📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਖੁਦ੍ਦਕਨਿਕਾਯੇ

ਜਾਤਕ-ਅਟ੍ਠਕਥਾ

ਚਤੁਤ੍ਥੋ ਭਾਗੋ

੧੦. ਦਸਕਨਿਪਾਤੋ

[੪੩੯] ੧. ਚਤੁਦ੍ਵਾਰਜਾਤਕਵਣ੍ਣਨਾ

ਚਤੁਦ੍ਵਾਰਮਿਦਂ ਨਗਰਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਦੁਬ੍ਬਚਭਿਕ੍ਖੁਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਨਵਕਨਿਪਾਤਸ੍ਸ ਪਠਮਜਾਤਕੇ ਵਿਤ੍ਥਾਰਿਤਮੇਵ. ਇਧ ਪਨ ਸਤ੍ਥਾ ਤਂ ਭਿਕ੍ਖੁਂ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਦੁਬ੍ਬਚੋ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਪੁਬ੍ਬੇਪਿ ਤ੍ਵਂ ਭਿਕ੍ਖੁ ਦੁਬ੍ਬਚਤਾਯ ਪਣ੍ਡਿਤਾਨਂ ਵਚਨਂ ਅਕਤ੍ਵਾ ਖੁਰਚਕ੍ਕਂ ਆਪਾਦੇਸੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕਸ੍ਸਪਦਸਬਲਸ੍ਸ ਕਾਲੇ ਬਾਰਾਣਸਿਯਂ ਅਸੀਤਿਕੋਟਿਵਿਭਵਸ੍ਸ ਸੇਟ੍ਠਿਨੋ ਏਕੋ ਪੁਤ੍ਤੋ ਮਿਤ੍ਤਵਿਨ੍ਦਕੋ ਨਾਮ ਅਹੋਸਿ. ਤਸ੍ਸ ਮਾਤਾਪਿਤਰੋ ਸੋਤਾਪਨ੍ਨਾ ਅਹੇਸੁਂ, ਸੋ ਪਨ ਦੁਸ੍ਸੀਲੋ ਅਸ੍ਸਦ੍ਧੋ. ਅਥ ਨਂ ਅਪਰਭਾਗੇ ਪਿਤਰਿ ਕਾਲਕਤੇ ਮਾਤਾ ਕੁਟੁਮ੍ਬਂ ਵਿਚਾਰੇਨ੍ਤੀ ਆਹ – ‘‘ਤਾਤ, ਤਯਾ ਦੁਲ੍ਲਭਂ ਮਨੁਸ੍ਸਤ੍ਤਂ ਲਦ੍ਧਂ, ਦਾਨਂ ਦੇਹਿ, ਸੀਲਂ ਰਕ੍ਖਾਹਿ, ਉਪੋਸਥਕਮ੍ਮਂ ਕਰੋਹਿ, ਧਮ੍ਮਂ ਸੁਣਾਹੀ’’ਤਿ. ਅਮ੍ਮ, ਨ ਮਯ੍ਹਂ ਦਾਨਾਦੀਹਿ ਅਤ੍ਥੋ, ਮਾ ਮਂ ਕਿਞ੍ਚਿ ਅਵਚੁਤ੍ਥ, ਅਹਂ ਯਥਾਕਮ੍ਮਂ ਗਮਿਸ੍ਸਾਮੀਤਿ. ਏਵਂ ਵਦਨ੍ਤਮ੍ਪਿ ਨਂ ਏਕਦਿਵਸਂ ਪੁਣ੍ਣਮੁਪੋਸਥਦਿਵਸੇ ਮਾਤਾ ਆਹ – ‘‘ਤਾਤ, ਅਜ੍ਜ ਅਭਿਲਕ੍ਖਿਤੋ ਮਹਾਉਪੋਸਥਦਿਵਸੋ, ਅਜ੍ਜ ਉਪੋਸਥਂ ਸਮਾਦਿਯਿਤ੍ਵਾ ਵਿਹਾਰਂ ਗਨ੍ਤ੍ਵਾ ਸਬ੍ਬਰਤ੍ਤਿਂ ਧਮ੍ਮਂ ਸੁਤ੍ਵਾ ਏਹਿ, ਅਹਂ ਤੇ ਸਹਸ੍ਸਂ ਦਸ੍ਸਾਮੀ’’ਤਿ. ਸੋ ‘‘ਸਾਧੂ’’ਤਿ ਧਨਲੋਭੇਨ ਉਪੋਸਥਂ ਸਮਾਦਿਯਿਤ੍ਵਾ ਭੁਤ੍ਤਪਾਤਰਾਸੋ ਵਿਹਾਰਂ ਗਨ੍ਤ੍ਵਾ ਦਿਵਸਂ ਵੀਤਿਨਾਮੇਤ੍ਵਾ ਰਤ੍ਤਿਂ ਯਥਾ ਏਕਮ੍ਪਿ ਧਮ੍ਮਪਦਂ ਕਣ੍ਣਂ ਨ ਪਹਰਤਿ, ਤਥਾ ਏਕਸ੍ਮਿਂ ਪਦੇਸੇ ਨਿਪਜ੍ਜਿਤ੍ਵਾ ਨਿਦ੍ਦਂ ਓਕ੍ਕਮਿਤ੍ਵਾ ਪੁਨਦਿਵਸੇ ਪਾਤੋਵ ਮੁਖਂ ਧੋਵਿਤ੍ਵਾ ਗੇਹਂ ਗਨ੍ਤ੍ਵਾ ਨਿਸੀਦਿ.

ਮਾਤਾ ਪਨਸ੍ਸ ‘‘ਅਜ੍ਜ ਮੇ ਪੁਤ੍ਤੋ ਧਮ੍ਮਂ ਸੁਤ੍ਵਾ ਪਾਤੋਵ ਧਮ੍ਮਕਥਿਕਤ੍ਥੇਰਂ ਆਦਾਯ ਆਗਮਿਸ੍ਸਤੀ’’ਤਿ ਯਾਗੁਂ ਖਾਦਨੀਯਂ ਭੋਜਨੀਯਂ ਪਟਿਯਾਦੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਤਸ੍ਸਾਗਮਨਂ ਪਟਿਮਾਨੇਨ੍ਤੀ ਤਂ ਏਕਕਂ ਆਗਤਂ ਦਿਸ੍ਵਾ ‘‘ਤਾਤ, ਧਮ੍ਮਕਥਿਕੋ ਕੇਨ ਨ ਆਨੀਤੋ’’ਤਿ ਵਤ੍ਵਾ ‘‘ਨ ਮਯ੍ਹਂ ਧਮ੍ਮਕਥਿਕੇਨ ਅਤ੍ਥੋ’’ਤਿ ਵੁਤ੍ਤੇ ‘‘ਤੇਨ ਹਿ ਯਾਗੁਂ ਪਿਵਾ’’ਤਿ ਆਹ. ਸੋ ‘‘ਤੁਮ੍ਹੇਹਿ ਮਯ੍ਹਂ ਸਹਸ੍ਸਂ ਪਟਿਸ੍ਸੁਤਂ, ਤਂ ਤਾਵ ਮੇ ਦੇਥ, ਪਚ੍ਛਾ ਪਿਵਿਸ੍ਸਾਮੀ’’ਤਿ ਆਹ. ‘‘ਪਿਵ, ਤਾਤ, ਪਚ੍ਛਾ ਦਸ੍ਸਾਮੀ’’ਤਿ. ‘‘ਗਹੇਤ੍ਵਾਵ ਪਿਵਿਸ੍ਸਾਮੀ’’ਤਿ. ਅਥਸ੍ਸ ਮਾਤਾ ਸਹਸ੍ਸਭਣ੍ਡਿਕਂ ਪੁਰਤੋ ਠਪੇਸਿ. ਸੋ ਯਾਗੁਂ ਪਿਵਿਤ੍ਵਾ ਸਹਸ੍ਸਭਣ੍ਡਿਕਂ ਗਹੇਤ੍ਵਾ ਵੋਹਾਰਂ ਕਰੋਨ੍ਤੋ ਨ ਚਿਰਸ੍ਸੇਵ ਵੀਸਸਤਸਹਸ੍ਸਂ ਉਪ੍ਪਾਦੇਸਿ. ਅਥਸ੍ਸ ਏਤਦਹੋਸਿ – ‘‘ਨਾਵਂ ਉਪਟ੍ਠਪੇਤ੍ਵਾ ਵੋਹਾਰਂ ਕਰਿਸ੍ਸਾਮੀ’’ਤਿ. ਸੋ ਨਾਵਂ ਉਪਟ੍ਠਪੇਤ੍ਵਾ ‘‘ਅਮ੍ਮ, ਅਹਂ ਨਾਵਾਯ ਵੋਹਾਰਂ ਕਰਿਸ੍ਸਾਮੀ’’ਤਿ ਆਹ. ਅਥ ਨਂ ਮਾਤਾ ‘‘ਤ੍ਵਂ ਤਾਤ, ਏਕਪੁਤ੍ਤਕੋ, ਇਮਸ੍ਮਿਂ ਘਰੇ ਧਨਮ੍ਪਿ ਬਹੁ, ਸਮੁਦ੍ਦੋ ਅਨੇਕਾਦੀਨਵੋ, ਮਾ ਗਮੀ’’ਤਿ ਨਿਵਾਰੇਸਿ. ਸੋ ‘‘ਅਹਂ ਗਮਿਸ੍ਸਾਮੇਵ, ਨ ਸਕ੍ਕਾ ਮਂ ਨਿਵਾਰੇਤੁ’’ਨ੍ਤਿ ਵਤ੍ਵਾ ‘‘ਅਹਂ ਤਂ, ਤਾਤ, ਵਾਰੇਸ੍ਸਾਮੀ’’ਤਿ ਮਾਤਰਾ ਹਤ੍ਥੇ ਗਹਿਤੋ ਹਤ੍ਥਂ ਵਿਸ੍ਸਜ੍ਜਾਪੇਤ੍ਵਾ ਮਾਤਰਂ ਪਹਰਿਤ੍ਵਾ ਪਾਤੇਤ੍ਵਾ ਅਨ੍ਤਰਂ ਕਤ੍ਵਾ ਗਨ੍ਤ੍ਵਾ ਨਾਵਾਯ ਸਮੁਦ੍ਦਂ ਪਕ੍ਖਨ੍ਦਿ.

ਨਾਵਾ ਸਤ੍ਤਮੇ ਦਿਵਸੇ ਮਿਤ੍ਤਵਿਨ੍ਦਕਂ ਨਿਸ੍ਸਾਯ ਸਮੁਦ੍ਦਪਿਟ੍ਠੇ ਨਿਚ੍ਚਲਾ ਅਟ੍ਠਾਸਿ. ਕਾਲ਼ਕਣ੍ਣਿਸਲਾਕਾ ਕਰਿਯਮਾਨਾ ਮਿਤ੍ਤਵਿਨ੍ਦਕਸ੍ਸੇਵ ਹਤ੍ਥੇ ਤਿਕ੍ਖਤ੍ਤੁਂ ਪਤਿ. ਅਥਸ੍ਸ ਉਲ਼ੁਮ੍ਪਂ ਦਤ੍ਵਾ ‘‘ਇਮਂ ਏਕਂ ਨਿਸ੍ਸਾਯ ਬਹੂ ਮਾ ਨਸ੍ਸਨ੍ਤੂ’’ਤਿ ਤਂ ਸਮੁਦ੍ਦਪਿਟ੍ਠੇ ਖਿਪਿਂਸੁ. ਤਾਵਦੇਵ ਨਾਵਾ ਜਵੇਨ ਮਹਾਸਮੁਦ੍ਦਂ ਪਕ੍ਖਨ੍ਦਿ. ਸੋਪਿ ਉਲ਼ੁਮ੍ਪੇ ਨਿਪਜ੍ਜਿਤ੍ਵਾ ਏਕਂ ਦੀਪਕਂ ਪਾਪੁਣਿ. ਤਤ੍ਥ ਫਲਿਕਵਿਮਾਨੇ ਚਤਸ੍ਸੋ ਵੇਮਾਨਿਕਪੇਤਿਯੋ ਅਦ੍ਦਸ. ਤਾ ਸਤ੍ਤਾਹਂ ਦੁਕ੍ਖਂ ਅਨੁਭਵਨ੍ਤਿ, ਸਤ੍ਤਾਹਂ ਸੁਖਂ. ਸੋ ਤਾਹਿ ਸਦ੍ਧਿਂ ਸਤ੍ਤਾਹਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿ. ਅਥ ਨਂ ਤਾ ਦੁਕ੍ਖਾਨੁਭਵਨਤ੍ਥਾਯ ਗਚ੍ਛਮਾਨਾ ‘‘ਸਾਮਿ, ਮਯਂ ਸਤ੍ਤਮੇ ਦਿਵਸੇ ਆਗਮਿਸ੍ਸਾਮ, ਯਾਵ ਮਯਂ ਆਗਚ੍ਛਾਮ, ਤਾਵ ਅਨੁਕ੍ਕਣ੍ਠਮਾਨੋ ਇਧੇਵ ਵਸਾ’’ਤਿ ਵਤ੍ਵਾ ਅਗਮਂਸੁ. ਸੋ ਤਣ੍ਹਾਵਸਿਕੋ ਹੁਤ੍ਵਾ ਤਸ੍ਮਿਂਯੇਵ ਫਲਕੇ ਨਿਪਜ੍ਜਿਤ੍ਵਾ ਪੁਨ ਸਮੁਦ੍ਦਪਿਟ੍ਠੇਨ ਗਚ੍ਛਨ੍ਤੋ ਅਪਰਂ ਦੀਪਕਂ ਪਤ੍ਵਾ ਤਤ੍ਥ ਰਜਤਵਿਮਾਨੇ ਅਟ੍ਠ ਵੇਮਾਨਿਕਪੇਤਿਯੋ ਦਿਸ੍ਵਾ ਏਤੇਨੇਵ ਉਪਾਯੇਨ ਅਪਰਸ੍ਮਿਂ ਦੀਪਕੇ ਮਣਿਵਿਮਾਨੇ ਸੋਲ਼ਸ, ਅਪਰਸ੍ਮਿਂ ਦੀਪਕੇ ਕਨਕਵਿਮਾਨੇ ਦ੍ਵਤ੍ਤਿਂਸ ਵੇਮਾਨਿਕਪੇਤਿਯੋ ਦਿਸ੍ਵਾ ਤਾਹਿ ਸਦ੍ਧਿਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਾਸਮ੍ਪਿ ਦੁਕ੍ਖਂ ਅਨੁਭਵਿਤੁਂ ਗਤਕਾਲੇ ਪੁਨ ਸਮੁਦ੍ਦਪਿਟ੍ਠੇਨ ਗਚ੍ਛਨ੍ਤੋ ਏਕਂ ਪਾਕਾਰਪਰਿਕ੍ਖਿਤ੍ਤਂ ਚਤੁਦ੍ਵਾਰਂ ਨਗਰਂ ਅਦ੍ਦਸ. ਉਸ੍ਸਦਨਿਰਯੋ ਕਿਰੇਸ, ਬਹੂਨਂ ਨੇਰਯਿਕਸਤ੍ਤਾਨਂ ਕਮ੍ਮਕਰਣਾਨੁਭਵਨਟ੍ਠਾਨਂ ਮਿਤ੍ਤਵਿਨ੍ਦਕਸ੍ਸ ਅਲਙ੍ਕਤਪਟਿਯਤ੍ਤਨਗਰਂ ਵਿਯ ਹੁਤ੍ਵਾ ਉਪਟ੍ਠਾਸਿ.

ਸੋ ‘‘ਇਮਂ ਨਗਰਂ ਪਵਿਸਿਤ੍ਵਾ ਰਾਜਾ ਭਵਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਖੁਰਚਕ੍ਕਂ ਉਕ੍ਖਿਪਿਤ੍ਵਾ ਸੀਸੇ ਪਚ੍ਚਮਾਨਂ ਨੇਰਯਿਕਸਤ੍ਤਂ ਅਦ੍ਦਸ. ਅਥਸ੍ਸ ਤਂ ਤਸ੍ਸ ਸੀਸੇ ਖੁਰਚਕ੍ਕਂ ਪਦੁਮਂ ਵਿਯ ਹੁਤ੍ਵਾ ਉਪਟ੍ਠਾਸਿ. ਉਰੇ ਪਞ੍ਚਙ੍ਗਿਕਬਨ੍ਧਨਂ ਉਰਚ੍ਛਦਪਸਾਧਨਂ ਹੁਤ੍ਵਾ ਸੀਸਤੋ ਗਲਨ੍ਤਂ ਲੋਹਿਤਂ ਲੋਹਿਤਚਨ੍ਦਨਵਿਲੇਪਨਂ ਵਿਯ ਹੁਤ੍ਵਾ ਪਰਿਦੇਵਨਸਦ੍ਦੋ ਮਧੁਰਸਰੋ ਗੀਤਸਦ੍ਦੋ ਵਿਯ ਹੁਤ੍ਵਾ ਉਪਟ੍ਠਾਸਿ. ਸੋ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਭੋ ਪੁਰਿਸ, ਚਿਰਂ ਤਯਾ ਪਦੁਮਂ ਧਾਰਿਤਂ, ਦੇਹਿ ਮੇ ਏਤ’’ਨ੍ਤਿ ਆਹ. ‘‘ਸਮ੍ਮ, ਨਯਿਦਂ ਪਦੁਮਂ, ਖੁਰਚਕ੍ਕਂ ਏਤ’’ਨ੍ਤਿ. ‘‘ਤ੍ਵਂ ਮਯ੍ਹਂ ਅਦਾਤੁਕਾਮਤਾਯ ਏਵਂ ਵਦਸੀ’’ਤਿ. ਨੇਰਯਿਕਸਤ੍ਤੋ ਚਿਨ੍ਤੇਸਿ ‘‘ਮਯ੍ਹਂ ਕਮ੍ਮਂ ਖੀਣਂ ਭਵਿਸ੍ਸਤਿ, ਇਮਿਨਾਪਿ ਮਯਾ ਵਿਯ ਮਾਤਰਂ ਪਹਰਿਤ੍ਵਾ ਆਗਤੇਨ ਭਵਿਤਬ੍ਬਂ, ਦਸ੍ਸਾਮਿਸ੍ਸ ਖੁਰਚਕ੍ਕ’’ਨ੍ਤਿ. ਅਥ ਨਂ ‘‘ਏਹਿ ਭੋ, ਗਣ੍ਹ ਇਮ’’ਨ੍ਤਿ ਵਤ੍ਵਾ ਖੁਰਚਕ੍ਕਂ ਤਸ੍ਸ ਸੀਸੇ ਖਿਪਿ, ਤਂ ਤਸ੍ਸ ਮਤ੍ਥਕਂ ਪਿਸਮਾਨਂ ਭਸ੍ਸਿ. ਤਸ੍ਮਿਂ ਖਣੇ ਮਿਤ੍ਤਵਿਨ੍ਦਕੋ ਤਸ੍ਸ ਖੁਰਚਕ੍ਕਭਾਵਂ ਞਤ੍ਵਾ ‘‘ਤਵ ਖੁਰਚਕ੍ਕਂ ਗਣ੍ਹ, ਤਵ ਖੁਰਚਕ੍ਕਂ ਗਣ੍ਹਾ’’ਤਿ ਵੇਦਨਾਪ੍ਪਤ੍ਤੋ ਪਰਿਦੇਵਿ, ਇਤਰੋ ਅਨ੍ਤਰਧਾਯਿ. ਤਦਾ ਬੋਧਿਸਤ੍ਤੋ ਰੁਕ੍ਖਦੇਵਤਾ ਹੁਤ੍ਵਾ ਮਹਨ੍ਤੇਨ ਪਰਿਵਾਰੇਨ ਉਸ੍ਸਦਚਾਰਿਕਂ ਚਰਮਾਨੋ ਤਂ ਠਾਨਂ ਪਾਪੁਣਿ. ਮਿਤ੍ਤਵਿਨ੍ਦਕੋ ਤਂ ਓਲੋਕੇਤ੍ਵਾ ‘‘ਸਾਮਿ ਦੇਵਰਾਜ, ਇਦਂ ਮਂ ਚਕ੍ਕਂ ਸਣ੍ਹਕਰਣਿਯਂ ਵਿਯ ਤਿਲਾਨਿ ਪਿਸਮਾਨਂ ਓਤਰਤਿ, ਕਿਂ ਨੁ ਖੋ ਮਯਾ ਪਾਪਂ ਪਕਤ’’ਨ੍ਤਿ ਪੁਚ੍ਛਨ੍ਤੋ ਦ੍ਵੇ ਗਾਥਾ ਅਭਾਸਿ –

੧.

