ਅਟ੍ਠਕਥਾ > ਸੁਤ੍ਤਪਿਟਕ (ਅਟ੍ਠਕਥਾ) > ਖੁਦ੍ਦਕਨਿਕਾਯ (ਅਟ੍ਠਕਥਾ)

ਤਤ੍ਥ ਵਿਮਾਨਾਨੀਤਿ ਵਿਸਿਟ੍ਠਮਾਨਾਨਿ ਦੇਵਤਾਨਂ ਕੀਲ਼ਾਨਿਵਾਸਟ੍ਠਾਨਾਨਿ. ਤਾਨਿ ਹਿ ਤਾਸਂ ਸੁਚਰਿਤਕਮ੍ਮਾਨੁਭਾਵਨਿਬ੍ਬਤ੍ਤਾਨਿ ਯੋਜਨਿਕਦ੍ਵਿਯੋਜਨਿਕਾਦਿਪਮਾਣਵਿਸੇਸਯੁਤ੍ਤਤਾਯ ¶ , ਨਾਨਾਰਤਨਸਮੁਜ੍ਜਲਾਨਿ ਵਿਚਿਤ੍ਤਵਣ੍ਣਸਣ੍ਠਾਨਾਨਿ ਸੋਭਾਤਿਸਯਯੋਗੇਨ ਵਿਸੇਸਤੋ ਮਾਨਨੀਯਤਾਯ ਚ ‘‘ਵਿਮਾਨਾਨੀ’’ਤਿ ਵੁਚ੍ਚਨ੍ਤਿ. ਵਿਮਾਨਾਨਂ ਵਤ੍ਥੁ ਕਾਰਣਂ ਏਤਿਸ੍ਸਾਤਿ ਵਿਮਾਨਵਤ੍ਥੁ, ‘‘ਪੀਠਂ ਤੇ ਸੋਵਣ੍ਣਮਯ’’ਨ੍ਤਿਆਦਿਨਯਪ੍ਪਵਤ੍ਤਾ ਦੇਸਨਾ. ਨਿਦਸ੍ਸਨਮਤ੍ਤਞ੍ਚੇਤਂ ਤਾਸਂ ਦੇਵਤਾਨਂ ਰੂਪਭੋਗਪਰਿਵਾਰਾਦਿਸਮ੍ਪਤ੍ਤਿਯੋ ਤਂਨਿਬ੍ਬਤ੍ਤਕਕਮ੍ਮਞ੍ਚ ਨਿਸ੍ਸਾਯ ਇਮਿਸ੍ਸਾ ਦੇਸਨਾਯ ਪਵਤ੍ਤਤ੍ਤਾ. ਵਿਪਾਕਮੁਖੇਨ ਵਾ ਕਮ੍ਮਨ੍ਤਰਮਾਨਸ੍ਸ ਕਾਰਣਭਾਵਤੋ ਵਿਮਾਨਵਤ੍ਥੂਤਿ ਵੇਦਿਤਬ੍ਬਂ.

ਤਯਿਦਂ ਕੇਨ ਭਾਸਿਤਂ, ਕਤ੍ਥ ਭਾਸਿਤਂ, ਕਦਾ ਭਾਸਿਤਂ, ਕਸ੍ਮਾ ਚ ਭਾਸਿਤਨ੍ਤਿ? ਵੁਚ੍ਚਤੇ ¶ – ਇਦਞ੍ਹਿ ਵਿਮਾਨਵਤ੍ਥੁ ਦੁਵਿਧੇਨ ਪਵਤ੍ਤਂ – ਪੁਚ੍ਛਾਵਸੇਨ ਵਿਸ੍ਸਜ੍ਜਨਵਸੇਨ ਚ. ਤਤ੍ਥ ਵਿਸ੍ਸਜ੍ਜਨਗਾਥਾ ਤਾਹਿ ਤਾਹਿ ਦੇਵਤਾਹਿ ਭਾਸਿਤਾ, ਪੁਚ੍ਛਾਗਾਥਾ ਪਨ ਕਾਚਿ ਭਗਵਤਾ ਭਾਸਿਤਾ, ਕਾਚਿ ਸਕ੍ਕਾਦੀਹਿ, ਕਾਚਿ ਸਾਵਕੇਹਿ ਥੇਰੇਹਿ. ਤਤ੍ਥਾਪਿ ਯੇਭੁਯ੍ਯੇਨ ਯੋ ਸੋ ਕਪ੍ਪਾਨਂ ਸਤਸਹਸ੍ਸਾਧਿਕਂ ਏਕਂ ਅਸਙ੍ਖ੍ਯੇਯ੍ਯਂ ਬੁਦ੍ਧਸ੍ਸ ਭਗਵਤੋ ਅਗ੍ਗਸਾਵਕਭਾਵਾਯ ਪੁਞ੍ਞਞਾਣਸਮ੍ਭਾਰੇ ਸਮ੍ਭਰਨ੍ਤੋ ਅਨੁਕ੍ਕਮੇਨ ਸਾਵਕਪਾਰਮਿਯੋ ਪੂਰੇਤ੍ਵਾ, ਛਲ਼ਭਿਞ੍ਞਾਚਤੁਪਟਿਸਮ੍ਭਿਦਾਦਿਗੁਣਵਿਸੇਸਪਰਿਵਾਰਸ੍ਸ, ਸਕਲਸ੍ਸ ਸਾਵਕਪਾਰਮਿਞਾਣਸ੍ਸ ਮਤ੍ਥਕਂ ਪਤ੍ਤੋ ਦੁਤਿਯੇ ਅਗ੍ਗਸਾਵਕਟ੍ਠਾਨੇ ਠਿਤੋ ਇਦ੍ਧਿਮਨ੍ਤੇਸੁ ਚ ਭਗਵਤਾ ਏਤਦਗ੍ਗੇ ਠਪਿਤੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ, ਤੇਨ ਭਾਸਿਤਾ.

ਭਾਸਨ੍ਤੇਨ ਚ ਪਠਮਂ ਤਾਵ ਲੋਕਹਿਤਾਯ ਦੇਵਚਾਰਿਕਂ ਚਰਨ੍ਤੇਨ ਦੇਵਲੋਕੇ ਦੇਵਤਾਨਂ ਪੁਚ੍ਛਾਵਸੇਨ ਪੁਨ ਤਤੋ ਮਨੁਸ੍ਸਲੋਕਂ ਆਗਨ੍ਤ੍ਵਾ ਮਨੁਸ੍ਸਾਨਂ ਪੁਞ੍ਞਫਲਸ੍ਸ ਪਚ੍ਚਕ੍ਖਕਰਣਤ੍ਥਂ ਪੁਚ੍ਛਂ ਵਿਸ੍ਸਜ੍ਜਨਞ੍ਚ ਏਕਜ੍ਝਂ ¶ ਕਤ੍ਵਾ ¶ ਭਗਵਤੋ ਪਵੇਦੇਤ੍ਵਾ ਭਿਕ੍ਖੂਨਂ ਭਾਸਿਤਾ, ਸਕ੍ਕੇਨ ਪੁਚ੍ਛਾਵਸੇਨ, ਦੇਵਤਾਹਿ ਤਸ੍ਸ ਵਿਸ੍ਸਜ੍ਜਨਵਸੇਨ ਭਾਸਿਤਾਪਿ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਭਾਸਿਤਾ ਏਵ. ਏਵਂ ਭਗਵਤਾ ਥੇਰੇਹਿ ਚ ਦੇਵਤਾਹਿ ਚ ਪੁਚ੍ਛਾਵਸੇਨ, ਦੇਵਤਾਹਿ ਤਸ੍ਸਾ ਵਿਸ੍ਸਜ੍ਜਨਵਸੇਨ ਚ ਤਤ੍ਥ ਤਤ੍ਥ ਭਾਸਿਤਾ ਪਚ੍ਛਾ ਧਮ੍ਮਵਿਨਯਂ ਸਙ੍ਗਾਯਨ੍ਤੇਹਿ ਧਮ੍ਮਸਙ੍ਗਾਹਕੇਹਿ ਏਕਤੋ ਕਤ੍ਵਾ ‘‘ਵਿਮਾਨਵਤ੍ਥੁ’’ਇਚ੍ਚੇਵ ਸਙ੍ਗਹਂ ਆਰੋਪਿਤਾ. ਅਯਂ ਤਾਵੇਤ੍ਥ ‘‘ਕੇਨ ਭਾਸਿਤ’’ਨ੍ਤਿਆਦੀਨਂ ਪਦਾਨਂ ਸਙ੍ਖੇਪਤੋ ਸਾਧਾਰਣਤੋ ਚ ਵਿਸ੍ਸਜ੍ਜਨਾ.

ਵਿਤ੍ਥਾਰਤੋ ਪਨ ‘‘ਕੇਨ ਭਾਸਿਤ’’ਨ੍ਤਿ ਪਦਸ੍ਸ ਅਨੋਮਦਸ੍ਸਿਸ੍ਸ ਭਗਵਤੋ ਪਾਦਮੂਲੇ ਕਤਪਣਿਧਾਨਤੋ ਪਟ੍ਠਾਯ ਮਹਾਥੇਰਸ੍ਸ ਆਗਮਨੀਯਪਟਿਪਦਾ ਕਥੇਤਬ੍ਬਾ, ਸਾ ਪਨ ਆਗਮਟ੍ਠਕਥਾਸੁ ਤਤ੍ਥ ਤਤ੍ਥ ਵਿਤ੍ਥਾਰਿਤਾਤਿ ਤਤ੍ਥ ਆਗਤਨਯੇਨੇਵ ਵੇਦਿਤਬ੍ਬਾ. ਅਸਾਧਾਰਣਤੋ ‘‘ਕਤ੍ਥ ਭਾਸਿਤ’’ਨ੍ਤਿਆਦੀਨਂ ਪਦਾਨਂ ਵਿਸ੍ਸਜ੍ਜਨਾ ਤਸ੍ਸ ਤਸ੍ਸ ਵਿਮਾਨਸ੍ਸ ਅਤ੍ਥਵਣ੍ਣਨਾਨਯੇਨੇਵ ਆਗਮਿਸ੍ਸਤਿ.

ਅਪਰੇ ਪਨ ਭਣਨ੍ਤਿ – ਏਕਦਿਵਸਂ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ ‘‘ਏਤਰਹਿ ਖੋ ਮਨੁਸ੍ਸਾ ਅਸਤਿਪਿ ਵਤ੍ਥੁਸਮ੍ਪਤ੍ਤਿਯਾ ਖੇਤ੍ਤਸਮ੍ਪਤ੍ਤਿਯਾ ਅਤ੍ਤਨੋ ਚ ਚਿਤ੍ਤਪਸਾਦਸਮ੍ਪਤ੍ਤਿਯਾ ਤਾਨਿ ਤਾਨਿ ਪੁਞ੍ਞਾਨਿ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਾ ਉਲ਼ਾਰਸਮ੍ਪਤ੍ਤਿਂ ਪਚ੍ਚਨੁਭੋਨ੍ਤਿ, ਯਂਨੂਨਾਹਂ ਦੇਵਚਾਰਿਕਂ ਚਰਨ੍ਤੋ ਤਾ ਦੇਵਤਾ ਕਾਯਸਕ੍ਖਿਂ ਕਤ੍ਵਾ ਤਾਹਿ ਯਥੂਪਚਿਤਂ ਪੁਞ੍ਞਂ ਯਥਾਧਿਗਤਞ੍ਚ ਪੁਞ੍ਞਫਲਂ ਕਥਾਪੇਤ੍ਵਾ ਤਮਤ੍ਥਂ ਭਗਵਤੋ ਆਰੋਚੇਯ੍ਯਂ. ਏਵਂ ਮੇ ਸਤ੍ਥਾ ਗਗਨਤਲੇ ਪੁਣ੍ਣਚਨ੍ਦਂ ਉਟ੍ਠਾਪੇਨ੍ਤੋ ਵਿਯ ਮਨੁਸ੍ਸਾਨਂ ਕਮ੍ਮਫਲਂ ਪਚ੍ਚਕ੍ਖਤੋ ਦਸ੍ਸੇਨ੍ਤੋ ਅਪ੍ਪਕਾਨਮ੍ਪਿ ਕਾਰਾਨਂ ਆਯਤਨਗਤਾਯ ਸਦ੍ਧਾਯ ਵਸੇਨ ਉਲ਼ਾਰਫਲਤਂ ਵਿਭਾਵੇਨ੍ਤੋ ਤਂ ਤਂ ਵਿਮਾਨਵਤ੍ਥੁਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਮਹਤਿਂ ਧਮ੍ਮਦੇਸਨਂ ਪਵਤ੍ਤੇਸ੍ਸਤਿ, ਸਾ ਹੋਤਿ ਬਹੁਜਨਸ੍ਸ ¶ ਅਤ੍ਥਾਯ ਹਿਤਾਯ ਸੁਖਾਯ ਦੇਵਮਨੁਸ੍ਸਾਨ’’ਨ੍ਤਿ ¶ . ਸੋ ਆਸਨਾ ਵੁਟ੍ਠਹਿਤ੍ਵਾ ਰਤ੍ਤਦੁਪਟ੍ਟਂ ਨਿਵਾਸੇਤ੍ਵਾ ਅਪਰਂ ਰਤ੍ਤਦੁਪਟ੍ਟਂ ਏਕਂਸਂ ਕਤ੍ਵਾ ਸਮਨ੍ਤਤੋ ਜਾਤਿਹਿਙ੍ਗੁਲਿਕਧਾਰਾ ਵਿਜ੍ਜੁਲਤਾ ਵਿਯ ਸਞ੍ਝਾਪਭਾਨੁਰਞ੍ਜਿਤੋ ਵਿਯ ਚ ਜਙ੍ਗਮੋ ਅਞ੍ਜਨਗਿਰਿਸਿਖਰੋ, ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਅਤ੍ਤਨੋ ਅਧਿਪ੍ਪਾਯਂ ਆਰੋਚੇਤ੍ਵਾ ਭਗਵਤਾ ਅਨੁਞ੍ਞਾਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਅਭਿਞ੍ਞਾਪਾਦਕਂ ਚਤੁਤ੍ਥਜ੍ਝਾਨਂ ¶ ਸਮਾਪਜ੍ਜਿਤ੍ਵਾ, ਤਤੋ ਵੁਟ੍ਠਾਯ ਇਦ੍ਧਿਬਲੇਨ ਤਙ੍ਖਣਞ੍ਞੇਵ ਤਾਵਤਿਂਸਭਵਨਂ ਗਨ੍ਤ੍ਵਾ ਤਤ੍ਥ ਤਤ੍ਥ ਤਾਹਿ ਤਾਹਿ ਦੇਵਤਾਹਿ ਯਥੂਪਚਿਤਂ ਪੁਞ੍ਞਕਮ੍ਮਂ ਪੁਚ੍ਛਿ, ਤਸ੍ਸ ਤਾ ਕਥੇਸੁਂ. ਤਤੋ ਮਨੁਸ੍ਸਲੋਕਂ ਆਗਨ੍ਤ੍ਵਾ ਤਂ ਸਬ੍ਬਂ ਤਤ੍ਥ ਪਵਤ੍ਤਿਤਨਿਯਾਮੇਨੇਵ ਭਗਵਤੋ ਆਰੋਚੇਸਿ, ਤਂ ਸਮਨੁਞ੍ਞੋ ਸਤ੍ਥਾ ਅਹੋਸਿ. ਇਚ੍ਚੇਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸੀਤਿ.

ਤਂ ਪਨੇਤਂ ਵਿਮਾਨਵਤ੍ਥੁ ਵਿਨਯਪਿਟਕਂ ਸੁਤ੍ਤਨ੍ਤਪਿਟਕਂ ਅਭਿਧਮ੍ਮਪਿਟਕਨ੍ਤਿ ਤੀਸੁ ਪਿਟਕੇਸੁ ਸੁਤ੍ਤਨ੍ਤਪਿਟਕਪਰਿਯਾਪਨ੍ਨਂ, ਦੀਘਨਿਕਾਯੋ ਮਜ੍ਝਿਮਨਿਕਾਯੋ ਸਂਯੁਤ੍ਤਨਿਕਾਯੋ ਅਙ੍ਗੁਤ੍ਤਰਨਿਕਾਯੋ ਖੁਦ੍ਦਕਨਿਕਾਯੋਤਿ ਪਞ੍ਚਸੁ ਨਿਕਾਯੇਸੁ ਖੁਦ੍ਦਕਨਿਕਾਯਪਰਿਯਾਪਨ੍ਨਂ, ਸੁਤ੍ਤਂ ਗੇਯ੍ਯਂ ਵੇਯ੍ਯਾਕਰਣਂ ਗਾਥਾ ਉਦਾਨਂ ਇਤਿਵੁਤ੍ਤਕਂ ਜਾਤਕਂ ਅਬ੍ਭੁਤਧਮ੍ਮਂ ਵੇਦਲ੍ਲਨ੍ਤਿ ਨਵਸੁ ਸਾਸਨਙ੍ਗੇਸੁ ਗਾਥਾਸਙ੍ਗਹਂ.

‘‘ਦ੍ਵਾਸੀਤਿ ਬੁਦ੍ਧਤੋ ਗਣ੍ਹਿਂ, ਦ੍ਵੇ ਸਹਸ੍ਸਾਨਿ ਭਿਕ੍ਖੁਤੋ;

ਚਤੁਰਾਸੀਤਿ ਸਹਸ੍ਸਾਨਿ, ਯੇ ਮੇ ਧਮ੍ਮਾ ਪਵਤ੍ਤਿਨੋ’’ਤਿ. (ਥੇਰਗਾ. ੧੦੨੭) –

ਏਵਂ ਧਮ੍ਮਭਣ੍ਡਾਗਾਰਿਕੇਨ ਪਟਿਞ੍ਞਾਤੇਸੁ ਚਤੁਰਾਸੀਤਿਯਾ ਧਮ੍ਮਕ੍ਖਨ੍ਧਸਹਸ੍ਸੇਸੁ ਕਤਿਪਯਧਮ੍ਮਕ੍ਖਨ੍ਧਸਙ੍ਗਹਂ. ਵਗ੍ਗਤੋ ਪੀਠਵਗ੍ਗੋ ਚਿਤ੍ਤਲਤਾਵਗ੍ਗੋ ਪਾਰਿਚ੍ਛਤ੍ਤਕਵਗ੍ਗੋ ਮਞ੍ਜਿਟ੍ਠਕਵਗ੍ਗੋ ਮਹਾਰਥਵਗ੍ਗੋ ਪਾਯਾਸਿਵਗ੍ਗੋ ਸੁਨਿਕ੍ਖਿਤ੍ਤਵਗ੍ਗੋਤਿ ਸਤ੍ਤ ਵਗ੍ਗਾ. ਵਤ੍ਥੁਤੋ ਪਠਮੇ ਵਗ੍ਗੇ ਸਤ੍ਤਰਸ ਵਤ੍ਥੂਨਿ, ਦੁਤਿਯੇ ਏਕਾਦਸ, ਤਤਿਯੇ ਦਸ, ਚਤੁਤ੍ਥੇ ਦ੍ਵਾਦਸ ¶ , ਪਞ੍ਚਮੇ ਚਤੁਦ੍ਦਸ, ਛਟ੍ਠੇ ਦਸ, ਸਤ੍ਤਮੇ ਏਕਾਦਸਾਤਿ ਅਨ੍ਤਰਵਿਮਾਨਾਨਂ ਅਗ੍ਗਹਣੇ ਪਞ੍ਚਾਸੀਤਿ, ਗਹਣੇ ਪਨ ਤੇਵੀਸਸਤਂ ਵਤ੍ਥੂਨਿ, ਗਾਥਾਤੋ ਪਨ ਦਿਯਡ੍ਢਸਹਸ੍ਸਗਾਥਾ. ਤਸ੍ਸ ਵਗ੍ਗੇਸੁ ਪੀਠਵਗ੍ਗੋ ਆਦਿ, ਵਤ੍ਥੂਸੁ ਸੋਵਣ੍ਣਪੀਠਵਤ੍ਥੁ ਆਦਿ, ਤਸ੍ਸਾਪਿ ‘‘ਪੀਠਂ ਤੇ ਸੋਵਣ੍ਣਮਯ’’ਨ੍ਤਿ ਗਾਥਾ ਆਦਿ.

ਤਤ੍ਥ ¶ ¶ ਪਠਮਵਤ੍ਥੁਸ੍ਸ ਅਯਂ ਅਟ੍ਠੁਪ੍ਪਤ੍ਤਿ – ਭਗਵਤਿ ਸਾਵਤ੍ਥਿਯਂ ਵਿਹਰਨ੍ਤੇ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ ਰਞ੍ਞਾ ਪਸੇਨਦਿਨਾ ਕੋਸਲੇਨ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤ੍ਤਾਹਂ ਅਸਦਿਸਦਾਨੇ ਪਵਤ੍ਤਿਤੇ ਤਦਨੁਰੂਪੇਨ ਅਨਾਥਪਿਣ੍ਡਿਕੇਨ ਮਹਾਸੇਟ੍ਠਿਨਾ ਤਯੋ ਦਿਵਸੇ, ਤਥਾ ਵਿਸਾਖਾਯ ਮਹਾਉਪਾਸਿਕਾਯ ਮਹਾਦਾਨੇ ਦਿਨ੍ਨੇ ਅਸਦਿਸਦਾਨਸ੍ਸ ਪਵਤ੍ਤਿ ਸਕਲਜਮ੍ਬੁਦੀਪੇ ਪਾਕਟਾ ਅਹੋਸਿ. ਅਥ ਮਹਾਜਨੋ ਤਤ੍ਥ ਤਤ੍ਥ ਕਥਂ ਸਮੁਟ੍ਠਾਪੇਸਿ ‘‘ਕਿਂ ਨੁ ਖੋ ਏਵਂ ਉਲ਼ਾਰਵਿਭਵਪਰਿਚ੍ਚਾਗੇਨੇਵ ਦਾਨਂ ਮਹਪ੍ਫਲਤਰਂ ਭਵਿਸ੍ਸਤਿ, ਉਦਾਹੁ ਅਤ੍ਤਨੋ ਵਿਭਵਾਨੁਰੂਪਪਰਿਚ੍ਚਾਗੇਨਾਪੀ’’ਤਿ. ਭਿਕ੍ਖੂ ਤਂ ਕਥਂ ਸੁਤ੍ਵਾ ਭਗਵਤੋ ਆਰੋਚੇਸੁਂ. ਭਗਵਾ ‘‘ਨ, ਭਿਕ੍ਖਵੇ, ਦੇਯ੍ਯਧਮ੍ਮਸਮ੍ਪਤ੍ਤਿਯਾਵ ਦਾਨਂ ਮਹਪ੍ਫਲਤਰਂ ਭਵਿਸ੍ਸਤਿ, ਅਥ ਖੋ ਚਿਤ੍ਤਪਸਾਦਸਮ੍ਪਤ੍ਤਿਯਾ ਚ ਖੇਤ੍ਤਸਮ੍ਪਤ੍ਤਿਯਾ ਚ, ਤਸ੍ਮਾ ਕੁਣ੍ਡਕਮੁਟ੍ਠਿਮਤ੍ਤਮ੍ਪਿ ਪਿਲੋਤਿਕਾਮਤ੍ਤਮ੍ਪਿ ਤਿਣਪਣ੍ਣਸਨ੍ਥਾਰਮਤ੍ਤਮ੍ਪਿ ਪੂਤਿਮੁਤ੍ਤਹਰੀਤਕਮਤ੍ਤਮ੍ਪਿ ਵਿਪ੍ਪਸਨ੍ਨੇਨ ਚੇਤਸਾ ਦਕ੍ਖਿਣੇਯ੍ਯਪੁਗ੍ਗਲੇ ਪਤਿਟ੍ਠਾਪਿਤਂ, ਤਮ੍ਪਿ ਮਹਪ੍ਫਲਤਰਂ ਭਵਿਸ੍ਸਤਿ ਮਹਾਜੁਤਿਕਂ ਮਹਾਵਿਪ੍ਫਾਰ’’ਨ੍ਤਿ ਆਹ. ਤਥਾ ਹਿ ਵੁਤ੍ਤਂ ਸਕ੍ਕੇਨ ਦੇਵਾਨਮਿਨ੍ਦੇਨ –

‘‘ਨਤ੍ਥਿ ਚਿਤ੍ਤੇ ਪਸਨ੍ਨਮ੍ਹਿ, ਅਪ੍ਪਿਕਾ ਨਾਮ ਦਕ੍ਖਿਣਾ;

ਤਥਾਗਤੇ ਵਾ ਸਮ੍ਬੁਦ੍ਧੇ, ਅਥ ਵਾ ਤਸ੍ਸ ਸਾਵਕੇ’’ਤਿ. (ਵਿ. ਵ. ੮੦੪);

ਸਾ ਪਨੇਸਾ ਕਥਾ ਸਕਲਜਮ੍ਬੁਦੀਪੇ ਵਿਤ੍ਥਾਰਿਕਾ ਅਹੋਸਿ. ਮਨੁਸ੍ਸਾ ਸਮਣਬ੍ਰਾਹ੍ਮਣਕਪਣਦ੍ਧਿਕਵਣਿਬ੍ਬਕਯਾਚਕਾਨਂ ਯਥਾਵਿਭਵਂ ¶ ਦਾਨਾਨਿ ਦੇਨ੍ਤਿ, ਗੇਹਙ੍ਗਣੇ ਪਾਨੀਯਂ ਉਪਟ੍ਠਪੇਨ੍ਤਿ, ਦ੍ਵਾਰਕੋਟ੍ਠਕੇਸੁ ਆਸਨਾਨਿ ਠਪੇਨ੍ਤਿ. ਤੇਨ ਚ ਸਮਯੇਨ ਅਞ੍ਞਤਰੋ ਪਿਣ੍ਡਪਾਤਚਾਰਿਕੋ ਥੇਰੋ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ ਵਿਲੋਕਿਤੇਨ ਸਮਿਞ੍ਜਿਤੇਨ ਪਸਾਰਿਤੇਨ ¶ ਓਕ੍ਖਿਤ੍ਤਚਕ੍ਖੁ ਇਰਿਯਾਪਥਸਮ੍ਪਨ੍ਨੋ ਪਿਣ੍ਡਾਯ ਚਰਨ੍ਤੋ ਉਪਕਟ੍ਠੇ ਕਾਲੇ ਅਞ੍ਞਤਰਂ ਗੇਹਂ ਸਮ੍ਪਾਪੁਣਿ. ਤਤ੍ਥੇਕਾ ਕੁਲਧੀਤਾ ਸਦ੍ਧਾ ਪਸਨ੍ਨਾ ਥੇਰਂ ¶ ਪਸ੍ਸਿਤ੍ਵਾ ਸਞ੍ਜਾਤਗਾਰਵਬਹੁਮਾਨਾ ਉਲ਼ਾਰਪੀਤਿਸੋਮਨਸ੍ਸਂ ਉਪ੍ਪਾਦੇਤ੍ਵਾ ਗੇਹਂ ਪਵੇਸੇਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਅਤ੍ਤਨੋ ਪੀਠਂ ਪਞ੍ਞਾਪੇਤ੍ਵਾ ਤਸ੍ਸ ਉਪਰਿ ਪੀਤਕਂ ਮਟ੍ਠਵਤ੍ਥਂ ਅਤ੍ਥਰਿਤ੍ਵਾ ਅਦਾਸਿ. ਅਥ ਥੇਰੇ ਤਤ੍ਥ ਨਿਸਿਨ੍ਨੇ ‘‘ਇਦਂ ਮਯ੍ਹਂ ਉਤ੍ਤਮਂ ਪੁਞ੍ਞਕ੍ਖੇਤ੍ਤਂ ਉਪਟ੍ਠਿਤ’’ਨ੍ਤਿ ਪਸਨ੍ਨਚਿਤ੍ਤਾ ਯਥਾਵਿਭਵਂ ਆਹਾਰੇਨ ਪਰਿਵਿਸਿ, ਬੀਜਨਿਞ੍ਚ ਗਹੇਤ੍ਵਾ ਬੀਜਿ. ਸੋ ਥੇਰੋ ਕਤਭਤ੍ਤਕਿਚ੍ਚੋ ਆਸਨਦਾਨਭੋਜਨਦਾਨਾਦਿਪਟਿਸਂਯੁਤ੍ਤਂ ਧਮ੍ਮਿਂ ਕਥਂ ਕਥੇਤ੍ਵਾ ਪਕ੍ਕਾਮਿ. ਸਾ ਇਤ੍ਥੀ ਤਂ ਅਤ੍ਤਨੋ ਦਾਨਂ ਤਞ੍ਚ ਧਮ੍ਮਕਥਂ ਪਚ੍ਚਵੇਕ੍ਖਨ੍ਤੀ ਪੀਤਿਯਾ ਨਿਰਨ੍ਤਰਂ ਫੁਟ੍ਠਸਰੀਰਾ ਹੁਤ੍ਵਾ ਤਂ ਪੀਠਮ੍ਪਿ ਥੇਰਸ੍ਸ ਅਦਾਸਿ.

ਤਤੋ ਅਪਰੇਨ ਸਮਯੇਨ ਅਞ੍ਞਤਰੇਨ ਰੋਗੇਨ ਫੁਟ੍ਠਾ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਅਚ੍ਛਰਾਸਹਸ੍ਸਂ ਚਸ੍ਸਾ ਪਰਿਵਾਰੋ ਅਹੋਸਿ, ਪੀਠਦਾਨਾਨੁਭਾਵੇਨ ਚਸ੍ਸਾ ਯੋਜਨਿਕੋ ਕਨਕਪਲ੍ਲਙ੍ਕੋ ਨਿਬ੍ਬਤ੍ਤਿ ਆਕਾਸਚਾਰੀ ਸੀਘਜਵੋ ਉਪਰਿ ਕੂਟਾਗਾਰਸਣ੍ਠਾਨੋ, ਤੇਨ ਤਂ ‘‘ਪੀਠਵਿਮਾਨ’’ਨ੍ਤਿ ਵੁਚ੍ਚਤਿ. ਤਞ੍ਹਿ ਸੁਵਣ੍ਣਵਣ੍ਣਂ ਵਤ੍ਥਂ ਅਤ੍ਥਰਿਤ੍ਵਾ ਦਿਨ੍ਨਤ੍ਤਾ ਕਮ੍ਮਸਰਿਕ੍ਖਤਂ ਵਿਭਾਵੇਨ੍ਤਂ ਸੁਵਣ੍ਣਮਯਂ ਅਹੋਸਿ, ਪੀਤਿਵੇਗਸ੍ਸ ਬਲਵਭਾਵੇਨ ਸੀਘਜਵਂ, ਦਕ੍ਖਿਣੇਯ੍ਯਸ੍ਸ ਚਿਤ੍ਤਰੁਚਿਵਸੇਨ ਦਿਨ੍ਨਤ੍ਤਾ ਯਥਾਰੁਚਿਗਾਮੀ ¶ , ਪਸਾਦਸਮ੍ਪਤ੍ਤਿਯਾ ਉਲ਼ਾਰਤਾਯ ਸਬ੍ਬਸੋਵ ਪਾਸਾਦਿਕਂ ਸੋਭਾਤਿਸਯਯੁਤ੍ਤਞ੍ਚ ਅਹੋਸਿ.

ਅਥੇਕਸ੍ਮਿਂ ਉਸ੍ਸਵਦਿਵਸੇ ਦੇਵਤਾਸੁ ਯਥਾਸਕਂ ਦਿਬ੍ਬਾਨੁਭਾਵੇਨ ਉਯ੍ਯਾਨਕੀਲ਼ਨਤ੍ਥਂ ਨਨ੍ਦਨਵਨਂ ਗਚ੍ਛਨ੍ਤੀਸੁ ਸਾ ਦੇਵਤਾ ਦਿਬ੍ਬਵਤ੍ਥਨਿਵਤ੍ਥਾ ਦਿਬ੍ਬਾਭਰਣਵਿਭੂਸਿਤਾ ਅਚ੍ਛਰਾਸਹਸ੍ਸਪਰਿਵਾਰਾ ਸਕਭਵਨਾ ਨਿਕ੍ਖਮਿਤ੍ਵਾ ਤਂ ਪੀਠਵਿਮਾਨਂ ਅਭਿਰੁਯ੍ਹ ਮਹਤਿਯਾ ਦੇਵਿਦ੍ਧਿਯਾ ਮਹਨ੍ਤੇਨ ਸਿਰਿਸੋਭਗ੍ਗੇਨ ਸਮਨ੍ਤਤੋ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਓਭਾਸੇਨ੍ਤੀ ਉਯ੍ਯਾਨਂ ਗਚ੍ਛਤਿ. ਤੇਨ ਚ ਸਮਯੇਨ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਉਪਗਤੋ ਤਸ੍ਸਾ ਦੇਵਤਾਯ ਅਵਿਦੂਰੇ ਅਤ੍ਤਾਨਂ ਦਸ੍ਸੇਸਿ. ਅਥ ਸਾ ਦੇਵਤਾ ਤਂ ਦਿਸ੍ਵਾ ਸਮੁਪ੍ਪਨ੍ਨਬਲਵਪਸਾਦਗਾਰਵਾ ਸਹਸਾ ਪਲ੍ਲਙ੍ਕਤੋ ਓਰੁਯ੍ਹ ਥੇਰਂ ਉਪਸਙ੍ਕਮਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਦਸਨਖਸਮੋਧਾਨਸਮੁਜ੍ਜਲਂ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨਾ ਅਟ੍ਠਾਸਿ. ਥੇਰੋ ਕਿਞ੍ਚਾਪਿ ਤਾਯ ਅਞ੍ਞੇਹਿ ਚ ਸਤ੍ਤੇਹਿ ਯਥੂਪਚਿਤਂ ਕੁਸਲਾਕੁਸਲਂ ਅਤ੍ਤਨੋ ਯਥਾਕਮ੍ਮੂਪਗਞਾਣਾਨੁਭਾਵੇਨ ਹਤ੍ਥਤਲੇ ਠਪਿਤਆਮਲਕਂ ¶ ਵਿਯ ਪਞ੍ਞਾਬਲਭੇਦੇਨ ਪਚ੍ਚਕ੍ਖਤੋ ਪਸ੍ਸਤਿ, ਤਥਾਪਿ ਯਸ੍ਮਾ ਦੇਵਤਾਨਂ ਉਪਪਤ੍ਤਿਸਮਨਨ੍ਤਰਮੇਵ ‘‘ਕੁਤੋ ਨੁ ਖੋ ਅਹਂ ਚਵਿਤ੍ਵਾ ਇਧੂਪਪਨ੍ਨਾ, ਕਿਂ ਨੁ ਖੋ ਕੁਸਲਕਮ੍ਮਂ ਕਤ੍ਵਾ ਇਮਂ ਸਮ੍ਪਤ੍ਤਿਂ ਪਟਿਲਭਾਮੀ’’ਤਿ ਅਤੀਤਭਵਂ ਯਥੂਪਚਿਤਞ੍ਚ ਕਮ੍ਮਂ ਉਦ੍ਦਿਸ੍ਸ ਯੇਭੁਯ੍ਯੇਨ ਧਮ੍ਮਤਾਸਿਦ੍ਧਾ ਉਪਧਾਰਣਾ ¶ , ਤਸ੍ਸਾ ਚ ਯਾਥਾਵਤੋ ਞਾਣਂ ਉਪ੍ਪਜ੍ਜਤਿ, ਤਸ੍ਮਾ ਤਾਯ ਦੇਵਤਾਯ ਕਤਕਮ੍ਮਂ ਕਥਾਪੇਤ੍ਵਾ ਸਦੇਵਕਸ੍ਸ ਲੋਕਸ੍ਸ ਕਮ੍ਮਫਲਂ ਪਚ੍ਚਕ੍ਖਂ ਕਾਤੁਕਾਮੋ –

‘‘ਪੀਠਂ ਤੇ ਸੋਵਣ੍ਣਮਯਂ ਉਲ਼ਾਰਂ, ਮਨੋਜਵਂ ਗਚ੍ਛਤਿ ਯੇਨਕਾਮਂ;

ਅਲਙ੍ਕਤੇ ¶ ਮਲ੍ਯਧਰੇ ਸੁਵਤ੍ਥੇ, ਓਭਾਸਸਿ ਵਿਜ੍ਜੁਰਿਵਬ੍ਭ ਕੂਟਂ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. ਆਹ –

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਅਬ੍ਭਾਗਤਾਨਾਸਨਕਂ ਅਦਾਸਿਂ;

ਅਭਿਵਾਦਯਿਂ ਅਞ੍ਜਲਿਕਂ ਅਕਾਸਿਂ, ਯਥਾਨੁਭਾਵਞ੍ਚ ਅਦਾਸਿ ਦਾਨਂ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ¶ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੧. ਤਤ੍ਥ ਪੀਠਨ੍ਤਿ ਯਂਕਿਞ੍ਚਿ ਤਾਦਿਸਂ ਦਾਰੁਕ੍ਖਨ੍ਧਮ੍ਪਿ ਆਪਣਮ੍ਪਿ ਬਲਿਕਰਣਪੀਠਮ੍ਪਿ ਵੇਤ੍ਤਾਸਨਮ੍ਪਿ ਮਸਾਰਕਾਦਿਵਿਸੇਸਨਾਮਂ ਦਾਰੁਮਯਾਦਿਆਸਨਮ੍ਪਿ ਵੁਚ੍ਚਤਿ. ਤਥਾ ਹਿ ‘‘ਪਾਦਪੀਠਂ ਪਾਦਕਥਲਿਕ’’ਨ੍ਤਿ (ਮਹਾਵ. ੨੦੯; ਚੂਲ਼ਵ. ੭੫) ਏਤ੍ਥ ਪਾਦਠਪਨਯੋਗ੍ਗਂ ਪੀਠਾਦਿਕਂ ਦਾਰੁਕ੍ਖਨ੍ਧਂ ਵੁਚ੍ਚਤਿ, ‘‘ਪੀਠਸਪ੍ਪੀ’’ਤਿ (ਮਿ. ਪ. ੫.੩.੧) ਏਤ੍ਥ ਹਤ੍ਥੇਨ ਗਹਣਯੋਗ੍ਗਂ. ‘‘ਪੀਠਿਕਾ’’ਤਿ ਪਨ ਏਕਚ੍ਚੇਸੁ ¶ ਜਨਪਦੇਸੁ ਦੇਸਵੋਹਾਰੇਨ ਆਪਣਂ. ‘‘ਭੂਤਪੀਠਿਕਾ ਦੇਵਕੁਲਪੀਠਿਕਾ’’ਤਿ ਏਤ੍ਥ ਦੇਵਤਾਨਂ ਬਲਿਕਰਣਟ੍ਠਾਨਭੂਤਂ ਪੀਠਂ. ‘‘ਭਦ੍ਦਪੀਠ’’ਨ੍ਤਿ ਏਤ੍ਥ ਵੇਤ੍ਤਲਤਾਦੀਹਿ ਉਪਰਿ ਵੀਤਂ ਆਸਨਂ, ਯਂ ਸਨ੍ਧਾਯ ਵੁਤ੍ਤਂ ‘‘ਭਦ੍ਦਪੀਠਂ ਉਪਾਨਯੀ’’ਤਿ ¶ . ‘‘ਸੁਪਞ੍ਞਤ੍ਤਂ ਮਞ੍ਚਪੀਠਂ. ਮਞ੍ਚਂ ਵਾ ਪੀਠਂ ਵਾ ਕਾਰਯਮਾਨੇਨਾ’’ਤਿ (ਪਾਚਿ. ੫੨੨) ਚ ਆਦੀਸੁ ਮਸਾਰਕਾਦਿਭੇਦਂ ਦਾਰੁਮਯਾਦਿਆਸਨਂ. ਇਧ ਪਨ ਪਲ੍ਲਙ੍ਕਾਕਾਰਸਣ੍ਠਿਤਂ ਦੇਵਤਾਯ ਪੁਞ੍ਞਾਨੁਭਾਵਾਭਿਨਿਬ੍ਬਤ੍ਤਂ ਯੋਜਨਿਕਂ ਕਨਕਵਿਮਾਨਂ ਵੇਦਿਤਬ੍ਬਂ.

ਤੇਤਿ ਤੇ-ਸਦ੍ਦੋ ‘‘ਨ ਤੇ ਸੁਖਂ ਪਜਾਨਨ੍ਤਿ, ਯੇ ਨ ਪਸ੍ਸਨ੍ਤਿ ਨਨ੍ਦਨ’’ਨ੍ਤਿਆਦੀਸੁ (ਸਂ. ਨਿ. ੧.੧੧, ੨੨੬) ਤ-ਸਦ੍ਦਸ੍ਸ ਵਸੇਨ ਪਚ੍ਚਤ੍ਤਬਹੁਵਚਨੇ ਆਗਤੋ. ‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ (ਦੀ. ਨਿ. ੩.੨੭੮; ਸੁ. ਨਿ. ੫੪੯). ਨਮੋ ਤੇ ਬੁਦ੍ਧ ਵੀਰਤ੍ਥੂ’’ਤਿ (ਸਂ. ਨਿ. ੧.੯੦) ਚ ਆਦੀਸੁ ਤੁਮ੍ਹ-ਸਦ੍ਦਸ੍ਸ ਵਸੇਨ ਸਮ੍ਪਦਾਨੇ, ਤੁਯ੍ਹਨ੍ਤਿ ਅਤ੍ਥੋ. ‘‘ਕਿਂ ਤੇ ਦਿਟ੍ਠਂ ਕਿਨ੍ਤਿ ਤੇ ਸੁਤਂ. ਉਪਧੀ ਤੇ ਸਮਤਿਕ੍ਕਨ੍ਤਾ, ਆਸਵਾ ਤੇ ਪਦਾਲਿਤਾ’’ਤਿ (ਮ. ਨਿ. ੨.੪੦੦; ਸੁ. ਨਿ. ੫੫੧) ਚ ਆਦੀਸੁ ਕਰਣੇ. ‘‘ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯ’’ਨ੍ਤਿਆਦੀਸੁ (ਵਿ. ਵ. ੧੨੫੧; ਜਾ. ੧.੧੦.੯੨) ਸਾਮਿਅਤ੍ਥੇ. ਇਧਾਪਿ ਸਾਮਿਅਤ੍ਥੇ ਦਟ੍ਠਬ੍ਬੋ. ਤਵਾਤਿ ਹਿ ਅਤ੍ਥੋ.

ਸੋਵਣ੍ਣਮਯਨ੍ਤਿ ¶ ਏਤ੍ਥ ਸੁਵਣ੍ਣ-ਸਦ੍ਦੋ ‘‘ਸੁਵਣ੍ਣੇ ਦੁਬ੍ਬਣ੍ਣੇ ਸੁਗਤੇ ਦੁਗ੍ਗਤੇ’’ਤਿ (ਮ. ਨਿ. ੧.੧੪੮) ਚ ‘‘ਸੁਵਣ੍ਣਤਾ ਸੁਸਰਤਾ’’ਤਿ (ਖੁ. ਪਾ. ੮.੧੧) ਚ ਏਵਮਾਦੀਸੁ ਛਵਿਸਮ੍ਪਤ੍ਤਿਯਂ ਆਗਤੋ. ‘‘ਕਾਕਂ ਸੁਵਣ੍ਣਾ ਪਰਿਵਾਰਯਨ੍ਤੀ’’ਤਿਆਦੀਸੁ (ਜਾ. ੧.੧.੭੭) ਗਰੁਲ਼ੇ. ‘‘ਸੁਵਣ੍ਣਵਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ’’ਤਿਆਦੀਸੁ (ਦੀ. ਨਿ. ੩.੨੦੦) ਜਾਤਰੂਪੇ. ਇਧਾਪਿ ਜਾਤਰੂਪੇ ਏਵ ਦਟ੍ਠਬ੍ਬੋ. ਤਞ੍ਹਿ ਬੁਦ੍ਧਾਨਂ ਸਮਾਨਵਣ੍ਣਤਾਯ ਸੋਭਨੋ ਵਣ੍ਣੋ ਏਤਸ੍ਸਾਤਿ ਸੁਵਣ੍ਣਨ੍ਤਿ ਵੁਚ੍ਚਤਿ. ਸੁਵਣ੍ਣਮੇਵ ¶ ਸੋਵਣ੍ਣਂ ਯਥਾ ‘‘ਵੇਕਤਂ ਵੇਸਮ’’ਨ੍ਤਿ ਚ. ਮਯ-ਸਦ੍ਦੋ ਚ ‘‘ਅਨੁਞ੍ਞਾਤਪਟਿਞ੍ਞਾਤਾ, ਤੇਵਿਜ੍ਜਾ ਮਯਮਸ੍ਮੁਭੋ’’ਤਿਆਦੀਸੁ (ਸੁ. ਨਿ. ੫੯੯; ਮ. ਨਿ. ੨.੪੫੫) ਅਸ੍ਮਦਤ੍ਥੇ ਆਗਤੋ. ‘‘ਮਯਂ ਨਿਸ੍ਸਾਯ ਹੇਮਾਯ, ਜਾਤਮਣ੍ਡੋ ਦਰੀ ਸੁਭਾ’’ਤਿ ਏਤ੍ਥ ਪਞ੍ਞਤ੍ਤਿਯਂ. ‘‘ਮਨੋਮਯਾ ਪੀਤਿਭਕ੍ਖਾ ਸਯਂਪਭਾ’’ਤਿਆਦੀਸੁ (ਦੀ. ਨਿ. ੧.੩੯; ੩.੩੮) ਨਿਬ੍ਬਤ੍ਤਿਅਤ੍ਥੇ, ਬਾਹਿਰੇਨ ਪਚ੍ਚਯੇਨ ਵਿਨਾ ਮਨਸਾਵ ਨਿਬ੍ਬਤ੍ਤਾਤਿ ਮਨੋਮਯਾਤਿ ਵੁਤ੍ਤਾ. ‘‘ਯਂਨੂਨਾਹਂ ਸਾਮਂ ਚਿਕ੍ਖਲ੍ਲਂ ਮਦ੍ਦਿਤ੍ਵਾ ਸਬ੍ਬਮਤ੍ਤਿਕਾਮਯਂ ਕੁਟਿਕਂ ਕਰੇਯ੍ਯ’’ਨ੍ਤਿਆਦੀਸੁ (ਪਾਰਾ. ੮੪) ਵਿਕਾਰਤ੍ਥੇ. ‘‘ਦਾਨਮਯਂ ਸੀਲਮਯ’’ਨ੍ਤਿਆਦੀਸੁ (ਦੀ. ਨਿ. ੩.੩੦੫) ਪਦਪੂਰਣਮਤ੍ਤੇ. ਇਧਾਪਿ ਵਿਕਾਰਤ੍ਥੇ, ਪਦਪੂਰਣਮਤ੍ਤੇ ਵਾ ਦਟ੍ਠਬ੍ਬੋ. ਯਦਾ ਹਿ ਸੁਵਣ੍ਣੇਨ ਨਿਬ੍ਬਤ੍ਤਂ ਸੋਵਣ੍ਣਮਯਨ੍ਤਿ ਅਯਮਤ੍ਥੋ, ਤਦਾ ਸੁਵਣ੍ਣਸ੍ਸ ਵਿਕਾਰੋ ਸੋਵਣ੍ਣਮਯਨ੍ਤਿ ਵਿਕਾਰਤ੍ਥੇ ਮਯ-ਸਦ੍ਦੋ ਦਟ੍ਠਬ੍ਬੋ, ‘‘ਨਿਬ੍ਬਤ੍ਤਿਅਤ੍ਥੇ’’ਤਿਪਿ ਵਤ੍ਤੁਂ ¶ ਵਟ੍ਟਤਿਯੇਵ. ਯਦਾ ਪਨ ਸੁਵਣ੍ਣੇਨ ਨਿਬ੍ਬਤ੍ਤਂ ਸੋਵਣ੍ਣਨ੍ਤਿ ਅਯਮਤ੍ਥੋ, ਤਦਾ ਸੋਵਣ੍ਣਮੇਵ ਸੋਵਣ੍ਣਮਯਨ੍ਤਿ ਪਦਪੂਰਣਮਤ੍ਤੇ ਮਯ-ਸਦ੍ਦੋ ਦਟ੍ਠਬ੍ਬੋ.

ਉਲ਼ਾਰਨ੍ਤਿ ਪਣੀਤਮ੍ਪਿ ਸੇਟ੍ਠਮ੍ਪਿ ਮਹਨ੍ਤਮ੍ਪਿ. ਉਲ਼ਾਰ-ਸਦ੍ਦੋ ਹਿ ‘‘ਪੁਬ੍ਬੇਨਾਪਰਂ ਉਲ਼ਾਰਂ ਵਿਸੇਸਂ ਅਧਿਗਚ੍ਛਤੀ’’ਤਿਆਦੀਸੁ (ਸਂ. ਨਿ. ੫.੩੭੬) ਪਣੀਤੇ ਆਗਤੋ. ‘‘ਉਲ਼ਾਰਾਯ ਖਲੁ ਭਵਂ ਵਚ੍ਛਾਯਨੋ ਸਮਣਂ ਗੋਤਮਂ ਪਸਂਸਾਯ ਪਸਂਸਤੀ’’ਤਿਆਦੀਸੁ (ਮ. ਨਿ. ੧.੨੮੮) ਸੇਟ੍ਠੇ. ‘‘ਉਲ਼ਾਰਭੋਗਾ ਉਲ਼ਾਰਯਸਾ ਓਲ਼ਾਰਿਕ’’ਨ੍ਤਿ ਚ ¶ ਆਦੀਸੁ (ਧ. ਸ. ੮੯੪, ੮੯੬; ਮ. ਨਿ. ੧.੨੪੪) ਮਹਨ੍ਤੇ. ਤਮ੍ਪਿ ਚ ਵਿਮਾਨਂ ਮਨੁਞ੍ਞਭਾਵੇਨ ਉਪਭੁਞ੍ਜਨ੍ਤਾਨਂ ਅਤਿਤ੍ਤਿਕਰਣਤ੍ਥੇਨ ਪਣੀਤਂ, ਸਮਨ੍ਤਪਾਸਾਦਿਕਤਾਦਿਨਾ ਪਸਂਸਿਤਤਾਯ ਸੇਟ੍ਠਂ, ਪਮਾਣਮਹਨ੍ਤਤਾਯ ਚ ਮਹਗ੍ਘਤਾਯ ਚ ਮਹਨ੍ਤਂ, ਤੀਹਿਪਿ ਅਤ੍ਥੇਹਿ ਉਲ਼ਾਰਮੇਵਾਤਿ ਵੁਤ੍ਤਂ ਉਲ਼ਾਰਨ੍ਤਿ.

ਮਨੋਜਵਨ੍ਤਿ ¶ ਏਤ੍ਥ ਮਨੋਤਿ ਚਿਤ੍ਤਂ. ਯਦਿਪਿ ਮਨੋ-ਸਦ੍ਦੋ ਸਬ੍ਬੇਸਮ੍ਪਿ ਕੁਸਲਾਕੁਸਲਾਬ੍ਯਾਕਤਚਿਤ੍ਤਾਨਂ ਸਾਧਾਰਣਵਾਚੀ, ‘‘ਮਨੋਜਵ’’ਨ੍ਤਿ ਪਨ ਵੁਤ੍ਤਤ੍ਤਾ ਯਤ੍ਥ ਕਤ੍ਥਚਿ ਆਰਮ੍ਮਣੇ ਪਵਤ੍ਤਨਕਸ੍ਸ ਕਿਰਿਯਮਯਚਿਤ੍ਤਸ੍ਸ ਵਸੇਨ ਵੇਦਿਤਬ੍ਬਂ. ਤਸ੍ਮਾ ਮਨਸੋ ਵਿਯ ਜਵੋ ਏਤਸ੍ਸਾਤਿ ਮਨੋਜਵਂ ਯਥਾ ਓਟ੍ਠਮੁਖੋਤਿ, ਅਤਿਵਿਯ ਸੀਘਗਮਨਨ੍ਤਿ ਅਤ੍ਥੋ. ਮਨੋ ਹਿ ਲਹੁਪਰਿਵਤ੍ਤਿਤਾਯ ਅਤਿਦੂਰੇਪਿ ਵਿਸਯੇ ਖਣੇਨੇਵ ਨਿਪਤਤਿ, ਤੇਨਾਹ ਭਗਵਾ – ‘‘ਨਾਹਂ, ਭਿਕ੍ਖਵੇ, ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮਿ ਯਂ ਏਵਂ ਲਹੁਪਰਿਵਤ੍ਤਂ, ਯਥਯਿਦਂ, ਭਿਕ੍ਖਵੇ, ਚਿਤ੍ਤ’’ਨ੍ਤਿ (ਅ. ਨਿ. ੧.੪੮) ‘‘ਦੂਰਙ੍ਗਮਂ ਏਕਚਰ’’ਨ੍ਤਿ (ਧ. ਪ. ੩੭) ਚ. ਗਚ੍ਛਤੀਤਿ ਤਸ੍ਸਾ ਦੇਵਤਾਯ ਵਸਨਵਿਮਾਨਤੋ ਉਯ੍ਯਾਨਂ ਉਦ੍ਦਿਸ੍ਸ ਆਕਾਸੇਨ ਗਚ੍ਛਤਿ.

ਯੇਨਕਾਮਨ੍ਤਿ ਏਤ੍ਥ ਕਾਮ-ਸਦ੍ਦੋ ‘‘ਕਾਮਾ ਹਿ ਚਿਤ੍ਰਾ ਮਧੁਰਾ ਮਨੋਰਮਾ, ਵਿਰੂਪਰੂਪੇਨ ਮਥੇਨ੍ਤਿ ਚਿਤ੍ਤ’’ਨ੍ਤਿਆਦੀਸੁ (ਸੁ. ਨਿ. ੫੦; ਥੇਰਗਾ. ੭੮੭) ਮਨਾਪਿਯੇ ਰੂਪਾਦਿਵਿਸਯੇ ਆਗਤੋ. ‘‘ਛਨ੍ਦੋ ਕਾਮੋ ਰਾਗੋ ਕਾਮੋ’’ਤਿਆਦੀਸੁ (ਵਿਭ. ੫੬੪; ਮਹਾਨਿ. ੧; ਚੂਲ਼ਨਿ. ੮ ਅਜਿਤਮਾਣਵਪੁਚ੍ਛਾਨਿਦ੍ਦੇਸ) ਛਨ੍ਦਰਾਗੇ. ‘‘ਕਿਲੇਸਕਾਮੋ ਕਾਮੁਪਾਦਾਨ’’ਨ੍ਤਿਆਦੀਸੁ (ਧ. ਸ. ੧੨੧੯; ਮਹਾਨਿ. ੨) ਸਬ੍ਬਸ੍ਮਿਂ ਲੋਭੇ. ‘‘ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸੇਯ੍ਯਾ’’ਤਿਆਦੀਸੁ (ਪਾਰਾ. ੨੯੧) ਗਾਮਧਮ੍ਮੇ. ‘‘ਸਨ੍ਤੇਤ੍ਥ ਤਯੋ ਕੁਲਪੁਤ੍ਤਾ ਅਤ੍ਤਕਾਮਰੂਪਾ ਵਿਹਰਨ੍ਤੀ’’ਤਿਆਦੀਸੁ (ਮ. ਨਿ. ੧.੩੨੫; ਮਹਾਵ. ੪੬੬) ਹਿਤਚ੍ਛਨ੍ਦੇ. ‘‘ਅਤ੍ਤਾਧੀਨੋ ਅਪਰਾਧੀਨੋ ਭੁਜਿਸ੍ਸੋ ਯੇਨਕਾਮਂਗਮੋ’’ਤਿਆਦੀਸੁ ¶ (ਦੀ. ਨਿ. ੧.੨੨੧; ਮ. ਨਿ. ੧.੪੨੬) ਸੇਰਿਭਾਵੇ. ਇਧਾਪਿ ਸੇਰਿਭਾਵੇ ਏਵ ਦਟ੍ਠਬ੍ਬੋ, ਤਸ੍ਮਾ ਯੇਨਕਾਮਨ੍ਤਿ ਯਥਾਰੁਚਿ, ਦੇਵਤਾਯ ਇਚ੍ਛਾਨੁਰੂਪਨ੍ਤਿ ਅਤ੍ਥੋ.

ਅਲਙ੍ਕਤੇਤਿ ¶ ਅਲਙ੍ਕਤਗਤ੍ਤੇ, ਨਾਨਾਵਿਧਰਂਸਿਜਾਲਸਮੁਜ੍ਜਲਵਿਵਿਧਰਤਨਵਿਜ੍ਜੋਤਿਤੇਹਿ ਹਤ੍ਥੂਪਗਪਾਦੂਪਗਾਦਿਭੇਦੇਹਿ ਸਟ੍ਠਿਸਕਟਭਾਰਪਰਿਮਾਣੇਹਿ ਦਿਬ੍ਬਾਲਙ੍ਕਾਰੇਹਿ ਵਿਭੂਸਿਤਸਰੀਰੇਤਿ ਅਤ੍ਥੋ. ਸਮ੍ਬੋਧਨੇ ਚੇਤਂ ਏਕਵਚਨਂ. ਮਲ੍ਯਧਰੇਤਿ ਕਪ੍ਪਰੁਕ੍ਖਪਾਰਿਚ੍ਛਤ੍ਤਕਸਨ੍ਤਾਨਕਲਤਾਦਿਸਮ੍ਭਵੇਹਿ, ਸੁਵਿਸੁਦ੍ਧਚਾਮੀਕਰਵਿਵਿਧਰਤਨਮਯਪਤ੍ਤਕਿਞ੍ਜਕ੍ਖਕੇਸਰੇਹਿ, ਸਮਨ੍ਤਤੋ ਵਿਜ੍ਜੋਤਮਾਨਵਿਪ੍ਫੁਰਨ੍ਤਕਿਰਣਨਿਕਰਰੁਚਿਰੇਹਿ ਦਿਬ੍ਬਕੁਸੁਮੇਹਿ ਸੁਮਣ੍ਡਿਤਕੇਸਹਤ੍ਥਾਦਿਤਾਯ ਮਾਲਾਭਾਰਿਨੀ. ਸੁਵਤ੍ਥੇਤਿ ਕਪ੍ਪਲਤਾਨਿਬ੍ਬਤ੍ਤਾਨਂ, ਨਾਨਾਵਿਰਾਗਵਣ੍ਣਵਿਸੇਸਾਨਂ ਸੁਪਰਿਸੁਦ੍ਧਭਾਸੁਰਪ੍ਪਭਾਨਂ ਨਿਵਾਸਨੁਤ੍ਤਰਿਯਪਟਿਚ੍ਛਦਾਦੀਨਂ ਦਿਬ੍ਬਵਤ੍ਥਾਨਂ ਵਸੇਨ ¶ ਸੁਨ੍ਦਰਵਤ੍ਥੇ. ਓਭਾਸਸੀਤਿ ਵਿਜ੍ਜੋਤਸਿ. ਵਿਜ੍ਜੁਰਿਵਾਤਿ ਵਿਜ੍ਜੁਲਤਾ ਵਿਯ. ਅਬ੍ਭਕੂਟਨ੍ਤਿ ਵਲਾਹਕਸਿਖਰੇ. ਭੁਮ੍ਮਤ੍ਥੇ ਹਿ ਏਤਂ ਉਪਯੋਗਵਚਨਂ. ਓਭਾਸਸੀਤਿ ਵਾ ਅਨ੍ਤੋਗਧਹੇਤੁਅਤ੍ਥਵਚਨਂ, ਓਭਾਸੇਸੀਤਿ ਅਤ੍ਥੋ. ਇਮਸ੍ਮਿਂ ਪਕ੍ਖੇ ‘‘ਅਬ੍ਭਕੂਟ’’ਨ੍ਤਿ ਉਪਯੋਗਤ੍ਥੇ ਏਵ ਉਪਯੋਗਵਚਨਂ ਦਟ੍ਠਬ੍ਬਂ.

ਅਯਞ੍ਹੇਤ੍ਥ ਅਤ੍ਥੋ – ਯਥਾ ਨਾਮ ਸਞ੍ਝਾਪਭਾਨੁਰਞ੍ਜਿਤਂ ਰਤ੍ਤਵਲਾਹਕਸਿਖਰਂ ਪਕਤਿਯਾਪਿ ਓਭਾਸਮਾਨਂ ਸਮਨ੍ਤਤੋ ਵਿਜ੍ਜੋਤਮਾਨਾ ਵਿਜ੍ਜੁਲਤਾ ਨਿਚ੍ਛਰਨ੍ਤੀ ਵਿਸੇਸਤੋ ਓਭਾਸੇਤਿ, ਏਵਮੇਵਂ ਸੁਪਰਿਸੁਦ੍ਧਤਪਨੀਯਮਯਂ ਨਾਨਾਰਤਨਸਮੁਜ੍ਜਲਂ ਪਕਤਿਪਭਸ੍ਸਰਂ ਇਮਂ ਵਿਮਾਨਂ ਤ੍ਵਂ ਸਬ੍ਬਾਲਙ੍ਕਾਰੇਹਿ ਵਿਭੂਸਿਤਾ ਸਬ੍ਬਸੋ ਵਿਜ੍ਜੋਤਯਨ੍ਤੀਹਿ ਅਤ੍ਤਨੋ ਸਰੀਰਪ੍ਪਭਾਹਿ ਵਤ੍ਥਾਭਰਣੋਭਾਸੇਹਿ ਚ ਵਿਸੇਸਤੋ ਓਭਾਸੇਸੀਤਿ.

ਏਤ੍ਥ ਹਿ ‘‘ਪੀਠ’’ਨ੍ਤਿ ਨਿਦਸ੍ਸੇਤਬ੍ਬਵਚਨਮੇਤਂ ¶ , ‘‘ਅਬ੍ਭਕੂਟ’’ਨ੍ਤਿ ਨਿਦਸ੍ਸਨਵਚਨਂ. ਤਥਾ ‘‘ਤੇ’’ਤਿ ਨਿਦਸ੍ਸੇਤਬ੍ਬਵਚਨਂ. ਤਞ੍ਹਿ ‘‘ਪੀਠ’’ਨ੍ਤਿ ਇਦਂ ਅਪੇਕ੍ਖਿਤ੍ਵਾ ਸਾਮਿਵਚਨੇਨ ਵੁਤ੍ਤਮ੍ਪਿ ‘‘ਅਲਙ੍ਕਤੇ ਮਲ੍ਯਧਰੇ ਸੁਵਤ੍ਥੇ ਓਭਾਸਸੀ’’ਤਿ ਇਮਾਨਿ ਪਦਾਨਿ ਅਪੇਕ੍ਖਿਤ੍ਵਾ ਪਚ੍ਚਤ੍ਤਵਸੇਨ ਪਰਿਣਮਤਿ, ਤਸ੍ਮਾ ‘‘ਤ੍ਵ’’ਨ੍ਤਿ ਵੁਤ੍ਤਂ ਹੋਤਿ. ‘‘ਵਿਜ੍ਜੁਰਿਵਾ’’ਤਿ ਨਿਦਸ੍ਸਨਵਚਨਂ. ‘‘ਓਭਾਸਸੀ’’ਤਿ ਇਦਂ ਦ੍ਵਿਨ੍ਨਮ੍ਪਿ ਉਪਮੇਯ੍ਯੁਪਮਾਨਾਨਂ ਸਮ੍ਬਨ੍ਧਦਸ੍ਸਨਂ. ‘‘ਓਭਾਸਸੀ’’ਤਿ ਹਿ ਇਦਂ ‘‘ਤ੍ਵ’’ਨ੍ਤਿ ਪਦਂ ਅਪੇਕ੍ਖਿਤ੍ਵਾ ਮਜ੍ਝਿਮਪੁਰਿਸਵਸੇਨ ਵੁਤ੍ਤਂ, ‘‘ਪੀਠ’’ਨ੍ਤਿ ਇਦਂ ਅਪੇਕ੍ਖਿਤ੍ਵਾ ਪਠਮਪੁਰਿਸਵਸੇਨ ਪਰਿਣਮਤਿ. ਚ-ਸਦ੍ਦੋ ਚੇਤ੍ਥ ਲੁਤ੍ਤਨਿਦ੍ਦਿਟ੍ਠੋ ਦਟ੍ਠਬ੍ਬੋ. ‘‘ਗਚ੍ਛਤਿ ਯੇਨਕਾਮਂ ਓਭਾਸਸੀ’’ਤਿ ਚ ‘‘ਵਿਜ੍ਜੁਲਤੋਭਾਸਿਤਂ ਅਬ੍ਭਕੂਟਂ ਵਿਯਾ’’ਤਿ ਪਚ੍ਚਤ੍ਤਵਸੇਨ ਚੇਤਂ ਉਪਯੋਗਵਚਨਂ ਪਰਿਣਮਤਿ. ਤਥਾ ‘‘ਪੀਠ’’ਨ੍ਤਿ ਵਿਸੇਸਿਤਬ੍ਬਵਚਨਮੇਤਂ, ‘‘ਤੇ ਸੋਵਣ੍ਣਮਯਂ ਉਲ਼ਾਰ’’ਨ੍ਤਿਆਦਿ ਤਸ੍ਸ ਵਿਸੇਸਨਂ.

ਨਨੁ ਚ ‘‘ਸੋਵਣ੍ਣਮਯ’’ਨ੍ਤਿ ਵਤ੍ਵਾ ਸੁਵਣ੍ਣਸ੍ਸ ਅਗ੍ਗਲੋਹਤਾਯ ਸੇਟ੍ਠਭਾਵਤੋ ਦਿਬ੍ਬਸ੍ਸ ਚ ਇਧਾਧਿਪ੍ਪੇਤਤ੍ਤਾ ‘‘ਉਲ਼ਾਰ’’ਨ੍ਤਿ ਨ ਵਤ੍ਤਬ੍ਬਨ੍ਤਿ? ਨ, ਕਿਞ੍ਚਿ ਵਿਸੇਸਸਬ੍ਭਾਵਤੋ. ਯਥੇਵ ਹਿ ਮਨੁਸ੍ਸਪਰਿਭੋਗਸੁਵਣ੍ਣਵਿਕਤਿਤੋ ਰਸਵਿਦ੍ਧਂ ਸੇਟ੍ਠਂ ਸੁਵਿਸੁਦ੍ਧਂ, ਤਤੋ ਆਕਰੁਪ੍ਪਨ੍ਨਂ, ਤਤੋ ਯਂਕਿਞ੍ਚਿ ਦਿਬ੍ਬਂ ¶ ਸੇਟ੍ਠਂ, ਏਵਂ ਦਿਬ੍ਬਸੁਵਣ੍ਣੇਪਿ ਚਾਮੀਕਰਂ, ਚਾਮੀਕਰਤੋ ਸਾਤਕੁਮ੍ਭਂ, ਸਾਤਕੁਮ੍ਭਤੋ ਜਮ੍ਬੁਨਦਂ, ਜਮ੍ਬੁਨਦਤੋ ਸਿਙ੍ਗੀਸੁਵਣ੍ਣਂ. ਤਞ੍ਹਿ ਸਬ੍ਬਸੇਟ੍ਠਂ. ਤੇਨਾਹ ਸਕ੍ਕੋ ਦੇਵਾਨਮਿਨ੍ਦੋ –

‘‘ਮੁਤ੍ਤੋ ¶ ਮੁਤ੍ਤੇਹਿ ਸਹ ਪੁਰਾਣਜਟਿਲੇਹਿ, ਵਿਪ੍ਪਮੁਤ੍ਤੋ ਵਿਪ੍ਪਮੁਤ੍ਤੇਹਿ;

ਸਿਙ੍ਗੀਨਿਕ੍ਖਸਵਣ੍ਣੋ, ਰਾਜਗਹਂ ਪਾਵਿਸਿ ਭਗਵਾ’’ਤਿ. (ਮਹਾਵ. ੫੮);

ਤਸ੍ਮਾ ‘‘ਸੋਵਣ੍ਣਮਯ’’ਨ੍ਤਿ ਵਤ੍ਵਾਪਿ ‘‘ਉਲ਼ਾਰ’’ਨ੍ਤਿ ਵੁਤ੍ਤਂ. ਅਥ ਵਾ ‘‘ਉਲ਼ਾਰ’’ਨ੍ਤਿ ਇਦਂ ਨ ਤਸ੍ਸ ਸੇਟ੍ਠਪਣੀਤਭਾਵਮੇਵ ਸਨ੍ਧਾਯ ਵੁਤ੍ਤਂ, ਅਥ ਖੋ ਮਹਨ੍ਤਭਾਵਮ੍ਪੀਤਿ ਵੁਤ੍ਤੋਵਾਯਮਤ੍ਥੋ ¶ . ਏਤ੍ਥ ਚ ‘‘ਪੀਠ’’ਨ੍ਤਿਆਦਿ ਫਲਸ੍ਸ ਕਮ੍ਮਸਰਿਕ੍ਖਤਾਦਸ੍ਸਨਂ. ਤਤ੍ਥਾਪਿ ‘‘ਸੋਵਣ੍ਣਮਯ’’ਨ੍ਤਿ ਇਮਿਨਾ ਤਸ੍ਸ ਵਿਮਾਨਸ੍ਸ ਵਤ੍ਥੁਸਮ੍ਪਦਂ ਦਸ੍ਸੇਤਿ, ‘‘ਉਲ਼ਾਰ’’ਨ੍ਤਿ ਇਮਿਨਾ ਸੋਭਾਤਿਸਯਸਮ੍ਪਦਂ, ‘‘ਮਨੋਜਵ’’ਨ੍ਤਿ ਇਮਿਨਾ ਗਮਨਸਮ੍ਪਦਂ. ‘‘ਗਚ੍ਛਤਿ ਯੇਨਕਾਮ’’ਨ੍ਤਿ ਇਮਿਨਾ ਸੀਘਜਵਤਾਯ ਪੀਠਸਮ੍ਪਤ੍ਤਿਭਾਵਸਮ੍ਪਦਂ ਦਸ੍ਸੇਤਿ.

ਅਥ ਵਾ ‘‘ਸੋਵਣ੍ਣਮਯ’’ਨ੍ਤਿ ਇਮਿਨਾ ਤਸ੍ਸ ਪਣੀਤਭਾਵਂ ਦਸ੍ਸੇਤਿ, ‘‘ਉਲ਼ਾਰ’’ਨ੍ਤਿ ਇਮਿਨਾ ਵੇਪੁਲ੍ਲਮਹਤ੍ਤਂ. ‘‘ਮਨੋਜਵ’’ਨ੍ਤਿ ਇਮਿਨਾ ਆਨੁਭਾਵਮਹਤ੍ਤਂ. ‘‘ਗਚ੍ਛਤਿ ਯੇਨਕਾਮ’’ਨ੍ਤਿ ਇਮਿਨਾ ਵਿਹਾਰਸੁਖਤ੍ਤਂ ਦਸ੍ਸੇਤਿ. ‘‘ਸੋਵਣ੍ਣਮਯ’’ਨ੍ਤਿ ਵਾ ਇਮਿਨਾ ਤਸ੍ਸ ਅਭਿਰੂਪਤਂ ਵਣ੍ਣਪੋਕ੍ਖਰਤਞ੍ਚ ਦਸ੍ਸੇਤਿ, ‘‘ਉਲ਼ਾਰ’’ਨ੍ਤਿ ਇਮਿਨਾ ਦਸ੍ਸਨੀਯਤਂ ਪਾਸਾਦਿਕਤਞ੍ਚ ਦਸ੍ਸੇਤਿ, ‘‘ਮਨੋਜਵ’’ਨ੍ਤਿ ਇਮਿਨਾ ਸੀਘਸਮ੍ਪਦਂ, ‘‘ਗਚ੍ਛਤਿ ਯੇਨਕਾਮ’’ਨ੍ਤਿ ਇਮਿਨਾ ਕਤ੍ਥਚਿ ਅਪ੍ਪਟਿਹਤਚਾਰਤਂ ਦਸ੍ਸੇਤਿ.

ਅਥ ਵਾ ਤਂ ਵਿਮਾਨਂ ਯਸ੍ਸ ਪੁਞ੍ਞਕਮ੍ਮਸ੍ਸ ਨਿਸ੍ਸਨ੍ਦਫਲਂ, ਤਸ੍ਸ ਅਲੋਭਨਿਸ੍ਸਨ੍ਦਤਾਯ ਸੋਵਣ੍ਣਮਯਂ, ਅਦੋਸਨਿਸ੍ਸਨ੍ਦਤਾਯ ਉਲ਼ਾਰਂ, ਅਮੋਹਨਿਸ੍ਸਨ੍ਦਤਾਯ ਮਨੋਜਵਂ ਗਚ੍ਛਤਿ ਯੇਨਕਾਮਂ. ਤਥਾ ਤਸ੍ਸ ਕਮ੍ਮਸ੍ਸ ਸਦ੍ਧਾਨਿਸ੍ਸਨ੍ਦਭਾਵੇਨ ਸੋਵਣ੍ਣਮਯਂ, ਪਞ੍ਞਾਨਿਸ੍ਸਨ੍ਦਭਾਵੇਨ ਉਲ਼ਾਰਂ, ਵੀਰਿਯਨਿਸ੍ਸਨ੍ਦਭਾਵੇਨ ਮਨੋਜਵਂ, ਸਮਾਧਿਨਿਸ੍ਸਨ੍ਦਭਾਵੇਨ ਗਚ੍ਛਤਿ ਯੇਨਕਾਮਂ. ਸਦ੍ਧਾਸਮਾਧਿਨਿਸ੍ਸਨ੍ਦਭਾਵੇਨ ਵਾ ਸੋਵਣ੍ਣਮਯਂ, ਸਮਾਧਿਪਞ੍ਞਾਨਿਸ੍ਸਨ੍ਦਭਾਵੇਨ ਉਲ਼ਾਰਂ, ਸਮਾਧਿਵੀਰਿਯਨਿਸ੍ਸਨ੍ਦਭਾਵੇਨ ਮਨੋਜਵਂ, ਸਮਾਧਿਸਤਿਨਿਸ੍ਸਨ੍ਦਭਾਵੇਨ ਗਚ੍ਛਤਿ ਯੇਨਕਾਮਨ੍ਤਿ ਵੇਦਿਤਬ੍ਬਂ.

ਤਤ੍ਥ ¶ ਯਥਾ ‘‘ਪੀਠ’’ਨ੍ਤਿਆਦਿ ਵਿਮਾਨਸਮ੍ਪਤ੍ਤਿਦਸ੍ਸਨਵਸੇਨ ਤਸ੍ਸਾ ਦੇਵਤਾਯ ਪੁਞ੍ਞਫਲਵਿਭਵਸਮ੍ਪਤ੍ਤਿਕਿਤ੍ਤਨਂ, ਏਵਂ ‘‘ਅਲਙ੍ਕਤੇ’’ਤਿਆਦਿ ਅਤ੍ਤਭਾਵਸਮ੍ਪਤ੍ਤਿਦਸ੍ਸਨਵਸੇਨ ਪੁਞ੍ਞਫਲਵਿਭਵਸਮ੍ਪਤ੍ਤਿਕਿਤ੍ਤਨਂ. ਯਥਾ ਹਿ ਸੁਸਿਕ੍ਖਿਤਸਿਪ੍ਪਾਚਰਿਯਵਿਰਚਿਤੋਪਿ ਰਤ੍ਤਸੁਵਣ੍ਣਾਲਙ੍ਕਾਰੋ ਵਿਵਿਧਰਂਸਿਜਾਲਸਮੁਜ੍ਜਲਮਣਿਰਤਨਖਚਿਤੋ ਏਵ ਸੋਭਤਿ, ਨ ਕੇਵਲੋ, ਏਵਂ ਸਬ੍ਬਙ੍ਗਸਮ੍ਪਨ੍ਨੋ ਚਤੁਰਸ੍ਸਸੋਭਨੋਪਿ ਅਤ੍ਤਭਾਵੋ ਸੁਮਣ੍ਡਿਤਪਸਾਧਿਤੋਵ ਸੋਭਤਿ, ਨ ਕੇਵਲੋ. ਤੇਨਸ੍ਸਾ ‘‘ਅਲਙ੍ਕਤੇ’’ਤਿਆਦਿਨਾ ¶ ਆਹਰਿਮਂ ਸੋਭਾਵਿਸੇਸਂ ਦਸ੍ਸੇਤਿ, ‘‘ਓਭਾਸਸੀ’’ਤਿ ਇਮਿਨਾ ¶ ਅਨਾਹਰਿਮਂ. ਤਥਾ ਪੁਰਿਮੇਨ ਵਤ੍ਤਮਾਨਪਚ੍ਚਯਨਿਮਿਤ੍ਤਂ ਸੋਭਾਤਿਸਯਂ ਦਸ੍ਸੇਤਿ, ਪਚ੍ਛਿਮੇਨ ਅਤੀਤਪਚ੍ਚਯਨਿਮਿਤ੍ਤਂ. ਪੁਰਿਮੇਨ ਵਾ ਤਸ੍ਸਾ ਉਪਭੋਗਵਤ੍ਥੁਸਮ੍ਪਦਂ ਦਸ੍ਸੇਤਿ, ਪਚ੍ਛਿਮੇਨ ਉਪਭੁਞ੍ਜਨਕਵਤ੍ਥੁਸਮ੍ਪਦਂ.

ਏਤ੍ਥਾਹ ‘‘ਕਿਂ ਪਨ ਤਂ ਵਿਮਾਨਂ ਯੁਤ੍ਤਵਾਹਂ, ਉਦਾਹੁ ਅਯੁਤ੍ਤਵਾਹ’’ਨ੍ਤਿ? ਯਦਿਪਿ ਦੇਵਲੋਕੇ ਰਥਵਿਮਾਨਾਨਿ ਯੁਤ੍ਤਵਾਹਾਨਿਪਿ ਹੋਨ੍ਤਿ ‘‘ਸਹਸ੍ਸਯੁਤ੍ਤਂ ਆਜਞ੍ਞਰਥ’’ਨ੍ਤਿ (ਸਂ. ਨਿ. ੧.੨੬੪) ਆਦਿਵਚਨਤੋ, ਤੇ ਪਨ ਦੇਵਪੁਤ੍ਤਾ ਏਵ ਕਿਚ੍ਚਕਰਣਕਾਲੇ ਵਾਹਰੂਪੇਨ ਅਤ੍ਤਾਨਂ ਦਸ੍ਸੇਨ੍ਤਿ ਯਥਾ ਏਰਾਵਣੋ ਦੇਵਪੁਤ੍ਤੋ ਕੀਲ਼ਨਕਾਲੇ ਹਤ੍ਥਿਰੂਪੇਨ. ਇਦਂ ਪਨ ਅਞ੍ਞਞ੍ਚ ਏਦਿਸਂ ਅਯੁਤ੍ਤਵਾਹਂ ਦਟ੍ਠਬ੍ਬਂ.

ਯਦਿ ਏਵਂ ਕਿਂ ਤਸ੍ਸ ਵਿਮਾਨਸ੍ਸ ਅਬ੍ਭਨ੍ਤਰਾ ਵਾਯੋਧਾਤੁ ਗਮਨੇ ਵਿਸੇਸਪਚ੍ਚਯੋ, ਉਦਾਹੁ ਬਾਹਿਰਾਤਿ? ਅਬ੍ਭਨ੍ਤਰਾਤਿ ਗਹੇਤਬ੍ਬਂ. ਯਥਾ ਹਿ ਚਨ੍ਦਵਿਮਾਨਸੂਰਿਯਵਿਮਾਨਾਦੀਨਂ ਦੇਸਨ੍ਤਰਗਮਨੇ ਤਦੁਪਜੀਵੀਨਂ ਸਤ੍ਤਾਨਂ ਸਾਧਾਰਣਕਮ੍ਮਨਿਬ੍ਬਤ੍ਤਂ ਅਤਿਵਿਯ ਸੀਘਜਵਂ ਮਹਨ੍ਤਂ ਵਾਯੁਮਣ੍ਡਲਂ ਤਾਨਿ ਪੇਲੇਨ੍ਤਂ ਪਵਤ੍ਤੇਤਿ, ਨ ਏਵਂ ਤਂ ਪੇਲੇਤ੍ਵਾ ਪਵਤ੍ਤੇਨ੍ਤੀ ਬਾਹਿਰਾ ਵਾਯੋਧਾਤੁ ਅਤ੍ਥਿ. ਯਥਾ ਚ ਪਨ ਚਕ੍ਕਰਤਨਂ ਅਨ੍ਤੋਸਮੁਟ੍ਠਿਤਾਯ ਵਾਯੋਧਾਤੁਯਾ ਵਸੇਨ ਪਵਤ੍ਤਤਿ. ਨ ਹਿ ਤਸ੍ਸ ਚਨ੍ਦਵਿਮਾਨਾਦੀਨਂ ਵਿਯ ਬਾਹਿਰਾ ਵਾਯੋਧਾਤੁ ਪੇਲੇਤ੍ਵਾ ਪਵਤ੍ਤਿਕਾ ਅਤ੍ਥਿ ਰਞ੍ਞੋ ਚਕ੍ਕਵਤ੍ਤਿਸ੍ਸ ਚਿਤ੍ਤਵਸੇਨ ‘‘ਪਵਤ੍ਤਤੁ ਭਵਂ ਚਕ੍ਕਰਤਨ’’ਨ੍ਤਿਆਦਿਵਚਨਸਮਨਨਨ੍ਤਰਮੇਵ ਪਵਤ੍ਤਨਤੋ, ਏਵਂ ਤਸ੍ਸਾ ਦੇਵਤਾਯ ਚਿਤ੍ਤਵਸੇਨ ਅਤ੍ਤਸਨ੍ਨਿਸ੍ਸਿਤਾਯ ਵਾਯੋਧਾਤੁਯਾ ਗਚ੍ਛਤੀਤਿ ਵੇਦਿਤਬ੍ਬਂ. ਤੇਨ ਵੁਤ੍ਤਂ ‘‘ਮਨੋਜਵਂ ਗਚ੍ਛਤਿ ਯੇਨਕਾਮ’’ਨ੍ਤਿ.

੨. ਏਵਂ ¶ ਪਠਮਗਾਥਾਯ ਤਸ੍ਸਾ ਦੇਵਤਾਯ ਪੁਞ੍ਞਫਲਸਮ੍ਪਤ੍ਤਿਂ ਕਿਤ੍ਤੇਤ੍ਵਾ ਇਦਾਨਿ ਤਸ੍ਸਾ ਕਾਰਣਭੂਤਂ ਪੁਞ੍ਞਸਮ੍ਪਦਂ ਵਿਭਾਵੇਤੁਂ ‘‘ਕੇਨ ਤੇਤਾਦਿਸੋ ਵਣ੍ਣੋ’’ਤਿਆਦਿ ਗਾਥਾਦ੍ਵਯਂ ਵੁਤ੍ਤਂ. ਤਤ੍ਥ ¶ ਕੇਨਾਤਿ ਕਿਂ-ਸਦ੍ਦੋ ‘‘ਕਿਂ ਰਾਜਾ ਯੋ ਲੋਕਂ ਨ ਰਕ੍ਖਤਿ, ਕਿਂ ਨੁ ਖੋ ਨਾਮ ਤੁਮ੍ਹੇ ਮਂ ਵਤ੍ਤਬ੍ਬਂ ਮਞ੍ਞਥਾ’’ਤਿਆਦੀਸੁ (ਪਾਰਾ. ੪੨੪) ਗਰਹਣੇ ਆਗਤੋ. ‘‘ਯਂਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨ’’ਨ੍ਤਿਆਦੀਸੁ (ਮ. ਨਿ. ੧.੨੪੪; ਸਂ. ਨਿ. ੩.੫੯) ਅਨਿਯਮੇ. ‘‘ਕਿਂ ਸੂਧ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠ’’ਨ੍ਤਿਆਦੀਸੁ (ਸੁ. ਨਿ. ੧੮੩; ਸਂ. ਨਿ. ੧.੭੩) ਪੁਚ੍ਛਾਯਂ. ਇਧਾਪਿ ਪੁਚ੍ਛਾਯਮੇਵ ਦਟ੍ਠਬ੍ਬੋ. ‘‘ਕੇਨਾ’’ਤਿ ਚ ਹੇਤੁਅਤ੍ਥੇ ਕਰਣਵਚਨਂ, ਕੇਨ ਹੇਤੁਨਾਤਿ ਅਤ੍ਥੋ. ਤੇਤਿ ਤਵ. ਏਤਾਦਿਸੋਤਿ ਏਦਿਸੋ, ਏਤਰਹਿ ਯਥਾਦਿਸ੍ਸਮਾਨੋਤਿ ਅਤ੍ਥੋ. ਵਣ੍ਣੋਤਿ ਵਣ੍ਣ-ਸਦ੍ਦੋ ‘‘ਕਦਾ ਸਞ੍ਞੂਲ਼੍ਹਾ ਪਨ ਤੇ, ਗਹਪਤਿ, ਇਮੇ ਸਮਣਸ੍ਸ ਗੋਤਮਸ੍ਸ ਵਣ੍ਣਾ’’ਤਿਆਦੀਸੁ (ਮ. ਨਿ. ੨.੭੭) ਗੁਣੇ ਆਗਤੋ. ‘‘ਅਨੇਕਪਰਿਯਾਯੇਨ ਬੁਦ੍ਧਸ੍ਸ ਵਣ੍ਣਂ ਭਾਸਤਿ, ਧਮ੍ਮਸ੍ਸ ਵਣ੍ਣਂ ¶ ਭਾਸਤਿ, ਸਙ੍ਘਸ੍ਸ ਵਣ੍ਣਂ ਭਾਸਤੀ’’ਤਿਆਦੀਸੁ (ਦੀ. ਨਿ. ੧.੪) ਥੁਤਿਯਂ. ‘‘ਅਥ ਕੇਨ ਨੁ ਵਣ੍ਣੇਨ, ਗਨ੍ਧਥੇਨੋਤਿ ਵੁਚ੍ਚਤੀ’’ਤਿਆਦੀਸੁ (ਸਂ. ਨਿ. ੧.੨੩੪; ਜਾ. ੧.੬.੧੧੬) ਕਾਰਣੇ. ‘‘ਤਯੋ ਪਤ੍ਤਸ੍ਸ ਵਣ੍ਣਾ’’ਤਿਆਦੀਸੁ (ਪਾਰਾ. ੬੦੨) ਪਮਾਣੇ. ‘‘ਚਤ੍ਤਾਰੋਮੇ, ਭੋ ਗੋਤਮ, ਵਣ੍ਣਾ’’ਤਿਆਦੀਸੁ (ਦੀ. ਨਿ. ੩.੧੧੫; ਮ. ਨਿ. ੨.੩੭੯-੩੮੦) ਜਾਤਿਯਂ. ‘‘ਮਹਨ੍ਤਂ ਹਤ੍ਥਿਰਾਜਵਣ੍ਣਂ ਅਭਿਨਿਮ੍ਮਿਨਿਤ੍ਵਾ’’ਤਿਆਦੀਸੁ ਸਣ੍ਠਾਨੇ. ‘‘ਸੁਵਣ੍ਣਵਣ੍ਣੋਸਿ ਭਗਵਾ, ਸੁਸੁਕ੍ਕਦਾਠੋਸਿ ਵੀਰਿਯਵਾ’’ਤਿਆਦੀਸੁ (ਮ. ਨਿ. ੨.੩੯੯; ਸੁ. ਨਿ. ੫੫੩) ਛਵਿਵਣ੍ਣੇ. ਇਧਾਪਿ ਛਵਿਵਣ੍ਣੇ ਏਵ ਦਟ੍ਠਬ੍ਬੋ. ਅਯਞ੍ਹੇਤ੍ਥ ਅਤ੍ਥੋ – ਕੇਨ ਕੀਦਿਸੇਨ ਪੁਞ੍ਞਵਿਸੇਸੇਨ ਹੇਤੁਭੂਤੇਨ ਦੇਵਤੇ, ਤਵ ਏਤਾਦਿਸੋ ਏਵਂਵਿਧੋ ਦ੍ਵਾਦਸਯੋਜਨਾਨਿ ਫਰਣਕਪ੍ਪਭੋ ਸਰੀਰਵਣ੍ਣੋ ਜਾਤੋਤਿ?

ਕੇਨ ਤੇ ਇਧ ਮਿਜ੍ਝਤੀਤਿ ਕੇਨ ਪੁਞ੍ਞਾਤਿਸਯੇਨ ਤੇ ਇਧ ਇਮਸ੍ਮਿਂ ਠਾਨੇ ਇਦਾਨਿ ਤਯਿ ਲਬ੍ਭਮਾਨਂ ਉਲ਼ਾਰਂ ਸੁਚਰਿਤਫਲਂ ਇਜ੍ਝਤਿ ਨਿਪ੍ਫਜ੍ਜਤਿ. ਉਪ੍ਪਜ੍ਜਨ੍ਤੀਤਿ ਨਿਬ੍ਬਤ੍ਤਨ੍ਤਿ, ਅਵਿਚ੍ਛੇਦਵਸੇਨ ¶ ਉਪਰੂਪਰਿ ਵਤ੍ਤਨ੍ਤੀਤਿ ਅਤ੍ਥੋ. ਭੋਗਾਤਿ ਪਰਿਭੁਞ੍ਜਿਤਬ੍ਬਟ੍ਠੇਨ ‘‘ਭੋਗਾ’’ਤਿ ਲਦ੍ਧਨਾਮਾ ਵਤ੍ਥਾਭਰਣਾਦਿਵਿਤ੍ਤੂਪਕਰਣਵਿਸੇਸਾ. ਯੇਤਿ ਸਾਮਞ੍ਞੇਨ ਅਨਿਯਮਨਿਦ੍ਦੇਸੋ, ਕੇਚੀਤਿ ਪਕਾਰਭੇਦਂ ਆਮਸਿਤ੍ਵਾ ਅਨਿਯਮਨਿਦ੍ਦੇਸੋ, ਉਭਯੇਨਾਪਿ ਪਣੀਤਪਣੀਤਤਰਾਦਿਭੇਦੇ ਤਤ੍ਥ ਲਬ੍ਭਮਾਨੇ ਤਾਦਿਸੇ ਭੋਗੇ ਅਨਵਸੇਸਤੋ ਬ੍ਯਾਪੇਤ੍ਵਾ ਸਙ੍ਗਣ੍ਹਾਤਿ. ਅਨਵਸੇਸਬ੍ਯਾਪਕੋ ਹਿ ਅਯਂ ਨਿਦ੍ਦੇਸੋ ਯਥਾ ‘‘ਯੇ ¶ ਕੇਚਿ ਸਙ੍ਖਾਰਾ’’ਤਿ. ਮਨਸੋ ਪਿਯਾਤਿ ਮਨਸਾ ਪਿਯਾਯਿਤਬ੍ਬਾ, ਮਨਾਪਿਯਾਤਿ ਅਤ੍ਥੋ.

ਏਤ੍ਥ ਚ ‘‘ਏਤਾਦਿਸੋ ਵਣ੍ਣੋ’’ਤਿ ਇਮਿਨਾ ਹੇਟ੍ਠਾ ਵੁਤ੍ਤਵਿਸੇਸਾ ਤਸ੍ਸਾ ਦੇਵਤਾਯ ਅਤ੍ਤਭਾਵਪਰਿਯਾਪਨ੍ਨਾ ਵਣ੍ਣਸਮ੍ਪਦਾ ਦਸ੍ਸਿਤਾ. ‘‘ਭੋਗਾ’’ਤਿ ਇਮਿਨਾ ਉਪਭੋਗਪਰਿਭੋਗਵਤ੍ਥੁਭੂਤਾ ਦਿਬ੍ਬਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਭੇਦਾ ਕਾਮਗੁਣਸਮ੍ਪਦਾ. ‘‘ਮਨਸੋ ਪਿਯਾ’’ਤਿ ਇਮਿਨਾ ਤੇਸਂ ਰੂਪਾਦੀਨਂ ਇਟ੍ਠਕਨ੍ਤਮਨਾਪਤਾ. ‘‘ਇਧ ਮਿਜ੍ਝਤੀ’’ਤਿ ਇਮਿਨਾ ਪਨ ਦਿਬ੍ਬਆਯੁਵਣ੍ਣਯਸਸੁਖਆਧਿਪਤੇਯ੍ਯਸਮ੍ਪਦਾ ਦਸ੍ਸਿਤਾ. ‘‘ਯੇ ਕੇਚਿ ਮਨਸੋ ਪਿਯਾ’’ਤਿ ਇਮਿਨਾ ਯਾਨਿ ‘‘ਸੋ ਅਞ੍ਞੇ ਦੇਵੇ ਦਸਹਿ ਠਾਨੇਹਿ ਅਧਿਗ੍ਗਣ੍ਹਾਤਿ ਦਿਬ੍ਬੇਨ ਆਯੁਨਾ ਦਿਬ੍ਬੇਨ ਵਣ੍ਣੇਨ ਦਿਬ੍ਬੇਨ ਸੁਖੇਨ ਦਿਬ੍ਬੇਨ ਯਸੇਨ ਦਿਬ੍ਬੇਨ ਆਧਿਪਤੇਯ੍ਯੇਨ ਦਿਬ੍ਬੇਹਿ ਰੂਪੇਹਿ ਦਿਬ੍ਬੇਹਿ ਸਦ੍ਦੇਹਿ ਦਿਬ੍ਬੇਹਿ ਗਨ੍ਧੇਹਿ ਦਿਬ੍ਬੇਹਿ ਰਸੇਹਿ ਦਿਬ੍ਬੇਹਿ ਫੋਟ੍ਠਬ੍ਬੇਹੀ’’ਤਿ (ਸਂ. ਨਿ. ੪.੩੪੧) ਸੁਤ੍ਤੇ ਆਗਤਾਨਿ ਦਸ ਠਾਨਾਨਿ. ਤੇਸਂ ਇਧ ਅਨਵਸੇਸਤੋ ਸਙ੍ਗਹੋ ਦਸ੍ਸਿਤੋਤਿ ਵੇਦਿਤਬ੍ਬੋ.

੩. ਪੁਚ੍ਛਾਮੀਤਿ ਪਞ੍ਹਂ ਕਰੋਮਿ, ਞਾਤੁਮਿਚ੍ਛਾਮੀਤਿ ਅਤ੍ਥੋ. ਕਾਮਞ੍ਚੇਤਂ ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ. ਕਿਮਕਾਸਿ ਪੁਞ੍ਞਂ, ਕੇਨਾਸਿ ਏਵਂ ਜਲਿਤਾਨੁਭਾਵਾ’’ਤਿ ਚ ਕਿਂ-ਸਦ੍ਦਗ੍ਗਹਣੇਨੇਵ ਅਤ੍ਥਨ੍ਤਰਸ੍ਸ ਅਸਮ੍ਭਵਤੋ ਪੁਚ੍ਛਾਵਸੇਨ ਗਾਥਾਤ੍ਤਯਂ ਵੁਤ੍ਤਨ੍ਤਿ ਵਿਞ੍ਞਾਯਤਿ. ਪੁਚ੍ਛਾਵਿਸੇਸਭਾਵਞਾਪਨਤ੍ਥਂ ¶ ਪਨ ‘‘ਪੁਚ੍ਛਾਮੀ’’ਤਿ ਵੁਤ੍ਤਂ. ਅਯਞ੍ਹਿ ਪੁਚ੍ਛਾ ਅਦਿਟ੍ਠਜੋਤਨਾ ਤਾਵ ਨ ਹੋਤਿ ਏਦਿਸਸ੍ਸ ਅਤ੍ਥਸ੍ਸ ਮਹਾਥੇਰਸ੍ਸ ਅਦਿਟ੍ਠਭਾਵਾਭਾਵਤੋ, ਵਿਮਤਿਚ੍ਛੇਦਨਾਪਿ ਨ ਹੋਤਿ ਸਬ੍ਬਸੋ ਸਮੁਗ੍ਘਾਤਿਤਸਂਸਯਤ੍ਤਾ, ਅਨੁਮਤਿਪੁਚ੍ਛਾਪਿ ਨ ਹੋਤਿ ‘‘ਤਂ ਕਿਂ ਮਞ੍ਞਸਿ ਰਾਜਞ੍ਞਾ’’ਤਿਆਦੀਸੁ (ਦੀ. ਨਿ. ੨.੪੧੩) ਵਿਯ ਅਨੁਮਤਿਗਹਣਾਕਾਰੇਨ ਅਪ੍ਪਵਤ੍ਤਤ੍ਤਾ, ਕਥੇਤੁਕਮ੍ਯਤਾਪੁਚ੍ਛਾਪਿ ¶ ਨ ਹੋਤਿ ਤਸ੍ਸਾ ਦੇਵਤਾਯ ਕਥੇਤੁਕਮ੍ਯਤਾਵਸੇਨ ਥੇਰੇਨ ਅਪੁਚ੍ਛਿਤਤ੍ਤਾ. ਵਿਸੇਸੇਨ ਪਨ ਦਿਟ੍ਠਸਂਸਨ੍ਦਨਾਤਿ ਵੇਦਿਤਬ੍ਬਾ. ਸ੍ਵਾਯਮਤ੍ਥੋ ਹੇਟ੍ਠਾ ਅਟ੍ਠੁਪ੍ਪਤ੍ਤਿਕਥਾਯਂ ‘‘ਥੇਰੋ ਕਿਞ੍ਚਾਪੀ’’ਤਿਆਦਿਨਾ ਵਿਭਾਵਿਤੋ ਏਵ. ਤਨ੍ਤਿ ਤ੍ਵਂ. ਤਯਿਦਂ ਪੁਬ੍ਬਾਪਰਾਪੇਕ੍ਖਂ, ਪੁਬ੍ਬਾਪੇਕ੍ਖਤਾਯ ਉਪਯੋਗੇਕਵਚਨਂ, ਪਰਾਪੇਕ੍ਖਤਾਯ ਪਨ ਪਚ੍ਚਤ੍ਤੇਕਵਚਨਂ ਦਟ੍ਠਬ੍ਬਂ.

ਦੇਵੀਤਿ ਏਤ੍ਥ ਦੇਵ-ਸਦ੍ਦੋ ‘‘ਇਮਾਨਿ ਤੇ ਦੇਵ ਚਤੁਰਾਸੀਤਿ ਨਗਰਸਹਸ੍ਸਾਨਿ ਕੁਸਵਤੀਰਾਜਧਾਨਿਪਮੁਖਾਨਿ, ਏਤ੍ਥ, ਦੇਵ, ਛਨ੍ਦਂ ਕਰੋਹਿ ਜੀਵਿਤੇ ¶ ਅਪੇਕ੍ਖ’’ਨ੍ਤਿ ਚ ਆਦੀਸੁ (ਦੀ. ਨਿ. ੨.੨੬੬) ਸਮ੍ਮੁਤਿਦੇਵਵਸੇਨ ਆਗਤੋ, ‘‘ਤਸ੍ਸ ਦੇਵਾਤਿਦੇਵਸ੍ਸ, ਸਾਸਨਂ ਸਬ੍ਬਦਸ੍ਸਿਨੋ’’ਤਿਆਦੀਸੁ ਵਿਸੁਦ੍ਧਿਦੇਵਵਸੇਨ. ਵਿਸੁਦ੍ਧਿਦੇਵਾਨਞ੍ਹਿ ਭਗਵਤੋ ਅਤਿਦੇਵਭਾਵੇ ਵੁਤ੍ਤੇ ਇਤਰੇਸਂ ਵੁਤ੍ਤੋ ਏਵ ਹੋਤੀਤਿ. ‘‘ਚਾਤੁਮਹਾਰਾਜਿਕਾ ਦੇਵਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’’ਤਿਆਦੀਸੁ (ਦੀ. ਨਿ. ੩.੩੩੭) ਉਪਪਤ੍ਤਿਦੇਵਵਸੇਨ. ਇਧਾਪਿ ਉਪਪਤ੍ਤਿਦੇਵਵਸੇਨੇਵ ਵੇਦਿਤਬ੍ਬੋ. ਪਦਤ੍ਥਤੋ ਪਨ – ਦਿਬ੍ਬਤਿ ਅਤ੍ਤਨੋ ਪੁਞ੍ਞਿਦ੍ਧਿਯਾ ਕੀਲ਼ਤਿ ਲਲ਼ਤਿ ਪਞ੍ਚਹਿ ਕਾਮਗੁਣੇਹਿ ਰਮਤਿ, ਅਥ ਵਾ ਹੇਟ੍ਠਾ ਵੁਤ੍ਤਨਯੇਨ ਜੋਤਤਿ ਓਭਾਸਤਿ, ਆਕਾਸੇਨ ਵਿਮਾਨੇਨ ਚ ਗਚ੍ਛਤੀਤਿ ਦੇਵੀ. ‘‘ਤ੍ਵਂ ਦੇਵੀ’’ਤਿ ਸਮ੍ਬੋਧਨੇ ਚੇਤਂ ਏਕਵਚਨਂ. ਮਹਾਨੁਭਾਵੇਤਿ ਉਲ਼ਾਰਪ੍ਪਭਾਵੇ, ਸੋ ਪਨਸ੍ਸਾਨੁਭਾਵੋ ਹੇਟ੍ਠਾ ਦ੍ਵੀਹਿ ਗਾਥਾਹਿ ਦਸ੍ਸਿਤੋਯੇਵ.

ਮਨੁਸ੍ਸਭੂਤਾਤਿ ਏਤ੍ਥ ਮਨਸ੍ਸ ਉਸ੍ਸਨ੍ਨਤਾਯ ਮਨੁਸ੍ਸਾ, ਸਤਿਸੂਰਭਾਵਬ੍ਰਹ੍ਮਚਰਿਯਯੋਗ੍ਯਤਾਦਿਗੁਣਵਸੇਨ ਉਪਚਿਤਮਾਨਸਾ ਉਕ੍ਕਟ੍ਠਗੁਣਚਿਤ੍ਤਾ. ਕੇ ਪਨ ਤੇ? ਜਮ੍ਬੁਦੀਪਵਾਸਿਨੋ ਸਤ੍ਤਵਿਸੇਸਾ. ਤੇਨਾਹ ਭਗਵਾ –

‘‘ਤੀਹਿ, ਭਿਕ੍ਖਵੇ, ਠਾਨੇਹਿ ਜਮ੍ਬੁਦੀਪਕਾ ਮਨੁਸ੍ਸਾ ਉਤ੍ਤਰਕੁਰੁਕੇ ਮਨੁਸ੍ਸੇ ਅਧਿਗ੍ਗਣ੍ਹਨ੍ਤਿ ਦੇਵੇ ਚ ਤਾਵਤਿਂਸੇ. ਕਤਮੇਹਿ ਤੀਹਿ? ਸੂਰਾ, ਸਤਿਮਨ੍ਤੋ, ਇਧ ਬ੍ਰਹ੍ਮਚਰਿਯਵਾਸੋ’’ਤਿ (ਅ. ਨਿ. ੯.੨੧).

ਤਥਾ ਹਿ ਬੁਦ੍ਧਾ ਭਗਵਨ੍ਤੋ ਪਚ੍ਚੇਕਬੁਦ੍ਧਾ ਅਗ੍ਗਸਾਵਕਾ ਮਹਾਸਾਵਕਾ ਚਕ੍ਕਵਤ੍ਤਿਨੋ ਅਞ੍ਞੇ ਚ ਮਹਾਨੁਭਾਵਾ ¶ ਸਤ੍ਤਾ ¶ ਏਤ੍ਥੇਵ ਉਪ੍ਪਜ੍ਜਨ੍ਤਿ. ਤੇਹਿ ਸਮਾਨਰੂਪਾਦਿਤਾਯ ਪਨ ਸਦ੍ਧਿਂ ਪਰਿਤ੍ਤਦੀਪਵਾਸੀਹਿ ਇਤਰਮਹਾਦੀਪਵਾਸਿਨੋਪਿ ‘‘ਮਨੁਸ੍ਸਾ’’ਤ੍ਵੇਵ ਪਞ੍ਞਾਯਿਂਸੂਤਿ ਏਕੇ.

ਅਪਰੇ ਪਨ ਭਣਨ੍ਤਿ – ਲੋਭਾਦੀਹਿ ਅਲੋਭਾਦੀਹਿ ਚ ਸਹਿਤਸ੍ਸ ਮਨਸ੍ਸ ਉਸ੍ਸਨ੍ਨਤਾਯ ਮਨੁਸ੍ਸਾ. ਯੇ ਹਿ ਸਤ੍ਤਾ ਮਨੁਸ੍ਸਜਾਤਿਕਾ, ਤੇਸੁ ਵਿਸੇਸਤੋ ਲੋਭਾਦਯੋ ਅਲੋਭਾਦਯੋ ਚ ਉਸ੍ਸਨ੍ਨਾ, ਤੇ ਲੋਭਾਦਿਉਸ੍ਸਨ੍ਨਤਾਯ ਅਪਾਯਮਗ੍ਗਂ, ਅਲੋਭਾਦਿਉਸ੍ਸਨ੍ਨਤਾਯ ਸੁਗਤਿਮਗ੍ਗਂ ਨਿਬ੍ਬਾਨਗਾਮਿਮਗ੍ਗਞ੍ਚ ਪੂਰੇਨ੍ਤਿ, ਤਸ੍ਮਾ ਲੋਭਾਦੀਹਿ ਅਲੋਭਾਦੀਹਿ ਚ ਸਹਿਤਸ੍ਸ ਮਨਸ੍ਸ ਉਸ੍ਸਨ੍ਨਤਾਯ ਪਰਿਤ੍ਤਦੀਪਵਾਸੀਹਿ ਸਦ੍ਧਿਂ ਚਤੁਮਹਾਦੀਪਵਾਸਿਨੋ ਸਤ੍ਤਵਿਸੇਸਾ ‘‘ਮਨੁਸ੍ਸਾ’’ਤਿ ਵੁਚ੍ਚਨ੍ਤੀਤਿ.

ਲੋਕਿਯਾ ¶ ਪਨ ‘‘ਮਨੁਨੋ ਅਪਚ੍ਚਭਾਵੇਨ ਮਨੁਸ੍ਸਾ’’ਤਿ ਵਦਨ੍ਤਿ. ਮਨੁ ਨਾਮ ਪਠਮਕਪ੍ਪਿਕੋ ਲੋਕਮਰਿਯਾਦਾਯ ਆਦਿਭੂਤੋ ਹਿਤਾਹਿਤਵਿਧਾਯਕੋ ਸਤ੍ਤਾਨਂ ਪਿਤੁਟ੍ਠਾਨਿਯੋ, ਯੋ ਸਾਸਨੇ ‘‘ਮਹਾਸਮ੍ਮਤੋ’’ਤਿ ਵੁਚ੍ਚਤਿ. ਪਚ੍ਚਕ੍ਖਤੋ ਪਰਮ੍ਪਰਾਯ ਚ ਤਸ੍ਸ ਓਵਾਦਾਨੁਸਾਸਨਿਯਂ ਠਿਤਾ ਸਤ੍ਤਾ ਪੁਤ੍ਤਸਦਿਸਤਾਯ ‘‘ਮਨੁਸ੍ਸਾ’’ਤਿ ਵੁਚ੍ਚਨ੍ਤਿ. ਤਤੋ ਏਵ ਹਿ ਤੇ ਮਾਣਵਾ ‘‘ਮਨੁਜਾ’’ਤਿ ਚ ਵੋਹਰੀਯਨ੍ਤਿ. ਮਨੁਸ੍ਸੇਸੁ ਭੂਤਾ ਜਾਤਾ, ਮਨੁਸ੍ਸਭਾਵਂ ਵਾ ਪਤ੍ਤਾਤਿ ਮਨੁਸ੍ਸਭੂਤਾ.

ਕਿਮਕਾਸਿ ਪੁਞ੍ਞਨ੍ਤਿ ਕਿਂ ਦਾਨਸੀਲਾਦਿਪ੍ਪਭੇਦੇਸੁ ਕੀਦਿਸਂ ਪੁਜ੍ਜਭਾਵਫਲਨਿਬ੍ਬਤ੍ਤਨਤੋ, ਯਤ੍ਥ ਸਯਂ ਉਪ੍ਪਨ੍ਨਂ, ਤਂ ਸਨ੍ਤਾਨਂ ਪੁਨਾਤਿ ਵਿਸੋਧੇਤੀਤਿ ਚ ‘‘ਪੁਞ੍ਞ’’ਨ੍ਤਿ ਲਦ੍ਧਨਾਮਂ ਸੁਚਰਿਤਂ ਕੁਸਲਕਮ੍ਮਂ ਅਕਾਸਿ, ਉਪਚਿਨਿ ਨਿਬ੍ਬਤ੍ਤੇਸੀਤਿ ਅਤ੍ਥੋ. ਜਲਿਤਾਨੁਭਾਵਾਤਿ ਸਬ੍ਬਸੋ ਵਿਜ੍ਜੋਤਮਾਨਪੁਞ੍ਞਿਦ੍ਧਿਕਾ.

ਕਸ੍ਮਾ ਪਨੇਤ੍ਥ ‘‘ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞ’’ਨ੍ਤਿ ਵੁਤ੍ਤਂ, ਕਿਂ ਅਞ੍ਞਾਸੁ ਗਤੀਸੁ ਪੁਞ੍ਞਕਿਰਿਯਾ ਨਤ੍ਥੀਤਿ? ਨੋ ਨਤ੍ਥਿ. ਯਸ੍ਮਾ ¶ ਨਿਰਯੇਪਿ ਨਾਮ ਕਾਮਾਵਚਰਕੁਸਲਚਿਤ੍ਤਪਵਤ੍ਤਿ ਕਦਾਚਿ ਲਬ੍ਭਤੇਵ, ਕਿਮਙ੍ਗਂ ਪਨਞ੍ਞਤ੍ਥ, ਨਨੁ ਅਵੋਚੁਮ੍ਹਾ ‘‘ਦਿਟ੍ਠਸਂਸਨ੍ਦਨਾ ਪੁਚ੍ਛਾ’’ਤਿ. ਤਸ੍ਮਾ ਮਹਾਥੇਰੋ ਮਨੁਸ੍ਸਤ੍ਤਭਾਵੇ ਠਤ੍ਵਾ ਪੁਞ੍ਞਕਮ੍ਮਂ ਕਤ੍ਵਾ ਉਪ੍ਪਨ੍ਨਂ ਤਂ ਦਿਸ੍ਵਾ ਭੂਤਤ੍ਥਵਸੇਨ ਪੁਚ੍ਛਨ੍ਤੋ ‘‘ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞ’’ਨ੍ਤਿ ਅਵੋਚ.

ਅਥ ਵਾ ਅਞ੍ਞਾਸੁ ਗਤੀਸੁ ਏਕਨ੍ਤਸੁਖਤਾਯ ਏਕਨ੍ਤਦੁਕ੍ਖਤਾਯ ਦੁਕ੍ਖਬਹੁਲਤਾਯ ਚ ਪੁਞ੍ਞਕਿਰਿਯਾਯ ਓਕਾਸੋ ਨ ਸੁਲਭਰੂਪੋ ਸਪ੍ਪੁਰਿਸੂਪਨਿਸ੍ਸਯਾਦਿਪਚ੍ਚਯਸਮਵਾਯਸ੍ਸ ਸੁਦੁਲ੍ਲਭਭਾਵਤੋ. ਕਦਾਚਿ ਉਪ੍ਪਜ੍ਜਮਾਨੋਪਿ ਯਥਾਵੁਤ੍ਤਕਾਰਣੇਨ ਉਲ਼ਾਰੋ ਵਿਪੁਲੋ ਨ ਚ ਹੋਤਿ, ਮਨੁਸ੍ਸਗਤਿਯਂ ਪਨ ਸੁਖਬਹੁਲਤਾਯ ਪੁਞ੍ਞਕਿਰਿਯਾਯ ਓਕਾਸੋ ਸੁਲਭਰੂਪੋ ਸਪ੍ਪੁਰਿਸੂਪਨਿਸ੍ਸਯਾਦਿਪਚ੍ਚਯਸਮਵਾਯਸ੍ਸ ਯੇਭੁਯ੍ਯੇਨ ਸੁਲਭਭਾਵਤੋ. ਯਞ੍ਚ ਤਤ੍ਥ ਦੁਕ੍ਖਂ ਉਪ੍ਪਜ੍ਜਤਿ, ਤਮ੍ਪਿ ਵਿਸੇਸਤੋ ਪੁਞ੍ਞਕਿਰਿਯਾਯ ¶ ਉਪਨਿਸ੍ਸਯੋ ਹੋਤਿ. ਦੁਕ੍ਖੂਪਨਿਸ੍ਸਯਾ ਹਿ ਸਦ੍ਧਾਤਿ. ਯਥਾ ਹਿ ਅਯੋਘਨੇਨ ਸਤ੍ਥਕੇ ਨਿਪ੍ਫਾਦਿਯਮਾਨੇ ਤਸ੍ਸ ਏਕਨ੍ਤਤੋ ਨ ਅਗ੍ਗਿਮ੍ਹਿ ਤਾਪਨਂ ਉਦਕੇਨ ਵਾ ਤੇਮਨਂ ਛੇਦਨਕਿਰਿਯਾਸਮਤ੍ਥਤਾਯ ਵਿਸੇਸਪਚ੍ਚਯੋ, ਤਾਪੇਤ੍ਵਾ ਪਨ ਪਮਾਣਯੋਗਤੋ ਉਦਕਤੇਮਨਂ ਤਸ੍ਸਾ ਵਿਸੇਸਪਚ੍ਚਯੋ, ਏਵਮੇਵ ਸਤ੍ਤਸਨ੍ਤਾਨਸ੍ਸ ਏਕਨ੍ਤਦੁਕ੍ਖਸਮਙ੍ਗਿਤਾ ਦੁਕ੍ਖਬਹੁਲਤਾ ਏਕਨ੍ਤਸੁਖਸਮਙ੍ਗਿਤਾ ਚ ਪੁਞ੍ਞਕਿਰਿਯਾਯ ¶ ਨ ਵਿਸੇਸਪਚ੍ਚਯੋ ਹੋਤਿ. ਸਤਿ ਪਨ ਦੁਕ੍ਖਸਨ੍ਤਾਪਨੇ ਪਮਾਣਯੋਗਤੋ ਸੁਖੂਪਬ੍ਰੂਹਨੇ ਚ ਲਦ੍ਧੂਪਨਿਸ੍ਸਯਾ ਪੁਞ੍ਞਕਿਰਿਯਾ ਉਪ੍ਪਜ੍ਜਤਿ, ਉਪ੍ਪਜ੍ਜਮਾਨਾ ਚ ਮਹਾਜੁਤਿਕਾ ਮਹਾਵਿਪ੍ਫਾਰਾ ਪਟਿਪਕ੍ਖਛੇਦਨਸਮਤ੍ਥਾ ਚ ਹੋਤਿ, ਤਸ੍ਮਾ ਮਨੁਸ੍ਸਭਾਵੋ ਪੁਞ੍ਞਕਿਰਿਯਾਯ ਵਿਸੇਸਪਚ੍ਚਯੋ ¶ . ਤੇਨ ਵੁਤ੍ਤਂ ‘‘ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞ’’ਨ੍ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

੪. ਏਵਂ ਪਨ ਥੇਰੇਨ ਪੁਚ੍ਛਿਤਾ ਸਾ ਦੇਵਤਾ ਪਞ੍ਹਂ ਵਿਸ੍ਸਜ੍ਜੇਸਿ. ਤਮਤ੍ਥਂ ਦਸ੍ਸੇਤੁਂ ‘‘ਸਾ ਦੇਵਤਾ ਅਤ੍ਤਮਨਾ’’ਤਿ ਗਾਥਾ ਵੁਤ੍ਤਾ. ਕੇਨ ਪਨਾਯਂ ਗਾਥਾ ਵੁਤ੍ਤਾ? ਧਮ੍ਮਸਙ੍ਗਾਹਕੇਹਿ. ਤਤ੍ਥ ਸਾਤਿ ਯਾ ਪੁਬ੍ਬੇ ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ’’ਤਿ ਵੁਤ੍ਤਾ, ਸਾ. ਦੇਵਤਾਤਿ ਦੇਵਪੁਤ੍ਤੋਪਿ ਬ੍ਰਹ੍ਮਾਪਿ ਦੇਵਧੀਤਾਪਿ ਵੁਚ੍ਚਤਿ. ‘‘ਅਥ ਖੋ ਅਞ੍ਞਤਰਾ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ’’ਤਿਆਦੀਸੁ (ਸਂ. ਨਿ. ੧.੧; ਖੁ. ਪਾ. ੫.੧) ਹਿ ਦੇਵਪੁਤ੍ਤੋ ‘‘ਦੇਵਤਾ’’ਤਿ ਵੁਤ੍ਤੋ ਦੇਵੋਯੇਵ ਦੇਵਤਾਤਿ ਕਤ੍ਵਾ. ਤਥਾ ‘‘ਤਾ ਦੇਵਤਾ ਸਤ੍ਤਸਤਾ ਉਲ਼ਾਰਾ, ਬ੍ਰਹ੍ਮਵਿਮਾਨਾ ਅਭਿਨਿਕ੍ਖਮਿਤ੍ਵਾ’’ਤਿਆਦੀਸੁ ਬ੍ਰਹ੍ਮਾਨੋ.

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ’’ਤਿ. (ਵਿ. ਵ. ੭੫) –

ਆਦੀਸੁ ਦੇਵਧੀਤਾ. ਇਧਾਪਿ ਦੇਵਧੀਤਾ ਏਵ ਦਟ੍ਠਬ੍ਬਾ. ਅਤ੍ਤਮਨਾਤਿ ਤੁਟ੍ਠਮਨਾ ਪੀਤਿਸੋਮਨਸ੍ਸੇਹਿ ਗਹਿਤਮਨਾ. ਪੀਤਿਸੋਮਨਸ੍ਸਸਹਗਤਞ੍ਹਿ ਚਿਤ੍ਤਂ ਦੋਮਨਸ੍ਸਸ੍ਸ ਅਨੋਕਾਸਤੋ ਤੇਹਿ ਤਂ ਸਕਂ ਕਤ੍ਵਾ ਗਹਿਤਂ ਵਿਯ ਹੋਤਿ. ਅਤ੍ਤਮਨਾਤਿ ਵਾ ਸਕਮਨਾ. ਅਨਵਜ੍ਜਪੀਤਿਸੋਮਨਸ੍ਸਸਮ੍ਪਯੁਤ੍ਤਞ੍ਹਿ ਚਿਤ੍ਤਂ ਸਮ੍ਪਤਿ ਆਯਤਿਞ੍ਚ ਤਂਸਮਙ੍ਗਿਨੋ ਹਿਤਸੁਖਾਵਹਤੋ ‘‘ਸਕ’’ਨ੍ਤਿ ਵਤ੍ਤਬ੍ਬਤਂ ਲਭਤਿ, ਨ ਇਤਰਂ.

ਮੋਗ੍ਗਲ੍ਲਾਨੇਨਾਤਿ ਮੋਗ੍ਗਲ੍ਲਾਨਗੋਤ੍ਤਸ੍ਸ ਬ੍ਰਾਹ੍ਮਣਮਹਾਸਾਲਸ੍ਸ ਪੁਤ੍ਤਭਾਵਤੋ ਸੋ ਮਹਾਥੇਰੋ ਗੋਤ੍ਤਵਸੇਨ ‘‘ਮੋਗ੍ਗਲ੍ਲਾਨੋ’’ਤਿ ਪਞ੍ਞਾਤੋ, ਤੇਨ ਮੋਗ੍ਗਲ੍ਲਾਨੇਨ ¶ . ਪੁਚ੍ਛਿਤਾਤਿ ਦਿਟ੍ਠਸਂਸਨ੍ਦਨਵਸੇਨ ਪੁਚ੍ਛਿਤਾ, ਅਤ੍ਤਮਨਾ ਸਾ ਦੇਵਤਾ ਪਞ੍ਹਂ ਬ੍ਯਾਕਾਸੀਤਿ ਯੋਜਨਾ. ਅਤ੍ਤਮਨਤਾ ਚਸ੍ਸਾ ‘‘ਤਮ੍ਪਿ ਨਾਮ ਪਰਿਤ੍ਤਕਮ੍ਪਿ ਕਮ੍ਮਂ ਏਵਂ ਮਹਤਿਯਾ ਦਿਬ੍ਬਸਮ੍ਪਤ੍ਤਿਯਾ ਕਾਰਣਂ ਅਹੋਸੀ’’ਤਿ ਪੁਬ੍ਬੇਪਿ ਸਾ ਅਤ੍ਤਨੋ ਪੁਞ੍ਞਫਲਂ ¶ ਪਟਿਚ੍ਚ ਅਨ੍ਤਰਨ੍ਤਰਾ ਸੋਮਨਸ੍ਸਂ ਪਟਿਸਂਵੇਦੇਤਿ, ਇਦਾਨਿ ਪਨ ‘‘ਅਞ੍ਞਤਰਸ੍ਸ ਥੇਰਸ੍ਸ ਕਤੋਪਿ ਨਾਮ ਕਾਰੋ ਏਵਂ ਉਲ਼ਾਰਫਲੋ, ਅਯਂ ਪਨ ਬੁਦ੍ਧਾਨਂ ਅਗ੍ਗਸਾਵਕੋ ਉਲ਼ਾਰਗੁਣੋ ਮਹਾਨੁਭਾਵੋ ¶ , ਇਮਮ੍ਪਿ ਪਸ੍ਸਿਤੁਂ ਨਿਪਚ੍ਚਕਾਰਞ੍ਚ ਕਾਤੁਂ ਲਭਾਮਿ, ਮਮ ਪੁਞ੍ਞਫਲਪਟਿਸਂਯੁਤ੍ਤਮੇਵ ਚ ਪੁਚ੍ਛਂ ਕਰੋਤੀ’’ਤਿ ਦ੍ਵੀਹਿ ਕਾਰਣੇਹਿ ਉਪ੍ਪਨ੍ਨਾ. ਏਵਂ ਸਞ੍ਜਾਤਬਲਵਪੀਤਿਸੋਮਨਸ੍ਸਾ ਸਾ ਥੇਰਸ੍ਸ ਵਚਨਂ ਸਿਰਸਾ ਸਮ੍ਪਟਿਚ੍ਛਿਤ੍ਵਾ ਪਞ੍ਹਂ ਪੁਟ੍ਠਾ ਬ੍ਯਾਕਾਸਿ.

ਪਞ੍ਹਨ੍ਤਿ ਞਾਤੁਂ ਇਚ੍ਛਿਤਂ ਤਂ ਅਤ੍ਥਂ ਵਿਯਾਕਾਸਿ ਕਥੇਸਿ ਵਿਸ੍ਸਜ੍ਜੇਸਿ. ਕਥਂ ਪਨ ਬ੍ਯਾਕਾਸਿ? ਪੁਟ੍ਠਾਤਿ ਪੁਟ੍ਠਾਕਾਰਤੋ, ਪੁਚ੍ਛਿਤਾਕਾਰੇਨੇਵਾਤਿ ਅਤ੍ਥੋ. ਏਤ੍ਥ ਹਿ ‘‘ਪੁਚ੍ਛਿਤਾ’’ਤਿ ਵਤ੍ਵਾ ਪੁਨ ‘‘ਪੁਟ੍ਠਾ’’ਤਿ ਵਚਨਂ ਵਿਸੇਸਤ੍ਥਨਿਯਮਨਂ ਦਟ੍ਠਬ੍ਬਂ. ਸਿਦ੍ਧੇ ਹਿ ਸਤਿ ਆਰਮ੍ਭੋ ਵਿਸੇਸਤ੍ਥਞਾਪਕੋਵ ਹੋਤਿ. ਕੋ ਪਨੇਸੋ ਵਿਸੇਸਤ੍ਥੋ? ਬ੍ਯਾਕਰਣਸ੍ਸ ਪੁਚ੍ਛਾਨੁਰੂਪਤਾ. ਯਞ੍ਹਿ ਕਮ੍ਮਫਲਂ ਦਸ੍ਸੇਤ੍ਵਾ ਤਸ੍ਸ ਕਾਰਣਭੂਤਂ ਕਮ੍ਮਂ ਪੁਚ੍ਛਿਤਂ, ਤਦੁਭਯਸ੍ਸ ਅਞ੍ਞਮਞ੍ਞਾਨੁਰੂਪਭਾਵਵਿਭਾਵਨਾ. ਯੇਨ ਚ ਆਕਾਰੇਨ ਪੁਚ੍ਛਾ ਪਵਤ੍ਤਾ ਅਤ੍ਥਤੋ ਚ ਬ੍ਯਞ੍ਜਨਤੋ ਚ, ਤਦਾਕਾਰਸ੍ਸ ਬ੍ਯਾਕਰਣਸ੍ਸ ਪੁਚ੍ਛਾਨੁਰੂਪਤਾ, ਤਥਾ ਚੇਵ ਵਿਸ੍ਸਜ੍ਜਨਂ ਪਵਤ੍ਤਂ. ਇਤਿ ਇਮਸ੍ਸ ਵਿਸੇਸਸ੍ਸ ਞਾਪਨਤ੍ਥਂ ‘‘ਪੁਚ੍ਛਿਤਾ’’ਤਿ ਵਤ੍ਵਾ ਪੁਨ ‘‘ਪੁਟ੍ਠਾ’’ਤਿ ਵੁਤ੍ਤਂ.

‘‘ਪੁਚ੍ਛਿਤਾ’’ਤਿ ਵਾ ਤਾਯ ਦੇਵਤਾਯ ਵਿਸੇਸਨਮੁਖੇਨ ਪੁਟ੍ਠਭਾਵਸ੍ਸ ਪਞ੍ਹਬ੍ਯਾਕਰਣਸ੍ਸ ਚ ਕਾਰਣਕਿਤ੍ਤਨਂ. ਇਦਂ ਵੁਤ੍ਤਂ ਹੋਤਿ – ‘‘ਕੇਨ ਤੇਤਾਦਿਸੋ ਵਣ੍ਣੋ’’ਤਿਆਦਿਨਾ ਥੇਰੇਨ ਪੁਚ੍ਛੀਯਤੀਤਿ ¶ ਪੁਚ੍ਛਾ, ਤਾਯ ਦੇਵਤਾਯ ਕਤਕਮ੍ਮਂ, ਤਸ੍ਸਾ ਪੁਚ੍ਛਾਯ ਕਾਰਿਤਾ ਆਚਿਕ੍ਖਿਤਾ ਵਾਤਿ ਸਾ ਦੇਵਤਾ ‘‘ਪੁਚ੍ਛਿਤਾ’’ਤਿ ਵੁਤ੍ਤਾ. ਯਸ੍ਮਾ ਪੁਚ੍ਛਿਤਾ ਪੁਚ੍ਛਿਯਮਾਨਸ੍ਸ ਕਮ੍ਮਸ੍ਸ ਕਾਰਿਤਾ, ਤਸ੍ਮਾ ਪਞ੍ਹਂ ਪੁਟ੍ਠਾ. ਯਸ੍ਮਾ ਚ ਪੁਚ੍ਛਿਤਾ ਪੁਚ੍ਛਿਯਮਾਨਸ੍ਸ ਕਮ੍ਮਸ੍ਸ ਆਚਿਕ੍ਖਨਸਭਾਵਾ, ਤਸ੍ਮਾ ਪਞ੍ਹਂ ਬ੍ਯਾਕਾਸੀਤਿ. ਯਸ੍ਸ ਕਮ੍ਮਸ੍ਸਿਦਂ ਫਲਨ੍ਤਿ ਇਦਂ ‘‘ਪਞ੍ਹ’’ਨ੍ਤਿ ਵੁਤ੍ਤਸ੍ਸ ਅਤ੍ਥਸ੍ਸ ਸਰੂਪਦਸ੍ਸਨਂ. ਅਯਂ ਚੇਤ੍ਥ ਅਤ੍ਥੋ – ਇਦਂ ਪੁਚ੍ਛਨ੍ਤਸ੍ਸ ਪੁਚ੍ਛਿਯਮਾਨਾਯ ਚ ਪਚ੍ਚਕ੍ਖਭੂਤਂ ਅਨਨ੍ਤਰਂ ਵੁਤ੍ਤਪ੍ਪਕਾਰਂ ਪੁਞ੍ਞਫਲਂ, ਯਸ੍ਸ ਕਮ੍ਮਸ੍ਸ ਤਂ ਞਾਤੁਂ ਇਚ੍ਛਿਤਤ੍ਤਾ ਪਞ੍ਹਨ੍ਤਿ ਵੁਤ੍ਤਂ ਪੁਞ੍ਞਕਮ੍ਮਂ ਬ੍ਯਾਕਾਸੀਤਿ.

੫. ਅਹਂ ਮਨੁਸ੍ਸੇਸੂਤਿਆਦਿ ਪਞ੍ਹਸ੍ਸ ਬ੍ਯਾਕਰਣਾਕਾਰੋ. ਤਤ੍ਥ ਅਹਨ੍ਤਿ ਦੇਵਤਾ ਅਤ੍ਤਾਨਂ ਨਿਦ੍ਦਿਸਤਿ. ‘‘ਮਨੁਸ੍ਸੇਸੂ’’ਤਿ ਵਤ੍ਵਾ ਪੁਨ ‘‘ਮਨੁਸ੍ਸਭੂਤਾ’’ਤਿ ਵਚਨਂ ਤਦਾ ਅਤ੍ਤਨਿ ਮਨੁਸ੍ਸਗੁਣਾਨਂ ਵਿਜ੍ਜਮਾਨਤਾਦਸ੍ਸਨਤ੍ਥਂ. ਯੋ ਹਿ ਮਨੁਸ੍ਸਜਾਤਿਕੋਵ ਸਮਾਨੋ ਪਾਣਾਤਿਪਾਤਾਦਿਂ ਅਕਤ੍ਤਬ੍ਬਂ ਕਤ੍ਵਾ ਦਣ੍ਡਾਰਹੋ ਤਤ੍ਥ ਤਤ੍ਥ ਰਾਜਾਦਿਤੋ ਹਤ੍ਥਚ੍ਛੇਦਾਦਿਕਮ੍ਮਕਾਰਣਂ ਪਾਪੁਣਨ੍ਤੋ ¶ ਮਹਾਦੁਕ੍ਖਂ ਅਨੁਭਵਤਿ, ਅਯਂ ਮਨੁਸ੍ਸਨੇਰਯਿਕੋ ਨਾਮ. ਅਪਰੋ ਮਨੁਸ੍ਸਜਾਤਿਕੋਵ ਸਮਾਨੋ ਪੁਬ੍ਬੇਕਤਕਮ੍ਮੁਨਾ ਘਾਸਚ੍ਛਾਦਨਮ੍ਪਿ ਨ ਲਭਤਿ, ਖੁਪ੍ਪਿਪਾਸਾਭਿਭੂਤੋ ਦੁਕ੍ਖਬਹੁਲੋ ਕਤ੍ਥਚਿ ਪਤਿਟ੍ਠਂ ਅਲਭਮਾਨੋ ਵਿਚਰਤਿ, ਅਯਂ ਮਨੁਸ੍ਸਪੇਤੋ ¶ ਨਾਮ. ਅਪਰੋ ਮਨੁਸ੍ਸਜਾਤਿਕੋਵ ਸਮਾਨੋ ਪਰਾਧੀਨਵੁਤ੍ਤਿ ਪਰੇਸਂ ਭਾਰਂ ਵਹਨ੍ਤੋ ਭਿਨ੍ਨਮਰਿਯਾਦੋ ਵਾ ਅਨਾਚਾਰਂ ਆਚਰਿਤ੍ਵਾ ਪਰੇਹਿ ਸਨ੍ਤਜ੍ਜਿਤੋ ਮਰਣਭਯਭੀਤੋ ਗਹਨਨਿਸ੍ਸਿਤੋ ਦੁਕ੍ਖਬਹੁਲੋ ਵਿਚਰਤਿ ਹਿਤਾਹਿਤਂ ਅਜਾਨਨ੍ਤੋ ਨਿਦ੍ਦਾਜਿਘਚ੍ਛਾਦੁਕ੍ਖਵਿਨੋਦਨਾਦਿਪਰੋ, ਅਯਂ ਮਨੁਸ੍ਸਤਿਰਚ੍ਛਾਨੋ ਨਾਮ. ਯੋ ਪਨ ਅਤ੍ਤਨੋ ਹਿਤਾਹਿਤਂ ਜਾਨਨ੍ਤੋ ਕਮ੍ਮਫਲਂ ਸਦ੍ਦਹਨ੍ਤੋ ਹਿਰੋਤ੍ਤਪ੍ਪਸਮ੍ਪਨ੍ਨੋ ਦਯਾਪਨ੍ਨੋ ਸਬ੍ਬਸਤ੍ਤੇਸੁ ਸਂਵੇਗਬਹੁਲੋ ਅਕੁਸਲਕਮ੍ਮਪਥੇ ¶ ਪਰਿਵਜ੍ਜੇਨ੍ਤੋ ਕੁਸਲਕਮ੍ਮਪਥੇ ਸਮਾਚਰਨ੍ਤੋ ਪੁਞ੍ਞਕਿਰਿਯਵਤ੍ਥੂਨਿ ਪਰਿਪੂਰੇਤਿ, ਅਯਂ ਮਨੁਸ੍ਸਧਮ੍ਮੇ ਪਤਿਟ੍ਠਿਤੋ ਪਰਮਤ੍ਥਤੋ ਮਨੁਸ੍ਸੋ ਨਾਮ. ਅਯਮ੍ਪਿ ਤਾਦਿਸਾ ਅਹੋਸਿ. ਤੇਨ ਵੁਤ੍ਤਂ ‘‘ਮਨੁਸ੍ਸੇਸੁ ਮਨੁਸ੍ਸਭੂਤਾ’’ਤਿ. ਮਨੁਸ੍ਸੇ ਸਤ੍ਤਨਿਕਾਯੇ ਮਨੁਸ੍ਸਭਾਵਂ ਪਤ੍ਤਾ ਮਨੁਸ੍ਸਧਮ੍ਮਞ੍ਚ ਅਪ੍ਪਹਾਯ ਠਿਤਾਤਿ ਅਤ੍ਥੋ.

ਅਬ੍ਭਾਗਤਾਨਨ੍ਤਿ ਅਭਿਆਗਤਾਨਂ, ਸਮ੍ਪਤ੍ਤਆਗਨ੍ਤੁਕਾਨਨ੍ਤਿ ਅਤ੍ਥੋ. ਦੁਵਿਧਾ ਹਿ ਆਗਨ੍ਤੁਕਾ ਅਤਿਥਿ ਅਬ੍ਭਾਗਤੋਤਿ. ਤੇਸੁ ਕਤਪਰਿਚਯੋ ਆਗਨ੍ਤੁਕੋ ਅਤਿਥਿ, ਅਕਤਪਰਿਚਯੋ ਅਬ੍ਭਾਗਤੋ. ਕਤਪਰਿਚਯੋ ਅਕਤਪਰਿਚਯੋਪਿ ਵਾ ਪੁਰੇਤਰਂ ਆਗਤੋ ਅਤਿਥਿ, ਭੋਜਨਵੇਲਾਯਂ ਉਪਟ੍ਠਿਤੋ ਸਮ੍ਪਤਿ ਆਗਤੋ ਅਬ੍ਭਾਗਤੋ. ਨਿਮਨ੍ਤਿਤੋ ਵਾ ਭਤ੍ਤੇਨ ਅਤਿਥਿ, ਅਨਿਮਨ੍ਤਿਤੋ ਅਬ੍ਭਾਗਤੋ. ਅਯਂ ਪਨ ਅਕਤਪਰਿਚਯੋ ਅਨਿਮਨ੍ਤਿਤੋ ਸਮ੍ਪਤਿ ਆਗਤੋ ਚ, ਤਂ ਸਨ੍ਧਾਯਾਹ ‘‘ਅਬ੍ਭਾਗਤਾਨ’’ਨ੍ਤਿ, ਗਰੁਕਾਰੇਨ ਪਨੇਤ੍ਥ ਬਹੁਵਚਨਂ ਵੁਤ੍ਤਂ. ਆਸਤਿ ਨਿਸੀਦਤਿ ਏਤ੍ਥਾਤਿ ਆਸਨਂ. ਯਂਕਿਞ੍ਚਿ ਨਿਸੀਦਨਯੋਗ੍ਗਂ, ਇਧ ਪਨ ਪੀਠਂ ਅਧਿਪ੍ਪੇਤਂ, ਤਸ੍ਸ ਚ ਅਪ੍ਪਕਤ੍ਤਾ ਅਨੁਲ਼ਾਰਤ੍ਤਾ ਚ ‘‘ਆਸਨਕ’’ਨ੍ਤਿ ਆਹ. ਅਦਾਸਿਨ੍ਤਿ ‘‘ਇਦਮਸ੍ਸ ਥੇਰਸ੍ਸ ਦਿਨ੍ਨਂ ਮਯ੍ਹਂ ਮਹਪ੍ਫਲਂ ਭਵਿਸ੍ਸਤਿ ਮਹਾਨਿਸਂਸ’’ਨ੍ਤਿ ਸਞ੍ਜਾਤਸੋਮਨਸ੍ਸਾ ਕਮ੍ਮਂ ਕਮ੍ਮਫਲਞ੍ਚ ਸਦ੍ਦਹਿਤ੍ਵਾ ਤਸ੍ਸ ਥੇਰਸ੍ਸ ਪਰਿਭੋਗਤ੍ਥਾਯ ਅਦਾਸਿਂ, ਨਿਰਪੇਕ੍ਖਪਰਿਚ੍ਚਾਗਵਸੇਨ ਪਰਿਚ੍ਚਜਿਨ੍ਤਿ ਅਤ੍ਥੋ.

ਅਭਿਵਾਦਯਿਨ੍ਤਿ ਅਭਿਵਾਦਨਮਕਾਸਿਂ, ਪਞ੍ਚਪਤਿਟ੍ਠਿਤੇਨ ਦਕ੍ਖਿਣੇਯ੍ਯਪੁਗ੍ਗਲੇ ਵਨ੍ਦਿਨ੍ਤਿ ਅਨ੍ਤੋ. ਵਨ੍ਦਮਾਨਾ ਹਿ ਤਂ ਤਾਯੇਵ ਵਨ੍ਦਨਕਿਰਿਯਾਯ ਵਨ੍ਦਿਯਮਾਨਂ ‘‘ਸੁਖਿਨੀ ਹੋਹਿ, ਅਰੋਗਾ ਹੋਹੀ’’ਤਿਆਦਿਨਾ ਆਸਿਵਾਦਂ ਅਤ੍ਥਤੋ ਵਦਾਪੇਸਿ ¶ ਨਾਮ. ਅਞ੍ਜਲਿਕਂ ਅਕਾਸਿਨ੍ਤਿ ਦਸਨਖਸਮੋਧਾਨਸਮੁਜ੍ਜਲਂ ਅਞ੍ਜਲਿਂ ਸਿਰਸਿ ਪਗ੍ਗਣ੍ਹਨ੍ਤੀ ਗੁਣਵਿਸਿਟ੍ਠਾਨਂ ਅਪਚਾਯਨਂ ਅਕਾਸਿਨ੍ਤਿ ¶ ਅਤ੍ਥੋ. ਯਥਾਨੁਭਾਵਨ੍ਤਿ ਯਥਾਬਲਂ, ਤਦਾ ਮਮ ਵਿਜ੍ਜਮਾਨਵਿਭਵਾਨੁਰੂਪਨ੍ਤਿ ਅਤ੍ਥੋ. ਅਦਾਸਿ ਦਾਨਨ੍ਤਿ ਅਨ੍ਨਪਾਨਾਦਿਦੇਯ੍ਯਧਮ੍ਮਪਰਿਚ੍ਚਾਗੇਨ ਦਕ੍ਖਿਣੇਯ੍ਯਂ ਭੋਜੇਨ੍ਤੀ ਦਾਨਮਯਂ ਪੁਞ੍ਞਂ ਪਸਵਿਂ.

ਏਤ੍ਥ ਚ ‘‘ਅਹ’’ਨ੍ਤਿ ਇਦਂ ਕਮ੍ਮਸ੍ਸ ਫਲਸ੍ਸ ਚ ਏਕਸਨ੍ਤਤਿਪਤਿਤਤਾਦਸ੍ਸਨੇਨ ਸਮ੍ਬਨ੍ਧਭਾਵਦਸ੍ਸਨਂ, ‘‘ਮਨੁਸ੍ਸੇਸੁ ਮਨੁਸ੍ਸਭੂਤਾ’’ਤਿ ਇਦਂ ਤਸ੍ਸਾ ਪੁਞ੍ਞਕਿਰਿਯਾਯ ਅਧਿਟ੍ਠਾਨਭੂਤਸਨ੍ਤਾਨਵਿਸੇਸਦਸ੍ਸਨਂ, ‘‘ਅਬ੍ਭਾਗਤਾਨ’’ਨ੍ਤਿ ਇਦਂ ਚਿਤ੍ਤਸਮ੍ਪਤ੍ਤਿਦਸ੍ਸਨਞ੍ਚੇਵ ਖੇਤ੍ਤਸਮ੍ਪਤ੍ਤਿਦਸ੍ਸਨਞ੍ਚ ¶ ਦਾਨਸ੍ਸ ਵਿਯ ਪਟਿਗ੍ਗਹਣਸ੍ਸ ਚ ਕਿਞ੍ਚਿ ਅਨਪੇਕ੍ਖਿਤ੍ਵਾ ਪਵਤ੍ਤਿਤਭਾਵਦੀਪਨਤੋ. ‘‘ਆਸਨਕਂ ਅਦਾਸਿਂ ਯਥਾਨੁਭਾਵਞ੍ਚ ਅਦਾਸਿ ਦਾਨ’’ਨ੍ਤਿ ਇਦਂ ਭੋਗਸਾਰਦਾਨਦਸ੍ਸਨਂ, ‘‘ਅਭਿਵਾਦਯਿਂ ਅਞ੍ਜਲਿਕਂ ਅਕਾਸਿ’’ਨ੍ਤਿ ਇਦਂ ਕਾਯਸਾਰਦਾਨਦਸ੍ਸਨਂ.

੬. ਤੇਨਾਤਿ ਤੇਨ ਯਥਾਵੁਤ੍ਤੇਨ ਪੁਞ੍ਞੇਨ ਹੇਤੁਭੂਤੇਨ. ਮੇਤਿ ਅਯਂ ਮੇ-ਸਦ੍ਦੋ ‘‘ਕਿਚ੍ਛੇਨ ਮੇ ਅਧਿਗਤਂ, ਹਲਂ ਦਾਨਿ ਪਕਾਸਿਤੁ’’ਨ੍ਤਿਆਦੀਸੁ (ਦੀ. ਨਿ. ੨.੬੫; ਮ. ਨਿ. ੧.੨੮੧; ਸਂ. ਨਿ. ੧.੧੭੨) ਕਰਣੇ ਆਗਤੋ, ਮਯਾਤਿ ਅਤ੍ਥੋ. ‘‘ਸਾਧੁ ਮੇ, ਭਨ੍ਤੇ, ਭਗਵਾ ਸਂਖਿਤ੍ਤੇਨ ਧਮ੍ਮਂ ਦੇਸੇਤੂ’’ਤਿਆਦੀਸੁ (ਸਂ. ਨਿ. ੩.੧੮੨; ਅ. ਨਿ. ੪.੨੫੭) ਸਮ੍ਪਦਾਨੇ, ਮਯ੍ਹਨ੍ਤਿ ਅਤ੍ਥੋ. ‘‘ਪੁਬ੍ਬੇਵ ਮੇ, ਭਿਕ੍ਖਵੇ, ਸਮ੍ਬੋਧਾ ਅਨਭਿਸਮ੍ਬੁਦ੍ਧਸ੍ਸ ਬੋਧਿਸਤ੍ਤਸ੍ਸੇਵ ਸਤੋ’’ਤਿਆਦੀਸੁ (ਮ. ਨਿ. ੧.੨੦੬; ਸਂ. ਨਿ. ੪.੧੪; ਅ. ਨਿ. ੩.੧੦੪) ਸਾਮਿਅਤ੍ਥੇ ਆਗਤੋ, ਇਧਾਪਿ ਸਾਮਿਅਤ੍ਥੇ ਏਵ, ਮਮਾਤਿ ਅਤ੍ਥੋ. ਸ੍ਵਾਯਂ ਮੇ-ਸਦ੍ਦੋ ਤੇਨ ਮੇ ਪੁਞ੍ਞੇਨਾਤਿ ਚ ਮੇ ਏਤਾਦਿਸੋਤਿ ਚ ਉਭਯਤ੍ਥ ਸਮ੍ਬਨ੍ਧਿਤਬ੍ਬੋ. ਸੇਸਂ ਵੁਤ੍ਤਨਯਮੇਵ.

ਏਵਂ ਤਾਯ ਦੇਵਤਾਯ ਪਞ੍ਹੇ ਬ੍ਯਾਕਤੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਸਪਰਿਵਾਰਾਯ ਤਸ੍ਸਾ ਦੇਵਤਾਯ ਸਾਤ੍ਥਿਕਾ ਅਹੋਸਿ. ਥੇਰੋ ਤਤੋ ਮਨੁਸ੍ਸਲੋਕਂ ਆਗਨ੍ਤ੍ਵਾ ਸਬ੍ਬਂ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ¶ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਗਾਥਾ ਏਵ ਪਨ ਸਙ੍ਗਹਂ ਆਰੁਲ਼੍ਹਾਤਿ.

ਪੀਠਂ ¶ ਤੇ ਵੇਲ਼ੁਰਿਯਮਯਨ੍ਤਿ ਦੁਤਿਯਪੀਠਵਿਮਾਨਂ. ਤਸ੍ਸ ਅਟ੍ਠੁਪ੍ਪਤ੍ਤਿ ਚ ਅਤ੍ਥਵਣ੍ਣਨਾ ਚ ਪਠਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਅਯਂ ਪਨ ਵਿਸੇਸੋ – ਸਾਵਤ੍ਥਿਵਾਸਿਨੀ ਕਿਰ ਏਕਾ ਇਤ੍ਥੀ ਅਤ੍ਤਨੋ ਗੇਹਂ ਪਿਣ੍ਡਾਯ ਪਵਿਟ੍ਠਂ ਏਕਂ ਥੇਰਂ ਪਸ੍ਸਿਤ੍ਵਾ ਪਸਨ੍ਨਚਿਤ੍ਤਾ ਤਸ੍ਸ ਆਸਨਂ ਦੇਨ੍ਤੀ ਅਤ੍ਤਨੋ ਪੀਠਂ ਉਪਰਿ ਨੀਲਵਤ੍ਥੇਨ ਅਤ੍ਥਰਿਤ੍ਵਾ ਅਦਾਸਿ. ਤੇਨ ਤਸ੍ਸਾ ਦੇਵਲੋਕੇ ਨਿਬ੍ਬਤ੍ਤਾਯ ਵੇਲ਼ੁਰਿਯਮਯਂ ਪਲ੍ਲਙ੍ਕਵਿਮਾਨਂ ਨਿਬ੍ਬਤ੍ਤਂ. ਤੇਨ ਵੁਤ੍ਤਂ –

‘‘ਪੀਠਂ ਤੇ ਵੇਲ਼ੁਰਿਯਮਯਂ ਉਲ਼ਾਰਂ, ਮਨੋਜਵਂ ਗਚ੍ਛਤਿ ਯੇਨਕਾਮਂ;

ਅਲਙ੍ਕਤੇ ਮਲ੍ਯਧਰੇ ਸੁਵਤ੍ਥੇ, ਓਭਾਸਸਿ ਵਿਜ੍ਜੁਰਿਵਬ੍ਭ ਕੂਟਂ.

‘‘ਕੇਨ ¶ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਅਬ੍ਭਾਗਤਾਨਾਸਨਕਂ ਅਦਾਸਿਂ;

ਅਭਿਵਾਦਯਿਂ ਅਞ੍ਜਲਿਕਂ ਅਕਾਸਿਂ, ਯਥਾਨੁਭਾਵਞ੍ਚ ਅਦਾਸਿ ਦਾਨਂ.

‘‘ਤੇਨ ¶ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ¶ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੮. ਤਤ੍ਥ ਵੇਲ਼ੁਰਿਯਮਯਨ੍ਤਿ ਵੇਲ਼ੁਰਿਯਮਣਿਮਯਂ. ਵੇਲ਼ੁਰਿਯਮਣਿ ਨਾਮ ਵਿਲ਼ੂਰਪਬ੍ਬਤਸ੍ਸ ਵਿਲ਼ੂਰਗਾਮਸ੍ਸ ਚ ਅਵਿਦੂਰੇ ਉਪ੍ਪਜ੍ਜਨਕਮਣਿ. ਤਸ੍ਸ ਕਿਰ ਵਿਲ਼ੂਰਗਾਮਟ੍ਠਾਨੇ ਆਕਰੋ, ਵਿਲ਼ੂਰਸ੍ਸ ਪਨ ਅਵਿਦੂਰੇ ਭਵਤ੍ਤਾ ਵੇਲ਼ੁਰਿਯਨ੍ਤੇਵ ਪਞ੍ਞਾਯਿਤ੍ਥ. ਤਂਸਦਿਸਵਣ੍ਣਨਿਭਤਾਯ ਦੇਵਲੋਕੇਪਿਸ੍ਸ ਤਥੇਵ ਨਾਮਂ ਜਾਤਂ ਯਥਾ ਤਂ ਮਨੁਸ੍ਸਲੋਕੇ ਲਦ੍ਧਨਾਮਵਸੇਨੇਵ ਦੇਵਲੋਕੇ ਦੇਵਪੁਤ੍ਤਾਨਂ. ਤਂ ਪਨ ਮਯੂਰਗੀਵਵਣ੍ਣਂ ਵਾ ਹੋਤਿ, ਵਾਯਸਪਤ੍ਤਵਣ੍ਣਂ ਵਾ, ਸਿਨਿਦ੍ਧਵੇਣੁਪਤ੍ਤਵਣ੍ਣਂ ਵਾ. ਇਧ ਪਨ ਮਯੂਰਗੀਵਵਣ੍ਣਂ ਵੇਦਿਤਬ੍ਬਂ. ਸੇਸਂ ਸਬ੍ਬਂ ਪਠਮਪੀਠਵਿਮਾਨੇ ਵੁਤ੍ਤਸਦਿਸਮੇਵਾਤਿ.

ਦੁਤਿਯਪੀਠਵਿਮਾਨਵਣ੍ਣਨਾ ਨਿਟ੍ਠਿਤਾ.

ਪੀਠਂ ਤੇ ਸੋਵਣ੍ਣਮਯਨ੍ਤਿ ਤਤਿਯਪੀਠਵਿਮਾਨਂ. ਤਸ੍ਸ ਵਤ੍ਥੁ ਰਾਜਗਹੇ ਸਮੁਟ੍ਠਿਤਂ. ਅਞ੍ਞਤਰੋ ਕਿਰ ¶ ਖੀਣਾਸਵਤ੍ਥੇਰੋ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਭਤ੍ਤਂ ਗਹੇਤ੍ਵਾ ਉਪਕਟ੍ਠੇ ਕਾਲੇ ਭਤ੍ਤਕਿਚ੍ਚਂ ਕਾਤੁਕਾਮੋ ਏਕਂ ਵਿਵਟਦ੍ਵਾਰਗੇਹਂ ਉਪਸਙ੍ਕਮਿ. ਤਸ੍ਮਿਂ ਪਨ ਗੇਹੇ ਗੇਹਸਾਮਿਨੀ ਇਤ੍ਥੀ ਸਦ੍ਧਾ ਪਸਨ੍ਨਾ ਥੇਰਸ੍ਸ ਆਕਾਰਂ ਸਲ੍ਲਕ੍ਖੇਤ੍ਵਾ ‘‘ਏਥ, ਭਨ੍ਤੇ, ਇਧ ਨਿਸੀਦਿਤ੍ਵਾ ਭਤ੍ਤਕਿਚ੍ਚਂ ਕਰੋਥਾ’’ਤਿ ਅਤ੍ਤਨੋ ਭਦ੍ਦਪੀਠਂ ਪਞ੍ਞਾਪੇਤ੍ਵਾ ਉਪਰਿ ਪੀਤਵਤ੍ਥਂ ਅਤ੍ਥਰਿਤ੍ਵਾ ਨਿਰਪੇਕ੍ਖਪਰਿਚ੍ਚਾਗਵਸੇਨ ਅਦਾਸਿ, ‘‘ਇਦਂ ਮੇ ਪੁਞ੍ਞਂ ਆਯਤਿਂ ਸੋਵਣ੍ਣਪੀਠਪਟਿਲਾਭਾਯ ਹੋਤੂ’’ਤਿ ਪਤ੍ਥਨਞ੍ਚ ਪਟ੍ਠਪੇਸਿ. ਅਥ ਥੇਰੇ ਤਤ੍ਥ ਨਿਸੀਦਿਤ੍ਵਾ ਭਤ੍ਤਕਿਚ੍ਚਂ ਕਤ੍ਵਾ ਪਤ੍ਤਂ ਧੋਵਿਤ੍ਵਾ ਉਟ੍ਠਾਯ ਗਚ੍ਛਨ੍ਤੇ ¶ ‘‘ਭਨ੍ਤੇ, ਇਦਮਾਸਨਂ ਤੁਮ੍ਹਾਕਂਯੇਵ ਪਰਿਚ੍ਚਤ੍ਤਂ, ਮਯ੍ਹਂ ਅਨੁਗ੍ਗਹਤ੍ਥਂ ਪਰਿਭੁਞ੍ਜਥਾ’’ਤਿ ਆਹ. ਥੇਰੋ ਤਸ੍ਸਾ ਅਨੁਕਮ੍ਪਾਯ ਤਂ ਪੀਠਂ ਸਮ੍ਪਟਿਚ੍ਛਿਤ੍ਵਾ ਸਙ੍ਘਸ੍ਸ ਦਾਪੇਸਿ. ਸਾ ਅਪਰੇਨ ਸਮਯੇਨ ਅਞ੍ਞਤਰੇਨ ਰੋਗੇਨ ਫੁਟ੍ਠਾ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ¶ ਨਿਬ੍ਬਤ੍ਤੀਤਿਆਦਿ ਸਬ੍ਬਂ ਪਠਮਵਿਮਾਨਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਤੇਨ ਵੁਤ੍ਤਂ –

‘‘ਪੀਠਂ ਤੇ ਸੋਵਣ੍ਣਮਯਂ ਉਲ਼ਾਰਂ, ਮਨੋਜਵਂ ਗਚ੍ਛਤਿ ਯੇਨਕਾਮਂ;

ਅਲਙ੍ਕਤੇ ਮਲ੍ਯਧਰੇ ਸੁਵਤ੍ਥੇ,ਓਭਾਸਸਿ ਵਿਜ੍ਜੁਰਿਵਬ੍ਭਕੂਟਂ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਪ੍ਪਸ੍ਸ ਕਮ੍ਮਸ੍ਸ ਫਲਂ ਮਮੇਦਂ, ਯੇਨਮ੍ਹਿ ਏਵਂ ਜਲਿਤਾਨੁਭਾਵਾ;

ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ.

‘‘ਅਦ੍ਦਸਂ ਵਿਰਜਂ ਭਿਕ੍ਖੁਂ, ਵਿਪ੍ਪਸਨ੍ਨਮਨਾਵਿਲਂ;

ਤਸ੍ਸ ਅਦਾਸਹਂ ਪੀਠਂ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਤੇਨ ¶ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤੀ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੯. ਯਞ੍ਚ ¶ ¶ ਪਨ ਪਞ੍ਚਮਗਾਥਾਯਂ ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇਤਿਆਦਿ, ਏਤ੍ਥ ਜਾਤਿ-ਸਦ੍ਦੋ ਅਤ੍ਥੇਵ ਸਙ੍ਖਤਲਕ੍ਖਣੇ ‘‘ਜਾਤਿ ਦ੍ਵੀਹਿ ਖਨ੍ਧੇਹਿ ਸਙ੍ਗਹਿਤਾ’’ਤਿਆਦੀਸੁ (ਧਾਤੁ. ੭੧). ਅਤ੍ਥਿ ਨਿਕਾਯੇ ‘‘ਨਿਗਣ੍ਠਾ ਨਾਮ ਸਮਣਜਾਤੀ’’ਤਿਆਦੀਸੁ (ਅ. ਨਿ. ੩.੭੧). ਅਤ੍ਥਿ ਪਟਿਸਨ੍ਧਿਯਂ ‘‘ਯਂ ਮਾਤੁਕੁਚ੍ਛਿਸ੍ਮਿਂ ਪਠਮਂ ਚਿਤ੍ਤਂ ਉਪ੍ਪਨ੍ਨਂ, ਪਠਮਂ ਵਿਞ੍ਞਾਣਂ ਪਾਤੁਭੂਤਂ, ਤਦੁਪਾਦਾਯ ਸਾਵਸ੍ਸ ਜਾਤੀ’’ਤਿਆਦੀਸੁ (ਮਹਾਵ. ੧੨੪). ਅਤ੍ਥਿ ਕੁਲੇ ‘‘ਅਕ੍ਖਿਤ੍ਤੋ ਅਨੁਪਕੁਟ੍ਠੋ ਜਾਤਿਵਾਦੇਨਾ’’ਤਿਆਦੀਸੁ (ਦੀ. ਨਿ. ੧.੩੦੩). ਅਤ੍ਥਿ ਪਸੁਤਿਯਂ ‘‘ਸਮ੍ਪਤਿਜਾਤੋ, ਆਨਨ੍ਦ, ਬੋਧਿਸਤ੍ਤੋ’’ਤਿਆਦੀਸੁ (ਦੀ. ਨਿ. ੨.੩੧; ਮ. ਨਿ. ੩.੨੦੭). ਅਤ੍ਥਿ ਭਵੇ ‘‘ਏਕਮ੍ਪਿ ਜਾਤਿਂ ਦ੍ਵੇਪਿ ਜਾਤਿਯੋ’’ਤਿਆਦੀਸੁ (ਦੀ. ਨਿ. ੧.੨੪੪; ਮ. ਨਿ. ੧.੫੩). ਇਧਾਪਿ ਭਵੇ ਏਵ ਦਟ੍ਠਬ੍ਬੋ. ਤਸ੍ਮਾ ਪੁਰਿਮਾਯ ਜਾਤਿਯਾ ਪੁਰਿਮਸ੍ਮਿਂ ਭਵੇ ਅਨਨ੍ਤਰਾਤੀਤੇ ਪੁਰਿਮੇ ਅਤ੍ਤਭਾਵੇਤਿ ਅਤ੍ਥੋ. ਭੁਮ੍ਮਤ੍ਥੇ ਹਿਦਂ ਕਰਣਵਚਨਂ. ਮਨੁਸ੍ਸਲੋਕੇਤਿ ਮਨੁਸ੍ਸਲੋਕਭਵੇ, ਰਾਜਗਹਂ ਸਨ੍ਧਾਯ ਵਦਤਿ. ਓਕਾਸਲੋਕੋ ਹਿ ਇਧ ਅਧਿਪ੍ਪੇਤੋ, ਸਤ੍ਤਲੋਕੋ ਪਨ ‘‘ਮਨੁਸ੍ਸੇਸੂ’’ਤਿ ਇਮਿਨਾ ਵੁਤ੍ਤੋਯੇਵ.

੨੦. ਅਦ੍ਦਸਨ੍ਤਿ ਅਦ੍ਦਕ੍ਖਿਂ. ਵਿਰਜਨ੍ਤਿ ਵਿਗਤਰਾਗਾਦਿਰਜਤ੍ਤਾ ਵਿਰਜਂ. ਭਿਕ੍ਖੁਨ੍ਤਿ ਭਿਨ੍ਨਕਿਲੇਸਤ੍ਤਾ ਭਿਕ੍ਖੁਂ, ਸਬ੍ਬਸੋ ਕਿਲੇਸਕਾਲੁਸ੍ਸਿਯਾਭਾਵੇਨ ਵਿਪ੍ਪਸਨ੍ਨਚਿਤ੍ਤਤਾਯ ਵਿਪ੍ਪਸਨ੍ਨਂ, ਅਨਾਵਿਲਸਙ੍ਕਪ੍ਪਤਾਯ ਅਨਾਵਿਲਂ. ਪੁਰਿਮਂ ਪੁਰਿਮਞ੍ਚੇਤ੍ਥ ਪਦਂ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਕਾਰਣਵਚਨਂ, ਵਿਗਤਰਾਗਾਦਿਰਜਤ੍ਤਾ ਭਿਨ੍ਨਕਿਲੇਸਤਾਯ ਭਿਕ੍ਖੁਂ, ਭਿਨ੍ਨਕਿਲੇਸਤ੍ਤਾ ਕਿਲੇਸਕਾਲੁਸ੍ਸਿਯਾਭਾਵੇਨ ਵਿਪ੍ਪਸਨ੍ਨਂ, ਵਿਪ੍ਪਸਨ੍ਨਮਨਤ੍ਤਾ ਅਨਾਵਿਲਨ੍ਤਿ. ਪਚ੍ਛਿਮਂ ਪਚ੍ਛਿਮਂ ਵਾ ਪਦਂ ਪੁਰਿਮਸ੍ਸ ਪੁਰਿਮਸ੍ਸ ਕਾਰਣਵਚਨਂ, ਵਿਰਜਂ ਭਿਕ੍ਖੁਗੁਣਯੋਗਤੋ. ਭਿਨ੍ਨਕਿਲੇਸੋ ਹਿ ਭਿਕ੍ਖੁ. ਭਿਕ੍ਖੁਂ ਵਿਪ੍ਪਸਨ੍ਨਭਾਵਤੋ. ਕਿਲੇਸਕਾਲੁਸ੍ਸਿਯਾਭਾਵੇਨ ਵਿਪ੍ਪਸਨ੍ਨਮਾਨਸੋ ਹਿ ਭਿਕ੍ਖੁ. ਵਿਪ੍ਪਸਨ੍ਨਂ ਅਨਾਵਿਲਸਙ੍ਕਪ੍ਪਭਾਵਤੋਤਿ ¶ . ਰਾਗਰਜਾਭਾਵੇਨ ਵਾ ‘‘ਵਿਰਜ’’ਨ੍ਤਿ ਵੁਤ੍ਤਂ, ਦੋਸਕਾਲੁਸ੍ਸਿਯਾਭਾਵੇਨ ‘‘ਵਿਪ੍ਪਸਨ੍ਨ’’ਨ੍ਤਿ, ਮੋਹਬ੍ਯਾਕੁਲਾਭਾਵੇਨ ‘‘ਅਨਾਵਿਲ’’ਨ੍ਤਿ. ਏਵਂਭੂਤੋ ਪਰਮਤ੍ਥਤੋ ਭਿਕ੍ਖੁ ਨਾਮ ਹੋਤੀਤਿ ‘‘ਭਿਕ੍ਖੁ’’ਨ੍ਤਿ ਵੁਤ੍ਤਂ. ਅਦਾਸਹਨ੍ਤਿ ਅਦਾਸਿਂ ਅਹਂ. ਪੀਠਨ੍ਤਿ ਤਦਾ ਮਮ ਸਨ੍ਤਿਕੇ ਵਿਜ੍ਜਮਾਨਂ ਭਦ੍ਦਪੀਠਂ. ਪਸਨ੍ਨਾਤਿ ਕਮ੍ਮਫਲਸਦ੍ਧਾਯ ਰਤਨਤ੍ਤਯਸਦ੍ਧਾਯ ਚ ਪਸਨ੍ਨਚਿਤ੍ਤਾ. ਸੇਹਿ ਪਾਣਿਭੀਤਿ ਅਞ੍ਞਂ ਅਨਾਣਾਪੇਤ੍ਵਾ ਅਤ੍ਤਨੋ ਹਤ੍ਥੇਹਿ ਉਪਨੀਯ ਪੀਠਂ ਪਞ੍ਞਾਪੇਤ੍ਵਾ ਅਦਾਸਿਨ੍ਤਿ ਅਤ੍ਥੋ.

