ਅਟ੍ਠਕਥਾ > ਸੁਤ੍ਤਪਿਟਕ (ਅਟ੍ਠਕਥਾ) > ਖੁਦ੍ਦਕਨਿਕਾਯ (ਅਟ੍ਠਕਥਾ)

ਤਤ੍ਥ ¶ ਪੇਤਵਤ੍ਥੂਤਿ ਸੇਟ੍ਠਿਪੁਤ੍ਤਾਦਿਕਸ੍ਸ ਤਸ੍ਸ ਤਸ੍ਸ ਸਤ੍ਤਸ੍ਸ ਪੇਤਭਾਵਹੇਤੁਭੂਤਂ ਕਮ੍ਮਂ, ਤਸ੍ਸ ਪਨ ਪਕਾਸਨਵਸੇਨ ਪਵਤ੍ਤੋ ‘‘ਖੇਤ੍ਤੂਪਮਾ ਅਰਹਨ੍ਤੋ’’ਤਿਆਦਿਕਾ ਪਰਿਯਤ੍ਤਿਧਮ੍ਮੋ ਇਧ ‘‘ਪੇਤਵਤ੍ਥੂ’’ਤਿ ਅਧਿਪ੍ਪੇਤੋ.

ਤਯਿਦਂ ਪੇਤਵਤ੍ਥੁ ਕੇਨ ਭਾਸਿਤਂ, ਕਤ੍ਥ ਭਾਸਿਤਂ, ਕਦਾ ਭਾਸਿਤਂ, ਕਸ੍ਮਾ ਚ ਭਾਸਿਤਨ੍ਤਿ? ਵੁਚ੍ਚਤੇ – ਇਦਞ੍ਹਿ ਪੇਤਵਤ੍ਥੁ ਦੁਵਿਧੇਨ ਪਵਤ੍ਤਂ ਅਟ੍ਠੁਪ੍ਪਤ੍ਤਿਵਸੇਨ, ਪੁਚ੍ਛਾਵਿਸ੍ਸਜ੍ਜਨਵਸੇਨ ਚ. ਤਤ੍ਥ ਯਂ ਅਟ੍ਠੁਪ੍ਪਤ੍ਤਿਵਸੇਨ ਪਵਤ੍ਤਂ, ਤਂ ਭਗਵਤਾ ਭਾਸਿਤਂ, ਇਤਰਂ ਨਾਰਦਤ੍ਥੇਰਾਦੀਹਿ ਪੁਚ੍ਛਿਤਂ ਤੇਹਿ ਤੇਹਿ ਪੇਤੇਹਿ ਭਾਸਿਤਂ. ਸਤ੍ਥਾ ਪਨ ਯਸ੍ਮਾ ਨਾਰਦਤ੍ਥੇਰਾਦੀਹਿ ਤਸ੍ਮਿਂ ਤਸ੍ਮਿਂ ਪੁਚ੍ਛਾਵਿਸ੍ਸਜ੍ਜਨੇ ਆਰੋਚਿਤੇ ਤਂ ¶ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਤਸ੍ਮਾ ਸਬ੍ਬਮ੍ਪੇਤਂ ਪੇਤਵਤ੍ਥੁ ਸਤ੍ਥਾਰਾ ਭਾਸਿਤਮੇਵ ਨਾਮ ਜਾਤਂ. ਪਵਤ੍ਤਿਤਵਰਧਮ੍ਮਚਕ੍ਕੇ ਹਿ ਸਤ੍ਥਰਿ ਤਤ੍ਥ ਤਤ੍ਥ ਰਾਜਗਹਾਦੀਸੁ ਵਿਹਰਨ੍ਤੇ ਯੇਭੁਯ੍ਯੇਨ ਤਾਯ ਤਾਯ ਅਟ੍ਠੁਪ੍ਪਤ੍ਤਿਯਾ ਪੁਚ੍ਛਾਵਿਸ੍ਸਜ੍ਜਨਵਸੇਨ ਸਤ੍ਤਾਨਂ ਕਮ੍ਮਫਲਪਚ੍ਚਕ੍ਖਕਰਣਾਯ ਤਂ ਤਂ ਪੇਤਵਤ੍ਥੁ ਦੇਸਨਾਰੁਲ਼੍ਹਨ੍ਤਿ ਅਯਂ ਤਾਵੇਤ੍ਥ ‘‘ਕੇਨ ਭਾਸਿਤ’’ਨ੍ਤਿਆਦੀਨਂ ਪਦਾਨਂ ਸਾਧਾਰਣਤੋ ਵਿਸ੍ਸਜ੍ਜਨਾ. ਅਸਾਧਾਰਣਤੋ ਪਨ ਤਸ੍ਸ ਤਸ੍ਸ ਵਤ੍ਥੁਸ੍ਸ ਅਤ੍ਥਵਣ੍ਣਨਾਯਮੇਵ ਆਗਮਿਸ੍ਸਤਿ.

ਤਂ ਪਨੇਤਂ ਪੇਤਵਤ੍ਥੁ ਵਿਨਯਪਿਟਕਂ ਸੁਤ੍ਤਨ੍ਤਪਿਟਕਂ ਅਭਿਧਮ੍ਮਪਿਟਕਨ੍ਤਿ ਤੀਸੁ ਪਿਟਕੇਸੁ ਸੁਤ੍ਤਨ੍ਤਪਿਟਕਪਰਿਯਾਪਨ੍ਨਂ, ਦੀਘਨਿਕਾਯੋ ਮਜ੍ਝਿਮਨਿਕਾਯੋ ਸਂਯੁਤ੍ਤਨਿਕਾਯੋ ਅਙ੍ਗੁਤ੍ਤਰਨਿਕਾਯੋ ਖੁਦ੍ਦਕਨਿਕਾਯੋਤਿ ਪਞ੍ਚਸੁ ਨਿਕਾਯੇਸੁ ਖੁਦ੍ਦਕਨਿਕਾਯਪਰਿਯਾਪਨ੍ਨਂ, ਸੁਤ੍ਤਂ ਗੇਯ੍ਯਂ ਵੇਯ੍ਯਾਕਰਣਂ ਗਾਥਾ ਉਦਾਨਂ ਇਤਿਵੁਤ੍ਤਕਂ ਜਾਤਕਂ ਅਬ੍ਭੁਤਧਮ੍ਮਂ ਵੇਦਲ੍ਲਨ੍ਤਿ ਨਵਸੁ ਸਾਸਨਙ੍ਗੇਸੁ ਗਾਥਾਸਙ੍ਗਹਂ.

‘‘ਦ੍ਵਾਸੀਤਿ ¶ ਬੁਦ੍ਧਤੋ ਗਣ੍ਹਿਂ, ਦ੍ਵੇ ਸਹਸ੍ਸਾਨਿ ਭਿਕ੍ਖੁਤੋ;

ਚਤੁਰਾਸੀਤਿ ਸਹਸ੍ਸਾਨਿ, ਯੇ ਮੇ ਧਮ੍ਮਾ ਪਵਤ੍ਤਿਨੋ’’ਤਿ. (ਥੇਰਗਾ. ੧੦੨੭) –

ਏਵਂ ਧਮ੍ਮਭਣ੍ਡਾਗਾਰਿਕੇਨ ਪਟਿਞ੍ਞਾਤੇਸੁ ਚਤੁਰਾਸੀਤਿਯਾ ਧਮ੍ਮਕ੍ਖਨ੍ਧਸਹਸ੍ਸੇਸੁ ਕਤਿਪਯਧਮ੍ਮਕ੍ਖਨ੍ਧਸਙ੍ਗਹਂ, ਭਾਣਵਾਰਤੋ ਚਤੁਭਾਣਵਾਰਮਤ੍ਤਂ, ਵਗ੍ਗਤੋ – ਉਰਗਵਗ੍ਗੋ ਉਬ੍ਬਰਿਵਗ੍ਗੋ ਚੂਲ਼ਵਗ੍ਗੋ ਮਹਾਵਗ੍ਗੋਤਿ ਚਤੁਵਗ੍ਗਸਙ੍ਗਹਂ. ਤੇਸੁ ਪਠਮਵਗ੍ਗੇ ਦ੍ਵਾਦਸ ਵਤ੍ਥੂਨਿ, ਦੁਤਿਯਵਗ੍ਗੇ ¶ ਤੇਰਸ ਵਤ੍ਥੂਨਿ, ਤਤਿਯਵਗ੍ਗੇ ਦਸ ਵਤ੍ਥੂਨਿ, ਚਤੁਤ੍ਥਵਗ੍ਗੇ ਸੋਲ਼ਸ ਵਤ੍ਥੂਨੀਤਿ ਵਤ੍ਥੁਤੋ ਏਕਪਞ੍ਞਾਸਵਤ੍ਥੁਪਟਿਮਣ੍ਡਿਤਂ. ਤਸ੍ਸ ਵਗ੍ਗੇਸੁ ਉਰਗਵਗ੍ਗੋ ਆਦਿ, ਵਤ੍ਥੂਸੁ ਖੇਤ੍ਤੂਪਮਪੇਤਵਤ੍ਥੁ ਆਦਿ, ਤਸ੍ਸਾਪਿ ‘‘ਖੇਤ੍ਤੂਪਮਾ ਅਰਹਨ੍ਤੋ’’ਤਿ ਅਯਂ ਗਾਥਾ ਆਦਿ.

ਤਂ ¶ ਪਨੇਤਂ ਵਤ੍ਥੁਂ ਭਗਵਾ ਰਾਜਗਹੇ ਵਿਹਰਨ੍ਤੋ ਵੇਲ਼ੁਵਨੇ ਕਲਨ੍ਦਕਨਿਵਾਪੇ ਅਞ੍ਞਤਰਂ ਸੇਟ੍ਠਿਪੁਤ੍ਤਪੇਤਂ ਆਰਬ੍ਭ ਕਥੇਸਿ. ਰਾਜਗਹੇ ਕਿਰ ਅਞ੍ਞਤਰੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਪਹੂਤਵਿਤ੍ਤੂਪਕਰਣੋ ਅਨੇਕਕੋਟਿਧਨਸਨ੍ਨਿਚਯੋ ਸੇਟ੍ਠਿ ਅਹੋਸਿ. ਤਸ੍ਸ ਮਹਾਧਨਸਮ੍ਪਨ੍ਨਤਾਯ ‘‘ਮਹਾਧਨਸੇਟ੍ਠਿ’’ਤ੍ਵੇਵ ਸਮਞ੍ਞਾ ਅਹੋਸਿ. ਏਕੋਵ ਪੁਤ੍ਤੋ ਅਹੋਸਿ, ਪਿਯੋ ਮਨਾਪੋ. ਤਸ੍ਮਿਂ ਵਿਞ੍ਞੁਤਂ ਪਤ੍ਤੇ ਮਾਤਾਪਿਤਰੋ ਏਵਂ ਚਿਨ੍ਤੇਸੁਂ – ‘‘ਅਮ੍ਹਾਕਂ ਪੁਤ੍ਤਸ੍ਸ ਦਿਵਸੇ ਦਿਵਸੇ ਸਹਸ੍ਸਂ ਸਹਸ੍ਸਂ ਪਰਿਬ੍ਬਯਂ ਕਰੋਨ੍ਤਸ੍ਸ ਵਸ੍ਸਸਤੇਨਾਪਿ ਅਯਂ ਧਨਸਨ੍ਨਿਚਯੋ ਪਰਿਕ੍ਖਯਂ ਨ ਗਮਿਸ੍ਸਤਿ, ਕਿਂ ਇਮਸ੍ਸ ਸਿਪ੍ਪੁਗ੍ਗਹਣਪਰਿਸ੍ਸਮੇਨ, ਅਕਿਲਨ੍ਤਕਾਯਚਿਤ੍ਤੋ ਯਥਾਸੁਖਂ ਭੋਗੇ ਪਰਿਭੁਞ੍ਜਤੂ’’ਤਿ ਸਿਪ੍ਪਂ ਨ ਸਿਕ੍ਖਾਪੇਸੁਂ. ਵਯਪ੍ਪਤ੍ਤੇ ਪਨ ਕੁਲਰੂਪਯੋਬ੍ਬਨਵਿਲਾਸਸਮ੍ਪਨ੍ਨਂ ਕਾਮਾਭਿਮੁਖਂ ਧਮ੍ਮਸਞ੍ਞਾਵਿਮੁਖਂ ਕਞ੍ਞਂ ਆਨੇਸੁਂ. ਸੋ ਤਾਯ ਸਦ੍ਧਿਂ ਅਭਿਰਮਨ੍ਤੋ ਧਮ੍ਮੇ ਚਿਤ੍ਤਮਤ੍ਤਮ੍ਪਿ ਅਨੁਪ੍ਪਾਦੇਤ੍ਵਾ, ਸਮਣਬ੍ਰਾਹ੍ਮਣਗੁਰੁਜਨੇਸੁ ਅਨਾਦਰੋ ਹੁਤ੍ਵਾ, ਧੁਤ੍ਤਜਨਪਰਿਵੁਤੋ ਰਜ੍ਜਮਾਨੋ ਪਞ੍ਚਕਾਮਗੁਣੇ ਰਤੋ ਗਿਦ੍ਧੋ ਮੋਹੇਨ ਅਨ੍ਧੋ ਹੁਤ੍ਵਾ ਕਾਲਂ ਵੀਤਿਨਾਮੇਤ੍ਵਾ, ਮਾਤਾਪਿਤੂਸੁ ਕਾਲਕਤੇਸੁ ਨਟਨਾਟਕਗਾਯਕਾਦੀਨਂ ਯਥਿਚ੍ਛਿਤਂ ਦੇਨ੍ਤੋ ਧਨਂ ਵਿਨਾਸੇਤ੍ਵਾ ਨਚਿਰਸ੍ਸੇਵ ¶ ਪਾਰਿਜੁਞ੍ਞਪ੍ਪਤ੍ਤੋ ਹੁਤ੍ਵਾ, ਇਣਂ ਗਹੇਤ੍ਵਾ ਜੀਵਿਕਂ ਕਪ੍ਪੇਨ੍ਤੋ ਪੁਨ ਇਣਮ੍ਪਿ ਅਲਭਿਤ੍ਵਾ ਇਣਾਯਿਕੇਹਿ ਚੋਦਿਯਮਾਨੋ ਤੇਸਂ ਅਤ੍ਤਨੋ ਖੇਤ੍ਤਵਤ੍ਥੁਘਰਾਦੀਨਿ ਦਤ੍ਵਾ, ਕਪਾਲਹਤ੍ਥੋ ਭਿਕ੍ਖਂ ਚਰਿਤ੍ਵਾ ਭੁਞ੍ਜਨ੍ਤੋ ਤਸ੍ਮਿਂਯੇਵ ਨਗਰੇ ਅਨਾਥਸਾਲਾਯਂ ਵਸਤਿ.

ਅਥ ਨਂ ਏਕਦਿਵਸਂ ਚੋਰਾ ਸਮਾਗਤਾ ਏਵਮਾਹਂਸੁ – ‘‘ਅਮ੍ਭੋ ਪੁਰਿਸ, ਕਿਂ ਤੁਯ੍ਹਂ ਇਮਿਨਾ ਦੁਜ੍ਜੀਵਿਤੇਨ, ਤਰੁਣੋ ਤ੍ਵਮਸਿ ¶ ਥਾਮਜਵਬਲਸਮ੍ਪਨ੍ਨੋ, ਕਸ੍ਮਾ ਹਤ੍ਥਪਾਦਵਿਕਲੋ ਵਿਯ ਅਚ੍ਛਸਿ? ਏਹਿ ਅਮ੍ਹੇਹਿ ਸਹ ਚੋਰਿਕਾਯ ਪਰੇਸਂ ਸਨ੍ਤਕਂ ਗਹੇਤ੍ਵਾ ਸੁਖੇਨ ਜੀਵਿਕਂ ਕਪ੍ਪੇਹੀ’’ਤਿ. ਸੋ ‘‘ਨਾਹਂ ਚੋਰਿਕਂ ਕਾਤੁਂ ਜਾਨਾਮੀ’’ਤਿ ਆਹ. ਚੋਰਾ ‘‘ਮਯਂ ਤਂ ਸਿਕ੍ਖਾਪੇਮ, ਕੇਵਲਂ ਤ੍ਵਂ ਅਮ੍ਹਾਕਂ ਵਚਨਂ ਕਰੋਹੀ’’ਤਿ ਆਹਂਸੁ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤੇਹਿ ਸਦ੍ਧਿਂ ਅਗਮਾਸਿ. ਅਥ ਤੇ ਚੋਰਾ ਤਸ੍ਸ ਹਤ੍ਥੇ ਮਹਨ੍ਤਂ ਮੁਗ੍ਗਰਂ ਦਤ੍ਵਾ ਸਨ੍ਧਿਂ ਛਿਨ੍ਦਿਤ੍ਵਾ ਘਰਂ ਪਵਿਸਨ੍ਤੋ ਤਂ ਸਨ੍ਧਿਮੁਖੇ ਠਪੇਤ੍ਵਾ ਆਹਂਸੁ – ‘‘ਸਚੇ ਇਧ ਅਞ੍ਞੋ ਕੋਚਿ ਆਗਚ੍ਛਤਿ, ਤਂ ਇਮਿਨਾ ਮੁਗ੍ਗਰੇਨ ਪਹਰਿਤ੍ਵਾ ਏਕਪ੍ਪਹਾਰੇਨੇਵ ਮਾਰੇਹੀ’’ਤਿ. ਸੋ ਅਨ੍ਧਬਾਲੋ ਹਿਤਾਹਿਤਂ ਅਜਾਨਨ੍ਤੋ ਪਰੇਸਂ ਆਗਮਨਮੇਵ ਓਲੋਕੇਨ੍ਤੋ ਤਤ੍ਥ ਅਟ੍ਠਾਸਿ ¶ . ਚੋਰਾ ਪਨ ਘਰਂ ਪਵਿਸਿਤ੍ਵਾ ਗਯ੍ਹੂਪਗਂ ਭਣ੍ਡਂ ਗਹੇਤ੍ਵਾ ਘਰਮਨੁਸ੍ਸੇਹਿ ਞਾਤਮਤ੍ਤਾਵ ਇਤੋ ਚਿਤੋ ਚ ਪਲਾਯਿਂਸੁ. ਘਰਮਨੁਸ੍ਸਾ ਉਟ੍ਠਹਿਤ੍ਵਾ ਸੀਘਂ ਸੀਘਂ ਧਾਵਨ੍ਤਾ ਇਤੋ ਚਿਤੋ ਚ ਓਲੋਕੇਨ੍ਤਾ ਤਂ ਪੁਰਿਸਂ ਸਨ੍ਧਿਦ੍ਵਾਰੇ ਠਿਤਂ ਦਿਸ੍ਵਾ ‘‘ਹਰੇ ਦੁਟ੍ਠਚੋਰਾ’’ਤਿ ਗਹੇਤ੍ਵਾ ਹਤ੍ਥਪਾਦੇ ਮੁਗ੍ਗਰਾਦੀਹਿ ਪੋਥੇਤ੍ਵਾ ਰਞ੍ਞੋ ਦਸ੍ਸੇਸੁਂ – ‘‘ਅਯਂ, ਦੇਵ, ਚੋਰੋ ਸਨ੍ਧਿਸੁਖੇ ਗਹਿਤੋ’’ਤਿ. ਰਾਜਾ ‘‘ਇਮਸ੍ਸ ਸੀਸਂ ਛਿਨ੍ਦਾਪੇਹੀ’’ਤਿ ਨਗਰਗੁਤ੍ਤਿਕਂ ਆਣਾਪੇਸਿ. ‘‘ਸਾਧੁ, ਦੇਵਾ’’ਤਿ ਨਗਰਗੁਤ੍ਤਿਕੋ ਤਂ ਗਾਹਾਪੇਤ੍ਵਾ ਪਚ੍ਛਾਬਾਹਂ ਗਾਲ਼੍ਹਬਨ੍ਧਨਂ ਬਨ੍ਧਾਪੇਤ੍ਵਾ ਰਤ੍ਤਵਣ੍ਣਵਿਰਲ਼ਮਾਲਾਬਨ੍ਧਕਣ੍ਠਂ ਇਟ੍ਠਕਚੁਣ੍ਣਮਕ੍ਖਿਤਸੀਸਂ ਵਜ੍ਝਪਹਟਭੇਰਿਦੇਸਿਤਮਗ੍ਗਂ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਵਿਚਰਾਪੇਤ੍ਵਾ ਕਸਾਹਿ ਤਾਲ਼ੇਨ੍ਤੋ ਆਘਾਤਨਾਭਿਮੁਖਂ ਨੇਤਿ. ‘‘ਅਯਂ ਇਮਸ੍ਮਿਂ ਨਗਰੇ ਵਿਲੁਮ੍ਪਮਾਨਕਚੋਰੋ ਗਹਿਤੋ’’ਤਿ ਕੋਲਾਹਲਂ ਅਹੋਸਿ.

ਤੇਨ ਚ ਸਮਯੇਨ ਤਸ੍ਮਿਂ ਨਗਰੇ ਸੁਲਸਾ ਨਾਮ ਨਗਰਸੋਭਿਨੀ ਪਾਸਾਦੇ ਠਿਤਾ ਵਾਤਪਾਨਨ੍ਤਰੇਨ ਓਲੋਕੇਨ੍ਤੀ ਤਂ ਤਥਾ ਨੀਯਮਾਨਂ ਦਿਸ੍ਵਾ ਪੁਬ੍ਬੇ ਤੇਨ ਕਤਪਰਿਚਯਾ ‘‘ਅਯਂ ਪੁਰਿਸੋ ਇਮਸ੍ਮਿਂਯੇਵ ਨਗਰੇ ਮਹਤਿਂ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਦਾਨਿ ਏਵਰੂਪਂ ਅਨਤ੍ਥਂ ਅਨਯਬ੍ਯਸਨਂ ਪਤ੍ਤੋ’’ਤਿ ਤਸ੍ਸ ਕਾਰੁਞ੍ਞਂ ¶ ਉਪ੍ਪਾਦੇਤ੍ਵਾ ਚਤ੍ਤਾਰੋ ਮੋਦਕੇ ਪਾਨੀਯਞ੍ਚ ਪੇਸੇਸਿ. ਨਗਰਗੁਤ੍ਤਿਕਸ੍ਸ ਚ ਆਰੋਚਾਪੇਸਿ – ‘‘ਤਾਵ ਅਯ੍ਯੋ ਆਗਮੇਤੁ, ਯਾਵਾਯਂ ¶ ਪੁਰਿਸੋ ਇਮੇ ਮੋਦਕੇ ਖਾਦਿਤ੍ਵਾ ਪਾਨੀਯਂ ਪਿਵਿਸ੍ਸਤੀ’’ਤਿ.

ਅਥੇਤਸ੍ਮਿਂ ਅਨ੍ਤਰੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦਿਬ੍ਬੇਨ ਚਕ੍ਖੁਨਾ ਓਲੋਕੇਨ੍ਤੋ ਤਸ੍ਸ ਬ੍ਯਸਨਪ੍ਪਤ੍ਤਿਂ ਦਿਸ੍ਵਾ ਕਰੁਣਾਯ ਸਞ੍ਚੋਦਿਤਮਾਨਸੋ – ‘‘ਅਯਂ ਪੁਰਿਸੋ ਅਕਤਪੁਞ੍ਞੋ ਕਤਪਾਪੋ, ਤੇਨਾਯਂ ਨਿਰਯੇ ਨਿਬ੍ਬਤ੍ਤਿਸ੍ਸਤਿ, ਮਯਿ ਪਨ ਗਤੇ ਮੋਦਕੇ ਚ ਪਾਨੀਯਞ੍ਚ ਦਤ੍ਵਾ ਭੁਮ੍ਮਦੇਵੇਸੁ ਉਪ੍ਪਜ੍ਜਿਸ੍ਸਤਿ, ਯਂਨੂਨਾਹਂ ਇਮਸ੍ਸ ਅਵਸ੍ਸਯੋ ਭਵੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਪਾਨੀਯਮੋਦਕੇਸੁ ਉਪਨੀਯਮਾਨੇਸੁ ਤਸ੍ਸ ਪੁਰਿਸਸ੍ਸ ਪੁਰਤੋ ਪਾਤੁਰਹੋਸਿ. ਸੋ ਥੇਰਂ ਦਿਸ੍ਵਾ ਪਸਨ੍ਨਮਾਨਸੋ ‘‘ਕਿਂ ਮੇ ਇਦਾਨੇਵ ਇਮੇਹਿ ਮਾਰਿਯਮਾਨਸ੍ਸ ਮੋਦਕੇਹਿ ਖਾਦਿਤੇਹਿ, ਇਦਂ ਪਨ ਪਰਲੋਕਂ ਗਚ੍ਛਨ੍ਤਸ੍ਸ ਪਾਥੇਯ੍ਯਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਮੋਦਕੇ ਚ ਪਾਨੀਯਞ੍ਚ ਥੇਰਸ੍ਸ ਦਾਪੇਸਿ. ਥੇਰੋ ਤਸ੍ਸ ਪਸਾਦਸਂਵਡ੍ਢਨਤ੍ਥਂ ਤਸ੍ਸ ਪਸ੍ਸਨ੍ਤਸ੍ਸੇਵ ਤਥਾਰੂਪੇ ਠਾਨੇ ਨਿਸੀਦਿਤ੍ਵਾ ਮੋਦਕੇ ਪਰਿਭੁਞ੍ਜਿਤ੍ਵਾ ਪਾਨੀਯਞ੍ਚ ਪਿਵਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਸੋ ਪਨ ਪੁਰਿਸੋ ਚੋਰਘਾਤਕੇਹਿ ਆਘਾਤਨਂ ਨੇਤ੍ਵਾ ਸੀਸਚ੍ਛੇਦਂ ਪਾਪਿਤੋ ਅਨੁਤ੍ਤਰੇ ਪੁਞ੍ਞਕ੍ਖੇਤ੍ਤੇ ਮਹਾਮੋਗ੍ਗਲ੍ਲਾਨਤ੍ਥੇਰੇ ਕਤੇਨ ਪੁਞ੍ਞੇਨ ਉਲ਼ਾਰੇ ਦੇਵਲੋਕੇ ਨਿਬ੍ਬਤ੍ਤਨਾਰਹੋਪਿ ਯਸ੍ਮਾ ‘‘ਸੁਲਸਂ ਆਗਮ੍ਮ ਮਯਾ ਅਯਂ ਦੇਯ੍ਯਧਮ੍ਮੋ ਲਦ੍ਧੋ’’ਤਿ ਸੁਲਸਾਯ ਗਤੇਨ ਸਿਨੇਹੇਨ ਮਰਣਕਾਲੇ ਚਿਤ੍ਤਂ ਉਪਕ੍ਕਿਲਿਟ੍ਠਂ ਅਹੋਸਿ. ਤਸ੍ਮਾ ਹੀਨਕਾਯਂ ਉਪਪਜ੍ਜਨ੍ਤੋ ਪਬ੍ਬਤਗਹਨਸਮ੍ਭੂਤੇ ਸਨ੍ਦਚ੍ਛਾਯੇ ਮਹਾਨਿਗ੍ਰੋਧਰੁਕ੍ਖੇ ਰੁਕ੍ਖਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ.

ਸੋ ¶ ਕਿਰ ਸਚੇ ਪਠਮਵਯੇ ਕੁਲਵਂਸਟ੍ਠਪਨੇ ਉਸ੍ਸੁਕ੍ਕਂ ਅਕਰਿਸ੍ਸ, ਤਸ੍ਮਿਂਯੇਵ ਨਗਰੇ ਸੇਟ੍ਠੀਨਂ ਅਗ੍ਗੋ ਅਭਵਿਸ੍ਸ, ਮਜ੍ਝਿਮਵਯੇ ਮਜ੍ਝਿਮੋ, ਪਚ੍ਛਿਮਵਯੇ ਪਚ੍ਛਿਮੋ. ਸਚੇ ਪਨ ਪਠਮਵਯੇ ਪਬ੍ਬਜਿਤੋ ਅਭਵਿਸ੍ਸ, ਅਰਹਾ ਅਭਵਿਸ੍ਸ, ਮਜ੍ਝਿਮਵਯੇ ਸਕਦਾਗਾਮੀ ਅਨਾਗਾਮੀ ਵਾ ਅਭਵਿਸ੍ਸ, ਪਚ੍ਛਿਮਵਯੇ ਸੋਤਾਪਨ੍ਨੋ ਅਭਵਿਸ੍ਸ. ਪਾਪਮਿਤ੍ਤਸਂਸਗ੍ਗੇਨ ਪਨ ਇਤ੍ਥਿਧੁਤ੍ਤੋ ਸੁਰਾਧੁਤ੍ਤੋ ਦੁਚ੍ਚਰਿਤਨਿਰਤੋ ਅਨਾਦਰਿਕੋ ਹੁਤ੍ਵਾ ਅਨੁਕ੍ਕਮੇਨ ਸਬ੍ਬਸਮ੍ਪਤ੍ਤਿਤੋ ਪਰਿਹਾਯਿਤ੍ਵਾ ਮਹਾਬ੍ਯਸਨਂ ਪਤ੍ਤੋਤਿ ਵਦਨ੍ਤਿ.

ਅਥ ¶ ਸੋ ਅਪਰੇਨ ਸਮਯੇਨ ਸੁਲਸਂ ਉਯ੍ਯਾਨਗਤਂ ਦਿਸ੍ਵਾ ਸਞ੍ਜਾਤਕਾਮਰਾਗੋ ਅਨ੍ਧਕਾਰਂ ਮਾਪੇਤ੍ਵਾ ਤਂ ਅਤ੍ਤਨੋ ਭਵਨਂ ਨੇਤ੍ਵਾ ਸਤ੍ਤਾਹਂ ਤਾਯ ¶ ਸਦ੍ਧਿਂ ਸਂਵਾਸਂ ਕਪ੍ਪੇਸਿ, ਅਤ੍ਤਾਨਞ੍ਚਸ੍ਸਾ ਆਰੋਚੇਸਿ. ਤਸ੍ਸਾ ਮਾਤਾ ਤਂ ਅਪਸ੍ਸਨ੍ਤੀ ਰੋਦਮਾਨਾ ਇਤੋ ਚਿਤੋ ਚ ਪਰਿਬ੍ਭਮਤਿ. ਤਂ ਦਿਸ੍ਵਾ ਮਹਾਜਨੋ ‘‘ਅਯ੍ਯੋ ਮਹਾਮੋਗ੍ਗਲ੍ਲਾਨੋ ਮਹਿਦ੍ਧਿਕੋ ਮਹਾਨੁਭਾਵੋ ਤਸ੍ਸਾ ਗਤਿਂ ਜਾਨੇਯ੍ਯ, ਤਂ ਉਪਸਙ੍ਕਮਿਤ੍ਵਾ ਪੁਚ੍ਛੇਯ੍ਯਾਸੀ’’ਤਿ ਆਹ. ਸਾ ‘‘ਸਾਧੁ ਅਯ੍ਯੋ’’ਤਿ ਥੇਰਂ ਉਪਸਙ੍ਕਮਿਤ੍ਵਾ ਤਮਤ੍ਥਂ ਪੁਚ੍ਛਿ. ਥੇਰੋ ‘‘ਇਤੋ ਸਤ੍ਤਮੇ ਦਿਵਸੇ ਵੇਲ਼ੁਵਨਮਹਾਵਿਹਾਰੇ ਭਗਵਤਿ ਧਮ੍ਮਂ ਦੇਸੇਨ੍ਤੇ ਪਰਿਸਪਰਿਯਨ੍ਤੇ ਪਸ੍ਸਿਸ੍ਸਸੀ’’ਤਿ ਆਹ. ਅਥ ਸੁਲਸਾ ਤਂ ਦੇਵਪੁਤ੍ਤਂ ਅਵੋਚ – ‘‘ਅਯੁਤ੍ਤਂ ਮਯ੍ਹਂ ਤਵ ਭਵਨੇ ਵਸਨ੍ਤਿਯਾ, ਅਜ੍ਜ ਸਤ੍ਤਮੋ ਦਿਵਸੋ, ਮਮ ਮਾਤਾ ਮਂ ਅਪਸ੍ਸਨ੍ਤੀ ਪਰਿਦੇਵਸੋਕਸਮਾਪਨ੍ਨਾ ਭਵਿਸ੍ਸਤਿ, ਸਾਧੁ ਮਂ, ਦੇਵ, ਤਤ੍ਥੇਵ ਨੇਹੀ’’ਤਿ. ਸੋ ਤਂ ਨੇਤ੍ਵਾ ਵੇਲ਼ੁਵਨੇ ਭਗਵਤਿ ਧਮ੍ਮਂ ਦੇਸੇਨ੍ਤੇ ਪਰਿਸਪਰਿਯਨ੍ਤੇ ਠਪੇਨ੍ਤ੍ਵਾ ਅਦਿਸ੍ਸਮਾਨਰੂਪੋ ਅਟ੍ਠਾਸਿ.

ਤਤੋ ਮਹਾਜਨੋ ਸੁਲਸਂ ਦਿਸ੍ਵਾ ਏਵਮਾਹ – ‘‘ਅਮ੍ਮ ਸੁਲਸੇ, ਤ੍ਵਂ ਏਤ੍ਤਕਂ ਦਿਵਸਂ ਕੁਹਿਂ ਗਤਾ? ਤਵ ਮਾਤਾ ਤ੍ਵਂ ਅਪਸ੍ਸਨ੍ਤੀ ਪਰਿਦੇਵਸੋਕਸਮਾਪਨ੍ਨਾ ਉਮ੍ਮਾਦਪ੍ਪਤ੍ਤਾ ਵਿਯ ਜਾਤਾ’’ਤਿ. ਸਾ ਤਂ ਪਵਤ੍ਤਿਂ ਮਹਾਜਨਸ੍ਸ ਆਚਿਕ੍ਖਿ. ਮਹਾਜਨੇਨ ਚ ‘‘ਕਥਂ ਸੋ ਪੁਰਿਸੋ ਤਥਾਪਾਪਪਸੁਤੋ ਅਕਤਕੁਸਲੋ ਦੇਵੂਪਪਤ੍ਤਿਂ ਪਟਿਲਭਤੀ’’ਤਿ ਵੁਤ੍ਤੇ ਸੁਲਸਾ ‘‘ਮਯਾ ਦਾਪਿਤੇ ਮੋਦਕੇ ਪਾਨੀਯਞ੍ਚ ਅਯ੍ਯਸ੍ਸ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਦਤ੍ਵਾ ਤੇਨ ਪੁਞ੍ਞੇਨ ਦੇਵੂਪਪਤ੍ਤਿਂ ਪਟਿਲਭਤੀ’’ਤਿ ਆਹ. ਤਂ ਸੁਤ੍ਵਾ ਮਹਾਜਨੋ ਅਚ੍ਛਰਿਯਬ੍ਭੁਤਚਿਤ੍ਤਜਾਤੋ ਅਹੋਸਿ – ‘‘ਅਰਹਨ੍ਤੋ ਨਾਮ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸ, ਯੇਸੁ ਅਪ੍ਪਕੋਪਿ ਕਤੋ ਕਾਰੋ ਸਤ੍ਤਾਨਂ ਦੇਵੂਪਪਤ੍ਤਿਂ ਆਵਹਤੀ’’ਤਿ ਉਲ਼ਾਰਂ ਪੀਤਿਸੋਮਨਸ੍ਸਂ ਪਟਿਸਂਵੇਦੇਸਿ. ਭਿਕ੍ਖੂ ਤਮਤ੍ਥਂ ਭਗਵਤੋ ਆਰੋਚੇਸੁਂ. ਤਤੋ ਭਗਵਾ ਇਮਿਸ੍ਸਾ ਅਟ੍ਠੁਪ੍ਪਤ੍ਤਿਯਾ –

‘‘ਖੇਤ੍ਤੂਪਮਾ ਅਰਹਨ੍ਤੋ, ਦਾਯਕਾ ਕਸ੍ਸਕੂਪਮਾ;

ਬੀਜੂਪਮਂ ਦੇਯ੍ਯਧਮ੍ਮਂ, ਏਤ੍ਤੋ ਨਿਬ੍ਬਤ੍ਤਤੇ ਫਲਂ.

‘‘ਏਤਂ ¶ ¶ ਬੀਜਂ ਕਸੀ ਖੇਤ੍ਤਂ, ਪੇਤਾਨਂ ਦਾਯਕਸ੍ਸ ਚ;

ਤਂ ਪੇਤਾ ਪਰਿਭੁਞ੍ਜਨ੍ਤਿ, ਦਾਤਾ ਪੁਞ੍ਞੇਨ ਵਡ੍ਢਤਿ.

‘‘ਇਧੇਵ ¶ ਕੁਸਲਂ ਕਤ੍ਵਾ, ਪੇਤੇ ਚ ਪਟਿਪੂਜਿਯ;

ਸਗ੍ਗਞ੍ਚ ਕਮਤਿਟ੍ਠਾਨਂ, ਕਮ੍ਮਂ ਕਤ੍ਵਾਨ ਭਦ੍ਦਕ’’ਨ੍ਤਿ. – ਇਮਾ ਗਾਥਾ ਅਭਾਸਿ;

੧. ਤਤ੍ਥ ਖੇਤ੍ਤੂਪਮਾਤਿ ਖਿਤ੍ਤਂ ਵੁਤ੍ਤਂ ਬੀਜਂ ਤਾਯਤਿ ਮਹਪ੍ਫਲਭਾਵਕਰਣੇਨ ਰਕ੍ਖਤੀਤਿ ਖੇਤ੍ਤਂ, ਸਾਲਿਬੀਜਾਦੀਨਂ ਵਿਰੁਹਨਟ੍ਠਾਨਂ. ਤਂ ਉਪਮਾ ਏਤੇਸਨ੍ਤਿ ਖੇਤ੍ਤੂਪਮਾ, ਕੇਦਾਰਸਦਿਸਾਤਿ ਅਤ੍ਥੋ. ਅਰਹਨ੍ਤੋਤਿ ਖੀਣਾਸਵਾ. ਤੇ ਹਿ ਕਿਲੇਸਾਰੀਨਂ ਸਂਸਾਰਚਕ੍ਕਸ੍ਸ ਅਰਾਨਞ੍ਚ ਹਤਤ੍ਤਾ, ਤਤੋ ਏਵ ਆਰਕਤ੍ਤਾ, ਪਚ੍ਚਯਾਦੀਨਂ ਅਰਹਤ੍ਤਾ, ਪਾਪਕਰਣੇ ਰਹਾਭਾਵਾ ਚ ‘‘ਅਰਹਨ੍ਤੋ’’ਤਿ ਵੁਚ੍ਚਨ੍ਤਿ. ਤਤ੍ਥ ਯਥਾ ਖੇਤਞ੍ਹਿ ਤਿਣਾਦਿਦੋਸਰਹਿਤਂ ਸ੍ਵਾਭਿਸਙ੍ਖਤਬੀਜਮ੍ਹਿ ਵੁਤ੍ਤੇ ਉਤੁਸਲਿਲਾਦਿਪਚ੍ਚਯਨ੍ਤਰੂਪੇਤਂ ਕਸ੍ਸਕਸ੍ਸ ਮਹਪ੍ਫਲਂ ਹੋਤਿ, ਏਵਂ ਖੀਣਾਸਵਸਨ੍ਤਾਨੋ ਲੋਭਾਦਿਦੋਸਰਹਿਤੋ ਸ੍ਵਾਭਿਸਙ੍ਖਤੇ ਦੇਯ੍ਯਧਮ੍ਮਬੀਜੇ ਵੁਤ੍ਤੇ ਕਾਲਾਦਿਪਚ੍ਚਯਨ੍ਤਰਸਹਿਤੋ ਦਾਯਕਸ੍ਸ ਮਹਪ੍ਫਲੋ ਹੋਤਿ. ਤੇਨਾਹ ਭਗਵਾ ‘‘ਖੇਤ੍ਤੂਪਮਾ ਅਰਹਨ੍ਤੋ’’ਤਿ. ਉਕ੍ਕਟ੍ਠਨਿਦ੍ਦੇਸੋ ਅਯਂ ਤਸ੍ਸ ਸੇਖਾਦੀਨਮ੍ਪਿ ਖੇਤ੍ਤਭਾਵਾਪਟਿਕ੍ਖੇਪਤੋ.

ਦਾਯਕਾਤਿ ਚੀਵਰਾਦੀਨਂ ਪਚ੍ਚਯਾਨਂ ਦਾਤਾਰੋ ਪਰਿਚ੍ਚਜਨਕਾ, ਤੇਸਂ ਪਰਿਚ੍ਚਾਗੇਨ ਅਤ੍ਤਨੋ ਸਨ੍ਤਾਨੇ ਲੋਭਾਦੀਨਂ ਪਰਿਚ੍ਚਜਨਕਾ ਛੇਦਨਕਾ, ਤਤੋ ਵਾ ਅਤ੍ਤਨੋ ਸਨ੍ਤਾਨਸ੍ਸ ਸੋਧਕਾ, ਰਕ੍ਖਕਾ ਚਾਤਿ ਅਤ੍ਥੋ. ਕਸ੍ਸਕੂਪਮਾਤਿ ਕਸ੍ਸਕਸਦਿਸਾ. ਯਥਾ ਕਸ੍ਸਕੋ ਸਾਲਿਖੇਤ੍ਤਾਦੀਨਿ ਕਸਿਤ੍ਵਾ ਯਥਾਕਾਲਞ੍ਚ ਵੁਤ੍ਤੁਦਕਦਾਨਨੀਹਰਣਨਿਧਾਨਰਕ੍ਖਣਾਦੀਹਿ ਅਪ੍ਪਮਜ੍ਜਨ੍ਤੋ ਉਲ਼ਾਰਂ ਵਿਪੁਲਞ੍ਚ ਸਸ੍ਸਫਲਂ ਪਟਿਲਭਤਿ, ਏਵਂ ਦਾਯਕੋਪਿ ਅਰਹਨ੍ਤੇਸੁ ਦੇਯ੍ਯਧਮ੍ਮਪਰਿਚ੍ਚਾਗੇਨ ਪਾਰਿਚਰਿਯਾਯ ਚ ਅਪ੍ਪਮਜ੍ਜਨ੍ਤੋ ਉਲ਼ਾਰਂ ਵਿਪੁਲਞ੍ਚ ਦਾਨਫਲਂ ਪਟਿਲਭਤਿ. ਤੇਨ ਵੁਤ੍ਤਂ ‘‘ਦਾਯਕਾ ਕਸ੍ਸਕੂਪਮਾ’’ਤਿ.

ਬੀਜੂਪਮਂ ਦੇਯ੍ਯਧਮ੍ਮਨ੍ਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਬੀਜਸਦਿਸੋ ਦੇਯ੍ਯਧਮ੍ਮੋਤਿ ਅਤ੍ਥੋ. ਅਨ੍ਨਪਾਨਾਦਿਕਸ੍ਸ ਹਿ ਦਸਵਿਧਸ੍ਸ ਦਾਤਬ੍ਬਵਤ੍ਥੁਨੋ ਏਤਂ ਨਾਮਂ. ਏਤ੍ਤੋ ਨਿਬ੍ਬਤ੍ਤਤੇ ਫਲਨ੍ਤਿ ਏਤਸ੍ਮਾ ਦਾਯਕਪਟਿਗ੍ਗਾਹਕਦੇਯ੍ਯਧਮ੍ਮਪਰਿਚ੍ਚਾਗਤੋ ¶ ਦਾਨਫਲਂ ਨਿਬ੍ਬਤ੍ਤਤਿ ਚੇਵ ਉਪ੍ਪਜ੍ਜਤਿ ਚ, ਚਿਰਤਰਪਬਨ੍ਧਵਸੇਨ ਪਵਤ੍ਤਤਿ ਚਾਤਿ ਅਤ੍ਥੋ. ਏਤ੍ਥ ਚ ਯਸ੍ਮਾ ਪਰਿਚ੍ਚਾਗਚੇਤਨਾਭਿਸਙ੍ਖਤਸ੍ਸ ਅਨ੍ਨਪਾਨਾਦਿਵਤ੍ਥੁਨੋ ਭਾਵੋ, ਨ ਇਤਰਸ੍ਸ, ਤਸ੍ਮਾ ‘‘ਬੀਜੂਪਮਂ ਦੇਯ੍ਯਧਮ੍ਮ’’ਨ੍ਤਿ ਦੇਯ੍ਯਧਮ੍ਮਗ੍ਗਹਣਂ ਕਤਂ. ਤੇਨ ਦੇਯ੍ਯਧਮ੍ਮਾਪਦੇਸੇਨ ¶ ਦੇਯ੍ਯਧਮ੍ਮਵਤ੍ਥੁਵਿਸਯਾਯ ਪਰਿਚ੍ਚਾਗਚੇਤਨਾਯਯੇਵ ਬੀਜਭਾਵੋ ਦਟ੍ਠਬ੍ਬੋ. ਸਾ ਹਿ ਪਟਿਸਨ੍ਧਿਆਦਿਪ੍ਪਭੇਦਸ੍ਸ ¶ ਤਸ੍ਸ ਨਿਸ੍ਸਯਾਰਮ੍ਮਣਪ੍ਪਭੇਦਸ੍ਸ ਚ ਫਲਸ੍ਸ ਨਿਪ੍ਫਾਦਿਕਾ, ਨ ਦੇਯ੍ਯਧਮ੍ਮੋਤਿ.

੨. ਏਤਂ ਬੀਜਂ ਕਸੀ ਖੇਤ੍ਤਨ੍ਤਿ ਯਥਾਵੁਤ੍ਤਂ ਬੀਜਂ, ਯਥਾਵੁਤ੍ਤਞ੍ਚ ਖੇਤ੍ਤਂ, ਤਸ੍ਸ ਬੀਜਸ੍ਸ ਤਸ੍ਮਿਂ ਖੇਤ੍ਤੇ ਵਪਨਪਯੋਗਸਙ੍ਖਾਤਾ ਕਸਿ ਚਾਤਿ ਅਤ੍ਥੋ. ਏਤਂ ਤਯਂ ਕੇਸਂ ਇਚ੍ਛਿਤਬ੍ਬਨ੍ਤਿ ਆਹ ‘‘ਪੇਤਾਨਂ ਦਾਯਕਸ੍ਸ ਚਾ’’ਤਿ. ਯਦਿ ਦਾਯਕੋ ਪੇਤੇ ਉਦ੍ਦਿਸ੍ਸ ਦਾਨਂ ਦੇਤਿ, ਪੇਤਾਨਞ੍ਚ ਦਾਯਕਸ੍ਸ ਚ, ਯਦਿ ਨ ਪੇਤੇ ਉਦ੍ਦਿਸ੍ਸ ਦਾਨਂ ਦੇਤਿ, ਦਾਯਕਸ੍ਸੇਵ ਏਤਂ ਬੀਜਂ ਏਸਾ ਕਸਿ ਏਤਂ ਖੇਤ੍ਤਂ ਉਪਕਾਰਾਯ ਹੋਤੀਤਿ ਅਧਿਪ੍ਪਾਯੋ. ਇਦਾਨਿ ਤਂ ਉਪਕਾਰਂ ਦਸ੍ਸੇਤੁਂ ‘‘ਤਂ ਪੇਤਾ ਪਰਿਭੁਞ੍ਜਨ੍ਤਿ, ਦਾਤਾ ਪੁਞ੍ਞੇਨ ਵਡ੍ਢਤੀ’’ਤਿ ਵੁਤ੍ਤਂ. ਤਤ੍ਥ ਤਂ ਪੇਤਾ ਪਰਿਭੁਞ੍ਜਨ੍ਤੀਤਿ ਦਾਯਕੇਨ ਪੇਤੇ ਉਦ੍ਦਿਸ੍ਸ ਦਾਨੇ ਦਿਨ੍ਨੇ ਯਥਾਵੁਤ੍ਤਖੇਤ੍ਤਕਸਿਬੀਜਸਮ੍ਪਤ੍ਤਿਯਾ ਅਨੁਮੋਦਨਾਯ ਚ ਯਂ ਪੇਤਾਨਂ ਉਪਕਪ੍ਪਤਿ, ਤਂ ਦਾਨਫਲਂ ਪੇਤਾ ਪਰਿਭੁਞ੍ਜਨ੍ਤਿ. ਦਾਤਾ ਪੁਞ੍ਞੇਨ ਵਡ੍ਢਤੀਤਿ ਦਾਤਾ ਪਨ ਅਤ੍ਤਨੋ ਦਾਨਮਯਪੁਞ੍ਞਨਿਮਿਤ੍ਤਂ ਦੇਵਮਨੁਸ੍ਸੇਸੁ ਭੋਗਸਮ੍ਪਤ੍ਤਿਆਦਿਨਾ ਪੁਞ੍ਞਫਲੇਨ ਅਭਿਵਡ੍ਢਤਿ. ਪੁਞ੍ਞਫਲਮ੍ਪਿ ਹਿ ‘‘ਕੁਸਲਾਨਂ, ਭਿਕ੍ਖਵੇ, ਧਮ੍ਮਾਨਂ ਸਮਾਦਾਨਹੇਤੁ ਏਵਮਿਦਂ ਪੁਞ੍ਞਂ ਪਵਡ੍ਢਤੀ’’ਤਿਆਦੀਸੁ (ਦੀ. ਨਿ. ੩.੮੦) ਪੁਞ੍ਞਨ੍ਤਿ ਵੁਚ੍ਚਤਿ.

੩. ਇਧੇਵ ਕੁਸਲਂ ਕਤ੍ਵਾਤਿ ਅਨਵਜ੍ਜਸੁਖਵਿਪਾਕਟ੍ਠੇਨ ਕੁਸਲਂ ਪੇਤਾਨਂ ਉਦ੍ਦਿਸਨਵਸੇਨ ਦਾਨਮਯਂ ਪੁਞ੍ਞਂ ਉਪਚਿਨਿਤ੍ਵਾ ਇਧੇਵ ਇਮਸ੍ਮਿਂਯੇਵ ਅਤ੍ਤਭਾਵੇ. ਪੇਤੇ ਚ ਪਟਿਪੂਜਿਯਾਤਿ ਪੇਤੇ ਉਦ੍ਦਿਸ੍ਸ ਦਾਨੇਨ ਸਮ੍ਮਾਨੇਤ੍ਵਾ ਅਨੁਭੁਯ੍ਯਮਾਨਦੁਕ੍ਖਤੋ ਤੇ ਮੋਚੇਤ੍ਵਾ. ਪੇਤੇ ਹਿ ਉਦ੍ਦਿਸ੍ਸ ਦਿਯ੍ਯਮਾਨਂ ਦਾਨਂ ਤੇਸਂ ਪੂਜਾ ਨਾਮ ਹੋਤਿ. ਤੇਨਾਹ – ‘‘ਅਮ੍ਹਾਕਞ੍ਚ ਕਤਾ ਪੂਜਾ’’ਤਿ (ਪੇ. ਵ. ੧੮), ‘‘ਪੇਤਾਨਂ ਪੂਜਾ ਚ ਕਤਾ ਉਲ਼ਾਰਾ’’ਤਿ (ਪੇ. ਵ. ੨੫) ਚ. ‘‘ਪੇਤੇ ਚਾ’’ਤਿ ਚ-ਸਦ੍ਦੇਨ ¶ ‘‘ਪਿਯੋ ਚ ਹੋਤਿ ਮਨਾਪੋ, ਅਭਿਗਮਨੀਯੋ ਚ ਹੋਤਿ ਵਿਸ੍ਸਾਸਨੀਯੋ, ਭਾਵਨੀਯੋ ਚ ਹੋਤਿ ਗਰੁਕਾਤਬ੍ਬੋ, ਪਾਸਂਸੋ ਚ ਹੋਤਿ ਕਿਤ੍ਤਨੀਯੋ ਵਿਞ੍ਞੂਨ’’ਨ੍ਤਿ ਏਵਮਾਦਿਕੇ ਦਿਟ੍ਠਧਮ੍ਮਿਕੇ ਦਾਨਾਨਿਸਂਸੇ ਸਙ੍ਗਣ੍ਹਾਤਿ. ਸਗ੍ਗਞ੍ਚ ਕਮਤਿ ਠਾਨਂ, ਕਮ੍ਮਂ ਕਤ੍ਵਾਨ ਭਦ੍ਦਕਨ੍ਤਿ ਕਲ੍ਯਾਣਂ ਕੁਸਲਕਮ੍ਮਂ ਕਤ੍ਵਾ ਦਿਬ੍ਬੇਹਿ ਆਯੁਆਦੀਹਿ ਦਸਹਿ ਠਾਨੇਹਿ ਸੁਟ੍ਠੁ ਅਗ੍ਗਤ੍ਤਾ ‘‘ਸਗ੍ਗ’’ਨ੍ਤਿ ਲਦ੍ਧਨਾਮਂ ਕਤਪੁਞ੍ਞਾਨਂ ਨਿਬ੍ਬਤ੍ਤਨਟ੍ਠਾਨਂ ਦੇਵਲੋਕਂ ਕਮਤਿ ਉਪਪਜ੍ਜਨਵਸੇਨ ਉਪਗਚ੍ਛਤਿ.

ਏਤ੍ਥ ¶ ਚ ‘‘ਕੁਸਲਂ ਕਤ੍ਵਾ’’ਤਿ ਵਤ੍ਵਾ ਪੁਨ ‘‘ਕਮ੍ਮਂ ਕਤ੍ਵਾਨ ਭਦ੍ਦਕ’’ਨ੍ਤਿ ਵਚਨਂ ‘‘ਦੇਯ੍ਯਧਮ੍ਮਪਰਿਚ੍ਚਾਗੋ ਵਿਯ ਪਤ੍ਤਿਦਾਨਵਸੇਨ ਦਾਨਧਮ੍ਮਪਰਿਚ੍ਚਾਗੋਪਿ ਦਾਨਮਯਕੁਸਲਕਮ੍ਮਮੇਵਾ’’ਤਿ ਦਸ੍ਸਨਤ੍ਥਨ੍ਤਿ ਦਟ੍ਠਬ੍ਬਂ. ਕੇਚਿ ਪਨੇਤ੍ਥ ‘‘ਪੇਤਾਤਿ ਅਰਹਨ੍ਤੋ ਅਧਿਪ੍ਪੇਤਾ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ ‘‘ਪੇਤਾ’’ਤਿ ਖੀਣਾਸਵਾਨਂ ਆਗਤਟ੍ਠਾਨਸ੍ਸੇਵ ਅਭਾਵਤੋ, ਬੀਜਾਦਿਭਾਵਸ੍ਸ ਚ ਦਾਯਕਸ੍ਸ ਵਿਯ ¶ ਤੇਸਂ ਅਯੁਜ੍ਜਮਾਨਤ੍ਤਾ, ਪੇਤਯੋਨਿਕਾਨਂ ਯੁਜ੍ਜਮਾਨਤ੍ਤਾ ਚ. ਦੇਸਨਾਪਰਿਯੋਸਾਨੇ ਦੇਵਪੁਤ੍ਤਂ ਸੁਲਸਞ੍ਚ ਆਦਿਂ ਕਤ੍ਵਾ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ.

ਖੇਤ੍ਤੂਪਮਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਕਾਯੋ ਤੇ ਸਬ੍ਬਸੋਵਣ੍ਣੋਤਿ ਇਦਂ ਸਤ੍ਥਰਿ ਰਾਜਗਹਂ ਉਪਨਿਸ੍ਸਾਯ ਵੇਲ਼ੁਵਨੇ ਕਲਨ੍ਦਕਨਿਵਾਪੇ ਵਿਹਰਨ੍ਤੇ ਅਞ੍ਞਤਰਂ ਸੂਕਰਮੁਖਪੇਤਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਕਸ੍ਸਪਸ੍ਸ ਭਗਵਤੋ ਸਾਸਨੇ ਏਕੋ ਭਿਕ੍ਖੁ ਕਾਯੇਨ ¶ ਸਞ੍ਞਤੋ ਅਹੋਸਿ, ਵਾਚਾਯ ਅਸਞ੍ਞਤੋ, ਭਿਕ੍ਖੂ ਅਕ੍ਕੋਸਤਿ ਪਰਿਭਾਸਤਿ. ਸੋ ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤੋ, ਏਕਂ ਬੁਦ੍ਧਨ੍ਤਰਂ ਤਤ੍ਥ ਪਚ੍ਚਿਤ੍ਵਾ ਤਤੋ ਚਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਸਮੀਪੇ ਗਿਜ੍ਝਕੂਟਪਬ੍ਬਤਪਾਦੇ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਖੁਪ੍ਪਿਪਾਸਾਭਿਭੂਤੋ ਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਕਾਯੋ ਸੁਵਣ੍ਣਵਣ੍ਣੋ ਅਹੋਸਿ, ਮੁਖਂ ਸੂਕਰਮੁਖਸਦਿਸਂ. ਅਥਾਯਸ੍ਮਾ ਨਾਰਦੋ ਗਿਜ੍ਝਕੂਟੇ ਪਬ੍ਬਤੇ ਵਸਨ੍ਤੋ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹਂ ਪਿਣ੍ਡਾਯ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਤਂ ਪੇਤਂ ਦਿਸ੍ਵਾ ਤੇਨ ਕਤਕਮ੍ਮਂ ਪੁਚ੍ਛਨ੍ਤੋ –

‘‘ਕਾਯੋ ਤੇ ਸਬ੍ਬਸੋਵਣ੍ਣੋ, ਸਬ੍ਬਾ ਓਭਾਸਤੇ ਦਿਸਾ;

ਮੁਖਂ ਤੇ ਸੂਕਰਸ੍ਸੇਵ, ਕਿਂ ਕਮ੍ਮਮਕਰੀ ਪੁਰੇ’’ਤਿ. –

ਗਾਥਮਾਹ. ਤਤ੍ਥ ਕਾਯੋ ਤੇ ਸਬ੍ਬਸੋਵਣ੍ਣੋਤਿ ਤਵ ਕਾਯੋ ਦੇਹੋ ਸਬ੍ਬੋ ਸੁਵਣ੍ਣਵਣ੍ਣੋ ਉਤ੍ਤਤ੍ਤਕਨਕਸਨ੍ਨਿਭੋ. ਸਬ੍ਬਾ ਓਭਾਸਤੇ ਦਿਸਾਤਿ ਤਸ੍ਸ ਪਭਾਯ ਸਬ੍ਬਾਪਿ ਦਿਸਾ ਸਮਨ੍ਤਨ੍ਤੋ ਓਭਾਸਤਿ ਵਿਜ੍ਜੋਤਤਿ. ਓਭਾਸਤੇਤਿ ਵਾ ਅਨ੍ਤੋਗਧਹੋਤੁਅਤ੍ਥਮਿਦਂ ਪਦਨ੍ਤਿ ‘‘ਤੇ ਕਾਯੋ ਸਬ੍ਬਸੋਵਣ੍ਣੋ ਸਬ੍ਬਾ ਦਿਸਾ ਓਭਾਸੇਤਿ ਵਿਜ੍ਜੋਤੇਤੀ’’ਤਿ ਅਤ੍ਥੋ ਦਟ੍ਠਬ੍ਬੋ. ਮੁਖਂ ¶ ਤੇ ਸੂਕਰਸ੍ਸੇਵਾਤਿ ਮੁਖਂ ਪਨ ਤੇ ਸੂਕਰਸ੍ਸ ਵਿਯ, ਸੂਕਰਮੁਖਸਦਿਸਂ ਤਵ ਮੁਖਨ੍ਤਿ ਅਤ੍ਥੋ. ਕਿਂ ਕਮ੍ਮਮਕਰੀ ਪੁਰੇਤਿ ‘‘ਤ੍ਵਂ ਪੁਬ੍ਬੇ ਅਤੀਤਜਾਤਿਯਂ ਕੀਦਿਸਂ ਕਮ੍ਮਂ ਅਕਾਸੀ’’ਤਿ ਪੁਚ੍ਛਤਿ.

ਏਵਂ ਥੇਰੇਨ ਸੋ ਪੇਤੋ ਕਤਕਮ੍ਮਂ ਪੁਟ੍ਠੋ ਗਾਥਾਯ ਵਿਸ੍ਸਜ੍ਜੇਨ੍ਤੋ –

‘‘ਕਾਯੇਨ ਸਞ੍ਞਤੋ ਆਸਿਂ, ਵਾਚਾਯਾਸਿਮਸਞ੍ਞਤੋ;

ਤੇਨ ਮੇਤਾਦਿਸੋ ਵਣ੍ਣੋ, ਯਥਾ ਪਸ੍ਸਸਿ ਨਾਰਦਾ’’ਤਿ. –

ਆਹ ¶ . ਤਤ੍ਥ ਕਾਯੇਨ ਸਞ੍ਞਤੋ ਆਸਿਨ੍ਤਿ ਕਾਯਿਕੇਨ ਸਂਯਮੇਨ ਸਂਯਤੋ ਕਾਯਦ੍ਵਾਰਿਕੇਨ ਸਂਵਰੇਨ ਸਂਵੁਤੋ ਅਹੋਸਿਂ. ਵਾਚਾਯਾਸਿਮਸਞ੍ਞਤੋਤਿ ¶ ਵਾਚਾਯ ਅਸਞ੍ਞਤੋ ਵਾਚਸਿਕੇਨ ਅਸਂਵਰੇਨ ਸਮਨ੍ਨਾਗਤੋ ਅਹੋਸਿਂ. ਤੇਨਾਤਿ ਤੇਨ ਉਭਯੇਨ ਸਂਯਮੇਨ ਅਸਂਯਮੇਨ ਚ. ਮੇਤਿ ਮਯ੍ਹਂ. ਏਤਾਦਿਸੋ ਵਣ੍ਣੋਤਿ ਏਦਿਸੋ. ਯਥਾ ਤ੍ਵਂ, ਨਾਰਦ, ਪਚ੍ਚਕ੍ਖਤੋ ਪਸ੍ਸਸਿ, ਏਵਰੂਪੋ, ਕਾਯੇਨ ਮਨੁਸ੍ਸਸਣ੍ਠਾਨੋ ਸੁਵਣ੍ਣਵਣ੍ਣੋ, ਮੁਖੇਨ ਸੂਕਰਸਦਿਸੋ ਆਸਿਨ੍ਤਿ ਯੋਜਨਾ. ਵਣ੍ਣਸਦ੍ਦੋ ਹਿ ਇਧ ਛਵਿਯਂ ਸਣ੍ਠਾਨੇ ਚ ਦਟ੍ਠਬ੍ਬੋ.

ਏਵਂ ਪੇਤੋ ਥੇਰੇਨ ਪੁਚ੍ਛਿਤੋ ਤਮਤ੍ਥਂ ਵਿਸ੍ਸਜ੍ਜੇਤ੍ਵਾ ਤਮੇਵ ਕਾਰਣਂ ਕਤ੍ਵਾ ਥੇਰਸ੍ਸ ਓਵਾਦਂ ਦੇਨ੍ਤੋ –

‘‘ਤਂ ਤ੍ਯਾਹਂ ਨਾਰਦ ਬ੍ਰੂਮਿ, ਸਾਮਂ ਦਿਟ੍ਠਮਿਦਂ ਤਯਾ;

ਮਾਕਾਸਿ ਮੁਖਸਾ ਪਾਪਂ, ਮਾ ਖੋ ਸੂਕਰਮੁਖੋ ਅਹੂ’’ਤਿ. –

ਗਾਥਮਾਹ. ਤਤ੍ਥ ਤਨ੍ਤਿ ਤਸ੍ਮਾ. ਤ੍ਯਾਹਨ੍ਤਿ ਤੇ ਅਹਂ. ਨਾਰਦਾਤਿ ਥੇਰਂ ਆਲਪਤਿ. ਬ੍ਰੂਮੀਤਿ ਕਥੇਮਿ. ਸਾਮਨ੍ਤਿ ਸਯਮੇਵ. ਇਦਨ੍ਤਿ ਅਤ੍ਤਨੋ ਸਰੀਰਂ ਸਨ੍ਧਾਯ ਵਦਤਿ. ਅਯਞ੍ਹੇਤ੍ਥ ਅਤ੍ਥੋ – ਯਸ੍ਮਾ, ਭਨ੍ਤੇ ਨਾਰਦ, ਇਦਂ ਮਮ ਸਰੀਰਂ ਗਲਤੋ ਪਟ੍ਠਾਯ ਹੇਟ੍ਠਾ ਮਨੁਸ੍ਸਸਣ੍ਠਾਨਂ, ਉਪਰਿ ਸੂਕਰਸਣ੍ਠਾਨਂ, ਤਯਾ ਪਚ੍ਚਕ੍ਖਤੋਵ ਦਿਟ੍ਠਂ, ਤਸ੍ਮਾ ਤੇ ਅਹਂ ਓਵਾਦਵਸੇਨ ਵਦਾਮੀਤਿ. ਕਿਨ੍ਤਿ ਚੇਤਿ ਆਹ ‘‘ਮਾਕਾਸਿ ਮੁਖਸਾ ਪਾਪਂ, ਮਾ ਖੋ ਸੂਕਰਮੁਖੋ ਅਹੂ’’ਤਿ. ਤਤ੍ਥ ਮਾਤਿ ਪਟਿਸੇਧੇ ਨਿਪਾਤੋ. ਮੁਖਸਾਤਿ ਮੁਖੇਨ. ਖੋਤਿ ਅਵਧਾਰਣੇ, ਵਾਚਾਯ ਪਾਪਕਮ੍ਮਂ ਮਾਕਾਸਿ ਮਾ ਕਰੋਹਿ. ਮਾ ¶ ਖੋ ਸੂਕਰਮੁਖੋ ਅਹੂਤਿ ਅਹਂ ਵਿਯ ਸੂਕਰਮੁਖੋ ਮਾ ਅਹੋਸਿਯੇਵ. ਸਚੇ ਪਨ ਤ੍ਵਂ ਮੁਖਰੋ ਹੁਤ੍ਵਾ ਵਾਚਾਯ ਪਾਪਂ ਕਰੇਯ੍ਯਾਸਿ, ਏਕਂਸੇਨ ਸੂਕਰਮੁਖੋ ਭਵੇਯ੍ਯਾਸਿ, ਤਸ੍ਮਾ ਮਾਕਾਸਿ ਮੁਖਸਾ ਪਾਪਨ੍ਤਿ ਫਲਪਟਿਸੇਧਨਮੁਖੇਨਪਿ ਹੇਤੁਮੇਵ ਪਟਿਸੇਧੇਤਿ.

ਅਥਾਯਸ੍ਮਾ ਨਾਰਦੋ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਚਤੁਪਰਿਸਮਜ੍ਝੇ ਨਿਸਿਨ੍ਨਸ੍ਸ ਸਤ੍ਥੁਨੋ ਤਮਤ੍ਥਂ ਆਰੋਚੇਸਿ. ਸਤ੍ਥਾ, ‘‘ਨਾਰਦ, ਪੁਬ੍ਬੇਵ ਮਯਾ ¶ ਸੋ ਸਤ੍ਥੋ ਦਿਟ੍ਠੋ’’ਤਿ ਵਤ੍ਵਾ ਅਨੇਕਾਕਾਰਵੋਕਾਰਂ ਵਚੀਦੁਚ੍ਚਰਿਤਸਨ੍ਨਿਸ੍ਸਿਤਂ ਆਦੀਨਵਂ, ਵਚੀਸੁਚਰਿਤਪਟਿਸਂਯੁਤ੍ਤਞ੍ਚ ਆਨਿਸਂਸਂ ਪਕਾਸੇਨ੍ਤੋ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਸਮ੍ਪਤ੍ਤਪਰਿਸਾਯ ਸਾਤ੍ਥਿਕਾ ਅਹੋਸੀਤਿ.

ਸੂਕਰਮੁਖਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਦਿਬ੍ਬਂ ¶ ਸੁਭਂ ਧਾਰੇਸਿ ਵਣ੍ਣਧਾਤੁਨ੍ਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਕਲਨ੍ਦਕਨਿਵਾਪੇ ਅਞ੍ਞਤਰਂ ਪੂਤਿਮੁਖਪੇਤਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਕਸ੍ਸਪਸ੍ਸ ਭਗਵਤੋ ਕਾਲੇ ਦ੍ਵੇ ਕੁਲਪੁਤ੍ਤਾ ਤਸ੍ਸ ਸਾਸਨੇ ਪਬ੍ਬਜਿਤ੍ਵਾ ਸੀਲਾਚਾਰਸਮ੍ਪਨ੍ਨਾ ਸਲ੍ਲੇਖਵੁਤ੍ਤਿਨੋ ਅਞ੍ਞਤਰਸ੍ਮਿਂ ਗਾਮਕਾਵਾਸੇ ਸਮਗ੍ਗਵਾਸਂ ਵਸਿਂਸੁ. ਅਥ ਅਞ੍ਞਤਰੋ ਪਾਪਜ੍ਝਾਸਯੋ ਪੇਸੁਞ੍ਞਾਭਿਰਤੋ ਭਿਕ੍ਖੁ ਤੇਸਂ ਵਸਨਟ੍ਠਾਨਂ ਉਪਗਞ੍ਛਿ. ਥੇਰਾ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਵਸਨਟ੍ਠਾਨਂ ਦਤ੍ਵਾ ਦੁਤਿਯਦਿਵਸੇ ਤਂ ਗਹੇਤ੍ਵਾ ਗਾਮਂ ਪਿਣ੍ਡਾਯ ਪਵਿਸਿਂਸੁ. ਮਨੁਸ੍ਸਾ ਤੇ ਦਿਸ੍ਵਾ ਤੇਸੁ ਥੇਰੇਸੁ ਅਤਿਵਿਯ ਪਰਮਨਿਪਚ੍ਚਕਾਰਂ ਕਤ੍ਵਾ ਯਾਗੁਭਤ੍ਤਾਦੀਹਿ ਪਟਿਮਾਨੇਸੁਂ. ਸੋ ਵਿਹਾਰਂ ਪਵਿਸਿਤ੍ਵਾ ਚਿਨ੍ਤੇਸਿ – ‘‘ਸੁਨ੍ਦਰੋ ਵਤਾਯਂ ਗੋਚਰਗਾਮੋ, ਮਨੁਸ੍ਸਾ ਚ ਸਦ੍ਧਾ ਪਸਨ੍ਨਾ, ਪਣੀਤਪਣੀਤਂ ਪਿਣ੍ਡਪਾਤਂ ਦੇਨ੍ਤਿ, ਅਯਞ੍ਚ ਵਿਹਾਰੋ ਛਾਯੂਦਕਸਮ੍ਪਨ੍ਨੋ, ਸਕ੍ਕਾ ਮੇ ਇਧ ਸੁਖੇਨ ਵਸਿਤੁਂ. ਇਮੇਸੁ ਪਨ ਭਿਕ੍ਖੂਸੁ ਇਧ ਵਸਨ੍ਤੇਸੁ ਮਯ੍ਹਂ ਫਾਸੁਵਿਹਾਰੋ ਨ ਭਵਿਸ੍ਸਤਿ, ਅਨ੍ਤੇਵਾਸਿਕਵਾਸੋ ਵਿਯ ਭਵਿਸ੍ਸਤਿ. ਹਨ੍ਦਾਹਂ ਇਮੇ ਅਞ੍ਞਮਞ੍ਞਂ ਭਿਨ੍ਦਿਤ੍ਵਾ ਯਥਾ ਨ ਪੁਨ ਇਧ ਵਸਿਸ੍ਸਨ੍ਤਿ, ਤਥਾ ਕਰਿਸ੍ਸਾਮੀ’’ਤਿ.

ਅਥੇਕਦਿਵਸਂ ¶ ਮਹਾਥੇਰੇ ਦ੍ਵਿਨ੍ਨਮ੍ਪਿ ਓਵਾਦਂ ਦਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਪਵਿਟ੍ਠੇ ਪੇਸੁਣਿਕੋ ਭਿਕ੍ਖੁ ਥੋਕਂ ਕਾਲਂ ਵੀਤਿਨਾਮੇਤ੍ਵਾ ਮਹਾਥੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਥੇਰੇਨ ‘‘ਕਿਂ, ਆਵੁਸੋ, ਵਿਕਾਲੇ ਆਗਤੋਸੀ’’ਤਿ ਚ ਵੁਤ੍ਤੇ, ‘‘ਆਮ, ਭਨ੍ਤੇ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥੀ’’ਤਿ ਵਤ੍ਵਾ ‘‘ਕਥੇਹਿ, ਆਵੁਸੋ’’ਤਿ ਥੇਰੇਨ ਅਨੁਞ੍ਞਾਤੋ ਆਹ – ‘‘ਏਸੋ, ਭਨ੍ਤੇ, ਤੁਮ੍ਹਾਕਂ ¶ ਸਹਾਯਕਤ੍ਥੇਰੋ ਸਮ੍ਮੁਖਾ ਮਿਤ੍ਤੋ ਵਿਯ ਅਤ੍ਤਾਨਂ ਦਸ੍ਸੇਤ੍ਵਾ ਪਰਮ੍ਮੁਖਾ ਸਪਤ੍ਤੋ ਵਿਯ ਉਪਵਦਤੀ’’ਤਿ. ‘‘ਕਿਂ ਕਥੇਤੀ’’ਤਿ ਪੁਚ੍ਛਿਤੋ ‘‘ਸੁਣਾਥ, ਭਨ੍ਤੇ, ‘ਏਸੋ ਮਹਾਥੇਰੋ ਸਠੋ ਮਾਯਾਵੀ ਕੁਹਕੋ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਤੀ’ਤਿ ਤੁਮ੍ਹਾਕਂ ਅਗੁਣਂ ਕਥੇਤੀ’’ਤਿ ਆਹ. ‘‘ਮਾ, ਆਵੁਸੋ, ਏਵਂ ਭਣਿ, ਨ ਸੋ ਭਿਕ੍ਖੁ ਏਵਂ ਮਂ ਉਪਵਦਿਸ੍ਸਤਿ, ਗਿਹਿਕਾਲਤੋ ਪਟ੍ਠਾਯ ਮਮ ਸਭਾਵਂ ਜਾਨਾਤਿ ‘ਪੇਸਲੋ ਕਲ੍ਯਾਣਸੀਲੋ’’’ਤਿ. ‘‘ਸਚੇ, ਭਨ੍ਤੇ, ਤੁਮ੍ਹੇ ਅਤ੍ਤਨੋ ਵਿਸੁਦ੍ਧਚਿਤ੍ਤਤਾਯ ਏਵਂ ਚਿਨ੍ਤੇਥ, ਤਂ ਤੁਮ੍ਹਾਕਂਯੇਵ ਅਨੁਚ੍ਛਵਿਕਂ, ਮਯ੍ਹਂ ਪਨ ਤੇਨ ਸਦ੍ਧਿਂ ਵੇਰਂ ਨਤ੍ਥਿ, ਕਸ੍ਮਾ ਅਹਂ ਤੇਨ ਅਵੁਤ੍ਤਂ ‘ਵੁਤ੍ਤ’ਨ੍ਤਿ ਵਦਾਮਿ. ਹੋਤੁ, ਕਾਲਨ੍ਤਰੇਨ ਸਯਮੇਵ ਜਾਨਿਸ੍ਸਥਾ’’ਤਿ ਆਹ. ਥੇਰੋਪਿ ਪੁਥੁਜ੍ਜਨਭਾਵਦੋਸੇਨ ਦ੍ਵੇਲ਼੍ਹਕਚਿਤ੍ਤੋ ‘‘ਏਵਮ੍ਪਿ ਸਿਯਾ’’ਤਿ ਸਾਸਙ੍ਕਹਦਯੋ ਹੁਤ੍ਵਾ ਥੋਕਂ ਸਿਥਿਲਵਿਸ੍ਸਾਸੋ ਅਹੋਸਿ. ਸੋ ਬਾਲੋ ਪਠਮਂ ਮਹਾਥੇਰਂ ਪਰਿਭਿਨ੍ਦਿਤ੍ਵਾ ਇਤਰਮ੍ਪਿ ਥੇਨਂ ਵੁਤ੍ਤਨਯੇਨੇਵ ਪਰਿਭਿਨ੍ਦਿ. ਅਥ ਤੇ ਉਭੋਪਿ ਥੇਰਾ ਦੁਤਿਯਦਿਵਸੇ ਅਞ੍ਞਮਞ੍ਞਂ ਅਨਾਲਪਿਤ੍ਵਾ ਪਤ੍ਤਚੀਵਰਮਾਦਾਯ ਗਾਮੇ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਮਾਦਾਯ ਅਤ੍ਤਨੋ ਵਸਨਟ੍ਠਾਨੇਯੇਵ ¶ ਪਰਿਭੁਞ੍ਜਿਤ੍ਵਾ ਸਾਮੀਚਿਮਤ੍ਤਮ੍ਪਿ ਅਕਤ੍ਵਾ ਤਂ ਦਿਵਸਂ ਤਤ੍ਥੇਵ ਵਸਿਤ੍ਵਾ ਵਿਭਾਤਾਯ ਚ ਰਤ੍ਤਿਯਾ ਅਞ੍ਞਮਞ੍ਞਂ ਅਨਾਰੋਚੇਤ੍ਵਾਵ ਯਥਾਫਾਸੁਕਟ੍ਠਾਨਂ ਅਗਮਂਸੁ.

ਪੇਸੁਣਿਕਂ ਪਨ ਭਿਕ੍ਖੁਂ ਪਰਿਪੁਣ੍ਣਮਨੋਰਥਂ ਗਾਮਂ ਪਿਣ੍ਡਾਯ ਪਵਿਟ੍ਠਂ ਮਨੁਸ੍ਸਾ ਦਿਸ੍ਵਾ ਆਹਂਸੁ – ‘‘ਭਨ੍ਤੇ, ਥੇਰਾ ਕੁਹਿਂ ਗਤਾ’’ਤਿ? ਸੋ ਆਹ – ‘‘ਸਬ੍ਬਰਤ੍ਤਿਂ ਅਞ੍ਞਮਞ੍ਞਂ ਕਲਹਂ ਕਤ੍ਵਾ ਮਯਾ ‘ਮਾ ਕਲਹਂ ਕਰੋਥ, ਸਮਗ੍ਗਾ ਹੋਥ, ਕਲਹੋ ਨਾਮ ਅਨਤ੍ਥਾਵਹੋ ਆਯਤਿਦੁਕ੍ਖੁਪ੍ਪਾਦਕੋ ਅਕੁਸਲਸਂਵਤ੍ਤਨਿਕੋ, ਪੁਰਿਮਕਾਪਿ ਕਲਹੇਨ ਮਹਤਾ ਹਿਤਾ ਪਰਿਭਟ੍ਠਾ’ਤਿਆਦੀਨਿ ਵੁਚ੍ਚਮਾਨਾਪਿ ਮਮ ਵਚਨਂ ਅਨਾਦਿਯਿਤ੍ਵਾ ਪਕ੍ਕਨ੍ਤਾ’’ਤਿ. ਤਤੋ ਮਨੁਸ੍ਸਾ ‘‘ਥੇਰਾ ਤਾਵ ਗਚ੍ਛਨ੍ਤੁ, ਤੁਮ੍ਹੇ ਪਨ ਅਮ੍ਹਾਕਂ ਅਨੁਕਮ੍ਪਾਯ ਇਧੇਵ ਅਨੁਕ੍ਕਣ੍ਠਿਤ੍ਵਾ ਵਸਥਾ’’ਤਿ ਯਾਚਿਂਸੁ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਤ੍ਥੇਵ ਵਸਨ੍ਤੋ ਕਤਿਪਾਹੇਨ ਚਿਨ੍ਤੇਸਿ – ‘‘ਮਯਾ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਭਿਕ੍ਖੂ ¶ ਆਵਾਸਲੋਭੇਨ ਪਰਿਭਿਨ੍ਨਾ, ਬਹੁਂ ਵਤ ਮਯਾ ਪਾਪਕਮ੍ਮਂ ਪਸੁਤ’’ਨ੍ਤਿ ¶ ਬਲਵਵਿਪ੍ਪਟਿਸਾਰਾਭਿਭੂਤੋ ਸੋਕਵੇਗੇਨ ਗਿਲਾਨੋ ਹੁਤ੍ਵਾ ਨਚਿਰੇਨੇਵ ਕਾਲਂ ਕਤ੍ਵਾ ਅਵੀਚਿਮ੍ਹਿ ਨਿਬ੍ਬਤ੍ਤਿ.

ਇਤਰੇ ਦ੍ਵੇ ਸਹਾਯਕਤ੍ਥੇਰਾ ਜਨਪਦਚਾਰਿਕਂ ਚਰਨ੍ਤਾ ਅਞ੍ਞਤਰਸ੍ਮਿਂ ਆਵਾਸੇ ਸਮਾਗਨ੍ਤ੍ਵਾ ਅਞ੍ਞਮਞ੍ਞਂ ਸਮ੍ਮੋਦਿਤ੍ਵਾ ਤੇਨ ਭਿਕ੍ਖੁਨਾ ਵੁਤ੍ਤਂ ਭੇਦਵਚਨਂ ਅਞ੍ਞਮਞ੍ਞਸ੍ਸ ਆਰੋਚੇਤ੍ਵਾ ਤਸ੍ਸ ਅਭੂਤਭਾਵਂ ਞਤ੍ਵਾ ਸਮਗ੍ਗਾ ਹੁਤ੍ਵਾ ਅਨੁਕ੍ਕਮੇਨ ਤਮੇਵ ਆਵਾਸਂ ਪਚ੍ਚਾਗਮਿਂਸੁ. ਮਨੁਸ੍ਸਾ ਦ੍ਵੇ ਥੇਰੇ ਦਿਸ੍ਵਾ ਹਟ੍ਠਤੁਟ੍ਠਾ ਸਞ੍ਜਾਤਸੋਮਨਸ੍ਸਾ ਹੁਤ੍ਵਾ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿਂਸੁ. ਥੇਰਾ ਚ ਤਤ੍ਥੇਵ ਵਸਨ੍ਤਾ ਸਪ੍ਪਾਯਆਹਾਰਲਾਭੇਨ ਸਮਾਹਿਤਚਿਤ੍ਤਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰੇਨੇਵ ਅਰਹਤ੍ਤਂ ਪਾਪੁਣਿਂਸੁ.

ਪੇਸੁਣਿਕੋ ਭਿਕ੍ਖੁ ਏਕਂ ਬੁਦ੍ਧਨ੍ਤਰਂ ਨਿਰਯੇ ਪਚ੍ਚਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਸ੍ਸ ਅਵਿਦੂਰੇ ਪੂਤਿਮੁਖਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਕਾਯੋ ਸੁਵਣ੍ਣਵਣ੍ਣੋ ਅਹੋਸਿ, ਮੁਖਤੋ ਪਨ ਪੁਲ਼ਵਕਾ ਨਿਕ੍ਖਮਿਤ੍ਵਾ ਇਤੋ ਚਿਤੋ ਚ ਮੁਖਂ ਖਾਦਨ੍ਤਿ, ਤਸ੍ਸ ਦੂਰਮ੍ਪਿ ਓਕਾਸਂ ਫਰਿਤ੍ਵਾ ਦੁਗ੍ਗਨ੍ਧਂ ਵਾਯਤਿ. ਅਥਾਯਸ੍ਮਾ ਨਾਰਦੋ ਗਿਜ੍ਝਕੂਟਪਬ੍ਬਤਾ ਓਰੋਹਨ੍ਤੋ ਤਂ ਦਿਸ੍ਵਾ –

‘‘ਦਿਬ੍ਬਂ ਸੁਭਂ ਧਾਰੇਸਿ ਵਣ੍ਣਧਾਤੁਂ, ਵੇਹਾਯਸਂ ਤਿਟ੍ਠਸਿ ਅਨ੍ਤਲਿਕ੍ਖੇ;

ਮੁਖਞ੍ਚ ਤੇ ਕਿਮਯੋ ਪੂਤਿਗਨ੍ਧਂ, ਖਾਦਨ੍ਤਿ ਕਿਂ ਕਮ੍ਮਮਕਾਸਿ ਪੁਬ੍ਬੇ’’ਤਿ. –

ਇਮਾਯ ਗਾਥਾਯ ਕਤਕਮ੍ਮਂ ਪੁਚ੍ਛਿ. ਤਤ੍ਥ ਦਿਬ੍ਬਨ੍ਤਿ ਦਿਵਿ ਭਵਂ ਦੇਵਤ੍ਤਭਾਵਪਰਿਯਾਪਨ੍ਨਂ. ਇਧ ਪਨ ਦਿਬ੍ਬਂ ਵਿਯਾਤਿ ਦਿਬ੍ਬਂ. ਸੁਭਨ੍ਤਿ ਸੋਭਨਂ, ਸੁਨ੍ਦਰਭਾਵਂ ਵਾ. ਵਣ੍ਣਧਾਤੁਨ੍ਤਿ ਛਵਿਵਣ੍ਣਂ. ਧਾਰੇਸੀਤਿ ਵਹਸਿ ¶ . ਵੇਹਾਯਸਂ ਤਿਟ੍ਠਸਿ ਅਨ੍ਤਲਿਕ੍ਖੇਤਿ ਵੇਹਾਯਸਸਞ੍ਞਿਤੇ ਅਨ੍ਤਲਿਕ੍ਖੇ ਤਿਟ੍ਠਸਿ. ਕੇਚਿ ਪਨ ‘‘ਵਿਹਾਯਸਂ ਤਿਟ੍ਠਸਿ ਅਨ੍ਤਲਿਕ੍ਖੇ’’ਤਿ ਪਾਠਂ ਵਤ੍ਵਾ ਵਿਹਾਯਸਂ ਓਭਾਸੇਨ੍ਤੋ ਅਨ੍ਤਲਿਕ੍ਖੇ ਤਿਟ੍ਠਸੀਤਿ ਵਚਨਸੇਸੇਨ ਅਤ੍ਥਂ ¶ ਵਦਨ੍ਤਿ. ਪੂਤਿਗਨ੍ਧਨ੍ਤਿ ਕੁਣਪਗਨ੍ਧਂ, ਦੁਗ੍ਗਨ੍ਧਨ੍ਤਿ ਅਤ੍ਥੋ. ਕਿਂ ਕਮ੍ਮਮਕਾਸਿ ਪੁਬ੍ਬੇਤਿ ਪਰਮਦੁਗ੍ਗਨ੍ਧਂ ਤੇ ਮੁਖਂ ਕਿਮਯੋ ਖਾਦਨ੍ਤਿ, ਕਾਯੋ ਚ ਸੁਵਣ੍ਣਵਣ੍ਣੋ, ਕੀਦਿਸਂ ਨਾਮ ਕਮ੍ਮਂ ਏਵਰੂਪਸ੍ਸ ਅਤ੍ਤਭਾਵਸ੍ਸ ਕਾਰਣਭੂਤਂ ਪੁਬ੍ਬੇ ਤ੍ਵਂ ਅਕਾਸੀਤਿ ਪੁਚ੍ਛਿ.

ਏਵਂ ¶ ਥੇਰੇਨ ਸੋ ਪੇਤੋ ਅਤ੍ਤਨਾ ਕਤਕਮ੍ਮਂ ਪੁਟ੍ਠੋ ਤਮਤ੍ਥਂ ਵਿਸ੍ਸਜ੍ਜੇਨ੍ਤੋ –

‘‘ਸਮਣੋ ਅਹਂ ਪਾਪੋਤਿਦੁਟ੍ਠਵਾਚੋ, ਤਪਸ੍ਸਿਰੂਪੋ ਮੁਖਸਾ ਅਸਞ੍ਞਤੋ;

ਲਦ੍ਧਾ ਚ ਮੇ ਤਮਸਾ ਵਣ੍ਣਧਾਤੁ, ਮੁਖਞ੍ਚ ਮੇ ਪੇਸੁਣਿਯੇਨ ਪੂਤੀ’’ਤਿ. –

ਗਾਥਮਾਹ. ਤਤ੍ਥ ਸਮਣੋ ਅਹਂ ਪਾਪੋਤਿ ਅਹਂ ਲਾਮਕੋ ਸਮਣੋ ਪਾਪਭਿਕ੍ਖੁ ਅਹੋਸਿਂ. ਅਤਿਦੁਟ੍ਠਵਾਚੋਤਿ ਅਤਿਦੁਟ੍ਠਵਚਨੋ, ਪਰੇ ਅਤਿਕ੍ਕਮਿਤ੍ਵਾ ਲਙ੍ਘਿਤ੍ਵਾ ਵਤ੍ਤਾ, ਪਰੇਸਂ ਗੁਣਪਰਿਧਂਸਕਵਚਨੋਤਿ ਅਤ੍ਥੋ. ‘‘ਅਤਿਦੁਕ੍ਖਵਾਚੋ’’ਤਿ ਵਾ ਪਾਠੋ, ਅਤਿਵਿਯ ਫਰੁਸਵਚਨੋ ਮੁਸਾਵਾਦਪੇਸੁਞ੍ਞਾਦਿਵਚੀਦੁਚ੍ਚਰਿਤਨਿਰਤੋ. ਤਪਸ੍ਸਿਰੂਪੋਤਿ ਸਮਣਪਤਿਰੂਪਕੋ. ਮੁਖਸਾਤਿ ਮੁਖੇਨ. ਲਦ੍ਧਾਤਿ ਪਟਿਲਦ੍ਧਾ. ਚ-ਕਾਰੋ ਸਮ੍ਪਿਣ੍ਡਨਤ੍ਥੋ. ਮੇਤਿ ਮਯਾ. ਤਪਸਾਤਿ ਬ੍ਰਹ੍ਮਚਰਿਯੇਨ. ਪੇਸੁਣਿਯੇਨਾਤਿ ਪਿਸੁਣਵਾਚਾਯ. ਪੁਤੀਤਿ ਪੂਤਿਗਨ੍ਧਂ.

ਏਵਂ ਸੋ ਪੇਤੋ ਅਤ੍ਤਨਾ ਕਤਕਮ੍ਮਂ ਆਚਿਕ੍ਖਿਤ੍ਵਾ ਇਦਾਨਿ ਥੇਰਸ੍ਸ ਓਵਾਦਂ ਦੇਨ੍ਤੋ –

ਯਕ੍ਖੋ ਤੁਵਂ ਹੋਹਿਸਿ ਕਾਮਕਾਮੀ’’ਤਿ. –

ਓਸਾਨਗਾਥਮਾਹ. ਤਤ੍ਥ ¶ ਤਯਿਦਨ੍ਤਿ ਤਂ ਇਦਂ ਮਮ ਰੂਪਂ. ਅਨੁਕਮ੍ਪਕਾ ਯੇ ਕੁਸਲਾ ਵਦੇਯ੍ਯੁਨ੍ਤਿ ਯੇ ਅਨੁਕਮ੍ਪਨਸੀਲਾ ਕਾਰੁਣਿਕਾ ਪਰਹਿਤਪਟਿਪਤ੍ਤਿਯਂ ਕੁਸਲਾ ਨਿਪੁਣਾ ਬੁਦ੍ਧਾਦਯੋ ਯਂ ਵਦੇਯ੍ਯੁਂ, ਤਦੇਵ ਵਦਾਮੀਤਿ ਅਧਿਪ੍ਪਾਯੋ. ਇਦਾਨਿ ਤਂ ਓਵਾਦਂ ਦਸ੍ਸੇਨ੍ਤੋ ‘‘ਮਾ ਪੇਸੁਣਂ ਮਾ ਚ ਮੁਸਾ ਅਭਾਣਿ, ਯਕ੍ਖੋ ਤੁਵਂ ਹੋਹਿਸਿ ਕਾਮਕਾਮੀ’’ਤਿ ਆਹ. ਤਸ੍ਸਤ੍ਥੋ – ਪੇਸੁਣਂ ਪਿਸੁਣਵਚਨਂ ਮੁਸਾ ਚ ਮਾ ਅਭਾਣਿ ¶ ਮਾ ਕਥੇਹਿ. ਯਦਿ ਹਿ ਤ੍ਵਂ ਮੁਸਾਵਾਦਂ ਪਿਸੁਣਵਾਚਞ੍ਚ ਪਹਾਯ ਵਾਚਾਯ ਸਞ੍ਞਤੋ ਭਵੇਯ੍ਯਾਸਿ, ਯਕ੍ਖੋ ਵਾ ਦੇਵੋ ਵਾ ਦੇਵਞ੍ਞਤਰੋ ਵਾ ਤ੍ਵਂ ਭਵਿਸ੍ਸਸਿ, ਕਾਮਂ ਕਾਮਿਤਬ੍ਬਂ ਉਲ਼ਾਰਂ ਦਿਬ੍ਬਸਮ੍ਪਤ੍ਤਿਂ ¶ ਪਟਿਲਭਿਤ੍ਵਾ ਤਤ੍ਥ ਕਾਮਨਸੀਲੋ ਯਥਾਸੁਖਂ ਇਨ੍ਦ੍ਰਿਯਾਨਂ ਪਰਿਚਰਣੇਨ ਅਭਿਰਮਣਸੀਲੋਤਿ.

ਤਂ ਸੁਤ੍ਵਾ ਥੇਰੋ ਤਤੋ ਰਾਜਗਹਂ ਗਨ੍ਤ੍ਵਾ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਸਤ੍ਥੁ ਤਮਤ੍ਥਂ ਆਰੋਚੇਸਿ. ਸਤ੍ਥਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਸਮ੍ਪਤ੍ਤਪਰਿਸਾਯ ਸਾਤ੍ਥਿਕਾ ਅਹੋਸੀਤਿ.

ਪੂਤਿਮੁਖਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੪. ਪਿਟ੍ਠਧੀਤਲਿਕਪੇਤਵਤ੍ਥੁਵਣ੍ਣਨਾ

ਯਂ ਕਿਞ੍ਚਾਰਮ੍ਮਣਂ ਕਤ੍ਵਾਤਿ ਇਦਂ ਸਤ੍ਥਾ ਸਾਵਤ੍ਥਿਯਂ ਜੇਤਵਨੇ ਵਿਹਰਨ੍ਤੋ ਅਨਾਥਪਿਣ੍ਡਿਕਸ੍ਸ ਗਹਪਤਿਨੋ ਦਾਨਂ ਆਰਬ੍ਭ ਕਥੇਸਿ. ਅਨਾਥਪਿਣ੍ਡਿਕਸ੍ਸ ਕਿਰ ਗਹਪਤਿਨੋ ਧੀਤੁ ਧੀਤਾਯ ਦਾਰਿਕਾਯ ਧਾਤਿ ਪਿਟ੍ਠਧੀਤਲਿਕਂ ਅਦਾਸਿ ‘‘ਅਯਂ ਤੇ ਧੀਤਾ, ਇਮਂ ਗਹੇਤ੍ਵਾ ਕੀਲ਼ਸ੍ਸੂ’’ਤਿ. ਸਾ ਤਤ੍ਥ ਧੀਤੁਸਞ੍ਞਂ ਉਪ੍ਪਾਦੇਸਿ. ਅਥਸ੍ਸਾ ਏਕਦਿਵਸਂ ਤਂ ਗਹੇਤ੍ਵਾ ਕੀਲ਼ਨ੍ਤਿਯਾ ਪਮਾਦੇਨ ਪਤਿਤ੍ਵਾ ਭਿਜ੍ਜਿ. ਤਤੋ ਦਾਰਿਕਾ ‘‘ਮਮ ਧੀਤਾ ਮਤਾ’’ਤਿ ਪਰੋਦਿ. ਤਂ ਰੋਦਨ੍ਤਿਂ ਕੋਚਿਪਿ ਗੇਹਜਨੋ ਸਞ੍ਞਾਪੇਤੁਂ ਨਾਸਕ੍ਖਿ. ਤਸ੍ਮਿਞ੍ਚ ਸਮਯੇ ਸਤ੍ਥਾ ਅਨਾਥਪਿਣ੍ਡਿਕਸ੍ਸ ਗਹਪਤਿਨੋ ਗੇਹੇ ਪਞ੍ਞਤ੍ਤੇ ਆਸਨੇ ਨਿਸਿਨ੍ਨੋ ਹੋਤਿ, ਮਹਾਸੇਟ੍ਠਿ ਚ ਭਗਵਤੋ ¶ ਸਮੀਪੇ ਨਿਸਿਨ੍ਨੋ ਅਹੋਸਿ. ਧਾਤਿ ਤਂ ਦਾਰਿਕਂ ਗਹੇਤ੍ਵਾ ਸੇਟ੍ਠਿਸ੍ਸ ਸਨ੍ਤਿਕਂ ਅਗਮਾਸਿ. ਸੇਟ੍ਠਿ ਤਂ ਦਿਸ੍ਵਾ ‘‘ਕਿਸ੍ਸਾਯਂ ਦਾਰਿਕਾ ਰੋਦਤੀ’’ਤਿ ਆਹ. ਧਾਤਿ ਤਂ ਪਵਤ੍ਤਿਂ ਸੇਟ੍ਠਿਸ੍ਸ ਆਰੋਚੇਸਿ. ਸੇਟ੍ਠਿ ਤਂ ਦਾਰਿਕਂ ਅਙ੍ਕੇ ਨਿਸੀਦਾਪੇਤ੍ਵਾ ‘‘ਤਵ ਧੀਤੁਦਾਨਂ ਦਸ੍ਸਾਮੀ’’ਤਿ ਸਞ੍ਞਾਪੇਤ੍ਵਾ ਸਤ੍ਥੁ ਆਰੋਚੇਸਿ – ‘‘ਭਨ੍ਤੇ, ਮਮ ਨਤ੍ਤੁਧੀਤਰਂ ਪਿਟ੍ਠਧੀਤਲਿਕਂ ਉਦ੍ਦਿਸ੍ਸ ਦਾਨਂ ਦਾਤੁਕਾਮੋ, ਤਂ ਮੇ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸ੍ਵਾਤਨਾਯ ਅਧਿਵਾਸੇਥਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ.

ਅਥ ਭਗਵਾ ਦੁਤਿਯਦਿਵਸੇ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸੇਟ੍ਠਿਸ੍ਸ ਘਰਂ ਗਨ੍ਤ੍ਵਾ ਭਤ੍ਤਕਿਚ੍ਚਂ ਕਤ੍ਵਾ ਅਨੁਮੋਦਨਂ ਕਰੋਨ੍ਤੋ –

‘‘ਯਂ ਕਿਞ੍ਚਾਰਮ੍ਮਣਂ ਕਤ੍ਵਾ, ਦਜ੍ਜਾ ਦਾਨਂ ਅਮਚ੍ਛਰੀ;

ਪੁਬ੍ਬਪੇਤੇ ਚ ਆਰਬ੍ਭ, ਅਥ ਵਾ ਵਤ੍ਥੁਦੇਵਤਾ.

‘‘ਚਤ੍ਤਾਰੋ ¶ ¶ ਚ ਮਹਾਰਾਜੇ, ਲੋਕਪਾਲੇ ਯਸਸ੍ਸਿਨੇ;

ਕੁਵੇਰਂ ਧਤਰਟ੍ਠਞ੍ਚ, ਵਿਰੂਪਕ੍ਖਂ ਵਿਰੂਲ਼੍ਹਕਂ;

ਤੇ ਚੇਵ ਪੂਜਿਤਾ ਹੋਨ੍ਤਿ, ਦਾਯਕਾ ਚ ਅਨਿਪ੍ਫਲਾ.

‘‘ਨ ਹਿ ਰੁਣ੍ਣਂ ਵਾ ਸੋਕੋ ਵਾ, ਯਾ ਚਞ੍ਞਾ ਪਰਿਦੇਵਨਾ;

ਨ ਤਂ ਪੇਤਸ੍ਸ ਅਤ੍ਥਾਯ, ਏਵਂ ਤਿਟ੍ਠਨ੍ਤਿ ਞਾਤਯੋ.

‘‘ਅਯਞ੍ਚ ਖੋ ਦਕ੍ਖਿਣਾ ਦਿਨ੍ਨਾ, ਸਙ੍ਘਮ੍ਹਿ ਸੁਪ੍ਪਤਿਟ੍ਠਿਤਾ;

ਦੀਘਰਤ੍ਤਂ ਹਿਤਾਯਸ੍ਸ, ਠਾਨਸੋ ਉਪਕਪ੍ਪਤੀ’’ਤਿ. – ਇਮਾ ਗਾਥਾ ਅਭਾਸਿ;

੧੦. ਤਤ੍ਥ ਯਂ ਕਿਞ੍ਚਾਰਮ੍ਮਣਂ ਕਤ੍ਵਾਤਿ ਮਙ੍ਗਲਾਦੀਸੁ ਅਞ੍ਞਤਰਂ ਯਂ ਕਿਞ੍ਚਿ ਆਰਬ੍ਭ ਉਦ੍ਦਿਸ੍ਸ. ਦਜ੍ਜਾਤਿ ਦਦੇਯ੍ਯ. ਅਮਚ੍ਛਰੀਤਿ ਅਤ੍ਤਨੋ ਸਮ੍ਪਤ੍ਤਿਯਾ ਪਰੇਹਿ ਸਾਧਾਰਣਭਾਵਾਸਹਨਲਕ੍ਖਣਸ੍ਸ ਮਚ੍ਛੇਰਸ੍ਸ ਅਭਾਵਤੋ ਅਮਚ੍ਛਰੀ, ਪਰਿਚ੍ਚਾਗਸੀਲੋ ਮਚ੍ਛਰਿਯਲੋਭਾਦਿਚਿਤ੍ਤਮਲਂ ਦੂਰਤੋ ਕਤ੍ਵਾ ਦਾਨਂ ਦਦੇਯ੍ਯਾਤਿ ਅਧਿਪ੍ਪਾਯੋ. ਪੁਬ੍ਬਪੇਤੇ ਚ ਆਰਬ੍ਭਾਤਿ ਪੁਬ੍ਬਕੇਪਿ ਪੇਤੇ ਉਦ੍ਦਿਸ੍ਸ. ਵਤ੍ਥੁਦੇਵਤਾਤਿ ਘਰਵਤ੍ਥੁਆਦੀਸੁ ਅਧਿਵਤ੍ਥਾ ਦੇਵਤਾ ਆਰਬ੍ਭਾਤਿ ਯੋਜਨਾ. ਅਥ ਵਾਤਿ ਇਮਿਨਾ ਅਞ੍ਞੇਪਿ ਦੇਵਮਨੁਸ੍ਸਾਦਿਕੇ ਯੇ ਕੇਚਿ ਆਰਬ੍ਭ ਦਾਨਂ ਦਦੇਯ੍ਯਾਤਿ ਦਸ੍ਸੇਤਿ.

੧੧. ਤਤ੍ਥ ਦੇਵੇਸੁ ਤਾਵ ਏਕਚ੍ਚੇ ਪਾਕਟੇ ਦੇਵੇ ਦਸ੍ਸੇਨ੍ਤੋ ‘‘ਚਤ੍ਤਾਰੋ ਚ ਮਹਾਰਾਜੇ’’ਤਿ ਵਤ੍ਵਾ ਪੁਨ ਤੇ ¶ ਨਾਮਤੋ ਗਣ੍ਹਨ੍ਤੋ ‘‘ਕੁਵੇਰ’’ਨ੍ਤਿਆਦਿਮਾਹ. ਤਤ੍ਥ ਕੁਵੇਰਨ੍ਤਿ ਵੇਸ੍ਸਵਣਂ. ਧਤਰਟ੍ਠਨ੍ਤਿਆਦੀਨਿ ਸੇਸਾਨਂ ਤਿਣ੍ਣਂ ਲੋਕਪਾਲਾਨਂ ਨਾਮਾਨਿ. ਤੇ ਚੇਵ ਪੂਜਿਤਾ ਹੋਨ੍ਤੀਤਿ ਤੇ ਚ ਮਹਾਰਾਜਾਨੋ ਪੁਬ੍ਬਪੇਤਵਤ੍ਥੁਦੇਵਤਾਯੋ ਚ ਉਦ੍ਦਿਸਨਕਿਰਿਯਾਯ ਪਟਿਮਾਨਿਕਾ ਹੋਨ੍ਤਿ. ਦਾਯਕਾ ਚ ਅਨਿਪ੍ਫਲਾਤਿ ਯੇ ਦਾਨਂ ਦੇਨ੍ਤਿ, ਤੇ ਦਾਯਕਾ ਚ ਪਰੇਸਂ ਉਦ੍ਦਿਸਨਮਤ੍ਤੇਨ ਨ ਨਿਪ੍ਫਲਾ, ਅਤ੍ਤਨੋ ਦਾਨਫਲਸ੍ਸ ਭਾਗਿਨੋ ਏਵ ਹੋਨ੍ਤਿ.

੧੨. ਇਦਾਨਿ ‘‘ਯੇ ਅਤ੍ਤਨੋ ਞਾਤੀਨਂ ਮਰਣੇਨ ਰੋਦਨ੍ਤਿ ਪਰਿਦੇਵਨ੍ਤਿ ਸੋਚਨ੍ਤਿ, ਤੇਸਂ ਤਂ ਨਿਰਤ੍ਥਕਂ, ਅਤ੍ਤਪਰਿਤਾਪਨਮਤ੍ਤਮੇਵਾ’’ਤਿ ਦਸ੍ਸੇਤੁਂ ‘‘ਨ ਹਿ ਰੁਣ੍ਣਂ ਵਾ’’ਤਿ ਗਾਥਮਾਹ. ਤਤ੍ਥ ਰੁਣ੍ਣਨ੍ਤਿ ਰੁਦਿਤਂ ਅਸ੍ਸੁਮੋਚਨਂ ਨ ਹਿ ਕਾਤਬ੍ਬਨ੍ਤਿ ¶ ਵਚਨਸੇਸੋ. ਸੋਕੋਤਿ ਸੋਚਨਂ ਚਿਤ੍ਤਸਨ੍ਤਾਪੋ, ਅਨ੍ਤੋਨਿਜ੍ਝਾਨਨ੍ਤਿ ਅਤ੍ਥੋ. ਯਾ ਚਞ੍ਞਾ ਪਰਿਦੇਵਨਾਤਿ ਯਾ ਚ ਰੁਣ੍ਣਸੋਕਤੋ ਅਞ੍ਞਾ ਪਰਿਦੇਵਨਾ, ‘‘ਕਹਂ ਏਕਪੁਤ੍ਤਕਾ’’ਤਿਆਦਿਵਾਚਾਵਿਪ੍ਪਲਾਪੋ, ਸੋਪਿ ਨ ਕਾਤਬ੍ਬੋਤਿ ਅਤ੍ਥੋ. ਸਬ੍ਬਤ੍ਥ ਵਾ-ਸਦ੍ਦੋ ਵਿਕਪ੍ਪਨਤ੍ਥੋ ¶ . ਨ ਤਂ ਪੇਤਸ੍ਸ ਅਤ੍ਥਾਯਾਤਿ ਯਸ੍ਮਾ ਰੁਣ੍ਣਂ ਵਾ ਸੋਕੋ ਵਾ ਪਰਿਦੇਵਨਾ ਵਾਤਿ ਸਬ੍ਬਮ੍ਪਿ ਤਂ ਪੇਤਸ੍ਸ ਕਾਲਕਤਸ੍ਸ ਅਤ੍ਥਾਯ ਉਪਕਾਰਾਯ ਨ ਹੋਤਿ, ਤਸ੍ਮਾ ਨ ਹਿ ਤਂ ਕਾਤਬ੍ਬਂ, ਤਥਾਪਿ ਏਵਂ ਤਿਟ੍ਠਨ੍ਤਿ ਞਾਤਯੋ ਅਵਿਦ੍ਦਸੁਨੋਤਿ ਅਧਿਪ੍ਪਾਯੋ.

੧੩. ਏਵਂ ਰੁਣ੍ਣਾਦੀਨਂ ਨਿਰਤ੍ਥਕਭਾਵਂ ਦਸ੍ਸੇਤ੍ਵਾ ਇਦਾਨਿ ਯਾ ਪੁਬ੍ਬਪੇਤਾਦਿਕੇ ਆਰਬ੍ਭ ਦਾਯਕੇਨ ਸਙ੍ਘਸ੍ਸ ਦਕ੍ਖਿਣਾ ਦਿਨ੍ਨਾ, ਤਸ੍ਸਾ ਸਾਤ੍ਥਕਭਾਵਂ ਦਸ੍ਸੇਨ੍ਤੋ ‘‘ਅਯਞ੍ਚ ਖੋ ਦਕ੍ਖਿਣਾ’’ਤਿ ਗਾਥਮਾਹ. ਤਤ੍ਥ ਅਯਨ੍ਤਿ ਦਾਯਕੇਨ ਤਂ ਦਿਨ੍ਨਂ ਦਾਨਂ ਪਚ੍ਚਕ੍ਖਤੋ ਦਸ੍ਸੇਨ੍ਤੋ ਵਦਤਿ. ਚ-ਸਦ੍ਦੋ ਬ੍ਯਤਿਰੇਕਤ੍ਥੋ, ਤੇਨ ਯਥਾ ਰੁਣ੍ਣਾਦਿ ਪੇਤਸ੍ਸ ਨ ਕਸ੍ਸਚਿ ਅਤ੍ਥਾਯ ਹੋਤਿ, ਨ ਏਵਮਯਂ, ਅਯਂ ਪਨ ਦਕ੍ਖਿਣਾ ਦੀਘਰਤ੍ਤਂ ਹਿਤਾਯਸ੍ਸ ਹੋਤੀਤਿ ਵਕ੍ਖਮਾਨਮੇਵ ਵਿਸੇਸਂ ਜੋਤੇਤਿ. ਖੋਤਿ ਅਵਧਾਰਣੇ. ਦਕ੍ਖਿਣਾਤਿ ਦਾਨਂ. ਸਙ੍ਘਮ੍ਹਿ ਸੁਪ੍ਪਤਿਟ੍ਠਿਤਾਤਿ ਅਨੁਤ੍ਤਰੇ ਪੁਞ੍ਞਕ੍ਖੇਤ੍ਤੇ ¶ ਸਙ੍ਘੇ ਸੁਟ੍ਠੁ ਪਤਿਟ੍ਠਿਤਾ. ਦੀਘਰਤ੍ਤਂ ਹਿਤਾਯਸ੍ਸਾਤਿ ਅਸ੍ਸ ਪੇਤਸ੍ਸ ਚਿਰਕਾਲਂ ਹਿਤਾਯ ਅਤ੍ਥਾਯ. ਠਾਨਸੋ ਉਪਕਪ੍ਪਤੀਤਿ ਤਙ੍ਖਣਞ੍ਞੇਵ ਨਿਪ੍ਫਜ੍ਜਤਿ, ਨ ਕਾਲਨ੍ਤਰੇਤਿ ਅਤ੍ਥੋ. ਅਯਞ੍ਹਿ ਤਤ੍ਥ ਧਮ੍ਮਤਾ – ਯਂ ਪੇਤੇ ਉਦ੍ਦਿਸ੍ਸ ਦਾਨੇ ਦਿਨ੍ਨੇ ਪੇਤਾ ਚੇ ਅਨੁਮੋਦਨ੍ਤਿ, ਤਾਵਦੇਵ ਤਸ੍ਸ ਫਲੇਨ ਪੇਤਾ ਪਰਿਮੁਚ੍ਚਨ੍ਤੀਤਿ.

ਏਵਂ ਭਗਵਾ ਧਮ੍ਮਂ ਦੇਸੇਤ੍ਵਾ ਮਹਾਜਨਂ ਪੇਤੇ ਉਦ੍ਦਿਸ੍ਸ ਦਾਨਾਭਿਰਤਮਾਨਸਂ ਕਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਪੁਨਦਿਵਸੇ ਸੇਟ੍ਠਿਭਰਿਯਾ ਅਵਸੇਸਾ ਚ ਞਾਤਕਾ ਸੇਟ੍ਠਿਂ ਅਨੁਵਤ੍ਤਨ੍ਤਾ ਏਵਂ ਤੇਮਾਸਮਤ੍ਤਂ ਮਹਾਦਾਨਂ ਪਵਤ੍ਤੇਸੁਂ. ਅਥ ਰਾਜਾ ਪਸੇਨਦਿ ਕੋਸਲੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਕਸ੍ਮਾ, ਭਨ੍ਤੇ, ਭਿਕ੍ਖੂ ਮਾਸਮਤ੍ਤਂ ਮਮ ਘਰਂ ਨਾਗਮਿਂਸੂ’’ਤਿ ਪੁਚ੍ਛਿ. ਸਤ੍ਥਾਰਾ ਤਸ੍ਮਿਂ ਕਾਰਣੇ ਕਥਿਤੇ ਰਾਜਾਪਿ ਸੇਟ੍ਠਿਂ ਅਨੁਵਤ੍ਤਨ੍ਤੋ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਪਵਤ੍ਤੇਸਿ, ਤਂ ਦਿਸ੍ਵਾ ਨਾਗਰਾ ਰਾਜਾਨਂ ਅਨੁਵਤ੍ਤਨ੍ਤਾ ਮਾਸਮਤ੍ਤਂ ਮਹਾਦਾਨਂ ਪਵਤ੍ਤੇਸੁਂ. ਏਵਂ ਮਾਸਦ੍ਵਯਂ ਪਿਟ੍ਠਧੀਤਲਿਕਮੂਲਕਂ ਮਹਾਦਾਨਂ ਪਵਤ੍ਤੇਸੁਨ੍ਤਿ.

ਪਿਟ੍ਠਧੀਤਲਿਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਤਿਰੋਕੁਟ੍ਟੇਸੁ ¶ ਤਿਟ੍ਠਨ੍ਤੀਤਿ ਇਦਂ ਸਤ੍ਥਾ ਰਾਜਗਹੇ ਵਿਹਰਨ੍ਤੋ ਸਮ੍ਬਹੁਲੇ ਪੇਤੇ ਆਰਬ੍ਭ ਕਥੇਸਿ.

ਤਤ੍ਰਾਯਂ ਵਿਤ੍ਥਾਰਕਥਾ – ਇਤੋ ਦ੍ਵਾਨਵੁਤਿਕਪ੍ਪੇ ਕਾਸਿ ਨਾਮ ਨਗਰਂ ਅਹੋਸਿ. ਤਤ੍ਥ ਜਯਸੇਨੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਸਿਰਿਮਾ ਨਾਮ ਦੇਵੀ. ਤਸ੍ਸਾ ਕੁਚ੍ਛਿਯਂ ਫੁਸ੍ਸੋ ਨਾਮ ਬੋਧਿਸਤ੍ਤੋ ¶ ਨਿਬ੍ਬਤ੍ਤਿਤ੍ਵਾ ਅਨੁਪੁਬ੍ਬੇਨ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਜ੍ਝਿ. ਜਯਸੇਨੋ ਰਾਜਾ ‘‘ਮਮ ਪੁਤ੍ਤੋ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਬੁਦ੍ਧੋ ਜਾਤੋ, ਮਯ੍ਹਮੇਵ ਬੁਦ੍ਧੋ, ਮਯ੍ਹਂ ਧਮ੍ਮੋ, ਮਯ੍ਹਂ ਸਙ੍ਘੋ’’ਤਿ ਮਮਤ੍ਤਂ ਉਪ੍ਪਾਦੇਤ੍ਵਾ ਸਬ੍ਬਕਾਲਂ ਸਯਮੇਵ ਉਪਟ੍ਠਹਤਿ, ਨ ਅਞ੍ਞੇਸਂ ਓਕਾਸਂ ਦੇਤਿ.

ਭਗਵਤੋ ਕਨਿਟ੍ਠਭਾਤਰੋ ਵੇਮਾਤਿਕਾ ਤਯੋ ਭਾਤਰੋ ਚਿਨ੍ਤੇਸੁਂ – ‘‘ਬੁਦ੍ਧਾ ¶ ਨਾਮ ਸਬ੍ਬਲੋਕ ਹਿਤਤ੍ਥਾਯ ਉਪ੍ਪਜ੍ਜਨ੍ਤਿ, ਨ ਏਕਸ੍ਸੇਵ ਅਤ੍ਥਾਯ. ਅਮ੍ਹਾਕਞ੍ਚ ਪਿਤਾ ਅਞ੍ਞੇਸਂ ਓਕਾਸਂ ਨ ਦੇਤਿ. ਕਥਂ ਨੁ ਖੋ ਮਯਂ ਲਭੇਯ੍ਯਾਮ ਭਗਵਨ੍ਤਂ ਉਪਟ੍ਠਾਤੁਂ ਭਿਕ੍ਖੁਸਙ੍ਘਞ੍ਚਾ’’ਤਿ? ਤੇਸਂ ਏਤਦਹੋਸਿ – ‘‘ਹਨ੍ਦ ਮਯਂ ਕਿਞ੍ਚਿ ਉਪਾਯਂ ਕਰੋਮਾ’’ਤਿ. ਤੇ ਪਚ੍ਚਨ੍ਤਂ ਕੁਪਿਤਂ ਵਿਯ ਕਾਰਾਪੇਸੁਂ. ਤਤੋ ਰਾਜਾ ‘‘ਪਚ੍ਚਨ੍ਤੋ ਕੁਪਿਤੋ’’ਤਿ ਸੁਤ੍ਵਾ ਤਯੋਪਿ ਪੁਤ੍ਤੇ ਪਚ੍ਚਨ੍ਤਂ ਵੂਪਸਮੇਤੁਂ ਪੇਸੇਸਿ. ਤੇ ਗਨ੍ਤ੍ਵਾ ਵੂਪਸਮੇਤ੍ਵਾ ਆਗਤਾ. ਰਾਜਾ ਤੁਟ੍ਠੋ ਵਰਂ ਅਦਾਸਿ ‘‘ਯਂ ਇਚ੍ਛਥ, ਤਂ ਗਣ੍ਹਥਾ’’ਤਿ. ਤੇ ‘‘ਮਯਂ ਭਗਵਨ੍ਤਂ ਉਪਟ੍ਠਾਤੁਂ ਇਚ੍ਛਾਮਾ’’ਤਿ ਆਹਂਸੁ. ਰਾਜਾ ‘‘ਏਤਂ ਠਪੇਤ੍ਵਾ ਅਞ੍ਞਂ ਗਣ੍ਹਥਾ’’ਤਿ ਆਹ. ਤੇ ‘‘ਮਯਂ ਅਞ੍ਞੇਨ ਅਨਤ੍ਥਿਕਾ’’ਤਿ ਆਹਂਸੁ. ਤੇਨ ਹਿ ਪਰਿਚ੍ਛੇਦਂ ਕਤ੍ਵਾ ਗਣ੍ਹਥਾਤਿ. ਤੇ ਸਤ੍ਤ ਵਸ੍ਸਾਨਿ ਯਾਚਿਂਸੁ. ਰਾਜਾ ਨ ਅਦਾਸਿ. ਏਵਂ ‘‘ਛ, ਪਞ੍ਚ, ਚਤ੍ਤਾਰਿ, ਤੀਣਿ, ਦ੍ਵੇ, ਏਕਂ, ਸਤ੍ਤ ਮਾਸੇ, ਛ, ਪਞ੍ਚ, ਚਤ੍ਤਾਰੋ’’ਤਿ ਵਤ੍ਵਾ ਯਾਵ ਤੇਮਾਸਂ ਯਾਚਿਂਸੁ. ਤਦਾ ਰਾਜਾ ‘‘ਗਣ੍ਹਥਾ’’ਤਿ ਅਦਾਸਿ.

ਤੇ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਆਹਂਸੁ – ‘‘ਇਚ੍ਛਾਮ ਮਯਂ, ਭਨ੍ਤੇ, ਭਗਵਨ੍ਤਂ ਤੇਮਾਸਂ ਉਪਟ੍ਠਾਤੁਂ, ਅਧਿਵਾਸੇਤੁ ਨੋ, ਭਨ੍ਤੇ, ਭਗਵਾ ਇਮਂ ਤੇਮਾਸਂ ਵਸ੍ਸਾਵਾਸ’’ਨ੍ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਤੇ ਤਯੋ ਅਤ੍ਤਨੋ ਜਨਪਦੇ ਨਿਯੁਤ੍ਤਕਪੁਰਿਸਸ੍ਸ ਲੇਖਂ ਪੇਸੇਸੁਂ ‘‘ਇਮਂ ਤੇਮਾਸਂ ਅਮ੍ਹੇਹਿ ਭਗਵਾ ਉਪਟ੍ਠਾਤਬ੍ਬੋ, ਵਿਹਾਰਂ ਆਦਿਂ ਕਤ੍ਵਾ ਸਬ੍ਬਂ ਭਗਵਤੋ ਉਪਟ੍ਠਾਨਸਮ੍ਭਾਰਂ ਸਮ੍ਪਾਦੇਹੀ’’ਤਿ. ਸੋ ਸਬ੍ਬਂ ਸਮ੍ਪਾਦੇਤ੍ਵਾ ਪਟਿਪੇਸੇਸਿ. ਤੇ ¶ ਕਾਸਾਯਵਤ੍ਥਨਿਵਤ੍ਥਾ ਹੁਤ੍ਵਾ ਪੁਰਿਸਸਹਸ੍ਸੇਹਿ ਵੇਯ੍ਯਾਵਚ੍ਚਕਰੇਹਿ ਭਗਵਨ੍ਤਂ ਭਿਕ੍ਖੁਸਙ੍ਘਞ੍ਚ ਸਕ੍ਕਚ੍ਚਂ ਉਪਟ੍ਠਹਮਾਨਾ ਜਨਪਦਂ ਨੇਤ੍ਵਾ ਵਿਹਾਰਂ ਨਿਯ੍ਯਾਤੇਤ੍ਵਾ ਵਸ੍ਸਂ ਵਸਾਪੇਸੁਂ.

ਤੇਸਂ ਭਣ੍ਡਾਗਾਰਿਕੋ ਏਕੋ ਗਹਪਤਿਪੁਤ੍ਤੋ ਸਪਜਾਪਤਿਕੋ ਸਦ੍ਧੋ ਅਹੋਸਿ ਪਸਨ੍ਨੋ. ਸੋ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਵਤ੍ਤਂ ਸਕ੍ਕਚ੍ਚਂ ਅਦਾਸਿ. ਜਨਪਦੇ ਨਿਯੁਤ੍ਤਕਪੁਰਿਸੋ ਤਂ ਗਹੇਤ੍ਵਾ ਜਾਨਪਦੇਹਿ ਏਕਾਦਸਮਤ੍ਤੇਹਿ ਪੁਰਿਸਸਹਸ੍ਸੇਹਿ ਸਦ੍ਧਿਂ ਸਕ੍ਕਚ੍ਚਮੇਵ ਦਾਨਂ ਪਵਤ੍ਤਾਪੇਸਿ. ਤਤ੍ਥ ਕੇਚਿ ਜਾਨਪਦਾ ਪਟਿਹਤਚਿਤ੍ਤਾ ਅਹੇਸੁਂ. ਤੇ ਦਾਨਸ੍ਸ ਅਨ੍ਤਰਾਯਂ ਕਤ੍ਵਾ ਦੇਯ੍ਯਧਮ੍ਮਂ ਅਤ੍ਤਨਾ ਖਾਦਿਂਸੁ, ਭਤ੍ਤਸਾਲਞ੍ਚ ਅਗ੍ਗਿਨਾ ਦਹਿਂਸੁ. ਪਵਾਰਿਤਾ ਰਾਜਪੁਤ੍ਤਾ ਭਗਵਤੋ ਸਕ੍ਕਾਰਂ ਕਤ੍ਵਾ ¶ ਭਗਵਨ੍ਤਂ ਪੁਰਕ੍ਖਤ੍ਵਾ ਪਿਤੁ ਸਨ੍ਤਿਕਮੇਵ ਪਚ੍ਚਾਗਮਿਂਸੁ. ਤਤ੍ਥ ਗਨ੍ਤ੍ਵਾ ਭਗਵਾ ਪਰਿਨਿਬ੍ਬਾਯਿ. ਰਾਜਪੁਤ੍ਤਾ ਚ ਜਨਪਦੇ ¶ ਨਿਯੁਤ੍ਤਕਪੁਰਿਸੋ ਚ ਭਣ੍ਡਾਗਾਰਿਕੋ ਚ ਅਨੁਪੁਬ੍ਬੇਨ ਕਾਲਂ ਕਤ੍ਵਾ ਸਦ੍ਧਿਂ ਪਰਿਸਾਯ ਸਗ੍ਗੇ ਉਪ੍ਪਜ੍ਜਿਂਸੁ, ਪਟਿਹਤਚਿਤ੍ਤਾ ਜਨਾ ਨਿਰਯੇ ਉਪ੍ਪਜ੍ਜਿਂਸੁ. ਏਵਂ ਤੇਸਂ ਉਭਯੇਸਂ ਜਨਾਨਂ ਸਗ੍ਗਤੋ ਸਗ੍ਗਂ ਨਿਰਯਤੋ ਨਿਰਯਂ ਉਪਪਜ੍ਜਨ੍ਤਾਨਂ ਦ੍ਵਾਨਵੁਤਿਕਪ੍ਪਾ ਵੀਤਿਵਤ੍ਤਾ.

ਅਥ ਇਮਸ੍ਮਿਂ ਭਦ੍ਦਕਪ੍ਪੇ ਕਸ੍ਸਪਸ੍ਸ ਭਗਵਤੋ ਕਾਲੇ ਤੇ ਪਟਿਹਤਚਿਤ੍ਤਾ ਜਨਾ ਪੇਤੇਸੁ ਉਪ੍ਪਨ੍ਨਾ. ਤਦਾ ਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਞਾਤਕਾਨਂ ਪੇਤਾਨਂ ਅਤ੍ਥਾਯ ਦਾਨਂ ਦਤ੍ਵਾ ਉਦ੍ਦਿਸਨ੍ਤਿ ‘‘ਇਦਂ ਨੋ ਞਾਤੀਨਂ ਹੋਤੂ’’ਤਿ, ਤੇ ਸਮ੍ਪਤ੍ਤਿਂ ਲਭਨ੍ਤਿ. ਅਥ ਇਮੇਪਿ ਪੇਤਾ ਤਂ ਦਿਸ੍ਵਾ ਕਸ੍ਸਪਂ ਸਮ੍ਮਾਸਮ੍ਬੁਦ੍ਧਂ ਉਪਸਙ੍ਕਮਿਤ੍ਵਾ ਪੁਚ੍ਛਿਂਸੁ – ‘‘ਕਿਂ ਨੁ ਖੋ, ਭਨ੍ਤੇ, ਮਯਮ੍ਪਿ ਏਵਰੂਪਂ ਸਮ੍ਪਤ੍ਤਿਂ ਲਭੇਯ੍ਯਾਮਾ’’ਤਿ? ਭਗਵਾ ਆਹ – ‘‘ਇਦਾਨਿ ਨ ਲਭਥ, ਅਨਾਗਤੇ ਪਨ ਗੋਤਮੋ ਨਾਮ ਸਮ੍ਮਾਸਮ੍ਬੁਦ੍ਧੋ ਭਵਿਸ੍ਸਤਿ, ਤਸ੍ਸ ਭਗਵਤੋ ਕਾਲੇ ਬਿਮ੍ਬਿਸਾਰੋ ਨਾਮ ਰਾਜਾ ਭਵਿਸ੍ਸਤਿ, ਸੋ ਤੁਮ੍ਹਾਕਂ ਇਤੋ ਦ੍ਵਾਨਵੁਤਿਕਪ੍ਪੇ ਞਾਤਿ ਅਹੋਸਿ, ਸੋ ਬੁਦ੍ਧਸ੍ਸ ਦਾਨਂ ਦਤ੍ਵਾ ਤੁਮ੍ਹਾਕਂ ਉਦ੍ਦਿਸਿਸ੍ਸਤਿ, ਤਦਾ ਲਭਿਸ੍ਸਥਾ’’ਤਿ. ਏਵਂ ਵੁਤ੍ਤੇ ਕਿਰ ਤੇਸਂ ਪੇਤਾਨਂ ਤਂ ਵਚਨਂ ‘‘ਸ੍ਵੇ ਲਭਿਸ੍ਸਥਾ’’ਤਿ ਵੁਤ੍ਤਂ ਵਿਯ ਅਹੋਸਿ.

ਤਤੋ ¶ ਏਕਸ੍ਮਿਂ ਬੁਦ੍ਧਨ੍ਤਰੇ ਵੀਤਿਵਤ੍ਤੇ ਅਮ੍ਹਾਕਂ ਭਗਵਾ ਉਪ੍ਪਜ੍ਜਿ. ਤੇਪਿ ਤਯੋ ਰਾਜਪੁਤ੍ਤਾ ਪੁਰਿਸਸਹਸ੍ਸੇਨ ਸਦ੍ਧਿਂ ਦੇਵਲੋਕਤੋ ਚਵਿਤ੍ਵਾ ਮਗਧਰਟ੍ਠੇ ਬ੍ਰਾਹ੍ਮਣਕੁਲੇ ਉਪ੍ਪਜ੍ਜਿਤ੍ਵਾ ਅਨੁਪੁਬ੍ਬੇਨ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਗਯਾਸੀਸੇ ਤਯੋ ਜਟਿਲਾ ਅਹੇਸੁਂ, ਜਨਪਦੇ ਨਿਯੁਤ੍ਤਕਪੁਰਿਸੋ ਰਾਜਾ ਬਿਮ੍ਬਿਸਾਰੋ ਅਹੋਸਿ, ਭਣ੍ਡਾਗਾਰਿਕੋ ਗਹਪਤਿਪੁਤ੍ਤੋ ਵਿਸਾਖੋ ਨਾਮ ਸੇਟ੍ਠਿ ਅਹੋਸਿ, ਤਸ੍ਸ ਪਜਾਪਤਿ ਧਮ੍ਮਦਿਨ੍ਨਾ ਨਾਮ ਸੇਟ੍ਠਿਧੀਤਾ ਅਹੋਸਿ, ਅਵਸੇਸਾ ਪਨ ਪਰਿਸਾ ਰਞ੍ਞੋ ਏਵ ਪਰਿਵਾਰਾ ਹੁਤ੍ਵਾ ਨਿਬ੍ਬਤ੍ਤਿਂਸੁ.

ਅਮ੍ਹਾਕਮ੍ਪਿ ਭਗਵਾ ਲੋਕੇ ਉਪ੍ਪਜ੍ਜਿਤ੍ਵਾ ਸਤ੍ਤਸਤ੍ਤਾਹਂ ਅਤਿਕ੍ਕਮਿਤ੍ਵਾ ਅਨੁਪੁਬ੍ਬੇਨ ਬਾਰਾਣਸਿਂ ਆਗਮ੍ਮ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਪਞ੍ਚਵਗ੍ਗਿਯੇ ਆਦਿਂ ਕਤ੍ਵਾ ਯਾਵ ਸਹਸ੍ਸਪਰਿਵਾਰੇ ਤਯੋ ਜਟਿਲੇ ਵਿਨੇਤ੍ਵਾ ਰਾਜਗਹਂ ਅਗਮਾਸਿ. ਤਤ੍ਥ ¶ ਚ ਤਦਹੁਪਸਙ੍ਕਮਨ੍ਤਂਯੇਵ ਰਾਜਾਨਂ ਬਿਮ੍ਬਿਸਾਰਂ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸਿ ਸਦ੍ਧਿਂ ਏਕਾਦਸਨਹੁਤੇਹਿ ਅਙ੍ਗਮਗਧਵਾਸੀਹਿ ਬ੍ਰਾਹ੍ਮਣਗਹਪਤਿਕੇਹਿ. ਅਥ ਰਞ੍ਞਾ ਸ੍ਵਾਤਨਾਯ ਭਤ੍ਤੇਨ ਨਿਮਨ੍ਤਿਤੋ ਅਧਿਵਾਸੇਤ੍ਵਾ ਦੁਤਿਯਦਿਵਸੇ ਮਾਣਵਕਵਣ੍ਣੇਨ ਸਕ੍ਕੇਨ ਦੇਵਾਨਮਿਨ੍ਦੇਨ ਪੁਰਤੋ ਗਚ੍ਛਨ੍ਤੇਨ –

‘‘ਦਨ੍ਤੋ ਦਨ੍ਤੇਹਿ ਸਹ ਪੁਰਾਣਜਟਿਲੇਹਿ, ਵਿਪ੍ਪਮੁਤ੍ਤੋ ਵਿਪ੍ਪਮੁਤ੍ਤੇਹਿ;

ਸਿਙ੍ਗੀਨਿਕ੍ਖਸਵਣ੍ਣੋ, ਰਾਜਗਹਂ ਪਾਵਿਸਿ ਭਗਵਾ’’ਤਿ. (ਮਹਾਵ. ੫੮) –

ਏਵਮਾਦੀਹਿ ¶ ਗਾਥਾਹਿ ਅਭਿਤ੍ਥਵਿਯਮਾਨੋ ਰਾਜਗਹਂ ਪਵਿਸਿਤ੍ਵਾ ਰਞ੍ਞੋ ਨਿਵੇਸਨੇ ਮਹਾਦਾਨਂ ਸਮ੍ਪਟਿਚ੍ਛਿ. ਤੇ ਪਨ ਪੇਤਾ ‘‘ਇਦਾਨਿ ਰਾਜਾ ਦਾਨਂ ਅਮ੍ਹਾਕਂ ਉਦ੍ਦਿਸਿਸ੍ਸਤਿ, ਇਦਾਨਿ ਉਦ੍ਦਿਸਿਸ੍ਸਤੀ’’ਤਿ ਆਸਾਯ ਸਮ੍ਪਰਿਵਾਰੇਤ੍ਵਾ ਅਟ੍ਠਂਸੁ.

ਰਾਜਾ ਦਾਨਂ ਦਤ੍ਵਾ ‘‘ਕਤ੍ਥ ਨੁ ਖੋ ਭਗਵਾ ਵਿਹਰੇਯ੍ਯਾ’’ਤਿ ਭਗਵਤੋ ਵਿਹਾਰਟ੍ਠਾਨਮੇਵ ਚਿਨ੍ਤੇਸਿ, ਨ ਤਂ ਦਾਨਂ ਕਸ੍ਸਚਿ ਉਦ੍ਦਿਸਿ. ਤਥਾ ਤਂ ਦਾਨਂ ਅਲਭਨ੍ਤਾ ਪੇਤਾ ਛਿਨ੍ਨਾਸਾ ਹੁਤ੍ਵਾ ਰਤ੍ਤਿਯਂ ਰਞ੍ਞੋ ਨਿਵੇਸਨੇ ਅਤਿਵਿਯ ਭਿਂਸਨਕਂ ਵਿਸ੍ਸਰਮਕਂਸੁ. ਰਾਜਾ ਭਯਸਨ੍ਤਾਸਸਂਵੇਗਂ ਆਪਜ੍ਜਿਤ੍ਵਾ ਵਿਭਾਤਾਯ ¶ ਰਤ੍ਤਿਯਾ ਭਗਵਤੋ ਆਰੋਚੇਹਿ – ‘‘ਏਵਰੂਪਂ ਸਦ੍ਦਂ ਅਸ੍ਸੋਸਿਂ, ਕਿਂ ਨੁ ਖੋ ਮੇ, ਭਨ੍ਤੇ, ਭਵਿਸ੍ਸਤੀ’’ਤਿ? ਭਗਵਾ ‘‘ਮਾ ਭਾਯਿ, ਮਹਾਰਾਜ, ਨ ਤੇ ਕਿਞ੍ਚਿ ਪਾਪਕਂ ਭਵਿਸ੍ਸਤਿ, ਅਪਿਚ ਖੋ ਸਨ੍ਤਿ ਤੇ ਪੁਰਾਣਞਾਤਕਾ ਪੇਤੇਸੁ ਉਪ੍ਪਨ੍ਨਾ. ਤੇ ਏਕਂ ਬੁਦ੍ਧਨ੍ਤਰਂ ਤਮੇਵ ਪਚ੍ਚਾਸੀਸਨ੍ਤਾ ‘ਬੁਦ੍ਧਸ੍ਸ ਦਾਨਂ ਦਤ੍ਵਾ ਅਮ੍ਹਾਕਂ ਉਦ੍ਦਿਸਿਸ੍ਸਤੀ’ਤਿ ਵਿਚਰਨ੍ਤਾ ਤਯਾ ਹਿਯ੍ਯੋ ਦਾਨਂ ਦਤ੍ਵਾ ਨ ਉਦ੍ਦਿਸਿਤਤ੍ਤਾ ਛਿਨ੍ਨਾਸਾ ਹੁਤ੍ਵਾ ਤਥਾਰੂਪਂ ਵਿਸ੍ਸਰਮਕਂਸੂ’’ਤਿ ਆਹ. ‘‘ਕਿਂ ਇਦਾਨਿਪਿ, ਭਨ੍ਤੇ, ਦਿਨ੍ਨੇ ਤੇ ਲਭੇਯ੍ਯੁ’’ਨ੍ਤਿ? ‘‘ਆਮ, ਮਹਾਰਾਜਾ’’ਤਿ. ‘‘ਤੇਨ ਹਿ, ਭਨ੍ਤੇ, ਅਧਿਵਾਸੇਤੁ ਮੇ ਭਗਵਾ ਅਜ੍ਜਤਨਾਯ ਦਾਨਂ, ਤੇਸਂ ਉਦ੍ਦਿਸਿਸ੍ਸਾਮੀ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ.

ਰਾਜਾ ਨਿਵੇਸਨਂ ਗਨ੍ਤ੍ਵਾ ਮਹਾਦਾਨਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ ¶ . ਭਗਵਾ ਰਾਜਨ੍ਤੇਪੁਰਂ ਗਨ੍ਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਤੇ ਪੇਤਾ ‘‘ਅਪਿ ਨਾਮ ਅਜ੍ਜ ਲਭੇਯ੍ਯਾਮਾ’’ਤਿ ਗਨ੍ਤ੍ਵਾ ਤਿਰੋਕੁਟ੍ਟਾਦੀਸੁ ਅਟ੍ਠਂਸੁ. ਭਗਵਾ ਤਥਾ ਅਕਾਸਿ, ਯਥਾ ਤੇ ਸਬ੍ਬੇਵ ਰਞ੍ਞੋ ਆਪਾਥਂ ਗਤਾ ਅਹੇਸੁਂ. ਰਾਜਾ ਦਕ੍ਖਿਣੋਦਕਂ ਦੇਨ੍ਤੋ ‘‘ਇਦਂ ਮੇ ਞਾਤੀਨਂ ਹੋਤੂ’’ਤਿ ਉਦ੍ਦਿਸਿ. ਤਾਵਦੇਵ ਪੇਤਾਨਂ ਕਮਲਕੁਵਲਯਸਞ੍ਛਨ੍ਨਾ ਪੋਕ੍ਖਰਣਿਯੋ ਨਿਬ੍ਬਤ੍ਤਿਂਸੁ. ਤੇ ਤਤ੍ਥ ਨ੍ਹਤ੍ਵਾ ਚ ਪਿਵਿਤ੍ਵਾ ਚ ਪਟਿਪ੍ਪਸ੍ਸਦ੍ਧਦਰਥਕਿਲਮਥਪਿਪਾਸਾ ਸੁਵਣ੍ਣਵਣ੍ਣਾ ਅਹੇਸੁਂ. ਰਾਜਾ ਯਾਗੁਖਜ੍ਜਭੋਜ੍ਜਾਨਿ ਦਤ੍ਵਾ ਉਦ੍ਦਿਸਿ. ਤੇਸਂ ਤਙ੍ਖਣਞ੍ਞੇਵ ਦਿਬ੍ਬਯਾਗੁਖਜ੍ਜਭੋਜ੍ਜਾਨਿ ਨਿਬ੍ਬਤ੍ਤਿਂਸੁ. ਤੇ ਤਾਨਿ ਪਰਿਭੁਞ੍ਜਿਤ੍ਵਾ ਪੀਣਿਨ੍ਦ੍ਰਿਯਾ ਅਹੇਸੁਂ. ਅਥ ਵਤ੍ਥਸੇਨਾਸਨਾਨਿ ਦਤ੍ਵਾ ਉਦ੍ਦਿਸਿ. ਤੇਸਂ ਦਿਬ੍ਬਵਤ੍ਥਪਾਸਾਦਪਚ੍ਚਤ੍ਥਰਣਸੇਯ੍ਯਾਦਿਅਲਙ੍ਕਾਰਵਿਧਯੋ ਨਿਬ੍ਬਤ੍ਤਿਂਸੁ. ਸਾ ਚ ਤੇਸਂ ਸਮ੍ਪਤ੍ਤਿ ਸਬ੍ਬਾਪਿ ਯਥਾ ਰਞ੍ਞੋ ਪਾਕਟਾ ਹੋਤਿ, ਤਥਾ ਭਗਵਾ ਅਧਿਟ੍ਠਾਸਿ. ਰਾਜਾ ਤਂ ਦਿਸ੍ਵਾ ਅਤਿਵਿਯ ਅਤ੍ਤਮਨੋ ਅਹੋਸਿ. ਤਤੋ ਭਗਵਾ ਭੁਤ੍ਤਾਵੀ ਪਵਾਰਿਤੋ ਰਞ੍ਞੋ ਬਿਮ੍ਬਿਸਾਰਸ੍ਸ ਅਨੁਮੋਦਨਤ੍ਥਂ ਤਿਰੋਕੁਟ੍ਟਪੇਤਵਤ੍ਥੁਂ ਅਭਾਸਿ –

‘‘ਤਿਰੋਕੁਟ੍ਟੇਸੁ ਤਿਟ੍ਠਨ੍ਤਿ, ਸਨ੍ਧਿਸਿਙ੍ਘਾਟਕੇਸੁ ਚ;

ਦ੍ਵਾਰਬਾਹਾਸੁ ਤਿਟ੍ਠਨ੍ਤਿ, ਆਗਨ੍ਤ੍ਵਾਨ ਸਕਂ ਘਰਂ.

‘‘ਪਹੂਤੇ ¶ ਅਨ੍ਨਪਾਨਮ੍ਹਿ, ਖਜ੍ਜਭੋਜ੍ਜੇ ਉਪਟ੍ਠਿਤੇ;

ਨ ਤੇਸਂ ਕੋਚਿ ਸਰਤਿ, ਸਤ੍ਤਾਨਂ ਕਮ੍ਮਪਚ੍ਚਯਾ.

‘‘ਏਵਂ ¶ ਦਦਨ੍ਤਿ ਞਾਤੀਨਂ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਸੁਚਿਂ ਪਣੀਤਂ ਕਾਲੇਨ, ਕਪ੍ਪਿਯਂ ਪਾਨਭੋਜਨਂ.

‘‘ਇਦਂ ਵੋ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ;

ਤੇ ਚ ਤਤ੍ਥ ਸਮਾਗਨ੍ਤ੍ਵਾ, ਞਾਤਿਪੇਤਾ ਸਮਾਗਤਾ;

ਪਹੂਤੇ ਅਨ੍ਨਪਾਨਮ੍ਹਿ, ਸਕ੍ਕਚ੍ਚਂ ਅਨੁਮੋਦਰੇ.

‘‘ਚਿਰਂ ਜੀਵਨ੍ਤੁ ਨੋ ਞਾਤੀ, ਯੇਸਂ ਹੇਤੁ ਲਭਾਮਸੇ;

ਅਮ੍ਹਾਕਞ੍ਚ ਕਤਾ ਪੂਜਾ, ਦਾਯਕਾ ਚ ਅਨਿਪ੍ਫਲਾ.

‘‘ਨ ਹਿ ਤਤ੍ਥ ਕਸਿ ਅਤ੍ਥਿ, ਗੋਰਕ੍ਖੇਤ੍ਥ ਨ ਵਿਜ੍ਜਤਿ;

ਵਣਿਜ੍ਜਾ ਤਾਦਿਸੀ ਨਤ੍ਥਿ, ਹਿਰਞ੍ਞੇਨ ਕਯਾਕਯਂ;

ਇਤੋ ਦਿਨ੍ਨੇਨ ਯਾਪੇਨ੍ਤਿ, ਪੇਤਾ ਕਾਲਗਤਾ ਤਹਿਂ.

‘‘ਉਨ੍ਨਮੇ ਉਦਕਂ ਵੁਟ੍ਠਂ, ਯਥਾ ਨਿਨ੍ਨਂ ਪਵਤ੍ਤਤਿ;

ਏਵਮੇਵ ਇਤੋ ਦਿਨ੍ਨਂ, ਪੇਤਾਨਂ ਉਪਕਪ੍ਪਤਿ.

‘‘ਯਥਾ ਵਾਰਿਵਹਾ ਪੂਰਾ, ਪਰਿਪੂਰੇਨ੍ਤਿ ਸਾਗਰਂ;

ਏਵਮੇਵ ¶ ਇਤੋ ਦਿਨ੍ਨਂ, ਪੇਤਾਨਂ ਉਪਕਪ੍ਪਤਿ.

‘‘ਅਦਾਸਿ ਮੇ ਅਕਾਸਿ ਮੇ, ਞਾਤਿਮਿਤ੍ਤਾ ਸਖਾ ਚ ਮੇ;

ਪੇਤਾਨਂ ਦਕ੍ਖਿਣਂ ਦਜ੍ਜਾ, ਪੁਬ੍ਬੇ ਕਤਮਨੁਸ੍ਸਰਂ.

‘‘ਨ ਹਿ ਰੁਣ੍ਣਂ ਵਾ ਸੋਕੋ ਵਾ, ਯਾ ਚਞ੍ਞਾ ਪਰਿਦੇਵਨਾ;

ਨ ਤਂ ਪੇਤਾਨਮਤ੍ਥਾਯ, ਏਵਂ ਤਿਟ੍ਠਨ੍ਤਿ ਞਾਤਯੋ.

‘‘ਅਯਞ੍ਚ ¶ ਖੋ ਦਕ੍ਖਿਣਾ ਦਿਨ੍ਨਾ, ਸਙ੍ਘਮ੍ਹਿ ਸੁਪ੍ਪਤਿਟ੍ਠਿਤਾ;

ਦੀਘਰਤ੍ਤਂ ਹਿਤਾਯਸ੍ਸ, ਠਾਨਸੋ ਉਪਕਪ੍ਪਤਿ.

‘‘ਸੋ ਞਾਤਿਧਮ੍ਮੋ ਚ ਅਯਂ ਨਿਦਸ੍ਸਿਤੋ, ਪੇਤਾਨ ਪੂਜਾ ਚ ਕਤਾ ਉਲ਼ਾਰਾ;

ਬਲਞ੍ਚ ਭਿਕ੍ਖੂਨਮਨੁਪ੍ਪਦਿਨ੍ਨਂ, ਤੁਮ੍ਹੇਹਿ ਪੁਞ੍ਞਂ ਪਹੁਤਂ ਅਨਪ੍ਪਕ’’ਨ੍ਤਿ.

੧੪. ਤਤ੍ਥ ¶ ਤਿਰੋਕੁਟ੍ਟੇਸੂਤਿ ਕੁਟ੍ਟਾਨਂ ਪਰਭਾਗੇਸੁ. ਤਿਟ੍ਠਨ੍ਤੀਤਿ ਨਿਸਜ੍ਜਾਦਿਪਟਿਕ੍ਖੇਪਤੋ ਠਾਨਕਪ੍ਪਨਵਚਨਮੇਤਂ, ਗੇਹਪਾਕਾਰਕੁਟ੍ਟਾਨਂ ਦ੍ਵਾਰਤੋ ਬਹਿ ਏਵ ਤਿਟ੍ਠਨ੍ਤੀਤਿ ਅਤ੍ਥੋ. ਸਨ੍ਧਿਸਿਙ੍ਘਾਟਕੇਸੁ ਚਾਤਿ ਸਨ੍ਧੀਸੁ ਚ ਸਿਙ੍ਘਾਟਕੇਸੁ ਚ. ਸਨ੍ਧੀਤਿ ਚਤੁਕ੍ਕੋਣਰਚ੍ਛਾ, ਘਰਸਨ੍ਧਿਭਿਤ੍ਤਿਸਨ੍ਧਿਆਲੋਕਸਨ੍ਧਿਯੋਪਿ ਵੁਚ੍ਚਨ੍ਤਿ. ਸਿਙ੍ਘਾਟਕਾਤਿ ਤਿਕੋਣਰਚ੍ਛਾ. ਦ੍ਵਾਰਬਾਹਾਸੁ ਤਿਟ੍ਠਨ੍ਤੀਤਿ ਨਗਰਦ੍ਵਾਰਘਰਦ੍ਵਾਰਾਨਂ ਬਾਹਾ ਨਿਸ੍ਸਾਯ ਤਿਟ੍ਠਨ੍ਤਿ. ਆਗਨ੍ਤ੍ਵਾਨ ਸਕਂ ਘਰਨ੍ਤਿ ਸਕਘਰਂ ਨਾਮ ਪੁਬ੍ਬਞਾਤਿਘਰਮ੍ਪਿ ਅਤ੍ਤਨਾ ਸਾਮਿਭਾਵੇਨ ਅਜ੍ਝਾਵੁਤ੍ਥਘਰਮ੍ਪਿ, ਤਦੁਭਯਮ੍ਪਿ ਤੇ ਯਸ੍ਮਾ ਸਕਘਰਸਞ੍ਞਾਯ ਆਗਚ੍ਛਨ੍ਤਿ, ਤਸ੍ਮਾ ‘‘ਆਗਨ੍ਤ੍ਵਾਨ ਸਕਂ ਘਰ’’ਨ੍ਤਿ ਆਹ.

੧੫. ਏਵਂ ਭਗਵਾ ਪੁਬ੍ਬੇ ਅਨਜ੍ਝਾਵੁਤ੍ਥਪੁਬ੍ਬਮ੍ਪਿ ਪੁਬ੍ਬਞਾਤਿਘਰਤ੍ਤਾ ਬਿਮ੍ਬਿਸਾਰਨਿਵੇਸਨਂ ਸਕਘਰਸਞ੍ਞਾਯ ਆਗਨ੍ਤ੍ਵਾ ਤਿਰੋਕੁਟ੍ਟਾਦੀਸੁ ਠਿਤੇ ਇਸ੍ਸਾਮਚ੍ਛਰਿਯਫਲਂ ਅਨੁਭਵਨ੍ਤੇ ਅਤਿਵਿਯ ਦੁਦ੍ਦਸਿਕਵਿਰੂਪਭਯਾਨਕਦਸ੍ਸਨੇ ਬਹੂ ਪੇਤੇ ਰਞ੍ਞੋ ਦਸ੍ਸੇਨ੍ਤੋ ‘‘ਤਿਰੋਕੁਟ੍ਟੇਸੁ ਤਿਟ੍ਠਨ੍ਤੀ’’ਤਿ ਗਾਥਂ ਵਤ੍ਵਾ ਪੁਨ ਤੇਹਿ ਕਤਸ੍ਸ ਕਮ੍ਮਸ੍ਸ ਦਾਰੁਣਭਾਵਂ ਦਸ੍ਸੇਨ੍ਤੋ ‘‘ਪਹੂਤੇ ਅਨ੍ਨਪਾਨਮ੍ਹੀ’’ਤਿ ਦੁਤਿਯਗਾਥਮਾਹ.

ਤਤ੍ਥ ਪਹੂਤੇਤਿ ਅਨਪ੍ਪਕੇ ਬਹੁਮ੍ਹਿ, ਯਾਵਦਤ੍ਥੇਤਿ ਅਤ੍ਥੋ ¶ . ਬ-ਕਾਰਸ੍ਸ ਹਿ ਪ-ਕਾਰੋ ਲਬ੍ਭਤਿ ‘‘ਪਹੁ ਸਨ੍ਤੋ ਨ ਭਰਤੀ’’ਤਿਆਦੀਸੁ (ਸੁ. ਨਿ. ੯੮) ਵਿਯ. ਕੇਚਿ ਪਨ ‘‘ਬਹੁਕੇ’’ਤਿ ਪਠਨ੍ਤਿ, ਸੋ ਪਨ ਪਮਾਦਪਾਠੋ. ਅਨ੍ਨਪਾਨਮ੍ਹੀਤਿ ਅਨ੍ਨੇ ਚ ਪਾਨੇ ਚ. ਖਜ੍ਜਭੋਜ੍ਜੇਤਿ ਖਜ੍ਜੇ ਚ ਭੋਜ੍ਜੇ ਚ. ਏਤੇਨ ਅਸਿਤਪੀਤਖਾਯਿਤਸਾਯਿਤਵਸੇਨ ਚਤੁਬ੍ਬਿਧਮ੍ਪਿ ਆਹਾਰਂ ਦਸ੍ਸੇਤਿ. ਉਪਟ੍ਠਿਤੇਤਿ ਉਪਗਮ੍ਮ ਠਿਤੇ ਸਜ੍ਜਿਤੇ, ਪਟਿਯਤ੍ਤੇਤਿ ਅਤ੍ਥੋ. ਨ ਤੇਸਂ ਕੋਚਿ ਸਰਤਿ ਸਤ੍ਤਾਨਨ੍ਤਿ ਤੇਸਂ ਪੇਤ੍ਤਿਵਿਸਯੇ ਉਪ੍ਪਨ੍ਨਾਨਂ ਸਤ੍ਤਾਨਂ ਕੋਚਿ ਮਾਤਾ ਵਾ ਪਿਤਾ ਵਾ ਪੁਤ੍ਤੋ ਵਾ ਨਤ੍ਤਾ ਵਾ ਨ ਸਰਤਿ. ਕਿਂ ਕਾਰਣਾ? ਕਮ੍ਮਪਚ੍ਚਯਾਤਿ, ਅਤ੍ਤਨਾ ਕਤਸ੍ਸ ਅਦਾਨਦਾਨਪਟਿਸੇਧਨਾਦਿਭੇਦਸ੍ਸ ਕਦਰਿਯਕਮ੍ਮਸ੍ਸ ਕਾਰਣਭਾਵਤੋ. ਤਞ੍ਹਿ ਕਮ੍ਮਂ ਤੇਸਂ ਞਾਤੀਨਂ ਸਰਿਤੁਂ ਨ ਦੇਤਿ.

੧੬. ਏਵਂ ਭਗਵਾ ਅਨਪ੍ਪਕੇਪਿ ਅਨ੍ਨਪਾਨਾਦਿਮ੍ਹਿ ਵਿਜ੍ਜਮਾਨੇ ਞਾਤੀਨਂ ਪਚ੍ਚਾਸੀਸਨ੍ਤਾਨਂ ਪੇਤਾਨਂ ¶ ਕਮ੍ਮਫਲੇਨ ਞਾਤਕਾਨਂ ਅਨੁਸ੍ਸਰਣਮਤ੍ਤਸ੍ਸਾਪਿ ਅਭਾਵਂ ਦਸ੍ਸੇਤ੍ਵਾ ¶ ਇਦਾਨਿ ਪੇਤ੍ਤਿਵਿਸਯੁਪਪਨ੍ਨੇ ਞਾਤਕੇ ਉਦ੍ਦਿਸ੍ਸ ਰਞ੍ਞਾ ਦਿਨ੍ਨਦਾਨਂ ਪਸਂਸਨ੍ਤੋ ‘‘ਏਵਂ ਦਦਨ੍ਤਿ ਞਾਤੀਨ’’ਨ੍ਤਿ ਤਤਿਯਗਾਥਮਾਹ.

ਤਤ੍ਥ ਏਵਨ੍ਤਿ ਉਪਮਾਵਚਨਂ. ਤਸ੍ਸ ਦ੍ਵਿਧਾ ਸਮ੍ਬਨ੍ਧੋ – ਤੇਸਂ ਸਤ੍ਤਾਨਂ ਕਮ੍ਮਪਚ੍ਚਯਾ ਅਸਰਨ੍ਤੇਸੁਪਿ ਕੇਸੁਚਿ ਕੇਚਿ ਦਦਨ੍ਤਿ ਞਾਤੀਨਂ, ਯੇ ਏਵਂ ਅਨੁਕਮ੍ਪਕਾ ਹੋਨ੍ਤੀਤਿ ਚ, ਮਹਾਰਾਜ, ਯਥਾ ਤਯਾ ਦਿਨ੍ਨਂ, ਏਵਂ ਸੁਚਿਂ ਪਣੀਤਂ ਕਾਲੇਨ ਕਪ੍ਪਿਯਂ ਪਾਨਭੋਜਨਂ ਦਦਨ੍ਤਿ ਞਾਤੀਨਂ, ਯੇ ਹੋਨ੍ਤਿ ਅਨੁਕਮ੍ਪਕਾਤਿ ਚ. ਤਤ੍ਥ ਦਦਨ੍ਤੀਤਿ ਦੇਨ੍ਤਿ ਉਦ੍ਦਿਸਨ੍ਤਿ ਨਿਯ੍ਯਾਤੇਨ੍ਤਿ. ਞਾਤੀਨਨ੍ਤਿ ਮਾਤਿਤੋ ਚ ਪਿਤਿਤੋ ਚ ਸਮ੍ਬਨ੍ਧਾਨਂ. ਯੇਤਿ ਯੇ ਕੇਚਿ ਪੁਤ੍ਤਾਦਯੋ. ਹੋਨ੍ਤੀਤਿ ਭਵਨ੍ਤਿ. ਅਨੁਕਮ੍ਪਕਾਤਿ ਅਤ੍ਥਕਾਮਾ ਹਿਤੇਸਿਨੋ. ਸੁਚਿਨ੍ਤਿ ਸੁਦ੍ਧਂ ਮਨੋਹਰਂ ਧਮ੍ਮਿਕਞ੍ਚ. ਪਣੀਤਨ੍ਤਿ ਉਲ਼ਾਰਂ. ਕਾਲੇਨਾਤਿ ਦਕ੍ਖਿਣੇਯ੍ਯਾਨਂ ਪਰਿਭੋਗਯੋਗ੍ਗਕਾਲੇਨ, ਞਾਤਿਪੇਤਾਨਂ ਵਾ ਤਿਰੋਕੁਟ੍ਟਾਦੀਸੁ ¶ ਆਗਨ੍ਤ੍ਵਾ ਠਿਤਕਾਲੇਨ. ਕਪ੍ਪਿਯਨ੍ਤਿ ਅਨੁਚ੍ਛਵਿਕਂ ਪਤਿਰੂਪਂ ਅਰਿਯਾਨਂ ਪਰਿਭੋਗਾਰਹਂ. ਪਾਨਭੋਜਨਨ੍ਤਿ ਪਾਨਞ੍ਚ ਭੋਜਨਞ੍ਚ, ਤਦੁਪਦੇਸੇਨ ਚੇਤ੍ਥ ਸਬ੍ਬਂ ਦੇਯ੍ਯਧਮ੍ਮਂ ਵਦਤਿ.

੧੭. ਇਦਾਨਿ ਯੇਨ ਪਕਾਰੇਨ ਤੇਸਂ ਪੇਤਾਨਂ ਦਿਨ੍ਨਂ ਨਾਮ ਹੋਤਿ, ਤਂ ਦਸ੍ਸੇਨ੍ਤੋ ‘‘ਇਦਂ ਵੋ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’’ਤਿ ਚਤੁਤ੍ਥਗਾਥਾਯ ਪੁਬ੍ਬਡ੍ਢਂ ਆਹ. ਤਂ ਤਤਿਯਗਾਥਾਯ ਪੁਬ੍ਬਡ੍ਢੇਨ ਸਮ੍ਬਨ੍ਧਿਤਬ੍ਬਂ –

‘‘ਏਵਂ ਦਦਨ੍ਤਿ ਞਾਤੀਨਂ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਇਦਂ ਵੋ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’’ਤਿ.

ਤੇਨ ‘‘ਇਦਂ ਵੋ ਞਾਤੀਨਂ ਹੋਤੂਤਿ ਏਵਂ ਪਕਾਰੇਨ ਦਦਨ੍ਤਿ, ਨੋ ਅਞ੍ਞਥਾ’’ਤਿ ਆਕਾਰਤ੍ਥੇਨ ਏਵਂਸਦ੍ਦੇਨ ਦਾਤਬ੍ਬਾਕਾਰਨਿਦਸ੍ਸਨਂ ਕਤਂ ਹੋਤਿ.

ਤਤ੍ਥ ਇਦਨ੍ਤਿ ਦੇਯ੍ਯਧਮ੍ਮਨਿਦਸ੍ਸਨਂ. ਵੋਤਿ ਨਿਪਾਤਮਤ੍ਤਂ ‘‘ਯੇਹਿ ਵੋ ਅਰਿਯਾ’’ਤਿਆਦੀਸੁ (ਮ. ਨਿ. ੧.੩੬) ਵਿਯ. ਞਾਤੀਨਂ ਹੋਤੂਤਿ ਪੇਤ੍ਤਿਵਿਸਯੇ ਉਪ੍ਪਨ੍ਨਾਨਂ ਞਾਤਕਾਨਂ ਹੋਤੁ. ‘‘ਨੋ ਞਾਤੀਨ’’ਨ੍ਤਿ ਚ ਪਠਨ੍ਤਿ, ਅਮ੍ਹਾਕਂ ਞਾਤੀਨਨ੍ਤਿ ਅਤ੍ਥੋ. ਸੁਖਿਤਾ ਹੋਨ੍ਤੁ ਞਾਤਯੋਤਿ ਤੇ ਪੇਤ੍ਤਿਵਿਸਯੂਪਪਨ੍ਨਾ ਞਾਤਯੋ ਇਦਂ ਫਲਂ ਪਚ੍ਚਨੁਭਵਨ੍ਤਾ ਸੁਖਿਤਾ ਸੁਖਪ੍ਪਤ੍ਤਾ ਹੋਨ੍ਤੁ.

ਯਸ੍ਮਾ ‘‘ਇਦਂ ਵੋ ਞਾਤੀਨਂ ਹੋਤੂ’’ਤਿ ਵੁਤ੍ਤੇਪਿ ਅਞ੍ਞੇਨ ਕਤਕਮ੍ਮਂ ਨ ਅਞ੍ਞਸ੍ਸ ਫਲਦਂ ਹੋਤਿ ¶ , ਕੇਵਲਂ ਪਨ ਤਥਾ ਉਦ੍ਦਿਸ੍ਸ ਦੀਯਮਾਨਂ ਤਂ ਵਤ੍ਥੁ ਞਾਤਿਪੇਤਾਨਂ ¶ ਕੁਸਲਕਮ੍ਮਸ੍ਸ ਪਚ੍ਚਯੋ ਹੋਤਿ, ਤਸ੍ਮਾ ਯਥਾ ਤੇਸਂ ਤਸ੍ਮਿਂ ਵਤ੍ਥੁਸ੍ਮਿਂ ਤਸ੍ਮਿਂਯੇਵ ਖਣੇ ਫਲਨਿਬ੍ਬਤ੍ਤਕਂ ਕੁਸਲਕਮ੍ਮਂ ਹੋਤਿ, ਤਂ ਦਸ੍ਸੇਨ੍ਤੋ ‘‘ਤੇ ਚ ਤਤ੍ਥੋ’’ਤਿਆਦਿਮਾਹ.

ਤਤ੍ਥ ਤੇਤਿ ਞਾਤਿਪੇਤਾ. ਤਤ੍ਥਾਤਿ ਯਤ੍ਥ ਦਾਨਂ ਦੀਯਤਿ, ਤਤ੍ਥ. ਸਮਾਗਨ੍ਤ੍ਵਾਤਿ ‘‘ਇਮੇ ਨੋ ਞਾਤਯੋ ਅਮ੍ਹਾਕਂ ਅਤ੍ਥਾਯ ਦਾਨਂ ਉਦ੍ਦਿਸਨ੍ਤੀ’’ਤਿ ਅਨੁਮੋਦਨਤ੍ਥਂ ਤਤ੍ਥ ਸਮਾਗਤਾ ਹੁਤ੍ਵਾ. ਪਹੂਤੇ ਅਨ੍ਨਪਾਨਮ੍ਹੀਤਿ ਅਤ੍ਤਨੋ ਉਦ੍ਦਿਸ੍ਸ ਦੀਯਮਾਨੇ ਤਸ੍ਮਿਂ ਵਤ੍ਥੁਸ੍ਮਿਂ. ਸਕ੍ਕਚ੍ਚਂ ਅਨੁਮੋਦਰੇਤਿ ਕਮ੍ਮਫਲਂ ਅਭਿਸਦ੍ਦਹਨ੍ਤਾ ਚਿਤ੍ਤੀਕਾਰਂ ਅਵਿਜਹਨ੍ਤਾ ਅਵਿਕ੍ਖਿਤ੍ਤਚਿਤ੍ਤਾ ਹੁਤ੍ਵਾ ‘‘ਇਦਂ ਨੋ ਦਾਨਂ ¶ ਹਿਤਾਯ ਸੁਖਾਯ ਹੋਤੂ’’ਤਿ ਮੋਦਨ੍ਤਿ ਅਨੁਮੋਦਨ੍ਤਿ ਪੀਤਿਸੋਮਨਸ੍ਸਜਾਤਾ ਹੋਨ੍ਤਿ.

੧੮. ਚਿਰਂ ਜੀਵਨ੍ਤੂਤਿ ਚਿਰਂ ਜੀਵਿਨੋ ਦੀਘਾਯੁਕਾ ਹੋਨ੍ਤੁ. ਨੋ ਞਾਤੀਤਿ ਅਮ੍ਹਾਕਂ ਞਾਤਕਾ. ਯੇਸਂ ਹੇਤੂਤਿ ਯੇਸਂ ਕਾਰਣਾ ਯੇ ਨਿਸ੍ਸਾਯ. ਲਭਾਮਸੇਤਿ ਈਦਿਸਂ ਸਮ੍ਪਤ੍ਤਿਂ ਪਟਿਲਭਾਮ. ਇਦਞ੍ਹਿ ਉਦ੍ਦਿਸਨੇਨ ਲਦ੍ਧਸਮ੍ਪਤ੍ਤਿਂ ਅਨੁਭਵਨ੍ਤਾਨਂ ਪੇਤਾਨਂ ਅਤ੍ਤਨੋ ਞਾਤੀਨਂ ਥੋਮਨਾਕਾਰਦਸ੍ਸਨਂ. ਪੇਤਾਨਞ੍ਹਿ ਅਤ੍ਤਨੋ ਅਨੁਮੋਦਨੇਨ, ਦਾਯਕਾਨਂ ਉਦ੍ਦਿਸਨੇਨ, ਉਕ੍ਖਿਣੇਯ੍ਯਸਮ੍ਪਤ੍ਤਿਯਾ ਚਾਤਿ ਤੀਹਿ ਅਙ੍ਗੇਹਿ ਦਕ੍ਖਿਣਾ ਤਙ੍ਖਣਞ੍ਞੇਵ ਫਲਨਿਬ੍ਬਤ੍ਤਿਕਾ ਹੋਤਿ. ਤਤ੍ਥ ਦਾਯਕਾ ਵਿਸੇਸਹੇਤੁ. ਤੇਨਾਹ ‘‘ਯੇਸਂ ਹੇਤੁ ਲਭਾਮਸੇ’’ਤਿ. ਅਮ੍ਹਾਕਞ੍ਚ ਕਤਾ ਪੂਜਾਤਿ ‘‘ਇਦਂ ਵੋ ਞਾਤੀਨਂ ਹੋਤੂ’’ਤਿ ਏਵਂ ਉਦ੍ਦਿਸਨ੍ਤੇਹਿ ਦਾਯਕੇਹਿ ਅਮ੍ਹਾਕਞ੍ਚ ਪੂਜਾ ਕਤਾ, ਤੇ ਦਾਯਕਾ ਚ ਅਨਿਪ੍ਫਲਾ ਯਸ੍ਮਿਂ ਸਨ੍ਤਾਨੇ ਪਰਿਚ੍ਚਾਗਮਯਂ ਕਮ੍ਮਂ ਨਿਬ੍ਬਤ੍ਤਂ ਤਸ੍ਸ ਤਤ੍ਥੇਵ ਫਲਦਾਨਤੋ.

ਏਤ੍ਥਾਹ – ‘‘ਕਿਂ ਪਨ ਪੇਤ੍ਤਿਵਿਸਯੂਪਪਨ੍ਨਾ ਏਵ ਞਾਤੀ ਹੇਤੁਸਮ੍ਪਤ੍ਤਿਯੋ ਲਭਨ੍ਤਿ, ਉਦਾਹੁ ਅਞ੍ਞੇਪੀ’’ਤਿ? ਨ ਚੇਤ੍ਥ ਅਮ੍ਹੇਹਿ ਵਤ੍ਤਬ੍ਬਂ, ਅਤ੍ਥਿ ਭਗਵਤਾ ਏਵਂ ਬ੍ਯਾਕਤਤ੍ਤਾ. ਵੁਤ੍ਤਞ੍ਹੇਤਂ –-

‘‘ਮਯਮਸ੍ਸੁ, ਭੋ ਗੋਤਮ, ਬ੍ਰਾਹ੍ਮਣਾ ਨਾਮ ਦਾਨਾਨਿ ਦੇਮ, ਪੁਞ੍ਞਾਨਿ ਕਰੋਮ ‘ਇਦਂ ਦਾਨਂ ਪੇਤਾਨਂ ਞਾਤਿਸਾਲੋਹਿਤਾਨਂ ਉਪਕਪ੍ਪਤੁ, ਇਦਂ ਦਾਨਂ ਪੇਤਾ ਞਾਤਿਸਾਲੋਹਿਤਾ ਪਰਿਭੁਞ੍ਜਨ੍ਤੂ’ਤਿ. ਕਚ੍ਚਿ ਤਂ, ਭੋ ਗੋਤਮ, ਦਾਨਂ ਪੇਤਾਨਂ ਞਾਤਿਸਾਲੋਹਿਤਾਨਂ ਉਪਕਪ੍ਪਤਿ ¶ , ਕਚ੍ਚਿ ਤੇ ਪੇਤਾ ਞਾਤਿਸਾਲੋਹਿਤਾ ਤਂ ਦਾਨਂ ਪਰਿਭੁਞ੍ਜਨ੍ਤੀਤਿ? ਠਾਨੇ ਖੋ, ਬ੍ਰਾਹ੍ਮਣ, ਉਪਕਪ੍ਪਤਿ, ਨੋ ਅਟ੍ਠਾਨੇਤਿ.

‘‘ਕਤਮਂ ਪਨ, ਭੋ ਗੋਤਮ, ਠਾਨਂ, ਕਤਮਂ ਅਟ੍ਠਾਨਨ੍ਤਿ? ਇਧ, ਬ੍ਰਾਹ੍ਮਣ, ਏਕਚ੍ਚੋ ਪਾਣਾਤਿਪਾਤੀ ¶ ਹੋਤਿ…ਪੇ… ਮਿਚ੍ਛਾਦਿਟ੍ਠਿਕੋ ਹੋਤਿ, ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਨਿਰਯਂ ਉਪਪਜ੍ਜਤਿ. ਯੋ ਨੇਰਯਿਕਾਨਂ ਸਤ੍ਤਾਨਂ ਆਹਾਰੋ, ਤੇਨ ਸੋ ਤਤ੍ਥ ਯਾਪੇਤਿ, ਤੇਨ ਸੋ ਤਤ੍ਥ ਤਿਟ੍ਠਤਿ. ਇਦਂ ਖੋ, ਬ੍ਰਾਹ੍ਮਣ, ਅਟ੍ਠਾਨਂ, ਯਤ੍ਥ ਠਿਤਸ੍ਸ ਤਂ ਦਾਨਂ ਨ ਉਪਕਪ੍ਪਤਿ.

‘‘ਇਧ ਪਨ, ਬ੍ਰਾਹ੍ਮਣ, ਏਕਚ੍ਚੋ ਪਾਣਾਤਿਪਾਤੀ ਹੋਤਿ…ਪੇ… ਮਿਚ੍ਛਾਦਿਟ੍ਠਿਕੋ ਹੋਤਿ, ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਤਿਰਚ੍ਛਾਨਯੋਨਿਂ ¶ ਉਪਪਜ੍ਜਤਿ. ਯੋ ਤਿਰਚ੍ਛਾਨਯੋਨਿਕਾਨਂ ਸਤ੍ਤਾਨਂ ਆਹਾਰੋ, ਤੇਨ ਸੋ ਤਤ੍ਥ ਯਾਪੇਤਿ, ਤੇਨ ਸੋ ਤਤ੍ਥ ਤਿਟ੍ਠਤਿ. ਇਦਮ੍ਪਿ ਖੋ, ਬ੍ਰਾਹ੍ਮਣ, ਅਟ੍ਠਾਨਂ, ਯਤ੍ਥ ਠਿਤਸ੍ਸ ਤਂ ਦਾਨਂ ਨ ਉਪਕਪ੍ਪਤਿ.

‘‘ਇਧ ਪਨ, ਬ੍ਰਾਹ੍ਮਣ, ਏਕਚ੍ਚੋ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸਮ੍ਮਾਦਿਟ੍ਠਿਕੋ ਹੋਤਿ, ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਮਨੁਸ੍ਸਾਨਂ ਸਹਬ੍ਯਤਂ ਉਪਪਜ੍ਜਤਿ…ਪੇ… ਦੇਵਾਨਂ ਸਹਬ੍ਯਤਂ ਉਪਪਜ੍ਜਤਿ. ਯੋ ਦੇਵਾਨਂ ਆਹਾਰੋ, ਤੇਨ ਸੋ ਤਤ੍ਥ ਯਾਪੇਤਿ, ਤੇਨ ਸੋ ਤਤ੍ਥ ਤਿਟ੍ਠਤਿ. ਇਦਮ੍ਪਿ ਖੋ, ਬ੍ਰਾਹ੍ਮਣ, ਅਟ੍ਠਾਨਂ, ਯਤ੍ਥ ਠਿਤਸ੍ਸ ਤਂ ਦਾਨਂ ਨ ਉਪਕਪ੍ਪਤਿ.

‘‘ਇਧ ਪਨ, ਬ੍ਰਾਹ੍ਮਣ, ਏਕਚ੍ਚੋ ਪਾਣਾਤਿਪਾਤੀ ਹੋਤਿ…ਪੇ… ਮਿਚ੍ਛਾਦਿਟ੍ਠਿਕੋ ਹੋਤਿ, ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਪੇਤ੍ਤਿਵਿਸਯਂ ਉਪਪਜ੍ਜਤਿ. ਯੋ ਪੇਤ੍ਤਿਵਿਸਯਿਕਾਨਂ ਸਤ੍ਤਾਨਂ ਆਹਾਰੋ, ਤੇਨ ਸੋ ਤਤ੍ਥ ਯਾਪੇਤਿ, ਤੇਨ ਸੋ ਤਤ੍ਥ ਤਿਟ੍ਠਤਿ. ਯਂ ਵਾ ਪਨਸ੍ਸ ਇਤੋ ਅਨੁਪਵੇਚ੍ਛੇਨ੍ਤਿ ਮਿਤ੍ਤਾਮਚ੍ਚਾ ਵਾ ਞਾਤਿਸਾਲੋਹਿਤਾ ਵਾ, ਤੇਨ ਸੋ ਤਤ੍ਥ ਯਾਪੇਤਿ, ਤੇਨ ਸੋ ਤਤ੍ਥ ਤਿਟ੍ਠਤਿ. ਇਦਂ ਖੋ, ਬ੍ਰਾਹ੍ਮਣ, ਠਾਨਂ, ਯਤ੍ਥ ਠਿਤਸ੍ਸ ਤਂ ਦਾਨਂ ਉਪਕਪ੍ਪਤੀ’’ਤਿ.

‘‘ਸਚੇ ਪਨ, ਭੋ ਗੋਤਮ, ਸੋ ਪੇਤੋ ਞਾਤਿਸਾਲੋਹਿਤੋ ਤਂ ਠਾਨਂ ਅਨੁਪਪਨ੍ਨੋ ਹੋਤਿ, ਕੋ ਤਂ ਦਾਨਂ ਪਰਿਭੁਞ੍ਜਤੀ’’ਤਿ ¶ ? ‘‘ਅਞ੍ਞੇਪਿਸ੍ਸ, ਬ੍ਰਾਹ੍ਮਣ, ਪੇਤਾ ਞਾਤਿਸਾਲੋਹਿਤਾ ਤਂ ਠਾਨਂ ਉਪਪਨ੍ਨਾ ਹੋਨ੍ਤਿ, ਤੇ ਤਂ ਦਾਨਂ ਪਰਿਭੁਞ੍ਜਨ੍ਤੀ’’ਤਿ.

‘‘ਸਚੇ ਪਨ, ਭੋ ਗੋਤਮ, ਸੋ ਚੇਵ ਪੇਤੋ ਞਾਤਿਸਾਲੋਹਿਤੋ ਤਂ ਠਾਨਂ ਅਨੁਪਪਨ੍ਨੋ ਹੋਤਿ, ਅਞ੍ਞੇਪਿਸ੍ਸ ਪੇਤਾ ਞਾਤਿਸਾਲੋਹਿਤਾ ਤਂ ਠਾਨਂ ਅਨੁਪਪਨ੍ਨਾ ਹੋਨ੍ਤਿ, ਕੋ ਤਂ ਦਾਨਂ ਪਰਿਭੁਞ੍ਜਤੀ’’ਤਿ? ‘‘ਅਟ੍ਠਾਨਂ ਖੋ ਏਤਂ, ਬ੍ਰਾਹ੍ਮਣ, ਅਨਵਕਾਸੋ, ਯਂ ਤਂ ਠਾਨਂ ਵਿਵਿਤ੍ਤਂ ਅਸ੍ਸ ¶ ਇਮਿਨਾ ਦੀਘੇਨ ਅਦ੍ਧੁਨਾ ਯਦਿਦਂ ਪੇਤੇਹਿ ਞਾਤਿਸਾਲੋਹਿਤੇਹਿ, ਅਪਿਚ, ਬ੍ਰਾਹ੍ਮਣ, ਦਾਯਕੋਪਿ ਅਨਿਪ੍ਫਲੋ’’ਤਿ (ਅ. ਨਿ. ੧੦.੧੭੭).