‘‘ਚਤੁਦ੍ਵਾਰਮਿਦਂ ਨਗਰਂ, ਆਯਸਂ ਦਲ਼੍ਹਪਾਕਾਰਂ;

ਓਰੁਦ੍ਧਪਟਿਰੁਦ੍ਧੋਸ੍ਮਿ, ਕਿਂ ਪਾਪਂ ਪਕਤਂ ਮਯਾ.

੨.

‘‘ਸਬ੍ਬੇ ਅਪਿਹਿਤਾ ਦ੍ਵਾਰਾ, ਓਰੁਦ੍ਧੋਸ੍ਮਿ ਯਥਾ ਦਿਜੋ;

ਕਿਮਾਧਿਕਰਣਂ ਯਕ੍ਖ, ਚਕ੍ਕਾਭਿਨਿਹਤੋ ਅਹ’’ਨ੍ਤਿ.

ਤਤ੍ਥ ਦਲ਼੍ਹਪਾਕਾਰਨ੍ਤਿ ਥਿਰਪਾਕਾਰਂ. ‘‘ਦਲ਼੍ਹਤੋਰਣ’’ਨ੍ਤਿਪਿ ਪਾਠੋ, ਥਿਰਦ੍ਵਾਰਨ੍ਤਿ ਅਤ੍ਥੋ. ਓਰੁਦ੍ਧਪਟਿਰੁਦ੍ਧੋਸ੍ਮੀਤਿ ਅਨ੍ਤੋ ਕਤ੍ਵਾ ਸਮਨ੍ਤਾ ਪਾਕਾਰੇਨ ਰੁਦ੍ਧੋ, ਪਲਾਯਨਟ੍ਠਾਨਂ ਨ ਪਞ੍ਞਾਯਤਿ. ਕਿਂ ਪਾਪਂ ਪਕਤਨ੍ਤਿ ਕਿਂ ਨੁ ਖੋ ਮਯਾ ਪਾਪਕਮ੍ਮਂ ਕਤਂ. ਅਪਿਹਿਤਾਤਿ ਥਕਿਤਾ. ਯਥਾ ਦਿਜੋਤਿ ਪਞ੍ਜਰੇ ਪਕ੍ਖਿਤ੍ਤੋ ਸਕੁਣੋ ਵਿਯ. ਕਿਮਾਧਿਕਰਣਨ੍ਤਿ ਕਿਂ ਕਾਰਣਂ. ਚਕ੍ਕਾਭਿਨਿਹਤੋਤਿ ਚਕ੍ਕੇਨ ਅਭਿਨਿਹਤੋ.

ਅਥਸ੍ਸ ਦੇਵਰਾਜਾ ਕਾਰਣਂ ਕਥੇਤੁਂ ਛ ਗਾਥਾ ਅਭਾਸਿ –

੩.

‘‘ਲਦ੍ਧਾ ਸਤਸਹਸ੍ਸਾਨਿ, ਅਤਿਰੇਕਾਨਿ ਵੀਸਤਿ;

ਅਨੁਕਮ੍ਪਕਾਨਂ ਞਾਤੀਨਂ, ਵਚਨਂ ਸਮ੍ਮ ਨਾਕਰਿ.

੪.

‘‘ਲਙ੍ਘਿਂ ਸਮੁਦ੍ਦਂ ਪਕ੍ਖਨ੍ਦਿ, ਸਾਗਰਂ ਅਪ੍ਪਸਿਦ੍ਧਿਕਂ;

ਚਤੁਬ੍ਭਿ ਅਟ੍ਠਜ੍ਝਗਮਾ, ਅਟ੍ਠਾਹਿਪਿ ਚ ਸੋਲ਼ਸ.

੫.

‘‘ਸੋਲ਼ਸਾਹਿ ਚ ਬਾਤ੍ਤਿਂਸ, ਅਤਿਚ੍ਛਂ ਚਕ੍ਕਮਾਸਦੋ;

ਇਚ੍ਛਾਹਤਸ੍ਸ ਪੋਸਸ੍ਸ, ਚਕ੍ਕਂ ਭਮਤਿ ਮਤ੍ਥਕੇ.

੬.

‘‘ਉਪਰਿਵਿਸਾਲਾ ਦੁਪ੍ਪੂਰਾ, ਇਚ੍ਛਾ ਵਿਸਟਗਾਮਿਨੀ;

ਯੇ ਚ ਤਂ ਅਨੁਗਿਜ੍ਝਨ੍ਤਿ, ਤੇ ਹੋਨ੍ਤਿ ਚਕ੍ਕਧਾਰਿਨੋ.

੭.

‘‘ਬਹੁਭਣ੍ਡਂ ਅਵਹਾਯ, ਮਗ੍ਗਂ ਅਪ੍ਪਟਿਵੇਕ੍ਖਿਯ;

ਯੇਸਞ੍ਚੇਤਂ ਅਸਙ੍ਖਾਤਂ, ਤੇ ਹੋਨ੍ਤਿ ਚਕ੍ਕਧਾਰਿਨੋ.

੮.

‘‘ਕਮ੍ਮਂ ਸਮੇਕ੍ਖੇ ਵਿਪੁਲਞ੍ਚ ਭੋਗਂ, ਇਚ੍ਛਂ ਨ ਸੇਵੇਯ੍ਯ ਅਨਤ੍ਥਸਂਹਿਤਂ;

ਕਰੇਯ੍ਯ ਵਾਕ੍ਯਂ ਅਨੁਕਮ੍ਪਕਾਨਂ, ਤਂ ਤਾਦਿਸਂ ਨਾਤਿਵਤ੍ਤੇਯ੍ਯ ਚਕ੍ਕ’’ਨ੍ਤਿ.

ਤਤ੍ਥ ਲਦ੍ਧਾ ਸਤਸਹਸ੍ਸਾਨਿ, ਅਤਿਰੇਕਾਨਿ ਵੀਸਤੀਤਿ ਤ੍ਵਂ ਉਪੋਸਥਂ ਕਤ੍ਵਾ ਮਾਤੁ ਸਨ੍ਤਿਕਾ ਸਹਸ੍ਸਂ ਗਹੇਤ੍ਵਾ ਵੋਹਾਰਂ ਕਰੋਨ੍ਤੋ ਸਤਸਹਸ੍ਸਾਨਿ ਚ ਅਤਿਰੇਕਾਨਿ ਵੀਸਤਿਸਹਸ੍ਸਾਨਿ ਲਭਿਤ੍ਵਾ. ਨਾਕਰੀਤਿ ਤੇਨ ਧਨੇਨ ਅਸਨ੍ਤੁਟ੍ਠੋ ਨਾਵਾਯ ਸਮੁਦ੍ਦਂ ਪਵਿਸਨ੍ਤੋ ਸਮੁਦ੍ਦੇ ਆਦੀਨਵਞ੍ਚ ਕਥੇਤ੍ਵਾ ਮਾਤੁਯਾ ਵਾਰਿਯਮਾਨੋਪਿ ਅਨੁਕਮ੍ਪਕਾਨਂ ਞਾਤੀਨਂ ਵਚਨਂ ਨ ਕਰੋਸਿ, ਸੋਤਾਪਨ੍ਨਂ ਮਾਤਰਂ ਪਹਰਿਤ੍ਵਾ ਅਨ੍ਤਰਂ ਕਤ੍ਵਾ ਨਿਕ੍ਖਨ੍ਤੋਯੇਵਾਸੀਤਿ ਦੀਪੇਤਿ.

ਲਙ੍ਘਿਨ੍ਤਿ ਨਾਵਂ ਉਲ੍ਲਙ੍ਘਨਸਮਤ੍ਥਂ. ਪਕ੍ਖਨ੍ਦੀਤਿ ਪਕ੍ਖਨ੍ਦੋਸਿ. ਅਪ੍ਪਸਿਦ੍ਧਿਕਨ੍ਤਿ ਮਨ੍ਦਸਿਦ੍ਧਿਂ ਵਿਨਾਸਬਹੁਲਂ. ਚਤੁਬ੍ਭਿ ਅਟ੍ਠਾਤਿ ਅਥ ਨਂ ਨਿਸ੍ਸਾਯ ਠਿਤਾਯ ਨਾਵਾਯ ਫਲਕਂ ਦਤ੍ਵਾ ਸਮੁਦ੍ਦੇ ਖਿਤ੍ਤੋਪਿ ਤ੍ਵਂ ਮਾਤਰਂ ਨਿਸ੍ਸਾਯ ਏਕਦਿਵਸਂ ਕਤਸ੍ਸ ਉਪੋਸਥਕਮ੍ਮਸ੍ਸ ਨਿਸ੍ਸਨ੍ਦੇਨ ਫਲਿਕਵਿਮਾਨੇ ਚਤਸ੍ਸੋ ਇਤ੍ਥਿਯੋ ਲਭਿਤ੍ਵਾ ਤਤੋ ਰਜਤਵਿਮਾਨੇ ਅਟ੍ਠ, ਮਣਿਵਿਮਾਨੇ ਸੋਲ਼ਸ, ਕਨਕਵਿਮਾਨੇ ਦ੍ਵਤ੍ਤਿਂਸ ਅਧਿਗਤੋਸੀਤਿ. ਅਤਿਚ੍ਛਂ ਚਕ੍ਕਮਾਸਦੋਤਿ ਅਥ ਤ੍ਵਂ ਯਥਾਲਦ੍ਧੇਨ ਅਸਨ੍ਤੁਟ੍ਠੋ ‘‘ਅਤ੍ਰ ਉਤ੍ਤਰਿਤਰਂ ਲਭਿਸ੍ਸਾਮੀ’’ਤਿ ਏਵਂ ਲਦ੍ਧਂ ਲਦ੍ਧਂ ਅਤਿਕ੍ਕਮਨਲੋਭਸਙ੍ਖਾਤਾਯ ਅਤਿਚ੍ਛਾਯ ਸਮਨ੍ਨਾਗਤਤ੍ਤਾ ਅਤਿਚ੍ਛੋ ਪਾਪਪੁਗ੍ਗਲੋ ਤਸ੍ਸ ਉਪੋਸਥਕਮ੍ਮਸ੍ਸ ਖੀਣਤ੍ਤਾ ਦ੍ਵਤ੍ਤਿਂਸ ਇਤ੍ਥਿਯੋ ਅਤਿਕ੍ਕਮਿਤ੍ਵਾ ਇਮਂ ਪੇਤਨਗਰਂ ਆਗਨ੍ਤ੍ਵਾ ਤਸ੍ਸ ਮਾਤੁਪਹਾਰਦਾਨਅਕੁਸਲਸ੍ਸ ਨਿਸ੍ਸਨ੍ਦੇਨ ਇਦਂ ਖੁਰਚਕ੍ਕਂ ਸਮ੍ਪਤ੍ਤੋਸਿ. ‘‘ਅਤ੍ਰਿਚ੍ਛ’’ਨ੍ਤਿਪਿ ਪਾਠੋ, ਅਤ੍ਰ ਅਤ੍ਰ ਇਚ੍ਛਮਾਨੋਤਿ ਅਤ੍ਥੋ. ‘‘ਅਤ੍ਰਿਚ੍ਛਾ’’ਤਿਪਿ ਪਾਠੋ, ਅਤ੍ਰਿਚ੍ਛਾਯਾਤਿ ਅਤ੍ਥੋ. ਭਮਤੀਤਿ ਤਸ੍ਸ ਤੇ ਇਚ੍ਛਾਹਤਸ੍ਸ ਪੋਸਸ੍ਸ ਇਦਂ ਚਕ੍ਕਂ ਮਤ੍ਥਕਂ ਪਿਸਮਾਨਂ ਇਦਾਨਿ ਕੁਮ੍ਭਕਾਰਚਕ੍ਕਂ ਵਿਯ ਮਤ੍ਥਕੇ ਭਮਤੀਤਿ ਅਤ੍ਥੋ.

ਯੇ ਚ ਤਂ ਅਨੁਗਿਜ੍ਝਨ੍ਤੀਤਿ ਤਣ੍ਹਾ ਨਾਮੇਸਾ ਗਚ੍ਛਨ੍ਤੀ ਉਪਰੂਪਰਿ ਵਿਸਾਲਾ ਹੋਤਿ, ਸਮੁਦ੍ਦੋ ਵਿਯ ਚ ਦੁਪ੍ਪੂਰਾ, ਰੂਪਾਦੀਸੁ ਤਸ੍ਸ ਤਸ੍ਸ ਇਚ੍ਛਨਇਚ੍ਛਾਯ ਵਿਸਟਗਾਮਿਨੀ, ਤਂ ਏਵਰੂਪਂ ਤਣ੍ਹਂ ਯੇ ਚ ਅਨੁਗਿਜ੍ਝਨ੍ਤਿ ਗਿਦ੍ਧਾ ਗਧਿਤਾ ਹੁਤ੍ਵਾ ਪੁਨਪ੍ਪੁਨਂ ਅਲ੍ਲੀਯਨ੍ਤਿ. ਤੇ ਹੋਨ੍ਤਿ ਚਕ੍ਕਧਾਰਿਨੋਤਿ ਤੇ ਏਵਂ ਪਚ੍ਚਨ੍ਤਾ ਖੁਰਚਕ੍ਕਂ ਧਾਰੇਨ੍ਤਿ. ਬਹੁਭਣ੍ਡਨ੍ਤਿ ਮਾਤਾਪਿਤੂਨਂ ਸਨ੍ਤਕਂ ਬਹੁਧਨਂ ਓਹਾਯ. ਮਗ੍ਗਨ੍ਤਿ ਗਨ੍ਤਬ੍ਬਂ ਅਪ੍ਪਸਿਦ੍ਧਿਕਂ ਸਮੁਦ੍ਦਮਗ੍ਗਂ ਅਪਚ੍ਚਵੇਕ੍ਖਿਤ੍ਵਾ ਯਥਾ ਤ੍ਵਂ ਪਟਿਪਨ੍ਨੋ, ਏਵਮੇਵ ਅਞ੍ਞੇਸਮ੍ਪਿ ਯੇਸਞ੍ਚੇਤਂ ਅਸਙ੍ਖਾਤਂ ਅਵੀਮਂਸਿਤਂ, ਤੇ ਯਥਾ ਤ੍ਵਂ ਤਥੇਵ ਤਣ੍ਹਾਵਸਿਕਾ ਹੁਤ੍ਵਾ ਧਨਂ ਪਹਾਯ ਗਮਨਮਗ੍ਗਂ ਅਨਪੇਕ੍ਖਿਤ੍ਵਾ ਪਟਿਪਨ੍ਨਾ ਚਕ੍ਕਧਾਰਿਨੋ ਹੋਨ੍ਤਿ. ਕਮ੍ਮਂ ਸਮੇਕ੍ਖੇਤਿ ਤਸ੍ਮਾ ਪਣ੍ਡਿਤੋ ਪੁਰਿਸੋ ਅਤ੍ਤਨਾ ਕਤ੍ਤਬ੍ਬਕਮ੍ਮਂ ‘‘ਸਦੋਸਂ ਨੁ ਖੋ, ਨਿਦ੍ਦੋਸ’’ਨ੍ਤਿ ਸਮੇਕ੍ਖੇਯ੍ਯ ਪਚ੍ਚਵੇਕ੍ਖੇਯ੍ਯ. ਵਿਪੁਲਞ੍ਚ ਭੋਗਨ੍ਤਿ ਅਤ੍ਤਨੋ ਧਮ੍ਮਲਦ੍ਧਂ ਧਨਰਾਸਿਮ੍ਪਿ ਸਮੇਕ੍ਖੇਯ੍ਯ. ਨਾਤਿਵਤ੍ਤੇਯ੍ਯਾਤਿ ਤਂ ਤਾਦਿਸਂ ਪੁਗ੍ਗਲਂ ਇਦਂ ਚਕ੍ਕਂ ਨ ਅਤਿਵਤ੍ਤੇਯ੍ਯ ਨਾਵਤ੍ਥਰੇਯ੍ਯ. ‘‘ਨਾਤਿਵਤ੍ਤੇਤੀ’’ਤਿਪਿ ਪਾਠੋ, ਨਾਵਤ੍ਥਰਤੀਤਿ ਅਤ੍ਥੋ.

ਤਂ ਸੁਤ੍ਵਾ ਮਿਤ੍ਤਵਿਨ੍ਦਕੋ ‘‘ਇਮਿਨਾ ਦੇਵਪੁਤ੍ਤੇਨ ਮਯਾ ਕਤਕਮ੍ਮਂ ਤਥਤੋ ਞਾਤਂ, ਅਯਂ ਮਯ੍ਹਂ ਪਚ੍ਚਨਪਮਾਣਮ੍ਪਿ ਜਾਨਿਸ੍ਸਤਿ, ਪੁਚ੍ਛਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਨਵਮਂ ਗਾਥਮਾਹ –

੯.

‘‘ਕੀਵਚਿਰਂ ਨੁ ਮੇ ਯਕ੍ਖ, ਚਕ੍ਕਂ ਸਿਰਸਿ ਠਸ੍ਸਤਿ;

ਕਤਿ ਵਸ੍ਸਸਹਸ੍ਸਾਨਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

ਅਥਸ੍ਸ ਕਥੇਨ੍ਤੋ ਮਹਾਸਤ੍ਤੋ ਦਸਮਂ ਗਾਥਮਾਹ –

੧੦.

‘‘ਅਤਿਸਰੋ ਪਚ੍ਚਸਰੋ, ਮਿਤ੍ਤਵਿਨ੍ਦ ਸੁਣੋਹਿ ਮੇ;

ਚਕ੍ਕਂ ਤੇ ਸਿਰਸਿ ਮਾਵਿਦ੍ਧਂ, ਨ ਤਂ ਜੀਵਂ ਪਮੋਕ੍ਖਸੀ’’ਤਿ.