ਏਤ੍ਥ ¶ ਚ ‘‘ਵਿਰਜਂ ਭਿਕ੍ਖੁਂ ਵਿਪ੍ਪਸਨ੍ਨਮਨਾਵਿਲ’’ਨ੍ਤਿ ਇਮਿਨਾ ਖੇਤ੍ਤਸਮ੍ਪਤ੍ਤਿਂ ਦਸ੍ਸੇਤਿ, ‘‘ਪਸਨ੍ਨਾ’’ਤਿ ਇਮਿਨਾ ਚਿਤ੍ਤਸਮ੍ਪਤ੍ਤਿਂ, ‘‘ਸੇਹਿ ਪਾਣਿਭੀ’’ਤਿ ਇਮਿਨਾ ਪਯੋਗਸਮ੍ਪਤ੍ਤਿਂ. ਤਥਾ ¶ ‘‘ਪਸਨ੍ਨਾ’’ਤਿ ਇਮਿਨਾ ਸਕ੍ਕਚ੍ਚਦਾਨਂ ਅਨੁਪਹਚ੍ਚਦਾਨਨ੍ਤਿ ਚ ਇਮੇ ਦ੍ਵੇ ਦਾਨਗੁਣਾ ਦਸ੍ਸਿਤਾ, ‘‘ਸੇਹਿ ਪਾਣਿਭੀ’’ਤਿ ਇਮਿਨਾ ਸਹਤ੍ਥੇਨ ਦਾਨਂ ਅਨੁਪਵਿਦ੍ਧਦਾਨਨ੍ਤਿ ਇਮੇ ਦ੍ਵੇ ਦਾਨਗੁਣਾ ਦਸ੍ਸਿਤਾ, ਪੀਤਵਤ੍ਥਸ੍ਸ ਅਤ੍ਥਰਣੇਨ ਨਿਸੀਦਨਕਾਲਞ੍ਞੁਤਾਯ ਚਿਤ੍ਤਿਂ ਕਤ੍ਵਾ ਦਾਨਂ ਕਾਲੇਨ ਦਾਨਨ੍ਤਿ ਇਮੇ ਦ੍ਵੇ ਦਾਨਗੁਣਾ ਦਸ੍ਸਿਤਾਤਿ ਵੇਦਿਤਬ੍ਬਾ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਤਤਿਯਪੀਠਵਿਮਾਨਵਣ੍ਣਨਾ ਨਿਟ੍ਠਿਤਾ.

ਪੀਠਂ ਤੇ ਵੇਲ਼ੁਰਿਯਮਯਨ੍ਤਿ ਚਤੁਤ੍ਥਪੀਠਵਿਮਾਨਂ. ਇਮਸ੍ਸਾਪਿ ਵਤ੍ਥੁ ਰਾਜਗਹੇ ਸਮੁਟ੍ਠਿਤਂ, ਤਂ ਦੁਤਿਯਵਿਮਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਨੀਲਵਤ੍ਥੇਨ ਹਿ ਅਤ੍ਥਰਿਤ੍ਵਾ ਪੀਠਸ੍ਸ ਦਿਨ੍ਨਤ੍ਤਾ ਇਮਿਸ੍ਸਾਪਿ ਵਿਮਾਨਂ ਵੇਲ਼ੁਰਿਯਮਯਂ ਨਿਬ੍ਬਤ੍ਤਂ. ਸੇਸਂ ਪਠਮਵਿਮਾਨੇ ਵੁਤ੍ਤਸਦਿਸਂ. ਤੇਨ ਵੁਤ੍ਤਂ –

‘‘ਪੀਠਂ ਤੇ ਵੇਲ਼ੁਰਿਯਮਯਂ ਉਲ਼ਾਰਂ, ਮਨੋਜਵਂ ਗਚ੍ਛਤਿ ਯੇਨਕਾਮਂ;

ਅਲਙ੍ਕਤੇ ਮਲ੍ਯਧਰੇ ਸੁਵਤ੍ਥੇ, ਓਭਾਸਸਿ ਵਿਜ੍ਜੁਰਿਵਬ੍ਭਕੂਟਂ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ¶ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਪ੍ਪਸ੍ਸ ¶ ਕਮ੍ਮਸ੍ਸ ਫਲਂ ਮਮੇਦਂ, ਯੇਨਮ੍ਹਿ ਏਵਂ ਜਲਿਤਾਨੁਭਾਵਾ;

ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ.

‘‘ਅਦ੍ਦਸਂ ¶ ਵਿਰਜਂ ਭਿਕ੍ਖੁਂ, ਵਿਪ੍ਪਸਨ੍ਨਮਨਾਵਿਲਂ;

ਤਸ੍ਸ ਅਦਾਸਹਂ ਪੀਠਂ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਏਤ੍ਥਾਪਿ ਹਿ ਨੀਲਵਤ੍ਥੇਨ ਅਤ੍ਥਰਿਤ੍ਵਾ ਪੀਠਸ੍ਸ ਦਿਨ੍ਨਤ੍ਤਾ ਇਮਿਸ੍ਸਾਪਿ ਵਿਮਾਨਂ ਵੇਲ਼ੁਰਿਯਮਯਂ ਨਿਬ੍ਬਤ੍ਤਂ. ਤੇਨੇਵੇਤ੍ਥ ‘‘ਪੀਠਂ ਤੇ ਵੇਲ਼ੁਰਿਯਮਯ’’ਨ੍ਤਿ ਆਦਿਤੋ ਆਗਤਂ. ਸੇਸਂ ਤਤਿਯਸਦਿਸਮੇਵਾਤਿ ਤਤ੍ਥ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ.

ਚਤੁਤ੍ਥਪੀਠਵਿਮਾਨਵਣ੍ਣਨਾ ਨਿਟ੍ਠਿਤਾ.

ਕੁਞ੍ਜਰੋ ਤੇ ਵਰਾਰੋਹੋਤਿ ਕੁਞ੍ਜਰਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਅਥੇਕਦਿਵਸਂ ਰਾਜਗਹਨਗਰੇ ਨਕ੍ਖਤ੍ਤਂ ਘੋਸਿਤਂ. ਨਾਗਰਾ ਵੀਥਿਯੋ ਸੋਧੇਤ੍ਵਾ ਵਾਲੁਕਂ ਓਕਿਰਿਤ੍ਵਾ ਲਾਜਪਞ੍ਚਮਕਾਨਿ ਪੁਪ੍ਫਾਨਿ ਵਿਪ੍ਪਕਿਰਿਂਸੁ, ਗੇਹਦ੍ਵਾਰੇ ਗੇਹਦ੍ਵਾਰੇ ਕਦਲਿਯੋ ਚ ਪੁਣ੍ਣਘਟੇ ਚ ਠਪੇਸੁਂ, ਯਥਾਵਿਭਵਂ ਨਾਨਾਵਿਰਾਗਵਣ੍ਣਵਿਚਿਤ੍ਤਾ ਧਜਪਟਾਕਾਦਯੋ ¶ ਉਸ੍ਸਾਪੇਸੁਂ, ਸਬ੍ਬੋ ਜਨੋ ਅਤ੍ਤਨੋ ਅਤ੍ਤਨੋ ਵਿਭਵਾਨੁਰੂਪਂ ਸੁਮਣ੍ਡਿਤਪਸਾਧਿਤੋ ਨਕ੍ਖਤ੍ਤਕੀਲ਼ਂ ਕੀਲ਼ਿ, ਸਕਲਨਗਰਂ ਦੇਵਨਗਰਂ ਵਿਯ ਅਲਙ੍ਕਤਪਟਿਯਤ੍ਤਂ ਅਹੋਸਿ. ਅਥ ਬਿਮ੍ਬਿਸਾਰਮਹਾਰਾਜਾ ਪੁਬ੍ਬਚਾਰਿਤ੍ਤਵਸੇਨ ¶ ਮਹਾਜਨਸ੍ਸ ਚਿਤ੍ਤਾਨੁਰਕ੍ਖਣਤ੍ਥਞ੍ਚ ਅਤ੍ਤਨੋ ਰਾਜਭਵਨਤੋ ਨਿਕ੍ਖਮਿਤ੍ਵਾ ਮਹਨ੍ਤੇਨ ਪਰਿਵਾਰੇਨ ਮਹਤਾ ਰਾਜਾਨੁਭਾਵੇਨ ਉਲ਼ਾਰੇਨ ਸਿਰਿਸੋਭਗ੍ਗੇਨ ਨਗਰਂ ਪਦਕ੍ਖਿਣਂ ਕਰੋਤਿ.

ਤੇਨ ਚ ਸਮਯੇਨ ਰਾਜਗਹਵਾਸਿਨੀ ਏਕਾ ਕੁਲਧੀਤਾ ਰਞ੍ਞੋ ਤਂ ਵਿਭਵਸਮ੍ਪਤ੍ਤਿਂ ਸਿਰਿਸੋਭਗ੍ਗਂ ਰਾਜਾਨੁਭਾਵਞ੍ਚ ਪਸ੍ਸਿਤ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ‘‘ਅਯਂ ਦੇਵਿਦ੍ਧਿਸਦਿਸਾ ਵਿਭਵਸਮ੍ਪਤ੍ਤਿ ਕੀਦਿਸੇਨ ਨੁ ਖੋ ਕਮ੍ਮੁਨਾ ਲਬ੍ਭਤੀ’’ਤਿ ਪਣ੍ਡਿਤਸਮ੍ਮਤੇ ਪੁਚ੍ਛਿ. ਤੇ ਤਸ੍ਸਾ ਕਥੇਸੁਂ ‘‘ਭਦ੍ਦੇ, ਪੁਞ੍ਞਕਮ੍ਮਂ ਨਾਮ ਚਿਨ੍ਤਾਮਣਿਸਦਿਸਂ ਕਪ੍ਪਰੁਕ੍ਖਸਦਿਸਂ, ਖੇਤ੍ਤਸਮ੍ਪਤ੍ਤਿਯਾ ਚਿਤ੍ਤਸਮ੍ਪਤ੍ਤਿਯਾ ਚ ਸਤਿ ਯਂ ¶ ਯਂ ਪਤ੍ਥੇਤ੍ਵਾ ਕਰੋਤਿ, ਤਂ ਤਂ ਨਿਪ੍ਫਾਦੇਤਿਯੇਵ. ਅਪਿਚ ਆਸਨਦਾਨੇਨ ਉਚ੍ਚਾਕੁਲੀਨਤਾ ਹੋਤਿ, ਅਨ੍ਨਦਾਨੇਨ ਬਲਸਮ੍ਪਤ੍ਤਿਪਟਿਲਾਭੋ, ਵਤ੍ਥਦਾਨੇਨ ਵਣ੍ਣਸਮ੍ਪਤ੍ਤਿਪਟਿਲਾਭੋ, ਯਾਨਦਾਨੇਨ ਸੁਖਵਿਸੇਸਪਟਿਲਾਭੋ, ਦੀਪਦਾਨੇਨ ਚਕ੍ਖੁਸਮ੍ਪਤ੍ਤਿਪਟਿਲਾਭੋ, ਆਵਾਸਦਾਨੇਨ ਸਬ੍ਬਸਮ੍ਪਤ੍ਤਿਪਟਿਲਾਭੋ ਹੋਤੀ’’ਤਿ. ਸਾ ਤਂ ਸੁਤ੍ਵਾ ‘‘ਦੇਵਸਮ੍ਪਤ੍ਤਿ ਇਤੋ ਉਲ਼ਾਰਾ ਹੋਤਿ ਮਞ੍ਞੇ’’ਤਿ ਤਤ੍ਥ ਚਿਤ੍ਤਂ ਠਪੇਤ੍ਵਾ ਪੁਞ੍ਞਕਿਰਿਯਾਯ ਅਤਿਵਿਯ ਉਸ੍ਸਾਹਜਾਤਾ ਅਹੋਸਿ.

ਮਾਤਾਪਿਤਰੋ ਚਸ੍ਸਾ ਅਹਤਂ ਵਤ੍ਥਯੁਗਂ ਨਵਪੀਠਂ ਏਕਂ ਪਦੁਮਕਲਾਪਂ ਸਪ੍ਪਿਮਧੁਸਕ੍ਖਰਾ ਤਣ੍ਡੁਲਖੀਰਾਨਿ ਚ ਪਰਿਭੋਗਤ੍ਥਾਯ ਪੇਸੇਸੁਂ. ਸਾ ਤਾਨਿ ਦਿਸ੍ਵਾ ‘‘ਅਹਞ੍ਚ ਦਾਨਂ ਦਾਤੁਕਾਮਾ, ਅਯਞ੍ਚ ਮੇ ਦੇਯ੍ਯਧਮ੍ਮੋ ਲਦ੍ਧੋ’’ਤਿ ਤੁਟ੍ਠਮਾਨਸਾ ਦੁਤਿਯਦਿਵਸੇ ਦਾਨਂ ਸਜ੍ਜੇਨ੍ਤੀ ਅਪ੍ਪੋਦਕਮਧੁਪਾਯਾਸਂ ਸਮ੍ਪਾਦੇਤ੍ਵਾ, ਤਸ੍ਸ ਪਰਿਵਾਰਭਾਵੇਨ ਅਞ੍ਞਮ੍ਪਿ ਬਹੁਂ ਖਾਦਨੀਯਭੋਜਨੀਯਂ ਪਟਿਯਾਦੇਤ੍ਵਾ ਦਾਨਗ੍ਗੇ ਗਨ੍ਧਪਰਿਭਣ੍ਡਂ ਕਤ੍ਵਾ ਵਿਕਸਿਤਪਦੁਮਪਤ੍ਤਕਿਞ੍ਜਕ੍ਖਕੇਸਰੋਪਸੋਭਿਤੇਸੁ ਪਦੁਮੇਸੁ ਆਸਨਂ ਪਞ੍ਞਾਪੇਤ੍ਵਾ, ਅਹਤੇਨ ਸੇਤਵਤ੍ਥੇਨ ਅਤ੍ਥਰਿਤ੍ਵਾ ਆਸਨਸ੍ਸ ਚਤੁਨ੍ਨਂ ਪਾਦਾਨਂ ਉਪਰਿ ਚਤ੍ਤਾਰਿ ਪਦੁਮਾਨਿ ਮਾਲਾਗੁਲ਼ਞ੍ਚ ਠਪੇਤ੍ਵਾ, ਆਸਨਸ੍ਸ ਉਪਰਿ ਵਿਤਾਨਂ ਬਨ੍ਧਿਤ੍ਵਾ ਮਾਲਾਦਾਮਓਲਮ੍ਬਕਦਾਮਾਨਿ ਓਲਮ੍ਬਿਤ੍ਵਾ, ਆਸਨਸ੍ਸ ਸਮਨ੍ਤਤੋ ਭੂਮਿਂ ਸਕੇਸਰੇਹਿ ਪਦੁਮਪਤ੍ਤੇਹਿ ¶ ਸਬ੍ਬਸਨ੍ਥਰਂ ¶ ਸਨ੍ਥਰਿਤ੍ਵਾ ‘‘ਦਕ੍ਖਿਣੇਯ੍ਯੇ ਆਗਤੇ ਪੂਜੇਸ੍ਸਾਮੀ’’ਤਿ ਪੁਪ੍ਫਪੂਰਿਤਂ ਚਙ੍ਕੋਟਕਂ ਏਕਮਨ੍ਤੇ ਠਪੇਸਿ.

ਅਥੇਵਂ ਕਤਦਾਨੂਪਕਰਣਸਂਵਿਧਾਨਾ ਸੀਸਂਨ੍ਹਾਤਾ ਸੁਦ੍ਧਵਤ੍ਥਨਿਵਤ੍ਥਾ ਸੁਦ੍ਧੁਤ੍ਤਰਾਸਙ੍ਗਾ ਵੇਲਂ ਸਲ੍ਲਕ੍ਖੇਤ੍ਵਾ ਏਕਂ ਦਾਸਿਂ ਆਣਾਪੇਸਿ ‘‘ਗਚ੍ਛ ਜੇ, ਅਮ੍ਹਾਕਂ ਤਾਦਿਸਂ ਦਕ੍ਖਿਣੇਯ੍ਯਂ ਪਰਿਯੇਸਾਹੀ’’ਤਿ. ਤੇਨ ਚ ਸਮਯੇਨ ਆਯਸ੍ਮਾ ਸਾਰਿਪੁਤ੍ਤੋ ਸਹਸ੍ਸਥਵਿਕਂ ਨਿਕ੍ਖਿਪਨ੍ਤੋ ਵਿਯ ਰਾਜਗਹੇ ਪਿਣ੍ਡਾਯ ਚਰਨ੍ਤੋ ਅਨ੍ਤਰਵੀਥਿਂ ਪਟਿਪਨ੍ਨੋ ਹੋਤਿ. ਅਥ ਸਾ ਦਾਸੀ ਥੇਰਂ ਵਨ੍ਦਿਤ੍ਵਾ ਆਹ ‘‘ਭਨ੍ਤੇ, ਤੁਮ੍ਹਾਕਂ ਪਤ੍ਤਂ ਮੇ ਦੇਥਾ’’ਤਿ. ‘‘ਏਕਿਸ੍ਸਾ ਉਪਾਸਿਕਾਯ ਅਨੁਗ੍ਗਹਤ੍ਥਂ ਇਤੋ ਏਥਾ’’ਤਿ ਚ ਆਹ. ਥੇਰੋ ਤਸ੍ਸਾ ਪਤ੍ਤਂ ਅਦਾਸਿ. ਸਾ ਥੇਰਂ ਗੇਹਂ ਪਵੇਸੇਸਿ. ਅਥ ਸਾ ਇਤ੍ਥੀ ਥੇਰਸ੍ਸ ਪਚ੍ਚੁਗ੍ਗਮਨਂ ਕਤ੍ਵਾ ਆਸਨਂ ਦਸ੍ਸੇਤ੍ਵਾ ‘‘ਨਿਸੀਦਥ, ਭਨ੍ਤੇ, ਇਦਮਾਸਨਂ ਪਞ੍ਞਤ੍ਤ’’ਨ੍ਤਿ ਵਤ੍ਵਾ ਥੇਰੇ ਤਤ੍ਥ ਨਿਸਿਨ੍ਨੇ ਸਕੇਸਰੇਹਿ ਪਦੁਮਪਤ੍ਤੇਹਿ ਥੇਰਂ ਪੂਜਯਮਾਨਾ ਆਸਨਸ੍ਸ ਸਮਨ੍ਤਤੋ ਓਕਿਰਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਸਪ੍ਪਿਮਧੁਸਕ੍ਖਰਾਸਮ੍ਮਿਸ੍ਸੇਨ ਅਪ੍ਪੋਦਕਮਧੁਪਾਯਾਸੇਨ ਪਰਿਵਿਸਿ. ਪਰਿਵਿਸਨ੍ਤੀ ਚ ‘‘ਇਮਸ੍ਸ ਮੇ ਪੁਞ੍ਞਸ੍ਸਾਨੁਭਾਵੇਨ ਦਿਬ੍ਬਗਜਕੂਟਾਗਾਰਪਲ੍ਲਙ੍ਕਸੋਭਿਤਾ ਦਿਬ੍ਬਸਮ੍ਪਤ੍ਤਿਯੋ ਹੋਨ੍ਤੁ, ਸਬ੍ਬਾਸੁ ਪਵਤ੍ਤੀਸੁ ਪਦੁਮਾ ਨਾਮ ਮਾ ਵਿਗਤਾ ਹੋਨ੍ਤੂ’’ਤਿ ਪਤ੍ਥਨਂ ਅਕਾਸਿ. ਪੁਨ ਥੇਰੇ ਕਤਭਤ੍ਤਕਿਚ੍ਚੇ ਪਤ੍ਤਂ ਧੋਵਿਤ੍ਵਾ ਸਪ੍ਪਿਮਧੁਸਕ੍ਖਰਾਹਿ ਪੂਰੇਤ੍ਵਾ ਪਲ੍ਲਙ੍ਕੇ ਅਤ੍ਥਤਂ ਸਾਟਕਂ ਚੁਮ੍ਬਟਕਂ ਕਤ੍ਵਾ ਥੇਰਸ੍ਸ ਹਤ੍ਥੇ ਠਪੇਤ੍ਵਾ ਥੇਰੇ ਚ ਅਨੁਮੋਦਨਂ ਕਤ੍ਵਾ ਪਕ੍ਕਮਨ੍ਤੇ ਦ੍ਵੇ ਪੁਰਿਸੇ ਆਣਾਪੇਸਿ ‘‘ਥੇਰਸ੍ਸ ਹਤ੍ਥੇ ਪਤ੍ਤਂ ਇਮਞ੍ਚ ਪਲ੍ਲਙ੍ਕਂ ਵਿਹਾਰਂ ਨੇਤ੍ਵਾ ਥੇਰਸ੍ਸ ਨਿਯ੍ਯਾਤੇਤ੍ਵਾ ਆਗਚ੍ਛਥਾ’’ਤਿ. ਤੇ ਤਥਾ ਅਕਂਸੁ.

ਸਾ ¶ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਯੋਜਨਸਤੁਬ੍ਬੇਧੇ ਕਨਕਵਿਮਾਨੇ ਨਿਬ੍ਬਤ੍ਤਿ ਅਚ੍ਛਰਾਸਹਸ੍ਸਪਰਿਵਾਰਾ. ਪਤ੍ਥਨਾਵਸੇਨ ਚਸ੍ਸਾ ਪਞ੍ਚਯੋਜਨੁਬ੍ਬੇਧੋ ਪਦੁਮਮਾਲਾਲਙ੍ਕਤੋ ¶ ਸਮਨ੍ਤਤੋ ਪਦੁਮਪਤ੍ਤਕਿਞ੍ਜਕ੍ਖਕੇਸਰੋਪਸੋਭਿਤੋ ਮਨੁਞ੍ਞਦਸ੍ਸਨੋ ਸੁਖਸਮ੍ਫਸ੍ਸੋ ਵਿਵਿਧਰਤਨਰਂਸਿਜਾਲਸਮੁਜ੍ਜਲਹੇਮਾਭਰਣਵਿਭੂਸਿਤੋ ਗਜਵਰੋ ਨਿਬ੍ਬਤ੍ਤਿ. ਤਸ੍ਸੂਪਰਿ ਯਥਾਵੁਤ੍ਤਸੋਭਾਤਿਸਯਯੁਤ੍ਤੋ ਯੋਜਨਿਕੋ ਕਨਕਪਲ੍ਲਙ੍ਕੋ ਨਿਬ੍ਬਤ੍ਤਿ. ਸਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਅਨ੍ਤਰਨ੍ਤਰਾ ਤਂ ਕੁਞ੍ਜਰਵਿਮਾਨਸ੍ਸ ਉਪਰਿ ਰਤਨਵਿਚਿਤ੍ਤਂ ਪਲ੍ਲਙ੍ਕਂ ਅਭਿਰੁਯ੍ਹ ਮਹਤਾ ਦੇਵਤਾਨੁਭਾਵੇਨ ਨਨ੍ਦਨਵਨਂ ਗਚ੍ਛਤਿ. ਅਥੇਕਸ੍ਮਿਂ ਉਸ੍ਸਵਦਿਵਸੇ ਦੇਵਤਾਸੁ ਯਥਾਸਕਂ ਦਿਬ੍ਬਾਨੁਭਾਵੇਨ ਉਯ੍ਯਾਨਕੀਲ਼ਨਤ੍ਥਂ ¶ ਨਨ੍ਦਨਵਨਂ ਗਚ੍ਛਨ੍ਤੀਸੂਤਿਆਦਿਨਾ ਸਬ੍ਬਂ ਪਠਮਪੀਠਵਿਮਾਨਵਣ੍ਣਨਾਯਂ ਆਗਤਸਦਿਸਂ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧ ਪਨ ਥੇਰੋ –

‘‘ਕੁਞ੍ਜਰੋ ਤੇ ਵਰਾਰੋਹੋ, ਨਾਨਾਰਤਨਕਪ੍ਪਨੋ;

ਰੁਚਿਰੋ ਥਾਮਵਾ ਜਵਸਮ੍ਪਨ੍ਨੋ, ਆਕਾਸਮ੍ਹਿ ਸਮੀਹਤਿ.

‘‘ਪਦੁਮਿ ਪਦ੍ਮਪਤ੍ਤਕ੍ਖਿ, ਪਦ੍ਮੁਪ੍ਪਲਜੁਤਿਨ੍ਧਰੋ;

ਪਦ੍ਮਚੁਣ੍ਣਾਭਿਕਿਣ੍ਣਙ੍ਗੋ, ਸੋਣ੍ਣਪੋਕ੍ਖਰਮਾਲਧਾ.

‘‘ਪਦੁਮਾਨੁਸਟਂ ਮਗ੍ਗਂ, ਪਦ੍ਮਪਤ੍ਤਵਿਭੂਸਿਤਂ;

ਠਿਤਂ ਵਗ੍ਗੁ ਮਨੁਗ੍ਘਾਤੀ, ਮਿਤਂ ਗਚ੍ਛਤਿ ਵਾਰਣੋ.

‘‘ਤਸ੍ਸ ਪਕ੍ਕਮਮਾਨਸ੍ਸ, ਸੋਣ੍ਣਕਂਸਾ ਰਤਿਸ੍ਸਰਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

‘‘ਤਸ੍ਸ ਨਾਗਸ੍ਸ ਖਨ੍ਧਮ੍ਹਿ, ਸੁਚਿਵਤ੍ਥਾ ਅਲਙ੍ਕਤਾ;

ਮਹਨ੍ਤਂ ਅਚ੍ਛਰਾਸਙ੍ਘਂ, ਵਣ੍ਣੇਨ ਅਤਿਰੋਚਸਿ.

‘‘ਦਾਨਸ੍ਸ ¶ ਤੇ ਇਦਂ ਫਲਂ, ਅਥੋ ਸੀਲਸ੍ਸ ਵਾ ਪਨ;

ਅਥੋ ਅਞ੍ਜਲਿਕਮ੍ਮਸ੍ਸ, ਤਂ ਮੇ ਅਕ੍ਖਾਹਿ ਪੁਚ੍ਛਿਤਾ’’ਤਿ. – ਆਹ;

੩੧. ਤਤ੍ਥ ਕੁਞ੍ਜਰੋ ਤੇ ਵਰਾਰੋਹੋਤਿ ਕੁਞ੍ਜੇ ਗਿਰਿਤਟੇ ਰਮਤਿ ਅਭਿਰਮਤਿ, ਤਤ੍ਥ ਵਾ ਰਵਤਿ ਕੋਞ੍ਚਨਾਦਂ ਨਦਨ੍ਤੋ ਵਿਚਰਤਿ. ਕੁਂ ਵਾ ਪਥਵਿਂ ਤਦਭਿਘਾਤੇਨ ਜਰਯਤੀਤਿ ਕੁਞ੍ਜਰੋ, ਗਿਰਿਚਰਾਦਿਭੇਦੋ ਮਨੁਸ੍ਸਲੋਕੇ ਹਤ੍ਥੀ, ਅਯਂ ਪਨ ਕੀਲ਼ਨਕਾਲੇ ਕੁਞ੍ਜਰਸਦਿਸਤਾਯ ਏਵਂ ਵੁਤ੍ਤੋ. ਆਰੁਯ੍ਹਤੀਤਿ ¶ ਆਰੋਹੋ, ਆਰੋਹਨੀਯੋਤਿ ਅਤ੍ਥੋ. ਵਰੋ ਅਗ੍ਗੋ ਸੇਟ੍ਠੋ ਆਰੋਹੋਤਿ ¶ ਵਰਾਰੋਹੋ, ਉਤ੍ਤਮਯਾਨਨ੍ਤਿ ਵੁਤ੍ਤਂ ਹੋਤਿ. ਨਾਨਾਰਤਨਕਪ੍ਪਨੋਤਿ ਨਾਨਾਵਿਧਾਨਿ ਰਤਨਾਨਿ ਏਤੇਸਨ੍ਤਿ ਨਾਨਾਰਤਨਾ, ਕੁਮ੍ਭਾਲਙ੍ਕਾਰਾਦਿਹਤ੍ਥਾਲਙ੍ਕਾਰਾ. ਤੇਹਿ ਵਿਹਿਤੋ ਕਪ੍ਪਨ੍ਨੋ ਸਨ੍ਨਾਹੋ ਯਸ੍ਸ ਸੋ ਨਾਨਾਰਤਨਕਪ੍ਪਨੋ. ਰੁਚਿਂ ਅਭਿਰਤਿਂ ਦੇਤੀਤਿ ਰੁਚਿਰੋ, ਮਨੁਞ੍ਞੋਤਿ ਅਤ੍ਥੋ. ਥਾਮਵਾਤਿ ਥਿਰੋ, ਬਲਵਾਤਿ ਅਤ੍ਥੋ. ਜਵਸਮ੍ਪਨ੍ਨੋਤਿ ਸਮ੍ਪਨ੍ਨਜਵੋ, ਸੀਘਜਵੋਤਿ ਵੁਤ੍ਤਂ ਹੋਤਿ. ਆਕਾਸਮ੍ਹਿ ਸਮੀਹਤੀਤਿ ਆਕਾਸੇ ਅਨ੍ਤਲਿਕ੍ਖੇ ਸਮ੍ਮਾ ਈਹਤਿ, ਆਰੁਲ਼੍ਹਾਨਂ ਖੋਭਂ ਅਕਰੋਨ੍ਤੋ ਚਰਤਿ ਗਚ੍ਛਤੀਤਿ ਅਤ੍ਥੋ.

੩੨. ਪਦੁਮੀਤਿ ਪਦੁਮਸਮਾਨਵਣ੍ਣਤਾਯ ‘‘ਪਦੁਮ’’ਨ੍ਤਿ ਲਦ੍ਧਨਾਮੇਨ ਕੁਮ੍ਭਵਣ੍ਣੇਨ ਸਮਨ੍ਨਾਗਤਤ੍ਤਾ ਪਦੁਮੀ. ਪਦ੍ਮਪਤ੍ਤਕ੍ਖੀਤਿ ਕਮਲਦਲਸਦਿਸਨਯਨੇ, ਆਲਪਨਮੇਤਂ ਤਸ੍ਸਾ ਦੇਵਤਾਯ. ਪਦ੍ਮੁਪ੍ਪਲਜੁਤਿਨ੍ਧਰੋਤਿ ਦਿਬ੍ਬਪਦੁਮੁਪ੍ਪਲਮਾਲਾਲਙ੍ਕਤਸਰੀਰਤਾਯ ਤਹਂ ਤਹਂ ਵਿਪ੍ਫੁਰਨ੍ਤਂ ਵਿਜ੍ਜੋਤਮਾਨਂ ਪਦੁਮੁਪ੍ਪਲਜੁਤਿਂ ਧਾਰੇਤੀਤਿ ਪਦੁਮੁਪ੍ਪਲਜੁਤਿਨ੍ਧਰੋ. ਪਦ੍ਮਚੁਣ੍ਣਾਭਿਕਿਣ੍ਣਙ੍ਗੋਤਿ ¶ ਪਦੁਮਪਤ੍ਤਕਿਞ੍ਜਕ੍ਖਕੇਸਰੇਹਿ ਸਮਨ੍ਤਤੋ ਓਕਿਣ੍ਣਗਤ੍ਤੋ. ਸੋਣ੍ਣਪੋਕ੍ਖਰਮਾਲਧਾਤਿ ਹੇਮਮਯਕਮਲਮਾਲਾਭਾਰੀ.

੩੩. ਪਦੁਮਾਨੁਸਟਂ ਮਗ੍ਗਂ ਪਦ੍ਮਪਤ੍ਤਵਿਭੂਸਿਤਨ੍ਤਿ ਹਤ੍ਥਿਨੋ ਪਦਨਿਕ੍ਖੇਪੇ ਪਦਨਿਕ੍ਖੇਪੇ ਤਸ੍ਸ ਪਾਦਂ ਸਨ੍ਧਾਰੇਨ੍ਤੇਹਿ ਮਹਨ੍ਤੇਹਿ ਪਦੁਮੇਹਿ ਅਨੁਸਟਂ ਵਿਪ੍ਪਕਿਣ੍ਣਂ, ਨਾਨਾਵਿਰਾਗਵਣ੍ਣੇਹਿ ਤੇਸਂਯੇਵ ਚ ਪਤ੍ਤੇਹਿ ਇਤੋ ਚਿਤੋ ਚ ਪਰਿਬ੍ਭਮਨ੍ਤੇਹਿ ਵਿਸੇਸਤੋ ਮਣ੍ਡਿਤਤਾਯ ਵਿਭੂਸਿਤਂ ਮਗ੍ਗਂ ਗਚ੍ਛਤੀਤਿ ਯੋਜਨਾ. ਠਿਤਨ੍ਤਿ ਇਦਂ ਮਗ੍ਗਵਿਸੇਸਨਂ, ਪਦੁਮਪਤ੍ਤਵਿਭੂਸਿਤਂ ਹੁਤ੍ਵਾ ਠਿਤਂ ਮਗ੍ਗਨ੍ਤਿ ਅਤ੍ਥੋ. ਵਗ੍ਗੂਤਿ ਚਾਰੁ, ਕਿਰਿਯਾਵਿਸੇਸਨਞ੍ਚੇਤਂ, ਮ-ਕਾਰੋ ਪਦਸਨ੍ਧਿਕਰੋ. ਅਨੁਗ੍ਘਾਤੀਤਿ ਨ ਉਗ੍ਘਾਤਿ, ਅਤ੍ਤਨੋ ਉਪਰਿ ਨਿਸਿਨ੍ਨਾਨਂ ਈਸਕਮ੍ਪਿ ਖੋਭਂ ਅਕਰੋਨ੍ਤੋਤਿ ਅਤ੍ਥੋ. ਮਿਤਨ੍ਤਿ ਨਿਮ੍ਮਿਤਂ, ਨਿਕ੍ਖੇਪਪਦਂ ਵੀਤਿਕ੍ਕਮਨ੍ਤਿ ਅਤ੍ਥੋ. ਅਯਞ੍ਹੇਤ੍ਥ ਅਤ੍ਥੋ ‘‘ਵਗ੍ਗੁ ਚਾਰੁ ਪਦਨਿਕ੍ਖੇਪਂ ਕਤ੍ਵਾ ਗਚ੍ਛਤੀ’’ਤਿ. ਮਿਤਨ੍ਤਿ ਵਾ ਪਰਿਮਿਤਂ ਪਮਾਣਯੁਤ੍ਤਂ, ਨਾਤਿਸੀਘਂ, ਨਾਤਿਸਣਿਕਨ੍ਤਿ ਵੁਤ੍ਤਂ ਹੋਤਿ. ਵਾਰਣੋਤਿ ਹਤ੍ਥੀ. ਸੋ ਹਿ ਪਚ੍ਚਤ੍ਥਿਕਵਾਰਣਤੋ ਗਮਨਪਰਿਕ੍ਕਿਲੇਸਵਾਰਣਤੋ ਚ ‘‘ਵਾਰਣੋ’’ਤਿ ਵੁਚ੍ਚਤਿ.

੩੪. ਤਸ੍ਸ ¶ ਪਕ੍ਕਮਮਾਨਸ੍ਸ, ਸੋਣ੍ਣਸਂਕਾ ਰਤਿਸ੍ਸਰਾਤਿ ਤਸ੍ਸ ਯਥਾਵੁਤ੍ਤਸ੍ਸ ਕੁਞ੍ਜਰਸ੍ਸ ਗਚ੍ਛਨ੍ਤਸ੍ਸ ਸੋਣ੍ਣਕਂਸਾ ਸੁਵਣ੍ਣਮਯਾ ਘਣ੍ਟਾ ਰਤਿਸ੍ਸਰਾ ਰਮਣੀਯਸਦ੍ਦਾ ਮਨੁਞ੍ਞਨਿਗ੍ਘੋਸਾ ਓਲਮ੍ਬਨ੍ਤੀਤਿ ਅਧਿਪ੍ਪਾਯੋ. ਤਸ੍ਸ ਹਿ ਕੁਞ੍ਜਰਸ੍ਸ ਉਭੋਸੁ ਪਸ੍ਸੇਸੁ ਮਹਾਕੋਲਮ੍ਬਪ੍ਪਮਾਣਾ ਮਣਿਮੁਤ੍ਤਾਦਿਖਚਿਤਾ ਹੇਮਮਯਾ ਅਨੇਕਸਤਾ ਮਹਨ੍ਤਿਯੋ ਘਣ੍ਟਾ ਤਹਂ ਤਹਂ ਓਲਮ੍ਬਮਾਨਾ ਪਚਲਨ੍ਤਿ, ਯਤੋ ਛੇਕੇਨ ਗਨ੍ਧਬ੍ਬਕੇਨ ਪਯੁਤ੍ਤਵਾਦਿਤਤੋ ਅਤਿਵਿਯ ਮਨੋਹਰਸਦ੍ਦੋ ਨਿਚ੍ਛਰਤਿ ¶ . ਤੇਨਾਹ ‘‘ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ’’ਤਿ. ਤਸ੍ਸਤ੍ਥੋ – ਯਥਾ ਨਾਮ ਆਤਤਂ ਵਿਤਤਂ ਆਤਤਵਿਤਤਂ ਘਨਂ ਸੁਸਿਰਨ੍ਤਿ ਏਵਂ ਪਞ੍ਚਙ੍ਗਿਕੇ ਤੂਰਿਯੇ ਕੁਸਲੇਹਿ ਵਾਦਿਯਮਾਨੇ ਠਾਨੁਪ੍ਪਤ੍ਤਿਯਾ ਮਨ੍ਦਤਾਰਵਿਭਾਗਂ ¶ ਦਸ੍ਸੇਨ੍ਤੇਨ ਗਾਯਨ੍ਤੇਨ ਸਮੀਰਿਤੋ ਵਾਦਿਤਸਰੋ ਵਗ੍ਗੁ ਰਜਨੀਯੋ ਨਿਗ੍ਘੋਸੋ ਸੁਯ੍ਯਤਿ, ਏਵਂ ਤੇਸਂ ਸੋਵਣ੍ਣਕਂਸਾਨਂ ਤਪਨੀਯਘਣ੍ਟਾਨਂ ਨਿਗ੍ਘੋਸੋ ਸੁਯ੍ਯਤੀਤਿ.

੩੫. ਨਾਗਸ੍ਸਾਤਿ ਹਤ੍ਥਿਨਾਗਸ੍ਸ. ਮਹਨ੍ਤਨ੍ਤਿ ਸਮ੍ਪਤ੍ਤਿਮਹਤ੍ਤੇਨਾਪਿ ਸਙ੍ਖ੍ਯਾਮਹਤ੍ਤੇਨਾਪਿ ਮਹਨ੍ਤਂ. ਅਚ੍ਛਰਾਸਙ੍ਘਨ੍ਤਿ ਦੇਵਕਞ੍ਞਾਸਮੂਹਂ. ਵਣ੍ਣੇਨਾਤਿ ਰੂਪੇਨ.

੩੬. ਦਾਨਸ੍ਸਾਤਿ ਦਾਨਮਯਪੁਞ੍ਞਸ੍ਸ. ਸੀਲਸ੍ਸਾਤਿ ਕਾਯਿਕਸਂਵਰਾਦਿਸਂਵਰਸੀਲਸ੍ਸ. ਵਾ-ਸਦ੍ਦੋ ਅਵੁਤ੍ਤਵਿਕਪ੍ਪਨਤ੍ਥੋ. ਤੇਨ ਅਭਿਵਾਦਨਾਦਿਂ ਅਵੁਤ੍ਤਂ ਚਾਰਿਤ੍ਤਸੀਲਂ ਸਙ੍ਗਣ੍ਹਾਤਿ.

ਏਵਂ ਥੇਰੇਨ ਪੁਚ੍ਛਿਤਾ ਸਾ ਦੇਵਤਾ ਪਞ੍ਹਂ ਵਿਸ੍ਸਜ੍ਜੇਸਿ, ਤਮਤ੍ਥਂ ਦਸ੍ਸੇਤੁਂ –

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਅਯਂ ਗਾਥਾ ਧਮ੍ਮਸਙ੍ਗਾਹਕੇਹਿ ਵੁਤ੍ਤਾ, ਤਸ੍ਸਾ ਅਤ੍ਥੋ ਹੇਟ੍ਠਾ ਵੁਤ੍ਤੋ ਏਵ.

‘‘ਦਿਸ੍ਵਾਨ ਗੁਣਸਮ੍ਪਨ੍ਨਂ, ਝਾਯਿਂ ਝਾਨਰਤਂ ਸਤਂ;

ਅਦਾਸਿਂ ਪੁਪ੍ਫਾਭਿਕਿਣ੍ਣਂ, ਆਸਨਂ ਦੁਸ੍ਸਸਨ੍ਥਤਂ.

‘‘ਉਪਡ੍ਢਂ ਪਦ੍ਮਮਾਲਾਹਂ, ਆਸਨਸ੍ਸ ਸਮਨ੍ਤਤੋ;

ਅਬ੍ਭੋਕਿਰਿਸ੍ਸਂ ਪਤ੍ਤੇਹਿ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਤਸ੍ਸ ¶ ਕਮ੍ਮਕੁਸਲਸ੍ਸ, ਇਦਂ ਮੇ ਈਦਿਸਂ ਫਲਂ;

ਸਕ੍ਕਾਰੋ ਗਰੁਕਾਰੋ ਚ, ਦੇਵਾਨਂ ਅਪਚਿਤਾ ਅਹਂ.

‘‘ਯੋ ¶ ਵੇ ਸਮ੍ਮਾਵਿਮੁਤ੍ਤਾਨਂ, ਸਨ੍ਤਾਨਂ ਬ੍ਰਹ੍ਮਚਾਰਿਨਂ;

ਪਸਨ੍ਨੋ ਆਸਨਂ ਦਜ੍ਜਾ, ਏਵਂ ਨਨ੍ਦੇ ਯਥਾ ਅਹਂ.

‘‘ਤਸ੍ਮਾ ਹਿ ਅਤ੍ਤਕਾਮੇਨ, ਮਹਤ੍ਤਮਭਿਕਙ੍ਖਤਾ;

ਆਸਨਂ ਦਾਤਬ੍ਬਂ ਹੋਤਿ, ਸਰੀਰਨ੍ਤਿਮਧਾਰਿਨ’’ਨ੍ਤਿ. – ਦੇਵਤਾਯ ਵੁਤ੍ਤਗਾਥਾ;

੩੮. ਤਤ੍ਥ ¶ ਗੁਣਸਮ੍ਪਨ੍ਨਨ੍ਤਿ ਸਬ੍ਬੇਹਿ ਸਾਵਕਗੁਣੇਹਿ ਸਮਨ੍ਨਾਗਤਂ, ਤੇਹਿ ਵਾ ਪਰਿਪੁਣ੍ਣਂ. ਏਤੇਨ ਸਾਵਕਪਾਰਮਿਞਾਣਸ੍ਸ ਮਤ੍ਥਕਪ੍ਪਤ੍ਤਿਂ ਦਸ੍ਸੇਤਿ. ਝਾਯਿਨ੍ਤਿ ਆਰਮ੍ਮਣੂਪਨਿਜ੍ਝਾਨਂ ਲਕ੍ਖਣੂਪਨਿਜ੍ਝਾਨਨ੍ਤਿ ਦੁਵਿਧੇਨਾਪਿ ਝਾਨੇਨ ਝਾਯਨਸੀਲਂ, ਤੇਨ ਵਾ ਝਾਪੇਤਬ੍ਬਂ ਸਬ੍ਬਸਂਕਿਲੇਸਪਕ੍ਖਂ ਝਾਪੇਤ੍ਵਾ ਠਿਤਂ. ਤਤੋ ਏਵ ਝਾਨੇ ਰਤਨ੍ਤਿ ਝਾਨਰਤਂ. ਸਤਨ੍ਤਿ ਸਮਾਨਂ, ਸਨ੍ਤਂ ਵਾ, ਸਪ੍ਪੁਰਿਸਨ੍ਤਿ ਅਤ੍ਥੋ. ਪੁਪ੍ਫਾਭਿਕਿਣ੍ਣਨ੍ਤਿ ਪੁਪ੍ਫੇਹਿ ਅਭਿਕਿਣ੍ਣਂ, ਕਮਲਦਲੇਹਿ ਅਭਿਪ੍ਪਕਿਣ੍ਣਨ੍ਤਿ ਅਤ੍ਥੋ. ਦੁਸ੍ਸਸਨ੍ਥਤਨ੍ਤਿ ਵਤ੍ਥੇਨ ਉਪਰਿ ਅਤ੍ਥਤਂ.

੩੯. ਉਪਡ੍ਢਂ ਪਦ੍ਮਮਾਲਾਹਨ੍ਤਿ ਉਪਡ੍ਢਂ ਪਦੁਮਪੁਪ੍ਫਂ ਅਹਂ. ਆਸਨਸ੍ਸ ਸਮਨ੍ਤਤੋਤਿ ਥੇਰੇਨ ਨਿਸਿਨ੍ਨਸ੍ਸ ਆਸਨਸ੍ਸ ਸਮਨ੍ਤਾ ਭੂਮਿਯਂ. ਅਬ੍ਭੋਕਿਰਿਸ੍ਸਨ੍ਤਿ ਅਭਿਓਕਿਰਿਂ ਅਭਿਪ੍ਪਕਿਰਿਂ. ਕਥਂ? ਪਤ੍ਤੇਹੀਤਿ, ਤਸ੍ਸ ਉਪਡ੍ਢਪਦੁਮਸ੍ਸ ਵਿਸੁਂ ਵਿਸੁਂ ਕਤੇਹਿ ਪਤ੍ਤੇਹਿ ਪੁਪ੍ਫਵਸ੍ਸਾਭਿਵਸ੍ਸਨਕਨਿਯਾਮੇਨ ਓਕਿਰਿਨ੍ਤਿ ਅਤ੍ਥੋ.

੪੦. ਇਦਂ ਮੇ ਈਦਿਸਂ ਫਲਨ੍ਤਿ ਇਮਿਨਾ ‘‘ਕੁਞ੍ਜਰੋ ਤੇ ਵਰਾਰੋਹੋ’’ਤਿਆਦਿਨਾ ਥੇਰੇਨ ਗਹਿਤਂ ਅਗ੍ਗਹਿਤਞ੍ਚ ਆਯੁਯਸਸੁਖਰੂਪਾਦਿਭੇਦਂ ¶ ਅਤ੍ਤਨੋ ਦਿਬ੍ਬਸਮ੍ਪਤ੍ਤਿਂ ਏਕਤੋ ਦਸ੍ਸੇਤ੍ਵਾ ਪੁਨਪਿ ਥੇਰੇਨ ਅਗ੍ਗਹਿਤਮੇਵ ਅਤ੍ਤਨੋ ਆਨੁਭਾਵਸਮ੍ਪਤ੍ਤਿਂ ਦਸ੍ਸੇਤੁਂ ‘‘ਸਕ੍ਕਾਰੋ ਗਰੁਕਾਰੋ’’ਤਿਆਦਿਮਾਹ. ਤੇਨ ‘‘ਨ ਕੇਵਲਂ ਭਨ੍ਤੇ ਤੁਮ੍ਹੇਹਿ ਯਥਾਵੁਤ੍ਤਮੇਵ ਇਧ ਮਯ੍ਹਂ ਪੁਞ੍ਞਫਲਂ, ਅਪਿਚ ਖੋ ਇਦਂ ਦਿਬ੍ਬਂ ਆਧਿਪਤੇਯ੍ਯਮ੍ਪੀ’’ਤਿ ਦਸ੍ਸੇਤਿ. ਤਤ੍ਥ ਸਕ੍ਕਾਰੋਤਿ ਆਦਰਕਿਰਿਯਾ, ਦੇਵੇਹਿ ਅਤ੍ਤਨੋ ਸਕ੍ਕਾਤਬ੍ਬਤਾਤਿ ਅਤ੍ਥੋ. ਤਥਾ ਗਰੁਕਾਰੋਤਿ ਗਰੁਕਾਤਬ੍ਬਤਾ. ਦੇਵਾਨਨ੍ਤਿ ਦੇਵੇਹਿ. ਅਪਚਿਤਾਤਿ ਪੂਜਿਤਾ.

੪੧. ਸਮ੍ਮਾਵਿਮੁਤ੍ਤਾਨਨ੍ਤਿ ਸੁਟ੍ਠੁ ਵਿਮੁਤ੍ਤਾਨਂ ਸਬ੍ਬਸਂਕਿਲੇਸਪ੍ਪਹਾਯੀਨਂ. ਸਨ੍ਤਾਨਨ੍ਤਿ ਸਨ੍ਤਕਾਯਵਚੀਮਨੋਕਮ੍ਮਾਨਂ ਸਾਧੂਨਂ. ਮਗ੍ਗਬ੍ਰਹ੍ਮਚਰਿਯਸ੍ਸ ਚ ਸਾਸਨਬ੍ਰਹ੍ਮਚਰਿਯਸ੍ਸ ਚ ਚਿਣ੍ਣਤ੍ਤਾ ਬ੍ਰਹ੍ਮਚਾਰਿਨਂ. ਪਸਨ੍ਨੋ ਆਸਨਂ ਦਜ੍ਜਾਤਿ ¶ ਕਮ੍ਮਫਲਸਦ੍ਧਾਯ ਰਤਨਤ੍ਤਯਸਦ੍ਧਾਯ ਚ ਪਸਨ੍ਨਮਾਨਸੋ ਹੁਤ੍ਵਾ ਯਦਿ ਆਸਨਮਤ੍ਤਮ੍ਪਿ ਦਦੇਯ੍ਯ. ਏਵਂ ਨਨ੍ਦੇ ਯਥਾ ਅਹਨ੍ਤਿ ਯਥਾ ਅਹਂ ਤੇਨ ਆਸਨਦਾਨੇਨ ਏਤਰਹਿ ਨਨ੍ਦਾਮਿ ਮੋਦਾਮਿ, ਏਵਮੇਵ ਅਞ੍ਞੋਪਿ ਨਨ੍ਦੇਯ੍ਯ ਮੋਦੇਯ੍ਯ.

੪੨. ਤਸ੍ਮਾਤਿ ਤੇਨ ਕਾਰਣੇਨ. ਹਿ-ਸਦ੍ਦੋ ਨਿਪਾਤਮਤ੍ਤਂ. ਅਤ੍ਤਕਾਮੇਨਾਤਿ ਅਤ੍ਤਨੋ ਹਿਤਕਾਮੇਨ. ਯੋ ਹਿ ਅਤ੍ਤਨੋ ਹਿਤਾਵਹਂ ਕਮ੍ਮਂ ਕਰੋਤਿ, ਨ ਅਹਿਤਾਵਹਂ, ਸੋ ਅਤ੍ਤਕਾਮੋ. ਮਹਤ੍ਤਨ੍ਤਿ ਵਿਪਾਕਮਹਤ੍ਤਂ. ਸਰੀਰਨ੍ਤਿਮਧਾਰਿਨਨ੍ਤਿ ਅਨ੍ਤਿਮਂ ਦੇਹਂ ਧਾਰੇਨ੍ਤਾਨਂ, ਖੀਣਾਸਵਾਨਨ੍ਤਿ ਅਤ੍ਥੋ. ਅਯਞ੍ਹੇਤ੍ਥ ਅਤ੍ਥੋ – ਯਸ੍ਮਾ ਅਰਹਤਂ ਆਸਨਦਾਨੇਨ ਅਹਂ ਏਵਂ ਦਿਬ੍ਬਸਮ੍ਪਤ੍ਤਿਯਾ ਮੋਦਾਮਿ, ਤਸ੍ਮਾ ਅਞ੍ਞੇਨਾਪਿ ¶ ਅਤ੍ਤਨੋ ਅਭਿਵੁਦ੍ਧਿਂ ਪਤ੍ਥਯਮਾਨੇਨ ਅਨ੍ਤਿਮਸਮੁਸ੍ਸਯੇ ਠਿਤਾਨਂ ਆਸਨਂ ਦਾਤਬ੍ਬਂ, ਨਤ੍ਥਿ ਤਾਦਿਸਂ ਪੁਞ੍ਞਨ੍ਤਿ ਦਸ੍ਸੇਤਿ. ਤੇਸਂ ਵੁਤ੍ਤਸਦਿਸਮੇਵਾਤਿ.

ਸੁਵਣ੍ਣਚ੍ਛਦਨਂ ¶ ਨਾਵਨ੍ਤਿ ਨਾਵਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਸਾਵਤ੍ਥਿਯਂ ਵਿਹਰਨ੍ਤੇ ਸੋਲ਼ਸਮਤ੍ਤਾ ਭਿਕ੍ਖੂ ਅਞ੍ਞਤਰਸ੍ਮਿਂ ਗਾਮਕਾਵਾਸੇ ਵਸਿਤ੍ਵਾ ਵੁਤ੍ਥਵਸ੍ਸਾ ‘‘ਭਗਵਨ੍ਤਂ ਪਸ੍ਸਿਸ੍ਸਾਮ, ਧਮ੍ਮਞ੍ਚ ਸੁਣਿਸ੍ਸਾਮਾ’’ਤਿ ਸਾਵਤ੍ਥਿਂ ਉਦ੍ਦਿਸ੍ਸ ਗਿਮ੍ਹਸਮਯੇ ਅਦ੍ਧਾਨਮਗ੍ਗਂ ਪਟਿਪਨ੍ਨਾ, ਅਨ੍ਤਰਾਮਗ੍ਗੇ ਚ ਨਿਰੁਦਕੋ ਕਨ੍ਤਾਰੋ, ਤੇ ਚ ਤਤ੍ਥ ਘਮ੍ਮਾਭਿਤਤ੍ਤਾ ਕਿਲਨ੍ਤਾ ਤਸਿਤਾ ਪਾਨੀਯਂ ਅਲਭਮਾਨਾ ਅਞ੍ਞਤਰਸ੍ਸ ਗਾਮਸ੍ਸ ਅਵਿਦੂਰੇਨ ਗਚ੍ਛਨ੍ਤਿ. ਤਤ੍ਥ ਅਞ੍ਞਤਰਾ ਇਤ੍ਥੀ ਉਦਕਭਾਜਨਂ ਗਹੇਤ੍ਵਾ ਉਦਕਤ੍ਥਾਯ ਉਦਪਾਨਾਭਿਮੁਖੀ ਗਚ੍ਛਤਿ. ਅਥ ਤੇ ਭਿਕ੍ਖੂ ਤਂ ਦਿਸ੍ਵਾ ‘‘ਯਤ੍ਥਾਯਂ ਇਤ੍ਥੀ ਗਚ੍ਛਤਿ, ਤਤ੍ਥ ਗਤੇ ਪਾਨੀਯਂ ਲਦ੍ਧੁਂ ਸਕ੍ਕਾ’’ਤਿ ਪਿਪਾਸਾਪਰੇਤਾ ਤਂਦਿਸਾਭਿਮੁਖਾ ਗਨ੍ਤ੍ਵਾ ਉਦਪਾਨਂ ਦਿਸ੍ਵਾ ਤਸ੍ਸਾ ਅਵਿਦੂਰੇ ਅਟ੍ਠਂਸੁ. ਸਾ ਇਤ੍ਥੀ ਤਤੋ ਉਦਕਂ ਗਹੇਤ੍ਵਾ ਨਿਵਤ੍ਤਿਤੁਕਾਮਾ ਤੇ ਭਿਕ੍ਖੂ ਦਿਸ੍ਵਾ ‘‘ਇਮੇ ਅਯ੍ਯਾ ਉਦਕੇਨ ਅਤ੍ਥਿਕਾ ਪਿਪਾਸਿਤਾ’’ਤਿ ਞਤ੍ਵਾ ਗਰੁਚਿਤ੍ਤੀਕਾਰਂ ਉਪਟ੍ਠਪੇਤ੍ਵਾ ਉਦਕੇਨ ਨਿਮਨ੍ਤੇਸਿ. ਤੇ ਪਤ੍ਤਥਵਿਕਤੋ ਪਰਿਸ੍ਸਾਵਨਂ ਨੀਹਰਿਤ੍ਵਾ ਪਰਿਸ੍ਸਾਵੇਤ੍ਵਾ ਯਾਵਦਤ੍ਥਂ ਪਾਨੀਯਂ ਪਿਵਿਤ੍ਵਾ ਹਤ੍ਥਪਾਦੇ ਸੀਤਲੇ ਕਤ੍ਵਾ ਤਸ੍ਸਾ ਇਤ੍ਥਿਯਾ ਪਾਨੀਯਦਾਨੇ ਅਨੁਮੋਦਨਂ ਵਤ੍ਵਾ ਅਗਮਂਸੁ.

ਸਾ ¶ ਤਂ ਪੁਞ੍ਞਂ ਹਦਯੇ ਠਪੇਤ੍ਵਾ ਅਨ੍ਤਰਨ੍ਤਰਾ ਅਨੁਸ੍ਸਰਨ੍ਤੀ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਤਸ੍ਸਾ ਪੁਞ੍ਞਾਨੁਭਾਵੇਨ ਕਪ੍ਪਰੁਕ੍ਖੋਪਸੋਭਿਤਂ ਮਹਨ੍ਤਂ ਵਿਮਾਨਂ ਉਪ੍ਪਜ੍ਜਿ. ਤਂ ਵਿਮਾਨਂ ਪਰਿਕ੍ਖਿਪਿਤ੍ਵਾ ਮੁਤ੍ਤਜਾਲਰਜਤਵਿਭੂਸਿਤਾ ਵਿਯ ਸਿਕਤਾਵਕਿਣ੍ਣਪਣ੍ਡਰਪੁਲਿਨਤਟਾ ਮਣਿਕ੍ਖਨ੍ਧਨਿਮ੍ਮਲਸਲਿਲਵਾਹਿਨੀ ¶ ਸਰਿਤਾ. ਤਸ੍ਸਾ ਉਭੋਸੁ ਤੀਰੇਸੁ ਉਯ੍ਯਾਨਵਿਮਾਨਦ੍ਵਾਰੇ ਚ ਮਹਤੀ ਪੋਕ੍ਖਰਣੀ ਪਞ੍ਚਵਣ੍ਣਪਦੁਮਸਣ੍ਡਮਣ੍ਡਿਤਾ ਸਹ ਸੁਵਣ੍ਣਨਾਵਾਯ ਨਿਬ੍ਬਤ੍ਤਿ. ਸਾ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਨਾਵਾਯ ਕੀਲ਼ਨ੍ਤੀ ਲਲ਼ਨ੍ਤੀ ਵਿਚਰਤਿ. ਅਥੇਕਦਿਵਸਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਤਂ ਦੇਵਧੀਤਰਂ ਨਾਵਾਯ ਕੀਲ਼ਨ੍ਤਿਂ ਦਿਸ੍ਵਾ ਤਾਯ ਕਤਪੁਞ੍ਞਕਮ੍ਮਂ ਪੁਚ੍ਛਨ੍ਤੋ –

‘‘ਸੁਵਣ੍ਣਚ੍ਛਦਨਂ ਨਾਵਂ, ਨਾਰਿ ਆਰੁਯ੍ਹ ਤਿਟ੍ਠਸਿ;

ਓਗਾਹਸਿ ਪੋਕ੍ਖਰਣਿਂ, ਪਦ੍ਮਂ ਛਿਨ੍ਦਸਿ ਪਾਣਿਨਾ.

‘‘ਕੇਨ ¶ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਆਹ;

ਤਤੋ ਥੇਰੇਨ ਪੁਟ੍ਠਾਯ ਦੇਵਤਾਯ ਵਿਸ੍ਸਜ੍ਜਿਤਾਕਾਰਂ ਦਸ੍ਸੇਤੁਂ ਸਙ੍ਗੀਤਿਕਾਰੇਹਿ –

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਦਿਸ੍ਵਾਨ ਭਿਕ੍ਖੂ ਤਸਿਤੇ ਕਿਲਨ੍ਤੇ, ਉਟ੍ਠਾਯ ਪਾਤੁਂ ਉਦਕਂ ਅਦਾਸਿਂ.

‘‘ਯੋ ¶ ਵੇ ਕਿਲਨ੍ਤਾਨ ਪਿਪਾਸਿਤਾਨਂ, ਉਟ੍ਠਾਯ ਪਾਤੁਂ ਉਦਕਂ ਦਦਾਤਿ;

ਸੀਤੋਦਕਾ ਤਸ੍ਸ ਭਵਨ੍ਤਿ ਨਜ੍ਜੋ, ਪਹੂਤਮਲ੍ਯਾ ਬਹੁਪੁਣ੍ਡਰੀਕਾ.

‘‘ਤਂ ਆਪਗਾ ਅਨੁਪਰਿਯਨ੍ਤਿ ਸਬ੍ਬਦਾ, ਸੀਤੋਦਕਾ ਵਾਲੁਕਸਨ੍ਥਤਾ ਨਦੀ;

ਅਮ੍ਬਾ ¶ ਚ ਸਾਲਾ ਤਿਲਕਾ ਚ ਜਮ੍ਬੁਯੋ, ਉਦ੍ਦਾਲਕਾ ਪਾਟਲਿਯੋ ਚ ਫੁਲ੍ਲਾ.

‘‘ਤਂਭੂਮਿਭਾਗੇਹਿ ਉਪੇਤਰੂਪਂ, ਵਿਮਾਨਸੇਟ੍ਠਂ ਭੁਸ ਸੋਭਮਾਨਂ;

ਤਸ੍ਸੀਧ ਕਮ੍ਮਸ੍ਸ ਅਯਂ ਵਿਪਾਕੋ, ਏਤਾਦਿਸਂ ਪੁਞ੍ਞਕਤਾ ਲਭਨ੍ਤਿ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ¶ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

੪੩. ਤਤ੍ਥ ਸੁਵਣ੍ਣਚ੍ਛਦਨਨ੍ਤਿ ਵਿਚਿਤ੍ਤਭਿਤ੍ਤਿਵਿਰਚਨੇਹਿ ਰਤ੍ਤਸੁਵਣ੍ਣਮਯੇਹਿ ਉਭੋਹਿ ਪਸ੍ਸੇਹਿ ਪਟਿਚ੍ਛਾਦਿਤਬ੍ਭਨ੍ਤਰਤਾਯ ਚੇਵ ਨਾਨਾਰਤਨਸਮੁਜ੍ਜਲਿਤੇਨ ਕਨਕਮਯਾਲਙ੍ਕਾਰੇਨ ਉਪਰਿ ਛਾਦਿਤਤਾਯ ਚ ਸੁਵਣ੍ਣਚ੍ਛਦਨਂ. ਨਾਵਨ੍ਤਿ ਪੋਤਂ. ਸੋ ਹਿ ਓਰਤੋ ਪਾਰਂ ਪਵਤਿ ਗਚ੍ਛਤੀਤਿ ਪੋਤੋ, ਸਤ੍ਤੇ ਨੇਤੀਤਿ ਨਾਵਾਤਿ ਚ ਵੁਚ੍ਚਤਿ. ਨਾਰੀਤਿ ਤਸ੍ਸਾ ਦੇਵਧੀਤਾਯ ਆਲਪਨਂ. ਨਰਤਿ ਨੇਤੀਤਿ ਨਰੋ, ਪੁਰਿਸੋ. ਯਥਾ ਹਿ ਪਠਮਪਕਤਿਭੂਤੋ ਸਤ੍ਤੋ ਇਤਰਾਯ ਪਕਤਿਯਾ ਸੇਟ੍ਠਤ੍ਥੇਨ ਪੁਰਿ ਸੇਤੀਤਿ ‘‘ਪੁਰਿਸੋ’’ਤਿ ਵੁਚ੍ਚਤਿ, ਏਵਂ ਨਯਨਟ੍ਠੇਨ ¶ ‘‘ਨਰੋ’’ਤਿ. ਪੁਤ੍ਤਭਾਤੁਭੂਤੋਪਿ ਹਿ ਪੁਗ੍ਗਲੋ ਮਾਤੁਜੇਟ੍ਠਭਗਿਨੀਨਂ ਪਿਤੁਟ੍ਠਾਨੇ ਤਿਟ੍ਠਤਿ, ਪਗੇਵ ਭਤ੍ਤੁਭੂਤੋ. ਨਰਸ੍ਸ ਏਸਾਤਿ ਨਾਰੀ, ਅਯਞ੍ਚ ਸਮਞ੍ਞਾ ਮਨੁਸ੍ਸਿਤ੍ਥੀਸੁ ਪਵਤ੍ਤਾ ਰੁਲ਼੍ਹਿਵਸੇਨ ਇਤਰਾਸੁਪਿ ਤਥਾ ਵੁਚ੍ਚਤਿ. ਓਗਾਹਸਿ ਪੋਕ੍ਖਰਣਿਨ੍ਤਿ ਸਤਿਪਿ ਰਤ੍ਤੁਪ੍ਪਲਨੀਲੁਪ੍ਪਲਾਦਿਕੇ ਬਹੁਵਿਧੇ ਰਤਨਮਯੇ ਜਲਜਕੁਸੁਮੇ ਪੋਕ੍ਖਰਸਙ੍ਖਾਤਾਨਂ ਦਿਬ੍ਬਪਦੁਮਾਨਂ ਤਤ੍ਥ ਯੇਭੁਯ੍ਯੇਨ ਅਤ੍ਥਿਤਾਯ ‘‘ਪੋਕ੍ਖਰਣੀ’’ਤਿ ਲਦ੍ਧਨਾਮਂ ਦਿਬ੍ਬਸਰਂ ਜਲਵਿਹਾਰਰਤਿਯਾ ਅਨੁਪਵਿਸਸਿ ¶ . ਪਦ੍ਮਂ ਛਿਨ੍ਦਸਿ ਪਾਣਿਨਾਤਿ ਰਜਤਮਯਨਾਲ਼ਂ ਪਦੁਮਰਾਗਰਤਨਮਯਪਤ੍ਤਸਙ੍ਘਾਤਂ ਕਨਕਮਯਕਣ੍ਣਿਕਾਕਿਞ੍ਜਕ੍ਖਕੇਸਰਂ ਦਿਬ੍ਬਕਮਲਂ ਲੀਲਾਰਵਿਨ੍ਦਂ ਕਤ੍ਤੁਕਾਮਤਾਯ ਤਵ ਹਤ੍ਥੇਨ ਭਞ੍ਜਸਿ.

੪੭. ਤਸਿਤੇਤਿ ਪਿਪਾਸਿਤੇ. ਕਿਲਨ੍ਤੇਤਿ ਤਾਯ ਪਿਪਾਸਾਯ ਅਦ੍ਧਾਨਪਰਿਸ੍ਸਮੇਨ ਚ ਕਿਲਨ੍ਤਕਾਯੇ. ਉਟ੍ਠਾਯਾਤਿ ਉਟ੍ਠਾਨਵੀਰਿਯਂ ਕਤ੍ਵਾ, ਆਲਸਿਯਂ ਅਨਾਪਜ੍ਜਿਤ੍ਵਾਤਿ ਅਤ੍ਥੋ.

੪੮. ਯੋ ਵੇਤਿਆਦਿਨਾ ਯਥਾ ਅਹਂ, ਏਵਂ ਅਞ੍ਞੇਪਿ ਆਯਤਨਗਤੇਨ ਉਦਕਦਾਨਪੁਞ੍ਞੇਨ ਏਤਾਦਿਸਂ ਫਲਂ ਪਟਿਲਭਨ੍ਤੀਤਿ ਦਿਟ੍ਠੇਨ ਅਦਿਟ੍ਠਸ੍ਸ ਅਨੁਮਾਨਵਿਧਿਂ ਦਸ੍ਸੇਨ੍ਤੀ ਥੇਰੇਨ ਪੁਟ੍ਠਮਤ੍ਥਂ ਸਾਧਾਰਣਤੋ ਵਿਸ੍ਸਜ੍ਜੇਤਿ. ਤਤ੍ਥ ਤਸ੍ਸਾਤਿ ਤਨ੍ਤਿ ਚ ਯਥਾਵੁਤ੍ਤਪੁਞ੍ਞਕਾਰਿਨਂ ਪਚ੍ਚਾਮਸਤਿ.

੪੯. ਅਨੁਪਰਿਯਨ੍ਤੀਤਿ ਅਨੁਰੂਪਵਸੇਨ ਪਰਿਕ੍ਖਿਪਨ੍ਤਿ. ਤਸ੍ਸ ਵਸਨਟ੍ਠਾਨਪਰਿਕ੍ਖਿਪਨੇਨ ਸੋਪਿ ਪਰਿਕ੍ਖਿਤ੍ਤੋ ਨਾਮ ਹੋਤਿ. ਤਿਲਕਾਤਿ ਬਨ੍ਧੁਜੀਵਕਪੁਪ੍ਫਸਦਿਸਪੁਪ੍ਫਾ ਏਕਾ ਰੁਕ੍ਖਜਾਤਿ. ਉਦ੍ਦਾਲਕਾਤਿ ਵਾਤਘਾਤਕਾ, ਯੇ ‘‘ਰਾਜਰੁਕ੍ਖਾ’’ਤਿਪਿ ਵੁਚ੍ਚਨ੍ਤਿ.

੫੦. ਤਂਭੂਮਿਭਾਗੇਹੀਤਿ ਤਾਦਿਸੇਹਿ ਭੂਮਿਭਾਗੇਹਿ, ਯਥਾਵੁਤ੍ਤਪੋਕ੍ਖਰਣੀਨਦੀਉਯ੍ਯਾਨਵਨ੍ਤੇਹਿ ਭੂਮਿਪਦੇਸੇਹੀਤਿ ¶ ਅਤ੍ਥੋ. ਉਪੇਤਰੂਪਨ੍ਤਿ ਪਾਸਂਸਿਯਭਾਵੇਨ ਉਪੇਤਂ, ਤੇਸਂ ਪੋਕ੍ਖਰਣੀਆਦੀਨਂ ਵਸੇਨ ਰਮਣੀਯਸਨ੍ਨਿਵੇਸਨ੍ਤਿ ਵੁਤ੍ਤਂ ਹੋਤਿ. ਭੁਸ ਸੋਭਮਾਨਨ੍ਤਿ ਭੁਸਂ ਅਤਿਵਿਯ ਵਿਰੋਚਮਾਨਂ ਵਿਮਾਨਸੇਟ੍ਠਂ ਲਭਨ੍ਤੀਤਿ ਯੋਜਨਾ. ਸੇਸਂ ਵੁਤ੍ਤਨਯਮੇਵਾਤਿ.

ਪਠਮਨਾਵਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਸੁਵਣ੍ਣਚ੍ਛਦਨਂ ¶ ਨਾਵਨ੍ਤਿ ਦੁਤਿਯਨਾਵਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ¶ ਸਾਵਤ੍ਥਿਯਂ ਵਿਹਰਨ੍ਤੇ ਅਞ੍ਞਤਰੋ ਖੀਣਾਸਵਤ੍ਥੇਰੋ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਗਾਮਕਾਵਾਸੇ ਵਸ੍ਸਂ ਉਪਗਨ੍ਤੁਕਾਮੋ ਸਾਵਤ੍ਥਿਤੋ ਤਂ ਗਾਮਂ ਉਦ੍ਦਿਸ੍ਸ ਪਚ੍ਛਾਭਤ੍ਤਂ ਅਦ੍ਧਾਨਮਗ੍ਗਪਟਿਪਨ੍ਨੋ, ਮਗ੍ਗਪਰਿਸ੍ਸਮੇਨ ਕਿਲਨ੍ਤੋ ਤਸਿਤੋ ਅਨ੍ਤਰਾਮਗ੍ਗੇ ਅਞ੍ਞਤਰਂ ਗਾਮਂ ਸਮ੍ਪਤ੍ਤੋ, ਬਹਿਗਾਮੇ ਤਾਦਿਸਂ ਛਾਯੂਦਕਸਮ੍ਪਨ੍ਨਟ੍ਠਾਨਂ ਅਪਸ੍ਸਨ੍ਤੋ ਪਰਿਸ੍ਸਮੇਨ ਚ ਅਭਿਭੁਯ੍ਯਮਾਨੋ ਚੀਵਰਂ ਪਾਰੁਪਿਤ੍ਵਾ ਗਾਮਂ ਪਵਿਸਿਤ੍ਵਾ ਧੁਰਗੇਹਸ੍ਸੇਵ ਦ੍ਵਾਰੇ ਅਟ੍ਠਾਸਿ. ਤਤ੍ਥ ਅਞ੍ਞਤਰਾ ਇਤ੍ਥੀ ਥੇਰਂ ਪਸ੍ਸਿਤ੍ਵਾ ‘‘ਕੁਤੋ, ਭਨ੍ਤੇ, ਆਗਤਤ੍ਥਾ’’ਤਿ ਪੁਚ੍ਛਿਤ੍ਵਾ ਮਗ੍ਗਪਰਿਸ੍ਸਮਂ ਪਿਪਾਸਿਤਭਾਵਞ੍ਚ ਞਤ੍ਵਾ ‘‘ਏਥ, ਭਨ੍ਤੇ’’ਤਿ ਗੇਹਂ ਪਵੇਸੇਤ੍ਵਾ ‘‘ਇਧ ਨਿਸੀਦਥਾ’’ਤਿ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਤਤ੍ਥ ਨਿਸਿਨ੍ਨੇ ਪਾਦੋਦਕਂ ਪਾਦਬ੍ਭਞ੍ਜਨਤੇਲਞ੍ਚ ਦਤ੍ਵਾ ਤਾਲਵਣ੍ਟਂ ਗਹੇਤ੍ਵਾ ਬੀਜਿ. ਪਰਿਲ਼ਾਹੇ ਵੂਪਸਨ੍ਤੇ ਮਧੁਰਂ ਸੀਤਲਂ ਸੁਗਨ੍ਧਂ ਪਾਨਕਂ ਯੋਜੇਤ੍ਵਾ ਅਦਾਸਿ. ਥੇਰੋ ਤਂ ਪਿਵਿਤ੍ਵਾ ਪਟਿਪ੍ਪਸ੍ਸਦ੍ਧਕਿਲਮਥੋ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤੀਤਿ ਸਬ੍ਬਂ ਅਨਨ੍ਤਰਵਿਮਾਨਸਦਿਸਨ੍ਤਿ ਵੇਦਿਤਬ੍ਬਂ. ਗਾਥਾਸੁਪਿ ਅਪੁਬ੍ਬਂ ਨਤ੍ਥਿ. ਤੇਨ ਵੁਤ੍ਤਂ –

‘‘ਸੁਵਣ੍ਣਚ੍ਛਦਨਂ ਨਾਵਂ, ਨਾਰਿ ਆਰੁਯ੍ਹ ਤਿਟ੍ਠਸਿ;

ਓਗਾਹਸਿ ਪੋਕ੍ਖਰਣਿਂ, ਪਦ੍ਮਂ ਛਿਨ੍ਦਸਿ ਪਾਣਿਨਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ¶ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ¶ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਦਿਸ੍ਵਾਨ ਭਿਕ੍ਖੁਂ ਤਸਿਤਂ ਕਿਲਨ੍ਤਂ, ਉਟ੍ਠਾਯ ਪਾਤੁਂ ਉਦਕਂ ਅਦਾਸਿਂ.

‘‘ਯੋ ¶ ਵੇ ਕਿਲਨ੍ਤਸ੍ਸ ਪਿਪਾਸਿਤਸ੍ਸ, ਟ੍ਠਾਯ ਪਾਤੁਂ ਉਦਕਂ ਦਦਾਤਿ;

ਸੀਤੋਦਕਾ ਤਸ੍ਸ ਭਵਨ੍ਤਿ ਨਜ੍ਜੋ, ਪਹੂਤਮਲ੍ਯਾ ਬਹੁਪੁਣ੍ਡਰੀਕਾ.

‘‘ਤਂ ਆਪਗਾ ਅਨੁਪਰਿਯਨ੍ਤਿ ਸਬ੍ਬਦਾ, ਸੀਤੋਦਕਾ ਵਾਲੁਕਸਨ੍ਥਤਾ ਨਦੀ;

ਅਮ੍ਬਾ ਚ ਸਾਲਾ ਤਿਲਕਾ ਚ ਜਮ੍ਬੁਯੋ, ਉਦ੍ਦਾਲਕਾ ਪਾਟਲਿਯੋ ਚ ਫੁਲ੍ਲਾ.

‘‘ਤਂਭੂਮਿਭਾਗੇਹਿ ਉਪੇਤਰੂਪਂ, ਵਿਮਾਨਸੇਟ੍ਠਂ ਭੁਸ ਸੋਭਮਾਨਂ;

ਤਸ੍ਸੀਧ ਕਮ੍ਮਸ੍ਸ ਅਯਂ ਵਿਪਾਕੋ, ਏਤਾਦਿਸਂ ਪੁਞ੍ਞਕਤਾ ਲਭਨ੍ਤਿ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਅਤ੍ਥਵਣ੍ਣਨਾਸੁਪਿ ਇਧ ਏਕੋਵ ਥੇਰੋਤਿ ਅਪੁਬ੍ਬਂ ਨਤ੍ਥਿ.

ਦੁਤਿਯਨਾਵਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਸੁਵਣ੍ਣਚ੍ਛਦਨਂ ¶ ਨਾਵਨ੍ਤਿ ਤਤਿਯਨਾਵਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਜਨਪਦਚਾਰਿਕਂ ਚਰਨ੍ਤੋ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਕੋਸਲਜਨਪਦੇ ਯੇਨ ਥੂਣਂ ਨਾਮ ਬ੍ਰਾਹ੍ਮਣਗਾਮੋ ਤਦਵਸਰਿ. ਅਸ੍ਸੋਸੁਂ ਖੋ ਥੂਣੇਯ੍ਯਕਾ ਬ੍ਰਾਹ੍ਮਣਗਹਪਤਿਕਾ ‘‘ਸਮਣੋ ਕਿਰ ਗੋਤਮੋ ਅਮ੍ਹਾਕਂ ਗਾਮਖੇਤ੍ਤਂ ਅਨੁਪ੍ਪਤ੍ਤੋ’’ਤਿ ¶ . ਅਥ ਥੂਣੇਯ੍ਯਕਾ ਬ੍ਰਾਹ੍ਮਣਗਹਪਤਿਕਾ ਅਪ੍ਪਸਨ੍ਨਾ ਮਿਚ੍ਛਾਦਿਟ੍ਠਿਕਾ ਮਚ੍ਛੇਰਪਕਤਾ ‘‘ਸਚੇ ਸਮਣੋ ਗੋਤਮੋ ਇਮਂ ਗਾਮਂ ਪਵਿਸਿਤ੍ਵਾ ਦ੍ਵੀਹਤੀਹਂ ਵਸੇਯ੍ਯ, ਸਬ੍ਬਂ ਇਮਂ ਜਨਂ ਅਤ੍ਤਨੋ ਵਚਨੇ ਪਤਿਟ੍ਠਪੇਯ੍ਯ, ਤਤੋ ਬ੍ਰਾਹ੍ਮਣਧਮ੍ਮੋ ¶ ਪਤਿਟ੍ਠਂ ਨ ਲਭੇਯ੍ਯਾ’’ਤਿ ਤਤ੍ਥ ਭਗਵਤੋ ਅਵਾਸਾਯ ਪਰਿਸਕ੍ਕਨ੍ਤਾ ਨਦੀਤਿਤ੍ਥੇਸੁ ਠਪਿਤਨਾਵਾਯੋ ਅਪਨੇਸੁਂ, ਸੇਤੁਸਙ੍ਕਮਨਾਨਿ ਚ ਅਵਲਞ੍ਜੇ ਅਕਂਸੁ, ਤਥਾ ਪਪਾਮਣ੍ਡਪਾਦੀਨਿ, ਏਕਂ ਉਦਪਾਨਂ ਠਪੇਤ੍ਵਾ ਇਤਰਾਨਿ ਉਦਪਾਨਾਨਿ ਤਿਣਾਦੀਹਿ ਪੂਰੇਤ੍ਵਾ ਪਿਦਹਿਂਸੁ. ਤੇਨ ਵੁਤ੍ਤਂ ਉਦਾਨੇ (ਉਦਾ. ੬੯) ‘‘ਅਥ ਖੋ ਥੂਣੇਯ੍ਯਕਾ ਬ੍ਰਾਹ੍ਮਣਗਹਪਤਿਕਾ ਉਦਪਾਨਂ ਤਿਣਸ੍ਸ ਚ ਭੁਸਸ੍ਸ ਚ ਯਾਵ ਮੁਖਤੋ ਪੂਰੇਸੁਂ ‘ਮਾ ਤੇ ਮੁਣ੍ਡਕਾ ਸਮਣਕਾ ਪਾਨੀਯਂ ਅਪਂਸੂ’’’ਤਿ.

ਭਗਵਾ ਤੇਸਂ ਤਂ ਵਿਪ੍ਪਕਾਰਂ ਞਤ੍ਵਾ ਤੇ ਅਨੁਕਮ੍ਪਨ੍ਤੋ ਸਦ੍ਧਿਂ ਭਿਕ੍ਖੁਸਙ੍ਘੇਨ ਆਕਾਸੇਨ ਨਦਿਂ ਅਤਿਕ੍ਕਮਿਤ੍ਵਾ ਗਨ੍ਤ੍ਵਾ ਅਨੁਕ੍ਕਮੇਨ ਥੂਣਂ ਬ੍ਰਾਹ੍ਮਣਗਾਮਂ ਪਤ੍ਵਾ ਮਗ੍ਗਾ ਓਕ੍ਕਮ੍ਮ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਤੇਨ ਚ ਸਮਯੇਨ ਸਮ੍ਬਹੁਲਾ ਉਦਕਹਾਰਿਨਿਯੋ ਭਗਵਤੋ ਅਵਿਦੂਰੇਨ ਅਤਿਕ੍ਕਮਨ੍ਤਿ. ਤਸ੍ਮਿਞ੍ਚ ਗਾਮੇ ‘‘ਸਚੇ ਸਮਣੋ ਗੋਤਮੋ ਇਧਾਗਮਿਸ੍ਸਤਿ, ਨ ਤਸ੍ਸ ਪਚ੍ਚੁਗ੍ਗਮਨਾਦਿਕਂ ਕਾਤਬ੍ਬਂ, ਗੇਹਂ ਆਗਤਸ੍ਸ ਚਸ੍ਸ ਸਾਵਕਾਨਞ੍ਚ ਭਿਕ੍ਖਾਪਿ ਨ ਦਾਤਬ੍ਬਾ’’ਤਿ ਕਤਿਕਾ ਕਤਾ ਹੋਤਿ.

ਤਤ੍ਥ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਦਾਸੀ ਘਟੇਨ ਪਾਨੀਯਂ ਗਹੇਤ੍ਵਾ ਗਚ੍ਛਨ੍ਤੀ ਭਗਵਨ੍ਤਂ ਭਿਕ੍ਖੁਸਙ੍ਘਪਰਿਵੁਤਂ ਨਿਸਿਨ੍ਨਂ ਦਿਸ੍ਵਾ ਭਿਕ੍ਖੂ ਚ ਮਗ੍ਗਪਰਿਸ੍ਸਮੇਨ ਕਿਲਨ੍ਤੇ ਤਸਿਤੇ ਞਤ੍ਵਾ ਪਸਨ੍ਨਚਿਤ੍ਤਾ ਪਾਨੀਯਂ ਦਾਤੁਕਾਮਾ ਹੁਤ੍ਵਾ ‘‘ਯਦਿਪਿ ਮੇ ਗਾਮਵਾਸਿਨੋ ‘ਸਮਣਸ੍ਸ ਗੋਤਮਸ੍ਸ ਨ ਕਿਞ੍ਚਿ ਦਾਤਬ੍ਬਂ, ਸਾਮੀਚਿਕਮ੍ਮਮ੍ਪਿ ਨ ਕਾਤਬ੍ਬ’ਨ੍ਤਿ ਕਤਿਕਂ ਕਤ੍ਵਾ ਠਿਤਾ, ਏਵਂ ਸਨ੍ਤੇਪਿ ਯਦਿ ਅਹਂ ਈਦਿਸੇ ਪੁਞ੍ਞਕ੍ਖੇਤ੍ਤੇ ਦਕ੍ਖਿਣੇਯ੍ਯੇ ਲਭਿਤ੍ਵਾ ਪਾਨੀਯਦਾਨਮਤ੍ਤੇਨਾਪਿ ਅਤ੍ਤਨੋ ਪਤਿਟ੍ਠਂ ਨ ਕਰੇਯ੍ਯਂ, ਕਦਾਹਂ ਇਤੋ ਦੁਕ੍ਖਜੀਵਿਤਤੋ ਮੁਚ੍ਚਿਸ੍ਸਾਮਿ, ਕਾਮਂ ਮੇ ¶ ਅਯ੍ਯਕੋ ਸਬ੍ਬੇਪਿਮੇ ਗਾਮਵਾਸਿਨੋ ਮਂ ਹਨਨ੍ਤੁ ਵਾ ਬਨ੍ਧਨ੍ਤੁ ਵਾ, ਈਦਿਸੇ ਪੁਞ੍ਞਕ੍ਖੇਤ੍ਤੇ ਪਾਨੀਯਦਾਨਂ ¶ ਦਸ੍ਸਾਮਿ ਏਵਾ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਅਞ੍ਞਾਹਿ ਉਦਕਹਾਰਿਨੀਹਿ ਵਾਰਿਯਮਾਨਾਪਿ ਜੀਵਿਤੇ ਨਿਰਪੇਕ੍ਖਾ ਸੀਸਤੋ ਪਾਨੀਯਘਟਂ ਓਤਾਰੇਤ੍ਵਾ ਉਭੋਹਿ ਹਤ੍ਥੇਹਿ ਪਰਿਗ੍ਗਹੇਤ੍ਵਾ ਏਕਮਨ੍ਤੇ ਠਪੇਤ੍ਵਾ ਸਞ੍ਜਾਤਪੀਤਿਸੋਮਨਸ੍ਸਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਪਾਨੀਯੇਨ ਨਿਮਨ੍ਤੇਸਿ. ਭਗਵਾ ਤਸ੍ਸਾ ਚਿਤ੍ਤਪ੍ਪਸਾਦਂ ਓਲੋਕੇਤ੍ਵਾ ਤਂ ਅਨੁਗ੍ਗਣ੍ਹਨ੍ਤੋ ਪਾਨੀਯਂ ਪਰਿਸ੍ਸਾਵੇਤ੍ਵਾ ਹਤ੍ਥਪਾਦੇ ਧੋਵਿਤ੍ਵਾ ਪਾਨੀਯਂ ਪਿਵਿ, ਘਟੇ ਉਦਕਂ ਪਰਿਕ੍ਖਯਂ ਨ ਗਚ੍ਛਤਿ. ਸਾ ਤਂ ਦਿਸ੍ਵਾ ਪੁਨ ਪਸਨ੍ਨਚਿਤ੍ਤਾ ਏਕਸ੍ਸ ਭਿਕ੍ਖੁਸ੍ਸ ਅਦਾਸਿ, ਤਥਾ ਅਪਰਸ੍ਸ ਅਪਰਸ੍ਸਾਤਿ ਸਬ੍ਬੇਸਮ੍ਪਿ ਅਦਾਸਿ, ਉਦਕਂ ਨ ਖੀਯਤੇਵ. ਸਾ ਹਟ੍ਠਤੁਟ੍ਠਾ ਯਥਾਪੁਣ੍ਣੇਨ ਘਟੇਨ ਗੇਹਾਭਿਮੁਖੀ ਅਗਮਾਸਿ. ਤਸ੍ਸਾ ਸਾਮਿਕੋ ਬ੍ਰਾਹ੍ਮਣੋ ਪਾਨੀਯਸ੍ਸ ਦਿਨ੍ਨਭਾਵਂ ਸੁਤ੍ਵਾ ‘‘ਇਮਾਯ ਗਾਮਵਤ੍ਤਂ ਭਿਨ੍ਨਂ, ਅਹਞ੍ਚ ਗਾਰਯ੍ਹੋ ਕਤੋ’’ਤਿ ਕੋਧੇਨ ਪਜ੍ਜਲਨ੍ਤੋ ਤਟਤਟਾਯਮਾਨੋ ਤਂ ਭੂਮਿਯਂ ਪਾਤੇਤ੍ਵਾ ¶ ਹਤ੍ਥੇਹਿ ਚ ਪਾਦੇਹਿ ਚ ਪਹਰਿ. ਸਾ ਤੇਨ ਉਪਕ੍ਕਮੇਨ ਜੀਵਿਤਕ੍ਖਯਂ ਪਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤਿ, ਵਿਮਾਨਂ ਚਸ੍ਸਾ ਪਠਮਨਾਵਾਵਿਮਾਨੇ ਵੁਤ੍ਤਸਦਿਸਂ ਉਪ੍ਪਜ੍ਜਿ.

ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ ‘‘ਇਙ੍ਘ ਮੇ ਤ੍ਵਂ, ਆਨਨ੍ਦ, ਉਦਪਾਨਤੋ ਪਾਨੀਯਂ ਆਹਰਾ’’ਤਿ. ਥੇਰੋ ‘‘ਇਦਾਨਿ, ਭਨ੍ਤੇ, ਉਦਪਾਨੋ ਥੂਣੇਯ੍ਯਕੇਹਿ ਦੂਸਿਤੋ, ਨ ਸਕ੍ਕਾ ਪਾਨੀਯਂ ਆਹਰਿਤੁ’’ਨ੍ਤਿ ਆਹ. ਭਗਵਾ ਦੁਤਿਯਮ੍ਪਿ ਤਤਿਯਮ੍ਪਿ ਆਣਾਪੇਸਿ. ਤਤਿਯਵਾਰੇ ਥੇਰੋ ਭਗਵਤੋ ਪਤ੍ਤਂ ਆਦਾਯ ਉਦਪਾਨਾਭਿਮੁਖੋ ਅਗਮਾਸਿ. ਗਚ੍ਛਨ੍ਤੇ ਥੇਰੇ ਉਦਪਾਨੇ ਉਦਕਂ ਪਰਿਪੁਣ੍ਣਂ ਹੁਤ੍ਵਾ ਉਤ੍ਤਰਿਤ੍ਵਾ ਸਮਨ੍ਤਤੋ ਸਨ੍ਦਤਿ, ਸਬ੍ਬਂ ਤਿਣਭੁਸਂ ਉਪਲਵਿਤ੍ਵਾ ਸਯਮੇਵ ਅਪਗਚ੍ਛਤਿ. ਤੇਨ ਸਨ੍ਦਮਾਨੇਨ ਸਲਿਲੇਨ ਉਪਰੂਪਰਿ ਵਡ੍ਢਨ੍ਤੇਨ ਅਞ੍ਞੇ ਜਲਾਸਯੇ ਪੂਰੇਤ੍ਵਾ ਤਂ ਗਾਮਂ ਪਰਿਕ੍ਖਿਪਨ੍ਤੇਨ ਗਾਮਪ੍ਪਦੇਸੋ ¶ ਅਜ੍ਝੋਤ੍ਥਰੀਯਤਿ. ਤਂ ਪਾਟਿਹਾਰਿਯਂ ਦਿਸ੍ਵਾ ਬ੍ਰਾਹ੍ਮਣਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਭਗਵਨ੍ਤਂ ਖਮਾਪੇਸੁਂ, ਤਙ੍ਖਣਞ੍ਞੇਵ ਉਦਕੋਘੋ ਅਨ੍ਤਰਧਾਯਿ. ਤੇ ਭਗਵਤੋ ਚ ਭਿਕ੍ਖੁਸਙ੍ਘਸ੍ਸ ਚ ਨਿਵਾਸਟ੍ਠਾਨਂ ਸਂਵਿਧਾਯ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਦੁਤਿਯਦਿਵਸੇ ਮਹਾਦਾਨਂ ਸਜ੍ਜੇਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਪਰਿਵਿਸਿਤ੍ਵਾ ਸਬ੍ਬੇ ਥੂਣੇਯ੍ਯਕਾ ਬ੍ਰਾਹ੍ਮਣਗਹਪਤਿਕਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਪਯਿਰੁਪਾਸਨ੍ਤਾ ਨਿਸੀਦਿਂਸੁ.

ਤੇਨ ¶ ਚ ਸਮਯੇਨ ਸਾ ਦੇਵਤਾ ਅਤ੍ਤਨੋ ਸਮ੍ਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਤਸ੍ਸਾ ਕਾਰਣਂ ਉਪਧਾਰੇਨ੍ਤੀ ਤਂ ‘‘ਪਾਨੀਯਦਾਨ’’ਨ੍ਤਿ ਞਤ੍ਵਾ ਪੀਤਿਸੋਮਨਸ੍ਸਜਾਤਾ ‘‘ਹਨ੍ਦਾਹਂ ਇਦਾਨੇਵ ਭਗਵਨ੍ਤਂ ਵਨ੍ਦਿਸ੍ਸਾਮਿ, ਸਮ੍ਮਾਪਟਿਪਨ੍ਨੇਸੁ ਕਤਾਨਂ ਅਪ੍ਪਕਾਨਮ੍ਪਿ ਕਾਰਾਨਂ ਉਲ਼ਾਰਫਲਤਞ੍ਚ ਮਨੁਸ੍ਸਲੋਕੇ ਪਾਕਟਂ ਕਰਿਸ੍ਸਾਮੀ’’ਤਿ ਉਸ੍ਸਾਹਜਾਤਾ ਅਚ੍ਛਰਾਸਹਸ੍ਸਪਰਿਵਾਰਾ ਉਯ੍ਯਾਨਾਦਿਸਹਿਤੇਨ ਵਿਮਾਨੇਨ ਸਦ੍ਧਿਂਯੇਵ ਮਹਤਿਯਾ ਦੇਵਿਦ੍ਧਿਯਾ ਮਹਨ੍ਤੇਨ ਦੇਵਾਨੁਭਾਵੇਨ ਮਹਾਜਨਕਾਯਸ੍ਸ ਪਸ੍ਸਨ੍ਤਸ੍ਸੇਵ ਆਗਨ੍ਤ੍ਵਾ ਵਿਮਾਨਤੋ ਓਰੁਯ੍ਹ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਅਭਿਵਾਦੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਅਥ ਨਂ ਭਗਵਾ ਤਸ੍ਸਾ ਪਰਿਸਾਯ ਕਮ੍ਮਫਲਂ ਪਚ੍ਚਕ੍ਖਤੋ ਵਿਭਾਵੇਤੁਕਾਮੋ –

‘‘ਸੁਵਣ੍ਣਚ੍ਛਦਨਂ ਨਾਵਂ, ਨਾਰਿ ਆਰੁਯ੍ਹ ਤਿਟ੍ਠਸਿ;

ਓਗਾਹਸਿ ਪੋਕ੍ਖਰਣਿਂ, ਪਦ੍ਮਂ ਛਿਨ੍ਦਸਿ ਪਾਣਿਨਾ.

‘‘ਕੂਟਾਗਾਰਾ ਨਿਵੇਸਾ ਤੇ, ਵਿਭਤ੍ਤਾ ਭਾਗਸੋ ਮਿਤਾ;

ਦਦ੍ਦਲ੍ਲਮਾਨਾ ਆਭਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ.

‘‘ਕੇਨ ¶ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ,

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

‘‘ਸਾ ¶ ਦੇਵਤਾ ਅਤ੍ਤਮਨਾ, ਸਮ੍ਬੁਦ੍ਧੇਨੇਵ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਦਿਸ੍ਵਾਨ ਭਿਕ੍ਖੂ ਤਸਿਤੇ ਕਿਲਨ੍ਤੇ, ਉਟ੍ਠਾਯ ਪਾਤੁਂ ਉਦਕਂ ਅਦਾਸਿਂ.

‘‘ਯੋ ¶ ਵੇ ਕਿਲਨ੍ਤਾਨ ਪਿਪਾਸਿਤਾਨਂ, ਉਟ੍ਠਾਯ ਪਾਤੁਂ ਉਦਕਂ ਦਦਾਤਿ;

ਸੀਤੋਦਕਾ ਤਸ੍ਸ ਭਵਨ੍ਤਿ ਨਜ੍ਜੋ, ਪਹੂਤਮਲ੍ਯਾ ਬਹੁਪੁਣ੍ਡਰੀਕਾ.

‘‘ਤਂ ਆਪਗਾ ਅਨੁਪਰਿਯਨ੍ਤਿ ਸਬ੍ਬਦਾ, ਸੀਤੋਦਕਾ ਵਾਲੁਕਸਨ੍ਥਤਾ ਨਦੀ;

ਅਮ੍ਬਾ ਚ ਸਾਲਾ ਤਿਲਕਾ ਚ ਜਮ੍ਬੁਯੋ, ਉਦ੍ਦਾਲਕਾ ਪਾਟਲਿਯੋ ਚ ਫੁਲ੍ਲਾ.

‘‘ਤਂਭੂਮਿਭਾਗੇਹਿ ਉਪੇਤਰੂਪਂ, ਵਿਮਾਨਸੇਟ੍ਠਂ ਭੁਸ ਸੋਭਮਾਨਂ;

ਤਸ੍ਸੀਧ ਕਮ੍ਮਸ੍ਸ ਅਯਂ ਵਿਪਾਕੋ, ਏਤਾਦਿਸਂ ਪੁਞ੍ਞਕਤਾ ਲਭਨ੍ਤਿ.

‘‘ਕੂਟਾਗਾਰਾ ਨਿਵੇਸਾ ਮੇ, ਵਿਭਤ੍ਤਾ ਭਾਗਸੋ ਮਿਤਾ;

ਦਦ੍ਦਲ੍ਲਮਾਨਾ ਆਭਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਤਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ¶ ਤੇ ਬੁਦ੍ਧ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤਿ;

ਏਤਸ੍ਸ ਕਮ੍ਮਸ੍ਸ ਫਲਂ ਮਮੇਦਂ, ਅਤ੍ਥਾਯ ਬੁਦ੍ਧੋ ਉਦਕਂ ਅਪਾਯੀ’’ਤਿ. –

੬੩. ਤਤ੍ਥ ਕਿਞ੍ਚਾਪਿ ਸਾ ਦੇਵਤਾ ਯਦਾ ਭਗਵਾ ਪੁਚ੍ਛਿ, ਤਦਾ ਤਂ ਨਾਵਂ ਆਰੁਯ੍ਹ ਨ ਠਿਤਾ, ਨ ਪੋਕ੍ਖਰਣਿਂ ਓਗਾਹਤਿ, ਨਾਪਿ ਪਦੁਮਂ ¶ ਛਿਨ੍ਦਤਿ, ਕਮ੍ਮਾਨੁਭਾਵਚੋਦਿਤਾ ਪਨ ਅਭਿਣ੍ਹਂ ਜਲਵਿਹਾਰਪਸੁਤਾ ਤਥਾ ਕਰੋਤੀਤਿ ਤਂ ਕਿਰਿਯਾਵਿਚ੍ਛੇਦਂ ਦਸ੍ਸਨਵਸੇਨੇਵਂ ਵੁਤ੍ਤਂ. ਅਯਞ੍ਚ ਅਤ੍ਥੋ ਨ ਕੇਵਲਮਿਧੇਵ, ਅਥ ਖੋ ਹੇਟ੍ਠਿਮੇਸੁਪਿ ਏਵਮੇਵ ਦਟ੍ਠਬ੍ਬੋ.

੭੨. ਕੂਟਾਗਾਰਾਤਿ ¶ ਸੁਵਣ੍ਣਮਯਕਣ੍ਣਿਕਾਬਦ੍ਧਗੇਹਵਨ੍ਤੋ. ਨਿਵੇਸਾਤਿ ਨਿਵੇਸਨਾਨਿ, ਕਚ੍ਛਰਾਨੀਤਿ ਅਤ੍ਥੋ. ਤੇਨਾਹ ‘‘ਵਿਭਤ੍ਤਾ ਭਾਗਸੋ ਮਿਤਾ’’ਤਿ. ਤਾਨਿ ਹਿ ਚਤੁਸਾਲਭੂਤਾਨਿ ਅਞ੍ਞਮਞ੍ਞਸ੍ਸ ਪਟਿਬਿਮ੍ਬਭੂਤਾਨਿ ਵਿਯ ਪਟਿਵਿਭਤ੍ਤਰੂਪਾਨਿ ਸਮਪ੍ਪਮਾਣਤਾਯ ਭਾਗਸੋ ਮਿਤਾਨਿ ਵਿਯ ਹੋਨ੍ਤਿ. ਦਦ੍ਦਲ੍ਲਮਾਨਾਤਿ ਅਤਿਵਿਯ ਵਿਜ੍ਜੋਤਮਾਨਾ. ਆਭਨ੍ਤੀਤਿ ਮਣਿਰਤਨਕਨਕਰਂਸਿਜਾਲੇਹਿ ਓਭਾਸੇਨ੍ਤਿ.

੭੪. ਮਮਾਤਿ ਇਦਂ ਪੁਬ੍ਬਾਪਰਾਪੇਕ੍ਖਂ, ਮਮ ਕਮ੍ਮਸ੍ਸ ਮਮ ਅਤ੍ਥਾਯਾਤਿ ਅਯਞ੍ਹੇਤ੍ਥ ਯੋਜਨਾ. ਉਦਕਂ ਅਪਾਯੀਤਿ ਯਦੇਤਂ ਉਦਕਦਾਨਂ ਵੁਤ੍ਤਂ, ਏਤਸ੍ਸ ਪੁਞ੍ਞਕਮ੍ਮਸ੍ਸ ਇਦਂ ਫਲਂ ਯਾਯਂ ਦਿਬ੍ਬਸਮ੍ਪਤ੍ਤਿ, ਯਸ੍ਮਾ ਮਮਤ੍ਥਾਯ ਸਦੇਵਕੇ ਲੋਕੇ ਅਗ੍ਗਦਕ੍ਖਿਣੇਯ੍ਯੋ ਬੁਦ੍ਧੋ ਭਗਵਾ ਮਯਾ ਦਿਨ੍ਨਂ ਉਦਕਂ ਅਪਾਯੀਤਿ. ਸੇਸਂ ਵੁਤ੍ਤਨਯਮੇਵ.

ਏਵਂ ਪਸਨ੍ਨਮਾਨਸਾਯ ਦੇਵਤਾਯ ਭਗਵਾ ਸਾਮੁਕ੍ਕਂਸਿਕਂ ਧਮ੍ਮਦੇਸਨਂ ਕਰੋਨ੍ਤੋ ਸਚ੍ਚਾਨਿ ਪਕਾਸੇਸਿ. ਸਾ ਦੇਸਨਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਹਿ, ਸਮ੍ਪਤ੍ਤਪਰਿਸਾਯਪਿ ਧਮ੍ਮਦੇਸਨਾ ਸਾਤ੍ਥਿਕਾ ਅਹੋਸਿ.

ਤਤਿਯਨਾਵਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਅਭਿਕ੍ਕਨ੍ਤੇਨ ¶ ਵਣ੍ਣੇਨਾਤਿ ਦੀਪਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਸਾਵਤ੍ਥਿਯਂ ਵਿਹਰਨ੍ਤੇ ਉਪੋਸਥਦਿਵਸੇ ਸਮ੍ਬਹੁਲਾ ¶ ਉਪਾਸਕਾ ਉਪੋਸਥਿਕਾ ਹੁਤ੍ਵਾ ਪੁਰੇਭਤ੍ਤਂ ਯਥਾਵਿਭਵਂ ਦਾਨਂ ਦਤ੍ਵਾ ਕਾਲਸ੍ਸੇਵ ਭੁਞ੍ਜਿਤ੍ਵਾ ਸੁਦ੍ਧਵਤ੍ਥਨਿਵਤ੍ਥਾ ਸੁਦ੍ਧੁਤ੍ਤਰਾਸਙ੍ਗਾ ਗਨ੍ਧਮਾਲਾਦਿਹਤ੍ਥਾ ਪਚ੍ਛਾਭਤ੍ਤਂ ਵਿਹਾਰਂ ਗਨ੍ਤ੍ਵਾ ਮਨੋਭਾਵਨੀਯੇ ਭਿਕ੍ਖੂ ਪਯਿਰੁਪਾਸਿਤ੍ਵਾ ਸਾਯਨ੍ਹੇ ਧਮ੍ਮਂ ਸੁਣਨ੍ਤਿ. ਵਿਹਾਰੇਯੇਵ ਵਸਿਤੁਕਾਮਾਨਂ ਤੇਸਂ ਧਮ੍ਮਂ ਸੁਣਨ੍ਤਾਨਂਯੇਵ ਸੂਰਿਯੋ ਅਤ੍ਥਙ੍ਗਤੋ, ਅਨ੍ਧਕਾਰੋ ਜਾਤੋ. ਤਤ੍ਥੇਕਾ ਅਞ੍ਞਤਰਾ ਇਤ੍ਥੀ ‘‘ਇਦਾਨਿ ਦੀਪਾਲੋਕਂ ਕਾਤੁਂ ਯੁਤ੍ਤ’’ਨ੍ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਗੇਹਤੋ ਪਦੀਪੇਯ੍ਯਂ ਆਹਰਾਪੇਤ੍ਵਾ ਪਦੀਪਂ ਉਜ੍ਜਾਲੇਤ੍ਵਾ ਧਮ੍ਮਾਸਨਸ੍ਸ ਪੁਰਤੋ ਠਪੇਤ੍ਵਾ ਧਮ੍ਮਂ ਸੁਣਿ. ਸਾ ਤੇਨ ਪਦੀਪਦਾਨੇਨ ਅਤ੍ਤਮਨਾ ਪੀਤਿਸੋਮਨਸ੍ਸਜਾਤਾ ਹੁਤ੍ਵਾ ਵਨ੍ਦਿਤ੍ਵਾ ਅਤ੍ਤਨੋ ਗੇਹਂ ਗਤਾ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ¶ ਜੋਤਿਰਸਵਿਮਾਨੇ ਨਿਬ੍ਬਤ੍ਤਿ. ਸਰੀਰਸੋਭਾ ਪਨਸ੍ਸਾ ਅਤਿਵਿਯ ਪਭਸ੍ਸਰਾ ਅਞ੍ਞੇ ਦੇਵੇ ਅਭਿਭਵਿਤ੍ਵਾ ਦਸ ਦਿਸਾ ਓਭਾਸਯਮਾਨਾ ਤਿਟ੍ਠਤਿ. ਅਥੇਕਦਿਵਸਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋਤਿ ਸਬ੍ਬਂ ਹੇਟ੍ਠਾ ਆਗਤਨਯੇਨੇਵ ਵੇਦਿਤਬ੍ਬਂ. ਇਧ ਪਨ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਕੇਨ ਤ੍ਵਂ ਵਿਮਲੋਭਾਸਾ, ਅਤਿਰੋਚਸਿ ਦੇਵਤਾ;

ਕੇਨ ਤੇ ਸਬ੍ਬਗਤ੍ਤੇਹਿ, ਸਬ੍ਬਾ ਓਭਾਸਤੇ ਦਿਸਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

‘‘ਸਾ ¶ ¶ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਤਮਨ੍ਧਕਾਰਮ੍ਹਿ ਤਿਮੀਸਿਕਾਯਂ, ਪਦੀਪਕਾਲਮ੍ਹਿ ਅਦਾਸਿ ਦੀਪਂ.

‘‘ਯੋ ਅਨ੍ਧਕਾਰਮ੍ਹਿ ਤਿਮੀਸਿਕਾਯਂ, ਪਦੀਪਕਾਲਮ੍ਹਿ ਦਦਾਤਿ ਦੀਪਂ;

ਉਪ੍ਪਜ੍ਜਤਿ ਜੋਤਿਰਸਂ ਵਿਮਾਨਂ, ਪਹੂਤਮਲ੍ਯਂ ਬਹੁਪੁਣ੍ਡਰੀਕਂ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਤੇਨਾਹਂ ¶ ਵਿਮਲੋਭਾਸਾ, ਅਤਿਰੋਚਾਮਿ ਦੇਵਤਾ;

ਤੇਨ ਮੇ ਸਬ੍ਬਗਤ੍ਤੇਹਿ, ਸਬ੍ਬਾ ਓਭਾਸਤੇ ਦਿਸਾ.

‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

੭੫. ਤਤ੍ਥ ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਏਤ੍ਥ ਅਭਿਕ੍ਕਨ੍ਤ-ਸਦ੍ਦੋ ‘‘ਅਭਿਕ੍ਕਨ੍ਤਾ, ਭਨ੍ਤੇ, ਰਤ੍ਤਿ, ਨਿਕ੍ਖਨ੍ਤੋ ਪਠਮੋ ਯਾਮੋ’’ਤਿਆਦੀਸੁ (ਅ. ਨਿ. ੮.੨੦; ਉਦਾ. ੪੫; ਚੂਲ਼ਵ. ੩੮੩) ਖਯੇ ਆਗਤੋ. ‘‘ਅਯਂ ਇਮੇਸਂ ਚਤੁਨ੍ਨਂ ਪੁਗ੍ਗਲਾਨਂ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚਾ’’ਤਿਆਦੀਸੁ (ਅ. ਨਿ. ੪.੧੦੦) ਸੁਨ੍ਦਰੇ. ‘‘ਅਭਿਕ੍ਕਨ੍ਤਂ, ਭਨ੍ਤੇ, ਅਭਿਕ੍ਕਨ੍ਤਂ, ਭਨ੍ਤੇ’’ਤਿਆਦੀਸੁ (ਦੀ. ਨਿ. ੧.੨੫੦; ਪਾਰਾ. ੧੫) ਅਬ੍ਭਨੁਮੋਦਨੇ. ‘‘ਅਭਿਕ੍ਕਨ੍ਤੇਨ ¶ ਵਣ੍ਣੇਨ, ਸਬ੍ਬਾ ਓਭਾਸਯਂ ਦਿਸਾ’’ਤਿਆਦੀਸੁ (ਵਿ. ਵ. ੮੫੭) ਅਭਿਰੂਪੇ. ਇਧਾਪਿ ਅਭਿਰੂਪੇ ਏਵ ਦਟ੍ਠਬ੍ਬੋ. ਤਸ੍ਮਾ ਅਭਿਕ੍ਕਨ੍ਤੇਨਾਤਿ ਅਤਿਕਨ੍ਤੇਨ ਅਤਿਮਨਾਪੇਨ, ਅਭਿਰੂਪੇਨਾਤਿ ਅਤ੍ਥੋ. ਵਣ੍ਣੇਨਾਤਿ ਛਵਿਵਣ੍ਣੇਨ. ਓਭਾਸੇਨ੍ਤੀ ਦਿਸਾ ਸਬ੍ਬਾਤਿ ਸਬ੍ਬਾਪਿ ਦਸ ਦਿਸਾ ਜੋਤੇਨ੍ਤੀ ਏਕਾਲੋਕਂ ਕਰੋਨ੍ਤੀ. ਕਿਂ ਵਿਯਾਤਿ ਆਹ ‘‘ਓਸਧੀ ਵਿਯ ਤਾਰਕਾ’’ਤਿ. ਉਸ੍ਸਨ੍ਨਾ ਪਭਾ ਏਤਾਯ ਧੀਯਤਿ, ਓਸਧੀਨਂ ¶ ਵਾ ਅਨੁਬਲਪ੍ਪਦਾਯਿਕਾਤਿ ਕਤ੍ਵਾ ‘‘ਓਸਧੀ’’ਤਿ ਲਦ੍ਧਨਾਮਾ ਤਾਰਕਾ ਯਥਾ ਸਮਨ੍ਤਤੋ ਆਲੋਕਂ ਕੁਰੁਮਾਨਾ ਤਿਟ੍ਠਤਿ, ਏਵਮੇਵ ਤ੍ਵਂ ਸਬ੍ਬਾ ਦਿਸਾ ਓਭਾਸਯਨ੍ਤੀ ਤਿਟ੍ਠਸੀਤਿ.

੭੭. ਸਬ੍ਬਗਤ੍ਤੇਹੀਤਿ ਸਬ੍ਬੇਹਿ ਸਰੀਰਾਵਯਵੇਹਿ, ਸਕਲੇਹਿ ਅਙ੍ਗਪਚ੍ਚਙ੍ਗੇਹਿ ਓਭਾਸਤੀਤਿ ਅਧਿਪ੍ਪਾਯੋ, ਹੇਤੁਮ੍ਹਿ ਚੇਤਂ ਕਰਣਵਚਨਂ. ਸਬ੍ਬਾ ਓਭਾਸਤੇ ਦਿਸਾਤਿ ਸਬ੍ਬਾਪਿ ਦਸਦਿਸਾ ਵਿਜ੍ਜੋਤਤਿ. ‘‘ਓਭਾਸਰੇ’’ਤਿਪਿ ਪਠਨ੍ਤਿ, ਤੇਸਂ ਸਬ੍ਬਾ ਦਿਸਾਤਿ ਬਹੁਵਚਨਮੇਵ ਦਟ੍ਠਬ੍ਬਂ.

੮੧. ਪਦੀਪਕਾਲਮ੍ਹੀਤਿ ਪਦੀਪਕਰਣਕਾਲੇ, ਪਦੀਪੁਜ੍ਜਲਨਯੋਗ੍ਗੇ ਅਨ੍ਧਕਾਰੇਤਿ ਅਤ੍ਥੋ. ਤੇਨਾਹ ‘‘ਯੋ ਅਨ੍ਧਕਾਰਮ੍ਹਿ ਤਿਮੀਸਿਕਾਯ’’ਨ੍ਤਿ, ਬਹਲੇ ¶ ਮਹਨ੍ਧਕਾਰੇਤਿ ਅਤ੍ਥੋ. ਦਦਾਤਿ ਦੀਪਨ੍ਤਿ ਪਦੀਪਂ ਉਜ੍ਜਾਲੇਨ੍ਤੋ ਵਾ ਅਨੁਜ੍ਜਾਲੇਨ੍ਤੋ ਵਾ ਪਦੀਪਦਾਨਂ ਦਦਾਤਿ, ਪਦੀਪੋਪਕਰਣਾਨਿ ਦਕ੍ਖਿਣੇਯ੍ਯੇ ਉਦ੍ਦਿਸ੍ਸ ਪਰਿਚ੍ਚਜਤਿ. ਉਪਪਜ੍ਜਤਿ ਜੋਤਿਰਸਂ ਵਿਮਾਨਨ੍ਤਿ ਪਟਿਸਨ੍ਧਿਗ੍ਗਹਣਵਸੇਨ ਜੋਤਿਰਸਂ ਵਿਮਾਨਂ ਉਪਗਚ੍ਛਤੀਤਿ. ਸੇਸਂ ਵੁਤ੍ਤਨਯਮੇਵ.

ਅਥ ਯਥਾਪੁਚ੍ਛਿਤੇ ਅਤ੍ਥੇ ਦੇਵਤਾਯ ਕਥਿਤੇ ਥੇਰੋ ਤਮੇਵ ਕਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਦਾਨਾਦਿਕਥਾਯ ਤਸ੍ਸਾ ਕਲ੍ਲਚਿਤ੍ਤਾਦਿਭਾਵਂ ਞਤ੍ਵਾ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਸਪਰਿਵਾਰਾ ਸਾ ਦੇਵਤਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਥੇਰੋ ਤਤੋ ਆਗਨ੍ਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ, ਭਗਵਾ ਤਸ੍ਮਿਂ ਵਤ੍ਥੁਸ੍ਮਿਂ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ ¶ . ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਜਾਤਾ, ਮਹਾਜਨੋ ਵਿਸੇਸਤੋ ਦੀਪਦਾਨੇ ਸਕ੍ਕਚ੍ਚਕਾਰੀ ਅਹੋਸੀਤਿ.

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਤਿਲਦਕ੍ਖਿਣਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਚ ਸਮਯੇਨ ਰਾਜਗਹੇ ਅਞ੍ਞਤਰਾ ਇਤ੍ਥੀ ਗਬ੍ਭਿਨੀ ਤਿਲੇ ਧੋਵਿਤ੍ਵਾ ਆਤਪੇ ਸੁਕ੍ਖਾਪੇਤਿ ਤੇਲਂ ਕਾਤੁਕਾਮਾ. ਸਾ ਚ ਪਰਿਕ੍ਖੀਣਾਯੁਕਾ ਤਂ ਦਿਵਸਮੇਵ ਚਵਨਧਮ੍ਮਾ, ਨਿਰਯਸਂਵਤ੍ਤਨਿਕਂ ਚਸ੍ਸਾ ਕਮ੍ਮਂ ਓਕਾਸਂ ਕਤ੍ਵਾ ਠਿਤਂ. ਅਥ ਨਂ ਭਗਵਾ ਪਚ੍ਚੂਸਵੇਲਾਯਂ ਲੋਕਂ ਵੋਲੋਕੇਨ੍ਤੋ ਦਿਬ੍ਬਚਕ੍ਖੁਨਾ ਦਿਸ੍ਵਾ ਚਿਨ੍ਤੇਸਿ ‘‘ਅਯਂ ਇਤ੍ਥੀ ਅਜ੍ਜ ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤਿਸ੍ਸਤਿ, ਯਂਨੂਨਾਹਂ ਤਿਲਭਿਕ੍ਖਾਪਟਿਗ੍ਗਹਣੇਨ ਤਂ ਸਗ੍ਗੂਪਗਂ ਕਰੇਯ੍ਯ’’ਨ੍ਤਿ. ਸੋ ਸਾਵਤ੍ਥਿਤੋ ਤਙ੍ਖਣੇਨੇਵ ਰਾਜਗਹਂ ਗਨ੍ਤ੍ਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹੇ ਪਿਣ੍ਡਾਯ ¶ ਚਰਨ੍ਤੋ ਅਨੁਪੁਬ੍ਬੇਨ ਤਸ੍ਸਾ ਗੇਹਦ੍ਵਾਰਂ ਪਾਪੁਣਿ. ਸਾ ਇਤ੍ਥੀ ਭਗਵਨ੍ਤਂ ਪਸ੍ਸਿਤ੍ਵਾ ਸਞ੍ਜਾਤਪੀਤਿਸੋਮਨਸ੍ਸਾ ਸਹਸਾ ਉਟ੍ਠਹਿਤ੍ਵਾ ਕਤਞ੍ਜਲੀ ਅਞ੍ਞਂ ਦਾਤਬ੍ਬਯੁਤ੍ਤਕਂ ਅਪਸ੍ਸਨ੍ਤੀ ਹਤ੍ਥਪਾਦੇ ਧੋਵਿਤ੍ਵਾ ਤਿਲੇ ਰਾਸਿਂ ਕਤ੍ਵਾ ਉਭੋਹਿ ਹਤ੍ਥੇਹਿ ਪਰਿਗ੍ਗਹੇਤ੍ਵਾ ਅਞ੍ਜਲਿਪੂਰਂ ਤਿਲਂ ਭਗਵਤੋ ਪਤ੍ਤੇ ਆਕਿਰਿਤ੍ਵਾ ਭਗਵਨ੍ਤਂ ਵਨ੍ਦਿ. ਤਂ ਭਗਵਾ ਅਨੁਕਮ੍ਪਮਾਨੋ ¶ ‘‘ਸੁਖਿਨੀ ਹੋਹੀ’’ਤਿ ਵਤ੍ਵਾ ਪਕ੍ਕਾਮਿ. ਸਾ ਤਸ੍ਸਾ ਰਤ੍ਤਿਯਾ ਪਚ੍ਚੂਸਸਮਯੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਸੁਤ੍ਤਪਬੁਦ੍ਧਾ ਵਿਯ ਨਿਬ੍ਬਤ੍ਤਿ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਤਂ ਅਚ੍ਛਰਾਸਹਸ੍ਸਪਰਿਵੁਤਂ ਮਹਤਿਯਾ ਦੇਵਿਦ੍ਧਿਯਾ ਵਿਰੋਚਮਾਨਮੁਪਗਨ੍ਤ੍ਵਾ –

‘‘ਅਭਿਕ੍ਕਨ੍ਤੇਨ ¶ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ.

‘‘ਅਦ੍ਦਸਂ ਵਿਰਜਂ ਬੁਦ੍ਧਂ, ਵਿਪ੍ਪਸਨ੍ਨਮਨਾਵਿਲਂ;

ਆਸਜ੍ਜ ਦਾਨਂ ਅਦਾਸਿਂ, ਅਕਾਮਾ ਤਿਲਦਕ੍ਖਿਣਂ;

ਦਕ੍ਖਿਣੇਯ੍ਯਸ੍ਸ ਬੁਦ੍ਧਸ੍ਸ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਤੇਨ ¶ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

੯੦. ਤਤ੍ਥ ¶ ਆਸਜ੍ਜਾਤਿ ਅਯਂ ਆਸਜ੍ਜ-ਸਦ੍ਦੋ ‘‘ਆਸਜ੍ਜ ਨਂ ਤਥਾਗਤ’’ਨ੍ਤਿਆਦੀਸੁ (ਚੂਲ਼ਵ. ੩੫੦) ਘਟ੍ਟੇਨ ਆਗਤੋ. ‘‘ਆਸਜ੍ਜ ਦਾਨਂ ਦੇਤੀ’’ਤਿਆਦੀਸੁ (ਦੀ. ਨਿ. ੩.੩੩੬; ਅ. ਨਿ. ੮.੩੧) ਸਮਾਗਮੇ. ਇਧਾਪਿ ਸਮਾਗਮੇਯੇਵ ਦਟ੍ਠਬ੍ਬੋ. ਤਸ੍ਮਾ ਆਸਜ੍ਜਾਤਿ ਸਮਾਗਨ੍ਤ੍ਵਾ, ਸਮਵਾਯੇਨ ਸਮ੍ਪਤ੍ਵਾਤਿ ਅਤ੍ਥੋ. ਤੇਨਾਹ ‘‘ਅਕਾਮਾ’’ਤਿ. ਸਾ ਹਿ ਦੇਯ੍ਯਧਮ੍ਮਸਂਵਿਧਾਨਪੁਬ੍ਬਕਂ ਪੁਰਿਮਸਿਦ੍ਧਂ ਦਾਨਸਙ੍ਕਪ੍ਪਂ ਵਿਨਾ ਸਹਸਾ ਸਮ੍ਪਤ੍ਤੇ ਭਗਵਤਿ ਪਵਤ੍ਤਿਤਂ ¶ ਤਿਲਦਾਨਂ ਸਨ੍ਧਾਯਾਹ ‘‘ਆਸਜ੍ਜ ਦਾਨਂ ਅਦਾਸਿਂ, ਅਕਾਮਾ ਤਿਲਦਕ੍ਖਿਣ’’ਨ੍ਤਿ. ਸੇਸਂ ਵੁਤ੍ਤਨਯਮੇਵ.

ਤਿਲਦਕ੍ਖਿਣਵਿਮਾਨਵਣ੍ਣਨਾ ਨਿਟ੍ਠਿਤਾ.

ਕੋਞ੍ਚਾ ਮਯੂਰਾ ਦਿਵਿਯਾ ਚ ਹਂਸਾਤਿ ਪਤਿਬ੍ਬਤਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤਤ੍ਥ ਅਞ੍ਞਤਰਾ ਇਤ੍ਥੀ ਪਤਿਬ੍ਬਤਾ ਅਹੋਸਿ ਭਤ੍ਤੁ ਅਨੁਕੂਲਵਤ੍ਤਿਨੀ ਖਮਾ ਪਦਕ੍ਖਿਣਗ੍ਗਾਹਿਨੀ, ਨ ਕੁਦ੍ਧਾਪਿ ਪਟਿਪ੍ਫਰਤਿ, ਅਫਰੁਸਵਾਚਾ ਸਚ੍ਚਵਾਦਿਨੀ ਸਦ੍ਧਾ ਪਸਨ੍ਨਾ ਯਥਾਵਿਭਵਂ ਦਾਨਾਨਿ ਚ ਅਦਾਸਿ. ਸਾ ਕੇਨਚਿਦੇਵ ਰੋਗੇਨ ਫੁਟ੍ਠਾ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪੁਰਿਮਨਯੇਨੇਵ ਦੇਵਚਾਰਿਕਂ ਚਰਨ੍ਤੋ ਤਂ ਦੇਵਧੀਤਰਂ ਮਹਤਿਂ ਸਮ੍ਪਤ੍ਤਿਂ ਅਨੁਭਵਨ੍ਤਿਂ ਦਿਸ੍ਵਾ ਤਸ੍ਸਾ ਸਮੀਪਮੁਪਗਤੋ. ਸਾ ਅਚ੍ਛਰਾਸਹਸ੍ਸਪਰਿਵੁਤਾ ਸਟ੍ਠਿਸਕਟਭਾਰਾਲਙ੍ਕਾਰਪਟਿਮਣ੍ਡਿਤਤ੍ਤਭਾਵਾ ਥੇਰਸ੍ਸ ਪਾਦੇਸੁ ਸਿਰਸਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਥੇਰੋਪਿ ਤਾਯ ਕਤਪੁਞ੍ਞਕਮ੍ਮਂ ਪੁਚ੍ਛਨ੍ਤੋ –

‘‘ਕੋਞ੍ਚਾ ਮਯੂਰਾ ਦਿਵਿਯਾ ਚ ਹਂਸਾ, ਵਗ੍ਗੁਸ੍ਸਰਾ ਕੋਕਿਲਾ ਸਮ੍ਪਤਨ੍ਤਿ;

ਪੁਪ੍ਫਾਭਿਕਿਣ੍ਣਂ ਰਮ੍ਮਮਿਦਂ ਵਿਮਾਨਂ, ਅਨੇਕਚਿਤ੍ਤਂ ਨਰਨਾਰਿਸੇਵਿਤਂ.

‘‘ਤਤ੍ਥਚ੍ਛਸਿ ¶ ਦੇਵਿ ਮਹਾਨੁਭਾਵੇ, ਇਦ੍ਧੀ ਵਿਕੁਬ੍ਬਨ੍ਤਿ ਅਨੇਕਰੂਪਾ;

ਇਮਾ ¶ ਚ ਤੇ ਅਚ੍ਛਰਾਯੋ ਸਮਨ੍ਤਤੋ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ ਚ.

‘‘ਦੇਵਿਦ੍ਧਿਪਤ੍ਤਾਸਿ ¶ ਮਹਾਨੁਭਾਵੇ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਆਹ;

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪਤਿਬ੍ਬਤਾਨਞ੍ਞਮਨਾ ਅਹੋਸਿਂ;

ਮਾਤਾਵ ਪੁਤ੍ਤਂ ਅਨੁਰਕ੍ਖਮਾਨਾ, ਕੁਦ੍ਧਾਪਿਹਂ ਨਪ੍ਫਰੁਸਂ ਅਵੋਚਂ.

‘‘ਸਚ੍ਚੇ ਠਿਤਾ ਮੋਸਵਜ੍ਜਂ ਪਹਾਯ, ਦਾਨੇ ਰਤਾ ਸਙ੍ਗਹਿਤਤ੍ਤਭਾਵਾ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤਾ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

੯੩. ਤਤ੍ਥ ਕੋਞ੍ਚਾਤਿ ਕੋਞ੍ਚਸਕੁਣਾ, ਯੇ ‘‘ਸਾਰਸਾ’’ਤਿਪਿ ਵੁਚ੍ਚਨ੍ਤਿ. ਮਯੂਰਾਤਿ ਮੋਰਾ. ਦਿਵਿਯਾਤਿ ਦਿਬ੍ਬਾਨੁਭਾਵਾ. ਇਦਞ੍ਹਿ ਪਦਂ ‘‘ਦਿਵਿਯਾ ਕੋਞ੍ਚਾ, ਦਿਵਿਯਾ ਮਯੂਰਾ’’ਤਿਆਦਿਨਾ ਚਤੂਹਿਪਿ ਪਦੇਹਿ ਯੋਜੇਤਬ੍ਬਂ. ਹਂਸਾਤਿ ਸੁਵਣ੍ਣਹਂਸਾਦਿਹਂਸਾ. ਵਗ੍ਗੁਸ੍ਸਰਾਤਿ ਮਧੁਰਸ੍ਸਰਾ. ਕੋਕਿਲਾਤਿ ਕਾਲ਼ਕੋਕਿਲਾ ਚੇਵ ਸੁਕ੍ਕਕੋਕਿਲਾ ਚ. ਸਮ੍ਪਤਨ੍ਤੀਤਿ ਦੇਵਤਾਯ ਅਭਿਰਮਣਤ੍ਥਂ ਕੀਲ਼ਨ੍ਤਾ ¶ ਲਲ਼ਨ੍ਤਾ ਸਮਨ੍ਤਤੋ ਪਤਨ੍ਤਿ ਵਿਚਰਨ੍ਤਿ. ਕੋਞ੍ਚਾਦਿਰੂਪੇਨ ਹਿ ਦੇਵਤਾਯ ਰਤਿਜਨਨਤ੍ਥਂ ਪਰਿਵਾਰਭੂਤਾ ਦੇਵਤਾ ਕੀਲ਼ਨ੍ਤਾ ¶ ¶ ਲਲ਼ਨ੍ਤਾ ‘‘ਕੋਞ੍ਚਾ’’ਤਿਆਦਿਨਾ ਵੁਤ੍ਤਾ. ਪੁਪ੍ਫਾਭਿਕਿਣ੍ਣਨ੍ਤਿ ਗਨ੍ਥਿਤਾਗਨ੍ਥਿਤੇਹਿ ਨਾਨਾਵਿਧਰਤਨਕੁਸੁਮੇਹਿ ਓਕਿਣ੍ਣਂ. ਰਮ੍ਮਨ੍ਤਿ ਰਮਣੀਯਂ, ਮਨੋਰਮਨ੍ਤਿ ਅਤ੍ਥੋ. ਅਨੇਕਚਿਤ੍ਤਨ੍ਤਿ ਅਨੇਕੇਹਿ ਉਯ੍ਯਾਨਕਪ੍ਪਰੁਕ੍ਖਪੋਕ੍ਖਰਣਿਆਦੀਹਿ ਵਿਮਾਨੇਸੁ ਚ ਅਨੇਕੇਹਿ ਭਿਤ੍ਤਿਵਿਸੇਸਾਦੀਹਿ ਚਿਤ੍ਤਂ. ਨਰਨਾਰਿਸੇਵਿਤਨ੍ਤਿ ਪਰਿਵਾਰਭੂਤੇਹਿ ਦੇਵਪੁਤ੍ਤੇਹਿ ਦੇਵਧੀਤਾਹਿ ਚ ਉਪਸੇਵਿਤਂ.

੯੪. ਇਦ੍ਧੀ ਵਿਕੁਬ੍ਬਨ੍ਤਿ ਅਨੇਕਰੂਪਾਤਿ ਨਾਨਾਰੂਪਾਨਂ ਵਿਦਂਸਨੇਨ ਅਨੇਕਰੂਪਾ ਕਮ੍ਮਾਨੁਭਾਵਸਿਦ੍ਧਾ ਇਦ੍ਧੀ ਵਿਕੁਬ੍ਬਨ੍ਤੀ ਵਿਕੁਬ੍ਬਨਿਦ੍ਧਿਯੋ ਵਲਞ੍ਜੇਨ੍ਤੀ ਅਚ੍ਛਸੀਤਿ ਯੋਜਨਾ.

੯੭. ਅਨਞ੍ਞਮਨਾਤਿ ਪਤਿਬ੍ਬਤਾ, ਪਤਿਤੋ ਅਞ੍ਞਸ੍ਮਿਂ ਮਨੋ ਏਤਿਸ੍ਸਾਤਿ ਅਞ੍ਞਮਨਾ, ਨ ਅਞ੍ਞਮਨਾਤਿ ਅਨਞ੍ਞਮਨਾ, ਮਯ੍ਹਂ ਸਾਮਿਕਤੋ ਅਞ੍ਞਸ੍ਮਿਂ ਪੁਰਿਸੇ ਪਾਪਕਂ ਚਿਤ੍ਤਂ ਨ ਉਪ੍ਪਾਦੇਸਿਨ੍ਤਿ ਅਤ੍ਥੋ. ਮਾਤਾਵ ਪੁਤ੍ਤਂ ਅਨੁਰਕ੍ਖਮਾਨਾਤਿ ਯਥਾ ਮਾਤਾ ਪੁਤ੍ਤਂ, ਏਵਂ ਮਯ੍ਹਂ ਸਾਮਿਕਂ, ਸਬ੍ਬੇਪਿ ਵਾ ਸਤ੍ਤੇ ਹਿਤੇਸਿਤਾਯ ਅਹਿਤਾਪਨਯਨਕਾਮਤਾਯ ਚ ਅਨੁਦ੍ਦਯਮਾਨਾ. ਕੁਦ੍ਧਾਪਿਹਂ ਨਪ੍ਫਰੁਸਂ ਅਵੋਚਨ੍ਤਿ ਪਰੇਨ ਕਤਂ ਅਫਾਸੁਕਂ ਪਟਿਚ੍ਚ ਕੁਦ੍ਧਾਪਿ ਸਮਾਨਾ ਅਹਂ ਫਰੁਸਵਚਨਂ ਨ ਕਥੇਸਿਂ, ਅਞ੍ਞਦਤ੍ਥੁ ਪਿਯਵਚਨਮੇਵ ਅਭਾਸਿਨ੍ਤਿ ਅਧਿਪ੍ਪਾਯੋ.

੯੮. ਸਚ੍ਚੇ ਠਿਤਾਤਿ ਸਚ੍ਚੇ ਪਤਿਟ੍ਠਿਤਾ. ਯਸ੍ਮਾ ਮੁਸਾਵਾਦਾ ਵੇਰਮਣਿਯਾ ਸਚ੍ਚੇ ਪਤਿਟ੍ਠਿਤਾ ਨਾਮ ਹੋਤਿ, ਨ ਕਦਾਚਿ ਸਚ੍ਚਵਚਨਮਤ੍ਤੇਨਾਤਿ ¶ ਆਹ – ਮੋਸਵਜ੍ਜਂ ਪਹਾਯਾਤਿ ਮੁਸਾਵਾਦਂ ਪਹਾਯ. ਦਾਨੇ ਰਤਾਤਿ ਦਾਨੇ ਅਭਿਰਤਾ, ਯੁਤ੍ਤਪ੍ਪਯੁਤ੍ਤਾਤਿ ਅਤ੍ਥੋ. ਸਙ੍ਗਹਿਤਤ੍ਤਭਾਵਾਤਿ ਸਙ੍ਗਹਵਤ੍ਥੂਹਿ ਅਤ੍ਤਾਨਂ ਵਿਯ ਸਭਾਵੇਨੇਵ ਪਰੇਸਂ ਸਙ੍ਗਣ੍ਹਨਸੀਲਾ ਅਨ੍ਨਞ੍ਚ ਪਾਨਞ੍ਚ ਕਮ੍ਮਫਲਸਦ੍ਧਾਯ ਪਸਨ੍ਨਚਿਤ੍ਤਾ ਸਕ੍ਕਚ੍ਚਂ ਚਿਤ੍ਤੀਕਾਰੇਨ ਅਦਾਸਿਂ, ਅਞ੍ਞਞ੍ਚ ਵਤ੍ਥਾਦਿਦਾਨਂ ਵਿਪੁਲਂ ਉਲ਼ਾਰਂ ਅਦਾਸਿਨ੍ਤਿ ਯੋਜਨਾ. ਸੇਸਂ ਵੁਤ੍ਤਨਯਮੇਵ.

ਪਤਿਬ੍ਬਤਾਵਿਮਾਨਵਣ੍ਣਨਾ ਨਿਟ੍ਠਿਤਾ.

੧੨. ਦੁਤਿਯਪਤਿਬ੍ਬਤਾਵਿਮਾਨਵਣ੍ਣਨਾ

ਵੇਲ਼ੁਰਿਯਥਮ੍ਭਨ੍ਤਿ ¶ ਦੁਤਿਯਪਤਿਬ੍ਬਤਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਸਾਵਤ੍ਥਿਯਂ ਕਿਰ ਅਞ੍ਞਤਰਾ ਉਪਾਸਿਕਾ ਪਤਿਬ੍ਬਤਾ ਹੁਤ੍ਵਾ ਸਦ੍ਧਾ ਪਸਨ੍ਨਾ ਪਞ੍ਚ ਸੀਲਾਨਿ ਸੁਵਿਸੁਦ੍ਧਾਨਿ ਕਤ੍ਵਾ ਰਕ੍ਖਿ, ਯਥਾਵਿਭਵਞ੍ਚ ਦਾਨਾਨਿ ਅਦਾਸਿ, ਸਾ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਉਪ੍ਪਜ੍ਜਿ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

‘‘ਵੇਲ਼ੁਰਿਯਥਮ੍ਭਂ ¶ ਰੁਚਿਰਂ ਪਭਸ੍ਸਰਂ, ਵਿਮਾਨਮਾਰੁਯ੍ਹ ਅਨੇਕਚਿਤ੍ਤਂ;

ਤਤ੍ਥਚ੍ਛਸਿ ਦੇਵਿ ਮਹਾਨੁਭਾਵੇ, ਉਚ੍ਚਾਵਚਾ ਇਦ੍ਧਿ ਵਿਕੁਬ੍ਬਮਾਨਾ;

ਇਮਾ ਚ ਤੇ ਅਚ੍ਛਰਾਯੋ ਸਮਨ੍ਤਤੋ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ ਚ.

‘‘ਦੇਵਿਦ੍ਧਿਪਤ੍ਤਾਸਿ ਮਹਾਨੁਭਾਵੇ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;

‘‘ਸਾ ¶ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਉਪਾਸਿਕਾ ਚਕ੍ਖੁਮਤੋ ਅਹੋਸਿਂ;

ਪਾਣਾਤਿਪਾਤਾ ਵਿਰਤਾ ਅਹੋਸਿਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਿਸ੍ਸਂ.

‘‘ਅਮਜ੍ਜਪਾ ਨੋ ਚ ਮੁਸਾ ਅਭਾਣਿਂ, ਸਕੇਨ ਸਾਮਿਨਾ ਅਹੋਸਿਂ ਤੁਟ੍ਠਾ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤਾ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ¶ ਤੇ ਭਿਕ੍ਖੁ ਮਹਾਨੁਭਾਵ,

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. – ਵਿਸ੍ਸਜ੍ਜੇਸਿ;

੧੦੧. ਤਤ੍ਥ ਵੇਲ਼ੁਰਿਯਥਮ੍ਭਨ੍ਤਿ ਵੇਲ਼ੁਰਿਯਮਣਿਮਯਥਮ੍ਭਂ. ਰੁਚਿਰਨ੍ਤਿ ਰਮਣੀਯਂ. ਪਭਸ੍ਸਰਨ੍ਤਿ ਅਤਿਵਿਯ ਭਾਸੁਰਂ. ਉਚ੍ਚਾਵਚਾਤਿ ਉਚ੍ਚਾ ਚ ਅਵਚਾ ਚ, ਵਿਵਿਧਾਤਿ ਅਤ੍ਥੋ.

੧੦੪-੫. ਉਪਾਸਿਕਾਤਿ ਸਰਣਗਮਨੇਨ ਉਪਾਸਿਕਾਲਕ੍ਖਣੇ ਠਿਤਾ. ਵੁਤ੍ਤਞ੍ਹਿ –

‘‘ਯਤੋ ¶ ਖੋ, ਮਹਾਨਾਮ, ਅਰਿਯਸਾਵਕੋ ਬੁਦ੍ਧਂ ਸਰਣਂ ਗਤੋ ਹੋਤਿ, ਧਮ੍ਮਂ ਸਰਣਂ ਗਤੋ ਹੋਤਿ, ਸਙ੍ਘਂ ਸਰਣਂ ਗਤੋ ਹੋਤਿ, ਏਤ੍ਤਾਵਤਾ ਖੋ, ਮਹਾਨਾਮ, ਅਰਿਯਸਾਵਕੋ ਉਪਾਸਕੋ ਹੋਤੀ’’ਤਿ (ਸਂ. ਨਿ. ੫.੧੦੩੩).

ਚਕ੍ਖੁਮਤੋਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਤੋ ਬੁਦ੍ਧਸ੍ਸ ਭਗਵਤੋ. ਏਵਂ ਉਪਾਸਿਕਾਭਾਵਕਿਤ੍ਤਨੇਨ ਆਸਯਸੁਦ੍ਧਿਂ ਦਸ੍ਸੇਤ੍ਵਾ ਪਯੋਗਸੁਦ੍ਧਿਂ ਦਸ੍ਸੇਤੁਂ ‘‘ਪਾਣਾਤਿਪਾਤਾ ਵਿਰਤਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਕੇਨ ਸਾਮਿਨਾ ਅਹੋਸਿਂ ਤੁਟ੍ਠਾਤਿ ਮਿਚ੍ਛਾਚਾਰਾਵੇਰਮਣਿਮਾਹ. ਸੇਸਂ ਹੇਟ੍ਠਾ ਵੁਤ੍ਤਸਦਿਸਮੇਵ.

ਦੁਤਿਯਪਤਿਬ੍ਬਤਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਸੁਣਿਸਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਸਾਵਤ੍ਥਿਯਂ ¶ ਅਞ੍ਞਤਰਸ੍ਮਿਂ ਗੇਹੇ ਏਕਾ ਕੁਲਸੁਣ੍ਹਾ ਗੇਹਂ ਪਿਣ੍ਡਾਯ ਪਵਿਟ੍ਠਂ ਖੀਣਾਸਵਤ੍ਥੇਰਂ ਦਿਸ੍ਵਾ ਸਞ੍ਜਾਤਪੀਤਿਸੋਮਨਸ੍ਸਾ ‘‘ਇਦਂ ਮਯ੍ਹਂ ਉਤ੍ਤਮਂ ਪੁਞ੍ਞਕ੍ਖੇਤ੍ਤਂ ਉਪਟ੍ਠਿਤ’’ਨ੍ਤਿ ਅਤ੍ਤਨਾ ਲਦ੍ਧਂ ਪੂਵਭਾਗਂ ਆਦਾਯ ਆਦਰੇਨ ਥੇਰਸ੍ਸ ਉਪਨੇਸਿ, ਥੇਰੋ ਤਂ ਪਟਿਗ੍ਗਹੇਤ੍ਵਾ ਅਨੁਮੋਦਨਂ ਕਤ੍ਵਾ ਗਤੋ. ਸਾ ਅਪਰਭਾਗੇ ਕਾਲਂ ¶ ਕਤ੍ਵਾ ਤਾਵਤਿਂਸਭਵਨੇ ਉਪ੍ਪਜ੍ਜਿ. ਸੇਸਂ ਸਬ੍ਬਂ ਹੇਟ੍ਠਾ ਵੁਤ੍ਤਸਦਿਸਮੇਵ. ਤੇਨ ਵੁਤ੍ਤਂ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ¶ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਸੁਣਿਸਾ ਅਹੋਸਿਂ ਸਸੁਰਸ੍ਸ ਗੇਹੇ.

‘‘ਅਦ੍ਦਸਂ ਵਿਰਜਂ ਭਿਕ੍ਖੁਂ, ਵਿਪ੍ਪਸਨ੍ਨਮਨਾਵਿਲਂ;

ਤਸ੍ਸ ਅਦਾਸਹਂ ਪੂਵਂ, ਪਸਨ੍ਨਾ ਸੇਹਿ ਪਾਣਿਭਿ;

ਭਾਗਡ੍ਢਭਾਗਂ ਦਤ੍ਵਾਨ, ਮੋਦਾਮਿ ਨਨ੍ਦਨੇ ਵਨੇ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੨. ਤਤ੍ਥ ਸੁਣਿਸਾਤਿ ਪੁਤ੍ਤਸ੍ਸ ਭਰਿਯਾ. ਇਤ੍ਥਿਯਾ ਹਿ ਸਾਮਿਕਸ੍ਸ ਪਿਤਾ ‘‘ਸਸੁਰੋ’’ਤਿ ਵੁਚ੍ਚਤਿ, ਤਸ੍ਸ ਚ ਸਾ ‘‘ਸੁਣਿਸਾ’’ਤਿ. ਤਂ ਸਨ੍ਧਾਯ ‘‘ਸੁਣਿਸਾ ਅਹੋਸਿਂ ਸਸੁਰਸ੍ਸ ਗੇਹੇ’’ਤਿ.

੧੧੩. ਭਾਗਡ੍ਢਭਾਗਨ੍ਤਿ ¶ ਅਤ੍ਤਨਾ ਲਦ੍ਧਪਟਿਵੀਸਤੋ ਉਪਡ੍ਢਭਾਗਂ. ਮੋਦਾਮਿ ਨਨ੍ਦਨੇ ਵਨੇਤਿ ਥੇਰੇਨ ਨਨ੍ਦਨਵਨੇ ਦਿਟ੍ਠਤਾਯ ਆਹ. ਸੇਸਂ ਵੁਤ੍ਤਨਯਮੇਵ.

ਅਭਿਕ੍ਕਨ੍ਤੇਨ ¶ ਵਣ੍ਣੇਨਾਤਿ ਦੁਤਿਯਸੁਣਿਸਾਵਿਮਾਨਂ. ਏਤ੍ਥ ਪਨ ਅਪੁਬ੍ਬਂ ਨਤ੍ਥਿ, ਅਟ੍ਠੁਪ੍ਪਤ੍ਤਿਯਂ ਕੁਮ੍ਮਾਸਦਾਨਮੇਵ ਵਿਸੇਸੋ. ਤੇਨ ਵੁਤ੍ਤਂ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ¶ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਸੁਣਿਸਾ ਅਹੋਸਿਂ ਸਸੁਰਸ੍ਸ ਗੇਹੇ.

‘‘ਅਦ੍ਦਸਂ ਵਿਰਜਂ ਭਿਕ੍ਖੁਂ, ਵਿਪ੍ਪਸਨ੍ਨਮਨਾਵਿਲਂ;

ਤਸ੍ਸ ਅਦਾਸਹਂ ਭਾਗਂ, ਪਸਨ੍ਨਾ ਸੇਹਿ ਪਾਣਿਭਿ;

ਕੁਮ੍ਮਾਸਪਿਣ੍ਡਂ ਦਤ੍ਵਾਨ, ਮੋਦਾਮਿ ਨਨ੍ਦਨੇ ਵਨੇ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ¶ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੨੧. ਤਤ੍ਥ ਭਾਗਨ੍ਤਿ ਕੁਮ੍ਮਾਸਕੋਟ੍ਠਾਸਂ. ਤੇਨਾਹ ‘‘ਕੁਮ੍ਮਾਸਪਿਣ੍ਡਂ ਦਤ੍ਵਾਨਾ’’ਤਿ. ਕੁਮ੍ਮਾਸੋਤਿ ਚ ਯਵਕੁਮ੍ਮਾਸੋ ਵੁਤ੍ਤੋ. ਸੇਸਂ ਵੁਤ੍ਤਨਯਮੇਵ.

ਦੁਤਿਯਸੁਣਿਸਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਉਤ੍ਤਰਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ¶ ਚ ਸਮਯੇਨ ਪੁਣ੍ਣੋ ਨਾਮ ਦੁਗ੍ਗਤਪੁਰਿਸੋ ਰਾਜਗਹਸੇਟ੍ਠਿਂ ਉਪਨਿਸ੍ਸਾਯ ¶ ਜੀਵਤਿ, ਤਸ੍ਸ ਭਰਿਯਾ ਉਤ੍ਤਰਾ, ਉਤ੍ਤਰਾ ਚ ਨਾਮ ਧੀਤਾਤਿ ਦ੍ਵੇ ਏਵ ਗੇਹਮਾਨੁਸਕਾ. ਅਥੇਕਦਿਵਸਂ ਰਾਜਗਹੇ ‘‘ਮਹਾਜਨੇਨ ਸਤ੍ਤਾਹਂ ਨਕ੍ਖਤ੍ਤਂ ਕੀਲ਼ਿਤਬ੍ਬ’’ਨ੍ਤਿ ਘੋਸਨਂ ਕਰਿਂਸੁ. ਤਂ ਸੁਤ੍ਵਾ ਸੇਟ੍ਠਿ ਪਾਤੋਵ ਆਗਤਂ ਪੁਣ੍ਣਂ ‘‘ਤਾਤ, ਅਮ੍ਹਾਕਂ ਪਰਿਜਨੋ ਨਕ੍ਖਤ੍ਤਂ ਕੀਲ਼ਿਤੁਕਾਮੋ, ਤ੍ਵਂ ਕਿਂ ਨਕ੍ਖਤ੍ਤਂ ਕੀਲ਼ਿਸ੍ਸਸਿ, ਉਦਾਹੁ ਭਤਿਂ ਕਰਿਸ੍ਸਸੀ’’ਤਿ ਆਹ. ‘‘ਸਾਮਿ, ਨਕ੍ਖਤ੍ਤਂ ਨਾਮ ਸਧਨਾਨਂ ਹੋਤਿ, ਮਮ ਪਨ ਗੇਹੇ ਸ੍ਵਾਤਨਾਯ ਯਾਗੁਤਣ੍ਡੁਲਾਨਿਪਿ ਨਤ੍ਥਿ, ਕਿਂ ਮੇ ਨਕ੍ਖਤ੍ਤੇਨ? ਗੋਣੇ ਲਭਨ੍ਤੋ ਕਸਿਤੁਂ ਗਮਿਸ੍ਸਾਮੀ’ਤਿ. ‘‘ਤੇਨ ਹਿ ਗੋਣੇ ਗਣ੍ਹਸ੍ਸੂ’’ਤਿ. ਸੋ ਬਲਵਗੋਣੇ ਚ ਭਦ੍ਦਨਙ੍ਗਲਞ੍ਚ ਗਹੇਤ੍ਵਾ ‘‘ਭਦ੍ਦੇ, ਨਾਗਰਾ ਨਕ੍ਖਤ੍ਤਂ ਕੀਲ਼ਨ੍ਤਿ, ਅਹਂ ਦਲਿਦ੍ਦਤਾਯ ਭਤਿਂ ਕਾਤੁਂ ਗਮਿਸ੍ਸਾਮਿ, ਮਯ੍ਹਮ੍ਪਿ ਤਾਵ ਅਜ੍ਜ ਦਿਗੁਣਂ ਨਿਵਾਪਂ ਪਚਿਤ੍ਵਾ ਭਤ੍ਤਂ ਆਹਰੇਯ੍ਯਾਸੀ’’ਤਿ ਭਰਿਯਂ ਵਤ੍ਵਾ ਖੇਤ੍ਤਂ ਅਗਮਾਸਿ.

ਸਾਰਿਪੁਤ੍ਤਤ੍ਥੇਰੋਪਿ ਸਤ੍ਤਾਹਂ ਨਿਰੋਧਸਮਾਪਨ੍ਨੋ ਤਤੋ ਵੁਟ੍ਠਾਯ ‘‘ਕਸ੍ਸ ਨੁ ਖੋ ਅਜ੍ਜ ਮਯਾ ਸਙ੍ਗਹਂ ਕਾਤੁਂ ਵਟ੍ਟਤੀ’’ਤਿ ਓਲੋਕੇਨ੍ਤੋ ਪੁਣ੍ਣਂ ਅਤ੍ਤਨੋ ਞਾਣਜਾਲਸ੍ਸ ਅਨ੍ਤੋ ਪਵਿਟ੍ਠਂ ਦਿਸ੍ਵਾ ‘‘ਸਦ੍ਧੋ ਨੁ ਖੋ ਏਸ, ਸਕ੍ਖਿਸ੍ਸਤਿ ¶ ਵਾ ਮੇ ਸਙ੍ਗਹਂ ਕਾਤੁ’’ਨ੍ਤਿ ਓਲੋਕੇਨ੍ਤੋ ਤਸ੍ਸ ਸਦ੍ਧਭਾਵਞ੍ਚ ਸਙ੍ਗਹਂ ਕਾਤੁਂ ਸਮਤ੍ਥਭਾਵਞ੍ਚ ਤਪ੍ਪਚ੍ਚਯਾ ਚ ਤਸ੍ਸ ਮਹਾਸਮ੍ਪਤ੍ਤਿਪਟਿਲਾਭਂ ਞਤ੍ਵਾ ਪਤ੍ਤਚੀਵਰਂ ਆਦਾਯ ਤਸ੍ਸ ਕਸਨਟ੍ਠਾਨਂ ਗਨ੍ਤ੍ਵਾ ਆਵਾਟਤੀਰੇ ਏਕਂ ਗੁਮ੍ਬਂ ਓਲੋਕੇਨ੍ਤੋ ਅਟ੍ਠਾਸਿ. ਪੁਣ੍ਣੋ ਥੇਰਂ ਦਿਸ੍ਵਾਵ ਕਸਿਂ ਠਪੇਤ੍ਵਾ ਪਞ੍ਚਪਤਿਟ੍ਠਿਤੇਨ ਥੇਰਂ ਵਨ੍ਦਿਤ੍ਵਾ ‘‘ਦਨ੍ਤਕਟ੍ਠੇਨ ਅਤ੍ਥੋ ਭਵਿਸ੍ਸਤੀ’’ਤਿ ਦਨ੍ਤਕਟ੍ਠਂ ਕਪ੍ਪਿਯਂ ਕਤ੍ਵਾ ਅਦਾਸਿ. ਅਥਸ੍ਸ ਥੇਰੋ ਪਤ੍ਤਞ੍ਚ ਪਰਿਸ੍ਸਾਵਨਞ੍ਚ ਨੀਹਰਿਤ੍ਵਾ ਅਦਾਸਿ. ਸੋ ‘‘ਪਾਨੀਯੇਨ ਅਤ੍ਥੋ ਭਵਿਸ੍ਸਤੀ’’ਤਿ ਤਂ ਆਦਾਯ ਪਾਨੀਯਂ ਪਰਿਸ੍ਸਾਵੇਤ੍ਵਾ ਅਦਾਸਿ.

ਥੇਰੋ ਚਿਨ੍ਤੇਸਿ ‘‘ਅਯਂ ਪਰੇਸਂ ਪਚ੍ਛਿਮਗੇਹੇ ਵਸਤਿ, ਸਚਸ੍ਸ ਗੇਹਦ੍ਵਾਰਂ ਗਮਿਸ੍ਸਾਮਿ, ਇਮਸ੍ਸ ਭਰਿਯਾ ਮਂ ਦਟ੍ਠੁਂ ਨ ਸਕ੍ਖਿਸ੍ਸਤਿ, ਯਾਵਸ੍ਸ ਭਰਿਯਾ ਭਤ੍ਤਂ ਆਦਾਯ ਮਗ੍ਗਂ ਪਟਿਪਜ੍ਜਤਿ, ਤਾਵ ਇਧੇਵ ਭਵਿਸ੍ਸਾਮੀ’’ਤਿ. ਸੋ ਤਤ੍ਥੇਵ ਥੋਕਂ ¶ ਵੀਤਿਨਾਮੇਤ੍ਵਾ ਤਸ੍ਸਾ ਮਗ੍ਗਾਰੁਲ਼੍ਹਭਾਵਂ ਞਤ੍ਵਾ ਅਨ੍ਤੋਨਗਰਾਭਿਮੁਖੋ ਪਾਯਾਸਿ. ਸਾ ਅਨ੍ਤਰਾਮਗ੍ਗੇ ਥੇਰਂ ਦਿਸ੍ਵਾ ਚਿਨ੍ਤੇਸਿ ‘‘ਅਪ੍ਪੇਕਦਾਹਂ ਦੇਯ੍ਯਧਮ੍ਮੇ ਸਤਿ ਅਯ੍ਯਂ ਨ ਪਸ੍ਸਾਮਿ, ਅਪ੍ਪੇਕਦਾ ਮੇ ਅਯ੍ਯਂ ਪਸ੍ਸਨ੍ਤਿਯਾ ਦੇਯ੍ਯਧਮ੍ਮੋ ਨ ਹੋਤਿ, ਅਜ੍ਜ ਪਨ ਮੇ ਅਯ੍ਯੋ ਚ ਦਿਟ੍ਠੋ, ਦੇਯ੍ਯਧਮ੍ਮੋ ਚਾਯਂ ਅਤ੍ਥਿ, ਕਰਿਸ੍ਸਤਿ ਨੁ ਖੋ ਮੇ ਸਙ੍ਗਹ’’ਨ੍ਤਿ. ਸਾ ਭਤ੍ਤਭਾਜਨਂ ਓਤਾਰੇਤ੍ਵਾ ਥੇਰਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ‘‘ਭਨ੍ਤੇ, ਇਦਂ ਲੂਖਂ ਵਾ ਪਣੀਤਂ ਵਾਤਿ ਅਚਿਨ੍ਤੇਤ੍ਵਾ ਦਾਸਸ੍ਸ ਵੋ ਸਙ੍ਗਹਂ ਕਰੋਥਾ’’ਤਿ ਆਹ. ਅਥ ਥੇਰੋ ਪਤ੍ਤਂ ਉਪਨਾਮੇਤ੍ਵਾ ਤਾਯ ਏਕੇਨ ਹਤ੍ਥੇਨ ਭਾਜਨਂ ਧਾਰੇਤ੍ਵਾ ਏਕੇਨ ਹਤ੍ਥੇਨ ਤਤੋ ਭਤ੍ਤਂ ਦਦਮਾਨਾਯ ਉਪਡ੍ਢਭਤ੍ਤੇ ਦਿਨ੍ਨੇ ‘‘ਅਲ’’ਨ੍ਤਿ ਹਤ੍ਥੇਨ ਪਤ੍ਤਂ ਪਿਦਹਿ. ਸਾ ‘‘ਭਨ੍ਤੇ, ਏਕੋਵ ਪਟਿਵੀਸੋ, ਨ ਸਕ੍ਕਾ ਦ੍ਵਿਧਾ ਕਾਤੁਂ, ਤੁਮ੍ਹਾਕਂ ਦਾਸਸ੍ਸ ਇਧਲੋਕਸਙ੍ਗਹਂ ਅਕਤ੍ਵਾ ਪਰਲੋਕਸਙ੍ਗਹਂ ਕਰੋਥ, ਨਿਰਵਸੇਸਮੇਵ ਦਾਤੁਕਾਮਾਮ੍ਹੀ’’ਤਿ ਵਤ੍ਵਾ ਸਬ੍ਬਮੇਵਸ੍ਸ ¶ ਪਤ੍ਤੇ ਪਤਿਟ੍ਠਾਪੇਤ੍ਵਾ ‘‘ਤੁਮ੍ਹੇਹਿ ਦਿਟ੍ਠਧਮ੍ਮਸ੍ਸ ਭਾਗਿਨੀ ਅਸ੍ਸ’’ਨ੍ਤਿ ਪਤ੍ਥਨਂ ਅਕਾਸਿ. ਥੇਰੋ ‘‘ਏਵਂ ਹੋਤੂ’’ਤਿ ਵਤ੍ਵਾ ਠਿਤਕੋਵ ਅਨੁਮੋਦਨਂ ਕਤ੍ਵਾ ਏਕਸ੍ਮਿਂ ਉਦਕਫਾਸੁਕਟ੍ਠਾਨੇ ਨਿਸੀਦਿਤ੍ਵਾ ਭਤ੍ਤਕਿਚ੍ਚਂ ਅਕਾਸਿ. ਸਾਪਿ ਪਟਿਨਿਵਤ੍ਤਿਤ੍ਵਾ ਤਣ੍ਡੁਲੇ ਪਰਿਯੇਸਿਤ੍ਵਾ ਭਤ੍ਤਂ ਪਚਿ.

ਪੁਣ੍ਣੋਪਿ ਅਡ੍ਢਕਰੀਸਮਤ੍ਤਂ ਠਾਨਂ ਕਸਿਤ੍ਵਾ ਜਿਘਚ੍ਛਂ ਸਹਿਤੁਂ ਅਸਕ੍ਕੋਨ੍ਤੋ ਗੋਣੇ ਵਿਸ੍ਸਜ੍ਜੇਤ੍ਵਾ ਏਕਂ ਰੁਕ੍ਖਛਾਯਂ ਪਵਿਸਿਤ੍ਵਾ ਮਗ੍ਗਂ ਓਲੋਕੇਨ੍ਤੋ ਨਿਸੀਦਿ. ਅਥਸ੍ਸ ਭਰਿਯਾ ਭਤ੍ਤਮਾਦਾਯ ਗਚ੍ਛਮਾਨਾ ਤਂ ਦਿਸ੍ਵਾਵ ‘‘ਏਸ ਜਿਘਚ੍ਛਾਪੀਲ਼ਿਤੋ ¶ ਮਂ ਓਲੋਕੇਨ੍ਤੋ ਨਿਸਿਨ੍ਨੋ, ਸਚੇ ਮਂ ‘ਅਤਿਵਿਯ ਚਿਰਾਯੀ’ਤਿ ਤਜ੍ਜੇਤ੍ਵਾ ਪਤੋਦਲਟ੍ਠਿਯਾ ਪਹਰਿਸ੍ਸਤਿ, ਮਯਾ ਕਤਕਮ੍ਮਂ ਨਿਰਤ੍ਥਕਂ ਭਵਿਸ੍ਸਤਿ, ਪਟਿਕਚ੍ਚੇਵਸ੍ਸ ਆਰੋਚੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਵਮਾਹ ‘‘ਸਾਮਿ, ਅਜ੍ਜੇਕਦਿਵਸਂ ਚਿਤ੍ਤਂ ਪਸਾਦੇਹਿ, ਮਾ ਮਯਾ ਕਤਕਮ੍ਮਂ ਨਿਰਤ੍ਥਕਂ ਕਰਿ, ਅਹਂ ਪਾਤੋਵ ਤੇ ਭਤ੍ਤਂ ਆਹਰਨ੍ਤੀ ਅਨ੍ਤਰਾਮਗ੍ਗੇ ਧਮ੍ਮਸੇਨਾਪਤਿਂ ਦਿਸ੍ਵਾ ਤਵ ਭਤ੍ਤਂ ਤਸ੍ਸ ਦਤ੍ਵਾ ਪੁਨ ਗੇਹਂ ਗਨ੍ਤ੍ਵਾ ਭਤ੍ਤਂ ਪਚਿਤ੍ਵਾ ਆਗਤਾ, ਪਸਾਦੇਹਿ, ਸਾਮਿ, ਚਿਤ੍ਤ’’ਨ੍ਤਿ. ਸੋ ‘‘ਕਿਂ ਵਦੇਸਿ, ਭਦ੍ਦੇ’’ਤਿ ਪੁਚ੍ਛਿਤ੍ਵਾ ਪੁਨ ਤਮਤ੍ਥਂ ਸੁਤ੍ਵਾ ‘‘ਭਦ੍ਦੇ ¶ , ਸਾਧੁ ਵਤ ਤੇ ਕਤਂ ਮਮ ਭਤ੍ਤਂ ਅਯ੍ਯਸ੍ਸ ਦਦਮਾਨਾਯ, ਮਯਾਪਿਸ੍ਸ ਅਜ੍ਜ ਪਾਤੋਵ ਦਨ੍ਤਕਟ੍ਠਞ੍ਚ ਮੁਖੋਦਕਞ੍ਚ ਦਿਨ੍ਨ’’ਨ੍ਤਿ ਪਸਨ੍ਨਮਾਨਸੋ ਤਂ ਵਚਨਂ ਅਭਿਨਨ੍ਦਿਤ੍ਵਾ ਉਸ੍ਸੂਰੇ ਲਦ੍ਧਭਤ੍ਤਤਾਯ ਕਿਲਨ੍ਤਕਾਯੋ ਤਸ੍ਸਾ ਅਙ੍ਕੇ ਸੀਸਂ ਕਤ੍ਵਾ ਨਿਦ੍ਦਂ ਓਕ੍ਕਮਿ.

ਅਥਸ੍ਸ ਪਾਤੋਵ ਕਸਿਤਟ੍ਠਾਨਂ ਪਂਸੁਚੁਣ੍ਣਂ ਉਪਾਦਾਯ ਸਬ੍ਬਂ ਰਤ੍ਤਸੁਵਣ੍ਣਂ ਹੁਤ੍ਵਾ ਕਣਿਕਾਰਪੁਪ੍ਫਰਾਸਿ ਵਿਯ ਸੋਭਮਾਨਂ ਅਟ੍ਠਾਸਿ. ਸੋ ਪਬੁਦ੍ਧੋ ਓਲੋਕੇਤ੍ਵਾ ਭਰਿਯਂ ਆਹ ‘‘ਭਦ੍ਦੇ, ਏਤਂ ਮਯਾ ਕਸਿਤਟ੍ਠਾਨਂ ਸਬ੍ਬਂ ਮਮ ਸੁਵਣ੍ਣਂ ਹੁਤ੍ਵਾ ਪਞ੍ਞਾਯਤਿ, ਕਿਂ ਨੁ ਖੋ ਮੇ ਅਤਿਉਸ੍ਸੂਰੇ ਲਦ੍ਧਭਤ੍ਤਤਾਯ ਅਕ੍ਖੀਨਿ ਭਮਨ੍ਤੀ’’ਤਿ. ‘‘ਸਾਮਿ, ਮਯ੍ਹਮ੍ਪਿ ਏਵਮੇਵ ਪਞ੍ਞਾਯਤੀ’’ਤਿ. ਸੋ ਉਟ੍ਠਾਯ ਤਤ੍ਥ ਗਨ੍ਤ੍ਵਾ ਏਕਂ ਪਿਣ੍ਡਂ ਗਹੇਤ੍ਵਾ ਨਙ੍ਗਲਸੀਸੇ ਪਹਰਿਤ੍ਵਾ ਸੁਵਣ੍ਣਭਾਵਂ ਞਤ੍ਵਾ ‘‘ਅਹੋ ਅਯ੍ਯਸ੍ਸ ਧਮ੍ਮਸੇਨਾਪਤਿਸ੍ਸ ਦਿਨ੍ਨਦਾਨੇ ਅਜ੍ਜੇਵ ਵਿਪਾਕੋ ਦਸ੍ਸਿਤੋ, ਨ ਖੋ ਪਨ ਸਕ੍ਕਾ ਏਤ੍ਤਕਂ ਧਨਂ ਪਟਿਚ੍ਛਾਦੇਤ੍ਵਾ ਪਰਿਭੁਞ੍ਜਿਤੁ’’ਨ੍ਤਿ ਭਰਿਯਾਯ ਆਭਤਂ ਭਤ੍ਤਪਾਤਿਂ ਸੁਵਣ੍ਣਸ੍ਸ ਪੂਰੇਤ੍ਵਾ ਰਾਜਕੁਲਂ ਗਨ੍ਤ੍ਵਾ ਰਞ੍ਞਾ ਕਤੋਕਾਸੋ ਪਵਿਸਿਤ੍ਵਾ ਰਾਜਾਨਂ ਅਭਿਵਾਦੇਤ੍ਵਾ ‘‘ਕਿਂ ਤਾਤਾ’’ਤਿ ਵੁਤ੍ਤੇ ‘‘ਦੇਵ, ਅਜ੍ਜ ਮਯਾ ਕਸਿਤਟ੍ਠਾਨਂ ਸਬ੍ਬਂ ਸੁਵਣ੍ਣਰਾਸਿਮੇਵ ਹੁਤ੍ਵਾ ਠਿਤਂ, ਸੁਵਣ੍ਣਂ ਆਹਰਾਪੇਤੁਂ ਵਟ੍ਟਤੀ’’ਤਿ ਆਹ. ‘‘ਕੋਸਿ ਤ੍ਵ’’ਨ੍ਤਿ? ‘‘ਪੁਣ੍ਣੋ ਨਾਮਾਹ’’ਨ੍ਤਿ. ‘‘ਕਿਂ ਪਨ ਤੇ ਅਜ੍ਜ ਕਤ’’ਨ੍ਤਿ? ‘‘ਧਮ੍ਮਸੇਨਾਪਤਿਸ੍ਸ ਮੇ ਪਾਤੋਵ ਦਨ੍ਤਕਟ੍ਠਞ੍ਚ ਮੁਖੋਦਕਞ੍ਚ ਦਿਨ੍ਨਂ, ਭਰਿਯਾਯਪਿ ਮੇ ਮਯ੍ਹਂ ਆਹਟਭਤ੍ਤਂ ਤਸ੍ਸੇਵ ਦਿਨ੍ਨ’’ਨ੍ਤਿ.