੧੯. ਇਦਾਨਿ ਪੇਤ੍ਤਿਵਿਸਯੂਪਪਨ੍ਨਾਨਂ ਤਤ੍ਥ ਅਞ੍ਞਸ੍ਸ ਕਸਿਗੋਰਕ੍ਖਾਦਿਨੋ ਸਮ੍ਪਤ੍ਤਿਪਟਿਲਾਭਕਾਰਣਸ੍ਸ ਅਭਾਵਂ ਇਤੋ ਦਿਨ੍ਨੇਨ ਯਾਪਨਞ੍ਚ ਦਸ੍ਸੇਤੁਂ ‘‘ਨ ਹੀ’’ਤਿਆਦਿ ਵੁਤ੍ਤਂ.

ਤਤ੍ਥ ਨ ਹਿ ਤਤ੍ਥ ਕਸਿ ਅਤ੍ਥੀਤਿ ਤਸ੍ਮਿਂ ਪੇਤ੍ਤਿਵਿਸਯੇ ਕਸਿ ਨ ਹਿ ਅਤ੍ਥਿ, ਯਂ ਨਿਸ੍ਸਾਯ ਪੇਤਾ ਸੁਖੇਨ ਜੀਵੇਯ੍ਯੁਂ. ਗੋਰਕ੍ਖੇਤ੍ਥ ਨ ਵਿਜ੍ਜਤੀਤਿ ਏਤ੍ਥ ਪੇਤ੍ਤਿਵਿਸਯੇ ਨ ਕੇਵਲਂ ਕਸਿਯੇਵ ਨਤ੍ਥਿ, ਅਥ ਖੋ ਗੋਰਕ੍ਖਾਪਿ ਨ ਵਿਜ੍ਜਤਿ, ਯਂ ਨਿਸ੍ਸਾਯ ¶ ਤੇ ਸੁਖੇਨ ਜੀਵੇਯ੍ਯੁਂ. ਵਣਿਜ੍ਜਾ ਤਾਦਿਸੀ ਨਤ੍ਥੀਤਿ ਵਣਿਜ੍ਜਾਪਿ ਤਾਦਿਸੀ ਨਤ੍ਥਿ, ਯਾ ਤੇਸਂ ਸਮ੍ਪਤ੍ਤਿਪਟਿਲਾਭਹੇਤੁ ਭਵੇਯ੍ਯ. ਹਿਰਞ੍ਞੇਨ ਕਯਾਕਯਨ੍ਤਿ ਹਿਰਞ੍ਞੇਨ ਕਯਵਿਕ੍ਕਯਮ੍ਪਿ ਤਤ੍ਥ ਤਾਦਿਸਂ ਨਤ੍ਥਿ, ਯਂ ਤੇਸਂ ਸਮ੍ਪਤ੍ਤਿਪਟਿਲਾਭਹੇਤੁ ਭਵੇਯ੍ਯ. ਇਤੇ ਦਿਨ੍ਨੇਨ ਯਾਪੇਨ੍ਤਿ, ਪੇਤਾ ਕਾਲਗਤਾ ਤਹਿਨ੍ਤਿ ਕੇਵਲਂ ਪਨ ਇਤੋ ਞਾਤੀਹਿ ਵਾ ਮਿਤ੍ਤਾਮਚ੍ਚੇਹਿ ਵਾ ਦਿਨ੍ਨੇਨ ਯਾਪੇਨ੍ਤਿ, ਅਤ੍ਤਭਾਵਂ ਪਵਤ੍ਤੇਨ੍ਤਿ. ਪੇਤਾਤਿ ਪੇਤ੍ਤਿਵਿਸਯੂਪਪਨ੍ਨਾ ਸਤ੍ਤਾ. ਕਾਲਗਤਾਤਿ ਅਤ੍ਤਨੋ ਮਰਣਕਾਲੇਨ ਗਤਾ. ‘‘ਕਾਲਕਤਾ’’ਤਿ ਵਾ ਪਾਠੋ, ਕਤਕਾਲਾ ਕਤਮਰਣਾ ਮਰਣਂ ਸਮ੍ਪਤ੍ਤਾ. ਤਹਿਨ੍ਤਿ ਤਸ੍ਮਿਂ ਪੇਤ੍ਤਿਵਿਸਯੇ.

੨੦-੨੧. ਇਦਾਨਿ ਯਥਾਵੁਤ੍ਤਮਤ੍ਥਂ ਉਪਮਾਹਿ ਪਕਾਸੇਤੁਂ ‘‘ਉਨ੍ਨਮੇ ਉਦਕਂ ਵੁਟ੍ਠ’’ਨ੍ਤਿ ਗਾਥਾਦ੍ਵਯਮਾਹ. ਤਸ੍ਸਤ੍ਥੋ – ਯਥਾ ਉਨ੍ਨਮੇ ਥਲੇ ਉਨ੍ਨਤਪ੍ਪਦੇਸੇ ਮੇਘੇਹਿ ਅਭਿਵੁਟ੍ਠਂ ਉਦਕਂ ਯਥਾ ਨਿਨ੍ਨਂ ਪਵਤ੍ਤਤਿ, ਯੋ ਭੂਮਿਭਾਗੋ ਨਿਨ੍ਨੋ ਓਣਤੋ, ਤਂ ਉਪਗਚ੍ਛਤਿ; ਏਵਮੇਵ ਇਤੋ ਦਿਨ੍ਨਂ ਦਾਨਂ ਪੇਤਾਨਂ ਉਪਕਪ੍ਪਤਿ ¶ , ਫਲੁਪ੍ਪਤ੍ਤਿਯਾ ਵਿਨਿਯੁਜ੍ਜਤਿ. ਨਿਨ੍ਨਮਿਵ ਹਿ ਉਦਕਪ੍ਪਵਤ੍ਤਿਯਾ ਠਾਨਂ ਪੇਤਲੋਕੋ ਦਾਨੂਪਕਪ੍ਪਨਾਯ. ਯਥਾਹ – ‘‘ਇਦਂ ਖੋ, ਬ੍ਰਾਹ੍ਮਣ, ਠਾਨਂ, ਯਤ੍ਥ ਠਿਤਸ੍ਸ ਤਂ ਦਾਨਂ ਉਪਕਪ੍ਪਤੀ’’ਤਿ (ਅ. ਨਿ. ੧੦.੧੭੭). ਯਥਾ ਚ ਕਨ੍ਦਰਪਦਰਸਾਖਪਸਾਖਕੁਸੋਬ੍ਭਮਹਾਸੋਬ੍ਭੇ ਹਿ ਓਗਲਿਤੇਨ ਉਦਕੇਨ ਵਾਰਿਵਹਾ ਮਹਾਨਜ੍ਜੋ ਪੂਰਾ ਹੁਤ੍ਵਾ ਸਾਗਰਂ ਪਰਿਪੂਰੇਨ੍ਤਿ, ਏਵਂ ਇਤੋ ਦਿਨ੍ਨਦਾਨਂ ਪੁਬ੍ਬੇ ਵੁਤ੍ਤਨਯੇਨ ਪੇਤਾਨਂ ਉਪਕਪ੍ਪਤੀਤਿ.

੨੨. ਯਸ੍ਮਾ ਪੇਤਾ ‘‘ਇਤੋ ਕਿਞ੍ਚਿ ਲਭਾਮਾ’’ਤਿ ਆਸਾਭਿਭੂਤਾ ਞਾਤਿਘਰਂ ਆਗਨ੍ਤ੍ਵਾਪਿ ‘‘ਇਦਂ ਨਾਮ ਨੋ ਦੇਥਾ’’ਤਿ ਯਾਚਿਤੁਂ ਨ ਸਕ੍ਕੋਨ੍ਤਿ, ਤਸ੍ਮਾ ਤੇਸਂ ਇਮਾਨਿ ਅਨੁਸ੍ਸਰਣਵਤ੍ਥੂਨਿ ਅਨੁਸ੍ਸਰਨ੍ਤੋ ਕੁਲਪੁਤ੍ਤੋ ਦਕ੍ਖਿਣਂ ਦਜ੍ਜਾਤਿ ਦਸ੍ਸੇਨ੍ਤੋ ‘‘ਅਦਾਸਿ ਮੇ’’ਤਿ ਗਾਥਮਾਹ.

ਤਸ੍ਸਤ੍ਥੋ ¶ – ਇਦਂ ਨਾਮ ਮੇ ਧਨਂ ਵਾ ਧਞ੍ਞਂ ਵਾ ਅਦਾਸਿ, ਇਦਂ ਨਾਮ ਮੇ ਕਿਚ੍ਚਂ ਅਤ੍ਤਨਾਯੇਵ ਯੋਗਂ ਆਪਜ੍ਜਨ੍ਤੋ ਅਕਾਸਿ, ‘‘ਅਸੁਕੋ ਮੇ ਮਾਤਿਤੋ ਵਾ ਪਿਤਿਤੋ ਵਾ ਸਮ੍ਬਨ੍ਧਤ੍ਤਾ ਞਾਤਿ, ਸਿਨੇਹਵਸੇਨ ¶ ਤਾਣਸਮਤ੍ਥਤਾਯ ਮਿਤ੍ਤੋ, ਅਸੁਕੋ ਮੇ ਸਹਪਂਸੁਕੀਲ਼ਕਸਹਾਯੋ ਸਖਾ’’ਤਿ ਚ ਏਤਂ ਸਬ੍ਬਮਨੁਸ੍ਸਰਨ੍ਤੋ ਪੇਤਾਨਂ ਦਕ੍ਖਿਣਂ ਦਜ੍ਜਾ ਦਾਨਂ ਨਿਯ੍ਯਾਤੇਯ੍ਯ. ‘‘ਦਕ੍ਖਿਣਾ ਦਜ੍ਜਾ’’ਤਿ ਵਾ ਪਾਠੋ, ਪੇਤਾਨਂ ਦਕ੍ਖਿਣਾ ਦਾਤਬ੍ਬਾ, ਤੇਨ ‘‘ਅਦਾਸਿ ਮੇ’’ਤਿਆਦਿਨਾ ਨਯੇਨ ਪੁਬ੍ਬੇ ਕਤਮਨੁਸ੍ਸਰਂ ਅਨੁਸ੍ਸਰਤਾਤਿ ਵੁਤ੍ਤਂ ਹੋਤਿ. ਕਰਣਤ੍ਥੇ ਹਿ ਇਦਂ ਪਚ੍ਚਤ੍ਤਵਚਨਂ.

੨੩-੨੪. ਯੇ ਪਨ ਸਤ੍ਤਾ ਞਾਤਿਮਰਣੇਨ ਰੁਣ੍ਣਸੋਕਾਦਿਪਰਾ ਏਵ ਹੁਤ੍ਵਾ ਤਿਟ੍ਠਨ੍ਤਿ, ਨ ਤੇਸਂ ਅਤ੍ਥਾਯ ਕਿਞ੍ਚਿ ਦੇਨ੍ਤਿ, ਤੇਸਂ ਤਂ ਰੁਣ੍ਣਸੋਕਾਦਿ ਕੇਵਲਂ ਅਤ੍ਤਪਰਿਤਾਪਨਮਤ੍ਤਮੇਵ ਹੋਤਿ, ਤਂ ਨ ਪੇਤਾਨਂ ਕਞ੍ਚਿ ਅਤ੍ਥਂ ਸਾਧੇਤੀਤਿ ਦਸ੍ਸੇਨ੍ਤੋ ‘‘ਨ ਹਿ ਰੁਣ੍ਣਂ ਵਾ’’ਤਿ ਗਾਥਂ ਵਤ੍ਵਾ ਪੁਨ ਮਗਧਰਾਜੇਨ ਦਿਨ੍ਨਦਕ੍ਖਿਣਾਯ ਸਾਤ੍ਥਕਭਾਵਂ ਦਸ੍ਸੇਤੁਂ ‘‘ਅਯਞ੍ਚ ਖੋ’’ਤਿ ਗਾਥਮਾਹ. ਤੇਸਂ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ.

੨੫. ਇਦਾਨਿ ਯਸ੍ਮਾ ਇਮਂ ਦਕ੍ਖਿਣਂ ਦੇਨ੍ਤੇਨ ਰਞ੍ਞਾ ਞਾਤੀਨਂ ਞਾਤੀਹਿ ਕਤ੍ਤਬ੍ਬਕਿਚ੍ਚਕਰਣੇਨ ਞਾਤਿਧਮ੍ਮੋ ਨਿਦਸ੍ਸਿਤੋ, ਬਹੁਜਨਸ੍ਸ ਪਾਕਟੋ ਕਤੋ, ਨਿਦਸ੍ਸਨਂ ਪਾਕਟਂ ਕਤਂ ‘‘ਤੁਮ੍ਹੇਹਿਪਿ ਏਵਮੇਵ ਞਾਤੀਸੁ ਞਾਤਿਧਮ੍ਮੋ ਪਰਿਪੂਰੇਤਬ੍ਬੋ’’ਤਿ. ਤੇ ਚ ਪੇਤੇ ਦਿਬ੍ਬਸਮ੍ਪਤ੍ਤਿਂ ਅਧਿਗਮੇਨ੍ਤੇਨ ਪੇਤਾਨਂ ਪੂਜਾ ਕਤਾ ਉਲ਼ਾਰਾ ¶ , ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਅਨ੍ਨਪਾਨਾਦੀਹਿ ਸਨ੍ਤਪ੍ਪੇਨ੍ਤੇਨ ਭਿਕ੍ਖੂਨਂ ਬਲਂ ਅਨੁਪ੍ਪਦਿਨ੍ਨਂ, ਅਨੁਕਮ੍ਪਾਦਿਗੁਣਪਰਿਵਾਰਞ੍ਚ ਚਾਗਚੇਤਨਂ ਨਿਬ੍ਬਤ੍ਤੇਨ੍ਤੇਨ ਅਨਪ੍ਪਕਂ ਪੁਞ੍ਞਂ ਪਸੁਤਂ, ਤਸ੍ਮਾ ਭਗਵਾ ਇਮੇਹਿ ਯਥਾਭੁਚ੍ਚਗੁਣੇਹਿ ਰਾਜਾਨਂ ਸਮ੍ਪਹਂਸੇਨ੍ਤੋ ‘‘ਸੋ ਞਾਤਿਧਮ੍ਮੋ’’ਤਿ ਓਸਾਨਗਾਥਮਾਹ.

ਤਤ੍ਥ ਞਾਤਿਧਮ੍ਮੋਤਿ ਞਾਤੀਹਿ ਞਾਤੀਨਂ ਕਤ੍ਤਬ੍ਬਕਰਣਂ. ਉਲ਼ਾਰਾਤਿ ਫੀਤਾ ਸਮਿਦ੍ਧਾ. ਬਲਨ੍ਤਿ ਕਾਯਬਲਂ. ਪਸੁਤਨ੍ਤਿ ਉਪਚਿਤਂ. ਏਤ੍ਥ ਚ ‘‘ਸੋ ਞਾਤਿਧਮ੍ਮੋ ਚ ਅਯਂ ਨਿਦਸ੍ਸਿਤੋ’’ਤਿ ਏਤੇਨ ਭਗਵਾ ਰਾਜਾਨਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ. ਞਾਤਿਧਮ੍ਮਦਸ੍ਸਨਞ੍ਹੇਤ੍ਥ ਸਨ੍ਦਸ੍ਸਨਂ. ‘‘ਪੇਤਾਨ ਪੂਜਾ ਚ ਕਤਾ ਉਲ਼ਾਰਾ’’ਤਿ ਇਮਿਨਾ ਸਮਾਦਪੇਸਿ. ‘‘ਉਲ਼ਾਰਾ’’ਤਿ ਪਸਂਸਨਞ੍ਹੇਤ੍ਥ ਪੁਨਪ੍ਪੁਨਂ ਪੂਜਾਕਰਣੇ ਸਮਾਦਪਨਂ. ‘‘ਬਲਞ੍ਚ ਭਿਕ੍ਖੂਨਮਨੁਪ੍ਪਦਿਨ੍ਨ’’ਨ੍ਤਿ ਇਮਿਨਾ ਸਮੁਤ੍ਤੇਜੇਸਿ. ਭਿਕ੍ਖੂਨਂ ਬਲਾਨੁਪ੍ਪਦਾਨਞ੍ਹੇਤ੍ਥ ਏਵਂਵਿਧਾਨਂ ਬਲਾਨੁਪ੍ਪਦਾਨੇ ਉਸ੍ਸਾਹਵਡ੍ਢਨੇਨ ¶ ਸਮੁਤ੍ਤੇਜਨਂ. ‘‘ਤੁਮ੍ਹੇਹਿ ਪੁਞ੍ਞਂ ਪਸੁਤਂ ਅਨਪ੍ਪਕ’’ਨ੍ਤਿ ਇਮਿਨਾ ਸਮ੍ਪਹਂਸੇਸਿ. ਪੁਞ੍ਞਪਸਵਨਕਿਤ੍ਤਨਞ੍ਹੇਤ੍ਥ ਤਸ੍ਸ ਯਥਾਭੁਚ੍ਚਗੁਣਸਂਵਣ੍ਣਨਭਾਵੇਨ ਸਮ੍ਪਹਂਸਨਨ੍ਤਿ ਏਵਮੇਤ੍ਥ ਯੋਜਨਾ ਵੇਦਿਤਬ੍ਬਾ.

ਦੇਸਨਾਪਰਿਯੋਸਾਨੇ ਚ ਪੇਤ੍ਤਿਵਿਸਯੂਪਪਤ੍ਤਿਆਦੀਨਵਸਂਵਣ੍ਣਨੇਨ ਸਂਵਿਗ੍ਗਹਦਯਾਨਂ ਯੋਨਿਸੋ ਪਦਹਤਂ ¶ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਦੁਤਿਯਦਿਵਸੇਪਿ ਦੇਵਮਨੁਸ੍ਸਾਨਂ ਇਦਮੇਵ ਤਿਰੋਕੁਟ੍ਟਦੇਸਨਂ ਦੇਸੇਸਿ. ਏਵਂ ਯਾਵ ਸਤ੍ਤ ਦਿਵਸਾ ਤਾਦਿਸੋਵ ਧਮ੍ਮਾਭਿਸਮਯੋ ਅਹੋਸੀਤਿ.

ਤਿਰੋਕੁਟ੍ਟਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੬. ਪਞ੍ਚਪੁਤ੍ਤਖਾਦਕਪੇਤਿਵਤ੍ਥੁਵਣ੍ਣਨਾ

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਪਞ੍ਚਪੁਤ੍ਤਖਾਦਕਪੇਤਿਂ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਾ ਕਿਰ ਅਵਿਦੂਰੇ ਗਾਮਕੇ ਅਞ੍ਞਤਰਸ੍ਸ ਕੁਟੁਮ੍ਬਿਕਸ੍ਸ ਭਰਿਯਾ ਵਞ੍ਝਾ ਅਹੋਸਿ. ਤਸ੍ਸ ਞਾਤਕਾ ਏਤਦਵੋਚੁਂ – ‘‘ਤਵ ਪਜਾਪਤਿ ਵਞ੍ਝਾ, ਅਞ੍ਞਂ ਤੇ ਕਞ੍ਞਂ ਆਨੇਮਾ’’ਤਿ. ਸੋ ਤਸ੍ਸੋ ਭਰਿਯਾਯ ਸਿਨੇਹੇਨ ਨ ਇਚ੍ਛਿ. ਅਥਸ੍ਸ ਭਰਿਯਾ ਤਂ ਪਵਤ੍ਤਿਂ ਸੁਤ੍ਵਾ ਸਾਮਿਕਂ ਏਵਮਾਹ ¶ – ‘‘ਸਾਮਿ, ਅਹਂ ਵਞ੍ਝਾ, ਅਞ੍ਞਾ ਕਞ੍ਞਾ ਆਨੇਤਬ੍ਬਾ, ਮਾ ਤੇ ਕੁਲਵਂਸੋ ਉਪਚ੍ਛਿਜ੍ਜੀ’’ਤਿ. ਸੋ ਤਾਯ ਨਿਪ੍ਪੀਲ਼ਿਯਮਾਨੋ ਅਞ੍ਞਂ ਕਞ੍ਞਂ ਆਨੇਸਿ. ਸਾ ਅਪਰੇਨ ਸਮਯੇਨ ਗਬ੍ਭਿਨੀ ਅਹੋਸਿ. ਵਞ੍ਝਿਤ੍ਥੀ – ‘‘ਅਯਂ ਪੁਤ੍ਤਂ ਲਭਿਤ੍ਵਾ ਇਮਸ੍ਸ ਗੇਹਸ੍ਸ ਇਸ੍ਸਰਾ ਭਵਿਸ੍ਸਤੀ’’ਤਿ ਇਸ੍ਸਾਪਕਤਾ ਤਸ੍ਸਾ ਗਬ੍ਭਪਾਤਨੂਪਾਯਂ ਪਰਿਯੇਸਨ੍ਤੀ ਅਞ੍ਞਤਰਂ ਪਰਿਬ੍ਬਾਜਿਕਂ ਅਨ੍ਨਪਾਨਾਦੀਹਿ ਸਙ੍ਗਣ੍ਹਿਤ੍ਵਾ ਤਾਯ ਤਸ੍ਸਾ ਗਬ੍ਭਪਾਤਨਂ ਦਾਪੇਸਿ. ਸਾ ਗਬ੍ਭੇ ਪਤਿਤੇ ਅਤ੍ਤਨੋ ਮਾਤੁਯਾ ਆਰੋਚੇਸਿ, ਮਾਤਾ ਅਤ੍ਤਨੋ ਞਾਤਕੇ ਸਮੋਧਾਨੇਤ੍ਵਾ ਤਮਤ੍ਥਂ ਨਿਵੇਦੇਸਿ. ਤੇ ਵਞ੍ਝਿਤ੍ਥਿਂ ਏਤਦਵੋਚੁਂ – ‘‘ਤਯਾ ਇਮਿਸ੍ਸਾ ਗਬ੍ਭੋ ਪਾਤਿਤੋ’’ਤਿ? ‘‘ਨਾਹਂ ਪਾਤੇਮੀ’’ਤਿ. ‘‘ਸਚੇ ਤਯਾ ਗਬ੍ਭੋ ਨ ਪਾਤਿਤੋ, ਸਪਥਂ ਕਰੋਹੀ’’ਤਿ ¶ . ‘‘ਸਚੇ ਮਯਾ ਗਬ੍ਭੋ ਪਾਤਿਤੋ, ਦੁਗ੍ਗਤਿਪਰਾਯਣਾ ਖੁਪ੍ਪਿਪਾਸਾਭਿਭੂਤਾ ਸਾਯਂ ਪਾਤਂ ਪਞ੍ਚ ਪਞ੍ਚ ਪੁਤ੍ਤੇ ਵਿਜਾਯਿਤ੍ਵਾ ਖਾਦਿਤ੍ਵਾ ਤਿਤ੍ਤਿਂ ਨ ਗਚ੍ਛੇਯ੍ਯਂ, ਨਿਚ੍ਚਂ ਦੁਗ੍ਗਨ੍ਧਾ ਮਕ੍ਖਿਕਾਪਰਿਕਿਣ੍ਣਾ ਚ ਭਵੇਯ੍ਯ’’ਨ੍ਤਿ ਮੁਸਾ ਵਤ੍ਵਾ ਸਪਥਂ ਅਕਾਸਿ. ਸਾ ਨਚਿਰਸ੍ਸੇਵ ਕਾਲਂ ਕਤ੍ਵਾ ਤਸ੍ਸੇਵ ਗਾਮਸ੍ਸ ਅਵਿਦੂਰੇ ਦੁਬ੍ਬਣ੍ਣਰੂਪਾ ਪੇਤੀ ਹੁਤ੍ਵਾ ਨਿਬ੍ਬਤ੍ਤਿ.

ਤਦਾ ਜਨਪਦੇ ਵੁਤ੍ਥਵਸ੍ਸਾ ਅਟ੍ਠ ਥੇਰਾ ਸਤ੍ਥੁ ਦਸ੍ਸਨਤ੍ਥਂ ਸਾਵਤ੍ਥਿਂ ਆਗਚ੍ਛਨ੍ਤਾ ਤਸ੍ਸ ਗਾਮਸ੍ਸ ਅਵਿਦੂਰੇ ਛਾਯੂਦਕਸਮ੍ਪਨ੍ਨੇ ਅਰਞ੍ਞਟ੍ਠਾਨੇ ਵਾਸਂ ਉਪਗਚ੍ਛਿਂਸੁ. ਅਥ ਸਾ ਪੇਤੀ ਥੇਰਾਨਂ ਅਤ੍ਤਾਨਂ ਦਸ੍ਸੇਸਿ. ਤੇਸੁ ਸਙ੍ਘਤ੍ਥੇਰੋ ਤਂ ਪੇਤਿਂ –

‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਦੁਗ੍ਗਨ੍ਧਾ ਪੂਤਿ ਵਾਯਸਿ;

ਮਕ੍ਖਿਕਾਹਿ ਪਰਿਕਿਣ੍ਣਾ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

ਗਾਥਾਯ ਪਟਿਪੁਚ੍ਛਿ. ਤਤ੍ਥ ਨਗ੍ਗਾਤਿ ਨਿਚ੍ਚੋਲ਼ਾ. ਦੁਬ੍ਬਣ੍ਣਰੂਪਾਸੀਤਿ ਣਵਿਰੂਪਾ ਅਤਿਵਿਯ ਬੀਭਚ੍ਛਰੂਪੇਨ ¶ ਸਮਨ੍ਨਾਗਤਾ ਅਸਿ. ਦੁਗ੍ਗਨ੍ਧਾਤਿ ਅਨਿਟ੍ਠਗਨ੍ਧਾ. ਪੂਤਿ ਵਾਯਸੀਤਿ ਸਰੀਰਤੋ ਕੁਣਪਗਨ੍ਧਂ ਵਾਯਸਿ. ਮਕ੍ਖਿਕਾਹਿ ਪਰਿਕਿਣ੍ਣਾਤਿ ਨੀਲਮਕ੍ਖਿਕਾਹਿ ਸਮਨ੍ਤਤੋ ਆਕਿਣ੍ਣਾ. ਕਾ ਨੁ ਤ੍ਵਂ ਇਧ ਤਿਟ੍ਠਸੀਤਿ ਕਾ ਨਾਮ ਏਵਰੂਪਾ ਇਮਸ੍ਮਿਂ ਠਾਨੇ ਤਿਟ੍ਠਸਿ, ਇਤੋ ਚਿਤੋ ਚ ਵਿਚਰਸੀਤਿ ਅਤ੍ਥੋ.

ਅਥ ਸਾ ਪੇਤੀ ਮਹਾਥੇਰੇਨ ਏਵਂ ਪੁਟ੍ਠਾ ਅਤ੍ਤਾਨਂ ਪਕਾਸੇਨ੍ਤੀ ਸਤ੍ਤਾਨਂ ਸਂਵੇਗਂ ਜਨੇਨ੍ਤੀ –

‘‘ਅਹਂ ¶ ਭਦਨ੍ਤੇ ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

‘‘ਕਾਲੇਨ ਪਞ੍ਚ ਪੁਤ੍ਤਾਨਿ, ਸਾਯਂ ਪਞ੍ਚ ਪੁਨਾਪਰੇ;

ਵਿਜਾਯਿਤ੍ਵਾਨ ਖਾਦਾਮਿ, ਤੇਪਿ ਨਾ ਹੋਨ੍ਤਿ ਮੇ ਅਲਂ.

‘‘ਪਰਿਡਯ੍ਹਤਿ ¶ ਧੂਮਾਯਤਿ, ਖੁਦਾਯ ਹਦਯਂ ਮਮ;

ਪਾਨੀਯਂ ਨ ਲਭੇ ਪਾਤੁਂ, ਪਸ੍ਸ ਮਂ ਬ੍ਯਸਨਂ ਗਤ’’ਨ੍ਤਿ. –

੨੭. ਤਤ੍ਥ ਭਦਨ੍ਤੇਤਿ ਥੇਰਂ ਗਾਰਵੇਨ ਆਲਪਤਿ. ਦੁਗ੍ਗਤਾਤਿ ਦੁਗ੍ਗਤਿਂ ਗਤਾ. ਯਮਲੋਕਿਕਾਤਿ ‘‘ਯਮਲੋਕੋ’’ਤਿ ਲਦ੍ਧਨਾਮੇ ਪੇਤਲੋਕੇ ਤਤ੍ਥ ਪਰਿਯਾਪਨ੍ਨਭਾਵੇਨ ਵਿਦਿਤਾ. ਇਤੋ ਗਤਾਤਿ ਇਤੋ ਮਨੁਸ੍ਸਲੋਕਤੋ ਪੇਤਲੋਕਂ ਉਪਪਜ੍ਜਨਵਸੇਨ ਗਤਾ, ਉਪਪਨ੍ਨਾਤਿ ਅਤ੍ਥੋ.

੨੮. ਕਾਲੇਨਾਤਿ ਰਤ੍ਤਿਯਾ ਵਿਭਾਤਕਾਲੇ. ਭੁਮ੍ਮਤ੍ਥੇ ਹਿ ਏਤਂ ਕਰਣਵਚਨਂ. ਪਞ੍ਚ ਪੁਤ੍ਤਾਨੀਤਿ ਪਞ੍ਚ ਪੁਤ੍ਤੇ. ਲਿਙ੍ਗਵਿਪਲ੍ਲਾਸੇਨ ਹੇਤਂ ਵੁਤ੍ਤਂ. ਸਾਯਂ ਪਞ੍ਚ ਪੁਨਾਪਰੇਤਿ ਸਾਯਨ੍ਹਕਾਲੇ ਪੁਨ ਅਪਰੇ ਪਞ੍ਚ ਪੁਤ੍ਤੇ ਖਾਦਾਮੀਤਿ ਯੋਜਨਾ. ਵਿਜਾਯਿਤ੍ਵਾਨਾਤਿ ਦਿਵਸੇ ਦਿਵਸੇ ਦਸ ਦਸ ਪੁਤ੍ਤੇ ਵਿਜਾਯਿਤ੍ਵਾ. ਤੇਪਿ ਨਾ ਹੋਨ੍ਤਿ ਮੇ ਅਲਨ੍ਤਿ ਤੇਪਿ ਦਸਪੁਤ੍ਤਾ ਏਕਦਿਵਸਂ ਮਯ੍ਹਂ ਖੁਦਾਯ ਪਟਿਘਾਤਾਯ ਅਹਂ ਪਰਿਯਤ੍ਤਾ ਨ ਹੋਨ੍ਤਿ. ਗਾਥਾਸੁਖਤ੍ਥਞ੍ਹੇਤ੍ਥ ਨਾ-ਇਤਿ ਦੀਘਂ ਕਤ੍ਵਾ ਵੁਤ੍ਤਂ.

੨੯. ਪਰਿਡਯ੍ਹਤਿ ਧੂਮਾਯਤਿ ਖੁਦਾਯ ਹਦਯਂ ਮਮਾਤਿ ਖੁਦਾਯ ਜਿਘਚ੍ਛਾਯ ਬਾਧਿਯਮਾਨਾਯ ਮਮ ਹਦਯਪਦੇਸੋ ਉਦਰਗ੍ਗਿਨਾ ਪਰਿਸਮਨ੍ਤਤੋ ਝਾਯਤਿ ਧੂਮਾਯਤਿ ਸਨ੍ਤਪ੍ਪਤਿ. ਪਾਨੀਯਂ ਨ ਲਭੇ ਪਾਤੁਨ੍ਤਿ ਪਿਪਾਸਾਭਿਭੂਤਾ ¶ ਤਤ੍ਥ ਤਤ੍ਥ ਵਿਚਰਨ੍ਤੀ ਪਾਨੀਯਮ੍ਪਿ ਪਾਤੁਂ ਨ ਲਭਾਮਿ. ਪਸ੍ਸ ਮਂ ਬ੍ਯਸਨਂ ਗਤਨ੍ਤਿ ਪੇਤੂਪਪਤ੍ਤਿਯਾ ਸਾਧਾਰਣਂ ਅਸਾਧਾਰਣਞ੍ਚ ਇਮਂ ਈਦਿਸਂ ਬ੍ਯਸਨਂ ਉਪਗਤਂ ਮਂ ਪਸ੍ਸ, ਭਨ੍ਤੇਤਿ ਅਤ੍ਤਨਾ ਅਨੁਭਵਿਯਮਾਨਂ ਦੁਕ੍ਖਂ ਥੇਰਸ੍ਸ ਪਵੇਦੇਸਿ.

ਤਂ ¶ ਸੁਤ੍ਵਾ ਥੇਰੋ ਤਾਯ ਕਤਕਮ੍ਮਂ ਪੁਚ੍ਛਨ੍ਤੋ –

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪੁਤ੍ਤਮਂਸਾਨਿ ਖਾਦਸੀ’’ਤਿ. –

ਗਾਥਮਾਹ. ਤਤ੍ਥ ਦੁਕ੍ਕਟਨ੍ਤਿ ਦੁਚ੍ਚਰਿਤਂ. ਕਿਸ੍ਸ ਕਮ੍ਮਵਿਪਾਕੇਨਾਤਿ ਕੀਦਿਸਸ੍ਸ ਕਮ੍ਮਸ੍ਸ ਵਿਪਾਕੇਨ, ਕਿਂ ਪਾਣਾਤਿਪਾਤਸ੍ਸ, ਉਦਾਹੁ ਅਦਿਨ੍ਨਾਦਾਨਾਦੀਸੁ ਅਞ੍ਞਤਰਸ੍ਸਾਤਿ ਅਤ੍ਥੋ. ‘‘ਕੇਨ ਕਮ੍ਮਵਿਪਾਕੇਨਾ’’ਤਿ ਕੇਚਿ ਪਠਨ੍ਤਿ.

ਅਥ ¶ ਸਾ ਪੇਤੀ ਅਤ੍ਤਨਾ ਕਤਕਮ੍ਮਂ ਥੇਰਸ੍ਸ ਕਥੇਨ੍ਤੀ –

‘‘ਸਪਤੀ ਮੇ ਗਬ੍ਭਿਨੀ ਆਸਿ, ਤਸ੍ਸਾ ਪਾਪਂ ਅਚੇਤਯਿਂ;

ਸਾਹਂ ਪਦੁਟ੍ਠਮਨਸਾ, ਅਕਰਿਂ ਗਬ੍ਭਪਾਤਨਂ.

‘‘ਤਸ੍ਸ ਦ੍ਵੇਮਾਸਿਕੋ ਗਬ੍ਭੋ, ਲੋਹਿਤਞ੍ਞੇਵ ਪਗ੍ਘਰਿ;

ਤਦਸ੍ਸਾ ਮਾਤਾ ਕੁਪਿਤਾ, ਮਯ੍ਹਂ ਞਾਤੀ ਸਮਾਨਯਿ;

ਸਪਥਞ੍ਚ ਮਂ ਅਕਾਰੇਸਿ, ਪਰਿਭਾਸਾਪਯੀ ਚ ਮਂ.

‘‘ਸਾਹਂ ਘੋਰਞ੍ਚ ਸਪਥਂ, ਮੁਸਾਵਾਦਂ ਅਭਾਸਿਸਂ;

‘ਪੁਤ੍ਤਮਂਸਾਨਿ ਖਾਦਾਮਿ, ਸਚੇ ਤਂ ਪਕਤਂ ਮਯਾ’.

‘‘ਤਸ੍ਸ ਕਮ੍ਮਸ੍ਸ ਵਿਪਾਕੇਨ, ਮੁਸਾਵਾਦਸ੍ਸ ਚੂਭਯਂ;

ਪੁਤ੍ਤਮਂਸਾਨਿ ਖਾਦਾਮਿ, ਪੁਬ੍ਬਲੋਹਿਤਮਕ੍ਖਿਤਾ’’ਤਿ. – ਗਾਥਾਯੋ ਅਭਾਸਿ;

੩੧-੩੨. ਤਤ੍ਥ ਸਪਤੀਤਿ ਸਮਾਨਪਤਿਕਾ ਇਤ੍ਥੀ ਵੁਚ੍ਚਤਿ. ਤਸ੍ਸਾ ਪਾਪਂ ਅਚੇਤਯਿਨ੍ਤਿ ਤਸ੍ਸ ਸਪਤਿਯਾ ਪਾਪਂ ਲੁਦ੍ਦਕਂ ਕਮ੍ਮਂ ਅਚੇਤਯਿਂ. ਪਦੁਟ੍ਠਮਨਸਾਤਿ ਪਦੁਟ੍ਠਚਿਤ੍ਤਾ, ਪਦੁਟ੍ਠੇਨ ਵਾ ਮਨਸਾ. ਦ੍ਵੇਮਾਸਿਕੋਤਿ ਦ੍ਵੇਮਾਸਜਾਤੋ ਪਤਿਟ੍ਠਿਤੋ ਹੁਤ੍ਵਾ ਦ੍ਵੇਮਾਸਿਕਾ. ਲੋਹਿਤਞ੍ਞੇਵ ਪਗ੍ਘਰੀਤਿ ਵਿਪਜ੍ਜਮਾਨੋ ਰੁਹਿਰਞ੍ਞੇਵ ਹੁਤ੍ਵਾ ਵਿਸ੍ਸਨ੍ਦਿ. ਤਦਸ੍ਸਾ ਮਾਤਾ ਕੁਪਿਤਾ, ਮਯ੍ਹਂ ਞਾਤੀ ਸਮਾਨਯੀਤਿ ਤਦਾ ਅਸ੍ਸਾ ਸਪਤਿਯਾ ¶ ਮਾਤਾ ਮਯ੍ਹਂ ਕੁਪਿਤਾ ਅਤ੍ਤਨੋ ਞਾਤਕੇ ਸਮੋਧਾਨੇਸਿ. ‘‘ਤਤਸ੍ਸਾ’’ਤਿ ਵਾ ਪਾਠੋ, ਤਤੋ ਅਸ੍ਸਾਤਿ ਪਦਵਿਭਾਗੋ.

੩੩-੩੪. ਸਪਥਨ੍ਤਿ ¶ ਸਪਨਂ. ਪਰਿਭਾਸਾਪਯੀਤਿ ਭਯੇਨ ਤਜ੍ਜਾਪੇਸਿ. ਸਪਥਂ ਮੁਸਾਵਾਦਂ ਅਭਾਸਿਸਨ੍ਤਿ ‘‘ਸਚੇ ਤਂ ਮਯਾ ਕਤਂ, ਈਦਿਸੀ ਭਵੇਯ੍ਯ’’ਨ੍ਤਿ ਕਤਮੇਵ ਪਾਪਂ ਅਕਤਂ ਕਤ੍ਵਾ ਦਸ੍ਸੇਨ੍ਤੀ ਮੁਸਾਵਾਦਂ ਅਭੂਤਂ ਸਪਥਂ ਅਭਾਸਿਂ. ਮੁਤ੍ਤਮਂਸਾਨਿ ਖਾਦਾਮਿ, ਸਚੇਤਂ ਪਕਤਂ ਮਯਾਤਿ ¶ ਇਦਂ ਤਦਾ ਸਪਥਸ੍ਸ ਕਤਾਕਾਰਦਸ੍ਸਨਂ. ਯਦਿ ਏਤਂ ਗਬ੍ਭਪਾਤਨਪਾਪਂ ਮਯਾ ਕਤਂ, ਆਯਤਿਂ ਪੁਨਬ੍ਭਵਾਭਿਨਿਬ੍ਬਤ੍ਤਿਯਂ ਮਯ੍ਹਂ ਪੁਤ੍ਤਮਂਸਾਨਿਯੇਵ ਖਾਦੇਯ੍ਯਨ੍ਤਿ ਅਤ੍ਥੋ. ਤਸ੍ਸ ਕਮ੍ਮਸ੍ਸਾਤਿ ਤਸ੍ਸ ਗਬ੍ਭਪਾਤਨਵਸੇਨ ਪਕਤਸ੍ਸ ਪਾਣਾਤਿਪਾਤਕਮ੍ਮਸ੍ਸ. ਮੁਸਾਵਾਦਸ੍ਸ ਚਾਤਿ ਮੁਸਾਵਾਦਕਮ੍ਮਸ੍ਸ ਚ. ਉਭਯਨ੍ਤਿ ਉਭਯਸ੍ਸਪਿ ਕਮ੍ਮਸ੍ਸ ਉਭਯੇਨ ਵਿਪਾਕੇਨ. ਕਰਣਤ੍ਥੇ ਹਿ ਇਦਂ ਪਚ੍ਚਤ੍ਤਵਚਨਂ. ਪੁਬ੍ਬਲੋਹਿਤਮਕ੍ਖਿਤਾਤਿ ਪਸਵਨਵਸੇਨ ਪਰਿਭਿਜ੍ਜਨਵਸੇਨ ਚ ਪੁਬ੍ਬੇਨ ਚ ਲੋਹਿਤੇਨ ਚ ਮਕ੍ਖਿਤਾ ਹੁਤ੍ਵਾ ਪੁਤ੍ਤਮਂਸਾਨਿ ਖਾਦਾਮੀਤਿ ਯੋਜਨਾ.

ਏਵਂ ਸਾ ਪੇਤੀ ਅਤ੍ਤਨੋ ਕਮ੍ਮਵਿਪਾਕਂ ਪਵੇਦੇਤ੍ਵਾ ਪੁਨ ਥੇਰੇ ਏਵਮਾਹ – ‘‘ਅਹਂ, ਭਨ੍ਤੇ, ਇਮਸ੍ਮਿਂਯੇਵ ਗਾਮੇ ਅਸੁਕਸ੍ਸ ਕੁਟੁਮ੍ਬਿਕਸ੍ਸ ਭਰਿਯਾ ਇਸ੍ਸਾਪਕਤਾ ਹੁਤ੍ਵਾ ਪਾਪਕਮ੍ਮਂ ਕਤ੍ਵਾ ਏਵਂ ਪੇਤਯੋਨਿਯਂ ਨਿਬ੍ਬਤ੍ਤਾ. ਸਾਧੁ, ਭਨ੍ਤੇ, ਤਸ੍ਸ ਕੁਟੁਮ੍ਬਿਕਸ੍ਸ ਗੇਹਂ ਗਚ੍ਛਥ, ਸੋ ਤੁਮ੍ਹਾਕਂ ਦਾਨਂ ਦਸ੍ਸਤਿ, ਤਂ ਦਕ੍ਖਿਣਂ ਮਯ੍ਹਂ ਉਦ੍ਦਿਸਾਪੇਯ੍ਯਾਥ, ਏਵਂ ਮੇ ਇਤੋ ਪੇਤਲੋਕਤੋ ਮੁਤ੍ਤਿ ਭਵਿਸ੍ਸਤੀ’’ਤਿ. ਥੇਰਾ ਤਂ ਸੁਤ੍ਵਾ ਤਂ ਅਨੁਕਮ੍ਪਮਾਨਾ ਉਲ੍ਲੁਮ੍ਪਨਸਭਾਵਸਣ੍ਠਿਤਾ ਤਸ੍ਸ ਕੁਟੁਮ੍ਬਿਕਸ੍ਸ ਗੇਹਂ ਪਿਣ੍ਡਾਯ ਪਵਿਸਿਂਸੁ. ਕੁਟਮ੍ਬਿਕੋ ਥੇਰੇ ਦਿਸ੍ਵਾ ਸਞ੍ਜਾਤਪ੍ਪਸਾਦੋ ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਾਨਿ ਗਹੇਤ੍ਵਾ ਥੇਰੇ ਆਸਨੇਸੁ ਨਿਸੀਦਾਪੇਤ੍ਵਾ ਪਣੀਤੇਨ ਆਹਾਰੇਨ ਭੋਜੇਤੁਂ ਆਰਭਿ. ਥੇਰਾ ਤਂ ਪਵਤ੍ਤਿਂ ਕੁਟੁਮ੍ਬਿਕਸ੍ਸ ਆਰੋਚੇਤ੍ਵਾ ਤਂ ਦਾਨਂ ਤਸ੍ਸਾ ਪੇਤਿਯਾ ਉਦ੍ਦਿਸਾਪੇਸੁਂ. ਤਙ੍ਖਣਞ੍ਞੇਵ ਚ ਸਾ ਪੇਤੀ ਤਤੋ ਦੁਕ੍ਖਤੋ ਅਪੇਤਾ ਉਲ਼ਾਰਸਮ੍ਪਤ੍ਤਿਂ ਪਟਿਲਭਿਤ੍ਵਾ ਰਤ੍ਤਿਯਂ ਕੁਟੁਮ੍ਬਿਕਸ੍ਸ ਅਤ੍ਤਾਨਂ ਦਸ੍ਸੇਸਿ. ਅਥ ਥੇਰਾ ਅਨੁਕ੍ਕਮੇਨ ਸਾਵਤ੍ਥਿਂ ਗਨ੍ਤ੍ਵਾ ਭਗਵਤੋ ਤਮਤ੍ਥਂ ਆਰੋਚੇਸੁਂ. ਭਗਵਾ ਚ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਦੇਸਨਾਵਸਾਨੇ ਮਹਾਜਨੋ ਪਟਿਲਦ੍ਧਸਂਵੇਗੋ ਇਸ੍ਸਾਮਚ੍ਛੇਰਤੋ ਪਟਿਵਿਰਮਿ. ਏਵਂ ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਪਞ੍ਚਪੁਤ੍ਤਖਾਦਕਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੭. ਸਤ੍ਤਪੁਤ੍ਤਖਾਦਕਪੇਤਿਵਤ੍ਥੁਵਣ੍ਣਨਾ

ਨਗ੍ਗਾ ¶ ¶ ¶ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਸਤ੍ਤਪੁਤ੍ਤਖਾਦਕਪੇਤਿਂ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਾ ਕਿਰ ਅਵਿਦੂਰੇ ਅਞ੍ਞਤਰਸ੍ਮਿਂ ਗਾਮਕੇ ਅਞ੍ਞਤਰਸ੍ਸ ਉਪਾਸਕਸ੍ਸ ਦ੍ਵੇ ਪੁਤ੍ਤਾ ਅਹੇਸੁਂ – ਪਠਮਵਯੇ ਠਿਤਾ ਰੂਪਸਮ੍ਪਨ੍ਨਾ ਸੀਲਾਚਾਰੇਨ ਸਮਨ੍ਨਾਗਤਾ. ਤੇਸਂ ਮਾਤਾ ‘‘ਪੁਤ੍ਤਵਤੀ ਅਹ’’ਨ੍ਤਿ ਪੁਤ੍ਤਬਲੇਨ ਭਤ੍ਤਾਰਂ ਅਤਿਮਞ੍ਞਤਿ. ਸੋ ਭਰਿਯਾਯ ਅਵਮਾਨਿਤੋ ਨਿਬ੍ਬਿਨ੍ਨਮਾਨਸੋ ਅਞ੍ਞਂ ਕਞ੍ਞਂ ਆਨੇਸਿ. ਸਾ ਨਚਿਰਸ੍ਸੇਵ ਗਬ੍ਭਿਨੀ ਅਹੋਸਿ. ਅਥਸ੍ਸ ਜੇਟ੍ਠਭਰਿਯਾ ਇਸ੍ਸਾਪਕਤਾ ਅਞ੍ਞਤਰਂ ਵੇਜ੍ਜਂ ਆਮਿਸੇਨ ਉਪਲਾਪੇਤ੍ਵਾ ਤੇਨ ਤਸ੍ਸਾ ਤੇਮਾਸਿਕਂ ਗਬ੍ਭਂ ਪਾਤੇਸਿ. ਅਥ ਸਾ ਞਾਤੀਹਿ ਚ ਭਤ੍ਤਾਰਾ ਚ ‘‘ਤਯਾ ਇਮਿਸ੍ਸਾ ਗਬ੍ਭੋ ਪਾਤਿਤੋ’’ਤਿ ਪੁਟ੍ਠਾ ‘‘ਨਾਹਂ ਪਾਤੇਮੀ’’ਤਿ ਮੁਸਾ ਵਤ੍ਵਾ ਤੇਹਿ ਅਸਦ੍ਦਹਨ੍ਤੇਹਿ ‘‘ਸਪਥਂ ਕਰੋਹੀ’’ਤਿ ਵੁਤ੍ਤਾ ‘‘ਸਾਯਂ ਪਾਤਂ ਸਤ੍ਤ ਸਤ੍ਤ ਪੁਤ੍ਤੇ ਵਿਜਾਯਿਤ੍ਵਾ ਪੁਤ੍ਤਮਂਸਾਨਿ ਖਾਦਾਮਿ, ਨਿਚ੍ਚਂ ਦੁਗ੍ਗਨ੍ਧਾ ਚ ਮਕ੍ਖਿਕਾਪਰਿਕਿਣ੍ਣਾ ਚ ਭਵੇਯ੍ਯ’’ਨ੍ਤਿ ਸਪਥਂ ਅਕਾਸਿ.

ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਸ੍ਸ ਗਬ੍ਭਪਾਤਨਸ੍ਸ ਮੁਸਾਵਾਦਸ੍ਸ ਚ ਫਲੇਨੇਵ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਪੁਤ੍ਤਨਯੇਨ ਪੁਤ੍ਤਮਂਸਾਨਿ ਖਾਦਨ੍ਤੀ ਤਸ੍ਸੇਵ ਗਾਮਸ੍ਸ ਅਵਿਦੂਰੇ ਵਿਚਰਤਿ. ਤੇਨ ਚ ਸਮਯੇਨ ਸਮ੍ਬਹੁਲਾ ਥੇਰਾ ਗਾਮਕਾਵਾਸੇ ਵੁਤ੍ਥਵਸ੍ਸਾ ਭਗਵਨ੍ਤਂ ਦਸ੍ਸਨਾਯ ਸਾਵਤ੍ਥਿਂ ਆਗਚ੍ਛਨ੍ਤਾ ਤਸ੍ਸ ਗਾਮਸ੍ਸ ਅਵਿਦੂਰੇ ਏਕਸ੍ਮਿਂ ਪਦੇਸੇ ਰਤ੍ਤਿਯਂ ਵਾਸਂ ਕਪ੍ਪੇਸੁਂ. ਅਥ ਸਾ ਪੇਤੀ ਤੇਸਂ ਥੇਰਾਨਂ ਅਤ੍ਤਾਨਂ ਦਸ੍ਸੇਸਿ. ਤਂ ਮਹਾਥੇਰੋ ਗਾਥਾਯ ਪੁਚ੍ਛਿ –

‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਦੁਗ੍ਗਨ੍ਧਾ ਪੂਤਿ ਵਾਯਸਿ;

ਮਕ੍ਖਿਕਾਹਿ ਪਰਿਕਿਣ੍ਣਾ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ.

ਸਾ ਥੇਰੇਨ ਪੁਟ੍ਠਾ ਤੀਹਿ ਗਾਥਾਹਿ ਪਟਿਵਚਨਂ ਅਦਾਸਿ –

‘‘ਅਹਂ ਭਦਨ੍ਤੇ ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

‘‘ਕਾਲੇਨ ਸਤ੍ਤ ਪੁਤ੍ਤਾਨਿ, ਸਾਯਂ ਸਤ੍ਤ ਪੁਨਾਪਰੇ;

ਵਿਜਾਯਿਤ੍ਵਾਨ ਖਾਦਾਮਿ, ਤੇਪਿ ਨਾ ਹੋਨ੍ਤਿ ਮੇ ਅਲਂ.

‘‘ਪਰਿਡਯ੍ਹਤਿ ¶ ¶ ¶ ਧੂਮਾਯਤਿ, ਖੁਦਾਯ ਹਦਯਂ ਮਮ;

ਨਿਬ੍ਬੁਤਿਂ ਨਾਧਿਗਚ੍ਛਾਮਿ, ਅਗ੍ਗਿਦਡ੍ਢਾਵ ਆਤਪੇ’’ਤਿ.

੩੮. ਤਤ੍ਥ ਨਿਬ੍ਬੁਤਿਨ੍ਤਿ ਖੁਪ੍ਪਿਪਾਸਾਦੁਕ੍ਖਸ੍ਸ ਵੂਪਸਮਂ. ਨਾਧਿਗਚ੍ਛਾਮੀਤਿ ਨ ਲਭਾਮਿ. ਅਗ੍ਗਿਦਡ੍ਢਾਵ ਆਤਪੇਤਿ ਅਤਿਉਣ੍ਹਆਤਪੇ ਅਗ੍ਗਿਨਾ ਡਯ੍ਹਮਾਨਾ ਵਿਯ ਨਿਬ੍ਬੁਤਿਂ ਨਾਧਿਗਚ੍ਛਾਮੀਤਿ ਯੋਜਨਾ.

ਤਂ ਸੁਤ੍ਵਾ ਮਹਾਥੇਰੋ ਤਾਯ ਕਤਕਮ੍ਮਂ ਪੁਚ੍ਛਨ੍ਤੋ –

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੁਤ੍ਤਮਂਸਾਨਿ ਖਾਦਸੀ’’ਤਿ. – ਗਾਥਮਾਹ;

ਅਥ ਸਾ ਪੇਤੀ ਅਤ੍ਤਨੋ ਪੇਤਲੋਕੂਪਪਤ੍ਤਿਞ੍ਚ ਪੁਤ੍ਤਮਂਸਖਾਦਨਕਾਰਣਞ੍ਚ ਕਥੇਨ੍ਤੀ –

‘‘ਅਹੂ ਮਯ੍ਹਂ ਦੁਵੇ ਪੁਤ੍ਤਾ, ਉਭੋ ਸਮ੍ਪਤ੍ਤਯੋਬ੍ਬਨਾ;

ਸਾਹਂ ਪੁਤ੍ਤਬਲੂਪੇਤਾ, ਸਾਮਿਕਂ ਅਤਿਮਞ੍ਞਿਸਂ.

‘‘ਤਤੋ ਮੇ ਸਾਮਿਕੋ ਕੁਦ੍ਧੋ, ਸਪਤਿਂ ਮਯ੍ਹਮਾਨਯਿ;

ਸਾ ਚ ਗਬ੍ਭਂ ਅਲਭਿਤ੍ਥ, ਤਸ੍ਸਾ ਪਾਪਂ ਅਚੇਤਯਿਂ.

‘‘ਸਾਹਂ ਪਦੁਟ੍ਠਮਨਸਾ, ਅਕਰਿਂ ਗਬ੍ਭਪਾਤਨਂ;

ਤਸ੍ਸ ਤੇਮਾਸਿਕੋ ਗਬ੍ਭੋ, ਪੂਤਿਲੋਹਿਤਕੋ ਪਤਿ.

‘‘ਤਦਸ੍ਸਾ ਮਾਤਾ ਕੁਪਿਤਾ, ਮਯ੍ਹਂ ਞਾਤੀ ਸਮਾਨਯਿ;

ਸਪਥਞ੍ਚ ਮਂ ਕਾਰੇਸਿ, ਪਰਿਭਾਸਾਪਯੀ ਚ ਮਂ.

‘‘ਸਾਹਂ ਘੋਰਞ੍ਚ ਸਪਥਂ, ਮੁਸਾਵਾਦਂ ਅਭਾਸਿਸਂ;

‘ਪੁਤ੍ਤਮਂਸਾਨਿ ਖਾਦਾਮਿ, ਸਚੇ ਤਂ ਪਕਤਂ ਮਯਾ’.

‘‘ਤਸ੍ਸ ¶ ਕਮ੍ਮਸ੍ਸ ਵਿਪਾਕੇਨ, ਮੁਸਾਵਾਦਸ੍ਸ ਚੂਭਯਂ;

ਪੁਤ੍ਤਮਂਸਾਨਿ ਖਾਦਾਮਿ, ਪੁਬ੍ਬਲੋਹਿਤਮਕ੍ਖਿਤਾ’’ਤਿ. – ਇਮਾ ਗਾਥਾ ਅਭਾਸਿ;

੪੦-੪੫. ਤਤ੍ਥ ¶ ਪੁਤ੍ਤਬਲੂਪੇਤਾਤਿ ਪੁਤ੍ਤਬਲੇਨ ਉਪੇਤਾ, ਪੁਤ੍ਤਾਨਂ ਵਸੇਨ ਲਦ੍ਧਬਲਾ. ਅਤਿਮਞ੍ਞਿਸਨ੍ਤਿ ਅਤਿਕ੍ਕਮਿਤ੍ਵਾ ਮਞ੍ਞਿਂ ਅਵਮਞ੍ਞਿਂ. ਪੂਤਿਲੋਹਿਤਕੋ ਪਤੀਤਿ ਕੁਣਪਲੋਹਿਤਂ ਹੁਤ੍ਵਾ ਗਬ੍ਭੋ ਪਰਿਪਤਿ. ਸੇਸਂ ਸਬ੍ਬਂ ਅਨਨ੍ਤਰਸਦਿਸਮੇਵ. ਤਤ੍ਥ ਅਟ੍ਠ ਥੇਰਾ, ਇਧ ਸਮ੍ਬਹੁਲਾ. ਤਤ੍ਥ ਪਞ੍ਚ ਪੁਤ੍ਤਾ, ਇਧ ਸਤ੍ਤਾਤਿ ਅਯਮੇਵ ਵਿਸੇਸੋਤਿ.

ਸਤ੍ਤਪੁਤ੍ਤਖਾਦਕਪੇਤਿਵਤ੍ਥੁਵਣ੍ਣਾਨਾ ਨਿਟ੍ਠਿਤਾ.

ਕਿਂ ¶ ਨੁ ਉਮ੍ਮਤ੍ਤਰੂਪੋ ਵਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਮਤਪਿਤਿਕਂ ਕੁਟੁਮ੍ਬਿਕਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਅਞ੍ਞਤਰਸ੍ਸ ਕੁਟੁਮ੍ਬਿਕਸ੍ਸ ਪਿਤਾ ਕਾਲਮਕਾਸਿ. ਸੋ ਪਿਤੁ ਮਰਣੇਨ ਸੋਕਸਨ੍ਤਤ੍ਤਹਦਯੋ ਰੋਦਮਾਨੋ ਉਮ੍ਮਤ੍ਤਕੋ ਪਿਯ ਵਿਚਰਨ੍ਤੋ ਯਂ ਯਂ ਪਸ੍ਸਤਿ, ਤਂ ਤਂ ਪੁਚ੍ਛਤਿ – ‘‘ਅਪਿ ਮੇ ਪਿਤਰਂ ਪਸ੍ਸਿਤ੍ਥਾ’’ਤਿ? ਨ ਕੋਚਿ ਤਸ੍ਸ ਸੋਕਂ ਵਿਨੋਦੇਤੁਂ ਅਸਕ੍ਖਿ. ਤਸ੍ਸ ਪਨ ਹਦਯੇ ਘਟੇ ਪਦੀਪੋ ਵਿਯ ਸੋਤਾਪਤ੍ਤਿਫਲਸ੍ਸ ਉਪਨਿਸ੍ਸਯੋ ਪਜ੍ਜਲਤਿ.

ਸਤ੍ਥਾ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਤਸ੍ਸ ਸੋਤਾਪਤ੍ਤਿਫਲਸ੍ਸ ਉਪਨਿਸ੍ਸਯਂ ਦਿਸ੍ਵਾ ‘‘ਇਮਸ੍ਸ ਅਤੀਤਕਾਰਣਂ ਆਹਰਿਤ੍ਵਾ ਸੋਕਂ ਵੂਪਸਮੇਤ੍ਵਾ ਸੋਤਾਪਤ੍ਤਿਫਲਂ ਦਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਨਦਿਵਸੇ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਪਚ੍ਛਾਸਮਣਂ ਅਨਾਦਾਯ ਤਸ੍ਸ ਘਰਦ੍ਵਾਰਂ ਅਗਮਾਸਿ. ਸੋ ‘‘ਸਤ੍ਥਾ ਆਗਤੋ’’ਤਿ ਸੁਤ੍ਵਾ ਪਚ੍ਚੁਗ੍ਗਨ੍ਤ੍ਵਾ ਸਤ੍ਥਾਰਂ ਗੇਹਂ ਪਵੇਸੇਤ੍ਵਾ ਸਤ੍ਥਰਿ ਪਞ੍ਞਤ੍ਤੇ ਆਸਨੇ ਨਿਸਿਨ੍ਨੇ ਸਯਂ ਭਗਵਨ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ‘‘ਕਿਂ, ਭਨ੍ਤੇ, ਮਯ੍ਹਂ ਪਿਤੁ ਗਤਟ੍ਠਾਨਂ ਜਾਨਾਥਾ’’ਤਿ ਆਹ. ਅਥ ਨਂ ਸਤ੍ਥਾ, ‘‘ਉਪਾਸਕ, ਕਿਂ ਇਮਸ੍ਮਿਂ ਅਤ੍ਤਭਾਵੇ ਪਿਤਰਂ ਪੁਚ੍ਛਸਿ, ਉਦਾਹੁ ਅਤੀਤੇ’’ਤਿ ਆਹ. ਸੋ ਤਂ ਵਚਨਂ ਸੁਤ੍ਵਾ ‘‘ਬਹੂ ਕਿਰ ਮਯ੍ਹਂ ਪਿਤਰੋ’’ਤਿ ਤਨੁਭੂਤਸੋਕੋ ਥੋਕਂ ਮਜ੍ਝਤ੍ਤਤਂ ਪਟਿਲਭਿ. ਅਥਸ੍ਸ ਸਤ੍ਥਾ ਸੋਕਵਿਨੋਦਨਂ ਧਮ੍ਮਕਥਂ ਕਤ੍ਵਾ ਅਪਗਤਸੋਕਂ ਕਲ੍ਲਚਿਤ੍ਤਂ ਵਿਦਿਤ੍ਵਾ ਸਾਮੁਕ੍ਕਂਸਿਕਾਯ ਧਮ੍ਮਦੇਸਨਾਯ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ਵਿਹਾਰਂ ਅਗਮਾਸਿ.

ਅਥ ¶ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਪਸ੍ਸਥ, ਆਵੁਸੋ, ਬੁਦ੍ਧਾਨੁਭਾਵਂ, ਤਥਾ ਸੋਕਪਰਿਦੇਵਸਮਾਪਨ੍ਨੋ ਉਪਾਸਕੋ ਖਣੇਨੇਵ ਭਗਵਤਾ ਸੋਤਾਪਤ੍ਤਿਫਲੇ ਵਿਨੀਤੋ’’ਤਿ. ਸਤ੍ਥਾ ¶ ਤਤ੍ਥ ਗਨ੍ਤ੍ਵਾ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿ. ਭਿਕ੍ਖੂ ਤਮਤ੍ਥਂ ਭਗਵਤੋ ਆਰੋਚੇਸੁਂ. ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ ਮਯਾ ਇਮਸ੍ਸ ਸੋਕੋ ਅਪਨੀਤੋ, ਪੁਬ੍ਬੇਪਿ ਅਪਨੀਤੋਯੇਵਾ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਅਞ੍ਞਤਰਸ੍ਸ ਗਹਪਤਿਕਸ੍ਸ ਪਿਤਾ ਕਾਲਮਕਾਸਿ. ਸੋ ਪਿਤੁ ਮਰਣੇਨ ਸੋਕਪਰਿਦੇਵਸਮਾਪਨ੍ਨੋ ¶ ਅਸ੍ਸੁਮੁਖੋ ਰਤ੍ਤਕ੍ਖੋ ਕਨ੍ਦਨ੍ਤੋ ਚਿਤਕਂ ਪਦਕ੍ਖਿਣਂ ਕਰੋਤਿ. ਤਸ੍ਸ ਪੁਤ੍ਤੋ ਸੁਜਾਤੋ ਨਾਮ ਕੁਮਾਰੋ ਪਣ੍ਡਿਤੋ ਬ੍ਯਤ੍ਤੋ ਬੁਦ੍ਧਿਸਮ੍ਪਨ੍ਨੋ ਪਿਤੁਸੋਕਵਿਨਯਨੂਪਾਯਂ ਚਿਨ੍ਤੇਨ੍ਤੋ ਏਕਦਿਵਸਂ ਬਹਿਨਗਰੇ ਏਕਂ ਮਤਗੋਣਂ ਦਿਸ੍ਵਾ ਤਿਣਞ੍ਚ ਪਾਨੀਯਞ੍ਚ ਆਹਰਿਤ੍ਵਾ ਤਸ੍ਸ ਪੁਰਤੋ ਠਪੇਤ੍ਵਾ ‘‘ਖਾਦ, ਖਾਦ, ਪਿਵ, ਪਿਵਾ’’ਤਿ ਵਦਨ੍ਤੋ ਅਟ੍ਠਾਸਿ. ਆਗਤਾਗਤਾ ਤਂ ਦਿਸ੍ਵਾ ‘‘ਸਮ੍ਮ ਸੁਜਾਤ, ਕਿਂ ਉਮ੍ਮਤ੍ਤਕੋਸਿ, ਯੋ ਤ੍ਵਂ ਮਤਸ੍ਸ ਗੋਣਸ੍ਸ ਤਿਣੋਦਕਂ ਉਪਨੇਸੀ’’ਤਿ ਵਦਨ੍ਤਿ? ਸੋ ਨ ਕਿਞ੍ਚਿ ਪਟਿਵਦਤਿ. ਮਨੁਸ੍ਸਾ ਤਸ੍ਸ ਪਿਤੁ ਸਨ੍ਤਿਕਂ ਗਨ੍ਤ੍ਵਾ ‘‘ਪੁਤ੍ਤੋ ਤੇ ਉਮ੍ਮਤ੍ਤਕੋ ਜਾਤੋ, ਮਤਗੋਣਸ੍ਸ ਤਿਣੋਦਕਂ ਦੇਤੀ’’ਤਿ ਆਹਂਸੁ. ਤਂ ਸੁਤ੍ਵਾ ਚ ਕੁਟੁਮ੍ਬਿਕਸ੍ਸ ਪਿਤਰਂ ਆਰਬ੍ਭ ਠਿਤੋ ਸੋਕੋ ਅਪਗਤੋ. ਸੋ ‘‘ਮਯ੍ਹਂ ਕਿਰ ਪੁਤ੍ਤੋ ਉਮ੍ਮਤ੍ਤਕੋ ਜਾਤੋ’’ਤਿ ਸਂਵੇਗਪ੍ਪਤ੍ਤੋ ਵੇਗੇਨ ਗਨ੍ਤ੍ਵਾ ‘‘ਨਨੁ ਤ੍ਵਂ, ਤਾਤ ਸੁਜਾਤ, ਪਣ੍ਡਿਤੋ ਬ੍ਯਤ੍ਤੋ ਬੁਦ੍ਧਿਸਮ੍ਪਨ੍ਨੋ, ਕਸ੍ਮਾ ਮਤਗੋਣਸ੍ਸ ਤਿਣੋਦਕਂ ਦੇਸੀ’’ਤਿ ਚੋਦੇਨ੍ਤੋ –

‘‘ਕਿਂ ਨੁ ਉਮ੍ਮਤ੍ਤਰੂਪੋਵ, ਲਾਯਿਤ੍ਵਾ ਹਰਿਤਂ ਤਿਣਂ;

ਖਾਦ ਖਾਦਾਤਿ ਲਪਸਿ, ਗਤਸਤ੍ਤਂ ਜਰਗ੍ਗਵਂ.

‘‘ਨ ਹਿ ਅਨ੍ਨੇਨ ਪਾਨੇਨ, ਮਤੋ ਗੋਣੋ ਸਮੁਟ੍ਠਹੇ;

ਤ੍ਵਂਸਿ ਬਾਲੋ ਚ ਦੁਮ੍ਮੇਧੋ, ਯਥਾ ਤਞ੍ਞੋਵ ਦੁਮ੍ਮਤੀ’’ਤਿ. –

ਗਾਥਾਦ੍ਵਯਮਾਹ. ਤਤ੍ਥ ਕਿਂ ਨੂਤਿ ਪੁਚ੍ਛਾਵਚਨਂ. ਉਮ੍ਮਤ੍ਤਰੂਪੋਵਾਤਿ ਉਮ੍ਮਤ੍ਤਕਸਭਾਵੋ ਵਿਯ ਚਿਤ੍ਤਕ੍ਖੇਪਂ ਪਤ੍ਤੋ ਵਿਯ. ਲਾਯਿਤ੍ਵਾਤਿ ¶ ਲਵਿਤ੍ਵਾ. ਹਰਿਤਂ ਤਿਣਨ੍ਤਿ ਅਲ੍ਲਤਿਣਂ. ਲਪਸਿ ਵਿਲਪਸਿ. ਗਤਸਤ੍ਤਨ੍ਤਿ ਵਿਗਤਜੀਵਿਤਂ. ਜਰਗ੍ਗਵਨ੍ਤਿ ਬਲਿਬਦ੍ਦਂ ¶ ਜਿਣ੍ਣਗੋਣਂ. ਅਨ੍ਨੇਨ ਪਾਨੇਨਾਤਿ ਤਯਾ ਦਿਨ੍ਨੇਨ ਹਰਿਤਤਿਣੇਨ ਵਾ ਪਾਨੀਯੇਨ ਵਾ. ਮਤੋ ਗੋਣੋ ਸਮੁਟ੍ਠਹੇਤਿ ਕਾਲਕਤੋ ਗੋਣੋ ਲਦ੍ਧਜੀਵਿਤੋ ਹੁਤ੍ਵਾ ਨ ਹਿ ਸਮੁਟ੍ਠਹੇਯ੍ਯ. ਤ੍ਵਂਸਿ ਬਾਲੋ ਚ ਦੁਮ੍ਮੇਧੋਤਿ ਤ੍ਵਂ ਬਾਲ੍ਯਯੋਗਤੋ ਬਾਲੋ, ਮੇਧਾਸਙ੍ਖਾਤਾਯ ਪਞ੍ਞਾਯ ਅਭਾਵਤੋ ਦੁਮ੍ਮੇਧੋ ਅਸਿ. ਯਥਾ ਤਞ੍ਞੋਵ ਦੁਮ੍ਮਤੀਤਿ ਯਥਾ ਤਂ ਅਞ੍ਞੋਪਿ ਨਿਪ੍ਪਞ੍ਞੋ ਵਿਪ੍ਪਲਪੇਯ੍ਯ, ਏਵਂ ਤ੍ਵਂ ਨਿਰਤ੍ਥਕਂ ਵਿਪ੍ਪਲਪਸੀਤਿ ਅਤ੍ਥੋ. ਯਥਾ ਤਨ੍ਤਿ ਨਿਪਾਤਮਤ੍ਤਂ.

ਤਂ ¶ ਸੁਤ੍ਵਾ ਸੁਜਾਤੋ ਪਿਤਰਂ ਸਞ੍ਞਾਪੇਤੁਂ ਅਤ੍ਤਨੋ ਅਧਿਪ੍ਪਾਯਂ ਪਕਾਸੇਨ੍ਤੋ –

‘‘ਇਮੇ ਪਾਦਾ ਇਦਂ ਸੀਸਂ, ਅਯਂ ਕਾਯੋ ਸਵਾਲਧਿ;

ਨੇਤ੍ਤਾ ਤਥੇਵ ਤਿਟ੍ਠਨ੍ਤਿ, ਅਯਂ ਗੋਣੋ ਸਮੁਟ੍ਠਹੇ.

‘‘ਨਾਯ੍ਯਕਸ੍ਸ ਹਤ੍ਥਪਾਦਾ, ਕਾਯੋ ਸੀਸਞ੍ਚ ਦਿਸ੍ਸਤਿ;

ਰੁਦਂ ਮਤ੍ਤਿਕਥੂਪਸ੍ਮਿਂ, ਨਨੁ ਤ੍ਵਞ੍ਞੇਵ ਦੁਮ੍ਮਤੀ’’ਤਿ. –

ਗਾਥਾਦ੍ਵਯਂ ਅਭਾਸਿ. ਤਸ੍ਸਤ੍ਥੋ – ਇਮਸ੍ਸ ਗੋਣਸ੍ਸ ਇਮੇ ਚਤ੍ਤਾਰੋ ਪਾਦਾ, ਇਦਂ ਸੀਸਂ, ਸਹ ਵਾਲਧਿਨਾ ਵਤ੍ਤਤੀਤਿ ਸਵਾਲਧਿ ਅਯਂ ਕਾਯੋ. ਇਮਾਨਿ ਚ ਨੇਤ੍ਤਾ ਨਯਨਾਨਿ ਯਥਾ ਮਰਣਤੋ ਪੁਬ੍ਬੇ, ਤਥੇਵ ਅਭਿਨ੍ਨਸਣ੍ਠਾਨਾਨਿ ਤਿਟ੍ਠਨ੍ਤਿ. ਅਯਂ ਗੋਣੋ ਸਮੁਟ੍ਠਹੇਤਿ ਇਮਸ੍ਮਾ ਕਾਰਣਾ ਅਯਂ ਗੋਣੋ ਸਮੁਟ੍ਠਹੇਯ੍ਯ ਸਮੁਤ੍ਤਿਟ੍ਠੇਯ੍ਯਾਤਿ ਮਮ ਚਿਤ੍ਤਂ ਭਵੇਯ੍ਯ. ‘‘ਮਞ੍ਞੇ ਗੋਣੋ ਸਮੁਟ੍ਠਹੇ’’ਤਿ ਕੇਚਿ ਪਠਨ੍ਤਿ, ਤੇਨ ਕਾਰਣੇਨ ਅਯਂ ਗੋਣੋ ਸਹਸਾਪਿ ਕਾਯਂ ਸਮੁਟ੍ਠਹੇਯ੍ਯਾਤਿ ਅਹਂ ਮਞ੍ਞੇਯ੍ਯਂ, ਏਵਂ ਮੇ ਮਞ੍ਞਨਾ ਸਮ੍ਭਵੇਯ੍ਯਾਤਿ ਅਧਿਪ੍ਪਾਯੋ. ਅਯ੍ਯਕਸ੍ਸ ¶ ਪਨ ਮਯ੍ਹਂ ਪਿਤਾਮਹਸ੍ਸ ਨ ਹਤ੍ਥਪਾਦਾ ਕਾਯੋ ਸੀਸਂ ਦਿਸ੍ਸਤਿ, ਕੇਵਲਂ ਪਨ ਤਸ੍ਸ ਅਟ੍ਠਿਕਾਨਿ ਪਕ੍ਖਿਪਿਤ੍ਵਾ ਕਤੇ ਮਤ੍ਤਿਕਾਮਯੇ ਥੂਪੇ ਰੁਦਨ੍ਤੋ ਸਤਗੁਣੇਨ ਸਹਸ੍ਸਗੁਣੇਨ, ਤਾਤ, ਤ੍ਵਞ੍ਞੇਵ ਦੁਮ੍ਮਤਿ ਨਿਪ੍ਪਞ੍ਞੋ, ਭਿਜ੍ਜਨਧਮ੍ਮਾ ਸਙ੍ਖਾਰਾ ਭਿਜ੍ਜਨ੍ਤਿ, ਤਤ੍ਥ ਵਿਜਾਨਤਂ ਕਾ ਪਰਿਦੇਵਨਾਤਿ ਪਿਤੁ ਧਮ੍ਮਂ ਕਥੇਸਿ.

ਤਂ ¶ ਸੁਤ੍ਵਾ ਬੋਧਿਸਤ੍ਤਸ੍ਸ ਪਿਤਾ ‘‘ਮਮ ਮੁਤ੍ਤੋ ਪਣ੍ਡਿਤੋ ਮਂ ਸਞ੍ਞਾਪੇਤੁਂ ਇਮਂ ਕਮ੍ਮਂ ਅਕਾਸੀ’’ਤਿ ਚਿਨ੍ਤੇਤ੍ਵਾ ‘‘ਤਾਤ ਸੁਜਾਤ, ‘ਸਬ੍ਬੇਪਿ ਸਤ੍ਤਾ ਮਰਣਧਮ੍ਮਾ’ਤਿ ਅਞ੍ਞਾਤਮੇਤਂ, ਇਤੋ ਪਟ੍ਠਾਯ ਨ ਸੋਚਿਸ੍ਸਾਮਿ, ਸੋਕਹਰਣਸਮਤ੍ਥੇਨ ਨਾਮ ਮੇਧਾਵਿਨਾ ਤਾਦਿਸੇਨੇਵ ਭਵਿਤਬ੍ਬ’’ਨ੍ਤਿ ਪੁਤ੍ਤਂ ਪਸਂਸਨ੍ਤੋ –

‘‘ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

‘‘ਅਬ੍ਬਹੀ ਵਤ ਮੇ ਸਲ੍ਲਂ, ਸੋਕਂ ਹਦਯਨਿਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪਿਤੁਸੋਕਂ ਅਪਾਨੁਦਿ.

‘‘ਸ੍ਵਾਹਂ ¶ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਸੀਤਿਭੂਤੋਸ੍ਮਿ ਨਿਬ੍ਬੁਤੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਮਾਣਵ.

‘‘ਏਵਂ ਕਰੋਨ੍ਤਿ ਸਪ੍ਪਞ੍ਞਾ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਵਿਨਿਵਤ੍ਤਯਨ੍ਤਿ ਸੋਕਮ੍ਹਾ, ਸੁਜਾਤੋ ਪਿਤਰਂ ਯਥਾ’’ਤਿ. –

ਚਤਸ੍ਸੋ ਗਾਥਾ ਅਭਾਸਿ. ਤਤ੍ਥ ਆਦਿਤ੍ਤਨ੍ਤਿ ਸੋਕਗ੍ਗਿਨਾ ਆਦਿਤ੍ਤਂ ਜਲਿਤਂ. ਸਨ੍ਤਨ੍ਤਿ ਸਮਾਨਂ. ਪਾਵਕਨ੍ਤਿ ਅਗ੍ਗਿ. ਵਾਰਿਨਾ ਵਿਯ ਓਸਿਞ੍ਚਨ੍ਤਿ ਉਦਕੇਨ ਅਵਸਿਞ੍ਚਨ੍ਤੋ ਵਿਯ. ਸਬ੍ਬਂ ਨਿਬ੍ਬਾਪਯੇ ਦਰਨ੍ਤਿ ਸਬ੍ਬਂ ਮੇ ਚਿਤ੍ਤਦਰਥਂ ਨਿਬ੍ਬਾਪੇਸਿ. ਅਬ੍ਬਹੀ ਵਤਾਤਿ ਨੀਹਰਿ ਵਤ. ਸਲ੍ਲਨ੍ਤਿ ਸੋਕਸਲ੍ਲਂ. ਹਦਯਨਿਸ੍ਸਿਤਨ੍ਤਿ ਚਿਤ੍ਤਸਨ੍ਨਿਸ੍ਸਿਤਸਲ੍ਲਭੂਤਂ. ਸੋਕਪਰੇਤਸ੍ਸਾਤਿ ਸੋਕੇਨ ਅਭਿਭੂਤਸ੍ਸ. ਪਿਤੁਸੋਕਨ੍ਤਿ ਪਿਤਰਂ ਆਰਬ੍ਭ ਉਪ੍ਪਨ੍ਨਂ ਸੋਕਂ. ਅਪਾਨੁਦੀਤਿ ਅਪਨੇਸਿ. ਤਵ ਸੁਤ੍ਵਾਨ ਮਾਣਵਾਤਿ, ਕੁਮਾਰ, ਤਵ ਵਚਨਂ ਸੁਤ੍ਵਾ ਇਦਾਨਿ ਪਨ ਨ ਸੋਚਾਮਿ ਨ ਰੋਦਾਮਿ. ਸੁਜਾਤੋ ਪਿਤਰਂ ਯਥਾਤਿ ਯਥਾ ਅਯਂ ਸੁਜਾਤੋ ਅਤ੍ਤਨੋ ਪਿਤਰਂ ਸੋਕਤੋ ਵਿਨਿਵਤ੍ਤੇਸਿ, ਏਵਂ ਅਞ੍ਞੇਪਿ ਯੇ ਅਨੁਕਮ੍ਪਕਾ ਅਨੁਗ੍ਗਣ੍ਹਸੀਲਾ ¶ ਹੋਨ੍ਤਿ, ਤੇ ਸਪ੍ਪਞ੍ਞਾ ਏਵਂ ਕਰੋਨ੍ਤਿ ਪਿਤੂਨਂ ਅਞ੍ਞੇਸਞ੍ਚ ਉਪਕਾਰਂ ਕਰੋਨ੍ਤੀਤਿ ਅਤ੍ਥੋ.

ਮਾਣਵਸ੍ਸ ਵਚਨਂ ਸੁਤ੍ਵਾ ਪਿਤਾ ਅਪਗਤਸੋਕੋ ਹੁਤ੍ਵਾ ਸੀਸਂ ਨਹਾਯਿਤ੍ਵਾ ਭੁਞ੍ਜਿਤ੍ਵਾ ਕਮ੍ਮਨ੍ਤੇ ਪਵਤ੍ਤੇਤ੍ਵਾ ਕਾਲਂ ਕਤ੍ਵਾ ਸਗ੍ਗਪਰਾਯਣੋ ਅਹੋਸਿ. ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਤੇਸਂ ਭਿਕ੍ਖੂਨਂ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਬਹੂ ਸੋਤਾਪਤ੍ਤਿਫਲਾਦੀਸੁ ਪਤਿਟ੍ਠਹਿਂਸੁ. ਤਦਾ ਸੁਜਾਤੋ ਲੋਕਨਾਥੋ ਅਹੋਸੀਤਿ.

ਗੂਥਞ੍ਚ ¶ ਮੁਤ੍ਤਂ ਰੁਹਿਰਞ੍ਚ ਪੁਬ੍ਬਨ੍ਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਅਞ੍ਞਤਰਂ ਪੇਸਕਾਰਪੇਤਿਂ ਆਰਬ੍ਭ ਵੁਤ੍ਤਂ. ਦ੍ਵਾਦਸਮਤ੍ਤਾ ਕਿਰ ਭਿਕ੍ਖੂ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਵਸਨਯੋਗ੍ਗਟ੍ਠਾਨਂ ਵੀਮਂਸਨ੍ਤਾ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਅਞ੍ਞਤਰਂ ਛਾਯੂਦਕਸਮ੍ਪਨ੍ਨਂ ਰਮਣੀਯਂ ਅਰਞ੍ਞਾਯਤਨਂ ਤਸ੍ਸ ਚ ਨਾਤਿਦੂਰੇ ਨਾਚ੍ਚਾਸਨ੍ਨੇ ਗੋਚਰਗਾਮਂ ਦਿਸ੍ਵਾ ਤਤ੍ਥ ਏਕਰਤ੍ਤਿਂ ਵਸਿਤ੍ਵਾ ਦੁਤਿਯਦਿਵਸੇ ਗਾਮਂ ਪਿਣ੍ਡਾਯ ਪਵਿਸਿਂਸੁ. ਤਤ੍ਥ ਏਕਾਦਸ ਪੇਸਕਾਰਾ ਪਟਿਵਸਨ੍ਤਿ, ਤੇ ਤੇ ਭਿਕ੍ਖੂ ਦਿਸ੍ਵਾ ਸਞ੍ਜਾਤਸੋਮਨਸ੍ਸਾ ¶ ਹੁਤ੍ਵਾ ਅਤ੍ਤਨੋ ਅਤ੍ਤਨੋ ਗੇਹਂ ਨੇਤ੍ਵਾ ਪਣੀਤੇਨ ਆਹਾਰੇਨ ਪਰਿਵਿਸਿਤ੍ਵਾ ਆਹਂਸੁ ‘‘ਕੁਹਿਂ, ਭਨ੍ਤੇ, ਗਚ੍ਛਥਾ’’ਤਿ? ‘‘ਯਤ੍ਥ ਅਮ੍ਹਾਕਂ ਫਾਸੁਕਂ, ਤਤ੍ਥ ਗਮਿਸ੍ਸਾਮਾ’’ਤਿ. ‘‘ਯਦਿ ਏਵਂ, ਭਨ੍ਤੇ, ਇਧੇਵ ਵਸਿਤਬ੍ਬ’’ਨ੍ਤਿ ਵਸ੍ਸੂਪਗਮਨਂ ਯਾਚਿਂਸੁ. ਭਿਕ੍ਖੂ ਸਮ੍ਪਟਿਚ੍ਛਿਂਸੁ. ਉਪਾਸਕਾ ਤੇਸਂ ਤਤ੍ਥ ਅਰਞ੍ਞਕੁਟਿਕਾਯੋ ਕਾਰੇਤ੍ਵਾ ਅਦਂਸੁ. ਭਿਕ੍ਖੂ ਤਤ੍ਥ ਵਸ੍ਸਂ ਉਪਗਚ੍ਛਿਂਸੁ.

ਤਤ੍ਥ ਜੇਟ੍ਠਕਪੇਸਕਾਰੋ ਦ੍ਵੇ ਭਿਕ੍ਖੂ ਚਤੂਹਿ ਪਚ੍ਚਯੇਹਿ ਸਕ੍ਕਚ੍ਚਂ ਉਪਟ੍ਠਹਿ, ਇਤਰੇ ਏਕੇਕਂ ਭਿਕ੍ਖੁਂ ਉਪਟ੍ਠਹਿਂਸੁ. ਜੇਟ੍ਠਕਪੇਸਕਾਰਸ੍ਸ ਭਰਿਯਾ ਅਸ੍ਸਦ੍ਧਾ ਅਪ੍ਪਸਨ੍ਨਾ ਮਿਚ੍ਛਾਦਿਟ੍ਠਿਕਾ ਮਚ੍ਛਰਿਨੀ ਭਿਕ੍ਖੂ ਨ ਸਕ੍ਕਚ੍ਚਂ ਉਪਟ੍ਠਾਤਿ. ਸੋ ਤਂ ਦਿਸ੍ਵਾ ਤਸ੍ਸਾਯੇਵ ਕਨਿਟ੍ਠਭਗਿਨਿਂ ਆਨੇਤ੍ਵਾ ਅਤ੍ਤਨੋ ਗੇਹੇ ਇਸ੍ਸਰਿਯਂ ਨਿਯ੍ਯਾਦੇਸਿ. ਸਾ ਸਦ੍ਧਾ ¶ ਪਸਨ੍ਨਾ ਹੁਤ੍ਵਾ ਸਕ੍ਕਚ੍ਚਂ ਭਿਕ੍ਖੂ ਪਟਿਜਗ੍ਗਿ. ਤੇ ਸਬ੍ਬੇ ਪੇਸਕਾਰੋ ਵਸ੍ਸਂ ਵੁਤ੍ਥਾਨਂ ਭਿਕ੍ਖੂਨਂ ਏਕੇਕਸ੍ਸ ਏਕੇਕਂ ਸਾਟਕਮਦਂਸੁ. ਤਤ੍ਥ ਮਚ੍ਛਰਿਨੀ ਜੇਟ੍ਠਪੇਸਕਾਰਸ੍ਸ ਭਰਿਯਾ ਪਦੁਟ੍ਠਚਿਤ੍ਤਾ ਅਤ੍ਤਨੋ ਸਾਮਿਕਂ ਪਰਿਭਾਸਿ – ‘‘ਯਂ ਤਯਾ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਦਾਨਂ ਦਿਨ੍ਨਂ ਅਨ੍ਨਪਾਨਂ, ਤਂ ਤੇ ਪਰਲੋਕੇ ਗੂਥਮੁਤ੍ਤਂ ਪੁਬ੍ਬਲੋਹਿਤਞ੍ਚ ਹੁਤ੍ਵਾ ਨਿਬ੍ਬਤ੍ਤਤੁ, ਸਾਟਕਾ ਚ ਜਲਿਤਾ ਅਯੋਮਯਪਟ੍ਟਾ ਹੋਨ੍ਤੂ’’ਤਿ.

ਤਤ੍ਥ ਜੇਟ੍ਠਪੇਸਕਾਰੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਵਿਞ੍ਝਾਟਵਿਯਂ ਆਨੁਭਾਵਸਮ੍ਪਨ੍ਨਾ ਰੁਕ੍ਖਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਪਨ ਕਦਰਿਯਾ ਭਰਿਯਾ ਕਾਲਂ ਕਤ੍ਵਾ ਤਸ੍ਸੇਵ ਵਸਨਟ੍ਠਾਨਸ੍ਸ ਅਵਿਦੂਰੇ ਪੇਤੀ ਹੁਤ੍ਵਾ ਨਿਬ੍ਬਤ੍ਤਿ. ਸਾ ਨਗ੍ਗਾ ਦੁਬ੍ਬਣ੍ਣਰੂਪਾ ਜਿਘਚ੍ਛਾਪਿਪਾਸਾਭਿਭੂਤਾ ਤਸ੍ਸ ਭੂਮਦੇਵਸ੍ਸ ਸਨ੍ਤਿਕਂ ਗਨ੍ਤ੍ਵਾ ਆਹ – ‘‘ਅਹਂ, ਸਾਮਿ, ਨਿਚ੍ਚੋਲ਼ਾ ਅਤਿਵਿਯ ਜਿਘਚ੍ਛਾਪਿਪਾਸਾਭਿਭੂਤਾ ਵਿਚਰਾਮਿ, ਦੇਹਿ ਮੇ ਵਤ੍ਥਂ ਅਨ੍ਨਪਾਨਞ੍ਚਾ’’ਤਿ. ਸੋ ਤਸ੍ਸਾ ਦਿਬ੍ਬਂ ਉਲ਼ਾਰਂ ਅਨ੍ਨਪਾਨਂ ਉਪਨੇਸਿ. ਤਂ ਤਾਯ ਗਹਿਤਮਤ੍ਤਮੇਵ ਗੂਥਮੁਤ੍ਤਂ ਪੁਬ੍ਬਲੋਹਿਤਞ੍ਚ ਸਮ੍ਪਜ੍ਜਤਿ, ਸਾਟਕਞ੍ਚ ਦਿਨ੍ਨਂ ਤਾਯ ਪਰਿਦਹਿਤਂ ਪਜ੍ਜਲਿਤਂ ਅਯੋਮਯਪਟ੍ਟਂ ਹੋਤਿ. ਸਾ ਮਹਾਦੁਕ੍ਖਂ ਅਨੁਭਵਨ੍ਤੀ ਤਂ ਛਡ੍ਡੇਤ੍ਵਾ ਕਨ੍ਦਨ੍ਤੀ ਵਿਚਰਤਿ.

ਤੇਨ ¶ ਚ ਸਮਯੇਨ ਅਞ੍ਞਤਰੋ ਭਿਕ੍ਖੁ ਵੁਤ੍ਥਵਸ੍ਸੋ ਸਤ੍ਥਾਰਂ ਵਨ੍ਦਿਤੁਂ ਗਚ੍ਛਨ੍ਤੋ ਮਹਤਾ ਸਤ੍ਥੇਨ ਸਦ੍ਧਿਂ ਵਿਞ੍ਝਾਟਵਿਂ ਪਟਿਪਜ੍ਜਿ. ਸਤ੍ਥਿਕਾ ਰਤ੍ਤਿਂ ਮਗ੍ਗਂ ਗਨ੍ਤ੍ਵਾ ਦਿਵਾ ਵਨੇ ਸਨ੍ਦਚ੍ਛਾਯੂਦਕਸਮ੍ਪਨ੍ਨਂ ਪਦੇਸਂ ਦਿਸ੍ਵਾ ਯਾਨਾਨਿ ਮੁਞ੍ਚਿਤ੍ਵਾ ਮੁਹੁਤ੍ਤਂ ਵਿਸ੍ਸਮਿਂਸੁ. ਭਿਕ੍ਖੁ ਪਨ ਵਿਵੇਕਕਾਮਤਾਯ ਥੋਕਂ ਅਪਕ੍ਕਮਿਤ੍ਵਾ ਅਞ੍ਞਤਰਸ੍ਸ ਸਨ੍ਦਚ੍ਛਾਯਸ੍ਸ ਵਨਗਹਨਪਟਿਚ੍ਛਨ੍ਨਸ੍ਸ ਰੁਕ੍ਖਸ੍ਸ ਮੂਲੇ ਸਙ੍ਘਾਟਿਂ ਪਞ੍ਞਪੇਤ੍ਵਾ ਨਿਪਨ੍ਨੋ ਰਤ੍ਤਿਯਂ ਮਗ੍ਗਗਮਨਪਰਿਸ੍ਸਮੇਨ ਕਿਲਨ੍ਤਕਾਯੋ ਨਿਦ੍ਦਂ ਉਪਗਞ੍ਛਿ. ਸਤ੍ਥਿਕਾ ਵਿਸ੍ਸਮਿਤ੍ਵਾ ਮਗ੍ਗਂ ਪਟਿਪਜ੍ਜਿਂਸੁ, ਸੋ ਭਿਕ੍ਖੁ ਨ ਪਟਿਬੁਜ੍ਝਿ. ਅਥ ਸਾਯਨ੍ਹਸਮਯੇ ਉਟ੍ਠਹਿਤ੍ਵਾ ਤੇ ਅਪਸ੍ਸਨ੍ਤੋ ¶ ਅਞ੍ਞਤਰਂ ਕੁਮ੍ਮਗ੍ਗਂ ¶ ਪਟਿਪਜ੍ਜਿਤ੍ਵਾ ਅਨੁਕ੍ਕਮੇਨ ਤਸ੍ਸਾ ਦੇਵਤਾਯ ਵਸਨਟ੍ਠਾਨਂ ਸਮ੍ਪਾਪੁਣਿ. ਅਥ ਨਂ ਸੋ ਦੇਵਪੁਤ੍ਤੋ ਦਿਸ੍ਵਾ ਮਨੁਸ੍ਸਰੂਪੇਨ ਉਪਗਨ੍ਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਅਤ੍ਤਨੋ ਵਿਮਾਨਂ ਪਵੇਸੇਤ੍ਵਾ ਪਾਦਬ੍ਭਞ੍ਜਨਾਦੀਨਿ ਦਤ੍ਵਾ ਪਯਿਰੁਪਾਸਨ੍ਤੋ ਨਿਸੀਦਿ. ਤਸ੍ਮਿਞ੍ਚ ਸਮਯੇ ਸਾ ਪੇਤੀ ਆਗਨ੍ਤ੍ਵਾ ‘‘ਦੇਹਿ ਮੇ, ਸਾਮਿ, ਅਨ੍ਨਪਾਨਂ ਸਾਟਕਞ੍ਚਾ’’ਤਿ ਆਹ. ਸੋ ਤਸ੍ਸਾ ਤਾਨਿ ਅਦਾਸਿ. ਤਾਨਿ ਚ ਤਾਯ ਗਹਿਤਮਤ੍ਤਾਨਿ ਗੂਥਮੁਤ੍ਤਪੁਬ੍ਬਲੋਹਿਤਪਜ੍ਜਲਿਤਅਯੋਪਟ੍ਟਾਯੇਵ ਅਹੇਸੁਂ. ਸੋ ਭਿਕ੍ਖੁ ਤਂ ਦਿਸ੍ਵਾ ਸਞ੍ਜਾਤਸਂਵੇਗੋ ਤਂ ਦੇਵਪੁਤ੍ਤਂ –

‘‘ਗੂਥਞ੍ਚ ਮੁਤ੍ਤਂ ਰੁਹਿਰਞ੍ਚ ਪੁਬ੍ਬਂ, ਪਰਿਭੁਞ੍ਜਤਿ ਕਿਸ੍ਸ ਅਯਂ ਵਿਪਾਕੋ;

ਅਯਂ ਨੁ ਕਿਂ ਕਮ੍ਮਮਕਾਸਿ ਨਾਰੀ, ਯਾ ਸਬ੍ਬਦਾ ਲੋਹਿਤਪੁਬ੍ਬਭਕ੍ਖਾ.

‘‘ਨਵਾਨਿ ਵਤ੍ਥਾਨਿ ਸੁਭਾਨਿ ਚੇਵ, ਮੁਦੂਨਿ ਸੁਦ੍ਧਾਨਿ ਚ ਲੋਮਸਾਨਿ;

ਦਿਨ੍ਨਾਨਿ ਮਿਸ੍ਸਾ ਕਿਤਕਾ ਭਵਨ੍ਤਿ, ਅਯਂ ਨੁ ਕਿਂ ਕਮ੍ਮਮਕਾਸਿ ਨਾਰੀ’’ਤਿ. –

ਦ੍ਵੀਹਿ ਗਾਥਾਹਿ ਪਟਿਪੁਚ੍ਛਿ. ਤਤ੍ਥ ਕਿਸ੍ਸ ਅਯਂ ਵਿਪਾਕੋਤਿ ਕੀਦਿਸਸ੍ਸ ਕਮ੍ਮਸ੍ਸ ਅਯਂ ਵਿਪਾਕੋ, ਯਂ ਏਸਾ ਇਦਾਨਿ ਪਚ੍ਚਨੁਭਵਤੀਤਿ. ਅਯਂ ਨੁ ਕਿਂ ਕਮ੍ਮਮਕਾਸਿ ਨਾਰੀਤਿ ਅਯਂ ਇਤ੍ਥੀ ਕਿਂ ਨੁ ਖੋ ਕਮ੍ਮਂ ਪੁਬ੍ਬੇ ਅਕਾਸਿ. ਯਾ ਸਬ੍ਬਦਾ ਲੋਹਿਤਪੁਬ੍ਬਭਕ੍ਖਾਤਿ ਯਾ ਸਬ੍ਬਕਾਲਂ ਰੁਹਿਰਪੁਬ੍ਬਮੇਵ ਭਕ੍ਖਤਿ ਪਰਿਭੁਞ੍ਜਤਿ. ਨਵਾਨੀਤਿ ਪਚ੍ਚਗ੍ਘਾਨਿ ਤਾਵਦੇਵ ਪਾਤੁਭੂਤਾਨਿ. ਸੁਭਾਨੀਤਿ ਸੁਨ੍ਦਰਾਨਿ ਦਸ੍ਸਨੀਯਾਨਿ. ਮੁਦੂਨੀਤਿ ਸੁਖਸਮ੍ਫਸ੍ਸਾਨਿ. ਸੁਦ੍ਧਾਨੀਤਿ ਪਰਿਸੁਦ੍ਧਵਣ੍ਣਾਨਿ. ਲੋਮਸਾਨੀਤਿ ਸਲੋਮਕਾਨਿ ਸੁਖਸਮ੍ਫਸ੍ਸਾਨਿ ¶ , ਸੁਨ੍ਦਰਾਨੀਤਿ ਅਤ੍ਥੋ. ਦਿਨ੍ਨਾਨਿ ਮਿਸ੍ਸਾ ਕਿਤਕਾ ਭਵਨ੍ਤੀਤਿ ਕਿਤਕਕਣ੍ਟਕਸਦਿਸਾਨਿ ਲੋਹਪਟ੍ਟਸਦਿਸਾਨਿ ਭਵਨ੍ਤਿ. ‘‘ਕੀਟਕਾ ਭਵਨ੍ਤੀ’’ਤਿ ਵਾ ਪਾਠੋ, ਖਾਦਕਪਾਣਕਵਣ੍ਣਾਨਿ ਭਵਨ੍ਤੀਤਿ ਅਤ੍ਥੋ.

ਏਵਂ ¶ ਸੋ ਦੇਵਪੁਤ੍ਤੋ ਤੇਨ ਭਿਕ੍ਖੁਨਾ ਪੁਟ੍ਠੋ ਤਾਯ ਪੁਰਿਮਜਾਤਿਯਾ ਕਤਕਮ੍ਮਂ ਪਕਾਸੇਨ੍ਤੋ –

‘‘ਭਰਿਯਾ ਮਮੇਸਾ ਅਹੁ ਭਦਨ੍ਤੇ, ਅਦਾਯਿਕਾ ਮਚ੍ਛਰਿਨੀ ਕਦਰਿਯਾ;

ਸਾ ਮਂ ਦਦਨ੍ਤਂ ਸਮਣਬ੍ਰਾਹ੍ਮਣਾਨਂ, ਅਕ੍ਕੋਸਤਿ ਚ ਪਰਿਭਾਸਤਿ ਚ.

‘‘ਗੂਥਞ੍ਚ ¶ ਮੁਤ੍ਤਂ ਰੁਹਿਰਞ੍ਚ ਪੁਬ੍ਬਂ, ਪਰਿਭੁਞ੍ਜ ਤ੍ਵਂ ਅਸੁਚਿਂ ਸਬ੍ਬਕਾਲਂ;

ਏਤਂ ਤੇ ਪਰਲੋਕਸ੍ਮਿਂ ਹੋਤੁ, ਵਤ੍ਥਾ ਚ ਤੇ ਕਿਤਕਸਮਾ ਭਵਨ੍ਤੁ;

ਏਤਾਦਿਸਂ ਦੁਚ੍ਚਰਿਤਂ ਚਰਿਤ੍ਵਾ, ਇਧਾਗਤਾ ਚਿਰਰਤ੍ਤਾਯ ਖਾਦਤੀ’’ਤਿ. –

ਦ੍ਵੇ ਗਾਥਾ ਅਭਾਸਿ. ਤਤ੍ਥ ਅਦਾਯਿਕਾਤਿ ਕਸ੍ਸਚਿ ਕਿਞ੍ਚਿਪਿ ਅਦਾਨਸੀਲਾ. ਮਚ੍ਛਰਿਨੀ ਕਦਰਿਯਾਤਿ ਪਠਮਂ ਮਚ੍ਛੇਰਮਲਸ੍ਸ ਸਭਾਵੇਨ ਮਚ੍ਛਰਿਨੀ, ਤਾਯ ਚ ਪੁਨਪ੍ਪੁਨਂ ਆਸੇਵਨਤਾਯ ਥਦ੍ਧਮਚ੍ਛਰਿਨੀ, ਤਾਯ ਕਦਰਿਯਾ ਅਹੂਤਿ ਯੋਜਨਾ. ਇਦਾਨਿ ਤਸ੍ਸਾ ਤਮੇਵ ਕਦਰਿਯਤਂ ਦਸ੍ਸੇਨ੍ਤੋ ‘‘ਸਾ ਮਂ ਦਦਨ੍ਤ’’ਨ੍ਤਿਆਦਿਮਾਹ. ਤਤ੍ਥ ਏਤਾਦਿਸਨ੍ਤਿ ਏਵਰੂਪਂ ਯਥਾਵੁਤ੍ਤਵਚੀਦੁਚ੍ਚਰਿਤਾਦਿਂ ਚਰਿਤ੍ਵਾ. ਇਧਾਗਤਾਤਿ ਇਮਂ ਪੇਤਲੋਕਂ ਆਗਤਾ, ਪੇਤਤ੍ਤਭਾਵਂ ਉਪਗਤਾ. ਚਿਰਰਤ੍ਤਾਯ ਖਾਦਤੀਤਿ ਚਿਰਕਾਲਂ ਗੂਥਾਦਿਮੇਵ ਖਾਦਤਿ. ਤਸ੍ਸਾ ਹਿ ਯੇਨਾਕਾਰੇਨ ਅਕ੍ਕੁਟ੍ਠਂ, ਤੇਨੇਵਾਕਾਰੇਨ ਪਵਤ੍ਤਮਾਨਮ੍ਪਿ ਫਲਂ. ਯਂ ਉਦ੍ਦਿਸ੍ਸ ਅਕ੍ਕੁਟ੍ਠਂ, ਤਤੋ ਅਞ੍ਞਤ੍ਥ ਪਥਵਿਯਂ ਕਮਨ੍ਤਕਸਙ੍ਖਾਤੇ ਮਤ੍ਥਕੇ ਅਸਨਿਪਾਤੋ ਵਿਯ ਅਤ੍ਤਨੋ ਉਪਰਿ ਪਤਤਿ.

ਏਵਂ ਸੋ ਦੇਵਪੁਤ੍ਤੋ ਤਾਯ ਪੁਬ੍ਬੇ ਕਤਕਮ੍ਮਂ ਕਥੇਤ੍ਵਾ ਪੁਨ ਤਂ ਭਿਕ੍ਖੁਂ ਆਹ – ‘‘ਅਤ੍ਥਿ ਪਨ, ਭਨ੍ਤੇ, ਕੋਚਿ ਉਪਾਯੋ ਇਮਂ ਪੇਤਲੋਕਤੋ ਮੋਚੇਤੁ’’ਨ੍ਤਿ ¶ ? ‘‘ਅਤ੍ਥੀ’’ਤਿ ਚ ਵੁਤ੍ਤੇ ‘‘ਕਥੇਥ, ਭਨ੍ਤੇ’’ਤਿ. ਯਦਿ ¶ ਭਗਵਤੋ ਅਰਿਯਸਙ੍ਘਸ੍ਸ ਚ ਏਕਸ੍ਸੇਵ ਵਾ ਭਿਕ੍ਖੁਨੋ ਦਾਨਂ ਦਤ੍ਵਾ ਇਮਿਸ੍ਸਾ ਉਦ੍ਦਿਸਿਯਤਿ, ਅਯਞ੍ਚ ਤਂ ਅਨੁਮੋਦਤਿ, ਏਵਮੇਤਿਸ੍ਸਾ ਇਤੋ ਦੁਕ੍ਖਤੋ ਮੁਤ੍ਤਿ ਭਵਿਸ੍ਸਤੀਤਿ. ਤਂ ਸੁਤ੍ਵਾ ਦੇਵਪੁਤ੍ਤੋ ਤਸ੍ਸ ਭਿਕ੍ਖੁਨੋ ਪਣੀਤਂ ਅਨ੍ਨਪਾਨਂ ਦਤ੍ਵਾ ਤਂ ਦਕ੍ਖਿਣਂ ਤਸ੍ਸਾ ਪੇਤਿਯਾ ਆਦਿਸਿ. ਤਾਵਦੇਵ ਸਾ ਪੇਤੀ ਸੁਹਿਤਾ ਪੀਣਿਨ੍ਦ੍ਰਿਯਾ ਦਿਬ੍ਬਾਹਾਰਸ੍ਸ ਤਿਤ੍ਤਾ ਅਹੋਸਿ. ਪੁਨ ਤਸ੍ਸੇਵ ਭਿਕ੍ਖੁਨੋ ਹਤ੍ਥੇ ਦਿਬ੍ਬਸਾਟਕਯੁਗਂ ਭਗਵਨ੍ਤਂ ਉਦ੍ਦਿਸ੍ਸ ਦਤ੍ਵਾ ਤਞ੍ਚ ਦਕ੍ਖਿਣਂ ਪੇਤਿਯਾ ਆਦਿਸਿ. ਤਾਵਦੇਵ ਚ ਸਾ ਦਿਬ੍ਬਵਤ੍ਥਨਿਵਤ੍ਥਾ ਦਿਬ੍ਬਾਲਙ੍ਕਾਰਵਿਭੂਸਿਤਾ ਸਬ੍ਬਕਾਮਸਮਿਦ੍ਧਾ ਦੇਵਚ੍ਛਰਾਪਟਿਭਾਗਾ ਅਹੋਸਿ. ਸੋ ਚ ਭਿਕ੍ਖੁ ਤਸ੍ਸ ਦੇਵਪੁਤ੍ਤਸ੍ਸ ਇਦ੍ਧਿਯਾ ਤਦਹੇਵ ਸਾਵਤ੍ਥਿਂ ਪਤ੍ਵਾ ਜੇਤਵਨਂ ਪਵਿਸਿਤ੍ਵਾ ਭਗਵਤੋ ਸਨ੍ਤਿਕਂ ਉਪਗਨ੍ਤ੍ਵਾ ਵਨ੍ਦਿਤ੍ਵਾ ਤਂ ਸਾਟਕਯੁਗਂ ਦਤ੍ਵਾ ਤਂ ਪਵਤ੍ਤਿਂ ਆਰੋਚੇਸਿ. ਭਗਵਾਪਿ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਮਹਾਪੇਸਕਾਰਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਕਾ ¶ ਨੁ ਅਨ੍ਤੋਵਿਮਾਨਸ੍ਮਿਨ੍ਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਅਞ੍ਞਤਰਂ ਖਲ੍ਲਾਟਿਯਪੇਤਿਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਬਾਰਾਣਸਿਯਂ ਅਞ੍ਞਤਰਾ ਰੂਪੂਪਜੀਵਿਨੀ ਇਤ੍ਥੀ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ ਅਤਿਮਨੋਹਰਕੇਸਕਲਾਪੀ ਅਹੋਸਿ. ਤਸ੍ਸਾ ਹਿ ਕੇਸਾ ਨੀਲਾ ਦੀਘਾ ਤਨੂ ਮੁਦੂ ਸਿਨਿਦ੍ਧਾ ਵੇਲ੍ਲਿਤਗ੍ਗਾ ਦ੍ਵਿਹਤ੍ਥਗਯ੍ਹਾ ਵਿਸਟ੍ਠਾ ਯਾਵ ਮੇਖਲਾ ਕਲਾਪਾ ਓਲਮ੍ਬਨ੍ਤਿ. ਤਂ ਤਸ੍ਸਾ ਕੇਸਸੋਭਂ ਦਿਸ੍ਵਾ ਤਰੁਣਜਨੋ ਯੇਭੁਯ੍ਯੇਨ ਤਸ੍ਸਂ ਪਟਿਬਦ੍ਧਚਿਤ੍ਤੋ ਅਹੋਸਿ. ਅਥਸ੍ਸਾ ਤਂ ਕੇਸਸੋਭਂ ਅਸਹਮਾਨਾ ਇਸ੍ਸਾਪਕਤਾ ਕਤਿਪਯਾ ਇਤ੍ਥਿਯੋ ਮਨ੍ਤੇਤ੍ਵਾ ਤਸ੍ਸਾ ਏਵ ਪਰਿਚਾਰਿਕਦਾਸਿਂ ਆਮਿਸੇਨ ਉਪਲਾਪੇਤ੍ਵਾ ਤਾਯ ਤਸ੍ਸਾ ਕੇਸੂਪਪਾਤਨਂ ਭੇਸਜ੍ਜਂ ਦਾਪੇਸੁਂ. ਸਾ ਕਿਰ ਦਾਸੀ ਤਂ ਭੇਸਜ੍ਜਂ ਨ੍ਹਾਨਿਯਚੁਣ੍ਣੇਨ ਸਦ੍ਧਿਂ ਪਯੋਜੇਤ੍ਵਾ ਗਙ੍ਗਾਯ ਨਦਿਯਾ ਨ੍ਹਾਨਕਾਲੇ ਤਸ੍ਸਾ ਅਦਾਸਿ ¶ . ਸਾ ਤੇਨ ਕੇਸਮੂਲੇਸੁ ਤੇਮੇਤ੍ਵਾ ਉਦਕੇ ਨਿਮੁਜ੍ਜਿ ¶ , ਨਿਮੁਜ੍ਜਨਮਤ੍ਤੇਯੇਵ ਕੇਸਾ ਸਮੂਲਾ ਪਰਿਪਤਿਂਸੁ, ਸੀਸਂ ਚਸ੍ਸਾ ਤਿਤ੍ਤਕਲਾਬੁਸਦਿਸਂ ਅਹੋਸਿ. ਅਥ ਸਾ ਸਬ੍ਬਸੋ ਵਿਲੂਨਕੇਸਾ ਲੁਞ੍ਚਿਤਮਤ੍ਥਕਾ ਕਪੋਤੀ ਵਿਯ ਵਿਰੂਪਾ ਹੁਤ੍ਵਾ ਲਜ੍ਜਾਯ ਅਨ੍ਤੋਨਗਰਂ ਪਵਿਸਿਤੁਂ ਅਸਕ੍ਕੋਨ੍ਤੀ ਵਤ੍ਥੇਨ ਸੀਸਂ ਵੇਠੇਤ੍ਵਾ ਬਹਿਨਗਰੇ ਅਞ੍ਞਤਰਸ੍ਮਿਂ ਪਦੇਸੇ ਵਾਸਂ ਕਪ੍ਪੇਨ੍ਤੀ ਕਤਿਪਾਹਚ੍ਚਯੇਨ ਅਪਗਤਲਜ੍ਜਾ ਤਤੋ ਨਿਵਤ੍ਤੇਤ੍ਵਾ ਤਿਲਾਨਿ ਪੀਲ਼ੇਤ੍ਵਾ ਤੇਲਵਣਿਜ੍ਜਂ ਸੁਰਾਵਣਿਜ੍ਜਞ੍ਚ ਕਰੋਨ੍ਤੀ ਜੀਵਿਕਂ ਕਪ੍ਪੇਸਿ. ਸਾ ਏਕਦਿਵਸਂ ਦ੍ਵੀਸੁ ਤੀਸੁ ਮਨੁਸ੍ਸੇਸੁ ਸੁਰਾਮਤ੍ਤੇਸੁ ਮਹਾਨਿਦ੍ਦਂ ਓਕ੍ਕਮਨ੍ਤੇਸੁ ਸਿਥਿਲਭੂਤਾਨਿ ਤੇਸਂ ਨਿਵਤ੍ਥਵਤ੍ਥਾਨਿ ਅਵਹਰਿ.

ਅਥੇਕਦਿਵਸਂ ਸਾ ਏਕਂ ਖੀਣਾਸਵਤ੍ਥੇਰਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤਾ ਅਤ੍ਤਨੋ ਘਰਂ ਨੇਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਾਪੇਤ੍ਵਾ ਤੇਲਸਂਸਟ੍ਠਂ ਦੋਣਿਨਿਮ੍ਮਜ੍ਜਨਿਂ ਪਿਞ੍ਞਾਕਮਦਾਸਿ. ਸੋ ਤਸ੍ਸਾ ਅਨੁਕਮ੍ਪਾਯ ਤਂ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿ. ਸਾ ਪਸਨ੍ਨਮਾਨਸਾ ਉਪਰਿ ਛਤ੍ਤਂ ਧਾਰਯਮਾਨਾ ਅਟ੍ਠਾਸਿ. ਸੋ ਚ ਥੇਰੋ ਤਸ੍ਸਾ ਚਿਤ੍ਤਂ ਪਹਂਸੇਨ੍ਤੋ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਾ ਚ ਇਤ੍ਥੀ ਅਨੁਮੋਦਨਕਾਲੇਯੇਵ ‘‘ਮਯ੍ਹਂ ਕੇਸਾ ਦੀਘਾ ਤਨੂ ਸਿਨਿਦ੍ਧਾ ਮੁਦੂ ਵੇਲ੍ਲਿਤਗ੍ਗਾ ਹੋਨ੍ਤੂ’’ਤਿ ਪਤ੍ਥਨਮਕਾਸਿ.

ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਮਿਸ੍ਸਕਕਮ੍ਮਸ੍ਸ ਫਲੇਨ ਸਮੁਦ੍ਦਮਜ੍ਝੇ ਕਨਕਵਿਮਾਨੇ ਏਕਿਕਾ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾ ਕੇਸਾ ਪਤ੍ਥਿਤਾਕਾਰਾਯੇਵ ਸਮ੍ਪਜ੍ਜਿਂਸੁ. ਮਨੁਸ੍ਸਾਨਂ ਸਾਟਕਾਵਹਰਣੇਨ ਪਨ ਨਗ੍ਗਾ ਅਹੋਸਿ. ਸਾ ਤਸ੍ਮਿਂ ਕਨਕਵਿਮਾਨੇ ਪੁਨਪ੍ਪੁਨਂ ਉਪ੍ਪਜ੍ਜਿਤ੍ਵਾ ਏਕਂ ਬੁਦ੍ਧਨ੍ਤਰਂ ਨਗ੍ਗਾਵ ਹੁਤ੍ਵਾ ਵੀਤਿਨਾਮੇਸਿ. ਅਥ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ¶ ਅਨੁਪੁਬ੍ਬੇਨ ਸਾਵਤ੍ਥਿਯਂ ਵਿਹਰਨ੍ਤੇ ਸਾਵਤ੍ਥਿਵਾਸਿਨੋ ਸਤ੍ਤਸਤਾ ਵਾਣਿਜਾ ਸੁਵਣ੍ਣਭੂਮਿਂ ਉਦ੍ਦਿਸ੍ਸ ਨਾਵਾਯ ਮਹਾਸਮੁਦ੍ਦਂ ਓਤਰਿਂਸੁ. ਤੇਹਿ ਆਰੁਲ਼੍ਹਾ ਨਾਵਾ ਵਿਸਮਵਾਤਵੇਗੁਕ੍ਖਿਤ੍ਤਾ ਇਤੋ ਚਿਤੋ ਚ ਪਰਿਬ੍ਭਮਨ੍ਤੀ ਤਂ ਪਦੇਸਂ ਅਗਮਾਸਿ. ਅਥ ਸਾ ਵਿਮਾਨਪੇਤੀ ਸਹ ਵਿਮਾਨੇਨ ਤੇਸਂ ਅਤ੍ਤਾਨਂ ਦਸ੍ਸੇਸਿ. ਤਂ ਦਿਸ੍ਵਾ ਜੇਟ੍ਠਵਾਣਿਜੋ ਪੁਚ੍ਛਨ੍ਤੋ –

‘‘ਕਾ ¶ ਨੁ ਅਨ੍ਤੋਵਿਮਾਨਸ੍ਮਿਂ, ਤਿਟ੍ਠਨ੍ਤੀ ਨੂਪਨਿਕ੍ਖਮਿ;

ਉਪਨਿਕ੍ਖਮਸ੍ਸੁ ਭਦ੍ਦੇ, ਪਸ੍ਸਾਮ ਤਂ ਬਹਿਟ੍ਠਿਤ’’ਨ੍ਤਿ. –

ਗਾਥਮਾਹ ¶ . ਤਤ੍ਥ ਕਾ ਨੁ ਅਨ੍ਤੋਵਿਮਾਨਸ੍ਮਿਂ ਤਿਟ੍ਠਨ੍ਤੀਤਿ ਵਿਮਾਨਸ੍ਸ ਅਨ੍ਤੋ ਅਬ੍ਭਨ੍ਤਰੇ ਤਿਟ੍ਠਨ੍ਤੀ ਕਾ ਨੁ ਤ੍ਵਂ, ਕਿਂ ਮਨੁਸ੍ਸਿਤ੍ਥੀ, ਉਦਾਹੁ ਅਮਨੁਸ੍ਸਿਤ੍ਥੀਤਿ ਪੁਚ੍ਛਤਿ. ਨੂਪਨਿਕ੍ਖਮੀਤਿ ਵਿਮਾਨਤੋ ਨ ਨਿਕ੍ਖਮਿ. ਉਪਨਿਕ੍ਖਮਸ੍ਸੁ, ਭਦ੍ਦੇ, ਪਸ੍ਸਾਮ ਤਂ ਬਹਿਟ੍ਠਿਤਨ੍ਤਿ, ਭਦ੍ਦੇ, ਤਂ ਮਯਂ ਬਹਿ ਠਿਤਂ ਪਸ੍ਸਾਮ ਦਟ੍ਠੁਕਾਮਮ੍ਹਾ, ਤਸ੍ਮਾ ਵਿਮਾਨਤੋ ਨਿਕ੍ਖਮਸ੍ਸੁ. ‘‘ਉਪਨਿਕ੍ਖਮਸ੍ਸੁ ਭਦ੍ਦਨ੍ਤੇ’’ਤਿ ਵਾ ਪਾਠੋ, ਭਦ੍ਦਂ ਤੇ ਅਤ੍ਥੂਤਿ ਅਤ੍ਥੋ.

ਅਥਸ੍ਸ ਸਾ ਅਤ੍ਤਨੋ ਬਹਿ ਨਿਕ੍ਖਮਿਸੁਂ ਅਸਕ੍ਕੁਣੇਯ੍ਯਤਂ ਪਕਾਸੇਨ੍ਤੀ –

‘‘ਅਟ੍ਟੀਯਾਮਿ ਹਰਾਯਾਮਿ, ਨਗ੍ਗਾ ਨਿਕ੍ਖਮਿਤੁਂ ਬਹਿ;

ਕੇਸੇਹਮ੍ਹਿ ਪਟਿਚ੍ਛਨ੍ਨਾ, ਪੁਞ੍ਞਂ ਮੇ ਅਪ੍ਪਕਂ ਕਤ’’ਨ੍ਤਿ. –

ਗਾਥਮਾਹ. ਤਤ੍ਥ ਅਟ੍ਟੀਯਾਮੀਤਿ ਨਗ੍ਗਾ ਹੁਤ੍ਵਾ ਬਹਿ ਨਿਕ੍ਖਮਿਤੁਂ ਅਟ੍ਟਿਕਾ ਦੁਕ੍ਖਿਤਾ ਅਮ੍ਹਿ. ਹਰਾਯਾਮੀਤਿ ਲਜ੍ਜਾਮਿ. ਕੇਸੇਹਮ੍ਹਿ ਪਟਿਚ੍ਛਨ੍ਨਾਤਿ ਕੇਸੇਹਿ ਅਮ੍ਹਿ ਅਹਂ ਪਟਿਚ੍ਛਾਦਿਤਾ ਪਾਰੁਤਸਰੀਰਾ. ਪੁਞ੍ਞਂ ਮੇ ਅਪ੍ਪਕਂ ਕਤਨ੍ਤਿ ਅਪ੍ਪਕਂ ਪਰਿਤ੍ਤਂ ਮਯਾ ਕੁਸਲਕਮ੍ਮਂ ਕਤਂ, ਪਿਞ੍ਞਾਕਦਾਨਮਤ੍ਤਨ੍ਤਿ ਅਧਿਪ੍ਪਾਯੋ.

ਅਥਸ੍ਸਾ ਵਾਣਿਜੋ ਅਤ੍ਤਨੋ ਉਤ੍ਤਰਿਸਾਟਕਂ ਦਾਤੁਕਾਮੋ –-

‘‘ਹਨ੍ਦੁਤ੍ਤਰੀਯਂ ਦਦਾਮਿ ਤੇ, ਇਦਂ ਦੁਸ੍ਸਂ ਨਿਵਾਸਯ;

ਇਦਂ ਦੁਸ੍ਸਂ ਨਿਵਾਸੇਤ੍ਵਾ, ਏਹਿ ਨਿਕ੍ਖਮ ਸੋਭਨੇ;

ਉਪਨਿਕ੍ਖਮਸ੍ਸੁ ਭਦ੍ਦੇ, ਪਸ੍ਸਾਮ ਤਂ ਬਹਿਟ੍ਠਿਤ’’ਨ੍ਤਿ. –

ਗਾਥਮਾਹ ¶ . ਤਤ੍ਥ ¶ ਹਨ੍ਦਾਤਿ ਗਣ੍ਹ. ਉਤ੍ਤਰੀਯਨ੍ਤਿ ਉਪਸਂਬ੍ਯਾਨਂ ਉਤ੍ਤਰਿਸਾਟਕਨ੍ਤਿ ਅਤ੍ਥੋ. ਦਦਾਮਿ ਤੇਤਿ ਤੁਯ੍ਹਂ ਦਦਾਮਿ. ਇਦਂ ਦੁਸ੍ਸਂ ਨਿਵਾਸਯਾਤਿ ਇਦਂ ਮਮ ਉਤ੍ਤਰਿਸਾਟਕਂ ਤ੍ਵਂ ਨਿਵਾਸੇਹਿ. ਸੋਭਨੇਤਿ ਸੁਨ੍ਦਰਰੂਪੇ.

ਏਵਞ੍ਚ ਪਨ ਵਤ੍ਵਾ ਅਤ੍ਤਨੋ ਉਤ੍ਤਰਿਸਾਟਕਂ ਤਸ੍ਸਾ ਉਪਨੇਸਿ, ਸਾ ਤਥਾ ਦਿਯ੍ਯਮਾਨਸ੍ਸ ਅਤ੍ਤਨੋ ਅਨੁਪਕਪ੍ਪਨੀਯਤਞ੍ਚ, ਯਥਾ ਦਿਯ੍ਯਮਾਨਂ ਉਪਕਪ੍ਪਤਿ, ਤਞ੍ਚ ਦਸ੍ਸੇਨ੍ਤੀ –

‘‘ਹਤ੍ਥੇਨ ਹਤ੍ਥੇ ਤੇ ਦਿਨ੍ਨਂ, ਨ ਮਯ੍ਹਂ ਉਪਕਪ੍ਪਤਿ;

ਏਸੇਤ੍ਥੁਪਾਸਕੋ ਸਦ੍ਧੋ, ਸਮ੍ਮਾਸਮ੍ਬੁਦ੍ਧਸਾਵਕੋ.

‘‘ਏਤਂ ਅਚ੍ਛਾਦਯਿਤ੍ਵਾਨ, ਮਮ ਦਕ੍ਖਿਣਮਾਦਿਸ;

ਤਥਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’’ਤਿ. –

ਗਾਥਾਦ੍ਵਯਮਾਹ ¶ . ਤਤ੍ਥ ਹਤ੍ਥੇਨ ਹਤ੍ਥੇ ਤੇ ਦਿਨ੍ਨਂ, ਨ ਮਯ੍ਹਂ ਉਪਕਪ੍ਪਤੀਤਿ, ਮਾਰਿਸ, ਤਵ ਹਤ੍ਥੇਨ ਮਮ ਹਤ੍ਥੇ ਤਯਾ ਦਿਨ੍ਨਂ ਨ ਮਯ੍ਹਂ ਉਪਕਪ੍ਪਤਿ ਨ ਵਿਨਿਯੁਜ੍ਜਤਿ, ਉਪਭੋਗਯੋਗ੍ਗਂ ਨ ਹੋਤੀਤਿ ਅਤ੍ਥੋ. ਏਸੇਤ੍ਥੁਪਾਸਕੋ ਸਦ੍ਧੋਤਿ ਏਸੋ ਰਤਨਤ੍ਤਯਂ ਉਦ੍ਦਿਸ੍ਸ ਸਰਣਗਮਨੇਨ ਉਪਾਸਕੋ ਕਮ੍ਮਫਲਸਦ੍ਧਾਯ ਚ ਸਮਨ੍ਨਾਗਤਤ੍ਤਾ ਸਦ੍ਧੋ ਏਤ੍ਥ ਏਤਸ੍ਮਿਂ ਜਨਸਮੂਹੇ ਅਤ੍ਥਿ. ਏਤਂ ਅਚ੍ਛਾਦਯਿਤ੍ਵਾਨ, ਮਮ ਦਕ੍ਖਿਣਮਾਦਿਸਾਤਿ ਏਤਂ ਉਪਾਸਕਂ ਮਮ ਦਿਯ੍ਯਮਾਨਂ ਸਾਟਕਂ ਪਰਿਦਹਾਪੇਤ੍ਵਾ ਤਂ ਦਕ੍ਖਿਣਂ ਮਯ੍ਹਂ ਆਦਿਸ ਪਤ੍ਤਿਦਾਨਂ ਦੇਹਿ. ਤਥਾਹਂ ਸੁਖਿਤਾ ਹੇਸ੍ਸਨ੍ਤਿ ਤਥਾ ਕਤੇ ਅਹਂ ਸੁਖਿਤਾ ਦਿਬ੍ਬਵਤ੍ਥਨਿਵਤ੍ਥਾ ਸੁਖਪ੍ਪਤ੍ਤਾ ਭਵਿਸ੍ਸਾਮੀਤਿ.

ਤਂ ਸੁਤ੍ਵਾ ਵਾਣਿਜਾ ਤਂ ਉਪਾਸਕਂ ਨ੍ਹਾਪੇਤ੍ਵਾ ਵਿਲਿਮ੍ਪੇਤ੍ਵਾ ਵਤ੍ਥਯੁਗੇਨ ਅਚ੍ਛਾਦੇਸੁਂ. ਤਮਤ੍ਥਂ ਪਕਾਸੇਨ੍ਤਾ ਸਙ੍ਗੀਤਿਕਾਰਾ –

‘‘ਤਞ੍ਚ ਤੇ ਨ੍ਹਾਪਯਿਤ੍ਵਾਨ, ਵਿਲਿਮ੍ਪੇਤ੍ਵਾਨ ਵਾਣਿਜਾ;

ਵਤ੍ਥੇਹਚ੍ਛਾਦਯਿਤ੍ਵਾਨ, ਤਸ੍ਸਾ ਦਕ੍ਖਿਣਮਾਦਿਸੁਂ.

‘‘ਸਮਨਨ੍ਤਰਾਨੁਦ੍ਦਿਟ੍ਠੇ ¶ , ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

‘‘ਤਤੋ ¶ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਹਸਨ੍ਤੀ ਵਿਮਾਨਾ ਨਿਕ੍ਖਮਿ, ਦਕ੍ਖਿਣਾਯ ਇਦਂ ਫਲ’’ਨ੍ਤਿ. –

੬੩. ਤਤ੍ਥ ਤਨ੍ਤਿ ਤਂ ਉਪਾਸਕਂ. ਚ-ਸਦ੍ਦੋ ਨਿਪਾਤਮਤ੍ਤਂ. ਤੇਤਿ ਤੇ ਵਾਣਿਜਾਤਿ ਯੋਜਨਾ. ਵਿਲਿਮ੍ਪੇਤ੍ਵਾਨਾਤਿ ਉਤ੍ਤਮੇਨ ਗਨ੍ਧੇਨ ਵਿਲਿਮ੍ਪੇਤ੍ਵਾ. ਵਤ੍ਥੇਹਚ੍ਛਾਦਯਿਤ੍ਵਾਨਾਤਿ ਵਣ੍ਣਗਨ੍ਧਰਸਸਮ੍ਪਨ੍ਨਂ ਸਬ੍ਯਞ੍ਜਨਂ ਭੋਜਨਂ ਭੋਜੇਤ੍ਵਾ ਨਿਵਾਸਨਂ ਉਤ੍ਤਰੀਯਨ੍ਤਿ ਦ੍ਵੀਹਿ ਵਤ੍ਥੇਹਿ ਅਚ੍ਛਾਦੇਸੁਂ, ਦ੍ਵੇ ਵਤ੍ਥਾਨਿ ਅਦਂਸੂਤਿ ਅਤ੍ਥੋ. ਤਸ੍ਸਾ ਦਕ੍ਖਿਣਮਾਦਿਸੁਨ੍ਤਿ ਤਸ੍ਸਾ ਪੇਤਿਯਾ ਤਂ ਦਕ੍ਖਿਣਂ ਆਦਿਸਿਂਸੁ.

੬੪. ਸਮਨਨ੍ਤਰਾਨੁਦ੍ਦਿਟ੍ਠੇਤਿ ਅਨੂ-ਤਿ ਨਿਪਾਤਮਤ੍ਤਂ, ਤਸ੍ਸਾ ਦਕ੍ਖਿਣਾਯ ਉਦ੍ਦਿਟ੍ਠਸਮਨਨ੍ਤਰਮੇਵ. ਵਿਪਾਕੋ ਉਦਪਜ੍ਜਥਾਤਿ ਤਸ੍ਸਾ ਪੇਤਿਯਾ ਵਿਪਾਕੋ ਦਕ੍ਖਿਣਾਯ ¶ ਫਲਂ ਉਪ੍ਪਜ੍ਜਿ. ਕੀਦਿਸੋਤਿ ਪੇਤੀ ਆਹ ਭੋਜਨਚ੍ਛਾਦਨਪਾਨੀਯਨ੍ਤਿ. ਨਾਨਪ੍ਪਕਾਰਂ ਦਿਬ੍ਬਭੋਜਨਸਦਿਸਂ ਭੋਜਨਞ੍ਚ ਨਾਨਾਵਿਰਾਗਵਣ੍ਣਸਮੁਜ੍ਜਲਂ ਦਿਬ੍ਬਵਤ੍ਥਸਦਿਸਂ ਵਤ੍ਥਞ੍ਚ ਅਨੇਕਵਿਧਂ ਪਾਨਕਞ੍ਚ ਦਕ੍ਖਿਣਾਯ ਇਦਂ ਈਦਿਸਂ ਫਲਂ ਉਦਪਜ੍ਜਥਾਤਿ ਯੋਜਨਾ.

੬੫. ਤਤੋਤਿ ਯਥਾਵੁਤ੍ਤਭੋਜਨਾਦਿਪਟਿਲਾਭਤੋ ਪਚ੍ਛਾ. ਸੁਦ੍ਧਾਤਿ ਨ੍ਹਾਨੇਨ ਸੁਦ੍ਧਸਰੀਰਾ. ਸੁਚਿਵਸਨਾਤਿ ਸੁਵਿਸੁਦ੍ਧਵਤ੍ਥਨਿਵਤ੍ਥਾ. ਕਾਸਿਕੁਤ੍ਤਮਧਾਰਿਨੀਤਿ ਕਾਸਿਕਵਤ੍ਥਤੋਪਿ ਉਤ੍ਤਮਵਤ੍ਥਧਾਰਿਨੀ. ਹਸਨ੍ਤੀਤਿ ‘‘ਪਸ੍ਸਥ ਤਾਵ ਤੁਮ੍ਹਾਕਂ ਦਕ੍ਖਿਣਾਯ ਇਦਂ ਫਲਵਿਸੇਸ’’ਨ੍ਤਿ ਪਕਾਸਨਵਸੇਨ ਹਸਮਾਨਾ ਵਿਮਾਨਤੋ ਨਿਕ੍ਖਮਿ.

ਅਥ ਤੇ ਵਾਣਿਜਾ ਏਵਂ ਪਚ੍ਚਕ੍ਖਤੋ ਪੁਞ੍ਞਫਲਂ ਦਿਸ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਤਸ੍ਮਿਂ ਉਪਾਸਕੇ ਸਞ੍ਜਾਤਗਾਰਵਬਹੁਮਾਨਾ ਕਤਞ੍ਜਲੀ ਤਂ ਪਯਿਰੁਪਾਸਿਂਸੁ. ਸੋਪਿ ਤੇ ਧਮ੍ਮਕਥਾਯ ਭਿਯ੍ਯੋਸੋਮਤ੍ਤਾਯ ਪਸਾਦੇਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਪੇਸਿ. ਤੇ ਤਾਯ ਵਿਮਾਨਪੇਤਿਯਾ ਕਤਕਮ੍ਮਂ –

‘‘ਸੁਚਿਤ੍ਤਰੂਪਂ ¶ ਰੁਚਿਰਂ, ਵਿਮਾਨਂ ਤੇ ਪਭਾਸਤਿ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਇਮਾਯ ¶ ਗਾਥਾਯ ਪੁਚ੍ਛਿਂਸੁ. ਤਤ੍ਥ ਸੁਚਿਤ੍ਤਰੂਪਨ੍ਤਿ ਹਤ੍ਥਿਅਸ੍ਸਇਤ੍ਥਿਪੁਰਿਸਾਦਿਵਸੇਨ ਚੇਵ ਮਾਲਾਕਮ੍ਮਲਤਾਕਮ੍ਮਾਦਿਵਸੇਨ ਚ ਸੁਟ੍ਠੁ ਵਿਹਿਤਚਿਤ੍ਤਰੂਪਂ. ਰੁਚਿਰਨ੍ਤਿ ਰਮਣੀਯਂ ਦਸ੍ਸਨੀਯਂ. ਕਿਸ੍ਸ ਕਮ੍ਮਸ੍ਸਿਦਂ ਫਲਨ੍ਤਿ ਕੀਦਿਸਸ੍ਸ ਕਮ੍ਮਸ੍ਸ, ਕਿਂ ਦਾਨਮਯਸ੍ਸ ਉਦਾਹੁ ਸੀਲਮਯਸ੍ਸ ਇਦਂ ਫਲਨ੍ਤਿ ਅਤ੍ਥੋ.

ਸਾ ਤੇਹਿ ਏਵਂ ਪੁਟ੍ਠਾ ‘‘ਮਯਾ ਕਤਸ੍ਸ ਪਰਿਤ੍ਤਕਸ੍ਸ ਕੁਸਲਕਮ੍ਮਸ੍ਸ ਤਾਵ ਇਦਂ ਫਲਂ, ਅਕੁਸਲਕਮ੍ਮਸ੍ਸ ਪਨ ਆਯਤਿਂ ਨਿਰਯੇ ਏਦਿਸਂ ਭਵਿਸ੍ਸਤੀ’’ਤਿ ਤਦੁਭਯਂ ਆਚਿਕ੍ਖਨ੍ਤੀ –

‘‘ਭਿਕ੍ਖੁਨੋ ਚਰਮਾਨਸ੍ਸ, ਦੋਣਿਨਿਮ੍ਮਜ੍ਜਨਿਂ ਅਹਂ;

ਅਦਾਸਿਂ ਉਜੁਭੂਤਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਤਸ੍ਸ ਕਮ੍ਮਸ੍ਸ ਕੁਸਲਸ੍ਸ, ਵਿਪਾਕਂ ਦੀਘਮਨ੍ਤਰਂ;

ਅਨੁਭੋਮਿ ਵਿਮਾਨਸ੍ਮਿਂ, ਤਞ੍ਚ ਦਾਨਿ ਪਰਿਤ੍ਤਕਂ.

‘‘ਉਦ੍ਧਂ ¶ ਚਤੂਹਿ ਮਾਸੇਹਿ, ਕਾਲਂਕਿਰਿਯਾ ਭਵਿਸ੍ਸਤਿ;

ਏਕਨ੍ਤਕਟੁਕਂ ਘੋਰਂ, ਨਿਰਯਂ ਪਪਤਿਸ੍ਸਹਂ.

‘‘ਚਤੁਕ੍ਕਣ੍ਣਂ ਚਤੁਦ੍ਵਾਰਂ, ਵਿਭਤ੍ਤਂ ਭਾਗਸੋ ਮਿਤਂ;

ਅਯੋਪਾਕਾਰਪਰਿਯਨ੍ਤਂ, ਅਯਸਾ ਪਟਿਕੁਜ੍ਜਿਤਂ.

‘‘ਤਸ੍ਸ ਅਯੋਮਯਾ ਭੂਮਿ, ਜਲਿਤਾ ਤੇਜਸਾ ਯੁਤਾ;

ਸਮਨ੍ਤਾ ਯੋਜਨਸਤਂ, ਫਰਿਤ੍ਵਾ ਤਿਟ੍ਠਤਿ ਸਬ੍ਬਦਾ.

‘‘ਤਤ੍ਥਾਹਂ ਦੀਘਮਦ੍ਧਾਨਂ, ਦੁਕ੍ਖਂ ਵੇਦਿਸ੍ਸ ਵੇਦਨਂ;

ਫਲਞ੍ਚ ਪਾਪਕਮ੍ਮਸ੍ਸ, ਤਸ੍ਮਾ ਸੋਚਾਮਹਂ ਭੁਸ’’ਨ੍ਤਿ. – ਗਾਥਾਯੋ ਅਭਾਸਿ;

੬੭. ਤਤ੍ਥ ਭਿਕ੍ਖੁਨੋ ਚਰਮਾਨਸ੍ਸਾਤਿ ਅਞ੍ਞਤਰਸ੍ਸ ਭਿਨ੍ਨਕਿਲੇਸਸ੍ਸ ਭਿਕ੍ਖੁਨੋ ਭਿਕ੍ਖਾਯ ਚਰਨ੍ਤਸ੍ਸ. ਦੋਣਿਨਿਮ੍ਮਜ੍ਜਨਿਨ੍ਤਿ ਵਿਸ੍ਸਨ੍ਦਮਾਨਤੇਲਂ ਪਿਞ੍ਞਾਕਂ. ਉਜੁਭੂਤਸ੍ਸਾਤਿ ਚਿਤ੍ਤਜਿਮ੍ਹਵਙ੍ਕਕੁਟਿਲਭਾਵਕਰਾਨਂ ¶ ਕਿਲੇਸਾਨਂ ਅਭਾਵੇਨ ¶ ਉਜੁਭਾਵਪ੍ਪਤ੍ਤਸ੍ਸ. ਵਿਪ੍ਪਸਨ੍ਨੇਨ ਚੇਤਸਾਤਿ ਕਮ੍ਮਫਲਸਦ੍ਧਾਯ ਸੁਟ੍ਠੁ ਪਸਨ੍ਨੇਨ ਚਿਤ੍ਤੇਨ.

੬੮-੬੯. ਦੀਘਮਨ੍ਤਰਨ੍ਤਿ ਮ-ਕਾਰੋ ਪਦਸਨ੍ਧਿਕਰੋ, ਦੀਘਅਨ੍ਤਰਂ ਦੀਘਕਾਲਨ੍ਤਿ ਅਤ੍ਥੋ. ਤਞ੍ਚ ਦਾਨਿ ਪਰਿਤ੍ਤਕਨ੍ਤਿ ਤਞ੍ਚ ਪੁਞ੍ਞਫਲਂ ਵਿਪਕ੍ਕਵਿਪਾਕਤ੍ਤਾ ਕਮ੍ਮਸ੍ਸ ਇਦਾਨਿ ਪਰਿਤ੍ਤਕਂ ਅਪ੍ਪਾਵਸੇਸਂ, ਨ ਚਿਰੇਨੇਵ ਇਤੋ ਚਵਿਸ੍ਸਾਮੀਤਿ ਅਤ੍ਥੋ. ਤੇਨਾਹ ‘‘ਉਦ੍ਧਂ ਚਤੂਹਿ ਮਾਸੇਹਿ, ਕਾਲਂਕਿਰਿਯਾ ਭਵਿਸ੍ਸਤੀ’’ਤਿ ਚਤੂਹਿ ਮਾਸੇਹਿ ਉਦ੍ਧਂ ਚਤੁਨ੍ਨਂ ਮਾਸਾਨਂ ਉਪਰਿ ਪਞ੍ਚਮੇ ਮਾਸੇ ਮਮ ਕਾਲਂਕਿਰਿਯਾ ਭਵਿਸ੍ਸਤੀਤਿ ਦਸ੍ਸੇਤਿ. ਏਕਨ੍ਤਕਟੁਕਨ੍ਤਿ ਏਕਨ੍ਤੇਨੇਵ ਅਨਿਟ੍ਠਛਫਸ੍ਸਾਯਤਨਿਕਭਾਵਤੋ ਏਕਨ੍ਤਦੁਕ੍ਖਨ੍ਤਿ ਅਤ੍ਥੋ. ਘੋਰਨ੍ਤਿ ਦਾਰੁਣਂ. ਨਿਰਯਨ੍ਤਿ ਨਤ੍ਥਿ ਏਤ੍ਥ ਅਯੋ ਸੁਖਨ੍ਤਿ ਕਤ੍ਵਾ ‘‘ਨਿਰਯ’’ਨ੍ਤਿ ਲਦ੍ਧਨਾਮਂ ਨਰਕਂ. ਪਪਤਿਸ੍ਸਹਨ੍ਤਿ ਪਪਹਿਸ੍ਸਾਮਿ ਅਹਂ.

੭੦. ‘‘ਨਿਰਯ’’ਨ੍ਤਿ ਚੇਤ੍ਥ ਅਵੀਚਿਮਹਾਨਿਰਯਸ੍ਸ ਅਧਿਪ੍ਪੇਤਤ੍ਤਾ ਤਂ ਸਰੂਪਤੋ ਦਸ੍ਸੇਤੁਂ ‘‘ਚਤੁਕ੍ਕਣ੍ਣ’’ਨ੍ਤਿਆਦਿਮਾਹ. ਤਤ੍ਥ ਚਤੁਕ੍ਕਣ੍ਣਨ੍ਤਿ ਚਤੁਕ੍ਕੋਣਂ. ਚਤੁਦ੍ਵਾਰਨ੍ਤਿ ਚਤੂਸੁ ਦਿਸਾਸੁ ਚਤੂਹਿ ਦ੍ਵਾਰੇਹਿ ਯੁਤ੍ਤਂ. ਵਿਭਤ੍ਤਨ੍ਤਿ ਸੁਟ੍ਠੁ ਵਿਭਤ੍ਤਂ.

ਭਾਗਸੋਤਿ ¶ ਭਾਗਤੋ. ਮਿਤਨ੍ਤਿ ਤੁਲਿਤਂ. ਅਯੋਪਾਕਾਰਪਰਿਯਨ੍ਤਨ੍ਤਿ ਅਯੋਮਯੇਨ ਪਾਕਾਰੇਨ ਪਰਿਕ੍ਖਿਤ੍ਤਂ. ਅਯਸਾ ਪਟਿਕੁਜ੍ਜਿਤਨ੍ਤਿ ਅਯੋਪਟਲੇਨੇਵ ਉਪਰਿ ਪਿਹਿਤਂ.

੭੧-੭੨. ਤੇਜਸਾ ਯੁਤਾਤਿ ਸਮਨ੍ਤਤੋ ਸਮੁਟ੍ਠਿਤਜਾਲੇਨ ਮਹਤਾ ਅਗ੍ਗਿਨਾ ਨਿਰਨ੍ਤਰਂ ਸਮਾਯੁਤਜਾਲਾ. ਸਮਨ੍ਤਾ ਯੋਜਨਸਤਨ੍ਤਿ ਏਵਂ ਪਨ ਸਮਨ੍ਤਾ ਬਹਿ ਸਬ੍ਬਦਿਸਾਸੁ ਯੋਜਨਸਤਂ ਯੋਜਨਾਨਂ ਸਤਂ. ਸਬ੍ਬਦਾਤਿ ਸਬ੍ਬਕਾਲਂ. ਫਰਿਤ੍ਵਾ ਤਿਟ੍ਠਤੀਤਿ ਬ੍ਯਾਪੇਤ੍ਵਾ ਤਿਟ੍ਠਤਿ. ਤਤ੍ਥਾਤਿ ਤਸ੍ਮਿਂ ਮਹਾਨਿਰਯੇ. ਵੇਦਿਸ੍ਸਨ੍ਤਿ ਵੇਦਿਸ੍ਸਾਮਿ ਅਨੁਭਵਿਸ੍ਸਾਮਿ. ਫਲਞ੍ਚ ਪਾਪਕਮ੍ਮਸ੍ਸਾਤਿ ਇਦਂ ਈਦਿਸਂ ਦੁਕ੍ਖਾਨੁਭਵਨਂ ਮਹਾ ਏਵਂ ਕਤਸ੍ਸ ਪਾਪਸ੍ਸ ਕਮ੍ਮਸ੍ਸ ਫਲਨ੍ਤਿ ਅਤ੍ਥੋ.

ਏਵਂ ਤਾਯ ਅਤ੍ਤਨਾ ਕਤਕਮ੍ਮਫਲੇ ਆਯਤਿਂ ਨੇਰਯਿਕਭਯੇ ਚ ਪਕਾਸਿਤੇ ¶ ਸੋ ਉਪਾਸਕੋ ਕਰੁਣਾਸਞ੍ਚੋਦਿਤਮਾਨਸੋ ‘‘ਹਨ੍ਦਸ੍ਸਾਹਂ ਪਤਿਟ੍ਠਾ ਭਵੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਆਹ – ‘‘ਦੇਵਤੇ, ਤ੍ਵਂ ਮਯ੍ਹਂ ਏਕਸ੍ਸ ਦਾਨਵਸੇਨ ਸਬ੍ਬਕਾਮਸਮਿਦ੍ਧਾ ਉਟ੍ਠਾਰਸਮ੍ਪਤ੍ਤਿਯੁਤ੍ਤਾ ਜਾਤਾ, ਇਦਾਨਿ ਪਨ ਇਮੇਸਂ ਉਪਾਸਕਾਨਂ ਦਾਨਂ ਦਤ੍ਵਾ ਸਤ੍ਥੁ ਚ ਗੁਣੇ ਅਨੁਸ੍ਸਰਿਤ੍ਵਾ ਨਿਰਯੂਪਪਤ੍ਤਿਤੋ ਮੁਚ੍ਚਿਸ੍ਸਸੀ’’ਤਿ. ਸਾ ਪੇਤੀ ਹਟ੍ਠਤੁਟ੍ਠਾ ‘‘ਸਾਧੂ’’ਤਿ ਵਤ੍ਵਾ ਤੇ ਦਿਬ੍ਬੇਨ ਅਨ੍ਨਪਾਨੇਨ ਸਨ੍ਤਪ੍ਪੇਤ੍ਵਾ ਦਿਬ੍ਬਾਨਿ ਵਤ੍ਥਾਨਿ ਨਾਨਾਵਿਧਾਨਿ ¶ ਰਤਨਾਨਿ ਚ ਅਦਾਸਿ, ਭਗਵਨ੍ਤਞ੍ਚ ਉਦ੍ਦਿਸ੍ਸ ਦਿਬ੍ਬਂ ਦੁਸ੍ਸਯੁਗਂ ਤੇਸਂ ਹਤ੍ਥੇ ਦਤ੍ਵਾ ‘‘ਅਞ੍ਞਤਰਾ, ਭਨ੍ਤੇ, ਵਿਮਾਨਪੇਤੀ ਭਗਵਤੋ ਪਾਦੇ ਸਿਰਸਾ ਵਨ੍ਦਤੀਤਿ ਸਾਵਤ੍ਥਿਂ ਗਨ੍ਤ੍ਵਾ ਸਤ੍ਥਾਰਂ ਮਮ ਵਚਨੇਨ ਵਨ੍ਦਥਾ’’ਤਿ ਵਨ੍ਦਨਞ੍ਚ ਪੇਸੇਸਿ, ਤਞ੍ਚ ਨਾਵਂ ਅਤ੍ਤਨੋ ਇਦ੍ਧਾਨੁਭਾਵੇਨ ਤੇਹਿ ਇਚ੍ਛਿਤਪਟ੍ਟਨਂ ਤਂ ਦਿਵਸਮੇਵ ਉਪਨੇਸਿ.

ਅਥ ਤੇ ਵਾਣਿਜਾ ਤਤੋ ਪਟ੍ਟਨਤੋ ਅਨੁਕ੍ਕਮੇਨ ਸਾਵਤ੍ਥਿਂ ਪਤ੍ਵਾ ਜੇਤਵਨਂ ਪਵਿਸਿਤ੍ਵਾ ਸਤ੍ਥੁ ਤਂ ਦੁਸ੍ਸਯੁਗਂ ਦਤ੍ਵਾ ਵਨ੍ਦਨਞ੍ਚ ਨਿਵੇਦੇਤ੍ਵਾ ਆਦਿਤੋ ਪਟ੍ਠਾਯ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸੁਂ. ਸਤ੍ਥਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਜਾਤਾ. ਤੇ ਪਨ ਉਪਾਸਕਾ ਦੁਤਿਯਦਿਵਸੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਤਸ੍ਸਾ ਦਕ੍ਖਿਣਮਾਦਿਸਿਂਸੁ. ਸਾ ਚ ਤਤੋ ਪੇਤਲੋਕਤੋ ਚਵਿਤ੍ਵਾ ਵਿਵਿਧਰਤਨਵਿਜ੍ਜੋਤਿਤੇ ਤਾਵਤਿਂਸਭਵਨੇ ਕਨਕਵਿਮਾਨੇ ਅਚ੍ਛਰਾਸਹਸ੍ਸਪਰਿਵਾਰਾ ਨਿਬ੍ਬਤ੍ਤੀਤਿ.

ਖਲ੍ਲਾਟਿਯਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਪੁਰਤੋਵ ¶ ਸੇਤੇਨ ਪਲੇਤਿ ਹਤ੍ਥਿਨਾਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਦ੍ਵੇ ਬ੍ਰਾਹ੍ਮਣਪੇਤੇ ਆਰਮ੍ਭ ਵੁਤ੍ਤਂ. ਆਯਸ੍ਮਾ ਕਿਰ ਸਂਕਿਚ੍ਚੋ ਸਤ੍ਤਵਸ੍ਸਿਕੋ ਖੁਰਗ੍ਗੇਯੇਵ ਅਰਹਤ੍ਤਂ ਪਤ੍ਵਾ ਸਾਮਣੇਰਭੂਮਿਯਂ ਠਿਤੋ ਤਿਂਸਮਤ੍ਤੇਹਿ ਭਿਕ੍ਖੂਹਿ ¶ ਸਦ੍ਧਿਂ ਅਰਞ੍ਞਾਯਤਨੇ ਵਸਨ੍ਤੋ ਤੇਸਂ ਭਿਕ੍ਖੂਨਂ ਪਞ੍ਚਨ੍ਨਂ ਚੋਰਸਤਾਨਂ ਹਤ੍ਥਤੋ ਆਗਤਂ ਮਰਣਮ੍ਪਿ ਬਾਹਿਤ੍ਵਾ ਤੇ ਚ ਚੋਰੇ ਦਮੇਤ੍ਵਾ ਪਬ੍ਬਾਜੇਤ੍ਵਾ ਸਤ੍ਥੁ ਸਨ੍ਤਿਕਂ ਅਗਮਾਸਿ. ਸਤ੍ਥਾ ਤੇਸਂ ਭਿਕ੍ਖੂਨਂ ਧਮ੍ਮਂ ਦੇਸੇਸਿ, ਦੇਸਨਾਵਸਾਨੇ ਤੇ ਭਿਕ੍ਖੂ ਅਰਹਤ੍ਤਂ ਪਾਪੁਣਿਂਸੁ. ਅਥਾਯਸ੍ਮਾ ਸਂਕਿਚ੍ਚੋ ਪਰਿਪੁਣ੍ਣਵਸ੍ਸੋ ਲਦ੍ਧੂਪਸਮ੍ਪਦੋ ਤੇਹਿ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਬਾਰਾਣਸਿਂ ਗਨ੍ਤ੍ਵਾ ਇਸਿਪਤਨੇ ਵਿਹਾਸਿ. ਮਨੁਸ੍ਸਾ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਸਨ੍ਨਮਾਨਸਾ ਵੀਥਿਪਟਿਪਾਟਿਯਾ ਵਗ੍ਗਵਗ੍ਗਾ ਹੁਤ੍ਵਾ ਆਗਨ੍ਤੁਕਦਾਨਂ ਅਦਂਸੁ. ਤਤ੍ਥ ਅਞ੍ਞਤਰੋ ਉਪਾਸਕੋ ਮਨੁਸ੍ਸੇ ਨਿਚ੍ਚਭਤ੍ਤੇ ਸਮਾਦਪੇਸਿ, ਤੇ ਯਥਾਬਲਂ ਨਿਚ੍ਚਭਤ੍ਤਂ ਪਟ੍ਠਪੇਸੁਂ.

ਤੇਨ ਚ ਸਮਯੇਨ ਬਾਰਾਣਸਿਯਂ ਅਞ੍ਞਤਰਸ੍ਸ ਮਿਚ੍ਛਾਦਿਟ੍ਠਿਕਸ੍ਸ ਬ੍ਰਾਹ੍ਮਣਸ੍ਸ ਦ੍ਵੇ ਪੁਤ੍ਤਾ ਏਕਾ ਚ ਧੀਤਾ ਅਹੇਸੁਂ. ਤੇਸੁ ਜੇਟ੍ਠਪੁਤ੍ਤੋ ਤਸ੍ਸ ਉਪਾਸਕਸ੍ਸ ਮਿਤ੍ਤੋ ਅਹੋਸਿ. ਸੋ ਤਂ ਗਹੇਤ੍ਵਾ ਆਯਸ੍ਮਤੋ ਸਂਕਿਚ੍ਚਸ੍ਸ ਸਨ੍ਤਿਕਂ ਅਗਮਾਸਿ. ਆਯਸ੍ਮਾ ਸਂਕਿਚ੍ਚੋ ਤਸ੍ਸ ਧਮ੍ਮਂ ਦੇਸੇਸਿ. ਸੋ ਮੁਦੁਚਿਤ੍ਤੋ ਅਹੋਸਿ. ਅਥ ਨਂ ਸੋ ਉਪਾਸਕੋ ਆਹ – ‘‘ਤ੍ਵਂ ਏਕਸ੍ਸ ਭਿਕ੍ਖੁਨੋ ਨਿਚ੍ਚਭਤ੍ਤਂ ਦੇਹੀ’’ਤਿ ¶ . ‘‘ਅਨਾਚਿਣ੍ਣਂ ਅਮ੍ਹਾਕਂ ਬ੍ਰਾਹ੍ਮਣਾਨਂ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਨਿਚ੍ਚਭਤ੍ਤਦਾਨਂ, ਤਸ੍ਮਾ ਨਾਹਂ ਦਸ੍ਸਾਮੀ’’ਤਿ. ‘‘ਕਿਂ ਮਯ੍ਹਮ੍ਪਿ ਭਤ੍ਤਂ ਨ ਦਸ੍ਸਸੀ’’ਤਿ? ‘‘ਕਥਂ ਨ ਦਸ੍ਸਾਮੀ’’ਤਿ ਆਹ. ‘‘ਯਦਿ ਏਵਂ ਯਂ ਮਯ੍ਹਂ ਦੇਸਿ, ਤਂ ਏਕਸ੍ਸ ਭਿਕ੍ਖੁਸ੍ਸ ਦੇਹੀ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਦੁਤਿਯਦਿਵਸੇ ਪਾਤੋਵ ਵਿਹਾਰਂ ਗਨ੍ਤ੍ਵਾ ਏਕਂ ਭਿਕ੍ਖੁਂ ਆਨੇਤ੍ਵਾ ਭੋਜੇਸਿ.

ਏਵਂ ਗਚ੍ਛਨ੍ਤੇ ਕਾਲੇ ਭਿਕ੍ਖੂਨਂ ਪਟਿਪਤ੍ਤਿਂ ਦਿਸ੍ਵਾ ਧਮ੍ਮਞ੍ਚ ਸੁਣਿਤ੍ਵਾ ਤਸ੍ਸ ਕਨਿਟ੍ਠਭਾਤਾ ਚ ਭਗਿਨੀ ਚ ਸਾਸਨੇ ਅਭਿਪ੍ਪਸਨ੍ਨਾ ਪੁਞ੍ਞਕਮ੍ਮਰਤਾ ਚ ਅਹੇਸੁਂ. ਏਵਂ ਤੇ ਤਯੋ ਜਨਾ ਯਥਾਵਿਭਵਂ ਦਾਨਾਨਿ ਦੇਨ੍ਤਾ ਸਮਣਬ੍ਰਾਹ੍ਮਣੇ ਸਕ੍ਕਰਿਂਸੁ ਗਰੁਂ ਕਰਿਂਸੁ ਮਾਨੇਸੁਂ ਪੂਜੇਸੁਂ. ਮਾਤਾਪਿਤਰੋ ਪਨ ਨੇਸਂ ਅਸ੍ਸਦ੍ਧਾ ¶ ਅਪ੍ਪਸਨ੍ਨਾ ਸਮਣਬ੍ਰਾਹ੍ਮਣੇਸੁ ਅਗਾਰਵਾ ਪੁਞ੍ਞਕਿਰਿਯਾਯ ਅਨਾਦਰਾ ਅਚ੍ਛਨ੍ਦਿਕਾ ਅਹੇਸੁਂ. ਤੇਸਂ ਧੀਤਰਂ ਦਾਰਿਕਂ ਮਾਤੁਲਪੁਤ੍ਤਸ੍ਸਤ੍ਥਾਯ ¶ ਞਾਤਕਾ ਵਾਰੇਸੁਂ. ਸੋ ਚ ਆਯਸ੍ਮਤੋ ਸਂਕਿਚ੍ਚਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਂਵੇਗਜਾਤੋ ਪਬ੍ਬਜਿਤ੍ਵਾ ਨਿਚ੍ਚਂ ਅਤ੍ਤਨੋ ਮਾਤੁ-ਗੇਹਂ ਭੁਞ੍ਜਿਤੁਂ ਗਚ੍ਛਤਿ. ਤਂ ਮਾਤਾ ਅਤ੍ਤਨੋ ਭਾਤੁ-ਧੀਤਾਯ ਦਾਰਿਕਾਯ ਪਲੋਭੇਤਿ. ਤੇਨ ਸੋ ਉਕ੍ਕਣ੍ਠਿਤੋ ਹੁਤ੍ਵਾ ਉਪਜ੍ਝਾਯਂ ਉਪਸਙ੍ਗਮਿਤ੍ਵਾ ਆਹ – ‘‘ਉਪ੍ਪਬ੍ਬਜਿਸ੍ਸਾਮਹਂ, ਭਨ੍ਤੇ, ਅਨੁਜਾਨਾਥ ਮ’’ਨ੍ਤਿ. ਉਪਜ੍ਝਾਯੋ ਤਸ੍ਸ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਆਹ – ‘‘ਸਾਮਣੇਰ, ਮਾਸਮਤ੍ਤਂ ਆਗਮੇਹੀ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਮਾਸੇ ਅਤਿਕ੍ਕਨ੍ਤੇ ਤਥੇਵ ਆਰੋਚੇਸਿ. ਉਪਜ੍ਝਾਯੋ ਪੁਨ ‘‘ਅਡ੍ਢਮਾਸਂ ਆਗਮੇਹੀ’’ਤਿ ਆਹ. ਅਡ੍ਢਮਾਸੇ ਅਤਿਕ੍ਕਨ੍ਤੇ ਤਥੇਵ ਵੁਤ੍ਤੇ ਪੁਨ ‘‘ਸਤ੍ਤਾਹਂ ਆਗਮੇਹੀ’’ਤਿ ਆਹ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿ. ਅਥ ਤਸ੍ਮਿਂ ਅਨ੍ਤੋਸਤ੍ਤਾਹੇ ਸਾਮਣੇਰਸ੍ਸ ਮਾਤੁਲਾਨਿਯਾ ਗੇਹਂ ਵਿਨਟ੍ਠਚ੍ਛਦਨਂ ਜਿਣ੍ਣਂ ਦੁਬ੍ਬਲਕੁਟ੍ਟਂ ਵਾਤਵਸ੍ਸਾਭਿਹਤਂ ਪਰਿਪਤਿ. ਤਤ੍ਥ ਬ੍ਰਾਹ੍ਮਣੋ ਬ੍ਰਾਹ੍ਮਣੀ ਦ੍ਵੇ ਪੁਤ੍ਤਾ ਘੀਤਾ ਚ ਗੇਹੇਨ ਅਜ੍ਝੋਤ੍ਥਟਾ ਕਾਲਮਕਂਸੁ. ਤੇਸੁ ਬ੍ਰਾਹ੍ਮਣੋ ਬ੍ਰਾਹ੍ਮਣੀ ਚ ਪੇਤਯੋਨਿਯਂ ਨਿਬ੍ਬਤ੍ਤਿਂਸੁ, ਦ੍ਵੇ ਪੁਤ੍ਤਾ ਧੀਤਾ ਚ ਭੁਮ੍ਮਦੇਵੇਸੁ. ਤੇਸੁ ਜੇਟ੍ਠਪੁਤ੍ਤਸ੍ਸ ਹਤ੍ਥਿਯਾਨਂ ਨਿਬ੍ਬਤ੍ਤਿ, ਕਨਿਟ੍ਠਸ੍ਸ ਅਸ੍ਸਤਰੀਰਥੋ, ਧੀਤਾਯ ਸੁਵਣ੍ਣਸਿਵਿਕਾ. ਬ੍ਰਾਹ੍ਮਣੋ ਚ ਬ੍ਰਾਹ੍ਮਣੀ ਚ ਮਹਨ੍ਤੇ ਮਹਨ੍ਤੇ ਅਯੋਮੁਗ੍ਗਰੇ ਗਹੇਤ੍ਵਾ ਅਞ੍ਞਮਞ੍ਞਂ ਆਕੋਟੇਨ੍ਤਿ, ਅਭਿਹਤਟ੍ਠਾਨੇਸੁ ਮਹਨ੍ਤਾ ਮਹਨ੍ਤਾ ਘਟਪ੍ਪਮਾਣਾ ਗਣ੍ਡਾ ਉਟ੍ਠਹਿਤ੍ਵਾ ਮੁਹੁਤ੍ਤੇਨੇਵ ਪਚਿਤ੍ਵਾ ਪਰਿਭੇਦਪ੍ਪਤ੍ਤਾ ਹੋਨ੍ਤਿ. ਤੇ ਅਞ੍ਞਮਞ੍ਞਸ੍ਸ ਗਣ੍ਡੇ ਫਾਲੇਤ੍ਵਾ ਕੋਧਾਭਿਭੂਤਾ ਨਿਕ੍ਕਰੁਣਾ ਫਰੁਸਵਚਨੇਹਿ ਤਜ੍ਜੇਨ੍ਤਾ ਪੁਬ੍ਬਲੋਹਿਤਂ ਪਿਵਨ੍ਤਿ, ਨ ਚ ਤਿਤ੍ਤਿਂ ਪਟਿਲਭਨ੍ਤਿ.

ਅਥ ਸਾਮਣੇਰੋ ਉਕ੍ਕਣ੍ਠਾਭਿਭੂਤੋ ਉਪਜ੍ਝਾਯਂ ਉਪਸਙ੍ਕਮਿਤ੍ਵਾ ਆਹ – ‘‘ਭਨ੍ਤੇ, ਮਯਾ ਪਟਿਞ੍ਞਾਤਦਿਵਸਾ ਵੀਤਿਵਤ੍ਤਾ, ਗੇਹਂ ਗਮਿਸ੍ਸਾਮਿ, ਅਨੁਜਾਨਾਥ ਮ’’ਨ੍ਤਿ. ਅਥ ਨਂ ਉਪਜ੍ਝਾਯੋ ‘‘ਅਤ੍ਥਙ੍ਗਤੇ ਸੂਰਿਯੇ ਕਾਲਪਕ੍ਖਚਾਤੁਦ੍ਦਸਿਯਾ ਪਵਤ੍ਤਮਾਨਾਯ ਏਹੀ’’ਤਿ ਵਤ੍ਵਾ ਇਸਿਪਤਨਵਿਹਾਰਸ੍ਸ ਪਿਟ੍ਠਿਪਸ੍ਸੇਨ ਥੋਕਂ ਗਨ੍ਤ੍ਵਾ ਅਟ੍ਠਾਸਿ. ਤੇਨ ਚ ਸਮਯੇਨ ਤੇ ਦ੍ਵੇ ਦੇਵਪੁਤ੍ਤਾ ਸਦ੍ਧਿਂ ਭਗਿਨਿਯਾ ਤੇਨੇਵ ਮਗ੍ਗੇਨ ¶ ਯਕ੍ਖਸਮਾਗਮਂ ਸਮ੍ਭਾਵੇਤੁਂ ਗਚ੍ਛਨ੍ਤਿ, ਤੇਸਂ ਪਨ ਮਾਤਾਪਿਤਰੋ ਮੁਗ੍ਗਰਹਤ੍ਥਾ ਫਰੁਸਵਾਚਾ ¶ ਕਾਲ਼ਰੂਪਾ ਆਕੁਲਾਕੁਲਲੂਖਪਤਿਤਕੇਸਭਾਰਾ ਅਗ੍ਗਿਦਡ੍ਢਤਾਲਕ੍ਖਨ੍ਧਸਦਿਸਾ ¶ ਵਿਗਲਿਤਪੁਬ੍ਬਲੋਹਿਤਾ ਵਲਿਤਗਤ੍ਤਾ ਅਤਿਵਿਯ ਜੇਗੁਚ੍ਛਬੀਭਚ੍ਛਦਸ੍ਸਨਾ ਤੇ ਅਨੁਬਨ੍ਧਨ੍ਤਿ.

ਅਥਾਯਸ੍ਮਾ ਸਂਕਿਚ੍ਚੋ ਯਥਾ ਸੋ ਸਾਮਣੇਰੋ ਤੇ ਸਬ੍ਬੇ ਗਚ੍ਛਨ੍ਤੇ ਪਸ੍ਸਤਿ, ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰਿਤ੍ਵਾ ਸਾਮਣੇਰਂ ਆਹ – ‘‘ਪਸ੍ਸਸਿ ਤ੍ਵਂ, ਸਾਮਣੇਰ, ਇਮੇ ਗਚ੍ਛਨ੍ਤੇ’’ਤਿ? ‘‘ਆਮ, ਭਨ੍ਤੇ, ਪਸ੍ਸਾਮੀ’’ਤਿ. ‘‘ਤੇਨ ਹਿ ਇਮੇਹਿ ਕਤਕਮ੍ਮਂ ਪਟਿਪੁਚ੍ਛਾ’’ਤਿ. ਸੋ ਹਤ੍ਥਿਯਾਨਾਦੀਹਿ ਗਚ੍ਛਨ੍ਤੇ ਅਨੁਕ੍ਕਮੇਨ ਪਟਿਪੁਚ੍ਛਿ. ਤੇ ਆਹਂਸੁ – ‘‘ਯੇ ਪਚ੍ਛਤੋ ਪੇਤਾ ਆਗਚ੍ਛਨ੍ਤਿ, ਤੇ ਪਟਿਪੁਚ੍ਛਾ’’ਤਿ. ਸਾਮਣੇਰੋ ਤੇ ਪੇਤੇ ਗਾਥਾਹਿ ਅਜ੍ਝਭਾਸਿ –

‘‘ਪੁਰਤੋਵ ਸੇਤੇਨ ਪਲੇਤਿ ਹਤ੍ਥਿਨਾ, ਮਜ੍ਝੇ ਪਨ ਅਸ੍ਸਤਰੀਰਥੇਨ;

ਪਚ੍ਛਾ ਚ ਕਞ੍ਞਾ ਸਿਵਿਕਾਯ ਨੀਯਤਿ, ਓਭਾਸਯਨ੍ਤੀ ਦਸ ਸਬ੍ਬਸੋ ਦਿਸਾ.

‘‘ਤੁਮ੍ਹੇ ਪਨ ਮੁਗ੍ਗਰਹਤ੍ਥਪਾਣਿਨੋ, ਰੁਦਂਮੁਖਾ ਛਿਨ੍ਨਪਭਿਨ੍ਨਗਤ੍ਤਾ;

ਮਨੁਸ੍ਸਭੂਤਾ ਕਿਮਕਤ੍ਥ ਪਾਪਂ, ਯੇਨਞ੍ਞਮਞ੍ਞਸ੍ਸ ਪਿਵਾਥ ਲੋਹਿਤ’’ਨ੍ਤਿ.

ਤਤ੍ਥ ਪੁਰਤੋਤਿ ਸਬ੍ਬਪਠਮਂ. ਸੇਤੇਨਾਤਿ ਪਣ੍ਡਰੇਨ. ਪਲੇਤੀਤਿ ਗਚ੍ਛਤਿ. ਮਜ੍ਝੇ ਪਨਾਤਿ ਹਤ੍ਥਿਂ ਆਰੁਲ਼੍ਹਸ੍ਸ ਸਿਵਿਕਂ ਆਰੁਲ਼੍ਹਾਯ ਚ ਅਨ੍ਤਰੇ. ਅਸ੍ਸਤਰੀਰਥੇਨਾਤਿ ਅਸ੍ਸਤਰੀਯੁਤ੍ਤੇਨ ਰਥੇਨ ਪਲੇਤੀਤਿ ਯੋਜਨਾ. ਨੀਯਤੀਤਿ ਵਹੀਯਤਿ. ਓਭਾਸਯਨ੍ਤੀ ਦਸ ਸਬ੍ਬਸੋ ਦਿਸਾਤਿ ਸਬ੍ਬਤੋ ਸਮਨ੍ਤਤੋ ਸਬ੍ਬਾ ਦਸ ਦਿਸਾ ਅਤ੍ਤਨੋ ਸਰੀਰਪ੍ਪਭਾਹਿ ਵਤ੍ਥਾਭਰਣਾਦਿਪ੍ਪਭਾਹਿ ਚ ਵਿਜ੍ਜੋਤਯਮਾਨਾ. ਮੁਗ੍ਗਰਹਤ੍ਥਪਾਣਿਨੋਤਿ ਮੁਗ੍ਗਰਾ ਹਤ੍ਥਸਙ੍ਖਾਤੇਸੁ ਪਾਣੀਸੁ ਯੇਸਂ ਤੇ ਮੁਗ੍ਗਰਹਤ੍ਥਪਾਣਿਨੋ, ਭੂਮਿਸਣ੍ਹਕਰਣੀਯਾਦੀਸੁ ਪਾਣਿਵੋਹਾਰਸ੍ਸ ਲਬ੍ਭਮਾਨਤ੍ਤਾ ਹਤ੍ਥਸਦ੍ਦੇਨ ਪਾਣਿ ਏਵ ਵਿਸੇਸਿਤੋ. ਛਿਨ੍ਨਪਭਿਨ੍ਨਗਤ੍ਤਾਤਿ ਮੁਗ੍ਗਰਪ੍ਪਹਾਰੇਨ ਤਤ੍ਥ ਤਤ੍ਥ ਛਿਨ੍ਨਪਭਿਨ੍ਨਸਰੀਰਾ. ਪਿਵਾਥਾਤਿ ਪਿਵਥ.

ਏਵਂ ¶ ਸਾਮਣੇਰੇਨ ਪੁਟ੍ਠਾ ਤੇ ਪੇਤਾ ਸਬ੍ਬਂ ਤਂ

ਪਵਤ੍ਤਿਂ ਚਤੂਹਿ ਗਾਥਾਹਿ ਪਚ੍ਚਭਾਸਿਂਸੁ –

‘‘ਪੁਰਤੋਵ ¶ ਯੋ ਗਚ੍ਛਤਿ ਕੁਞ੍ਜਰੇਨ, ਸੇਤੇਨ ਨਾਗੇਨ ਚਤੁਕ੍ਕਮੇਨ;

ਅਮ੍ਹਾਕ ਪੁਤ੍ਤੋ ਅਹੁ ਜੇਟ੍ਠਕੋ ਸੋ, ਦਾਨਾਨਿ ਦਤ੍ਵਾਨ ਸੁਖੀ ਪਮੋਦਤਿ.

‘‘ਯੋ ¶ ਯੋ ਮਜ੍ਝੇ ਅਸ੍ਸਤਰੀਰਥੇਨ, ਚਤੁਬ੍ਭਿ ਯੁਤ੍ਤੇਨ ਸੁਵਗ੍ਗਿਤੇਨ;

ਅਮ੍ਹਾਕ ਪੁਤ੍ਤੋ ਅਹੁ ਮਜ੍ਝਿਮੋ ਸੋ, ਅਮਚ੍ਛਰੀ ਦਾਨਪਤੀ ਵਿਰੋਚਤਿ.

‘‘ਯਾ ਸਾ ਚ ਪਚ੍ਛਾ ਸਿਵਿਕਾਯ ਨੀਯਤਿ, ਨਾਰੀ ਸਪਞ੍ਞਾ ਮਿਗਮਨ੍ਦਲੋਚਨਾ;

ਅਮ੍ਹਾਕ ਧੀਤਾ ਅਹੁ ਸਾ ਕਨਿਟ੍ਠਿਕਾ, ਭਾਗਡ੍ਢਭਾਗੇਨ ਸੁਖੀ ਪਮੋਦਤਿ.

‘‘ਏਤੇ ਚ ਦਾਨਾਨਿ ਅਦਂਸੁ ਪੁਬ੍ਬੇ, ਪਸਨ੍ਨਚਿਤ੍ਤਾ ਸਮਣਬ੍ਰਾਹ੍ਮਣਾਨਂ;

ਮਯਂ ਪਨ ਮਚ੍ਛਰੀਨੋ ਅਹੁਮ੍ਹ, ਪਰਿਭਾਸਕਾ ਸਮਣਬ੍ਰਾਹ੍ਮਣਾਨਂ;

ਏਤੇ ਚ ਦਤ੍ਵਾ ਪਰਿਚਾਰਯਨ੍ਤਿ, ਮਯਞ੍ਚ ਸੁਸ੍ਸਾਮ ਨਲ਼ੋਵ ਛਿਨ੍ਨੋ’’ਤਿ.

੭੫. ਤਤ੍ਥ ਪੁਰਤੋਵ ਯੋ ਗਚ੍ਛਤੀਤਿ ਇਮੇਸਂ ਗਚ੍ਛਨ੍ਤਾਨਂ ਯੋ ਪੁਰਤੋ ਗਚ੍ਛਤਿ. ‘‘ਯੋਸੋ ਪੁਰਤੋ ਗਚ੍ਛਤੀ’’ਤਿ ਵਾ ਪਾਠੋ, ਤਸ੍ਸ ਯੋ ਏਸੋ ਪੁਰਤੋ ਗਚ੍ਛਤੀਤਿ ਅਤ੍ਥੋ. ਕੁਞ੍ਜਰੇਨਾਤਿ ਕੁਂ ਪਥਵਿਂ ਜੀਰਯਤਿ, ਕੁਞ੍ਜੇਸੁ ਵਾ ਰਮਤਿ ਚਰਤੀਤਿ ‘‘ਕੁਞ੍ਜਰੋ’’ਤਿ ਲਦ੍ਧਨਾਮੇਨ ਹਤ੍ਥਿਨਾ. ਨਾਗੇਨਾਤਿ, ਨਾਸ੍ਸ ਅਗਮਨੀਯਂ ਅਨਭਿਭਵਨੀਯਂ ਅਤ੍ਥੀਤਿ ਨਾਗਾ, ਤੇਨ ਨਾਗੇਨ. ਚਤੁਕ੍ਕਮੇਨਾਤਿ ਚਤੁਪ੍ਪਦੇਨ. ਜੇਟ੍ਠਕੋਤਿ ਪੁਬ੍ਬਜੋ.