ਤਤ੍ਥ ਅਤਿਸਰੋਤਿ ਅਤਿਸਰੀਤਿਪਿ ਅਤਿਸਰੋ, ਅਤਿਸਰਿਸ੍ਸਤੀਤਿਪਿ ਅਤਿਸਰੋ. ਪਚ੍ਚਸਰੋਤਿ ਤਸ੍ਸੇਵ ਵੇਵਚਨਂ. ਇਦਂ ਵੁਤ੍ਤਂ ਹੋਤਿ – ਸਮ੍ਮ ਮਿਤ੍ਤਵਿਨ੍ਦਕ, ਸੁਣੋਹਿ ਮੇ ਵਚਨਂ, ਤ੍ਵਞ੍ਹਿ ਅਤਿਦਾਰੁਣਸ੍ਸ ਕਮ੍ਮਸ੍ਸ ਕਤਤ੍ਤਾ ਅਤਿਸਰੋ, ਤਸ੍ਸ ਪਨ ਨ ਸਕ੍ਕਾ ਵਸ੍ਸਗਣਨਾਯ ਵਿਪਾਕੋ ਪਞ੍ਞਾਪੇਤੁਨ੍ਤਿ ਅਪਰਿਮਾਣਂ ਅਤਿਮਹਨ੍ਤਂ ਵਿਪਾਕਦੁਕ੍ਖਂ ਸਰਿਸ੍ਸਸਿ ਪਟਿਪਜ੍ਜਿਸ੍ਸਸੀਤਿ ਅਤਿਸਰੋ. ਤੇਨ ਤੇ ‘‘ਏਤ੍ਤਕਾਨਿ ਵਸ੍ਸਸਹਸ੍ਸਾਨੀ’’ਤਿ ਵਤ੍ਤੁਂ ਨ ਸਕ੍ਕੋਮਿ. ਸਿਰਸਿਮਾਵਿਦ੍ਧਨ੍ਤਿ ਯਂ ਪਨ ਤੇ ਇਦਂ ਚਕ੍ਕਂ ਸਿਰਸ੍ਮਿਂ ਆਵਿਦ੍ਧਂ ਕੁਮ੍ਭਕਾਰਚਕ੍ਕਮਿਵ ਭਮਤਿ. ਨ ਤਂ ਜੀਵਂ ਪਮੋਕ੍ਖਸੀਤਿ ਤਂ ਤ੍ਵਂ ਯਾਵ ਤੇ ਕਮ੍ਮਵਿਪਾਕੋ ਨ ਖੀਯਤਿ, ਤਾਵ ਜੀਵਮਾਨੋ ਨ ਪਮੋਕ੍ਖਸਿ, ਕਮ੍ਮਵਿਪਾਕੇ ਪਨ ਖੀਣੇ ਇਦਂ ਚਕ੍ਕਂ ਪਹਾਯ ਯਥਾਕਮ੍ਮਂ ਗਮਿਸ੍ਸਸੀਤਿ.

ਇਦਂ ਵਤ੍ਵਾ ਦੇਵਪੁਤ੍ਤੋ ਅਤ੍ਤਨੋ ਦੇਵਟ੍ਠਾਨਮੇਵ ਗਤੋ, ਇਤਰੋਪਿ ਮਹਾਦੁਕ੍ਖਂ ਪਟਿਪਜ੍ਜਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਿਤ੍ਤਵਿਨ੍ਦਕੋ ਅਯਂ ਦੁਬ੍ਬਚਭਿਕ੍ਖੁ ਅਹੋਸਿ, ਦੇਵਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚਤੁਦ੍ਵਾਰਜਾਤਕਵਣ੍ਣਨਾ ਪਠਮਾ.

[੪੪੦] ੨. ਕਣ੍ਹਜਾਤਕਵਣ੍ਣਨਾ

ਕਣ੍ਹੋ ਵਤਾਯਂ ਪੁਰਿਸੋਤਿ ਇਦਂ ਸਤ੍ਥਾ ਕਪਿਲਵਤ੍ਥੁਂ ਉਪਨਿਸ੍ਸਾਯ ਨਿਗ੍ਰੋਧਾਰਾਮੇ ਵਿਹਰਨ੍ਤੋ ਸਿਤਪਾਤੁਕਮ੍ਮਂ ਆਰਬ੍ਭ ਕਥੇਸਿ. ਤਦਾ ਕਿਰ ਸਤ੍ਥਾ ਸਾਯਨ੍ਹਸਮਯੇ ਨਿਗ੍ਰੋਧਾਰਾਮੇ ਭਿਕ੍ਖੁਸਙ੍ਘਪਰਿਵੁਤੋ ਜਙ੍ਘਵਿਹਾਰਂ ਅਨੁਚਙ੍ਕਮਮਾਨੋ ਅਞ੍ਞਤਰਸ੍ਮਿਂ ਪਦੇਸੇ ਸਿਤਂ ਪਾਤ੍ਵਾਕਾਸਿ. ਆਨਨ੍ਦਤ੍ਥੇਰੋ ‘‘ਕੋ ਨੁ ਖੋ ਹੇਤੁ, ਕੋ ਪਚ੍ਚਯੋ ਭਗਵਤੋ ਸਿਤਸ੍ਸ ਪਾਤੁਕਮ੍ਮਾਯ, ਨ ਅਹੇਤੁ ਤਥਾਗਤਾ ਸਿਤਂ ਪਾਤੁਕਰੋਨ੍ਤਿ, ਪੁਚ੍ਛਿਸ੍ਸਾਮਿ ਤਾਵਾ’’ਤਿ ਅਞ੍ਜਲਿਂ ਪਗ੍ਗਯ੍ਹ ਸਿਤਕਾਰਣਂ ਪੁਚ੍ਛਿ. ਅਥਸ੍ਸ ਸਤ੍ਥਾ ‘‘ਭੂਤਪੁਬ੍ਬਂ, ਆਨਨ੍ਦ, ਕਣ੍ਹੋ ਨਾਮ ਇਸਿ ਅਹੋਸਿ, ਸੋ ਇਮਸ੍ਮਿਂ ਭੂਮਿਪ੍ਪਦੇਸੇ ਵਿਹਾਸਿ ਝਾਯੀ ਝਾਨਰਤੋ, ਤਸ੍ਸ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਕਮ੍ਪੀ’’ਤਿ ਸਿਤਕਾਰਣਂ ਵਤ੍ਵਾ ਤਸ੍ਸ ਵਤ੍ਥੁਨੋ ਅਪਾਕਟਤ੍ਤਾ ਥੇਰੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਾਰਾਣਸਿਯਂ ਏਕੇਨ ਅਸੀਤਿਕੋਟਿਵਿਭਵੇਨ ਅਪੁਤ੍ਤਕੇਨ ਬ੍ਰਾਹ੍ਮਣੇਨ ਸੀਲਂ ਸਮਾਦਿਯਿਤ੍ਵਾ ਪੁਤ੍ਤੇ ਪਤ੍ਥਿਤੇ ਬੋਧਿਸਤ੍ਤੋ ਤਸ੍ਸ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਕਾਲ਼ਵਣ੍ਣਤ੍ਤਾ ਪਨਸ੍ਸ ਨਾਮਗ੍ਗਹਣਦਿਵਸੇ ‘‘ਕਣ੍ਹਕੁਮਾਰੋ’’ਤਿ ਨਾਮਂ ਅਕਂਸੁ. ਸੋ ਸੋਲ਼ਸਵਸ੍ਸਕਾਲੇ ਮਣਿਪਟਿਮਾ ਵਿਯ ਸੋਭਗ੍ਗਪ੍ਪਤ੍ਤੋ ਹੁਤ੍ਵਾ ਪਿਤਰਾ ਸਿਪ੍ਪੁਗ੍ਗਹਣਤ੍ਥਾਯ ਪੇਸਿਤੋ ਤਕ੍ਕਸਿਲਾਯਂ ਸਬ੍ਬਸਿਪ੍ਪਾਨਿ ਉਗ੍ਗਹੇਤ੍ਵਾ ਪਚ੍ਚਾਗਚ੍ਛਿ. ਅਥ ਨਂ ਪਿਤਾ ਅਨੁਰੂਪੇਨ ਦਾਰੇਨ ਸਂਯੋਜੇਸਿ. ਸੋ ਅਪਰਭਾਗੇ ਮਾਤਾਪਿਤੂਨਂ ਅਚ੍ਚਯੇਨ ਸਬ੍ਬਿਸ੍ਸਰਿਯਂ ਪਟਿਪਜ੍ਜਿ. ਅਥੇਕਦਿਵਸਂ ਰਤਨਕੋਟ੍ਠਾਗਾਰਾਨਿ ਵਿਲੋਕੇਤ੍ਵਾ ਵਰਪਲ੍ਲਙ੍ਕਮਜ੍ਝਗਤੋ ਸੁਵਣ੍ਣਪਟ੍ਟਂ ਆਹਰਾਪੇਤ੍ਵਾ ‘‘ਏਤ੍ਤਕਂ ਧਨਂ ਅਸੁਕੇਨ ਉਪ੍ਪਾਦਿਤਂ, ਏਤ੍ਤਕਂ ਅਸੁਕੇਨਾ’’ਤਿ ਪੁਬ੍ਬਞਾਤੀਹਿ ਸੁਵਣ੍ਣਪਟ੍ਟੇ ਲਿਖਿਤਾਨਿ ਅਕ੍ਖਰਾਨਿ ਦਿਸ੍ਵਾ ਚਿਨ੍ਤੇਸਿ ‘‘ਯੇਹਿ ਇਮਂ ਧਨਂ ਉਪ੍ਪਾਦਿਤਂ, ਤੇ ਨ ਪਞ੍ਞਾਯਨ੍ਤਿ, ਧਨਮੇਵ ਪਞ੍ਞਾਯਤਿ, ਏਕੋਪਿ ਇਦਂ ਧਨਂ ਗਹੇਤ੍ਵਾ ਗਤੋ ਨਾਮ ਨਤ੍ਥਿ, ਨ ਖੋ ਪਨ ਸਕ੍ਕਾ ਧਨਭਣ੍ਡਿਕਂ ਬਨ੍ਧਿਤ੍ਵਾ ਪਰਲੋਕਂ ਗਨ੍ਤੁਂ. ਪਞ੍ਚਨ੍ਨਂ ਵੇਰਾਨਂ ਸਾਧਾਰਣਭਾਵੇਨ ਹਿ ਅਸਾਰਸ੍ਸ ਧਨਸ੍ਸ ਦਾਨਂ ਸਾਰੋ, ਬਹੁਰੋਗਸਾਧਾਰਣਭਾਵੇਨ ਅਸਾਰਸ੍ਸ ਸਰੀਰਸ੍ਸ ਸੀਲਵਨ੍ਤੇਸੁ ਅਭਿਵਾਦਨਾਦਿਕਮ੍ਮਂ ਸਾਰੋ, ਅਨਿਚ੍ਚਾਭਿਭੂਤਭਾਵੇਨ ਅਸਾਰਸ੍ਸ ਜੀਵਿਤਸ੍ਸ ਅਨਿਚ੍ਚਾਦਿਵਸੇਨ ਵਿਪਸ੍ਸਨਾਯੋਗੋ ਸਾਰੋ, ਤਸ੍ਮਾ ਅਸਾਰੇਹਿ ਭੋਗੇਹਿ ਸਾਰਗ੍ਗਹਣਤ੍ਥਂ ਦਾਨਂ ਦਸ੍ਸਾਮੀ’’ਤਿ.

ਸੋ ਆਸਨਾ ਵੁਟ੍ਠਾਯ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਰਾਜਾਨਂ ਆਪੁਚ੍ਛਿਤ੍ਵਾ ਮਹਾਦਾਨਂ ਪਵਤ੍ਤੇਸਿ. ਯਾਵ ਸਤ੍ਤਮਾ ਦਿਵਸਾ ਧਨਂ ਅਪਰਿਕ੍ਖੀਯਮਾਨਂ ਦਿਸ੍ਵਾ ‘‘ਕਿਂ ਮੇ ਧਨੇਨ, ਯਾਵ ਮਂ ਜਰਾ ਨਾਭਿਭਵਤਿ, ਤਾਵਦੇਵ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕਪਰਾਯਣੋ ਭਵਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗੇਹੇ ਸਬ੍ਬਦ੍ਵਾਰਾਨਿ ਵਿਵਰਾਪੇਤ੍ਵਾ ‘‘ਦਿਨ੍ਨਂ ਮੇ, ਹਰਨ੍ਤੂ’’ਤਿ ਅਸੁਚਿਂ ਵਿਯ ਜਿਗੁਚ੍ਛਨ੍ਤੋ ਵਤ੍ਥੁਕਾਮੇ ਪਹਾਯ ਮਹਾਜਨਸ੍ਸ ਰੋਦਨ੍ਤਸ੍ਸ ਪਰਿਦੇਵਨ੍ਤਸ੍ਸ ਨਗਰਾ ਨਿਕ੍ਖਮਿਤ੍ਵਾ ਹਿਮਵਨ੍ਤਪਦੇਸਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਤ੍ਤਨੋ ਵਸਨਤ੍ਥਾਯ ਰਮਣੀਯਂ ਭੂਮਿਭਾਗਂ ਓਲੋਕੇਨ੍ਤੋ ਇਮਂ ਠਾਨਂ ਪਤ੍ਵਾ ‘‘ਇਧ ਵਸਿਸ੍ਸਾਮੀ’’ਤਿ ਏਕਂ ਇਨ੍ਦਵਾਰੁਣੀਰੁਕ੍ਖਂ ਗੋਚਰਗਾਮਂ ਅਧਿਟ੍ਠਾਯ ਤਸ੍ਸੇਵ ਰੁਕ੍ਖਸ੍ਸ ਮੂਲੇ ਵਿਹਾਸਿ. ਗਾਮਨ੍ਤਸੇਨਾਸਨਂ ਪਹਾਯ ਆਰਞ੍ਞਿਕੋ ਅਹੋਸਿ, ਪਣ੍ਣਸਾਲਂ ਅਕਤ੍ਵਾ ਰੁਕ੍ਖਮੂਲਿਕੋ ਅਹੋਸਿ, ਅਬ੍ਭੋਕਾਸਿਕੋ ਨੇਸਜ੍ਜਿਕੋ. ਸਚੇ ਨਿਪਜ੍ਜਿਤੁਕਾਮੋ, ਭੂਮਿਯਂਯੇਵ ਨਿਪਜ੍ਜਤਿ, ਦਨ੍ਤਮੂਸਲਿਕੋ ਹੁਤ੍ਵਾ ਅਨਗ੍ਗਿਪਕ੍ਕਮੇਵ ਖਾਦਤਿ, ਥੁਸਪਰਿਕ੍ਖਿਤ੍ਤਂ ਕਿਞ੍ਚਿ ਨ ਖਾਦਤਿ, ਏਕਦਿਵਸਂ ਏਕਵਾਰਮੇਵ ਖਾਦਤਿ, ਏਕਾਸਨਿਕੋ ਅਹੋਸਿ. ਖਮਾਯ ਪਥਵੀਆਪਤੇਜਵਾਯੁਸਮੋ ਹੁਤ੍ਵਾ ਏਤੇ ਏਤ੍ਤਕੇ ਧੁਤਙ੍ਗਗੁਣੇ ਸਮਾਦਾਯ ਵਤ੍ਤਤਿ, ਇਮਸ੍ਮਿਂ ਕਿਰ ਜਾਤਕੇ ਬੋਧਿਸਤ੍ਤੋ ਪਰਮਪ੍ਪਿਚ੍ਛੋ ਅਹੋਸਿ. ਸੋ ਨ ਚਿਰਸ੍ਸੇਵ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਝਾਨਕੀਲ਼ਂ ਕੀਲ਼ਨ੍ਤੋ ਤਤ੍ਥੇਵ ਵਸਤਿ, ਫਲਾਫਲਤ੍ਥਮ੍ਪਿ ਅਞ੍ਞਤ੍ਥ ਨ ਗਚ੍ਛਤਿ, ਰੁਕ੍ਖਸ੍ਸ ਫਲਿਤਕਾਲੇ ਫਲਂ ਖਾਦਤਿ, ਪੁਪ੍ਫਿਤਕਾਲੇ ਪੁਪ੍ਫਂ ਖਾਦਤਿ, ਸਪਤ੍ਤਕਾਲੇ ਪਤ੍ਤਾਨਿ ਖਾਦਤਿ, ਨਿਪ੍ਪਤ੍ਤਕਾਲੇ ਪਪਟਿਕਂ ਖਾਦਤਿ. ਏਵਂ ਪਰਮਸਨ੍ਤੁਟ੍ਠੋ ਹੁਤ੍ਵਾ ਇਮਸ੍ਮਿਂ ਠਾਨੇ ਚਿਰਂ ਵਸਤਿ.