ਤਂ ਸੁਤ੍ਵਾ ਰਾਜਾ ‘‘ਅਜ੍ਜੇਵ ਕਿਰ ਭੋ ਧਮ੍ਮਸੇਨਾਪਤਿਸ੍ਸ ਦਿਨ੍ਨਦਾਨੇ ਵਿਪਾਕੋ ਦਸ੍ਸਿਤੋ’’ਤਿ ਵਤ੍ਵਾ ¶ ‘‘ਤਾਤ, ਕਿਂ ਕਰੋਮੀ’’ਤਿ ਪੁਚ੍ਛਿ. ‘‘ਬਹੂਨਿ ਸਕਟਸਹਸ੍ਸਾਨਿ ਪਹਿਣਿਤ੍ਵਾ ਸੁਵਣ੍ਣਂ ਆਹਰਾਪੇਥਾ’’ਤਿ. ਰਾਜਾ ਸਕਟਾਨਿ ਪਹਿਣਿ. ਰਾਜਪੁਰਿਸੇਸੁ ‘‘ਰਞ੍ਞੋ ਸਨ੍ਤਕ’’ਨ੍ਤਿ ਗਣ੍ਹਨ੍ਤੇਸੁ ਗਹਿਤਂ ਗਹਿਤਂ ਮਤ੍ਤਿਕਾਵ ਹੋਤਿ. ਤੇਹਿ ¶ ਗਨ੍ਤ੍ਵਾ ਰਞ੍ਞੋ ਆਰੋਚਿਤੇ ‘‘ਤਾਤਾ, ਤੁਮ੍ਹੇਹਿ ਕਿਨ੍ਤਿ ਵਤ੍ਵਾ ਗਹਿਤ’’ਨ੍ਤਿ ਪੁਟ੍ਠਾ ‘‘ਤੁਮ੍ਹਾਕਂ ਸਨ੍ਤਕ’’ਨ੍ਤਿ ਆਹਂਸੁ. ਤੇਨ ਹਿ, ਤਾਤਾ, ਪੁਨ ਗਚ੍ਛਥ, ‘‘ਪੁਣ੍ਣਸ੍ਸ ਸਨ੍ਤਕ’’ਨ੍ਤਿ ਵਤ੍ਵਾ ਗਣ੍ਹਥਾਤਿ. ਤੇ ਤਥਾ ਕਰਿਂਸੁ ¶ ਗਹਿਤਂ ਗਹਿਤਂ ਸੁਵਣ੍ਣਮੇਵ ਅਹੋਸਿ. ਤਂ ਸਬ੍ਬਂ ਆਹਰਿਤ੍ਵਾ ਰਾਜਙ੍ਗਣੇ ਰਾਸਿਂ ਅਕਂਸੁ, ਅਸੀਤਿਹਤ੍ਥੁਬ੍ਬੇਧੋ ਰਾਸਿ ਅਹੋਸਿ. ਰਾਜਾ ਨਾਗਰੇ ਸਨ੍ਨਿਪਾਤਾਪੇਤ੍ਵਾ ਆਹ ‘‘ਇਮਸ੍ਮਿਂ ਨਗਰੇ ਅਤ੍ਥਿ ਕਸ੍ਸਚਿ ਏਤ੍ਤਕਂ ਸੁਵਣ੍ਣ’’ਨ੍ਤਿ? ‘‘ਨਤ੍ਥਿ, ਦੇਵਾ’’ਤਿ. ‘‘ਕਿਂ ਪਨਸ੍ਸ ਦਾਤੁਂ ਵਟ੍ਟਤੀ’’ਤਿ? ‘‘ਸੇਟ੍ਠਿਚ੍ਛਤ੍ਤਂ, ਦੇਵਾ’’ਤਿ. ਰਾਜਾ ‘‘ਬਹੁਧਨਸੇਟ੍ਠਿ ਨਾਮ ਹੋਤੂ’’ਤਿ ਮਹਨ੍ਤੇਨ ਭੋਗੇਨ ਸਦ੍ਧਿਂ ਤਸ੍ਸ ਸੇਟ੍ਠਿਚ੍ਛਤ੍ਤਂ ਅਦਾਸਿ.

ਅਥ ਨਂ ਸੋ ਆਹ ‘‘ਮਯਂ, ਦੇਵ, ਏਤ੍ਤਕਂ ਕਾਲਂ ਪਰਕੁਲੇ ਵਸਿਮ੍ਹਾ, ਵਸਨਟ੍ਠਾਨਂ ਨੋ ਦੇਥਾ’’ਤਿ. ਤੇਨ ਹਿ ਪਸ੍ਸ, ਏਸ ਗੁਮ੍ਬੋ ਪਞ੍ਞਾਯਤਿ, ਏਤਂ ਹਰਾਪੇਤ੍ਵਾ ਗੇਹਂ ਕਾਰੇਹੀਤਿ ਪੁਰਾਣਸੇਟ੍ਠਿਸ੍ਸ ਗੇਹਟ੍ਠਾਨਂ ਆਚਿਕ੍ਖਿ. ਸੋ ਤਸ੍ਮਿਂ ਠਾਨੇ ਕਤਿਪਾਹੇਨੇਵ ਗੇਹਂ ਕਾਰਾਪੇਤ੍ਵਾ ਗੇਹਪਵੇਸਨਮਙ੍ਗਲਞ੍ਚ ਛਤ੍ਤਮਙ੍ਗਲਞ੍ਚ ਏਕਤੋਵ ਕਰੋਨ੍ਤੋ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਂ ਅਦਾਸਿ. ਅਥਸ੍ਸ ਸਤ੍ਥਾ ਦਾਨਾਨੁਮੋਦਨਂ ਕਰੋਨ੍ਤੋ ਅਨੁਪੁਬ੍ਬਿਂ ਕਥਂ ਕਥੇਸਿ. ਧਮ੍ਮਕਥਾਵਸਾਨੇ ਪੁਣ੍ਣਸੇਟ੍ਠਿ ਚ ਭਰਿਯਾ ਚਸ੍ਸ ਧੀਤਾ ਚ ਉਤ੍ਤਰਾਤਿ ਤਯੋਪਿ ਜਨਾ ਸੋਤਾਪਨ੍ਨਾ ਅਹੇਸੁਂ.

ਅਪਰਭਾਗੇ ਰਾਜਗਹਸੇਟ੍ਠਿ ਪੁਣ੍ਣਸੇਟ੍ਠਿਨੋ ਧੀਤਰਂ ਅਤ੍ਤਨੋ ਪੁਤ੍ਤਸ੍ਸ ਵਾਰੇਸਿ. ਸੋ ‘‘ਨਾਹਂ ਦਸ੍ਸਾਮੀ’’ਤਿ ਵੁਤ੍ਤੋ ‘‘ਮਾ ਏਵਂ ਕਰੋਤੁ, ਏਤ੍ਤਕਂ ਕਾਲਂ ਅਮ੍ਹੇ ਨਿਸ੍ਸਾਯ ਵਸਨ੍ਤੇਨੇਵ ਤੇ ਸਮ੍ਪਤ੍ਤਿ ਲਦ੍ਧਾ, ਦੇਤੁ ਮੇ ਪੁਤ੍ਤਸ੍ਸ ਤੇ ਧੀਤਰ’’ਨ੍ਤਿ ਆਹ. ਸੋ ‘‘ਮਿਚ੍ਛਾਦਿਟ੍ਠਿਕਾ ਤੁਮ੍ਹੇ, ਮਮ ਧੀਤਾ ਤੀਹਿ ਰਤਨੇਹਿ ਵਿਨਾ ਵਸਿਤੁਂ ਨ ਸਕ੍ਕੋਤਿ, ਨੇਵਸ੍ਸ ਧੀਤਰਂ ਦਸ੍ਸਾਮੀ’’ਤਿ ਆਹ. ਅਥ ਨਂ ਬਹੂ ਸੇਟ੍ਠਿਗਹਪਤਿਕਾਦਯੋ ਕੁਲਪੁਤ੍ਤਾ ‘‘ਮਾ ਤੇਨ ਸਦ੍ਧਿਂ ਵਿਸ੍ਸਾਸਂ ਭਿਨ੍ਦਿ, ਦੇਹਿਸ੍ਸ ਧੀਤਰ’’ਨ੍ਤਿ ਯਾਚਿਂਸੁ. ਸੋ ਤੇਸਂ ਵਚਨਂ ਸਮ੍ਪਟਿਚ੍ਛਿਤ੍ਵਾ ਆਸਾਲ਼੍ਹਿਪੁਣ੍ਣਮਾਯ ਧੀਤਰਂ ਅਦਾਸਿ. ਸਾ ਪਤਿਕੁਲਂ ਗਤਕਾਲਤੋ ਪਟ੍ਠਾਯ ਭਿਕ੍ਖੁਂ ਵਾ ਭਿਕ੍ਖੁਨਿਂ ਵਾ ਉਪਸਙ੍ਕਮਿਤੁਂ ਦਾਨਂ ਵਾ ਦਾਤੁਂ ਧਮ੍ਮਂ ਵਾ ਸੋਤੁਂ ਨਾਲਤ੍ਥ, ਏਵਂ ਅਡ੍ਢਤਿਯੇਸੁ ਮਾਸੇਸੁ ਵੀਤਿਵਤ੍ਤੇਸੁ ਅਤ੍ਤਨੋ ਸਨ੍ਤਿਕੇ ਠਿਤੇ ਪਰਿਚਾਰਿਕੇ ਪੁਚ੍ਛਿ ‘‘ਇਦਾਨਿ ਕਿਤ੍ਤਕਂ ਅਨ੍ਤੋਵਸ੍ਸਂ ਅਵਸਿਟ੍ਠ’’ਨ੍ਤਿ? ‘‘ਅਡ੍ਢਮਾਸੋ, ਅਯ੍ਯੇ’’ਤਿ. ਸਾ ਮਾਤਾਪਿਤੂਨਂ ਸਾਸਨਂ ਪਹਿਣਿ ‘‘ਕਸ੍ਮਾ ਮਂ ਏਵਰੂਪੇ ਬਨ੍ਧਨਾਗਾਰੇ ਪਕ੍ਖਿਪਿਂਸੁ, ਵਰਂ ਤੁਮ੍ਹੇਹਿ ਮਂ ਲਕ੍ਖਣਾਹਤਂ ਕਤ੍ਵਾ ਪਰੇਸਂ ਦਾਸਿਂ ਸਾਵੇਤੁਂ, ਨ ਏਵਰੂਪਸ੍ਸ ਮਿਚ੍ਛਾਦਿਟ੍ਠਿਕਸ੍ਸ ਕੁਲਸ੍ਸ ¶ ਦਾਤੁਂ, ਆਗਤਕਾਲਤੋ ਪਟ੍ਠਾਯ ਭਿਕ੍ਖੁਦਸ੍ਸਨਾਦੀਸੁ ¶ ਏਕਮ੍ਪਿ ਪੁਞ੍ਞਂ ਕਾਤੁਂ ਨ ਲਭਾਮੀ’’ਤਿ. ਅਥਸ੍ਸਾ ਪਿਤਾ ‘‘ਦੁਕ੍ਖਿਤਾ ਵਤ ਮੇ ਧੀਤਾ’’ਤਿ ਅਨਤ੍ਤਮਨਤਂ ਪਵੇਦੇਤ੍ਵਾ ਪਞ੍ਚਦਸ ਕਹਾਪਣਸਹਸ੍ਸਾਨਿ ਪੇਸੇਸਿ, ‘‘ਇਮਸ੍ਮਿਂ ਨਗਰੇ ਸਿਰਿਮਾ ¶ ਨਾਮ ਗਣਿਕਾ ਅਤ੍ਥਿ, ਦੇਵਸਿਕਂ ਸਹਸ੍ਸਂ ਗਣ੍ਹਾਤਿ, ਇਮੇਹਿ ਕਹਾਪਣੇਹਿ ਤਂ ਆਨੇਤ੍ਵਾ ਸਾਮਿਕਸ੍ਸ ਨਿਯ੍ਯਾਦੇਤ੍ਵਾ ਸਯਂ ਯਥਾਰੁਚਿ ਪੁਞ੍ਞਾਨਿ ਕਰੋਤੂ’’ਤਿ ਸਾਸਨਞ੍ਚ ਪਹਿਣਿ. ਉਤ੍ਤਰਾ ਤਥਾ ਕਤ੍ਵਾ ਸਾਮਿਕੇਨ ਸਿਰਿਮਂ ਦਿਸ੍ਵਾ ‘‘ਕਿਮਿਦ’’ਨ੍ਤਿ ਵੁਤ੍ਤੇ ‘‘ਸਾਮਿ, ਇਮਂ ਅਡ੍ਢਮਾਸਂ ਮਮ ਸਹਾਯਿਕਾ ਤੁਮ੍ਹੇ ਪਰਿਚਰਤੁ, ਅਹਂ ਪਨ ਇਮਂ ਅਡ੍ਢਮਾਸਂ ਦਾਨਞ੍ਚੇਵ ਦਾਤੁਕਾਮਾ ਧਮ੍ਮਞ੍ਚ ਸੋਤੁਕਾਮਾ’’ਤਿ ਆਹ. ਸੋ ਤਂ ਅਭਿਰੂਪਂ ਇਤ੍ਥਿਂ ਦਿਸ੍ਵਾ ਉਪ੍ਪਨ੍ਨਸਿਨੇਹੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ.

ਉਤ੍ਤਰਾਪਿ ਖੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ‘‘ਭਨ੍ਤੇ, ਇਮਂ ਅਡ੍ਢਮਾਸਂ ਅਞ੍ਞਤ੍ਥ ਅਗਨ੍ਤ੍ਵਾ ਇਧੇਵ ਭਿਕ੍ਖਾ ਗਹੇਤਬ੍ਬਾ’’ਤਿ ਸਤ੍ਥੁ ਪਟਿਞ੍ਞਂ ਗਹੇਤ੍ਵਾ ‘‘ਇਤੋ ਦਾਨਿ ਪਟ੍ਠਾਯ ਯਾਵ ਮਹਾਪਵਾਰਣਾ, ਤਾਵ ਸਤ੍ਥਾਰਂ ਉਪਟ੍ਠਾਤੁਂ ਧਮ੍ਮਞ੍ਚ ਸੋਤੁਂ ਲਭਿਸ੍ਸਾਮੀ’’ਤਿ ਤੁਟ੍ਠਮਾਨਸਾ ‘‘ਏਵਂ ਯਾਗੁਂ ਪਚਥ, ਏਵਂ ਭਤ੍ਤਂ ਪਚਥ, ਏਵਂ ਪੂਵਂ ਪਚਥਾ’’ਤਿ ਮਹਾਨਸੇ ਸਬ੍ਬਕਿਚ੍ਚਾਨਿ ਸਂਵਿਦਹਨ੍ਤੀ ਵਿਚਰਤਿ. ਅਥਸ੍ਸਾ ਸਾਮਿਕੋ ‘‘ਸ੍ਵੇ ਮਹਾਪਵਾਰਣਾ ਭਵਿਸ੍ਸਤੀ’’ਤਿ ਮਹਾਨਸਾਭਿਮੁਖੋ ਵਾਤਪਾਨੇ ਠਤ੍ਵਾ ‘‘ਕਿਂ ਨੁ ਖੋ ਕਰੋਨ੍ਤੀ ਸਾ ਅਨ੍ਧਬਾਲਾ ਵਿਚਰਤੀ’’ਤਿ ਓਲੋਕੇਤ੍ਵਾ ਤਂ ਸੇਦਕਿਲਿਨ੍ਨਂ ਛਾਰਿਕਾਯ ਓਕਿਣ੍ਣਂ ਅਙ੍ਗਾਰਮਸਿਮਕ੍ਖਿਤਂ ਤਥਾ ਸਂਵਿਦਹਿਤ੍ਵਾ ਵਿਚਰਮਾਨਂ ਦਿਸ੍ਵਾ ‘‘ਅਹੋ ਅਨ੍ਧਬਾਲਾ ਏਵਰੂਪੇ ਠਾਨੇ ਇਮਂ ਸਿਰਿਸਮ੍ਪਤ੍ਤਿਂ ਨਾਨੁਭਵਤਿ, ‘‘ਮੁਣ੍ਡਕਸਮਣੇ ਉਪਟ੍ਠਹਿਸ੍ਸਾਮੀ’ਤਿ ਤੁਟ੍ਠਚਿਤ੍ਤਾ ਵਿਚਰਤੀ’’ਤਿ ਹਸਿਤ੍ਵਾ ਅਪਗਞ੍ਛਿ.

ਤਸ੍ਮਿਂ ਅਪਗਤੇ ਤਸ੍ਸ ਸਨ੍ਤਿਕੇ ਠਿਤਾ ਸਿਰਿਮਾ ‘‘ਕਿਂ ਨੁ ਖੋ ਓਲੋਕੇਤ੍ਵਾ ਏਸ ਹਸਤੀ’’ਤਿ ਤੇਨੇਵ ਵਾਤਪਾਨੇਨ ਓਲੋਕੇਨ੍ਤੀ ਉਤ੍ਤਰਂ ਦਿਸ੍ਵਾ ‘‘ਇਮਂ ਓਲੋਕੇਤ੍ਵਾ ਇਮਿਨਾ ਹਸਿਤਂ, ਅਦ੍ਧਾ ਇਮਸ੍ਸ ਏਤਾਯ ਸਦ੍ਧਿਂ ਸਨ੍ਥਵੋ ਅਤ੍ਥੀ’’ਤਿ ਚਿਨ੍ਤੇਸਿ. ਸਾ ਕਿਰ ਅਡ੍ਢਮਾਸਂ ਤਸ੍ਮਿਂ ਗੇਹੇ ਬਾਹਿਰਕਇਤ੍ਥੀ ਹੁਤ੍ਵਾ ਵਸਮਾਨਾਪਿ ਤਂ ਸਮ੍ਪਤ੍ਤਿਂ ਅਨੁਭਵਮਾਨਾ ਅਤ੍ਤਨੋ ਬਾਹਿਰਕਇਤ੍ਥਿਭਾਵਂ ਅਜਾਨਿਤ੍ਵਾ ‘‘ਅਹਂ ਘਰਸਾਮਿਨੀ’’ਤਿ ਸਞ੍ਞਮਕਾਸਿ. ਸਾ ਉਤ੍ਤਰਾਯ ਆਘਾਤਂ ਬਨ੍ਧਿਤ੍ਵਾ ‘‘ਦੁਕ੍ਖਮਸ੍ਸਾ ਉਪ੍ਪਾਦੇਸ੍ਸਾਮੀ’’ਤਿ ਪਾਸਾਦਾ ਓਰੁਯ੍ਹ ਮਹਾਨਸਂ ਪਵਿਸਿਤ੍ਵਾ ਪੂਵਪਚਨਟ੍ਠਾਨੇ ਪਕ੍ਕੁਥਿਤਂ ¶ ਸਪ੍ਪਿਂ ਕਟਚ੍ਛੁਨਾ ਆਦਾਯ ਉਤ੍ਤਰਾਭਿਮੁਖਂ ¶ ਪਾਯਾਸਿ. ਉਤ੍ਤਰਾ ਤਂ ਆਗਚ੍ਛਨ੍ਤਿਂ ਦਿਸ੍ਵਾ ‘‘ਮਮ ਸਹਾਯਿਕਾਯ ਮਯ੍ਹਂ ਉਪਕਾਰੋ ਕਤੋ, ਚਕ੍ਕਵਾਲ਼ਂ ਅਤਿਸਮ੍ਬਾਧਂ, ਬ੍ਰਹ੍ਮਲੋਕੋ ਅਤਿਨੀਚਕੋ, ਮਮ ਪਨ ਸਹਾਯਿਕਾਯ ਗੁਣੋਵ ਮਹਨ੍ਤੋ, ਅਹਮ੍ਪਿ ਏਤਂ ਨਿਸ੍ਸਾਯ ਦਾਨਞ੍ਚ ਦਾਤੁਂ ਧਮ੍ਮਞ੍ਚ ਸੋਤੁਂ ਲਭਿਂ, ਸਚੇ ਮਮ ਏਤਿਸ੍ਸਾਯ ਉਪਰਿ ਕੋਧੋ ਅਤ੍ਥਿ, ਇਦਂ ਸਪ੍ਪਿ ਮਂ ਦਹਤੁ, ਸਚੇ ਨਤ੍ਥਿ, ਮਾ ਮਂ ਦਹਤੂ’’ਤਿ ਤਂ ਮੇਤ੍ਤਾਯ ਫਰਿ. ਤਾਯ ਤਸ੍ਸਾ ਮਤ੍ਥਕੇ ਆਸਿਞ੍ਚਿਤਮ੍ਪਿ ਪਕ੍ਕੁਥਿਤਸਪ੍ਪਿ ਸੀਤੋਦਕਂ ਵਿਯ ਅਹੋਸਿ. ਅਥ ਨਂ ‘‘ਇਦਂ ਸੀਤਲਂ ਭਵਿਸ੍ਸਤੀ’’ਤਿ ਪੁਨ ਕਟਚ੍ਛੁਕਂ ਪੂਰੇਤ੍ਵਾ ਆਦਾਯ ਆਗਚ੍ਛਨ੍ਤਿਂ ਉਤ੍ਤਰਾਯ ਦਾਸਿਯੋ ਦਿਸ੍ਵਾ ‘‘ਅਰੇ ਦੁਬ੍ਬਿਨੀਤੇ ਨ ਤ੍ਵਂ ਅਮ੍ਹਾਕਂ ਅਯ੍ਯਾਯ ਉਪਰਿ ਪਕ੍ਕਸਪ੍ਪਿਂ ਆਸਿਞ੍ਚਿਤੁਂ ਅਨੁਚ੍ਛਵਿਕਾ’’ਤਿ ਸਨ੍ਤਜ੍ਜੇਨ੍ਤਿਯੋ ਇਤੋ ਚਿਤੋ ਚ ਉਟ੍ਠਾਯ ਹਤ੍ਥੇਹਿ ਚ ਪਾਦੇਹਿ ¶ ਚ ਪੋਥੇਤ੍ਵਾ ਭੂਮਿਯਂ ਪਾਤੇਸੁਂ, ਉਤ੍ਤਰਾ ਵਾਰੇਨ੍ਤੀਪਿ ਵਾਰੇਤੁਂ ਨਾਸਕ੍ਖਿ. ਅਥ ਸਾ ਉਪਰਿ ਠਤ੍ਵਾ ਸਬ੍ਬਾ ਦਾਸਿਯੋ ਪਟਿਬਾਹਿਤ੍ਵਾ ‘‘ਕਿਸ੍ਸ ਤੇ ਏਵਰੂਪਂ ਭਾਰਿਯਂ ਕਮ੍ਮਂ ਕਤ’’ਨ੍ਤਿ ਸਿਰਿਮਂ ਓਵਦਿਤ੍ਵਾ ਉਣ੍ਹੋਦਕੇਨ ਨ੍ਹਾਪੇਤ੍ਵਾ ਸਤਪਾਕਤੇਲੇਨ ਅਬ੍ਭਞ੍ਜਿ.

ਤਸ੍ਮਿਂ ਖਣੇ ਸਾ ਅਤ੍ਤਨੋ ਬਾਹਿਰਕਿਤ੍ਥਿਭਾਵਂ ਞਤ੍ਵਾ ਚਿਨ੍ਤੇਸਿ ‘‘ਮਯਾ ਭਾਰਿਯਂ ਕਮ੍ਮਂ ਕਤਂ ਸਾਮਿਕਸ੍ਸ ਹਸਿਤਮਤ੍ਤਕਾਰਣਾ ਇਮਿਸ੍ਸਾ ਉਪਰਿ ਪਕ੍ਕਸਪ੍ਪਿਂ ਆਸਿਞ੍ਚਨ੍ਤਿਯਾ, ਅਯਂ ‘ਗਣ੍ਹਥ ਨ’ਨ੍ਤਿ ਦਾਸਿਯੋ ਨ ਆਣਾਪੇਤ੍ਵਾ ਮਂ ਵਿਹੇਠਨਕਾਲੇਪਿ ਸਬ੍ਬਾ ਦਾਸਿਯੋ ਪਟਿਬਾਹਿਤ੍ਵਾ ਮਯ੍ਹਂ ਕਤ੍ਤਬ੍ਬਮੇਵ ਅਕਾਸਿ. ਸਚਾਹਂ ਇਮਂ ਨ ਖਮਾਪੇਸ੍ਸਾਮਿ, ਮੁਦ੍ਧਾ ਮੇ ਸਤ੍ਤਧਾ ਫਲੇਯ੍ਯਾ’’ਤਿ ਤਸ੍ਸਾ ਪਾਦਮੂਲੇ ਨਿਪਜ੍ਜਿਤ੍ਵਾ ‘‘ਅਯ੍ਯੇ, ਖਮਾਹਿ ਮੇ ਦੋਸ’’ਨ੍ਤਿ ਆਹ. ‘‘ਅਹਂ ਸਪ੍ਪਿਤਿਕਾ ਧੀਤਾ, ਪਿਤਰਿ ਮੇ ਖਮਾਪਿਤੇ ਖਮਿਸ੍ਸਾਮੀ’’ਤਿ. ‘‘ਹੋਤੁ, ਅਯ੍ਯੇ, ਪਿਤਰਮ੍ਪਿ ਤੇ ਪੁਣ੍ਣਸੇਟ੍ਠਿਂ ਖਮਾਪੇਸ੍ਸਾਮੀ’’ਤਿ. ‘‘ਪੁਣ੍ਣੋ ਮਮ ਵਟ੍ਟੇ ਜਨਕਪਿਤਾ, ਵਿਵਟ੍ਟੇ ਜਨਕਪਿਤਰਿ ਖਮਾਪਿਤੇ ਪਨ ਅਹਂ ਖਮਿਸ੍ਸਾਮੀ’’ਤਿ. ‘‘ਕੋ ਪਨ ਤੇ ਵਿਵਟ੍ਟੇ ਜਨਕਪਿਤਾ’’ਤਿ? ‘‘ਸਮ੍ਮਾਸਮ੍ਬੁਦ੍ਧੋ’’ਤਿ. ‘‘ਮਯ੍ਹਂ ਤੇਨ ਸਦ੍ਧਿਂ ਵਿਸ੍ਸਾਸੋ ਨਤ੍ਥਿ, ਅਹਂ ਕਿਂ ਕਰਿਸ੍ਸਾਮੀ’’ਤਿ? ‘‘ਸਤ੍ਥਾ ਸ੍ਵੇ ਭਿਕ੍ਖੁਸਙ੍ਘਂ ਆਦਾਯ ਇਧਾਗਮਿਸ੍ਸਤਿ, ਤ੍ਵਂ ਯਥਾਲਦ੍ਧਂ ਸਕ੍ਕਾਰਂ ਗਹੇਤ੍ਵਾ ਇਧੇਵ ਆਗਨ੍ਤ੍ਵਾ ਤਂ ¶ ਖਮਾਪੇਹੀ’’ਤਿ. ਸਾ ‘‘ਸਾਧੁ, ਅਯ੍ਯੇ’’ਤਿ ਉਟ੍ਠਾਯ ਅਤ੍ਤਨੋ ਗੇਹਂ ਗਨ੍ਤ੍ਵਾ ਪਞ੍ਚਸਤਪਰਿਚਾਰਿਕਿਤ੍ਥਿਯੋ ਆਣਾਪੇਤ੍ਵਾ ਨਾਨਾਵਿਧਾਨਿ ਖਾਦਨੀਯਭੋਜਨੀਯਾਨਿ ਚੇਵ ਸੂਪੇਯ੍ਯਾਨਿ ਚ ਸਮ੍ਪਾਦੇਤ੍ਵਾ ਪੁਨਦਿਵਸੇ ਤਂ ਸਕ੍ਕਾਰਂ ਆਦਾਯ ਉਤ੍ਤਰਾਯ ਗੇਹਂ ਆਗਨ੍ਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਪਤ੍ਤੇ ਪਤਿਟ੍ਠਾਪੇਤੁਂ ਅਵਿਸਹਨ੍ਤੀ ਅਟ੍ਠਾਸਿ, ਤਂ ਸਬ੍ਬਂ ਗਹੇਤ੍ਵਾ ਉਤ੍ਤਰਾਵ ਸਂਵਿਦਹਿ.

ਸਿਰਿਮਾਪਿ ¶ ਸਤ੍ਥੁ ਭਤ੍ਤਕਿਚ੍ਚਾਵਸਾਨੇ ਸਦ੍ਧਿਂ ਪਰਿਵਾਰੇਨ ਸਤ੍ਥੁ ਪਾਦਮੂਲੇ ਨਿਪਜ੍ਜਿ. ਅਥ ਨਂ ਸਤ੍ਥਾ ਪੁਚ੍ਛਿ ‘‘ਕੋ ਤੇ ਅਪਰਾਧੋ’’ਤਿ. ‘‘ਭਨ੍ਤੇ ਮਯਾ ਹਿਯ੍ਯੋ ਇਦਂ ਨਾਮ ਕਤਂ, ਅਥ ਮੇ ਸਹਾਯਿਕਾ ਮਂ ਵਿਹੇਠਯਮਾਨਾ ਦਾਸਿਯੋ ਨਿਵਾਰੇਤ੍ਵਾ ਮਯ੍ਹਂ ਉਪਕਾਰਮੇਵ ਅਕਾਸਿ. ਸਾਹਂ ਇਮਿਸ੍ਸਾ ਗੁਣਂ ਜਾਨਿਤ੍ਵਾ ਇਮਂ ਖਮਾਪੇਸਿਂ, ਅਥ ਮਂ ਏਸਾ ‘ਤੁਮ੍ਹੇਸੁ ਖਮਾਪਿਤੇਸੁ ਖਮਿਸ੍ਸਾਮੀ’ਤਿ ਆਹਾ’’ਤਿ. ‘‘ਏਵਂ ਕਿਰ ਉਤ੍ਤਰੇ’’ਤਿ. ‘‘ਆਮ, ਭਨ੍ਤੇ, ਸੀਸੇ ਮੇ ਸਹਾਯਿਕਾਯ ਪਕ੍ਕਸਪ੍ਪਿ ਆਸਿਤ੍ਤ’’ਨ੍ਤਿ. ‘‘ਅਥ ਤਯਾ ਕਿਂ ਚਿਨ੍ਤਿਤ’’ਨ੍ਤਿ? ‘‘ਚਕ੍ਕਵਾਲ਼ਂ ਅਤਿਸਮ੍ਬਾਧਂ, ਬ੍ਰਹ੍ਮਲੋਕੋ ਅਤਿਨੀਚਕੋ, ਮਮ ਸਹਾਯਿਕਾਯ ਗੁਣੋਵ ਮਹਨ੍ਤੋ, ਅਹਞ੍ਹਿ ਏਤਂ ਨਿਸ੍ਸਾਯ ਦਾਨਞ੍ਚ ਦਾਤੁਂ ਧਮ੍ਮਞ੍ਚ ਸੋਤੁਂ ਅਲਤ੍ਥਂ, ਸਚੇ ਮੇ ਇਮਿਸ੍ਸਾ ਉਪਰਿ ਕੋਧੋ ਅਤ੍ਥਿ, ਇਦਂ ਮਂ ਦਹਤੁ, ਨੋ ਚੇ, ਮਾ ਦਹਤੂ’’ਤਿ ਏਵਂ ਚਿਨ੍ਤੇਤ੍ਵਾ ਇਮਂ ਮੇਤ੍ਤਾਯ ਫਰਿਂ, ਭਨ੍ਤੇਤਿ. ਸਤ੍ਥਾ ‘‘ਸਾਧੁ ਸਾਧੁ, ਉਤ੍ਤਰੇ, ਏਵਂ ਕੋਧਂ ਜਿਨਿਤੁਂ ਵਟ੍ਟਤਿ. ਕੋਧਨੋ ਹਿ ਨਾਮ ਅਕ੍ਕੋਧੇਨ, ਅਕ੍ਕੋਸਕੋ ਅਨਕ੍ਕੋਸਨ੍ਤੇਨ, ਪਰਿਭਾਸਕੋ ਅਪਰਿਭਾਸਨ੍ਤੇਨ ¶ , ਥਦ੍ਧਮਚ੍ਛਰੀ ਅਤ੍ਤਨੋ ਸਨ੍ਤਕਸ੍ਸ ਦਾਨੇਨ, ਮੁਸਾਵਾਦੀ ਸਚ੍ਚਵਚਨੇਨ ਜਿਨਿਤਬ੍ਬੋ’’ਤਿ ਇਮਮਤ੍ਥਂ ਦਸ੍ਸੇਨ੍ਤੋ –

‘‘ਅਕ੍ਕੋਧੇਨ ਜਿਨੇ ਕੋਧਂ, ਅਸਾਧੁਂ ਸਾਧੁਨਾ ਜਿਨੇ;

ਜਿਨੇ ਕਦਰਿਯਂ ਦਾਨੇਨ, ਸਚ੍ਚੇਨਾਲਿਕਵਾਦਿਨ’’ਨ੍ਤਿ. (ਧ. ਪ. ੨੨੩) –

ਇਮਂ ਗਾਥਂ ਵਤ੍ਵਾ ਗਾਥਾਪਰਿਯੋਸਾਨੇ ਚਤੁਸਚ੍ਚਕਥਂ ਅਭਾਸਿ. ਸਚ੍ਚਪਰਿਯੋਸਾਨੇ ਉਤ੍ਤਰਾ ਸਕਦਾਗਾਮਿਫਲੇ ਪਤਿਟ੍ਠਹਿ, ਸਾਮਿਕੋ ਚ ਸਸੁਰੋ ਚ ਸਸ੍ਸੁ ਚ ਸੋਤਾਪਤ੍ਤਿਫਲਂ ਸਚ੍ਛਿਕਰਿਂਸੁ, ਸਿਰਿਮਾਪਿ ਪਞ੍ਚਸਤਪਰਿਵਾਰਾ ਸੋਤਾਪਨ੍ਨਾ ਅਹੋਸਿ. ਅਪਰਭਾਗੇ ਉਤ੍ਤਰਾ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਉਪ੍ਪਜ੍ਜਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦੇਵਚਾਰਿਕਂ ¶ ਚਰਨ੍ਤੋ ਉਤ੍ਤਰਂ ਦੇਵਧੀਤਰਂ ਦਿਸ੍ਵਾ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ¶ ਤਂ ਦੇਵਿ ਮਹਾਨੁਭਾਵੇ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪਟਿਪੁਚ੍ਛਿ;

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਇਸ੍ਸਾ ਚ ਮਚ੍ਛੇਰਮਥੋ ਪਲ਼ਾਸੋ, ਨਾਹੋਸਿ ਮਯ੍ਹਂ ਘਰਮਾਵਸਨ੍ਤਿਯਾ;

ਅਕ੍ਕੋਧਨਾ ਭਤ੍ਤੁ ਵਸਾਨੁਵਤ੍ਤਿਨੀ, ਉਪੋਸਥੇ ਨਿਚ੍ਚਹਮਪ੍ਪਮਤ੍ਤਾ.

‘‘ਚਾਤੁਦ੍ਦਸਿਂ ¶ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ.

‘‘ਸਾਹਂ ਸਕੇਨ ਸੀਲੇਨ, ਯਸਸਾ ਚ ਯਸਸ੍ਸਿਨੀ;

ਅਨੁਭੋਮਿ ਸਕਂ ਪੁਞ੍ਞਂ, ਸੁਖਿਤਾ ਚਮ੍ਹਿਨਾਮਯਾ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ¶ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਹਂ ਅਕਾਸਿਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

੧੨੬. ਮਮ ਚ, ਭਨ੍ਤੇ, ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦੇਯ੍ਯਾਸਿ ‘‘ਉਤ੍ਤਰਾ ਨਾਮ ਭਨ੍ਤੇ, ਉਪਾਸਿਕਾ ਭਗਵਤੋ ਪਾਦੇ ਸਿਰਸਾ ਵਨ੍ਦਤੀ’’ਤਿ. ਅਨਚ੍ਛਰਿਯਂ ਖੋ ਪਨੇਤਂ, ਭਨ੍ਤੇ, ਯਂ ਮਂ ਭਗਵਾ ਅਞ੍ਞਤਰਸ੍ਮਿਂ ਸਾਮਞ੍ਞਫਲੇ ਬ੍ਯਾਕਰੇਯ੍ਯ, ਤਂ ਭਗਵਾ ਸਕਦਾਗਾਮਿਫਲੇ ਬ੍ਯਾਕਾਸੀਤਿ.

੧੨੮. ਤਤ੍ਥ ਇਸ੍ਸਾ ਚ ਮਚ੍ਛੇਰਮਥੋ ਪਲ਼ਾਸੋ, ਨਾਹੋਸਿ ਮਯ੍ਹਂ ਘਰਮਾਵਸਨ੍ਤਿਯਾਤਿ ਯਾ ਚ ਅਗਾਰਮਜ੍ਝੇ ਵਸਨ੍ਤੀਨਂ ਅਞ੍ਞਾਸਂ ਇਤ੍ਥੀਨਂ ਸਮ੍ਪਤ੍ਤਿਆਦਿਵਿਸਯਾ ਪਰਸਮ੍ਪਤ੍ਤਿਉਸੂਯਨਲਕ੍ਖਣਾ ਇਸ੍ਸਾ, ਯਞ੍ਚ ਤਾਵਕਾਲਿਕਾਦਿਵਸੇਨਾਪਿ ਕਿਞ੍ਚਿ ਯਾਚਨ੍ਤਾਨਂ ਅਦਾਤੁਕਾਮਤਾਯ ਅਤ੍ਤਸਮ੍ਪਤ੍ਤਿਨਿਗੂਹਨਲਕ੍ਖਣਂ ਮਚ੍ਛਰਿਯਂ ¶ , ਯੋ ਚ ਕੁਲਪਦੇਸਾਦਿਨਾ ਪਰੇਹਿ ਯੁਗਗ੍ਗਾਹਲਕ੍ਖਣੋ ਪਲ਼ਾਸੋ ਉਪ੍ਪਜ੍ਜਤਿ, ਸੋ ਤਿਵਿਧੋਪਿ ਪਾਪਧਮ੍ਮੋ ਗੇਹੇ ਠਿਤਾਯ ਮਯ੍ਹਂ ਸਤਿਪਿ ਪਚ੍ਚਯਸਮਵਾਯੇ ਨਾਹੋਸਿ ਨ ਉਪ੍ਪਜ੍ਜਿ. ਅਕ੍ਕੋਧਨਾਤਿ ਖਨ੍ਤਿਮੇਤ੍ਤਾਨੁਦ੍ਦਯਸਮ੍ਪਨ੍ਨਤਾਯ ਅਕੁਜ੍ਝਨਸਭਾਵਾ. ਭਤ੍ਤੁ ਵਸਾਨੁਵਤ੍ਤਿਨੀਤਿ ਪੁਬ੍ਬੁਟ੍ਠਾਨਪਚ੍ਛਾਨਿਪਾਤਨਾਦਿਨਾ ਸਾਮਿਕਸ੍ਸ ਅਨੁਕੂਲਭਾਵੇਨ ਵਸੇ ਵਤ੍ਤਨਸੀਲਾ, ਮਨਾਪਚਾਰਿਨੀਤਿ ਅਤ੍ਥੋ. ਉਪੋਸਥੇ ਨਿਚ੍ਚਹਮਪ੍ਪਮਤ੍ਤਾਤਿ ਅਹਂ ਉਪੋਸਥਸੀਲਰਕ੍ਖਣੇ ਨਿਚ੍ਚਂ ਅਪ੍ਪਮਤ੍ਤਾ ਅਪ੍ਪਮਾਦਵਿਹਾਰਿਨੀ.

੧੨੯. ਤਮੇਵ ਉਪੋਸਥੇ ਅਪ੍ਪਮਾਦਂ ਦਸ੍ਸੇਨ੍ਤੀ ਯੇਸੁ ਦਿਵਸੇਸੁ ਤਂ ਰਕ੍ਖਿਤਬ੍ਬਂ, ਯਾਦਿਸਂ ਯਥਾ ਚ ਰਕ੍ਖਿਤਬ੍ਬਂ, ਤਂ ਦਸ੍ਸੇਤੁਂ ‘‘ਚਾਤੁਦ੍ਦਸਿ’’ਨ੍ਤਿਆਦਿਮਾਹ. ਤਤ੍ਥ ਚਾਤੁਦ੍ਦਸਿਂ ਪਞ੍ਚਦਸਿਨ੍ਤਿ ਪਕ੍ਖਸ੍ਸਾਤਿ ਸਮ੍ਬਨ੍ਧੋ, ਅਚ੍ਚਨ੍ਤਸਂਯੋਗੇ ਚੇਤਂ ਉਪਯੋਗਵਚਨਂ. ਯਾ ਚ ਪਕ੍ਖਸ੍ਸ ਅਟ੍ਠਮੀਤਿ ਏਤ੍ਥ ਚਾਤਿ ਵਚਨਸੇਸੋ. ਪਾਟਿਹਾਰਿਯਪਕ੍ਖਞ੍ਚਾਤਿ ਪਟਿਹਰਣਕਪਕ੍ਖਞ੍ਚ, ਚਾਤੁਦ੍ਦਸੀਪਞ੍ਚਦਸੀਅਟ੍ਠਮੀਨਂ ਯਥਾਕ੍ਕਮਂ ਆਦਿਤੋ ਅਨ੍ਤਤੋ ਚਾਤਿ ਪਵੇਸਨਨਿਕ੍ਖਮਨਵਸੇਨ ਉਪੋਸਥਸੀਲਸ੍ਸ ਪਟਿਹਰਿਤਬ੍ਬਂ ਪਕ੍ਖਞ੍ਚ ¶ , ਤੇਰਸੀ ਪਾਟਿਪਦਾ ਸਤ੍ਤਮੀ ਨਵਮੀ ¶ ਚਾਤਿ ਅਤ੍ਥੋ. ਅਟ੍ਠਙ੍ਗਸੁਸਮਾਗਤਨ੍ਤਿ ਪਾਣਾਤਿਪਾਤਾਵੇਰਮਣੀਆਦੀਹਿ ਅਟ੍ਠਹਙ੍ਗੇਹਿ ਏਵ ਸੁਟ੍ਠੁ ਸਮਾਗਤਂ ਸਮਨ੍ਨਾਗਤਂ.

੧੩੦. ਉਪਵਸਿਸ੍ਸਨ੍ਤਿ ਉਪਵਸਿਂ. ਅਤੀਤਤ੍ਥੇ ਹਿ ਇਦਂ ਅਨਾਗਤਵਚਨਂ. ਕੇਚਿ ਪਨ ‘‘ਉਪਵਸਿਂ’’ਇਚ੍ਚੇਵ ਪਠਨ੍ਤਿ. ਸਦਾਤਿ ਸਪ੍ਪਟਿਹਾਰਿਕੇਸੁ ਸਬ੍ਬੇਸੁ ਉਪੋਸਥਦਿਵਸੇਸੁ. ਸੀਲੇਸੂਤਿ ਉਪੋਸਥਸੀਲੇਸੁ ਸਾਧੇਤਬ੍ਬੇਸੁ. ਨਿਪ੍ਫਾਦੇਤਬ੍ਬੇ ਹਿ ਇਦਂ ਭੁਮ੍ਮਂ. ਸਂਵੁਤਾਤਿ ਕਾਯਵਾਚਾਚਿਤ੍ਤੇਹਿ ਸਂਵੁਤਾ. ਸਦਾਤਿ ਵਾ ਸਬ੍ਬਕਾਲਂ. ਸੀਲੇਸੂਤਿ ਨਿਚ੍ਚਸੀਲੇਸੁ. ਸਂਵੁਤਾਤਿ ਕਾਯਵਾਚਾਹਿ ਸਂਵੁਤਾ.

੧੩੧. ਇਦਾਨਿ ਤਂ ਨਿਚ੍ਚਸੀਲਂ ਦਸ੍ਸੇਤੁਂ ‘‘ਪਾਣਾਤਿਪਾਤਾ ਵਿਰਤਾ’’ਤਿਆਦਿ ਵੁਤ੍ਤਂ. ਤਤ੍ਥ ਪਾਣੋਤਿ ਵੋਹਾਰਤੋ ਸਤ੍ਤੋ, ਪਰਮਤ੍ਥਤੋ ਜੀਵਿਤਿਨ੍ਦ੍ਰਿਯਂ. ਪਾਣਸ੍ਸ ਅਤਿਪਾਤੋ ਪਾਣਵਧੋ ਪਾਣਘਾਤੋ ਪਾਣਾਤਿਪਾਤੋ, ਅਤ੍ਥਤੋ ਪਾਣੇ ਪਾਣਸਞ੍ਞਿਨੋ ਜੀਵਿਤਿਨ੍ਦ੍ਰਿਯੁਪਚ੍ਛੇਦਕਉਪਕ੍ਕਮਸਮੁਟ੍ਠਾਪਿਕਾ ਕਾਯਵਚੀਦ੍ਵਾਰਾਨਂ ਅਞ੍ਞਤਰਦ੍ਵਾਰਪਵਤ੍ਤਾ ਵਧਕਚੇਤਨਾ. ਤਤੋ ਪਾਣਾਤਿਪਾਤਾ. ਵਿਰਤਾਤਿ ਓਰਤਾ, ਨਿਵਤ੍ਤਾਤਿ ਅਤ੍ਥੋ.

ਮੁਸਾਵਾਦਾਤਿ ਮੁਸਾ ਨਾਮ ਵਿਸਂਵਾਦਨਪੁਰੇਕ੍ਖਾਰਸ੍ਸ ਅਤ੍ਥਭਞ੍ਜਨਕੋ ਵਚੀਪਯੋਗੋ ਵਾ ਕਾਯਪਯੋਗੋ ਵਾ, ਵਿਸਂਵਾਦਨਾਧਿਪ੍ਪਾਯੇਨ ਪਰਸ੍ਸ ਵਿਸਂਵਾਦਕਕਾਯਵਚੀਪਯੋਗਸਮੁਟ੍ਠਾਪਿਕਾ ਚੇਤਨਾ ਮੁਸਾਵਾਦੋ. ਅਥ ਵਾ ਮੁਸਾਤਿ ਅਭੂਤਂ ਅਤਚ੍ਛਂ ਵਤ੍ਥੁ, ਵਾਦੋਤਿ ਤਸ੍ਸ ਭੂਤਤੋ ਤਚ੍ਛਤੋ ਵਿਞ੍ਞਾਪੇਤੁਕਾਮਸ੍ਸ ¶ ਤਥਾ ਵਿਞ੍ਞਤ੍ਤਿਸਮੁਟ੍ਠਾਪਿਕਾ ਚੇਤਨਾ. ਤਤੋ ਮੁਸਾਵਾਦਾ ਸਞ੍ਞਤਾ ਓਰਤਾ, ਵਿਰਤਾਤਿ ਅਤ੍ਥੋ. ਚ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ.

ਥੇਯ੍ਯਾਤਿ ਥੇਯ੍ਯਂ ਵੁਚ੍ਚਤਿ ਥੇਨਭਾਵੋ, ਚੋਰਿਕਾਯ ਪਰਸ੍ਸਹਰਣਨ੍ਤਿ ਅਤ੍ਥੋ. ਅਤ੍ਥਤੋ ਪਰਪਰਿਗ੍ਗਹਿਤੇ ਪਰਪਰਿਗ੍ਗਹਿਤਸਞ੍ਞਿਨੋ ਤਦਾਦਾਯਕਉਪਕ੍ਕਮਸਮੁਟ੍ਠਾਪਿਕਾ ਥੇਯ੍ਯਚੇਤਨਾ ਥੇਯ੍ਯਂ. ਤਤੋ ਥੇਯ੍ਯਾ ਸਞ੍ਞਤਾ, ਆਰਕਾਤਿ ਵਾ ਸਮ੍ਬਨ੍ਧੋ.

ਅਤਿਚਾਰਾਤਿ ਅਤਿਚ੍ਚ ਚਾਰੋ ਅਤਿਚਾਰੋ, ਲੋਕਮਰਿਯਾਦਂ ਅਤਿਕ੍ਕਮਿਤ੍ਵਾ ਅਗਮਨੀਯਟ੍ਠਾਨੇ ਕਾਮਵਸੇਨ ਚਾਰੋ ਮਿਚ੍ਛਾਚਾਰੋਤਿ ਅਤ੍ਥੋ. ਅਗਮਨੀਯਟ੍ਠਾਨਂ ਨਾਮ – ਪੁਰਿਸਾਨਂ ਮਾਤੁਰਕ੍ਖਿਤਾ ਪਿਤੁਰਕ੍ਖਿਤਾ ਮਾਤਾਪਿਤੁਰਕ੍ਖਿਤਾ ਭਾਤੁਰਕ੍ਖਿਤਾ ਭਗਿਨਿਰਕ੍ਖਿਤਾ ਞਾਤਿਰਕ੍ਖਿਤਾ ਗੋਤ੍ਤਰਕ੍ਖਿਤਾ ¶ ਧਮ੍ਮਰਕ੍ਖਿਤਾ ¶ ਸਾਰਕ੍ਖਾ ਸਪਰਿਦਣ੍ਡਾਤਿ ਦਸ, ਧਨਕ੍ਕੀਤਾ ਛਨ੍ਦਵਾਸਿਨੀ ਭੋਗਵਾਸਿਨੀ ਪਟਵਾਸਿਨੀ ਓਦਪਤ੍ਤਕਿਨੀ ਓਭਟਚੁਮ੍ਬਟਾ ਦਾਸੀ ਚ ਭਰਿਯਾ ਕਮ੍ਮਕਾਰੀ ਚ ਭਰਿਯਾ ਧਜਾਹਟਾ ਮੁਹੁਤ੍ਤਿਕਾਤਿ ਦਸਾਤਿ ਵੀਸਤਿ ਇਤ੍ਥਿਯੋ. ਇਤ੍ਥੀਸੁ ਪਨ ਦ੍ਵਿਨ੍ਨਂ ਸਾਰਕ੍ਖਸਪਰਿਦਣ੍ਡਾਨਂ ਦਸਨ੍ਨਞ੍ਚ ਧਨਕ੍ਕੀਤਾਦੀਨਨ੍ਤਿ ਦ੍ਵਾਦਸਨ੍ਨਂ ਅਞ੍ਞਪੁਰਿਸਾ ਅਗਮਨੀਯਟ੍ਠਾਨਂ, ਇਦਮੇਵ ਇਧ ਅਧਿਪ੍ਪੇਤਂ. ਲਕ੍ਖਣਤੋ ਪਨ ਅਸਦ੍ਧਮ੍ਮਾਧਿਪ੍ਪਾਯੇਨ ਕਾਯਦ੍ਵਾਰਪਵਤ੍ਤਾ ਅਗਮਨੀਯਟ੍ਠਾਨਵੀਤਿਕ੍ਕਮਚੇਤਨਾ ਅਤਿਚਾਰੋ. ਤਸ੍ਮਾ ਅਤਿਚਾਰਾ.

ਮਜ੍ਜਪਾਨਾਤਿ ਮਜ੍ਜਂ ਵੁਚ੍ਚਤਿਮਦਨੀਯਟ੍ਠੇਨ ਸੁਰਾ ਚ ਮੇਰਯਞ੍ਚ, ਪਿਵਨ੍ਤਿ ਤੇਨਾਤਿ ਪਾਨਂ, ਮਜ੍ਜਸ੍ਸ ਪਾਨਂ ਮਜ੍ਜਪਾਨਂ. ਯਾਯ ਦੁਸ੍ਸੀਲ੍ਯਚੇਤਨਾਯ ਮਜ੍ਜਸਙ੍ਖਾਤਂ ਪਿਟ੍ਠਸੁਰਾ, ਪੂਵਸੁਰਾ, ਓਦਨਿਯਸੁਰਾ, ਕਿਣ੍ਣਪਕ੍ਖਿਤ੍ਤਾ, ਸਮ੍ਭਾਰਸਂਯੁਤ੍ਤਾਤਿ ਪਞ੍ਚਭੇਦਂ ਸੁਰਂ ਵਾ, ਪੁਪ੍ਫਾਸਵੋ, ਫਲਾਸਵੋ, ਮਧ੍ਵਾਸਵੋ, ਗੁਲ਼ਾਸਵੋ, ਸਮ੍ਭਾਰਸਂਯੁਤ੍ਤੋਤਿ ਪਞ੍ਚਭੇਦਂ ਮੇਰਯਂ ਵਾ ਬੀਜਤੋ ਪਟ੍ਠਾਯ ਕੁਸਗ੍ਗੇਨਾਪਿ ਪਿਵਤਿ, ਸਾ ਚੇਤਨਾ ਮਜ੍ਜਪਾਨਂ. ਤਸ੍ਮਾ ਮਜ੍ਜਪਾਨਾ ਆਰਕਾ ਵਿਰਤਾ.

੧੩੨. ਏਵਂ ‘‘ਪਾਣਾਤਿਪਾਤਾ ਵਿਰਤਾ’’ਤਿਆਦਿਨਾ ਪਹਾਤਬ੍ਬਧਮ੍ਮਵਸੇਨ ਵਿਭਜਿਤ੍ਵਾ ਦਸ੍ਸਿਤਂ ਨਿਚ੍ਚਸੀਲਂ ਪੁਨ ਸਮਾਦਾਤਬ੍ਬਤਾਵਸੇਨ ਏਕਤੋ ਕਤ੍ਵਾ ਦਸ੍ਸੇਨ੍ਤੀ ‘‘ਪਞ੍ਚਸਿਕ੍ਖਾਪਦੇ ਰਤਾ’’ਤਿ ਆਹ. ਤਤ੍ਥ ਸਿਕ੍ਖਾਪਦਨ੍ਤਿ ਸਿਕ੍ਖਿਤਬ੍ਬਪਦਂ, ਸਿਕ੍ਖਾਕੋਟ੍ਠਾਸੇਤਿ ਅਤ੍ਥੋ. ਅਥ ਵਾ ਝਾਨਾਦਯੋ ਸਬ੍ਬੇਪਿ ਕੁਸਲਾ ਧਮ੍ਮਾ ਸਿਕ੍ਖਿਤਬ੍ਬਤੋ ਸਿਕ੍ਖਾ, ਪਞ੍ਚਸੁ ਪਨ ਸੀਲਙ੍ਗੇਸੁ ਯਂਕਿਞ੍ਚਿ ਅਙ੍ਗਂ ਤਾਸਂ ਸਿਕ੍ਖਾਨਂ ਪਤਿਟ੍ਠਾਨਟ੍ਠੇਨ ਪਦਨ੍ਤਿ ਸਿਕ੍ਖਾਨਂ ਪਦਤ੍ਤਾ ਸਿਕ੍ਖਾਪਦਂ, ਪਞ੍ਚ ਸੀਲਙ੍ਗਾਨਿ. ਤਸ੍ਮਿਂ ਪਞ੍ਚਵਿਧੇ ਸਿਕ੍ਖਾਪਦੇ ਰਤਾ ਅਭਿਰਤਾਤਿ ਪਞ੍ਚਸਿਕ੍ਖਾਪਦੇ ਰਤਾ. ਅਰਿਯਸਚ੍ਚਾਨ ਕੋਵਿਦਾਤਿ ਪਰਿਞ੍ਞਾਪਹਾਨਸਚ੍ਛਿਕਿਰਿਯਾਭਾਵਨਾਭਿਸਮਯਵਸੇਨ ਦੁਕ੍ਖਸਮੁਦਯਨਿਰੋਧਮਗ੍ਗਸਙ੍ਖਾਤੇਸੁ ਚਤੂਸੁ ਅਰਿਯਸਚ੍ਚੇਸੁ ¶ ਕੁਸਲਾ ਨਿਪੁਣਾ, ਪਟਿਵਿਦ੍ਧਚਤੁਸਚ੍ਚਾਤਿ ਅਤ੍ਥੋ. ਗੋਤਮਸ੍ਸਾਤਿ ਭਗਵਨ੍ਤਂ ਗੋਤ੍ਤੇਨ ਕਿਤ੍ਤੇਤਿ. ਯਸਸ੍ਸਿਨੋਤਿ ਕਿਤ੍ਤਿਮਤੋ, ਪਰਿਵਾਰਵਤੋ ਵਾ.

੧੩੩. ਸਾਹਨ੍ਤਿ ¶ ਸਾ ਯਥਾਵੁਤ੍ਤਗੁਣਾ ਅਹਂ. ਸਕੇਨ ਸੀਲੇਨਾਤਿ ਅਨੁਸ੍ਸੁਕਿਤਾਦਿਨਾ ਅਤ੍ਤਨੋ ਸਭਾਵਸੀਲੇਨ ਚ ਉਪੋਸਥਸੀਲਾਦਿਸਮਾਦਾਨਸੀਲੇਨ ਚ ਕਾਰਣਭੂਤੇਨ. ਤਞ੍ਹਿ ਸਤ੍ਤਾਨਂ ਕਮ੍ਮਸ੍ਸਕਤਾਯ ਹਿਤਸੁਖਾਵਹਤਾਯ ਚ ਵਿਸੇਸਤੋ ‘‘ਸਕ’’ਨ੍ਤਿ ਵੁਚ੍ਚਤਿ. ਤੇਨੇਵਾਹ –

‘‘ਤਞ੍ਹਿ ¶ ਤਸ੍ਸ ਸਕਂ ਹੋਤਿ, ਤਞ੍ਚ ਆਦਾਯ ਗਚ੍ਛਤਿ;

ਤਞ੍ਚਸ੍ਸ ਅਨੁਗਂ ਹੋਤਿ, ਛਾਯਾਵ ਅਨਪਾਯਿਨੀ’’ਤਿ. (ਸਂ. ਨਿ. ੧.੧੧੫);

ਯਸਸਾ ਚ ਯਸਸ੍ਸਿਨੀਤਿ ‘‘ਉਤ੍ਤਰਾ ਉਪਾਸਿਕਾ ਸੀਲਾਚਾਰਸਮ੍ਪਨ੍ਨਾ ਅਨੁਸ੍ਸੁਕੀ ਅਮਚ੍ਛਰੀ ਅਕ੍ਕੋਧਨਾ’’ਤਿਆਦਿਨਾ ‘‘ਆਗਤਫਲਾ ਵਿਞ੍ਞਾਤਸਾਸਨਾ’’ਤਿਆਦਿਨਾ ਚ ਯਥਾਭੂਤਗੁਣਾਧਿਗਤੇਨ ਜਲਤਲੇ ਤੇਲੇਨ ਵਿਯ ਸਮਨ੍ਤਤੋ ਪਤ੍ਥਟੇਨ ਕਿਤ੍ਤਿਸਦ੍ਦੇਨ ਯਸਸ੍ਸਿਨੀ ਕਿਤ੍ਤਿਮਤੀ, ਤੇਨ ਵਾ ਸੀਲਗੁਣੇਨ ਇਧ ਅਧਿਗਤੇਨ ਯਸਪਰਿਵਾਰੇਨ ਯਸਸ੍ਸਿਨੀ ਸਮ੍ਪਨ੍ਨਪਰਿਵਾਰਾ. ਅਨੁਭੋਮਿ ਸਕਂ ਪੁਞ੍ਞਨ੍ਤਿ ਯਥੂਪਚਿਤਂ ਅਤ੍ਤਨੋ ਪੁਞ੍ਞਂ ਪਚ੍ਚਨੁਭੋਮਿ. ਯਸ੍ਸ ਹਿ ਪੁਞ੍ਞਫਲਂ ਅਨੁਭੂਯਤਿ, ਫਲੂਪਚਾਰੇਨ ਤਂ ਪੁਞ੍ਞਮ੍ਪਿ ਅਨੁਭੂਯਤੀਤਿ ਵੁਚ੍ਚਤਿ. ਅਥ ਵਾ ਪੁਥੁਜ੍ਜਨਭਾਵਤੋ ਸੁਚਰਿਤਫਲਮ੍ਪਿ ‘‘ਪੁਞ੍ਞ’’ਨ੍ਤਿ ਵੁਚ੍ਚਤਿ. ਯਥਾਹ ‘‘ਕੁਸਲਾਨਂ, ਭਿਕ੍ਖਵੇ, ਧਮ੍ਮਾਨਂ ਸਮਾਦਾਨਹੇਤੁ ਏਵਮਿਦਂ ਪੁਞ੍ਞਂ ਪਵਡ੍ਢਤੀ’’ਤਿ. ਸੁਖਿਤਾ ਚਮ੍ਹਿਨਾਮਯਾਤਿ ਦਿਬ੍ਬਸੁਖੇਨ ਚ ਫਲਸੁਖੇਨ ਚ ਸੁਖਿਤਾ ਚਮ੍ਹਿ ਭਵਾਮਿ, ਕਾਯਿਕਚੇਤਸਿਕਦੁਕ੍ਖਾਭਾਵਤੋ ਅਨਾਮਯਾ ਅਰੋਗਾ.

੧੩੬. ਮਮ ਚਾਤਿ ਚ-ਸਦ੍ਦੋ ਸਮੁਚ੍ਚਯਤ੍ਥੋ. ਤੇਨ ‘‘ਮਮ ਵਚਨੇਨ ਚ ਵਨ੍ਦੇਯ੍ਯਾਸਿ, ਨ ਤਵ ਸਭਾਵੇਨੇਵਾ’’ਤਿ ਵਨ੍ਦਨਂ ਸਮੁਚ੍ਚਿਨੋਤਿ. ਅਨਚ੍ਛਰਿਯਨ੍ਤਿਆਦਿਨਾ ਅਤ੍ਤਨੋ ਅਰਿਯਸਾਵਿਕਾਭਾਵਸ੍ਸ ਪਾਕਟਭਾਵਂ ਦਸ੍ਸੇਤਿ. ਤਂ ਭਗਵਾਤਿਆਦਿ ਸਙ੍ਗੀਤਿਕਾਰਵਚਨਂ. ਸੇਸਂ ਵੁਤ੍ਤਨਯਮੇਵਾਤਿ.

ਯੁਤ੍ਤਾ ਚ ਤੇ ਪਰਮਅਲਙ੍ਕਤਾ ਹਯਾਤਿ ਸਿਰਿਮਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ¶ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਚ ਸਮਯੇਨ ਹੇਟ੍ਠਾ ਅਨਨ੍ਤਰਵਤ੍ਥੁਮ੍ਹਿ ਵੁਤ੍ਤਾ ਸਿਰਿਮਾ ਗਣਿਕਾ ¶ ਸੋਤਾਪਤ੍ਤਿਫਲਸ੍ਸ ਅਧਿਗਤਤ੍ਤਾ ਵਿਸ੍ਸਜ੍ਜਿਤਕਿਲਿਟ੍ਠਕਮ੍ਮਨ੍ਤਾ ਹੁਤ੍ਵਾ ਸਙ੍ਘਸ੍ਸ ਅਟ੍ਠ ਸਲਾਕਭਤ੍ਤਾਨਿ ਪਟ੍ਠਪੇਸਿ. ਆਦਿਤੋ ਪਟ੍ਠਾਯ ਨਿਬਦ੍ਧਂ ਅਟ੍ਠ ਭਿਕ੍ਖੂ ਗੇਹਂ ਆਗਚ੍ਛਨ੍ਤਿ. ਸਾ ‘‘ਸਪ੍ਪਿਂ ਗਣ੍ਹਥ ਖੀਰਂ ਗਣ੍ਹਥਾ’’ਤਿਆਦੀਨਿ ਵਤ੍ਵਾ ਤੇਸਂ ਪਤ੍ਤੇ ਪੂਰੇਤਿ, ਏਕੇਨ ਲਦ੍ਧਂ ਤਿਣ੍ਣਮ੍ਪਿ ਚਤੁਨ੍ਨਮ੍ਪਿ ਪਹੋਤਿ, ਦੇਵਸਿਕਂ ਸੋਲ਼ਸਕਹਾਪਣਪਰਿਬ੍ਬਯੇਨ ਪਿਣ੍ਡਪਾਤੋ ਦੀਯਤਿ. ਅਥੇਕਦਿਵਸਂ ਏਕੋ ਭਿਕ੍ਖੁ ਤਸ੍ਸਾ ਗੇਹੇ ¶ ਅਟ੍ਠਕਭਤ੍ਤਂ ਭੁਞ੍ਜਿਤ੍ਵਾ ਤਿਯੋਜਨਮਤ੍ਥਕੇ ਏਕਂ ਵਿਹਾਰਂ ਅਗਮਾਸਿ. ਅਥ ਨਂ ਸਾਯਂ ਥੇਰੁਪਟ੍ਠਾਨੇ ਨਿਸਿਨ੍ਨਂ ਪੁਚ੍ਛਿਂਸੁ, ‘‘ਆਵੁਸੋ, ਕਹਂ ਭਿਕ੍ਖਂ ਗਹੇਤ੍ਵਾ ਇਧਾਗਤੋਸੀ’’ਤਿ? ‘‘ਸਿਰਿਮਾਯ ਅਟ੍ਠਕਭਤ੍ਤਂ ਮੇ ਭੁਤ੍ਤ’’ਨ੍ਤਿ. ‘‘ਤਂ ਮਨਾਪਂ ਕਤ੍ਵਾ ਦੇਤਿ, ਆਵੁਸੋ’’ਤਿ. ‘‘ਨ ਸਕ੍ਕਾ ਤਸ੍ਸਾ ਭਤ੍ਤਂ ਵਣ੍ਣੇਤੁਂ, ਅਤਿਪਣੀਤਂ ਕਤ੍ਵਾ ਦੇਤਿ, ਏਕੇਨ ਲਦ੍ਧਂ ਤਿਣ੍ਣਮ੍ਪਿ ਚਤੁਨ੍ਨਮ੍ਪਿ ਪਹੋਤਿ, ਤਸ੍ਸਾ ਪਨ ਦੇਯ੍ਯਧਮ੍ਮਤੋਪਿ ਦਸ੍ਸਨਮੇਵ ਉਤ੍ਤਰਿਤਰਂ’’. ਸਾ ਹਿ ਇਤ੍ਥੀ ਏਵਰੂਪਾ ਚ ਏਵਰੂਪਾ ਚਾਤਿ ਤਸ੍ਸਾ ਗੁਣੇ ਕਥੇਸਿ.

ਅਥੇਕੋ ਭਿਕ੍ਖੁ ਤਸ੍ਸਾ ਗੁਣਕਥਂ ਸੁਤ੍ਵਾ ਅਦਿਸ੍ਵਾਪਿ ਸਵਨੇਨੇਵ ਸਿਨੇਹਂ ਉਪ੍ਪਾਦੇਤ੍ਵਾ ‘‘ਮਯਾ ਤਤ੍ਥ ਗਨ੍ਤ੍ਵਾ ਤਂ ਦਟ੍ਠੁਂ ਵਟ੍ਟਤੀ’’ਤਿ ਅਤ੍ਤਨੋ ਵਸ੍ਸਗ੍ਗਂ ਕਥੇਤ੍ਵਾ ਤਂ ਭਿਕ੍ਖੁਂ ਠਿਤਿਕਂ ਪੁਚ੍ਛਿਤ੍ਵਾ ‘‘ਸ੍ਵੇ, ਆਵੁਸੋ, ਤਸ੍ਮਿਂ ਗੇਹੇ ਤ੍ਵਂ ਸਙ੍ਘਤ੍ਥੇਰੋ ਹੁਤ੍ਵਾ ਅਟ੍ਠਕਭਤ੍ਤਂ ਲਭਿਸ੍ਸਸੀ’’ਤਿ ਸੁਤ੍ਵਾ ਤਙ੍ਖਣਞ੍ਞੇਵ ਪਤ੍ਤਚੀਵਰਮਾਦਾਯ ਪਕ੍ਕਨ੍ਤੋ ਪਾਤੋਵ ਅਰੁਣੇ ਉਗ੍ਗਚ੍ਛਨ੍ਤੇ ਸਲਾਕਗ੍ਗਂ ਪਵਿਸਿਤ੍ਵਾ ਠਿਤੋ ਸਙ੍ਘਤ੍ਥੇਰੋ ਹੁਤ੍ਵਾ ਤਸ੍ਸਾ ਗੇਹੇ ਅਟ੍ਠਕਭਤ੍ਤਂ ਲਭਿ. ਯੋ ਪਨ ਸੋ ਭਿਕ੍ਖੁ ਹਿਯ੍ਯੋ ਭੁਞ੍ਜਿਤ੍ਵਾ ਪਕ੍ਕਾਮਿ, ਤਸ੍ਸ ਗਤਵੇਲਾਯਮੇਵਸ੍ਸਾ ਸਰੀਰੇ ਰੋਗੋ ਉਪ੍ਪਜ੍ਜਿ. ਤਸ੍ਮਾ ਆਭਰਣਾਨਿ ਓਮੁਞ੍ਚਿਤ੍ਵਾ ਨਿਪਜ੍ਜਿ. ਅਥਸ੍ਸਾ ਦਾਸਿਯੋ ਅਟ੍ਠਕਭਤ੍ਤਂ ਲਭਿਤੁਂ ਆਗਤੇ ਭਿਕ੍ਖੂ ਦਿਸ੍ਵਾ ਆਰੋਚੇਸੁਂ. ਸਾ ਗਨ੍ਤ੍ਵਾ ਸਹਤ੍ਥਾ ਪਤ੍ਤੇ ਗਹੇਤੁਂ ਵਾ ਨਿਸੀਦਾਪੇਤੁਂ ਵਾ ਅਸਕ੍ਕੋਨ੍ਤੀ ਦਾਸਿਯੋ ਆਣਾਪੇਸਿ ‘‘ਅਮ੍ਮਾ ਪਤ੍ਤੇ ਗਹੇਤ੍ਵਾ ਅਯ੍ਯੇ ਨਿਸੀਦਾਪੇਤ੍ਵਾ ਯਾਗੁਂ ਪਾਯੇਤ੍ਵਾ ਖਜ੍ਜਕਂ ਦਤ੍ਵਾ ਭਤ੍ਤਵੇਲਾਯ ਪਤ੍ਤੇ ਪੂਰੇਤ੍ਵਾ ਦੇਥਾ’’ਤਿ. ਤਾ ‘‘ਸਾਧੁ, ਅਯ੍ਯੇ’’ਤਿ ਭਿਕ੍ਖੂ ਪਵੇਸੇਤ੍ਵਾ ਯਾਗੁਂ ਪਾਯੇਤ੍ਵਾ ਖਜ੍ਜਕਂ ਦਤ੍ਵਾ ਭਤ੍ਤਵੇਲਾਯ ਭਤ੍ਤਸ੍ਸ ਪਤ੍ਤੇ ਪੂਰੇਤ੍ਵਾ ਤਸ੍ਸਾ ਆਰੋਚਯਿਂਸੁ. ਸਾ ‘‘ਮਂ ਪਰਿਗ੍ਗਹੇਤ੍ਵਾ ਨੇਥ ¶ , ਅਯ੍ਯੇ ਵਨ੍ਦਿਸ੍ਸਾਮੀ’’ਤਿ ਵਤ੍ਵਾ ਤਾਹਿ ਪਰਿਗ੍ਗਹੇਤ੍ਵਾ ਭਿਕ੍ਖੂਨਂ ਸਨ੍ਤਿਕਂ ਨੀਤਾ ਵੇਧਮਾਨੇਨ ਸਰੀਰੇਨ ਭਿਕ੍ਖੂ ਵਨ੍ਦਿ. ਸੋ ਭਿਕ੍ਖੁ ਤਂ ਓਲੋਕੇਤ੍ਵਾ ਚਿਨ੍ਤੇਸਿ ‘‘ਗਿਲਾਨਾਯ ਤਾਵ ਅਯਂ ਏਤਿਸ੍ਸਾ ਰੂਪਸੋਭਾ, ਅਰੋਗਕਾਲੇ ਪਨ ਸਬ੍ਬਾਭਰਣਪਟਿਮਣ੍ਡਿਤਾਯ ਇਮਿਸ੍ਸਾ ਕੀਦਿਸੀ ਰੂਪਸਮ੍ਪਤ੍ਤੀ’’ਤਿ. ਅਥਸ੍ਸ ਅਨੇਕਵਸ੍ਸਕੋਟਿਸਨ੍ਨਿਚਿਤੋ ਕਿਲੇਸੋ ਸਮੁਦਾਚਰਿ. ਸੋ ਅਞ੍ਞਾਣੀ ਹੁਤ੍ਵਾ ਭਤ੍ਤਂ ਭੁਞ੍ਜਿਤੁਂ ਅਸਕ੍ਕੋਨ੍ਤੋ ਪਤ੍ਤਂ ਆਦਾਯ ਵਿਹਾਰਂ ਗਨ੍ਤ੍ਵਾ ਪਤ੍ਤਂ ਪਿਧਾਯ ਏਕਮਨ੍ਤੇ ਠਪੇਤ੍ਵਾ ਚੀਵਰਕਣ੍ਣਂ ਪਤ੍ਥਰਿਤ੍ਵਾ ਨਿਪਜ੍ਜਿ. ਅਥ ਨਂ ਏਕੋ ਸਹਾਯਕੋ ਭਿਕ੍ਖੁ ਯਾਚਨ੍ਤੋਪਿ ਭੋਜੇਤੁਂ ਨਾਸਕ੍ਖਿ, ਸੋ ਛਿਨ੍ਨਭਤ੍ਤੋ ਅਹੋਸਿ.

ਤਂ ¶ ¶ ਦਿਵਸਮੇਵ ਸਾਯਨ੍ਹਸਮਯੇ ਸਿਰਿਮਾ ਕਾਲਮਕਾਸਿ. ਰਾਜਾ ਸਤ੍ਥੁ ਸਾਸਨਂ ਪੇਸੇਸਿ ‘‘ਭਨ੍ਤੇ, ਜੀਵਕਸ੍ਸ ਕਨਿਟ੍ਠਭਗਿਨੀ ਸਿਰਿਮਾ ਕਾਲਮਕਾਸੀ’’ਤਿ. ਸਤ੍ਥਾ ਤਂ ਸੁਤ੍ਵਾ ਰਞ੍ਞੋ ਸਾਸਨਂ ਪਹਿਣਿ ‘‘ਸਿਰਿਮਾਯ ਸਰੀਰਝਾਪਨਕਿਚ੍ਚਂ ਨਤ੍ਥਿ, ਆਮਕਸੁਸਾਨੇ ਤਂ ਯਥਾ ਕਾਕਾਦਯੋ ਨ ਖਾਦਨ੍ਤਿ, ਤਥਾ ਨਿਪਜ੍ਜਾਪੇਤ੍ਵਾ ਰਕ੍ਖਾਪੇਥਾ’’ਤਿ. ਰਾਜਾ ਤਥਾ ਅਕਾਸਿ. ਪਟਿਪਾਟਿਯਾ ਤਯੋ ਦਿਵਸਾ ਅਤਿਕ੍ਕਨ੍ਤਾ, ਚਤੁਤ੍ਥੇ ਦਿਵਸੇ ਸਰੀਰਂ ਉਦ੍ਧੁਮਾਯਿ, ਨਵਹਿ ਵਣਮੁਖੇਹਿ ਪੁਲ਼ਵਕਾ ਪਗ੍ਘਰਿਂਸੁ, ਸਕਲਸਰੀਰਂ ਭਿਨ੍ਨਸਾਲਿਭਤ੍ਤਚਾਟਿ ਵਿਯ ਅਹੋਸਿ. ਰਾਜਾ ਨਗਰੇ ਭੇਰਿਂ ਚਰਾਪੇਸਿ ‘‘ਠਪੇਤ੍ਵਾ ਗੇਹਰਕ੍ਖਣਕਦਾਰਕੇ ਸਿਰਿਮਾਯ ਦਸ੍ਸਨਤ੍ਥਂ ਅਨਾਗਚ੍ਛਨ੍ਤਾਨਂ ਅਟ੍ਠ ਕਹਾਪਣਾ ਦਣ੍ਡੋ’’ਤਿ. ਸਤ੍ਥੁ ਸਨ੍ਤਿਕਞ੍ਚ ਪੇਸੇਸਿ ‘‘ਬੁਦ੍ਧਪ੍ਪਮੁਖੋ ਕਿਰ ਸਙ੍ਘੋ ਸਿਰਿਮਾਯ ਦਸ੍ਸਨਤ੍ਥਂ ਆਗਚ੍ਛਤੂ’’ਤਿ. ਸਤ੍ਥਾ ਭਿਕ੍ਖੂਨਂ ਆਰੋਚਾਪੇਸਿ ‘‘ਸਿਰਿਮਾਯ ਦਸ੍ਸਨਤ੍ਥਂ ਗਮਿਸ੍ਸਾਮਾ’’ਤਿ.

ਸੋਪਿ ਦਹਰਭਿਕ੍ਖੁ ਚਤ੍ਤਾਰੋ ਦਿਵਸੇ ਕਸ੍ਸਚਿ ਵਚਨਂ ਅਗ੍ਗਹੇਤ੍ਵਾ ਛਿਨ੍ਨਭਤ੍ਤੋਵ ਨਿਪਜ੍ਜਿ. ਪਤ੍ਤੇ ਭਤ੍ਤਂ ਪੂਤਿਕਂ ਜਾਤਂ, ਪਤ੍ਤੇ ਮਲਮ੍ਪਿ ਉਟ੍ਠਹਿ. ਅਥ ਸੋ ਸਹਾਯਕਭਿਕ੍ਖੁਨਾ ਉਪਸਙ੍ਕਮਿਤ੍ਵਾ ‘‘ਆਵੁਸੋ ਸਤ੍ਥਾ ਸਿਰਿਮਾਯ ਦਸ੍ਸਨਤ੍ਥਂ ਗਚ੍ਛਤੀ’’ਤਿ ਵੁਚ੍ਚਮਾਨੋ ਤਥਾ ਛਾਤਜ੍ਝਤ੍ਤੋਪਿ ‘‘ਸਿਰਿਮਾ’’ਤਿ ਵੁਤ੍ਤਪਦੇਯੇਵ ਸਹਸਾ ਉਟ੍ਠਹਿਤ੍ਵਾ ‘‘ਸਤ੍ਥਾ ਸਿਰਿਮਂ ਦਟ੍ਠੁਂ ¶ ਗਚ੍ਛਤਿ, ਤ੍ਵਮ੍ਪਿ ਗਮਿਸ੍ਸਸੀ’’ਤਿ? ‘‘ਆਮ ਗਮਿਸ੍ਸਾਮੀ’’ਤਿ ਭਤ੍ਤਂ ਛਡ੍ਡੇਤ੍ਵਾ ਪਤ੍ਤਂ ਧੋਵਿਤ੍ਵਾ ਥਵਿਕਾਯ ਪਕ੍ਖਿਪਿਤ੍ਵਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਗਮਾਸਿ. ਸਤ੍ਥਾ ਭਿਕ੍ਖੁਸਙ੍ਘਪਰਿਵੁਤੋ ਏਕਪਸ੍ਸੇ ਅਟ੍ਠਾਸਿ, ਭਿਕ੍ਖੁਨਿਸਙ੍ਘੋਪਿ ਰਾਜਪਰਿਸਾਪਿ ਉਪਾਸਕਪਰਿਸਾਪਿ ਉਪਾਸਿਕਾਪਰਿਸਾਪਿ ਏਕੇਕਪਸ੍ਸੇ ਅਟ੍ਠਂਸੁ.

ਸਤ੍ਥਾ ਰਾਜਾਨਂ ਪੁਚ੍ਛਿ ‘‘ਕਾ ਏਸਾ, ਮਹਾਰਾਜਾ’’ਤਿ? ‘‘ਭਨ੍ਤੇ, ਜੀਵਕਸ੍ਸ ਕਨਿਟ੍ਠਭਗਿਨੀ ਸਿਰਿਮਾ ਨਾਮਾ’’ਤਿ. ‘‘ਸਿਰਿਮਾ ਏਸਾ’’ਤਿ? ‘‘ਆਮ, ਭਨ੍ਤੇ’’ਤਿ. ਤੇਨ ਹਿ ਨਗਰੇ ਭੇਰਿਂ ਚਰਾਪੇਹਿ ‘‘ਸਹਸ੍ਸਂ ਦਤ੍ਵਾ ਸਿਰਿਮਂ ਗਣ੍ਹਨ੍ਤੂ’’ਤਿ. ਰਾਜਾ ਤਥਾ ਕਾਰੇਸਿ, ਏਕੋਪਿ ‘‘ਹ’’ਨ੍ਤਿ ਵਾ ‘‘ਹੁ’’ਨ੍ਤਿ ਵਾ ਵਦਨ੍ਤੋ ਨਾਮ ਨਾਹੋਸਿ. ਰਾਜਾ ਸਤ੍ਥੁ ਆਰੋਚੇਸਿ ‘‘ਨ ਗਣ੍ਹਨ੍ਤਿ ਭਨ੍ਤੇ’’ਤਿ, ਤੇਨ ਹਿ ਮਹਾਰਾਜ ਅਗ੍ਘਂ ਓਹਾਪੇਹੀਤਿ. ਰਾਜਾ ‘‘ਪਞ੍ਚਸਤਾਨਿ ਦਤ੍ਵਾ ਗਣ੍ਹਨ੍ਤੂ’’ਤਿ ਭੇਰਿਂ ਚਰਾਪੇਤ੍ਵਾ ਕਞ੍ਚਿ ਗਣ੍ਹਨਕਂ ਅਦਿਸ੍ਵਾ ‘‘ਅਡ੍ਢਤੇਯ੍ਯਸਤਾਨਿ, ਦ੍ਵੇਸਤਾਨਿ, ਸਤਂ, ਪਞ੍ਞਾਸਂ, ਪਞ੍ਚਵੀਸਤਿ, ਵੀਸਤਿ ਕਹਾਪਣੇ, ਦਸ ਕਹਾਪਣੇ, ਪਞ੍ਚ ਕਹਾਪਣੇ, ਏਕਂ ਕਹਾਪਣਂ, ਅਡ੍ਢਂ, ਪਾਦਂ, ਮਾਸਕਂ, ਕਾਕਣਿਕਂ ¶ ਦਤ੍ਵਾ ਸਿਰਿਮਂ ਗਣ੍ਹਨ੍ਤੂ’’ਤਿ ਭੇਰਿਂ ਚਰਾਪੇਤ੍ਵਾ ‘‘ਮੁਧਾਪਿ ਗਣ੍ਹਨ੍ਤੂ’’ਤਿ ਭੇਰਿਂ ਚਰਾਪੇਸਿ, ਤਥਾਪਿ ‘‘ਹ’’ਨ੍ਤਿ ਵਾ ‘‘ਹੁ’’ਨ੍ਤਿ ਵਾ ਵਦਨ੍ਤੋ ਨਾਮ ਨਾਹੋਸਿ. ਰਾਜਾ ‘‘ਮੁਧਾਪਿ, ਭਨ੍ਤੇ, ਗਣ੍ਹਨ੍ਤੋ ਨਤ੍ਥੀ’’ਤਿ ਆਹ. ਸਤ੍ਥਾ ‘‘ਪਸ੍ਸਥ, ਭਿਕ੍ਖਵੇ, ਮਹਾਜਨਸ੍ਸ ਪਿਯਮਾਤੁਗਾਮਂ, ਇਮਸ੍ਮਿਂਯੇਵ ਨਗਰੇ ਸਹਸ੍ਸਂ ਦਤ੍ਵਾ ਪੁਬ੍ਬੇ ਏਕਦਿਵਸਂ ਲਭਿਂਸੁ, ਇਦਾਨਿ ਮੁਧਾਪਿ ਗਣ੍ਹਨ੍ਤੋ ਨਤ੍ਥਿ ਏਵਰੂਪਂ ਨਾਮ ਰੂਪਂ ਖਯਵਯਪ੍ਪਤ੍ਤਂ ਆਹਰਿਮੇਹਿ ਅਲਙ੍ਕਾਰੇਹਿ ਵਿਚਿਤ੍ਤਕਤਂ ਨਵਨ੍ਨਂ ਵਣ੍ਣਮੁਖਾਨਂ ਵਸੇਨ ਅਰੁਭੂਤਂ ਤੀਹਿ ਅਟ੍ਠਿਸਤੇਹਿ ¶ ਸਮੁਸ੍ਸਿਤਂ ਨਿਚ੍ਚਾਤੁਰਂ ਕੇਵਲਂ ਬਾਲਮਹਾਜਨੇਨ ਬਹੁਧਾ ਸਙ੍ਕਪ੍ਪਿਤਤਾਯ ਬਹੁਸਙ੍ਕਪ੍ਪਂ ਅਦ੍ਧੁਵਂ ਅਤ੍ਤਭਾਵ’’ਨ੍ਤਿ ਦਸ੍ਸੇਨ੍ਤੋ –

‘‘ਪਸ੍ਸ ਚਿਤ੍ਤਕਤਂ ਬਿਮ੍ਬਂ, ਅਰੁਕਾਯਂ ਸਮੁਸ੍ਸਿਤਂ;

ਆਤੁਰਂ ਬਹੁਸਙ੍ਕਪ੍ਪਂ, ਯਸ੍ਸ ਨਤ੍ਥਿ ਧੁਵਂ ਠਿਤੀ’’ਤਿ. (ਥੇਰਗਾ. ੧੧੬੦) –

ਗਾਥਮਾਹ. ਦੇਸਨਾਪਰਿਯੋਸਾਨੇ ਸਿਰਿਮਾਯ ਪਟਿਬਦ੍ਧਚਿਤ੍ਤੋ ਭਿਕ੍ਖੁ ਵਿਗਤਛਨ੍ਦਰਾਗੋ ਹੁਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ¶ ਪਾਪੁਣਿ, ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ.

ਤੇਨ ਚ ਸਮਯੇਨ ਸਿਰਿਮਾ ਦੇਵਕਞ੍ਞਾ ਅਤ੍ਤਨੋ ਵਿਭਵਸਮਿਦ੍ਧਿਂ ਓਲੋਕੇਤ੍ਵਾ ਆਗਤਟ੍ਠਾਨਂ ਓਲੋਕੇਨ੍ਤੀ ਪੁਰਿਮਤ੍ਤਭਾਵੇ ਅਤ੍ਤਨੋ ਸਰੀਰਸਮੀਪੇ ਭਿਕ੍ਖੁਸਙ੍ਘਪਰਿਵੁਤਂ ਭਗਵਨ੍ਤਂ ਠਿਤਂ ਮਹਾਜਨਕਾਯਞ੍ਚ ਸਨ੍ਨਿਪਤਿਤਂ ਦਿਸ੍ਵਾ ਪਞ੍ਚਹਿ ਦੇਵਕਞ੍ਞਾਸਤੇਹਿ ਪਰਿਵੁਤਾ ਪਞ੍ਚਹਿ ਰਥਸਤੇਹਿ ਦਿਸ੍ਸਮਾਨਕਾਯਾ ਆਗਨ੍ਤ੍ਵਾ ਰਥਤੋ ਓਤਰਿਤ੍ਵਾ ਸਪਰਿਵਾਰਾ ਭਗਵਨ੍ਤਂ ਵਨ੍ਦਿਤ੍ਵਾ ਕਤਞ੍ਜਲੀ ਅਟ੍ਠਾਸਿ. ਤੇਨ ਚ ਸਮਯੇਨ ਆਯਸ੍ਮਾ ਵਙ੍ਗੀਸੋ ਭਗਵਤੋ ਅਵਿਦੂਰੇ ਠਿਤੋ ਹੋਤਿ. ਸੋ ਭਗਵਨ੍ਤਂ ਏਤਦਵੋਚ ‘‘ਪਟਿਭਾਤਿ ਮਂ ਭਗਵਾ ਏਕਂ ਪਞ੍ਹਂ ਪੁਚ੍ਛਿਤੁ’’ਨ੍ਤਿ. ‘‘ਪਟਿਭਾਤੁ ਤਂ ਵਙ੍ਗੀਸਾ’’ਤਿ ਭਗਵਾ ਅਵੋਚ. ਆਯਸ੍ਮਾ ਵਙ੍ਗੀਸੋ ਤਂ ਸਿਰਿਮਂ ਦੇਵਧੀਤਰਂ –

‘‘ਯੁਤ੍ਤਾ ਚ ਤੇ ਪਰਮਅਲਙ੍ਕਤਾ ਹਯਾ, ਅਧੋਮੁਖਾ ਅਘਸਿਗਮਾ ਬਲੀ ਜਵਾ;

ਅਭਿਨਿਮ੍ਮਿਤਾ ਪਞ੍ਚਰਥਾਸਤਾ ਚ ਤੇ, ਅਨ੍ਵੇਨ੍ਤਿ ਤਂ ਸਾਰਥਿਚੋਦਿਤਾ ਹਯਾ.

ਕਸ੍ਮਾ ਨੁ ਕਾਯਾ ਅਨਧਿਵਰਂ ਉਪਾਗਮੀ’’ਤਿ. – ਪਟਿਪੁਚ੍ਛਿ;

੧੩੭. ਤਤ੍ਥ ਯੁਤ੍ਤਾ ਚ ਤੇ ਪਰਮਅਲਙ੍ਕਤਾ ਹਯਾਤਿ ਪਰਮਂ ਅਤਿਵਿਯ ਵਿਸੇਸਤੋ ਅਲਙ੍ਕਤਾ, ਪਰਮੇਹਿ ਵਾ ਉਤ੍ਤਮੇਹਿ ਦਿਬ੍ਬੇਹਿ ਅਸ੍ਸਾਲਙ੍ਕਾਰੇਹਿ ਅਲਙ੍ਕਤਾ, ਪਰਮਾ ਵਾ ਅਗ੍ਗਾ ਸੇਟ੍ਠਾ ਆਜਾਨੀਯਾ ਸਬ੍ਬਾਲਙ੍ਕਾਰੇਹਿ ਅਲਙ੍ਕਤਾ ਹਯਾ ਅਸ੍ਸਾ ਤੇ ਤਵ ਰਥੇ ਯੋਜਿਤਾ, ਯੁਤ੍ਤਾ ਵਾ ਤੇ ਰਥਸ੍ਸ ਚ ਅਨੁਚ੍ਛਵਿਕਾ, ਅਞ੍ਞਮਞ੍ਞਂ ਵਾ ਸਦਿਸਤਾਯ ਯੁਤ੍ਤਾ ਸਂਸਟ੍ਠਾਤਿ ਅਤ੍ਥੋ. ਏਤ੍ਥ ਚ ‘‘ਪਰਮਅਲਙ੍ਕਤਾ’’ਤਿ ਪੁਰਿਮਸ੍ਮਿਂ ਪਕ੍ਖੇ ਸਨ੍ਧਿਂ ਅਕਤ੍ਵਾ ਦੁਤਿਯਸ੍ਮਿਂ ਪਕ੍ਖੇ ਅਵਿਭਤ੍ਤਿਕਨਿਦ੍ਦੇਸੋ ਦਟ੍ਠਬ੍ਬੋ ¶ . ਅਧੋਮੁਖਾਤਿ ਹੇਟ੍ਠਾਮੁਖਾ. ਯਦਿਪਿ ਤੇ ਤਦਾ ਪਕਤਿਯਾਵ ਠਿਤਾ, ਦੇਵਲੋਕਤੋ ਓਰੋਹਣਵਸੇਨ ‘‘ਅਧੋਮੁਖਾ’’ਤਿ ਵੁਤ੍ਤਾ. ਅਘਸਿਗਮਾਤਿ ਵੇਹਾਸਂਗਮਾ. ਬਲੀਤਿ ਬਲਵਨ੍ਤੋ. ਜਵਾਤਿ ਜਵਨਕਾ ¶ , ਬਲਵਨ੍ਤੋ ਚੇਵ ਵੇਗਵਨ੍ਤੋ ਚਾਤਿ ਅਤ੍ਥੋ. ਅਭਿਨਿਮ੍ਮਿਤਾਤਿ ਤਵ ਪੁਞ੍ਞਕਮ੍ਮੇਨ ਨਿਮ੍ਮਿਤਾ ਨਿਬ੍ਬਤ੍ਤਾ. ਸਯਂ ਨਿਮ੍ਮਿਤਮੇਵ ਵਾ ਸਨ੍ਧਾਯ ‘‘ਅਭਿਨਿਮ੍ਮਿਤਾ’’ਤਿ ਵੁਤ੍ਤਂ ਨਿਮ੍ਮਾਨਰਤਿਭਾਵਤੋ ਸਿਰਿਮਾਯ ਦੇਵਧੀਤਾਯ. ਪਞ੍ਚਰਥਾਸਤਾਤਿ ਗਾਥਾਸੁਖਤ੍ਥਂ ਥਕਾਰਸ੍ਸ ਦੀਘਂ ਲਿਙ੍ਗਵਿਪਲ੍ਲਾਸਞ੍ਚ ਕਤ੍ਵਾ ਵੁਤ੍ਤਂ, ਵਿਭਤ੍ਤਿਅਲੋਪੋ ਵਾ ਦਟ੍ਠਬ੍ਬੋ, ਪਞ੍ਚ ਰਥਸਤਾਨੀਤਿ ਅਤ੍ਥੋ. ਅਨ੍ਵੇਨ੍ਤਿ ਤਂ ਸਾਰਥਿਚੋਦਿਤਾ ਹਯਾਤਿ ਸਾਰਥੀਹਿ ਚੋਦਿਤਾ ਵਿਯ ਰਥੇਸੁ ਯੁਤ੍ਤਾ ਇਮੇ ਹਯਾ ਭਦ੍ਦੇ, ਦੇਵਤੇ, ਤਂ ਅਨੁਗਚ੍ਛਨ੍ਤਿ. ‘‘ਸਾਰਥਿਅਚੋਦਿਤਾ’’ਤਿ ਕੇਚਿ ਪਠਨ੍ਤਿ, ਸਾਰਥੀਹਿ ਅਚੋਦਿਤਾ ਏਵ ਅਨੁਗਚ੍ਛਨ੍ਤੀਤਿ ਅਤ੍ਥੋ. ‘‘ਸਾਰਥਿਚੋਦਿਤਾ ਹਯਾ’’ਤਿ ਏਕਂਯੇਵ ਵਾ ਪਦਂ ਗਾਥਾਸੁਖਤ੍ਥਂ ਦੀਘਂ ਕਤ੍ਵਾ ਵੁਤ੍ਤਂ, ਸਾਰਥਿਚੋਦਿਤਹਯਾ ਪਞ੍ਚ ਰਥਸਤਾਤਿ ਯੋਜਨਾ.

੧੩੮. ਸਾ ਤਿਟ੍ਠਸੀਤਿ ਸਾ ਤ੍ਵਂ ਤਿਟ੍ਠਸਿ. ਰਥਵਰੇਤਿ ਰਥੁਤ੍ਤਮੇ. ਅਲਙ੍ਕਤਾਤਿ ਸਟ੍ਠਿਸਕਟਭਾਰੇਹਿ ਦਿਬ੍ਬਾਲਙ੍ਕਾਰੇਹਿ ਅਲਙ੍ਕਤਸਰੀਰਾ. ਓਭਾਸਯਂ ਜਲਮਿਵ ਜੋਤਿ ਪਾਵਕੋਤਿ ਓਭਾਸੇਨ੍ਤੀ ਜੋਤਿਰਿਵ ਜਲਨ੍ਤੀ ਪਾਵਕੋ ਵਿਯ ਚ ਤਿਟ੍ਠਸਿ, ਸਮਨ੍ਤਤੋ ਓਭਾਸੇਨ੍ਤੀ ਜਲਨ੍ਤੀ ਤਿਟ੍ਠਸੀਤਿ ਵੁਤ੍ਤਂ ਹੋਤਿ. ‘‘ਜੋਤੀ’’ਤਿ ਚ ਚਨ੍ਦਿਮਸੂਰਿਯਨਕ੍ਖਤ੍ਤਤਾਰਕਰੂਪਾਨਂ ਸਾਧਾਰਣਨਾਮਂ. ਵਰਤਨੂਤਿ ਉਤ੍ਤਮਰੂਪਧਰੇ ਸਬ੍ਬਙ੍ਗਸੋਭਨੇ. ਤਤੋ ਏਵ ਅਨੋਮਦਸ੍ਸਨੇ ¶ ਅਲਾਮਕਦਸ੍ਸਨੇ, ਦਸ੍ਸਨੀਯੇ ਪਾਸਾਦਿਕੇਤਿ ਅਤ੍ਥੋ. ਕਸ੍ਮਾ ਨੁ ਕਾਯਾ ਅਨਧਿਵਰਂ ਉਪਾਗਮੀਤਿ ਕੁਤੋ ਨਾਮ ਦੇਵਕਾਯਤੋ ਅਨੁਤ੍ਤਰਂ ਸਮ੍ਮਾਸਮ੍ਬੁਦ੍ਧਂ ਪਯਿਰੁਪਾਸਨਾਯ ਉਪਗਞ੍ਛਿ ਉਪਗਤਾਸਿ.

ਏਵਂ ਥੇਰੇਨ ਪੁਚ੍ਛਿਤਾ ਸਾ ਦੇਵਤਾ ਅਤ੍ਤਾਨਂ ਆਵਿਕਰੋਨ੍ਤੀ –

‘‘ਕਾਮਗ੍ਗਪਤ੍ਤਾਨਂ ਯਮਾਹੁਨੁਤ੍ਤਰਂ, ਨਿਮ੍ਮਾਯ ਨਿਮ੍ਮਾਯ ਰਮਨ੍ਤਿ ਦੇਵਤਾ;

ਤਸ੍ਮਾ ਕਾਯਾ ਅਚ੍ਛਰਾ ਕਾਮਵਣ੍ਣਿਨੀ, ਇਧਾਗਤਾ ਅਨਧਿਵਰਂ ਨਮਸ੍ਸਿਤੁ’’ਨ੍ਤਿ. –

੧੩੯. ਤਤ੍ਥ ਕਾਮਗ੍ਗਪਤ੍ਤਾਨਂ ਯਮਾਹੁਨੁਤ੍ਤਰਨ੍ਤਿ ਕਾਮੂਪਭੋਗੇਹਿ ਅਗ੍ਗਭਾਵਂ ਪਤ੍ਤਾਨਂ ਪਰਨਿਮ੍ਮਿਤਵਸਵਤ੍ਤੀਨਂ ¶ ਦੇਵਾਨਂ ਯਂ ਦੇਵਕਾਯਂ ਯਸੇਨ ਭੋਗਾਦਿਵਸੇਨ ਚ ਅਨੁਤ੍ਤਰਨ੍ਤਿ ਵਦਨ੍ਤਿ, ਤਤੋ ਕਾਯਾ. ਨਿਮ੍ਮਾਯ ਨਿਮ੍ਮਾਯ ਰਮਨ੍ਤਿ ਦੇਵਤਾਤਿ ਨਿਮ੍ਮਾਨਰਤਿਦੇਵਤਾ ਅਤ੍ਤਨਾ ਯਥਾਰੁਚਿਤੇ ਕਾਮੇ ਸਯਂ ਨਿਮ੍ਮਿਨਿਤ੍ਵਾ ਨਿਮ੍ਮਿਨਿਤ੍ਵਾ ਰਮਨ੍ਤਿ ਕੀਲ਼ਨ੍ਤਿ ਲਲ਼ਨ੍ਤਾ ਅਭਿਰਮਨ੍ਤਿ. ਤਸ੍ਮਾ ਕਾਯਾਤਿ ਤਸ੍ਮਾ ਨਿਮ੍ਮਾਨਰਤਿਦੇਵਨਿਕਾਯਾ ¶ . ਕਾਮਵਣ੍ਣਿਨੀਤਿ ਕਾਮਰੂਪਧਰਾ ਯਥਿਚ੍ਛਿਤਰੂਪਧਾਰਿਨੀ. ਇਧਾਗਤਾਤਿ ਇਧ ਇਮਸ੍ਮਿਂ ਮਨੁਸ੍ਸਲੋਕੇ, ਇਮਂ ਵਾ ਮਨੁਸ੍ਸਲੋਕਂ ਆਗਤਾ.

ਏਵਂ ਦੇਵਤਾਯ ਅਤ੍ਤਨੋ ਨਿਮ੍ਮਾਨਰਤਿਦੇਵਤਾਭਾਵੇ ਕਥਿਤੇ ਪੁਨ ਥੇਰੋ ਤਸ੍ਸਾ ਪੁਰਿਮਭਵਂ ਤਤ੍ਥ ਕਤਪੁਞ੍ਞਕਮ੍ਮਂ ਲਦ੍ਧਿਞ੍ਚ ਕਥਾਪੇਤੁਕਾਮੋ –

‘‘ਕਿਂ ਤ੍ਵਂ ਪੁਰੇ ਸੁਚਰਿਤਮਾਚਰੀਧ, ਕੇਨਚ੍ਛਸਿ ਤ੍ਵਂ ਅਮਿਤਯਸਾ ਸੁਖੇਧਿਤਾ;

ਇਦ੍ਧੀ ਚ ਤੇ ਅਨਧਿਵਰਾ ਵਿਹਙ੍ਗਮਾ, ਵਣ੍ਣੋ ਚ ਤੇ ਦਸ ਦਿਸਾ ਵਿਰੋਚਤਿ.

‘‘ਦੇਵੇਹਿ ਤ੍ਵਂ ਪਰਿਵੁਤਾ ਸਕ੍ਕਤਾ ਚਸਿ,

ਆਚਿਕ੍ਖ ਮੇ ਤ੍ਵਂ ਯਦਿ ਬੁਦ੍ਧਸਾਵਿਕਾ’’ਤਿ. – ਦ੍ਵੇ ਗਾਥਾ ਅਭਾਸਿ;

੧੪੦. ਤਤ੍ਥ ¶ ਆਚਰੀਤਿ ਦੀਘਂ ਕਤ੍ਵਾ ਵੁਤ੍ਤਂ, ਉਪਚਿਨੀਤਿ ਅਤ੍ਥੋ. ਇਧਾਤਿ ਨਿਪਾਤਮਤ੍ਤਂ, ਇਧ ਵਾ ਇਮਸ੍ਮਿਂ ਦੇਵਤ੍ਤਭਾਵੇ. ਕੇਨਚ੍ਛਸੀਤਿ ਕੇਨ ਪੁਞ੍ਞਕਮ੍ਮੇਨ ਅਸ੍ਸਤ੍ਥਾ ਅਚ੍ਛਸਿ. ‘‘ਕੇਨਾਸਿ ਤ੍ਵ’’ਨ੍ਤਿ ਕੇਚਿ ਪਠਨ੍ਤਿ. ਅਮਿਤਯਸਾਤਿ ਨ ਮਿਤਯਸਾ ਅਨਪ੍ਪਕਪਰਿਵਾਰਾ. ਸੁਖੇਧਿਤਾਤਿ ਸੁਖੇਨ ਵਡ੍ਢਿਤਾ, ਸੁਪਰਿਬ੍ਰੂਹਿਤਦਿਬ੍ਬਸੁਖਾਤਿ ਅਤ੍ਥੋ. ਇਦ੍ਧੀਤਿ ਦਿਬ੍ਬਾਨੁਭਾਵੋ. ਅਨਧਿਵਰਾਤਿ ਅਧਿਕਾ ਵਿਸਿਟ੍ਠਾ ਅਞ੍ਞਾ ਏਤਿਸ੍ਸਾ ਨਤ੍ਥੀਤਿ ਅਨਧਿਵਰਾ, ਅਤਿਉਤ੍ਤਮਾਤਿ ਅਤ੍ਥੋ. ਵਿਹਙ੍ਗਮਾਤਿ ਵੇਹਾਸਗਾਮਿਨੀ. ਦਸ ਦਿਸਾਤਿ ਦਸਪਿ ਦਿਸਾ. ਵਿਰੋਚਤੀਤਿ ਓਭਾਸੇਤਿ.

੧੪੧. ਪਰਿਵੁਤਾ ¶ ਸਕ੍ਕਤਾ ਚਸੀਤਿ ਸਮਨ੍ਤਤੋ ਪਰਿਵਾਰਿਤਾ ਸਮ੍ਭਾਵਿਤਾ ਚ ਅਸਿ. ਕੁਤੋ ਚੁਤਾ ਸੁਗਤਿਗਤਾਸੀਤਿ ਪਞ੍ਚਸੁ ਗਤੀਸੁ ਕਤਰਗਤਿਤੋ ਚੁਤਾ ਹੁਤ੍ਵਾ ਸੁਗਤਿਂ ਇਮਂ ਦੇਵਗਤਿਂ ਪਟਿਸਨ੍ਧਿਵਸੇਨ ਉਪਗਤਾ ਅਸਿ. ਕਸ੍ਸ ਵਾ ਤ੍ਵਂ ਵਚਨਕਰਾਨੁਸਾਸਨਿਨ੍ਤਿ ਕਸ੍ਸ ਨੁ ਵਾ ਸਤ੍ਥੁ ਸਾਸਨੇ ਪਾਵਚਨੇ ਓਵਾਦਾਨੁਸਾਸਨਿਸਮ੍ਪਟਿਚ੍ਛਨੇਨ ਤ੍ਵਂ ਵਚਨਕਰਾ ਅਸੀਤਿ ਯੋਜਨਾ. ਕਸ੍ਸ ਵਾ ਤ੍ਵਂ ਸਤ੍ਥੁ ਵਚਨਕਰਾ ਅਨੁਸਾਸਕਸ੍ਸ ਅਨੁਸਿਟ੍ਠਿਯਂ ਪਤਿਟ੍ਠਾਨੇਨਾਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਏਵਂ ਅਨੁਦ੍ਦੇਸਿਕਵਸੇਨ ਤਸ੍ਸਾ ਲਦ੍ਧਿਂ ਪੁਚ੍ਛਿਤ੍ਵਾ ਪੁਨ ਉਦ੍ਦੇਸਿਕਵਸੇਨ ‘‘ਆਚਿਕ੍ਖ ਮੇ ਤ੍ਵਂ ਯਦਿ ਬੁਦ੍ਧਸਾਵਿਕਾ’’ਤਿ ਪੁਚ੍ਛਤਿ. ਤਤ੍ਥ ਬੁਦ੍ਧਸਾਵਿਕਾਤਿ ਸਬ੍ਬਮ੍ਪਿ ਞੇਯ੍ਯਧਮ੍ਮਂ ਸਯਮ੍ਭੁਞਾਣੇਨ ਹਤ੍ਥਤਲੇ ਆਮਲਕਂ ਵਿਯ ਪਚ੍ਚਕ੍ਖਤੋ ਬੁਦ੍ਧਤ੍ਤਾ ਬੁਦ੍ਧਸ੍ਸ ਭਗਵਤੋ ਧਮ੍ਮਸ੍ਸਵਨਨ੍ਤੇ ਜਾਤਾਤਿ ਬੁਦ੍ਧਸਾਵਿਕਾ.

ਏਵਂ ¶ ਥੇਰੇਨ ਪੁਚ੍ਛਿਤਮਤ੍ਥਂ ਕਥੇਨ੍ਤੀ ਦੇਵਤਾ ਇਮਾ ਗਾਥਾ ਅਭਾਸਿ –

‘‘ਨਗਨ੍ਤਰੇ ਨਗਰਵਰੇ ਸੁਮਾਪਿਤੇ, ਪਰਿਚਾਰਿਕਾ ਰਾਜਵਰਸ੍ਸ ਸਿਰਿਮਤੋ;

ਨਚ੍ਚੇ ਗੀਤੇ ਪਰਮਸੁਸਿਕ੍ਖਿਤਾ ਅਹੁਂ, ਸਿਰਿਮਾਤਿ ਮਂ ਰਾਜਗਹੇ ਅਵੇਦਿਂਸੁ.

‘‘ਬੁਦ੍ਧੋ ਚ ਮੇ ਇਸਿਨਿਸਭੋ ਵਿਨਾਯਕੋ, ਅਦੇਸਯੀ ਸਮੁਦਯਦੁਕ੍ਖਨਿਚ੍ਚਤਂ;

ਅਸਙ੍ਖਤਂ ਦੁਕ੍ਖਨਿਰੋਧ ਸਸ੍ਸਤਂ, ਮਗ੍ਗਞ੍ਚਿਮਂ ਅਕੁਟਿਲਮਞ੍ਜਸਂ ਸਿਵਂ.

‘‘ਸੁਤ੍ਵਾਨਹਂ ¶ ਅਮਤਪਦਂ ਅਸਙ੍ਖਤਂ, ਤਥਾਗਤਸ੍ਸਨਧਿਵਰਸ੍ਸ ਸਾਸਨਂ;

ਸੀਲੇਸ੍ਵਹਂ ਪਰਮਸੁਸਂਵੁਤਾ ਅਹੁਂ, ਧਮ੍ਮੇ ਠਿਤਾ ਨਰਵਰਬੁਦ੍ਧਦੇਸਿਤੇ.

‘‘ਞਤ੍ਵਾਨਹਂ ¶ ਵਿਰਜਪਦਂ ਅਸਙ੍ਖਤਂ, ਤਥਾਗਤੇਨਨਧਿਵਰੇਨ ਦੇਸਿਤਂ;

ਤਤ੍ਥੇਵਹਂ ਸਮਥਸਮਾਧਿਮਾਫੁਸਿਂ, ਸਾਯੇਵ ਮੇ ਪਰਮਨਿਯਾਮਤਾ ਅਹੁ.

‘‘ਲਦ੍ਧਾਨਹਂ ਅਮਤਵਰਂ ਵਿਸੇਸਨਂ, ਏਕਂਸਿਕਾ ਅਭਿਸਮਯੇ ਵਿਸੇਸਿਯ;

ਅਸਂਸਯਾ ਬਹੁਜਨਪੂਜਿਤਾ ਅਹਂ, ਖਿਡ੍ਡਾਰਤਿਂ ਪਚ੍ਚਨੁਭੋਮਨਪ੍ਪਕਂ.

‘‘ਏਵਂ ਅਹਂ ਅਮਤਦਸਮ੍ਹਿ ਦੇਵਤਾ, ਤਥਾਗਤਸ੍ਸਨਧਿਵਰਸ੍ਸ ਸਾਵਿਕਾ;

ਧਮ੍ਮਦ੍ਦਸਾ ਪਠਮਫਲੇ ਪਤਿਟ੍ਠਿਤਾ, ਸੋਤਾਪਨ੍ਨਾ ਨ ਚ ਪਨ ਮਤ੍ਥਿ ਦੁਗ੍ਗਤਿ.

‘‘ਸਾ ਵਨ੍ਦਿਤੁਂ ਅਨਧਿਵਰਂ ਉਪਾਗਮਿਂ, ਪਾਸਾਦਿਕੇ ਕੁਸਲਰਤੇ ਚ ਭਿਕ੍ਖਵੋ;

ਨਮਸ੍ਸਿਤੁਂ ਸਮਣਸਮਾਗਮਂ ਸਿਵਂ, ਸਗਾਰਵਾ ਸਿਰਿਮਤੋ ਧਮ੍ਮਰਾਜਿਨੋ.

‘‘ਦਿਸ੍ਵਾ ਮੁਨਿਂ ਮੁਦਿਤਮਨਮ੍ਹਿ ਪੀਣਿਤਾ, ਤਥਾਗਤਂ ਨਰਵਰਦਮ੍ਮਸਾਰਥਿਂ;

ਤਣ੍ਹਚ੍ਛਿਦਂ ਕੁਸਲਰਤਂ ਵਿਨਾਯਕਂ, ਵਨ੍ਦਾਮਹਂ ਪਰਮਹਿਤਾਨੁਕਮ੍ਪਕ’’ਨ੍ਤਿ.

੧੪੨. ਤਤ੍ਥ ਨਗਨ੍ਤਰੇਤਿ ਇਸਿਗਿਲਿਵੇਪੁਲ੍ਲਵੇਭਾਰਪਣ੍ਡਵਗਿਜ੍ਝਕੂਟਸਙ੍ਖਾਤਾਨਂ ਪਞ੍ਚਨ੍ਨਂ ਪਬ੍ਬਤਾਨਂ ਅਨ੍ਤਰੇ ਵੇਮਜ੍ਝੇ, ਯਤੋ ਤਂ ਨਗਰਂ ‘‘ਗਿਰਿਬ੍ਬਜ’’ਨ੍ਤਿ ਵੁਚ੍ਚਤਿ ¶ . ਨਗਰਵਰੇਤਿ ਉਤ੍ਤਮਨਗਰੇ, ਰਾਜਗਹਂ ਸਨ੍ਧਾਯਾਹ. ਸੁਮਾਪਿਤੇਤਿ ਮਹਾਗੋਵਿਨ੍ਦਪਣ੍ਡਿਤੇਨ ਵਤ੍ਥੁਵਿਜ੍ਜਾਵਿਧਿਨਾ ਸਮ੍ਮਦੇਵ ਨਿਵੇਸਿਤੇ. ਪਰਿਚਾਰਿਕਾਤਿ ਸਂਗੀਤਪਰਿਚਰਿਯਾਯ ਉਪਟ੍ਠਾਯਿਕਾ. ਰਾਜਵਰਸ੍ਸਾਤਿ ਬਿਮ੍ਬਿਸਾਰਮਹਾਰਾਜਸ੍ਸ. ਸਿਰਿਮਤੋਤਿ ¶ ਏਤ੍ਥ ‘‘ਸਿਰੀਤਿ ਬੁਦ੍ਧਿਪੁਞ੍ਞਾਨਂ ਅਧਿਵਚਨ’’ਨ੍ਤਿ ਵਦਨ੍ਤਿ. ਅਥ ਵਾ ਪੁਞ੍ਞਨਿਬ੍ਬਤ੍ਤਾ ਸਰੀਰਸੋਭਗ੍ਗਾਦਿਸਮ੍ਪਤ੍ਤਿ ¶ ਕਤਪੁਞ੍ਞਂ ਨਿਸ੍ਸਯਤਿ, ਕਤਪੁਞ੍ਞੇਹਿ ਵਾ ਨਿਸ੍ਸੀਯਤੀਤਿ ‘‘ਸਿਰੀ’’ਤਿ ਵੁਚ੍ਚਤਿ, ਸਾ ਏਤਸ੍ਸ ਅਤ੍ਥੀਤਿ ਸਿਰਿਮਾ, ਤਸ੍ਸ ਸਿਰਿਮਤੋ. ਪਰਮਸੁਸਿਕ੍ਖਿਤਾਤਿ ਅਤਿਵਿਯ ਸਮ੍ਮਦੇਵ ਚ ਸਿਕ੍ਖਿਤਾ. ਅਹੁਨ੍ਤਿ ਅਹੋਸਿਂ. ਅਵੇਦਿਂਸੂਤਿ ਅਞ੍ਞਾਸੁਂ.

੧੪੩. ਇਸਿਨਿਸਭੋਤਿ ਗਵਸਤਜੇਟ੍ਠਕੋ ਉਸਭੋ, ਗਵਸਹਸ੍ਸਜੇਟ੍ਠਕੋ ਵਸਭੋ, ਵਜਸਤਜੇਟ੍ਠਕੋ ਵਾ ਉਸਭੋ, ਵਜਸਹਸ੍ਸਜੇਟ੍ਠਕੋ ਵਸਭੋ, ਸਬ੍ਬਗਵਸੇਟ੍ਠੋ ਸਬ੍ਬਪਰਿਸ੍ਸਯਸਹੋ ਸੇਤੋ ਪਾਸਾਦਿਕੋ ਮਹਾਭਾਰਵਹੋ ਅਸਨਿਸਤਸਦ੍ਦੇਹਿਪਿ ਅਸਮ੍ਪਕਮ੍ਪਿਯੋ ਨਿਸਭੋ. ਰਥਾ ਸੋ ਅਤ੍ਤਨੋ ਨਿਸਭਬਲੇਨ ਸਮਨ੍ਨਾਗਤੋ ਚਤੂਹਿ ਪਾਦੇਹਿ ਪਥਵਿਂ ਉਪ੍ਪੀਲ਼ੇਤ੍ਵਾ ਕੇਨਚਿ ਪਰਿਸ੍ਸਯੇਨ ਅਕਮ੍ਪਿਯੋ ਅਚਲਟ੍ਠਾਨੇਨ ਤਿਟ੍ਠਤਿ, ਏਵਂ ਭਗਵਾ ਦਸਹਿ ਤਥਾਗਤਬਲੇਹਿ ਸਮਨ੍ਨਾਗਤੋ ਚਤੂਹਿ ਵੇਸਾਰਜ੍ਜਪਾਦੇਹਿ ਅਟ੍ਠਪਰਿਸਪਥਵਿਂ ਉਪ੍ਪੀਲ਼ੇਤ੍ਵਾ ਸਦੇਵਕੇ ਲੋਕੇ ਕੇਨਚਿ ਪਚ੍ਚਤ੍ਥਿਕੇਨ ਪਚ੍ਚਾਮਿਤ੍ਤੇਨ ਅਕਮ੍ਪਿਯੋ ਅਚਲਟ੍ਠਾਨੇਨ ਤਿਟ੍ਠਤਿ, ਤਸ੍ਮਾ ਨਿਸਭੋ ਵਿਯਾਤਿ ਨਿਸਭੋ. ਸੀਲਾਦੀਨਂ ਧਮ੍ਮਕ੍ਖਨ੍ਧਾਨਂ ਏਸਨਟ੍ਠੇਨ ‘‘ਇਸੀ’’ਤਿ ਲਦ੍ਧਵੋਹਾਰੇਸੁ ਸੇਕ੍ਖਾਸੇਕ੍ਖਇਸੀਸੁ ਨਿਸਭੋ, ਇਸੀਨਂ ਵਾ ਨਿਸਭੋ, ਇਸਿ ਚ ਸੋ ਨਿਸਭੋ ਚਾਤਿ ਵਾ ਇਸਿਨਿਸਭੋ. ਵੇਨੇਯ੍ਯਸਤ੍ਤੇ ਵਿਨੇਤੀਤਿ ਵਿਨਾਯਕੋ, ਨਾਯਕਵਿਰਹਿਤੋਤਿ ਵਾ ਵਿਨਾਯਕੋ, ਸਯਮ੍ਭੂਤਿ ਅਤ੍ਥੋ.

ਅਦੇਸਯੀ ਸਮੁਦਯਦੁਕ੍ਖਨਿਚ੍ਚਤਨ੍ਤਿ ਸਮੁਦਯਸਚ੍ਚਸ੍ਸ ਚ ਦੁਕ੍ਖਸਚ੍ਚਸ੍ਸ ਚ ਅਨਿਚ੍ਚਤਂ ਵਯਧਮ੍ਮਤਂ ਅਭਾਸਿ. ਤੇਨ ‘‘ਯਂਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ ਅਤ੍ਤਨੋ ਅਭਿਸਮਯਞਾਣਸ੍ਸ ਪਵਤ੍ਤਿਆਕਾਰਂ ਦਸ੍ਸੇਤਿ. ਸਮੁਦਯਦੁਕ੍ਖਨਿਚ੍ਚਤਨ੍ਤਿ ਵਾ ਸਮੁਦਯਸਚ੍ਚਞ੍ਚ ਦੁਕ੍ਖਸਚ੍ਚਞ੍ਚ ਅਨਿਚ੍ਚਤਞ੍ਚ. ਤਤ੍ਥ ਸਮੁਦਯਸਚ੍ਚਦੁਕ੍ਖਸਚ੍ਚਗ੍ਗਹਣੇਨ ਵਿਪਸ੍ਸਨਾਯ ਭੂਮਿਂ ਦਸ੍ਸੇਤਿ, ਅਨਿਚ੍ਚਤਾਗਹਣੇਨ ਤਸ੍ਸਾ ਪਵਤ੍ਤਿਆਕਾਰਂ ਦਸ੍ਸੇਤਿ. ਸਙ੍ਖਾਰਾਨਞ੍ਹਿ ਅਨਿਚ੍ਚਾਕਾਰੇ ਵਿਭਾਵਿਤੇ ਦੁਕ੍ਖਾਕਾਰੋ ਅਨਤ੍ਤਾਕਾਰੋਪਿ ਵਿਭਾਵਿਤੋਯੇਵ ਹੋਤਿ ਤਂਨਿਬਨ੍ਧਨਤ੍ਤਾ ¶ ਤੇਸਂ. ਤੇਨਾਹ ‘‘ਯਦਨਿਚ੍ਚਂ, ਤਂ ਦੁਕ੍ਖਂ, ਯਂ ਦੁਕ੍ਖਂ, ਤਦਨਤ੍ਤਾ’’ਤਿ (ਸਂ. ਨਿ. ੩.੧੫). ਅਸਙ੍ਖਤਂ ਦੁਕ੍ਖਨਿਰੋਧਸਸ੍ਸਤਨ੍ਤਿ ਕੇਨਚਿ ਪਚ੍ਚਯੇਨ ਨ ਸਙ੍ਖਤਨ੍ਤਿ ਅਸਙ੍ਖਤਂ ¶ , ਸਬ੍ਬਕਾਲਂ ਤਥਭਾਵੇਨ ਸਸ੍ਸਤਂ, ਸਕਲਵਟ੍ਟਦੁਕ੍ਖਨਿਰੋਧਭਾਵਤੋ ਦੁਕ੍ਖਨਿਰੋਧਂ ਅਰਿਯਸਚ੍ਚਞ੍ਚ ਮੇ ਅਦੇਸਯੀਤਿ ਯੋਜਨਾ. ਮਗ੍ਗਞ੍ਚਿਮਂ ਅਕੁਟਿਲਮਞ੍ਜਸਂ ਸਿਵਨ੍ਤਿ ਅਨ੍ਤਦ੍ਵਯਪਰਿਵਜ੍ਜਨੇਨ ਕੁਟਿਲਭਾਵਕਰਾਨਂ ਮਾਯਾਦੀਨਂ ਕਾਯਵਙ੍ਕਾਦੀਨਞ੍ਚ ਪਹਾਨੇਨ ਅਕੁਟਿਲਂ, ਤਤੋ ਏਵ ਅਞ੍ਜਸਂ, ਅਸਿਵਭਾਵਕਰਾਨਂ ਕਾਮਰਾਗਾਦੀਨਂ ਸਮੁਚ੍ਛਿਨ੍ਦਨੇਨ ਸਿਵਂ ਨਿਬ੍ਬਾਨਂ. ਮਗ੍ਗਨ੍ਤਿ ਨਿਬ੍ਬਾਨਤ੍ਥਿਕੇਹਿ ਮਗ੍ਗੀਯਤਿ, ਕਿਲੇਸੇ ਵਾ ਮਾਰੇਨ੍ਤੋ ਗਚ੍ਛਤੀਤਿ ‘‘ਮਗ੍ਗੋ’’ਤਿ ਲਦ੍ਧਨਾਮਂ ਇਦਂ ਤੁਮ੍ਹਾਕਞ੍ਚ ਮਮਞ੍ਚ ਪਚ੍ਚਕ੍ਖਭੂਤਂ ਦੁਕ੍ਖਨਿਰੋਧਗਾਮਿਨਿਪਟਿਪਦਾਸਙ੍ਖਾਤਂ ਅਰਿਯਸਚ੍ਚਞ੍ਚ ਮੇ ਅਦੇਸਯੀਤਿ ਯੋਜਨਾ.

੧੪੪. ਸੁਤ੍ਵਾਨਹਂ ¶ ਅਮਤਪਦਂ ਅਸਙ੍ਖਤਂ, ਤਥਾਗਤਸ੍ਸਨਧਿਵਰਸ੍ਸ ਸਾਸਨਨ੍ਤਿ ਏਤ੍ਥ ਅਯਂ ਸਙ੍ਖੇਪਤ੍ਥੋ – ਤਥਾ ਆਗਮਨਾਦਿਅਤ੍ਥੇਨ ਤਥਾਗਤਸ੍ਸ, ਸਦੇਵਕੇ ਲੋਕੇ ਅਗ੍ਗਭਾਵਤੋ ਅਨਧਿਵਰਸ੍ਸ, ਸਮ੍ਮਾਸਮ੍ਬੁਦ੍ਧਸ੍ਸ ਅਮਤਪਦਂ ਅਸਙ੍ਖਤਂ ਨਿਬ੍ਬਾਨਂ ਉਦ੍ਦਿਸ੍ਸ ਦੇਸਿਤਤ੍ਤਾ, ਅਮਤਸ੍ਸ ਵਾ ਨਿਬ੍ਬਾਨਸ੍ਸ ਪਟਿਪਜ੍ਜਨੁਪਾਯਤ੍ਤਾ ਕੇਨਚਿਪਿ ਅਸਙ੍ਖਰਣੀਯਤ੍ਤਾ ਚ ਅਮਤਪਦਂ ਅਸਙ੍ਖਤਂ ਸਾਸਨਂ ਸਦ੍ਧਮ੍ਮਂ ਅਹਂ ਸੁਤ੍ਵਾਨਾਤਿ. ਸੀਲੇਸ੍ਵਹਨ੍ਤਿ ਸੀਲੇਸੁ ਨਿਪ੍ਫਾਦੇਤਬ੍ਬੇਸੁ ਅਹਂ. ਪਰਮਸੁਸਂਵੁਤਾਤਿ ਅਤਿਵਿਯ ਸਮ੍ਮਦੇਵ ਸਂਵੁਤਾ. ਅਹੁਨ੍ਤਿ ਅਹੋਸਿਂ. ਧਮ੍ਮੇ ਠਿਤਾਤਿ ਪਟਿਪਤ੍ਤਿਧਮ੍ਮੇ ਪਤਿਟ੍ਠਿਤਾ.

੧੪੫. ਞਤ੍ਵਾਨਾਤਿ ਸਚ੍ਛਿਕਿਰਿਯਾਭਿਸਮਯਵਸੇਨ ਜਾਨਿਤ੍ਵਾ. ਤਤ੍ਥੇਵਾਤਿ ਤਸ੍ਮਿਂਯੇਵ ਖਣੇ, ਤਸ੍ਮਿਂਯੇਵ ਵਾ ਅਤ੍ਤਭਾਵੇ. ਸਮਥਸਮਾਧਿਮਾਫੁਸਿਨ੍ਤਿ ਪਚ੍ਚਨੀਕਧਮ੍ਮਾਨਂ ਸਮੁਚ੍ਛੇਦਵਸੇਨ ਸਮਨਤੋ ਵੂਪਸਮਨਤੋ ਪਰਮਤ੍ਥਸਮਥਭੂਤਂ ਲੋਕੁਤ੍ਤਰਸਮਾਧਿਂ ਆਫੁਸਿਂ ਅਧਿਗਚ੍ਛਿਂ. ਯਦਿਪਿ ਯਸ੍ਮਿਂ ਖਣੇ ਨਿਰੋਧਸ੍ਸ ਸਚ੍ਛਿਕਿਰਿਯਾਭਿਸਮਯੋ, ਤਸ੍ਮਿਂਯੇਵ ਖਣੇ ਮਗ੍ਗਸ੍ਸ ਭਾਵਨਾਭਿਸਮਯੋ, ਆਰਮ੍ਮਣਪਟਿਵੇਧਂ ਪਨ ਭਾਵਨਾਪਟਿਵੇਧਸ੍ਸੇਵ ਪੁਰਿਮਸਿਦ੍ਧਿਕਾਰਣਂ ਵਿਯ ਕਤ੍ਵਾ ਦਸ੍ਸੇਤੁਂ –

‘‘ਞਤ੍ਵਾਨਹਂ ¶ ਵਿਰਜਪਦਂ ਅਸਙ੍ਖਤਂ, ਤਥਾਗਤੇਨਨਧਿਵਰੇਨ ਦੇਸਿਤਂ’’.

ਤਤ੍ਥੇਵਹਂ ‘ਸਮਥਸਮਾਧਿਮਾਫੁਸਿ’ਨ੍ਤਿ ਵੁਤ੍ਤਂ ਯਥਾ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ (ਮ. ਨਿ. ੧.੪੦੦; ੩.੪੨੧; ਸਂ. ਨਿ. ੪.੬੦). ਞਤ੍ਵਾਨਾਤਿ ਵਾ ਸਮਾਨਕਾਲਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ ¶ ਯਥਾ ‘‘ਨਿਹਨ੍ਤ੍ਵਾਨ ਤਮਂ ਸਬ੍ਬਂ, ਆਦਿਚ੍ਚੋ ਨਭਮੁਗ੍ਗਤੋ’’ਤਿ. ਸਾਯੇਵਾਤਿ ਯਾ ਲੋਕੁਤ੍ਤਰਸਮਾਧਿਫੁਸਨਾ ਲਦ੍ਧਾ, ਸਾਯੇਵ. ਪਰਮਨਿਯਾਮਤਾਤਿ ਪਰਮਾ ਉਤ੍ਤਮਾ ਮਗ੍ਗਨਿਯਾਮਤਾ.

੧੪੬. ਵਿਸੇਸਨਨ੍ਤਿ ਪੁਥੁਜ੍ਜਨੇਹਿ ਵਿਸੇਸਕਂ ਵਿਸਿਟ੍ਠਭਾਵਸਾਧਕਂ. ਏਕਂਸਿਕਾਤਿ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’’ਤਿ ਏਕਂਸਗਾਹਵਤੀ ਰਤਨਤ੍ਤਯੇ ਨਿਬ੍ਬਿਚਿਕਿਚ੍ਛਾ. ਅਭਿਸਮਯੇ ਵਿਸੇਸਿਯਾਤਿ ਸਚ੍ਚਪਟਿਵੇਧਵਸੇਨ ਵਿਸੇਸਂ ਪਤ੍ਵਾ. ‘‘ਵਿਸੇਸਿਨੀ’’ਤਿਪਿ ਪਠਨ੍ਤਿ, ਅਭਿਸਮਯਹੇਤੁ ਵਿਸੇਸਵਤੀਤਿ ਅਤ੍ਥੋ. ਅਸਂਸਯਾਤਿ ਸੋਲ਼ਸਵਤ੍ਥੁਕਾਯ ਅਟ੍ਠਵਤ੍ਥੁਕਾਯ ਚ ਵਿਚਿਕਿਚ੍ਛਾਯ ਪਹੀਨਤ੍ਤਾ ਅਪਗਤਸਂਸਯਾ. ‘‘ਅਸਂਸਿਯਾ’’ਤਿ ਕੇਚਿ ਪਠਨ੍ਤਿ. ਬਹੁਜਨਪੂਜਿਤਾਤਿ ਸੁਗਤੀਹਿ ਪਰੇਹਿ ਪਤ੍ਥਨੀਯਗੁਣਾਤਿ ਅਤ੍ਥੋ. ਖਿਡ੍ਡਾਰਤਿਨ੍ਤਿ ਖਿਡ੍ਡਾਭੂਤਂ ਰਤਿਂ, ਅਥ ਵਾ ਖਿਡ੍ਡਞ੍ਚ ਰਤਿਞ੍ਚ ਖਿਡ੍ਡਾਵਿਹਾਰਞ੍ਚ ਰਤਿਸੁਖਞ੍ਚ.

੧੪੭. ਅਮਤਦਸਮ੍ਹੀਤਿ ਅਮਤਦਸਾ ਨਿਬ੍ਬਾਨਦਸ੍ਸਾਵਿਨੀ ਅਮ੍ਹਿ. ਧਮ੍ਮਦ੍ਦਸਾਤਿ ਚਤੁਸਚ੍ਚਧਮ੍ਮਂ ¶ ਦਿਟ੍ਠਵਤੀ. ਸੋਤਾਪਨ੍ਨਾਤਿ ਅਰਿਯਮਗ੍ਗਸੋਤਂ ਆਦਿਤੋ ਪਤ੍ਤਾ. ਨ ਚ ਪਨ ਮਤ੍ਥਿ ਦੁਗ੍ਗਤੀਤਿ ਨ ਚ ਪਨ ਮੇ ਅਤ੍ਥਿ ਦੁਗ੍ਗਤਿ ਅਵਿਨਿਪਾਤਧਮ੍ਮਤ੍ਤਾ.

੧੪੮. ਪਾਸਾਦਿਕੇਤਿ ਪਸਾਦਾਵਹੇ. ਕੁਸਲਰਤੇਤਿ ਕੁਸਲੇ ਅਨਵਜ੍ਜਧਮ੍ਮੇ ਨਿਬ੍ਬਾਨੇ ਰਤੇ. ਭਿਕ੍ਖਵੋਤਿ ਭਿਕ੍ਖੂ ਨਮਸ੍ਸਿਤੁਂ ਉਪਾਗਮਿਨ੍ਤਿ ਯੋਜਨਾ. ਸਮਣਸਮਾਗਮਂ ਸਿਵਨ੍ਤਿ ਸਮਣਾਨਂ ਸਮਿਤਪਾਪਾਨਂ ਬੁਦ੍ਧਬੁਦ੍ਧਸਾਵਕਾਨਂ ਸਿਵਞ੍ਚ ਧਮ੍ਮਂ ਖੇਮਂ ਸਮਾਗਮਂ ਸਙ੍ਗਮਂ ਪਯਿਰੁਪਾਸਿਤੁਂ ਉਪਾਗਮਿਨ੍ਤਿ ¶ ਸਮ੍ਬਨ੍ਧੋ. ਸਿਰਿਮਤੋ ਧਮ੍ਮਰਾਜਿਨੋਤਿ ਭੁਮ੍ਮਤ੍ਥੇ ਸਾਮਿਵਚਨਂ. ਸਿਰਿਮਤਿ ਧਮ੍ਮਰਾਜਿਨੀਤਿ ਅਤ੍ਥੋ. ਏਵਮੇਵ ਚ ਕੇਚਿ ਪਠਨ੍ਤਿ.

੧੪੯. ਮੁਦਿਤਮਨਮ੍ਹੀਤਿ ਮੋਦਿਤਮਨਾ ਅਮ੍ਹਿ. ਪੀਣਿਤਾਤਿ ਤੁਟ੍ਠਾ, ਪੀਤਿਰਸਵਸੇਨ ਵਾ ਤਿਤ੍ਤਾ. ਨਰਵਰਦਮ੍ਮਸਾਰਥਿਨ੍ਤਿ ਨਰਵਰੋ ਚ ਸੋ ਅਗ੍ਗਪੁਗ੍ਗਲਤ੍ਤਾ, ਦਮ੍ਮਾਨਂ ਦਮੇਤਬ੍ਬਾਨਂ ਵੇਨੇਯ੍ਯਾਨਂ ਨਿਬ੍ਬਾਨਾਭਿਮੁਖਂ ਸਾਰਣਤੋ ਦਮ੍ਮਸਾਰਥਿ ਚਾਤਿ ਨਰਵਰਦਮ੍ਮਸਾਰਥਿ, ਤਂ. ਪਰਮਹਿਤਾਨੁਕਮ੍ਪਕਨ੍ਤਿ ਪਰਮੇਨ ਉਤ੍ਤਮੇਨ ਹਿਤੇਨ ਸਬ੍ਬਸਤ੍ਤਾਨਂ ਅਨੁਕਮ੍ਪਕਂ.

ਏਵਂ ¶ ਸਿਰਿਮਾ ਦੇਵਧੀਤਾ ਅਤ੍ਤਨੋ ਲਦ੍ਧਿਪਵੇਦਨਮੁਖੇਨ ਰਤਨਤ੍ਤਯੇ ਪਸਾਦਂ ਪਵੇਦੇਤ੍ਵਾ ਭਗਵਨ੍ਤਂ ਭਿਕ੍ਖੁਸਙ੍ਘਞ੍ਚ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਦੇਵਲੋਕਮੇਵ ਗਤਾ. ਭਗਵਾ ਤਮੇਵ ਓਤਿਣ੍ਣਵਤ੍ਥੁਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਧਮ੍ਮਂ ਦੇਸੇਸਿ, ਦੇਸਨਾਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਅਰਹਤ੍ਤਂ ਪਾਪੁਣਿ, ਸਮ੍ਪਤ੍ਤਪਰਿਸਾਯਪਿ ਸਾ ਧਮ੍ਮਦੇਸਨਾ ਸਾਤ੍ਥਿਕਾ ਜਾਤਾਤਿ.

ਇਦਂ ਵਿਮਾਨਂ ਰੁਚਿਰਂ ਪਭਸ੍ਸਰਨ੍ਤਿ ਕੇਸਕਾਰੀਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਬਾਰਾਣਸਿਯਂ ਵਿਹਰਤਿ ਇਸਿਪਤਨੇ ਮਿਗਦਾਯੇ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਬਾਰਾਣਸਿਂ ਪਿਣ੍ਡਾਯ ਪਵਿਸਿਂਸੁ. ਤੇ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਗੇਹਦ੍ਵਾਰਸਮੀਪੇਨ ਗਚ੍ਛਨ੍ਤਿ. ਤਸ੍ਮਿਞ੍ਚ ਗੇਹੇ ਬ੍ਰਾਹ੍ਮਣਸ੍ਸ ਧੀਤਾ ਕੇਸਕਾਰੀ ਨਾਮ ਗੇਹਦ੍ਵਾਰਸਮੀਪੇ ਮਾਤੁ ਸੀਸਤੋ ਊਕਾ ਗਣ੍ਹਨ੍ਤੀ ਤੇ ਭਿਕ੍ਖੂ ਗਚ੍ਛਨ੍ਤੇ ਦਿਸ੍ਵਾ ਮਾਤਰਂ ਆਹ ‘‘ਅਮ੍ਮ, ਇਮੇ ਪਬ੍ਬਜਿਤਾ ਪਠਮੇਨ ਯੋਬ੍ਬਨੇਨ ਸਮਨ੍ਨਾਗਤਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਸੁਖੁਮਾਲਾ ਕੇਨਚਿ ਪਾਰਿਜੁਞ੍ਞੇਨ ਅਨਭਿਭੂਤਾ ਮਞ੍ਞੇ, ਕਸ੍ਮਾ ਨੁ ਖੋ ਇਮੇ ਇਮਸ੍ਮਿਂਯੇਵ ਵਯੇ ਪਬ੍ਬਜਨ੍ਤੀ’’ਤਿ ¶ ? ਤਂ ਮਾਤਾ ਆਹ ‘‘ਅਤ੍ਥਿ, ਅਮ੍ਮ, ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ¶ ਬੁਦ੍ਧੋ ਲੋਕੇ ਉਪ੍ਪਨ੍ਨੋ, ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ, ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਤਿ, ਤਸ੍ਸ ਇਮੇ ਧਮ੍ਮਂ ਸੁਤ੍ਵਾ ਪਬ੍ਬਜਨ੍ਤੀ’’ਤਿ.

ਤੇਨ ਚ ਸਮਯੇਨ ਆਗਤਫਲੋ ਵਿਞ੍ਞਾਤਸਾਸਨੋ ਅਞ੍ਞਤਰੋ ਉਪਾਸਕੋ ਤਾਯ ਵੀਥਿਯਾ ਗਚ੍ਛਨ੍ਤੋ ਤਂ ਕਥਂ ਸੁਤ੍ਵਾ ਤਾਸਂ ਸਨ੍ਤਿਕਂ ਉਪਸਙ੍ਕਮਿ. ਅਥ ਨਂ ਬ੍ਰਾਹ੍ਮਣੀ ਆਹ ‘‘ਏਤਰਹਿ ਖੋ ਉਪਾਸਕ ਬਹੂ ਕੁਲਪੁਤ੍ਤਾ ਮਹਨ੍ਤਂ ਭੋਗਕ੍ਖਨ੍ਧਂ ਮਹਨ੍ਤਂ ਞਾਤਿਪਰਿਵਟ੍ਟਂ ਪਹਾਯ ਸਕ੍ਯਸਮਯੇ ਪਬ੍ਬਜਨ੍ਤਿ, ਤੇ ਕਿਂ ਨੁ ਖੋ ਅਤ੍ਥਵਸਂ ਸਮ੍ਪਸ੍ਸਨ੍ਤਾ ਪਬ੍ਬਜਨ੍ਤੀ’’ਤਿ? ਤਂ ਸੁਤ੍ਵਾ ਉਪਾਸਕੋ ‘‘ਕਾਮੇਸੁ ਆਦੀਨਵਂ, ਨੇਕ੍ਖਮ੍ਮੇ ਚ ਆਨਿਸਂਸਂ ਸਮ੍ਪਸ੍ਸਨ੍ਤਾ’’ਤਿ ਵਤ੍ਵਾ ਅਤ੍ਤਨੋ ਞਾਣਬਲਾਨੁਰੂਪਂ ¶ ਤਮਤ੍ਥਂ ਵਿਤ੍ਥਾਰਤੋ ਕਥੇਸਿ, ਤਿਣ੍ਣਞ੍ਚ ਰਤਨਾਨਂ ਗੁਣੇ ਪਕਾਸੇਸਿ, ਪਞ੍ਚਨ੍ਨਂ ਸੀਲਾਨਂ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚ ਗੁਣਾਨਿਸਂਸਂ ਪਵੇਦੇਸਿ. ਅਥ ਬ੍ਰਾਹ੍ਮਣਧੀਤਾ ਤਂ ‘‘ਕਿਂ ਅਮ੍ਹੇਹਿਪਿ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਯ ਤਯਾ ਵੁਤ੍ਤੇ ਗੁਣਾਨਿਸਂਸੇ ਅਧਿਗਨ੍ਤੁਂ ਸਕ੍ਕਾ’’ਤਿ ਪੁਚ੍ਛਿ. ਸੋ ‘‘ਸਬ੍ਬਸਾਧਾਰਣਾ ਇਮੇ ਧਮ੍ਮਾ ਭਗਵਤਾ ਭਾਸਿਤਾ, ਕਸ੍ਮਾ ਨ ਸਕ੍ਕਾ’’ਤਿ ਵਤ੍ਵਾ ਤਸ੍ਸਾ ਸਰਣਾਨਿ ਚ ਸੀਲਾਨਿ ਚ ਅਦਾਸਿ. ਸਾ ਗਹਿਤਸਰਣਾ ਸਮਾਦਿਨ੍ਨਸੀਲਾ ਚ ਹੁਤ੍ਵਾ ਪੁਨ ਆਹ ‘‘ਕਿਂ ਇਤੋ ਉਤ੍ਤਰਿ ਅਞ੍ਞਮ੍ਪਿ ਕਰਣੀਯਂ ਅਤ੍ਥੀ’’ਤਿ. ਸੋ ਤਸ੍ਸਾ ਵਿਞ੍ਞੁਭਾਵਂ ਸਲ੍ਲਕ੍ਖੇਨ੍ਤੋ ‘‘ਉਪਨਿਸ੍ਸਯਸਮ੍ਪਨ੍ਨਾ ਭਵਿਸ੍ਸਤੀ’’ਤਿ ਞਤ੍ਵਾ ਸਰੀਰਸਭਾਵਂ ਵਿਭਾਵੇਨ੍ਤੋ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨਂ ਕਥੇਤ੍ਵਾ ਕਾਯੇ ਵਿਰਾਗਂ ਉਪ੍ਪਾਦੇਤ੍ਵਾ ਉਪਰਿ ਅਨਿਚ੍ਚਤਾਦਿਪਟਿਸਂਯੁਤ੍ਤਾਯ ਧਮ੍ਮਿਯਾ ਕਥਾਯ ਸਂਵੇਜੇਤ੍ਵਾ ਵਿਪਸ੍ਸਨਾਮਗ੍ਗਂ ਆਚਿਕ੍ਖਿਤ੍ਵਾ ਗਤੋ. ਸਾ ਤੇਨ ਵੁਤ੍ਤਨਯਂ ਸਬ੍ਬਂ ਮਨਸਿ ਕਤ੍ਵਾ ਪਟਿਕੂਲਮਨਸਿਕਾਰੇ ਸਮਾਹਿਤਚਿਤ੍ਤਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਉਪਨਿਸ੍ਸਯਸਮ੍ਪਤ੍ਤਿਯਾ ਨ ਚਿਰਸ੍ਸੇਵ ¶ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਅਥਾਪਰੇਨ ਸਮਯੇਨ ਕਾਲਂ ਕਤ੍ਵਾ ਸਕ੍ਕਸ੍ਸ ਦੇਵਰਞ੍ਞੋ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ, ਸਤਸਹਸ੍ਸਞ੍ਚਸ੍ਸਾ ਅਚ੍ਛਰਾਪਰਿਵਾਰੋ ਅਹੋਸਿ. ਤਂ ਸਕ੍ਕੋ ਦੇਵਰਾਜਾ ਦਿਸ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤੋ ਪਮੁਦਿਤਹਦਯੋ –

‘‘ਇਦਂ ਵਿਮਾਨਂ ਰੁਚਿਰਂ ਪਭਸ੍ਸਰਂ, ਵੇਲ਼ੁਰਿਯਥਮ੍ਭਂ ਸਤਤਂ ਸੁਨਿਮ੍ਮਿਤਂ;

ਸੁਵਣ੍ਣਰੁਕ੍ਖੇਹਿ ਸਮਨ੍ਤਮੋਤ੍ਥਤਂ, ਠਾਨਂ ਮਮਂ ਕਮ੍ਮਵਿਪਾਕਸਮ੍ਭਵਂ.

‘‘ਤਤ੍ਰੂਪਪਨ੍ਨਾ ਪੁਰਿਮਚ੍ਛਰਾ ਇਮਾ, ਸਤਂ ਸਹਸ੍ਸਾਨਿ ਸਕੇਨ ਕਮ੍ਮੁਨਾ;

ਤੁਵਂਸਿ ਅਜ੍ਝੁਪਗਤਾ ਯਸਸ੍ਸਿਨੀ, ਓਭਾਸਯਂ ਤਿਟ੍ਠਸਿ ਪੁਬ੍ਬਦੇਵਤਾ.

‘‘ਸਸੀ ¶ ਅਧਿਗ੍ਗਯ੍ਹ ਯਥਾ ਵਿਰੋਚਤਿ, ਨਕ੍ਖਤ੍ਤਰਾਜਾਰਿਵ ਤਾਰਕਾਗਣਂ;

ਤਥੇਵ ਤ੍ਵਂ ਅਚ੍ਛਰਾਸਙ੍ਗਣਂ ਇਮਂ, ਦਦ੍ਦਲ੍ਲਮਾਨਾ ਯਸਸਾ ਵਿਰੋਚਸਿ.

‘‘ਕੁਤੋ ¶ ਨੁ ਆਗਮ੍ਮ ਅਨੋਮਦਸ੍ਸਨੇ, ਉਪਪਨ੍ਨਾ ਤ੍ਵਂ ਭਵਨਂ ਮਮਂ ਇਦਂ;

ਬ੍ਰਹ੍ਮਂਵ ਦੇਵਾ ਤਿਦਸਾ ਸਹਿਨ੍ਦਕਾ, ਸਬ੍ਬੇ ਨ ਤਪ੍ਪਾਮਸੇ ਦਸ੍ਸਨੇਨ ਤ’’ਨ੍ਤਿ. –

ਚਤੂਹਿ ਗਾਥਾਹਿ ਤਾਯ ਕਤਕਮ੍ਮਂ ਪੁਚ੍ਛਿ.

੧੫੦. ਤਤ੍ਥ ਇਦਂ ਵਿਮਾਨਨ੍ਤਿ ਯਸ੍ਮਿਂ ਵਿਮਾਨੇ ਸਾ ਦੇਵਤਾ ਉਪ੍ਪਨ੍ਨਾ, ਤਂ ਅਤ੍ਤਨੋ ਵਿਮਾਨਂ ਸਨ੍ਧਾਯਾਹ. ਸਤਤਨ੍ਤਿ ਸਬ੍ਬਕਾਲਂ ਰੁਚਿਰਂ ਪਭਸ੍ਸਰਨ੍ਤਿ ਯੋਜਨਾ. ਸਤਤਨ੍ਤਿ ਵਾ ਸਮ੍ਮਾਤਤਂ, ਅਤਿਵਿਯ ਵਿਤ੍ਥਿਣ੍ਣਨ੍ਤਿ ਅਤ੍ਥੋ. ਸਮਨ੍ਤਮੋਤ੍ਥਤਨ੍ਤਿ ¶ ਸਮਨ੍ਤਤੋ ਅਵਤ੍ਥਤਂ ਛਾਦਿਤਂ. ਠਾਨਨ੍ਤਿ ਵਿਮਾਨਮੇਵ ਸਨ੍ਧਾਯ ਵਦਤਿ. ਤਞ੍ਹਿ ਤਿਟ੍ਠਨ੍ਤਿ ਏਤ੍ਥ ਕਤਪੁਞ੍ਞਾਤਿ ਠਾਨਨ੍ਤਿ ਵੁਚ੍ਚਤਿ. ਕਮ੍ਮਵਿਪਾਕਸਮ੍ਭਵਨ੍ਤਿ ਕਮ੍ਮਵਿਪਾਕਭਾਵੇਨ ਸਮ੍ਭੂਤਂ, ਕਮ੍ਮਵਿਪਾਕੇਨ ਵਾ ਸਹ ਸਮ੍ਭੂਤਂ. ਮਮਨ੍ਤਿ ਇਦਂ ਮਮ ਠਾਨਂ ਮਮ ਕਮ੍ਮਵਿਪਾਕਸਮ੍ਭਵਨ੍ਤਿ ਦ੍ਵੀਹਿਪਿ ਪਦੇਹਿ ਯੋਜੇਤਬ੍ਬਂ.

੧੫੧. ਤਤ੍ਰੂਪਪਨ੍ਨਾਤਿ ਗਾਥਾਯ ਅਯਂ ਸਙ੍ਖੇਪਤ੍ਥੋ – ਤਤ੍ਰ ਤਸ੍ਮਿਂ ਯਥਾਵੁਤ੍ਤੇ ਵਿਮਾਨੇ ਉਪਪਨ੍ਨਾਤਿ ਨਿਬ੍ਬਤ੍ਤਾ ਪਗੇਵ ਉਪ੍ਪਨ੍ਨਤ੍ਤਾ ਪੁਬ੍ਬਦੇਵਤਾ ਇਮਾ ਪੁਰਿਮਾ ਅਚ੍ਛਰਾਯੋ ਪਰਿਮਾਣਤੋ ਸਤਂ ਸਹਸ੍ਸਾਨਿ. ਤੁਵਂਸੀਤਿ ਤ੍ਵਂ ਅਸਿ ਸਕੇਨ ਕਮ੍ਮੁਨਾ ਅਜ੍ਝੁਪਗਤਾ ਉਪਪਨ੍ਨਾ. ਯਸਸ੍ਸਿਨੀਤਿ ਪਰਿਵਾਰਸਮ੍ਪਨ੍ਨਾ, ਤੇਨੇਵ ਸਕੇਨ ਕਮ੍ਮੁਨਾ ਕਮ੍ਮਾਨੁਭਾਵੇਨ ਓਭਾਸਯਨ੍ਤੀ ਵਿਰੋਚਮਾਨਾ ਤਿਟ੍ਠਸੀਤਿ.

੧੫੨. ਇਦਾਨਿ ਤਮੇਵ ਓਭਾਸਨਂ ਉਪਮਾਯ ਵਿਭਾਵੇਨ੍ਤੋ ‘‘ਸਸੀ’’ਤਿ ਗਾਥਮਾਹ. ਤਸ੍ਸਤ੍ਥੋ – ਯਥਾ ਸਸਲਞ੍ਛਨਯੋਗੇਨ ‘‘ਸਸੀ’’ਤਿ, ਨਕ੍ਖਤ੍ਤੇਹਿ ਅਧਿਕਗੁਣਤਾਯ ‘‘ਨਕ੍ਖਤ੍ਤਰਾਜਾ’’ਤਿ ਚ ਲਦ੍ਧਨਾਮੋ ਚਨ੍ਦੋ ਸਬ੍ਬਂ ਤਾਰਕਾਗਣਂ ਅਧਿਗ੍ਗਯ੍ਹ ਅਭਿਭਵਿਤ੍ਵਾ ਵਿਰੋਚਤਿ ਵਿਰਾਜਤਿ, ਤਥੇਵ ਤ੍ਵਂ ਇਮਂ ਅਚ੍ਛਰਾਨਂ ਦੇਵਕਞ੍ਞਾਨਂ ਗਣਂ ਸਮੂਹਂ ਅਤ੍ਤਨੋ ਯਸਸਾ ਦਦ੍ਦਲ੍ਲਮਾਨਾ ਅਤਿਵਿਯ ਵਿਜ੍ਜੋਤਮਾਨਾ ਵਿਰੋਚਸੀਤਿ. ਏਤ੍ਥ ਚ ‘‘ਇਮਾ’’ਤਿ ‘‘ਇਮ’’ਨ੍ਤਿ ਚ ਨਿਪਾਤਮਤ੍ਤਂ. ਕੇਚਿ ਪਨ ‘‘ਨਕ੍ਖਤ੍ਤਰਾਜਾਰਿਵ ਤਾਰਾਗਣਂ ਤਥੇਵ ਤ੍ਵ’’ਨ੍ਤਿ ਪਠਨ੍ਤਿ.

੧੫੩. ਇਦਾਨਿ ¶ ਤਸ੍ਸਾ ਦੇਵਤਾਯ ਪੁਰਿਮਭਵਂ ਤਤ੍ਥ ਕਤਪੁਞ੍ਞਞ੍ਚ ਪੁਚ੍ਛਨ੍ਤੋ ‘‘ਕੁਤੋ ਨੁ ਆਗਮ੍ਮਾ’’ਤਿ ਗਾਥਮਾਹ. ਤਤ੍ਥ ਕੁਤੋ ਨੁ ਆਗਮ੍ਮਾਤਿ ਕੁਤੋ ¶ ਨੁ ਭਵਤੋ ਕੁਤੋ ਨੁ ਪੁਞ੍ਞਕਮ੍ਮਤੋ ਕਾਰਣਭੂਤਤੋ ਇਦਂ ਮਮ ਭਵਨਂ ਆਗਮ੍ਮ ਭਦ੍ਦੇ ਅਨੋਮਦਸ੍ਸਨੇ ਸਬ੍ਬਙ੍ਗਸੋਭਨੇ ਤ੍ਵਂ ਉਪਪਨ੍ਨਾ ਉਪ੍ਪਤ੍ਤਿਗਹਣਵਸੇਨ ¶ ਉਪਗਤਾ. ‘‘ਅਨੋਮਦਸ੍ਸਨੇ’’ਤਿ ਵੁਤ੍ਤਮੇਵਤ੍ਥਂ ਉਪਮਾਯ ਪਕਾਸੇਨ੍ਤੋ ‘‘ਬ੍ਰਹ੍ਮਂਵ ਦੇਵਾ ਤਿਦਸਾ ਸਹਿਨ੍ਦਕਾ, ਸਬ੍ਬੇ ਨ ਤਪ੍ਪਾਮਸੇ ਦਸ੍ਸਨੇਨ ਤ’’ਨ੍ਤਿ ਆਹ. ਤਤ੍ਥ ਯਥਾ ਬ੍ਰਹ੍ਮਾਨਂ ਸਹਮ੍ਪਤਿਂ ਸਨਙ੍ਕੁਮਾਰਂ ਵਾ ਉਪਗਤਂ ਸਹ ਇਨ੍ਦੇਨਾਤਿ ਸਹਿਨ੍ਦਕਾ ਤਾਵਤਿਂਸਾ ਦੇਵਾ ਪਸ੍ਸਨ੍ਤਾ ਦਸ੍ਸਨੇਨ ਨ ਤਪ੍ਪਨ੍ਤਿ, ਏਵਂ ਤਵ ਦਸ੍ਸਨੇਨ ਮਯਂ ਸਬ੍ਬੇ ਦੇਵਾ ਨ ਤਪ੍ਪਾਮਸੇਤਿ ਅਤ੍ਥੋ.

ਏਵਂ ਪਨ ਸਕ੍ਕੇਨ ਦੇਵਾਨਮਿਨ੍ਦੇਨ ਪੁਚ੍ਛਿਤਾ ਸਾ ਦੇਵਤਾ ਤਮਤ੍ਥਂ ਪਕਾਸੇਨ੍ਤੀ –

‘‘ਯਮੇਤਂ ਸਕ੍ਕ ਅਨੁਪੁਚ੍ਛਸੇ ਮਮਂ, ਕੁਤੋ ਚੁਤਾ ਤ੍ਵਂ ਇਧ ਆਗਤਾਤਿ;

ਬਾਰਾਣਸੀ ਨਾਮ ਪੁਰਤ੍ਥਿ ਕਾਸਿਨਂ, ਤਤ੍ਥ ਅਹੋਸਿਂ ਪੁਰੇ ਕੇਸਕਾਰਿਕਾ.

‘‘ਬੁਦ੍ਧੇ ਚ ਧਮ੍ਮੇ ਚ ਪਸਨ੍ਨਮਾਨਸਾ, ਸਙ੍ਘੇ ਚ ਏਕਨ੍ਤਗਤਾ ਅਸਂਸਯਾ;

ਅਖਣ੍ਡਸਿਕ੍ਖਾਪਦਾ ਆਗਤਪ੍ਫਲਾ, ਸਮ੍ਬੋਧਿਧਮ੍ਮੇ ਨਿਯਤਾ ਅਨਾਮਯਾ’’ਤਿ. –

੧੫੪-੫. ਤਤ੍ਥ ਯਮੇਤਨ੍ਤਿ ਯਂ ਏਤਂ ਪਞ੍ਹਨ੍ਤਿ ਅਤ੍ਥੋ. ਅਨੁਪੁਚ੍ਛਸੇਤਿ ਅਨੁਕੂਲਭਾਵੇਨ ਪੁਚ੍ਛਸਿ. ਮਮਨ੍ਤਿ ਮਂ. ਪੁਰਤ੍ਥੀਤਿ ਪੁਰਂ ਅਤ੍ਥਿ. ਕਾਸਿਨਨ੍ਤਿ ਕਾਸਿਰਟ੍ਠਸ੍ਸ. ਕੇਸਕਾਰਿਕਾਤਿ ਪੁਰਿਮਤ੍ਤਭਾਵੇ ਅਤ੍ਤਨੋ ਨਾਮਂ ਵਦਤਿ. ਬੁਦ੍ਧੇ ¶ ਚ ਧਮ੍ਮੇ ਚਾਤਿਆਦਿਨਾ ਅਤ੍ਤਨੋ ਪੁਞ੍ਞਂ ਵਿਭਾਵੇਤਿ.

ਪੁਨ ਸਕ੍ਕੋ ਤਸ੍ਸਾ ਤਂ ਪੁਞ੍ਞਸਮ੍ਪਤ੍ਤਿਞ੍ਚ ਦਿਬ੍ਬਸਮ੍ਪਤ੍ਤਿਞ੍ਚ ਅਨੁਮੋਦਮਾਨੋ –

‘‘ਤਨ੍ਤ੍ਯਾਭਿਨਨ੍ਦਾਮਸੇ ¶ ਸ੍ਵਾਗਤਞ੍ਚ ਤੇ,

ਸਮ੍ਬੋਧਿਧਮ੍ਮੇ ਨਿਯਤੇ ਅਨਾਮਯੇ’’ਤਿ. – ਆਹ;

੧੫੬. ਤਤ੍ਥ ਤਨ੍ਤ੍ਯਾਭਿਨਨ੍ਦਾਮਸੇਤਿ ਤਂ ਤੇ ਦੁਵਿਧਮ੍ਪਿ ਸਮ੍ਪਤ੍ਤਿਂ ਅਭਿਨਨ੍ਦਾਮ ਅਨੁਮੋਦਾਮ. ਸ੍ਵਾਗਤਞ੍ਚ ¶ ਤੇਤਿ ਤੁਯ੍ਹਞ੍ਚ ਇਧਾਗਮਨਂ ਸ੍ਵਾਗਤਂ, ਅਮ੍ਹਾਕਂ ਪੀਤਿਸੋਮਨਸ੍ਸਸਂਵਦ੍ਧਨਮੇਵ. ਸੇਸਂ ਵੁਤ੍ਤਨਯਮੇਵਾਤਿ.

ਤਂ ਪਨ ਪਵਤ੍ਤਿਂ ਸਕ੍ਕੋ ਦੇਵਰਾਜਾ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਕਥੇਸਿ, ਥੇਰੋ ਭਗਵਤੋ ਨਿਵੇਦੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਸਦੇਵਕਸ੍ਸ ਲੋਕਸ੍ਸ ਸਾਤ੍ਥਿਕਾ ਜਾਤਾਤਿ.

ਕੇਸਕਾਰੀਵਿਮਾਨਵਣ੍ਣਨਾ ਨਿਟ੍ਠਿਤਾ.

ਇਤਿ ਪਰਮਤ੍ਥਦੀਪਨਿਯਾ ਖੁਦ੍ਦਕ-ਅਟ੍ਠਕਥਾਯ ਵਿਮਾਨਵਤ੍ਥੁਸ੍ਮਿਂ

ਸਤ੍ਤਰਸਵਤ੍ਥੁਪਟਿਮਣ੍ਡਿਤਸ੍ਸ ਪਠਮਸ੍ਸ ਪੀਠਵਗ੍ਗਸ੍ਸ

ਦੁਤਿਯਵਗ੍ਗੇ ¶ ਅਪਿ ਸਕ੍ਕੋਵ ਦੇਵਿਨ੍ਦੋਤਿ ਦਾਸਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਜੇਤਵਨੇ ਵਿਹਰਨ੍ਤੇ ਸਾਵਤ੍ਥਿਵਾਸੀ ਅਞ੍ਞਤਰੋ ਉਪਾਸਕੋ ਸਮ੍ਬਹੁਲੇਹਿ ਉਪਾਸਕੇਹਿ ਸਦ੍ਧਿਂ ਸਾਯਨ੍ਹਸਮਯਂ ਵਿਹਾਰਂ ¶ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਰਿਸਾਯ ਵੁਟ੍ਠਿਤਾਯ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਇਤੋ ਪਟ੍ਠਾਯ ਅਹਂ, ਭਨ੍ਤੇ, ਸਙ੍ਘਸ੍ਸ ਚਤ੍ਤਾਰਿ ਨਿਚ੍ਚਭਤ੍ਤਾਨਿ ਦਸ੍ਸਾਮੀ’’ਤਿ ਆਹ. ਅਥ ਨਂ ਭਗਵਾ ਤਦਨੁਚ੍ਛਵਿਕਂ ¶ ਧਮ੍ਮਕਥਂ ਕਥੇਤ੍ਵਾ ਵਿਸ੍ਸਜ੍ਜੇਸਿ. ਸੋ ‘‘ਮਯਾ, ਭਨ੍ਤੇ, ਸਙ੍ਘਸ੍ਸ ਚਤ੍ਤਾਰਿ ਨਿਚ੍ਚਭਤ੍ਤਾਨਿ ਪਞ੍ਞਤ੍ਤਾਨਿ. ਸ੍ਵੇ ਪਟ੍ਠਾਯ ਅਯ੍ਯਾ ਮਮ ਗੇਹਂ ਆਗਚ੍ਛਨ੍ਤੂ’’ਤਿ ਭਤ੍ਤੁਦ੍ਦੇਸਕਸ੍ਸ ਆਰੋਚੇਤ੍ਵਾ ਅਤ੍ਤਨੋ ਗੇਹਂ ਗਨ੍ਤ੍ਵਾ ਦਾਸਿਯਾ ਤਮਤ੍ਥਂ ਆਚਿਕ੍ਖਿਤ੍ਵਾ ‘‘ਤਤ੍ਥ ਤਯਾ ਨਿਚ੍ਚਕਾਲਂ ਅਪ੍ਪਮਤ੍ਤਾਯ ਭਵਿਤਬ੍ਬ’’ਨ੍ਤਿ ਆਹ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਪਕਤਿਯਾਵ ਸਾ ਸਦ੍ਧਾਸਮ੍ਪਨ੍ਨਾ ਪੁਞ੍ਞਕਾਮਾ ਸੀਲਵਤੀ, ਤਸ੍ਮਾ ਦਿਵਸੇ ਦਿਵਸੇ ਕਾਲਸ੍ਸੇਵ ਉਟ੍ਠਾਯ ਪਣੀਤਂ ਅਨ੍ਨਪਾਨਂ ਪਟਿਯਾਦੇਤ੍ਵਾ ਭਿਕ੍ਖੂਨਂ ਨਿਸੀਦਨਟ੍ਠਾਨਂ ਸੁਸਮ੍ਮਟ੍ਠਂ ਸੁਪਰਿਭਣ੍ਡਕਂ ਕਤ੍ਵਾ ਆਸਨਾਨਿ ਪਞ੍ਞਾਪੇਤ੍ਵਾ ਭਿਕ੍ਖੂ ਉਪਗਤੇ ਤਤ੍ਥ ਨਿਸੀਦਾਪੇਤ੍ਵਾ ਵਨ੍ਦਿਤ੍ਵਾ ਗਨ੍ਧਪੁਪ੍ਫਧੂਪਦੀਪੇਹਿ ਪੂਜੇਤ੍ਵਾ ਸਕ੍ਕਚ੍ਚਂ ਪਰਿਵਿਸਤਿ.