੭੬-੭੭. ਚਤੁਬ੍ਭੀਤਿ ਚਤੂਹਿ ਅਸ੍ਸਤਰੀਹਿ. ਸੁਵਗ੍ਗਿਤੇਨਾਤਿ ਸੁਨ੍ਦਰਗਮਨੇਨ ਚਾਤੁਰਗਮਨੇਨ. ਮਿਗਮਨ੍ਦਲੋਚਨਾਤਿ ਮਿਗੀ ਵਿਯ ਮਨ੍ਦਕ੍ਖਿਕਾ. ਭਾਗਡ੍ਢਭਾਗੇਨਾਤਿ ¶ ਭਾਗਸ੍ਸ ਅਡ੍ਢਭਾਗੇਨ, ਅਤ੍ਤਨਾ ਲਦ੍ਧਕੋਟ੍ਠਾਸਤੋ ਅਡ੍ਢਭਾਗਦਾਨੇਨ ਹੇਤੁਭੂਤੇਨ. ਸੁਖੀਤਿ ਸੁਖਿਨੀ. ਲਿਙ੍ਗਵਿਪਲ੍ਲਾਸੇਨ ਹੇਤਂ ਵੁਤ੍ਤਂ.

੭੮. ਪਰਿਭਾਸਕਾਤਿ ¶ ਅਕ੍ਕੋਸਕਾ. ਪਰਿਚਾਰਯਨ੍ਤੀਤਿ ਦਿਬ੍ਬੇਸੁ ਕਾਮਗੁਣੇਸੁ ਅਤ੍ਤਨੋ ਇਨ੍ਦ੍ਰਿਯਾਨਿ ਇਤੋ ਚਿਤੋ ਚ ਯਥਾਸੁਖਂ ਚਾਰੇਨ੍ਤਿ, ਪਰਿਜਨੇਹਿ ਵਾ ਅਤ੍ਤਨੋ ਪੁਞ੍ਞਾਨੁਭਾਵਨਿਸ੍ਸਨ੍ਦੇਨ ਪਰਿਚਰਿਯਂ ਕਾਰੇਨ੍ਤਿ. ਮਯਞ੍ਚ ਸੁਸ੍ਸਾਮ ਨਲ਼ੋਵ ਛਿਨ੍ਨੋਤਿ ਮਯਂ ਪਨ ਛਿਨ੍ਨੋ ਆਤਪੇ ਖਿਤ੍ਤੋ ਨਲ਼ੋ ਵਿਯ ਸੁਸ੍ਸਾਮ, ਖੁਪ੍ਪਿਪਾਸਾਹਿ ਅਞ੍ਞਮਞ੍ਞਂ ਦਣ੍ਡਾਭਿਘਾਤੇਹਿ ਚ ਸੁਕ੍ਖਾ ਵਿਸੁਕ੍ਖਾ ਭਵਾਮਾਤਿ.

ਏਵਂ ਅਤ੍ਤਨੋ ਪਾਪਂ ਸਮ੍ਪਵੇਦੇਤ੍ਵਾ ‘‘ਮਯਂ ਤੁਯ੍ਹਂ ਮਾਤੁਲਮਾਤੁਲਾਨਿਯੋ’’ਤਿ ਆਚਿਕ੍ਖਿਂਸੁ. ਤਂ ਸੁਤ੍ਵਾ ਸਾਮਣੇਰੋ ਸਞ੍ਜਾਤਸਂਵੇਗੋ ‘‘ਏਵਰੂਪਾਨਂ ਕਿਬ੍ਬਿਸਕਾਰੀਨਂ ਕਥਂ ਨੁ ਖੋ ਭੋਜਨਾਨਿ ਸਿਜ੍ਝਨ੍ਤੀ’’ਤਿ ਪੁਚ੍ਛਨ੍ਤੋ –

‘‘ਕਿਂ ¶ ਤੁਮ੍ਹਾਕਂ ਭੋਜਨਂ ਕਿਂ ਸਯਾਨਂ, ਕਥਞ੍ਚ ਯਾਪੇਥ ਸੁਪਾਪਧਮ੍ਮਿਨੋ;

ਪਹੂਤਭੋਗੇਸੁ ਅਨਪ੍ਪਕੇਸੁ, ਸੁਖਂ ਵਿਰਾਧਾਯ ਦੁਕ੍ਖਜ੍ਜ ਪਤ੍ਤਾ’’ਤਿ. –

ਇਮਂ ਗਾਥਮਾਹ. ਤਤ੍ਥ ਕਿਂ ਤੁਮ੍ਹਾਕਂ ਭੋਜਨਨ੍ਤਿ ਕੀਦਿਸਂ ਤੁਮ੍ਹਾਕਂ ਭੋਜਨਂ? ਕਿਂ ਸਯਾਨਨ੍ਤਿ ਕੀਦਿਸਂ ਸਯਨਂ? ‘‘ਕਿਂ ਸਯਾਨਾ’’ਤਿ ਕੇਚਿ ਪਠਨ੍ਤਿ, ਕੀਦਿਸਾ ਸਯਨਾ, ਕੀਦਿਸੇ ਸਯਨੇ ਸਯਥਾਤਿ ਅਤ੍ਥੋ. ਕਥਞ੍ਚ ਯਾਪੇਥਾਤਿ ਕੇਨ ਪਕਾਰੇਨ ਯਾਪੇਥ, ‘‘ਕਥਂ ਵੋ ਯਾਪੇਥਾ’’ਤਿਪਿ ਪਾਠੋ, ਕਥਂ ਤੁਮ੍ਹੇ ਯਾਪੇਥਾਤਿ ਅਤ੍ਥੋ. ਸੁਪਾਪਧਮ੍ਮਿਨੋਤਿ ਸੁਟ੍ਠੁ ਅਤਿਵਿਯ ਪਾਪਧਮ੍ਮਾ. ਪਹੂਤਭੋਗੇਸੂਤਿ ਅਪਰਿਯਨ੍ਤੇਸੁ ਉਲ਼ਾਰੇਸੁ ਭੋਗੇਸੁ ਸਨ੍ਤੇਸੁ. ਅਨਪ੍ਪਕੇਸੂਤਿ ਨ ਅਪ੍ਪਕੇਸੁ ਬਹੂਸੁ. ਸੁਖਂ ਵਿਰਾਧਾਯਾਤਿ ਸੁਖਹੇਤੁਨੋ ਪੁਞ੍ਞਸ੍ਸ ਅਕਰਣੇਨ ¶ ਸੁਖਂ ਵਿਰਜ੍ਝਿਤ੍ਵਾ ਵਿਰਾਧੇਤ੍ਵਾ. ‘‘ਸੁਖਸ੍ਸ ਵਿਰਾਧੇਨਾ’’ਤਿ ਕੇਚਿ ਪਠਨ੍ਤਿ. ਦੁਕ੍ਖਜ੍ਜ ਪਤ੍ਤਾਤਿ ਅਜ੍ਜ ਇਦਾਨਿ ਇਦਂ ਪੇਤਯੋਨਿਪਰਿਯਾਪਨ੍ਨਂ ਦੁਕ੍ਖਂ ਅਨੁਪ੍ਪਤ੍ਤਾਤਿ.

ਏਵਂ ਸਾਮਣੇਰੇਨ ਪੁਟ੍ਠਾ ਪੇਤਾ ਤੇਨ ਪੁਚ੍ਛਿਤਮਤ੍ਥਂ ਵਿਸ੍ਸਜ੍ਜੇਨ੍ਤਾ –

‘‘ਅਞ੍ਞਮਞ੍ਞਂ ਵਧਿਤ੍ਵਾਨ, ਪਿਵਾਮ ਪੁਬ੍ਬਲੋਹਿਤਂ;

ਬਹੁਂ ਵਿਤ੍ਵਾ ਨ ਧਾਤਾ ਹੋਮ, ਨਚ੍ਛਾਦਿਮ੍ਹਸੇ ਮਯਂ.

‘‘ਇਚ੍ਚੇਵ ¶ ਮਚ੍ਚਾ ਪਰਿਦੇਵਯਨ੍ਤਿ, ਅਦਾਯਕਾ ਪੇਚ੍ਚ ਯਮਸ੍ਸ ਠਾਯਿਨੋ;

ਯੇ ਤੇ ਵਿਦਿਚ੍ਚ ਅਧਿਗਮ੍ਮ ਭੋਗੇ, ਨ ਭੁਞ੍ਜਰੇ ਨਾਪਿ ਕਰੋਨ੍ਤਿ ਪੁਞ੍ਞਂ.

‘‘ਤੇ ਖੁਪ੍ਪਿਪਾਸੂਪਗਤਾ ਪਰਤ੍ਥ, ਪਚ੍ਛਾ ਚਿਰਂ ਝਾਯਰੇ ਡਯ੍ਹਮਾਨਾ;

ਕਮ੍ਮਾਨਿ ਕਤ੍ਵਾਨ ਦੁਖੁਦ੍ਰਾਨਿ, ਅਨੁਭੋਨ੍ਤਿ ਦੁਕ੍ਖਂ ਕਟੁਕਪ੍ਫਲਾਨਿ.

‘‘ਇਤ੍ਤਰਞ੍ਹਿ ਧਨਂ ਧਞ੍ਞਂ, ਇਤ੍ਤਰਂ ਇਧ ਜੀਵਿਤਂ;

ਇਤ੍ਤਰਂ ਇਤ੍ਤਰਤੋ ਞਤ੍ਵਾ, ਦੀਪਂ ਕਯਿਰਾਥ ਪਣ੍ਡਿਤੋ.

‘‘ਯੇ ਤੇ ਏਵਂ ਪਜਾਨਨ੍ਤਿ, ਨਰਾ ਧਮ੍ਮਸ੍ਸ ਕੋਵਿਦਾ;

ਤੇ ਦਾਨੇ ਨਪ੍ਪਮਜ੍ਜਨ੍ਤਿ, ਸੁਤ੍ਵਾ ਅਰਹਤਂ ਵਚੋ’’ਤਿ. –

੮੦-੮੧. ਤਤ੍ਥ ¶ ਨ ਧਾਤਾ ਹੋਮਾਤਿ ਧਾਤਾ ਸੁਹਿਤਾ ਤਿਤ੍ਤਾ ਨ ਹੋਮ. ਨਚ੍ਛਾਦਿਮ੍ਹਸੇਤਿ ਨ ਰੁਚ੍ਚਾਮ, ਨ ਰੁਚਿਂ ਉਪ੍ਪਾਦੇਮ, ਨ ਤਂ ਮਯਂ ਅਤ੍ਤਨੋ ਰੁਚਿਯਾ ਪਿਵਿਸ੍ਸਾਮਾਤਿ ਅਤ੍ਥੋ. ਇਚ੍ਚੇਵਾਤਿ ਏਵਮੇਵ. ਮਚ੍ਚਾ ਪਰਿਦੇਵਯਨ੍ਤੀਤਿ ਮਯਂ ਵਿਯ ਅਞ੍ਞੇਪਿ ਮਨੁਸ੍ਸਾ ਕਤਕਿਬ੍ਬਿਸਾ ਪਰਿਦੇਵਨ੍ਤਿ ਕਨ੍ਦਨ੍ਤਿ. ਅਦਾਯਕਾਤਿ ਅਦਾਨਸੀਲਾ ਮਚ੍ਛਰਿਨੋ. ਯਮਸ੍ਸ ਠਾਯਿਨੋਤਿ ਯਮਲੋਕਸਞ੍ਞਿਤੇ ਯਮਸ੍ਸ ਠਾਨੇ ਪੇਤ੍ਤਿਵਿਸਯੇ ਠਾਨਸੀਲਾ ¶ . ਯੇ ਤੇ ਵਿਦਿਚ੍ਚ ਅਧਿਗਮ੍ਮਭੋਗੇਤਿ ਯੇ ਤੇ ਸਮ੍ਪਤਿ ਆਯਤਿਞ੍ਚ ਸੁਖਵਿਸੇਸਵਿਧਾਯਕੇ ਭੋਗੇ ਵਿਨ੍ਦਿਤ੍ਵਾ ਪਟਿਲਭਿਤ੍ਵਾ. ਨ ਭੁਞ੍ਜਰੇ ਨਾਪਿ ਕਰੋਨ੍ਤਿ ਪੁਞ੍ਞਨ੍ਤਿ ਅਮ੍ਹੇ ਵਿਯ ਸਯਮ੍ਪਿ ਨ ਭੁਞ੍ਜਨ੍ਤਿ, ਪਰੇਸਂ ਦੇਨ੍ਤਾ ਦਾਨਮਯਂ ਪੁਞ੍ਞਮ੍ਪਿ ਨ ਕਰੋਨ੍ਤਿ.

੮੨. ਤੇ ਖੁਪ੍ਪਿਪਾਸੂਪਗਤਾ ਪਰਤ੍ਥਾਤਿ ਤੇ ਸਤ੍ਤਾ ਪਰਤ੍ਥ ਪਰਲੋਕੇ ਪੇਤ੍ਤਿਵਿਸਯੇ ਜਿਘਚ੍ਛਾਪਿਪਾਸਾਭਿਭੂਤਾ ਹੁਤ੍ਵਾ. ਚਿਰਂ ਝਾਯਰੇ ਡਯ੍ਹਮਾਨਾਤਿ ਖੁਦਾਦਿਹੇਤੁਕੇਨ ਦੁਕ੍ਖਗ੍ਗਿਨਾ ‘‘ਅਕਤਂ ਵਤ ਅਮ੍ਹੇਹਿ ਕੁਸਲਂ, ਕਤਂ ਪਾਪ’’ਨ੍ਤਿਆਦਿਨਾ ਵਤ੍ਤਮਾਨੇਨ ਵਿਪ੍ਪਟਿਸਾਰਗ੍ਗਿਨਾ ਪਰਿਡਯ੍ਹਮਾਨਾ ਝਾਯਨ੍ਤਿ, ਅਨੁਤ੍ਥੁਨਨ੍ਤੀਤਿ ਅਤ੍ਥੋ. ਦੁਖੁਦ੍ਰਾਨੀਤਿ ਦੁਕ੍ਖਵਿਪਾਕਾਨਿ. ਅਨੁਭੋਨ੍ਤਿ ਦੁਕ੍ਖਂ ਕਟੁਕਪ੍ਫਲਾਨੀਤਿ ਅਨਿਟ੍ਠਫਲਾਨਿ ਪਾਪਕਮ੍ਮਾਨਿ ਕਤ੍ਵਾ ਚਿਰਕਾਲਂ ਦੁਕ੍ਖਂ ਆਪਾਯਿਕਦੁਕ੍ਖਂ ਅਨੁਭਵਨ੍ਤਿ.

੮੩-੮੪. ਇਤ੍ਤਰਨ੍ਤਿ ¶ ਨ ਚਿਰਕਾਲਟ੍ਠਾਯੀ, ਅਨਿਚ੍ਚਂ ਵਿਪਰਿਣਾਮਧਮ੍ਮਂ. ਇਤ੍ਤਰਂ ਇਧ ਜੀਵਿਤਨ੍ਤਿ ਇਧ ਮਨੁਸ੍ਸਲੋਕੇ ਸਤ੍ਤਾਨਂ ਜੀਵਿਤਮ੍ਪਿ ਇਤ੍ਤਰਂ ਪਰਿਤ੍ਤਂ ਅਪ੍ਪਕਂ. ਤੇਨਾਹ ਭਗਵਾ – ‘‘ਯੋ ਚਿਰਂ ਜੀਵਤਿ, ਸੋ ਵਸ੍ਸਸਤਂ ਅਪ੍ਪਂ ਵਾ ਭਿਯ੍ਯੋ’’ਤਿ (ਦੀ. ਨਿ. ੨.੯੧; ਸਂ. ਨਿ. ੧.੧੪੫; ਅ. ਨਿ. ੭.੭੪). ਇਤ੍ਤਰਂ ਇਤ੍ਤਰਤੋ ਞਤ੍ਵਾਤਿ ਧਨਧਞ੍ਞਾਦਿਉਪਕਰਣਂ ਮਨੁਸ੍ਸਾਨਂ ਜੀਵਿਤਞ੍ਚ ਇਤ੍ਤਰਂ ਪਰਿਤ੍ਤਂ ਖਣਿਕਂ ਨ ਚਿਰਸ੍ਸਨ੍ਤਿ ਪਞ੍ਞਾਯ ਉਪਪਰਿਕ੍ਖਿਤ੍ਵਾ. ਦੀਪਂ ਕਯਿਰਾਥ ਪਣ੍ਡਿਤੋਤਿ ਸਪਞ੍ਞੋ ਪੁਰਿਸੋ ਦੀਪਂ ਅਤ੍ਤਨੋ ਪਤਿਟ੍ਠਂ ਪਰਲੋਕੇ ਹਿਤਸੁਖਾਧਿਟ੍ਠਾਨਂ ਕਰੇਯ੍ਯ. ਯੇ ਤੇ ਏਵਂ ਪਜਾਨਨ੍ਤੀਤਿ ਯੇ ਤੇ ਮਨੁਸ੍ਸਾ ਮਨੁਸ੍ਸਾਨਂ ਭੋਗਾਨਂ ਜੀਵਿਤਸ੍ਸ ਚ ਇਤ੍ਤਰਭਾਵਂ ਯਾਥਾਵਤੋ ਜਾਨਨ੍ਤਿ, ਤੇ ਦਾਨੇ ਸਬ੍ਬਕਾਲਂ ਨਪ੍ਪਮਜ੍ਜਨ੍ਤਿ. ਸੁਤ੍ਵਾ ਅਰਹਤਂ ਵਚੋਤਿ ਅਰਹਤਂ ਬੁਦ੍ਧਾਦੀਨਂ ਅਰਿਯਾਨਂ ਵਚਨਂ ਸੁਤ੍ਵਾ, ਸੁਤਤ੍ਤਾਤਿ ਅਤ੍ਥੋ. ਸੇਸਂ ਪਾਕਟਮੇਵ.

ਏਵਂ ਤੇ ਪੇਤਾ ਸਾਮਣੇਰੇਨ ਪੁਟ੍ਠਾ ਤਮਤ੍ਥਂ ਆਚਿਕ੍ਖਿਤ੍ਵਾ ‘‘ਮਯਂ ਤੁਯ੍ਹਂ ਮਾਤੁਲਮਾਤੁਲਾਨਿਯੋ’’ਤਿ ਪਵੇਦੇਸੁਂ. ਤਂ ਸੁਤ੍ਵਾ ਸਾਮਣੇਰੋ ਸਞ੍ਜਾਤਸਂਵੇਗੋ ਉਕ੍ਕਣ੍ਠਂ ਪਟਿਵਿਨੋਦੇਤ੍ਵਾ ਉਪਜ੍ਝਾਯਸ੍ਸ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਏਵਮਾਹ – ‘‘ਯਂ, ਭਨ੍ਤੇ, ਅਨੁਕਮ੍ਪਕੇਨ ¶ ਕਰਣੀਯਂ ਅਨੁਕਮ੍ਪਂ ਉਪਾਦਾਯ, ਤਂ ਮੇ ਤੁਮ੍ਹੇਹਿ ਕਤਂ, ਮਹਤਾ ਵਤਮ੍ਹਿ ਅਨਤ੍ਥਪਾਤਤੋ ਰਕ੍ਖਿਤੋ, ਨ ਦਾਨਿ ਮੇ ¶ ਘਰਾਵਾਸੇਨ ਅਤ੍ਥੋ, ਅਭਿਰਮਿਸ੍ਸਾਮਿ ਬ੍ਰਹ੍ਮਚਰਿਯਵਾਸੇ’’ਤਿ. ਅਥਾਯਸ੍ਮਾ ਸਂਕਿਚ੍ਚੋ ਤਸ੍ਸ ਅਜ੍ਝਾਸਯਾਨੁਰੂਪਂ ਕਮ੍ਮਟ੍ਠਾਨਂ ਆਚਿਕ੍ਖਿ. ਸੋ ਕਮ੍ਮਟ੍ਠਾਨਂ ਅਨੁਯੁਞ੍ਜਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਆਯਸ੍ਮਾ ਪਨ ਸਂਕਿਚ੍ਚੋ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਸਤ੍ਥਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਉਰਗੋਵ ਤਚਂ ਜਿਣ੍ਣਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਉਪਾਸਕਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਅਞ੍ਞਤਰਸ੍ਸ ਉਪਾਸਕਸ੍ਸ ਪੁਤ੍ਤੋ ਕਾਲਮਕਾਸਿ. ਸੋ ਪੁਤ੍ਤਮਰਣਹੇਤੁ ਪਰਿਦੇਵਸੋਕਸਮਾਪਨ੍ਨੋ ਬਹਿ ਨਿਕ੍ਖਮਿਤ੍ਵਾ ਕਿਞ੍ਚਿ ਕਮ੍ਮਂ ਕਾਤੁਂ ਅਸਕ੍ਕੋਨ੍ਤੋ ਗੇਹੇਯੇਵ ਅਟ੍ਠਾਸਿ. ਅਥ ¶ ਸਤ੍ਥਾ ਪਚ੍ਚੂਸਵੇਲਾਯਂ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਤਂ ਉਪਾਸਕਂ ਦਿਸ੍ਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਤਸ੍ਸ ਗੇਹਂ ਗਨ੍ਤ੍ਵਾ ਦ੍ਵਾਰੇ ਅਟ੍ਠਾਸਿ. ਉਪਾਸਕੋ ਚ ਸਤ੍ਥੁ ਆਗਤਭਾਵਂ ਸੁਤ੍ਵਾ ਸੀਘਂ ਉਟ੍ਠਾਯ ਗਨ੍ਤ੍ਵਾ ਪਚ੍ਚੁਗ੍ਗਮਨਂ ਕਤ੍ਵਾ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਗੇਹਂ ਪਵੇਸੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਅਦਾਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਉਪਾਸਕੋਪਿ ਭਗਵਨ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਤਂ ਭਗਵਾ ‘‘ਕਿਂ, ਉਪਾਸਕ, ਸੋਕਪਰੇਤੋ ਵਿਯ ਦਿਸ੍ਸਤੀ’’ਤਿ ਆਹ. ‘‘ਆਮ, ਭਗਵਾ, ਪਿਯੋ ਮੇ ਪੁਤ੍ਤੋ ਕਾਲਕਤੋ, ਤੇਨਾਹਂ ਸੋਚਾਮੀ’’ਤਿ. ਅਥਸ੍ਸ ਭਗਵਾ ਸੋਕਵਿਨੋਦਨਂ ਕਰੋਨ੍ਤੋ ਉਰਗਜਾਤਕਂ (ਜਾ. ੧.੫.੧੯ ਆਦਯੋ) ਕਥੇਸਿ.

ਅਤੀਤੇ ਕਿਰ ਕਾਸਿਰਟ੍ਠੇ ਬਾਰਾਣਸਿਯਂ ਧਮ੍ਮਪਾਲਂ ਨਾਮ ਬ੍ਰਾਹ੍ਮਣਕੁਲਂ ਅਹੋਸਿ. ਤਤ੍ਥ ਬ੍ਰਾਹ੍ਮਣੋ ਬ੍ਰਾਹ੍ਮਣੀ ਪੁਤ੍ਤੋ ਧੀਤਾ ਸੁਣਿਸਾ ਦਾਸੀਤਿ ਇਮੇ ਸਬ੍ਬੇਪਿ ਮਰਣਾਨੁਸ੍ਸਤਿਭਾਵਨਾਭਿਰਤਾ ¶ ਅਹੇਸੁਂ. ਤੇਸੁ ਯੋ ਗੇਹਤੋ ਨਿਕ੍ਖਮਤਿ, ਸੋ ਸੇਸਜਨੇ ਓਵਦਿਤ੍ਵਾ ਨਿਰਪੇਕ੍ਖੋਵ ਨਿਕ੍ਖਮਤਿ. ਅਥੇਕਦਿਵਸਂ ਬ੍ਰਾਹ੍ਮਣੋ ਪੁਤ੍ਤੇਨ ਸਦ੍ਧਿਂ ਘਰਤੋ ਨਿਕ੍ਖਮਿਤ੍ਵਾ ਖੇਤ੍ਤਂ ਗਨ੍ਤ੍ਵਾ ਕਸਤਿ. ਪੁਤ੍ਤੋ ਸੁਕ੍ਖਤਿਣਪਣ੍ਣਕਟ੍ਠਾਨਿ ਆਲਿਮ੍ਪੇਤਿ. ਤਤ੍ਥੇਕੋ ਕਣ੍ਹਸਪ੍ਪੋ ਡਾਹਭਯੇਨ ਰੁਕ੍ਖਸੁਸਿਰਤੋ ਨਿਕ੍ਖਮਿਤ੍ਵਾ ਇਮਂ ਬ੍ਰਾਹ੍ਮਣਸ੍ਸ ਪੁਤ੍ਤਂ ਡਂਸਿ. ਸੋ ਵਿਸਵੇਗੇਨ ਮੁਚ੍ਛਿਤੋ ਤਤ੍ਥੇਵ ਪਰਿਪਤਿਤ੍ਵਾ ਕਾਲਕਤੋ, ਸਕ੍ਕੋ ਦੇਵਰਾਜਾ ਹੁਤ੍ਵਾ ਨਿਬ੍ਬਤ੍ਤਿ. ਬ੍ਰਾਹ੍ਮਣੋ ਪੁਤ੍ਤਂ ਮਤਂ ਦਿਸ੍ਵਾ ਕਮ੍ਮਨ੍ਤਸਮੀਪੇਨ ਗਚ੍ਛਨ੍ਤਂ ਏਕਂ ਪੁਰਿਸਂ ਏਵਮਾਹ – ‘‘ਸਮ੍ਮ, ਮਮ ਘਰਂ ਗਨ੍ਤ੍ਵਾ ਬ੍ਰਾਹ੍ਮਣਿਂ ਏਵਂ ਵਦੇਹਿ ‘ਨ੍ਹਾਯਿਤ੍ਵਾ ਸੁਦ੍ਧਵਤ੍ਥਨਿਵਤ੍ਥਾ ਏਕਸ੍ਸ ਭਤ੍ਤਂ ਮਾਲਾਗਨ੍ਧਾਦੀਨਿ ਚ ਗਹੇਤ੍ਵਾ ਤੁਰਿਤਂ ਆਗਚ੍ਛਤੂ’ਤਿ’’. ਸੋ ਤਤ੍ਥ ਗਨ੍ਤ੍ਵਾ ਤਥਾ ਆਰੋਚੇਸਿ, ਗੇਹਜਨੋਪਿ ਤਥਾ ਅਕਾਸਿ. ਬ੍ਰਾਹ੍ਮਣੋ ਨ੍ਹਤ੍ਵਾ ਭੁਞ੍ਜਿਤ੍ਵਾ ਵਿਲਿਮ੍ਪਿਤ੍ਵਾ ਪਰਿਜਨਪਰਿਵੁਤੋ ਪੁਤ੍ਤਸ੍ਸ ਸਰੀਰਂ ਚਿਤਕਂ ਆਰੋਪੇਤ੍ਵਾ ਅਗ੍ਗਿਂ ਦਤ੍ਵਾ ਦਾਰੁਕ੍ਖਨ੍ਧਂ ਡਹਨ੍ਤੋ ਵਿਯ ਨਿਸ੍ਸੋਕੋ ਨਿਸ੍ਸਨ੍ਤਾਪੋ ਅਨਿਚ੍ਚਸਞ੍ਞਂ ਮਨਸਿ ਕਰੋਨ੍ਤੋ ਅਟ੍ਠਾਸਿ.

ਅਥ ¶ ਬ੍ਰਾਹ੍ਮਣਸ੍ਸ ਪੁਤ੍ਤੋ ਸਕ੍ਕੋ ਹੁਤ੍ਵਾ ਨਿਬ੍ਬਤ੍ਤਿ, ਸੋ ਚ ਅਮ੍ਹਾਕਂ ਬੋਧਿਸਤ੍ਤੋ ਅਹੋਸਿ. ਸੋ ਅਤ੍ਤਨੋ ਪੁਰਿਮਜਾਤਿਂ ਕਤਪੁਞ੍ਞਞ੍ਚ ਪਚ੍ਚਵੇਕ੍ਖਿਤ੍ਵਾ ਪਿਤਰਂ ਞਾਤਕੇ ਚ ਅਨੁਕਮ੍ਪਮਾਨੋ ਬ੍ਰਾਹ੍ਮਣਵੇਸੇਨ ਤਤ੍ਥ ਆਗਨ੍ਤ੍ਵਾ ¶ ਞਾਤਕੇ ਅਸੋਚਨ੍ਤੇ ਦਿਸ੍ਵਾ ‘‘ਅਮ੍ਭੋ, ਮਿਗਂ ਝਾਪੇਥ, ਅਮ੍ਹਾਕਂ ਮਂਸਂ ਦੇਥ, ਛਾਤੋਮ੍ਹੀ’’ਤਿ ਆਹ. ‘‘ਨ ਮਿਗੋ, ਮਨੁਸ੍ਸੋ ਬ੍ਰਾਹ੍ਮਣਾ’’ਤਿ ਆਹ. ‘‘ਕਿਂ ਤੁਮ੍ਹਾਕਂ ਪਚ੍ਚਤ੍ਥਿਕੋ ਏਸੋ’’ਤਿ? ‘‘ਨ ਪਚ੍ਚਤ੍ਥਿਕੋ, ਉਰੇ ਜਾਤੋ ਓਰਸੋ ਮਹਾਗੁਣਵਨ੍ਤੋ ਤਰੁਣਪੁਤ੍ਤੋ’’ਤਿ ਆਹ. ‘‘ਕਿਮਤ੍ਥਂ ਤੁਮ੍ਹੇ ਤਥਾਰੂਪੇ ਗੁਣਵਤਿ ਤਰੁਣਪੁਤ੍ਤੇ ਮਤੇ ਨ ਸੋਚਥਾ’’ਤਿ? ਤਂ ਸੁਤ੍ਵਾ ਬ੍ਰਾਹ੍ਮਣੋ ਅਸੋਚਨਕਾਰਣਂ ਕਥੇਨ੍ਤੋ –

‘‘ਉਰਗੋਵ ਤਚਂ ਜਿਣ੍ਣਂ, ਹਿਤ੍ਵਾ ਗਚ੍ਛਤਿ ਸਂ ਤਨੁਂ;

ਏਵਂ ਸਰੀਰੇ ਨਿਬ੍ਭੋਗੇ, ਪੇਤੇ ਕਾਲਕਤੇ ਸਤਿ.

‘‘ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਰੋਦਾਮਿ, ਗਤੋ ਸੋ ਤਸ੍ਸ ਯਾ ਗਤੀ’’ਤਿ. –

੮੫-੮੬. ਤਤ੍ਥ ¶ ਉਰਗੋਤਿ ਉਰੇਨ ਗਚ੍ਛਤੀਤਿ ਉਰਗੋ. ਸਪ੍ਪਸ੍ਸੇਤਂ ਅਧਿਵਚਨਂ. ਤਚਂ ਜਿਣ੍ਣਨ੍ਤਿ ਜਜ੍ਜਰਭਾਵੇਨ ਜਿਣ੍ਣਂ ਪੁਰਾਣਂ ਅਤ੍ਤਨੋ ਤਚਂ ਨਿਮ੍ਮੋਕਂ. ਹਿਤ੍ਵਾ ਗਚ੍ਛਤਿ ਸਂ ਤਨੁਨ੍ਤਿ ਯਥਾ ਉਰਗੋ ਅਤ੍ਤਨੋ ਜਿਣ੍ਣਤਚਂ ਰੁਕ੍ਖਨ੍ਤਰੇ ਵਾ ਕਟ੍ਠਨ੍ਤਰੇ ਵਾ ਮੂਲਨ੍ਤਰੇ ਵਾ ਪਾਸਾਣਨ੍ਤਰੇ ਵਾ ਕਞ੍ਚੁਕਂ ਓਮੁਞ੍ਚਨ੍ਤੋ ਵਿਯ ਸਰੀਰਤੋ ਓਮੁਞ੍ਚਿਤ੍ਵਾ ਪਹਾਯ ਛਡ੍ਡੇਤ੍ਵਾ ਯਥਾਕਾਮਂ ਗਚ੍ਛਤਿ, ਏਵਮੇਵ ਸਂਸਾਰੇ ਪਰਿਬ੍ਭਮਨ੍ਤੋ ਸਤ੍ਤੋ ਪੋਰਾਣਸ੍ਸ ਕਮ੍ਮਸ੍ਸ ਪਰਿਕ੍ਖੀਣਤ੍ਤਾ ਜਜ੍ਜਰੀਭੂਤਂ ਸਂ ਤਨੁਂ ਅਤ੍ਤਨੋ ਸਰੀਰਂ ਹਿਤ੍ਵਾ ਗਚ੍ਛਤਿ, ਯਥਾਕਮ੍ਮਂ ਗਚ੍ਛਤਿ, ਪੁਨਬ੍ਭਵਵਸੇਨ ਉਪਪਜ੍ਜਤੀਤਿ ਅਤ੍ਥੋ. ਏਵਨ੍ਤਿ ਡਯ੍ਹਮਾਨਂ ਪੁਤ੍ਤਸ੍ਸ ਸਰੀਰਂ ਦਸ੍ਸੇਨ੍ਤੋ ਆਹ. ਸਰੀਰੇ ਨਿਬ੍ਭੋਗੇਤਿ ਅਸ੍ਸ ਵਿਯ ਅਞ੍ਞੇਸਮ੍ਪਿ ਕਾਯੇ ਏਵਂ ਭੋਗਵਿਰਹਿਤੇ ਨਿਰਤ੍ਥਕੇ ਜਾਤੇ. ਪੇਤੇਤਿ ਆਯੁਉਸ੍ਮਾਵਿਞ੍ਞਾਣਤੋ ਅਪਗਤੇ. ਕਾਲਕਤੇ ਸਤੀਤਿ ਮਤੇ ਜਾਤੇ. ਤਸ੍ਮਾਤਿ ਯਸ੍ਮਾ ਡਯ੍ਹਮਾਨੋ ਕਾਯੋ ਅਪੇਤਵਿਞ੍ਞਾਣਤ੍ਤਾ ਡਾਹਦੁਕ੍ਖਂ ਵਿਯ ਞਾਤੀਨਂ ਰੁਦਿਤਂ ਪਰਿਦੇਵਿਤਮ੍ਪਿ ਨ ਜਾਨਾਤਿ, ਤਸ੍ਮਾ ਏਤਂ ਮਮ ਪੁਤ੍ਤਂ ਨਿਮਿਤ੍ਤਂ ਕਤ੍ਵਾ ਨ ਰੋਦਾਮਿ. ਗਤੋ ਸੋ ¶ ਤਸ੍ਸ ਯਾ ਗਤੀਤਿ ਯਦਿ ਮਤਸਤ੍ਤਾ ਨ ਉਚ੍ਛਿਜ੍ਜਨ੍ਤਿ, ਮਤਸ੍ਸ ਪਨ ਕਤੋਕਾਸਸ੍ਸ ਕਮ੍ਮਸ੍ਸ ਵਸੇਨ ਯਾ ਗਤਿ ਪਾਟਿਕਙ੍ਖਾ, ਤਂ ¶ ਚੁਤਿਅਨਨ੍ਤਰਮੇਵ ਗਤੋ, ਸੋ ਨ ਪੁਰਿਮਞਾਤੀਨਂ ਰੁਦਿਤਂ ਪਰਿਦੇਵਿਤਂ ਵਾ ਪਚ੍ਚਾਸੀਸਤਿ, ਨਾਪਿ ਯੇਭੁਯ੍ਯੇਨ ਪੁਰਿਮਞਾਤੀਨਂ ਰੁਦਿਤੇਨ ਕਾਚਿ ਅਤ੍ਥਸਿਦ੍ਧੀਤਿ ਅਧਿਪ੍ਪਾਯੋ.

ਏਵਂ ਬ੍ਰਾਹ੍ਮਣੇਨ ਅਤ੍ਤਨੋ ਅਸੋਚਨਕਾਰਣੇ ਕਥਿਤੇ ਪਰਿਯਾਯਮਨਸਿਕਾਰਕੋਸਲ੍ਲੇ ਪਕਾਸਿਤੇ ਬ੍ਰਾਹ੍ਮਣਰੂਪੋ ਸਕ੍ਕੋ ਬ੍ਰਾਹ੍ਮਣਿਂ ਆਹ – ‘‘ਅਮ੍ਮ, ਤੁਯ੍ਹਂ ਸੋ ਮਤੋ ਕਿਂ ਹੋਤੀ’’ਤਿ? ‘‘ਦਸ ਮਾਸੇ ਕੁਚ੍ਛਿਨਾ ਪਰਿਹਰਿਤ੍ਵਾ ਥਞ੍ਞਂ ਪਾਯੇਤ੍ਵਾ ਹਤ੍ਥਪਾਦੇ ਸਣ੍ਠਪੇਤ੍ਵਾ ਸਂਵਡ੍ਢਿਤੋ ਪੁਤ੍ਤੋ ਮੇ, ਸਾਮੀ’’ਤਿ. ‘‘ਯਦਿ ਏਵਂ ਪਿਤਾ ਤਾਵ ਪੁਰਿਸਭਾਵੇਨ ਮਾ ਰੋਦਤੁ, ਮਾਤੁ ਨਾਮ ਹਦਯਂ ਮੁਦੁਕਂ, ਤ੍ਵਂ ਕਸ੍ਮਾ ਨ ਰੋਦਸੀ’’ਤਿ? ਤਂ ਸੁਤ੍ਵਾ ਸਾ ਅਰੋਦਨਕਾਰਣਂ ਕਥੇਨ੍ਤੀ –

‘‘ਅਨਬ੍ਭਿਤੋ ¶ ਤਤੋ ਆਗਾ, ਨਾਨੁਞ੍ਞਾਤੋ ਇਤੋ ਗਤੋ;

ਯਥਾਗਤੋ ਤਥਾ ਗਤੋ, ਤਤ੍ਥ ਕਾ ਪਰਿਦੇਵਨਾ.

‘‘ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਰੋਦਾਮਿ, ਗਤੋ ਸੋ ਤਸ੍ਸ ਯਾ ਗਤੀ’’ਤਿ. –

ਗਾਥਾਦ੍ਵਯਮਾਹ. ਤਤ੍ਥ ਅਨਬ੍ਭਿਤੋਤਿ ਅਨਵ੍ਹਾਤੋ, ‘‘ਏਹਿ ਮਯ੍ਹਂ ਪੁਤ੍ਤਭਾਵਂ ਉਪਗਚ੍ਛਾ’’ਤਿ ਏਵਂ ਅਪਕ੍ਕੋਸਿਤੋ. ਤਤੋਤਿ ਯਤ੍ਥ ਪੁਬ੍ਬੇ ਠਿਤੋ, ਤਤੋ ਪਰਲੋਕਤੋ. ਆਗਾਤਿ ਆਗਞ੍ਛਿ. ਨਾਨੁਞ੍ਞਾਤੋਤਿ ਅਨਨੁਮਤੋ, ‘‘ਗਚ੍ਛ, ਤਾਤ, ਪਰਲੋਕ’’ਨ੍ਤਿ ਏਵਂ ਅਮ੍ਹੇਹਿ ਅਵਿਸ੍ਸਟ੍ਠੋ. ਇਤੋਤਿ ਇਧਲੋਕਤੋ. ਗਤੋਤਿ ਅਪਗਤੋ. ਯਥਾਗਤੋਤਿ ਯੇਨਾਕਾਰੇਨ ਆਗਤੋ, ਅਮ੍ਹੇਹਿ ਅਨਬ੍ਭਿਤੋ ਏਵ ਆਗਤੋਤਿ ਅਤ੍ਥੋ. ਤਥਾ ਗਤੋਤਿ ਤੇਨੇਵਾਕਾਰੇਨ ਗਤੋ. ਯਥਾ ਸਕੇਨੇਵ ਕਮ੍ਮੁਨਾ ਆਗਤੋ, ਤਥਾ ਸਕੇਨੇਵ ਕਮ੍ਮੁਨਾ ਗਤੋਤਿ. ਏਤੇਨ ਕਮ੍ਮਸ੍ਸਕਤਂ ਦਸ੍ਸੇਤਿ. ਤਤ੍ਥ ਕਾ ਪਰਿਦੇਵਨਾਤਿ ਏਵਂ ਅਵਸਵਤ੍ਤਿਕੇ ਸਂਸਾਰਪਵਤ੍ਤੇ ਮਰਣਂ ਪਟਿਚ੍ਚ ਕਾ ਨਾਮ ਪਰਿਦੇਵਨਾ, ਅਯੁਤ੍ਤਾ ਸਾ ਪਞ੍ਞਵਤਾ ਅਕਰਣੀਯਾਤਿ ਦਸ੍ਸੇਤਿ.

ਏਵਂ ਬ੍ਰਾਹ੍ਮਣਿਯਾ ਵਚਨਂ ਸੁਤ੍ਵਾ ਤਸ੍ਸ ਭਗਿਨਿਂ ਪੁਚ੍ਛਿ – ‘‘ਅਮ੍ਮ, ਤੁਯ੍ਹਂ ਸੋ ਕਿਂ ਹੋਤੀ’’ਤਿ? ‘‘ਭਾਤਾ ਮੇ, ਸਾਮੀ’’ਤਿ. ‘‘ਅਮ੍ਮ, ਭਗਿਨਿਯੋ ਨਾਮ ਭਾਤੂਸੁ ਸਿਨੇਹਾ, ਤ੍ਵਂ ਕਸ੍ਮਾ ਨ ਰੋਦਸੀ’’ਤਿ? ਸਾਪਿ ਅਰੋਦਨਕਾਰਣਂ ਕਥੇਨ੍ਤੀ –

‘‘ਸਚੇ ¶ ¶ ਰੋਦੇ ਕਿਸ੍ਸ ਅਸ੍ਸਂ, ਤਤ੍ਥ ਮੇ ਕਿਂ ਫਲਂ ਸਿਯਾ;

ਞਾਤਿਮਿਤ੍ਤਸੁਹਜ੍ਜਾਨਂ, ਭਿਯ੍ਯੋ ਨੋ ਅਰਤੀ ਸਿਯਾ.

‘‘ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਰੋਦਾਮਿ, ਗਤੋ ਸੋ ਤਸ੍ਸ ਯਾ ਗਤੀ’’ਤਿ. –

ਗਾਥਾਦ੍ਵਯਮਾਹ. ਤਤ੍ਥ ਸਚੇ ਰੋਦੇ ਕਿਸਾ ਅਸ੍ਸਨ੍ਤਿ ਯਦਿ ਅਹਂ ਰੋਦੇਯ੍ਯਂ, ਕਿਸਾ ਪਰਿਸੁਕ੍ਖਸਰੀਰਾ ਭਵੇਯ੍ਯਂ. ਤਤ੍ਥ ਮੇ ਕਿਂ ਫਲਂ ਸਿਯਾਤਿ ਤਸ੍ਮਿਂ ਮਯ੍ਹਂ ਭਾਤੁ ਮਰਣਨਿਮਿਤ੍ਤੇ ਰੋਦਨੇ ਕਿਂ ਨਾਮ ਫਲਂ, ਕੋ ਆਨਿਸਂਸੋ ਭਵੇਯ੍ਯ? ਨ ਤੇਨ ਮਯ੍ਹਂ ਭਾਤਿਕੋ ¶ ਆਗਚ੍ਛੇਯ੍ਯ, ਨਾਪਿ ਸੋ ਤੇਨ ਸੁਗਤਿਂ ਗਚ੍ਛੇਯ੍ਯਾਤਿ ਅਧਿਪ੍ਪਾਯੋ. ਞਾਤਿਮਿਤ੍ਤਸੁਹਜ੍ਜਾਨਂ, ਭਿਯ੍ਯੋ ਨੋ ਅਰਤੀ ਸਿਯਾਤਿ ਅਮ੍ਹਾਕਂ ਞਾਤੀਨਂ ਮਿਤ੍ਤਾਨਂ ਸੁਹਦਯਾਨਞ੍ਚ ਮਮ ਸੋਚਨੇਨ ਭਾਤੁਮਰਣਦੁਕ੍ਖਤੋ ਭਿਯ੍ਯੋਪਿ ਅਰਤਿ ਦੁਕ੍ਖਮੇਵ ਸਿਯਾਤਿ.

ਏਵਂ ਭਗਿਨਿਯਾ ਵਚਨਂ ਸੁਤ੍ਵਾ ਤਸ੍ਸ ਭਰਿਯਂ ਪੁਚ੍ਛਿ – ‘‘ਤੁਯ੍ਹਂ ਸੋ ਕਿਂ ਹੋਤੀ’’ਤਿ? ‘‘ਭਤ੍ਤਾ ਮੇ, ਸਾਮੀ’’ਤਿ. ‘‘ਭਦ੍ਦੇ, ਇਤ੍ਥਿਯੋ ਨਾਮ ਭਤ੍ਤਰਿ ਸਿਨੇਹਾ ਹੋਨ੍ਤਿ, ਤਸ੍ਮਿਞ੍ਚ ਮਤੇ ਵਿਧਵਾ ਅਨਾਥਾ ਹੋਨ੍ਤਿ, ਕਸ੍ਮਾ ਤ੍ਵਂ ਨ ਰੋਦਸੀ’’ਤਿ? ਸਾਪਿ ਅਤ੍ਤਨੋ ਅਰੋਦਨਕਾਰਣਂ ਕਥੇਨ੍ਤੀ –

‘‘ਯਥਾਪਿ ਦਾਰਕੋ ਚਨ੍ਦਂ, ਗਚ੍ਛਨ੍ਤਮਨੁਰੋਦਤਿ;

ਏਵਂਸਮ੍ਪਦਮੇਵੇਤਂ, ਯੋ ਪੇਤਮਨੁਸੋਚਤਿ.

‘‘ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਰੋਦਾਮਿ, ਗਤੋ ਸੋ ਤਸ੍ਸ ਯਾ ਗਤੀ’’ਤਿ. – ਗਾਥਾਦ੍ਵਯਮਾਹ;

ਤਤ੍ਥ ਦਾਰਕੋਤਿ ਬਾਲਦਾਰਕੋ. ਚਨ੍ਦਨ੍ਤਿ ਚਨ੍ਦਮਣ੍ਡਲਂ. ਗਚ੍ਛਨ੍ਤਨ੍ਤਿ ਨਭਂ ਅਬ੍ਭੁਸ੍ਸੁਕ੍ਕਮਾਨਂ. ਅਨੁਰੋਦਤੀਤਿ ‘‘ਮਯ੍ਹਂ ਰਥਚਕ੍ਕਂ ਗਹੇਤ੍ਵਾ ਦੇਹੀ’’ਤਿ ਅਨੁਰੋਦਤਿ. ਏਵਂਸਮ੍ਪਦਮੇਵੇਤਨ੍ਤਿ ਯੋ ਪੇਤਂ ਮਤਂ ਅਨੁਸੋਚਤਿ, ਤਸ੍ਸੇਤਂ ਅਨੁਸੋਚਨਂ ਏਵਂਸਮ੍ਪਦਂ ਏਵਰੂਪਂ, ਆਕਾਸੇਨ ਗਚ੍ਛਨ੍ਤਸ੍ਸ ਚਨ੍ਦਸ੍ਸ ਗਹੇਤੁਕਾਮਤਾਸਦਿਸਂ ਅਲਬ੍ਭਨੇਯ੍ਯਵਤ੍ਥੁਸ੍ਮਿਂ ਇਚ੍ਛਾਭਾਵਤੋਤਿ ਅਧਿਪ੍ਪਾਯੋ.

ਏਵਂ ਤਸ੍ਸ ਭਰਿਯਾਯ ਵਚਨਂ ਸੁਤ੍ਵਾ ਦਾਸਿਂ ਪੁਚ੍ਛਿ – ‘‘ਅਮ੍ਮ, ਤੁਯ੍ਹਂ ਸੋ ਕਿਂ ਹੋਤੀ’’ਤਿ? ‘‘ਅਯ੍ਯੋ ਮੇ, ਸਾਮੀ’’ਤਿ. ‘‘ਯਦਿ ਏਵਂ ਤੇਨ ਤ੍ਵਂ ਪੋਥੇਤ੍ਵਾ ਵੇਯ੍ਯਾਵਚ੍ਚਂ ¶ ਕਾਰਿਤਾ ਭਵਿਸ੍ਸਸਿ, ਤਸ੍ਮਾ ¶ ਮਞ੍ਞੇ ‘ਸੁਮੁਤ੍ਤਾਹਂ ਤੇਨਾ’ਤਿ ਨ ਰੋਦਸੀ’’ਤਿ? ‘‘ਸਾਮਿ, ਮਾ ਮਂ ਏਵਂ ਅਵਚ, ਨ ਚੇਤਂ ਅਨੁਚ੍ਛਵਿਕਂ ¶ , ਅਤਿਵਿਯ ਖਨ੍ਤਿਮੇਤ੍ਤਾਨੁਦ੍ਦਯਾਸਮ੍ਪਨ੍ਨੋ ਯੁਤ੍ਤਵਾਦੀ ਮਯ੍ਹਂ ਅਯ੍ਯਪੁਤ੍ਤੋ ਉਰੇ ਸਂਵਡ੍ਢਪੁਤ੍ਤੋ ਵਿਯ ਅਹੋਸੀ’’ਤਿ. ਅਥ ‘‘ਕਸ੍ਮਾ ਨ ਰੋਦਸੀ’’ਤਿ? ਸਾਪਿ ਅਤ੍ਤਨੋ ਅਰੋਦਨਕਾਰਣਂ ਕਥੇਨ੍ਤੀ –

‘‘ਯਥਾਪਿ ਬ੍ਰਹ੍ਮੇ ਉਦਕੁਮ੍ਭੋ, ਭਿਨ੍ਨੋ ਅਪ੍ਪਟਿਸਨ੍ਧਿਯੋ;

ਏਵਂਸਮ੍ਪਦਮੇਵੇਤਂ, ਯੋ ਪੇਤਮਨੁਸੋਚਤਿ.

‘‘ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਰੋਦਾਮਿ, ਗਤੋ ਸੋ ਤਸ੍ਸ ਯਾ ਗਤੀ’’ਤਿ. –

ਗਾਥਾਦ੍ਵਯਮਾਹ. ਤਤ੍ਥ ਯਥਾਪਿ ਬ੍ਰਹ੍ਮੇ ਉਦਕੁਬ੍ਭੋ, ਭਿਨ੍ਨੋ ਅਪ੍ਪਟਿਸਨ੍ਧਿਯੋਤਿ ਬ੍ਰਾਹ੍ਮਣ ਸੇਯ੍ਯਥਾਪਿ ਉਦਕਘਟੋ ਮੁਗ੍ਗਰਪ੍ਪਹਾਰਾਦਿਨਾ ਭਿਨ੍ਨੋ ਅਪ੍ਪਟਿਸਨ੍ਧਿਯੋ ਪੁਨ ਪਾਕਤਿਕੋ ਨ ਹੋਤਿ. ਸੇਸਮੇਤ੍ਥ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.

ਸਕ੍ਕੋ ਤੇਸਂ ਕਥਂ ਸੁਤ੍ਵਾ ਪਸਨ੍ਨਮਾਨਸੋ ‘‘ਸਮ੍ਮਦੇਵ ਤੁਮ੍ਹੇਹਿ ਮਰਣਸ੍ਸਤਿ ਭਾਵਿਤਾ, ਇਤੋ ਪਟ੍ਠਾਯ ਨ ਤੁਮ੍ਹੇਹਿ ਕਸਿਆਦਿਕਰਣਕਿਚ੍ਚਂ ਅਤ੍ਥੀ’’ਤਿ ਤੇਸਂ ਗੇਹਂ ਸਤ੍ਤਰਤਨਭਰਿਤਂ ਕਤ੍ਵਾ ‘‘ਅਪ੍ਪਮਤ੍ਤਾ ਦਾਨਂ ਦੇਥ, ਸੀਲਂ ਰਕ੍ਖਥ, ਉਪੋਸਥਕਮ੍ਮਂ ਕਰੋਥਾ’’ਤਿ ਓਵਦਿਤ੍ਵਾ ਅਤ੍ਤਾਨਞ੍ਚ ਤੇਸਂ ਨਿਵੇਦੇਤ੍ਵਾ ਸਕਟ੍ਠਾਨਮੇਵ ਗਤੋ. ਤੇਪਿ ਬ੍ਰਾਹ੍ਮਣਾਦਯੋ ਦਾਨਾਦੀਨਿ ਪੁਞ੍ਞਾਨਿ ਕਰੋਨ੍ਤਾ ਯਾਵਤਾਯੁਕਂ ਠਤ੍ਵਾ ਦੇਵਲੋਕੇ ਉਪ੍ਪਜ੍ਜਿਂਸੁ.

ਸਤ੍ਥਾ ਇਮਂ ਜਾਤਕਂ ਆਹਰਿਤ੍ਵਾ ਤਸ੍ਸ ਉਪਾਸਕਸ੍ਸ ਸੋਕਸਲ੍ਲਂ ਸਮੁਦ੍ਧਰਿਤ੍ਵਾ ਉਪਰਿ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਉਪਾਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹੀਤਿ.

ਇਤਿ ਖੁਦ੍ਦਕ-ਅਟ੍ਠਕਥਾਯ ਪੇਤਵਤ੍ਥੁਸ੍ਮਿਂ

ਪਠਮਸ੍ਸ ਉਰਗਵਗ੍ਗਸ੍ਸ ਅਤ੍ਥਸਂਵਣ੍ਣਨਾ ਨਿਟ੍ਠਿਤਾ.

ਨਗ੍ਗਾ ¶ ¶ ¶ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਮਗਧਰਟ੍ਠੇ ਇਟ੍ਠਕਵਤੀਨਾਮਕੇ ਗਾਮੇ ਅਞ੍ਞਤਰਂ ਪੇਤਿਂ ਆਰਬ੍ਭ ਵੁਤ੍ਤਂ. ਮਗਧਰਟ੍ਠੇ ਕਿਰ ਇਟ੍ਠਕਵਤੀ ਚ ਦੀਘਰਾਜਿ ਚਾਤਿ ਦ੍ਵੇ ਗਾਮਕਾ ਅਹੇਸੁਂ, ਤਤ੍ਥ ਬਹੂ ਸਂਸਾਰਮੋਚਕਾ ਮਿਚ੍ਛਾਦਿਟ੍ਠਿਕਾ ਪਟਿਵਸਨ੍ਤਿ. ਅਤੀਤੇ ਚ ਕਾਲੇ ਪਞ੍ਚਨ੍ਨਂ ਵਸ੍ਸਸਤਾਨਂ ਮਤ੍ਥਕੇ ਅਞ੍ਞਤਰਾ ਇਤ੍ਥੀ ਤਤ੍ਥੇਵ ਇਟ੍ਠਕਵਤਿਯਂ ਅਞ੍ਞਤਰਸ੍ਮਿਂ ਸਂਸਾਰਮੋਚਕਕੁਲੇ ਨਿਬ੍ਬਤ੍ਤਿਤ੍ਵਾ ਮਿਚ੍ਛਾਦਿਟ੍ਠਿਵਸੇਨ ਬਹੂ ਕੀਟਪਟਙ੍ਗੇ ਜੀਵਿਤਾ ਵੋਰੋਪੇਤ੍ਵਾ ਪੇਤੇਸੁ ਨਿਬ੍ਬਤ੍ਤਿ.

ਸਾ ਪਞ੍ਚ ਵਸ੍ਸਸਤਾਨਿ ਖੁਪ੍ਪਿਪਾਸਾਦਿਦੁਕ੍ਖਂ ਅਨੁਭਵਿਤ੍ਵਾ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਰਾਜਗਹਂ ਉਪਨਿਸ੍ਸਾਯ ਵੇਲ਼ੁਵਨੇ ਵਿਹਰਨ੍ਤੇ ਪੁਨਪਿ ਇਟ੍ਠਕਵਤਿਯਂਯੇਵ ਅਞ੍ਞਤਰਸ੍ਮਿਂ ਸਂਸਾਰਮੋਚਕਕੁਲੇਯੇਵ ਨਿਬ੍ਬਤ੍ਤਿਤ੍ਵਾ ਯਦਾ ਸਤ੍ਤਟ੍ਠਵਸ੍ਸੁਦ੍ਦੇਸਿਕਕਾਲੇ ਅਞ੍ਞਾਹਿ ਦਾਰਿਕਾਹਿ ਸਦ੍ਧਿਂ ਰਥਿਕਾਯ ਕੀਲ਼ਨਸਮਤ੍ਥਾ ਅਹੋਸਿ, ਤਦਾ ਆਯਸ੍ਮਾ ਸਾਰਿਪੁਤ੍ਤਤ੍ਥੇਰੋ ਤਮੇਵ ਗਾਮਂ ਉਪਨਿਸ੍ਸਾਯ ਅਰੁਣਵਤੀਵਿਹਾਰੇ ਵਿਹਰਨ੍ਤੋ ਏਕਦਿਵਸਂ ਦ੍ਵਾਦਸਹਿ ਭਿਕ੍ਖੂਹਿ ਸਦ੍ਧਿਂ ਤਸ੍ਸ ਗਾਮਸ੍ਸ ਦ੍ਵਾਰਸਮੀਪੇਨ ਮਗ੍ਗੇਨ ਅਤਿਕ੍ਕਮਤਿ. ਤਸ੍ਮਿਂ ਖਣੇ ਬਹੂ ਗਾਮਦਾਰਿਕਾ ਗਾਮਤੋ ਨਿਕ੍ਖਮਿਤ੍ਵਾ ਦ੍ਵਾਰਸਮੀਪੇ ਕੀਲ਼ਨ੍ਤਿਯੋ ਪਸਨ੍ਨਮਾਨਸਾ ਮਾਤਾਪਿਤੂਨਂ ਪਟਿਪਤ੍ਤਿਦਸ੍ਸਨੇਨ ਵੇਗੇਨਾਗਨ੍ਤ੍ਵਾ ਥੇਰਂ ਅਞ੍ਞੇ ਚ ਭਿਕ੍ਖੂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਂਸੁ. ਸਾ ਪਨੇਸਾ ਅਸ੍ਸਦ੍ਧਕੁਲਸ੍ਸ ਧੀਤਾ ਚਿਰਕਾਲਂ ਅਪਰਿਚਿਤਕੁਸਲਤਾਯ ਸਾਧੁਜਨਾਚਾਰਵਿਰਹਿਤਾ ਅਨਾਦਰਾ ਅਲਕ੍ਖਿਕਾ ਵਿਯ ਅਟ੍ਠਾਸਿ. ਥੇਰੋ ਤਸ੍ਸਾ ਪੁਬ੍ਬਚਰਿਤਂ ਇਦਾਨਿ ਚ ਸਂਸਾਰਮੋਚਕਕੁਲੇ ਨਿਬ੍ਬਤ੍ਤਨਂ ਆਯਤਿਞ੍ਚ ਨਿਰਯੇ ਨਿਬ੍ਬਤ੍ਤਨਾਰਹਤਂ ਦਿਸ੍ਵਾ ‘‘ਸਚਾਯਂ ਮਂ ਵਨ੍ਦਿਸ੍ਸਤਿ, ਨਿਰਯੇ ਨ ਉਪ੍ਪਜ੍ਜਿਸ੍ਸਤਿ, ਪੇਤੇਸੁ ਨਿਬ੍ਬਤ੍ਤਿਤ੍ਵਾਪਿ ਮਮਂਯੇਵ ਨਿਸ੍ਸਾਯ ਸਮ੍ਪਤ੍ਤਿਂ ਪਟਿਲਭਿਸ੍ਸਤੀ’’ਤਿ ਞਤ੍ਵਾ ਕਰੁਣਾਸਞ੍ਚੋਦਿਤਮਾਨਸੋ ¶ ਤਾ ਦਾਰਿਕਾਯੋ ਆਹ – ‘‘ਤੁਮ੍ਹੇ ਭਿਕ੍ਖੂ ਵਨ੍ਦਥ, ਅਯਂ ਪਨ ਦਾਰਿਕਾ ਅਲਕ੍ਖਿਕਾ ਵਿਯ ਠਿਤਾ’’ਤਿ. ਅਥ ਨਂ ਤਾ ਦਾਰਿਕਾ ਹਤ੍ਥੇਸੁ ਪਰਿਗ੍ਗਹੇਤ੍ਵਾ ਆਕਡ੍ਢਿਤ੍ਵਾ ਬਲਕ੍ਕਾਰੇਨ ਥੇਰਸ੍ਸ ਪਾਦੇ ਵਨ੍ਦਾਪੇਸੁਂ.

ਸਾ ¶ ਅਪਰੇਨ ਸਮਯੇਨ ਵਯਪ੍ਪਤ੍ਤਾ ਦੀਘਰਾਜਿਯਂ ਸਂਸਾਰਮੋਚਕਕੁਲੇ ਅਞ੍ਞਤਰਸ੍ਸ ਕੁਮਾਰਸ੍ਸ ਦਿਨ੍ਨਾ ਪਰਿਪੁਣ੍ਣਗਬ੍ਭਾ ਹੁਤ੍ਵਾ ਕਾਲਕਤਾ ਪੇਤੇਸੁ ਉਪ੍ਪਜ੍ਜਿਤ੍ਵਾ ਨਗ੍ਗਾ ਦੁਬ੍ਬਣ੍ਣਰੂਪਾ ਖੁਪ੍ਪਿਪਾਸਾਭਿਭੂਤਾ ¶ ਅਤਿਵਿਯ ਬੀਭਚ੍ਛਦਸ੍ਸਨਾ ਵਿਚਰਨ੍ਤੀ ਰਤ੍ਤਿਯਂ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਅਤ੍ਤਾਨਂ ਦਸ੍ਸੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਤਂ ਦਿਸ੍ਵਾ ਥੇਰੋ –

‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

ਗਾਥਾਯ ਪੁਚ੍ਛਿ. ਤਤ੍ਥ ਧਮਨਿਸਨ੍ਥਤਾਤਿ ਨਿਮ੍ਮਂਸਲੋਹਿਤਤਾਯ ਸਿਰਾਜਾਲੇਹਿ ਪਤ੍ਥਤਗਤ੍ਤਾ. ਉਪ੍ਫਾਸੁਲਿਕੇਤਿ ਉਗ੍ਗਤਫਾਸੁਲਿਕੇ. ਕਿਸਿਕੇਤਿ ਕਿਸਸਰੀਰੇ. ਪੁਬ੍ਬੇਪਿ ‘‘ਕਿਸਾ’’ਤਿ ਵਤ੍ਵਾ ਪੁਨ ‘‘ਕਿਸਿਕੇ’’ਤਿ ਵਚਨਂ ਅਟ੍ਠਿਚਮ੍ਮਨ੍ਹਾਰੁਮਤ੍ਤਸਰੀਰਤਾਯ ਅਤਿਵਿਯ ਕਿਸਭਾਵਦਸ੍ਸਨਤ੍ਥਂ ਵੁਤ੍ਤਂ. ਤਂ ਸੁਤ੍ਵਾ ਪੇਤੀ ਅਤ੍ਤਾਨਂ ਪਵੇਦੇਨ੍ਤੀ –

‘‘ਅਹਂ ਭਦਨ੍ਤੇ ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. – ਗਾਥਂ ਵਤ੍ਵਾ ਪੁਨ ਥੇਰੇਨ –

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ. –

ਕਤਕਮ੍ਮਂ ਪੁਟ੍ਠਾ ‘‘ਅਦਾਨਸੀਲਾ ਮਚ੍ਛਰਿਨੀ ਹੁਤ੍ਵਾ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਏਵਂ ਮਹਾਦੁਕ੍ਖਂ ਅਨੁਭਵਾਮੀ’’ਤਿ ਦਸ੍ਸੇਨ੍ਤੀ ਤਿਸ੍ਸੋ ਗਾਥਾ ਅਭਾਸਿ –

‘‘ਅਨੁਕਮ੍ਪਕਾ ¶ ¶ ਮਯ੍ਹਂ ਨਾਹੇਸੁਂ ਭਨ੍ਤੇ, ਪਿਤਾ ਚ ਮਾਤਾ ਅਥਵਾਪਿ ਞਾਤਕਾ;

ਯੇ ਮਂ ਨਿਯੋਜੇਯ੍ਯੁਂ ਦਦਾਹਿ ਦਾਨਂ, ਪਸਨ੍ਨਚਿਤ੍ਤਾ ਸਮਣਬ੍ਰਾਹ੍ਮਣਾਨਂ.

‘‘ਇਤੋ ਅਹਂ ਵਸ੍ਸਸਤਾਨਿ ਪਞ੍ਚ, ਯਂ ਏਵਰੂਪਾ ਵਿਚਰਾਮਿ ਨਗ੍ਗਾ;

ਖੁਦਾਯ ਤਣ੍ਹਾਯ ਚ ਖਜ੍ਜਮਾਨਾ, ਪਾਪਸ੍ਸ ਕਮ੍ਮਸ੍ਸ ਫਲਂ ਮਮੇਦਂ.

‘‘ਵਨ੍ਦਾਮਿ ¶ ਤਂ ਅਯ੍ਯ ਪਸਨ੍ਨਚਿਤ੍ਤਾ, ਅਨੁਕਮ੍ਪ ਮਂ ਵੀਰ ਮਹਾਨੁਭਾਵ;

ਦਤ੍ਵਾ ਚ ਮੇ ਆਦਿਸ ਯਞ੍ਹਿ ਕਿਞ੍ਚਿ, ਮੋਚੇਹਿ ਮਂ ਦੁਗ੍ਗਤਿਯਾ ਭਦਨ੍ਤੇ’’ਤਿ.

੯੮. ਤਤ੍ਥ ਅਨੁਕਮ੍ਪਕਾਤਿ ਸਮ੍ਪਰਾਯਿਕੇਨ ਅਤ੍ਥੇਨ ਅਨੁਗ੍ਗਣ੍ਹਕਾ. ਭਨ੍ਤੇਤਿ ਥੇਰਂ ਆਲਪਤਿ. ਯੇ ਮਂ ਨਿਯੋਜੇਯ੍ਯੁਨ੍ਤਿ ਮਾਤਾ ਵਾ ਪਿਤਾ ਵਾ ਅਥ ਵਾ ਞਾਤਕਾ ਏਦਿਸਾ ਪਸਨ੍ਨਚਿਤ੍ਤਾ ਹੁਤ੍ਵਾ ‘‘ਸਮਣਬ੍ਰਾਹ੍ਮਣਾਨਂ ਦਦਾਹਿ ਦਾਨ’’ਨ੍ਤਿ ਯੇ ਮਂ ਨਿਯੋਜੇਯ੍ਯੁਂ, ਤਾਦਿਸਾ ਅਨੁਕਮ੍ਪਕਾ ਮਯ੍ਹਂ ਨਾਹੇਸੁਨ੍ਤਿ ਯੋਜਨਾ.

੯੯. ਇਤੋ ਅਹਂ ਵਸ੍ਸਸਤਾਨਿ ਪਞ੍ਚ, ਯਂ ਏਵਰੂਪਾ ਵਿਚਰਾਮਿ ਨਗ੍ਗਾਤਿ ਇਦਂ ਸਾ ਪੇਤੀ ਇਤੋ ਤਤਿਯਾਯ ਜਾਤਿਯਾ ਅਤ੍ਤਨੋ ਪੇਤਤ੍ਤਭਾਵਂ ਅਨੁਸ੍ਸਰਿਤ੍ਵਾ ਇਦਾਨਿਪਿ ਤਥਾ ਪਞ੍ਚਵਸ੍ਸਸਤਾਨਿ ਵਿਚਰਾਮੀਤਿ ਅਧਿਪ੍ਪਾਯੇਨਾਹ. ਤਤ੍ਥ ਯਨ੍ਤਿ ਯਸ੍ਮਾ, ਦਾਨਾਦੀਨਂ ਪੁਞ੍ਞਾਨਂ ਅਕਤਤ੍ਤਾ ਏਵਰੂਪਾ ਨਗ੍ਗਾ ਪੇਤੀ ਹੁਤ੍ਵਾ ਇਤੋ ਪਟ੍ਠਾਯ ਵਸ੍ਸਸਤਾਨਿ ਪਞ੍ਚ ਵਿਚਰਾਮੀਤਿ ਯੋਜਨਾ. ਤਣ੍ਹਾਯਾਤਿ ਪਿਪਾਸਾਯ. ਖਜ੍ਜਮਾਨਾਤਿ ਖਾਦਿਯਮਾਨਾ, ਬਾਧਿਯਮਾਨਾਤਿ ਅਤ੍ਥੋ.

੧੦੦. ਵਨ੍ਦਾਮਿ ਤਂ ਅਯ੍ਯ ਪਸਨ੍ਨਚਿਤ੍ਤਾਤਿ ਅਯ੍ਯ, ਤਮਹਂ ਪਸਨ੍ਨਚਿਤ੍ਤਾ ਹੁਤ੍ਵਾ ਵਨ੍ਦਾਮਿ, ਏਤ੍ਤਕਮੇਵ ਪੁਞ੍ਞਂ ਇਦਾਨਿ ਮਯਾ ਕਾਤੁਂ ਸਕ੍ਕਾਤਿ ਦਸ੍ਸੇਤਿ. ਅਨੁਕਮ੍ਪ ਮਨ੍ਤਿ ਅਨੁਗ੍ਗਣ੍ਹ ¶ ਮਮਂ ਉਦ੍ਦਿਸ੍ਸ ਅਨੁਦ੍ਦਯਂ ਕਰੋਹਿ. ਦਤ੍ਵਾ ਚ ਮੇ ਆਦਿਸ ਯਞ੍ਹਿ ਕਿਞ੍ਚੀਤਿ ਕਿਞ੍ਚਿਦੇਵ ਦੇਯ੍ਯਧਮ੍ਮਂ ਸਮਣਬ੍ਰਾਹ੍ਮਣਾਨਂ ਦਤ੍ਵਾ ਤਂ ਦਕ੍ਖਿਣਂ ਮਯ੍ਹਂ ਆਦਿਸ, ਤੇਨ ਮੇ ਇਤੋ ਪੇਤਯੋਨਿਤੋ ਮੋਕ੍ਖੋ ਭਵਿਸ੍ਸਤੀਤਿ ਅਧਿਪ੍ਪਾਯੇਨ ਵਦਤਿ. ਤੇਨੇਵਾਹ ‘‘ਮੋਚੇਹਿ ਮਂ ਦੁਗ੍ਗਤਿਯਾ ਭਦਨ੍ਤੇ’’ਤਿ.

ਏਵਂ ਪੇਤਿਯਾ ਵੁਤ੍ਤੇ ਯਥਾ ਸੋ ਥੇਰੋ ਪਟਿਪਜ੍ਜਿ, ਤਂ ਦਸ੍ਸੇਤੁਂ ਸਙ੍ਗੀਤਿਕਾਰੇਹਿ ਤਿਸ੍ਸੋ ਗਾਥਾ ਵੁਤ੍ਤਾ –

‘‘ਸਾਧੂਤਿ ਸੋ ਪਟਿਸ੍ਸੁਤ੍ਵਾ, ਸਾਰਿਪੁਤ੍ਤੋਨੁਕਮ੍ਪਕੋ;

ਭਿਕ੍ਖੂਨਂ ਆਲੋਪਂ ਦਤ੍ਵਾ, ਪਾਣਿਮਤ੍ਤਞ੍ਚ ਚੋਲ਼ਕਂ;

ਥਾਲਕਸ੍ਸ ਚ ਪਾਨੀਯਂ, ਤਸ੍ਸਾ ਦਕ੍ਖਿਣਮਾਦਿਸਿ.

‘‘ਸਮਨਨ੍ਤਰਾਨੁਦ੍ਦਿਟ੍ਠੇ ¶ , ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

‘‘ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਸਾਰਿਪੁਤ੍ਤਂ ਉਪਸਙ੍ਕਮੀ’’ਤਿ.

੧੦੧-੧੦੩. ਤਤ੍ਥ ¶ ਭਿਕ੍ਖੂਨਨ੍ਤਿ ਭਿਕ੍ਖੁਨੋ, ਵਚਨਵਿਪਲ੍ਲਾਸੇਨ ਹੇਤਂ ਵੁਤ੍ਤਂ. ‘‘ਆਲੋਪਂ ਭਿਕ੍ਖੁਨੋ ਦਤ੍ਵਾ’’ਤਿ ਕੇਚਿ ਪਠਨ੍ਤਿ. ਆਲੋਪਨ੍ਤਿ ਕਬਲ਼ਂ, ਏਕਾਲੋਪਮਤ੍ਤਂ ਭੋਜਨਨ੍ਤਿ ਅਤ੍ਥੋ. ਪਾਣਿਮਤ੍ਤਞ੍ਚ ਚੋਲ਼ਕਨ੍ਤਿ ਏਕਹਤ੍ਥਪ੍ਪਮਾਣਂ ਚੋਲ਼ਖਣ੍ਡਨ੍ਤਿ ਅਤ੍ਥੋ. ਥਾਲਕਸ੍ਸ ਚ ਪਾਨੀਯਨ੍ਤਿ ਏਕਥਾਲਕਪੂਰਣਮਤ੍ਤਂ ਉਦਕਂ. ਸੇਸਂ ਖਲ੍ਲਾਟਿਯਪੇਤਵਤ੍ਥੁਸ੍ਮਿਂ ਵੁਤ੍ਤਨਯਮੇਵ.

ਅਥਾਯਸ੍ਮਾ ਸਾਰਿਪੁਤ੍ਤੋ ਤਂ ਪੇਤਿਂ ਪੀਣਿਨ੍ਦ੍ਰਿਯਂ ਪਰਿਸੁਦ੍ਧਛਵਿਵਣ੍ਣਂ ਦਿਬ੍ਬਵਤ੍ਥਾਭਰਣਾਲਙ੍ਕਾਰਂ ਸਮਨ੍ਤਤੋ ਅਤ੍ਤਨੋ ਪਭਾਯ ਓਭਾਸੇਨ੍ਤਿਂ ਅਤ੍ਤਨੋ ਸਨ੍ਤਿਕਂ ਉਪਗਨ੍ਤ੍ਵਾ ਠਿਤਂ ਦਿਸ੍ਵਾ ਪਚ੍ਚਕ੍ਖਤੋ ਕਮ੍ਮਫਲਂ ਤਾਯ ਵਿਭਾਵੇਤੁਕਾਮੋ ਹੁਤ੍ਵਾ ਤਿਸ੍ਸੋ ਗਾਥਾ ਅਭਾਸਿ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ¶ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੦੪. ਤਤ੍ਥ ਅਭਿਕ੍ਕਨ੍ਤੇਨਾਤਿ ਅਤਿਮਨਾਪੇਨ, ਅਭਿਰੂਪੇਨਾਤਿ ਅਤ੍ਥੋ. ਵਣ੍ਣੇਨਾਤਿ ਛਵਿਵਣ੍ਣੇਨ. ਓਭਾਸੇਨ੍ਤੀ ਦਿਸਾ ਸਬ੍ਬਾਤਿ ਸਬ੍ਬਾਪਿ ਦਸ ਦਿਸਾ ਜੋਤੇਨ੍ਤੀ ਏਕਾਲੋਕਂ ਕਰੋਨ੍ਤੀ. ਯਥਾ ਕਿਨ੍ਤਿ ਆਹ ‘‘ਓਸਧੀ ਵਿਯ ਤਾਰਕਾ’’ਤਿ. ਉਸ੍ਸਨ੍ਨਾ ਪਭਾ ਏਤਾਯ ਧੀਯਤਿ, ਓਸਧਾਨਂ ਵਾ ¶ ਅਨੁਬਲਪ੍ਪਦਾਯਿਕਾਤਿ ਕਤ੍ਵਾ ‘‘ਓਸਧੀ’’ਤਿ ਲਦ੍ਧਨਾਮਾ ਤਾਰਕਾ ਯਥਾ ਸਮਨ੍ਤਤੋ ਆਲੋਕਂ ਕੁਰੁਮਾਨਾ ਤਿਟ੍ਠਤਿ, ਏਵਮੇਵ ਤ੍ਵਂ ਸਬ੍ਬਦਿਸਾ ਓਭਾਸੇਨ੍ਤੀਤਿ ਅਤ੍ਥੋ.

੧੦੫. ਕੇਨਾਤਿ ਕਿਂ-ਸਦ੍ਦੋ ਪੁਚ੍ਛਾਯਂ. ਹੇਤੁਅਤ੍ਥੇ ਚੇਤਂ ਕਰਣਵਚਨਂ, ਕੇਨ ਹੇਤੁਨਾਤਿ ਅਤ੍ਥੋ. ਤੇਤਿ ਤਵ. ਏਤਾਦਿਸੋਤਿ ਏਦਿਸੋ, ਏਤਰਹਿ ਯਥਾਦਿਸ੍ਸਮਾਨੋਤਿ ਵੁਤ੍ਤਂ ਹੋਤਿ. ਕੇਨ ਤੇ ਇਧ ਮਿਜ੍ਝਤੀਤਿ ਕੇਨ ਪੁਞ੍ਞਵਿਸੇਸੇਨ ਇਧ ਇਮਸ੍ਮਿਂ ਠਾਨੇ ਇਦਾਨਿ ਤਯਾ ਲਬ੍ਭਮਾਨਂ ਸੁਚਰਿਤਫਲਂ ਇਜ੍ਝਤਿ ਨਿਪ੍ਫਜ੍ਜਤਿ. ਉਪ੍ਪਜ੍ਜਨ੍ਤੀਤਿ ਨਿਬ੍ਬਤ੍ਤਨ੍ਤਿ. ਭੋਗਾਤਿ ਪਰਿਭੁਞ੍ਜਿਤਬ੍ਬਟ੍ਠੇਨ ‘‘ਭੋਗਾ’’ਤਿ ਲਦ੍ਧਨਾਮਾ ਵਤ੍ਥਾਭਰਣਾਦਿਵਿਤ੍ਤੂਪਕਰਣਵਿਸੇਸਾ. ਯੇ ਕੇਚੀਤਿ ਭੋਗੇ ਅਨਵਸੇਸਤੋ ਬ੍ਯਾਪੇਤ੍ਵਾ ਸਙ੍ਗਣ੍ਹਾਤਿ ¶ . ਅਨਵਸੇਸਬ੍ਯਾਪਕੋ ਹਿ ਅਯਂ ਨਿਦ੍ਦੇਸੋ ਯਥਾ ‘‘ਯੇ ਕੇਚਿ ਸਙ੍ਖਾਰਾ’’ਤਿ. ਮਨਸੋ ਪਿਯਾਤਿ ਮਨਸਾ ਪਿਯਾਯਿਤਬ੍ਬਾ, ਮਨਾਪਿਯਾਤਿ ਅਤ੍ਥੋ.

੧੦੬. ਪੁਚ੍ਛਾਮੀਤਿ ਪੁਚ੍ਛਂ ਕਰੋਮਿ, ਞਾਤੁਂ ਇਚ੍ਛਾਮੀਤਿ ਅਤ੍ਥੋ. ਤਨ੍ਤਿ ਤ੍ਵਂ. ਦੇਵੀਤਿ ਦਿਬ੍ਬਾਨਭਾਵਸਮਙ੍ਗਿਤਾਯ, ਦੇਵਿ. ਤੇਨਾਹ ‘‘ਮਹਾਨੁਭਾਵੇ’’ਤਿ. ਮਨੁਸ੍ਸਭੂਤਾਤਿ ਮਨੁਸ੍ਸੇਸੁ ਜਾਤਾ ਮਨੁਸ੍ਸਭਾਵਂ ਪਤ੍ਤਾ. ਇਦਂ ਯੇਭੁਯ੍ਯੇਨ ਸਤ੍ਤਾ ਮਨੁਸ੍ਸਤ੍ਤਭਾਵੇ ਠਿਤਾ ਪੁਞ੍ਞਾਨਿ ਕਰੋਨ੍ਤੀਤਿ ਕਤ੍ਵਾ ਵੁਤ੍ਤਂ. ਅਯਮੇਤਾਯਂ ਗਾਥਾਨਂ ਸਙ੍ਖੇਪਤੋ ਅਤ੍ਥੋ, ਵਿਤ੍ਥਾਰਤੋ ਪਨ ਪਰਮਤ੍ਥਦੀਪਨਿਯਂ ਵਿਮਾਨਵਤ੍ਥੁਅਟ੍ਠਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਏਵਂ ¶ ਪੁਨ ਥੇਰੇਨ ਪੁਟ੍ਠਾ ਪੇਤੀ ਤਸ੍ਸਾ ਸਮ੍ਪਤ੍ਤਿਯਾ ਲਦ੍ਧਕਾਰਣਂ ਪਕਾਸੇਨ੍ਤੀ ਸੇਸਗਾਥਾ ਅਭਾਸਿ –

‘‘ਉਪ੍ਪਣ੍ਡੁਕਿਂ ਕਿਸਂ ਛਾਤਂ, ਨਗ੍ਗਂ ਸਮ੍ਪਤਿਤਚ੍ਛਵਿਂ;

ਮੁਨਿ ਕਾਰੁਣਿਕੋ ਲੋਕੇ, ਤਂ ਮਂ ਅਦ੍ਦਕ੍ਖਿ ਦੁਗ੍ਗਤਂ.

‘‘ਭਿਕ੍ਖੂਨਂ ਆਲੋਪਂ ਦਤ੍ਵਾ, ਪਾਣਿਮਤ੍ਤਞ੍ਚ ਚੋਲ਼ਕਂ;

ਥਾਲਕਸ੍ਸ ਚ ਪਾਨੀਯਂ, ਮਮ ਦਕ੍ਖਿਣਮਾਦਿਸਿ.

‘‘ਆਲੋਪਸ੍ਸ ਫਲਂ ਪਸ੍ਸ, ਭਤ੍ਤਂ ਵਸ੍ਸਸਤਂ ਦਸ;

ਭੁਞ੍ਜਾਮਿ ਕਾਮਕਾਮਿਨੀ, ਅਨੇਕਰਸਬ੍ਯਞ੍ਜਨਂ.

‘‘ਪਾਣਿਮਤ੍ਤਸ੍ਸ ¶ ਚੋਲ਼ਸ੍ਸ, ਵਿਪਾਕਂ ਪਸ੍ਸ ਯਾਦਿਸਂ;

ਯਾਵਤਾ ਨਨ੍ਦਰਾਜਸ੍ਸ, ਵਿਜਿਤਸ੍ਮਿਂ ਪਟਿਚ੍ਛਦਾ.

‘‘ਤਤੋ ਬਹੁਤਰਾ ਭਨ੍ਤੇ, ਵਤ੍ਥਾਨਚ੍ਛਾਦਨਾਨਿ ਮੇ;

ਕੋਸੇਯ੍ਯਕਮ੍ਬਲੀਯਾਨਿ, ਖੋਮਕਪ੍ਪਾਸਿਕਾਨਿ ਚ.

‘‘ਵਿਪੁਲਾ ਚ ਮਹਗ੍ਘਾ ਚ, ਤੇਪਾਕਾਸੇਵਲਮ੍ਬਰੇ;

ਸਾਹਂ ਤਂ ਪਰਿਦਹਾਮਿ, ਯਂ ਯਞ੍ਹਿ ਮਨਸੋ ਪਿਯਂ.

‘‘ਥਾਲਕਸ੍ਸ ¶ ਚ ਪਾਨੀਯਂ, ਵਿਪਾਕਂ ਪਸ੍ਸ ਯਾਦਿਸਂ;

ਗਮ੍ਭੀਰਾ ਚਤੁਰਸ੍ਸਾ ਚ, ਪੋਕ੍ਖਰਞ੍ਞੋ ਸੁਨਿਮ੍ਮਿਤਾ.

‘‘ਸੇਤੋਦਕਾ ਸੁਪ੍ਪਤਿਤ੍ਥਾ, ਸੀਤਾ ਅਪ੍ਪਟਿਗਨ੍ਧਿਯਾ;

ਪਦੁਮੁਪ੍ਪਲਸਞ੍ਛਨ੍ਨਾ, ਵਾਰਿਕਿਞ੍ਜਕ੍ਖਪੂਰਿਤਾ.

‘‘ਸਾਹਂ ਰਮਾਮਿ ਕੀਲ਼ਾਮਿ, ਮੋਦਾਮਿ ਅਕੁਤੋਭਯਾ;

ਮੁਨਿਂ ਕਾਰੁਣਿਕਂ ਲੋਕੇ, ਭਨ੍ਤੇ ਵਨ੍ਦਿਤੁਮਾਗਤਾ’’ਤਿ.

੧੦੭. ਤਤ੍ਥ ਉਪ੍ਪਣ੍ਡੁਕਿਨ੍ਤਿ ਉਪ੍ਪਣ੍ਡੁਕਜਾਤਂ. ਛਾਤਨ੍ਤਿ ਬੁਭੁਕ੍ਖਿਤਂ ਖੁਦਾਯ ਅਭਿਭੂਤਂ. ਸਮ੍ਪਤਿਤਚ੍ਛਵਿਨ੍ਤਿ ਛਿਨ੍ਨਭਿਨ੍ਨਸਰੀਰਚ੍ਛਵਿਂ. ਲੋਕੇਤਿ ਇਦਂ ‘‘ਕਾਰੁਣਿਕੋ’’ਤਿ ਏਤ੍ਥ ਵੁਤ੍ਤਕਰੁਣਾਯ ਵਿਸਯਦਸ੍ਸਨਂ. ਤਂ ਮਨ੍ਤਿ ਤਾਦਿਸਂ ਮਮਂ, ਵੁਤ੍ਤਨਯੇਨ ਏਕਨ੍ਤਤੋ ਕਰੁਣਟ੍ਠਾਨਿਯਂ ਮਂ. ਦੁਗ੍ਗਤਨ੍ਤਿ ਦੁਗ੍ਗਤਿਂ ਗਤਂ.

੧੦੮-੧੦੯. ਭਿਕ੍ਖੂਨਂ ਆਲੋਪਂ ਦਤ੍ਵਾਤਿਆਦਿ ਥੇਰੇਨ ਅਤ੍ਤਨੋ ਕਰੁਣਾਯ ਕਤਾਕਾਰਦਸ੍ਸਨਂ. ਤਤ੍ਥ ¶ ਭਤ੍ਤਨ੍ਤਿ ਓਦਨਂ, ਦਿਬ੍ਬਭੋਜਨਨ੍ਤਿ ਅਤ੍ਥੋ. ਵਸ੍ਸਸਤਂ ਦਸਾਤਿ ਦਸ ਵਸ੍ਸਸਤਾਨਿ, ਵਸ੍ਸਸਹਸ੍ਸਨ੍ਤਿ ਵੁਤ੍ਤਂ ਹੋਤਿ. ਅਚ੍ਚਨ੍ਤਸਂਯੋਗੇ ਚੇਤਂ ਉਪਯੋਗਵਚਨਂ. ਭੁਞ੍ਜਾਮਿ ਕਾਮਕਾਮਿਨੀ, ਅਨੇਕਰਸਬ੍ਯਞ੍ਜਨਨ੍ਤਿ ਅਞ੍ਞੇਹਿਪਿ ਕਾਮੇਤਬ੍ਬਕਾਮੇਹਿ ਸਮਨ੍ਨਾਗਤਾ ਅਨੇਕਰਸਬ੍ਯਞ੍ਜਨਂ ਭਤ੍ਤਂ ਭੁਞ੍ਜਾਮੀਤਿ ਯੋਜਨਾ.

੧੧੦. ਚੋਲ਼ਸ੍ਸਾਤਿ ਦੇਯ੍ਯਧਮ੍ਮਸੀਸੇਨ ਤਬ੍ਬਿਸਯਂ ਦਾਨਮਯਂ ਪੁਞ੍ਞਮੇਵ ਦਸ੍ਸੇਤਿ. ਵਿਪਾਕਂ ਪਸ੍ਸ ਯਾਦਿਸਨ੍ਤਿ ਤਸ੍ਸ ਚੋਲ਼ਦਾਨਸ੍ਸ ਵਿਪਾਕਸਙ੍ਖਾਤਂ ਫਲਂ ਪਸ੍ਸ, ਭਨ੍ਤੇ. ਤਂ ਪਨ ਯਾਦਿਸਂ ਯਥਾਰੂਪਂ, ਕਿਨ੍ਤਿ ਚੇਤਿ ਆਹ ‘‘ਯਾਵਤਾ ਨਨ੍ਦਰਾਜਸ੍ਸਾ’’ਤਿਆਦਿ.

ਤਤ੍ਥ ¶ ਕੋਯਂ ਨਨ੍ਦਰਾਜਾ ਨਾਮ? ਅਤੀਤੇ ਕਿਰ ਦਸਵਸ੍ਸਸਹਸ੍ਸਾਯੁਕੇਸੁ ਮਨੁਸ੍ਸੇਸੁ ਬਾਰਾਣਸਿਵਾਸੀ ਏਕੋ ਕੁਟੁਮ੍ਬਿਕੋ ਅਰਞ੍ਞੇ ਜਙ੍ਘਾਵਿਹਾਰਂ ਵਿਚਰਨ੍ਤੋ ਅਰਞ੍ਞਟ੍ਠਾਨੇ ਅਞ੍ਞਤਰਂ ਪਚ੍ਚੇਕਬੁਦ੍ਧਂ ਅਦ੍ਦਸ. ਸੋ ਪਚ੍ਚੇਕਬੁਦ੍ਧੋ ਤਤ੍ਥ ਚੀਵਰਕਮ੍ਮਂ ਕਰੋਨ੍ਤੋ ਅਨੁਵਾਤੇ ਅਪ੍ਪਹੋਨ੍ਤੇ ਸਂਹਰਿਤ੍ਵਾਵ ਠਪੇਤੁਂ ਆਰਦ੍ਧੋ. ਸੋ ਕੁਟੁਮ੍ਬਿਕੋ ਤਂ ਦਿਸ੍ਵਾ, ‘‘ਭਨ੍ਤੇ, ਕਿਂ ਕਰੋਥਾ’’ਤਿ ਵਤ੍ਵਾ ਤੇਨ ਅਪ੍ਪਿਚ੍ਛਤਾਯ ਕਿਞ੍ਚਿ ਅਵੁਤ੍ਤੇਪਿ ‘‘ਚੀਵਰਦੁਸ੍ਸਂ ਨਪ੍ਪਹੋਤੀ’’ਤਿ ਞਤ੍ਵਾ ਅਤ੍ਤਨੋ ਉਤ੍ਤਰਾਸਙ੍ਗਂ ਪਚ੍ਚੇਕਬੁਦ੍ਧਸ੍ਸ ¶ ਪਾਦਮੂਲੇ ਠਪੇਤ੍ਵਾ ਅਗਮਾਸਿ. ਪਚ੍ਚੇਕਬੁਦ੍ਧੋ ਤਂ ਗਹੇਤ੍ਵਾ ਅਨੁਵਾਤਂ ਆਰੋਪੇਨ੍ਤੋ ਚੀਵਰਂ ਕਤ੍ਵਾ ਪਾਰੁਪਿ. ਸੋ ਕੁਟੁਮ੍ਬਿਕਾ ਜੀਵਿਤਪਰਿਯੋਸਾਨੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚਵਿਤ੍ਵਾ ਬਾਰਾਣਸਿਤੋ ਯੋਜਨਮਤ੍ਤੇ ਠਾਨੇ ਅਞ੍ਞਤਰਸ੍ਮਿਂ ਗਾਮੇ ਅਮਚ੍ਚਕੁਲੇ ਨਿਬ੍ਬਤ੍ਤਿ.

ਤਸ੍ਸ ਵਯਪ੍ਪਤ੍ਤਕਾਲੇ ਤਸ੍ਮਿਂ ਗਾਮੇ ਨਕ੍ਖਤ੍ਤਂ ਸਙ੍ਘੁਟ੍ਠਂ ਅਹੋਸਿ. ਸੋ ਮਾਤਰਂ ਆਹ – ‘‘ਅਮ੍ਮ, ਸਾਟਕਂ ਮੇ ਦੇਹਿ, ਨਕ੍ਖਤ੍ਤਂ ਕੀਲ਼ਿਸ੍ਸਾਮੀ’’ਤਿ. ਸਾ ਸੁਧੋਤਵਤ੍ਥਂ ਨੀਹਰਿਤ੍ਵਾ ਅਦਾਸਿ. ‘‘ਅਮ੍ਮ, ਥੂਲਂ ਇਦ’’ਨ੍ਤਿ. ਅਞ੍ਞਂ ਨੀਹਰਿਤ੍ਵਾ ਅਦਾਸਿ, ਤਮ੍ਪਿ ਪਟਿਕ੍ਖਿਪਿ. ਅਥ ਨਂ ਮਾਤਾ ਆਹ – ‘‘ਤਾਤ, ਯਾਦਿਸੇ ਗੇਹੇ ਮਯਂ ਜਾਤਾ, ਨਤ੍ਥਿ ਨੋ ਇਤੋ ਸੁਖੁਮਤਰਸ੍ਸ ਵਤ੍ਥਸ੍ਸ ਪਟਿਲਾਭਾਯ ਪੁਞ੍ਞ’’ਨ੍ਤਿ. ‘‘ਲਭਨਟ੍ਠਾਨਂ ਗਚ੍ਛਾਮਿ, ਅਮ੍ਮਾ’’ਤਿ. ‘‘ਗਚ੍ਛ, ਪੁਤ੍ਤ, ਅਹਂ ਅਜ੍ਜੇਵ ਤੁਯ੍ਹਂ ਬਾਰਾਣਸਿਨਗਰੇ ਰਜ੍ਜਪਟਿਲਾਭਂ ¶ ਇਚ੍ਛਾਮੀ’’ਤਿ. ਸੋ ‘‘ਸਾਧੁ, ਅਮ੍ਮਾ’’ਤਿ ਮਾਤਰਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਆਹ – ‘‘ਗਚ੍ਛਾਮਿ, ਅਮ੍ਮਾ’’ਤਿ. ‘‘ਗਚ੍ਛ, ਤਾਤਾ’’ਤਿ. ਏਵਂ ਕਿਰਸ੍ਸਾ ਚਿਤ੍ਤਂ ਅਹੋਸਿ – ‘‘ਕਹਂ ਗਮਿਸ੍ਸਤਿ, ਇਧ ਵਾ ਏਤ੍ਥ ਵਾ ਗੇਹੇ ਨਿਸੀਦਿਸ੍ਸਤੀ’’ਤਿ. ਸੋ ਪਨ ਪੁਞ੍ਞਨਿਯਾਮੇਨ ਚੋਦਿਯਮਾਨੋ ਗਾਮਤੋ ਨਿਕ੍ਖਮਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਮਙ੍ਗਲਸਿਲਾਪਟ੍ਟੇ ਸਸੀਸਂ ਪਾਰੁਪਿਤ੍ਵਾ ਨਿਪਜ੍ਜਿ. ਸੋ ਚ ਬਾਰਾਣਸਿਰਞ੍ਞੋ ਕਾਲਕਤਸ੍ਸ ਸਤ੍ਤਮੋ ਦਿਵਸੋ ਹੋਤਿ.

ਅਮਚ੍ਚਾ ਚ ਪੁਰੋਹਿਤੋ ਚ ਰਞ੍ਞੋ ਸਰੀਰਕਿਚ੍ਚਂ ਕਤ੍ਵਾ ਰਾਜਙ੍ਗਣੇ ਨਿਸੀਦਿਤ੍ਵਾ ਮਨ੍ਤਯਿਂਸੁ – ‘‘ਰਞ੍ਞੋ ਏਕਾ ਧੀਤਾ ਅਤ੍ਥਿ, ਪੁਤ੍ਤੋ ਨਤ੍ਥਿ, ਅਰਾਜਕਂ ਰਜ੍ਜਂ ਨ ਤਿਟ੍ਠਤਿ, ਫੁਸ੍ਸਰਥਂ ਵਿਸ੍ਸਜ੍ਜੇਮਾ’’ਤਿ. ਤੇ ਕੁਮੁਦਵਣ੍ਣੇ ਚਤ੍ਤਾਰੋ ਸਿਨ੍ਧਵੇ ਯੋਜੇਤ੍ਵਾ ਸੇਤਚ੍ਛਤ੍ਤਪ੍ਪਮੁਖਂ ਪਞ੍ਚਵਿਧਂ ਰਾਜਕਕੁਧਭਣ੍ਡਂ ਰਥਸ੍ਮਿਂਯੇਵ ਠਪੇਤ੍ਵਾ ਰਥਂ ਵਿਸ੍ਸਜ੍ਜੇਤ੍ਵਾ ਪਚ੍ਛਤੋ ਤੂਰਿਯਾਨਿ ਪਗ੍ਗਣ੍ਹਾਪੇਸੁਂ. ਰਥੋ ਪਾਚੀਨਦ੍ਵਾਰੇਨ ਨਿਕ੍ਖਮਿਤ੍ਵਾ ਉਯ੍ਯਾਨਾਭਿਮੁਕ੍ਖੋ ਅਹੋਸਿ. ‘‘ਪਰਿਚਯੇਨ ਉਯ੍ਯਾਨਾਭਿਮੁਖੋ ਗਚ੍ਛਤਿ ¶ , ਨਿਵਤ੍ਤੇਮਾ’’ਤਿ ਕੇਚਿ ਆਹਂਸੁ. ਪੁਰੋਹਿਤੋ ‘‘ਮਾ ਨਿਵਤ੍ਤਯਿਤ੍ਥਾ’’ਤਿ ਆਹ. ਰਥੋ ਕੁਮਾਰਂ ਪਦਕ੍ਖਿਣਂ ਕਤ੍ਵਾ ਆਰੋਹਨਸਜ੍ਜੋ ਹੁਤ੍ਵਾ ਅਟ੍ਠਾਸਿ, ਪੁਰੋਹਿਤੋ ਪਾਰੁਪਨਕਣ੍ਣਂ ਅਪਨੇਤ੍ਵਾ ਪਾਦਤਲਾਨਿ ਓਲੋਕੇਨ੍ਤੋ ‘‘ਤਿਟ੍ਠਤੁ ਅਯਂ ਦੀਪੋ, ਦ੍ਵਿਸਹਸ੍ਸਦੀਪਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਏਕਰਜ੍ਜਂ ਕਾਰੇਤੁਂ ਯੁਤ੍ਤੋ’’ਤਿ ਵਤ੍ਵਾ ‘‘ਤੂਰਿਯਾਨਿ ਪਗ੍ਗਣ੍ਹਥ, ਪੁਨਪਿ ਪਗ੍ਗਣ੍ਹਥਾ’’ਤਿ ਤਿਕ੍ਖਤ੍ਤੁਂ ਤੂਰਿਯਾਨਿ ਪਗ੍ਗਣ੍ਹਾਪੇਸਿ.

ਅਥ ਕੁਮਾਰੋ ਮੁਖਂ ਵਿਵਰਿਤ੍ਵਾ ਓਲੋਕੇਤ੍ਵਾ ‘‘ਕੇਨ ਕਮ੍ਮੇਨ ਆਗਤਤ੍ਥ, ਤਾਤਾ’’ਤਿ ਆਹ. ‘‘ਦੇਵ, ਤੁਮ੍ਹਾਕਂ ਰਜ੍ਜਂ ਪਾਪੁਣਾਤੀ’’ਤਿ. ‘‘ਤੁਮ੍ਹਾਕਂ ਰਾਜਾ ਕਹ’’ਨ੍ਤਿ? ‘‘ਦਿਵਙ੍ਗਤੋ, ਸਾਮੀ’’ਤਿ. ‘‘ਕਤਿ ¶ ਦਿਵਸਾ ਅਤਿਕ੍ਕਨ੍ਤਾ’’ਤਿ? ‘‘ਅਜ੍ਜ ਸਤ੍ਤਮੋ ਦਿਵਸੋ’’ਤਿ. ‘‘ਪੁਤ੍ਤੋ ਵਾ ਧੀਤਾ ਵਾ ਨਤ੍ਥੀ’’ਤਿ? ‘‘ਧੀਤਾ ਅਤ੍ਥਿ, ਦੇਵ, ਪੁਤ੍ਤੋ ਨਤ੍ਥੀ’’ਤਿ. ‘‘ਤੇਨ ਹਿ ਕਰਿਸ੍ਸਾਮਿ ਰਜ੍ਜ’’ਨ੍ਤਿ. ਤੇ ਤਾਵਦੇਵ ਅਭਿਸੇਕਮਣ੍ਡਪਂ ਕਤ੍ਵਾ ਰਾਜਧੀਤਰਂ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਉਯ੍ਯਾਨਂ ਆਨੇਤ੍ਵਾ ਕੁਮਾਰਸ੍ਸ ਅਭਿਸੇਕਂ ਅਕਂਸੁ.

ਅਥਸ੍ਸ ਕਤਾਭਿਸੇਕਸ੍ਸ ਸਤਸਹਸ੍ਸਗ੍ਘਨਿਕਂ ਵਤ੍ਥਂ ਉਪਨੇਸੁਂ. ਸੋ ‘‘ਕਿਮਿਦਂ, ਤਾਤਾ’’ਤਿ ਆਹ. ‘‘ਨਿਵਾਸਨਵਤ੍ਥਂ, ਦੇਵਾ’’ਤਿ. ‘‘ਨਨੁ, ਤਾਤਾ, ਥੂਲ’’ਨ੍ਤਿ? ‘‘ਮਨੁਸ੍ਸਾਨਂ ¶ ਪਰਿਭੋਗਵਤ੍ਥੇਸੁ ਇਤੋ ਸੁਖੁਮਤਰਂ ਨਤ੍ਥਿ, ਦੇਵਾ’’ਤਿ. ‘‘ਤੁਮ੍ਹਾਕਂ ਰਾਜਾ ਏਵਰੂਪਂ ਨਿਵਾਸੇਸੀ’’ਤਿ? ‘‘ਆਮ, ਦੇਵਾ’’ਤਿ. ‘‘ਨ ਮਞ੍ਞੇ ਪੁਞ੍ਞਵਾ ਤੁਮ੍ਹਾਕਂ ਰਾਜਾ (ਅ. ਨਿ. ਅਟ੍ਠ. ੧.੧.੧੯੧) ਸੁਵਣ੍ਣਭਿਙ੍ਕਾਰਂ ਆਹਰਥ, ਲਭਿਸ੍ਸਾਮਿ ਵਤ੍ਥ’’ਨ੍ਤਿ. ਸੁਵਣ੍ਣਭਿਙ੍ਕਾਰਂ ਆਹਰਿਂਸੁ. ਸੋ ਉਟ੍ਠਾਯ ਹਤ੍ਥੇ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਹਤ੍ਥੇਨ ਉਦਕਂ ਆਦਾਯ ਪੁਰਤ੍ਥਿਮਦਿਸਾਯਂ ਅਬ੍ਭੁਕ੍ਕਿਰਿ. ਤਦਾ ਘਨਪਥਵਿਂ ਭਿਨ੍ਦਿਤ੍ਵਾ ਅਟ੍ਠ ਕਪ੍ਪਰੁਕ੍ਖਾ ਉਟ੍ਠਹਿਂਸੁ. ਪੁਨ ਉਦਕਂ ਗਹੇਤ੍ਵਾ ਦਕ੍ਖਿਣਾਯ ਪਚ੍ਛਿਮਾਯ ਉਤ੍ਤਰਾਯਾਤਿ ਏਵਂ ਚਤੂਸੁ ਦਿਸਾਸੁ ਅਬ੍ਭੁਕ੍ਕਿਰਿ. ਸਬ੍ਬਦਿਸਾਸੁ ਅਟ੍ਠ ਅਟ੍ਠ ਕਤ੍ਵਾ ਦ੍ਵਤ੍ਤਿਂਸ ਕਪ੍ਪਰੁਕ੍ਖਾ ਉਟ੍ਠਹਿਂਸੁ. ਏਕੇਕਾਯ ਦਿਸਾਯ ਸੋਲ਼ਸ ਸੋਲ਼ਸ ਕਤ੍ਵਾ ਚਤੁਸਟ੍ਠਿ ਕਮ੍ਮਰੁਕ੍ਖਾਤਿ ਕੇਚਿ ਵਦਨ੍ਤਿ. ਸੋ ਏਕਂ ਦਿਬ੍ਬਦੁਸ੍ਸਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ‘‘ਨਨ੍ਦਰਞ੍ਞੋ ਵਿਜਿਤੇ ਸੁਤ੍ਤਕਨ੍ਤਿਕਾ ਇਤ੍ਥਿਯੋ ਮਾ ਸੁਤ੍ਤਂ ਕਨ੍ਤਿਂਸੂਤਿ ਭੇਰਿਂ ਚਰਾਪੇਥਾ’’ਤਿ ਵਤ੍ਵਾ ਛਤ੍ਤਂ ਉਸ੍ਸਾਪੇਤ੍ਵਾ ਅਲਙ੍ਕਤਪਟਿਯਤ੍ਤੋ ਹਤ੍ਥਿਕ੍ਖਨ੍ਧਵਰਗਤੋ ਨਗਰਂ ਪਵਿਸਿਤ੍ਵਾ ਪਾਸਾਦਂ ਆਰੁਯ੍ਹ ਮਹਾਸਮ੍ਪਤ੍ਤਿਂ ਅਨੁਭਵਿ.

ਏਵਂ ਗਚ੍ਛਨ੍ਤੇ ਕਾਲੇ ਏਕਦਿਵਸਂ ਦੇਵੀ ਰਞ੍ਞੋ ਸਮ੍ਪਤ੍ਤਿਂ ਦਿਸ੍ਵਾ ‘‘ਅਹੋ ਤਪਸ੍ਸੀ’’ਤਿ ਕਾਰੁਞ੍ਞਾਕਾਰਂ ਦਸ੍ਸੇਸਿ. ‘‘ਕਿਮਿਦਂ, ਦੇਵੀ’’ਤਿ ਚ ਪੁਟ੍ਠਾ ‘‘ਅਤਿਮਹਤੀ ¶ ਤੇ, ਦੇਵ, ਸਮ੍ਪਤ੍ਤਿ. ਅਤੀਤੇ ਅਦ੍ਧਨਿ ਕਲ੍ਯਾਣਂ ਅਕਤ੍ਥ, ਇਦਾਨਿ ਅਨਾਗਤਸ੍ਸ ਅਤ੍ਥਾਯ ਕੁਸਲਂ ਨ ਕਰੋਥਾ’’ਤਿ ਆਹ. ‘‘ਕਸ੍ਸ ਦੇਮ? ਸੀਲਵਨ੍ਤੋ ਨਤ੍ਥੀ’’ਤਿ. ‘‘ਅਸੁਞ੍ਞੋ, ਦੇਵ, ਜਮ੍ਬੁਦੀਪੋ ਅਰਹਨ੍ਤੇਹਿ, ਤੁਮ੍ਹੇ ਦਾਨਮੇਵ ਸਜ੍ਜੇਥ, ਅਹਂ ਅਰਹਨ੍ਤੇ ਲਚ੍ਛਾਮੀ’’ਤਿ ਆਹ. ਪੁਨਦਿਵਸੇ ਰਾਜਾ ਮਹਾਰਹਂ ਦਾਨਂ ਸਜ੍ਜਾਪੇਸਿ. ਦੇਵੀ ‘‘ਸਚੇ ਇਮਿਸ੍ਸਾਯ ਦਿਸਾਯ ਅਰਹਨ੍ਤੋ ਅਤ੍ਥਿ, ਇਧਾਗਨ੍ਤ੍ਵਾ ਅਮ੍ਹਾਕਂ ਭਿਕ੍ਖਂ ਗਣ੍ਹਨ੍ਤੂ’’ਤਿ ਅਧਿਟ੍ਠਹਿਤ੍ਵਾ ਉਤ੍ਤਰਦਿਸਾਭਿਮੁਖਾ ਉਰੇਨ ਨਿਪਜ੍ਜਿ. ਨਿਪਨ੍ਨਮਤ੍ਤਾਯ ਏਵ ਦੇਵਿਯਾ ਹਿਮਵਨ੍ਤੇ ਵਸਨ੍ਤਾਨਂ ਪਦੁਮਵਤਿਯਾ ਪੁਤ੍ਤਾਨਂ ਪਞ੍ਚਸਤਾਨਂ ਪਚ੍ਚੇਕਬੁਦ੍ਧਾਨਂ ਜੇਟ੍ਠਕੋ ਮਹਾਪਦੁਮਪਚ੍ਚੇਕਬੁਦ੍ਧੋ ਭਾਤਿਕੇ ਆਮਨ੍ਤੇਸਿ – ‘‘ਮਾਰਿਸਾ ਨਨ੍ਦਰਾਜਾ ਤੁਮ੍ਹੇ ਨਿਮਨ੍ਤੇਤਿ, ਅਧਿਵਾਸੇਥ ਤਸ੍ਸਾ’’ਤਿ. ਤੇ ਅਧਿਵਾਸੇਤ੍ਵਾ ਤਾਵਦੇਵ ਆਕਾਸੇਨਾਗਨ੍ਤ੍ਵਾ ਉਤ੍ਤਰਦ੍ਵਾਰੇ ਓਤਰਿਂਸੁ. ਮਨੁਸ੍ਸਾ ¶ ‘‘ਪਞ੍ਚਸਤਾ, ਦੇਵ, ਪਚ੍ਚੇਕਬੁਦ੍ਧਾ ਆਗਤਾ’’ਤਿ ਰਞ੍ਞੋ ਆਰੋਚੇਸੁਂ. ਰਾਜਾ ਸਦ੍ਧਿਂ ਦੇਵਿਯਾ ਆਗਨ੍ਤ੍ਵਾ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ¶ ਪਚ੍ਚੇਕਬੁਦ੍ਧੇ ਪਾਸਾਦਂ ਆਰੋਪੇਤ੍ਵਾ ਤਤ੍ਥ ਤੇਸਂ ਦਾਨਂ ਦਤ੍ਵਾ ਭਤ੍ਤਕਿਚ੍ਚਾਵਸਾਨੇ ਰਾਜਾ ਸਙ੍ਘਤ੍ਥੇਰਸ੍ਸ, ਦੇਵੀ ਸਙ੍ਘਨਵਕਸ੍ਸ ਪਾਦਮੂਲੇ ਨਿਪਜ੍ਜਿਤ੍ਵਾ ‘‘ਅਯ੍ਯਾ, ਪਚ੍ਚਯੇਹਿ ਨ ਕਿਲਮਿਸ੍ਸਨ੍ਤਿ, ਮਯਂ ਪੁਞ੍ਞੇਨ ਨ ਹਾਯਿਸ੍ਸਾਮ, ਅਮ੍ਹਾਕਂ ਇਧ ਨਿਵਾਸਾਯ ਪਟਿਞ੍ਞਂ ਦੇਥਾ’’ਤਿ ਪਟਿਞ੍ਞਂ ਕਾਰੇਤ੍ਵਾ ਉਯ੍ਯਾਨੇ ਨਿਵਾਸਟ੍ਠਾਨਾਨਿ ਕਾਰੇਤ੍ਵਾ ਯਾਵਜੀਵਂ ਪਚ੍ਚੇਕਬੁਦ੍ਧੇ ਉਪਟ੍ਠਹਿਤ੍ਵਾ ਤੇਸੁ ਪਰਿਨਿਬ੍ਬੁਤੇਸੁ ਸਾਧੁਕੀਲ਼ਿਤਂ ਕਾਰੇਤ੍ਵਾ ਗਨ੍ਧਦਾਰੁਆਦੀਹਿ ਸਰੀਰਕਿਚ੍ਚਂ ਕਾਰੇਤ੍ਵਾ ਧਾਤੁਯੋ ਗਹੇਤ੍ਵਾ ਚੇਤਿਯਂ ਪਤਿਟ੍ਠਾਪੇਤ੍ਵਾ ‘‘ਏਵਰੂਪਾਨਮ੍ਪਿ ਨਾਮ ਮਹਾਨੁਭਾਵਾਨਂ ਮਹੇਸੀਨਂ ਮਰਣਂ ਭਵਿਸ੍ਸਤਿ, ਕਿਮਙ੍ਗਂ ਪਨ ਮਾਦਿਸਾਨ’’ਨ੍ਤਿ ਸਂਵੇਗਜਾਤੋ ਜੇਟ੍ਠਪੁਤ੍ਤਂ ਰਜ੍ਜੇ ਪਤਿਟ੍ਠਾਪੇਤ੍ਵਾ ਸਯਂ ਤਾਪਸਪਬ੍ਬਜ੍ਜਂ ਪਬ੍ਬਜਿ. ਦੇਵੀਪਿ ‘‘ਰਞ੍ਞੇ ਪਬ੍ਬਜਿਤੇ ਅਹਂ ਕਿਂ ਕਰਿਸ੍ਸਾਮੀ’’ਤਿ ਪਬ੍ਬਜਿ. ਦ੍ਵੇਪਿ ਉਯ੍ਯਾਨੇ ਵਸਨ੍ਤਾ ਝਾਨਾਨਿ ਨਿਬ੍ਬਤ੍ਤੇਤ੍ਵਾ ਝਾਨਸੁਖੇਨ ਵੀਤਿਨਾਮੇਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਂਸੁ. ਸੋ ਕਿਰ ਨਨ੍ਦਰਾਜਾ ਅਮ੍ਹਾਕਂ ਸਤ੍ਥੁ ਮਹਾਸਾਵਕੋ ਮਹਾਕਸ੍ਸਪਤ੍ਥੇਰੋ ਅਹੋਸੀ, ਤਸ੍ਸ ਅਗ੍ਗਮਹੇਸੀ ਭਦ੍ਦਾ ਕਾਪਿਲਾਨੀ ਨਾਮ.

ਅਯਂ ਪਨ ਨਨ੍ਦਰਾਜਾ ਦਸ ਵਸ੍ਸਸਹਸ੍ਸਾਨਿ ਸਯਂ ਦਿਬ੍ਬਵਤ੍ਥਾਨਿ ਪਰਿਦਹਨ੍ਤੋ ਸਬ੍ਬਮੇਵ ਅਤ੍ਤਨੋ ਵਿਜਿਤਂ ਉਤ੍ਤਰਕੁਰੁਸਦਿਸਂ ਕਰੋਨ੍ਤੋ ਆਗਤਾਗਤਾਨਂ ਮਨੁਸ੍ਸਾਨਂ ¶ ਦਿਬ੍ਬਦੁਸ੍ਸਾਨਿ ਅਦਾਸਿ. ਤਯਿਦਂ ਦਿਬ੍ਬਵਤ੍ਥਸਮਿਦ੍ਧਿਂ ਸਨ੍ਧਾਯ ਸਾ ਪੇਤੀ ਆਹ ‘‘ਯਾਵਤਾ ਨਨ੍ਦਰਾਜਸ੍ਸ, ਵਿਜਿਤਸ੍ਮਿਂ ਪਟਿਚ੍ਛਦਾ’’ਤਿ. ਤਤ੍ਥ ਵਿਜਿਤਸ੍ਮਿਨ੍ਤਿ ਰਟ੍ਠੇ. ਪਟਿਚ੍ਛਦਾਤਿ ਵਤ੍ਥਾਨਿ. ਤਾਨਿ ਹਿ ਪਟਿਚ੍ਛਾਦੇਨ੍ਤਿ ਏਤੇਹੀਤਿ ‘‘ਪਟਿਚ੍ਛਦਾ’’ਤਿ ਵੁਚ੍ਚਨ੍ਤਿ.

੧੧੧. ਇਦਾਨਿ ਸਾ ਪੇਤੀ ‘‘ਨਨ੍ਦਰਾਜਸਮਿਦ੍ਧਿਤੋਪਿ ਏਤਰਹਿ ਮਯ੍ਹਂ ਸਮਿਦ੍ਧਿ ਵਿਪੁਲਤਰਾ’’ਤਿ ਦਸ੍ਸੇਨ੍ਤੀ ‘‘ਤਤੋ ਬਹੁਤਰਾ, ਭਨ੍ਤੇ, ਵਤ੍ਥਾਨਚ੍ਛਾਦਨਾਨਿ ਮੇ’’ਤਿਆਦਿਮਾਹ. ਤਤ੍ਥ ਤਤੋਤਿ ਨਨ੍ਦਰਾਜਸ੍ਸ ਪਰਿਗ੍ਗਹਭੂਤਵਤ੍ਥਤੋਪਿ ਬਹੁਤਰਾਨਿ ਮਯ੍ਹਂ ਵਤ੍ਥਚ੍ਛਾਦਨਾਨੀਤਿ ਅਤ੍ਥੋ. ਵਤ੍ਥਾਨਚ੍ਛਾਦਨਾਨੀਤਿ ਨਿਵਾਸਨਵਤ੍ਥਾਨਿ ਚੇਵ ਪਾਰੁਪਨਵਤ੍ਥਾਨਿ ਚ ¶ . ਕੋਸੇਯ੍ਯਕਮ੍ਬਲੀਯਾਨੀਤਿ ਕੋਸੇਯ੍ਯਾਨਿ ਚੇਵ ਕਮ੍ਬਲਾਨਿ ਚ. ਖੋਮਕਪ੍ਪਾਸਿਕਾਨੀਤਿ ਖੋਮਵਤ੍ਥਾਨਿ ਚੇਵ ਕਪ੍ਪਾਸਮਯਵਤ੍ਥਾਨਿ ਚ.

੧੧੨. ਵਿਪੁਲਾਤਿ ਆਯਾਮਤੋ ਚ ਵਿਤ੍ਥਾਰਤੋ ਚ ਵਿਪੁਲਾ. ਮਹਗ੍ਘਾਤਿ ਮਹਗ੍ਘਵਸੇਨ ਮਹਨ੍ਤਾ ਮਹਾਰਹਾ. ਆਕਾਸੇਵਲਮ੍ਬਰੇਤਿ ਆਕਾਸੇਯੇਵ ਓਲਮ੍ਬਮਾਨਾ ਤਿਟ੍ਠਨ੍ਤਿ. ਯਂ ਯਞ੍ਹਿ ਮਨਸੋ ਪਿਯਨ੍ਤਿ ਯਂ ਯਂ ਮਯ੍ਹਂ ਮਨਸੋ ਪਿਯਂ, ਤਂ ਤਂ ਗਹੇਤ੍ਵਾ ਪਰਿਦਹਾਮਿ ਪਾਰੁਪਾਮਿ ਚਾਤਿ ਯੋਜਨਾ.

੧੧੩. ਥਾਲਕਸ੍ਸ ਚ ਪਾਨੀਯਂ, ਵਿਪਾਕਂ ਪਸ੍ਸ ਯਾਦਿਸਨ੍ਤਿ ਥਾਲਕਪੂਰਣਮਤ੍ਤਂ ਪਾਨੀਯਂ ਦਿਨ੍ਨਂ ਅਨੁਮੋਦਿਤਂ ¶ , ਤਸ੍ਸ ਪਨ ਵਿਪਾਕਂ ਯਾਦਿਸਂ ਯਾਵ ਮਹਨ੍ਤਂ ਪਸ੍ਸਾਤਿ ਦਸ੍ਸੇਨ੍ਤੀ ‘‘ਗਮ੍ਭੀਰਾ ਚਤੁਰਸ੍ਸਾ ਚਾ’’ਤਿਆਦਿਮਾਹ. ਤਤ੍ਥ ਗਮ੍ਭੀਰਾਤਿ ਅਗਾਧਾ. ਚਤੁਰਸ੍ਸਾਤਿ ਚਤੁਰਸ੍ਸਸਣ੍ਠਾਨਾ. ਪੋਕ੍ਖਰਞ੍ਞੋਤਿ ਪੋਕ੍ਖਰਣਿਯੋ. ਸੁਨਿਮ੍ਮਿਤਾਤਿ ਕਮ੍ਮਾਨੁਭਾਵੇਨੇਵ ਸੁਟ੍ਠੁ ਨਿਮ੍ਮਿਤਾ.

੧੧੪. ਸੇਤੋਦਕਾਤਿ ਸੇਤਉਦਕਾ ਸੇਤਵਾਲੁਕਸਮ੍ਪਰਿਕਿਣ੍ਣਾ. ਸੁਪ੍ਪਤਿਤ੍ਥਾਤਿ ਸੁਨ੍ਦਰਤਿਤ੍ਥਾ. ਸੀਤਾਤਿ ਸੀਤਲੋਦਕਾ. ਅਪ੍ਪਟਿਗਨ੍ਧਿਯਾਤਿ ਪਟਿਕੂਲਗਨ੍ਧਰਹਿਤਾ ਸੁਰਭਿਗਨ੍ਧਾ. ਵਾਰਿਕਿਞ੍ਜਕ੍ਖਪੂਰਿਤਾਤਿ ਕਮਲਕੁਵਲਯਾਦੀਨਂ ਕੇਸਰਸਞ੍ਛਨ੍ਨੇਨ ਵਾਰਿਨਾ ਪਰਿਪੁਣ੍ਣਾ.

੧੧੫. ਸਾਹਨ੍ਤਿ ਸਾ ਅਹਂ. ਰਮਾਮੀਤਿ ਰਤਿਂ ਵਿਨ੍ਦਾਮਿ. ਕੀਲ਼ਾਮੀਤਿ ਇਨ੍ਦ੍ਰਿਯਾਨਿ ਪਰਿਚਾਰੇਮਿ. ਮੋਦਾਮੀਤਿ ਭੋਗਸਮ੍ਪਤ੍ਤਿਯਾ ਪਮੁਦਿਤਾ ਹੋਮਿ. ਅਕੁਤੋਭਯਾਤਿ ਕੁਤੋਚਿਪਿ ਅਸਞ੍ਜਾਤਭਯਾ, ਸੇਰੀ ਸੁਖਵਿਹਾਰਿਨੀ ਹੋਮਿ ¶ . ਭਨ੍ਤੇ, ਵਨ੍ਦਿਤੁਮਾਗਤਾਤਿ, ਭਨ੍ਤੇ, ਇਮਿਸ੍ਸਾ ਦਿਬ੍ਬਸਮ੍ਪਤ੍ਤਿਯਾ ਪਟਿਲਾਭਸ੍ਸ ਕਾਰਣਭੂਤਂ ਤ੍ਵਂ ਵਨ੍ਦਿਤੁਂ ਆਗਤਾ ਉਪਗਤਾਤਿ ਅਤ੍ਥੋ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਤਤ੍ਥ ਤਤ੍ਥ ਵੁਤ੍ਤਮੇਵ.

ਏਵਂ ਤਾਯ ਪੇਤਿਯਾ ਵੁਤ੍ਤੇ ਆਯਸ੍ਮਾ ਸਾਰਿਪੁਤ੍ਤੋ ਇਟ੍ਠਕਵਤਿਯਂ ਦੀਘਰਾਜਿਯਨ੍ਤਿ ਗਾਮਦ੍ਵਯਵਾਸਿਕੇਸੁ ਅਤ੍ਤਨੋ ਸਨ੍ਤਿਕਂ ਉਪਗਤੇਸੁ ਮਨੁਸ੍ਸੇਸੁ ਇਮਮਤ੍ਥਂ ਵਿਤ੍ਥਾਰਤੋ ਕਥੇਨ੍ਤੋ ਸਂਵੇਜੇਤ੍ਵਾ ਸਂਸਾਰਮੋਚਨਪਾਪਕਮ੍ਮਤੋ ਮੋਚੇਤ੍ਵਾ ਉਪਾਸਕਭਾਵੇ ¶ ਪਤਿਟ੍ਠਾਪੇਸਿ. ਸਾ ਪਵਤ੍ਤਿ ਭਿਕ੍ਖੂਸੁ ਪਾਕਟਾ ਜਾਤਾ. ਤਂ ਭਿਕ੍ਖੂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਸਂਸਾਰਮੋਚਕਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੨. ਸਾਰਿਪੁਤ੍ਤਤ੍ਥੇਰਮਾਤੁਪੇਤਿਵਤ੍ਥੁਵਣ੍ਣਨਾ

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਇਤੋ ਪਞ੍ਚਮਾਯ ਜਾਤਿਯਾ ਮਾਤੁਭੂਤਂ ਪੇਤਿਂ ਆਰਬ੍ਭ ਵੁਤ੍ਤਂ. ਏਕਦਿਵਸਂ ਆਯਸ੍ਮਾ ਚ ਸਾਰਿਪੁਤ੍ਤੋ ਆਯਸ੍ਮਾ ਚ ਮਹਾਮੋਗ੍ਗਲ੍ਲਾਨੋ ਆਯਸ੍ਮਾ ਚ ਅਨੁਰੁਦ੍ਧੋ ਆਯਸ੍ਮਾ ਚ ਕਪ੍ਪਿਨੋ ਰਾਜਗਹਸ੍ਸ ਅਵਿਦੂਰੇ ਅਞ੍ਞਤਰਸ੍ਮਿਂ ਅਰਞ੍ਞਾਯਤਨੇ ਵਿਹਰਨ੍ਤਿ. ਤੇਨ ਚ ਸਮਯੇਨ ਬਾਰਾਣਸਿਯਂ ਅਞ੍ਞਤਰੋ ਬ੍ਰਾਹ੍ਮਣੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਸਮਣਬ੍ਰਾਹ੍ਮਣਕਪਣਦ੍ਧਿਕਵਨਿਬ੍ਬਕਯਾਚਕਾਨਂ ਓਪਾਨਭੂਤੋ ਅਨ੍ਨਪਾਨਵਤ੍ਥਸਯਨਾਦੀਨਿ ਦੇਤਿ. ਦੇਨ੍ਤੋ ਚ ਆਗਤਾਗਤਾਨਂ ਯਥਾਕਾਲਂ ਯਥਾਰਹਞ੍ਚ ਪਾਦੋਦਕਪਾਦਬ੍ਭਞ੍ਜਨਾਦਿਦਾਨਾਨੁਪੁਬ੍ਬਕਂ ¶ ਸਬ੍ਬਾਭਿਦੇਯ੍ਯਂ ਪਟਿਪਨ੍ਨੋ ਹੋਤਿ, ਪੁਰੇਭਤ੍ਤਂ ਭਿਕ੍ਖੂ ਅਨ੍ਨਪਾਨਾਦਿਨਾ ਸਕ੍ਕਚ੍ਚਂ ਪਰਿਵਿਸਤਿ. ਸੋ ਦੇਸਨ੍ਤਰਂ ਗਚ੍ਛਨ੍ਤੋ ਭਰਿਯਂ ਆਹ – ‘‘ਭੋਤਿ, ਯਥਾਪਞ੍ਞਤ੍ਤਂ ਇਮਂ ਦਾਨਵਿਧਿਂ ਅਪਰਿਹਾਪੇਨ੍ਤੀ ਸਕ੍ਕਚ੍ਚਂ ਅਨੁਪਤਿਟ੍ਠਾਹੀ’’ਤਿ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਸ੍ਮਿਂ ਪਕ੍ਕਨ੍ਤੇ ਏਵ ਤਾਵ ਭਿਕ੍ਖੂਨਂ ਪਞ੍ਞਤ੍ਤਂ ਦਾਨਵਿਧਿਂ ਪਚ੍ਛਿਨ੍ਦਿ, ਅਦ੍ਧਿਕਾਨਂ ਪਨ ਨਿਵਾਸਤ੍ਥਾਯ ਉਪਗਤਾਨਂ ਗੇਹਪਿਟ੍ਠਿਤੋ ਛਡ੍ਡਿਤਂ ਜਰਸਾਲਂ ਦਸ੍ਸੇਸਿ ‘‘ਏਤ੍ਥ ਵਸਥਾ’’ਤਿ. ਅਨ੍ਨਪਾਨਾਦੀਨਂ ਅਤ੍ਥਾਯ ਤਤ੍ਥ ਅਦ੍ਧਿਕੇਸੁ ਆਗਤੇਸੁ ‘‘ਗੂਥਂ ਖਾਦਥ, ਮੁਤ੍ਤਂ ਪਿਵਥ, ਲੋਹਿਤਂ ਪਿਵਥ ¶ , ਤੁਮ੍ਹਾਕਂ ਮਾਤੁ ਮਤ੍ਥਲੁਙ੍ਗਂ ਖਾਦਥਾ’’ਤਿ ਯਂ ਯਂ ਅਸੁਚਿ ਜੇਗੁਚ੍ਛਂ, ਤਸ੍ਸ ਤਸ੍ਸ ਨਾਮਂ ਗਹੇਤ੍ਵਾ ਨਿਟ੍ਠੁਰਂ ਵਦਤਿ.

ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਕਮ੍ਮਾਨੁਭਾਵੁਕ੍ਖਿਤ੍ਤਾ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਤ੍ਤਨੋ ਵਚੀਦੁਚ੍ਚਰਿਤਾਨੁਰੂਪਂ ਦੁਕ੍ਖਂ ਅਨੁਭਵਨ੍ਤੀ ¶ ਪੁਰਿਮਜਾਤਿਸਮ੍ਬਨ੍ਧਂ ਅਨੁਸ੍ਸਰਿਤ੍ਵਾ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਸਨ੍ਤਿਕਂ ਉਪਸਙ੍ਕਮਿਤੁਕਾਮਾ ਤਸ੍ਸ ਵਿਹਾਰਦ੍ਵਾਰਂ ਸਮ੍ਪਾਪੁਣਿ, ਤਸ੍ਸ ਵਿਹਾਰਦ੍ਵਾਰਦੇਵਤਾਯੋ ਵਿਹਾਰਪ੍ਪਵੇਸਨਂ ਨਿਵਾਰੇਸੁਂ. ਸਾ ਕਿਰ ਇਤੋ ਪਞ੍ਚਮਾਯ ਜਾਤਿਯਾ ਥੇਰਸ੍ਸ ਮਾਤੁਭੂਤਪੁਬ੍ਬਾ, ਤਸ੍ਮਾ ਏਵਮਾਹ – ‘‘ਅਹਂ ਅਯ੍ਯਸ੍ਸ ਸਾਰਿਪੁਤ੍ਤਤ੍ਥੇਰਸ੍ਸ ਇਤੋ ਪਞ੍ਚਮਾਯ ਜਾਤੀਯਾ ਮਾਤਾ, ਦੇਥ ਮੇ ਦ੍ਵਾਰਪ੍ਪਵੇਸਨਂ ਥੇਰਂ ਦਟ੍ਠੁ’’ਨ੍ਤਿ. ਤਂ ਸੁਤ੍ਵਾ ਦੇਵਤਾ ਤਸ੍ਸਾ ਪਵੇਸਨਂ ਅਨੁਜਾਨਿਂਸੁ. ਸਾ ਪਵਿਸਿਤ੍ਵਾ ਚਙ੍ਕਮਨਕੋਟਿਯਂ ਠਤ੍ਵਾ ਥੇਰਸ੍ਸ ਅਤ੍ਤਾਨਂ ਦਸ੍ਸੇਸਿ. ਥੇਰੋ ਤਂ ਦਿਸ੍ਵਾ ਕਰੁਣਾਯ ਸਞ੍ਚੋਦਿਤਮਾਨਸੋ ਹੁਤ੍ਵਾ –

‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

ਗਾਥਾਯ ਪੁਚ੍ਛਿ. ਸਾ ਥੇਰੇਨ ਪੁਟ੍ਠਾ ਪਟਿਵਚਨਂ ਦੇਨ੍ਤੀ –

‘‘ਅਹਂ ਤੇ ਸਕਿਯਾ ਮਾਤਾ, ਪੁਬ੍ਬੇ ਅਞ੍ਞਾਸੁ ਜਾਤੀਸੁ;

ਉਪਪਨ੍ਨਾ ਪੇਤ੍ਤਿਵਿਸਯਂ, ਖੁਪ੍ਪਿਪਾਸਸਮਪ੍ਪਿਤਾ.

‘‘ਛਡ੍ਡਿਤਂ ਖਿਪਿਤਂ ਖੇਲ਼ਂ, ਸਿਙ੍ਘਾਣਿਕਂ ਸਿਲੇਸੁਮਂ;

ਵਸਞ੍ਚ ਡਯ੍ਹਮਾਨਾਨਂ, ਵਿਜਾਤਾਨਞ੍ਚ ਲੋਹਿਤਂ.

‘‘ਵਣਿਕਾਨਞ੍ਚ ¶ ਯਂ ਘਾਨ-ਸੀਸਚ੍ਛਿਨ੍ਨਾਨ ਲੋਹਿਤਂ;

ਖੁਦਾਪਰੇਤਾ ਭੁਞ੍ਜਾਮਿ, ਇਚ੍ਛਿਪੁਰਿਸਨਿਸ੍ਸਿਤਂ.

‘‘ਪੁਬ੍ਬਲੋਹਿਤਂ ਭਕ੍ਖਾਮਿ, ਪਸੂਨਂ ਮਾਨੁਸਾਨ ਚ;

ਅਲੇਣਾ ਅਨਗਾਰਾ ਚ, ਨੀਲਮਞ੍ਚਪਰਾਯਣਾ.

‘‘ਦੇਹਿ ਪੁਤ੍ਤਕ ਮੇ ਦਾਨਂ, ਦਤ੍ਵਾ ਅਨ੍ਵਾਦਿਸਾਹਿ ਮੇ;

ਅਪ੍ਪੇਵ ਨਾਮ ਮੁਚ੍ਚੇਯ੍ਯਂ, ਪੁਬ੍ਬਲੋਹਿਤਭੋਜਨਾ’’ਤਿ. – ਪਞ੍ਚਗਾਥਾ ਅਭਾਸਿ;

੧੧੭. ਤਤ੍ਥ ¶ ਅਹਂ ਤੇ ਸਕਿਯਾ ਮਾਤਾਤਿ ਅਹਂ ਤੁਯ੍ਹਂ ਜਨਨਿਭਾਵਤੋ ਸਕਿਯਾ ਮਾਤਾ. ਪੁਬ੍ਬੇ ਅਞ੍ਞਾਸੁ ਜਾਤੀਸੂਤਿ ਮਾਤਾ ਹੋਨ੍ਤੀਪਿ ਨ ਇਮਿਸ੍ਸਂ ਜਾਤਿਯਂ, ਅਥ ਖੋ ਪੁਬ੍ਬੇ ਅਞ੍ਞਾਸੁ ਜਾਤੀਸੁ, ਇਤੋ ਪਞ੍ਚਮਿਯਨ੍ਤਿ ਦਟ੍ਠਬ੍ਬਂ. ਉਪਪਨ੍ਨਾ ਪੇਤ੍ਤਿਵਿਸਯਨ੍ਤਿ ਪਟਿਸਨ੍ਧਿਵਸੇਨ ਪੇਤਲੋਕਂ ਉਪਗਤਾ. ਖੁਪ੍ਪਿਪਾਸਸਮਪ੍ਪਿਤਾਤਿ ¶ ਖੁਦਾਯ ਚ ਪਿਪਾਸਾਯ ਚ ਅਭਿਭੂਤਾ, ਨਿਰਨ੍ਤਰਂ ਜਿਘਚ੍ਛਾਪਿਪਾਸਾਹਿ ਅਭਿਭੁਯ੍ਯਮਾਨਾਤਿ ਅਤ੍ਥੋ.

੧੧੮-੧੧੯. ਛਡ੍ਡਿਤਨ੍ਤਿ ਉਚ੍ਛਿਟ੍ਠਕਂ, ਵਨ੍ਤਨ੍ਤਿ ਅਤ੍ਥੋ. ਖਿਪਿਤਨ੍ਤਿ ਖਿਪਿਤੇਨ ਸਦ੍ਧਿਂ ਮੁਖਤੋ ਨਿਕ੍ਖਨ੍ਤਮਲਂ. ਖੇਲ਼ਨ੍ਤਿ ਨਿਟ੍ਠੁਭਂ. ਸਿਙ੍ਘਾਣਿਕਨ੍ਤਿ ਮਤ੍ਥਲੁਙ੍ਗਤੋ ਵਿਸ੍ਸਨ੍ਦਿਤ੍ਵਾ ਨਾਸਿਕਾਯ ਨਿਕ੍ਖਨ੍ਤਮਲਂ. ਸਿਲੇਸੁਮਨ੍ਤਿ ਸੇਮ੍ਹਂ. ਵਸਞ੍ਚ ਡਯ੍ਹਮਾਨਾਨਨ੍ਤਿ ਚਿਤਕਸ੍ਮਿਂ ਡਯ੍ਹਮਾਨਾਨਂ ਕਲ਼ੇਵਰਾਨਂ ਵਸਾਤੇਲਞ੍ਚ. ਵਿਜਾਤਾਨਞ੍ਚ ਲੋਹਿਤਨ੍ਤਿ ਪਸੂਤਾਨਂ ਇਤ੍ਥੀਨਂ ਲੋਹਿਤਂ, ਗਬ੍ਭਮਲਂ ਚ-ਸਦ੍ਦੇਨ ਸਙ੍ਗਣ੍ਹਾਤਿ. ਵਣਿਕਾਨਨ੍ਤਿ ਸਞ੍ਜਾਤਵਣਾਨਂ. ਯਨ੍ਤਿ ਯਂ ਲੋਹਿਤਨ੍ਤਿ ਸਮ੍ਬਨ੍ਧੋ. ਘਾਨਸੀਸਚ੍ਛਿਨ੍ਨਾਨਨ੍ਤਿ ਘਾਨਚ੍ਛਿਨ੍ਨਾਨਂ ਸੀਸਚ੍ਛਿਨ੍ਨਾਨਞ੍ਚ ਯਂ ਲੋਹਿਤਂ, ਤਂ ਭੁਞ੍ਜਾਮੀਤਿ ਯੋਜਨਾ. ਦੇਸਨਾਸੀਸਮੇਤਂ ‘‘ਘਾਨਸੀਸਚ੍ਛਿਨ੍ਨਾਨ’’ਨ੍ਤਿ, ਯਸ੍ਮਾ ਹਤ੍ਥਪਾਦਾਦਿਚ੍ਛਿਨ੍ਨਾਨਮ੍ਪਿ ਲੋਹਿਤਂ ਭੁਞ੍ਜਾਮਿਯੇਵ. ਤਥਾ ‘‘ਵਣਿਕਾਨ’’ਨ੍ਤਿ ਇਮਿਨਾ ਤੇਸਮ੍ਪਿ ਲੋਹਿਤਂ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਖੁਦਾਪਰੇਤਾਤਿ ਜਿਘਚ੍ਛਾਭਿਭੂਤਾ ਹੁਤ੍ਵਾ. ਇਤ੍ਥਿਪੁਰਿਸਨਿਸ੍ਸਿਤਨ੍ਤਿ ਇਤ੍ਥਿਪੁਰਿਸਸਰੀਰਨਿਸ੍ਸਿਤਂ ਯਥਾਵੁਤ੍ਤਂ ਅਞ੍ਞਞ੍ਚ ਚਮ੍ਮਮਂਸਨ੍ਹਾਰੁਪੁਬ੍ਬਾਦਿਕਂ ਪਰਿਭੁਞ੍ਜਾਮੀਤਿ ਦਸ੍ਸੇਤਿ.

੧੨੦-੧੨੧. ਪਸੂਨਨ੍ਤਿ ਅਜਗੋਮਹਿਂਸਾਦੀਨਂ. ਅਲੇਣਾਤਿ ਅਸਰਣਾ. ਅਨਗਾਰਾਤਿ ਅਨਾਵਾਸਾ. ਨੀਲਮਞ੍ਚਪਰਾਯਣਾਤਿ ਸੁਸਾਨੇ ਛਡ੍ਡਿਤਮਲਮਞ੍ਚਸਯਨਾ. ਅਥ ਵਾ ਨੀਲਾਤਿ ਛਾਰਿਕਙ੍ਗਾਰਬਹੁਲਾ ਸੁਸਾਨਭੂਮਿ ਅਧਿਪ੍ਪੇਤਾ, ਤਂਯੇਵ ਮਞ੍ਚਂ ਵਿਯ ਅਧਿਸਯਨਾਤਿ ਅਤ੍ਥੋ. ਅਨ੍ਵਾਦਿਸਾਹਿ ¶ ਮੇਤਿ ਯਥਾ ਦਿਨ੍ਨਂ ਦਕ੍ਖਿਣਂ ਮਯ੍ਹਂ ਉਪਕਪ੍ਪਤਿ, ਤਥਾ ਉਦ੍ਦਿਸ ਪਤ੍ਤਿਦਾਨਂ ਦੇਹਿ. ਅਪ੍ਪੇਵ ਨਾਮ ਮੁਚ੍ਚੇਯ੍ਯਂ, ਪੁਬ੍ਬਲੋਹਿਤਭੋਜਨਾਤਿ ਤਵ ਉਦ੍ਦਿਸਨੇਨ ਏਤਸ੍ਮਾ ਪੁਬ੍ਬਲੋਹਿਤਭੋਜਨਾ ਪੇਤਜੀਵਿਕਾ ਅਪਿ ਨਾਮ ਮੁਚ੍ਚੇਯ੍ਯਂ.

ਤਂ ਸੁਤ੍ਵਾ ਆਯਸ੍ਮਾ ਸਾਰਿਪੁਤ੍ਤਤ੍ਥੇਰੋ ਦੁਤਿਯਦਿਵਸੇ ਮਹਾਮੋਗ੍ਗਲ੍ਲਾਨਤ੍ਥੇਰਾਦਿਕੇ ਤਯੋ ਥੇਰੇ ਆਮਨ੍ਤੇਤ੍ਵਾ ਤੇਹਿ ਸਦ੍ਧਿਂ ਰਾਜਗਹੇ ¶ ¶ ਪਿਣ੍ਡਾਯ ਚਰਨ੍ਤੋ ਰਞ੍ਞੋ ਬਿਮ੍ਬਿਸਾਰਸ੍ਸ ਨਿਵੇਸਨਂ ਅਗਮਾਸਿ. ਰਾਜਾ ਥੇਰੇ ਦਿਸ੍ਵਾ ਵਨ੍ਦਿਤ੍ਵਾ ‘‘ਕਿਂ, ਭਨ੍ਤੇ, ਆਗਤਤ੍ਥਾ’’ਤਿ ਆਗਮਨਕਾਰਣਂ ਪੁਚ੍ਛਿ. ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸਿ. ਰਾਜਾ ‘‘ਅਞ੍ਞਾਤਂ, ਭਨ੍ਤੇ’’ਤਿ ਵਤ੍ਵਾ ਥੇਰੇ ਵਿਸ੍ਸਜ੍ਜੇਤ੍ਵਾ ਸਬ੍ਬਕਮ੍ਮਿਕਂ ਅਮਚ੍ਚਂ ਪਕ੍ਕੋਸਾਪੇਤ੍ਵਾ ਆਣਾਪੇਸਿ ‘‘ਨਗਰਸ੍ਸ ਅਵਿਦੂਰੇ ਵਿਵਿਤ੍ਤੇ ਛਾਯੂਦਕਸਮ੍ਪਨ੍ਨੇ ਠਾਨੇ ਚਤਸ੍ਸੋ ਕੁਟਿਯੋ ਕਾਰੇਹੀ’’ਤਿ. ਅਨ੍ਤੇਪੁਰੇ ਚ ਪਹੋਨਕਵਿਸੇਸਵਸੇਨ ਤਿਧਾ ਵਿਭਜਿਤ੍ਵਾ ਚਤਸ੍ਸੋ ਕੁਟਿਯੋ ਪਟਿਚ੍ਛਾਪੇਸਿ, ਸਯਞ੍ਚ ਤਤ੍ਥ ਗਨ੍ਤ੍ਵਾ ਕਾਤਬ੍ਬਯੁਤ੍ਤਕਂ ਅਕਾਸਿ. ਨਿਟ੍ਠਿਤਾਸੁ ਕੁਟਿਕਾਸੁ ਸਬ੍ਬਂ ਬਲਿਕਰਣਂ ਸਜ੍ਜਾਪੇਤ੍ਵਾ ਅਨ੍ਨਪਾਨਵਤ੍ਥਾਦੀਨਿ ਬੁਦ੍ਧਪ੍ਪਮੁਖਸ੍ਸ ਚਾਤੁਦ੍ਦਿਸਸ੍ਸ ਭਿਕ੍ਖੁਸਙ੍ਘਸ੍ਸ ਅਨੁਚ੍ਛਵਿਕੇ ਸਬ੍ਬਪਰਿਕ੍ਖਾਰੇ ਚ ਉਪਟ੍ਠਾਪੇਤ੍ਵਾ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਤਂ ਸਬ੍ਬਂ ਨਿਯ੍ਯਾਦੇਸਿ. ਅਥ ਥੇਰੋ ਤਂ ਪੇਤਿਂ ਉਦ੍ਦਿਸ੍ਸ ਤਂ ਸਬ੍ਬਂ ਬੁਦ੍ਧਪ੍ਪਮੁਖਸ੍ਸ ਚਾਤੁਦ੍ਦਿਸਸ੍ਸ ਭਿਕ੍ਖੁਸਙ੍ਘਸ੍ਸ ਅਦਾਸਿ. ਸਾ ਪੇਤੀ ਤਂ ਅਨੁਮੋਦਿਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਸਬ੍ਬਕਾਮਸਮਿਦ੍ਧਾ ਚ ਹੁਤ੍ਵਾ ਅਪਰਦਿਵਸੇ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਸਨ੍ਤਿਕਂ ਉਪਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਤਂ ਥੇਰੋ ਪਟਿਪੁਚ੍ਛਿ, ਸਾ ਅਤ੍ਤਨੋ ਪੇਤੂਪਪਤ੍ਤਿਂ ਪੁਨ ਦੇਵੂਪਪਤ੍ਤਿਞ੍ਚ ਵਿਤ੍ਥਾਰਤੋ ਕਥੇਸਿ. ਤੇਨ ਵੁਤ੍ਤਂ –

‘‘ਮਾਤੁਯਾ ਵਚਨਂ ਸੁਤ੍ਵਾ, ਉਪਤਿਸ੍ਸੋਨੁਕਮ੍ਪਕੋ;

ਆਮਨ੍ਤਯਿ ਮੋਗ੍ਗਲ੍ਲਾਨਂ, ਅਨੁਰੁਦ੍ਧਞ੍ਚ ਕਪ੍ਪਿਨਂ.

‘‘ਚਤਸ੍ਸੋ ਕੁਟਿਯੋ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਕੁਟਿਯੋ ਅਨ੍ਨਪਾਨਞ੍ਚ, ਮਾਤੁ ਦਕ੍ਖਿਣਮਾਦਿਸੀ.

‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਂ ਪਾਨੀਯਂ ਵਤ੍ਥਂ, ਦਕ੍ਖਿਣਾਯ ਇਦਂ ਫਲਂ.

‘‘ਤਤੋ ¶ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਕੋਲਿਕਂ ਉਪਸਙ੍ਕਮੀ’’ਤਿ.

੧੨੩. ਤਤ੍ਥ ਸਙ੍ਘੇ ਚਾਤੁਦ੍ਦਿਸੇ ਅਦਾਤਿ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ ਅਦਾਸਿ, ਨਿਯ੍ਯਾਦੇਸੀਤਿ ਅਤ੍ਥੋ. ਸੇਸਂ ¶ ਵੁਤ੍ਤਤ੍ਥਮੇਵ.

ਅਥਾਯਸ੍ਮਾ ¶ ਮਹਾਮੋਗ੍ਗਲ੍ਲਾਨੋ ਤਂ ਪੇਤਿਂ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਤੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;

੧੨੯-੧੩੩. ਅਥ ਸਾ ‘‘ਸਾਰਿਪੁਤ੍ਤਸ੍ਸਾਹਂ ਮਾਤਾ’’ਤਿਆਦਿਨਾ ਵਿਸ੍ਸਜ੍ਜੇਸਿ. ਸੇਸਂ ਵੁਤ੍ਤਤ੍ਥਮੇਵ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਸਾਰਿਪੁਤ੍ਤਤ੍ਥੇਰਮਾਤੁਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਮਤ੍ਤਂ ਨਾਮ ਪੇਤਿਂ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਂ ਕਿਰ ਅਞ੍ਞਤਰੋ ਕੁਟੁਮ੍ਬਿਕੋ ਸਦ੍ਧੋ ਪਸਨ੍ਨੋ ਅਹੋਸਿ. ਤਸ੍ਸ ਭਰਿਯਾ ਅਸ੍ਸਦ੍ਧਾ ਅਪ੍ਪਸਨ੍ਨਾ ਕੋਧਨਾ ਵਞ੍ਝਾ ਚ ਅਹੋਸਿ ਨਾਮੇਨ ਮਤ੍ਤਾ ਨਾਮ. ਅਥ ਸੋ ਕੁਟੁਮ੍ਬਿਕੋ ਕੁਲਵਂਸੂਪਚ੍ਛੇਦਨਭਯੇਨ ਸਦਿਸਕੁਲਤੋ ਤਿਸ੍ਸਂ ਨਾਮ ਅਞ੍ਞਂ ਕਞ੍ਞਂ ਆਨੇਸਿ. ਸਾ ਅਹੋਸਿ ਸਦ੍ਧਾ ਪਸਨ੍ਨਾ ¶ ਸਾਮਿਨੋ ਚ ਪਿਯਾ ਮਨਾਪਾ, ਸਾ ਨਚਿਰਸ੍ਸੇਵ ਗਬ੍ਭਿਨੀ ਹੁਤ੍ਵਾ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿ, ‘‘ਭੂਤੋ’’ਤਿਸ੍ਸ ਨਾਮਂ ਅਹੋਸਿ. ਸਾ ਗੇਹਸ੍ਸਾਮਿਨੀ ਹੁਤ੍ਵਾ ਚਤ੍ਤਾਰੋ ਭਿਕ੍ਖੂ ਸਕ੍ਕਚ੍ਚਂ ਉਪਟ੍ਠਹਿ, ਵਞ੍ਝਾ ਪਨ ਤਂ ਉਸੂਯਤਿ.

ਤਾ ਉਭੋਪਿ ਏਕਸ੍ਮਿਂ ਦਿਵਸੇ ਸੀਸਂ ਨ੍ਹਤ੍ਵਾ ਅਲ੍ਲਕੇਸਾ ਅਟ੍ਠਂਸੁ, ਕੁਟੁਮ੍ਬਿਕੋ ਗੁਣਵਸੇਨ ਤਿਸ੍ਸਾਯ ਆਬਦ੍ਧਸਿਨੇਹੋ ਮਨੁਞ੍ਞੇਨ ਹਦਯੇਨ ਤਾਯ ¶ ਸਦ੍ਧਿਂ ਬਹੁਂ ਸਲ੍ਲਪਨ੍ਤੋ ਅਟ੍ਠਾਸਿ. ਤਂ ਅਸਹਮਾਨਾ ਮਤ੍ਤਾ ਇਸ੍ਸਾਪਕਤਾ ਗੇਹੇ ਸਮ੍ਮਜ੍ਜਿਤ੍ਵਾ ਠਪਿਤਂ ਸਙ੍ਕਾਰਂ ਤਿਸ੍ਸਾਯ ਮਤ੍ਥਕੇ ਓਕਿਰਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਤ੍ਤਨੋ ਕਮ੍ਮਬਲੇਨ ਪਞ੍ਚਵਿਧਂ ਦੁਕ੍ਖਂ ਅਨੁਭਵਤਿ. ਤਂ ਪਨ ¶ ਦੁਕ੍ਖਂ ਪਾਲ਼ਿਤੋ ਏਵ ਵਿਞ੍ਞਾਯਤਿ. ਅਥੇਕਦਿਵਸਂ ਸਾ ਪੇਤੀ ਸਞ੍ਝਾਯ ਵੀਤਿਵਤ੍ਤਾਯ ਗੇਹਸ੍ਸ ਪਿਟ੍ਠਿਪਸ੍ਸੇ ਨ੍ਹਾਯਨ੍ਤਿਯਾ ਤਿਸ੍ਸਾਯ ਅਤ੍ਤਾਨਂ ਦਸ੍ਸੇਸਿ. ਤਂ ਦਿਸ੍ਵਾ ਤਿਸ੍ਸਾ –

‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

‘‘ਅਹਂ ਮਤ੍ਤਾ ਤੁਵਂ ਤਿਸ੍ਸਾ, ਸਪਤ੍ਤੀ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਪਟਿਵਚਨਂ ਅਦਾਸਿ. ਤਤ੍ਥ ਅਹਂ ਮਤ੍ਤਾ ਤੁਵਂ ਤਿਸ੍ਸਾਤਿ ਅਹਂ ਮਤ੍ਤਾ ਨਾਮ, ਤੁਵਂ ਤਿਸ੍ਸਾ ਨਾਮ. ਪੁਰੇਤਿ ਪੁਰਿਮਤ੍ਤਭਾਵੇ. ਤੇਤਿ ਤੁਯ੍ਹਂ ਸਪਤ੍ਤੀ ਅਹੁਂ, ਅਹੋਸਿਨ੍ਤਿ ਅਤ੍ਥੋ. ਪੁਨ ਤਿਸ੍ਸਾ –

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਕਤਕਮ੍ਮਂ ਪੁਚ੍ਛਿ. ਪੁਨ ਇਤਰਾ –

‘‘ਚਣ੍ਡੀ ਚ ਫਰੁਸਾ ਚਾਸਿਂ, ਇਸ੍ਸੁਕੀ ਮਚ੍ਛਰੀ ਸਠਾ;

ਤਾਹਂ ਦੁਰੁਤ੍ਤਂ ਵਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ¶ ਅਤ੍ਤਨਾ ਕਤਕਮ੍ਮਂ ਆਚਿਕ੍ਖਿ. ਤਤ੍ਥ ਚਣ੍ਡੀਤਿ ਕੋਧਨਾ. ਫਰੁਸਾਤਿ ਫਰੁਸਵਚਨਾ. ਆਸਿਨ੍ਤਿ ਅਹੋਸਿਂ. ਤਾਹਨ੍ਤਿ ਤਂ ਅਹਂ. ਦੁਰੁਤ੍ਤਨ੍ਤਿ ਦੁਬ੍ਭਾਸਿਤਂ ਨਿਰਤ੍ਥਕਵਚਨਂ. ਇਤੋ ਪਰਮ੍ਪਿ ਤਾਸਂ ਵਚਨਪਟਿਵਚਨਵਸੇਨੇਵ ਗਾਥਾ ਪਵਤ੍ਤਾ –

‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਯਥਾ ਤ੍ਵਂ ਚਣ੍ਡਿਕਾ ਅਹੁ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਪਂਸੁਕੁਨ੍ਥਿਤਾ.

‘‘ਸੀਸਂਨ੍ਹਾਤਾ ¶ ਤੁਵਂ ਆਸਿ, ਸੁਚਿਵਤ੍ਥਾ ਅਲਙ੍ਕਤਾ;

ਅਹਞ੍ਚ ਖੋ ਅਧਿਮਤ੍ਤਂ, ਸਮਲਙ੍ਕਤਤਰਾ ਤਯਾ.

‘‘ਤਸ੍ਸਾ ਮੇ ਪੇਕ੍ਖਮਾਨਾਯ, ਸਾਮਿਕੇਨ ਸਮਨ੍ਤਯਿ;

ਤਤੋ ਮੇ ਇਸ੍ਸਾ ਵਿਪੁਲਾ, ਕੋਧੋ ਮੇ ਸਮਜਾਯਥ.

‘‘ਤਤੋ ¶ ਪਂਸੁਂ ਗਹੇਤ੍ਵਾਨ, ਪਂਸੁਨਾ ਤਞ੍ਹਿ ਓਕਿਰਿਂ;

ਤਸ੍ਸਕਮ੍ਮਵਿਪਾਕੇਨ, ਤੇਨਮ੍ਹਿ ਪਂਸੁਕੁਨ੍ਥਿਤਾ.

‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਪਂਸੁਨਾ ਮਂ ਤ੍ਵਮੋਕਿਰਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨ ਖਜ੍ਜਸਿ ਕਚ੍ਛੁਯਾ.

‘‘ਭੇਸਜ੍ਜਹਾਰੀ ਉਭਯੋ, ਵਨਨ੍ਤਂ ਅਗਮਿਮ੍ਹਸੇ;

ਤ੍ਵਞ੍ਚ ਭੇਸਜ੍ਜਮਾਹਰਿ, ਅਹਞ੍ਚ ਕਪਿਕਚ੍ਛੁਨੋ.

‘‘ਤਸ੍ਸਾ ਤ੍ਯਾਜਾਨਮਾਨਾਯ, ਸੇਯ੍ਯਂ ਤ੍ਯਾਹਂ ਸਮੋਕਿਰਿਂ;

ਤਸ੍ਸਕਮ੍ਮਵਿਪਾਕੇਨ, ਤੇਨ ਖਜ੍ਜਾਮਿ ਕਚ੍ਛੁਯਾ.

‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਸੇਯ੍ਯਂ ਮੇ ਤ੍ਵਂ ਸਮੋਕਿਰਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਨਗ੍ਗਿਯਾ ਤੁਵਂ.

‘‘ਸਹਾਯਾਨਂ ¶ ਸਮਯੋ ਆਸਿ, ਞਾਤੀਨਂ ਸਮਿਤੀ ਅਹੁ;

ਤ੍ਵਞ੍ਚ ਆਮਨ੍ਤਿਤਾ ਆਸਿ, ਸਸਾਮਿਨੀ ਨੋ ਚ ਖੋਹਂ.

‘‘ਤਸ੍ਸਾ ਤ੍ਯਾਜਾਨਮਾਨਾਯ, ਦੁਸ੍ਸਂ ਤ੍ਯਾਹਂ ਅਪਾਨੁਦਿਂ;

ਤਸ੍ਸਕਮ੍ਮਵਿਪਾਕੇਨ, ਤੇਨਮ੍ਹਿ ਨਗ੍ਗਿਯਾ ਅਹਂ.

‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਦੁਸ੍ਸਂ ਮੇ ਤ੍ਵਂ ਅਪਾਨੁਦਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਗੂਥਗਨ੍ਧਿਨੀ.

‘‘ਤਵ ਗਨ੍ਧਞ੍ਚ ਮਾਲਞ੍ਚ, ਪਚ੍ਚਗ੍ਘਞ੍ਚ ਵਿਲੇਪਨਂ;

ਗੂਥਕੂਪੇ ਅਤਾਰੇਸਿਂ, ਤਂ ਪਾਪਂ ਪਕਤਂ ਮਯਾ;

ਤਸ੍ਸਕਮ੍ਮਵਿਪਾਕੇਨ, ਤੇਨਮ੍ਹਿ ਗੂਥਗਨ੍ਧਿਨੀ.

‘‘ਸਬ੍ਬਂ ¶ ਅਹਮ੍ਪਿ ਜਾਨਾਮਿ, ਤਂ ਪਾਪਂ ਪਕਤਂ ਤਯਾ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਦੁਗ੍ਗਤਾ ਤੁਵਂ.

‘‘ਉਭਿਨ੍ਨਂ ਸਮਕਂ ਆਸਿ, ਯਂ ਗੇਹੇ ਵਿਜ੍ਜਤੇ ਧਨਂ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਾਸਿਮਤ੍ਤਨੋ;

ਤਸ੍ਸਕਮ੍ਮਵਿਪਾਕੇਨ, ਤੇਨਮ੍ਹਿ ਦੁਗ੍ਗਤਾ ਅਹਂ.

‘‘ਤਦੇਵ ਮਂ ਤ੍ਵਂ ਅਵਚ, ਪਾਪਕਮ੍ਮਂ ਨਿਸੇਵਸਿ;

ਨ ਹਿ ਪਾਪੇਹਿ ਕਮ੍ਮੇਹਿ, ਸੁਲਭਾ ਹੋਤਿ ਸੁਗ੍ਗਤਿ.

‘‘ਵਾਮਤੋ ਮਂ ਤ੍ਵਂ ਪਚ੍ਚੇਸਿ, ਅਥੋਪਿ ਮਂ ਉਸੂਯਸਿ;

ਪਸ੍ਸ ਪਾਪਾਨਂ ਕਮ੍ਮਾਨਂ, ਵਿਪਾਕੋ ਹੋਤਿ ਯਾਦਿਸੋ.

‘‘ਤੇ ¶ ਘਰਾ ਤਾ ਚ ਦਾਸਿਯੋ, ਤਾਨੇਵਾਭਰਣਾਨਿਮੇ;

ਤੇ ਅਞ੍ਞੇ ਪਰਿਚਾਰੇਨ੍ਤਿ, ਨ ਭੋਗਾ ਹੋਨ੍ਤਿ ਸਸ੍ਸਤਾ.

‘‘ਇਦਾਨਿ ¶ ਭੂਤਸ੍ਸ ਪਿਤਾ, ਆਪਣਾ ਗੇਹਮੇਹਿਤਿ;

ਅਪ੍ਪੇਵ ਤੇ ਦਦੇ ਕਿਞ੍ਚਿ, ਮਾ ਸੁ ਤਾਵ ਇਤੋ ਅਗਾ.

‘‘ਨਗ੍ਗਾ ਦੁਬ੍ਬਣ੍ਣਰੂਪਾਮ੍ਹਿ, ਕਿਸਾ ਧਮਨਿਸਨ੍ਥਤਾ;

ਕੋਪੀਨਮੇਤਂ ਇਤ੍ਥੀਨਂ, ਮਾ ਮਂ ਭੂਤਪਿਤਾਦ੍ਦਸ.

‘‘ਹਨ੍ਦ ਕਿਂ ਵਾ ਤ੍ਯਾਹਂ ਦਮ੍ਮਿ, ਕਿਂ ਵਾ ਤੇਚ ਕਰੋਮਹਂ;

ਯੇਨ ਤ੍ਵਂ ਸੁਖਿਤਾ ਅਸ੍ਸ, ਸਬ੍ਬਕਾਮਸਮਿਦ੍ਧਿਨੀ.

‘‘ਚਤ੍ਤਾਰੋ ਭਿਕ੍ਖੂ ਸਙ੍ਘਤੋ, ਚਤ੍ਤਾਰੋ ਪਨ ਪੁਗ੍ਗਲੇ;

ਅਟ੍ਠ ਭਿਕ੍ਖੂ ਭੋਜਯਿਤ੍ਵਾ, ਮਮ ਦਕ੍ਖਿਣਮਾਦਿਸ;

ਤਦਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ.

‘‘ਸਾਧੂਤਿ ਸਾ ਪਟਿਸ੍ਸੁਤ੍ਵਾ, ਭੋਜਯਿਤ੍ਵਾਟ੍ਠ ਭਿਕ੍ਖਵੋ;

ਵਤ੍ਥੇਹਚ੍ਛਾਦਯਿਤ੍ਵਾਨ, ਤਸ੍ਸਾ ਦਕ੍ਖਿਣਮਾਦਿਸੀ.

‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

‘‘ਤਤੋ ¶ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਸਪਤ੍ਤਿਂ ਉਪਸਙ੍ਕਮਿ.

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸੀ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀਤਿ.

‘‘ਅਹਂ ¶ ਮਤ੍ਤਾ ਤੁਵਂ ਤਿਸ੍ਸਾ, ਸਪਤ੍ਤੀ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

‘‘ਤਵ ਦਿਨ੍ਨੇਨ ਦਾਨੇਨ, ਮੋਦਾਮਿ ਅਕੁਤੋਭਯਾ;

ਚਿਰਂ ਜੀਵਾਹਿ ਭਗਿਨਿ, ਸਹ ਸਬ੍ਬੇਹਿ ਞਾਤਿਭਿ;

ਅਸੋਕਂ ਵਿਰਜਂ ਠਾਨਂ, ਆਵਾਸਂ ਵਸਵਤ੍ਤਿਨਂ.

‘‘ਇਧ ਧਮ੍ਮਂ ਚਰਿਤ੍ਵਾਨ, ਦਾਨਂ ਦਤ੍ਵਾਨ ਸੋਭਨੇ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤਾ ਸਗ੍ਗਮੁਪੇਹਿ ਠਾਨ’’ਨ੍ਤਿ.

੧੩੮. ਤਤ੍ਥ ¶ ਸਬ੍ਬਂ ਅਹਮ੍ਪਿ ਜਾਨਾਮਿ, ਯਥਾ ਤ੍ਵਂ ਚਣ੍ਡਿਕਾ ਅਹੂਤਿ ‘‘ਚਣ੍ਡੀ ਚ ਫਰੁਸਾ ਚਾਸਿ’’ਨ੍ਤਿ ਯਂ ਤਯਾ ਵੁਤ੍ਤਂ, ਤਂ ਸਬ੍ਬਂ ਅਹਮ੍ਪਿ ਜਾਨਾਮਿ, ਯਥਾ ਤ੍ਵਂ ਚਣ੍ਡਿਕਾ ਕੋਧਨਾ ਫਰੁਸਵਚਨਾ ਇਸ੍ਸੁਕੀ ਮਚ੍ਛਰੀ ਸਠਾ ਚ ਅਹੋਸਿ. ਅਞ੍ਞਞ੍ਚ ਖੋ ਤਂ ਪੁਚ੍ਛਾਮੀਤਿ ਅਞ੍ਞਂ ਪੁਨ ਤਂ ਇਦਾਨਿ ਪੁਚ੍ਛਾਮਿ. ਕੇਨਾਸਿ ਪਂਸੁਕੁਨ੍ਥਿਤਾਤਿ ਕੇਨ ਕਮ੍ਮੇਨ ਸਙ੍ਕਾਰਪਂਸੂਤਿ ਓਗੁਣ੍ਠਿਤਾ ਸਬ੍ਬਸੋ ਓਕਿਣ੍ਣਸਰੀਰਾ ਅਹੂਤਿ ਅਤ੍ਥੋ.

੧੩੯-੪੦. ਸੀਸਂਨ੍ਹਾਤਾਤਿ ਸਸੀਸਂ ਨ੍ਹਾਤਾ. ਅਧਿਮਤ੍ਤਨ੍ਤਿ ਅਧਿਕਤਰਂ. ਸਮਲਙ੍ਕਤਤਰਾਤਿ ਸਮ੍ਮਾ ਅਤਿਸਯੇਨ ਅਲਙ੍ਕਤਾ. ‘‘ਅਧਿਮਤ੍ਤਾ’’ਤਿ ਵਾ ਪਾਠੋ, ਅਤਿਵਿਯ ਮਤ੍ਤਾ ਮਾਨਮਦਮਤ੍ਤਾ, ਮਾਨਨਿਸ੍ਸਿਤਾਤਿ ਅਤ੍ਥੋ. ਤਯਾਤਿ ਭੋਤਿਯਾ ¶ . ਸਾਮਿਕੇਨ ਸਮਨ੍ਤਯੀਤਿ ਸਾਮਿਕੇਨ ਸਦ੍ਧਿਂ ਅਲ੍ਲੋਪਸਲ੍ਲਾਪਵਸੇਨ ਕਥੇਸਿ.

੧੪੨-੧੪੪. ਖਜ੍ਜਸਿ ਕਚ੍ਛੁਯਾਤਿ ਕਚ੍ਛੁਰੋਗੇਨ ਖਾਦੀਯਸਿ, ਬਾਧੀਯਸੀਤਿ ਅਤ੍ਥੋ. ਭੇਸਜ੍ਜਹਾਰੀਤਿ ਭੇਸਜ੍ਜਹਾਰਿਨਿਯੋ ਓਸਧਹਾਰਿਕਾਯੋ. ਉਭਯੋਤਿ ਦੁਵੇ, ਤ੍ਵਞ੍ਚ ਅਹਞ੍ਚਾਤਿ ਅਤ੍ਥੋ. ਵਨਨ੍ਤਨ੍ਤਿ ਵਨਂ. ਤ੍ਵਞ੍ਚ ਭੇਸਜ੍ਜਮਾਹਰੀਤਿ ਤ੍ਵਂ ਵੇਜ੍ਜੇਹਿ ਵੁਤ੍ਤਂ ਅਤ੍ਤਨੋ ਉਪਕਾਰਾਵਹਂ ਭੇਸਜ੍ਜਂ ਆਹਰਿ. ਅਹਞ੍ਚ ਕਪਿਕਚ੍ਛੁਨੋਤਿ ਅਹਂ ਪਨ ਕਪਿਕਚ੍ਛੁਫਲਾਨਿ ਦੁਫਸ੍ਸਫਲਾਨਿ ਆਹਰਿਂ. ਕਪਿਕਚ੍ਛੂਤਿ ਵਾ ਸਯਂਭੂਤਾ ਵੁਚ੍ਚਤਿ, ਤਸ੍ਮਾ ਸਯਂਭੂਤਾਯ ਪਤ੍ਤਫਲਾਨਿ ਆਹਰਿਨ੍ਤਿ ਅਤ੍ਥੋ. ਸੇਯ੍ਯਂ ਤ੍ਯਾਹਂ ਸਮੋਕਿਰਿਨ੍ਤਿ ਤਵ ਸੇਯ੍ਯਂ ਅਹਂ ਕਪਿਕਚ੍ਛੁਫਲਪਤ੍ਤੇਹਿ ਸਮਨ੍ਤਤੋ ਅਵਕਿਰਿਂ.

੧੪੬-੧੪੭. ਸਹਾਯਾਨਨ੍ਤਿ ਮਿਤ੍ਤਾਨਂ. ਸਮਯੋਤਿ ਸਮਾਗਮੋ. ਞਾਤੀਨਨ੍ਤਿ ਬਨ੍ਧੂਨਂ. ਸਮਿਤੀਤਿ ¶ ਸਨ੍ਨਿਪਾਤੋ. ਆਮਨ੍ਤਿਤਾਤਿ ਮਙ੍ਗਲਕਿਰਿਯਾਵਸੇਨ ਨਿਮਨ੍ਤਿਤਾ. ਸਸਾਮਿਨੀਤਿ ਸਭਤ੍ਤਿਕਾ, ਸਹ ਭਤ੍ਤੁਨਾਤਿ ਅਤ੍ਥੋ. ਨੋ ਚ ਖੋਹਨ੍ਤਿ ਨੋ ਚ ਖੋ ਅਹਂ ਆਮਨ੍ਤਿਤਾ ਆਸਿਨ੍ਤਿ ਯੋਜਨਾ. ਦੁਸ੍ਸਂ ਤ੍ਯਾਹਨ੍ਤਿ ਦੁਸ੍ਸਂ ਤੇ ਅਹਂ. ਅਪਾਨੁਦਿਨ੍ਤਿ ਚੋਰਿਕਾਯ ਅਵਹਰਿਂ ਅਗ੍ਗਹੋਸਿਂ.

੧੪੯. ਪਚ੍ਚਗ੍ਘਨ੍ਤਿ ¶ ਅਭਿਨਵਂ, ਮਹਗ੍ਘਂ ਵਾ. ਅਤਾਰੇਸਿਨ੍ਤਿ ਖਿਪਿਂ. ਗੂਥਗਨ੍ਧਿਨੀਤਿ ਗੂਥਗਨ੍ਧਗਨ੍ਧਿਨੀ ਕਰੀਸਵਾਯਿਨੀ.

੧੫੧. ਯਂ ਗੇਹੇ ਵਿਜ੍ਜਤੇ ਧਨਨ੍ਤਿ ਯਂ ਗੇਹੇ ਧਨਂ ਉਪਲਬ੍ਭਤਿ, ਤਂ ਤੁਯ੍ਹਂ ਮਯ੍ਹਞ੍ਚਾਤਿ ਅਮ੍ਹਾਕਂ ਉਭਿਨ੍ਨ ਸਮਕਂ ਤੁਲ੍ਯਮੇਵ ਆਸਿ. ਸਨ੍ਤੇਸੂਤਿ ਵਿਜ੍ਜਮਾਨੇਸੁ. ਦੀਪਨ੍ਤਿ ਪਤਿਟ੍ਠਂ, ਪੁਞ੍ਞਕਮ੍ਮਂ ਸਨ੍ਧਾਯ ਵਦਤਿ.

੧੫੨. ਏਵਂ ਸਾ ਪੇਤੀ ਤਿਸ੍ਸਾਯ ਪੁਚ੍ਛਿਤਮਤ੍ਥਂ ਕਤ੍ਥੇਤ੍ਵਾ ਪੁਨ ਪੁਬ੍ਬੇ ਤਸ੍ਸਾ ਵਚਨਂ ਅਕਤ੍ਵਾ ਅਤ੍ਤਨਾ ਕਤਂ ਅਪਰਾਧਂ ਪਕਾਸੇਨ੍ਤੀ ‘‘ਤਦੇਵ ਮਂ ਤ੍ਵ’’ਨ੍ਤਿਆਦਿਮਾਹ. ਤਤ੍ਥ ਤਦੇਵਾਤਿ ਤਦਾ ਏਵ, ਮਯ੍ਹਂ ਮਨੁਸ੍ਸਤ੍ਤਭਾਵੇ ਠਿਤਕਾਲੇਯੇਵ. ਤਥੇਵਾਤਿ ਵਾ ਪਾਠੋ, ਯਥਾ ਏਤਰਹਿ ਜਾਤਂ, ਤਂ ਤਥਾ ਏਵਾਤਿ ਅਤ੍ਥੋ. ਮਨ੍ਤਿ ਅਤ੍ਤਾਨਂ ਨਿਦ੍ਦਿਸਤਿ, ਤ੍ਵਨ੍ਤਿ ਤਿਸ੍ਸਂ. ਅਵਚਾਤਿ ਅਭਣਿ. ਯਥਾ ਪਨ ਅਵਚ, ਤਂ ਦਸ੍ਸੇਤੁਂ ‘‘ਪਾਪਕਮ੍ਮ’’ਨ੍ਤਿਆਦਿ ਵੁਤ੍ਤਂ. ‘‘ਪਾਪਕਮ੍ਮਾਨੀ’’ਤਿ ¶ ਪਾਲ਼ਿ. ‘‘ਤ੍ਵਂ ਪਾਪਕਮ੍ਮਾਨਿਯੇਵ ਕਰੋਸਿ, ਪਾਪੇਹਿ ਪਨ ਕਮ੍ਮੇਹਿ ਸੁਗਤਿ ਸੁਲਭਾ ਨ ਹੋਤਿ, ਅਥ ਖੋ ਦੁਗ੍ਗਤਿ ਏਵ ਸੁਲਭਾ’’ਤਿ ਯਥਾ ਮਂ ਤ੍ਵਂ ਪੁਬ੍ਬੇ ਅਵਚ ਓਵਦਿ, ਤਂ ਤਥੇਵਾਤਿ ਵਦਤਿ.

੧੫੩. ਤਂ ਸੁਤ੍ਵਾ ਤਿਸ੍ਸਾ ‘‘ਵਾਮਤੋ ਮਂ ਤ੍ਵਂ ਪਚ੍ਚੇਸੀ’’ਤਿਆਦਿਨਾ ਤਿਸ੍ਸੋ ਗਾਥਾ ਆਹ. ਤਤ੍ਥ ਵਾਮਤੋ ਮਂ ਤ੍ਵਂ ਪਚ੍ਚੇਸੀਤਿ ਵਿਲੋਮਤੋ ਮਂ ਤ੍ਵਂ ਅਧਿਗਚ੍ਛਸਿ, ਤੁਯ੍ਹਂ ਹਿਤੇਸਿਮ੍ਪਿ ਵਿਪਚ੍ਚਨੀਕਕਾਰਿਨਿਂ ਕਤ੍ਵਾ ਮਂ ਗਣ੍ਹਾਸਿ. ਮਂ ਉਸੂਯਸੀਤਿ ਮਯ੍ਹਂ ਉਸੂਯਸਿ, ਮਯਿ ਇਸ੍ਸਂ ਕਰੋਸਿ. ਪਸ੍ਸ ਪਾਪਾਨਂ ਕਮ੍ਮਾਨਂ, ਵਿਪਾਕੋ ਹੋਤਿ ਯਾਦਿਸੋਤਿ ਪਾਪਕਾਨਂ ਨਾਮ ਕਮ੍ਮਾਨਂ ਵਿਪਾਕੋ ਯਾਦਿਸੋ ਯਥਾ ਘੋਰਤਰੋ, ਤਂ ਪਚ੍ਚਕ੍ਖਤੋ ਪਸ੍ਸਾਤਿ ਵਦਤਿ.

੧੫੪. ਤੇ ਅਞ੍ਞੇ ਪਰਿਚਾਰੇਨ੍ਤੀਤਿ ਤੇ ਘਰੇ ਦਾਸਿਯੋ ਆਭਰਣਾਨਿ ਚ ਇਮਾਨਿ ਤਯਾ ਪੁਬ੍ਬੇ ਪਰਿਗ੍ਗਹਿਤਾਨਿ ਇਦਾਨਿ ਅਞ੍ਞੇ ਪਰਿਚਾਰੇਨ੍ਤਿ ਪਰਿਭੁਞ੍ਜਨ੍ਤਿ. ‘‘ਇਮੇ’’ਤਿ ਹਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ. ਨ ਭੋਗਾ ਹੋਨ੍ਤਿ ਸਸ੍ਸਤਾਤਿ ਭੋਗਾ ਨਾਮੇਤੇ ਨ ਸਸ੍ਸਤਾ ਅਨਵਟ੍ਠਿਤਾ ਤਾਵਕਾਲਿਕਾ ਮਹਾਯਗਮਨੀਯਾ, ਤਸ੍ਮਾ ਤਦਤ੍ਥਂ ਇਸ੍ਸਾਮਚ੍ਛਰਿਯਾਦੀਨਿ ਨ ਕਤ੍ਤਬ੍ਬਾਨੀਤਿ ਅਧਿਪ੍ਪਾਯੋ.