ਸੋ ਏਕਦਿਵਸਂ ਪੁਬ੍ਬਣ੍ਹਸਮਯੇ ਤਸ੍ਸ ਰੁਕ੍ਖਸ੍ਸ ਪਕ੍ਕਾਨਿ ਫਲਾਨਿ ਗਣ੍ਹਿ, ਗਣ੍ਹਨ੍ਤੋ ਪਨ ਲੋਲੁਪ੍ਪਚਾਰੇਨ ਉਟ੍ਠਾਯ ਅਞ੍ਞਸ੍ਮਿਂ ਪਦੇਸੇ ਨ ਗਣ੍ਹਾਤਿ, ਯਥਾਨਿਸਿਨ੍ਨੋਵ ਹਤ੍ਥਂ ਪਸਾਰੇਤ੍ਵਾ ਹਤ੍ਥਪ੍ਪਸਾਰਣਟ੍ਠਾਨੇ ਠਿਤਾਨਿ ਫਲਾਨਿ ਸਂਹਰਤਿ, ਤੇਸੁਪਿ ਮਨਾਪਾਮਨਾਪਂ ਅਵਿਚਿਨਿਤ੍ਵਾ ਸਮ੍ਪਤ੍ਤਸਮ੍ਪਤ੍ਤਮੇਵ ਗਣ੍ਹਾਤਿ. ਏਵਂ ਪਰਮਸਨ੍ਤੁਟ੍ਠਸ੍ਸ ਤਸ੍ਸ ਸੀਲਤੇਜੇਨ ਸਕ੍ਕਸ੍ਸ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਤਂ ਕਿਰ ਸਕ੍ਕਸ੍ਸ ਆਯੁਕ੍ਖਯੇਨ ਵਾ ਉਣ੍ਹਂ ਹੋਤਿ ਪੁਞ੍ਞਕ੍ਖਯੇਨ ਵਾ, ਅਞ੍ਞਸ੍ਮਿਂ ਵਾ ਮਹਾਨੁਭਾਵਸਤ੍ਤੇ ਤਂ ਠਾਨਂ ਪਤ੍ਥੇਨ੍ਤੇ, ਧਮ੍ਮਿਕਾਨਂ ਵਾ ਮਹਿਦ੍ਧਿਕਸਮਣਬ੍ਰਾਹ੍ਮਣਾਨਂ ਸੀਲਤੇਜੇਨ ਉਣ੍ਹਂ ਹੋਤਿ. ਸਕ੍ਕੋ ‘‘ਕੋ ਨੁ ਖੋ ਮਂ ਠਾਨਾ ਚਾਵੇਤੁਕਾਮੋ’’ਤਿ ਆਵਜ੍ਜੇਤ੍ਵਾ ਇਮਸ੍ਮਿਂ ਪਦੇਸੇ ਵਸਨ੍ਤਂ ਕਣ੍ਹਂ ਇਸਿਂ ਰੁਕ੍ਖਫਲਾਨਿ ਉਚ੍ਚਿਨਨ੍ਤਂ ਦਿਸ੍ਵਾ ਚਿਨ੍ਤੇਸਿ ‘‘ਅਯਂ ਇਸਿ ਘੋਰਤਪੋ ਪਰਮਜਿਤਿਨ੍ਦ੍ਰਿਯੋ, ਇਮਂ ਧਮ੍ਮਕਥਾਯ ਸੀਹਨਾਦਂ ਨਦਾਪੇਤ੍ਵਾ ਸੁਕਾਰਣਂ ਸੁਤ੍ਵਾ ਵਰੇਨ ਸਨ੍ਤਪ੍ਪੇਤ੍ਵਾ ਇਮਮਸ੍ਸ ਰੁਕ੍ਖਂ ਧੁਵਫਲਂ ਕਤ੍ਵਾ ਆਗਮਿਸ੍ਸਾਮੀ’’ਤਿ. ਸੋ ਮਹਨ੍ਤੇਨਾਨੁਭਾਵੇਨ ਸੀਘਂ ਓਤਰਿਤ੍ਵਾ ਤਸ੍ਮਿਂ ਰੁਕ੍ਖਮੂਲੇ ਤਸ੍ਸ ਪਿਟ੍ਠਿਪਸ੍ਸੇ ਠਤ੍ਵਾ ‘‘ਅਤ੍ਤਨੋ ਅਵਣ੍ਣੇ ਕਥਿਤੇ ਕੁਜ੍ਝਿਸ੍ਸਤਿ ਨੁ ਖੋ, ਨੋ’’ਤਿ ਵੀਮਂਸਨ੍ਤੋ ਪਠਮਂ ਗਾਥਮਾਹ –

੧੧.

‘‘ਕਣ੍ਹੋ ਵਤਾਯਂ ਪੁਰਿਸੋ, ਕਣ੍ਹਂ ਭੁਞ੍ਜਤਿ ਭੋਜਨਂ;

ਕਣ੍ਹੇ ਭੂਮਿਪਦੇਸਸ੍ਮਿਂ, ਨ ਮਯ੍ਹਂ ਮਨਸੋ ਪਿਯੋ’’ਤਿ.

ਤਤ੍ਥ ਕਣ੍ਹੋਤਿ ਕਾਲ਼ਵਣ੍ਣੋ. ਭੋਜਨਨ੍ਤਿ ਰੁਕ੍ਖਫਲਭੋਜਨਂ.

ਕਣ੍ਹੋ ਇਸਿ ਸਕ੍ਕਸ੍ਸ ਵਚਨਂ ਸੁਤ੍ਵਾ ‘‘ਕੋ ਨੁ ਖੋ ਮਯਾ ਸਦ੍ਧਿਂ ਕਥੇਤੀ’’ਤਿ ਦਿਬ੍ਬਚਕ੍ਖੁਨਾ ਉਪਧਾਰੇਨ੍ਤੋ ‘‘ਸਕ੍ਕੋ’’ਤਿ ਞਤ੍ਵਾ ਅਨਿਵਤ੍ਤਿਤ੍ਵਾ ਅਨੋਲੋਕੇਤ੍ਵਾਵ ਦੁਤਿਯਂ ਗਾਥਮਾਹ –

੧੨.

‘‘ਨ ਕਣ੍ਹੋ ਤਚਸਾ ਹੋਤਿ, ਅਨ੍ਤੋਸਾਰੋ ਹਿ ਬ੍ਰਾਹ੍ਮਣੋ;

ਯਸ੍ਮਿਂ ਪਾਪਾਨਿ ਕਮ੍ਮਾਨਿ, ਸ ਵੇ ਕਣ੍ਹੋ ਸੁਜਮ੍ਪਤੀ’’ਤਿ.

ਤਤ੍ਥ ਤਚਸਾਤਿ ਤਚੇਨ ਕਣ੍ਹੋ ਨਾਮ ਨ ਹੋਤੀਤਿ ਅਤ੍ਥੋ. ਅਨ੍ਤੋਸਾਰੋਤਿ ਅਬ੍ਭਨ੍ਤਰੇ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਸਾਰੇਹਿ ਸਮਨ੍ਨਾਗਤੋ. ਏਵਰੂਪੋ ਹਿ ਬਾਹਿਤਪਾਪਤ੍ਤਾ ਬ੍ਰਾਹ੍ਮਣੋ ਨਾਮ ਹੋਤਿ. ਸ ਵੇਤਿ ਯਸ੍ਮਿਂ ਪਨ ਪਾਪਾਨਿ ਕਮ੍ਮਾਨਿ ਅਤ੍ਥਿ, ਸੋ ਯਤ੍ਥ ਕਤ੍ਥਚਿ ਕੁਲੇ ਜਾਤੋਪਿ ਯੇਨ ਕੇਨਚਿ ਸਰੀਰਵਣ੍ਣੇਨ ਸਮਨ੍ਨਾਗਤੋਪਿ ਕਾਲ਼ਕੋਵ.

ਏਵਞ੍ਚ ਪਨ ਵਤ੍ਵਾ ਇਮੇਸਂ ਸਤ੍ਤਾਨਂ ਕਣ੍ਹਭਾਵਕਰਾਨਿ ਪਾਪਕਮ੍ਮਾਨਿ ਏਕਵਿਧਾਦਿਭੇਦੇਹਿ ਵਿਤ੍ਥਾਰੇਤ੍ਵਾ ਸਬ੍ਬਾਨਿਪਿ ਤਾਨਿ ਗਰਹਿਤ੍ਵਾ ਸੀਲਾਦਯੋ ਗੁਣੇ ਪਸਂਸਿਤ੍ਵਾ ਆਕਾਸੇ ਚਨ੍ਦਂ ਉਟ੍ਠਾਪੇਨ੍ਤੋ ਵਿਯ ਸਕ੍ਕਸ੍ਸ ਧਮ੍ਮਂ ਦੇਸੇਸਿ. ਸਕ੍ਕੋ ਤਸ੍ਸ ਧਮ੍ਮਕਥਂ ਸੁਤ੍ਵਾ ਪਮੁਦਿਤੋ ਸੋਮਨਸ੍ਸਜਾਤੋ ਮਹਾਸਤ੍ਤਂ ਵਰੇਨ ਨਿਮਨ੍ਤੇਨ੍ਤੋ ਤਤਿਯਂ ਗਾਥਮਾਹ –

੧੩.

‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਬ੍ਰਾਹ੍ਮਣ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸੀ’’ਤਿ.

ਤਤ੍ਥ ਏਤਸ੍ਮਿਨ੍ਤਿ ਯਂ ਇਦਂ ਤਯਾ ਸਬ੍ਬਞ੍ਞੁਬੁਦ੍ਧੇਨ ਵਿਯ ਸੁਲਪਿਤਂ, ਤਸ੍ਮਿਂ ਸੁਲਪਿਤੇ ਤੁਮ੍ਹਾਕਮੇਵ ਅਨੁਚ੍ਛਵਿਕਤ੍ਤਾ ਪਤਿਰੂਪੇ ਸੁਭਾਸਿਤੇ ਯਂ ਕਿਞ੍ਚਿ ਮਨਸਾ ਇਚ੍ਛਸਿ, ਸਬ੍ਬਂ ਤੇ ਯਂ ਵਰਂ ਇਚ੍ਛਿਤਂ ਪਤ੍ਥਿਤਂ, ਤਂ ਦਮ੍ਮੀਤਿ ਅਤ੍ਥੋ.

ਤਂ ਸੁਤ੍ਵਾ ਮਹਾਸਤ੍ਤੋ ਚਿਨ੍ਤੇਸਿ ‘‘ਅਯਂ ਕਿਂ ਨੁ ਖੋ ਅਤ੍ਤਨੋ ਅਵਣ੍ਣੇ ਕਥਿਤੇ ਕੁਜ੍ਝਿਸ੍ਸਤਿ, ਨੋਤਿ ਮਂ ਵੀਮਂਸਨ੍ਤੋ ਮਯ੍ਹਂ ਛਵਿਵਣ੍ਣਞ੍ਚ ਭੋਜਨਞ੍ਚ ਵਸਨਟ੍ਠਾਨਞ੍ਚ ਗਰਹਿਤ੍ਵਾ ਇਦਾਨਿ ਮਯ੍ਹਂ ਅਕੁਦ੍ਧਭਾਵਂ ਞਤ੍ਵਾ ਪਸਨ੍ਨਚਿਤ੍ਤੋ ਵਰਂ ਦੇਤਿ, ਮਂ ਖੋ ਪਨੇਸ ‘ਸਕ੍ਕਿਸ੍ਸਰਿਯਬ੍ਰਹ੍ਮਿਸ੍ਸਰਿਯਾਨਂ ਅਤ੍ਥਾਯ ਬ੍ਰਹ੍ਮਚਰਿਯਂ ਚਰਤੀ’ਤਿਪਿ ਮਞ੍ਞੇਯ੍ਯ, ਤਤ੍ਰਸ੍ਸ ਨਿਕ੍ਕਙ੍ਖਭਾਵਤ੍ਥਂ ਮਯ੍ਹਂ ਪਰੇਸੁ ਕੋਧੋ ਵਾ ਦੋਸੋ ਵਾ ਮਾ ਉਪ੍ਪਜ੍ਜਤੁ, ਪਰਸਮ੍ਪਤ੍ਤਿਯਂ ਲੋਭੋ ਵਾ ਪਰੇਸੁ ਸਿਨੇਹੋ ਵਾ ਮਾ ਉਪ੍ਪਜ੍ਜਤੁ, ਮਜ੍ਝਤ੍ਤੋਵ ਭਵੇਯ੍ਯਨ੍ਤਿ ਇਮੇ ਮਯਾ ਚਤ੍ਤਾਰੋ ਵਰੇ ਗਹੇਤੁਂ ਵਟ੍ਟਤੀ’’ਤਿ. ਸੋ ਤਸ੍ਸ ਨਿਕ੍ਕਙ੍ਖਭਾਵਤ੍ਥਾਯ ਚਤ੍ਤਾਰੋ ਵਰੇ ਗਣ੍ਹਨ੍ਤੋ ਚਤੁਤ੍ਥਂ ਗਾਥਮਾਹ –

੧੪.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਸੁਨਿਕ੍ਕੋਧਂ ਸੁਨਿਦ੍ਦੋਸਂ, ਨਿਲ੍ਲੋਭਂ ਵੁਤ੍ਤਿਮਤ੍ਤਨੋ;

ਨਿਸ੍ਨੇਹਮਭਿਕਙ੍ਖਾਮਿ, ਏਤੇ ਮੇ ਚਤੁਰੋ ਵਰੇ’’ਤਿ.

ਤਤ੍ਥ ਵਰਞ੍ਚੇ ਮੇ ਅਦੋ ਸਕ੍ਕਾਤਿ ਸਚੇ ਤ੍ਵਂ ਮਯ੍ਹਂ ਵਰਂ ਅਦਾਸਿ. ਸੁਨਿਕ੍ਕੋਧਨ੍ਤਿ ਅਕੁਜ੍ਝਨਵਸੇਨ ਸੁਟ੍ਠੁ ਨਿਕ੍ਕੋਧਂ. ਸੁਨਿਦ੍ਦੋਸਨ੍ਤਿ ਅਦੁਸ੍ਸਨਵਸੇਨ ਸੁਟ੍ਠੁ ਨਿਦ੍ਦੋਸਂ. ਨਿਲ੍ਲੋਭਨ੍ਤਿ ਪਰਸਮ੍ਪਤ੍ਤੀਸੁ ਨਿਲ੍ਲੋਭਂ. ਵੁਤ੍ਤਿਮਤ੍ਤਨੋਤਿ ਏਵਰੂਪਂ ਅਤ੍ਤਨੋ ਵੁਤ੍ਤਿਂ. ਨਿਸ੍ਨੇਹਨ੍ਤਿ ਪੁਤ੍ਤਧੀਤਾਦੀਸੁ ਵਾ ਸਵਿਞ੍ਞਾਣਕੇਸੁ ਧਨਧਞ੍ਞਾਦੀਸੁ ਵਾ ਅਵਿਞ੍ਞਾਣਕੇਸੁ ਅਤ੍ਤਨੋ ਸਨ੍ਤਕੇਸੁਪਿ ਨਿਸ੍ਨੇਹਂ ਅਪਗਤਲੋਭਂ. ਅਭਿਕਙ੍ਖਾਮੀਤਿ ਏਵਰੂਪਂ ਇਮੇਹਿ ਚਤੂਹਙ੍ਗੇਹਿ ਸਮਨ੍ਨਾਗਤਂ ਅਤ੍ਤਨੋ ਵੁਤ੍ਤਿਂ ਅਭਿਕਙ੍ਖਾਮਿ. ਏਤੇ ਮੇ ਚਤੁਰੋ ਵਰੇਤਿ ਏਤੇ ਨਿਕ੍ਕੋਧਾਦਿਕੇ ਚਤੁਰੋ ਮਯ੍ਹਂ ਵਰੇ ਦੇਹੀਤਿ.

ਕਿਂ ਪਨੇਸ ਨ ਜਾਨਾਤਿ ‘‘ਯਥਾ ਨ ਸਕ੍ਕਾ ਸਕ੍ਕਸ੍ਸ ਸਨ੍ਤਿਕੇ ਵਰਂ ਗਹੇਤ੍ਵਾ ਵਰੇਨ ਕੋਧਾਦਯੋ ਹਨਿਤੁ’’ਨ੍ਤਿ. ਨੋ ਨ ਜਾਨਾਤਿ, ਸਕ੍ਕੇ ਖੋ ਪਨ ਵਰਂ ਦੇਨ੍ਤੇ ਨ ਗਣ੍ਹਾਮੀਤਿ ਵਚਨਂ ਨ ਯੁਤ੍ਤਨ੍ਤਿ ਤਸ੍ਸ ਚ ਨਿਕ੍ਕਙ੍ਖਭਾਵਤ੍ਥਾਯ ਗਣ੍ਹਿ. ਤਤੋ ਸਕ੍ਕੋ ਚਿਨ੍ਤੇਸਿ ‘‘ਕਣ੍ਹਪਣ੍ਡਿਤੋ ਵਰਂ ਗਣ੍ਹਨ੍ਤੋ ਅਤਿਵਿਯ ਅਨਵਜ੍ਜੇ ਵਰੇ ਗਣ੍ਹਿ, ਏਤੇਸੁ ਵਰੇਸੁ ਗੁਣਦੋਸਂ ਏਤਮੇਵ ਪੁਚ੍ਛਿਸ੍ਸਾਮੀ’’ਤਿ. ਅਥ ਨਂ ਪੁਚ੍ਛਨ੍ਤੋ ਪਞ੍ਚਮਂ ਗਾਥਮਾਹ –

੧੫.

‘‘ਕਿਂਨੁ ਕੋਧੇ ਵਾ ਦੋਸੇ ਵਾ, ਲੋਭੇ ਸ੍ਨੇਹੇ ਚ ਬ੍ਰਾਹ੍ਮਣ;

ਆਦੀਨਵਂ ਤ੍ਵਂ ਪਸ੍ਸਸਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

ਤਸ੍ਸਤ੍ਥੋ – ਬ੍ਰਾਹ੍ਮਣ ਕਿਂ ਨੁ ਖੋ ਤ੍ਵਂ ਕੋਧੇ ਦੋਸੇ ਲੋਭੇ ਸ੍ਨੇਹੇ ਚ ਆਦੀਨਵਂ ਪਸ੍ਸਸਿ, ਤਂ ਤਾਵ ਮੇ ਪੁਚ੍ਛਿਤੋ ਅਕ੍ਖਾਹਿ, ਨ ਹਿ ਮਯਂ ਏਤ੍ਥ ਆਦੀਨਵਂ ਜਾਨਾਮਾਤਿ.

ਅਥ ਨਂ ਮਹਾਸਤ੍ਤੋ ‘‘ਤੇਨ ਹਿ ਸੁਣਾਹੀ’’ਤਿ ਵਤ੍ਵਾ ਚਤਸ੍ਸੋ ਗਾਥਾ ਅਭਾਸਿ –

੧੬.

‘‘ਅਪ੍ਪੋ ਹੁਤ੍ਵਾ ਬਹੁ ਹੋਤਿ, ਵਡ੍ਢਤੇ ਸੋ ਅਖਨ੍ਤਿਜੋ;

ਆਸਙ੍ਗੀ ਬਹੁਪਾਯਾਸੋ, ਤਸ੍ਮਾ ਕੋਧਂ ਨ ਰੋਚਯੇ.

੧੭.

‘‘ਦੁਟ੍ਠਸ੍ਸ ਫਰੁਸਾ ਵਾਚਾ, ਪਰਾਮਾਸੋ ਅਨਨ੍ਤਰਾ;

ਤਤੋ ਪਾਣਿ ਤਤੋ ਦਣ੍ਡੋ, ਸਤ੍ਥਸ੍ਸ ਪਰਮਾ ਗਤਿ;

ਦੋਸੋ ਕੋਧਸਮੁਟ੍ਠਾਨੋ, ਤਸ੍ਮਾ ਦੋਸਂ ਨ ਰੋਚਯੇ.

੧੮.

‘‘ਆਲੋਪਸਾਹਸਾਕਾਰਾ, ਨਿਕਤੀ ਵਞ੍ਚਨਾਨਿ ਚ;

ਦਿਸ੍ਸਨ੍ਤਿ ਲੋਭਧਮ੍ਮੇਸੁ, ਤਸ੍ਮਾ ਲੋਭਂ ਨ ਰੋਚਯੇ.

੧੯.

‘‘ਸ੍ਨੇਹਸਙ੍ਗਥਿਤਾ ਗਨ੍ਥਾ, ਸੇਨ੍ਤਿ ਮਨੋਮਯਾ ਪੁਥੂ;

ਤੇ ਭੁਸਂ ਉਪਤਾਪੇਨ੍ਤਿ, ਤਸ੍ਮਾ ਸ੍ਨੇਹਂ ਨ ਰੋਚਯੇ’’ਤਿ.