ਅਥੇਕਦਿਵਸਂ ਭਿਕ੍ਖੂ ਕਤਭਤ੍ਤਕਿਚ੍ਚੇ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਵਮਾਹ ‘‘ਕਥਂ ਨੁ ਖੋ, ਭਨ੍ਤੇ, ਇਤੋ ਜਾਤਿਆਦਿਦੁਕ੍ਖਤੋ ਪਰਿਮੁਤ੍ਤਿ ਹੋਤੀ’’ਤਿ. ਭਿਕ੍ਖੂ ਤਸ੍ਸਾ ਸਰਣਾਨਿ ਚ ਪਞ੍ਚ ਸੀਲਾਨਿ ਚ ਦਤ੍ਵਾ ਕਾਯਸਭਾਵਂ ਪਕਾਸੇਤ੍ਵਾ ਪਟਿਕੂਲਮਨਸਿਕਾਰੇ ਨਿਯੋਜੇਸੁਂ, ਅਪਰੇ ਅਨਿਚ੍ਚਤਾਪਟਿਸਂਯੁਤ੍ਤਂ ਧਮ੍ਮਕਥਂ ਕਥੇਸੁਂ. ਸਾ ਸੋਲ਼ਸ ਵਸ੍ਸਾਨਿ ਸੀਲਂ ਰਕ੍ਖਨ੍ਤੀ ਅਨ੍ਤਰਨ੍ਤਰਾ ਯੋਨਿਸੋ ਮਨਸਿਕਰੋਨ੍ਤੀ ਏਕਦਿਵਸਂ ਧਮ੍ਮਸ੍ਸਵਨਸਪ੍ਪਾਯਂ ਲਭਿਤ੍ਵਾ ਞਾਣਸ੍ਸ ਚ ਪਰਿਪਕ੍ਕਤ੍ਤਾ ਵਿਪਸ੍ਸਨਂ ਵਡ੍ਢੇਤ੍ਵਾ ਸੋਤਾਪਤ੍ਤਿਫਲਂ ਸਚ੍ਛਾਕਾਸਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਸਕ੍ਕਸ੍ਸ ਦੇਵਰਞ੍ਞੋ ਵਲ੍ਲਭਾ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ. ਸਾ ਸਟ੍ਠਿਤੂਰਿਯਸਹਸ੍ਸੇਹਿ ਪਰਿਚਰਿਯਮਾਨਾ ਅਚ੍ਛਰਾਸਤਸਹਸ੍ਸਪਰਿਵੁਤਾ ਮਹਨ੍ਤਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਪਮੁਦਾ ਮੋਦਮਾਨਾ ਸਪਰਿਵਾਰਾ ਉਯ੍ਯਾਨਾਦੀਸੁ ਵਿਚਰਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦਿਸ੍ਵਾ –

‘‘ਅਪਿ ¶ ¶ ਸਕ੍ਕੋਵ ਦੇਵਿਨ੍ਦੋ, ਰਮ੍ਮੇ ਚਿਤ੍ਤਲਤਾਵਨੇ;

ਸਮਨ੍ਤਾ ਅਨੁਪਰਿਯਾਸਿ, ਨਾਰੀਗਣਪੁਰਕ੍ਖਤਾ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ¶ ਤਂ ਦੇਵਿ ਮਹਾਨੁਭਾਵੇ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਦਾਸੀ ਅਹੋਸਿਂ ਪਰਪੇਸ੍ਸਿਯਾ ਕੁਲੇ.

‘‘ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ;

ਤਸ੍ਸਾ ਮੇ ਨਿਕ੍ਕਮੋ ਆਸਿ, ਸਾਸਨੇ ਤਸ੍ਸ ਤਾਦਿਨੋ.

‘‘ਕਾਮਂ ਭਿਜ੍ਜਤੁਯਂ ਕਾਯੋ, ਨੇਵ ਅਤ੍ਥੇਤ੍ਥ ਸਣ੍ਠਨਂ;

ਸਿਕ੍ਖਾਪਦਾਨਂ ਪਞ੍ਚਨ੍ਨਂ, ਮਗ੍ਗੋ ਸੋਵਤ੍ਥਿਕੋ ਸਿਵੋ.

‘‘ਅਕਣ੍ਟਕੋ ਅਗਹਨੋ, ਉਜੁ ਸਬ੍ਭਿ ਪਵੇਦਿਤੋ;

ਨਿਕ੍ਕਮਸ੍ਸ ਫਲਂ ਪਸ੍ਸ, ਯਥਿਦਂ ਪਾਪੁਣਿਤ੍ਥਿਕਾ.

‘‘ਆਮਨ੍ਤਨਿਕਾ ਰਞ੍ਞੋਮ੍ਹਿ, ਸਕ੍ਕਸ੍ਸ ਵਸਵਤ੍ਤਿਨੋ;

ਸਟ੍ਠਿ ਤੂਰਿਯਸਹਸ੍ਸਾਨਿ, ਪਟਿਬੋਧਂ ਕਰੋਨ੍ਤਿ ਮੇ.

‘‘ਆਲਮ੍ਬੋ ¶ ਗਗ੍ਗਰੋ ਭੀਮੋ, ਸਾਧੁਵਾਦੀ ਚ ਸਂਸਯੋ;

ਪੋਕ੍ਖਰੋ ਚ ਸੁਫਸ੍ਸੋ ਚ, ਵੀਣਾਮੋਕ੍ਖਾ ਚ ਨਾਰਿਯੋ.

‘‘ਨਨ੍ਦਾ ਚੇਵ ਸੁਨਨ੍ਦਾ ਚ, ਸੋਣਦਿਨ੍ਨਾ ਸੁਚਿਮ੍ਹਿਤਾ;

ਅਲਮ੍ਬੁਸਾ ਮਿਸ੍ਸਕੇਸੀ ਚ, ਪੁਣ੍ਡਰੀਕਾਤਿ ਦਾਰੁਣੀ.

‘‘ਏਣੀਫਸ੍ਸਾ ¶ ਸੁਫਸ੍ਸਾ ਚ, ਸੁਭਦ੍ਦਾ ਮੁਦੁਵਾਦਿਨੀ;

ਏਤਾ ਚਞ੍ਞਾ ਚ ਸੇਯ੍ਯਾਸੇ, ਅਚ੍ਛਰਾਨਂ ਪਬੋਧਿਕਾ.

‘‘ਤਾ ਮਂ ਕਾਲੇਨੁਪਾਗਨ੍ਤ੍ਵਾ, ਅਭਿਭਾਸਨ੍ਤਿ ਦੇਵਤਾ;

ਹਨ੍ਦ ਨਚ੍ਚਾਮ ਗਾਯਾਮ, ਹਨ੍ਦ ਤਂ ਰਮਯਾਮਸੇ.

‘‘ਨਯਿਦਂ ¶ ਅਕਤਪੁਞ੍ਞਾਨਂ, ਕਤਪੁਞ੍ਞਾਨਮੇਵਿਦਂ;

ਅਸੋਕਂ ਨਨ੍ਦਨਂ ਰਮ੍ਮਂ, ਤਿਦਸਾਨਂ ਮਹਾਵਨਂ.

‘‘ਸੁਖਂ ਅਕਤਪੁਞ੍ਞਾਨਂ, ਇਧ ਨਤ੍ਥਿ ਪਰਤ੍ਥ ਚ;

ਸੁਖਞ੍ਚ ਕਤਪੁਞ੍ਞਾਨਂ, ਇਧ ਚੇਵ ਪਰਤ੍ਥ ਚ.

‘‘ਤੇਸਂ ਸਹਬ੍ਯਕਾਮਾਨਂ, ਕਤ੍ਤਬ੍ਬਂ ਕੁਸਲਂ ਬਹੁਂ;

ਕਤਪੁਞ੍ਞਾ ਹਿ ਮੋਦਨ੍ਤਿ, ਸਗ੍ਗੇ ਭੋਗਸਮਙ੍ਗਿਨੋ’’ਤਿ. – ਦੇਵਤਾ ਵਿਸ੍ਸਜ੍ਜੇਸਿ;

੧੫੭. ਤਤ੍ਥ ਅਪਿ ਸਕ੍ਕੋਵ ਦੇਵਿਨ੍ਦੋਤਿ ਅਪਿਸਦ੍ਦੋ ਸਮ੍ਭਾਵਨਾਯਂ, ਇਵਸਦ੍ਦੋ ਇਕਾਰਲੋਪਂ ਕਤ੍ਵਾ ਵੁਤ੍ਤੋ ਉਪਮਾਯਂ, ਤਸ੍ਮਾ ਯਥਾ ਨਾਮ ਸਕ੍ਕੋ ਦੇਵਾਨਮਿਨ੍ਦੋਤਿ ਅਤ੍ਥੋ. ਸਕ੍ਕਸਮਭਾਵੋ ਤਿਸ੍ਸਾ ਦੇਵਤਾਯ ਪਰਿਵਾਰਸਮ੍ਪਤ੍ਤਿਦਸ੍ਸਨਤ੍ਥਂ ਵੁਤ੍ਤੋ. ਕੇਚਿ ‘‘ਅਪੀਤਿ ਨਿਪਾਤਮਤ੍ਤ’’ਨ੍ਤਿ ਵਦਨ੍ਤਿ. ਚਿਤ੍ਤਲਤਾਵਨੇਤਿ ਚਿਤ੍ਤਾਯ ਨਾਮ ਦੇਵਧੀਤਾਯ ਪੁਞ੍ਞਾਨੁਭਾਵੇਨ ਨਿਬ੍ਬਤ੍ਤੇ, ਚਿਤ੍ਤਾਨਂ ਵਾ ਵਿਚਿਤ੍ਤਪੁਪ੍ਫਫਲਾਦਿਵਿਸੇਸਯੁਤ੍ਤਾਨਂ ਸਨ੍ਤਾਨਕਵਲ੍ਲਿਆਦੀਨਂ ਤਤ੍ਥ ਯੇਭੁਯ੍ਯਤਾਯ ਚਿਤ੍ਤਲਤਾਵਨਨ੍ਤਿ ਲਦ੍ਧਨਾਮੇ ਦੇਵੁਯ੍ਯਾਨੇ.

੧੬੧. ਪਰਪੇਸ੍ਸਿਯਾਤਿ ਪਰੇਸਂ ਕੁਲੇ ਤਸ੍ਮਿਂ ਤਸ੍ਮਿਂ ਕਿਚ੍ਚੇ ਪੇਸਨਿਯਾ, ਪਰੇਸਂ ਵੇਯ੍ਯਾਵਚ੍ਚਕਾਰੀਤਿ ਅਤ੍ਥੋ.

੧੬੨. ਤਸ੍ਸਾ ¶ ਮੇ ਨਿਕ੍ਕਮੋ ਆਸਿ, ਸਾਸਨੇ ਤਸ੍ਸ ਤਾਦਿਨੋਤਿ ਤਸ੍ਸਾ ਦਾਸਿਯਾਪਿ ਸਮਾਨਾਯ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਤੋ ਬੁਦ੍ਧਸ੍ਸ ਭਗਵਤੋ ਉਪਾਸਿਕਾ ਹੁਤ੍ਵਾ ਸੋਲ਼ਸ ਵਸ੍ਸਾਨਿ ਸੀਲਂ ਰਕ੍ਖਨ੍ਤਿਯਾ ਕਮ੍ਮਟ੍ਠਾਨਞ੍ਚ ਮਨਸਿ ਕਰੋਨ੍ਤਿਯਾ ਮਨਸਿਕਾਰਾਨੁਭਾਵੇਨ ¶ ਮੇ ਮਯ੍ਹਂ ਉਪ੍ਪਜ੍ਜਮਾਨੇ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮਸਙ੍ਖਾਤੇ ਇਟ੍ਠਾਦੀਸੁ ਤਾਦਿਲਕ੍ਖਣਸਮ੍ਪਤ੍ਤਿਯਾ ਤਾਦਿਨੋ ਸਤ੍ਥੁ ਸਾਸਨੇ ਤਪ੍ਪਰਿਯਾਪਨ੍ਨੋਯੇਵ ਸਂਕਿਲੇਸਪਕ੍ਖਤੋ ਨਿਕ੍ਕਮਨੇਨ ‘‘ਨਿਕ੍ਕਮੋ’’ਤਿ ਲਦ੍ਧਨਾਮੋ ਸਮ੍ਮਾਵਾਯਾਮੋ ਆਸਿ ਅਹੋਸਿ ਉਪ੍ਪਜ੍ਜਿ.

੧੬੩-੪. ਤਸ੍ਸ ਪਨ ਨਿਕ੍ਕਮਸ੍ਸ ਪੁਬ੍ਬਭਾਗਸ੍ਸ ਪਵਤ੍ਤਾਕਾਰਂ ਦਸ੍ਸੇਤੁਂ ‘‘ਕਾਮਂ ਭਿਜ੍ਜਤੁਯਂ ਕਾਯੋ, ਨੇਵ ਅਤ੍ਥੇਤ੍ਥ ਸਣ੍ਠਨਨ੍ਤਿ ਵੁਤ੍ਤਂ. ਤਸ੍ਸਤ੍ਥੋ ¶ – ਯਦਿਪਿ ਮੇ ਅਯਂ ਕਾਯੋ ਭਿਜ੍ਜਤੁ ਵਿਨਸ੍ਸਤੁ, ਤਤ੍ਥ ਕਿਞ੍ਚਿਮਤ੍ਤਮ੍ਪਿ ਅਪੇਕ੍ਖਂ ਅਕਰੋਨ੍ਤੀ ਏਤ੍ਥ ਏਤਸ੍ਮਿਂ ਕਮ੍ਮਟ੍ਠਾਨਾਨੁਯੋਗੇ ਨੇਵ ਅਤ੍ਥਿ, ਮੇ ਵੀਰਿਯਸ੍ਸ ਸਣ੍ਠਨਂ ਸਿਥਿਲੀਕਰਣਨ੍ਤਿ ਵੀਰਿਯਂ ਸਮੁਤ੍ਤੇਜੇਨ੍ਤੀ ਵਿਪਸ੍ਸਨਂ ਉਸ੍ਸੁਕ੍ਕਾਪੇਸਿਨ੍ਤਿ.

ਇਦਾਨਿ ਤਥਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਪਟਿਲਦ੍ਧਗੁਣਂ ਦਸ੍ਸੇਨ੍ਤੀ –

‘‘ਸਿਕ੍ਖਾਪਦਾਨਂ ਪਞ੍ਚਨ੍ਨਂ, ਮਗ੍ਗੋ ਸੋਵਤ੍ਥਿਕੋ ਸਿਵੋ;

ਅਕਣ੍ਟਕੋ ਅਗਹਨੋ, ਉਜੁ ਸਬ੍ਭਿ ਪਵੇਦਿਤੋ;

ਨਿਕ੍ਕਮਸ੍ਸ ਫਲਂ ਪਸ੍ਸ, ਯਥਿਦਂ ਪਾਪੁਣਿਤ੍ਥਿਕਾ’’ਤਿ. – ਆਹ;

ਤਤ੍ਰਾਯਂ ਸਙ੍ਖੇਪਤ੍ਥੋ – ਯੋ ਨਿਚ੍ਚਸੀਲਵਸੇਨ ਸਮਾਦਿਨ੍ਨਾਨਂ ਪਞ੍ਚਨ੍ਨਂ ਸਿਕ੍ਖਾਪਦਾਨਂ ਸਿਕ੍ਖਾਕੋਟ੍ਠਾਸਾਨਂ ਉਪਨਿਸ੍ਸਯਭਾਵੇਨ ਲਦ੍ਧਤ੍ਤਾ ਤੇਸਂ ਪਰਿਪੂਰਿਤਤ੍ਤਾ ਚ ਸਿਕ੍ਖਾਪਦਾਨਂ ਪਞ੍ਚਨ੍ਨਂ ਸਮ੍ਬਨ੍ਧੀਭੂਤੋ, ਯਸ੍ਮਿਂ ਸਨ੍ਤਾਨੇ ਉਪ੍ਪਨ੍ਨੋ, ਤਸ੍ਸ ਸਬ੍ਬਾਕਾਰੇਨ ਸੋਤ੍ਥਿਭਾਵਸਮ੍ਪਾਦਨਤੋ ਸੁਨ੍ਦਰਤ੍ਥਭਾਵਤੋ ਚ ਸੋਵਤ੍ਥਿਕੋ ਸੋਤ੍ਥਿਕੋ, ਸਂਕਿਲੇਸਧਮ੍ਮੇਹਿ ਅਨੁਪਦ੍ਦੁਤਤ੍ਤਾ ਖੇਮਪ੍ਪਤ੍ਤਿਹੇਤੁਤਾਯ ਚ ਸਿਵੋ, ਰਾਗਕਣ੍ਟਕਾਦੀਨਂ ¶ ਅਭਾਵੇਨ ਅਕਣ੍ਟਕੋ, ਕਿਲੇਸਦਿਟ੍ਠਿਦੁਚ੍ਚਰਿਤਗਹਨਸਮੁਚ੍ਛੇਦਨਤੋ ਅਗਹਨੋ, ਸਬ੍ਬਜਿਮ੍ਹਵਙ੍ਕਕੁਟਿਲਭਾਵਾਪਗਮਹੇਤੁਤਾਯ ਉਜੁ, ਬੁਦ੍ਧਾਦੀਹਿ ਸਪ੍ਪੁਰਿਸੇਹਿ ਪਕਾਸਿਤਤ੍ਤਾ ਸਬ੍ਭਿ ਪਵੇਦਿਤੋ ਅਰਿਯਮਗ੍ਗੋ, ਤਂ ਯਥਾ ਯੇਨ ਉਪਾਯਭੂਤੇਨ ਇਤ੍ਥਿਕਾ ਦ੍ਵਙ੍ਗੁਲਬਹਲਬੁਦ੍ਧਿਕਾਪਿ ਸਮਾਨਾ ਪਾਪੁਣਿਂ, ਤਸ੍ਸ ਨਿਕ੍ਕਮਸ੍ਸ ਯਥਾਵੁਤ੍ਤਵੀਰਿਯਸ੍ਸ ਇਦਂ ਫਲਂ ਪਸ੍ਸਾਤਿ ਸਕ੍ਕਂ ਆਲਪਤਿ.

੧੬੫. ਆਮਨ੍ਤਨਿਕਾ ਰਞ੍ਞੋਮ੍ਹਿ, ਸਕ੍ਕਸ੍ਸ ਵਸਵਤ੍ਤਿਨੋਤਿ ਸਯਂਵਸੀਭਾਵੇਨ ਵਤ੍ਤਨਤੋ, ਦ੍ਵੀਸੁ ਦੇਵਲੋਕੇਸੁ ਅਤ੍ਤਨੋ ਵਸਂ ਇਸ੍ਸਰਿਯਂ ਵਤ੍ਤੇਤੀਤਿ ਵਾ ਵਸਵਤ੍ਤੀ, ਤਸ੍ਸ ਵਸਵਤ੍ਤਿਨੋ ਸਕ੍ਕਸ੍ਸ ਦੇਵਰਞ੍ਞੋ ਆਮਨ੍ਤਨਿਕਾ ਆਲਾਪਸਲ੍ਲਾਪਯੋਗ੍ਗਾ, ਕੀਲ਼ਨਕਾਲੇ ਵਾ ਤੇਨ ਆਮਨ੍ਤੇਤਬ੍ਬਾ ਅਮ੍ਹਿ, ਨਿਕ੍ਕਮਸ੍ਸ ਵੀਰਿਯਸ੍ਸ ਫਲਂ ਪਸ੍ਸਾਤਿ ਯੋਜਨਾ. ਆਤਤਵਿਤਤਾਦਿਭੇਦੇਨ ਪਞ੍ਚ ਤੂਰਿਯਙ੍ਗਾਨਿ ਦ੍ਵਾਦਸਹਿ ¶ ਪਾਣਿਭਾਗੇਹਿ ਏਕਤੋ ਪਵਜ੍ਜਮਾਨਾਨਿ ਸਟ੍ਠਿ ਹੋਨ੍ਤਿ, ਤਾਨਿ ਪਨ ਸਹਸ੍ਸਮਤ੍ਤਾਨਿ ਪਯਿਰੁਪਾਸਨਵਸੇਨ ਉਪਟ੍ਠਿਤਾਨਿ ਸਨ੍ਧਾਯਾਹ ‘‘ਸਟ੍ਠਿ ਤੂਰਿਯਸਹਸ੍ਸਾਨਿ, ਪਟਿਬੋਧਂ ਕਰੋਨ੍ਤਿ ਮੇ’’ਤਿ. ਤਤ੍ਥ ਪਟਿਬੋਧਨ੍ਤਿ ਪੀਤਿਸੋਮਨਸ੍ਸਾਨਂ ਪਬੋਧਨਂ.

੧੬੬-੮. ਆਲਮ੍ਬੋਤਿਆਦਿ ¶ ਤੂਰਿਯਵਾਦਕਾਨਂ ਦੇਵਪੁਤ੍ਤਾਨਂ ਏਕਦੇਸਤੋ ਨਾਮਗ੍ਗਹਣਨ੍ਤਿ ਵਦਨ੍ਤਿ, ਤੂਰਿਯਾਨਂ ਪਨੇਤਂ ਨਾਮਗ੍ਗਹਣਂ. ਵੀਣਾਮੋਕ੍ਖਾਦਿਕਾ ਦੇਵਧੀਤਾ. ਸੁਚਿਮ੍ਹਿਤਾਤਿ ਸੁਦ੍ਧਮਿਹਿਤਾ, ਨਾਮਮੇਵ ਵਾ ਏਤਂ. ਮੁਦੁਵਾਦਿਨੀਤਿ ਮੁਦੁਨਾਵ ਵਦਤੀਤਿ ਮੁਦੁਵਾਦਿਨੀ, ਮੁਦੁਕਂ ਅਤਿਵਿਯ ਵਾਦਨਸੀਲਾ, ਨਾਮਮੇਵ ਵਾ. ਸੇਯ੍ਯਾਸੇਤਿ ਸੇਯ੍ਯਤਰਾ. ਅਚ੍ਛਰਾਨਨ੍ਤਿ ਅਚ੍ਛਰਾਸੁ ਸਙ੍ਗੀਤੇ ਪਾਸਂਸਤਰਾ. ਪਬੋਧਿਕਾਤਿ ਪਬੋਧਨਕਰਾ.

੧੬੯. ਕਾਲੇਨਾਤਿ ਯੁਤ੍ਤਪ੍ਪਤ੍ਤਕਾਲੇਨ. ਅਭਿਭਾਸਨ੍ਤੀਤਿ ਅਭਿਮੁਖਾ, ਅਭਿਰਤਾ ਵਾ ਹੁਤ੍ਵਾ ਭਾਸਨ੍ਤਿ. ਯਥਾ ਚ ਭਾਸਨ੍ਤਿ, ਤਂ ਦਸ੍ਸੇਤੁਂ ‘‘ਹਨ੍ਦ ਨਚ੍ਚਾਮ ਗਾਯਾਮ, ਹਨ੍ਦ ਤਂ ਰਮਯਾਮਸੇ’’ਤਿ ਵੁਤ੍ਤਂ.

੧੭੦. ਇਦਨ੍ਤਿ ¶ ਇਦਂ ਮਯਾ ਲਦ੍ਧਟ੍ਠਾਨਂ. ਅਸੋਕਨ੍ਤਿ ਇਟ੍ਠਕਨ੍ਤਪਿਯਮਨਾਪਾਨਂਯੇਵ ਰੂਪਾਦੀਨਂ ਸਮ੍ਭਵਤੋ ਵਿਸੋਕਂ. ਤਤੋ ਏਵ ਸਬ੍ਬਕਾਲਂ ਪਮੋਦਸਂਵਦ੍ਧਨਤੋ ਨਨ੍ਦਨਂ. ਤਿਦਸਾਨਂ ਮਹਾਵਨਨ੍ਤਿ ਤਾਵਤਿਂਸਦੇਵਾਨਂ ਮਹਨ੍ਤਂ ਮਹਨੀਯਞ੍ਚ ਉਯ੍ਯਾਨਂ.

੧੭੧. ਏਵਰੂਪਾ ਦਿਬ੍ਬਸਮ੍ਪਤ੍ਤਿ ਨਾਮ ਪੁਞ੍ਞਕਮ੍ਮਵਸੇਨੇਵਾਤਿ ਓਦਿਸ੍ਸਕਨਯੇਨ ਵਤ੍ਵਾ ਪਨੁ ਅਨੋਦਿਸ੍ਸਕਨਯੇਨ ਦਸ੍ਸੇਨ੍ਤੀ ‘‘ਸੁਖਂ ਅਕਤਪੁਞ੍ਞਾਨ’’ਨ੍ਤਿ ਗਾਥਮਾਹ.

੧੭੨. ਪੁਨ ਅਤ੍ਤਨਾ ਲਦ੍ਧਸ੍ਸ ਦਿਬ੍ਬਟ੍ਠਾਨਸ੍ਸ ਪਰੇਹਿ ਸਾਧਾਰਣਕਾਮਤਾਵਸੇਨ ਧਮ੍ਮਂ ਕਥੇਨ੍ਤੀ ‘‘ਤੇਸਂ ਸਹਬ੍ਯਕਾਮਾਨ’’ਨ੍ਤਿ ਓਸਾਨਗਾਥਮਾਹ. ਤੇਸਨ੍ਤਿ ਤਾਵਤਿਂਸਦੇਵਾਨਂ. ਸਹਬ੍ਯਕਾਮਾਨਨ੍ਤਿ ਸਹਭਾਵਂ ਇਚ੍ਛਨ੍ਤੇਹਿ, ਕਤ੍ਤੁਅਤ੍ਥੇ ਹਿ ਇਦਂ ਸਾਮਿਵਚਨਂ. ਸਹ ਵਾਤਿ ਪਵਤ੍ਤਤੀਤਿ ਸਹਵੋ, ਤਸ੍ਸ ਭਾਵੋ ਸਹਬ੍ਯਂ ਯਥਾ ਵੀਰਸ੍ਸ ਭਾਵੋ ਵੀਰਿਯਨ੍ਤਿ.

ਏਵਂ ਥੇਰੋ ਦੇਵਤਾਯ ਅਤ੍ਤਨੋ ਪੁਞ੍ਞਕਮ੍ਮੇ ਆਵਿਕਤੇ ਤਸ੍ਸਾ ਸਪਰਿਵਾਰਾਯ ਧਮ੍ਮਂ ਦੇਸੇਤ੍ਵਾ ਦੇਵਲੋਕਤੋ ਆਗਨ੍ਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਸਦੇਵਕਸ੍ਸ ਲੋਕਸ੍ਸ ਸਾਤ੍ਥਿਕਾ ਅਹੋਸੀਤਿ.

ਅਭਿਕ੍ਕਨ੍ਤੇਨ ¶ ¶ ਵਣ੍ਣੇਨਾਤਿ ਲਖੁਮਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਬਾਰਾਣਸਿਯਂ ਵਿਹਰਨ੍ਤੇ ਕੇਵਟ੍ਟਦ੍ਵਾਰਂ ਨਾਮ ਬਾਰਾਣਸਿਨਗਰਸ੍ਸ ਏਕਂ ਦ੍ਵਾਰਂ, ਤਸ੍ਸ ਅਵਿਦੂਰੇ ਨਿਵਿਟ੍ਠਗਾਮੋਪਿ ¶ ‘‘ਕੇਵਟ੍ਟਦ੍ਵਾਰ’’ਨ੍ਤ੍ਵੇਵ ਪਞ੍ਞਾਯਿਤ੍ਥ. ਤਤ੍ਥ ਲਖੁਮਾ ਨਾਮ ਏਕਾ ਇਤ੍ਥੀ ਸਦ੍ਧਾ ਪਸਨ੍ਨਾ ਬੁਦ੍ਧਿਸਮ੍ਪਨ੍ਨਾ ਤੇਨ ਦ੍ਵਾਰੇਨ ਪਵਿਸਨ੍ਤੇ ਭਿਕ੍ਖੂ ਦਿਸ੍ਵਾ ਵਨ੍ਦਿਤ੍ਵਾ ਅਤ੍ਤਨੋ ਗੇਹਂ ਨੇਤ੍ਵਾ ਕਟਚ੍ਛੁਭਿਕ੍ਖਂ ਦਤ੍ਵਾ ਤੇਨੇਵ ਪਰਿਚਯੇਨ ਸਦ੍ਧਾਯ ਵਡ੍ਢਮਾਨਾਯ ਆਸਨਸਾਲਂ ਕਾਰੇਤ੍ਵਾ ਤਤ੍ਥ ਪਵਿਟ੍ਠਾਨਂ ਭਿਕ੍ਖੂਨਂ ਆਸਨਂ ਉਪਨੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਪੇਤਿ. ਯਞ੍ਚ ਓਦਨਕੁਮ੍ਮਾਸਡਾਕਾਦਿ ਅਤ੍ਤਨੋ ਗੇਹੇ ਵਿਜ੍ਜਤਿ, ਤਂ ਭਿਕ੍ਖੂਨਂ ਦੇਤਿ. ਸਾ ਭਿਕ੍ਖੂਨਂ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਯ ਸਮਾਹਿਤਾ ਹੁਤ੍ਵਾ ਵਿਪਸ੍ਸਨਾਕਮ੍ਮਟ੍ਠਾਨਂ ਉਗ੍ਗਹੇਤ੍ਵਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਨ੍ਤੀ ਉਪਨਿਸ੍ਸਯਸਮ੍ਪਨ੍ਨਤਾਯ ਨ ਚਿਰਸ੍ਸੇਵ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਮਹਤਿ ਵਿਮਾਨੇ ਨਿਬ੍ਬਤ੍ਤਿ, ਅਚ੍ਛਰਾਸਹਸ੍ਸਞ੍ਚਸ੍ਸਾ ਪਰਿਵਾਰੋ ਅਹੋਸਿ. ਸਾ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਪਮੋਦਮਾਨਾ ਵਿਚਰਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ‘‘ਅਭਿਕ੍ਕਨ੍ਤੇਨ ਵਣ੍ਣੇਨਾ’’ਤਿਆਦਿਗਾਥਾਹਿ ਪੁਚ੍ਛੀਤਿ ਸਬ੍ਬਂ ਵੁਤ੍ਤਨਯਮੇਵ. ਤੇਨ ਵੁਤ੍ਤਂ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਕੇਵਟ੍ਟਦ੍ਵਾਰਾ ¶ ਨਿਕ੍ਖਮ੍ਮ, ਅਹੁ ਮਯ੍ਹਂ ਨਿਵੇਸਨਂ;

ਤਤ੍ਥ ਸਞ੍ਚਰਮਾਨਾਨਂ, ਸਾਵਕਾਨਂ ਮਹੇਸਿਨਂ.

‘‘ਓਦਨਂ ¶ ਕੁਮ੍ਮਾਸਂ ਡਾਕਂ, ਲੋਣਸੋਵੀਰਕਞ੍ਚਹਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਚਾਤੁਦ੍ਦਸਿਂ ¶ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ.

‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਮਮ ਚ, ਭਨ੍ਤੇ, ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦੇਯ੍ਯਾਸਿ ‘‘ਲਖੁਮਾ ਨਾਮ, ਭਨ੍ਤੇ, ਉਪਾਸਿਕਾ ਭਗਵਤੋ ਪਾਦੇ ਸਿਰਸਾ ਵਨ੍ਦਤੀ’’ਤਿ. ਅਨਚ੍ਛਰਿਯਂ ਖੋ ਪਨੇਤਂ, ਭਨ੍ਤੇ, ਯਂ ਮਂ ਭਗਵਾ ਅਞ੍ਞਤਰਸ੍ਮਿਂ ਸਾਮਞ੍ਞਫਲੇ ਬ੍ਯਾਕਰੇਯ੍ਯ. ਤਂ ਭਗਵਾ ਸਕਦਾਗਾਮਿਫਲੇ ਬ੍ਯਾਕਾਸੀਤਿ.

੧੭੭. ਤਤ੍ਥ ਕੇਵਟ੍ਟਦ੍ਵਾਰਾ ਨਿਕ੍ਖਮ੍ਮਾਤਿ ਕੇਵਟ੍ਟਦ੍ਵਾਰਤੋ ਨਿਕ੍ਖਮਨਟ੍ਠਾਨੇ.

੧੭੮. ਡਾਕਨ੍ਤਿ ਤਣ੍ਡੁਲੇਯ੍ਯਕਾਦਿਸਾਕਬ੍ਯਞ੍ਜਨਂ. ਲੋਣਸੋਵੀਰਕਨ੍ਤਿ ਧਞ੍ਞਰਸਾਦੀਹਿ ਬਹੂਹਿ ਸਮ੍ਭਾਰੇਹਿ ਸਮ੍ਪਾਦੇਤਬ੍ਬਂ ਏਕਂ ਪਾਨਕਂ. ‘‘ਆਚਾਮਕਞ੍ਜਿਕਲੋਣੂਦਕ’’ਨ੍ਤਿਪਿ ਵਦਨ੍ਤਿ.

ਪੁਚ੍ਛਾਵਿਸ੍ਸਜ੍ਜਨਾਵਸਾਨੇ ਸਾ ਥੇਰਸ੍ਸ ਧਮ੍ਮਦੇਸਨਾਯ ਸਕਦਾਗਾਮਿਫਲਂ ਪਾਪੁਣਿ. ਸੇਸਂ ਉਤ੍ਤਰਾਵਿਧਾਨੇ ਵੁਤ੍ਤਨਯਾਨੁਸਾਰੇਨ ਏਵ ਵੇਦਿਤਬ੍ਬਂ.

ਪਿਣ੍ਡਾਯ ¶ ¶ ਤੇ ਚਰਨ੍ਤਸ੍ਸਾਤਿ ਆਚਾਮਦਾਯਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ¶ ਖੋ ਪਨ ਸਮਯੇਨ ਰਾਜਗਹੇ ਅਞ੍ਞਤਰਂ ਕੁਲਂ ਅਹਿਵਾਤਰੋਗੇਨ ਉਪਦ੍ਦੁਤਂ ਅਹੋਸਿ. ਤਤ੍ਥ ਸਬ੍ਬੇ ਜਨਾ ਮਤਾ ਠਪੇਤ੍ਵਾ ਏਕਂ ਇਤ੍ਥਿਂ. ਸਾ ਗੇਹਂ ਗੇਹਗਤਞ੍ਚ ਸਬ੍ਬਂ ਧਨਧਞ੍ਞਂ ਛਡ੍ਡੇਤ੍ਵਾ ਮਰਣਭਯਭੀਤਾ ਭਿਤ੍ਤਿਛਿਦ੍ਦੇਨ ਪਲਾਤਾ ਅਨਾਥਾ ਹੁਤ੍ਵਾ ਪਰਗੇਹਂ ਗਨ੍ਤ੍ਵਾ ਤਸ੍ਸ ਪਿਟ੍ਠਿਪਸ੍ਸੇ ਵਸਤਿ. ਤਸ੍ਮਿਂ ਗੇਹੇ ਮਨੁਸ੍ਸਾ ਕਰੁਣਾਯਨ੍ਤਾ ਉਕ੍ਖਲਿਆਦੀਸੁ ਅਵਸਿਟ੍ਠਂ ਯਾਗੁਭਤ੍ਤਆਚਾਮਾਦਿਂ ਤਸ੍ਸਾ ਦੇਨ੍ਤਿ. ਸਾ ਤਂ ਭੁਞ੍ਜਿਤ੍ਵਾ ਜੀਵਿਕਂ ਕਪ੍ਪੇਤਿ.

ਤੇਨ ਚ ਸਮਯੇਨ ਆਯਸ੍ਮਾ ਮਹਾਕਸ੍ਸਪੋ ਸਤ੍ਤਾਹਂ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਿਤੋ ‘‘ਕਂ ਨੁ ਖੋ ਅਹਂ ਅਜ੍ਜ ਆਹਾਰਪਟਿਗ੍ਗਹਣੇਨ ਅਨੁਗ੍ਗਹੇਸ੍ਸਾਮਿ, ਦੁਗ੍ਗਤਿਤੋ ਚ ਦੁਕ੍ਖਤੋ ਚ ਮੋਚੇਸ੍ਸਾਮੀ’’ਤਿ ਚਿਨ੍ਤੇਨ੍ਤੋ ਤਂ ਇਤ੍ਥਿਂ ਆਸਨ੍ਨਮਰਣਂ ਨਿਰਯਸਂਵਤ੍ਤਨਿਕਞ੍ਚਸ੍ਸਾ ਕਮ੍ਮਂ ਕਤੋਕਾਸਂ ਦਿਸ੍ਵਾ ‘‘ਅਯਂ ਮਯਿ ਗਤੇ ਅਤ੍ਤਨਾ ਲਦ੍ਧਂ ਆਚਾਮਂ ਦਸ੍ਸਤਿ, ਤੇਨੇਵ ਨਿਮ੍ਮਾਨਰਤਿਦੇਵਲੋਕੇ ਉਪ੍ਪਜ੍ਜਿਸ੍ਸਤਿ, ਏਵਂ ਨਿਰਯੂਪਪਤ੍ਤਿਤੋ ਮੋਚੇਤ੍ਵਾ ਹਨ੍ਦਾਹਂ ਇਮਿਸ੍ਸਾ ਸਗ੍ਗਸਮ੍ਪਤ੍ਤਿਂ ਨਿਪ੍ਫਾਦੇਸ੍ਸਾਮੀ’’ਤਿ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਂ ਆਦਾਯ ਤਸ੍ਸਾ ਨਿਵੇਸਨਟ੍ਠਾਨਾਭਿਮੁਖੋ ਗਚ੍ਛਤਿ. ਅਥ ਸਕ੍ਕੋ ਦੇਵਾਨਮਿਨ੍ਦੋ ਅਞ੍ਞਾਤਕਵੇਸੇਨ ਅਨੇਕਰਸਂ ਅਨੇਕਸੂਪਬ੍ਯਞ੍ਜਨਂ ਦਿਬ੍ਬਾਹਾਰਂ ਉਪਨੇਸਿ. ਤਂ ਞਤ੍ਵਾ ਥੇਰੋ ‘‘ਕੋਸਿਯ, ਤ੍ਵਂ ਕਤਕੁਸਲੋ, ਕਸ੍ਮਾ ਏਵਂ ਕਰੋਸਿ, ਮਾ ਦੁਗ੍ਗਤਾਨਂ ਕਪਣਾਨਂ ਸਮ੍ਪਤ੍ਤਿਂ ਵਿਲੁਮ੍ਪੀ’’ਤਿ ਪਟਿਕ੍ਖਿਪਿਤ੍ਵਾ ਤਸ੍ਸਾ ਇਤ੍ਥਿਯਾ ਪੁਰਤੋ ਅਟ੍ਠਾਸਿ.

ਸਾ ਥੇਰਂ ਦਿਸ੍ਵਾ ‘‘ਅਯਂ ਮਹਾਨੁਭਾਵੋ ਥੇਰੋ, ਇਮਸ੍ਸ ਦਾਤਬ੍ਬਯੁਤ੍ਤਕਂ ਖਾਦਨੀਯਂ ਵਾ ਭੋਜਨੀਯਂ ਵਾ ਇਧ ਨਤ੍ਥਿ, ਇਦਞ੍ਚ ਕਿਲਿਟ੍ਠਭਾਜਨਗਤਂ ਤਿਣਚੁਣ੍ਣਰਜਾਨੁਕਿਣ੍ਣਂ ਅਲੋਣਂ ਸੀਤਲਂ ਅਪ੍ਪਰਸਂ ਆਚਾਮਕਞ੍ਜਿਯਮਤ੍ਤਂ ਏਦਿਸਸ੍ਸ ਦਾਤੁਂ ਨ ਉਸ੍ਸਹਾਮੀ’’ਤਿ ਚਿਨ੍ਤੇਤ੍ਵਾ ‘‘ਅਤਿਚ੍ਛਥਾ’’ਤਿ ¶ ਆਹ. ਥੇਰੋ ਏਕਪਦਨਿਕ੍ਖੇਪਮਤ੍ਤਂ ਅਪਸਕ੍ਕਿਤ੍ਵਾ ਅਟ੍ਠਾਸਿ. ਗੇਹਵਾਸਿਨੋ ਮਨੁਸ੍ਸਾ ਭਿਕ੍ਖਂ ਉਪਨੇਸੁਂ, ਥੇਰੋ ਨ ਸਮ੍ਪਟਿਚ੍ਛਤਿ. ਸਾ ਦੁਗ੍ਗਤਿਤ੍ਥੀ ‘‘ਮਮੇਵ ਅਨੁਗ੍ਗਹਤ੍ਥਾਯ ਇਧਾਗਤੋ, ਮਮ ਸਨ੍ਤਕਮੇਵ ਪਟਿਗ੍ਗਹੇਤੁਕਾਮੋ’’ਤਿ ਞਤ੍ਵਾ ਪਸਨ੍ਨਮਾਨਸਾ ਆਦਰਜਾਤਾ ਤਂ ਆਚਾਮਂ ਥੇਰਸ੍ਸ ਪਤ੍ਤੇ ਆਕਿਰਿ. ਥੇਰੋ ਤਸ੍ਸਾ ਪਸਾਦਸਂਵਦ੍ਧਨਤ੍ਥਂ ¶ ਭੁਞ੍ਜਨਾਕਾਰਂ ਦਸ੍ਸੇਸਿ, ਮਨੁਸ੍ਸਾ ਆਸਨਂ ਪਞ੍ਞਾਪੇਸੁਂ. ਥੇਰੋ ਤਤ੍ਥ ਨਿਸੀਦਿਤ੍ਵਾ ਤਂ ਆਚਾਮਂ ਭੁਞ੍ਜਿਤ੍ਵਾ ਪਿਵਿਤ੍ਵਾ ਓਨੀਤਪਤ੍ਤਪਾਣੀ ਅਨੁਮੋਦਨਂ ਕਤ੍ਵਾ ਤਂ ਦੁਗ੍ਗਤਿਤ੍ਥਿਂ ‘‘ਤ੍ਵਂ ਇਤੋ ਤਤਿਯੇ ਅਤ੍ਤਭਾਵੇ ਮਮ ਮਾਤਾ ਅਹੋਸੀ’’ਤਿ ਵਤ੍ਵਾ ਗਤੋ. ਸਾ ਤੇਨ ਥੇਰੇ ਅਤਿਪਸਾਦਞ੍ਚ ਉਪ੍ਪਾਦੇਤ੍ਵਾ ਤਸ੍ਸਾ ਰਤ੍ਤਿਯਾ ਪਠਮਯਾਮੇ ਕਾਲਂ ਕਤ੍ਵਾ ਨਿਮ੍ਮਾਨਰਤੀਨਂ ਦੇਵਾਨਂ ਸਹਬ੍ਯਤਂ ¶ ਉਪਪਜ੍ਜਿ. ਅਥ ਸਕ੍ਕੋ ਦੇਵਰਾਜਾ ਤਸ੍ਸਾ ਕਾਲਕਤਭਾਵਂ ਞਤ੍ਵਾ ‘‘ਕਤ੍ਥ ਨੁ ਖੋ ਉਪ੍ਪਨ੍ਨਾ’’ਤਿ ਆਵਜ੍ਜੇਨ੍ਤੋ ਤਾਵਤਿਂਸੇਸੁ ਅਦਿਸ੍ਵਾ ਰਤ੍ਤਿਯਾ ਮਜ੍ਝਿਮਯਾਮੇ ਆਯਸ੍ਮਨ੍ਤਂ ਮਹਾਕਸ੍ਸਪਂ ਉਪਸਙ੍ਕਮਿਤ੍ਵਾ ਤਸ੍ਸਾ ਨਿਬ੍ਬਤ੍ਤਟ੍ਠਾਨਂ ਪੁਚ੍ਛਨ੍ਤੋ –

‘‘ਪਿਣ੍ਡਾਯ ਤੇ ਚਰਨ੍ਤਸ੍ਸ, ਤੁਣ੍ਹੀਭੂਤਸ੍ਸ ਤਿਟ੍ਠਤੋ;

ਦਲਿਦ੍ਦਾ ਕਪਣਾ ਨਾਰੀ, ਪਰਾਗਾਰਂ ਅਪਸ੍ਸਿਤਾ.

‘‘ਯਾ ਤੇ ਅਦਾਸਿ ਆਚਾਮਂ, ਪਸਨ੍ਨਾ ਸੇਹਿ ਪਾਣਿਭਿ;

ਸਾ ਹਿਤ੍ਵਾ ਮਾਨੁਸਂ ਦੇਹਂ, ਕਂ ਨੁ ਸਾ ਦਿਸਤਂ ਗਤਾ’’ਤਿ. –

੧੮੫. ਤਤ੍ਥ ਪਿਣ੍ਡਾਯਾਤਿ ਪਿਣ੍ਡਪਾਤਤ੍ਥਾਯ. ਤੁਣ੍ਹੀਭੂਤਸ੍ਸ ਤਿਟ੍ਠਤੋਤਿ ਇਦਂ ਪਿਣ੍ਡਾਯ ਚਰਣਾਕਾਰਦਸ੍ਸਨਂ, ਉਦ੍ਦਿਸ੍ਸ ਤਿਟ੍ਠਤੋਤਿ ਅਤ੍ਥੋ. ਦਲਿਦ੍ਦਾਤਿ ਦੁਗ੍ਗਤਾ. ਕਪਣਾਤਿ ਵਰਾਕੀ. ‘‘ਦਲਿਦ੍ਦਾ’’ਤਿ ਇਮਿਨਾ ਤਸ੍ਸਾ ਭੋਗਪਾਰਿਜੁਞ੍ਞਂ ਦਸ੍ਸੇਤਿ, ‘‘ਕਪਣਾ’’ਤਿ ਇਮਿਨਾ ਞਾਤਿਪਾਰਿਜੁਞ੍ਞਂ. ਪਰਾਗਾਰਂ ਅਪਸ੍ਸਿਤਾਤਿ ਪਰਗੇਹਂ ਨਿਸ੍ਸਿਤਾ, ਪਰੇਸਂ ਘਰੇ ਬਹਿਪਿਟ੍ਠਿਛਦਨਂ ਨਿਸ੍ਸਾਯ ਵਸਨ੍ਤੀ.

੧੮੬. ਕਂ ¶ ਨੁ ਸਾ ਦਿਸਤਂ ਗਤਾਤਿ ਛਸੁ ਕਾਮਦੇਵਲੋਕੇਸੁ ਉਪ੍ਪਜ੍ਜਨਵਸੇਨ ਕਂ ਨਾਮ ਦਿਸਂ ਗਤਾ. ਇਤਿ ਸਕ੍ਕੋ ‘‘ਥੇਰੇਨ ਤਥਾ ਕਤਾਨੁਗ੍ਗਹਾ ਉਲ਼ਾਰਾਯ ਦਿਬ੍ਬਸਮ੍ਪਤ੍ਤਿਯਾ ਭਾਗਿਨੀ, ਨ ਚ ਦਿਸ੍ਸਤੀ’’ਤਿ ਹੇਟ੍ਠਾ ਦ੍ਵੀਸੁ ਦੇਵਲੋਕੇਸੁ ਅਪਸ੍ਸਨ੍ਤੋ ਸਂਸਯਾਪਨ੍ਨੋ ਪੁਚ੍ਛਤਿ.

‘‘ਪਿਣ੍ਡਾਯ ਮੇ ਚਰਨ੍ਤਸ੍ਸ, ਤੁਣ੍ਹੀਭੂਤਸ੍ਸ ਤਿਟ੍ਠਤੋ;

ਦਲਿਦ੍ਦਾ ਕਪਣਾ ਨਾਰੀ, ਪਰਾਗਾਰਂ ਅਪਸ੍ਸਿਤਾ.

‘‘ਯਾ ¶ ਮੇ ਅਦਾਸਿ ਆਚਾਮਂ, ਪਸਨ੍ਨਾ ਸੇਹਿ ਪਾਣਿਭਿ;

ਸਾ ਹਿਤ੍ਵਾ ਮਾਨੁਸਂ ਦੇਹਂ, ਵਿਪ੍ਪਮੁਤ੍ਤਾ ਇਤੋ ਚੁਤਾ.

‘‘ਨਿਮ੍ਮਾਨਰਤਿਨੋ ¶ ਨਾਮ, ਸਨ੍ਤਿ ਦੇਵਾ ਮਹਿਦ੍ਧਿਕਾ;

ਤਤ੍ਥ ਸਾ ਸੁਖਿਤਾ ਨਾਰੀ, ਮੋਦਤਾਚਾਮਦਾਯਿਕਾ’’ਤਿ. –

ਪੁਚ੍ਛਿਤਨਿਯਾਮੇਨੇਵ ਪਟਿਵਚਨਂ ਦੇਨ੍ਤੋ ਤਸ੍ਸਾ ਨਿਬ੍ਬਤ੍ਤਟ੍ਠਾਨਂ ਕਥੇਸਿ.

੧੮੮. ਤਤ੍ਥ ਵਿਪ੍ਪਮੁਤ੍ਤਾਤਿ ਤਤੋ ਮਨੁਸ੍ਸਦੋਭਗ੍ਗਿਯਤੋ ਪਰਮਕਾਰੁਞ੍ਞਵੁਤ੍ਤਿਤੋ ਵਿਪ੍ਪਮੁਤ੍ਤਾ ਅਪਗਤਾ.

੧੮੯. ਮੋਦਤਾਚਾਮਦਾਯਿਕਾਤਿ ਆਚਾਮਮਤ੍ਤਦਾਯਿਕਾ, ਸਾਪਿ ਨਾਮ ਪਞ੍ਚਮੇ ਕਾਮਸਗ੍ਗੇ ਦਿਬ੍ਬਸਮ੍ਪਤ੍ਤਿਯਾ ਮੋਦਤਿ, ਪਸ੍ਸ ਤਾਵ ਖੇਤ੍ਤਸਮ੍ਪਤ੍ਤਿਫਲਨ੍ਤਿ ਦਸ੍ਸੇਤਿ.

ਪੁਨ ਸਕ੍ਕੋ ਤਸ੍ਸਾ ਦਾਨਸ੍ਸ ਮਹਪ੍ਫਲਤਂ ਮਹਾਨਿਸਂਸਤਞ੍ਚ ਸੁਤ੍ਵਾ ਤਂ ਥੋਮੇਨ੍ਤੋ –

‘‘ਅਹੋ ਦਾਨਂ ਵਰਾਕਿਯਾ, ਕਸ੍ਸਪੇ ਸੁਪ੍ਪਤਿਟ੍ਠਿਤਂ;

ਪਰਾਭਤੇਨ ਦਾਨੇਨ, ਇਜ੍ਝਿਤ੍ਥ ਵਤ ਦਕ੍ਖਿਣਾ.

‘‘ਯਾ ਮਹੇਸਿਤ੍ਤਂ ਕਾਰੇਯ੍ਯ, ਚਕ੍ਕਵਤ੍ਤਿਸ੍ਸ ਰਾਜਿਨੋ;

ਨਾਰੀ ਸਬ੍ਬਙ੍ਗਕਲ੍ਯਾਣੀ, ਭਤ੍ਤੁ ਚਾਨੋਮਦਸ੍ਸਿਕਾ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿਂ.

‘‘ਸੁਤਂ ¶ ਨਿਕ੍ਖਾ ਸਤਂ ਅਸ੍ਸਾ, ਸਤਂ ਅਸ੍ਸਤਰੀਰਥਾ;

ਸਤਂ ਕਞ੍ਞਾਸਹਸ੍ਸਾਨਿ, ਆਮੁਤ੍ਤਮਣਿਕੁਣ੍ਡਲਾ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਨ੍ਤਿ ਸੋਲ਼ਸਿਂ.

‘‘ਸਤਂ ਹੇਮਵਤਾ ਨਾਗਾ, ਈਸਾਦਨ੍ਤਾ ਉਰੂਲ਼੍ਹਵਾ;

ਸੁਵਣ੍ਣਕਚ੍ਛਾ ਮਿਤਙ੍ਗਾ, ਹੇਮਕਪ੍ਪਨਵਾਸਸਾ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗਚ੍ਛਨ੍ਤਿ ਸੋਲ਼ਸਿਂ.

‘‘ਚਤੁਨ੍ਨਮਪਿ ਦੀਪਾਨਂ, ਇਸ੍ਸਰਂ ਯੋਧ ਕਾਰਯੇ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿ’’ਨ੍ਤਿ. – ਆਹ;

੧੯੦. ਤਤ੍ਥ ¶ ¶ ਅਹੋਤਿ ਅਚ੍ਛਰਿਯਤ੍ਥੇ ਨਿਪਾਤੋ. ਵਰਾਕਿਯਾਤਿ ਕਪਣਿਯਾ. ਪਰਾਭਤੇਨਾਤਿ ਪਰਤੋ ਆਨੀਤੇਨ, ਪਰੇਸਂ ਘਰਤੋ ਉਚ੍ਛਾਚਰਿਯਾਯ ਲਦ੍ਧੇਨਾਤਿ ਅਤ੍ਥੋ. ਦਾਨੇਨਾਤਿ ਦਾਤਬ੍ਬੇਨ ਆਚਾਮਮਤ੍ਤੇਨ ਦੇਯ੍ਯਧਮ੍ਮੇਨ. ਇਜ੍ਝਿਤ੍ਥ ਵਤ ਦਕ੍ਖਿਣਾਤਿ ਦਕ੍ਖਿਣਾ ਦਾਨਂ ਅਹੋ ਨਿਪ੍ਫਜ੍ਜਿਤ੍ਥ, ਅਹੋ ਮਹਪ੍ਫਲਾ ਮਹਾਜੁਤਿਕਾ ਮਹਾਵਿਪ੍ਫਾਰਾ ਅਹੁਵਤ੍ਥਾਤਿ ਅਤ੍ਥੋ.

੧੯੧. ਇਦਾਨਿ ‘‘ਇਤ੍ਥਿਰਤਨਾਦੀਨਿਪਿ ਤਸ੍ਸ ਦਾਨਸ੍ਸ ਸਤਭਾਗਮ੍ਪਿ ਸਹਸ੍ਸਭਾਗਮ੍ਪਿ ਨ ਉਪੇਨ੍ਤੀ’’ਤਿ ਦਸ੍ਸੇਤੁਂ ‘‘ਯਾ ਮਹੇਸਿਤ੍ਤਂ ਕਾਰੇਯ੍ਯਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਬ੍ਬਙ੍ਗਕਲ੍ਯਾਣੀਤਿ ‘‘ਨਾਤਿਦੀਘਾ ਨਾਤਿਰਸ੍ਸਾ ਨਾਤਿਕਿਸਾ ਨਾਤਿਥੂਲਾ ਨਾਤਿਕਾਲ਼ੀ ਨਾਚ੍ਚੋਦਾਤਾ ਅਤਿਕ੍ਕਨ੍ਤਾ ਮਾਨੁਸਵਣ੍ਣਂ ਅਪ੍ਪਤ੍ਤਾ ਦਿਬ੍ਬਵਣ੍ਣ’’ਨ੍ਤਿ ਏਵਂ ਵੁਤ੍ਤੇਹਿ ਸਬ੍ਬੇਹਿ ਅਙ੍ਗੇਹਿ ਕਾਰਣੇਹਿ, ਸਬ੍ਬੇਹਿ ਵਾ ਅਙ੍ਗਪਚ੍ਚਙ੍ਗੇਹਿ ਕਲ੍ਯਾਣੀ ਸੋਭਨਾ ਸੁਨ੍ਦਰਾ. ਭਤ੍ਤੁ ਚਾਨੋਮਦਸ੍ਸਿਕਾਤਿ ਸਾਮਿਕਸ੍ਸ ਅਲਾਮਕਦਸ੍ਸਨਾ ਸਾਤਿਸਯਂ ਦਸ੍ਸਨੀਯਾ ਪਾਸਾਦਿਕਾ. ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿਨ੍ਤਿ ਏਤਸ੍ਸ ਏਤਾਯ ਦਿਨ੍ਨਸ੍ਸ ਆਚਾਮਦਾਨਸ੍ਸ ਫਲਂ ਸੋਲ਼ਸਭਾਗਂ ਕਤ੍ਵਾ ਤਤੋ ਏਕਂ ਭਾਗਂ ਪੁਨ ਸੋਲ਼ਸਭਾਗਂ ਕਤ੍ਵਾ ਗਹਿਤਭਾਗਸਙ੍ਖਾਤਂ ¶ ਸੋਲ਼ਸਿਂ ਕਲਂ ਚਕ੍ਕਵਤ੍ਤਿਰਞ੍ਞੋ ਇਤ੍ਥਿਰਤਨਭਾਵੋਪਿ ਨਾਗ੍ਘਤਿ ਨਾਨੁਭੋਤਿ ਨ ਪਾਪੁਣਾਤਿ. ‘‘ਸੁਵਣ੍ਣਸ੍ਸ ਪਞ੍ਚਦਸਧਰਣਂ ਨਿਕ੍ਖ’’ਨ੍ਤਿ ਵਦਨ੍ਤਿ, ‘‘ਸਤਧਰਣ’’ਨ੍ਤਿ ਅਪਰੇ.

੧੯੩. ਹੇਮਵਤਾਤਿ ਹਿਮਵਤਿ ਜਾਤਾ, ਹੇਮਵਤਜਾਤਿਕਾ ਵਾ. ਤੇ ਹਿ ਮਹਨ੍ਤਾ ਥਾਮਜਵਸਮ੍ਪਨ੍ਨਾ ਚ ਹੋਨ੍ਤਿ. ਈਸਾਦਨ੍ਤਾਤਿ ਰਥੀਸਾਸਦਿਸਦਨ੍ਤਾ, ਥੋਕਂਯੇਵ ਅਵਨਤਦਨ੍ਤਾਤਿ ਅਤ੍ਥੋ. ਤੇਨ ਵਿਸਾਲਕਦਾਠੀਭਾਵਂ ਨਿਵਾਰੇਤਿ. ਉਰੂਲ਼੍ਹਵਾਤਿ ਥਾਮਜਵਪਰਕ੍ਕਮੇਹਿ ਬ੍ਰੂਹਨ੍ਤੋ, ਮਹਨ੍ਤਂ ਯੁਦ੍ਧਕਿਚ੍ਚਂ ਵਹਿਤੁਂ ਸਮਤ੍ਥਾਤਿ ਅਤ੍ਥੋ. ਸੁਵਣ੍ਣਕਚ੍ਛਾਤਿ ਹੇਮਮਯਗੀਵੇਯ੍ਯਕਪਟਿਮੁਕ੍ਕਾ. ਕਚ੍ਛਸੀਸੇਨ ਹਿ ਸਬ੍ਬਂ ਹਤ੍ਥਿਯੋਗ੍ਗਂ ਵਦਤਿ. ਹੇਮਕਪ੍ਪਨਵਾਸਸਾਤਿ ਸੁਵਣ੍ਣਖਚਿਤਗਜਤ੍ਥਰਣਕਙ੍ਕਨਾਦਿਹਤ੍ਥਾਲਙ੍ਕਾਰਸਮ੍ਪਨ੍ਨਾ.

੧੯੪. ਚਤੁਨ੍ਨਮਪਿ ਦੀਪਾਨਂ ਇਸ੍ਸਰਨ੍ਤਿ ਦ੍ਵਿਸਹਸ੍ਸਪਰਿਤ੍ਤਦੀਪਪਰਿਵਾਰਾਨਂ ਜਮ੍ਬੁਦੀਪਾਦੀਨਂ ਚਤੁਨ੍ਨਂ ਮਹਾਦੀਪਾਨਂ ਇਸ੍ਸਰਿਯਂ. ਤੇਨ ਸਤ੍ਤਰਤਨਸਮੁਜ੍ਜਲਂ ਸਕਲਂ ਚਕ੍ਕਵਤ੍ਤਿਸਿਰਿਂ ਵਦਤਿ. ਯਂ ਪਨੇਤ੍ਥ, ਤਂ ਹੇਟ੍ਠਾ ਵੁਤ੍ਤਨਯਮੇਵ.

ਇਧ ¶ ਸਕ੍ਕੇਨ ਦੇਵਰਾਜੇਨ ਅਤ੍ਤਨਾ ਚ ਵੁਤ੍ਤਂ ਸਬ੍ਬਂ ਆਯਸ੍ਮਾ ਮਹਾਕਸ੍ਸਪਤ੍ਥੇਰੋ ਭਗਵਤੋ ਆਰੋਚੇਸਿ. ਭਗਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਆਚਾਮਦਾਯਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਚਣ੍ਡਾਲਿ ¶ ਵਨ੍ਦ ਪਾਦਾਨੀਤਿ ਚਣ੍ਡਾਲਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ¶ ਰਾਜਗਹੇ ਵਿਹਰਨ੍ਤੋ ਪਚ੍ਚੂਸਵੇਲਾਯਂ ਬੁਦ੍ਧਾਚਿਣ੍ਣਂ ਮਹਾਕਰੁਣਾਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਉਟ੍ਠਾਯ ਲੋਕਂ ਓਲੋਕੇਨ੍ਤੋ ਅਦ੍ਦਸ ਤਸ੍ਮਿਂਯੇਵ ਨਗਰੇ ਚਣ੍ਡਾਲਾਵਸਥੇ ਵਸਨ੍ਤਿਂ ਏਕਂ ਮਹਲ੍ਲਿਕਂ ਚਣ੍ਡਾਲਿਂ ਖੀਣਾਯੁਕਂ, ਨਿਰਯਸਂਵਤ੍ਤਨਿਕਞ੍ਚਸ੍ਸਾ ਕਮ੍ਮਂ ਉਪਟ੍ਠਿਤਂ. ਸੋ ਮਹਾਕਰੁਣਾਯ ਸਮੁਸ੍ਸਾਹਿਤਮਾਨਸੋ ‘‘ਸਗ੍ਗਸਂਵਤ੍ਤਨਿਕਂ ਕਮ੍ਮਂ ਕਾਰੇਤ੍ਵਾ ਤੇਨਸ੍ਸਾ ਨਿਰਯੂਪਪਤ੍ਤਿਂ ਨਿਸੇਧੇਤ੍ਵਾ ਸਗ੍ਗੇ ਪਤਿਟ੍ਠਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਰਾਜਗਹਂ ਪਿਣ੍ਡਾਯ ਪਵਿਸਤਿ. ਤੇਨ ਚ ਸਮਯੇਨ ਸਾ ਚਣ੍ਡਾਲੀ ਦਣ੍ਡਂ ਓਲੁਬ੍ਭ ਨਗਰਤੋ ਨਿਕ੍ਖਮਨ੍ਤੀ ਭਗਵਨ੍ਤਂ ਆਗਚ੍ਛਨ੍ਤਂ ਦਿਸ੍ਵਾ ਅਭਿਮੁਖੀ ਹੁਤ੍ਵਾ ਅਟ੍ਠਾਸਿ. ਭਗਵਾਪਿ ਤਸ੍ਸਾ ਗਮਨਂ ਨਿਵਾਰੇਨ੍ਤੋ ਵਿਯ ਪੁਰਤੋ ਅਟ੍ਠਾਸਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਸਤ੍ਥੁ ਚਿਤ੍ਤਂ ਞਤ੍ਵਾ ਤਸ੍ਸਾ ਚ ਆਯੁਪਰਿਕ੍ਖਯਂ ਭਗਵਤੋ ਵਨ੍ਦਨਾਯ ਤਂ ਨਿਯੋਜੇਨ੍ਤੋ –

‘‘ਚਣ੍ਡਾਲਿ ਵਨ੍ਦ ਪਾਦਾਨਿ, ਗੋਤਮਸ੍ਸ ਯਸਸ੍ਸਿਨੋ;

ਤਮੇਵ ਅਨੁਕਮ੍ਪਾਯ, ਅਟ੍ਠਾਸਿ ਇਸਿਸਤ੍ਤਮੋ.

‘‘ਅਭਿਪ੍ਪਸਾਦੇਹਿ ਮਨਂ, ਅਰਹਨ੍ਤਮ੍ਹਿ ਤਾਦਿਨਿ;

ਖਿਪ੍ਪਂ ਪਞ੍ਜਲਿਕਾ ਵਨ੍ਦ, ਪਰਿਤ੍ਤਂ ਤਵ ਜੀਵਿਤ’’ਨ੍ਤਿ. – ਗਾਥਾਦ੍ਵਯਮਾਹ;

੧੯੫. ਤਤ੍ਥ ਚਣ੍ਡਾਲੀਤਿ ਜਾਤਿਆਗਤੇਨ ਨਾਮੇਨ ਤਂ ਆਲਪਤਿ. ਵਨ੍ਦਾਤਿ ਅਭਿਵਾਦਯ. ਪਾਦਾਨੀਤਿ ਸਦੇਵਕਸ੍ਸ ਲੋਕਸ੍ਸ ਸਰਣਾਨਿ ਚਰਣਾਨਿ ¶ . ਤਮੇਵ ਅਨੁਕਮ੍ਪਾਯਾਤਿ ਤਮੇਵ ਅਨੁਗ੍ਗਣ੍ਹਨਤ੍ਥਂ, ਅਪਾਯੂਪਪਤ੍ਤਿਤੋ ਨਿਸੇਧੇਤ੍ਵਾ ਸਗ੍ਗੇ ਨਿਬ੍ਬਤ੍ਤਾਪਨਤ੍ਥਨ੍ਤਿ ਅਧਿਪ੍ਪਾਯੋ. ਅਟ੍ਠਾਸੀਤਿ ਨਗਰਮ੍ਪਿ ਅਪਵਿਸਿਤ੍ਵਾ ਠਿਤੋ. ਇਸਿਸਤ੍ਤਮੋਤਿ ਲੋਕਿਯਸੇਕ੍ਖਾਸੇਕ੍ਖਪਚ੍ਚੇਕਬੁਦ੍ਧਇਸੀਹਿ ਉਤ੍ਤਮੋ ਉਕ੍ਕਟ੍ਠਤਮੋ, ਅਥ ਵਾ ਬੁਦ੍ਧਇਸੀਨਂ ਵਿਪਸ੍ਸਿਆਦੀਨਂ ਸਤ੍ਤਮੋਤਿ ਇਸਿਸਤ੍ਤਮੋ.

੧੯੬. ਅਭਿਪ੍ਪਸਾਦੇਹਿ ਮਨਨ੍ਤਿ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ’’ਤਿ ਤਵ ਚਿਤ੍ਤਂ ਪਸਾਦੇਹਿ. ਅਰਹਨ੍ਤਮ੍ਹਿ ਤਾਦਿਨੀਤਿ ਆਰਕਤ੍ਤਾ ¶ ਕਿਲੇਸਾਨਂ, ਤੇਸਂਯੇਵ ਅਰੀਨਂ ਹਤਤ੍ਤਾ, ਸਂਸਾਰਚਕ੍ਕਸ੍ਸ ਅਰਾਨਂ ਹਤਤ੍ਤਾ, ਪਚ੍ਚਯਾਨਂ ਅਰਹਤ੍ਤਾ, ਪਾਪਕਰਣੇ ਰਹਾਭਾਵਾ ਚ ਅਰਹਨ੍ਤੇ, ਇਟ੍ਠਾਦੀਸੁ ਤਾਦਿਭਾਵਪ੍ਪਤ੍ਤਿਯਾ ਤਾਦਿਮ੍ਹਿ. ਖਿਪ੍ਪਂ ਪਞ੍ਜਲਿਕਾ ਵਨ੍ਦਾਤਿ ਸੀਘਂਯੇਵ ਪਗ੍ਗਹਿਤਅਞ੍ਜਲਿਕਾ ਹੁਤ੍ਵਾ ਵਨ੍ਦਸ੍ਸੁ. ਕਸ੍ਮਾਤਿ ਚੇ? ਪਰਿਤ੍ਤਂ ਤਵ ਜੀਵਿਤਨ੍ਤਿ, ਇਦਾਨੇਵ ਭਿਜ੍ਜਨਸਭਾਵਤ੍ਤਾ ਪਰਿਤ੍ਤਂ ਅਤਿਇਤ੍ਤਰਂ.

ਇਤਿ ¶ ਥੇਰੋ ਗਾਥਾਦ੍ਵਯੇਨ ਭਗਵਤੋ ਗੁਣੇ ਪਕਿਤ੍ਤੇਨ੍ਤੋ ਅਤ੍ਤਨੋ ਆਨੁਭਾਵੇ ਠਤ੍ਵਾ ਤਸ੍ਸਾ ਚ ਖੀਣਾਯੁਕਤਾਵਿਭਾਵਨੇਨ ਸਂਵੇਜੇਨ੍ਤੋ ਸਤ੍ਥੁ ਵਨ੍ਦਨਾਯ ਨਿਯੋਜੇਸਿ. ਸਾ ਚ ਤਂ ਸੁਤ੍ਵਾ ਸਂਵੇਗਜਾਤਾ ਸਤ੍ਥਰਿ ਪਸਨ੍ਨਮਾਨਸਾਵ ਹੁਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਅਞ੍ਜਲਿਂ ਕਤ੍ਵਾ ਨਮਸ੍ਸਮਾਨਾ ਬੁਦ੍ਧਗਤਾਯ ਪੀਤਿਯਾ ਏਕਗ੍ਗਚਿਤ੍ਤਾ ਹੁਤ੍ਵਾ ਅਟ੍ਠਾਸਿ. ਭਗਵਾ ‘‘ਅਲਮੇਤ੍ਤਕਮੇਤਿਸ੍ਸਾ ਸਗ੍ਗੂਪਪਤ੍ਤਿਯਾ’’ਤਿ ਨਗਰਂ ਪਾਵਿਸਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਨਂ ਏਕਾ ਭਨ੍ਤਾ ਗਾਵੀ ਤਰੁਣਵਚ੍ਛਾ ਤਤੋ ਏਵ ਅਭਿਧਾਵਨ੍ਤੀ ਸਿਙ੍ਗੇਨ ਪਹਰਿਤ੍ਵਾ ਜੀਵਿਤਾ ਵੋਰੋਪੇਸਿ. ਤਂ ਸਬ੍ਬਂ ਦਸ੍ਸੇਤੁਂ ਸਙ੍ਗੀਤਿਕਾਰਾ –

‘‘ਚੋਦਿਤਾ ਭਾਵਿਤਤ੍ਤੇਨ, ਸਰੀਰਨ੍ਤਿਮਧਾਰਿਨਾ;

ਚਣ੍ਡਾਲੀ ਵਨ੍ਦਿ ਪਾਦਾਨਿ, ਗੋਤਮਸ੍ਸ ਯਸਸ੍ਸਿਨੋ.

‘‘ਤਮੇਨਂ ਅਵਧੀ ਗਾਵੀ, ਚਣ੍ਡਾਲਿਂ ਪਞ੍ਜਲਿਂ ਠਿਤਂ;

ਨਮਸ੍ਸਮਾਨਂ ਸਮ੍ਬੁਦ੍ਧਂ, ਅਨ੍ਧਕਾਰੇ ਪਭਙ੍ਕਰ’’ਨ੍ਤਿ. – ਗਾਥਾਦ੍ਵਯਮਾਹਂਸੁ;

੧੯੮. ਤਤ੍ਥ ਪਞ੍ਜਲਿਂ ਠਿਤਂ ਨਮਸ੍ਸਮਾਨਂ ਸਮ੍ਬੁਦ੍ਧਨ੍ਤਿ ਗਤੇਪਿ ਭਗਵਤਿ ਬੁਦ੍ਧਾਰਮ੍ਮਣਾਯ ਪੀਤਿਯਾ ਸਮਾਹਿਤਾ ਹੁਤ੍ਵਾ ਸਮ੍ਮੁਖਾ ਵਿਯ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨਂ ¶ ਠਿਤਂ. ਅਨ੍ਧਕਾਰੇਤਿ ਅਵਿਜ੍ਜਨ੍ਧਕਾਰੇਨ ਸਕਲੇਨ ਕਿਲੇਸਨ੍ਧਕਾਰੇਨ ਚ ਅਨ੍ਧਕਾਰੇ ਲੋਕੇ. ਪਭਙ੍ਕਰਨ੍ਤਿ ਞਾਣੋਭਾਸਕਰਂ.

ਸਾ ¶ ਚ ਤਤੋ ਚੁਤਾ ਤਾਵਤਿਂਸੇਸੁ ਨਿਬ੍ਬਤ੍ਤਿ, ਅਚ੍ਛਰਾਨਂ ਸਤਸਹਸ੍ਸਂ ਚਸ੍ਸਾ ਪਰਿਵਾਰੋ ਅਹੋਸਿ. ਤਦਹੇਵ ਚ ਸਾ ਸਹ ਵਿਮਾਨੇਨ ਆਗਨ੍ਤ੍ਵਾ ਵਿਮਾਨਤੋ ਓਤਰਿਤ੍ਵਾ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਉਪਸਙ੍ਕਮਿਤ੍ਵਾ ਵਨ੍ਦਿ. ਤਮਤ੍ਥਂ ਦਸ੍ਸੇਤੁਂ –

‘‘ਖੀਣਾਸਵਂ ਵਿਗਤਰਜਂ ਅਨੇਜਂ, ਏਕਂ ਅਰਞ੍ਞਮ੍ਹਿ ਰਹੋ ਨਿਸਿਨ੍ਨਂ;

ਦੇਵਿਦ੍ਧਿਪਤ੍ਤਾ ਉਪਸਙ੍ਕਮਿਤ੍ਵਾ, ਵਨ੍ਦਾਮਿ ਤਂ ਵੀਰ ਮਹਾਨੁਭਾਵ’’ਨ੍ਤਿ. –

‘‘ਸੁਵਣ੍ਣਵਣ੍ਣਾ ਜਲਿਤਾ ਮਹਾਯਸਾ, ਵਿਮਾਨਮੋਰੁਯ੍ਹ ਅਨੇਕਚਿਤ੍ਤਾ;

ਪਰਿਵਾਰਿਤਾ ਅਚ੍ਛਰਾਸਙ੍ਗਣੇਨ, ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮ’’ਨ੍ਤਿ.

੨੦੦. ਤਤ੍ਥ ਜਲਿਤਾਤਿ ਅਤ੍ਤਨੋ ਸਰੀਰਪ੍ਪਭਾਯ ਵਤ੍ਥਾਭਰਣਾਦੀਨਂ ਓਭਾਸੇਨ ਚ ਜਲਨ੍ਤੀ ਜੋਤੇਨ੍ਤੀ ¶ . ਮਹਾਯਸਾਤਿ ਮਹਾਪਰਿਵਾਰਾ. ਵਿਮਾਨਮੋਰੁਯ੍ਹਾਤਿ ਵਿਮਾਨਤੋ ਓਰੁਯ੍ਹ. ਅਨੇਕਚਿਤ੍ਤਾਤਿ ਅਨੇਕਵਿਧਚਿਤ੍ਤਤਾਯੁਤ੍ਤਾ. ਸੁਭੇਤਿ ਸੁਭਗੁਣੇ. ਮਮਨ੍ਤਿ ਮਂ.

‘‘ਅਹਂ ਭਦ੍ਦਨ੍ਤੇ ਚਣ੍ਡਾਲੀ, ਤਯਾ ਵੀਰੇਨ ਪੇਸਿਤਾ;

ਵਨ੍ਦਿਂ ਅਰਹਤੋ ਪਾਦੇ, ਗੋਤਮਸ੍ਸ ਯਸਸ੍ਸਿਨੋ.

‘‘ਸਾਹਂ ਵਨ੍ਦਿਤ੍ਵਾ ਪਾਦਾਨਿ, ਚੁਤਾ ਚਣ੍ਡਾਲਯੋਨਿਯਾ;

ਵਿਮਾਨਂ ਸਬ੍ਬਤੋ ਭਦ੍ਦਂ, ਉਪਪਨ੍ਨਮ੍ਹਿ ਨਨ੍ਦਨੇ.

‘‘ਅਚ੍ਛਰਾਨਂ ਸਤਸਹਸ੍ਸਂ, ਪੁਰਕ੍ਖਤ੍ਵਾਨ ਤਿਟ੍ਠਤਿ;

ਤਾਸਾਹਂ ਪਵਰਾ ਸੇਟ੍ਠਾ, ਵਣ੍ਣੇਨ ਯਸਸਾਯੁਨਾ.

‘‘ਪਹੂਤਕਤਕਲ੍ਯਾਣਾ ¶ ¶ , ਸਮ੍ਪਜਾਨਾ ਪਟਿਸ੍ਸਤਾ;

ਮੁਨਿਂ ਕਾਰੁਣਿਕਂ ਲੋਕੇ, ਤਂ ਭਨ੍ਤੇ ਵਨ੍ਦਿਤੁਮਾਗਤਾ’’ਤਿ. –

੨੦੧-੪. ਤਤ੍ਥ ਪੇਸਿਤਾਤਿ ‘‘ਚਣ੍ਡਾਲਿ, ਵਨ੍ਦ ਪਾਦਾਨੀ’’ਤਿਆਦਿਨਾ ਵਨ੍ਦਨਾਯ ਉਯ੍ਯੋਜਿਤਾ. ਯਦਿਪਿ ਤਂ ਵਨ੍ਦਨਾਮਯਂ ਪੁਞ੍ਞਂ ਪਵਤ੍ਤਿਕ੍ਖਣਵਸੇਨ ਪਰਿਤ੍ਤਂ, ਖੇਤ੍ਤਮਹਨ੍ਤਤਾਯ ਪਨ ਫਲਮਹਨ੍ਤਤਾਯ ਚ ਅਤਿਵਿਯ ਮਹਨ੍ਤਮੇਵਾਤਿ ਆਹ ‘‘ਪਹੂਤਕਤਕਲ੍ਯਾਣਾ’’ਤਿ. ਤਥਾ ਬੁਦ੍ਧਾਰਮ੍ਮਣਾਯ ਪੀਤਿਯਾ ਪਵਤ੍ਤਿਕ੍ਖਣੇ ਪਞ੍ਞਾਯ ਸਤਿਯਾ ਚ ਵਿਸਦਭਾਵਂ ਸਨ੍ਧਾਯਾਹ ‘‘ਸਮ੍ਪਜਾਨਾ ਪਟਿਸ੍ਸਤਾ’’ਤਿ. ਪੁਨ –

‘‘ਇਦਂ ਵਤ੍ਵਾਨ ਚਣ੍ਡਾਲੀ, ਕਤਞ੍ਞੂ ਕਤਵੇਦਿਨੀ;

ਵਨ੍ਦਿਤ੍ਵਾ ਅਰਹਤੋ ਪਾਦੇ, ਤਤ੍ਥੇਵਨ੍ਤਰਧਾਯਥਾ’’ਤਿ. –

੨੦੫. ਤਤ੍ਥ ¶ ਚਣ੍ਡਾਲੀਤਿ ਚਣ੍ਡਾਲੀਭੂਤਪੁਬ੍ਬਾਤਿ ਕਤ੍ਵਾ ਵੁਤ੍ਤਂ, ਦੇਵਲੋਕੇ ਚ ਇਦਮਾਚਿਣ੍ਣਂ, ਯਂ ਮਨੁਸ੍ਸਲੋਕੇ ਨਿਰੁਲ਼੍ਹਸਮਞ੍ਞਾਯ ਵੋਹਾਰੋ. ਸੇਸਂ ਵੁਤ੍ਤਨਯਮੇਵ.

ਆਯਸ੍ਮਾ ਪਨ ਮਹਾਮੋਗ੍ਗਲ੍ਲਾਨੋ ਇਮਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਚਣ੍ਡਾਲਿਵਿਮਾਨਵਣ੍ਣਨਾ ਨਿਟ੍ਠਿਤਾ.

ਨੀਲਾ ਪੀਤਾ ਚ ਕਾਲ਼ਾ ਚਾਤਿ ਭਦ੍ਦਿਤ੍ਥਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ¶ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਚ ਸਮਯੇਨ ਕਿਮਿਲਨਗਰੇ ਰੋਹਕੋ ਨਾਮ ਗਹਪਤਿਪੁਤ੍ਤੋ ਅਹੋਸਿ ਸਦ੍ਧੋ ਪਸਨ੍ਨੋ ਸੀਲਾਚਾਰਸਮ੍ਪਨ੍ਨੋ. ਤਸ੍ਮਿਂਯੇਵ ਚ ਨਗਰੇ ਤੇਨ ਸਮਾਨਮਹਾਭੋਗੇ ਕੁਲੇ ਏਕਾ ਦਾਰਿਕਾ ਅਹੋਸਿ ਸਦ੍ਧਾ ਪਸਨ੍ਨਾ ¶ ਪਕਤਿਯਾਪਿ ਭਦ੍ਦਤਾਯ ਭਦ੍ਦਾਤਿ ਨਾਮੇਨ. ਅਥ ਰੋਹਕਸ੍ਸ ਮਾਤਾਪਿਤਰੋ ਤਂ ਕੁਮਾਰਿਂ ਵਾਰੇਤ੍ਵਾ ਤਾਦਿਸੇ ਕਾਲੇ ਤਂ ਆਨੇਤ੍ਵਾ ਆਵਾਹਵਿਵਾਹਂ ਅਕਂਸੁ. ਤੇ ਉਭੋਪਿ ਸਮਗ੍ਗਵਾਸਂ ਵਸਨ੍ਤਿ. ਸਾ ਅਤ੍ਤਨੋ ਆਚਾਰਸਮ੍ਪਤ੍ਤਿਯਾ ‘‘ਭਦ੍ਦਿਤ੍ਥੀ’’ਤਿ ਤਸ੍ਮਿਂ ਨਗਰੇ ਪਾਕਟਾ ਪਞ੍ਞਾਤਾ ਅਹੋਸਿ.

ਤੇਨ ਚ ਸਮਯੇਨ ਦ੍ਵੇ ਅਗ੍ਗਸਾਵਕਾ ਪਞ੍ਚਸਤਪਞ੍ਚਸਤਭਿਕ੍ਖੁਪਰਿਵਾਰਾ ਜਨਪਦਚਾਰਿਕਂ ਚਰਨ੍ਤਾ ਕਿਮਿਲਨਗਰਂ ਪਾਪੁਣਿਂਸੁ. ਰੋਹਕੋ ਤੇਸਂ ਤਤ੍ਥ ਗਤਭਾਵਂ ਞਤ੍ਵਾ ਸੋਮਨਸ੍ਸਜਾਤੋ ਥੇਰੇ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਦੁਤਿਯਦਿਵਸੇ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਪਰਿਵਾਰੇ ਤੇ ਸਨ੍ਤਪ੍ਪੇਤ੍ਵਾ ਸਪੁਤ੍ਤਦਾਰੋ ਤੇਹਿ ਦੇਸਿਤਂ ਧਮ੍ਮਦੇਸਨਂ ਸੁਤ੍ਵਾ ਤੇਸਂ ਓਵਾਦੇ ਪਤਿਟ੍ਠਹਨ੍ਤੋ ਸਰਣਾਨਿ ਗਣ੍ਹਿ, ਪਞ੍ਚ ਸੀਲਾਨਿ ਸਮਾਦਿਯਿ. ਭਰਿਯਾ ਪਨਸ੍ਸ ਅਟ੍ਠਮੀਚਾਤੁਦ੍ਦਸੀਪਨ੍ਨਰਸੀਪਾਟਿਹਾਰਿਯਪਕ੍ਖੇਸੁ ਉਪੋਸਥਂ ਉਪਵਸਿ, ਵਿਸੇਸਤੋ ਸੀਲਾਚਾਰਸਮ੍ਪਨ੍ਨਾ ਅਹੋਸਿ ਦੇਵਤਾਹਿ ਚ ਅਨੁਕਮ੍ਪਿਤਾ. ਤਾਯ ਏਵ ਚ ਦੇਵਤਾਨੁਕਮ੍ਪਾਯ ਅਤ੍ਤਨੋ ਉਪਰਿ ਪਤਿਤਂ ਮਿਚ੍ਛਾਪਵਾਦਂ ਨਿਰਂਕਤ੍ਵਾ ਸੁਵਿਸੁਦ੍ਧਸੀਲਾਚਾਰਤਾਯ ਅਤਿਵਿਯ ਲੋਕੇ ਪਤ੍ਥਟਯਸਾ ਅਹੋਸਿ.

ਸਾ ਹਿ ਸਯਂ ਕਿਮਿਲਨਗਰੇ ਠਿਤਾ ਅਤ੍ਤਨੋ ਸਾਮਿਕਸ੍ਸ ਵਣਿਜ੍ਜਾਵਸੇਨ ਤਕ੍ਕਸਿਲਾਯਂ ਵਸਨ੍ਤਸ੍ਸ, ਉਸ੍ਸਵਦਿਵਸੇ ਸਹਾਯੇਹਿ ਉਸ੍ਸਾਹਿਤਸ੍ਸ ਨਕ੍ਖਤ੍ਤਕੀਲ਼ਾਚਿਤ੍ਤੇ ਉਪ੍ਪਨ੍ਨੇ ਘਰਦੇਵਤਾਯ ਅਤ੍ਤਨੋ ਦਿਬ੍ਬਾਨੁਭਾਵੇਨ ਤਂ ਤਤ੍ਥ ¶ ਨੇਤ੍ਵਾ ਸਾਮਿਕੇਨ ਸਹ ਯੋਜਿਤਾ ਤੇਨੇਵ ਸਮਾਗਮੇਨ ਪਤਿਟ੍ਠਿਤਗਬ੍ਭਾ ¶ ਹੁਤ੍ਵਾ ਦੇਵਤਾਯ ਕਿਮਿਲਨਗਰਂ ਪਟਿਨੀਤਾ, ਅਨੁਕ੍ਕਮੇਨ ਗਬ੍ਭਿਨਿਭਾਵੇ ਪਾਕਟੇ ਜਾਤੇ ਸਸ੍ਸੁਆਦੀਹਿ ‘‘ਅਤਿਚਾਰਿਨੀ’’ਤਿ ਆਸਙ੍ਕਿਤਾ, ਤਾਯ ਏਵ ਦੇਵਤਾਯ ਅਤ੍ਤਨੋ ਆਨੁਭਾਵੇਨ ਗਙ੍ਗਾਮਹੋਘੇ ਕਿਮਿਲਨਗਰਂ ਓਤ੍ਥਰਨ੍ਤੇ ਵਿਯ ਉਪਟ੍ਠਾਪਿਤੇ ਅਤ੍ਤਨੋ ਪਤਿਬ੍ਬਤਾਭਾਵਸਂਸੂਚਕੇਨ ਸਚ੍ਚਾਧਿਟ੍ਠਾਨਪੁਬ੍ਬਕੇਨ ਸਪਥੇਨ ਵਾਤਵੇਗਸਮੁਟ੍ਠਿਤਵੀਚਿਜਾਲਂ ਗਙ੍ਗਾਮਹੋਘਂ ਅਤ੍ਤਨੋ ਉਪਰਿ ਆਪਤਿਤਂ ਆਯਸ੍ਸਞ੍ਚ ਨਿਵਤ੍ਤੇਤ੍ਵਾ, ਸਾਮਿਕੇਨ ਸਮਾਗਤਾਪਿ ਤੇਨ ਪੁਬ੍ਬੇ ਸਸ੍ਸੁਆਦੀਹਿ ਵਿਯ ਆਸਙ੍ਕਿਤਾ ਤਕ੍ਕਸਿਲਾਯਂ ਤੇਨ ਦਿਨ੍ਨਂ ਨਾਮਮੁਦ੍ਦਿਤਂ ਸਞ੍ਞਾਣਞ੍ਚ ਅਪ੍ਪੇਨ੍ਤੀ, ਤਂ ਆਸਙ੍ਕਂ ਨਿਰਂਕਤ੍ਵਾ ਭਤ੍ਤੁਨੋ ਞਾਤਿਜਨਸ੍ਸ ¶ ਚ ਮਹਾਜਨਸ੍ਸ ਚ ਸਮ੍ਭਾਵਨੀਯਾ ਜਾਤਾ. ਤੇਨ ਵੁਤ੍ਤਂ ‘‘ਸੁਵਿਸੁਦ੍ਧਸੀਲਾਚਾਰਤਾਯ ਅਤਿਵਿਯ ਲੋਕੇ ਪਤ੍ਥਟਯਸਾ ਅਹੋਸੀ’’ਤਿ.

ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਉਪ੍ਪਨ੍ਨਾ. ਅਥ ਭਗਵਤਿ ਸਾਵਤ੍ਥਿਤੋ ਤਾਵਤਿਂਸਭਵਨਂ ਗਨ੍ਤ੍ਵਾ ਪਾਰਿਚ੍ਛਤ੍ਤਕਮੂਲੇ ਪਣ੍ਡੁਕਮ੍ਬਲਸਿਲਾਯਂ ਨਿਸਿਨ੍ਨੇ, ਦੇਵਪਰਿਸਾਯ ਚ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨਾਯ ਭਦ੍ਦਿਤ੍ਥੀਪਿ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥ ਭਗਵਾ ਦਸਸਹਸ੍ਸਿਲੋਕਧਾਤੂਸੁ ਸਨ੍ਨਿਪਤਿਤਾਯ ਦੇਵਬ੍ਰਹ੍ਮਪਰਿਸਾਯ ਮਜ੍ਝੇ ਤਾਯ ਦੇਵਤਾਯ ਕਤਪੁਞ੍ਞਕਮ੍ਮਂ ਪੁਚ੍ਛਨ੍ਤੋ –

‘‘ਨੀਲਾ ਪੀਤਾ ਚ ਕਾਲ਼ਾ ਚ, ਮਞ੍ਜਿਟ੍ਠਾ ਅਥ ਲੋਹਿਤਾ;

ਉਚ੍ਚਾਵਚਾਨਂ ਵਣ੍ਣਾਨਂ, ਕਿਞ੍ਜਕ੍ਖਪਰਿਵਾਰਿਤਾ.

‘‘ਮਨ੍ਦਾਰਵਾਨਂ ਪੁਪ੍ਫਾਨਂ, ਮਾਲਂ ਧਾਰੇਸਿ ਮੁਦ੍ਧਨਿ;

ਨਯਿਮੇ ਅਞ੍ਞੇਸੁ ਕਾਯੇਸ, ਰੁਕ੍ਖਾ ਸਨ੍ਤਿ ਸੁਮੇਧਸੇ.

‘‘ਕੇਨ ਕਾਯਂ ਉਪਪਨ੍ਨਾ, ਤਾਵਤਿਂਸਂ ਯਸਸ੍ਸਿਨੀ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. – ਆਹ;

੨੦੬-੭. ਤਤ੍ਥ ¶ ਨੀਲਾ ਪੀਤਾ ਚ ਕਾਲ਼ਾ ਚ, ਮਞ੍ਜਿਟ੍ਠਾ ਅਥ ਲੋਹਿਤਾਤਿ ਏਤ੍ਥ ਚ-ਸਦ੍ਦੋ ਵੁਤ੍ਤਤ੍ਥਸਮੁਚ੍ਚਯੋ, ਸੋ ਨੀਲਾ ਚ ਪੀਤਾ ਚਾਤਿਆਦਿਨਾ ਪਚ੍ਚੇਕਂ ਯੋਜੇਤਬ੍ਬੋ. ਅਥਾਤਿ ਅਞ੍ਞਤ੍ਥੇ ਨਿਪਾਤੋ. ਤੇਨ ਓਦਾਤਾਦਿਕੇ ਅਵੁਤ੍ਤਵਣ੍ਣੇ ਸਙ੍ਗਣ੍ਹਾਤਿ. ਇਤਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ ਵੇਦਿਤਬ੍ਬੋ. ਚ-ਸਦ੍ਦੋ ਵਾ ਅਵੁਤ੍ਤਤ੍ਥਸਮੁਚ੍ਚਯੋ. ਅਥਾਤਿ ਇਤਿ-ਸਦ੍ਦਤ੍ਥੇ ਨਿਪਾਤੋ. ਉਚ੍ਚਾਵਚਾਨਂ ਵਣ੍ਣਾਨਨ੍ਤਿ ਏਤ੍ਥ ਉਚ੍ਚਾਵਚਾਨਨ੍ਤਿ ਵਿਭਤ੍ਤਿਯਾ ਅਲੋਪੋ ਦਟ੍ਠਬ੍ਬੋ, ਉਚ੍ਚਾਵਚਵਣ੍ਣਾਨਂ ਨਾਨਾਵਿਧਵਣ੍ਣਾਨਨ੍ਤਿ ਅਤ੍ਥੋ. ਵਣ੍ਣਾਨਨ੍ਤਿ ਵਾ ਵਣ੍ਣਵਨ੍ਤਾਨਂ. ਕਿਞ੍ਜਕ੍ਖਪਰਿਵਾਰਿਤਾਤਿ ਕਿਞ੍ਜਕ੍ਖੇਹਿ ਪਰਿਵਾਰਿਤਾਨਂ. ਸਾਮਿਅਤ੍ਥੇ ਹਿ ¶ ਏਤਂ ਪਚ੍ਚਤ੍ਤਵਚਨਂ. ਇਦਂ ਵੁਤ੍ਤਂ ਹੋਤਿ – ਨੀਲਾ ਚ ਪੀਤਾ ਚ ਕਾਲ਼ਾ ਚ ਮਞ੍ਜਿਟ੍ਠਾ ਚ ਲੋਹਿਤਾ ਚ ਅਥ ਅਞ੍ਞੇ ਓਦਾਤਾਦਯੋ ਚਾਤਿ ਇਮੇਸਂ ਵਸੇਨ ਉਚ੍ਚਾਵਚਵਣ੍ਣਾਨਂ ਤਥਾਭੂਤੇਹਿਯੇਵ ਕਿਞ੍ਜਕ੍ਖੇਹਿ ਕੇਸਰੇਹਿ ਪਰਿਵਾਰਿਤਾਨਂ ਵਿਚਿਤ੍ਤਸਣ੍ਠਾਨਾਦਿਤਾਯ ਵਾ ਉਚ੍ਚਾਵਚਾਨਂ ਯਥਾਵੁਤ੍ਤਵਣ੍ਣਵਨ੍ਤਾਨਂ ਮਨ੍ਦਾਰਵਰੁਕ੍ਖਸਮ੍ਭੂਤਤਾਯ ਮਨ੍ਦਾਰਵਾਨਂ ਪੁਪ੍ਫਾਨਂ ਮਾਲਂ ਤੇਹਿ ਕਤਂ ਮਾਲਾਗੁਣਂ ਤ੍ਵਂ ਦੇਵਤੇ ਅਤ੍ਤਨੋ ਸੀਸੇ ਧਾਰੇਸਿ ਪਿਲ਼ਨ੍ਧਸੀਤਿ.

ਯਤੋ ¶ ਰੁਕ੍ਖਤੋ ਤਾਨਿ ਪੁਪ੍ਫਾਨਿ, ਤੇਸਂ ਵਿਸੇਸਵਣ੍ਣਤਾਯ ਅਨਞ੍ਞਸਾਧਾਰਣਤਂ ਦਸ੍ਸੇਤੁਂ ‘‘ਨਯਿਮੇ ਅਞ੍ਞੇਸੁ ਕਾਯੇਸੁ, ਰੁਕ੍ਖਾ ਸਨ੍ਤਿ ਸੁਮੇਧਸੇ’’ਤਿ ਵੁਤ੍ਤਂ. ਤਤ੍ਥ ਇਮੇਤਿ ਯਥਾਵੁਤ੍ਤਵਣ੍ਣਸਣ੍ਠਾਨਾਦਿਯੁਤ੍ਤਾ ਪੁਪ੍ਫਵਨ੍ਤੋ ਰੁਕ੍ਖਾ ਨ ਸਨ੍ਤੀਤਿ ਯੋਜਨਾ. ਕਾਯੇਸੂਤਿ ਦੇਵਨਿਕਾਯੇਸੁ. ਸੁਮੇਧਸੇਤਿ ਸੁਨ੍ਦਰਪਞ੍ਞੇ.

ਤਤ੍ਥ ਨੀਲਾਤਿ ਇਨ੍ਦਨੀਲਮਹਾਨੀਲਾਦਿਮਣਿਰਤਨਾਨਂ ਵਸੇਨ ਨੀਲੋਭਾਸਾ. ਪੀਤਾਤਿ ਪੁਪ੍ਫਰਾਗਕਕ੍ਕੇਤਨਪੁਲਕਾਦਿਮਣਿਰਤਨਾਨਞ੍ਚੇਵ ਸਿਙ੍ਗੀਸੁਵਣ੍ਣਸ੍ਸ ਚ ਵਸੇਨ ਪੀਤੋਭਾਸਾ. ਕਾਲ਼ਾਤਿ ਅਸ੍ਮਕਉਪਲਕਾਦਿਮਣਿਰਤਨਾਨਂ ਵਸੇਨ ਕਣ੍ਹੋਭਾਸਾ. ਮਞ੍ਜਿਟ੍ਠਾਤਿ ਜੋਤਿਰਸਗੋਮੁਤ੍ਤਕਗੋਮੇਦਕਾਦਿਮਣਿਰਤਨਾਨਂ ਵਸੇਨ ਮਞ੍ਜਿਟ੍ਠੋਭਾਸਾ. ਲੋਹਿਤਾਤਿ ਪਦੁਮਰਾਗਲੋਹਿਤਙ੍ਕਪਵਾਲ਼ਰਤਨਾਦੀਨਂ ¶ ਵਸੇਨ ਲੋਹਿਤੋਭਾਸਾ. ਕੇਚਿ ਪਨ ਨੀਲਾਦਿਪਦਾਨਿ ‘‘ਰੁਕ੍ਖਾ’’ਤਿ ਇਮਿਨਾ ‘‘ਨੀਲਾ ਰੁਕ੍ਖਾ’’ਤਿਆਦਿਨਾ ਯੋਜੇਤ੍ਵਾ ਵਦਨ੍ਤਿ. ਰੁਕ੍ਖਾਪਿ ਹਿ ਨੀਲਾਦਿਵਣ੍ਣੇਹਿ ਪੁਪ੍ਫੇਹਿ ਸਞ੍ਛਨ੍ਨਤ੍ਤਾ ਨੀਲਾਦਿਯੋਗਤੋ ਨੀਲਾਦਿਵੋਹਾਰਂ ਲਭਨ੍ਤੀਤਿ ਤੇਹਿ ‘‘ਨੀਲਾ…ਪੇ… ਲੋਹਿਤਾ…ਪੇ… ਨਯਿਮੇ ਅਞ੍ਞੇਸੁ ਕਾਯੇਸੁ ਰੁਕ੍ਖਾ ਸਨ੍ਤਿ ਸੁਮੇਧਸੇਤਿ, ਯਤੋ ਤ੍ਵਂ ਉਚ੍ਚਾਵਚਾਨਂ ਵਣ੍ਣਾਨਂ ਕਿਞ੍ਜਕ੍ਖਪਰਿਵਾਰਿਤਾਨਂ ਮਨ੍ਦਾਰਵਾਨਂ ਪੁਪ੍ਫਾਨਂ ਮਾਲਂ ਧਾਰੇਸੀ’’ਤਿ ਯੋਜਨਾ ਕਾਤਬ੍ਬਾ. ਤਤ੍ਥ ਯਥਾਦਿਟ੍ਠੇ ਵਣ੍ਣਵਿਸੇਸਯੁਤ੍ਤੇ ਪੁਪ੍ਫੇ ਕਿਤ੍ਤੇਤ੍ਵਾ ਤੇਸਂ ਅਸਾਧਾਰਣਭਾਵਦਸ੍ਸਨੇਨ ਰੁਕ੍ਖਾਨਂ ਆਵੇਨਿਕਭਾਵਦਸ੍ਸਨਂ ਪਠਮਨਯੋ, ਰੁਕ੍ਖਾਨਂ ਅਸਾਧਾਰਣਭਾਵਦਸ੍ਸਨੇਨ ਪੁਪ੍ਫਾਨਂ ਆਵੇਨਿਕਭਾਵਦਸ੍ਸਨਂ ਦੁਤਿਯਨਯੋ. ਪਠਮਨਯੇ ਵਣ੍ਣਾਦਯੋ ਸਰੂਪੇਨ ਗਹਿਤਾ, ਦੁਤਿਯਨਯੇ ਨਿਸ੍ਸਯਮੁਖੇਨਾਤਿ ਅਯਮੇਤੇਸਂ ਵਿਸੇਸੋ.

੨੦੮. ਕੇਨਾਤਿ ਕੇਨ ਪੁਞ੍ਞਕਮ੍ਮੇਨ, ਕਾਯਂ ਤਾਵਤਿਂਸਨ੍ਤਿ ਯੋਜਨਾ. ਪੁਚ੍ਛਿਤਾਚਿਕ੍ਖਾਤਿ ਪੁਚ੍ਛਿਤਾ ਤ੍ਵਂ ਆਚਿਕ੍ਖ ਕਥੇਹਿ.

ਏਵਂ ਭਗਵਤਾ ਪੁਚ੍ਛਿਤਾ ਸਾ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਭਦ੍ਦਿਤ੍ਥਿਕਾਤਿ ¶ ਮਂ ਅਞ੍ਞਂਸੁ, ਕਿਮਿਲਾਯਂ ਉਪਾਸਿਕਾ;

ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ.

‘‘ਅਚ੍ਛਾਦਨਞ੍ਚ ਭਤ੍ਤਞ੍ਚ, ਸੇਨਾਸਨਂ ਪਦੀਪਿਯਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਚਾਤੁਦ੍ਦਸਿਂ ¶ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਅਪ੍ਪਮਾਦਵਿਹਾਰਿਨੀ;

ਕਤਾਵਾਸਾ ¶ ਕਤਕੁਸਲਾ ਤਤੋ ਚੁਤਾ, ਸਯਂਪਭਾ ਅਨੁਵਿਚਰਾਮਿ ਨਨ੍ਦਨਂ.

‘‘ਭਿਕ੍ਖੂ ਚਾਹਂ ਪਰਮਹਿਤਾਨੁਕਮ੍ਪਕੇ, ਅਭੋਜਯਿਂ ਤਪਸ੍ਸਿਯੁਗਂ ਮਹਾਮੁਨਿਂ;

ਕਤਾਵਾਸਾ ਕਤਕੁਸਲਾ ਤਤੋ ਚੁਤਾ, ਸਯਂਪਭਾ ਅਨੁਵਿਚਰਾਮਿ ਨਨ੍ਦਨਂ.

‘‘ਅਟ੍ਠਙ੍ਗਿਕਂ ਅਪਰਿਮਿਤਂ ਸੁਖਾਵਹਂ, ਉਪੋਸਥਂ ਸਤਤਮੁਪਾਵਸਿਂ ਅਹਂ;

ਕਤਾਵਾਸਾ ਕਤਕੁਸਲਾ ਤਤੋ ਚੁਤਾ, ਸਯਂਪਭਾ ਅਨੁਵਿਚਰਾਮਿ ਨਨ੍ਦਨ’’ਨ੍ਤਿ.

੨੦੯-੨੧੪. ਤਤ੍ਥ ਭਦ੍ਦਿਤ੍ਥਿਕਾਤਿ ਮਂ ਅਞ੍ਞਂਸੁ, ਕਿਮਿਲਾਯਂ ਉਪਾਸਿਕਾਤਿ ਆਚਾਰਸਮ੍ਪਤ੍ਤਿਯਾ ਸਚ੍ਚਕਿਰਿਯਾਯ ਉਬ੍ਬਤ੍ਤਮਾਨਮਹੋਘਨਿਵਤ੍ਤਨੇਨ ਅਖਣ੍ਡਸੀਲਾਤਿ ਸਞ੍ਜਾਤਨਿਚ੍ਛਯਾ ਭਦ੍ਦਾ ਸੁਨ੍ਦਰਾ ਅਯਂ ਇਤ੍ਥੀ, ਤਸ੍ਮਾ ‘‘ਭਦ੍ਦਿਤ੍ਥਿਕਾ ਉਪਾਸਿਕਾ’’ਤਿ ਚ ਮਂ ਕਿਮਿਲਨਗਰਵਾਸਿਨੋ ਜਾਨਿਂਸੁ. ਸਦ੍ਧਾ ਸੀਲੇਨ ਸਮ੍ਪਨ੍ਨਾਤਿਆਦਿ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.

ਅਪਿਚ ¶ ‘‘ਸਦ੍ਧਾ’’ਤਿ ਇਮਿਨਾ ਸਦ੍ਧਾਧਨਂ, ‘‘ਸਂਵਿਭਾਗਰਤਾ, ਅਚ੍ਛਾਦਨਞ੍ਚ ਭਤ੍ਤਞ੍ਚ, ਸੇਨਾਸਨਂ ਪਦੀਪਿਯਂ. ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ’’ਤਿ ਇਮਿਨਾ ਚਾਗਧਨਂ ¶ , ‘‘ਸੀਲੇਨ ਸਮ੍ਪਨ੍ਨਾ, ਚਤੁਦ੍ਦਸਿਂ ਪਞ੍ਚਦਸਿਂ…ਪੇ… ਪਞ੍ਚਸਿਕ੍ਖਾਪਦੇ ਰਤਾ’’ਤਿ ਇਮਿਨਾ ਸੀਲਧਨਂ ਹਿਰਿਧਨਂ ਓਤ੍ਤਪ੍ਪਧਨਞ੍ਚ, ‘‘ਅਰਿਯਸਚ੍ਚਾਨ ਕੋਵਿਦਾ’’ਤਿ ਇਮਿਨਾ ਸੁਤਧਨਂ ਪਞ੍ਞਾਧਨਞ੍ਚ ਦਸ੍ਸਿਤਨ੍ਤਿ ਸਾ ਅਤ੍ਤਨੋ ਸਤ੍ਤਵਿਧਅਰਿਯਧਨਪਟਿਲਾਭਂ. ‘‘ਉਪਾਸਿਕਾ ਚਕ੍ਖੁਮਤੋ…ਪੇ… ਅਨੁਵਿਚਰਾਮਿ ਨਨ੍ਦਨ’’ਨ੍ਤਿ ਇਮਿਨਾ ਤਸ੍ਸ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚ ਆਨਿਸਂਸਂ ਵਿਭਾਵੇਤਿ. ਤਤ੍ਥ ਕਤਾਵਾਸਾਤਿ ਨਿਪ੍ਫਾਦਿਤਸੁਚਰਿਤਾਵਾਸਾ. ਸੁਚਰਿਤਕਮ੍ਮਞ੍ਹਿ ਤਦਤ੍ਤੇ ਆਯਤਿਞ੍ਚ ਸੁਖਾਵਾਸਹੇਤੁਤਾਯ ‘‘ਸੁਖਵਿਹਾਰਸ੍ਸ ਆਵਾਸੋ’’ਤਿ ਵੁਚ੍ਚਤਿ. ਤੇਨਾਹ ‘‘ਕਤਕੁਸਲਾ’’ਤਿ.

੨੧੫. ਪੁਬ੍ਬੇ ਅਨਾਮਸਿਤਖੇਤ੍ਤਵਿਸੇਸਂ ਅਤ੍ਤਨੋ ਦਾਨਮਯਂ ਪੁਞ੍ਞਂ ਵਤ੍ਵਾ ¶ ਇਦਾਨਿ ਤਸ੍ਸ ਆਯਤਨਗਤਤਂ ਦਸ੍ਸੇਤੁਂ ‘‘ਭਿਕ੍ਖੂ ਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਭਿਕ੍ਖੂਤਿ ਅਨਵਸੇਸਭਿਨ੍ਨਕਿਲੇਸਤਾਯ ਭਿਕ੍ਖੂ. ਪਰਮਹਿਤਾਨੁਕਮ੍ਪਕੇਤਿ ਪਰਮਂ ਅਤਿਵਿਯ ਦਿਟ੍ਠਧਮ੍ਮਿਕਾਦਿਨਾ ਹਿਤੇਨ ਅਨੁਗ੍ਗਾਹਕੇ. ਅਭੋਜਯਿਨ੍ਤਿ ਪਣੀਤੇਨ ਭੋਜਨੇਨ ਭੋਜੇਸਿਂ. ਤਪਸ੍ਸਿਯੁਗਨ੍ਤਿ ਉਤ੍ਤਮੇਨ ਤਪਸਾ ਸਬ੍ਬਕਿਲੇਸਮਲਂ ਤਾਪੇਤ੍ਵਾ ਸਮੁਚ੍ਛਿਨ੍ਦਿਤ੍ਵਾ ਠਿਤਤ੍ਤਾ ਤਪਸ੍ਸਿਭੂਤਂ ਯੁਗਂ. ਮਹਾਮੁਨਿਨ੍ਤਿ ਤਤੋ ਏਵ ਮਹਾਇਸਿਭੂਤਂ, ਮਹਤੋ ਵਾ ਅਤ੍ਤਨੋ ਵਿਸਯਸ੍ਸ ਮਹਨ੍ਤੇਨੇਵ ਞਾਣੇਨ ਮੁਨਨਤੋ ਪਰਿਚ੍ਛਿਨ੍ਦਨਤੋ ਮਹਾਮੁਨਿਂ. ਸਬ੍ਬਮੇਤਂ ਦ੍ਵੇ ਅਗ੍ਗਸਾਵਕੇ ਸਨ੍ਧਾਯ ਵਦਤਿ.

੨੧੬. ਅਪਰਿਮਿਤਂ ਸੁਖਾਵਹਨ੍ਤਿ ਅਨੁਨਾਸਿਕਲੋਪਂ ਅਕਤ੍ਵਾ ਵੁਤ੍ਤਂ. ‘‘ਯਾਵਞ੍ਚਿਦਂ, ਭਿਕ੍ਖਵੇ, ਨ ਸੁਕਰਂ ਅਕ੍ਖਾਨੇਨ ਪਾਪੁਣਿਤੁਂ ਯਾਵ ਸੁਖਾ ਸਗ੍ਗਾ’’ਤਿ (ਮ. ਨਿ. ੩.੨੫੫) ਵਚਨਤੋ ਭਗਵਤੋਪਿ ਵਚਨਪਥਾਤੀਤਪਰਿਮਾਣਰਹਿਤਸੁਖਨਿਬ੍ਬਤ੍ਤਕਂ ਅਤ੍ਤਨੋ ਵਾ ਆਨੁਭਾਵੇਨ ਅਪਰਿਮਿਤਸੁਖਾਵਹਂ ਸੁਖਸ੍ਸ ਆਵਹਨਕਂ. ਸਤਤਨ੍ਤਿ ਸਬ੍ਬਕਾਲਂ. ਤਂ ਤਂ ਉਪੋਸਥਰਕ੍ਖਣਦਿਵਸਂ ਅਹਾਪੇਤ੍ਵਾ, ਤਂ ਤਂ ਵਾ ਉਪੋਸਥਰਕ੍ਖਣਦਿਵਸਂ ਅਖਣ੍ਡਂ ਕਤ੍ਵਾ ਪਰਿਪੁਣ੍ਣਂ ਕਤ੍ਵਾ ਸਤਤਂ ਵਾ ਸਬ੍ਬਕਾਲਂ ਸੁਖਾਵਹਨ੍ਤਿ ਯੋਜਨਾ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਅਥ ਭਗਵਾ ਮਾਤੁਦੇਵਪੁਤ੍ਤਪ੍ਪਮੁਖਾਨਂ ਦਸਸਹਸ੍ਸਿਲੋਕਧਾਤੁਵਾਸੀਨਂ ਦੇਵਬ੍ਰਹ੍ਮਸਙ੍ਘਾਨਂ ਤਯੋ ਮਾਸੇ ਅਭਿਧਮ੍ਮਪਿਟਕਂ ਦੇਸੇਤ੍ਵਾ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਦ੍ਦਿਤ੍ਥਿਵਿਮਾਨਂ ਭਿਕ੍ਖੂਨਂ ਦੇਸੇਸਿ. ਸਾ ਦੇਸਨਾ ਸਮ੍ਪਤ੍ਤਪਰਿਸਾਯ ਸਾਤ੍ਥਿਕਾ ਅਹੋਸੀਤਿ.

ਭਦ੍ਦਿਤ੍ਥਿਵਿਮਾਨਵਣ੍ਣਨਾ ਨਿਟ੍ਠਿਤਾ.

ਅਭਿਕ੍ਕਨ੍ਤੇਨ ¶ ¶ ਵਣ੍ਣੇਨਾਤਿ ਸੋਣਦਿਨ੍ਨਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਚ ਸਮਯੇਨ ਨਾਲ਼ਨ੍ਦਾਯਂ ਸੋਣਦਿਨ੍ਨਾ ਨਾਮ ਏਕਾ ਉਪਾਸਿਕਾ ਸਦ੍ਧਾ ਪਸਨ੍ਨਾ ਭਿਕ੍ਖੂਨਂ ¶ ਚਤੂਹਿ ਪਚ੍ਚਯੇਹਿ ਸਕ੍ਕਚ੍ਚਂ ਉਪਟ੍ਠਹਨ੍ਤੀ ਸੁਵਿਸੁਦ੍ਧਨਿਚ੍ਚਸੀਲਾ ਅਟ੍ਠਙ੍ਗਸਮਨ੍ਨਾਗਤਂ ਉਪੋਸਥਮ੍ਪਿ ਉਪਵਸਤਿ. ਸਾ ਧਮ੍ਮਸਵਨਸਪ੍ਪਾਯਂ ਪਟਿਲਭਿਤ੍ਵਾ ਉਪਨਿਸ੍ਸਯਸਮ੍ਪਨ੍ਨਤਾਯ ਚਤੁਸਚ੍ਚਕਮ੍ਮਟ੍ਠਾਨਂ ਪਰਿਬ੍ਰੂਹਨ੍ਤੀ ਸੋਤਾਪਨ੍ਨਾ ਅਹੋਸਿ. ਅਥ ਅਞ੍ਞਤਰੇਨ ਰੋਗੇਨ ਫੁਟ੍ਠਾ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਸੋਣਦਿਨ੍ਨਾਤਿ ਮਂ ਅਞ੍ਞਂਸੁ…ਪੇ… ਗੋਤਮਸ੍ਸ ਯਸਸ੍ਸਿਨੋ.

‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਦੇਵਤਾ ਬ੍ਯਾਕਾਸਿ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਮੇਵ.

ਸੋਣਦਿਨ੍ਨਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਅਭਿਕ੍ਕਨ੍ਤੇਨ ¶ ¶ ਵਣ੍ਣੇਨਾਤਿ ਉਪੋਸਥਾਵਿਮਾਨਂ. ਇਧ ਅਟ੍ਠੁਪ੍ਪਤ੍ਤਿਯਂ ਸਾਕੇਤੇ ਉਪੋਸਥਾ ਨਾਮ ਏਕਾ ਉਪਾਸਿਕਾਤਿ ਅਯਮੇਵ ਵਿਸੇਸੋ, ਸੇਸਂ ਅਨਨ੍ਤਰਵਿਮਾਨਸਦਿਸਂ. ਤੇਨ ਵੁਤ੍ਤਂ –

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਉਪੋਸਥਾਤਿ ਮਂ ਅਞ੍ਞਂਸੁ, ਸਾਕੇਤਾਯਂ ਉਪਾਸਿਕਾ…ਪੇ…

ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ.

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਦੇਵਤਾ ਬ੍ਯਾਕਾਸਿ. ਪੁਨ ਅਤ੍ਤਨੋ ਏਕਂ ਦੋਸਂ ਦਸ੍ਸੇਨ੍ਤੀ –

‘‘ਅਭਿਕ੍ਖਣਂ ਨਨ੍ਦਨਂ ਸੁਤ੍ਵਾ, ਛਨ੍ਦੋ ਮੇ ਉਦਪਜ੍ਜਥ;

ਤਤ੍ਥ ਚਿਤ੍ਤਂ ਪਣਿਧਾਯ, ਉਪਪਨ੍ਨਾਮ੍ਹਿ ਨਨ੍ਦਨਂ.

‘‘ਨਾਕਾਸਿਂ ਸਤ੍ਥੁ ਵਚਨਂ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;

ਹੀਨੇ ਚਿਤ੍ਤਂ ਪਣਿਧਾਯ, ਸਾਮ੍ਹਿ ਪਚ੍ਛਾਨੁਤਾਪਿਨੀ’’ਤਿ. – ਦ੍ਵੇ ਗਾਥਾ ਅਭਾਸਿ;

੨੩੩. ਤਤ੍ਥ ਉਪੋਸਥਾਤਿ ਮਂ ਅਞ੍ਞਂਸੂਤਿ ‘‘ਉਪੋਸਥਾ’’ਤਿ ਇਮਿਨਾ ਨਾਮੇਨ ਮਂ ਮਨੁਸ੍ਸਾ ਜਾਨਿਂਸੁ. ਸਾਕੇਤਾਯਨ੍ਤਿ ਸਾਕੇਤਨਗਰੇ.

੨੪੧. ਅਭਿਕ੍ਖਣਨ੍ਤਿ ¶ ਅਭਿਣ੍ਹਂ. ਨਨ੍ਦਨਂ ਸੁਤ੍ਵਾਤਿ ‘‘ਤਾਵਤਿਂਸਭਵਨੇ ਨਨ੍ਦਨਵਨਂ ਨਾਮ ਏਦਿਸਞ੍ਚ ਏਦਿਸਞ੍ਚਾ’’ਤਿ ਤਤ੍ਥ ਨਾਨਾਵਿਧਂ ਦਿਬ੍ਬਸਮ੍ਪਤ੍ਤਿਂ ਸੁਤ੍ਵਾ. ਛਨ੍ਦੋਤਿ ਤਨ੍ਨਿਬ੍ਬਤ੍ਤਕਪੁਞ੍ਞਕਮ੍ਮਸ੍ਸ ¶ ਕਾਰਣਭੂਤੋ ਕੁਸਲਚ੍ਛਨ੍ਦੋ, ਤਤ੍ਰੂਪਪਤ੍ਤਿਯਾ ਪਤ੍ਥਨਾਭੂਤੋ ਤਣ੍ਹਾਛਨ੍ਦੋ ਵਾ. ਉਦਪਜ੍ਜਥਾਤਿ ਉਪ੍ਪਜ੍ਜਿਤ੍ਥ. ਤਤ੍ਥਾਤਿ ਤਾਵਤਿਂਸਭਵਨੇ, ਨਨ੍ਦਨਾਪਦੇਸੇਨਪਿ ਹਿ ਤਂ ਦੇਵਲੋਕਂ ਵਦਤਿ. ਉਪਪਨ੍ਨਾਮ੍ਹੀਤਿ ਉਪ੍ਪਨ੍ਨਾ ਨਿਬ੍ਬਤ੍ਤਾ ਅਮ੍ਹਿ.

੨੪੨. ਨਾਕਾਸਿਂ ¶ ਸਤ੍ਥੁ ਵਚਨਨ੍ਤਿ ‘‘ਨਾਹਂ, ਭਿਕ੍ਖਵੇ, ਅਪ੍ਪਮਤ੍ਤਕਮ੍ਪਿ ਭਵਂ ਵਣ੍ਣੇਮੀ’’ਤਿਆਦਿਨਾ (ਅ. ਨਿ. ੧.੩੨੦-੩੨੧) ਸਤ੍ਥਾਰਾ ਵੁਤ੍ਤਵਚਨਂ ਨ ਕਰਿਂ, ਭਵੇਸੁ ਛਨ੍ਦਰਾਗਂ ਨ ਪਜਹਿਨ੍ਤਿ ਅਤ੍ਥੋ. ਆਦਿਚ੍ਚੋ ਗੋਤਮਗੋਤ੍ਤੋ, ਭਗਵਾਪਿ ਗੋਤਮਗੋਤ੍ਤੋਤਿ ਸਗੋਤ੍ਤਤਾਯ ਵੁਤ੍ਤਂ ‘‘ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ’’ਤਿ. ਅਥ ਵਾ ਆਦਿਚ੍ਚਸ੍ਸ ਬਨ੍ਧੁ ਆਦਿਚ੍ਚਬਨ੍ਧੁ, ਭਗਵਾ. ਤਂ ਪਟਿਚ੍ਚ ਤਸ੍ਸ ਅਰਿਯਾਯ ਜਾਤਿਯਾ ਜਾਤਤ੍ਤਾ ਆਦਿਚ੍ਚੋ ਵਾ ਬਨ੍ਧੁ ਏਤਸ੍ਸ ਓਰਸਪੁਤ੍ਤਭਾਵਤੋਤਿ ਆਦਿਚ੍ਚਬਨ੍ਧੁ, ਭਗਵਾ. ਤਥਾ ਹਿ ਵੁਤ੍ਤਂ –

‘‘ਯੋ ਅਨ੍ਧਕਾਰੇ ਤਮਸੀ ਪਭਙ੍ਕਰੋ, ਵੇਰੋਚਨੋ ਮਣ੍ਡਲੀ ਉਗ੍ਗਤੇਜੋ;

ਮਾ ਰਾਹੁ ਗਿਲੀ ਚਰਮਨ੍ਤਲਿਕ੍ਖੇ, ਪਜਂ ਮਮਂ ਰਾਹੁ ਪਮੁਞ੍ਚ ਸੂਰਿਯ’’ਨ੍ਤਿ. (ਸਂ. ਨਿ. ੧.੯੧);

ਹੀਨੇਤਿ ਲਾਮਕੇ. ਅਤ੍ਤਨੋ ਭਵਾਭਿਰਤਿਂ ਸਨ੍ਧਾਯ ਵਦਤਿ. ਸਾਮ੍ਹੀਤਿ ਸਾ ਅਮ੍ਹਿ.

ਏਵਂ ਤਾਯ ਦੇਵਤਾਯ ਭਵਾਭਿਰਤਿਨਿਮਿਤ੍ਤੇ ਉਪ੍ਪਨ੍ਨਵਿਪ੍ਪਟਿਸਾਰੇ ਪਵੇਦਿਤੇ ਥੇਰੋ ਭਵਸ੍ਸ ਪਰਿਚ੍ਛਿਨ੍ਨਾਯੁਭਾਵਵਿਭਾਵਨਮੁਖੇਨ ਆਯਤਿਂ ਮਨੁਸ੍ਸਤ੍ਤਭਾਵੇ ਠਤ੍ਵਾ ਵਟ੍ਟਦੁਕ੍ਖਸ੍ਸ ਸਮਤਿਕ੍ਕਮੋ ਕਾਤੁਂ ਸੁਕਰੋ, ਸਬ੍ਬਸੋ ਖੀਣਾਸਵਭਾਵੋ ਨਾਮ ਮਹਾਨਿਸਂਸੋਤਿ ਚ ਸਮਸ੍ਸਾਸੇਤੁਂ –

‘‘ਕੀਵ ਚਿਰਂ ਵਿਮਾਨਮ੍ਹਿ, ਇਧ ਵਚ੍ਛਸੁਪੋਸਥੇ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਯਦਿ ਜਾਨਾਸਿ ਆਯੁਨੋ’’ਤਿ. –

‘‘ਸਟ੍ਠਿ ਵਸ੍ਸਸਹਸ੍ਸਾਨਿ ¶ , ਤਿਸ੍ਸੋ ਚ ਵਸ੍ਸਕੋਟਿਯੋ;

ਇਧ ਠਤ੍ਵਾ ਮਹਾਮੁਨਿ, ਇਤੋ ਚੁਤਾ ਗਮਿਸ੍ਸਾਮਿ;

‘‘ਮਾ ਤ੍ਵਂ ਉਪੋਸਥੇ ਭਾਯਿ, ਸਮ੍ਬੁਦ੍ਧੇਨਾਸਿ ਬ੍ਯਾਕਤਾ;

ਸੋਤਾਪਨ੍ਨਾ ਵਿਸੇਸਯਿ, ਪਹੀਨਾ ਤਵ ਦੁਗ੍ਗਤੀ’’ਤਿ. –

੨੪੩-੪. ਤਤ੍ਥ ¶ ਕੀਵ ਚਿਰਨ੍ਤਿ ਕਿਤ੍ਤਕਂ ਅਦ੍ਧਾਨਂ. ਇਧਾਤਿ ਇਮਸ੍ਮਿਂ ਦੇਵਲੋਕੇ, ਇਧ ਵਾ ਵਿਮਾਨਸ੍ਮਿਂ. ਆਯੁ ਨੋਤਿ ਆਯੁ, ਨੋਤਿ ਨਿਪਾਤਮਤ੍ਤਂ. ਆਯੁਨੋ ਵਾ ਚਿਰਾਚਿਰਭਾਵਂ, ਅਥ ਵਾ ਯਦਿ ਜਾਨਾਸਿ ਆਯੁਨੋਤਿ ਅਤ੍ਥੋ. ਮਹਾਮੁਨੀਤਿ ਥੇਰਂ ਆਲਪਤਿ.

੨੪੫. ਮਾ ਤ੍ਵਂ ਉਪੋਸਥੇ ਭਾਯੀਤਿ ਭਦ੍ਦੇ ਉਪੋਸਥੇ ਤ੍ਵਂ ਮਾ ਭਾਯਿ. ਕਸ੍ਮਾ? ਯਸ੍ਮਾ ਸਮ੍ਬੁਦ੍ਧੇਨਾਸਿ ਬ੍ਯਾਕਤਾ. ਕਿਨ੍ਤਿ? ਸੋਤਾਪਨ੍ਨਾ ਵਿਸੇਸਯੀਤਿ. ਮਗ੍ਗਫਲਸਞ੍ਞਿਤਂ ਵਿਸੇਸਂ ਯਾਤਾ ਅਧਿਗਤਾ, ਤਸ੍ਮਾ ਪਹੀਨਾ ਤਵ ਸਬ੍ਬਾਪਿ ਦੁਗ੍ਗਤੀਤਿ ਇਮਮ੍ਪਿ ਵਿਸੇਸਂ ਯਾਤਾਤਿ ਵਿਸੇਸਯਿ. ਸੇਸਂ ਵੁਤ੍ਤਨਯਮੇਵ.

੮-੯. ਨਿਦ੍ਦਾ-ਸੁਨਿਦ੍ਦਾਵਿਮਾਨਵਣ੍ਣਨਾ

ਅਟ੍ਠਮਨਵਮਵਿਮਾਨਾਨਿ ਰਾਜਗਹਨਿਦਾਨਾਨਿ. ਅਟ੍ਠੁਪ੍ਪਤ੍ਤਿਯਂ ਯਥਾਕ੍ਕਮਂ ‘‘ਨਿਦ੍ਦਾ ਨਾਮ ਉਪਾਸਿਕਾ…ਪੇ… ਗੋਤਮਸ੍ਸ ਯਸਸ੍ਸਿਨੋ. ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਸੁਨਿਦ੍ਦਾ ਨਾਮ ਉਪਾਸਿਕਾ’’ਤਿ ਵਤ੍ਤਬ੍ਬਂ. ਸੇਸਂ ਵੁਤ੍ਤਨਯਮੇਵ. ਗਾਥਾਸੁਪਿ ਅਪੁਬ੍ਬਂ ਨਤ੍ਥਿ. ਤਥਾ ਹਿ ਏਕਚ੍ਚੇਸੁ ਪੋਤ੍ਥਕੇਸੁ ਪਾਲ਼ਿ ਪੇਯ੍ਯਾਲਵਸੇਨ ਠਪਿਤਾਤਿ. ਤੇਨ ਵੁਤ੍ਤਂ –

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਨਿਦ੍ਦਾਤਿ ਮਮਂ ਅਞ੍ਞਂਸੁ, ਰਾਜਗਹਸ੍ਮਿਂ ਉਪਾਸਿਕਾ…ਪੇ…

‘‘ਤੇਨ ¶ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਅਭਿਕ੍ਕਨ੍ਤੇਨ ¶ ਵਣ੍ਣੇਨ…ਪੇ… ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸੁਨਿਦ੍ਦਾਤਿ ਮਂ ਅਞ੍ਞਂਸੁ, ਰਾਜਗਹਸ੍ਮਿਂ ਉਪਾਸਿਕਾ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਨਿਦ੍ਦਾ-ਸੁਨਿਦ੍ਦਾਵਿਮਾਨਵਣ੍ਣਨਾ ਨਿਟ੍ਠਿਤਾ.

੧੦. ਪਠਮਭਿਕ੍ਖਾਦਾਯਿਕਾਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਭਿਕ੍ਖਾਦਾਯਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਚ ਸਮਯੇਨ ਉਤ੍ਤਰਮਧੁਰਾਯਂ ਅਞ੍ਞਤਰਾ ਇਤ੍ਥੀ ਖੀਣਾਯੁਕਾ ਹੋਤਿ ਅਪਾਯੇ ਉਪ੍ਪਜ੍ਜਨਾਰਹਾ. ਭਗਵਾ ਪਚ੍ਚੂਸਵੇਲਾਯਂ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਤਂ ਇਤ੍ਥਿਂ ਅਪਾਯੇ ਉਪ੍ਪਜ੍ਜਨਾਰਹਂ ਦਿਸ੍ਵਾ ਮਹਾਕਰੁਣਾਯ ਸਞ੍ਚੋਦਿਤਮਾਨਸੋ ਤਂ ਸੁਗਤਿਯਂ ਪਤਿਟ੍ਠਾਪੇਤੁਕਾਮੋ ਏਕੋ ਅਦੁਤਿਯੋ ਮਧੁਰਂ ਅਗਮਾਸਿ. ਗਨ੍ਤ੍ਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਂ ਆਦਾਯ ਬਹਿਨਗਰਂ ਪਿਣ੍ਡਾਯ ਪਾਵਿਸਿ. ਤੇਨ ਸਮਯੇਨ ਸਾ ਇਤ੍ਥੀ ਗੇਹੇ ਆਹਾਰਂ ਸਮ੍ਪਾਦੇਤ੍ਵਾ ਏਕਮਨ੍ਤੇ ਪਟਿਸਾਮੇਤ੍ਵਾ ਘਟਂ ਗਹੇਤ੍ਵਾ ਉਦਕਤਿਤ੍ਥਂ ਗਨ੍ਤ੍ਵਾ ਨ੍ਹਾਯਿਤ੍ਵਾ ਘਟੇਨ ਉਦਕਂ ਗਹੇਤ੍ਵਾ ਅਤ੍ਤਨੋ ਗੇਹਂ ਗਚ੍ਛਨ੍ਤੀ ਅਨ੍ਤਰਾਮਗ੍ਗੇ ਭਗਵਨ੍ਤਂ ਪਸ੍ਸਿਤ੍ਵਾ ‘‘ਅਪਿ, ਭਨ੍ਤੇ, ਪਿਣ੍ਡੋ ਲਦ੍ਧੋ’’ਤਿ ਵਤ੍ਵਾ ‘‘ਲਭਿਸ੍ਸਾਮੀ’’ਤਿ ਚ ਭਗਵਤਾ ਵੁਤ੍ਤੇ ਅਲਦ੍ਧਭਾਵਂ ਞਤ੍ਵਾ ਘਟਂ ਠਪੇਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਅਹਂ, ਭਨ੍ਤੇ, ਪਿਣ੍ਡਪਾਤਂ ਦਸ੍ਸਾਮਿ, ਅਧਿਵਾਸੇਥਾ’’ਤਿ ਆਹ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਸਾ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਪਠਮਤਰਂ ਗਨ੍ਤ੍ਵਾ ਸਿਤ੍ਤਸਮ੍ਮਟ੍ਠੇ ਪਦੇਸੇ ਆਸਨਂ ਪਞ੍ਞਾਪੇਤ੍ਵਾ ਭਗਵਤੋ ਪਵੇਸਨਂ ਉਦਿਕ੍ਖਮਾਨਾ ਅਟ੍ਠਾਸਿ. ਭਗਵਾ ਗੇਹਂ ਪਵਿਸਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਸਾ ਭਗਵਨ੍ਤਂ ਭੋਜੇਸਿ. ਭਗਵਾ ਕਤਭਤ੍ਤਕਿਚ੍ਚੋ ਓਨੀਤਪਤ੍ਤਪਾਣੀ ਤਸ੍ਸਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਾ ਅਨੁਮੋਦਨਂ ਸੁਤ੍ਵਾ ਅਨਪ੍ਪਕਂ ਪੀਤਿਸੋਮਨਸ੍ਸਂ ¶ ¶ ਪਟਿਸਂਵੇਦੇਨ੍ਤੀ ਯਾਵ ਚਕ੍ਖੁਪਥਸਮਤਿਕ੍ਕਮਾ ਬੁਦ੍ਧਾਰਮ੍ਮਣਂ ਪੀਤਿਂ ਅਵਿਜਹਨ੍ਤੀ ਨਮਸ੍ਸਮਾਨਾ ਅਟ੍ਠਾਸਿ. ਸਾ ¶ ਕਤਿਪਯਦਿਵਸਾਤਿਕ੍ਕਮੇਨੇਵ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ, ਅਚ੍ਛਰਾਸਹਸ੍ਸਞ੍ਚਸ੍ਸਾ ਪਰਿਵਾਰੋ ਅਹੋਸਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ… ਓਸਧੀ ਵਿਯ ਤਾਰਕਾ.

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਗਾਥਾਹਿ ਪੁਚ੍ਛਿ;

‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਦ੍ਦਸਂ ਵਿਰਜਂ ਬੁਦ੍ਧਂ, ਵਿਪ੍ਪਸਨ੍ਨਮਨਾਵਿਲਂ;

ਤਸ੍ਸ ਅਦਾਸਹਂ ਭਿਕ੍ਖਂ, ਪਸਨ੍ਨਾ ਸੇਹਿ ਪਾਣਿਭਿ.

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਦੇਵਤਾ ਬ੍ਯਾਕਾਸਿ. ਸੇਸਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.

ਪਠਮਭਿਕ੍ਖਾਦਾਯਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.

੧੧. ਦੁਤਿਯਭਿਕ੍ਖਾਦਾਯਿਕਾਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਦੁਤਿਯਭਿਕ੍ਖਾਦਾਯਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ¶ . ਤਤ੍ਥ ਅਞ੍ਞਤਰਾ ਇਤ੍ਥੀ ਸਦ੍ਧਾ ਪਸਨ੍ਨਾ ਅਞ੍ਞਤਰਂ ਖੀਣਾਸਵਤ੍ਥੇਰਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਅਤ੍ਤਨੋ ਗੇਹਂ ਪਵੇਸੇਤ੍ਵਾ ਭੋਜਨਂ ਅਦਾਸਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਸੇਸਂ ਅਨਨ੍ਤਰਵਿਮਾਨਸਦਿਸਮੇਵ.

‘‘ਅਭਿਕ੍ਕਨ੍ਤੇਨ ¶ ¶ ਵਣ੍ਣੇਨ…ਪੇ… ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਦੁਤਿਯਭਿਕ੍ਖਾਦਾਯਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਇਤਿ ਪਰਮਤ੍ਥਦੀਪਨਿਯਾ ਖੁਦ੍ਦਕ-ਅਟ੍ਠਕਥਾਯ ਵਿਮਾਨਵਤ੍ਥੁਸ੍ਮਿਂ

ਏਕਾਦਸਵਤ੍ਥੁਪਟਿਮਣ੍ਡਿਤਸ੍ਸ ਦੁਤਿਯਸ੍ਸ ਚਿਤ੍ਤਲਤਾਵਗ੍ਗਸ੍ਸ

ਪਾਰਿਚ੍ਛਤ੍ਤਕਵਗ੍ਗੇ ¶ ਉਲ਼ਾਰੋ ਤੇ ਯਸੋ ਵਣ੍ਣੋਤਿ ਉਲ਼ਾਰਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਸਮਯੇਨ ਰਾਜਗਹੇ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਉਪਟ੍ਠਾਕਕੁਲੇ ਏਕਾ ਦਾਰਿਕਾ ਦਾਨਜ੍ਝਾਸਯਾ ਦਾਨਸਂਵਿਭਾਗਰਤਾ ਅਹੋਸਿ. ਸਾ ਯਂ ਤਸ੍ਮਿਂ ਗੇਹੇ ਪੁਰੇਭਤ੍ਤਂ ਖਾਦਨੀਯਭੋਜਨੀਯਂ ਉਪ੍ਪਜ੍ਜਤਿ, ਤਤ੍ਥ ਅਤ੍ਤਨਾ ਲਦ੍ਧਪਟਿਵੀਸਤੋ ਉਪਡ੍ਢਂ ਦੇਤਿ, ਉਪਡ੍ਢਂ ਅਤ੍ਤਨਾ ਪਰਿਭੁਞ੍ਜਤਿ, ਅਦਤ੍ਵਾ ਪਨ ਨ ਭੁਞ੍ਜਤਿ, ਦਕ੍ਖਿਣੇਯ੍ਯੇ ਅਪਸ੍ਸਨ੍ਤੀਪਿ ਠਪੇਤ੍ਵਾ ਦਿਟ੍ਠਕਾਲੇ ਦੇਤਿ, ਯਾਚਕਾਨਮ੍ਪਿ ਦੇਤਿਯੇਵ. ਅਥਸ੍ਸਾ ਮਾਤਾ ‘‘ਮਮ ਧੀਤਾ ਦਾਨਜ੍ਝਾਸਯਾ ਦਾਨਸਂਵਿਭਾਗਰਤਾ’’ਤਿ ਹਟ੍ਠਤੁਟ੍ਠਾ ਤਸ੍ਸਾ ਦਿਗੁਣਂ ਭਾਗਂ ਦੇਤਿ. ਦੇਨ੍ਤੀ ਚ ਏਕਸ੍ਮਿਂ ਭਾਗੇ ਤਾਯ ਸਂਵਿਭਾਗੇ ਕਤੇ ਪੁਨ ਅਪਰਂ ਦੇਤਿ, ਸਾ ਤਤੋਪਿ ਸਂਵਿਭਾਗਂ ਕਰੋਤਿਯੇਵ.

ਏਵਂ ਗਚ੍ਛਨ੍ਤੇ ਕਾਲੇ ਤਂ ਵਯਪ੍ਪਤ੍ਤਂ ਮਾਤਾਪਿਤਰੋ ਤਸ੍ਮਿਂਯੇਵ ਨਗਰੇ ਅਞ੍ਞਤਰਸ੍ਮਿਂ ਕੁਲੇ ਕੁਮਾਰਸ੍ਸ ਅਦਂਸੁ. ਤਂ ਪਨ ਕੁਲਂ ਮਿਚ੍ਛਾਦਿਟ੍ਠਿਕਂ ਹੋਤਿ ਅਸ੍ਸਦ੍ਧਂ ਅਪ੍ਪਸਨ੍ਨਂ ¶ . ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਰਾਜਗਹੇ ਸਪਦਾਨਂ ¶ ਪਿਣ੍ਡਾਯ ਚਰਮਾਨੋ ਤਸ੍ਸਾ ਦਾਰਿਕਾਯ ਸਸੁਰਸ੍ਸ ਗੇਹਦ੍ਵਾਰੇ ਅਟ੍ਠਾਸਿ. ਤਂ ਦਿਸ੍ਵਾ ਸਾ ਦਾਰਿਕਾ ਪਸਨ੍ਨਚਿਤ੍ਤਾ ‘‘ਪਵਿਸਥ ਭਨ੍ਤੇ’’ਤਿ ਪਵੇਸੇਤ੍ਵਾ ਵਨ੍ਦਿਤ੍ਵਾ ਸਸ੍ਸੁਯਾ ਠਪਿਤਂ ਪੂਵਂ ਤਂ ਅਪਸ੍ਸਨ੍ਤੀ ‘‘ਤਸ੍ਸਾ ਕਥੇਤ੍ਵਾ ਅਨੁਮੋਦਾਪੇਸ੍ਸਾਮੀ’’ਤਿ ਵਿਸ੍ਸਾਸੇਨ ਗਹੇਤ੍ਵਾ ਥੇਰਸ੍ਸ ਅਦਾਸਿ, ਥੇਰੋ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਦਾਰਿਕਾ ‘‘ਤੁਮ੍ਹੇਹਿ ਠਪਿਤਂ ਪੂਵਂ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਅਦਾਸਿ’’ਨ੍ਤਿ ਸਸ੍ਸੁਯਾ ਕਥੇਸਿ. ਸਾ ਤਂ ਸੁਤ੍ਵਾ ‘‘ਕਿਨ੍ਨਾਮਿਦਂ ਪਾਗਬ੍ਭਿਯਂ, ਅਯਂ ਮਮ ਸਨ੍ਤਕਂ ਅਨਾਪੁਚ੍ਛਿਤ੍ਵਾਵ ਸਮਣਸ੍ਸ ਅਦਾਸੀ’’ਤਿ ਤਂ ਕਟਤਟਾਯਮਾਨਾ ਕੋਧਾਭਿਭੂਤਾ ਯੁਤ੍ਤਾਯੁਤ੍ਤਂ ਅਚਿਨ੍ਤੇਨ੍ਤੀ ਪੁਰਤੋ ਠਿਤਂ ਮੁਸਲਖਣ੍ਡਂ ਗਹੇਤ੍ਵਾ ਅਂਸਕੂਟੇ ਪਹਰਿ. ਸਾ ਸੁਖੁਮਾਲਤਾਯ ਪਰਿਕ੍ਖੀਣਾਯੁਕਤਾਯ ਚ ਤੇਨੇਵ ਪਹਾਰੇਨ ਬਲਵਦੁਕ੍ਖਾਭਿਭੂਤਾ ਹੁਤ੍ਵਾ ਕਤਿਪਾਹੇਨੇਵ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਤਸ੍ਸਾ ਸਤਿਪਿ ਅਞ੍ਞਸ੍ਮਿਂ ਸੁਚਰਿਤਕਮ੍ਮੇ ਥੇਰਸ੍ਸ ਕਤਦਾਨਮੇਵ ਸਾਤਿਸਯਂ ਹੁਤ੍ਵਾ ਉਪਟ੍ਠਾਸਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਗਨ੍ਤ੍ਵਾ –

‘‘ਉਲ਼ਾਰੋ ¶ ਤੇ ਯਸੋ ਵਣ੍ਣੋ, ਸਬ੍ਬਾ ਓਭਾਸਤੇ ਦਿਸਾ;

ਨਾਰਿਯੋ ਨਚ੍ਚਨ੍ਤਿ ਗਾਯਨ੍ਤਿ, ਦੇਵਪੁਤ੍ਤਾ ਅਲਙ੍ਕਤਾ.

‘‘ਮੋਦੇਨ੍ਤਿ ਪਰਿਵਾਰੇਨ੍ਤਿ, ਤਵ ਪੂਜਾਯ ਦੇਵਤੇ;

ਸੋਵਣ੍ਣਾਨਿ ਵਿਮਾਨਾਨਿ, ਤਵਿਮਾਨਿ ਸੁਦਸ੍ਸਨੇ.

‘‘ਤੁਵਂਸਿ ਇਸ੍ਸਰਾ ਤੇਸਂ, ਸਬ੍ਬਕਾਮਸਮਿਦ੍ਧਿਨੀ;

ਅਭਿਜਾਤਾ ਮਹਨ੍ਤਾਸਿ, ਦੇਵਕਾਯੇ ਪਮੋਦਸਿ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

੨੮੬. ਤਤ੍ਥ ¶ ਯਸੋਤਿ ਪਰਿਵਾਰੋ. ਵਣ੍ਣੋਤਿ ਵਣ੍ਣਨਿਭਾ ਸਰੀਰੋਭਾਸੋ. ‘‘ਉਲ਼ਾਰੋ’’ਤਿ ਪਨ ਵਿਸੇਸੇਤ੍ਵਾ ਵੁਤ੍ਤਤ੍ਤਾ ਤਸ੍ਸਾ ਦੇਵਤਾਯ ਪਰਿਵਾਰਸਮ੍ਪਤ੍ਤਿ ਚ ਵਣ੍ਣਸਮ੍ਪਤ੍ਤਿ ਚ ਵੁਤ੍ਤਾ ਹੋਤਿ. ਤਾਸੁ ‘‘ਉਲ਼ਾਰੋ ਤੇ ਵਣ੍ਣੋ’’ਤਿ ਸਙ੍ਖੇਪਤੋ ਵੁਤ੍ਤਂ ਵਣ੍ਣਸਮ੍ਪਤ੍ਤਿਂ ਵਿਸਯਵਸੇਨ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਸਬ੍ਬਾ ਓਭਾਸਤੇ ਦਿਸਾ’’ਤਿ ਵਤ੍ਵਾ ‘‘ਉਲ਼ਾਰੋ ਤੇ ਯਸੋ’’ਤਿ ਵੁਤ੍ਤਂ ਪਰਿਵਾਰਸਮ੍ਪਤ੍ਤਿਂ ਵਤ੍ਥੁਵਸੇਨ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਨਾਰਿਯੋ ਨਚ੍ਚਨ੍ਤੀ’’ਤਿਆਦਿ ¶ ਵੁਤ੍ਤਂ. ਤਤ੍ਥ ਸਬ੍ਬਾ ਓਭਾਸਤੇ ਦਿਸਾਤਿ ਸਬ੍ਬਾਸੁ ਦਿਸਾਸੁ ਵਿਜ੍ਜੋਤਤੇ, ਸਬ੍ਬਾ ਵਾ ਦਿਸਾ ਓਭਾਸਯਤੇ, ਵਿਜ੍ਜੋਤਯਤੀਤਿ ਅਤ੍ਥੋ. ‘‘ਓਭਾਸਤੇ’’ਤਿ ਪਦਸ੍ਸ ‘‘ਓਭਾਸਨ੍ਤੇ’’ਤਿ ਕੇਚਿ ਵਚਨਵਿਪਲ੍ਲਾਸੇਨ ਅਤ੍ਥਂ ਵਦਨ੍ਤਿ, ਤੇਹਿ ‘‘ਵਣ੍ਣੇਨਾ’’ਤਿ ਵਿਭਤ੍ਤਿ ਵਿਪਰਿਣਾਮੇਤਬ੍ਬਾ. ਵਣ੍ਣੇਨਾਤਿ ਚ ਹੇਤੁਮ੍ਹਿ ਕਰਣਵਚਨਂ, ਵਣ੍ਣੇਨ ਹੇਤੁਭੂਤੇਨਾਤਿ ਅਤ੍ਥੋ. ‘‘ਸਬ੍ਬਾ ਦਿਸਾ’’ਤਿ ਚ ਜਾਤਿਵਸੇਨ ਦਿਸਾਸਾਮਞ੍ਞੇ ਅਪੇਕ੍ਖਿਤੇ ਵਚਨਵਿਪਲ੍ਲਾਸੇਨਪਿ ਪਯੋਜਨਂ ਨਤ੍ਥਿ. ਨਾਰਿਯੋਤਿ ਏਤ੍ਥਾਪਿ ‘‘ਅਲਙ੍ਕਤਾ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਦੇਵਪੁਤ੍ਤਾਤਿ ਏਤ੍ਥ ਚ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਤੇਨ ਨਾਰਿਯੋ ਦੇਵਪੁਤ੍ਤਾ ਚਾਤਿ ਸਮੁਚ੍ਚਯੋ ਵੇਦਿਤਬ੍ਬੋ.

੨੮੭. ਮੋਦੇਨ੍ਤੀਤਿ ਪਮੋਦਯਨ੍ਤਿ. ਪੂਜਾਯਾਤਿ ਪੂਜਨਤ੍ਥਂ ਪੂਜਾਨਿਮਿਤ੍ਤਂ ਵਾ, ਨਚ੍ਚਨ੍ਤਿ ਗਾਯਨ੍ਤੀਤਿ ਯੋਜਨਾ. ਤਵਿਮਾਨੀਤਿ ਤਵ ਇਮਾਨਿ.

੨੮੮. ਸਬ੍ਬਕਾਮਸਮਿਦ੍ਧਿਨੀਤਿ ਸਬ੍ਬੇਹਿ ਪਞ੍ਚਹਿ ਕਾਮਗੁਣੇਹਿ, ਸਬ੍ਬੇਹਿ ਵਾ ਤਯਾ ਕਾਮਿਤੇਹਿ ਇਚ੍ਛਿਤੇਹਿ ਵਤ੍ਥੂਹਿ ਸਮਿਦ੍ਧਾ. ਅਭਿਜਾਤਾਤਿ ਸੁਜਾਤਾ. ਮਹਨ੍ਤਾਸੀਤਿ ਮਹਤੀ ਮਹਾਨੁਭਾਵਾ ¶ ਅਸਿ. ਦੇਵਕਾਯੇ ਪਮੋਦਸੀਤਿ ਇਮਸ੍ਮਿਂ ਦੇਵਨਿਕਾਯੇ ਦਿਬ੍ਬਸਮ੍ਪਤ੍ਤਿਹੇਤੁਕੇਨ ਪਰਮੇਨ ਪਮੋਦਨੇਨ ਪਮੋਦਸਿ.

ਏਵਂ ਥੇਰੇਨ ਪੁਚ੍ਛਿਤਾ ਸਾ ਦੇਵਤਾ ਤਮਤ੍ਥਂ ਵਿਸ੍ਸਜ੍ਜੇਸਿ –

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਦੁਸ੍ਸੀਲਕੁਲੇ ਸੁਣਿਸਾ ਅਹੋਸਿਂ, ਅਸ੍ਸਦ੍ਧੇਸੁ ਕਦਰਿਯੇਸੁ ਅਹਂ.

‘‘ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ;

ਪਿਣ੍ਡਾਯ ਚਰਮਾਨਸ੍ਸ, ਅਪੂਵਂ ਤੇ ਅਦਾਸਹਂ.

‘‘ਤਦਾਹਂ ¶ ਸਸ੍ਸੁਯਾਚਿਕ੍ਖਿਂ, ‘ਸਮਣੋ ਆਗਤੋ ਇਧ;

ਤਸ੍ਸ ਅਦਾਸਹਂ ਪੂਵਂ, ਪਸਨ੍ਨਾ ਸੇਹਿ ਪਾਣਿਭਿ’.

‘‘ਇਤਿਸ੍ਸਾ ਸਸ੍ਸੁ ਪਰਿਭਾਸਿ, ਅਵਿਨੀਤਾਸਿ ਤ੍ਵਂ ਵਧੁ;

ਨ ਮਂ ਸਮ੍ਪੁਚ੍ਛਿਤੁਂ ਇਚ੍ਛਿ, ‘ਸਮਣਸ੍ਸ ਦਦਾਮਹਂ’.

‘‘ਤਤੋ ¶ ਮੇ ਸਸ੍ਸੁ ਕੁਪਿਤਾ, ਪਹਾਸਿ ਮੁਸਲੇਨ ਮਂ;

ਕੂਟਙ੍ਗਚ੍ਛਿ ਅਵਧਿ ਮਂ, ਨਾਸਕ੍ਖਿਂ ਜੀਵਿਤੁਂ ਚਿਰਂ.

‘‘ਅਹਂ ਕਾਯਸ੍ਸ ਭੇਦਾ, ਵਿਪ੍ਪਮੁਤ੍ਤਾ ਤਤੋ ਚੁਤਾ;

ਦੇਵਾਨਂ ਤਾਵਤਿਂਸਾਨਂ, ਉਪਪਨ੍ਨਾ ਸਹਬ੍ਯਤਂ.

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੨੮੯. ਤਤ੍ਥ ਅਸ੍ਸਦ੍ਧੇਸੂਤਿ ਰਤਨਤ੍ਤਯਸਦ੍ਧਾਯ ਕਮ੍ਮਫਲਸਦ੍ਧਾਯ ਚ ਅਭਾਵੇਨ ਅਸ੍ਸਦ੍ਧੇਸੁ, ਥਦ੍ਧਮਚ੍ਛਰਿਯਤਾਯ ਕਦਰਿਯੇਸੁ ਸਸ੍ਸੁਆਦੀਸੁ ਅਹਂ ਸਦ੍ਧਾ ਸੀਲੇਨ ਸਮ੍ਪਨ੍ਨਾ ਅਹੋਸਿਨ੍ਤਿ ਯੋਜਨਾ.

੨੯੦-੧. ਅਪੂਵਨ੍ਤਿ ¶ ਕਪਲ੍ਲਪੂਵਂ. ਤੇਤਿ ਨਿਪਾਤਮਤ੍ਤਂ. ਸਸ੍ਸੁਯਾ ਆਚਿਕ੍ਖਿਂ ਗਹਿਤਭਾਵਞਾਪਨਤ੍ਥਞ੍ਚ ਅਨੁਮੋਦਨਤ੍ਥਞ੍ਚਾਤਿ ਅਧਿਪ੍ਪਾਯੋ.

੨੯੨. ਇਤਿਸ੍ਸਾਤਿ ਏਤ੍ਥ ਅਸ੍ਸਾਤਿ ਨਿਪਾਤਮਤ੍ਤਂ. ਸਮਣਸ੍ਸ ਦਦਾਮਹਨ੍ਤਿ ਅਹਂ ਸਮਣਸ੍ਸ ਅਪੂਵਂ ਦਦਾਮੀਤਿ. ਯਸ੍ਮਾ ਨ ਮਂ ਸਮ੍ਪੁਚ੍ਛਿਤੁਂ ਇਚ੍ਛਿ, ਤਸ੍ਮਾ ਤ੍ਵਂ ਵਧੁ ਅਵਿਨੀਤਾਸੀਤਿ ਸਸ੍ਸੁ ਪਰਿਭਾਸੀਤਿ ਯੋਜਨਾ.

੨੯੩. ਪਹਾਸੀਤਿ ਪਹਰਿ. ਕੂਟਙ੍ਗਚ੍ਛਿ ਅਵਧਿ ਮਨ੍ਤਿ ਏਤ੍ਥ ਕੂਟਨ੍ਤਿ ਅਂਸਕੂਟਂ ਵੁਤ੍ਤਂ ਪੁਰਿਮਪਦਲੋਪੇਨ, ਕੂਟਮੇਵ ਅਙ੍ਗਨ੍ਤਿ ਕੂਟਙ੍ਗਂ, ਤਂ ਛਿਨ੍ਦਤੀਤਿ ਕੂਟਙ੍ਗਚ੍ਛਿ. ਏਵਂ ਕੋਧਾਭਿਭੂਤਾ ਹੁਤ੍ਵਾ ਮਂ ਅਵਧਿ, ਮਮ ਅਂਸਕੂਟਂ ਛਿਨ੍ਦਿ, ਤੇਨੇਵ ਉਪਕ੍ਕਮੇਨ ਮਤਤ੍ਤਾ ਮਂ ਮਾਰੇਸੀਤਿ ਅਤ੍ਥੋ. ਤੇਨਾਹ ‘‘ਨਾਸਕ੍ਖਿਂ ਜੀਵਿਤੁਂ ਚਿਰ’’ਨ੍ਤਿ.

੨੯੪. ਵਿਪ੍ਪਮੁਤ੍ਤਾਤਿ ¶ ਤਤੋ ਦੁਕ੍ਖਤੋ ਸੁਟ੍ਠੁ ਮੁਤ੍ਤਾ. ਸੇਸਂ ਵੁਤ੍ਤਨਯਮੇਵ.

ਓਭਾਸਯਿਤ੍ਵਾ ¶ ਪਥਵਿਂ ਸਦੇਵਕਨ੍ਤਿ ਉਚ੍ਛੁਦਾਯਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤੀਤਿਆਦਿ ਸਬ੍ਬਂ ਅਨਨ੍ਤਰਵਿਮਾਨੇ ਵੁਤ੍ਤਸਦਿਸਂ. ਅਯਂ ਪਨ ਵਿਸੇਸੋ – ਇਧ ਉਚ੍ਛੁ ਦਿਨ੍ਨਾ, ਸਸ੍ਸੁਯਾ ਚ ਪੀਠਕੇਨ ਪਹਟਾ, ਤਙ੍ਖਣਞ੍ਞੇਵ ਮਤਾ ਤਾਵਤਿਂਸੇਸੁ ਉਪ੍ਪਨ੍ਨਾ, ਤਸ੍ਸਂਯੇਵ ਰਤ੍ਤਿਯਂ ਥੇਰਸ੍ਸ ਉਪਟ੍ਠਾਨਂ ਆਗਤਾ, ਕੇਵਲਕਪ੍ਪਂ ਗਿਜ੍ਝਕੂਟਂ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਓਭਾਸੇਨ੍ਤੀ ਥੇਰਂ ਵਨ੍ਦਿਤ੍ਵਾ ਪਞ੍ਜਲਿਕਾ ਨਮਸ੍ਸਮਾਨਾ ਏਕਮਨ੍ਤਂ ਅਟ੍ਠਾਸਿ. ਅਥ ਨਂ ਥੇਰੋ –

‘‘ਓਭਾਸਯਿਤ੍ਵਾ ਪਥਵਿਂ ਸਦੇਵਕਂ, ਅਤਿਰੋਚਸਿ ਚਨ੍ਦਿਮਸੂਰਿਯਾ ਵਿਯ;

ਸਿਰਿਯਾ ਚ ਵਣ੍ਣੇਨ ਯਸੇਨ ਤੇਜਸਾ, ਬ੍ਰਹ੍ਮਾਵ ਦੇਵੇ ਤਿਦਸੇ ਸਹਿਨ੍ਦਕੇ.

‘‘ਪੁਚ੍ਛਾਮਿ ਤਂ ਉਪ੍ਪਲਮਾਲਧਾਰਿਨੀ, ਆਵੇਲ਼ਿਨੀ ਕਞ੍ਚਨਸਨ੍ਨਿਭਤ੍ਤਚੇ;

ਅਲਙ੍ਕਤੇ ਉਤ੍ਤਮਵਤ੍ਥਧਾਰਿਨੀ, ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮਂ.

‘‘ਕਿਂ ¶ ਤ੍ਵਂ ਪੁਰੇ ਕਮ੍ਮਮਕਾਸਿ ਅਤ੍ਤਨਾ, ਮਨੁਸ੍ਸਭੂਤਾ ਪੁਰਿਮਾਯ ਜਾਤਿਯਾ;

ਦਾਨਂ ਸੁਚਿਣ੍ਣਂ ਅਥ ਸੀਲਸਂਯਮਂ, ਕੇਨੂਪਪਨ੍ਨਾ ਸੁਗਤਿਂ ਯਸਸ੍ਸਿਨੀ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

੨੯੬-੭. ਤਤ੍ਥ ¶ ਓਭਾਸਯਿਤ੍ਵਾ ਪਥਵਿਂ ਸਦੇਵਕਨ੍ਤਿ ਚਨ੍ਦਿਮਸੂਰਿਯਰਸ੍ਮਿਸਮ੍ਮਿਸ੍ਸੇਹਿ ਸਿਨੇਰੁਪਸ੍ਸਵਿਨਿਗ੍ਗਤੇਹਿ ਪਭਾਵਿਸਰੇਹਿ ਵਿਜ੍ਜੋਤਯਮਾਨਤਾਯ ਦੇਵੇਨ ਆਕਾਸੇਨ ਸਹਾਤਿ ਸਦੇਵਕਂ ਉਪਗਤਭੂਮਿਭਾਗਭੂਤਂ ਇਮਂ ਪਥਵਿਂ ਵਿਜ੍ਜੋਤੇਤ੍ਵਾ, ਏਕੋਭਾਸਂ ਏਕਪਜ੍ਜੋਤਂ ਕਤ੍ਵਾਤਿ ਅਤ੍ਥੋ. ਓਭਾਸਯਿਤ੍ਵਾ ਪਥਵਿਂ ਚਨ੍ਦਿਮਸੂਰਿਯਾ ਵਿਯਾਤਿ ਯੋਜਨਾ. ਅਤਿਰੋਚਸੀਤਿ ਅਤਿਕ੍ਕਮਿਤ੍ਵਾ ਰੋਚਸਿ. ਤਂ ਪਨ ਅਤਿਰੋਚਨਂ ਕੇਨ ਕਿਂ ਵਿਯ ਕੇਨ ਵਾਤਿ ਆਹ ¶ ‘‘ਸਿਰਿਯਾ’’ਤਿਆਦਿ. ਤਤ੍ਥ ਸਿਰਿਯਾਤਿ ਸੋਭਗ੍ਗਾਦਿਸੋਭਾਵਿਸੇਸੇਨ. ਤੇਜਸਾਤਿ ਅਤ੍ਤਨੋ ਆਨੁਭਾਵੇਨ. ਆਵੇਲ਼ਿਨੀਤਿ ਰਤਨਮਯਪੁਪ੍ਫਾਵੇਲ਼ਵਤੀ.

ਏਵਂ ਥੇਰੇਨ ਪੁਚ੍ਛਿਤਾ ਦੇਵਤਾ ਇਮਾਹਿ ਗਾਥਾਹਿ ਵਿਸ੍ਸਜ੍ਜੇਸਿ –

‘‘ਇਦਾਨਿ ਭਨ੍ਤੇ ਇਮਮੇਵ ਗਾਮਂ, ਪਿਣ੍ਡਾਯ ਅਮ੍ਹਾਕਂ ਘਰਂ ਉਪਾਗਮਿ;

ਤਤੋ ਤੇ ਉਚ੍ਛੁਸ੍ਸ ਅਦਾਸਿ ਖਣ੍ਡਿਕਂ, ਪਸਨ੍ਨਚਿਤ੍ਤਾ ਅਤੁਲਾਯ ਪੀਤਿਯਾ.

‘‘ਸਸ੍ਸੁ ਚ ਪਚ੍ਛਾ ਅਨੁਯੁਞ੍ਜਤੇ ਮਮਂ, ਕਹਂ ਨੁ ਉਚ੍ਛੁਂ ਵਧੁਕੇ ਅਵਾਕਿਰਿ;

ਨ ਛਡ੍ਡਿਤਂ ਨੋ ਪਨ ਖਾਦਿਤਂ ਮਯਾ, ਸਨ੍ਤਸ੍ਸ ਭਿਕ੍ਖੁਸ੍ਸ ਸਯਂ ਅਦਾਸਹਂ.

‘‘ਤੁਯ੍ਹਂ ਨ੍ਵਿਦਂ ਇਸ੍ਸਰਿਯਂ ਅਥੋ ਮਮ, ਇਤਿਸ੍ਸਾ ਸਸ੍ਸੁ ਪਰਿਭਾਸਤੇ ਮਮਂ;

ਪੀਠਂ ਗਹੇਤ੍ਵਾ ਪਹਾਰਂ ਅਦਾਸਿ ਮੇ, ਤਤੋ ਚੁਤਾ ਕਾਲਕਤਾਮ੍ਹਿ ਦੇਵਤਾ.

‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਦੇਵੇਹਿ ਸਦ੍ਧਿਂ ਪਰਿਚਾਰਯਾਮਹਂ, ਮੋਦਾਮਹਂ ਕਾਮਗੁਣੇਹਿ ਪਞ੍ਚਹਿ.

‘‘ਤਦੇਵ ¶ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਦੇਵਿਨ੍ਦਗੁਤ੍ਤਾ ਤਿਦਸੇਹਿ ਰਕ੍ਖਿਤਾ, ਸਮਪ੍ਪਿਤਾ ਕਾਮਗੁਣੇਹਿ ਪਞ੍ਚਹਿ.

‘‘ਏਤਾਦਿਸਂ ¶ ਪੁਞ੍ਞਫਲਂ ਅਨਪ੍ਪਕਂ, ਮਹਾਵਿਪਾਕਾ ਮਮ ਉਚ੍ਛੁਦਕ੍ਖਿਣਾ;

ਦੇਵੇਹਿ ਸਦ੍ਧਿਂ ਪਰਿਚਾਰਯਾਮਹਂ, ਮੋਦਾਮਹਂ ਕਾਮਗੁਣੇਹਿ ਪਞ੍ਚਹਿ.