੧੫੫. ਇਦਾਨਿ ¶ ¶ ਭੂਤਸ੍ਸ ਪਿਤਾਤਿ ਇਦਾਨੇਵ ਭੂਤਸ੍ਸ ਮਯ੍ਹਂ ਪੁਤ੍ਤਸ੍ਸ ਪਿਤਾ ਕੁਟੁਮ੍ਬਿਕੋ. ਆਪਣਾਤਿ ਆਪਣਤੋ ਇਮਂ ਗੇਹਂ ਏਹਿਤਿ ਆਗਮਿਸ੍ਸਤਿ. ਅਪ੍ਪੇਵ ਤੇ ਦਦੇ ਕਿਞ੍ਚੀਤਿ ਗੇਹਂ ਆਗਤੋ ਕੁਟੁਮ੍ਬਿਕੋ ਤੁਯ੍ਹਂ ਦਾਤਬ੍ਬਯੁਤ੍ਤਕਂ ਕਿਞ੍ਚਿ ਦੇਯ੍ਯਧਮ੍ਮਂ ਅਪਿ ਨਾਮ ਦਦੇਯ੍ਯ. ਮਾ ਸੁ ਤਾਵ ਇਤੋ ਅਗਾਤਿ ਇਤੋ ਗੇਹਸ੍ਸ ਪਚ੍ਛਾ ਵਤ੍ਥੁਤੋ ਮਾ ਤਾਵ ਅਗਮਾਸੀਤਿ ਤਂ ਅਨੁਕਮ੍ਪਮਾਨਾ ਆਹ.

੧੫੬. ਤਂ ਸੁਤ੍ਵਾ ਪੇਤੀ ਅਤ੍ਤਨੋ ਅਜ੍ਝਾਸਯਂ ਪਕਾਸੇਨ੍ਤੀ ‘‘ਨਗ੍ਗਾ ਦੁਬ੍ਬਣ੍ਣਰੂਪਾਮ੍ਹੀ’’ਤਿ ਗਾਥਮਾਹ. ਤਤ੍ਥ ਕੋਪੀਨਮੇਤਂ ਇਤ੍ਥੀਨਨ੍ਤਿ ਏਤਂ ਨਗ੍ਗਦੁਬ੍ਬਣ੍ਣਤਾਦਿਕਂ ਪਟਿਚ੍ਛਾਦੇਤਬ੍ਬਤਾਯ ਇਤ੍ਥੀਨਂ ਕੋਪੀਨਂ ਰੁਨ੍ਧਨੀਯਂ. ਮਾ ਮਂ ਭੂਤਪਿਤਾਦ੍ਦਸਾਤਿ ਤਸ੍ਮਾ ਭੂਤਸ੍ਸ ਪਿਤਾ ਕੁਟੁਮ੍ਬਿਕੋ ਮਂ ਮਾ ਅਦ੍ਦਕ੍ਖੀਤਿ ਲਜ੍ਜਮਾਨਾ ਵਦਤਿ.

੧੫੭. ਤਂ ¶ ਸੁਤ੍ਵਾ ਤਿਸ੍ਸਾ ਸਞ੍ਜਾਤਨੁਦ੍ਦਯਾ ‘‘ਹਨ੍ਦ ਕਿਂ ਵਾ ਤ੍ਯਾਹਂ ਦਮ੍ਮੀ’’ਤਿ ਗਾਥਮਾਹ. ਤਤ੍ਥ ਹਨ੍ਦਾਤਿ ਚੋਦਨਤ੍ਥੇ ਨਿਪਾਤੋ. ਕਿਂ ਵਾ ਤ੍ਯਾਹਂ ਦਮ੍ਮੀਤਿ ਕਿਂ ਤੇ ਅਹਂ ਦਮ੍ਮਿ, ਕਿਂ ਵਤ੍ਥਂ ਦਸ੍ਸਾਮਿ, ਉਦਾਹੁ ਭਤ੍ਤਨ੍ਤਿ. ਕਿਂ ਵਾ ਤੇਧ ਕਰੋਮਹਨ੍ਤਿ ਕਿਂ ਵਾ ਅਞ੍ਞਂ ਤੇ ਇਧ ਇਮਸ੍ਮਿਂ ਕਾਲੇ ਉਪਕਾਰਂ ਕਰਿਸ੍ਸਾਮਿ.

੧੫੮. ਤਂ ਸੁਤ੍ਵਾ ਪੇਤੀ ‘‘ਚਤ੍ਤਾਰੋ ਭਿਕ੍ਖੂ ਸਙ੍ਘਤੋ’’ਤਿ ਗਾਥਮਾਹ. ਤਤ੍ਥ ਚਤ੍ਤਾਰੋ ਭਿਕ੍ਖੂ ਸਙ੍ਘਤੋ, ਚਤ੍ਤਾਰੋ ਪਨ ਪੁਗ੍ਗਲੇਤਿ ਭਿਕ੍ਖੁਸਙ੍ਘਤੋ ਸਙ੍ਘਵਸੇਨ ਚਤ੍ਤਾਰੋ ਭਿਕ੍ਖੂ, ਪੁਗ੍ਗਲਵਸੇਨ ਚਤ੍ਤਾਰੋ ਭਿਕ੍ਖੂਤਿ ਏਵਂ ਅਟ੍ਠ ਭਿਕ੍ਖੂ ਯਥਾਰੁਚਿਂ ਭੋਜੇਤ੍ਵਾ ਤਂ ਦਕ੍ਖਿਣਂ ਮਮ ਆਦਿਸ, ਮਯ੍ਹਂ ਪਤ੍ਤਿਦਾਨਂ ਦੇਹਿ. ਤਦਾਹਂ ਸੁਖਿਤਾ ਹੇਸ੍ਸਨ੍ਤਿ ਯਦਾ ਤ੍ਵਂ ਦਕ੍ਖਿਣਂ ਮਮ ਉਦ੍ਦਿਸਿਸ੍ਸਸਿ, ਤਦਾ ਅਹਂ ਸੁਖਿਤਾ ਸੁਖਪ੍ਪਤ੍ਤਾ ਸਬ੍ਬਕਾਮਸਮਿਦ੍ਧਿਨੀ ਭਵਿਸ੍ਸਾਮੀਤਿ ਅਤ੍ਥੋ.

੧੫੯-੧੬੧. ਤਂ ਸੁਤ੍ਵਾ ਤਿਸ੍ਸਾ ਤਮਤ੍ਥਂ ਅਤ੍ਤਨੋ ਸਾਮਿਕਸ੍ਸ ਆਰੋਚੇਤ੍ਵਾ ਦੁਤਿਯਦਿਵਸੇ ਅਟ੍ਠ ਭਿਕ੍ਖੂ ਭੋਜੇਤ੍ਵਾ ਤਸ੍ਸਾ ਦਕ੍ਖਿਣਮਾਦਿਸਿ, ਸਾ ਤਾਵਦੇਵ ਪਟਿਲਦ੍ਧਦਿਬ੍ਬਸਮ੍ਪਤ੍ਤਿਕਾ ਪੁਨ ਤਿਸ੍ਸਾਯ ਸਨ੍ਤਿਕਂ ਉਪਸਙ੍ਕਮਿ. ਤਮਤ੍ਥਂ ਦਸ੍ਸੇਤੁਂ ਸਙ੍ਗੀਤਿਕਾਰੇਹਿ ‘‘ਸਾਧੂਤਿ ਸਾ ਪਟਿਸ੍ਸੁਤ੍ਵਾ’’ਤਿਆਦਿਕਾ ਤਿਸ੍ਸੋ ਗਾਥਾ ਠਪਿਤਾ.

੧੬੨-੧੬੭. ਉਪਸਙ੍ਕਮਿਤ੍ਵਾ ਠਿਤਂ ਪਨ ਨਂ ਤਿਸ੍ਸਾ ‘‘ਅਭਿਕ੍ਕਨ੍ਤੇਨ ਵਣ੍ਣੇਨਾ’’ਤਿਆਦੀਹਿ ¶ ਤੀਹਿ ਗਾਥਾਹਿ ਪਟਿਪੁਚ੍ਛਿ. ਇਤਰਾ ‘‘ਅਹਂ ਮਤ੍ਤਾ’’ਤਿ ਗਾਥਾਯ ਅਤ੍ਤਾਨਂ ਆਚਿਕ੍ਖਿਤ੍ਵਾ ‘‘ਚਿਰਂ ਜੀਵਾਹੀ’’ਤਿ ਗਾਥਾਯ ਤਸ੍ਸਾ ਅਨੁਮੋਦਨਂ ਦਤ੍ਵਾ ‘‘ਇਧ ਧਮ੍ਮਂ ਚਰਿਤ੍ਵਾਨਾ’’ਤਿ ਗਾਥਾਯ ¶ ਓਵਾਦਂ ਅਦਾਸਿ. ਤਤ੍ਥ ਤਵ ਦਿਨ੍ਨੇਨਾਤਿ ਤਯਾ ਦਿਨ੍ਨੇਨ. ਅਸੋਕਂ ਵਿਰਜਂ ਠਾਨਨ੍ਤਿ ਸੋਕਾਭਾਵੇਨ ਅਸੋਕਂ, ਸੇਦਜਲ੍ਲਿਕਾਨਂ ਪਨ ਅਭਾਵੇਨ ਵਿਰਜਂ ਦਿਬ੍ਬਟ੍ਠਾਨਂ, ਸਬ੍ਬਮੇਤਂ ਦੇਵਲੋਕਂ ਸਨ੍ਧਾਯ ਵਦਤਿ. ਆਵਾਸਨ੍ਤਿ ਠਾਨਂ. ਵਸਵਤ੍ਤਿਨਨ੍ਤਿ ਦਿਬ੍ਬੇਨ ਆਧਿਪਤੇਯ੍ਯੇਨ ਅਤ੍ਤਨੋ ਵਸਂ ਵਤ੍ਤੇਨ੍ਤਾਨਂ. ਸਮੂਲਨ੍ਤਿ ਸਲੋਭਦੋਸਂ. ਲੋਭਦੋਸਾ ਹਿ ਮਚ੍ਛਰਿਯਸ੍ਸ ਮੂਲਂ ਨਾਮ. ਅਨਿਨ੍ਦਿਤਾਤਿ ਅਗਰਹਿਤਾ ਪਾਸਂਸਾ, ਸਗ੍ਗਮੁਪੇਹਿ ਠਾਨਨ੍ਤਿ ਰੂਪਾਦੀਹਿ ਵਿਸਯੇਹਿ ਸੁਟ੍ਠੁ ਅਗ੍ਗਤ੍ਤਾ ‘‘ਸਗ੍ਗ’’ਨ੍ਤਿ ਲਦ੍ਧਨਾਮਂ ਦਿਬ੍ਬਟ੍ਠਾਨਂ ਉਪੇਹਿ, ਸੁਗਤਿਪਰਾਯਣਾ ਹੋਹੀਤਿ ਅਤ੍ਥੋ. ਸੇਸਂ ਉਤ੍ਤਾਨਮੇਵ.

ਅਥ ¶ ਤਿਸ੍ਸਾ ਤਂ ਪਵਤ੍ਤਿਂ ਕੁਟੁਮ੍ਬਿਕਸ੍ਸ ਆਰੋਚੇਸਿ, ਕੁਟੁਮ੍ਬਿਕੋ ਭਿਕ੍ਖੂਨਂ ਆਰੋਚੇਸਿ, ਭਿਕ੍ਖੂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਤਂ ਸੁਤ੍ਵਾ ਮਹਾਜਨੋ ਪਟਿਲਦ੍ਧਸਂਵੇਗੋ ਵਿਨੇਯ੍ਯ ਮਚ੍ਛੇਰਾਦਿਮਲਂ ਦਾਨਸੀਲਾਦਿਰਤੋ ਸੁਗਤਿਪਰਾਯਣੋ ਅਹੋਸੀਤਿ.

ਮਤ੍ਤਾਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਕਾਲ਼ੀ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਨਨ੍ਦਂ ਨਾਮ ਪੇਤਿਂ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਾ ਕਿਰ ਅਵਿਦੂਰੇ ਅਞ੍ਞਤਰਸ੍ਮਿਂ ਗਾਮਕੇ ਨਨ੍ਦਿਸੇਨੋ ਨਾਮ ਉਪਾਸਕੋ ਅਹੋਸਿ ਸਦ੍ਧੋ ਪਸਨ੍ਨੋ. ਭਰਿਯਾ ਪਨਸ੍ਸ ਨਨ੍ਦਾ ਨਾਮ ਅਸ੍ਸਦ੍ਧਾ ਅਪ੍ਪਸਨ੍ਨਾ ਮਚ੍ਛਰਿਨੀ ਚਣ੍ਡੀ ਫਰੁਸਵਚਨਾ ਸਾਮਿਕੇ ਅਗਾਰਵਾ ਅਗ੍ਗਤਿਸ੍ਸਾ ਸਸ੍ਸੁਂ ਚੋਰਿਵਾਦੇਨ ਅਕ੍ਕੋਸਤਿ ਪਰਿਭਾਸਤਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਤਸ੍ਸੇਵ ਗਾਮਸ੍ਸ ਅਵਿਦੂਰੇ ਵਿਚਰਨ੍ਤੀ ਏਕਦਿਵਸਂ ¶ ਨਨ੍ਦਿਸੇਨਸ੍ਸ ਉਪਾਸਕਸ੍ਸ ਗਾਮਤੋ ਨਿਕ੍ਖਮਨ੍ਤਸ੍ਸ ਅਵਿਦੂਰੇ ਅਤ੍ਤਾਨਂ ਦਸ੍ਸੇਸਿ. ਸੋ ਤਂ ਦਿਸ੍ਵਾ –

‘‘ਕਾਲ਼ੀ ਦੁਬ੍ਬਣ੍ਣਰੂਪਾਸਿ, ਫਰੁਸਾ ਭੀਰੁਦਸ੍ਸਨਾ;

ਪਿਙ੍ਗਲਾਸਿ ਕਲ਼ਾਰਾਸਿ, ਨ ਤਂ ਮਞ੍ਞਾਮਿ ਮਾਨੁਸਿ’’ਨ੍ਤਿ. –

ਗਾਥਾਯ ਅਜ੍ਝਭਾਸਿ. ਤਤ੍ਥ ਕਾਲ਼ੀਤਿ ਕਾਲ਼ਵਣ੍ਣਾ, ਝਾਮਙ੍ਗਾਰਸਦਿਸੋ ਹਿਸ੍ਸਾ ਵਣ੍ਣੋ ਅਹੋਸਿ. ਫਰੁਸਾਤਿ ਖਰਗਤ੍ਤਾ. ਭੀਰੁਦਸ੍ਸਨਾਤਿ ਭਯਾਨਕਦਸ੍ਸਨਾ ਸਪ੍ਪਟਿਭਯਾਕਾਰਾ. ‘‘ਭਾਰੁਦਸ੍ਸਨਾ’’ਤਿ ਵਾ ਪਾਠੋ, ਭਾਰਿਯਦਸ੍ਸਨਾ, ਦੁਬ੍ਬਣ੍ਣਤਾਦਿਨਾ ਦੁਦ੍ਦਸਿਕਾਤਿ ਅਤ੍ਥੋ. ਪਿਙ੍ਗਲਾਤਿ ਪਿਙ੍ਗਲਲੋਚਨਾ. ਕਲ਼ਾਰਾਤਿ ਕਲ਼ਾਰਦਨ੍ਤਾ. ਨ ਤਂ ਮਞ੍ਞਾਮਿ ਮਾਨੁਸਿਨ੍ਤਿ ਅਹਂ ਤਂ ਮਾਨੁਸਿਨ੍ਤਿ ਨ ਮਞ੍ਞਾਮਿ, ਪੇਤਿਮੇਵ ਚ ਤਂ ਮਞ੍ਞਾਮੀਤਿ ਅਧਿਪ੍ਪਾਯੋ. ਤਂ ਸੁਤ੍ਵਾ ਪੇਤੀ ਅਤ੍ਤਾਨਂ ਪਕਾਸੇਨ੍ਤੀ –

‘‘ਅਹਂ ¶ ਨਨ੍ਦਾ ਨਨ੍ਦਿਸੇਨ, ਭਰਿਯਾ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਮਾਹ ¶ . ਤਤ੍ਥ ਅਹਂ ਨਨ੍ਦਾ ਨਨ੍ਦਿਸੇਨਾਤਿ ਸਾਮਿ ਨਨ੍ਦਿਸੇਨ ਅਹਂ ਨਨ੍ਦਾ ਨਾਮ. ਭਰਿਯਾ ਤੇ ਪੁਰੇ ਅਹੁਨ੍ਤਿ ਪੁਰਿਮਜਾਤਿਯਂ ਤੁਯ੍ਹਂ ਭਰਿਯਾ ਅਹੋਸਿਂ. ਇਤੋ ਪਰਂ –

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ. –

ਤਸ੍ਸ ਉਪਾਸਕਸ੍ਸ ਪੁਚ੍ਛਾ. ਅਥਸ੍ਸ ਸਾ –

‘‘ਚਣ੍ਡੀ ਚ ਫਰੁਸਾ ਚਾਸਿਂ, ਤਯਿ ਚਾਪਿ ਅਗਾਰਵਾ;

ਤਾਹਂ ਦੁਰੁਤ੍ਤਂ ਵਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

‘‘ਹਨ੍ਦੁਤ੍ਤਰੀਯਂ ਦਦਾਮਿ ਤੇ, ਇਮਂ ਦੁਸ੍ਸਂ ਨਿਵਾਸਯ;

ਇਮਂ ਦੁਸ੍ਸਂ ਨਿਵਾਸੇਤ੍ਵਾ, ਏਹਿ ਨੇਸ੍ਸਾਮਿ ਤਂ ਘਰਂ.

‘‘ਵਤ੍ਥਞ੍ਚ ¶ ਅਨ੍ਨਪਾਨਞ੍ਚ, ਲਚ੍ਛਸਿ ਤ੍ਵਂ ਘਰਂ ਗਤਾ;

ਪੁਤ੍ਤੇ ਚ ਤੇ ਪਸ੍ਸਿਸ੍ਸਸਿ, ਸੁਣਿਸਾਯੋ ਚ ਦਕ੍ਖਸੀ’’ਤਿ. – ਅਥਸ੍ਸ ਸਾ –

‘‘ਹਤ੍ਥੇਨ ਹਤ੍ਥੇ ਤੇ ਦਿਨ੍ਨਂ, ਨ ਮਯ੍ਹਂ ਉਪਕਪ੍ਪਤਿ;

ਭਿਕ੍ਖੂ ਚ ਸੀਲਸਮ੍ਪਨ੍ਨੇ, ਵੀਤਰਾਗੇ ਬਹੁਸ੍ਸੁਤੇ.

‘‘ਤਪ੍ਪੇਹਿ ਅਨ੍ਨਪਾਨੇਨ, ਮਮ ਦਕ੍ਖਿਣਮਾਦਿਸ;

ਤਦਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’’ਤਿ. –

‘‘ਸਾਧੂਤਿ ¶ ਸੋ ਪਟਿਸ੍ਸੁਤ੍ਵਾ, ਦਾਨਂ ਵਿਪੁਲਮਾਕਿਰਿ;

ਅਨ੍ਨਂ ਪਾਨਂ ਖਾਦਨੀਯਂ, ਵਤ੍ਥਸੇਨਾਸਨਾਨਿ ਚ;

ਛਤ੍ਤਂ ਗਨ੍ਧਞ੍ਚ ਮਾਲਞ੍ਚ, ਵਿਵਿਧਾ ਚ ਉਪਾਹਨਾ.

‘‘ਭਿਕ੍ਖੂ ਚ ਸੀਲਸਮ੍ਪਨ੍ਨੇ, ਵੀਤਰਾਗੇ ਬਹੁਸ੍ਸੁਤੇ;

ਤਪ੍ਪੇਤ੍ਵਾ ਅਨ੍ਨਪਾਨੇਨ, ਤਸ੍ਸਾ ਦਕ੍ਖਿਣਮਾਦਿਸੀ.

‘‘ਸਮਨਨ੍ਤਰਾਨੁਦ੍ਦਿਟ੍ਠੇ ¶ , ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

‘‘ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਸਾਮਿਕਂ ਉਪਸਙ੍ਕਮੀ’’ਤਿ. –

ਚਤਸ੍ਸੋ ਗਾਥਾ ਸਙ੍ਗੀਤਿਕਾਰੇਹਿ ਵੁਤ੍ਤਾ. ਤਤੋ ਪਰਂ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

‘‘ਅਹਂ ਨਨ੍ਦਾ ਨਨ੍ਦਿਸੇਨ, ਭਰਿਯਾ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

‘‘ਤਵ ਦਿਨ੍ਨੇਨ ਦਾਨੇਨ, ਮੋਦਾਮਿ ਅਕੁਤੋਭਯਾ;

ਚਿਰਂ ਜੀਵ ਗਹਪਤਿ, ਸਹ ਸਬ੍ਬੇਹਿ ਞਾਤਿਭਿ;

ਅਸੋਕਂ ¶ ¶ ਵਿਰਜਂ ਖੇਮਂ, ਆਵਾਸਂ ਵਸਵਤ੍ਤਿਨਂ.

‘‘ਇਧ ਧਮ੍ਮਂ ਚਰਿਤ੍ਵਾਨ, ਦਾਨਂ ਦਤ੍ਵਾ ਗਹਪਤਿ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤੋ ਸਗ੍ਗਮੁਪੇਹਿ ਠਾਨ’’ਨ੍ਤਿ. –

ਉਪਾਸਕਸ੍ਸ ਚ ਪੇਤਿਯਾ ਚ ਵਚਨਪਟਿਵਚਨਗਾਥਾ.

੧੭੬. ਤਤ੍ਥ ਦਾਨਂ ਵਿਪੁਲਮਾਕਿਰੀਤਿ ਉਕ੍ਖਿਣੇਯ੍ਯਖੇਤ੍ਤੇ ਦੇਯ੍ਯਧਮ੍ਮਬੀਜਂ ਵਿਪ੍ਪਕਿਰਨ੍ਤੋ ਵਿਯ ਮਹਾਦਾਨਂ ਪਵਤ੍ਤੇਸਿ. ਸੇਸਂ ਅਨਨ੍ਤਰਵਤ੍ਥੁਸਦਿਸਮੇਵ.

ਏਵਂ ਸਾ ਅਤ੍ਤਨੋ ਦਿਬ੍ਬਸਮ੍ਪਤ੍ਤਿਂ ਤਸ੍ਸਾ ਚ ਕਾਰਣਂ ਨਨ੍ਦਿਸੇਨਸ੍ਸ ਵਿਭਾਵੇਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਗਤਾ. ਉਪਾਸਕੋ ਤਂ ਪਵਤ੍ਤਿਂ ਭਿਕ੍ਖੂਨਂ ਆਰੋਚੇਸਿ ¶ , ਭਿਕ੍ਖੂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਨਨ੍ਦਾਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੫. ਮਟ੍ਠਕੁਣ੍ਡਲੀਪੇਤਵਤ੍ਥੁਵਣ੍ਣਨਾ

ਅਲਙ੍ਕਤੋ ਮਟ੍ਠਕੁਣ੍ਡਲੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਮਟ੍ਠਕੁਣ੍ਡਲਿਦੇਵਪੁਤ੍ਤਂ ਆਰਬ੍ਭ ਵੁਤ੍ਤਂ. ਤਤ੍ਥ ਯਂ ਵਤ੍ਤਬ੍ਬਂ, ਤਂ ਪਰਮਤ੍ਥਦੀਪਨਿਯਂ ਵਿਮਾਨਵਤ੍ਥੁਵਣ੍ਣਨਾਯਂ ਮਟ੍ਠਕੁਣ੍ਡਲੀਵਿਮਾਨਵਤ੍ਥੁਵਣ੍ਣਨਾਯ (ਵਿ. ਵ. ਅਟ੍ਠ. ੧੨੦੬ ਮਟ੍ਠਕੁਣ੍ਡਲੀਵਿਮਾਨਵਣ੍ਣਨਾ) ਵੁਤ੍ਤਮੇਵ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਏਤ੍ਥ ਚ ਮਟ੍ਠਕੁਣ੍ਡਲੀਦੇਵਪੁਤ੍ਤਸ੍ਸ ਵਿਮਾਨਦੇਵਤਾਭਾਵਤੋ ਤਸ੍ਸ ਵਤ੍ਥੁ ਯਦਿਪਿ ਵਿਮਾਨਵਤ੍ਥੁਪਾਲ਼ਿਯਂ ਸਙ੍ਗਹਂ ਆਰੋਪਿਤਂ, ਯਸ੍ਮਾ ਪਨ ਸੋ ਦੇਵਪੁਤ੍ਤੋ ਅਦਿਨ੍ਨਪੁਬ੍ਬਕਬ੍ਰਾਹ੍ਮਣਸ੍ਸ ਪੁਤ੍ਤਸੋਕੇਨ ਸੁਸਾਨਂ ਗਨ੍ਤ੍ਵਾ ਆਲ਼ਾਹਨਂ ਅਨੁਪਰਿਯਾਯਿਤ੍ਵਾ ਰੋਦਨ੍ਤਸ੍ਸ ਸੋਕਹਰਣਤ੍ਥਂ ਅਤ੍ਤਨੋ ਦੇਵਰੂਪਂ ਪਟਿਸਂਹਰਿਤ੍ਵਾ ਹਰਿਚਨ੍ਦਨੁਸ੍ਸਦੋ ਬਾਹਾ ਪਗ੍ਗਯ੍ਹ ਕਨ੍ਦਨ੍ਤੋ ਦੁਕ੍ਖਾਭਿਭੂਤਾਕਾਰੇਨ ਪੇਤੋ ਵਿਯ ਅਤ੍ਤਾਨਂ ਦਸ੍ਸੇਸਿ. ਮਨੁਸ੍ਸਤ੍ਤਭਾਵਤੋ ਅਪੇਤਤ੍ਤਾ ਪੇਤਪਰਿਯਾਯੋਪਿ ਲਬ੍ਭਤਿ ਏਵਾਤਿ ਤਸ੍ਸ ਵਤ੍ਥੁ ਪੇਤਵਤ੍ਥੁਪਾਲ਼ਿਯਮ੍ਪਿ ਸਙ੍ਗਹਂ ਆਰੋਪਿਤਨ੍ਤਿ ਦਟ੍ਠਬ੍ਬਂ.

ਮਟ੍ਠਕੁਣ੍ਡਲੀਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਉਟ੍ਠੇਹਿ ¶ ¶ ਕਣ੍ਹ ਕਿਂ ਸੇਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਮਤਪੁਤ੍ਤਂ ਉਪਾਸਕਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਅਞ੍ਞਤਰਸ੍ਸ ਉਪਾਸਕਸ੍ਸ ਪੁਤ੍ਤੋ ਕਾਲਮਕਾਸਿ. ਸੋ ਤੇਨ ਸੋਕਸਲ੍ਲਸਮਪ੍ਪਿਤੋ ਨ ਨ੍ਹਾਯਤਿ, ਨ ਭੁਞ੍ਜਤਿ, ਨ ਕਮ੍ਮਨ੍ਤੇ ਵਿਚਾਰੇਤਿ, ਨ ਬੁਦ੍ਧੁਪਟ੍ਠਾਨਂ ਗਚ੍ਛਤਿ, ਕੇਵਲਂ, ‘‘ਤਾਤ ਪਿਯਪੁਤ੍ਤਕ, ਮਂ ਓਹਾਯ ਕਹਂ ਪਠਮਤਰਂ ਗਤੋਸੀ’’ਤਿਆਦੀਨਿ ਵਦਨ੍ਤੋ ਵਿਪ੍ਪਲਪਤਿ. ਸਤ੍ਥਾ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਤਸ੍ਸ ¶ ਸੋਤਾਪਤ੍ਤਿਫਲੂਪਨਿਸ੍ਸਯਂ ਦਿਸ੍ਵਾ ਪੁਨਦਿਵਸੇ ਭਿਕ੍ਖੁਸਙ੍ਘਪਰਿਵੁਤੋ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚੋ ਭਿਕ੍ਖੂ ਉਯ੍ਯੋਜੇਤ੍ਵਾ ਆਨਨ੍ਦਤ੍ਥੇਰੇਨ ਪਚ੍ਛਾਸਮਣੇਨ ਤਸ੍ਸ ਘਰਦ੍ਵਾਰਂ ਅਗਮਾਸਿ. ਸਤ੍ਥੁ ਆਗਤਭਾਵਂ ਉਪਾਸਕਸ੍ਸ ਆਰੋਚੇਸੁਂ. ਅਥਸ੍ਸ ਗੇਹਜਨੋ ਗੇਹਦ੍ਵਾਰੇ ਆਸਨਂ ਪਞ੍ਞਾਪੇਤ੍ਵਾ ਸਤ੍ਥਾਰਂ ਨਿਸੀਦਾਪੇਤ੍ਵਾ ਉਪਾਸਕਂ ਪਰਿਗ੍ਗਹੇਤ੍ਵਾ ਸਤ੍ਥੁ ਸਨ੍ਤਿਕਂ ਉਪਨੇਸਿ. ਏਕਮਨ੍ਤਂ ਨਿਸਿਨ੍ਨਂ ਤਂ ਦਿਸ੍ਵਾ ‘‘ਕਿਂ, ਉਪਾਸਕ, ਸੋਚਸੀ’’ਤਿ ਵਤ੍ਵਾ ‘‘ਆਮ, ਭਨ੍ਤੇ’’ਤਿ ਵੁਤ੍ਤੇ, ‘‘ਉਪਾਸਕ, ਪੋਰਾਣਕਪਣ੍ਡਿਤਾ ਪਣ੍ਡਿਤਾਨਂ ਕਥਂ ਸੁਤ੍ਵਾ ਮਤਪੁਤ੍ਤਂ ਨਾਨੁਸੋਚਿਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਦ੍ਵਾਰਵਤੀਨਗਰੇ ਦਸ ਭਾਤਿਕਰਾਜਾਨੋ ਅਹੇਸੁਂ – ਵਾਸੁਦੇਵੋ ਬਲਦੇਵੋ ਚਨ੍ਦਦੇਵਾ ਸੂਰਿਯਦੇਵੋ ਅਗ੍ਗਿਦੇਵੋ ਵਰੁਣਦੇਵੋ ਅਜ੍ਜੁਨੋ ਪਜ੍ਜੁਨੋ ਘਟਪਣ੍ਡਿਤੋ ਅਙ੍ਕੁਰੋ ਚਾਤਿ. ਤੇਸੁ ਵਾਸੁਦੇਵਮਹਾਰਾਜਸ੍ਸ ਪਿਯਪੁਤ੍ਤੋ ਕਾਲਮਕਾਸਿ. ਤੇਨ ਰਾਜਾ ਸੋਕਪਰੇਤੋ ਸਬ੍ਬਕਿਚ੍ਚਾਨਿ ਪਹਾਯ ਮਞ੍ਚਸ੍ਸ ਅਟਨਿਂ ਪਰਿਗ੍ਗਹੇਤ੍ਵਾ ਵਿਪ੍ਪਲਪਨ੍ਤੋ ਨਿਪਜ੍ਜਿ. ਤਸ੍ਮਿਂ ਕਾਲੇ ਘਟਪਣ੍ਡਿਤੋ ਚਿਨ੍ਤੇਸਿ – ‘‘ਠਪੇਤ੍ਵਾ ਮਂ ਅਞ੍ਞੋ ਕੋਚਿ ਮਮ ਭਾਤੁ ਸੋਕਂ ਪਰਿਹਰਿਤੁਂ ਸਮਤ੍ਥੋ ਨਾਮ ਨਤ੍ਥਿ, ਉਪਾਯੇਨਸ੍ਸ ਸੋਕਂ ਹਰਿਸ੍ਸਾਮੀ’’ਤਿ. ਸੋ ਉਮ੍ਮਤ੍ਤਕਵੇਸਂ ਗਹੇਤ੍ਵਾ ‘‘ਸਸਂ ਮੇ ਦੇਥ, ਸਸਂ ਮੇ ਦੇਥਾ’’ਤਿ ਆਕਾਸਂ ਓਲੋਕੇਨ੍ਤੋ ਸਕਲਨਗਰਂ ਵਿਚਰਿ. ‘‘ਘਟਪਣ੍ਡਿਤੋ ਉਮ੍ਮਤ੍ਤਕੋ ਜਾਤੋ’’ਤਿ ਸਕਲਨਗਰਂ ਸਙ੍ਖੁਭਿ.

ਤਸ੍ਮਿਂ ਕਾਲੇ ਰੋਹਿਣੇਯ੍ਯੋ ਨਾਮ ਅਮਚ੍ਚੋ ਵਾਸੁਦੇਵਰਞ੍ਞੋ ਸਨ੍ਤਿਕਂ ¶ ਗਨ੍ਤ੍ਵਾ ਤੇਨ ਸਦ੍ਧਿਂ ਕਥਂ ਸਮੁਟ੍ਠਾਪੇਨ੍ਤੋ –

‘‘ਉਟ੍ਠੇਹਿ ਕਣ੍ਹ ਕਿਂ ਸੇਸਿ, ਕੋ ਅਤ੍ਥੋ ਸੁਪਨੇਨ ਤੇ;

ਯੋ ਚ ਤੁਯ੍ਹਂ ਸਕੋ ਭਾਤਾ, ਹਦਯਂ ਚਕ੍ਖੁ ਚ ਦਕ੍ਖਿਣਂ;

ਤਸ੍ਸ ਵਾਤਾ ਬਲੀਯਨ੍ਤਿ, ਸਸਂ ਜਪ੍ਪਤਿ ਕੇਸਵਾ’’ਤਿ. – ਇਮਂ ਗਾਥਮਾਹ;

੨੦੭. ਤਤ੍ਥ ਕਣ੍ਹਾਤਿ ਵਾਸੁਦੇਵਂ ਗੋਤ੍ਤੇਨਾਲਪਤਿ. ਕੋ ਅਤ੍ਥੋ ਸੁਪਨੇਨ ਤੇਤਿ ਸੁਪਨੇਨ ਤੁਯ੍ਹਂ ਕਾ ¶ ਨਾਮ ਵਡ੍ਢਿ. ਸਕੋ ਭਾਤਾਤਿ ਸੋਦਰਿਯੋ ਭਾਤਾ. ਹਦਯਂ ਚਕ੍ਖੁ ਚ ਦਕ੍ਖਿਣਨ੍ਤਿ ਹਦਯੇਨ ਚੇਵ ਦਕ੍ਖਿਣਚਕ੍ਖੁਨਾ ਚ ਸਦਿਸੋਤਿ ਅਤ੍ਥੋ. ਤਸ੍ਸ ਵਾਤਾ ਬਲੀਯਨ੍ਤੀਤਿ ਤਸ੍ਸ ਅਪਰਾਪਰਂ ¶ ਉਪ੍ਪਜ੍ਜਮਾਨਾ ਉਮ੍ਮਾਦਵਾਤਾ ਬਲਵਨ੍ਤੋ ਹੋਨ੍ਤਿ ਵਡ੍ਢਨ੍ਤਿ ਅਭਿਭਵਨ੍ਤਿ. ਸਸਂ ਜਪ੍ਪਤੀਤਿ ‘‘ਸਸਂ ਮੇ ਦੇਥਾ’’ਤਿ ਵਿਪ੍ਪਲਪਤਿ. ਕੇਸਵਾਤਿ ਸੋ ਕਿਰ ਕੇਸਾਨਂ ਸੋਭਨਾਨਂ ਅਤ੍ਥਿਤਾਯ ‘‘ਕੇਸਵੋ’’ਤਿ ਵੋਹਰੀਯਤਿ. ਤੇਨ ਨਂ ਨਾਮੇਨ ਆਲਪਤਿ.

ਤਸ੍ਸ ਵਚਨਂ ਸੁਤ੍ਵਾ ਸਯਨਤੋ ਉਟ੍ਠਿਤਭਾਵਂ ਦੀਪੇਨ੍ਤੋ ਸਤ੍ਥਾ ਅਭਿਸਮ੍ਬੁਦ੍ਧੋ ਹੁਤ੍ਵਾ –

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਰੋਹਿਣੇਯ੍ਯਸ੍ਸ ਕੇਸਵੋ;

ਤਰਮਾਨਰੂਪੋ ਵੁਟ੍ਠਾਸਿ, ਭਾਤੁ ਸੋਕੇਨ ਅਟ੍ਟਿਤੋ’’ਤਿ. – ਇਮਂ ਗਾਥਮਾਹ;

ਰਾਜਾ ਉਟ੍ਠਾਯ ਸੀਘਂ ਪਾਸਾਦਾ ਓਤਰਿਤ੍ਵਾ ਘਟਪਣ੍ਡਿਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਉਭੋਸੁ ਹਤ੍ਥੇਸੁ ਨਂ ਦਲ਼੍ਹਂ ਗਹੇਤ੍ਵਾ ਤੇਨ ਸਦ੍ਧਿਂ ਸਲ੍ਲਪਨ੍ਤੋ –

‘‘ਕਿਂ ਨੁ ਉਮ੍ਮਤ੍ਤਰੂਪੋਵ, ਕੇਵਲਂ ਦ੍ਵਾਰਕਂ ਇਮਂ;

ਸਸੋ ਸਸੋਤਿ ਲਪਸਿ, ਕੀਦਿਸਂ ਸਸਮਿਚ੍ਛਸਿ.

‘‘ਸੋਵਣ੍ਣਮਯਂ ਮਣਿਮਯਂ, ਲੋਹਮਯਂ ਅਥ ਰੂਪਿਯਮਯਂ;

ਸਙ੍ਖਸਿਲਾਪਵਾਲ਼ਮਯਂ, ਕਾਰਯਿਸ੍ਸਾਮਿ ਤੇ ਸਸਂ.

‘‘ਸਨ੍ਤਿ ਅਞ੍ਞੇਪਿ ਸਸਕਾ, ਅਰਞ੍ਞਵਨਗੋਚਰਾ;

ਤੇਪਿ ਤੇ ਆਨਯਿਸ੍ਸਾਮਿ, ਕੀਦਿਸਂ ਸਸਮਿਚ੍ਛਸੀ’’ਤਿ. –

੨੦੯-੨੧੧. ਤਤ੍ਥ ¶ ਉਮ੍ਮਤ੍ਤਰੂਪੋਵਾਤਿ ਉਮ੍ਮਤ੍ਤਕੋ ਵਿਯ. ਕੇਵਲਨ੍ਤਿ ਸਕਲਂ. ਦ੍ਵਾਰਕਨ੍ਤਿ ਦ੍ਵਾਰਵਤੀਨਗਰਂ ਵਿਚਰਨ੍ਤੋ. ਸਸੋ ਸਸੋਤਿ ਲਪਸੀਤਿ ਸਸੋ ਸਸੋਤਿ ਵਿਲਪਸਿ. ਸੋਵਣ੍ਣਮਯਨ੍ਤਿ ਸੁਵਣ੍ਣਮਯਂ. ਲੋਹਮਯਨ੍ਤਿ ਤਮ੍ਬਲੋਹਮਯਂ. ਰੂਪਿਯਮਯਨ੍ਤਿ ਰਜਤਮਯਂ. ਯਂ ਇਚ੍ਛਸਿ ਤਂ ਵਦੇਹਿ, ਅਥ ਕੇਨ ਸੋਚਸਿ. ਅਞ੍ਞੇਪਿ ਅਰਞ੍ਞੇ ਵਨਗੋਚਰਾ ਸਸਕਾ ਅਤ੍ਥਿ, ਤੇ ਤੇ ਆਨਯਿਸ੍ਸਾਮਿ, ਵਦ, ਭਦ੍ਰਮੁਖ ¶ , ਕੀਦਿਸਂ ਸਸਮਿਚ੍ਛਸੀਤਿ ਘਟਪਣ੍ਡਿਤਂ ‘‘ਸਸੇਨ ਅਤ੍ਥਿਕੋ’’ਤਿ ਅਧਿਪ੍ਪਾਯੇਨ ਸਸੇਨ ਨਿਮਨ੍ਤੇਸਿ. ਤਂ ਸੁਤ੍ਵਾ ਘਟਪਣ੍ਡਿਤੋ –

‘‘ਨਾਹਮੇਤੇ ¶ ਸਸੇ ਇਚ੍ਛੇ, ਯੇ ਸਸਾ ਪਥਵਿਸ੍ਸਿਤਾ;

ਚਨ੍ਦਤੋ ਸਸਮਿਚ੍ਛਾਮਿ, ਤਂ ਮੇ ਓਹਰ ਕੇਸਵਾ’’ਤਿ. –

ਗਾਥਮਾਹ. ਤਤ੍ਥ ਓਹਰਾਤਿ ਓਹਾਰੇਹਿ. ਤਂ ਸੁਤ੍ਵਾ ਰਾਜਾ ‘‘ਨਿਸ੍ਸਂਸਯਂ ਮੇ ਭਾਤਾ ਉਮ੍ਮਤ੍ਤਕੋ ਜਾਤੋ’’ਤਿ ਦੋਮਨਸ੍ਸਪ੍ਪਤ੍ਤੋ –

‘‘ਸੋ ਨੂਨ ਮਧੁਰਂ ਞਾਤਿ, ਜੀਵਿਤਂ ਵਿਜਹਿਸ੍ਸਸਿ;

ਅਪਤ੍ਥਿਯਂ ਪਤ੍ਥਯਸਿ, ਚਨ੍ਦਤੋ ਸਸਮਿਚ੍ਛਸੀ’’ਤਿ. –

ਗਾਥਮਾਹ. ਤਤ੍ਥ ਞਾਤੀਤਿ ਕਨਿਟ੍ਠਂ ਆਲਪਤਿ. ਅਯਮੇਤ੍ਥ ਅਤ੍ਥੋ – ਮਯ੍ਹਂ ਪਿਯਞਾਤਿ ਯਂ ਅਤਿਮਧੁਰਂ ਅਤ੍ਤਨੋ ਜੀਵਿਤਂ, ਤਂ ਵਿਜਹਿਸ੍ਸਸਿ ਮਞ੍ਞੇ, ਯੋ ਅਪਤ੍ਥਯਿਤਬ੍ਬਂ ਪਤ੍ਥੇਸੀਤਿ.

ਘਟਪਣ੍ਡਿਤੋ ਰਞ੍ਞੋ ਵਚਨਂ ਸੁਤ੍ਵਾ ਨਿਚ੍ਚਲੋਵ ਠਤ੍ਵਾ ‘‘ਭਾਤਿਕ, ਤ੍ਵਂ ਚਨ੍ਦਤੋ ਸਸਂ ਪਤ੍ਥੇਨ੍ਤਸ੍ਸ ਤਂ ਅਲਭਿਤ੍ਵਾ ਜੀਵਿਤਕ੍ਖਯੋ ਭਵਿਸ੍ਸਤੀਤਿ ਜਾਨਨ੍ਤੋ ਕਸ੍ਮਾ ਮਤਂ ਪੁਤ੍ਤਂ ਅਲਭਿਤ੍ਵਾ ਅਨੁਸੋਚਸੀ’’ਤਿ ਇਮਮਤ੍ਥਂ ਦੀਪੇਨ੍ਤੋ –

‘‘ਏਵਂ ¶ ਚੇ ਕਣ੍ਹ ਜਾਨਾਸਿ, ਯਥਞ੍ਞਮਨੁਸਾਸਸਿ;

ਕਸ੍ਮਾ ਪੁਰੇ ਮਤਂ ਪੁਤ੍ਤਂ, ਅਜ੍ਜਾਪਿ ਮਨੁਸੋਚਸੀ’’ਤਿ. –

ਗਾਥਮਾਹ. ਤਤ੍ਥ ਏਵਂ ਚੇ, ਕਣ੍ਹ, ਜਾਨਾਸੀਤਿ, ਭਾਤਿਕ, ਕਣ੍ਹਨਾਮਕ ਮਹਾਰਾਜ, ‘‘ਅਲਬ੍ਭਨੇਯ੍ਯਵਤ੍ਥੁ ਨਾਮ ਨ ਪਤ੍ਥੇਤਬ੍ਬ’’ਨ੍ਤਿ ਯਦਿ ਏਵਂ ਜਾਨਾਸਿ. ਯਥਞ੍ਞਨ੍ਤਿ ਏਵਂ ਜਾਨਨ੍ਤੋਵ ਯਥਾ ਅਞ੍ਞਂ ਅਨੁਸਾਸਸਿ, ਤਥਾ ਅਕਤ੍ਵਾ. ਕਸ੍ਮਾ ਪੁਰੇ ਮਤਂ ਪੁਤ੍ਤਨ੍ਤਿ ਅਥ ਕਸ੍ਮਾ ਇਤੋ ਚਤੁਮਾਸਮਤ੍ਥਕੇ ਮਤਂ ਪੁਤ੍ਤਂ ਅਜ੍ਜਾਪਿ ਅਨੁਸੋਚਸੀਤਿ.

ਏਵਂ ਸੋ ਅਨ੍ਤਰਵੀਥਿਯਂ ਠਿਤਕੋਵ ‘‘ਅਹਂ ਤਾਵ ਏਵਂ ਪਞ੍ਞਾਯਮਾਨਂ ਪਤ੍ਥੇਮਿ, ਤ੍ਵਂ ਪਨ ਅਪਞ੍ਞਾਯਮਾਨਸ੍ਸਤ੍ਥਾਯ ਸੋਚਸੀ’’ਤਿ ਵਤ੍ਵਾ ਤਸ੍ਸ ਧਮ੍ਮਂ ਦੇਸੇਨ੍ਤੋ –

‘‘ਨ ¶ ਯਂ ਲਬ੍ਭਾ ਮਨੁਸ੍ਸੇਨ, ਅਮਨੁਸ੍ਸੇਨ ਵਾ ਪਨ;

ਜਾਤੋ ਮੇ ਮਾ ਮਰਿ ਪੁਤ੍ਤੋ, ਕੁਤੋ ਲਬ੍ਭਾ ਅਲਬ੍ਭਿਯਂ.

‘‘ਨ ¶ ਮਨ੍ਤਾ ਮੂਲਭੇਸਜ੍ਜਾ, ਓਸਧੇਹਿ ਧਨੇਨ ਵਾ;

ਸਕ੍ਕਾ ਆਨਯਿਤੁਂ ਕਣ੍ਹ, ਯਂ ਪੇਤਮਨੁਸੋਚਸੀ’’ਤਿ. – ਗਾਥਾਦ੍ਵਯਮਾਹ;

੨੧੫. ਤਤ੍ਥ ਯਨ੍ਤਿ, ਭਾਤਿਕ, ਯਂ ‘‘ਏਵਂ ਜਾਤੋ ਮੇ ਪੁਤ੍ਤੋ ਮਾ ਮਰੀ’’ਤਿ ਮਨੁਸ੍ਸੇਨ ਵਾ ਦੇਵੇਨ ਵਾ ਪਨ ਨ ਲਬ੍ਭਾ ਨ ਸਕ੍ਕਾ ਲਦ੍ਧੁਂ, ਤਂ ਤ੍ਵਂ ਪਤ੍ਥੇਸਿ, ਤਂ ਪਨੇਤਂ ਕੁਤੋ ਲਬ੍ਭਾ, ਕੇਨ ਕਾਰਣੇਨ ਲਦ੍ਧੁਂ ਸਕ੍ਕਾ. ਯਸ੍ਮਾ ਅਲਬ੍ਭਿਯਂ ਅਲਬ੍ਭਨੇਯ੍ਯਵਤ੍ਥੁ ਨਾਮੇਤਨ੍ਤਿ ਅਤ੍ਥੋ.

੨੧੬. ਮਨ੍ਤਾਤਿ ਮਨ੍ਤਪ੍ਪਯੋਗੇਨ. ਮੂਲਭੇਸਜ੍ਜਾਤਿ ਮੂਲਭੇਸਜ੍ਜੇਨ. ਓਸਧੇਹੀਤਿ ਨਾਨਾਵਿਧੇਹਿ ਓਸਧੇਹਿ. ਧਨੇਨ ਵਾਤਿ ਕੋਟਿਸਤਸਙ੍ਖੇਨ ਧਨੇਨ ਵਾਪਿ. ਇਦਂ ਵੁਤ੍ਤਂ ਹੋਤਿ – ਯਂ ਪੇਤਮਨੁਸੋਚਸਿ, ਤਂ ਏਤੇਹਿ ਮਨ੍ਤਪ੍ਪਯੋਗਾਦੀਹਿਪਿ ਆਨੇਤੁਂ ਨ ਸਕ੍ਕਾਤਿ.

ਪੁਨ ਘਟਪਣ੍ਡਿਤੋ ‘‘ਭਾਤਿਕ, ਇਦਂ ਮਰਣਂ ਨਾਮ ਧਨੇਨ ਵਾ ਜਾਤਿਯਾ ਵਾ ਵਿਜ੍ਜਾਯ ਵਾ ਸੀਲੇਨ ਵਾ ਭਾਵਨਾਯ ਵਾ ਨ ਸਕ੍ਕਾ ਪਟਿਬਾਹਿਤੁ’’ਨ੍ਤਿ ਦਸ੍ਸੇਨ੍ਤੋ –

‘‘ਮਹਦ੍ਧਨਾ ¶ ਮਹਾਭੋਗਾ, ਰਟ੍ਠਵਨ੍ਤੋਪਿ ਖਤ੍ਤਿਯਾ;

ਪਹੂਤਧਨਧਞ੍ਞਾਸੇ, ਤੇਪਿ ਨੋ ਅਜਰਾਮਰਾ.

‘‘ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸ੍ਸਾ;

ਏਤੇ ਚਞ੍ਞੇ ਚ ਜਾਤਿਯਾ, ਤੇਪਿ ਨੋ ਅਜਰਾਮਰਾ.

‘‘ਯੇ ਮਨ੍ਤਂ ਪਰਿਵਤ੍ਤੇਨ੍ਤਿ, ਛਲ਼ਙ੍ਗਂ ਬ੍ਰਹ੍ਮਚਿਨ੍ਤਿਤਂ;

ਏਤੇ ਚਞ੍ਞੇ ਚ ਵਿਜ੍ਜਾਯ, ਤੇਪਿ ਨੋ ਅਜਰਾਮਰਾ.

‘‘ਇਸਯੋ ਵਾਪਿ ਯੇ ਸਨ੍ਤਾ, ਸਞ੍ਞਤਤ੍ਤਾ ਤਪਸ੍ਸਿਨੋ;

ਸਰੀਰਂ ਤੇਪਿ ਕਾਲੇਨ, ਵਿਜਹਨ੍ਤਿ ਤਪਸ੍ਸਿਨੋ.

‘‘ਭਾਵਿਤਤ੍ਤਾ ¶ ਅਰਹਨ੍ਤੋ, ਕਤਕਿਚ੍ਚਾ ਅਨਾਸਵਾ;

ਨਿਕ੍ਖਿਪਨ੍ਤਿ ਇਮਂ ਦੇਹਂ, ਪੁਞ੍ਞਪਾਪਪਰਿਕ੍ਖਯਾ’’ਤਿ. –

ਪਞ੍ਚਹਿ ਗਾਥਾਹਿ ਰਞ੍ਞੋ ਧਮ੍ਮਂ ਦੇਸੇਸਿ.

੨੧੭. ਤਤ੍ਥ ¶ ਮਹਦ੍ਧਨਾਤਿ ਨਿਧਾਨਗਤਸ੍ਸੇਵ ਮਹਤੋ ਧਨਸ੍ਸ ਅਤ੍ਥਿਤਾਯ ਬਹੁਧਨਾ. ਮਹਾਭੋਗਾਤਿ ਦੇਵਭੋਗਸਦਿਸਾਯ ਮਹਤਿਯਾ ਭੋਗਸਮ੍ਪਤ੍ਤਿਯਾ ਸਮਨ੍ਨਾਗਤਾ. ਰਟ੍ਠਵਨ੍ਤੋਤਿ ਸਕਲਰਟ੍ਠਵਨ੍ਤੋ. ਪਹੂਤਧਨਧਞ੍ਞਾਸੇਤਿ ਤਿਣ੍ਣਂ ਚਤੁਨ੍ਨਂ ਵਾ ਸਂਵਚ੍ਛਰਾਨਂ ਅਤ੍ਥਾਯ ਨਿਦਹਿਤ੍ਵਾ ਠਪੇਤਬ੍ਬਸ੍ਸ ਨਿਚ੍ਚਪਰਿਬ੍ਬਯਭੂਤਸ੍ਸ ਧਨਧਞ੍ਞਸ੍ਸ ਵਸੇਨ ਅਪਰਿਯਨ੍ਤਧਨਧਞ੍ਞਾ. ਤੇਪਿ ਨੋ ਅਜਰਾਮਰਾਤਿ ਤੇਪਿ ਏਵਂ ਮਹਾਵਿਭਵਾ ਮਨ੍ਧਾਤੁਮਹਾਸੁਦਸ੍ਸਨਾਦਯੋ ਖਤ੍ਤਿਯਾ ਅਜਰਾਮਰਾ ਨਾਹੇਸੁਂ, ਅਞ੍ਞਦਤ੍ਥੁ ਮਰਣਮੁਖਮੇਵ ਅਨੁਪਵਿਟ੍ਠਾਤਿ ਅਤ੍ਥੋ.

੨੧੮. ਏਤੇਤਿ ਯਥਾਵੁਤ੍ਤਖਤ੍ਤਿਯਾਦਯੋ. ਅਞ੍ਞੇਤਿ ਅਞ੍ਞਤਰਾ ਏਵਂਭੂਤਾ ਅਮ੍ਬਟ੍ਠਾਦਯੋ. ਜਾਤਿਯਾਤਿ ਅਤ੍ਤਨੋ ਜਾਤਿਨਿਮਿਤ੍ਤਂ ਅਜਰਾਮਰਾ ਨਾਹੇਸੁਨ੍ਤਿ ਅਤ੍ਥੋ.

੨੧੯. ਮਨ੍ਤਨ੍ਤਿ ਵੇਦਂ. ਪਰਿਵਤ੍ਤੇਨ੍ਤੀਤਿ ਸਜ੍ਝਾਯਨ੍ਤਿ ਵਾਚੇਨ੍ਤਿ ਚ. ਅਥ ਵਾ ਪਰਿਵਤ੍ਤੇਨ੍ਤੀਤਿ ਵੇਦਂ ਅਨੁਪਰਿਵਤ੍ਤੇਨ੍ਤਾ ਹੋਮਂ ਕਰੋਨ੍ਤਾ ਜਪਨ੍ਤਿ. ਛਲ਼ਙ੍ਗਨ੍ਤਿ ਸਿਕ੍ਖਾਕਪ੍ਪਨਿਰੁਤ੍ਤਿਬ੍ਯਾਕਰਣਜੋਤਿਸਤ੍ਥਛਨ੍ਦੋਵਿਚਿਤਿਸਙ੍ਖਾਤੇਹਿ ਛਹਿ ਅਙ੍ਗੇਹਿ ਯੁਤ੍ਤਂ. ਬ੍ਰਹ੍ਮਚਿਨ੍ਤਿਤਨ੍ਤਿ ਬ੍ਰਾਹ੍ਮਣਾਨਮਤ੍ਥਾਯ ਬ੍ਰਹ੍ਮਨਾ ¶ ਚਿਨ੍ਤਿਤਂ ਕਥਿਤਂ. ਵਿਜ੍ਜਾਯਾਤਿ ਬ੍ਰਹ੍ਮਸਦਿਸਵਿਜ੍ਜਾਯ ਸਮਨ੍ਨਾਗਤਾ, ਤੇਪਿ ਨੋ ਅਜਰਾਮਰਾਤਿ ਅਤ੍ਥੋ.

੨੨੦-੨੨੧. ਇਸਯੋਤਿ ਯਮਨਿਯਮਾਦੀਨਂ ਪਟਿਕੂਲਸਞ੍ਞਾਦੀਨਞ੍ਚ ਏਸਨਟ੍ਠੇਨ ਇਸਯੋ. ਸਨ੍ਤਾਤਿ ਕਾਯਵਾਚਾਹਿ ਸਨ੍ਤਸਭਾਵਾ. ਸਞ੍ਞਤਤ੍ਤਾਤਿ ਰਾਗਾਦੀਨਂ ਸਂਯਮੇਨ ਸਂਯਤਚਿਤ੍ਤਾ. ਕਾਯਤਪਨਸਙ੍ਖਾਤੋ ਤਪੋ ਏਤੇਸਂ ਅਤ੍ਥੀਤਿ ਤਪਸ੍ਸਿਨੋ. ਪੁਨ ਤਪਸ੍ਸਿਨੋਤਿ ਸਂਵਰਕਾ. ਤੇਨ ਏਵਂ ਤਪਨਿਸ੍ਸਿਤਕਾ ਹੁਤ੍ਵਾ ਸਰੀਰੇਨ ਚ ਵਿਮੋਕ੍ਖਂ ਪਤ੍ਤੁਕਾਮਾਪਿ ਸਂਵਰਕਾ ਸਰੀਰਂ ਵਿਜਹਨ੍ਤਿ ਏਵਾਤਿ ਦਸ੍ਸੇਤਿ. ਅਥ ਵਾ ਇਸਯੋਤਿ ਅਧਿਸੀਲਸਿਕ੍ਖਾਦੀਨਂ ਏਸਨਟ੍ਠੇਨ ਇਸਯੋ, ਤਦਤ੍ਥਂ ਤਪ੍ਪਟਿਪਕ੍ਖਾਨਂ ਪਾਪਧਮ੍ਮਾਨਂ ਵੂਪਸਮੇਨ ਸਨ੍ਤਾ, ਏਕਾਰਮ੍ਮਣੇ ਚਿਤ੍ਤਸ੍ਸ ਸਂਯਮੇਨ ਸਞ੍ਞਤਤ੍ਤਾ, ਸਮ੍ਮਪ੍ਪਧਾਨਯੋਗਤੋ ਵੀਰਿਯਤਾਪੇਨ ਤਪਸ੍ਸਿਨੋ, ਸਪ੍ਪਯੋਗਾ ਰਾਗਾਦੀਨਂ ਸਨ੍ਤਪਨੇਨ ਤਪਸ੍ਸਿਨੋਤਿ ¶ ਯੋਜੇਤਬ੍ਬਂ. ਭਾਵਿਤਤ੍ਤਾਤਿ ਚਤੁਸਚ੍ਚਕਮ੍ਮਟ੍ਠਾਨਭਾਵਨਾਯ ਭਾਵਿਤਚਿਤ੍ਤਾ.

ਏਵਂ ¶ ਘਟਪਣ੍ਡਿਤੇਨ ਧਮ੍ਮੇ ਕਥਿਤੇ ਤਂ ਸੁਤ੍ਵਾ ਰਾਜਾ ਅਪਗਤਸੋਕਸਲ੍ਲੋ ਪਸਨ੍ਨਮਾਨਸੋ ਘਟਪਣ੍ਡਿਤਂ ਪਸਂਸਨ੍ਤੋ –

‘‘ਆਦਿਤ੍ਤਂ ਵਤ ਮਂ ਸਨ੍ਤਂ, ਘਟਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

‘‘ਅਬ੍ਬਹੀ ਵਤ ਮੇ ਸਲ੍ਲਂ, ਸੋਕਂ ਹਦਯਨਿਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪੁਤ੍ਤਸੋਕਂ ਅਪਾਨੁਦਿ.

‘‘ਸ੍ਵਾਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਸੀਤਿਭੂਤੋਸ੍ਮਿ ਨਿਬ੍ਬੁਤੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਭਾਤਿਕ.

‘‘ਏਵਂ ਕਰੋਨ੍ਤਿ ਸਪ੍ਪਞ੍ਞਾ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਨਿਵਤ੍ਤਯਨ੍ਤਿ ਸੋਕਮ੍ਹਾ, ਘਟੋ ਜੇਟ੍ਠਂਵ ਭਾਤਰਂ.

‘‘ਯਸ੍ਸ ¶ ਏਤਾਦਿਸਾ ਹੋਨ੍ਤਿ, ਅਮਚ੍ਚਾ ਪਰਿਚਾਰਕਾ;

ਸੁਭਾਸਿਤੇਨ ਅਨ੍ਵੇਨ੍ਤਿ, ਘਟੋ ਜੇਟ੍ਠਂਵ ਭਾਤਰ’’ਨ੍ਤਿ. – ਸੇਸਗਾਥਾ ਅਭਾਸਿ;

੨੨੫. ਤਤ੍ਥ ਘਟੋ ਜੇਟ੍ਠਂਵ ਭਾਤਰਨ੍ਤਿ ਯਥਾ ਘਟਪਣ੍ਡਿਤੋ ਅਤ੍ਤਨੋ ਜੇਟ੍ਠਭਾਤਰਂ ਮਤਪੁਤ੍ਤਸੋਕਾਭਿਭੂਤਂ ਅਤ੍ਤਨੋ ਉਪਾਯਕੋਸਲ੍ਲੇਨ ਚੇਵ ਧਮ੍ਮਕਥਾਯ ਚ ਤਤੋ ਪੁਤ੍ਤਸੋਕਤੋ ਵਿਨਿਵਤ੍ਤਯਿ, ਏਵਂ ਅਞ੍ਞੇਪਿ ਸਪ੍ਪਞ੍ਞਾ ਯੇ ਹੋਨ੍ਤਿ ਅਨੁਕਮ੍ਪਕਾ, ਤੇ ਞਾਤੀਨਂ ਉਪਕਾਰਂ ਕਰੋਨ੍ਤੀਤਿ ਅਤ੍ਥੋ.

੨੨੬. ਯਸ੍ਸ ਏਤਾਦਿਸਾ ਹੋਨ੍ਤੀਤਿ ਅਯਂ ਅਭਿਸਮ੍ਬੁਦ੍ਧਗਾਥਾ. ਤਸ੍ਸਤ੍ਥੋ – ਯਥਾ ਯੇਨ ਕਾਰਣੇਨ ਪੁਤ੍ਤਸੋਕਪਰੇਤਂ ਰਾਜਾਨਂ ਵਾਸੁਦੇਵਂ ਘਟਪਣ੍ਡਿਤੋ ਸੋਕਹਰਣਤ੍ਥਾਯ ਸੁਭਾਸਿਤੇਨ ਅਨ੍ਵੇਸਿ ਅਨੁਏਸਿ, ਯਸ੍ਸ ਅਞ੍ਞਸ੍ਸਾਪਿ ਏਤਾਦਿਸਾ ਪਣ੍ਡਿਤਾ ਅਮਚ੍ਚਾ ਪਟਿਲਦ੍ਧਾ ਅਸ੍ਸੁ, ਤਸ੍ਸ ਕੁਤੋ ਸੋਕੋਤਿ! ਸੇਸਗਾਥਾ ਹੇਟ੍ਠਾ ਵੁਤ੍ਤਤ੍ਥਾ ਏਵਾਤਿ.

ਸਤ੍ਥਾ ¶ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਉਪਾਸਕ, ਪੋਰਾਣਕਪਣ੍ਡਿਤਾ ਪਣ੍ਡਿਤਾਨਂ ਕਥਂ ਸੁਤ੍ਵਾ ¶ ਪੁਤ੍ਤਸੋਕਂ ਹਰਿਂਸੂ’’ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ. ਸਚ੍ਚਪਰਿਯੋਸਾਨੇ ਉਪਾਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹੀਤਿ.

ਕਣ੍ਹਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੭. ਧਨਪਾਲਸੇਟ੍ਠਿਪੇਤਵਤ੍ਥੁਵਣ੍ਣਨਾ

ਨਗ੍ਗੋ ਦੁਬ੍ਬਣ੍ਣਰੂਪੋਸੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਧਨਪਾਲਪੇਤਂ ਆਰਬ੍ਭ ਵੁਤ੍ਤਂ. ਅਨੁਪ੍ਪਨ੍ਨੇ ਕਿਰ ਬੁਦ੍ਧੇ ਪਣ੍ਣਰਟ੍ਠੇ ਏਰਕਚ੍ਛਨਗਰੇ ਧਨਪਾਲਕੋ ਨਾਮ ਸੇਟ੍ਠਿ ਅਹੋਸਿ ਅਸ੍ਸਦ੍ਧੋ ਅਪ੍ਪਸਨ੍ਨੋ ਕਦਰਿਯੋ ਨਤ੍ਥਿਕਦਿਟ੍ਠਿਕੋ. ਤਸ੍ਸ ਕਿਰਿਯਾ ਪਾਲ਼ਿਤੋ ਏਵ ਵਿਞ੍ਞਾਯਤਿ. ਸੋ ਕਾਲਂ ਕਤ੍ਵਾ ਮਰੁਕਨ੍ਤਾਰੇ ਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਤਾਲਕ੍ਖਨ੍ਧਪ੍ਪਮਾਣੋ ਕਾਯੋ ਅਹੋਸਿ, ਸਮੁਟ੍ਠਿਤਚ੍ਛਵਿ ਫਰੁਸੋ, ਵਿਰੂਪਕੇਸੋ, ਭਯਾਨਕੋ, ਦੁਬ੍ਬਣ੍ਣੋ ਅਤਿਵਿਯ ਵਿਰੂਪੋ ਬੀਭਚ੍ਛਦਸ੍ਸਨੋ. ਸੋ ਪਞ੍ਚਪਣ੍ਣਾਸ ਵਸ੍ਸਾਨਿ ਭਤ੍ਤਸਿਤ੍ਥਂ ਵਾ ਉਦਕਬਿਨ੍ਦੁਂ ਵਾ ਅਲਭਨ੍ਤੋ ਵਿਸੁਕ੍ਖਕਣ੍ਠੋਟ੍ਠਜਿਵ੍ਹੋ ਜਿਘਚ੍ਛਾਪਿਪਾਸਾਭਿਭੂਤੋ ਇਤੋ ਚਿਤੋ ਚ ¶ ਪਰਿਬ੍ਭਮਤਿ.

ਅਥ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਸਾਵਤ੍ਥਿਯਂ ਵਿਹਰਨ੍ਤੇ ਸਾਵਤ੍ਥਿਵਾਸਿਨੋ ਵਾਣਿਜਾ ਪਞ੍ਚਮਤ੍ਤਾਨਿ ਸਕਟਸਤਾਨਿ ਭਣ੍ਡਸ੍ਸ ਪੂਰੇਤ੍ਵਾ ਉਤ੍ਤਰਾਪਥਂ ਗਨ੍ਤ੍ਵਾ ਭਣ੍ਡਂ ਵਿਕ੍ਕਿਣਿਤ੍ਵਾ ਪਟਿਲਦ੍ਧਭਣ੍ਡਂ ਸਕਟੇਸੁ ਆਰੋਪੇਤ੍ਵਾ ਪਟਿਨਿਵਤ੍ਤਮਾਨਾ ਸਾਯਨ੍ਹਸਮਯੇ ਅਞ੍ਞਤਰਂ ਸੁਕ੍ਖਨਦਿਂ ਪਾਪੁਣਿਤ੍ਵਾ ਤਤ੍ਥ ਯਾਨਂ ਮੁਞ੍ਚਿਤ੍ਵਾ ਰਤ੍ਤਿਯਂ ਵਾਸਂ ਕਪ੍ਪੇਸੁਂ. ਅਥ ਸੋ ਪੇਤੋ ਪਿਪਾਸਾਭਿਭੂਤੋ ਪਾਨੀਯਸ੍ਸਤ੍ਥਾਯ ਆਗਨ੍ਤ੍ਵਾ ਤਤ੍ਥ ਬਿਨ੍ਦੁਮਤ੍ਤਮ੍ਪਿ ਪਾਨੀਯਂ ਅਲਭਿਤ੍ਵਾ ਵਿਗਤਾਸੋ ਛਿਨ੍ਨਮੂਲੋ ਵਿਯ ਤਾਲੋ ਛਿਨ੍ਨਪਾਦੋ ਪਤਿ. ਤਂ ਦਿਸ੍ਵਾ ਵਾਣਿਜਾ –

‘‘ਨਗ੍ਗੋ ਦੁਬ੍ਬਣ੍ਣਰੂਪੋਸਿ, ਕਿਸੋ ਧਮਨਿਸਨ੍ਥਤੋ;

ਉਪ੍ਫਾਸੁਲਿਕੋ ਕਿਸਿਕੋ, ਕੋ ਨੁ ਤ੍ਵਮਸਿ ਮਾਰਿਸਾ’’ਤਿ. –

ਇਮਾਯ ਗਾਥਾਯ ਪੁਚ੍ਛਿਂਸੁ. ਤਤੋ ਪੇਤੋ –

‘‘ਅਹਂ ¶ ਭਦਨ੍ਤੇ ਪੇਤੋਮ੍ਹਿ, ਦੁਗ੍ਗਤੋ ਯਮਲੋਕਿਕੋ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤੋ’’ਤਿ. –

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤੋ’’ਤਿ. –

ਕਤਕਮ੍ਮਂ ਪੁਚ੍ਛਿਤੋ ਪੁਬ੍ਬੇ ਨਿਬ੍ਬਤ੍ਤਟ੍ਠਾਨਤੋ ਪਟ੍ਠਾਯ ਅਤੀਤਂ ਪਚ੍ਚੁਪ੍ਪਨ੍ਨਂ ਅਨਾਗਤਞ੍ਚ ਅਤ੍ਤਨੋ ਪਵਤ੍ਤਿਂ ਦਸ੍ਸੇਨ੍ਤੋ ਤੇਸਞ੍ਚ ਓਵਾਦਂ ਦੇਨ੍ਤੋ –

‘‘ਨਗਰਂ ਅਤ੍ਥਿ ਪਣ੍ਣਾਨਂ, ਏਰਕਚ੍ਛਨ੍ਤਿ ਵਿਸ੍ਸੁਤਂ;

ਤਤ੍ਥ ਸੇਟ੍ਠਿ ਪੁਰੇ ਆਸਿਂ, ਧਨਪਾਲੋਤਿ ਮਂ ਵਿਦੂ.

‘‘ਅਸੀਤਿ ਸਕਟਵਾਹਾਨਂ, ਹਿਰਞ੍ਞਸ੍ਸ ਅਹੋਸਿ ਮੇ;

ਪਹੂਤਂ ਮੇ ਜਾਤਰੂਪਂ, ਮੁਤ੍ਤਾ ਵੇਲ਼ੁਰਿਯਾ ਬਹੂ.

‘‘ਤਾਵ ਮਹਦ੍ਧਨਸ੍ਸਾਪਿ, ਨ ਮੇ ਦਾਤੁਂ ਪਿਯਂ ਅਹੁ;

ਪਿਦਹਿਤ੍ਵਾ ਦ੍ਵਾਰਂ ਭੁਞ੍ਜਿਂ, ਮਾ ਮਂ ਯਾਚਨਕਾਦ੍ਦਸੁਂ.

‘‘ਅਸ੍ਸਦ੍ਧੋ ਮਚ੍ਛਰੀ ਚਾਸਿਂ, ਕਦਰਿਯੋ ਪਰਿਭਾਸਕੋ;

ਦਦਨ੍ਤਾਨਂ ਕਰੋਨ੍ਤਾਨਂ, ਵਾਰਯਿਸ੍ਸਂ ਬਹੂ ਜਨੇ.

‘‘ਵਿਪਾਕੋ ¶ ਨਤ੍ਥਿ ਦਾਨਸ੍ਸ, ਸਂਯਮਸ੍ਸ ਕੁਤੋ ਫਲਂ;

ਪੋਕ੍ਖਰਞ੍ਞੋਦਪਾਨਾਨਿ, ਆਰਾਮਾਨਿ ਚ ਰੋਪਿਤੇ;

ਪਪਾਯੋ ਚ ਵਿਨਾਸੇਸਿਂ, ਦੁਗ੍ਗੇ ਸਙ੍ਕਮਨਾਨਿ ਚ.

‘‘ਸ੍ਵਾਹਂ ਅਕਤਕਲ੍ਯਾਣੋ, ਕਤਪਾਪੋ ਤਤੋ ਚੁਤੋ;

ਉਪਪਨ੍ਨੋ ਪੇਤ੍ਤਿਵਿਸਯਂ, ਖੁਪ੍ਪਿਪਾਸਸਮਪ੍ਪਿਤੋ.

‘‘ਪਞ੍ਚਪਣ੍ਣਾਸ ਵਸ੍ਸਾਨਿ, ਯਤੋ ਕਾਲਙ੍ਕਤੋ ਅਹਂ;

ਨਾਭਿਜਾਨਾਮਿ ਭੁਤ੍ਤਂ ਵਾ, ਪੀਤਂ ਵਾ ਪਨ ਪਾਨਿਯਂ.

‘‘ਯੋ ¶ ਸਂਯਮੋ ਸੋ ਵਿਨਾਸੋ, ਯੋ ਵਿਨਾਸੋ ਸੋ ਸਂਯਮੋ;

ਪੇਤਾ ਹਿ ਕਿਰ ਜਾਨਨ੍ਤਿ, ਯੋ ਸਂਯਮੋ ਸੋ ਵਿਨਾਸੋ.

‘‘ਅਹਂ ¶ ਪੁਰੇ ਸਂਯਮਿਸ੍ਸਂ, ਨਾਦਾਸਿਂ ਬਹੁਕੇ ਧਨੇ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਾਸਿਮਤ੍ਤਨੋ;

ਸ੍ਵਾਹਂ ਪਚ੍ਛਾਨੁਤਪ੍ਪਾਮਿ, ਅਤ੍ਤਕਮ੍ਮਫਲੂਪਗੋ.

‘‘ਉਦ੍ਧਂ ਚਤੂਹਿ ਮਾਸੇਹਿ, ਕਾਲਕਿਰਿਯਾ ਭਵਿਸ੍ਸਤਿ;

ਏਕਨ੍ਤਕਟੁਕਂ ਘੋਰਂ, ਨਿਰਯਂ ਪਪਤਿਸ੍ਸਹਂ.

‘‘ਚਤੁਕ੍ਕਣ੍ਣਂ ਚਤੁਦ੍ਵਾਰਂ, ਵਿਭਤ੍ਤਂ ਭਾਗਸੋ ਮਿਤਂ;

ਅਯੋਪਾਕਾਰਪਰਿਯਨ੍ਤਂ, ਅਯਸਾ ਪਟਿਕੁਜ੍ਜਿਤਂ.

‘‘ਤਸ੍ਸ ਅਯੋਮਯਾ ਭੂਮਿ, ਜਲਿਤਾ ਤੇਜਸਾ ਯੁਤਾ;

ਸਮਨ੍ਤਾ ਯੋਜਨਸਤਂ, ਫਰਿਤ੍ਵਾ ਤਿਟ੍ਠਤਿ ਸਬ੍ਬਦਾ.

‘‘ਤਤ੍ਥਾਹਂ ਦੀਘਮਦ੍ਧਾਨਂ, ਦੁਕ੍ਖਂ ਵੇਦਿਸ੍ਸ ਵੇਦਨਂ;

ਫਲਂ ਪਾਪਸ੍ਸ ਕਮ੍ਮਸ੍ਸ, ਤਸ੍ਮਾ ਸੋਚਾਮਹਂ ਭੁਸਂ.

‘‘ਤਂ ਵਾ ਵਦਾਮਿ ਭਦ੍ਦਂ ਵੋ, ਯਾਵਨ੍ਤੇਤ੍ਥ ਸਮਾਗਤਾ;

ਮਾਕਤ੍ਥ ਪਾਪਕਂ ਕਮ੍ਮਂ, ਆਵਿ ਵਾ ਯਦਿ ਵਾ ਰਹੋ.

‘‘ਸਚੇ ਤਂ ਪਾਪਕਂ ਕਮ੍ਮਂ, ਕਰਿਸ੍ਸਥ ਕਰੋਥ ਵਾ;

ਨ ਵੋ ਦੁਕ੍ਖਾ ਪਮੁਤ੍ਯਤ੍ਥਿ, ਉਪ੍ਪਚ੍ਚਾਪਿ ਪਲਾਯਤਂ.

‘‘ਮਤ੍ਤੇਯ੍ਯਾ ਹੋਥ ਪੇਤ੍ਤੇਯ੍ਯਾ, ਕੁਲੇ ਜੇਟ੍ਠਾਪਚਾਯਿਕਾ;

ਸਾਮਞ੍ਞਾ ਹੋਥ ਬ੍ਰਹ੍ਮਞ੍ਞਾ, ਏਵਂ ਸਗ੍ਗਂ ਗਮਿਸ੍ਸਥਾ’’ਤਿ. –

੨੩੦-੨੩੧. ਤਤ੍ਥ ¶ ਪਣ੍ਣਾਨਨ੍ਤਿ ਪਣ੍ਣਾਨਾਮਰਟ੍ਠਸ੍ਸ ਏਵਂਨਾਮਕਾਨਂ ਰਾਜੂਨਂ. ਏਰਕਚ੍ਛਨ੍ਤਿ ਤਸ੍ਸ ਨਗਰਸ੍ਸ ਨਾਮਂ. ਤਤ੍ਥਾਤਿ ਤਸ੍ਮਿਂ ਨਗਰੇ. ਪੁਰੇਤਿ ਪੁਬ੍ਬੇ ਅਤੀਤਤ੍ਤਭਾਵੇ ¶ . ਧਨਪਾਲੋਤਿ ਮਂ ਵਿਦੂਤਿ ‘‘ਧਨਪਾਲਸੇਟ੍ਠੀ’’ਤਿ ਮਂ ਜਾਨਨ੍ਤਿ. ਤਯਿਦਂ ਨਾਮਂ ਤਦਾ ਮਯ੍ਹਂ ਅਤ੍ਥਾਨੁਗਤਮੇਵਾਤਿ ਦਸ੍ਸੇਨ੍ਤੋ ‘‘ਅਸੀਤੀ’’ਤਿ ਗਾਥਮਾਹ. ਤਤ੍ਥ ਅਸੀਤਿ ਸਕਟਵਾਹਾਨਨ੍ਤਿ ਵੀਸਤਿਖਾਰਿਕੋ ਵਾਹੋ, ਯੋ ਸਕਟਨ੍ਤਿ ਵੁਚ੍ਚਤਿ. ਤੇਸਂ ਸਕਟਵਾਹਾਨਂ ਅਸੀਤਿ ਹਿਰਞ੍ਞਸ੍ਸ ਤਥਾ ਕਹਾਪਣਸ੍ਸ ਚ ਮੇ ਅਹੋਸੀਤਿ ਯੋਜਨਾ. ਪਹੂਤਂ ਮੇ ਜਾਤਰੂਪਨ੍ਤਿ ਸੁਵਣ੍ਣਮ੍ਪਿ ਪਹੂਤਂ ਅਨੇਕਭਾਰਪਰਿਮਾਣਂ ਅਹੋਸੀਤਿ ਸਮ੍ਬਨ੍ਧੋ.

੨੩੨-੨੩੩. ਨ ¶ ਮੇ ਦਾਤੁਂ ਪਿਯਂ ਅਹੂਤਿ ਦਾਨਂ ਦਾਤੁਂ ਮਯ੍ਹਂ ਪਿਯਂ ਨਾਹੋਸਿ. ਮਾ ਮਂ ਯਾਚਨਕਾਦ੍ਦਸੁਨ੍ਤਿ ‘‘ਯਾਚਕਾ ਮਾ ਮਂ ਪਸ੍ਸਿਂਸੂ’’ਤਿ ਪਿਦਹਿਤ੍ਵਾ ਗੇਹਦ੍ਵਾਰਂ ਭੁਞ੍ਜਾਮਿ. ਕਦਰਿਯੋਤਿ ਥਦ੍ਧਮਚ੍ਛਰੀ. ਪਰਿਭਾਸਕੋਤਿ ਦਾਨਂ ਦੇਨ੍ਤੇ ਦਿਸ੍ਵਾ ਭਯੇਨ ਸਨ੍ਤਜ੍ਜਕੋ. ਦਦਨ੍ਤਾਨਂ ਕਰੋਨ੍ਤਾਨਨ੍ਤਿ ਉਪਯੋਗਤ੍ਥੇ ਸਾਮਿਵਚਨਂ, ਦਾਨਾਨਿ ਦਦਨ੍ਤੇ ਪੁਞ੍ਞਾਨਿ ਕਰੋਨ੍ਤੇ. ਬਹੂ ਜਨੇਤਿ ਬਹੂ ਸਤ੍ਤੇ. ਦਦਨ੍ਤਾਨਂ ਵਾ ਕਰੋਨ੍ਤਾਨਂ ਵਾ ਸਮੁਦਾਯਭੂਤਂ ਬਹੁਂ ਜਨਂ ਪੁਞ੍ਞਕਮ੍ਮਤੋ ਵਾਰਯਿਸ੍ਸਂ ਨਿਵਾਰੇਸਿਂ.

੨੩੪-੨੩੬. ਵਿਪਾਕੋ ਨਤ੍ਥਿ ਦਾਨਸ੍ਸਾਤਿਆਦਿ ਦਾਨਾਦੀਨਂ ਨਿਵਾਰਣੇ ਕਾਰਣਦਸ੍ਸਨਂ. ਤਤ੍ਥ ਵਿਪਾਕੋ ਨਤ੍ਥਿ ਦਾਨਸ੍ਸਾਤਿ ਦਾਨਕਮ੍ਮਸ੍ਸ ਫਲਂ ਨਾਮ ਨਤ੍ਥਿ, ਕੇਵਲਂ ਪੁਞ੍ਞਂ ਪੁਞ੍ਞਨ੍ਤਿ ਧਨਵਿਨਾਸੋ ਏਵਾਤਿ ਦੀਪੇਤਿ. ਸਂਯਮਸ੍ਸਾਤਿ ਸੀਲਸਂਯਮਸ੍ਸ. ਕੁਤੋ ਫਲਨ੍ਤਿ ਕੁਤੋ ਨਾਮ ਫਲਂ ਲਬ੍ਭਤਿ, ਨਿਰਤ੍ਥਕਮੇਵ ਸੀਲਰਕ੍ਖਣਨ੍ਤਿ ਅਧਿਪ੍ਪਾਯੋ. ਆਰਾਮਾਨੀਤਿ ਆਰਾਮੂਪਵਨਾਨੀਤਿ ਅਤ੍ਥੋ. ਪਪਾਯੋਤਿ ਪਾਨੀਯਸਾਲਾ. ਦੁਗ੍ਗੇਤਿ ਉਦਕਚਿਕ੍ਖਲ੍ਲਾਨਂ ਵਸੇਨ ਦੁਗ੍ਗਮਟ੍ਠਾਨਾਨਿ. ਸਙ੍ਕਮਨਾਨੀਤਿ ਸੇਤੁਯੋ. ਤਤੋ ਚੁਤੋਤਿ ਤਤੋ ਮਨੁਸ੍ਸਲੋਕਤੋ ਚੁਤੋ. ਪਞ੍ਚਪਣ੍ਣਾਸਾਤਿ ਪਞ੍ਚਪਞ੍ਞਾਸ. ਯਤੋ ਕਾਲਙ੍ਕਤੋ ਅਹਨ੍ਤਿ ਯਦਾ ਕਾਲਕਤਾ ਅਹਂ, ਤਤੋ ਪਟ੍ਠਾਯ. ਨਾਭਿਜਾਨਾਮੀਤਿ ਏਤ੍ਤਕਂ ਕਾਲਂ ਭੁਤ੍ਤਂ ਵਾ ਪੀਤਂ ਵਾ ਕਿਞ੍ਚਿ ਨ ਜਾਨਾਮਿ.

੨੩੭-੩੮. ਯੋ ਸਂਯਮੋ ਸੋ ਵਿਨਾਸੋਤਿ ਲੋਭਾਦਿਵਸੇਨ ਯਂ ਸਂਯਮਨਂ ਕਸ੍ਸਚਿ ਅਦਾਨਂ, ਸੋ ਇਮੇਸਂ ਸਤ੍ਤਾਨਂ ¶ ਵਿਨਾਸੋ ਨਾਮ ਪੇਤਯੋਨਿਯਂ ਨਿਬ੍ਬਤ੍ਤਪੇਤਾਨਂ ਮਹਾਬ੍ਯਸਨਸ੍ਸ ਹੇਤੁਭਾਵਤੋ. ‘‘ਯੋ ਵਿਨਾਸੋ ਸੋ ਸਂਯਮੋ’’ਤਿ ਇਮਿਨਾ ਯਥਾਵੁਤ੍ਤਸ੍ਸ ਅਤ੍ਥਸ੍ਸ ਏਕਨ੍ਤਿਕਭਾਵਂ ਵਦਤਿ. ਪੇਤਾ ਹਿ ਕਿਰ ਜਾਨਨ੍ਤੀਤਿ ਏਤ੍ਥ ਹਿ-ਸਦ੍ਦੋ ਅਵਧਾਰਣੇ, ਕਿਰ-ਸਦ੍ਦੋ ਅਰੁਚਿਸੂਚਨੇ. ‘‘ਸਂਯਮੋ ਦੇਯ੍ਯਧਮ੍ਮਸ੍ਸ ਅਪਰਿਚ੍ਚਾਗੋ ਵਿਨਾਸਹੇਤੂ’’ਤਿ ਇਮਮਤ੍ਥਂ ਪੇਤਾ ਏਵ ਕਿਰ ਜਾਨਨ੍ਤਿ ਪਚ੍ਚਕ੍ਖਤੋ ਅਨੁਭੁਯ੍ਯਮਾਨਤ੍ਤਾ, ਨ ਮਨੁਸ੍ਸਾਤਿ. ਨਯਿਦਂ ਯੁਤ੍ਤਂ ਮਨੁਸ੍ਸਾਨਮ੍ਪਿ ਪੇਤਾਨਂ ਵਿਯ ਖੁਪ੍ਪਿਪਾਸਾਦੀਹਿ ਅਭਿਭੁਯ੍ਯਮਾਨਾਨਂ ਦਿਸ੍ਸਮਾਨਤ੍ਤਾ. ਪੇਤਾ ਪਨ ਪੁਰਿਮਤ੍ਤਭਾਵੇ ਕਤਕਮ੍ਮਸ੍ਸ ਪਾਕਟਭਾਵਤੋ ਤਮਤ੍ਥਂ ਸੁਟ੍ਠੁਤਰਂ ਜਾਨਨ੍ਤਿ. ਤੇਨਾਹ ¶ – ‘‘ਅਹਂ ਪੁਰੇ ਸਂਯਮਿਸ੍ਸ’’ਨ੍ਤਿਆਦਿ. ਤਤ੍ਥ ਸਂਯਮਿਸ੍ਸਨ੍ਤਿ ਸਯਮ੍ਪਿ ਦਾਨਾਦਿਪੁਞ੍ਞਕਿਰਿਯਤੋ ਸਂਯਮਨਂ ਸਙ੍ਕੋਚਂ ਅਕਾਸਿਂ. ਬਹੁਕੇ ਧਨੇਤਿ ਮਹਨ੍ਤੇ ਧਨੇ ਵਿਜ੍ਜਮਾਨੇ.

੨੪੩. ਤਨ੍ਤਿ ¶ ਤਸ੍ਮਾ. ਵੋਤਿ ਤੁਮ੍ਹੇ. ਭਦ੍ਦਂ ਵੋਤਿ ਭਦ੍ਦਂ ਕਲ੍ਯਾਣਂ ਸੁਨ੍ਦਰਂ ਤੁਮ੍ਹਾਕਂ ਹੋਤੂਤਿ ਵਚਨਸੇਸੋ. ਯਾਵਨ੍ਤੇਤ੍ਥ ਸਮਾਗਤਾਤਿ ਯਾਵਨ੍ਤੋ ਯਾਵਤਕਾ ਏਤ੍ਥ ਸਮਾਗਤਾ, ਤੇ ਸਬ੍ਬੇ ਮਮ ਵਚਨਂ ਸੁਣਾਥਾਤਿ ਅਧਿਪ੍ਪਾਯੋ. ਆਵੀਤਿ ਪਕਾਸਨਂ ਪਰੇਸਂ ਪਾਕਟਵਸੇਨ. ਰਹੋਤਿ ਪਟਿਚ੍ਛਨ੍ਨਂ ਅਪਾਕਟਵਸੇਨ. ਆਵਿ ਵਾ ਪਾਣਾਤਿਪਾਤਾਦਿਮੁਸਾਵਾਦਾਦਿਕਾਯਵਚੀਪਯੋਗਵਸੇਨ, ਯਦਿ ਵਾ ਰਹੋ ਅਭਿਜ੍ਝਾਦਿਵਸੇਨ ਪਾਪਕਂ ਲਾਮਕਂ ਅਕੁਸਲਕਮ੍ਮਂ ਮਾਕਤ੍ਥ ਮਾ ਕਰਿਤ੍ਥ.

੨੪੪. ਸਚੇ ਤਂ ਪਾਪਕਂ ਕਮ੍ਮਨ੍ਤਿ ਅਥ ਪਨ ਤਂ ਪਾਪਕਮ੍ਮਂ ਆਯਤਿਂ ਕਰਿਸ੍ਸਥ, ਏਤਰਹਿ ਵਾ ਕਰੋਥ, ਨਿਰਯਾਦੀਸੁ ਚਤੂਸੁ ਅਪਾਯੇਸੁ ਮਨੁਸ੍ਸੇਸੁ ਚ ਅਪ੍ਪਾਯੁਕਤਾਦਿਵਸੇਨ ਤਸ੍ਸ ਫਲਭੂਤਾ ਦੁਕ੍ਖਤੋ ਪਮੁਤ੍ਤਿ ਪਮੋਕ੍ਖੋ ਨਾਮ ਨਤ੍ਥਿ. ਉਪ੍ਪਚ੍ਚਾਪਿ ਪਲਾਯਤਨ੍ਤਿ ਉਪ੍ਪਤਿਤ੍ਵਾ ਆਕਾਸੇਨ ਗਚ੍ਛਨ੍ਤਾਨਮ੍ਪਿ ਮੋਕ੍ਖੋ ਨਤ੍ਥਿਯੇਵਾਤਿ ਅਤ੍ਥੋ. ‘‘ਉਪੇਚ੍ਚਾ’’ਤਿਪਿ ਪਾਲ਼ਿ, ਇਤੋ ਵਾ ਏਤ੍ਤੋ ਵਾ ਪਲਾਯਨ੍ਤੇ ਤੁਮ੍ਹੇ ਅਨੁਬਨ੍ਧਿਸ੍ਸਤੀਤਿ ਅਧਿਪ੍ਪਾਯੇਨ ਉਪੇਚ੍ਚ ਸਞ੍ਚਿਚ੍ਚ ਪਲਾਯਨ੍ਤਾਨਮ੍ਪਿ ¶ ਤੁਮ੍ਹਾਕਂ ਤਤੋ ਮੋਕ੍ਖੋ ਨਤ੍ਥਿ, ਗਤਿਕਾਲਾਦਿਪਚ੍ਚਯਨ੍ਤਰਸਮਵਾਯੇ ਪਨ ਸਤਿ ਵਿਪਚ੍ਚਤਿਯੇਵਾਤਿ ਅਤ੍ਥੋ. ਅਯਞ੍ਚ ਅਤ੍ਥੋ –

‘‘ਨ ਅਨ੍ਤਲਿਕ੍ਖੇ ਨ ਸਮੁਦ੍ਦਮਜ੍ਝੇ, ਨ ਪਬ੍ਬਤਾਨਂ ਵਿਵਰਂ ਪਵਿਸ੍ਸ;

ਨ ਵਿਜ੍ਜਤੀ ਸੋ ਜਗਤਿਪ੍ਪਦੇਸੋ, ਯਤ੍ਥਟ੍ਠਿਤੋ ਮੁਚ੍ਚੇਯ੍ਯ ਪਾਪਕਮ੍ਮਾ’’ਤਿ. (ਧ. ਪ. ੧੨੭; ਮਿ. ਪ. ੪.੨.੪) –

੨੪੫. ਮਤ੍ਤੇਯ੍ਯਾਤਿ ਮਾਤੁਹਿਤਾ. ਹੋਥਾਤਿ ਤੇਸਂ ਉਪਟ੍ਠਾਨਾਦੀਨਿ ਕਰੋਥ. ਤਥਾ ਪੇਤ੍ਤੇਯ੍ਯਾਤਿ ਵੇਦਿਤਬ੍ਬਾ. ਕੁਲੇ ਜੇਟ੍ਠਾਪਚਾਯਿਕਾਤਿ ਕੁਲੇ ਜੇਟ੍ਠਕਾਨਂ ਅਪਚਾਯਨਕਰਾ. ਸਾਮਞ੍ਞਾਤਿ ਸਮਣਪੂਜਕਾ. ਤਥਾ ਬ੍ਰਹ੍ਮਞ੍ਞਾਤਿ ਬਾਹਿਤਪਾਪਪੂਜਕਾਤਿ ਅਤ੍ਥੋ. ਏਵਂ ਸਗ੍ਗਂ ਗਮਿਸ੍ਸਥਾਤਿ ਇਮਿਨਾ ਮਯਾ ਵੁਤ੍ਤਨਯੇਨ ਪੁਞ੍ਞਾਨਿ ਕਤ੍ਵਾ ਦੇਵਲੋਕਂ ਉਪਪਜ੍ਜਿਸ੍ਸਥਾਤਿ ਅਤ੍ਥੋ. ਯਂ ਪਨੇਤ੍ਥ ਅਤ੍ਥਤੋ ਨ ਵਿਭਤ੍ਤਂ, ਤਂ ਹੇਟ੍ਠਾ ਖਲ੍ਲਾਟਿਯਪੇਤਵਤ੍ਥੁਆਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਤੇ ¶ ¶ ਵਾਣਿਜਾ ਤਸ੍ਸ ਵਚਨਂ ਸੁਤ੍ਵਾ ਸਂਵੇਗਜਾਤਾ ਤਂ ਅਨੁਕਮ੍ਪਮਾਨਾ ਭਾਜਨੇਹਿ ਪਾਨੀਯਂ ਗਹੇਤ੍ਵਾ ਤਂ ਸਯਾਪੇਤ੍ਵਾ ਮੁਖੇ ਆਸਿਞ੍ਚਿਂਸੁ. ਤਤੋ ਮਹਾਜਨੇਨ ਬਹੁਵੇਲਂ ਆਸਿਤ੍ਤਂ ਉਦਕਂ ਤਸ੍ਸ ਪੇਤਸ੍ਸ ਪਾਪਬਲੇਨ ਅਧੋਗਲ਼ਂ ਨ ਓਤਿਣ੍ਣਂ, ਕੁਤੋ ਪਿਪਾਸਂ ਪਟਿਵਿਨੇਸ੍ਸਤਿ. ਤੇ ਤਂ ਪੁਚ੍ਛਿਂਸੁ – ‘‘ਅਪਿ ਤੇ ਕਾਚਿ ਅਸ੍ਸਾਸਮਤ੍ਤਾ ਲਦ੍ਧਾ’’ਤਿ. ਸੋ ਆਹ – ‘‘ਯਦਿ ਮੇ ਏਤ੍ਤਕੇਹਿ ਜਨੇਹਿ ਏਤ੍ਤਕਂ ਵੇਲਂ ਆਸਿਞ੍ਚਮਾਨਂ ਉਦਕਂ ਏਕਬਿਨ੍ਦੁਮਤ੍ਤਮ੍ਪਿ ਪਰਗਲ਼ਂ ਪਵਿਟ੍ਠਂ, ਇਤੋ ਪੇਤਯੋਨਿਤੋ ਮੋਕ੍ਖੋ ਮਾ ਹੋਤੂ’’ਤਿ. ਅਥ ਤੇ ਵਾਣਿਜਾ ਤਂ ਸੁਤ੍ਵਾ ਅਤਿਵਿਯ ਸਂਵੇਗਜਾਤਾ ‘‘ਅਤ੍ਥਿ ਪਨ ਕੋਚਿ ਉਪਾਯੋ ਪਿਪਾਸਾਵੂਪਸਮਾਯਾ’’ਤਿ ¶ ਆਹਂਸੁ. ਸੋ ਆਹ – ‘‘ਇਮਸ੍ਮਿਂ ਪਾਪਕਮ੍ਮੇ ਖੀਣੇ ਤਥਾਗਤਸ੍ਸ ਵਾ ਤਥਾਗਤਸਾਵਕਾਨਂ ਵਾ ਦਾਨੇ ਦਿਨ੍ਨੇ ਮਮ ਦਾਨਮੁਦ੍ਦਿਸਿਸ੍ਸਤਿ, ਅਹਂ ਇਤੋ ਪੇਤਤ੍ਤਤੋ ਮੁਚ੍ਚਿਸ੍ਸਾਮੀ’’ਤਿ. ਤਂ ਸੁਤ੍ਵਾ ਵਾਣਿਜਾ ਸਾਵਤ੍ਥਿਂ ਗਨ੍ਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਤਂ ਪਵਤ੍ਤਿਂ ਆਰੋਚੇਤ੍ਵਾ ਸਰਣਾਨਿ ਸੀਲਾਨਿ ਚ ਗਹੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤ੍ਤਾਹਂ ਦਾਨਂ ਦਤ੍ਵਾ ਤਸ੍ਸ ਪੇਤਸ੍ਸ ਦਕ੍ਖਿਣਂ ਆਦਿਸਿਂਸੁ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਚਤੁਨ੍ਨਂ ਪਰਿਸਾਨਂ ਧਮ੍ਮਂ ਦੇਸੇਸਿ. ਮਹਾਜਨੋ ਚ ਲੋਭਾਦਿਮਚ੍ਛੇਰਮਲਂ ਪਹਾਯ ਦਾਨਾਦਿਪੁਞ੍ਞਾਭਿਰਤੋ ਅਹੋਸੀਤਿ.

ਧਨਪਾਲਸੇਟ੍ਠਿਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਨਗ੍ਗੋ ਕਿਸੋ ਪਬ੍ਬਜਿਤੋਸਿ, ਭਨ੍ਤੇਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਚੂਲ਼ਸੇਟ੍ਠਿਪੇਤਂ ਆਰਬ੍ਭ ਵੁਤ੍ਤਂ. ਬਾਰਾਣਸਿਯਂ ਕਿਰ ਏਕੋ ਗਹਪਤਿ ਅਸ੍ਸਦ੍ਧੋ ਅਪ੍ਪਸਨ੍ਨੋ ਮਚ੍ਛਰੀ ਕਦਰਿਯੋ ਪੁਞ੍ਞਕਿਰਿਯਾਯ ਅਨਾਦਰੋ ਚੂਲ਼ਸੇਟ੍ਠਿ ਨਾਮ ਅਹੋਸਿ. ਸੋ ਕਾਲਂ ਕਤ੍ਵਾ ਪੇਤੇਸੁ ਨਿਬ੍ਬਤ੍ਤਿ, ਤਸ੍ਸ ਕਾਯੋ ਅਪਗਤਮਂਸਲੋਹਿਤੋ ਅਟ੍ਠਿਨ੍ਹਾਰੁਚਮ੍ਮਮਤ੍ਤੋ ਮੁਣ੍ਡੋ ਅਪੇਤਵਤ੍ਥੋ ਅਹੋਸਿ. ਧੀਤਾ ਪਨਸ੍ਸ ਅਨੁਲਾ ਅਨ੍ਧਕਵਿਨ੍ਦੇ ਸਾਮਿਕਸ੍ਸ ਗੇਹੇ ਵਸਨ੍ਤੀ ਪਿਤਰਂ ਉਦ੍ਦਿਸ੍ਸ ਬ੍ਰਾਹ੍ਮਣੇ ਭੋਜੇਤੁਕਾਮਾ ਤਣ੍ਡੁਲਾਦੀਨਿ ਦਾਨੂਪਕਰਣਾਨਿ ਸਜ੍ਜੇਸਿ. ਤਂ ਞਤ੍ਵਾ ਪੇਤੋ ਆਸਾਯ ਆਕਾਸੇਨ ਤਤ੍ਥ ਗਚ੍ਛਨ੍ਤੋ ਰਾਜਗਹਂ ਸਮ੍ਪਾਪੁਣਿ. ਤੇਨ ਚ ਸਮਯੇਨ ਰਾਜਾ ਅਜਾਤਸਤ੍ਤੁ ਦੇਵਦਤ੍ਤੇਨ ¶ ਉਯ੍ਯੋਜਿਤੋ ਪਿਤਰਂ ਜੀਵਿਤਾ ਵੋਰੋਪੇਤ੍ਵਾ ਤੇਨ ਵਿਪ੍ਪਟਿਸਾਰੇਨ ਦੁਸ੍ਸੁਪਿਨੇਨ ਚ ਨਿਦ੍ਦਂ ਅਨੁਪਗਚ੍ਛਨ੍ਤੋ ਉਪਰਿਪਾਸਾਦਵਰਗਤੋ ਚਙ੍ਕਮਨ੍ਤੋ ਤਂ ਪੇਤਂ ਆਕਾਸੇਨ ਗਚ੍ਛਨ੍ਤਂ ਦਿਸ੍ਵਾ ਇਮਾਯ ਗਾਥਾਯ ਪੁਚ੍ਛਿ –

‘‘ਨਗ੍ਗੋ ¶ ਕਿਸੋ ਪਬ੍ਬਜਿਤੋਸਿ ਭਨ੍ਤੇ, ਰਤ੍ਤਿਂ ਕੁਹਿਂ ਗਚ੍ਛਸਿ ਕਿਸ੍ਸਹੇਤੁ;

ਆਚਿਕ੍ਖ ਮੇ ਤਂ ਅਪਿ ਸਕ੍ਕੁਣੇਮੁ, ਸਬ੍ਬੇਨ ਵਿਤ੍ਤਂ ਪਟਿਪਾਦਯੇ ਤੁਵ’’ਨ੍ਤਿ.

ਤਤ੍ਥ ¶ ਪਬ੍ਬਜਿਤੋਤਿ ਸਮਣੋ. ਰਾਜਾ ਕਿਰ ਤਂ ਨਗ੍ਗਤ੍ਤਾ ਮੁਣ੍ਡਤ੍ਤਾ ਚ ‘‘ਨਗ੍ਗੋ ਸਮਣੋ ਅਯ’’ਨ੍ਤਿ ਸਞ੍ਞਾਯ ‘‘ਨਗ੍ਗੋ ਕਿਸੋ ਪਬ੍ਬਜਿਤੋਸੀ’’ਤਿਆਦਿਮਾਹ. ਕਿਸ੍ਸਹੇਤੂਤਿ ਕਿਨ੍ਨਿਮਿਤ੍ਤਂ. ਸਬ੍ਬੇਨ ਵਿਤ੍ਤਂ ਪਟਿਪਾਦਯੇ ਤੁਵਨ੍ਤਿ ਵਿਤ੍ਤਿਯਾ ਉਪਕਰਣਭੂਤਂ ਵਿਤ੍ਤਂ ਸਬ੍ਬੇਨ ਭੋਗੇਨ ਤੁਯ੍ਹਂ ਅਜ੍ਝਾਸਯਾਨੁਰੂਪਂ, ਸਬ੍ਬੇਨ ਵਾ ਉਸ੍ਸਾਹੇਨ ਪਟਿਪਾਦੇਯ੍ਯਂ ਸਮ੍ਪਾਦੇਯ੍ਯਂ. ਤਥਾ ਕਾਤੁਂ ਮਯਂ ਅਪ੍ਪੇਵ ਨਾਮ ਸਕ੍ਕੁਣੇਯ੍ਯਾਮ, ਤਸ੍ਮਾ ਆਚਿਕ੍ਖ ਮੇ ਤਂ, ਏਤਂ ਤਵ ਆਗਮਨਕਾਰਣਂ ਮਯ੍ਹਂ ਕਥੇਹੀਤਿ ਅਤ੍ਥੋ.

ਏਵਂ ਰਞ੍ਞਾ ਪੁਟ੍ਠੋ ਪੇਤੋ ਅਤ੍ਤਨੋ ਪਵਤ੍ਤਿਂ ਕਥੇਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –

‘‘ਬਾਰਾਣਸੀ ਨਗਰਂ ਦੂਰਘੁਟ੍ਠਂ, ਤਤ੍ਥਾਹਂ ਗਹਪਤਿ ਅਡ੍ਢਕੋ ਅਹੁ ਦੀਨੋ;

ਅਦਾਤਾ ਗੇਧਿਤਮਨੋ ਆਮਿਸਸ੍ਮਿਂ, ਦੁਸ੍ਸੀਲ੍ਯੇਨ ਯਮਵਿਸਯਮ੍ਹਿ ਪਤ੍ਤੋ.

ਤੇਨੇਵ ਞਾਤੀਸੁ ਯਾਮਿ ਆਮਿਸਕਿਞ੍ਚਿਕ੍ਖਹੇਤੁ;

‘‘ਧੀਤਾ ਚ ਮਯ੍ਹਂ ਲਪਤੇ ਅਭਿਕ੍ਖਣਂ, ਦਸ੍ਸਾਮਿ ਦਾਨਂ ਪਿਤੂਨਂ ਪਿਤਾਮਹਾਨਂ;

ਤਮੁਪਕ੍ਖਟਂ ¶ ਪਰਿਵਿਸਯਨ੍ਤਿ ਬ੍ਰਾਹ੍ਮਣਾ, ਯਾਮਿ ਅਹਂ ਅਨ੍ਧਕਵਿਨ੍ਦਂ ਭੁਤ੍ਤੁ’’ਨ੍ਤਿ.

੨੪੭. ਤਤ੍ਥ ¶ ਦੂਰਘੁਟ੍ਠਨ੍ਤਿ ਦੂਰਤੋ ਏਵ ਗੁਣਕਿਤ੍ਤਨਵਸੇਨ ਘੋਸਿਤਂ, ਸਬ੍ਬਤ੍ਥ ਵਿਸ੍ਸੁਤਂ ਪਾਕਟਨ੍ਤਿ ਅਤ੍ਥੋ. ਅਡ੍ਢਕੋਤਿ ਅਡ੍ਢੋ ਮਹਾਵਿਭਵੋ. ਦੀਨੋਤਿ ਨਿਹੀਨਚਿਤ੍ਤੋ ਅਦਾਨਜ੍ਝਾਸਯੋ. ਤੇਨਾਹ ‘‘ਅਦਾਤਾ’’ਤਿ. ਗੇਧਿਤਮਨੋ ਆਮਿਸਸ੍ਮਿਨ੍ਤਿ ਕਾਮਾਮਿਸੇ ਲਗ੍ਗਚਿਤ੍ਤੋ ਗੇਧਂ ਆਪਨ੍ਨੋ. ਦੁਸ੍ਸੀਲ੍ਯੇਨ ਯਮਵਿਸਯਮ੍ਹਿ ਪਤ੍ਤੋਤਿ ਅਤ੍ਤਨਾ ਕਤੇਨ ਦੁਸ੍ਸੀਲਕਮ੍ਮੁਨਾ ਯਮਵਿਸਯਂ ਪੇਤਲੋਕਂ ਪਤ੍ਤੋ ਅਮ੍ਹਿ.

੨੪੮. ਸੋ ਸੂਚਿਕਾਯ ਕਿਲਮਿਤੋਤਿ ਸੋ ਅਹਂ ਵਿਜ੍ਝਨਟ੍ਠੇਨ ਸੂਚਿਸਦਿਸਤਾਯ ‘‘ਸੂਚਿਕਾ’’ਤਿ ਲਦ੍ਧਨਾਮਾਯ ਜਿਘਚ੍ਛਾਯ ਕਿਲਮਿਤੋ ਨਿਰਨ੍ਤਰਂ ਵਿਜ੍ਝਮਾਨੋ. ‘‘ਕਿਲਮਥੋ’’ਤਿ ਇਚ੍ਚੇਵ ਵਾ ਪਾਠੋ. ਤੇਹੀਤਿ ‘‘ਦੀਨੋ’’ਤਿਆਦਿਨਾ ਵੁਤ੍ਤੇਹਿ ਪਾਪਕਮ੍ਮੇਹਿ ਕਾਰਣਭੂਤੇਹਿ. ਤਸ੍ਸ ਹਿ ਪੇਤਸ੍ਸ ¶ ਤਾਨਿ ਪਾਪਕਮ੍ਮਾਨਿ ਅਨੁਸ੍ਸਰਨ੍ਤਸ੍ਸ ਅਤਿਵਿਯ ਦੋਮਨਸ੍ਸਂ ਉਪ੍ਪਜ੍ਜਿ, ਤਸ੍ਮਾ ਏਵਮਾਹ. ਤੇਨੇਵਾਤਿ ਤੇਨੇਵ ਜਿਘਚ੍ਛਾਦੁਕ੍ਖੇਨ. ਞਾਤੀਸੁ ਯਾਮੀਤਿ ਞਾਤੀਨਂ ਸਮੀਪਂ ਯਾਮਿ ਗਚ੍ਛਾਮਿ. ਆਮਿਸਕਿਞ੍ਚਿਕ੍ਖਹੇਤੂਤਿ ਆਮਿਸਸ੍ਸ ਕਿਞ੍ਚਿਕ੍ਖਨਿਮਿਤ੍ਤਂ, ਕਿਞ੍ਚਿ ਆਮਿਸਂ ਪਤ੍ਥੇਨ੍ਤੋਤਿ ਅਤ੍ਥੋ. ਅਦਾਨਸੀਲਾ ਨ ਚ ਸਦ੍ਦਹਨ੍ਤਿ, ‘ਦਾਨਫਲਂ ਹੋਤਿ ਪਰਮ੍ਹਿ ਲੋਕੇ’ਤਿ ਯਥਾ ਅਹਂ, ਤਥਾ ਏਵਂ ਅਞ੍ਞੇਪਿ ਮਨੁਸ੍ਸਾ ਅਦਾਨਸੀਲਾ ‘‘ਦਾਨਸ੍ਸ ਫਲਂ ਏਕਂਸੇਨ ਪਰਲੋਕੇ ਹੋਤੀ’’ਤਿ ਨ ਚ ਸਦ੍ਦਹਨ੍ਤਿ. ਯਤੋ ਅਹਂ ਵਿਯ ਤੇਪਿ ਪੇਤਾ ਹੁਤ੍ਵਾ ਮਹਾਦੁਕ੍ਖਂ ਪਚ੍ਚਨੁਭਵਨ੍ਤੀਤਿ ਅਧਿਪ੍ਪਾਯੋ.

੨੪੯. ਲਪਤੇਤਿ ਕਥੇਤਿ. ਅਭਿਕ੍ਖਣਨ੍ਤਿ ਅਭਿਣ੍ਹਂ ਬਹੁਸੋ. ਕਿਨ੍ਤਿ ਲਪਤੀਤਿ ਆਹ ‘‘ਦਸ੍ਸਾਮਿ ਦਾਨਂ ਪਿਤੂਨਂ ਪਿਤਾਮਹਾਨ’’ਨ੍ਤਿ. ਤਤ੍ਥ ਪਿਤੂਨਨ੍ਤਿ ਮਾਤਾਪਿਤੂਨਂ, ਚੂਲ਼ਪਿਤੁਮਹਾਪਿਤੂਨਂ ਵਾ. ਪਿਤਾਮਹਾਨਨ੍ਤਿ ਅਯ੍ਯਕਪਯ੍ਯਕਾਨਂ. ਉਪਕ੍ਖਟਨ੍ਤਿ ਸਜ੍ਜਿਤਂ. ਪਰਿਵਿਸਯਨ੍ਤੀਤਿ ਭੋਜਯਨ੍ਤਿ. ਅਨ੍ਧਕਵਿਨ੍ਦਨ੍ਤਿ ਏਵਂਨਾਮਕਂ ਨਗਰਂ. ਭੁਤ੍ਤੁਨ੍ਤਿ ਭੁਞ੍ਜਿਤੁਂ. ਤਤੋ ¶ ਪਰਾ ਸਙ੍ਗੀਤਿਕਾਰਕੇਹਿ ਵੁਤ੍ਤਾ –

‘‘ਤਮਵੋਚ ਰਾਜਾ ‘ਅਨੁਭਵਿਯਾਨ ਤਮ੍ਪਿ,

ਏਯ੍ਯਾਸਿ ਖਿਪ੍ਪਂ ਅਹਮਪਿ ਕਸ੍ਸਂ ਪੂਜਂ;

‘‘ਤਥਾਤਿ ¶ ਵਤ੍ਵਾ ਅਗਮਾਸਿ ਤਤ੍ਥ, ਭੁਞ੍ਜਿਂਸੁ ਭਤ੍ਤਂ ਨ ਚ ਦਕ੍ਖਿਣਾਰਹਾ;

ਪਚ੍ਚਾਗਮਿ ਰਾਜਗਹਂ ਪੁਨਾਪਰਂ, ਪਾਤੁਰਹੋਸਿ ਪੁਰਤੋ ਜਨਾਧਿਪਸ੍ਸ.

‘‘ਦਿਸ੍ਵਾਨ ਪੇਤਂ ਪੁਨਦੇਵ ਆਗਤਂ, ਰਾਜਾ ਅਵੋਚ ‘ਅਹਮਪਿ ਕਿਂ ਦਦਾਮਿ;

ਆਚਿਕ੍ਖ ਮੇ ਤਂ ਯਦਿ ਅਤ੍ਥਿ ਹੇਤੁ, ਯੇਨ ਤੁਵਂ ਚਿਰਤਰਂ ਪੀਣਿਤੋ ਸਿਯਾ’.

‘‘ਬੁਦ੍ਧਞ੍ਚ ਸਙ੍ਘਂ ਪਰਿਵਿਸਿਯਾਨ ਰਾਜ, ਅਨ੍ਨੇਨ ਪਾਨੇਨ ਚ ਚੀਵਰੇਨ;

ਤਂ ਦਕ੍ਖਿਣਂ ਆਦਿਸ ਮੇ ਹਿਤਾਯ, ਏਵਂ ਅਹਂ ਚਿਰਤਰਂ ਪੀਣਿਤੋ ਸਿਯਾ.

‘‘ਤਤੋ ਚ ਰਾਜਾ ਨਿਪਤਿਤ੍ਵਾ ਤਾਵਦੇ, ਦਾਨਂ ਸਹਤ੍ਥਾ ਅਤੁਲਂ ਦਦਿਤ੍ਵਾ ਸਙ੍ਘੇ;

ਆਰੋਚੇਸਿ ਪਕਤਂ ਤਥਾਗਤਸ੍ਸ, ਤਸ੍ਸ ਚ ਪੇਤਸ੍ਸ ਦਕ੍ਖਿਣਂ ਆਦਿਸਿਤ੍ਥ.

‘‘ਸੋ ¶ ਪੂਜਿਤੋ ਅਤਿਵਿਯ ਸੋਭਮਾਨੋ, ਪਾਤੁਰਹੋਸਿ ਪੁਰਤੋ ਜਨਾਧਿਪਸ੍ਸ;

ਯਕ੍ਖੋਹਮਸ੍ਮਿ ਪਰਮਿਦ੍ਧਿਪਤ੍ਤੋ, ਨ ਮਯ੍ਹਮਤ੍ਥਿ ਸਮਾ ਸਦਿਸਾ ਮਾਨੁਸਾ.

‘‘ਪਸ੍ਸਾਨੁਭਾਵਂ ਅਪਰਿਮਿਤਂ ਮਮਯਿਦਂ, ਤਯਾਨੁਦਿਟ੍ਠਂ ਅਤੁਲਂ ਦਤ੍ਵਾ ਸਙ੍ਘੇ;

ਸਨ੍ਤਪ੍ਪਿਤੋ ¶ ਸਤਤਂ ਸਦਾ ਬਹੂਹਿ, ਯਾਮਿ ਅਹਂ ਸੁਖਿਤੋ ਮਨੁਸ੍ਸਦੇਵਾ’’ਤਿ.

੨੫੦. ਤਤ੍ਥ ਤਮਵੋਚ ਰਾਜਾਤਿ ਤਂ ਪੇਤਂ ਤਥਾ ਵਤ੍ਵਾ ਠਿਤਂ ਰਾਜਾ ਅਜਾਤਸਤ੍ਤੁ ਅਵੋਚ. ਅਨੁਭਵਿਯਾਨ ਤਮ੍ਪੀਤਿ ਤਂ ਤਵ ਧੀਤੁਯਾ ਉਪਕ੍ਖਟਂ ਦਾਨਮ੍ਪਿ ਅਨੁਭਵਿਤ੍ਵਾ. ਏਯ੍ਯਾਸੀਤਿ ਆਗਚ੍ਛੇਯ੍ਯਾਸਿ. ਕਸ੍ਸਨ੍ਤਿ ਕਰਿਸ੍ਸਾਮਿ. ਆਚਿਕ੍ਖ ¶ ਮੇ ਤਂ ਯਦਿ ਅਤ੍ਥਿ ਹੇਤੂਤਿ ਸਚੇ ਕਿਞ੍ਚਿ ਕਾਰਣਂ ਅਤ੍ਥਿ, ਤਂ ਕਾਰਣਂ ਮਯ੍ਹਂ ਆਚਿਕ੍ਖ ਕਥੇਹਿ. ਸਦ੍ਧਾਯਿਤਨ੍ਤਿ ਸਦ੍ਧਾਯਿਤਬ੍ਬਂ. ਹੇਤੁਵਚੋਤਿ ਹੇਤੁਯੁਤ੍ਤਵਚਨਂ, ‘‘ਅਮੁਕਸ੍ਮਿਂ ਠਾਨੇ ਅਸੁਕੇਨ ਪਕਾਰੇਨ ਦਾਨੇ ਕਤੇ ਮਯ੍ਹਂ ਉਪਕਪ੍ਪਤੀ’’ਤਿ ਸਕਾਰਣਂ ਵਚਨਂ ਵਦਾਤਿ ਅਤ੍ਥੋ.

੨੫੧. ਤਥਾਤਿ ਵਤ੍ਵਾਤਿ ਸਾਧੂਤਿ ਵਤ੍ਵਾ. ਤਤ੍ਥਾਤਿ ਤਸ੍ਮਿਂ ਅਨ੍ਧਕਵਿਨ੍ਦੇ ਪਰਿਵੇਸਨਟ੍ਠਾਨੇ. ਭੁਞ੍ਜਿਂਸੁ ਭਤ੍ਤਂ ਨ ਚ ਦਕ੍ਖਿਣਾਰਹਾਤਿ ਭਤ੍ਤਂ ਭੁਞ੍ਜਿਂਸੁ ਦੁਸ੍ਸੀਲਬ੍ਰਾਹ੍ਮਣਾ, ਨ ਚ ਪਨ ਦਕ੍ਖਿਣਾਰਹਾ ਸੀਲਵਨ੍ਤੋ ਭੁਞ੍ਜਿਂਸੂਤਿ ਅਤ੍ਥੋ. ਪੁਨਾਪਰਨ੍ਤਿ ਪੁਨ ਅਪਰਂ ਵਾਰਂ ਰਾਜਗਹਂ ਪਚ੍ਚਾਗਮਿ.

੨੫੨. ਕਿਂ ਦਦਾਮੀਤਿ ‘‘ਕੀਦਿਸਂ ਤੇ ਦਾਨਂ ਦਸ੍ਸਾਮੀ’’ਤਿ ਰਾਜਾ ਪੇਤਂ ਪੁਚ੍ਛਿ. ਯੇਨ ਤੁਵਨ੍ਤਿ ਯੇਨ ਕਾਰਣੇਨ ਤ੍ਵਂ. ਚਿਰਤਰਨ੍ਤਿ ਚਿਰਕਾਲਂ. ਪੀਣਿਤੋਤਿ ਤਿਤ੍ਤੋ ਸਿਯਾ, ਤਂ ਕਥੇਹੀਤਿ ਅਤ੍ਥੋ.

੨੫੩. ਪਰਿਵਿਸਿਯਾਨਾਤਿ ਭੋਜੇਤ੍ਵਾ. ਰਾਜਾਤਿ ਅਜਾਤਸਤ੍ਤੁਂ ਆਲਪਤਿ. ਮੇ ਹਿਤਾਯਾਤਿ ਮਯ੍ਹਂ ਹਿਤਤ੍ਥਾਯ ਪੇਤਤ੍ਤਭਾਵਤੋ ਪਰਿਮੁਤ੍ਤਿਯਾ.

੨੫੪. ਤਤੋਤਿ ਤਸ੍ਮਾ ਤੇਨ ਵਚਨੇਨ, ਤਤੋ ਵਾ ਪਾਸਾਦਤੋ. ਨਿਪਤਿਤ੍ਵਾਤਿ ਨਿਕ੍ਖਮਿਤ੍ਵਾ. ਤਾਵਦੇਤਿ ਤਦਾ ਏਵ ਅਰੁਣੁਗ੍ਗਮਨਵੇਲਾਯ. ਯਮ੍ਹਿ ਪੇਤੋ ਪਚ੍ਚਾਗਨ੍ਤ੍ਵਾ ਰਞ੍ਞੋ ਅਤ੍ਤਾਨਂ ਦਸ੍ਸੇਸਿ, ਤਸ੍ਮਿਂ ਪੁਰੇਭਤ੍ਤੇ ਏਵ ਦਾਨਂ ਅਦਾਸਿ ¶ . ਸਹਤ੍ਥਾਤਿ ਸਹਤ੍ਥੇਨ. ਅਤੁਲਨ੍ਤਿ ਅਪ੍ਪਮਾਣਂ ਉਲ਼ਾਰਂ ਪਣੀਤਂ. ਦਤ੍ਵਾ ਸਙ੍ਘੇਤਿ ਸਙ੍ਘਸ੍ਸ ਦਤ੍ਵਾ. ਆਰੋਚੇਸਿ ਪਕਤਂ ਤਥਾਗਤਸ੍ਸਾਤਿ ‘‘ਇਦਂ, ਭਨ੍ਤੇ, ਦਾਨਂ ਅਞ੍ਞਤਰਂ ਪੇਤਂ ਸਨ੍ਧਾਯ ਪਕਤ’’ਨ੍ਤਿ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਆਰੋਚੇਤ੍ਵਾ ¶ ਚ ਯਥਾ ਤਂ ਦਾਨਂ ਤਸ੍ਸ ਉਪਕਪ੍ਪਤਿ, ਏਵਂ ਤਸ੍ਸ ਚ ਪੇਤਸ੍ਸ ਦਕ੍ਖਿਣਂ ਆਦਿਸਿਤ੍ਥ ਆਦਿਸਿ.

੨੫੫. ਸੋਤਿ ਸੋ ਪੇਤੋ. ਪੂਜਿਤੋਤਿ ਦਕ੍ਖਿਣਾਯ ਦਿਯ੍ਯਮਾਨਾਯ ਪੂਜਿਤੋ. ਅਤਿਵਿਯ ਸੋਭਮਾਨੋਤਿ ਦਿਬ੍ਬਾਨੁਭਾਵੇਨ ਅਤਿਵਿਯ ਵਿਰੋਚਮਾਨੋ. ਪਾਤੁਰਹੋਸੀਤਿ ਪਾਤੁਭਵਿ, ਰਞ੍ਞੋ ਪੁਰਤੋ ਅਤ੍ਤਾਨਂ ਦਸ੍ਸੇਸਿ. ਯਕ੍ਖੋਹਮਸ੍ਮੀਤਿ ਪੇਤਤ੍ਤਭਾਵਤੋ ਮੁਤ੍ਤੋ ਯਕ੍ਖੋ ਅਹਂ ਜਾਤੋ ਦੇਵਭਾਵਂ ਪਤ੍ਤੋਸ੍ਮਿ. ਨ ਮਯ੍ਹਮਤ੍ਥਿ ਸਮਾ ਸਦਿਸਾ ਮਾਨੁਸਾਤਿ ਮਯ੍ਹਂ ਆਨੁਭਾਵਸਮ੍ਪਤ੍ਤਿਯਾ ਸਮਾ ਵਾ ਭੋਗਸਮ੍ਪਤ੍ਤਿਯਾ ਸਦਿਸਾ ਵਾ ਮਨੁਸ੍ਸਾ ਨ ਸਨ੍ਤਿ.

੨੫੬. ਪਸ੍ਸਾਨੁਭਾਵਂ ¶ ਅਪਰਿਮਿਤਂ ਮਮਯਿਦਨ੍ਤਿ ‘‘ਮਮ ਇਦਂ ਅਪਰਿਮਾਣਂ ਦਿਬ੍ਬਾਨੁਭਾਵਂ ਪਸ੍ਸਾ’’ਤਿ ਅਤ੍ਤਨੋ ਸਮ੍ਪਤ੍ਤਿਂ ਪਚ੍ਚਕ੍ਖਤੋ ਰਞ੍ਞੋ ਦਸ੍ਸੇਨ੍ਤੋ ਵਦਤਿ. ਤਯਾਨੁਦਿਟ੍ਠਂ ਅਤੁਲਂ ਦਤ੍ਵਾ ਸਙ੍ਘੇਤਿ ਅਰਿਯਸਙ੍ਘਸ੍ਸ ਅਤੁਲਂ ਉਲ਼ਾਰਂ ਦਾਨਂ ਦਤ੍ਵਾ ਮਯ੍ਹਂ ਅਨੁਕਮ੍ਪਾਯ ਤਯਾ ਅਨੁਦਿਟ੍ਠਂ. ਸਨ੍ਤਪ੍ਪਿਤੋ ਸਤਤਂ ਸਦਾ ਬਹੂਹੀਤਿ ਅਨ੍ਨਪਾਨਵਤ੍ਥਾਦੀਹਿ ਬਹੂਹਿ ਦੇਯ੍ਯਧਮ੍ਮੇਹਿ ਅਰਿਯਸਙ੍ਘਂ ਸਨ੍ਤਪ੍ਪੇਨ੍ਤੇਨ ਤਯਾ ਸਦਾ ਸਬ੍ਬਕਾਲਂ ਯਾਵਜੀਵਂ ਤਤ੍ਥਾਪਿ ਸਤਤਂ ਨਿਰਨ੍ਤਰਂ ਅਹਂ ਸਨ੍ਤਪ੍ਪਿਤੋ ਪੀਣਿਤੋ. ਯਾਮਿ ਅਹਂ ਸੁਖਿਤੋ ਮਨੁਸ੍ਸਦੇਵਾਤਿ ‘‘ਤਸ੍ਮਾ ਅਹਂ ਇਦਾਨਿ ਸੁਖਿਤੋ ਮਨੁਸ੍ਸਦੇਵ ਮਹਾਰਾਜ ਯਥਿਚ੍ਛਿਤਟ੍ਠਾਨਂ ਯਾਮੀ’’ਤਿ ਰਾਜਾਨਂ ਆਪੁਚ੍ਛਿ.

ਏਵਂ ¶ ਪੇਤੇ ਆਪੁਚ੍ਛਿਤ੍ਵਾ ਗਤੇ ਰਾਜਾ ਅਜਾਤਸਤ੍ਤੁ ਤਮਤ੍ਥਂ ਭਿਕ੍ਖੂਨਂ ਆਰੋਚੇਸਿ, ਭਿਕ੍ਖੂ ਭਗਵਤੋ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਮਹਾਜਨੋ ਮਚ੍ਛੇਰਮਲਂ ਪਹਾਯ ਦਾਨਾਦਿਪੁਞ੍ਞਾਭਿਰਤੋ ਅਹੋਸੀਤਿ.

ਚੂਲ਼ਾਸੇਟ੍ਠਿਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਯਸ੍ਸ ਅਤ੍ਥਾਯ ਗਚ੍ਛਾਮਾਤਿ ਇਦਂ ਸਤ੍ਥਾ ਸਾਵਤ੍ਥਿਯਂ ਵਿਹਰਨ੍ਤੋ ਅਙ੍ਕੁਰਪੇਤਂ ਆਰਬ੍ਭ ਕਥੇਸਿ. ਕਾਮਞ੍ਚੇਤ੍ਥ ਅਙ੍ਕੁਰੋ ਪੇਤੋ ਨ ਹੋਤਿ, ਤਸ੍ਸ ਪਨ ਚਰਿਤਂ ਯਸ੍ਮਾ ਪੇਤਸਮ੍ਬਨ੍ਧਂ, ਤਸ੍ਮਾ ਤਂ ‘‘ਅਙ੍ਕੁਰਪੇਤਵਤ੍ਥੂ’’ਤਿ ਵੁਤ੍ਤਂ.

ਤਤ੍ਰਾਯਂ ਸਙ੍ਖੇਪਕਥਾ – ਯੇ ਤੇ ਉਤ੍ਤਰਮਧੁਰਾਧਿਪਤਿਨੋ ਰਞ੍ਞੋ ਮਹਾਸਾਗਰਸ੍ਸ ਪੁਤ੍ਤਂ ਉਪਸਾਗਰਂ ਪਟਿਚ੍ਚ ¶ ਉਤ੍ਤਰਾਪਥੇ ਕਂਸਭੋਗੇ ਅਸਿਤਞ੍ਜਨਨਗਰੇ ਮਹਾਕਂਸਸ੍ਸ ਧੀਤੁਯਾ ਦੇਵਗਬ੍ਭਾਯ ਕੁਚ੍ਛਿਯਂ ਉਪ੍ਪਨ੍ਨਾ ਅਞ੍ਜਨਦੇਵੀ ਵਾਸੁਦੇਵੋ ਬਲਦੇਵੋ ਚਨ੍ਦਦੇਵੋ ਸੂਰਿਯਦੇਵੋ ਅਗ੍ਗਿਦੇਵੋ ਵਰੁਣਦੇਵੋ ਅਜ੍ਜੁਨੋ ਪਜ੍ਜੁਨੋ ਘਟਪਣ੍ਡਿਤੋ ਅਙ੍ਕੁਰੋ ਚਾਤਿ ਵਾਸੁਦੇਵਾਦਯੋ ਦਸ ਭਾਤਿਕਾਤਿ ਏਕਾਦਸ ਖਤ੍ਤਿਯਾ ਅਹੇਸੁਂ, ਤੇਸੁ ਵਾਸੁਦੇਵਾਦਯੋ ਭਾਤਰੋ ਅਸਿਤਞ੍ਜਨਨਗਰਂ ਆਦਿਂ ਕਤ੍ਵਾ ਦ੍ਵਾਰਵਤੀਪਰਿਯੋਸਾਨੇਸੁ ਸਕਲਜਮ੍ਬੁਦੀਪੇ ਤੇਸਟ੍ਠਿਯਾ ਨਗਰਸਹਸ੍ਸੇਸੁ ਸਬ੍ਬੇ ਰਾਜਾਨੋ ਚਕ੍ਕੇਨ ¶ ਜੀਵਿਤਕ੍ਖਯਂ ਪਾਪੇਤ੍ਵਾ ਦ੍ਵਾਰਵਤਿਯਂ ਵਸਮਾਨਾ ਰਜ੍ਜਂ ਦਸ ਕੋਟ੍ਠਾਸੇ ਕਤ੍ਵਾ ਵਿਭਜਿਂਸੁ. ਭਗਿਨਿਂ ਪਨ ਅਞ੍ਜਨਦੇਵਿਂ ਨ ਸਰਿਂਸੁ. ਪੁਨ ਸਰਿਤ੍ਵਾ ‘‘ਏਕਾਦਸ ਕੋਟ੍ਠਾਸੇ ਕਰੋਮਾ’’ਤਿ ਵੁਤ੍ਤੇ ਤੇਸਂ ਸਬ੍ਬਕਨਿਟ੍ਠੋ ਅਙ੍ਕੁਰੋ ‘‘ਮਮ ਕੋਟ੍ਠਾਸਂ ਤਸ੍ਸਾ ਦੇਥ, ਅਹਂ ਵੋਹਾਰਂ ਕਤ੍ਵਾ ਜੀਵਿਸ੍ਸਾਮਿ, ਤੁਮ੍ਹੇ ਅਤ੍ਤਨੋ ਅਤ੍ਤਨੋ ਜਨਪਦੇਸੁ ਸੁਙ੍ਕਂ ਮਯ੍ਹਂ ਵਿਸ੍ਸਜ੍ਜੇਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਸ੍ਸ ਕੋਟ੍ਠਾਯਂ ਭਗਿਨਿਯਾ ਦਤ੍ਵਾ ਨਵ ਰਾਜਾਨੋ ਦ੍ਵਾਰਵਤਿਯਂ ਵਸਿਂਸੁ.

ਅਙ੍ਕੁਰੋ ਪਨ ਵਣਿਜ੍ਜਂ ਕਰੋਨ੍ਤੋ ਨਿਚ੍ਚਕਾਲਂ ਮਹਾਦਾਨਂ ਦੇਤਿ. ਤਸ੍ਸ ਪਨੇਕੋ ਦਾਸੋ ¶ ਭਣ੍ਡਾਗਾਰਿਕੋ ਅਤ੍ਥਕਾਮੋ ਅਹੋਸਿ. ਅਙ੍ਕੁਰੋ ਪਸਨ੍ਨਮਾਨਸੋ ਤਸ੍ਸ ਏਕਂ ਕੁਲਧੀਤਰਂ ਗਹੇਤ੍ਵਾ ਅਦਾਸਿ. ਸੋ ਪੁਤ੍ਤੇ ਗਬ੍ਭਗਤੇਯੇਵ ਕਾਲਮਕਾਸਿ. ਅਙ੍ਕੁਰੋ ਤਸ੍ਮਿਂ ਜਾਤੇ ਤਸ੍ਸ ਪਿਤੁਨੋ ਦਿਨ੍ਨਂ ਭਤ੍ਤਵੇਤਨਂ ਤਸ੍ਸ ਅਦਾਸਿ. ਅਥ ਤਸ੍ਮਿਂ ਦਾਰਕੇ ਵਯਪ੍ਪਤ੍ਤੇ ‘‘ਦਾਸੋ ਨ ਦਾਸੋ’’ਤਿ ਰਾਜਕੁਲੇ ਵਿਨਿਚ੍ਛਯੋ ਉਪ੍ਪਜ੍ਜਿ. ਤਂ ਸੁਤ੍ਵਾ ਅਞ੍ਜਨਦੇਵੀ ਧੇਨੂਪਮਂ ਵਤ੍ਵਾ ‘‘ਮਾਤੁ ਭੁਜਿਸ੍ਸਾਯ ਪੁਤ੍ਤੋਪਿ ਭੁਜਿਸ੍ਸੋ ਏਵਾ’’ਤਿ ਦਾਸਬ੍ਯਤੋ ਮੋਚੇਸਿ.

ਦਾਰਕੋ ਪਨ ਲਜ੍ਜਾਯ ਤਤ੍ਥ ਵਸਿਤੁਂ ਅਵਿਸਹਨ੍ਤੋ ਰੋਰੁਵਨਗਰਂ ਗਨ੍ਤ੍ਵਾ ਤਤ੍ਥ ਅਞ੍ਞਤਰਸ੍ਸ ਤੁਨ੍ਨਵਾਯਸ੍ਸ ਧੀਤਰਂ ਗਹੇਤ੍ਵਾ ਤੁਨ੍ਨਵਾਯਸਿਪ੍ਪੇਨ ਜੀਵਿਕਂ ਕਪ੍ਪੇਸਿ. ਤੇਨ ਸਮਯੇਨ ਰੋਰੁਵਨਗਰੇ ਅਸਯ੍ਹਮਹਾਸੇਟ੍ਠਿ ਨਾਮ ਅਹੋਸਿ. ਸੋ ਸਮਣਬ੍ਰਾਹ੍ਮਣਕਪਣਦ੍ਧਿਕਵਨਿਬ੍ਬਕਯਾਚਕਾਨਂ ਮਹਾਦਾਨਂ ਦੇਤਿ. ਸੋ ਤੁਨ੍ਨਵਾਯੋ ਸੇਟ੍ਠਿਨੋ ਘਰਂ ਅਜਾਨਨ੍ਤਾਨਂ ਪੀਤਿਸੋਮਨਸ੍ਸਜਾਤੋ ਹੁਤ੍ਵਾ ਅਸਯ੍ਹਸੇਟ੍ਠਿਨੋ ਨਿਵੇਸਨਂ ਦਕ੍ਖਿਣਬਾਹੁਂ ਪਸਾਰੇਤ੍ਵਾ ਦਸ੍ਸੇਸਿ ‘‘ਏਤ੍ਥ ਗਨ੍ਤ੍ਵਾ ਲਦ੍ਧਬ੍ਬਂ ਲਭਨ੍ਤੂ’’ਤਿ. ਤਸ੍ਸ ਕਮ੍ਮਂ ਪਾਲ਼ਿਯਂਯੇਵ ਆਗਤਂ.

ਸੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਮਰੁਭੂਮਿਯਂ ਅਞ੍ਞਤਰਸ੍ਮਿਂ ਨਿਗ੍ਰੋਧਰੁਕ੍ਖੇ ਭੁਮ੍ਮਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਦਕ੍ਖਿਣਹਤ੍ਥੋ ਸਬ੍ਬਕਾਮਦਦੋ ਅਹੋਸਿ. ਤਸ੍ਮਿਂਯੇਵ ਚ ਰੋਰੁਵੇ ਅਞ੍ਞਤਰੋ ਪੁਰਿਸੋ ਅਸਯ੍ਹਸੇਟ੍ਠਿਨੋ ਦਾਨੇ ਬ੍ਯਾਵਟੋ ਅਸ੍ਸਦ੍ਧੋ ਅਪ੍ਪਸਨ੍ਨੋ ਮਿਚ੍ਛਾਦਿਟ੍ਠਿਕੋ ਪੁਞ੍ਞਕਿਰਿਯਾਯ ਅਨਾਦਰੋ ਕਾਲਂ ਕਤ੍ਵਾ ਤਸ੍ਸ ਦੇਵਪੁਤ੍ਤਸ੍ਸ ਵਸਨਟ੍ਠਾਨਸ੍ਸ ਅਵਿਦੂਰੇ ਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਤੇਨ ਚ ¶ ਕਤਕਮ੍ਮਂ ਪਾਲ਼ਿਯਂਯੇਵ ਆਗਤਂ. ਅਸਯ੍ਹਮਹਾਸੇਟ੍ਠਿ ਪਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਸਕ੍ਕਸ੍ਸ ਦੇਵਰਞ੍ਞੋ ਸਹਬ੍ਯਤਂ ਉਪਗਤੋ.

ਅਥ ¶ ਅਪਰੇਨ ਸਮਯੇਨ ਅਙ੍ਕੁਰੋ ਪਞ੍ਚਹਿ ਸਕਟਸਤੇਹਿ, ਅਞ੍ਞਤਰੋ ਚ ਬ੍ਰਾਹ੍ਮਣੋ ਪਞ੍ਚਹਿ ਸਕਟਸਤੇਹੀਤਿ ਦ੍ਵੇਪਿ ਜਨਾ ਸਕਟਸਹਸ੍ਸੇਨ ਭਣ੍ਡਂ ਆਦਾਯ ਮਰੁਕਨ੍ਤਾਰਮਗ੍ਗਂ ਪਟਿਪਨ੍ਨਾ ਮਗ੍ਗਮੂਲ਼੍ਹਾ ਹੁਤ੍ਵਾ ਬਹੁਂ ਦਿਵਸਂ ਤਤ੍ਥੇਵ ਵਿਚਰਨ੍ਤਾ ਪਰਿਕ੍ਖੀਣਤਿਣੋਦਕਾਹਾਰਾ ਅਹੇਸੁਂ. ਅਙ੍ਕੁਰੋ ਅਸ੍ਸਦੂਤੇਹਿ ਚਤੂਸੁ ਦਿਸਾਸੁ ਪਾਨਿਯਂ ਮਗ੍ਗਾਪੇਸਿ. ਅਥ ਸੋ ਕਾਮਦਦਹਤ੍ਥੋ ਯਕ੍ਖੋ ਤਂ ਤੇਸਂ ਬ੍ਯਸਨਪ੍ਪਤ੍ਤਿਂ ਦਿਸ੍ਵਾ ਅਙ੍ਕੁਰੇਨ ਪੁਬ੍ਬੇ ¶ ਅਤ੍ਤਨੋ ਕਤਂ ਉਪਕਾਰਂ ਚਿਨ੍ਤੇਤ੍ਵਾ ‘‘ਹਨ੍ਦ ਦਾਨਿ ਇਮਸ੍ਸ ਮਯਾ ਅਵਸ੍ਸਯੇਨ ਭਵਿਤਬ੍ਬ’’ਨ੍ਤਿ ਅਤ੍ਤਨੋ ਵਸਨਵਟਰੁਕ੍ਖਂ ਦਸ੍ਸੇਸਿ. ਸੋ ਕਿਰ ਵਟਰੁਕ੍ਖੋ ਸਾਖਾਵਿਟਪਸਮ੍ਪਨ੍ਨੋ ਘਨਪਲਾਸੋ ਸਨ੍ਦਚ੍ਛਾਯੋ ਅਨੇਕਸਹਸ੍ਸਪਾਰੋਹੋ ਆਯਾਮੇਨ ਵਿਤ੍ਥਾਰੇਨ ਉਬ੍ਬੇਧੇਨ ਚ ਯੋਜਨਪਰਿਮਾਣੋ ਅਹੋਸਿ. ਤਂ ਦਿਸ੍ਵਾ ਅਙ੍ਕੁਰੋ ਹਟ੍ਠਤੁਟ੍ਠੋ ਤਸ੍ਸ ਹੇਟ੍ਠਾ ਖਨ੍ਧਾਵਾਰਂ ਬਨ੍ਧਾਪੇਸਿ. ਯਕ੍ਖੋ ਅਤ੍ਤਨੋ ਦਕ੍ਖਿਣਹਤ੍ਥਂ ਪਸਾਰੇਤ੍ਵਾ ਪਠਮਂ ਤਾਵ ਪਾਨੀਯੇਨ ਸਬ੍ਬਂ ਜਨਂ ਸਨ੍ਤਪ੍ਪੇਸਿ. ਤਤੋ ਯੋ ਯੋ ਯਂ ਯਂ ਇਚ੍ਛਤਿ, ਤਸ੍ਸ ਤਸ੍ਸ ਤਂ ਤਂ ਅਦਾਸਿ.

ਏਵਂ ਤਸ੍ਮਿਂ ਮਹਾਜਨੇ ਨਾਨਾਵਿਧੇਨ ਅਨ੍ਨਪਾਨਾਦਿਨਾ ਯਥਾਕਾਮਂ ਸਨ੍ਤਪ੍ਪਿਤੇ ਪਚ੍ਛਾ ਵੂਪਸਨ੍ਤੇ ਮਗ੍ਗਪਰਿਸ੍ਸਮੇ ਸੋ ਬ੍ਰਾਹ੍ਮਣਵਾਣਿਜੋ ਅਯੋਨਿਸੋ ਮਨਸਿਕਰੋਨ੍ਤੋ ਏਵਂ ਚਿਨ੍ਤੇਸਿ – ‘‘ਧਨਲਾਭਾਯ ਇਤੋ ਕਮ੍ਬੋਜਂ ਗਨ੍ਤ੍ਵਾ ਮਯਂ ਕਿਂ ਕਰਿਸ੍ਸਾਮ, ਇਮਮੇਵ ਪਨ ਯਕ੍ਖਂ ਯੇਨ ਕੇਨਚਿ ਉਪਾਯੇਨ ਗਹੇਤ੍ਵਾ ਯਾਨਂ ਆਰੋਪੇਤ੍ਵਾ ਅਮ੍ਹਾਕਂ ਨਗਰਮੇਵ ਗਮਿਸ੍ਸਾਮਾ’’ਤਿ. ਏਵਂ ਚਿਨ੍ਤੇਤ੍ਵਾ ਤਮਤ੍ਥਂ ਅਙ੍ਕੁਰਸ੍ਸ ਕਥੇਨ੍ਤੋ –

‘‘ਯਸ੍ਸ ਅਤ੍ਥਾਯ ਗਚ੍ਛਾਮ, ਕਮ੍ਬੋਜਂ ਧਨਹਾਰਕਾ;

ਅਯਂ ਕਾਮਦਦੋ ਯਕ੍ਖੋ, ਇਮਂ ਯਕ੍ਖਂ ਨਯਾਮਸੇ.

‘‘ਇਮਂ ਯਕ੍ਖਂ ਗਹੇਤ੍ਵਾਨ, ਸਾਧੁਕੇਨ ਪਸਯ੍ਹ ਵਾ;

ਯਾਨਂ ਆਰੋਪਯਿਤ੍ਵਾਨ, ਖਿਪ੍ਪਂ ਗਚ੍ਛਾਮ ਦ੍ਵਾਰਕ’’ਨ੍ਤਿ. –

ਗਾਥਾਦ੍ਵਯਮਾਹ. ਤਤ੍ਥ ਯਸ੍ਸ ਅਤ੍ਥਾਯਾਤਿ ਯਸ੍ਸ ਕਾਰਣਾ. ਕਮ੍ਬੋਜਨ੍ਤਿ ਕਮ੍ਬੋਜਰਟ੍ਠਂ. ਧਨਹਾਰਕਾਤਿ ਭਣ੍ਡਵਿਕ੍ਕਯੇਨ ਲਦ੍ਧਧਨਹਾਰਿਨੋ. ਕਾਮਦਦੋਤਿ ਇਚ੍ਛਿਤਿਚ੍ਛਿਤਦਾਯਕੋ. ਯਕ੍ਖੋਤਿ ਦੇਵਪੁਤ੍ਤੋ. ਨਯਾਮਸੇਤਿ ਨਯਿਸ੍ਸਾਮ ¶ . ਸਾਧੁਕੇਨਾਤਿ ਯਾਚਨੇਨ. ਪਸਯ੍ਹਾਤਿ ਅਭਿਭਵਿਤ੍ਵਾ ਬਲਕ੍ਕਾਰੇਨ, ਯਾਨਨ੍ਤਿ ਸੁਖਯਾਨਂ ¶ . ਦ੍ਵਾਰਕਨ੍ਤਿ ਦ੍ਵਾਰਵਤੀਨਗਰਂ. ਅਯਂ ਹੇਤ੍ਥਾਧਿਪ੍ਪਾਯੋ – ਯਦਤ੍ਥਂ ਮਯਂ ਇਤੋ ਕਮ੍ਬੋਜਂ ਗਨ੍ਤੁਕਾਮਾ, ਤੇਨ ਗਮਨੇਨ ਸਾਧੇਤਬ੍ਬੋ ਅਤ੍ਥੋ ਇਧੇਵ ਸਿਜ੍ਝਤਿ. ਅਯਞ੍ਹਿ ਯਕ੍ਖੋ ਕਾਮਦਦੋ, ਤਸ੍ਮਾ ¶ ਇਮਂ ਯਕ੍ਖਂ ਯਾਚਿਤ੍ਵਾ ਤਸ੍ਸ ਅਨੁਮਤਿਯਾ ਵਾ, ਸਚੇ ਸਞ੍ਞਤ੍ਤਿਂ ਨ ਗਚ੍ਛਤਿ, ਬਲਕ੍ਕਾਰੇਨ ਵਾ ਯਾਨਂ ਆਰੋਪੇਤ੍ਵਾ ਯਾਨੇ ਪਚ੍ਛਾਬਾਹਂ ਬਨ੍ਧਿਤ੍ਵਾ ਤਂ ਗਹੇਤ੍ਵਾ ਇਤੋਯੇਵ ਖਿਪ੍ਪਂ ਦ੍ਵਾਰਵਤੀਨਗਰਂ ਗਚ੍ਛਾਮਾਤਿ.

ਏਵਂ ਪਨ ਬ੍ਰਾਹ੍ਮਣੇਨ ਵੁਤ੍ਤੋ ਅਙ੍ਕੁਰੋ ਸਪ੍ਪੁਰਿਸਧਮ੍ਮੇ ਠਤ੍ਵਾ ਤਸ੍ਸ ਵਚਨਂ ਪਟਿਕ੍ਖਿਪਨ੍ਤੋ –

‘‘ਯਸ੍ਸ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;

ਨ ਤਸ੍ਸ ਸਾਖਂ ਭਞ੍ਜੇਯ੍ਯ, ਮਿਤ੍ਤਦੁਬ੍ਭੋ ਹਿ ਪਾਪਕੋ’’ਤਿ. –

ਗਾਥਮਾਹ. ਤਤ੍ਥ ਨ ਭਞ੍ਜੇਯ੍ਯਾਤਿ ਨ ਛਿਨ੍ਦੇਯ੍ਯ. ਮਿਤ੍ਤਦੁਬ੍ਭੋਤਿ ਮਿਤ੍ਤੇਸੁ ਦੁਬ੍ਭਨਂ ਤੇਸਂ ਅਨਤ੍ਥੁਪ੍ਪਾਦਨਂ. ਪਾਪਕੋਤਿ ਅਭਦ੍ਦਕੋ ਮਿਤ੍ਤਦੁਬ੍ਭੋ. ਯੋ ਹਿ ਸੀਤਚ੍ਛਾਯੋ ਰੁਕ੍ਖੋ ਘਮ੍ਮਾਭਿਤਤ੍ਤਸ੍ਸ ਪੁਰਿਸਸ੍ਸ ਪਰਿਸ੍ਸਮਵਿਨੋਦਕੋ, ਤਸ੍ਸਾਪਿ ਨਾਮ ਪਾਪਕਂ ਨ ਚਿਨ੍ਤੇਤਬ੍ਬਂ, ਕਿਮਙ੍ਕਂ ਪਨ ਸਤ੍ਤਭੂਤੇਸੁ. ਅਯਂ ਦੇਵਪੁਤ੍ਤੋ ਸਪ੍ਪੁਰਿਸੋ ਪੁਬ੍ਬਕਾਰੀ ਅਮ੍ਹਾਕਂ ਦੁਕ੍ਖਪਨੂਦਕੋ ਬਹੂਪਕਾਰੋ, ਨ ਤਸ੍ਸ ਕਿਞ੍ਚਿ ਅਨਤ੍ਥਂ ਚਿਨ੍ਤੇਤਬ੍ਬਂ, ਅਞ੍ਞਦਤ੍ਥੁ ਸੋ ਪੂਜੇਤਬ੍ਬੋ ਏਵਾਤਿ ਦਸ੍ਸੇਤਿ.

ਤਂ ਸੁਤ੍ਵਾ ਬ੍ਰਾਹ੍ਮਣਾ ‘‘ਅਤ੍ਥਸ੍ਸ ਮੂਲਂ ਨਿਕਤਿਵਿਨਯੋ’’ਤਿ ਨੀਤਿਮਗ੍ਗਂ ਨਿਸ੍ਸਾਯ ਅਙ੍ਕੁਰਸ੍ਸ ਪਟਿਲੋਮਪਕ੍ਖੇ ਠਤ੍ਵਾ –

‘‘ਯਸ੍ਸ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;

ਖਨ੍ਧਮ੍ਪਿ ਤਸ੍ਸ ਛਿਨ੍ਦੇਯ੍ਯ, ਅਤ੍ਥੋ ਚੇ ਤਾਦਿਸੋ ਸਿਯਾ’’ਤਿ. –

ਗਾਥਮਾਹ. ਤਤ੍ਥ ਅਤ੍ਥੋ ਚੇ ਤਾਦਿਸੋ ਸਿਯਾਤਿ ਤਾਦਿਸੇਨ ਦਬ੍ਬਸਮ੍ਭਾਰੇਨ ਸਚੇ ਅਤ੍ਥੋ ਭਵੇਯ੍ਯ, ਤਸ੍ਸ ਰੁਕ੍ਖਸ੍ਸ ਖਨ੍ਧਮ੍ਪਿ ਛਿਨ੍ਦੇਯ੍ਯ, ਕਿਮਙ੍ਗਂ ਪਨ ਸਾਖਾਦਯੋਤਿ ਅਧਿਪ੍ਪਾਯੋ.

ਏਵਂ ¶ ਬ੍ਰਾਹ੍ਮਣੇਨ ਵੁਤ੍ਤੇ ਅਙ੍ਕੁਰੋ ਸਪ੍ਪੁਰਿਸਧਮ੍ਮਂਯੇਵ ਪਗ੍ਗਣ੍ਹਨ੍ਤੋ –

‘‘ਯਸ੍ਸ ¶ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;

ਨ ਤਸ੍ਸ ਪਤ੍ਤਂ ਭਿਨ੍ਦੇਯ੍ਯ, ਮਿਤ੍ਤਦੁਬ੍ਭੋ ਹਿ ਪਾਪਕੋ’’ਤਿ. –

ਇਮਂ ਗਾਥਮਾਹ. ਤਤ੍ਥ ¶ ਨ ਤਸ੍ਸ ਪਤ੍ਤਂ ਭਿਨ੍ਦੇਯ੍ਯਾਤਿ ਤਸ੍ਸ ਰੁਕ੍ਖਸ੍ਸ ਏਕਪਣ੍ਣਮਤ੍ਤਮ੍ਪਿ ਨ ਪਾਤੇਯ੍ਯ, ਪਗੇਵ ਸਾਖਾਦਿਕੇਤਿ ਅਧਿਪ੍ਪਾਯੋ.

ਪੁਨਪਿ ਬ੍ਰਾਹ੍ਮਣੋ ਅਤ੍ਤਨੋ ਵਾਦਂ ਪਗ੍ਗਣ੍ਹਨ੍ਤੋ –

‘‘ਯਸ੍ਸ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;

ਸਮੂਲਮ੍ਪਿ ਤਂ ਅਬ੍ਬੁਹੇ, ਅਤ੍ਥੋ ਚੇ ਤਾਦਿਸੋ ਸਿਯਾ’’ਤਿ. –

ਗਾਥਮਾਹ. ਤਤ੍ਥ ਸਮੂਲਮ੍ਪਿ ਤਂ ਅਬ੍ਬੁਹੇਤਿ ਤਂ ਤਤ੍ਥ ਸਮੂਲਮ੍ਪਿ ਸਹ ਮੂਲੇਨਪਿ ਅਬ੍ਬੁਹੇਯ੍ਯ, ਉਦ੍ਧਰੇਯ੍ਯਾਤਿ ਅਤ੍ਥੋ.

ਏਵਂ ਬ੍ਰਾਹ੍ਮਣੇਨ ਵੁਤ੍ਤੇ ਪੁਨ ਅਙ੍ਕੁਰੋ ਤਂ ਨੀਤਿਂ ਨਿਰਤ੍ਥਕਂ ਕਾਤੁਕਾਮੋ –

‘‘ਯਸ੍ਸੇਕਰਤ੍ਤਿਮ੍ਪਿ ਘਰੇ ਵਸੇਯ੍ਯ, ਯਤ੍ਥਨ੍ਨਪਾਨਂ ਪੁਰਿਸੋ ਲਭੇਥ;

ਨ ਤਸ੍ਸ ਪਾਪਂ ਮਨਸਾਪਿ ਚਿਨ੍ਤਯੇ, ਕਤਞ੍ਞੁਤਾ ਸਪ੍ਪੁਰਿਸੇਹਿ ਵਣ੍ਣਿਤਾ.

‘‘ਯਸ੍ਸੇਕਰਤ੍ਤਿਮ੍ਪਿ ਘਰੇ ਵਸੇਯ੍ਯ, ਅਨ੍ਨੇਨ ਪਾਨੇਨ ਉਪਟ੍ਠਿਤੋ ਸਿਯਾ;

ਨ ਤਸ੍ਸ ਪਾਪਂ ਮਨਸਾਪਿ ਚਿਨ੍ਤਯੇ, ਅਦੁਬ੍ਭਪਾਣੀ ਦਹਤੇ ਮਿਤ੍ਤਦੁਬ੍ਭਿਂ.

‘‘ਯੋ ਪੁਬ੍ਬੇ ਕਤਕਲ੍ਯਾਣੋ, ਪਚ੍ਛਾ ਪਾਪੇਨ ਹਿਂਸਤਿ;

ਅਲ੍ਲਪਾਣਿਹਤੋ ਪੋਸੋ, ਨ ਸੋ ਭਦ੍ਰਾਨਿ ਪਸ੍ਸਤੀ’’ਤਿ. –

੨੬੩. ਤਤ੍ਥ ਯਸ੍ਸਾਤਿ ਯਸ੍ਸ ਪੁਗ੍ਗਲਸ੍ਸ. ਏਕਰਤ੍ਤਿਮ੍ਪੀਤਿ ਏਕਰਤ੍ਤਿਮਤ੍ਤਮ੍ਪਿ ਕੇਵਲਂ ਗੇਹੇ ਵਸੇਯ੍ਯ. ਯਤ੍ਥਨ੍ਨਪਾਨਂ ਪੁਰਿਸੋ ਲਭੇਥਾਤਿ ਯਸ੍ਸ ਸਨ੍ਤਿਕੇ ਕੋਚਿ ਪੁਰਿਸੋ ਅਨ੍ਨਪਾਨਂ ਵਾ ਯਂਕਿਞ੍ਚਿ ਭੋਜਨਂ ¶ ਵਾ ਲਭੇਯ੍ਯ. ਨ ਤਸ੍ਸ ¶ ਪਾਪਂ ਮਨਸਾਪਿ ਚਿਨ੍ਤਯੇਤਿ ਤਸ੍ਸ ਪੁਗ੍ਗਲਸ੍ਸ ਅਭਦ੍ਦਕਂ ਅਨਤ੍ਥਂ ¶ ਮਨਸਾਪਿ ਨ ਚਿਨ੍ਤੇਯ੍ਯ ਨ ਪਿਹੇਯ੍ਯ, ਪਗੇਵ ਕਾਯਵਾਚਾਹਿ. ਕਸ੍ਮਾਤਿ ਚੇ? ਕਤਞ੍ਞੁਤਾ ਸਪ੍ਪੁਰਿਸੇਹਿ ਵਣ੍ਣਿਤਾਤਿ ਕਤਞ੍ਞੁਤਾ ਨਾਮ ਬੁਦ੍ਧਾਦੀਹਿ ਉਤ੍ਤਮਪੁਰਿਸੇਹਿ ਪਸਂਸਿਤਾ.

੨੬੪. ਉਪਟ੍ਠਿਤੋਤਿ ਪਯਿਰੁਪਾਸਿਤੋ ‘‘ਇਦਂ ਗਣ੍ਹ ਇਦਂ ਭੁਞ੍ਜਾ’’ਤਿ ਅਨ੍ਨਪਾਨਾਦਿਨਾ ਉਪਟ੍ਠਿਤੋ. ਅਦੁਬ੍ਭਪਾਣੀਤਿ ਅਹਿਂਸਕਹਤ੍ਥੋ ਹਤ੍ਥਸਂਯਤੋ. ਦਹਤੇ ਮਿਤ੍ਤਦੁਬ੍ਭਿਨ੍ਤਿ ਤਂ ਮਿਤ੍ਤਦੁਬ੍ਭਿਂ ਪੁਗ੍ਗਲਂ ਦਹਤਿ ਵਿਨਾਸੇਤਿ, ਅਪ੍ਪਦੁਟ੍ਠੇ ਹਿਤਜ੍ਝਾਸਯਸਮ੍ਪਨ੍ਨੇ ਪੁਗ੍ਗਲੇ ਪਰੇਨ ਕਤੋ ਅਪਰਾਧੋ ਅਵਿਸੇਸੇਨ ਤਸ੍ਸੇਵ ਅਨਤ੍ਥਾਵਹੋ, ਅਪ੍ਪਦੁਟ੍ਠੋ ਪੁਗ੍ਗਲੋ ਅਤ੍ਥਤੋ ਤਂ ਦਹਤਿ ਨਾਮ. ਤੇਨਾਹ ਭਗਵਾ –

‘‘ਯੋ ਅਪ੍ਪਦੁਟ੍ਠਸ੍ਸ ਨਰਸ੍ਸ ਦੁਸ੍ਸਤਿ, ਸੁਦ੍ਧਸ੍ਸ ਪੋਸਸ੍ਸ ਅਨਙ੍ਗਣਸ੍ਸ;

ਤਮੇਵ ਬਾਲਂ ਪਚ੍ਚੇਤਿ ਪਾਪਂ, ਸੁਖੁਮੋ ਰਜੋ ਪਟਿਵਾਤਂਵ ਖਿਤ੍ਤੋ’’ਤਿ. (ਧ. ਪ. ੧੨੫; ਜਾ. ੧.੫.੯੪; ਸਂ. ਨਿ. ੧.੨੨);

੨੬੫. ਯੋ ਪੁਬ੍ਬੇ ਕਤਕਲ੍ਯਾਣੋਤਿ ਯੋ ਪੁਗ੍ਗਲੋ ਕੇਨਚਿ ਸਾਧੁਨਾ ਕਤਭਦ੍ਦਕੋ ਕਤੂਪਕਾਰੋ. ਪਚ੍ਛਾ ਪਾਪੇਨ ਹਿਂਸਤੀਤਿ ਤਂ ਪੁਬ੍ਬਕਾਰਿਨਂ ਅਪਰਭਾਗੇ ਪਾਪੇਨ ਅਭਦ੍ਦਕੇਨ ਅਨਤ੍ਥਕੇਨ ਬਾਧਤਿ. ਅਲ੍ਲਪਾਣਿਹਤੋ ਪੋਸੋਤਿ ਅਲ੍ਲਪਾਣਿਨਾ ਉਪਕਾਰਕਿਰਿਯਾਯ ਅਲ੍ਲਪਾਣਿਨਾ ਧੋਤਹਤ੍ਥੇਨ ਪੁਬ੍ਬਕਾਰਿਨਾ ਹੇਟ੍ਠਾ ਵੁਤ੍ਤਨਯੇਨ ਹਤੋ ਬਾਧਿਤੋ, ਤਸ੍ਸ ਵਾ ਪੁਬ੍ਬਕਾਰਿਨੋ ਬਾਧਨੇਨ ਹਤੋ ਅਲ੍ਲਪਾਣਿਹਤੋ ਨਾਮ, ਅਕਤਞ੍ਞੁਪੁਗ੍ਗਲੋ. ਨ ਸੋ ਭਦ੍ਰਾਨਿ ਪਸ੍ਸਤੀਤਿ ਸੋ ਯਥਾਵੁਤ੍ਤਪੁਗ੍ਗਲੋ ਇਧਲੋਕੇ ਚ ਪਰਲੋਕੇ ਚ ਇਟ੍ਠਾਨਿ ਨ ਪਸ੍ਸਤਿ, ਨ ਵਿਨ੍ਦਤਿ, ਨ ਲਭਤੀਤਿ ਅਤ੍ਥੋ.

ਏਵਂ ¶ ਸਪ੍ਪੁਰਿਸਧਮ੍ਮਂ ਪਗ੍ਗਣ੍ਹਨ੍ਤੇਨ ਅਙ੍ਕੁਰੇਨ ਅਭਿਭਵਿਤ੍ਵਾ ਵੁਤ੍ਤੋ ਸੋ ਬ੍ਰਾਹ੍ਮਣੋ ਨਿਰੁਤ੍ਤਰੋ ਤੁਣ੍ਹੀ ਅਹੋਸਿ. ਯਕ੍ਖੋ ਪਨ ਤੇਸਂ ਦ੍ਵਿਨ੍ਨਂ ਵਚਨਪਟਿਵਚਨਾਨਿ ਸੁਤ੍ਵਾ ਬ੍ਰਾਹ੍ਮਣਸ੍ਸ ਕੁਜ੍ਝਿਤ੍ਵਾਪਿ ‘‘ਹੋਤੁ ਇਮਸ੍ਸ ਦੁਟ੍ਠਬ੍ਰਾਹ੍ਮਣਸ੍ਸ ਕਤ੍ਤਬ੍ਬਂ ਪਚ੍ਛਾ ਜਾਨਿਸ੍ਸਾਮੀ’’ਤਿ ਅਤ੍ਤਨੋ ਕੇਨਚਿ ਅਨਭਿਭਵਨੀਯਤਮੇਵ ਤਾਵ ਦਸ੍ਸੇਨ੍ਤੋ –

‘‘ਨਾਹਂ ¶ ਦੇਵੇਨ ਵਾ ਮਨੁਸ੍ਸੇਨ ਵਾ, ਇਸ੍ਸਰਿਯੇਨ ਵਾ ਹਂ ਸੁਪ੍ਪਸਯ੍ਹੋ;

ਯਕ੍ਖੋਹਮਸ੍ਮਿ ਪਰਮਿਦ੍ਧਿਪਤ੍ਤੋ, ਦੂਰਙ੍ਗਮੋ ਵਣ੍ਣਬਲੂਪਪਨ੍ਨੋ’’ਤਿ. –

ਗਾਥਮਾਹ. ਤਤ੍ਥ ਦੇਵੇਨ ਵਾਤਿ ਯੇਨ ਕੇਨਚਿ ਦੇਵੇਨ ਵਾ. ਮਨੁਸ੍ਸੇਨ ਵਾਤਿ ਏਤ੍ਥਾਪਿ ਏਸੇਵ ਨਯੋ. ਇਸ੍ਸਰਿਯੇਨ ¶ ਵਾਤਿ ਦੇਵਿਸ੍ਸਰਿਯੇਨ ਵਾ ਮਨੁਸ੍ਸਿਸ੍ਸਰਿਯੇਨ ਵਾ. ਤਤ੍ਥ ਦੇਵਿਸ੍ਸਰਿਯਂ ਨਾਮ ਚਤੁਮਹਾਰਾਜਿਕਸਕ੍ਕਸੁਯਾਮਾਦੀਨਂ ਦੇਵਿਦ੍ਧਿ, ਮਨੁਸ੍ਸਿਸ੍ਸਰਿਯਂ ਨਾਮ ਚਕ੍ਕਵਤ੍ਤਿਆਦੀਨਂ ਪੁਞ੍ਞਿਦ੍ਧਿ. ਤਸ੍ਮਾ ਇਸ੍ਸਰਿਯਗ੍ਗਹਣੇਨ ਮਹਾਨੁਭਾਵੇ ਦੇਵਮਨੁਸ੍ਸੇ ਸਙ੍ਗਣ੍ਹਾਤਿ. ਮਹਾਨੁਭਾਵਾਪਿ ਹਿ ਦੇਵਾ ਅਤ੍ਤਨੋ ਪੁਞ੍ਞਫਲੂਪਤ੍ਥਮ੍ਭਿਤੇ ਮਨੁਸ੍ਸੇਪਿ ਅਸਤਿ ਪਯੋਗਵਿਪਤ੍ਤਿਯਂ ਅਭਿਭਵਿਤੁਂ ਨ ਸਕ੍ਕੋਨ੍ਤਿ, ਪਗੇਵ ਇਤਰੇ. ਹਨ੍ਤਿ ਅਸਹਨੇ ਨਿਪਾਤੋ. ਨ ਸੁਪ੍ਪਸਯ੍ਹੋਤਿ ਅਪ੍ਪਧਂਸਿਯੋ. ਯਕ੍ਖੋਹਮਸ੍ਮਿ ਪਰਮਿਦ੍ਧਿਪਤ੍ਤੋਤਿ ਅਤ੍ਤਨੋ ਪੁਞ੍ਞਫਲੇਨ ਅਹਂ ਯਕ੍ਖਤ੍ਤਂ ਉਪਗਤੋ ਅਸ੍ਮਿ, ਯਕ੍ਖੋਵ ਸਮਾਨੋ ਨ ਯੋ ਵਾ ਸੋ ਵਾ, ਅਥ ਖੋ ਪਰਮਿਦ੍ਧਿਪਤ੍ਤੋ ਪਰਮਾਯ ਉਤ੍ਤਮਾਯ ਯਕ੍ਖਿਦ੍ਧਿਯਾ ਸਮਨ੍ਨਾਗਤੋ. ਦੂਰਙ੍ਗਮੋਤਿ ਖਣੇਨੇਵ ਦੂਰਮ੍ਪਿ ਠਾਨਂ ਗਨ੍ਤੁਂ ਸਮਤ੍ਥੋ. ਵਣ੍ਣਬਲੂਪਪਨ੍ਨੋਤਿ ਰੂਪਸਮ੍ਪਤ੍ਤਿਯਾ ਸਰੀਰਬਲੇਨ ਚ ਉਪਪਨ੍ਨੋ ਸਮਨ੍ਨਾਗਤੋਤਿ ਤੀਹਿਪਿ ਪਦੇਹਿ ਮਨ੍ਤਪ੍ਪਯੋਗਾਦੀਹਿ ਅਤ੍ਤਨੋ ਅਨਭਿਭਵਨੀਯਤਂਯੇਵ ਦਸ੍ਸੇਤਿ. ਰੂਪਸਮ੍ਪਨ੍ਨੋ ਹਿ ਪਰੇਸਂ ਬਹੁਮਾਨਿਤੋ ਹੋਤਿ, ਰੂਪਸਮ੍ਪਦਂ ਨਿਸ੍ਸਾਯ ¶ ਵਿਸਭਾਗਵਤ੍ਥੁਨਾਪਿ ਅਨਾਕਡ੍ਢਨਿਯੋਵਾਤਿ ਵਣ੍ਣਸਮ੍ਪਦਾ ਅਨਭਿਭਵਨੀਯਕਾਰਣਨ੍ਤਿ ਵੁਤ੍ਤਾ.

ਇਤੋ ਪਰਂ ਅਙ੍ਕੁਰਸ੍ਸ ਚ ਦੇਵਪੁਤ੍ਤਸ੍ਸ ਚ ਵਚਨਪਟਿਵਚਨਕਥਾ ਹੋਤਿ –

‘‘ਪਾਣਿ ਤੇ ਸਬ੍ਬਸੋਵਣ੍ਣੋ, ਪਞ੍ਚਧਾਰੋ ਮਧੁਸ੍ਸਵੋ;

ਨਾਨਾਰਸਾ ਪਗ੍ਘਰਨ੍ਤਿ, ਮਞ੍ਞੇਹਂ ਤਂ ਪੁਰਿਨ੍ਦਦਂ.

‘‘ਨਾਮ੍ਹਿ ਦੇਵੋ ਨ ਗਨ੍ਧਬ੍ਬੋ, ਨਾਪਿ ਸਕ੍ਕੋ ਪੁਰਿਨ੍ਦਦੋ;

ਪੇਤਂ ਮਂ ਅਙ੍ਕੁਰ ਜਾਨਾਹਿ, ਰੋਰੁਵਮ੍ਹਾ ਇਧਾਗਤਂ.

‘‘ਕਿਂਸੀਲੋ ਕਿਂਸਮਾਚਾਰੋ, ਰੋਰੁਵਸ੍ਮਿਂ ਪੁਰੇ ਤੁਵਂ;

ਕੇਨ ਤੇ ਬ੍ਰਹ੍ਮਚਰਿਯੇਨ, ਪੁਞ੍ਞਂ ਪਾਣਿਮ੍ਹਿ ਇਜ੍ਝਤਿ.

‘‘ਤੁਨ੍ਨਵਾਯੋ ¶ ਪੁਰੇ ਆਸਿਂ, ਰੋਰੁਵਸ੍ਮਿਂ ਤਦਾ ਅਹਂ;

ਸੁਕਿਚ੍ਛਵੁਤ੍ਤਿ ਕਪਣੋ, ਨ ਮੇ ਵਿਜ੍ਜਤਿ ਦਾਤਵੇ.

‘‘ਨਿਵੇਸਨਞ੍ਚ ਮੇ ਆਸਿ, ਅਸਯ੍ਹਸ੍ਸ ਉਪਨ੍ਤਿਕੇ;

ਸਦ੍ਧਸ੍ਸ ਦਾਨਪਤਿਨੋ, ਕਤਪੁਞ੍ਞਸ੍ਸ ਲਜ੍ਜਿਨੋ.

‘‘ਤਤ੍ਥ ¶ ਯਾਚਨਕਾਯਨ੍ਤਿ, ਨਾਨਾਗੋਤ੍ਤਾ ਵਨਿਬ੍ਬਕਾ;

ਤੇ ਚ ਮਂ ਤਤ੍ਥ ਪੁਚ੍ਛਨ੍ਤਿ, ਅਸਯ੍ਹਸ੍ਸ ਨਿਵੇਸਨਂ.

‘‘ਕਤ੍ਥ ਗਚ੍ਛਾਮ ਭਦ੍ਦਂ ਵੋ, ਕਤ੍ਥ ਦਾਨਂ ਪਦੀਯਤਿ;

ਤੇਸਾਹਂ ਪੁਟ੍ਠੋ ਅਕ੍ਖਾਮਿ, ਅਸਯ੍ਹਸ੍ਸ ਨਿਵੇਸਨਂ.

‘‘ਪਗ੍ਗਯ੍ਹ ਦਕ੍ਖਿਣਂ ਬਾਹੁਂ, ਏਤ੍ਥ ਗਚ੍ਛਥ ਭਦ੍ਦਂ ਵੋ;

ਏਤ੍ਥ ਦਾਨਂ ਪਦੀਯਤਿ, ਅਸਯ੍ਹਸ੍ਸ ਨਿਵੇਸਨੇ.

‘‘ਤੇਨ ਪਾਣਿ ਕਾਮਦਦੋ, ਤੇਨ ਪਾਣਿ ਮਧੁਸ੍ਸਵੋ;

ਤੇਨ ਮੇ ਬ੍ਰਹ੍ਮਚਰਿਯੇਨ, ਪੁਞ੍ਞਂ ਪਾਣਿਮ੍ਹਿ ਇਜ੍ਝਤਿ.

‘‘ਨ ਕਿਰ ਤ੍ਵਂ ਅਦਾ ਦਾਨਂ, ਸਕਪਾਣੀਹਿ ਕਸ੍ਸਚਿ;

ਪਰਸ੍ਸ ਦਾਨਂ ਅਨੁਮੋਦਮਾਨੋ, ਪਾਣਿਂ ਪਗ੍ਗਯ੍ਹ ਪਾਵਦਿ.

‘‘ਤੇਨ ਪਾਣਿ ਕਾਮਦਦੋ, ਤੇਨ ਪਾਣਿ ਮਧੁਸ੍ਸਵੋ;

ਤੇਨ ਤੇ ਬ੍ਰਹ੍ਮਚਰਿਯੇਨ, ਪੁਞ੍ਞਂ ਪਾਣਿਮ੍ਹਿ ਇਜ੍ਝਤਿ.

‘‘ਯੋ ਸੋ ਦਾਨਮਦਾ ਭਨ੍ਤੇ, ਪਸਨ੍ਨੋ ਸਕਪਾਣਿਭਿ;

ਸੋ ਹਿਤ੍ਵਾ ਮਾਨੁਸਂ ਦੇਹਂ, ਕਿਂ ਨੁ ਸੋ ਦਿਸਤਂ ਗਤੋ.

‘‘ਨਾਹਂ ਪਜਾਨਾਮਿ ਅਸਯ੍ਹਸਾਹਿਨੋ, ਅਙ੍ਗੀਰਸਸ੍ਸ ਗਤਿਂ ਆਗਤਿਂ ਵਾ;

ਸੁਤਞ੍ਚ ¶ ਮੇ ਵੇਸ੍ਸਵਣਸ੍ਸ ਸਨ੍ਤਿਕੇ, ਸਕ੍ਕਸ੍ਸ ਸਹਬ੍ਯਤਂ ਗਤੋ ਅਸਯ੍ਹੋ.

‘‘ਅਲਮੇਵ ਕਾਤੁਂ ਕਲ੍ਯਾਣਂ, ਦਾਨਂ ਦਾਤੁਂ ਯਥਾਰਹਂ;

ਪਾਣਿਂ ਕਾਮਦਦਂ ਦਿਸ੍ਵਾ, ਕੋ ਪੁਞ੍ਞਂ ਨ ਕਰਿਸ੍ਸਤਿ.

‘‘ਸੋ ¶ ਹਿ ਨੂਨ ਇਤੋ ਗਨ੍ਤ੍ਵਾ, ਅਨੁਪ੍ਪਤ੍ਵਾਨ ਦ੍ਵਾਰਕਂ;

ਦਾਨਂ ਪਟ੍ਠਪਯਿਸ੍ਸਾਮਿ, ਯਂ ਮਮਸ੍ਸ ਸੁਖਾਵਹਂ.

‘‘ਦਸ੍ਸਾਮਨ੍ਨਞ੍ਚ ¶ ਪਾਨਞ੍ਚ, ਵਤ੍ਥਸੇਨਾਸਨਾਨਿ ਚ;

ਪਪਞ੍ਚ ਉਦਪਾਨਞ੍ਚ, ਦੁਗ੍ਗੇ ਸਙ੍ਕਮਨਾਨਿ ਚਾ’’ਤਿ. –

੨੬੭. ਤਤ੍ਥ ਪਾਣਿ ਤੇਤਿ ਤਵ ਦਕ੍ਖਿਣਹਤ੍ਥੋ. ਸਬ੍ਬਸੋਵਣ੍ਣੋਤਿ ਸਬ੍ਬਸੋ ਸੁਵਣ੍ਣਵਣ੍ਣੋ. ਪਞ੍ਚਧਾਰੋਤਿ ਪਞ੍ਚਹਿ ਅਙ੍ਗੁਲੀਹਿ ਪਰੇਹਿ ਕਾਮਿਤਵਤ੍ਥੂਨਂ ਧਾਰਾ ਏਤਸ੍ਸ ਸਨ੍ਤੀਤਿ ਪਞ੍ਚਧਾਰੋ. ਮਧੁਸ੍ਸਵੋਤਿ ਮਧੁਰਰਸਵਿਸ੍ਸਨ੍ਦਕੋ. ਤੇਨਾਹ ‘‘ਨਾਨਾਰਸਾ ਪਗ੍ਘਰਨ੍ਤੀ’’ਤਿ, ਮਧੁਰਕਟੁਕਕਸਾਵਾਦਿਭੇਦਾ ਨਾਨਾਵਿਧਾ ਰਸਾ ਵਿਸ੍ਸਨ੍ਦਨ੍ਤੀਤਿ ਅਤ੍ਥੋ. ਯਕ੍ਖਸ੍ਸ ਹਿ ਕਾਮਦਦੇ ਮਧੁਰਾਦਿਰਸਸਮ੍ਪਨ੍ਨਾਨਿ ਵਿਵਿਧਾਨਿ ਖਾਦਨੀਯਭੋਜਨੀਯਾਨਿ ਹਤ੍ਥੇ ਵਿਸ੍ਸਜ੍ਜਨ੍ਤੇ ਮਧੁਰਾਦਿਰਸਾ ਪਗ੍ਘਰਨ੍ਤੀਤਿ ਵੁਤ੍ਤਂ. ਮਞ੍ਞੇਹਂ ਤਂ ਪੁਰਿਨ੍ਦਦਨ੍ਤਿ ਮਞ੍ਞੇ ਅਹਂ ਤਂ ਪੁਰਿਨ੍ਦਦਂ ਸਕ੍ਕਂ, ‘‘ਏਵਂਮਹਾਨੁਭਾਵੋ ਸਕ੍ਕੋ ਦੇਵਰਾਜਾ’’ਤਿ ਤਂ ਅਹਂ ਮਞ੍ਞਾਮੀਤਿ ਅਤ੍ਥੋ.