ਤਤ੍ਥ ਅਖਨ੍ਤਿਜੋਤਿ ਸੋ ਅਨਧਿਵਾਸਕਜਾਤਿਕਸ੍ਸ ਅਖਨ੍ਤਿਤੋ ਜਾਤੋ ਕੋਧੋ ਪਠਮਂ ਪਰਿਤ੍ਤੋ ਹੁਤ੍ਵਾ ਪਚ੍ਛਾ ਬਹੁ ਹੋਤਿ ਅਪਰਾਪਰਂ ਵਡ੍ਢਤਿ. ਤਸ੍ਸ ਵਡ੍ਢਨਭਾਵੋ ਖਨ੍ਤਿਵਾਦੀਜਾਤਕੇਨ (ਜਾ. ੧.੪.੪੯ ਆਦਯੋ) ਚੇਵ ਚੂਲ਼ਧਮ੍ਮਪਾਲਜਾਤਕੇਨ (ਜਾ. ੧.੫.੪੪ ਆਦਯੋ) ਚ ਵਣ੍ਣੇਤਬ੍ਬੋ. ਅਪਿਚ ਤਿਸ੍ਸਾਮਚ੍ਚਸ੍ਸਪੇਤ੍ਥ ਭਰਿਯਂ ਆਦਿਂ ਕਤ੍ਵਾ ਸਬ੍ਬਂ ਸਪਰਿਜਨਂ ਮਾਰੇਤ੍ਵਾ ਪਚ੍ਛਾ ਅਤ੍ਤਨੋ ਮਾਰਿਤਵਤ੍ਥੁ ਕਥੇਤਬ੍ਬਂ. ਆਸਙ੍ਗੀਤਿ ਆਸਙ੍ਗਕਰਣੋ. ਯਸ੍ਸ ਉਪ੍ਪਜ੍ਜਤਿ, ਤਂ ਆਸਤ੍ਤਂ ਲਗ੍ਗਿਤਂ ਕਰੋਤਿ, ਤਂ ਵਤ੍ਥੁਂ ਵਿਸ੍ਸਜ੍ਜੇਤ੍ਵਾ ਗਨ੍ਤੁਂ ਨ ਦੇਤਿ, ਨਿਵਤ੍ਤਿਤ੍ਵਾ ਅਕ੍ਕੋਸਨਾਦੀਨਿ ਕਾਰੇਤਿ. ਬਹੁਪਾਯਾਸੋਤਿ ਬਹੁਨਾ ਕਾਯਿਕਚੇਤਸਿਕਦੁਕ੍ਖਸਙ੍ਖਾਤੇਨ ਉਪਾਯਾਸੇਨ ਕਿਲਮਥੇਨ ਸਮਨ੍ਨਾਗਤੋ. ਕੋਧਂ ਨਿਸ੍ਸਾਯ ਹਿ ਕੋਧਵਸੇਨ ਅਰਿਯਾਦੀਸੁ ਕਤਵੀਤਿਕ੍ਕਮਾ ਦਿਟ੍ਠਧਮ੍ਮੇ ਚੇਵ ਸਮ੍ਪਰਾਯੇ ਚ ਵਧਬਨ੍ਧਵਿਪ੍ਪਟਿਸਾਰਾਦੀਨਿ ਚੇਵ ਪਞ੍ਚਵਿਧਬਨ੍ਧਨਕਮ੍ਮਕਰਣਾਦੀਨਿ ਚ ਬਹੂਨਿ ਦੁਕ੍ਖਾਨਿ ਅਨੁਭਵਨ੍ਤੀਤਿ ਕੋਧੋ ਬਹੁਪਾਯਾਸੋ ਨਾਮ. ਤਸ੍ਮਾਤਿ ਯਸ੍ਮਾ ਏਸ ਏਵਂ ਅਨੇਕਾਦੀਨਵੋ, ਤਸ੍ਮਾ ਕੋਧਂ ਨ ਰੋਚੇਮਿ.

ਦੁਟ੍ਠਸ੍ਸਾਤਿ ਕੁਜ੍ਝਨਲਕ੍ਖਣੇਨ ਕੋਧੇਨ ਕੁਜ੍ਝਿਤ੍ਵਾ ਅਪਰਭਾਗੇ ਦੁਸ੍ਸਨਲਕ੍ਖਣੇਨ ਦੋਸੇਨ ਦੁਟ੍ਠਸ੍ਸ ਪਠਮਂ ਤਾਵ ‘‘ਅਰੇ, ਦਾਸ, ਪੇਸ੍ਸਾ’’ਤਿ ਫਰੁਸਵਾਚਾ ਨਿਚ੍ਛਰਤਿ, ਵਾਚਾਯ ਅਨਨ੍ਤਰਾ ਆਕਡ੍ਢਨਵਿਕਡ੍ਢਨਵਸੇਨ ਹਤ੍ਥਪਰਾਮਾਸੋ, ਤਤੋ ਅਨਨ੍ਤਰਾ ਉਪਕ੍ਕਮਨਵਸੇਨ ਪਾਣਿ ਪਵਤ੍ਤਤਿ, ਤਤੋ ਦਣ੍ਡੋ, ਦਣ੍ਡਪ੍ਪਹਾਰੇ ਅਤਿਕ੍ਕਮਿਤ੍ਵਾ ਪਨ ਏਕਤੋਧਾਰਉਭਤੋਧਾਰਸ੍ਸ ਸਤ੍ਥਸ੍ਸ ਪਰਮਾ ਗਤਿ, ਸਬ੍ਬਪਰਿਯਨ੍ਤਾ ਸਤ੍ਥਨਿਪ੍ਫਤ੍ਤਿ ਹੋਤਿ. ਯਦਾ ਹਿ ਸਤ੍ਥੇਨ ਪਰਂ ਜੀਵਿਤਾ ਵੋਰੋਪੇਤ੍ਵਾ ਪਚ੍ਛਾ ਤੇਨੇਵ ਸਤ੍ਥੇਨ ਅਤ੍ਤਾਨਂ ਜੀਵਿਤਾ ਵੋਰੋਪੇਤਿ, ਤਦਾ ਦੋਸੋ ਮਤ੍ਥਕਪ੍ਪਤ੍ਤੋ ਹੋਤਿ. ਦੋਸੋ ਕੋਧਸਮੁਟ੍ਠਾਨੋਤਿ ਯਥਾ ਅਨਮ੍ਬਿਲਂ ਤਕ੍ਕਂ ਵਾ ਕਞ੍ਜਿਕਂ ਵਾ ਪਰਿਣਾਮਵਸੇਨ ਪਰਿਵਤ੍ਤਿਤ੍ਵਾ ਅਮ੍ਬਿਲਂ ਹੋਤਿ, ਤਂ ਏਕਜਾਤਿਕਮ੍ਪਿ ਸਮਾਨਂ ਅਮ੍ਬਿਲਂ ਅਨਮ੍ਬਿਲਨ੍ਤਿ ਨਾਨਾ ਵੁਚ੍ਚਤਿ, ਤਥਾ ਪੁਬ੍ਬਕਾਲੇ ਕੋਧੋ ਪਰਿਣਮਿਤ੍ਵਾ ਅਪਰਭਾਗੇ ਦੋਸੋ ਹੋਤਿ. ਸੋ ਅਕੁਸਲਮੂਲਤ੍ਤੇਨ ਏਕਜਾਤਿਕੋਪਿ ਸਮਾਨੋ ਕੋਧੋ ਦੋਸੋਤਿ ਨਾਨਾ ਵੁਚ੍ਚਤਿ. ਯਥਾ ਅਨਮ੍ਬਿਲਤੋ ਅਮ੍ਬਿਲਂ, ਏਵਂ ਸੋਪਿ ਕੋਧਤੋ ਸਮੁਟ੍ਠਾਤੀਤਿ ਕੋਧਸਮੁਟ੍ਠਾਨੋ. ਤਸ੍ਮਾਤਿ ਯਸ੍ਮਾ ਏਵਂ ਅਨੇਕਾਦੀਨਵੋ ਦੋਸੋ, ਤਸ੍ਮਾ ਦੋਸਮ੍ਪਿ ਨ ਰੋਚੇਮਿ.

ਆਲੋਪਸਾਹਸਾਕਾਰਾਤਿ ਦਿਵਾ ਦਿਵਸ੍ਸੇਵ ਗਾਮਂ ਪਹਰਿਤ੍ਵਾ ਵਿਲੁਮ੍ਪਨਾਨਿ ਚ ਆਵੁਧਂ ਸਰੀਰੇ ਠਪੇਤ੍ਵਾ ‘‘ਇਦਂ ਨਾਮ ਮੇ ਦੇਹੀ’’ਤਿ ਸਾਹਸਾਕਾਰਾ ਚ. ਨਿਕਤੀ ਵਞ੍ਚਨਾਨਿ ਚਾਤਿ ਪਤਿਰੂਪਕਂ ਦਸ੍ਸੇਤ੍ਵਾ ਪਰਸ੍ਸ ਹਰਣਂ ਨਿਕਤਿ ਨਾਮ, ਸਾ ਅਸੁਵਣ੍ਣਮੇਵ ‘‘ਸੁਵਣ੍ਣ’’ਨ੍ਤਿ ਕੂਟਕਹਾਪਣਂ ‘‘ਕਹਾਪਣੋ’’ਤਿ ਦਤ੍ਵਾ ਪਰਸਨ੍ਤਕਗ੍ਗਹਣੇ ਦਟ੍ਠਬ੍ਬਾ. ਪਟਿਭਾਨਵਸੇਨ ਪਨ ਉਪਾਯਕੁਸਲਤਾਯ ਪਰਸਨ੍ਤਕਗ੍ਗਹਣਂ ਵਞ੍ਚਨਂ ਨਾਮ. ਤਸ੍ਸੇਵਂ ਪਵਤ੍ਤਿ ਦਟ੍ਠਬ੍ਬਾ – ਏਕੋ ਕਿਰ ਉਜੁਜਾਤਿਕੋ ਗਾਮਿਕਪੁਰਿਸੋ ਅਰਞ੍ਞਤੋ ਸਸਕਂ ਆਨੇਤ੍ਵਾ ਨਦੀਤੀਰੇ ਠਪੇਤ੍ਵਾ ਨ੍ਹਾਯਿਤੁਂ ਓਤਰਿ. ਅਥੇਕੋ ਧੁਤ੍ਤੋ ਤਂ ਸਸਕਂ ਸੀਸੇ ਕਤ੍ਵਾ ਨ੍ਹਾਯਿਤੁਂ ਓਤਿਣ੍ਣੋ. ਇਤਰੋ ਉਤ੍ਤਰਿਤ੍ਵਾ ਸਸਕਂ ਅਪਸ੍ਸਨ੍ਤੋ ਇਤੋ ਚਿਤੋ ਚ ਵਿਲੋਕੇਸਿ. ਤਮੇਨਂ ਧੁਤ੍ਤੋ ‘‘ਕਿਂ ਭੋ ਵਿਲੋਕੇਸੀ’’ਤਿ ਵਤ੍ਵਾ ‘‘ਇਮਸ੍ਮਿਂ ਮੇ ਠਾਨੇ ਸਸਕੋ ਠਪਿਤੋ, ਤਂ ਨ ਪਸ੍ਸਾਮੀ’’ਤਿ ਵੁਤ੍ਤੇ ‘‘ਅਨ੍ਧਬਾਲ, ਤ੍ਵਂ ਨ ਜਾਨਾਸਿ, ਸਸਕਾ ਨਾਮ ਨਦੀਤੀਰੇ ਠਪਿਤਾ ਪਲਾਯਨ੍ਤਿ, ਪਸ੍ਸ ਅਹਂ ਅਤ੍ਤਨੋ ਸਸਕਂ ਸੀਸੇ ਠਪੇਤ੍ਵਾਵ ਨ੍ਹਾਯਾਮੀ’’ਤਿ ਆਹ. ਸੋ ਅਪ੍ਪਟਿਭਾਨਤਾਯ ‘‘ਏਵਂ ਭਵਿਸ੍ਸਤੀ’’ਤਿ ਪਕ੍ਕਾਮਿ. ਏਕਕਹਾਪਣੇਨ ਮਿਗਪੋਤਕਂ ਗਹੇਤ੍ਵਾ ਪੁਨ ਤਂ ਦਤ੍ਵਾ ਦ੍ਵਿਕਹਾਪਣਗ੍ਘਨਕਸ੍ਸ ਮਿਗਸ੍ਸ ਗਹਿਤਵਤ੍ਥੁਪੇਤ੍ਥ ਕਥੇਤਬ੍ਬਂ. ਦਿਸ੍ਸਨ੍ਤਿ ਲੋਭਧਮ੍ਮੇਸੂਤਿ ਸਕ੍ਕ, ਇਮੇ ਆਲੋਪਾਦਯੋ ਪਾਪਧਮ੍ਮਾ ਲੋਭਸਭਾਵੇਸੁ ਲੋਭਾਭਿਭੂਤੇਸੁ ਸਤ੍ਤੇਸੁ ਦਿਸ੍ਸਨ੍ਤਿ. ਨ ਹਿ ਅਲੁਦ੍ਧਾ ਏਵਰੂਪਾਨਿ ਕਮ੍ਮਾਨਿ ਕਰੋਨ੍ਤਿ. ਏਵਂ ਲੋਭੋ ਅਨੇਕਾਦੀਨਵੋ, ਤਸ੍ਮਾ ਲੋਭਮ੍ਪਿ ਨ ਰੋਚੇਮਿ.

ਸ੍ਨੇਹਸਙ੍ਗਥਿਤਾ ਗਨ੍ਥਾਤਿ ਆਰਮ੍ਮਣੇਸੁ ਅਲ੍ਲੀਯਨਲਕ੍ਖਣੇਨ ਸ੍ਨੇਹੇਨ ਸਙ੍ਗਥਿਤਾ ਪੁਨਪ੍ਪੁਨਂ ਉਪ੍ਪਾਦਵਸੇਨ ਘਟਿਤਾ ਸੁਤ੍ਤੇਨ ਪੁਪ੍ਫਾਨਿ ਵਿਯ ਬਦ੍ਧਾ ਨਾਨਪ੍ਪਕਾਰੇਸੁ ਆਰਮ੍ਮਣੇਸੁ ਪਵਤ੍ਤਮਾਨਾ ਅਭਿਜ੍ਝਾਕਾਯਗਨ੍ਥਾ. ਸੇਨ੍ਤਿ ਮਨੋਮਯਾ ਪੁਥੂਤਿ ਤੇ ਪੁਥੂਸੁ ਆਰਮ੍ਮਣੇਸੁ ਉਪ੍ਪਨ੍ਨਾ ਸੁਵਣ੍ਣਾਦੀਹਿ ਨਿਬ੍ਬਤ੍ਤਾਨਿ ਸੁਵਣ੍ਣਾਦਿਮਯਾਨਿ ਆਭਰਣਾਦੀਨਿ ਵਿਯ ਮਨੇਨ ਨਿਬ੍ਬਤ੍ਤਤ੍ਤਾ ਮਨੋਮਯਾ ਅਭਿਜ੍ਝਾਕਾਯਗਨ੍ਥਾ ਤੇਸੁ ਆਰਮ੍ਮਣੇਸੁ ਸੇਨ੍ਤਿ ਅਨੁਸੇਨ੍ਤਿ. ਤੇ ਭੁਸਂ ਉਪਤਾਪੇਨ੍ਤੀਤਿ ਤੇ ਏਵਂ ਅਨੁਸਯਿਤਾ ਬਲਵਤਾਪਂ ਜਨੇਨ੍ਤਾ ਭੁਸਂ ਉਪਤਾਪੇਨ੍ਤਿ ਅਤਿਕਿਲਮੇਨ੍ਤਿ. ਤੇਸਂ ਪਨ ਭੁਸਂ ਉਪਤਾਪਨੇ ‘‘ਸਲ੍ਲਵਿਦ੍ਧੋਵ ਰੁਪ੍ਪਤੀ’’ਤਿ (ਸੁ. ਨਿ. ੭੭੩) ਗਾਥਾਯ ਵਤ੍ਥੁ, ‘‘ਪਿਯਜਾਤਿਕਾ ਹਿ ਗਹਪਤਿ, ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਪਿਯਪ੍ਪਭੁਤਿਕਾ’’ (ਮ. ਨਿ. ੨.੩੫੩), ‘‘ਪਿਯਤੋ ਜਾਯਤੀ ਸੋਕੋ’’ਤਿਆਦੀਨਿ (ਧ. ਪ. ੨੧੨) ਸੁਤ੍ਤਾਨਿ ਚ ਆਹਰਿਤਬ੍ਬਾਨਿ. ਅਪਿਚ ਮਙ੍ਗਲਬੋਧਿਸਤ੍ਤਸ੍ਸ ਦਾਰਕੇ ਦਤ੍ਵਾ ਬਲਵਸੋਕੇਨ ਹਦਯਂ ਫਲਿ, ਵੇਸ੍ਸਨ੍ਤਰਬੋਧਿਸਤ੍ਤਸ੍ਸ ਮਹਨ੍ਤਂ ਦੋਮਨਸ੍ਸਂ ਉਦਪਾਦਿ. ਏਵਂ ਪੂਰਿਤਪਾਰਮੀਨਂ ਮਹਾਸਤ੍ਤਾਨਂ ਪੇਮਂ ਉਪਤਾਪਂ ਕਰੋਤਿਯੇਵ. ਅਯਂ ਸ੍ਨੇਹੇ ਆਦੀਨਵੋ, ਤਸ੍ਮਾ ਸ੍ਨੇਹਮ੍ਪਿ ਨ ਰੋਚੇਮੀਤਿ.

ਸਕ੍ਕੋ ਪਞ੍ਹਵਿਸ੍ਸਜ੍ਜਨਂ ਸੁਤ੍ਵਾ ‘‘ਕਣ੍ਹਪਣ੍ਡਿਤ ਤਯਾ ਇਮੇ ਪਞ੍ਹਾ ਬੁਦ੍ਧਲੀਲ਼ਾਯ ਸਾਧੁਕਂ ਕਥਿਤਾ, ਅਤਿਵਿਯ ਤੁਟ੍ਠੋਸ੍ਮਿ ਤੇ, ਅਪਰਮ੍ਪਿ ਵਰਂ ਗਣ੍ਹਾਹੀ’’ਤਿ ਵਤ੍ਵਾ ਦਸਮਂ ਗਾਥਮਾਹ –

੨੦.

‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਬ੍ਰਾਹ੍ਮਣ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸੀ’’ਤਿ.

ਤਤੋ ਬੋਧਿਸਤ੍ਤੋ ਅਨਨ੍ਤਰਗਾਥਮਾਹ –

੨੧.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਅਰਞ੍ਞੇ ਮੇ ਵਿਹਰਤੋ, ਨਿਚ੍ਚਂ ਏਕਵਿਹਾਰਿਨੋ;

ਆਬਾਧਾ ਮਾ ਉਪ੍ਪਜ੍ਜੇਯ੍ਯੁਂ, ਅਨ੍ਤਰਾਯਕਰਾ ਭੁਸਾ’’ਤਿ.

ਤਤ੍ਥ ਅਨ੍ਤਰਾਯਕਰਾ ਭੁਸਾਤਿ ਇਮਸ੍ਸ ਮੇ ਤਪੋਕਮ੍ਮਸ੍ਸ ਅਨ੍ਤਰਾਯਕਰਾ.