‘‘ਏਤਾਦਿਸਂ ¶ ਪੁਞ੍ਞਫਲਂ ਅਨਪ੍ਪਕਂ, ਮਹਾਜੁਤਿਕਾ ਮਮ ਉਚ੍ਛੁਦਕ੍ਖਿਣਾ;

ਦੇਵਿਨ੍ਦਗੁਤ੍ਤਾ ਤਿਦਸੇਹਿ ਰਕ੍ਖਿਤਾ, ਸਹਸ੍ਸਨੇਤ੍ਤੋਰਿਵ ਨਨ੍ਦਨੇ ਵਨੇ.

‘‘ਤੁਵਞ੍ਚ ਭਨ੍ਤੇ ਅਨੁਕਮ੍ਪਕਂ ਵਿਦੁਂ, ਉਪੇਚ੍ਚ ਵਨ੍ਦਿਂ ਕੁਸਲਞ੍ਚ ਪੁਚ੍ਛਿਸਂ;

ਤਤੋ ਤੇ ਉਚ੍ਛੁਸ੍ਸ ਅਦਾਸਿ ਖਣ੍ਡਿਕਂ, ਪਸਨ੍ਨਚਿਤ੍ਤਾ ਅਤੁਲਾਯ ਪੀਤਿਯਾ’’ਤਿ.

੨੯੯. ਤਤ੍ਥ ਇਦਾਨੀਤਿ ਅਨਨ੍ਤਰਾਤੀਤਦਿਵਸਤ੍ਤਾ ਆਹ, ਅਧੁਨਾਤਿ ਅਤ੍ਥੋ. ਇਮਮੇਵ ਗਾਮਨ੍ਤਿ ਇਮਸ੍ਮਿਂਯੇਵ ਗਾਮੇ, ਰਾਜਗਹਂ ਸਨ੍ਧਾਯ ਵਦਤਿ. ਵੁਤ੍ਤਞ੍ਹਿ ‘‘ਗਾਮੋਪਿ ਨਿਗਮੋਪਿ ਨਗਰਮ੍ਪਿ ‘ਗਾਮੋ’ ਇਚ੍ਚੇਵ ਵੁਚ੍ਚਤੀ’’ਤਿ. ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਉਪਾਗਮੀਤਿ ਉਪਗਤੋ ਅਹੋਸਿ. ਅਤੁਲਾਯਾਤਿ ਅਨੁਪਮਾਯ, ਅਪ੍ਪਮਾਣਾਯ ਵਾ.

੩੦੦. ਅਵਾਕਿਰੀਤਿ ਅਪਨੇਸਿ ਛਡ੍ਡੇਸਿ, ਵਿਨਾਸੇਸਿ ਵਾ. ਸਨ੍ਤਸ੍ਸਾਤਿ ਸਾਧੁਰੂਪਸ੍ਸ ਸਨ੍ਤਕਿਲੇਸਸ੍ਸ ਪਰਿਸ੍ਸਮਮਪ੍ਪਤ੍ਤਸ੍ਸ ਵਾ.

੩੦੧. ਤੁਯ੍ਹਂ ਨੂਤਿ ਨੁ-ਸਦ੍ਦੋ ਅਨਤ੍ਤਮਨਤਾਸੂਚਨੇ ਨਿਪਾਤੋ, ਸੋ ‘‘ਮਮਾ’’ਤਿ ਏਤ੍ਥਾਪਿ ਆਨੇਤ੍ਵਾ ਯੋਜੇਤਬ੍ਬੋ ‘‘ਮਮ ਨੂ’’ਤਿ. ਇਦਂ ਇਸ੍ਸਰਿਯਨ੍ਤਿ ਗੇਹੇ ਆਧਿਪਚ੍ਚਂ ਸਨ੍ਧਾਯਾਹ. ਤਤੋ ਚੁਤਾਤਿ ਤਤੋ ਮਨੁਸ੍ਸਲੋਕਤੋ ਚੁਤਾ. ਯਸ੍ਮਾ ਠਿਤਟ੍ਠਾਨਤੋ ਅਪਗਤਾਪਿ ‘‘ਚੁਤਾ’’ਤਿ ਵੁਚ੍ਚਤਿ, ਤਸ੍ਮਾ ਚੁਤਿਂ ਵਿਸੇਸੇਤੁਂ ‘‘ਕਾਲਕਤਾ’’ਤਿ ਵੁਤ੍ਤਂ. ਕਾਲਕਤਾਪਿ ਚ ਨ ਯਤ੍ਥ ਕਤ੍ਥਚਿ ਨਿਬ੍ਬਤ੍ਤਾ, ਅਪਿਚ ਖੋ ਦੇਵਤ੍ਤਂ ਉਪਗਤਾਤਿ ਦਸ੍ਸੇਨ੍ਤੀ ਆਹ ‘‘ਅਮ੍ਹਿ ਦੇਵਤਾ’’ਤਿ.

੩੦੨. ਤਦੇਵ ¶ ਕਮ੍ਮਂ ਕੁਸਲਂ ਕਤਂ ਮਯਾਤਿ ਤਦੇਵ ਉਚ੍ਛੁਖਣ੍ਡਦਾਨਮਤ੍ਤਂ ਕੁਸਲਂ ਕਮ੍ਮਂ ਕਤਂ ਮਯਾ, ਅਞ੍ਞਂ ਨ ਜਾਨਾਮੀਤਿ ਅਤ੍ਥੋ. ਸੁਖਞ੍ਚ ਕਮ੍ਮਨ੍ਤਿ ਸੁਖਞ੍ਚ ਕਮ੍ਮਫਲਂ. ਕਮ੍ਮਫਲਞ੍ਹਿ ਇਧ ‘‘ਕਮ੍ਮ’’ਨ੍ਤਿ ਵੁਤ੍ਤਂ ਉਤ੍ਤਰਪਦਲੋਪੇਨ, ਕਾਰਣੋਪਚਾਰੇਨ ਵਾ ‘‘ਕੁਸਲਾਨਂ, ਭਿਕ੍ਖਵੇ, ਧਮ੍ਮਾਨਂ ਸਮਾਦਾਨਹੇਤੁ ¶ ਏਵਮਿਦਂ ਪੁਞ੍ਞਂ ਪਵਡ੍ਢਤਿ (ਦੀ. ਨਿ. ੩.੮੦). ਅਨੁਭੋਮਿ ਸਕਂ ਪੁਞ੍ਞ’’ਨ੍ਤਿ (ਵਿ. ਵ. ੧੩੩) ਚ ਆਦੀਸੁ ਵਿਯ. ਕਮ੍ਮਨ੍ਤਿ ਵਾ ਕਰਣਤ੍ਥੇ ਉਪਯੋਗਵਚਨਂ, ਕਮ੍ਮੇਨਾਤਿ ਅਤ੍ਥੋ. ਕਮ੍ਮੇ ਵਾ ਭਵਂ ਕਮ੍ਮਂ ਯਥਾ ਕਮ੍ਮਨ੍ਤਿ. ਅਥ ਵਾ ਕਾਮੇਤਬ੍ਬਤਾਯ ਕਮ੍ਮਂ. ਤਞ੍ਹਿ ਸੁਖਰਜਨੀਯਭਾਵਤੋ ਕਾਮੂਪਸਂਹਿਤਂ ਕਾਮੇਤਬ੍ਬਨ੍ਤਿ ਕਮਨੀਯਂ. ਅਤ੍ਤਨਾਤਿ ਅਤ੍ਤਨਾ ਏਵ, ਸਯਂਵਸਿਤਾਯ ¶ ਸੇਰਿਭਾਵੇਨ ਸਯਮੇਵਾਤਿ ਅਤ੍ਥੋ. ਪਰਿਚਾਰਯਾਮਹਂ ਅਤ੍ਤਾਨਨ੍ਤਿ ਪੁਰਿਮਗਾਥਾਯ ‘‘ਅਤ੍ਤਨਾ’’ਤਿ ਵੁਤ੍ਤਂ ਪਦਂ ਵਿਭਤ੍ਤਿਵਿਪਰਿਣਾਮੇਨ ‘‘ਅਤ੍ਤਾਨ’’ਨ੍ਤਿ ਯੋਜੇਤਬ੍ਬਂ.

੩੦੩-੫. ਦੇਵਿਨ੍ਦਗੁਤ੍ਤਾਤਿ ਦੇਵਿਨ੍ਦੇਨ ਸਕ੍ਕੇਨ ਗੁਤ੍ਤਾ, ਦੇਵਿਨ੍ਦੋ ਵਿਯ ਵਾ ਗੁਤ੍ਤਾ ਮਹਾਪਰਿਵਾਰਤਾਯ. ਸਮਪ੍ਪਿਤਾਤਿ ਸੁਟ੍ਠੁ ਅਪ੍ਪਿਤਾ ਸਮਨ੍ਨਾਗਤਾ. ਮਹਾਵਿਪਾਕਾਤਿ ਵਿਪੁਲਫਲਾ. ਮਹਾਜੁਤਿਕਾਤਿ ਮਹਾਤੇਜਾ, ਮਹਾਨੁਭਾਵਾਤਿ ਅਤ੍ਥੋ.

੩੦੬. ਤੁਵਨ੍ਤਿ ਤਂ. ਅਨੁਕਮ੍ਪਕਨ੍ਤਿ ਕਾਰੁਣਿਕਂ. ਵਿਦੁਨ੍ਤਿ ਸਪ੍ਪਞ੍ਞਂ, ਸਾਵਕਪਾਰਮਿਯਾ ਮਤ੍ਥਕਂ ਪਤ੍ਤਨ੍ਤਿ ਅਤ੍ਥੋ. ਉਪੇਚ੍ਚਾਤਿ ਉਪਗਨ੍ਤ੍ਵਾ. ਵਨ੍ਦਿਨ੍ਤਿ ਪਞ੍ਚਪਤਿਟ੍ਠਿਤੇਨ ਅਭਿਵਾਦਯਿਂ. ਕੁਸਲਞ੍ਚ ਆਰੋਗ੍ਯ ਪੁਚ੍ਛਿਸਂ ਅਪੁਚ੍ਛਿਂ, ਅਤੁਲਾਯ ਪੀਤਿਯਾ ਇਦਞ੍ਚ ਕੁਸਲਂ ਅਨੁਸ੍ਸਰਾਮੀਤਿ ਅਧਿਪ੍ਪਾਯੋ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਉਚ੍ਛੁਦਾਯਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਪਲ੍ਲਙ੍ਕਸੇਟ੍ਠੇ ¶ ਮਣਿਸੋਣ੍ਣਚਿਤ੍ਤੇਤਿ ਪਲ੍ਲਙ੍ਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਚ ਸਮਯੇਨ ਸਾਵਤ੍ਥਿਯਂ ਅਞ੍ਞਤਰਸ੍ਸ ਉਪਾਸਕਸ੍ਸ ਧੀਤਾ ਕੁਲਪਦੇਸਾਦਿਨਾ ਸਦਿਸਸ੍ਸ ਤਤ੍ਥੇਵ ਅਞ੍ਞਤਰਸ੍ਸ ਕੁਲਪੁਤ੍ਤਸ੍ਸ ਦਿਨ੍ਨਾ, ਸਾ ਚ ਹੋਤਿ ਅਕ੍ਕੋਧਨਾ ਸੀਲਾਚਾਰਸਮ੍ਪਨ੍ਨਾ ਪਤਿਦੇਵਤਾ ਸਮਾਦਿਨ੍ਨਪਞ੍ਚਸੀਲਾ, ਉਪੋਸਥੇ ਸਕ੍ਕਚ੍ਚਂ ਉਪੋਸਥਸੀਲਾਨਿ ਚ ਰਕ੍ਖਤਿ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਹੇਟ੍ਠਾ ਵੁਤ੍ਤਨਯੇਨੇਵ ਗਨ੍ਤ੍ਵਾ –

‘‘ਪਲ੍ਲਙ੍ਕਸੇਟ੍ਠੇ ¶ ਮਣਿਸੋਣ੍ਣਚਿਤ੍ਤੇ, ਪੁਪ੍ਫਾਭਿਕਿਣ੍ਣੇ ਸਯਨੇ ਉਲ਼ਾਰੇ;

ਤਤ੍ਥਚ੍ਛਸਿ ਦੇਵਿ ਮਹਾਨੁਭਾਵੇ, ਉਚ੍ਚਾਵਚਾ ਇਦ੍ਧਿ ਵਿਕੁਬ੍ਬਮਾਨਾ.

‘‘ਇਮਾ ਚ ਤੇ ਅਚ੍ਛਰਾਯੋ ਸਮਨ੍ਤਤੋ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ;

ਦੇਵਿਦ੍ਧਿਪਤ੍ਤਾਸਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਸਾਪਿਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਅਡ੍ਢੇ ਕੁਲੇ ਸੁਣਿਸਾ ਅਹੋਸਿਂ;

ਅਕ੍ਕੋਧਨਾ ਭਤ੍ਤੁ ਵਸਾਨੁਵਤ੍ਤਿਨੀ, ਉਪੋਸਥੇ ਅਪ੍ਪਮਤ੍ਤਾ ਅਹੋਸਿਂ.

‘‘ਮਨੁਸ੍ਸਭੂਤਾ ਦਹਰਾ ਅਪਾਪਿਕਾ, ਪਸਨ੍ਨਚਿਤ੍ਤਾ ਪਤਿਮਾਭਿਰਾਧਯਿਂ;

ਦਿਵਾ ਚ ਰਤ੍ਤੋ ਚ ਮਨਾਪਚਾਰਿਨੀ, ਅਹਂ ਪੁਰੇ ਸੀਲਵਤੀ ਅਹੋਸਿਂ.

‘‘ਪਾਣਾਤਿਪਾਤਾ ¶ ਵਿਰਤਾ ਅਚੋਰਿਕਾ, ਸਂਸੁਦ੍ਧਕਾਯਾ ਸੁਚਿਬ੍ਰਹ੍ਮਚਾਰਿਨੀ;

ਅਮਜ੍ਜਪਾ ਨੋ ਚ ਮੁਸਾ ਅਭਾਣਿਂ, ਸਿਕ੍ਖਾਪਦੇਸੁ ਪਰਿਪੂਰਕਾਰਿਨੀ.

‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਪਸਨ੍ਨਮਾਨਸਾ ਅਹਂ.

‘‘ਅਟ੍ਠਙ੍ਗੁਪੇਤਂ ¶ ਅਨੁਧਮ੍ਮਚਾਰਿਨੀ, ਉਪੋਸਥਂ ਪੀਤਿਮਨਾ ਉਪਾਵਸਿਂ;

ਇਮਞ੍ਚ ਅਰਿਯਂ ਅਟ੍ਠਙ੍ਗਵਰੇਹੁਪੇਤਂ, ਸਮਾਦਿਯਿਤ੍ਵਾ ਕੁਸਲਂ ਸੁਖੁਦ੍ਰਯਂ;

ਪਤਿਮ੍ਹਿ ਕਲ੍ਯਾਣੀ ਵਸਾਨੁਵਤ੍ਤਿਨੀ, ਅਹੋਸਿਂ ਪੁਬ੍ਬੇ ਸੁਗਤਸ੍ਸ ਸਾਵਿਕਾ.

‘‘ਏਤਾਦਿਸਂ ਕੁਸਲਂ ਜੀਵਲੋਕੇ, ਕਮ੍ਮਂ ਕਰਿਤ੍ਵਾਨ ਵਿਸੇਸਭਾਗਿਨੀ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਦੇਵਿਦ੍ਧਿਪਤ੍ਤਾ ਸੁਗਤਿਮ੍ਹਿ ਆਗਤਾ.

‘‘ਵਿਮਾਨਪਾਸਾਦਵਰੇ ਮਨੋਰਮੇ, ਪਰਿਵਾਰਿਤਾ ਅਚ੍ਛਰਾਸਙ੍ਗਣੇਨ;

ਸਯਂਪਭਾ ਦੇਵਗਣਾ ਰਮੇਨ੍ਤਿ ਮਂ, ਦੀਘਾਯੁਕਿਂ ਦੇਵਵਿਮਾਨਮਾਗਤ’’ਨ੍ਤਿ.

੩੦੭. ਤਤ੍ਥ ਪਲ੍ਲਙ੍ਕਸੇਟ੍ਠੇਤਿ ਪਲ੍ਲਙ੍ਕਵਰੇ ਉਤ੍ਤਮਪਲ੍ਲਙ੍ਕੇ. ਤਂਯੇਵਸ੍ਸ ਸੇਟ੍ਠਤਂ ਦਸ੍ਸੇਤੁਂ ‘‘ਮਣਿਸੋਣ੍ਣਚਿਤ੍ਤੇ’’ਤਿ ਵੁਤ੍ਤਂ, ਵਿਵਿਧਰਤਨਰਂਸਿਜਾਲਸਮੁਜ੍ਜਲੇਹਿ ਮਣੀਹਿ ਚੇਵ ਸੁਵਣ੍ਣੇਨ ਚ ਵਿਚਿਤ੍ਤੇ ‘‘ਤਤ੍ਥਾ’’ਤਿ ‘‘ਸਯਨੇ’’ਤਿ ਚ ਵੁਤ੍ਤੇ ਸਯਿਤਬ੍ਬਟ੍ਠਾਨਭੂਤੇ ਪਲ੍ਲਙ੍ਕਸੇਟ੍ਠੇ.

੩੦੮. ਤੇਤਿ ¶ ਤੁਯ੍ਹਂ ਸਮਨ੍ਤਤੋ. ‘‘ਪਮੋਦਯਨ੍ਤੀ’’ਤਿ ਪਦਂ ਪਨ ਅਪੇਕ੍ਖਿਤ੍ਵਾ ‘‘ਤ’’ਨ੍ਤਿ ਵਿਭਤ੍ਤਿ ਵਿਪਰਿਣਾਮੇਤਬ੍ਬਾ. ਪਮੋਦਯਨ੍ਤੀਤਿ ਵਾ ਪਮੋਦਨਂ ਕਰੋਨ੍ਤਿ, ਪਮੋਦਨਂ ਤੁਯ੍ਹਂ ਉਪ੍ਪਾਦੇਨ੍ਤੀਤਿ ਅਤ੍ਥੋ.

੩੧੦. ਦਹਰਾ ਅਪਾਪਿਕਾਤਿ ਦਹਰਾਪਿ ਅਪਾਪਿਕਾ. ‘‘ਦਹਰਾਸੁ ਪਾਪਿਕਾ’’ਤਿ ਵਾ ਪਾਠੋ, ਸੋਯੇਵਤ੍ਥੋ. ‘‘ਦਹਰਸ੍ਸਾਪਾਪਿਕਾ’’ਤਿਪਿ ¶ ਪਠਨ੍ਤਿ, ਦਹਰਸ੍ਸ ਸਾਮਿਕਸ੍ਸ ਅਪਾਪਿਕਾ, ਸਕ੍ਕਚ੍ਚਂ ਉਪਟ੍ਠਾਨੇਨ ਅਨਤਿਚਰਿਯਾਯ ਚ ਭਦ੍ਦਿਕਾਤਿ ਅਤ੍ਥੋ. ਤੇਨ ਵੁਤ੍ਤਂ ‘‘ਪਸਨ੍ਨਚਿਤ੍ਤਾ’’ਤਿਆਦਿ. ਅਭਿਰਾਧਯਿਨ੍ਤਿ ਆਰਾਧੇਸਿਂ. ਰਤ੍ਤੋਤਿ ਰਤ੍ਤਿਯਂ.

੩੧੧. ਅਚੋਰਿਕਾਤਿ ਚੋਰਿਯਰਹਿਤਾ, ਅਦਿਨ੍ਨਾਦਾਨਾ ਪਟਿਵਿਰਤਾਤਿ ਅਤ੍ਥੋ. ‘‘ਵਿਰਤਾ ਚ ਚੋਰਿਯਾ’’ਤਿਪਿ ਪਾਠੋ, ਥੇਯ੍ਯਤੋ ਚ ਵਿਰਤਾਤਿ ਅਤ੍ਥੋ ¶ . ਸਂਸੁਦ੍ਧਕਾਯਾਤਿ ਪਰਿਸੁਦ੍ਧਕਾਯਕਮ੍ਮਨ੍ਤਤਾਯ ਸਮ੍ਮਦੇਵ ਸੁਦ੍ਧਕਾਯਾ, ਤਤੋ ਏਵ ਸੁਚਿਬ੍ਰਹ੍ਮਚਾਰਿਨੀ ਸਾਮਿਕਤੋ ਅਞ੍ਞਤ੍ਥ ਅਬ੍ਰਹ੍ਮਚਰਿਯਾਸਮ੍ਭਵਤੋ. ਤਥਾ ਹਿ ਵੁਤ੍ਤਂ –

ਅਞ੍ਞਤ੍ਰ ਤਾਹਿ ਬ੍ਰਹ੍ਮਚਰਿਯਂ ਚਰਾਮ,

ਤਸ੍ਮਾ ਹਿ ਅਮ੍ਹਂ ਦਹਰਾ ਨਿ ਮਿਯ੍ਯਰੇ’’ਤਿ. (ਜਾ. ੧.੧੦.੯੭);

ਅਥ ਵਾ ਸੁਚਿਬ੍ਰਹ੍ਮਚਾਰਿਨੀਤਿ ਸੁਚਿਨੋ ਸੁਦ੍ਧਸ੍ਸ ਬ੍ਰਹ੍ਮਸ੍ਸ ਸੇਟ੍ਠਸ੍ਸ ਉਪੋਸਥਸੀਲਸ੍ਸ, ਮਗ੍ਗਬ੍ਰਹ੍ਮਚਰਿਯਸ੍ਸ ਵਾ ਅਨੁਰੂਪਸ੍ਸ ਪੁਬ੍ਬਭਾਗਬ੍ਰਹ੍ਮਚਰਿਯਸ੍ਸ ਵਸੇਨ ਸੁਚਿਬ੍ਰਹ੍ਮਚਾਰਿਨੀ.

੩੧੩. ਅਨੁਧਮ੍ਮਚਾਰਿਨੀਤਿ ਅਰਿਯਾਨਂ ਧਮ੍ਮਸ੍ਸ ਅਨੁਧਮ੍ਮਂ ਚਰਣਸੀਲਾ. ਇਮਞ੍ਚ ਅਨਨ੍ਤਰਂ ਵੁਤ੍ਤਂ ਨਿਦ੍ਦੋਸਤਾਯ ਅਰਿਯਂ, ਅਟ੍ਠਙ੍ਗਵਰੇਹਿ ਅਟ੍ਠਹਿ ਉਤ੍ਤਮਙ੍ਗੇਹਿ ਅਰਿਯਤ੍ਤਾ ਏਵ ਵਾ ਅਰਿਯਟ੍ਠਙ੍ਗਵਰੇਹਿ ਉਪੇਤਂ ਆਰੋਗ੍ਯਟ੍ਠੇਨ ਅਨਵਜ੍ਜਟ੍ਠੇਨ ਚ ਕੁਸਲਂ ਸੁਖਵਿਪਾਕਤਾਯ ਸੁਖਾਨਿਸਂਸਤਾਯ ਚ ਸੁਖੁਦ੍ਰਯਂ ਉਪਾਵਸਿਨ੍ਤਿ ਯੋਜਨਾ.

੩੧੪. ਵਿਸੇਸਭਾਗਿਨੀਤਿ ਵਿਸੇਸਸ੍ਸ ਦਿਬ੍ਬਸ੍ਸ ਸਮ੍ਪਤ੍ਤਿਭਵਸ੍ਸ ਭਾਗਿਨੀ. ਸੁਗਤਿਮ੍ਹਿ ਆਗਤਾਤਿ ਸੁਗਤਿਂ ਆਗਤਾ ਉਪਗਤਾ, ਸੁਗਤਿਮ੍ਹਿ ਵਾ ਸੁਗਤਿਯਂ ਦਿਬ੍ਬਸਮ੍ਪਤ੍ਤਿਯਂ ਆਗਤਾ. ‘‘ਸੁਗਤਿਞ੍ਹਿ ¶ ਆਗਤਾ’’ਤਿਪਿ ਪਾਠੋ. ਤਤ੍ਥ ਹੀਤਿ ਨਿਪਾਤਮਤ੍ਤਂ, ਹੇਤੁਅਤ੍ਥੋ ਵਾ, ਯਸ੍ਮਾ ਸੁਗਤਿਂ ਆਗਤਾ, ਤਸ੍ਮਾ ਵਿਸੇਸਭਾਗਿਨੀਤਿ ਯੋਜਨਾ.

੩੧੫. ਵਿਮਾਨਪਾਸਾਦਵਰੇਤਿ ਵਿਮਾਨੇਸੁ ਉਤ੍ਤਮਪਾਸਾਦੇ, ਵਿਮਾਨਸਙ੍ਖਾਤੇ ¶ ਵਾ ਅਗ੍ਗਪਾਸਾਦੇ, ਵਿਮਾਨੇ ਵਾ ਵਿਗਤਮਾਨੇ ਅਪ੍ਪਮਾਣੇ ਮਹਨ੍ਤੇ ਵਰਪਾਸਾਦੇ ਪਰਿਵਾਰਿਤਾ ਅਚ੍ਛਰਾਸਙ੍ਗਣੇਨ ਸਯਂਪਭਾ ਪਮੋਦਾਮਿ, ‘‘ਅਮ੍ਹੀ’’ਤਿ ਵਾ ਪਦਂ ਆਨੇਤ੍ਵਾ ਯੋਜੇਤਬ੍ਬਂ. ਦੀਘਾਯੁਕਿਨ੍ਤਿ ਹੇਟ੍ਠਿਮੇਹਿ ਦੇਵੇਹਿ ਦੀਘਤਰਾਯੁਕਤਾਯ ਤਤ੍ਰੂਪਪਨ੍ਨੇਹਿ ਅਨਪ੍ਪਾਯੁਕਤਾਯ ਚ ਦੀਘਾਯੁਕਿਂ ਮਂ ਯਥਾਵੁਤ੍ਤਂ ਦੇਵਵਿਮਾਨਮਾਗਤਂ ਉਪਗਤਂ ਦੇਵਗਣਾ ਰਮੇਨ੍ਤੀਤਿ ਯੋਜਨਾ. ਸੇਸਂ ਵੁਤ੍ਤਨਯਮੇਵ.

ਪਲ੍ਲਙ੍ਕਵਿਮਾਨਵਣ੍ਣਨਾ ਨਿਟ੍ਠਿਤਾ.

ਲਤਾ ¶ ਚ ਸਜ੍ਜਾ ਪਵਰਾ ਚ ਦੇਵਤਾਤਿ ਲਤਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਚ ਸਮਯੇਨ ਸਾਵਤ੍ਥਿਵਾਸਿਨੋ ਅਞ੍ਞਤਰਸ੍ਸ ਉਪਾਸਕਸ੍ਸ ਧੀਤਾ ਲਤਾ ਨਾਮ ਪਣ੍ਡਿਤਾ ਬ੍ਯਤ੍ਤਾ ਮੇਧਾਵਿਨੀ ਪਤਿਕੁਲਂ ਗਤਾ ਭਤ੍ਤੁ ਸਸ੍ਸੁਸਸੁਰਾਨਞ੍ਚ ਮਨਾਪਚਾਰਿਨੀ ਪਿਯਵਾਦਿਨੀ ਪਰਿਜਨਸ੍ਸ ਸਙ੍ਗਹਕੁਸਲਾ ਗੇਹੇ ਕੁਟੁਮ੍ਬਭਾਰਸ੍ਸ ਨਿਤ੍ਥਰਣਸਮਤ੍ਥਾ ਅਕ੍ਕੋਧਨਾ ਸੀਲਾਚਾਰਸਮ੍ਪਨ੍ਨਾ ਦਾਨਸਂਵਿਭਾਗਰਤਾ ਅਖਣ੍ਡਪਞ੍ਚਸੀਲਾ ਉਪੋਸਥਰਕ੍ਖਣੇ ਚ ਅਪ੍ਪਮਤ੍ਤਾ ਅਹੋਸਿ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਵੇਸ੍ਸਵਣਸ੍ਸ ਮਹਾਰਾਜਸ੍ਸ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ ਲਤਾਤ੍ਵੇਵ ਨਾਮੇਨ. ਅਞ੍ਞਾਪਿ ਤਸ੍ਸਾ ਸਜ੍ਜਾ, ਪਵਰਾ, ਅਚ੍ਚਿਮਤੀ, ਸੁਤਾਤਿ ਚਤਸ੍ਸੋ ਭਗਿਨਿਯੋ ਅਹੇਸੁਂ. ਤਾ ਪਞ੍ਚਪਿ ਸਕ੍ਕੇਨ ਦੇਵਰਾਜੇਨ ਆਨੇਤ੍ਵਾ ਨਾਟਕਿਤ੍ਥਿਭਾਵੇਨ ਪਰਿਚਾਰਿਕਟ੍ਠਾਨੇ ਠਪਿਤਾ. ਲਤਾ ਪਨਸ੍ਸ ਨਚ੍ਚਗੀਤਾਦੀਸੁ ਛੇਕਤਾਯ ਇਟ੍ਠਤਰਾ ਅਹੋਸਿ.

ਤਾਸਂ ਏਕਤੋ ਸਮਾਗਨ੍ਤ੍ਵਾ ਸੁਖਨਿਸਜ੍ਜਾਯ ਨਿਸਿਨ੍ਨਾਨਂ ਸਙ੍ਗੀਤਨੇਪੁਞ੍ਞਂ ਪਟਿਚ੍ਚ ਵਿਵਾਦੋ ਉਪ੍ਪਨ੍ਨੋ. ਤਾ ਸਬ੍ਬਾਪਿ ਵੇਸ੍ਸਵਣਸ੍ਸ ਮਹਾਰਾਜਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਿਂਸੁ ‘‘ਤਾਤ, ਕਤਮਾ ਅਮ੍ਹਾਕਂ ਨਚ੍ਚਾਦੀਸੁ ਕੁਸਲਾ’’ਤਿ? ਸੋ ਏਵਮਾਹ ‘‘ਗਚ੍ਛਥ ਧੀਤਰੋ ਅਨੋਤਤ੍ਤਦਹਤੀਰੇ ਦੇਵਸਮਾਗਮੇ ਸਙ੍ਗੀਤਂ ਪਵਤ੍ਤੇਥ, ਤਤ੍ਥ ਵੋ ਵਿਸੇਸੋ ਪਾਕਟੋ ਭਵਿਸ੍ਸਤੀ’’ਤਿ. ਤਾ ਤਥਾ ਅਕਂਸੁ. ਤਤ੍ਥ ਦੇਵਪੁਤ੍ਤਾ ¶ ਲਤਾਯ ਨਚ੍ਚਮਾਨਾਯ ਅਤ੍ਤਨੋ ਸਭਾਵੇਨ ਠਾਤੁਂ ਨਾਸਕ੍ਖਿਂਸੁ, ਸਞ੍ਜਾਤਪਹਾਸਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਨਿਰਨ੍ਤਰਂ ਸਾਧੁਕਾਰਂ ਦੇਨ੍ਤਾ ਉਕ੍ਕੁਟ੍ਠਿਸਦ੍ਦੇ ਚੇਲੁਕ੍ਖੇਪੇ ਚ ਪਵਤ੍ਤੇਨ੍ਤਾ ਹਿਮਵਨ੍ਤਂ ¶ ਕਮ੍ਪਯਮਾਨਾ ਵਿਯ ਮਹਨ੍ਤਂ ਕੋਲਾਹਲਮਕਂਸੁ. ਇਤਰਾਸੁ ਪਨ ਨਚ੍ਚਨ੍ਤੀਸੁ ਸਿਸਿਰਕਾਲੇ ਕੋਕਿਲਾ ਵਿਯ ਤੁਣ੍ਹੀਭੂਤਾ ਨਿਸੀਦਿਂਸੁ. ਏਵਂ ਤਤ੍ਥ ਸਙ੍ਗੀਤੇ ਲਤਾਯ ਵਿਸੇਸੋ ਪਾਕਟੋ ਅਹੋਸਿ.

ਅਥ ਤਾਸਂ ਦੇਵਧੀਤਾਨਂ ਸੁਤਾਯ ਦੇਵਧੀਤਾਯ ਏਤਦਹੋਸਿ ‘‘ਕਿਂ ਨੁ ਖੋ ਕਮ੍ਮਂ ਕਤ੍ਵਾ ਅਯਂ ਲਤਾ ਅਮ੍ਹੇ ਅਭਿਭੁਯ੍ਯ ਤਿਟ੍ਠਤਿ ਵਣ੍ਣੇਨ ਚੇਵ ਯਸਸਾ ਚ, ਯਂਨੂਨਾਹਂ ਲਤਾਯ ਕਤਕਮ੍ਮਂ ਪੁਚ੍ਛੇਯ੍ਯ’’ਨ੍ਤਿ. ਸਾ ਤਂ ਪੁਚ੍ਛਿ. ਇਤਰਾਪਿ ਤਸ੍ਸਾ ਏਤਮਤ੍ਥਂ ਵਿਸ੍ਸਜ੍ਜੇਸਿ. ਤਯਿਦਂ ਸਬ੍ਬਂ ਵੇਸ੍ਸਵਣਮਹਾਰਾਜਾ ਦੇਵਚਾਰਿਕਵਸੇਨ ਉਪਗਤਸ੍ਸ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਆਚਿਕ੍ਖਿ. ਥੇਰੋ ਤਮਤ੍ਥਂ ਪੁਚ੍ਛਾਯ ਮੂਲਕਾਰਣਤੋ ਪਟ੍ਠਾਯ ਭਗਵਤੋ ਆਰੋਚੇਨ੍ਤੋ –

‘‘ਲਤਾ ¶ ਚ ਸਜ੍ਜਾ ਪਵਰਾ ਚ ਦੇਵਤਾ, ਅਚ੍ਚਿਮਤੀ ਰਾਜਵਰਸ੍ਸ ਸਿਰੀਮਤੋ;

ਸੁਤਾ ਚ ਰਞ੍ਞੋ ਵੇਸ੍ਸਵਣਸ੍ਸ ਧੀਤਾ, ਰਾਜੀਮਤੀ ਧਮ੍ਮਗੁਣੇਹਿ ਸੋਭਥ.

‘‘ਪਞ੍ਚੇਤ੍ਥ ਨਾਰਿਯੋ ਆਗਮਂਸੁ ਨ੍ਹਾਯਿਤੁਂ, ਸੀਤੋਦਕਂ ਉਪ੍ਪਲਿਨਿਂ ਸਿਵਂ ਨਦਿਂ;

ਤਾ ਤਤ੍ਥ ਨ੍ਹਾਯਿਤ੍ਵਾ ਰਮੇਤ੍ਵਾ ਦੇਵਤਾ, ਨਚ੍ਚਿਤ੍ਵਾ ਗਾਯਿਤ੍ਵਾ ਸੁਤਾ ਲਤਂ ਬ੍ਰਵਿ.

‘‘ਪੁਚ੍ਛਾਮਿ ਤਂ ਉਪ੍ਪਲਮਾਲਧਾਰਿਨਿ, ਆਵੇਲ਼ਿਨਿ ਕਞ੍ਚਨਸਨ੍ਨਿਭਤ੍ਤਚੇ;

ਤਿਮਿਰਤਮ੍ਬਕ੍ਖਿ ਨਭੇਵ ਸੋਭਨੇ, ਦੀਘਾਯੁਕੀ ਕੇਨ ਕਤੋ ਯਸੋ ਤਵ.

‘‘ਕੇਨਾਸਿ ਭਦ੍ਦੇ ਪਤਿਨੋ ਪਿਯਤਰਾ, ਵਿਸਿਟ੍ਠਕਲ੍ਯਾਣਿਤਰਸ੍ਸੁ ਰੂਪਤੋ;

ਪਦਕ੍ਖਿਣਾ ਨਚ੍ਚਨਗੀਤਵਾਦਿਤੇ, ਆਚਿਕ੍ਖ ਨੋ ਤ੍ਵਂ ਨਰਨਾਰਿਪੁਚ੍ਛਿਤਾ’’ਤਿ. –

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਉਲ਼ਾਰਭੋਗੇ ਕੁਲੇ ਸੁਣਿਸਾ ਅਹੋਸਿਂ;

ਅਕ੍ਕੋਧਨਾ ਭਤ੍ਤੁ ਵਸਾਨੁਵਤ੍ਤਿਨੀ, ਉਪੋਸਥੇ ਅਪ੍ਪਮਤ੍ਤਾ ਅਹੋਸਿਂ.

‘‘ਮਨੁਸ੍ਸਭੂਤਾ ਦਹਰਾ ਅਪਾਪਿਕਾ, ਪਸਨ੍ਨਚਿਤ੍ਤਾ ਪਤਿਮਾਭਿਰਾਧਯਿਂ;

ਸਦੇਵਰਂ ਸਸ੍ਸਸੁਰਂ ਸਦਾਸਕਂ, ਅਭਿਰਾਧਯਿਂ ਤਮ੍ਹਿ ਕਤੋ ਯਸੋ ਮਮ.

‘‘ਸਾਹਂ ¶ ਤੇਨ ਕੁਸਲੇਨ ਕਮ੍ਮੁਨਾ, ਚਤੁਬ੍ਭਿ ਠਾਨੇਹਿ ਵਿਸੇਸਮਜ੍ਝਗਾ;

ਆਯੁਞ੍ਚ ਵਣ੍ਣਞ੍ਚ ਸੁਖਂ ਬਲਞ੍ਚ, ਖਿਡ੍ਡਾਰਤਿਂ ਪਚ੍ਚਨੁਭੋਮਨਪ੍ਪਕਂ.

‘‘ਸੁਤਂ ¶ ਨੁ ਤਂ ਭਾਸਤਿ ਯਂ ਅਯਂ ਲਤਾ, ਯਂ ਨੋ ਅਪੁਚ੍ਛਿਮ੍ਹ ਅਕਿਤ੍ਤਯੀ ਨੋ;

ਪਤਿਨੋ ਕਿਰਮ੍ਹਾਕਂ ਵਿਸਿਟ੍ਠ ਨਾਰੀਨਂ, ਗਤੀ ਚ ਤਾਸਂ ਪਵਰਾ ਚ ਦੇਵਤਾ.

‘‘ਪਤੀਸੁ ਧਮ੍ਮਂ ਪਚਰਾਮ ਸਬ੍ਬਾ, ਪਤਿਬ੍ਬਤਾ ਯਤ੍ਥ ਭਵਨ੍ਤਿ ਇਤ੍ਥਿਯੋ;

ਪਤੀਸੁ ਧਮ੍ਮਂ ਪਚਰਿਤ੍ਵਾ ਸਬ੍ਬਾ, ਲਚ੍ਛਾਮਸੇ ਭਾਸਤਿ ਯਂ ਅਯਂ ਲਤਾ.

‘‘ਸੀਹੋ ਯਥਾ ਪਬ੍ਬਤਸਾਨੁਗੋਚਰੋ, ਮਹਿਨ੍ਧਰਂ ਪਬ੍ਬਤਮਾਵਸਿਤ੍ਵਾ;

ਪਸਯ੍ਹ ਹਨ੍ਤ੍ਵਾ ਇਤਰੇ ਚਤੁਪ੍ਪਦੇ, ਖੁਦ੍ਦੇ ਮਿਗੇ ਖਾਦਤਿ ਮਂਸਭੋਜਨੋ.

‘‘ਤਥੇਵ ਸਦ੍ਧਾ ਇਧ ਅਰਿਯਸਾਵਿਕਾ, ਭਤ੍ਤਾਰਂ ਨਿਸ੍ਸਾਯ ਪਤਿਂ ਅਨੁਬ੍ਬਤਾ;

ਕੋਧਂ ਵਧਿਤ੍ਵਾ ਅਭਿਭੁਯ੍ਯ ਮਚ੍ਛਰਂ, ਸਗ੍ਗਮ੍ਹਿ ਸਾ ਮੋਦਤਿ ਧਮ੍ਮਚਾਰਿਨੀ’’ਤਿ. –

੩੧੬. ਤਤ੍ਥ ¶ ਲਤਾ ਚ ਸਜ੍ਜਾ ਪਵਰਾ ਅਚ੍ਚਿਮਤੀ ਸੁਤਾਤਿ ਤਾਸਂ ਨਾਮਂ. ਚ-ਸਦ੍ਦੋ ਸਮੁਚ੍ਚਯਤ੍ਥੋ. ਰਾਜਵਰਸ੍ਸਾਤਿ ਚਤੁਨ੍ਨਂ ਮਹਾਰਾਜਾਨਂ ਵਰਸ੍ਸ ਸੇਟ੍ਠਸ੍ਸ ਦੇਵਰਾਜਸ੍ਸ. ਸਕ੍ਕਸ੍ਸ ਪਰਿਚਾਰਿਕਾਤਿ ਅਧਿਪ੍ਪਾਯੋ. ਰਞ੍ਞੋਤਿ ਮਹਾਰਾਜਸ੍ਸ. ਤੇਨਾਹ ‘‘ਵੇਸ੍ਸਵਣਸ੍ਸ ਧੀਤਾ’’ਤਿ, ਇਦਂ ਪਚ੍ਚੇਕਂ ਯੋਜੇਤਬ੍ਬਂ, ਵਚਨਵਿਪਲ੍ਲਾਸੋ ਵਾ, ਧੀਤਰੋਤਿ ਅਤ੍ਥੋ. ਰਾਜਤਿ ਵਿਜ੍ਜੋਤਤੀਤਿ ਰਾਜੀ, ਰਾਜੀਤਿ ਮਤਾ ਪਞ੍ਞਾਤਾ ਰਾਜੀਮਤੀ, ਇਦਂ ਤਾਸਂ ਸਬ੍ਬਾਸਂ ਵਿਸੇਸਨਂ. ਨਾਮਮੇਵ ਏਤਂ ਏਕਿਸ੍ਸਾ ਦੇਵਤਾਯਾਤਿ ਕੇਚਿ, ਤੇਸਂ ਮਤੇਨ ‘‘ਪਵਰਾ’’ਤਿ ਸਬ੍ਬਾਸਂ ਵਿਸੇਸਨਮੇਵ. ਧਮ੍ਮਗੁਣੇਹੀਤਿ ਧਮ੍ਮਿਯੇਹਿ ਧਮ੍ਮਤੋ ਅਨਪੇਤੇਹਿ ਗੁਣੇਹਿ, ਯਥਾਭੁਚ੍ਚਗੁਣੇਹੀਤਿ ਅਤ੍ਥੋ. ਸੋਭਥਾਤਿ ਵਿਰੋਚਥ.

੩੧੭. ਪਞ੍ਚੇਤ੍ਥ ਨਾਰਿਯੋਤਿ ਪਞ੍ਚ ਯਥਾਵੁਤ੍ਤਨਾਮਾ ਦੇਵਧੀਤਰੋ ਏਤ੍ਥ ਇਮਸ੍ਮਿਂ ਹਿਮਵਨ੍ਤਪਦੇਸੇ. ਸੀਤੋਦਕਂ ਉਪ੍ਪਲਿਨਿਂ ਸਿਵਂ ਨਦਿਨ੍ਤਿ ਅਨੋਤਤ੍ਤਦਹਤੋ ਨਿਕ੍ਖਨ੍ਤਨਦਿਮੁਖਂ ਸਨ੍ਧਾਯ ਵਦਤਿ. ਨਚ੍ਚਿਤ੍ਵਾ ਗਾਯਿਤ੍ਵਾਤਿ ਪਿਤੁ ਵੇਸ੍ਸਵਣਸ੍ਸ ¶ ਆਣਾਯ ਦੇਵਸਮਾਗਮੇ ਤਾਹਿ ਕਤਸ੍ਸ ਨਚ੍ਚਗੀਤਸ੍ਸ ਵਸੇਨ ਵੁਤ੍ਤਂ. ਸੁਤਾ ਲਤਂ ਬ੍ਰਵੀਤਿ ਸੁਤਾ ਦੇਵਧੀਤਾ ਲਤਂ ਅਤ੍ਤਨੋ ਭਗਿਨਿਂ ਕਥੇਸਿ. ‘‘ਸੁਤਾ ਲਤਂ ਬ੍ਰਵੁ’’ਨ੍ਤਿਪਿ ਪਠਨ੍ਤਿ, ਸੁਤਾ ਧੀਤਰੋ ਵੇਸ੍ਸਵਣਸ੍ਸ ਮਹਾਰਾਜਸ੍ਸ ਲਤਂ ਕਥੇਸੁਨ੍ਤਿ ਅਤ੍ਥੋ.

੩੧੮. ਤਿਮਿਰਤਮ੍ਬਕ੍ਖੀਤਿ ¶ ਨਿਚੁਲਕੇਸਰਭਾਸਸਦਿਸੇਹਿ ਤਮ੍ਬਰਾਜੀਹਿ ਸਮਨ੍ਨਾਗਤਕ੍ਖਿ. ਨਭੇਵ ਸੋਭਨੇਤਿ ਨਭਂ ਵਿਯ ਸੋਭਮਾਨੇ, ਸਰਦਸਮਯੇ ਅਬ੍ਭਮਹਿਕਾਦਿਉਪਕ੍ਕਿਲੇਸਵਿਮੁਤ੍ਤਂ ਨਭਂ ਵਿਯ ਸੁਵਿਸੁਦ੍ਧਙ੍ਗਪਚ੍ਚਙ੍ਗਤਾਯ ਵਿਰਾਜਮਾਨੇਤਿ ਅਤ੍ਥੋ. ਅਥ ਵਾ ਨਭੇਵਾਤਿ ਨਭੇ ਏਵ, ਸਮੁਚ੍ਚਯਤ੍ਥੋ ਏਵ-ਸਦ੍ਦੋ, ਆਕਾਸਟ੍ਠਵਿਮਾਨੇਸੁ ਹਿਮਵਨ੍ਤਯੁਗਨ੍ਧਰਾਦਿਭੂਮਿਪਟਿਬਦ੍ਧਟ੍ਠਾਨੇਸੁ ¶ ਚਾਤਿ ਸਬ੍ਬਤ੍ਥੇਵ ਸੋਭਮਾਨੇਤਿ ਅਤ੍ਥੋ. ਕੇਨ ਕਤੋਤਿ ਕੇਨ ਕੀਦਿਸੇਨ ਪੁਞ੍ਞੇਨ ਨਿਬ੍ਬਤ੍ਤਿਤੋ. ਯਸੋਤਿ ਪਰਿਵਾਰਸਮ੍ਪਤ੍ਤਿ ਕਿਤ੍ਤਿਸਦ੍ਦੋ ਚ. ਕਿਤ੍ਤਿਸਦ੍ਦਗ੍ਗਹਣੇਨ ਚ ਕਿਤ੍ਤਿਸਦ੍ਦਹੇਤੁਭੂਤਾ ਗੁਣਾ ਗਯ੍ਹਨ੍ਤਿ.

੩੧੯. ਪਤਿਨੋ ਪਿਯਤਰਾਤਿ ਸਾਮਿਨੋ ਪਿਯਤਰਾ ਸਾਮਿਵਲ੍ਲਭਾ. ਤੇਨਸ੍ਸਾ ਸੁਭਗਤਂ ਦਸ੍ਸੇਤਿ. ਵਿਸਿਟ੍ਠਕਲ੍ਯਾਣਿਤਰਸ੍ਸੂ ਰੂਪਤੋਤਿ ਰੂਪਸਮ੍ਪਤ੍ਤਿਯਾ ਵਿਸਿਟ੍ਠਾ ਉਤ੍ਤਮਾ ਕਲ੍ਯਾਣਿਤਰਾ ਸੁਨ੍ਦਰਤਰਾ, ਅਸ੍ਸੂਤਿ ਨਿਪਾਤਮਤ੍ਤਂ. ‘‘ਵਿਸਿਟ੍ਠਕਲ੍ਯਾਣਿਤਰਾਸਿ ਰੂਪਤੋ’’ਤਿ ਚ ਪਠਨ੍ਤਿ. ਪਦਕ੍ਖਿਣਾਤਿ ਪਕਾਰੇਹਿ, ਵਿਸੇਸੇਨ ਵਾ ਦਕ੍ਖਿਣਾ ਕੁਸਲਾ. ਨਚ੍ਚਨਗੀਤਵਾਦਿਤੇਤਿ ਏਤ੍ਥ ਨਚ੍ਚਨਾਤਿ ਵਿਭਤ੍ਤਿਲੋਪੋ ਕਤੋ, ਨਚ੍ਚੇ ਚ ਗੀਤੇ ਚ ਵਾਦਿਤੇ ਚਾਤਿ ਅਤ੍ਥੋ. ਨਰਨਾਰਿਪੁਚ੍ਛਿਤਾਤਿ ਦੇਵਪੁਤ੍ਤੇਹਿ ਦੇਵਧੀਤਾਹਿ ਚ ‘‘ਕਹਂ ਲਤਾ, ਕਿਂ ਕਰੋਤਿ ਲਤਾ’’ਤਿ ਰੂਪਦਸ੍ਸਨਤ੍ਥਞ੍ਚੇਵ ਸਿਪ੍ਪਦਸ੍ਸਨਤ੍ਥਞ੍ਚ ਪੁਚ੍ਛਿਤਾ.

੩੨੧. ਨਿਚ੍ਚਂ ਕਾਯੇਨ ਅਸਂਸਟ੍ਠਤਾਯ ਦੇਵੋ ਵਿਯ ਰਮੇਤਿ, ਦੁਤਿਯੋ ਵਰੋਤਿ ਵਾ ਦੇਵਰੋ, ਭਤ੍ਤੁ ਕਨਿਟ੍ਠਭਾਤਾ, ਸਹ ਦੇਵਰੇਨਾਤਿ ਸਦੇਵਰਂ. ਸਸ੍ਸੁ ਚ ਸਸੁਰੋ ਚ ਸਸੁਰਾ, ਸਹ ਸਸੁਰੇਹੀਤਿ ਸਸ੍ਸਸੁਰਂ. ਸਹ ਦਾਸੇਹਿ ਦਾਸੀਹਿ ਚਾਤਿ ਸਦਾਸਕਂ ਪਤਿਮਾਭਿਰਾਧਯਿਨ੍ਤਿ ਸਮ੍ਬਨ੍ਧੋ. ਤਮ੍ਹਿ ਕਤੋਤਿ ਤਮ੍ਹਿ ਕੁਲੇ, ਕਾਲੇ ਵਾ ਸੁਣਿਸਾਕਾਲੇ ਕਤੋ ਯਸੋ ਤਨ੍ਨਿਬ੍ਬਤ੍ਤਕਪੁਞ੍ਞਸ੍ਸ ਨਿਬ੍ਬਤ੍ਤਨੇਨਾਤਿ ਅਧਿਪ੍ਪਾਯੋ. ਮਮਾਤਿ ਇਦਂ ‘‘ਕਤੋ’’ਤਿ ਪਦਂ ਅਪੇਕ੍ਖਿਤ੍ਵਾ ‘‘ਮਯਾ’’ਤਿ ਪਰਿਣਾਮੇਤਬ੍ਬਂ.

੩੨੨. ਚਤੁਬ੍ਭਿ ¶ ਠਾਨੇਹੀਤਿ ਚਤੂਹਿ ਕਾਰਣੇਹਿ, ਚਤੂਸੁ ਵਾ ਠਾਨੇਸੁ ਨਿਮਿਤ੍ਤਭੂਤੇਸੁ. ਵਿਸੇਸਮਜ੍ਝਗਾਤਿ ਅਞ੍ਞਾਹਿ ਅਤਿਸਯਂ ਅਧਿਗਤਾ. ਆਯੁਞ੍ਚ ਵਣ੍ਣਞ੍ਚ ਸੁਖਂ ਬਲਞ੍ਚਾਤਿ ‘‘ਚਤੂਹਿ ਠਾਨੇਹੀ’’ਤਿ ਵੁਤ੍ਤਾਨਂ ਸਰੂਪਤੋ ਦਸ੍ਸਨਂ. ਆਯੁਆਦਯੋ ਏਵ ਹਿਸ੍ਸਾ ਅਞ੍ਞਾਹਿ ਵਿਸਿਟ੍ਠਸਭਾਵਤਾਯ ਵਿਸੇਸਾ ਤਸ੍ਸਾ ਤਥਾ ਸਮ੍ਭਾਵਨਾਵਸੇਨ ਗਹੇਤਬ੍ਬਤਾਯ ਹੇਤੁਭਾਵਤੋ ‘‘ਠਾਨ’’ਨ੍ਤਿ ਚ ਵੁਤ੍ਤਂ. ਵਿਸੇਸਮਜ੍ਝਗਾ. ਕੀਦਿਸਂ? ਆਯੁਞ੍ਚ ਵਣ੍ਣਞ੍ਚ ਸੁਖਞ੍ਚ ਬਲਞ੍ਚਾਤਿ ਯੋਜਨਾ.

੩੨੩. ਸੁਤਂ ¶ ਨੁ ਤਂ ਭਾਸਤਿ ਯਂ ਅਯਂ ਲਤਾਤਿ ਅਯਂ ਲਤਾ ਅਮ੍ਹਾਕਂ ਜੇਟ੍ਠਭਗਿਨੀ ਯਂ ਭਾਸਤਿ, ਤਂ ਤੁਮ੍ਹੇਹਿ ਸੁਤਂ ਨੁ ਕਿਂ ਅਸੁਤ’’ਨ੍ਤਿ ਇਤਰਾ ਤਿਸ੍ਸੋ ਭਗਿਨਿਯੋ ਪੁਚ੍ਛਤਿ. ਯਂ ਨੋਤਿ ਯਂ ਅਮ੍ਹਾਕਂ ਸਂਸਯਿਤਂ. ਨੋਤਿ ਨਿਪਾਤਮਤ੍ਤਂ, ਪੁਨ ਨੋਤਿ ਅਮ੍ਹਾਕਂ, ਅਵਧਾਰਣੇ ਵਾ ‘‘ਨ ਨੋ ਸਮਂ ਅਤ੍ਥੀ’’ਤਿਆਦੀਸੁ ¶ (ਖੁ. ਪਾ. ੬.੩; ਸੁ. ਨਿ. ੨੨੬) ਵਿਯ, ਤੇਨ ਅਕਿਤ੍ਤਯਿਯੇਵ, ਅਵਿਪਰੀਤਂ ਬ੍ਯਾਕਾਸਿਯੇਵਾਤਿ ਅਤ੍ਥੋ. ਪਤਿਨੋ ਕਿਰਮ੍ਹਾਕਂ ਵਿਸਿਟ੍ਠ ਨਾਰੀਨਂ, ਗਤੀ ਚ ਤਾਸਂ ਪਵਰਾ ਚ ਦੇਵਤਾਤਿ ਅਨਤ੍ਥਤੋ ਪਾਲਨਤੋ ਪਤਿਨੋ ਸਾਮਿਕਾ ਨਾ ਅਮ੍ਹਾਕਂ ਨਾਰੀਨਂ ਇਤ੍ਥੀਨਂ ਵਿਸਿਟ੍ਠਾ ਗਤਿ ਚ ਤਾਸਂ ਪਟਿਸਰਣਞ੍ਚ, ਤਾਸਂ ਮਾਤੁਗਾਮਾਨਂ ਸਰਣਤੋ ਪਵਰਾ ਉਤ੍ਤਮਾ ਦੇਵਤਾ ਚ ਸਮ੍ਮਦੇਵ ਆਰਾਧਿਤਾ ਸਮ੍ਪਤਿ ਆਯਤਿਞ੍ਚ ਹਿਤਸੁਖਾਵਹਾਤਿ ਅਤ੍ਥੋ.

੩੨੪. ਪਤੀਸੁ ਧਮ੍ਮਂ ਪਚਰਾਮ ਸਬ੍ਬਾਤਿ ਸਬ੍ਬਾਵ ਮਯਂ ਪਤੀਸੁ ਅਤ੍ਤਨੋ ਸਾਮਿਕੇਸੁ ਪੁਬ੍ਬੁਟ੍ਠਾਨਾਦਿਕਂ ਚਰਿਤਬ੍ਬਧਮ੍ਮਂ ਪਚਰਾਮ. ਯਤ੍ਥਾਤਿ ਯਂ ਨਿਮਿਤ੍ਤਂ, ਯਸ੍ਮਿਂ ਵਾ ਪਤੀਸੁ ਚਰਿਤਬ੍ਬਧਮ੍ਮੇ ਚਰਿਯਮਾਨੇ ਇਤ੍ਥਿਯੋ ਪਤਿਬ੍ਬਤਾ ਨਾਮ ਭਵਨ੍ਤਿ. ਲਚ੍ਛਾਮਸੇ ਭਾਸਤਿ ਯਂ ਅਯਂ ਲਤਾਤਿ ਅਯਂ ਲਤਾ ਯਂ ਸਮ੍ਪਤ੍ਤਿਂ ਏਤਰਹਿ ਲਭਤੀਤਿ ਭਾਸਤਿ, ਤਂ ਸਮ੍ਪਤ੍ਤਿਂ ਪਤੀਸੁ ਧਮ੍ਮਂ ਪਚਰਿਤ੍ਵਾਤਿ ਲਭਿਸ੍ਸਾਮ.

੩੨੫. ਪਬ੍ਬਤਸਾਨੁਗੋਚਰੋਤਿ ਪਬ੍ਬਤਵਨਸਣ੍ਡਚਾਰੀ. ਮਹਿਨ੍ਧਰਂ ਪਬ੍ਬਤਮਾਵਸਿਤ੍ਵਾਤਿ ਮਹਿਂ ਧਾਰੇਤੀਤਿ ਮਹਿਨ੍ਧਰਨਾਮਕਂ ਪਬ੍ਬਤਂ ਅਚਲਂ ਆਵਸਿਤ੍ਵਾ ਅਧਿਵਸਿਤ੍ਵਾ, ਤਤ੍ਥ ਵਸਨ੍ਤੋਤਿ ਅਤ੍ਥੋ. ‘‘ਆਵਸਿਤ੍ਵਾ’’ਤਿ ਹਿ ਪਦਂ ਅਪੇਕ੍ਖਿਤ੍ਵਾ ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਪਸਯ੍ਹਾਤਿ ਅਭਿਭਵਿਤ੍ਵਾ. ਖੁਦ੍ਦੇਤਿ ਬਲਵਸੇਨਨਿਹੀਨੇ ਪਮਾਣਤੋ ਪਨ ਮਹਨ੍ਤੇ ਹਤ੍ਥਿਆਦਿਕੇਪਿ ਮਿਗੇ ਸੋ ਹਨ੍ਤਿਯੇਵ.

੩੨੬. ਤਥੇਵਾਤਿ ¶ ਗਾਥਾਯ ਅਯਂ ਉਪਮਾਸਂਸਨ੍ਦਨੇਨ ਸਦ੍ਧਿਂ ਅਤ੍ਥਯੋਜਨਾ – ਯਥਾ ਸੀਹੋ ਅਤ੍ਤਨੋ ਨਿਵਾਸਗੋਚਰਟ੍ਠਾਨਭੂਤਂ ਪਬ੍ਬਤਂ ਨਿਸ੍ਸਾਯ ਵਸਨ੍ਤੋ ਅਤ੍ਤਨੋ ਯਥਿਚ੍ਛਿਤਮਤ੍ਥਂ ¶ ਸਾਧੇਤਿ, ਏਵਮੇਵ ਸਾ ਸਦ੍ਧਾ ਪਸਨ੍ਨਾ ਅਰਿਯਸਾਵਿਕਾ ਘਾਸਚ੍ਛਾਦਨਾਦੀਹਿ ਭਰਣਤੋ ਪੋਸਨਤੋ ਭਤ੍ਤਾਰਂ ਪਤਿਂ ਸਾਮਿਕਂ ਨਿਸ੍ਸਾਯ ਵਸਨ੍ਤੀ ਸਬ੍ਬਤ੍ਥਾਪਿ ਪਤਿਅਨੁਕੂਲਤਾਸਙ੍ਖਾਤੇਨ ਵਤੇਨ ਤਂ ਅਨੁਬ੍ਬਤਾ ਪਰਿਜਨਾਦੀਸੁ ਉਪ੍ਪਜ੍ਜਨਕਂ ਕੋਧਂ ਵਧਿਤ੍ਵਾ ਪਜਹਿਤ੍ਵਾ ਪਰਿਗ੍ਗਹਵਤ੍ਥੂਸੁ ਉਪ੍ਪਜ੍ਜਨਕਂ ਮਚ੍ਛੇਰਂ ਅਭਿਭੁਯ੍ਯ ਅਭਿਭਵਿਤ੍ਵਾ ਅਨੁਪ੍ਪਾਦੇਤ੍ਵਾ ਪਤਿਬ੍ਬਤਾਧਮ੍ਮਸ੍ਸ ਚ ਉਪਾਸਿਕਾਧਮ੍ਮਸ੍ਸ ਚ ਸਮ੍ਮਦੇਵ ਚਰਣਤੋ ਧਮ੍ਮਚਾਰਿਨੀ ਸਾ ਸਗ੍ਗਮ੍ਹਿ ਦੇਵਲੋਕੇ ਮੋਦਤਿ, ਪਮੋਦਂ ਆਪਜ੍ਜਤੀਤਿ. ਸੇਸਂ ਵੁਤ੍ਤਨਯਮੇਵ.

ਸਤ੍ਤਤਨ੍ਤਿਂ ਸੁਮਧੁਰਨ੍ਤਿ ਗੁਤ੍ਤਿਲਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਰਾਜਗਹੇ ਵਿਹਰਨ੍ਤੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਗਨ੍ਤ੍ਵਾ ਤਤ੍ਥ ਪਟਿਪਾਟਿਯਾ ¶ ਠਿਤੇਸੁ ਛਤ੍ਤਿਂਸਾਯ ਵਿਮਾਨੇਸੁ ਛਤ੍ਤਿਂਸ ਦੇਵਧੀਤਰੋ ਪਚ੍ਚੇਕਂ ਅਚ੍ਛਰਾਸਹਸ੍ਸਪਰਿਵਾਰਾ ਮਹਤਿਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤਿਯੋ ਦਿਸ੍ਵਾ ਤਾਹਿ ਪੁਬ੍ਬੇ ਕਤਕਮ੍ਮਂ ‘‘ਅਭਿਕ੍ਕਨ੍ਤੇਨ ਵਣ੍ਣੇਨਾ’’ਤਿਆਦੀਹਿ ਤੀਹਿ ਗਾਥਾਹਿ ਪਟਿਪਾਟਿਯਾ ਪੁਚ੍ਛਿ. ਤਾਪਿ ਤਸ੍ਸ ਪੁਚ੍ਛਾਨਨ੍ਤਰਂ ‘‘ਵਤ੍ਥੁਤ੍ਤਮਦਾਯਿਕਾ ਨਾਰੀ’’ਤਿਆਦਿਨਾ ਬ੍ਯਾਕਰਿਂਸੁ. ਅਥ ਥੇਰੋ ਤਤੋ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਤਂ ਸੁਤ੍ਵਾ ਭਗਵਾ ‘‘ਮੋਗ੍ਗਲ੍ਲਾਨ, ਤਾ ਦੇਵਤਾ ਨ ਕੇਵਲਂ ਤਯਾ ਏਵ ਪੁਚ੍ਛਿਤਾ ਏਵਂ ਬ੍ਯਾਕਰਿਂਸੁ, ਅਥ ਖੋ ਪੁਬ੍ਬੇ ਮਯਾਪਿ ਪੁਚ੍ਛਿਤਾ ਏਵਮੇਵ ਬ੍ਯਾਕਰਿਂਸੂ’’ਤਿ ਵਤ੍ਵਾ ਥੇਰੇਨ ਯਾਚਿਤੋ ਅਤੀਤਂ ਅਤ੍ਤਨੋ ਗੁਤ੍ਤਿਲਾਚਰਿਯਂ ਕਥੇਸਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਗਨ੍ਧਬ੍ਬਕੁਲੇ ਨਿਬ੍ਬਤ੍ਤਿਤ੍ਵਾ ਗਨ੍ਧਬ੍ਬਸਿਪ੍ਪੇ ਪਰਿਯੋਦਾਤਸਿਪ੍ਪਤਾਯ ਤਿਮ੍ਬਰੁਨਾਰਦਸਦਿਸੋ ਸਬ੍ਬਦਿਸਾਸੁ ਪਾਕਟੋ ਪਞ੍ਞਾਤਾ ¶ ਆਚਰਿਯੋ ਅਹੋਸਿ ਨਾਮੇਨ ¶ ਗੁਤ੍ਤਿਲੋ ਨਾਮ. ਸੋ ਅਨ੍ਧੇ ਜਿਣ੍ਣੇ ਮਾਤਾਪਿਤਰੋ ਪੋਸੇਸਿ. ਤਸ੍ਸ ਸਿਪ੍ਪਨਿਪ੍ਫਤ੍ਤਿਂ ਸੁਤ੍ਵਾ ਉਜ੍ਜੇਨਿਵਾਸੀ ਮੁਸਿਲੋ ਨਾਮ ਗਨ੍ਧਬ੍ਬੋ ਉਪਗਨ੍ਤ੍ਵਾ ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ‘‘ਕਸ੍ਮਾ ਆਗਤੋਸੀ’’ਤਿ ਚ ਵੁਤ੍ਤੇ ‘‘ਤੁਮ੍ਹਾਕਂ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਿਤੁ’’ਨ੍ਤਿ ਆਹ. ਗੁਤ੍ਤਿਲਾਚਰਿਯੋ ਤਂ ਓਲੋਕੇਤ੍ਵਾ ਲਕ੍ਖਣਕੁਸਲਤਾਯ ‘‘ਅਯਂ ਪੁਰਿਸੋ ਵਿਸਮਜ੍ਝਾਸਯੋ ਕਕ੍ਖਲ਼ੋ ਫਰੁਸੋ ਅਕਤਞ੍ਞੂ ਭਵਿਸ੍ਸਤਿ, ਨ ਸਙ੍ਗਹੇਤਬ੍ਬੋ’’ਤਿ ਸਿਪ੍ਪੁਗ੍ਗਹਣਤ੍ਥਂ ਓਕਾਸਂ ਨਾਕਾਸਿ. ਸੋ ਤਸ੍ਸ ਮਾਤਾਪਿਤਰੋ ਪਯਿਰੁਪਾਸਿਤ੍ਵਾ ਤੇਹਿ ਯਾਚਾਪੇਸਿ. ਗੁਤ੍ਤਿਲਾਚਰਿਯੋ ਮਾਤਾਪਿਤੂਹਿ ਨਿਪ੍ਪੀਲ਼ਿਯਮਾਨੋ ‘‘ਗਰੁਵਚਨਂ ਅਲਙ੍ਘਨੀਯ’’ਨ੍ਤਿ ਤਸ੍ਸ ਸਿਪ੍ਪਂ ਪਟ੍ਠਪੇਤ੍ਵਾ ਵਿਗਤਮਚ੍ਛਰਿਯਤਾਯ ਕਾਰੁਣਿਕਤਾਯ ਚ ਆਚਰਿਯਮੁਟ੍ਠਿਂ ਅਕਤ੍ਵਾ ਅਨਵਸੇਸਤੋ ਸਿਪ੍ਪਂ ਸਿਕ੍ਖਾਪੇਸਿ.

ਸੋਪਿ ਮੇਧਾਵਿਤਾਯ ਪੁਬ੍ਬੇਕਤਪਰਿਚਯਤਾਯ ਅਕੁਸੀਤਤਾਯ ਚ ਨ ਚਿਰਸ੍ਸੇਵ ਪਰਿਯੋਦਾਤਸਿਪ੍ਪੋ ਹੁਤ੍ਵਾ ਚਿਨ੍ਤੇਸਿ ‘‘ਅਯਂ ਬਾਰਾਣਸੀ ਜਮ੍ਬੁਦੀਪੇ ਅਗ੍ਗਨਗਰਂ, ਯਂਨੂਨਾਹਂ ਇਧ ਸਰਾਜਿਕਾਯ ਪਰਿਸਾਯ ਸਿਪ੍ਪਂ ਦਸ੍ਸੇਯ੍ਯਂ, ਏਵਾਹਂ ਆਚਰਿਯਤੋਪਿ ਜਮ੍ਬੁਦੀਪੇ ਪਾਕਟੋ ਪਞ੍ਞਾਤੋ ਭਵਿਸ੍ਸਾਮੀ’’ਤਿ. ਸੋ ਆਚਰਿਯਸ੍ਸ ਆਰੋਚੇਸਿ ‘‘ਅਹਂ ਰਞ੍ਞੋ ਪੁਰਤੋ ਸਿਪ੍ਪਂ ਦਸ੍ਸੇਤੁਕਾਮੋ, ਰਾਜਾਨਂ ਮਂ ਦਸ੍ਸੇਥਾ’’ਤਿ. ਮਹਾਸਤ੍ਤੋ ‘‘ਅਯਂ ਮਮ ਸਨ੍ਤਿਕੇ ਉਗ੍ਗਹਿਤਸਿਪ੍ਪੋ ਪਤਿਟ੍ਠਂ ਲਭਤੂ’’ਤਿ ਕਰੁਣਾਯਮਾਨੋ ਤਂ ਰਞ੍ਞੋ ਸਨ੍ਤਿਕਂ ਨੇਤ੍ਵਾ ‘‘ਮਹਾਰਾਜ ਇਮਸ੍ਸ ਮੇ ਅਨ੍ਤੇਵਾਸਿਕਸ੍ਸ ਵੀਣਾਯ ਪਗੁਣਤਂ ਪਸ੍ਸਥਾ’’ਤਿ ਆਹ. ਰਾਜਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਸ੍ਸ ਵੀਣਾਵਾਦਨਂ ਸੁਤ੍ਵਾ ਪਰਿਤੁਟ੍ਠੋ ਤਂ ਗਨ੍ਤੁਕਾਮਂ ਨਿਵਾਰੇਤ੍ਵਾ ‘‘ਮਮੇਵ ਸਨ੍ਤਿਕੇ ਵਸ, ਆਚਰਿਯਸ੍ਸ ਦਿਨ੍ਨਕੋਟ੍ਠਾਸਤੋ ਉਪਡ੍ਢਂ ਦਸ੍ਸਾਮੀ’’ਤਿ ਆਹ. ਮੁਸਿਲੋ ‘‘ਨਾਹਂ ਆਚਰਿਯਤੋ ਹਾਯਾਮਿ, ਸਮਮੇਵ ਦੇਥਾ’’ਤਿ ਵਤ੍ਵਾ ਰਞ੍ਞਾ ‘‘ਮਾ ਏਵਂ ਭਣਿ, ਆਚਰਿਯੋ ਨਾਮ ਮਹਨ੍ਤੋ, ਉਪਡ੍ਢਮੇਵ ਤੁਯ੍ਹਂ ਦਸ੍ਸਾਮੀ’’ਤਿ ਵੁਤ੍ਤੇ ‘‘ਮਮ ਚ ਆਚਰਿਯਸ੍ਸ ਚ ਸਿਪ੍ਪਂ ਪਸ੍ਸਥਾ’’ਤਿ ਵਤ੍ਵਾ ਰਾਜਗੇਹਤੋ ਨਿਕ੍ਖਮਿਤ੍ਵਾ ‘‘ਇਤੋ ਸਤ੍ਤਮੇ ਦਿਵਸੇ ਮਮ ਚ ਗੁਤ੍ਤਿਲਾਚਰਿਯਸ੍ਸ ਚ ¶ ਰਾਜਙ੍ਗਣੇ ਸਿਪ੍ਪਦਸ੍ਸਨਂ ਭਵਿਸ੍ਸਤਿ, ਤਂ ਪਸ੍ਸਿਤੁਕਾਮਾ ਪਸ੍ਸਨ੍ਤੂ’’ਤਿ ਤਤ੍ਥ ਤਤ੍ਥ ਆਹਿਣ੍ਡਨ੍ਤੋ ਉਗ੍ਘੋਸੇਸਿ.

ਮਹਾਸਤ੍ਤੋ ¶ ਤਂ ਸੁਤ੍ਵਾ ‘‘ਅਯਂ ਤਰੁਣੋ ਥਾਮਵਾ, ਅਹਂ ਪਨ ਜਿਣ੍ਣੋ ਦੁਬ੍ਬਲੋ, ਯਦਿ ਪਨ ਮੇ ਪਰਾਜਯੋ ਭਵੇਯ੍ਯ, ਮਤਂ ਮੇ ਜੀਵਿਤਾ ਸੇਯ੍ਯਂ, ਤਸ੍ਮਾ ¶ ਅਰਞ੍ਞਂ ਪਵਿਸਿਤ੍ਵਾ ਉਬ੍ਬਨ੍ਧਿਤ੍ਵਾ ਮਰਿਸ੍ਸਾਮੀ’’ਤਿ ਅਰਞ੍ਞਂ ਗਤੋ ਮਰਣਭਯਤਜ੍ਜਿਤੋ ਪਟਿਨਿਵਤ੍ਤਿ. ਪੁਨ ਮਰਿਤੁਕਾਮੋ ਹੁਤ੍ਵਾ ਗਨ੍ਤ੍ਵਾ ਪੁਨਪਿ ਮਰਣਭਯੇਨ ਪਟਿਨਿਵਤ੍ਤਿ. ਏਵਂ ਗਮਨਾਗਮਨਂ ਕਰੋਨ੍ਤਸ੍ਸ ਤਂ ਠਾਨਂ ਵਿਗਤਤਿਣਂ ਅਹੋਸਿ. ਅਥ ਦੇਵਰਾਜਾ ਮਹਾਸਤ੍ਤਂ ਉਪਸਙ੍ਕਮਿਤ੍ਵਾ ਦਿਸ੍ਸਮਾਨਰੂਪੋ ਆਕਾਸੇ ਠਤ੍ਵਾ ਏਵਮਾਹ ‘‘ਆਚਰਿਯ, ਕਿਂ ਕਰੋਸੀ’’ਤਿ. ਮਹਾਸਤ੍ਤੋ –

‘‘ਸਤ੍ਤਤਨ੍ਤਿਂ ਸੁਮਧੁਰਂ, ਰਾਮਣੇਯ੍ਯਂ ਅਵਾਚਯਿਂ;

ਸੋ ਮਂ ਰਙ੍ਗਮ੍ਹਿ ਅਵ੍ਹੇਤਿ, ਸਰਣਂ ਮੇ ਹੋਹਿ ਕੋਸਿਯਾ’’ਤਿ. –

ਤਸ੍ਸਤ੍ਥੋ – ਅਹਂ ਦੇਵਰਾਜ ਮੁਸਿਲਂ ਨਾਮ ਅਨ੍ਤੇਵਾਸਿਕਂ ਸਤ੍ਤਨ੍ਨਂ ਤਨ੍ਤੀਨਂ ਅਤ੍ਥਿਤਾਯ ਛਜ੍ਜਾਦਿਸਤ੍ਤਵਿਧਸਰਦੀਪਨਤੋ ਚ ਸਤ੍ਤਤਨ੍ਤਿਂ, ਤਂ ਵਿਸਯਂ ਕਤ੍ਵਾ ਯਥਾਰਹਂ ਦ੍ਵਾਵੀਸਤਿਯਾ ਸੁਤਿਭੇਦਾਨਂ ਅਹਾਪਨਤੋ ਸੁਟ੍ਠੁ ਮਧੁਰਨ੍ਤਿ ਸੁਮਧੁਰਂ, ਯਥਾਧਿਗਤਾਨਂ ਸਮਪਞ੍ਞਾਸਾਯ ਮੁਚ੍ਛਨਾਨਂ ਪਰਿਬ੍ਯਤ੍ਤਤਾਯ ਸਰਸ੍ਸ ਚ ਵੀਣਾਯ ਚ ਅਞ੍ਞਮਞ੍ਞਸਂਸਨ੍ਦਨੇਨ ਸੁਣਨ੍ਤਾਨਂ ਅਤਿਵਿਯ ਮਨੋਰਮਭਾਵਤੋ ਰਾਮਣੇਯ੍ਯਂ, ਸਰਗਤਾਦਿਵਿਭਾਗਤੋ ਛਜ੍ਜਾਦਿਚਤੁਬ੍ਬਿਧਂ ਗਨ੍ਧਬ੍ਬਂ ਅਹਾਪੇਤ੍ਵਾ ਗਨ੍ਧਬ੍ਬਸਿਪ੍ਪਂ ਅਵਾਚਯਿਨ੍ਤਿ ਵਾਚੇਸਿਂ ਉਗ੍ਗਣ੍ਹਾਪੇਸਿਂ ਸਿਕ੍ਖਾਪੇਸਿਂ. ਸੋ ਮੁਸਿਲੋ ਅਨ੍ਤੇਵਾਸੀ ਸਮਾਨੋ ਮਂ ਅਤ੍ਤਨੋ ਆਚਰਿਯਂ ਰਙ੍ਗਮ੍ਹਿ ਰਙ੍ਗਮਣ੍ਡਲੇ ਅਵ੍ਹੇਤਿ ਸਾਰਮ੍ਭਵਸੇਨ ਅਤ੍ਤਨੋ ਵਿਸੇਸਂ ਦਸ੍ਸੇਤੁਂ ਸਙ੍ਘਟ੍ਟਿਯਤਿ, ‘‘ਏਹਿ ਸਿਪ੍ਪਂ ਦਸ੍ਸੇਹੀ’’ਤਿ ਮਂ ¶ ਆਚਿਕ੍ਖਿ, ਤਸ੍ਸ ਮੇ ਤ੍ਵਂ ਕੋਸਿਯ ਦੇਵਰਾਜ ਸਰਣਂ ਅਵਸ੍ਸਯੋ ਹੋਹੀਤਿ.

ਤਂ ਸੁਤ੍ਵਾ ਸਕ੍ਕੋ ਦੇਵਰਾਜਾ ‘‘ਮਾ ਭਾਯਿ ਆਚਰਿਯ, ਅਹਂ ਤੇ ਸਰਣਂ ਪਰਾਯਣ’’ਨ੍ਤਿ ਦਸ੍ਸੇਨ੍ਤੋ –

‘‘ਅਹਂ ਤੇ ਸਰਣਂ ਹੋਮਿ, ਅਹਮਾਚਰਿਯਪੂਜਕੋ;

ਨ ਤਂ ਜਯਿਸ੍ਸਤਿ ਸਿਸ੍ਸੋ, ਸਿਸ੍ਸਮਾਚਰਿਯ ਜੇਸ੍ਸਸੀ’’ਤਿ. –

ਆਹ ¶ . ਸਕ੍ਕਸ੍ਸ ਕਿਰ ਦੇਵਰਞ੍ਞੋ ਪੁਰਿਮਤ੍ਤਭਾਵੇ ਮਹਾਸਤ੍ਤੋ ਆਚਰਿਯੋ ਅਹੋਸਿ. ਤੇਨਾਹ ‘‘ਅਹਮਾਚਰਿਯਪੂਜਕੋ’’ਤਿ. ਅਹਂ ਆਚਰਿਯਾਨਂ ਪੂਜਕੋ, ਨ ਮੁਸਿਲੋ ਵਿਯ ਯੁਗਗ੍ਗਾਹੀ, ਮਾਦਿਸੇਸੁ ਅਨ੍ਤੇਵਾਸਿਕੇਸੁ ਠਿਤੇਸੁ ਤਾਦਿਸਸ੍ਸ ਆਚਰਿਯਸ੍ਸ ਕਥਂ ਪਰਾਜਯੋ, ਤਸ੍ਮਾ ਨ ਤਂ ਜਯਿਸ੍ਸਤਿ ¶ ਸਿਸ੍ਸੋ, ਅਞ੍ਞਦਤ੍ਥੁ ਸਿਸ੍ਸਂ ਮੁਸਿਲਂ ਆਚਰਿਯ ਤ੍ਵਮੇਵ ਜਯਿਸ੍ਸਸਿ, ਸੋ ਪਨ ਪਰਾਜਿਤੋ ਵਿਨਾਸਂ ਪਾਪੁਣਿਸ੍ਸਤੀਤਿ ਅਧਿਪ੍ਪਾਯੋ. ਏਵਞ੍ਚ ਪਨ ਵਤ੍ਵਾ ‘‘ਅਹਂ ਸਤ੍ਤਮੇ ਦਿਵਸੇ ਸਾਕਚ੍ਛਾਮਣ੍ਡਲਂ ਆਗਮਿਸ੍ਸਾਮਿ, ਤੁਮ੍ਹੇ ਵਿਸ੍ਸਤ੍ਥਾ ਵਾਦੇਥਾ’’ਤਿ ਸਮਸ੍ਸਾਸੇਤ੍ਵਾ ਗਤੋ.

ਸਤ੍ਤਮੇ ਪਨ ਦਿਵਸੇ ਰਾਜਾ ਸਪਰਿਵਾਰੋ ਰਾਜਸਭਾਯਂ ਨਿਸੀਦਿ. ਗੁਤ੍ਤਿਲਾਚਰਿਯੋ ਚ ਮੁਸਿਲੋ ਚ ਸਿਪ੍ਪਦਸ੍ਸਨਤ੍ਥਂ ਸਜ੍ਜਾ ਹੁਤ੍ਵਾ ਉਪਸਙ੍ਕਮਿਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ਅਤ੍ਤਨੋ ਅਤ੍ਤਨੋ ਲਦ੍ਧਾਸਨੇ ਨਿਸੀਦਿਤ੍ਵਾ ਵੀਣਾ ਵਾਦਯਿਂਸੁ. ਸਕ੍ਕੋ ਆਗਨ੍ਤ੍ਵਾ ਅਨ੍ਤਲਿਕ੍ਖੇ ਅਟ੍ਠਾਸਿ. ਤਂ ਮਹਾਸਤ੍ਤੋਵ ਪਸ੍ਸਤਿ, ਇਤਰੇ ਪਨ ਨ ਪਸ੍ਸਨ੍ਤਿ. ਪਰਿਸਾ ਦ੍ਵਿਨ੍ਨਮ੍ਪਿ ਵਾਦਨੇ ਸਮਚਿਤ੍ਤਾ ਅਹੋਸਿ. ਸਕ੍ਕੋ ਗੁਤ੍ਤਿਲਂ ‘‘ਏਕਂ ਤਨ੍ਤਿਂ ਛਿਨ੍ਦਾ’’ਤਿ ਆਹ. ਛਿਨ੍ਨਾਯਪਿ ਤਨ੍ਤਿਯਾ ਵੀਣਾ ਤਥੇਵ ਮਧੁਰਨਿਗ੍ਘੋਸਾ ਅਹੋਸਿ. ਏਵਂ ‘‘ਦੁਤਿਯਂ, ਤਤਿਯਂ, ਚਤੁਤ੍ਥਂ, ਪਞ੍ਚਮਂ, ਛਟ੍ਠਂ, ਸਤ੍ਤਮਂ ਛਿਨ੍ਦਾ’’ਤਿ ਆਹ, ਤਾਸੁ ਛਿਨ੍ਨਾਸੁਪਿ ਵੀਣਾ ਮਧੁਰਨਿਗ੍ਘੋਸਾਵ ਅਹੋਸਿ. ਤਂ ਦਿਸ੍ਵਾ ਮੁਸਿਲੋ ਪਰਾਜਿਤਭੂਤਰੂਪੋ ਪਤ੍ਤਕ੍ਖਨ੍ਧੋ ਅਹੋਸਿ, ਪਰਿਸਾ ਹਟ੍ਠਤੁਟ੍ਠਾ ਚੇਲੁਕ੍ਖੇਪੇ ਕਰੋਨ੍ਤੀ ¶ ਗੁਤ੍ਤਿਲਸ੍ਸ ਸਾਧੁਕਾਰਮਦਾਸਿ. ਰਾਜਾ ਮੁਸਿਲਂ ਸਭਾਯ ਨੀਹਰਾਪੇਸਿ, ਮਹਾਜਨੋ ਲੇਡ੍ਡੁਦਣ੍ਡਾਦੀਹਿ ਪਹਰਨ੍ਤੋ ਮੁਸਿਲਂ ਤਤ੍ਥੇਵ ਜੀਵਿਤਕ੍ਖਯਂ ਪਾਪੇਸਿ.

ਸਕ੍ਕੋ ਦੇਵਾਨਮਿਨ੍ਦੋ ਮਹਾਪੁਰਿਸੇਨ ਸਦ੍ਧਿਂ ਸਮ੍ਮੋਦਨੀਯਂ ਕਤ੍ਵਾ ਦੇਵਲੋਕਮੇਵ ਗਤੋ. ਤਂ ਦੇਵਤਾ ‘‘ਮਹਾਰਾਜ, ਕੁਹਿਂ ਗਤਤ੍ਥਾ’’ਤਿ ਪੁਚ੍ਛਿਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ ‘‘ਮਹਾਰਾਜ, ਮਯਂ ਗੁਤ੍ਤਿਲਾਚਰਿਯਂ ਪਸ੍ਸਿਸ੍ਸਾਮ, ਸਾਧੁ ਨੋ ਤਂ ਇਧਾਨੇਤ੍ਵਾ ਦਸ੍ਸੇਹੀ’’ਤਿ ਆਹਂਸੁ. ਸਕ੍ਕੋ ਦੇਵਾਨਂ ਵਚਨਂ ਸੁਤ੍ਵਾ ਮਾਤਲਿਂ ਆਣਾਪੇਸਿ ‘‘ਗਚ੍ਛ ਵੇਜਯਨ੍ਤਰਥੇਨ ਅਮ੍ਹਾਕਂ ਗੁਤ੍ਤਿਲਾਚਰਿਯਂ ਆਨੇਹਿ, ਦੇਵਤਾ ਤਂ ਦਸ੍ਸਨਕਾਮਾ’’ਤਿ, ਸੋ ਤਥਾ ਅਕਾਸਿ. ਸਕ੍ਕੋ ਮਹਾਸਤ੍ਤੇਨ ਸਦ੍ਧਿਂ ਸਮ੍ਮੋਦਨੀਯਂ ਕਤ੍ਵਾ ਏਵਮਾਹ ‘‘ਆਚਰਿਯ, ਵੀਣਂ ਵਾਦਯ, ਦੇਵਤਾ ਸੋਤੁਕਾਮਾ’’ਤਿ. ‘‘ਮਯਂ ਸਿਪ੍ਪੂਪਜੀਵਿਨੋ, ਵੇਤਨੇਨ ਵਿਨਾ ਸਿਪ੍ਪਂ ਨ ਦਸ੍ਸੇਮਾ’’ਤਿ. ‘‘ਕੀਦਿਸਂ ਪਨ ਵੇਤਨਂ ਇਚ੍ਛਸੀ’’ਤਿ. ‘‘ਨਾਞ੍ਞੇਨ ਮੇ ਵੇਤਨੇਨ ਕਿਚ੍ਚਂ ਅਤ੍ਥਿ, ਇਮਾਸਂ ਪਨ ਦੇਵਤਾਨਂ ਅਤ੍ਤਨਾ ਅਤ੍ਤਨਾ ਪੁਬ੍ਬੇਕਤਕੁਸਲਕਥਨਮੇਵ ਮੇ ਵੇਤਨਂ ਹੋਤੂ’’ਤਿ ਆਹ. ਤਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਂਸੁ. ਅਥ ਮਹਾਸਤ੍ਤੋ ਪਾਟੇਕ੍ਕਂ ਤਾਹਿ ਤਦਾ ਪਟਿਲਦ੍ਧਸਮ੍ਪਤ੍ਤਿਕਿਤ੍ਤਨਮੁਖੇਨ ਤਸ੍ਸਾ ਹੇਤੁਭੂਤਂ ਪੁਰਿਮਤ੍ਤਭਾਵੇ ਕਤਂ ਸੁਚਰਿਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਵਿਯ ਪੁਚ੍ਛਨ੍ਤੋ ‘‘ਅਭਿਕ੍ਕਨ੍ਤੇਨ ਵਣ੍ਣੇਨਾ’’ਤਿਆਦਿਗਾਥਾਹਿ ਪੁਚ੍ਛਿ. ਤਾਪਿ ‘‘ਵਤ੍ਥੁਤ੍ਤਮਦਾਯਿਕਾ ¶ ਨਾਰੀ’’ਤਿਆਦਿਨਾ ਯਥਾ ਏਤਰਹਿ ਥੇਰਸ੍ਸ, ਏਵਮੇਵ ਤਸ੍ਸ ਬ੍ਯਾਕਰਿਂਸੁ. ਤੇਨ ਵੁਤ੍ਤਂ ¶ ‘‘ਮੋਗ੍ਗਲ੍ਲਾਨ ਤਾ ਦੇਵਤਾ ਨ ਕੇਵਲਂ ਤਯਾ ਏਵ ਪੁਚ੍ਛਿਤਾ ਏਵਂ ਬ੍ਯਾਕਰਿਂਸੁ, ਅਥ ਖੋ ਪੁਬ੍ਬੇ ਮਯਾਪਿ ਪੁਚ੍ਛਿਤਾ ਏਵਮੇਵ ਬ੍ਯਾਕਰਿਂਸੂ’’ਤਿ.

ਤਾ ਕਿਰ ਇਤ੍ਥਿਯੋ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਮਨੁਸ੍ਸਤ੍ਤਭਾਵੇ ਠਿਤਾ ਤਂ ਤਂ ਪੁਞ੍ਞਂ ਅਕਂਸੁ. ਤਤ੍ਥ ਏਕਾ ¶ ਇਤ੍ਥੀ ਵਤ੍ਥਂ ਅਦਾਸਿ, ਏਕਾ ਸੁਮਨਮਾਲਂ, ਏਕਾ ਗਨ੍ਧਂ, ਏਕਾ ਉਲ਼ਾਰਾਨਿ ਫਲਾਨਿ, ਏਕਾ ਉਚ੍ਛੁਰਸਂ, ਏਕਾ ਭਗਵਤੋ ਚੇਤਿਯੇ ਗਨ੍ਧਪਞ੍ਚਙ੍ਗੁਲਿਕਂ ਅਦਾਸਿ, ਏਕਾ ਉਪੋਸਥਂ ਉਪਵਸਿ, ਏਕਾ ਉਪਕਟ੍ਠਾਯ ਵੇਲਾਯ ਨਾਵਾਯ ਭੁਞ੍ਜਨ੍ਤਸ੍ਸ ਭਿਕ੍ਖੁਨੋ ਉਦਕਂ ਅਦਾਸਿ, ਏਕਾ ਕੋਧਨਾਨਂ ਸਸ੍ਸੁਸਸੁਰਾਨਂ ਅਕ੍ਕੋਧਨਾ ਉਪਟ੍ਠਾਨਂ ਅਕਾਸਿ, ਏਕਾ ਦਾਸੀ ਹੁਤ੍ਵਾ ਅਤਨ੍ਦਿਤਾਚਾਰਾ ਅਹੋਸਿ, ਏਕੋ ਪਿਣ੍ਡਚਾਰਿਕਸ੍ਸ ਭਿਕ੍ਖੁਨੋ ਖੀਰਭਤ੍ਤਂ ਅਦਾਸਿ, ਏਕਾ ਫਾਣਿਤਂ ਅਦਾਸਿ, ਏਕਾ ਉਚ੍ਛੁਖਣ੍ਡਂ ਅਦਾਸਿ, ਏਕਾ ਤਿਮ੍ਬਰੁਸਕਂ ਅਦਾਸਿ, ਏਕਾ ਕਕ੍ਕਾਰਿਕਂ ਅਦਾਸਿ, ਏਕਾ ਏਲ਼ਾਲੁਕਂ ਅਦਾਸਿ, ਏਕਾ ਵਲ੍ਲਿਫਲਂ ਅਦਾਸਿ, ਏਕਾ ਫਾਰੁਸਕਂ ਅਦਾਸਿ, ਏਕਾ ਅਙ੍ਗਾਰਕਪਲ੍ਲਂ ਅਦਾਸਿ, ਏਕਾ ਸਾਕਮੁਟ੍ਠਿਂ ਅਦਾਸਿ, ਏਕਾ ਪੁਪ੍ਫਕਮੁਟ੍ਠਿਂ ਅਦਾਸਿ, ਏਕਾ ਮੂਲਕਲਾਪਂ ਅਦਾਸਿ, ਏਕਾ ਨਿਮ੍ਬਮੁਟ੍ਠਿਂ ਅਦਾਸਿ, ਏਕਾ ਕਞ੍ਜਿਕਂ ਅਦਾਸਿ, ਏਕਾ ਤਿਲਪਿਞ੍ਞਾਕਂ ਅਦਾਸਿ, ਏਕਾ ਕਾਯਬਨ੍ਧਨਂ ਅਦਾਸਿ, ਏਕਾ ਅਂਸਬਦ੍ਧਕਂ ਅਦਾਸਿ, ਏਕਾ ਆਯੋਗਪਟ੍ਟਂ ਅਦਾਸਿ, ਏਕਾ ਵਿਧੂਪਨਂ, ਏਕਾ ਤਾਲਵਣ੍ਟਂ, ਏਕਾ ਮੋਰਹਤ੍ਥਂ, ਏਕਾ ਛਤ੍ਤਂ, ਏਕਾ ਉਪਾਹਨਂ, ਏਕਾ ਪੂਵਂ, ਏਕਾ ਮੋਦਕਂ, ਏਕਾ ਸਕ੍ਖਲਿਕਂ ਅਦਾਸਿ. ਤਾ ਏਕੇਕਾ ਅਚ੍ਛਰਾਸਹਸ੍ਸਪਰਿਵਾਰਾ ਪਹਤਿਯਾ ਦੇਵਿਦ੍ਧਿਯਾ ਵਿਰਾਜਮਾਨਾ ਤਾਵਤਿਂਸਭਵਨੇ ਸਕ੍ਕਸ੍ਸ ਦੇਵਰਾਜਸ੍ਸ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਾ ਗੁਤ੍ਤਿਲਾਚਰਿਯੇਨ ਪੁਚ੍ਛਿਤਾ ‘‘ਵਤ੍ਥੁਤ੍ਤਮਦਾਯਿਕਾ ਨਾਰੀ’’ਤਿਆਦਿਨਾ ਅਤ੍ਤਨਾ ਅਤ੍ਤਨਾ ਕਤਕੁਸਲਂ ਪਟਿਪਾਟਿਯਾ ਬ੍ਯਾਕਰਿਂਸੁ.

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ¶ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ¶ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਵਤ੍ਥੁਤ੍ਤਮਦਾਯਿਕਾ ¶ ਨਾਰੀ, ਪਵਰਾ ਹੋਤਿ ਨਰੇਸੁ ਨਾਰੀਸੁ;

ਏਵਂ ਪਿਯਰੂਪਦਾਯਿਕਾ ਮਨਾਪਂ, ਦਿਬ੍ਬਂ ਸਾ ਲਭਤੇ ਉਪੇਚ੍ਚ ਠਾਨਂ.

‘‘ਤਸ੍ਸਾ ਮੇ ਪਸ੍ਸ ਵਿਮਾਨਂ, ਅਚ੍ਛਰਾ ਕਾਮਵਣ੍ਣਿਨੀਹਮਸ੍ਮਿ;

ਅਚ੍ਛਰਾਸਹਸ੍ਸਸ੍ਸਾਹਂ, ਪਵਰਾ ਪਸ੍ਸ ਪੁਞ੍ਞਾਨਂ ਵਿਪਾਕਂ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

(ਯਥਾ ਚ ਏਤ੍ਥ, ਏਵਂ ਉਪਰਿ ਸਬ੍ਬਵਿਮਾਨੇਸੁ ਵਿਤ੍ਥਾਰੇਤਬ੍ਬਂ.)

‘‘ਪੁਪ੍ਫੁਤ੍ਤਮਦਾਯਿਕਾ ਨਾਰੀ, ਪਵਰਾ ਹੋਤਿ ਨਰੇਸੁ ਨਾਰੀਸੁ…ਪੇ….

‘‘ਗਨ੍ਧੁਤ੍ਤਮਦਾਯਿਕਾ ਨਾਰੀ, ਪਵਰਾ ਹੋਤਿ ਨਰੇਸੁ ਨਾਰੀਸੁ…ਪੇ….

‘‘ਗਨ੍ਧਪਞ੍ਚਙ੍ਗੁਲਿਕਂ ¶ ਅਹਮਦਾਸਿਂ,ਕਸ੍ਸਪਸ੍ਸ ਭਗਵਤੋ ਥੂਪਮ੍ਹਿ…ਪੇ….

‘‘ਭਿਕ੍ਖੂ ਚ ਅਹਂ ਭਿਕ੍ਖੁਨਿਯੋ ਚ, ਅਦ੍ਦਸਾਸਿਂ ਪਨ੍ਥਪਟਿਪਨ੍ਨੇ;

ਤੇਸਾਹਂ ਧਮ੍ਮਂ ਸੁਤ੍ਵਾਨ, ਏਕੂਪੋਸਥਂ ਉਪਵਸਿਸ੍ਸਂ.

‘‘ਉਦਕੇ ਠਿਤਾ ਉਦਕਮਦਾਸਿਂ, ਭਿਕ੍ਖੁਨੋ ਚਿਤ੍ਤੇਨ ਵਿਪ੍ਪਸਨ੍ਨੇਨ…ਪੇ….

‘‘ਸਸ੍ਸੁਞ੍ਚਾਹਂ ¶ ਸਸੁਰਞ੍ਚ, ਚਣ੍ਡਿਕੇ ਕੋਧਨੇ ਚ ਫਰੁਸੇ ਚ;

ਅਨੁਸੂਯਿਕਾ ਉਪਟ੍ਠਾਸਿਂ, ਅਪ੍ਪਮਤ੍ਤਾ ਸਕੇਨ ਸੀਲੇਨ…ਪੇ….

‘‘ਪਰਕਮ੍ਮਕਰੀ ਆਸਿਂ, ਅਤ੍ਥੇਨਾਤਨ੍ਦਿਤਾ ਦਾਸੀ;

ਅਕ੍ਕੋਧਨਾਨਤਿਮਾਨਿਨੀ, ਸਂਵਿਭਾਗਿਨੀ ਕਕਸ੍ਸ ਭਾਗਸ੍ਸ…ਪੇ….

‘‘ਖੀਰੋਦਨਂ ਅਹਮਦਾਸਿਂ, ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ;

ਏਵਂ ਕਰਿਤ੍ਵਾ ਕਮ੍ਮਂ, ਸੁਗਤਿਂ ਉਪਪਜ੍ਜ ਮੋਦਾਮਿ…ਪੇ….

‘‘ਉਚ੍ਛੁਖਣ੍ਡਿਕਂ ਅਹਮਦਾਸਿਂ…ਪੇ….

‘‘ਹਤ੍ਥਪ੍ਪਤਾਪਕਂ ਅਹਮਦਾਸਿਂ…ਪੇ….

‘‘ਪੁਪ੍ਫਕਮੁਟ੍ਠਿਂ ਅਹਮਦਾਸਿਂ…ਪੇ….

੫੦੯. ‘‘ਨਿਮ੍ਬਮੁਟ੍ਠਿਂ ¶ ਅਹਮਦਾਸਿਂ…ਪੇ….

੫੧੭. ‘‘ਅਮ੍ਬਕਞ੍ਜਿਕਂ ਅਹਮਦਾਸਿਂ…ਪੇ….

੫੨੫. ‘‘ਦੋਣਿਨਿਮ੍ਮਜ੍ਜਨਿਂ ਅਹਮਦਾਸਿਂ…ਪੇ….

੫੩੩. ‘‘ਕਾਯਬਨ੍ਧਨਂ ਅਹਮਦਾਸਿਂ…ਪੇ….

੫੪੧. ‘‘ਅਂਸਬਦ੍ਧਕਂ ਅਹਮਦਾਸਿਂ…ਪੇ….

੫੪੯. ‘‘ਆਯੋਗਪਟ੍ਟਂ ਅਹਮਦਾਸਿਂ…ਪੇ….

੬੧੩. ‘‘ਸਕ੍ਖਲਿਕਂ ਅਹਮਦਾਸਿਂ, ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ…ਪੇ….

‘‘ਤਸ੍ਸਾ ਮੇ ਪਸ੍ਸ ਵਿਮਾਨਂ, ਅਚ੍ਛਰਾ ਕਾਮਵਣ੍ਣਿਨੀਹਮਸ੍ਮਿਂ;

ਅਚ੍ਛਰਾਸਹਸ੍ਸਸ੍ਸਾਹਂ, ਪਵਰਾ ਪਸ੍ਸ ਪੁਞ੍ਞਾਨਂ ਵਿਪਾਕਂ.

੬੧੫. ‘‘ਤੇਨ ¶ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਏਵਂ ਮਹਾਸਤ੍ਤੋ ਤਾਹਿ ਦੇਵਤਾਹਿ ਕਤਸੁਚਰਿਤੇ ਬ੍ਯਾਕਤੇ ਤੁਟ੍ਠਮਾਨਸੋ ਸਮ੍ਮੋਦਨਂ ਕਰੋਨ੍ਤੋ ਅਤ੍ਤਨੋ ਚ ਸੁਚਰਿਤਚਰਣੇ ਯੁਤ੍ਤਪਯੁਤ੍ਤਤਂ ਵਿਵਟ੍ਟਜ੍ਝਾਸਯਤਞ੍ਚ ਪਵੇਦੇਨ੍ਤੋ ਆਹ –

‘‘ਸ੍ਵਾਗਤਂ ¶ ਵਤ ਮੇ ਅਜ੍ਜ, ਸੁਪ੍ਪਭਾਤਂ ਸੁਹੁਟ੍ਠਿਤਂ;

ਯਂ ਅਦ੍ਦਸਾਮਿ ਦੇਵਤਾਯੋ, ਅਚ੍ਛਰਾ ਕਾਮਵਣ੍ਣਿਨਿਯੋ.

‘‘ਇਮਾਸਾਹਂ ਧਮ੍ਮਂ ਸੁਤ੍ਵਾ, ਕਾਹਾਮਿ ਕੁਸਲਂ ਬਹੁਂ;

ਦਾਨੇਨ ਸਮਚਰਿਯਾਯ, ਸਞ੍ਞਮੇਨ ਦਮੇਨ ਚ;

ਸ੍ਵਾਹਂ ਤਤ੍ਥ ਗਮਿਸ੍ਸਾਮਿ, ਯਤ੍ਥ ਗਨ੍ਤ੍ਵਾ ਨ ਸੋਚਰੇ’’ਤਿ.

੩੩੩. ਤਤ੍ਥ ਵਤ੍ਥੁਤ੍ਤਮਦਾਯਿਕਾਤਿ ਵਤ੍ਥਾਨਂ ਉਤ੍ਤਮਂ ਸੇਟ੍ਠਂ, ਵਤ੍ਥੇਸੁ ਵਾ ਬਹੂਸੁ ਉਚ੍ਚਿਨਿਤ੍ਵਾ ਗਹਿਤਂ ਉਕ੍ਕਂਸਗਤਂ ਪਵਰਂ ਕੋਟਿਭੂਤਂ ਵਤ੍ਥਂ ਵਤ੍ਥੁਤ੍ਤਮਂ, ਤਸ੍ਸ ਦਾਯਿਕਾ. ‘‘ਪੁਪ੍ਫੁਤ੍ਤਮਦਾਯਿਕਾ’’ਤਿਆਦੀਸੁਪਿ ਏਸੇਵ ਨਯੋ. ਪਿਯਰੂਪਦਾਯਿਕਾਤਿ ਪਿਯਸਭਾਵਸ੍ਸ ਪਿਯਜਾਤਿਕਸ੍ਸ ਚ ਵਤ੍ਥੁਨੋ ਦਾਯਿਕਾ. ਮਨਾਪਨ੍ਤਿ ਮਨਵਡ੍ਢਨਕਂ. ਦਿਬ੍ਬਨ੍ਤਿ ਦਿਵਿ ਭਵਤ੍ਤਾ ਦਿਬ੍ਬਂ. ਉਪੇਚ੍ਚਾਤਿ ਉਪਗਨ੍ਤ੍ਵਾ ਚੇਤੇਤ੍ਵਾ, ‘‘ਏਦਿਸਂ ਲਭੇਯ੍ਯ’’ਨ੍ਤਿ ਪਕਪ੍ਪੇਤ੍ਵਾਤਿ ਅਤ੍ਥੋ. ਠਾਨਨ੍ਤਿ ਵਿਮਾਨਾਦਿਕਂ ਠਾਨਂ, ਇਸ੍ਸਰਿਯਂ ਵਾ. ‘‘ਮਨਾਪਾ’’ਤਿਪਿ ਪਾਠੋ, ਅਞ੍ਞੇਸਂ ਮਨਵਡ੍ਢਨਕਾ ਹੁਤ੍ਵਾਤਿ ਅਤ੍ਥੋ.

੩੩੪. ਪਸ੍ਸ ਪੁਞ੍ਞਾਨਂ ਵਿਪਾਕਨ੍ਤਿ ਵਤ੍ਥੁਤ੍ਤਮਦਾਨਸ੍ਸ ਨਾਮ ਇਦਮੀਦਿਸਂ ਫਲਂ ਪਸ੍ਸਾਤਿ ਅਤ੍ਤਨਾ ਲਦ੍ਧਸਮ੍ਪਤ੍ਤਿਂ ਸਮ੍ਭਾਵੇਨ੍ਤੀ ਵਦਤਿ.

੩੪੧. ਪੁਪ੍ਫੁਤ੍ਤਮਦਾਯਿਕਾਤਿ ਰਤਨਤ੍ਤਯਪੂਜਾਵਸੇਨ ਪੁਪ੍ਫੁਤ੍ਤਮਦਾਯਿਕਾ, ਤਥਾ ਗਨ੍ਧੁਤ੍ਤਮਦਾਯਿਕਾਤਿ ਦਟ੍ਠਬ੍ਬਾ. ਤਤ੍ਥ ¶ ਪੁਪ੍ਫੁਤ੍ਤਮਂ ਸੁਮਨਪੁਪ੍ਫਾਦਿ, ਗਨ੍ਧੁਤ੍ਤਮਂ ਚਨ੍ਦਨਗਨ੍ਧਾਦਿ, ਫਲੁਤ੍ਤਮਂ ਪਨਸਫਲਾਦਿ, ਰਸੁਤ੍ਤਮਂ ਗੋਰਸਸਪ੍ਪਿਆਦਿ ਵੇਦਿਤਬ੍ਬਂ.

੩੭੩. ਗਨ੍ਧਪਞ੍ਚਙ੍ਗੁਲਿਕਨ੍ਤਿ ਗਨ੍ਧੇਨ ਪਞ੍ਚਙ੍ਗੁਲਿਕਦਾਨਂ. ਕਸ੍ਸਪਸ੍ਸ ਭਗਵਤੋ ਥੂਪਮ੍ਹੀਤਿ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਯੋਜਨਿਕੇ ਕਨਕਥੂਪੇ.

੩੮੧. ਪਨ੍ਥਪਟਿਪਨ੍ਨੇਤਿ ¶ ਮਗ੍ਗਂ ਗਚ੍ਛਨ੍ਤੇ. ਏਕੂਪੋਸਥਨ੍ਤਿ ਏਕਦਿਵਸਂ ਉਪੋਸਥਵਾਸਂ.

੩੮੯. ਉਦਕਮਦਾਸਿਨ੍ਤਿ ਮੁਖਵਿਕ੍ਖਾਲਨਤ੍ਥਂ ਪਿਵਨਤ੍ਥਞ੍ਚ ਉਦਕਂ ਪਾਨੀਯਂ ਅਦਾਸਿਂ.

੩੯੭. ਚਣ੍ਡਿਕੇਤਿ ਚਣ੍ਡੇ. ਅਨੁਸੂਯਿਕਾਤਿ ਉਸੂਯਾ ਰਹਿਤਾ.

੪੦੫. ਪਰਕਮ੍ਮਕਰੀਤਿ ਪਰੇਸਂ ਵੇਯ੍ਯਾਵਚ੍ਚਕਾਰਿਨੀ. ਅਤ੍ਥੇਨਾਤਿ ਅਤ੍ਥਕਿਚ੍ਚੇਨ. ਸਂਵਿਭਾਗਿਨੀ ਸਕਸ੍ਸ ਭਾਗਸ੍ਸਾਤਿ ਅਤ੍ਥਿਕਾਨਂ ਅਤ੍ਤਨਾ ਪਟਿਲਦ੍ਧਭਾਗਸ੍ਸ ਸਂਵਿਭਜਨਸੀਲਾ.

੪੧੩. ਖੀਰੋਦਨਨ੍ਤਿ ¶ ਖੀਰਸਮ੍ਮਿਸ੍ਸਂ ਓਦਨਂ, ਖੀਰੇਨ ਸਦ੍ਧਿਂ ਓਦਨਂ ਵਾ.

੪੩੭. ਤਿਮ੍ਬਰੁਸਕਨ੍ਤਿ ਤਿਣ੍ਡੁਕਫਲਂ. ਤਿਪੁਸਸਦਿਸਾ ਏਕਾ ਵਲ੍ਲਿਜਾਤਿ ਤਿਮ੍ਬਰੁਸਂ, ਤਸ੍ਸ ਫਲਂ ਤਿਮ੍ਬਰੁਸਕਨ੍ਤਿ ਵਦਨ੍ਤਿ.

੪੪੫. ਕਕ੍ਕਾਰਿਕਨ੍ਤਿ ਖੁਦ੍ਦਕੇਲ਼ਾਲੁਕਂ, ਤਿਪੁਸਨ੍ਤਿ ਚ ਵਦਨ੍ਤਿ.

੪੭੭. ਹਤ੍ਥਪ੍ਪਤਾਪਕਨ੍ਤਿ ਮਨ੍ਦਾਮੁਖਿਂ.

੫੧੭. ਅਮ੍ਬਕਞ੍ਜਿਕਨ੍ਤਿ ਅਮ੍ਬਿਲਕਞ੍ਜਿਕਂ.

੫੨੫. ਦੋਣਿਨਿਮ੍ਮਜ੍ਜਨਿਨ੍ਤਿ ਸਤੇਲਂ ਤਿਲਪਿਞ੍ਞਾਕਂ.

੫੫੭. ਵਿਧੂਪਨਨ੍ਤਿ ਚਤੁਰਸ੍ਸਬੀਜਨਿਂ.

੫੬੫. ਤਾਲਵਣ੍ਟਨ੍ਤਿ ਤਾਲਪਤ੍ਤੇਹਿ ਕਤਮਣ੍ਡਲਬੀਜਨਿਂ.

੫੭੩. ਮੋਰਹਤ੍ਥਨ੍ਤਿ ਮਯੂਰਪਿਞ੍ਛੇ ਹਿ ਕਤਂ ਮਕਸਬੀਜਨਿਂ.

੬੧੭. ਸ੍ਵਾਗਤਂ ¶ ਵਤ ਮੇਤਿ ਮਯ੍ਹਂ ਇਧਾਗਮਨਂ ਸੋਭਨਂ ਵਤ ਅਹੋ ਸੁਨ੍ਦਰਂ. ਅਜ੍ਜ ਸੁਪ੍ਪਭਾਤਂ ¶ ਸੁਹੁਟ੍ਠਿਤਨ੍ਤਿ ਅਜ੍ਜ ਮਯ੍ਹਂ ਰਤ੍ਤਿਯਾ ਸੁਟ੍ਠੁ ਪਭਾਤਂ ਸਮ੍ਮਦੇਵ ਵਿਭਾਯਨਂ ਜਾਤਂ, ਸਯਨਤੋ ਉਟ੍ਠਾਨਮ੍ਪਿ ਸੁਹੁਟ੍ਠਿਤਂ ਸੁਟ੍ਠੁ ਉਟ੍ਠਿਤਂ. ਕਿਂ ਕਾਰਣਾਤਿ ਆਹ ‘‘ਯਂ ਅਦ੍ਦਸਾਮਿ ਦੇਵਤਾਯੋ’’ਤਿਆਦਿ.

੬੧੮. ਧਮ੍ਮਂ ਸੁਤ੍ਵਾਤਿ ਕਮ੍ਮਫਲਸ੍ਸ ਪਚ੍ਚਕ੍ਖਕਰਣਵਸੇਨ ਤੁਮ੍ਹੇਹਿ ਕਤਂ ਕੁਸਲਂ ਧਮ੍ਮਂ ਸੁਤ੍ਵਾ. ਕਾਹਾਮੀਤਿ ਕਰਿਸ੍ਸਾਮਿ. ਸਮਚਰਿਯਾਯਾਤਿ ਕਾਯਸਮਾਚਾਰਿਕਸ੍ਸ ਸੁਚਰਿਤਸ੍ਸ ਚਰਣੇਨ. ਸਞ੍ਞਮੇਨਾਤਿ ਸੀਲਸਂਵਰੇਨ. ਦਮੇਨਾਤਿ ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਦਮੇਨ. ਇਦਾਨਿ ਤਸ੍ਸ ਕੁਸਲਸ੍ਸ ਅਤ੍ਤਨੋ ਲੋਕਸ੍ਸ ਚ ਵਿਵਟ੍ਟੂਪਨਿਸ੍ਸਯਤਂ ਦਸ੍ਸੇਤੁਂ ‘‘ਸ੍ਵਾਹਂ ਤਤ੍ਥ ਗਮਿਸ੍ਸਾਮਿ, ਯਤ੍ਥ ਗਨ੍ਤ੍ਵਾ ਨ ਸੋਚਰੇ’’ਤਿ ਵੁਤ੍ਤਂ.

ਏਵਮਯਂ ਯਦਿਪਿ ਵਤ੍ਥੁਤ੍ਤਮਦਾਯਿਕਾਵਿਮਾਨਾਦਿਵਸੇਨ ਛਤ੍ਤਿਂਸਵਿਮਾਨਸਙ੍ਗਹਾ ਦੇਸਨਾ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਵਿਯ ਗੁਤ੍ਤਿਲਾਚਰਿਯਸ੍ਸਾਪਿ ਵਿਭਾਵਨਵਸੇਨ ਪਵਤ੍ਤਾਤਿ ‘‘ਗੁਤ੍ਤਿਲਵਿਮਾਨ’’ਨ੍ਤ੍ਵੇਵ ਸਙ੍ਗਹਂ ਆਰੁਲ਼੍ਹਾ, ਵਿਮਾਨਾਨਿ ਪਨ ਇਤ੍ਥਿਪਟਿਬਦ੍ਧਾਨੀਤਿ ਇਤ੍ਥਿਵਿਮਾਨੇਯੇਵ ਸਙ੍ਗਹਿਤਾਨਿ. ਤਾ ਪਨ ਇਤ੍ਥਿਯੋ ¶ ਕਸ੍ਸਪਸ੍ਸ ਦਸਬਲਸ੍ਸ ਕਾਲੇ ਯਥਾਵੁਤ੍ਤਧਮ੍ਮਚਰਣੇ ਅਪਰਾਪਰੁਪ੍ਪਨ੍ਨਚੇਤਨਾਵਸੇਨ ਦੁਤਿਯਤ੍ਤਭਾਵਤੋ ਪਟ੍ਠਾਯ ਏਕਂ ਬੁਦ੍ਧਨ੍ਤਰਂ ਦੇਵਲੋਕੇ ਏਵ ਸਂਸਰਨ੍ਤਿਯੋ ਅਮ੍ਹਾਕਮ੍ਪਿ ਭਗਵਤੋ ਕਾਲੇ ਤਾਵਤਿਂਸਭਵਨੇਯੇਵ ਨਿਬ੍ਬਤ੍ਤਾ, ਆਯਸ੍ਮਤਾ ਮਹਾਮੋਗ੍ਗਲ੍ਲਾਨੇਨ ਪੁਚ੍ਛਿਤਾ ਕਮ੍ਮਸਰਿਕ੍ਖਤਾਯ ਗੁਤ੍ਤਿਲਾਚਰਿਯੇਨ ਪੁਚ੍ਛਿਤਕਾਲੇ ਵਿਯ ਬ੍ਯਾਕਰਿਂਸੂਤਿ ਦਟ੍ਠਬ੍ਬਾ.

ਗੁਤ੍ਤਿਲਵਿਮਾਨਵਣ੍ਣਨਾ ਨਿਟ੍ਠਿਤਾ.

ਦਦ੍ਦਲ੍ਲਮਾਨਾ ¶ ਵਣ੍ਣੇਨਾਤਿ ਦਦ੍ਦਲ੍ਲਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਚ ਸਮਯੇਨ ਨਾਲਕਗਾਮਕੇ ਆਯਸ੍ਮਤੋ ਰੇਵਤਤ੍ਥੇਰਸ੍ਸ ਉਪਟ੍ਠਾਕਸ੍ਸ ਅਞ੍ਞਤਰਸ੍ਸ ਕੁਟੁਮ੍ਬਿਕਸ੍ਸ ਦ੍ਵੇ ਧੀਤਰੋ ਅਹੇਸੁਂ, ਏਕਾ ਭਦ੍ਦਾ ਨਾਮ, ਇਤਰਾ ਸੁਭਦ੍ਦਾ ਨਾਮ. ਤਾਸੁ ਭਦ੍ਦਾ ਪਤਿਕੁਲਂ ਗਤਾ ਸਦ੍ਧਾ ਪਸਨ੍ਨਾ ਬੁਦ੍ਧਿਸਮ੍ਪਨ੍ਨਾ ਵਞ੍ਝਾ ਚ ਅਹੋਸਿ. ਸਾ ਸਾਮਿਕਂ ਆਹ ‘‘ਮਮ ਕਨਿਟ੍ਠਾ ਸੁਭਦ੍ਦਾ ਨਾਮ ਅਤ੍ਥਿ, ਤਂ ਆਨੇਹਿ, ਸਚਸ੍ਸਾ ਪੁਤ੍ਤੋ ਭਵੇਯ੍ਯ, ਸੋ ਮਮਪਿ ਪੁਤ੍ਤੋ ਸਿਯਾ, ਅਯਞ੍ਚ ਕੁਲਵਂਸੋ ਨ ਨਸ੍ਸੇਯ੍ਯਾ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਥਾ ਅਕਾਸਿ.

ਅਥ ਭਦ੍ਦਾ ਸੁਭਦ੍ਦਂ ਓਵਦਿ ‘‘ਸੁਭਦ੍ਦੇ, ਦਾਨਸਂਵਿਭਾਗਰਤਾ ਧਮ੍ਮਚਰਿਯਾਯ ਅਪ੍ਪਮਤ੍ਤਾ ਹੋਹਿ, ਏਵਂ ਤੇ ਦਿਟ੍ਠਧਮ੍ਮਿਕੋ ਸਮ੍ਪਰਾਯਿਕੋ ਚ ਅਤ੍ਥੋ ਹਤ੍ਥਗਤੋ ਏਵ ਹੋਤੀ’’ਤਿ. ਸਾ ਤਸ੍ਸਾ ਓਵਾਦੇ ਠਤ੍ਵਾ ¶ ਵੁਤ੍ਤਨਯੇਨ ਪਟਿਪਜ੍ਜਮਾਨਾ ਏਕਦਿਵਸਂ ਆਯਸ੍ਮਨ੍ਤਂ ਰੇਵਤਤ੍ਥੇਰਂ ਅਤ੍ਤਟ੍ਠਮਂ ਨਿਮਨ੍ਤੇਸਿ. ਥੇਰੋ ਸੁਭਦ੍ਦਾਯ ਪੁਞ੍ਞੂਪਚਯਂ ਆਕਙ੍ਖਨ੍ਤੋ ਸਙ੍ਘੁਦ੍ਦੇਸਵਸੇਨ ਸਤ੍ਤ ਭਿਕ੍ਖੂ ਗਹੇਤ੍ਵਾ ਤਸ੍ਸਾ ਗੇਹਂ ਅਗਮਾਸਿ. ਸਾ ਪਸਨ੍ਨਚਿਤ੍ਤਾ ਆਯਸ੍ਮਨ੍ਤਂ ਰੇਵਤਤ੍ਥੇਰਂ ਤੇ ਚ ਭਿਕ੍ਖੂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਸਿ, ਥੇਰੋ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਨਿਮ੍ਮਾਨਰਤੀਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਿ. ਭਦ੍ਦਾ ਪਨ ਪੁਗ੍ਗਲੇਸੁ ਦਾਨਾਨਿ ਦਤ੍ਵਾ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ.

ਅਥ ਸੁਭਦ੍ਦਾ ਅਤ੍ਤਨੋ ਸਮ੍ਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ‘‘ਕੇਨ ਨੁ ਖੋ ਅਹਂ ਪੁਞ੍ਞੇਨ ਇਧੂਪਪਨ੍ਨਾ’’ਤਿ ਆਵਜ੍ਜੇਨ੍ਤੀ ‘‘ਭਦ੍ਦਾਯ ਓਵਾਦੇ ਠਤ੍ਵਾ ਸਙ੍ਘਗਤਾਯ ਦਕ੍ਖਿਣਾਯ ¶ ਇਮਂ ਸਮ੍ਪਤ੍ਤਿਂ ਸਮ੍ਪਤ੍ਤਾ, ਭਦ੍ਦਾ ਨੁ ਖੋ ਕਹਂ ਨਿਬ੍ਬਤ੍ਤਾ’’ਤਿ ਓਲੋਕੇਨ੍ਤੀ ਤਂ ਸਕ੍ਕਸ੍ਸ ਪਰਿਚਾਰਿਕਾਭਾਵੇਨ ਨਿਬ੍ਬਤ੍ਤਂ ਦਿਸ੍ਵਾ ਅਨੁਕਮ੍ਪਮਾਨਾ ਤਸ੍ਸਾ ਵਿਮਾਨਂ ਪਾਵਿਸਿ. ਅਥ ਨਂ ਭਦ੍ਦਾ –

‘‘ਦਦ੍ਦਲ੍ਲਮਾਨਾ ¶ ਵਣ੍ਣੇਨ, ਯਸਸਾ ਚ ਯਸਸ੍ਸਿਨੀ;

ਸਬ੍ਬੇ ਦੇਵੇ ਤਾਵਤਿਂਸੇ, ਵਣ੍ਣੇਨ ਅਤਿਰੋਚਸਿ.

‘‘ਦਸ੍ਸਨਂ ਨਾਭਿਜਾਨਾਮਿ, ਇਦਂ ਪਠਮਦਸ੍ਸਨਂ;

ਕਸ੍ਮਾ ਕਾਯਾ ਨੁ ਆਗਮ੍ਮ, ਨਾਮੇਨ ਭਾਸਸੇ ਮਮ’’ਨ੍ਤਿ. –

ਦ੍ਵੀਹਿ ਗਾਥਾਹਿ ਪੁਚ੍ਛਿ. ਸਾਪਿ ਤਸ੍ਸਾ –

‘‘ਅਹਂ ਭਦ੍ਦੇ ਸੁਭਦ੍ਦਾਸਿਂ, ਪੁਬ੍ਬੇ ਮਾਨੁਸਕੇ ਭਵੇ;

ਸਹਭਰਿਯਾ ਚ ਤੇ ਆਸਿਂ, ਭਗਿਨੀ ਚ ਕਨਿਟ੍ਠਿਕਾ.

‘‘ਸਾ ਅਹਂ ਕਾਯਸ੍ਸ ਭੇਦਾ, ਵਿਪ੍ਪਮੁਤ੍ਤਾ ਤਤੋ ਚੁਤਾ;

ਨਿਮ੍ਮਾਨਰਤੀਨਂ ਦੇਵਾਨਂ, ਉਪਪਨ੍ਨਾ ਸਹਬ੍ਯਤ’’ਨ੍ਤਿ. – ਦ੍ਵੀਹਿ ਗਾਥਾਹਿ ਬ੍ਯਾਕਾਸਿ;

੬੧੯-੨੦. ਤਤ੍ਥ ਵਣ੍ਣੇਨਾਤਿ ਵਣ੍ਣਾਦਿਸਮ੍ਪਤ੍ਤਿਯਾ. ਦਸ੍ਸਨਂ ਨਾਭਿਜਾਨਾਮੀਤਿ ਇਤੋ ਪੁਬ੍ਬੇ ਤਵ ਦਸ੍ਸਨਂ ਨਾਭਿਜਾਨਾਮਿ, ਤ੍ਵਂ ਮਯਾ ਨ ਦਿਟ੍ਠਪੁਬ੍ਬਾਤਿ ਅਤ੍ਥੋ. ਤੇਨਾਹ ‘‘ਇਦਂ ਪਠਮਦਸ੍ਸਨ’’ਨ੍ਤਿ. ਕਸ੍ਮਾ ਕਾਯਾ ਨੁ ਆਗਮ੍ਮ, ਨਾਮੇਨ ਭਾਸਸੇ ਮਮਨ੍ਤਿ ਕਤਰਦੇਵਨਿਕਾਯਤੋ ਆਗਨ੍ਤ੍ਵਾ ‘‘ਭਦ੍ਦੇ’’ਤਿ ਨਾਮੇਨ ਮਂ ਆਲਪਸਿ.

੬੨੧. ਅਹਂ ¶ ਭਦ੍ਦੇਤਿ ਏਤ੍ਥ ਭਦ੍ਦੇਤਿ ਆਲਪਨਂ. ਸੁਭਦ੍ਦਾਸਿਨ੍ਤਿ ਅਹਂ ਸੁਭਦ੍ਦਾ ਨਾਮ ਤਵ ਭਗਿਨੀ ਕਨਿਟ੍ਠਿਕਾ ਆਸਿਂ ਅਹੋਸਿਂ, ਤਤ੍ਥ ਪੁਬ੍ਬੇ ਮਾਨੁਸਕੇ ਭਵੇ ਸਹਭਰਿਯਾ ਸਮਾਨਭਰਿਯਾ ਤੇ ਤਯਾ ਏਕਸ੍ਸੇਵ ਭਰਿਯਾ, ਤਵ ਪਤਿਨੋ ਏਵ ਭਰਿਯਾ, ਆਸਿਨ੍ਤਿ ਅਤ੍ਥੋ. ਪੁਨ ਭਦ੍ਦਾ –

‘‘ਪਹੂਤਕਤਕਲ੍ਯਾਣਾ, ਤੇ ਦੇਵੇ ਯਨ੍ਤਿ ਪਾਣਿਨੋ;

ਯੇਸਂ ਤ੍ਵਂ ਕਿਤ੍ਤਯਿਸ੍ਸਸਿ, ਸੁਭਦ੍ਦੇ ਜਾਤਿਮਤ੍ਤਨੋ.

‘‘ਅਥ ਤ੍ਵਂ ਕੇਨ ਵਣ੍ਣੇਨ, ਕੇਨ ਵਾ ਅਨੁਸਾਸਿਤਾ;

ਕੀਦਿਸੇਨੇਵ ਦਾਨੇਨ, ਸੁਬ੍ਬਤੇਨ ਯਸਸ੍ਸਿਨੀ.

‘‘ਯਸਂ ¶ ¶ ਏਤਾਦਿਸਂ ਪਤ੍ਤਾ, ਵਿਸੇਸਂ ਵਿਪੁਲਮਜ੍ਝਗਾ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਤੀਹਿ ਗਾਥਾਹਿ ਪੁਚ੍ਛਿ. ਪੁਨ ਸੁਭਦ੍ਦਾ –

‘‘ਅਟ੍ਠੇਵ ਪਿਣ੍ਡਪਾਤਾਨਿ, ਯਂ ਦਾਨਂ ਅਦਦਂ ਪੁਰੇ;

ਦਕ੍ਖਿਣੇਯ੍ਯਸ੍ਸ ਸਙ੍ਘਸ੍ਸ, ਪਸਨ੍ਨਾ ਸੇਹਿ ਪਾਣਿਭਿ.

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

੬੨੩. ਤਤ੍ਥ ਪਹੂਤਕਤਕਲ੍ਯਾਣਾ ਤੇ ਦੇਵੇ ਯਨ੍ਤੀਤਿ ਪਹੂਤਕਤਕਲ੍ਯਾਣਾ ਮਹਾਪੁਞ੍ਞਾ ਤੇ ਨਿਮ੍ਮਾਨਰਤਿਨੋ ਦੇਵੇ ਯਨ੍ਤਿ ਉਪ੍ਪਜ੍ਜਨਵਸੇਨ ਗਚ੍ਛਨ੍ਤਿ ਪਾਣਿਨੋ ਸਤ੍ਤਾ, ਯੇਸਂ ਨਿਮ੍ਮਾਨਰਤੀਨਂ ਦੇਵਾਨਂ ਅਨ੍ਤਰੇ ਤ੍ਵਂ ਅਤ੍ਤਨੋ ਜਾਤਿਂ ਕਿਤ੍ਤਯਿਸ੍ਸਸਿ ਕਥੇਸੀਤਿ ਯੋਜਨਾ.

੬੨੪. ਕੇਨ ਵਣ੍ਣੇਨਾਤਿ ਕੇਨ ਕਾਰਣੇਨ. ਕੀਦਿਸੇਨੇਵਾਤਿ ਏਵਸਦ੍ਦੋ ਸਮੁਚ੍ਚਯਤ੍ਥੋ, ਕੀਦਿਸੇਨ ਚਾਤਿ ਅਤ੍ਥੋ, ਅਯਮੇਵ ਵਾ ਪਾਠੋ. ਸੁਬ੍ਬਤੇਨਾਤਿ ਸੁਨ੍ਦਰੇਨ ਵਤੇਨ, ਸੁਵਿਸੁਦ੍ਧੇਨ ਸੀਲੇਨਾਤਿ ਅਤ੍ਥੋ.

੬੨੬. ਅਟ੍ਠੇਵ ¶ ਪਿਣ੍ਡਪਾਤਾਨੀਤਿ ਅਟ੍ਠਨ੍ਨਂ ਭਿਕ੍ਖੂਨਂ ਦਿਨ੍ਨਪਿਣ੍ਡਪਾਤੇ ਸਨ੍ਧਾਯ ਵਦਤਿ. ਅਦਦਨ੍ਤਿ ਅਦਾਸਿਂ.

ਏਵਂ ਸੁਭਦ੍ਦਾਯ ਕਥਿਤੇ ਪੁਨ ਭਦ੍ਦਾ –

‘‘ਅਹਂ ਤਯਾ ਬਹੁਤਰੇ ਭਿਕ੍ਖੂ, ਸਞ੍ਞਤੇ ਬ੍ਰਹ੍ਮਚਾਰਯੋ;

ਤਪ੍ਪੇਸਿਂ ਅਨ੍ਨਪਾਨੇਨ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਤਯਾ ਬਹੁਤਰਂ ਦਤ੍ਵਾ, ਹੀਨਕਾਯੂਪਗਾ ਅਹਂ;

ਕਥਂ ਤ੍ਵਂ ਅਪ੍ਪਤਰਂ ਦਤ੍ਵਾ, ਵਿਸੇਸਂ ਵਿਪੁਲਮਜ੍ਝਗਾ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਪੁਚ੍ਛਿ. ਤਤ੍ਥ ¶ ਤਯਾਤਿ ਨਿਸ੍ਸਕ੍ਕੇ ਕਰਣਵਚਨਂ. ਪੁਨ ਸੁਭਦ੍ਦਾ –

‘‘ਮਨੋਭਾਵਨੀਯੋ ¶ ਭਿਕ੍ਖੁ, ਸਨ੍ਦਿਟ੍ਠੋ ਮੇ ਪੁਰੇ ਅਹੁ;

ਤਾਹਂ ਭਤ੍ਤੇਨ ਨਿਮਨ੍ਤੇਸਿਂ, ਰੇਵਤਂ ਅਤ੍ਤਨਟ੍ਠਮਂ.

‘‘ਸੋ ਮੇ ਅਤ੍ਥਪੁਰੇਕ੍ਖਾਰੋ, ਅਨੁਕਮ੍ਪਾਯ ਰੇਵਤੋ;

ਸਙ੍ਘੇ ਦੇਹੀਤਿ ਮਂਵੋਚ, ਤਸ੍ਸਾਹਂ ਵਚਨਂ ਕਰਿਂ.

‘‘ਸਾ ਦਕ੍ਖਿਣਾ ਸਙ੍ਘਗਤਾ, ਅਪ੍ਪਮੇਯ੍ਯੇ ਪਤਿਟ੍ਠਿਤਾ;

ਪੁਗ੍ਗਲੇਸੁ ਤਯਾ ਦਿਨ੍ਨਂ, ਨ ਤਂ ਤਵ ਮਹਪ੍ਫਲ’’ਨ੍ਤਿ. –

੬੩੧. ਤਤ੍ਥ ਮਨੋਭਾਵਨੀਯੋਤਿ ਮਨਵਡ੍ਢਨਕੋ ਉਲ਼ਾਰਗੁਣਤਾਯ ਸਮ੍ਭਾਵਨੀਯੋ. ਸਨ੍ਦਿਟ੍ਠੋਤਿ ਨਿਮਨ੍ਤਨਵਸੇਨ ਬੋਧਿਤੋ ਕਥਿਤੋ. ਤੇਨਾਹ ‘‘ਤਾਹਂ ਭਤ੍ਤੇਨ ਨਿਮਨ੍ਤੇਸਿਂ, ਰੇਵਤਂ ਅਤ੍ਤਨਟ੍ਠਮ’’ਨ੍ਤਿ, ਤਂ ਮਨੋਭਾਵਨੀਯਂ ਅਯ੍ਯਂ ਰੇਵਤਂ ਅਤ੍ਤਨਟ੍ਠਮਂ ਭਤ੍ਤੇਨ ਅਹਂ ਨਿਮਨ੍ਤੇਸਿਂ.

੬੩੨-੩. ਸੋ ਮੇ ਅਤ੍ਥਪੁਰੇਕ੍ਖਾਰੋਤਿ ਸੋ ਅਯ੍ਯੋ ਰੇਵਤੋ ਦਾਨਸ੍ਸ ਮਹਪ੍ਫਲਭਾਵਕਰਣੇਨ ਮਮ ¶ ਅਤ੍ਥਪੁਰੇਕ੍ਖਾਰੋ ਹਿਤੇਸੀ. ਸਙ੍ਘੇ ਦੇਹੀਤਿ ਮਂਵੋਚਾਤਿ ‘‘ਯਦਿ ਤ੍ਵਂ ਸੁਭਦ੍ਦੇ ਅਟ੍ਠਨ੍ਨਂ ਭਿਕ੍ਖੂਨਂ ਦਾਤੁਕਾਮਾ, ਯਸ੍ਮਾ ਪੁਗ੍ਗਲਗਤਾਯ ਦਕ੍ਖਿਣਾਯ ਸਙ੍ਘਗਤਾ ਏਵ ਦਕ੍ਖਿਣਾ ਮਹਪ੍ਫਲਤਰਾ, ਤਸ੍ਮਾ ਸਙ੍ਘੇ ਦੇਹਿ, ਸਙ੍ਘਂ ਉਦ੍ਦਿਸ੍ਸ ਦਾਨਂ ਦੇਹੀ’’ਤਿ ਮਂ ਅਭਾਸਿ. ਤਨ੍ਤਿ ਤਂ ਦਾਨਂ.

ਏਵਂ ਸੁਭਦ੍ਦਾਯ ਵੁਤ੍ਤੇ ਭਦ੍ਦਾ ਤਮਤ੍ਥਂ ਸਮ੍ਪਟਿਚ੍ਛਨ੍ਤੀ ਉਤ੍ਤਰਿ ਚ ਤਥਾ ਪਟਿਪਜ੍ਜਿਤੁਕਾਮਾ –

‘‘ਇਦਾਨੇਵਾਹਂ ਜਾਨਾਮਿ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ;

ਸਾਹਂ ਗਨ੍ਤ੍ਵਾ ਮਨੁਸ੍ਸਤ੍ਤਂ, ਵਦਞ੍ਞੂ ਵੀਤਮਚ੍ਛਰਾ;

ਸਙ੍ਘੇ ਦਾਨਾਨਿ ਦਸ੍ਸਾਮਿ, ਅਪ੍ਪਮਤ੍ਤਾ ਪੁਨਪ੍ਪੁਨ’’ਨ੍ਤਿ. –

ਗਾਥਮਾਹ. ਸੁਭਦ੍ਦਾ ਪਨ ਅਤ੍ਤਨੋ ਦੇਵਲੋਕਮੇਵ ਗਤਾ. ਅਥ ¶ ਸਕ੍ਕੋ ਦੇਵਾਨਮਿਨ੍ਦੋ ਸਬ੍ਬੇ ਦੇਵੇ ਤਾਵਤਿਂਸੇ ਅਤ੍ਤਨੋ ਸਰੀਰੋਭਾਸੇਨ ਅਭਿਭੁਯ੍ਯ ਵਿਰੋਚਮਾਨਂ ਸੁਭਦ੍ਦਂ ਦੇਵਧੀਤਰਂ ਦਿਸ੍ਵਾ ਤਞ੍ਚ ਤਾਸਂ ਕਥਾਸਲ੍ਲਾਪਂ ਸੁਤ੍ਵਾ ਤਾਵਦੇਵ ਚ ਸੁਭਦ੍ਦਾਯ ਅਨ੍ਤਰਹਿਤਾਯ ਤਂ ‘‘ਅਯਂ ਨਾਮਾ’’ਤਿ ਅਜਾਨਨ੍ਤੋ –

‘‘ਕਾ ¶ ਏਸਾ ਦੇਵਤਾ ਭਦ੍ਦੇ, ਤਯਾ ਮਨ੍ਤਯਤੇ ਸਹ;

ਸਬ੍ਬੇ ਦੇਵੇ ਤਾਵਤਿਂਸੇ, ਵਣ੍ਣੇਨ ਅਤਿਰੋਚਤੀ’’ਤਿ. –

‘‘ਮਨੁਸ੍ਸਭੂਤਾ ਦੇਵਿਨ੍ਦ, ਪੁਬ੍ਬੇ ਮਾਨੁਸਕੇ ਭਵੇ;

ਸਹਭਰਿਯਾ ਚ ਮੇ ਆਸਿ, ਭਗਿਨੀ ਚ ਕਨਿਟ੍ਠਿਕਾ,

ਸਙ੍ਘੇ ਦਾਨਾਨਿ ਦਤ੍ਵਾਨ, ਕਤਪੁਞ੍ਞਾ ਵਿਰੋਚਤੀ’’ਤਿ. –

ਕਥੇਸਿ. ਅਥ ਸਕ੍ਕੋ ਤਸ੍ਸਾ ਸਙ੍ਘਗਤਾਯ ਦਕ੍ਖਿਣਾਯ ਮਹਪ੍ਫਲਭਾਵਂ ਦਸ੍ਸੇਨ੍ਤੋ ਧਮ੍ਮਂ ਕਥੇਸਿ. ਤੇਨ ਵੁਤ੍ਤਂ –

‘‘ਧਮ੍ਮੇਨ ਪੁਬ੍ਬੇ ਭਗਿਨੀ, ਤਯਾ ਭਦ੍ਦੇ ਵਿਰੋਚਤਿ;

ਯਂ ਸਙ੍ਘਮ੍ਹਿ ਅਪ੍ਪਮੇਯ੍ਯੇ, ਪਤਿਟ੍ਠਾਪੇਸਿ ਦਕ੍ਖਿਣਂ.

‘‘ਪੁਚ੍ਛਿਤੋ ¶ ਹਿ ਮਯਾ ਬੁਦ੍ਧੋ, ਗਿਜ੍ਝਕੂਟਮ੍ਹਿ ਪਬ੍ਬਤੇ;

ਵਿਪਾਕਂ ਸਂਵਿਭਾਗਸ੍ਸ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

‘‘ਤਂ ਮੇ ਬੁਦ੍ਧੋ ਵਿਯਾਕਾਸਿ, ਜਾਨਂ ਕਮ੍ਮਫਲਂ ਸਕਂ;

ਵਿਪਾਕਂ ਸਂਵਿਭਾਗਸ੍ਸ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

‘‘ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ.

‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ.

‘‘ਏਸੋ ¶ ਹਿ ਸਙ੍ਘੋ ਵਿਪੁਲੋ ਮਹਗ੍ਗਤੋ, ਏਸਪ੍ਪਮੇਯ੍ਯੋ ਉਦਧੀਵ ਸਾਗਰੋ;

ਏਤੇ ਹਿ ਸੇਟ੍ਠਾ ਨਰਵੀਰਸਾਵਕਾ, ਪਭਙ੍ਕਰਾ ਧਮ੍ਮਮੁਦੀਰਯਨ੍ਤਿ.

‘‘ਤੇਸਂ ¶ ਸੁਦਿਨ੍ਨਂ ਸੁਹੁਤਂ ਸੁਯਿਟ੍ਠਂ, ਯੇ ਸਙ੍ਘਮੁਦ੍ਦਿਸ੍ਸ ਦਦਨ੍ਤਿ ਦਾਨਂ;

ਸਾ ਦਕ੍ਖਿਣਾ ਸਙ੍ਘਗਤਾ ਪਤਿਟ੍ਠਿਤਾ, ਮਹਪ੍ਫਲਾ ਲੋਕਵਿਦੂਨ ਵਣ੍ਣਿਤਾ.

‘‘ਏਤਾਦਿਸਂ ਯਞ੍ਞਮਨੁਸ੍ਸਰਨ੍ਤਾ, ਯੇ ਵੇਦਜਾਤਾ ਵਿਚਰਨ੍ਤਿ ਲੋਕੇ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤਾ ਸਗ੍ਗਮੁਪੇਨ੍ਤਿ ਠਾਨ’’ਨ੍ਤਿ.

੬੩੭. ਤਤ੍ਥ ਧਮ੍ਮੇਨਾਤਿ ਕਾਰਣੇਨ ਞਾਯੇਨ ਵਾ. ਤਯਾਤਿ ਨਿਸ੍ਸਕ੍ਕੇ ਕਰਣਵਚਨਂ. ਇਦਾਨਿ ਤਂ ‘‘ਧਮ੍ਮੇਨਾ’’ਤਿ ਵੁਤ੍ਤਕਾਰਣਂ ਦਸ੍ਸੇਤੁਂ ਯਂ ਸਙ੍ਘਮ੍ਹਿ ਅਪ੍ਪਮੇਯ੍ਯੇ, ਪਤਿਟ੍ਠਾਪੇਸਿ ਦਕ੍ਖਿਣ’’ਨ੍ਤਿ ਵੁਤ੍ਤਂ. ਅਪ੍ਪਮੇਯ੍ਯੇਤਿ ਗੁਣਾਨੁਭਾਵਸ੍ਸ ਅਤ੍ਤਨਿ ਕਤਾਨਂ ਕਾਰਾਨਂ ਫਲਵਿਸੇਸਸ੍ਸ ਚ ਵਸੇਨ ਪਮਿਨਿਤੁਂ ਅਸਕ੍ਕੁਣੇਯ੍ਯੇ.

੬੩੮-੯. ਅਯਞ੍ਚ ਅਤ੍ਥੋ ਭਗਵਤੋ ਸਮ੍ਮੁਖਾ ਚ ਸੁਤੋ, ਸਮ੍ਮੁਖਾ ਚ ਪਟਿਗ੍ਗਹਿਤੋਤਿ ਦਸ੍ਸੇਨ੍ਤੋ ¶ ‘‘ਪੁਚ੍ਛਿਤੋ’’ਤਿਆਦਿਮਾਹ. ਤਤ੍ਥ ਯਜਮਾਨਾਨਨ੍ਤਿ ਦਦਨ੍ਤਾਨਂ. ਪੁਞ੍ਞਪੇਕ੍ਖਾਨ ਪਾਣਿਨਨ੍ਤਿ ਅਨੁਨਾਸਿਕਲੋਪਂ ਕਤ੍ਵਾ ਨਿਦ੍ਦੇਸੋ, ਪੁਞ੍ਞਫਲਂ ਆਕਙ੍ਖਨ੍ਤਾਨਂ ਸਤ੍ਤਾਨਂ. ਓਪਧਿਕਨ੍ਤਿ ਉਪਧਿ ਨਾਮ ਖਨ੍ਧਾ, ਉਪਧਿਸ੍ਸ ਕਰਣਸੀਲਂ, ਉਪਧਿਪਯੋਜਨਨ੍ਤਿ ਵਾ ਓਪਧਿਕਂ, ਅਤ੍ਤਭਾਵਜਨਕਂ ਪਟਿਸਨ੍ਧਿਪਵਤ੍ਤਿਵਿਪਾਕਦਾਯਕਂ.

੬੪੦. ਜਾਨਂ ਕਮ੍ਮਫਲਂ ਸਕਨ੍ਤਿ ਸਤ੍ਤਾਨਂ ਸਕਂ ਸਕਂ ਯਥਾਸਕਂ ਪੁਞ੍ਞਂ ਪੁਞ੍ਞਫਲਞ੍ਚ ਹਤ੍ਥਤਲੇ ਆਮਲਕਂ ਵਿਯ ਜਾਨਨ੍ਤੋ. ਸਕਨ੍ਤਿ ਵਾ ਯਕਾਰਸ੍ਸ ਕਕਾਰਂ ਕਤ੍ਵਾ ਵੁਤ੍ਤਂ, ਸਯਂ ਅਤ੍ਤਨਾਤਿ ਅਤ੍ਥੋ.

੬੪੧. ਪਟਿਪਨ੍ਨਾਤਿ ਪਟਿਪਜ੍ਜਮਾਨਾ, ਮਗ੍ਗਟ੍ਠਾਤਿ ਅਤ੍ਥੋ. ਉਜੁਭੂਤੋਤਿ ¶ ਉਜੁਪਟਿਪਤ੍ਤਿਯਾ ਉਜੁਭਾਵਂ ਪਤ੍ਤੋ ਦਕ੍ਖਿਣੇਯ੍ਯੋ ਜਾਤੋ. ਪਞ੍ਞਾਸੀਲਸਮਾਹਿਤੋਤਿ ਪਞ੍ਞਾਯ ਸੀਲੇਨ ਚ ਸਮਾਹਿਤੋ, ਦਿਟ੍ਠਿਸੀਲਸਮ੍ਪਨ੍ਨੋ ਅਰਿਯਾਯ ਦਿਟ੍ਠਿਯਾ ਅਰਿਯੇਨ ਸੀਲੇਨ ਚ ਸਮਨ੍ਨਾਗਤੋ. ਤੇਨਾਪਿਸ੍ਸ ਪਰਮਤ੍ਥਸਙ੍ਘਭਾਵਮੇਵ ਵਿਭਾਵੇਤਿ. ਦਿਟ੍ਠਿਸੀਲਸਾਮਞ੍ਞੇਨ ਸਙ੍ਘਟਿਤਤ੍ਤਾ ਹਿ ਸਙ੍ਘੋ ¶ . ਅਥ ਵਾ ਸਮਾਹਿਤਂ ਸਮਾਧਿ, ਪਞ੍ਞਾ ਸੀਲਂ ਸਮਾਹਿਤਞ੍ਚ ਅਸ੍ਸ ਅਤ੍ਥੀਤਿ ਪਞ੍ਞਾਸੀਲਸਮਾਹਿਤੋ. ਤੇਨਸ੍ਸ ਸੀਲਾਦਿਧਮ੍ਮਕ੍ਖਨ੍ਧਤ੍ਤਯਸਮ੍ਪਨ੍ਨਤਾਯ ਅਗ੍ਗਦਕ੍ਖਿਣੇਯ੍ਯਭਾਵਂ ਵਿਭਾਵੇਤਿ.

੬੪੩. ਵਿਪੁਲੋ ਮਹਗ੍ਗਤੋਤਿ ਗੁਣੇਹਿ ਮਹਤ੍ਤਂ ਗਤੋਤਿ ਮਹਗ੍ਗਤੋ, ਤਤੋ ਏਵ ਅਤ੍ਤਨਿ ਕਤਾਨਂ ਕਾਰਾਨਂ ਫਲਵੇਪੁਲ੍ਲਹੇਤੁਤਾਯ ਵਿਪੁਲੋ. ਉਦਧੀਵ ਸਾਗਰੋਤਿ ਯਥਾ ਉਦਕਂ ਏਤ੍ਥ ਧੀਯਤੀਤਿ ‘‘ਉਦਧੀ’’ਤਿ ਲਦ੍ਧਨਾਮੋ ਸਾਗਰੋ, ‘‘ਏਤ੍ਤਕਾਨਿ ਉਦਕਾਲ਼੍ਹਕਾਨੀ’’ਤਿਆਦਿਨਾ ਉਦਕਤੋ ਅਪ੍ਪਮੇਯ੍ਯੋ, ਏਵਮੇਸ ਗੁਣਤੋਤਿ ਅਤ੍ਥੋ. ਏਤੇ ਹੀਤਿ ਹਿ-ਸਦ੍ਦੋ ਅਵਧਾਰਣੇ ਨਿਪਾਤੋ, ਏਤੇ ਏਵ ਸੇਟ੍ਠਾਤਿ ਅਤ੍ਥੋ. ਵੁਤ੍ਤਞ੍ਹੇਤਂ –

‘‘ਯਾਵਤਾ, ਭਿਕ੍ਖਵੇ, ਸਙ੍ਘਾ ਵਾ ਗਣਾ ਵਾ, ਤਥਾਗਤਸਾਵਕਸਙ੍ਘੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿ (ਇਤਿਵੁ. ੯੦; ਅ. ਨਿ. ੪.੩੪; ੫.੩੨).

ਨਰਵੀਰਸਾਵਕਾਤਿ ਨਰੇਸੁ ਵੀਰਿਯਸਮ੍ਪਨ੍ਨਸ੍ਸ ਨਰਸ੍ਸ ਸਾਵਕਾ. ਪਭਙ੍ਕਰਾਤਿ ਲੋਕਸ੍ਸ ਞਾਣਾਲੋਕਕਰਾ. ਧਮ੍ਮਮੁਦੀਰਯਨ੍ਤੀਤਿ ਧਮ੍ਮਂ ਉਦ੍ਦਿਸਨ੍ਤਿ. ਕਥਂ? ਧਮ੍ਮਸਾਮਿਨਾ ਹਿ ਧਮ੍ਮਪਜ੍ਜੋਤੋ ਅਰਿਯਸਙ੍ਘੇ ਠਪਿਤੋ.

੬੪੪. ਯੇ ਸਙ੍ਘਮੁਦ੍ਦਿਸ੍ਸ ਦਦਨ੍ਤਿ ਦਾਨਨ੍ਤਿ ਯੇ ਸਤ੍ਤਾ ਅਰਿਯਸਙ੍ਘਂ ਉਦ੍ਦਿਸ੍ਸ ਸਮ੍ਮੁਤਿਸਙ੍ਘੇ ਅਨ੍ਤਮਸੋ ¶ ਗੋਤ੍ਰਭੁਪੁਗ੍ਗਲੇਸੁਪਿ ਦਾਨਂ ਦਦਨ੍ਤਿ, ਤਂ ਦਾਨਂ ਸਂਵਿਭਾਗਵਸੇਨ ਦਿਨ੍ਨਮ੍ਪਿ ਸੁਦਿਨ੍ਨਂ, ਆਹੁਨਪਾਹੁਨਵਸੇਨ ਹੁਤਮ੍ਪਿ ਸੁਹੁਤਂ, ਮਹਾਯਾਗਵਸੇਨ ਯਿਟ੍ਠਮ੍ਪਿ ਸੁਯਿਟ੍ਠਮੇਵ ਹੋਤਿ. ਕਸ੍ਮਾ? ਯਸ੍ਮਾ ਸਾ ਦਕ੍ਖਿਣਾ ਸਙ੍ਘਗਤਾ ਪਤਿਟ੍ਠਿਤਾ ਮਹਪ੍ਫਲਾ ਲੋਕਵਿਦੂਨ ਵਣ੍ਣਿਤਾਤਿ, ਲੋਕਵਿਦੂਹਿ ਸਮ੍ਮਾਸਮ੍ਬੁਦ੍ਧੇਹਿ ‘‘ਨ ਤ੍ਵੇਵਾਹਂ, ਆਨਨ੍ਦ, ਕੇਨਚਿ ਪਰਿਯਾਯੇਨ ਸਙ੍ਘਗਤਾਯ ਦਕ੍ਖਿਣਾਯ ¶ ਪਾਟਿਪੁਗ੍ਗਲਿਕਂ ਦਕ੍ਖਿਣਂ ਮਹਪ੍ਫਲਤਰਂ ਵਦਾਮਿ (ਮ. ਨਿ. ੩.੩੮੦). ਪੁਞ੍ਞਂ ਆਕਙ੍ਖਮਾਨਾਨਂ, ਸਙ੍ਘੋ ਵੇ ਯਜਤਂ ਮੁਖਂ (ਮ. ਨਿ. ੨.੪੦੦; ਸੁ. ਨਿ. ੫੭੪; ਮਹਾਵ. ੩੦੦). ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾ’’ਤਿ (ਮ. ਨਿ. ੧.੭੪; ਸਂ. ਨਿ. ੫.੯੯੭) ਚ ਆਦਿਨਾ ਮਹਪ੍ਫਲਤਾ ਵਣ੍ਣਿਤਾ ਪਸਤ੍ਥਾ ਥੋਮਿਤਾਤਿ ਅਤ੍ਥੋ.

੬੪੫. ਈਦਿਸਂ ਯਞ੍ਞਮਨੁਸ੍ਸਰਨ੍ਤਾਤਿ ਏਤਾਦਿਸਂ ਸਙ੍ਘਂ ਉਦ੍ਦਿਸ੍ਸ ਅਤ੍ਤਨਾ ਕਤਂ ਦਾਨਂ ਅਨੁਸ੍ਸਰਨ੍ਤਾ. ਵੇਦਜਾਤਾਤਿ ਜਾਤਸੋਮਨਸ੍ਸਾ. ਵਿਨੇਯ੍ਯ ਮਚ੍ਛੇਰਮਲਂ ¶ ਸਮੂਲਨ੍ਤਿ ਮਚ੍ਛੇਰਮੇਵ ਚਿਤ੍ਤਸ੍ਸ ਮਲਿਨਭਾਵਕਰਣਤੋ ਮਚ੍ਛੇਰਮਲਂ, ਅਥ ਵਾ ਮਚ੍ਛੇਰਞ੍ਚ ਅਞ੍ਞਂ ਇਸ੍ਸਾਲੋਭਦੋਸਾਦਿਮਲਞ੍ਚਾਤਿ ਮਚ੍ਛੇਰਮਲਂ. ਤਞ੍ਚ ਅਵਿਜ੍ਜਾਵਿਚਿਕਿਚ੍ਛਾਵਿਪਲ੍ਲਾਸਾਦੀਹਿ ਸਹ ਮੂਲੇਹੀਤਿ ਸਮੂਲਂ ਵਿਨੇਯ੍ਯ ਵਿਨਯਿਤ੍ਵਾ ਵਿਕ੍ਖਮ੍ਭੇਤ੍ਵਾ ਅਨਿਨ੍ਦਿਤ੍ਵਾ ਸਗ੍ਗਮੁਪੇਨ੍ਤਿ ਠਾਨਨ੍ਤਿ ਯੋਜਨਾ. ਸੇਸਂ ਵੁਤ੍ਤਨਯਮੇਵ.

ਇਮਂ ਪਨ ਸਬ੍ਬਂ ਪਵਤ੍ਤਿਂ ਸਕ੍ਕੋ ਦੇਵਾਨਮਿਨ੍ਦੋ ‘‘ਦਦ੍ਦਲ੍ਲਮਾਨਾ ਵਣ੍ਣੇਨਾ’’ਤਿਆਦਿਨਾ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਆਚਿਕ੍ਖਿ, ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਭਗਵਤੋ ਆਰੋਚੇਸਿ, ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸਿ.

ਦਦ੍ਦਲ੍ਲਵਿਮਾਨਵਣ੍ਣਨਾ ਨਿਟ੍ਠਿਤਾ.

ਫਲਿਕਰਜਤਹੇਮਜਾਲਛਨ੍ਨਨ੍ਤਿ ਪੇਸਵਤੀਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਮਗਧੇਸੁ ਨਾਲਕਗਾਮੇ ਏਕਸ੍ਮਿਂ ਗਹਪਤਿਮਹਾਸਾਰਕੁਲੇ ਪੇਸਵਤੀ ਨਾਮ ਕੁਲਸੁਣ੍ਹਾ ਅਹੋਸਿ. ਸਾ ਕਿਰ ਕਸ੍ਸਪਸ੍ਸ ਭਗਵਤੋ ਯੋਜਨਿਕੇ ਕਨਕਥੂਪੇ ਕਯਿਰਮਾਨੇ ਦਾਰਿਕਾ ਹੁਤ੍ਵਾ ਮਾਤਰਾ ਸਦ੍ਧਿਂ ਚੇਤਿਯਟ੍ਠਾਨਂ ਗਨ੍ਤ੍ਵਾ ਮਾਤਰਂ ਪੁਚ੍ਛਿ ‘‘ਕਿਂ ਇਮੇ, ਅਮ੍ਮ, ਕਰੋਨ੍ਤੀ’’ਤਿ? ‘‘ਚੇਤਿਯਂ ਕਾਤੁਂ ਸੁਵਣ੍ਣਿਟ੍ਠਕਾ ¶ ਕਰੋਨ੍ਤੀ’’ਤਿ. ਤਂ ਸੁਤ੍ਵਾ ਦਾਰਿਕਾ ਪਸਨ੍ਨਮਾਨਸਾ ਮਾਤਰਂ ਆਹ – ‘‘ਅਮ੍ਮ, ਮਮ ਗੀਵਾਯ ਇਦਂ ਸੋਵਣ੍ਣਮਯਂ ਖੁਦ੍ਦਕਪਿਲ਼ਨ੍ਧਨਂ ਅਤ੍ਥਿ, ਇਮਾਹਂ ਚੇਤਿਯਤ੍ਥਾਯ ¶ ਦੇਮੀ’’ਤਿ. ਮਾਤਾ ‘‘ਸਾਧੁ ਦੇਹੀ’’ਤਿ ਵਤ੍ਵਾ ਤਂ ਗੀਵਤੋ ਓਮੁਞ੍ਚਿਤ੍ਵਾ ਸੁਵਣ੍ਣਕਾਰਸ੍ਸ ਹਤ੍ਥੇ ਅਦਾਸਿ ‘‘ਇਦਂ ਇਮਾਯ ਦਾਰਿਕਾਯ ਪਰਿਚ੍ਚਜਿਤਂ, ਇਮਮ੍ਪਿ ਪਕ੍ਖਿਪਿਤ੍ਵਾ ਇਟ੍ਠਕਂ ਕਰੋਹੀ’’ਤਿ. ਸੁਵਣ੍ਣਕਾਰੋ ਤਥਾ ਅਕਾਸਿ. ਸਾ ਦਾਰਿਕਾ ਅਪਰਭਾਗੇ ਕਾਲਂ ਕਤ੍ਵਾ ਤੇਨੇਵ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਸੁਗਤਿਯਂਯੇਵ ਅਪਰਾਪਰਂ ਸਂਸਰਨ੍ਤੀ ਅਮ੍ਹਾਕਂ ਭਗਵਤੋ ਕਾਲੇ ਨਾਲਕਗਾਮੇ ਨਿਬ੍ਬਤ੍ਤਾ ਅਨੁਕ੍ਕਮੇਨ ਦ੍ਵਾਦਸਵਸ੍ਸਿਕਾ ਜਾਤਾ.

ਸਾ ਏਕਦਿਵਸਂ ਮਾਤਰਾ ਪੇਸਿਤਂ ਮੂਲਂ ਗਹੇਤ੍ਵਾ ਤੇਲਤ੍ਥਾਯ ਅਞ੍ਞਤਰਂ ਆਪਣਂ ਅਗਮਾਸਿ. ਤਸ੍ਮਿਞ੍ਚ ਆਪਣੇ ਅਞ੍ਞਤਰੋ ਕੁਟੁਮ੍ਬਿਯਪੁਤ੍ਤੋ ਪਿਤਰਾ ¶ ਨਿਦਹਿਤ੍ਵਾ ਠਪਿਤਂ ਬਹੁਂ ਹਿਰਞ੍ਞਸੁਵਣ੍ਣਂ ਮੁਤ੍ਤਾਮਣਿਰਤਨਾਨਿ ਚ ਗਹੇਤੁਂ ਉਦ੍ਧਰਨ੍ਤੋ ਆਪਣਿਕੋ ਕਮ੍ਮਬਲੇਨ ਕਥਲਪਾਸਾਣਸਕ੍ਖਰਰੂਪੇਨ ਉਪਟ੍ਠਹਨ੍ਤਾਨਿ ਦਿਸ੍ਵਾ ਤਤੋ ਏਕਦੇਸਂ ‘‘ਪੁਞ੍ਞਵਨ੍ਤਾਨਂ ਵਸੇਨ ਹਿਰਞ੍ਞਸੁਵਣ੍ਣਾਦਿ ਭਵਿਸ੍ਸਤੀ’’ਤਿ ਵੀਮਂਸਿਤੁਂ ਰਾਸਿਂ ਕਤ੍ਵਾ ਠਪੇਸਿ. ਅਥ ਨਂ ਸਾ ਦਾਰਿਕਾ ਦਿਸ੍ਵਾ ‘‘ਕਸ੍ਮਾ ਆਪਣੇ ਰਤਨਾਨਿ ਏਵਂ ਠਪਿਤਾਨਿ, ਨਨੁ ਨਾਮ ਸਮ੍ਮਦੇਵ ਪਟਿਸਾਮੇਤਬ੍ਬਾਨੀ’’ਤਿ ਆਹ. ਆਪਣਿਕੋ ਤਂ ਸੁਤ੍ਵਾ ‘‘ਮਹਾਪੁਞ੍ਞਾ ਅਯਂ ਦਾਰਿਕਾ, ਇਮਿਸ੍ਸਾ ਵਸੇਨ ਸਬ੍ਬਮਿਦਂ ਹਿਰਞ੍ਞਾਦਿ ਏਵ ਹੁਤ੍ਵਾ ਅਮ੍ਹਾਕਂ ਵਿਨਿਯੋਗਂ ਗਮਿਸ੍ਸਤਿ, ਸਙ੍ਗਣ੍ਹਿਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਤਸ੍ਸਾ ਮਾਤੁ ਸਨ੍ਤਿਕਂ ਗਨ੍ਤ੍ਵਾ ‘‘ਇਮਂ ਦਾਰਿਕਂ ਮਯ੍ਹਂ ਪੁਤ੍ਤਸ੍ਸਤ੍ਥਾਯ ਦੇਹੀ’’ਤਿ ਵਾਰੇਤ੍ਵਾ ਬਹੁਧਨਂ ਦਤ੍ਵਾ ਆਵਾਹਵਿਵਾਹਂ ਕਤ੍ਵਾ ਤਂ ਅਤ੍ਤਨੋ ਗੇਹਂ ਆਨੇਸਿ. ਅਥਸ੍ਸਾ ਸੀਲਾਚਾਰਂ ਞਤ੍ਵਾ ਭਣ੍ਡਾਗਾਰਂ ਵਿਵਰਿਤ੍ਵਾ ‘‘ਕਿਂ ਏਤ੍ਥ ਪਸ੍ਸਸੀ’’ਤਿ ਵਤ੍ਵਾ ਤਾਯ ‘‘ਹਿਰਞ੍ਞਸੁਵਣ੍ਣਮਣਿਮੇਵ ਰਾਸਿਕਤਂ ਪਸ੍ਸਾਮੀ’’ਤਿ ਵੁਤ੍ਤੇ ‘‘ਏਤਾਨਿ ਅਮ੍ਹਾਕਂ ਕਮ੍ਮਬਲੇਨ ਅਨ੍ਤਰਧਾਯਨ੍ਤਾਨਿ ਤਵ ਪੁਞ੍ਞਵਿਸੇਸੇਨ ਪੁਨ ਵਿਸੇਸਾਨਿ ਜਾਤਾਨਿ, ਤਸ੍ਮਾ ਇਤੋ ਪਟ੍ਠਾਯ ਇਮਸ੍ਮਿਂ ਗੇਹੇ ਸਬ੍ਬਂ ਤ੍ਵਂਯੇਵ ਵਿਚਾਰੇਹਿ ¶ , ਤਯਾ ਦਿਨ੍ਨਮੇਵ ਮਯਂ ਪਰਿਭੁਞ੍ਜਿਸ੍ਸਾਮਾ’’ਤਿ ਵਤ੍ਵਾ ਤਤੋ ਪਭੁਤਿ ਤਂ ‘‘ਪੇਸਵਤੀ’’ਤਿ ਵੋਹਰਿਂਸੁ.