੨੬੮. ਨਾਮ੍ਹਿ ਦੇਵੋਤਿ ਵੇਸ੍ਸਵਣਾਦਿਕੋ ਪਾਕਟਦੇਵੋ ਨ ਹੋਮਿ. ਨ ਗਨ੍ਧਬ੍ਬੋਤਿ ਗਨ੍ਧਬ੍ਬਕਾਯਿਕਦੇਵੋਪਿ ਨ ਹੋਮਿ. ਨਾਪਿ ਸਕ੍ਕੋ ਪੁਰਿਨ੍ਦਦੋਤਿ ਪੁਰਿਮਤ੍ਤਭਾਵੇ ਪੁਰੇ ਦਾਨਸ੍ਸ ਪਟ੍ਠਪਿਤਤ੍ਤਾ ‘‘ਪੁਰਿਨ੍ਦਦੋ’’ਤਿ ਲਦ੍ਧਨਾਮੋ ਸਕ੍ਕੋ ਦੇਵਰਾਜਾਪਿ ਨ ਹੋਮਿ. ਕਤਰੋ ਪਨ ਅਹੋਸੀਤਿ ਆਹ ‘‘ਪੇਤਂ ਮਂ ਅਙ੍ਕੁਰ ਜਾਨਾਹੀ’’ਤਿਆਦਿ. ਅਙ੍ਕੁਰਪੇਤੂਪਪਤ੍ਤਿਕਂ ਮਂ ਜਾਨਾਹਿ, ‘‘ਅਞ੍ਞਤਰੋ ਪੇਤਮਹਿਦ੍ਧਿਕੋ’’ਤਿ ਮਂ ਉਪਧਾਰੇਹਿ. ਰੋਰੁਵਮ੍ਹਾ ਇਧਾਗਤਨ੍ਤਿ ਰੋਰੁਵਨਗਰਤੋ ਚਵਿਤ੍ਵਾ ਮਰੁਕਨ੍ਤਾਰੇ ਇਧ ਇਮਸ੍ਮਿਂ ਨਿਗ੍ਰੋਧਰੁਕ੍ਖੇ ਉਪਪਜ੍ਜਨਵਸੇਨ ਆਗਤਂ, ਏਤ੍ਥ ਨਿਬ੍ਬਤ੍ਤਨ੍ਤਿ ਅਤ੍ਥੋ.

੨੬੯. ਕਿਂਸੀਲੋ ਕਿਂਸਮਾਚਾਰੋ, ਰੋਰੁਵਸ੍ਮਿਂ ਪੁਰੇ ਤੁਵਨ੍ਤਿ ਪੁਬ੍ਬੇ ਪੁਰਿਮਤ੍ਤਭਾਵੇ ਰੋਰੁਵਨਗਰੇ ਵਸਨ੍ਤੋ ਤ੍ਵਂ ਕਿਂਸੀਲੋ ¶ ਕਿਂਸਮਾਚਾਰੋ ਅਹੋਸਿ, ਪਾਪਤੋ ਨਿਵਤ੍ਤਨਲਕ੍ਖਣਂ ਕੀਦਿਸਂ ਸੀਲਂ ਸਮਾਦਾਯ ਸਂਵਤ੍ਤਿਤਪੁਞ੍ਞਕਿਰਿਯਾਲਕ੍ਖਣੇਨ ਸਮਾਚਾਰੇਨ ਕਿਂਸਮਾਚਾਰੋ, ਦਾਨਾਦੀਸੁ ਕੁਸਲਸਮਾਚਾਰੇਸੁ ਕੀਦਿਸੋ ਸਮਾਚਾਰੋ ਅਹੋਸੀਤਿ ਅਤ੍ਥੋ. ਕੇਨ ਤੇ ਬ੍ਰਹ੍ਮਚਰਿਯੇਨ ¶ , ਪੁਞ੍ਞਂ ਪਾਣਿਮ੍ਹਿ ਇਜ੍ਝਤੀਤਿ ਕੀਦਿਸੇਨ ਸੇਟ੍ਠਚਰਿਯੇਨ ਇਦਂ ਏਵਰੂਪਂ ਤਵ ਹਤ੍ਥੇਸੁ ਪੁਞ੍ਞਫਲਂ ਇਦਾਨਿ ਸਮਿਜ੍ਝਤਿ ਨਿਪ੍ਫਜ੍ਜਤਿ, ਤਂ ਕਥੇਹੀਤਿ ਅਤ੍ਥੋ. ਪੁਞ੍ਞਫਲਞ੍ਹਿ ਇਧ ਉਤ੍ਤਰਪਦਲੋਪੇਨ ‘‘ਪੁਞ੍ਞ’’ਨ੍ਤਿ ਅਧਿਪ੍ਪੇਤਂ. ਤਤ੍ਥਾ ਹਿ ਤਂ ‘‘ਕੁਸਲਾਨਂ, ਭਿਕ੍ਖਵੇ, ਧਮ੍ਮਾਨਂ ਸਮਾਦਾਨਹੇਤੁ ਏਵਮਿਦਂ ਪੁਞ੍ਞਂ ਪਵਡ੍ਢਤੀ’’ਤਿਆਦੀਸੁ (ਦੀ. ਨਿ. ੩.੮੦) ਪੁਞ੍ਞਨ੍ਤਿ ਵੁਤ੍ਤਂ.

੨੭੦. ਤੁਨ੍ਨਵਾਯੋਤਿ ¶ ਤੁਨ੍ਨਕਾਰੋ. ਸੁਕਿਚ੍ਛਵੁਤ੍ਤੀਤਿ ਸੁਟ੍ਠੁ ਕਿਚ੍ਛਪੁਤ੍ਤਿਕੋ ਅਤਿਵਿਯ ਦੁਕ੍ਖਜੀਵਿਕੋ. ਕਪਣੋਤਿ ਵਰਾਕੋ, ਦੀਨੋਤਿ ਅਤ੍ਥੋ. ਨ ਮੇ ਵਿਜ੍ਜਤਿ ਦਾਤਵੇਤਿ ਅਦ੍ਧਿਕਾਨਂ ਸਮਣਬ੍ਰਾਹ੍ਮਣਾਨਂ ਦਾਤੁਂ ਕਿਞ੍ਚਿ ਦਾਤਬ੍ਬਯੁਤ੍ਤਕਂ ਮਯ੍ਹਂ ਨਤ੍ਥਿ, ਚਿਤ੍ਤਂ ਪਨ ਮੇ ਦਾਨਂ ਦਿਨ੍ਨਨ੍ਤਿ ਅਧਿਪ੍ਪਾਯੋ.

੨੭੧. ਨਿਵੇਸਨਨ੍ਤਿ ਘਰਂ, ਕਮ੍ਮਕਰਣਸਾਲਾ ਵਾ. ਅਸਯ੍ਹਸ੍ਸ ਉਪਨ੍ਤਿਕੇਤਿ ਅਸਯ੍ਹਸ੍ਸ ਮਹਾਸੇਟ੍ਠਿਨੋ ਗੇਹਸ੍ਸ ਸਮੀਪੇ. ਸਦ੍ਧਸ੍ਸਾਤਿ ਕਮ੍ਮਫਲਸਦ੍ਧਾਯ ਸਮਨ੍ਨਾਗਤਸ੍ਸ. ਦਾਨਪਤਿਨੋਤਿ ਦਾਨੇ ਨਿਰਨ੍ਤਰਪ੍ਪਵਤ੍ਤਾਯ ਪਰਿਚ੍ਚਾਗਸਮ੍ਪਤ੍ਤਿਯਾ ਲੋਭਸ੍ਸ ਚ ਅਭਿਭਵੇਨ ਪਤਿਭੂਤਸ੍ਸ. ਕਤਪੁਞ੍ਞਸ੍ਸਾਤਿ ਪੁਬ੍ਬੇ ਕਤਸੁਚਰਿਤਕਮ੍ਮਸ੍ਸ. ਲਜ੍ਜਿਨੋਤਿ ਪਾਪਜਿਗੁਚ੍ਛਨਸਭਾਵਸ੍ਸ.

੨੭੨. ਤਤ੍ਥਾਤਿ ਤਸ੍ਮਿਂ ਮਮ ਨਿਵੇਸਨੇ. ਯਾਚਨਕਾਯਨ੍ਤੀਤਿ ਯਾਚਨਕਾ ਜਨਾ ਅਸਯ੍ਹਸੇਟ੍ਠਿਂ ਕਿਞ੍ਚਿ ਯਾਚਿਤੁਕਾਮਾ ਆਗਚ੍ਛਨ੍ਤਿ. ਨਾਨਾਗੋਤ੍ਤਾਤਿ ਨਾਨਾਵਿਧਗੋਤ੍ਤਾਪਦੇਸਾ. ਵਨਿਬ੍ਬਕਾਤਿ ਵਣ੍ਣਦੀਪਕਾ, ਯੇ ਦਾਯਕਸ੍ਸ ਪੁਞ੍ਞਫਲਾਦਿਞ੍ਚ ਗੁਣਕਿਤ੍ਤਨਾਦਿਮੁਖੇਨ ਅਤ੍ਤਨੋ ਅਤ੍ਥਿਕਭਾਵਂ ਪਵੇਦੇਨ੍ਤਾ ਵਿਚਰਨ੍ਤਿ. ਤੇ ਚ ਮਂ ਤਤ੍ਥ ਪੁਚ੍ਛਨ੍ਤੀਤਿ ਤਤ੍ਥਾਤਿ ਨਿਪਾਤਮਤ੍ਤਂ, ਤੇ ਯਾਚਕਾਦਯੋ ਮਂ ਅਸਯ੍ਹਸੇਟ੍ਠਿਨੋ ਨਿਵੇਸਨਂ ਪੁਚ੍ਛਨ੍ਤਿ. ਅਕ੍ਖਰਚਿਨ੍ਤਕਾ ਹਿ ਈਦਿਸੇਸੁ ਠਾਨੇਸੁ ਕਮ੍ਮਦ੍ਵਯਂ ¶ ਇਚ੍ਛਨ੍ਤਿ.

੨੭੩. ਕਤ੍ਥ ਗਚ੍ਛਾਮ ਭਦ੍ਦਂ ਵੋ, ਕਤ੍ਥ ਦਾਨਂ ਪਦੀਯਤੀਤਿ ਤੇਸਂ ਪੁਚ੍ਛਨਾਕਾਰਦਸ੍ਸਨਂ. ਅਯਂ ਪੇਤ੍ਥ ਅਤ੍ਥੋ – ਭਦ੍ਦਂ ਤੁਮ੍ਹਾਕਂ ਹੋਤੁ, ਮਯਂ ‘‘ਅਸਯ੍ਹਮਹਾਸੇਟ੍ਠਿਨਾ ਦਾਨਂ ਪਦੀਯਤੀ’’ਤਿ ਸੁਤ੍ਵਾ ਆਗਤਾ, ਕਤ੍ਥ ਦਾਨਂ ਪਦੀਯਤਿ, ਕਤ੍ਥ ਵਾ ਮਯਂ ਗਚ੍ਛਾਮ, ਕਤ੍ਥ ਗਤੇਨ ਦਾਨਂ ਸਕ੍ਕਾ ਲਦ੍ਧੁਨ੍ਤਿ. ਤੇਸਾਹਂ ਪੁਟ੍ਠੋ ਅਕ੍ਖਾਮੀਤਿ ਏਵਂ ਤੇਹਿ ਅਦ੍ਧਿਕਜਨੇਹਿ ਲਭਨਟ੍ਠਾਨਂ ਪੁਟ੍ਠੋ ¶ ‘‘ਅਹਂ ਪੁਬ੍ਬੇ ਅਕਤਪੁਞ੍ਞਤਾਯ ਇਦਾਨਿ ਈਦਿਸਾਨਂ ਕਿਞ੍ਚਿ ਦਾਤੁਂ ਅਸਮਤ੍ਥੋ ਜਾਤੋ, ਦਾਨਗ੍ਗਂ ਪਨ ਇਮੇਸਂ ਦਸ੍ਸੇਨ੍ਤੋ ਲਾਭਸ੍ਸ ਉਪਾਯਾਚਿਕ੍ਖਣੇਨ ਪੀਤਿਂ ਉਪ੍ਪਾਦੇਨ੍ਤੋ ਏਤ੍ਤਕੇਨਪਿ ਬਹੁਂ ਪੁਞ੍ਞਂ ਪਸਵਾਮੀ’’ਤਿ ਗਾਰਵਂ ਉਪ੍ਪਾਦੇਤ੍ਵਾ ਦਕ੍ਖਿਣਂ ਬਾਹੁਂ ਪਸਾਰੇਤ੍ਵਾ ਤੇਸਂ ਅਸਯ੍ਹਸੇਟ੍ਠਿਸ੍ਸ ਨਿਵੇਸਨਂ ਅਕ੍ਖਾਮਿ. ਤੇਨਾਹ ‘‘ਪਗ੍ਗਯ੍ਹ ਦਕ੍ਖਿਣਂ ਬਾਹੁ’’ਨ੍ਤਿਆਦਿ.

੨੭੪. ਤੇਨ ਪਾਣਿ ਕਾਮਦਦੋਤਿ ਤੇਨ ਪਰਦਾਨਪਕਾਸਨੇਨ ਪਰੇਨ ਕਤਸ੍ਸ ਦਾਨਸ੍ਸ ਸਕ੍ਕਚ੍ਚਂ ਅਨੁਮੋਦਨਮਤ੍ਤੇਨ ਹੇਤੁਨਾ ਇਦਾਨਿ ਮਯ੍ਹਂ ਹਤ੍ਥੋ ਕਪ੍ਪਰੁਕ੍ਖੋ ਵਿਯ ਸਨ੍ਤਾਨਕਲਤਾ ਵਿਯ ਚ ਕਾਮਦੁਹੋ ਇਚ੍ਛਿਤਿਚ੍ਛਿਤਦਾਯੀ ਕਾਮਦਦੋ ਹੋਤਿ. ਕਾਮਦਦੋ ਚ ਹੋਨ੍ਤੋ ਤੇਨ ਪਾਣਿ ਮਧੁਸ੍ਸਵੋ ਇਟ੍ਠਵਤ੍ਥੁਵਿਸ੍ਸਜ੍ਜਨਕੋ ਜਾਤੋ.

੨੭੬. ਨ ¶ ਕਿਰ ਤ੍ਵਂ ਅਦਾ ਦਾਨਨ੍ਤਿ ਕਿਰਾਤਿ ਅਨੁਸ੍ਸਵਨਤ੍ਥੇ ਨਿਪਾਤੋ, ਤ੍ਵਂ ਕਿਰ ਅਤ੍ਤਨੋ ਸਨ੍ਤਕਂ ਨ ਪਰਿਚ੍ਚਜਿ, ਸਕਪਾਣੀਹਿ ਸਹਤ੍ਥੇਹਿ ਯਸ੍ਸ ਕਸ੍ਸਚਿ ਸਮਣਸ੍ਸ ਵਾ ਬ੍ਰਾਹ੍ਮਣਸ੍ਸ ਵਾ ਕਿਞ੍ਚਿ ਦਾਨਂ ਨ ਅਦਾਸਿ. ਪਰਸ੍ਸ ਦਾਨਂ ਅਨੁਮੋਦਮਾਨੋਤਿ ਕੇਵਲਂ ਪਨ ਪਰੇਨ ਕਤਂ ਪਰਸ੍ਸ ਦਾਨਂ ‘‘ਅਹੋ ਦਾਨਂ ਪਵਤ੍ਤੇਸੀ’’ਤਿ ਅਨੁਮੋਦਮਾਨੋਯੇਵ ਵਿਹਾਸਿ.

੨੭੭. ਤੇਨ ਪਾਣਿ ਕਾਮਦਦੋਤਿ ਤੇਨ ਤੁਯ੍ਹਂ ਪਾਣਿ ਏਵਂ ਕਾਮਦਦੋ, ਅਹੋ ਅਚ੍ਛਰਿਯਾ ਵਤ ਪੁਞ੍ਞਾਨਂ ਗਤੀਤਿ ਅਧਿਪ੍ਪਾਯੋ.

੨੭੮. ਯੋ ਸੋ ਦਾਨਮਦਾ, ਭਨ੍ਤੇ, ਪਸਨ੍ਨੋ ਸਕਪਾਣਿਭੀਤਿ ਦੇਵਪੁਤ੍ਤਂ ਗਾਰਵੇਨ ਆਲਪਤਿ. ਭਨ੍ਤੇ, ਪਰੇਨ ¶ ਕਤਸ੍ਸ ਦਾਨਾਨੁਮੋਦਕਸ੍ਸ ਤਾਵ ਤੁਯ੍ਹਂ ਈਦਿਸਂ ਫਲਂ ਏਵਰੂਪੋ ਆਨੁਭਾਵੋ, ਯੋ ਪਨ ਸੋ ਅਸਯ੍ਹਮਹਾਸੇਟ੍ਠਿ ਮਹਾਦਾਨਂ ਅਦਾਸਿ, ਪਸਨ੍ਨਚਿਤ੍ਤੋ ਹੁਤ੍ਵਾ ਸਹਤ੍ਥੇਹਿ ਤਦਾ ਮਹਾਦਾਨਂ ਪਵਤ੍ਤੇਸਿ. ਸੋ ਹਿਤ੍ਵਾ ਮਾਨੁਸਂ ਦੇਹਨ੍ਤਿ ਸੋ ਇਧ ਮਨੁਸ੍ਸਤ੍ਤਭਾਵਂ ਪਹਾਯ. ਕਿਨ੍ਤਿ ਕਤਰਂ. ਨੁ ਸੋਤਿ ਨੂਤਿ ਨਿਪਾਤਮਤ੍ਤਂ. ਦਿਸਤਂ ਗਤੋਤਿ ਦਿਸਂ ਠਾਨਂ ਗਤੋ, ਕੀਦਿਸੀ ਤਸ੍ਸ ਗਤੋ ਨਿਪ੍ਫਤ੍ਤੀਤਿ ਅਸਯ੍ਹਸੇਟ੍ਠਿਨੋ ਅਭਿਸਮ੍ਪਰਾਯਂ ਪੁਚ੍ਛਿ.

੨੭੯. ਅਸਯ੍ਹਸਾਹਿਨੋਤਿ ਅਞ੍ਞੇਹਿ ਮਚ੍ਛਰੀਹਿ ਲੋਭਾਭਿਭੂਤੇਹਿ ਸਹਿਤੁਂ ਵਹਿਤੁਂ ਅਸਕ੍ਕੁਣੇਯ੍ਯਸ੍ਸ ਪਰਿਚ੍ਚਾਗਾਦਿਵਿਭਾਗਸ੍ਸ ਸਪ੍ਪੁਰਿਸਧੁਰਸ੍ਸ ਸਹਨਤੋ ¶ ਅਸਯ੍ਹਸਾਹਿਨੋ. ਅਙ੍ਗੀਰਸਸ੍ਸਾਤਿ ਅਙ੍ਗਤੋ ਨਿਕ੍ਖਮਨਕਜੁਤਿਸ੍ਸ. ਰਸੋਤਿ ਹਿ ਜੁਤਿਯਾ ਅਧਿਵਚਨਂ. ਤਸ੍ਸ ਕਿਰ ਯਾਚਕੇ ਆਗਚ੍ਛਨ੍ਤੇ ਦਿਸ੍ਵਾ ਉਲ਼ਾਰਂ ਪੀਤਿਸੋਮਨਸ੍ਸਂ ਉਪ੍ਪਜ੍ਜਤਿ, ਮੁਖਵਣ੍ਣੋ ਵਿਪ੍ਪਸੀਦਤਿ, ਤਂ ਅਤ੍ਤਨੋ ਪਚ੍ਚਕ੍ਖਂ ਕਤ੍ਵਾ ਏਵਮਾਹ. ਗਤਿਂ ਆਗਤਿਂ ਵਾਤਿ ਤਸ੍ਸ ‘‘ਅਸੁਕਂ ਨਾਮ ਗਤਿਂ, ਇਤੋ ਗਤੋ’’ਤਿ ਗਤਿਂ ਵਾ ‘‘ਤਤੋ ਵਾ ਪਨ ਅਸੁਕਸ੍ਮਿਂ ਕਾਲੇ ਇਧਾਗਮਿਸ੍ਸਤੀ’’ਤਿ ਆਗਤਿਂ ਵਾ ਨਾਹਂ ਜਾਨਾਮਿ, ਅਵਿਸਯੋ ਏਸ ਮਯ੍ਹਂ. ਸੁਤਞ੍ਚ ਮੇ ਵੇਸ੍ਸਵਣਸ੍ਸ ਸਨ੍ਤਿਕੇਤਿ ਅਪਿਚ ਖੋ ਉਪਟ੍ਠਾਨਂ ਗਤੇਨ ਵੇਸ੍ਸਵਣਸ੍ਸ ਮਹਾਰਾਜਸ੍ਸ ਸਨ੍ਤਿਕੇ ਸੁਤਮੇਤਂ ਮਯਾ. ਸਕ੍ਕਸ੍ਸ ਸਹਬ੍ਯਤਂ ਗਤੋ ਅਸਯ੍ਹੋਤਿ ਅਸਯ੍ਹਸੇਟ੍ਠਿ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਸਹਬ੍ਯਤਂ ਗਤੋ ਅਹੋਸਿ, ਤਾਵਤਿਂਸਭਵਨੇ ਨਿਬ੍ਬਤ੍ਤੋਤਿ ਅਤ੍ਥੋ.

੨੮੦. ਅਲਮੇਵ ਕਾਤੁਂ ਕਲ੍ਯਾਣਨ੍ਤਿ ਯਂਕਿਞ੍ਚਿ ਕਲ੍ਯਾਣਂ ਕੁਸਲਂ ਪੁਞ੍ਞਂ ਕਾਤੁਂ ਯੁਤ੍ਤਮੇਵ ਪਤਿਰੂਪਮੇਵ. ਤਤ੍ਥ ਪਨ ਯਂ ਸਬ੍ਬਸਾਧਾਰਣਂ ਸੁਕਤਤਰਂ, ਤਂ ਦਸ੍ਸੇਤੁਂ ‘‘ਦਾਨਂ ਦਾਤੁਂ ਯਥਾਰਹ’’ਨ੍ਤਿ ਵੁਤ੍ਤਂ, ਅਤ੍ਤਨੋ ਵਿਭਵਬਲਾਨੁਰੂਪਂ ਦਾਨਂ ਦਾਤੁਂ ਅਲਮੇਵ. ਤਤ੍ਥ ਕਾਰਣਮਾਹ ‘‘ਪਾਣਿਂ ਕਾਮਦਦਂ ਦਿਸ੍ਵਾ’’ਤਿ. ਯਤ੍ਰ ਹਿ ਨਾਮ ਪਰਕਤਪੁਞ੍ਞਾਨੁਮੋਦਨਪੁਬ੍ਬਕੇਨ ਦਾਨਪਤਿਨਿਵੇਸਨਮਗ੍ਗਾਚਿਕ੍ਖਣਮਤ੍ਤੇਨ ਅਯਂ ¶ ਹਤ੍ਥੋ ਕਾਮਦਦੋ ਦਿਟ੍ਠੋ, ਇਮਂ ਦਿਸ੍ਵਾ. ਕੋ ¶ ਪੁਞ੍ਞਂ ਨ ਕਰਿਸ੍ਸਤੀਤਿ ਮਾਦਿਸੋ ਕੋ ਨਾਮ ਅਤ੍ਤਨੋ ਪਤਿਟ੍ਠਾਨਭੂਤਂ ਪੁਞ੍ਞਂ ਨ ਕਰਿਸ੍ਸਤੀਤਿ.

੨੮੧. ਏਵਂ ਅਨਿਯਮਵਸੇਨ ਪੁਞ੍ਞਕਿਰਿਯਾਯ ਆਦਰਂ ਦਸ੍ਸੇਤ੍ਵਾ ਇਦਾਨਿ ਅਤ੍ਤਨਿ ਤਂ ਨਿਯਮੇਤ੍ਵਾ ਦਸ੍ਸੇਨ੍ਤੋ ‘‘ਸੋ ਹਿ ਨੂਨਾ’’ਤਿਆਦਿਗਾਥਾਦ੍ਵਯਮਾਹ. ਤਤ੍ਥ ਸੋਤਿ ਸੋ ਅਹਂ. ਹੀਤਿ ਅਵਧਾਰਣੇ ਨਿਪਾਤੋ, ਨੂਨਾਤਿ ਪਰਿਵਿਤਕ੍ਕੇ. ਇਤੋ ਗਨ੍ਤ੍ਵਾਤਿ ਇਤੋ ਮਰੁਭੂਮਿਤੋ ਅਪਗਨ੍ਤ੍ਵਾ. ਅਨੁਪ੍ਪਤ੍ਵਾਨ ਦ੍ਵਾਰਕਨ੍ਤਿ ਦ੍ਵਾਰਵਤੀਨਗਰਂ ਅਨੁਪਾਪੁਣਿਤ੍ਵਾ. ਪਟ੍ਠਪਯਿਸ੍ਸਾਮੀਤਿ ਪਵਤ੍ਤਯਿਸ੍ਸਾਮਿ.

ਏਵਂ ਅਙ੍ਕੁਰੇਨ ‘‘ਦਾਨਂ ਦਸ੍ਸਾਮੀ’’ਤਿ ਪਟਿਞ੍ਞਾਯ ਕਤਾਯ ਯਕ੍ਖੋ ਤੁਟ੍ਠਮਾਨਸੋ ‘‘ਮਾਰਿਸ, ਤ੍ਵਂ ਵਿਸ੍ਸਤ੍ਥੋ ਦਾਨਂ ਦੇਹਿ, ਅਹਂ ਪਨ ਤੇ ਸਹਾਯਕਿਚ੍ਚਂ ਕਰਿਸ੍ਸਾਮਿ, ਯੇਨ ਤੇ ਦੇਯ੍ਯਧਮ੍ਮੋ ਨ ਪਰਿਕ੍ਖਯਂ ਗਮਿਸ੍ਸਤਿ, ਤੇਨ ਪਕਾਰੇਨ ਕਰਿਸ੍ਸਾਮੀ’’ਤਿ ਤਂ ਦਾਨਕਿਰਿਯਾਯ ਸਮੁਤ੍ਤੇਜੇਤ੍ਵਾ ‘‘ਬ੍ਰਾਹ੍ਮਣ ਵਾਣਿਜ, ਤ੍ਵਂ ਕਿਰ ਮਾਦਿਸੇ ਬਲਕ੍ਕਾਰੇਨ ਨੇਤੁਕਾਮੋ ਅਤ੍ਤਨੋ ਪਮਾਣਂ ਨ ਜਾਨਾਸੀ’’ਤਿ ਤਸ੍ਸ ¶ ਭਣ੍ਡਮਨ੍ਤਰਧਾਪੇਤ੍ਵਾ ਤਂ ਯਕ੍ਖਵਿਭਿਂਸਕਾਯ ਭਿਂਸਾਪੇਨ੍ਤੋ ਸਨ੍ਤਜ੍ਜੇਸਿ. ਅਥ ਨਂ ਅਙ੍ਕੁਰੋ ਨਾਨਪ੍ਪਕਾਰਂ ਯਾਚਿਤ੍ਵਾ ਬ੍ਰਾਹ੍ਮਣੇਨ ਖਮਾਪੇਨ੍ਤੋ ਪਸਾਦੇਤ੍ਵਾ ਸਬ੍ਬਭਣ੍ਡਂ ਪਾਕਤਿਕਂ ਕਾਰਾਪੇਤ੍ਵਾ ਰਤ੍ਤਿਯਾ ਉਪਗਤਾਯ ਯਕ੍ਖਂ ਵਿਸ੍ਸਜ੍ਜੇਤ੍ਵਾ ਗਚ੍ਛਨ੍ਤੋ ਤਸ੍ਸ ਅਵਿਦੂਰੇ ਅਞ੍ਞਤਰਂ ਅਤਿਵਿਯ ਬੀਭਚ੍ਛਦਸ੍ਸਨਂ ਪੇਤਂ ਦਿਸ੍ਵਾ ਤੇਨ ਕਤਕਮ੍ਮਂ ਪੁਚ੍ਛਨ੍ਤੋ –

‘‘ਕੇਨ ਤੇ ਅਙ੍ਗੁਲੀ ਕੁਣਾ, ਮੁਖਞ੍ਚ ਕੁਣਲੀਕਤਂ;

ਅਕ੍ਖੀਨਿ ਚ ਪਗ੍ਘਰਨ੍ਤਿ, ਕਿਂ ਪਾਪਂ ਪਕਤਂ ਤਯਾ’’ਤਿ. –

ਗਾਥਮਾਹ. ਤਤ੍ਥ ਕੁਣਾਤਿ ਕੁਣਿਕਾ ਪਟਿਕੁਣਿਕਾ ਅਨੁਜੁਭੂਤਾ. ਕੁਣਲੀਕਤਨ੍ਤਿ ਮੁਖਵਿਕਾਰੇਨ ਵਿਕੁਣਿਤਂ ਸਂਕੁਣਿਤਂ. ਪਗ੍ਘਰਨ੍ਤੀਤਿ ਅਸੁਚਿਂ ਵਿਸ੍ਸਨ੍ਦਨ੍ਤਿ.

‘‘ਅਙ੍ਗੀਰਸਸ੍ਸ ¶ ਗਹਪਤਿਨੋ, ਸਦ੍ਧਸ੍ਸ ਘਰਮੇਸਿਨੋ;

ਤਸ੍ਸਾਹਂ ਦਾਨਵਿਸ੍ਸਗ੍ਗੇ, ਦਾਨੇ ਅਧਿਕਤੋ ਅਹੁਂ.

‘‘ਤਤ੍ਥ ¶ ਯਾਚਨਕੇ ਦਿਸ੍ਵਾ, ਆਗਤੇ ਭੋਜਨਤ੍ਥਿਕੇ;

ਏਕਮਨ੍ਤਂ ਅਪਕ੍ਕਮ੍ਮ, ਅਕਾਸਿਂ ਕੁਣਲਿਂ ਮੁਖਂ.

‘‘ਤੇਨ ਮੇ ਅਙ੍ਗੁਲੀ ਕੁਣਾ, ਮੁਖਞ੍ਚ ਕੁਣਲੀਕਤਂ;

ਅਕ੍ਖੀਨਿ ਮੇ ਪਗ੍ਘਰਨ੍ਤਿ, ਤਂ ਪਾਪਂ ਪਕਤਂ ਮਯਾ’’ਤਿ. –

੨੮੪. ਤਤ੍ਥ ‘‘ਅਙ੍ਗੀਰਸਸ੍ਸਾ’’ਤਿਆਦਿਨਾ ਅਸਯ੍ਹਸੇਟ੍ਠਿਂ ਕਿਤ੍ਤੇਤਿ. ਘਰਮੇਸਿਨੋਤਿ ਘਰਮਾਵਸਨ੍ਤਸ੍ਸ ਗਹਟ੍ਠਸ੍ਸ. ਦਾਨਵਿਸ੍ਸਗ੍ਗੇਤਿ ਦਾਨਗ੍ਗੇ ਪਰਿਚ੍ਚਾਗਟ੍ਠਾਨੇ. ਦਾਨੇ ਅਧਿਕਤੋ ਅਹੁਨ੍ਤਿ ਦੇਯ੍ਯਧਮ੍ਮਸ੍ਸ ਪਰਿਚ੍ਚਜਨੇ ਦਾਨਾਧਿਕਾਰੇ ਅਧਿਕਤੋ ਠਪਿਤੋ ਅਹੋਸਿਂ.

੨੮੫. ਏਕਮਨ੍ਤਂ ਅਪਕ੍ਕਮ੍ਮਾਤਿ ਯਾਚਨਕੇ ਭੋਜਨਤ੍ਥਿਕੇ ਆਗਤੇ ਦਿਸ੍ਵਾ ਦਾਨਬ੍ਯਾਵਟੇਨ ਦਾਨਗ੍ਗਤੋ ਅਨਪਕ੍ਕਮ੍ਮ ਯਥਾਠਾਨੇਯੇਵ ਠਤ੍ਵਾ ਸਞ੍ਜਾਤਪੀਤਿਸੋਮਨਸ੍ਸੇਨ ¶ ਵਿਪ੍ਪਸਨ੍ਨਮੁਖਵਣ੍ਣੇਨ ਸਹਤ੍ਥੇਨ ਦਾਨਂ ਦਾਤਬ੍ਬਂ, ਪਰੇਹਿ ਵਾ ਪਤਿਰੂਪੇਹਿ ਦਾਪੇਤਬ੍ਬਂ, ਅਹਂ ਪਨ ਤਥਾ ਅਕਤ੍ਵਾ ਯਾਚਨਕੇ ਆਗਚ੍ਛਨ੍ਤੇ ਦੂਰਤੋਵ ਦਿਸ੍ਵਾ ਅਤ੍ਤਾਨਂ ਅਦਸ੍ਸੇਨ੍ਤੋ ਏਕਮਨ੍ਤਂ ਅਪਕ੍ਕਮ੍ਮ ਅਪਕ੍ਕਮਿਤ੍ਵਾ. ਅਕਾਸਿਂ ਕੁਣਲਿਂ ਮੁਖਨ੍ਤਿ ਵਿਕੁਣਿਤਂ ਸਙ੍ਕੁਚਿਤਂ ਮੁਖਂ ਅਕਾਸਿਂ.

੨੮੬. ਤੇਨਾਤਿ ਯਸ੍ਮਾ ਤਦਾਹਂ ਸਾਮਿਨਾ ਦਾਨਾਧਿਕਾਰੇ ਨਿਯੁਤ੍ਤੋ ਸਮਾਨੋ ਦਾਨਕਾਲੇ ਉਪਟ੍ਠਿਤੇ ਮਚ੍ਛਰਿਯਾਪਕਤੋ ਦਾਨਗ੍ਗਤੋ ਅਪਕ੍ਕਮਨ੍ਤੋ ਪਾਦੇਹਿ ਸਙ੍ਕੋਚਂ ਆਪਜ੍ਜਿਂ, ਸਹਤ੍ਥੇਹਿ ਦਾਤਬ੍ਬੇ ਤਥਾ ਅਕਤ੍ਵਾ ਹਤ੍ਥਸਙ੍ਕੋਚਂ ਆਪਜ੍ਜਿਂ, ਪਸਨ੍ਨਮੁਖੇਨ ਭਵਿਤਬ੍ਬੇ ਮੁਖਸਙ੍ਕੋਚਂ ਆਪਜ੍ਜਿਂ, ਪਿਯਚਕ੍ਖੂਹਿ ਓਲੋਕੇਤਬ੍ਬੇ ਚਕ੍ਖੁਕਾਲੁਸਿਯਂ ਉਪ੍ਪਾਦੇਸਿਂ, ਤਸ੍ਮਾ ਹਤ੍ਥਙ੍ਗੁਲਿਯੋ ਚ ¶ ਪਾਦਙ੍ਗੁਲਿਯੋ ਚ ਕੁਣਿਤਾ ਜਾਤਾ, ਮੁਖਞ੍ਚ ਕੁਣਲੀਕਤਂ ਵਿਰੂਪਰੂਪਂ ਸਙ੍ਕੁਚਿਤਂ, ਅਕ੍ਖੀਨਿ ਅਸੁਚੀਦੁਗ੍ਗਨ੍ਧਜੇਗੁਚ੍ਛਾਨਿ ਅਸ੍ਸੂਨਿ ਪਗ੍ਘਰਨ੍ਤੀਤਿ ਅਤ੍ਥੋ. ਤੇਨ ਵੁਤ੍ਤਂ –

‘‘ਤੇਨ ਮੇ ਅਙ੍ਗੁਲੀ ਕੁਣਾ, ਮੁਖਞ੍ਚ ਕੁਣਲੀਕਤਂ;

ਅਕ੍ਖੀਨਿ ਮੇ ਪਗ੍ਘਰਨ੍ਤਿ, ਤਂ ਪਾਪਂ ਪਕਤਂ ਮਯਾ’’ਤਿ.

ਤਂ ਸੁਤ੍ਵਾ ਅਙ੍ਕੁਰੋ ਪੇਤਂ ਗਰਹਨ੍ਤੋ –

‘‘ਧਮ੍ਮੇਨ ¶ ਤੇ ਕਾਪੁਰਿਸ, ਮੁਖਞ੍ਚ ਕੁਣਲੀਕਤਂ;

ਅਕ੍ਖੀਨਿ ਚ ਪਗ੍ਘਰਨ੍ਤਿ, ਯਂ ਤਂ ਪਰਸ੍ਸ ਦਾਨਸ੍ਸ;

ਗਾਥਮਾਹ. ਤਤ੍ਥ ਧਮ੍ਮੇਨਾਤਿ ਯੁਤ੍ਤੇਨੇਵ ਕਾਰਣੇਨ. ਤੇਤਿ ਤਵ. ਕਾਪੁਰਿਸਾਤਿ ਲਾਮਕਪੁਰਿਸ. ਯਨ੍ਤਿ ਯਸ੍ਮਾ. ਪਰਸ੍ਸ ਦਾਨਸ੍ਸਾਤਿ ਪਰਸ੍ਸ ਦਾਨਸ੍ਮਿਂ. ਅਯਮੇਵ ਵਾ ਪਾਠੋ.

ਪੁਨ ਅਙ੍ਕੁਰੋ ਤਂ ਦਾਨਪਤਿਂ ਸੇਟ੍ਠਿਂ ਗਰਹਨ੍ਤੋ –

‘‘ਕਥਞ੍ਹਿ ਦਾਨਂ ਦਦਮਾਨੋ, ਕਰੇਯ੍ਯ ਪਰਪਤ੍ਤਿਯਂ;

ਅਨ੍ਨਪਾਨਂ ਖਾਦਨੀਯਂ, ਵਤ੍ਥਸੇਨਾਸਨਾਨਿ ਚਾ’’ਤਿ. –

ਗਾਥਮਾਹ. ਤਸ੍ਸਤ੍ਥੋ – ਦਾਨਂ ਦਦਨ੍ਤੋ ਪੁਰਿਸੋ ਕਥਞ੍ਹਿ ਨਾਮ ਤਂ ਪਰਪਤ੍ਤਿਯਂ ਪਰੇਨ ਪਾਪੇਤਬ੍ਬਂ ਸਾਧੇਤਬ੍ਬਂ ਕਰੇਯ੍ਯ, ਅਤ੍ਤਪਚ੍ਚਕ੍ਖਮੇਵ ਕਤ੍ਵਾ ਸਹਤ੍ਥੇਨੇਵ ¶ ਦਦੇਯ੍ਯ, ਸਯਂ ਵਾ ਤਤ੍ਥ ਬ੍ਯਾਵਟੋ ਭਵੇਯ੍ਯ, ਅਞ੍ਞਥਾ ਅਤ੍ਤਨੋ ਦੇਯ੍ਯਧਮ੍ਮੋ ਅਟ੍ਠਾਨੇ ਵਿਦ੍ਧਂਸਿਯੇਥ, ਦਕ੍ਖਿਣੇਯ੍ਯਾ ਚ ਦਾਨੇਨ ਪਰਿਹਾਯੇਯ੍ਯੁਨ੍ਤਿ.

ਏਵਂ ¶ ਤਂ ਗਰਹਿਤ੍ਵਾ ਇਦਾਨਿ ਅਤ੍ਤਨਾ ਪਟਿਪਜ੍ਜਿਤਬ੍ਬਵਿਧਿਂ ਦਸ੍ਸੇਨ੍ਤੋ –

‘‘ਸੋ ਹਿ ਨੂਨ ਇਤੋ ਗਨ੍ਤ੍ਵਾ, ਅਨੁਪ੍ਪਤ੍ਵਾਨ ਦ੍ਵਾਰਕਂ;

ਦਾਨਂ ਪਟ੍ਠਪਯਿਸ੍ਸਾਮਿ, ਯਂ ਮਮਸ੍ਸ ਸੁਖਾਵਹਂ.

‘‘ਦਸ੍ਸਾਮਨ੍ਨਞ੍ਚ ਪਾਨਞ੍ਚ, ਵਤ੍ਥਸੇਨਾਸਨਾਨਿ ਚ;

ਪਪਞ੍ਚ ਉਦਪਾਨਞ੍ਚ, ਦੁਗ੍ਗੇ ਸਙ੍ਕਮਨਾਨਿ ਚਾ’’ਤਿ. –

‘‘ਤਤੋ ਹਿ ਸੋ ਨਿਵਤ੍ਤਿਤ੍ਵਾ, ਅਨੁਪ੍ਪਤ੍ਵਾਨ ਦ੍ਵਾਰਕਂ;

ਦਾਨਂ ਪਟ੍ਠਪਯਿ ਅਙ੍ਕੁਰੋ, ਯਂਤੁਮਸ੍ਸ ਸੁਖਾਵਹਂ.

‘‘ਅਦਾ ¶ ਅਨ੍ਨਞ੍ਚ ਪਾਨਞ੍ਚ, ਵਤ੍ਥਸੇਨਾਸਨਾਨਿ ਚ;

ਪਪਞ੍ਚ ਉਦਪਾਨਞ੍ਚ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਕੋ ਛਾਤੋ ਕੋ ਚ ਤਸਿਤੋ, ਕੋ ਵਤ੍ਥਂ ਪਰਿਦਹਿਸ੍ਸਤਿ;

ਕਸ੍ਸ ਸਨ੍ਤਾਨਿ ਯੋਗ੍ਗਾਨਿ, ਇਤੋ ਯੋਜੇਨ੍ਤੁ ਵਾਹਨਂ.

‘‘ਕੋ ਛਤ੍ਤਿਚ੍ਛਤਿ ਗਨ੍ਧਞ੍ਚ, ਕੋ ਮਾਲਂ ਕੋ ਉਪਾਹਨਂ;

ਇਤਿਸ੍ਸੁ ਤਤ੍ਥ ਘੋਸੇਨ੍ਤਿ, ਕਪ੍ਪਕਾ ਸੂਦਮਾਗਧਾ;

ਸਦਾ ਸਾਯਞ੍ਚ ਪਾਤੋ ਚ, ਅਙ੍ਗੁਰਸ੍ਸ ਨਿਵੇਸਨੇ’’ਤਿ. –

ਚਤਸ੍ਸੋ ਗਾਥਾ ਅਙ੍ਗੁਰਸ੍ਸ ਪਟਿਪਤ੍ਤਿਂ ਦਸ੍ਸੇਤੁਂ ਸਙ੍ਗੀਤਿਕਾਰੇਹਿ ਠਪਿਤਾ.

੨੯੧. ਤਤ੍ਥ ਤਤੋਤਿ ਮਰੁਕਨ੍ਤਾਰਤੋ. ਨਿਵਤ੍ਤਿਤ੍ਵਾਤਿ ਪਟਿਨਿਵਤ੍ਤਿਤ੍ਵਾ. ਅਨੁਪ੍ਪਤ੍ਵਾਨ ਦ੍ਵਾਰਕਨ੍ਤਿ ਦ੍ਵਾਰਵਤੀਨਗਰਂ ਅਨੁਪਾਪੁਣਿਤ੍ਵਾ. ਦਾਨਂ ਪਟ੍ਠਪਯਿ ਅਙ੍ਗੁਰੋਤਿ ਯਕ੍ਖੇਨ ਪਰਿਪੂਰਿਤਸਕਲਕੋਟ੍ਠਾਗਾਰੋ ਸਬ੍ਬਪਾਥੇਯ੍ਯਕਂ ਮਹਾਦਾਨਂ ਸੋ ਅਙ੍ਗੁਰੋ ਪਟ੍ਠਪੇਸਿ. ਯਂਤੁਮਸ੍ਸ ਸੁਖਾਵਹਨ੍ਤਿ ਯਂ ਅਤ੍ਤਨੋ ਸਮ੍ਪਤਿ ਆਯਤਿਞ੍ਚ ਸੁਖਨਿਬ੍ਬਤ੍ਤਕਂ.

੨੯੩. ਕੋ ¶ ਛਾਤੋਤਿ ਕੋ ਜਿਘਚ੍ਛਿਤੋ, ਸੋ ਆਗਨ੍ਤ੍ਵਾ ਯਥਾਰੁਚਿ ਭੁਞ੍ਜਤੂਤਿ ਅਧਿਪ੍ਪਾਯੋ. ਏਸੇਵ ਨਯੋ ਸੇਸੇਸੁਪਿ. ਤਸਿਤੋਤਿ ¶ ਪਿਪਾਸਿਤੋ. ਪਰਿਦਹਿਸ੍ਸਤੀਤਿ ਨਿਵਾਸੇਸ੍ਸਤਿ ਪਾਰੁਪਿਸ੍ਸਤਿ ਚਾਤਿ ਅਤ੍ਥੋ. ਸਨ੍ਤਾਨੀਤਿ ਪਰਿਸ੍ਸਮਪ੍ਪਤ੍ਤਾਨਿ. ਯੋਗ੍ਗਾਨੀਤਿ ਰਥਵਾਹਨਾਨਿ. ਇਤੋ ਯੋਜੇਨ੍ਤੁ ਵਾਹਨਨ੍ਤਿ ਇਤੋ ਯੋਗ੍ਗਸਮੂਹਤੋ ਯਥਾਰੁਚਿਤਂ ਗਹੇਤ੍ਵਾ ਵਾਹਨਂ ਯੋਜੇਨ੍ਤੁ.

੨੯੪. ਕੋ ਛਤ੍ਤਿਚ੍ਛਤੀਤਿ ਕੋ ਕਿਲਞ੍ਜਛਤ੍ਤਾਦਿਭੇਦਂ ਛਤ੍ਤਂ ਇਚ੍ਛਤਿ, ਸੋ ਗਣ੍ਹਾਤੂਤਿ ਅਧਿਪ੍ਪਾਯੋ. ਸੇਸੇਸੁਪਿ ਏਸੇਵ ਨਯੋ. ਗਨ੍ਧਨ੍ਤਿ ਚਤੁਜ੍ਜਾਤਿਯਗਨ੍ਧਾਦਿਕਂ ਗਨ੍ਧਂ. ਮਾਲਨ੍ਤਿ ਗਨ੍ਥਿਤਾਗਨ੍ਥਿਤਭੇਦਂ ਪੁਪ੍ਫਂ. ਉਪਾਹਨਨ੍ਤਿ ਖਲ੍ਲਬਦ੍ਧਾਦਿਭੇਦਂ ਉਪਾਹਨਂ. ਇਤਿਸ੍ਸੂਤਿ ਏਤ੍ਥ ਸੂਤਿ ਨਿਪਾਤਮਤ੍ਤਂ, ਇਤਿ ਏਵਂ ‘‘ਕੋ ਛਾਤੋ, ਕੋ ਤਸਿਤੋ’’ਤਿਆਦਿਨਾਤਿ ਅਤ੍ਥੋ. ਕਪ੍ਪਕਾਤਿ ਨ੍ਹਾਪਿਤਕਾ. ਸੂਦਾਤਿ ਭਤ੍ਤਕਾਰਕਾ. ਮਾਗਧਾਤਿ ਗਨ੍ਧਿਨੋ. ਸਦਾਤਿ ਸਬ੍ਬਕਾਲਂ ਦਿਵਸੇ ਦਿਵਸੇ ਸਾਯਞ੍ਚ ਪਾਤੋ ਚ ਤਤ੍ਥ ਅਙ੍ਗੁਰਸ੍ਸ ਨਿਵੇਸਨੇ ਘੋਸੇਨ੍ਤਿ ਉਗ੍ਘੋਸੇਨ੍ਤੀਤਿ ਯੋਜਨਾ.

ਏਵਂ ¶ ਮਹਾਦਾਨਂ ਪਵਤ੍ਤੇਨ੍ਤਸ੍ਸ ਗਚ੍ਛਨ੍ਤੇ ਕਾਲੇ ਤਿਤ੍ਤਿਭਾਵਤੋ ਅਤ੍ਥਿਕਜਨੇਹਿ ਪਵਿਵਿਤ੍ਤਂ ਵਿਰਲ਼ਂ ਦਾਨਗ੍ਗਂ ਅਹੋਸਿ. ਤਂ ਦਿਸ੍ਵਾ ਅਙ੍ਕੁਰੋ ਦਾਨੇ ਉਲ਼ਾਰਜ੍ਝਾਸਯਤਾਯ ਅਤੁਟ੍ਠਮਾਨਸੋ ਹੁਤ੍ਵਾ ਅਤ੍ਤਨੋ ਦਾਨੇ ਨਿਯੁਤ੍ਤਂ ਸਿਨ੍ਧਕਂ ਨਾਮ ਮਾਣਵਂ ਆਮਨ੍ਤੇਤ੍ਵਾ –

‘‘ਸੁਖਂ ਸੁਪਤਿ ਅਙ੍ਕੁਰੋ, ਇਤਿ ਜਾਨਾਤਿ ਮਂ ਜਨੋ;

ਦੁਕ੍ਖਂ ਸੁਪਾਮਿ ਸਿਨ੍ਧਕ, ਯਂ ਨ ਪਸ੍ਸਾਮਿ ਯਾਚਕੇ.

‘‘ਸੁਖਂ ਸੁਪਤਿ ਅਙ੍ਕੁਰੋ, ਇਤਿ ਜਾਨਾਤਿ ਮਂ ਜਨੋ;

ਦੁਕ੍ਖਂ ਸੁਪਾਮਿ ਸਿਨ੍ਧਕ, ਅਪ੍ਪਕੇ ਸੁ ਵਨਿਬ੍ਬਕੇ’’ਤਿ. –

ਗਾਥਾਦ੍ਵਯਮਾਹ. ਤਤ੍ਥ ਸੁਖਂ ਸੁਪਤਿ ਅਙ੍ਕੁਰੋ, ਇਤਿ ਜਾਨਾਤਿ ਮਂ ਜਨੋਤਿ ‘‘ਅਙ੍ਕੁਰੋ ਰਾਜਾ ਯਸਭੋਗਸਮਪ੍ਪਿਤੋ ਦਾਨਪਤਿ ਅਤ੍ਤਨੋ ਭੋਗਸਮ੍ਪਤ੍ਤਿਯਾ ਦਾਨਸਮ੍ਪਤ੍ਤਿਯਾ ਚ ਸੁਖਂ ਸੁਪਤਿ, ਸੁਖੇਨੇਵ ¶ ਨਿਦ੍ਦਂ ਉਪਗਚ੍ਛਤਿ, ਸੁਖਂ ਪਟਿਬੁਜ੍ਝਤੀ’’ਤਿ ਏਵਂ ਮਂ ਜਨੋ ਸਮ੍ਭਾਵੇਤਿ. ਦੁਕ੍ਖਂ ਸੁਪਾਮਿ ਸਿਨ੍ਧਕਾਤਿ ਅਹਂ ਪਨ ਸਿਨ੍ਧਕ ਦੁਕ੍ਖਮੇਵ ਸੁਪਾਮਿ. ਕਸ੍ਮਾ? ਯਂ ਨ ਪਸ੍ਸਾਮਿ ਯਾਚਕੇਤਿ, ਯਸ੍ਮਾ ਮਮ ਅਜ੍ਝਾਸਯਾਨੁਰੂਪਂ ¶ ਦੇਯ੍ਯਧਮ੍ਮਪਟਿਗ੍ਗਾਹਕੇ ਬਹੂ ਯਾਚਕੇ ਨ ਪਸ੍ਸਾਮਿ, ਤਸ੍ਮਾਤਿ ਅਤ੍ਥੋ. ਅਪ੍ਪਕੇ ਸੁ ਵਨਿਬ੍ਬਕੇਤਿ ਵਨਿਬ੍ਬਕਜਨੇ ਅਪ੍ਪਕੇ ਕਤਿਪਯੇ ਜਾਤੇ ਦੁਕ੍ਖਂ ਸੁਪਾਮੀਤਿ ਯੋਜਨਾ. ਸੂਤਿ ਚ ਨਿਪਾਤਮਤ੍ਤਂ, ਅਪ੍ਪਕੇ ਵਨਿਬ੍ਬਕਜਨੇ ਸਤੀਤਿ ਅਤ੍ਥੋ.

ਤਂ ਸੁਤ੍ਵਾ ਸਿਨ੍ਧਕੋ ਤਸ੍ਸ ਉਲ਼ਾਰਂ ਦਾਨਾਧਿਮੁਤ੍ਤਿਂ ਪਾਕਟਤਰਂ ਕਾਤੁਕਾਮੋ –

‘‘ਸਕ੍ਕੋ ਚੇ ਤੇ ਵਰਂ ਦਜ੍ਜਾ, ਤਾਵਤਿਂਸਾਨਮਿਸ੍ਸਰੋ;

ਕਿਸ੍ਸ ਸਬ੍ਬਸ੍ਸ ਲੋਕਸ੍ਸ, ਵਰਮਾਨੋ ਵਰਂ ਵਰੇ’’ਤਿ. –

ਗਾਥਮਾਹ. ਤਸ੍ਸਤ੍ਥੋ – ਤਾਵਤਿਂਸਾਨਂ ਦੇਵਾਨਂ ਸਬ੍ਬਸ੍ਸ ਚ ਲੋਕਸ੍ਸ ਇਸ੍ਸਰੋ ਸਕ੍ਕੋ ‘‘ਵਰਂ ਵਰਸ੍ਸੁ, ਅਙ੍ਕੁਰ, ਯਂਕਿਞ੍ਚਿ ਮਨਸਿਚ੍ਛਿਤ’’ਨ੍ਤਿ ਤੁਯ੍ਹਂ ਵਰਂ ਦਜ੍ਜਾ ਦਦੇਯ੍ਯ ਚੇ, ਵਰਮਾਨੋ ਪਤ੍ਥਯਮਾਨੋ ਕਿਸ੍ਸ ਕੀਦਿਸਂ ਵਰਂ ਵਰੇਯ੍ਯਾਸੀਤਿ ਅਤ੍ਥੋ.

ਅਥ ਅਙ੍ਕੁਰੋ ਅਤ੍ਤਨੋ ਅਜ੍ਝਾਸਯਂ ਯਾਥਾਵਤੋ ਪਵੇਦੇਨ੍ਤੋ –

‘‘ਸਕ੍ਕੋ ¶ ਚੇ ਮੇ ਵਰਂ ਦਜ੍ਜਾ, ਤਾਵਤਿਂਸਾਨਮਿਸ੍ਸਰੋ;

ਕਾਲੁਟ੍ਠਿਤਸ੍ਸ ਮੇ ਸਤੋ, ਸੂਰਿਯੁਗ੍ਗਮਨਂ ਪਤਿ;

ਦਿਬ੍ਬਾ ਭਕ੍ਖਾ ਪਾਤੁਭਵੇਯ੍ਯੁਂ, ਸੀਲਵਨ੍ਤੋ ਚ ਯਾਚਕਾ.

‘‘ਦਦਤੋ ਮੇ ਨ ਖੀਯੇਥ, ਦਤ੍ਵਾ ਨਾਨੁਤਪੇਯ੍ਯਹਂ;

ਦਦਂ ਚਿਤ੍ਤਂ ਪਸਾਦੇਯ੍ਯਂ, ਏਤਂ ਸਕ੍ਕਂ ਵਰਂ ਵਰੇ’’ਤਿ. – ਦ੍ਵੇ ਗਾਥਾ ਅਭਾਸਿ;

੨੯੮. ਤਤ੍ਥ ਕਾਲੁਟ੍ਠਿਤਸ੍ਸ ਮੇ ਸਤੋਤਿ ਕਾਲੇ ਪਾਤੋ ਵੁਟ੍ਠਿਤਸ੍ਸ ਅਤ੍ਥਿਕਾਨਂ ਦਕ੍ਖਿਣੇਯ੍ਯਾਨਂ ਅਪਚਾਯਨਪਾਰਿਚਰਿਯਾਦਿਵਸੇਨ ਉਟ੍ਠਾਨਵੀਰਿਯਸਮ੍ਪਨ੍ਨਸ੍ਸ ¶ ਮੇ ਸਮਾਨਸ੍ਸ. ਸੂਰਿਯੁਗ੍ਗਮਨਂ ਪਤੀਤਿ ਸੂਰਿਯੁਗ੍ਗਮਨਵੇਲਾਯਂ. ਦਿਬ੍ਬਾ ਭਕ੍ਖਾ ਪਾਤੁਭਵੇਯ੍ਯੁਨ੍ਤਿ ਦੇਵਲੋਕਪਰਿਯਾਪਨ੍ਨਾ ਆਹਾਰਾ ਉਪ੍ਪਜ੍ਜੇਯ੍ਯੁਂ. ਸੀਲਵਨ੍ਤੋ ਚ ਯਾਚਕਾਤਿ ਯਾਚਕਾ ਚ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਭਵੇਯ੍ਯੁਂ.

੨੯੯. ਦਦਤੋ ¶ ਮੇ ਨ ਖੀਯੇਥਾਤਿ ਆਗਤਾਗਤਾਨਂ ਦਾਨਂ ਦਦਤੋ ਚ ਮੇ ਦੇਯ੍ਯਧਮ੍ਮੋ ਨ ਖੀਯੇਥ, ਨ ਪਰਿਕ੍ਖਯਂ ਗਚ੍ਛੇਯ੍ਯ. ਦਤ੍ਵਾ ਨਾਨੁਤਪੇਯ੍ਯਹਨ੍ਤਿ ਤਞ੍ਚ ਦਾਨਂ ਦਤ੍ਵਾ ਕਿਞ੍ਚਿਦੇਵ ਅਪ੍ਪਸਾਦਕਂ ਦਿਸ੍ਵਾ ਤੇਨ ਅਹਂ ਪਚ੍ਛਾ ਨਾਨੁਤਪੇਯ੍ਯਂ. ਦਦਂ ਚਿਤ੍ਤਂ ਪਸਾਦੇਯ੍ਯਨ੍ਤਿ ਦਦਮਾਨੋ ਚਿਤ੍ਤਂ ਪਸਾਦੇਯ੍ਯਂ, ਪਸਨ੍ਨਚਿਤ੍ਤੋਯੇਵ ਹੁਤ੍ਵਾ ਦਦੇਯ੍ਯਂ. ਏਤਂ ਸਕ੍ਕਂ ਵਰਂ ਵਰੇਤਿ ਸਕ੍ਕਂ ਦੇਵਾਨਮਿਨ੍ਦਂ ਆਰੋਗ੍ਯਸਮ੍ਪਦਾ, ਦੇਯ੍ਯਧਮ੍ਮਸਮ੍ਪਦਾ, ਦਕ੍ਖਿਣੇਯ੍ਯਸਮ੍ਪਦਾ, ਦੇਯ੍ਯਧਮ੍ਮਸ੍ਸ ਅਪਰਿਮਿਤਸਮ੍ਪਦਾ, ਦਾਯਕਸਮ੍ਪਦਾਤਿ ਏਤਂ ਪਞ੍ਚਵਿਧਂ ਵਰਂ ਵਰੇਯ੍ਯਂ. ਏਤ੍ਥ ਚ ‘‘ਕਾਲੁਟ੍ਠਿਤਸ੍ਸ ਮੇ ਸਤੋ’’ਤਿ ਏਤੇਨ ਆਰੋਗ੍ਯਸਮ੍ਪਦਾ, ‘‘ਦਿਬ੍ਬਾ ਭਕ੍ਖਾ ਪਾਤੁਭਵੇਯ੍ਯੁ’’ਨ੍ਤਿ ਏਤੇਨ ਦੇਯ੍ਯਧਮ੍ਮਸਮ੍ਪਦਾ, ‘‘ਸੀਲਵਨ੍ਤੋ ਚ ਯਾਚਕਾ’’ਤਿ ਏਤੇਨ ਦਕ੍ਖਿਣੇਯ੍ਯਸਮ੍ਪਦਾ, ‘‘ਦਦਤੋ ਮੇ ਨ ਖੀਯੇਥਾ’’ਤਿ ਏਤੇਨ ਦੇਯ੍ਯਧਮ੍ਮਸ੍ਸ ਅਪਰਿਮਿਤਸਮ੍ਪਦਾ, ‘‘ਦਤ੍ਵਾ ਨਾਨੁਤਪੇਯ੍ਯਹਂ, ਦਦਂ ਚਿਤ੍ਤਂ ਪਸਾਦੇਯ੍ਯ’’ਨ੍ਤਿ ਏਤੇਹਿ ਦਾਯਕਸਮ੍ਪਦਾਤਿ ਇਮੇ ਪਞ੍ਚ ਅਤ੍ਥਾ ਵਰਭਾਵੇਨ ਇਚ੍ਛਿਤਾ. ਤੇ ਚ ਖੋ ਦਾਨਮਯਪੁਞ੍ਞਸ੍ਸ ਯਾਵਦੇਵ ਉਲ਼ਾਰਭਾਵਾਯਾਤਿ ਵੇਦਿਤਬ੍ਬਾ.

ਏਵਂ ਅਙ੍ਕੁਰੇਨ ਅਤ੍ਤਨੋ ਅਜ੍ਝਾਸਯੇ ਪਵੇਦਿਤੇ ਤਤ੍ਥ ਨਿਸਿਨ੍ਨੋ ਨੀਤਿਸਤ੍ਥੇ ਕਤਪਰਿਚਯੋ ਸੋਨਕੋ ਨਾਮ ਏਕੋ ਪੁਰਿਸੋ ਤਂ ਅਤਿਦਾਨਤੋ ਵਿਚ੍ਛਿਨ੍ਦਿਤੁਕਾਮੋ –

‘‘ਨ ਸਬ੍ਬਵਿਤ੍ਤਾਨਿ ਪਰੇ ਪਵੇਚ੍ਛੇ, ਦਦੇਯ੍ਯ ਦਾਨਞ੍ਚ ਧਨਞ੍ਚ ਰਕ੍ਖੇ;

ਤਸ੍ਮਾ ਹਿ ਦਾਨਾ ਧਨਮੇਵ ਸੇਯ੍ਯੋ, ਅਤਿਪ੍ਪਦਾਨੇਨ ਕੁਲਾ ਨ ਹੋਨ੍ਤਿ.

‘‘ਅਦਾਨਮਤਿਦਾਨਞ੍ਚ ¶ ਨਪ੍ਪਸਂਸਨ੍ਤਿ ਪਣ੍ਡਿਤਾ,

ਸਮੇਨ ਵਤ੍ਤੇਯ੍ਯ ਸ ਧੀਰਧਮ੍ਮੋ’’ਤਿ. –

ਦ੍ਵੇ ਗਾਥਾ ਅਭਾਸਿ. ਸਿਨ੍ਧਕੋ ਏਵਂ ਪੁਨਪਿ ਵੀਮਂਸਿਤੁਕਾਮੋ ‘‘ਨ ਸਬ੍ਬਵਿਤ੍ਤਾਨੀ’’ਤਿਆਦਿਮਾਹਾਤਿ ਅਪਰੇ.

੩੦੦. ਤਤ੍ਥ ਸਬ੍ਬਵਿਤ੍ਤਾਨੀਤਿ ਸਵਿਞ੍ਞਾਣਕਅਵਿਞ੍ਞਾਣਕਪ੍ਪਭੇਦਾਨਿ ਸਬ੍ਬਾਨਿ ਵਿਤ੍ਤੂਪਕਰਣਾਨਿ, ਧਨਾਨੀਤਿ ਅਤ੍ਥੋ. ਪਰੇਤਿ ਪਰਮ੍ਹਿ, ਪਰਸ੍ਸਾਤਿ ਅਤ੍ਥੋ ¶ . ਨ ਪਵੇਚ੍ਛੇਤਿ ਨ ਦਦੇਯ੍ਯ, ‘‘ਦਕ੍ਖਿਣੇਯ੍ਯਾ ਲਦ੍ਧਾ’’ਤਿ ਕਤ੍ਵਾ ਕਿਞ੍ਚਿ ਅਸੇਸੇਤ੍ਵਾ ਸਬ੍ਬਸਾਪਤੇਯ੍ਯਪਰਿਚ੍ਚਾਗੋ ਨ ਕਾਤਬ੍ਬੋਤਿ ਅਤ੍ਥੋ. ਦਦੇਯ੍ਯ ਦਾਨਞ੍ਚਾਤਿ ਸਬ੍ਬੇਨ ਸਬ੍ਬਂ ਦਾਨਧਮ੍ਮੋ ਨ ਕਾਤਬ੍ਬੋ, ਅਥ ਖੋ ਅਤ੍ਤਨੋ ਆਯਞ੍ਚ ਵਯਞ੍ਚ ਜਾਨਿਤ੍ਵਾ ਵਿਭਵਾਨੁਰੂਪਂ ਦਾਨਞ੍ਚ ਦਦੇਯ੍ਯ. ਧਨਞ੍ਚ ਰਕ੍ਖੇਤਿ ਅਲਦ੍ਧਲਾਭਲਦ੍ਧਪਰਿਰਕ੍ਖਣਰਕ੍ਖਿਤਸਮ੍ਬਨ੍ਧਵਸੇਨ ਧਨਂ ਪਰਿਪਾਲੇਯ੍ਯ.

‘‘ਏਕੇਨ ਭੋਗੇ ਭੁਞ੍ਜੇਯ੍ਯ, ਦ੍ਵੀਹਿ ਕਮ੍ਮਂ ਪਯੋਜਯੇ;

ਚਤੁਤ੍ਥਞ੍ਚ ਨਿਧਾਪੇਯ੍ਯ, ਆਪਦਾਸੁ ਭਵਿਸ੍ਸਤੀ’’ਤਿ. (ਦੀ. ਨਿ. ੩.੨੬੫) –

ਵੁਤ੍ਤਵਿਧਿਨਾ ਵਾ ਧਨਂ ਰਕ੍ਖੇਯ੍ਯ ਤਮ੍ਮੂਲਕਤ੍ਤਾ ਦਾਨਸ੍ਸ. ਤਯੋਪਿ ਮਗ੍ਗਾ ਅਞ੍ਞਮਞ੍ਞਵਿਸੋਧਨੇਨ ਪਟਿਸੇਵਿਤਬ੍ਬਾਤਿ ਹਿ ਨੀਤਿਚਿਨ੍ਤਕਾ. ਤਸ੍ਮਾ ਹੀਤਿ ਯਸ੍ਮਾ ਧਨਞ੍ਚ ਰਕ੍ਖਨ੍ਤੋ ਦਾਨਞ੍ਚ ਕਰੋਨ੍ਤੋ ਉਭਯਲੋਕਹਿਤਾਯ ਪਟਿਪਨ੍ਨੋ ਹੋਤਿ ਧਨਮੂਲਕਞ੍ਚ ਦਾਨਂ, ਤਸ੍ਮਾ ਦਾਨਤੋ ਧਨਮੇਵ ਸੇਯ੍ਯੋ ਸੁਨ੍ਦਰਤਰੋਤਿ ਅਤਿਦਾਨਂ ਨ ਕਾਤਬ੍ਬਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਅਤਿਪ੍ਪਦਾਨੇਨ ਕੁਲਾ ਨ ਹੋਨ੍ਤੀ’’ਤਿ, ਧਨਸ੍ਸ ਪਮਾਣਂ ਅਜਾਨਿਤ੍ਵਾ ਦਾਨਸ੍ਸ ਤਂ ਨਿਸ੍ਸਾਯ ਅਤਿਪ੍ਪਦਾਨਪਸਙ੍ਗੇਨ ਕੁਲਾਨਿ ਨ ਹੋਨ੍ਤਿ ਨਪ੍ਪਵਤ੍ਤਨ੍ਤਿ, ਉਚ੍ਛਿਜ੍ਜਨ੍ਤੀਤਿ ਅਤ੍ਥੋ.

੩੦੧. ਇਦਾਨਿ ਵਿਞ੍ਞੂਨਂ ਪਸਂਸਿਤਮੇਵਤ੍ਥਂ ¶ ਪਤਿਟ੍ਠਪੇਨ੍ਤੋ ‘‘ਅਦਾਨਮਤਿਦਾਨਞ੍ਚਾ’’ਤਿ ਗਾਥਮਾਹ. ਤਤ੍ਥ ਅਦਾਨਮਤਿਦਾਨਞ੍ਚਾਤਿ ਸਬ੍ਬੇਨ ਸਬ੍ਬਂ ਕਟਚ੍ਛੁਭਿਕ੍ਖਾਯਪਿ ਤਣ੍ਡੁਲਮੁਟ੍ਠਿਯਾਪਿ ਅਦਾਨਂ, ਪਮਾਣਂ ਅਤਿਕ੍ਕਮਿਤ੍ਵਾ ਪਰਿਚ੍ਚਾਗਸਙ੍ਖਾਤਂ ਅਤਿਦਾਨਞ੍ਚ ਪਣ੍ਡਿਤਾ ਬੁਦ੍ਧਿਮਨ੍ਤੋ ਸਪਞ੍ਞਜਾਤਿਕਾ ਨਪ੍ਪਸਂਸਨ੍ਤਿ ਨ ਵਣ੍ਣਯਨ੍ਤਿ. ਸਬ੍ਬੇਨ ਸਬ੍ਬਂ ਅਦਾਨੇਨ ਹਿ ਸਮ੍ਪਰਾਯਿਕਤੋ ਅਤ੍ਥਤੋ ਪਰਿਬਾਹਿਰੋ ਹੋਤਿ. ਅਤਿਦਾਨੇਨ ਦਿਟ੍ਠਧਮ੍ਮਿਕਪਵੇਣੀ ਨ ਪਵਤ੍ਤਤਿ. ਸਮੇਨ ਵਤ੍ਤੇਯ੍ਯਾਤਿ ਅਵਿਸਮੇਨ ¶ ਲੋਕਿਯਸਰਿਕ੍ਖਕੇਨ ਸਮਾਹਿਤੇਨ ਮਜ੍ਝਿਮੇਨ ਞਾਯੇਨ ਪਵਤ੍ਤੇਯ੍ਯ. ਸ ਧੀਰਧਮ੍ਮੋਤਿ ਯਾ ਯਥਾਵੁਤ੍ਤਾ ਦਾਨਾਦਾਨਪ੍ਪਵਤ੍ਤਿ, ਸੋ ਧੀਰਾਨਂ ਧਿਤਿਸਮ੍ਪਨ੍ਨਾਨਂ ਨੀਤਿਨਯਕੁਸਲਾਨਂ ਧਮ੍ਮੋ, ਤੇਹਿ ਗਤਮਗ੍ਗੋਤਿ ਦੀਪੇਤਿ.

ਤਂ ¶ ਸੁਤ੍ਵਾ ਅਙ੍ਕੁਰੋ ਤਸ੍ਸ ਅਧਿਪ੍ਪਾਯਂ ਪਰਿਵਤ੍ਤੇਨ੍ਤੋ –

‘‘ਅਹੋ ਵਤ ਰੇ ਅਹਮੇਵ ਦਜ੍ਜਂ, ਸਨ੍ਤੋ ਚ ਮਂ ਸਪ੍ਪੁਰਿਸਾ ਭਜੇਯ੍ਯੁਂ;

ਮੇਘੋਵ ਨਿਨ੍ਨਾਨਿ ਪਰਿਪੂਰਯਨ੍ਤੋ, ਸਨ੍ਤਪ੍ਪਯੇ ਸਬ੍ਬਵਨਿਬ੍ਬਕਾਨਂ.

‘‘ਯਸ੍ਸ ਯਾਚਨਕੇ ਦਿਸ੍ਵਾ, ਮੁਖਵਣ੍ਣੋ ਪਸੀਦਤਿ;

ਦਤ੍ਵਾ ਅਤ੍ਤਮਨੋ ਹੋਤਿ, ਤਂ ਘਰਂ ਵਸਤੋ ਸੁਖਂ.

‘‘ਯਸ੍ਸ ਯਾਚਨਕੇ ਦਿਸ੍ਵਾ, ਮੁਖਵਣ੍ਣੋ ਪਸੀਦਤਿ;

ਦਤ੍ਵਾ ਅਤ੍ਤਮਨੋ ਹੋਤਿ, ਏਸਾ ਯਞ੍ਞਸ੍ਸ ਸਮ੍ਪਦਾ.

‘‘ਪੁਬ੍ਬੇਵ ਦਾਨਾ ਸੁਮਨੋ, ਦਦਂ ਚਿਤ੍ਤਂ ਪਸਾਦਯੇ;

ਦਤ੍ਵਾ ਅਤ੍ਤਮਨੋ ਹੋਤਿ, ਏਸਾ ਯਞ੍ਞਸ੍ਸ ਸਮ੍ਪਦਾ’’ਤਿ. –

ਚਤੂਹਿ ਗਾਥਾਹਿ ਅਤ੍ਤਨਾ ਪਟਿਪਜ੍ਜਿਤਬ੍ਬਵਿਧਿਂ ਪਕਾਸੇਸਿ.

੩੦੨. ਤਤ੍ਥ ਅਹੋ ਵਤਾਤਿ ਸਾਧੁ ਵਤ. ਰੇਤਿ ਆਲਪਨਂ. ਅਹਮੇਵ ਦਜ੍ਜਨ੍ਤਿ ਅਹਂ ਦਜ੍ਜਮੇਵ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ ¶ – ਮਾਣਵ, ‘‘ਦਾਨਾ ਧਨਮੇਵ ਸੇਯ੍ਯੋ’’ਤਿ ਯਦਿ ਅਯਂ ਨੀਤਿਕੁਸਲਾਨਂ ਵਾਦੋ ਤਵ ਹੋਤੁ, ਕਾਮਂ ਅਹਂ ਦਜ੍ਜਮੇਵ. ਸਨ੍ਤੋ ਚ ਮਂ ਸਪ੍ਪੁਰਿਸਾ ਭਜੇਯ੍ਯੁਨ੍ਤਿ ਤਸ੍ਮਿਞ੍ਚ ਦਾਨੇ ਸਨ੍ਤੋ ਉਪਸਨ੍ਤਕਾਯਵਚੀਮਨੋਸਮਾਚਾਰਾ ਸਪ੍ਪੁਰਿਸਾ ਸਾਧਵੋ ਮਂ ਭਜੇਯ੍ਯੁਂ ਉਪਗਚ੍ਛੇਯ੍ਯੁਂ. ਮੇਘੋਵ ਨਿਨ੍ਨਾਨਿ ਪਰਿਪੂਰਯਨ੍ਤੋਤਿ ਅਹਂ ਅਭਿਪ੍ਪਵਸ੍ਸਨ੍ਤੋ ਮਹਾਮੇਘੋ ਵਿਯ ਨਿਨ੍ਨਾਨਿ ਨਿਨ੍ਨਟ੍ਠਾਨਾਨਿ ਸਬ੍ਬੇਸਂ ਵਨਿਬ੍ਬਕਾਨਂ ਅਧਿਪ੍ਪਾਯੇ ਪਰਿਪੂਰਯਨ੍ਤੋ ਅਹੋ ਵਤ ਤੇ ਸਨ੍ਤਪ੍ਪੇਯ੍ਯਨ੍ਤਿ.

੩੦੩. ਯਸ੍ਸ ਯਾਚਨਕੇ ਦਿਸ੍ਵਾਤਿ ਯਸ੍ਸ ਪੁਗ੍ਗਲਸ੍ਸ ਘਰਮੇਸਿਨੋ ਯਾਚਨਕੇ ਦਿਸ੍ਵਾ ‘‘ਪਠਮਂ ਤਾਵ ਉਪਟ੍ਠਿਤਂ ਵਤ ਮੇ ਪੁਞ੍ਞਕ੍ਖੇਤ੍ਤ’’ਨ੍ਤਿ ਸਦ੍ਧਾਜਾਤਸ੍ਸ ਮੁਖਵਣ੍ਣੋ ਪਸੀਦਤਿ, ਯਥਾਵਿਭਵਂ ਪਨ ਤੇਸਂ ¶ ਦਾਨਂ ਦਤ੍ਵਾ ਅਤ੍ਤਮਨੋ ਪੀਤਿਸੋਮਨਸ੍ਸੇਹਿ ਗਹਿਤਚਿਤ੍ਤੋ ਹੋਤਿ. ਤਨ੍ਤਿ ਯਦੇਤ੍ਥ ਯਾਚਕਾਨਂ ਦਸ੍ਸਨਂ ¶ , ਤੇਨ ਚ ਦਿਸ੍ਵਾ ਚਿਤ੍ਤਸ੍ਸ ਪਸਾਦਨਂ, ਯਥਾਰਹਂ ਦਾਨਂ ਦਤ੍ਵਾ ਚ ਅਤ੍ਤਮਨਤਾ.

੩੦੪. ਏਸਾ ਯਞ੍ਞਸ੍ਸ ਸਮ੍ਪਦਾਤਿ ਏਸਾ ਯਞ੍ਞਸ੍ਸ ਸਮ੍ਪਤ੍ਤਿ ਪਾਰਿਪੂਰਿ, ਨਿਪ੍ਫਤ੍ਤੀਤਿ ਅਤ੍ਥੋ.

੩੦੫. ਪੁਬ੍ਬੇਵ ਦਾਨਾ ਸੁਮਨੋਤਿ ‘‘ਸਮ੍ਪਤ੍ਤੀਨਂ ਨਿਦਾਨਂ ਅਨੁਗਾਮਿਕਂ ਨਿਧਾਨਂ ਨਿਧੇਸ੍ਸਾਮੀ’’ਤਿ ਮੁਞ੍ਚਨਚੇਤਨਾਯ ਪੁਬ੍ਬੇ ਏਵ ਦਾਨੂਪਕਰਣਸ੍ਸ ਸਮ੍ਪਾਦਨਤੋ ਪਟ੍ਠਾਯ ਸੁਮਨੋ ਸੋਮਨਸ੍ਸਜਾਤੋ ਭਵੇਯ੍ਯ. ਦਦਂ ਚਿਤ੍ਤਂ ਪਸਾਦਯੇਤਿ ਦਦਨ੍ਤੋ ਦੇਯ੍ਯਧਮ੍ਮਂ ਦਕ੍ਖਿਣੇਯ੍ਯਹਤ੍ਥੇ ਪਤਿਟ੍ਠਾਪੇਨ੍ਤੋ ‘‘ਅਸਾਰਤੋ ਧਨਤੋ ਸਾਰਾਦਾਨਂ ਕਰੋਮੀ’’ਤਿ ਅਤ੍ਤਨੋ ਚਿਤ੍ਤਂ ਪਸਾਦੇਯ੍ਯ. ਦਤ੍ਵਾ ਅਤ੍ਤਮਨੋ ਹੋਤੀਤਿ ਦਕ੍ਖਿਣੇਯ੍ਯਾਨਂ ਦੇਯ੍ਯਧਮ੍ਮਂ ਪਰਿਚ੍ਚਜਿਤ੍ਵਾ ‘‘ਪਣ੍ਡਿਤਪਞ੍ਞਤ੍ਤਂ ਨਾਮ ਮਯਾ ਅਨੁਟ੍ਠਿਤਂ, ਅਹੋ ਸਾਧੁ ਸੁਟ੍ਠੂ’’ਤਿ ਅਤ੍ਤਮਨੋ ਪਮੁਦਿਤਮਨੋ ਪੀਤਿਸੋਮਨਸ੍ਸਜਾਤੋ ਹੋਤਿ. ਏਸਾ ਯਞ੍ਞਸ੍ਸ ਸਮ੍ਪਦਾਤਿ ਯਾ ¶ ਅਯਂ ਪੁਬ੍ਬਚੇਤਨਾ ਮੁਞ੍ਜਚੇਤਨਾ ਅਪਰਚੇਤਨਾਤਿ ਇਮੇਸਂ ਕਮ੍ਮਫਲਸਦ੍ਧਾਨੁਗਤਾਨਂ ਸੋਮਨਸ੍ਸਪਰਿਗ੍ਗਹਿਤਾਨਂ ਤਿਸ੍ਸਨ੍ਨਂ ਚੇਤਨਾਨਂ ਪਾਰਿਪੂਰਿ, ਏਸਾ ਯਞ੍ਞਸ੍ਸ ਸਮ੍ਪਦਾ ਦਾਨਸ੍ਸ ਸਮ੍ਪਤ੍ਤਿ, ਨ ਇਤੋ ਅਞ੍ਞਥਾਤਿ ਅਧਿਪ੍ਪਾਯੋ.

ਏਵਂ ਅਙ੍ਕੁਰੋ ਅਤ੍ਤਨੋ ਪਟਿਪਜ੍ਜਨਵਿਧਿਂ ਪਕਾਸੇਤ੍ਵਾ ਭਿਯ੍ਯੋਸੋਮਤ੍ਤਾਯ ਅਭਿਵਡ੍ਢਮਾਨਦਾਨਜ੍ਝਾਸਯੋ ਦਿਵਸੇ ਦਿਵਸੇ ਮਹਾਦਾਨਂ ਪਵਤ੍ਤੇਸਿ. ਤੇਨ ਤਦਾ ਸਬ੍ਬਰਜ੍ਜਾਨਿ ਉਨ੍ਨਙ੍ਗਲਾਨਿ ਕਤ੍ਵਾ ਮਹਾਦਾਨੇ ਦਿਯ੍ਯਮਾਨੇ ਪਟਿਲਦ੍ਧਸਬ੍ਬੂਪਕਰਣਾ ਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਕਮ੍ਮਨ੍ਤੇ ਪਹਾਯ ਯਥਾਸੁਖਂ ਵਿਚਰਿਂਸੁ, ਤੇਨ ਰਾਜੂਨਂ ਕੋਟ੍ਠਾਗਾਰਾਨਿ ਪਰਿਕ੍ਖਯਂ ਅਗਮਂਸੁ. ਤਤੋ ਰਾਜਾਨੋ ਅਙ੍ਕੁਰਸ੍ਸ ਦੂਤਂ ਪਾਹੇਸੁਂ – ‘‘ਭੋਤੋ ਦਾਨਂ ਨਿਸ੍ਸਾਯ ਅਮ੍ਹਾਕਂ ਆਯਸ੍ਸ ਵਿਨਾਸੋ ਅਹੋਸਿ, ਕੋਟ੍ਠਾਗਾਰਾਨਿ ਪਰਿਕ੍ਖਯਂ ਗਤਾਨਿ, ਤਤ੍ਥ ਯੁਤ੍ਤਮਤ੍ਤਂ ਞਾਤਬ੍ਬ’’ਨ੍ਤਿ.

ਤਂ ਸੁਤ੍ਵਾ ਅਙ੍ਕੁਰੋ ਦਕ੍ਖਿਣਾਪਥਂ ਗਨ੍ਤ੍ਵਾ ਦਮਿਲ਼ਵਿਸਯੇ ਸਮੁਦ੍ਦਸ੍ਸ ਅਵਿਦੂਰਟ੍ਠਾਨੇ ਮਹਤਿਯੋ ਅਨੇਕਦਾਨਸਾਲਾਯੋ ਕਾਰਾਪੇਤ੍ਵਾ ਮਹਾਦਾਨਾਨਿ ਪਵਤ੍ਤੇਨ੍ਤੋ ਯਾਵਤਾਯੁਕਂ ਠਤ੍ਵਾ ਕਾਯਸ੍ਸ ਭੇਦਾ ਪਰਂ ¶ ਮਰਣਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਤਸ੍ਸ ਦਾਨਵਿਭੂਤਿਞ੍ਚ ਸਗ੍ਗੂਪਪਤ੍ਤਿਞ੍ਚ ਦਸ੍ਸੇਨ੍ਤੋ ਸਙ੍ਗੀਤਿਕਾਰਾ –

‘‘ਸਟ੍ਠਿ ਵਾਹਸਹਸ੍ਸਾਨਿ, ਅਙ੍ਕੁਰਸ੍ਸ ਨਿਵੇਸਨੇ;

ਭੋਜਨਂ ਦੀਯਤੇ ਨਿਚ੍ਚਂ, ਪੁਞ੍ਞਪੇਕ੍ਖਸ੍ਸ ਜਨ੍ਤੁਨੋ.

‘‘ਤਿਸਹਸ੍ਸਾਨਿ ¶ ਸੂਦਾ ਹਿ, ਆਮੁਤ੍ਤਮਣਿਕੁਣ੍ਡਲਾ;

ਅਙ੍ਕੁਰਂ ਉਪਜੀਵਨ੍ਤਿ, ਦਾਨੇ ਯਞ੍ਞਸ੍ਸ ਵਾਵਟਾ.

‘‘ਸਟ੍ਠਿ ਪੁਰਿਸਸਹਸ੍ਸਾਨਿ, ਆਮੁਤ੍ਤਮਣਿਕੁਣ੍ਡਲਾ;

ਅਙ੍ਕੁਰਸ੍ਸ ਮਹਾਦਾਨੇ, ਕਟ੍ਠਂ ਫਾਲੇਨ੍ਤਿ ਮਾਣਵਾ.

‘‘ਸੋਲ਼ਸਿਤ੍ਥਿਸਹਸ੍ਸਾਨਿ ¶ , ਸਬ੍ਬਾਲਙ੍ਕਾਰਭੂਸਿਤਾ;

ਅਙ੍ਕੁਰਸ੍ਸ ਮਹਾਦਾਨੇ, ਵਿਧਾ ਪਿਣ੍ਡੇਨ੍ਤਿ ਨਾਰਿਯੋ.

‘‘ਸੋਲ਼ਸਿਤ੍ਥਿਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਅਙ੍ਕੁਰਸ੍ਸ ਮਹਾਦਾਨੇ, ਦਬ੍ਬਿਗਾਹਾ ਉਪਟ੍ਠਿਤਾ.

‘‘ਬਹੁਂ ਬਹੂਨਂ ਪਾਦਾਸਿ, ਚਿਰਂ ਪਾਦਾਸਿ ਖਤ੍ਤਿਯੋ;

ਸਕ੍ਕਚ੍ਚਞ੍ਚ ਸਹਤ੍ਥਾ ਚ, ਚਿਤ੍ਤੀਕਤ੍ਵਾ ਪੁਨਪ੍ਪੁਨਂ.

‘‘ਬਹੂ ਮਾਸੇ ਚ ਪਕ੍ਖੇ ਚ, ਉਤੁਸਂਵਚ੍ਛਰਾਨਿ ਚ;

ਮਹਾਦਾਨਂ ਪਵਤ੍ਤੇਸਿ, ਅਙ੍ਕੁਰੋ ਦੀਘਮਨ੍ਤਰਂ.

‘‘ਏਵਂ ਦਤ੍ਵਾ ਯਜਿਤ੍ਵਾ ਚ, ਅਙ੍ਕੁਰੋ ਦੀਘਮਨ੍ਤਰਂ;

ਸੋ ਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗੋ ਅਹੂ’’ਤਿ. – ਗਾਥਾ ਆਹਂਸੁ;

੩੦੬. ਤਥ ਸਟ੍ਠਿ ਵਾਹਸਹਸ੍ਸਾਨੀਤਿ ਵਾਹਾਨਂ ਸਟ੍ਠਿਸਹਸ੍ਸਾਨਿ ਗਨ੍ਧਸਾਲਿਤਣ੍ਡੁਲਾਦਿਪੂਰਿਤਵਾਹਾਨਂ ਸਟ੍ਠਿਸਹਸ੍ਸਾਨਿ. ਪੁਞ੍ਞਪੇਕ੍ਖਸ੍ਸ ਦਾਨਜ੍ਝਾਸਯਸ੍ਸ ਦਾਨਾਧਿਮੁਤ੍ਤਸ੍ਸ ਅਙ੍ਕੁਰਸ੍ਸ ਨਿਵੇਸਨੇ ਨਿਚ੍ਚਂ ਦਿਵਸੇ ਦਿਵਸੇ ਜਨ੍ਤੁਨੋ ਸਤ੍ਤਕਾਯਸ੍ਸ ਭੋਜਨਂ ਦੀਯਤੇਤਿ ਯੋਜਨਾ.

੩੦੭-੮. ਤਿਸਹਸ੍ਸਾਨਿ ਸੂਦਾ ਹੀਤਿ ਤਿਸਹਸ੍ਸਮਤ੍ਤਾ ਸੂਦਾ ਭਤ੍ਤਕਾਰਕਾ. ਤੇ ਚ ਖੋ ਪਨ ਪਧਾਨਭੂਤਾ ਅਧਿਪ੍ਪੇਤਾ, ਤੇਸੁ ਏਕਮੇਕਸ੍ਸ ਪਨ ¶ ਵਚਨਕਰਾ ਅਨੇਕਾਤਿ ਵੇਦਿਤਬ੍ਬਾ. ‘‘ਤਿਸਹਸ੍ਸਾਨਿ ਸੂਦਾਨ’’ਨ੍ਤਿ ਚ ਪਠਨ੍ਤਿ. ਆਮੁਤ੍ਤਮਣਿਕੁਣ੍ਡਲਾਤਿ ਨਾਨਾਮਣਿਵਿਚਿਤ੍ਤਕੁਣ੍ਡਲਧਰਾ. ਨਿਦਸ੍ਸਨਮਤ੍ਤਞ੍ਚੇਤਂ, ਆਮੁਤ੍ਤਕਟਕਕਟਿਸੁਤ੍ਤਾਦਿਆਭਰਣਾਪਿ ਤੇ ਅਹੇਸੁਂ. ਅਙ੍ਕੁਰਂ ਉਪਜੀਵਨ੍ਤੀਤਿ ਤਂ ਉਪਨਿਸ੍ਸਾਯ ¶ ਜੀਵਨ੍ਤਿ, ਤਪ੍ਪਟਿਬਦ੍ਧਜੀਵਿਕਾ ਹੋਨ੍ਤੀਤਿ ਅਤ੍ਥੋ. ਦਾਨੇ ਯਞ੍ਞਸ੍ਸ ਵਾਵਟਾਤਿ ¶ ਮਹਾਯਾਗਸਞ੍ਞਿਤਸ੍ਸ ਯਞ੍ਞਸ੍ਸ ਦਾਨੇ ਯਜਨੇ ਵਾਵਟਾ ਉਸ੍ਸੁਕ੍ਕਂ ਆਪਨ੍ਨਾ. ਕਟ੍ਠਂ ਫਾਲੇਨ੍ਤਿ ਮਾਣਵਾਤਿ ਨਾਨਪ੍ਪਕਾਰਾਨਂ ਖਜ੍ਜਭੋਜ੍ਜਾਦਿਆਹਾਰਵਿਸੇਸਾਨਂ ਪਚਨਾਯ ਅਲਙ੍ਕਤਪਟਿਯਤ੍ਤਾ ਤਰੁਣਮਨੁਸ੍ਸਾ ਕਟ੍ਠਾਨਿ ਫਾਲੇਨ੍ਤਿ ਵਿਦਾਲੇਨ੍ਤਿ.

੩੦੯. ਵਿਧਾਤਿ ਵਿਧਾਤਬ੍ਬਾਨਿ ਭੋਜਨਯੋਗ੍ਗਾਨਿ ਕਟੁਕਭਣ੍ਡਾਨਿ. ਪਿਣ੍ਡੇਨ੍ਤੀਤਿ ਪਿਸਨਵਸੇਨ ਪਯੋਜੇਨ੍ਤਿ.

੩੧੦. ਦਬ੍ਬਿਗਾਹਾਤਿ ਕਟਚ੍ਛੁਗਾਹਿਕਾ. ਉਪਟ੍ਠਿਤਾਤਿ ਪਰਿਵੇਸਨਟ੍ਠਾਨਂ ਉਪਗਨ੍ਤ੍ਵਾ ਠਿਤਾ ਹੋਨ੍ਤਿ.

੩੧੧. ਬਹੁਨ੍ਤਿ ਮਹਨ੍ਤਂ ਪਹੂਤਿਕਂ. ਬਹੂਨਨ੍ਤਿ ਅਨੇਕੇਸਂ. ਪਾਦਾਸੀਤਿ ਪਕਾਰੇਹਿ ਅਦਾਸਿ. ਚੀਰਨ੍ਤਿ ਚਿਰਕਾਲਂ. ਵੀਸਤਿਵਸ੍ਸਸਹਸ੍ਸਾਯੁਕੇਸੁ ਹਿ ਮਨੁਸ੍ਸੇਸੁ ਸੋ ਉਪ੍ਪਨ੍ਨੋ. ਬਹੁਂ ਬਹੂਨਂ ਚਿਰਕਾਲਞ੍ਚ ਦੇਨ੍ਤੋ ਯਥਾ ਅਦਾਸਿ, ਤਂ ਦਸ੍ਸੇਤੁਂ ‘‘ਸਕ੍ਕਚ੍ਚਞ੍ਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਕ੍ਕਚ੍ਚਨ੍ਤਿ ਸਾਦਰਂ, ਅਨਪਵਿਦ੍ਧਂ ਅਨਵਞ੍ਞਾਤਂ ਕਤ੍ਵਾ. ਸਹਤ੍ਥਾਤਿ ਸਹਤ੍ਥੇਨ, ਨ ਆਣਾਪਨਮਤ੍ਤੇਨ. ਚਿਤ੍ਤੀਕਤ੍ਵਾਤਿ ਗਾਰਵਬਹੁਮਾਨਯੋਗੇਨ ਚਿਤ੍ਤੇਨ ਕਰਿਤ੍ਵਾ ਪੂਜੇਤ੍ਵਾ. ਪੁਨਪ੍ਪੁਨਨ੍ਤਿ ਬਹੁਸੋ ਨ ਏਕਵਾਰਂ, ਕਤਿਪਯਵਾਰੇ ਵਾ ਅਕਤ੍ਵਾ ਅਨੇਕਵਾਰਂ ਪਾਦਾਸੀਤਿ ਯੋਜਨਾ.

੩੧੨. ਇਦਾਨਿ ਤਮੇਵ ਪੁਨਪ੍ਪੁਨਂ ਕਰਣਂ ਵਿਭਾਵੇਤੁਂ ‘‘ਬਹੂ ਮਾਸੇ ਚਾ’’ਤਿ ਗਾਥਮਾਹਂਸੁ. ਤਤ੍ਥ ਬਹੂ ਮਾਸੇਤਿ ਚਿਤ੍ਤਮਾਸਾਦਿਕੇ ਬਹੂ ਅਨੇਕੇ ਮਾਸੇ. ਪਕ੍ਖੇਤਿ ਕਣ੍ਹਸੁਕ੍ਕਭੇਦੇ ਬਹੂ ਪਕ੍ਖੇ. ਉਤੁਸਂਵਚ੍ਛਰਾਨਿ ਚਾਤਿ ਵਸਨ੍ਤਗਿਮ੍ਹਾਦਿਕੇ ਬਹੂ ਉਤੂ ਚ ਸਂਵਚ੍ਛਰਾਨਿ ਚ, ਸਬ੍ਬਤ੍ਥ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਦੀਘਮਨ੍ਤਰਨ੍ਤਿ ਦੀਘਕਾਲਮਨ੍ਤਰਂ. ਏਤ੍ਥ ਚ ‘‘ਚਿਰਂ ਪਾਦਾਸੀ’’ਤਿ ਚਿਰਕਾਲਂ ਦਾਨਸ੍ਸ ਪਵਤ੍ਤਿਤਭਾਵਂ ਵਤ੍ਵਾ ਪੁਨ ਤਸ੍ਸ ਨਿਰਨ੍ਤਰਮੇਵ ¶ ਪਵਤ੍ਤਿਤਭਾਵਂ ਦਸ੍ਸੇਤੁਂ ‘‘ਬਹੂ ਮਾਸੇ’’ਤਿਆਦਿ ਵੁਤ੍ਤਨ੍ਤਿ ਦਟ੍ਠਬ੍ਬਂ.

੩੧੩. ਏਵਨ੍ਤਿ ¶ ਵੁਤ੍ਤਪ੍ਪਕਾਰੇਨ. ਦਤ੍ਵਾ ਯਜਿਤ੍ਵਾ ਚਾਤਿ ਅਤ੍ਥਤੋ ਏਕਮੇਵ, ਕੇਸਞ੍ਚਿ ਦਕ੍ਖਿਣੇਯ੍ਯਾਨਂ ਏਕਚ੍ਚਸ੍ਸ ਦੇਯ੍ਯਧਮ੍ਮਸ੍ਸ ਪਰਿਚ੍ਚਜਨਵਸੇਨ ਦਤ੍ਵਾ, ਪੁਨ ‘‘ਬਹੁਂ ਬਹੂਨਂ ਪਾਦਾਸੀ’’ਤਿ ਵੁਤ੍ਤਨਯੇਨ ਅਤ੍ਥਿਕਾਨਂ ਸਬ੍ਬੇਸਂ ਯਥਾਕਾਮਂ ਦੇਨ੍ਤੋ ਮਹਾਯਾਗਵਸੇਨ ਯਜਿਤ੍ਵਾ. ਸੋ ਹਿਤ੍ਵਾ ਮਾਨੁਸਂ ਦੇਹਂ ¶ , ਤਾਵਤਿਂਸੂਪਗੋ ਅਹੂਤਿ ਸੋ ਅਙ੍ਕੁਰੋ ਆਯੁਪਰਿਯੋਸਾਨੇ ਮਨੁਸ੍ਸਤ੍ਥਭਾਵਂ ਪਹਾਯ ਪਟਿਸਨ੍ਧਿਗ੍ਗਹਣਵਸੇਨ ਤਾਵਤਿਂਸਦੇਵਨਿਕਾਯੂਪਗੋ ਅਹੋਸਿ.

ਏਵਂ ਤਸ੍ਮਿਂ ਤਾਵਤਿਂਸੇਸੁ ਨਿਬ੍ਬਤ੍ਤਿਤ੍ਵਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੇ ਅਮ੍ਹਾਕਂ ਭਗਵਤੋ ਕਾਲੇ ਇਨ੍ਦਕੋ ਨਾਮ ਮਾਣਵੋ ਆਯਸ੍ਮਤੋ ਅਨੁਰੁਦ੍ਧਤ੍ਥੇਰਸ੍ਸ ਪਿਣ੍ਡਾਯ ਚਰਨ੍ਤਸ੍ਸ ਪਸਨ੍ਨਮਾਨਸੋ ਕਟਚ੍ਛੁਭਿਕ੍ਖਂ ਦਾਪੇਸਿ. ਸੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਖੇਤ੍ਤਗਤਸ੍ਸ ਪੁਞ੍ਞਸ੍ਸ ਆਨੁਭਾਵੇਨ ਤਾਵਤਿਂਸੇਸੁ ਮਹਿਦ੍ਧਿਕੋ ਮਹਾਨੁਭਾਵੋ ਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੋ ਦਿਬ੍ਬੇਹਿ ਰੂਪਾਦੀਹਿ ਦਸਹਿ ਠਾਨੇਹਿ ਅਙ੍ਕੁਰਂ ਦੇਵਪੁਤ੍ਤਂ ਅਭਿਭਵਿਤ੍ਵਾ ਵਿਰੋਚਤਿ. ਤੇਨ ਵੁਤ੍ਤਂ –

‘‘ਕਟਚ੍ਛੁਭਿਕ੍ਖਂ ਦਤ੍ਵਾਨ, ਅਨੁਰੁਦ੍ਧਸ੍ਸ ਇਨ੍ਦਕੋ;

ਸੋ ਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗੋ ਅਹੁ.

‘‘ਦਸਹਿ ਠਾਨੇਹਿ ਅਙ੍ਕੁਰਂ, ਇਨ੍ਦਕੋ ਅਤਿਰੋਚਤਿ;

ਰੂਪੇ ਸਦ੍ਦੇ ਰਸੇ ਗਨ੍ਧੇ, ਫੋਟ੍ਠਬ੍ਬੇ ਚ ਮਨੋਰਮੇ.

‘‘ਆਯੁਨਾ ਯਸਸਾ ਚੇਵ, ਵਣ੍ਣੇਨ ਚ ਸੁਖੇਨ ਚ;

ਆਧਿਪਚ੍ਚੇਨ ਅਙ੍ਕੁਰਂ, ਇਨ੍ਦਕੋ ਅਤਿਰੋਚਤੀ’’ਤਿ.

੩੧੪-੫. ਤਤ੍ਥ ਰੂਪੇਤਿ ਰੂਪਹੇਤੁ, ਅਤ੍ਤਨੋ ਰੂਪਸਮ੍ਪਤ੍ਤਿਨਿਮਿਤ੍ਤਨ੍ਤਿ ਅਤ੍ਥੋ. ਸਦ੍ਦੇਤਿਆਦੀਸੁਪਿ ਏਸੇਵ ਨਯੋ. ਆਯੁਨਾਤਿ ਜੀਵਿਤੇਨ. ਨਨੁ ਚ ਦੇਵਾਨਂ ਜੀਵਿਤਂ ਪਰਿਚ੍ਛਿਨ੍ਨਪ੍ਪਮਾਣਂ ਵੁਤ੍ਤਂ. ਸਚ੍ਚਂ ਵੁਤ੍ਤਂ, ਤਂ ਪਨ ਯੇਭੁਯ੍ਯਵਸੇਨ. ਤਥਾ ਹਿ ਏਕਚ੍ਚਾਨਂ ਦੇਵਾਨਂ ਯੋਗਵਿਪਤ੍ਤਿਆਦਿਨਾ ਅਨ੍ਤਰਾਮਰਣਂ ਹੋਤਿਯੇਵ. ਇਨ੍ਦਕੋ ਪਨ ਤਿਸ੍ਸੋ ਵਸ੍ਸਕੋਟਿਯੋ ਸਟ੍ਠਿ ਚ ਵਸ੍ਸਸਹਸ੍ਸਾਨਿ ਪਰਿਪੂਰੇਤਿਯੇਵ. ਤੇਨ ਵੁਤ੍ਤਂ ‘‘ਆਯੁਨਾ ਅਤਿਰੋਚਤੀ’’ਤਿ. ਯਸਸਾਤਿ ਮਹਤਿਯਾ ਪਰਿਵਾਰਸਮ੍ਪਤ੍ਤਿਯਾ ¶ . ਵਣ੍ਣੇਨਾਤਿ ਸਣ੍ਠਾਨਸਮ੍ਪਤ੍ਤਿਯਾ. ਵਣ੍ਣਧਾਤੁਸਮ੍ਪਦਾ ਪਨ ‘‘ਰੂਪੇ’’ਤਿ ਇਮਿਨਾ ਵੁਤ੍ਤਾਯੇਵ. ਆਧਿਪਚ੍ਚੇਨਾਤਿ ਇਸ੍ਸਰਿਯੇਨ.

ਏਵਂ ਅਙ੍ਕੁਰੇ ਚ ਇਨ੍ਦਕੇ ਚ ਤਾਵਤਿਂਸੇਸੁ ਨਿਬ੍ਬਤ੍ਤਿਤ੍ਵਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੇਸੁ ਅਮ੍ਹਾਕਂ ਭਗਵਾ ਅਭਿਸਮ੍ਬੋਧਿਤੋ ਸਤ੍ਤਮੇ ਸਂਵਚ੍ਛਰੇ ਆਸਾਲ਼੍ਹਿਪੁਣ੍ਣਮਾਯਂ ¶ ਸਾਵਤ੍ਥਿਨਗਰਦ੍ਵਾਰੇ ਕਣ੍ਡਮ੍ਬਰੁਕ੍ਖਮੂਲੇ ਯਮਕਪਾਟਿਹਾਰਿਯਂ ਕਤ੍ਵਾ ਅਨੁਕ੍ਕਮੇਨ ਤਿਪਦਵਿਕ੍ਕਮੇਨ ਤਾਵਤਿਂਸਭਵਨਂ ਗਨ੍ਤ੍ਵਾ ਪਾਰਿਚ੍ਛਤ੍ਤਕਮੂਲੇ ¶ ਪਣ੍ਡੁਕਮ੍ਬਲਸਿਲਾਯਂ ਯੁਗਨ੍ਧਰਪਬ੍ਬਤੇ ਬਾਲਸੂਰਿਯੋ ਵਿਯ ਵਿਰੋਚਮਾਨੋ ਦਸਹਿ ਲੋਕਧਾਤੂਹਿ ਸਨ੍ਨਿਪਤਿਤਾਯ ਦੇਵਬ੍ਰਹ੍ਮਪਰਿਸਾਯ ਜੁਤਿਂ ਅਤ੍ਤਨੋ ਸਰੀਰਪ੍ਪਭਾਯ ਅਭਿਭਵਨ੍ਤੋ ਅਭਿਧਮ੍ਮਂ ਦੇਸੇਤੁਂ ਨਿਸਿਨ੍ਨੋ ਅਵਿਦੂਰੇ ਨਿਸਿਨ੍ਨਂ ਇਨ੍ਦਕਂ, ਦ੍ਵਾਦਸਯੋਜਨਨ੍ਤਰੇ ਨਿਸਿਨ੍ਨਂ ਅਙ੍ਕੁਰਞ੍ਚ ਦਿਸ੍ਵਾ ਦਕ੍ਖਿਣੇਯ੍ਯਸਮ੍ਪਤ੍ਤਿਵਿਭਾਵਨਤ੍ਥਂ –

‘‘ਮਹਾਦਾਨਂ ਤਯਾ ਦਿਨ੍ਨਂ, ਅਙ੍ਕੁਰ ਦੀਘਮਨ੍ਤਰਂ;

ਅਤਿਦੂਰੇ ਨਿਸਿਨ੍ਨੋਸਿ, ਆਗਚ੍ਛ ਮਮ ਸਨ੍ਤਿਕੇ’’ਤਿ. –

ਗਾਥਮਾਹ. ਤਂ ਸੁਤ੍ਵਾ ਅਙ੍ਕੁਰੋ ‘‘ਭਗਵਾ ਮਯਾ ਚਿਰਕਾਲਂ ਬਹੁਂ ਦੇਯ੍ਯਧਮ੍ਮਂ ਪਰਿਚ੍ਚਜਿਤ੍ਵਾ ਪਵਤ੍ਤਿਤਮ੍ਪਿ ਮਹਾਦਾਨਂ ਦਕ੍ਖਿਣੇਯ੍ਯਸਮ੍ਪਤ੍ਤਿਵਿਰਹੇਨ ਅਖੇਤ੍ਤੇ ਵੁਤ੍ਤਬੀਜਂ ਵਿਯ ਨ ਉਲ਼ਾਰਫਲਂ ਅਹੋਸਿ, ਇਨ੍ਦਕਸ੍ਸ ਪਨ ਕਟਚ੍ਛੁਭਿਕ੍ਖਾਦਾਨਮ੍ਪਿ ਦਕ੍ਖਿਣੇਯ੍ਯਸਮ੍ਪਤ੍ਤਿਯਾ ਸੁਖੇਤ੍ਤੇ ਵੁਤ੍ਤਬੀਜਂ ਵਿਯ ਅਤਿਵਿਯ ਉਲ਼ਾਰਫਲਂ ਜਾਤ’’ਨ੍ਤਿ ਆਹ. ਤਮਤ੍ਥਂ ਦਸ੍ਸੇਨ੍ਤੇ ਸਙ੍ਗੀਤਿਕਾਰਾ –

‘‘ਤਾਵਤਿਂਸੇ ਯਦਾ ਬੁਦ੍ਧੋ, ਸਿਲਾਯਂ ਪਣ੍ਡੁਕਮ੍ਬਲੇ;

ਪਾਰਿਚ੍ਛਤ੍ਤਯਮੂਲਮ੍ਹਿ, ਵਿਹਾਸਿ ਪੁਰਿਸੁਤ੍ਤਮੋ.

‘‘ਦਸਸੁ ਲੋਕਧਾਤੂਸੁ, ਸਨ੍ਨਿਪਤਿਤ੍ਵਾਨ ਦੇਵਤਾ;

ਪਯਿਰੁਪਾਸਨ੍ਤਿ ਸਮ੍ਬੁਦ੍ਧਂ, ਵਸਨ੍ਤਂ ਨਗਮੁਦ੍ਧਨਿ.

‘‘ਨ ਕੋਚਿ ਦੇਵੋ ਵਣ੍ਣੇਨ, ਸਮ੍ਬੁਦ੍ਧਂ ਅਤਿਰੋਚਤਿ;

ਸਬ੍ਬੇ ਦੇਵੇ ਅਤਿਕ੍ਕਮ੍ਮ, ਸਮ੍ਬੁਦ੍ਧੋਵ ਵਿਰੋਚਤਿ.

‘‘ਯੋਜਨਾਨਿ ¶ ਦਸ ਦ੍ਵੇ ਚ, ਅਙ੍ਕੁਰੋਯਂ ਤਦਾ ਅਹੁ;

ਅਵਿਦੂਰੇਵ ਬੁਦ੍ਧਸ੍ਸ, ਇਨ੍ਦਕੋ ਅਤਿਰੋਚਤਿ.

‘‘ਓਲੋਕੇਤ੍ਵਾਨ ਸਮ੍ਬੁਦ੍ਧੋ, ਅਙ੍ਕੁਰਞ੍ਚਾਪਿ ਇਨ੍ਦਕਂ;

ਦਕ੍ਖਿਣੇਯ੍ਯਂ ਸਮ੍ਭਾਵੇਨ੍ਤੋ, ਇਦਂ ਵਚਨਮਬ੍ਰਵਿ.

‘‘ਮਹਾਦਾਨਂ ¶ ਤਯਾ ਦਿਨ੍ਨਂ, ਅਙ੍ਕੁਰਂ ਦੀਘਮਨ੍ਤਰਂ;

ਅਤਿਦੂਰੇ ਨਿਸਿਨ੍ਨੋਸਿ, ਆਗਚ੍ਛ ਮਮ ਸਨ੍ਤਿਕੇ.

‘‘ਚੋਦਿਤੋ ¶ ਭਾਵਿਤਤ੍ਤੇਨ, ਅਙ੍ਕੁਰੋ ਇਦਮਬ੍ਰਵਿ;

ਕਿਂ ਮਯ੍ਹਂ ਤੇਨ ਦਾਨੇਨ, ਦਕ੍ਖਿਣੇਯ੍ਯੇਨ ਸੁਞ੍ਞਤਂ.

‘‘ਅਯਂ ਸੋ ਇਨ੍ਦਕੋ ਯਕ੍ਖੋ, ਦਜ੍ਜਾ ਦਾਨਂ ਪਰਿਤ੍ਤਕਂ;

ਅਤਿਰੋਚਤਿ ਅਮ੍ਹੇਹਿ, ਚਨ੍ਦੋ ਤਾਰਗਣੇ ਯਥਾ.

‘‘ਉਜ੍ਜਙ੍ਗਲੇ ਯਥਾ ਖੇਤ੍ਤੇ, ਬੀਜਂ ਬਹੁਮ੍ਪਿ ਰੋਪਿਤਂ;

ਨ ਵਿਪੁਲਂ ਫਲਂ ਹੋਤਿ, ਨਪਿ ਤੋਸੇਤਿ ਕਸ੍ਸਕਂ.

‘‘ਤਥੇਵ ਦਾਨਂ ਬਹੁਕਂ, ਦੁਸ੍ਸੀਲੇਸੁ ਪਤਿਟ੍ਠਿਤਂ;

ਨ ਵਿਪੁਲਂ ਫਲਂ ਹੋਤਿ, ਨਪਿ ਤੋਸੇਤਿ ਦਾਯਕਂ.

‘‘ਯਥਾਪਿ ਭਦ੍ਦਕੇ ਖੇਤ੍ਤੇ, ਬੀਜਂ ਅਪ੍ਪਮ੍ਪਿ ਰੋਪਿਤਂ;

ਸਮ੍ਮਾ ਧਾਰਂ ਪਵੇਚ੍ਛਨ੍ਤੇ, ਫਲਂ ਤੋਸੇਸਿ ਕਸ੍ਸਕਂ.

‘‘ਤਥੇਵ ਸੀਲਵਨ੍ਤੇਸੁ, ਗੁਣਵਨ੍ਤੇਸੁ ਤਾਦਿਸੁ;

ਅਪ੍ਪਕਮ੍ਪਿ ਕਤਂ ਕਾਰਂ, ਪੁਞ੍ਞਂ ਹੋਤਿ ਮਹਪ੍ਫਲ’’ਨ੍ਤਿ. – ਗਾਥਾਯੋ ਅਵੋਚੁਂ;

੩੧੭. ਤਤ੍ਥ ਤਾਵਤਿਂਸੇਤਿ ਤਾਵਤਿਂਸਭਵਨੇ. ਸਿਲਾਯਂ ਪਣ੍ਡੁਕਮ੍ਬਲੇਤਿ ਪਣ੍ਡੁਕਮ੍ਬਲਨਾਮਕੇ ਸਿਲਾਸਨੇ ਪੁਰਿਸੁਤ੍ਤਮੋ ਬੁਦ੍ਧੋ ਯਦਾ ਵਿਹਾਸੀਤਿ ਯੋਜਨਾ.

੩੧੮. ਦਸਸੁ ਲੋਕਧਾਤੂਸੁ, ਸਨ੍ਨਿਪਤਿਤ੍ਵਾਨ ਦੇਵਤਾਤਿ ਜਾਤਿਖੇਤ੍ਤਸਞ੍ਞਿਤੇਸੁ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਕਾਮਾਵਚਰਦੇਵਤਾ ਬ੍ਰਹ੍ਮਦੇਵਤਾ ਚ ਬੁਦ੍ਧਸ੍ਸ ਭਗਵਤੋ ਪਯਿਰੁਪਾਸਨਾਯ ਧਮ੍ਮਸ੍ਸਵਨਤ੍ਥਞ੍ਚ ਏਕਤੋ ਸਨ੍ਨਿਪਤਿਤ੍ਵਾ. ਤੇਨਾਹ ‘‘ਪਯਿਰੁਪਾਸਨ੍ਤਿ ਸਮ੍ਬੁਦ੍ਧਂ, ਵਸਨ੍ਤਂ ਨਗਮੁਦ੍ਧਨੀ’’ਤਿ, ਸਿਨੇਰੁਮੁਦ੍ਧਨੀਤਿ ਅਤ੍ਥੋ.

੩੨੦. ਯੋਜਨਾਨਿ ¶ ¶ ਦਸ ਦ੍ਵੇ ਚ, ਅਙ੍ਕੁਰੋਯਂ ਤਦਾ ਅਹੂਤਿ ਅਯਂ ਯਥਾਵੁਤ੍ਤਚਰਿਤੋ ਅਙ੍ਕੁਰੋ ਤਦਾ ਸਤ੍ਥੁ ਸਮ੍ਮੁਖਕਾਲੇ ਦਸ ਦ੍ਵੇ ਯੋਜਨਾਨਿ ਅਨ੍ਤਰਂ ਕਤ੍ਵਾ ਅਹੁ. ਸਤ੍ਥੁ ਨਿਸਿਨ੍ਨਟ੍ਠਾਨਤੋ ਦ੍ਵਾਦਸਯੋਜਨਨ੍ਤਰੇ ਠਾਨੇ ਨਿਸਿਨ੍ਨੋ ਅਹੋਸੀਤਿ ਅਤ੍ਥੋ.

੩੨੩. ਚੋਦਿਤੋ ¶ ਭਾਵਿਤਤ੍ਤੇਨਾਤਿ ਪਾਰਮਿਪਰਿਭਾਵਿਤਾਯ ਅਰਿਯਮਗ੍ਗਭਾਵਨਾਯ ਭਾਵਿਤਤ੍ਤੇਨ ਸਮ੍ਮਾਸਮ੍ਬੁਦ੍ਧੇਨ ਚੋਦਿਤੋ. ਕਿਂ ਮਯ੍ਹਂ ਤੇਨਾਤਿਆਦਿਕਾ ਸਤ੍ਥੁ ਪਟਿਵਚਨਵਸੇਨ ਅਙ੍ਕੁਰੇਨ ਵੁਤ੍ਤਗਾਥਾ. ਦਕ੍ਖਿਣੇਯ੍ਯੇਨ ਸੁਞ੍ਞਤਨ੍ਤਿ ਯਂ ਦਕ੍ਖਿਣੇਯ੍ਯੇਨ ਸੁਞ੍ਞਤਂ ਰਿਤ੍ਤਕਂ ਵਿਰਹਿਤਂ ਤਦਾ ਮਮ ਦਾਨਂ, ਤਸ੍ਮਾ ‘‘ਕਿਂ ਮਯ੍ਹਂ ਤੇਨਾ’’ਤਿ ਅਤ੍ਤਨੋ ਦਾਨਪੁਞ੍ਞਂ ਹੀਲ਼ੇਨ੍ਤੋ ਵਦਤਿ.

੩੨੪. ਯਕ੍ਖੋਤਿ ਦੇਵਪੁਤ੍ਤੋ. ਦਜ੍ਜਾਤਿ ਦਤ੍ਵਾ. ਅਤਿਰੋਚਤਿ ਅਮ੍ਹੇਹੀਤਿ ਅਤ੍ਤਨਾ ਮਾਦਿਸੇਹਿ ਅਤਿਵਿਯ ਵਿਰੋਚਤਿ. ਹੀਤਿ ਵਾ ਨਿਪਾਤਮਤ੍ਤਂ, ਅਮ੍ਹੇ ਅਤਿਕ੍ਕਮਿਤ੍ਵਾ ਅਭਿਭਵਿਤ੍ਵਾ ਵਿਰੋਚਤੀਤਿ ਅਤ੍ਥੋ. ਯਥਾ ਕਿਨ੍ਤਿ ਆਹ ‘‘ਚਨ੍ਦੋ ਤਾਰਗਣੇ ਯਥਾ’’ਤਿ.

੩੨੫-੬. ਉਜ੍ਜਙ੍ਗਲੇਤਿ ਅਤਿਵਿਯ ਥਦ੍ਧਭੂਮਿਭਾਗੇ. ‘‘ਊਸਰੇ’’ਤਿ ਕੇਚਿ ਵਦਨ੍ਤਿ. ਰੋਪਿਤਨ੍ਤਿ ਵੁਤ੍ਤਂ, ਵਪਿਤ੍ਵਾ ਵਾ ਉਦ੍ਧਰਿਤ੍ਵਾ ਵਾ ਪੁਨ ਰੋਪਿਤਂ. ਨਪਿ ਤੋਸੇਤੀਤਿ ਨ ਨਨ੍ਦਯਤਿ, ਅਪ੍ਪਫਲਤਾਯ ਵਾ ਤੁਟ੍ਠਿਂ ਨ ਜਨੇਤਿ. ਤਥੇਵਾਤਿ ਯਥਾ ਉਜ੍ਜਙ੍ਗਲੇ ਖੇਤ੍ਤੇ ਬਹੁਮ੍ਪਿ ਬੀਜਂ ਰੋਪਿਤਂ ਵਿਪੁਲਫਲਂ ਉਲ਼ਾਰਫਲਂ ਨ ਹੋਤਿ, ਤਤੋ ਏਵ ਕਸ੍ਸਕਂ ਨ ਤੋਸੇਤਿ, ਤਥਾ ਦੁਸ੍ਸੀਲੇਸੁ ਸੀਲਵਿਰਹਿਤੇਸੁ ਬਹੁਕਮ੍ਪਿ ਦਾਨਂ ਪਤਿਟ੍ਠਾਪਿਤਂ ਵਿਪੁਲਫਲਂ ਮਹਪ੍ਫਲਂ ਨ ਹੋਤਿ, ਤਤੋ ਏਵ ਦਾਯਕਂ ਨ ਤੋਸੇਤੀਤਿ ਅਤ੍ਥੋ.

੩੨੭-੮. ਯਥਾਪਿ ਭਦ੍ਦਕੇਤਿ ਗਾਥਾਦ੍ਵਯਸ੍ਸ ਵਤ੍ਤਵਿਪਰਿਯਾਯੇਨ ਅਤ੍ਥਯੋਜਨਾ ਵੇਦਿਤਬ੍ਬਾ. ਤਤ੍ਥ ਸਮ੍ਮਾ ਧਾਰਂ ਪਵੇਚ੍ਛਨ੍ਤੇਤਿ ਵੁਟ੍ਠਿਧਾਰਂ ਸਮ੍ਮਦੇਵ ਪਵਤ੍ਤੇਨ੍ਤੇ, ਅਨ੍ਵਡ੍ਢਮਾਸਂ ਅਨੁਦਸਾਹਂ ਅਨੁਪਞ੍ਚਾਹਂ ਦੇਵੇ ਵਸ੍ਸਨ੍ਤੇਤਿ ਅਤ੍ਥੋ. ਗੁਣਵਨ੍ਤੇਸੂਤਿ ਝਾਨਾਦਿਗੁਣਯੁਤ੍ਤੇਸੁ. ਤਾਦਿਸੂਤਿ ਇਟ੍ਠਾਦੀਸੁ ¶ ਤਾਦਿਲਕ੍ਖਣਪ੍ਪਤ੍ਤੇਸੁ. ਕਾਰਨ੍ਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਉਪਕਾਰੋਤਿ ਅਤ੍ਥੋ. ਕੀਦਿਸੋ ਉਪਕਾਰੋਤਿ ਆਹ ‘‘ਪੁਞ੍ਞ’’ਨ੍ਤਿ.

‘‘ਵਿਚੇਯ੍ਯ ਦਾਨਂ ਦਾਤਬ੍ਬਂ, ਯਤ੍ਥ ਦਿਨ੍ਨਂ ਮਹਪ੍ਫਲਂ;

ਵਿਚੇਯ੍ਯ ਦਾਨਂ ਦਤ੍ਵਾਨ, ਸਗ੍ਗਂ ਗਚ੍ਛਨ੍ਤਿ ਦਾਯਕਾ.

‘‘ਵਿਚੇਯ੍ਯ ¶ ਦਾਨਂ ਸੁਗਤਪ੍ਪਸਟ੍ਠਂ, ਯੇ ਦਕ੍ਖਿਣੇਯ੍ਯਾ ਇਧ ਜੀਵਲੋਕੇ;

ਏਤੇਸੁ ਦਿਨ੍ਨਾਨਿ ਮਹਪ੍ਫਲਾਨਿ, ਬੀਜਾਨਿ ਵੁਤ੍ਤਾਨਿ ਯਥਾ ਸੁਖੇਤ੍ਤੇ’’ਤਿ. –

੩੨੯. ਤਤ੍ਥ ¶ ਵਿਚੇਯ੍ਯਾਤਿ ਵਿਚਿਨਿਤ੍ਵਾ, ਪੁਞ੍ਞਕ੍ਖੇਤ੍ਤਂ ਪਞ੍ਞਾਯ ਉਪਪਰਿਕ੍ਖਿਤ੍ਵਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਤਯਿਦਂ ਅਙ੍ਕੁਰਪੇਤਵਤ੍ਥੁ ਸਤ੍ਥਾਰਾ ਤਾਵਤਿਂਸਭਵਨੇ ਦਸਸਹਸ੍ਸਚਕ੍ਕਵਾਲ਼ਦੇਵਤਾਨਂ ਪੁਰਤੋ ਦਕ੍ਖਿਣੇਯ੍ਯਸਮ੍ਪਤ੍ਤਿਵਿਭਾਵਨਤ੍ਥਂ ‘‘ਮਹਾਦਾਨਂ ਤਯਾ ਦਿਨ੍ਨ’’ਨ੍ਤਿਆਦਿਨਾ ਅਤ੍ਤਨਾ ਸਮੁਟ੍ਠਾਪਿਤਂ, ਤਤ੍ਥ ਤਯੋ ਮਾਸੇ ਅਭਿਧਮ੍ਮਂ ਦੇਸੇਤ੍ਵਾ ਮਹਾਪਵਾਰਣਾਯ ਦੇਵਗਣਪਰਿਵੁਤੋ ਦੇਵਦੇਵੋ ਦੇਵਲੋਕਤੋ ਸਙ੍ਕਸ੍ਸਨਗਰਂ ਓਤਰਿਤ੍ਵਾ ਅਨੁਕ੍ਕਮੇਨ ਸਾਵਤ੍ਥਿਂ ਪਤ੍ਵਾ ਜੇਤਵਨੇ ਵਿਹਰਨ੍ਤੋ ਚਤੁਪਰਿਸਮਜ੍ਝੇ ਦਕ੍ਖਿਣੇਯ੍ਯਸਮ੍ਪਤ੍ਤਿਵਿਭਾਵਨਤ੍ਥਮੇਵ ‘‘ਯਸ੍ਸ ਅਤ੍ਥਾਯ ਗਚ੍ਛਾਮਾ’’ਤਿਆਦਿਨਾ ਵਿਤ੍ਥਾਰਤੋ ਦੇਸੇਤ੍ਵਾ ਚਤੁਸਚ੍ਚਕਥਾਯ ਦੇਸਨਾਯ ਕੂਟਂ ਗਣ੍ਹਿ. ਦੇਸਨਾਵਸਾਨੇ ਤੇਸਂ ਅਨੇਕਕੋਟਿਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ.

ਅਙ੍ਕੁਰਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੧੦. ਉਤ੍ਤਰਮਾਤੁਪੇਤਿਵਤ੍ਥੁਵਣ੍ਣਨਾ

ਦਿਵਾਵਿਹਾਰਗਤਂ ਭਿਕ੍ਖੁਨ੍ਤਿ ਇਦਂ ਉਤ੍ਤਰਮਾਤੁਪੇਤਿਵਤ੍ਥੁ. ਤਤ੍ਰਾਯਂ ਅਤ੍ਥਵਿਭਾਵਨਾ – ਸਤ੍ਥਰਿ ਪਰਿਨਿਬ੍ਬੁਤੇ ਪਠਮਮਹਾਸਙ੍ਗੀਤਿਯਾ ਪਵਤ੍ਤਿਤਾਯ ਆਯਸ੍ਮਾ ਮਹਾਕਚ੍ਚਾਯਨੋ ਦ੍ਵਾਦਸਹਿ ¶ ਭਿਕ੍ਖੂਹਿ ਸਦ੍ਧਿਂ ਕੋਸਮ੍ਬਿਯਾ ਅਵਿਦੂਰੇ ਅਞ੍ਞਤਰਸ੍ਮਿਂ ਅਰਞ੍ਞਾਯਤਨੇ ਵਿਹਾਸਿ. ਤੇਨ ਚ ਸਮਯੇਨ ਰਞ੍ਞੋ ਉਦੇਨਸ੍ਸ ਅਞ੍ਞਤਰੋ ਅਮਚ੍ਚੋ ਕਾਲਮਕਾਸਿ, ਤੇਨ ਚ ਪੁਬ੍ਬੇ ਨਗਰੇ ਕਮ੍ਮਨ੍ਤਾ ਅਧਿਟ੍ਠਿਤਾ ਅਹੇਸੁਂ. ਅਥ ਰਾਜਾ ਤਸ੍ਸ ਪੁਤ੍ਤਂ ਉਤ੍ਤਰਂ ਨਾਮ ਮਾਣਵਂ ਪਕ੍ਕੋਸਾਪੇਤ੍ਵਾ ‘‘ਤ੍ਵਞ੍ਚ ਪਿਤਰਾ ਅਧਿਟ੍ਠਿਤੇ ਕਮ੍ਮਨ੍ਤੇ ਸਮਨੁਸਾਸਾ’’ਤਿ ਤੇਨ ਠਿਤਟ੍ਠਾਨੇ ਠਪੇਸਿ.

ਸੋ ਚ ਸਾਧੂਤਿ ਸਮ੍ਪਟਿਚ੍ਛਿਤ੍ਵਾ ਏਕਦਿਵਸਂ ਨਗਰਪਟਿਸਙ੍ਖਰਣਿਯਾਨਂ ਦਾਰੂਨਂ ਅਤ੍ਥਾਯ ਵਡ੍ਢਕਿਯੋ ਗਹੇਤ੍ਵਾ ਅਰਞ੍ਞਂ ਗਤੋ. ਤਤ੍ਥ ਆਯਸ੍ਮਤੋ ਮਹਾਕਚ੍ਚਾਯਨਤ੍ਥੇਰਸ੍ਸ ਵਸਨਟ੍ਠਾਨਂ ਉਪਗਨ੍ਤ੍ਵਾ ਥੇਰਂ ਤਤ੍ਥ ਪਂਸੁਕੂਲਚੀਵਰਧਰਂ ਵਿਵਿਤ੍ਤਂ ਨਿਸਿਨ੍ਨਂ ਦਿਸ੍ਵਾ ਇਰਿਯਾਪਥੇਯੇਵ ਪਸੀਦਿਤ੍ਵਾ ਕਤਪਟਿਸਨ੍ਥਾਰੋ ਵਨ੍ਦਿਤ੍ਵਾ ¶ ਏਕਮਨ੍ਤਂ ਨਿਸੀਦਿ. ਥੇਰੋ ਤਸ੍ਸ ਧਮ੍ਮਂ ਕਥੇਸਿ. ਸੋ ਧਮ੍ਮਂ ¶ ਸੁਤ੍ਵਾ ਰਤਨਤ੍ਤਯੇ ਸਞ੍ਜਾਤਪ੍ਪਸਾਦੋ ਸਰਣੇਸੁ ਪਤਿਟ੍ਠਾਯ ਥੇਰਂ ਨਿਮਨ੍ਤੇਸਿ – ‘‘ਅਧਿਵਾਸੇਥ ਮੇ, ਭਨ੍ਤੇ, ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੂਹਿ ਅਨੁਕਮ੍ਪਂ ਉਪਾਦਾਯਾ’’ਤਿ. ਅਧਿਵਾਸੇਸਿ ਥੇਰੋ ਤੁਣ੍ਹੀਭਾਵੇਨ. ਸੋ ਤਤੋ ਨਿਕ੍ਖਮਿਤ੍ਵਾ ਨਗਰਂ ਗਨ੍ਤ੍ਵਾ ਅਞ੍ਞੇਸਂ ਉਪਾਸਕਾਨਂ ਆਚਿਕ੍ਖਿ – ‘‘ਥੇਰੋ ਮਯਾ ਸ੍ਵਾਤਨਾਯ ਨਿਮਨ੍ਤਿਤੋ, ਤੁਮ੍ਹੇਹਿਪਿ ਮਮ ਦਾਨਗ੍ਗਂ ਆਗਨ੍ਤਬ੍ਬ’’ਨ੍ਤਿ.

ਸੋ ਦੁਤਿਯਦਿਵਸੇ ਕਾਲਸ੍ਸੇਵ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਕਾਲਂ ਆਰੋਚਾਪੇਤ੍ਵਾ ਸਦ੍ਧਿਂ ਭਿਕ੍ਖੂਹਿ ਆਗਚ੍ਛਨ੍ਤਸ੍ਸ ਥੇਰਸ੍ਸ ਪਚ੍ਚੁਗ੍ਗਮਨਂ ਕਤ੍ਵਾ ਵਨ੍ਦਿਤ੍ਵਾ ਪੁਰਕ੍ਖਤ੍ਵਾ ਗੇਹਂ ਪਵੇਸੇਸਿ. ਅਥ ਮਹਾਰਹਕਪ੍ਪਿਯਪਚ੍ਚਤ੍ਥਰਣਅਤ੍ਥਤੇਸੁ ਆਸਨੇਸੁ ਥੇਰੇ ਚ ਭਿਕ੍ਖੂਸੁ ਚ ਨਿਸਿਨ੍ਨੇਸੁ ਗਨ੍ਧਪੁਪ੍ਫਧੂਪੇਹਿ ਪੂਜਂ ਕਤ੍ਵਾ ਪਣੀਤੇਨ ਅਨ੍ਨਪਾਨੇਨ ਤੇ ਸਨ੍ਤਪ੍ਪੇਤ੍ਵਾ ਸਞ੍ਜਾਤਪ੍ਪਸਾਦੋ ਕਤਞ੍ਜਲੀ ਅਨੁਮੋਦਨਂ ਸੁਣਿਤ੍ਵਾ ਕਤਭਤ੍ਤਾਨੁਮੋਦਨੇ ਥੇਰੇ ਗਚ੍ਛਨ੍ਤੇ ਪਤ੍ਤਂ ਗਹੇਤ੍ਵਾ ਅਨੁਗਚ੍ਛਨ੍ਤੋ ਨਗਰਤੋ ਨਿਕ੍ਖਮਿਤ੍ਵਾ ਪਟਿਨਿਵਤ੍ਤਨ੍ਤੋ ‘‘ਭਨ੍ਤੇ, ਤੁਮ੍ਹੇਹਿ ਨਿਚ੍ਚਂ ਮਮ ਗੇਹਂ ਪਵਿਸਿਤਬ੍ਬ’’ਨ੍ਤਿ ਯਾਚਿਤ੍ਵਾ ਥੇਰਸ੍ਸ ਅਧਿਵਾਸਨਂ ਞਤ੍ਵਾ ਨਿਵਤ੍ਤਿ. ਏਵਂ ਸੋ ਥੇਰਂ ਉਪਟ੍ਠਹਨ੍ਤੋ ਤਸ੍ਸ ਓਵਾਦੇ ਪਤਿਟ੍ਠਾਯ ¶ ਸੋਤਾਪਤ੍ਤਿਫਲਂ ਪਾਪੁਣਿ, ਵਿਹਾਰਞ੍ਚ ਕਾਰੇਸਿ, ਸਬ੍ਬੇ ਚ ਅਤ੍ਤਨੋ ਞਾਤਕੇ ਸਾਸਨੇ ਅਭਿਪ੍ਪਸਨ੍ਨੇ ਅਕਾਸਿ.

ਮਾਤਾ ਪਨਸ੍ਸ ਮਚ੍ਛੇਰਮਲਪਰਿਯੁਟ੍ਠਿਤਚਿਤ੍ਤਾ ਹੁਤ੍ਵਾ ਏਵਂ ਪਰਿਭਾਸਿ – ‘‘ਯਂ ਤ੍ਵਂ ਮਮ ਅਨਿਚ੍ਛਨ੍ਤਿਯਾ ਏਵ ਸਮਣਾਨਂ ਅਨ੍ਨਪਾਨਂ ਦੇਸਿ, ਤਂ ਤੇ ਪਰਲੋਕੇ ਲੋਹਿਤਂ ਸਮ੍ਪਜ੍ਜਤੂ’’ਤਿ. ਏਕਂ ਪਨ ਮੋਰਪਿਞ੍ਛਕਲਾਪਂ ਵਿਹਾਰਮਹਦਿਵਸੇ ਦਿਯ੍ਯਮਾਨਂ ਅਨੁਜਾਨਿ. ਸਾ ਕਾਲਂ ਕਤ੍ਵਾ ਪੇਤਯੋਨਿਯਂ ਉਪ੍ਪਜ੍ਜਿ, ਮੋਰਪਿਞ੍ਛਕਲਾਪਦਾਨਾਨੁਮੋਦਨੇਨ ਪਨਸ੍ਸਾ ਕੇਸਾ ਨੀਲਾ ਸਿਨਿਦ੍ਧਾ ਵੇਲ੍ਲਿਤਗ੍ਗਾ ਸੁਖੁਮਾ ਦੀਘਾ ਚ ਅਹੇਸੁਂ. ਸਾ ਯਦਾ ਗਙ੍ਗਾਨਦਿਂ ‘‘ਪਾਨੀਯਂ ਪਿਵਿਸ੍ਸਾਮੀ’’ਤਿ ਓਤਰਤਿ, ਤਦਾ ਨਦੀ ਲੋਹਿਤਪੂਰਾ ਹੋਤਿ. ਸਾ ਪਞ੍ਚਪਣ੍ਣਾਸ ਵਸ੍ਸਾਨਿ ਖੁਪ੍ਪਿਪਾਸਾਭਿਭੂਤਾ ਵਿਚਰਿਤ੍ਵਾ ਏਕਦਿਵਸਂ ਕਙ੍ਖਾਰੇਵਤਤ੍ਥੇਰਂ ਗਙ੍ਗਾਯ ਤੀਰੇ ਦਿਵਾਵਿਹਾਰਂ ਨਿਸਿਨ੍ਨਂ ਦਿਸ੍ਵਾ ਅਤ੍ਤਾਨਂ ਅਤ੍ਤਨੋ ਕੇਸੇਹਿ ਪਟਿਚ੍ਛਾਦੇਤ੍ਵਾ ਉਪਸਙ੍ਕਮਿਤ੍ਵਾ ਪਾਨੀਯਂ ਯਾਚਿ. ਤਂ ਸਨ੍ਧਾਯ ਵੁਤ੍ਤਂ –

‘‘ਦਿਵਾਵਿਹਾਰਗਤਂ ਭਿਕ੍ਖੁਂ, ਗਙ੍ਗਾਤੀਰੇ ਨਿਸਿਨ੍ਨਕਂ;

ਤਂ ਪੇਤੀ ਉਪਸਙ੍ਕਮ੍ਮ, ਦੁਬ੍ਬਣ੍ਣਾ ਭੀਰੁਦਸ੍ਸਨਾ.

‘‘ਕੇਸਾ ¶ ¶ ਚਸ੍ਸਾ ਅਤਿਦੀਘਾ, ਯਾਵਭੂਮਾਵਲਮ੍ਬਰੇ;

ਕੇਸੇਹਿ ਸਾ ਪਟਿਚ੍ਛਨ੍ਨਾ, ਸਮਣਂ ਏਤਦਬ੍ਰਵੀ’’ਤਿ. –

ਇਮਾ ਦ੍ਵੇ ਗਾਥਾ ਸਙ੍ਗੀਤਿਕਾਰਕੇਹਿ ਇਧ ਆਦਿਤੋ ਠਪਿਤਾ.

ਤਤ੍ਥ ਭੀਰੁਦਸ੍ਸਨਾਤਿ ਭਯਾਨਕਦਸ੍ਸਨਾ. ‘‘ਰੁਦ੍ਦਦਸ੍ਸਨਾ’’ਤਿ ਵਾ ਪਾਠੋ, ਬੀਭਚ੍ਛਭਾਰਿਯਦਸ੍ਸਨਾਤਿ ਅਤ੍ਥੋ. ਯਾਵਭੂਮਾਵਲਮ੍ਬਰੇਤਿ ਯਾਵ ਭੂਮਿ, ਤਾਵ ਓਲਮ੍ਬਨ੍ਤਿ. ਪੁਬ੍ਬੇ ‘‘ਭਿਕ੍ਖੁ’’ਨ੍ਤਿ ਚ ਪਚ੍ਛਾ ‘‘ਸਮਣ’’ਨ੍ਤਿ ਚ ਕਙ੍ਖਾਰੇਵਤਤ੍ਥੇਰਮੇਵ ਸਨ੍ਧਾਯ ਵੁਤ੍ਤਂ.

ਸਾ ਪਨ ਪੇਤੀ ਥੇਰਂ ਉਪਸਙ੍ਕਮਿਤ੍ਵਾ ਪਾਨੀਯਂ ਯਾਚਨ੍ਤੀ –

‘‘ਪਞ੍ਚਪਣ੍ਣਾਸ ਵਸ੍ਸਾਨਿ, ਯਤੋ ਕਾਲਕਤਾ ਅਹਂ;

ਨਾਭਿਜਾਨਾਮਿ ¶ ਭੁਤ੍ਤਂ ਵਾ, ਪੀਤਂ ਵਾ ਪਨ ਪਾਨਿਯਂ;

ਦੇਹਿ ਤ੍ਵਂ ਪਾਨਿਯਂ ਭਨ੍ਤੇ, ਤਸਿਤਾ ਪਾਨਿਯਾਯ ਮੇ’’ਤਿ. – ਇਮਂ ਗਾਥਮਾਹ;

੩੩੩. ਤਤ੍ਥ ਨਾਭਿਜਾਨਾਮਿ ਭੁਤ੍ਤਂ ਵਾਤਿ ਏਵਂ ਦੀਘਮਨ੍ਤਰੇ ਕਾਲੇ ਭੋਜਨਂ ਭੁਤ੍ਤਂ ਵਾ ਪਾਨੀਯਂ ਪੀਤਂ ਵਾ ਨਾਭਿਜਾਨਾਮਿ, ਨ ਭੁਤ੍ਤਂ ਨ ਪੀਤਨ੍ਤਿ ਅਤ੍ਥੋ. ਤਸਿਤਾਤਿ ਪਿਪਾਸਿਤਾ. ਪਾਨਿਯਾਯਾਤਿ ਪਾਨੀਯਤ੍ਥਾਯ ਆਹਿਣ੍ਡਨ੍ਤਿਯਾ ਮੇ ਪਾਨੀਯਂ ਦੇਹਿ, ਭਨ੍ਤੇਤਿ ਯੋਜਨਾ.

‘‘ਅਯਂ ਸੀਤੋਦਿਕਾ ਗਙ੍ਗਾ, ਹਿਮਵਨ੍ਤਤੋ ਸਨ੍ਦਤਿ;

ਪਿਵ ਏਤ੍ਤੋ ਗਹੇਤ੍ਵਾਨ, ਕਿਂ ਮਂ ਯਾਚਸਿ ਪਾਨਿਯਂ.

‘‘ਸਚਾਹਂ ਭਨ੍ਤੇ ਗਙ੍ਗਾਯ, ਸਯਂ ਗਣ੍ਹਾਮਿ ਪਾਨਿਯਂ;

ਲੋਹਿਤਂ ਮੇ ਪਰਿਵਤ੍ਤਤਿ, ਤਸ੍ਮਾ ਯਾਚਾਮਿ ਪਾਨਿਯਂ.

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਗਙ੍ਗਾ ਤੇ ਹੋਤਿ ਲੋਹਿਤਂ.

‘‘ਪੁਤ੍ਤੋ ¶ ਮੇ ਉਤ੍ਤਰੋ ਨਾਮ, ਸਦ੍ਧੋ ਆਸਿ ਉਪਾਸਕੋ;

ਸੋ ਚ ਮਯ੍ਹਂ ਅਕਾਮਾਯ, ਸਮਣਾਨਂ ਪਵੇਚ੍ਛਤਿ.

‘‘ਚੀਵਰਂ ¶ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਤਮਹਂ ਪਰਿਭਾਸਾਮਿ, ਮਚ੍ਛੇਰੇਨ ਉਪਦ੍ਦੁਤਾ.

‘‘ਯਂ ਤ੍ਵਂ ਮਯ੍ਹਂ ਅਕਾਮਾਯ, ਸਮਣਾਨਂ ਪਵੇਚ੍ਛਸਿ;

ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ.

‘‘ਏਤਂ ਤੇ ਪਰਲੋਕਸ੍ਮਿਂ, ਲੋਹਿਤਂ ਹੋਤੁ ਉਤ੍ਤਰ;

ਤਸ੍ਸਕਮ੍ਮਵਿਪਾਕੇਨ, ਗਙ੍ਗਾ ਮੇ ਹੋਤਿ ਲੋਹਿਤ’’ਨ੍ਤਿ. –

ਇਮਾ ਥੇਰਸ੍ਸ ਚ ਪੇਤਿਯਾ ਚ ਵਚਨਪਟਿਵਚਨਗਾਥਾ.

੩੩੪. ਤਤ੍ਥ ਹਿਮਵਨ੍ਤਤੋਤਿ ਮਹਤੋ ਹਿਮਸ੍ਸ ਅਤ੍ਥਿਤਾਯ ‘‘ਹਿਮਵਾ’’ਤਿ ਲਦ੍ਧਨਾਮਤੋ ਪਬ੍ਬਤਰਾਜਤੋ. ਸਨ੍ਦਤੀਤਿ ਪਵਤ੍ਤਤਿ. ਏਤ੍ਤੋਤਿ ਇਤੋ ਮਹਾਗਙ੍ਗਾਤੋ. ਕਿਨ੍ਤਿ ਕਸ੍ਮਾ ਮਂ ਯਾਚਸਿ ਪਾਨੀਯਂ, ਗਙ੍ਗਾਨਦਿਂ ਓਤਰਿਤ੍ਵਾ ਯਥਾਰੁਚਿ ਪਿਵਾਤਿ ਦਸ੍ਸੇਤਿ.

੩੩੫. ਲੋਹਿਤਂ ¶ ਮੇ ਪਰਿਵਤ੍ਤਤੀਤਿ ਉਦਕਂ ਸਨ੍ਦਮਾਨਂ ਮਯ੍ਹਂ ਪਾਪਕਮ੍ਮਫਲੇਨ ਲੋਹਿਤਂ ਹੁਤ੍ਵਾ ਪਰਿਵਤ੍ਤਤਿ ਪਰਿਣਮਤਿ, ਤਾਯ ਗਹਿਤਮਤ੍ਤਂ ਉਦਕਂ ਲੋਹਿਤਂ ਜਾਯਤਿ.

੩੩੭-੪੦. ਮਯ੍ਹਂ ਅਕਾਮਾਯਾਤਿ ਮਮ ਅਨਿਚ੍ਛਨ੍ਤਿਯਾ. ਪਵੇਚ੍ਛਤੀਤਿ ਦੇਤਿ. ਪਚ੍ਚਯਨ੍ਤਿ ਗਿਲਾਨਪਚ੍ਚਯਂ. ਏਤਨ੍ਤਿ ਯਂ ਏਤਂ ਚੀਵਰਾਦਿਕਂ ਪਚ੍ਚਯਜਾਤਂ ਸਮਣਾਨਂ ਪਵੇਚ੍ਛਸਿ ਦੇਸਿ, ਏਤਂ ਤੇ ਪਰਲੋਕਸ੍ਮਿਂ ਲੋਹਿਤਂ ਹੋਤੁ ਉਤ੍ਤਰਾਤਿ ਅਭਿਸਪਨਵਸੇਨ ਕਤਂ ਪਾਪਕਮ੍ਮਂ, ਤਸ੍ਸ ਵਿਪਾਕੇਨਾਤਿ ਯੋਜਨਾ.

ਅਥਾਯਸ੍ਮਾ ਰੇਵਤੋ ਤਂ ਪੇਤਿਂ ਉਦ੍ਦਿਸ੍ਸ ਭਿਕ੍ਖੁਸਙ੍ਘਸ੍ਸ ਪਾਨੀਯਂ ਅਦਾਸਿ, ਪਿਣ੍ਡਾਯ ਚਰਿਤ੍ਵਾ ਭਤ੍ਤਂ ਗਹੇਤ੍ਵਾ ਭਿਕ੍ਖੂਨਮਦਾਸਿ, ਸਙ੍ਕਾਰਕੂਟਾਦਿਤੋ ਪਂਸੁਕੂਲਂ ਗਹੇਤ੍ਵਾ ਧੋਵਿਤ੍ਵਾ ਭਿਸਿਞ੍ਚ ਚਿਮਿਲਿਕਞ੍ਚ ਕਤ੍ਵਾ ਭਿਕ੍ਖੂਨਂ ਅਦਾਸਿ, ਤੇਨ ਚਸ੍ਸਾ ਪੇਤਿਯਾ ਦਿਬ੍ਬਸਮ੍ਪਤ੍ਤਿਯੋ ਅਹੇਸੁਂ. ਸਾ ਥੇਰਸ੍ਸ ¶ ਸਨ੍ਤਿਕਂ ਗਨ੍ਤ੍ਵਾ ਅਤ੍ਤਨਾ ਲਦ੍ਧਦਿਬ੍ਬਸਮ੍ਪਤ੍ਤਿਂ ਥੇਰਸ੍ਸ ਦਸ੍ਸੇਸਿ. ਥੇਰੋ ਤਂ ਪਵਤ੍ਤਿਂ ਅਤ੍ਤਨੋ ਸਨ੍ਤਿਕਂ ਉਪਗਤਾਨਂ ਚਤੁਨ੍ਨਂ ਪਰਿਸਾਨਂ ਪਕਾਸੇਤ੍ਵਾ ਧਮ੍ਮਕਥਂ ¶ ਕਥੇਸਿ. ਤੇਨ ਮਹਾਜਨੋ ਸਞ੍ਜਾਤਸਂਵੇਗੋ ਵਿਗਤਮਲਮਚ੍ਛੇਰੋ ਹੁਤ੍ਵਾ ਦਾਨਸੀਲਾਦਿਕੁਸਲਧਮ੍ਮਾਭਿਰਤੋ ਅਹੋਸੀਤਿ. ਇਦਂ ਪਨ ਪੇਤਵਤ੍ਥੁ ਦੁਤਿਯਸਙ੍ਗੀਤਿਯਂ ਸਙ੍ਗਹਂ ਆਰੁਲ਼੍ਹਨ੍ਤਿ ਦਟ੍ਠਬ੍ਬਂ.

ਉਤ੍ਤਰਮਾਤੁਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਅਹਂ ਪੁਰੇ ਪਬ੍ਬਜਿਤਸ੍ਸ ਭਿਕ੍ਖੁਨੋਤਿ ਇਦਂ ਸੁਤ੍ਤਪੇਤਵਤ੍ਥੁ. ਤਸ੍ਸ ਕਾ ਉਪ੍ਪਤ੍ਤਿ? ਸਾਵਤ੍ਥਿਯਾ ਕਿਰ ਅਵਿਦੂਰੇ ਅਞ੍ਞਤਰਸ੍ਮਿਂ ਗਾਮਕੇ ਅਮ੍ਹਾਕਂ ਸਤ੍ਥਰਿ ਅਨੁਪ੍ਪਨ੍ਨੇਯੇਵ ਸਤ੍ਤਨ੍ਨਂ ਵਸ੍ਸਸਤਾਨਂ ਉਪਰਿ ਅਞ੍ਞਤਰੋ ਦਾਰਕੋ ਏਕਂ ਪਚ੍ਚੇਕਬੁਦ੍ਧਂ ਉਪਟ੍ਠਹਿ. ਤਸ੍ਸ ਮਾਤਾ ਤਸ੍ਮਿਂ ਵਯਪ੍ਪਤ੍ਤੇ ਤਸ੍ਸਤ੍ਥਾਯ ਸਮਾਨਕੁਲਤੋ ਅਞ੍ਞਤਰਂ ਕੁਲਧੀਤਰਂ ਆਨੇਸਿ. ਵਿਵਾਹਦਿਵਸੇਯੇਵ ਚ ਸੋ ਕੁਮਾਰੋ ਸਹਾਯੇਹਿ ਸਦ੍ਧਿਂ ਨ੍ਹਾਯਿਤੁਂ ਗਤੋ ਅਹਿਨਾ ਦਟ੍ਠੋ ਕਾਲਮਕਾਸਿ, ‘‘ਯਕ੍ਖਗਾਹੇਨਾ’’ਤਿਪਿ ¶ ਵਦਨ੍ਤਿ. ਸੋ ਪਚ੍ਚੇਕਬੁਦ੍ਧਸ੍ਸ ਉਪਟ੍ਠਾਨੇਨ ਬਹੁਂ ਕੁਸਲਕਮ੍ਮਂ ਕਤ੍ਵਾ ਠਿਤੋਪਿ ਤਸ੍ਸਾ ਦਾਰਿਕਾਯ ਪਟਿਬਦ੍ਧਚਿਤ੍ਤਤਾਯ ਵਿਮਾਨਪੇਤੋ ਹੁਤ੍ਵਾ ਨਿਬ੍ਬਤ੍ਤਿ, ਮਹਿਦ੍ਧਿਕੋ ਪਨ ਅਹੋਸਿ ਮਹਾਨੁਭਾਵੋ.

ਅਥ ਸੋ ਤਂ ਦਾਰਿਕਂ ਅਤ੍ਤਨੋ ਵਿਮਾਨਂ ਨੇਤੁਕਾਮੋ ‘‘ਕੇਨ ਨੁ ਖੋ ਉਪਾਯੇਨ ਏਸਾ ਦਿਟ੍ਠਧਮ੍ਮਵੇਦਨੀਯਕਮ੍ਮਂ ਕਤ੍ਵਾ ਮਯਾ ਸਦ੍ਧਿਂ ਇਧ ਅਭਿਰਮੇਯ੍ਯਾ’’ਤਿ ਤਸ੍ਸਾ ਦਿਬ੍ਬਭੋਗਸਮ੍ਪਤ੍ਤਿਯਾ ਅਨੁਭਵਨਹੇਤੁਂ ਵੀਮਂਸਨ੍ਤੋ ਪਚ੍ਚੇਕਬੁਦ੍ਧਂ ਚੀਵਰਕਮ੍ਮਂ ਕਰੋਨ੍ਤਂ ਦਿਸ੍ਵਾ ਮਨੁਸ੍ਸਰੂਪੇਨ ਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਕਿਂ, ਭਨ੍ਤੇ, ਸੁਤ੍ਤਕੇਨ ਅਤ੍ਥੋ ਅਤ੍ਥੀ’’ਤਿ ਆਹ. ‘‘ਚੀਵਰਕਮ੍ਮਂ ਕਰੋਮਿ, ਉਪਾਸਕਾ’’ਤਿ. ‘‘ਤੇਨ ਹਿ, ਭਨ੍ਤੇ, ਅਸੁਕਸ੍ਮਿਂ ਠਾਨੇ ਸੁਤ੍ਤਭਿਕ੍ਖਂ ਚਰਥਾ’’ਤਿ ਤਸ੍ਸਾ ਦਾਰਿਕਾਯ ਗੇਹਂ ਦਸ੍ਸੇਸਿ. ਪਚ੍ਚੇਕਬੁਦ੍ਧੋ ਤਤ੍ਥ ਗਨ੍ਤ੍ਵਾ ਘਰਦ੍ਵਾਰੇ ਅਟ੍ਠਾਸਿ. ਅਥ ਸਾ ਪਚ੍ਚੇਕਬੁਦ੍ਧਂ ਤਤ੍ਥ ਠਿਤਂ ਦਿਸ੍ਵਾ ਪਸਨ੍ਨਮਾਨਸਾ ‘‘ਸੁਤ੍ਤਕੇਨ ਮੇ ਅਯ੍ਯੋ ਅਤ੍ਥਿਕੋ’’ਤਿ ਞਤ੍ਵਾ ਏਕਂ ਸੁਤ੍ਤਗੁਲ਼ਂ ਅਦਾਸਿ. ਅਥ ਸੋ ਅਮਨੁਸ੍ਸੋ ਮਨੁਸ੍ਸਰੂਪੇਨ ਤਸ੍ਸ ਦਾਰਿਕਾਯ ਘਰਂ ਗਨ੍ਤ੍ਵਾ ਤਸ੍ਸਾ ਮਾਤਰਂ ਯਾਚਿਤ੍ਵਾ ਤਾਯ ਸਦ੍ਧਿਂ ਕਤਿਪਾਹਂ ਵਸਿਤ੍ਵਾ ਤਸ੍ਸਾ ਮਾਤੁਯਾ ਅਨੁਗ੍ਗਹਤ੍ਥਂ ਤਸ੍ਮਿਂ ਗੇਹੇ ਸਬ੍ਬਭਾਜਨਾਨਿ ਹਿਰਞ੍ਞਸੁਵਣ੍ਣਸ੍ਸ ਪੂਰੇਤ੍ਵਾ ਸਬ੍ਬਤ੍ਥ ਉਪਰਿ ਨਾਮਂ ਲਿਖਿ ‘‘ਇਦਂ ਦੇਵਦਤ੍ਤਿਯਂ ਧਨਂ ਨ ਕੇਨਚਿ ਗਹੇਤਬ੍ਬ’’ਨ੍ਤਿ, ਤਞ੍ਚ ਦਾਰਿਕਂ ਗਹੇਤ੍ਵਾ ਅਤ੍ਤਨੋ ¶ ਵਿਮਾਨਂ ਅਗਮਾਸਿ. ਤਸ੍ਸਾ ਮਾਤਾ ਪਹੂਤਂ ਧਨਂ ਲਭਿਤ੍ਵਾ ਅਤ੍ਤਨੋ ਞਾਤਕਾਨਂ ਕਪਣਦ੍ਧਿਕਾਦਿਨਞ੍ਚ ਦਤ੍ਵਾ ਅਤ੍ਤਨਾ ਚ ਪਰਿਭੁਞ੍ਜਿਤ੍ਵਾ ਕਾਲਂ ਕਰੋਨ੍ਤੀ ‘‘ਮਮ ਧੀਤਾ ਆਗਚ੍ਛਤਿ ਚੇ, ਇਦਂ ਧਨਂ ਦਸ੍ਸੇਥਾ’’ਤਿ ਞਾਤਕਾਨਂ ਕਥੇਤ੍ਵਾ ਕਾਲਮਕਾਸਿ.

ਤਤੋ ¶ ਸਤ੍ਤਨ੍ਨਂ ਵਸ੍ਸਸਤਾਨਂ ਅਚ੍ਚਯੇਨ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਸਾਵਤ੍ਥਿਯਂ ਵਿਹਰਨ੍ਤੇ ਤਸ੍ਸਾ ਇਤ੍ਥਿਯਾ ਤੇਨ ਅਮਨੁਸ੍ਸੇਨ ਸਦ੍ਧਿਂ ਵਸਨ੍ਤਿਯਾ ਉਕ੍ਕਣ੍ਠਾ ਉਪ੍ਪਜ੍ਜਿ. ਸਾ ਤਂ ‘‘ਸਾਧੁ, ਅਯ੍ਯਪੁਤ੍ਤ, ਮਂ ਸਕਞ੍ਞੇਵ ਗੇਹਂ ਪਟਿਨੇਹੀ’’ਤਿ ਵਦਨ੍ਤੀ –

‘‘ਅਹਂ ਪੁਰੇ ਪਬ੍ਬਜਿਤਸ੍ਸ ਭਿਕ੍ਖੁਨੋ,

ਸੁਤ੍ਤਂ ਅਦਾਸਿਂ ਉਪਸਙ੍ਕਮ੍ਮ ਯਾਚਿਤਾ;

ਤਸ੍ਸ ਵਿਪਾਕੋ ¶ ਵਿਪੁਲਫਲੂਪਲਬ੍ਭਤਿ,

ਬਹੁਕਾ ਚ ਮੇ ਉਪ੍ਪਜ੍ਜਰੇ ਵਤ੍ਥਕੋਟਿਯੋ.

‘‘ਪੁਪ੍ਫਾਭਿਕਿਣ੍ਣਂ ਰਮਿਤਂ ਵਿਮਾਨਂ, ਅਨੇਕਚਿਤ੍ਤਂ ਨਰਨਾਰਿਸੇਵਿਤਂ;

ਸਾਹਂ ਭੁਞ੍ਜਾਮਿ ਚ ਪਾਰੁਪਾਮਿ ਚ, ਪਹੂਤਵਿਤ੍ਤਾ ਨ ਚ ਤਾਵ ਖੀਯਤਿ.

‘‘ਤਸ੍ਸੇਵ ਕਮ੍ਮਸ੍ਸ ਵਿਪਾਕਮਨ੍ਵਯਾ, ਸੁਖਞ੍ਚ ਸਾਤਞ੍ਚ ਇਧੂਪਲਬ੍ਭਤਿ;

ਸਾਹਂ ਗਨ੍ਤ੍ਵਾ ਪੁਨਦੇਵ ਮਾਨੁਸਂ, ਕਾਹਾਮਿ ਪੁਞ੍ਞਾਨਿ ਨਯਯ੍ਯਪੁਤ੍ਤ ਮ’’ਨ੍ਤਿ. –

੩੪੧. ਤਤ੍ਥ ‘‘ਪਬ੍ਬਜਿਤਸ੍ਸ ਭਿਕ੍ਖੁਨੋ’’ਤਿ ਇਦਂ ਪਚ੍ਚੇਕਬੁਦ੍ਧਂ ਸਦ੍ਧਾਯ ਵੁਤ੍ਤਂ. ਸੋ ਹਿ ਕਾਮਾਦਿਮਲਾਨਂ ਅਤ੍ਤਨੋ ਸਨ੍ਤਾਨਤੋ ਅਨਵਸੇਸਤੋ ਪਬ੍ਬਾਜਿਤਤ੍ਤਾ ਪਹੀਨਤ੍ਤਾ ਪਰਮਤ੍ਥਤੋ ‘‘ਪਬ੍ਬਜਿਤੋ’’ਤਿ, ਭਿਨ੍ਨਕਿਲੇਸਤ੍ਤਾ ‘‘ਭਿਕ੍ਖੂ’’ਤਿ ਚ ਵਤ੍ਤਬ੍ਬਤਂ ਅਰਹਤਿ. ਸੁਤ੍ਤਨ੍ਤਿ ਕਪ੍ਪਾਸਿਯਸੁਤ੍ਤਂ. ਉਪਸਙ੍ਕਮ੍ਮਾਤਿ ਮਯ੍ਹਂ ਗੇਹਂ ਉਪਸਙ੍ਕਮਿਤ੍ਵਾ. ਯਾਚਿਤਾਤਿ ‘‘ਉਦ੍ਦਿਸ੍ਸ ਅਰਿਯਾ ਤਿਟ੍ਠਨ੍ਤਿ, ਏਸਾ ਅਰਿਯਾਨ ਯਾਚਨਾ’’ਤਿ (ਜਾ. ੧.੭.੫੯) ਏਵਂ ਵੁਤ੍ਤਾਯ ਕਾਯਵਿਞ੍ਞਤ੍ਤਿਪਯੋਗਸਙ੍ਖਾਤਾਯ ਭਿਕ੍ਖਾਚਰਿਯਾਯ ¶ ਯਾਚਿਤਾ. ਤਸ੍ਸਾਤਿ ਤਸ੍ਸ ਸੁਤ੍ਤਦਾਨਸ੍ਸ. ਵਿਪਾਕੋ ਵਿਪੁਲਫਲੂਪਲਬ੍ਭਤੀਤਿ ਵਿਪੁਲਫਲੋ ਉਲ਼ਾਰਉਦਯੋ ਮਹਾਉਦਯੋ ਵਿਪਾਕੋ ਏਤਰਹਿ ਉਪਲਬ੍ਭਤਿ ਪਚ੍ਚਨੁਭਵੀਯਤਿ. ਬਹੁਕਾਤਿ ਅਨੇਕਾ. ਵਤ੍ਥਕੋਟਿਯੋਤਿ ਵਤ੍ਥਾਨਂ ਕੋਟਿਯੋ, ਅਨੇਕਸਤਸਹਸ੍ਸਪਭੇਦਾਨਿ ਵਤ੍ਥਾਨੀਤਿ ਅਤ੍ਥੋ.

੩੪੨. ਅਨੇਕਚਿਤ੍ਤਨ੍ਤਿ ¶ ਨਾਨਾਵਿਧਚਿਤ੍ਤਕਮ੍ਮਂ, ਅਨੇਕੇਹਿ ਵਾ ਮੁਤ੍ਤਾਮਣਿਆਦੀਹਿ ਰਤਨੇਹਿ ਵਿਚਿਤ੍ਤਰੂਪਂ. ਨਰਨਾਰਿਸੇਵਿਤਨ੍ਤਿ ਪਰਿਚਾਰਕਭੂਤੇਹਿ ਨਰੇਹਿ ਨਾਰੀਹਿ ਚ ਉਪਸੇਵਿਤਂ. ਸਾਹਂ ਭੁਞ੍ਜਾਮੀਤਿ ¶ ਸਾ ਅਹਂ ਤਂ ਵਿਮਾਨਂ ਪਰਿਭੁਞ੍ਜਾਮਿ. ਪਾਰੁਪਾਮੀਤਿ ਅਨੇਕਾਸੁ ਵਤ੍ਥਕੋਟੀਸੁ ਇਚ੍ਛਿਤਿਚ੍ਛਿਤਂ ਨਿਵਾਸੇਮਿ ਚੇਵ ਪਰਿਦਹਾਮਿ ਚ. ਪਹੂਤਵਿਤ੍ਤਾਤਿ ਪਹੂਤਵਿਤ੍ਤੂਪਕਰਣਾ ਮਹਦ੍ਧਨਾ ਮਹਾਭੋਗਾ. ਨ ਚ ਤਾਵ ਖੀਯਤੀਤਿ ਤਞ੍ਚ ਵਿਤ੍ਤਂ ਨ ਖੀਯਤਿ, ਨ ਪਰਿਕ੍ਖਯਂ ਪਰਿਯਾਦਾਨਂ ਗਚ੍ਛਤਿ.

੩੪੩. ਤਸ੍ਸੇਵ ਕਮ੍ਮਸ੍ਸ ਵਿਪਾਕਮਨ੍ਵਯਾਤਿ ਤਸ੍ਸੇਵ ਸੁਤ੍ਤਦਾਨਮਯਪੁਞ੍ਞਕਮ੍ਮਸ੍ਸ ਅਨ੍ਵਯਾ ਪਚ੍ਚਯਾ ਹੇਤੁਭਾਵੇਨ ਵਿਪਾਕਭੂਤਂ ਸੁਖਂ, ਇਟ੍ਠਮਧੁਰਸਙ੍ਖਾਤਂ ਸਾਤਞ੍ਚ ਇਧ ਇਮਸ੍ਮਿਂ ਵਿਮਾਨੇ ਉਪਲਬ੍ਭਤਿ. ਗਨ੍ਤ੍ਵਾ ਪੁਨਦੇਵ ਮਾਨੁਸਨ੍ਤਿ ਪੁਨ ਏਵ ਮਨੁਸ੍ਸਲੋਕਂ ਉਪਗਨ੍ਤ੍ਵਾ. ਕਾਹਾਮਿ ਪੁਞ੍ਞਾਨੀਤਿ ਮਯ੍ਹਂ ਸੁਖਵਿਸੇਸਨਿਪ੍ਫਾਦਕਾਨਿ ਪੁਞ੍ਞਾਨਿ ਕਰਿਸ੍ਸਾਮਿ, ਯੇਸਂ ਵਾ ਮਯਾ ਅਯਂ ਸਮ੍ਪਤ੍ਤਿ ਲਦ੍ਧਾਤਿ ਅਧਿਪ੍ਪਾਯੋ. ਨਯਯ੍ਯਪੁਤ੍ਤ ਮਨ੍ਤਿ, ਅਯ੍ਯਪੁਤ੍ਤ, ਮਂ ਮਨੁਸ੍ਸਲੋਕਂ ਨਯ, ਨੇਹੀਤਿ ਅਤ੍ਥੋ.

ਤਂ ਸੁਤ੍ਵਾ ਸੋ ਅਮਨੁਸ੍ਸੋ ਤਸ੍ਸਾ ਪਟਿਬਦ੍ਧਚਿਤ੍ਤਤਾਯ ਅਨੁਕਮ੍ਪਾਯ ਗਮਨਂ ਅਨਿਚ੍ਛਨ੍ਤੋ –

ਜਿਣ੍ਣਾ ਚ ਵੁਡ੍ਢਾ ਚ ਤਹਿਂ ਭਵਿਸ੍ਸਸਿ;

ਕਿਂ ਤਤ੍ਥ ਗਨ੍ਤ੍ਵਾਨ ਇਤੋ ਕਰਿਸ੍ਸਸੀ’’ਤਿ. –

ਗਾਥਮਾਹ. ਤਤ੍ਥ ਸਤ੍ਤਾਤਿ ਵਿਭਤ੍ਤਿਲੋਪੇਨ ਨਿਦ੍ਦੇਸੋ, ਨਿਸ੍ਸਕ੍ਕੇ ਵਾ ਏਤਂ ਪਚ੍ਚਤ੍ਤਵਚਨਂ. ਵਸ੍ਸਸਤਾਤਿ ਵਸ੍ਸਸਤਤੋ, ਸਤ੍ਤਹਿ ਵਸ੍ਸਸਤੇਹਿ ਉਦ੍ਧਂ ਤੁਵਂ ਇਧਾਗਤਾ ਇਮਂ ਵਿਮਾਨਂ ਆਗਤਾ, ਇਧਾਗਤਾਯ ਤੁਯ੍ਹਂ ਸਤ੍ਤ ਵਸ੍ਸਸਤਾਨਿ ¶ ਹੋਨ੍ਤੀਤਿ ਅਤ੍ਥੋ. ਜਿਣ੍ਣਾ ਚ ¶ ਵੁਡ੍ਢਾ ਚ ਤਹਿਂ ਭਵਿਸ੍ਸਸੀਤਿ ਇਧ ਦਿਬ੍ਬੇਹਿ ਉਤੁਆਹਾਰੇਹਿ ਉਪਥਮ੍ਭਿਤਤ੍ਤਭਾਵਾ ਕਮ੍ਮਾਨੁਭਾਵੇਨ ਏਤ੍ਤਕਂ ਕਾਲਂ ਦਹਰਾਕਾਰੇਨੇਵ ਠਿਤਾ. ਇਤੋ ਪਨ ਗਤਾ ਕਮ੍ਮਸ੍ਸ ਚ ਪਰਿਕ੍ਖੀਣਤ੍ਤਾ ਮਨੁਸ੍ਸਾਨਞ੍ਚ ਉਤੁਆਹਾਰਵਸੇਨ ਜਰਾਜਿਣ੍ਣਾ ਵਯੋਵੁਡ੍ਢਾ ਚ ਤਹਿਂ ਮਨੁਸ੍ਸਲੋਕੇ ਭਵਿਸ੍ਸਸਿ. ਕਿਨ੍ਤਿ? ਸਬ੍ਬੇਵ ਤੇ ਕਾਲਕਤਾ ਚ ਞਾਤਕਾਤਿ ਦੀਘਸ੍ਸ ਅਦ੍ਧੁਨੋ ਗਤਤ੍ਤਾ ਤਵ ਞਾਤਯੋਪਿ ਸਬ੍ਬੇ ਏਵ ਮਤਾ, ਤਸ੍ਮਾ ਇਤੋ ਦੇਵਲੋਕਤੋ ਤਤ੍ਥ ਮਨੁਸ੍ਸਲੋਕਂ ਗਨ੍ਤ੍ਵਾ ਕਿਂ ਕਰਿਸ੍ਸਸਿ, ਅਵਸੇਸਮ੍ਪਿ ਆਯੁਞ੍ਚ ਇਧੇਵ ਖੇਪੇਹਿ, ਇਧ ਵਸਾਹੀਤਿ ਅਧਿਪ੍ਪਾਯੋ.

ਏਵਂ ਤੇਨ ਵੁਤ੍ਤਾ ਸਾ ਤਸ੍ਸ ਵਚਨਂ ਅਸਦ੍ਦਹਨ੍ਤੀ ਪੁਨਦੇਵ –

‘‘ਸਤ੍ਤੇਵ ¶ ਵਸ੍ਸਾਨਿ ਇਧਾਗਤਾਯ ਮੇ, ਦਿਬ੍ਬਞ੍ਚ ਸੁਖਞ੍ਚ ਸਮਪ੍ਪਿਤਾਯ;

ਸਾਹਂ ਗਨ੍ਤ੍ਵਾ ਪੁਨਦੇਵ ਮਾਨੁਸਂ, ਕਾਹਾਮਿ ਪੁਞ੍ਞਾਨਿ ਨਯਯ੍ਯਪੁਤ੍ਤ ਮ’’ਨ੍ਤਿ. –

ਗਾਥਮਾਹ. ਤਤ੍ਥ ਸਤ੍ਤੇਵ ਵਸ੍ਸਾਨਿ ਇਧਾਗਤਾਯ ਮੇਤਿ, ਅਯ੍ਯਪੁਤ੍ਤ, ਮਯ੍ਹਂ ਇਧਾਗਤਾਯ ਸਤ੍ਤੇਵ ਵਸ੍ਸਾਨਿ ਮਞ੍ਞੇ ਵੀਤਿਵਤ੍ਤਾਨਿ. ਸਤ੍ਤ ਵਸ੍ਸਸਤਾਨਿ ਦਿਬ੍ਬਸੁਖਸਮਪ੍ਪਿਤਾਯ ਬਹੁਮ੍ਪਿ ਕਾਲਂ ਗਤਂ ਅਸਲ੍ਲਕ੍ਖੇਨ੍ਤੀ ਏਵਮਾਹ.

ਏਵਂ ਪਨ ਤਾਯ ਵੁਤ੍ਤੋ ਸੋ ਵਿਮਾਨਪੇਤੋ ਨਾਨਪ੍ਪਕਾਰਂ ਤਂ ਅਨੁਸਾਸਿਤ੍ਵਾ ‘‘ਤ੍ਵਂ ਇਦਾਨਿ ਸਤ੍ਤਾਹਤੋ ਉਤ੍ਤਰਿ ਤਤ੍ਥ ਨ ਜੀਵਿਸ੍ਸਸਿ, ਮਾਤੁਯਾ ਤੇ ਨਿਕ੍ਖਿਤ੍ਤਂ ਮਯਾ ਦਿਨ੍ਨਂ ਧਨਂ ਅਤ੍ਥਿ, ਤਂ ਸਮਣਬ੍ਰਾਹ੍ਮਣਾਨਂ ਦਤ੍ਵਾ ਇਧੇਵ ਉਪ੍ਪਤ੍ਤਿਂ ਪਤ੍ਥੇਹੀ’’ਤਿ ਵਤ੍ਵਾ ਤਂ ਬਾਹਾਯਂ ਗਹੇਤ੍ਵਾ ਗਾਮਮਜ੍ਝੇ ਠਪੇਤ੍ਵਾ ‘‘ਇਧਾਗਤੇ ਅਞ੍ਞੇਪਿ ਜਨੇ ‘ਯਥਾਬਲਂ ਪੁਞ੍ਞਾਨਿ ਕਰੋਥਾ’ਤਿ ਓਵਦੇਯ੍ਯਾਸੀ’’ਤਿ ਵਤ੍ਵਾ ਗਤੋ. ਤੇਨ ਵੁਤ੍ਤਂ –

‘‘ਸੋ ¶ ਤਂ ਗਹੇਤ੍ਵਾਨ ਪਸਯ੍ਹ ਬਾਹਾਯਂ, ਪਚ੍ਚਾਨਯਿਤ੍ਵਾਨ ਥੇਰਿਂ ਸੁਦੁਬ੍ਬਲਂ;

ਵਜ੍ਜੇਸਿ ‘ਅਞ੍ਞਮ੍ਪਿ ਜਨਂ ਇਧਾਗਤਂ, ਕਰੋਥ ਪੁਞ੍ਞਾਨਿ ਸੁਖੂਪਲਬ੍ਭਤੀ’’’ਤਿ.

ਤਤ੍ਥ ਸੋਤਿ ਸੋ ਵਿਮਾਨਪੇਤੋ. ਤਨ੍ਤਿ ਤਂ ਇਤ੍ਥਿਂ. ਗਹੇਤ੍ਵਾਨ ਪਸਯ੍ਹ ਬਾਹਾਯਨ੍ਤਿ ਪਸਯ੍ਹ ਨੇਤਾ ਵਿਯ ਬਾਹਾਯਂ ਤਂ ਗਹੇਤ੍ਵਾ. ਪਚ੍ਚਾਨਯਿਤ੍ਵਾਨਾਤਿ ¶ ਤਸ੍ਸਾ ਜਾਤਸਂਵੁਡ੍ਢਗਾਮਂ ਪੁਨਦੇਵ ਆਨਯਿਤ੍ਵਾ. ਥੇਰਿਨ੍ਤਿ ਥਾਵਰਿਂ, ਜਿਣ੍ਣਂ ਵੁਡ੍ਢਨ੍ਤਿ ਅਤ੍ਥੋ. ਸੁਦੁਬ੍ਬਲਨ੍ਤਿ ਜਰਾਜਿਣ੍ਣਤਾਯ ਏਵ ਸੁਟ੍ਠੁ ਦੁਬ੍ਬਲਂ. ਸਾ ਕਿਰ ਤਤੋ ਵਿਮਾਨਤੋ ਅਪਗਮਨਸਮਨਨ੍ਤਰਮੇਵ ਜਿਣ੍ਣਾ ਵੁਡ੍ਢਾ ਮਹਲ੍ਲਿਕਾ ਅਦ੍ਧਗਤਾ ਵਯੋਅਨੁਪ੍ਪਤ੍ਤਾ ਅਹੋਸਿ. ਵਜ੍ਜੇਸੀਤਿ ਵਦੇਯ੍ਯਾਸਿ. ਵਤ੍ਤਬ੍ਬਵਚਨਾਕਾਰਞ੍ਚ ਦਸ੍ਸੇਤੁਂ ‘‘ਅਞ੍ਞਮ੍ਪਿ ਜਨ’’ਨ੍ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ – ਭਦ੍ਦੇ, ਤ੍ਵਮ੍ਪਿ ਪੁਞ੍ਞਂ ਕਰੇਯ੍ਯਾਸਿ, ਅਞ੍ਞਮ੍ਪਿ ਜਨਂ ਇਧ ਤਵ ਦਸ੍ਸਨਤ੍ਥਾਯ ਆਗਤਂ ‘‘ਭਦ੍ਰਮੁਖਾ, ਆਦਿਤ੍ਤਂ ਸੀਸਂ ਵਾ ਚੇਲਂ ਵਾ ਅਜ੍ਝੁਪੇਕ੍ਖਿਤ੍ਵਾਪਿ ਦਾਨਸੀਲਾਦੀਨਿ ਪੁਞ੍ਞਾਨਿ ਕਰੋਥਾਤਿ, ਕਤੇ ਚ ਪੁਞ੍ਞੇ ਏਕਂਸੇਨੇਵ ਤਸ੍ਸ ਫਲਭੂਤਂ ਸੁਖਂ ਉਪਲਬ੍ਭਤਿ, ਨ ਏਤ੍ਥ ਸਂਸਯੋ ਕਾਤਬ੍ਬੋ’’ਤਿ ਵਦੇਯ੍ਯਾਸਿ ਓਵਦੇਯ੍ਯਾਸੀਤਿ.