ਤਂ ਸੁਤ੍ਵਾ ਸਕ੍ਕੋ ‘‘ਕਣ੍ਹਪਣ੍ਡਿਤੋ ਵਰਂ ਗਣ੍ਹਨ੍ਤੋ ਨ ਆਮਿਸਸਨ੍ਨਿਸ੍ਸਿਤਂ ਗਣ੍ਹਾਤਿ, ਤਪੋਕਮ੍ਮਨਿਸ੍ਸਿਤਮੇਵ ਗਣ੍ਹਾਤੀ’’ਤਿ ਚਿਨ੍ਤੇਤ੍ਵਾ ਭਿਯ੍ਯੋਸੋਮਤ੍ਤਾਯ ਪਸਨ੍ਨੋ ਅਪਰਮ੍ਪਿ ਵਰਂ ਦਦਮਾਨੋ ਇਤਰਂ ਗਾਥਮਾਹ –

੨੨.

‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਬ੍ਰਾਹ੍ਮਣ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸੀ’’ਤਿ.

ਬੋਧਿਸਤ੍ਤੋਪਿ ਵਰਗ੍ਗਹਣਾਪਦੇਸੇਨ ਤਸ੍ਸ ਧਮ੍ਮਂ ਦੇਸੇਨ੍ਤੋ ਓਸਾਨਗਾਥਮਾਹ –

੨੩.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਨ ਮਨੋ ਵਾ ਸਰੀਰਂ ਵਾ, ਮਂ-ਕਤੇ ਸਕ੍ਕ ਕਸ੍ਸਚਿ;

ਕਦਾਚਿ ਉਪਹਞ੍ਞੇਥ, ਏਤਂ ਸਕ੍ਕ ਵਰਂ ਵਰੇ’’ਤਿ.

ਤਤ੍ਥ ਮਨੋ ਵਾਤਿ ਮਨੋਦ੍ਵਾਰਂ ਵਾ. ਸਰੀਰਂ ਵਾਤਿ ਕਾਯਦ੍ਵਾਰਂ ਵਾ, ਵਚੀਦ੍ਵਾਰਮ੍ਪਿ ਏਤੇਸਂ ਗਹਣੇਨ ਗਹਿਤਮੇਵਾਤਿ ਵੇਦਿਤਬ੍ਬਂ. ਮਂ-ਕਤੇਤਿ ਮਮ ਕਾਰਣਾ. ਉਪਹਞ੍ਞੇਥਾਤਿ ਉਪਘਾਤਂ ਆਪਜ੍ਜੇਯ੍ਯ ਅਪਰਿਸੁਦ੍ਧਂ ਅਸ੍ਸ. ਇਦਂ ਵੁਤ੍ਤਂ ਹੋਤਿ – ਸਕ੍ਕ ਦੇਵਰਾਜ, ਮਮ ਕਾਰਣਾ ਮਂ ਨਿਸ੍ਸਾਯ ਮਮ ਅਨਤ੍ਥਕਾਮਤਾਯ ਕਸ੍ਸਚਿ ਸਤ੍ਤਸ੍ਸ ਕਿਸ੍ਮਿਞ੍ਚਿ ਕਾਲੇ ਇਦਂ ਤਿਵਿਧਮ੍ਪਿ ਕਮ੍ਮਦ੍ਵਾਰਂ ਨ ਉਪਹਞ੍ਞੇਥ, ਪਾਣਾਤਿਪਾਤਾਦੀਹਿ ਦਸਹਿ ਅਕੁਸਲਕਮ੍ਮਪਥੇਹਿ ਵਿਮੁਤ੍ਤਂ ਪਰਿਸੁਦ੍ਧਮੇਵ ਭਵੇਯ੍ਯਾਤਿ.

ਇਤਿ ਮਹਾਸਤ੍ਤੋ ਛਸੁਪਿ ਠਾਨੇਸੁ ਵਰਂ ਗਣ੍ਹਨ੍ਤੋ ਨੇਕ੍ਖਮ੍ਮਨਿਸ੍ਸਿਤਮੇਵ ਗਣ੍ਹਿ, ਜਾਨਾਤਿ ਚੇਸ ‘‘ਸਰੀਰਂ ਨਾਮ ਬ੍ਯਾਧਿਧਮ੍ਮਂ, ਨ ਤਂ ਸਕ੍ਕਾ ਸਕ੍ਕੇਨ ਅਬ੍ਯਾਧਿਧਮ੍ਮਂ ਕਾਤੁ’’ਨ੍ਤਿ. ਸਤ੍ਤਾਨਞ੍ਹਿ ਤੀਸੁ ਦ੍ਵਾਰੇਸੁ ਪਰਿਸੁਦ੍ਧਭਾਵੋ ਅਸਕ੍ਕਾਯਤ੍ਤੋਵ, ਏਵਂ ਸਨ੍ਤੇਪਿ ਤਸ੍ਸ ਧਮ੍ਮਦੇਸਨਤ੍ਥਂ ਇਮੇ ਵਰੇ ਗਣ੍ਹਿ. ਸਕ੍ਕੋਪਿ ਤਂ ਰੁਕ੍ਖਂ ਧੁਵਫਲਂ ਕਤ੍ਵਾ ਮਹਾਸਤ੍ਤਂ ਵਨ੍ਦਿਤ੍ਵਾ ਸਿਰਸਿ ਅਞ੍ਜਲਿਂ ਪਤਿਟ੍ਠਪੇਤ੍ਵਾ ‘‘ਅਰੋਗਾ ਇਧੇਵ ਵਸਥਾ’’ਤਿ ਵਤ੍ਵਾ ਸਕਟ੍ਠਾਨਮੇਵ ਗਤੋ. ਬੋਧਿਸਤ੍ਤੋਪਿ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਆਨਨ੍ਦ, ਪੁਬ੍ਬੇ ਮਯਾ ਨਿਵੁਤ੍ਥਭੂਮਿਪ੍ਪਦੇਸੋ ਚੇਸੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਕ੍ਕੋ ਅਨੁਰੁਦ੍ਧੋ ਅਹੋਸਿ, ਕਣ੍ਹਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕਣ੍ਹਜਾਤਕਵਣ੍ਣਨਾ ਦੁਤਿਯਾ.

[੪੪੧] ੩. ਚਤੁਪੋਸਥਿਕਜਾਤਕਵਣ੍ਣਨਾ

੨੪-੩੮. ਯੋ ਕੋਪਨੇਯ੍ਯੋਤਿ ਇਦਂ ਚਤੁਪੋਸਥਿਕਜਾਤਕਂ ਪੁਣ੍ਣਕਜਾਤਕੇ ਆਵਿ ਭਵਿਸ੍ਸਤਿ.

ਚਤੁਪੋਸਥਿਕਜਾਤਕਵਣ੍ਣਨਾ ਤਤਿਯਾ.

[੪੪੨] ੪. ਸਙ੍ਖਜਾਤਕਵਣ੍ਣਨਾ

ਬਹੁਸ੍ਸੁਤੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਬ੍ਬਪਰਿਕ੍ਖਾਰਦਾਨਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰੇਕੋ ਉਪਾਸਕੋ ਤਥਾਗਤਸ੍ਸ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਚਿਤ੍ਤੋ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਅਤ੍ਤਨੋ ਘਰਦ੍ਵਾਰੇ ਮਣ੍ਡਪਂ ਕਾਰੇਤ੍ਵਾ ਅਲਙ੍ਕਰਿਤ੍ਵਾ ਪੁਨਦਿਵਸੇ ਤਥਾਗਤਸ੍ਸ ਕਾਲਂ ਆਰੋਚਾਪੇਸਿ. ਸਤ੍ਥਾ ਪਞ੍ਚਸਤਭਿਕ੍ਖੁਪਰਿਵਾਰੋ ਤਤ੍ਥ ਗਨ੍ਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਉਪਾਸਕੋ ਸਪੁਤ੍ਤਦਾਰੋ ਸਪਰਿਜਨੋ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਪੁਨ ਸ੍ਵਾਤਨਾਯਾਤਿ ਏਵਂ ਸਤ੍ਤਾਹਂ ਨਿਮਨ੍ਤੇਤ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਤਮੇ ਦਿਵਸੇ ਸਬ੍ਬਪਰਿਕ੍ਖਾਰਂ ਅਦਾਸਿ. ਤਂ ਪਨ ਦਦਮਾਨੋ ਉਪਾਹਨਦਾਨਂ ਉਸ੍ਸਨ੍ਨਂ ਕਤ੍ਵਾ ਅਦਾਸਿ. ਦਸਬਲਸ੍ਸ ਦਿਨ੍ਨੋ ਉਪਾਹਨਸਙ੍ਘਾਟੋ ਸਹਸ੍ਸਗ੍ਘਨਕੋ ਅਹੋਸਿ, ਦ੍ਵਿਨ੍ਨਂ ਅਗ੍ਗਸਾਵਕਾਨਂ ਪਞ੍ਚਸਤਗ੍ਘਨਕੋ, ਸੇਸਾਨਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਸਤਗ੍ਘਨਕੋ. ਇਤਿ ਸੋ ਸਬ੍ਬਪਰਿਕ੍ਖਾਰਦਾਨਂ ਦਤ੍ਵਾ ਅਤ੍ਤਨੋ ਪਰਿਸਾਯ ਸਦ੍ਧਿਂ ਭਗਵਤੋ ਸਨ੍ਤਿਕੇ ਨਿਸੀਦਿ. ਅਥਸ੍ਸ ਸਤ੍ਥਾ ਮਧੁਰੇਨ ਸਰੇਨ ਅਨੁਮੋਦਨਂ ਕਰੋਨ੍ਤੋ ‘‘ਉਪਾਸਕ, ਉਲ਼ਾਰਂ ਤੇ ਸਬ੍ਬਪਰਿਕ੍ਖਾਰਦਾਨਂ, ਅਤ੍ਤਮਨੋ ਹੋਹਿ, ਪੁਬ੍ਬੇ ਅਨੁਪ੍ਪਨ੍ਨੇ ਬੁਦ੍ਧੇ ਪਚ੍ਚੇਕਬੁਦ੍ਧਸ੍ਸ ਏਕਂ ਉਪਾਹਨਸਙ੍ਘਾਟਂ ਦਤ੍ਵਾ ਨਾਵਾਯ ਭਿਨ੍ਨਾਯ ਅਪ੍ਪਤਿਟ੍ਠੇ ਮਹਾਸਮੁਦ੍ਦੇਪਿ ਉਪਾਹਨਦਾਨਨਿਸ੍ਸਨ੍ਦੇਨ ਪਤਿਟ੍ਠਂ ਲਭਿਂਸੁ, ਤ੍ਵਂ ਪਨ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਬ੍ਬਪਰਿਕ੍ਖਾਰਦਾਨਂ ਅਦਾਸਿ, ਤਸ੍ਸ ਤੇ ਉਪਾਹਨਦਾਨਸ੍ਸ ਫਲਂ ਕਸ੍ਮਾ ਨ ਪਤਿਟ੍ਠਾ ਭਵਿਸ੍ਸਤੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਅਯਂ ਬਾਰਾਣਸੀ ਮੋਲ਼ਿਨੀ ਨਾਮ ਅਹੋਸਿ. ਮੋਲ਼ਿਨਿਨਗਰੇ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਸਙ੍ਖੋ ਨਾਮ ਬ੍ਰਾਹ੍ਮਣੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਪਹੂਤਵਿਤ੍ਤੁਪਕਰਣੋ ਪਹੂਤਧਨਧਞ੍ਞਸੁਵਣ੍ਣਰਜਤੋ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਨਿਵੇਸਨਦ੍ਵਾਰੇ ਚਾਤਿ ਛਸੁ ਠਾਨੇਸੁ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛਸਤਸਹਸ੍ਸਾਨਿ ਵਿਸ੍ਸਜ੍ਜੇਨ੍ਤੋ ਕਪਣਦ੍ਧਿਕਾਨਂ ਮਹਾਦਾਨਂ ਪਵਤ੍ਤੇਸਿ. ਸੋ ਏਕਦਿਵਸਂ ਚਿਨ੍ਤੇਸਿ ‘‘ਅਹਂ ਗੇਹੇ ਧਨੇ ਖੀਣੇ ਦਾਤੁਂ ਨ ਸਕ੍ਖਿਸ੍ਸਾਮਿ, ਅਪਰਿਕ੍ਖੀਣੇਯੇਵ ਧਨੇ ਨਾਵਾਯ ਸੁਵਣ੍ਣਭੂਮਿਂ ਗਨ੍ਤ੍ਵਾ ਧਨਂ ਆਹਰਿਸ੍ਸਾਮੀ’’ਤਿ. ਸੋ ਨਾਵਂ ਬਨ੍ਧਾਪੇਤ੍ਵਾ ਭਣ੍ਡਸ੍ਸ ਪੂਰਾਪੇਤ੍ਵਾ ਪੁਤ੍ਤਦਾਰਂ ਆਮਨ੍ਤੇਤ੍ਵਾ ‘‘ਯਾਵਾਹਂ ਆਗਚ੍ਛਾਮਿ, ਤਾਵ ਮੇ ਦਾਨਂ ਅਨੁਪਚ੍ਛਿਨ੍ਦਿਤ੍ਵਾ ਪਵਤ੍ਤੇਯ੍ਯਾਥਾ’’ਤਿ ਵਤ੍ਵਾ ਦਾਸਕਮ੍ਮਕਰਪਰਿਵੁਤੋ ਛਤ੍ਤਂ ਆਦਾਯ ਉਪਾਹਨਂ ਆਰੁਯ੍ਹ ਮਜ੍ਝਨ੍ਹਿਕਸਮਯੇ ਪਟ੍ਟਨਗਾਮਾਭਿਮੁਖੋ ਪਾਯਾਸਿ. ਤਸ੍ਮਿਂ ਖਣੇ ਗਨ੍ਧਮਾਦਨੇ ਏਕੋ ਪਚ੍ਚੇਕਬੁਦ੍ਧੋ ਆਵਜ੍ਜੇਤ੍ਵਾ ਤਂ ਧਨਾਹਰਣਤ੍ਥਾਯ ਗਚ੍ਛਨ੍ਤਂ ਦਿਸ੍ਵਾ ‘‘ਮਹਾਪੁਰਿਸੋ ਧਨਂ ਆਹਰਿਤੁਂ ਗਚ੍ਛਤਿ, ਭਵਿਸ੍ਸਤਿ ਨੁ ਖੋ ਅਸ੍ਸ ਸਮੁਦ੍ਦੇ ਅਨ੍ਤਰਾਯੋ, ਨੋ’’ਤਿ ਆਵਜ੍ਜੇਤ੍ਵਾ ‘‘ਭਵਿਸ੍ਸਤੀ’’ਤਿ ਞਤ੍ਵਾ ‘‘ਏਸ ਮਂ ਦਿਸ੍ਵਾ ਛਤ੍ਤਞ੍ਚ ਉਪਾਹਨਞ੍ਚ ਮਯ੍ਹਂ ਦਤ੍ਵਾ ਉਪਾਹਨਦਾਨਨਿਸ੍ਸਨ੍ਦੇਨ ਸਮੁਦ੍ਦੇ ਭਿਨ੍ਨਾਯ ਨਾਵਾਯ ਪਤਿਟ੍ਠਂ ਲਭਿਸ੍ਸਤਿ, ਕਰਿਸ੍ਸਾਮਿਸ੍ਸ ਅਨੁਗ੍ਗਹ’’ਨ੍ਤਿ ਆਕਾਸੇਨਾਗਨ੍ਤ੍ਵਾ ਤਸ੍ਸਾਵਿਦੂਰੇ ਓਤਰਿਤ੍ਵਾ ਚਣ੍ਡਵਾਤਾਤਪੇ ਅਙ੍ਗਾਰਸਨ੍ਥਰਸਦਿਸਂ ਉਣ੍ਹਵਾਲੁਕਂ ਮਦ੍ਦਨ੍ਤੋ ਤਸ੍ਸ ਅਭਿਮੁਖੋ ਆਗਚ੍ਛਿ.