ਤੇਨ ਚ ਸਮਯੇਨ ਆਯਸ੍ਮਾ ਧਮ੍ਮਸੇਨਾਪਤਿ ਅਤ੍ਤਨੋ ਆਯੁਸਙ੍ਖਾਰਾਨਂ ਪਰਿਕ੍ਖੀਣਭਾਵਂ ਞਤ੍ਵਾ ‘‘ਮਯ੍ਹਂ ਮਾਤੁਯਾ ਰੂਪਸਾਰਿਬ੍ਰਾਹ੍ਮਣਿਯਾ ਪੋਸਾਵਨਿਕਮੂਲਂ ਦਤ੍ਵਾ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਰਿਨਿਬ੍ਬਾਨਂ ਅਨੁਜਾਨਾਪੇਤ੍ਵਾ ਸਤ੍ਥੁ ਆਣਾਯ ਮਹਨ੍ਤਂ ਪਾਟਿਹਾਰਿਯਂ ਦਸ੍ਸੇਤ੍ਵਾ ਅਨੇਕੇਹਿ ਥੁਤਿਸਹਸ੍ਸੇਹਿ ਭਗਵਨ੍ਤਂ ਥੋਮੇਤ੍ਵਾ ਯਾਵ ਦਸ੍ਸਨਵਿਸਯਾਤਿਕ੍ਕਮਾ ਅਭਿਮੁਖੋਵ ਅਪਕ੍ਕਮਿਤ੍ਵਾ ਪੁਨ ਵਨ੍ਦਿਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਵਿਹਾਰਾ ਨਿਕ੍ਖਮ੍ਮ ਭਿਕ੍ਖੁਸਙ੍ਘਸ੍ਸ ਓਵਾਦਂ ਦਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਸਮਸ੍ਸਾਸੇਤ੍ਵਾ ਚਤਸ੍ਸੋਪਿ ਪਰਿਸਾ ਨਿਵਤ੍ਤੇਤ੍ਵਾ ਅਨੁਕ੍ਕਮੇਨ ਨਾਲਕਗਾਮਂ ਪਤ੍ਵਾ ਮਾਤਰਂ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ਪਚ੍ਚੂਸਸਮਯੇ ਜਾਤੋਵਰਕੇ ਪਰਿਨਿਬ੍ਬਾਯਿ. ਪਰਿਨਿਬ੍ਬੁਤਸ੍ਸ ਚਸ੍ਸ ਸਰੀਰਸਕ੍ਕਾਰਕਰਣਵਸੇਨ ਦੇਵਾ ਚੇਵ ਮਨੁਸ੍ਸਾ ਚ ਸਤ੍ਤਾਹਂ ਵੀਤਿਨਾਮੇਸੁਂ, ਅਗਰੁਚਨ੍ਦਨਾਦੀਹਿ ਹਤ੍ਥਸਤੁਬ੍ਬੇਧਂ ਚਿਤਕਮਕਂਸੁ.

ਪੇਸਵਤੀਪਿ ¶ ਥੇਰਸ੍ਸ ਪਰਿਨਿਬ੍ਬਾਨਂ ਸੁਤ੍ਵਾ ‘‘ਗਨ੍ਤਾ ਪੂਜੇਸ੍ਸਾਮੀ’’ਤਿ ਸੁਵਣ੍ਣਪੁਪ੍ਫੇਹਿ ਗਨ੍ਧਜਾਤੇਹਿ ਚ ਪੂਰਿਤਾਨਿ ਚਙ੍ਕੋਟਕਾਨਿ ਗਾਹਾਪੇਤ੍ਵਾ ਗਨ੍ਤੁਕਾਮਾ ¶ ਸਸੁਰਂ ਆਪੁਚ੍ਛਿਤ੍ਵਾ ਤੇਨ ‘‘ਤ੍ਵਂ ਗਰੁਭਾਰਾ, ਤਤ੍ਥ ਚ ਮਹਾਜਨਸਮ੍ਮਦ੍ਦੋ, ਪੁਪ੍ਫਗਨ੍ਧਾਨਿ ਪੇਸੇਤ੍ਵਾ ਇਧੇਵ ਹੋਹੀ’’ਤਿ ਵੁਤ੍ਤਾਪਿ ਸਦ੍ਧਾਜਾਤਾ ‘‘ਯਦਿਪਿ ਮੇ ਤਤ੍ਥ ਜੀਵਿਤਨ੍ਤਰਾਯੋ ਸਿਯਾ, ਗਨ੍ਤਾਵ ਪੂਜਾਸਕ੍ਕਾਰਂ ਕਰਿਸ੍ਸਾਮੀ’’ਤਿ ਤਂ ਵਚਨਂ ਅਗ੍ਗਹੇਤ੍ਵਾ ਸਪਰਿਵਾਰਾ ਤਤ੍ਥ ਗਨ੍ਤ੍ਵਾ ਗਨ੍ਧਪੁਪ੍ਫਾਦੀਹਿ ਪੂਜੇਤ੍ਵਾ ਕਤਞ੍ਜਲੀ ਅਟ੍ਠਾਸਿ. ਤਸ੍ਮਿਞ੍ਚ ਸਮਯੇ ਥੇਰਂ ਪੂਜੇਤੁਂ ਆਗਤਾਨਂ ਰਾਜਪਰਿਸਾਨਂ ਹਤ੍ਥੀ ਮਤ੍ਤੋ ਹੁਤ੍ਵਾ ਤਂ ਪਦੇਸਂ ਉਪਗਞ੍ਛਿ. ਤਂ ਦਿਸ੍ਵਾ ਮਰਣਭਯਭੀਤੇਸੁ ਮਨੁਸ੍ਸੇਸੁ ਪਲਾਯਨ੍ਤੇਸੁ ਜਨਸਮ੍ਮਦ੍ਦੇਨ ਪਤਿਤਂ ਪੇਸਵਤਿਂ ਮਹਾਜਨੋ ਅਕ੍ਕਮਿਤ੍ਵਾ ਮਾਰੇਸਿ. ਸਾ ਪੂਜਾਸਕ੍ਕਾਰਂ ਕਤ੍ਵਾ ਥੇਰਗਤਾਯ ਸਦ੍ਧਾਯ ਸਮ੍ਪਨ੍ਨਚਿਤ੍ਤਾ ਏਵ ¶ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ, ਅਚ੍ਛਰਾਸਹਸ੍ਸਞ੍ਚਸ੍ਸਾ ਪਰਿਵਾਰੋ ਅਹੋਸਿ.

ਸਾ ਤਾਵਦੇਵ ਅਤ੍ਤਨੋ ਦਿਬ੍ਬਸਮ੍ਪਤ੍ਤਿਂ ਓਲੋਕੇਤ੍ਵਾ ‘‘ਕੀਦਿਸੇਨ ਨੁ ਖੋ ਪੁਞ੍ਞੇਨ ਮਯਾ ਏਸਾ ਲਦ੍ਧਾ’’ਤਿ, ਤਸ੍ਸਾ ਹੇਤੁਂ ਉਪਧਾਰੇਨ੍ਤੀ ਥੇਰਂ ਉਦ੍ਦਿਸ੍ਸ ਕਤਂ ਪੂਜਾਸਕ੍ਕਾਰਂ ਦਿਸ੍ਵਾ, ਰਤਨਤ੍ਤਯੇ ਅਭਿਪ੍ਪਸਨ੍ਨਮਾਨਸਾ ਸਤ੍ਥਾਰਂ ਵਨ੍ਦਿਤੁਂ ਅਚ੍ਛਰਾਸਹਸ੍ਸਪਰਿਵੁਤਾ ਸਟ੍ਠਿਸਕਟਭਾਰਾਲਙ੍ਕਾਰਪਟਿਮਣ੍ਡਿਤਤ੍ਤਭਾਵਾ ਸੁਮਹਤਿਯਾ ਦੇਵਿਦ੍ਧਿਯਾ ਚਨ੍ਦੋ ਵਿਯ ਚ ਸੂਰਿਯੋ ਵਿਯ ਚ ਦਸ ਦਿਸਾ ਓਭਾਸਯਮਾਨਾ ਸਹ ਵਿਮਾਨੇਨ ਆਗਨ੍ਤ੍ਵਾ ਵਿਮਾਨਤੋ ਓਰੁਯ੍ਹ ਭਗਵਨ੍ਤਂ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਤੇਨ ਚ ਸਮਯੇਨ ਆਯਸ੍ਮਾ ਵਙ੍ਗੀਸੋ ਭਗਵਤੋ ਸਮੀਪੇ ਨਿਸਿਨ੍ਨੋ ਭਗਵਨ੍ਤਂ ਏਵਮਾਹ ‘‘ਪਟਿਭਾਤਿ ਮਂ ਭਗਵਾ ਇਮਿਸ੍ਸਾ ਦੇਵਤਾਯ ਕਤਕਮ੍ਮਂ ਪੁਚ੍ਛਿਤੁ’’ਨ੍ਤਿ. ‘‘ਪਟਿਭਾਤੁ ਤਂ, ਵਙ੍ਗੀਸਾ’’ਤਿ ਭਗਵਾ ਅਵੋਚ. ਅਥ ਆਯਸ੍ਮਾ ਵਙ੍ਗੀਸੋ ਤਾਯ ਦੇਵਤਾਯ ਕਤਕਮ੍ਮਂ ਪੁਚ੍ਛਿਤੁਕਾਮੋ ਪਠਮਂ ਤਾਵਸ੍ਸਾ ਵਿਮਾਨਂ ਸਂਵਣ੍ਣੇਨ੍ਤੋ ਆਹ –

‘‘ਫਲਿਕਰਜਤਹੇਮਜਾਲਛਨ੍ਨਂ, ਵਿਵਿਧਚਿਤ੍ਰਤਲਮਦ੍ਦਸਂ ਸੁਰਮ੍ਮਂ;

ਬ੍ਯਮ੍ਹਂ ਸੁਨਿਮ੍ਮਿਤਂ ਤੋਰਣੂਪਪਨ੍ਨਂ, ਰੁਚਕੁਪਕਿਣ੍ਣਮਿਦਂ ਸੁਭਂ ਵਿਮਾਨਂ.

‘‘ਭਾਤਿ ਚ ਦਸ ਦਿਸਾ ਨਭੇਵ ਸੁਰਿਯੋ, ਸਰਦੇ ਤਮੋਨੁਦੋ ਸਹਸ੍ਸਰਂਸੀ;

ਤਥਾ ਤਪਤਿ ਮਿਦਂ ਤਵ ਵਿਮਾਨਂ, ਜਲਮਿਵ ਧੂਮਸਿਖੋ ਨਿਸੇ ਨਭਗ੍ਗੇ.

‘‘ਮੁਸਤੀਵ ¶ ਨਯਨਂ ਸਤੇਰਤਾਵ, ਆਕਾਸੇ ਠਪਿਤਮਿਦਂ ਮਨੁਞ੍ਞਂ;

ਵੀਣਾਮੁਰਜਸਮ੍ਮਤਾਲ਼ਘੁਟ੍ਠਂ, ਇਦ੍ਧਂ ਇਨ੍ਦਪੁਰਂ ਯਥਾ ਤਵੇਦਂ.

‘‘ਪਦੁਮਕੁਮੁਦੁਪ੍ਪਲਕੁਵਲਯਂ ¶ , ਯੋਧਿਕਬਨ੍ਧੁਕਨੋਜਕਾ ਚ ਸਨ੍ਤਿ;

ਸਾਲਕੁਸੁਮਿਤਪੁਪ੍ਫਿਤਾ ¶ ਅਸੋਕਾ, ਵਿਵਿਧਦੁਮਗ੍ਗਸੁਗਨ੍ਧਸੇਵਿਤਮਿਦਂ.

‘‘ਸਲ਼ਲਲਬੁਜਭੁਜਕਸਂਯੁਤ੍ਤਾ, ਕੁਸਕਸੁਫੁਲ੍ਲਿਤਲਤਾਵਲਮ੍ਬਿਨੀਹਿ;

ਮਣਿਜਾਲਸਦਿਸਾ ਯਸਸ੍ਸਿਨੀ, ਰਮ੍ਮਾ ਪੋਕ੍ਖਰਣੀ ਉਪਟ੍ਠਿਤਾ ਤੇ.

‘‘ਉਦਕਰੁਹਾ ਚ ਯੇਤ੍ਥਿ ਪੁਪ੍ਫਜਾਤਾ, ਥਲਜਾ ਯੇ ਚ ਸਨ੍ਤਿ ਰੁਕ੍ਖਜਾਤਾ;

ਮਾਨੁਸਕਾਮਾਨੁਸ੍ਸਕਾ ਚ ਦਿਬ੍ਬਾ, ਸਬ੍ਬੇ ਤੁਯ੍ਹਂ ਨਿਵੇਸਨਮ੍ਹਿ ਜਾਤਾ.

‘‘ਕਿਸ੍ਸ ਸਂਯਮਦਮਸ੍ਸਯਂ ਵਿਪਾਕੋ, ਕੇਨਾਸਿ ਕਮ੍ਮਫਲੇਨਿਧੂਪਪਨ੍ਨਾ;

ਯਥਾ ਚ ਤੇ ਅਧਿਗਤਮਿਦਂ ਵਿਮਾਨਂ, ਤਦਨੁਪਦਂ ਅਵਚਾਸਿਲ਼ਾਰਪਮ੍ਹੇ’’ਤਿ.

੬੪੬. ਤਤ੍ਥ ਫਲਿਕਰਜਤਹੇਮਜਾਲਛਨ੍ਨਨ੍ਤਿ ਫਲਿਕਮਣੀਹਿ ਰਜਤਹੇਮਜਾਲੇਹਿ ਚ ਛਾਦਿਤਂ, ਫਲਿਕਮਣਿਮਯਾਹਿ ਭਿਤ੍ਤੀਹਿ ਰਜਤਹੇਮਮਯੇਹਿ ਜਾਲੇਹਿ ਚ ਸਮਨ੍ਤਤੋ ਹੇਟ੍ਠਾ ਚ ਉਪਰਿ ਚ ਛਾਦਿਤਂ, ਵਿਵਿਧਵਣ੍ਣਾਨਂ ਵਿਚਿਤ੍ਤਸਨ੍ਨਿਵੇਸਾਨਞ੍ਚ ਤਲਾਨਂ ਭੂਮੀਨਂ ਵਸੇਨ ਵਿਵਿਧਚਿਤ੍ਰਤਲਂ ਅਦ੍ਦਸਂ ਪਸ੍ਸਿਂ. ਸੁਰਮ੍ਮਨ੍ਤਿ ਸੁਟ੍ਠੁ ਰਮਣੀਯਂ. ਵਿਹਰਿਤੁਕਾਮਾ ਵਸਨ੍ਤਿ ਏਤ੍ਥਾਤਿ ਬ੍ਯਮ੍ਹਂ, ਭਵਨਂ. ਤੋਰਣੂਪਪਨ੍ਨਨ੍ਤਿ ਵਿਵਿਧਮਾਲਾਕਮ੍ਮਾਦਿਵਿਚਿਤ੍ਤੇਨ ਸਤ੍ਤਰਤਨਮਯੇਨ ਤੋਰਣੇਨ ਉਪੇਤਂ. ਤੋਰਣਨ੍ਤਿ ਵਾ ਦ੍ਵਾਰਕੋਟ੍ਠਕਪਾਸਾਦਸ੍ਸ ਨਾਮਂ, ਤੇਨ ਚ ਅਨੇਕਭੂਮਕੇਨ ¶ ਵਿਚਿਤ੍ਤਾਕਾਰੇਨ ਤਂ ਵਿਮਾਨਂ ਉਪੇਤਂ. ਰੁਚਕੁਪਤਿਣ੍ਣਨ੍ਤਿ ਸੁਵਣ੍ਣਵਾਲਿਕਾਹਿ ਓਕਿਣ੍ਣਙ੍ਗਣਂ. ਵਾਲਿਕਸਦਿਸਾ ਹਿ ਸੁਵਣ੍ਣਖਣ੍ਡਾ ਰੁਚਾ ਨਾਮ, ਰੁਚਮੇਵ ਰੁਚਕਨ੍ਤਿ ਵੁਤ੍ਤਂ. ਸੁਭਨ੍ਤਿ ਸੋਭਤਿ, ਸੁਟ੍ਠੁ ਭਾਤੀਤਿ ਵਾ ਸੁਭਂ. ਵਿਮਾਨਨ੍ਤਿ ਵਿਸਿਟ੍ਠਮਾਨਂ, ਪਮਾਣਤੋ ਮਹਨ੍ਤਨ੍ਤਿ ਅਤ੍ਥੋ.

੬੪੭. ਭਾਤੀਤਿ ¶ ਜੋਤਤਿ ਉਜ੍ਜਲਤਿ. ਨਭੇਵ ਸੁਰਿਯੋਤਿ ਆਕਾਸੇ ਆਦਿਚ੍ਚੋ ਵਿਯ. ਸਰਦੇਤਿ ਸਰਦਸਮਯੇ. ਤਮੋਨੁਦੋਤਿ ਅਨ੍ਧਕਾਰਵਿਦ੍ਧਂਸਨੋ. ਤਥਾ ਤਪਤਿ ਮਿਦਨ੍ਤਿ ਯਥਾ ਸਰਦਕਾਲੇ ਸਹਸ੍ਸਰਂਸੀ ਸੂਰਿਯੋ, ਤਥਾ ਤਪਤਿ ਦਿਬ੍ਬਤਿ ਇਦਂ ਤਵ ਵਿਮਾਨਂ, ਮ-ਕਾਰੋ ਪਦਸਨ੍ਧਿਕਰੋ. ਜਲਮਿਵ ਧੂਮਸਿਖੋਤਿ ਜਲਨ੍ਤੋ ਅਗ੍ਗਿ ਵਿਯ. ਅਗ੍ਗਿ ਹਿ ਤਸ੍ਸ ਅਗ੍ਗਤੋ ਧੂਮੋ ਪਞ੍ਞਾਯਤੀਤਿ ‘‘ਧੂਮਸਿਖੋ ਧੂਮਕੇਤੂ’’ਤਿ ਚ ਵੁਚ੍ਚਤਿ. ਨਿਸੇਤਿ ਨਿਸਤਿ, ਰਤ੍ਤਿਯਨ੍ਤਿ ਅਤ੍ਥੋ. ਨਭਗ੍ਗੇਤਿ ਨਭਕੋਟ੍ਠਾਸੇ, ਆਕਾਸਪਦੇਸੇਤਿ ਵੁਤ੍ਤਂ ਹੋਤਿ. ‘‘ਨਗਗ੍ਗੇ’’ਤਿ ਵਾ ਪਾਠੋ, ਪਬ੍ਬਤਸਿਖਰੇਤਿ ਅਤ੍ਥੋ. ਇਦਂ ਤਵ ਵਿਮਾਨਨ੍ਤਿ ਯੋਜਨਾ.

੬੪੮. ਮੁਸਤੀਵ ¶ ਨਯਨਨ੍ਤਿ ਅਤਿਵਿਯ ਅਤ੍ਤਨੋ ਪਭਸ੍ਸਰਤਾਯ ਪਟਿਹਨਨ੍ਤਂ ਦਸ੍ਸਨਕਿਚ੍ਚਂ ਕਾਤੁਂ ਅਦੇਨ੍ਤਂ ਓਲੋਕੇਨ੍ਤਾਨਂ ਚਕ੍ਖੁਂ ਮੁਸਤਿ ਵਿਯ. ਤੇਨਾਹ ‘‘ਸਤੇਰਤਾਵਾ’’ਤਿ, ਵਿਜ੍ਜੁਲਤਾ ਵਿਯਾਤਿ ਅਤ੍ਥੋ. ਵੀਣਾਮੁਰਜਸਮ੍ਮਤਾਲ਼ਘੁਟ੍ਠਨ੍ਤਿ ਮਹਤੀਆਦਿਵੀਣਾਨਂ ਭੇਰਿਆਦਿਪਟਹਾਨਂ ਹਤ੍ਥਤਾਲ਼ਕਂਸਤਾਲ਼ਾਨਞ੍ਚ ਸਦ੍ਦੇਹਿ ਘੋਸਿਤਂ ਏਕਨਿਨ੍ਨਾਦਂ. ਇਦ੍ਧਨ੍ਤਿ ਦੇਵਪੁਤ੍ਤੇਹਿ ਦੇਵਧੀਤਾਹਿ ਦਿਬ੍ਬਸਮ੍ਪਤ੍ਤਿਯਾ ਚ ਸਮਿਦ੍ਧਂ. ਇਨ੍ਦਪੁਰਂ ਯਥਾਤਿ ਸੁਦਸ੍ਸਨਨਗਰਂ ਵਿਯ.

੬੪੯. ਪਦੁਮਾਨਿ ਚ ਕੁਮੁਦਾਨਿ ਚ ਉਪ੍ਪਲਾਨਿ ਚ ਕੁਵਲਯਾਨਿ ਚ ਪਦੁਮਕੁਮੁਦੁਪ੍ਪਲਕੁਵਲਯਨ੍ਤਿ ਏਕਤ੍ਤਵਸੇਨ ਵੁਤ੍ਤਂ. ਅਤ੍ਥੀਤਿ ਵਚਨਂ ਪਰਿਣਾਮੇਤ੍ਵਾ ਯੋਜੇਤਬ੍ਬਂ. ਤਤ੍ਥ ਪਦੁਮਗ੍ਗਹਣੇਨ ਪੁਣ੍ਡਰੀਕਮ੍ਪਿ ਗਹਿਤਂ, ਕੁਮੁਦਗ੍ਗਹਣੇਨ ਸੇਤਰਤ੍ਤਭੇਦਾਨਿ ਸਬ੍ਬਾਨਿ ਕੁਮੁਦਾਨਿ, ਉਪ੍ਪਲਗ੍ਗਹਣੇਨ ਰਤ੍ਤਉਪ੍ਪਲਂ ਸਬ੍ਬਾ ਵਾ ਉਪ੍ਪਲਜਾਤਿ, ਕੁਵਲਯਗ੍ਗਹਣੇਨ ਨੀਲੁਪ੍ਪਲਮੇਵ ਗਹਿਤਨ੍ਤਿ ਵੇਦਿਤਬ੍ਬਂ. ਯੋਧਿਕਬਨ੍ਧੁਕਨੋਜਕਾ ਚ ਸਨ੍ਤੀਤਿ ਚ-ਕਾਰੋ ਨਿਪਾਤਮਤ੍ਤਂ, ਯੋਧਿਕਬਨ੍ਧੁਜੀਵਕਅਨੋਜਕਰੁਕ੍ਖਾ ਚ ਸਨ੍ਤੀਤਿ ਅਤ੍ਥੋ. ਕੇਚਿ ‘‘ਅਨੋਜਕਾਪਿ ਸਨ੍ਤੀ’’ਤਿ ਪਾਠਂ ਵਤ੍ਵਾ ‘‘ਅਨੋਜਕਾਪੀਤਿ ਵੁਤ੍ਤਂ ਹੋਤੀ’’ਤਿ ਅਤ੍ਥਂ ਵਦਨ੍ਤਿ. ਸਾਲਕੁਸੁਮਿਤਪੁਪ੍ਫਿਤਾ ਅਸੋਕਾਤਿ ਸਾਲਾ ਕੁਸੁਮਿਤਾ ਪੁਪ੍ਫਿਤਾ ਅਸੋਕਾਤਿ ਯੋਜੇਤਬ੍ਬਂ ¶ . ਵਿਵਿਧਦੁਮਗ੍ਗਸੁਗਨ੍ਧਸੇਵਿਤਮਿਦਨ੍ਤਿ ਨਾਨਾਵਿਧਾਨਂ ਉਤ੍ਤਮਰੁਕ੍ਖਾਨਂ ¶ ਸੋਭਨੇਹਿ ਗਨ੍ਧੇਹਿ ਸੇਵਿਤਂ ਪਰਿਭਾਵਿਤਂ ਇਦਂ ਤੇ ਵਿਮਾਨਨ੍ਤਿ ਅਤ੍ਥੋ.

੬੫੦. ਸਲ਼ਲਲਬੁਜਭੁਜਕਸਂਯੁਤ੍ਤਾਤਿ ਤੀਰੇ ਠਿਤੇਹਿ ਸਲ਼ਲੇਹਿ ਲਬੁਜੇਹਿ ਭੁਜਕਰੁਕ੍ਖੇਹਿ ਚ ਸਹਿਤਾ. ਭੁਜਕੋ ਨਾਮ ਏਕੋ ਸੁਗਨ੍ਧਰੁਕ੍ਖੋ ਦੇਵਲੋਕੇ ਚ ਗਨ੍ਧਮਾਦਨੇ ਚ ਅਤ੍ਥਿ, ਅਞ੍ਞਤ੍ਥ ਨਤ੍ਥੀਤਿ ਵਦਨ੍ਤਿ. ਕੁਸਕਸੁਫੁਲ੍ਲਿਤਲਤਾਵਲਮ੍ਬਿਨੀਹੀਤਿ ਕੁਸਕੇਹਿ ਤਾਲਨਾਲ਼ਿਕੇਰਾਦੀਹਿ ਤਿਣਜਾਤੀਹਿ ਓਲਮ੍ਬਮਾਨਾਹਿ ਸਨ੍ਤਾਨਕਵਲ੍ਲਿਆਦੀਹਿ ਸੁਟ੍ਠੁ ਕੁਸੁਮਿਤਲਤਾਹਿ ਚ ਸਂਯੁਤ੍ਤਾਤਿ ਯੋਜਨਾ. ਮਣਿਜਾਲਸਦਿਸਾਤਿ ਮਣਿਜਾਲਸਦਿਸਜਲਾ. ‘‘ਮਣਿਜਲਸਦਿਸਾ’’ਤਿਪਿ ਪਾਲ਼ਿ, ਮਣਿਸਦਿਸਜਲਾਤਿ ਅਤ੍ਥੋ. ਯਸਸ੍ਸਿਨੀਤਿ ਦੇਵਤਾਯ ਆਲਪਨਂ. ਉਪਟ੍ਠਿਤਾ ਤੇਤਿ ਯਥਾਵੁਤ੍ਤਗੁਣਾ ਰਮਣੀਯਾ ਪੋਕ੍ਖਰਣੀ ਤਵ ਵਿਮਾਨਸਮੀਪੇ ਠਿਤਾ.

੬੫੧. ਉਦਕਰੁਹਾਤਿ ਯਥਾਵੁਤ੍ਤੇ ਪਦੁਮਾਦਿਕੇ ਸਨ੍ਧਾਯ ਵਦਤਿ. ਯੇਤ੍ਥੀਤਿ ਯੇ ਅਤ੍ਥਿ. ਥਲਜਾਤਿ ਯੋਧਿਕਾਦਿਕਾ. ਯੇ ਚ ਸਨ੍ਤੀਤਿ ਯੇ ਅਞ੍ਞੇਪਿ ਰੁਕ੍ਖਜਾਤਾ ਪੁਪ੍ਫੂਪਗਾ ਚ ਫਲੂਪਗਾ ਚ, ਤੇਪਿ ਤਵ ਵਿਮਾਨਸਮੀਪੇ ਸਨ੍ਤਿਯੇਵ.

੬੫੨. ਕਿਸ੍ਸ ਸਂਯਮਦਮਸ੍ਸਯਂ ਵਿਪਾਕੋਤਿ ਕਾਯਸਂਯਮਾਦੀਸੁ ਕੀਦਿਸਸ੍ਸ ਸਂਯਮਸ੍ਸ, ਇਨ੍ਦ੍ਰਿਯਦਮਨਾਦੀਸੁ ਕੀਦਿਸਸ੍ਸ ਦਮਸ੍ਸ ਅਯਂ ਵਿਪਾਕੋ. ਕੇਨਾਸੀਤਿ ਅਞ੍ਞਮੇਵ ਉਪਪਤ੍ਤਿਨਿਬ੍ਬਤ੍ਤਕਂ, ਅਞ੍ਞਂ ¶ ਉਪਭੋਗਸੁਖਨਿਬ੍ਬਤ੍ਤਕਂ ਹੋਤੀਤਿ ‘‘ਕੇਨਾਸਿ ਕਮ੍ਮਫਲੇਨਿਧੂਪਪਨ੍ਨਾ’’ਤਿ ਵਤ੍ਵਾ ਪੁਨ ‘‘ਯਥਾ ਚ ਤੇ ਅਧਿਗਤਮਿਦਂ ਵਿਮਾਨ’’ਨ੍ਤਿ ਆਹ. ਤਤ੍ਥ ਕਮ੍ਮਫਲੇਨਾਤਿ ਕਮ੍ਮਫਲੇਨ ਵਿਪਚ੍ਚਿਤੁਂ ਆਰਦ੍ਧੇਨਾਤਿ ਵਚਨਸੇਸੋ, ਇਤ੍ਥਮ੍ਭੂਤਲਕ੍ਖਣੇ ਚੇਤਂ ਕਰਣਵਚਨਂ. ਤਦਨੁਪਦਂ ਅਵਚਾਸੀਤਿ ਤਂ ਕਮ੍ਮਂ ਮਯਾ ਵੁਤ੍ਤਪਦਸ੍ਸ ਅਨੁਪਦਂ ਅਨੁਰੂਪਪਦਂ ਕਤ੍ਵਾ ਕਥੇਯ੍ਯਾਸਿ. ਅਲ਼ਾਰਪਮ੍ਹੇਤਿ ਬਹਲਸਂਹਤਪਖੁਮੇ, ਗੋਪਖੁਮੇਤਿ ਅਧਿਪ੍ਪਾਯੋ.

‘‘ਯਥਾ ਚ ਮੇ ਅਧਿਗਤਮਿਦਂ ਵਿਮਾਨਂ, ਕੋਞ੍ਚਮਯੂਰਚਕੋਰ ਸਙ੍ਘਚਰਿਤਂ;

ਦਿਬ੍ਯਪਿਲਵਹਂਸਰਾਜਚਿਣ੍ਣਂ, ਦਿਜਕਾਰਣ੍ਡਵਕੋਕਿਲਾਭਿਨਦਿਤਂ.

‘‘ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਾ ¶ , ਪਾਟਲਿਜਮ੍ਬੁਅਸੋਕਰੁਕ੍ਖਵਨ੍ਤਂ;

ਯਥਾ ਚ ਮੇ ਅਧਿਗਤਮਿਦਂ ਵਿਮਾਨਂ, ਤਂ ਤੇ ਪਵੇਦਯਾਮਿ ਸੁਣੋਹਿ ਭਨ੍ਤੇ.

‘‘ਮਗਧਵਰਪੁਰਤ੍ਥਿਮੇਨ, ਨਾਲਕਗਾਮੋ ਨਾਮ ਅਤ੍ਥਿ ਭਨ੍ਤੇ;

ਤਤ੍ਥ ਅਹੋਸਿਂ ਪੁਰੇ ਸੁਣਿਸਾ, ਪੇਸਵਤੀਤਿ ਤਤ੍ਥ ਜਾਨਿਂਸੁ ਮਮਂ.

‘‘ਸਾਹਮਪਚਿਤਤ੍ਥਧਮ੍ਮਕੁਸਲਂ, ਦੇਵਮਨੁਸ੍ਸਪੂਜਿਤਂ ਮਹਨ੍ਤਂ;

ਉਪਤਿਸ੍ਸਂ ਨਿਬ੍ਬੁਤਮਪ੍ਪਮੇਯ੍ਯਂ, ਮੁਦਿਤਮਨਾ ਕੁਸੁਮੇਹਿ ਅਬ੍ਭੁਕਿਰਿਂ.

‘‘ਪਰਮਗਤਿਗਤਞ੍ਚ ਪੂਜਯਿਤ੍ਵਾ, ਅਨ੍ਤਿਮਦੇਹਧਰਂ ਇਸਿਂ ਉਲ਼ਾਰਂ;

ਪਹਾਯ ਮਾਨੁਸਕਂ ਸਮੁਸ੍ਸਯਂ, ਤਿਦਸਗਤਾ ਇਧ ਮਾਵਸਾਮਿ ਠਾਨ’’ਨ੍ਤਿ.

੬੫੩. ਤਤ੍ਥ ਕੋਞ੍ਚਮਯੂਰਚਕੋਰਸਙ੍ਘਚਰਿਤਨ੍ਤਿ ਸਾਰਸਸਿਖਣ੍ਡਿਕੁਮ੍ਭਕਾਰਕੁਕ੍ਕੁਟਗਣੇਹਿ ਤਤ੍ਥ ਤਤ੍ਥ ਵਿਚਰਿਤਂ. ਦਿਬ੍ਯਪਿਲਵਹਂਸਰਾਜਚਿਣ੍ਣਨ੍ਤਿ ਉਦਕੇ ਪਿਲਵਿਤ੍ਵਾ ਵਿਚਰਣਤੋ ‘‘ਪਿਲਵਾ’’ਤਿ ਲਦ੍ਧਨਾਮੇਹਿ ਉਦਕਸਕੁਣੇਹਿ ਹਂਸਰਾਜੇਹਿ ਚ ਤਹਿਂ ਤਹਿਂ ਵਿਚਰਿਤਂ. ਦਿਜਕਾਰਣ੍ਡਵਕੋਕਿਲਾਭਿਨਦਿਤਨ੍ਤਿ ਕਾਰਣ੍ਡਵੇਹਿ ਕਾਦਮ੍ਬੇਹਿ ਕੋਕਿਲੇਹਿ ਅਞ੍ਞੇਹਿ ਚ ਦਿਜੇਹਿ ਅਭਿਨਾਦਿਤਂ.

੬੫੪. ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਾਤਿ ਨਾਨਾਵਿਧਸਾਖਾਪਸਾਖਵਨ੍ਤਾ ਨਾਨਾਪੁਪ੍ਫਰੁਕ੍ਖਾ ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਾ ¶ , ਤੇਹਿ ਵਿਵਿਧਂ ਚਿਤ੍ਤਾਕਾਰਂ ਵਿਚਿਤ੍ਤਸਨ੍ਨਿਵੇਸਂ ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਾ ¶ . ‘‘ਵਿਵਿਧ’’ਨ੍ਤਿ ਹਿ ਵਤ੍ਤਬ੍ਬੇ ‘‘ਵਿਵਿਧਾ’’ਤਿ ਵੁਤ੍ਤਂ. ਸਨ੍ਤਾਨਕਾਤਿ ਹਿ ਕਾਮਵਲ੍ਲਿਯੋ, ਨਾਨਾਵਿਧਪੁਪ੍ਫਰੁਕ੍ਖਾ ਚ ਵਿਵਿਧਾ ਏਤ੍ਥ ਸਨ੍ਤਿ ¶ , ਤੇਹਿ ਵਾ ਵਿਵਿਧਨ੍ਤਿ ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਾ. ‘‘ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਂ, ਪਾਟਲਿਜਮ੍ਬੁਅਸੋਕਰੁਕ੍ਖਵਨ੍ਤ’’ਨ੍ਤਿ ਚ ਕੇਚਿ ਪਠਨ੍ਤਿ. ਤੇਹਿ ‘‘ਪੁਪ੍ਫਰੁਕ੍ਖਾ ਸਨ੍ਤੀ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ‘‘ਪੁਪ੍ਫਰੁਕ੍ਖਾ’’ਤਿ ਵਾ ਅਵਿਭਤ੍ਤਿਕਨਿਦ੍ਦੇਸੋ, ਪੁਪ੍ਫਰਕ੍ਖਨ੍ਤਿ ਵੁਤ੍ਤਂ ਹੋਤਿ.

੬੫੫. ਮਗਧਵਰਪੁਰਤ੍ਥਿਮੇਨਾਤਿ ਮਗਧਵਰੇ ਪੁਰਤ੍ਥਿਮੇਨ, ਅਭਿਸਮ੍ਬੋਧਿਟ੍ਠਾਨਤਾਯ ਉਤ੍ਤਮੇ ਮਗਧਰਟ੍ਠੇ ਪੁਰਤ੍ਥਿਮਦਿਸਾਯ. ਤਤ੍ਥ ਅਹੋਸਿਂ ਪੁਰੇ ਸੁਣਿਸਾਤਿ ਪੁਬ੍ਬੇ ਅਹਂ ਤਸ੍ਮਿਂ ਨਾਲਕਗਾਮੇ ਏਕਸ੍ਮਿਂ ਗਹਪਤਿਕੁਲੇ ਸੁਣਿਸਾ ਸੁਣ੍ਹਾ ਅਹੋਸਿਂ.

੬੫੬. ਸਾਤਿ ਸਯਂ. ਅਤ੍ਥੇ ਚ ਧਮ੍ਮੇ ਚ ਕੁਸਲੋਤਿ ਅਤ੍ਥਧਮ੍ਮਕੁਸਲੋ, ਭਗਵਾ. ਅਪਚਿਤੋ ਅਤ੍ਥਧਮ੍ਮਕੁਸਲੋ ਏਤੇਨਾਤਿ ਅਪਚਿਤਤ੍ਥਧਮ੍ਮਕੁਸਲੋ, ਧਮ੍ਮਸੇਨਾਪਤਿ, ਤਂ. ਅਪਚਿਤਂ ਵਾ ਅਪਚਯੋ, ਨਿਬ੍ਬਾਨਂ, ਤਸ੍ਮਿਂ ਅਵਸਿਟ੍ਠਅਤ੍ਥਧਮ੍ਮੇ ਚ ਕੁਸਲਂ, ਅਪਚਿਤੇ ਵਾ ਪੂਜਨੀਯੇ ਅਤ੍ਥੇ ਧਮ੍ਮੇ ਨਿਰੋਧੇ ਮਗ੍ਗੇ ਚ ਕੁਸਲਂ. ਮਹਨ੍ਤੇਹਿ ਉਲ਼ਾਰੇਹਿ ਸੀਲਕ੍ਖਨ੍ਧਾਦੀਹਿ ਸਮਨ੍ਨਾਗਤਤ੍ਤਾ ਮਹਨ੍ਤਂ. ਕੁਸੁਮੇਹੀਤਿ ਰਤਨਮਯੇਹਿ ਇਤਰੇਹਿ ਚ ਕੁਸੁਮੇਹਿ.

੬੫੭. ਪਰਮਗਤਿਗਤਨ੍ਤਿ ਅਨੁਪਾਦਿਸੇਸਨਿਬ੍ਬਾਨਂ ਪਤ੍ਤਂ. ਸਮੁਸ੍ਸਯਨ੍ਤਿ ਸਰੀਰਂ. ਤਿਦਸਗਤਾਤਿ ਤਿਦਸਭਵਨਂ ਗਤਾ, ਤਾਵਤਿਂਸਂ ਦੇਵਨਿਕਾਯਂ ਉਪਪਨ੍ਨਾ. ਇਧਾਤਿ ਇਮਸ੍ਮਿਂ ਦੇਵਲੋਕੇ. ਆਵਸਾਮਿ ਠਾਨਨ੍ਤਿ ਇਮਂ ਵਿਮਾਨਂ ਅਧਿਵਸਾਮਿ. ਸੇਸਂ ਵੁਤ੍ਤਨਯਮੇਵ.

ਏਵਂ ਆਯਸ੍ਮਤਾ ਵਙ੍ਗੀਸੇਨ ਦੇਵਤਾਯ ਚ ਕਥਿਤਕਥਾਮਗ੍ਗਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਭਗਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ¶ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਪੀਤਵਤ੍ਥੇ ¶ ਪੀਤਧਜੇਤਿ ਮਲ੍ਲਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਧਮ੍ਮਚਕ੍ਕਪ੍ਪਵਤ੍ਤਨਮਾਦਿਂ ਕਤ੍ਵਾ ਯਾਵ ਸੁਭਦ੍ਦਪਰਿਬ੍ਬਾਜਕਵਿਨਯਨਾ ਕਤਬੁਦ੍ਧਕਿਚ੍ਚੇ ਕੁਸਿਨਾਰਾਯਂ ਉਪਵਤ੍ਤਨੇ ਮਲ੍ਲਰਾਜੂਨਂ ਸਾਲਵਨੇ ਯਮਕਸਾਲਾਨਮਨ੍ਤਰੇ ਵਿਸਾਖਪੁਣ੍ਣਮਾਯਂ ਪਚ੍ਚੂਸਵੇਲਾਯਂ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੇ ¶ ਭਗਵਤਿ ਲੋਕਨਾਥੇ ਦੇਵਮਨੁਸ੍ਸੇਹਿ ਤਸ੍ਸ ਸਰੀਰਪੂਜਾਯ ਕਯਿਰਮਾਨਾਯ ਤਦਾ ਕੁਸਿਨਾਰਾਯਂ ਵਸਮਾਨਾ ਬਨ੍ਧੁਲਮਲ੍ਲਸ੍ਸ ਭਰਿਯਾ ਮਲ੍ਲਰਾਜਪੁਤ੍ਤੀ ਮਲ੍ਲਿਕਾ ਨਾਮ ਉਪਾਸਿਕਾ ਸਦ੍ਧਾ ਪਸਨ੍ਨਾ ਵਿਸਾਖਾਯ ਮਹਾਉਪਾਸਿਕਾਯ ਪਸਾਧਨਸਦਿਸਂ ਅਤ੍ਤਨੋ ਮਹਾਲਤਾਪਸਾਧਨਂ ਗਨ੍ਧੋਦਕੇਨ ਧੋਵਿਤ੍ਵਾ ਦੁਕੂਲਚੁਮ੍ਬਟਕੇਨ ਮਜ੍ਜਿਤ੍ਵਾ ਅਞ੍ਞਞ੍ਚ ਬਹੁਂ ਗਨ੍ਧਮਾਲਾਦਿਂ ਗਹੇਤ੍ਵਾ ਭਗਵਤੋ ਸਰੀਰਂ ਪੂਜੇਸਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨ ਮਲ੍ਲਿਕਾਵਤ੍ਥੁ ਧਮ੍ਮਪਦਵਣ੍ਣਨਾਯਂ ਆਗਤਮੇਵ.

ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ, ਤੇਨ ਪੂਜਾਨੁਭਾਵੇਨ ਅਸ੍ਸਾ ਅਞ੍ਞੇਹਿ ਅਸਾਧਾਰਣਾ ਉਲ਼ਾਰਾ ਦਿਬ੍ਬਸਮ੍ਪਤ੍ਤਿ ਅਹੋਸਿ. ਵਤ੍ਥਾਲਙ੍ਕਾਰਵਿਮਾਨਾਨਿ ਸਤ੍ਤਰਤਨਸਮੁਜ੍ਜਲਾਨਿ ਵਿਸੇਸਤੋ ਸਿਙ੍ਗੀਸੁਵਣ੍ਣੋਭਾਸਾਨਿ ਅਤਿਵਿਯ ਪਭਸ੍ਸਰਾਨਿ ਸਬ੍ਬਾ ਦਿਸਾ ਆਸਿਞ੍ਚਮਾਨਾਵ ਸੁਵਣ੍ਣਰਸਧਾਰਾਪਿਞ੍ਜਰਾ ਕਰੋਨ੍ਤਿ. ਅਥਾਯਸ੍ਮਾ ਨਾਰਦੋ ਦੇਵਚਾਰਿਕਂ ਚਰਨ੍ਤੋ ਤਂ ਦਿਸ੍ਵਾ ਉਪਗਞ੍ਛਿ. ਸਾ ਤਂ ਦਿਸ੍ਵਾ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਸੋ ਤਂ –

‘‘ਪੀਤਵਤ੍ਥੇ ਪੀਤਧਜੇ, ਪੀਤਾਲਙ੍ਕਾਰਭੂਸਿਤੇ;

ਪੀਤਨ੍ਤਰਾਹਿ ਵਗ੍ਗੂਹਿ, ਅਪਿਲ਼ਨ੍ਧਾਵ ਸੋਭਸਿ.

‘‘ਕਾ ਕਮ੍ਬੁਕਾਯੂਰਧਰੇ, ਕਞ੍ਚਨਾਵੇਲ਼ਭੂਸਿਤੇ;

ਹੇਮਜਾਲਕਸਞ੍ਛਨ੍ਨੇ, ਨਾਨਾਰਤਨਮਾਲਿਨੀ.

‘‘ਸੋਵਣ੍ਣਮਯਾ ¶ ਲੋਹਿਤਙ੍ਗਮਯਾ ਚ, ਮੁਤ੍ਤਾਮਯਾ ਵੇਲ਼ੁਰਿਯਮਯਾ ਚ;

ਮਸਾਰਗਲ੍ਲਾ ਸਹਲੋਹਿਤਙ੍ਗਾ, ਪਾਰੇਵਤਕ੍ਖੀਹਿ ਮਣੀਹਿ ਚਿਤ੍ਤਤਾ.

‘‘ਕੋਚਿ ¶ ਕੋਚਿ ਏਤ੍ਥ ਮਯੂਰਸੁਸ੍ਸਰੋ, ਹਂਸਸ੍ਸਰਞ੍ਞੋ ਕਰਵੀਕਸੁਸ੍ਸਰੋ;

ਤੇਸਂ ਸਰੋ ਸੁਯ੍ਯਤਿ ਵਗ੍ਗੁਰੂਪੋ, ਪਞ੍ਚਙ੍ਗਿਕਂ ਤੂਰਿਯਮਿਵਪ੍ਪਵਾਦਿਤਂ.

‘‘ਰਥੋ ਚ ਤੇ ਸੁਭੋ ਵਗ੍ਗੁ, ਨਾਨਾਰਤਨਚਿਤ੍ਤਿਤੋ;

ਨਾਨਾਵਣ੍ਣਾਹਿ ਧਾਤੂਹਿ, ਸੁਵਿਭਤ੍ਤੋਵ ਸੋਭਤਿ.

‘‘ਤਸ੍ਮਿਂ ਰਥੇ ਕਞ੍ਚਨਬਿਮ੍ਬਵਣ੍ਣੇ, ਯਾ ਤ੍ਵਂ ਠਿਤਾ ਭਾਸਸਿਮਂ ਪਦੇਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. – ਪੁਚ੍ਛਿ;

੬੫੮. ਤਤ੍ਥ ¶ ਪੀਤਵਤ੍ਥੇਤਿ ਪਰਿਸੁਦ੍ਧਚਾਮੀਕਰਪਭਸ੍ਸਰਤਾਯ ਪੀਤੋਭਾਸਨਿਵਾਸਨੇ. ਪੀਤਧਜੇਤਿ ਵਿਮਾਨਦ੍ਵਾਰੇ ਰਥੇ ਚ ਸਮੁਸ੍ਸਿਤਹੇਮਮਯਵਿਪੁਲਕੇਤੁਭਾਵਤੋ ਪੀਤੋਭਾਸਧਜੇ. ਪੀਤਾਲਙ੍ਕਾਰਭੂਸਿਤੇਤਿ ਪੀਤੋਭਾਸੇਹਿ ਆਭਰਣੇਹਿ ਅਲਙ੍ਕਤੇ. ਸਤਿਪਿ ਅਲਙ੍ਕਾਰਾਨਂ ਨਾਨਾਵਿਧਰਂਸਿਜਾਲਸਮੁਜ੍ਜਲਵਿਵਿਧਰਤਨਵਿਚਿਤ੍ਤਭਾਵੇ ਤਾਦਿਸਸੁਚਰਿਤਵਿਸੇਸਨਿਬ੍ਬਤ੍ਤਤਾਯ ਪਨ ਸੁਪਰਿਸੁਦ੍ਧਚਾਮੀਕਰਮਰੀਚਿਜਾਲਵਿਜ੍ਜੋਤਿਤਤ੍ਤਾ ਵਿਸੇਸਤੋ ਪੀਤਨਿਭਾਸਾਨਿ ਤਸ੍ਸਾ ਆਭਰਣਾਨਿ ਅਹੇਸੁਂ. ਪੀਤਨ੍ਤਰਾਹੀਤਿ ਪੀਤਵਣ੍ਣੇਹਿ ਉਤ੍ਤਰਿਯੇਹਿ. ‘‘ਸਨ੍ਤਰੁਤ੍ਤਰਪਰਮਂ ਤੇਨ ਭਿਕ੍ਖੁਨਾ ਤਤੋ ਚੀਵਰਂ ਸਾਦਿਤਬ੍ਬ’’ਨ੍ਤਿਆਦੀਸੁ (ਪਾਰਾ. ੫੨੩-੫੨੪) ਨਿਵਾਸਨੇ ਅਨ੍ਤਰਸਦ੍ਦੋ ਆਗਤੋ, ਇਧ ਪਨ ‘‘ਅਨ੍ਤਰਸਾਟਕਾ’’ਤਿਆਦੀਸੁ ਵਿਯ ਉਤ੍ਤਰਿਯੇ ਦਟ੍ਠਬ੍ਬੋ. ਅਨ੍ਤਰਾ ਉਤ੍ਤਰਿਯਂ ਉਤ੍ਤਰਾਸਙ੍ਗੋ ਉਪਸਂਬ੍ਯਾਨਨ੍ਤਿ ਪਰਿਯਾਯਸਦ੍ਦਾ ਏਤੇ. ਵਗ੍ਗੂਹੀਤਿ ਸੋਭਨੇਹਿ ਸਣ੍ਹਮਟ੍ਠੇਹਿ. ਅਪਿਲ਼ਨ੍ਧਾਵ ਸੋਭਸੀਤਿ ਤ੍ਵਂ ਇਮੇਹਿ ਅਲਙ੍ਕਾਰੇਹਿ ¶ ਅਨਲਙ੍ਕਤਾਪਿ ਅਤ੍ਤਨੋ ਰੂਪਸਮ੍ਪਤ੍ਤਿਯਾਵ ਸੋਭਸਿ. ਤੇ ਪਨ ਅਲਙ੍ਕਾਰਾ ਤਵ ਸਰੀਰਂ ਪਤ੍ਵਾ ਸੋਭਨ੍ਤਿ, ਤਸ੍ਮਾ ਅਨਲਙ੍ਕਤਾਪਿ ਤ੍ਵਂ ਅਲਙ੍ਕਤਸਦਿਸੀਤਿ ਅਧਿਪ੍ਪਾਯੋ.

੬੫੯. ਕਾ ਕਮ੍ਬੁਕਾਯੂਰਧਰੇਤਿ ਕਾ ਤ੍ਵਂ ਕਤਰਦੇਵਨਿਕਾਯਪਰਿਯਾਪਨ੍ਨਾ ਸੁਵਣ੍ਣਮਯਪਰਿਹਾਰਕਧਰੇ, ਸੁਵਣ੍ਣਮਯਕੇਯੂਰਧਰੇ ਵਾ. ਕਮ੍ਬੁਪਰਿਹਾਰਕਨ੍ਤਿ ਚ ਹਤ੍ਥਾਲਙ੍ਕਾਰਵਿਸੇਸੋ ਵੁਚ੍ਚਤਿ, ਕਾਯੂਰਨ੍ਤਿ ਭੁਜਾਲਙ੍ਕਾਰਵਿਸੇਸੋ. ਅਥ ਵਾ ਕਮ੍ਬੂਤਿ ਸੁਵਣ੍ਣਂ, ਤਸ੍ਮਾ ਕਮ੍ਬੁਕਾਯੂਰਧਰੇ ਸੁਵਣ੍ਣਮਯਬਾਹਾਭਰਣਧਰੇਤਿ ¶ ਅਤ੍ਥੋ. ਕਞ੍ਚਨਾਵੇਲ਼ਭੂਸਿਤੇਤਿ ਕਞ੍ਚਨਮਯਾਵੇਲ਼ਪਿਲ਼ਨ੍ਧਨਭੂਸਿਤੇ. ਹੇਮਜਾਲਕਸਞ੍ਛਨ੍ਨੇਤਿ ਰਤਨਪਰਿਸਿਬ੍ਬਿਤੇਨ ਹੇਮਮਯੇਨ ਜਾਲਕੇਨ ਛਾਦਿਤਸਰੀਰੇ. ਨਾਨਾਰਤਨਮਾਲਿਨੀਤਿ ਨਕ੍ਖਤ੍ਤਮਾਲਾਯ ਵਿਯ ਕਾਲ਼ਪਕ੍ਖਰਤ੍ਤਿਯਂ ਸੀਸੇ ਪਟਿਮੁਕ੍ਕਾਹਿ ਵਿਵਿਧਾਹਿ ਰਤਨਾਵਲੀਹਿ ਨਾਨਾਰਤਨਮਾਲਿਨੀ ਕਾ ਤ੍ਵਨ੍ਤਿ ਪੁਚ੍ਛਤਿ.

੬੬੦. ਸੋਵਣ੍ਣਮਯਾਤਿਆਦਿ ਯਾਹਿ ਰਤਨਮਾਲਾਹਿ ਸਾ ਦੇਵਤਾ ਨਾਨਾਰਤਨਮਾਲਿਨੀਤਿ ਵੁਤ੍ਤਾ, ਤਾਸਂ ਦਸ੍ਸਨਂ. ਤਤ੍ਥ ਸੋਵਣ੍ਣਮਯਾਤਿ ਸਿਙ੍ਗੀਸੁਵਣ੍ਣਮਯਾ ਮਾਲਾ. ਲੋਹਿਤਙ੍ਗਮਯਾਤਿ ਪਦੁਮਰਾਗਾਦਿਰਤ੍ਤਮਣਿਮਯਾ. ਮਸਾਰਗਲ੍ਲਾਤਿ ਮਸਾਰਗਲ੍ਲਮਣਿਮਯਾ. ਸਹਲੋਹਿਤਙ੍ਗਾਤਿ ਲੋਹਿਤਙ੍ਗਮਣਿਮਯਾਹਿ ਸਦ੍ਧਿਂ ਕਬਰਮਣਿਮਯਾ ਚੇਵ ਲੋਹਿਤਙ੍ਗਸਙ੍ਖਾਤਰਤ੍ਤਮਣਿਮਯਾ ਚਾਤਿ ਅਤ੍ਥੋ. ਪਾਰੇਵਤਕ੍ਖੀਹਿ ਮਣੀਹਿ ਚਿਤ੍ਤਤਾਤਿ ਪਾਰੇਵਤਕ੍ਖਿਸਦਿਸੇਹਿ ਮਣੀਹਿ ਯਥਾਵੁਤ੍ਤਮਣੀਹਿ ਚ ਸਙ੍ਖਤਚਿਤ੍ਤਭਾਵਾ ਇਮਾ ਤਵ ਕੇਸਹਤ੍ਥੇ ਰਤਨਮਾਲਾਤਿ ਅਧਿਪ੍ਪਾਯੋ.

੬੬੧. ਕੋਚਿ ਕੋਚੀਤਿ ਏਕਚ੍ਚੋ ਏਕਚ੍ਚੋ. ਏਤ੍ਥਾਤਿ ਏਤੇਸੁ ਮਾਲਾਦਾਮੇਸੁ. ਮਯੂਰਸੁਸ੍ਸਰੋਤਿ ਮਯੂਰੋ ਵਿਯ ਸੁਨ੍ਦਰਨਾਦੋ. ਹਂਸਸ੍ਸਰਞ੍ਞੋਤਿ ਹਂਸਸ੍ਸਰੋ ਅਞ੍ਞੋ, ਹਂਸਸਦਿਸਸ੍ਸਰੋ ਅਪਰੋ. ਕਰਵੀਕਸੁਸ੍ਸਰੋਤਿ ਕਰਵੀਕੋ ਵਿਯ ਸੋਭਨਸ੍ਸਰੋ. ਤੇਸਂ ਮਾਲਾਦਾਮਾਨਂ ਯਥਾ ਮਯੂਰਸ੍ਸਰੋ, ਹਂਸਸ੍ਸਰੋ ¶ , ਕਰਵੀਕਸ੍ਸਰੋ, ਏਵਂ ਵਗ੍ਗੁਰੂਪੋ ਮਧੁਰਾਕਾਰੋ ਸਰੋ ਸੁਯ੍ਯਤਿ. ਕਿਮਿਵ ¶ ? ਪਞ੍ਚਙ੍ਗਿਕਂ ਤੂਰਿਯਮਿਵਪ੍ਪਵਾਦਿਤਂ. ਯਥਾ ਕੁਸਲੇਨ ਵਾਦਿਤੇ ਪਞ੍ਚਙ੍ਗਿਕੇ ਤੂਰਿਯੇ, ਏਵਂ ਤੇਸਂ ਸਰੋ ਸੁਯ੍ਯਤਿ, ਵਗ੍ਗੁਰੂਪੋਤਿ ਅਤ੍ਥੋ. ਭੁਮ੍ਮਤ੍ਥੇ ਹਿ ਇਦਂ ਉਪਯੋਗਵਚਨਂ.

੬੬੨. ਨਾਨਾਵਣ੍ਣਾਹਿ ਧਾਤੂਹੀਤਿ ਅਨੇਕਰੂਪਾਹਿ ਅਕ੍ਖਚਕ੍ਕਈਸਾਦਿਅਵਯਵਧਾਤੂਹਿ. ਸੁਵਿਭਤ੍ਤੋਵ ਸੋਭਤੀਤਿ ਅਵਯਵਾਨਂ ਅਞ੍ਞਮਞ੍ਞਂ ਯੁਤ੍ਤਪ੍ਪਮਾਣਤਾਯ ਵਿਭਤ੍ਤਿਵਿਭਾਗਸਮ੍ਪਤ੍ਤਿਯਾ ਚ ਸੁਵਿਭਤ੍ਤੋਵ ਹੁਤ੍ਵਾ ਵਿਰਾਜਤਿ. ਅਥ ਵਾ ਸੁਵਿਭਤ੍ਤੋਵਾਤਿ ਕੇਵਲਂ ਕਮ੍ਮਨਿਬ੍ਬਤ੍ਤੋਪਿ ਸੁਸਿਕ੍ਖਿਤੇਨ ਸਿਪ੍ਪਾਚਰਿਯੇਨ ਵਿਭਤ੍ਤੋਵ ਵਿਰਚਿਤੋ ਵਿਯ ਸੋਭਤੀਤਿ ਅਤ੍ਥੋ.

੬੬੩. ਕਞ੍ਚਨਬਿਮ੍ਬਵਣ੍ਣੇਤਿ ਸਾਤਿਸਯਂ ਪੀਤੋਭਾਸਤਾਯ ਕਞ੍ਚਨਬਿਮ੍ਬਕਸਦਿਸੇ ਤਸ੍ਮਿਂ ਰਥੇ. ਕਞ੍ਚਨਬਿਮ੍ਬਵਣ੍ਣੇਤਿ ਵਾ ਤਸ੍ਸਾ ਦੇਵਤਾਯ ਆਲਪਨਂ ¶ , ਗਨ੍ਧੋਦਕੇਨ ਧੋਵਿਤ੍ਵਾ ਜਾਤਿਹਿਙ੍ਗੁਲਕਰਸੇਨ ਮਜ੍ਜਿਤ੍ਵਾ ਦੁਕੂਲਚੁਮ੍ਬਟਕੇਨ ਮਜ੍ਜਿਤਕਞ੍ਚਨਪਟਿਮਾਸਦਿਸੇਤਿ ਅਤ੍ਥੋ. ਭਾਸਸਿਮਂ ਪਦੇਸਨ੍ਤਿ ਇਮਂ ਸਕਲਮ੍ਪਿ ਭੂਮਿਪਦੇਸਂ ਭਾਸਯਸਿ ਵਿਜ੍ਜੋਤਯਸਿ.

ਏਵਂ ਥੇਰੇਨ ਪੁਚ੍ਛਿਤਾ ਸਾਪਿ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਸੋਵਣ੍ਣਜਾਲਂ ਮਣਿਸੋਣ੍ਣਚਿਤ੍ਤਿਤਂ, ਮੁਤ੍ਤਾਚਿਤਂ ਹੇਮਜਾਲੇਨ ਛਨ੍ਨਂ;

ਪਰਿਨਿਬ੍ਬੁਤੇ ਗੋਤਮੇ ਅਪ੍ਪਮੇਯ੍ਯੇ, ਪਸਨ੍ਨਚਿਤ੍ਤਾ ਅਹਮਾਭਿਰੋਪਯਿਂ.

‘‘ਤਾਹਂ ਕਮ੍ਮਂ ਕਰਿਤ੍ਵਾਨ, ਕੁਸਲਂ ਬੁਦ੍ਧਵਣ੍ਣਿਤਂ;

ਅਪੇਤਸੋਕਾ ਸੁਖਿਤਾ, ਸਮ੍ਪਮੋਦਾਮਨਾਮਯਾ’’ਤਿ.

੬੬੪. ਤਤ੍ਥ ਸੋਵਣ੍ਣਜਾਲਨ੍ਤਿ ਸਰੀਰਪ੍ਪਮਾਣੇਨ ਕਤਂ ਸੁਵਣ੍ਣਮਯਂ ਜਾਲਂ. ਮਣਿਸੋਣ੍ਣਚਿਤ੍ਤਿਤਨ੍ਤਿ ਸੀਸਾਦਿਟ੍ਠਾਨੇਸੁ ਸੀਸੂਪਗਗੀਵੂਪਗਾਦਿਆਭਰਣਵਸੇਨ ਨਾਨਾਵਿਧੇਹਿ ¶ ਮਣੀਹਿ ਚ ਸੁਵਣ੍ਣੇਨ ਚ ਚਿਤ੍ਤਿਤਂ. ਮੁਤ੍ਤਾਚਿਤਨ੍ਤਿ ਅਨ੍ਤਰਨ੍ਤਰਾ ਆਬਦ੍ਧਾਹਿ ਮੁਤ੍ਤਾਵਲੀਹਿ ਆਚਿਤਂ. ਹੇਮਜਾਲੇਨ ਛਨ੍ਨਨ੍ਤਿ ਹੇਮਮਯੇਨ ਪਭਾਜਾਲੇਨ ਛਨ੍ਨਂ. ਤਞ੍ਹਿ ਨਾਨਾਵਿਧੇਹਿ ਮਣੀਹਿ ਚੇਵ ਸੁਵਣ੍ਣੇਨ ਚ ਚਿਤ੍ਤਿਤਂ ਮੁਤ੍ਤਾਵਲੀਹਿ ਆਚਿਤਮ੍ਪਿ ਸੁਪਰਿਸੁਦ੍ਧਸ੍ਸ ਰਤ੍ਤਸੁਵਣ੍ਣਸ੍ਸੇਵ ਯੇਭੁਯ੍ਯਤਾਯ ਦਿਵਾਕਰਕਿਰਣਸਮ੍ਫਸ੍ਸਤੋ ਅਤਿਵਿਯ ਪਭਸ੍ਸਰੇਨ ਹੇਮਮਯੇਨ ਪਭਾਜਾਲੇਨ ਸਞ੍ਛਾਦਿਤਂ ਏਕੋਭਾਸਂ ਹੁਤ੍ਵਾ ਕਞ੍ਚਨਾਦਾਸਂ ਵਿਯ ਤਿਟ੍ਠਤਿ. ਪਰਿਨਿਬ੍ਬੁਤੇਤਿ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੇ. ਗੋਤਮੇਤਿ ਭਗਵਨ੍ਤਂ ਗੋਤ੍ਤੇਨ ਨਿਦ੍ਦਿਸਤਿ. ਅਪ੍ਪਮੇਯ੍ਯੇਤਿ ਗੁਣਾਨੁਭਾਵਤੋ ਪਮਿਨਿਤੁਂ ਅਸਕ੍ਕੁਣੇਯ੍ਯੇ. ਪਸਨ੍ਨਚਿਤ੍ਤਾਤਿ ਕਮ੍ਮਫਲਵਿਸਯਾਯ ¶ ਬੁਦ੍ਧਾਰਮ੍ਮਣਾਯ ਚ ਸਦ੍ਧਾਯ ਪਸਨ੍ਨਮਾਨਸਾ. ਅਭਿਰੋਪਯਿਨ੍ਤਿ ਪੂਜਾਵਸੇਨ ਸਰੀਰੇ ਰੋਪੇਸਿਂ ਪਟਿਮੁਞ੍ਚਿਂ.

੬੬੫. ਤਾਹਨ੍ਤਿ ਤਂ ਅਹਂ. ਕੁਸਲਨ੍ਤਿ ਕੁਚ੍ਛਿਤਸਲਨਾਦਿਅਤ੍ਥੇਨ ਕੁਸਲਂ. ਬੁਦ੍ਧਵਣ੍ਣਿਤਨ੍ਤਿ ‘‘ਯਾਵਤਾ, ਭਿਕ੍ਖਵੇ, ਸਤ੍ਤਾ ਅਪਦਾ ਵਾ ਦ੍ਵਿਪਦਾ ਵਾ’’ਤਿਆਦਿਨਾ (ਸਂ. ਨਿ. ੫.੧੩੯; ਅ. ਨਿ. ੪.੩੪) ਸਮ੍ਮਾਸਮ੍ਬੁਦ੍ਧੇਨ ਪਸਤ੍ਥਂ. ਅਪੇਤਸੋਕਾਤਿ ਸੋਕਹੇਤੂਨਂ ਭੋਗਬ੍ਯਸਨਾਦੀਨਂ ਅਭਾਵੇਨ ਅਪਗਤਸੋਕਾ. ਤੇਨ ਚਿਤ੍ਤਦੁਕ੍ਖਾਭਾਵਮਾਹ. ਸੁਖਿਤਾਤਿ ¶ ਸਞ੍ਜਾਤਸੁਖਾ ਸੁਖਪ੍ਪਤ੍ਤਾ. ਏਤੇਨ ਸਰੀਰਦੁਕ੍ਖਾਭਾਵਂ ਵਦਤਿ. ਚਿਤ੍ਤਦੁਕ੍ਖਾਭਾਵੇਨ ਚਸ੍ਸਾ ਪਮੋਦਾਪਤ੍ਤਿ, ਸਰੀਰਦੁਕ੍ਖਾਭਾਵੇਨ ਅਰੋਗਤਾ. ਤੇਨਾਹ ‘‘ਸਮ੍ਪਮੋਦਾਮਨਾਮਯਾ’’ਤਿ. ਸੇਸਂ ਵੁਤ੍ਤਨਯਮੇਵ. ਅਯਞ੍ਚ ਅਤ੍ਥੋ ਤਦਾ ਅਤ੍ਤਨਾ ਦੇਵਤਾਯ ਚ ਕਥਿਤਨਿਯਾਮੇਨੇਵ ਸਙ੍ਗੀਤਿਕਾਲੇ ਆਯਸ੍ਮਤਾ ਨਾਰਦੇਨ ਧਮ੍ਮਸਙ੍ਗਾਹਕਾਨਂ ਆਰੋਚਿਤੋ, ਤੇ ਚ ਤਂ ਤਥੇਵ ਸਙ੍ਗਹਂ ਆਰੋਪਯਿਂਸੂਤਿ.

ਮਲ੍ਲਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਕਾ ਨਾਮ ਤ੍ਵਂ ਵਿਸਾਲਕ੍ਖੀਤਿ ਵਿਸਾਲਕ੍ਖਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ¶ ਪਰਿਨਿਬ੍ਬੁਤੇ ਰਞ੍ਞਾ ਅਜਾਤਸਤ੍ਤੁਨਾ ਅਤ੍ਤਨਾ ਪਟਿਲਦ੍ਧਾ ਭਗਵਤਾ ਸਰੀਰਧਾਤੁਯੋ ਗਹੇਤ੍ਵਾ ਰਾਜਗਹੇ ਥੂਪੇ ਚ ਮਹੇ ਚ ਕਤੇ ਰਾਜਗਹਵਾਸਿਨੀ ਏਕਾ ਮਾਲਾਕਾਰਧੀਤਾ ਸੁਨਨ੍ਦਾ ਨਾਮ ਉਪਾਸਿਕਾ ਅਰਿਯਸਾਵਿਕਾ ਸੋਤਾਪਨ੍ਨਾ ਪਿਤੁਂ ਗੇਹਤੋ ਪੇਸਿਤਂ ਬਹੁਂ ਮਾਲਞ੍ਚ ਗਨ੍ਧਞ੍ਚ ਪੇਸੇਤ੍ਵਾ ਦੇਵਸਿਕਂ ਚੇਤਿਯੇ ਪੂਜਂ ਕਾਰੇਸਿ, ਉਪੋਸਥਦਿਵਸੇਸੁ ਪਨ ਸਯਮੇਵ ਗਨ੍ਤ੍ਵਾ ਪੂਜਂ ਅਕਾਸਿ. ਸਾ ਅਪਰਭਾਗੇ ਅਞ੍ਞਤਰੇਨ ਰੋਗੇਨ ਫੁਟ੍ਠਾ ਕਾਲਂ ਕਤ੍ਵਾ ਸਕ੍ਕਸ੍ਸ ਦੇਵਰਞ੍ਞੋ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ. ਅਥੇਕਦਿਵਸਂ ਸਾ ਸਕ੍ਕੇਨ ਦੇਵਾਨਮਿਨ੍ਦੇਨ ਸਹ ਚਿਤ੍ਤਲਤਾਵਨਂ ਪਾਵਿਸਿ. ਤਤ੍ਥ ਚ ਅਞ੍ਞਾਸਂ ਦੇਵਤਾਨਂ ਪਭਾ ਪੁਪ੍ਫਾਦੀਨਂ ਪਭਾਹਿ ਪਟਿਹਤਾ ਹੁਤ੍ਵਾ ਵਿਚਿਤ੍ਤਵਣ੍ਣਾ ਹੋਤਿ, ਸੁਨਨ੍ਦਾਯ ਪਨ ਪਭਾ ਤਾਹਿ ਅਨਭਿਭੂਤਾ ਸਭਾਵੇਨੇਵ ਅਟ੍ਠਾਸਿ. ਤਂ ਦਿਸ੍ਵਾ ਸਕ੍ਕੋ ਦੇਵਰਾਜਾ ਤਾਯ ਕਤਸੁਚਰਿਤਂ ਞਾਤੁਕਾਮੋ ਇਮਾਹਿ ਗਾਥਾਹਿ ਪੁਚ੍ਛਿ –

‘‘ਕਾ ਨਾਮ ਤ੍ਵਂ ਵਿਸਾਲਕ੍ਖਿ, ਰਮ੍ਮੇ ਚਿਤ੍ਤਲਤਾਵਨੇ;

ਸਮਨ੍ਤਾ ਅਨੁਪਰਿਯਾਸਿ, ਨਾਰੀਗਣਪੁਰਕ੍ਖਤਾ.

‘‘ਯਦਾ ¶ ਦੇਵਾ ਤਾਵਤਿਂਸਾ, ਪਵਿਸਨ੍ਤਿ ਇਮਂ ਵਨਂ;

ਸਯੋਗ੍ਗਾ ਸਰਥਾ ਸਬ੍ਬੇ, ਚਿਤ੍ਰਾ ਹੋਨ੍ਤਿ ਇਧਾਗਤਾ.

‘‘ਤੁਯ੍ਹਞ੍ਚ ¶ ਇਧ ਪਤ੍ਤਾਯ, ਉਯ੍ਯਾਨੇ ਵਿਚਰਨ੍ਤਿਯਾ;

ਕਾਯੇ ਨ ਦਿਸ੍ਸਤੀ ਚਿਤ੍ਤਂ, ਕੇਨ ਰੂਪਂ ਤਵੇਦਿਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੬੬. ਤਤ੍ਥ ਕਾ ਨਾਮ ਤ੍ਵਨ੍ਤਿ ਪੁਰਿਮਤ੍ਤਭਾਵੇ ਕਾ ਨਾਮ ਕੀਦਿਸੀ ਨਾਮ ਤ੍ਵਂ, ਯਤ੍ਥ ਕਤੇਨ ਸੁਚਰਿਤੇਨ ਅਯਂ ਤੇ ਈਦਿਸੀ ਆਨੁਭਾਵਸਮ੍ਪਤ੍ਤਿ ਅਹੋਸੀਤਿ ਅਧਿਪ੍ਪਾਯੋ. ਵਿਸਾਲਕ੍ਖੀਤਿ ਵਿਪੁਲਲੋਚਨੇ.

੬੬੭. ਯਦਾਤਿ ਯਸ੍ਮਿਂ ਕਾਲੇ. ਇਮਂ ਵਨਨ੍ਤਿ ਇਮਂ ਚਿਤ੍ਤਲਤਾਨਾਮਕਂ ਉਪਵਨਂ. ਚਿਤ੍ਰਾ ਹੋਨ੍ਤੀਤਿ ਇਮਸ੍ਮਿਂ ਚਿਤ੍ਤਲਤਾਵਨੇ ਵਿਚਿਤ੍ਤਪਭਾਸਂਸਗ੍ਗੇਨ ਅਤ੍ਤਨੋ ਸਰੀਰਵਤ੍ਥਾਲਙ੍ਕਾਰਾਦੀਨਂ ਪਕਤਿਓਭਾਸਤੋਪਿ ਵਿਸਿਟ੍ਠਭਾਵਪ੍ਪਤ੍ਤਿਯਾ ਵਿਚਿਤ੍ਰਾਕਾਰਾ ਹੋਨ੍ਤਿ. ਇਧਾਗਤਾਤਿ ਇਧ ਆਗਤਾ ਸਮ੍ਪਤ੍ਤਾ, ਇਧ ਵਾ ਆਗਮਨਹੇਤੁ.

੬੬੮. ਇਧ ਪਤ੍ਤਾਯਾਤਿ ਇਮਂ ਠਾਨਂ ਸਮ੍ਪਤ੍ਤਾਯ ਉਪਗਤਾਯ. ਕੇਨ ¶ ਰੂਪਂ ਤਵੇਦਿਸਨ੍ਤਿ ਕੇਨ ਕਾਰਣੇਨ ਤਵ ਰੂਪਂ ਸਰੀਰਂ ਏਦਿਸਂ ਏਵਰੂਪਂ, ਚਿਤ੍ਤਲਤਾਵਨਸ੍ਸ ਪਭਂ ਅਭਿਭਵਨ੍ਤਂ ਤਿਟ੍ਠਤੀਤਿ ਅਧਿਪ੍ਪਾਯੋ.

ਏਵਂ ਸਕ੍ਕੇਨ ਪੁਟ੍ਠਾ ਸਾ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਯੇਨ ਕਮ੍ਮੇਨ ਦੇਵਿਨ੍ਦ, ਰੂਪਂ ਮਯ੍ਹਂ ਗਤੀ ਚ ਮੇ;

ਇਦ੍ਧਿ ਚ ਆਨੁਭਾਵੋ ਚ, ਤਂ ਸੁਣੋਹਿ ਪੁਰਿਨ੍ਦਦ.

‘‘ਅਹਂ ਰਾਜਗਹੇ ਰਮ੍ਮੇ, ਸੁਨਨ੍ਦਾ ਨਾਮੁਪਾਸਿਕਾ;

ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ.

‘‘ਅਚ੍ਛਾਦਨਞ੍ਚ ਭਤ੍ਤਞ੍ਚ, ਸੇਨਾਸਨਂ ਪਦੀਪਿਯਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਚਾਤੁਦ੍ਦਸਿਂ ¶ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

‘‘ਪਾਣਾਤਿਪਾਤਾ ¶ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ.

‘‘ਤਸ੍ਸਾ ਮੇ ਞਾਤਿਕੁਲਾ ਦਾਸੀ, ਸਦਾ ਮਾਲਾਭਿਹਾਰਤਿ;

ਤਾਹਂ ਭਗਵਤੋ ਥੂਪੇ, ਸਬ੍ਬਮੇਵਾਭਿਰੋਪਯਿਂ.

‘‘ਉਪੋਸਥੇ ਚਹਂ ਗਨ੍ਤ੍ਵਾ, ਮਾਲਾਗਨ੍ਧਵਿਲੇਪਨਂ;

ਥੂਪਸ੍ਮਿਂ ਅਭਿਰੋਪੇਸਿਂ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਤੇਨ ਕਮ੍ਮੇਨ ਦੇਵਿਨ੍ਦ, ਰੂਪਂ ਮਯ੍ਹਂ ਗਤੀ ਚ ਮੇ;

ਇਦ੍ਧਿ ਚ ਆਨੁਭਾਵੋ ਚ, ਯਂ ਮਾਲਂ ਅਭਿਰੋਪਯਿਂ.

‘‘ਯਞ੍ਚ ਸੀਲਵਤੀ ਆਸਿਂ, ਨ ਤਂ ਤਾਵ ਵਿਪਚ੍ਚਤਿ;

ਆਸਾ ਚ ਪਨ ਮੇ ਦੇਵਿਨ੍ਦ, ਸਕਦਾਗਾਮਿਨੀ ਸਿਯ’’ਨ੍ਤਿ.

੬੬੯. ਤਤ੍ਥ ਗਤੀਤਿ ਅਯਂ ਦੇਵਗਤਿ, ਨਿਬ੍ਬਤ੍ਤਿ ਵਾ. ਇਦ੍ਧੀਤਿ ਅਯਂ ਦੇਵਿਦ੍ਧਿ, ਅਧਿਪ੍ਪਾਯਸਮਿਜ੍ਝਨਂ ਵਾ. ਆਨੁਭਾਵੋਤਿ ਪਭਾਵੋ. ਪੁਰਿਨ੍ਦਦਾਤਿ ਸਕ੍ਕਂ ਆਲਪਤਿ. ਸੋ ਹਿ ਪੁਰੇ ਦਾਨਂ ਅਦਾਸੀਤਿ ‘‘ਪੁਰਿਨ੍ਦਦੋ’’ਤਿ ਵੁਚ੍ਚਤਿ.

੬੭੬. ਞਾਤਿਕੁਲਾਤਿ ਪਿਤੁ ਗੇਹਂ ਸਨ੍ਧਾਯ ਵਦਤਿ. ਸਦਾ ਮਾਲਾਭਿਹਾਰਤੀਤਿ ¶ ਸਦਾ ਸਬ੍ਬਕਾਲਂ ਦਿਵਸੇ ਦਿਵਸੇ ਞਾਤਿਕੁਲਤੋ ਦਾਸਿਯਾ ਪੁਪ੍ਫਂ ਮਯ੍ਹਂ ਅਭਿਹਰੀਯਤਿ. ਸਬ੍ਬਮੇਵਾਭਿਰੋਪਯਿਨ੍ਤਿ ¶ ਮਯ੍ਹਂ ਪਿਲ਼ਨ੍ਧਨਤ੍ਥਾਯ ਪਿਤੁਗੇਹਤੋ ਆਹਟਂ ਮਾਲਂ ਅਞ੍ਞਞ੍ਚ ਗਨ੍ਧਾਦਿਂ ਸਬ੍ਬਮੇਵ ਅਤ੍ਤਨਾ ਅਪਰਿਭੁਞ੍ਜਿਤ੍ਵਾ ਭਗਵਤੋ ਥੂਪੇ ਪੂਜਨਵਸੇਨ ਅਭਿਰੋਪਯਿਂ ਪੂਜਂ ਕਾਰੇਸਿਂ.

੬੭੭-੮. ਉਪੋਸਥੇ ਚਹਂ ਗਨ੍ਤ੍ਵਾਤਿ ਉਪੋਸਥਦਿਵਸੇ ਅਹਮੇਵ ਥੂਪਟ੍ਠਾਨਂ ਗਨ੍ਤ੍ਵਾ. ਯਂ ਮਾਲਂ ਅਭਿਰੋਪਯਿਨ੍ਤਿ ਯਂ ਤਦਾ ਭਗਵਤੋ ਥੂਪੇ ਮਾਲਾਗਨ੍ਧਾਭਿਰੋਪਨਂ ਕਤਂ, ਤੇਨ ਕਮ੍ਮੇਨਾਤਿ ਯੋਜਨਾ.

੬੭੯. ਨ ਤਂ ਤਾਵ ਵਿਪਚ੍ਚਤੀਤਿ ਯਂ ਸੀਲਵਤੀ ਆਸਿਂ, ਤਂ ਸੀਲਰਕ੍ਖਣਂ ਤਂ ਰਕ੍ਖਿਤਂ ਸੀਲਂ ਪੂਜਾਮਯਪੁਞ੍ਞਸ੍ਸ ਬਲਵਭਾਵੇਨ ਅਲਦ੍ਧੋਕਾਸਂ ਨ ਤਾਵ ਵਿਪਚ੍ਚਤਿ ¶ , ਨ ਵਿਪਚ੍ਚਿਤੁਂ ਆਰਦ੍ਧਂ, ਅਪਰਸ੍ਮਿਂਯੇਵ ਅਤ੍ਤਭਾਵੇ ਤਸ੍ਸ ਵਿਪਾਕੋਤਿ ਅਤ੍ਥੋ. ਆਸਾ ਚ ਪਨ ਮੇ ਦੇਵਿਨ੍ਦ, ਸਕਦਾਗਾਮਿਨੀ ਸਿਯਨ੍ਤਿ ‘‘ਕਥਂ ਨੁ ਖੋ ਅਹਂ ਸਕਦਾਗਾਮਿਨੀ ਭਵੇਯ੍ਯ’’ਨ੍ਤਿ ਪਤ੍ਥਨਾ ਚ ਮੇ ਦੇਵਿਨ੍ਦ, ਅਰਿਯਧਮ੍ਮਵਿਸਯਾਵ, ਨ ਭਵਵਿਸੇਸਵਿਸਯਾ. ਸਾ ਪਨ ਸਪ੍ਪਿਮਣ੍ਡਂ ਇਚ੍ਛਤੋ ਦਧਿਤੋ ਪਚਿਤਂ ਵਿਯ ਅਨਿਪ੍ਫਾਦਿਨੀਤਿ ਦਸ੍ਸੇਤਿ. ਸੇਸਂ ਵੁਤ੍ਤਨਯਮੇਵ.

ਇਮਂ ਪਨ ਅਤ੍ਥਂ ਸਕ੍ਕੋ ਦੇਵਾਨਮਿਨ੍ਦੋ ਅਤ੍ਤਨਾ ਚ ਤਾਯ ਦੇਵਧੀਤਾਯ ਚ ਵੁਤ੍ਤਨਿਯਾਮੇਨੇਵ ਆਯਸ੍ਮਤੋ ਵਙ੍ਗੀਸਤ੍ਥੇਰਸ੍ਸ ਆਰੋਚੇਸਿ. ਆਯਸ੍ਮਾ ਵਙ੍ਗੀਸੋ ਸਙ੍ਗੀਤਿਕਾਲੇ ਧਮ੍ਮਸਙ੍ਗਾਹਕਾਨਂ ਮਹਾਥੇਰਾਨਂ ਆਰੋਚੇਸਿ, ਤੇ ਚ ਤਂ ਤਥੇਵ ਸਙ੍ਗੀਤਿਂ ਆਰੋਪਯਿਂਸੂਤਿ.

ਵਿਸਾਲਕ੍ਖਿਵਿਮਾਨਵਣ੍ਣਨਾ ਨਿਟ੍ਠਿਤਾ.

ਪਾਰਿਚ੍ਛਤ੍ਤਕੇ ਕੋਵਿਲ਼ਾਰੇਤਿ ਪਾਰਿਚ੍ਛਤ੍ਤਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ¶ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਸਾਵਤ੍ਥਿਵਾਸੀ ਅਞ੍ਞਤਰੋ ਉਪਾਸਕੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ, ਸ੍ਵਾਤਨਾਯ ਨਿਮਨ੍ਤੇਤ੍ਵਾ, ਅਤ੍ਤਨੋ ਗੇਹਦ੍ਵਾਰੇ ਮਹਨ੍ਤਂ ਮਣ੍ਡਪਂ ਸਜ੍ਜੇਤ੍ਵਾ ਸਾਣਿਪਾਕਾਰਂ ਪਰਿਕ੍ਖਿਪਿਤ੍ਵਾ ਉਪਰਿ ਵਿਤਾਨਂ ਬਨ੍ਧਿਤ੍ਵਾ ਧਜਪਟਾਕਾਦਯੋ ਉਸ੍ਸਾਪੇਤ੍ਵਾ ਨਾਨਾਵਿਰਾਗਵਣ੍ਣਾਨਿ ਵਤ੍ਥਾਨਿ ਗਨ੍ਧਦਾਮਮਾਲਾਦਾਮਾਨਿ ਚ ਓਲਮ੍ਬੇਤ੍ਵਾ ਸਿਤ੍ਤਸਮ੍ਮਟ੍ਠੇ ਪਦੇਸੇ ਆਸਨਾਨਿ ਪਞ੍ਞਾਪੇਤ੍ਵਾ ਭਗਵਤੋ ਕਾਲਂ ਆਰੋਚੇਸਿ. ਅਥ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਦੇਵਵਿਮਾਨਂ ਵਿਯ ਅਲਙ੍ਕਤਪਟਿਯਤ੍ਤਂ ਮਣ੍ਡਪਂ ਪਵਿਸਿਤ੍ਵਾ ਸਹਸ੍ਸਰਂਸੀ ਵਿਯ ਅਣ੍ਣਵਕੁਚ੍ਛਿਂ ਓਭਾਸਯਮਾਨੋ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਉਪਾਸਕੋ ਗਨ੍ਧਪੁਪ੍ਫਧੂਮਦੀਪੇਹਿ ਭਗਵਨ੍ਤਂ ਪੂਜੇਸਿ.

ਤੇਨ ¶ ਚ ਸਮਯੇਨ ਅਞ੍ਞਤਰਾ ਕਟ੍ਠਹਾਰਿਕਾ ਇਤ੍ਥੀ ਅਨ੍ਧਵਨੇ ਸੁਪੁਪ੍ਫਿਤਂ ਅਸੋਕਰੁਕ੍ਖਂ ਦਿਸ੍ਵਾ ਸਪਲ੍ਲਵਙ੍ਕੁਰਾਨਿ ਪਿਣ੍ਡੀਕਤਾਨਿ ਬਹੂਨਿ ਅਸੋਕਪੁਪ੍ਫਾਨਿ ਗਹੇਤ੍ਵਾ ਆਗਚ੍ਛਨ੍ਤੀ, ਭਗਵਨ੍ਤਂ ਤਤ੍ਥ ਨਿਸਿਨ੍ਨਂ ਦਿਸ੍ਵਾ ਪਸਨ੍ਨਚਿਤ੍ਤਾ ਆਸਨਸ੍ਸ ਸਮਨ੍ਤਤੋ ਤੇਹਿ ਪੁਪ੍ਫੇਹਿ ਪੁਪ੍ਫਸਨ੍ਥਰਂ ਸਨ੍ਥਰਨ੍ਤੀ, ਭਗਵਤੋ ਪੂਜਂ ਕਤ੍ਵਾ ਵਨ੍ਦਿਤ੍ਵਾ ¶ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਨਮਸ੍ਸਮਾਨਾ ਅਗਮਾਸਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ, ਅਚ੍ਛਰਾਸਹਸ੍ਸਪਰਿਵਾਰਾ ਯੇਭੁਯ੍ਯੇਨ ਨਨ੍ਦਨਵਨੇ ਨਚ੍ਚਨ੍ਤੀ ਗਾਯਨ੍ਤੀ ਪਾਰਿਚ੍ਛਤ੍ਤਕਮਾਲਾ ਗਨ੍ਥੇਨ੍ਤੀ ਪਮੋਦਮਾਨਾ ਕੀਲ਼ਨ੍ਤੀ ਸੁਖਂ ਅਨੁਭਵਤਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਗਨ੍ਤ੍ਵਾ ਤਂ ਦਿਸ੍ਵਾ ਤਾਯ ਕਤਕਮ੍ਮਂ ਇਮਾਹਿ ਗਾਥਾਹਿ ਪੁਚ੍ਛਿ –

‘‘ਪਾਰਿਚ੍ਛਤ੍ਤਕੇ ਕੋਵਿਲ਼ਾਰੇ, ਰਮਣੀਯੇ ਮਨੋਰਮੇ;

ਦਿਬ੍ਬਮਾਲਂ ਗਨ੍ਥਮਾਨਾ, ਗਾਯਨ੍ਤੀ ਸਮ੍ਪਮੋਦਸਿ.

‘‘ਤਸ੍ਸਾ ¶ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਸਦ੍ਦਾ ਨਿਚ੍ਛਰਨ੍ਤਿ, ਸਵਨੀਯਾ ਮਨੋਰਮਾ.

‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਗਨ੍ਧਾ ਪਵਾਯਨ੍ਤਿ, ਸੁਚਿਗਨ੍ਧਾ ਮਨੋਰਮਾ.

‘‘ਵਿਵਤ੍ਤਮਾਨਾ ਕਾਯੇਨ, ਯਾ ਵੇਣੀਸੁ ਪਿਲ਼ਨ੍ਧਨਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

‘‘ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

‘‘ਯਾਪਿ ਤੇ ਸਿਰਸ੍ਮਿਂ ਮਾਲਾ, ਸੁਚਿਗਨ੍ਧਾ ਮਨੋਰਮਾ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੮੦. ਤਤ੍ਥ ¶ ਪਾਰਿਚ੍ਛਤ੍ਤਕੇ ਕੋਵਿਲ਼ਾਰੇਤਿ ਪਾਰਿਚ੍ਛਤ੍ਤਕਨਾਮਕੇ ਕੋਵਿਲ਼ਾਰਪੁਪ੍ਫੇ ਆਦਾਯ ਦਿਬ੍ਬਮਾਲਂ ਗਨ੍ਥਮਾਨਾਤਿ ਯੋਜਨਾ. ਯਞ੍ਹਿ ਲੋਕਿਯਾ ‘‘ਪਾਰਿਜਾਤ’’ਨ੍ਤਿ ਵਦਨ੍ਤਿ, ਤਂ ਮਾਗਧਭਾਸਾਯ ‘‘ਪਾਰਿਚ੍ਛਤ੍ਤਕ’’ਨ੍ਤਿ ਵੁਚ੍ਚਤਿ. ਕੋਵਿਲ਼ਾਰੋਤਿ ਚ ਕੋਵਿਲ਼ਾਰਜਾਤਿਕੋ, ਸੋ ਚ ਮਨੁਸ੍ਸਲੋਕੇਪਿ ਦੇਵਲੋਕੇਪਿ ਕੋਵਿਲ਼ਾਰੋ, ਤਸ੍ਸਾਪਿ ਜਾਤੀਤਿ ਵਦਨ੍ਤਿ.

੬੮੧. ਤਸ੍ਸਾ ¶ ਪਨ ਦੇਵਤਾਯ ਨਚ੍ਚਨਕਾਲੇ ਅਙ੍ਗਭਾਰਵਸੇਨ ਸਰੀਰਤੋ ਚ ਪਿਲ਼ਨ੍ਧਨਤੋ ਚ ਅਤਿਵਿਯ ਮਧੁਰੋ ਸਦ੍ਦੋ ਨਿਚ੍ਛਰਤਿ, ਗਨ੍ਧੋ ਸਦਾ ਸਬ੍ਬਾ ਦਿਸਾਪਿ ਫਰਿਤ੍ਵਾ ਤਿਟ੍ਠਤਿ. ਤੇਨਾਹ ‘‘ਤਸ੍ਸਾ ਤੇ ਨਚ੍ਚਮਾਨਾਯਾ’’ਤਿਆਦਿ. ਤਤ੍ਥ ਸਵਨੀਯਾਤਿ ਸੋਤੁਂ ਯੁਤ੍ਤਾ, ਸਵਨਸ੍ਸ ਵਾ ਹਿਤਾ, ਕਣ੍ਣਸੁਖਾਤਿ ਅਤ੍ਥੋ.

੬੮੩. ਵਿਵਤ੍ਤਮਾਨਾ ਕਾਯੇਨਾਤਿ ਤਵ ਕਾਯੇਨ ਸਰੀਰੇਨ ਪਰਿਵਤ੍ਤਮਾਨੇਨ, ਇਤ੍ਥਮ੍ਭੂਤਲਕ੍ਖਣੇ ਚੇਤਂ ਕਰਣਵਚਨਂ. ਯਾ ਵੇਣੀਸੁ ਪਿਲ਼ਨ੍ਧਨਾਤਿ ਯਾਨਿ ਤੇ ਕੇਸਵੇਣੀਸੁ ਪਿਲ਼ਨ੍ਧਨਾਨਿ, ਵਿਭਤ੍ਤਿਲੋਪੋ ਚੇਤ੍ਥ ਦਟ੍ਠਬ੍ਬੋ, ਲਿਙ੍ਗਵਿਪਲ੍ਲਾਸੋ ਵਾ.

੬੮੪. ਵਟਂਸਕਾਤਿ ਰਤਨਮਯਾ ਕਣ੍ਣਿਕਾ ਵਟਂਸਕਾਤਿ ਅਤ੍ਥੋ. ਵਾਤਧੁਤਾਤਿ ਮਨ੍ਦੇਨ ਮਾਲੁਤੇਨ ਧੂਪਯਮਾਨਾ. ਵਾਤੇਨ ¶ ਸਮ੍ਪਕਮ੍ਪਿਤਾਤਿ ਵਾਤੇਨ ਸਮਨ੍ਤਤੋ ਵਿਸੇਸਤੋ ਕਮ੍ਪਿਤਾ ਚਲਿਤਾ. ਅਥ ਵਾ ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾਤਿ ਅਵਾਤੇਰਿਤਾਪਿ ਵਾਤੇਰਿਤਾਪਿ ਯੇ ਤੇ ਵਟਂਸਕਾ ਕਮ੍ਪਿਤਾ, ਤੇਸਂ ਸੁਯ੍ਯਤਿ ਨਿਗ੍ਘੋਸੋਤਿ ਅਤ੍ਥਯੋਜਨਾ.

੬੮੫. ਵਾਤਿ ਗਨ੍ਧੋ ਦਿਸਾ ਸਬ੍ਬਾਤਿ ਤਸ੍ਸਾ ਤੇ ਸਿਰਸ੍ਮਿਂ ਦਿਬ੍ਬਮਾਲਾਯ ਗਨ੍ਧੋ ਵਾਯਤਿ ਸਬ੍ਬਾ ਦਿਸਾ. ਯਥਾ ਕਿਂ? ਰੁਕ੍ਖੋ ਮਞ੍ਜੂਸਕੋ ਯਥਾਤਿ, ਯਥਾ ਨਾਮ ਮਞ੍ਜੂਸਕੋ ਰੁਕ੍ਖੋ ਸੁਪੁਪ੍ਫਿਤੋ ਅਤ੍ਤਨੋ ਗਨ੍ਧੇਨ ਬਹੂਨਿ ਯੋਜਨਾਨਿ ਫਰਮਾਨੋ ਸਬ੍ਬਾ ਦਿਸਾ ਵਾਯਤਿ, ਏਵਂ ਤਵ ਸਿਰਸ੍ਮਿਂ ਪਿਲ਼ਨ੍ਧਨਮਾਲਾਯ ਗਨ੍ਧੋਤਿ ਅਤ੍ਥੋ. ਸੋ ਕਿਰ ਰੁਕ੍ਖੋ ਗਨ੍ਧਮਾਦਨੇ ਪਚ੍ਚੇਕਬੁਦ੍ਧਾਨਂ ਉਪੋਸਥਕਰਣਮਣ੍ਡਲਮਾਲ਼ਕਮਜ੍ਝੇ ਤਿਟ੍ਠਤਿ. ਯਤ੍ਤਕਾਨਿ ਦੇਵਲੋਕੇ ਚ ਮਨੁਸ੍ਸਲੋਕੇ ਚ ਸੁਰਭਿਕੁਸੁਮਾਨਿ, ਤਾਨਿ ਤਸ੍ਸ ਸਾਖਗ੍ਗੇਸੁ ਨਿਬ੍ਬਤ੍ਤਨ੍ਤਿ. ਤੇਨ ਸੋ ਅਤਿਵਿਯ ਸੁਗਨ੍ਧੋ ਹੋਤਿ. ਏਵਂ ਤਾਯ ਦੇਵਤਾਯ ਪਿਲ਼ਨ੍ਧਨਮਾਲਾਯ ਗਨ੍ਧੋਤਿ. ਤੇਨ ਵੁਤ੍ਤਂ ‘‘ਰੁਕ੍ਖੋ ਮਞ੍ਜੂਸਕੋ ਯਥਾ’’ਤਿ.

੬੮੬. ਯਦਿਪਿ ਤਸ੍ਸ ਸਗ੍ਗਸ੍ਸ ਛਫਸ੍ਸਾਯਤਨਿਕਭਾਵਤੋ ਸਬ੍ਬਾਨਿਪਿ ਤਤ੍ਥ ਆਰਮ੍ਮਣਾਨਿ ਪਿਯਰੂਪਾਨਿਯੇਵ, ਗਨ੍ਧਰੂਪਾਨਂ ਪਨ ਸਵਿਸੇਸਾਨਂ ਤਸ੍ਸਾ ਦੇਵਤਾਯ ਲਾਭਿਭਾਵਤੋ ‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸ’’ਨ੍ਤਿ ਵੁਤ੍ਤਂ.

ਅਥ ¶ ¶ ਦੇਵਤਾ ਦ੍ਵੀਹਿ ਗਾਥਾਹਿ ਬ੍ਯਾਕਾਸਿ –

‘‘ਪਭਸ੍ਸਰਂ ਅਚ੍ਚਿਮਨ੍ਤਂ, ਵਣ੍ਣਗਨ੍ਧੇਨ ਸਂਯੁਤਂ;

ਅਸੋਕਪੁਪ੍ਫਮਾਲਾਹਂ, ਬੁਦ੍ਧਸ੍ਸ ਉਪਨਾਮਯਿਂ.

‘‘ਤਾਹਂ ਕਮ੍ਮਂ ਕਰਿਤ੍ਵਾਨ, ਕੁਸਲਂ ਬੁਦ੍ਧਵਣ੍ਣਿਤਂ;

ਅਪੇਤਸੋਕਾ ਸੁਖਿਤਾ, ਸਮ੍ਪਮੋਦਾਮਨਾਮਯਾ’’ਤਿ.

੬੮੭. ਤਤ੍ਥ ਸੁਧੋਤਪਵਾਲ਼ਸਙ੍ਘਾਤਸਨ੍ਨਿਭਸ੍ਸ ਕਿਞ੍ਜਕ੍ਖਕੇਸਰਸਮੁਦਾਯੇਨ ਭਾਣੁਰਂਸਿਜਾਲਸ੍ਸ ਵਿਯ ਅਸੋਕਪੁਪ੍ਫੁਤ੍ਤਮਸ੍ਸ ¶ ਤਦਾ ਉਪਟ੍ਠਿਤਤਂ ਸਨ੍ਧਾਯਾਹ ‘‘ਪਭਸ੍ਸਰਂ ਅਚ੍ਚਿਮਨ੍ਤ’’ਨ੍ਤਿ. ਸੇਸਂ ਵੁਤ੍ਤਨਯਮੇਵ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਾਯ ਦੇਵਤਾਯ ਅਤ੍ਤਨੋ ਸੁਚਰਿਤਕਮ੍ਮੇ ਕਥਿਤੇ ਸਪਰਿਵਾਰਾਯ ਤਸ੍ਸਾ ਧਮ੍ਮਂ ਦੇਸੇਤ੍ਵਾ ਤਤੋ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਤਂ ਪਵਤ੍ਤਿਂ ਕਥੇਸਿ. ਭਗਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਮਹਾਜਨਸ੍ਸ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਪਾਰਿਚ੍ਛਤ੍ਤਕਵਿਮਾਨਵਣ੍ਣਨਾ ਨਿਟ੍ਠਿਤਾ.

ਇਤਿ ਪਰਮਤ੍ਥਦੀਪਨਿਯਾ ਖੁਦ੍ਦਕ-ਅਟ੍ਠਕਥਾਯ ਵਿਮਾਨਵਤ੍ਥੁਸ੍ਮਿਂ

ਦਸਵਤ੍ਥੁਪਟਿਮਣ੍ਡਿਤਸ੍ਸ ਤਤਿਯਸ੍ਸ ਪਾਰਿਚ੍ਛਤ੍ਤਕਵਗ੍ਗਸ੍ਸ

ਮਞ੍ਜਿਟ੍ਠਕਵਗ੍ਗੇ ¶ ਮਞ੍ਜਿਟ੍ਠਕੇ ਵਿਮਾਨਸ੍ਮਿਨ੍ਤਿ ਮਞ੍ਜਿਟ੍ਠਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤਤ੍ਥ ਅਞ੍ਞਤਰੋ ਉਪਾਸਕੋ ਭਗਵਨ੍ਤਂ ਨਿਮਨ੍ਤੇਤ੍ਵਾ ਅਨਨ੍ਤਰਵਿਮਾਨੇ ਵੁਤ੍ਤਨਯੇਨੇਵ ਮਣ੍ਡਪਂ ਸਜ੍ਜੇਤ੍ਵਾ ਤਤ੍ਥ ਨਿਸਿਨ੍ਨਂ ਸਤ੍ਥਾਰਂ ਪੂਜੇਤ੍ਵਾ ਦਾਨਂ ਦੇਤਿ. ਤੇਨ ਚ ਸਮਯੇਨ ਅਞ੍ਞਤਰਾ ਕੁਲਦਾਸੀ ਅਨ੍ਧਵਨੇ ਸੁਪੁਪ੍ਫਿਤਂ ਸਾਲਰੁਕ੍ਖਂ ਦਿਸ੍ਵਾ ਤਤ੍ਥ ਪੁਪ੍ਫਾਨਿ ਗਹੇਤ੍ਵਾ ਹੀਰੇਹਿ ¶ ਆਵੁਣਿਤ੍ਵਾ ਵਟਂਸਕੇ ਕਤ੍ਵਾ ਪੁਨ ਬਹੂਨਿ ਮੁਤ੍ਤਪੁਪ੍ਫਾਨਿ ਅਗ੍ਗਪੁਪ੍ਫਾਨਿ ਚ ਗਹੇਤ੍ਵਾ ਨਗਰਂ ਪਵਿਟ੍ਠਾ. ਤਸ੍ਮਿਂ ਮਣ੍ਡਪੇ ਯੁਗਨ੍ਧਰਪਬ੍ਬਤਕੁਚ੍ਛਿਂ ਓਭਾਸਯਮਾਨਂ ਬਾਲਸੂਰਿਯਂ ਵਿਯ ਛਬ੍ਬਣ੍ਣਬੁਦ੍ਧਰਂਸਿਯੋ ਵਿਸ੍ਸਜ੍ਜੇਤ੍ਵਾ ਨਿਸਿਨ੍ਨਂ, ਭਗਵਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤਾ ਤੇਹਿ ਪੁਪ੍ਫੇਹਿ ਪੂਜੇਨ੍ਤੀ ਵਟਂਸਕਾਨਿ ਆਸਨਸ੍ਸ ਸਮਨ੍ਤਤੋ ਠਪੇਤ੍ਵਾ ਇਤਰਾਨਿ ਚ ਪੁਪ੍ਫਾਨਿ ਓਕਿਰਿਤ੍ਵਾ ਸਕ੍ਕਚ੍ਚਂ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਅਗਮਾਸਿ. ਸਾ ¶ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ, ਤਤ੍ਥ ਤਸ੍ਸਾ ਰਤ੍ਤਫਲਿਕਮਯਂ ਵਿਮਾਨਂ, ਤਸ੍ਸ ਚ ਪੁਰਤੋ ਸੁਵਣ੍ਣਵਾਲੁਕਾਸਨ੍ਥਤਭੂਮਿਭਾਗਂ ਮਹਨ੍ਤਂ ਸਾਲਵਨਂ ਪਾਤੁਰਹੋਸਿ. ਸਾ ਯਦਾ ਵਿਮਾਨਤੋ ਨਿਕ੍ਖਮਿਤ੍ਵਾ ਸਾਲਵਨਂ ਪਵਿਸਤਿ, ਤਦਾ ਸਾਲਸਾਖਾ ਓਨਮਿਤ੍ਵਾ ਤਸ੍ਸਾ ਉਪਰਿ ਕੁਸੁਮਾਨਿ ਓਕਿਰਨ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨ ਉਪਗਨ੍ਤ੍ਵਾ ਇਮਾਹਿ ਗਾਥਾਹਿ ਕਤਕਮ੍ਮਂ ਪੁਚ੍ਛਿ –

‘‘ਮਞ੍ਜਿਟ੍ਠਕੇ ਵਿਮਾਨਸ੍ਮਿਂ, ਸੋਣ੍ਣਵਾਲੁਕਸਨ੍ਥਤੇ;

ਪਞ੍ਚਙ੍ਗਿਕੇਨ ਤੂਰਿਯੇਨ, ਰਮਸਿ ਸੁਪ੍ਪਵਾਦਿਤੇ.

‘‘ਤਮ੍ਹਾ ਵਿਮਾਨਾ ਓਰੁਯ੍ਹ, ਨਿਮ੍ਮਿਤਾ ਰਤਨਾਮਯਾ;

ਓਗਾਹਸਿ ਸਾਲਵਨਂ, ਪੁਪ੍ਫਿਤਂ ਸਬ੍ਬਕਾਲਿਕਂ.

‘‘ਯਸ੍ਸ ਯਸ੍ਸੇਵ ਸਾਲਸ੍ਸ, ਮੂਲੇ ਤਿਟ੍ਠਸਿ ਦੇਵਤੇ;

ਸੋ ਸੋ ਮੁਞ੍ਚਤਿ ਪੁਪ੍ਫਾਨਿ, ਓਨਮਿਤ੍ਵਾ ਦੁਮੁਤ੍ਤਮੋ.

‘‘ਵਾਤੇਰਿਤਂ ¶ ਸਾਲਵਨਂ, ਆਧੁਤਂ ਦਿਜਸੇਵਿਤਂ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੮੯. ਤਤ੍ਥ ਮਞ੍ਜਿਟ੍ਠਕੇ ਵਿਮਾਨਸ੍ਮਿਨ੍ਤਿ ਰਤ੍ਤਫਲਿਕਮਯੇ ਵਿਮਾਨੇ. ਸਿਨ੍ਦੁਵਾਰਕਣਵੀਰਮਕੁਲਸਦਿਸਵਣ੍ਣਞ੍ਹਿ ‘‘ਮਞ੍ਜਿਟ੍ਠਕ’’ਨ੍ਤਿ ਵੁਚ੍ਚਤਿ. ਸੋਣ੍ਣਵਾਲੁਕਸਨ੍ਥਤੇਤਿ ਸਮਨ੍ਤਤੋ ਵਿਪ੍ਪਕਿਣ੍ਣਾਹਿ ਸੁਵਣ੍ਣਵਾਲੁਕਾਹਿ ਸਨ੍ਥਤਭੂਮਿਭਾਗੇ. ਰਮਸਿ ਸੁਪ੍ਪਵਾਦਿਤੇਤਿ ਸੁਟ੍ਠੁ ਪਵਾਦਿਤੇਨ ਪਞ੍ਚਙ੍ਗਿਕੇਨ ਤੂਰਿਯੇਨ ਅਭਿਰਮਸਿ.

੬੯੦. ਨਿਮਿਤ੍ਤਾ ¶ ਰਤਨਾਮਯਾਤਿ ਤਵ ਸੁਚਰਿਤਸਿਪ੍ਪਿਨਾ ਅਭਿਨਿਮ੍ਮਿਤਾ ਰਤਨਮਯਾ ਵਿਮਾਨਾ. ਓਗਾਹਸੀਤਿ ਪਵਿਸਸਿ. ਸਬ੍ਬਕਾਲਿਕਨ੍ਤਿ ਸਬ੍ਬਕਾਲੇ ਸੁਖਂ ਸਬ੍ਬਉਤੁਸਪ੍ਪਾਯਂ, ਸਬ੍ਬਕਾਲੇ ਪੁਪ੍ਫਨਕਂ ਵਾ.

੬੯੨. ਵਾਤੇਰਿਤਨ੍ਤਿ ਯਥਾ ਪੁਪ੍ਫਾਨਿ ਓਕਿਰਨ੍ਤਿ, ਏਵਂ ਵਾਤੇਨ ਈਰਿਤਂ ¶ ਚਲਿਤਂ. ਆਧੁਤਨ੍ਤਿ ਮਨ੍ਦੇਨ ਮਾਲੁਤੇਨ ਸਣਿਕਸਣਿਕਂ ਵਿਧੂਪਯਮਾਨਂ. ਦਿਜਸੇਵਿਤਨ੍ਤਿ ਮਯੂਰਕੋਕਿਲਾਦਿਸਕੁਣਸਙ੍ਘੇਹਿ ਉਪਸੇਵਿਤਂ.

ਏਵਂ ਥੇਰੇਨ ਪੁਟ੍ਠਾ ਸਾ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਦਾਸੀ ਅਯਿਰਕੁਲੇ ਅਹੁਂ;

ਬੁਦ੍ਧਂ ਨਿਸਿਨ੍ਨਂ ਦਿਸ੍ਵਾਨ, ਸਾਲਪੁਪ੍ਫੇਹਿ ਓਕਿਰਿਂ.

‘‘ਵਟਂਸਕਞ੍ਚ ਸੁਕਤਂ, ਸਾਲਪੁਪ੍ਫਮਯਂ ਅਹਂ;

ਬੁਦ੍ਧਸ੍ਸ ਉਪਨਾਮੇਸਿਂ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਤਾਹਂ ਕਮ੍ਮਂ ਕਰਿਤ੍ਵਾਨ, ਕੁਸਲਂ ਬੁਦ੍ਧਵਣ੍ਣਿਤਂ;

ਅਪੇਤਸੋਕਾ ਸੁਖਿਤਾ, ਸਮ੍ਪਮੋਦਾਮਨਾਮਯਾ’’ਤਿ.

੬੯੪-੫. ਤਤ੍ਥ ¶ ਅਯਿਰਕੁਲੇਤਿ ਅਯ੍ਯਕੁਲੇ, ਸਾਮਿਕਗੇਹੇਤਿ ਅਤ੍ਥੋ. ਅਹੁਨ੍ਤਿ ਅਹੋਸਿਂ. ਓਕਿਰਿਨ੍ਤਿ ਪੁਪ੍ਫੇਹਿ ਵਿਪ੍ਪਕਿਰਿਂ. ਉਪਨਾਮੇਸਿਨ੍ਤਿ ਪੂਜਾਵਸੇਨ ਉਪਨਾਮੇਸਿਂ. ਸੇਸਂ ਵੁਤ੍ਤਨਯਮੇਵ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਸਪਰਿਵਾਰਾਯ ਤਸ੍ਸਾ ਦੇਵਤਾਯ ਧਮ੍ਮਂ ਦੇਸੇਤ੍ਵਾ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਤਮਤ੍ਥਂ ਨਿਵੇਦੇਸਿ. ਭਗਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਮਹਾਜਨਸ੍ਸ ਧਮ੍ਮਂ ਦੇਸੇਸਿ. ਦੇਸਨਾ ਸਦੇਵਕਸ੍ਸ ਲੋਕਸ੍ਸ ਸਾਤ੍ਥਿਕਾ ਅਹੋਸੀਤਿ.

ਮਞ੍ਜਿਟ੍ਠਕਵਿਮਾਨਵਣ੍ਣਨਾ ਨਿਟ੍ਠਿਤਾ.

ਪਭਸ੍ਸਰਵਰਵਣ੍ਣਨਿਭੇਤਿ ¶ ਪਭਸ੍ਸਰਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ. ਤੇਨ ਚ ਸਮਯੇਨ ਰਾਜਗਹੇ ਅਞ੍ਞਤਰੋ ਉਪਾਸਕੋ ਮਹਾਮੋਗ੍ਗਲ੍ਲਾਨਤ੍ਥੇਰੇ ਅਭਿਪ੍ਪਸਨ੍ਨੋ ਹੋਤਿ. ਤਸ੍ਸੇਕਾ ਧੀਤਾ ਸਦ੍ਧਾ ਪਸਨ੍ਨਾ, ਸਾਪਿ ਥੇਰੇ ਗਰੁਚਿਤ੍ਤੀਕਾਰਬਹੁਲਾ ਹੋਤਿ. ਅਥੇਕਦਿਵਸਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਰਾਜਗਹੇ ਪਿਣ੍ਡਾਯ ਚਰਨ੍ਤੋ ਤਂ ਕੁਲਂ ਉਪਸਙ੍ਕਮਿ. ਸਾ ਥੇਰਂ ਦਿਸ੍ਵਾ ਸੋਮਨਸ੍ਸਜਾਤਾ ਆਸਨਂ ਪਞ੍ਞਾਪੇਤ੍ਵਾ ਥੇਰੇ ਤਤ੍ਥ ਨਿਸਿਨ੍ਨੇ ਸੁਮਨਮਾਲਾਯ ਪੂਜੇਤ੍ਵਾ ¶ ਮਧੁਰਂ ਗੁਲ਼ਫਾਣਿਤਂ ਥੇਰਸ੍ਸ ਪਤ੍ਤੇ ਆਕਿਰਿ, ਥੇਰੋ ਅਨੁਮੋਦਿਤੁਕਾਮੋ ਨਿਸੀਦਿ. ਸਾ ਘਰਾਵਾਸਸ੍ਸ ਬਹੁਕਿਚ੍ਚਤਾਯ ਅਨੋਕਾਸਤਂ ਪਵੇਦੇਤ੍ਵਾ ‘‘ਅਞ੍ਞਸ੍ਮਿਂ ਦਿਵਸੇ ਧਮ੍ਮਂ ਸੋਸ੍ਸਾਮੀ’’ਤਿ ਥੇਰਂ ਵਨ੍ਦਿਤ੍ਵਾ ਉਯ੍ਯੋਜੇਸਿ. ਤਦਹੇਵ ਚ ਸਾ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਉਪਸਙ੍ਕਮਿਤ੍ਵਾ ਇਮਾਹਿ ਗਾਥਾਹਿ ਪੁਚ੍ਛਿ –

‘‘ਪਭਸ੍ਸਰਵਰਵਣ੍ਣਨਿਭੇ, ਸੁਰਤ੍ਤਵਤ੍ਥਵਸਨੇ;

‘‘ਪਲ੍ਲਙ੍ਕੋ ਚ ਤੇ ਮਹਗ੍ਘੋ, ਨਾਨਾਰਤਨਚਿਤ੍ਤਿਤੋ ਰੁਚਿਰੋ;

ਯਤ੍ਥ ਤ੍ਵਂ ਨਿਸਿਨ੍ਨਾ ਵਿਰੋਚਸਿ, ਦੇਵਰਾਜਾਰਿਵ ਨਨ੍ਦਨੇ ਵਨੇ.

‘‘ਕਿਂ ¶ ਤ੍ਵਂ ਪੁਰੇ ਸੁਚਰਿਤਮਾਚਰੀ ਭਦ੍ਦੇ, ਕਿਸ੍ਸ ਕਮ੍ਮਸ੍ਸ ਵਿਪਾਕਂ;

ਅਨੁਭੋਸਿ ਦੇਵਲੋਕਸ੍ਮਿਂ, ਦੇਵਤੇ ਪੁਚ੍ਛਿਤਾਚਿਕ੍ਖ;

੬੯੭. ਤਤ੍ਥ ਪਭਸ੍ਸਰਵਰਵਣ੍ਣਨਿਭੇਤਿ ਨਿਭਾਤਿ ਦਿਬ੍ਬਤੀਤਿ ਨਿਭਾ, ਵਣ੍ਣੋਵ ਨਿਭਾ ਵਣ੍ਣਨਿਭਾ, ਅਤਿਵਿਯ ਓਭਾਸਨਤੋ ਪਭਸ੍ਸਰਾ ਛਵਿਦੋਸਾਭਾਵੇਨ ਵਰਾ ਉਤ੍ਤਮਾ ਵਣ੍ਣਨਿਭਾ ਏਤਿਸ੍ਸਾਤਿ ਪਭਸ੍ਸਰਵਰਵਣ੍ਣਨਿਭਾ. ਆਮਨ੍ਤਨਵਸੇਨ ‘‘ਪਭਸ੍ਸਰਵਰਵਣ੍ਣਨਿਭੇ’’ਤਿ ਵੁਤ੍ਤਂ. ਸੁਰਤ੍ਤਵਤ੍ਥਵਸਨੇਤਿ ਸੁਟ੍ਠੁ ਰਤ੍ਤਵਤ੍ਥਨਿਵਤ੍ਥੇ. ਚਨ੍ਦਨਰੁਚਿਰਗਤ੍ਤੇਤਿ ਚਨ੍ਦਨਾਨੁਲਿਤ੍ਤਂ ਵਿਯ ਰੁਚਿਰਗਤ੍ਤੇ, ਗੋਸੀਤਚਨ੍ਦਨੇਨ ਬਹਲਤਰਾਨੁਲਿਤ੍ਤਂ ਵਿਯ ਸੁਰਤ੍ਤਮਨੁਞ੍ਞਸਰੀਰਾਵਯਵੇਤਿ ਅਤ੍ਥੋ, ਚਨ੍ਦਨਾਨੁਲੇਪੇਨ ਵਾ ਰੁਚਿਰਗਤ੍ਤੇ.

ਏਵਂ ¶ ਥੇਰੇਨ ਪੁਟ੍ਠਾ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਪਿਣ੍ਡਾਯ ਤੇ ਚਰਨ੍ਤਸ੍ਸ, ਮਾਲਂ ਫਾਣਿਤਞ੍ਚ ਅਦਦਂ ਭਨ੍ਤੇ;

ਤਸ੍ਸ ਕਮ੍ਮਸ੍ਸਿਦਂ ਵਿਪਾਕਂ, ਅਨੁਭੋਮਿ ਦੇਵਲੋਕਸ੍ਮਿਂ.

‘‘ਹੋਤਿ ਚ ਮੇ ਅਨੁਤਾਪੋ, ਅਪਰਦ੍ਧਂ ਦੁਕ੍ਖਿਤਞ੍ਚ ਮੇ ਭਨ੍ਤੇ;

ਸਾਹਂ ¶ ਧਮ੍ਮਂ ਨਾਸ੍ਸੋਸਿਂ, ਸੁਦੇਸਿਤਂ ਧਮ੍ਮਰਾਜੇਨ.

‘‘ਤਂ ਤਂ ਵਦਾਮਿ ਭਦ੍ਦਨ੍ਤੇ, ਯਸ੍ਸ ਮੇ ਅਨੁਕਮ੍ਪਿਯੋ ਕੋਚਿ;

ਧਮ੍ਮੇਸੁ ਤਂ ਸਮਾਦਪੇਥ, ਸੁਦੇਸਿਤਂ ਧਮ੍ਮਰਾਜੇਨ.

‘‘ਯੇਸਂ ਅਤ੍ਥਿ ਸਦ੍ਧਾ ਬੁਦ੍ਧੇ, ਧਮ੍ਮੇ ਚ ਸਙ੍ਘਰਤਨੇ;

ਤੇ ਮਂ ਅਤਿਵਿਰੋਚਨ੍ਤਿ, ਆਯੁਨਾ ਯਸਸਾ ਸਿਰਿਯਾ.

‘‘ਪਤਾਪੇਨ ਵਣ੍ਣੇਨ ਉਤ੍ਤਰਿਤਰਾ, ਅਞ੍ਞੇ ਮਹਿਦ੍ਧਿਕਤਰਾ ਮਯਾ ਦੇਵਾ’’ਤਿ.

੭੦੦. ਤਤ੍ਥ ਮਾਲਨ੍ਤਿ ਸੁਮਨਪੁਪ੍ਫਂ. ਫਾਣਿਤਨ੍ਤਿ ਉਚ੍ਛੁਰਸਂ ਗਹੇਤ੍ਵਾ ਕਤਫਾਣਿਤਂ.

੭੦੧. ਅਨੁਤਾਪੋਤਿ ਵਿਪ੍ਪਟਿਸਾਰੋ. ਤਸ੍ਸ ਕਾਰਣਮਾਹ ‘‘ਅਪਰਦ੍ਧਂ ਦੁਕ੍ਖਤਞ੍ਚ ਮੇ ਭਨ੍ਤੇ’’ਤਿ ¶ . ਇਦਾਨਿ ਤਂ ਸਰੂਪਤੋ ਦਸ੍ਸੇਤਿ ‘‘ਸਾਹਂ ਧਮ੍ਮਂ ਨਾਸ੍ਸੋਸਿ’’ਨ੍ਤਿ, ਸਾ ਅਹਂ ਤਦਾ ਤਵ ਦੇਸੇਤੁਕਾਮਸ੍ਸ ਧਮ੍ਮਂ ਨ ਸੁਣਿਂ. ਕੀਦਿਸਂ? ਸੁਦੇਸਿਤਂ ਧਮ੍ਮਰਾਜੇਨਾਤਿ, ਸਮ੍ਮਾਸਮ੍ਬੁਦ੍ਧੇਨ ਆਦਿਕਲ੍ਯਾਣਾਦਿਤਾਯ ਏਕਨ੍ਤਨਿਯ੍ਯਾਨਿਕਤਾਯ ਚ ਸ੍ਵਾਖਾਤਨ੍ਤਿ ਅਤ੍ਥੋ.

੭੦੨. ਤਨ੍ਤਿ ਤਸ੍ਮਾ ਧਮ੍ਮਰਾਜੇਨ ਸੁਦੇਸਿਤਤ੍ਤਾ ਅਸਵਨਸ੍ਸ ਚ ਮਾਦਿਸਾਨਂ ਅਨੁਤਾਪਹੇਤੁਭਾਵਤੋ. ਤਨ੍ਤਿ ਤੁਵਂ, ਤੁਯ੍ਹਨ੍ਤਿ ਅਤ੍ਥੋ. ਯਸ੍ਸਾਤਿ ਯੋ ਅਸ੍ਸ. ਅਨੁਕਮ੍ਪਿਯੋਤਿ ਅਨੁਕਮ੍ਪਿਤਬ੍ਬੋ. ਕੋਚੀਤਿ ਯੋ ਕੋਚਿ. ਧਮ੍ਮੇਸੂਤਿ ਸੀਲਾਦਿਧਮ੍ਮੇਸੁ. ‘‘ਧਮ੍ਮੇ ਹੀ’’ਤਿ ਵਾ ਪਾਠੋ, ਸਾਸਨਧਮ੍ਮੇਤਿ ਅਤ੍ਥੋ. ਹੀਤਿ ਨਿਪਾਤਮਤ੍ਤਂ, ਵਚਨਵਿਪਲ੍ਲਾਸੋ ਵਾ. ਤਨ੍ਤਿ ਅਨੁਕਮ੍ਪਿਤਬ੍ਬਪੁਗ੍ਗਲਂ. ਸੁਦੇਸਿਤਨ੍ਤਿ ਸੁਟ੍ਠੁ ਦੇਸਿਤਂ.

੭੦੩-੪. ਤੇ ਮਂ ਅਤਿਵਿਰੋਚਨ੍ਤੀਤਿ ਤੇ ਰਤਨਤ੍ਤਯੇ ਪਸਨ੍ਨਾ ਦੇਵਪੁਤ੍ਤਾ ਮਂ ਅਤਿਕ੍ਕਮਿਤ੍ਵਾ ਵਿਰੋਚਨ੍ਤਿ. ਪਤਾਪੇਨਾਤਿ ਤੇਜਸਾ ਆਨੁਭਾਵੇਨ. ਅਞ੍ਞੇਤਿ ¶ ਯੇ ਅਞ੍ਞੇ. ਮਯਾਤਿ ਨਿਸ੍ਸਕ੍ਕੇ ਕਰਣਵਚਨਂ. ਵਣ੍ਣੇਨ ਉਤ੍ਤਰਿਤਰਾ ਮਹਿਦ੍ਧਿਕਤਰਾ ¶ ਚ ਦੇਵਾ, ਤੇ ਰਤਨਤ੍ਤਯੇ ਅਭਿਪ੍ਪਸਨ੍ਨਾਯੇਵਾਤਿ ਦਸ੍ਸੇਤਿ. ਸੇਸਂ ਵੁਤ੍ਤਨਯਮੇਵ.

ਅਲਙ੍ਕਤਾ ਮਣਿਕਞ੍ਚਨਾਚਿਤਨ੍ਤਿ ਨਾਗਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਬਾਰਾਣਸਿਯਂ ਵਿਹਰਤਿ ਇਸਿਪਤਨੇ ਮਿਗਦਾਯੇ. ਤੇਨ ਸਮਯੇਨ ਬਾਰਾਣਸਿਵਾਸਿਨੀ ਏਕਾ ਉਪਾਸਿਕਾ ਸਦ੍ਧਾ ਪਸਨ੍ਨਾ ਸੀਲਾਚਾਰਸਮ੍ਪਨ੍ਨਾ ਭਗਵਨ੍ਤਂ ਉਦ੍ਦਿਸ੍ਸ ਵਤ੍ਥਯੁਗਂ ਵਾਯਾਪੇਤ੍ਵਾ ਸੁਪਰਿਧੋਤਂ ਕਾਰਾਪੇਤ੍ਵਾ ਉਪਸਙ੍ਕਮਿਤ੍ਵਾ ਭਗਵਤੋ ਪਾਦਮੂਲੇ ਠਪੇਤ੍ਵਾ ਏਵਮਾਹ ‘‘ਪਟਿਗ੍ਗਣ੍ਹਾਤੁ, ਭਨ੍ਤੇ ਭਗਵਾ, ਇਮਂ ਵਤ੍ਥਯੁਗਂ ਅਨੁਕਮ੍ਪਂ ਉਪਾਦਾਯ ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਭਗਵਾ ਤਂ ਪਟਿਗ੍ਗਹੇਤ੍ਵਾ ਤਸ੍ਸਾ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਧਮ੍ਮਂ ਦੇਸੇਸਿ, ਸਾ ਦੇਸਨਾਵਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਹਿਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਗੇਹਂ ਅਗਮਾਸਿ. ਸਾ ਨ ਚਿਰਸ੍ਸੇਵ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਨ੍ਨਾ ਸਕ੍ਕਸ੍ਸ ਦੇਵਰਾਜਸ੍ਸ ਪਿਯਾ ਅਹੋਸਿ ਵਲ੍ਲਭਾ ਯਸੁਤ੍ਤਰਾ ਨਾਮ ਨਾਮੇਨ. ਤਸ੍ਸਾ ਪੁਞ੍ਞਾਨੁਭਾਵੇਨ ਹੇਮਜਾਲਸਞ੍ਛਨ੍ਨੋ ਕੁਞ੍ਜਰਵਰੋ ਨਿਬ੍ਬਤ੍ਤਿ, ਤਸ੍ਸ ਚ ਖਨ੍ਧੇ ਮਣਿਮਯੋ ਮਣ੍ਡਪੋ, ਮਜ੍ਝੇ ਸੁਪਞ੍ਞਤ੍ਤਰਤਨਪਲ੍ਲਙ੍ਕੋ ਨਿਬ੍ਬਤ੍ਤਿ, ਦ੍ਵੀਸੁ ਦਨ੍ਤੇਸੁ ਚਸ੍ਸ ਕਮਲਕੁਵਲਯੁਜ੍ਜਲਾ ਰਮਣੀਯਾ ਦ੍ਵੇ ਪੋਕ੍ਖਰਣਿਯੋ ¶ ਪਾਤੁਰਹੇਸੁਂ. ਤਤ੍ਥ ਪਦੁਮਕਣ੍ਣਿਕਾਸੁ ਠਿਤਾ ਦੇਵਧੀਤਾ ਪਗ੍ਗਹਿਤਪਞ੍ਚਙ੍ਗਿਕਤੂਰਿਯਾ ਨਚ੍ਚਨ੍ਤਿ ਚੇਵ ਗਾਯਨ੍ਤਿ ਚ.

ਸਤ੍ਥਾ ਬਾਰਾਣਸਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਸਾਵਤ੍ਥਿਂ ਪਤ੍ਵਾ ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਸਾ ਦੇਵਤਾ ਅਤ੍ਤਨਾ ਅਨੁਭੁਯ੍ਯਮਾਨਂ ਦਿਬ੍ਬਸਮ੍ਪਤ੍ਤਿਂ ਓਲੋਕੇਤ੍ਵਾ ਤਸ੍ਸਾ ਕਾਰਣਂ ਉਪਧਾਰੇਨ੍ਤੀ ‘‘ਸਤ੍ਥੁ ਵਤ੍ਥਯੁਗਦਾਨਕਾਰਣ’’ਨ੍ਤਿ ਞਤ੍ਵਾ ਸਞ੍ਜਾਤਸੋਮਨਸ੍ਸਾ ਭਗਵਤਿ ਪਸਾਦਬਹੁਮਾਨਾ ¶ ਵਨ੍ਦਿਤੁਕਾਮਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਹਤ੍ਥਿਕ੍ਖਨ੍ਧਵਰਗਤਾ ਆਕਾਸੇਨ ਆਗਨ੍ਤ੍ਵਾ ਤਤੋ ਓਤਰਿਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਏਕਮਨ੍ਤਂ ਅਟ੍ਠਾਸਿ. ਤਂ ਆਯਸ੍ਮਾ ਵਙ੍ਗੀਸੋ ਭਗਵਤੋ ਅਨੁਞ੍ਞਾਯ ਇਮਾਹਿ ਗਾਥਾਹਿ ਪੁਚ੍ਛਿ –

‘‘ਅਲਙ੍ਕਤਾ ¶ ਮਣਿਕਞ੍ਚਨਾਚਿਤਂ, ਸੋਵਣ੍ਣਜਾਲਚਿਤਂ ਮਹਨ੍ਤਂ;

ਅਭਿਰੁਯ੍ਹ ਗਜਵਰਂ ਸੁਕਪ੍ਪਿਤਂ, ਇਧਾਗਮਾ ਵੇਹਾਯਸਂ ਅਨ੍ਤਲਿਕ੍ਖੇ.

‘‘ਨਾਗਸ੍ਸ ਦਨ੍ਤੇਸੁ ਦੁਵੇਸੁ ਨਿਮ੍ਮਿਤਾ, ਅਚ੍ਛੋਦਕਾ ਪਦੁਮਿਨਿਯੋ ਸੁਫੁਲ੍ਲਾ;

ਪਦੁਮੇਸੁ ਚ ਤੂਰਿਯਗਣਾ ਪਭਿਜ੍ਜਰੇ, ਇਮਾ ਚ ਨਚ੍ਚਨ੍ਤਿ ਮਨੋਹਰਾਯੋ.

‘‘ਦੇਵਿਦ੍ਧਿਪਤ੍ਤਾਸਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੦੫. ਤਤ੍ਥ ਅਲਙ੍ਕਤਾਤਿ ਸਬ੍ਬਾਭਰਣਵਿਭੂਸਿਤਾ. ਮਣਿਕਞ੍ਚਨਾਚਿਤਨ੍ਤਿ ਤੇਹਿ ਦਿਬ੍ਬਮਾਨੇਹਿ ਮਣਿਸੁਵਣ੍ਣੇਹਿ ਆਚਿਤਂ. ਸੋਵਣ੍ਣਜਾਲਚਿਤਨ੍ਤਿ ਹੇਮਜਾਲਸਞ੍ਛਨ੍ਨਂ. ਮਹਨ੍ਤਨ੍ਤਿ ਵਿਪੁਲਂ. ਸੁਕਪ੍ਪਿਤਨ੍ਤਿ ਗਮਨਸਨ੍ਨਾਹਵਸੇਨ ਸੁਟ੍ਠੁ ਸਨ੍ਨਦ੍ਧਂ. ਵੇਹਾਯਸਨ੍ਤਿ ਵੇਹਾਯਸਭੂਤੇ ਹਤ੍ਥਿਪਿਟ੍ਠੇ. ਅਨ੍ਤਲਿਕ੍ਖੇਤਿ ਆਕਾਸੇ, ‘‘ਅਲਙ੍ਕਤਮਣਿਕਞ੍ਚਨਾਚਿਤ’’ਨ੍ਤਿਪਿ ਪਾਠੋ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਦੇਵਤੇ, ਤ੍ਵਂ ਸਬ੍ਬਾਲਙ੍ਕਾਰੇਹਿ ਅਲਙ੍ਕਤਾ ਅਲਙ੍ਕਤਮਣਿਕਞ੍ਚਨਾਚਿਤਂ, ਅਤਿਵਿਯ ਦਿਬ੍ਬਮਾਨੇਹਿ ਮਣੀਹਿ ਕਞ੍ਚਨੇਹਿ ਚ ਅਲਙ੍ਕਰਣਵਸੇਨ ਖਚਿਤਂ, ਹੇਮਜਾਲੇਹਿ ਕੁਮ੍ਭਾਲਙ੍ਕਾਰਾਦਿਭੇਦੇਹਿ ਹਤ੍ਥਾਲਙ੍ਕਾਰੇਹਿ ਚਿਤਂ ਆਮੁਤ੍ਤਂ ਮਹਨ੍ਤਂ ਅਤਿਵਿਯ ਬ੍ਰਹਨ੍ਤਂ ਉਤ੍ਤਮਂ ਗਜਂ ਆਰੁਯ੍ਹ ਹਤ੍ਥਿਪਿਟ੍ਠਿਯਾ ¶ ਨਿਸਿਨ੍ਨਾ ਆਕਾਸੇਨੇਵ ਇਧ ਅਮ੍ਹਾਕਂ ਸਨ੍ਤਿਕਂ ਆਗਤਾਤਿ.

੭੦੬. ਨਾਗਸ੍ਸ ਦਨ੍ਤੇਸੁ ਦੁਵੇਸੁ ਨਿਮ੍ਮਿਤਾਤਿ ਏਰਾਵਣਸ੍ਸ ਵਿਯ ਨਾਗਰਾਜਸ੍ਸ ਇਮਸ੍ਸ ਦ੍ਵੀਸੁ ਦਨ੍ਤੇਸੁ ¶ ਦ੍ਵੇ ਪੋਕ੍ਖਰਣਿਯੋ ਸੁਚਰਿਤਸਿਪ੍ਪਿਨਾ ਸੁਟ੍ਠੁ ਵਿਰਚਿਤਾ. ਤੂਰਿਯਗਣਾਤਿ ਪਞ੍ਚਙ੍ਗਿਕਤੂਰਿਯਸਮੂਹਾ. ਪਭਿਜ੍ਜਰੇਤਿ ਦ੍ਵਾਦਸਨ੍ਨਂ ਲਯਭੇਦਾਨਂ ਵਸੇਨ ਪਭੇਦਂ ਗਚ੍ਛਨ੍ਤਿ. ‘‘ਪਵਜ੍ਜਰੇ’’ਤਿ ਚ ਪਠਨ੍ਤਿ, ਪਕਾਰੇਹਿ ਵਾਦੀਯਨ੍ਤੀਤਿ ਅਤ੍ਥੋ.

ਏਵਂ ¶ ਥੇਰੇਨ ਪੁਟ੍ਠਾ ਦੇਵਤਾ ਇਮਾਹਿ ਗਾਥਾਹਿ ਵਿਸ੍ਸਜ੍ਜੇਸਿ –

‘‘ਬਾਰਾਣਸਿਯਂ ਉਪਸਙ੍ਕਮਿਤ੍ਵਾ, ਬੁਦ੍ਧਸ੍ਸਹਂ ਵਤ੍ਥਯੁਗਂ ਅਦਾਸਿਂ;

ਪਾਦਾਨਿ ਵਨ੍ਦਿਤ੍ਵਾ ਛਮਾ ਨਿਸੀਦਿਂ, ਵਿਤ੍ਤਾ ਚਹਂ ਅਞ੍ਜਲਿਕਂ ਅਕਾਸਿਂ.

‘‘ਬੁਦ੍ਧੋ ਚ ਮੇ ਕਞ੍ਚਨਸਨ੍ਨਿਭਤ੍ਤਚੋ, ਅਦੇਸਯਿ ਸਮੁਦਯਦੁਕ੍ਖਨਿਚ੍ਚਤਂ;

ਅਸਙ੍ਖਤਂ ਦੁਕ੍ਖਨਿਰੋਧਸਸ੍ਸਤਂ, ਮਗ੍ਗਂ ਅਦੇਸਯਿ ਯਤੋ ਵਿਜਾਨਿਸਂ.

‘‘ਅਪ੍ਪਾਯੁਕੀ ਕਾਲਕਤਾ ਤਤੋ ਚੁਤਾ, ਉਪਪਨ੍ਨਾ ਤਿਦਸਗਣਂ ਯਸਸ੍ਸਿਨੀ;

ਸਕ੍ਕਸ੍ਸਹਂ ਅਞ੍ਞਤਰਾ ਪਜਾਪਤਿ, ਯਸੁਤ੍ਤਰਾ ਨਾਮ ਦਿਸਾਸੁ ਵਿਸ੍ਸੁਤਾ’’ਤਿ.

੭੦੮-੯. ਤਤ੍ਥ ਛਮਾਤਿ ਭੂਮਿਯਂ. ਭੁਮ੍ਮਤ੍ਥੇ ਹਿ ਇਦਂ ਪਚ੍ਚਤ੍ਤਵਚਨਂ. ਵਿਤ੍ਤਾਤਿ ਤੁਟ੍ਠਾ. ਯਤੋਤਿ ਯਤੋ ਸਤ੍ਥੁ ਸਾਮੁਕ੍ਕਂਸਿਕਧਮ੍ਮਦੇਸਨਤੋ. ਵਿਜਾਨਿਸਨ੍ਤਿ ਚਤ੍ਤਾਰਿ ਅਰਿਯਸਚ੍ਚਾਨਿ ਪਟਿਵਿਜ੍ਝਿਂ.

੭੧੦. ਅਪ੍ਪਾਯੁਕੀਤਿ ‘‘ਈਦਿਸਂ ਨਾਮ ਉਲ਼ਾਰਂ ਪੁਞ੍ਞਂ ਕਤ੍ਵਾ ਨ ਤਯਾ ਏਤਸ੍ਮਿਂ ਦੁਕ੍ਖਬਹੁਲੇ ਮਨੁਸ੍ਸਤ੍ਤਭਾਵੇ ਏਵਂ ਠਾਤਬ੍ਬ’’ਨ੍ਤਿ ਸਞ੍ਜਾਤਾਭਿਸਨ੍ਧਿਨਾ ਵਿਯ ਪਰਿਕ੍ਖਯਂ ਗਤੇਨ ਕਮ੍ਮੁਨਾ ਅਪ੍ਪਾਯੁਕਾ ਸਮਾਨਾ. ਅਞ੍ਞਤਰਾ ਪਜਾਪਤੀਤਿ ¶ ਸੋਲ਼ਸਸਹਸ੍ਸਾਨਂ ਮਹੇਸੀਨਂ ਅਞ੍ਞਤਰਾ. ਦਿਸਾਸੁ ਵਿਸ੍ਸੁਤਾਤਿ ਦ੍ਵੀਸੁ ਦੇਵਲੋਕੇਸੁ ਸਬ੍ਬਦਿਸਾਸੁ ਪਾਕਟਾ ਪਞ੍ਞਾਤਾ. ਸੇਸਂ ਵੁਤ੍ਤਨਯਮੇਵ.

ਅਭਿਕ੍ਕਨ੍ਤੇਨ ¶ ਵਣ੍ਣੇਨਾਤਿ ਅਲੋਮਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਬਾਰਾਣਸਿਯਂ ਇਸਿਪਤਨੇ ਮਿਗਦਾਯੇ ਵਿਹਰਨ੍ਤੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਬਾਰਾਣਸਿਂ ਪਿਣ੍ਡਾਯ ਪਾਵਿਸਿ ¶ . ਤਤ੍ਥੇਕਾ ਅਲੋਮਾ ਨਾਮ ਦੁਗ੍ਗਤਿਤ੍ਥੀ ਭਗਵਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤਾ ਅਞ੍ਞਂ ਦਾਤਬ੍ਬਂ ਅਪਸ੍ਸਨ੍ਤੀ ‘‘ਈਦਿਸਮ੍ਪਿ ਭਗਵਤੋ ਦਿਨ੍ਨਂ ਮਯ੍ਹਂ ਮਹਪ੍ਫਲਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਪਰਿਭਿਨ੍ਨਵਣ੍ਣਂ ਅਲੋਣਂ ਸੁਕ੍ਖਕੁਮ੍ਮਾਸਂ ਉਪਨੇਸਿ, ਭਗਵਾ ਪਟਿਗ੍ਗਹੇਸਿ. ਸਾ ਤਂ ਦਾਨਂ ਆਰਮ੍ਮਣਂ ਕਤ੍ਵਾ ਸੋਮਨਸ੍ਸਂ ਪਵੇਦੇਸਿ, ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ… ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਪੁਚ੍ਛਿ. ਸਾਪਿ ਤਸ੍ਸ ਬ੍ਯਾਕਾਸਿ, ਤਂ ਦਸ੍ਸੇਤੁਂ –

‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. – ਵੁਤ੍ਤਂ;

‘‘ਅਹਞ੍ਚ ਬਾਰਾਣਸਿਯਂ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;

ਅਦਾਸਿਂ ਸੁਕ੍ਖਕੁਮ੍ਮਾਸਂ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਸੁਕ੍ਖਾਯ ਅਲੋਣਿਕਾਯ ਚ, ਪਸ੍ਸ ਫਲਂ ਕੁਮ੍ਮਾਸਪਿਣ੍ਡਿਯਾ;

ਅਲੋਮਂ ਸੁਖਿਤਂ ਦਿਸ੍ਵਾ, ਕੋ ਪੁਞ੍ਞਂ ਨ ਕਰਿਸ੍ਸਤਿ.

‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੧੬. ਤਤ੍ਥ ਅਲੋਮਂ ਸੁਖਿਤਂ ਦਿਸ੍ਵਾਤਿ ਅਲੋਮਮ੍ਪਿ ਨਾਮ ¶ ਸੁਕ੍ਖਕੁਮ੍ਮਾਸਮਤ੍ਤਂ ਦਤ੍ਵਾ ਏਵਂ ਦਿਬ੍ਬਸੁਖੇਨ ਸੁਖਿਤਂ ਦਿਸ੍ਵਾ. ਕੋ ਪੁਞ੍ਞਂ ਨ ਕਰਿਸ੍ਸਤੀਤਿ ਕੋ ਨਾਮ ਅਤ੍ਤਨੋ ਹਿਤਸੁਖਂ ਇਚ੍ਛਨ੍ਤੋ ਪੁਞ੍ਞਂ ਨ ਕਰਿਸ੍ਸਤੀਤਿ. ਸੇਸਂ ਵੁਤ੍ਤਨਯਮੇਵ.

ਅਭਿਕ੍ਕਨ੍ਤੇਨ ¶ ਵਣ੍ਣੇਨਾਤਿ ਕਞ੍ਜਿਕਦਾਯਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਅਨ੍ਧਕਵਿਨ੍ਦੇ ਵਿਹਰਤਿ. ਤੇਨ ਚ ਸਮਯੇਨ ਭਗਵਤੋ ਕੁਚ੍ਛਿਯਂ ਵਾਤਰੋਗੋ ਉਪ੍ਪਜ੍ਜਿ. ਭਗਵਾ ਆਯਸ੍ਮਨ੍ਤਂ ¶ ਆਨਨ੍ਦਂ ਆਮਨ੍ਤੇਸਿ ‘‘ਗਚ੍ਛ ਤ੍ਵਂ ਆਨਨ੍ਦ, ਪਿਣ੍ਡਾਯ ਚਰਿਤ੍ਵਾ ਮਯ੍ਹਂ ਭੇਸਜ੍ਜਤ੍ਥਂ ਕਞ੍ਜਿਕਂ ਆਹਰਾ’’ਤਿ. ‘‘ਏਵਂ ਭਨ੍ਤੇ’’ਤਿ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਪਟਿਸ੍ਸੁਣਿਤ੍ਵਾ ਮਹਾਰਾਜਦਤ੍ਤਿਯਂ ਪਤ੍ਤਂ ਗਹੇਤ੍ਵਾ ਅਤ੍ਤਨੋ ਉਪਟ੍ਠਾਕਵੇਜ੍ਜਸ੍ਸ ਨਿਵੇਸਨਦ੍ਵਾਰੇ ਅਟ੍ਠਾਸਿ. ਤਂ ਦਿਸ੍ਵਾ ਵੇਜ੍ਜਸ੍ਸ ਭਰਿਯਾ ਪਚ੍ਚੁਗ੍ਗਨ੍ਤ੍ਵਾ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ਥੇਰਂ ਪੁਚ੍ਛਿ ‘‘ਕੀਦਿਸੇਨ ਵੋ, ਭਨ੍ਤੇ, ਭੇਸਜ੍ਜੇਨ ਅਤ੍ਥੋ’’ਤਿ. ਸਾ ਕਿਰ ਬੁਦ੍ਧਿਸਮ੍ਪਨ੍ਨਾ ‘‘ਭੇਸਜ੍ਜੇਨ ਪਯੋਜਨੇ ਸਤਿ ਥੇਰੋ ਇਧਾਗਚ੍ਛਤਿ, ਨ ਭਿਕ੍ਖਤ੍ਥ’’ਨ੍ਤਿ ਸਲ੍ਲਕ੍ਖੇਸਿ. ‘‘ਕਞ੍ਜਿਕੇਨਾ’’ਤਿ ਚ ਵੁਤ੍ਤੇ ‘‘ਨ ਯਿਦਂ ਭੇਸਜ੍ਜਂ ਮਯ੍ਹਂ ਅਯ੍ਯਸ੍ਸ, ਤਥਾ ਹੇਸ ਭਗਵਤੋ ਪਤ੍ਤੋ, ਹਨ੍ਦਾਹਂ ਲੋਕਨਾਥਸ੍ਸ ਅਨੁਚ੍ਛਵਿਕਂ ਕਞ੍ਜਿਕਂ ਸਮ੍ਪਾਦੇਮੀ’’ਤਿ ਸੋਮਨਸ੍ਸਜਾਤਾ ਸਞ੍ਜਾਤਬਹੁਮਾਨਾ ਬਦਰਯੂਸੇਨ ਯਾਗੁਂ ਸਮ੍ਪਾਦੇਤ੍ਵਾ ਪਤ੍ਤਂ ਪੂਰੇਤ੍ਵਾ ਤਸ੍ਸ ਪਰਿਵਾਰਭਾਵੇਨ ਅਞ੍ਞਞ੍ਚ ਭੋਜਨਂ ਪਟਿਯਾਦੇਤ੍ਵਾ ਪੇਸੇਸਿ. ਤਂ ਪਰਿਭੁਤ੍ਤਮਤ੍ਤਸ੍ਸੇਵ ਭਗਵਤੋ ਸੋ ਆਬਾਧੋ ਵੂਪਸਮਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿਤ੍ਵਾ ਮਹਤਿਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਮੋਦਤਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਤਂ ਅਚ੍ਛਰਾਸਹਸ੍ਸਪਰਿਵਾਰੇਨ ਵਿਚਰਨ੍ਤਿਂ ਦਿਸ੍ਵਾ ਤਾਯ ਕਤਕਮ੍ਮਂ ਇਮਾਹਿ ਗਾਥਾਹਿ ਪੁਚ੍ਛਿ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ ¶ …ਪੇ… ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਅਨ੍ਧਕਵਿਨ੍ਦਮ੍ਹਿ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;

ਅਦਾਸਿਂ ਕੋਲਸਮ੍ਪਾਕਂ, ਕਞ੍ਜਿਕਂ ਤੇਲਧੂਪਿਤਂ.

‘‘ਪਿਪ੍ਫਲ੍ਯਾ ਲਸੁਣੇਨ ਚ, ਮਿਸ੍ਸਂ ਲਾਮਞ੍ਜਕੇਨ ਚ;

ਅਦਾਸਿਂ ਉਜੁਭੂਤਸ੍ਮਿਂ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਯਾ ਮਹੇਸਿਤ੍ਤਂ ਕਾਰੇਯ੍ਯ, ਚਕ੍ਕਵਤ੍ਤਿਸ੍ਸ ਰਾਜਿਨੋ;

ਨਾਰੀ ਸਬ੍ਬਙ੍ਗਕਲ੍ਯਾਣੀ, ਭਤ੍ਤੁ ਚਾਨੋਮਦਸ੍ਸਿਕਾ;

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿਂ.

‘‘ਸਤਂ ¶ ¶ ਨਿਕ੍ਖਾ ਸਤਂ ਅਸ੍ਸਾ, ਸਤਂ ਅਸ੍ਸਤਰੀਰਥਾ;

ਸਤਂ ਕਞ੍ਞਾਸਹਸ੍ਸਾਨਿ, ਆਮੁਤ੍ਤਮਣਿਕੁਣ੍ਡਲਾ;

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਨ੍ਤਿ ਸੋਲ਼ਸਿਂ.

‘‘ਸਤਂ ਹੇਮਵਤਾ ਨਾਗਾ, ਈਸਾਦਨ੍ਤਾ ਉਰੂਲ਼੍ਹਵਾ;

ਸੁਵਣ੍ਣਕਚ੍ਛਾ ਮਾਤਙ੍ਗਾ, ਹੇਮਕਪ੍ਪਨਵਾਸਸਾ,

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਨ੍ਤਿ ਸੋਲ਼ਸਿਂ.

‘‘ਚਤੁਨ੍ਨਮਪਿ ਦੀਪਾਨਂ, ਇਸ੍ਸਰਂ ਯੋਧ ਕਾਰਯੇ;

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿ’’ਨ੍ਤਿ.

੭੨੩-੪. ਤਤ੍ਥ ਅਦਾਸਿਂ ਕੋਲਸਮ੍ਪਾਪਕਂ, ਕਞ੍ਜਿਕਂ ਤੇਲਧੂਪਿਤਨ੍ਤਿ ਬਦਰਮੋਦਕਕਸਾਵੇ ਚਤੁਗੁਣੋਦਕਸਮੋਦਿਤੇ ਪਾਕੇਨ ਚਤੁਤ੍ਥਭਾਗਾਵਸਿਟ੍ਠਂ ਯਾਗੁਂ ਪਚਿਤ੍ਵਾ ਤਂ ਤਿਕਟੁਕਅਜਮੋਦਹਿਙ੍ਗੁਜੀਰਕਲਸੁਣਾਦੀਹਿ ਕਟੁਕਭਣ੍ਡੇਹਿ ਅਭਿਸਙ੍ਖਰਿਤ੍ਵਾ ਸੁਧੂਪਿਤਂ ਕਤ੍ਵਾ ਲਾਮਞ੍ਜਗਨ੍ਧਂ ਗਾਹਾਪੇਤ੍ਵਾ ਪਸਨ੍ਨਚਿਤ੍ਤੇਨ ਭਗਵਤੋ ਪਤ੍ਤੇ ਆਕਿਰਿਤ੍ਵਾ ਸਤ੍ਥਾਰਂ ਉਦ੍ਦਿਸਿਤ੍ਵਾ ਅਦਾਸਿਂ, ਥੇਰਸ੍ਸ ਹਤ੍ਥੇ ਪਤਿਟ੍ਠਪੇਸਿਨ੍ਤਿ ਦਸ੍ਸੇਤਿ. ਤੇਨਾਹ –

‘‘ਪਿਪ੍ਫਲ੍ਯਾ ¶ ਲਸੁਣੇਨ ਚ, ਮਿਸ੍ਸਂ ਲਾਮਞ੍ਜਕੇਨ ਚ;

ਅਦਾਸਿਂ ਉਜੁਭੂਤਸ੍ਮਿਂ, ਵਿਪ੍ਪਸਨ੍ਨੇਨ ਚੇਤਸਾ’’ਤਿ.

ਏਵਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਾਯ ਦੇਵਤਾਯ ਅਤ੍ਤਨਾ ਸਮੁਪਚਿਤਸੁਚਰਿਤਕਮ੍ਮੇ ਆਵਿਕਤੇ ਸਪਰਿਵਾਰਾਯ ਤਸ੍ਸਾ ਧਮ੍ਮਂ ਦੇਸੇਤ੍ਵਾ ਮਨੁਸ੍ਸਲੋਕਂ ਆਗਨ੍ਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਚਤੁਪਰਿਸਮਜ੍ਝੇ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਕਞ੍ਜਿਕਦਾਯਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਅਭਿਕ੍ਕਨ੍ਤੇਨ ¶ ¶ ਵਣ੍ਣੇਨਾਤਿ ਵਿਹਾਰਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਵਿਸਾਖਾ ਮਹਾਉਪਾਸਿਕਾ ਅਞ੍ਞਤਰਸ੍ਮਿਂ ਉਸ੍ਸਵਦਿਵਸੇ ਉਯ੍ਯਾਨੇ ਵਿਚਰਣਤ੍ਥਂ ਸਹਾਯਿਕਾਹਿ ਪਰਿਜਨੇਨ ਚ ਉਸ੍ਸਾਹਿਤਾ ਸੁਨ੍ਹਾਤਾਨੁਲਿਤ੍ਤਾ ਸੁਭੋਜਨਂ ਭੁਞ੍ਜਿਤ੍ਵਾ ਮਹਾਲਤਾਪਸਾਧਨਂ ਪਿਲ਼ਨ੍ਧਿਤ੍ਵਾ ਪਞ੍ਚਮਤ੍ਤੇਹਿ ਸਹਾਯਿਕਾਸਤੇਹਿ ਪਰਿਵਾਰਿਤਾ ਮਹਨ੍ਤੇਨ ਇਸ੍ਸਰਿਯੇਨ ਮਹਤਾ ਪਰਿਚ੍ਛੇਦੇਨ ਗੇਹਤੋ ਨਿਕ੍ਖਮ੍ਮ ਉਯ੍ਯਾਨਂ ਉਦ੍ਦਿਸ੍ਸ ਗਚ੍ਛਨ੍ਤੀ ਚਿਨ੍ਤੇਸਿ ‘‘ਬਾਲਦਾਰਿਕਾਯ ਵਿਯ ਕਿਂ ਮੇ ਮੋਘਕੀਲ਼ਿਤੇਨ, ਹਨ੍ਦਾਹਂ ਵਿਹਾਰਂ ਗਨ੍ਤ੍ਵਾ ਭਗਵਨ੍ਤਂ ਮਨੋਭਾਵਨੀਯੇ ਚ ਅਯ੍ਯੇ ਵਨ੍ਦਿਸ੍ਸਾਮਿ, ਧਮ੍ਮਞ੍ਚ ਸੋਸ੍ਸਾਮੀ’’ਤਿ ਵਿਹਾਰਂ ਗਨ੍ਤ੍ਵਾ ਏਕਮਨ੍ਤੇ ਠਤ੍ਵਾ ਮਹਾਲਤਾਪਿਲ਼ਨ੍ਧਨਂ ਓਮੁਞ੍ਚਿਤ੍ਵਾ ਤਂ ਦਾਸਿਯਾ ਹਤ੍ਥੇ ਦਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਤਸ੍ਸਾ ਭਗਵਾ ਧਮ੍ਮਂ ਦੇਸੇਸਿ.

ਸਾ ਧਮ੍ਮਂ ਸੁਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਮਨੋਭਾਵਨੀਯੇ ਚ ਭਿਕ੍ਖੂ ਵਨ੍ਦਿਤ੍ਵਾ ਵਿਹਾਰਤੋ ਨਿਕ੍ਖਮਿਤ੍ਵਾ ਥੋਕਂ ਗਨ੍ਤ੍ਵਾ ਦਾਸਿਂ ਆਹ ‘‘ਹਨ੍ਦ ਜੇ ਆਭਰਣਂ ਪਿਲ਼ਨ੍ਧਿਸ੍ਸਾਮੀ’’ਤਿ. ਸਾ ਤਂ ਭਣ੍ਡਿਕਂ ਕਤ੍ਵਾ ਬਨ੍ਧਿਤ੍ਵਾ ਵਿਹਾਰੇ ਠਪੇਤ੍ਵਾ ਤਹਂ ਤਹਂ ਵਿਚਰਿਤ੍ਵਾ ਗਮਨਕਾਲੇ ਵਿਸ੍ਸਰਿਤ੍ਵਾ ਗਤਤ੍ਤਾ ‘‘ਵਿਸ੍ਸਰਿਤਂ ਮਯਾ, ਤਿਟ੍ਠ ਅਯ੍ਯੇ ਆਹਰਿਸ੍ਸਾਮੀ’’ਤਿ ਨਿਵਤ੍ਤਿਤੁਕਾਮਾ ਅਹੋਸਿ. ਵਿਸਾਖਾ ‘‘ਸਚੇ ਜੇ ਵਿਹਾਰੇ ਠਪੇਤ੍ਵਾ ਵਿਸ੍ਸਰਿਤਂ, ਤਸ੍ਸ ਵਿਹਾਰਸ੍ਸੇਵ ਅਤ੍ਥਾਯ ਤਂ ਪਰਿਚ੍ਚਜਿਸ੍ਸਾਮੀ’’ਤਿ ਵਿਹਾਰਂ ¶ ਗਨ੍ਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਅਤ੍ਤਨੋ ਅਧਿਪ੍ਪਾਯਂ ਪਵੇਦੇਨ੍ਤੀ ‘‘ਵਿਹਾਰਂ, ਭਨ੍ਤੇ, ਕਾਰੇਸ੍ਸਾਮਿ, ਅਧਿਵਾਸੇਤੁ ਮੇ ਭਗਵਾ ਅਨੁਕਮ੍ਪਂ ਉਪਾਦਾਯਾ’’ਤਿ ਆਹ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ.

ਸਾ ਤਂ ਪਿਲ਼ਨ੍ਧਨਂ ਸਤਸਹਸ੍ਸਾਧਿਕਨਵਕੋਟਿਅਗ੍ਘਨਕਂ ਵਿਸ੍ਸਜ੍ਜੇਤ੍ਵਾ ਆਯਸ੍ਮਤਾ ਮਹਾਮੋਗ੍ਗਲ੍ਲਾਨੇਨ ਨਵਕਮ੍ਮਾਧਿਟ੍ਠਾਯਕੇਨ ਸੁਵਿਭਤ੍ਤਭਿਤ੍ਤਿਥਮ੍ਭਤੁਲਾਗੋਪਾਨਸਿਕਣ੍ਣਿਕਦ੍ਵਾਰਬਾਹਵਾਤਪਾਨ ਸੋਪਾਨਾਦਿਗੇਹਾਵਯਵਂ ਮਨੋਹਰਂ ਸੁਵਿਕਪ੍ਪਿਤਕਟ੍ਠਕਮ੍ਮਰਮਣੀਯਂ ਸੁਪਰਿਕਮ੍ਮਕਤਸੁਧਾਕਮ੍ਮਂ ਮਨੁਞ੍ਞਂ ਸੁਵਿਰਚਿਤਮਾਲਾਕਮ੍ਮਲਤਾਕਮ੍ਮਾਦਿਚਿਤ੍ਤਕਮ੍ਮਵਿਚਿਤ੍ਤਂ ਸੁਪਰਿਨਿਟ੍ਠਿਤਮਣਿਕੁਟ੍ਟਿਮ ਸਦਿਸਭੂਮਿਤਲਂ ਦੇਵਵਿਮਾਨਸਦਿਸਂ ਹੇਟ੍ਠਾਭੂਮਿਯਂ ਪਞ੍ਚ ਗਬ੍ਭਸਤਾਨਿ, ਉਪਰਿਭੂਮਿਯਂ ਪਞ੍ਚ ਗਬ੍ਭਸਤਾਨੀਤਿ ਗਬ੍ਭਸਹਸ੍ਸਪਟਿਮਣ੍ਡਿਤਂ ਬੁਦ੍ਧਸ੍ਸ ਭਗਵਤੋ ਭਿਕ੍ਖੁਸਙ੍ਘਸ੍ਸ ¶ ਚ ਵਸਨਾਨੁਚ੍ਛਵਿਕਂ ਮਹਨ੍ਤਂ ਪਾਸਾਦਂ ਤਸ੍ਸ ਪਰਿਵਾਰਪਾਸਾਦਸਹਸ੍ਸਞ੍ਚ ਤੇਸਂ ਪਰਿਵਾਰਭਾਵੇਨ ਕੁਟਿਮਣ੍ਡਪਚਙ੍ਕਮਨਾਦੀਨਿ ਚ ਕਾਰੇਨ੍ਤੀ ਨਵਹਿ ਮਾਸੇਹਿ ਵਿਹਾਰਂ ਨਿਟ੍ਠਾਪੇਸਿ. ਪਰਿਨਿਟ੍ਠਿਤੇ ਚ ਵਿਹਾਰੇ ਨਵਹੇਵ ਹਿਰਞ੍ਞਕੋਟੀਹਿ ਵਿਹਾਰਮਹਂ ਕਾਰੇਨ੍ਤੀ ਪਞ੍ਚਮਤ੍ਤੇਹਿ ਸਹਾਯਿਕਾਸਤੇਹਿ ਸਦ੍ਧਿਂ ਪਾਸਾਦਂ ਅਭਿਰੁਹਿਤ੍ਵਾ ਤਸ੍ਸ ਸਮ੍ਪਤ੍ਤਿਂ ਦਿਸ੍ਵਾ ਸੋਮਨਸ੍ਸਜਾਤਾ ¶ ਸਹਾਯਿਕਾ ਆਹ ‘‘ਇਮਂ ਏਵਰੂਪਂ ਪਾਸਾਦਂ ਕਾਰੇਨ੍ਤਿਯਾ ਯਂ ਮਯਾ ਪੁਞ੍ਞਂ ਪਸੁਤਂ, ਤਂ ਅਨੁਮੋਦਥ, ਪਤ੍ਤਿਦਾਨਂ ਵੋ ਦਮ੍ਮੀ’’ਤਿ. ‘‘ਅਹੋ ਸਾਧੁ ਅਹੋ ਸਾਧੂ’’ਤਿ ਪਸਨ੍ਨਚਿਤ੍ਤਾ ਸਬ੍ਬਾਪਿ ਅਨੁਮੋਦਿਂਸੁ.

ਤਤ੍ਥ ਅਞ੍ਞਤਰਾ ਉਪਾਸਿਕਾ ਵਿਸੇਸਤੋ ਤਂ ਪਤ੍ਤਿਦਾਨਂ ਮਨਸਾਕਾਸਿ. ਸਾ ਨ ਚਿਰਸ੍ਸੇਵ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਤਸ੍ਸਾ ਪੁਞ੍ਞਾਨੁਭਾਵੇਨ ਅਨੇਕਕੂਟਾਗਾਰਪਾਕਾਰਉਯ੍ਯਾਨਪੋਕ੍ਖਰਣਿਆਦਿਪਟਿਮਣ੍ਡਿਤਂ ਸੋਲ਼ਸਯੋਜਨਾਯਾਮਵਿਤ੍ਥਾਰਬ੍ਬੇਧਂ ਅਤ੍ਤਨੋ ਪਭਾਯ ਯੋਜਨਸਤਂ ਫਰਨ੍ਤਂ ਆਕਾਸਚਾਰਿਂ ਮਹਨ੍ਤਂ ਵਿਮਾਨਂ ਪਾਤੁਰਹੋਸਿ. ਸਾ ਗਚ੍ਛਨ੍ਤੀਪਿ ¶ ਅਚ੍ਛਰਾਸਹਸ੍ਸਪਰਿਵਾਰਾ ਸਹ ਵਿਮਾਨੇਨ ਗਚ੍ਛਤਿ. ਵਿਸਾਖਾ ਪਨ ਮਹਾਉਪਾਸਿਕਾ ਵਿਪੁਲਪਰਿਚ੍ਚਾਗਤਾਯ ਸਦ੍ਧਾਸਮ੍ਪਤ੍ਤਿਯਾ ਚ ਨਿਮ੍ਮਾਨਰਤੀਸੁ ਨਿਬ੍ਬਤ੍ਤਿਤ੍ਵਾ ਸੁਨਿਮ੍ਮਿਤਦੇਵਰਾਜਸ੍ਸ ਅਗ੍ਗਮਹੇਸਿਭਾਵਂ ਸਮ੍ਪਾਪੁਣਿ. ਅਥਾਯਸ੍ਮਾ ਅਨੁਰੁਦ੍ਧੋ ਦੇਵਚਾਰਿਕਂ ਚਰਨ੍ਤੋ ਤਂ ਵਿਸਾਖਾਯ ਸਹਾਯਿਕਂ ਤਾਵਤਿਂਸਭਵਨੇ ਉਪ੍ਪਨ੍ਨਂ ਦਿਸ੍ਵਾ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਸਦ੍ਦਾ ਨਿਚ੍ਛਰਨ੍ਤਿ, ਸਵਨੀਯਾ ਮਨੋਰਮਾ.

‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਗਨ੍ਧਾ ਪਵਾਯਨ੍ਤਿ, ਸੁਚਿਗਨ੍ਧਾ ਮਨੋਰਮਾ.

‘‘ਵਿਵਤ੍ਤਮਾਨਾ ਕਾਯੇਨ, ਯਾ ਵੇਣੀਸੁ ਪਿਲ਼ਨ੍ਧਨਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

‘‘ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

‘‘ਯਾਪਿ ¶ ਤੇ ਸਿਰਸ੍ਮਿਂ ਮਾਲਾ, ਸੁਚਿਗਨ੍ਧਾ ਮਨੋਰਮਾ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

‘‘ਘਾਯਸੇ ¶ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਇਮਾਹਿ ਗਾਥਾਹਿ ਪੁਚ੍ਛਿ. ਸਾਪਿ ਤਸ੍ਸ ਏਵਂ ਬ੍ਯਾਕਾਸਿ –

‘‘ਸਾਵਤ੍ਥਿਯਂ ਮਯ੍ਹਂ ਸਖੀ ਭਦਨ੍ਤੇ, ਸਙ੍ਘਸ੍ਸ ਕਾਰੇਸਿ ਮਹਾਵਿਹਾਰਂ;

ਤਤ੍ਥਪ੍ਪਸਨ੍ਨਾ ਅਹਮਾਨੁਮੋਦਿਂ, ਦਿਸ੍ਵਾ ਅਗਾਰਞ੍ਚ ਪਿਯਞ੍ਚ ਮੇਤਂ.