ਏਵਞ੍ਚ ਵਤ੍ਵਾ ਤਸ੍ਮਿਂ ਗਤੇ ਸਾ ਇਤ੍ਥੀ ਅਤ੍ਤਨੋ ਞਾਤਕਾਨਂ ਵਸਨਟ੍ਠਾਨਂ ਗਨ੍ਤ੍ਵਾ ਤੇਸਂ ਅਤ੍ਤਾਨਂ ਜਾਨਾਪੇਤ੍ਵਾ ਤੇਹਿ ਨਿਯ੍ਯਾਦਿਤਧਨਂ ਗਹੇਤ੍ਵਾ ਸਮਣਬ੍ਰਾਹ੍ਮਣਾਨਂ ਦਾਨਂ ਦੇਨ੍ਤੀ ਅਤ੍ਤਨੋ ਸਨ੍ਤਿਕਂ ਆਗਤਾਗਤਾਨਂ –

‘‘ਦਿਟ੍ਠਾ ¶ ਮਯਾ ਅਕਤੇਨ ਸਾਧੁਨਾ, ਪੇਤਾ ਵਿਹਞ੍ਞਨ੍ਤਿ ਤਥੇਵ ਮਨੁਸ੍ਸਾ;

ਕਮ੍ਮਞ੍ਚ ¶ ਕਤ੍ਵਾ ਸੁਖਵੇਦਨੀਯਂ, ਦੇਵਾ ਮਨੁਸ੍ਸਾ ਚ ਸੁਖੇ ਠਿਤਾ ਪਜਾ’’ਤਿ. –

ਤਤ੍ਥ ਅਕਤੇਨਾਤਿ ਅਨਿਬ੍ਬਤ੍ਤਿਤੇਨ ਅਤ੍ਤਨਾ ਅਨੁਪਚਿਤੇਨ. ਸਾਧੁਨਾਤਿ ਕੁਸਲਕਮ੍ਮੇਨ, ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ. ਵਿਹਞ੍ਞਨ੍ਤੀਤਿ ਵਿਘਾਤਂ ਆਪਜ੍ਜਨ੍ਤਿ. ਸੁਖਵੇਦਨੀਯਨ੍ਤਿ ਸੁਖਵਿਪਾਕਂ ਪੁਞ੍ਞਕਮ੍ਮਂ. ਸੁਖੇ ਠਿਤਾਤਿ ਸੁਖੇ ਪਤਿਟ੍ਠਿਤਾ. ‘‘ਸੁਖੇਧਿਤਾ’’ਤਿ ਵਾ ਪਾਠੋ, ਸੁਖੇਨ ਅਭਿਵੁਡ੍ਢਾ ਫੀਤਾਤਿ ਅਤ੍ਥੋ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਯਥਾ ਪੇਤਾ ਤਥੇਵ ਮਨੁਸ੍ਸਾ ਅਕਤੇਨ ਕੁਸਲੇਨ, ਕਤੇਨ ਚ ਅਕੁਸਲੇਨ ਵਿਹਞ੍ਞਮਾਨਾ ਖੁਪ੍ਪਿਪਾਸਾਦਿਨਾ ਵਿਘਾਤਂ ਆਪਜ੍ਜਨ੍ਤਾ ਮਹਾਦੁਕ੍ਖਂ ਅਨੁਭਵਨ੍ਤਾ ਦਿਟ੍ਠਾ ਮਯਾ. ਸੁਖਵੇਦਨੀਯਂ ਪਨ ਕਮ੍ਮਂ ਕਤ੍ਵਾ ਤੇਨ ਕਤੇਨ ਕੁਸਲਕਮ੍ਮੇਨ, ਅਕਤੇਨ ਚ ਅਕੁਸਲਕਮ੍ਮੇਨ ਦੇਵਮਨੁਸ੍ਸਪਰਿਯਾਪਨ੍ਨਾ ਪਜਾ ਸੁਖੇ ਠਿਤਾ ਦਿਟ੍ਠਾ ਮਯਾ, ਅਤ੍ਤਪਚ੍ਚਕ੍ਖਮੇਤਂ, ਤਸ੍ਮਾ ਪਾਪਂ ਦੂਰਤੋਵ ਪਰਿਵਜ੍ਜੇਨ੍ਤਾ ਪੁਞ੍ਞਕਿਰਿਯਾਯ ਯੁਤ੍ਤਪਯੁਤ੍ਤਾ ਹੋਥਾਤਿ.

ਏਵਂ ਪਨ ਓਵਾਦਂ ਦੇਨ੍ਤੀ ਸਮਣਬ੍ਰਾਹ੍ਮਣਾਦੀਨਂ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਤਮੇ ਦਿਵਸੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਭਿਕ੍ਖੂ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ¶ ਧਮ੍ਮਂ ਦੇਸੇਸਿ, ਵਿਸੇਸਤੋ ਚ ਪਚ੍ਚੇਕਬੁਦ੍ਧੇਸੁ ਪਵਤ੍ਤਿਤਦਾਨਸ੍ਸ ਮਹਪ੍ਫਲਤਂ ਮਹਾਨਿਸਂਸਤਞ੍ਚ ਪਕਾਸੇਸਿ. ਤਂ ਸੁਤ੍ਵਾ ਮਹਾਜਨੋ ਵਿਗਤਮਲਮਚ੍ਛੇਰੋ ਦਾਨਾਦਿਪੁਞ੍ਞਾਭਿਰਤੋ ਅਹੋਸੀਤਿ.

ਸੁਤ੍ਤਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੧੨. ਕਣ੍ਣਮੁਣ੍ਡਪੇਤਿਵਤ੍ਥੁਵਣ੍ਣਨਾ

ਸੋਣ੍ਣਸੋਪਾਨਫਲਕਾਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਕਣ੍ਣਮੁਣ੍ਡਪੇਤਿਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ¶ ਕਸ੍ਸਪਬੁਦ੍ਧਕਾਲੇ ਕਿਮਿਲਨਗਰੇ ਅਞ੍ਞਤਰੋ ਉਪਾਸਕੋ ਸੋਤਾਪਨ੍ਨੋ ਪਞ੍ਚਹਿ ਉਪਾਸਕਸਤੇਹਿ ਸਦ੍ਧਿਂ ਸਮਾਨਚ੍ਛਨ੍ਦੋ ਹੁਤ੍ਵਾ ਆਰਾਮਰੋਪਨਸੇਤੁਬਨ੍ਧਨਚਙ੍ਕਮਨਕਰਣਾਦੀਸੁ ਪੁਞ੍ਞਕਮ੍ਮੇਸੁ ਪਸੁਤੋ ਹੁਤ੍ਵਾ ਵਿਹਰਨ੍ਤੋ ਸਙ੍ਘਸ੍ਸ ਵਿਹਾਰਂ ਕਾਰੇਤ੍ਵਾ ਤੇਹਿ ਸਦ੍ਧਿਂ ਕਾਲੇਨ ਕਾਲਂ ਵਿਹਾਰਂ ਗਚ੍ਛਤਿ. ਤੇਸਂ ਭਰਿਯਾਯੋਪਿ ਉਪਾਸਿਕਾ ਹੁਤ੍ਵਾ ਅਞ੍ਞਮਞ੍ਞਂ ਸਮਗ੍ਗਾ ਮਾਲਾਗਨ੍ਧਵਿਲੇਪਨਾਦਿਹਤ੍ਥਾ ਕਾਲੇਨ ਕਾਲਂ ਵਿਹਾਰਂ ਗਚ੍ਛਨ੍ਤਿਯੋ ਅਨ੍ਤਰਾਮਗ੍ਗੇ ਆਰਾਮਸਭਾਦੀਸੁ ਵਿਸ੍ਸਮਿਤ੍ਵਾ ਗਚ੍ਛਨ੍ਤਿ.

ਅਥੇਕਦਿਵਸਂ ¶ ਕਤਿਪਯਾ ਧੁਤ੍ਤਾ ਏਕਿਸ੍ਸਾ ਸਭਾਯ ਸਨ੍ਨਿਸਿਨ੍ਨਾ ਤਾਸੁ ਤਤ੍ਥ ਵਿਸ੍ਸਮਿਤ੍ਵਾ ਗਤਾਸੁ ਤਾਸਂ ਰੂਪਸਮ੍ਪਤ੍ਤਿਂ ਦਿਸ੍ਵਾ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ਤਾਸਂ ਸੀਲਾਚਾਰਗੁਣਸਮ੍ਪਨ੍ਨਤਂ ਞਤ੍ਵਾ ਕਥਂ ਸਮੁਟ੍ਠਾਪੇਸੁਂ ‘‘ਕੋ ਏਤਾਸੁ ਏਕਿਸ੍ਸਾਪਿ ਸੀਲਭੇਦਂ ਕਾਤੁਂ ਸਮਤ੍ਥੋ’’ਤਿ. ਤਤ੍ਥ ਅਞ੍ਞਤਰੋ ‘‘ਅਹਂ ਸਮਤ੍ਥੋ’’ਤਿ ਆਹ. ਤੇ ਤੇਨ ‘‘ਸਹਸ੍ਸੇਨ ਅਬ੍ਭੁਤਂ ਕਰੋਮਾ’’ਤਿ ਅਬ੍ਭੁਤਂ ਅਕਂਸੁ. ਸੋ ਅਨੇਕੇਹਿ ਉਪਾਯੇਹਿ ਵਾਯਮਮਾਨੋ ਤਾਸੁ ਸਭਂ ਆਗਤਾਸੁ ਸੁਮੁਞ੍ਚਿਤਂ ਸਤ੍ਤਤਨ੍ਤਿਂ ਮਧੁਰਸ੍ਸਰਂ ਵੀਣਂ ਵਾਦੇਨ੍ਤੋ ਮਧੁਰੇਨੇਵ ਸਰੇਨ ਕਾਮਪਟਿਸਂਯੁਤ੍ਤਗੀਤਾਨਿ ਗਾਯਨ੍ਤੋ ਗੀਤਸਦ੍ਦੇਨ ਤਾਸੁ ਅਞ੍ਞਤਰਂ ਇਤ੍ਥਿਂ ਸੀਲਭੇਦਂ ਪਾਪੇਨ੍ਤੋ ਅਤਿਚਾਰਿਨਿਂ ਕਤ੍ਵਾ ਤੇ ਧੁਤ੍ਤੇ ਸਹਸ੍ਸਂ ਪਰਾਜੇਸਿ. ਤੇ ਸਹਸ੍ਸਪਰਾਜਿਤਾ ਤਸ੍ਸਾ ਸਾਮਿਕਸ੍ਸ ਆਰੋਚੇਸੁਂ. ਸਾਮਿਕੋ ਤਂ ਪੁਚ੍ਛਿ – ‘‘ਕਿਂ ਤ੍ਵਂ ਏਵਰੂਪਾ, ਯਥਾ ਤੇ ¶ ਪੁਰਿਸਾ ਅਵੋਚੁ’’ਨ੍ਤਿ. ਸਾ ‘‘ਨਾਹਂ ਈਦਿਸਂ ਜਾਨਾਮੀ’’ਤਿ ਪਟਿਕ੍ਖਿਪਿਤ੍ਵਾ ਤਸ੍ਮਿਂ ਅਸਦ੍ਦਹਨ੍ਤੇ ਸਮੀਪੇ ਠਿਤਂ ਸੁਨਖਂ ਦਸ੍ਸੇਤ੍ਵਾ ਸਪਥਂ ਅਕਾਸਿ ‘‘ਸਚੇ ਮਯਾ ਤਾਦਿਸਂ ਪਾਪਕਮ੍ਮਂ ਕਤਂ, ਅਯਂ ਛਿਨ੍ਨਕਣ੍ਣੋ ਕਾਲ਼ਸੁਨਖੋ ਤਤ੍ਥ ਤਤ੍ਥ ਭਵੇ ਜਾਤਂ ਮਂ ¶ ਖਾਦਤੂ’’ਤਿ. ਇਤਰਾਪਿ ਪਞ੍ਚਸਤਾ ਇਤ੍ਥਿਯੋ ਤਂ ਇਤ੍ਥਿਂ ਅਤਿਚਾਰਿਨਿਂ ਜਾਨਨ੍ਤੀ ਕਿਂ ਅਯਂ ਤਥਾਰੂਪਂ ਪਾਪਂ ਅਕਾਸਿ, ਉਦਾਹੁ ਨਾਕਾਸੀ’’ਤਿ ਚੋਦਿਤਾ ‘‘ਨ ਮਯਂ ਏਵਰੂਪਂ ਜਾਨਾਮਾ’’ਤਿ ਮੁਸਾ ਵਤ੍ਵਾ ‘‘ਸਚੇ ਮਯਂ ਜਾਨਾਮ, ਭਵੇ ਭਵੇ ਏਤਿਸ੍ਸਾਯੇਵ ਦਾਸਿਯੋ ਭਵੇਯ੍ਯਾਮਾ’’ਤਿ ਸਪਥਂ ਅਕਂਸੁ.

ਅਥ ਸਾ ਅਤਿਚਾਰਿਨੀ ਇਤ੍ਥੀ ਤੇਨੇਵ ਵਿਪ੍ਪਟਿਸਾਰੇਨ ਡਯ੍ਹਮਾਨਹਦਯਾ ਸੁਸ੍ਸਿਤ੍ਵਾ ਨ ਚਿਰੇਨੇਵ ਕਾਲਂ ਕਤ੍ਵਾ ਹਿਮਵਤਿ ਪਬ੍ਬਤਰਾਜੇ ਸਤ੍ਤਨ੍ਨਂ ਮਹਾਸਰਾਨਂ ਅਞ੍ਞਤਰਸ੍ਸ ਕਣ੍ਣਮੁਣ੍ਡਦਹਸ੍ਸ ਤੀਰੇ ਵਿਮਾਨਪੇਤੀ ਹੁਤ੍ਵਾ ਨਿਬ੍ਬਤ੍ਤਿ. ਵਿਮਾਨਸਾਮਨ੍ਤਾ ਚਸ੍ਸਾ ਕਮ੍ਮਵਿਪਾਕਾਨੁਭਵਨਯੋਗ੍ਗਾ ਏਕਾ ਪੋਕ੍ਖਰਣੀ ਨਿਬ੍ਬਤ੍ਤਿ. ਸੇਸਾ ਚ ਪਞ੍ਚਸਤਾ ਇਤ੍ਥਿਯੋ ਕਾਲਂ ਕਤ੍ਵਾ ਸਪਥਕਮ੍ਮਵਸੇਨ ਤਸ੍ਸਾਯੇਵ ਦਾਸਿਯੋ ਹੁਤ੍ਵਾ ਨਿਬ੍ਬਤ੍ਤਿਂਸੁ. ਸਾ ਤਤ੍ਥ ਪੁਬ੍ਬੇ ਕਤਸ੍ਸ ਪੁਞ੍ਞਕਮ੍ਮਸ੍ਸ ਫਲੇਨ ਦਿਵਸਭਾਗਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਡ੍ਢਰਤ੍ਤੇ ਪਾਪਕਮ੍ਮਬਲਸਞ੍ਚੋਦਿਤਾ ਸਯਨਤੋ ਉਟ੍ਠਹਿਤ੍ਵਾ ਪੋਕ੍ਖਰਣਿਤੀਰਂ ਗਚ੍ਛਤਿ. ਤਤ੍ਥ ਗਤਂ ਗਜਪੋਤਕਪ੍ਪਮਾਣੋ ਏਕੋ ਕਾਲ਼ਸੁਨਖੋ ਭੇਰਵਰੂਪੋ ਛਿਨ੍ਨਕਣ੍ਣੋ ਤਿਖਿਣਾਯਤਕਥਿਨਦਾਠੋ ਸੁਵਿਪ੍ਫੁਲਿਤਖਦਿਰਙ੍ਗਾਰਪੁਞ੍ਜਸਦਿਸਨਯਨੋ ਨਿਰਨ੍ਤਰਪ੍ਪਵਤ੍ਤਵਿਜ੍ਜੁਲਤਾਸਙ੍ਘਾਤਸਦਿਸਜਿਵ੍ਹੋ ਕਥਿਨਤਿਖਿਣਨਖੋ ਖਰਾਯਤਦੁਬ੍ਬਣ੍ਣਲੋਮੋ ਤਤੋ ਆਗਨ੍ਤ੍ਵਾ ਤਂ ਭੂਮਿਯਂ ਨਿਪਾਤੇਤ੍ਵਾ ਅਤਿਸਯਜਿਘਚ੍ਛਾਭਿਭੂਤੋ ਵਿਯ ਪਸਯ੍ਹ ਖਾਦਨ੍ਤੋ ਅਟ੍ਠਿਸਙ੍ਖਲਿਕਮਤ੍ਤਂ ਕਤ੍ਵਾ ਦਨ੍ਤੇਹਿ ਗਹੇਤ੍ਵਾ ਪੋਕ੍ਖਰਣਿਯਂ ਖਿਪਿਤ੍ਵਾ ਅਨ੍ਤਰਧਾਯਤਿ. ਸਾ ਚ ਤਤ੍ਥ ਪਕ੍ਖਿਤ੍ਤਸਮਨਨ੍ਤਰਮੇਵ ਪਕਤਿਰੂਪਧਾਰਿਨੀ ਹੁਤ੍ਵਾ ਵਿਮਾਨਂ ਅਭਿਰੁਯ੍ਹ ਸਯਨੇ ਨਿਪਜ੍ਜਤਿ. ਇਤਰਾ ਪਨ ਤਸ੍ਸਾ ਦਾਸਬ੍ਯਮੇਵ ਦੁਕ੍ਖਂ ਅਨੁਭਵਨ੍ਤਿ. ਏਵਂ ਤਾਸਂ ਤਤ੍ਥ ਵਸਨ੍ਤੀਨਂ ਪਞ੍ਞਾਸਾਧਿਕਾਨਿ ਪਞ੍ਚ ਵਸ੍ਸਸਤਾਨਿ ਵੀਤਿਵਤ੍ਤਾਨਿ.

ਅਥ ¶ ਤਾਸਂ ਪੁਰਿਸੇਹਿ ਵਿਨਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀਨਂ ਉਕ੍ਕਣ੍ਠਾ ਅਹੇਸੁਂ. ਤਤ੍ਥ ਚ ਕਣ੍ਣਮੁਣ੍ਡਦਹਤੋ ਨਿਗ੍ਗਤਾ ਪਬ੍ਬਤਵਿਵਰੇਨ ਆਗਨ੍ਤ੍ਵਾ ਗਙ੍ਗਂ ਨਦਿਂ ਅਨੁਪਵਿਟ੍ਠਾ ਏਕਾ ਨਦੀ ਅਤ੍ਥਿ. ਤਾਸਞ੍ਚ ਵਸਨਟ੍ਠਾਨਸਮੀਪੇ ¶ ਏਕੋ ਦਿਬ੍ਬਫਲੇਹਿ ਅਮ੍ਬਰੁਕ੍ਖੇਹਿ ਪਨਸਲਬੁਜਾਦੀਹਿ ਚ ਉਪਸੋਭਿਤੋ ਆਰਾਮਸਦਿਸੋ ਅਰਞ੍ਞਪ੍ਪਦੇਸੋ ਅਤ੍ਥਿ. ਤਾ ਏਵਂ ਸਮਚਿਨ੍ਤੇਸੁਂ – ‘‘ਹਨ੍ਦ, ਮਯਂ ਇਮਾਨਿ ਅਮ੍ਬਫਲਾਨਿ ਇਮਿਸ੍ਸਾ ਨਦਿਯਾ ਪਕ੍ਖਿਪਿਸ੍ਸਾਮ, ਅਪ੍ਪੇਵ ਨਾਮ ਇਮਂ ਫਲਂ ਦਿਸ੍ਵਾ ਫਲਲੋਭੇਨ ¶ ਕੋਚਿਦੇਵ ਪੁਰਿਸੋ ਇਧਾਗਚ੍ਛੇਯ੍ਯ, ਤੇਨ ਸਦ੍ਧਿਂ ਰਮਿਸ੍ਸਾਮਾਤਿ. ਤਾ ਤਥਾ ਅਕਂਸੁ. ਤਾਹਿ ਪਨ ਪਕ੍ਖਿਤ੍ਤਾਨਿ ਅਮ੍ਬਫਲਾਨਿ ਕਾਨਿਚਿ ਤਾਪਸਾ ਗਣ੍ਹਿਂਸੁ, ਕਾਨਿਚਿ ਵਨਚਰਕਾ, ਕਾਨਿਚਿ ਕਾਕਾ ਵਿਲੁਜ੍ਜਿਂਸੁ, ਕਾਨਿਚਿ ਤੀਰੇ ਲਗ੍ਗਿਂਸੁ. ਏਕਂ ਪਨ ਗਙ੍ਗਾਯ ਸੋਤਂ ਪਤ੍ਵਾ ਅਨੁਕ੍ਕਮੇਨ ਬਾਰਾਣਸਿਂ ਸਮ੍ਪਾਪੁਣਿ.

ਤੇਨ ਚ ਸਮਯੇਨ ਬਾਰਾਣਸਿਰਾਜਾ ਲੋਹਜਾਲਪਰਿਕ੍ਖਿਤ੍ਤੇ ਗਙ੍ਗਾਜਲੇ ਨ੍ਹਾਯਤਿ. ਅਥ ਤਂ ਫਲਂ ਨਦਿਸੋਤੇਨ ਵੁਯ੍ਹਮਾਨਂ ਅਨੁਕ੍ਕਮੇਨ ਆਗਨ੍ਤ੍ਵਾ ਲੋਹਜਾਲੇ ਲਗ੍ਗਿ. ਤਂ ਵਣ੍ਣਗਨ੍ਧਰਸਸਮ੍ਪਨ੍ਨਂ ਮਹਨ੍ਤਂ ਦਿਬ੍ਬਂ ਅਮ੍ਬਫਲਂ ਦਿਸ੍ਵਾ ਰਾਜਪੁਰਿਸਾ ਰਞ੍ਞੋ ਉਪਨੇਸੁਂ. ਰਾਜਾ ਤਸ੍ਸ ਏਕਦੇਸਂ ਗਹੇਤ੍ਵਾ ਵੀਮਂਸਨਤ੍ਥਾਯ ਏਕਸ੍ਸ ਬਨ੍ਧਨਾਗਾਰੇ ਠਪਿਤਸ੍ਸ ਵਜ੍ਝਚੋਰਸ੍ਸ ਖਾਦਿਤੁਂ ਅਦਾਸਿ. ਸੋ ਤਂ ਖਾਦਿਤ੍ਵਾ ‘‘ਦੇਵ, ਮਯਾ ਏਵਰੂਪਂ ਨ ਖਾਦਿਤਪੁਬ੍ਬਂ, ਦਿਬ੍ਬਮਿਦਂ ਮਞ੍ਞੇ ਅਮ੍ਬਫਲ’’ਨ੍ਤਿ ਆਹ. ਰਾਜਾ ਪੁਨਪਿ ਤਸ੍ਸ ਏਕਂ ਖਣ੍ਡਂ ਅਦਾਸਿ. ਸੋ ਤਂ ਖਾਦਿਤ੍ਵਾ ਵਿਗਤਵਲਿਤਪਲਿਤੋ ਅਤਿਵਿਯ ਮਨੋਹਰਰੂਪੋ ਯੋਬ੍ਬਨੇ ਠਿਤੋ ਵਿਯ ਅਹੋਸਿ. ਤਂ ਦਿਸ੍ਵਾ ਰਾਜਾ ਅਚ੍ਛਰਿਯਬ੍ਭੁਤਜਾਤੋ ਤਂ ਅਮ੍ਬਫਲਂ ਪਰਿਭੁਞ੍ਜਿਤ੍ਵਾ ਸਰੀਰੇ ਵਿਸੇਸਂ ਲਭਿਤ੍ਵਾ ਮਨੁਸ੍ਸੇ ਪੁਚ੍ਛਿ – ‘‘ਕਤ੍ਥ ਏਵਰੂਪਾਨਿ ਦਿਬ੍ਬਅਮ੍ਬਫਲਾਨਿ ਸਂਵਿਜ੍ਜਨ੍ਤੀ’’ਤਿ? ਮਨੁਸ੍ਸਾ ਏਵਮਾਹਂਸੁ – ‘‘ਹਿਮਵਨ੍ਤੇ ਕਿਰ, ਦੇਵ, ਪਬ੍ਬਤਰਾਜੇ’’ਤਿ. ‘‘ਸਕ੍ਕਾ ਪਨ ਤਾਨਿ ਆਨੇਤੁ’’ਨ੍ਤਿ? ‘‘ਵਨਚਰਕਾ, ਦੇਵ, ਜਾਨਨ੍ਤੀ’’ਤਿ.

ਰਾਜਾ ਵਨਚਰਕੇ ਪਕ੍ਕੋਸਾਪੇਤ੍ਵਾ ਤੇਸਂ ਤਮਤ੍ਥਂ ਆਚਿਕ੍ਖਿਤ੍ਵਾ ਤੇਹਿ ਸਮ੍ਮਨ੍ਤੇਤ੍ਵਾ ਦਿਨ੍ਨਸ੍ਸ ਏਕਸ੍ਸ ਵਨਚਰਕਸ੍ਸ ਸਹਸ੍ਸਂ ਦਤ੍ਵਾ ਤਂ ਵਿਸ੍ਸਜ੍ਜੇਸਿ – ‘‘ਗਚ੍ਛ ¶ , ਸੀਘਂ ਤਂ ਮੇ ਅਮ੍ਬਫਲਂ ਆਨੇਹੀ’’ਤਿ. ਸੋ ਤਂ ਕਹਾਪਣਸਹਸ੍ਸਂ ਪੁਤ੍ਤਦਾਰਸ੍ਸ ਦਤ੍ਵਾ ਪਾਥੇਯ੍ਯਂ ਗਹੇਤ੍ਵਾ ਪਟਿਗਙ੍ਗਂ ਕਣ੍ਣਮੁਣ੍ਡਦਹਾਭਿਮੁਖੋ ਗਨ੍ਤ੍ਵਾ ਮਨੁਸ੍ਸਪਥਂ ਅਤਿਕ੍ਕਮਿਤ੍ਵਾ ਕਣ੍ਣਮੁਣ੍ਡਦਹਤੋ ਓਰਂ ਸਟ੍ਠਿਯੋਜਨਪ੍ਪਮਾਣੇ ਪਦੇਸੇ ਏਕਂ ਤਾਪਸਂ ਦਿਸ੍ਵਾ ਤੇਨ ਆਚਿਕ੍ਖਿਤਮਗ੍ਗੇਨ ਗਚ੍ਛਨ੍ਤੋ ਪੁਨ ਤਿਂਸਯੋਜਨਪ੍ਪਮਾਣੇ ਪਦੇਸੇ ਏਕਂ ਤਾਪਸਂ ਦਿਸ੍ਵਾ, ਤੇਨ ਆਚਿਕ੍ਖਿਤਮਗ੍ਗੇਨ ਗਚ੍ਛਨ੍ਤੋ ਪੁਨ ਪਨ੍ਨਰਸਯੋਜਨਪ੍ਪਮਾਣੇ ਠਾਨੇ ਅਞ੍ਞਂ ਤਾਪਸਂ ਦਿਸ੍ਵਾ, ਤਸ੍ਸ ਅਤ੍ਤਨੋ ਆਗਮਨਕਾਰਣਂ ਕਥੇਸਿ. ਤਾਪਸੋ ਤਂ ਅਨੁਸਾਸਿ – ‘‘ਇਤੋ ਪਟ੍ਠਾਯ ਇਮਂ ਮਹਾਗਙ੍ਗਂ ਪਹਾਯ ਇਮਂ ਖੁਦ੍ਦਕਨਦਿਂ ਨਿਸ੍ਸਾਯ ਪਟਿਸੋਤਂ ਗਚ੍ਛਨ੍ਤੋ ਯਦਾ ਪਬ੍ਬਤਵਿਵਰਂ ਪਸ੍ਸਸਿ, ਤਦਾ ਰਤ੍ਤਿਯਂ ਉਕ੍ਕਂ ਗਹੇਤ੍ਵਾ ਪਵਿਸੇਯ੍ਯਾਸਿ. ਅਯਞ੍ਚ ¶ ਨਦੀ ਰਤ੍ਤਿਯਂ ਨਪ੍ਪਵਤ੍ਤਤਿ, ਤੇਨ ¶ ਤੇ ਗਮਨਯੋਗ੍ਗਾ ਹੋਤਿ, ਕਤਿਪਯਯੋਜਨਾਤਿਕ੍ਕਮੇਨ ਤੇ ਅਮ੍ਬੇ ਪਸ੍ਸਿਸ੍ਸਸੀ’’ਤਿ. ਸੋ ਤਥਾ ਕਤ੍ਵਾ ਉਦਯਨ੍ਤੇ ਸੂਰਿਯੇ ਵਿਵਿਧਰਤਨਰਂਸਿਜਾਲਪਜ੍ਜੋਤਿਤਭੂਮਿਭਾਗਂ ਫਲਭਾਰਾਵਨਤਸਾਖਾਵਿਤਾਨਤਰੁਗਣੋਪਸੋਭਿਤਂ ਨਾਨਾਵਿਧਵਿਹਙ੍ਗਗਣੂਪਕੂਜਿਤਂ ਅਤਿਵਿਯ ਮਨੋਹਰਂ ਅਮ੍ਬਵਨਂ ਸਮ੍ਪਾਪੁਣਿ.

ਅਥ ਨਂ ਤਾ ਅਮਨੁਸ੍ਸਿਤ੍ਥਿਯੋ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ‘‘ਏਸ ਮਮ ਪਰਿਗ੍ਗਹੋ, ਏਸ ਮਮ ਪਰਿਗ੍ਗਹੋ’’ਤਿ ਉਪਧਾਵਿਂਸੁ. ਸੋ ਪਨ ਤਾਹਿ ਸਦ੍ਧਿਂ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤੁਂ ਯੋਗ੍ਗਸ੍ਸ ਪੁਞ੍ਞਕਮ੍ਮਸ੍ਸ ਅਕਤਤ੍ਤਾ ਤਾ ਦਿਸ੍ਵਾਵ ਭੀਤੋ ਵਿਰਵਨ੍ਤੋ ਪਲਾਯਿਤ੍ਵਾ ਅਨੁਕ੍ਕਮੇਨ ਬਾਰਾਣਸਿਂ ਪਤ੍ਵਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸਿ. ਰਾਜਾ ਤਂ ਸੁਤ੍ਵਾ ਤਾ ਇਤ੍ਥਿਯੋ ਦਟ੍ਠੁਂ ਅਮ੍ਬਫਲਾਨਿ ਚ ਪਰਿਭੁਞ੍ਜਿਤੁਂ ਸਞ੍ਜਾਤਾਭਿਲਾਸੋ ਰਜ੍ਜਭਾਰਂ ਅਮਚ੍ਚੇਸੁ ਆਰੋਪੇਤ੍ਵਾ ਮਿਗਵਾਪਦੇਸੇਨ ਸਨ੍ਨਦ੍ਧਧਨੁਕਲਾਪੋ ਖਗ੍ਗਂ ਬਨ੍ਧਿਤ੍ਵਾ ਕਤਿਪਯਮਨੁਸ੍ਸਪਰਿਵਾਰੋ ਤੇਨੇਵ ਵਨਚਰਕੇਨ ਦਸ੍ਸਿਤਮਗ੍ਗੇਨ ਗਨ੍ਤ੍ਵਾ ਕਤਿਪਯਯੋਜਨਨ੍ਤਰੇ ਠਾਨੇ ਮਨੁਸ੍ਸੇਪਿ ਠਪੇਤ੍ਵਾ ਵਨਚਰਕਮੇਵ ਗਹੇਤ੍ਵਾ ਅਨੁਕ੍ਕਮੇਨ ਗਨ੍ਤ੍ਵਾ ਤਮ੍ਪਿ ਤਤੋ ਨਿਵਤ੍ਤਾਪੇਤ੍ਵਾ ਉਦਯਨ੍ਤੇ ¶ ਦਿਵਾਕਰੇ ਅਮ੍ਬਵਨਂ ਪਾਵਿਸਿ. ਅਥ ਨਂ ਤਾ ਇਤ੍ਥਿਯੋ ਅਭਿਨਵਉਪ੍ਪਨ੍ਨਮਿਵ ਦੇਵਪੁਤ੍ਤਂ ਦਿਸ੍ਵਾ ਪਚ੍ਚੁਗ੍ਗਨ੍ਤ੍ਵਾ ‘‘ਰਾਜਾ’’ਤਿ ਞਤ੍ਵਾ ਸਞ੍ਜਾਤਸਿਨੇਹਬਹੁਮਾਨਾ ਸਕ੍ਕਚ੍ਚਂ ਨ੍ਹਾਪੇਤ੍ਵਾ ਦਿਬ੍ਬੇਹਿ ਵਤ੍ਥਾਲਙ੍ਕਾਰਮਾਲਾਗਨ੍ਧਵਿਲੇਪਨੇਹਿ ਸੁਮਣ੍ਡਿਤਪਸਾਧਿਤਂ ਕਤ੍ਵਾ ਵਿਮਾਨਂ ਆਰੋਪੇਤ੍ਵਾ ਨਾਨਗ੍ਗਰਸਂ ਦਿਬ੍ਬਭੋਜਨਂ ਭੋਜੇਤ੍ਵਾ ਤਸ੍ਸ ਇਚ੍ਛਾਨੁਰੂਪਂ ਪਯਿਰੁਪਾਸਿਂਸੁ.

ਅਥ ਦਿਯਡ੍ਢਵਸ੍ਸਸਤੇ ਅਤਿਕ੍ਕਨ੍ਤੇ ਰਾਜਾ ਅਡ੍ਢਰਤ੍ਤਿਸਮਯੇ ਉਟ੍ਠਹਿਤ੍ਵਾ ਨਿਸਿਨ੍ਨੋ ਤਂ ਅਤਿਚਾਰਿਨਿਂ ਪੇਤਿਂ ਪੋਕ੍ਖਰਣਿਤੀਰਂ ਗਚ੍ਛਨ੍ਤਿਂ ਦਿਸ੍ਵਾ ‘‘ਕਿਂ ਨੁ ਖੋ ਏਸਾ ਇਮਾਯ ਵੇਲਾਯ ਗਚ੍ਛਤੀ’’ਤਿ ਵੀਮਂਸਿਤੁਕਾਮੋ ਅਨੁਬਨ੍ਧਿ. ਅਥ ਨਂ ਤਤ੍ਥ ਗਤਂ ਸੁਨਖੇਨ ਖਜ੍ਜਮਾਨਂ ਦਿਸ੍ਵਾ ‘‘ਕਿਂ ਨੁ ਖੋ ਇਦ’’ਨ੍ਤਿ ਅਜਾਨਨ੍ਤੋ ਤਯੋ ਚ ਦਿਵਸੇ ਵੀਮਂਸਿਤ੍ਵਾ ‘‘ਏਸੋ ਏਤਿਸ੍ਸਾ ਪਚ੍ਚਾਮਿਤ੍ਤੋ ਭਵਿਸ੍ਸਤੀ’’ਤਿ ਨਿਸਿਤੇਨ ਉਸੁਨਾ ਵਿਜ੍ਝਿਤ੍ਵਾ ਜੀਵਿਤਾ ਵੋਰੋਪੇਤ੍ਵਾ ਤਞ੍ਚ ਇਤ੍ਥਿਂ ਪੋਥੇਤ੍ਵਾ ਪੋਕ੍ਖਰਣਿਂ ਓਤਾਰੇਤ੍ਵਾ ਪਟਿਲਦ੍ਧਪੁਰਿਮਰੂਪਂ ਦਿਸ੍ਵਾ –

‘‘ਸੋਣ੍ਣਸੋਪਾਨਫਲਕਾ ¶ , ਸੋਣ੍ਣਵਾਲੁਕਸਨ੍ਥਤਾ;

ਤਤ੍ਥ ਸੋਗਨ੍ਧਿਯਾ ਵਗ੍ਗੂ, ਸੁਚਿਗਨ੍ਧਾ ਮਨੋਰਮਾ.

‘‘ਨਾਨਾਰੁਕ੍ਖੇਹਿ ਸਞ੍ਛਨ੍ਨਾ, ਨਾਨਾਗਨ੍ਧਸਮੇਰਿਤਾ;

ਨਾਨਾਪਦੁਮਸਞ੍ਛਨ੍ਨਾ, ਪੁਣ੍ਡਰੀਕਸਮੋਤਤਾ.

‘‘ਸੁਰਭਿਂ ¶ ਸਮ੍ਪਵਾਯਨ੍ਤਿ, ਮਨੁਞ੍ਞਾ ਮਾਲੁਤੇਰਿਤਾ;

ਹਂਸਕੋਞ੍ਚਾਭਿਰੁਦਾ ਚ, ਚਕ੍ਕਵਕ੍ਕਾਭਿਕੂਜਿਤਾ.

‘‘ਨਾਨਾਦਿਜਗਣਾਕਿਣ੍ਣਾ, ਨਾਨਾਸਰਗਣਾਯੁਤਾ;

ਨਾਨਾਫਲਧਰਾ ਰੁਕ੍ਖਾ, ਨਾਨਾਪੁਪ੍ਫਧਰਾ ਵਨਾ.

‘‘ਨ ¶ ਮਨੁਸ੍ਸੇਸੁ ਈਦਿਸਂ, ਨਗਰਂ ਯਾਦਿਸਂ ਇਦਂ;

ਪਾਸਾਦਾ ਬਹੁਕਾ ਤੁਯ੍ਹਂ, ਸੋਵਣ੍ਣਰੂਪਿਯਾਮਯਾ;

ਦਦ੍ਦਲ੍ਲਮਾਨਾ ਆਭੇਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ.

‘‘ਪਞ੍ਚ ਦਾਸਿਸਤਾ ਤੁਯ੍ਹਂ, ਯਾ ਤੇਮਾ ਪਰਿਚਾਰਿਕਾ;

ਤਾ ਕਮ੍ਬੁਕਾਯੂਰਧਰਾ, ਕਞ੍ਚਨਾਵੇਲ਼ਭੂਸਿਤਾ.

‘‘ਪਲ੍ਲਙ੍ਕਾ ਬਹੁਕਾ ਤੁਯ੍ਹਂ, ਸੋਵਣ੍ਣਰੂਪਿਯਾਮਯਾ;

ਕਦਲਿਮਿਗਸਞ੍ਛਨ੍ਨਾ, ਸਜ੍ਜਾ ਗੋਨਕਸਨ੍ਥਤਾ.

‘‘ਯਤ੍ਥ ਤੁਵਂ ਵਾਸੂਪਗਤਾ, ਸਬ੍ਬਕਾਮਸਮਿਦ੍ਧਿਨੀ;

ਸਮ੍ਪਤ੍ਤਾਯਡ੍ਢਰਤ੍ਤਾਯ, ਤਤੋ ਉਟ੍ਠਾਯ ਗਚ੍ਛਸਿ.

‘‘ਉਯ੍ਯਾਨਭੂਮਿਂ ਗਨ੍ਤ੍ਵਾਨ, ਪੋਕ੍ਖਰਞ੍ਞਾ ਸਮਨ੍ਤਤੋ;

ਤਸ੍ਸਾ ਤੀਰੇ ਤੁਵਂ ਠਾਸਿ, ਹਰਿਤੇ ਸਦ੍ਦਲੇ ਸੁਭੇ.

‘‘ਤਤੋ ਤੇ ਕਣ੍ਣਮੁਣ੍ਡੋ ਸੁਨਖੋ, ਅਙ੍ਗਮਙ੍ਗਾਨਿ ਖਾਦਤਿ;

ਯਦਾ ਚ ਖਾਯਿਤਾ ਆਸਿ, ਅਟ੍ਠਿਸਙ੍ਖਲਿਕਾ ਕਤਾ;

ਓਗਾਹਸਿ ਪੋਕ੍ਖਰਣਿਂ, ਹੋਤਿ ਕਾਯੋ ਯਥਾ ਪੁਰੇ.

‘‘ਤਤੋ ਤ੍ਵਂ ਅਙ੍ਗਪਚ੍ਚਙ੍ਗੀ, ਸੁਚਾਰੁ ਪਿਯਦਸ੍ਸਨਾ;

ਵਤ੍ਥੇਨ ਪਾਰੁਪਿਤ੍ਵਾਨ, ਆਯਾਸਿ ਮਮ ਸਨ੍ਤਿਕਂ.

‘‘ਕਿਂ ¶ ¶ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਕਣ੍ਣਮੁਣ੍ਡੋ ਸੁਨਖੋ ਤਵ;

ਦ੍ਵਾਦਸਹਿ ਗਾਥਾਹਿ ਤਂ ਤਸ੍ਸ ਪਵਤ੍ਤਿਂ ਪਟਿਪੁਚ੍ਛਿ.

੩੪੮. ਤਤ੍ਥ ਸੋਣ੍ਣਸੋਪਾਨਫਲਕਾਤਿ ਸੁਵਣ੍ਣਮਯਸੋਪਾਨਫਲਕਾ. ਸੋਣ੍ਣਵਾਲੁਕਸਨ੍ਥਤਾਤਿ ਸਮਨ੍ਤਤੋ ਸੁਵਣ੍ਣਮਯਾਹਿ ਵਾਲੁਕਾਹਿ ਸਨ੍ਥਤਾ. ਤਤ੍ਥਾਤਿ ਪੋਕ੍ਖਰਣਿਯਂ. ਸੋਗਨ੍ਧਿਯਾਤਿ ਸੋਗਨ੍ਧਿਕਾ. ਵਗ੍ਗੂਤਿ ਸੁਨ੍ਦਰਾ ਰੁਚਿਰਾ. ਸੁਚਿਗਨ੍ਧਾਤਿ ਮਨੁਞ੍ਞਗਨ੍ਧਾ.

੩੪੯. ਨਾਨਾਗਨ੍ਧਸਮੇਰਿਤਾਤਿ ਨਾਨਾਵਿਧਸੁਰਭਿਗਨ੍ਧਵਸੇਨ ਗਨ੍ਧਵਾਯੁਨਾ ਸਮਨ੍ਤਤੋ ਏਰਿਤਾ. ਨਾਨਾਪਦੁਮਸਞ੍ਛਨ੍ਨਾਤਿ ¶ ਨਾਨਾਵਿਧਰਤ੍ਤਪਦੁਮਸਞ੍ਛਾਦਿਤਸਲਿਲਤਲਾ. ਪੁਣ੍ਡਰੀਕਸਮੋਤਤਾਤਿ ਸੇਤਪਦੁਮੇਹਿ ਚ ਸਮੋਕਿਣ੍ਣਾ.

੩੫੦. ਸੁਰਭਿਂ ਸਮ੍ਪਵਾਯਨ੍ਤੀਤਿ ਸਮ੍ਮਦੇਵ ਸੁਗਨ੍ਧਂ ਵਾਯਤਿ ਪੋਕ੍ਖਰਣੀਤਿ ਅਧਿਪ੍ਪਾਯੋ. ਹਂਸਕੋਞ੍ਚਾਭਿਰੁਦਾਤਿ ਹਂਸੇਹਿ ਚ ਕੋਞ੍ਚੇਹਿ ਚ ਅਭਿਨਾਦਿਤਾ.

੩੫੧. ਨਾਨਾਦਿਜਗਣਾਕਿਣ੍ਣਾਤਿ ਨਾਨਾਦਿਜਗਣਾਕਿਣ੍ਣਾ. ਨਾਨਾਸਰਗਣਾਯੁਤਾਤਿ ਨਾਨਾਵਿਧਵਿਹਙ੍ਗਮਾਭਿਰੁਦਸਮੂਹਯੁਤ੍ਤਾ. ਨਾਨਾਫਲਧਰਾਤਿ ਨਾਨਾਵਿਧਫਲਧਾਰਿਨੋ ਸਬ੍ਬਕਾਲਂ ਵਿਵਿਧਫਲਭਾਰਨਮਿਤਸਾਖਤ੍ਤਾ. ਨਾਨਾਪੁਪ੍ਫਧਰਾ ਵਨਾਤਿ ਨਾਨਾਵਿਧਸੁਰਭਿਕੁਸੁਮਦਾਯਿਕਾਨਿ ਵਨਾਨੀਤਿ ਅਤ੍ਥੋ. ਲਿਙ੍ਗਵਿਪਲ੍ਲਾਸੇਨ ਹਿ ‘‘ਵਨਾ’’ਤਿ ਵੁਤ੍ਤਂ.

੩੫੨. ਨ ਮਨੁਸ੍ਸੇਸੁ ਈਦਿਸਂ ਨਗਰਨ੍ਤਿ ਯਾਦਿਸਂ ਤਵ ਇਦਂ ਨਗਰਂ, ਈਦਿਸਂ ਮਨੁਸ੍ਸੇਸੁ ਨਤ੍ਥਿ, ਮਨੁਸ੍ਸਲੋਕੇ ਨ ਉਪਲਬ੍ਭਤੀਤਿ ਅਤ੍ਥੋ. ਰੂਪਿਯਮਯਾਤਿ ਰਜਤਮਯਾ. ਦਦ੍ਦਲ੍ਲਮਾਨਾਤਿ ਅਤਿਵਿਯ ਵਿਰੋਚਮਾਨਾ. ਆਭੇਨ੍ਤੀਤਿ ਸੋਭਯਨ੍ਤਿ. ਸਮਨ੍ਤਾ ਚਤੁਰੋ ਦਿਸਾਤਿ ਸਮਨ੍ਤਤੋ ਚਤਸ੍ਸੋਪਿ ਦਿਸਾਯੋ.

੩੫੩. ਯਾ ਤੇਮਾਤਿ ਯਾ ਤੇ ਇਮਾ. ਪਰਿਚਾਰਿਕਾਤਿ ਵੇਯ੍ਯਾਵਚ੍ਚਕਾਰਿਨਿਯੋ. ਤਾਤਿ ਤਾ ਪਰਿਚਾਰਿਕਾਯੋ. ਕਮ੍ਬੁਕਾਯੂਰਧਰਾਤਿ ਸਙ੍ਖਵਲਯਕਾਯੂਰਵਿਭੂਸਿਤਾ. ਕਞ੍ਚਨਾਵੇਲ਼ਭੂਸਿਤਾਤਿ ਸੁਵਣ੍ਣਵਟਂਸਕਸਮਲਙ੍ਕਤਕੇਸਹਤ੍ਥਾ.

੩੫੪. ਕਦਲਿਮਿਗਸਞ੍ਛਨ੍ਨਾਤਿ ¶ ¶ ਕਦਲਿਮਿਗਚਮ੍ਮਪਚ੍ਚਤ੍ਥਰਣਤ੍ਥਤਾ. ਸਜ੍ਜਾਤਿ ਸਜ੍ਜਿਤਾ ਸਯਿਤੁਂ ਯੁਤ੍ਤਰੂਪਾ. ਗੋਨਕਸਨ੍ਥਤਾਤਿ ਦੀਘਲੋਮਕੇਨ ਕੋਜਵੇਨ ਸਨ੍ਥਤਾ.

੩੫੫. ਯਤ੍ਥਾਤਿ ਯਸ੍ਮਿਂ ਪਲ੍ਲਙ੍ਕੇ. ਵਾਸੂਪਗਤਾਤਿ ਵਾਸਂ ਉਪਗਤਾ, ਸਯਿਤਾਤਿ ਅਤ੍ਥੋ. ਸਮ੍ਪਤ੍ਤਾਯਡ੍ਢਰਤ੍ਤਾਯਾਤਿ ਅਡ੍ਢਰਤ੍ਤਿਯਾ ਉਪਗਤਾਯ. ਤਤੋਤਿ ਪਲ੍ਲਙ੍ਕਤੋ.

੩੫੬. ਪੋਕ੍ਖਰਞ੍ਞਾਤਿ ਪੋਕ੍ਖਰਣਿਯਾ. ਹਰਿਤੇਤਿ ¶ ਨੀਲੇ. ਸਦ੍ਦਲੇਤਿ ਤਰੁਣਤਿਣਸਞ੍ਛਨ੍ਨੇ. ਸੁਭੇਤਿ ਸੁਦ੍ਧੇ. ਸੁਭੇਤਿ ਵਾ ਤਸ੍ਸਾ ਆਲਪਨਂ. ਭਦ੍ਦੇ, ਸਮਨ੍ਤਤੋ ਹਰਿਤੇ ਸਦ੍ਦਲੇ ਤਸ੍ਸਾ ਪੋਕ੍ਖਰਣਿਯਾ ਤੀਰੇ ਤ੍ਵਂ ਗਨ੍ਤ੍ਵਾਨ ਠਾਸਿ ਤਿਟ੍ਠਸੀਤਿ ਯੋਜਨਾ.

੩੫੭. ਕਣ੍ਣਮੁਣ੍ਡੋਤਿ ਖਣ੍ਡਿਤਕਣ੍ਣੋ ਛਿਨ੍ਨਕਣ੍ਣੋ. ਖਾਯਿਤਾ ਆਸੀਤਿ ਖਾਦਿਤਾ ਅਹੋਸਿ. ਅਟ੍ਠਿਸਙ੍ਖਲਿਕਾ ਕਤਾਤਿ ਅਟ੍ਠਿਸਙ੍ਖਲਿਕਮਤ੍ਤਾ ਕਤਾ. ਯਥਾ ਪੁਰੇਤਿ ਸੁਨਖੇਨ ਖਾਦਨਤੋ ਪੁਬ੍ਬੇ ਵਿਯ.

੩੫੮. ਤਤੋਤਿ ਪੋਕ੍ਖਰਣਿਂ ਓਗਾਹਨਤੋ ਪਚ੍ਛਾ. ਅਙ੍ਗਪਚ੍ਚਙ੍ਗੀਤਿ ਪਰਿਪੁਣ੍ਣਸਬ੍ਬਙ੍ਗਪਚ੍ਚਙ੍ਗਵਤੀ. ਸੁਚਾਰੂਤਿ ਸੁਟ੍ਠੁ ਮਨੋਰਮਾ. ਪਿਯਦਸ੍ਸਨਾਤਿ ਦਸ੍ਸਨੀਯਾ. ਆਯਾਸੀਤਿ ਆਗਚ੍ਛਸਿ.

ਏਵਂ ਤੇਨ ਰਞ੍ਞਾ ਪੁਚ੍ਛਿਤਾ ਸਾ ਪੇਤੀ ਆਦਿਤੋ ਪਟ੍ਠਾਯ ਅਤ੍ਤਨੋ ਪਵਤ੍ਤਿਂ ਤਸ੍ਸ ਕਥੇਨ੍ਤੀ –

‘‘ਕਿਮਿਲਾਯਂ ਗਹਪਤਿ, ਸਦ੍ਧੋ ਆਸਿ ਉਪਾਸਕੋ;

ਤਸ੍ਸਾਹਂ ਭਰਿਯਾ ਆਸਿਂ, ਦੁਸ੍ਸੀਲਾ ਅਤਿਚਾਰਿਨੀ.

‘‘ਸੋ ਮਂ ਅਤਿਚਰਮਾਨਾਯ, ਸਾਮਿਕੋ ਏਤਦਬ੍ਰਵਿ;

‘ਨੇਤਂ ਤਂ ਛਨ੍ਨਂ ਪਤਿਰੂਪਂ, ਯਂ ਤ੍ਵਂ ਅਤਿਚਰਾਸਿ ਮਂ’.

‘‘ਸਾਹਂ ਘੋਰਞ੍ਚ ਸਪਥਂ, ਮੁਸਾਵਾਦਞ੍ਚ ਭਾਸਿਸਂ;

‘ਨਾਹਂ ਤਂ ਅਤਿਚਰਾਮਿ, ਕਾਯੇਨ ਉਦ ਚੇਤਸਾ.

‘‘‘ਸਚਾਹਂ ¶ ¶ ਤਂ ਅਤਿਚਰਾਮਿ, ਕਾਯੇਨ ਉਦ ਚੇਤਸਾ;

ਕਣ੍ਣਮੁਣ੍ਡੋਯਂ ਸੁਨਖੋ, ਅਙ੍ਗਮਙ੍ਗਾਨਿ ਖਾਦਤੁ’.

‘‘ਤਸ੍ਸ ਕਮ੍ਮਸ੍ਸ ਵਿਪਾਕਂ, ਮੁਸਾਵਾਦਸ੍ਸ ਚੂਭਯਂ;

ਸਤ੍ਤੇਵ ਵਸ੍ਸਸਤਾਨਿ, ਅਨੁਭੂਤਂ ਯਤੋ ਹਿ ਮੇ;

ਕਣ੍ਣਮੁਣ੍ਡੋ ਚ ਸੁਨਖੋ, ਅਙ੍ਗਮਙ੍ਗਾਨਿ ਖਾਦਤੀ’’ਤਿ. – ਪਞ੍ਚ ਗਾਥਾ ਆਹ;

੩੬੦-੧. ਤਤ੍ਥ ¶ ਕਿਮਿਲਾਯਨ੍ਤਿ ਏਵਂਨਾਮਕੇ ਨਗਰੇ. ਅਤਿਚਾਰਿਨੀਤਿ ਭਰਿਯਾ ਹਿ ਪਤਿਂ ਅਤਿਕ੍ਕਮ੍ਮ ਚਰਣਤੋ ‘‘ਅਤਿਚਾਰਿਨੀ’’ਤਿ ਵੁਚ੍ਚਤਿ. ਅਤਿਚਰਮਾਨਾਯ ਮਯਿ ਸੋ ਸਾਮਿਕੋ ਮਂ ਏਤਦਬ੍ਰਵੀਤਿ ਯੋਜਨਾ. ਨੇਤਂ ਛਨ੍ਨਨ੍ਤਿਆਦਿ ਵੁਤ੍ਤਾਕਾਰਦਸ੍ਸਨਂ. ਤਤ੍ਥ ਨੇਤਂ ਛਨ੍ਨਨ੍ਤਿ ਨ ਏਤਂ ਯੁਤ੍ਤਂ. ਨ ਪਤਿਰੂਪਨ੍ਤਿ ਤਸ੍ਸੇਵ ਵੇਵਚਨਂ. ਯਨ੍ਤਿ ਕਿਰਿਯਾਪਰਾਮਸਨਂ. ਅਤਿਚਰਾਸੀਤਿ ਅਤਿਚਰਸਿ, ਅਯਮੇਵ ਵਾ ਪਾਠੋ. ਯਂ ਮਂ ਤ੍ਵਂ ਅਤਿਚਰਸਿ, ਤਤ੍ਥ ਯਂ ਅਤਿਚਰਣਂ, ਨੇਤਂ ਛਨ੍ਨਂ ਨੇਤਂ ਪਤਿਰੂਪਨ੍ਤਿ ਅਤ੍ਥੋ.

੩੬੨-੪. ਘੋਰਨ੍ਤਿ ਦਾਰੁਣਂ. ਸਪਥਨ੍ਤਿ ਸਪਨਂ. ਭਾਸਿਸਨ੍ਤਿ ਅਭਾਸਿਂ. ਸਚਾਹਨ੍ਤਿ ਸਚੇ ਅਹਂ. ਤਨ੍ਤਿ ਤ੍ਵਂ. ਤਸ੍ਸ ਕਮ੍ਮਸ੍ਸਾਤਿ ਤਸ੍ਸ ਪਾਪਕਮ੍ਮਸ੍ਸ ਦੁਸ੍ਸੀਲ੍ਯਕਮ੍ਮਸ੍ਸ. ਮੁਸਾਵਾਦਸ੍ਸ ਚਾਤਿ ‘‘ਨਾਹਂ ਤਂ ਅਤਿਚਰਾਮੀ’’ਤਿ ਵੁਤ੍ਤਮੁਸਾਵਾਦਸ੍ਸ ਚ. ਉਭਯਨ੍ਤਿ ਉਭਯਸ੍ਸ ਵਿਪਾਕਂ. ਅਨੁਭੂਤਨ੍ਤਿ ਅਨੁਭੂਯਮਾਨਂ ਮਯਾਤਿ ਅਤ੍ਥੋ. ਯਤੋਤਿ ਯਤੋ ਪਾਪਕਮ੍ਮਤੋ.

ਏਵਞ੍ਚ ਪਨ ਵਤ੍ਵਾ ਤੇਨ ਅਤ੍ਤਨੋ ਕਤਂ ਉਪਕਾਰਂ ਕਿਤ੍ਤੇਨ੍ਤੀ –

‘‘ਤ੍ਵਞ੍ਚ ਦੇਵ ਬਹੁਕਾਰੋ, ਅਤ੍ਥਾਯ ਮੇ ਇਧਾਗਤੋ;

ਸੁਮੁਤ੍ਤਾਹਂ ਕਣ੍ਣਮੁਣ੍ਡਸ੍ਸ, ਅਸੋਕਾ ਅਕੁਤੋਭਯਾ.

‘‘ਤਾਹਂ ਦੇਵ ਨਮਸ੍ਸਾਮਿ, ਯਾਚਾਮਿ ਪਞ੍ਜਲੀਕਤਾ;

ਭੁਞ੍ਜ ਅਮਾਨੁਸੇ ਕਾਮੇ, ਰਮ ਦੇਵ ਮਯਾ ਸਹਾ’’ਤਿ. –

ਦ੍ਵੇ ਗਾਥਾ ਆਹ. ਤਤ੍ਥ ਦੇਵਾਤਿ ਰਾਜਾਨਂ ਆਲਪਤਿ. ਕਣ੍ਣਮੁਣ੍ਡਸ੍ਸਾਤਿ ਕਣ੍ਣਮੁਣ੍ਡਤੋ. ਨਿਸ੍ਸਕ੍ਕੇ ਹਿ ਇਦਂ ਸਾਮਿਵਚਨਂ. ਅਥ ਰਾਜਾ ਤਤ੍ਥ ਵਾਸੇਨ ਨਿਬ੍ਬਿਨ੍ਨਮਾਨਸੋ ਗਮਨਜ੍ਝਾਸਯਂ ਪਕਾਸੇਸਿ. ਤਂ ਸੁਤ੍ਵਾ ¶ ਪੇਤੀ ਰਞ੍ਞੋ ਪਟਿਬਦ੍ਧਚਿਤ੍ਤਾ ਤਤ੍ਥੇਵਸ੍ਸ ¶ ਵਾਸਂ ਯਾਚਨ੍ਤੀ ‘‘ਤਾਹਂ, ਦੇਵ, ਨਮਸ੍ਸਾਮੀ’’ਤਿ ਗਾਥਮਾਹ.

ਪੁਨ ¶ ਰਾਜਾ ਏਕਂਸੇਨ ਨਗਰਂ ਗਨ੍ਤੁਕਾਮੋਵ ਹੁਤ੍ਵਾ ਅਤ੍ਤਨੋ ਅਜ੍ਝਾਸਯਂ ਪਵੇਦੇਨ੍ਤੋ –

‘‘ਭੁਤ੍ਤਾ ਅਮਾਨੁਸਾ ਕਾਮਾ, ਰਮਿਤੋਮ੍ਹਿ ਤਯਾ ਸਹ;

ਤਾਹਂ ਸੁਭਗੇ ਯਾਚਾਮਿ, ਖਿਪ੍ਪਂ ਪਟਿਨਯਾਹਿ ਮ’’ਨ੍ਤਿ. –

ਓਸਾਨਗਾਥਮਾਹ. ਤਤ੍ਥ ਤਾਹਨ੍ਤਿ ਤਂ ਅਹਂ. ਸੁਭਗੇਤਿ ਸੁਭਗਯੁਤ੍ਤੇ. ਪਟਿਨਯਾਹਿ ਮਨ੍ਤਿ ਮਯ੍ਹਂ ਨਗਰਮੇਵ ਮਂ ਪਟਿਨੇਹਿ. ਸੇਸਂ ਸਬ੍ਬਤ੍ਥ ਪਾਕਟਮੇਵ.

ਅਥ ਸਾ ਵਿਮਾਨਪੇਤੀ ਰਞ੍ਞੋ ਵਚਨਂ ਸੁਤ੍ਵਾ ਵਿਯੋਗਂ ਅਸਹਮਾਨਾ ਸੋਕਾਤੁਰਤਾਯ ਬ੍ਯਾਕੁਲਹਦਯਾ ਵੇਧਮਾਨਸਰੀਰਾ ਨਾਨਾਵਿਧੇਹਿ ਉਪਾਯੇਹਿ ਆਯਾਚਿਤ੍ਵਾਪਿ ਤਂ ਤਤ੍ਥ ਵਾਸੇਤੁਂ ਅਸਕ੍ਕੋਨ੍ਤੀ ਬਹੂਹਿ ਮਹਾਰਹੇਹਿ ਰਤਨੇਹਿ ਸਦ੍ਧਿਂ ਰਾਜਾਨਂ ਨਗਰਂ ਨੇਤ੍ਵਾ ਪਾਸਾਦਂ ਆਰੋਪੇਤ੍ਵਾ ਕਨ੍ਦਿਤ੍ਵਾ ਪਰਿਦੇਵਿਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਗਤਾ. ਰਾਜਾ ਪਨ ਤਂ ਦਿਸ੍ਵਾ ਸਞ੍ਜਾਤਸਂਵੇਗੋ ਦਾਨਾਦੀਨਿ ਪੁਞ੍ਞਕਮ੍ਮਾਨਿ ਕਤ੍ਵਾ ਸਗ੍ਗਪਰਾਯਣੋ ਅਹੋਸਿ. ਅਥ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਸਾਵਤ੍ਥਿਯਂ ਵਿਹਰਨ੍ਤੇ ਏਕਦਿਵਸਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪਬ੍ਬਤਚਾਰਿਕਂ ਚਰਮਾਨੋ ਤਂ ਇਤ੍ਥਿਂ ਸਪਰਿਵਾਰਂ ਦਿਸ੍ਵਾ ਤਾਯ ਕਤਕਮ੍ਮਂ ਪੁਚ੍ਛਿ. ਸਾ ਆਦਿਤੋ ਪਟ੍ਠਾਯ ਸਬ੍ਬਂ ਥੇਰਸ੍ਸ ਕਥੇਸਿ. ਥੇਰੋ ਤਾਸਂ ਧਮ੍ਮਂ ਦੇਸੇਸਿ. ਤਂ ਪਵਤ੍ਤਿਂ ਥੇਰੋ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਮਹਾਜਨੋ ਪਟਿਲਦ੍ਧਸਂਵੇਗੋ ਪਾਪਤੋ ਓਰਮਿਤ੍ਵਾ ਦਾਨਾਦੀਨਿ ਪੁਞ੍ਞਕਮ੍ਮਾਨਿ ਕਤ੍ਵਾ ਸਗ੍ਗਪਰਾਯਣੋ ਅਹੋਸੀਤਿ.

ਕਣ੍ਣਮੁਣ੍ਡਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਅਹੁ ਰਾਜਾ ਬ੍ਰਹ੍ਮਦਤ੍ਤੋਤਿ ਇਦਂ ਉਬ੍ਬਰਿਪੇਤਵਤ੍ਥੁਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਉਪਾਸਿਕਂ ਆਰਬ੍ਭ ਕਥੇਸਿ ¶ . ਸਾਵਤ੍ਥਿਯਂ ਕਿਰ ਅਞ੍ਞਤਰਾਯ ਉਪਾਸਿਕਾਯ ਸਾਮਿਕੋ ਕਾਲਮਕਾਸਿ. ਸਾ ਪਤਿਵਿਯੋਗਦੁਕ੍ਖਾਤੁਰਾ ਸੋਚਨ੍ਤੀ ਆਲ਼ਾਹਨਂ ਗਨ੍ਤ੍ਵਾ ਰੋਦਤਿ. ਭਗਵਾ ਤਸ੍ਸਾ ਸੋਤਾਪਤ੍ਤਿਫਲਸ੍ਸ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਕਰੁਣਾਯ ਸਞ੍ਚੋਦਿਤਮਾਨਸੋ ਹੁਤ੍ਵਾ ¶ ਤਸ੍ਸਾ ਗੇਹਂ ਗਨ੍ਤ੍ਵਾ ਪਞ੍ਞਤ੍ਤੇ ਆਸਨੇ ¶ ਨਿਸੀਦਿ. ਉਪਾਸਿਕਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਥ ਨਂ ਸਤ੍ਥਾ ‘‘ਕਿਂ, ਉਪਾਸਿਕੇ, ਸੋਚਸੀ’’ਤਿ ਵਤ੍ਵਾ ‘‘ਆਮ, ਭਗਵਾ, ਪਿਯਵਿਪ੍ਪਯੋਗੇਨ ਸੋਚਾਮੀ’’ਤਿ ਵੁਤ੍ਤੇ ਤਸ੍ਸਾ ਸੋਕਂ ਅਪਨੇਤੁਕਾਮੋ ਅਤੀਤਂ ਆਹਰਿ.

ਅਤੀਤੇ ਪਞ੍ਚਾਲਰਟ੍ਠੇ ਕਪਿਲਨਗਰੇ ਚੂਲ਼ਨੀਬ੍ਰਹ੍ਮਦਤ੍ਤੋ ਨਾਮ ਰਾਜਾ ਅਹੋਸਿ. ਸੋ ਅਗਤਿਗਮਨਂ ਪਹਾਯ ਅਤ੍ਤਨੋ ਵਿਜਿਤੇ ਪਜਾਯ ਹਿਤਕਰਣਨਿਰਤੋ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਰਜ੍ਜਂ ਅਨੁਸਾਸਮਾਨੋ ਕਦਾਚਿ ‘‘ਅਤ੍ਤਨੋ ਰਜ੍ਜੇ ਕਿਂ ਵਦਨ੍ਤੀ’’ਤਿ ਸੋਤੁਕਾਮੋ ਤੁਨ੍ਨਵਾਯਵੇਸਂ ਗਹੇਤ੍ਵਾ ਏਕੋ ਅਦੁਤਿਯੋ ਨਗਰਤੋ ਨਿਕ੍ਖਮਿਤ੍ਵਾ ਗਾਮਤੋ ਗਾਮਂ ਜਨਪਦਤੋ ਜਨਪਦਂ ਵਿਚਰਿਤ੍ਵਾ ਸਬ੍ਬਰਜ੍ਜਂ ਅਕਣ੍ਟਕਂ ਅਨੁਪਪੀਲ਼ਂ ਮਨੁਸ੍ਸੇ ਸਮ੍ਮੋਦਮਾਨੇ ਅਪਾਰੁਤਘਰੇ ਮਞ੍ਞੇ ਵਿਹਰਨ੍ਤੇ ਦਿਸ੍ਵਾ ਸੋਮਨਸ੍ਸਜਾਤੋ ਨਿਵਤ੍ਤਿਤ੍ਵਾ ਨਗਰਾਭਿਮੁਖੋ ਆਗਚ੍ਛਨ੍ਤੋ ਅਞ੍ਞਤਰਸ੍ਮਿਂ ਗਾਮੇ ਏਕਿਸ੍ਸਾ ਵਿਧਵਾਯ ਦੁਗ੍ਗਤਿਤ੍ਥਿਯਾ ਗੇਹਂ ਪਾਵਿਸਿ. ਸਾ ਤਂ ਦਿਸ੍ਵਾ ਆਹ – ‘‘ਕੋ ਨੁ ਤ੍ਵਂ, ਅਯ੍ਯੋ, ਕੁਤੋ ਵਾ ਆਗਤੋਸੀ’’ਤਿ? ‘‘ਅਹਂ ਤੁਨ੍ਨਵਾਯੋ, ਭਦ੍ਦੇ, ਭਤਿਯਾ ਤੁਨ੍ਨਵਾਯਕਮ੍ਮਂ ਕਰੋਨ੍ਤੋ ਵਿਚਰਾਮਿ. ਯਦਿ ਤੁਮ੍ਹਾਕਂ ਤੁਨ੍ਨਵਾਯਕਮ੍ਮਂ ਅਤ੍ਥਿ, ਭਤ੍ਤਞ੍ਚ ਵੇਤਨਞ੍ਚ ਦੇਥ, ਤੁਮ੍ਹਾਕਮ੍ਪਿ ਕਮ੍ਮਂ ਕਰੋਮੀ’’ਤਿ. ‘‘ਨਤ੍ਥਮ੍ਹਾਕਂ ਕਮ੍ਮਂ ਭਤ੍ਤਵੇਤਨਂ ਵਾ, ਅਞ੍ਞੇਸਂ ਕਰੋਹਿ, ਅਯ੍ਯਾ’’ਤਿ. ਸੋ ਤਤ੍ਥ ਕਤਿਪਾਹਂ ਵਸਨ੍ਤੋ ਧਞ੍ਞਪੁਞ੍ਞਲਕ੍ਖਣਸਮ੍ਪਨ੍ਨਂ ਤਸ੍ਸਾ ਧੀਤਰਂ ਦਿਸ੍ਵਾ ਮਾਤਰਂ ਆਹ – ‘‘ਅਯਂ ਦਾਰਿਕਾ ਕਿਂ ਕੇਨਚਿ ਕਤਪਰਿਗ੍ਗਹਾ, ਉਦਾਹੁ ਅਕਤਪਰਿਗ੍ਗਹਾ. ਸਚੇ ਪਨ ਕੇਨਚਿ ਅਕਤਪਰਿਗ੍ਗਹਾ, ਇਮਂ ਮਯ੍ਹਂ ਦੇਥ, ਅਹਂ ਤੁਮ੍ਹਾਕਂ ਸੁਖੇਨ ਜੀਵਨੂਪਾਯਂ ਕਾਤੁਂ ਸਮਤ੍ਥੋ’’ਤਿ. ‘‘ਸਾਧੁ, ਅਯ੍ਯਾ’’ਤਿ ਸਾ ਤਸ੍ਸ ਤਂ ਅਦਾਸਿ.

ਸੋ ਤਾਯ ਸਦ੍ਧਿਂ ਕਤਿਪਾਹਂ ਵਸਿਤ੍ਵਾ ਤਸ੍ਸਾ ਕਹਾਪਣਸਹਸ੍ਸਂ ਦਤ੍ਵਾ ‘‘ਅਹਂ ਕਤਿਪਾਹੇਨੇਵ ਨਿਵਤ੍ਤਿਸ੍ਸਾਮਿ. ਭਦ੍ਦੇ ¶ , ਤ੍ਵਂ ਮਾ ਉਕ੍ਕਣ੍ਠਸੀ’’ਤਿ ਵਤ੍ਵਾ ਅਤ੍ਤਨੋ ਨਗਰਂ ਗਨ੍ਤ੍ਵਾ, ਨਗਰਸ੍ਸ ਚ ਤਸ੍ਸ ਗਾਮਸ੍ਸ ਚ ਅਨ੍ਤਰੇ ਮਗ੍ਗਂ ਸਮਂ ਕਾਰਾਪੇਤ੍ਵਾ ਅਲਙ੍ਕਾਰਾਪੇਤ੍ਵਾ ਮਹਤਾ ਰਾਜਾਨੁਭਾਵੇਨ ਤਤ੍ਥ ਗਨ੍ਤ੍ਵਾ ਤਂ ਦਾਰਿਕਂ ਕਹਾਪਣਰਾਸਿਮ੍ਹਿ ਠਪੇਤ੍ਵਾ ਸੁਵਣ੍ਣਰਜਤਕਲਸੇਹਿ ਨ੍ਹਾਪੇਤ੍ਵਾ ‘‘ਉਬ੍ਬਰੀ’’ਤਿ ਨਾਮਂ ਕਾਰਾਪੇਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਤ੍ਵਾ ਤਞ੍ਚ ਗਾਮਂ ਤਸ੍ਸਾ ਞਾਤੀਨਂ ਦਤ੍ਵਾ ਮਹਤਾ ਰਾਜਾਨੁਭਾਵੇਨ ਤਂ ਨਗਰਂ ਆਨੇਤ੍ਵਾ ਤਾਯ ਸਦ੍ਧਿਂ ਅਭਿਰਮਮਾਨੋ ਯਾਵਜੀਵਂ ਰਜ੍ਜਸੁਖਂ ਅਨੁਭਵਿਤ੍ਵਾ ਆਯੁਪਰਿਯੋਸਾਨੇ ¶ ਕਾਲਮਕਾਸਿ. ਕਾਲਕਤੇ ਚ ਤਸ੍ਮਿਂ, ਕਤੇ ਚ ਸਰੀਰਕਿਚ੍ਚੇ ਉਬ੍ਬਰੀ ਪਤਿਵਿਯੋਗੇਨ ਸੋਕਸਲ੍ਲਸਮਪ੍ਪਿਤਹਦਯਾ ਆਲ਼ਾਹਨਂ ਗਨ੍ਤ੍ਵਾ ਬਹੂ ਦਿਵਸੇ ਗਨ੍ਧਪੁਪ੍ਫਾਦੀਹਿ ਪੂਜੇਤ੍ਵਾ ਰਞ੍ਞੋ ਗੁਣੇ ਕਿਤ੍ਤੇਤ੍ਵਾ ਉਮ੍ਮਾਦਪ੍ਪਤ੍ਤਾ ਵਿਯ ਕਨ੍ਦਨ੍ਤੀ ਪਰਿਦੇਵਨ੍ਤੀ ਆਲ਼ਾਹਨਂ ਪਦਕ੍ਖਿਣਂ ਕਰੋਤਿ.

ਤੇਨ ¶ ਚ ਸਮਯੇਨ ਅਮ੍ਹਾਕਂ ਭਗਵਾ ਬੋਧਿਸਤ੍ਤਭੂਤੋ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਧਿਗਤਜ੍ਝਾਨਾਭਿਞ੍ਞੋ ਹਿਮਵਨ੍ਤਸ੍ਸ ਸਾਮਨ੍ਤਾ ਅਞ੍ਞਤਰਸ੍ਮਿਂ ਅਰਞ੍ਞਾਯਤਨੇ ਵਿਹਰਨ੍ਤੋ ਸੋਕਸਲ੍ਲਸਮਪ੍ਪਿਤਂ ਉਬ੍ਬਰਿਂ ਦਿਬ੍ਬੇਨ ਚਕ੍ਖੁਨਾ ਦਿਸ੍ਵਾ ਆਕਾਸੇਨ ਆਗਨ੍ਤ੍ਵਾ ਦਿਸ੍ਸਮਾਨਰੂਪੋ ਆਕਾਸੇ ਠਤ੍ਵਾ ਤਤ੍ਥ ਠਿਤੇ ਮਨੁਸ੍ਸੇ ਪੁਚ੍ਛਿ – ‘‘ਕਸ੍ਸਿਦਂ ਆਲ਼ਾਹਨਂ, ਕਸ੍ਸਤ੍ਥਾਯ ਚਾਯਂ ਇਤ੍ਥੀ ‘ਬ੍ਰਹ੍ਮਦਤ੍ਤ, ਬ੍ਰਹ੍ਮਦਤ੍ਤਾ’ਤਿ ਕਨ੍ਦਨ੍ਤੀ ਪਰਿਦੇਵਤੀ’’ਤਿ. ਤਂ ਸੁਤ੍ਵਾ ਮਨੁਸ੍ਸਾ ‘‘ਬ੍ਰਹ੍ਮਦਤ੍ਤੋ ਨਾਮ ਪਞ੍ਚਾਲਾਨਂ ਰਾਜਾ, ਸੋ ਆਯੁਪਰਿਯੋਸਾਨੇ ਕਾਲਮਕਾਸਿ, ਤਸ੍ਸਿਦਂ ਆਲ਼ਾਹਨਂ, ਤਸ੍ਸ ਅਯਂ ਅਗ੍ਗਮਹੇਸੀ ਉਬ੍ਬਰੀ ਨਾਮ ‘ਬ੍ਰਹ੍ਮਦਤ੍ਤ, ਬ੍ਰਹ੍ਮਦਤ੍ਤਾ’ਤਿ ਤਸ੍ਸ ਨਾਮਂ ਗਹੇਤ੍ਵਾ ਕਨ੍ਦਨ੍ਤੀ ਪਰਿਦੇਵਤੀ’’ਤਿ ਆਹਂਸੁ. ਤਮਤ੍ਥਂ ਦੀਪੇਨ੍ਤਾ ਸਙ੍ਗੀਤਿਕਾਰਾ –

‘‘ਅਹੁ ਰਾਜਾ ਬ੍ਰਹ੍ਮਦਤ੍ਤੋ, ਪਞ੍ਚਾਲਾਨਂ ਰਥੇਸਭੋ;

ਅਹੋਰਤ੍ਤਾਨਮਚ੍ਚਯਾ, ਰਾਜਾ ਕਾਲਮਕ੍ਰੁਬ੍ਬਥ.

‘‘ਤਸ੍ਸ ਆਲ਼ਾਹਨਂ ਗਨ੍ਤ੍ਵਾ, ਭਰਿਯਾ ਕਨ੍ਦਤਿ ਉਬ੍ਬਰਿ;

ਬ੍ਰਹ੍ਮਦਤ੍ਤਂ ਅਪਸ੍ਸਨ੍ਤੀ, ਬ੍ਰਹ੍ਮਦਤ੍ਤਾਤਿ ਕਨ੍ਦਤਿ.

‘‘ਇਸਿ ¶ ਚ ਤਤ੍ਥ ਆਗਚ੍ਛਿ, ਸਮ੍ਪਨ੍ਨਚਰਣੋ ਮੁਨਿ;

ਸੋ ਚ ਤਤ੍ਥ ਅਪੁਚ੍ਛਿਤ੍ਥ, ਯੇ ਤਤ੍ਥ ਸੁ ਸਮਾਗਤਾ.

‘‘‘ਕਸ੍ਸ ਇਦਂ ਆਲ਼ਾਹਨਂ, ਨਾਨਾਗਨ੍ਧਸਮੇਰਿਤਂ;

ਕਸ੍ਸਾਯਂ ਕਨ੍ਦਤਿ ਭਰਿਯਾ, ਇਤੋ ਦੂਰਗਤਂ ਪਤਿਂ;

ਬ੍ਰਹ੍ਮਦਤ੍ਤਂ ਅਪਸ੍ਸਨ੍ਤੀ, ਬ੍ਰਹ੍ਮਦਤ੍ਤਾਤਿ ਕਨ੍ਦਤਿ’.

‘‘ਤੇ ਚ ਤਤ੍ਥ ਵਿਯਾਕਂਸੁ, ਯੇ ਤਤ੍ਥ ਸੁ ਸਮਾਗਤਾ;

ਬ੍ਰਹ੍ਮਦਤ੍ਤਸ੍ਸ ਭਦ੍ਦਨ੍ਤੇ, ਬ੍ਰਹ੍ਮਦਤ੍ਤਸ੍ਸ ਮਾਰਿਸ.

‘‘ਤਸ੍ਸ ¶ ਇਦਂ ਆਲ਼ਾਹਨਂ, ਨਾਨਾਗਨ੍ਧਸਮੇਰਿਤਂ;

ਤਸ੍ਸਾਯਂ ਕਨ੍ਦਤਿ ਭਰਿਯਾ, ਇਤੋ ਦੂਰਗਤਂ ਪਤਿਂ;

ਬ੍ਰਹ੍ਮਦਤ੍ਤਂ ਅਪਸ੍ਸਨ੍ਤੀ, ਬ੍ਰਹ੍ਮਦਤ੍ਤਾਤਿ ਕਨ੍ਦਤੀ’’ਤਿ. – ਛ ਗਾਥਾ ਠਪੇਸੁਂ;

੩੬੮-੯. ਤਤ੍ਥ ¶ ਅਹੂਤਿ ਅਹੋਸਿ. ਪਞ੍ਚਾਲਾਨਨ੍ਤਿ ਪਞ੍ਚਾਲਰਟ੍ਠਵਾਸੀਨਂ, ਪਞ੍ਚਾਲਰਟ੍ਠਸ੍ਸੇਵ ਵਾ. ਏਕੋਪਿ ਹਿ ਜਨਪਦੋ ਜਨਪਦਿਕਾਨਂ ਰਾਜਕੁਮਾਰਾਨਂ ਵਸੇਨ ਰੁਲ਼੍ਹਿਯਾ ‘‘ਪਞ੍ਚਾਲਾਨ’’ਨ੍ਤਿ ਬਹੁਵਚਨੇਨ ਨਿਦ੍ਦਿਸੀਯਤਿ. ਰਥੇਸਭੋਤਿ ਰਥੇਸੁ ਉਸਭਸਦਿਸੋ, ਮਹਾਰਥੋਤਿ ਅਤ੍ਥੋ. ਤਸ੍ਸ ਆਲ਼ਾਹਨਨ੍ਤਿ ਤਸ੍ਸ ਰਞ੍ਞੋ ਸਰੀਰਸ੍ਸ ਦਡ੍ਢਟ੍ਠਾਨਂ.

੩੭੦. ਇਸੀਤਿ ਝਾਨਾਦੀਨਂ ਗੁਣਾਨਂ ਏਸਨਟ੍ਠੇਨ ਇਸਿ. ਤਤ੍ਥਾਤਿ ਤਸ੍ਮਿਂ ਉਬ੍ਬਰਿਯਾ ਠਿਤਟ੍ਠਾਨੇ, ਸੁਸਾਨੇਤਿ ਅਤ੍ਥੋ. ਆਗਚ੍ਛੀਤਿ ਅਗਮਾਸਿ. ਸਮ੍ਪਨ੍ਨਚਰਣੋਤਿ ਸੀਲਸਮ੍ਪਦਾ, ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਾ, ਭੋਜਨੇ ਮਤ੍ਤਞ੍ਞੁਤਾ, ਜਾਗਰਿਯਾਨੁਯੋਗੋ, ਸਦ੍ਧਾਦਯੋ ਸਤ੍ਤ ਸਦ੍ਧਮ੍ਮਾ, ਚਤ੍ਤਾਰਿ ਰੂਪਾਵਚਰਝਾਨਾਨੀਤਿ ਇਮੇਹਿ ਪਨ੍ਨਰਸਹਿ ਚਰਣਸਙ੍ਖਾਤੇਹਿ ਗੁਣੇਹਿ ਸਮ੍ਪਨ੍ਨੋ ਸਮਨ੍ਨਾਗਤੋ, ਚਰਣਸਮ੍ਪਨ੍ਨੋਤਿ ਅਤ੍ਥੋ. ਮੁਨੀਤਿ ਅਤ੍ਤਹਿਤਞ੍ਚ ਪਰਹਿਤਞ੍ਚ ਮੁਨਾਤਿ ਜਾਨਾਤੀਤਿ ਮੁਨਿ. ਸੋ ਚ ਤਤ੍ਥ ਅਪੁਚ੍ਛਿਤ੍ਥਾਤਿ ਸੋ ਤਸ੍ਮਿਂ ਠਾਨੇ ਠਿਤੇ ਜਨੇ ਪਟਿਪੁਚ੍ਛਿ. ਯੇ ਤਤ੍ਥ ਸੁ ਸਮਾਗਤਾਤਿ ਯੇ ਮਨੁਸ੍ਸਾ ਤਤ੍ਥ ਸੁਸਾਨੇ ਸਮਾਗਤਾ. ਸੂਤਿ ਨਿਪਾਤਮਤ੍ਤਂ. ‘‘ਯੇ ਤਤ੍ਥਾਸੁਂ ਸਮਾਗਤਾ’’ਤਿ ਵਾ ਪਾਠੋ. ਆਸੁਨ੍ਤਿ ਅਹੇਸੁਨ੍ਤਿ ਅਤ੍ਥੋ.

੩੭੧. ਨਾਨਾਗਨ੍ਧਸਮੇਰਿਤਨ੍ਤਿ ¶ ਨਾਨਾਵਿਧੇਹਿ ਗਨ੍ਧੇਹਿ ਸਮਨ੍ਤਤੋ ਏਰਿਤਂ ਉਪਵਾਸਿਤਂ. ਇਤੋਤਿ ਮਨੁਸ੍ਸਲੋਕਤੋ. ਦੂਰਗਤਨ੍ਤਿ ਪਰਲੋਕਂ ਗਤਤ੍ਤਾ ਵਦਤਿ. ਬ੍ਰਹ੍ਮਦਤ੍ਤਾਤਿ ਕਨ੍ਦਤੀਤਿ ਬ੍ਰਹ੍ਮਦਤ੍ਤਾਤਿ ਏਵਂ ਨਾਮਸਂਕਿਤ੍ਤਨਂ ਕਤ੍ਵਾ ਪਰਿਦੇਵਨਵਸੇਨ ਅਵ੍ਹਾਯਤਿ.

੩੭੨-੩. ਬ੍ਰਹ੍ਮਦਤ੍ਤਸ੍ਸ ਭਦ੍ਦਨ੍ਤੇ, ਬ੍ਰਹ੍ਮਦਤ੍ਤਸ੍ਸ ਮਾਰਿਸਾਤਿ ਮਾਰਿਸ, ਨਿਰਾਮਯਕਾਯਚਿਤ੍ਤ ਮਹਾਮੁਨਿ ਬ੍ਰਹ੍ਮਦਤ੍ਤਸ੍ਸ ਰਞ੍ਞੋ ਇਦਂ ਆਲ਼ਾਹਨਂ, ਤਸ੍ਸੇਵ ਬ੍ਰਹ੍ਮਦਤ੍ਤਸ੍ਸ ਰਞ੍ਞੋ ਅਯਂ ਭਰਿਯਾ, ਭਦ੍ਦਂ ਤੇ ਤਸ੍ਸ ਚ ਬ੍ਰਹ੍ਮਦਤ੍ਤਸ੍ਸ ਭਦ੍ਦਂ ਹੋਤੁ, ਤਾਦਿਸਾਨਂ ਮਹੇਸੀਨਂ ਹਿਤਾਨੁਚਿਨ੍ਤਨੇਨ ਪਰਲੋਕੇ ਠਿਤਾਨਮ੍ਪਿ ਹਿਤਸੁਖਂ ਹੋਤਿਯੇਵਾਤਿ ਅਧਿਪ੍ਪਾਯੋ.

ਅਥ ¶ ਸੋ ਤਾਪਸੋ ਤੇਸਂ ਵਚਨਂ ਸੁਤ੍ਵਾ ਅਨੁਕਮ੍ਪਂ ਉਪਾਦਾਯ ਉਬ੍ਬਰਿਯਾ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸਾ ਸੋਕਵਿਨੋਦਨਤ੍ਥਂ –

‘‘ਛਲ਼ਾਸੀਤਿਸਹਸ੍ਸਾਨਿ, ਬ੍ਰਹ੍ਮਦਤ੍ਤਸ੍ਸਨਾਮਕਾ;

ਇਮਸ੍ਮਿਂ ਆਲ਼ਾਹਨੇ ਦਡ੍ਢਾ, ਤੇਸਂ ਕਮਨੁਸੋਚਸੀ’’ਤਿ. –

ਗਾਥਮਾਹ ¶ . ਤਤ੍ਥ ਛਲ਼ਾਸੀਤਿਸਹਸ੍ਸਾਨੀਤਿ ਛਸਹਸ੍ਸਾਧਿਕਅਸੀਤਿਸਹਸ੍ਸਸਙ੍ਖਾ. ਬ੍ਰਹ੍ਮਦਤ੍ਤਸ੍ਸਨਾਮਕਾਤਿ ਬ੍ਰਹ੍ਮਦਤ੍ਤੋਤਿ ਏਵਂਨਾਮਕਾ. ਤੇਸਂ ਕਮਨੁਸੋਚਸੀਤਿ ਤੇਸਂ ਛਲ਼ਾਸੀਤਿਸਹਸ੍ਸਸਙ੍ਖਾਤਾਨਂ ਬ੍ਰਹ੍ਮਦਤ੍ਤਾਨਂ ਕਤਮਂ ਬ੍ਰਹ੍ਮਦਤ੍ਤਂ ਤ੍ਵਂ ਅਨੁਸੋਚਸਿ, ਕਤਮਂ ਪਟਿਚ੍ਚ ਤੇ ਸੋਕੋ ਉਪ੍ਪਨ੍ਨੋਤਿ ਪੁਚ੍ਛਿ.

ਏਵਂ ਪਨ ਤੇਨ ਇਸਿਨਾ ਪੁਚ੍ਛਿਤਾ ਉਬ੍ਬਰੀ ਅਤ੍ਤਨਾ ਅਧਿਪ੍ਪੇਤਂ ਬ੍ਰਹ੍ਮਦਤ੍ਤਂ ਆਚਿਕ੍ਖਨ੍ਤੀ –

‘‘ਯੋ ਰਾਜਾ ਚੂਲ਼ਨੀਪੁਤ੍ਤੋ, ਪਞ੍ਚਾਲਾਨਂ ਰਥੇਸਭੋ;

ਤਂ ਭਨ੍ਤੇ ਅਨੁਸੋਚਾਮਿ, ਭਤ੍ਤਾਰਂ ਸਬ੍ਬਕਾਮਦ’’ਨ੍ਤਿ. –

ਗਾਥਮਾਹ. ਤਤ੍ਥ ਚੂਲ਼ਨੀਪੁਤ੍ਤੋਤਿ ਏਵਂਨਾਮਸ੍ਸ ਰਞ੍ਞੋ ਪੁਤ੍ਤੋ. ਸਬ੍ਬਕਾਮਦਨ੍ਤਿ ¶ ਮਯ੍ਹਂ ਸਬ੍ਬਸ੍ਸ ਇਚ੍ਛਿਤਿਚ੍ਛਿਤਸ੍ਸ ਦਾਤਾਰਂ, ਸਬ੍ਬੇਸਂ ਵਾ ਸਤ੍ਤਾਨਂ ਇਚ੍ਛਿਤਦਾਯਕਂ.

ਏਵਂ ਉਬ੍ਬਰਿਯਾ ਵੁਤ੍ਤੇ ਪੁਨ ਤਾਪਸੋ –

‘‘ਸਬ੍ਬੇਵਾਹੇਸੁਂ ਰਾਜਾਨੋ, ਬ੍ਰਹ੍ਮਦਤ੍ਤਸ੍ਸਨਾਮਕਾ;

ਸਬ੍ਬੇਵ ਚੂਲ਼ਨੀਪੁਤ੍ਤਾ, ਪਞ੍ਚਾਲਾਨਂ ਰਥੇਸਭਾ.

‘‘ਸਬ੍ਬੇਸਂ ਅਨੁਪੁਬ੍ਬੇਨ, ਮਹੇਸਿਤ੍ਤਮਕਾਰਯਿ;

ਕਸ੍ਮਾ ਪੁਰਿਮਕੇ ਹਿਤ੍ਵਾ, ਪਚ੍ਛਿਮਂ ਅਨੁਸੋਚਸੀ’’ਤਿ. – ਗਾਥਾਦ੍ਵਯਮਾਹ;

੩੭੬. ਤਤ੍ਥ ਸਬ੍ਬੇਵਾਹੇਸੁਨ੍ਤਿ ਸਬ੍ਬੇਵ ਤੇ ਛਲ਼ਾਸੀਤਿਸਹਸ੍ਸਸਙ੍ਖਾ ਰਾਜਾਨੋ ਬ੍ਰਹ੍ਮਦਤ੍ਤਸ੍ਸ ਨਾਮਕਾ ਚੂਲ਼ਨੀਪੁਤ੍ਤਾ ਪਞ੍ਚਾਲਾਨਂ ਰਥੇਸਭਾਵ ਅਹੇਸੁਂ. ਇਮੇ ਰਾਜਭਾਵਾਦਯੋ ਵਿਸੇਸਾ ਤੇਸੁ ਏਕਸ੍ਸਾਪਿ ਨਾਹੇਸੁਂ.

੩੭੭. ਮਹੇਸਿਤ੍ਤਮਕਾਰਯੀਤਿ ਤ੍ਵਞ੍ਚ ਤੇਸਂ ਸਬ੍ਬੇਸਮ੍ਪਿ ਅਨੁਪੁਬ੍ਬੇਨ ਅਗ੍ਗਮਹੇਸਿਭਾਵਂ ਅਕਾਸਿ, ਅਨੁਪ੍ਪਤ੍ਤਾਤਿ ਅਤ੍ਥੋ. ਕਸ੍ਮਾਤਿ ਗੁਣਤੋ ਚ ਸਾਮਿਕਭਾਵਤੋ ¶ ਚ ਅਵਿਸਿਟ੍ਠੇਸੁ ਏਤ੍ਤਕੇਸੁ ਜਨੇਸੁ ਪੁਰਿਮਕੇ ਰਾਜਾਨੋ ਪਹਾਯ ਪਚ੍ਛਿਮਂ ਏਕਂਮੇਵ ਕਸ੍ਮਾ ਕੇਨ ਕਾਰਣੇਨ ਅਨੁਸੋਚਸੀਤਿ ਪੁਚ੍ਛਿ.

ਤਂ ¶ ਸੁਤ੍ਵਾ ਉਬ੍ਬਰੀ ਸਂਵੇਗਜਾਤਾ ਪੁਨ ਤਾਪਸਂ –

‘‘ਆਤੁਮੇ ਇਤ੍ਥਿਭੂਤਾਯ, ਦੀਘਰਤ੍ਤਾਯ ਮਾਰਿਸ;

ਯਸ੍ਸਾ ਮੇ ਇਤ੍ਥਿਭੂਤਾਯ, ਸਂਸਾਰੇ ਬਹੁਭਾਸਸੀ’’ਤਿ. –

ਗਾਥਮਾਹ. ਤਤ੍ਥ ਆਤੁਮੇਤਿ ਅਤ੍ਤਨਿ. ਇਤ੍ਥਿਭੂਤਾਯਾਤਿ ਇਤ੍ਥਿਭਾਵਂ ਉਪਗਤਾਯ. ਦੀਘਰਤ੍ਤਾਯਾਤਿ ਦੀਘਰਤ੍ਤਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਇਤ੍ਥਿਭੂਤਾਯ ਅਤ੍ਤਨਿ ਸਬ੍ਬਕਾਲਂ ਇਤ੍ਥੀਯੇਵ ਹੋਤਿ, ਉਦਾਹੁ ਪੁਰਿਸਭਾਵਮ੍ਪਿ ਉਪਗਚ੍ਛਤੀਤਿ. ਯਸ੍ਸਾ ਮੇ ਇਤ੍ਥਿਭੂਤਾਯਾਤਿ ਯਸ੍ਸਾ ਮਯ੍ਹਂ ਇਤ੍ਥਿਭੂਤਾਯ ਏਵਂ ਤਾਵ ਬਹੁਸਂਸਾਰੇ ਮਹੇਸਿਭਾਵਂ ਮਹਾਮੁਨਿ ਤ੍ਵਂ ਭਾਸਸਿ ਕਥੇਸੀਤਿ ਅਤ੍ਥੋ. ‘‘ਆਹੁ ਮੇ ਇਤ੍ਥਿਭੂਤਾਯਾ’’ਤਿ ਵਾ ਪਾਠੋ. ਤਤ੍ਥ ਆਤਿ ਅਨੁਸ੍ਸਰਣਤ੍ਥੇ ਨਿਪਾਤੋ. ਆਹੁ ਮੇਤਿ ਸਯਂ ਅਨੁਸ੍ਸਰਿਤਂ ਅਞ੍ਞਾਤਮਿਦਂ ਮਯਾ, ਇਤ੍ਥਿਭੂਤਾਯ ਇਤ੍ਥਿਭਾਵਂ ਉਪਗਤਾਯ ਏਵਂ ਮਯ੍ਹਂ ¶ ਏਤ੍ਤਕਂ ਕਾਲਂ ਅਪਰਾਪਰੁਪ੍ਪਤ੍ਤਿ ਅਹੋਸਿ. ਕਸ੍ਮਾ? ਯਸ੍ਮਾ ਯਸ੍ਸਾ ਮੇ ਇਤ੍ਥਿਭੂਤਾਯ ਸਬ੍ਬੇਸਂ ਅਨੁਪੁਬ੍ਬੇਨ ਮਹੇਸਿਤ੍ਤਮਕਾਰਯਿ, ਕਿਂ ਤ੍ਵਂ, ਮਹਾਮੁਨਿ, ਸਂਸਾਰੇ ਬਹੁਂ ਭਾਸਸੀਤਿ ਯੋਜਨਾ.

ਤਂ ਸੁਤ੍ਵਾ ਤਾਪਸੋ ਅਯਂ ਨਿਯਮੋ ਸਂਸਾਰੇ ਨਤ੍ਥਿ ‘‘ਇਤ੍ਥੀ ਇਤ੍ਥੀਯੇਵ ਹੋਤਿ, ਪੁਰਿਸੋ ਪੁਰਿਸੋ ਏਵਾ’’ਤਿ ਦਸ੍ਸੇਨ੍ਤੋ –

‘‘ਅਹੁ ਇਤ੍ਥੀ ਅਹੁ ਪੁਰਿਸੋ, ਪਸੁਯੋਨਿਮ੍ਪਿ ਆਗਮਾ;

ਏਵਮੇਤਂ ਅਤੀਤਾਨਂ, ਪਰਿਯਨ੍ਤੋ ਨ ਦਿਸ੍ਸਤੀ’’ਤਿ. –

ਗਾਥਮਾਹ. ਤਤ੍ਥ ਅਹੁ ਇਤ੍ਥੀ ਅਹੁ ਪੁਰਿਸੋਤਿ ਤ੍ਵਂ ਕਦਾਚਿ ਇਤ੍ਥੀਪਿ ਅਹੋਸਿ, ਕਦਾਚਿ ਪੁਰਿਸੋਪਿ ਅਹੋਸਿ. ਨ ਕੇਵਲਂ ਇਤ੍ਥਿਪੁਰਿਸਭਾਵਮੇਵ, ਅਥ ਖੋ ਪਸੁ ਯੋਨਿਮ੍ਪਿ ਅਗਮਾਸਿ, ਕਦਾਚਿ ਪਸੁਭਾਵਮ੍ਪਿ ਅਗਮਾਸਿ, ਤਿਰਚ੍ਛਾਨਯੋਨਿਮ੍ਪਿ ਉਪਗਤਾ ਅਹੋਸਿ. ਏਵਮੇਤਂ ਅਤੀਤਾਨਂ, ਪਰਿਯਨ੍ਤੋ ਨ ਦਿਸ੍ਸਤੀਤਿ ਏਵਂ ਯਥਾਵੁਤ੍ਤਂ ਏਤਂ ਇਤ੍ਥਿਭਾਵਂ ਪੁਰਿਸਭਾਵਂ ਤਿਰਚ੍ਛਾਨਾਦਿਭਾਵਞ੍ਚ ਉਪਗਤਾਨਂ ਅਤੀਤਾਨਂ ਅਤ੍ਤਭਾਵਾਨਂ ਪਰਿਯਨ੍ਤੋ ਞਾਣਚਕ੍ਖੁਨਾ ਮਹਤਾ ਉਸ੍ਸਾਹੇਨ ਪਸ੍ਸਨ੍ਤਾਨਮ੍ਪਿ ਨ ਦਿਸ੍ਸਤਿ. ਨ ਕੇਵਲਂ ਤਵੇਵ, ਅਥ ਖੋ ਸਬ੍ਬੇਸਮ੍ਪਿ ¶ ਸਂਸਾਰੇ ਪਰਿਬ੍ਭਮਨ੍ਤਾਨਂ ਸਤ੍ਤਾਨਂ ਅਤ੍ਤਭਾਵਸ੍ਸ ਪਰਿਯਨ੍ਤੋ ਨ ਦਿਸ੍ਸਤੇਵ ਨ ਪਞ੍ਞਾਯਤੇਵ. ਤੇਨਾਹ ਭਗਵਾ –

‘‘ਅਨਮਤਗ੍ਗੋਯਂ, ਭਿਕ੍ਖਵੇ, ਸਂਸਾਰੋ, ਪੁਬ੍ਬਾ ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਨੀਵਰਣਾਨਂ ¶ ਸਤ੍ਤਾਨਂ ਤਣ੍ਹਾਸਂਯੋਜਨਾਨਂ ਸਨ੍ਧਾਵਤਂ ਸਂਸਰਤ’’ਨ੍ਤਿ (ਸਂ. ਨਿ. ੨.੧੨੪).

ਏਵਂ ਤੇਨ ਤਾਪਸੇਨ ਸਂਸਾਰਸ੍ਸ ਅਪਰਿਯਨ੍ਤਤਂ ਕਮ੍ਮਸ੍ਸਕਤਞ੍ਚ ਵਿਭਾਵੇਨ੍ਤੇਨ ਦੇਸਿਤਂ ਧਮ੍ਮਂ ਸੁਤ੍ਵਾ ਸਂਸਾਰੇ ਸਂਵਿਗ੍ਗਹਦਯਾ ਧਮ੍ਮੇ ਚ ਪਸਨ੍ਨਮਾਨਸਾ ਵਿਗਤਸੋਕਸਲ੍ਲਾ ਹੁਤ੍ਵਾ ਅਤ੍ਤਨੋ ਪਸਾਦਂ ਸੋਕਵਿਗਮਨਞ੍ਚ ਪਕਾਸੇਨ੍ਤੀ –

‘‘ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

‘‘ਅਬ੍ਬਹੀ ¶ ਵਤ ਮੇ ਸਲ੍ਲਂ, ਸੋਕਂ ਹਦਯਨਿਸ੍ਸਿਤਂ;

ਯੋ ਮੇ ਸੋਕਪਰੇਤਾਯ, ਪਤਿਸੋਕਂ ਅਪਾਨੁਦਿ.

‘‘ਸਾਹਂ ਅਬ੍ਬੂਲ਼੍ਹਸਲ੍ਲਾਸ੍ਮਿ, ਸੀਤਿਭੂਤਾਸ੍ਮਿ ਨਿਬ੍ਬੁਤਾ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾ ਮਹਾਮੁਨੀ’’ਤਿ. –

ਤਿਸ੍ਸੋ ਗਾਥਾ ਅਭਾਸਿ. ਤਾਸਂ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ.

ਇਦਾਨਿ ਸਂਵਿਗ੍ਗਹਦਯਾਯ ਉਬ੍ਬਰਿਯਾ ਪਟਿਪਤ੍ਤਿਂ ਦਸ੍ਸੇਨ੍ਤੋ ਸਤ੍ਥਾ –

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਸਮਣਸ੍ਸ ਸੁਭਾਸਿਤਂ;

ਪਤ੍ਤਚੀਵਰਮਾਦਾਯ, ਪਬ੍ਬਜਿ ਅਨਗਾਰਿਯਂ.

‘‘ਸਾ ਚ ਪਬ੍ਬਜਿਤਾ ਸਨ੍ਤਾ, ਅਗਾਰਸ੍ਮਾ ਅਨਗਾਰਿਯਂ;

ਮੇਤ੍ਤਚਿਤ੍ਤਂ ਆਭਾਵੇਸਿ, ਬ੍ਰਹ੍ਮਲੋਕੂਪਪਤ੍ਤਿਯਾ.

‘‘ਗਾਮਾ ਗਾਮਂ ਵਿਚਰਨ੍ਤੀ, ਨਿਗਮੇ ਰਾਜਧਾਨਿਯੋ;

ਉਰੁਵੇਲ਼ਾ ਨਾਮ ਸੋ ਗਾਮੋ, ਯਤ੍ਥ ਕਾਲਮਕ੍ਰੁਬ੍ਬਥ.

‘‘ਮੇਤ੍ਤਚਿਤ੍ਤਂ ¶ ਆਭਾਵੇਤ੍ਵਾ, ਬ੍ਰਹ੍ਮਲੋਕੂਪਪਤ੍ਤਿਯਾ;

ਇਤ੍ਥਿਚਿਤ੍ਤਂ ਵਿਰਾਜੇਤ੍ਵਾ, ਬ੍ਰਹ੍ਮਲੋਕੂਪਗਾ ਅਹੂ’’ਤਿ. – ਚਤਸ੍ਸੋ ਗਾਥਾ ਅਭਾਸਿ;

੩੮੩-੪. ਤਤ੍ਥ ¶ ਤਸ੍ਸਾਤਿ ਤਸ੍ਸ ਤਾਪਸਸ੍ਸ. ਸੁਭਾਸਿਤਨ੍ਤਿ ਸੁਟ੍ਠੁ ਭਾਸਿਤਂ, ਧਮ੍ਮਨ੍ਤਿ ਅਤ੍ਥੋ. ਪਬ੍ਬਜਿਤਾ ਸਨ੍ਤਾਤਿ ਪਬ੍ਬਜ੍ਜਂ ਉਪਗਤਾ ਸਮਾਨਾ, ਪਬ੍ਬਜਿਤ੍ਵਾ ਵਾ ਹੁਤ੍ਵਾ ਸਨ੍ਤਕਾਯਵਾਚਾ. ਮੇਤ੍ਤਚਿਤ੍ਤਨ੍ਤਿ ਮੇਤ੍ਤਾਸਹਗਤਂ ਚਿਤ੍ਤਂ. ਚਿਤ੍ਤਸੀਸੇਨ ਮੇਤ੍ਤਜ੍ਝਾਨਂ ਵਦਤਿ. ਬ੍ਰਹ੍ਮਲੋਕੂਪਪਤ੍ਤਿਯਾਤਿ ਤਞ੍ਚ ਸਾ ਮੇਤ੍ਤਚਿਤ੍ਤਂ ਭਾਵੇਨ੍ਤੀ ਬ੍ਰਹ੍ਮਲੋਕੂਪਪਤ੍ਤਿਯਾ ਅਭਾਵੇਸਿ, ਨ ਵਿਪਸ੍ਸਨਾਪਾਦਕਾਦਿਅਤ੍ਥਂ. ਅਨੁਪ੍ਪਨ੍ਨੇ ਹਿ ਬੁਦ੍ਧੇ ਬ੍ਰਹ੍ਮਵਿਹਾਰਾਦਿਕੇ ਭਾਵੇਨ੍ਤਾ ਤਾਪਸਪਰਿਬ੍ਬਾਜਕਾ ਯਾਵਦੇਵ ਭਵਸਮ੍ਪਤ੍ਤਿਅਤ੍ਥਮੇਵ ਭਾਵੇਸੁਂ.

੩੮੫-੬. ਗਾਮਾ ¶ ਗਾਮਨ੍ਤਿ ਗਾਮਤੋ ਅਞ੍ਞਂ ਗਾਮਂ. ਆਭਾਵੇਤ੍ਵਾਤਿ ਵਡ੍ਢੇਤ੍ਵਾ ਬ੍ਰੂਹੇਤ੍ਵਾ. ‘‘ਅਭਾਵੇਤ੍ਵਾ’’ਤਿ ਕੇਚਿ ਪਠਨ੍ਤਿ, ਤੇਸਂ ਅ-ਕਾਰੋ ਨਿਪਾਤਮਤ੍ਤਂ. ਇਤ੍ਥਿਚਿਤ੍ਤਂ ਵਿਰਾਜੇਤ੍ਵਾਤਿ ਇਤ੍ਥਿਭਾਵੇ ਚਿਤ੍ਤਂ ਅਜ੍ਝਾਸਯਂ ਅਭਿਰੁਚਿਂ ਵਿਰਾਜੇਤ੍ਵਾ ਇਤ੍ਥਿਭਾਵੇ ਵਿਰਤ੍ਤਚਿਤ੍ਤਾ ਹੁਤ੍ਵਾ. ਬ੍ਰਹ੍ਮਲੋਕੂਪਗਾਤਿ ਪਟਿਸਨ੍ਧਿਗ੍ਗਹਣਵਸੇਨ ਬ੍ਰਹ੍ਮਲੋਕਂ ਉਪਗਮਨਕਾ ਅਹੋਸਿ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਤਸ੍ਸਾ ਉਪਾਸਿਕਾਯ ਸੋਕਂ ਵਿਨੋਦੇਤ੍ਵਾ ਉਪਰਿ ਚਤੁਸਚ੍ਚਦੇਸਨਂ ਅਕਾਸਿ. ਸਚ੍ਚਪਰਿਯੋਸਾਨੇ ਸਾ ਉਪਾਸਿਕਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਮ੍ਪਤ੍ਤਪਰਿਸਾਯ ਚ ਦੇਸਨਾ ਸਾਤ੍ਥਿਕਾ ਅਹੋਸੀਤਿ.

ਉਬ੍ਬਰਿਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਇਤਿ ਖੁਦ੍ਦਕ-ਅਟ੍ਠਕਥਾਯ ਪੇਤਵਤ੍ਥੁਸ੍ਮਿਂ

ਦੁਤਿਯਸ੍ਸ ਉਬ੍ਬਰਿਵਗ੍ਗਸ੍ਸ ਅਤ੍ਥਸਂਵਣ੍ਣਨਾ ਨਿਟ੍ਠਿਤਾ.

ਅਭਿਜ੍ਜਮਾਨੇ ¶ ¶ ਵਾਰਿਮ੍ਹੀਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਅਞ੍ਞਤਰਂ ਲੁਦ੍ਦਪੇਤਂ ਆਰਬ੍ਭ ਵੁਤ੍ਤਂ. ਬਾਰਾਣਸਿਯਂ ਕਿਰ ਅਪਰਦਿਸਾਭਾਗੇ ਪਾਰਗਙ੍ਗਾਯ ਵਾਸਭਗਾਮਂ ਅਤਿਕ੍ਕਮਿਤ੍ਵਾ ਚੁਨ੍ਦਟ੍ਠਿਲਨਾਮਕੇ ਗਾਮੇ ਏਕੋ ਲੁਦ੍ਦਕੋ ਅਹੋਸਿ. ਸੋ ਅਰਞ੍ਞੇ ਮਿਗੇ ਵਧਿਤ੍ਵਾ ਵਰਮਂਸਂ ਅਙ੍ਗਾਰੇ ਪਚਿਤ੍ਵਾ ਖਾਦਿਤ੍ਵਾ ਅਵਸੇਸਂ ਪਣ੍ਣਪੁਟੇ ਬਨ੍ਧਿਤ੍ਵਾ ਕਾਜੇਨ ਗਹੇਤ੍ਵਾ ਗਾਮਂ ਆਗਚ੍ਛਤਿ. ਤਂ ਬਾਲਦਾਰਕਾ ਗਾਮਦ੍ਵਾਰੇ ਦਿਸ੍ਵਾ ‘‘ਮਂਸਂ ਮੇ ਦੇਹਿ, ਮਂਸਂ ਮੇ ਦੇਹੀ’’ਤਿ ਹਤ੍ਥੇ ਪਸਾਰੇਤ੍ਵਾ ਉਪਧਾਵਨ੍ਤਿ. ਸੋ ਤੇਸਂ ਥੋਕਂ ਥੋਕਂ ਮਂਸਂ ਦੇਤਿ. ਅਥੇਕਦਿਵਸਂ ਮਂਸਂ ਅਲਭਿਤ੍ਵਾ ¶ ਉਦ੍ਦਾਲਕਪੁਪ੍ਫਂ ਪਿਲ਼ਨ੍ਧਿਤ੍ਵਾ ਬਹੁਞ੍ਚ ਹਤ੍ਥੇਨ ਗਹੇਤ੍ਵਾ ਗਾਮਂ ਗਚ੍ਛਨ੍ਤਂ ਤਂ ਦਾਰਕਾ ਗਾਮਦ੍ਵਾਰੇ ਦਿਸ੍ਵਾ ‘‘ਮਂਸਂ ਮੇ ਦੇਹਿ, ਮਂਸਂ ਮੇ ਦੇਹੀ’’ਤਿ ਹਤ੍ਥੇ ਪਸਾਰੇਤ੍ਵਾ ਉਪਧਾਵਿਂਸੁ. ਸੋ ਤੇਸਂ ਏਕੇਕਂ ਪੁਪ੍ਫਮਞ੍ਜਰਿਂ ਅਦਾਸਿ.

ਅਥ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਪੇਤੇਸੁ ਨਿਬ੍ਬਤ੍ਤੋ ਨਗ੍ਗੋ ਵਿਰੂਪਰੂਪੋ ਭਯਾਨਕਦਸ੍ਸਨੋ ਸੁਪਿਨੇਪਿ ਅਨ੍ਨਪਾਨਂ ਅਜਾਨਨ੍ਤੋ ਸੀਸੇ ਆਬਨ੍ਧਿਤਉਦ੍ਦਾਲਕਕੁਸੁਮਮਾਲਾਕਲਾਪੋ ‘‘ਚੁਨ੍ਦਟ੍ਠਿਲਾਯਂ ਞਾਤਕਾਨਂ ਸਨ੍ਤਿਕੇ ਕਿਞ੍ਚਿ ਲਭਿਸ੍ਸਾਮੀ’’ਤਿ ਗਙ੍ਗਾਯ ਉਦਕੇ ਅਭਿਜ੍ਜਮਾਨੇ ਪਟਿਸੋਤਂ ਪਦਸਾ ਗਚ੍ਛਤਿ. ਤੇਨ ਚ ਸਮਯੇਨ ਕੋਲਿਯੋ ਨਾਮ ਰਞ੍ਞੋ ਬਿਮ੍ਬਿਸਾਰਸ੍ਸ ਮਹਾਮਤ੍ਤੋ ਕੁਪਿਤਂ ਪਚ੍ਚਨ੍ਤਂ ਵੂਪਸਮੇਤ੍ਵਾ ਪਟਿਨਿਵਤ੍ਤੇਨ੍ਤੋ ਹਤ੍ਥਿਅਸ੍ਸਾਦਿਪਰਿਵਾਰਬਲਂ ਥਲਪਥੇਨ ਪੇਸੇਤ੍ਵਾ ਸਯਂ ਗਙ੍ਗਾਯ ਨਦਿਯਾ ਅਨੁਸੋਤਂ ਨਾਵਾਯ ਆਗਚ੍ਛਨ੍ਤੋ ਤਂ ਪੇਤਂ ਤਥਾ ਗਚ੍ਛਨ੍ਤਂ ਦਿਸ੍ਵਾ ਪੁਚ੍ਛਨ੍ਤੋ –

‘‘ਅਭਿਜ੍ਜਮਾਨੇ ਵਾਰਿਮ੍ਹਿ, ਗਙ੍ਗਾਯ ਇਧ ਗਚ੍ਛਸਿ;

ਨਗ੍ਗੋ ਪੁਬ੍ਬਦ੍ਧਪੇਤੋਵ, ਮਾਲਧਾਰੀ ਅਲਙ੍ਕਤੋ;

ਕੁਹਿਂ ਗਮਿਸ੍ਸਸਿ ਪੇਤ, ਕਤ੍ਥ ਵਾਸੋ ਭਵਿਸ੍ਸਤੀ’’ਤਿ. –

ਗਾਥਮਾਹ. ਤਤ੍ਥ ਅਭਿਜ੍ਜਮਾਨੇਤਿ ਪਦਨਿਕ੍ਖੇਪੇਨ ਅਭਿਜ੍ਜਮਾਨੇ ਸਙ੍ਘਾਤੇ, ਵਾਰਿਮ੍ਹਿ ਗਙ੍ਗਾਯਾਤਿ ਗਙ੍ਗਾਯ ਨਦਿਯਾ ਉਦਕੇ. ਇਧਾਤਿ ਇਮਸ੍ਮਿਂ ਠਾਨੇ. ਪੁਬ੍ਬਦ੍ਧਪੇਤੋਵਾਤਿ ਕਾਯਸ੍ਸ ਪੁਰਿਮਦ੍ਧੇਨ ਅਪੇਤੋ ਵਿਯ ਅਪੇਤਯੋਨਿਕੋ ਦੇਵਪੁਤ੍ਤੋ ¶ ਵਿਯ. ਕਥਂ? ਮਾਲਧਾਰੀ ਅਲਙ੍ਕਤੋਤਿ, ਮਾਲਾਹਿ ਪਿਲ਼ਨ੍ਧਿਤ੍ਵਾ ਅਲਙ੍ਕਤਸੀਸਗ੍ਗੋਤਿ ¶ ਅਤ੍ਥੋ. ਕਤ੍ਥ ਵਾਸੋ ਭਵਿਸ੍ਸਤੀਤਿ ਕਤਰਸ੍ਮਿਂ ਗਾਮੇ ਦੇਸੇ ਵਾ ਤੁਯ੍ਹਂ ਨਿਵਾਸੋ ਭਵਿਸ੍ਸਤਿ, ਤਂ ਕਥੇਹੀਤਿ ਅਤ੍ਥੋ.

ਇਦਾਨਿ ਯਂ ਤਦਾ ਤੇਨ ਪੇਤੇਨ ਕੋਲਿਯੇਨ ਚ ਵੁਤ੍ਤਂ, ਤਂ ਦਸ੍ਸੇਤੁਂ ਸਙ੍ਗੀਤਿਕਾਰਾ –

‘‘ਚੁਨ੍ਦਟ੍ਠਿਲਂ ¶ ਗਮਿਸ੍ਸਾਮਿ, ਪੇਤੋ ਸੋ ਇਤਿ ਭਾਸਤਿ;

ਅਨ੍ਤਰੇ ਵਾਸਭਗਾਮਂ, ਬਾਰਾਣਸਿਞ੍ਚ ਸਨ੍ਤਿਕੇ.

‘‘ਤਞ੍ਚ ਦਿਸ੍ਵਾ ਮਹਾਮਤ੍ਤੋ, ਕੋਲਿਯੋ ਇਤਿ ਵਿਸ੍ਸੁਤੋ;

ਸਤ੍ਤੁਂ ਭਤ੍ਤਞ੍ਚ ਪੇਤਸ੍ਸ, ਪੀਤਕਞ੍ਚ ਯੁਗਂ ਅਦਾ.

‘‘ਨਾਵਾਯ ਤਿਟ੍ਠਮਾਨਾਯ, ਕਪ੍ਪਕਸ੍ਸ ਅਦਾਪਯਿ;

ਕਪ੍ਪਕਸ੍ਸ ਪਦਿਨ੍ਨਮ੍ਹਿ, ਠਾਨੇ ਪੇਤਸ੍ਸ ਦਿਸ੍ਸਥ.

‘‘ਤਤੋ ਸੁਵਤ੍ਥਵਸਨੋ, ਮਾਲਧਾਰੀ ਅਲਙ੍ਕਤੋ;

ਠਾਨੇ ਠਿਤਸ੍ਸ ਪੇਤਸ੍ਸ, ਦਕ੍ਖਿਣਾ ਉਪਕਪ੍ਪਥ;

ਤਸ੍ਮਾ ਦਜ੍ਜੇਥ ਪੇਤਾਨਂ, ਅਨੁਕਮ੍ਪਾਯ ਪੁਨਪ੍ਪੁਨ’’ਨ੍ਤਿ. – ਗਾਥਾਯੋ ਅਵੋਚੁਂ;

੩੮੮. ਤਤ੍ਥ ਚੁਨ੍ਦਟ੍ਠਿਲਨ੍ਤਿ ਏਵਂਨਾਮਕਂ ਗਾਮਂ. ਅਨ੍ਤਰੇ ਵਾਸਭਗਾਮਂ, ਬਾਰਾਣਸਿਞ੍ਚ ਸਨ੍ਤਿਕੇਤਿ ਵਾਸਭਗਾਮਸ੍ਸ ਚ ਬਾਰਾਣਸਿਯਾ ਚ ਵੇਮਜ੍ਝੇ. ਅਨ੍ਤਰਾ-ਸਦ੍ਦਯੋਗੇਨ ਹੇਤਂ ਸਾਮ੍ਯਤ੍ਥੇ ਉਪਯੋਗਵਚਨਂ. ਬਾਰਾਣਸਿਯਾ ਸਨ੍ਤਿਕੇ ਹਿ ਸੋ ਗਾਮੋਤਿ. ਅਯਞ੍ਹੇਤ੍ਥ ਅਤ੍ਥੋ – ਅਨ੍ਤਰੇ ਵਾਸਭਗਾਮਸ੍ਸ ਚ ਬਾਰਾਣਸਿਯਾ ਚ ਯੋ ਚੁਨ੍ਦਟ੍ਠਿਲਨਾਮਕੋ ਗਾਮੋ ਬਾਰਾਣਸਿਯਾ ਅਵਿਦੂਰੇ, ਤਂ ਗਾਮਂ ਗਮਿਸ੍ਸਾਮੀਤਿ.

੩੮੯. ਕੋਲਿਯੋ ਇਤਿ ਵਿਸ੍ਸੁਤੋਤਿ ਕੋਲਿਯੋਤਿ ਏਵਂਪਕਾਸਿਤਨਾਮੋ. ਸਤ੍ਤੁਂ ਭਤ੍ਤਞ੍ਚਾਤਿ ਸਤ੍ਤੁਞ੍ਚੇਵ ਭਤ੍ਤਞ੍ਚ. ਪੀਤਕਞ੍ਚ ਯੁਗਂ ਅਦਾਤਿ ਪੀਤਕਂ ਸੁਵਣ੍ਣਵਣ੍ਣਂ ਏਕਂ ਵਤ੍ਥਯੁਗਞ੍ਚ ਅਦਾਸਿ.

੩੯੦. ਕਦਾ ਅਦਾਸੀਤਿ ਚੇ ਆਹ ਨਾਵਾਯ ਤਿਟ੍ਠਮਾਨਾਯ. ਕਪ੍ਪਕਸ੍ਸ ਅਦਾਪਯੀਤਿ ਗਚ੍ਛਨ੍ਤਿਂ ਨਾਵਂ ਠਪੇਤ੍ਵਾ ਤਤ੍ਥ ਏਕਸ੍ਸ ਨ੍ਹਾਪਿਤਸ੍ਸ ਉਪਾਸਕਸ੍ਸ ਦਾਪੇਸਿ ¶ , ਦਿਨ੍ਨਮ੍ਹਿ ਵਤ੍ਥਯੁਗੇਤਿ ਯੋਜਨਾ. ਠਾਨੇਤਿ ਠਾਨਸੋ ਤਙ੍ਖਣਞ੍ਞੇਵ. ਪੇਤਸ੍ਸ ਦਿਸ੍ਸਥਾਤਿ ਪੇਤਸ੍ਸ ਸਰੀਰੇ ਪਞ੍ਞਾਯਿਤ੍ਥ, ਤਸ੍ਸ ਨਿਵਾਸਨਪਾਰੁਪਨਵਤ੍ਥਂ ¶ ਸਮ੍ਪਜ੍ਜਿ. ਤੇਨਾਹ ‘‘ਤਤੋ ਸੁਵਤ੍ਥਵਸਨੋ, ਮਾਲਧਾਰੀ ਅਲਙ੍ਕਤੋ’’ਤਿ, ਸੁਵਤ੍ਥਵਸਨੋ ¶ ਮਾਲਾਭਰਣੇਹਿ ਸੁਮਣ੍ਡਿਤਪਸਾਧਿਤੋ. ਠਾਨੇ ਠਿਤਸ੍ਸ ਪੇਤਸ੍ਸ, ਦਕ੍ਖਿਣਾ ਉਪਕਪ੍ਪਥਾਤਿ ਦਕ੍ਖਿਣੇਯ੍ਯਟ੍ਠਾਨੇ ਠਿਤਾ ਪਨੇਸਾ ਦਕ੍ਖਿਣਾ ਤਸ੍ਸ ਪੇਤਸ੍ਸ ਯਸ੍ਮਾ ਉਪਕਪ੍ਪਤਿ, ਵਿਨਿਯੋਗਂ ਅਗਮਾਸਿ. ਤਸ੍ਮਾ ਦਜ੍ਜੇਥ ਪੇਤਾਨਂ, ਅਨੁਕਮ੍ਪਾਯ ਪੁਨਪ੍ਪੁਨਨ੍ਤਿ ਪੇਤਾਨਂ ਅਨੁਕਮ੍ਪਾਯ ਪੇਤੇ ਉਦ੍ਦਿਸ੍ਸ ਪੁਨਪ੍ਪੁਨਂ ਦਕ੍ਖਿਣਂ ਦਦੇਯ੍ਯਾਤਿ ਅਤ੍ਥੋ.

ਅਥ ਸੋ ਕੋਲਿਯਮਹਾਮਤ੍ਤੋ ਤਂ ਪੇਤਂ ਅਨੁਕਮ੍ਪਮਾਨੋ ਦਾਨਵਿਧਿਂ ਸਮ੍ਪਾਦੇਤ੍ਵਾ ਅਨੁਸੋਤਂ ਆਗਨ੍ਤ੍ਵਾ ਸੂਰਿਯੇ ਉਗ੍ਗਚ੍ਛਨ੍ਤੇ ਬਾਰਾਣਸਿਂ ਸਮ੍ਪਾਪੁਣਿ. ਭਗਵਾ ਚ ਤੇਸਂ ਅਨੁਗ੍ਗਹਤ੍ਥਂ ਆਕਾਸੇਨ ਆਗਨ੍ਤ੍ਵਾ ਗਙ੍ਗਾਤੀਰੇ ਅਟ੍ਠਾਸਿ. ਕੋਲਿਯਮਹਾਮਤ੍ਤੋਪਿ ਨਾਵਾਤੋ ਓਤਰਿਤ੍ਵਾ ਹਟ੍ਠਪਹਟ੍ਠੋ ਭਗਵਨ੍ਤਂ ਨਿਮਨ੍ਤੇਸਿ – ‘‘ਅਧਿਵਾਸੇਥ ਮੇ, ਭਨ੍ਤੇ, ਭਗਵਾ ਅਜ੍ਜਤਨਾਯ ਭਤ੍ਤਂ ਅਨੁਕਮ੍ਪਂ ਉਪਾਦਾਯਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਸੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਤਾਵਦੇਵ ਰਮਣੀਯੇ ਭੂਮਿਭਾਗੇ ਮਹਨ੍ਤਂ ਸਾਖਾਮਣ੍ਡਪਂ ਉਪਰਿ ਚਤੂਸੁ ਚ ਪਸ੍ਸੇਸੁ ਨਾਨਾਵਿਰਾਗਵਣ੍ਣਵਿਚਿਤ੍ਤਵਿਵਿਧਵਸਨਸਮਲਙ੍ਕਤਂ ਕਾਰੇਤ੍ਵਾ ਤਤ੍ਥ ਭਗਵਤੋ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ.

ਅਥ ਸੋ ਮਹਾਮਤ੍ਤੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਗਨ੍ਧਪੁਪ੍ਫਾਦੀਹਿ ਪੂਜੇਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਹੇਟ੍ਠਾ ਅਤ੍ਤਨੋ ਵੁਤ੍ਤਵਚਨਂ ਪੇਤਸ੍ਸ ਚ ਪਟਿਵਚਨਂ ਭਗਵਤੋ ਆਰੋਚੇਸਿ. ਭਗਵਾ ‘‘ਭਿਕ੍ਖੁਸਙ੍ਘੋ ਆਗਚ੍ਛਤੂ’’ਤਿ ਚਿਨ੍ਤੇਸਿ. ਚਿਨ੍ਤਿਤਸਮਨਨ੍ਤਰਮੇਵ ਬੁਦ੍ਧਾਨੁਭਾਵਸਞ੍ਚੋਦਿਤੋ ਸੁਵਣ੍ਣਹਂਸਗਣੋ ਵਿਯ ਧਤਰਟ੍ਠਹਂਸਰਾਜਂ ਭਿਕ੍ਖੁਸਙ੍ਘੋ ਧਮ੍ਮਰਾਜਂ ਸਮ੍ਪਰਿਵਾਰੇਸਿ. ਤਾਵਦੇਵ ਮਹਾਜਨੋ ਸਨ੍ਨਿਪਤਿ ‘‘ਉਲ਼ਾਰਾ ਧਮ੍ਮਦੇਸਨਾ ਭਵਿਸ੍ਸਤੀ’’ਤਿ. ਤਂ ਦਿਸ੍ਵਾ ਪਸਨ੍ਨਮਾਨਸੋ ਮਹਾਮਤ੍ਤੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਨ੍ਤਪ੍ਪੇਸਿ. ਭਗਵਾ ਕਤਭਤ੍ਤਕਿਚ੍ਚੋ ਮਹਾਜਨਸ੍ਸ ਅਨੁਕਮ੍ਪਾਯ ‘‘ਬਾਰਾਣਸਿਸਮੀਪਗਾਮਵਾਸਿਨੋ ਸਨ੍ਨਿਪਤਨ੍ਤੂ’’ਤਿ ਅਧਿਟ੍ਠਾਸਿ. ਸਬ੍ਬੇ ਚ ਤੇ ਇਦ੍ਧਿਬਲੇਨ ਮਹਾਜਨਾ ਸਨ੍ਨਿਪਤਿਂਸੁ, ਉਲ਼ਾਰੇ ਚਸ੍ਸ ਪੇਤੇ ਪਾਕਟੇ ਅਕਾਸਿ. ਤੇਸੁ ਕੇਚਿ ਛਿਨ੍ਨਭਿਨ੍ਨਪਿਲੋਤਿਕਖਣ੍ਡਧਰਾ, ਕੇਚਿ ¶ ਅਤ੍ਤਨੋ ਕੇਸੇਹੇਵ ¶ ਪਟਿਚ੍ਛਾਦਿਤਕੋਪਿਨਾ, ਕੇਚਿ ਨਗ੍ਗਾ ਯਥਾਜਾਤਰੂਪਾ ਖੁਪ੍ਪਿਪਾਸਾਭਿਭੂਤਾ ਤਚਪਰਿਯੋਨਦ੍ਧਾ ਅਟ੍ਠਿਮਤ੍ਤਸਰੀਰਾ ਇਤੋ ਚਿਤੋ ਚ ਪਰਿਬ੍ਭਮਨ੍ਤਾ ਮਹਾਜਨਸ੍ਸ ਪਚ੍ਚਕ੍ਖਤੋ ਪਞ੍ਞਾਯਿਂਸੁ.

ਅਥ ਭਗਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸਿ, ਯਥਾ ਤੇ ਏਕਜ੍ਝਂ ਸਨ੍ਨਿਪਤਿਤ੍ਵਾ ਅਤ੍ਤਨਾ ਕਤਂ ਪਾਪਕਮ੍ਮਂ ਮਹਾਜਨਸ੍ਸ ਪਵੇਦੇਸੁਂ. ਤਮਤ੍ਥਂ ਦੀਪੇਨ੍ਤਾ ਸਙ੍ਗੀਤਿਕਾਰਾ –

‘‘ਸਾਤੁਨ੍ਨਵਸਨਾ ¶ ਏਕੇ, ਅਞ੍ਞੇ ਕੇਸਨਿਵਾਸਨਾ;

ਪੇਤਾ ਭਤ੍ਤਾਯ ਗਚ੍ਛਨ੍ਤਿ, ਪਕ੍ਕਮਨ੍ਤਿ ਦਿਸੋਦਿਸਂ.

‘‘ਦੂਰੇ ਏਕੇ ਪਧਾਵਿਤ੍ਵਾ, ਅਲਦ੍ਧਾਵ ਨਿਵਤ੍ਤਰੇ;

ਛਾਤਾ ਪਮੁਚ੍ਛਿਤਾ ਭਨ੍ਤਾ, ਭੂਮਿਯਂ ਪਟਿਸੁਮ੍ਭਿਤਾ.

‘‘ਕੇਚਿ ਤਤ੍ਥ ਪਪਤਿਤ੍ਵਾ, ਭੂਮਿਯਂ ਪਟਿਸੁਮ੍ਭਿਤਾ;

ਪੁਬ੍ਬੇ ਅਕਤਕਲ੍ਯਾਣਾ, ਅਗ੍ਗਿਦਡ੍ਢਾਵ ਆਤਪੇ.

‘‘ਮਯਂ ਪੁਬ੍ਬੇ ਪਾਪਧਮ੍ਮਾ, ਘਰਣੀ ਕੁਲਮਾਤਰੋ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਮ੍ਹ ਅਤ੍ਤਨੋ.

‘‘ਪਹੂਤਂ ਅਨ੍ਨਪਾਨਮ੍ਪਿ, ਅਪਿਸ੍ਸੁ ਅਵਕਿਰੀਯਤਿ;

ਸਮ੍ਮਗ੍ਗਤੇ ਪਬ੍ਬਜਿਤੇ, ਨ ਚ ਕਿਞ੍ਚਿ ਅਦਮ੍ਹਸੇ.

‘‘ਅਕਮ੍ਮਕਾਮਾ ਅਲਸਾ, ਸਾਦੁਕਾਮਾ ਮਹਗ੍ਘਸਾ;

ਆਲੋਪਪਿਣ੍ਡਦਾਤਾਰੋ, ਪਟਿਗ੍ਗਹੇ ਪਰਿਭਾਸਿਮ੍ਹਸੇ.

‘‘ਤੇ ਘਰਾ ਤਾ ਚ ਦਾਸਿਯੋ, ਤਾਨੇਵਾਭਰਣਾਨਿ ਨੋ;

ਤੇ ਅਞ੍ਞੇ ਪਰਿਚਾਰੇਨ੍ਤਿ, ਮਯਂ ਦੁਕ੍ਖਸ੍ਸ ਭਾਗਿਨੋ.

‘‘ਵੇਣੀ ਵਾ ਅਵਞ੍ਞਾ ਹੋਨ੍ਤਿ, ਰਥਕਾਰੀ ਚ ਦੁਬ੍ਭਿਕਾ;

ਚਣ੍ਡਾਲੀ ਕਪਣਾ ਹੋਨ੍ਤਿ, ਕਪ੍ਪਕਾ ਚ ਪੁਨਪ੍ਪੁਨਂ.

‘‘ਯਾਨਿ ¶ ਯਾਨਿ ਨਿਹੀਨਾਨਿ, ਕੁਲਾਨਿ ਕਪਣਾਨਿ ਚ;

ਤੇਸੁ ਤੇਸ੍ਵੇਵ ਜਾਯਨ੍ਤਿ, ਏਸਾ ਮਚ੍ਛਰਿਨੋ ਗਤਿ.

‘‘ਪੁਬ੍ਬੇ ¶ ਚ ਕਤਕਲ੍ਯਾਣਾ, ਦਾਯਕਾ ਵੀਤਮਚ੍ਛਰਾ;

ਸਗ੍ਗਂ ਤੇ ਪਰਿਪੂਰੇਨ੍ਤਿ, ਓਭਾਸੇਨ੍ਤਿ ਚ ਨਨ੍ਦਨਂ.

‘‘ਵੇਜਯਨ੍ਤੇ ¶ ਚ ਪਾਸਾਦੇ, ਰਮਿਤ੍ਵਾ ਕਾਮਕਾਮਿਨੋ;

ਉਚ੍ਚਾਕੁਲੇਸੁ ਜਾਯਨ੍ਤਿ, ਸਭੋਗੇਸੁ ਤਤੋ ਚੁਤਾ.

‘‘ਕੂਟਾਗਾਰੇ ਚ ਪਾਸਾਦੇ, ਪਲ੍ਲਙ੍ਕੇ ਪੋਨਕਤ੍ਥਤੇ;

ਬੀਜਿਤਙ੍ਗਾ ਮੋਰਹਤ੍ਥੇਹਿ, ਕੁਲੇ ਜਾਤਾ ਯਸਸ੍ਸਿਨੋ.

‘‘ਅਙ੍ਕਤੋ ਅਙ੍ਕਂ ਗਚ੍ਛਨ੍ਤਿ, ਮਾਲਧਾਰੀ ਅਲਙ੍ਕਤਾ;

ਧਾਤਿਯੋ ਉਪਤਿਟ੍ਠਨ੍ਤਿ, ਸਾਯਂ ਪਾਤਂ ਸੁਖੇਸਿਨੋ.

‘‘ਨਯਿਦਂ ਅਕਤਪੁਞ੍ਞਾਨਂ, ਕਤਪੁਞ੍ਞਾਨਮੇਵਿਦਂ;

ਅਸੋਕਂ ਨਨ੍ਦਨਂ ਰਮ੍ਮਂ, ਤਿਦਸਾਨਂ ਮਹਾਵਨਂ.

‘‘ਸੁਖਂ ਅਕਤਪੁਞ੍ਞਾਨਂ, ਇਧ ਨਤ੍ਥਿ ਪਰਤ੍ਥ ਚ;

ਸੁਖਞ੍ਚ ਕਤਪੁਞ੍ਞਾਨਂ, ਇਧ ਚੇਵ ਪਰਤ੍ਥ ਚ.

‘‘ਤੇਸਂ ਸਹਬ੍ਯਕਾਮਾਨਂ, ਕਤ੍ਤਬ੍ਬਂ ਕੁਸਲਂ ਬਹੁਂ;

ਕਤਪੁਞ੍ਞਾ ਹਿ ਮੋਦਨ੍ਤਿ, ਸਗ੍ਗੇ ਭੋਗਸਮਙ੍ਗਿਨੋ’’ਤਿ. – ਗਾਥਾਯੋ ਅਵੋਚੁਂ;

੩੯੨. ਤਤ੍ਥ ਸਾਤੁਨ੍ਨਵਸਨਾਤਿ ਛਿਨ੍ਨਭਿਨ੍ਨਪਿਲੋਤਿਕਖਣ੍ਡਨਿਵਾਸਨਾ. ਏਕੇਤਿ ਏਕਚ੍ਚੇ. ਕੇਸਨਿਵਾਸਨਾਤਿ ਕੇਸੇਹੇਵ ਪਟਿਚ੍ਛਾਦਿਤਕੋਪਿਨਾ. ਭਤ੍ਤਾਯ ਗਚ੍ਛਨ੍ਤੀਤਿ ‘‘ਅਪ੍ਪੇਵ ਨਾਮ ਇਤੋ ਗਤਾ ਯਤ੍ਥ ਵਾ ਤਤ੍ਥ ਵਾ ਕਿਞ੍ਚਿ ਉਚ੍ਛਿਟ੍ਠਭਤ੍ਤਂ ਵਾ ਵਮਿਤਭਤ੍ਤਂ ਵਾ ਗਬ੍ਭਮਲਾਦਿਕਂ ਵਾ ਲਭੇਯ੍ਯਾਮਾ’’ਤਿ ਕਤ੍ਥਚਿਦੇਵ ਅਟ੍ਠਤ੍ਵਾ ਘਾਸਤ੍ਥਾਯ ਗਚ੍ਛਨ੍ਤਿ. ਪਕ੍ਕਮਨ੍ਤਿ ਦਿਸੋਦਿਸਨ੍ਤਿ ਦਿਸਤੋ ਦਿਸਂ ਅਨੇਕਯੋਜਨਨ੍ਤਰਿਕਂ ਠਾਨਂ ਪਕ੍ਕਮਨ੍ਤਿ.

੩੯੩. ਦੂਰੇਤਿ ਦੂਰੇਵ ਠਾਨੇ. ਏਕੇਤਿ ਏਕਚ੍ਚੇ ਪੇਤਾ. ਪਧਾਵਿਤ੍ਵਾਤਿ ਘਾਸਤ੍ਥਾਯ ਉਪਧਾਵਿਤ੍ਵਾ. ਅਲਦ੍ਧਾਵ ਨਿਵਤ੍ਤਰੇਤਿ ¶ ਕਿਞ੍ਚਿ ਘਾਸਂ ਵਾ ਪਾਨੀਯਂ ਵਾ ਅਲਭਿਤ੍ਵਾ ਏਵ ਨਿਵਤ੍ਤਨ੍ਤਿ. ਪਮੁਚ੍ਛਿਤਾਤਿ ਖੁਪ੍ਪਿਪਾਸਾਦਿਦੁਕ੍ਖੇਨ ਸਞ੍ਜਾਤਮੁਚ੍ਛਾ. ਭਨ੍ਤਾਤਿ ¶ ਪਰਿਬ੍ਭਮਨ੍ਤਾ. ਭੂਮਿਯਂ ਪਟਿਸੁਮ੍ਭਿਤਾਤਿ ਤਾਯ ਏਵ ਮੁਚ੍ਛਾਯ ਉਪ੍ਪਤ੍ਤਿਯਾ ਠਤ੍ਵਾ ਅਵਕ੍ਖਿਤ੍ਤਮਤ੍ਤਿਕਾਪਿਣ੍ਡਾ ਵਿਯ ਵਿਸ੍ਸੁਸ੍ਸਿਤ੍ਵਾ ਪਥਵਿਯਂ ਪਤਿਤਾ.

੩੯੪. ਤਤ੍ਥਾਤਿ ¶ ਗਤਟ੍ਠਾਨੇ. ਭੂਮਿਯਂ ਪਟਿਸੁਮ੍ਭਿਤਾਤਿ ਪਪਾਤੇ ਪਤਿਤਾ ਵਿਯ ਜਿਘਚ੍ਛਾਦਿਦੁਕ੍ਖੇਨ ਠਾਤੁਂ ਅਸਮਤ੍ਥਭਾਵੇਨ ਭੂਮਿਯਂ ਪਤਿਤਾ, ਤਤ੍ਥ ਵਾ ਗਤਟ੍ਠਾਨੇ ਘਾਸਾਦੀਨਂ ਅਲਾਭੇਨ ਛਿਨ੍ਨਾਸਾ ਹੁਤ੍ਵਾ ਕੇਨਚਿ ਪਟਿਮੁਖਂ ਸੁਮ੍ਭਿਤਾ ਪੋਥਿਤਾ ਵਿਯ ਭੂਮਿਯਂ ਪਤਿਤਾ ਹੋਨ੍ਤੀਤਿ ਅਤ੍ਥੋ. ਪੁਬ੍ਬੇ ਅਕਤਕਲ੍ਯਾਣਾਤਿ ਪੁਰਿਮਭਵੇ ਅਕਤਕੁਸਲਾ. ਅਗ੍ਗਿਦਡ੍ਢਾਵ ਆਤਪੇਤਿ ਨਿਦਾਘਕਾਲੇ ਆਤਪਟ੍ਠਾਨੇ ਅਗ੍ਗਿਨਾ ਦਡ੍ਢਾ ਵਿਯ, ਖੁਪ੍ਪਿਪਾਸਗ੍ਗਿਨਾ ਡਯ੍ਹਮਾਨਾ ਮਹਾਦੁਕ੍ਖਂ ਅਨੁਭਵਨ੍ਤੀਤਿ ਅਤ੍ਥੋ.

੩੯੫. ਪੁਬ੍ਬੇਤਿ ਅਤੀਤਭਵੇ. ਪਾਪਧਮ੍ਮਾਤਿ ਇਸ੍ਸੁਕੀਮਚ੍ਛਰੀਆਦਿਭਾਵੇਨ ਲਾਮਕਸਭਾਵਾ. ਘਰਣੀਤਿ ਘਰਸਾਮਿਨਿਯੋ. ਕੁਲਮਾਤਰੋਤਿ ਕੁਲਦਾਰਕਾਨਂ ਮਾਤਰੋ, ਕੁਲਪੁਰਿਸਾਨਂ ਵਾ ਮਾਤਰੋ. ਦੀਪਨ੍ਤਿ ਪਤਿਟ੍ਠਂ, ਪੁਞ੍ਞਨ੍ਤਿ ਅਤ੍ਥੋ. ਤਞ੍ਹਿ ਸਤ੍ਤਾਨਂ ਸੁਗਤੀਸੁ ਪਤਿਟ੍ਠਾਭਾਵਤੋ ‘‘ਪਤਿਟ੍ਠਾ’’ਤਿ ਵੁਚ੍ਚਤਿ. ਨਾਕਮ੍ਹਾਤਿ ਨ ਕਰਿਮ੍ਹ.

੩੯੬. ਪਹੂਤਨ੍ਤਿ ਬਹੁਂ. ਅਨ੍ਨਪਾਨਮ੍ਪੀਤਿ ਅਨ੍ਨਞ੍ਚ ਪਾਨਞ੍ਚ. ਅਪਿਸ੍ਸੁ ਅਵਕਿਰੀਯਤੀਤਿ ਸੂਤਿ ਨਿਪਾਤਮਤ੍ਤਂ, ਅਪਿ ਅਵਕਿਰੀਯਤਿ ਛਟ੍ਟੀਯਤਿ. ਸਮ੍ਮਗ੍ਗਤੇਤਿ ਸਮ੍ਮਾ ਗਤੇ ਸਮ੍ਮਾ ਪਟਿਪਨ੍ਨੇ ਸਮ੍ਮਾ ਪਟਿਪਨ੍ਨਾਯ. ਪਬ੍ਬਜਿਤੇਤਿ ਪਬ੍ਬਜਿਤਾਯ. ਸਮ੍ਪਦਾਨੇ ਹਿ ਇਦਂ ਭੁਮ੍ਮਵਚਨਂ. ਸਮ੍ਮਗ੍ਗਤੇ ਵਾ ਪਬ੍ਬਜਿਤੇ ਸਤਿ ਲਬ੍ਭਮਾਨੇਤਿ ਅਤ੍ਥੋ. ਨ ਚ ਕਿਞ੍ਚਿ ਅਦਮ੍ਹਸੇਤਿ ‘‘ਕਿਞ੍ਚਿਮਤ੍ਤਮ੍ਪਿ ਦੇਯ੍ਯਧਮ੍ਮਂ ਨਾਦਮ੍ਹਾ’’ਤਿ ਵਿਪ੍ਪਟਿਸਾਰਾਭਿਭੂਤਾ ਵਦਨ੍ਤਿ.

੩੯੭. ਅਕਮ੍ਮਕਾਮਾਤਿ ਸਾਧੂਤਿ ਅਕਤ੍ਤਬ੍ਬਂ ਕਮ੍ਮਂ ਅਕੁਸਲਂ ਕਾਮੇਨ੍ਤੀਤਿ ਅਕਮ੍ਮਕਾਮਾ, ਸਾਧੂਹਿ ਵਾ ਕਤ੍ਤਬ੍ਬਂ ਕੁਸਲਂ ਕਾਮੇਨ੍ਤੀਤਿ ਕਮ੍ਮਕਾਮਾ, ਨ ਕਮ੍ਮਕਾਮਾਤਿ ਅਕਮ੍ਮਕਾਮਾ ¶ , ਕੁਸਲਧਮ੍ਮੇਸੁ ਅਚ੍ਛਨ੍ਦਿਕਾਤਿ ਅਤ੍ਥੋ. ਅਲਸਾਤਿ ਕੁਸੀਤਾ ਕੁਸਲਕਮ੍ਮਕਰਣੇ ਨਿਬ੍ਬੀਰਿਯਾ. ਸਾਦੁਕਾਮਾਤਿ ਸਾਤਮਧੁਰਵਤ੍ਥੁਪਿਯਾ. ਮਹਗ੍ਘਸਾਤਿ ਮਹਾਭੋਜਨਾ, ਉਭਯੇਨਾਪਿ ਸੁਨ੍ਦਰਞ੍ਚ ਮਧੁਰਞ੍ਚ ਭੋਜਨਂ ਲਭਿਤ੍ਵਾ ਅਤ੍ਥਿਕਾਨਂ ਕਿਞ੍ਚਿ ਅਦਤ੍ਵਾ ਸਯਮੇਵ ਭੁਞ੍ਜਿਤਾਰੋਤਿ ¶ ਦਸ੍ਸੇਤਿ. ਆਲੋਪਪਿਣ੍ਡਦਾਤਾਰੋਤਿ ਆਲੋਪਮਤ੍ਤਸ੍ਸਪਿ ਭੋਜਨਪਿਣ੍ਡਸ੍ਸ ਦਾਯਕਾ. ਪਟਿਗ੍ਗਹੇਤਿ ਤਸ੍ਸ ਪਟਿਗ੍ਗਣ੍ਹਨਕੇ. ਪਰਿਭਾਸਿਮ੍ਹਸੇਤਿ ਪਰਿਭਵਂ ਕਰੋਨ੍ਤਾ ਭਾਸਿਮ੍ਹ, ਅਵਮਞ੍ਞਿਮ੍ਹ ਉਪ੍ਪਣ੍ਡਿਮ੍ਹਾ ਚਾਤਿ ਅਤ੍ਥੋ.

੩੯੮. ਤੇ ਘਰਾਤਿ ਯਤ੍ਥ ਮਯਂ ਪੁਬ੍ਬੇ ‘‘ਅਮ੍ਹਾਕਂ ਘਰ’’ਨ੍ਤਿ ਮਮਤ੍ਤਂ ਅਕਰਿਮ੍ਹਾ, ਤਾਨਿ ਘਰਾਨਿ ਯਥਾਠਿਤਾਨਿ, ਇਦਾਨਿ ਨੋ ਨ ਕਿਞ੍ਚਿ ਉਪਕਪ੍ਪਤੀਤਿ ਅਧਿਪ੍ਪਾਯੋ. ਤਾ ਚ ਦਾਸਿਯੋ ਤਾਨੇਵਾਭਰਣਾਨਿ ਨੋਤਿ ਏਤ੍ਥਾਪਿ ਏਸੇਵ ਨਯੋ. ਤਤ੍ਥ ਨੋਤਿ ਅਮ੍ਹਾਕਂ. ਤੇਤਿ ਤੇ ਘਰਾਦਿਕੇ. ਅਞ੍ਞੇ ਪਰਿਚਾਰੇਨ੍ਤਿ ¶ , ਪਰਿਭੋਗਾਦਿਵਸੇਨ ਵਿਨਿਯੋਗਂ ਕਰੋਨ੍ਤੀਤਿ ਅਤ੍ਥੋ. ਮਯਂ ਦੁਕ੍ਖਸ੍ਸ ਭਾਗਿਨੋਤਿ ਮਯਂ ਪਨ ਪੁਬ੍ਬੇ ਕੇਵਲਂ ਕੀਲ਼ਨਪ੍ਪਸੁਤਾ ਹੁਤ੍ਵਾ ਸਾਪਤੇਯ੍ਯਂ ਪਹਾਯ ਗਮਨੀਯਂ ਅਨੁਗਾਮਿਕਂ ਕਾਤੁਂ ਅਜਾਨਨ੍ਤਾ ਇਦਾਨਿ ਖੁਪ੍ਪਿਪਾਸਾਦਿਦੁਕ੍ਖਸ੍ਸ ਭਾਗਿਨੋ ਭਵਾਮਾਤਿ ਅਤ੍ਤਾਨਂ ਗਰਹਨ੍ਤਾ ਵਦਨ੍ਤਿ.

੩੯੯. ਇਦਾਨਿ ਯਸ੍ਮਾ ਪੇਤਯੋਨਿਤੋ ਚਵਿਤ੍ਵਾ ਮਨੁਸ੍ਸੇਸੁ ਉਪ੍ਪਜ੍ਜਨ੍ਤਾਪਿ ਸਤ੍ਤਾ ਯੇਭੁਯ੍ਯੇਨ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਹੀਨਜਾਤਿਕਾ ਕਪਣਵੁਤ੍ਤਿਨੋਵ ਹੋਨ੍ਤਿ, ਤਸ੍ਮਾ ਤਮਤ੍ਥਂ ਦਸ੍ਸੇਤੁਂ ‘‘ਵੇਣਿਵਾ’’ਤਿਆਦਿਨਾ ਦ੍ਵੇ ਗਾਥਾ ਵੁਤ੍ਤਾ. ਤਤ੍ਥ ਵੇਣਿਵਾਤਿ ਵੇਨਜਾਤਿਕਾ, ਵਿਲੀਵਕਾਰਾ ਨਲ਼ਕਾਰਾ ਹੋਨ੍ਤੀਤਿ ਅਤ੍ਥੋ. ਵਾ-ਸਦ੍ਦੋ ਅਨਿਯਮਤ੍ਥੋ. ਅਵਞ੍ਞਾਤਿ ਅਵਞ੍ਞੇਯ੍ਯਾ, ਅਵਜਾਨਿਤਬ੍ਬਾਤਿ ਵੁਤ੍ਤਂ ਹੋਤਿ. ‘‘ਵਮ੍ਭਨਾ’’ਤਿ ਵਾ ਪਾਠੋ, ਪਰੇਹਿ ਬਾਧਨੀਯਾਤਿ ਅਤ੍ਥੋ. ਰਥਕਾਰੀਤਿ ਚਮ੍ਮਕਾਰਿਨੋ. ਦੁਬ੍ਭਿਕਾਤਿ ਮਿਤ੍ਤਦੁਬ੍ਭਿਕਾ ਮਿਤ੍ਤਾਨਂ ਬਾਧਿਕਾ. ਚਣ੍ਡਾਲੀਤਿ ਚਣ੍ਡਾਲਜਾਤਿਕਾ. ਕਪਣਾਤਿ ਵਨਿਬ੍ਬਕਾ ਅਤਿਵਿਯ ਕਾਰੁਞ੍ਞਪ੍ਪਤ੍ਤਾ ¶ . ਕਪ੍ਪਕਾਤਿ ਕਪ੍ਪਕਜਾਤਿਕਾ, ਸਬ੍ਬਤ੍ਥ ‘‘ਹੋਨ੍ਤਿ ਪੁਨਪ੍ਪੁਨ’’ਨ੍ਤਿ ਯੋਜਨਾ, ਅਪਰਾਪਰਮ੍ਪਿ ਇਮੇਸੁ ਨਿਹੀਨਕੁਲੇਸੁ ਉਪ੍ਪਜ੍ਜਨ੍ਤੀਤਿ ਵੁਤ੍ਤਂ ਹੋਤਿ.

੪੦੦. ਤੇਸੁ ਤੇਸ੍ਵੇਵ ਜਾਯਨ੍ਤੀਤਿ ਯਾਨਿ ਯਾਨਿ ਅਞ੍ਞਾਨਿਪਿ ਨੇਸਾਦਪੁਕ੍ਕੁਸਕੁਲਾਦੀਨਿ ਕਪਣਾਨਿ ਅਤਿਵਿਯ ਵਮ੍ਭਨਿਯਾਨਿ ਪਰਮਦੁਗ੍ਗਤਾਨਿ ਚ, ਤੇਸੁ ਤੇਸੁ ਏਵ ਨਿਹੀਨਕੁਲੇਸੁ ਮਚ੍ਛਰਿਯਮਲੇਨ ਪੇਤੇਸੁ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤਾ ਨਿਬ੍ਬਤ੍ਤਨ੍ਤਿ. ਤੇਨਾਹ ‘‘ਏਸਾ ਮਚ੍ਛਰਿਨੋ ਗਤੀ’’ਤਿ.

੪੦੧. ਏਵਂ ¶ ਅਕਤਪੁਞ੍ਞਾਨਂ ਸਤ੍ਤਾਨਂ ਗਤਿਂ ਦਸ੍ਸੇਤ੍ਵਾ ਇਦਾਨਿ ਕਤਪੁਞ੍ਞਾਨਂ ਗਤਿਂ ਦਸ੍ਸੇਤੁਂ ‘‘ਪੁਬ੍ਬੇ ਚ ਕਤਕਲ੍ਯਾਣਾ’’ਤਿ ਸਤ੍ਤ ਗਾਥਾ ਵੁਤ੍ਤਾ. ਤਤ੍ਥ ਸਗ੍ਗਂ ਤੇ ਪਰਿਪੂਰੇਨ੍ਤੀਤਿ ਯੇ ਪੁਬ੍ਬੇ ਪੁਰਿਮਜਾਤਿਯਂ ਕਤਕਲ੍ਯਾਣਾ ਦਾਯਕਾ ਦਾਨਪੁਞ੍ਞਾਭਿਰਤਾ ਵਿਗਤਮਲਮਚ੍ਛੇਰਾ, ਤੇ ਅਤ੍ਤਨੋ ਰੂਪਸਮ੍ਪਤ੍ਤਿਯਾ ਚੇਵ ਪਰਿਵਾਰਸਮ੍ਪਤ੍ਤਿਯਾ ਚ ਸਗ੍ਗਂ ਦੇਵਲੋਕਂ ਪਰਿਪੂਰੇਨ੍ਤਿ ਪਰਿਪੁਣ੍ਣਂ ਕਰੋਨ੍ਤਿ. ਓਭਾਸੇਨ੍ਤਿ ਚ ਨਨ੍ਦਨਨ੍ਤਿ ਨ ਕੇਵਲਂ ਪਰਿਪੂਰੇਨ੍ਤਿਯੇਵ, ਅਥ ਖੋ ਕਪ੍ਪਰੁਕ੍ਖਾਦੀਨਂ ਪਭਾਹਿ ਸਭਾਵੇਨੇਵ ਓਭਾਸਮਾਨਮ੍ਪਿ ਨਨ੍ਦਨਵਨਂ ਅਤ੍ਤਨੋ ਵਤ੍ਥਾਭਰਣਜੁਤੀਹਿ ਸਰੀਰਪ੍ਪਭਾਯ ਚ ਅਭਿਭਵਿਤ੍ਵਾ ਚੇਵ ਓਭਾਸੇਤ੍ਵਾ ਚ ਜੋਤੇਨ੍ਤਿ.

੪੦੨. ਕਾਮਕਾਮਿਨੋਤਿ ਯਥਿਚ੍ਛਿਤੇਸੁ ਕਾਮਗੁਣੇਸੁ ਯਥਾਕਾਮਂ ਪਰਿਭੋਗਵਨ੍ਤੋ. ਉਚ੍ਚਾਕੁਲੇਸੂਤਿ ਉਚ੍ਚੇਸੁ ਖਤ੍ਤਿਯਕੁਲਾਦੀਸੁ ਕੁਲੇਸੁ. ਸਭੋਗੇਸੂਤਿ ਮਹਾਵਿਭਵੇਸੁ. ਤਤੋ ਚੁਤਾਤਿ ਤਤੋ ਦੇਵਲੋਕਤੋ ਚੁਤਾ.

੪੦੩. ਕੂਟਾਗਾਰੇ ¶ ਚ ਪਾਸਾਦੇਤਿ ਕੂਟਾਗਾਰੇ ਚ ਪਾਸਾਦੇ ਚ. ਬੀਜਿਤਙ੍ਗਾਤਿ ਬੀਜਿਯਮਾਨਦੇਹਾ. ਮੋਰਹਤ੍ਥੇਹੀਤਿ ਮੋਰਪਿਞ੍ਛਪਟਿਮਣ੍ਡਿਤਬੀਜਨੀਹਤ੍ਥੇਹਿ. ਯਸਸ੍ਸਿਨੋਤਿ ਪਰਿਵਾਰਵਨ੍ਤੋ ਰਮਨ੍ਤੀਤਿ ਅਧਿਪ੍ਪਾਯੋ.

੪੦੪. ਅਙ੍ਕਤੋ ਅਙ੍ਕਂ ਗਚ੍ਛਨ੍ਤੀਤਿ ਦਾਰਕਕਾਲੇਪਿ ਞਾਤੀਨਂ ਧਾਤੀਨਞ੍ਚ ਅਙ੍ਕਟ੍ਠਾਨਤੋ ਅਙ੍ਕਟ੍ਠਾਨਮੇਵ ਗਚ੍ਛਨ੍ਤਿ, ਨ ਭੂਮਿਤਲਨ੍ਤਿ ਅਧਿਪ੍ਪਾਯੋ. ਉਪਤਿਟ੍ਠਨ੍ਤੀਤਿ ਉਪਟ੍ਠਾਨਂ ਕਰੋਨ੍ਤਿ. ਸੁਖੇਸਿਨੋਤਿ ਸੁਖਮਿਚ੍ਛਨ੍ਤਾ, ‘‘ਮਾ ਸੀਤਂ ¶ ਵਾ ਉਣ੍ਹਂ ਵਾ’’ਤਿ ਅਪ੍ਪਕਮ੍ਪਿ ਦੁਕ੍ਖਂ ਪਰਿਹਰਨ੍ਤਾ ਉਪਤਿਟ੍ਠਨ੍ਤੀਤਿ ਅਧਿਪ੍ਪਾਯੋ.

੪੦੫. ਨਯਿਦਂ ਅਕਤਪੁਞ੍ਞਾਨਨ੍ਤਿ ਇਦਂ ਸੋਕਵਤ੍ਥੁਅਭਾਵਤੋ ਅਸੋਕਂ ਰਮ੍ਮਂ ਰਮਣੀਯਂ ਤਿਦਸਾਨਂ ਤਾਵਤਿਂਸਦੇਵਾਨਂ ਮਹਾਵਨਂ ਮਹਾਉਪਵਨਭੂਤਂ ਨਨ੍ਦਨਂ ਨਨ੍ਦਨਵਨਂ ਅਕਤਪੁਞ੍ਞਾਨਂ ਨ ਹੋਤਿ, ਤੇਹਿ ਲਦ੍ਧੁਂ ਨ ਸਕ੍ਕਾਤਿ ਅਤ੍ਥੋ.

੪੦੬. ਇਧਾਤਿ ਇਮਸ੍ਮਿਂ ਮਨੁਸ੍ਸਲੋਕੇ ਵਿਸੇਸਤੋ ਪੁਞ੍ਞਂ ਕਰੀਯਤਿ, ਤਂ ਸਨ੍ਧਾਯਾਹ. ਇਧਾਤਿ ਵਾ ਦਿਟ੍ਠਧਮ੍ਮੇ. ਪਰਤ੍ਥਾਤਿ ਸਮ੍ਪਰਾਯੇ.

੪੦੭. ਤੇਸਨ੍ਤਿ ਤੇਹਿ ਯਥਾਵੁਤ੍ਤੇਹਿ ਦੇਵੇਹਿ. ਸਹਬ੍ਯਕਾਮਾਨਨ੍ਤਿ ਸਹਭਾਵਂ ਇਚ੍ਛਨ੍ਤੇਹਿ. ਭੋਗਸਮਙ੍ਗਿਨੋਤਿ ਭੋਗੇਹਿ ਸਮਨ੍ਨਾਗਤਾ, ਦਿਬ੍ਬੇਹਿ ¶ ਪਞ੍ਚਕਾਮਗੁਣੇਹਿ ਸਮਪ੍ਪਿਤਾ ਮੋਦਨ੍ਤੀਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵ.

ਏਵਂ ਤੇਹਿ ਪੇਤੇਹਿ ਸਾਧਾਰਣਤੋ ਅਤ੍ਤਨਾ ਕਤਕਮ੍ਮਸ੍ਸ ਚ ਗਤਿਯਾ ਪੁਞ੍ਞਕਮ੍ਮਸ੍ਸ ਚ ਗਤਿਯਾ ਪਵੇਦਿਤਾਯ ਸਂਵਿਗ੍ਗਮਨਸ੍ਸ ਕੋਲ਼ਿਯਾਮਚ੍ਚਪਮੁਖਸ੍ਸ ਤਤ੍ਥ ਸਨ੍ਨਿਪਤਿਤਸ੍ਸ ਮਹਾਜਨਸ੍ਸ ਅਜ੍ਝਾਸਯਾਨੁਰੂਪਂ ਭਗਵਾ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ.

ਅਭਿਜ੍ਜਮਾਨਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੨. ਸਾਣਵਾਸਿਤ੍ਥੇਰਪੇਤਵਤ੍ਥੁਵਣ੍ਣਨਾ

ਕੁਣ੍ਡਿਨਾਗਰਿਯੋ ਥੇਰੋਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਆਯਸ੍ਮਤੋ ਸਾਣਵਾਸਿਤ੍ਥੇਰਸ੍ਸ ਞਾਤਿਪੇਤੇ ¶ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਬਾਰਾਣਸਿਯਂ ਕਿਤਵਸ੍ਸ ਨਾਮ ਰਞ੍ਞੋ ਪੁਤ੍ਤੋ ਉਯ੍ਯਾਨਕੀਲ਼ਂ ਕੀਲ਼ਿਤ੍ਵਾ ਨਿਵਤ੍ਤਨ੍ਤੋ ਸੁਨੇਤ੍ਤਂ ਨਾਮ ਪਚ੍ਚੇਕਬੁਦ੍ਧਂ ਪਿਣ੍ਡਾਯ ਚਰਿਤ੍ਵਾ ਨਗਰਤੋ ਨਿਕ੍ਖਮਨ੍ਤਂ ਦਿਸ੍ਵਾ ਇਸ੍ਸਰਿਯਮਦਮਤ੍ਤੋ ਹੁਤ੍ਵਾ ‘‘ਕਥਞ੍ਹਿ ਨਾਮ ਮਯ੍ਹਂ ਅਞ੍ਜਲਿਂ ¶ ਅਕਤ੍ਵਾ ਅਯਂ ਮੁਣ੍ਡਕੋ ਗਚ੍ਛਤੀ’’ਤਿ ਪਦੁਟ੍ਠਚਿਤ੍ਤੋ ਹਤ੍ਥਿਕ੍ਖਨ੍ਧਤੋ ਓਤਰਿਤ੍ਵਾ ‘‘ਕਚ੍ਚਿ ਤੇ ਪਿਣ੍ਡਪਾਤੋ ਲਦ੍ਧੋ’’ਤਿ ਆਲਪਨ੍ਤੋ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਪਥਵਿਯਂ ਪਾਤੇਤ੍ਵਾ ਭਿਨ੍ਦਿ. ਅਥ ਨਂ ਸਬ੍ਬਤ੍ਥ ਤਾਦਿਭਾਵਪ੍ਪਤ੍ਤਿਯਾ ਨਿਬ੍ਬਿਕਾਰਂ ਕਰੁਣਾਵਿਪ੍ਫਾਰਸੋਮਨਸ੍ਸਨਿਪਾਤਪਸਨ੍ਨਚਿਤ੍ਤਮੇਵ ਓਲੋਕੇਨ੍ਤਂ ਅਟ੍ਠਾਨਾਘਾਤੇਨ ਦੂਸਿਤਚਿਤ੍ਤੋ ‘‘ਕਿਂ ਮਂ ਕਿਤਵਸ੍ਸ ਰਞ੍ਞੋ ਪੁਤ੍ਤਂ ਨ ਜਾਨਾਸਿ, ਤ੍ਵਂ ਓਲੋਕਯਨ੍ਤੋ ਮਯ੍ਹਂ ਕਿਂ ਕਰਿਸ੍ਸਸੀ’’ਤਿ ਵਤ੍ਵਾ ਅਵਹਸਨ੍ਤੋ ਪਕ੍ਕਾਮਿ. ਪਕ੍ਕਨ੍ਤਮਤ੍ਤਸ੍ਸੇਵ ਚਸ੍ਸ ਨਰਕਗ੍ਗਿਦਾਹਪਟਿਭਾਗੋ ਬਲਵਸਰੀਰਦਾਹੋ ਉਪ੍ਪਜ੍ਜਿ. ਸੋ ਤੇਨ ਮਹਾਸਨ੍ਤਾਪੇਨਾਭਿਭੂਤਕਾਯੋ ਅਤਿਬਾਲ਼੍ਹਂ ਦੁਕ੍ਖਵੇਦਨਾਭਿਤੁਨ੍ਨੋ ਕਾਲਂ ਕਤ੍ਵਾ ਅਵੀਚੀਮਹਾਨਿਰਯੇ ਨਿਬ੍ਬਤ੍ਤਿ.

ਸੋ ਤਤ੍ਥ ਦਕ੍ਖਿਣਪਸ੍ਸੇਨ ਵਾਮਪਸ੍ਸੇਨ ਉਤ੍ਤਾਨੋ ਅਵਕੁਜ੍ਜੋਤਿ ਬਹੂਹਿ ਪਕਾਰੇਹਿ ਪਰਿਵਤ੍ਤਿਤ੍ਵਾ ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਪਚ੍ਚਿਤ੍ਵਾ ਤਤੋ ¶ ਚੁਤੋ ਪੇਤੇਸੁ ਅਪਿਰਿਮਿਤਕਾਲਂ ਖੁਪ੍ਪਿਪਾਸਾਦਿਦੁਕ੍ਖਂ ਅਨੁਭਵਿਤ੍ਵਾ ਤਤੋ ਚੁਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਣ੍ਡਿਨਗਰਸ੍ਸ ਸਮੀਪੇ ਕੇਵਟ੍ਟਗਾਮੇ ਨਿਬ੍ਬਤ੍ਤਿ. ਤਸ੍ਸ ਜਾਤਿਸ੍ਸਰਞਾਣਂ ਉਪ੍ਪਜ੍ਜਿ, ਤੇਨ ਸੋ ਪੁਬ੍ਬੇ ਅਤ੍ਤਨਾ ਅਨੁਭੂਤਪੁਬ੍ਬਂ ਦੁਕ੍ਖਂ ਅਨੁਸ੍ਸਰਨ੍ਤੋ ਵਯਪ੍ਪਤ੍ਤੋਪਿ ਪਾਪਭਯੇਨ ਞਾਤਕੇਹਿਪਿ ਸਦ੍ਧਿਂ ਮਚ੍ਛਬਨ੍ਧਨਤ੍ਥਂ ਨ ਗਚ੍ਛਤਿ. ਤੇਸੁ ਗਚ੍ਛਨ੍ਤੇਸੁ ਮਚ੍ਛੇ ਘਾਤੇਤੁਂ ਅਨਿਚ੍ਛਨ੍ਤੋ ਨਿਲੀਯਤਿ, ਗਤੋ ਚ ਜਾਲਂ ਭਿਨ੍ਦਤਿ, ਜੀਵਨ੍ਤੇ ਵਾ ਮਚ੍ਛੇ ਗਹੇਤ੍ਵਾ ਉਦਕੇ ਵਿਸ੍ਸਜ੍ਜੇਤਿ, ਤਸ੍ਸ ਤਂ ਕਿਰਿਯਂ ਅਰੋਚਨ੍ਤਾ ਞਾਤਕਾ ਗੇਹਤੋ ਤਂ ਨੀਹਰਿਂਸੁ. ਏਕੋ ਪਨਸ੍ਸ ਭਾਤਾ ਸਿਨੇਹਬਦ੍ਧਹਦਯੋ ਅਹੋਸਿ.

ਤੇਨ ਚ ਸਮਯੇਨ ਆਯਸ੍ਮਾ ਆਨਨ੍ਦੋ ਕੁਣ੍ਡਿਨਗਰਂ ਉਪਨਿਸ੍ਸਾਯ ਸਾਣਪਬ੍ਬਤੇ ਵਿਹਰਤਿ. ਅਥ ਸੋ ਕੇਵਟ੍ਟਪੁਤ੍ਤੋ ਞਾਤਕੇਹਿ ਪਰਿਚ੍ਚਤ੍ਤੋ ਹੁਤ੍ਵਾ ਇਤੋ ਚਿਤੋ ਚ ਪਰਿਬ੍ਭਮਨ੍ਤੋ ਤਂ ਪਦੇਸਂ ਪਤ੍ਤੋ ਭੋਜਨਵੇਲਾਯ ਥੇਰਸ੍ਸ ਸਨ੍ਤਿਕਂ ਉਪਸਙ੍ਕਮਿ. ਥੇਰੋ ਤਂ ਪੁਚ੍ਛਿਤ੍ਵਾ ਭੋਜਨੇਨ ਅਤ੍ਥਿਕਭਾਵਂ ਞਤ੍ਵਾ ਤਸ੍ਸ ਭਤ੍ਤਂ ਦਤ੍ਵਾ ਕਤਭਤ੍ਤਕਿਚ੍ਚੋ ਸਬ੍ਬਂ ਤਂ ¶ ਪਵਤ੍ਤਿਂ ਞਤ੍ਵਾ ਧਮ੍ਮਕਥਾਯ ਪਸਨ੍ਨਮਾਨਸਂ ਞਤ੍ਵਾ ‘‘ਪਬ੍ਬਜਿਸ੍ਸਸਿ, ਆਵੁਸੋ’’ਤਿ? ‘‘ਆਮ, ਭਨ੍ਤੇ, ਪਬ੍ਬਜਿਸ੍ਸਾਮੀ’’ਤਿ. ਥੇਰੋ ਤਂ ਪਬ੍ਬਾਜੇਤ੍ਵਾ ਤੇਨ ਸਦ੍ਧਿਂ ਭਗਵਤੋ ਸਨ੍ਤਿਕਂ ਅਗਮਾਸਿ. ਅਥ ਨਂ ਸਤ੍ਥਾ ਆਹ – ‘‘ਆਨਨ੍ਦ, ਇਮਂ ਸਾਮਣੇਰਂ ਅਨੁਕਮ੍ਪੇਯ੍ਯਾਸੀ’’ਤਿ. ਸੋ ਚ ਅਕਤਕੁਸਲਤ੍ਤਾ ਅਪ੍ਪਲਾਭੋ ਅਹੋਸਿ. ਅਥ ਨਂ ਸਤ੍ਥਾ ਅਨੁਗ੍ਗਣ੍ਹਨ੍ਤੋ ਭਿਕ੍ਖੂਨਂ ਪਰਿਭੋਗਤ੍ਥਾਯ ਪਾਨੀਯਘਟਾਨਂ ਪਰਿਪੂਰਣੇ ਨਿਯੋਜੇਸਿ. ਤਂ ਦਿਸ੍ਵਾ ਉਪਾਸਕਾ ਤਸ੍ਸ ਬਹੂਨਿ ਨਿਚ੍ਚਭਤ੍ਤਾਨਿ ਪਟ੍ਠਪੇਸੁਂ.

ਸੋ ¶ ਅਪਰੇਨ ਸਮਯੇਨ ਲਦ੍ਧੂਪਸਮ੍ਪਦੋ ਅਰਹਤ੍ਤਂ ਪਤ੍ਵਾ ਥੇਰੋ ਹੁਤ੍ਵਾ ਦ੍ਵਾਦਸਹਿ ਭਿਕ੍ਖੂਹਿ ਸਦ੍ਧਿਂ ਸਾਣਪਬ੍ਬਤੇ ਵਸਿ. ਤਸ੍ਸ ਪਨ ਞਾਤਕਾ ਪਞ੍ਚਸਤਮਤ੍ਤਾ ਅਨੁਪਚਿਤਕੁਸਲਕਮ੍ਮਾ ਉਪਚਿਤਮਚ੍ਛੇਰਾਦਿਪਾਪਧਮ੍ਮਾ ਕਾਲਂ ਕਤ੍ਵਾ ਪੇਤੇਸੁ ਨਿਬ੍ਬਤ੍ਤਿਂਸੁ. ਤਸ੍ਸ ਪਨ ਮਾਤਾਪਿਤਰੋ ‘‘ਏਸ ਅਮ੍ਹੇਹਿ ਪੁਬ੍ਬੇ ਗੇਹਤੋ ਨਿਕ੍ਕਡ੍ਢਿਤੋ’’ਤਿ ਸਾਰਜ੍ਜਮਾਨਾ ਤਂ ਅਨੁਪਸਙ੍ਕਮਿਤ੍ਵਾ ਤਸ੍ਮਿਂ ਬਦ੍ਧਸਿਨੇਹਂ ਭਾਤਿਕਂ ਪੇਸੇਸੁਂ. ਸੋ ਥੇਰਸ੍ਸ ਗਾਮਂ ਪਿਣ੍ਡਾਯ ਪਵਿਟ੍ਠਸਮਯੇ ਦਕ੍ਖਿਣਜਾਣੁਮਣ੍ਡਲਂ ਪਥਵਿਯਂ ਪਤਿਟ੍ਠਾਪੇਤ੍ਵਾ ਕਤਞ੍ਜਲੀ ਅਤ੍ਤਾਨਂ ਦਸ੍ਸੇਤ੍ਵਾ ¶ ‘‘ਮਾਤਾ ਪਿਤਾ ਚ ਤੇ, ਭਨ੍ਤੇ’’ਤਿਆਦਿਗਾਥਾ ਅਵੋਚ. ਕੁਣ੍ਡਿਨਾਗਰਿਯੋ ਥੇਰੋਤਿਆਦਯੋ ਪਨ ਆਦਿਤੋ ਪਞ੍ਚ ਗਾਥਾ ਤਾਸਂ ਸਮ੍ਬਨ੍ਧਦਸ੍ਸਨਤ੍ਥਂ ਧਮ੍ਮਸਙ੍ਗਾਹਕੇਹਿ ਠਪਿਤਾ.

‘‘ਕੁਣ੍ਡਿਨਾਗਰਿਯੋ ਥੇਰੋ, ਸਾਣਵਾਸਿਨਿਵਾਸਿਕੋ;

ਪੋਟ੍ਠਪਾਦੋਤਿ ਨਾਮੇਨ, ਸਮਣੋ ਭਾਵਿਤਿਨ੍ਦ੍ਰਿਯੋ.

‘‘ਤਸ੍ਸ ਮਾਤਾ ਪਿਤਾ ਭਾਤਾ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

‘‘ਤੇ ਦੁਗ੍ਗਤਾ ਸੂਚਿਕਟ੍ਟਾ, ਕਿਲਨ੍ਤਾ ਨਗ੍ਗਿਨੋ ਕਿਸਾ;

ਉਤ੍ਤਸਨ੍ਤਾ ਮਹਤ੍ਤਾਸਾ, ਨ ਦਸ੍ਸੇਨ੍ਤਿ ਕੁਰੂਰਿਨੋ.

‘‘ਤਸ੍ਸ ¶ ਭਾਤਾ ਵਿਤਰਿਤ੍ਵਾ, ਨਗ੍ਗੋ ਏਕਪਥੇਕਕੋ;

ਚਤੁਕੁਣ੍ਡਿਕੋ ਭਵਿਤ੍ਵਾਨ, ਥੇਰਸ੍ਸ ਦਸ੍ਸਯੀਤੁਮਂ.

‘‘ਥੇਰੋ ਚਾਮਨਸਿਕਤ੍ਵਾ, ਤੁਣ੍ਹੀਭੂਤੋ ਅਤਿਕ੍ਕਮਿ;

ਸੋ ਚ ਵਿਞ੍ਞਾਪਯੀ ਥੇਰਂ, ‘ਭਾਤਾ ਪੇਤਗਤੋ ਅਹਂ’.