ਸੋ ਤਂ ਦਿਸ੍ਵਾਵ ‘‘ਪੁਞ੍ਞਕ੍ਖੇਤ੍ਤਂ ਮੇ ਆਗਤਂ, ਅਜ੍ਜ ਮਯਾ ਏਤ੍ਥ ਦਾਨਬੀਜਂ ਰੋਪੇਤੁਂ ਵਟ੍ਟਤੀ’’ਤਿ ਤੁਟ੍ਠਚਿਤ੍ਤੋ ਵੇਗੇਨ ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਭਨ੍ਤੇ, ਮਯ੍ਹਂ ਅਨੁਗ੍ਗਹਤ੍ਥਾਯ ਥੋਕਂ ਮਗ੍ਗਾ ਓਕ੍ਕਮ੍ਮ ਇਮਂ ਰੁਕ੍ਖਮੂਲਂ ਉਪਸਙ੍ਕਮਥਾ’’ਤਿ ਵਤ੍ਵਾ ਤਸ੍ਮਿਂ ਰੁਕ੍ਖਮੂਲਂ ਉਪਸਙ੍ਕਮਨ੍ਤੇ ਰੁਕ੍ਖਮੂਲੇ ਵਾਲੁਕਂ ਉਸ੍ਸਾਪੇਤ੍ਵਾ ਉਤ੍ਤਰਾਸਙ੍ਗਂ ਪਞ੍ਞਪੇਤ੍ਵਾ ਪਚ੍ਚੇਕਬੁਦ੍ਧਂ ਨਿਸੀਦਾਪੇਤ੍ਵਾ ਵਨ੍ਦਿਤ੍ਵਾ ਵਾਸਿਤਪਰਿਸ੍ਸਾਵਿਤੇਨ ਉਦਕੇਨ ਪਾਦੇ ਧੋਵਿਤ੍ਵਾ ਗਨ੍ਧਤੇਲੇਨ ਮਕ੍ਖੇਤ੍ਵਾ ਅਤ੍ਤਨੋ ਉਪਾਹਨਾ ਓਮੁਞ੍ਚਿਤ੍ਵਾ ਪਪ੍ਫੋਟੇਤ੍ਵਾ ਗਨ੍ਧਤੇਲੇਨ ਮਕ੍ਖੇਤ੍ਵਾ ਤਸ੍ਸ ਪਾਦੇਸੁ ਪਟਿਮੁਞ੍ਚਿਤ੍ਵਾ ‘‘ਭਨ੍ਤੇ, ਇਮਾ ਉਪਾਹਨਾ ਆਰੁਯ੍ਹ ਛਤ੍ਤਂ ਮਤ੍ਥਕੇ ਕਤ੍ਵਾ ਗਚ੍ਛਥਾ’’ਤਿ ਛਤ੍ਤੁਪਾਹਨਂ ਅਦਾਸਿ. ਸੋ ਅਸ੍ਸ ਅਨੁਗ੍ਗਹਤ੍ਥਾਯ ਤਂ ਗਹੇਤ੍ਵਾ ਪਸਾਦਸਂਵਡ੍ਢਨਤ੍ਥਂ ਪਸ੍ਸਨ੍ਤਸ੍ਸੇਵਸ੍ਸ ਉਪ੍ਪਤਿਤ੍ਵਾ ਗਨ੍ਧਮਾਦਨਮੇਵ ਅਗਮਾਸਿ. ਬੋਧਿਸਤ੍ਤੋਪਿ ਤਂ ਦਿਸ੍ਵਾ ਅਤਿਵਿਯ ਪਸਨ੍ਨਚਿਤ੍ਤੋ ਪਟ੍ਟਨਂ ਗਨ੍ਤ੍ਵਾ ਨਾਵਂ ਅਭਿਰੁਹਿ. ਅਥਸ੍ਸ ਮਹਾਸਮੁਦ੍ਦਂ ਪਟਿਪਨ੍ਨਸ੍ਸ ਸਤ੍ਤਮੇ ਦਿਵਸੇ ਨਾਵਾ ਵਿਵਰਂ ਅਦਾਸਿ, ਉਦਕਂ ਉਸ੍ਸਿਞ੍ਚਿਤੁਂ ਨਾਸਕ੍ਖਿਂਸੁ. ਮਹਾਜਨੋ ਮਰਣਭਯਭੀਤੋ ਅਤ੍ਤਨੋ ਅਤ੍ਤਨੋ ਦੇਵਤਾ ਨਮਸ੍ਸਿਤ੍ਵਾ ਮਹਾਵਿਰਵਂ ਵਿਰਵਿ. ਮਹਾਸਤ੍ਤੋ ਏਕਂ ਉਪਟ੍ਠਾਕਂ ਗਹੇਤ੍ਵਾ ਸਕਲਸਰੀਰਂ ਤੇਲੇਨ ਮਕ੍ਖੇਤ੍ਵਾ ਸਪ੍ਪਿਨਾ ਸਦ੍ਧਿਂ ਸਕ੍ਖਰਚੁਣ੍ਣਂ ਯਾਵਦਤ੍ਥਂ ਖਾਦਿਤ੍ਵਾ ਤਮ੍ਪਿ ਖਾਦਾਪੇਤ੍ਵਾ ਤੇਨ ਸਦ੍ਧਿਂ ਕੂਪਕਯਟ੍ਠਿਮਤ੍ਥਕਂ ਆਰੁਯ੍ਹ ‘‘ਇਮਾਯ ਦਿਸਾਯ ਅਮ੍ਹਾਕਂ ਨਗਰ’’ਨ੍ਤਿ ਦਿਸਂ ਵਵਤ੍ਥਪੇਤ੍ਵਾ ਮਚ੍ਛਕਚ੍ਛਪਪਰਿਪਨ੍ਥਤੋ ਅਤ੍ਤਾਨਂ ਮੋਚੇਨ੍ਤੋ ਤੇਨ ਸਦ੍ਧਿਂ ਉਸਭਮਤ੍ਤਂ ਅਤਿਕ੍ਕਮਿਤ੍ਵਾ ਪਤਿ. ਮਹਾਜਨੋ ਵਿਨਾਸਂ ਪਾਪੁਣਿ. ਮਹਾਸਤ੍ਤੋ ਪਨ ਉਪਟ੍ਠਾਕੇਨ ਸਦ੍ਧਿਂ ਸਮੁਦ੍ਦਂ ਤਰਿਤੁਂ ਆਰਭਿ. ਤਸ੍ਸ ਤਰਨ੍ਤਸ੍ਸੇਵ ਸਤ੍ਤਮੋ ਦਿਵਸੋ ਜਾਤੋ. ਸੋ ਤਸ੍ਮਿਮ੍ਪਿ ਕਾਲੇ ਲੋਣੋਦਕੇਨ ਮੁਖਂ ਵਿਕ੍ਖਾਲੇਤ੍ਵਾ ਉਪੋਸਥਿਕੋ ਅਹੋਸਿਯੇਵ.

ਤਦਾ ਪਨ ਚਤੂਹਿ ਲੋਕਪਾਲੇਹਿ ਮਣਿਮੇਖਲਾ ਨਾਮ ਦੇਵਧੀਤਾ ‘‘ਸਚੇ ਸਮੁਦ੍ਦੇ ਨਾਵਾਯ ਭਿਨ੍ਨਾਯ ਤਿਸਰਣਗਤਾ ਵਾ ਸੀਲਸਮ੍ਪਨ੍ਨਾ ਵਾ ਮਾਤਾਪਿਤੁਪਟ੍ਠਾਕਾ ਵਾ ਮਨੁਸ੍ਸਾ ਦੁਕ੍ਖਪ੍ਪਤ੍ਤਾ ਹੋਨ੍ਤਿ, ਤੇ ਰਕ੍ਖੇਯ੍ਯਾਸੀ’’ਤਿ ਸਮੁਦ੍ਦੇ ਆਰਕ੍ਖਣਤ੍ਥਾਯ ਠਪਿਤਾ ਹੋਤਿ. ਸਾ ਅਤ੍ਤਨੋ ਇਸ੍ਸਰਿਯੇਨ ਸਤ੍ਤਾਹਮਨੁਭਵਿਤ੍ਵਾ ਪਮਜ੍ਜਿਤ੍ਵਾ ਸਤ੍ਤਮੇ ਦਿਵਸੇ ਸਮੁਦ੍ਦਂ ਓਲੋਕੇਨ੍ਤੀ ਸੀਲਾਚਾਰਸਂਯੁਤ੍ਤਂ ਸਙ੍ਖਬ੍ਰਾਹ੍ਮਣਂ ਦਿਸ੍ਵਾ ‘‘ਇਮਸ੍ਸ ਸਤ੍ਤਮੋ ਦਿਵਸੋ ਸਮੁਦ੍ਦੇ ਪਤਿਤਸ੍ਸ, ਸਚੇ ਸੋ ਮਰਿਸ੍ਸਤਿ ਅਤਿਵਿਯ ਗਾਰਯ੍ਹਾ ਮੇ ਭਵਿਸ੍ਸਤੀ’’ਤਿ ਸਂਵਿਗ੍ਗਮਾਨਹਦਯਾ ਹੁਤ੍ਵਾ ਏਕਂ ਸੁਵਣ੍ਣਪਾਤਿਂ ਨਾਨਗ੍ਗਰਸਭੋਜਨਸ੍ਸ ਪੂਰੇਤ੍ਵਾ ਵਾਤਵੇਗੇਨ ਤਤ੍ਥ ਗਨ੍ਤ੍ਵਾ ਤਸ੍ਸ ਪੁਰਤੋ ਆਕਾਸੇ ਠਤ੍ਵਾ ‘‘ਬ੍ਰਾਹ੍ਮਣ, ਤ੍ਵਂ ਸਤ੍ਤਾਹਂ ਨਿਰਾਹਾਰੋ, ਇਦਂ ਦਿਬ੍ਬਭੋਜਨਂ ਭੁਞ੍ਜਾ’’ਤਿ ਆਹ. ਸੋ ਤਂ ਓਲੋਕੇਤ੍ਵਾ ‘‘ਅਪਨੇਹਿ ਤਵ ਭਤ੍ਤਂ, ਅਹਂ ਉਪੋਸਥਿਕੋ’’ਤਿ ਆਹ. ਅਥਸ੍ਸ ਉਪਟ੍ਠਾਕੋ ਪਚ੍ਛਤੋ ਆਗਤੋ ਦੇਵਤਂ ਅਦਿਸ੍ਵਾ ਸਦ੍ਦਮੇਵ ਸੁਤ੍ਵਾ ‘‘ਅਯਂ ਬ੍ਰਾਹ੍ਮਣੋ ਪਕਤਿਸੁਖੁਮਾਲੋ ਸਤ੍ਤਾਹਂ ਨਿਰਾਹਾਰਤਾਯ ਦੁਕ੍ਖਿਤੋ ਮਰਣਭਯੇਨ ਵਿਲਪਤਿ ਮਞ੍ਞੇ, ਅਸ੍ਸਾਸੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਪਠਮਂ ਗਾਥਮਾਹ –

੩੯.

‘‘ਬਹੁਸ੍ਸੁਤੋ ਸੁਤਧਮ੍ਮੋਸਿ ਸਙ੍ਖ, ਦਿਟ੍ਠਾ ਤਯਾ ਸਮਣਬ੍ਰਾਹ੍ਮਣਾ ਚ;

ਅਥਕ੍ਖਣੇ ਦਸ੍ਸਯਸੇ ਵਿਲਾਪਂ, ਅਞ੍ਞੋ ਨੁ ਕੋ ਤੇ ਪਟਿਮਨ੍ਤਕੋ ਮਯਾ’’ਤਿ.

ਤਤ੍ਥ ਸੁਤਧਮ੍ਮੋਸੀਤਿ ਧਮ੍ਮੋਪਿ ਤਯਾ ਧਮ੍ਮਿਕਸਮਣਬ੍ਰਾਹ੍ਮਣਾਨਂ ਸਨ੍ਤਿਕੇ ਸੁਤੋ ਅਸਿ. ਦਿਟ੍ਠਾ ਤਯਾਤਿ ਤੇਸਂ ਪਚ੍ਚਯੇ ਦੇਨ੍ਤੇਨ ਵੇਯ੍ਯਾਵਚ੍ਚਂ ਕਰੋਨ੍ਤੇਨ ਧਮ੍ਮਿਕਸਮਣਬ੍ਰਾਹ੍ਮਣਾ ਚ ਤਯਾ ਦਿਟ੍ਠਾ. ਏਵਂ ਅਕਰੋਨ੍ਤੋ ਹਿ ਪਸ੍ਸਨ੍ਤੋਪਿ ਤੇ ਨ ਪਸ੍ਸਤਿਯੇਵ. ਅਥਕ੍ਖਣੇਤਿ ਅਥ ਅਕ੍ਖਣੇ ਸਲ੍ਲਪਨ੍ਤਸ੍ਸ ਕਸ੍ਸਚਿ ਅਭਾਵੇਨ ਵਚਨਸ੍ਸ ਅਨੋਕਾਸੇ. ਦਸ੍ਸਯਸੇਤਿ ‘‘ਅਹਂ ਉਪੋਸਥਿਕੋ’’ਤਿ ਵਦਨ੍ਤੋ ਵਿਲਾਪਂ ਦਸ੍ਸੇਸਿ. ਪਟਿਮਨ੍ਤਕੋਤਿ ਮਯਾ ਅਞ੍ਞੋ ਕੋ ਤਵ ਪਟਿਮਨ੍ਤਕੋ ਪਟਿਵਚਨਦਾਯਕੋ, ਕਿਂਕਾਰਣਾ ਏਵਂ ਵਿਪ੍ਪਲਪਸੀਤਿ?

ਸੋ ਤਸ੍ਸ ਵਚਨਂ ਸੁਤ੍ਵਾ ‘‘ਇਮਸ੍ਸ ਦੇਵਤਾ ਨ ਪਞ੍ਞਾਯਤਿ ਮਞ੍ਞੇ’’ਤਿ ਚਿਨ੍ਤੇਤ੍ਵਾ ‘‘ਸਮ੍ਮ, ਨਾਹਂ ਮਰਣਸ੍ਸ ਭਾਯਾਮਿ, ਅਤ੍ਥਿ ਪਨ ਮੇ ਅਞ੍ਞੋ ਪਟਿਮਨ੍ਤਕੋ’’ਤਿ ਵਤ੍ਵਾ ਦੁਤਿਯਂ ਗਾਥਮਾਹ –

੪੦.

‘‘ਸੁਬ੍ਭੂ ਸੁਭਾ ਸੁਪ੍ਪਟਿਮੁਕ੍ਕਕਮ੍ਬੁ, ਪਗ੍ਗਯ੍ਹ ਸੋਵਣ੍ਣਮਯਾਯ ਪਾਤਿਯਾ;

‘ਭੁਞ੍ਜਸ੍ਸੁ ਭਤ੍ਤਂ’ ਇਤਿ ਮਂ ਵਦੇਤਿ, ਸਦ੍ਧਾਵਿਤ੍ਤਾ, ਤਮਹਂ ਨੋਤਿ ਬ੍ਰੂਮੀ’’ਤਿ.

ਤਤ੍ਥ ਸੁਬ੍ਭੂਤਿ ਸੁਭਮੁਖਾ. ਸੁਭਾਤਿ ਪਾਸਾਦਿਕਾ ਉਤ੍ਤਮਰੂਪਧਰਾ. ਸੁਪ੍ਪਟਿਮੁਕ੍ਕਕਮ੍ਬੂਤਿ ਪਟਿਮੁਕ੍ਕਸੁਵਣ੍ਣਾਲਙ੍ਕਾਰਾ. ਪਗ੍ਗਯ੍ਹਾਤਿ ਸੁਵਣ੍ਣਪਾਤਿਯਾ ਭਤ੍ਤਂ ਗਹੇਤ੍ਵਾ ਉਕ੍ਖਿਪਿਤ੍ਵਾ. ਸਦ੍ਧਾਵਿਤ੍ਤਾਤਿ ਸਦ੍ਧਾ ਚੇਵ ਤੁਟ੍ਠਚਿਤ੍ਤਾ ਚ. ‘‘ਸਦ੍ਧਂ ਚਿਤ੍ਤ’’ਨ੍ਤਿਪਿ ਪਾਠੋ, ਤਸ੍ਸਤ੍ਥੋ ਸਦ੍ਧਨ੍ਤਿ ਸਦ੍ਦਹਨ੍ਤਂ, ਚਿਤ੍ਤਨ੍ਤਿ ਤੁਟ੍ਠਚਿਤ੍ਤਂ. ਤਮਹਂ ਨੋਤੀਤਿ ਤਮਹਂ ਦੇਵਤਂ ਉਪੋਸਥਿਕਤ੍ਤਾ ਪਟਿਕ੍ਖਿਪਨ੍ਤੋ ਨੋਤਿ ਬ੍ਰੂਮਿ, ਨ ਵਿਪ੍ਪਲਪਾਮਿ ਸਮ੍ਮਾਤਿ.

ਅਥਸ੍ਸ ਸੋ ਤਤਿਯਂ ਗਾਥਮਾਹ –

੪੧.

‘‘ਏਤਾਦਿਸਂ ਬ੍ਰਾਹ੍ਮਣ ਦਿਸ੍ਵਾਨ ਯਕ੍ਖਂ, ਪੁਚ੍ਛੇਯ੍ਯ ਪੋਸੋ ਸੁਖਮਾਸਿਸਾਨੋ;

ਉਟ੍ਠੇਹਿ ਨਂ ਪਞ੍ਜਲਿਕਾਭਿਪੁਚ੍ਛ, ਦੇਵੀ ਨੁਸਿ ਤ੍ਵਂ ਉਦ ਮਾਨੁਸੀ ਨੂ’’ਤਿ.

ਤਤ੍ਥ ਸੁਖਮਾਸਿਸਾਨੋਤਿ ਏਤਾਦਿਸਂ ਯਕ੍ਖਂ ਦਿਸ੍ਵਾ ਅਤ੍ਤਨੋ ਸੁਖਂ ਆਸੀਸਨ੍ਤੋ ਪਣ੍ਡਿਤੋ ਪੁਰਿਸੋ ‘‘ਅਮ੍ਹਾਕਂ ਸੁਖਂ ਭਵਿਸ੍ਸਤਿ, ਨ ਭਵਿਸ੍ਸਤੀ’’ਤਿ ਪੁਚ੍ਛੇਯ੍ਯ. ਉਟ੍ਠੇਹੀਤਿ ਉਦਕਤੋ ਉਟ੍ਠਾਨਾਕਾਰਂ ਦਸ੍ਸੇਨ੍ਤੋ ਉਟ੍ਠਹ. ਪਞ੍ਜਲਿਕਾਭਿਪੁਚ੍ਛਾਤਿ ਅਞ੍ਜਲਿਕੋ ਹੁਤ੍ਵਾ ਅਭਿਪੁਚ੍ਛ. ਉਦ ਮਾਨੁਸੀਤਿ ਉਦਾਹੁ ਮਹਿਦ੍ਧਿਕਾ ਮਾਨੁਸੀ ਤ੍ਵਨ੍ਤਿ.

ਬੋਧਿਸਤ੍ਤੋ ‘‘ਯੁਤ੍ਤਂ ਕਥੇਸੀ’’ਤਿ ਤਂ ਪੁਚ੍ਛਨ੍ਤੋ ਚਤੁਤ੍ਥਂ ਗਾਥਮਾਹ –

੪੨.

‘‘ਯਂ ਤ੍ਵਂ ਸੁਖੇਨਾਭਿਸਮੇਕ੍ਖਸੇ ਮਂ, ਭੁਞ੍ਜਸ੍ਸੁ ਭਤ੍ਤਂ ਇਤਿ ਮਂ ਵਦੇਸਿ;

ਪੁਚ੍ਛਾਮਿ ਤਂ ਨਾਰਿ ਮਹਾਨੁਭਾਵੇ, ਦੇਵੀ ਨੁਸਿ ਤ੍ਵਂ ਉਦ ਮਾਨੁਸੀ ਨੂ’’ਤਿ.

ਤਤ੍ਥ ਯਂ ਤ੍ਵਨ੍ਤਿ ਯਸ੍ਮਾ ਤ੍ਵਂ ਸੁਖੇਨ ਮਂ ਅਭਿਸਮੇਕ੍ਖਸੇ, ਪਿਯਚਕ੍ਖੂਹਿ ਓਲੋਕੇਸਿ. ਪੁਚ੍ਛਾਮਿ ਤਨ੍ਤਿ ਤੇਨ ਕਾਰਣੇਨ ਤਂ ਪੁਚ੍ਛਾਮਿ.

ਤਤੋ ਦੇਵਧੀਤਾ ਦ੍ਵੇ ਗਾਥਾ ਅਭਾਸਿ –

੪੩.

‘‘ਦੇਵੀ ਅਹਂ ਸਙ੍ਖ ਮਹਾਨੁਭਾਵਾ, ਇਧਾਗਤਾ ਸਾਗਰਵਾਰਿਮਜ੍ਝੇ;

ਅਨੁਕਮ੍ਪਿਕਾ ਨੋ ਚ ਪਦੁਟ੍ਠਚਿਤ੍ਤਾ, ਤਵੇਵ ਅਤ੍ਥਾਯ ਇਧਾਗਤਾਸ੍ਮਿ.

੪੪.

‘‘ਇਧਨ੍ਨਪਾਨਂ ਸਯਨਾਸਨਞ੍ਚ, ਯਾਨਾਨਿ ਨਾਨਾਵਿਵਿਧਾਨਿ ਸਙ੍ਖ;

ਸਬ੍ਬਸ੍ਸ ਤ੍ਯਾਹਂ ਪਟਿਪਾਦਯਾਮਿ, ਯਂ ਕਿਞ੍ਚਿ ਤੁਯ੍ਹਂ ਮਨਸਾਭਿਪਤ੍ਥਿਤ’’ਨ੍ਤਿ.