‘‘ਤਾਯੇਵ ਮੇ ਸੁਦ੍ਧਨੁਮੋਦਨਾਯ, ਲਦ੍ਧਂ ਵਿਮਾਨਬ੍ਭੁਤਦਸ੍ਸਨੇਯ੍ਯਂ;

ਸਮਨ੍ਤਤੋ ਸੋਲ਼ਸਯੋਜਨਾਨਿ, ਵੇਹਾਯਸਂ ਗਚ੍ਛਤਿ ਇਦ੍ਧਿਯਾ ਮਮ.

‘‘ਕੂਟਾਗਾਰਾ ਨਿਵੇਸਾ ਮੇ, ਵਿਭਤ੍ਤਾ ਭਾਗਸੋ ਮਿਤਾ;

ਦਦ੍ਦਲ੍ਲਮਾਨਾ ਆਭਨ੍ਤਿ, ਸਮਨ੍ਤਾ ਸਤਯੋਜਨਂ.

‘‘ਪੋਕ੍ਖਰਞ੍ਞੋ ¶ ਚ ਮੇ ਏਤ੍ਥ, ਪੁਥੁਲੋਮਨਿਸੇਵਿਤਾ;

ਅਚ੍ਛੋਦਕਾ ਵਿਪ੍ਪਸਨ੍ਨਾ, ਸੋਣ੍ਣਵਾਲੁਕਸਨ੍ਥਤਾ.

‘‘ਨਾਨਾਪਦੁਮਸਞ੍ਛਨ੍ਨਾ, ਪੁਣ੍ਡਰੀਕਸਮੋਤਤਾ;

ਸੁਰਭੀ ਸਮ੍ਪਵਾਯਨ੍ਤਿ, ਮਨੁਞ੍ਞਾ ਮਾਲੁਤੇਰਿਤਾ.

‘‘ਜਮ੍ਬੁਯੋ ਪਨਸਾ ਤਾਲਾ, ਨਾਲ਼ਿਕੇਰਵਨਾਨਿ ਚ;

ਅਨ੍ਤੋਨਿਵੇਸਨੇ ਜਾਤਾ, ਨਾਨਾਰੁਕ੍ਖਾ ਅਰੋਪਿਮਾ.

‘‘ਨਾਨਾਤੂਰਿਯਸਙ੍ਘੁਟ੍ਠਂ, ਅਚ੍ਛਰਾਗਣਘੋਸਿਤਂ;

ਯੋਪਿ ਮਂ ਸੁਪਿਨੇ ਪਸ੍ਸੇ, ਸੋਪਿ ਵਿਤ੍ਤੋ ਸਿਯਾ ਨਰੋ.

‘‘ਏਤਾਦਿਸਂ ਅਬ੍ਭੁਤਦਸ੍ਸਨੇਯ੍ਯਂ, ਵਿਮਾਨਂ ਸਬ੍ਬਸੋ ਪਭਂ;

ਮਮ ਕਮ੍ਮੇ ਹਿ ਨਿਬ੍ਬਤ੍ਤਂ, ਅਲਂ ਪੁਞ੍ਞਾਨਿ ਕਾਤਵੇ’’ਤਿ.

੭੩੬. ਤਤ੍ਥ ¶ ਸਾਵਤ੍ਥਿਯਂ ਮਯ੍ਹਂ ਸਖੀ ਭਦਨ੍ਤੇ, ਸਙ੍ਘਸ੍ਸ ਕਾਰੇਸਿ ਮਹਾਵਿਹਾਰਨ੍ਤਿ ਭਨ੍ਤੇ ਅਨੁਰੁਦ੍ਧ ¶ , ਸਾਵਤ੍ਥਿਯਾ ਸਮੀਪੇ ਪਾਚੀਨਪਸ੍ਸੇ ਮਯ੍ਹਂ ਮਮ ਸਕ੍ਖੀ ਸਹਾਯਿਕਾ ਵਿਸਾਖਾ ਮਹਾਉਪਾਸਿਕਾ ਆਗਤਾਗਤਂ ਚਾਤੁਦ੍ਦਿਸਂ ਭਿਕ੍ਖੁਸਙ੍ਘਂ ਉਦ੍ਦਿਸ੍ਸ ਨਵਹਿਰਞ੍ਞਕੋਟਿਪਰਿਚ੍ਚਾਗੇਨ ਪੁਬ੍ਬਾਰਾਮਂ ਨਾਮ ਮਹਨ੍ਤਂ ਵਿਹਾਰਂ ਕਾਰੇਸਿ. ਤਤ੍ਥਪ੍ਪਸਨ੍ਨਾ ਅਹਮਾਨੁਮੋਦਿਨ੍ਤਿ ਤਸ੍ਮਿਂ ਵਿਹਾਰੇ ਕਤਪਰਿਯੋਸਿਤੇ ਸਙ੍ਘਸ੍ਸ ਨਿਯ੍ਯਾਦਿਯਮਾਨੇ ਤਾਯ ਕਤੇ ਪਤ੍ਤਿਦਾਨੇ ‘‘ਅਹੋ ਠਾਨੇ ਵਤ ਪਰਿਚ੍ਚਾਗੋ ਕਤੋ’’ਤਿ ਪਸਨ੍ਨਾ ਰਤਨਤ੍ਤਯੇ ਕਮ੍ਮਫਲੇ ਚ ਸਞ੍ਜਾਤਪਸਾਦਾ ਅਹਂ ਅਨੁਮੋਦਿਂ. ਵਤ੍ਥੁਵਸੇਨ ਤਸ੍ਸਾ ਅਨੁਮੋਦਨਾਯ ਉਲ਼ਾਰਭਾਵਂ ਦਸ੍ਸੇਤੁਂ ‘‘ਦਿਸ੍ਵਾ ਅਗਾਰਞ੍ਚ ਪਿਯਞ੍ਚ ਮੇਤ’’ਨ੍ਤਿ ਆਹ. ਸਹਸ੍ਸਗਬ੍ਭਂ ਅਤਿਵਿਯ ਰਮਣੀਯਂ ਦੇਵਵਿਮਾਨਸਦਿਸਂ ਤਞ੍ਚ ਅਗਾਰਂ ਮਹਨ੍ਤਂ ਪਾਸਾਦਂ ਪਿਯਞ੍ਚ ਮੇ ਬੁਦ੍ਧਪ੍ਪਮੁਖਂ ਸਙ੍ਘਂ ਉਦ੍ਦਿਸ੍ਸ ਤਾਦਿਸਂ ਮਹਨ੍ਤਂ ਧਨਪਰਿਚ੍ਚਾਗਂ ਦਿਸ੍ਵਾ ਅਨੁਮੋਦਿਨ੍ਤਿ ਯੋਜਨਾ.

੭੩੭. ਤਾਯੇਵ ਮੇ ਸੁਦ੍ਧਨੁਮੋਦਨਾਯਾਤਿ ਯਥਾਵੁਤ੍ਤਾਯ ਦੇਯ੍ਯਧਮ੍ਮਪਰਿਚ੍ਚਾਗਾਭਾਵੇਨ ਸੁਦ੍ਧਾਯ ਕੇਵਲਾਯ ਅਨੁਮੋਦਨਾਯੇਵ. ਲਦ੍ਧਂ ਵਿਮਾਨਬ੍ਭੁਤਦਸ੍ਸਨੇਯ੍ਯਨ੍ਤਿ ¶ ਮਯ੍ਹਂ ਪੁਬ੍ਬੇ ਈਦਿਸਸ੍ਸ ਅਭੂਤਪੁਬ੍ਬਤਾਯ ਅਬ੍ਭੁਤਂ ਸਮਨ੍ਤਭਦ੍ਦਕਭਾਵੇਨ ਅਤਿਵਿਯ ਸੁਰੂਪਤਾਯ ਚ ਦਸ੍ਸਨੇਯ੍ਯਂ ਇਮਂ ਵਿਮਾਨਂ ਲਦ੍ਧਂ ਅਧਿਗਤਂ. ਏਵਂ ਤਸ੍ਸ ਵਿਮਾਨਸ੍ਸ ਅਭਿਰੂਪਤਂ ਦਸ੍ਸੇਤ੍ਵਾ ਇਦਾਨਿ ਪਮਾਣਮਹਤ੍ਤਂ ਪਭਾਵਮਹਤ੍ਤਂ ਉਪਭੋਗਵਤ੍ਥੁਮਹਤ੍ਤਞ੍ਚ ਦਸ੍ਸੇਤੁਂ ‘‘ਸਮਨ੍ਤਤੋ ਸੋਲ਼ਸਯੋਜਨਾਨੀ’’ਤਿਆਦਿ ਵੁਤ੍ਤਂ. ਤਤ੍ਥ ਇਦ੍ਧਿਯਾ ਮਮਾਤਿ ਮਮ ਪੁਞ੍ਞਿਦ੍ਧਿਯਾ.

੭੩੯. ਪੋਕ੍ਖਰਞ੍ਞੋਤਿ ਪੋਕ੍ਖਰਣਿਯੋ. ਪੁਥੁਲੋਮਨਿਸੇਵਿਤਾਤਿ ਦਿਬ੍ਬਮਚ੍ਛੇਹਿ ਉਪਸੇਵਿਤਾ.

੭੪੦. ਨਾਨਾਪਦੁਮਸਞ੍ਛਨ੍ਨਾਤਿ ਸਤਪਤ੍ਤਸਹਸ੍ਸਪਤ੍ਤਾਦਿਭੇਦੇਹਿ ਨਾਨਾਵਿਧੇਹਿ ਰਤ੍ਤਪਦੁਮੇਹਿ ਰਤ੍ਤਕਮਲੇਹਿ ਚ ਸਞ੍ਛਾਦਿਤਾ. ਪੁਣ੍ਡਰੀਕਸਮੋਤਤਾਤਿ ਨਾਨਾਵਿਧੇਹਿ ਸੇਤਕਮਲੇਹਿ ਸਮਨ੍ਤਤੋ ਅਵਤਤਾ, ਨਾਨਾਰੁਕ੍ਖਾ ਅਰੋਪਿਮਾ ਸੁਰਭੀ ਸਮ੍ਪਵਾਯਨ੍ਤੀਤਿ ਯੋਜਨਾ.

੭੪੨. ਸੋਪੀਤਿ ਸੋ ਸੁਪਿਨਦਸ੍ਸਾਵੀਪਿ. ਵਿਤ੍ਤੋਤਿ ਤੁਟ੍ਠੋ.

੭੪੩. ਸਬ੍ਬਸੋ ¶ ਪਭਨ੍ਤਿ ਸਮਨ੍ਤਤੋ ਓਭਾਸਮਾਨਂ. ਕਮ੍ਮੇ ਹੀਤਿ ਕਮ੍ਮਨਿਮਿਤ੍ਤਂ. ਹੀਤਿ ਨਿਪਾਤਮਤ੍ਤਂ. ਚੇਤਨਾਨਂ ਵਾ ਅਪਰਾਪਰੁਪ੍ਪਤ੍ਤਿਯਾ ਬਹੁਭਾਵਤੋ ‘‘ਕਮ੍ਮੇਹੀ’’ਤਿ ਵੁਤ੍ਤਂ. ਅਲਨ੍ਤਿ ਯੁਤ੍ਤਂ. ਕਾਤਵੇਤਿ ਕਾਤੁਂ.

ਇਦਾਨਿ ਥੇਰੋ ਵਿਸਾਖਾਯ ਨਿਬ੍ਬਤ੍ਤਟ੍ਠਾਨਂ ਕਥਾਪੇਤੁਕਾਮੋ ਇਮਂ ਗਾਥਮਾਹ –

ਤਸ੍ਸਾ ਗਤਿਂ ਬ੍ਰੂਹਿ ਕੁਹਿਂ ਉਪ੍ਪਨ੍ਨਾ ਸਾ’’ਤਿ.

੭੪੪. ਤਤ੍ਥ ਯਾ ਚੇਵ ਸਾ ਦਾਨਮਦਾਸਿ ਨਾਰੀਤਿ ਯਸ੍ਸ ਦਾਨਸ੍ਸ ਅਨੁਮੋਦਨਾਯ ਤ੍ਵਂ ਈਦਿਸਂ ਸਮ੍ਪਤ੍ਤਿਂ ਪਟਿਲਭਿ, ਤਂ ਦਾਨਂ ਯਾ ਚੇਵ ਸਾ ਨਾਰੀ ਅਦਾਸੀਤਿ ਵਿਸਾਖਂ ਮਹਾਉਪਾਸਿਕਂ ਸਨ੍ਧਾਯ ਵਦਤਿ. ਤਾਯ ਏਵ ਦੇਵਤਾਯ ਤਸ੍ਸਾ ਸਮ੍ਪਤ੍ਤਿਂ ਕਥਾਪੇਤੁਕਾਮੋ ਆਹ ‘‘ਤਸ੍ਸਾ ਗਤਿਂ ਬ੍ਰੂਹਿ ਕੁਹਿਂ ¶ ਉਪ੍ਪਨ੍ਨਾ ਸਾ’’ਤਿ. ਤਸ੍ਸਾ ਗਤਿਨ੍ਤਿ ਤਾਯ ਨਿਬ੍ਬਤ੍ਤਦੇਵਗਤਿਂ.

ਇਦਾਨਿ ਥੇਰੇਨ ਪੁਚ੍ਛਿਤਮਤ੍ਥਂ ਦਸ੍ਸੇਨ੍ਤੀ ਆਹ –

‘‘ਯਾ ਸਾ ਅਹੁ ਮਯ੍ਹਂ ਸਖੀ ਭਦਨ੍ਤੇ, ਸਙ੍ਘਸ੍ਸ ਕਾਰੇਸਿ ਮਹਾਵਿਹਾਰਂ;

ਵਿਞ੍ਞਾਤਧਮ੍ਮਾ ਸਾ ਅਦਾਸਿ ਦਾਨਂ, ਉਪ੍ਪਨ੍ਨਾ ਨਿਮ੍ਮਾਨਰਤੀਸੁ ਦੇਵੇਸੁ.

ਯਮੇਤਂ ਪੁਚ੍ਛਸਿ ‘ਕੁਹਿਂ ਉਪ੍ਪਨ੍ਨਾ ਸਾ’ਤਿ,

ਤਂ ਤੇ ਵਿਯਾਕਾਸਿਂ ਅਨਞ੍ਞਥਾ ਅਹ’’ਨ੍ਤਿ.

੭੪੫. ਤਤ੍ਥ ਵਿਞ੍ਞਾਤਧਮ੍ਮਾਤਿ ਵਿਞ੍ਞਾਤਸਾਸਨਧਮ੍ਮਾ, ਪਟਿਵਿਦ੍ਧਚਤੁਸਚ੍ਚਧਮ੍ਮਾਤਿ ਅਤ੍ਥੋ.

੭੪੬. ਸੁਨਿਮ੍ਮਿਤਸ੍ਸਾਤਿ ਸੁਨਿਮ੍ਮਿਤਸ੍ਸ ਦੇਵਰਾਜਸ੍ਸ. ਅਚਿਨ੍ਤਿਯੋ ਕਮ੍ਮਵਿਪਾਕ ਤਸ੍ਸਾਤਿ ਵਿਭਤ੍ਤਿਲੋਪਂ ਕਤ੍ਵਾ ਨਿਦ੍ਦੇਸੋ, ਤਸ੍ਸਾ ਮਮ ਸਖਿਯਾ ਨਿਬ੍ਬਾਨਰਤੀਸੁ ¶ ਨਿਬ੍ਬਤ੍ਤਾਯ ਕਮ੍ਮਵਿਪਾਕੋ ਪੁਞ੍ਞਕਮ੍ਮਸ੍ਸ ਵਿਪਾਕਭੂਤਾ ਦਿਬ੍ਬਸਮ੍ਪਤ੍ਤਿ ਅਚਿਨ੍ਤਿਯਾ ਅਪ੍ਪਮੇਯ੍ਯਾਤਿ ਅਤ੍ਥੋ. ਅਨਞ੍ਞਥਾਤਿ ਅਵਿਪਰੀਤਂ ਯਥਾਸਭਾਵਤੋ. ਕਥਂ ਪਨਾਯਂ ਤਸ੍ਸਾ ਸਮ੍ਪਤ੍ਤਿਂ ਅਞ੍ਞਾਸੀਤਿ? ਸੁਭਦ੍ਦਾ ਵਿਯ ਭਦ੍ਦਾਯ, ਵਿਸਾਖਾਪਿ ਦੇਵਧੀਤਾ ਇਮਿਸ੍ਸਾ ਸਨ੍ਤਿਕਂ ਅਗਮਾਸਿ.

ਇਦਾਨਿ ਦੇਵਧੀਤਾ ਥੇਰਂ ਅਞ੍ਞੇਸਮ੍ਪਿ ਦਾਨਸਮਾਦਪਨੇ ਨਿਯੋਜੇਨ੍ਤੀ ਇਮਾਹਿ ਗਾਥਾਹਿ ਧਮ੍ਮਂ ਦੇਸੇਸਿ –

‘‘ਤੇਨਹਞ੍ਞੇਪਿ ¶ ਸਮਾਦਪੇਥ, ਸਙ੍ਘਸ੍ਸ ਦਾਨਾਨਿ ਦਦਾਥ ਵਿਤ੍ਤਾ;

ਧਮ੍ਮਞ੍ਚ ਸੁਣਾਥ ਪਸਨ੍ਨਮਾਨਸਾ, ਸੁਦੁਲ੍ਲਭੋ ਲਦ੍ਧੋ ਮਨੁਸ੍ਸਲਾਭੋ.

‘‘ਯਂ ਮਗ੍ਗਂ ਮਗ੍ਗਾਧਿਪਤੀ ਅਦੇਸਯਿ, ਬ੍ਰਹ੍ਮਸ੍ਸਰੋ ਕਞ੍ਚਨਸਨ੍ਨਿਭਤ੍ਤਚੋ;

ਸਙ੍ਘਸ੍ਸ ¶ ਦਾਨਾਨਿ ਦਦਾਥ ਵਿਤ੍ਤਾ, ਮਹਪ੍ਫਲਾ ਯਤ੍ਥ ਭਵਨ੍ਤਿ ਦਕ੍ਖਿਣਾ.

‘‘ਯੇ ਪੁਗ੍ਗਲਾ ਅਟ੍ਠ ਸਤਂ ਪਸਤ੍ਥਾ, ਚਤ੍ਤਾਰਿ ਏਤਾਨਿ ਯੁਗਾਨਿ ਹੋਨ੍ਤਿ;

ਤੇ ਦਕ੍ਖਿਣੇਯ੍ਯਾ ਸੁਗਤਸ੍ਸ ਸਾਵਕਾ, ਏਤੇਸੁ ਦਿਨ੍ਨਾਨਿ ਮਹਪ੍ਫਲਾਨਿ.

‘‘ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ.

‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ.

‘‘ਏਸੋ ਹਿ ਸਙ੍ਘੋ ਵਿਪੁਲੋ ਮਹਗ੍ਗਤੋ, ਏਸਪ੍ਪਮੇਯ੍ਯੋ ਉਦਧੀਵ ਸਾਗਰੋ;

ਏਤੇ ਹਿ ਸੇਟ੍ਠਾ ਨਰਵੀਰਸਾਵਕਾ, ਪਭਙ੍ਕਰਾ ਧਮ੍ਮਮੁਦੀਰਯਨ੍ਤਿ.

‘‘ਤੇਸਂ ¶ ਸੁਦਿਨ੍ਨਂ ਸੁਹੁਤਂ ਸੁਯਿਟ੍ਠਂ, ਯੇ ਸਙ੍ਘਮੁਦ੍ਦਿਸ੍ਸ ਦਦਨ੍ਤਿ ਦਾਨਂ;

ਸਾ ਦਕ੍ਖਿਣਾ ਸਙ੍ਘਗਤਾ ਪਤਿਟ੍ਠਿਤਾ, ਮਹਪ੍ਫਲਾ ਲੋਕਵਿਦੂਨ ਵਣ੍ਣਿਤਾ.

‘‘ਏਤਾਦਿਸਂ ਯਞ੍ਞਮਨੁਸ੍ਸਰਨ੍ਤਾ, ਯੇ ਵੇਦਜਾਤਾ ਵਿਚਰਨ੍ਤਿ ਲੋਕੇ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤਾ ਸਗ੍ਗਮੁਪੇਨ੍ਤਿ ਠਾਨ’’ਨ੍ਤਿ.

੭੪੭. ਤਤ੍ਥ ਤੇਨਹਞ੍ਞੇਪੀਤਿ ਤੇਨਹਿ ਅਞ੍ਞੇਪਿ. ਤੇਨਾਤਿ ਚ ਤੇਨ ਕਾਰਣੇਨ, ਹੀਤਿ ਨਿਪਾਤਮਤ੍ਤਂ. ‘‘ਸਮਾਦਪੇਥਾ’’ਤਿ ਵਤ੍ਵਾ ਸਮਾਦਪਨਾਕਾਰਂ ਦਸ੍ਸੇਤੁਂ ‘‘ਸਙ੍ਘਸ੍ਸ ਦਾਨਾਨਿ ਦਦਾਥਾ’’ਤਿਆਦਿ ਵੁਤ੍ਤਂ. ਅਟ੍ਠਹਿ ਅਕ੍ਖਣੇਹਿ ਵਜ੍ਜਿਤਂ ਮਨੁਸ੍ਸਭਾਵਂ ਸਨ੍ਧਾਯਾਹ ‘‘ਸੁਦੁਲ੍ਲਭੋ ਲਦ੍ਧੋ ਮਨੁਸ੍ਸਲਾਭੋ’’ਤਿ. ਤਤ੍ਥ ਅਟ੍ਠ ਅਕ੍ਖਣਾ ਨਾਮ ਤਯੋ ਅਪਾਯਾ ਅਰੂਪਾ ਅਸਞ੍ਞਸਤ੍ਤਾ ਪਚ੍ਚਨ੍ਤਦੇਸੋ ਇਨ੍ਦ੍ਰਿਯਾਨਂ ਵੇਕਲ੍ਲਂ ਨਿਯਤਮਿਚ੍ਛਾਦਿਟ੍ਠਿਕਤਾ ਅਪਾਤੁਭਾਵੋ ਬੁਦ੍ਧਸ੍ਸਾਤਿ.

੭੪੮. ਯਂ ¶ ਮਗ੍ਗਨ੍ਤਿ ਯਂ ਖੇਤ੍ਤਵਿਸੇਸੇ ਕਤਂ ਦਾਨਂ, ਤਂ ਏਕਨ੍ਤੇਨ ¶ ਸੁਗਤਿਸਮ੍ਪਾਪਨਤੋ ਸੁਗਤਿਗਾਮਿਮਗ੍ਗਂ ਅਪਾਯਮਗ੍ਗਤੋ ਜਗ੍ਘਮਗ੍ਗਾਦਿਤੋ ਚ ਅਤਿਵਿਯ ਸੇਟ੍ਠਭਾਵੇਨ ਮਗ੍ਗਾਧਿਪਨ੍ਤਿ ਕਤ੍ਵਾ. ਦਾਨਮ੍ਪਿ ਹਿ ਸਦ੍ਧਾਹਿਰਿਯੋ ਵਿਯ ‘‘ਦੇਵਲੋਕਗਾਮਿਮਗ੍ਗੋ’’ਤਿ ਵੁਚ੍ਚਤਿ. ਯਥਾਹ –

‘‘ਸਦ੍ਧਾ ਹਿਰਿਯਂ ਕੁਸਲਞ੍ਚ ਦਾਨਂ, ਧਮ੍ਮਾ ਏਤੇ ਸਪ੍ਪੁਰਿਸਾਨੁਯਾਤਾ;

ਏਤਞ੍ਹਿ ਮਗ੍ਗਂ ਦਿਵਿਯਂ ਵਦਨ੍ਤਿ, ਏਤੇਨ ਹਿ ਗਚ੍ਛਤਿ ਦੇਵਲੋਕ’’ਨ੍ਤਿ.(ਅ. ਨਿ. ੮.੩੨; ਕਥਾ. ੪੮੦);

‘‘ਮਗ੍ਗਾਧਿਪਤੀ’’ਤਿ ਵਾ ਪਾਠੋ, ਤਸ੍ਸ ਅਰਿਯਮਗ੍ਗੇਨ ਸਦੇਵਕਸ੍ਸ ਲੋਕਸ੍ਸ ਅਧਿਪਤਿਭੂਤੋ ਸਤ੍ਥਾਤਿ ਅਤ੍ਥੋ ਦਟ੍ਠਬ੍ਬੋ. ਸਙ੍ਘਸ੍ਸ ਦਾਨਾਨਿ ਦਦਾਥਾਤਿਆਦਿਨਾ ਪੁਨਪਿ ਦਕ੍ਖਿਣੇਯ੍ਯੇਸੁ ਦਾਨਸਂਵਿਭਾਗੇ ਨਿਯੋਜੇਨ੍ਤੀ ਆਹ.

੭੪੯. ਇਦਾਨਿ ¶ ਤਂ ਦਕ੍ਖਿਣੇਯ੍ਯਂ ਅਰਿਯਸਙ੍ਘਂ ਸਰੂਪਤੋ ਦਸ੍ਸੇਨ੍ਤੀ ‘‘ਯੇ ਪੁਗ੍ਗਲਾ ਅਟ੍ਠ ਸਤਂ ਪਸਤ੍ਥਾ’’ਤਿ ਗਾਥਮਾਹ. ਤਤ੍ਥ ਯੇਤਿ ਅਨਿਯਮਿਤਨਿਦ੍ਦੇਸੋ. ਪੁਗ੍ਗਲਾਤਿ ਸਤ੍ਤਾ. ਅਟ੍ਠਾਤਿ ਤੇਸਂ ਗਣਨਪਰਿਚ੍ਛੇਦੋ. ਤੇ ਹਿ ਚਤ੍ਤਾਰੋ ਚ ਪਟਿਪਨ੍ਨਾ ਚਤ੍ਤਾਰੋ ਚ ਫਲੇ ਠਿਤਾਤਿ ਅਟ੍ਠ ਹੋਨ੍ਤਿ. ਸਤਂ ਪਸਤ੍ਥਾਤਿ ਸਪ੍ਪੁਰਿਸੇਹਿ ਬੁਦ੍ਧਪਚ੍ਚੇਕਬੁਦ੍ਧਸਾਵਕੇਹਿ ਅਞ੍ਞੇਹਿ ਚ ਦੇਵਮਨੁਸ੍ਸੇਹਿ ਪਸ੍ਸਤ੍ਥਾ. ਕਸ੍ਮਾ? ਸਹਜਾਤਸੀਲਾਦਿਗੁਣਯੋਗਤੋ. ਤੇਸਞ੍ਹਿ ਚਮ੍ਪਕਬਕੁਲਕੁਸੁਮਾਦੀਨਂ ਵਿਯ ਸਹਜਾਤਵਣ੍ਣਗਨ੍ਧਾਦਯੋ ਸਹਜਾਤਸੀਲਸਮਾਧਿਆਦਯੋ ਗੁਣਾ, ਤੇਨ ਤੇ ਵਣ੍ਣਗਨ੍ਧਾਦਿਸਮ੍ਪਨ੍ਨਾਨਿ ਵਿਯ ਪੁਪ੍ਫਾਨਿ ਦੇਵਮਨੁਸ੍ਸਾਨਂ ਸਤਂ ਪਿਯਾ ਮਨਾਪਾ ਪਾਸਂਸਿਯਾ ਚ ਹੋਨ੍ਤਿ. ਤੇਨ ਵੁਤ੍ਤਂ ‘‘ਯੇ ਪੁਗ੍ਗਲਾ ਅਟ੍ਠ ਸਤਂ ਪਸਤ੍ਥਾ’’ਤਿ. ਤੇ ਪਨ ਸਙ੍ਖੇਪਤੋ ਸੋਤਾਪਤ੍ਤਿਮਗ੍ਗਟ੍ਠੋ ਫਲਟ੍ਠੋਤਿ ਏਕਂ ਯੁਗਂ, ਏਵਂ ਯਾਵ ਅਰਹਤ੍ਤਮਗ੍ਗਟ੍ਠੋ ਫਲਟ੍ਠੋਤਿ ਏਕਂ ਯੁਗਨ੍ਤਿ ਚਤ੍ਤਾਰਿ ਯੁਗਾਨਿ ਹੋਨ੍ਤਿ. ਤੇਨਾਹ ‘‘ਚਤ੍ਤਾਰਿ ਏਤਾਨਿ ਯੁਗਾਨਿ ਹੋਨ੍ਤਿ ਤੇ ਦਕ੍ਖਿਣੇਯ੍ਯਾ’’ਤਿ. ਤੇਤਿ ਪੁਬ੍ਬੇ ਅਨਿਯਮਤੋ ਉਦ੍ਦਿਟ੍ਠਾਨਂ ਨਿਯਮੇਤ੍ਵਾ ਦਸ੍ਸਨਂ. ਤੇ ਹਿ ਸਬ੍ਬੇਪਿ ਕਮ੍ਮਂ ਕਮ੍ਮਫਲਞ੍ਚ ਸਦ੍ਦਹਿਤ੍ਵਾ ਦਾਤਬ੍ਬਦੇਯ੍ਯਧਮ੍ਮਸਙ੍ਖਾਤਂ ਦਕ੍ਖਿਣਂ ਅਰਹਨ੍ਤੀਤਿ ਦਕ੍ਖਿਣੇਯ੍ਯਾ ਗੁਣਵਿਸੇਸਯੋਗੇਨ ਦਾਨਸ੍ਸ ਮਹਪ੍ਫਲਭਾਵਸਾਧਨਤੋ. ਸੁਗਤਸ੍ਸ ਸਾਵਕਾਤਿ ਸਮ੍ਮਾਸਮ੍ਬੁਦ੍ਧਸ੍ਸ ¶ ਧਮ੍ਮਸਵਨਨ੍ਤੇ ਅਰਿਯਾਯ ਜਾਤਿਯਾ ਜਾਤਤਾਯ ਤਂ ਧਮ੍ਮਂ ਸੁਣਨ੍ਤੀਤਿ ਸਾਵਕਾ. ਏਤੇਸੁ ਦਿਨ੍ਨਾਨਿ ਮਹਪ੍ਫਲਾਨੀਤਿ ਏਤੇਸੁ ਸੁਗਤਸ੍ਸ ਸਾਵਕੇਸੁ ਅਪ੍ਪਕਾਨਿਪਿ ਦਾਨਾਨਿ ਦਿਨ੍ਨਾਨਿ ਪਟਿਗ੍ਗਾਹਕਤੋ ਦਕ੍ਖਿਣਾਵਿਸੁਦ੍ਧਿਯਾ ਮਹਪ੍ਫਲਾਨਿ ਹੋਨ੍ਤਿ. ਤੇਨਾਹ ਭਗਵਾ ‘‘ਯਾਵਤਾ, ਭਿਕ੍ਖਵੇ, ਸਙ੍ਘਾ ਵਾ ਗਣਾ ਵਾ, ਤਥਾਗਤਸਾਵਕਸਙ੍ਘੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿਆਦਿ (ਅ. ਨਿ. ੪.੩੪; ੫.੩੨; ਇਤਿਵੁ. ੯੦).

੭੫੦. ਚਤ੍ਤਾਰੋ ¶ ਚ ਪਟਿਪਨ੍ਨਾਤਿਆਦਿ ਹੇਟ੍ਠਾ ਵੁਤ੍ਤਤ੍ਥਮੇਵ.

ਇਧ ਪਨ ਆਯਸ੍ਮਾ ਅਨੁਰੁਦ੍ਧੋ ਅਤ੍ਤਨਾ ਦੇਵਤਾਯ ਚ ਵੁਤ੍ਤਮਤ੍ਥਂ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਅਭਿਕ੍ਕਨ੍ਤੇਨ ¶ ਵਣ੍ਣੇਨਾਤਿ ਚਤੁਰਿਤ੍ਥਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਸਾਵਤ੍ਥਿਯਂ ਵਿਹਰਨ੍ਤੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਗਤੋ. ਸੋ ਤਤ੍ਥ ਪਟਿਪਾਟਿਯਾ ਠਿਤੇਸੁ ਚਤੂਸੁ ਵਿਮਾਨੇਸੁ ਚਤਸ੍ਸੋ ਦੇਵਧੀਤਰੋ ਪਚ੍ਚੇਕਂ ਅਚ੍ਛਰਾਸਹਸ੍ਸਪਰਿਵਾਰਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤਿਯੋ ਦਿਸ੍ਵਾ ਤਾਹਿ ਪੁਬ੍ਬੇ ਕਤਕਮ੍ਮਂ ਪੁਚ੍ਛਨ੍ਤੋ –

੭੫੫. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਇਮਾਹਿ ਗਾਥਾਹਿ ਪਟਿਪਾਟਿਯਾ ਪੁਚ੍ਛਿ. ਤਾਪਿ ਤਸ੍ਸ ਪੁਚ੍ਛਾਨਨ੍ਤਰਂ ਪਟਿਪਾਟਿਯਾ ਬ੍ਯਾਕਰਿਂਸੁ. ਤਂ ਦਸ੍ਸੇਤੁਂ –

੭੫੮. ‘‘ਸਾ ਦੇਵਤਾ ਅਤ੍ਤਮਨਾ…ਪੇ…ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਤਾ ਕਿਰ ਕਸ੍ਸਪਸ੍ਸ ਭਗਵਤੋ ਕਾਲੇ ਏਸਿਕਾਨਾਮਕੇ ਰਟ੍ਠੇ ਪਣ੍ਣਕਤੇ ਨਾਮ ਨਗਰੇ ਕੁਲਗੇਹੇ ਨਿਬ੍ਬਤ੍ਤਾ ਵਯਪ੍ਪਤ੍ਤਾ ਤਸ੍ਮਿਂਯੇਵ ਨਗਰੇ ਪਤਿਕੁਲਂ ਗਤਾ ਸਮਗ੍ਗਵਾਸਂ ਵਸਨ੍ਤਿ. ਤਾਸੁ ਏਕਾ ਅਞ੍ਞਤਰਂ ਪਿਣ੍ਡਚਾਰਿਕਂ ਭਿਕ੍ਖੁਂ ਦਿਸ੍ਵਾ ਪਸਨ੍ਨਚਿਤ੍ਤਾ ¶ ਇਨ੍ਦੀਵਰਕਲਾਪਂ ਅਦਾਸਿ, ਅਪਰਾ ਅਞ੍ਞਸ੍ਸ ਨੀਲੁਪ੍ਪਲਹਤ੍ਥਕਂ ਅਦਾਸਿ, ਅਪਰਾ ਪਦੁਮਹਤ੍ਥਕਂ ਅਦਾਸਿ, ਅਪਰਾ ਸੁਮਨਮਕੁਲ਼ਾਨਿ ਅਦਾਸਿ. ਤਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿਂਸੁ, ਤਾਸਂ ਅਚ੍ਛਰਾਸਹਸ੍ਸਂ ਪਰਿਵਾਰੋ ਅਹੋਸਿ. ਤਾ ਤਤ੍ਥ ਯਾਵਤਾਯੁਕਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚੁਤਾ ਤਸ੍ਸੇਵ ਕਮ੍ਮਸ੍ਸ ¶ ਵਿਪਾਕਾਵਸੇਸੇਨ ਅਪਰਾਪਰਂ ਤਤ੍ਥੇਵ ਸਂਸਰਨ੍ਤਿਯੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਤਤ੍ਥੇਵ ਉਪ੍ਪਨ੍ਨਾ ਵੁਤ੍ਤਨਯੇਨ ਆਯਸ੍ਮਤਾ ਮਹਾਮੋਗ੍ਗਲ੍ਲਾਨੇਨ ਪੁਚ੍ਛਿਤਾ. ਤਾਸੁ ਏਕਾ ਅਤ੍ਤਨਾ ਕਤਂ ਪੁਬ੍ਬਕਮ੍ਮਂ ਥੇਰਸ੍ਸ ਕਥੇਨ੍ਤੀ –

‘‘ਇਨ੍ਦੀਵਰਾਨਂ ¶ ਹਤ੍ਥਕਂ ਅਹਮਦਾਸਿਂ, ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ;

ਏਸਿਕਾਨਂ ਉਣ੍ਣਤਸ੍ਮਿਂ, ਨਗਰਵਰੇ ਪਣ੍ਣਕਤੇ ਰਮ੍ਮੇ.

‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

‘‘ਨੀਲੁਪ੍ਪਲਹਤ੍ਥਕਂ ਅਹਮਦਾਸਿਂ, ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ;

ਏਸਿਕਾਨਂ ਉਣ੍ਣਤਸ੍ਮਿਂ, ਨਗਰਵਰੇ ਪਣ੍ਣਕਤੇ ਰਮ੍ਮੇ.

੭੬੭. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

‘‘ਓਦਾਤਮੂਲਕਂ ਹਰਿਤਪਤ੍ਤਂ, ਉਦਕਸ੍ਮਿਂ ਸਰੇ ਜਾਤਂ ਅਹਮਦਾਸਿਂ;

ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ, ਏਸਿਕਾਨਂ ਉਣ੍ਣਤਸ੍ਮਿਂ;

੭੭੪. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

‘‘ਅਹਂ ਸੁਮਨਾ ਸੁਮਨਸ੍ਸ ਸੁਮਨਮਕੁਲ਼ਾਨਿ, ਦਨ੍ਤਵਣ੍ਣਾਨਿ ਅਹਮਦਾਸਿਂ;

ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ, ਏਸਿਕਾਨਂ ਉਣ੍ਣਤਸ੍ਮਿਂ;

੭੮੧. ‘‘ਤੇਨ ¶ ¶ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

੭੫੯. ਤਤ੍ਥ ਇਨ੍ਦੀਵਰਾਨਂ ਹਤ੍ਥਕਨ੍ਤਿ ਉਦ੍ਦਾਲਕਪੁਪ੍ਫਹਤ੍ਥਂ ਵਾਤਘਾਤਕਪੁਪ੍ਫਕਲਾਪਂ. ਏਸਿਕਾਨਨ੍ਤਿ ਏਸਿਕਾਰਟ੍ਠਸ੍ਸ. ਉਣ੍ਣਤਸ੍ਮਿਂ ਨਗਰਵਰੇਤਿ ਉਣ੍ਣਤੇ ਭੂਮਿਪਦੇਸੇ ਨਿਵਿਟ੍ਠੇ ਮੇਘੋਦਰਂ ਲਿਹਨ੍ਤੇਹਿ ਵਿਯ ਅਚ੍ਚੁਗ੍ਗਤੇਹਿ ਪਾਸਾਦਕੂਟਾਗਾਰਾਦੀਹਿ ਉਣ੍ਣਤੇ ਉਤ੍ਤਮਨਗਰੇ. ਪਣ੍ਣਕਤੇਤਿ ਏਵਂਨਾਮਕੇ ਨਗਰੇ.

੭੬੬. ਨੀਲੁਪ੍ਪਲਹਤ੍ਥਕਨ੍ਤਿ ਕੁਵਲਯਕਲਾਪਂ.

੭੭੩. ਓਦਾਤਮੂਲਕਨ੍ਤਿ ਸੇਤਮੂਲਂ, ਭਿਸਮੂਲਾਨਂ ਧਵਲਤਾਯ ਵੁਤ੍ਤਂ, ਪਦੁਮਕਲਾਪਂ ਸਨ੍ਧਾਯ ਵਦਤਿ. ਤੇਨਾਹ ‘‘ਹਰਿਤਪਤ੍ਤ’’ਨ੍ਤਿਆਦਿ. ਤਤ੍ਥ ਹਰਿਤਪਤ੍ਤਨ੍ਤਿ ਨੀਲਪਤ੍ਤਂ. ਅਵਿਜਹਿਤਮਕੁਲ਼ਪਤ੍ਤਸ੍ਸ ਹਿ ਪਦੁਮਸ੍ਸ ਬਾਹਿਰਪਤ੍ਤਾਨਿ ਹਰਿਤਵਣ੍ਣਾਨਿ ਏਵ ਹੋਨ੍ਤਿ. ਉਦਕਸ੍ਮਿਂ ਸਰੇ ਜਾਤਨ੍ਤਿ ਸਰੇ ਉਦਕਮ੍ਹਿ ਜਾਤਂ, ਸਰੋਰੁਹਨ੍ਤਿ ਅਤ੍ਥੋ.

੭੮੦. ਸੁਮਨਾਤਿ ਏਵਂਨਾਮਾ. ਸੁਮਨਸ੍ਸਾਤਿ ਸੁਨ੍ਦਰਚਿਤ੍ਤਸ੍ਸ. ਸੁਮਨਮਕੁਲ਼ਾਨੀਤਿ ਜਾਤਿਸੁਮਨਪੁਪ੍ਫਮਕੁਲ਼ਾਨਿ. ਦਨ੍ਤਵਣ੍ਣਾਨੀਤਿ ਸਜ੍ਜੁਕਂ ਉਲ੍ਲਿਖਿਤਹਤ੍ਥਿਦਨ੍ਤਸਦਿਸਵਣ੍ਣਾਨਿ.

ਏਵਂ ਤਾਹਿ ਅਤ੍ਤਨਾ ਕਤਕਮ੍ਮੇ ਕਥਿਤੇ ਥੇਰੋ ਤਾਸਂ ਅਨੁਪੁਬ੍ਬਿਂ ਕਥਂ ਕਥੇਤ੍ਵਾ ਸਚ੍ਚਾਨਿ ਪਕਾਸੇਸਿ. ਸਚ੍ਚਪਰਿਯੋਸਾਨੇ ਸਾ ਸਬ੍ਬਾਪਿ ਸਹਪਰਿਵਾਰਾ ਸੋਤਾਪਨ੍ਨਾ ਅਹੇਸੁਂ. ਥੇਰੋ ਤਂ ਪਵਤ੍ਤਿਂ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਧਮ੍ਮਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਜਾਤਾਤਿ.

ਚਤੁਰਿਤ੍ਥਿਵਿਮਾਨਵਣ੍ਣਨਾ ਨਿਟ੍ਠਿਤਾ.

ਦਿਬ੍ਬਂ ¶ ¶ ਤੇ ਅਮ੍ਬਵਨਂ ਰਮ੍ਮਨ੍ਤਿ ਅਮ੍ਬਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਸਾਵਤ੍ਥਿਯਂ ਅਞ੍ਞਤਰਾ ਉਪਾਸਿਕਾ ਆਵਾਸਦਾਨਸ੍ਸ ਮਹਪ੍ਫਲਤਂ ਮਹਾਨਿਸਂਸਤਞ੍ਚ ¶ ਸੁਤ੍ਵਾ ਛਨ੍ਦਜਾਤਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਵਮਾਹ ‘‘ਅਹਂ, ਭਨ੍ਤੇ, ਏਕਂ ਆਵਾਸਂ ਕਾਰੇਤੁਕਾਮਾ, ਇਚ੍ਛਾਮਿ ਤਾਦਿਸਂ ਓਕਾਸਂ, ਆਚਿਕ੍ਖਤੂ’’ਤਿ. ਭਗਵਾ ਭਿਕ੍ਖੂ ਆਣਾਪੇਸਿ, ਭਿਕ੍ਖੂ ਤਸ੍ਸਾ ਓਕਾਸਂ ਦਸ੍ਸੇਸੁਂ. ਸਾ ਤਤ੍ਥ ਰਮਣੀਯਂ ਆਵਾਸਂ ਕਾਰੇਤ੍ਵਾ ਤਸ੍ਸ ਸਮਨ੍ਤਤੋ ਅਮ੍ਬਰੁਕ੍ਖੇ ਰੋਪੇਸਿ. ਸੋ ਆਵਾਸੋ ਸਮਨ੍ਤਤੋ ਅਮ੍ਬਪਨ੍ਤੀਹਿ ਪਰਿਕ੍ਖਿਤ੍ਤੋ ਛਾਯੂਦਕਸਮ੍ਪਨ੍ਨੋ ਮੁਤ੍ਤਾਜਾਲਸਦਿਸਵਾਲੁਕਾਕਿਣ੍ਣਪਣ੍ਡਰਭੂਮਿਭਾਗੋ ਅਤਿਵਿਯ ਮਨੋਹਰੋ ਅਹੋਸਿ. ਸਾ ਤਂ ਵਿਹਾਰਂ ਨਾਨਾਵਣ੍ਣੇਹਿ ਵਤ੍ਥੇਹਿ ਪੁਪ੍ਫਦਾਮਗਨ੍ਧਦਾਮਾਦੀਹਿ ਚ ਦੇਵਵਿਮਾਨਂ ਵਿਯ ਅਲਙ੍ਕਰਿਤ੍ਵਾ ਤੇਲਪਦੀਪਂ ਆਰੋਪੇਤ੍ਵਾ ਅਮ੍ਬਰੁਕ੍ਖੇ ਚ ਅਹਤੇਹਿ ਵਤ੍ਥੇਹਿ ਵੇਠੇਤ੍ਵਾ ਸਙ੍ਘਸ੍ਸ ਨਿਯ੍ਯਾਦੇਸਿ.

ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ, ਤਸ੍ਸਾ ਮਹਨ੍ਤਂ ਵਿਮਾਨਂ ਪਾਤੁਰਹੋਸਿ ਅਮ੍ਬਵਨਪਰਿਕ੍ਖਿਤ੍ਤਂ. ਸਾ ਤਤ੍ਥ ਅਚ੍ਛਰਾਗਣਪਰਿਵਾਰਿਤਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਉਪਗਨ੍ਤ੍ਵਾ ਇਮਾਹਿ ਗਾਥਾਹਿ ਪੁਚ੍ਛਿ –

‘‘ਦਿਬ੍ਬਂ ਤੇ ਅਮ੍ਬਵਨਂ ਰਮ੍ਮਂ, ਪਾਸਾਦੇਤ੍ਥ ਮਹਲ੍ਲਕੋ;

ਨਾਨਾਤੂਰਿਯਸਙ੍ਘੁਟ੍ਠੋ, ਅਚ੍ਛਰਾਗਣਘੋਸਿਤੋ.

‘‘ਪਦੀਪੋ ਚੇਤ੍ਥ ਜਲਤਿ, ਨਿਚ੍ਚਂ ਸੋਵਣ੍ਣਯੋ ਮਹਾ;

ਦੁਸ੍ਸਫਲੇਹਿ ਰੁਕ੍ਖੇਹਿ, ਸਮਨ੍ਤਾ ਪਰਿਵਾਰਿਤੋ.

੭੮੫. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੮੭. ‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ¶ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਵਿਹਾਰਂ ਸਙ੍ਘਸ੍ਸ ਕਾਰੇਸਿਂ, ਅਮ੍ਬੇਹਿ ਪਰਿਵਾਰਿਤਂ.

‘‘ਪਰਿਯੋਸਿਤੇ ¶ ਵਿਹਾਰੇ, ਕਾਰੇਨ੍ਤੇ ਨਿਟ੍ਠਿਤੇ ਮਹੇ;

ਅਮ੍ਬੇਹਿ ਛਾਦਯਿਤ੍ਵਾਨ, ਕਤ੍ਵਾ ਦੁਸ੍ਸਮਯੇ ਫਲੇ.

‘‘ਪਦੀਪਂ ਤਤ੍ਥ ਜਾਲੇਤ੍ਵਾ, ਭੋਜਯਿਤ੍ਵਾ ਗਣੁਤ੍ਤਮਂ;

ਨਿਯ੍ਯਾਦੇਸਿਂ ਤਂ ਸਙ੍ਘਸ੍ਸ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਤੇਨ ¶ ਮੇ ਅਮ੍ਬਵਨਂ ਰਮ੍ਮਂ, ਪਾਸਾਦੇਤ੍ਥ ਮਹਲ੍ਲਕੋ;

ਨਾਨਾਤੂਰਿਯਸਙ੍ਘੁਟ੍ਠੋ, ਅਚ੍ਛਰਾਗਣਘੋਸਿਤੋ.

‘‘ਪਦੀਪੋ ਚੇਤ੍ਥ ਜਲਤਿ, ਨਿਚ੍ਚਂ ਸੋਵਣ੍ਣਯੋ ਮਹਾ;

ਦੁਸ੍ਸਫਲੇਹਿ ਰੁਕ੍ਖੇਹਿ, ਸਮਨ੍ਤਾ ਪਰਿਵਾਰਿਤੋ.

‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

੭੮੩. ਤਤ੍ਥ ਮਹਲ੍ਲਕੋਤਿ ਮਹਨ੍ਤੋ ਆਯਾਮਵਿਤ੍ਥਾਰੇਹਿ ਉਬ੍ਬੇਧੇਨ ਚ ਵਿਪੁਲੋ, ਉਲ਼ਾਰਤਮੋਤਿ ਅਤ੍ਥੋ. ਅਚ੍ਛਰਾਗਣਘੋਸਿਤੋਤਿ ਤਂ ਪਮੋਦਿਤੁਂ ਸਙ੍ਗੀਤਿਵਸੇਨ ਚੇਵ ਪਿਯਸਲ੍ਲਾਪਵਸੇਨ ਚ ਅਚ੍ਛਰਾਸਙ੍ਘੇਨ ਸਮੁਗ੍ਘੋਸਿਤੋ.

੭੮੪. ਪਦੀਪੋ ਚੇਤ੍ਥ ਜਲਤੀਤਿ ਸੂਰਿਯਰਸ੍ਮਿਸਮੁਜ੍ਜਲਕਿਰਣਵਿਤਾਨੋ ਰਤਨਪ੍ਪਦੀਪੋ ਚ ਏਤ੍ਥ ਏਤਸ੍ਮਿਂ ਪਾਸਾਦੇ ਅਭਿਜਲਤਿ. ਦੁਸ੍ਸਫਲੇਹੀਤਿ ਦੁਸ੍ਸਾਨਿ ਫਲਾਨਿ ਏਤੇਸਨ੍ਤਿ ਦੁਸ੍ਸਫਲਾ. ਤੇਹਿ ਸਮੁਗ੍ਗਿਰਿਯਮਾਨਦਿਬ੍ਬਵਤ੍ਥੇਹੀਤਿ ਅਤ੍ਥੋ.

੭੮੯. ਕਾਰੇਨ੍ਤੇ ਨਿਟ੍ਠਿਤੇ ਮਹੇਤਿ ਕਤਪਰਿਯੋਸਿਤਸ੍ਸ ਵਿਹਾਰਸ੍ਸ ਮਹੇ ਪੂਜਾਯ ਕਰੀਯਮਾਨਾਯ ਚ. ਕਤ੍ਵਾ ਦੁਸ੍ਸਮਯੇ ਫਲੇਤਿ ਦੁਸ੍ਸੇਯੇਵ ਤੇਸਂ ਅਮ੍ਬਾਨਂ ਫਲਂ ਕਤ੍ਵਾ.

੭੯੦. ਗਣੁਤ੍ਤਮਨ੍ਤਿ ਗਣਾਨਂ ਉਤ੍ਤਮਂ ਭਗਵਤੋ ਸਾਵਕਸਙ੍ਘਂ. ਨਿਯ੍ਯਾਦੇਸਿਨ੍ਤਿ ਸਮ੍ਪਟਿਚ੍ਛਾਪੇਸਿਂ, ਅਦਾਸਿਨ੍ਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵ.

ਪੀਤਵਤ੍ਥੇ ¶ ¶ ਪੀਤਧਜੇਤਿ ਪੀਤਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਪਰਿਨਿਬ੍ਬੁਤੇ ਰਞ੍ਞਾ ਅਜਾਤਸਤ੍ਤੁਨਾ ਅਤ੍ਤਨਾ ਪਟਿਲਦ੍ਧਾ ਭਗਵਤੋ ਸਰੀਰਧਾਤੁਯੋ ਗਹੇਤ੍ਵਾ ਥੂਪੇ ਚ ਮਹੇ ਚ ਕਤੇ ਰਾਜਗਹਵਾਸਿਨੀ ¶ ਅਞ੍ਞਤਰਾ ਉਪਾਸਿਕਾ ਪਾਤੋਵ ਕਤਸਰੀਰਪਟਿਜਗ੍ਗਨਾ ‘‘ਸਤ੍ਥੁ ਥੂਪਂ ਪੂਜੇਸ੍ਸਾਮੀ’’ਤਿ ਯਥਾਲਦ੍ਧਾਨਿ ਚਤ੍ਤਾਰਿ ਕੋਸਾਤਕੀਪੁਪ੍ਫਾਨਿ ਗਹੇਤ੍ਵਾ ਸਦ੍ਧਾਵੇਗੇਨ ਸਮੁਸ੍ਸਾਹਿਤਮਾਨਸਾ ਮਗ੍ਗਪਰਿਸ੍ਸਯਂ ਅਨੁਪਧਾਰੇਤ੍ਵਾਵ ਥੂਪਾਭਿਮੁਖੀ ਗਚ੍ਛਤਿ. ਅਥ ਨਂ ਤਰੁਣਵਚ੍ਛਾ ਗਾਵੀ ਅਭਿਧਾਵਨ੍ਤੀ ਵੇਗੇਨ ਆਪਤਿਤ੍ਵਾ ਸਿਙ੍ਗੇਨ ਪਹਰਿਤ੍ਵਾ ਜੀਵਿਤਕ੍ਖਯਂ ਪਾਪੇਸਿ. ਸਾ ਤਾਵਦੇਵ ਤਾਵਤਿਂਸਭਵਨੇ ਨਿਬ੍ਬਤ੍ਤਨ੍ਤੀ ਸਕ੍ਕਸ੍ਸ ਦੇਵਰਞ੍ਞੋ ਉਯ੍ਯਾਨਕੀਲ਼ਾਯ ਗਚ੍ਛਨ੍ਤਸ੍ਸ ਪਰਿਵਾਰਭੂਤਾਨਂ ਅਡ੍ਢਤਿਯਾਨਂ ਨਾਟਕਕੋਟੀਨਂ ਮਜ੍ਝੇ ਅਤ੍ਤਨੋ ਸਰੀਰਪਭਾਯ ਤਾ ਸਬ੍ਬਾ ਅਭਿਭਵਨ੍ਤੀ ਸਹ ਰਥੇਨ ਪਾਤੁਰਹੋਸਿ. ਤਂ ਦਿਸ੍ਵਾ ਸਕ੍ਕੋ ਦੇਵਰਾਜਾ ਵਿਮ੍ਹਿਤਚਿਤ੍ਤੋ ਅਚ੍ਛਰਿਯਬ੍ਭੁਤਜਾਤੋ ‘‘ਕੀਦਿਸੇਨ ਨੁ ਖੋ ਓਲ਼ਾਰਿਕੇਨ ਕਮ੍ਮੁਨਾ ਅਯਂ ਏਦਿਸਿਂ ਸੁਮਹਤਿਂ ਦੇਵਿਦ੍ਧਿਮੁਪਾਗਤਾ’’ਤਿ ਤਂ ਇਮਾਹਿ ਗਾਥਾਹਿ ਪੁਚ੍ਛਿ –

‘‘ਪੀਤਵਤ੍ਥੇ ਪੀਤਧਜੇ, ਪੀਤਾਲਙ੍ਕਾਰਭੂਸਿਤੇ;

ਪੀਤਚਨ੍ਦਨਲਿਤ੍ਤਙ੍ਗੇ, ਪੀਤਉਪ੍ਪਲਮਾਲਿਨੀ.

‘‘ਪੀਤਪਾਸਾਦਸਯਨੇ, ਪੀਤਾਸਨੇ ਪੀਤਭਾਜਨੇ;

ਪੀਤਛਤ੍ਤੇ ਪੀਤਰਥੇ, ਪੀਤਸ੍ਸੇ ਪੀਤਬੀਜਨੇ.

‘‘ਕਿਂ ਕਮ੍ਮਮਕਰੀ ਭਦ੍ਦੇ, ਪੁਬ੍ਬੇ ਮਾਨੁਸਕੇ ਭਵੇ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

ਸਾਪਿਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਕੋਸਾਤਕੀ ਨਾਮ ਲਤਤ੍ਥਿ ਭਨ੍ਤੇ, ਤਿਤ੍ਤਿਕਾ ਅਨਭਿਚ੍ਛਿਤਾ;

ਤਸ੍ਸਾ ਚਤ੍ਤਾਰਿ ਪੁਪ੍ਫਾਨਿ, ਥੂਪਂ ਅਭਿਹਰਿਂ ਅਹਂ.

‘‘ਸਤ੍ਥੁ ਸਰੀਰਮੁਦ੍ਦਿਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ;

ਨਾਸ੍ਸ ਮਗ੍ਗਂ ਅਵੇਕ੍ਖਿਸ੍ਸਂ, ਨ ਤਗ੍ਗਮਨਸਾ ਸਤੀ.

‘‘ਤਤੋ ¶ ਮਂ ਅਵਧੀ ਗਾਵੀ, ਥੂਪਂ ਅਪਤ੍ਤਮਾਨਸਂ;

ਤਞ੍ਚਾਹਂ ਅਭਿਸਞ੍ਚੇਯ੍ਯਂ, ਭਿਯ੍ਯੋ ਨੂਨ ਇਤੋ ਸਿਯਾ.

‘‘ਤੇਨ ¶ ¶ ਕਮ੍ਮੇਨ ਦੇਵਿਨ੍ਦ, ਮਘਵਾ ਦੇਵਕੁਞ੍ਜਰ;

ਪਹਾਯ ਮਾਨੁਸਂ ਦੇਹਂ, ਤਵ ਸਹਬ੍ਯਮਾਗਤਾ’’ਤਿ.

੭੯੫-੬. ਤਤ੍ਥ ਪੀਤਚਨ੍ਦਨਲਿਤ੍ਤਙ੍ਗੇਤਿ ਸੁਵਣ੍ਣਵਣ੍ਣੇਨ ਚਨ੍ਦਨੇਨ ਅਨੁਲਿਤ੍ਤਸਰੀਰੇ. ਪੀਤਪਾਸਾਦਸਯਨੇਤਿ ਸਬ੍ਬਸੋਵਣ੍ਣਮਯੇਨ ਪਾਸਾਦੇਨ ਸੁਵਣ੍ਣਪਰਿਕ੍ਖਿਤ੍ਤੇਹਿ ਸਯਨੇਹਿ ਚ ਸਮਨ੍ਨਾਗਤੇ. ਏਵਂ ਸਬ੍ਬਤ੍ਥ ਹੇਟ੍ਠਾ ਉਪਰਿ ਚ ਪੀਤਸਦ੍ਦੇਨ ਸੁਵਣ੍ਣਮੇਵ ਗਹਿਤਨ੍ਤਿ ਦਟ੍ਠਬ੍ਬਂ.

੭੯੮. ਲਤਤ੍ਥੀਤਿ ਲਤਾ ਅਤ੍ਥਿ. ਭਨ੍ਤੇਤਿ ਸਕ੍ਕਂ ਦੇਵਰਾਜਾਨਂ ਗਾਰਵੇਨ ਆਲਪਤਿ. ਅਨਭਿਚ੍ਛਿਤਾਤਿ ਨ ਅਭਿਕਙ੍ਖਿਤਾ.

੭੯੯. ਸਰੀਰਨ੍ਤਿ ਸਰੀਰਭੂਤਂ ਧਾਤੁਂ. ਅਵਯਵੇ ਚਾਯਂ ਸਮੁਦਾਯਵੋਹਾਰੋ ਯਥਾ ‘‘ਪਟੋ ਡਡ੍ਢੋ, ਸਮੁਦ੍ਦੋ ਦਿਟ੍ਠੋ’’ਤਿ ਚ. ਅਸ੍ਸਾਤਿ ਗੋਰੂਪਸ੍ਸ. ਮਗ੍ਗਨ੍ਤਿ ਆਗਮਨਮਗ੍ਗਂ. ਨ ਅਵੇਕ੍ਖਿਸ੍ਸਨ੍ਤਿ ਨ ਓਲੋਕਯਿਂ. ਕਸ੍ਮਾ? ਨ ਤਗ੍ਗਮਨਸਾ ਸਤੀਤਿ, ਤਸ੍ਸਂ ਗਾਵਿਯਂ ਗਤਮਨਾ ਠਪਿਤਮਨਾ ਨ ਹੋਨ੍ਤੀ, ਅਞ੍ਞਦਤ੍ਥੁ ਭਗਵਤੋ ਥੂਪਗਤਮਨਾ ਏਵ ਸਮਾਨਾਤਿ ਅਤ੍ਥੋ. ‘‘ਤਦਙ੍ਗਮਨਸਾ ਸਤੀ’’ਤਿ ਚ ਪਾਠੋ, ਤਦਙ੍ਗੇ ਤਸ੍ਸ ਭਗਵਤੋ ਧਾਤੁਯਾ ਅਙ੍ਗੇ ਮਨੋ ਏਤਿਸ੍ਸਾਤਿ ਤਦਙ੍ਗਮਨਸਾ. ਏਵਂਭੂਤਾ ਅਹਂ ਤਦਾ ਤਸ੍ਸਾ ਮਗ੍ਗਂ ਨਾਵੇਕ੍ਖਿਸ੍ਸਨ੍ਤਿ ਦਸ੍ਸੇਤਿ.

੮੦੦. ਥੂਪਂ ਅਪਤ੍ਤਮਾਨਸਨ੍ਤਿ ਥੂਪਂ ਚੇਤਿਯਂ ਅਸਮ੍ਪਤ੍ਤਅਜ੍ਝਾਸਯਂ, ਮਨਸਿ ਭਵੋਤਿ ਹਿ ਮਾਨਸੋ, ਅਜ੍ਝਾਸਯੋ ਮਨੋਰਥੋ. ‘‘ਥੂਪਂ ਉਪਗਨ੍ਤ੍ਵਾ ਪੁਪ੍ਫੇਹਿ ਪੂਜੇਸ੍ਸਾਮੀ’’ਤਿ ਉਪ੍ਪਨ੍ਨਮਨੋਰਥਸ੍ਸ ਅਸਮ੍ਪੁਣ੍ਣਤਾਯ ਏਵਂ ਵੁਤ੍ਤਂ. ਥੂਪਂ ਚੇਤਿਯਂ ਪਨ ਪੁਪ੍ਫੇਹਿ ਪੂਜਨਚਿਤ੍ਤਂ ਸਿਦ੍ਧਮੇਵ, ਯੇਨ ਸਾ ਦੇਵਲੋਕੇ ਉਪ੍ਪਨ੍ਨ. ਤਞ੍ਚਾਹਂ ਅਭਿਸਞ੍ਚੇਯ੍ਯਨ੍ਤਿ ¶ ਤਞ੍ਚੇ ਅਹਂ ਅਭਿਸਞ੍ਚਿਨੇਯ੍ਯਂ, ਪੁਪ੍ਫਪੂਜਨੇਨ ਹਿ ਪੁਞ੍ਞਂ ਅਹਂ ਥੂਪਂ ਅਭਿਗਨ੍ਤ੍ਵਾ ਯਥਾਧਿਪ੍ਪਾਯਂ ਪੂਜਨੇਨ ਸਮ੍ਮਦੇਵ ਚਿਨੇਯ੍ਯਂ ਉਪਚਿਨੇਯ੍ਯਨ੍ਤਿ ਅਤ੍ਥੋ. ਭਿਯ੍ਯੋ ਨੂਨ ਇਤੋ ਸਿਯਾਤਿ ਇਤੋ ਯਥਾਲਦ੍ਧਸਮ੍ਪਤ੍ਤਿਤੋਪਿ ਭਿਯ੍ਯੋ ਉਪਰਿ ਉਤ੍ਤਰਿਤਰਾ ਸਮ੍ਪਤ੍ਤਿ ਸਿਯਾਤਿ ਮਞ੍ਞੇਤਿ ਅਤ੍ਥੋ.

੮੦੧. ਮਘਵਾ ¶ ਦੇਵਕੁਞ੍ਜਰਾਤਿ ਆਲਪਨਂ. ਤਤ੍ਥ ਦੇਵਕੁਞ੍ਜਰਾਤਿ ਸਬ੍ਬਬਲਪਰਕ੍ਕਮਾਦਿਵਿਸੇਸੇਹਿ ਦੇਵੇਸੁ ਕੁਞ੍ਜਰਸਦਿਸੋ. ਸਹਬ੍ਯਨ੍ਤਿ ਸਹਭਾਵਂ.

‘‘ਇਦਂ ਸੁਤ੍ਵਾ ਤਿਦਸਾਧਿਪਤਿ, ਮਘਵਾ ਦੇਵਕੁਞ੍ਜਰੋ;

ਤਾਵਤਿਂਸੇ ਪਸਾਦੇਨ੍ਤੋ, ਮਾਤਲਿਂ ਏਤਦਬ੍ਰਵੀ’’ਤਿ. –

ਇਦਂ ¶ ਧਮ੍ਮਸਙ੍ਗਾਹਕਵਚਨਂ. ਤਤੋ ਸਕ੍ਕੋ ਮਾਤਲਿਪਮੁਖਸ੍ਸ ਦੇਵਗਣਸ੍ਸ ਇਮਾਹਿ ਗਾਥਾਹਿ ਧਮ੍ਮਂ ਦੇਸੇਸਿ –

‘‘ਪਸ੍ਸ ਮਾਤਲਿ ਅਚ੍ਛੇਰਂ, ਚਿਤ੍ਤਂ ਕਮ੍ਮਫਲਂ ਇਦਂ;

ਅਪ੍ਪਕਮ੍ਪਿ ਕਤਂ ਦੇਯ੍ਯਂ, ਪੁਞ੍ਞਂ ਹੋਤਿ ਮਹਪ੍ਫਲਂ.

‘‘ਨਤ੍ਥਿ ਚਿਤ੍ਤੇ ਪਸਨ੍ਨਮ੍ਹਿ, ਅਪ੍ਪਕਾ ਨਾਮ ਦਕ੍ਖਿਣਾ;

ਤਥਾਗਤੇ ਵਾ ਸਮ੍ਬੁਦ੍ਧੇ, ਅਥ ਵਾ ਤਸ੍ਸ ਸਾਵਕੇ.

‘‘ਏਹਿ ਮਾਤਲਿ ਅਮ੍ਹੇਪਿ, ਭਿਯ੍ਯੋ ਭਿਯ੍ਯੋ ਮਹੇਮਸੇ;

ਤਥਾਗਤਸ੍ਸ ਧਾਤੁਯੋ, ਸੁਖੋ ਪੁਞ੍ਞਾਨਮੁਚ੍ਚਯੋ.

‘‘ਤਿਟ੍ਠਨ੍ਤੇ ਨਿਬ੍ਬੁਤੇ ਚਾਪਿ, ਸਮੇ ਚਿਤ੍ਤੇ ਸਮਂ ਫਲਂ;

ਚੇਤੋਪਣਿਧਿਹੇਤੁਹਿ, ਸਤ੍ਤਾ ਗਚ੍ਛਨ੍ਤਿ ਸੁਗ੍ਗਤਿਂ.

‘‘ਬਹੂਨਂ ਵਤ ਅਤ੍ਥਾਯ, ਉਪ੍ਪਜ੍ਜਨ੍ਤਿ ਤਥਾਗਤਾ;

ਯਤ੍ਥ ਕਾਰਂ ਕਰਿਤ੍ਵਾਨ, ਸਗ੍ਗਂ ਗਚ੍ਛਨ੍ਤਿ ਦਾਯਕਾ’’ਤਿ.

੮੦੨. ਤਤ੍ਥ ਪਸਾਦੇਨ੍ਤੋਤਿ ਪਸਨ੍ਨੇ ਕਰੋਨ੍ਤੋ, ਰਤਨਤ੍ਤਯੇ ਸਦ੍ਧਂ ਉਪ੍ਪਾਦੇਨ੍ਤੋਤਿ ਅਤ੍ਥੋ.

੮੦੩. ਚਿਤ੍ਤਨ੍ਤਿ ਵਿਚਿਤ੍ਤਂ ਅਚਿਨ੍ਤੇਯ੍ਯਂ. ਕਮ੍ਮਫਲਨ੍ਤਿ ਦੇਯ੍ਯਧਮ੍ਮਸ੍ਸ ਅਨੁਲ਼ਾਰਤ੍ਤੇਪਿ ਖੇਤ੍ਤਸਮ੍ਪਤ੍ਤਿਯਾ ਚ ਚਿਤ੍ਤਸਮ੍ਪਤ੍ਤਿਯਾ ਚ ਉਲ਼ਾਰਸ੍ਸ ਪੁਞ੍ਞਕਮ੍ਮਸ੍ਸ ਫਲਂ ਪਸ੍ਸਾਤਿ ਯੋਜਨਾ. ਅਪ੍ਪਕਮ੍ਪਿ ਕਤਂ ਦੇਯ੍ਯਂ, ਪੁਞ੍ਞਂ ਹੋਤਿ ਮਹਪ੍ਫਲਨ੍ਤਿ ਏਤ੍ਥ ਕਤਨ੍ਤਿ ਕਾਰਵਸੇਨ ਸਕ੍ਕਾਰਵਸੇਨ ¶ ਆਯਤਨੇ ਵਿਨਿਯੁਤ੍ਤਂ. ਦੇਯ੍ਯਨ੍ਤਿ ਦਾਤਬ੍ਬਵਤ੍ਥੁਂ. ਪੁਞ੍ਞਨ੍ਤਿ ਤਥਾਪਵਤ੍ਤਂ ਪੁਞ੍ਞਕਮ੍ਮਂ.

੮੦੪. ਇਦਾਨਿ ¶ ਯਤ੍ਥ ਅਪ੍ਪਕਮ੍ਪਿ ਕਤਂ ਪੁਞ੍ਞਂ ਮਹਪ੍ਫਲਂ ਹੋਤਿ, ਤਂ ਪਾਕਟਂ ਕਤ੍ਵਾ ਦਸ੍ਸੇਨ੍ਤੋ ‘‘ਨਤ੍ਥਿ ਚਿਤ੍ਤੇ ਪਸਨ੍ਨਮ੍ਹੀ’’ਤਿ ਗਾਥਮਾਹ. ਤਂ ਸੁਵਿਞ੍ਞੇਯ੍ਯਮੇਵ.

੮੦੫-੬. ਅਮ੍ਹੇਪੀਤਿ ਮਯਮ੍ਪਿ. ਮਹੇਮਸੇਤਿ ਮਹਾਮਸੇ ਪੂਜਾਮਸੇ. ਚੇਤੋਪਣਿਧਿਹੇਤੁ ਹੀਤਿ ਅਤ੍ਤਨੋ ਚਿਤ੍ਤਸ੍ਸ ਸਮ੍ਮਦੇਵ ਠਪਨਨਿਮਿਤ੍ਤਂ, ਅਤ੍ਤਸਮ੍ਮਾਪਣਿਧਾਨੇਨਾਤਿ ਅਤ੍ਥੋ. ਤੇਨਾਹ ਭਗਵਾ –

‘‘ਨ ¶ ਤਂ ਮਾਤਾਪਿਤਾ ਕਯਿਰਾ, ਅਞ੍ਞੇ ਵਾਪਿ ਚ ਞਾਤਕਾ;

ਸਮ੍ਮਾ ਪਣਿਹਿਤਂ ਚਿਤ੍ਤਂ, ਸੇਯ੍ਯਸੋ ਨਂ ਤਤੋ ਕਰੇ’’ਤਿ. (ਧ. ਪ. ੪੩);

ਏਵਞ੍ਚ ਪਨ ਵਤ੍ਵਾ ਸਕ੍ਕੋ ਦੇਵਾਨਮਿਨ੍ਦੋ ਉਯ੍ਯਾਨਕੀਲ਼ਾਯ ਉਸ੍ਸਾਹਂ ਪਟਿਪ੍ਪਸ੍ਸਮ੍ਭੇਤ੍ਵਾ ਤਤੋਵ ਪਟਿਨਿਵਤ੍ਤਿਤ੍ਵਾ ਅਤ੍ਤਨਾ ਅਭਿਣ੍ਹਂ ਪੂਜਨੇਯ੍ਯਟ੍ਠਾਨਭੂਤੇ ਚੂਲ਼ਾਮਣਿਚੇਤਿਯੇ ਸਤ੍ਤਾਹਂ ਪੂਜਂ ਅਕਾਸਿ. ਅਥ ਅਪਰੇਨ ਸਮਯੇਨ ਦੇਵਚਾਰਿਕਂ ਗਤਸ੍ਸ ਆਯਸ੍ਮਤੋ ਨਾਰਦਤ੍ਥੇਰਸ੍ਸ ਤਂ ਪਵਤ੍ਤਿਂ ਗਾਥਾਹੇਵ ਕਥੇਸਿ, ਥੇਰੋ ਧਮ੍ਮਸਙ੍ਗਾਹਕਾਨਂ ਆਰੋਚੇਸਿ, ਤੇ ਤਥਾ ਨਂ ਸਙ੍ਗਹਂ ਆਰੋਪੇਸੁਨ੍ਤਿ.

ਓਭਾਸਯਿਤ੍ਵਾ ਪਥਵਿਂ ਸਦੇਵਕਨ੍ਤਿ ਉਚ੍ਛੁਵਿਮਾਨਂ. ਤਂ ਹੇਟ੍ਠਾ ਉਚ੍ਛੁਵਿਮਾਨੇਨ ਪਾਲ਼ਿਤੋ ਚ ਅਟ੍ਠੁਪ੍ਪਤ੍ਤਿਤੋ ਚ ਸਦਿਸਮੇਵ. ਕੇਵਲਂ ਤਤ੍ਥ ਸਸ੍ਸੁ ਸੁਣਿਸਂ ਪੀਠਕੇਨ ਪਹਰਿਤ੍ਵਾ ਮਾਰੇਸਿ, ਇਧ ਪਨ ਲੇਡ੍ਡੁਨਾਤਿ ਅਯਮੇਵ ਵਿਸੇਸੋ. ਵਤ੍ਥੁਨੋ ਪਨ ਭਿਨ੍ਨਤ੍ਤਾ ਉਭਯਮ੍ਪਿ ਵਿਸੁਂਯੇਵ ਸਙ੍ਗਹਂ ਆਰੁਲ਼੍ਹਨ੍ਤਿ ਵੇਦਿਤਬ੍ਬਂ.

‘‘ਓਭਾਸਯਿਤ੍ਵਾ ਪਥਵਿਂ ਸਦੇਵਕਂ, ਅਤਿਰੋਚਸਿ ਚਨ੍ਦਿਮਸੂਰਿਯਾ ਵਿਯ;

ਸਿਰਿਯਾ ਚ ਵਣ੍ਣੇਨ ਯਸੇਨ ਤੇਜਸਾ, ਬ੍ਰਹ੍ਮਾਵ ਦੇਵੇ ਤਿਦਸੇ ਸਹਿਨ੍ਦਕੇ.

‘‘ਪੁਚ੍ਛਾਮਿ ¶ ¶ ਤਂ ਉਪ੍ਪਲਮਾਲਧਾਰਿਨੀ, ਆਵੇਲ਼ਿਨੀ ਕਞ੍ਚਨਸਨ੍ਨਿਭਤ੍ਤਚੇ;

ਅਲਙ੍ਕਤੇ ਉਤ੍ਤਮਵਤ੍ਥਧਾਰਿਨੀ, ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮਂ.

‘‘ਕਿਂ ਤ੍ਵਂ ਪੁਰੇ ਕਮ੍ਮਮਕਾਸਿ ਅਤ੍ਤਨਾ, ਮਨੁਸ੍ਸਭੂਤਾ ਪੁਰਿਮਾਯ ਜਾਤਿਯਾ;

ਦਾਨਂ ਸੁਚਿਣ੍ਣਂ ਅਥ ਸੀਲਸਞ੍ਞਮਂ, ਕੇਨੁਪਪਨ੍ਨਾ ਸੁਗਤਿਂ ਯਸਸ੍ਸਿਨੀ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਪੁਚ੍ਛਿ. ਤਤੋ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਇਦਾਨਿ ¶ ਭਨ੍ਤੇ ਇਮਮੇਵ ਗਾਮਂ, ਪਿਣ੍ਡਾਯ ਅਮ੍ਹਾਕਂ ਘਰਂ ਉਪਾਗਮਿ;

ਤਤੋ ਤੇ ਉਚ੍ਛੁਸ੍ਸ ਅਦਾਸਿਂ ਖਣ੍ਡਿਕਂ, ਪਸਨ੍ਨਚਿਤ੍ਤਾ ਅਤੁਲਾਯ ਪੀਤਿਯਾ.

‘‘ਸਸ੍ਸੁ ਚ ਪਚ੍ਛਾ ਅਨੁਯੁਞ੍ਜਤੇ ਮਮਂ, ਕਹਂ ਨੁ ਉਚ੍ਛੁਂ ਵਧੁਕੇ ਅਵਾਕਿਰਿ;

ਨ ਛਡ੍ਡਿਤਂ ਨੋ ਪਨ ਖਾਦਿਤਂ ਮਯਾ, ਸਨ੍ਤਸ੍ਸ ਭਿਕ੍ਖੁਸ੍ਸ ਸਯਂ ਅਦਾਸਹਂ.

‘‘‘ਤੁਯ੍ਹਂ ਨ੍ਵਿਦਂ ਇਸ੍ਸਰਿਯਂ ਅਥੋ ਮਮ’, ਇਤਿਸ੍ਸਾ ਸਸ੍ਸੁ ਪਰਿਭਾਸਤੇ ਮਮਂ;

ਲੇਡ੍ਡੁਂ ਗਹੇਤ੍ਵਾ ਪਹਾਰਂ ਅਦਾਸਿ ਮੇ, ਤਤੋ ਚੁਤਾ ਕਾਲਕਤਾਮ੍ਹਿ ਦੇਵਤਾ.

‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਦੇਵੇਹਿ ਸਦ੍ਧਿਂ ਪਰਿਚਾਰਯਾਮਹਂ, ਮੋਦਾਮਹਂ ਕਾਮਗੁਣੇਹਿ ਪਞ੍ਚਹਿ.

‘‘ਤਦੇਵ ¶ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਦੇਵਿਨ੍ਦਗੁਤ੍ਤਾ ਤਿਦਸੇਹਿ ਰਕ੍ਖਿਤਾ, ਸਮਪ੍ਪਿਤਾ ਕਾਮਗੁਣੇਹਿ ਪਞ੍ਚਹਿ.

‘‘ਏਤਾਦਿਸਂ ਪੁਞ੍ਞਫਲਂ ਅਨਪ੍ਪਕਂ, ਮਹਾਵਿਪਾਕਾ ਮਮ ਉਚ੍ਛੁਦਕ੍ਖਿਣਾ;

ਦੇਵੇਹਿ ਸਦ੍ਧਿਂ ਪਰਿਚਾਰਯਾਮਹਂ, ਮੋਦਾਮਹਂ ਕਾਮਗੁਣੇਹਿ ਪਞ੍ਚਹਿ.

‘‘ਏਤਾਦਿਸਂ ¶ ਪੁਞ੍ਞਫਲਂ ਅਨਪ੍ਪਕਂ, ਮਹਾਜੁਤਿਕਾ ਮਮ ਉਚ੍ਛੁਦਕ੍ਖਿਣਾ;

ਦੇਵਿਨ੍ਦਗੁਤ੍ਤਾ ਤਿਦਸੇਹਿ ਰਕ੍ਖਿਤਾ, ਸਹਸ੍ਸਨੇਤ੍ਤੋਰਿਵ ਨਨ੍ਦਨੇ ਵਨੇ.

‘‘ਤੁਵਞ੍ਚ ਭਨ੍ਤੇ ਅਨੁਕਮ੍ਪਕਂ ਵਿਦੁਂ, ਉਪੇਚ੍ਚ ਵਨ੍ਦਿਂ ਕੁਸਲਞ੍ਚ ਪੁਚ੍ਛਿਸਂ;

ਤਤੋ ਤੇ ਉਚ੍ਛੁਸ੍ਸ ਅਦਾਸਿਂ ਖਣ੍ਡਿਕਂ, ਪਸਨ੍ਨਚਿਤ੍ਤਾ ਅਤੁਲਾਯ ਪੀਤਿਯਾ’’ਤਿ.

ਅਭਿਕ੍ਕਨ੍ਤੇਨ ¶ ਵਣ੍ਣੇਨਾਤਿ ਵਨ੍ਦਨਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਅਞ੍ਞਤਰਸ੍ਮਿਂ ਗਾਮਕਾਵਾਸੇ ਵਸ੍ਸਂ ਵਸਿਤ੍ਵਾ ਵੁਤ੍ਥਵਸ੍ਸਾ ਪਵਾਰੇਤ੍ਵਾ ਸੇਨਾਸਨਂ ਪਟਿਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਸਾਵਤ੍ਥਿਂ ਉਦ੍ਦਿਸ੍ਸ ਭਗਵਨ੍ਤਂ ਦਸ੍ਸਨਤ੍ਥਾਯ ਗਚ੍ਛਨ੍ਤਾ ਅਞ੍ਞਤਰਸ੍ਸ ਗਾਮਸ੍ਸ ਮਜ੍ਝੇਨ ਅਤਿਕ੍ਕਮਨ੍ਤਿ. ਤਤ੍ਥ ਅਞ੍ਞਤਰਾ ਇਤ੍ਥੀ ਤੇ ਭਿਕ੍ਖੂ ਦਿਸ੍ਵਾ ਪਸਨ੍ਨਚਿਤ੍ਤਾ ਸਞ੍ਜਾਤਗਾਰਵਬਹੁਮਾਨਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਸਿਰਸ੍ਮਿਂ ਅਞ੍ਜਲਿਂ ਪਗ੍ਗਯ੍ਹ ਯਾਵ ਦਸ੍ਸਨੂਪਚਾਰਾ ਪਸਾਦਸੋਮ੍ਮਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਓਲੋਕੇਨ੍ਤੀ ਅਟ੍ਠਾਸਿ ¶ . ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਅਥ ਨਂ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤਿਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –

੮੧੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੮੨੨. ‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਦਿਸ੍ਵਾਨ ਸਮਣੇ ਸੀਲਵਨ੍ਤੇ;

ਪਾਦਾਨਿ ¶ ਵਨ੍ਦਿਤ੍ਵਾ ਮਨਂ ਪਸਾਦਯਿਂ, ਵਿਤ੍ਤਾ ਚਹਂ ਅਞ੍ਜਲਿਕਂ ਅਕਾਸਿਂ.

‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

੮੨੩. ਤਤ੍ਥ ਸਮਣੇਤਿ ਸਮਿਤਪਾਪੇ. ਸੀਲਵਨ੍ਤੇਤਿ ਸੀਲਗੁਣਯੁਤ੍ਤੇ. ਮਨਂ ਪਸਾਦਯਿਨ੍ਤਿ ‘‘ਸਾਧੁਰੂਪਾ ਵਤਿਮੇ ਅਯ੍ਯਾ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ’’ਤਿ ਤੇਸਂ ਗੁਣੇ ਆਰਬ੍ਭ ਚਿਤ੍ਤਂ ਪਸਾਦੇਸਿਂ. ਵਿਤ੍ਤਾ ਚਹਂ ਅਞ੍ਜਲਿਕਂ ਅਕਾਸਿਨ੍ਤਿ ਤੁਟ੍ਠਾ ਸੋਮਨਸ੍ਸਜਾਤਾ ਅਹਂ ਵਨ੍ਦਿਂ. ਪੇਸਲਾਨਂ ਭਿਕ੍ਖੂਨਂ ਪਸਾਦਵਿਕਸਿਤਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਦਸ੍ਸਨਮਤ੍ਤਮ੍ਪਿ ਇਮੇਸਂ ਸਤ੍ਤਾਨਂ ਬਹੂਪਕਾਰਂ, ਪਗੇਵ ਵਨ੍ਦਨਾਤਿ. ਤੇਨਾਹ ‘‘ਤੇਨ ਮੇਤਾਦਿਸੋ ਵਣ੍ਣੋ’’ਤਿਆਦਿ. ਸੇਸਂ ਵੁਤ੍ਤਨਯਮੇਵ.

ਅਭਿਕ੍ਕਨ੍ਤੇਨ ¶ ਵਣ੍ਣੇਨਾਤਿ ਰਜ੍ਜੁਮਾਲਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਗਯਾਗਾਮਕੇ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਧੀਤਾ ਤਸ੍ਮਿਂਯੇਵ ਗਾਮੇ ਏਕਸ੍ਸ ਬ੍ਰਾਹ੍ਮਣਕੁਮਾਰਸ੍ਸ ਦਿਨ੍ਨਾ ਪਤਿਕੁਲਂ ਗਤਾ, ਤਸ੍ਮਿਂ ਗੇਹੇ ਇਸ੍ਸਰਿਯਂ ਵਤ੍ਤੇਨ੍ਤੀ ਤਿਟ੍ਠਤਿ. ਸਾ ¶ ਤਸ੍ਮਿਂ ਗੇਹੇ ਦਾਸਿਯਾ ਧੀਤਰਂ ਦਿਸ੍ਵਾ ਨ ਸਹਤਿ. ਦਿਟ੍ਠਕਾਲਤੋ ਪਟ੍ਠਾਯ ਕੋਧੇਨ ਤਟਤਟਾਯਮਾਨਾ ਅਕ੍ਕੋਸਤਿ ਪਰਿਭਾਸਤਿ, ਖਟਕਞ੍ਚਸ੍ਸਾ ਦੇਤਿ. ਯਦਾ ਪਨ ਸਾ ਵਯਪ੍ਪਤ੍ਤਿਯਾ ਕਿਚ੍ਚਸਮਤ੍ਥਾ ਜਾਤਾ, ਤਦਾ ਨਂ ਜਣ੍ਣੁਕਪ੍ਪਰਮੁਟ੍ਠੀਹਿ ਪਹਰਤੇਵ ਯਥਾ ਤਂ ਪੁਰਿਮਜਾਤੀਸੁ ਬਦ੍ਧਾਘਾਤਾ.

ਸਾ ਕਿਰ ਦਾਸੀ ਕਸ੍ਸਪਦਸਬਲਸ੍ਸ ਕਾਲੇ ਤਸ੍ਸਾ ਸਾਮਿਨੀ ਅਹੋਸਿ, ਇਤਰਾ ਦਾਸੀ. ਸਾ ਤਂ ਲੇਡ੍ਡੁਦਣ੍ਡਾਦੀਹਿ ਮੁਟ੍ਠਿਆਦੀਹਿ ¶ ਚ ਅਭਿਣ੍ਹਂ ਅਭਿਹਨਤਿ. ਸਾ ਤੇਨ ਨਿਬ੍ਬਿਨ੍ਨਾ ਯਥਾਬਲਂ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ‘‘ਅਨਾਗਤੇ ਅਹਂ ਸਾਮਿਨੀ ਹੁਤ੍ਵਾ ਇਮਿਸ੍ਸਾ ਉਪਰਿ ਇਸ੍ਸਰਿਯਂ ਵਤ੍ਤੇਯ੍ਯ’’ਨ੍ਤਿ ਪਤ੍ਥਨਂ ਠਪੇਸਿ. ਅਥ ਸਾ ਦਾਸੀ ਤਤੋ ਚੁਤਾ ਅਪਰਾਪਰਂ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੁਤ੍ਤਨਯੇਨ ਗਯਾਗਾਮਕੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਪਤਿਕੁਲਂ ਗਤਾ, ਇਤਰਾਪਿ ਤਸ੍ਸਾ ਦਾਸੀ ਅਹੋਸਿ. ਏਵਂ ਬਦ੍ਧਾਘਾਤਤਾਯ ਸਾ ਤਂ ਵਿਹੇਠੇਤਿ.

ਏਵਂ ਵਿਹੇਠੇਨ੍ਤੀ ਅਕਾਰਣੇਨੇਵ ਕੇਸੇਸੁ ਗਹੇਤ੍ਵਾ ਹਤ੍ਥੇਹਿ ਚ ਪਾਦੇਹਿ ਚ ਸੁਹਤਂ ਹਨਿ. ਸਾ ਨ੍ਹਾਪਿਤਸਾਲਂ ਗਨ੍ਤ੍ਵਾ ਖੁਰਮੁਣ੍ਡਂ ਕਾਰੇਤ੍ਵਾ ਅਗਮਾਸਿ. ਸਾਮਿਨੀ ‘‘ਕਿਂ ਜੇ ਦੁਟ੍ਠਦਾਸਿ ਮੁਣ੍ਡਨਮਤ੍ਤੇਨ ਤਵ ਵਿਪ੍ਪਮੋਕ੍ਖੋ’’ਤਿ ਰਜ੍ਜੁਂ ਸੀਸੇ ਬਨ੍ਧਿਤ੍ਵਾ ਤਤ੍ਥ ਨਂ ਗਹੇਤ੍ਵਾ ਓਣਮੇਤ੍ਵਾ ਘਾਤੇਤਿ, ਤਸ੍ਸਾ ਤਞ੍ਚ ਰਜ੍ਜੁਂ ਅਪਨੇਤੁਂ ਨ ਦੇਤਿ. ਤਤੋ ਪਟ੍ਠਾਯ ਦਾਸਿਯਾ ‘‘ਰਜ੍ਜੁਮਾਲਾ’’ਤਿ ਨਾਮਂ ਅਹੋਸਿ.

ਅਥੇਕਦਿਵਸਂ ਸਤ੍ਥਾ ਪਚ੍ਚੂਸਸਮਯੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਰਜ੍ਜੁਮਾਲਾਯ ਸੋਤਾਪਤ੍ਤਿਫਲੂਪਨਿਸ੍ਸਯਂ, ਤਸ੍ਸਾ ਚ ਬ੍ਰਾਹ੍ਮਣਿਯਾ ਸਰਣੇਸੁ ਸੀਲੇਸੁ ਚ ਪਤਿਟ੍ਠਾਨਂ ਦਿਸ੍ਵਾ ਅਰਞ੍ਞਂ ਪਵਿਸਿਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਨ੍ਤੋ. ਰਜ੍ਜੁਮਾਲਾਪਿ ਖੋ ਦਿਵਸੇ ਦਿਵਸੇ ਤਾਯ ਤਥਾ ਵਿਹੇਠਿਯਮਾਨਾ ‘‘ਕਿਂ ਮੇ ਇਮਿਨਾ ਦੁਜ੍ਜੀਵਿਤੇਨਾ’’ਤਿ ਨਿਬ੍ਬਿਨ੍ਨਰੂਪਾ ਜੀਵਿਤੇ ਮਰਿਤੁਕਾਮਾ ਘਟਂ ਗਹੇਤ੍ਵਾ ਉਦਕਤਿਤ੍ਥਂ ਗਚ੍ਛਨ੍ਤੀ ਵਿਯ ਗੇਹਤੋ ਨਿਕ੍ਖਨ੍ਤਾ ਅਨੁਕ੍ਕਮੇਨ ਵਨਂ ਪਵਿਸਿਤ੍ਵਾ ਭਗਵਤੋ ਨਿਸਿਨ੍ਨਰੁਕ੍ਖਸ੍ਸ ਅਵਿਦੂਰੇ ਅਞ੍ਞਤਰਸ੍ਸ ਰੁਕ੍ਖਸ੍ਸ ਸਾਖਾਯ ਰਜ੍ਜੁਂ ਬਨ੍ਧਿਤ੍ਵਾ ਪਾਸਂ ਕਤ੍ਵਾ ਉਬ੍ਬਨ੍ਧਿਤੁਕਾਮਾ ਇਤੋ ਚਿਤੋ ਚ ਓਲੋਕੇਨ੍ਤੀ ਅਦ੍ਦਸ ਭਗਵਨ੍ਤਂ ਤਤ੍ਥ ਨਿਸਿਨ੍ਨਂ ਪਾਸਾਦਿਕਂ ਪਸਾਦਨੀਯਂ ਉਤ੍ਤਮਦਮਥਸਮਥਮਨੁਪ੍ਪਤ੍ਤਂ ਛਬ੍ਬਣ੍ਣਬੁਦ੍ਧਰਸ੍ਮਿਯੋ ¶ ਵਿਸ੍ਸਜ੍ਜੇਨ੍ਤਂ. ਦਿਸ੍ਵਾ ਬੁਦ੍ਧਗਾਰਵੇਨ ਆਕਡ੍ਢਿਯਮਾਨਹਦਯਾ ¶ ‘‘ਕਿਂ ਨੁ ਖੋ ਭਗਵਾ ਮਾਦਿਸਾਨਮ੍ਪਿ ¶ ਧਮ੍ਮਂ ਦੇਸੇਤਿ, ਯਮਹਂ ਸੁਤ੍ਵਾ ਇਤੋ ਦੁਜ੍ਜੀਵਿਤਤੋ ਮੁਚ੍ਚੇਯ੍ਯ’’ਨ੍ਤਿ ਚਿਨ੍ਤੇਸਿ.

ਅਥ ਭਗਵਾ ਤਸ੍ਸਾ ਚਿਤ੍ਤਾਚਾਰਂ ਓਲੋਕੇਤ੍ਵਾ ‘‘ਰਜ੍ਜੁਮਾਲੇ’’ਤਿ ਆਹ. ਸਾ ਤਂ ਸੁਤ੍ਵਾ ਅਮਤੇਨ ਵਿਯ ਅਭਿਸਿਤ੍ਤਾ ਪੀਤਿਯਾ ਨਿਰਨ੍ਤਰਂ ਫੁਟ੍ਠਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਤਸ੍ਸਾ ਭਗਵਾ ਅਨੁਪੁਬ੍ਬਿਕਥਾਨੁਪੁਬ੍ਬਕਂ ਚਤੁਸਚ੍ਚਕਥਂ ਕਥੇਸਿ, ਸਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਤ੍ਥਾ ‘‘ਵਟ੍ਟਤਿ ਏਤ੍ਤਕੋ ਰਜ੍ਜੁਮਾਲਾਯ ਅਨੁਗ੍ਗਹੋ, ਇਦਾਨੇਸਾ ਕੇਨਚਿ ਅਪ੍ਪਧਂਸਿਯਾ ਜਾਤਾ’’ਤਿ ਅਰਞ੍ਞਤੋ ਨਿਕ੍ਖਮਿਤ੍ਵਾ ਗਾਮਸ੍ਸ ਅਵਿਦੂਰੇ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਰਜ੍ਜੁਮਾਲਾਪਿ ਅਤ੍ਤਾਨਂ ਵਿਨਿਪਾਤੇਤੁਂ ਅਭਬ੍ਬਤਾਯ ਖਨ੍ਤਿਮੇਤ੍ਤਾਨੁਦ੍ਦਯਸਮ੍ਪਨ੍ਨਤਾਯ ਚ ‘‘ਬ੍ਰਾਹ੍ਮਣੀ ਮਂ ਹਨਤੁ ਵਾ ਵਿਹੇਠੇਤੁ ਵਾ ਯਂ ਵਾ ਤਂ ਵਾ ਕਰੋਤੂ’’ਤਿ ਘਟੇਨ ਉਦਕਂ ਗਹੇਤ੍ਵਾ ਗੇਹਂ ਅਗਮਾਸਿ. ਸਾਮਿਕੋ ਗੇਹਦ੍ਵਾਰੇ ਠਿਤੋ ਤਂ ਦਿਸ੍ਵਾ ‘‘ਤ੍ਵਂ ਅਜ੍ਜ ਉਦਕਤਿਤ੍ਥਂ ਗਤਾ ਚਿਰਾਯਿਤ੍ਵਾ ਆਗਤਾ, ਮੁਖਵਣ੍ਣੋ ਚ ਤੇ ਅਤਿਵਿਯ ਵਿਪ੍ਪਸਨ੍ਨੋ, ਤ੍ਵਞ੍ਚ ਅਞ੍ਞੇਨ ਆਕਾਰੇਨ ਉਪਟ੍ਠਾਸਿ, ਕਿਂ ਏਤ’’ਨ੍ਤਿ ਪੁਚ੍ਛਿ. ਸਾ ਤਸ੍ਸ ਤਂ ਪਵਤ੍ਤਿਂ ਆਚਿਕ੍ਖਿ.

ਬ੍ਰਾਹ੍ਮਣੋ ਤਸ੍ਸਾ ਵਚਨਂ ਸੁਤ੍ਵਾ ਤੁਸ੍ਸਿਤ੍ਵਾ ਗੇਹਂ ਗਨ੍ਤ੍ਵਾ ਰਜ੍ਜੁਮਾਲਾਯ ਉਪਰਿ ‘‘ਤਯਾ ਨ ਕਿਞ੍ਚਿ ਕਾਤਬ੍ਬ’’ਨ੍ਤਿ ਸੁਣਿਸਾਯ ਵਤ੍ਵਾ ਤੁਟ੍ਠਮਾਨਸੋ ਸੀਘਤਰਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਸਾਦਰੇਨ ਕਤਪਟਿਸਨ੍ਥਾਰੋ ਸਤ੍ਥਾਰਂ ਨਿਮਨ੍ਤੇਤ੍ਵਾ ਅਤ੍ਤਨੋ ਗੇਹਂ ਆਨੇਤ੍ਵਾ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਪਰਿਵਿਸਿਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਉਪਸਙ੍ਕਮਿਤ੍ਵਾ ਏਕਮਨ੍ਤਂ ਨਿਸੀਦਿ, ਸੁਣਿਸਾਪਿਸ੍ਸ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਗਯਾਗਾਮਵਾਸਿਨੋਪਿ ਬ੍ਰਾਹ੍ਮਣਗਹਪਤਿਕਾ ਤਂ ਪਵਤ੍ਤਿਂ ਸੁਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਅਪ੍ਪੇਕਚ੍ਚੇ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ, ਅਪ੍ਪੇਕਚ੍ਚੇ ਸਮ੍ਮੋਦਨੀਯਂ ਕਤ੍ਵਾ ਏਕਮਨ੍ਤਂ ਨਿਸੀਦਿਂਸੁ.

ਸਤ੍ਥਾ ਰਜ੍ਜੁਮਾਲਾਯ ਤਸ੍ਸਾ ਚ ਬ੍ਰਾਹ੍ਮਣਿਯਾ ਪੁਰਿਮਜਾਤੀਸੁ ਕਤਕਮ੍ਮਂ ਵਿਤ੍ਥਾਰਤੋ ਕਥੇਤ੍ਵਾ ਸਮ੍ਪਤ੍ਤਪਰਿਸਾਯ ਅਨੁਰੂਪਂ ਧਮ੍ਮਂ ਦੇਸੇਸਿ ¶ . ਤਂ ਸੁਤ੍ਵਾ ਬ੍ਰਾਹ੍ਮਣੀ ਚ ਮਹਾਜਨੋ ਚ ਤਤ੍ਥ ਸਨ੍ਨਿਪਤਿਤੋ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਹਿ. ਸਤ੍ਥਾ ਆਸਨਾ ਉਟ੍ਠਹਿਤ੍ਵਾ ਸਾਵਤ੍ਥਿਮੇਵ ਅਗਮਾਸਿ. ਬ੍ਰਾਹ੍ਮਣੋ ਰਜ੍ਜੁਮਾਲਂ ਧੀਤੁਟ੍ਠਾਨੇ ਠਪੇਸਿ. ਤਸ੍ਸ ਸੁਣਿਸਾ ਰਜ੍ਜੁਮਾਲਂ ਪਿਯਚਕ੍ਖੂਹਿ ਓਲੋਕੇਨ੍ਤੀ ਯਾਵਜੀਵਂ ਮਨਾਪੇਨੇਵ ਸਿਨੇਹੇਨ ਪਰਿਹਰਿ. ਰਜ੍ਜੁਮਾਲਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ, ਅਚ੍ਛਰਾਸਹਸ੍ਸਞ੍ਚਸ੍ਸਾ ਪਰਿਵਾਰੋ ¶ ਅਹੋਸਿ. ਸਾ ਸਟ੍ਠਿਸਕਟਭਾਰਪ੍ਪਮਾਣੇਹਿ ਦਿਬ੍ਬਾਭਰਣੇਹਿ ਪਟਿਮਣ੍ਡਿਤਤ੍ਤਭਾਵਾ ਅਚ੍ਛਰਾਸਹਸ੍ਸਪਰਿਵੁਤ੍ਤਾ ਨਨ੍ਦਨਵਨਾਦੀਸੁ ਮਹਤਿਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਮਾਨਾ ਪਮੁਦਿਤਮਨਾ ਵਿਚਰਤਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਗਤੋ ਤਂ ਮਹਨ੍ਤੇਨ ਦਿਬ੍ਬਾਨੁਭਾਵੇਨ ਮਹਤਿਯਾ ਦੇਵਿਦ੍ਧਿਯਾ ਵਿਜ੍ਜੋਤਮਾਨਂ ਦਿਸ੍ਵਾ ਤਾਯ ਕਤਕਮ੍ਮਂ ਇਮਾਹਿ ਗਾਥਾਹਿ ਪੁਚ੍ਛਿ.

‘‘ਅਭਿਕ੍ਕਨ੍ਤੇਨ ¶ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਹਤ੍ਥੇ ਪਾਦੇ ਚ ਵਿਗ੍ਗਯ੍ਹ, ਨਚ੍ਚਸਿ ਸੁਪ੍ਪਵਾਦਿਤੇ.

‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਸਦ੍ਦਾ ਨਿਚ੍ਛਰਨ੍ਤਿ, ਸਵਨੀਯਾ ਮਨੋਰਮਾ.

‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਗਨ੍ਧਾ ਪਵਾਯਨ੍ਤਿ, ਸੁਚਿਗਨ੍ਧਾ ਮਨੋਰਮਾ.

‘‘ਵਿਵਤ੍ਤਮਾਨਾ ਕਾਯੇਨ, ਯਾ ਵੇਣੀਸੁ ਪਿਲ਼ਨ੍ਧਨਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

‘‘ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

‘‘ਯਾਪਿ ਤੇ ਸਿਰਸ੍ਮਿਂ ਮਾਲਾ, ਸੁਚਿਗਨ੍ਧਾ ਮਨੋਰਮਾ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੮੨੬. ਤਤ੍ਥ ਹਤ੍ਥੇ ਪਾਦੇ ਚ ਵਿਗ੍ਗਯ੍ਹਾਤਿ ਹਤ੍ਥੇ ਚ ਪਾਦੇ ਚ ਵਿਵਿਧੇਹਿ ਆਕਾਰੇਹਿ ਗਹੇਤ੍ਵਾ, ਪੁਪ੍ਫਮੁਟ੍ਠਿਪੁਪ੍ਫਞ੍ਜਲਿਆਦਿਭੇਦਸ੍ਸ ਸਾਖਾਭਿਨਯਸ੍ਸ ਦਸ੍ਸਨਵਸੇਨ ਵਿਵਿਧੇਹਿ ਆਕਾਰੇਹਿ ਹਤ੍ਥੇ, ਚ, ਸਮਪਾਦਾਦੀਨਮ੍ਪਿ ਠਾਨਵਿਸੇਸਾਨਂ ਦਸ੍ਸਨਵਸੇਨ ਵਿਵਿਧੇਹਿ ਆਕਾਰੇਹਿ ਪਾਦੇ ਚ ਉਪਾਦਿਯਿਤ੍ਵਾਤਿ ਅਤ੍ਥੋ. ਚ-ਸਦ੍ਦੇਨ ¶ ਸਾਖਾਭਿਨਯਂ ਸਙ੍ਗਣ੍ਹਾਤਿ. ਨਚ੍ਚਸੀਤਿ ਨਟਸਿ. ਯਾ ਤ੍ਵਨ੍ਤਿ ਯਾ ਵੁਤ੍ਤਨਯਵਸੇਨ ਨਚ੍ਚਂ ਕਰੋਸੀਤਿ ਅਤ੍ਥੋ. ਸੁਪ੍ਪਵਾਦਿਤੇਤਿ ਸੁਨ੍ਦਰੇ ਪਵਜ੍ਜਨੇ ਸਤਿ ਤਵ ਨਚ੍ਚਸ੍ਸ ਅਨੁਰੂਪਵਸੇਨ ਵੀਣਾਵਂਸਮੁਦਿਙ੍ਗਤਾਲ਼ਾਦਿਕੇ ਵਾਦਿਯਮਾਨੇ, ਪਞ੍ਚਙ੍ਗਿਕੇ ਤੂਰਿਯੇ ਪਗ੍ਗਯ੍ਹਮਾਨੇਤਿ ਅਤ੍ਥੋ. ਸੇਸਂ ਹੇਟ੍ਠਾਵਿਮਾਨੇ ਵੁਤ੍ਤਨਯਮੇਵ.

ਏਵਂ ¶ ਥੇਰੇਨ ਪੁਚ੍ਛਿਤਾ ਸਾ ਦੇਵਤਾ ਅਤ੍ਤਨੋ ਪੁਰਿਮਜਾਤਿਆਦਿਂ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਦਾਸੀ ¶ ਅਹਂ ਪੁਰੇ ਆਸਿਂ, ਗਯਾਯਂ ਬ੍ਰਾਹ੍ਮਣਸ੍ਸਹਂ;

ਅਪ੍ਪਪੁਞ੍ਞਾ ਅਲਕ੍ਖਿਕਾ, ਰਜ੍ਜੁਮਾਲਾਤਿ ਮਂ ਵਿਦੁਂ.

‘‘ਅਕ੍ਕੋਸਾਨਂ ਵਧਾਨਞ੍ਚ, ਤਜ੍ਜਨਾਯ ਚ ਉਗ੍ਗਤਾ;

ਕੁਟਂ ਗਹੇਤ੍ਵਾ ਨਿਕ੍ਖਮ੍ਮ, ਅਗਞ੍ਛਿਂ ਉਦਹਾਰਿਯਾ.

‘‘ਵਿਪਥੇ ਕੁਟਂ ਨਿਕ੍ਖਿਪਿਤ੍ਵਾ, ਵਨਸਣ੍ਡਂ ਉਪਾਗਮਿਂ;

‘ਇਧੇਵਾਹਂ ਮਰਿਸ੍ਸਾਮਿ, ਕੋ ਅਤ੍ਥੋ ਜੀਵਿਤੇਨ ਮੇ’.

‘‘ਦਲ਼੍ਹਂ ਪਾਸਂ ਕਰਿਤ੍ਵਾਨ, ਆਸੁਮ੍ਭਿਤ੍ਵਾਨ ਪਾਦਪੇ;

ਤਤੋ ਦਿਸਾ ਵਿਲੋਕੇਸਿਂ, ‘ਕੋ ਨੁ ਖੋ ਵਨਮਸ੍ਸਿਤੋ’.

‘‘ਤਤ੍ਥਦ੍ਦਸਾਸਿਂ ਸਮ੍ਬੁਦ੍ਧਂ, ਸਬ੍ਬਲੋਕਹਿਤਂ ਮੁਨਿਂ;

ਨਿਸਿਨ੍ਨਂ ਰੁਕ੍ਖਮੂਲਸ੍ਮਿਂ, ਝਾਯਨ੍ਤਂ ਅਕੁਤੋਭਯਂ.

‘‘ਤਸ੍ਸਾ ਮੇ ਅਹੁ ਸਂਵੇਗੋ, ਅਬ੍ਭੁਤੋ ਲੋਮਹਂਸਨੋ;

‘ਕੋ ਨੁ ਖੋ ਵਨਮਸ੍ਸਿਤੋ, ਮਨੁਸ੍ਸੋ ਉਦਾਹੁ ਦੇਵਤਾ’.

‘‘ਪਾਸਾਦਿਕਂ ਪਸਾਦਨੀਯਂ, ਵਨਾ ਨਿਬ੍ਬਨਮਾਗਤਂ;

ਦਿਸ੍ਵਾ ਮਨੋ ਮੇ ਪਸੀਦਿ, ਨਾਯਂ ਯਾਦਿਸਕੀਦਿਸੋ.

‘‘ਗੁਤ੍ਤਿਨ੍ਦ੍ਰਿਯੋ ਝਾਨਰਤੋ, ਅਬਹਿਗ੍ਗਤਮਾਨਸੋ;

ਹਿਤੋ ਸਬ੍ਬਸ੍ਸ ਲੋਕਸ੍ਸ, ਬੁਦ੍ਧੋ ਅਯਂ ਭਵਿਸ੍ਸਤਿ.

‘‘ਭਯਭੇਰਵੋ ਦੁਰਾਸਦੋ, ਸੀਹੋਵ ਗੁਹਮਸ੍ਸਿਤੋ;

ਦੁਲ੍ਲਭਾਯਂ ਦਸ੍ਸਨਾਯ, ਪੁਪ੍ਫਂ ਓਦੁਮ੍ਬਰਂ ਯਥਾ.

‘‘ਸੋ ¶ ਮਂ ਮੁਦੂਹਿ ਵਾਚਾਹਿ, ਆਲਪਿਤ੍ਵਾ ਤਥਾਗਤੋ;

ਰਜ੍ਜੁਮਾਲੇਤਿ ਮਂਵੋਚ, ਸਰਣਂ ਗਚ੍ਛ ਤਥਾਗਤਂ.

‘‘ਤਾਹਂ ¶ ¶ ਗਿਰਂ ਸੁਣਿਤ੍ਵਾਨ, ਨੇਲਂ ਅਤ੍ਥਵਤਿਂ ਸੁਚਿਂ;

ਸਣ੍ਹਂ ਮੁਦੁਞ੍ਚ ਵਗ੍ਗੁਞ੍ਚ, ਸਬ੍ਬਸੋਕਾਪਨੂਦਨਂ.

‘‘ਕਲ੍ਲਚਿਤ੍ਤਞ੍ਚ ਮਂ ਞਤ੍ਵਾ, ਪਸਨ੍ਨਂ ਸੁਦ੍ਧਮਾਨਸਂ;

ਹਿਤੋ ਸਬ੍ਬਸ੍ਸ ਲੋਕਸ੍ਸ, ਅਨੁਸਾਸਿ ਤਥਾਗਤੋ.

‘‘ਇਦਂ ਦੁਕ੍ਖਨ੍ਤਿ ਮਂਵੋਚ, ਅਯਂ ਦੁਕ੍ਖਸ੍ਸ ਸਮ੍ਭਵੋ;

ਦੁਕ੍ਖਨਿਰੋਧੋ ਮਗ੍ਗੋ ਚ, ਅਞ੍ਜਸੋ ਅਮਤੋਗਧੋ.

‘‘ਅਨੁਕਮ੍ਪਕਸ੍ਸ ਕੁਸਲਸ੍ਸ, ਓਵਾਦਮ੍ਹਿ ਅਹਂ ਠਿਤਾ;

ਅਜ੍ਝਗਾ ਅਮਤਂ ਸਨ੍ਤਿਂ, ਨਿਬ੍ਬਾਨਂ ਪਦਮਚ੍ਚੁਤਂ.

‘‘ਸਾਹਂ ਅਵਟ੍ਠਿਤਾਪੇਮਾ, ਦਸ੍ਸਨੇ ਅਵਿਕਮ੍ਪਿਨੀ;

ਮੂਲਜਾਤਾਯ ਸਦ੍ਧਾਯ, ਧੀਤਾ ਬੁਦ੍ਧਸ੍ਸ ਓਰਸਾ.

‘‘ਸਾਹਂ ਰਮਾਮਿ ਕੀਲ਼ਾਮਿ, ਮੋਦਾਮਿ ਅਕੁਤੋਭਯਾ;

ਦਿਬ੍ਬਮਾਲਂ ਧਾਰਯਾਮਿ, ਪਿਵਾਮਿ ਮਧੁਮਦ੍ਦਵਂ.

‘‘ਸਟ੍ਠਿਤੂਰਿਯਸਹਸ੍ਸਾਨਿ, ਪਟਿਬੋਧਂ ਕਰੋਨ੍ਤਿ ਮੇ;

ਆਲ਼ਮ੍ਬੋ ਗਗ੍ਗਰੋ ਭੀਮੋ, ਸਾਧੁਵਾਦੀ ਚ ਸਂਸਯੋ.

‘‘ਪੋਕ੍ਖਰੋ ਚ ਸੁਫਸ੍ਸੋ ਚ, ਵਿਣਾਮੋਕ੍ਖਾ ਚ ਨਾਰਿਯੋ;

ਨਨ੍ਦਾ ਚੇਵ ਸੁਨਨ੍ਦਾ ਚ, ਸੋਣਦਿਨ੍ਨਾ ਸੁਚਿਮ੍ਹਿਤਾ.

‘‘ਅਲਮ੍ਬੁਸਾ ਮਿਸ੍ਸਕੇਸੀ ਚ, ਪੁਣ੍ਡਰੀਕਾਤਿਦਾਰੁਣੀ;

ਏਣੀਫਸ੍ਸਾ ਸੁਫਸ੍ਸਾ ਚ, ਸੁਭਦ੍ਦਾ ਮੁਦੁਵਾਦਿਨੀ.

‘‘ਏਤਾ ਚਞ੍ਞਾ ਚ ਸੇਯ੍ਯਾਸੇ, ਅਚ੍ਛਰਾਨਂ ਪਬੋਧਿਕਾ;

ਤਾ ਮਂ ਕਾਲੇਨੁਪਾਗਨ੍ਤ੍ਵਾ, ਅਭਿਭਾਸਨ੍ਤਿ ਦੇਵਤਾ.

‘‘ਹਨ੍ਦ ਨਚ੍ਚਾਮ ਗਾਯਾਮ, ਹਨ੍ਦ ਤਂ ਰਮਯਾਮਸੇ;

ਨਯਿਦਂ ਅਕਤਪੁਞ੍ਞਾਨਂ, ਕਤਪੁਞ੍ਞਾਨਮੇਵਿਦਂ.

‘‘ਅਸੋਕਂ ¶ ¶ ਨਨ੍ਦਨਂ ਰਮ੍ਮਂ, ਤਿਦਸਾਨਂ ਮਹਾਵਨਂ;

ਸੁਖਂ ਅਕਤਪੁਞ੍ਞਾਨਂ, ਇਧ ਨਤ੍ਥਿ ਪਰਤ੍ਥ ਚ.

‘‘ਸੁਖਞ੍ਚ ਕਤਪੁਞ੍ਞਾਨਂ, ਇਧ ਚੇਵ ਪਰਤ੍ਥ ਚ;

ਤੇਸਂ ¶ ਸਹਬ੍ਯਕਾਮਾਨਂ, ਕਤ੍ਤਬ੍ਬਂ ਕੁਸਲਂ ਬਹੁਂ;

ਕਤਪੁਞ੍ਞਾ ਹਿ ਮੋਦਨ੍ਤਿ, ਸਗ੍ਗੇ ਭੋਗਸਮਙ੍ਗਿਨੋ.

‘‘ਬਹੂਨਂ ਵਤ ਅਤ੍ਥਾਯ, ਉਪ੍ਪਜ੍ਜਨ੍ਤਿ ਤਥਾਗਤਾ;

ਦਕ੍ਖਿਣੇਯ੍ਯਾ ਮਨੁਸ੍ਸਾਨਂ, ਪੁਞ੍ਞਕ੍ਖੇਤ੍ਤਾਨਮਾਕਰਾ;

ਯਤ੍ਥ ਕਾਰਂ ਕਰਿਤ੍ਵਾਨ, ਸਗ੍ਗੇ ਮੋਦਨ੍ਤਿ ਦਾਯਕਾ’’ਤਿ.

੮੩੩. ਤਤ੍ਥ ਦਾਸੀ ਅਹਂ ਪੁਰੇ ਆਸਿਨ੍ਤਿ ਪੁਰੇ ਪੁਰਿਮਜਾਤਿਯਂ ਅਹਂ ਅਨ੍ਤੋਜਾਤਾ ਦਾਸੀ ਅਹੋਸਿਂ. ਤਤ੍ਥ ਕਸ੍ਸਾਤਿ ਆਹ ‘‘ਗਯਾਯਂ ਬ੍ਰਾਹ੍ਮਣਸ੍ਸਹ’’ਨ੍ਤਿ, ਗਯਾਨਾਮਕੇ ਗਾਮੇ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ. ਹਨ੍ਤਿ ਨਿਪਾਤਮਤ੍ਤਂ. ਅਪ੍ਪਪੁਞ੍ਞਾਤਿ ਮਨ੍ਦਭਾਗ੍ਯਾ ਅਪੁਞ੍ਞਾ. ਅਲਕ੍ਖਿਕਾਤਿ ਨਿਸ੍ਸਿਰਿਕਾ ਕਾਲਕਣ੍ਣੀ. ਰਜ੍ਜੁਮਾਲਾਤਿ ਮਂ ਵਿਦੁਨ੍ਤਿ, ਕੇਸੇ ਗਹੇਤ੍ਵਾ ਆਕਡ੍ਢਨਪਰਿਕਡ੍ਢਨਦੁਕ੍ਖੇਨ ਮੁਣ੍ਡਕੇ ਕਤੇ ਪੁਨਪਿ ਤਦਤ੍ਥਮੇਵ ਸੀਸੇ ਦਲ਼੍ਹਂ ਬਨ੍ਧਿਤ੍ਵਾ ਠਪਿਤਰਜ੍ਜੁਕੁਣ੍ਡਲਕਵਸੇਨ ‘‘ਰਜ੍ਜੁਮਾਲਾ’’ਤਿ ਮਂ ਮਨੁਸ੍ਸਾ ਜਾਨਿਂਸੁ.

੮੩੪. ਵਧਾਨਨ੍ਤਿ ਤਾਲ਼ਨਾਨਂ. ਤਜ੍ਜਨਾਯਾਤਿ ਭਯਸਂਤਜ੍ਜਨੇਨ. ਉਗ੍ਗਤਾਤਿ ਉਗ੍ਗਤਾਯ ਦੋਮਨਸ੍ਸੁਪ੍ਪਤ੍ਤਿਯਾ. ਉਦਹਾਰਿਯਾਤਿ ਉਦਕਹਾਰਿਕਾ, ਉਦਕਂ ਆਹਰਨ੍ਤੀ ਵਿਯ ਹੁਤ੍ਵਾਤਿ ਅਧਿਪ੍ਪਾਯੋ.

੮੩੫. ਵਿਪਥੇਤਿ ਅਪਥੇ, ਮਗ੍ਗਤੋ ਅਪਕ੍ਕਮਿਤ੍ਵਾਤਿ ਅਤ੍ਥੋ. ਕ੍ਵਤ੍ਥੋਤਿ ਕੋ ਅਤ੍ਥੋ. ਸੋਯੇਵ ਵਾ ਪਾਠੋ.

੮੩੬. ਦਲ਼੍ਹਂ ਪਾਸਂ ਕਰਿਤ੍ਵਾਨਾਤਿ ਬਨ੍ਧਨਪਾਸਂ ਥਿਰਂ ਅਚ੍ਛਿਜ੍ਜਨਕਂ ਕਤ੍ਵਾ. ਆਸੁਮ੍ਭਿਤ੍ਵਾਨ ਪਾਦਪੇਤਿ ਵਿਟਪੇ ਲਗ੍ਗਨਵਸੇਨ ਪਾਦਪੇ ਰੁਕ੍ਖੇ ਖਿਪਿਤ੍ਵਾ. ਤਤੋ ਦਿਸਾ ਵਿਲੋਕੇਸਿਂ, ਕੋ ਨੁ ਖੋ ਵਨਮਸ੍ਸਿਤੋਤਿ ਇਮਂ ਵਨਂ ਪਵਿਸਨਵਸੇਨ ਅਸ੍ਸਿਤੋ ਨੁ ਖੋ ਕੋਚਿ ਅਤ੍ਥਿ, ਯਤੋ ਮੇ ਮਰਣਨ੍ਤਰਾਯੋ ਸਿਯਾਤਿ ਅਧਿਪ੍ਪਾਯੋ.

੮੩੭. ਸਮ੍ਬੁਦ੍ਧਨ੍ਤਿਆਦਿ ¶ ਤਦਾ ਤਸ੍ਸਾ ਤਾਦਿਸੇ ਨਿਚ੍ਛਯੇ ਅਸਤਿਪਿ ਸਭਾਵਵਸੇਨ ਵੁਤ੍ਤਂ. ਤਸ੍ਸਤ੍ਥੋ ¶ – ਸਯਮੇਵ ਸਮ੍ਮਦੇਵ ਚ ਸਬ੍ਬਸ੍ਸਾਪਿ ਬੁਜ੍ਝਿਤਬ੍ਬਸ੍ਸ ਬੁਦ੍ਧਤ੍ਤਾ ਸਮ੍ਬੁਦ੍ਧਂ, ਮਹਾਕਰੁਣਾਯੋਗੇਨ ਹੀਨਾਦਿਭੇਦਭਿਨ੍ਨਸ੍ਸ ਸਬ੍ਬਸ੍ਸਾਪਿ ਲੋਕਸ੍ਸ ਏਕਨ੍ਤਹਿਤਤ੍ਤਾ ਸਬ੍ਬਲੋਕਹਿਤਂ, ਉਭਯਲੋਕਂ ¶ ਮੁਨਨਤੋ ਮੁਨਿਂ, ਨਿਸਜ੍ਜਾਵਸੇਨ ਕਿਲੇਸਾਭਿਸਙ੍ਖਾਰੇਹਿ ਠਾਨਾ ਚਾਵਨਾਭਾਵੇਨ ਚ ਨਿਸਿਨ੍ਨਂ, ਆਰਮ੍ਮਣੂਪਨਿਜ੍ਝਾਨੇਨ ਲਕ੍ਖਣੂਪਨਿਜ੍ਝਾਨੇਨ ਚ ਝਾਯਨ੍ਤਂ, ਬੋਧਿਮੂਲੇਯੇਵ ਭਯਹੇਤੂਨਂ ਸਮੁਚ੍ਛਿਨ੍ਨਤ੍ਤਾ ਕੁਤੋਚਿਪਿ ਭਯਾਭਾਵਤੋ ਅਕੁਤੋਭਯਨ੍ਤਿ ਵੇਦਿਤਬ੍ਬਂ.

੮੩੮. ਸਂਵੇਗੋ ਨਾਮ ਸਹੋਤ੍ਤਪ੍ਪਂ ਞਾਣਂ, ਸੋ ਤਸ੍ਸਾ ਭਗਵਤੋ ਦਸ੍ਸਨੇਨ ਉਪ੍ਪਜ੍ਜਿ. ਤੇਨਾਹ ‘‘ਤਸ੍ਸਾ ਮੇ ਅਹੁ ਸਂਵੇਗੋ’’ਤਿ.

੮੩੯. ਪਾਸਾਦਿਕਨ੍ਤਿ ਪਸਾਦਾਵਹਂ, ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਕੇਤੁਮਾਲਾਲਙ੍ਕਤਾਯ ਸਮਨ੍ਤਪਾਸਾਦਿਕਾਯ ਅਤ੍ਤਨੋ ਸਰੀਰਸੋਭਾਸਮ੍ਪਤ੍ਤਿਯਾ ਰੂਪਕਾਯਦਸ੍ਸਨਬ੍ਯਾਵਟਸ੍ਸ ਜਨਸ੍ਸ ਸਾਧੁਭਾਵਤੋ ਪਸਾਦਸਂਵਡ੍ਢਨਨ੍ਤਿ ਅਤ੍ਥੋ. ਪਸਾਦਨੀਯਨ੍ਤਿ ਦਸਬਲ-ਚਤੁਵੇਸਾਰਜ੍ਜਛਅਸਾਧਾਰਣਞਾਣ-ਅਟ੍ਠਾਰਸਾਵੇਣਿਕ-ਬੁਦ੍ਧਧਮ੍ਮਪਭੁਤਿਅਪਰਿਮਾਣਗੁਣਸਮਨ੍ਨਾਗਤਾਯ ਧਮ੍ਮਕਾਯਸਮ੍ਪਤ੍ਤਿਯਾ ਸਰਿਕ੍ਖਕਜਨਸ੍ਸ ਪਸੀਦਿਤਬ੍ਬਯੁਤ੍ਤਂ, ਪਾਸਾਦਿਕਨ੍ਤਿ ਅਤ੍ਥੋ. ਵਨਾਤਿ ਕਿਲੇਸਵਨਤੋ ਅਪਕ੍ਕਮਿਤ੍ਵਾ. ਨਿਬ੍ਬਨਮਾਗਤਨ੍ਤਿ ਨਿਤ੍ਤਣ੍ਹਭਾਵਂ ਨਿਬ੍ਬਾਨਮੇਵ ਉਪਗਤਂ ਅਧਿਗਤਂ. ਯਾਦਿਸਕੀਦਿਸੋਤਿ ਯੋ ਵਾ ਸੋ ਵਾ, ਪਚੁਰਜਨੋਤਿ ਅਤ੍ਥੋ.

੮੪੦-੪੧. ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਅਗ੍ਗਮਗ੍ਗਗੋਪਨਾਯ ਗੋਪਿਤਤ੍ਤਾ ਗੁਤ੍ਤਿਨ੍ਦ੍ਰਿਯੋ. ਅਗ੍ਗਫਲਜ੍ਝਾਨਾਭਿਰਤਿਯਾ ਝਾਨਰਤੋ. ਤਤੋ ਏਵ ਬਹਿਭੂਤੇਹਿ ਰੂਪਾਦਿਆਰਮ੍ਮਣੇਹਿ ਅਪਕ੍ਕਮਿਤ੍ਵਾ ਵਿਸਯਜ੍ਝਤ੍ਤੇ ਨਿਬ੍ਬਾਨੇ ਚ ਓਗਾਲ਼੍ਹਚਿਤ੍ਤਤਾਯ ਅਬਹਿਗ੍ਗਤਮਾਨਸੋ. ਮਿਚ੍ਛਾਗਾਹਮੋਚਨਭਯੇਨ ਵਿਪਲ੍ਲਾਸਵਨ੍ਤੇਹਿ ਮਿਚ੍ਛਾਦਿਟ੍ਠਿਕੇਹਿ ਭਾਯਿਤਬ੍ਬਤੋ ਤੇਸਞ੍ਚ ਭਯਜਨਨਤੋ ਭਯਭੇਰਵੋ. ਪਯੋਗਾਸਯਵਿਪਨ੍ਨੇਹਿ ਅਨੁਪਗਮਨੀਯਤੋ ਚ ਕੇਨਚਿਪਿ ਅਨਾਸਾਦਨੀਯਤੋ ਚ ਦੁਰਾਸਦੋ. ਦੁਲ੍ਲਭਾਯਨ੍ਤਿ ਦੁਲ੍ਲਭੋ ਅਯਂ. ਦਸ੍ਸਨਾਯਾਤਿ ਦਟ੍ਠੁਮ੍ਪਿ. ਪੁਪ੍ਫਂ ਓਦੁਮ੍ਬਰਂ ਯਥਾਤਿ ਯਥਾ ਨਾਮ ਉਦੁਮ੍ਬਰੇ ਭਵਂ ਪੁਪ੍ਫਂ ਦੁਲ੍ਲਭਦਸ੍ਸਨਂ, ਕਦਾਚਿਦੇਵ ਭਵੇਯ੍ਯ, ਨ ਵਾ ਭਵੇਯ੍ਯ, ਏਵਂ ਈਦਿਸਸ੍ਸ ਉਤ੍ਤਮਪੁਗ੍ਗਲਸ੍ਸਾਤਿ ਅਤ੍ਥੋ.

੮੪੨. ਸੋ ¶ ਤਥਾਗਤੋ ਮੁਦੂਹਿ ਵਾਚਾਹਿ ਸਣ੍ਹਾਯ ਵਾਚਾਯ ‘‘ਰਜ੍ਜੁਮਾਲੇ’’ਤਿ ¶ ਮਂ ਆਲਪਿਤ੍ਵਾ ਆਮਨ੍ਤੇਤ੍ਵਾ ਸਰਣਂ ਗਚ੍ਛ ਤਥਾਗਤਨ੍ਤਿ ‘‘ਤਥਾ ਆਗਤੋ’’ਤਿਆਦਿਨਾ ਤਥਾਗਤਂ ਸਮ੍ਮਾਸਮ੍ਬੁਦ੍ਧਂ ਸਰਣਂ ਗਚ੍ਛਾਤਿ ਮਂ ਅਵੋਚ ਅਭਾਸੀਤਿ ਯੋਜਨਾ.

੮੪੩-੪. ਤਾਹਨ੍ਤਿ ਤਂ ਅਹਂ. ਗਿਰਨ੍ਤਿ ਵਾਚਂ. ਨੇਲਨ੍ਤਿ ਨਿਦ੍ਦੋਸਂ. ਅਤ੍ਥਵਤਿਨ੍ਤਿ ਅਤ੍ਥਯੁਤ੍ਤਂ ਸਾਤ੍ਥਂ ¶ , ਏਕਨ੍ਤਹਿਤਂ ਵਾ. ਵਚੀਸੋਚੇਯ੍ਯਤਾਯ ਸੁਚਿਂ. ਅਕਕ੍ਖਲ਼ਤਾਯ ਸਣ੍ਹਂ. ਵੇਨੇਯ੍ਯਾਨਂ ਮੁਦੁਭਾਵਕਰਤ੍ਤਾ ਮੁਦੁ. ਸਵਨੀਯਭਾਵੇਨ ਵਗ੍ਗੁਂ. ਸਬ੍ਬਸੋਕਾਪਨੂਦਨਨ੍ਤਿ ਞਾਤਿਬ੍ਯਸਨਾਦਿਵਸੇਨ ਉਪ੍ਪਜ੍ਜਨਕਸ੍ਸ ਸਬ੍ਬਸ੍ਸਾਪਿ ਸੋਕਸ੍ਸ ਵਿਨੋਦਨਂ ਗਿਰਂ ਸੁਤ੍ਵਾਨ ਪਸਨ੍ਨਚਿਤ੍ਤਾ ਅਹੋਸਿਨ੍ਤਿ ਸਮ੍ਬਨ੍ਧੋ. ਸਬ੍ਬਮੇਤਂ ਦਾਨਕਥਂ ਆਦਿਂ ਕਤ੍ਵਾ ਉਸ੍ਸਕ੍ਕਿਤ੍ਵਾ ਨੇਕ੍ਖਮ੍ਮੇ ਆਨਿਸਂਸਂ ਵਿਭਾਵਨਵਸੇਨ ਪਵਤ੍ਤਿਤਂ ਭਗਵਤੋ ਅਨੁਪੁਬ੍ਬਿਕਥਂ ਸਨ੍ਧਾਯ ਵਦਤਿ. ਤੇਨੇਵਾਹ ‘‘ਕਲ੍ਲਚਿਤ੍ਤਞ੍ਚ ਮਂ ਞਤ੍ਵਾ’’ਤਿਆਦਿ.

ਤਤ੍ਥ ਕਲ੍ਲਚਿਤ੍ਤਨ੍ਤਿ ਕਮ੍ਮਨਿਯਚਿਤ੍ਤਂ, ਹੇਟ੍ਠਾ ਪਵਤ੍ਤਿਤਦੇਸਨਾਯ ਅਸ੍ਸਦ੍ਧਿਯਾਦੀਨਂ ਚਿਤ੍ਤਦੋਸਾਨਂ ਵਿਗਤਤ੍ਤਾ ਉਪਰਿਦੇਸਨਾਯ ਭਾਜਨਭਾਵੂਪਗਮਨੇਨ ਕਮ੍ਮਕ੍ਖਮਚਿਤ੍ਤਂ, ਭਾਵਨਾਕਮ੍ਮਸ੍ਸ ਯੋਗ੍ਗਚਿਤ੍ਤਨ੍ਤਿ ਅਤ੍ਥੋ. ਤੇਨੇਵਾਹ ‘‘ਪਸਨ੍ਨਂ ਸੁਦ੍ਧਮਾਨਸ’’ਨ੍ਤਿ. ਤਤ੍ਥ ‘‘ਪਸਨ੍ਨ’’ਨ੍ਤਿ ਇਮਿਨਾ ਅਸ੍ਸਦ੍ਧਿਯਾਪਗਮਮਾਹ, ‘‘ਸੁਦ੍ਧਮਾਨਸ’’ਨ੍ਤਿ ਇਮਿਨਾ ਕਾਮਚ੍ਛਨ੍ਦਾਦਿਅਪਗਮਨੇਨ ਮੁਦੁਚਿਤ੍ਤਤਂ ਉਦਗ੍ਗਚਿਤ੍ਤਤਞ੍ਚ ਦਸ੍ਸੇਤਿ. ਅਨੁਸਾਸੀਤਿ ਓਵਦਿ, ਸਾਮੁਕ੍ਕਂਸਿਕਾਯ ਧਮ੍ਮਦੇਸਨਾਯ ਸਹ ਉਪਾਯੇਨ ਪਵਤ੍ਤਿਨਿਵਤ੍ਤਿਯੋ ਉਪਦਿਸੀਤਿ ਅਤ੍ਥੋ. ਤੇਨੇਵਾਹ ‘‘ਇਦਂ ਦੁਕ੍ਖ’’ਨ੍ਤਿਆਦਿ. ਅਨੁਸਾਸਿਤਾਕਾਰਦਸ੍ਸਨਞ੍ਹੇਤਂ.

੮੪੫. ਤਤ੍ਥ ਇਦਂ ਦੁਕ੍ਖਨ੍ਤਿ ਮਂਵੋਚਾਤਿ ਇਦਂ ਤਣ੍ਹਾਵਜ੍ਜਂ ਤੇਭੂਮਕਂ ਧਮ੍ਮਜਾਤਂ ਬਾਧਕਸਭਾਵਤ੍ਤਾ ਕੁਚ੍ਛਿਕਂ ¶ ਹੁਤ੍ਵਾ ਤੁਚ੍ਛਸਭਾਵਤ੍ਤਾ ਤਥਤ੍ਤਾ ਚ ਦੁਕ੍ਖਂ ਅਰਿਯਸਚ੍ਚਨ੍ਤਿ ਮਯ੍ਹਂ ਅਭਾਸਿ. ਅਯਂ ਦੁਕ੍ਖਸ੍ਸ ਸਮ੍ਭਵੋਤਿ ਅਯਂ ਆਮਤਣ੍ਹਾਦਿਭੇਦਾ ਤਣ੍ਹਾ ਯਥਾਵੁਤ੍ਤਸ੍ਸ ਦੁਕ੍ਖਸ੍ਸ ਸਮ੍ਭਵੋ ਪਭਵੋ ਉਪ੍ਪਤ੍ਤਿ ਹੇਤੁ ਸਮੁਦਯੋ ਅਰਿਯਸਚ੍ਚਨ੍ਤਿ. ਦੁਕ੍ਖਨਿਰੋਧੋਤਿ ਦੁਕ੍ਖਸ੍ਸ ਸਨ੍ਤਿਭਾਵੋ ਅਸਙ੍ਖਤਧਾਤੁ ਨਿਰੋਧੋ ਅਰਿਯਸਚ੍ਚਨ੍ਤਿ. ਅਨ੍ਤਦ੍ਵਯਸ੍ਸ ਪਰਿਵਜ੍ਜਨਤੋ ਅਞ੍ਜਸੋ ਨਿਬ੍ਬਾਨਗਾਮਿਨਿਪਟਿਪਦਾਭਾਵਤੋ ਅਮਤੋਗਧੋ ਮਗ੍ਗੋ ਅਰਿਯਸਚ੍ਚਨ੍ਤਿ ਮਂ ਅਵੋਚਾਤਿ ਸਮ੍ਬਨ੍ਧੋ.

੮੪੬. ਕੁਸਲਸ੍ਸਾਤਿ ¶ ਓਵਾਦਦਾਨੇ ਵੇਨੇਯ੍ਯਦਮਨੇ ਛੇਕਸ੍ਸ, ਅਪ੍ਪਮਾਦਪਟਿਪਤ੍ਤਿਯਾ ਵਾ ਮਤ੍ਥਕਪ੍ਪਤ੍ਤਿਯਾ ਅਨਵਜ੍ਜਸ੍ਸ. ਓਵਾਦਮ੍ਹਿ ਅਹਂ ਠਿਤਾਤਿ ਯਥਾਵੁਤ੍ਤੇ ਓਵਾਦੇ ਅਨੁਸਿਟ੍ਠਿਯਂ ਸਿਕ੍ਖਾਤ੍ਤਯਪਾਰਿਪੂਰਿਯਾ ਸਚ੍ਚਪਟਿਵੇਧੇਨ ਅਹਂ ਪਤਿਟ੍ਠਿਤਾ. ਤੇਨਾਹ ‘‘ਅਜ੍ਝਗਾ ਅਮਤਂ ਸਨ੍ਤਿਂ, ਨਿਬ੍ਬਾਨਂ ਪਦਮਚ੍ਚੁਤ’’ਨ੍ਤਿ, ਇਦਂ ਓਵਾਦੇ ਪਤਿਟ੍ਠਾਨਸ੍ਸ ਕਾਰਣਵਚਨਂ. ਯਾ ਨਿਚ੍ਚਤਾਯ ਮਰਣਾਭਾਵਤੋ ਅਮਤਂ, ਸਬ੍ਬਦੁਕ੍ਖਵੂਪਸਮਤਾਯ ਸਨ੍ਤਿਂ, ਅਧਿਗਤਾਨਂ ਅਚਵਨਹੇਤੁਤਾਯ ਅਚ੍ਚੁਤਂ ਨਿਬ੍ਬਾਨਂ ਪਦਂ ਅਜ੍ਝਗਾ ਅਧਿਗਞ੍ਛਿ, ਸਾ ਏਕਂਸੇਨ ਸਤ੍ਥੁ ਓਵਾਦੇ ਪਤਿਟ੍ਠਿਤਾ ਨਾਮਾਤਿ.

੮੪੭. ਅਵਟ੍ਠਿਤਾਪੇਮਾਤਿ ਦਲ਼੍ਹਭਤ੍ਤੀ ਰਤਨਤ੍ਤਯੇ ਨਿਚ੍ਚਲਪਸਾਦਸਿਨੇਹਾ. ਕਸ੍ਮਾ? ਯਸ੍ਮਾ ਦਸ੍ਸਨੇ ਅਵਿਕਮ੍ਪਿਨੀ, ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’’ਤਿ ਏਤਸ੍ਮਿਂ ਸਮ੍ਮਾਦਸ੍ਸਨੇ ਅਚਲਾ ਕੇਨਚਿ ਅਚਾਲਨੀਯਾ. ਕੇਨ ਪਨੇਤਂ ਅਵਿਕਮ੍ਪਨਨ੍ਤਿ ਆਹ ‘‘ਮੂਲਜਾਤਾਯ ¶ ਸਦ੍ਧਾਯਾ’’ਤਿ. ਅਯਂ ‘‘ਇਤਿਪਿ ਸੋ ਭਗਵਾ ਅਰਹ’’ਨ੍ਤਿਆਦਿਨਾ (ਮ. ਨਿ. ੧.੭੪; ਸਂ. ਨਿ. ੫.੯੯੭; ਅ. ਨਿ. ੯.੨੭) ਸਮ੍ਮਾਸਮ੍ਬੁਦ੍ਧੇ, ‘‘ਸ੍ਵਾਕ੍ਖਾਤੋ ਭਗਵਤਾ ਧਮ੍ਮਾ’ਤਿਆਦਿਨਾ ਤਸ੍ਸ ਧਮ੍ਮੇ, ‘‘ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’’ਤਿਆਦਿਨਾ ਤਸ੍ਸ ਸਙ੍ਘੇ ਚ ਸਚ੍ਚਾਭਿਸਮਯਸਙ੍ਖਾਤੇਨ ¶ ਮੂਲੇਨ ਜਾਤਮੂਲਾ ਸਦ੍ਧਾ, ਤਾਯ ਅਹਂ ਅਵਿਕਮ੍ਪਿਨੀਤਿ ਦਸ੍ਸੇਤਿ. ਤਤੋ ਏਵ ਧੀਤਾ ਬੁਦ੍ਧਸ੍ਸ ਓਰਸਾਤਿ ਸਮ੍ਮਾਸਮ੍ਬੁਦ੍ਧਸ੍ਸ ਉਰੇ ਵਾਯਾਮਜਨਿਤਾਭਿਜਾਤਿਤਾਯ ਓਰਸਪੁਤ੍ਤੀ.

੮੪੮. ਸਾਹਂ ਰਮਾਮੀਤਿ ਸਾ ਅਹਂ ਤਦਾ ਅਰਿਯਾਯ ਜਾਤਿਯਾ ਇਦਾਨਿ ਦੇਵੂਪਪਤ੍ਤਿਯਾ ਆਗਤਾ ਮਗ੍ਗਰਤਿਯਾ ਫਲਰਤਿਯਾ ਚ ਰਮਾਮਿ, ਕਾਮਗੁਣਰਤਿਯਾ ਕੀਲ਼ਾਮਿ, ਉਭਯੇਨਾਪਿ ਮੋਦਾਮਿ. ਅਤ੍ਤਾਨੁਵਾਦਭਯਾਦੀਨਂ ਅਪਗਤਤ੍ਤਾ ਅਕੁਤੋਭਯਾ. ਮਧੁਮਦ੍ਦਵਨ੍ਤਿ ਮਧੁਸਙ੍ਖਾਤਂ ਮਦ੍ਦਵਕਰਂ, ਨਚ੍ਚਨਗਾਯਨਕਾਲੇਸੁ ਸਰੀਰਸ੍ਸ ਸਰਸ੍ਸ ਚ ਮੁਦੁਭਾਵਾਵਹਂ ਗਨ੍ਧਪਾਨਂ ਸਨ੍ਧਾਯ ਵਦਤਿ.‘‘ਮਧੁਮਾਦਵ’’ਨ੍ਤਿਪਿ ਪਠਨ੍ਤਿ, ਆਦਵਂ ਯਾਵਦਵਂ ਯਾਵਦੇਵ ਦਵਤ੍ਥਂ ਮਧੁਰਂ ਪਿਵਾਮੀਤਿ ਅਤ੍ਥੋ.

੮੪੯. ਪੁਞ੍ਞਕ੍ਖੇਤ੍ਤਾਨਮਾਕਰਾਤਿ ਸਦੇਵਕਸ੍ਸ ਲੋਕਸ੍ਸ ਪੁਞ੍ਞਕ੍ਖੇਤ੍ਤਭੂਤਾਨਂ ਅਰਿਯਾਨਂ ਮਗ੍ਗਫਲਟ੍ਠਾਨਂ ਅਰਿਯਸਙ੍ਘਸ੍ਸ ਆਕਰਾ ਉਪ੍ਪਤ੍ਤਿਟ੍ਠਾਨਂ ਤਥਾਗਤਾ. ਯਥਾਤਿ ਯਸ੍ਮਿਂ ਪੁਞ੍ਞਕ੍ਖੇਤ੍ਤੇ. ਸੇਸਂ ਵੁਤ੍ਤਨਯਮੇਵ.

ਅਥਾਯਸ੍ਮਾ ¶ ਮਹਾਮੋਗ੍ਗਲ੍ਲਾਨੋ ਅਤ੍ਤਨਾ ਚ ਦੇਵਤਾਯ ਚ ਪਵਤ੍ਤਿਤਂ ਇਮਂ ਕਥਾਸਲ੍ਲਾਪਂ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਰਜ੍ਜੁਮਾਲਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਇਤਿ ਪਰਮਤ੍ਥਦੀਪਨਿਯਾ ਖੁਦ੍ਦਕ-ਅਟ੍ਠਕਥਾਯ ਵਿਮਾਨਵਤ੍ਥੁਸ੍ਮਿਂ

ਦ੍ਵਾਦਸਵਤ੍ਥੁਪਟਿਮਣ੍ਡਿਤਸ੍ਸ ਚਤੁਤ੍ਥਸ੍ਸ ਮਞ੍ਜਿਟ੍ਠਕਵਗ੍ਗਸ੍ਸ

੧. ਮਣ੍ਡੂਕਦੇਵਪੁਤ੍ਤਵਿਮਾਨਵਣ੍ਣਨਾ

ਮਹਾਰਥਵਗ੍ਗੇ ¶ ¶ ਕੋ ਮੇ ਵਨ੍ਦਤਿ ਪਾਦਾਨੀਤਿ ਮਣ੍ਡੂਕਦੇਵਪੁਤ੍ਤਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ¶ ਚਮ੍ਪਾਯਂ ਵਿਹਰਤਿ ਗਗ੍ਗਰਾਯ ਪੋਕ੍ਖਰਣਿਯਾ ਤੀਰੇ. ਸੋ ਪਚ੍ਚੂਸਵੇਲਾਯਂ ਬੁਦ੍ਧਾਚਿਣ੍ਣਂ ਮਹਾਕਰੁਣਾਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਵੇਨੇਯ੍ਯਬਨ੍ਧਵੇ ਸਤ੍ਤੇ ਵੋਲੋਕੇਨ੍ਤੋ ਅਦ੍ਦਸ ‘‘ਅਜ੍ਜ ਮਯਿ ਸਾਯਨ੍ਹਸਮਯੇ ਧਮ੍ਮਂ ਦੇਸੇਨ੍ਤੇ ਏਕੋ ਮਣ੍ਡੂਕੋ ਮਮ ਸਰੇ ਨਿਮਿਤ੍ਤਂ ਗਣ੍ਹਨ੍ਤੋ ਪਰੂਪਕ੍ਕਮੇਨ ਮਰਿਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਮਹਤਾ ਦੇਵਪਰਿਵਾਰੇਨ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ਆਗਮਿਸ੍ਸਤਿ, ਤਤ੍ਥ ਬਹੂਨਂ ਧਮ੍ਮਾਭਿਸਮਯੋ ਭਵਿਸ੍ਸਤੀ’’ਤਿ ਦਿਸ੍ਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਚਮ੍ਪਾਨਗਰਂ ਪਿਣ੍ਡਾਯ ਪਵਿਸਿਤ੍ਵਾ, ਭਿਕ੍ਖੂਨਂ ਸੁਲਭਪਿਣ੍ਡਪਾਤਂ ਕਤ੍ਵਾ ਕਤਭਤ੍ਤਕਿਚ੍ਚੋ ਵਿਹਾਰਂ ਪਵਿਸਿਤ੍ਵਾ ਭਿਕ੍ਖੂਸੁ ਵਤ੍ਤਂ ਦਸ੍ਸੇਤ੍ਵਾ, ਅਤ੍ਤਨੋ ਅਤ੍ਤਨੋ ਦਿਵਾਟ੍ਠਾਨਂ ਗਤੇਸੁ ਗਨ੍ਧਕੁਟਿਂ ਪਵਿਸਿਤ੍ਵਾ ਫਲਸਮਾਪਤ੍ਤਿਸੁਖੇਨ ਦਿਵਸਭਾਗਂ ਖੇਪੇਤ੍ਵਾ, ਸਾਯਨ੍ਹਸਮਯੇ ਚਤੂਸੁ ਪਰਿਸਾਸੁ ਸਨ੍ਨਿਪਤਿਤਾਸੁ ਸੁਰਭਿਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਤਙ੍ਖਣਾਨੁਰੂਪੇਨ ਪਾਟਿਹਾਰਿਯੇਨ ਪੋਕ੍ਖਰਣਿਤੀਰੇ ਧਮ੍ਮਸਭਾਮਣ੍ਡਪਂ ਪਵਿਸਿਤ੍ਵਾ ਅਲਙ੍ਕਤਵਰਬੁਦ੍ਧਾਸਨੇ ਨਿਸਿਨ੍ਨੋ ਮਨੋਸਿਲਾਤਲੇ ਸੀਹਨਾਦਂ ਨਦਨ੍ਤੋ ਅਛਮ੍ਭੀਤਕੇਸਰਸੀਹੋ ਵਿਯ ਅਟ੍ਠਙ੍ਗਸਮਨ੍ਨਾਗਤਂ ਬ੍ਰਹ੍ਮਸ੍ਸਰਂ ਨਿਚ੍ਛਾਰੇਨ੍ਤੋ ਅਚਿਨ੍ਤੇਯ੍ਯੇਨ ਬੁਦ੍ਧਾਨੁਭਾਵੇਨ ਅਨੁਪਮਾਯ ਬੁਦ੍ਧਲੀਲਾਯ ਧਮ੍ਮਂ ਦੇਸੇਤੁਂ ਆਰਭਿ.

ਤਸ੍ਮਿਞ੍ਚ ਖਣੇ ਏਕੋ ਮਣ੍ਡੂਕੋ ਪੋਕ੍ਖਰਣਿਤੋ ਆਗਨ੍ਤ੍ਵਾ ‘‘ਧਮ੍ਮੋ ਏਸੋ ਵੁਚ੍ਚਤੀ’’ਤਿ ਧਮ੍ਮਸਞ੍ਞਾਯ ਸਰੇ ਨਿਮਿਤ੍ਤਂ ਗਣ੍ਹਨ੍ਤੋ ਪਰਿਸਪਰਿਯਨ੍ਤੇ ਨਿਪਜ੍ਜਿ. ਅਥੇਕੋ ਵਚ੍ਛਪਾਲੋ ਤਂ ਪਦੇਸਂ ਆਗਤੋ ਸਤ੍ਥਾਰਂ ਧਮ੍ਮਂ ਦੇਸੇਨ੍ਤਂ ਪਰਿਸਞ੍ਚ ਪਰਮੇਨ ਉਪਸਮੇਨ ਧਮ੍ਮਂ ਸੁਣਨ੍ਤਂ ਦਿਸ੍ਵਾ ਤਗ੍ਗਤਮਾਨਸੋ ਦਣ੍ਡਮੋਲੁਬ੍ਭ ਤਿਟ੍ਠਨ੍ਤੋ ਮਣ੍ਡੂਕਂ ਅਨੋਲੋਕੇਤ੍ਵਾ ਤਸ੍ਸ ਸੀਸੇ ਸਨ੍ਨਿਰੁਮ੍ਭਿਤ੍ਵਾ ਅਟ੍ਠਾਸਿ. ਸੋ ਧਮ੍ਮਸਞ੍ਞਾਯ ਪਸਨ੍ਨਚਿਤ੍ਤੋ ਤਾਵਦੇਵ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿਤ੍ਵਾ ¶ ਸੁਤ੍ਤਪ੍ਪਬੁਦ੍ਧੋ ¶ ਵਿਯ ਤਤ੍ਥ ਅਚ੍ਛਰਾਸਙ੍ਘਪਰਿਵੁਤਂ ਅਤ੍ਤਾਨਂ ਦਿਸ੍ਵਾ ‘‘ਕੁਤੋ ਨੁ ਖੋ ਇਧ ਅਹਂ ਨਿਬ੍ਬਤ੍ਤੋ’’ਤਿ ਆਵਜ੍ਜੇਨ੍ਤੋ ਪੁਰਿਮਜਾਤਿਂ ਦਿਸ੍ਵਾ ‘‘ਅਹਮ੍ਪਿ ਨਾਮ ਇਧ ਉਪ੍ਪਜ੍ਜਿਂ, ਈਦਿਸਞ੍ਚ ¶ ਸਮ੍ਪਤ੍ਤਿਂ ਪਟਿਲਭਿਂ, ਕਿਂ ਨੁ ਖੋ ਕਮ੍ਮਂ ਅਕਾਸਿ’’ਨ੍ਤਿ ਉਪਧਾਰੇਨ੍ਤੋ ਅਞ੍ਞਂ ਨ ਅਦ੍ਦਸ ਅਞ੍ਞਤ੍ਰ ਭਗਵਤੋ ਸਰੇ ਨਿਮਿਤ੍ਤਗ੍ਗਾਹਾ. ਸੋ ਤਾਵਦੇਵ ਸਹ ਵਿਮਾਨੇਨ ਆਗਨ੍ਤ੍ਵਾ ਵਿਮਾਨਤੋ ਓਤਰਿਤ੍ਵਾ, ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ਮਹਤਾ ਪਰਿਵਾਰੇਨ ਮਹਨ੍ਤੇਨ ਦਿਬ੍ਬਾਨੁਭਾਵੇਨ ਉਪਸਙ੍ਕਮਿਤ੍ਵਾ, ਭਗਵਤੋ ਪਾਦੇ ਸਿਰਸਾ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨੋ ਅਟ੍ਠਾਸਿ. ਅਥ ਨਂ ਭਗਵਾ ਜਾਨਨ੍ਤੋਵ ਮਹਾਜਨਸ੍ਸ ਕਮ੍ਮਫਲਂ ਬੁਦ੍ਧਾਨੁਭਾਵਞ੍ਚ ਪਚ੍ਚਕ੍ਖਂ ਕਾਤੁਂ –

‘‘ਕੋ ਮੇ ਵਨ੍ਦਤਿ ਪਾਦਾਨਿ, ਇਦ੍ਧਿਯਾ ਯਸਸਾ ਜਲਂ;

ਅਭਿਕ੍ਕਨ੍ਤੇਨ ਵਣ੍ਣੇਨ, ਸਬ੍ਬਾ ਓਭਾਸਯਂ ਦਿਸਾ’’ਤਿ. –

ਪੁਚ੍ਛਿ. ਤਤ੍ਥ ਕੋਤਿ ਦੇਵਨਾਗਯਕ੍ਖਮਨੁਸ੍ਸਾਦੀਸੁ ਕੋ, ਕਤਮੋਤਿ ਅਤ੍ਥੋ. ਮੇਤਿ ਮਮ. ਪਾਦਾਨੀਤਿ ਪਾਦੇ. ਇਦ੍ਧਿਯਾਤਿ ਇਮਾਯ ਈਦਿਸਾਯ ਦੇਵਿਦ੍ਧਿਯਾ. ਯਸਸਾਤਿ ਇਮਿਨਾ ਈਦਿਸੇਨ ਪਰਿਵਾਰੇਨ ਪਰਿਚ੍ਛੇਦੇਨ ਚ. ਜਲਨ੍ਤਿ ਵਿਜ੍ਜੋਤਮਾਨੋ. ਅਭਿਕ੍ਕਨ੍ਤੇਨਾਤਿ ਅਤਿਵਿਯ ਕਨ੍ਤੇਨ ਕਮਨੀਯੇਨ ਸੁਨ੍ਦਰੇਨ. ਵਣ੍ਣੇਨਾਤਿ ਛਵਿਵਣ੍ਣੇਨ, ਸਰੀਰਵਣ੍ਣਨਿਭਾਯਾਤਿ ਅਤ੍ਥੋ.

ਅਥ ਦੇਵਪੁਤ੍ਤੋ ਅਤ੍ਤਨੋ ਪੁਰਿਮਜਾਤਿਆਦਿਂ ਆਵਿ ਕਰੋਨ੍ਤੋ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਮਣ੍ਡੂਕੋਹਂ ਪੁਰੇ ਆਸਿਂ, ਉਦਕੇ ਵਾਰਿਗੋਚਰੋ;

ਤਵ ਧਮ੍ਮਂ ਸੁਣਨ੍ਤਸ੍ਸ, ਅਵਧੀ ਵਚ੍ਛਪਾਲਕੋ.

‘‘ਮੁਹੁਤ੍ਤਂ ਚਿਤ੍ਤਪਸਾਦਸ੍ਸ, ਇਦ੍ਧਿਂ ਪਸ੍ਸ ਯਸਞ੍ਚ ਮੇ;

ਆਨੁਭਾਵਞ੍ਚ ਮੇ ਪਸ੍ਸ, ਵਣ੍ਣਂ ਪਸ੍ਸ ਜੁਤਿਞ੍ਚ ਮੇ.

‘‘ਯੇ ਚ ਤੇ ਦੀਘਮਦ੍ਧਾਨਂ, ਧਮ੍ਮਂ ਅਸ੍ਸੋਸੁਂ ਗੋਤਮ;

ਪਤ੍ਤਾ ਤੇ ਅਚਲਟ੍ਠਾਨਂ, ਯਤ੍ਥ ਗਨ੍ਤ੍ਵਾ ਨ ਸੋਚਰੇ’’ਤਿ.

੮੫੮. ਤਤ੍ਥ ਪੁਰੇਤਿ ਪੁਰਿਮਜਾਤਿਯਂ. ਉਦਕੇਤਿ ਇਦਂ ਤਦਾ ਅਤ੍ਤਨੋ ਉਪ੍ਪਤ੍ਤਿਟ੍ਠਾਨਦਸ੍ਸਨਂ. ਉਦਕੇ ਮਣ੍ਡੂਕੋਤਿ ਏਤੇਨ ਉਦ੍ਧੁਮਾਯਿਕਾਦਿਕਸ੍ਸ ਥਲੇ ¶ ਮਣ੍ਡੂਕਸ੍ਸ ਨਿਵਤ੍ਤਨਂ ਕਤਂ ਹੋਤਿ. ਗਾਵੋ ਚਰਨ੍ਤਿ ਏਤ੍ਥਾਤਿ ਗੋਚਰੋ, ਗੋਚਰੋ ਵਿਯਾਤਿ ਗੋਚਰੋ, ਘਾਸੇਸਨਟ੍ਠਾਨਂ. ਵਾਰਿ ਉਦਕਂ ਗੋਚਰੋ ਏਤਸ੍ਸਾਤਿ ¶ ਵਾਰਿਗੋਚਰੋ ¶ . ਉਦਕਚਾਰੀਪਿ ਹਿ ਕੋਚਿ ਕਚ੍ਛਪਾਦਿ ਅਵਾਰਿਗੋਚਰੋਪਿ ਹੋਤੀਤਿ ‘‘ਵਾਰਿਗੋਚਰੋ’’ਤਿ ਵਿਸੇਸੇਤ੍ਵਾ ਵੁਤ੍ਤਂ. ਤਵ ਧਮ੍ਮਂ ਸੁਣਨ੍ਤਸ੍ਸਾਤਿ ਬ੍ਰਹ੍ਮਸ੍ਸਰੇਨ ਕਰਵੀਕਰੁਤਮਞ੍ਜੁਨਾ ਦੇਸੇਨ੍ਤਸ੍ਸ ਤਵ ਧਮ੍ਮਂ ‘‘ਧਮ੍ਮੋ ਏਸੋ ਵੁਚ੍ਚਤੀ’’ਤਿ ਸਰੇ ਨਿਮਿਤ੍ਤਗ੍ਗਾਹਵਸੇਨ ਸੁਣਨ੍ਤਸ੍ਸ, ਅਨਾਦਰੇ ਚੇਤਂ ਸਾਮਿਵਚਨਂ ਵੇਦਿਤਬ੍ਬਂ. ਅਵਧੀ ਵਚ੍ਛਪਾਲਕੋਤਿ ਵਚ੍ਛੇ ਰਕ੍ਖਨ੍ਤੋ ਗੋਪਾਲਦਾਰਕੋ ਮਮ ਸਮੀਪਂ ਆਗਨ੍ਤ੍ਵਾ ਦਣ੍ਡਮੋਲੁਬ੍ਭਿਤ੍ਵਾ ਤਿਟ੍ਠਨ੍ਤੋ ਮਮ ਸੀਸੇ ਦਣ੍ਡਂ ਸਨ੍ਨਿਰੁਮ੍ਭਿਤ੍ਵਾ ਮਂ ਮਾਰੇਸਿ.

੮੫੯. ਮੁਹੁਤ੍ਤਂ ਚਿਤ੍ਤਪਸਾਦਸ੍ਸਾਤਿ ਤਵ ਧਮ੍ਮੇ ਮੁਹੁਤ੍ਤਮਤ੍ਤਂ ਉਪ੍ਪਨ੍ਨਸ੍ਸ ਚਿਤ੍ਤਪਸਾਦਸ੍ਸ ਹੇਤੁਭੂਤਸ੍ਸ ਇਦ੍ਧਿਨ੍ਤਿ ਸਮਿਦ੍ਧਿਂ, ਦਿਬ੍ਬਵਿਭੂਤਿਨ੍ਤਿ ਅਤ੍ਥੋ. ਯਸਨ੍ਤਿ ਪਰਿਵਾਰਂ. ਆਨੁਭਾਵਨ੍ਤਿ ਕਾਮਵਣ੍ਣਿਤਾਦਿਦਿਬ੍ਬਾਨੁਭਾਵਂ. ਵਣ੍ਣਨ੍ਤਿ ਸਰੀਰਵਣ੍ਣਸਮ੍ਪਤ੍ਤਿਂ. ਜੁਤਿਨ੍ਤਿ ਦ੍ਵਾਦਸਯੋਜਨਾਨਿ ਫਰਣਸਮਤ੍ਥਂ ਪਭਾਵਿਸੇਸਂ.

੮੬੦. ਯੇਤਿ ਯੇ ਸਤ੍ਤਾ. ਚ-ਸਦ੍ਦੋ ਬ੍ਯਤਿਰੇਕੇ. ਤੇਤਿ ਤਵ. ਦੀਘਮਦ੍ਧਾਨਨ੍ਤਿ ਬਹੁਵੇਲਂ. ਅਸ੍ਸੋਸੁਨ੍ਤਿ ਸੁਣਿਂਸੁ. ਗੋਤਮਾਤਿ ਭਗਵਨ੍ਤਂ ਗੋਤ੍ਤੇਨ ਆਲਪਤਿ. ਅਚਲਟ੍ਠਾਨਨ੍ਤਿ ਨਿਬ੍ਬਾਨਂ. ਅਯਞ੍ਹੇਤ੍ਥ ਅਤ੍ਥੋ – ਗੋਤਮ ਭਗਵਾ ਅਹਂ ਵਿਯ ਇਤ੍ਤਰਮੇਵ ਕਾਲਂ ਅਸੁਣਿਤ੍ਵਾ ਯੇ ਪਨ ਕਤਪੁਞ੍ਞਾ ਚਿਰਂ ਕਾਲਂ ਤਵ ਧਮ੍ਮਂ ਅਸ੍ਸੋਸੁਂ ਸੋਤੁਂ ਲਭਿਂਸੁ, ਤੇ ਦੀਘਰਤ੍ਤਂ ਸਂਸਾਰਬ੍ਯਸਨਾਭਿਭੂਤਾ ਇਮੇ ਸਤ੍ਤਾ ਯਤ੍ਥ ਗਨ੍ਤ੍ਵਾ ਨ ਸੋਚੇਯ੍ਯੁਂ, ਤਂ ਅਸੋਕਂ ਸਸ੍ਸਤਭਾਵੇਨ ਅਚਲਂ ਸਨ੍ਤਿਪਦਂ ਪਤ੍ਤਾ ਏਵ, ਨ ਤੇਸਂ ਤਸ੍ਸ ਪਤ੍ਤਿਯਾ ਅਨ੍ਤਰਾਯੋਤਿ.

ਅਥਸ੍ਸ ਭਗਵਾ ਸਮ੍ਪਤ੍ਤਪਰਿਸਾਯ ਚ ਉਪਨਿਸ੍ਸਯਸਮ੍ਪਤ੍ਤਿਂ ਓਲੋਕੇਤ੍ਵਾ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਸੋ ਦੇਵਪੁਤ੍ਤੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ, ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਦੇਵਪੁਤ੍ਤੋ ਭਗਵਨ੍ਤਂ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਭਿਕ੍ਖੁਸਙ੍ਘਸ੍ਸ ਚ ਅਞ੍ਜਲਿਂ ਕਤ੍ਵਾ ਸਹ ਪਰਿਵਾਰੇਨ ਦੇਵਲੋਕਮੇਵ ਗਤੋਤਿ.

ਮਣ੍ਡੂਕਦੇਵਪੁਤ੍ਤਵਿਮਾਨਵਣ੍ਣਨਾ ਨਿਟ੍ਠਿਤਾ.

ਉਟ੍ਠੇਹਿ ¶ ¶ ਰੇਵਤੇ ਸੁਪਾਪਧਮ੍ਮੇਤਿ ਰੇਵਤੀਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਬਾਰਾਣਸਿਯਂ ਵਿਹਰਤਿ ਇਸਿਪਤਨੇ ਮਿਗਦਾਯੇ. ਤੇਨ ਸਮਯੇਨ ਬਾਰਾਣਸਿਯਂ ਸਦ੍ਧਾਸਮ੍ਪਨ੍ਨਸ੍ਸ ਕੁਲਸ੍ਸ ਪੁਤ੍ਤੋ ਨਨ੍ਦਿਯੋ ਨਾਮ ਉਪਾਸਕੋ ਅਹੋਸਿ ਸਦ੍ਧਾਸਮ੍ਪਨ੍ਨੋ ਦਾਯਕੋ ਦਾਨਪਤਿ ਸਙ੍ਘੁਪਟ੍ਠਾਕੋ. ਅਥਸ੍ਸ ਮਾਤਾਪਿਤਰੋ ¶ ਸਮ੍ਮੁਖਗੇਹਤੋ ਮਾਤੁਲਧੀਤਰਂ ਰੇਵਤਿਂ ਨਾਮ ਕਞ੍ਞਂ ਆਨੇਤੁਕਾਮਾ ਅਹੇਸੁਂ. ਸਾ ਪਨ ਅਸ੍ਸਦ੍ਧਾ ਅਦਾਨਸੀਲਾ, ਨਨ੍ਦਿਯੋ ਤਂ ਨ ਇਚ੍ਛਿ. ਤਸ੍ਸ ਮਾਤਾ ਰੇਵਤਿਂ ਆਹ ‘‘ਅਮ੍ਮ, ਤ੍ਵਂ ਇਮਂ ਗੇਹਂ ਆਗਨ੍ਤ੍ਵਾ ਭਿਕ੍ਖੁਸਙ੍ਘਸ੍ਸ ਨਿਸੀਦਨਟ੍ਠਾਨਂ ਹਰਿਤੇਨ ਗੋਮਯੇਨ ਉਪਲਿਮ੍ਪਿਤ੍ਵਾ ਆਸਨਾਨਿ ਪਞ੍ਞਾਪੇਹਿ, ਆਧਾਰਕੇ ਠਪੇਹਿ, ਭਿਕ੍ਖੂਨਂ ਆਗਤਕਾਲੇ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ਨਿਸੀਦਾਪੇਤ੍ਵਾ ਧਮਕਰਣੇਨ ਪਾਨੀਯਂ ਪਰਿਸ੍ਸਾਵੇਤ੍ਵਾ ਭੁਤ੍ਤਕਾਲੇ ਪਤ੍ਤਾਨਿ ਧੋਵਾਹਿ, ਏਵਂ ਮੇ ਪੁਤ੍ਤਸ੍ਸ ਆਰਾਧਿਕਾ ਭਵਿਸ੍ਸਸੀ’’ਤਿ. ਸਾ ਤਥਾ ਅਕਾਸਿ. ਅਥ ਨਂ ‘‘ਓਵਾਦਕ੍ਖਮਾ ਜਾਤਾ’’ਤਿ ਪੁਤ੍ਤਸ੍ਸ ਆਰੋਚੇਤ੍ਵਾ ਤੇਨ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤੇ ਦਿਵਸਂ ਠਪੇਤ੍ਵਾ ਆਵਾਹਂ ਕਰਿਂਸੁ.