‘‘ਮਾਤਾ ਪਿਤਾ ਚ ਤੇ ਭਨ੍ਤੇ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

‘‘ਤੇਨ ਦੁਗ੍ਗਤਾ ਸੂਚਿਕਟ੍ਟਾ, ਕਿਲਨ੍ਤਾ ਨਗ੍ਗਿਨੋ ਕਿਸਾ;

ਉਤ੍ਤਸਨ੍ਤਾ ਮਹਤ੍ਤਾਸਾ, ਨ ਦਸ੍ਸੇਨ੍ਤਿ ਕੁਰੂਰਿਨੋ.

‘‘ਅਨੁਕਮ੍ਪਸ੍ਸੁ ¶ ਕਾਰੁਣਿਕੋ, ਦਤ੍ਵਾ ਅਨ੍ਵਾਦਿਸਾਹਿ ਨੋ;

ਤਵ ਦਿਨ੍ਨੇਨ ਦਾਨੇਨ, ਯਾਪੇਸ੍ਸਨ੍ਤਿ ਕੁਰੂਰਿਨੋ’’ਤਿ.

੪੦੮-੯. ਤਤ੍ਥ ਕੁਣ੍ਡਿਨਾਗਰਿਯੋ ਥੇਰੋਤਿ ਏਵਂਨਾਮਕੇ ਨਗਰੇ ਜਾਤਸਂਵਡ੍ਢਤ੍ਥੇਰੋ, ‘‘ਕੁਣ੍ਡਿਕਨਗਰੋ ਥੇਰੋ’’ਤਿਪਿ ਪਾਠੋ, ਸੋ ਏਵਤ੍ਥੋ. ਸਾਣਵਾਸਿਨਿਵਾਸਿਕੋਤਿ ਸਾਣਪਬ੍ਬਤਵਾਸੀ. ਪੋਟ੍ਠਪਾਦੋਤਿ ਨਾਮੇਨਾਤਿ ਨਾਮੇਨ ਪੋਟ੍ਠਪਾਦੋ ਨਾਮ. ਸਮਣੋਤਿ ਸਮਿਤਪਾਪੋ. ਭਾਵਿਤਿਨ੍ਦ੍ਰਿਯੋਤਿ ਅਰਿਯਮਗ੍ਗਭਾਵਨਾਯ ਭਾਵਿਤਸਦ੍ਧਾਦਿਇਨ੍ਦ੍ਰਿਯੋ, ਅਰਹਾਤਿ ਅਤ੍ਥੋ. ਤਸ੍ਸਾਤਿ ਤਸ੍ਸ ਸਾਣਵਾਸਿਤ੍ਥੇਰਸ੍ਸ. ਦੁਗ੍ਗਤਾਤਿ ਦੁਗ੍ਗਤਿਗਤਾ.

੪੧੦. ਸੂਚਿਕਟ੍ਟਾਤਿ ¶ ਪੂਤਿਨਾ ਲੂਖਗਤ੍ਤਾ ਅਟ੍ਟਕਾ, ਸੂਚਿਕਾਤਿ ਲਦ੍ਧਨਾਮਾਯ ਖੁਪ੍ਪਿਪਾਸਾਯ ਅਟ੍ਟਾ ਪੀਲ਼ਿਤਾ. ‘‘ਸੂਚਿਕਣ੍ਠਾ’’ਤਿ ਕੇਚਿ ਪਠਨ੍ਤਿ, ਸੂਚਿਛਿਦ੍ਦਸਦਿਸਮੁਖਦ੍ਵਾਰਾਤਿ ਅਤ੍ਥੋ. ਕਿਲਨ੍ਤਾਤਿ ਕਿਲਨ੍ਤਕਾਯਚਿਤ੍ਤਾ. ਨਗ੍ਗਿਨੋਤਿ ਨਗ੍ਗਰੂਪਾ ਨਿਚ੍ਚੋਲ਼ਾ. ਕਿਸਾਤਿ ਅਟ੍ਠਿਤ੍ਤਚਮਤ੍ਤਸਰੀਰਤਾਯ ਕਿਸਦੇਹਾ. ਉਤ੍ਤਸਨ੍ਤਾਤਿ ‘‘ਅਯਂ ਸਮਣੋ ਅਮ੍ਹਾਕਂ ਪੁਤ੍ਤੋ’’ਤਿ ਓਤ੍ਤਪ੍ਪੇਨ ਉਤ੍ਰਾਸਂ ਆਪਜ੍ਜਨ੍ਤਾ ¶ . ਮਹਤ੍ਤਾਸਾਤਿ ਅਤ੍ਤਨਾ ਪੁਬ੍ਬੇ ਕਤਕਮ੍ਮਂ ਪਟਿਚ੍ਚ ਸਞ੍ਜਾਤਮਹਾਭਯਾ. ਨ ਦਸ੍ਸੇਨ੍ਤੀਤਿ ਅਤ੍ਤਾਨਂ ਨ ਦਸ੍ਸੇਨ੍ਤਿ, ਸਮ੍ਮੁਖੀਭਾਵਂ ਨ ਗਚ੍ਛਨ੍ਤਿ. ਕੁਰੂਰਿਨੋਤਿ ਦਾਰੁਣਕਮ੍ਮਨ੍ਤਾ.

੪੧੧. ਤਸ੍ਸ ਭਾਤਾਤਿ ਸਾਣਵਾਸਿਤ੍ਥੇਰਸ੍ਸ ਭਾਤਾ. ਵਿਤਰਿਤ੍ਵਾਤਿ ਵਿਤਿਣ੍ਣੋ ਹੁਤ੍ਵਾ, ਓਤ੍ਤਪ੍ਪਸਨ੍ਤਾਸਭਯਾਤਿ ਅਤ੍ਥੋ. ਵਿਤੁਰਿਤ੍ਵਾਤਿ ਵਾ ਪਾਠੋ, ਤੁਰਿਤੋ ਹੁਤ੍ਵਾ, ਤਰਮਾਨਰੂਪੋ ਹੁਤ੍ਵਾਤਿ ਵੁਤ੍ਤਂ ਹੋਤਿ. ਏਕਪਥੇਤਿ ਏਕਪਦਿਕਮਗ੍ਗੇ. ਏਕਕੋਤਿ ਏਕਿਕੋ ਅਦੁਤਿਯੋ. ਚਤੁਕੁਣ੍ਡਿਕੋ ਭਵਿਤ੍ਵਾਨਾਤਿ ਚਤੂਹਿ ਅਙ੍ਗੇਹਿ ਕੁਣ੍ਡੇਤਿ ਅਤ੍ਤਭਾਵਂ ਪਵਤ੍ਤੇਤੀਤਿ ਚਤੁਕੁਣ੍ਡਿਕੋ, ਦ੍ਵੀਹਿ ਜਾਣੂਹਿ ਦ੍ਵੀਹਿ ਹਤ੍ਥੇਹਿ ਗਚ੍ਛਨ੍ਤੋ ਤਿਟ੍ਠਨ੍ਤੋ ਚ, ਏਵਂਭੂਤੋ ਹੁਤ੍ਵਾਤਿ ਅਤ੍ਥੋ. ਸੋ ਹਿ ਏਵਂ ਪੁਰਤੋ ਕੋਪੀਨਪਟਿਚ੍ਛਾਦਨਾ ਹੋਤੀਤਿ ਤਥਾ ਅਕਾਸਿ. ਥੇਰਸ੍ਸ ਦਸ੍ਸਯੀਤੁਮਨ੍ਤਿ ਥੇਰਸ੍ਸ ਅਤ੍ਤਾਨਂ ਉਦ੍ਦਿਸਯਿ ਦਸ੍ਸੇਸਿ.

੪੧੨. ਅਮਨਸਿਕਤ੍ਵਾਤਿ ‘‘ਅਯਂ ਨਾਮ ਏਸੋ’’ਤਿ ਏਵਂ ਮਨਸਿ ਅਕਰਿਤ੍ਵਾ ਅਨਾਵਜ੍ਜੇਤ੍ਵਾ. ਸੋ ਚਾਤਿ ਸੋ ਪੇਤੋ. ਭਾਤਾ ਪੇਤਗਤੋ ਅਹਨ੍ਤਿ ‘‘ਅਹਂ ਅਤੀਤਤ੍ਤਭਾਵੇ ਭਾਤਾ, ਇਦਾਨਿ ਪੇਤਭੂਤੋ ਇਧਾਗਤੋ’’ਤਿ ਵਤ੍ਵਾ ਵਿਞ੍ਞਾਪਯਿ ਥੇਰਨ੍ਤਿ ਯੋਜਨਾ.

੪੧੩-੫. ਯਥਾ ਪਨ ਵਿਞ੍ਞਾਪਯਿ, ਤਂ ਦਸ੍ਸੇਤੁਂ ‘‘ਮਾਤਾ ਪਿਤਾ ਚਾ’’ਤਿਆਦਿਨਾ ਤਿਸ੍ਸੋ ਗਾਥਾ ਵੁਤ੍ਤਾ. ਤਤ੍ਥ ਮਾਤਾ ਪਿਤਾ ਚ ਤੇਤਿ ਤਵ ਮਾਤਾ ਚ ਪਿਤਾ ਚ. ਅਨੁਕਮ੍ਪਸ੍ਸੂਤਿ ਅਨੁਗ੍ਗਣ੍ਹ ਅਨੁਦਯਂ ¶ ਕਰੋਹਿ. ਅਨ੍ਵਾਦਿਸਾਹੀਤਿ ਆਦਿਸ. ਨੋਤਿ ਅਮ੍ਹਾਕਂ. ਤਵ ਦਿਨ੍ਨੇਨਾਤਿ ਤਯਾ ਦਿਨ੍ਨੇਨ.

ਤਂ ¶ ਸੁਤ੍ਵਾ ਥੇਰੋ ਯਥਾ ਪਟਿਪਜ੍ਜਿ, ਤਂ ਦਸ੍ਸੇਤੁਂ –

‘‘ਥੇਰੋ ਚਰਿਤ੍ਵਾ ਪਿਣ੍ਡਾਯ, ਭਿਕ੍ਖੂ ਅਞ੍ਞੇ ਚ ਦ੍ਵਾਦਸ;

ਏਕਜ੍ਝਂ ਸਨ੍ਨਿਪਤਿਂਸੁ, ਭਤ੍ਤਵਿਸ੍ਸਗ੍ਗਕਾਰਣਾ.

‘‘ਥੇਰੋ ਸਬ੍ਬੇਵ ਤੇ ਆਹ, ਯਥਾਲਦ੍ਧਂ ਦਦਾਥ ਮੇ;

ਸਙ੍ਘਭਤ੍ਤਂ ਕਰਿਸ੍ਸਾਮਿ, ਅਨੁਕਮ੍ਪਾਯ ਞਾਤਿਨਂ.

‘‘ਨਿਯ੍ਯਾਦਯਿਂਸੁ ¶ ਥੇਰਸ੍ਸ, ਥੇਰੋ ਸਙ੍ਘਂ ਨਿਮਨ੍ਤਯਿ;

ਦਤ੍ਵਾ ਅਨ੍ਵਾਦਿਸਿ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਭੋਜਨਂ ਉਦਪਜ੍ਜਥ;

ਸੁਚਿਂ ਪਣੀਤਂ ਸਮ੍ਪਨ੍ਨਂ, ਅਨੇਕਰਸਬ੍ਯਞ੍ਜਨਂ.

‘‘ਤਤੋ ਉਦ੍ਦਸ੍ਸਯੀ ਭਾਤਾ, ਵਣ੍ਣਵਾ ਬਲਵਾ ਸੁਖੀ;

ਪਹੂਤਂ ਭੋਜਨਂ ਭਨ੍ਤੇ, ਪਸ੍ਸ ਨਗ੍ਗਾਮ੍ਹਸੇ ਮਯਂ;

ਤਥਾ ਭਨ੍ਤੇ ਪਰਕ੍ਕਮ, ਯਥਾ ਵਤ੍ਥਂ ਲਭਾਮਸੇ.

‘‘ਥੇਰੋ ਸਙ੍ਕਾਰਕੂਟਮ੍ਹਾ, ਉਚ੍ਚਿਨਿਤ੍ਵਾਨ ਨਨ੍ਤਕੇ;

ਪਿਲੋਤਿਕਂ ਪਟਂ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ.

‘‘ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਤ੍ਥਾਨਿ ਉਦਪਜ੍ਜਿਸੁਂ;

ਤਤੋ ਸੁਵਤ੍ਥਵਸਨੋ, ਥੇਰਸ੍ਸ ਦਸ੍ਸਯੀਤੁਮਂ.

‘‘ਯਾਵਤਾ ¶ ਨਨ੍ਦਰਾਜਸ੍ਸ, ਵਿਜਿਤਸ੍ਮਿਂ ਪਟਿਚ੍ਛਦਾ;

ਤਤੋ ਬਹੁਤਰਾ ਭਨ੍ਤੇ, ਵਤ੍ਥਾਨਚ੍ਛਾਦਨਾਨਿ ਨੋ.

‘‘ਕੋਸੇਯ੍ਯਕਮ੍ਬਲੀਯਾਨਿ, ਖੋਮਕਪ੍ਪਾਸਿਕਾਨਿ ਚ;

ਵਿਪੁਲਾ ਚ ਮਹਗ੍ਘਾ ਚ, ਤੇਪਾਕਾਸੇਵਲਮ੍ਬਰੇ.

‘‘ਤੇ ¶ ਮਯਂ ਪਰਿਦਹਾਮ, ਯਂ ਯਞ੍ਹਿ ਮਨਸੋ ਪਿਯਂ;

ਤਥਾ ਭਨ੍ਤੇ ਪਰਕ੍ਕਮ, ਯਥਾ ਗੇਹਂ ਲਭਾਮਸੇ.

‘‘ਥੇਰੋ ¶ ਪਣ੍ਣਕੁਟਿਂ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਦਤ੍ਵਾ ਚ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਘਰਾਨਿ ਉਦਪਜ੍ਜਿਸੁਂ;

ਕੂਟਾਗਾਰਨਿਵੇਸਨਾ, ਵਿਭਤ੍ਤਾ ਭਾਗਸੋ ਮਿਤਾ.

‘‘ਨ ਮਨੁਸ੍ਸੇਸੁ ਈਦਿਸਾ, ਯਾਦਿਸਾ ਨੋ ਘਰਾ ਇਧ;

ਅਪਿ ਦਿਬ੍ਬੇਸੁ ਯਾਦਿਸਾ, ਤਾਦਿਸਾ ਨੋ ਘਰਾ ਇਧ.

‘‘ਦਦ੍ਦਲ੍ਲਮਾਨਾ ਆਭੇਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ;

ਤਥਾ ਭਨ੍ਤੇ ਪਰਕ੍ਕਮ, ਯਥਾ ਪਾਨੀਯਂ ਲਭਾਮਸੇ.

‘‘ਥੇਰੋ ਕਰਣਂ ਪੂਰੇਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਪਾਨੀਯਂ ਉਦਪਜ੍ਜਥ;

ਗਮ੍ਭੀਰਾ ਚਤੁਰਸ੍ਸਾ ਚ, ਪੋਕ੍ਖਰਞ੍ਞੋ ਸੁਨਿਮ੍ਮਿਤਾ.

‘‘ਸੀਤੋਦਿਕਾ ¶ ਸੁਪ੍ਪਤਿਤ੍ਥਾ, ਸੀਤਾ ਅਪ੍ਪਟਿਗਨ੍ਧਿਯਾ;

ਪਦੁਮੁਪ੍ਪਲਸਞ੍ਛਨ੍ਨਾ, ਵਾਰਿਕਿਞ੍ਜਕ੍ਖਪੂਰਿਤਾ.

‘‘ਤਤ੍ਥ ਨ੍ਹਤ੍ਵਾ ਪਿਵਿਤ੍ਵਾ ਚ, ਥੇਰਸ੍ਸ ਪਟਿਦਸ੍ਸਯੁਂ;

ਪਹੂਤਂ ਪਾਨੀਯਂ ਭਨ੍ਤੇ, ਪਾਦਾ ਦੁਕ੍ਖਾ ਫਲਨ੍ਤਿ ਨੋ.

‘‘ਆਹਿਣ੍ਡਮਾਨਾ ਖਞ੍ਜਾਮ, ਸਕ੍ਖਰੇ ਕੁਸਕਣ੍ਟਕੇ;

ਤਥਾ ਭਨ੍ਤੇ ਪਰਕ੍ਕਮ, ਯਥਾ ਯਾਨਂ ਲਭਾਮਸੇ.

‘‘ਥੇਰੋ ਸਿਪਾਟਿਕਂ ਲਦ੍ਧਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

‘‘ਸਮਨਨ੍ਤਰਾਨੁਦ੍ਦਿਟ੍ਠੇ ¶ , ਪੇਤਾ ਰਥੇਨ ਮਾਗਮੁਂ;

ਅਨੁਕਮ੍ਪਿਤਮ੍ਹ ਭਦਨ੍ਤੇ, ਭਤ੍ਤੇਨਚ੍ਛਾਦਨੇਨ ਚ.

‘‘ਘਰੇਨ ¶ ਪਾਨੀਯਦਾਨੇਨ, ਯਾਨਦਾਨੇਨ ਚੂਭਯਂ;

ਮੁਨਿਂ ਕਾਰੁਣਿਕਂ ਲੋਕੇ, ਭਨ੍ਤੇ ਵਨ੍ਦਿਤੁਮਾਗਤਾ’’ਤਿ. – ਗਾਥਾਯੋ ਆਹਂਸੁ;

੪੧੬-੭. ਤਤ੍ਥ ਥੇਰੋ ਚਰਿਤ੍ਵਾ ਪਿਣ੍ਡਾਯਾਤਿ ਥੇਰੋ ਪਿਣ੍ਡਾਪਾਤਚਾਰਿਕਾਯ ਚਰਿਤ੍ਵਾ. ਭਿਕ੍ਖੂ ਅਞ੍ਞੇ ਚ ਦ੍ਵਾਦਸਾਤਿ ਥੇਰੇਨ ਸਹ ਵਸਨ੍ਤਾ ਅਞ੍ਞੇ ਚ ਦ੍ਵਾਦਸ ਭਿਕ੍ਖੂ ਏਕਜ੍ਝਂ ਏਕਤੋ ਸਨ੍ਨਿਪਤਿਂਸੁ. ਕਸ੍ਮਾਤਿ ਚੇ? ਭਤ੍ਤਵਿਸ੍ਸਗ੍ਗਕਾਰਣਾਤਿ ਭਤ੍ਤਕਿਚ੍ਚਕਾਰਣਾ ਭੁਞ੍ਜਨਨਿਮਿਤ੍ਤਂ. ਤੇਤਿ ਤੇ ਭਿਕ੍ਖੂ. ਯਥਾਲਦ੍ਧਨ੍ਤਿ ਯਂ ਯਂ ਲਦ੍ਧਂ. ਦਦਾਥਾਤਿ ਦੇਥ.

੪੧੮. ਨਿਯ੍ਯਾਦਯਿਂਸੂਤਿ ਅਦਂਸੁ. ਸਙ੍ਘਂ ਨਿਮਨ੍ਤਯੀਤਿ ਤੇ ਏਵ ਦ੍ਵਾਦਸ ਭਿਕ੍ਖੂ ਸਙ੍ਘੁਦ੍ਦੇਸਵਸੇਨ ਤਂ ਭਤ੍ਤਂ ਦਾਤੁਂ ਨਿਮਨ੍ਤੇਸਿ. ਅਨ੍ਵਾਦਿਸੀਤਿ ਆਦਿਸਿ. ਤਤ੍ਥ ਯੇਸਂ ਅਨ੍ਵਾਦਿਸਿ, ਤੇ ਦਸ੍ਸੇਤੁਂ ‘‘ਮਾਤੁ ਪਿਤੁ ਚ ਭਾਤੁਨੋ, ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’’ਤਿ ਵੁਤ੍ਤਂ.

੪੧੯. ਸਮਨਨ੍ਤਰਾਨੁਦ੍ਦਿਟ੍ਠੇਤਿ ਉਦ੍ਦਿਟ੍ਠਸਮਨਨ੍ਤਰਮੇਵ. ਭੋਜਨਂ ਉਦਪਜ੍ਜਥਾਤਿ ਤੇਸਂ ਪੇਤਾਨਂ ਭੋਜਨਂ ¶ ਉਪ੍ਪਜ੍ਜਿ. ਕੀਦਿਸਨ੍ਤਿ ਆਹ ‘‘ਸੁਚਿ’’ਨ੍ਤਿਆਦਿ. ਤਤ੍ਥ ਅਨੇਕਰਸਬ੍ਯਞ੍ਜਨਨ੍ਤਿ ਨਾਨਾਰਸੇਹਿ ਬ੍ਯਞ੍ਜਨੇਹਿ ਯੁਤ੍ਤਂ, ਅਥ ਵਾ ਅਨੇਕਰਸਂ ਅਨੇਕਬ੍ਯਞ੍ਜਨਞ੍ਚ. ਤਤੋਤਿ ਭੋਜਨਲਾਭਤੋ ਪਚ੍ਛਾ.

੪੨੦. ਉਦ੍ਦਸ੍ਸਯੀ ਭਾਤਾਤਿ ਭਾਤਿਕਭੂਤੋ ਪੇਤੋ ਥੇਰਸ੍ਸ ਅਤ੍ਤਾਨਂ ਦਸ੍ਸੇਸਿ. ਵਣ੍ਣਵਾ ਬਲਵਾ ਸੁਖੀਤਿ ਤੇਨ ਭੋਜਨਲਾਭੇਨ ਤਾਵਦੇਵ ਰੂਪਸਮ੍ਪਨ੍ਨੋ ਬਲਸਮ੍ਪਨ੍ਨੋ ਸੁਖਿਤੋਵ ਹੁਤ੍ਵਾ. ਪਹੂਤਂ ਭੋਜਨਂ, ਭਨ੍ਤੇਤਿ, ਭਨ੍ਤੇ, ਤਵ ਦਾਨਾਨੁਭਾਵੇਨ ਪਹੂਤਂ ਅਨਪ੍ਪਕਂ ਭੋਜਨਂ ਅਮ੍ਹੇਹਿ ਲਦ੍ਧਂ. ਪਸ੍ਸ ਨਗ੍ਗਾਮ੍ਹਸੇਤਿ ਓਲੋਕੇਹਿ, ਨਗ੍ਗਿਕਾ ਪਨ ਅਮ੍ਹ, ਤਸ੍ਮਾ ਤਥਾ, ਭਨ੍ਤੇ, ਪਰਕ੍ਕਮ ਪਯੋਗਂ ਕਰੋਹਿ. ਯਥਾ ਵਤ੍ਥਂ ਲਭਾਮਸੇਤਿ ਯੇਨ ਪਕਾਰੇਨ ਯਾਦਿਸੇਨ ਪਯੋਗੇਨ ¶ ਸਬ੍ਬੇਵ ਮਯਂ ਵਤ੍ਥਾਨਿ ਲਭੇਯ੍ਯਾਮ, ਤਥਾ ਵਾਯਮਥਾਤਿ ਅਤ੍ਥੋ.

੪੨੧. ਸਙ੍ਕਾਰਕੂਟਮ੍ਹਾਤਿ ਤਤ੍ਥ ਤਤ੍ਥ ਸਙ੍ਕਾਰਟ੍ਠਾਨਤੋ. ਉਚ੍ਚਿਨਿਤ੍ਵਾਨਾਤਿ ਗਵੇਸਨਵਸੇਨ ਗਹੇਤ੍ਵਾ. ਨਨ੍ਤਕੇਤਿ ਛਿਨ੍ਨਪਰਿਯਨ੍ਤੇ ਛਡ੍ਡਿਤਦੁਸ੍ਸਖਣ੍ਡੇ ¶ . ਤੇ ਪਨ ਯਸ੍ਮਾ ਖਣ੍ਡਭੂਤਾ ਪਿਲੋਤਿਕਾ ਨਾਮ ਹੋਨ੍ਤਿ, ਤਾਹਿ ਚ ਥੇਰੋ ਚੀਵਰਂ ਕਤ੍ਵਾ ਸਙ੍ਘਸ੍ਸ ਅਦਾਸਿ, ਤਸ੍ਮਾ ਆਹ ‘‘ਪਿਲੋਤਿਕਂ ਪਟਂ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ’’ਤਿ. ਤਤ੍ਥ ਸਙ੍ਘੇ ਚਾਤੁਦ੍ਦਿਸੇ ਅਦਾਤਿ ਚਤੂਹਿਪਿ ਦਿਸਾਹਿ ਆਗਤਭਿਕ੍ਖੁਸਙ੍ਘਸ੍ਸ ਅਦਾਸਿ. ਸਮ੍ਪਦਾਨਤ੍ਥੇ ਹਿ ਇਦਂ ਭੁਮ੍ਮਵਚਨਂ.

੪੨੩-੪. ਸੁਵਤ੍ਥਵਸਨੋਤਿ ਸੁਨ੍ਦਰਵਤ੍ਥਵਸਨੋ. ਥੇਰਸ੍ਸ ਦਸ੍ਸਯੀਤੁਮਨ੍ਤਿ ਥੇਰਸ੍ਸ ਅਤ੍ਤਾਨਂ ਦਸ੍ਸਯਿ ਦਸ੍ਸੇਸਿ, ਪਾਕਟੋ ਅਹੋਸਿ. ਪਟਿਚ੍ਛਾਦਯਤਿ ਏਤ੍ਥਾਤਿ ਪਟਿਚ੍ਛਦਾ.

੪੨੮-੯. ਕੂਟਾਗਾਰਨਿਵੇਸਨਾਤਿ ਕੂਟਾਗਾਰਭੂਤਾ ਤਦਞ੍ਞਨਿਵੇਸਨਸਙ੍ਖਾਤਾ ਚ ਘਰਾ. ਲਿਙ੍ਗਵਿਪਲ੍ਲਾਸਵਸੇਨ ਹੇਤਂ ਵੁਤ੍ਤਂ. ਵਿਭਤ੍ਤਾਤਿ ਸਮਚਤੁਰਸ੍ਸਆਯਤਵਟ੍ਟਸਣ੍ਠਾਨਾਦਿਵਸੇਨ ਵਿਭਤ੍ਤਾ. ਭਾਗਸੋ ਮਿਤਾਤਿ ਭਾਗੇਨ ਪਰਿਚ੍ਛਿਨ੍ਨਾ. ਨੋਤਿ ਅਮ੍ਹਾਕਂ. ਇਧਾਤਿ ਇਮਸ੍ਮਿਂ ਪੇਤਲੋਕੇ. ਅਪਿ ਦਿਬ੍ਬੇਸੂਤਿ ਅਪੀਤਿ ਨਿਪਾਤਮਤ੍ਤਂ, ਦੇਵਲੋਕੇਸੂਤਿ ਅਤ੍ਥੋ.

੪੩੧. ਕਰਣਨ੍ਤਿ ਧਮਕਰਣਂ. ਪੂਰੇਤ੍ਵਾਤਿ ਉਦਕਸ੍ਸ ਪੂਰੇਤ੍ਵਾ. ਵਾਰਿਕਿਞ੍ਜਕ੍ਖਪੂਰਿਤਾਤਿ ਤਤ੍ਥ ਤਤ੍ਥ ਵਾਰਿਮਤ੍ਥਕੇ ਪਦੁਮੁਪ੍ਪਲਾਦੀਨਂ ਕੇਸਰਭਾਰੇਹਿ ਸਞ੍ਛਾਦਿਤਵਸੇਨ ਪੂਰਿਤਾ. ਫਲਨ੍ਤੀਤਿ ਪੁਪ੍ਫਨ੍ਤਿ, ਪਣ੍ਹਿਕਪਰਿਯਨ੍ਤਾਦੀਸੁ ਵਿਦਾਲੇਨ੍ਤੀਤਿ ਅਤ੍ਥੋ.

੪੩੫-੬. ਆਹਿਣ੍ਡਮਾਨਾਤਿ ਵਿਚਰਮਾਨਾ. ਖਞ੍ਜਾਮਾਤਿ ਖਞ੍ਜਨਵਸੇਨ ¶ ਗਚ੍ਛਾਮ. ਸਕ੍ਖਰੇ ਕੁਸਕਣ੍ਟਕੇਤਿ ¶ ਸਕ੍ਖਰਵਤਿ ਕੁਸਕਣ੍ਟਕਵਤਿ ਚ ਭੂਮਿਭਾਗੇ, ਸਕ੍ਖਰੇ ਕੁਸਕਣ੍ਟਕੇ ਚ ਅਕ੍ਕਮਨ੍ਤਾਤਿ ਅਤ੍ਥੋ. ਯਾਨਨ੍ਤਿ ਰਥਵਯ੍ਹਾਦਿਕਂ ਯਂਕਿਞ੍ਚਿ ਯਾਨਂ. ਸਿਪਾਟਿਕਨ੍ਤਿ ਏਕਪਟਲਉਪਾਹਨਂ.

੪੩੭-੮. ਰਥੇਨ ਮਾਗਮੁਨ੍ਤਿ ਮਕਾਰੋ ਪਦਸਨ੍ਧਿਕਰੋ, ਰਥੇਨ ਆਗਮਂਸੁ. ਉਭਯਨ੍ਤਿ ਉਭਯੇਨ ਦਾਨੇਨ, ਯਾਨਦਾਨੇਨ ਚੇਵ ਭਤ੍ਤਾਦਿਚਤੁਪਚ੍ਚਯਦਾਨੇਨ ਚ. ਪਾਨੀਯਦਾਨੇਨ ਹੇਤ੍ਥ ਭੇਸਜ੍ਜਦਾਨਮ੍ਪਿ ਸਙ੍ਗਹਿਤਂ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵਾਤਿ.

ਥੇਰੋ ¶ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ‘‘ਯਥਾ ਇਮੇ ਏਤਰਹਿ, ਏਵਂ ਤ੍ਵਮ੍ਪਿ ਇਤੋ ਅਨਨ੍ਤਰਾਤੀਤੇ ਅਤ੍ਤਭਾਵੇ ਪੇਤੋ ਹੁਤ੍ਵਾ ਮਹਾਦੁਕ੍ਖਂ ਅਨੁਭਵੀ’’ਤਿ ਵਤ੍ਵਾ ਥੇਰੇਨ ਯਾਚਿਤੋ ਸੁਤ੍ਤਪੇਤਵਤ੍ਥੁਂ ਕਥੇਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਮਹਾਜਨੋ ਸਞ੍ਜਾਤਸਂਵੇਗੋ ਦਾਨਸੀਲਾਦਿਪੁਞ੍ਞਕਮ੍ਮਨਿਰਤੋ ਅਹੋਸੀਤਿ.

ਸਾਣਵਾਸਿਤ੍ਥੇਰਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਵੇਲ਼ੁਰਿਯਥਮ੍ਭਂ ਰੁਚਿਰਂ ਪਭਸ੍ਸਰਨ੍ਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਅਞ੍ਞਤਰਂ ਪੇਤਿਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਕਸ੍ਸਪਸ੍ਸ ਭਗਵਤੋ ਕਾਲੇ ਅਞ੍ਞਤਰਾ ਇਤ੍ਥੀ ਸੀਲਾਚਾਰਸਮ੍ਪਨ੍ਨਾ ਕਲ੍ਯਾਣਮਿਤ੍ਤਸਨ੍ਨਿਸ੍ਸਯੇਨ ਸਾਸਨੇ ਅਭਿਪ੍ਪਸਨ੍ਨਾ ਸੁਵਿਭਤ੍ਤਵਿਚਿਤ੍ਰਭਿਤ੍ਤਿਥਮ੍ਭਸੋਪਾਨਭੂਮਿਤਲਂ ਅਤਿਵਿਯ ਦਸ੍ਸਨੀਯਂ ਏਕਂ ਆਵਾਸਂ ਕਤ੍ਵਾ ਤਤ੍ਥ ਭਿਕ੍ਖੂ ਨਿਸੀਦਾਪੇਤ੍ਵਾ ਪਣੀਤੇਨ ਆਹਾਰੇਨ ਪਰਿਵਿਸਿਤ੍ਵਾ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦੇਸਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਅਞ੍ਞਸ੍ਸ ਪਾਪਕਮ੍ਮਸ੍ਸ ਵਸੇਨ ਹਿਮਵਤਿ ਪਬ੍ਬਤਰਾਜੇ ਰਥਕਾਰਦਹਂ ਨਿਸ੍ਸਾਯ ਵਿਮਾਨਪੇਤੀ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾ ਸਙ੍ਘਸ੍ਸ ਆਵਾਸਦਾਨਪੁਞ੍ਞਾਨੁਭਾਵੇਨ ਸਬ੍ਬਰਤਨਮਯਂ ਉਲ਼ਾਰਂ ਅਤਿਵਿਯ ਸਮਨ੍ਤਤੋ ਪਾਸਾਦਿਕਂ ਮਨੋਹਰਂ ਰਮਣੀਯਂ ਪੋਕ੍ਖਰਣਿਯਂ ¶ ਨਨ੍ਦਨਵਨਸਦਿਸਂ ਉਪਸੋਭਿਤਂ ਵਿਮਾਨਂ ਨਿਬ੍ਬਤ੍ਤਿ, ਸਯਞ੍ਚ ਸੁਵਣ੍ਣਵਣ੍ਣਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਅਹੋਸਿ.

ਸਾ ਤਤ੍ਥ ਪੁਰਿਸੇਹਿ ਵਿਨਾਵ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਵਿਹਰਤਿ. ਤਸ੍ਸਾ ਤਤ੍ਥ ਦੀਘਰਤ੍ਤਂ ਨਿਪ੍ਪੁਰਿਸਾਯ ਵਸਨ੍ਤਿਯਾ ਅਨਭਿਰਤਿ ਉਪ੍ਪਨ੍ਨਾ. ਸਾ ਉਕ੍ਕਣ੍ਠਿਤਾ ਹੁਤ੍ਵਾ ‘‘ਅਤ੍ਥੇਸੋ ਉਪਾਯੋ’’ਤਿ ਚਿਨ੍ਤੇਤ੍ਵਾ ਦਿਬ੍ਬਾਨਿ ਅਮ੍ਬਪਕ੍ਕਾਨਿ ਨਦਿਯਂ ਪਕ੍ਖਿਪਤਿ. ਸਬ੍ਬਂ ਕਣ੍ਣਮੁਣ੍ਡਪੇਤਿਵਤ੍ਥੁਸ੍ਮਿਂ ਆਗਤਨਯੇਨੇਵ ਵੇਦਿਤਬ੍ਬਂ. ਇਧ ਪਨ ਬਾਰਾਣਸਿਵਾਸੀ ਏਕੋ ਮਾਣਵੋ ਗਙ੍ਗਾਯ ਤੇਸੁ ਏਕਂ ਅਮ੍ਬਫਲਂ ਦਿਸ੍ਵਾ ¶ ਤਸ੍ਸ ਪਭਵਂ ਗਵੇਸਨ੍ਤੋ ਅਨੁਕ੍ਕਮੇਨ ਤਂ ਠਾਨਂ ਗਨ੍ਤ੍ਵਾ ਨਦਿਂ ਦਿਸ੍ਵਾ ਤਦਨੁਸਾਰੇਨ ਤਸ੍ਸਾ ਵਸਨਟ੍ਠਾਨਂ ਗਤੋ. ਸਾ ਤਂ ਦਿਸ੍ਵਾ ਅਤ੍ਤਨੋ ਵਸਨਟ੍ਠਾਨਂ ¶ ਨੇਤ੍ਵਾ ਪਟਿਸਨ੍ਥਾਰਂ ਕਰੋਨ੍ਤੀ ਨਿਸੀਦਿ. ਸੋ ਤਸ੍ਸਾ ਵਸਨਟ੍ਠਾਨਸਮ੍ਪਤ੍ਤਿਂ ਦਿਸ੍ਵਾ ਪੁਚ੍ਛਨ੍ਤੋ –

‘‘ਵੇਲ਼ੁਰਿਯਥਮ੍ਭਂ ਰੁਚਿਰਂ ਪਭਸ੍ਸਰਂ, ਵਿਮਾਨਮਾਰੁਯ੍ਹ ਅਨੇਕਚਿਤ੍ਤਂ;

ਤਤ੍ਥਚ੍ਛਸਿ ਦੇਵਿ ਮਹਾਨੁਭਾਵੇ, ਪਥਦ੍ਧਨਿ ਪਨ੍ਨਰਸੇਵ ਚਨ੍ਦੋ.

‘‘ਵਣ੍ਣੋ ਚ ਤੇ ਕਨਕਸ੍ਸ ਸਨ੍ਨਿਭੋ, ਉਤ੍ਤਤ੍ਤਰੂਪੋ ਭੁਸ ਦਸ੍ਸਨੇਯ੍ਯੋ;

ਪਲ੍ਲਙ੍ਕਸੇਟ੍ਠੇ ਅਤੁਲੇ ਨਿਸਿਨ੍ਨਾ, ਏਕਾ ਤੁਵਂ ਨਤ੍ਥਿ ਚ ਤੁਯ੍ਹ ਸਾਮਿਕੋ.

‘‘ਇਮਾ ਚ ਤੇ ਪੋਕ੍ਖਰਣੀ ਸਮਨ੍ਤਾ, ਪਹੂਤਮਲ੍ਯਾ ਬਹੁਪੁਣ੍ਡਰੀਕਾ;

ਸੁਵਣ੍ਣਚੁਣ੍ਣੇਹਿ ਸਮਨ੍ਤਮੋਤ੍ਥਤਾ, ਨ ਤਤ੍ਥ ਪਙ੍ਕੋ ਪਣਕੋ ਚ ਵਿਜ੍ਜਤਿ.

‘‘ਹਂਸਾ ਚਿਮੇ ਦਸ੍ਸਨੀਯਾ ਮਨੋਰਮਾ, ਉਦਕਸ੍ਮਿਮਨੁਪਰਿਯਨ੍ਤਿ ¶ ਸਬ੍ਬਦਾ;

ਸਮਯ੍ਯ ਵਗ੍ਗੂਪਨਦਨ੍ਤਿ ਸਬ੍ਬੇ, ਬਿਨ੍ਦੁਸ੍ਸਰਾ ਦੁਨ੍ਦੁਭੀਨਂਵ ਘੋਸੋ.

‘‘ਦਦ੍ਦਲ੍ਲਮਾਨਾ ਯਸਸਾ ਯਸਸ੍ਸਿਨੀ, ਨਾਵਾਯ ਚ ਤ੍ਵਂ ਅਵਲਮ੍ਬ ਤਿਟ੍ਠਸਿ;

ਆਲ਼ਾਰਪਮ੍ਹੇ ਹਸਿਤੇ ਪਿਯਂਵਦੇ, ਸਬ੍ਬਙ੍ਗਕਲ੍ਯਾਣਿ ਭੁਸਂ ਵਿਰੋਚਸਿ.

‘‘ਇਦਂ ਵਿਮਾਨਂ ਵਿਰਜਂ ਸਮੇ ਠਿਤਂ, ਉਯ੍ਯਾਨਵਨ੍ਤਂ ਰਤਿਨਨ੍ਦਿਵਡ੍ਢਨਂ;

ਇਚ੍ਛਾਮਹਂ ਨਾਰਿ ਅਨੋਮਦਸ੍ਸਨੇ, ਤਯਾ ਸਹ ਨਨ੍ਦਨੇ ਇਧ ਮੋਦਿਤੁ’’ਨ੍ਤਿ. –

੪੩੯. ਤਤ੍ਥ ¶ ਤਤ੍ਥਾਤਿ ਤਸ੍ਮਿਂ ਵਿਮਾਨੇ. ਅਚ੍ਛਸੀਤਿ ਇਚ੍ਛਿਤਿਚ੍ਛਿਤਕਾਲੇ ਨਿਸੀਦਸਿ. ਦੇਵੀਤਿ ਤਂ ਆਲਪਤਿ. ਮਹਾਨੁਭਾਵੇਤਿ ਮਹਤਾ ਦਿਬ੍ਬਾਨੁਭਾਵੇਨ ਸਮਨ੍ਨਾਗਤੇ. ਪਥਦ੍ਧਨੀਤਿ ਅਤ੍ਤਨੋ ਪਥਭੂਤੇ ਅਦ੍ਧਨਿ, ਗਗਨਤਲਮਗ੍ਗੇਤਿ ਅਤ੍ਥੋ. ਪਨ੍ਨਰਸੇਵ ਚਨ੍ਦੋਤਿ ਪੁਣ੍ਣਮਾਸਿਯਂ ਪਰਿਪੁਣ੍ਣਮਣ੍ਡਲੋ ਚਨ੍ਦੋ ਵਿਯ ਵਿਜ੍ਜੋਤਮਾਨਾਤਿ ਅਤ੍ਥੋ.

੪੪੦. ਵਣ੍ਣੋ ¶ ਚ ਤੇ ਕਨਕਸ੍ਸ ਸਨ੍ਨਿਭੋਤਿ ਤਵ ਵਣ੍ਣੋ ਚ ਉਤ੍ਤਤ੍ਤਸਿਙ੍ਗੀਸੁਵਣ੍ਣੇਨ ਸਦਿਸੋ ਅਤਿਵਿਯ ਮਨੋਹਰੋ. ਤੇਨਾਹ ‘‘ਉਤ੍ਤਤ੍ਤਰੂਪੋ ਭੁਸ ਦਸ੍ਸਨੇਯ੍ਯੋ’’ਤਿ. ਅਤੁਲੇਤਿ ਮਹਾਰਹੇ. ਅਤੁਲੇਤਿ ਵਾ ਦੇਵਤਾਯ ਆਲਪਨਂ, ਅਸਦਿਸਰੂਪੇਤਿ ਅਤ੍ਥੋ. ਨਤ੍ਥਿ ਚ ਤੁਯ੍ਹ ਸਾਮਿਕੋਤਿ ਤੁਯ੍ਹਂ ਸਾਮਿਕੋ ਚ ਨਤ੍ਥਿ.

੪੪੧. ਪਹੂਤਮਲ੍ਯਾਤਿ ਕਮਲਕੁਵਲਯਾਦਿਬਹੁਵਿਧਕੁਸੁਮਵਤਿਯੋ ¶ . ਸੁਵਣ੍ਣਚੁਣ੍ਣੇਹੀਤਿ ਸੁਵਣ੍ਣਵਾਲੁਕਾਹਿ. ਸਮਨ੍ਤਮੋਤ੍ਥਤਾਤਿ ਸਮਨ੍ਤਤੋ ਓਕਿਣ੍ਣਾ. ਤਤ੍ਥਾਤਿ ਤਾਸੁ ਪੋਕ੍ਖਰਣੀਸੁ. ਪਙ੍ਕੋ ਪਣਕੋ ਚਾਤਿ ਕਦ੍ਦਮੋ ਵਾ ਉਦਕਪਿਚ੍ਛਿਲ੍ਲੋ ਵਾ ਨ ਵਿਜ੍ਜਤਿ.

੪੪੨. ਹਂਸਾ ਚਿਮੇ ਦਸ੍ਸਨੀਯਾ ਮਨੋਰਮਾਤਿ ਇਮੇ ਹਂਸਾ ਚ ਦਸ੍ਸਨਸੁਖਾ ਮਨੋਰਮਾ ਚ. ਅਨੁਪਰਿਯਨ੍ਤੀਤਿ ਅਨੁਵਿਚਰਨ੍ਤਿ. ਸਬ੍ਬਦਾਤਿ ਸਬ੍ਬੇਸੁ ਉਤੂਸੁ. ਸਮਯ੍ਯਾਤਿ ਸਙ੍ਗਮ੍ਮ. ਵਗ੍ਗੂਤਿ ਮਧੁਰਂ. ਉਪਨਦਨ੍ਤੀਤਿ ਵਿਕੂਜਨ੍ਤਿ. ਬਿਨ੍ਦੁਸ੍ਸਰਾਤਿ ਅਵਿਸਟਸ੍ਸਰਾ ਸਮ੍ਪਿਣ੍ਡਿਤਸ੍ਸਰਾ. ਦੁਨ੍ਦੁਭੀਨਂਵ ਘੋਸੋਤਿ ਵਗ੍ਗੁਬਿਨ੍ਦੁਸ੍ਸਰਭਾਵੇਨ ਦੁਨ੍ਦੁਭੀਨਂ ਵਿਯ ਤਵ ਪੋਕ੍ਖਰਣਿਯਂ ਹਂਸਾਨਂ ਘੋਸੋਤਿ ਅਤ੍ਥੋ.

੪੪੩. ਦਦ੍ਦਲ੍ਲਮਾਨਾਤਿ ਅਤਿਵਿਯ ਅਭਿਜਲਨ੍ਤੀ. ਯਸਸਾਤਿ ਦੇਵਿਦ੍ਧਿਯਾ. ਨਾਵਾਯਾਤਿ ਦੋਣਿਯਂ. ਪੋਕ੍ਖਰਣਿਯਞ੍ਹਿ ਪਦੁਮਿਨਿਯਂ ਸੁਵਣ੍ਣਨਾਵਾਯ ਮਹਾਰਹੇ ਪਲ੍ਲਙ੍ਕੇ ਨਿਸੀਦਿਤ੍ਵਾ ਉਦਕਕੀਲ਼ਂ ਕੀਲ਼ਨ੍ਤਿਂ ਪੇਤਿਂ ਦਿਸ੍ਵਾ ਏਵਮਾਹ. ਅਵਲਮ੍ਬਾਤਿ ਅਵਲਮ੍ਬਿਤ੍ਵਾ ਅਪਸ੍ਸੇਨਂ ਅਪਸ੍ਸਾਯ. ਤਿਟ੍ਠਸੀਤਿ ਇਦਂ ਠਾਨਸਦ੍ਦਸ੍ਸ ਗਤਿਨਿਵਤ੍ਤਿ ਅਤ੍ਥਤ੍ਤਾ ਗਤਿਯਾ ਪਟਿਕ੍ਖੇਪਵਚਨਂ. ‘‘ਨਿਸਜ੍ਜਸੀ’’ਤਿ ਵਾ ਪਾਠੋ, ਨਿਸੀਦਸਿਚ੍ਚੇਵਸ੍ਸ ਅਤ੍ਥੋ ਦਟ੍ਠਬ੍ਬੋ. ਆਲ਼ਾਰਪਮ੍ਹੇਤਿ ਵੇਲ੍ਲਿਤਦੀਘਨੀਲਪਖੁਮੇ. ਹਸਿਤੇਤਿ ਹਸਿਤਮਹਾਹਸਿਤਮੁਖੇ. ਪਿਯਂਵਦੇਤਿ ਪਿਯਭਾਣਿਨੀ. ਸਬ੍ਬਙ੍ਗਕਲ੍ਯਾਣੀਤਿ ਸਬ੍ਬੇਹਿ ਅਙ੍ਗੇਹਿ ਸੁਨ੍ਦਰੇ, ਸੋਭਨਸਬ੍ਬਙ੍ਗਪਚ੍ਚਙ੍ਗੀਤਿ ਅਤ੍ਥੋ. ਵਿਰੋਚਸੀਤਿ ਵਿਰਾਜੇਸਿ.

੪੪੪. ਵਿਰਜਨ੍ਤਿ ¶ ਵਿਗਤਰਜਂ ਨਿਦ੍ਦੋਸਂ. ਸਮੇ ਠਿਤਨ੍ਤਿ ਸਮੇ ਭੂਮਿਭਾਗੇ ਠਿਤਂ, ਚਤੁਰਸ੍ਸਸੋਭਿਤਤਾਯ ਵਾ ਸਮਭਾਗੇ ਠਿਤਂ, ਸਮਨ੍ਤਭਦ੍ਦਕਨ੍ਤਿ ਅਤ੍ਥੋ. ਉਯ੍ਯਾਨਵਨ੍ਤਨ੍ਤਿ ਨਨ੍ਦਨਵਨਸਹਿਤਂ. ਰਤਿਨਨ੍ਦਿਵਡ੍ਢਨਨ੍ਤਿ ਰਤਿਞ੍ਚ ¶ ਨਨ੍ਦਿਞ੍ਚ ਵਡ੍ਢੇਤੀਤਿ ਰਤਿਨਨ੍ਦਿਵਡ੍ਢਨਂ, ਸੁਖਸ੍ਸ ਚ ਪੀਤਿਯਾ ਚ ਸਂਵਡ੍ਢਨਨ੍ਤਿ ਅਤ੍ਥੋ. ਨਾਰੀਤਿ ਤਸ੍ਸਾ ਆਲਪਨਂ. ਅਨੋਮਦਸ੍ਸਨੇਤਿ ਪਰਿਪੁਣ੍ਣਅਙ੍ਗਪਚ੍ਚਙ੍ਗਤਾਯ ਅਨਿਨ੍ਦਿਤਦਸ੍ਸਨੇ. ਨਨ੍ਦਨੇਤਿ ਨਨ੍ਦਨਕਰੇ. ਇਧਾਤਿ ਨਨ੍ਦਨਵਨੇ, ਵਿਮਾਨੇ ਵਾ. ਮੋਦਿਤੁਨ੍ਤਿ ਅਭਿਰਮਿਤੁਂ ਇਚ੍ਛਾਮੀਤਿ ਯੋਜਨਾ.

ਏਵਂ ¶ ਤੇਨ ਮਾਣਵੇਨ ਵੁਤ੍ਤੇ ਸਾ ਵਿਮਾਨਪੇਤਿਦੇਵਤਾ ਤਸ੍ਸ ਪਟਿਵਚਨਂ ਦੇਨ੍ਤੀ –

‘‘ਕਰੋਹਿ ਕਮ੍ਮਂ ਇਧ ਵੇਦਨੀਯਂ, ਚਿਤ੍ਤਞ੍ਚ ਤੇ ਇਧ ਨਿਹਿਤਂ ਭਵਤੁ;

ਕਤ੍ਵਾਨ ਕਮ੍ਮਂ ਇਧ ਵੇਦਨੀਯਂ, ਏਵਂ ਮਮਂ ਲਚ੍ਛਸਿ ਕਾਮਕਾਮਿਨਿ’’ਨ੍ਤਿ. –

ਗਾਥਮਾਹ. ਤਤ੍ਥ ਕਰੋਹਿ ਕਮ੍ਮਂ ਇਧ ਵੇਦਨੀਯਨ੍ਤਿ ਇਧ ਇਮਸ੍ਮਿਂ ਦਿਬ੍ਬਟ੍ਠਾਨੇ ਵਿਪਚ੍ਚਨਕਂ ਵਿਪਾਕਦਾਯਕਂ ਕੁਸਲਕਮ੍ਮਂ ਕਰੋਹਿ ਪਸਵੇਯ੍ਯਾਸਿ. ਇਧ ਨਿਹਿਤਨ੍ਤਿ ਇਧੂਪਨੀਤਂ, ‘‘ਇਧ ਨਿਨ੍ਨ’’ਨ੍ਤਿ ਵਾ ਪਾਠੋ, ਇਮਸ੍ਮਿਂ ਠਾਨੇ ਨਿਨ੍ਨਂ ਪੋਣਂ ਪਬ੍ਭਾਰਂ ਤਵ ਚਿਤ੍ਤਂ ਭਵਤੁ ਹੋਤੁ. ਮਮਨ੍ਤਿ ਮਂ. ਲਚ੍ਛਸੀਤਿ ਲਭਿਸ੍ਸਸਿ.

ਸੋ ਮਾਣਵੋ ਤਸ੍ਸਾ ਵਿਮਾਨਪੇਤਿਯਾ ਵਚਨਂ ਸੁਤ੍ਵਾ ਤਤੋ ਮਨੁਸ੍ਸਪਥਂ ਗਤੋ ਤਤ੍ਥ ਚਿਤ੍ਤਂ ਪਣਿਧਾਯ ਤਜ੍ਜਂ ਪੁਞ੍ਞਕਮ੍ਮਂ ਕਤ੍ਵਾ ਨਚਿਰਸ੍ਸੇਵ ਕਾਲਂ ਕਤ੍ਵਾ ਤਤ੍ਥ ਨਿਬ੍ਬਤ੍ਤਿ ਤਸ੍ਸਾ ਪੇਤਿਯਾ ਸਹਬ੍ਯਤਂ. ਤਮਤ੍ਥਂ ਪਕਾਸੇਨ੍ਤਾ ਸਙ੍ਗੀਤਿਕਾਰਾ –

‘‘ਸਾਧੂਤਿ ਸੋ ਤਸ੍ਸਾ ਪਟਿਸ੍ਸੁਣਿਤ੍ਵਾ,

ਉਪਪਜ੍ਜਿ ਸੋ ਮਾਣਵੋ ਤਸ੍ਸਾ ਸਹਬ੍ਯਤ’’ਨ੍ਤਿ. –

ਓਸਾਨਗਾਥਮਾਹਂਸੁ. ਤਤ੍ਥ ¶ ਸਾਧੂਤਿ ਸਮ੍ਪਟਿਚ੍ਛਨੇ ਨਿਪਾਤੋ. ਤਸ੍ਸਾਤਿ ਤਸ੍ਸਾ ਵਿਮਾਨਪੇਤਿਯਾ. ਪਟਿਸ੍ਸੁਣਿਤ੍ਵਾਤਿ ਤਸ੍ਸਾ ਵਚਨਂ ਸਮ੍ਪਟਿਚ੍ਛਿਤ੍ਵਾ. ਤਹਿਂ ਵੇਦਨੀਯਨ੍ਤਿ ¶ ਤਸ੍ਮਿਂ ਵਿਮਾਨੇ ਤਾਯ ਸਦ੍ਧਿਂ ਵੇਦਿਤਬ੍ਬਸੁਖਵਿਪਾਕਂ ਕੁਸਲਕਮ੍ਮਂ. ਸਹਬ੍ਯਤਨ੍ਤਿ ਸਹਭਾਵਂ. ਸੋ ਮਾਣਵੋ ਤਸ੍ਸਾ ਸਹਬ੍ਯਤਂ ਉਪਪਜ੍ਜੀਤਿ ਯੋਜਨਾ. ਸੇਸਂ ਉਤ੍ਤਾਨਮੇਵ.

ਏਵਂ ਤੇਸੁ ਤਤ੍ਥ ਚਿਰਕਾਲਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੇਸੁ ਪੁਰਿਸੋ ਕਮ੍ਮਸ੍ਸ ਪਰਿਕ੍ਖਯੇਨ ਕਾਲਮਕਾਸਿ, ਇਤ੍ਥੀ ਪਨ ਅਤ੍ਤਨੋ ਪੁਞ੍ਞਕਮ੍ਮਸ੍ਸ ਖੇਤ੍ਤਙ੍ਗਤਭਾਵੇਨ ਏਕਂ ਬੁਦ੍ਧਨ੍ਤਰਂ ਤਤ੍ਥ ਪਰਿਪੁਣ੍ਣਂ ਕਤ੍ਵਾ ਵਸਿ. ਅਥ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਜੇਤਵਨੇ ਵਿਹਰਨ੍ਤੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਏਕਦਿਵਸਂ ਪਬ੍ਬਤਚਾਰਿਕਂ ਚਰਮਾਨੋ ਤਂ ਵਿਮਾਨਞ੍ਚ ਵਿਮਾਨਪੇਤਿਞ੍ਚ ਦਿਸ੍ਵਾ ‘‘ਵੇਲ਼ੁਰਿਯਥਮ੍ਭਂ ਰੁਚਿਰਂ ਪਭਸ੍ਸਰ’’ਨ੍ਤਿਆਦਿਕਾਹਿ ਗਾਥਾਹਿ ਪੁਚ੍ਛਿ. ਸਾ ਚਸ੍ਸ ¶ ਆਦਿਤੋ ਪਟ੍ਠਾਯ ਸਬ੍ਬਂ ਅਤ੍ਤਨੋ ਪਵਤ੍ਤਿਂ ਆਰੋਚੇਸਿ. ਤਂ ਸੁਤ੍ਵਾ ਥੇਰੋ ਸਾਵਤ੍ਥਿਂ ਆਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਮਹਾਜਨੋ ਦਾਨਾਦਿਪੁਞ੍ਞਧਮ੍ਮਨਿਰਤੋ ਅਹੋਸੀਤਿ.

ਰਥਕਾਰਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਭੁਸਾਨਿ ਏਕੋ ਸਾਲਿਂ ਪੁਨਾਪਰੋਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਚਤ੍ਤਾਰੋ ਪੇਤੇ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਾ ਕਿਰ ਅਵਿਦੂਰੇ ਅਞ੍ਞਤਰਸ੍ਮਿਂ ਗਾਮਕੇ ਏਕੋ ਕੂਟਵਾਣਿਜੋ ਕੂਟਮਾਨਾਦੀਹਿ ਜੀਵਿਕਂ ਕਪ੍ਪੇਸਿ. ਸੋ ਸਾਲਿਪਲਾਪੇ ਗਹੇਤ੍ਵਾ ਤਮ੍ਬਮਤ੍ਤਿਕਾਯ ਪਰਿਭਾਵੇਤ੍ਵਾ ਗਰੁਤਰੇ ਕਤ੍ਵਾ ਰਤ੍ਤਸਾਲਿਹਿ ਸਦ੍ਧਿਂ ਮਿਸ੍ਸੇਤ੍ਵਾ ਵਿਕ੍ਕਿਣਿ. ਤਸ੍ਸ ਪੁਤ੍ਤੋ ‘‘ਘਰਂ ਆਗਤਾਨਂ ਮਮ ਮਿਤ੍ਤਸੁਹਜ੍ਜਾਨਂ ਸਮ੍ਮਾਨਂ ਨ ਕਰੋਤੀ’’ਤਿ ਕੁਪਿਤੋ ਯੁਗਚਮ੍ਮਂ ਗਹੇਤ੍ਵਾ ਮਾਤੁਸੀਸੇ ਪਹਾਰਮਦਾਸਿ. ਤਸ੍ਸ ਸੁਣਿਸਾ ¶ ਸਬ੍ਬੇਸਂ ਅਤ੍ਥਾਯ ਠਪਿਤਮਂਸਂ ਚੋਰਿਕਾਯ ਖਾਦਿਤ੍ਵਾ ਪੁਨ ਤੇਹਿ ਅਨੁਯੁਞ੍ਜਿਯਮਾਨਾ ‘‘ਸਚੇ ਮਯਾ ਤਂ ਮਂਸਂ ਖਾਦਿਤਂ, ਭਵੇ ਭਵੇ ਅਤ੍ਤਨੋ ਪਿਟ੍ਠਿਮਂਸਂ ਕਨ੍ਤਿਤ੍ਵਾ ਖਾਦੇਯ੍ਯ’’ਨ੍ਤਿ ਸਪਥਮਕਾਸਿ. ਭਰਿਯਾ ਪਨਸ੍ਸ ਕਿਞ੍ਚਿਦੇਵ ਉਪਕਰਣਂ ਯਾਚਨ੍ਤਾਨਂ ‘‘ਨਤ੍ਥੀ’’ਤਿ ਵਤ੍ਵਾ ਤੇਹਿ ਨਿਪ੍ਪੀਲ਼ਿਯਮਾਨਾ ‘‘ਸਚੇ ਸਨ੍ਤਂ ਨਤ੍ਥੀਤਿ ਵਦਾਮਿ, ਜਾਤਜਾਤਟ੍ਠਾਨੇ ਗੂਥਭਕ੍ਖਾ ਭਵੇਯ੍ਯ’’ਨ੍ਤਿ ਮੁਸਾਵਾਦੇਨ ਸਪਥਮਕਾਸਿ.

ਤੇ ¶ ਚਤ੍ਤਾਰੋਪਿ ਜਨਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਵਿਞ੍ਝਾਟਵਿਯਂ ਪੇਤਾ ਹੁਤ੍ਵਾ ਨਿਬ੍ਬਤ੍ਤਿਂਸੁ. ਤਤ੍ਥ ਕੂਟਵਾਣਿਜੋ ਕਮ੍ਮਫਲੇਨ ਪਜ੍ਜਲਨ੍ਤਂ ਭੁਸਂ ਉਭੋਹਿ ਹਤ੍ਥੇਹਿ ਗਹੇਤ੍ਵਾ ਅਤ੍ਤਨੋ ਮਤ੍ਥਕੇ ਆਕਿਰਿਤ੍ਵਾ ਮਹਾਦੁਕ੍ਖਂ ਅਨੁਭਵਤਿ, ਤਸ੍ਸ ਪੁਤ੍ਤੋ ਅਯੋਮਯੇਹਿ ਮੁਗ੍ਗਰੇਹਿ ਸਯਮੇਵ ਅਤ੍ਤਨੋ ਸੀਸਂ ਭਿਨ੍ਦਿਤ੍ਵਾ ਅਨਪ੍ਪਕਂ ਦੁਕ੍ਖਂ ਪਚ੍ਚਨੁਭੋਤਿ. ਤਸ੍ਸ ਸੁਣਿਸਾ ਕਮ੍ਮਫਲੇਨ ਸੁਨਿਸਿਤੇਹਿ ਅਤਿਵਿਯ ਵਿਪੁਲਾਯਤੇਹਿ ਨਖੇਹਿ ਅਤ੍ਤਨੋ ਪਿਟ੍ਠਿਮਂਸਾਨਿ ਕਨ੍ਤਿਤ੍ਵਾ ਖਾਦਨ੍ਤੀ ਅਪਰਿਮਿਤਂ ਦੁਕ੍ਖਂ ਅਨੁਭਵਤਿ, ਤਸ੍ਸ ਭਰਿਯਾਯ ਸੁਗਨ੍ਧਂ ਸੁਵਿਸੁਦ੍ਧਂ ਅਪਗਤਕਾਲ਼ਕਂ ਸਾਲਿਭਤ੍ਤਂ ਉਪਨੀਤਮਤ੍ਤਮੇਵ ਨਾਨਾਵਿਧਕਿਮਿਕੁਲਾਕੁਲਂ ਪਰਮਦੁਗ੍ਗਨ੍ਧਜੇਗੁਚ੍ਛਂ ਗੂਥਂ ਸਮ੍ਪਜ੍ਜਤਿ, ਤਂ ਸਾ ਉਭੋਹਿ ਹਤ੍ਥੇਹਿ ਪਰਿਗ੍ਗਹੇਤ੍ਵਾ ਭੁਞ੍ਜਨ੍ਤੀ ਮਹਾਦੁਕ੍ਖਂ ਪਟਿਸਂਵੇਦੇਤਿ.

ਏਵਂ ਤੇਸੁ ਚਤੂਸੁ ਜਨੇਸੁ ਪੇਤੇਸੁ ਨਿਬ੍ਬਤ੍ਤਿਤ੍ਵਾ ਮਹਾਦੁਕ੍ਖਂ ਅਨੁਭਵਨ੍ਤੇਸੁ ਆਯਸ੍ਮਾ ਮਹਾਮੋਗ੍ਗਲਾਨੋ ਪਬ੍ਬਤਚਾਰਿਕਂ ਚਰਨ੍ਤੋ ਏਕਦਿਵਸਂ ਤਂ ਠਾਨਂ ਗਤੋ. ਤੇ ਪੇਤੇ ਦਿਸ੍ਵਾ –

‘‘ਭੁਸਾਨਿ ¶ ਏਕੋ ਸਾਲਿਂ ਪੁਨਾਪਰੋ, ਅਯਞ੍ਚ ਨਾਰੀ ਸਕਮਂਸਲੋਹਿਤਂ;

ਤੁਵਞ੍ਚ ਗੂਥਂ ਅਸੁਚਿਂ ਅਕਨ੍ਤਂ, ਪਰਿਭੁਞ੍ਜਸਿ ਕਿਸ੍ਸ ਅਯਂ ਵਿਪਾਕੋ’’ਤਿ. –

ਇਮਾਯ ਗਾਥਾਯ ਤੇਹਿ ਕਤਕਮ੍ਮਂ ਪੁਚ੍ਛਿ. ਤਤ੍ਥ ਭੁਸਾਨੀਤਿ ਪਲਾਪਾਨਿ. ਏਕੋਤਿ ਏਕਕੋ. ਸਾਲਿਨ੍ਤਿ ਸਾਲਿਨੋ. ਸਾਮਿਅਤ੍ਥੇ ਹੇਤਂ ਉਪਯੋਗਵਚਨਂ, ਸਾਲਿਨੋ ਪਲਾਪਾਨਿ ¶ ਪਜ੍ਜਲਨ੍ਤਾਨਿ ਅਤ੍ਤਨੋ ਸੀਸੇ ਅਵਕਿਰਤੀਤਿ ਅਧਿਪ੍ਪਾਯੋ. ਪੁਨਾਪਰੋਤਿ ਪੁਨ ਅਪਰੋ. ਯੋ ਹਿ ਸੋ ਮਾਤੁਸੀਸਂ ਪਹਰਿ, ਸੋ ਅਯੋਮੁਗ੍ਗਰੇਹਿ ਅਤ੍ਤਨੋ ਸੀਸਂ ਪਹਰਿਤ੍ਵਾ ਸੀਸਭੇਦਂ ਪਾਪੁਣਾਤਿ, ਤਂ ਸਨ੍ਧਾਯ ਵਦਤਿ. ਸਕਮਂਸਲੋਹਿਤਨ੍ਤਿ ਅਤ੍ਤਨੋ ਪਿਟ੍ਠਿਮਂਸਂ ਲੋਹਿਤਞ੍ਚ ਪਰਿਭੁਞ੍ਜਤੀਤਿ ਯੋਜਨਾ. ਅਕਨ੍ਤਨ੍ਤਿ ਅਮਨਾਪਂ ਜੇਗੁਚ੍ਛਂ. ਕਿਸ੍ਸ ਅਯਂ ਵਿਪਾਕੋਤਿ ਕਤਮਸ੍ਸ ਪਾਪਕਮ੍ਮਸ੍ਸ ਇਦਂ ਫਲਂ, ਯਂ ਇਦਾਨਿ ਤੁਮ੍ਹੇਹਿ ਪਚ੍ਚਨੁਭਵੀਯਤੀਤਿ ਅਤ੍ਥੋ.

ਏਵਂ ਥੇਰੇਨ ਤੇਹਿ ਕਤਕਮ੍ਮੇ ਪੁਚ੍ਛਿਤੇ ਕੂਟਵਾਣਿਜਸ੍ਸ ਭਰਿਯਾ ਸਬ੍ਬੇਹਿ ਤੇਹਿ ਕਤਕਮ੍ਮਂ ਆਚਿਕ੍ਖਨ੍ਤੀ –

‘‘ਅਯਂ ¶ ਪੁਰੇ ਮਾਤਰਂ ਹਿਂਸਤਿ, ਅਯਂ ਪਨ ਕੂਟਵਾਣਿਜੋ;

ਅਯਂ ਮਂਸਾਨਿ ਖਾਦਿਤ੍ਵਾ, ਮੁਸਾਵਾਦੇਨ ਵਞ੍ਚੇਤਿ.

‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਅਗਾਰਿਨੀ ਸਬ੍ਬਕੁਲਸ੍ਸ ਇਸ੍ਸਰਾ;

ਸਨ੍ਤੇਸੁ ਪਰਿਗੁਹਾਮਿ, ਮਾ ਚ ਕਿਞ੍ਚਿ ਇਤੋ ਅਦਂ.

‘‘ਮੁਸਾਵਾਦੇਨ ਛਾਦੇਮਿ, ਨਤ੍ਥਿ ਏਤਂ ਮਮ ਗੇਹੇ;

ਸਚੇ ਸਨ੍ਤਂ ਨਿਗੁਹਾਮਿ, ਗੂਥੋ ਮੇ ਹੋਤੁ ਭੋਜਨਂ.

‘‘ਤਸ੍ਸ ਕਮ੍ਮਸ੍ਸ ਵਿਪਾਕੇਨ, ਮੁਸਾਵਾਦਸ੍ਸ ਚੂਭਯਂ;

ਸੁਗਨ੍ਧਂ ਸਾਲਿਨੋ ਭਤ੍ਤਂ, ਗੂਥਂ ਮੇ ਪਰਿਵਤ੍ਤਤਿ.

‘‘ਅਵਞ੍ਝਾਨਿ ਚ ਕਮ੍ਮਾਨਿ, ਨ ਹਿ ਕਮ੍ਮਂ ਵਿਨਸ੍ਸਤਿ;

ਦੁਗ੍ਗਨ੍ਧਂ ਕਿਮਿਨਂ ਮੀਲ਼੍ਹਂ, ਭੁਞ੍ਜਾਮਿ ਚ ਪਿਵਾਮਿ ਚਾ’’ਤਿ. – ਗਾਥਾ ਅਭਾਸਿ;

੪੪੮. ਤਤ੍ਥ ¶ ਅਯਨ੍ਤਿ ਪੁਤ੍ਤਂ ਦਸ੍ਸੇਨ੍ਤਿ ਵਦਤਿ. ਹਿਂਸਤੀਤਿ ਥਾਮੇਨ ਪਰਿਬਾਧੇਤਿ, ਮੁਗ੍ਗਰੇਨ ਪਹਰਤੀਤਿ ਅਤ੍ਥੋ. ਕੂਟਵਾਣਿਜੋਤਿ ਖਲਵਾਣਿਜੋ, ਵਞ੍ਚਨਾਯ ਵਣਿਜ੍ਜਕਾਰਕੋਤਿ ਅਤ੍ਥੋ ¶ . ਮਂਸਾਨਿ ਖਾਦਿਤ੍ਵਾਤਿ ਪਰੇਹਿ ਸਾਧਾਰਣਮਂਸਂ ਖਾਦਿਤ੍ਵਾ ‘‘ਨ ਖਾਦਾਮੀ’’ਤਿ ਮੁਸਾਵਾਦੇਨ ਤੇ ਵਞ੍ਚੇਤਿ.

੪੪੯-੫੦. ਅਗਾਰਿਨੀਤਿ ਗੇਹਸਾਮਿਨੀ. ਸਨ੍ਤੇਸੂਤਿ ਵਿਜ੍ਜਮਾਨੇਸ੍ਵੇਵ ਪਰੇਹਿ ਯਾਚਿਤਉਪਕਰਣੇਸੁ. ਪਰਿਗੁਹਾਮੀਤਿ ਪਟਿਚ੍ਛਾਦੇਸਿਂ. ਕਾਲਵਿਪਲ੍ਲਾਸੇਨ ਹੇਤਂ ਵੁਤ੍ਤਂ. ਮਾ ਚ ਕਿਞ੍ਚਿ ਇਤੋ ਅਦਨ੍ਤਿ ਇਤੋ ਮਮ ਸਨ੍ਤਕਤੋ ਕਿਞ੍ਚਿਮਤ੍ਤਮ੍ਪਿ ਅਤ੍ਥਿਕਸ੍ਸ ਪਰਸ੍ਸ ਨ ਅਦਾਸਿਂ. ਛਾਦੇਮਿਤਿ ‘‘ਨਤ੍ਥਿ ਏਤਂ ਮਮ ਗੇਹੇ’’ਤਿ ਮੁਸਾਵਾਦੇਨ ਛਾਦੇਸਿਂ.

੪੫੧-੨. ਗੂਥਂ ਮੇ ਪਰਿਵਤ੍ਤਤੀਤਿ ਸੁਗਨ੍ਧਂ ਸਾਲਿਭਤ੍ਤਂ ਮਯ੍ਹਂ ਕਮ੍ਮਵਸੇਨ ਗੂਥਭਾਵੇਨ ਪਰਿਵਤ੍ਤਤਿ ਪਰਿਣਮਤਿ. ਅਵਞ੍ਝਾਨੀਤਿ ਅਮੋਘਾਨਿ ਅਨਿਪ੍ਫਲਾਨਿ. ਨ ਹਿ ਕਮ੍ਮਂ ਵਿਨਸ੍ਸਤੀਤਿ ਯਥੂਪਚਿਤਂ ਕਮ੍ਮਂ ਫਲਂ ਅਦਤ੍ਵਾ ਨ ਹਿ ਵਿਨਸ੍ਸਤਿ. ਕਿਮਿਨਨ੍ਤਿ ¶ ਕਿਮਿਵਨ੍ਤਂ ਸਞ੍ਜਾਤਕਿਮਿਕੁਲਂ. ਮੀਲ਼੍ਹਨ੍ਤਿ ਗੂਥਂ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵ.

ਏਵਂ ਥੇਰੋ ਤਸ੍ਸਾ ਪੇਤਿਯਾ ਵਚਨਂ ਸੁਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਅਚ੍ਛੇਰਰੂਪਂ ਸੁਗਤਸ੍ਸ ਞਾਣਨ੍ਤਿ ਇਦਂ ਕੁਮਾਰਪੇਤਵਤ੍ਥੁ. ਤਸ੍ਸ ਕਾ ਉਪ੍ਪਤ੍ਤਿ? ਸਾਵਤ੍ਥਿਯਂ ਕਿਰ ਬਹੂ ਉਪਾਸਕਾ ਧਮ੍ਮਗਣਾ ਹੁਤ੍ਵਾ ਨਗਰੇ ਮਹਨ੍ਤਂ ਮਣ੍ਡਪਂ ਕਾਰੇਤ੍ਵਾ ਤਂ ਨਾਨਾਵਣ੍ਣੇਹਿ ਵਤ੍ਥੇਹਿ ਅਲਙ੍ਕਰਿਤ੍ਵਾ ਕਾਲਸ੍ਸੇਵ ਸਤ੍ਥਾਰਂ ਭਿਕ੍ਖੁਸਙ੍ਘਞ੍ਚ ਨਿਮਨ੍ਤੇਤ੍ਵਾ ਮਹਾਰਹਵਰਪਚ੍ਚਤ੍ਥਰਣਤ੍ਥਤੇਸੁ ਆਸਨੇਸੁ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਗਨ੍ਧਪੁਪ੍ਫਾਦੀਹਿ ਪੂਜੇਤ੍ਵਾ ¶ ਮਹਾਦਾਨਂ ਪਵਤ੍ਤੇਨ੍ਤਿ. ਤਂ ਦਿਸ੍ਵਾ ਅਞ੍ਞਤਰੋ ਮਚ੍ਛੇਰਮਲਪਰਿਯੁਟ੍ਠਿਤਚਿਤ੍ਤੋ ਪੁਰਿਸੋ ਤਂ ਸਕ੍ਕਾਰਂ ਅਸਹਮਾਨੋ ਏਵਮਾਹ – ‘‘ਵਰਮੇਤਂ ਸਬ੍ਬਂ ਸਙ੍ਕਾਰਕੂਟੇ ਛਡ੍ਡਿਤਂ, ਨ ਤ੍ਵੇਵ ਇਮੇਸਂ ਮੁਣ੍ਡਕਾਨਂ ਦਿਨ੍ਨ’’ਨ੍ਤਿ. ਤਂ ਸੁਤ੍ਵਾ ਉਪਾਸਕਾ ਸਂਵਿਗ੍ਗਮਾਨਸਾ ‘‘ਭਾਰਿਯਂ ਵਤ ਇਮਿਨਾ ਪੁਰਿਸੇਨ ਪਾਪਂ ਪਸੁਤਂ, ਯੇਨ ਏਵਂ ਬੁਦ੍ਧਪ੍ਪਮੁਖੇ ਭਿਕ੍ਖੁਸਙ੍ਘੇ ਅਪਰਦ੍ਧ’’ਨ੍ਤਿ ਤਮਤ੍ਥਂ ਤਸ੍ਸ ਮਾਤੁਯਾ ਆਰੋਚੇਤ੍ਵਾ ‘‘ਗਚ੍ਛ, ਤ੍ਵਂ ਸਸਾਵਕਸਙ੍ਘਂ ਭਗਵਨ੍ਤਂ ਖਮਾਪੇਹੀ’’ਤਿ ਆਹਂਸੁ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਪੁਤ੍ਤਂ ਸਨ੍ਤਜ੍ਜੇਨ੍ਤੀ ਸਞ੍ਞਾਪੇਤ੍ਵਾ ਭਗਵਨ੍ਤਂ ਭਿਕ੍ਖੁਸਙ੍ਘਞ੍ਚ ¶ ਉਪਸਙ੍ਕਮਿਤ੍ਵਾ ਪੁਤ੍ਤੇਨ ਕਤਅਚ੍ਚਯਂ ਦੇਸੇਨ੍ਤੀ ਖਮਾਪੇਤ੍ਵਾ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਸਤ੍ਤਾਹਂ ਯਾਗੁਦਾਨੇਨ ਪੂਜਂ ਅਕਾਸਿ. ਤਸ੍ਸਾ ਪੁਤ੍ਤੋ ਨਚਿਰਸ੍ਸੇਵ ਕਾਲਂ ਕਤ੍ਵਾ ਕਿਲਿਟ੍ਠਕਮ੍ਮੂਪਜੀਵਿਨਿਯਾ ਗਣਿਕਾਯ ਕੁਚ੍ਛਿਯਂ ਨਿਬ੍ਬਤ੍ਤਿ. ਸਾ ਚ ਨਂ ਜਾਤਮਤ੍ਤਂਯੇਵ ‘‘ਦਾਰਕੋ’’ਤਿ ਞਤ੍ਵਾ ਸੁਸਾਨੇ ਛਡ੍ਡਾਪੇਸਿ. ਸੋ ਤਤ੍ਥ ਅਤ੍ਤਨੋ ਪੁਞ੍ਞਬਲੇਨੇਵ ਗਹਿਤਾਰਕ੍ਖੋ ਕੇਨਚਿ ਅਨੁਪਦ੍ਦੁਤੋ ਮਾਤੁ-ਅਙ੍ਕੇ ਵਿਯ ਸੁਖਂ ਸੁਪਿ. ਦੇਵਤਾ ਤਸ੍ਸ ਆਰਕ੍ਖਂ ਗਣ੍ਹਿਂਸੂਤਿ ਚ ਵਦਨ੍ਤਿ.

ਅਥ ¶ ਭਗਵਾ ਪਚ੍ਚੂਸਸਮਯੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਤਂ ਦਾਰਕਂ ਸਿਵਥਿਕਾਯ ਛਡ੍ਡਿਤਂ ਦਿਸ੍ਵਾ ਸੂਰਿਯੁਗ੍ਗਮਨਵੇਲਾਯ ਸਿਵਥਿਕਂ ਅਗਮਾਸਿ. ‘‘ਸਤ੍ਥਾ ਇਧਾਗਤੋ, ਕਾਰਣੇਨੇਤ੍ਥ ਭਵਿਤਬ੍ਬ’’ਨ੍ਤਿ ਮਹਾਜਨੋ ਸਨ੍ਨਿਪਤਿ. ਭਗਵਾ ਸਨ੍ਨਿਪਤਿਤਪਰਿਸਾਯ ‘‘ਨਾਯਂ ਦਾਰਕੋ ਓਞ੍ਞਾਤਬ੍ਬੋ, ਯਦਿਪਿ ਇਦਾਨਿ ਸੁਸਾਨੇ ਛਡ੍ਡਿਤੋ ਅਨਾਥੋ ਠਿਤੋ, ਆਯਤਿਂ ਪਨ ਦਿਟ੍ਠੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚ ਉਲ਼ਾਰਸਮ੍ਪਤ੍ਤਿਂ ਪਟਿਲਭਿਸ੍ਸਤੀ’’ਤਿ ਵਤ੍ਵਾ ਤੇਹਿ ਮਨੁਸ੍ਸੇਹਿ ‘‘ਕਿਂ ਨੁ ਖੋ, ਭਨ੍ਤੇ, ਇਮਿਨਾ ਪੁਰਿਮਜਾਤਿਯਂ ਕਤਂ ਕਮ੍ਮ’’ਨ੍ਤਿ ਪੁਟ੍ਠੋ –

‘‘ਬੁਦ੍ਧਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ, ਪੂਜਂ ਅਕਾਸਿ ਜਨਤਾ ਉਲ਼ਾਰਂ;

ਤਤ੍ਰਸ੍ਸ ਚਿਤ੍ਤਸ੍ਸਹੁ ਅਞ੍ਞਥਤ੍ਤਂ, ਵਾਚਂ ਅਭਾਸਿ ਫਰੁਸਂ ਅਸਬ੍ਭ’’ਨ੍ਤਿ. –

ਆਦਿਨਾ ਨਯੇਨ ਦਾਰਕੇਨ ਕਤਕਮ੍ਮਂ ਆਯਤਿਂ ਪਤ੍ਤਬ੍ਬਂ ਸਮ੍ਪਤ੍ਤਿਞ੍ਚ ਪਕਾਸੇਤ੍ਵਾ ਸਨ੍ਨਿਪਤਿਤਾਯ ਪਰਿਸਾਯ ਅਜ੍ਝਾਸਯਾਨੁਰੂਪਂ ਧਮ੍ਮਂ ਕਥੇਤ੍ਵਾ ਉਪਰਿ ਸਾਮੁਕ੍ਕਂਸਿਕਂ ਧਮ੍ਮਦੇਸਨਂ ਅਕਾਸਿ. ਸਚ੍ਚਪਰਿਯੋਸਾਨੇ ਚਤੁਰਾਸੀਤਿਯਾ ¶ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ, ਤਞ੍ਚ ਦਾਰਕਂ ਅਸੀਤਿਕੋਟਿਵਿਭਵੋ ਏਕੋ ਕੁਟੁਮ੍ਬਿਕੋ ਭਗਵਤੋ ਸਮ੍ਮੁਖਾਵ ‘‘ਮਯ੍ਹਂ ਪੁਤ੍ਤੋ’’ਤਿ ਅਗ੍ਗਹੇਸਿ. ਭਗਵਾ ‘‘ਏਤ੍ਤਕੇਨ ਅਯਂ ਦਾਰਕੋ ਰਕ੍ਖਿਤੋ, ਮਹਾਜਨਸ੍ਸ ਚ ਅਨੁਗ੍ਗਹੋ ਕਤੋ’’ਤਿ ਵਿਹਾਰਂ ਅਗਮਾਸਿ.

ਸੋ ਅਪਰੇਨ ਸਮਯੇਨ ਤਸ੍ਮਿਂ ਕੁਟੁਮ੍ਬਿਕੇ ਕਾਲਕਤੇ ਤੇਨ ਨਿਯ੍ਯਾਦਿਤਂ ਧਨਂ ਪਟਿਪਜ੍ਜਿਤ੍ਵਾ ਕੁਟੁਮ੍ਬਂ ਸਣ੍ਠਪੇਨ੍ਤੋ ਤਸ੍ਮਿਂ ਨਗਰੇਯੇਵ ਮਹਾਵਿਭਵੋ ਗਹਪਤਿ ਹੁਤ੍ਵਾ ਦਾਨਾਦਿਨਿਰਤੋ ਅਹੋਸਿ. ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਅਹੋ ਨੂਨ ਸਤ੍ਥਾ ਸਤ੍ਤੇਸੁ ਅਨੁਕਮ੍ਪਕੋ, ਸੋਪਿ ਨਾਮ ਦਾਰਕੋ ਤਦਾ ਅਨਾਥੋ ਠਿਤੋ ਏਤਰਹਿ ਮਹਤਿਂ ਸਮ੍ਪਤ੍ਤਿਂ ਪਚ੍ਚਨੁਭਵਤਿ, ਉਲ਼ਾਰਾਨਿ ਚ ਪੁਞ੍ਞਾਨਿ ਕਰੋਤੀ’’ਤਿ. ਤਂ ਸੁਤ੍ਵਾ ਸਤ੍ਥਾ ‘‘ਨ, ਭਿਕ੍ਖਵੇ, ਤਸ੍ਸ ਏਤ੍ਤਕਾਵ ਸਮ੍ਪਤ੍ਤਿ, ਅਥ ਖੋ ਆਯੁਪਰਿਯੋਸਾਨੇ ਤਾਵਤਿਂਸਭਵਨੇ ਸਕ੍ਕਸ੍ਸ ਦੇਵਰਞ੍ਞੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿਸ੍ਸਤਿ, ਮਹਤਿਂ ਦਿਬ੍ਬਸਮ੍ਪਤ੍ਤਿਞ੍ਚ ¶ ਪਟਿਲਭਿਸ੍ਸਤੀ’’ਤਿ ਬ੍ਯਾਕਾਸਿ. ਤਂ ਸੁਤ੍ਵਾ ਭਿਕ੍ਖੂ ਚ ਮਹਾਜਨੋ ¶ ਚ ‘‘ਇਦਂ ਕਿਰ ਕਾਰਣਂ ਦਿਸ੍ਵਾ ਦੀਘਦਸ੍ਸੀ ਭਗਵਾ ਜਾਤਮਤ੍ਤਸ੍ਸੇਵਸ੍ਸ ਆਮਕਸੁਸਾਨੇ ਛਡ੍ਡਿਤਸ੍ਸ ਤਤ੍ਥ ਗਨ੍ਤ੍ਵਾ ਸਙ੍ਗਹਂ ਅਕਾਸੀ’’ਤਿ ਸਤ੍ਥੁ ਞਾਣਵਿਸੇਸਂ ਥੋਮੇਤ੍ਵਾ ਤਸ੍ਮਿਂ ਅਤ੍ਤਭਾਵੇ ਤਸ੍ਸ ਪਵਤ੍ਤਿਂ ਕਥੇਸੁਂ. ਤਮਤ੍ਥਂ ਦੀਪੇਨ੍ਤਾ ਸਙ੍ਗੀਤਿਕਾਰਾ –

‘‘ਅਚ੍ਛੇਰਰੂਪਂ ਸੁਗਤਸ੍ਸ ਞਾਣਂ, ਸਤ੍ਥਾ ਯਥਾ ਪੁਗ੍ਗਲਂ ਬ੍ਯਾਕਾਸਿ;

ਉਸ੍ਸਨ੍ਨਪੁਞ੍ਞਾਪਿ ਭਵਨ੍ਤਿ ਹੇਕੇ, ਪਰਿਤ੍ਤਪੁਞ੍ਞਾਪਿ ਭਵਨ੍ਤਿ ਹੇਕੇ.

‘‘ਅਯਂ ਕੁਮਾਰੋ ਸੀਵਥਿਕਾਯ ਛਡ੍ਡਿਤੋ, ਅਙ੍ਗੁਟ੍ਠਸ੍ਨੇਹੇਨ ਯਾਪੇਤਿ ਰਤ੍ਤਿਂ;

ਨ ਯਕ੍ਖਭੂਤਾ ਨ ਸਰੀਸਪਾ ਵਾ, ਵਿਹੇਠਯੇਯ੍ਯੁਂ ਕਤਪੁਞ੍ਞਂ ਕੁਮਾਰਂ.

‘‘ਸੁਨਖਾਪਿਮਸ੍ਸ ਪਲਿਹਿਂਸੁ ਪਾਦੇ, ਧਙ੍ਕਾ ਸਿਙ੍ਗਾਲਾ ਪਰਿਵਤ੍ਤਯਨ੍ਤਿ;

ਗਬ੍ਭਾਸਯਂ ¶ ਪਕ੍ਖਿਗਣਾ ਹਰਨ੍ਤਿ, ਕਾਕਾ ਪਨ ਅਕ੍ਖਿਮਲਂ ਹਰਨ੍ਤਿ.

‘‘ਨਯਿਮਸ੍ਸ ਰਕ੍ਖਂ ਵਿਦਹਿਂਸੁ ਕੇਚਿ, ਨ ਓਸਧਂ ਸਾਸਪਧੂਪਨਂ ਵਾ;

ਨਕ੍ਖਤ੍ਤਯੋਗਮ੍ਪਿ ਨ ਅਗ੍ਗਹੇਸੁਂ, ਨ ਸਬ੍ਬਧਞ੍ਞਾਨਿਪਿ ਆਕਿਰਿਂਸੁ.

‘‘ਏਤਾਦਿਸਂ ਉਤ੍ਤਮਕਿਚ੍ਛਪਤ੍ਤਂ, ਰਤ੍ਤਾਭਤਂ ਸੀਵਥਿਕਾਯ ਛਡ੍ਡਿਤਂ;

ਨੋਨੀਤਪਿਣ੍ਡਂਵ ਪਵੇਧਮਾਨਂ, ਸਸਂਸਯਂ ਜੀਵਿਤਸਾਵਸੇਸਂ.

‘‘ਤਮਦ੍ਦਸਾ ਦੇਵਮਨੁਸ੍ਸਪੂਜਿਤੋ, ਦਿਸ੍ਵਾ ਚ ਤਂ ਬ੍ਯਾਕਰਿ ਭੂਰਿਪਞ੍ਞੋ;

‘ਅਯਂ ਕੁਮਾਰੋ ਨਗਰਸ੍ਸਿਮਸ੍ਸ, ਅਗ੍ਗਕੁਲਿਕੋ ਭਵਿਸ੍ਸਤਿ ਭੋਗਤੋ ਚ’.

‘‘ਕਿਸ੍ਸ ¶ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਏਤਾਦਿਸਂ ਬ੍ਯਸਨਂ ਪਾਪੁਣਿਤ੍ਵਾ, ਤਂ ਤਾਦਿਸਂ ਪਚ੍ਚਨੁਭੋਸ੍ਸਤਿਦ੍ਧਿ’’ਨ੍ਤਿ. –

੪੫੩. ਤਤ੍ਥ ਅਚ੍ਛੇਰਰੂਪਨ੍ਤਿ ਅਚ੍ਛਰਿਯਸਭਾਵਂ. ਸੁਗਤਸ੍ਸ ਞਾਣਨ੍ਤਿ ਅਞ੍ਞੇਹਿ ਅਸਾਧਾਰਣਂ ਸਮ੍ਮਾਸਮ੍ਬੁਦ੍ਧਸ੍ਸ ¶ ਞਾਣਂ, ਆਸਯਾਨੁਸਯਞਾਣਾਦਿਸਬ੍ਬਞ੍ਞੁਤਞ੍ਞਾਣਮੇਵ ਸਨ੍ਧਾਯ ਵੁਤ੍ਤਂ. ਤਯਿਦਂ ਅਞ੍ਞੇਸਂ ਅਵਿਸਯਭੂਤਂ ਕਥਂ ਞਾਣਨ੍ਤਿ ਆਹ ‘‘ਸਤ੍ਥਾ ਯਥਾ ਪੁਗ੍ਗਲਂ ਬ੍ਯਾਕਾਸੀ’’ਤਿ. ਤੇਨ ਸਤ੍ਥੁ ਦੇਸਨਾਯ ਏਵ ਞਾਣਸ੍ਸ ਅਚ੍ਛਰਿਯਭਾਵੋ ਵਿਞ੍ਞਾਯਤੀਤਿ ਦਸ੍ਸੇਤਿ.

ਇਦਾਨਿ ਬ੍ਯਾਕਰਣਂ ਦਸ੍ਸੇਨ੍ਤੋ ‘‘ਉਸ੍ਸਨ੍ਨਪੁਞ੍ਞਾਪਿ ਭਵਨ੍ਤਿ ਹੇਕੇ, ਪਰਿਤ੍ਤਪੁਞ੍ਞਾਪਿ ਭਵਨ੍ਤਿ ਹੇਕੇ’’ਤਿ ਆਹ. ਤਸ੍ਸਤ੍ਥੋ – ਉਸ੍ਸਨ੍ਨਕੁਸਲਧਮ੍ਮਾਪਿ ਇਧੇਕਚ੍ਚੇ ਪੁਗ੍ਗਲਾ ਲਦ੍ਧਪਚ੍ਚਯਸ੍ਸ ¶ ਅਪੁਞ੍ਞਸ੍ਸ ਵਸੇਨ ਜਾਤਿਆਦਿਨਾ ਨਿਹੀਨਾ ਭਵਨ੍ਤਿ, ਪਰਿਤ੍ਤਪੁਞ੍ਞਾਪਿ ਅਪ੍ਪਤਰਪੁਞ੍ਞਧਮ੍ਮਾਪਿ ਏਕੇ ਸਤ੍ਤਾ ਖੇਤ੍ਤਸਮ੍ਪਤ੍ਤਿਆਦਿਨਾ ਤਸ੍ਸ ਪੁਞ੍ਞਸ੍ਸ ਮਹਾਜੁਤਿਕਤਾਯ ਉਲ਼ਾਰਾ ਭਵਨ੍ਤੀਤਿ.

੪੫੪. ਸੀਵਥਿਕਾਯਾਤਿ ਸੁਸਾਨੇ. ਅਙ੍ਗੁਟ੍ਠਸ੍ਨੇਹੇਨਾਤਿ ਅਙ੍ਗੁਟ੍ਠਤੋ ਪਵਤ੍ਤਸ੍ਨੇਹੇਨ, ਦੇਵਤਾਯ ਅਙ੍ਗੁਟ੍ਠਤੋ ਪਗ੍ਘਰਿਤਖੀਰੇਨਾਤਿ ਅਤ੍ਥੋ. ਨ ਯਕ੍ਖਭੂਤਾ ਨ ਸਰੀਸਪਾ ਵਾਤਿ ਪਿਸਾਚਭੂਤਾ ਵਾ ਯਕ੍ਖਭੂਤਾ ਵਾ ਸਰੀਸਪਾ ਵਾ ਯੇ ਕੇਚਿ ਸਰਨ੍ਤਾ ਗਚ੍ਛਨ੍ਤਾ ਵਾ ਨ ਵਿਹੇਠਯੇਯ੍ਯੁਂ ਨ ਬਾਧੇਯ੍ਯੁਂ.

੪੫੫. ਪਲਿਹਿਂਸੁ ਪਾਦੇਤਿ ਅਤ੍ਤਨੋ ਜਿਵ੍ਹਾਯ ਪਾਦੇ ਲਿਹਿਸੁਂ. ਧਙ੍ਕਾਤਿ ਕਾਕਾ. ਪਰਿਵਤ੍ਤਯਨ੍ਤੀਤਿ ‘‘ਮਾ ਨਂ ਕੁਮਾਰਂ ਕੇਚਿ ਵਿਹੇਠੇਯ੍ਯੁ’’ਨ੍ਤਿ ਰਕ੍ਖਨ੍ਤਾ ਨਿਰੋਗਭਾਵਜਾਨਨਤ੍ਥਂ ਅਪਰਾਪਰਂ ਪਰਿਵਤ੍ਤਨ੍ਤਿ. ਗਬ੍ਭਾਸਯਨ੍ਤਿ ਗਬ੍ਭਮਲਂ. ਪਕ੍ਖਿਗਣਾਤਿ ਗਿਜ੍ਝਕੁਲਲਾਦਯੋ ਸਕੁਣਗਣਾ. ਹਰਨ੍ਤੀਤਿ ਅਪਨੇਨ੍ਤਿ. ਅਕ੍ਖਿਮਲਨ੍ਤਿ ਅਕ੍ਖਿਗੂਥਂ.

੪੫੬. ਕੇਚੀਤਿ ¶ ਕੇਚਿ ਮਨੁਸ੍ਸਾ, ਅਮਨੁਸ੍ਸਾ ਪਨ ਰਕ੍ਖਂ ਸਂਵਿਦਹਿਂਸੁ. ਓਸਧਨ੍ਤਿ ਤਦਾ ਆਯਤਿਞ੍ਚ ਆਰੋਗ੍ਯਾਵਹਂ ਅਗਦਂ. ਸਾਸਪਧੂਪਨਂ ਵਾਤਿ ਯਂ ਜਾਤਸ੍ਸ ਦਾਰਕਸ੍ਸ ਰਕ੍ਖਣਤ੍ਥਂ ਸਾਸਪੇਨ ਧੂਪਨਂ ਕਰੋਨ੍ਤਿ, ਤਮ੍ਪਿ ਤਸ੍ਸ ਕਰੋਨ੍ਤਾ ਨਾਹੇਸੁਨ੍ਤਿ ਦੀਪੇਨ੍ਤਿ. ਨਕ੍ਖਤ੍ਤਯੋਗਮ੍ਪਿ ਨ ਅਗ੍ਗਹੇਸੁਨ੍ਤਿ ਨਕ੍ਖਤ੍ਤਯੁਤ੍ਤਮ੍ਪਿ ਨ ਗਣ੍ਹਿਂਸੁ. ‘‘ਅਸੁਕਮ੍ਹਿ ਨਕ੍ਖਤ੍ਤੇ ਤਿਥਿਮ੍ਹਿ ਮੁਹੁਤ੍ਤੇ ਅਯਂ ਜਾਤੋ’’ਤਿ ਏਵਂ ਜਾਤਕਮ੍ਮਮ੍ਪਿਸ੍ਸ ਨ ਕੇਚਿ ਅਕਂਸੂਤਿ ਅਤ੍ਥੋ. ਨ ਸਬ੍ਬਧਞ੍ਞਾਨਿਪਿ ਆਕਿਰਿਂਸੂਤਿ ਮਙ੍ਗਲਂ ਕਰੋਨ੍ਤਾ ਅਗਦਵਸੇਨ ਯਂ ਸਾਸਪਤੇਲਮਿਸ੍ਸਿਤਂ ਸਾਲਿਆਦਿਧਞ੍ਞਂ ਆਕਿਰਨ੍ਤਿ, ਤਮ੍ਪਿਸ੍ਸ ਨਾਕਂਸੂਤਿ ਅਤ੍ਥੋ.

੪੫੭. ਏਤਾਦਿਸਨ੍ਤਿ ਏਵਰੂਪਂ ¶ . ਉਤ੍ਤਮਕਿਚ੍ਛਪਤ੍ਤਨ੍ਤਿ ਪਰਮਕਿਚ੍ਛਂ ਆਪਨ੍ਨਂ ਅਤਿਵਿਯ ਦੁਕ੍ਖਪ੍ਪਤ੍ਤਂ. ਰਤ੍ਤਾਭਤਨ੍ਤਿ ਰਤ੍ਤਿਯਂ ਆਭਤਂ. ਨੋਨੀਤਪਿਣ੍ਡਂ ਵਿਯਾਤਿ ਨਵਨੀਤਪਿਣ੍ਡਸਦਿਸਂ, ਮਂਸਪੇਸਿਮਤ੍ਤਤਾ ਏਵਂ ਵੁਤ੍ਤਂ. ਪਵੇਧਮਾਨਨ੍ਤਿ ਦੁਬ੍ਬਲਭਾਵੇਨ ਪਕਮ੍ਪਮਾਨਂ. ਸਸਂਸਯਨ੍ਤਿ ‘‘ਜੀਵਤਿ ਨੁ ਖੋ ਨ ਨੁ ਖੋ ਜੀਵਤੀ’’ਤਿ ਸਂਸਯਿਤਤਾਯ ਸਂਸਯਵਨ੍ਤਂ. ਜੀਵਿਤਸਾਵਸੇਸਨ੍ਤਿ ਜੀਵਿਤਟ੍ਠਿਤਿਯਾ ਹੇਤੁਭੂਤਾਨਂ ¶ ਸਾਧਨਾਨਂ ਅਭਾਵੇਨ ਕੇਵਲਂ ਜੀਵਿਤਮਤ੍ਤਾਵਸੇਸਕਂ.

੪੫੮. ਅਗ੍ਗਕੁਲਿਕੋ ਭਵਿਸ੍ਸਤਿ ਭੋਗਤੋ ਚਾਤਿ ਭੋਗਨਿਮਿਤ੍ਤਂ ਭੋਗਸ੍ਸ ਵਸੇਨ ਅਗ੍ਗਕੁਲਿਕੋ ਸੇਟ੍ਠਕੁਲਿਕੋ ਭਵਿਸ੍ਸਤੀਤਿ ਅਤ੍ਥੋ.

੪੫੯. ‘‘ਕਿਸ੍ਸ ਵਤ’’ਨ੍ਤਿ ਅਯਂ ਗਾਥਾ ਸਤ੍ਥੁ ਸਨ੍ਤਿਕੇ ਠਿਤੇਹਿ ਉਪਾਸਕੇਹਿ ਤੇਨ ਕਤਕਮ੍ਮਸ੍ਸ ਪੁਚ੍ਛਾਵਸੇਨ ਵੁਤ੍ਤਾ. ਸਾ ਚ ਖੋ ਸਿਵਥਿਕਾਯ ਸਨ੍ਨਿਪਤਿਤੇਹੀਤਿ ਵੇਦਿਤਬ੍ਬਾ. ਤਤ੍ਥ ਕਿਸ੍ਸਾਤਿ ਕਿਂ ਅਸ੍ਸ. ਵਤਨ੍ਤਿ ਵਤਸਮਾਦਾਨਂ. ਪੁਨ ਕਿਸ੍ਸਾਤਿ ਕੀਦਿਸਸ੍ਸ ਸੁਚਿਣ੍ਣਸ੍ਸ ਵਤਸ੍ਸ ਬ੍ਰਹ੍ਮਚਰਿਯਸ੍ਸ ਚਾਤਿ ਵਿਭਤ੍ਤਿਂ ਵਿਪਰਿਣਾਮੇਤ੍ਵਾ ਯੋਜਨਾ. ਏਤਾਦਿਸਨ੍ਤਿ ਗਣਿਕਾਯ ਕੁਚ੍ਛਿਯਾ ਨਿਬ੍ਬਤ੍ਤਨਂ, ਸੁਸਾਨੇ ਛਡ੍ਡਨਨ੍ਤਿ ਏਵਰੂਪਂ. ਬ੍ਯਸਨਨ੍ਤਿ ਅਨਤ੍ਥਂ. ਤਾਦਿਸਨ੍ਤਿ ਤਥਾਰੂਪਂ, ‘‘ਅਙ੍ਗੁਟ੍ਠਸ੍ਨੇਹੇਨ ਯਾਪੇਤਿ ਰਤ੍ਤਿ’’ਨ੍ਤਿਆਦਿਨਾ, ‘‘ਅਯਂ ਕੁਮਾਰੋ ਨਗਰਸ੍ਸਿਮਸ੍ਸ ਅਗ੍ਗਕੁਲਿਕੋ ਭਵਿਸ੍ਸਤੀ’’ਤਿਆਦਿਨਾ ਚ ਵੁਤ੍ਤਪ੍ਪਕਾਰਨ੍ਤਿ ਅਤ੍ਥੋ. ਇਦ੍ਧਿਨ੍ਤਿ ਦੇਵਿਦ੍ਧਿਂ, ਦਿਬ੍ਬਸਮ੍ਪਤ੍ਤਿਨ੍ਤਿ ਵੁਤ੍ਤਂ ਹੋਤਿ.

ਇਦਾਨਿ ਤੇਹਿ ਉਪਾਸਕੇਹਿ ਪੁਟ੍ਠੋ ਭਗਵਾ ਯਥਾ ਤਦਾ ਬ੍ਯਾਕਾਸਿ, ਤਂ ਦਸ੍ਸੇਨ੍ਤਾ ਸਙ੍ਗੀਤਿਕਾਰਾ –

‘‘ਬੁਦ੍ਧਪਮੁਖਸ੍ਸ ¶ ਭਿਕ੍ਖੁਸਙ੍ਘਸ੍ਸ, ਪੂਜਂ ਅਕਾਸਿ ਜਨਤਾ ਉਲ਼ਾਰਂ;

ਤਤ੍ਰਸ੍ਸ ਚਿਤ੍ਤਸ੍ਸਹੁ ਅਞ੍ਞਥਤ੍ਤਂ, ਵਾਚਂ ਅਭਾਸਿ ਫਰੁਸਂ ਅਸਬ੍ਭਂ.

‘‘ਸੋ ਤਂ ਵਿਤਕ੍ਕਂ ਪਵਿਨੋਦਯਿਤ੍ਵਾ, ਪੀਤਿਂ ਪਸਾਦਂ ਪਟਿਲਦ੍ਧਾ ਪਚ੍ਛਾ;

ਤਥਾਗਤਂ ¶ ਜੇਤਵਨੇ ਵਸਨ੍ਤਂ, ਯਾਗੁਯਾ ਉਪਟ੍ਠਾਸਿ ਸਤ੍ਤਰਤ੍ਤਂ.

‘‘ਤਸ੍ਸ ਵਤਂ ਤਂ ਪਨ ਬ੍ਰਹ੍ਮਚਰਿਯਂ, ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਏਤਾਦਿਸਂ ਬ੍ਯਸਨਂ ਪਾਪੁਣਿਤ੍ਵਾ, ਤਂ ਤਾਦਿਸਂ ਪਚ੍ਚਨੁਭੋਸ੍ਸਤਿਦ੍ਧਿਂ.

‘‘ਠਤ੍ਵਾਨ ਸੋ ਵਸ੍ਸਸਤਂ ਇਧੇਵ, ਸਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਸਹਬ੍ਯਤਂ ਗਚ੍ਛਤਿ ਵਾਸਵਸ੍ਸਾ’’ਤਿ. –

੪੬੦. ਤਤ੍ਥ ¶ ਜਨਤਾਤਿ ਜਨਸਮੂਹੋ, ਉਪਾਸਕਗਣੋਤਿ ਅਧਿਪ੍ਪਾਯੋ. ਤਤ੍ਰਾਤਿ ਤਸ੍ਸਂ ਪੂਜਾਯਂ. ਅਸ੍ਸਾਤਿ ਤਸ੍ਸ ਦਾਰਕਸ੍ਸ. ਚਿਤ੍ਤਸ੍ਸਹੁ ਅਞ੍ਞਥਤ੍ਤਨ੍ਤਿ ਪੁਰਿਮਭਵਸ੍ਮਿਂ ਚਿਤ੍ਤਸ੍ਸ ਅਞ੍ਞਥਾਭਾਵੋ ਅਨਾਦਰੋ ਅਗਾਰਵੋ ਅਪਚ੍ਚਯੋ ਅਹੋਸਿ. ਅਸਬ੍ਭਨ੍ਤਿ ਸਾਧੁਸਭਾਯ ਸਾਵੇਤੁਂ ਅਯੁਤ੍ਤਂ ਫਰੁਸਂ ਵਾਚਂ ਅਭਾਸਿ.

੪੬੧. ਸੋਤਿ ਸੋ ਅਯਂ. ਤਂ ਵਿਤਕ੍ਕਨ੍ਤਿ ਤਂ ਪਾਪਕਂ ਵਿਤਕ੍ਕਂ. ਪਵਿਨੋਦਯਿਤ੍ਵਾਤਿ ਮਾਤਰਾ ਕਤਾਯ ਸਞ੍ਞਤ੍ਤਿਯਾ ਵੂਪਸਮੇਤ੍ਵਾ. ਪੀਤਿਂ ਪਸਾਦਂ ਪਟਿਲਦ੍ਧਾਤਿ ਪੀਤਿਂ ਪਸਾਦਞ੍ਚ ਪਟਿਲਭਿਤ੍ਵਾ ਉਪ੍ਪਾਦੇਤ੍ਵਾ. ਯਾਗੁਯਾ ਉਪਟ੍ਠਾਸੀਤਿ ਯਾਗੁਦਾਨੇਨ ਉਪਟ੍ਠਹਿ. ਸਤ੍ਤਰਤ੍ਤਨ੍ਤਿ ਸਤ੍ਤਦਿਵਸਂ.

੪੬੨. ਤਸ੍ਸ ¶ ਵਤਂ ਤਂ ਪਨ ਬ੍ਰਹ੍ਮਚਰਿਯਨ੍ਤਿ ਤਂ ਮਯਾ ਹੇਟ੍ਠਾ ਵੁਤ੍ਤਪ੍ਪਕਾਰਂ ਅਤ੍ਤਨੋ ਚਿਤ੍ਤਸ੍ਸ ਪਸਾਦਨਂ ਦਾਨਞ੍ਚ ਇਮਸ੍ਸ ਪੁਗ੍ਗਲਸ੍ਸ ਵਤਂ ਤਂ ਬ੍ਰਹ੍ਮਚਰਿਯਞ੍ਚ, ਅਞ੍ਞਂ ਕਿਞ੍ਚਿ ਨਤ੍ਥੀਤਿ ਅਤ੍ਥੋ.

੪੬੩. ਠਤ੍ਵਾਨਾਤਿ ਯਾਵ ਆਯੁਪਰਿਯੋਸਾਨਾ ਇਧੇਵ ਮਨੁਸ੍ਸਲੋਕੇ ਠਤ੍ਵਾ. ਅਭਿਸਮ੍ਪਰਾਯਨ੍ਤਿ ਪੁਨਬ੍ਭਵੇ. ਸਹਬ੍ਯਤਂ ਗਚ੍ਛਤਿ ਵਾਸਵਸ੍ਸਾਤਿ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ¶ ਪੁਤ੍ਤਭਾਵੇਨ ਸਹਭਾਵਂ ਗਮਿਸ੍ਸਤਿ. ਅਨਾਗਤਤ੍ਥੇ ਹਿ ਇਦਂ ਪਚ੍ਚੁਪ੍ਪਨ੍ਨਕਾਲਵਚਨਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਕੁਮਾਰਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਸੇਰਿਣੀਪੇਤਿਂ ਆਰਬ੍ਭ ਵੁਤ੍ਤਂ. ਕੁਰੁਰਟ੍ਠੇ ਕਿਰ ਹਤ੍ਥਿਨਿਪੁਰੇ ਸੇਰਿਣੀ ਨਾਮ ਏਕਾ ਰੂਪੂਪਜੀਵਿਨੀ ਅਹੋਸਿ. ਤਤ੍ਥ ਚ ਉਪੋਸਥਕਰਣਤ੍ਥਾਯ ਤਤੋ ਤਤੋ ਭਿਕ੍ਖੂ ਸਨ੍ਨਿਪਤਿਂਸੁ. ਪੁਨ ਮਹਾਭਿਕ੍ਖੁਸਨ੍ਨਿਪਾਤੋ ਅਹੋਸਿ. ਤਂ ਦਿਸ੍ਵਾ ਮਨੁਸ੍ਸਾ ਤਿਲਤਣ੍ਡੁਲਾਦਿਂ ਸਪ੍ਪਿਨਵਨੀਤਮਧੁਆਦਿਞ੍ਚ ਬਹੁਂ ਦਾਨੂਪਕਰਣਂ ਸਜ੍ਜੇਤ੍ਵਾ ਮਹਾਦਾਨਂ ਪਵਤ੍ਤੇਸੁਂ. ਤੇਨ ਚ ਸਮਯੇਨ ਸਾ ਗਣਿਕਾ ਅਸ੍ਸਦ੍ਧਾ ਅਪ੍ਪਸਨ੍ਨਾ ਮਚ੍ਛੇਰਮਲਪਰਿਯੁਟ੍ਠਿਤਚਿਤ੍ਤਾ ਤੇਹਿ ਮਨੁਸ੍ਸੇਹਿ ‘‘ਏਹਿ ਤਾਵ ਇਦਂ ਦਾਨਂ ਅਨੁਮੋਦਾਹੀ’’ਤਿ ਉਸ੍ਸਾਹਿਤਾਪਿ ‘‘ਕਿਂ ਤੇਨ ਮੁਣ੍ਡਕਾਨਂ ਸਮਣਾਨਂ ਦਿਨ੍ਨੇਨਾ’’ਤਿ ਅਪ੍ਪਸਾਦਮੇਵ ਨੇਸਂ ਸਮ੍ਪਵੇਦੇਸਿ, ਕੁਤੋ ਅਪ੍ਪਮਤ੍ਤਕਸ੍ਸ ਪਰਿਚ੍ਚਾਗੋ.

ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਅਞ੍ਞਤਰਸ੍ਸ ਪਚ੍ਚਨ੍ਤਨਗਰਸ੍ਸ ਪਰਿਖਾਪਿਟ੍ਠੇ ਪੇਤੀ ਹੁਤ੍ਵਾ ਨਿਬ੍ਬਤ੍ਤਿ. ਅਥ ਹਤ੍ਥਿਨਿਪੁਰਵਾਸੀ ਅਞ੍ਞਤਰੋ ਉਪਾਸਕੋ ਵਣਿਜ੍ਜਾਯ ਤਂ ਨਗਰਂ ਗਨ੍ਤ੍ਵਾ ਰਤ੍ਤਿਯਾ ਪਚ੍ਚੂਸਸਮਯੇ ¶ ਪਰਿਖਾਪਿਟ੍ਠਂ ਗਤੋ ਤਾਦਿਸੇਨ ਪਯੋਜਨੇਨ. ਸਾ ਤਤ੍ਥ ਤਂ ਦਿਸ੍ਵਾ ਸਞ੍ਜਾਨਿਤ੍ਵਾ ਨਗ੍ਗਾ ਅਟ੍ਠਿਤ੍ਤਚਮਤ੍ਤਾਵਸੇਸਸਰੀਰਾ ਅਤਿਵਿਯ ਬੀਭਚ੍ਛਦਸ੍ਸਨਾ ਅਵਿਦੂਰੇ ਠਤ੍ਵਾ ਅਤ੍ਤਾਨਂ ਦਸ੍ਸੇਸਿ. ਸੋ ਤਂ ਦਿਸ੍ਵਾ –

‘‘ਨਗ੍ਗਾ ¶ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

‘‘ਅਹਂ ਭਦਨ੍ਤੇ ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਅਤ੍ਤਾਨਂ ਪਕਾਸੇਸਿ. ਪੁਨ ਤੇਨ –

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ. –

‘‘ਅਨਾਵਟੇਸੁ ¶ ਤਿਤ੍ਥੇਸੁ, ਵਿਚਿਨਿਂ ਅਡ੍ਢਮਾਸਕਂ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਾਸਿਮਤ੍ਤਨੋ.

‘‘ਨਦਿਂ ਉਪੇਮਿ ਤਸਿਤਾ, ਰਿਤ੍ਤਕਾ ਪਰਿਵਤ੍ਤਤਿ;

ਛਾਯਂ ਉਪੇਮਿ ਉਣ੍ਹੇਸੁ, ਆਤਪੋ ਪਰਿਵਤ੍ਤਤਿ.

‘‘ਅਗ੍ਗਿਵਣ੍ਣੋ ਚ ਮੇ ਵਾਤੋ, ਡਹਨ੍ਤੋ ਉਪਵਾਯਤਿ;

ਏਤਞ੍ਚ ਭਨ੍ਤੇ ਅਰਹਾਮਿ, ਅਞ੍ਞਞ੍ਚ ਪਾਪਕਂ ਤਤੋ.

‘‘ਗਨ੍ਤ੍ਵਾਨ ¶ ਹਤ੍ਥਿਨਿਂ ਪੁਰਂ, ਵਜ੍ਜੇਸਿ ਮਯ੍ਹ ਮਾਤਰਂ;

‘ਧੀਤਾ ਚ ਤੇ ਮਯਾ ਦਿਟ੍ਠਾ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’.

‘‘ਅਤ੍ਥਿ ਮੇ ਏਤ੍ਥ ਨਿਕ੍ਖਿਤ੍ਤਂ, ਅਨਕ੍ਖਾਤਞ੍ਚ ਤਂ ਮਯਾ;

ਚਤ੍ਤਾਰਿ ਸਤਸਹਸ੍ਸਾਨਿ, ਪਲ੍ਲਙ੍ਕਸ੍ਸ ਚ ਹੇਟ੍ਠਤੋ.

‘‘ਤਤੋ ਮੇ ਦਾਨਂ ਦਦਤੁ, ਤਸ੍ਸਾ ਚ ਹੋਤੁ ਜੀਵਿਕਾ;

ਦਾਨਂ ਦਤ੍ਵਾ ਚ ਮੇ ਮਾਤਾ, ਦਕ੍ਖਿਣਂ ਅਨੁਦਿਚ੍ਛਤੁ;

ਤਦਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’’ਤਿ. –

ਇਮਾਹਿ ¶ ਛਹਿ ਗਾਥਾਹਿ ਅਤ੍ਤਨਾ ਕਤਕਮ੍ਮਞ੍ਚੇਵ ਪੁਨ ਤੇਨ ਅਤ੍ਤਨੋ ਕਾਤਬ੍ਬਂ ਅਤ੍ਥਞ੍ਚ ਆਚਿਕ੍ਖਿ.

੪੬੭. ਤਤ੍ਥ ਅਨਾਵਟੇਸੁ ਤਿਤ੍ਥੇਸੂਤਿ ਕੇਨਚਿ ਅਨਿਵਾਰਿਤੇਸੁ ਨਦੀਤਲ਼ਾਕਾਦੀਨਂ ਤਿਤ੍ਥਪਦੇਸੇਸੁ, ਯਤ੍ਥ ਮਨੁਸ੍ਸਾ ਨ੍ਹਾਯਨ੍ਤਿ, ਉਦਕਕਿਚ੍ਚਂ ਕਰੋਨ੍ਤਿ, ਤਾਦਿਸੇਸੁ ਠਾਨੇਸੁ. ਵਿਚਿਨਿਂ ਅਡ੍ਢਮਾਸਕਨ੍ਤਿ ‘‘ਮਨੁਸ੍ਸੇਹਿ ਠਪੇਤ੍ਵਾ ਵਿਸ੍ਸਰਿਤਂ ਅਪਿਨਾਮੇਤ੍ਥ ਕਿਞ੍ਚਿ ਲਭੇਯ੍ਯ’’ਨ੍ਤਿ ਲੋਭਾਭਿਭੂਤਾ ਅਡ੍ਢਮਾਸਕਮਤ੍ਤਮ੍ਪਿ ਵਿਚਿਨਿਂ ਗਵੇਸਿਂ. ਅਥ ਵਾ ਅਨਾਵਟੇਸੁ ਤਿਤ੍ਥੇਸੂਤਿ ਉਪਸਙ੍ਕਮਨੇਨ ਕੇਨਚਿ ਅਨਿਵਾਰਿਤੇਸੁ ਸਤ੍ਤਾਨਂ ਪਯੋਗਾਸਯਸੁਦ੍ਧਿਯਾ ਕਾਰਣਭਾਵੇਨ ਤਿਤ੍ਥਭੂਤੇਸੁ ਸਮਣਬ੍ਰਾਹ੍ਮਣੇਸੁ ਵਿਜ੍ਜਮਾਨੇਸੁ. ਵਿਚਿਨਿਂ ਅਡ੍ਢਮਾਸਕਨ੍ਤਿ ਮਚ੍ਛੇਰਮਲਪਰਿਯੁਟ੍ਠਿਤਚਿਤ੍ਤਾ ਕਸ੍ਸਚਿ ਕਿਞ੍ਚਿ ਅਦੇਨ੍ਤੀ ਅਡ੍ਢਮਾਸਕਮ੍ਪਿ ਵਿਸੇਸੇਨ ਚਿਨਿਂ, ਨ ਸਞ੍ਚਿਨਿਂ ਪੁਞ੍ਞਂ. ਤੇਨਾਹ ‘‘ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਾਸਿਮਤ੍ਤਨੋ’’ਤਿ.

੪੬੮. ਤਸਿਤਾਤਿ ਪਿਪਾਸਿਤਾ. ਰਿਤ੍ਤਕਾਤਿ ਕਾਕਪੇਯ੍ਯਾ ਸਨ੍ਦਮਾਨਾਪਿ ਨਦੀ ਮਮ ਪਾਪਕਮ੍ਮੇਨ ਉਦਕੇਨ ਰਿਤ੍ਤਾ ਤੁਚ੍ਛਾ ਵਾਲਿਕਮਤ੍ਤਾ ¶ ਹੁਤ੍ਵਾ ਪਰਿਵਤ੍ਤਤਿ. ਉਣ੍ਹੇਸੂਤਿ ਉਣ੍ਹਸਮਯੇਸੁ. ਆਤਪੋ ਪਰਿਵਤ੍ਤਤੀਤਿ ਛਾਯਾਟ੍ਠਾਨਂ ਮਯਿ ਉਪਗਤਾਯ ਆਤਪੋ ਸਮ੍ਪਜ੍ਜਤਿ.

੪੬੯-੭੦. ਅਗ੍ਗਿਵਣ੍ਣੋਤਿ ਸਮ੍ਫਸ੍ਸੇਨ ਅਗ੍ਗਿਸਦਿਸੋ. ਤੇਨ ਵੁਤ੍ਤਂ ‘‘ਡਹਨ੍ਤੋ ਉਪਵਾਯਤੀ’’ਤਿ. ਏਤਞ੍ਚ, ਭਨ੍ਤੇ, ਅਰਹਾਮੀਤਿ, ਭਨ੍ਤੇਤਿ ਤਂ ਉਪਾਸਕਂ ਗਰੁਕਾਰੇਨ ਵਦਤਿ. ਭਨ੍ਤੇ, ਏਤਞ੍ਚ ਯਥਾਵੁਤ੍ਤਂ ਪਿਪਾਸਾਦਿਦੁਕ੍ਖਂ, ਅਞ੍ਞਞ੍ਚ ਤਤੋ ਪਾਪਕਂ ਦਾਰੁਣਂ ਦੁਕ੍ਖਂ ਅਨੁਭਵਿਤੁਂ ਅਰਹਾਮਿ ਤਜ੍ਜਸ੍ਸ ¶ ਪਾਪਸ੍ਸ ਕਤਤ੍ਤਾਤਿ ਅਧਿਪ੍ਪਾਯੋ. ਵਜ੍ਜੇਸੀਤਿ ਵਦੇਯ੍ਯਾਸਿ.

੪੭੧-੭੨. ਏਤ੍ਥ ਨਿਕ੍ਖਿਤ੍ਤਂ, ਅਨਕ੍ਖਾਤਨ੍ਤਿ ‘‘ਏਤ੍ਤਕਂ ਏਤ੍ਥ ਨਿਕ੍ਖਿਤ੍ਤ’’ਨ੍ਤਿ ਅਨਾਚਿਕ੍ਖਿਤਂ. ਇਦਾਨਿ ਤਸ੍ਸ ਪਰਿਮਾਣਂ ਠਪਿਤਟ੍ਠਾਨਞ੍ਚ ਦਸ੍ਸੇਨ੍ਤੀ ‘‘ਚਤ੍ਤਾਰਿ ਸਤਸਹਸ੍ਸਾਨਿ, ਪਲ੍ਲਙ੍ਕਸ੍ਸ ਚ ਹੇਟ੍ਠਤੋ’’ਤਿ ਆਹ. ਤਤ੍ਥ ਪਲ੍ਲਙ੍ਕਸ੍ਸਾਤਿ ਪੁਬ੍ਬੇ ਅਤ੍ਤਨੋ ਸਯਨਪਲ੍ਲਙ੍ਕਸ੍ਸ. ਤਤੋਤਿ ਨਿਹਿਤਧਨਤੋ ਏਕਦੇਸਂ ਗਹੇਤ੍ਵਾ ਮਮਂ ਉਦ੍ਦਿਸ੍ਸ ਦਾਨਂ ਦੇਤੁ. ਤਸ੍ਸਾਤਿ ਮਯ੍ਹਂ ਮਾਤੁਯਾ.

ਏਵਂ ¶ ਤਾਯ ਪੇਤਿਯਾ ਵੁਤ੍ਤੇ ਸੋ ਉਪਾਸਕੋ ਤਸ੍ਸਾ ਵਚਨਂ ਸਮ੍ਪਟਿਚ੍ਛਿਤ੍ਵਾ ਤਤ੍ਥ ਅਤ੍ਤਨੋ ਕਰਣੀਯਂ ਤੀਰੇਤ੍ਵਾ ਹਤ੍ਥਿਨਿਪੁਰਂ ਗਨ੍ਤ੍ਵਾ ਤਸ੍ਸਾ ਮਾਤੁਯਾ ਤਮਤ੍ਥਂ ਆਰੋਚੇਸਿ. ਤਮਤ੍ਥਂ ਦਸ੍ਸੇਤੁਂ –

ਸਾਧੂਤਿ ਸੋ ਪਟਿਸ੍ਸੁਤ੍ਵਾ, ਗਨ੍ਤ੍ਵਾਨ ਹਤ੍ਥਿਨਿਂ ਪੁਰਂ;

‘‘ਧੀਤਾ ਚ ਤੇ ਮਯਾ ਦਿਟ੍ਠਾ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

‘‘ਸਾ ਮਂ ਤਤ੍ਥ ਸਮਾਦਪੇਸਿ, ਵਜ੍ਜੇਸਿ ਮਯ੍ਹ ਮਾਤਰਂ;

‘ਧੀਤਾ ਚ ਤੇ ਮਯਾ ਦਿਟ੍ਠਾ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

‘‘‘ਅਤ੍ਥਿ ਚ ਮੇ ਏਤ੍ਥ ਨਿਕ੍ਖਿਤ੍ਤਂ, ਅਨਕ੍ਖਾਤਞ੍ਚ ਤਂ ਮਯਾ;

ਚਤ੍ਤਾਰਿ ਸਤਸਹਸ੍ਸਾਨਿ, ਪਲ੍ਲਙ੍ਕਸ੍ਸ ਚ ਹੇਟ੍ਠਤੋ.

‘‘‘ਤਤੋ ¶ ਮੇ ਦਾਨਂ ਦਦਤੁ, ਤਸ੍ਸਾ ਚ ਹੋਤੁ ਜੀਵਿਕਾ;

ਦਾਨਂ ਦਤ੍ਵਾ ਚ ਮੇ ਮਾਤਾ, ਦਕ੍ਖਿਣਂ ਅਨੁਦਿਚ੍ਛਤੁ;

ਤਦਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’.

‘‘ਤਤੋ ਹਿ ਸਾ ਦਾਨਮਦਾ, ਤਸ੍ਸਾ ਦਕ੍ਖਿਣਮਾਦਿਸੀ;

ਪੇਤੀ ਚ ਸੁਖਿਤਾ ਆਸਿ, ਤਸ੍ਸਾ ਚਾਸਿ ਸੁਜੀਵਿਕਾ’’ਤਿ. –

ਸਙ੍ਗੀਤਿਕਾਰਾ ¶ ਆਹਂਸੁ. ਤਾ ਸੁਵਿਞ੍ਞੇਯ੍ਯਾਵ.

ਤਂ ਸੁਤ੍ਵਾ ਤਸ੍ਸਾ ਮਾਤਾ ਭਿਕ੍ਖੁਸਙ੍ਘਸ੍ਸ ਦਾਨਂ ਦਤ੍ਵਾ ਤਸ੍ਸਾ ਆਦਿਸਿ. ਤੇਨ ਸਾ ਪਟਿਲਦ੍ਧੂਪਕਰਣਸਮ੍ਪਤ੍ਤਿਯਂ ਠਿਤਾ ਮਾਤੁ ਅਤ੍ਤਾਨਂ ਦਸ੍ਸੇਤ੍ਵਾ ਤਂ ਕਾਰਣਂ ਆਚਿਕ੍ਖਿ, ਮਾਤਾ ਭਿਕ੍ਖੂਨਂ ਆਰੋਚੇਸਿ, ਭਿਕ੍ਖੂ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਸੇਰਿਣੀਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਨਰਨਾਰਿਪੁਰਕ੍ਖਤੋ ¶ ਯੁਵਾਤਿ ਇਦਂ ਭਗਵਤਿ ਵੇਲ਼ੁਵਨੇ ਵਿਹਰਨ੍ਤੇ ਮਿਗਲੁਦ੍ਦਕਪੇਤਂ ਆਰਬ੍ਭ ਵੁਤ੍ਤਂ. ਰਾਜਗਹੇ ਕਿਰ ਅਞ੍ਞਤਰੋ ਲੁਦ੍ਦਕੋ ਰਤ੍ਤਿਨ੍ਦਿਵਂ ਮਿਗੇ ਵਧਿਤ੍ਵਾ ਜੀਵਿਕਂ ਕਪ੍ਪੇਸਿ. ਤਸ੍ਸੇਕੋ ਉਪਾਸਕੋ ਮਿਤ੍ਤੋ ਅਹੋਸਿ, ਸੋ ਤਂ ਸਬ੍ਬਕਾਲਂ ਪਾਪਤੋ ਨਿਵਤ੍ਤੇਤੁਂ ਅਸਕ੍ਕੋਨ੍ਤੋ ‘‘ਏਹਿ, ਸਮ੍ਮ, ਰਤ੍ਤਿਯਂ ਪਾਣਾਤਿਪਾਤਾ ਵਿਰਮਾਹੀ’’ਤਿ ਰਤ੍ਤਿਯਂ ਪੁਞ੍ਞੇ ਸਮਾਦਪੇਸਿ. ਸੋ ਰਤ੍ਤਿਯਂ ਵਿਰਮਿਤ੍ਵਾ ਦਿਵਾ ਏਵ ਪਾਣਾਤਿਪਾਤਂ ਕਰੋਤਿ.

ਸੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਰਾਜਗਹਸਮੀਪੇ ਵੇਮਾਨਿਕਪੇਤੋ ਹੁਤ੍ਵਾ ਨਿਬ੍ਬਤ੍ਤੋ, ਦਿਵਸਭਾਗਂ ਮਹਾਦੁਕ੍ਖਂ ਅਨੁਭਵਿਤ੍ਵਾ ਰਤ੍ਤਿਯਂ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤਾ ਸਮਙ੍ਗੀਭੂਤੋ ਪਰਿਚਾਰੇਸਿ. ਤਂ ਦਿਸ੍ਵਾ ਆਯਸ੍ਮਾ ਨਾਰਦੋ –

‘‘ਨਰਨਾਰਿਪੁਰਕ੍ਖਤੋ ¶ ਯੁਵਾ, ਰਜਨੀਯੇਹਿ ਕਾਮਗੁਣੇਹਿ ਸੋਭਸਿ;

ਦਿਵਸਂ ਅਨੁਭੋਸਿ ਕਾਰਣਂ, ਕਿਮਕਾਸਿ ਪੁਰਿਮਾਯ ਜਾਤਿਯਾ’’ਤਿ. –

ਇਮਾਯ ਗਾਥਾਯ ਪਟਿਪੁਚ੍ਛਿ. ਤਤ੍ਥ ਨਰਨਾਰਿਪੁਰਕ੍ਖਤੋਤਿ ਪਰਿਚਾਰਕਭੂਤੇਹਿ ਦੇਵਪੁਤ੍ਤੇਹਿ ਦੇਵਧੀਤਾਹਿ ਚ ਪੁਰਕ੍ਖਤੋ ਪਯਿਰੁਪਾਸਿਤੋ. ਯੁਵਾਤਿ ਤਰੁਣੋ. ਰਜਨੀਯੇਹੀਤਿ ਕਮਨੀਯੇਹਿ ਰਾਗੁਪ੍ਪਤ੍ਤਿਹੇਤੁਭੂਤੇਹਿ. ਕਾਮਗੁਣੇਹੀਤਿ ਕਾਮਕੋਟ੍ਠਾਸੇਹਿ. ਸੋਭਸੀਤਿ ਸਮਙ੍ਗਿਭਾਵੇਨ ਵਿਰੋਚਸਿ ਰਤ੍ਤਿਯਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਦਿਵਸਂ ਅਨੁਭੋਸਿ ਕਾਰਣ’’ਨ੍ਤਿ, ਦਿਵਸਭਾਗੇ ਪਨ ਨਾਨਪ੍ਪਕਾਰਂ ਕਾਰਣਂ ਘਾਤਨਂ ਪਚ੍ਚਨੁਭਵਸਿ. ਰਜਨੀਤਿ ਵਾ ਰਤ੍ਤੀਸੁ. ਯੇਹੀਤਿ ਨਿਪਾਤਮਤ੍ਤਂ. ਕਿਮਕਾਸਿ ਪੁਰਿਮਾਯ ਜਾਤਿਯਾਤਿ ਏਵਂ ਸੁਖਦੁਕ੍ਖਸਂਵਤ੍ਤਨਿਯਂ ਕਿਂ ਨਾਮ ਕਮ੍ਮਂ ਇਤੋ ਪੁਰਿਮਾਯ ਜਾਤਿਯਾ ਤ੍ਵਂ ਅਕਤ੍ਥ, ਤਂ ਕਥੇਹੀਤਿ ਅਤ੍ਥੋ ¶ .

ਤਂ ਸੁਤ੍ਵਾ ਪੇਤੋ ਥੇਰਸ੍ਸ ਅਤ੍ਤਨਾ ਕਤਕਮ੍ਮਂ ਆਚਿਕ੍ਖਨ੍ਤੋ –

‘‘ਅਹਂ ਰਾਜਗਹੇ ਰਮ੍ਮੇ, ਰਮਣੀਯੇ ਗਿਰਿਬ੍ਬਜੇ;

ਮਿਗਲੁਦ੍ਦੋ ਪੁਰੇ ਆਸਿਂ, ਲੋਹਿਤਪਾਣਿ ਦਾਰੁਣੋ.

‘‘ਅਵਿਰੋਧਕਰੇਸੁ ¶ ਪਾਣਿਸੁ, ਪੁਥੁਸਤ੍ਤੇਸੁ ਪਦੁਟ੍ਠਮਾਨਸੋ;

ਵਿਚਰਿਂ ਅਤਿਦਾਰੁਣੋ ਸਦਾ, ਪਰਹਿਂਸਾਯ ਰਤੋ ਅਸਞ੍ਞਤੋ.

‘‘ਤਸ੍ਸ ਮੇ ਸਹਾਯੋ ਸੁਹਦਯੋ, ਸਦ੍ਧੋ ਆਸਿ ਉਪਾਸਕੋ;

ਸੋਪਿ ਮਂ ਅਨੁਕਮ੍ਪਨ੍ਤੋ, ਨਿਵਾਰੇਸਿ ਪੁਨਪ੍ਪੁਨਂ.

‘‘‘ਮਾਕਾਸਿ ਪਾਪਕਂ ਕਮ੍ਮਂ, ਮਾ ਤਾਤ ਦੁਗ੍ਗਤਿਂ ਅਗਾ;

ਸਚੇ ਇਚ੍ਛਸਿ ਪੇਚ੍ਚ ਸੁਖਂ, ਵਿਰਮ ਪਾਣਵਧਾ ਅਸਂਯਮਾ.

‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਸੁਖਕਾਮਸ੍ਸ ਹਿਤਾਨੁਕਮ੍ਪਿਨੋ;

ਨਾਕਾਸਿਂ ਸਕਲਾਨੁਸਾਸਨਿਂ, ਚਿਰਪਾਪਾਭਿਰਤੋ ਅਬੁਦ੍ਧਿਮਾ.

‘‘ਸੋ ਮਂ ਪੁਨ ਭੂਰਿਸੁਮੇਧਸੋ, ਅਨੁਕਮ੍ਪਾਯ ਸਂਯਮੇ ਨਿਵੇਸਯਿ;

ਸਚੇ ਦਿਵਾ ਹਨਸਿ ਪਾਣਿਨੋ, ਅਥ ਤੇ ਰਤ੍ਤਿਂ ਭਵਤੁ ਸਂਯਮੋ.

‘‘ਸ੍ਵਾਹਂ ¶ ਦਿਵਾ ਹਨਿਤ੍ਵਾ ਪਾਣਿਨੋ, ਵਿਰਤੋ ਰਤ੍ਤਿਮਹੋਸਿ ਸਞ੍ਞਤੋ;

ਰਤ੍ਤਾਹਂ ਪਰਿਚਾਰੇਮਿ, ਦਿਵਾ ਖਜ੍ਜਾਮਿ ਦੁਗ੍ਗਤੋ.

‘‘ਤਸ੍ਸ ਕਮ੍ਮਸ੍ਸ ਕੁਸਲਸ੍ਸ, ਅਨੁਭੋਮਿ ਰਤ੍ਤਿਂ ਅਮਾਨੁਸਿਂ;

ਦਿਵਾ ਪਟਿਹਤਾਵ ਕੁਕ੍ਕੁਰਾ, ਉਪਧਾਵਨ੍ਤਿ ਸਮਨ੍ਤਾ ਖਾਦਿਤੁਂ.

‘‘ਯੇ ¶ ਚ ਤੇ ਸਤਤਾਨੁਯੋਗਿਨੋ, ਧੁਵਂ ਪਯੁਤ੍ਤਾ ਸੁਗਤਸ੍ਸ ਸਾਸਨੇ;

ਮਞ੍ਞਾਮਿ ਤੇ ਅਮਤਮੇਵ ਕੇਵਲਂ, ਅਧਿਗਚ੍ਛਨ੍ਤਿ ਪਦਂ ਅਸਙ੍ਖਤ’’ਨ੍ਤਿ. –

੪੭੯-੮੦. ਤਤ੍ਥ ¶ ਲੁਦ੍ਦੋਤਿ ਦਾਰੁਣੋ. ਲੋਹਿਤਪਾਣੀਤਿ ਅਭਿਣ੍ਹਂ ਪਾਣਘਾਤੇਨ ਲੋਹਿਤਮਕ੍ਖਿਤਪਾਣੀ. ਦਾਰੁਣੋਤਿ ਖਰੋ, ਸਤ੍ਤਾਨਂ ਹਿਂਸਨਕੋਤਿ ਅਤ੍ਥੋ. ਅਵਿਰੋਧਕਰੇਸੂਤਿ ਕੇਨਚਿ ਵਿਰੋਧਂ ਅਕਰੋਨ੍ਤੇਸੁ ਮਿਗਸਕੁਣਾਦੀਸੁ.

੪੮੨-੮੩. ਅਸਂਯਮਾਤਿ ਅਸਂਵਰਾ ਦੁਸ੍ਸੀਲ੍ਯਾ. ਸਕਲਾਨੁਸਾਸਨਿਨ੍ਤਿ ਸਬ੍ਬਂ ਅਨੁਸਾਸਨਿਂ, ਸਬ੍ਬਕਾਲਂ ਪਾਣਾਤਿਪਾਤਤੋ ਪਟਿਵਿਰਤਿਨ੍ਤਿ ਅਤ੍ਥੋ. ਚਿਰਪਾਪਾਭਿਰਤੋਤਿ ਚਿਰਕਾਲਂ ਪਾਪੇ ਅਭਿਰਤੋ.

੪੮੪. ਸਂਯਮੇਤਿ ਸੁਚਰਿਤੇ. ਨਿਵੇਸਯੀਹਿ ਨਿਵੇਸੇਸਿ. ਸਚੇ ਦਿਵਾ ਹਨਸਿ ਪਾਣਿਨੋ, ਅਥ ਤੇ ਰਤ੍ਤਿਂ ਭਵਤੁ ਸਂਯਮੋਤਿ ਨਿਵੇਸਿਤਾਕਾਰਦਸ੍ਸਨਂ. ਸੋ ਕਿਰ ਸਲ੍ਲਪਾਸਸਜ੍ਜਨਾਦਿਨਾ ਰਤ੍ਤਿਯਮ੍ਪਿ ਪਾਣਵਧਂ ਅਨੁਯੁਤ੍ਤੋ ਅਹੋਸਿ.

੪੮੫. ਦਿਵਾ ਖਜ੍ਜਾਮਿ ਦੁਗ੍ਗਤੋਤਿ ਇਦਾਨਿ ਦੁਗ੍ਗਤਿਂ ਗਤੋ ਮਹਾਦੁਕ੍ਖਪ੍ਪਤ੍ਤੋ ਦਿਵਸਭਾਗੇ ਖਾਦਿਯਾਮਿ. ਤਸ੍ਸ ਕਿਰ ਦਿਵਾ ਸੁਨਖੇਹਿ ਮਿਗਾਨਂ ਖਾਦਾਪਿਤਤ੍ਤਾ ਕਮ੍ਮਸਰਿਕ੍ਖਕਂ ਫਲਂ ਹੋਤਿ, ਦਿਵਸਭਾਗੇ ਮਹਨ੍ਤਾ ਸੁਨਖਾ ਉਪਧਾਵਿਤ੍ਵਾ ਅਟ੍ਠਿਸਙ੍ਘਾਤਮਤ੍ਤਾਵਸੇਸਂ ਸਰੀਰਂ ਕਰੋਨ੍ਤਿ. ਰਤ੍ਤਿਯਾ ਪਨ ਉਪਗਤਾਯ ਤਂ ਪਾਕਤਿਕਮੇਵ ਹੋਤਿ, ਦਿਬ੍ਬਸਮ੍ਪਤ੍ਤਿਂ ਅਨੁਭਵਤਿ. ਤੇਨ ਵੁਤ੍ਤਂ –

‘‘ਤਸ੍ਸ ¶ ਕਮ੍ਮਸ੍ਸ ਕੁਸਲਸ੍ਸ, ਅਨੁਭੋਮਿ ਰਤ੍ਤਿਂ ਅਮਾਨੁਸਿਂ;

ਦਿਵਾ ਪਟਿਹਤਾਵ ਕੁਕ੍ਕੁਰਾ, ਉਪਧਾਵਨ੍ਤਿ ਸਮਨ੍ਤਾ ਖਾਦਿਤੁ’’ਨ੍ਤਿ.

ਤਤ੍ਥ ਪਟਿਹਤਾਤਿ ਪਟਿਹਤਚਿਤ੍ਤਾ ਬਦ੍ਧਾਘਾਤਾ ਵਿਯ ਹੁਤ੍ਵਾ. ਸਮਨ੍ਤਾ ਖਾਦਿਤੁਨ੍ਤਿ ਮਮ ਸਰੀਰਂ ਸਮਨ੍ਤਤੋ ਖਾਦਿਤੁਂ ਉਪਧਾਵਨ੍ਤਿ. ਇਦਞ੍ਚ ਨੇਸਂ ਅਤਿਵਿਯ ਅਤ੍ਤਨੋ ਭਯਾਵਹਂ ਉਪਗਮਨਕਾਲਂ ਗਹੇਤ੍ਵਾ ਵੁਤ੍ਤਂ. ਤੇ ਪਨ ਉਪਧਾਵਿਤ੍ਵਾ ਅਟ੍ਠਿਮਤ੍ਤਾਵਸੇਸਂ ਸਰੀਰਂ ਕਤ੍ਵਾ ਗਚ੍ਛਨ੍ਤਿ.

੪੮੭. ਯੇ ਚ ਤੇ ਸਤਤਾਨੁਯੋਗਿਨੋਤਿ ਓਸਾਨਗਾਥਾਯ ਅਯਂ ਸਙ੍ਖੇਪਤ੍ਥੋ – ਅਹਮ੍ਪਿ ਨਾਮ ਰਤ੍ਤਿਯਂ ¶ ਪਾਣਵਧਮਤ੍ਤਤੋ ਵਿਰਤੋ ਏਵਰੂਪਂ ਸਮ੍ਪਤ੍ਤਿਂ ¶ ਅਨੁਭਵਾਮਿ. ਯੇ ਪਨ ਤੇ ਪੁਰਿਸਾ ਸੁਗਤਸ੍ਸ ਬੁਦ੍ਧਸ੍ਸ ਭਗਵਤੋ ਸਾਸਨੇ ਅਧਿਸੀਲਾਦਿਕੇ ਧੁਵਂ ਪਯੁਤ੍ਤਾ ਦਲ਼੍ਹਂ ਪਯੁਤ੍ਤਾ ਸਤਤਂ ਸਬ੍ਬਕਾਲਂ ਅਨੁਯੋਗਵਨ੍ਤਾ, ਤੇ ਪੁਞ੍ਞਵਨ੍ਤੋ ਕੇਵਲਂ ਲੋਕਿਯਸੁਖੇਨ ਅਸਮ੍ਮਿਸ੍ਸਂ ‘‘ਅਸਙ੍ਖਤਂ ਪਦ’’ਨ੍ਤਿ ਲਦ੍ਧਨਾਮਂ ਅਮਤਮੇਵ ਅਧਿਗਚ੍ਛਨ੍ਤਿ ਮਞ੍ਞੇ, ਨਤ੍ਥਿ ਤੇਸਂ ਤਦਧਿਗਮੇ ਕੋਚਿ ਵਿਬਨ੍ਧੋਤਿ.

ਏਵਂ ਤੇਨ ਪੇਤੇਨ ਵੁਤ੍ਤੇ ਥੇਰੋ ਤਂ ਪਵਤ੍ਤਿਂ ਸਤ੍ਥੁ ਆਰੋਚੇਸਿ. ਸਤ੍ਥਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਬ੍ਬਮ੍ਪਿ ਵੁਤ੍ਤਨਯਮੇਵ.

ਮਿਗਲੁਦ੍ਦਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੮. ਦੁਤਿਯਮਿਗਲੁਦ੍ਦਕਪੇਤਵਤ੍ਥੁਵਣ੍ਣਨਾ

ਕੂਟਾਗਾਰੇ ਚ ਪਾਸਾਦੇਤਿ ਇਦਂ ਭਗਵਤਿ ਵੇਲ਼ੁਵਨੇ ਵਿਹਰਨ੍ਤੇ ਅਪਰਂ ਮਿਗਲੁਦ੍ਦਕਪੇਤਂ ਆਰਬ੍ਭ ਵੁਤ੍ਤਂ. ਰਾਜਗਹੇ ਕਿਰ ਅਞ੍ਞਤਰੋ ਮਾਗਵਿਕੋ ਮਾਣਵੋ ਵਿਭਵਸਮ੍ਪਨ੍ਨੋਪਿ ਸਮਾਨੋ ਭੋਗਸੁਖਂ ਪਹਾਯ ਰਤ੍ਤਿਨ੍ਦਿਵਂ ਮਿਗੇ ਹਨਨ੍ਤੋ ਵਿਚਰਤਿ. ਤਸ੍ਸ ਸਹਾਯਭੂਤੋ ਏਕੋ ਉਪਾਸਕੋ ਅਨੁਦ੍ਦਯਂ ਪਟਿਚ੍ਚ – ‘‘ਸਾਧੁ, ਸਮ੍ਮ, ਪਾਣਾਤਿਪਾਤਤੋ ਵਿਰਮਾਹਿ, ਮਾ ਤੇ ਅਹੋਸਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾ’’ਤਿ ਓਵਾਦਂ ਅਦਾਸਿ. ਸੋ ¶ ਤਂ ਅਨਾਦਿਯਿ. ਅਥ ਸੋ ਉਪਾਸਕੋ ਅਞ੍ਞਤਰਂ ਅਤ੍ਤਨੋ ਮਨੋਭਾਵਨੀਯਂ ਖੀਣਾਸਵਤ੍ਥੇਰਂ ਯਾਚਿ – ‘‘ਸਾਧੁ, ਭਨ੍ਤੇ, ਅਸੁਕਪੁਰਿਸਸ੍ਸ ਤਥਾ ਧਮ੍ਮਂ ਦੇਸੇਥ, ਯਥਾ ਸੋ ਪਾਣਾਤਿਪਾਤਤੋ ਵਿਰਮੇਯ੍ਯਾ’’ਤਿ.

ਅਥੇਕਦਿਵਸਂ ਸੋ ਥੇਰੋ ਰਾਜਗਹੇ ਪਿਣ੍ਡਾਯ ਚਰਨ੍ਤੋ ਤਸ੍ਸ ਗੇਹਦ੍ਵਾਰੇ ਅਟ੍ਠਾਸਿ. ਤਂ ਦਿਸ੍ਵਾ ਸੋ ਮਾਗਵਿਕੋ ਸਞ੍ਜਾਤਬਹੁਮਾਨੋ ਪਚ੍ਚੁਗ੍ਗਨ੍ਤ੍ਵਾ ਗੇਹਂ ਪਵੇਸੇਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਨਿਸੀਦਿ ਥੇਰੋ ਪਞ੍ਞਤ੍ਤੇ ਆਸਨੇ, ਸੋਪਿ ਥੇਰਂ ਉਪਸਙ੍ਕਮਿਤ੍ਵਾ ਨਿਸੀਦਿ. ਤਸ੍ਸ ਥੇਰੋ ਪਾਣਾਤਿਪਾਤੇ ਆਦੀਨਵਂ, ਤਤੋ ਵਿਰਤਿਯਾ ਆਨਿਸਂਸਞ੍ਚ ਪਕਾਸੇਸਿ. ਸੋ ਤਂ ਸੁਤ੍ਵਾਪਿ ਤਤੋ ਵਿਰਮਿਤੁਂ ਨ ਇਚ੍ਛਿ. ਅਥ ਨਂ ਥੇਰੋ ਆਹ – ‘‘ਸਚੇ, ਤ੍ਵਂ ਆਵੁਸੋ, ਸਬ੍ਬੇਨ ਸਬ੍ਬਂ ਵਿਰਮਿਤੁਂ ਨ ਸਕ੍ਕੋਸਿ, ਰਤ੍ਤਿਮ੍ਪਿ ਤਾਵ ਵਿਰਮਸ੍ਸੂ’’ਤਿ, ਸੋ ‘‘ਸਾਧੁ, ਭਨ੍ਤੇ, ਵਿਰਮਾਮਿ ਰਤ੍ਤਿ’’ਨ੍ਤਿ ਤਤੋ ਵਿਰਮਿ. ਸੇਸਂ ਅਨਨ੍ਤਰਵਤ੍ਥੁਸਦਿਸਂ. ਗਾਥਾਸੁ ਪਨ –

‘‘ਕੂਟਾਗਾਰੇ ¶ ਚ ਪਾਸਾਦੇ, ਪਲ੍ਲਙ੍ਕੇ ਗੋਨਕਤ੍ਥਤੇ;

ਪਞ੍ਚਙ੍ਗਿਕੇਨ ਤੁਰਿਯੇਨ, ਰਮਸਿ ਸੁਪ੍ਪਵਾਦਿਤੇ.

‘‘ਤਤੋ ¶ ਰਤ੍ਯਾ ਵਿਵਸਾਨੇ, ਸੂਰਿਯੁਗ੍ਗਮਨਂ ਪਤਿ;

ਅਪਵਿਦ੍ਧੋ ਸੁਸਾਨਸ੍ਮਿਂ, ਬਹੁਦੁਕ੍ਖਂ ਨਿਗਚ੍ਛਸਿ.

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਇਦਂ ਦੁਕ੍ਖਂ ਨਿਗਚ੍ਛਸੀ’’ਤਿ. –

ਤੀਹਿ ਗਾਥਾਹਿ ਨਾਰਦਤ੍ਥੇਰੋ ਨਂ ਪਟਿਪੁਚ੍ਛਿ. ਅਥਸ੍ਸ ਪੇਤੋ –

‘‘ਅਹਂ ਰਾਜਗਹੇ ਰਮ੍ਮੇ, ਰਮਣੀਯੇ ਗਿਰਿਬ੍ਬਜੇ;

ਮਿਗਲੁਦ੍ਦੋ ਪੁਰੇ ਆਸਿਂ, ਲੁਦ੍ਦੋ ਚਾਸਿਮਸਞ੍ਞਤੋ.

‘‘ਤਸ੍ਸ ਮੇ ਸਹਾਯੋ ਸੁਹਦਯੋ, ਸਦ੍ਧੋ ਆਸਿ ਉਪਾਸਕੋ;

ਤਸ੍ਸ ¶ ਕੁਲੂਪਕੋ ਭਿਕ੍ਖੁ, ਆਸਿ ਗੋਤਮਸਾਵਕੋ;

ਸੋਪਿ ਮਂ ਅਨੁਕਮ੍ਪਨ੍ਤੋ, ਨਿਵਾਰੇਸਿ ਪੁਨਪ੍ਪੁਨਂ.

‘‘‘ਮਾਕਾਸਿ ਪਾਪਕਂ ਕਮ੍ਮਂ, ਮਾ ਤਾਤ ਦੁਗ੍ਗਤਿਂ ਅਗਾ;

ਸਚੇ ਇਚ੍ਛਸਿ ਪੇਚ੍ਚ ਸੁਖਂ, ਵਿਰਮ ਪਾਣਵਧਾ ਅਸਂਯਮਾ’.

‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਸੁਖਕਾਮਸ੍ਸ ਹਿਤਾਨੁਕਮ੍ਪਿਨੋ;

ਨਾਕਾਸਿਂ ਸਕਲਾਨੁਸਾਸਨਿਂ, ਚਿਰਪਾਪਾਭਿਰਤੋ ਅਬੁਦ੍ਧਿਮਾ.

‘‘ਸੋ ਮਂ ਪੁਨ ਭੂਰਿਸੁਮੇਧਸੋ, ਅਨੁਕਮ੍ਪਾਯ ਸਂਯਮੇ ਨਿਵੇਸਯਿ;

‘ਸਚੇ ਦਿਵਾ ਹਨਸਿ ਪਾਣਿਨੋ, ਅਥ ਤੇ ਰਤ੍ਤਿਂ ਭਵਤੁ ਸਂਯਮੋ’.

‘‘ਸ੍ਵਾਹਂ ਦਿਵਾ ਹਨਿਤ੍ਵਾ ਪਾਣਿਨੋ, ਵਿਰਤੋ ਰਤ੍ਤਿਮਹੋਸਿ ਸਞ੍ਞਤੋ;

ਰਤ੍ਤਾਹਂ ਪਰਿਚਾਰੇਮਿ, ਦਿਵਾ ਖਜ੍ਜਾਮਿ ਦੁਗ੍ਗਤੋ.

‘‘ਤਸ੍ਸ ¶ ਕਮ੍ਮਸ੍ਸ ਕੁਸਲਸ੍ਸ, ਅਨੁਭੋਮਿ ਰਤ੍ਤਿਂ ਅਮਾਨੁਸਿਂ;

ਦਿਵਾ ਪਟਿਹਤਾਵ ਕੁਕ੍ਕੁਰਾ, ਉਪਧਾਵਨ੍ਤਿ ਸਮਨ੍ਤਾ ਖਾਦਿਤੁਂ.

‘‘ਯੇ ¶ ਚ ਤੇ ਸਤਤਾਨੁਯੋਗਿਨੋ, ਧੁਵਂ ਪਯੁਤ੍ਤਾ ਸੁਗਤਸ੍ਸ ਸਾਸਨੇ;

ਮਞ੍ਞਾਮਿ ਤੇ ਅਮਤਮੇਵ ਕੇਵਲਂ, ਅਧਿਗਚ੍ਛਨ੍ਤਿ ਪਦਂ ਅਸਙ੍ਖਤ’’ਨ੍ਤਿ. –

ਤਮਤ੍ਥਂ ਆਚਿਕ੍ਖਿ. ਤਾਸਂ ਅਤ੍ਥੋ ਹੇਟ੍ਠਾ ਵੁਤ੍ਤਨਯੋਵ.

ਦੁਤਿਯਮਿਗਲੁਦ੍ਦਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੯. ਕੂਟਵਿਨਿਚ੍ਛਯਿਕਪੇਤਵਤ੍ਥੁਵਣ੍ਣਨਾ

ਮਾਲੀ ਕਿਰਿਟੀ ਕਾਯੂਰੀਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਕੂਟਵਿਨਿਚ੍ਛਯਿਕਪੇਤਂ ਆਰਬ੍ਭ ਵੁਤ੍ਤਂ. ਤਦਾ ਬਿਮ੍ਬਿਸਾਰੋ ਰਾਜਾ ਮਾਸਸ੍ਸ ਛਸੁ ਦਿਵਸੇਸੁ ਉਪੋਸਥਂ ਉਪਵਸਤਿ, ਤਂ ਅਨੁਵਤ੍ਤਨ੍ਤਾ ਬਹੂ ਮਨੁਸ੍ਸਾ ਉਪੋਸਥਂ ਉਪਵਸਨ੍ਤਿ. ਰਾਜਾ ਅਤ੍ਤਨੋ ਸਨ੍ਤਿਕਂ ਆਗਤਾਗਤੇ ਮਨੁਸ੍ਸੇ ਪੁਚ੍ਛਤਿ – ‘‘ਕਿਂ ਤੁਮ੍ਹੇਹਿ ਉਪੋਸਥੋ ਉਪਵੁਤ੍ਥੋ, ਉਦਾਹੁ ਨ ਉਪਵੁਤ੍ਥੋ’’ਤਿ? ਤਤ੍ਰੇਕੋ ਅਧਿਕਰਣੇ ਨਿਯੁਤ੍ਤਕਪੁਰਿਸੋ ਪਿਸੁਣਵਾਚੋ ਨੇਕਤਿਕੋ ਲਞ੍ਜਗਾਹਕੋ ‘‘ਨ ਉਪਵੁਤ੍ਥੋਮ੍ਹੀ’’ਤਿ ਵਤ੍ਤੁਂ ਅਸਹਨ੍ਤੋ ‘‘ਉਪਵੁਤ੍ਥੋਮ੍ਹਿ, ਦੇਵਾ’’ਤਿ ਆਹ. ਅਥ ਨਂ ਰਾਜਸਮੀਪਤੋ ਨਿਕ੍ਖਨ੍ਤਂ ਸਹਾਯੋ ਆਹ – ‘‘ਕਿਂ, ਸਮ੍ਮ, ਅਜ੍ਜ ਤਯਾ ਉਪਵੁਤ੍ਥੋ’’ਤਿ? ‘‘ਭਯੇਨਾਹਂ, ਸਮ੍ਮ, ਰਞ੍ਞੋ ਸਮ੍ਮੁਖਾ ਏਵਂ ਅਵੋਚਂ, ਨਾਹਂ ਉਪੋਸਥਿਕੋ’’ਤਿ.

ਅਥ ਨਂ ਸਹਾਯੋ ਆਹ – ‘‘ਯਦਿ ਏਵਂ ਉਪਡ੍ਢੁਪੋਸਥੋਪਿ ਤਾਵ ਤੇ ਅਜ੍ਜ ਹੋਤੁ, ਉਪੋਸਥਙ੍ਗਾਨਿ ਸਮਾਦਿਯਾਹੀ’’ਤਿ. ਸੋ ਤਸ੍ਸ ਵਚਨਂ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਗੇਹਂ ਗਨ੍ਤ੍ਵਾ ਅਭੁਤ੍ਵਾਵ ਮੁਖਂ ਵਿਕ੍ਖਾਲੇਤ੍ਵਾ ਉਪੋਸਥਂ ਅਧਿਟ੍ਠਾਯ ਰਤ੍ਤਿਯਂ ਵਾਸੂਪਗਤੋ ਰਿਤ੍ਤਾਸਯਸਮ੍ਭੂਤੇਨ ¶ ਬਲਵਵਾਤਹੇਤੁਕੇਨ ਸੂਲੇਨ ਉਪਚ੍ਛਿਨ੍ਨਾਯੁਸਙ੍ਖਾਰੋ ਚੁਤਿਅਨਨ੍ਤਰਂ ਪਬ੍ਬਤਕੁਚ੍ਛਿਯਂ ਵੇਮਾਨਿਕਪੇਤੋ ¶ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਹਿ ਏਕਰਤ੍ਤਿਂ ਉਪੋਸਥਰਕ੍ਖਣਮਤ੍ਤੇਨ ਵਿਮਾਨਂ ਪਟਿਲਭਿ ਦਸਕਞ੍ਞਾਸਹਸ੍ਸਪਰਿਵਾਰਂ ਮਹਤਿਞ੍ਚ ਦਿਬ੍ਬਸਮ੍ਪਤ੍ਤਿਂ. ਕੂਟਵਿਨਿਚ੍ਛਯਿਕਤਾਯ ਪਨ ਪੇਸੁਣਿਕਤਾਯ ਚ ਅਤ੍ਤਨੋ ਪਿਟ੍ਠਿਮਂਸਾਨਿ ਸਯਮੇਵ ਓਕ੍ਕਨ੍ਤਿਤ੍ਵਾ ਖਾਦਤਿ. ਤਂ ਆਯਸ੍ਮਾ ਨਾਰਦੋ ਗਿਜ੍ਜਕੂਟਤੋ ਓਤਰਨ੍ਤੋ ਦਿਸ੍ਵਾ –

‘‘ਮਾਲੀ ਕਿਰਿਟੀ ਕਾਯੂਰੀ, ਗਤ੍ਤਾ ਤੇ ਚਨ੍ਦਨੁਸ੍ਸਦਾ;

ਪਸਨ੍ਨਮੁਖਵਣ੍ਣੋਸਿ, ਸੂਰਿਯਵਣ੍ਣੋਵ ਸੋਭਸਿ.

‘‘ਅਮਾਨੁਸਾ ¶ ਪਾਰਿਸਜ੍ਜਾ, ਯੇ ਤੇਮੇ ਪਰਿਚਾਰਕਾ;

ਦਸ ਕਞ੍ਞਾਸਹਸ੍ਸਾਨਿ, ਯਾ ਤੇਮਾ ਪਰਿਚਾਰਿਕਾ;

ਤਾ ਕਮ੍ਬੁਕਾਯੂਰਧਰਾ, ਕਞ੍ਚਨਾਵੇਲ਼ਭੂਸਿਤਾ.

‘‘ਮਹਾਨੁਭਾਵੋਸਿ ਤੁਵਂ, ਲੋਮਹਂਸਨਰੂਪਵਾ;

ਪਿਟ੍ਠਿਮਂਸਾਨਿ ਅਤ੍ਤਨੋ, ਸਾਮਂ ਉਕ੍ਕਚ੍ਚ ਖਾਦਸਿ.

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪਿਟ੍ਠਿਮਂਸਾਨਿ ਅਤ੍ਤਨੋ;

‘‘ਅਤ੍ਤਨੋਹਂ ਅਨਤ੍ਥਾਯ, ਜੀਵਲੋਕੇ ਅਚਾਰਿਸਂ;

ਪੇਸੁਞ੍ਞਮੁਸਾਵਾਦੇਨ, ਨਿਕਤਿਵਞ੍ਚਨਾਯ ਚ.

‘‘ਤਤ੍ਥਾਹਂ ਪਰਿਸਂ ਗਨ੍ਤ੍ਵਾ, ਸਚ੍ਚਕਾਲੇ ਉਪਟ੍ਠਿਤੇ;

ਅਤ੍ਥਂ ਧਮ੍ਮਂ ਨਿਰਾਕਤ੍ਵਾ, ਅਧਮ੍ਮਮਨੁਵਤ੍ਤਿਸਂ.

‘‘ਏਵਂ ਸੋ ਖਾਦਤਤ੍ਤਾਨਂ, ਯੋ ਹੋਤਿ ਪਿਟ੍ਠਿਮਂਸਿਕੋ;

ਯਥਾਹਂ ਅਜ੍ਜ ਖਾਦਾਮਿ, ਪਿਟ੍ਠਿਮਂਸਾਨਿ ਅਤ੍ਤਨੋ.

‘‘ਤਯਿਦਂ ¶ ਤਯਾ ਨਾਰਦ ਸਾਮਂ ਦਿਟ੍ਠਂ, ਅਨੁਕਮ੍ਪਕਾ ਯੇ ਕੁਸਲਾ ਵਦੇਯ੍ਯੁਂ;

ਮਾ ਪੇਸੁਣਂ ਮਾ ਚ ਮੁਸਾ ਅਭਾਣਿ, ਮਾ ਖੋਸਿ ਪਿਟ੍ਠਿਮਂਸਿਕੋ ਤੁਵ’’ਨ੍ਤਿ. –

ਥੇਰੋ ¶ ਚਤੂਹਿ ਗਾਥਾਹਿ ਪੁਚ੍ਛਿ, ਸੋਪਿ ਤਸ੍ਸ ਚਤੂਹਿ ਗਾਥਾਹਿ ਏਤਮਤ੍ਥਂ ਵਿਸ੍ਸਜ੍ਜੇਸਿ.

੪੯੯. ਤਤ੍ਥ ਮਾਲੀਤਿ ਮਾਲਧਾਰੀ, ਦਿਬ੍ਬਪੁਪ੍ਫੇਹਿ ਪਟਿਮਣ੍ਡਿਤੋਤਿ ਅਧਿਪ੍ਪਾਯੋ. ਕਿਰਿਟੀਤਿ ਵੇਠਿਤਸੀਸੋ. ਕਾਯੂਰੀਤਿ ਕੇਯੂਰਵਾ, ਬਾਹਾਲਙ੍ਕਾਰਪਟਿਮਣ੍ਡਿਤੋਤਿ ਅਤ੍ਥੋ. ਗਤ੍ਤਾਤਿ ਸਰੀਰਾਵਯਵਾ. ਚਨ੍ਦਨੁਸ੍ਸਦਾਤਿ ਚਨ੍ਦਨਸਾਰਾਨੁਲਿਤ੍ਤਾ. ਸੂਰਿਯਵਣ੍ਣੋਵ ਸੋਭਸੀਤਿ ਬਾਲਸੂਰਿਯਸਦਿਸਵਣ੍ਣੋ ਏਵ ਹੁਤ੍ਵਾ ਵਿਰੋਚਸਿ. ‘‘ਅਰਣਵਣ੍ਣੀ ਪਭਾਸਸੀ’’ਤਿਪਿ ਪਾਲ਼ਿ, ਅਰਣਨ੍ਤਿ ਅਰਣਿਯੇਹਿ ਦੇਵੇਹਿ ਸਦਿਸਵਣ੍ਣੋ ਅਰਿਯਾਵਕਾਸੋਤਿ ¶ ਅਤ੍ਥੋ.

੫੦੦. ਪਾਰਿਸਜ੍ਜਾਤਿ ਪਰਿਸਪਰਿਯਾਪਨ੍ਨਾ, ਉਪਟ੍ਠਾਕਾਤਿ ਅਤ੍ਥੋ. ਤੁਵਨ੍ਤਿ ਤ੍ਵਂ. ਲੋਮਹਂਸਨਰੂਪਵਾਤਿ ਪਸ੍ਸਨ੍ਤਾਨਂ ਲੋਮਹਂਸਜਨਨਰੂਪਯੁਤ੍ਤੋ. ਮਹਾਨੁਭਾਵਤਾਸਮਙ੍ਗਿਤਾਯ ਹੇਤਂ ਵੁਤ੍ਤਂ. ਉਕ੍ਕਚ੍ਚਾਤਿ ਉਕ੍ਕਨ੍ਤਿਤ੍ਵਾ, ਛਿਨ੍ਦਿਤ੍ਵਾਤਿ ਅਤ੍ਥੋ.

੫੦੩. ਅਚਾਰਿਸਨ੍ਤਿ ਅਚਰਿਂ ਪਟਿਪਜ੍ਜਿਂ. ਪੇਸੁਞ੍ਞਮੁਸਾਵਾਦੇਨਾਤਿ ਪੇਸੁਞ੍ਞੇਨ ਚੇਵ ਮੁਸਾਵਾਦੇਨ ਚ. ਨਿਕਤਿਵਞ੍ਚਨਾਯ ਚਾਤਿ ਨਿਕਤਿਯਾ ਵਞ੍ਚਨਾਯ ਚ ਪਤਿਰੂਪਦਸ੍ਸਨੇਨ ਪਰੇਸਂ ਵਿਕਾਰੇਨ ਵਞ੍ਚਨਾਯ ਚ.

੫੦੪. ਸਚ੍ਚਕਾਲੇਤਿ ਸਚ੍ਚਂ ਵਤ੍ਤੁਂ ਯੁਤ੍ਤਕਾਲੇ. ਅਤ੍ਥਨ੍ਤਿ ਦਿਟ੍ਠਧਮ੍ਮਿਕਾਦਿਭੇਦਂ ਹਿਤਂ. ਧਮ੍ਮਨ੍ਤਿ ਕਾਰਣਂ ਞਾਯਂ. ਨਿਰਾਕਤ੍ਵਾਤਿ ਛਡ੍ਡੇਤ੍ਵਾ ਪਹਾਯ. ਸੋਤਿ ਯੋ ਪੇਸੁਞ੍ਞਾਦਿਂ ਆਚਰਤਿ, ਸੋ ਸਤ੍ਤੋ. ਸੇਸਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਮੇਵ.

ਕੂਟਵਿਨਿਚ੍ਛਯਿਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੧੦. ਧਾਤੁਵਿਵਣ੍ਣਪੇਤਵਤ੍ਥੁਵਣ੍ਣਨਾ

ਅਨ੍ਤਲਿਕ੍ਖਸ੍ਮਿਂ ¶ ਤਿਟ੍ਠਨ੍ਤੋਤਿ ਇਦਂ ਧਾਤੁਵਿਵਣ੍ਣਪੇਤਵਤ੍ਥੁ. ਭਗਵਤਿ ਕੁਸਿਨਾਰਾਯਂ ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇ ਯਮਕਸਾਲਾਨਮਨ੍ਤਰੇ ਪਰਿਨਿਬ੍ਬੁਤੇ ਧਾਤੁਵਿਭਾਗੇ ਚ ਕਤੇ ਰਾਜਾ ਅਜਾਤਸਤ੍ਤੁ ਅਤ੍ਤਨਾ ਲਦ੍ਧਧਾਤੁਭਾਗਂ ਗਹੇਤ੍ਵਾ ਸਤ੍ਤ ਵਸ੍ਸਾਨਿ ਸਤ੍ਤ ਚ ਮਾਸੇ ਸਤ੍ਤ ਚ ਦਿਵਸੇ ਬੁਦ੍ਧਗੁਣੇ ਅਨੁਸ੍ਸਰਨ੍ਤੋ ਉਲ਼ਾਰਪੂਜਂ ਪਵਤ੍ਤੇਸਿ. ਤਤ੍ਥ ਅਸਙ੍ਖੇਯ੍ਯਾ ਅਪ੍ਪਮੇਯ੍ਯਾ ਮਨੁਸ੍ਸਾ ਚਿਤ੍ਤਾਨਿ ਪਸਾਦੇਤ੍ਵਾ ¶ ਸਗ੍ਗੂਪਗਾ ਅਹੇਸੁਂ, ਛਲ਼ਾਸੀਤਿਮਤ੍ਤਾਨਿ ਪਨ ਪੁਰਿਸਸਹਸ੍ਸਾਨਿ ਚਿਰਕਾਲਭਾਵਿਤੇਨ ਅਸ੍ਸਦ੍ਧਿਯੇਨ ਮਿਚ੍ਛਾਦਸ੍ਸਨੇਨ ਚ ਵਿਪਲ੍ਲਤ੍ਥਚਿਤ੍ਤਾ ਪਸਾਦਨੀਯੇਪਿ ਠਾਨੇ ਅਤ੍ਤਨੋ ਚਿਤ੍ਤਾਨਿ ਪਦੋਸੇਤ੍ਵਾ ਪੇਤੇਸੁ ਉਪ੍ਪਜ੍ਜਿਂਸੁ. ਤਸ੍ਮਿਂਯੇਵ ਰਾਜਗਹੇ ਅਞ੍ਞਤਰਸ੍ਸ ਵਿਭਵਸਮ੍ਪਨ੍ਨਸ੍ਸ ਕੁਟੁਮ੍ਬਿਕਸ੍ਸ ਭਰਿਯਾ ਧੀਤਾ ਸੁਣਿਸਾ ਚ ਪਸਨ੍ਨਚਿਤ੍ਤਾ ‘‘ਧਾਤੁਪੂਜਂ ਕਰਿਸ੍ਸਾਮਾ’’ਤਿ ਗਨ੍ਧਪੁਪ੍ਫਾਦੀਨਿ ਗਹੇਤ੍ਵਾ ਧਾਤੁਟ੍ਠਾਨਂ ਗਨ੍ਤੁਂ ਆਰਦ੍ਧਾ. ਸੋ ਕੁਟੁਮ੍ਬਿਕੋ ‘‘ਕਿਂ ਅਟ੍ਠਿਕਾਨਂ ਪੂਜਨੇਨਾ’’ਤਿ ਤਾ ਪਰਿਭਾਸੇਤ੍ਵਾ ਧਾਤੁਪੂਜਂ ਵਿਵਣ੍ਣੇਸਿ. ਤਾਪਿ ਤਸ੍ਸ ਵਚਨਂ ਅਨਾਦਿਯਿਤ੍ਵਾ ਤਤ੍ਥ ਗਨ੍ਤ੍ਵਾ ਧਾਤੁਪੂਜਂ ਕਤ੍ਵਾ ਗੇਹਂ ਆਗਤਾ ਤਾਦਿਸੇਨ ਰੋਗੇਨ ਅਭਿਭੂਤਾ ਨਚਿਰਸ੍ਸੇਵ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਂਸੁ. ਸੋ ਪਨ ਕੋਧੇਨ ਅਭਿਭੂਤੋ ਨਚਿਰਸ੍ਸੇਵ ਕਾਲਂ ਕਤ੍ਵਾ ਤੇਨ ਪਾਪਕਮ੍ਮੇਨ ਪੇਤੇਸੁ ਨਿਬ੍ਬਤ੍ਤਿ.

ਅਥੇਕਦਿਵਸਂ ¶ ਆਯਸ੍ਮਾ ਮਹਾਕਸ੍ਸਪੋ ਸਤ੍ਤੇਸੁ ਅਨੁਕਮ੍ਪਾਯ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸਿ, ਯਥਾ ਮਨੁਸ੍ਸਾ ਤੇ ਪੇਤੇ ਤਾ ਚ ਦੇਵਤਾਯੋ ਪਸ੍ਸਨ੍ਤਿ. ਤਥਾ ਪਨ ਕਤ੍ਵਾ ਚੇਤਿਯਙ੍ਗਣੇ ਠਿਤੋ ਤਂ ਧਾਤੁਵਿਵਣ੍ਣਕਂ ਪੇਤਂ ਤੀਹਿ ਗਾਥਾਹਿ ਪੁਚ੍ਛਿ. ਤਸ੍ਸ ਸੋ ਪੇਤੋ ਬ੍ਯਾਕਾਸਿ –

‘‘ਅਨ੍ਤਲਿਕ੍ਖਸ੍ਮਿਂ ਤਿਟ੍ਠਨ੍ਤੋ, ਦੁਗ੍ਗਨ੍ਧੋ ਪੂਤਿ ਵਾਯਸਿ;

ਮੁਖਞ੍ਚ ਤੇ ਕਿਮਯੋ ਪੂਤਿਗਨ੍ਧਂ, ਖਾਦਨ੍ਤਿ ਕਿਂ ਕਮ੍ਮਮਕਾਸਿ ਪੁਬ੍ਬੇ.

‘‘ਤਤੋ ਸਤ੍ਥਂ ਗਹੇਤ੍ਵਾਨ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਂ;

ਖਾਰੇਨ ਪਰਿਪ੍ਫੋਸਿਤ੍ਵਾ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਂ.

‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਇਦਂ ਦੁਕ੍ਖਂ ਨਿਗਚ੍ਛਸੀ’’ਤਿ.

‘‘ਅਹਂ ¶ ਰਾਜਗਹੇ ਰਮ੍ਮੇ, ਰਮਣੀਯੇ ਗਿਰਿਬ੍ਬਜੇ;

ਇਸ੍ਸਰੋ ਧਨਧਞ੍ਞਸ੍ਸ, ਸੁਪਹੂਤਸ੍ਸ ਮਾਰਿਸ.

‘‘ਤਸ੍ਸਾਯਂ ਮੇ ਭਰਿਯਾ ਚ, ਧੀਤਾ ਚ ਸੁਣਿਸਾ ਚ ਮੇ;

ਤਾ ਮਾਲਂ ਉਪ੍ਪਲਞ੍ਚਾਪਿ, ਪਚ੍ਚਗ੍ਘਞ੍ਚ ਵਿਲੇਪਨਂ;

ਥੂਪਂ ਹਰਨ੍ਤਿਯੋ ਵਾਰੇਸਿਂ, ਤਂ ਪਾਪਂ ਪਕਤਂ ਮਯਾ.

‘‘ਛਲ਼ਾਸੀਤਿਸਹਸ੍ਸਾਨਿ ¶ , ਮਯਂ ਪਚ੍ਚਤ੍ਤਵੇਦਨਾ;

ਥੂਪਪੂਜਂ ਵਿਵਣ੍ਣੇਤ੍ਵਾ, ਪਚ੍ਚਾਮ ਨਿਰਯੇ ਭੁਸਂ.

‘‘ਯੇ ਚ ਖੋ ਥੂਪਪੂਜਾਯ, ਵਤ੍ਤਨ੍ਤੇ ਅਰਹਤੋ ਮਹੇ;

ਆਦੀਨਵਂ ਪਕਾਸੇਨ੍ਤਿ, ਵਿਵੇਚਯੇਥ ਨੇ ਤਤੋ.

‘‘ਇਮਾ ਚ ਪਸ੍ਸ ਅਯਨ੍ਤਿਯੋ, ਮਾਲਧਾਰੀ ਅਲਙ੍ਕਤਾ;

ਮਾਲਾਵਿਪਾਕਂਨੁਭੋਨ੍ਤਿਯੋ, ਸਮਿਦ੍ਧਾ ਚ ਤਾ ਯਸਸ੍ਸਿਨਿਯੋ.

‘‘ਤਞ੍ਚ ¶ ਦਿਸ੍ਵਾਨ ਅਚ੍ਛੇਰਂ, ਅਬ੍ਭੁਤਂ ਲੋਮਹਂਸਨਂ;

ਨਮੋ ਕਰੋਨ੍ਤਿ ਸਪ੍ਪਞ੍ਞਾ, ਵਨ੍ਦਨ੍ਤਿ ਤਂ ਮਹਾਮੁਨਿਂ.

‘‘ਸੋਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;

ਥੂਪਪੂਜਂ ਕਰਿਸ੍ਸਾਮਿ, ਅਪ੍ਪਮਤ੍ਤੋ ਪੁਨਪ੍ਪੁਨ’’ਨ੍ਤਿ.

੫੦੭-੮. ਤਤ੍ਥ ਦੁਗ੍ਗਨ੍ਧੋਤਿ ਅਨਿਟ੍ਠਗਨ੍ਧੋ, ਕੁਣਪਗਨ੍ਧਗਨ੍ਧੀਤਿ ਅਤ੍ਥੋ. ਤੇਨਾਹ ‘‘ਪੂਤਿ ਵਾਯਸੀ’’ਤਿ. ਤਤੋਤਿ ਦੁਗ੍ਗਨ੍ਧਵਾਯਨਤੋ ਕਿਮੀਹਿ ਖਾਯਿਤਬ੍ਬਤੋ ਚ ਉਪਰਿ. ਸਤ੍ਤਂ ਗਹੇਤ੍ਵਾਨ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਨ੍ਤਿ ਕਮ੍ਮਸਞ੍ਚੋਦਿਤਾ ਸਤ੍ਤਾ ਨਿਸਿਤਧਾਰਂ ਸਤ੍ਥਂ ਗਹੇਤ੍ਵਾ ਪੁਨਪ੍ਪੁਨਂ ਤਂ ਵਣਮੁਖਂ ਅਵਕਨ੍ਤਨ੍ਤਿ. ਖਾਰੇਨ ਪਰਿਪ੍ਫੋਸਿਤ੍ਵਾ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਨ੍ਤਿ ਅਵਕਨ੍ਤਿਤਟ੍ਠਾਨੇ ਖਾਰੋਦਕੇਨ ਆਸਿਞ੍ਚਿਤ੍ਵਾ ਪੁਨਪ੍ਪੁਨਮ੍ਪਿ ਅਵਕਨ੍ਤਨ੍ਤਿ.