ਅਥ ਨਂ ਨਨ੍ਦਿਯੋ ਆਹ ‘‘ਸਚੇ ਭਿਕ੍ਖੁਸਙ੍ਘਂ ਮਾਤਾਪਿਤਰੋ ਚ ਮੇ ਉਪਟ੍ਠਹਿਸ੍ਸਸਿ, ਏਵਂ ਇਮਸ੍ਮਿਂ ਗੇਹੇ ਵਸਿਤੁਂ ਲਭਿਸ੍ਸਸਿ, ਅਪ੍ਪਮਤ੍ਤਾ ਹੋਹੀ’’ਤਿ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਕਿਞ੍ਚਿ ਕਾਲਂ ਸਦ੍ਧਾ ਵਿਯ ਹੁਤ੍ਵਾ ਭਤ੍ਤਾਰਂ ਅਨਵਤ੍ਤੇਨ੍ਤੀ ਦ੍ਵੇ ਪੁਤ੍ਤੇ ਵਿਜਾਯਿ. ਨਨ੍ਦਿਯਸ੍ਸ ਮਾਤਾਪਿਤਰੋ ਕਾਲਮਕਂਸੁ. ਗੇਹੇ ਸਬ੍ਬਿਸ੍ਸਰਿਯਂ ਤਸ੍ਸਾ ਏਵ ਅਹੋਸਿ. ਨਨ੍ਦਿਯੋਪਿ ਮਹਾਦਾਨਪਤਿ ਹੁਤ੍ਵਾ ਭਿਕ੍ਖੁਸਙ੍ਘਸ੍ਸ ਦਾਨਂ ਪਟ੍ਠਪੇਸਿ, ਕਪਣਦ੍ਧਿਕਾਦੀਨਮ੍ਪਿ ਗੇਹਦ੍ਵਾਰੇ ਪਾਕਵਤ੍ਤਂ ਪਟ੍ਠਪੇਸਿ. ਇਸਿਪਤਨਮਹਾਵਿਹਾਰੇ ਚਤੂਹਿ ਗਬ੍ਭੇਹਿ ਪਟਿਮਣ੍ਡਿਤਂ ਚਤੁਸਾਲਂ ਕਾਰੇਤ੍ਵਾ ਮਞ੍ਚਪੀਠਾਦੀਨਿ ਅਤ੍ਥਰਾਪੇਤ੍ਵਾ ¶ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਤਥਾਗਤਸ੍ਸ ਹਤ੍ਥੇ ਦਕ੍ਖਿਣੋਦਕਂ ਪਾਤੇਤ੍ਵਾ ਨਿਯ੍ਯਾਦੇਸਿ, ਸਹ ਦਕ੍ਖਿਣੋਦਕਦਾਨੇਨ ਤਾਵਤਿਂਸਭਵਨੇ ਆਯਾਮਤੋ ਚ ਵਿਤ੍ਥਾਰਤੋ ਚ ਸਮਨ੍ਤਾ ਦ੍ਵਾਦਸਯੋਜਨਿਕੋ ਯੋਜਨਸਤੁਬ੍ਬੇਧੋ ਸਤ੍ਤਰਤਨਮਯੋ ਅਚ੍ਛਰਾਗਣਸਹਸ੍ਸਸਙ੍ਘੁਟ੍ਠੋ ਦਿਬ੍ਬਪਾਸਾਦੋ ਉਗ੍ਗਞ੍ਛਿ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਤਂ ਪਾਸਾਦਂ ਦਿਸ੍ਵਾ ਅਤ੍ਤਾਨਂ ਵਨ੍ਦਿਤੁਂ ਆਗਤੇ ਦੇਵਪੁਤ੍ਤੇ ਪੁਚ੍ਛਿ ‘‘ਕਸ੍ਸਾਯਂ ਪਾਸਾਦੋ’’ਤਿ? ‘‘ਇਮਸ੍ਸ ¶ , ਭਨ੍ਤੇ, ਪਾਸਾਦਸ੍ਸ ਸਾਮਿਕੋ ਮਨੁਸ੍ਸਲੋਕੇ ਬਾਰਾਣਸਿਯਂ ਨਨ੍ਦਿਯੋ ਨਾਮ ਕੁਟੁਮ੍ਬਿਯਪੁਤ੍ਤੋ ਸਙ੍ਘਸ੍ਸ ਇਸਿਪਤਨਮਹਾਵਿਹਾਰੇ ਚਤੁਸਾਲਂ ਕਾਰੇਸਿ, ਤਸ੍ਸਾਯਂ ਨਿਬ੍ਬਤ੍ਤੋ ਪਾਸਾਦੋ’’ਤਿ ਆਹਂਸੁ. ਪਾਸਾਦੇ ਨਿਬ੍ਬਤ੍ਤਦੇਵਚ੍ਛਰਾਯੋਪਿ ਥੇਰਂ ਵਨ੍ਦਿਤ੍ਵਾ ‘‘ਭਨ੍ਤੇ, ਮਯਂ ਬਾਰਾਣਸਿਯਂ ਨਨ੍ਦਿਯਸ੍ਸ ਨਾਮ ਉਪਾਸਕਸ੍ਸ ਪਰਿਚਾਰਿਕਾ ਭਵਿਤੁਂ ਇਧ ਨਿਬ੍ਬਤ੍ਤਾ, ਤਸ੍ਸ ਏਵਂ ਵਦੇਥ ‘‘ਤੁਯ੍ਹਂ ਪਰਿਚਾਰਿਕਾ ਭਵਿਤੁਂ ਨਿਬ੍ਬਤ੍ਤਾ, ਦੇਵਤਾਯੋ ਤਯਿ ਚਿਰਾਯਨ੍ਤੇ ਉਕ੍ਕਣ੍ਠਿਤਾ, ਦੇਵਲੋਕਸਮ੍ਪਤ੍ਤਿ ਨਾਮ ਮਤ੍ਤਿਕਾਭਾਜਨਂ ਭਿਨ੍ਦਿਤ੍ਵਾ ਸੁਵਣ੍ਣਭਾਜਨਸ੍ਸ ਗਹਣਂ ਵਿਯ ਅਤਿਮਨਾਪ’ਨ੍ਤਿ ਵਤ੍ਵਾ ਇਧਾਗਮਨਤ੍ਥਾਯ ਤਸ੍ਸ ਵਦੇਥਾ’’ਤਿ ਆਹਂਸੁ. ਥੇਰੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਸਹਸਾ ਦੇਵਲੋਕਤੋ ਆਗਨ੍ਤ੍ਵਾ ਚਤੁਪਰਿਸਮਜ੍ਝੇ ਭਗਵਨ੍ਤਂ ਪੁਚ੍ਛਿ ‘‘ਨਿਬ੍ਬਤ੍ਤਤਿ ਨੁ ਖੋ, ਭਨ੍ਤੇ, ਕਤਪੁਞ੍ਞਾਨਂ ਮਨੁਸ੍ਸਲੋਕੇ ਠਿਤਾਨਂਯੇਵ ਦਿਬ੍ਬਸਮ੍ਪਤ੍ਤੀ’’ਤਿ? ‘‘ਨਨੁ ਤੇ, ਮੋਗ੍ਗਲ੍ਲਾਨ, ਨਨ੍ਦਿਯਸ੍ਸ ਦੇਵਲੋਕੇ ਨਿਬ੍ਬਤ੍ਤਾ ਦਿਬ੍ਬਸਮ੍ਪਤ੍ਤਿ ਸਾਮਂ ਦਿਟ੍ਠਾ, ਕਸ੍ਮਾ ਮਂ ਪੁਚ੍ਛਸੀ’’ਤਿ? ‘‘ਏਵਂ, ਭਨ੍ਤੇ, ਨਿਬ੍ਬਤ੍ਤਤੀ’’ਤਿ ¶ . ਅਥਸ੍ਸ ਸਤ੍ਥਾ ‘‘ਯਥਾ ਚਿਰਂ ਵਿਪ੍ਪਵਸਿਤ੍ਵਾ ਆਗਤਂ ਪੁਰਿਸਂ ਮਿਤ੍ਤਬਨ੍ਧਵਾ ਅਭਿਨਨ੍ਦਨ੍ਤਿ ਸਮ੍ਪਟਿਚ੍ਛਨ੍ਤਿ, ਏਵਂ ਕਤਪੁਞ੍ਞਂ ਪੁਗ੍ਗਲਂ ਇਤੋ ਪਰਲੋਕਂ ਗਤਂ ਸਕਾਨਿ ਪੁਞ੍ਞਾਨਿ ਸਮ੍ਪਤ੍ਤਿਹਤ੍ਥੇਹਿ ਸਮ੍ਪਟਿਚ੍ਛਨ੍ਤਿ ਪਟਿਗ੍ਗਣ੍ਹਨ੍ਤੀ’’ਤਿ ਦਸ੍ਸੇਨ੍ਤੋ –

‘‘ਚਿਰਪ੍ਪਵਾਸਿਂ ਪੁਰਿਸਂ, ਦੂਰਤੋ ਸੋਤ੍ਥਿਮਾਗਤਂ;

ਞਾਤਿਮਿਤ੍ਤਾ ਸੁਹਜ੍ਜਾ ਚ, ਅਭਿਨਨ੍ਦਨ੍ਤਿ ਆਗਤਂ.

‘‘ਤਥੇਵ ਕਤਪੁਞ੍ਞਮ੍ਪਿ, ਅਸ੍ਮਾ ਲੋਕਾ ਪਰਂ ਗਤਂ;

ਪੁਞ੍ਞਾਨਿ ਪਟਿਗ੍ਗਣ੍ਹਨ੍ਤਿ, ਪਿਯਂ ਞਾਤੀਵ ਆਗਤ’’ਨ੍ਤਿ. – ਗਾਥਾ ਅਭਾਸਿ;

ਨਨ੍ਦਿਯੋ ¶ ਤਂ ਸੁਤ੍ਵਾ ਭਿਯ੍ਯੋਸੋਮਤ੍ਤਾਯ ਦਾਨਾਨਿ ਦੇਤਿ, ਪੁਞ੍ਞਾਨਿ ਕਰੋਤਿ, ਸੋ ਵਣਿਜ੍ਜਾਯ ਗਚ੍ਛਨ੍ਤੋ ਰੇਵਤਿਂ ਆਹ ‘‘ਭਦ੍ਦੇ, ਮਯਾ ਪਟ੍ਠਪਿਤਂ ਸਙ੍ਘਸ੍ਸ ਦਾਨਂ ਅਨਾਥਾਨਂ ਪਾਕਵਤ੍ਤਞ੍ਚ ਤ੍ਵਂ ਅਪ੍ਪਮਤ੍ਤਾ ਪਵਤ੍ਤੇਯ੍ਯਾਸੀ’’ਤਿ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿ. ਸੋ ਪਵਾਸਗਤੋਪਿ ਯਤ੍ਥ ਯਤ੍ਥ ਵਾਸਂ ਕਪ੍ਪੇਤਿ, ਤਤ੍ਥ ਤਤ੍ਥ ਭਿਕ੍ਖੂਨਂ ਅਨਾਥਾਨਞ੍ਚ ਯਥਾਵਿਭਵਂ ਦਾਨਂ ਦੇਤਿਯੇਵ. ਤਸ੍ਸ ਅਨੁਕਮ੍ਪਾਯ ਖੀਣਾਸਵਾ ਦੂਰਤੋਪਿ ਆਗਨ੍ਤ੍ਵਾ ਦਾਨਂ ਸਮ੍ਪਟਿਚ੍ਛਨ੍ਤਿ. ਰੇਵਤੀ ਪਨ ਤਸ੍ਮਿਂ ਗਤੇ ਕਤਿਪਾਹਮੇਵ ਦਾਨਂ ਪਵਤ੍ਤੇਤ੍ਵਾ ਅਨਾਥਾਨਂ ਭਤ੍ਤਂ ਉਪਚ੍ਛਿਨ੍ਦਿ, ਭਿਕ੍ਖੂਨਮ੍ਪਿ ਭਤ੍ਤਂ ਕਣਾਜਕਂ ਬਿਲਙ੍ਗਦੁਤਿਯਂ ਅਦਾਸਿ ¶ . ਭਿਕ੍ਖੂਨਂ ਭੁਤ੍ਤਟ੍ਠਾਨੇ ਅਤ੍ਤਨਾ ਭੁਤ੍ਤਾਵਸੇਸਾਨਿ ਸਿਤ੍ਥਾਨਿ ਮਚ੍ਛਮਂਸਖਣ੍ਡਮਿਸ੍ਸਕਾਨਿ ਚਲਕਟ੍ਠਿਕਾਨਿ ਚ ਪਕਿਰਿਤ੍ਵਾ ਮਨੁਸ੍ਸਾਨਂ ਦਸ੍ਸੇਤਿ ‘‘ਪਸ੍ਸਥ ਸਮਣਾਨਂ ਕਮ੍ਮਂ, ਸਦ੍ਧਾਦੇਯ੍ਯਂ ਨਾਮ ਏਵਂ ਛਡ੍ਡੇਨ੍ਤੀ’’ਤਿ.

ਅਥ ਨਨ੍ਦਿਯੋ ਵੋਹਾਰਕਸਿਦ੍ਧਿ ਯਥਾਲਾਭੋ ਆਗਨ੍ਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ ਰੇਵਤਿਂ ਗੇਹਤੋ ਨੀਹਰਿਤ੍ਵਾ ਗੇਹਂ ਪਾਵਿਸਿ. ਦੁਤਿਯਦਿਵਸੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਪਵਤ੍ਤੇਤ੍ਵਾ ਨਿਚ੍ਚਭਤ੍ਤਂ ਅਨਾਥਭਤ੍ਤਞ੍ਚ ਸਮ੍ਮਦੇਵ ਪਵਤ੍ਤੇਸਿ, ਅਤ੍ਤਨੋ ਸਹਾਯੇਹਿ ਉਪਨੀਤਂ ਰੇਵਤਿਂ ਘਾਸਚ੍ਛਾਦਨਪਰਮਤਾਯ ਠਪੇਸਿ. ਸੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਅਤ੍ਤਨੋ ਵਿਮਾਨੇਯੇਵ ਨਿਬ੍ਬਤ੍ਤਿ. ਰੇਵਤੀ ਪਨ ਸਬ੍ਬਂ ਦਾਨਂ ਪਚ੍ਛਿਨ੍ਦਿਤ੍ਵਾ ‘‘ਇਮੇਸਂ ਵਸੇਨ ਮਯ੍ਹਂ ਲਾਭਸਕ੍ਕਾਰੋ ਪਰਿਹਾਯੀ’’ਤਿ ਭਿਕ੍ਖੁਸਙ੍ਘਂ ਅਕ੍ਕੋਸਨ੍ਤੀ ਪਰਿਭਾਸਨ੍ਤੀ ਵਿਚਰਤਿ. ਅਥ ਵੇਸ੍ਸਵਣੋ ਦ੍ਵੇ ਯਕ੍ਖੇ ਆਣਾਪੇਸਿ ‘‘ਗਚ੍ਛਥ, ਭਣੇ, ਬਾਰਾਣਸਿਨਗਰੇ ਉਗ੍ਘੋਸਥ ‘‘ਇਤੋ ਸਤ੍ਤਮੇ ਦਿਵਸੇ ਰੇਵਤੀ ਜੀਵਨ੍ਤੀਯੇਵ ਨਿਰਯੇ ਪਕ੍ਖਿਪੀਯਤੀ’ਤਿ’’. ਤਂ ਸੁਤ੍ਵਾ ਮਹਾਜਨੋ ਸਂਵੇਗਜਾਤੋ ਭੀਤਤਸਿਤੋ ਅਹੋਸਿ.

ਅਥ ¶ ਰੇਵਤੀ ਪਨ ਪਾਸਾਦਂ ਅਭਿਰੁਹਿਤ੍ਵਾ ਦ੍ਵਾਰਂ ਥਕੇਤ੍ਵਾ ਨਿਸੀਦਿ. ਸਤ੍ਤਮੇ ਦਿਵਸੇ ਤਸ੍ਸਾ ਪਾਪਕਮ੍ਮਸਞ੍ਚੋਦਿਤੇਨ ਵੇਸ੍ਸਵਣੇਨ ਰਞ੍ਞਾ ਆਣਤ੍ਤਾ ਜਲਿਤਕਪਿਲਕੇਸਮਸ੍ਸੁਕਾ ਚਿਪਿਟਵਿਰੂਪਨਾਸਿਕਾ ਪਰਿਣਤਦਾਠਾ ਲੋਹਿਤਕ੍ਖਾ ਸਜਲਧਰਸਮਾਨਵਣ੍ਣਾ ¶ ਅਤਿਵਿਯ ਭਯਾਨਕਰੂਪਾ ਦ੍ਵੇ ਯਕ੍ਖਾ ਉਪਗਨ੍ਤ੍ਵਾ ‘‘ਉਟ੍ਠੇਹਿ, ਰੇਵਤੇ, ਸੁਪਾਪਧਮ੍ਮੇ’’ਤਿਆਦੀਨਿ ਵਦਨ੍ਤਾ ਨਾਨਾਬਾਹਾਸੁ ਗਹੇਤ੍ਵਾ ‘‘ਮਹਾਜਨੋ ਪਸ੍ਸਤੂ’’ਤਿ ਸਕਲਨਗਰੇ ਵੀਥਿਤੋ ਵੀਥਿਂ ਪਰਿਬ੍ਭਮਾਪੇਤ੍ਵਾ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਤਾਵਤਿਂਸਭਵਨਂ ਨੇਤ੍ਵਾ ਨਨ੍ਦਿਯਸ੍ਸ ਵਿਮਾਨਂ ਸਮ੍ਪਤ੍ਤਿਞ੍ਚਸ੍ਸਾ ਦਸ੍ਸੇਤ੍ਵਾ ਤਂ ਵਿਲਪਨ੍ਤਿਂਯੇਵ ਉਸ੍ਸਦਨਿਰਯਸਮੀਪਂ ਪਾਪੇਸੁਂ. ਤਂ ਯਮਪੁਰਿਸਾ ਉਸ੍ਸਦਨਿਰਯੇ ਖਿਪਿਂਸੁ. ਤੇਨਾਹ –

‘‘ਉਟ੍ਠੇਹਿ ਰੇਵਤੇ ਸੁਪਾਪਧਮ੍ਮੇ, ਅਪਾਰੁਤਦ੍ਵਾਰੇ ਅਦਾਨਸੀਲੇ;

ਨੇਸ੍ਸਾਮ ਤਂ ਯਤ੍ਥ ਥੁਨਨ੍ਤਿ ਦੁਗ੍ਗਤਾ, ਸਮਪ੍ਪਿਤਾ ਨੇਰਯਿਕਾ ਦੁਖੇਨਾ’’ਤਿ.

ਤਤ੍ਥ ¶ ਉਟ੍ਠੇਹੀਤਿ ਉਟ੍ਠਹ, ਨ ਦਾਨੇਸ ਪਾਸਾਦੋ ਤਂ ਨਿਰਯਭਯਤੋ ਰਕ੍ਖਿਤੁਂ ਸਕ੍ਕੋਤਿ, ਤਸ੍ਮਾ ਸੀਘਂ ਉਟ੍ਠਹਿਤ੍ਵਾ ਆਗਚ੍ਛਾਹੀਤਿ ਅਤ੍ਥੋ. ਰੇਵਤੇਤਿ ਤਂ ਨਾਮੇਨ ਆਲਪਤਿ. ਸੁਪਾਪਧਮ੍ਮੇਤਿਆਦਿਨਾ ਉਟ੍ਠਾਨਸ੍ਸ ਕਾਰਣਂ ਵਦਤਿ. ਯਸ੍ਮਾ ਤ੍ਵਂ ਅਰਿਯਾਨਂ ਅਕ੍ਕੋਸਨਪਰਿਭਾਸਨਾਦਿਨਾ ਸੁਟ੍ਟੁ ਲਾਮਕਪਾਪਧਮ੍ਮਾ, ਯਸ੍ਮਾ ਚ ਅਪਾਰੁਤਂ ਦ੍ਵਾਰਂ ਨਿਰਯਸ੍ਸ ਤਵ ਪਵੇਸਨਤ੍ਥਂ, ਤਸ੍ਮਾ ਉਟ੍ਠੇਹੀਤਿ. ਅਦਾਨਸੀਲੇਤਿ ਕਸ੍ਸਚਿ ਕਿਞ੍ਚਿ ਨ ਦਾਨਸੀਲੇ ਕਦਰਿਯੇ ਮਚ੍ਛਰਿਨੀ, ਇਦਮ੍ਪਿ ਉਟ੍ਠਾਨਸ੍ਸੇਵ ਕਾਰਣਵਚਨਂ. ਯਸ੍ਮਾ ਦਾਨਸੀਲਾਨਂ ਅਮਚ੍ਛਰੀਨਂ ਤਵ ਸਾਮਿਕਸਦਿਸਾਨਂ ਸੁਗਤਿਯਂ ਨਿਵਾਸੋ, ਤਾਦਿਸਾਨਂ ਪਨ ਅਦਾਨਸੀਲਾਨਂ ਮਚ੍ਛਰੀਨਂ ਨਿਰਯੇ ਨਿਵਾਸੋ, ਤਸ੍ਮਾ ਉਟ੍ਠੇਹਿ, ਮੁਹੁਤ੍ਤਮਤ੍ਤਮ੍ਪਿ ਤਵ ਇਧ ਠਾਤੁਂ ਨ ਦਸ੍ਸਾਮੀਤਿ ਅਧਿਪ੍ਪਾਯੋ. ਯਤ੍ਥ ਥੁਨਨ੍ਤਿ ਦੁਗ੍ਗਤਾਤਿ ਦੁਕ੍ਖਗਤਤ੍ਤਾ ਦੁਗ੍ਗਤਾ. ਨੇਰਯਿਕਾਤਿ ਨਿਰਯਦੁਕ੍ਖੇਨ ਸਮਪ੍ਪਿਤਾ ਸਮਙ੍ਗੀਭੂਤਾ ਯਸ੍ਮਿਂ ਨਿਰਯੇ ਥੁਨਨ੍ਤਿ, ਯਾਵ ਪਾਪਕਮ੍ਮਂ ਨ ਬ੍ਯਨ੍ਤਿ ਹੋਤਿ, ਤਾਵ ਨਿਕ੍ਖਮਿਤੁਂ ਅਲਭਨ੍ਤਾ ¶ ਨਿਤ੍ਥੁਨਨ੍ਤਿ, ਤਤ੍ਥ ਤਂ ਨੇਸ੍ਸਾਮ ਨਯਿਸ੍ਸਾਮ ਖਿਪਿਸ੍ਸਾਮਾਤਿ ਯੋਜਨਾ.

‘‘ਇਚ੍ਚੇਵ ਵਤ੍ਵਾਨ ਯਮਸ੍ਸ ਦੂਤਾ, ਤੇ ਦ੍ਵੇ ਯਕ੍ਖਾ ਲੋਹਿਤਕ੍ਖਾ ਬ੍ਰਹਨ੍ਤਾ;

ਪਚ੍ਚੇਕਬਾਹਾਸੁ ਗਹੇਤ੍ਵਾ ਰੇਵਤਂ, ਪਕ੍ਕਾਮਯੁਂ ਦੇਵਗਣਸ੍ਸ ਸਨ੍ਤਿਕੇ’’ਤਿ. –

ਤਤ੍ਥ ਇਚ੍ਚੇਵ ਵਤ੍ਵਾਨਾਤਿ ਇਤਿ ਏਵ ‘‘ਉਟ੍ਠੇਹੀ’’ਤਿਆਦਿਨਾ ਵਤ੍ਵਾ, ਵਚਨਸਮਨਨ੍ਤਰਮੇਵਾਤਿ ਅਤ੍ਥੋ. ਯਮਸ੍ਸ ਦੂਤਾਤਿ ਅਪ੍ਪਟਿਸੇਧਨਿਯਤਸ੍ਸ ਯਮਸ੍ਸ ਰਞ੍ਞੋ ਦੂਤਸਦਿਸਾ. ਵੇਸ੍ਸਵਣੇਨ ਹਿ ਤੇ ਪੇਸਿਤਾ ¶ . ਤਥਾ ਹਿ ਤੇ ਤਾਵਤਿਂਸਭਵਨਂ ਨਯਿਂਸੁ. ਕੇਚਿ ‘‘ਨ ਯਮਸ੍ਸ ਦੂਤਾ’’ਤਿ ਨ-ਕਾਰਂ ‘‘ਯਮਸ੍ਸਾ’’ਤਿ ਪਦੇਨ ਸਮ੍ਬਨ੍ਧਿਤ੍ਵਾ ‘‘ਵੇਸ੍ਸਵਣਸ੍ਸ ਦੂਤਾ’’ਤਿ ਅਤ੍ਥਂ ਵਦਨ੍ਤਿ, ਤਂ ਨ ਯੁਜ੍ਜਤਿ. ਨ ਹਿ ਨ ਯਮਦੂਤਤਾਯ ਵੇਸ੍ਸਵਣਸ੍ਸ ਦੂਤਾਤਿ ਸਿਜ੍ਝਤਿ. ਯਜਨ੍ਤਿ ਤਤ੍ਥ ਬਲਿਂ ਉਪਹਰਨ੍ਤੀਤਿ ਯਕ੍ਖਾ. ਲੋਹਿਤਕ੍ਖਾਤਿ ਰਤ੍ਤਨਯਨਾ. ਯਕ੍ਖਾਨਞ੍ਹਿ ਨੇਤ੍ਤਾਨਿ ਅਤਿਲੋਹਿਤਾਨਿ ਹੋਨ੍ਤਿ. ਬ੍ਰਹਨ੍ਤਾਤਿ ਮਹਨ੍ਤਾ. ਪਚ੍ਚੇਕਬਾਹਾਸੂਤਿ ਏਕੋ ਏਕਬਾਹਾਯਂ, ਇਤਰੋ ਇਤਰਬਾਹਾਯਨ੍ਤਿ ਪਚ੍ਚੇਕਂ ਬਾਹਾਸੁ. ਰੇਵਤਨ੍ਤਿ ਰੇਵਤਿਂ. ਰੇਵਤਾਤਿਪਿ ਤਸ੍ਸਾ ਨਾਮਮੇਵ. ਤਥਾ ਹਿ ‘‘ਰੇਵਤੇ’’ਤਿ ¶ ਵੁਤ੍ਤਂ. ਪਕ੍ਕਾਮਯੁਨ੍ਤਿ ਪਕ੍ਕਾਮੇਸੁਂ, ਉਪਨੇਸੁਨ੍ਤਿ ਅਤ੍ਥੋ. ਦੇਵਗਣਸ੍ਸਾਤਿ ਤਾਵਤਿਂਸਭਵਨੇ ਦੇਵਸਙ੍ਘਸ੍ਸ.

ਏਵਂ ਤੇਹਿ ਯਕ੍ਖੇਹਿ ਤਾਵਤਿਂਸਭਵਨਂ ਨੇਤ੍ਵਾ ਨਨ੍ਦਿਯਵਿਮਾਨਸ੍ਸ ਅਵਿਦੂਰੇ ਠਪਿਤਾ ਰੇਵਤੀ ਤਂ ਸੂਰਿਯਮਣ੍ਡਲਸਦਿਸਂ ਅਤਿਵਿਯ ਪਭਸ੍ਸਰਂ ਦਿਸ੍ਵਾ –

‘‘ਆਦਿਚ੍ਚਵਣ੍ਣਂ ਰੁਚਿਰਂ ਪਭਸ੍ਸਰਂ, ਬ੍ਯਮ੍ਹਂ ਸੁਭਂ ਕਞ੍ਚਨਜਾਲਛਨ੍ਨਂ;

ਕਸ੍ਸੇਤਮਾਕਿਣ੍ਣਜਨਂ ¶ ਵਿਮਾਨਂ, ਸੁਰਿਯਸ੍ਸ ਰਂਸੀਰਿਵ ਜੋਤਮਾਨਂ.

‘‘ਨਾਰੀਗਣਾ ਚਨ੍ਦਨਸਾਰਲਿਤ੍ਤਾ, ਉਭਤੋ ਵਿਮਾਨਂ ਉਪਸੋਭਯਨ੍ਤਿ;

ਤਂ ਦਿਸ੍ਸਤਿ ਸੁਰਿਯਸਮਾਨਵਣ੍ਣਂ, ਕੋ ਮੋਦਤਿ ਸਗ੍ਗਪਤ੍ਤੋ ਵਿਮਾਨੇ’’ਤਿ. –

‘‘ਬਾਰਾਣਸਿਯਂ ਨਨ੍ਦਿਯੋ ਨਾਮਾਸਿ, ਉਪਾਸਕੋ ਅਮਚ੍ਛਰੀ ਦਾਨਪਤਿ ਵਦਞ੍ਞੂ;

ਤਸ੍ਸੇਤਮਾਕਿਣ੍ਣਜਨਂ ਵਿਮਾਨਂ, ਸੂਰਿਯਸ੍ਸ ਰਂਸੀਰਿਵ ਜੋਤਮਾਨਂ.

‘‘ਨਾਰੀਗਣਾ ਚਨ੍ਦਨਸਾਰਲਿਤ੍ਤਾ, ਉਭਤੋ ਵਿਮਾਨਂ ਉਪਸੋਭਯਨ੍ਤਿ;

ਤਂ ਦਿਸ੍ਸਤਿ ਸੂਰਿਯਸਮਾਨਵਣ੍ਣਂ, ਸੋ ਮੋਦਤਿ ਸਗ੍ਗਪਤ੍ਤੋ ਵਿਮਾਨੇ’’ਤਿ. –

੮੬੮. ਤਤ੍ਥ ਚਨ੍ਦਨਸਾਰਲਿਤ੍ਤਾਤਿ ਸਾਰਭੂਤੇਨ ਚਨ੍ਦਨਗਨ੍ਧੇਨ ਅਨੁਲਿਤ੍ਤਸਰੀਰਾ. ਉਭਤੋ ਵਿਮਾਨਨ੍ਤਿ ਵਿਮਾਨਂ ਉਭਤੋ ਅਨ੍ਤੋ ਚੇਵ ਬਹਿ ਚ ਸਙ੍ਗੀਤਾਦੀਹਿ ਉਪੇਚ੍ਚ ਸੋਭਯਨ੍ਤਿ.

‘‘ਨਨ੍ਦਿਯਸ੍ਸਾਹਂ ਭਰਿਯਾ, ਅਗਾਰਿਨੀ ਸਬ੍ਬਕੁਲਸ੍ਸ ਇਸ੍ਸਰਾ;

ਭਤ੍ਤੁ ਵਿਮਾਨੇ ਰਮਿਸ੍ਸਾਮਿ ਦਾਨਹਂ, ਨ ਪਤ੍ਥਯੇ ਨਿਰਯਂ ਦਸ੍ਸਨਾਯਾ’’ਤਿ. –

ਆਹ. ਤਤ੍ਥ ਅਗਾਰਿਨੀਤਿ ਗੇਹਸਾਮਿਨੀ. ‘‘ਭਰਿਯਾ ਸਗਾਮਿਨੀ’’ਤਿਪਿ ਪਠਨ੍ਤਿ, ਭਰਿਯਾ ਸਹਗਾਮਿਨੀਤਿ ਅਤ੍ਥੋ. ਸਬ੍ਬਕੁਲਸ੍ਸ ਇਸ੍ਸਰਾ ਭਤ੍ਤੂਤਿ ਮਮ ਭਤ੍ਤੁ ਨਨ੍ਦਿਯਸ੍ਸ ਸਬ੍ਬਕੁਟੁਮ੍ਬਿਕਸ੍ਸ ਇਸ੍ਸਰਾ ਸਾਮਿਨੀ ਅਹੋਸਿਂ, ਤਸ੍ਮਾ ਇਦਾਨਿਪਿ ਵਿਮਾਨੇ ਇਸ੍ਸਰਾ ਭਵਿਸ੍ਸਾਮੀਤਿ ਆਹ. ਵਿਮਾਨੇ ਰਮਿਸ੍ਸਾਮਿ ¶ ਦਾਨਹਨ੍ਤਿ ਏਵਂ ਪਲੋਭੇਤੁਮੇਵ ਹਿ ਤਂ ਤੇ ਤਤ੍ਥ ਨੇਸੁਂ. ਨ ਪਤ੍ਥਯੇ ਨਿਰਯਂ ਦਸ੍ਸਨਾਯਾਤਿ ਯਂ ਪਨ ਨਿਰਯਂ ਮਂ ਤੁਮ੍ਹੇ ਨੇਤੁਕਾਮਾ, ਤਂ ਨਿਰਯਂ ਦਸ੍ਸਨਾਯਪਿ ਨ ਪਤ੍ਥਯੇ, ਕੁਤੋ ਪਵਿਸਿਤੁਨ੍ਤਿ ਵਦਤਿ.

ਏਵਂ ਵਦਨ੍ਤਿਮੇਵ ‘‘ਤ੍ਵਂ ਤਂ ਪਤ੍ਥੇਹਿ ਵਾ ਮਾ ਵਾ, ਕਿਂ ਤਵ ਪਤ੍ਥਨਾਯਾ’’ਤਿ ਨਿਰਯਸਮੀਪਂ ਨੇਤ੍ਵਾ –

‘‘ਏਸੋ ਤੇ ਨਿਰਯੋ ਸੁਪਾਪਧਮ੍ਮੇ, ਪੁਞ੍ਞਂ ਤਯਾ ਅਕਤਂ ਜੀਵਲੋਕੇ;

ਨ ਹਿ ਮਚ੍ਛਰੀ ਰੋਸਕੋ ਪਾਪਧਮ੍ਮੋ, ਸਗ੍ਗੂਪਗਾਨਂ ਲਭਤਿ ਸਹਬ੍ਯਤ’’ਨ੍ਤਿ. –

ਗਾਥਮਾਹਂਸੁ. ਤਸ੍ਸਤ੍ਥੋ – ਏਸੋ ਤਵ ਨਿਰਯੋ, ਤਯਾ ਦੀਘਰਤ੍ਤਂ ਮਹਾਦੁਕ੍ਖਂ ਅਨੁਭਵਿਤਬ੍ਬਟ੍ਠਾਨਭੂਤੋ. ਕਸ੍ਮਾ? ਪੁਞ੍ਞਂ ਤਯਾ ਅਕਤਂ ਜੀਵਲੋਕੇ, ਯਸ੍ਮਾ ਮਨੁਸ੍ਸਲੋਕੇ ਅਪ੍ਪਮਤ੍ਤਕਮ੍ਪਿ ਤਯਾ ਪੁਞ੍ਞਂ ਨਾਮ ਨ ਕਤਂ, ਏਵਂ ਅਕਤਪੁਞ੍ਞੋ ਪਨ ਤਾਦਿਸੋ ਸਤ੍ਤੋ ਮਚ੍ਛਰੀ ਅਤ੍ਤਨੋ ਸਮ੍ਪਤ੍ਤਿਨਿਗੂਹਨਲਕ੍ਖਣੇਨ ਮਚ੍ਛਰੇਨ ਸਮਨ੍ਨਾਗਤੋ, ਪਰੇਸਂ ਰੋਸੁਪ੍ਪਾਦਨੇਨ ਰੋਸਕੋ, ਲੋਭਾਦੀਹਿ ਪਾਪਧਮ੍ਮੇਹਿ ਸਮਙ੍ਗੀਭਾਵਤੋ ਪਾਪਧਮ੍ਮੋ ਸਗ੍ਗੂਪਗਾਨਂ ਦੇਵਾਨਂ ਸਹਬ੍ਯਤਂ ਸਹਭਾਵਂ ਨ ਲਭਤੀਤਿ ਯੋਜਨਾ.

ਏਵਂ ਪਨ ਵਤ੍ਵਾ ਤੇ ਦ੍ਵੇ ਯਕ੍ਖਾ ਤਤ੍ਥੇਵਨ੍ਤਰਧਾਯਿਂਸੁ. ਤਂਸਦਿਸੇ ਪਨ ਦ੍ਵੇ ਨਿਰਯਪਾਲੇ ਸਂਸਵਕੇ ਨਾਮ ਗੂਥਨਿਰਯੇ ਪਕ੍ਖਿਪਿਤੁਂ ਆਕਡ੍ਢਨ੍ਤੇ ਪਸ੍ਸਿਤ੍ਵਾ –

‘‘ਕਿਂ ¶ ਨੁ ਗੂਥਞ੍ਚ ਮੁਤ੍ਤਞ੍ਚ, ਅਸੁਚਿ ਪਟਿਦਿਸ੍ਸਤਿ;

ਦੁਗ੍ਗਨ੍ਧਂ ਕਿਮਿਦਂ ਮੀਲ਼੍ਹਂ, ਕਿਮੇਤਂ ਉਪਵਾਯਤੀ’’ਤਿ. –

‘‘ਏਸ ਸਂਸਵਕੋ ਨਾਮ, ਗਮ੍ਭੀਰੋ ਸਤਪੋਰਿਸੋ;

ਯਤ੍ਥ ਵਸ੍ਸਸਹਸ੍ਸਾਨਿ, ਤੁਵਂ ਪਚ੍ਚਸਿ ਰੇਵਤੇ’’ਤਿ. –

ਤਸ੍ਮਿਂ ¶ ਕਥਿਤੇ ਤਤ੍ਥ ਅਤ੍ਤਨੋ ਨਿਬ੍ਬਤ੍ਤਿਹੇਤੁਭੂਤਂ ਕਮ੍ਮਂ ਪੁਚ੍ਛਨ੍ਤੀ –

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕੇਨ ਸਂਸਵਕੋ ਲਦ੍ਧੋ, ਗਮ੍ਭੀਰੋ ਸਤਪੋਰਿਸੋ’’ਤਿ. – ਆਹ;

‘‘ਸਮਣੇ ਬ੍ਰਾਹ੍ਮਣੇ ਚਾਪਿ, ਅਞ੍ਞੇ ਵਾਪਿ ਵਨਿਬ੍ਬਕੇ;

ਮੁਸਾਵਾਦੇਨ ਵਞ੍ਚੇਸਿ, ਤਂ ਪਾਪਂ ਪਕਤਂ ਤਯਾ’’ਤਿ. –

ਤਸ੍ਸਾ ਤਂ ਕਮ੍ਮਂ ਕਥੇਤ੍ਵਾ ਪੁਨ ਤੇ –

‘‘ਤੇਨ ਸਂਸਵਕੋ ਲਦ੍ਧੋ, ਗਮ੍ਭੀਰੋ ਸਤਪੋਰਿਸੋ;

ਤਤ੍ਥੇ ਵਸ੍ਸਸਹਸ੍ਸਾਨਿ, ਤੁਵਂ ਪਚ੍ਚਸਿ ਰੇਵਤੇ’’ਤਿ. –

ਆਹਂਸੁ. ਤਤ੍ਥ ਸਂਸਵਕੋ ਨਾਮਾਤਿ ਨਿਚ੍ਚਕਾਲਂ ਗੂਥਮੁਤ੍ਤਾਦਿਅਸੁਚਿਸ੍ਸ ਸਂਸਵਨਤੋ ਪਗ੍ਘਰਣਤੋ ਸਂਸਵਕੋ ਨਾਮ.

ਨ ਕੇਵਲਂ ਤੁਯ੍ਹਂ ਇਧ ਸਂਸਵਕਲਾਭੋ ਏਵ, ਅਥ ਖੋ ਏਤ੍ਥ ਅਨੇਕਾਨਿ ਵਸ੍ਸਸਹਸ੍ਸਾਨਿ ਪਚ੍ਚਿਤ੍ਵਾ ਉਤ੍ਤਿਣ੍ਣਾਯ ਹਤ੍ਥਚ੍ਛੇਦਾਦਿਲਾਭੋਪੀਤਿ ਦਸ੍ਸੇਤੁਂ –

‘‘ਹਤ੍ਥੇਪਿ ਛਿਨ੍ਦਨ੍ਤਿ ਅਥੋਪਿ ਪਾਦੇ, ਕਣ੍ਣੇਪਿ ਛਿਨ੍ਦਨ੍ਤਿ ਅਥੋਪਿ ਨਾਸਂ;

ਅਥੋਪਿ ਕਾਕੋਲ਼ਗਣਾ ਸਮੇਚ੍ਚ, ਸਙ੍ਗਮ੍ਮ ਖਾਦਨ੍ਤਿ ਵਿਫਨ੍ਦਮਾਨ’’ਨ੍ਤਿ. –

ਤਤ੍ਥ ਲਦ੍ਧਬ੍ਬਕਾਰਣਂ ਆਹਂਸੁ. ਤਤ੍ਥ ਕਾਕੋਲ਼ਗਣਾਤਿ ਕਾਕਸਙ੍ਘਾ. ਤੇ ਕਿਰਸ੍ਸਾ ਤਿਗਾਵੁਤਪ੍ਪਮਾਣੇ ਸਰੀਰੇ ਅਨੇਕਸਤਾਨਿ ਅਨੇਕਸਹਸ੍ਸਾਨਿ ਪਤਿਤ੍ਵਾ ਤਾਲਕ੍ਖਨ੍ਧਪਰਿਮਾਣੇਹਿ ਸੁਨਿਸਿਤਗ੍ਗੇਹਿ ਅਯੋਮਯੇਹਿ ¶ ਮੁਖਤੁਣ੍ਡੇਹਿ ਵਿਜ੍ਝਿਤ੍ਵਾ ਵਿਜ੍ਝਿਤ੍ਵਾ ਖਾਦਨ੍ਤਿ, ਮਂਸਂ ਗਹਿਤਗਹਿਤਟ੍ਠਾਨੇ ਕਮ੍ਮਬਲੇਨ ¶ ਪੂਰਤੇਵ. ਤੇਨਾਹ ‘‘ਕਾਕੋਲ਼ਗਣਾ ਸਮੇਚ੍ਚ, ਸਙ੍ਗਮ੍ਮ ਖਾਦਨ੍ਤਿ ਵਿਫਨ੍ਦਮਾਨ’’ਨ੍ਤਿ.

ਪੁਨ ਸਾ ਮਨੁਸ੍ਸਲੋਕਂ ਪਚ੍ਚਾਨਯਨਾਯ ਯਾਚਨਾਦਿਵਸੇਨ ਤਂ ਤਂ ਵਿਪ੍ਪਲਪਿ. ਤੇਨ ਵੁਤ੍ਤਂ –

‘‘ਸਾਧੁ ¶ ਖੋ ਮਂ ਪਟਿਨੇਥ, ਕਾਹਾਮਿ ਕੁਸਲਂ ਬਹੁਂ;

ਯਂ ਕਤ੍ਵਾ ਸੁਖਿਤਾ ਹੋਨ੍ਤਿ, ਨ ਚ ਪਚ੍ਛਾਨੁਤਪ੍ਪਰੇ’’ਤਿ.

‘‘ਪੁਰੇ ਤੁਵਂ ਪਮਜ੍ਜਿਤ੍ਵਾ, ਇਦਾਨਿ ਪਰਿਦੇਵਸਿ;

ਸਯਂ ਕਤਾਨਂ ਕਮ੍ਮਾਨਂ, ਵਿਪਾਕਂ ਅਨੁਭੋਸ੍ਸਸੀ’’ਤਿ. –

‘‘ਕੋ ਦੇਵਲੋਕਤੋ ਮਨੁਸ੍ਸਲੋਕਂ, ਗਨ੍ਤ੍ਵਾਨ ਪੁਟ੍ਠੋ ਮੇ ਏਵਂ ਵਦੇਯ੍ਯ;

ਨਿਕ੍ਖਿਤ੍ਤਦਣ੍ਡੇਸੁ ਦਦਾਥ ਦਾਨਂ, ਅਚ੍ਛਾਦਨਂ ਸੇਯ੍ਯਮਥਨ੍ਨਪਾਨਂ;

ਨ ਹਿ ਮਚ੍ਛਰੀ ਰੋਸਕੋ ਪਾਪਧਮ੍ਮੋ, ਸਗ੍ਗੂਪਗਾਨਂ ਲਭਤਿ ਸਹਬ੍ਯਤਂ.

‘‘ਸਾਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;

ਵਦਞ੍ਞੂ ਸੀਲਸਮ੍ਪਨ੍ਨਾ, ਕਾਹਾਮਿ ਕੁਸਲਂ ਬਹੁਂ;

‘‘ਆਰਾਮਾਨਿ ਚ ਰੋਪਿਸ੍ਸਂ, ਦੁਗ੍ਗੇ ਸਙ੍ਕਮਾਨਿ ਚ;

ਪਪਞ੍ਚ ਉਦਪਾਨਞ੍ਚ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

‘‘ਉਪੋਸਥਂ ¶ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਨ ਚ ਦਾਨੇ ਪਮਜ੍ਜਿਸ੍ਸਂ, ਸਾਮਂ ਦਿਟ੍ਠਮਿਦਂ ਮਯਾ’’ਤਿ.

‘‘ਇਚ੍ਚੇਵਂ ¶ ਵਿਪ੍ਪਲਪਨ੍ਤਿਂ, ਫਨ੍ਦਮਾਨਂ ਤਤੋ ਤਤੋ;

ਖਿਪਿਂਸੁ ਨਿਰਯੇ ਘੋਰੇ, ਉਦ੍ਧਂਪਾਦਂ ਅਵਂਸਿਰ’’ਨ੍ਤਿ. –

‘‘ਅਹਂ ਪੁਰੇ ਮਚ੍ਛਰਿਨੀ ਅਹੋਸਿਂ, ਪਰਿਭਾਸਿਕਾ ਸਮਣਬ੍ਰਾਹ੍ਮਣਾਨਂ;

ਵਿਤਥੇਨ ਚ ਸਾਮਿਕਂ ਵਞ੍ਚਯਿਤ੍ਵਾ, ਪਚ੍ਚਾਮਹਂ ਨਿਰਯੇ ਘੋਰਰੂਪੇ’’ਤਿ. –

ਓਸਾਨਗਾਥਮਾਹ. ਤਤ੍ਥ ¶ ‘‘ਅਹਂ ਪੁਰੇ ਮਚ੍ਛਰਿਨੀ’’ਤਿ ਗਾਥਾ ਨਿਰਯੇ ਨਿਬ੍ਬਤ੍ਤਾਯ ਵੁਤ੍ਤਾ, ਇਤਰਾ ਅਨਿਬ੍ਬਤ੍ਤਾਯ ਏਵਾਤਿ ਵੇਦਿਤਬ੍ਬਾ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਭਿਕ੍ਖੂ ਰੇਵਤਿਯਾ ਯਕ੍ਖੇਹਿ ਗਹੇਤ੍ਵਾ ਨੀਤਭਾਵਂ ਭਗਵਤੋ ਆਰੋਚੇਸੁਂ. ਤਂ ਸੁਤ੍ਵਾ ਭਗਵਾ ਆਦਿਤੋ ਪਟ੍ਠਾਯ ਇਮਂ ਵਤ੍ਥੁਂ ਕਥੇਤ੍ਵਾ ਉਪਰਿ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ, ਦੇਸਨਾਪਰਿਯੋਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ. ਕਾਮਞ੍ਚੇਤਂ ਰੇਵਤੀਪਟਿਬਦ੍ਧਾਯ ਕਥਾਯ ਯੇਭੁਯ੍ਯਭਾਵਤੋ ‘‘ਰੇਵਤੀਵਿਮਾਨ’’ਨ੍ਤਿ ਵੋਹਰੀਯਤਿ, ਯਸ੍ਮਾ ਪਨ ਰੇਵਤੀ ਵਿਮਾਨਦੇਵਤਾ ਨ ਹੋਤਿ, ਨਨ੍ਦਿਯਸ੍ਸ ਪਨ ਦੇਵਪੁਤ੍ਤਸ੍ਸ ਵਿਮਾਨਾਦਿਸਮ੍ਪਤ੍ਤਿਪਟਿਸਂਯੁਤ੍ਤਞ੍ਚੇਤਂ, ਤਸ੍ਮਾ ਪੁਰਿਸਵਿਮਾਨੇਸ੍ਵੇਵ ਸਙ੍ਗਹਂ ਆਰੋਪਿਤਨ੍ਤਿ ਦਟ੍ਠਬ੍ਬਂ.

ਯੋ ਵਦਤਂ ਪਵਰੋ ਮਨੁਜੇਸੂਤਿ ਛਤ੍ਤਮਾਣਵਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਸੇਤਬ੍ਯਾਯਂ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਕਿਚ੍ਛਾਲਦ੍ਧੋ ਪੁਤ੍ਤੋ ਛਤ੍ਤੋ ਨਾਮ ਬ੍ਰਾਹ੍ਮਣਮਾਣਵੋ ਅਹੋਸਿ. ਸੋ ਵਯਪ੍ਪਤ੍ਤੋ ਪਿਤਰਾ ਪੇਸਿਤੋ ਉਕ੍ਕਟ੍ਠਂ ਗਨ੍ਤ੍ਵਾ ਬ੍ਰਾਹ੍ਮਣਸ੍ਸ ਪੋਕ੍ਖਰਸਾਤਿਸ੍ਸ ਸਨ੍ਤਿਕੇ ਮੇਧਾਵਿਤਾਯ ਅਨਲਸਤਾਯ ਚ ਨ ਚਿਰੇਨੇਵ ਮਨ੍ਤੇ ਵਿਜ੍ਜਾਟ੍ਠਾਨਾਨਿ ਚ ਉਗ੍ਗਹੇਤ੍ਵਾ ਬ੍ਰਾਹ੍ਮਣਸਿਪ੍ਪੇ ਨਿਪ੍ਫਤ੍ਤਿਂ ਪਤ੍ਤੋ. ਸੋ ਆਚਰਿਯਂ ਅਭਿਵਾਦੇਤ੍ਵਾ ‘‘ਮਯਾ ¶ ਤੁਮ੍ਹਾਕਂ ਸਨ੍ਤਿਕੇ ਸਿਪ੍ਪਂ ¶ ਸਿਕ੍ਖਿਤਂ, ਕਿਂ ਵੋ ਗਰੁਦਕ੍ਖਿਣਂ ਦੇਮੀ’’ਤਿ ਆਹ. ਆਚਰਿਯੋ ‘‘ਗਰੁਦਕ੍ਖਿਣਾ ਨਾਮ ਅਨ੍ਤੇਵਾਸਿਕਸ੍ਸ ਵਿਭਵਾਨੁਰੂਪਾ, ਕਹਾਪਣਸਹਸ੍ਸਮਾਨੇਹੀ’’ਤਿ ਆਹ. ਛਤ੍ਤਮਾਣਵੋ ਆਚਰਿਯਂ ਅਭਿਵਾਦੇਤ੍ਵਾ ਸੇਤਬ੍ਯਂ ਗਨ੍ਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਤੇਹਿ ਅਭਿਨਨ੍ਦਿਯਮਾਨੋ ਕਤਪਟਿਸਨ੍ਥਾਰੋ ਤਮਤ੍ਥਂ ਪਿਤੁ ਆਰੋਚੇਤ੍ਵਾ ‘‘ਦੇਥ ਮੇ ਦਾਤਬ੍ਬਯੁਤ੍ਤਕਂ, ਅਜ੍ਜੇਵ ਦਤ੍ਵਾ ਆਗਮਿਸ੍ਸਾਮੀ’’ਤਿ ਆਹ. ਤਂ ਮਾਤਾਪਿਤਰੋ ¶ ‘‘ਤਾਤ, ਅਜ੍ਜ ਵਿਕਾਲੋ, ਸ੍ਵੇ ਗਮਿਸ੍ਸਸੀ’’ਤਿ ਵਤ੍ਵਾ ਕਹਾਪਣੇ ਨੀਹਰਿਤ੍ਵਾ ਭਣ੍ਡਿਕਂ ਬਨ੍ਧਾਪੇਤ੍ਵਾ ਠਪੇਸੁਂ. ਚੋਰਾ ਤਂ ਪਵਤ੍ਤਿਂ ਞਤ੍ਵਾ ਛਤ੍ਤਮਾਣਵਕਸ੍ਸ ਗਮਨਮਗ੍ਗੇ ਅਞ੍ਞਤਰਸ੍ਮਿਂ ਵਨਗਹਨੇ ਨਿਲੀਨਾ ਅਚ੍ਛਿਂਸੁ ‘‘ਮਾਣਵਂ ਮਾਰੇਤ੍ਵਾ ਕਹਾਪਣੇ ਗਣ੍ਹਿਸ੍ਸਾਮਾ’’ਤਿ.

ਭਗਵਾ ਪਚ੍ਚੂਸਸਮਯੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਛਤ੍ਤਮਾਣਵਕਸ੍ਸ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਨਂ, ਚੋਰੇਹਿ ਮਾਰਿਤਸ੍ਸ ਦੇਵਲੋਕੇ ਨਿਬ੍ਬਤ੍ਤਿਂ, ਤਤੋ ਸਹ ਵਿਮਾਨੇਨ ਆਗਤਸ੍ਸ ਤਤ੍ਥ ਸਨ੍ਨਿਪਤਿਤਪਰਿਸਾਯ ਚ ਧਮ੍ਮਾਭਿਸਮਯਂ ਦਿਸ੍ਵਾ ਪਠਮਤਰਮੇਵ ਗਨ੍ਤ੍ਵਾ ਮਾਣਵਕਸ੍ਸ ਗਮਨਮਗ੍ਗੇ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਮਾਣਵੋ ਆਚਰਿਯਧਨਂ ਗਹੇਤ੍ਵਾ ਸੇਤਬ੍ਯਤੋ ਉਕ੍ਕਟ੍ਠਾਭਿਮੁਖੋ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਭਗਵਨ੍ਤਂ ਨਿਸਿਨ੍ਨਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਅਟ੍ਠਾਸਿ. ‘‘ਕੁਹਿਂ ਗਮਿਸ੍ਸਸੀ’’ਤਿ ਭਗਵਤਾ ਵੁਤ੍ਤੋ ‘‘ਉਕ੍ਕਟ੍ਠਂ, ਭੋ ਗੋਤਮ, ਗਮਿਸ੍ਸਾਮਿ ਮਯ੍ਹਂ ਆਚਰਿਯਸ੍ਸ ਪੋਕ੍ਖਰਸਾਤਿਸ੍ਸ ਗਰੁਦਕ੍ਖਿਣਂ ਦਾਤੁ’’ਨ੍ਤਿ ਆਹ. ਅਥ ਭਗਵਾ ‘‘ਜਾਨਾਸਿ ਪਨ ਤ੍ਵਂ, ਮਾਣਵ, ਤੀਣਿ ਸਰਣਾਨਿ, ਪਞ੍ਚ ਸੀਲਾਨੀ’’ਤਿ ਵਤ੍ਵਾ ਤੇਨ ‘‘ਨਾਹਂ ਜਾਨਾਮਿ, ਕਿਮਤ੍ਥਿਯਾਨਿ ਪਨੇਤਾਨਿ ਕੀਦਿਸਾਨਿ ਚਾ’’ਤਿ ਵੁਤ੍ਤੇ ‘‘ਇਦਮੀਦਿਸ’’ਨ੍ਤਿ ਸਰਣਗਮਨਸ੍ਸ ਸੀਲਸਮਾਦਾਨਸ੍ਸ ਚ ਫਲਾਨਿਸਂਸਂ ਵਿਭਾਵੇਤ੍ਵਾ ‘‘ਉਗ੍ਗਣ੍ਹਾਹਿ ਤਾਵ, ਮਾਣਵਕ, ਸਰਣਗਮਨਵਿਧਿ’’ਨ੍ਤਿ ਵਤ੍ਵਾ ‘‘ਸਾਧੁ ਉਗ੍ਗਣ੍ਹਿਸ੍ਸਾਮਿ, ਕਥੇਥ ਭਨ੍ਤੇ ਭਗਵਾ’’ਤਿ ਤੇਨ ਯਾਚਿਤੋ ਤਸ੍ਸ ਰੁਚਿਯਾ ਅਨੁਰੂਪਂ ਗਾਥਾਬਨ੍ਧਵਸੇਨ ਸਰਣਗਮਨਵਿਧਿਂ ਦਸ੍ਸੇਨ੍ਤੋ –

‘‘ਯੋ ਵਦਤਂ ਪਵਰੋ ਮਨੁਜੇਸੁ, ਸਕ੍ਯਮੁਨੀ ਭਗਵਾ ਕਤਕਿਚ੍ਚੋ;

ਪਾਰਗਤੋ ਬਲਵੀਰਿਯਸਮਙ੍ਗੀ, ਤਂ ਸੁਗਤਂ ਸਰਣਤ੍ਥਮੁਪੇਹਿ.

‘‘ਰਾਗਵਿਰਾਗਮਨੇਜਮਸੋਕਂ ¶ , ਧਮ੍ਮਮਸਙ੍ਖਤਮਪ੍ਪਟਿਕੂਲਂ;

ਮਧੁਰਮਿਮਂ ¶ ਪਗੁਣਂ ਸੁਵਿਭਤ੍ਤਂ, ਧਮ੍ਮਮਿਮਂ ਸਰਣਤ੍ਥਮੁਪੇਹਿ.

‘‘ਯਤ੍ਥ ਚ ਦਿਨ੍ਨ ਮਹਪ੍ਫਲਮਾਹੁ, ਚਤੂਸੁ ਸੁਚੀਸੁ ਪੁਰਿਸਯੁਗੇਸੁ;

ਅਟ੍ਠ ਚ ਪੁਗ੍ਗਲ ਧਮ੍ਮਦਸਾ ਤੇ, ਸਙ੍ਘਮਿਮਂ ਸਰਣਤ੍ਥਮੁਪੇਹੀ’’ਤਿ. –

੮੮੬. ਤਤ੍ਥ ਯੋਤਿ ਅਨਿਯਮਿਤਵਚਨਂ, ਤਸ੍ਸ ‘‘ਤ’’ਨ੍ਤਿ ਇਮਿਨਾ ਨਿਯਮਨਂ ਵੇਦਿਤਬ੍ਬਂ. ਵਦਤਨ੍ਤਿ ਵਦਨ੍ਤਾਨਂ. ਪਵਰੋਤਿ ਸੇਟ੍ਠੋ, ਕਥਿਕਾਨਂ ਉਤ੍ਤਮੋ ਵਾਦੀਵਰੋਤਿ ਅਤ੍ਥੋ. ਮਨੁਜੇਸੂਤਿ ਉਕ੍ਕਟ੍ਠਨਿਦ੍ਦੇਸੋ ਯਥਾ ‘‘ਸਤ੍ਥਾ ਦੇਵਮਨੁਸ੍ਸਾਨ’’ਨ੍ਤਿ. ਭਗਵਾ ਪਨ ਦੇਵਮਨੁਸ੍ਸਾਨਮ੍ਪਿ ਬ੍ਰਹ੍ਮਾਨਮ੍ਪਿ ਸਬ੍ਬੇਸਮ੍ਪਿ ਸਤ੍ਤਾਨਂ ਪਵਰੋਯੇਵ, ਭਗਵਤੋ ਚ ਚਰਿਮਭਵੇ ਮਨੁਸ੍ਸੇਸੁ ਉਪ੍ਪਨ੍ਨਤਾਯ ਵੁਤ੍ਤਂ ‘‘ਮਨੁਜੇਸੂ’’ਤਿ. ਤੇਨੇਵਾਹ ‘‘ਸਕ੍ਯਮੁਨੀ’’ਤਿ. ਸਕ੍ਯਕੁਲਪ੍ਪਸੁਤਤਾਯ ਸਕ੍ਯੋ, ਕਾਯਮੋਨੇਯ੍ਯਾਦੀਹਿ ਸਮਨ੍ਨਾਗਤਤੋ ਅਨਵਸੇਸਸ੍ਸ ਚ ਞੇਯ੍ਯਸ੍ਸ ਮੁਨਨਤੋ ਮੁਨਿ ਚਾਤਿ ਸਕ੍ਯਮੁਨਿ. ਭਾਗ੍ਯਵਨ੍ਤਤਾਦੀਹਿ ਚਤੂਹਿ ਕਾਰਣੇਹਿ ਭਗਵਾ. ਚਤੂਹਿ ਮਗ੍ਗੇਹਿ ਕਾਤਬ੍ਬਸ੍ਸ ਪਰਿਞ੍ਞਾਦਿਪਭੇਦਸ੍ਸ ਸੋਲ਼ਸਵਿਧਸ੍ਸ ਕਿਚ੍ਚਸ੍ਸ ਕਤਤ੍ਤਾ ਨਿਪ੍ਫਾਦਿਤਤ੍ਤਾ ਕਤਕਿਚ੍ਚੋ. ਪਾਰਂ ਸਕ੍ਕਾਯਸ੍ਸ ਪਰਤੀਰਂ ਨਿਬ੍ਬਾਨਂ ਗਤੋ ਸਯਮ੍ਭੁਞਾਣੇਨ ਅਧਿਗਤੋਤਿ ਪਾਰਗਤੋ. ਅਸਦਿਸੇਨ ਕਾਯਬਲੇਨ, ਅਨਞ੍ਞਸਾਧਾਰਣੇਨ ਞਾਣਬਲੇਨ, ਚਤੁਬ੍ਬਿਧਸਮ੍ਮਪ੍ਪਧਾਨਵੀਰਿਯੇਨ ਚ ਸਮਨ੍ਨਾਗਤਤ੍ਤਾ ਬਲਵੀਰਿਯਸਮਙ੍ਗੀ. ਸੋਭਨਗਮਨਤ੍ਤਾ, ਸੁਨ੍ਦਰਂ ਠਾਨਂ ਗਤਤ੍ਤਾ, ਸਮ੍ਮਾ ਗਤਤ੍ਤਾ, ਸਮ੍ਮਾ ਚ ਗਦਿਤਤ੍ਤਾ ਸੁਗਤੋ. ਤਂ ਸੁਗਤਂ ਸਮ੍ਮਾਸਮ੍ਬੁਦ੍ਧਂ ਸਰਣਤ੍ਥਂ ਸਰਣਾਯ ਪਰਾਯਣਾਯ ਅਪਾਯਦੁਕ੍ਖਵਟ੍ਟਦੁਕ੍ਖਪਰਿਤ੍ਤਾਣਾਯ ਉਪੇਹਿ ਉਪਗਚ੍ਛ, ਅਜ੍ਜ ਪਟ੍ਠਾਯ ਅਹਿਤਨਿਵਤ੍ਤਨੇਨ ਹਿਤਸਂਵਡ੍ਢਨੇਨ ‘‘ਅਯਂ ਮੇ ਭਗਵਾ ਸਰਣਂ ਤਾਣਂ ਲੇਣਂ ਪਰਾਯਣਂ ਗਤਿ ਪਟਿਸਰਣ’’ਨ੍ਤਿ ਭਜ ਸੇਵ, ਏਵਂ ਜਾਨਾਹਿ ਵਾ ਬੁਜ੍ਝਸ੍ਸੂਤਿ ਅਤ੍ਥੋ.

੮੮੭. ਰਾਗਵਿਰਾਗਨ੍ਤਿ ¶ ਅਰਿਯਮਗ੍ਗਮਾਹ. ਤੇਨ ਹਿ ਅਰਿਯਾ ਅਨਾਦਿਕਾਲਭਾਵਿਤਮ੍ਪਿ ਰਾਗਂ ਵਿਰਜ੍ਜੇਨ੍ਤਿ. ਅਨੇਜਮਸੋਕਨ੍ਤਿ ਅਰਿਯਫਲਂ. ਤਞ੍ਹਿ ਏਜਾਸਙ੍ਖਾਤਾਯ ਤਣ੍ਹਾਯ ਅਵਸਿਟ੍ਠਾਨਞ੍ਚ ਸੋਕਨਿਮਿਤ੍ਤਾਨਂ ਕਿਲੇਸਾਨਂ ਸਬ੍ਬਸੋ ਪਟਿਪ੍ਪਸ੍ਸਮ੍ਭਨਤੋ ¶ ‘‘ਅਨੇਜਂ ਅਸੋਕ’’ਨ੍ਤਿ ਚ ਵੁਚ੍ਚਤਿ. ਧਮ੍ਮਨ੍ਤਿ ਸਭਾਵਧਮ੍ਮਂ. ਸਭਾਵਤੋ ਗਹੇਤਬ੍ਬਧਮ੍ਮੋ ਹੇਸ ਯਦਿਦਂ ਮਗ੍ਗਫਲਨਿਬ੍ਬਾਨਾਨਿ, ਨ ਪਰਿਯਤ੍ਤਿਧਮ੍ਮੋ ਵਿਯ ਪਞ੍ਞਤ੍ਤਿਧਮ੍ਮਵਸੇਨ. ਧਮ੍ਮਨ੍ਤਿ ਵਾ ਪਰਮਤ੍ਥਧਮ੍ਮਂ, ਨਿਬ੍ਬਾਨਨ੍ਤਿ ਅਤ੍ਥੋ. ਸਮੇਚ੍ਚ ਸਮ੍ਭੁਯ੍ਯ ਪਚ੍ਚਯੇਹਿ ਕਤਂ ਸਙ੍ਖਤਂ, ਨ ਸਙ੍ਖਤਨ੍ਤਿ ਅਸਙ੍ਖਤਂ. ਤਦੇਵ ਨਿਬ੍ਬਾਨਂ. ਨਤ੍ਥਿ ਏਤ੍ਥ ਕਿਞ੍ਚਿਪਿ ਪਟਿਕੂਲਨ੍ਤਿ ਅਪ੍ਪਟਿਕੂਲਂ. ਸਵਨਵੇਲਾਯਂ ਉਪਪਰਿਕ੍ਖਣਵੇਲਾਯਂ ਪਟਿਪਜ੍ਜਨਵੇਲਾਯਨ੍ਤਿ ਸਬ੍ਬਦਾਪਿ ਇਟ੍ਠਮੇਵਾਤਿ ਮਧੁਰਂ. ਸਬ੍ਬਞ੍ਞੁਤਞ੍ਞਾਣਸਨ੍ਨਿਸ੍ਸਯਾਯ ਪਟਿਭਾਨਸਮ੍ਪਦਾਯ ਪਵਤ੍ਤਿਤਤ੍ਤਾ ਸੁਪ੍ਪਵਤ੍ਤਿਭਾਵਤੋ ਨਿਪੁਣਭਾਵਤੋ ਚ ਪਗੁਣਂ. ਵਿਭਜਿਤਬ੍ਬਸ੍ਸ ਅਤ੍ਥਸ੍ਸ ਖਨ੍ਧਾਦਿਵਸੇਨ ਕੁਸਲਾਦਿਵਸੇਨ ਉਦ੍ਦੇਸਾਦਿਵਸੇਨ ਚ ਸੁਟ੍ਠੁ ਵਿਭਜਨਤੋ ਸੁਵਿਭਤ੍ਤਂ. ਤੀਹਿਪਿ ਪਦੇਹਿ ਪਰਿਯਤ੍ਤਿਧਮ੍ਮਮੇਵ ਵਦਤਿ. ਤੇਨੇਵ ਹਿਸ੍ਸ ਆਪਾਥਕਾਲੇ ਵਿਯ ਵਿਮਦ੍ਦਨਕਾਲੇਪਿ ਕਥੇਨ੍ਤਸ੍ਸ ਵਿਯ ਸੁਣਨ੍ਤਸ੍ਸਾਪਿ ਸਮ੍ਮੁਖੀਭਾਵਤੋ ਉਭਤੋਪਚ੍ਚਕ੍ਖਤਾਯ ਦਸ੍ਸਨਤ੍ਥਂ ‘‘ਇਮ’’ਨ੍ਤਿ ਵੁਤ੍ਤਂ. ਧਮ੍ਮਨ੍ਤਿ ਯਥਾਵਪਟਿਪਜ੍ਜਨ੍ਤੇ ਅਪਾਯਦੁਕ੍ਖਪਾਤਤੋ ਧਾਰਣਤ੍ਥੇਨ ਧਮ੍ਮਂ, ਇਦਂ ਚਤੁਬ੍ਬਿਧਸ੍ਸਾਪਿ ਧਮ੍ਮਸ੍ਸ ਸਾਧਾਰਣਵਚਨਂ. ਪਰਿਯਤ੍ਤਿਧਮ੍ਮੋਪਿ ¶ ਹਿ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਨਮਤ੍ਤਾਯਪਿ ਯਥਾਵਪਟਿਪਤ੍ਤਿਯਾ ਅਪਾਯਦੁਕ੍ਖਪਾਤਤੋ ਧਾਰੇਤਿ ਏਵ. ਇਮਸ੍ਸ ਚ ਅਤ੍ਥਸ੍ਸ ਇਦਮੇਵ ਵਿਮਾਨਂ ਸਾਧਕਨ੍ਤਿ ਦਟ੍ਠਬ੍ਬਂ. ਸਾਧਾਰਣਭਾਵੇਨ ਯਥਾਵੁਤ੍ਤਧਮ੍ਮਸ੍ਸ ਪਚ੍ਚਕ੍ਖਂ ਕਤ੍ਵਾ ਦਸ੍ਸੇਨ੍ਤੋ ਪੁਨ ‘‘ਇਮ’’ਨ੍ਤਿ ਆਹ.

੮੮੮. ਯਤ੍ਥਾਤਿ ਯਸ੍ਮਿਂ ਅਰਿਯਸਙ੍ਘੇ. ਦਿਨ੍ਨਨ੍ਤਿ ਪਰਿਚ੍ਚਤ੍ਤਂ ਅਨ੍ਨਾਦਿਦੇਯ੍ਯਧਮ੍ਮਂ. ਦਿਨ੍ਨ ਮਹਪ੍ਫਲਨ੍ਤਿ ਗਾਥਾਸੁਖਤ੍ਥਂ ¶ ਅਨੁਨਾਸਿਕਲੋਪੋ ਕਤੋ. ਅਚ੍ਚਨ੍ਤਮੇਵ ਕਿਲੇਸਾਸੁਚਿਤੋ ਵਿਸੁਜ੍ਝਨੇਨ ਸੁਚੀਸੁ ‘‘ਸੋਤਾਪਨ੍ਨੋ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ’’ਤਿਆਦਿਨਾ (ਅ. ਨਿ. ੮.੬੦) ਵੁਤ੍ਤੇਸੁ ਚਤੂਸੁ ਪੁਰਿਸਯੁਗੇਸੁ. ਅਟ੍ਠਾਤਿ ਮਗ੍ਗਟ੍ਠਫਲਟ੍ਠੇਸੁ ਯੁਗਲ਼ੇ ਅਕਤ੍ਵਾ ਵਿਸੁਂ ਵਿਸੁਂ ਗਹਣੇਨ ਅਟ੍ਠ ਪੁਗ੍ਗਲਾ. ਗਾਥਾਸੁਖਤ੍ਥਮੇਵ ਚੇਤ੍ਥ ‘‘ਪੁਗ੍ਗਲ ਧਮ੍ਮਦਸਾ’’ਤਿ ਰਸ੍ਸਂ ਕਤ੍ਵਾ ਨਿਦ੍ਦੇਸੋ. ਧਮ੍ਮਦਸਾਤਿ ਚਤੁਸਚ੍ਚਧਮ੍ਮਸ੍ਸ ਨਿਬ੍ਬਾਨਧਮ੍ਮਸ੍ਸ ਚ ਪਚ੍ਚਕ੍ਖਤੋ ਦਸ੍ਸਨਕਾ. ਦਿਟ੍ਠਿਸੀਲਸਾਮਞ੍ਞੇਨ ਸਂਹਤਭਾਵੇਨ ਸਙ੍ਘਂ.

ਏਵਂ ਭਗਵਤਾ ਤੀਹਿ ਗਾਥਾਹਿ ਸਰਣਗੁਣਸਨ੍ਦਸ੍ਸਨੇਨ ਸਦ੍ਧਿਂ ਸਰਣਗਮਨਵਿਧਿਮ੍ਹਿ ਵੁਤ੍ਤੇ ਮਾਣਵੋ ਤਂਤਂਸਰਣਗੁਣਾਨੁਸ੍ਸਰਣਮੁਖੇਨ ਸਰਣਗਮਨਵਿਧਿਨੋ ਅਤ੍ਤਨੋ ਹਦਯੇ ਠਪਿਤਭਾਵਂ ਵਿਭਾਵੇਨ੍ਤੋ ਤਸ੍ਸਾ ਤਸ੍ਸਾ ਗਾਥਾਯ ¶ ਅਨਨ੍ਤਰਂ ‘‘ਯੋ ਵਦਤਂ ਪਵਰੋ’’ਤਿਆਦਿਨਾ ਤਂ ਤਂ ਗਾਥਂ ਪਚ੍ਚਨੁਭਾਸਿ. ਏਵਂ ਪਚ੍ਚਨੁਭਾਸਿਤ੍ਵਾ ਠਿਤਸ੍ਸ ਪਞ੍ਚ ਸਿਕ੍ਖਾਪਦਾਨਿ ਸਰੂਪਤੋ ਫਲਾਨਿਸਂਸਤੋ ਚ ਵਿਭਾਵੇਤ੍ਵਾ ਤੇਸਂ ਸਮਾਦਾਨਵਿਧਿਂ ਕਥੇਸਿ. ਸੋ ਤਮ੍ਪਿ ਸੁਟ੍ਠੁ ਉਪਧਾਰੇਤ੍ਵਾ ਪਸਨ੍ਨਮਾਨਸੋ ‘‘ਹਨ੍ਦਾਹਂ ਭਗਵਾ ਗਮਿਸ੍ਸਾਮੀ’’ਤਿ ਵਤ੍ਵਾ ਰਤਨਤ੍ਤਯਗੁਣਂ ਅਨੁਸ੍ਸਰਨ੍ਤੋ ਤਂਯੇਵ ਮਗ੍ਗਂ ਪਟਿਪਜ੍ਜਿ. ਭਗਵਾਪਿ ‘‘ਅਲਂ ਇਮਸ੍ਸ ਏਤ੍ਤਕਂ ਕੁਸਲਂ ਦੇਵਲੋਕੂਪਪਤ੍ਤਿਯਾ’’ਤਿ ਜੇਤਵਨਮੇਵ ਅਗਮਾਸਿ.

ਮਾਣਵਸ੍ਸ ਪਨ ਪਸਨ੍ਨਚਿਤ੍ਤਸ੍ਸ ਰਤਨਤ੍ਤਯਗੁਣਂ ਸਲ੍ਲਕ੍ਖਣਵਸੇਨ ‘‘ਸਰਣਂ ਉਪੇਮੀ’’ਤਿ ਪਵਤ੍ਤਚਿਤ੍ਤੁਪ੍ਪਾਦਤਾਯ ਸਰਣੇਸੁ ਚ, ਭਗਵਤਾ ਵੁਤ੍ਤਨਯੇਨ ਪਞ੍ਚਨ੍ਨਂ ਸੀਲਾਨਂ ਅਧਿਟ੍ਠਾਨੇਨ ਸੀਲੇਸੁ ਚ ਪਤਿਟ੍ਠਿਤਸ੍ਸ ਤੇਨੇਵ ਨਯੇਨ ਰਤਨਤ੍ਤਯਗੁਣੇ ਅਨੁਸ੍ਸਰਨ੍ਤਸ੍ਸੇਵ ਗਚ੍ਛਨ੍ਤਸ੍ਸ ਚੋਰਾ ਮਗ੍ਗੇ ਪਰਿਯੁਟ੍ਠਿਂਸੁ. ਸੋ ਤੇ ਅਗਣੇਤ੍ਵਾ ਰਤਨਤ੍ਤਯਗੁਣੇ ਅਨੁਸ੍ਸਰਨ੍ਤੋਯੇਵ ਗਚ੍ਛਤਿ. ਤਞ੍ਚੇਕੋ ਚੋਰੋ ਗੁਮ੍ਬਨ੍ਤਰਂ ਉਪਨਿਸ੍ਸਾਯ ਠਿਤੋ ਵਿਸਪੀਤੇਨ ਸਰੇਨ ਸਹਸਾਵ ਵਿਜ੍ਝਿਤ੍ਵਾ ¶ ਜੀਵਿਤਕ੍ਖਯਂ ਪਾਪੇਤ੍ਵਾ ਕਹਾਪਣਭਣ੍ਡਿਕਂ ਗਹੇਤ੍ਵਾ ਅਤ੍ਤਨੋ ਸਹਾਯੇਹਿ ਸਦ੍ਧਿਂ ਪਕ੍ਕਾਮਿ. ਮਾਣਵੋ ਪਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਤਿਂਸਯੋਜਨਿਕੇ ਕਨਕਵਿਮਾਨੇ ਸੁਤ੍ਤਪ੍ਪਬੁਦ੍ਧੋ ਵਿਯ ਅਚ੍ਛਰਾਸਹਸ੍ਸਪਰਿਵੁਤੋ ਸਟ੍ਠਿਸਕਟਭਾਰਾਲਙ੍ਕਾਰਪਟਿਮਣ੍ਡਿਤਤ੍ਤਭਾਵੋ ਨਿਬ੍ਬਤ੍ਤਿ, ਤਸ੍ਸ ਵਿਮਾਨਸ੍ਸ ਆਭਾ ਸਾਤਿਰੇਕਾਨਿ ਵੀਸਤਿਯੋਜਨਾਨਿ ਫਰਿਤ੍ਵਾ ਤਿਟ੍ਠਤਿ.

ਅਥ ਮਾਣਵਂ ਕਾਲਕਤਂ ਦਿਸ੍ਵਾ ਸੇਤਬ੍ਯਗਾਮਵਾਸਿਨੋ ਮਨੁਸ੍ਸਾ ਸੇਤਬ੍ਯਂ ਗਨ੍ਤ੍ਵਾ ਤਸ੍ਸ ਮਾਤਾਪਿਤੂਨਂ ¶ ਉਕ੍ਕਟ੍ਠਗਾਮਵਾਸਿਨੋ ਚ ਉਕ੍ਕਟ੍ਠਂ ਗਨ੍ਤ੍ਵਾ ਬ੍ਰਾਹ੍ਮਣਸ੍ਸ ਪੋਕ੍ਖਰਸਾਤਿਸ੍ਸ ਕਥੇਸੁਂ. ਤਂ ਸੁਤ੍ਵਾ ਤਸ੍ਸ ਮਾਤਾਪਿਤਰੋ ਞਾਤਿਮਿਤ੍ਤਾ ਬ੍ਰਾਹ੍ਮਣੋ ਚ ਪੋਕ੍ਖਰਸਾਤਿ ਸਪਰਿਵਾਰਾ ਅਸ੍ਸੁਮੁਖਾ ਰੋਦਮਾਨਾ ਤਂ ਪਦੇਸਂ ਅਗਮਂਸੁ, ਯੇਭੁਯ੍ਯੇਨ ਸੇਤਬ੍ਯਵਾਸਿਨੋ ਚ ਉਕ੍ਕਟ੍ਠਵਾਸਿਨੋ ਚ ਇਚ੍ਛਾਨਙ੍ਗਲਵਾਸਿਨੋ ਚ ਸਨ੍ਨਿਪਤਿਂਸੁ, ਮਹਾਸਮਾਗਮੋ ਅਹੋਸਿ. ਅਥ ਮਾਣਵਸ੍ਸ ਮਾਤਾਪਿਤਰੋ ਮਗ੍ਗਸ੍ਸ ਅਵਿਦੂਰੇ ਚਿਤਕਂ ਸਜ੍ਜੇਤ੍ਵਾ ਸਰੀਰਕਿਚ੍ਚਂ ਕਾਤੁਂ ਆਰਭਿਂਸੁ.

ਅਥ ਭਗਵਾ ਚਿਨ੍ਤੇਸਿ ‘‘ਮਯਿ ਗਤੇ ਛਤ੍ਤਮਾਣਵੋ ਮਂ ਵਨ੍ਦਿਤੁਂ ਆਗਮਿਸ੍ਸਤਿ, ਆਗਤਞ੍ਚ ਤਂ ਕਤਕਮ੍ਮਂ ਕਥਾਪੇਨ੍ਤੋ ਕਮ੍ਮਫਲਂ ਪਚ੍ਚਕ੍ਖਂ ਕਾਰੇਤ੍ਵਾ ਧਮ੍ਮਂ ਦੇਸੇਸ੍ਸਾਮਿ, ਏਵਂ ਮਹਾਜਨਸ੍ਸ ਧਮ੍ਮਾਭਿਸਮਯੋ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਤਂ ਪਦੇਸਂ ਉਪਗਨ੍ਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ¶ ਨਿਸੀਦਿ ਛਬ੍ਬਣ੍ਣਬੁਦ੍ਧਰਂਸਿਯੋ ਵਿਸ੍ਸਜ੍ਜੇਨ੍ਤੋ. ਅਥ ਛਤ੍ਤਮਾਣਵਦੇਵਪੁਤ੍ਤੋਪਿ ਅਤ੍ਤਨੋ ਸਮ੍ਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ, ਤਸ੍ਸਾ ਕਾਰਣਂ ਉਪਧਾਰੇਨ੍ਤੋ ਸਰਣਗਮਨਞ੍ਚ ਸੀਲਸਮਾਦਾਨਞ੍ਚ ਦਿਸ੍ਵਾ, ਵਿਮ੍ਹਯਜਾਤੋ ਭਗਵਤਿ ਸਞ੍ਜਾਤਪਸਾਦਬਹੁਮਾਨੋ ‘‘ਇਦਾਨੇਵਾਹਂ ਗਨ੍ਤ੍ਵਾ ਭਗਵਨ੍ਤਞ੍ਚ ਭਿਕ੍ਖੁਸਙ੍ਘਞ੍ਚ ਵਨ੍ਦਿਸ੍ਸਾਮਿ, ਰਤਨਤ੍ਤਯਗੁਣੇ ਚ ਮਹਾਜਨਸ੍ਸ ਪਾਕਟੇ ਕਰਿਸ੍ਸਾਮੀ’’ਤਿ ਕਤਞ੍ਞੁਤਂ ਨਿਸ੍ਸਾਯ ਸਕਲਂ ਤਂ ਅਰਞ੍ਞਪਦੇਸਂ ਏਕਾਲੋਕਂ ਕਰੋਨ੍ਤੋ, ਸਹ ਵਿਮਾਨੇਨ ਆਗਨ੍ਤ੍ਵਾ ਵਿਮਾਨਤੋ ਓਰੁਯ੍ਹ ਮਹਤਾ ਪਰਿਵਾਰੇਨ ਸਦ੍ਧਿਂ ਦਿਸ੍ਸਮਾਨਰੂਪੋ ਉਪਸਙ੍ਕਮਿਤ੍ਵਾ ਭਗਵਤੋ ¶ ਪਾਦੇਸੁ ਸਿਰਸਾ ਨਿਪਤਨ੍ਤੋ ਅਭਿਵਾਦੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਏਕਮਨ੍ਤਂ ਅਟ੍ਠਾਸਿ. ਤਂ ਦਿਸ੍ਵਾ ਮਹਾਜਨੋ ‘‘ਕੋ ਨੁ ਖੋ ਅਯਂ ਦੇਵੋ ਵਾ ਬ੍ਰਹ੍ਮਾ ਵਾ’’ਤਿ ਅਚ੍ਛਰਿਯਬ੍ਭੁਤਜਾਤੋ ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਪਰਿਵਾਰੇਸਿ. ਭਗਵਾ ਤੇਨ ਕਤਪੁਞ੍ਞਕਮ੍ਮਂ ਪਾਕਟਂ ਕਾਤੁਂ –

‘‘ਨ ਤਥਾ ਤਪਤਿ ਨਭੇ ਸੂਰਿਯੋ, ਚਨ੍ਦੋ ਚ ਨ ਭਾਸਤਿ ਨ ਫੁਸ੍ਸੋ;

ਯਥਾ ਅਤੁਲਮਿਦਂ ਮਹਪ੍ਪਭਾਸਂ, ਕੋ ਨੁ ਤ੍ਵਂ ਤਿਦਿਵਾ ਮਹਿਂ ਉਪਾਗਾ.

‘‘ਛਿਨ੍ਦਤਿ ਰਂਸੀ ਪਭਙ੍ਕਰਸ੍ਸ, ਸਾਧਿਕਵੀਸਤਿਯੋਜਨਾਨਿ ਆਭਾ;

ਰਤ੍ਤਿਮਪਿ ਯਥਾ ਦਿਵਂ ਕਰੋਤਿ, ਪਰਿਸੁਦ੍ਧਂ ਵਿਮਲਂ ਸੁਭਂ ਵਿਮਾਨਂ.

‘‘ਬਹੁਪਦੁਮਵਿਚਿਤ੍ਰਪੁਣ੍ਡਰੀਕਂ, ਵੋਕਿਣ੍ਣਂ ਕੁਸੁਮੇਹਿ ਨੇਕਚਿਤ੍ਤਂ;

ਅਰਜਵਿਰਜਹੇਮਜਾਲਛਨ੍ਨਂ, ਆਕਾਸੇ ਤਪਤਿ ਯਥਾਪਿ ਸੂਰਿਯੋ.

‘‘ਰਤ੍ਤਮ੍ਬਰਪੀਤਵਾਸਸਾਹਿ, ਅਗਰੁਪਿਯਙ੍ਗੁਚਨ੍ਦਨੁਸ੍ਸਦਾਹਿ;

ਕਞ੍ਚਨਤਨੁਸਨ੍ਨਿਭਤ੍ਤਚਾਹਿ, ਪਰਿਪੂਰਂ ਗਗਨਂਵ ਤਾਰਕਾਹਿ.

‘‘ਨਰਨਾਰਿਯੋ ¶ ¶ ਬਹੁਕੇਤ੍ਥਨੇਕਵਣ੍ਣਾ, ਕੁਸੁਮਵਿਭੂਸਿਤਾਭਰਣੇਤ੍ਥ ਸੁਮਨਾ;

ਅਨਿਲਪਮੁਞ੍ਚਿਤਾ ਪਵਨ੍ਤਿ ਸੁਰਭਿਂ, ਤਪਨਿਯਵਿਤਤਾ ਸੁਵਣ੍ਣਛਨ੍ਨਾ.

‘‘ਕਿਸ੍ਸ ਸਂਯਮਸ੍ਸ ਅਯਂ ਵਿਪਾਕੋ, ਕੇਨਾਸਿ ਕਮ੍ਮਫਲੇਨਿਧੂਪਪਨ੍ਨੋ;

ਯਥਾ ¶ ਚ ਤੇ ਅਧਿਗਤਮਿਦਂ ਵਿਮਾਨਂ, ਤਦਨੁਪਦਂ ਅਵਚਾਸਿ ਇਗ੍ਘ ਪੁਟ੍ਠੋ’’ਤਿ. –

੮੮੬. ਤਤ੍ਥ ਤਪਤੀਤਿ ਦਿਪ੍ਪਤਿ. ਨਭੇਤਿ ਆਕਾਸੇ. ਫੁਸ੍ਸੋਤਿ ਫੁਸ੍ਸਤਾਰਕਾ. ਅਤੁਲਨ੍ਤਿ ਅਨੁਪਮਂ, ਅਪ੍ਪਮਾਣਂ ਵਾ. ਇਦਂ ਵੁਤ੍ਤਂ ਹੋਤਿ – ਯਥਾ ਇਦਂ ਤਵ ਵਿਮਾਨਂ ਅਨੁਪਮਂ ਅਪ੍ਪਮਾਣਂ ਪਭਸ੍ਸਰਭਾਵੇਨ ਤਤੋ ਏਵ ਮਹਪ੍ਪਭਾਸਂ ਆਕਾਸੇ ਦਿਪ੍ਪਤਿ, ਨ ਤਥਾ ਤਾਰਕਰੂਪਾਨਿ ਦਿਪ੍ਪਨ੍ਤਿ, ਨ ਚਨ੍ਦੋ, ਤਾਨਿ ਤਾਵ ਤਿਟ੍ਠਨ੍ਤੁ, ਨਾਪਿ ਸੂਰਿਯੋ ਦਿਪ੍ਪਤਿ, ਏਵਂਭੂਤੋ ਕੋ ਨੁ ਤ੍ਵਂ ਦੇਵਲੋਕਤੋ ਇਮਂ ਭੂਮਿਪਦੇਸਂ ਉਪਗਤੋ, ਤਂ ਪਾਕਟਂ ਕਤ੍ਵਾ ਇਮਸ੍ਸ ਮਹਾਜਨਸ੍ਸ ਕਥੇਹੀਤਿ.

੮੯੦. ਛਿਨ੍ਦਤੀਤਿ ਵਿਚ੍ਛਿਨ੍ਦਤਿ, ਪਵਤ੍ਤਿਤੁਂ ਅਦੇਨ੍ਤੋ ਪਟਿਹਨਤੀਤਿ ਅਤ੍ਥੋ. ਰਂਸੀਤਿ ਰਸ੍ਮਿਯੋ. ਪਭਙ੍ਕਰਸ੍ਸਾਤਿ ਸੂਰਿਯਸ੍ਸ. ਤਸ੍ਸ ਚ ਵਿਮਾਨਸ੍ਸ ਪਭਾ ਸਮਨ੍ਤਤੋ ਪਞ੍ਚਵੀਸਤਿ ਯੋਜਨਾਨਿ ਫਰਿਤ੍ਵਾ ਤਿਟ੍ਠਤਿ. ਤੇਨਾਹ ‘‘ਸਾਧਿਕਵੀਸਤਿਯੋਜਨਾਨਿ ਆਭਾ’’ਤਿ. ਰਤ੍ਤਿਮਪਿ ਯਥਾ ਦਿਵਂ ਕਰੋਤੀਤਿ ਅਤ੍ਤਨੋ ਪਭਾਯ ਅਨ੍ਧਕਾਰਂ ਵਿਧਮਨ੍ਤਂ ਰਤ੍ਤਿਭਾਗਮ੍ਪਿ ਦਿਵਸਭਾਗਂ ਵਿਯ ਕਰੋਤਿ. ਪਰਿਸਮਨ੍ਤਤੋ ਅਨ੍ਤੋ ਚੇਵ ਬਹਿ ਚ ਸੁਦ੍ਧਤਾਯ ਪਰਿਸੁਦ੍ਧਂ. ਸਬ੍ਬਸੋ ਮਲਾਭਾਵੇਨ ਵਿਮਲਂ. ਸੁਨ੍ਦਰਤਾਯ ਸੁਭਂ.

੮੯੧. ਬਹੁਪਦੁਮਵਿਚਿਤ੍ਰਪੁਣ੍ਡਰੀਕਨ੍ਤਿ ਬਹੁਵਿਧਰਤ੍ਤਕਮਲਞ੍ਚੇਵ ਵਿਚਿਤ੍ਤਵਣ੍ਣਸੇਤਕਮਲਞ੍ਚ. ਸੇਤਕਮਲਂ ਪਦੁਮਂ, ਰਤ੍ਤਕਮਲਂ ਪੁਣ੍ਡਰੀਕਨ੍ਤਿ ਵਦਨ੍ਤਿ. ਵੋਕਿਣ੍ਣਂ ਕੁਸੁਮੇਹੀਤਿ ਅਞ੍ਞੇਹਿ ਚ ਨਾਨਾਵਿਧੇਹਿ ਪੁਪ੍ਫੇਹਿ ਸਮੋਕਿਣ੍ਣਂ. ਨੇਕਚਿਤ੍ਤਨ੍ਤਿ ¶ ਮਾਲਾਕਮ੍ਮਲਤਾਕਮ੍ਮਾਦਿਨਾਨਾਵਿਧਵਿਚਿਤ੍ਤਂ. ਅਰਜਵਿਰਜਹੇਮਜਾਲਛਨ੍ਨਨ੍ਤਿ ਸਯਂ ਅਪਗਤਰਜਂ ਵਿਰਜੇਨ ਨਿਦ੍ਦੋਸੇਨ ਕਞ੍ਚਨਜਾਲੇਨ ਛਾਦਿਤਂ.

੮੯੨. ਰਤ੍ਤਮ੍ਬਰਪੀਤਵਾਸਸਾਹੀਤਿ ਰਤ੍ਤਵਤ੍ਥਾਹਿ ਚੇਵ ਪੀਤਵਤ੍ਥਾਹਿ ਚ. ਏਕਾ ਹਿ ਰਤ੍ਤਂ ਦਿਬ੍ਬਵਤ੍ਥਂ ਨਿਵਾਸੇਤ੍ਵਾ ਪੀਤਂ ਉਤ੍ਤਰਿਯਂ ਕਰੋਤਿ, ਅਪਰਾ ਪੀਤਂ ਨਿਵਾਸੇਤ੍ਵਾ ਰਤ੍ਤਂ ਉਤ੍ਤਰਿਯਂ ਕਰੋਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਰਤ੍ਤਮ੍ਬਰਪੀਤਵਾਸਸਾਹੀ’’ਤਿ ¶ . ਅਗਰੁਪਿਯਙ੍ਗੁਚਨ੍ਦਨੁਸ੍ਸਦਾਹੀਤਿ ਅਗਰੁਗਨ੍ਧੇਨ ਪਿਯਙ੍ਗੁਮਾਲਾਹਿ ਚਨ੍ਦਨਗਨ੍ਧੇਹਿ ਚ ਉਸ੍ਸਦਾਹਿ, ਉਸ੍ਸਨ੍ਨਦਿਬ੍ਬਾਗਰੁਗਨ੍ਧਾਦਿਕਾਹੀਤਿ ਅਤ੍ਥੋ. ਕਞ੍ਚਨਤਨੁਸਨ੍ਨਿਭਤ੍ਤਚਾਹੀਤਿ ¶ ਕਨਕਸਦਿਸਸੁਖੁਮਚ੍ਛਵੀਹਿ. ਪਰਿਪੂਰਨ੍ਤਿ ਤਹਂ ਤਹਂ ਵਿਚਰਨ੍ਤੀਹਿ ਸਙ੍ਗੀਤਿਪਸੁਤਾਹਿ ਚ ਪਰਿਪੁਣ੍ਣਂ.

੮੯੩. ਬਹੁਕੇਤ੍ਥਾਤਿ ਬਹੁਕਾ ਏਤ੍ਥ. ਅਨੇਕਵਣ੍ਣਾਤਿ ਨਾਨਾਰੂਪਾ. ਕੁਸਮਵਿਭੂਸਿਤਾਭਰਣਾਤਿ ਵਿਸੇਸਤੋ ਸੁਰਭਿਵਾਯਨਤ੍ਥਂ ਦਿਬ੍ਬਕੁਸੁਮੇਹਿ ਅਲਙ੍ਕਤਦਿਬ੍ਬਾਭਰਣਾ. ਏਤ੍ਥਾਤਿ ਏਤਸ੍ਮਿਂ ਵਿਮਾਨੇ. ਸੁਮਨਾਤਿ ਸੁਨ੍ਦਰਮਨਾ ਪਮੁਦਿਤਚਿਤ੍ਤਾ. ਅਨਿਲਪਮੁਞ੍ਚਿਤਾ ਪਵਨ੍ਤਿ ਸੁਰਭਿਨ੍ਤਿ ਅਨਿਲੇਨ ਪਮੁਞ੍ਚਿਤਗਨ੍ਧਾਨਂ ਪੁਪ੍ਫਾਨਂ ਵਾਯੁਨਾ ਵਿਮੁਤ੍ਤਪਤ੍ਤਪੁਟਂ ਵਿਯ ਵਿਬਨ੍ਧਤਾਯ ਵਿਕਸਿਤਤਾਯ ਚ ਸੁਗਨ੍ਧਂ ਪਵਾਯਨ੍ਤਿ. ‘‘ਅਨਿਲਪਧੂਪਿਤਾ’’ਤਿਪਿ ਪਠਨ੍ਤਿ, ਵਾਤੇਨ ਮਨ੍ਦਂ ਆਵੁਯ੍ਹਮਾਨਾ ਹੇਮਮਯਪੁਪ੍ਫਾਤਿ ਅਤ੍ਥੋ. ਕਨਕਚੀਰਕਾਦੀਹਿ ਵੇਣਿਆਦੀਸੁ ਓਤਤਤਾਯ ਤਪਨਿਯਵਿਤਤਾ. ਯੇਭੁਯ੍ਯੇਨ ਕਞ੍ਚਨਾਭਰਣੇਹਿ ਅਚ੍ਛਾਦਿਤਸਰੀਰਤਾਯ ਸੁਵਣ੍ਣਛਨ੍ਨਾ. ਨਰਨਾਰਿਯੋਤਿ ਦੇਵਪੁਤ੍ਤਾ ਦੇਵਧੀਤਰੋ ਚ ਬਹੁਕਾ ਏਤ੍ਥ ਤਵ ਵਿਮਾਨੇਤਿ ਦਸ੍ਸੇਤਿ.

੮੯੪. ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ ਪੁਟ੍ਠੋਤਿ ਪੁਚ੍ਛਿਤੋ ਇਮਸ੍ਸ ਮਹਾਜਨਸ੍ਸ ਕਮ੍ਮਫਲਪਚ੍ਚਕ੍ਖਭਾਵਾਯਾਤਿ ਅਧਿਪ੍ਪਾਯੋ.

ਤਤੋ ਦੇਵਪੁਤ੍ਤੋ ਇਮਾਹਿ ਗਾਥਾਹਿ ਬ੍ਯਾਕਾਸਿ –

‘‘ਸਯਮਿਧ ਪਥੇ ਸਮੇਚ੍ਚ ਮਾਣਵੇਨ, ਸਤ੍ਥਾਨੁਸਾਸਿ ਅਨੁਕਮ੍ਪਮਾਨੋ;

ਤਵ ਰਤਨਵਰਸ੍ਸ ਧਮ੍ਮਂ ਸੁਤ੍ਵਾ, ਕਰਿਸ੍ਸਾਮੀਤਿ ਚ ਬ੍ਰਵਿਤ੍ਥ ਛਤ੍ਤੋ.

‘‘ਜਿਨਵਰਪਵਰਂ ¶ ¶ ਉਪੇਹਿ ਸਰਣਂ, ਧਮ੍ਮਞ੍ਚਾਪਿ ਤਥੇਵ ਭਿਕ੍ਖੁਸਙ੍ਘਂ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ, ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ.

‘‘ਮਾ ਚ ਪਾਣਵਧਂ ਵਿਵਿਧਂ ਚਰਸ੍ਸੁ ਅਸੁਚਿਂ,

ਨ ਹਿ ਪਾਣੇਸੁ ਅਸਞ੍ਞਤਂ ਅਵਣ੍ਣਯਿਂਸੁ ਸਪ੍ਪਞ੍ਞਾ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ, ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ.

‘‘ਮਾ ਚ ਪਰਜਨਸ੍ਸ ਰਕ੍ਖਿਤਮ੍ਪਿ, ਆਦਾਤਬ੍ਬਮਮਞ੍ਞਿਥੋ ਅਦਿਨ੍ਨਂ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ, ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ.

‘‘ਮਾ ¶ ਚ ਪਰਜਨਸ੍ਸ ਰਕ੍ਖਿਤਾਯੋ, ਪਰਭਰਿਯਾ ਅਗਮਾ ਅਨਰਿਯਮੇਤਂ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ, ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ.

‘‘ਮਾ ਚ ਵਿਤਥਂ ਅਞ੍ਞਥਾ ਅਭਾਣਿ, ਨ ਹਿ ਮੁਸਾਵਾਦਂ ਅਵਣ੍ਣਯਿਂਸੁ ਸਪ੍ਪਞ੍ਞਾ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ, ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ.

‘‘ਯੇਨ ਚ ਪੁਰਿਸਸ੍ਸ ਅਪੇਤਿ ਸਞ੍ਞਾ, ਤਂ ਮਜ੍ਜਂ ਪਰਿਵਜ੍ਜਯਸ੍ਸੁ ਸਬ੍ਬਂ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ, ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ.

‘‘ਸ੍ਵਾਹਂ ਇਧ ਪਞ੍ਚ ਸਿਕ੍ਖਾ ਕਰਿਤ੍ਵਾ, ਪਟਿਪਜ੍ਜਿਤ੍ਵਾ ਤਥਾਗਤਸ੍ਸ ਧਮ੍ਮੇ;

ਦ੍ਵੇਪਥਮਗਮਾਸਿਂ ਚੋਰਮਜ੍ਝੇ, ਤੇ ਮਂ ਤਤ੍ਥ ਵਧਿਂਸੁ ਭੋਗਹੇਤੁ.

‘‘ਏਤ੍ਤਕਮਿਦਂ ¶ ਅਨੁਸ੍ਸਰਾਮਿ ਕੁਸਲਂ, ਤਤੋ ਪਰਂ ਨ ਮੇ ਵਿਜ੍ਜਤਿ ਅਞ੍ਞਂ;

ਤੇਨ ¶ ਸੁਚਰਿਤੇਨ ਕਮ੍ਮੁਨਾਹਂ, ਉਪ੍ਪਨ੍ਨੋ ਤਿਦਿਵੇਸੁ ਕਾਮਕਾਮੀ.

‘‘ਪਸ੍ਸ ਖਣਮੁਹੁਤ੍ਤਸਞ੍ਞਮਸ੍ਸ, ਅਨੁਧਮ੍ਮਪ੍ਪਟਿਪਤ੍ਤਿਯਾ ਵਿਪਾਕਂ;

ਜਲਮਿਵ ਯਸਸਾ ਸਮੇਕ੍ਖਮਾਨਾ, ਬਹੁਕਾਮਂ ਪਿਹਯਨ੍ਤਿ ਹੀਨਕਮ੍ਮਾ.

‘‘ਪਸ੍ਸ ਕਤਿਪਯਾਯ ਦੇਸਨਾਯ, ਸੁਗਤਿਞ੍ਚਮ੍ਹਿ ਗਤੋ ਸੁਖਞ੍ਚ ਪਤ੍ਤੋ;

ਯੇ ਚ ਤੇ ਸਤਤਂ ਸੁਣਨ੍ਤਿ ਧਮ੍ਮਂ, ਮਞ੍ਞੇ ਤੇ ਅਮਤਂ ਫੁਸਨ੍ਤਿ ਖੇਮਂ.

‘‘ਅਪ੍ਪਮ੍ਪਿ ਕਤਂ ਮਹਾਵਿਪਾਕਂ, ਵਿਪੁਲਂ ਹੋਤਿ ਤਥਾਗਤਸ੍ਸ ਧਮ੍ਮੇ;

ਪਸ੍ਸ ਕਤਪੁਞ੍ਞਤਾਯ ਛਤ੍ਤੋ, ਓਭਾਸੇਤਿ ਪਥਵਿਂ ਯਥਾਪਿ ਸੂਰਿਯੋ.

‘‘ਕਿਮਿਦਂ ਕੁਸਲਂ ਕਿਮਾਚਰੇਮ, ਇਚ੍ਚੇਕੇ ਹਿ ਸਮੇਚ੍ਚ ਮਨ੍ਤਯਨ੍ਤਿ;

ਤੇ ਮਯਂ ਪੁਨਰੇਵ ਲਦ੍ਧ ਮਾਨੁਸਤ੍ਤਂ, ਪਟਿਪਨ੍ਨਾ ਵਿਹਰੇਮੁ ਸੀਲਵਨ੍ਤੋ.

‘‘ਬਹੁਕਾਰੋ ਅਨੁਕਮ੍ਪਕੋ ਚ ਸਤ੍ਥਾ, ਇਤਿ ਮੇ ਸਤਿ ਅਗਮਾ ਦਿਵਾ ਦਿਵਸ੍ਸ;

ਸ੍ਵਾਹਂ ਉਪਗਤੋਮ੍ਹਿ ਸਚ੍ਚਨਾਮਂ, ਅਨੁਕਮ੍ਪਸ੍ਸੁ ਪੁਨਪਿ ਸੁਣੇਮ੍ਹ ਧਮ੍ਮਂ.

‘‘ਯੇ ¶ ਚਿਧ ਪਜਹਨ੍ਤਿ ਕਾਮਰਾਗਂ, ਭਵਰਾਗਾਨੁਸਯਞ੍ਚ ਪਹਾਯ ਮੋਹਂ;

ਨ ਚ ਤੇ ਪੁਨ ਮੁਪੇਨ੍ਤਿ ਗਬ੍ਭਸੇਯ੍ਯਂ, ਪਰਿਨਿਬ੍ਬਾਨਗਤਾ ਹਿ ਸੀਤਿਭੂਤਾ’’ਤਿ.

੮੯੫. ਤਤ੍ਥ ¶ ਸਯਮਿਧ ਪਥੇ ਸਮੇਚ੍ਚ ਮਾਣਵੇਨਾਤਿ ਇਧ ਇਮਸ੍ਮਿਂ ਪਥੇ ਮਹਾਮਗ੍ਗੇ ਸਯਮੇਵ ਉਪਗਤੇਨ ਮਾਣਵੇਨ ਬ੍ਰਾਹ੍ਮਣਕੁਮਾਰੇਨ ਸਮੇਚ੍ਚ ਸਮਾਗਨ੍ਤ੍ਵਾ. ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਸਤ੍ਤਾਨਂ ਯਥਾਰਹਮਨੁਸਾਸਨਤੋ ਸਤ੍ਥਾ ਭਗਵਾ, ਤ੍ਵਂ ਯਂ ਮਾਣਵਂ ਯਥਾਧਮ੍ਮਂ ¶ ਅਨੁਸਾਸਿ ਅਨੁਕਮ੍ਪਮਾਨੋ ਅਨੁਗ੍ਗਣ੍ਹਨ੍ਤੋ, ਤਵ ਰਤਨਵਰਸ੍ਸ ਅਗ੍ਗਰਤਨਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ, ਤਂ ਧਮ੍ਮਂ ਸੁਤ੍ਵਾ ਇਤਿ ਏਵਂ ਕਰਿਸ੍ਸਾਮਿ ਯਥਾਨੁਸਿਟ੍ਠਂ ਪਟਿਪਜ੍ਜਿਸ੍ਸਾਮੀਤਿ, ਸੋ ਛਤ੍ਤੋ ਛਤ੍ਤਨਾਮਕੋ ਮਾਣਵੋ ਬ੍ਰਵਿਤ੍ਥ ਕਥੇਸੀਤਿ ਪਦਯੋਜਨਾ.

੮੯੬. ਏਵਂ ਯਥਾਪੁਚ੍ਛਿਤਂ ਕਮ੍ਮਂ ਕਾਰਣਤੋ ਦਸ੍ਸੇਤ੍ਵਾ ਇਦਾਨਿ ਤਂ ਸਰੂਪਤੋ ਵਿਭਾਗਤੋ ਚ ਦਸ੍ਸੇਨ੍ਤੋ ਸਤ੍ਥਾਰਾ ਸਮਾਦਪਿਤਭਾਵਂ ਅਤ੍ਤਨਾ ਚ ਤਤ੍ਥ ਪਚ੍ਛਾ ਪਤਿਟ੍ਠਿਤਭਾਵਂ ਦਸ੍ਸੇਤੁਂ ‘‘ਜਿਨਵਰਪਵਰ’’ਨ੍ਤਿਆਦਿਮਾਹ. ਤਤ੍ਥ ਨੋਤਿ ਪਠਮਂ ਅਵੋਚਹਂ ਭਨ੍ਤੇਤਿ ਭਨ੍ਤੇ ਭਗਵਾ ‘‘ਸਰਣਗਮਨਂ ਜਾਨਾਸੀ’’ਤਿ ਤਯਾ ਵੁਤ੍ਤੋ ‘‘ਨੋ’’ਤਿ ਨ ‘‘ਜਾਨਾਮੀ’’ਤਿ ਪਠਮਂ ਅਵੋਚਂ ਅਹਂ. ਪਚ੍ਛਾ ਤੇ ਵਚਨਂ ਤਥੇਵਕਾਸਿਨ੍ਤਿ ਪਚ੍ਛਾ ਤਯਾ ਵੁਤ੍ਤਂ ਕਥਂ ਪਰਿਵਤ੍ਤੇਨ੍ਤੋ ਤਵ ਵਚਨਂ ਤਥੇਵ ਅਕਾਸਿਂ ਪਟਿਪਜ੍ਜਿਂ, ਤੀਣਿਪਿ ਸਰਣਾਨਿ ਉਪਗਚ੍ਛਿਨ੍ਤਿ ਅਤ੍ਥੋ.

੮੯੭. ਵਿਵਿਧਨ੍ਤਿ ਉਚ੍ਚਾਵਚਂ, ਅਪ੍ਪਸਾਵਜ੍ਜਂ ਮਹਾਸਾਵਜ੍ਜਞ੍ਚਾਤਿ ਅਤ੍ਥੋ. ਮਾ ਚਰਸ੍ਸੂਤਿ ਮਾ ਅਕਾਸਿ. ਅਸੁਚਿਨ੍ਤਿ ਕਿਲੇਸਾਸੁਚਿਮਿਸ੍ਸਤਾਯ ਨ ਸੁਚਿਂ. ਪਾਣੇਸੁ ਅਸਞ੍ਞਤਨ੍ਤਿ ਪਾਣਘਾਤਤੋ ਅਵਿਰਤਂ. ਨ ਹਿ ਅਵਣ੍ਣਯਿਂਸੂਤਿ ਨ ਹਿ ਵਣ੍ਣਯਨ੍ਤਿ. ਪਚ੍ਚੂਪ੍ਪਨ੍ਨਕਾਲਤ੍ਥੇ ਹਿ ਇਦਂ ਅਤੀਤਕਾਲਵਚਨਂ. ਅਥ ਵਾ ‘‘ਅਵਣ੍ਣਯਿਂਸੂ’’ਤਿ ਏਕਦੇਸੇਨ ਸਕਲਸ੍ਸ ਕਾਲਸ੍ਸ ਉਪਲਕ੍ਖਣਂ, ਤਸ੍ਮਾ ਯਥਾ ਨ ਵਣ੍ਣਯਿਂਸੁ ਅਤੀਤਮਦ੍ਧਾਨਂ, ਏਵਂ ਏਤਰਹਿਪਿ ਨ ਵਣ੍ਣਯਨ੍ਤਿ, ਅਨਾਗਤੇਪਿ ਨ ਵਣ੍ਣਯਿਸ੍ਸਨ੍ਤੀਤਿ ਵੁਤ੍ਤਂ ਹੋਤਿ.

੮੯੮-੯੦੦. ਪਰਜਨਸ੍ਸ ਰਕ੍ਖਿਤਨ੍ਤਿ ਪਰਪਰਿਗ੍ਗਹਿਤਵਤ੍ਥੁ. ਤੇਨਾਹ ‘‘ਅਦਿਨ੍ਨ’’ਨ੍ਤਿ. ਮਾ ਅਗਮਾਤਿ ਮਾ ਅਜ੍ਝਾਚਰਿ. ਵਿਤਥਨ੍ਤਿ ਅਤਥਂ, ਮੁਸਾਤਿ ਅਤ੍ਥੋ. ਅਞ੍ਞਥਾਤਿ ਅਞ੍ਞਥਾਵ, ਵਿਤਥਸਞ੍ਞੀ ਏਵਂ ਵਿਤਥਨ੍ਤਿ ਜਾਨਨ੍ਤੋ ਏਵਂ ਮਾ ਭਣੀਤਿ ਅਤ੍ਥੋ.

੯੦੧. ਯੇਨਾਤਿ ¶ ¶ ਯੇਨ ਮਜ੍ਜੇਨ, ਪੀਤੇਨਾਤਿ ਅਧਿਪ੍ਪਾਯੋ. ਅਪੇਤੀਤਿ ਵਿਗਚ੍ਛਤਿ. ਸਞ੍ਞਾਤਿ ਧਮ੍ਮਸਞ੍ਞਾ, ਲੋਕਸਞ੍ਞਾ ਏਵ ਵਾ. ਸਬ੍ਬਨ੍ਤਿ ਅਨਵਸੇਸਂ, ਬੀਜਤੋ ਪਟ੍ਠਾਯਾਤਿ ਅਤ੍ਥੋ.

੯੦੨. ਸ੍ਵਾਹਨ੍ਤਿ ¶ ਸੋ ਤਦਾ ਛਤ੍ਤਮਾਣਵਭੂਤੋ ਅਹਂ. ਇਧ ਇਮਸ੍ਮਿਂ ਮਗ੍ਗਪਦੇਸੇ, ਇਮਸ੍ਮਿਂ ਵਾ ਤਵ ਸਾਸਨੇ. ਤੇਨਾਹ ‘‘ਤਥਾਗਤਸ੍ਸ ਧਮ੍ਮੇ’’ਤਿ. ਪਞ੍ਚ ਸਿਕ੍ਖਾਤਿ ਪਞ੍ਚ ਸੀਲਾਨਿ. ਕਰਿਤ੍ਵਾਤਿ ਆਦਿਯਿਤ੍ਵਾ, ਅਧਿਟ੍ਠਾਯਾਤਿ ਅਤ੍ਥੋ. ਦ੍ਵੇਪਥਨ੍ਤਿ ਦ੍ਵਿਨ੍ਨਂ ਗਾਮਸੀਮਾਨਂ ਵੇਮਜ੍ਝਭੂਤਂ ਪਥਂ, ਸੀਮਨ੍ਤਰਿਕਪਥਨ੍ਤਿ ਅਤ੍ਥੋ. ਤੇਤਿ ਤੇ ਚੋਰਾ. ਤਤ੍ਥਾਤਿ ਸੀਮਨ੍ਤਰਿਕਮਗ੍ਗੇ. ਭੋਗਹੇਤੂਤਿ ਆਮਿਸਕਿਞ੍ਚਿਕ੍ਖਨਿਮਿਤ੍ਤਂ.

੯੦੩. ਤਤੋਤਿ ਯਥਾਵੁਤ੍ਤਕੁਸਲਤੋ ਪਰਂ ਉਪਰਿ ਅਞ੍ਞਂ ਕੁਸਲਂ ਨ ਵਿਜ੍ਜਤਿ ਨ ਉਪਲਬ੍ਭਤਿ, ਯਮਹਂ ਅਨੁਸ੍ਸਰੇਯ੍ਯਨ੍ਤਿ ਅਤ੍ਥੋ. ਕਾਮਕਾਮੀਤਿ ਯਥਿਚ੍ਛਿਤਕਾਮਗੁਣਸਮਙ੍ਗੀ.

੯੦੪. ਖਣਮੁਹੁਤ੍ਤਸਞ੍ਞਮਸ੍ਸਾਤਿ ਖਣਮੁਹੁਤ੍ਤਮਤ੍ਤਂ ਪਵਤ੍ਤਸੀਲਸ੍ਸ. ਅਨੁਧਮ੍ਮਪ੍ਪਟਿਪਤ੍ਤਿਯਾਤਿ ਯਥਾਧਿਗਤਸ੍ਸ ਫਲਸ੍ਸ ਅਨੁਰੂਪਧਮ੍ਮਂ ਪਟਿਪਜ੍ਜਮਾਨਸ੍ਸ ਭਗਵਾ ਪਸ੍ਸ, ਤੁਯ੍ਹਂ ਓਵਾਦਧਮ੍ਮਸ੍ਸ ਵਾ ਅਨੁਰੂਪਾਯ ਧਮ੍ਮਪਟਿਪਤ੍ਤਿਯਾ ਵੁਤ੍ਤਨਿਯਾਮੇਨੇਵ ਸਰਣਗਮਨਸ੍ਸ ਸੀਲਸਮਾਦਾਨਸ੍ਸ ਚਾਤਿ ਅਤ੍ਥੋ. ਜਲਮਿਵ ਯਸਸਾਤਿ ਇਦ੍ਧਿਯਾ ਪਰਿਵਾਰਸਮ੍ਪਤ੍ਤਿਯਾ ਚ ਜਲਨ੍ਤਂ ਵਿਯ. ਸਮੇਕ੍ਖਮਾਨਾਤਿ ਪਸ੍ਸਨ੍ਤਾ. ਬਹੁਕਾਤਿ ਬਹਵੋ. ਪਿਹਯਨ੍ਤੀਤਿ ‘‘ਕਥਂ ਨੁ ਖੋ ਮਯਂ ਏਦਿਸਾ ਭਵੇਯ੍ਯਾਮਾ’’ਤਿ ਪਤ੍ਥੇਨ੍ਤਿ. ਹੀਨਕਮ੍ਮਾਤਿ ਮਮ ਸਮ੍ਪਤ੍ਤਿਤੋ ਨਿਹੀਨਭੋਗਾ.

੯੦੫. ਕਤਿਪਯਾਯਾਤਿ ਅਪ੍ਪਿਕਾਯ. ਯੇਤਿ ਯੇ ਭਿਕ੍ਖੂ ਚੇਵ ਉਪਾਸਕਾਦਯੋ ਚ. ਚ-ਸਦ੍ਦੋ ਬ੍ਯਤਿਰੇਕੇ. ਤੇਤਿ ਤਵ. ਸਤਤਨ੍ਤਿ ਦਿਵਸੇ ਦਿਵਸੇ.

੯੦੬. ਵਿਪੁਲਨ੍ਤਿ ਉਲ਼ਾਰਫਲਂ ਵਿਪੁਲਾਨੁਭਾਵਂ. ਤਥਾਗਤਸ੍ਸ ਧਮ੍ਮੇਤਿ ਤਥਾਗਤਸ੍ਸ ਸਾਸਨੇ ਓਵਾਦੇ ਠਤ੍ਵਾ ਕਤਨ੍ਤਿ ਯੋਜਨਾ. ਏਵਂ ਅਨੁਦ੍ਦੇਸਿਕਵਸੇਨ ਵੁਤ੍ਤਮੇਵਤ੍ਥਂ ਅਤ੍ਤੁਦ੍ਦੇਸਿਕਵਸੇਨ ਦਸ੍ਸੇਨ੍ਤੋ ‘‘ਪਸ੍ਸਾ’’ਤਿਆਦਿਮਾਹ. ਤਤ੍ਥ ਪਸ੍ਸਾਤਿ ਭਗਵਨ੍ਤਂ ਵਦਤਿ, ਅਤ੍ਤਾਨਮੇਵ ਵਾ ਅਞ੍ਞਂ ਵਿਯ ਚ ਕਤ੍ਵਾ ਵਦਤਿ.

੯੦੭. ਕਿਮਿਦਂ ¶ ¶ ਕੁਸਲਂ ਕਿਮਾਚਰੇਮਾਤਿ ਕੁਸਲਂ ਨਾਮੇਤਂ ਕਿਂਸਭਾਵਂ ਕੀਦਿਸਂ, ਕਥਂ ਵਾ ਤਂ ਆਚਰੇਯ੍ਯਾਮ. ਇਚ੍ਚੇਕੇ ਹਿ ਸਮੇਚ੍ਚ ਮਨ੍ਤਯਨ੍ਤੀਤਿ ਏਵਮੇਕੇ ਸਮੇਚ੍ਚ ਸਮਾਗਨ੍ਤ੍ਵਾ ਪਥਵਿਂ ਪਰਿਵਤ੍ਤੇਨ੍ਤਾ ਵਿਯ ਸਿਨੇਰੁਂ ਉਕ੍ਖਿਪਨ੍ਤਾ ਵਿਯ ਚ ਸੁਦੁਕ੍ਕਰਂ ਕਤ੍ਵਾ ਮਨ੍ਤਯਨ੍ਤਿ ਵਿਚਾਰੇਨ੍ਤਿ, ਮਯਂ ਪਨ ਅਕਿਚ੍ਛੇਨੇਵ ਪੁਨਪਿ ਕੁਸਲਂ ਆਚਰੇਯ੍ਯਾਮਾਤਿ ਅਧਿਪ੍ਪਾਯੋ. ਤੇਨੇਵਾਹ ‘‘ਮਯ’’ਨ੍ਤਿਆਦਿ.

੯੦੮. ਬਹੁਕਾਰੋਤਿ ਬਹੂਪਕਾਰੋ, ਮਹਾਉਪਕਾਰੋ ਵਾ. ਅਨੁਕਮ੍ਪਕੋਤਿ ਕਾਰੁਣਿਕੋ. ਮ-ਕਾਰੋ ¶ ਪਦਸਨ੍ਧਿਕਰੋ. ਇਤੀਤਿ ਏਵਂ, ਭਗਵਤੋ ਅਤ੍ਤਨਿ ਪਟਿਪਨ੍ਨਾਕਾਰਂ ਸਨ੍ਧਾਯ ਵਦਤਿ. ਮੇ ਸਤੀਤਿ ਮਯਿ ਸਤਿ ਵਿਜ੍ਜਮਾਨੇ, ਚੋਰੇਹਿ ਅਵਧਿਤੇ ਏਵਾਤਿ ਅਤ੍ਥੋ. ਦਿਵਾ ਦਿਵਸ੍ਸਾਤਿ ਦਿਵਸਸ੍ਸਪਿ ਦਿਵਾ, ਕਾਲਸ੍ਸੇਵਾਤਿ ਅਤ੍ਥੋ. ਸ੍ਵਾਹਨ੍ਤਿ ਸੋ ਛਤ੍ਤਮਾਣਵਭੂਤੋ ਅਹਂ. ਸਚ੍ਚਨਾਮਨ੍ਤਿ ‘‘ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿਆਦਿਨਾਮੇਹਿ ਅਵਿਤਥਨਾਮਂ ਭੂਤਤ੍ਥਨਾਮਂ. ਅਨੁਕਮ੍ਪਸ੍ਸੂਤਿ ਅਨੁਗ੍ਗਣ੍ਹਾਹਿ. ਪੁਨਪੀਤਿ ਭਿਯ੍ਯੋਪਿ ਸੁਣੇਮੁ, ਤਵ ਧਮ੍ਮਂ ਸੁਣੇਯ੍ਯਾਮਯੇਵਾਤਿ ਅਤ੍ਥੋ.

ਏਵਂ ਦੇਵਪੁਤ੍ਤੋ ਸਬ੍ਬਮੇਤਂ ਕਤਞ੍ਞੁਤਾਭਾਵੇ ਠਤ੍ਵਾ ਸਤ੍ਥੁ ਪਯਿਰੁਪਾਸਨੇ ਚ ਧਮ੍ਮਸ੍ਸਵਨੇ ਚ ਅਤਿਤ੍ਤਿਮੇਵ ਦੀਪੇਨ੍ਤੋ ਵਦਤਿ. ਭਗਵਾ ਦੇਵਪੁਤ੍ਤਸ੍ਸ ਚ ਤਤ੍ਥ ਸਨ੍ਨਿਪਤਿਤਪਰਿਸਾਯ ਚ ਅਜ੍ਝਾਸਯਂ ਓਲੋਕੇਤ੍ਵਾ ਅਨੁਪੁਬ੍ਬਿਕਥਂ ਕਥੇਸਿ. ਅਥ ਨੇਸਂ ਅਲ੍ਲਚਿਤ੍ਤਤਂ ਞਤ੍ਵਾ ਸਾਮੁਕ੍ਕਂਸਿਕਂ ਧਮ੍ਮਦੇਸਨਂ ਪਕਾਸੇਸਿ. ਦੇਸਨਾਪਰਿਯੋਸਾਨੇ ਦੇਵਪੁਤ੍ਤੋ ਚੇਵ ਮਾਤਾਪਿਤਰੋ ਚਸ੍ਸ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ, ਮਹਤੋ ਚ ਜਨਕਾਯਸ੍ਸ ਧਮ੍ਮਾਭਿਸਮਯੋ ਅਹੋਸਿ.

੯੦੯. ਪਠਮਫਲੇ ਪਤਿਟ੍ਠਿਤੋ ਦੇਵਪੁਤ੍ਤੋ ਉਪਰਿਮਗ੍ਗੇਸੁ ਅਤ੍ਤਨੋ ਗਰੁਚਿਤ੍ਤੀਕਾਰਂ, ਤਦਧਿਗਮਸ੍ਸ ਚ ਮਹਾਨਿਸਂਸਤਂ ਵਿਭਾਵੇਨ੍ਤੋ ‘‘ਯੇ ਚਿਧ ਪਜਹਨ੍ਤਿ ਕਾਮਰਾਗ’’ਨ੍ਤਿ ਪਰਿਯੋਸਾਨਗਾਥਮਾਹ. ਤਸ੍ਸਤ੍ਥੋ – ਯੇ ਇਧ ਇਮਸ੍ਮਿਂ ਸਾਸਨੇ ਠਿਤਾ ਪਜਹਨ੍ਤਿ ਅਨਵਸੇਸਤੋ ਸਮੁਚ੍ਛਿਨ੍ਦਨ੍ਤਿ ਕਾਮਰਾਗਂ, ਨ ਚ ਤੇ ਪੁਨ ਉਪੇਨ੍ਤਿ ¶ ਗਬ੍ਭਸੇਯ੍ਯਂ ਓਰਮ੍ਭਾਗਿਯਾਨਂ ਸਂਯੋਜਨਾਨਂ ਸਮੁਚ੍ਛਿਨ੍ਨਤ੍ਤਾ. ਯੇ ਚ ਪਨ ਪਹਾਯ ਮੋਹਂ ਸਬ੍ਬਸੋ ਸਮੁਗ੍ਘਾਤੇਤ੍ਵਾ ਭਵਰਾਗਾਨੁਸਯਞ੍ਚ ਪਜਹਨ੍ਤਿ, ਤੇ ਪੁਨ ਉਪੇਨ੍ਤਿ ਗਬ੍ਭਸੇਯ੍ਯਨ੍ਤਿ ਵਤ੍ਤਬ੍ਬਮੇਵ ਨਤ੍ਥਿ. ਕਸ੍ਮਾ? ਪਰਿਨਿਬ੍ਬਾਨਗਤਾ ਹਿ ਸੀਤਿਭੂਤਾ, ਤੇ ਹਿ ਉਤ੍ਤਮਪੁਰਿਸਾ ਅਨੁਪਾਦਿਸੇਸਾਯ ¶ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਨਂ ਗਤਾ ਏਵਂ ਇਧੇਵ ਸਬ੍ਬਵੇਦਯਿਤਾਨਂ ਸਬ੍ਬਪਰਿਲ਼ਾਹਾਨਂ ਬ੍ਯਨ੍ਤਿਭਾਵੇਨ ਸੀਤਿਭੂਤਾ.

ਇਤਿ ਦੇਵਪੁਤ੍ਤੋ ਅਤ੍ਤਨੋ ਅਰਿਯਸੋਤਸਮਾਪਨ੍ਨਭਾਵਂ ਪਵੇਦੇਨ੍ਤੋ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਦੇਸਨਾਯ ਕੂਟਂ ਗਹੇਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਭਿਕ੍ਖੁਸਙ੍ਘਸ੍ਸ ਅਪਚਿਤਿਂ ਦਸ੍ਸੇਤ੍ਵਾ ਮਾਤਾਪਿਤਰੋ ਆਪੁਚ੍ਛਿਤ੍ਵਾ ਦੇਵਲੋਕਮੇਵ ਗਤੋ, ਸਤ੍ਥਾਪਿ ਉਟ੍ਠਾਯਾਸਨਾ ਗਤੋ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਮਾਣਵਸ੍ਸ ਪਨ ਮਾਤਾਪਿਤਰੋ ਬ੍ਰਾਹ੍ਮਣੋ ਪੋਕ੍ਖਰਸਾਤਿ ਸਬ੍ਬੋ ਚ ਮਹਾਜਨੋ ਭਗਵਨ੍ਤਂ ਅਨੁਗਨ੍ਤ੍ਵਾ ਨਿਵਤ੍ਤਿ. ਭਗਵਾ ਜੇਤਵਨਂ ਗਨ੍ਤ੍ਵਾ ਸਨ੍ਨਿਪਤਿਤਾਯ ਪਰਿਸਾਯ ਇਮਂ ਵਿਮਾਨਂ ਵਿਤ੍ਥਾਰਤੋ ਕਥੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਛਤ੍ਤਮਾਣਵਕਵਿਮਾਨਵਣ੍ਣਨਾ ਨਿਟ੍ਠਿਤਾ.

ਉਚ੍ਚਮਿਦਂ ¶ ਮਣਿਥੂਣਂ ਵਿਮਾਨਨ੍ਤਿ ਕਕ੍ਕਟਕਰਸਦਾਯਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਆਰਦ੍ਧਵਿਪਸ੍ਸਕੋ ਕਣ੍ਣਸੂਲੇਨ ਪੀਲ਼ਿਤੋ ਅਕਲ੍ਲਸਰੀਰਤਾਯ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤੁਂ ਨਾਸਕ੍ਖਿ, ਵੇਜ੍ਜੇਹਿ ਵੁਤ੍ਤਵਿਧਿਨਾ ਭੇਸਜ੍ਜੇ ਕਤੇਪਿ ਰੋਗੋ ਨ ਵੂਪਸਮਿ. ਸੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਅਥਸ੍ਸ ਭਗਵਾ ‘‘ਕਕ੍ਕਟਕਰਸਭੋਜਨਂ ਸਪ੍ਪਾਯ’’ਨ੍ਤਿ ਞਤ੍ਵਾ ਆਹ ‘‘ਗਚ੍ਛ ਤ੍ਵਂ ਭਿਕ੍ਖੁ ਮਗਧਖੇਤ੍ਤੇ ਪਿਣ੍ਡਾਯ ਚਰਾਹੀ’’ਤਿ.

ਸੋ ਭਿਕ੍ਖੁ ‘‘ਦੀਘਦਸ੍ਸਿਨਾ ਅਦ੍ਧਾ ਕਿਞ੍ਚਿ ਦਿਟ੍ਠਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ‘‘ਸਾਧੁ ਭਨ੍ਤੇ’’ਤਿ ਭਗਵਤੋ ਪਟਿਸ੍ਸੁਣਿਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਪਤ੍ਤਚੀਵਰਮਾਦਾਯ ਮਗਧਖੇਤ੍ਤਂ ਗਨ੍ਤ੍ਵਾ ¶ ਅਞ੍ਞਤਰਸ੍ਸ ਖੇਤ੍ਤਪਾਲਸ੍ਸ ਕੁਟਿਯਾ ਦ੍ਵਾਰੇ ਪਿਣ੍ਡਾਯ ਅਟ੍ਠਾਸਿ. ਸੋ ਚ ਖੇਤ੍ਤਪਾਲੋ ਕਕ੍ਕਟਕਰਸਂ ਸਮ੍ਪਾਦੇਤ੍ਵਾ ਭਤ੍ਤਞ੍ਚ ਪਚਿਤ੍ਵਾ ‘‘ਥੋਕਂ ਵਿਸ੍ਸਮਿਤ੍ਵਾ ਭੁਞ੍ਜਿਸ੍ਸਾਮੀ’’ਤਿ ਨਿਸਿਨ੍ਨੋ ਥੇਰਂ ਦਿਸ੍ਵਾ ਪਤ੍ਤਂ ਗਹੇਤ੍ਵਾ ਕੁਟਿਕਾਯਂ ਨਿਸੀਦਾਪੇਤ੍ਵਾ ਕਕ੍ਕਟਕਰਸਭਤ੍ਤਂ ਅਦਾਸਿ. ਥੇਰਸ੍ਸ ਤਂ ਭਤ੍ਤਂ ਥੋਕਂ ਭੁਤ੍ਤਸ੍ਸਯੇਵ ਕਣ੍ਣਸੂਲਂ ਪਟਿਪ੍ਪਸ੍ਸਮ੍ਭਿ, ਘਟਸਤੇਨ ਨ੍ਹਾਤੋ ਵਿਯ ਅਹੋਸਿ ¶ . ਸੋ ਸਪ੍ਪਾਯਾਹਾਰਵਸੇਨ ਚਿਤ੍ਤਫਾਸੁਕਂ ਲਭਿਤ੍ਵਾ ਵਿਪਸ੍ਸਨਾਵਸੇਨ ਚਿਤ੍ਤਂ ਅਭਿਨਿਨ੍ਨਾਮੇਨ੍ਤੋ ਅਪਰਿਯੋਸਿਤੇਯੇਵ ਭੋਜਨੇ ਅਨਵਸੇਸਤੋ ਆਸਵੇ ਖੇਪੇਤ੍ਵਾ ਅਰਹਤ੍ਤੇ ਪਤਿਟ੍ਠਾਯ ਖੇਤ੍ਤਪਾਲਂ ਆਹ ‘‘ਉਪਾਸਕ, ਤਵ ਪਿਣ੍ਡਪਾਤਭੋਜਨੇਨ ਮਯ੍ਹਂ ਰੋਗੋ ਵੂਪਸਨ੍ਤੋ, ਕਾਯਚਿਤ੍ਤਂ ਕਲ੍ਲਂ ਜਾਤਂ, ਤ੍ਵਮ੍ਪਿ ਇਮਸ੍ਸ ਪੁਞ੍ਞਸ੍ਸ ਫਲੇਨ ਵਿਗਤਕਾਯਚਿਤ੍ਤਦੁਕ੍ਖੋ ਭਵਿਸ੍ਸਸੀ’’ਤਿ ਵਤ੍ਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ.

ਖੇਤ੍ਤਪਾਲੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਦ੍ਵਾਦਸਯੋਜਨਿਕੇ ਮਣਿਥਮ੍ਭੇ ਕਨਕਵਿਮਾਨੇ ਸਤ੍ਤਸਤਕੂਟਾਗਾਰਪਟਿਮਣ੍ਡਿਤੇ ਵੇਲ਼ੁਰਿਯਮਯਗਬ੍ਭੇ ਨਿਬ੍ਬਤ੍ਤਿ, ਦ੍ਵਾਰੇ ਚਸ੍ਸ ਯਥੂਪਚਿਤਕਮ੍ਮਸਂਸੂਚਕੋ ਮੁਤ੍ਤਾਸਿਕ੍ਕਾਗਤੋ ਸੁਵਣ੍ਣਕਕ੍ਕਟਕੋ ਓਲਮ੍ਬਮਾਨੋ ਅਟ੍ਠਾਸਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪੁਬ੍ਬੇ ਵੁਤ੍ਤਨਯੇਨ ਤਤ੍ਥ ਗਤੋ ਤਂ ਦਿਸ੍ਵਾ ਇਮਾਹਿ ਗਾਥਾਹਿ ਪੁਚ੍ਛਿ –

‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

‘‘ਤਤ੍ਥਚ੍ਛਸਿ ¶ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ¶ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵ ਮਹਾਨੁਭਾਵ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

ਸੋਪਿਸ੍ਸ ਬ੍ਯਾਕਾਸਿ, ਤਂ ਦਸ੍ਸੇਤੁਂ –

‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. – ਵੁਤ੍ਤਂ;

‘‘ਸਤਿਸਮੁਪ੍ਪਾਦਕਰੋ ¶ , ਦ੍ਵਾਰੇ ਕਕ੍ਕਟਕੋ ਠਿਤੋ;

ਨਿਟ੍ਠਿਤੋ ਜਾਤਰੂਪਸ੍ਸ, ਸੋਭਤਿ ਦਸਪਾਦਕੋ.

‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤੋ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੧੦. ਤਤ੍ਥ ਉਚ੍ਚਨ੍ਤਿ ਅਚ੍ਚੁਗ੍ਗਤਂ. ਮਣਿਥੂਣਨ੍ਤਿ ਪਦੁਮਰਾਗਾਦਿਮਣਿਮਯਥਮ੍ਭਂ. ਸਮਨ੍ਤਤੋਤਿ ਚਤੂਸੁਪਿ ਪਸ੍ਸੇਸੁ. ਰੁਚਕਤ੍ਥਤਾਤਿ ਤਸ੍ਸਂ ਤਸ੍ਸਂ ਭੂਮਿਯਂ ਸੁਵਣ੍ਣਫਲਕੇਹਿ ਅਤ੍ਥਤਾ.

੯੧੧. ਪਿਵਸਿ ਖਾਦਸਿ ਚਾਤਿ ਕਾਲੇਨ ਕਾਲਂ ਉਪਯੁਜ੍ਜਮਾਨਂ ਗਨ੍ਧਪਾਨਂ ਸੁਧਾਭੋਜਨਞ੍ਚ ਸਨ੍ਧਾਯ ਵਦਤਿ. ਪਵਦਨ੍ਤੀਤਿ ਪਵਜ੍ਜਨ੍ਤਿ. ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚਾਤਿ ਦਿਬ੍ਬਾ ਰਸਾ ਅਨਪ੍ਪਕਾ ਪਞ੍ਚ ਕਾਮਗੁਣਾ ਏਤ੍ਥ ਏਤਸ੍ਮਿਂ ਤਵ ਵਿਮਾਨੇ ਸਂਵਿਜ੍ਜਨ੍ਤੀਤਿ ਅਤ੍ਥੋ. ਸੁਵਣ੍ਣਛਨ੍ਨਾਤਿ ਹੇਮਾਭਰਣਵਿਭੂਸਿਤਾ.

੯੧੫. ਸਤਿਸਮੁਪ੍ਪਾਦਕਰੋਤਿ ¶ ਸਤੁਪ੍ਪਾਦਕਰੋ, ਯੇਨ ਪੁਞ੍ਞਕਮ੍ਮੇਨ ਅਯਂ ਦਿਬ੍ਬਸਮ੍ਪਤ੍ਤਿ ਮਯਾ ਲਦ੍ਧਾ, ਤਤ੍ਥ ਸਤੁਪ੍ਪਾਦਸ੍ਸ ਕਾਰਕੋ, ‘‘ਕਕ੍ਕਟਕਰਸਦਾਨੇਨ ਅਯਂ ਤਯਾ ਸਮ੍ਪਤ੍ਤਿ ¶ ਲਦ੍ਧਾ’’ਤਿ ਏਵਂ ਸਤੁਪ੍ਪਾਦਂ ਕਰੋਨ੍ਤੋਤਿ ਅਤ੍ਥੋ. ਨਿਟ੍ਠਿਤੋ ਜਾਤਰੂਪਸ੍ਸਾਤਿ ਜਾਤਰੂਪੇਨ ਸਿਦ੍ਧੋ ਜਾਤਰੂਪਮਯੋ. ਏਕਮੇਕਸ੍ਮਿਂ ਪਸ੍ਸੇ ਪਞ੍ਚ ਪਞ੍ਚ ਕਤ੍ਵਾ ਦਸ ਪਾਦਾ ਏਤਸ੍ਸਾਤਿ ਦਸਪਾਦਕੋ ਦ੍ਵਾਰੇ ਕਕ੍ਕਟਕੋ ਠਿਤੋ ਸੋਭਤਿ. ਸੋ ਏਵ ਮਮ ਪੁਞ੍ਞਕਮ੍ਮਂ ਤਾਦਿਸਾਨਂ ਮਹੇਸੀਨਂ ਵਿਭਾਵੇਤਿ, ਨ ਏਤ੍ਥ ਮਯਾ ਵਤ੍ਤਬ੍ਬਂ ਅਤ੍ਥੀਤਿ ਅਧਿਪ੍ਪਾਯੋ. ਤੇਨਾਹ ‘‘ਤੇਨ ਮੇਤਾਦਿਸੋ ਵਣ੍ਣੋ’’ਤਿਆਦਿ. ਸੇਸਂ ਵੁਤ੍ਤਨਯਮੇਵ.

ਕਕ੍ਕਟਕਰਸਦਾਯਕਵਿਮਾਨਵਣ੍ਣਨਾ ਨਿਟ੍ਠਿਤਾ.

ਉਚ੍ਚਮਿਦਂ ¶ ਮਣਿਥੂਣਨ੍ਤਿ ਦ੍ਵਾਰਪਾਲਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਚ ਸਮਯੇਨ ਰਾਜਗਹੇ ਅਞ੍ਞਤਰੋ ਉਪਾਸਕੋ ਚਤ੍ਤਾਰਿ ਨਿਚ੍ਚਭਤ੍ਤਾਨਿ ਸਙ੍ਘਸ੍ਸ ਦੇਤਿ. ਤਸ੍ਸ ਪਨ ਗੇਹਂ ਪਰਿਯਨ੍ਤੇ ਠਿਤਂ ਚੋਰਭਯੇਨ ਯੇਭੁਯ੍ਯੇਨ ਪਿਹਿਤਦ੍ਵਾਰਮੇਵ ਹੋਤਿ. ਭਿਕ੍ਖੂ ਗਨ੍ਤ੍ਵਾ ਕਦਾਚਿ ਦ੍ਵਾਰਸ੍ਸ ਪਿਹਿਤਤ੍ਤਾ ਭਤ੍ਤਂ ਅਲਦ੍ਧਾਵ ਪਟਿਗਚ੍ਛਨ੍ਤਿ. ਉਪਾਸਕੋ ਭਰਿਯਂ ਆਹ ‘‘ਕਿਂ, ਭਦ੍ਦੇ, ਅਯ੍ਯਾਨਂ ਸਕ੍ਕਚ੍ਚਂ ਭਿਕ੍ਖਾ ਦੀਯਤੀ’’ਤਿ? ਸਾ ਆਹ ‘‘ਏਕੇਸੁ ਦਿਵਸੇਸੁ ਅਯ੍ਯਾ ਨਾਗਮਿਂਸੂ’’ਤਿ. ‘‘ਕਿਂ ਕਾਰਣ’’ਨ੍ਤਿ? ‘‘ਦ੍ਵਾਰਸ੍ਸ ਪਿਹਿਤਤ੍ਤਾ ਮਞ੍ਞੇ’’ਤਿ. ਤਂ ਸੁਤ੍ਵਾ ਉਪਾਸਕੋ ਸਂਵੇਗਪ੍ਪਤ੍ਤੋ ਹੁਤ੍ਵਾ ਏਕਂ ਪੁਰਿਸਂ ਦ੍ਵਾਰਪਾਲਂ ਕਤ੍ਵਾ ਠਪੇਸਿ ‘‘ਤ੍ਵਂ ਅਜ੍ਜਤੋ ਪਟ੍ਠਾਯ ਦ੍ਵਾਰਂ ਰਕ੍ਖਨ੍ਤੋ ਨਿਸੀਦ, ਯਦਾ ਚ ਅਯ੍ਯਾ ਆਗਮਿਸ੍ਸਨ੍ਤਿ, ਤਦਾ ਤੇ ਪਵੇਸੇਤ੍ਵਾ ਪਵਿਟ੍ਠਾਨਂ ਨੇਸਂ ਪਤ੍ਤਪਟਿਗ੍ਗਹਣਆਸਨਪਞ੍ਞਾਪਨਾਦਿ ਸਬ੍ਬਂ ਯੁਤ੍ਤਪਯੁਤ੍ਤਂ ਜਾਨਾਹੀ’’ਤਿ. ਸੋ ‘‘ਸਾਧੂ’’ਤਿ ਤਥਾ ਕਰੋਨ੍ਤੋ ਭਿਕ੍ਖੂਨਂ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਉਪ੍ਪਨ੍ਨਸਦ੍ਧੋ ਕਮ੍ਮਫਲਂ ਸਦ੍ਦਹਿਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਹਿ, ਸਕ੍ਕਚ੍ਚਂ ਭਿਕ੍ਖੂ ਉਪਟ੍ਠਹਿ.

ਅਪਰਭਾਗੇ ਨਿਚ੍ਚਭਤ੍ਤਦਾਯਕੋ ਉਪਾਸਕੋ ਕਾਲਂ ਕਤ੍ਵਾ ਯਾਮੇਸੁ ਨਿਬ੍ਬਤ੍ਤਿ. ਦ੍ਵਾਰਪਾਲੋ ਪਨ ਸਕ੍ਕਚ੍ਚਂ ਭਿਕ੍ਖੂਨਂ ਉਪਟ੍ਠਹਿਤ੍ਵਾ ਪਰਸ੍ਸ ਪਰਿਚ੍ਚਾਗੇ ਵੇਯ੍ਯਾਵਚ੍ਚਕਰਣੇਨ ਅਨੁਮੋਦਨੇਨ ਚ ਤਾਵਤਿਂਸੇਸੁ ਉਪ੍ਪਜ੍ਜਿ. ਤਸ੍ਸ ਦ੍ਵਾਦਸਯੋਜਨਿਕਂ ਕਨਕਵਿਮਾਨਨ੍ਤਿਆਦਿ ਸਬ੍ਬਂ ਕਕ੍ਕਟਕਵਿਮਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਪੁਚ੍ਛਾਵਿਸ੍ਸਜ੍ਜਨਗਾਥਾ ਏਵਮਾਗਤਾ –

‘‘ਉਚ੍ਚਮਿਦਂ ¶ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

‘‘ਤਤ੍ਥਚ੍ਛਸਿ ¶ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੯੨੦. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੨੨. ‘‘ਸੋ ¶ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਦਿਬ੍ਬਂ ਮਮਂ ਵਸ੍ਸਸਹਸ੍ਸਮਾਯੁ, ਵਾਚਾਭਿਗੀਤਂ ਮਨਸਾ ਪਵਤ੍ਤਿਤਂ;

ਏਤ੍ਤਾਵਤਾ ਠਸ੍ਸਤਿ ਪੁਞ੍ਞਕਮ੍ਮੋ, ਦਿਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ.

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੨੩. ਤਤ੍ਥ ਦਿਬ੍ਬਂ ਮਮਂ ਵਸ੍ਸਸਹਸ੍ਸਮਾਯੂਤਿ ਯਸ੍ਮਿਂ ਦੇਵਨਿਕਾਯੇ ਸਯਂ ਉਪ੍ਪਨ੍ਨੋ, ਤੇਸਂ ਤਾਵਤਿਂਸਦੇਵਾਨਂ ਆਯੁਪ੍ਪਮਾਣਮੇਵ ਵਦਤਿ. ਤੇਸਞ੍ਹਿ ਮਨੁਸ੍ਸਾਨਂ ਗਣਨਾਯ ਵਸ੍ਸਸਤਂ ਏਕੋ ਰਤ੍ਤਿਦਿਵੋ, ਤਾਯ ਰਤ੍ਤਿਯਾ ਤਿਂਸਰਤ੍ਤਿਕੋ ਮਾਸੋ, ਤੇਨ ਮਾਸੇਨ ਦ੍ਵਾਦਸਮਾਸਿਕੋ ਸਂਵਚ੍ਛਰੋ, ਤੇਨ ਸਂਵਚ੍ਛਰੇਨ ਸਹਸ੍ਸਸਂਵਚ੍ਛਰਾਨਿ ਆਯੁ, ਤਂ ਮਨੁਸ੍ਸਾਨਂ ਗਣਨਾਯ ਤਿਸ੍ਸੋ ਵਸ੍ਸਕੋਟਿਯੋ ਸਟ੍ਠਿ ਚ ਵਸ੍ਸਸਤਸਹਸ੍ਸਾਨਿ ਹੋਨ੍ਤਿ. ਵਾਚਾਭਿਗੀਤਨ੍ਤਿ ਵਾਚਾਯ ਅਭਿਗੀਤਂ, ‘‘ਆਗਚ੍ਛਨ੍ਤੁ ਅਯ੍ਯਾ, ਇਦਂ ਆਸਨਂ ਪਞ੍ਞਤ੍ਤਂ, ਇਧ ਨਿਸੀਦਥਾ’’ਤਿਆਦਿਨਾ, ‘‘ਕਿਂ ਅਯ੍ਯਾਨਂ ਸਰੀਰਸ੍ਸ ਆਰੋਗ੍ਯਂ, ਕਿਂ ਵਸਨਟ੍ਠਾਨਂ ਫਾਸੁਕ’’ਨ੍ਤਿਆਦਿਨਾ ਪਟਿਸਨ੍ਥਾਰਵਸੇਨ ਚ ਵਾਚਾਯ ਕਥਿਤਮਤ੍ਤਂ ¶ . ਮਨਸਾ ਪਵਤ੍ਤਿਤਨ੍ਤਿ ‘‘ਇਮੇ ਅਯ੍ਯਾ ਪੇਸਲਾ ਬ੍ਰਹ੍ਮਚਾਰਿਨੋ ਧਮ੍ਮਚਾਰਿਨੋ’’ਤਿਆਦਿਨਾ ਚਿਤ੍ਤੇਨ ਪਵਤ੍ਤਿਤਂ ਪਸਾਦਮਤ੍ਤਂ, ਨ ਪਨ ਮਮ ਸਨ੍ਤਕਂ ਕਿਞ੍ਚਿ ਪਰਿਚ੍ਚਤ੍ਤਂ ਅਤ੍ਥੀਤਿ ਦਸ੍ਸੇਤਿ. ਏਤ੍ਤਾਵਤਾਤਿ ਏਤ੍ਤਕੇਨ ਏਵਂ ਕਥਨਮਤ੍ਤੇਨ ਪਸਾਦਮਤ੍ਤੇਨਪਿ. ਠਸ੍ਸਤਿ ਪੁਞ੍ਞਕਮ੍ਮੋਤਿ ਕਤਪੁਞ੍ਞੋ ਨਾਮ ਹੁਤ੍ਵਾ ਦੇਵਲੋਕੇ ਠਸ੍ਸਤਿ ਚਿਰਂ ਪਵਤ੍ਤਿਸ੍ਸਤਿ, ਤਿਟ੍ਠਨ੍ਤੋ ਚ ਦਿਬ੍ਬੇਹਿ ਕਾਮੇਹਿ ਸਮਙ੍ਗੀਭੂਤੋ ਤਸ੍ਮਿਂ ਦੇਵਨਿਕਾਯੇ ਦੇਵਾਨਂ ਵਲਞ੍ਜਨਿਯਾਮੇਨੇਵ ਦਿਬ੍ਬੇਹਿ ਪਞ੍ਚਹਿ ਕਾਮਗੁਣੇਹਿ ਸਮਙ੍ਗੀਭੂਤੋ ਸਮਨ੍ਨਾਗਤੋ ਹੁਤ੍ਵਾ ਇਨ੍ਦ੍ਰਿਯਾਨਿ ਪਰਿਚਾਰੇਨ੍ਤੋ ਵਿਹਰਤੀਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵ.

ਦ੍ਵਾਰਪਾਲਕਵਿਮਾਨਵਣ੍ਣਨਾ ਨਿਟ੍ਠਿਤਾ.

ਉਚ੍ਚਮਿਦਂ ¶ ¶ ਮਣਿਥੂਣਨ੍ਤਿ ਕਰਣੀਯਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਸਾਵਤ੍ਥਿਵਾਸੀ ਏਕੋ ਉਪਾਸਕੋ ਨ੍ਹਾਨੋਪਕਰਣਾਨਿ ਗਹੇਤ੍ਵਾ ਅਚਿਰਵਤਿਂ ਗਨ੍ਤ੍ਵਾ ਨ੍ਹਤ੍ਵਾ ਆਗਚ੍ਛਨ੍ਤੋ ਭਗਵਨ੍ਤਂ ਸਾਵਤ੍ਥਿਂ ਪਿਣ੍ਡਾਯ ਪਵਿਸਨ੍ਤਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਵਮਾਹ ‘‘ਭਨ੍ਤੇ ਕੇਨ ਨਿਮਨ੍ਤਿਤਾ’’ਤਿ. ਭਗਵਾ ਤੁਣ੍ਹੀ ਅਹੋਸਿ. ਸੋ ਕੇਨਚਿ ਅਨਿਮਨ੍ਤਿਤਭਾਵਂ ਞਤ੍ਵਾ ਆਹ ‘‘ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਭਤ੍ਤਂ ਅਨੁਕਮ੍ਪਂ ਉਪਾਦਾਯਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਸੋ ਭਗਵਨ੍ਤਂ ਅਤ੍ਤਨੋ ਗੇਹਂ ਨੇਤ੍ਵਾ ਬੁਦ੍ਧਾਰਹਂ ਆਸਨਂ ਪਞ੍ਞਾਪੇਤ੍ਵਾ ਤਤ੍ਥ ਭਗਵਨ੍ਤਂ ਨਿਸੀਦਾਪੇਤ੍ਵਾ ਪਣੀਤੇਨ ਅਨ੍ਨਪਾਨੇਨ ਸਨ੍ਤਪ੍ਪੇਸਿ. ਭਗਵਾ ਕਤਭਤ੍ਤਕਿਚ੍ਚੋ ਤਸ੍ਸ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸੇਸਂ ਅਨਨ੍ਤਰਵਿਮਾਨਸਦਿਸਂ. ਤੇਨ ਵੁਤ੍ਤਂ –

੯੨੬. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ…ਪੇ… ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੯੨੮. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੩੦. ‘‘ਸੋ ¶ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਕਰਣੀਯਾਨਿ ਪੁਞ੍ਞਾਨਿ, ਪਣ੍ਡਿਤੇਨ ਵਿਜਾਨਤਾ;

ਸਮ੍ਮਗ੍ਗਤੇਸੁ ਬੁਦ੍ਧੇਸੁ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

‘‘ਅਤ੍ਥਾਯ ਵਤ ਮੇ ਬੁਦ੍ਧੋ, ਅਰਞ੍ਞਾ ਗਾਮਮਾਗਤੋ;

ਕਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਤਾਵਤਿਂਸੂਪਗੋ ਅਹਂ.

੯੩੩. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੩੧. ਤਤ੍ਥ ਪਣ੍ਡਿਤੇਨਾਤਿ ਸਪ੍ਪਞ੍ਞੇਨ. ਵਿਜਾਨਤਾਤਿ ਅਤ੍ਤਨੋ ਹਿਤਾਹਿਤਂ ਜਾਨਨ੍ਤੇਨ. ਸਮ੍ਮਗ੍ਗਤੇਸੂਤਿ ਸਮ੍ਮਾਪਟਿਪਨ੍ਨੇਸੁ, ਬੁਦ੍ਧੇਸੂਤਿ ਸਮ੍ਮਾਸਮ੍ਬੁਦ੍ਧੇਸੁ.

੯੩੨. ਅਤ੍ਥਾਯਾਤਿ ¶ ਹਿਤਾਯ, ਵੁਡ੍ਢਿਯਾ ਵਾ. ਅਰਞ੍ਞਾਤਿ ਵਿਹਾਰਤੋ, ਜੇਤਵਨਂ ਸਨ੍ਧਾਯ ਵਦਤਿ ¶ . ਤਾਵਤਿਂਸੂਪਗੋਤਿ ਤਾਵਤਿਂਸਦੇਵਕਾਯਂ, ਤਾਵਤਿਂਸਭਵਨਂ ਵਾ ਉਪ੍ਪਜ੍ਜਨਵਸੇਨ ਉਪਗਤੋ. ਸੇਸਂ ਵੁਤ੍ਤਨਯਮੇਵ.

ਸਤ੍ਤਮਵਿਮਾਨਂ ਛਟ੍ਠਵਿਮਾਨਸਦਿਸਂ. ਕੇਵਲਂ ਤਤ੍ਥ ਉਪਾਸਕੇਨ ਭਗਵਤੋ ਆਹਾਰੋ ਦਿਨ੍ਨੋ, ਇਧ ਅਞ੍ਞਤਰਸ੍ਸ ਥੇਰਸ੍ਸ. ਏਸਂ ਵੁਤ੍ਤਨਯਮੇਵ. ਤੇਨ ਵੁਤ੍ਤਂ –

‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੯੩੭. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀਤਿ.

‘‘ਸੋ ¶ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਕਰਣੀਯਾਨਿ ਪੁਞ੍ਞਾਨਿ, ਪਣ੍ਡਿਤੇਨ ਵਿਜਾਨਤਾ;

ਸਮ੍ਮਗ੍ਗਤੇਸੁ ਭਿਕ੍ਖੂਸੁ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

‘‘ਅਤ੍ਥਾਯ ¶ ਵਤ ਮੇ ਭਿਕ੍ਖੁ, ਅਰਞ੍ਞਾ ਗਾਮਮਾਗਤੋ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਤਾਵਤਿਂਸੂਪਗੋ ਅਹਂ.

੯੪੨. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਦੁਤਿਯਕਰਣੀਯਵਿਮਾਨਵਣ੍ਣਨਾ ਨਿਟ੍ਠਿਤਾ.

ਉਚ੍ਚਮਿਦਂ ¶ ਮਣਿਥੂਣਂ ਵਿਮਾਨਨ੍ਤਿ ਸੂਚਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਚੀਵਰਕਮ੍ਮਂ ਕਾਤਬ੍ਬਂ ਹੋਤਿ, ਅਤ੍ਥੋ ਚ ਹੋਤਿ ਸੂਚਿਯਾ. ਸੋ ਰਾਜਗਹੇ ਪਿਣ੍ਡਾਯ ਚਰਨ੍ਤੋ ਕਮ੍ਮਾਰਸ੍ਸ ਗੇਹਦ੍ਵਾਰੇ ਅਟ੍ਠਾਸਿ. ਤਂ ਦਿਸ੍ਵਾ ਕਮ੍ਮਾਰੋ ਆਹ ‘‘ਕੇਨ, ਭਨ੍ਤੇ, ਅਤ੍ਥੋ’’ਤਿ? ‘‘ਚੀਵਰਕਮ੍ਮਂ ਕਾਤਬ੍ਬਂ ਅਤ੍ਥਿ, ਸੂਚਿਯਾ ਅਤ੍ਥੋ’’ਤਿ. ਕਮ੍ਮਾਰੋ ਪਸਨ੍ਨਮਾਨਸੋ ਕਤਪਰਿਯੋਸਿਤਾ ਦ੍ਵੇ ਸੂਚਿਯੋ ਦਤ੍ਵਾ ‘‘ਪੁਨਪਿ, ਭਨ੍ਤੇ, ਸੂਚਿਯਾ ਅਤ੍ਥੇ ਸਤਿ ਮਮ ਆਚਿਕ੍ਖੇਯ੍ਯਾਥਾ’’ਤਿ ਵਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿ. ਥੇਰੋ ਤਸ੍ਸ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸੋ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿ. ਅਥ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਤਂ ਦੇਵਪੁਤ੍ਤਂ ਇਮਾਹਿ ਗਾਥਾਹਿ ਪੁਚ੍ਛਿ –

‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੪੮. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਯਂ ਦਦਾਤਿ ਨ ਤਂ ਹੋਤਿ, ਯਞ੍ਚੇਵ ਦਜ੍ਜਾ ਤਞ੍ਚੇਵ ਸੇਯ੍ਯੋ;

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੪੯. ਤਤ੍ਥ ¶ ਯਂ ਦਦਾਤੀਤਿ ਯਾਦਿਸਂ ਦੇਯ੍ਯਧਮ੍ਮਂ ਦਦਾਤਿ. ਨ ਤਂ ਹੋਤੀਤਿ ਤਸ੍ਸ ਤਾਦਿਸਮੇਵ ਫਲਂ ਨ ਹੋਤਿ. ਅਥ ਖੋ ਖੇਤ੍ਤਸਮ੍ਪਤ੍ਤਿਯਾ ਚ ਚਿਤ੍ਤਸਮ੍ਪਤ੍ਤਿਯਾ ਚ ਤਤੋ ਵਿਪੁਲਤਰਂ ਉਲ਼ਾਰਤਰਮੇਵ ਫਲਂ ਹੋਤਿ. ਤਸ੍ਮਾ ਯਞ੍ਚੇਵ ਦਜ੍ਜਾ ਤਞ੍ਚੇਵ ਸੇਯ੍ਯੋਤਿ ਯਂਕਿਞ੍ਚਿਦੇਵ ਵਿਜ੍ਜਮਾਨਂ ਦਜ੍ਜਾ ਦਦੇਯ੍ਯ, ਤਞ੍ਚੇਵ ਤਦੇਵ ਸੇਯ੍ਯੋ, ਯਸ੍ਸ ਕਸ੍ਸਚਿ ਅਨਵਜ੍ਜਸ੍ਸ ਦੇਯ੍ਯਧਮ੍ਮਸ੍ਸ ਦਾਨਮੇਵ ਸੇਯ੍ਯੋ, ਕਸ੍ਮਾ? ਮਯਾ ਹਿ ਸੂਚਿ ਦਿਨ੍ਨਾ ਸੂਚਿਮੇਵ ਸੇਯ੍ਯੋ, ਸੂਚਿਦਾਨਮੇਵ ਮਯ੍ਹਂ ਸੇਯ੍ਯਂ ਜਾਤਂ, ਯਤੋ ਅਯਮੀਦਿਸੀ ਸਮ੍ਪਤ੍ਤਿ ਲਦ੍ਧਾਤਿ ਅਧਿਪ੍ਪਾਯੋ.

ਉਚ੍ਚਮਿਦਂ ¶ ਮਣਿਥੂਣਨ੍ਤਿ ਦੁਤਿਯਸੂਚਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਰਾਜਗਹਵਾਸੀ ਏਕੋ ਤੁਨ੍ਨਕਾਰਕੋ ਵਿਹਾਰਪੇਕ੍ਖਕੋ ਹੁਤ੍ਵਾ ਵੇਲ਼ੁਵਨਂ ਗਤੋ. ਤਤ੍ਥ ਅਞ੍ਞਤਰਂ ਭਿਕ੍ਖੁਂ ਵੇਲ਼ੁਵਨੇ ਕਤਸੂਚਿਯਾ ਚੀਵਰਂ ਸਿਬ੍ਬਨ੍ਤਂ ਦਿਸ੍ਵਾ ਸੂਚਿਘਰੇਨ ਸਦ੍ਧਿਂ ਸੂਚਿਯੋ ਅਦਾਸਿ. ਸੇਸਂ ਸਬ੍ਬਂ ਵੁਤ੍ਤਨਯਮੇਵ.

‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;

‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਪੁਰਿਮਜਾਤਿਯਾ ਮਨੁਸ੍ਸਲੋਕੇ.

‘‘ਅਦ੍ਦਸਂ ਵਿਰਜਂ ਭਿਕ੍ਖੁਂ, ਵਿਪ੍ਪਸਨ੍ਨਮਨਾਵਿਲਂ;

ਤਸ੍ਸ ਅਦਾਸਹਂ ਸੂਚਿਂ, ਪਸਨ੍ਨੋ ਸੇਹਿ ਪਾਣਿਭਿ.

‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਦੁਤਿਯਸੂਚਿਵਿਮਾਨਵਣ੍ਣਨਾ ਨਿਟ੍ਠਿਤਾ.

ਸੁਸੁਕ੍ਕਖਨ੍ਧਂ ¶ ¶ ਅਭਿਰੁਯ੍ਹ ਨਾਗਨ੍ਤਿ ਨਾਗਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਉਪਗਤੋ. ਤਤ੍ਥ ਅਦ੍ਦਸ ਅਞ੍ਞਤਰਂ ਦੇਵਪੁਤ੍ਤਂ ਸਬ੍ਬਸੇਤਂ ਮਹਨ੍ਤਂ ਦਿਬ੍ਬਨਾਗਂ ਅਭਿਰੁਯ੍ਹ ਮਹਨ੍ਤੇਨ ਪਰਿਵਾਰੇਨ ਮਹਤਾ ਦਿਬ੍ਬਾਨੁਭਾਵੇਨ ਆਕਾਸੇਨ ਗਚ੍ਛਨ੍ਤਂ, ਸਬ੍ਬਾ ਦਿਸਾ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਓਭਾਸਯਮਾਨਂ. ਦਿਸ੍ਵਾ ਯੇਨ ਸੋ ਦੇਵਪੁਤ੍ਤੋ ਤੇਨੁਪਸਙ੍ਕਮਿ. ਅਥ ਸੋ ਦੇਵਪੁਤ੍ਤੋ ¶ ਤਤੋ ਓਰੁਯ੍ਹ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਅਭਿਵਾਦੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਅਥ ਥੇਰੋ –

‘‘ਸੁਸੁਕ੍ਕਖਨ੍ਧਂ ਅਭਿਰੁਯ੍ਹ ਨਾਗਂ, ਅਕਾਚਿਨਂ ਦਨ੍ਤਿ