੫੧੦. ਇਸ੍ਸਰੋ ਧਨਧਞ੍ਞਸ੍ਸ, ਸੁਪਹੂਤਸ੍ਸਾਤਿ ਅਤਿਵਿਯ ਪਹੂਤਸ੍ਸ ¶ ਧਨਸ੍ਸ ਧਞ੍ਞਸ੍ਸ ਚ ਇਸ੍ਸਰੋ ਸਾਮੀ, ਅਡ੍ਢੋ ਮਹਦ੍ਧਨੋਤਿ ਅਤ੍ਥੋ.

੫੧੧. ਤਸ੍ਸਾਯਂ ਮੇ ਭਰਿਯਾ ਚ, ਧੀਤਾ ਚ ਸੁਣਿਸਾ ਚਾਤਿ ਤਸ੍ਸ ਮਯ੍ਹਂ ਅਯਂ ਪੁਰਿਮਤ੍ਤਭਾਵੇ ਭਰਿਯਾ, ਅਯਂ ਧੀਤਾ, ਅਯਂ ਸੁਣਿਸਾ. ਤਾ ਦੇਵਭੂਤਾ ਆਕਾਸੇ ਠਿਤਾਤਿ ਦਸ੍ਸੇਨ੍ਤੋ ਵਦਤਿ. ਪਚ੍ਚਗ੍ਘਨ੍ਤਿ ਅਭਿਨਵਂ. ਥੂਪਂ ਹਰਨ੍ਤਿਯੋ ਵਾਰੇਸਿਨ੍ਤਿ ਥੂਪਂ ਪੂਜੇਤੁਂ ਉਪਨੇਨ੍ਤਿਯੋ ਧਾਤੁਂ ਵਿਵਣ੍ਣੇਨ੍ਤੋ ਪਟਿਕ੍ਖਿਪਿਂ. ਤਂ ਪਾਪਂ ਪਕਤਂ ਮਯਾਤਿ ਤਂ ਧਾਤੁਵਿਵਣ੍ਣਨਪਾਪਂ ਕਤਂ ਸਮਾਚਰਿਤਂ ਮਯਾਤਿ ਵਿਪ੍ਪਟਿਸਾਰਪ੍ਪਤ੍ਤੋ ਵਦਤਿ.

੫੧੨. ਛਲ਼ਾਸੀਤਿਸਹਸ੍ਸਾਨੀਤਿ ¶ ਛਸਹਸ੍ਸਾਧਿਕਾ ਅਸੀਤਿਸਹਸ੍ਸਮਤ੍ਤਾ. ਮਯਨ੍ਤਿ ਤੇ ਪੇਤੇ ਅਤ੍ਤਨਾ ਸਦ੍ਧਿਂ ਸਙ੍ਗਹੇਤ੍ਵਾ ਵਦਤਿ. ਪਚ੍ਚਤ੍ਤਵੇਦਨਾਤਿ ਵਿਸੁਂ ਵਿਸੁਂ ਅਨੁਭੁਯ੍ਯਮਾਨਦੁਕ੍ਖਵੇਦਨਾ. ਨਿਰਯੇਤਿ ਬਲਦੁਕ੍ਖਤਾਯ ਪੇਤ੍ਤਿਵਿਸਯਂ ਨਿਰਯਸਦਿਸਂ ਕਤ੍ਵਾ ਆਹ.

੫੧੩. ਯੇ ਚ ਖੋ ਥੂਪਪੂਜਾਯ, ਵਤ੍ਤਨ੍ਤੇ ਅਰਹਤੋ ਮਹੇਤਿ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਥੂਪਂ ਉਦ੍ਦਿਸ੍ਸ ਪੂਜਾਮਹੇ ਪਵਤ੍ਤਮਾਨੇ ਅਹਂ ਵਿਯ ਯੇ ਥੂਪਪੂਜਾਯ ਆਦੀਨਵਂ ਦੋਸਂ ਪਕਾਸੇਨ੍ਤਿ. ਤੇ ਪੁਗ੍ਗਲੇ ਤਤੋ ਪੁਞ੍ਞਤੋ ਵਿਵੇਚਯੇਥ ਵਿਵੇਚਾਪਯੇਥ, ਪਰਿਬਾਹਿਰੇ ਜਨਯੇਥਾਤਿ ਅਞ੍ਞਾਪਦੇਸੇਨ ਅਤ੍ਤਨੋ ਮਹਾਜਾਨਿਯਤਂ ਵਿਭਾਵੇਤਿ.

੫੧੪. ਆਯਨ੍ਤਿਯੋਤਿ ¶ ਆਕਾਸੇਨ ਆਗਚ੍ਛਨ੍ਤਿਯੋ. ਮਾਲਾਵਿਪਾਕਨ੍ਤਿ ਥੂਪੇ ਕਤਮਾਲਾਪੂਜਾਯ ਵਿਪਾਕਂ ਫਲਂ. ਸਮਿਦ੍ਧਾਤਿ ਦਿਬ੍ਬਸਮ੍ਪਤ੍ਤਿਯਾ ਸਮਿਦ੍ਧਾ. ਤਾ ਯਸਸ੍ਸਿਨਿਯੋਤਿ ਤਾ ਪਰਿਵਾਰਵਨ੍ਤਿਯੋ.

੫੧੫. ਤਞ੍ਚ ਦਿਸ੍ਵਾਨਾਤਿ ਤਸ੍ਸ ਅਤਿਪਰਿਤ੍ਤਸ੍ਸ ਪੂਜਾਪੁਞ੍ਞਸ੍ਸ ਅਚ੍ਛਰਿਯਂ ਅਬ੍ਭੁਤਂ ਲੋਮਹਂਸਨਂ ਅਤਿਉਲ਼ਾਰਂ ਵਿਪਾਕਵਿਸੇਸਂ ਦਿਸ੍ਵਾ. ਨਮੋ ਕਰੋਨ੍ਤਿ ਸਪ੍ਪਞ੍ਞਾ, ਵਨ੍ਦਨ੍ਤਿ ਤਂ ਮਹਾਮੁਨਿਨ੍ਤਿ, ਭਨ੍ਤੇ ਕਸ੍ਸਪ, ਇਮਾ ਇਤ੍ਥਿਯੋ ਤਂ ਉਤ੍ਤਮਪੁਞ੍ਞਕ੍ਖੇਤ੍ਤਭੂਤਂ ਵਨ੍ਦਨ੍ਤਿ ਅਭਿਵਾਦੇਨ੍ਤਿ, ਨਮੋ ਕਰੋਨ੍ਤਿ ਨਮਕ੍ਕਾਰਞ੍ਚ ਕਰੋਨ੍ਤੀਤਿ ਅਤ੍ਥੋ.

੫੧੬. ਅਥ ¶ ਸੋ ਪੇਤੋ ਸਂਵਿਗ੍ਗਮਾਨਸੋ ਸਂਵੇਗਾਨੁਰੂਪਂ ਆਯਤਿਂ ਅਤ੍ਤਨਾ ਕਾਤਬ੍ਬਂ ਦਸ੍ਸੇਨ੍ਤੋ ‘‘ਸੋਹਂ ਨੂਨਾ’’ਤਿ ਗਾਥਮਾਹ. ਤਂ ਉਤ੍ਤਾਨਤ੍ਥਮੇਵ.

ਏਵਂ ਪੇਤੇਨ ਵੁਤ੍ਤੋ ਮਹਾਕਸ੍ਸਪੋ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ.

ਧਾਤੁਵਿਵਣ੍ਣਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਇਤਿ ਖੁਦ੍ਦਕ-ਅਟ੍ਠਕਥਾਯ ਪੇਤਵਤ੍ਥੁਸ੍ਮਿਂ

ਤਤਿਯਸ੍ਸ ਚੂਲ਼ਵਗ੍ਗਸ੍ਸ ਅਤ੍ਥਸਂਵਣ੍ਣਨਾ ਨਿਟ੍ਠਿਤਾ.

ਵੇਸਾਲੀ ¶ ¶ ਨਾਮ ਨਗਰਤ੍ਥਿ ਵਜ੍ਜੀਨਨ੍ਤਿ ਇਦਂ ਅਮ੍ਬਸਕ੍ਕਰਪੇਤਵਤ੍ਥੁ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਜੇਤਵਨੇ ਵਿਹਰਨ੍ਤੇ ਅਮ੍ਬਸਕ੍ਕਰੋ ਨਾਮ ਲਿਚ੍ਛਵਿਰਾਜਾ ਮਿਚ੍ਛਾਦਿਟ੍ਠਿਕੋ ਨਤ੍ਥਿਕਵਾਦੋ ਵੇਸਾਲਿਯਂ ਰਜ੍ਜਂ ਕਾਰੇਸਿ. ਤੇਨ ਚ ਸਮਯੇਨ ਵੇਸਾਲਿਨਗਰੇ ਅਞ੍ਞਤਰਸ੍ਸ ਵਾਣਿਜਸ੍ਸ ਆਪਣਸਮੀਪੇ ਚਿਕ੍ਖਲ੍ਲਂ ਹੋਤਿ, ਤਤ੍ਥ ਬਹੂ ਜਨਾ ਉਪ੍ਪਤਿਤ੍ਵਾ ਅਤਿਕ੍ਕਮਨ੍ਤਾ ਕਿਲਮਨ੍ਤਿ, ਕੇਚਿ ਕਦ੍ਦਮੇਨ ਲਿਮ੍ਪਨ੍ਤਿ. ਤਂ ਦਿਸ੍ਵਾ ਸੋ ਵਾਣਿਜੋ ‘‘ਮਾ ਇਮੇ ਮਨੁਸ੍ਸਾ ਕਲਲਂ ਅਕ੍ਕਮਿਂਸੂ’’ਤਿ ਅਪਗਤਦੁਗ੍ਗਨ੍ਧਂ ਸਙ੍ਖਵਣ੍ਣਪਟਿਭਾਗਂ ਗੋਸੀਸਟ੍ਠਿਂ ਆਹਰਾਪੇਤ੍ਵਾ ਨਿਕ੍ਖਿਪਾਪੇਸਿ. ਪਕਤਿਯਾ ਚ ਸੀਲਵਾ ਅਹੋਸਿ ਅਕ੍ਕੋਧਨੋ ਸਣ੍ਹਵਾਚੋ, ਪਰੇਸਞ੍ਚ ਯਥਾਭੂਤਂ ਗੁਣਂ ਕਿਤ੍ਤੇਤਿ.

ਸੋ ਏਕਸ੍ਮਿਂ ਦਿਵਸੇ ਅਤ੍ਤਨੋ ਸਹਾਯਸ੍ਸ ਨ੍ਹਾਯਨ੍ਤਸ੍ਸ ਪਮਾਦੇਨ ਅਨੋਲੋਕੇਨ੍ਤਸ੍ਸ ਨਿਵਾਸਨਵਤ੍ਥਂ ਕੀਲ਼ਾਧਿਪ੍ਪਾਯੇਨ ਅਪਨਿਧਾਯ ਤਂ ਦੁਕ੍ਖਾਪੇਤ੍ਵਾ ਅਦਾਸਿ. ਭਾਗਿਨੇਯ੍ਯੋ ਪਨਸ੍ਸ ਚੋਰਿਕਾਯ ਪਰਗੇਹਤੋ ਭਣ੍ਡਂ ਆਹਰਿਤ੍ਵਾ ਤਸ੍ਸੇਵ ਆਪਣੇ ਨਿਕ੍ਖਿਪਿ. ਭਣ੍ਡਸਾਮਿਕਾ ਵੀਮਂਸਨ੍ਤਾ ਭਣ੍ਡੇਨ ਸਦ੍ਧਿਂ ਤਸ੍ਸ ਭਾਗਿਨੇਯ੍ਯਂ ਤਞ੍ਚ ਰਞ੍ਞੋ ਦਸ੍ਸੇਸੁਂ. ਰਾਜਾ ‘‘ਇਮਸ੍ਸ ਸੀਸਂ ਛਿਨ੍ਦਥ, ਭਾਗਿਨੇਯ੍ਯਂ ਪਨਸ੍ਸ ਸੂਲੇ ਆਰੋਪੇਥਾ’’ਤਿ ਆਣਾਪੇਸਿ. ਰਾਜਪੁਰਿਸਾ ਤਥਾ ਅਕਂਸੁ. ਸੋ ਕਾਲਂ ਕਤ੍ਵਾ ਭੁਮ੍ਮਦੇਵੇਸੁ ਉਪ੍ਪਜ੍ਜਿ. ਸੋ ਗੋਸੀਸੇਨ ਸੇਤੁਨੋ ਕਤਤ੍ਤਾ ਸੇਤਵਣ੍ਣਂ ¶ ਦਿਬ੍ਬਂ ਮਨੋਜਵਂ ਅਸ੍ਸਾਜਾਨੀਯਂ ਪਟਿਲਭਿ, ਗੁਣਵਨ੍ਤਾਨਂ ਵਣ੍ਣਕਥਨੇਨ ਤਸ੍ਸ ਗਤ੍ਤਤੋ ਦਿਬ੍ਬਗਨ੍ਧੋ ਵਾਯਤਿ, ਸਾਟਕਸ੍ਸ ਪਨ ਅਪਨਿਹਿਤਤ੍ਤਾ ਨਗ੍ਗੋ ਅਹੋਸਿ. ਸੋ ਅਤ੍ਤਨਾ ਪੁਬ੍ਬੇ ਕਤਕਮ੍ਮਂ ਓਲੋਕੇਨ੍ਤੋ ਤਦਨੁਸਾਰੇਨ ਅਤ੍ਤਨੋ ਭਾਗਿਨੇਯ੍ਯਂ ਸੂਲੇ ਆਰੋਪਿਤਂ ਦਿਸ੍ਵਾ ਕਰੁਣਾਯ ਚੋਦਿਯਮਾਨੋ ਮਨੋਜਵਂ ਅਸ੍ਸਂ ਅਭਿਰੁਹਿਤ੍ਵਾ ਅਡ੍ਢਰਤ੍ਤਿਸਮਯੇ ਤਸ੍ਸ ਸੂਲਾ ਰੋਪਿਤਟ੍ਠਾਨਂ ਗਨ੍ਤ੍ਵਾ ਅਵਿਦੂਰੇ ਠਿਤੋ ‘‘ਜੀਵ, ਭੋ, ਜੀਵਿਤਮੇਵ ਸੇਯ੍ਯੋ’’ਤਿ ਦਿਵਸੇ ਦਿਵਸੇ ਵਦਤਿ.

ਤੇਨ ਚ ਸਮਯੇਨ ਅਮ੍ਬਸਕ੍ਕਰੋ ਰਾਜਾ ਹਤ੍ਥਿਕ੍ਖਨ੍ਧਵਰਗਤੋ ਨਗਰਂ ਪਦਕ੍ਖਿਣਂ ਕਰੋਨ੍ਤੋ ਅਞ੍ਞਤਰਸ੍ਮਿਂ ਗੇਹੇ ਵਾਤਪਾਨਂ ਵਿਵਰਿਤ੍ਵਾ ਰਾਜਵਿਭੂਤਿਂ ਪਸ੍ਸਨ੍ਤਿਂ ¶ ਏਕਂ ਇਤ੍ਥਿਂ ਦਿਸ੍ਵਾ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਪਚ੍ਛਾਸਨੇ ਨਿਸਿਨ੍ਨਸ੍ਸ ਪੁਰਿਸਸ੍ਸ ‘‘ਇਮਂ ਘਰਂ ਇਮਞ੍ਚ ਇਤ੍ਥਿਂ ਉਪਧਾਰੇਹੀ’’ਤਿ ਸਞ੍ਞਂ ਦਤ੍ਵਾ ਅਨੁਕ੍ਕਮੇਨ ¶ ਅਤ੍ਤਨੋ ਰਾਜਗੇਹਂ ਪਵਿਟ੍ਠੋ ਤਂ ਪੁਰਿਸਂ ਪੇਸੇਸਿ – ‘‘ਗਚ੍ਛ, ਭਣੇ, ਤਸ੍ਸਾ ਇਤ੍ਥਿਯਾ ਸਸਾਮਿਕਭਾਵਂ ਵਾ ਅਸਾਮਿਕਭਾਵਂ ਵਾ ਜਾਨਾਹੀ’’ਤਿ. ਸੋ ਗਨ੍ਤ੍ਵਾ ਤਸ੍ਸਾ ਸਸਾਮਿਕਭਾਵਂ ਞਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਤਸ੍ਸਾ ਇਤ੍ਥਿਯਾ ਪਰਿਗ੍ਗਹਣੂਪਾਯਂ ਚਿਨ੍ਤੇਨ੍ਤੋ ਤਸ੍ਸਾ ਸਾਮਿਕਂ ਪਕ੍ਕੋਸਾਪੇਤ੍ਵਾ ‘‘ਏਹਿ, ਭਣੇ, ਮਂ ਉਪਟ੍ਠਾਹੀ’’ਤਿ ਆਹ. ਸੋ ਅਨਿਚ੍ਛਨ੍ਤੋਪਿ ‘‘ਰਾਜਾ ਅਤ੍ਤਨੋ ਵਚਨਂ ਅਕਰੋਨ੍ਤੇ ਮਯਿ ਰਾਜਦਣ੍ਡਂ ਕਰੇਯ੍ਯਾ’’ਤਿ ਭਯੇਨ ਰਾਜੁਪਟ੍ਠਾਨਂ ਸਮ੍ਪਟਿਚ੍ਛਿਤ੍ਵਾ ਦਿਵਸੇ ਦਿਵਸੇ ਰਾਜੁਪਟ੍ਠਾਨਂ ਗਚ੍ਛਤਿ. ਰਾਜਾਪਿ ਤਸ੍ਸ ਭਤ੍ਤਵੇਤਨਂ ਦਾਪੇਤ੍ਵਾ ਕਤਿਪਯਦਿਵਸਾਤਿਕ੍ਕਮੇਨ ਪਾਤੋਵ ਉਪਟ੍ਠਾਨਂ ਆਗਤਂ ਏਵਮਾਹ – ‘‘ਗਚ੍ਛ, ਭਣੇ, ਅਮੁਮ੍ਹਿ ਠਾਨੇ ਏਕਾ ਪੋਕ੍ਖਰਣੀ ਅਤ੍ਥਿ, ਤਤੋ ਅਰੁਣਵਣ੍ਣਮਤ੍ਤਿਕਂ ਰਤ੍ਤੁਪ੍ਪਲਾਨਿ ਚ ਆਨੇਹਿ, ਸਚੇ ਅਜ੍ਜੇਵ ਨਾਗਚ੍ਛੇਯ੍ਯਾਸਿ, ਜੀਵਿਤਂ ਤੇ ਨਤ੍ਥੀ’’ਤਿ. ਤਸ੍ਮਿਞ੍ਚ ਗਤੇ ਦ੍ਵਾਰਪਾਲਂ ਆਹ – ‘‘ਅਜ੍ਜ ਅਨਤ੍ਥਙ੍ਗਤੇ ਏਵ ਸੂਰਿਯੇ ਸਬ੍ਬਦ੍ਵਾਰਾਨਿ ਥਕੇਤਬ੍ਬਾਨੀ’’ਤਿ.

ਸਾ ਚ ਪੋਕ੍ਖਰਣੀ ਵੇਸਾਲਿਯਾ ਤਿਯੋਜਨਮਤ੍ਥਕੇ ਹੋਤਿ, ਤਥਾਪਿ ਸੋ ਪੁਰਿਸੋ ਮਰਣਭਯਤਜ੍ਜਿਤੋ ਵਾਤਵੇਗੇਨ ਪੁਬ੍ਬਣ੍ਹੇਯੇਵ ਤਂ ਪੋਕ੍ਖਰਣਿਂ ਸਮ੍ਪਾਪੁਣਿ. ‘‘ਸਾ ਚ ਪੋਕ੍ਖਰਣੀ ਅਮਨੁਸ੍ਸਪਰਿਗ੍ਗਹਿਤਾ’’ਤਿ ਪਗੇਵ ਸੁਤਤ੍ਤਾ ਭਯੇਨ ਸੋ ‘‘ਅਤ੍ਥਿ ਨੁ ਖੋ ਏਤ੍ਥ ਕੋਚਿ ਪਰਿਸ੍ਸਯੋ’’ਤਿ ਸਮਨ੍ਤਤੋ ¶ ਅਨੁਪਰਿਯਾਯਤਿ. ਤਂ ਦਿਸ੍ਵਾ ਪੋਕ੍ਖਰਣਿਪਾਲਕੋ ਅਮਨੁਸ੍ਸੋ ਕਰੁਣਾਯਮਾਨਰੂਪੋ ਮਨੁਸ੍ਸਰੂਪੇਨ ਉਪਸਙ੍ਕਮਿਤ੍ਵਾ ‘‘ਕਿਮਤ੍ਥਂ, ਭੋ ਪੁਰਿਸ, ਇਧਾਗਤੋਸੀ’’ਤਿ ਆਹ. ਸੋ ਤਸ੍ਸ ਤਂ ਪਵਤ੍ਤਿਂ ਕਥੇਸਿ. ਸੋ ‘‘ਯਦਿ ਏਵਂ ਯਾਵਦਤ੍ਥਂ ਗਣ੍ਹਾਹੀ’’ਤਿ ਅਤ੍ਤਨੋ ਦਿਬ੍ਬਰੂਪਂ ਦਸ੍ਸੇਤ੍ਵਾ ਅਨ੍ਤਰਧਾਯਿ.

ਸੋ ਤਤ੍ਥ ਅਰੁਣਵਣ੍ਣਮਤ੍ਤਿਕਂ ਰਤ੍ਤੁਪ੍ਪਲਾਨਿ ਚ ਗਹੇਤ੍ਵਾ ਅਨਤ੍ਥਙ੍ਗਤੇਯੇਵ ਸੂਰਿਯੇ ਨਗਰਦ੍ਵਾਰਂ ਸਮ੍ਪਾਪੁਣਿ. ਤਂ ਦਿਸ੍ਵਾ ਦ੍ਵਾਰਪਾਲੋ ਤਸ੍ਸ ਵਿਰਵਨ੍ਤਸ੍ਸੇਵ ਦ੍ਵਾਰਂ ਥਕੇਸਿ. ਸੋ ਥਕਿਤੇ ਦ੍ਵਾਰੇ ਪਵੇਸਨਂ ਅਲਭਨ੍ਤੋ ਦ੍ਵਾਰਸਮੀਪੇ ਸੂਲੇ ਆਰੋਪਿਤਂ ਪੁਰਿਸਂ ਦਿਸ੍ਵਾ ‘‘ਏਤੇ ਮਯਿ ਅਨਤ੍ਥਙ੍ਗਤੇ ਏਵ ਸੂਰਿਯੇ ਆਗਤੇ ਵਿਰਵਨ੍ਤੇ ਏਵਂ ਦ੍ਵਾਰਂ ਥਕੇਸੁਂ. ‘ਅਹਂ ਕਾਲੇਯੇਵ ਆਗਤੋ, ਮਮ ਦਾਸੋ ਨਤ੍ਥੀ’ਤਿ ਤਯਾਪਿ ਞਾਤਂ ਹੋਤੂ’’ਤਿ ¶ ਸਕ੍ਖਿਮਕਾਸਿ. ਤਂ ਸੁਤ੍ਵਾ ਸੋ ਆਹ ‘‘ਅਹਂ ਸੂਲੇ ਆਵੁਤੋ ਵਜ੍ਝੋ ਮਰਣਾਭਿਮੁਖੋ, ਕਥਂ ਤਵ ਸਕ੍ਖਿ ਹੋਮਿ. ਏਕੋ ਪਨੇਤ੍ਥ ਪੇਤੋ ਮਹਿਦ੍ਧਿਕੋ ਮਮ ਸਮੀਪਂ ਆਗਮਿਸ੍ਸਤਿ, ਤਂ ਸਕ੍ਖਿਂ ਕਰੋਹੀ’’ਤਿ. ‘‘ਕਥਂ ਪਨ ਸੋ ਮਯਾ ਦਟ੍ਠਬ੍ਬੋ’’ਤਿ? ਇਧੇਵ ਤ੍ਵਂ ਤਿਟ੍ਠ, ‘‘ਸਯਮੇਵ ਦਕ੍ਖਿਸ੍ਸਸੀ’’ਤਿ. ਸੋ ਤਤ੍ਥ ਠਿਤੋ ਮਜ੍ਝਿਮਯਾਮੇ ਤਂ ਪੇਤਂ ਆਗਤਂ ਦਿਸ੍ਵਾ ਸਕ੍ਖਿਂ ਅਕਾਸਿ. ਵਿਭਾਤਾਯ ਚ ਰਤ੍ਤਿਯਾ ਰਞ੍ਞਾ ‘‘ਮਮ ਆਣਾ ਤਯਾ ਅਤਿਕ੍ਕਨ੍ਤਾ, ਤਸ੍ਮਾ ਰਾਜਦਣ੍ਡਂ ਤੇ ਕਰਿਸ੍ਸਾਮੀ’’ਤਿ ਵੁਤ੍ਤੇ, ਦੇਵ, ਮਯਾ ਤਵ ਆਣਾ ਨਾਤਿਕ੍ਕਨ੍ਤਾ, ਅਨਤ੍ਥਙ੍ਗਤੇ ਏਵ ਸੂਰਿਯੇ ਅਹਂ ਇਧਾਗਤੋਤਿ. ਤਤ੍ਥ ਕੋ ਤੇ ਸਕ੍ਖੀਤਿ? ਸੋ ¶ ਤਸ੍ਸ ਸੂਲਾਵੁਤਸ੍ਸ ਪੁਰਿਸਸ੍ਸ ਸਨ੍ਤਿਕੇ ਆਗਚ੍ਛਨ੍ਤਂ ਨਗ੍ਗਪੇਤਂ ‘‘ਸਕ੍ਖੀ’’ਤਿ ਨਿਦ੍ਦਿਸਿਤ੍ਵਾ ‘‘ਕਥਮੇਤਂ ਅਮ੍ਹੇਹਿ ਸਦ੍ਧਾਤਬ੍ਬ’’ਨ੍ਤਿ ਰਞ੍ਞਾ ਵੁਤ੍ਤੇ ‘‘ਅਜ੍ਜ ਰਤ੍ਤਿਯਂ ਤੁਮ੍ਹੇਹਿ ਸਦ੍ਧਾਤਬ੍ਬਂ ਪੁਰਿਸਂ ਮਯਾ ਸਦ੍ਧਿਂ ਪੇਸੇਥਾ’’ਤਿ ਆਹ. ਤਂ ਸੁਤ੍ਵਾ ਰਾਜਾ ਸਯਮੇਵ ਤੇਨ ਸਦ੍ਧਿਂ ਤਤ੍ਥ ਗਨ੍ਤ੍ਵਾ ਠਿਤੋ ਪੇਤੇਨ ਚ ਤਤ੍ਥਾਗਨ੍ਤ੍ਵਾ ‘‘ਜੀਵ, ਭੋ, ਜੀਵਿਤਮੇਵ ਸੇਯ੍ਯੋ’’ਤਿ ਵੁਤ੍ਤੇ ਤਂ ‘‘ਸੇਯ੍ਯਾ ਨਿਸਜ੍ਜਾ ਨਯਿਮਸ੍ਸ ਅਤ੍ਥੀ’’ਤਿਆਦਿਨਾ ਪਞ੍ਚਹਿ ਗਾਥਾਹਿ ਪਟਿਪੁਚ੍ਛਿ. ਇਦਾਨਿ ਆਦਿਤੋ ਪਨ ‘‘ਵੇਸਾਲਿ ਨਾਮ ਨਗਰਤ੍ਥਿ ਵਜ੍ਜੀਨ’’ਨ੍ਤਿ ਗਾਥਾ ਤਾਸਂ ਸਮ੍ਬਨ੍ਧਦਸ੍ਸਨਤ੍ਥਂ ਸਙ੍ਗੀਤਿਕਾਰੇਹਿ ਠਪਿਤਾ –

‘‘ਵੇਸਾਲੀ ¶ ਨਾਮ ਨਗਰਤ੍ਥਿ ਵਜ੍ਜੀਨਂ, ਤਤ੍ਥ ਅਹੁ ਲਿਚ੍ਛਵਿ ਅਮ੍ਬਸਕ੍ਕਰੋ;

ਦਿਸ੍ਵਾਨ ਪੇਤਂ ਨਗਰਸ੍ਸ ਬਾਹਿਰਂ, ਤਤ੍ਥੇਵ ਪੁਚ੍ਛਿਤ੍ਥ ਤਂ ਕਾਰਣਤ੍ਥਿਕੋ.

‘‘ਸੇਯ੍ਯਾ ਨਿਸਜ੍ਜਾ ਨਯਿਮਸ੍ਸ ਅਤ੍ਥਿ, ਅਭਿਕ੍ਕਮੋ ਨਤ੍ਥਿ ਪਟਿਕ੍ਕਮੋ ਚ;

ਅਸਿਤਪੀਤਖਾਯਿਤਵਤ੍ਥਭੋਗਾ, ਪਰਿਚਾਰਣਾ ਸਾਪਿ ਇਮਸ੍ਸ ਨਤ੍ਥਿ.

‘‘ਯੇ ਞਾਤਕਾ ਦਿਟ੍ਠਸੁਤਾ ਸੁਹਜ੍ਜਾ, ਅਨੁਕਮ੍ਪਕਾ ਯਸ੍ਸ ਅਹੇਸੁਂ ਪੁਬ੍ਬੇ;

ਦਟ੍ਠੁਮ੍ਪਿ ਤੇ ਦਾਨਿ ਨ ਤਂ ਲਭਨ੍ਤਿ, ਵਿਰਾਜਿਤਤੋ ਹਿ ਜਨੇਨ ਤੇਨ.

‘‘ਨ ¶ ਓਗ੍ਗਤਤ੍ਤਸ੍ਸ ਭਵਨ੍ਤਿ ਮਿਤ੍ਤਾ, ਜਹਨ੍ਤਿ ਮਿਤ੍ਤਾ ਵਿਕਲਂ ਵਿਦਿਤ੍ਵਾ;

ਅਤ੍ਥਞ੍ਚ ਦਿਸ੍ਵਾ ਪਰਿਵਾਰਯਨ੍ਤਿ, ਬਹੂ ਮਿਤ੍ਤਾ ਉਗ੍ਗਤਤ੍ਤਸ੍ਸ ਹੋਨ੍ਤਿ.

‘‘ਨਿਹੀਨਤ੍ਤੋ ਸਬ੍ਬਭੋਗੇਹਿ ਕਿਚ੍ਛੋ, ਸਮ੍ਮਕ੍ਖਿਤੋ ਸਮ੍ਪਰਿਭਿਨ੍ਨਗਤ੍ਤੋ;

ਉਸ੍ਸਾਵਬਿਨ੍ਦੂਵ ਪਲਿਮ੍ਪਮਾਨਾ, ਅਜ੍ਜ ਸੁਵੇ ਜੀਵਿਤਸ੍ਸੂਪਰੋਧੋ.

‘‘ਏਤਾਦਿਸਂ ਉਤ੍ਤਮਕਿਚ੍ਛਪ੍ਪਤ੍ਤਂ,

੫੧੭. ਤਤ੍ਥ ਤਤ੍ਥਾਤਿ ਤਸ੍ਸਂ ਵੇਸਾਲਿਯਂ. ਨਗਰਸ੍ਸ ਬਾਹਿਰਨ੍ਤਿ ਨਗਰਸ੍ਸ ਬਹਿ ਭਵਂ, ਵੇਸਾਲਿਨਗਰਸ੍ਸ ਬਹਿ ਏਵ ¶ ਜਾਤਂ ਪਵਤ੍ਤਂ ਸਮ੍ਬਨ੍ਧਂ. ਤਤ੍ਥੇਵਾਤਿ ਯਤ੍ਥ ਤਂ ਪਸ੍ਸਿ, ਤਤ੍ਥੇਵ ਠਾਨੇ. ਤਨ੍ਤਿ ¶ ਤਂ ਪੇਤਂ. ਕਾਰਣਤ੍ਥਿਕੋਤਿ ‘‘ਜੀਵ, ਭੋ, ਜੀਵਿਤਮੇਵ ਸੇਯ੍ਯੋ’’ਤਿ ਵੁਤ੍ਤਅਤ੍ਥਸ੍ਸ ਕਾਰਣੇਨ ਅਤ੍ਥਿਕੋ ਹੁਤ੍ਵਾ.

੫੧੮. ਸੇਯ੍ਯਾ ਨਿਸਜ੍ਜਾ ਨਯਿਮਸ੍ਸ ਅਤ੍ਥੀਤਿ ਪਿਟ੍ਠਿਪਸਾਰਣਲਕ੍ਖਣਾ ਸੇਯ੍ਯਾ, ਪਲ੍ਲਙ੍ਕਾਭੁਜਨਲਕ੍ਖਣਾ ਨਿਸਜ੍ਜਾ ਚ ਇਮਸ੍ਸ ਸੂਲੇ ਆਰੋਪਿਤਪੁਗ੍ਗਲਸ੍ਸ ਨਤ੍ਥਿ. ਅਭਿਕ੍ਕਮੋ ਨਤ੍ਥਿ ਪਟਿਕ੍ਕਮੋ ਚਾਤਿ ਅਭਿਕ੍ਕਮਾਦਿਲਕ੍ਖਣਂ ਅਪ੍ਪਮਤ੍ਤਕਮ੍ਪਿ ਗਮਨਂ ਇਮਸ੍ਸ ਨਤ੍ਥਿ. ਪਰਿਚਾਰਿਕਾ ਸਾਪੀਤਿ ਯਾ ਅਸਿਤਪੀਤਖਾਯਿਤਵਤ੍ਥਪਰਿਭੋਗਾਦਿਲਕ੍ਖਣਾ ਇਨ੍ਦ੍ਰਿਯਾਨਂ ਪਰਿਚਾਰਣਾ, ਸਾਪਿ ਇਮਸ੍ਸ ਨਤ੍ਥਿ. ‘‘ਪਰਿਹਰਣਾ ਸਾਪੀ’’ਤਿ ਵਾ ਪਾਠੋ, ਅਸਿਤਾਦਿਪਰਿਭੋਗਵਸੇਨ ਇਨ੍ਦ੍ਰਿਯਾਨਂ ਪਰਿਹਰਣਾ, ਸਾਪਿ ਇਮਸ੍ਸ ਨਤ੍ਥਿ ਵਿਗਤਜੀਵਿਤਤ੍ਤਾਤਿ ਅਤ੍ਥੋ. ‘‘ਪਰਿਚਾਰਣਾ ਸਾਪੀ’’ਤਿ ਕੇਚਿ ਪਠਨ੍ਤਿ.

੫੧੯. ਦਿਟ੍ਠਸੁਤਾ ਸੁਹਜ੍ਜਾ, ਅਨੁਕਮ੍ਪਕਾ ਯਸ੍ਸ ਅਹੇਸੁਂ ਪੁਬ੍ਬੇਤਿ ਸਨ੍ਦਿਟ੍ਠਸਹਾਯਾ ਚੇਵ ਅਦਿਟ੍ਠਸਹਾਯਾ ਚ ਯਸ੍ਸ ਮਿਤ੍ਤਾ ਅਨੁਦ੍ਦਯਾਵਨ੍ਤੋ ਯੇ ¶ ਅਸ੍ਸ ਇਮਸ੍ਸ ਪੁਬ੍ਬੇ ਅਹੇਸੁਂ. ਦਟ੍ਠੁਮ੍ਪੀਤਿ ਪਸ੍ਸਿਤੁਮ੍ਪਿ ਨ ਲਭਨ੍ਤਿ, ਕੁਤੋ ਸਹ ਵਸਿਤੁਨ੍ਤਿ ਅਤ੍ਥੋ. ਵਿਰਾਜਿਤਤ੍ਤੋਤਿ ਪਰਿਚ੍ਚਤ੍ਤਸਭਾਵੋ. ਜਨੇਨ ਤੇਨਾਤਿ ਤੇਨ ਞਾਤਿਆਦਿਜਨੇਨ.

੫੨੦. ਨ ਓਗ੍ਗਤਤ੍ਤਸ੍ਸ ਭਵਨ੍ਤਿ ਮਿਤ੍ਤਾਤਿ ਅਪਗਤਵਿਞ੍ਞਾਣਸ੍ਸ ਮਤਸ੍ਸ ਮਿਤ੍ਤਾ ਨਾਮ ਨ ਹੋਨ੍ਤਿ ਤਸ੍ਸ ਮਿਤ੍ਤੇਹਿ ਕਾਤਬ੍ਬਕਿਚ੍ਚਸ੍ਸ ਅਤਿਕ੍ਕਨ੍ਤਤ੍ਤਾ. ਜਹਨ੍ਤਿ ਮਿਤ੍ਤਾ ਵਿਕਲਂ ਵਿਦਿਤ੍ਵਾਤਿ ਮਤੋ ਤਾਵ ਤਿਟ੍ਠਤੁ, ਜੀਵਨ੍ਤਮ੍ਪਿ ਭੋਗਵਿਕਲਂ ਪੁਰਿਸਂ ਵਿਦਿਤ੍ਵਾ ‘‘ਨ ਇਤੋ ਕਿਞ੍ਚਿ ਗਯ੍ਹੂਪਗ’’ਨ੍ਤਿ ਮਿਤ੍ਤਾ ਪਜਹਨ੍ਤਿ. ਅਤ੍ਥਞ੍ਚ ਦਿਸ੍ਵਾ ਪਰਿਵਾਰਯਨ੍ਤੀਤਿ ਤਸ੍ਸ ਪਨ ਸਨ੍ਤਕਂ ਅਤ੍ਥਂ ਧਨਂ ਦਿਸ੍ਵਾ ਪਿਯਵਾਦਿਨੋ ਮੁਖੁਲ੍ਲੋਕਿਕਾ ਹੁਤ੍ਵਾ ਤਂ ਪਰਿਵਾਰੇਨ੍ਤਿ. ਬਹੂ ਮਿਤ੍ਤਾ ਉਗ੍ਗਤਤ੍ਤਸ੍ਸ ਹੋਨ੍ਤੀਤਿ ਵਿਭਵਸਮ੍ਪਤ੍ਤਿਯਾ ¶ ਉਗ੍ਗਤਸਭਾਵਸ੍ਸ ਸਮਿਦ੍ਧਸ੍ਸ ਬਹੂ ਅਨੇਕਾ ਮਿਤ੍ਤਾ ਹੋਨ੍ਤਿ, ਅਯਂ ਲੋਕਿਯਸਭਾਵੋਤਿ ਅਤ੍ਥੋ.

੫੨੧. ਨਿਹੀਨਤ੍ਤੋ ਸਬ੍ਬਭੋਗੇਹੀਤਿ ਸਬ੍ਬੇਹਿ ਉਪਭੋਗਪਰਿਭੋਗਵਤ੍ਥੂਹਿ ਪਰਿਹੀਨਤ੍ਤੋ. ਕਿਚ੍ਛੋਤਿ ਦੁਕ੍ਖਿਤੋ. ਸਮ੍ਮਕ੍ਖਿਤੋਤਿ ਰੁਹਿਰੇਹਿ ਸਮ੍ਮਕ੍ਖਿਤਸਰੀਰੋ. ਸਮ੍ਪਰਿਭਿਨ੍ਨਗਤ੍ਤੋਤਿ ਸੂਲੇਨ ਅਬ੍ਭਨ੍ਤਰੇ ਵਿਦਾਲਿਤਗਤ੍ਤੋ. ਉਸ੍ਸਾਵਬਿਨ੍ਦੂਵ ਪਲਿਮ੍ਪਮਾਨੋਤਿ ਤਿਣਗ੍ਗੇ ਲਿਮ੍ਪਮਾਨਉਸ੍ਸਾਵਬਿਨ੍ਦੁਸਦਿਸੋ. ਅਜ੍ਜ ਸੁਵੇਤਿ ਅਜ੍ਜ ਵਾ ਸੁਵੇ ਵਾ ਇਮਸ੍ਸ ਨਾਮ ਪੁਰਿਸਸ੍ਸ ਜੀਵਿਤਸ੍ਸ ਉਪਰੋਧੋ ਨਿਰੋਧੋ, ਤਤੋ ਉਦ੍ਧਂ ਨਪ੍ਪਵਤ੍ਤਤੀਤਿ ਅਤ੍ਥੋ.

੫੨੨. ਉਤ੍ਤਾਸਿਤਨ੍ਤਿ ਆਵੁਤਂ ਆਰੋਪਿਤਂ. ਪੁਚਿਮਨ੍ਦਸ੍ਸ ਸੂਲੇਤਿ ਨਿਮ੍ਬਰੁਕ੍ਖਸ੍ਸ ਦਣ੍ਡੇਨ ਕਤਸੂਲੇ ¶ . ਕੇਨ ਵਣ੍ਣੇਨਾਤਿ ਕੇਨ ਕਾਰਣੇਨ. ਜੀਵ, ਭੋ, ਜੀਵਿਤਮੇਵ ਸੇਯ੍ਯੋਤਿ, ਭੋ ਪੁਰਿਸ, ਜੀਵ. ਕਸ੍ਮਾ? ਸੂਲਂ ਆਰੋਪਿਤਸ੍ਸਾਪਿ ਹਿ ਤੇ ਇਧ ਜੀਵਿਤਮੇਵ ਇਤੋ ਚੁਤਸ੍ਸ ਜੀਵਿਤਤੋ ਸਤਭਾਗੇਨ ਸਹਸ੍ਸਭਾਗੇਨ ਸੇਯ੍ਯੋ ਸੁਨ੍ਦਰਤਰੋਤਿ.

ਏਵਂ ਤੇਨ ਰਞ੍ਞਾ ਪੁਚ੍ਛਿਤੋ ਸੋ ਪੇਤੋ ਅਤ੍ਤਨੋ ਅਧਿਪ੍ਪਾਯਂ ਪਕਾਸੇਨ੍ਤੋ –

‘‘ਸਾਲੋਹਿਤੋ ਏਸ ਅਹੋਸਿ ਮਯ੍ਹਂ, ਅਹਂ ਸਰਾਮਿ ਪੁਰਿਮਾਯ ਜਾਤਿਯਾ;

ਦਿਸ੍ਵਾ ਚ ਮੇ ਕਾਰੁਞ੍ਞਮਹੋਸਿ ਰਾਜ, ਮਾ ਪਾਪਧਮ੍ਮੋ ਨਿਰਯਂ ਪਤਾਯਂ.

‘‘ਇਤੋ ¶ ਚੁਤੋ ਲਿਚ੍ਛਵਿ ਏਸ ਪੋਸੋ, ਸਤ੍ਥੁਸ੍ਸਦਂ ਨਿਰਯਂ ਘੋਰਰੂਪਂ;

ਉਪਪਜ੍ਜਤਿ ਦੁਕ੍ਕਟਕਮ੍ਮਕਾਰੀ, ਮਹਾਭਿਤਾਪਂ ਕਟੁਕਂ ਭਯਾਨਕਂ.

‘‘ਅਨੇਕਭਾਗੇਨ ਗੁਣੇਨ ਸੇਯ੍ਯੋ, ਅਯਮੇਵ ਸੂਲੋ ਨਿਰਯੇਨ ਤੇਨ;

ਏਕਨ੍ਤਦੁਕ੍ਖਂ ਕਟੁਕਂ ਭਯਾਨਕਂ, ਏਕਨ੍ਤਤਿਬ੍ਬਂ ਨਿਰਯਂ ਪਤਾਯਂ.

‘‘ਇਦਞ੍ਚ ¶ ਸੁਤ੍ਵਾ ਵਚਨਂ ਮਮੇਸੋ, ਦੁਕ੍ਖੂਪਨੀਤੋ ਵਿਜਹੇਯ੍ਯ ਪਾਣਂ;

ਤਸ੍ਮਾ ਅਹਂ ਸਨ੍ਤਿਕੇ ਨ ਭਣਾਮਿ, ਮਾ ਮੇਕਤੋ ਜੀਵਿਤਸ੍ਸੂਪਰੋਧੋ’’ਤਿ. –

੫੨੩. ਤਤ੍ਥ ਸਾਲੋਹਿਤੋ ਸਮਾਨਲੋਹਿਤੋ ਯੋਨਿਸਮ੍ਬਨ੍ਧੇਨ ਸਮ੍ਬਨ੍ਧੋ, ਞਾਤਕੋਤਿ ਅਤ੍ਥੋ. ਪੁਰਿਮਾਯ ਜਾਤਿਯਾਤਿ ਪੁਰਿਮਤ੍ਤਭਾਵੇ. ਮਾ ਪਾਪਧਮ੍ਮੋ ਨਿਰਯਂ ਪਤਾਯਨ੍ਤਿ ਅਯਂ ਪਾਪਧਮ੍ਮੋ ਪੁਰਿਸੋ ਨਿਰਯਂ ਮਾ ਪਤਿ, ਮਾ ਨਿਰਯਂ ਉਪਪਜ੍ਜੀਤਿ ਇਮਂ ਦਿਸ੍ਵਾ ਮੇ ਕਾਰੁਞ੍ਞਂ ਅਹੋਸੀਤਿ ਯੋਜਨਾ.

੫੨੪. ਸਤ੍ਤੁਸ੍ਸਦਨ੍ਤਿ ਪਾਪਕਾਰੀਹਿ ਸਤ੍ਤੇਹਿ ਉਸ੍ਸਨ੍ਨਂ, ਅਥ ਵਾ ਪਞ੍ਚਵਿਧਬਨ੍ਧਨਂ, ਮੁਖੇ ਤਤ੍ਤਲੋਹਸੇਚਨਂ, ਅਙ੍ਗਾਰਪਬ੍ਬਤਾਰੋਪਨਂ, ਲੋਹਕੁਮ੍ਭਿਪਕ੍ਖੇਪਨਂ, ਅਸਿਪਤ੍ਤਵਨਪ੍ਪਵੇਸਨਂ, ਵੇਤ੍ਤਰਣਿਯਂ ਸਮੋਤਰਣਂ, ਮਹਾਨਿਰਯੇ ਪਕ੍ਖੇਪੋਤਿ. ਇਮੇਹਿ ਸਤ੍ਤਹਿ ਪਞ੍ਚਵਿਧਬਨ੍ਧਨਾਦੀਹਿ ਦਾਰੁਣਕਾਰਣੇਹਿ ਉਸ੍ਸਨ੍ਨਂ, ਉਪਰੂਪਰਿ ਨਿਚਿਤਨ੍ਤਿ ਅਤ੍ਥੋ. ਮਹਾਭਿਤਾਪਨ੍ਤਿ ਮਹਾਦੁਕ੍ਖਂ, ਮਹਾਅਗ੍ਗਿਸਨ੍ਤਾਪਂ ਵਾ. ਕਟੁਕਨ੍ਤਿ ਅਨਿਟ੍ਠਂ. ਭਯਾਨਕਨ੍ਤਿ ਭਯਜਨਕਂ.

੫੨੫. ਅਨੇਕਭਾਗੇਨ ¶ ਗੁਣੇਨਾਤਿ ਅਨੇਕਕੋਟ੍ਠਾਸੇਨ ਆਨਿਸਂਸੇਨ. ਅਯਮੇਵ ਸੂਲੋ ਨਿਰਯੇਨ ਤੇਨਾਤਿ ਤਤੋ ਇਮਸ੍ਸ ਉਪ੍ਪਤ੍ਤਿਟ੍ਠਾਨਭੂਤਤੋ ਨਿਰਯਤੋ ਅਯਮੇਵ ਸੂਲੋ ਸੇਯ੍ਯੋਤਿ. ਨਿਸ੍ਸਕ੍ਕੇ ਹਿ ¶ ਇਦਂ ਕਰਣਵਚਨਂ. ਏਕਨ੍ਤ ਤਿਬ੍ਬਨ੍ਤਿ ਏਕਨ੍ਤੇਨੇਵ ਤਿਖਿਣਦੁਕ੍ਖਂ, ਨਿਯਤਮਹਾਦੁਕ੍ਖਨ੍ਤਿ ਅਤ੍ਥੋ.

੫੨੬. ਇਦਞ੍ਚ ਸੁਤ੍ਵਾ ਵਚਨਂ ਮਮੇਸੋਤਿ ‘‘ਇਤੋ ਚੁਤੋ’’ਤਿਆਦਿਨਾ ਵੁਤ੍ਤਂ ਮਮ ਵਚਨਂ ਸੁਤ੍ਵਾ ਏਸੋ ਪੁਰਿਸੋ ਦੁਕ੍ਖੂਪਨੀਤੋ ਮਮ ਵਚਨੇਨ ਨਿਰਯਦੁਕ੍ਖਂ ਉਪਨੀਤੋ ਵਿਯ ਹੁਤ੍ਵਾ. ਵਿਜਹੇਯ੍ਯ ਪਾਣਨ੍ਤਿ ਅਤ੍ਤਨੋ ਜੀਵਿਤਂ ਪਰਿਚ੍ਚਜੇਯ੍ਯ. ਤਸ੍ਮਾਤਿ ਤੇਨ ਕਾਰਣੇਨ. ਮਾ ਮੇਕਤੋਤਿ ‘‘ਮਯਾ ਏਕਤੋ ਇਮਸ੍ਸ ਪੁਰਿਸਸ੍ਸ ਜੀਵਿਤਸ੍ਸ ਉਪਰੋਧੋ ਮਾ ਹੋਤੂ’’ਤਿ ਇਮਸ੍ਸ ਸਨ੍ਤਿਕੇ ਇਦਂ ਵਚਨਂ ਅਹਂ ਨ ਭਣਾਮਿ, ਅਥ ਖੋ ¶ ‘‘ਜੀਵ, ਭੋ, ਜੀਵਿਤਮੇਵ ਸੇਯ੍ਯੋ’’ਤਿ ਇਦਮੇਵ ਭਣਾਮੀਤਿ ਅਧਿਪ੍ਪਾਯੋ.

ਏਵਂ ਪੇਤੇਨ ਅਤ੍ਤਨੋ ਅਧਿਪ੍ਪਾਯੇ ਪਕਾਸਿਤੇ ਪੁਨ ਰਾਜਾ ਪੇਤਸ੍ਸ ਪਵਤ੍ਤਿਂ ਪੁਚ੍ਛਿਤੁਂ ਓਕਾਸਂ ਕਰੋਨ੍ਤੋ ਇਮਂ ਗਾਥਮਾਹ –

‘‘ਅਞ੍ਞਾਤੋ ਏਸੋ ਪੁਰਿਸਸ੍ਸ ਅਤ੍ਥੋ, ਅਞ੍ਞਮ੍ਪਿ ਇਚ੍ਛਾਮਸੇ ਪੁਚ੍ਛਿਤੁਂ ਤੁਵਂ;

ਓਕਾਸਕਮ੍ਮਂ ਸਚੇ ਨੋ ਕਰੋਸਿ, ਪੁਚ੍ਛਾਮ ਤਂ ਨੋ ਨ ਚ ਕੁਜ੍ਝਿਤਬ੍ਬ’’ਨ੍ਤਿ.

‘‘ਅਦ੍ਧਾ ਪਟਿਞ੍ਞਾ ਮੇ ਤਦਾ ਅਹੁ, ਨਾਚਿਕ੍ਖਣਾ ਅਪ੍ਪਸਨ੍ਨਸ੍ਸ ਹੋਤਿ;

ਅਕਾਮਾ ਸਦ੍ਧੇਯ੍ਯਵਚੋਤਿ ਕਤ੍ਵਾ, ਪੁਚ੍ਛਸ੍ਸੁ ਮਂ ਕਾਮਂ ਯਥਾ ਵਿਸਯ੍ਹ’’ਨ੍ਤਿ. –

ਇਮਾ ਰਞ੍ਞੋ ਪੇਤਸ੍ਸ ਚ ਵਚਨਪਟਿਵਚਨਗਾਥਾ.

੫੨੭. ਤਤ੍ਥ ਅਞ੍ਞਾਤੋਤਿ ਅਵਗਤੋ. ਇਚ੍ਛਾਮਸੇਤਿ ਇਚ੍ਛਾਮ. ਨੋਤਿ ਅਮ੍ਹਾਕਂ. ਨ ਚ ਕੁਜ੍ਝਿਤਬ੍ਬਨ੍ਤਿ ‘‘ਇਮੇ ਮਨੁਸ੍ਸਾ ਯਂਕਿਞ੍ਚਿ ਪੁਚ੍ਛਨ੍ਤੀ’’ਤਿ ਕੋਧੋ ਨ ਕਾਤਬ੍ਬੋ.

੫੨੮. ਅਦ੍ਧਾਤਿ ਏਕਂਸੇਨ. ਪਟਿਞ੍ਞਾ ਮੇਤਿ ਞਾਣਵਸੇਨ ਮਯ੍ਹਂ ‘‘ਪੁਚ੍ਛਸ੍ਸੂ’’ਤਿ ਪਟਿਞ੍ਞਾ, ਓਕਾਸਦਾਨਨ੍ਤਿ ਅਤ੍ਥੋ. ਤਦਾ ਅਹੂਤਿ ਤਸ੍ਮਿਂ ਕਾਲੇ ¶ ਪਠਮਦਸ੍ਸਨੇ ਅਹੋਸਿ. ਨਾਚਿਕ੍ਖਣਾ ਅਪ੍ਪਸਨ੍ਨਸ੍ਸ ਹੋਤੀਤਿ ਅਕਥਨਾ ਅਪ੍ਪਸਨ੍ਨਸ੍ਸ ਹੋਤਿ. ਪਸਨ੍ਨੋ ਏਵ ਹਿ ਪਸਨ੍ਨਸ੍ਸ ਕਿਞ੍ਚਿ ਕਥੇਤਿ. ਤ੍ਵਂ ਪਨ ਤਦਾ ਮਯਿ ਅਪ੍ਪਸਨ੍ਨੋ, ਅਹਞ੍ਚ ਤਯਿ, ਤੇਨ ਪਟਿਜਾਨਿਤ੍ਵਾ ਕਥੇਤੁਕਾਮੋ ਨਾਹੋਸਿ. ਇਦਾਨਿ ਪਨਾਹਂ ਤੁਯ੍ਹਂ ਅਕਾਮਾ ਸਦ੍ਧੇਯ੍ਯਵਚੋ ਅਕਾਮੋ ਏਵ ਸਦ੍ਧਾਤਬ੍ਬਵਚਨੋ ਇਤਿ ਕਤ੍ਵਾ ਇਮਿਨਾ ਕਾਰਣੇਨ ¶ . ਪੁਚ੍ਛਸ੍ਸੁ ¶ ਮਂ ਕਾਮਂ ਯਥਾ ਵਿਸਯ੍ਹਨ੍ਤਿ ਤ੍ਵਂ ਯਥਾ ਇਚ੍ਛਸਿ, ਤਮਤ੍ਥਂ ਮਂ ਪੁਚ੍ਛਸ੍ਸੁ. ਅਹਂ ਪਨ ਯਥਾ ਵਿਸਯ੍ਹਂ ਯਥਾ ਮਯ੍ਹਂ ਸਹਿਤੁਂ ਸਕ੍ਕਾ, ਤਥਾ ਅਤ੍ਤਨੋ ਞਾਣਬਲਾਨੁਰੂਪਂ ਕਥੇਸ੍ਸਾਮੀਤਿ ਅਧਿਪ੍ਪਾਯੋ.

ਏਵਂ ਪੇਤੇਨ ਪੁਚ੍ਛਨਾਯ ਓਕਾਸੇ ਕਤੇ ਰਾਜਾ –

‘‘ਯਂ ਕਿਞ੍ਚਹਂ ਚਕ੍ਖੁਨਾ ਪਸ੍ਸਿਸਾਮਿ,

ਦਿਸ੍ਵਾਵ ਤਂ ਨੋਪਿ ਚੇ ਸਦ੍ਦਹੇਯ੍ਯਂ,

ਕਰੇਯ੍ਯਾਸਿ ਮੇ ਯਕ੍ਖ ਨਿਯਸ੍ਸਕਮ੍ਮ’’ਨ੍ਤਿ. –

ਗਾਥਮਾਹ. ਤਸ੍ਸਤ੍ਥੋ – ਅਹਂ ਯਂ ਕਿਞ੍ਚਿਦੇਵ ਚਕ੍ਖੁਨਾ ਪਸ੍ਸਿਸ੍ਸਾਮਿ, ਤਂ ਸਬ੍ਬਮ੍ਪਿ ਤਥੇਵ ਅਹਂ ਅਭਿਸਦ੍ਦਹੇਯ੍ਯਂ, ਤਂ ਪਨ ਦਿਸ੍ਵਾਵ ਤਂ ਵਚਨਂ ਨੋਪਿ ਚੇ ਸਦ੍ਦਹੇਯ੍ਯਂ. ਯਕ੍ਖ, ਮਯ੍ਹਂ ਨਿਯਸ੍ਸਕਮ੍ਮਂ ਨਿਗ੍ਗਹਕਮ੍ਮਂ ਕਰੇਯ੍ਯਾਸੀਤਿ. ਅਥ ਵਾ ਯਂ ਕਿਞ੍ਚਹਂ ਚਕ੍ਖੁਨਾ ਪਸ੍ਸਿਸ੍ਸਾਮੀਤਿ ਅਹਂ ਯਂ ਕਿਞ੍ਚਿਦੇਵ ਚਕ੍ਖੁਨਾ ਪਸ੍ਸਿਸ੍ਸਾਮਿ ਅਚਕ੍ਖੁਗੋਚਰਸ੍ਸ ਅਦਸ੍ਸਨਤੋ. ਸਬ੍ਬਮ੍ਪਿ ਤਾਹਂ ਅਭਿਸਦ੍ਦਹੇਯ੍ਯਨ੍ਤਿ ਸਬ੍ਬਮ੍ਪਿ ਤੇ ਅਹਂ ਦਿਟ੍ਠਂ ਸੁਤਂ ਅਞ੍ਞਂ ਵਾ ਅਭਿਸਦ੍ਦਹੇਯ੍ਯਂ. ਤਾਦਿਸੋ ਹਿ ਮਯ੍ਹਂ ਤਯਿ ਅਭਿਪ੍ਪਸਾਦੋਤਿ ਅਧਿਪ੍ਪਾਯੋ. ਪਚ੍ਛਿਮਪਦਸ੍ਸ ਪਨ ਯਥਾਵੁਤ੍ਤੋਵ ਅਤ੍ਥੋ.

‘‘ਸਚ੍ਚਪ੍ਪਟਿਞ੍ਞਾ ਤਵ ਮੇਸਾ ਹੋਤੁ, ਸੁਤ੍ਵਾਨ ਧਮ੍ਮਂ ਲਭ ਸੁਪ੍ਪਸਾਦਂ;

ਅਞ੍ਞਤ੍ਥਿਕੋ ਨੋ ਚ ਪਦੁਟ੍ਠਚਿਤ੍ਤੋ, ਯਂ ਤੇ ਸੁਤਂ ਅਸੁਤਞ੍ਚਾਪਿ ਧਮ੍ਮਂ;

ਸਬ੍ਬਮ੍ਪਿ ਅਕ੍ਖਿਸ੍ਸਂ ਯਥਾ ਪਜਾਨ’’ਨ੍ਤਿ. – ਗਾਥਮਾਹ ¶ ; ਇਤੋ ਪਰਂ –

‘‘ਸੇਤੇਨ ¶ ਅਸ੍ਸੇਨ ਅਲਙ੍ਕਤੇਨ, ਉਪਯਾਸਿ ਸੂਲਾਵੁਤਕਸ੍ਸ ਸਨ੍ਤਿਕੇ;

ਯਾਨਂ ਇਦਂ ਅਬ੍ਭੁਤਂ ਦਸ੍ਸਨੇਯ੍ਯਂ, ਕਿਸ੍ਸੇਤਂ ਕਮ੍ਮਸ੍ਸ ਅਯਂ ਵਿਪਾਕੋਤਿ.

‘‘ਵੇਸਾਲਿਯਾ ਨਗਰਸ੍ਸ ਮਜ੍ਝੇ, ਚਿਕ੍ਖਲ੍ਲਮਗ੍ਗੇ ਨਰਕਂ ਅਹੋਸਿ;

ਗੋਸੀਸਮੇਕਾਹਂ ਪਸਨ੍ਨਚਿਤ੍ਤੋ, ਸੇਤਂ ਗਹੇਤ੍ਵਾ ਨਰਕਸ੍ਮਿਂ ਨਿਕ੍ਖਿਪਿਂ.

‘‘ਏਤਸ੍ਮਿਂ ¶ ਪਾਦਾਨਿ ਪਤਿਟ੍ਠਪੇਤ੍ਵਾ, ਮਯਞ੍ਚ ਅਞ੍ਞੇ ਚ ਅਤਿਕ੍ਕਮਿਮ੍ਹਾ;

ਯਾਨਂ ਇਦਂ ਅਬ੍ਭੁਤਂ ਦਸ੍ਸਨੇਯ੍ਯਂ, ਤਸ੍ਸੇਵ ਕਮ੍ਮਸ੍ਸ ਅਯਂ ਵਿਪਾਕੋਤਿ.

‘‘ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤਿ, ਗਨ੍ਧੋ ਚ ਤੇ ਸਬ੍ਬਦਿਸਾ ਪਵਾਯਤਿ;

ਯਕ੍ਖਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਨਗ੍ਗੋ ਚਾਸਿ ਕਿਸ੍ਸ ਅਯਂ ਵਿਪਾਕੋਤਿ.

‘‘ਅਕ੍ਕੋਧਨੋ ਨਿਚ੍ਚਪਸਨ੍ਨਚਿਤ੍ਤੋ, ਸਣ੍ਹਾਹਿ ਵਾਚਾਹਿ ਜਨਂ ਉਪੇਮਿ;

ਤਸ੍ਸੇਵ ਕਮ੍ਮਸ੍ਸ ਅਯਂ ਵਿਪਾਕੋ, ਦਿਬ੍ਬੋ ਮੇ ਵਣ੍ਣੋ ਸਤਤਂ ਪਭਾਸਤਿ.

‘‘ਯਸਞ੍ਚ ਕਿਤ੍ਤਿਞ੍ਚ ਧਮ੍ਮੇ ਠਿਤਾਨਂ, ਦਿਸ੍ਵਾਨ ਮਨ੍ਤੇਮਿ ਪਸਨ੍ਨਚਿਤ੍ਤੋ;

ਤਸ੍ਸੇਵ ਕਮ੍ਮਸ੍ਸ ਅਯਂ ਵਿਪਾਕੋ, ਦਿਬ੍ਬੋ ਮੇ ਗਨ੍ਧੋ ਸਤਤਂ ਪਵਾਯਤਿ.

‘‘ਸਹਾਯਾਨਂ ¶ ਤਿਤ੍ਥਸ੍ਮਿਂ ਨ੍ਹਾਯਨ੍ਤਾਨਂ, ਥਲੇ ਗਹੇਤ੍ਵਾ ਨਿਦਹਿਸ੍ਸ ਦੁਸ੍ਸਂ;

ਖਿਡ੍ਡਤ੍ਥਿਕੋ ਨੋ ਚ ਪਦੁਟ੍ਠਚਿਤ੍ਤੋ, ਤੇਨਮ੍ਹਿ ਨਗ੍ਗੋ ਕਸਿਰਾ ਚ ਵੁਤ੍ਤੀਤਿ.

‘‘ਯੋ ¶ ਕੀਲ਼ਮਾਨੋ ਪਕਰੋਤਿ ਪਾਪਂ, ਤਸ੍ਸੇਦਿਸਂ ਕਮ੍ਮਵਿਪਾਕਮਾਹੁ;

ਅਕੀਲ਼ਮਾਨੋ ਪਨ ਯੋ ਕਰੋਤਿ, ਕਿਂ ਤਸ੍ਸ ਕਮ੍ਮਸ੍ਸ ਵਿਪਾਕਮਾਹੂਤਿ.

‘‘ਯੇ ਦੁਟ੍ਠਸਙ੍ਕਪ੍ਪਮਨਾ ਮਨੁਸ੍ਸਾ, ਕਾਯੇਨ ਵਾਚਾਯ ਚ ਸਂਕਿਲਿਟ੍ਠਾ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਅਸਂਸਯਂ ਤੇ ਨਿਰਯਂ ਉਪੇਨ੍ਤਿ.

‘‘ਅਪਰੇ ਪਨ ਸੁਗਤਿਮਾਸਮਾਨਾ, ਦਾਨੇ ਰਤਾ ਸਙ੍ਗਹਿਤਤ੍ਤਭਾਵਾ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਅਸਂਸਯਂ ਤੇ ਸੁਗਤਿਂ ਉਪੇਨ੍ਤੀ’’ਤਿ. –

ਤੇਸਂ ਉਭਿਨ੍ਨਂ ਵਚਨਪਟਿਵਚਨਗਾਥਾ ਹੋਨ੍ਤਿ.

੫੩੦. ਤਤ੍ਥ ਸਚ੍ਚਪ੍ਪਟਿਞ੍ਞਾ ਤਵ ਮੇਸਾ ਹੋਤੂਤਿ ‘‘ਸਬ੍ਬਮ੍ਪਿ ਤਾਹਂ ਅਭਿਸਦ੍ਦਹੇਯ੍ਯ’’ਨ੍ਤਿ ਤਵ ਏਸਾ ਪਟਿਞ੍ਞਾ ਮਯ੍ਹਂ ਸਚ੍ਚਂ ਹੋਤੁ. ਸੁਤ੍ਵਾਨ ਧਮ੍ਮਂ ਲਭ ਸੁਪ੍ਪਸਾਦਨ੍ਤਿ ਮਯਾ ਵੁਚ੍ਚਮਾਨਂ ਧਮ੍ਮਂ ਸੁਤ੍ਵਾ ਸੁਨ੍ਦਰਂ ਪਸਾਦਂ ਲਭਸ੍ਸੁ. ਅਞ੍ਞਤ੍ਥਿਕੋਤਿ ਆਜਾਨਨਤ੍ਥਿਕੋ. ਯਥਾ ਪਜਾਨਨ੍ਤਿ ਯਥਾ ਅਞ੍ਞੋਪਿ ¶ ਪਜਾਨਨ੍ਤੋ, ‘‘ਯਥਾਪਿ ਞਾਤ’’ਨ੍ਤਿ ਵਾ ਮਯਾ ਯਥਾ ਞਾਤਨ੍ਤਿ ਅਤ੍ਥੋ.

੫੩੧. ਕਿਸ੍ਸੇਤਂ ਕਮ੍ਮਸ੍ਸ ਅਯਂ ਵਿਪਾਕੋਤਿ ਕਿਸ੍ਸੇਤਂ ਕਿਸ੍ਸ ਨਾਮ ਏਤਂ, ਕਿਸ੍ਸ ਕਮ੍ਮਸ੍ਸ ਅਯਂ ਵਿਪਾਕੋ. ਏਤਨ੍ਤਿ ਵਾ ਨਿਪਾਤਮਤ੍ਤਂ, ਕਿਸ੍ਸ ਕਮ੍ਮਸ੍ਸਾਤਿ ਯੋਜਨਾ. ‘‘ਕਿਸ੍ਸ ਤੇ’’ਤਿ ਚ ਕੇਚਿ ਪਠਨ੍ਤਿ.

੫੩੨-੩੩. ਚਿਕ੍ਖਲ੍ਲਮਗ੍ਗੇਤਿ ¶ ਚਿਕ੍ਖਲ੍ਲਵਤਿ ਪਥਮ੍ਹਿ. ਨਰਕਨ੍ਤਿ ਆਵਾਟਂ. ਏਕਾਹਨ੍ਤਿ ਏਕਂ ਅਹਂ. ਨਰਕਸ੍ਮਿਂ ਨਿਕ੍ਖਿਪਿਨ੍ਤਿ ਯਥਾ ਕਦ੍ਦਮੋ ਨ ਅਕ੍ਕਮੀਯਤਿ, ਏਵਂ ਤਸ੍ਮਿਂ ਚਿਕ੍ਖਲ੍ਲਾਵਾਟੇ ਠਪੇਸਿਂ. ਤਸ੍ਸਾਤਿ ਤਸ੍ਸ ਗੋਸੀਸੇਨ ਸੇਤੁਕਰਣਸ੍ਸ.

੫੩੬-੭. ਧਮ੍ਮੇ ਠਿਤਾਨਨ੍ਤਿ ਧਮ੍ਮਚਾਰੀਨਂ ਸਮਚਾਰੀਨਂ. ਮਨ੍ਤੇਮੀਤਿ ਕਥੇਮਿ ਕਿਤ੍ਤਯਾਮਿ. ਖਿਡ੍ਡਤ੍ਥਿਕੋਤਿ ¶ ਹਸਾਧਿਪ੍ਪਾਯੋ. ਨੋ ਚ ਪਦੁਟ੍ਠਚਿਤ੍ਤੋਤਿ ਦੁਸ੍ਸਸਾਮਿਕੇ ਨ ਦੂਸਿਤਚਿਤ੍ਤੋ, ਨ ਅਵਹਰਣਾਧਿਪ੍ਪਾਯੋ ਨਾਪਿ ਵਿਨਾਸਾਧਿਪ੍ਪਾਯੋਤਿ ਅਤ੍ਥੋ.

੫੩੮. ਅਕੀਲ਼ਮਾਨੋਤਿ ਅਖਿਡ੍ਡਾਧਿਪ੍ਪਾਯੋ, ਲੋਭਾਦੀਹਿ ਦੂਸਿਤਚਿਤ੍ਤੋ. ਕਿਂ ਤਸ੍ਸ ਕਮ੍ਮਸ੍ਸ ਵਿਪਾਕਮਾਹੂਤਿ ਤਸ੍ਸ ਤਥਾ ਕਤਸ੍ਸ ਪਾਪਕਮ੍ਮਸ੍ਸ ਕੀਵ ਕਟੁਕਂ ਦੁਕ੍ਖਵਿਪਾਕਂ ਪਣ੍ਡਿਤਾ ਆਹੁ.

੫੩੯-੪੦. ਦੁਟ੍ਠਸਙ੍ਕਪ੍ਪਮਨਾਤਿ ਕਾਮਸਙ੍ਕਪ੍ਪਾਦਿਵਸੇਨ ਦੂਸਿਤਮਨੋਵਿਤਕ੍ਕਾ, ਏਤੇਨ ਮਨੋਦੁਚ੍ਚਰਿਤਮਾਹ. ਕਾਯੇਨ ਵਾਚਾਯ ਚ ਸਂਕਿਲਿਟ੍ਠਾਤਿ ਪਾਣਾਤਿਪਾਤਾਦਿਵਸੇਨ ਕਾਯਵਾਚਾਹਿ ਮਲਿਨਾ. ਆਸਮਾਨਾਤਿ ਆਸੀਸਮਾਨਾ ਪਤ੍ਥਯਮਾਨਾ.

ਏਵਂ ਪੇਤੇਨ ਸਙ੍ਖੇਪੇਨੇਵ ਕਮ੍ਮਫਲੇਸੁ ਵਿਭਜਿਤ੍ਵਾ ਦਸ੍ਸਿਤੇਸੁ ਤਂ ਅਸਦ੍ਦਹਨ੍ਤੋ ਰਾਜਾ –

‘‘ਤਂ ਕਿਨ੍ਤਿ ਜਾਨੇਯ੍ਯਮਹਂ ਅਵੇਚ੍ਚ, ਕਲ੍ਯਾਣਪਾਪਸ੍ਸ ਅਯਂ ਵਿਪਾਕੋ;

ਕਿਂ ਵਾਹਂ ਦਿਸ੍ਵਾ ਅਭਿਸਦ੍ਦਹੇਯ੍ਯਂ, ਕੋ ਵਾਪਿ ਮਂ ਸਦ੍ਦਹਾਪੇਯ੍ਯ ਏਤ’’ਨ੍ਤਿ. –

ਗਾਥਮਾਹ. ਤਤ੍ਥ ਤਂ ਕਿਨ੍ਤਿ ਜਾਨੇਯ੍ਯਮਹਂ ਅਵੇਚ੍ਚਾਤਿ ਯੋਯਂ ਤਯਾ ‘‘ਯੇ ਦੁਟ੍ਠਸਙ੍ਕਪ੍ਪਮਨਾ ਮਨੁਸ੍ਸਾ, ਕਾਯੇਨ ਵਾਚਾਯ ਚ ਸਂਕਿਲਿਟ੍ਠਾ’’ਤਿਆਦਿਨਾ. ‘‘ਅਪਰੇ ਪਨ ਸੁਗਤਿਮਾਸਮਾਨਾ’’ਤਿਆਦਿਨਾ ਚ ਕਲ੍ਯਾਣਸ੍ਸ ਪਾਪਸ੍ਸ ਚ ਕਮ੍ਮਸ੍ਸ ਵਿਪਾਕੋ ਵਿਭਜਿਤ੍ਵਾ ਵੁਤ੍ਤੋ, ਤਂ ਕਿਨ੍ਤਿ ਕੇਨ ਕਾਰਣੇਨ ਅਹਂ ਅਵੇਚ੍ਚ ¶ ¶ ਅਪਰਪਚ੍ਚਯਭਾਵੇਨ ਸਦ੍ਦਹੇਯ੍ਯਂ. ਕਿਂ ਵਾਹਂ ਦਿਸ੍ਵਾ ਅਭਿਸਦ੍ਦਹੇਯ੍ਯਨ੍ਤਿ ਕੀਦਿਸਂ ਵਾ ਪਨਾਹਂ ਪਚ੍ਚਕ੍ਖਭੂਤਂ ਨਿਦਸ੍ਸਨਂ ਦਿਸ੍ਵਾ ਪਟਿਸਦ੍ਦਹੇਯ੍ਯਂ. ਕੋ ਵਾਪਿ ਮਂ ਸਦ੍ਦਹਾਪੇਯ੍ਯ ਏਤਨ੍ਤਿ ਕੋ ਵਾ ਵਿਞ੍ਞੂ ਪੁਰਿਸੋ ਪਣ੍ਡਿਤੋ ਏਤਮਤ੍ਥਂ ਮਂ ਸਦ੍ਦਹਾਪੇਯ੍ਯ, ਤਂ ਕਥੇਹੀਤਿ ¶ ਅਤ੍ਥੋ.

ਤਂ ਸੁਤ੍ਵਾ ਪੇਤੋ ਕਾਰਣੇਨ ਤਮਤ੍ਥਂ ਤਸ੍ਸ ਪਕਾਸੇਨ੍ਤੋ –

‘‘ਦਿਸ੍ਵਾ ਚ ਸੁਤ੍ਵਾ ਅਭਿਸਦ੍ਦਹਸ੍ਸੁ, ਕਲ੍ਯਾਣਪਾਪਸ੍ਸ ਅਯਂ ਵਿਪਾਕੋ;

ਕਲ੍ਯਾਣਪਾਪੇ ਉਭਯੇ ਅਸਨ੍ਤੇ, ਸਿਯਾ ਨੁ ਸਤ੍ਤਾ ਸੁਗਤਾ ਦੁਗ੍ਗਤਾ ਵਾ.

‘‘ਨੋ ਚੇਤ੍ਥ ਕਮ੍ਮਾਨਿ ਕਰੇਯ੍ਯੁਂ ਮਚ੍ਚਾ, ਕਲ੍ਯਾਣਪਾਪਾਨਿ ਮਨੁਸ੍ਸਲੋਕੇ;

ਨਾਹੇਸੁਂ ਸਤ੍ਤਾ ਸੁਗਤਾ ਦੁਗ੍ਗਤਾ ਵਾ, ਹੀਨਾ ਪਣੀਤਾ ਚ ਮਨੁਸ੍ਸਲੋਕੇ.

‘‘ਯਸ੍ਮਾ ਚ ਕਮ੍ਮਾਨਿ ਕਰੋਨ੍ਤਿ ਮਚ੍ਚਾ, ਕਲ੍ਯਾਣਪਾਪਾਨਿ ਮਨੁਸ੍ਸਲੋਕੇ;

ਤਸ੍ਮਾ ਹਿ ਸਤ੍ਤਾ ਸੁਗਤਾ ਦੁਗ੍ਗਤਾ ਵਾ, ਹੀਨਾ ਪਣੀਤਾ ਚ ਮਨੁਸ੍ਸਲੋਕੇ.

‘‘ਦ੍ਵਯਜ੍ਜ ਕਮ੍ਮਾਨਂ ਵਿਪਾਕਮਾਹੁ, ਸੁਖਸ੍ਸ ਦੁਕ੍ਖਸ੍ਸ ਚ ਵੇਦਨੀਯਂ;

ਤਾ ਦੇਵਤਾਯੋ ਪਰਿਚਾਰਯਨ੍ਤਿ, ਪਚ੍ਚੇਨ੍ਤਿ ਬਾਲਾ ਦ੍ਵਯਤਂ ਅਪਸ੍ਸਿਨੋ’’ਤਿ. –

੫੪੨. ਤਤ੍ਥ ਦਿਸ੍ਵਾ ਚਾਤਿ ਪਚ੍ਚਕ੍ਖਤੋ ਦਿਸ੍ਵਾਪਿ. ਸੁਤ੍ਵਾਤਿ ਧਮ੍ਮਂ ਸੁਤ੍ਵਾ ਤਦਨੁਸਾਰੇਨ ਨਯਂ ਨੇਨ੍ਤੋ ਅਨੁਮਿਨਨ੍ਤੋ. ਕਲ੍ਯਾਣਪਾਪਸ੍ਸਾਤਿ ਕੁਸਲਸ੍ਸ ਅਕੁਸਲਸ੍ਸ ਚ ਕਮ੍ਮਸ੍ਸ ਅਯਂ ਸੁਖੋ ਅਯਂ ਦੁਕ੍ਖੋ ਚ ਵਿਪਾਕੋਤਿ ਅਭਿਸਦ੍ਦਹਸ੍ਸੁ. ਉਭਯੇ ਅਸਨ੍ਤੇਤਿ ਕਲ੍ਯਾਣੇ ਪਾਪੇ ਚਾਤਿ ਦੁਵਿਧੇ ਕਮ੍ਮੇ ਅਵਿਜ੍ਜਮਾਨੇ. ਸਿਯਾ ਨੁ ਸਤ੍ਤਾ ਸੁਗਤਾ ਦੁਗ੍ਗਤਾ ਵਾਤਿ ‘‘ਇਮੇ ਸਤ੍ਤਾ ¶ ਸੁਗਤਿਂ ਗਤਾ ਦੁਗ੍ਗਤਿਂ ਗਤਾ ਵਾ, ਸੁਗਤਿਯਂ ਵਾ ਅਡ੍ਢਾ ਦੁਗ੍ਗਤਿਯਂ ਦਲਿਦ੍ਦਾ ਵਾ’’ਤਿ ਅਯਮਤ੍ਥੋ ਕਿਂ ਨੁ ਸਿਯਾ ਕਥਂ ਸਮ੍ਭਵੇਯ੍ਯਾਤਿ ਅਤ੍ਥੋ.

੫੪੩-੪. ਇਦਾਨਿ ਯਥਾਵੁਤ੍ਤਮਤ੍ਥਂ ‘‘ਨੋ ¶ ਚੇਤ੍ਥ ਕਮ੍ਮਾਨੀ’’ਤਿ ਚ ‘‘ਯਸ੍ਮਾ ਚ ਕਮ੍ਮਾਨੀ’’ਤਿ ਚ ਗਾਥਾਦ੍ਵਯੇਨ ਬ੍ਯਤਿਰੇਕਤੋ ਅਨ੍ਵਯਤੋ ਚ ਵਿਭਾਵੇਤਿ. ਤਤ੍ਥ ਹੀਨਾ ਪਣੀਤਾਤਿ ਕੁਲਰੂਪਾਰੋਗ੍ਯਪਰਿਵਾਰਾਦੀਹਿ ¶ ਹੀਨਾ ਉਲ਼ਾਰਾ ਚ.

੫੪੫. ਦ੍ਵਯਜ੍ਜ ਕਮ੍ਮਾਨਂ ਵਿਪਾਕਮਾਹੂਤਿ ਦ੍ਵਯਂ ਦੁਵਿਧਂ ਅਜ੍ਜ ਇਦਾਨਿ ਕਮ੍ਮਾਨਂ ਸੁਚਰਿਤਦੁਚ੍ਚਰਿਤਾਨਂ ਵਿਪਾਕਂ ਵਦਨ੍ਤਿ ਕਥੇਨ੍ਤਿ. ਕਿਂ ਤਨ੍ਤਿ ਆਹ ‘‘ਸੁਖਸ੍ਸ ਦੁਕ੍ਖਸ੍ਸ ਚ ਵੇਦਨੀਯ’’ਨ੍ਤਿ, ਇਟ੍ਠਸ੍ਸ ਚ ਅਨਿਟ੍ਠਸ੍ਸ ਚ ਅਨੁਭਵਨਯੋਗ੍ਗਂ. ਤਾ ਦੇਵਤਾਯੋ ਪਰਿਚਾਰਯਨ੍ਤੀਤਿ ਯੇ ਉਕ੍ਕਂਸਵਸੇਨ ਸੁਖਵੇਦਨੀਯਂ ਵਿਪਾਕਂ ਪਟਿਲਭਨ੍ਤਿ, ਤੇ ਦੇਵਲੋਕੇ ਤਾ ਦੇਵਤਾ ਹੁਤ੍ਵਾ ਦਿਬ੍ਬਸੁਖਸਮਪ੍ਪਿਤਾ ਇਨ੍ਦ੍ਰਿਯਾਨਿ ਪਰਿਚਾਰੇਨ੍ਤਿ. ਪਚ੍ਚੇਨ੍ਤਿ ਬਾਲਾ ਦ੍ਵਯਤਂ ਅਪਸ੍ਸਿਨੋਤਿ ਯੇ ਬਾਲਾ ਕਮ੍ਮਞ੍ਚ ਕਮ੍ਮਫਲਞ੍ਚਾਤਿ ਦ੍ਵਯਂ ਅਪਸ੍ਸਨ੍ਤਾ ਅਸਦ੍ਦਹਨ੍ਤਾ, ਤੇ ਪਾਪਪ੍ਪਸੁਤਾ ਦੁਕ੍ਖਵੇਦਨੀਯਂ ਵਿਪਾਕਂ ਅਨੁਭਵਨ੍ਤਾ ਨਿਰਯਾਦੀਸੁ ਕਮ੍ਮੁਨਾ ਪਚ੍ਚੇਨ੍ਤਿ ਦੁਕ੍ਖਂ ਪਾਪੁਣਨ੍ਤਿ.

ਏਵਂ ਕਮ੍ਮਫਲਂ ਸਦ੍ਦਹਨ੍ਤੋ ਪਨ ਤ੍ਵਂ ਕਸ੍ਮਾ ਏਵਰੂਪਂ ਦੁਕ੍ਖਂ ਪਚ੍ਚਨੁਭਵਸੀਤਿ ਅਨੁਯੋਗਂ ਸਨ੍ਧਾਯ –

‘‘ਨ ਮਤ੍ਥਿ ਕਮ੍ਮਾਨਿ ਸਯਂਕਤਾਨਿ, ਦਤ੍ਵਾਪਿ ਮੇ ਨਤ੍ਥਿ ਯੋ ਆਦਿਸੇਯ੍ਯ;

ਅਚ੍ਛਾਦਨਂ ਸਯਨਮਥਨ੍ਨਪਾਨਂ, ਤੇਨਮ੍ਹਿ ਨਗ੍ਗੋ ਕਸਿਰਾ ਚ ਵੁਤ੍ਤੀ’’ਤਿ. –

ਗਾਥਮਾਹ. ਤਤ੍ਥ ਨ ਮਤ੍ਥਿ ਕਮ੍ਮਾਨਿ ਸਯਂਕਤਾਨੀਤਿ ਯਸ੍ਮਾ ਸਯਂ ਅਤ੍ਤਨਾ ਪੁਬ੍ਬੇ ਕਤਾਨਿ ਪੁਞ੍ਞਕਮ੍ਮਾਨਿ ਮਮ ਨਤ੍ਥਿ ਨ ਵਿਜ੍ਜਨ੍ਤਿ, ਯੇਹਿ ਇਦਾਨਿ ਅਚ੍ਛਾਦਨਾਦੀਨਿ ਲਭੇਯ੍ਯਂ. ਦਤ੍ਵਾਪਿ ਮੇ ਨਤ੍ਥਿ ਯੋ ਆਦਿਸੇਯ੍ਯਾਤਿ ਯੋ ਸਮਣਬ੍ਰਾਹ੍ਮਣਾਨਂ ਦਾਨਂ ਦਤ੍ਵਾ ‘‘ਅਸੁਕਸ੍ਸ ਪੇਤਸ੍ਸ ਹੋਤੂ’’ਤਿ ਮੇ ਆਦਿਸੇਯ੍ਯ ਉਦ੍ਦਿਸੇਯ੍ਯ, ਸੋ ਨਤ੍ਥਿ. ਤੇਨਮ੍ਹਿ ਨਗ੍ਗੋ ਕਸਿਰਾ ਚ ਵੁਤ੍ਤੀਤਿ ਤੇਨ ਦੁਵਿਧੇਨਾਪਿ ਕਾਰਣੇਨ ਇਦਾਨਿ ਨਗ੍ਗੋ ¶ ਨਿਚ੍ਚੋਲ਼ੋ ਅਮ੍ਹਿ, ਕਸਿਰਾ ਦੁਕ੍ਖਾ ਚ ਵੁਤ੍ਤਿ ਜੀਵਿਕਾ ਹੋਤੀਤਿ.

ਤਂ ¶ ਸੁਤ੍ਵਾ ਰਾਜਾ ਤਸ੍ਸ ਅਚ੍ਛਾਦਨਾਦਿਲਾਭਂ ਆਕਙ੍ਖਨ੍ਤੋ –

‘‘ਸਿਯਾ ਨੁ ਖੋ ਕਾਰਣਂ ਕਿਞ੍ਚਿ ਯਕ੍ਖ, ਅਚ੍ਛਾਦਨਂ ਯੇਨ ਤੁਵਂ ਲਭੇਥ;

ਆਚਿਕ੍ਖ ਮੇ ਤ੍ਵਂ ਯਦਤ੍ਥਿ ਹੇਤੁ, ਸਦ੍ਧਾਯਿਕਂ ਹੇਤੁਵਚੋ ਸੁਣੋਮਾ’’ਤਿ. –

ਗਾਥਮਾਹ. ਤਤ੍ਥ ਯੇਨਾਤਿ ਯੇਨ ਕਾਰਣੇਨ ਤ੍ਵਂ ਅਚ੍ਛਾਦਨਂ ਲਭੇਥ ਲਭੇਯ੍ਯਾਸਿ, ਕਿਞ੍ਚਿ ਤਂ ਕਾਰਣਂ ਸਿਯਾ ਨੁ ਖੋ ਭਵੇਯ੍ਯ ਨੁ ਖੋਤਿ ਅਤ੍ਥੋ. ਯਦਤ੍ਥੀਤਿ ਯਦਿ ਅਤ੍ਥਿ.

ਅਥਸ੍ਸ ¶ ਪੇਤੋ ਤਂ ਕਾਰਣਂ ਆਚਿਕ੍ਖਨ੍ਤੋ –

‘‘ਕਪ੍ਪਿਤਕੋ ਨਾਮ ਇਧਤ੍ਥਿ ਭਿਕ੍ਖੁ, ਝਾਯੀ ਸੁਸੀਲੋ ਅਰਹਾ ਵਿਮੁਤ੍ਤੋ;

ਗੁਤ੍ਤਿਨ੍ਦ੍ਰਿਯੋ ਸਂਵੁਤਪਾਤਿਮੋਕ੍ਖੋ, ਸੀਤਿਭੂਤੋ ਉਤ੍ਤਮਦਿਟ੍ਠਿਪਤ੍ਤੋ.

‘‘ਸਖਿਲੋ ਵਦਞ੍ਞੂ ਸੁਵਚੋ ਸੁਮੁਖੋ, ਸ੍ਵਾਗਮੋ ਸੁਪ੍ਪਟਿਮੁਤ੍ਤਕੋ ਚ;

ਪੁਞ੍ਞਸ੍ਸ ਖੇਤ੍ਤਂ ਅਰਣਵਿਹਾਰੀ, ਦੇਵਮਨੁਸ੍ਸਾਨਞ੍ਚ ਦਕ੍ਖਿਣੇਯ੍ਯੋ.

‘‘ਸਨ੍ਤੋ ਵਿਧੂਮੋ ਅਨੀਘੋ ਨਿਰਾਸੋ, ਮੁਤ੍ਤੋ ਵਿਸਲ੍ਲੋ ਅਮਮੋ ਅਵਙ੍ਕੋ;

ਨਿਰੂਪਧੀ ਸਬ੍ਬਪਪਞ੍ਚਖੀਣੋ, ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤੋ ਜੁਤਿਮਾ.

‘‘ਅਪ੍ਪਞ੍ਞਾਤੋ ਦਿਸ੍ਵਾਪਿ ਨ ਚ ਸੁਜਾਨੋ, ਮੁਨੀਤਿ ਨਂ ਵਜ੍ਜਿਸੁ ਵੋਹਰਨ੍ਤਿ;

ਜਾਨਨ੍ਤਿ ਤਂ ਯਕ੍ਖਭੂਤਾ ਅਨੇਜਂ, ਕਲ੍ਯਾਣਧਮ੍ਮਂ ਵਿਚਰਨ੍ਤਂ ਲੋਕੇ.

‘‘ਤਸ੍ਸ ¶ ¶ ਤੁਵਂ ਏਕਯੁਗਂ ਦੁਵੇ ਵਾ, ਮਮੁਦ੍ਦਿਸਿਤ੍ਵਾਨ ਸਚੇ ਦਦੇਥ;

ਪਟਿਗ੍ਗਹੀਤਾਨਿ ਚ ਤਾਨਿ ਅਸ੍ਸੁ, ਮਮਞ੍ਚ ਪਸ੍ਸੇਥ ਸਨ੍ਨਦ੍ਧਦੁਸ੍ਸ’’ਨ੍ਤਿ. –

੫੪੮. ਤਤ੍ਥ ਕਪ੍ਪਿਤਤੋ ਨਾਮਾਤਿ ਜਟਿਲਸਹਸ੍ਸਸ੍ਸ ਅਬ੍ਭਨ੍ਤਰੇ ਆਯਸ੍ਮਤੋ ਉਪਾਲਿਤ੍ਥੇਰਸ੍ਸ ਉਪਜ੍ਝਾਯਂ ਸਨ੍ਧਾਯ ਵਦਤਿ. ਇਧਾਤਿ ਇਮਿਸ੍ਸਾ ਵੇਸਾਲਿਯਾ ਸਮੀਪੇ. ਝਾਯੀਤਿ ਅਗ੍ਗਫਲਝਾਨੇਨ ਝਾਯੀ. ਸੀਤਿਭੂਤੋਤਿ ਸਬ੍ਬਕਿਲੇਸਦਰਥਪਰਿਲ਼ਾਹਵੂਪਸਮੇਨ ਸੀਤਿਭਾਵਪ੍ਪਤ੍ਤੋ. ਉਤ੍ਤਮਦਿਟ੍ਠਿਪਤ੍ਤੋਤਿ ਉਤ੍ਤਮਂ ਅਗ੍ਗਫਲਂ ਸਮ੍ਮਾਦਿਟ੍ਠਿਂ ਪਤ੍ਤੋ.

੫੪੯. ਸਖਿਲੋਤਿ ਮੁਦੁ. ਸੁਵਚੋਤਿ ਸੁਬ੍ਬਚੋ. ਸ੍ਵਾਗਮੋਤਿ ਸੁਟ੍ਠੁ ਆਗਤਾਗਮੋ. ਸੁਪ੍ਪਟਿਮੁਤ੍ਤਕੋਤਿ ਸੁਟ੍ਠੁ ਪਟਿਮੁਤ੍ਤਕਵਾਚੋ, ਮੁਤ੍ਤਭਾਣੀਤਿ ਅਤ੍ਥੋ. ਅਰਣਵਿਹਾਰੀਤਿ ਮੇਤ੍ਤਾਵਿਹਾਰੀ.

੫੫੦. ਸਨ੍ਤੋਤਿ ਉਪਸਨ੍ਤਕਿਲੇਸੋ. ਵਿਧੂਮੋਤਿ ਵਿਗਤਮਿਚ੍ਛਾਵਿਤਕ੍ਕਧੂਮੋ. ਅਨੀਘੋਤਿ ਨਿਦ੍ਦੁਕ੍ਖੋ. ਨਿਰਾਸੋਤਿ ਨਿਤ੍ਤਣ੍ਹੋ. ਮੁਤ੍ਤੋਤਿ ਸਬ੍ਬਭਵੇਹਿ ਵਿਮੁਤ੍ਤੋ. ਵਿਸਲ੍ਲੋਤਿ ਵੀਤਰਾਗਾਦਿਸਲ੍ਲੋ. ਅਮਮੋਤਿ ¶ ਮਮਂਕਾਰਵਿਰਹਿਤੋ. ਅਵਙ੍ਕੋਤਿ ਕਾਯਵਙ੍ਕਾਦਿਵਙ੍ਕਵਿਰਹਿਤੋ. ਨਿਰੂਪਧੀਤਿ ਕਿਲੇਸਾਭਿਸਙ੍ਖਾਰਾਦਿਉਪਧਿਪ੍ਪਹਾਯੀ. ਸਬ੍ਬਪਪਞ੍ਚਖੀਣੋਤਿ ਪਰਿਕ੍ਖੀਣਤਣ੍ਹਾਦਿਪਪਞ੍ਚੋ. ਜੁਤਿਮਾਤਿ ਅਨੁਤ੍ਤਰਾਯ ਞਾਣਜੁਤਿਯਾ ਜੁਤਿਮਾ. ਅਪ੍ਪਞ੍ਞਾਤੋਤਿ ਪਰਮਪ੍ਪਿਚ੍ਛਤਾਯ ਪਟਿਚ੍ਛਨ੍ਨਗੁਣਤਾਯ ਚ ਨ ਪਾਕਟੋ.

੫੫੧. ਦਿਸ੍ਵਾਪਿ ਨ ਚ ਸੁਜਾਨੋਤਿ ਗਮ੍ਭੀਰਭਾਵੇਨ ਦਿਸ੍ਵਾਪਿ ‘‘ਏਵਂਸੀਲੋ, ਏਵਂਧਮ੍ਮੋ, ਏਵਂਪਞ੍ਞੋ’’ਤਿ ਨ ਸੁਵਿਞ੍ਞੇਯ੍ਯੋ. ਜਾਨਨ੍ਤਿ ਤਂ ਯਕ੍ਖਭੂਤਾ ਅਨੇਜਨ੍ਤਿ ਯਕ੍ਖਭੂਤਾ ਚ ਅਨੇਜਂ ਨਿਤ੍ਤਣ੍ਹਂ ‘‘ਅਰਹਾ’’ਤਿ ਤਂ ਜਾਨਨ੍ਤਿ. ਕਲ੍ਯਾਣਧਮ੍ਮਨ੍ਤਿ ਸੁਨ੍ਦਰਸੀਲਾਦਿਗੁਣਂ.

੫੫੨. ਤਸ੍ਸਾਤਿ ਤਸ੍ਸ ਕਪ੍ਪਿਤਕਮਹਾਥੇਰਸ੍ਸ. ਏਕਯੁਗਨ੍ਤਿ ਏਕਂ ਵਤ੍ਥਯੁਗਂ. ਦੁਵੇ ਵਾਤਿ ਦ੍ਵੇ ਵਾ ਵਤ੍ਥਯੁਗਾਨਿ. ਮਮੁਦ੍ਦਿਸਿਤ੍ਵਾਨਾਤਿ ਮਮਂ ਉਦ੍ਦਿਸਿਤ੍ਵਾ. ਪਟਿਗ੍ਗਹੀਤਾਨਿ ਚ ¶ ਤਾਨਿ ਅਸ੍ਸੂਤਿ ਤਾਨਿ ਵਤ੍ਥਯੁਗਾਨਿ ਤੇਨ ਪਟਿਗ੍ਗਹਿਤਾਨਿ ਚ ਅਸ੍ਸੁ ¶ ਭਵੇਯ੍ਯੁਂ. ਸਨ੍ਨਦ੍ਧਦੁਸ੍ਸਨ੍ਤਿ ਦੁਸ੍ਸੇਨ ਕਤਸਨ੍ਨਾਹਂ, ਲਦ੍ਧਵਤ੍ਥਂ ਨਿਵਤ੍ਥਪਾਰੁਤਦੁਸ੍ਸਨ੍ਤਿ ਅਤ੍ਥੋ.

‘‘ਕਸ੍ਮਿਂ ਪਦੇਸੇ ਸਮਣਂ ਵਸਨ੍ਤਂ, ਗਨ੍ਤ੍ਵਾਨ ਪਸ੍ਸੇਮੁ ਮਯਂ ਇਦਾਨਿ;

ਯੋ ਮਜ੍ਜ ਕਙ੍ਖਂ ਵਿਚਿਕਿਚ੍ਛਿਤਞ੍ਚ, ਦਿਟ੍ਠੀਵਿਸੂਕਾਨਿ ਵਿਨੋਦਯੇਯ੍ਯਾ’’ਤਿ. –

ਥੇਰਸ੍ਸ ਵਸਨਟ੍ਠਾਨਂ ਪੁਚ੍ਛਿ. ਤਤ੍ਥ ਕਸ੍ਮਿਂ ਪਦੇਸੇਤਿ ਕਤਰਸ੍ਮਿਂ ਪਦੇਸੇ. ਯੋ ਮਜ੍ਜਾਤਿ ਯੋ ਅਜ੍ਜ, ਮ-ਕਾਰੋ ਪਦਸਨ੍ਧਿਕਰੋ.

‘‘ਏਸੋ ਨਿਸਿਨ੍ਨੋ ਕਪਿਨਚ੍ਚਨਾਯਂ, ਪਰਿਵਾਰਿਤੋ ਦੇਵਤਾਹਿ ਬਹੂਹਿ;

ਧਮ੍ਮਿਂ ਕਥਂ ਭਾਸਤਿ ਸਚ੍ਚਨਾਮੋ, ਸਕਸ੍ਮਿਮਾਚੇਰਕੇ ਅਪ੍ਪਮਤ੍ਤੋ’’ਤਿ. –

ਗਾਥਮਾਹ. ਤਤ੍ਥ ਕਪਿਨਚ੍ਚਨਾਯਨ੍ਤਿ ਕਪੀਨਂ ਵਾਨਰਾਨਂ ਨਚ੍ਚਨੇਨ ‘‘ਕਪਿਨਚ੍ਚਨਾ’’ਤਿ ਲਦ੍ਧਵੋਹਾਰੇ ਪਦੇਸੇ. ਸਚ੍ਚਨਾਮੋਤਿ ਝਾਯੀ ਸੁਸੀਲੋ ਅਰਹਾ ਵਿਮੁਤ੍ਤੋਤਿਆਦੀਹਿ ਗੁਣਨਾਮੇਹਿ ਯਾਥਾਵਨਾਮੋ ਅਵਿਪਰੀਤਨਾਮੋ ¶ .

ਏਵਂ ਪੇਤੇਨ ਵੁਤ੍ਤੇ ਰਾਜਾ ਤਾਵਦੇਵ ਥੇਰਸ੍ਸ ਸਨ੍ਤਿਕਂ ਗਨ੍ਤੁਕਾਮੋ –

‘‘ਤਥਾਹਂ ਕਸ੍ਸਾਮਿ ਗਨ੍ਤ੍ਵਾ ਇਦਾਨਿ, ਅਚ੍ਛਾਦਯਿਸ੍ਸਂ ਸਮਣਂ ਯੁਗੇਨ;

ਪਟਿਗ੍ਗਹੀਤਾਨਿ ਚ ਤਾਨਿ ਅਸ੍ਸੁ, ਤੁਵਞ੍ਚ ਪਸ੍ਸੇਮੁ ਸਨ੍ਨਦ੍ਧਦੁਸ੍ਸ’’ਨ੍ਤਿ. –

ਗਾਥਮਾਹ. ਤਤ੍ਥ ¶ ਕਸ੍ਸਾਮੀਤਿ ਕਰਿਸ੍ਸਾਮਿ.

ਅਥ ਪੇਤੋ ‘‘ਦੇਵਤਾਨਂ ਥੇਰੋ ਧਮ੍ਮਂ ਦੇਸੇਤਿ, ਤਸ੍ਮਾ ਨਾਯਂ ਉਪਸਙ੍ਕਮਨਕਾਲੋ’’ਤਿ ਦਸ੍ਸੇਨ੍ਤੋ –

‘‘ਮਾ ¶ ਅਕ੍ਖਣੇ ਪਬ੍ਬਜਿਤਂ ਉਪਾਗਮਿ, ਸਾਧੁ ਵੋ ਲਿਚ੍ਛਵਿ ਨੇਸ ਧਮ੍ਮੋ;

ਤਤੋ ਚ ਕਾਲੇ ਉਪਸਙ੍ਕਮਿਤ੍ਵਾ, ਤਤ੍ਥੇਵ ਪਸ੍ਸਾਹਿ ਰਹੋ ਨਿਸਿਨ੍ਨ’’ਨ੍ਤਿ. –

ਗਾਥਮਾਹ. ਤਤ੍ਥ ਸਾਧੂਤਿ ਆਯਾਚਨੇ ਨਿਪਾਤੋ. ਵੋ ਲਿਚ੍ਛਵਿ ਨੇਸ ਧਮ੍ਮੋਤਿ, ਲਿਚ੍ਛਵਿਰਾਜ, ਤੁਮ੍ਹਾਕਂ ਰਾਜੂਨਂ ਏਸ ਧਮ੍ਮੋ ਨ ਹੋਤਿ, ਯਂ ਅਕਾਲੇ ਉਪਸਙ੍ਕਮਨਂ. ਤਤ੍ਥੇਵਾਤਿ ਤਸ੍ਮਿਂਯੇਵ ਠਾਨੇ.

ਏਵਂ ਪੇਤੇਨ ਵੁਤ੍ਤੇ ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਅਤ੍ਤਨੋ ਨਿਵੇਸਨਮੇਵ ਗਨ੍ਤ੍ਵਾ ਪੁਨ ਯੁਤ੍ਤਪਤ੍ਤਕਾਲੇ ਅਟ੍ਠ ਵਤ੍ਥੁਯੁਗਾਨਿ ਗਾਹਾਪੇਤ੍ਵਾ ਥੇਰਂ ਉਪਸਙ੍ਕਮਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਪਟਿਸਨ੍ਥਾਰਂ ਕਤ੍ਵਾ ‘‘ਇਮਾਨਿ, ਭਨ੍ਤੇ, ਅਟ੍ਠ ਵਤ੍ਥਯੁਗਾਨਿ ਪਟਿਗ੍ਗਣ੍ਹਾ’’ਤਿ ਆਹ. ਤਂ ਸੁਤ੍ਵਾ ਥੇਰੋ ਕਥਾਸਮੁਟ੍ਠਾਪਨਤ੍ਥਂ ‘‘ਮਹਾਰਾਜ, ਪੁਬ੍ਬੇ ਤ੍ਵਂ ਅਦਾਨਸੀਲੋ ਸਮਣਬ੍ਰਾਹ੍ਮਣਾਨਂ ਵਿਹੇਠਨਜਾਤਿਕੋਵ ਕਥਂ ਪਣੀਤਾਨਿ ਵਤ੍ਥਾਨਿ ਦਾਤੁਕਾਮੋ ਜਾਤੋ’’ਤਿ ਆਹ. ਤਂ ਸੁਤ੍ਵਾ ਰਾਜਾ ਤਸ੍ਸ ਕਾਰਣਂ ਆਚਿਕ੍ਖਨ੍ਤੋ ਪੇਤੇਨ ਸਮਾਗਮਂ, ਤੇਨ ਚ ਅਤ੍ਤਨਾ ਚ ਕਥਿਤਂ ਸਬ੍ਬਂ ਥੇਰਸ੍ਸ ਆਰੋਚੇਤ੍ਵਾ ਵਤ੍ਥਾਨਿ ਦਤ੍ਵਾ ਪੇਤਸ੍ਸ ਉਦ੍ਦਿਸਿ. ਤੇਨ ਪੇਤੋ ਦਿਬ੍ਬਵਤ੍ਥਧਰੋ ਅਲਙ੍ਕਤਪਟਿਯਤ੍ਤੋ ਅਸ੍ਸਾਰੁਲ਼੍ਹੋ ਥੇਰਸ੍ਸ ਚ ਰਞ੍ਞੋ ਚ ਪੁਰਤੋ ਪਾਤੁਭਵਿ. ਤਂ ਦਿਸ੍ਵਾ ਰਾਜਾ ਅਤ੍ਤਮਨੋ ਪਮੁਦਿਤੋ ਪੀਤਿਸੋਮਨਸ੍ਸਜਾਤੋ ‘‘ਪਚ੍ਚਕ੍ਖਤੋ ਵਤ ਮਯਾ ਕਮ੍ਮਫਲਂ ਦਿਟ੍ਠਂ, ਨ ਦਾਨਾਹਂ ਪਾਪਂ ਕਰਿਸ੍ਸਾਮਿ, ਪੁਞ੍ਞਮੇਵ ਕਰਿਸ੍ਸਾਮੀ’’ਤਿ ਵਤ੍ਵਾ ਤੇਨ ਪੇਤੇਨ ਸਕ੍ਖਿਂ ਅਕਾਸਿ. ਸੋ ਚ ਪੇਤੋ ‘‘ਸਚੇ, ਤ੍ਵਂ ਲਿਚ੍ਛਵਿਰਾਜ, ਇਤੋ ਪਟ੍ਠਾਯ ਅਧਮ੍ਮਂ ਪਹਾਯ ਧਮ੍ਮਂ ਚਰਸਿ, ਏਵਾਹਂ ਤਵ ਸਕ੍ਖਿਂ ਕਰਿਸ੍ਸਾਮਿ, ਸਨ੍ਤਿਕਞ੍ਚ ਤੇ ਆਗਮਿਸ੍ਸਾਮਿ, ਸੂਲਾਵੁਤਞ੍ਚ ਪੁਰਿਸਂ ਸੀਘਂ ਸੂਲਤੋ ਮੋਚੇਹਿ, ਏਵਂ ਸੋ ਜੀਵਿਤਂ ਲਭਿਤ੍ਵਾ ਧਮ੍ਮਂ ਚਰਨ੍ਤੋ ਦੁਕ੍ਖਤੋ ਮੁਚ੍ਚਿਸ੍ਸਤਿ, ਥੇਰਞ੍ਚ ਕਾਲੇਨ ਕਾਲਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਣਨ੍ਤੋ ¶ ਪੁਞ੍ਞਾਨਿ ¶ ਕਰੋਹੀ’’ਤਿ ਵਤ੍ਵਾ ਗਤੋ.

ਅਥ ਰਾਜਾ ਥੇਰਂ ਵਨ੍ਦਿਤ੍ਵਾ ਨਗਰਂ ਪਵਿਸਿਤ੍ਵਾ ਸੀਘਂ ਸੀਘਂ ਲਿਚ੍ਛਵਿਪਰਿਸਂ ਸਨ੍ਨਿਪਾਤੇਤ੍ਵਾ ਤੇ ਅਨੁਜਾਨਾਪੇਤ੍ਵਾ ਤਂ ਪੁਰਿਸਂ ਸੂਲਤੋ ਮੋਚੇਤ੍ਵਾ ‘‘ਇਮਂ ਅਰੋਗਂ ਕਰੋਥਾ’’ਤਿ ਤਿਕਿਚ੍ਛਕੇ ਆਣਾਪੇਸਿ. ਥੇਰਞ੍ਚ ਉਪਸਙ੍ਕਮਿਤ੍ਵਾ ਪੁਚ੍ਛਿ – ‘‘ਸਿਯਾ ਨੁ ਖੋ, ਭਨ੍ਤੇ, ਨਿਰਯਗਾਮਿਕਮ੍ਮਂ ਕਤ੍ਵਾ ਠਿਤਸ੍ਸ ਨਿਰਯਤੋ ਮੁਤ੍ਤੀ’’ਤਿ. ਸਿਯਾ, ਮਹਾਰਾਜ, ਸਚੇ ਉਲ਼ਾਰਂ ਪੁਞ੍ਞਂ ਕਰੋਤਿ, ਮੁਚ੍ਚਤੀਤਿ ¶ ਵਤ੍ਵਾ ਥੇਰੋ ਰਾਜਾਨਂ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਪੇਸਿ. ਸੋ ਤਤ੍ਥ ਪਤਿਟ੍ਠਿਤੋ ਥੇਰਸ੍ਸ ਓਵਾਦੇ ਠਤ੍ਵਾ ਸੋਤਾਪਨ੍ਨੋ ਅਹੋਸਿ, ਸੂਲਾਵੁਤੋ ਪਨ ਪੁਰਿਸੋ ਅਰੋਗੋ ਹੁਤ੍ਵਾ ਸਂਵੇਗਜਾਤੋ ਭਿਕ੍ਖੂਸੁ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤਮਤ੍ਥਂ ਦਸ੍ਸੇਨ੍ਤਾ ਸਙ੍ਗੀਤਿਕਾਰਾ –

‘‘ਤਥਾਤਿ ਵਤ੍ਵਾ ਅਗਮਾਸਿ ਤਤ੍ਥ, ਪਰਿਵਾਰਿਤੋ ਦਾਸਗਣੇਨ ਲਿਚ੍ਛਵਿ;

ਸੋ ਤਂ ਨਗਰਂ ਉਪਸਙ੍ਕਮਿਤ੍ਵਾ, ਵਾਸੂਪਗਚ੍ਛਿਤ੍ਥ ਸਕੇ ਨਿਵੇਸਨੇ.

‘‘ਤਤੋ ਚ ਕਾਲੇ ਗਿਹਿਕਿਚ੍ਚਾਨਿ ਕਤ੍ਵਾ,

ਨ੍ਹਤ੍ਵਾ ਪਿਵਿਤ੍ਵਾ ਚ ਖਣਂ ਲਭਿਤ੍ਵਾ;

‘‘ਸੋ ਤਂ ਪਦੇਸਂ ਉਪਸਙ੍ਕਮਿਤ੍ਵਾ, ਤਂ ਅਦ੍ਦਸ ਸਮਣਂ ਸਨ੍ਤਚਿਤ੍ਤਂ;

ਪਟਿਕ੍ਕਨ੍ਤਂ ਗੋਚਰਤੋ ਨਿਵਤ੍ਤਂ, ਸੀਤਿਭੂਤਂ ਰੁਕ੍ਖਮੂਲੇ ਨਿਸਿਨ੍ਨਂ.

‘‘ਤਮੇਨਮਵੋਚ ਉਪਸਙ੍ਕਮਿਤ੍ਵਾ, ਅਪ੍ਪਾਬਾਧਂ ਫਾਸੁਵਿਹਾਰਞ੍ਚ ਪੁਚ੍ਛਿ;

ਵੇਸਾਲਿਯਂ ਲਿਚ੍ਛਵਿਹਂ ਭਦਨ੍ਤੇ, ਜਾਨਨ੍ਤਿ ਮਂ ਲਿਚ੍ਛਵਿ ਅਮ੍ਬਸਕ੍ਕਰੋ.

‘‘ਇਮਾਨਿ ¶ ਮੇ ਅਟ੍ਠ ਯੁਗਾ ਸੁਭਾਨਿ, ਪਟਿਗ੍ਗਣ੍ਹ ਭਨ੍ਤੇ ਪਦਦਾਮਿ ਤੁਯ੍ਹਂ;

ਤੇਨੇਵ ਅਤ੍ਥੇਨ ਇਧਾਗਤੋਸ੍ਮਿ, ਯਥਾ ਅਹਂ ਅਤ੍ਤਮਨੋ ਭਵੇਯ੍ਯਨ੍ਤਿ.

‘‘ਦੂਰਤੋਵ ਸਮਣਾ ਬ੍ਰਾਹ੍ਮਣਾ ਚ, ਨਿਵੇਸਨਂ ਤੇ ਪਰਿਵਜ੍ਜਯਨ੍ਤਿ;

ਪਤ੍ਤਾਨਿ ਭਿਜ੍ਜਨ੍ਤਿ ਚ ਤੇ ਨਿਵੇਸਨੇ, ਸਙ੍ਘਾਟਿਯੋ ਚਾਪਿ ਵਿਦਾਲਯਨ੍ਤਿ.

‘‘ਅਥਾਪਰੇ ¶ ¶ ਪਾਦਕੁਠਾਰਿਕਾਹਿ, ਅਵਂਸਿਰਾ ਸਮਣਾ ਪਾਤਯਨ੍ਤਿ;

ਏਤਾਦਿਸਂ ਪਬ੍ਬਜਿਤਾ ਵਿਹੇਸਂ, ਤਯਾ ਕਤਂ ਸਮਣਾ ਪਾਪੁਣਨ੍ਤਿ.

‘‘ਤਿਣੇਨ ਤੇਲਮ੍ਪਿ ਨ ਤ੍ਵਂ ਅਦਾਸਿ, ਮੂਲ਼੍ਹਸ੍ਸ ਮਗ੍ਗਮ੍ਪਿ ਨ ਪਾਵਦਾਸਿ;

ਅਨ੍ਧਸ੍ਸ ਦਣ੍ਡਂ ਸਯਮਾਦਿਯਾਸਿ, ਏਤਾਦਿਸੋ ਕਦਰਿਯੋ ਅਸਂਵੁਤੋ ਤੁਵਂ;

ਅਥ ਤ੍ਵਂ ਕੇਨ ਵਣ੍ਣੇਨ ਕਿਮੇਵ ਦਿਸ੍ਵਾ, ਅਮ੍ਹੇਹਿ ਸਹ ਸਂਵਿਭਾਗਂ ਕਰੋਸੀਤਿ.

‘‘ਪਚ੍ਚੇਮਿ ਭਨ੍ਤੇ ਯਂ ਤ੍ਵਂ ਵਦੇਸਿ, ਵਿਹੇਸਯਿਂ ਸਮਣੇ ਬ੍ਰਾਹ੍ਮਣੇ ਚ;

ਖਿਡ੍ਡਤ੍ਥਿਕੋ ਨੋ ਚ ਪਦੁਟ੍ਠਚਿਤ੍ਤੋ, ਏਤਮ੍ਪਿ ਮੇ ਦੁਕ੍ਕਟਮੇਵ ਭਨ੍ਤੇ.

ਖਿਡ੍ਡਾਯ ਯਕ੍ਖੋ ਪਸਵਿਤ੍ਵਾ ਪਾਪਂ, ਵੇਦੇਤਿ ਦੁਕ੍ਖਂ ਅਸਮਤ੍ਤਭੋਗੀ;

ਦਹਰੋ ¶ ਯੁਵਾ ਨਗ੍ਗਨਿਯਸ੍ਸ ਭਾਗੀ, ਕਿਂ ਸੁ ਤਤੋ ਦੁਕ੍ਖਤਰਸ੍ਸ ਹੋਤਿ.

‘‘ਤਂ ਦਿਸ੍ਵਾ ਸਂਵੇਗਮਲਤ੍ਥਂ ਭਨ੍ਤੇ, ਤਪ੍ਪਚ੍ਚਯਾ ਵਾਪਿ ਦਦਾਮਿ ਦਾਨਂ;

ਪਟਿਗ੍ਗਣ੍ਹ ਭਨ੍ਤੇ ਵਤ੍ਥਯੁਗਾਨਿ ਅਟ੍ਠ, ਯਕ੍ਖਸ੍ਸਿਮਾ ਗਚ੍ਛਨ੍ਤੁ ਦਕ੍ਖਿਣਾਯੋਤਿ.

‘‘ਅਦ੍ਧਾ ਹਿ ਦਾਨਂ ਬਹੁਧਾ ਪਸਤ੍ਥਂ, ਦਦਤੋ ਚ ਤੇ ਅਕ੍ਖਯਧਮ੍ਮਮਤ੍ਥੁ;

ਪਟਿਗਣ੍ਹਾਮਿ ਤੇ ਵਤ੍ਥਯੁਗਾਨਿ ਅਟ੍ਠ, ਯਕ੍ਖਸ੍ਸਿਮਾ ਗਚ੍ਛਨ੍ਤੁ ਦਕ੍ਖਿਣਾਯੋਤਿ.

‘‘ਤਤੋ ¶ ਹਿ ਸੋ ਆਚਮਯਿਤ੍ਵਾ ਲਿਚ੍ਛਵਿ, ਥੇਰਸ੍ਸ ਦਤ੍ਵਾਨ ਯੁਗਾਨਿ ਅਟ੍ਠ;

ਪਟਿਗ੍ਗਹੀਤਾਨਿ ਚ ਤਾਨਿ ਅਸ੍ਸੁ, ਯਕ੍ਖਞ੍ਚ ਪਸ੍ਸੇਥ ਸਨ੍ਨਦ੍ਧਦੁਸ੍ਸਂ.

‘‘ਤਮਦ੍ਦਸਾ ਚਨ੍ਦਨਸਾਰਲਿਤ੍ਤਂ, ਆਜਞ੍ਞਮਾਰੂਲ਼੍ਹਮੁਲ਼ਾਰਵਣ੍ਣਂ;

ਅਲਙ੍ਕਤਂ ਸਾਧੁਨਿਵਤ੍ਥਦੁਸ੍ਸਂ, ਪਰਿਵਾਰਿਤਂ ਯਕ੍ਖਮਹਿਦ੍ਧਿਪਤ੍ਤਂ.

‘‘ਸੋ ਤਂ ਦਿਸ੍ਵਾ ਅਤ੍ਤਮਨੋ ਉਦਗ੍ਗੋ, ਪਹਟ੍ਠਚਿਤ੍ਤੋ ਚ ਸੁਭਗ੍ਗਰੂਪੋ;

ਕਮ੍ਮਞ੍ਚ ਦਿਸ੍ਵਾਨ ਮਹਾਵਿਪਾਕਂ, ਸਨ੍ਦਿਟ੍ਠਿਕਂ ਚਕ੍ਖੁਨਾ ਸਚ੍ਛਿਕਤ੍ਵਾ.

‘‘ਤਮੇਨਮਵੋਚ ¶ ਉਪਸਙ੍ਕਮਿਤ੍ਵਾ, ਦਸ੍ਸਾਮਿ ਦਾਨਂ ਸਮਣਬ੍ਰਾਹ੍ਮਣਾਨਂ;

ਨ ਚਾਪਿ ਮੇ ਕਿਞ੍ਚਿ ਅਦੇਯ੍ਯਮਤ੍ਥਿ, ਤੁਵਞ੍ਚ ਮੇ ਯਕ੍ਖ ਬਹੂਪਕਾਰੋਤਿ.

‘‘ਤੁਵਞ੍ਚ ਮੇ ਲਿਚ੍ਛਵਿ ਏਕਦੇਸਂ, ਅਦਾਸਿ ਦਾਨਾਨਿ ਅਮੋਘਮੇਤਂ;

ਸ੍ਵਾਹਂ ¶ ਕਰਿਸ੍ਸਾਮਿ ਤਯਾਵ ਸਕ੍ਖਿਂ, ਅਮਾਨੁਸੋ ਮਾਨੁਸਕੇਨ ਸਦ੍ਧਿਨ੍ਤਿ.

‘‘ਗਤੀ ਚ ਬਨ੍ਧੂ ਚ ਪਰਾਯਣਞ੍ਚ, ਮਿਤ੍ਤੋ ਮਮਾਸਿ ਅਥ ਦੇਵਤਾ ਮੇ;

ਯਾਚਾਮਿ ਤਂ ਪਞ੍ਜਲਿਕੋ ਭਵਿਤ੍ਵਾ, ਇਚ੍ਛਾਮਿ ਤਂ ਯਕ੍ਖ ਪੁਨਪਿ ਦਟ੍ਠੁਨ੍ਤਿ.

‘‘ਸਚੇ ਤੁਵਂ ਅਸ੍ਸਦ੍ਧੋ ਭਵਿਸ੍ਸਸਿ, ਕਦਰਿਯਰੂਪੋ ਵਿਪ੍ਪਟਿਪਨ੍ਨਚਿਤ੍ਤੋ;

ਤ੍ਵਂ ਨੇਵ ਮਂ ਲਚ੍ਛਸਿ ਦਸ੍ਸਨਾਯ, ਦਿਸ੍ਵਾ ਚ ਤਂ ਨੋਪਿ ਚ ਆਲਪਿਸ੍ਸਂ.

‘‘ਸਚੇ ¶ ਪਨ ਤ੍ਵਂ ਭਵਿਸ੍ਸਸਿ ਧਮ੍ਮਗਾਰਵੋ, ਦਾਨੇ ਰਤੋ ਸਙ੍ਗਹਿਤਤ੍ਤਭਾਵੋ;

ਓਪਾਨਭੂਤੋ ਸਮਣਬ੍ਰਾਹ੍ਮਣਾਨਂ, ਏਵਂ ਮਮਂ ਲਚ੍ਛਸਿ ਦਸ੍ਸਨਾਯ.

‘‘ਦਿਸ੍ਵਾ ਚ ਤਂ ਆਲਪਿਸ੍ਸਂ ਭਦਨ੍ਤੇ, ਇਮਞ੍ਚ ਸੂਲਤੋ ਲਹੁਂ ਪਮੁਞ੍ਚ;

ਯਤੋਨਿਦਾਨਂ ਅਕਰਿਮ੍ਹ ਸਕ੍ਖਿਂ, ਮਞ੍ਞਾਮਿ ਸੂਲਾਵੁਤਕਸ੍ਸ ਕਾਰਣਾ.

‘‘ਤੇ ਅਞ੍ਞਮਞ੍ਞਂ ਅਕਰਿਮ੍ਹ ਸਕ੍ਖਿਂ, ਅਯਞ੍ਚ ਸੂਲਤੋ ਲਹੁਂ ਪਮੁਤ੍ਤੋ;

ਸਕ੍ਕਚ੍ਚ ਧਮ੍ਮਾਨਿ ਸਮਾਚਰਨ੍ਤੋ, ਮੁਚ੍ਚੇਯ੍ਯ ਸੋ ਨਿਰਯਾ ਚ ਤਮ੍ਹਾ;

‘‘ਕਪ੍ਪਿਤਕਞ੍ਚ ¶ ਉਪਸਙ੍ਕਮਿਤ੍ਵਾ, ਤੇਨੇਵ ਸਹ ਸਂਵਿਭਜਿਤ੍ਵਾ ਕਾਲੇ;

ਸਯਂ ਮੁਖੇਨੂਪਨਿਸਜ੍ਜ ਪੁਚ੍ਛ, ਸੋ ਤੇ ਅਕ੍ਖਿਸ੍ਸਤਿ ਏਤਮਤ੍ਥਂ.

‘‘ਤਮੇਵ ਭਿਕ੍ਖੁਂ ਉਪਸਙ੍ਕਮਿਤ੍ਵਾ, ਪੁਚ੍ਛਸ੍ਸੁ ਅਞ੍ਞਤ੍ਥਿਕੋ ਨੋ ਚ ਪਦੁਟ੍ਠਚਿਤ੍ਤੋ;

ਸੋ ਤੇ ਸੁਤਂ ਅਸੁਤਞ੍ਚਾਪਿ ਧਮ੍ਮਂ, ਸਬ੍ਬਮ੍ਪਿ ਅਕ੍ਖਿਸ੍ਸਤਿ ਯਥਾ ਪਜਾਨਨ੍ਤਿ.

‘‘ਸੋ ¶ ਤਤ੍ਥ ਰਹਸ੍ਸਂ ਸਮੁਲ੍ਲਪਿਤ੍ਵਾ, ਸਕ੍ਖਿਂ ਕਰਿਤ੍ਵਾਨ ਅਮਾਨੁਸੇਨ;

ਪਕ੍ਕਾਮਿ ਸੋ ਲਿਚ੍ਛਵਿਨਂ ਸਕਾਸਂ, ਅਥ ਬ੍ਰਵਿ ਪਰਿਸਂ ਸਨ੍ਨਿਸਿਨ੍ਨਂ.

‘‘‘ਸੁਣਨ੍ਤੁ ¶ ਭੋਨ੍ਤੋ ਮਮ ਏਕਵਾਕ੍ਯਂ, ਵਰਂ ਵਰਿਸ੍ਸਂ ਲਭਿਸ੍ਸਾਮਿ ਅਤ੍ਥਂ;

ਸੂਲਾਵੁਤੋ ਪੁਰਿਸੋ ਲੁਦ੍ਦਕਮ੍ਮੋ, ਪਣਿਹਿਤਦਣ੍ਡੋ ਅਨੁਸਤ੍ਤਰੂਪੋ.

‘‘‘ਏਤ੍ਤਾਵਤਾ ਵੀਸਤਿਰਤ੍ਤਿਮਤ੍ਤਾ, ਯਤੋ ਆਵੁਤੋ ਨੇਵ ਜੀਵਤਿ ਨ ਮਤੋ;

ਤਾਹਂ ਮੋਚਯਿਸ੍ਸਾਮਿ ਦਾਨਿ, ਯਥਾਮਤਿਂ ਅਨੁਜਾਨਾਤੁ ਸਙ੍ਘੋ’ਤਿ.

‘‘‘ਏਤਞ੍ਚ ਅਞ੍ਞਞ੍ਚ ਲਹੁਂ ਪਮੁਞ੍ਚ, ਕੋ ਤਂ ਵਦੇਥ ਤਥਾ ਕਰੋਨ੍ਤਂ;

ਯਥਾ ਪਜਾਨਾਸਿ ਤਥਾ ਕਰੋਹਿ, ਯਥਾਮਤਿਂ ਅਨੁਜਾਨਾਤਿ ਸਙ੍ਘੋ’ਤਿ.

‘‘ਸੋ ¶ ਤਂ ਪਦੇਸਂ ਉਪਸਙ੍ਕਮਿਤ੍ਵਾ, ਸੂਲਾਵੁਤਂ ਮੋਚਯਿ ਖਿਪ੍ਪਮੇਵ;

ਮਾ ਭਾਯਿ ਸਮ੍ਮਾਤਿ ਚ ਤਂ ਅਵੋਚ, ਤਿਕਿਚ੍ਛਕਾਨਞ੍ਚ ਉਪਟ੍ਠਪੇਸਿ.

‘‘ਕਪ੍ਪਿਤਕਞ੍ਚ ਉਪਸਙ੍ਕਮਿਤ੍ਵਾ, ਤੇਨੇਵ ਸਹ ਸਂਵਿਭਜਿਤ੍ਵਾ ਕਾਲੇ;

ਸਯਂ ਮੁਖੇਨੂਪਨਿਸਜ੍ਜ ਲਿਚ੍ਛਵਿ, ਤਥੇਵ ਪੁਚ੍ਛਿਤ੍ਥ ਨਂ ਕਾਰਣਤ੍ਥਿਕੋ.

‘‘ਸੂਲਾਵੁਤੋ ਪੁਰਿਸੋ ਲੁਦ੍ਦਕਮ੍ਮੋ, ਪਣੀਤਦਣ੍ਡੋ ਅਨੁਸਤ੍ਤਰੂਪੋ;

ਏਤ੍ਤਾਵਤਾ ਵੀਸਤਿਰਤ੍ਤਿਮਤ੍ਤਾ, ਯਤੋ ਆਵੁਤੋ ਨੇਵ ਜੀਵਤਿ ਨ ਮਤੋ.

‘‘ਸੋ ਮੋਚਿਤੋ ਗਨ੍ਤ੍ਵਾ ਮਯਾ ਇਦਾਨਿ, ਏਤਸ੍ਸ ਯਕ੍ਖਸ੍ਸ ਵਚੋ ਹਿ ਭਨ੍ਤੇ;

ਸਿਯਾ ਨੁ ਖੋ ਕਾਰਣਂ ਕਿਞ੍ਚਿਦੇਵ, ਯੇਨ ਸੋ ਨਿਰਯਂ ਨੋ ਵਜੇਯ੍ਯ.

‘‘ਆਚਿਕ੍ਖ ¶ ਭਨ੍ਤੇ ਯਦਿ ਅਤ੍ਥਿ ਹੇਤੁ, ਸਦ੍ਧਾਯਿਕਂ ਹੇਤੁਵਚੋ ਸੁਣੋਮ;

ਨ ਤੇਸਂ ਕਮ੍ਮਾਨਂ ਵਿਨਾਸਮਤ੍ਥਿ, ਅਵੇਦਯਿਤ੍ਵਾ ਇਧ ਬ੍ਯਨ੍ਤਿਭਾਵੋਤਿ.

‘‘ਸਚੇ ਸ ਧਮ੍ਮਾਨਿ ਸਮਾਚਰੇਯ੍ਯ, ਸਕ੍ਕਚ੍ਚ ਰਤ੍ਤਿਨ੍ਦਿਵਮਪ੍ਪਮਤ੍ਤੋ;

ਮੁਚ੍ਚੇਯ੍ਯ ਸੋ ਨਿਰਯਾ ਚ ਤਮ੍ਹਾ, ਕਮ੍ਮਂ ਸਿਯਾ ਅਞ੍ਞਤ੍ਰ ਵੇਦਨੀਯਨ੍ਤਿ.

‘‘ਅਞ੍ਞਾਤੋ ¶ ਏਸੋ ਪੁਰਿਸਸ੍ਸ ਅਤ੍ਥੋ, ਮਮਮ੍ਪਿ ਦਾਨਿ ਅਨੁਕਮ੍ਪ ਭਨ੍ਤੇ;

ਅਨੁਸਾਸ ਮਂ ਓਵਦ ਭੂਰਿਪਞ੍ਞ, ਯਥਾ ਅਹਂ ਨੋ ਨਿਰਯਂ ਵਜੇਯ੍ਯਨ੍ਤਿ.

‘‘ਅਜ੍ਜੇਵ ਬੁਦ੍ਧਂ ਸਰਣਂ ਉਪੇਹਿ, ਧਮ੍ਮਞ੍ਚ ¶ ਸਙ੍ਘਞ੍ਚ ਪਸਨ੍ਨਚਿਤ੍ਤੋ;

ਤਥੇਵ ਸਿਕ੍ਖਾਯ ਪਦਾਨਿ ਪਞ੍ਚ, ਅਖਣ੍ਡਫੁਲ੍ਲਾਨਿ ਸਮਾਦਿਯਸ੍ਸੁ.

‘‘ਪਾਣਾਤਿਪਾਤਾ ਵਿਰਮਸ੍ਸੁ ਖਿਪ੍ਪਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਸ੍ਸੁ;

ਅਮਜ੍ਜਪੋ ਮਾ ਚ ਮੁਸਾ ਅਭਾਣੀ, ਸਕੇਨ ਦਾਰੇਨ ਚ ਹੋਤਿ ਤੁਟ੍ਠੋ;

ਇਮਞ੍ਚ ਅਰਿਯਂ ਅਟ੍ਠਙ੍ਗਵਰੇਨੁਪੇਤਂ, ਸਮਾਦਿਯਾਹਿ ਕੁਸਲਂ ਸੁਖੁਦ੍ਰਯਂ.

‘‘ਚੀਵਰਂ ¶ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਅਨ੍ਨਂ ਪਾਨਂ ਖਾਦਨੀਯਂ, ਵਤ੍ਥਸੇਨਾਸਨਾਨਿ ਚ;

ਦਦਾਹਿ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਭਿਕ੍ਖੂਪਿ ਸੀਲਸਮ੍ਪਨ੍ਨੇ, ਵੀਤਰਾਗੇ ਬਹੁਸ੍ਸੁਤੇ;

ਤਪ੍ਪੇਹਿ ਅਨ੍ਨਪਾਨੇਨ, ਸਦਾ ਪੁਞ੍ਞਂ ਪਵਡ੍ਢਤਿ.

‘‘ਏਵਞ੍ਚ ¶ ਧਮ੍ਮਾਨਿ ਸਮਾਚਰਨ੍ਤੋ, ਸਕ੍ਕਚ੍ਚ ਰਤ੍ਤਿਨ੍ਦਿਵਮਪ੍ਪਮਤ੍ਤੋ;

ਮੁਞ੍ਚ ਤੁਵਂ ਨਿਰਯਾ ਚ ਤਮ੍ਹਾ, ਕਮ੍ਮਂ ਸਿਯਾ ਅਞ੍ਞਤ੍ਰ ਵੇਦਨੀਯਨ੍ਤਿ.

‘‘ਅਜ੍ਜੇਵ ਬੁਦ੍ਧਂ ਸਰਣਂ ਉਪੇਮਿ, ਧਮ੍ਮਞ੍ਚ ਸਙ੍ਘਞ੍ਚ ਪਸਨ੍ਨਚਿਤ੍ਤੋ;

ਤਥੇਵ ਸਿਕ੍ਖਾਯ ਪਦਾਨਿ ਪਞ੍ਚ, ਅਖਣ੍ਡਫੁਲ੍ਲਾਨਿ ਸਮਾਦਿਯਾਮਿ.

‘‘ਪਾਣਾਤਿਪਾਤਾ ਵਿਰਮਾਮਿ ਖਿਪ੍ਪਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਾਮਿ;

ਅਮਜ੍ਜਪੋ ਨੋ ਚ ਮੁਸਾ ਭਣਾਮਿ, ਸਕੇਨ ਦਾਰੇਨ ਚ ਹੋਮਿ ਤੁਟ੍ਠੋ;

ਇਮਞ੍ਚ ਅਰਿਯਂ ਅਟ੍ਠਙ੍ਗਵਰੇਨੁਪੇਤਂ, ਸਮਾਦਿਯਾਮਿ ਕੁਸਲਂ ਸੁਖੁਦ੍ਰਯਂ.

‘‘ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਅਨ੍ਨਂ ਪਾਨਂ ਖਾਦਨੀਯਂ, ਵਤ੍ਥਸੇਨਾਸਨਾਨਿ ਚ.

‘‘ਭਿਕ੍ਖੂ ¶ ਚ ਸੀਲਸਮ੍ਪਨ੍ਨੇ, ਵੀਤਰਾਗੇ ਬਹੁਸ੍ਸੁਤੇ;

ਦਦਾਮਿ ਨ ਵਿਕਮ੍ਪਾਮਿ, ਬੁਦ੍ਧਾਨਂ ਸਾਸਨੇ ਰਤੋਤਿ.

‘‘ਏਤਾਦਿਸੋ ਲਿਚ੍ਛਵਿ ਅਮ੍ਬਸਕ੍ਕਰੋ, ਵੇਸਾਲਿਯਂ ਅਞ੍ਞਤਰੋ ਉਪਾਸਕੋ;

ਸਦ੍ਧੋ ਮੁਦੂ ਕਾਰਕਰੋ ਚ ਭਿਕ੍ਖੁ, ਸਙ੍ਘਞ੍ਚ ਸਕ੍ਕਚ੍ਚ ਤਦਾ ਉਪਟ੍ਠਹਿ.

‘‘ਸੂਲਾਵੁਤੋ ਚ ਅਰੋਗੋ ਹੁਤ੍ਵਾ, ਸੇਰੀ ਸੁਖੀ ਪਬ੍ਬਜ੍ਜਂ ਉਪਾਗਮਿ;

ਭਿਕ੍ਖੁਞ੍ਚ ਆਗਮ੍ਮ ਕਪ੍ਪਿਤਕੁਤ੍ਤਮਂ, ਉਭੋਪਿ ਸਾਮਞ੍ਞਫਲਾਨਿ ਅਜ੍ਝਗੁਂ.

‘‘ਏਤਾਦਿਸਾ ¶ ਸਪ੍ਪੁਰਿਸਾਨ ਸੇਵਨਾ, ਮਹਪ੍ਫਲਾ ਹੋਤਿ ਸਤਂ ਵਿਜਾਨਤਂ;

ਸੂਲਾਵੁਤੋ ਅਗ੍ਗਫਲਂ ਅਫਸ੍ਸਯਿ, ਫਲਂ ਕਨਿਟ੍ਠਂ ਪਨ ਅਮ੍ਬਸਕ੍ਕਰੋ’’ਤਿ. –

੫੫੭-੫੬੦. ਤਤ੍ਥ ਵਾਸੂਪਗਚ੍ਛਿਤ੍ਥਾਤਿ ਵਾਸਂ ਉਪਗਚ੍ਛਿ. ਗਿਹਿਕਿਚ੍ਚਾਨੀਤਿ ਗੇਹਂ ਆਵਸਨ੍ਤੇਨ ਕਾਤਬ੍ਬਕੁਟੁਮ੍ਬਕਿਚ੍ਚਾਨਿ. ਵਿਚੇਯ੍ਯਾਤਿ ਸੁਨ੍ਦਰਵਤ੍ਥਗਹਣਤ੍ਥਂ ਵਿਚਿਨਿਤ੍ਵਾ. ਪਟਿਕ੍ਕਨ੍ਤਨ੍ਤਿ ਪਿਣ੍ਡਪਾਤਤੋ ਪਟਿਕ੍ਕਨ੍ਤਂ. ਤੇਨਾਹ ‘‘ਗੋਚਰਤੋ ਨਿਵਤ੍ਤ’’ਨ੍ਤਿ. ਅਵੋਚਾਤਿ ‘‘ਵੇਸਾਲਿਯਂ ਲਿਚ੍ਛਵਿਹਂ, ਭਦਨ੍ਤੇ’’ਤਿਆਦਿਕਂ ਅਵੋਚ.

੫੬੨-੩. ਵਿਦਾਲਯਨ੍ਤੀਤਿ ਵਿਫਾਲਯਨ੍ਤਿ. ਪਾਦਕੁਠਾਰਿਕਾਹੀਤਿ ਪਾਦਸਙ੍ਖਾਤਾਹਿ ਕੁਠਾਰੀਹਿ. ਪਾਤਯਨ੍ਤੀਤਿ ਪਰਿਪਾਤਯਨ੍ਤਿ.

੫੬੪. ਤਿਣੇਨਾਤਿ ¶ ਤਿਣਗ੍ਗੇਨਾਪਿ. ਮੂਲ਼੍ਹਸ੍ਸ ਮਗ੍ਗਮ੍ਪਿ ਨ ਪਾਵਦਾਸੀਤਿ ਮਗ੍ਗਮੂਲ਼੍ਹਸ੍ਸ ਮਗ੍ਗਮ੍ਪਿ ਤ੍ਵਂ ਨ ਕਥਯਸਿ ‘‘ਏਵਾਯਂ ਪੁਰਿਸਾ ਇਤੋ ਚਿਤੋ ਚ ਪਰਿਬ੍ਭਮਤੂ’’ਤਿ. ਕੇਲ਼ੀਸੀਲੋ ਹਿ ਅਯਂ ਰਾਜਾ. ਸਯਮਾਦਿਯਾਸੀਤਿ ਅਨ੍ਧਸ੍ਸ ਹਤ੍ਥਤੋ ਯਟ੍ਠਿਂ ਸਯਮੇਵ ਅਚ੍ਛਿਨ੍ਦਿਤ੍ਵਾ ਗਣ੍ਹਸਿ. ਸਂਵਿਭਾਗਂ ਕਰੋਸੀਤਿ ਅਤ੍ਤਨਾ ਪਰਿਭੁਞ੍ਜਿਤਬ੍ਬਵਤ੍ਥੁਤੋ ਏਕਚ੍ਚਾਨਿ ਦਤ੍ਵਾ ਸਂਵਿਭਜਸਿ.

੫੬੫. ਪਚ੍ਚੇਮਿ, ਭਨ੍ਤੇ, ਯਂ ਤ੍ਵਂ ਵਦੇਸੀਤਿ ‘‘ਭਨ੍ਤੇ, ਤ੍ਵਂ ਪਤ੍ਤਾਨਿ ਭਿਜ੍ਜਨ੍ਤੀ’’ਤਿਆਦਿਨਾ ਯਂ ਵਦੇਸਿ, ਤਂ ਪਟਿਜਾਨਾਮਿ, ਸਬ੍ਬਮੇਵੇਤਂ ਮਯਾ ਕਤਂ ਕਾਰਾਪਿਤਞ੍ਚਾਤਿ ਦਸ੍ਸੇਤਿ. ਏਤਮ੍ਪੀਤਿ ਏਤਂ ਖਿਡ੍ਡਾਧਿਪ੍ਪਾਯੇਨ ¶ ਕਤਮ੍ਪਿ.

੫੬੬-੭. ਖਿਡ੍ਡਾਤਿ ਖਿਡ੍ਡਾਯ. ਪਸਵਿਤ੍ਵਾਤਿ ਉਪਚਿਨਿਤ੍ਵਾ. ਵੇਦੇਤੀਤਿ ਅਨੁਭਵਤਿ. ਅਸਮਤ੍ਤਭੋਗੀਤਿ ਅਪਰਿਪੁਣ੍ਣਭੋਗੋ. ਤਮੇਵ ਅਪਰਿਪੁਣ੍ਣਭੋਗਤਂ ਦਸ੍ਸੇਤੁਂ ‘‘ਦਹਰੋ ਯੁਵਾ’’ਤਿਆਦਿ ਵੁਤ੍ਤਂ. ਨਗ੍ਗਨਿਯਸ੍ਸਾਤਿ ਨਗ੍ਗਭਾਵਸ੍ਸ. ਕਿਂ ਸੁ ਤਤੋ ਦੁਕ੍ਖਤਰਸ੍ਸ ਹੋਤੀਤਿ ਕਿਂ ਸੁ ਨਾਮ ਤਤੋ ਨਗ੍ਗਭਾਵਤੋ ਦੁਕ੍ਖਤਰਂ ਅਸ੍ਸ ਪੇਤਸ੍ਸ ਹੋਤਿ. ਯਕ੍ਖਸ੍ਸਿਮਾ ਗਚ੍ਛਨ੍ਤੁ ਦਕ੍ਖਿਣਾਯੋਤਿ ਇਮਾ ਮਯਾ ਦਿਯ੍ਯਮਾਨਵਤ੍ਥਦਕ੍ਖਿਣਾਯੋ ਪੇਤਸ੍ਸ ਉਪਕਪ੍ਪਨ੍ਤੁ.

੫੬੮-੭੨. ਬਹੁਧਾ ¶ ਪਸਤ੍ਥਨ੍ਤਿ ਬਹੂਹਿ ਪਕਾਰੇਹਿ ਬੁਦ੍ਧਾਦੀਹਿ ਵਣ੍ਣਿਤਂ. ਅਕ੍ਖਯਧਮ੍ਮਮਤ੍ਥੂਤਿ ਅਪਰਿਕ੍ਖਯਧਮ੍ਮਂ ਹੋਤੁ. ਆਚਮਯਿਤ੍ਵਾਤਿ ਹਤ੍ਥਪਾਦਧੋਵਨਪੁਬ੍ਬਕਂ ਮੁਖਂ ਵਿਕ੍ਖਾਲੇਤ੍ਵਾ. ਚਨ੍ਦਨਸਾਰਲਿਤ੍ਤਨ੍ਤਿ ਸਾਰਭੂਤਚਨ੍ਦਨਲਿਤ੍ਤਂ. ਉਲ਼ਾਰਵਣ੍ਣਨ੍ਤਿ ਸੇਟ੍ਠਰੂਪਂ. ਪਰਿਵਾਰਿਤਨ੍ਤਿ ਅਨੁਕੁਲਵੁਤ੍ਤਿਨਾ ਪਰਿਜਨੇਨ ਪਰਿਵਾਰਿਤਂ. ਯਕ੍ਖਮਹਿਦ੍ਧਿਪਤ੍ਤਨ੍ਤਿ ਮਹਤਿਂ ਯਕ੍ਖਿਦ੍ਧਿਂ, ਦੇਵਿਦ੍ਧਿਂ ਪਤ੍ਵਾ ਠਿਤਂ. ਤਮੇਨਮਵੋਚਾਤਿ ਤਮੇਨਂ ਅਵੋਚ.

੫੭੩. ਏਕਦੇਸਂ ਅਦਾਸੀਤਿ ਚਤੂਸੁ ਪਚ੍ਚਯੇਸੁ ਏਕਦੇਸਭੂਤਂ ਵਤ੍ਥਦਾਨਂ ਸਨ੍ਧਾਯ ਵਦਤਿ. ਸਕ੍ਖਿਨ੍ਤਿ ਸਕ੍ਖਿਭਾਵਂ.

੫੭੪. ਮਮਾਸੀਤਿ ¶ ਮੇ ਆਸਿ. ਦੇਵਤਾ ਮੇਤਿ ਮਯ੍ਹਂ ਦੇਵਤਾ ਆਸੀਤਿ ਯੋਜਨਾ.

੫੭੫-੭. ਵਿਪ੍ਪਟਿਪਨ੍ਨਚਿਤ੍ਤੋਤਿ ਮਿਚ੍ਛਾਦਿਟ੍ਠਿਂ ਪਟਿਪਨ੍ਨਮਾਨਸੋ, ਧਮ੍ਮਿਯਂ ਪਟਿਪਦਂ ਪਹਾਯ ਅਧਮ੍ਮਿਯਂ ਪਟਿਪਦਂ ਪਟਿਪਨ੍ਨੋਤਿ ਅਤ੍ਥੋ. ਯਤੋਨਿਦਾਨਨ੍ਤਿ ਯਨ੍ਨਿਮਿਤ੍ਤਂ ਯਸ੍ਸ ਸਨ੍ਤਿਕਂ ਆਗਮਨਹੇਤੁ.

੫੭੯. ਸਂਵਿਭਜਿਤ੍ਵਾਤਿ ਦਾਨਸਂਵਿਭਾਗਂ ਕਤ੍ਵਾ. ਸਯਂ ਮੁਖੇਨੂਪਨਿਸਜ੍ਜ ਪੁਚ੍ਛਾਤਿ ਅਞ੍ਞੇ ਪੁਰਿਸੇ ਅਪੇਸੇਤ੍ਵਾ ਉਪਿਨਿਸੀਦਿਤ੍ਵਾ ਸਮ੍ਮੁਖੇਨੇਵ ਪੁਚ੍ਛ.

੫੮੧-੩. ਸਨ੍ਨਿਸਿਨ੍ਨਨ੍ਤਿ ਸਨ੍ਨਿਪਤਿਤਵਸੇਨ ਨਿਸਿਨ੍ਨਂ. ਲਭਿਸ੍ਸਾਮਿ ਅਤ੍ਥਨ੍ਤਿ ਮਯਾ ਇਚ੍ਛਿਤਮ੍ਪਿ ਅਤ੍ਥਂ ਲਭਿਸ੍ਸਾਮਿ. ਪਣਿਹਿਤਦਣ੍ਡੋਤਿ ਠਪਿਤਸਰੀਰਦਣ੍ਡੋ. ਅਨੁਸਤ੍ਤਰੂਪੋਤਿ ਰਾਜਿਨਿ ਅਨੁਸਤ੍ਤਸਭਾਵੋ. ਵੀਸਤਿਰਤ੍ਤਿਮਤ੍ਤਾਤਿ ਵੀਸਤਿਮਤ੍ਤਾ ਰਤ੍ਤਿਯੋ ਅਤਿਵਤ੍ਤਾਤਿ ਅਤ੍ਥੋ. ਤਾਹਨ੍ਤਿ ਤਂ ਅਹਂ. ਯਥਾਮਤਿਨ੍ਤਿ ਮਯ੍ਹਂ ਯਥਾਰੁਚਿ.

੫੮੪. ਏਤਞ੍ਚ ¶ ਅਞ੍ਞਞ੍ਚਾਤਿ ਏਤਂ ਸੂਲੇ ਆਵੁਤਂ ਪੁਰਿਸਂ ਅਞ੍ਞਞ੍ਚ ਯਸ੍ਸ ਰਾਜਾਣਾ ਪਣਿਹਿਤਾ, ਤਞ੍ਚ. ਲਹੁਂ ਪਮੁਞ੍ਚਾਤਿ ਸੀਘਂ ਮੋਚੇਹਿ. ਕੋ ਤਂ ਵਦੇਥ ਤਥਾ ਕਰੋਨ੍ਤਨ੍ਤਿ ਤਥਾ ਧਮ੍ਮਿਯਕਮ੍ਮਂ ਕਰੋਨ੍ਤਂ ਤਂ ਇਮਸ੍ਮਿਂ ਵਜ੍ਜਿਰਟ੍ਠੇ ਕੋ ਨਾਮ ‘‘ਨ ਪਮੋਚੇਹੀ’’ਤਿ ਵਦੇਯ੍ਯ, ਏਵਂ ਵਤ੍ਤੁਂ ਕੋਚਿਪਿ ਨ ਲਭਤੀਤਿ ਅਤ੍ਥੋ.

੫੮੫. ਤਿਕਿਚ੍ਛਕਾਨਞ੍ਚਾਤਿ ¶ ਤਿਕਿਚ੍ਛਕੇ ਚ.

੫੮੮. ਯਕ੍ਖਸ੍ਸ ਵਚੋਤਿ ਪੇਤਸ੍ਸ ਵਚਨਂ, ਤਸ੍ਸ, ਭਨ੍ਤੇ, ਪੇਤਸ੍ਸ ਵਚਨੇਨ ਏਵਮਕਾਸਿਨ੍ਤਿ ਦਸ੍ਸੇਤਿ.

੫੯੦. ਧਮ੍ਮਾਨੀਤਿ ਪੁਬ੍ਬੇ ਕਤਂ ਪਾਪਕਮ੍ਮਂ ਅਭਿਭਵਿਤੁਂ ਸਮਤ੍ਥੇ ਪੁਞ੍ਞਧਮ੍ਮੇ. ਕਮ੍ਮਂ ਸਿਯਾ ਅਞ੍ਞਤ੍ਰ ਵੇਦਨੀਯਨ੍ਤਿ ਯਂ ਤਸ੍ਮਿਂ ਪਾਪਕਮ੍ਮੇ ਉਪਪਜ੍ਜਵੇਦਨੀਯਂ, ਤਂ ਅਹੋਸਿਕਮ੍ਮਂ ਨਾਮ ਹੋਤਿ. ਯਂ ਪਨ ਅਪਰਪਰਿਯਾਯਵੇਦਨੀਯਂ, ਤਂ ਅਞ੍ਞਤ੍ਰ ਅਪਰਪਰਿਯਾਯੇ ਵੇਦਯਿਤਬ੍ਬਫਲਂ ਹੋਤਿ ਸਤਿ ਸਂਸਾਰਪ੍ਪਵਤ੍ਤਿਯਨ੍ਤਿ ਅਤ੍ਥੋ.

੫੯੩. ਇਮਞ੍ਚਾਤਿ ¶ ਅਤ੍ਤਨਾ ਵੁਚ੍ਚਮਾਨਂ ਤਾਯ ਆਸਨ੍ਨਂ ਪਚ੍ਚਕ੍ਖਂ ਵਾਤਿ ਕਤ੍ਵਾ ਵੁਤ੍ਤਂ. ਅਰਿਯਂ ਅਟ੍ਠਙ੍ਗਵਰੇਨੁਪੇਤਨ੍ਤਿ ਪਰਿਸੁਦ੍ਧਟ੍ਠੇਨ ਅਰਿਯਂ, ਪਾਣਾਤਿਪਾਤਾਵੇਰਮਣਿਆਦੀਹਿ ਅਟ੍ਠਹਿ ਅਙ੍ਗੇਹਿ ਉਪੇਤਂ ਯੁਤ੍ਤਂ ਉਤ੍ਤਮਂ ਉਪੋਸਥਸੀਲਂ. ਕੁਸਲਨ੍ਤਿ ਅਨਵਜ੍ਜਂ. ਸੁਖੁਦ੍ਰਯਨ੍ਤਿ ਸੁਖਵਿਪਾਕਂ.

੫੯੫. ਸਦਾ ਪੁਞ੍ਞਂ ਪਵਡ੍ਢਤੀਤਿ ਸਕਿਦੇਵ ਪੁਞ੍ਞਂ ਕਤ੍ਵਾ ‘‘ਅਲਮੇਤ੍ਤਾਵਤਾ’’ਤਿ ਅਪਰਿਤੁਟ੍ਠੋ ਹੁਤ੍ਵਾ ਅਪਰਾਪਰਂ ਸੁਚਰਿਤਂ ਪੂਰੇਨ੍ਤਸ੍ਸ ਸਬ੍ਬਕਾਲਂ ਪੁਞ੍ਞਂ ਅਭਿਵਡ੍ਢਤਿ, ਅਪਰਾਪਰਂ ਵਾ ਸੁਚਰਿਤਂ ਪੂਰੇਨ੍ਤਸ੍ਸ ਪੁਞ੍ਞਸਙ੍ਖਾਤਂ ਪੁਞ੍ਞਫਲਂ ਉਪਰੂਪਰਿ ਵਡ੍ਢਤਿ ਪਰਿਪੂਰੇਤੀਤਿ ਅਤ੍ਥੋ.

੫੯੭. ਏਵਂ ਥੇਰੇਨ ਵੁਤ੍ਤੇ ਰਾਜਾ ਅਪਾਯਦੁਕ੍ਖਤੋ ਉਤ੍ਰਸ੍ਤਚਿਤ੍ਤੋ ਰਤਨਤ੍ਤਯੇ ਪੁਞ੍ਞਧਮ੍ਮੇ ਚ ਅਭਿਵਡ੍ਢਮਾਨਪਸਾਦੋ ਤਤੋ ਪਟ੍ਠਾਯ ਸਰਣਾਨਿ ਸੀਲਾਨਿ ਚ ਸਮਾਦਿਯਨ੍ਤੋ ‘‘ਅਜ੍ਜੇਵ ਬੁਦ੍ਧਂ ਸਰਣਂ ਉਪੇਮੀ’’ਤਿਆਦਿਮਾਹ.

੬੦੧. ਤਤ੍ਥ ਏਤਾਦਿਸੋਤਿ ਏਦਿਸੋ ਯਥਾਵੁਤ੍ਤਰੂਪੋ. ਵੇਸਾਲਿਯਂ ਅਞ੍ਞਤਰੋ ਉਪਾਸਕੋਤਿ ਵੇਸਾਲਿਯਂ ਅਨੇਕਸਹਸ੍ਸੇਸੁ ਉਪਾਸਕੇਸੁ ਅਞ੍ਞਤਰੋ ਉਪਾਸਕੋ ਹੁਤ੍ਵਾ. ਸਦ੍ਧੋਤਿਆਦਿ ਕਲ੍ਯਾਣਮਿਤ੍ਤਸਨ੍ਨਿਸ੍ਸਯੇਨ ¶ ਤਸ੍ਸ ਪੁਰਿਮਭਾਵਤੋ ਅਞ੍ਞਾਦਿਸਤਂ ਦਸ੍ਸੇਤੁਂ ਵੁਤ੍ਤਂ. ਪੁਬ੍ਬੇ ਹਿ ਸੋ ਅਸ੍ਸਦ੍ਧੋ ਕਕ੍ਖਲ਼ੋ ਭਿਕ੍ਖੂਨਂ ਅਕ੍ਕੋਸਕਾਰਕੋ ਸਙ੍ਘਸ੍ਸ ਚ ਅਨੁਪਟ੍ਠਾਕੋ ਅਹੋਸਿ. ਇਦਾਨਿ ਪਨ ਸਦ੍ਧੋ ਮੁਦੁਕੋ ਹੁਤ੍ਵਾ ਭਿਕ੍ਖੁਸਙ੍ਘਞ੍ਚ ਸਕ੍ਕਚ੍ਚਂ ਤਦਾ ਉਪਟ੍ਠਹੀਤਿ. ਤਤ੍ਤ ਕਾਰਕਰੋਤਿ ਉਪਕਾਰਕਾਰੀ.

੬੦੨. ਉਭੋਪੀਤਿ ¶ ਦ੍ਵੇਪਿ ਸੂਲਾਵੁਤੋ ਰਾਜਾ ਚ. ਸਾਮਞ੍ਞਫਲਾਨਿ ਅਜ੍ਝਗੁਨ੍ਤਿ ਯਥਾਰਹਂ ਸਾਮਞ੍ਞਫਲਾਨਿ ਅਧਿਗਚ੍ਛਿਂਸੁ. ਤਯਿਦਂ ਯਥਾਰਹਂ ਦਸ੍ਸੇਤੁਂ ‘‘ਸੂਲਾਵੁਤੋ ਅਗ੍ਗਫਲਂ ਅਫਸ੍ਸਯਿ, ਫਲਂ ਕਨਿਟ੍ਠਂ ਪਨ ਅਮ੍ਬਸਕ੍ਕਰੋ’’ਤਿ ਵੁਤ੍ਤਂ. ਤਤ੍ਥ ਫਲਂ ਕਨਿਟ੍ਠਨ੍ਤਿ ਸੋਤਾਪਤ੍ਤਿਫਲਂ ਸਨ੍ਧਾਯਾਹ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.

ਏਵਂ ਰਞ੍ਞਾ ਪੇਤੇਨ ਅਤ੍ਤਨਾ ਚ ਵੁਤ੍ਤਮਤ੍ਥਂ ਆਯਸ੍ਮਾ ਕਪ੍ਪਿਤਕੋ ਸਤ੍ਥਾਰਂ ਵਨ੍ਦਿਤੁਂ ਸਾਵਤ੍ਥਿਂ ਗਤੋ ਭਗਵਤੋ ਆਰੋਚੇਸਿ ¶ . ਸਤ੍ਥਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਅਮ੍ਬਸਕ੍ਕਰਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੬੦੪-੫੭. ਸੁਣੋਥ ਯਕ੍ਖਸ੍ਸ ਵਾਣਿਜਾਨਞ੍ਚਾਤਿ ਇਦਂ ਸੇਰੀਸਕਪੇਤਵਤ੍ਥੁ. ਤਂ ਯਸ੍ਮਾ ਸੇਰੀਸਕਵਿਮਾਨਵਤ੍ਥੁਨਾ ਨਿਬ੍ਬਿਸੇਸਂ, ਤਸ੍ਮਾ ਤਤ੍ਥ ਅਟ੍ਠੁਪ੍ਪਤ੍ਤਿਯਂ ਗਾਥਾਸੁ ਚ ਯਂ ਵਤ੍ਤਬ੍ਬਂ, ਤਂ ਪਰਮਤ੍ਥਦੀਪਨਿਯਂ ਵਿਮਾਨਵਤ੍ਥੁਵਣ੍ਣਨਾਯਂ (ਵਿ. ਵ. ਅਟ੍ਠ. ੧੨੨੭ ਸੇਰੀਸਕਵਿਮਾਨਵਣ੍ਣਨਾ) ਵੁਤ੍ਤਮੇਵ, ਤਸ੍ਮਾ ਤਤ੍ਥ ਵੁਤ੍ਤਨਯੇਨ ਵੇਦਿਤਬ੍ਬਨ੍ਤਿ.

ਸੇਰੀਸਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਰਾਜਾ ਪਿਙ੍ਗਲਕੋ ਨਾਮਾਤਿ ਇਦਂ ਨਨ੍ਦਕਪੇਤਵਤ੍ਥੁ. ਤਸ੍ਸ ਕਾ ਉਪ੍ਪਤ੍ਤਿ? ਸਤ੍ਥੁ ਪਰਿਨਿਬ੍ਬਾਨਤੋ ਵਸ੍ਸਸਤਦ੍ਵਯਸ੍ਸ ਅਚ੍ਚਯੇਨ ਸੁਰਟ੍ਠਵਿਸਯੇ ਪਿਙ੍ਗਲੋ ਨਾਮ ਰਾਜਾ ਅਹੋਸਿ. ਤਸ੍ਸ ਸੇਨਾਪਤਿ ਨਨ੍ਦਕੋ ਨਾਮ ਮਿਚ੍ਛਾਦਿਟ੍ਠੀ ਵਿਪਰੀਤਦਸ੍ਸਨੋ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਾ ਮਿਚ੍ਛਾਗਾਹਂ ਪਗ੍ਗਯ੍ਹ ਵਿਚਰਿ. ਤਸ੍ਸ ਧੀਤਾ ਉਤ੍ਤਰਾ ਨਾਮ ਉਪਾਸਿਕਾ ਪਤਿਰੂਪੇ ਕੁਲੇ ਦਿਨ੍ਨਾ ਅਹੋਸਿ. ਨਨ੍ਦਕੋ ਪਨ ਕਾਲਂ ਕਤ੍ਵਾ ਵਿਞ੍ਝਾਟਵਿਯਂ ਮਹਤਿ ਨਿਗ੍ਰੋਧਰੁਕ੍ਖੇ ਵੇਮਾਨਿਕਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਮਿਂ ਕਾਲਕਤੇ ਉਤ੍ਤਰਾ ਸੁਚਿਸੀਤਲਗਨ੍ਧੋਦਕਪੂਰਿਤਂ ¶ ਪਾਨੀਯਘਟਂ ਕੁਮ੍ਮਾਸਾਭਿਸਙ੍ਖਤੇਹਿ ¶ ਵਣ੍ਣਗਨ੍ਧਰਸਸਮ੍ਪਨ੍ਨੇਹਿ ਪੂਵੇਹਿ ਪਰਿਪੁਣ੍ਣਸਰਾਵਕਞ੍ਚ ਅਞ੍ਞਤਰਸ੍ਸ ਖੀਣਾਸਵਤ੍ਥੇਰਸ੍ਸ ਦਤ੍ਵਾ ‘‘ਅਯਂ ਦਕ੍ਖਿਣਾ ਮਯ੍ਹਂ ਪਿਤੁ ਉਪਕਪ੍ਪਤੂ’’ਤਿ ਉਦ੍ਦਿਸਿ, ਤਸ੍ਸ ਤੇਨ ਦਾਨੇਨ ਦਿਬ੍ਬਪਾਨੀਯਂ ਅਪਰਿਮਿਤਾ ਚ ਪੂਵਾ ਪਾਤੁਭਵਿਂਸੁ. ਤਂ ਦਿਸ੍ਵਾ ਸੋ ਏਵਂ ਚਿਨ੍ਤੇਸਿ – ‘‘ਪਾਪਕਂ ਵਤ ਮਯਾ ਕਤਂ, ਯਂ ਮਹਾਜਨੋ ‘ਨਤ੍ਥਿ ਦਿਨ੍ਨ’ਨ੍ਤਿਆਦਿਨਾ ਮਿਚ੍ਛਾਗਾਹਂ ਗਾਹਿਤੋ. ਇਦਾਨਿ ਪਨ ਪਿਙ੍ਗਲੋ ਰਾਜਾ ਧਮ੍ਮਾਸੋਕਸ੍ਸ ਰਞ੍ਞੋ ਓਵਾਦਂ ਦਾਤੁਂ ਗਤੋ, ਸੋ ਤਂ ਤਸ੍ਸ ਦਤ੍ਵਾ ਆਗਮਿਸ੍ਸਤਿ, ਹਨ੍ਦਾਹਂ ਨਤ੍ਥਿਕਦਿਟ੍ਠਿਂ ਵਿਨੋਦੇਸ੍ਸਾਮੀ’’ਤਿ. ਨ ਚਿਰੇਨੇਵ ਚ ਪਿਙ੍ਗਲੋ ਰਾਜਾ ਧਮ੍ਮਾਸੋਕਸ੍ਸ ਰਞ੍ਞੋ ਓਵਾਦਂ ਦਤ੍ਵਾ ਪਟਿਨਿਵਤ੍ਤਨ੍ਤੋ ¶ ਮਗ੍ਗਂ ਪਟਿਪਜ੍ਜਿ.

ਅਥ ਸੋ ਪੇਤੋ ਅਤ੍ਤਨੋ ਵਸਨਟ੍ਠਾਨਾਭਿਮੁਖਂ ਤਂ ਮਗ੍ਗਂ ਨਿਮ੍ਮਿਨਿ. ਰਾਜਾ ਠਿਤਮਜ੍ਝਨ੍ਹਿਕੇ ਸਮਯੇ ਤੇਨ ਮਗ੍ਗੇਨ ਗਚ੍ਛਤਿ. ਤਸ੍ਸ ਗਛਨ੍ਤਸ੍ਸ ਪੁਰਤੋ ਮਗ੍ਗੋ ਦਿਸ੍ਸਤਿ, ਪਿਟ੍ਠਿਤੋ ਪਨਸ੍ਸ ਅਨ੍ਤਰਧਾਯਤਿ. ਸਬ੍ਬਪਚ੍ਛਤੋ ਗਚ੍ਛਨ੍ਤੋ ਪੁਰਿਸੋ ਮਗ੍ਗਂ ਅਨ੍ਤਰਹਿਤਂ ਦਿਸ੍ਵਾ ਭੀਤੋ ਵਿਸ੍ਸਰਂ ਵਿਰਵਨ੍ਤੋ ਧਾਵਿਤ੍ਵਾ ਰਞ੍ਞੋ ਆਰੋਚੇਸਿ, ਤਂ ਸੁਤ੍ਵਾ ਰਾਜਾ ਭੀਤੋ ਸਂਵਿਗ੍ਗਮਾਨਸੋ ਹਤ੍ਥਿਕ੍ਖਨ੍ਧੇ ਠਤ੍ਵਾ ਚਤਸ੍ਸੋ ਦਿਸਾ ਓਲੋਕੇਨ੍ਤੋ ਪੇਤਸ੍ਸ ਵਸਨਨਿਗ੍ਰੋਧਰੁਕ੍ਖਂ ਦਿਸ੍ਵਾ ਤਦਭਿਮੁਖੋ ਅਗਮਾਸਿ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯ. ਅਥਾਨੁਕ੍ਕਮੇਨ ਰਞ੍ਞੇ ਤਂ ਠਾਨਂ ਪਤ੍ਤੇ ਪੇਤੋ ਸਬ੍ਬਾਭਰਣਵਿਭੂਸਿਤੋ ਰਾਜਾਨਂ ਉਪਸਙ੍ਕਮਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਪੂਵੇ ਚ ਪਾਨੀਯਞ੍ਚ ਦਾਪੇਸਿ. ਰਾਜਾ ਸਪਰਿਜਨੋ ਨ੍ਹਤ੍ਵਾ ਪੂਵੇ ਖਾਦਿਤ੍ਵਾ ਪਾਨੀਯਂ ਪਿਵਿਤ੍ਵਾ ਪਟਿਪ੍ਪਸ੍ਸਦ੍ਧਮਗ੍ਗਕਿਲਮਥੋ ‘‘ਦੇਵਤਾ ਨੁਸਿ ਗਨ੍ਧਬ੍ਬੋ’’ਤਿਆਦਿਨਾ ਪੇਤਂ ਪੁਚ੍ਛਿ. ਪੇਤੋ ਆਦਿਤੋ ਪਟ੍ਠਾਯ ਅਤ੍ਤਨੋ ਪਵਤ੍ਤਿਂ ਆਚਿਕ੍ਖਿਤ੍ਵਾ ਰਾਜਾਨਂ ਮਿਚ੍ਛਾਦਸ੍ਸਨਤੋ ਵਿਮੋਚੇਤ੍ਵਾ ਸਰਣੇਸੁ ਸੀਲੇਸੁ ਚ ਪਤਿਟ੍ਠਾਪੇਸਿ. ਤਮਤ੍ਥਂ ਦਸ੍ਸੇਤੁਂ ਸਙ੍ਗੀਤਿਕਾਰਾ –

‘‘ਰਾਜਾ ਪਿਙ੍ਗਲਕੋ ਨਾਮ, ਸੁਰਟ੍ਠਾਨਂ ਅਧਿਪਤਿ ਅਹੁ;

ਮੋਰਿਯਾਨਂ ਉਪਟ੍ਠਾਨਂ ਗਨ੍ਤ੍ਵਾ, ਸੁਰਟ੍ਠਂ ਪੁਨਰਾਗਮਾ.

‘‘ਉਣ੍ਹੇ ਮਜ੍ਝਨ੍ਹਿਕੇ ਕਾਲੇ, ਰਾਜਾ ਪਙ੍ਕਂ ਉਪਾਗਮਿ;

ਅਦ੍ਦਸ ਮਗ੍ਗਂ ਰਮਣੀਯਂ, ਪੇਤਾਨਂ ਤਂ ਵਣ੍ਣੁਪਥਂ.

‘‘‘ਅਯਂ ਮਗ੍ਗੋ ਰਮਣੀਯੋ, ਖੇਮੋ ਸੋਵਤ੍ਥਿਕੋ ਸਿਵੋ;

ਇਮਿਨਾ ਸਾਰਥਿ ਯਾਮ, ਸੁਰਟ੍ਠਾਨਂ ਸਨ੍ਤਿਕੇ ਇਤੋ’.

‘‘ਤੇਨ ¶ ਪਾਯਾਸਿ ਸੋਰਟ੍ਠੋ, ਸੇਨਾਯ ਚਤੁਰਙ੍ਗਿਨਿਯਾ;

ਉਬ੍ਬਿਗ੍ਗਰੂਪੋ ਪੁਰਿਸੋ, ਸੋਰਟ੍ਠਂ ਏਤਦਬ੍ਰਵਿ.

‘‘‘ਕੁਮ੍ਮਗ੍ਗਂ ¶ ਪਟਿਪਨ੍ਨਮ੍ਹਾ, ਭਿਂਸਨਂ ਲੋਮਹਂਸਨਂ;

ਪੁਰਤੋ ਦਿਸ੍ਸਤਿ ਮਗ੍ਗੋ, ਪਚ੍ਛਤੋ ਚ ਨ ਦਿਸ੍ਸਤਿ.

‘‘‘ਕੁਮ੍ਮਗ੍ਗਂ ਪਟਿਪਨ੍ਨਮ੍ਹਾ, ਯਮਪੁਰਿਸਾਨ ਸਨ੍ਤਿਕੇ;

ਅਮਾਨੁਸੋ ਵਾਯਤਿ ਗਨ੍ਧੋ, ਘੋਸੋ ਸੁਯ੍ਯਤਿ ਦਾਰੁਣੋ’.

‘‘ਸਂਵਿਗ੍ਗੋ ਰਾਜਾ ਸੋਰਟ੍ਠੋ, ਸਾਰਥਿਂ ਏਤਦਬ੍ਰਵਿ;

‘ਕੁਮ੍ਮਗ੍ਗਂ ਪਟਿਪਨ੍ਨਮ੍ਹਾ, ਭਿਂਸਨਂ ਲੋਮਹਂਸਨਂ;

ਪੁਰਤੋ ਦਿਸ੍ਸਤਿ ਮਗ੍ਗੋ, ਪਚ੍ਛਤੋ ਚ ਨ ਦਿਸ੍ਸਤਿ.

‘‘‘ਕੁਮ੍ਮਗ੍ਗਂ ਪਟਿਪਨ੍ਨਮ੍ਹਾ, ਯਮਪੁਰਿਸਾਨ ਸਨ੍ਤਿਕੇ;

ਅਮਾਨੁਸੋ ਵਾਯਤਿ ਗਨ੍ਧੋ, ਘੋਸੋ ਸੁਯ੍ਯਤਿ ਦਾਰੁਣੋ’.

‘‘ਹਤ੍ਥਿਕ੍ਖਨ੍ਧਂ ਸਮਾਰੁਯ੍ਹ, ਓਲੋਕੇਨ੍ਤੋ ਚਤੁਦ੍ਦਿਸਾ;

ਅਦ੍ਦਸ ਨਿਗ੍ਰੋਧਂ ਰਮਣੀਯਂ, ਪਾਦਪਂ ਛਾਯਾਸਮ੍ਪਨ੍ਨਂ;

ਨੀਲਬ੍ਭਵਣ੍ਣਸਦਿਸਂ, ਮੇਘਵਣ੍ਣਸਿਰੀਨਿਭਂ.

‘‘ਸਾਰਥਿਂ ਆਮਨ੍ਤਯੀ ਰਾਜਾ, ‘ਕਿਂ ਏਸੋ ਦਿਸ੍ਸਤਿ ਬ੍ਰਹਾ;

ਨੀਲਬ੍ਭਵਣ੍ਣਸਦਿਸੋ, ਮੇਘਵਣ੍ਣਸਿਰੀਨਿਭੋ’.

‘‘ਨਿਗ੍ਰੋਧੋ ਸੋ ਮਹਾਰਾਜ, ਪਾਦਪੋ ਛਾਯਾਸਮ੍ਪਨ੍ਨੋ;

ਨੀਲਬ੍ਭਵਣ੍ਣਸਦਿਸੋ, ਮੇਘਵਣ੍ਣਸਿਰੀਨਿਭੋ.

‘‘ਤੇਨ ਪਾਯਾਸਿ ਸੋਰਟ੍ਠੋ, ਯੇਨ ਸੋ ਦਿਸ੍ਸਤੇ ਬ੍ਰਹਾ;

ਨੀਲਬ੍ਭਵਣ੍ਣਸਦਿਸੋ, ਮੇਘਵਣ੍ਣਸਿਰੀਨਿਭੋ.

‘‘ਹਤ੍ਥਿਕ੍ਖਨ੍ਧਤੋ ¶ ¶ ਓਰੁਯ੍ਹ, ਰਾਜਾ ਰੁਕ੍ਖਂ ਉਪਾਗਮਿ;

ਨਿਸੀਦਿ ਰੁਕ੍ਖਮੂਲਸ੍ਮਿਂ, ਸਾਮਚ੍ਚੋ ਸਪਰਿਜ੍ਜਨੋ;

ਪੂਰਂ ਪਾਨੀਯਸਰਕਂ, ਪੂਵੇ ਵਿਤ੍ਤੇ ਚ ਅਦ੍ਦਸ.

‘‘ਪੁਰਿਸੋ ਚ ਦੇਵਵਣ੍ਣੀ, ਸਬ੍ਬਾਭਰਣਭੂਸਿਤੋ;

ਉਪਸਙ੍ਕਮਿਤ੍ਵਾ ਰਾਜਾਨਂ, ਸੋਰਟ੍ਠਂ ਏਤਦਬ੍ਰਵਿ.

‘‘‘ਸ੍ਵਾਗਤਂ ਤੇ ਮਹਾਰਾਜ, ਅਥੋ ਤੇ ਅਦੁਰਾਗਤਂ;

ਪਿਵਤੁ ਦੇਵੋ ਪਾਨੀਯਂ, ਪੂਵੇ ਖਾਦ ਅਰਿਨ੍ਦਮ’.

‘‘ਪਿਵਿਤ੍ਵਾ ਰਾਜਾ ਪਾਨੀਯਂ, ਸਾਮਚ੍ਚੋ ਸਪਰਿਜ੍ਜਨੋ;

ਪੂਵੇ ਖਾਦਿਤ੍ਵਾ ਪਿਤ੍ਵਾ ਚ, ਸੋਰਟ੍ਠੋ ਏਤਦਬ੍ਰਵਿ.

‘‘ਦੇਵਤਾ ¶ ਨੁਸਿ ਗਨ੍ਧਬ੍ਬੋ, ਅਦੁ ਸਕ੍ਕੋ ਪੁਰਿਨ੍ਦਦੋ;

ਅਜਾਨਨ੍ਤਾ ਤਂ ਪੁਚ੍ਛਾਮ, ਕਥਂ ਜਾਨੇਮੁ ਤਂ ਮਯਨ੍ਤਿ.

‘‘ਨਾਮ੍ਹਿ ਦੇਵੋ ਨ ਗਨ੍ਧਬ੍ਬੋ, ਨਾਪਿ ਸਕ੍ਕੋ ਪੁਰਿਨ੍ਦਦੋ;

ਪੇਤੋ ਅਹਂ ਮਹਾਰਾਜ, ਸੁਰਟ੍ਠਾ ਇਧ ਮਾਗਤੋਤਿ.

‘‘ਕਿਂਸੀਲੋ ਕਿਂਸਮਾਚਾਰੋ, ਸੁਰਟ੍ਠਸ੍ਮਿਂ ਪੁਰੇ ਤੁਵਂ;

ਕੇਨ ਤੇ ਬ੍ਰਹ੍ਮਚਰਿਯੇਨ, ਆਨੁਭਾਵੋ ਅਯਂ ਤਵਾਤਿ.

‘‘ਤਂ ਸੁਣੋਹਿ ਮਹਾਰਾਜ, ਅਰਿਨ੍ਦਮ ਰਟ੍ਠਵਡ੍ਢਨ;

ਅਮਚ੍ਚਾ ਪਾਰਿਸਜ੍ਜਾ ਚ, ਬ੍ਰਾਹ੍ਮਣੋ ਚ ਪੁਰੋਹਿਤੋ.

‘‘ਸੁਰਟ੍ਠਸ੍ਮਿਂ ਅਹਂ ਦੇਵ, ਪੁਰਿਸੋ ਪਾਪਚੇਤਸੋ;

ਮਿਚ੍ਛਾਦਿਟ੍ਠਿ ਚ ਦੁਸ੍ਸੀਲੋ, ਕਦਰਿਯੋ