ਤਤ੍ਥ ਇਧਾਤਿ ਇਮਸ੍ਮਿਂ ਮਹਾਸਮੁਦ੍ਦੇ. ਨਾਨਾਵਿਵਿਧਾਨੀਤਿ ਬਹੂਨਿ ਚ ਅਨੇਕਪ੍ਪਕਾਰਾਨਿ ਚ ਹਤ੍ਥਿਯਾਨਅਸ੍ਸਯਾਨਾਦੀਨਿ ਅਤ੍ਥਿ. ਸਬ੍ਬਸ੍ਸ ਤ੍ਯਾਹਨ੍ਤਿ ਤਸ੍ਸ ਅਨ੍ਨਪਾਨਾਦਿਨੋ ਸਬ੍ਬਸ੍ਸ ਸਾਮਿਕਂ ਕਤ੍ਵਾ ਤਂ ਤੇ ਅਨ੍ਨਪਾਨਾਦਿਂ ਪਟਿਪਾਦਯਾਮਿ ਦਦਾਮਿ. ਯਂ ਕਿਞ੍ਚੀਤਿ ਅਞ੍ਞਮ੍ਪਿ ਯਂ ਕਿਞ੍ਚਿ ਮਨਸਾ ਇਚ੍ਛਿਤਂ, ਤਂ ਸਬ੍ਬਂ ਤੇ ਦਮ੍ਮੀਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਅਯਂ ਦੇਵਧੀਤਾ ਸਮੁਦ੍ਦਪਿਟ੍ਠੇ ਮਯ੍ਹਂ ‘ਇਦਞ੍ਚਿਦਞ੍ਚ ਦਮ੍ਮੀ’ਤਿ ਵਦਤਿ, ਕਿਂ ਨੁ ਖੋ ਏਸਾ ਮਯਾ ਕਤੇਨ ਪੁਞ੍ਞਕਮ੍ਮੇਨ ਦਾਤੁਕਾਮਾ, ਉਦਾਹੁ ਅਤ੍ਤਨੋ ਬਲੇਨ, ਪੁਚ੍ਛਿਸ੍ਸਾਮਿ ਤਾਵ ਨ’’ਨ੍ਤਿ ਚਿਨ੍ਤੇਤ੍ਵਾ ਪੁਚ੍ਛਨ੍ਤੋ ਸਤ੍ਤਮਂ ਗਾਥਮਾਹ –

੪੫.

‘‘ਯਂ ਕਿਞ੍ਚਿ ਯਿਟ੍ਠਞ੍ਚ ਹੁਤਞ੍ਚ ਮਯ੍ਹਂ, ਸਬ੍ਬਸ੍ਸ ਨੋ ਇਸ੍ਸਰਾ ਤ੍ਵਂ ਸੁਗਤ੍ਤੇ;

ਸੁਸ੍ਸੋਣਿ ਸੁਬ੍ਭਮੁ ਸੁਵਿਲਗ੍ਗਮਜ੍ਝੇ, ਕਿਸ੍ਸ ਮੇ ਕਮ੍ਮਸ੍ਸ ਅਯਂ ਵਿਪਾਕੋ’’ਤਿ.

ਤਤ੍ਥ ਯਿਟ੍ਠਨ੍ਤਿ ਦਾਨਵਸੇਨ ਯਜਿਤਂ. ਹੁਤਨ੍ਤਿ ਆਹੁਨਪਾਹੁਨਵਸੇਨ ਦਿਨ੍ਨਂ. ਸਬ੍ਬਸ੍ਸ ਨੋ ਇਸ੍ਸਰਾ ਤ੍ਵਨ੍ਤਿ ਤਸ੍ਸ ਅਮ੍ਹਾਕਂ ਪੁਞ੍ਞਕਮ੍ਮਸ੍ਸ ਤ੍ਵਂ ਇਸ੍ਸਰਾ, ‘‘ਇਮਸ੍ਸ ਅਯਂ ਵਿਪਾਕੋ, ਇਮਸ੍ਸ ਅਯ’’ਨ੍ਤਿ ਬ੍ਯਾਕਰਿਤੁਂ ਸਮਤ੍ਥਾਤਿ ਅਤ੍ਥੋ. ਸੁਸ੍ਸੋਣੀਤਿ ਸੁਨ੍ਦਰਊਰੁਲਕ੍ਖਣੇ. ਸੁਬ੍ਭਮੂਤਿ ਸੁਨ੍ਦਰਭਮੁਕੇ. ਸੁਵਿਲਗ੍ਗਮਜ੍ਝੇਤਿ ਸੁਟ੍ਠੁਵਿਲਗ੍ਗਿਤਤਨੁਮਜ੍ਝੇ. ਕਿਸ੍ਸ ਮੇਤਿ ਮਯਾ ਕਤਕਮ੍ਮੇਸੁ ਕਤਰਕਮ੍ਮਸ੍ਸ ਅਯਂ ਵਿਪਾਕੋ, ਯੇਨਾਹਂ ਅਪ੍ਪਤਿਟ੍ਠੇ ਸਮੁਦ੍ਦੇ ਪਤਿਟ੍ਠਂ ਲਭਾਮੀਤਿ.

ਤਂ ਸੁਤ੍ਵਾ ਦੇਵਧੀਤਾ ‘‘ਅਯਂ ਬ੍ਰਾਹ੍ਮਣੋ ‘ਯਂ ਤੇਨ ਕੁਸਲਂ ਕਤਂ, ਤਂ ਕਮ੍ਮਂ ਨ ਜਾਨਾਤੀ’ਤਿ ਅਞ੍ਞਾਯ ਪੁਚ੍ਛਤਿ ਮਞ੍ਞੇ, ਕਥਯਿਸ੍ਸਾਮਿ ਦਾਨਿਸ੍ਸਾ’’ਤਿ ਤਂ ਕਥੇਨ੍ਤੀ ਅਟ੍ਠਮਂ ਗਾਥਮਾਹ –

੪੬.

‘‘ਘਮ੍ਮੇ ਪਥੇ ਬ੍ਰਾਹ੍ਮਣ ਏਕਭਿਕ੍ਖੁਂ, ਉਗ੍ਘਟ੍ਟਪਾਦਂ ਤਸਿਤਂ ਕਿਲਨ੍ਤਂ;

ਪਟਿਪਾਦਯੀ ਸਙ੍ਖ ਉਪਾਹਨਾਨਿ, ਸਾ ਦਕ੍ਖਿਣਾ ਕਾਮਦੁਹਾ ਤਵਜ੍ਜਾ’’ਤਿ.

ਤਤ੍ਥ ਏਕਭਿਕ੍ਖੁਨ੍ਤਿ ਏਕਂ ਪਚ੍ਚੇਕਬੁਦ੍ਧਂ ਸਨ੍ਧਾਯਾਹ. ਉਗ੍ਘਟ੍ਟਪਾਦਨ੍ਤਿ ਉਣ੍ਹਵਾਲੁਕਾਯ ਘਟ੍ਟਿਤਪਾਦਂ. ਤਸਿਤਨ੍ਤਿ ਪਿਪਾਸਿਤਂ. ਪਟਿਪਾਦਯੀਤਿ ਪਟਿਪਾਦੇਸਿ, ਯੋਜੇਸੀਤਿ ਅਤ੍ਥੋ. ਕਾਮਦੁਹਾਤਿ ਸਬ੍ਬਕਾਮਦਾਯਿਕਾ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਏਵਰੂਪੇਪਿ ਨਾਮ ਅਪ੍ਪਤਿਟ੍ਠੇ ਮਹਾਸਮੁਦ੍ਦੇ ਮਯਾ ਦਿਨ੍ਨਉਪਾਹਨਦਾਨਂ ਮਮ ਸਬ੍ਬਕਾਮਦਦਂ ਜਾਤਂ, ਅਹੋ ਸੁਦਿਨ੍ਨਂ ਮੇ ਪਚ੍ਚੇਕਬੁਦ੍ਧਸ੍ਸ ਦਾਨ’’ਨ੍ਤਿ ਤੁਟ੍ਠਚਿਤ੍ਤੋ ਨਵਮਂ ਗਾਥਮਾਹ –

੪੭.

‘‘ਸਾ ਹੋਤੁ ਨਾਵਾ ਫਲਕੂਪਪਨ੍ਨਾ, ਅਨਵਸ੍ਸੁਤਾ ਏਰਕਵਾਤਯੁਤ੍ਤਾ;

ਅਞ੍ਞਸ੍ਸ ਯਾਨਸ੍ਸ ਨ ਹੇਤ੍ਥ ਭੂਮਿ, ਅਜ੍ਜੇਵ ਮਂ ਮੋਲ਼ਿਨਿਂ ਪਾਪਯਸ੍ਸੂ’’ਤਿ.

ਤਸ੍ਸਤ੍ਥੋ – ਦੇਵਤੇ, ਏਵਂ ਸਨ੍ਤੇ ਮਯ੍ਹਂ ਏਕਂ ਨਾਵਂ ਮਾਪੇਹਿ, ਖੁਦ੍ਦਕਂ ਪਨ ਏਕਦੋਣਿਕਨਾਵਂ ਮਾਪੇਹਿ, ਯਂ ਨਾਵਂ ਮਾਪੇਸ੍ਸਸਿ, ਸਾ ਹੋਤੁ ਨਾਵਾ ਬਹੂਹਿ ਸੁਸਿਬ੍ਬਿਤੇਹਿ ਫਲਕੇਹਿ ਉਪਪਨ੍ਨਾ, ਉਦਕਪਵੇਸਨਸ੍ਸਾਭਾਵੇਨ ਅਨਵਸ੍ਸੁਤਾ, ਏਰਕੇਨ ਸਮ੍ਮਾ ਗਹੇਤ੍ਵਾ ਗਚ੍ਛਨ੍ਤੇਨ ਵਾਤੇਨ ਯੁਤ੍ਤਾ, ਠਪੇਤ੍ਵਾ ਦਿਬ੍ਬਨਾਵਂ ਅਞ੍ਞਸ੍ਸ ਯਾਨਸ੍ਸ ਏਤ੍ਥ ਭੂਮਿ ਨਤ੍ਥਿ, ਤਾਯ ਪਨ ਦਿਬ੍ਬਨਾਵਾਯ ਅਜ੍ਜੇਵ ਮਂ ਮੋਲ਼ਿਨਿਨਗਰਂ ਪਾਪਯਸ੍ਸੂਤਿ.

ਦੇਵਧੀਤਾ ਤਸ੍ਸ ਵਚਨਂ ਸੁਤ੍ਵਾ ਤੁਟ੍ਠਚਿਤ੍ਤਾ ਸਤ੍ਤਰਤਨਮਯਂ ਨਾਵਂ ਮਾਪੇਸਿ. ਸਾ ਦੀਘਤੋ ਅਟ੍ਠਉਸਭਾ ਅਹੋਸਿ ਵਿਤ੍ਥਾਰਤੋ ਚਤੁਉਸਭਾ, ਗਮ੍ਭੀਰਤੋ ਵੀਸਤਿਯਟ੍ਠਿਕਾ. ਤਸ੍ਸਾ ਇਨ੍ਦਨੀਲਮਯਾ ਤਯੋ ਕੂਪਕਾ, ਸੋਵਣ੍ਣਮਯਾਨਿ ਯੋਤ੍ਤਾਨਿ ਰਜਤਮਯਾਨਿ ਪਤ੍ਤਾਨਿ ਸੋਵਣ੍ਣਮਯਾਨਿ ਚ ਫਿਯਾਰਿਤ੍ਤਾਨਿ ਅਹੇਸੁਂ. ਦੇਵਤਾ ਤਂ ਨਾਵਂ ਸਤ੍ਤਨ੍ਨਂ ਰਤਨਾਨਂ ਪੂਰੇਤ੍ਵਾ ਬ੍ਰਾਹ੍ਮਣਂ ਆਲਿਙ੍ਗਿਤ੍ਵਾ ਅਲਙ੍ਕਤਨਾਵਾਯ ਆਰੋਪੇਸਿ, ਉਪਟ੍ਠਾਕਂ ਪਨਸ੍ਸ ਨ ਓਲੋਕੇਸਿ. ਬ੍ਰਾਹ੍ਮਣੋ ਅਤ੍ਤਨਾ ਕਤਕਲ੍ਯਾਣਤੋ ਤਸ੍ਸ ਪਤ੍ਤਿਂ ਅਦਾਸਿ, ਸੋ ਅਨੁਮੋਦਿ. ਤਦਾ ਦੇਵਤਾ ਤਮ੍ਪਿ ਆਲਿਙ੍ਗਿਤ੍ਵਾ ਨਾਵਾਯ ਪਤਿਟ੍ਠਾਪੇਸਿ. ਅਥ ਨਂ ਨਾਵਂ ਮੋਲ਼ਿਨਿਨਗਰਂ ਨੇਤ੍ਵਾ ਬ੍ਰਾਹ੍ਮਣਸ੍ਸ ਘਰੇ ਧਨਂ ਪਤਿਟ੍ਠਾਪੇਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਅਗਮਾਸਿ. ਸਤ੍ਥਾ ਅਭਿਸਮ੍ਬੁਦ੍ਧੋ ਹੁਤ੍ਵਾ –

੪੮.

‘‘ਸਾ ਤਤ੍ਥ ਵਿਤ੍ਤਾ ਸੁਮਨਾ ਪਤੀਤਾ, ਨਾਵਂ ਸੁਚਿਤ੍ਤਂ ਅਭਿਨਿਮ੍ਮਿਨਿਤ੍ਵਾ;

ਆਦਾਯ ਸਙ੍ਖਂ ਪੁਰਿਸੇਨ ਸਦ੍ਧਿਂ, ਉਪਾਨਯੀ ਨਗਰਂ ਸਾਧੁਰਮ੍ਮ’’ਨ੍ਤਿ. –

ਇਮਂ ਓਸਾਨਗਾਥਂ ਅਭਾਸਿ.

ਤਤ੍ਥ ਸਾਤਿ ਭਿਕ੍ਖਵੇ, ਸਾ ਦੇਵਤਾ ਤਤ੍ਥ ਸਮੁਦ੍ਦਮਜ੍ਝੇ ਤਸ੍ਸ ਵਚਨਂ ਸੁਤ੍ਵਾ ਵਿਤ੍ਤਿਸਙ੍ਖਾਤਾਯ ਪੀਤਿਯਾ ਸਮਨ੍ਨਾਗਤਤ੍ਤਾ ਵਿਤ੍ਤਾ. ਸੁਮਨਾਤਿ ਸੁਨ੍ਦਰਮਨਾ ਪਾਮੋਜ੍ਜੇਨ ਪਤੀਤਚਿਤ੍ਤਾ ਹੁਤ੍ਵਾ ਵਿਚਿਤ੍ਰਨਾਵਂ ਨਿਮ੍ਮਿਨਿਤ੍ਵਾ ਬ੍ਰਾਹ੍ਮਣਂ ਪਰਿਚਾਰਕੇਨ ਸਦ੍ਧਿਂ ਆਦਾਯ ਸਾਧੁਰਮ੍ਮਂ ਅਤਿਰਮਣੀਯਂ ਨਗਰਂ ਉਪਾਨਯੀਤਿ.

ਬ੍ਰਾਹ੍ਮਣੋਪਿ ਯਾਵਜੀਵਂ ਅਪਰਿਮਿਤਧਨਂ ਗੇਹਂ ਅਜ੍ਝਾਵਸਨ੍ਤੋ ਦਾਨਂ ਦਤ੍ਵਾ ਸੀਲਂ ਰਕ੍ਖਿਤ੍ਵਾ ਜੀਵਿਤਪਰਿਯੋਸਾਨੇ ਸਪਰਿਸੋ ਦੇਵਨਗਰਂ ਪਰਿਪੂਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਪਾਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.

ਤਦਾ ਦੇਵਧੀਤਾ ਉਪ੍ਪਲਵਣ੍ਣਾ ਅਹੋਸਿ, ਉਪਟ੍ਠਾਕਪੁਰਿਸੋ ਆਨਨ੍ਦੋ, ਸਙ੍ਖਬ੍ਰਾਹ੍ਮਣੋ ਪਨ ਅਹਮੇਵ ਅਹੋਸਿਨ੍ਤਿ.

ਸਙ੍ਖਜਾਤਕਵਣ੍ਣਨਾ ਚਤੁਤ੍ਥਾ.

[੪੪੩] ੫. ਚੂਲ਼ਬੋਧਿਜਾਤਕਵਣ੍ਣਨਾ

ਯੋ ਤੇ ਇਮਂ ਵਿਸਾਲਕ੍ਖਿਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਕੋਧਨਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਕਿਰ ਭਿਕ੍ਖੁ ਨਿਯ੍ਯਾਨਿਕੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾਪਿ ਕੋਧਂ ਨਿਗ੍ਗਹੇਤੁਂ ਨਾਸਕ੍ਖਿ, ਕੋਧਨੋ ਅਹੋਸਿ ਉਪਾਯਾਸਬਹੁਲੋ, ਅਪ੍ਪਮ੍ਪਿ ਵੁਤ੍ਤੋ ਸਮਾਨੋ ਅਭਿਸਜ੍ਜਿ ਕੁਪ੍ਪਿ ਬ੍ਯਾਪਜ੍ਜਿ ਪਤਿਟ੍ਠਯਿ. ਸਤ੍ਥਾ ਤਸ੍ਸ ਕੋਧਨਭਾਵਂ ਸੁਤ੍ਵਾ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ ਕੋਧਨੋ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਕੋਧੋ ਨਾਮ ਵਾਰੇਤਬ੍ਬੋ, ਏਵਰੂਪੋ ਹਿ ਇਧਲੋਕੇ ਚ ਪਰਲੋਕੇ ਚ ਅਨਤ੍ਥਕਾਰਕੋ, ਤ੍ਵਂ ਨਿਕ੍ਕੋਧਸ੍ਸ ਬੁਦ੍ਧਸ੍ਸ ਸਾਸਨੇ ਪਬ੍ਬਜਿਤ੍ਵਾ ਕਸ੍ਮਾ ਕੁਜ੍ਝਸਿ, ਪੋਰਾਣਕਪਣ੍ਡਿਤਾ ਬਾਹਿਰਸਾਸਨੇ ਪਬ੍ਬਜਿਤ੍ਵਾਪਿ ਕੋਧਂ ਨ ਕਰਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਅਞ੍ਞਤਰਸ੍ਮਿਂ ਕਾਸਿਨਿਗਮੇ ਏਕੋ ਬ੍ਰਾਹ੍ਮਣੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਅਪੁਤ੍ਤਕੋ ਅਹੋਸਿ, ਤਸ੍ਸ ਬ੍ਰਾਹ੍ਮਣੀ ਪੁਤ੍ਤਂ ਪਤ੍ਥੇਸਿ. ਤਦਾ ਬੋਧਿਸਤ੍ਤੋ ਬ੍ਰਹ੍ਮਲੋਕਾ ਚਵਿਤ੍ਵਾ ਤਸ੍ਸਾ ਕੁਚ੍ਛਿਯਂ ਨਿਬ੍ਬਤ੍ਤਿ, ਤਸ੍ਸ ਨਾਮਗ੍ਗਹਣਦਿਵਸੇ ‘‘ਬੋਧਿਕੁਮਾਰੋ’’ਤਿ ਨਾਮਂ ਕਰਿਂਸੁ. ਤਸ੍ਸ ਵਯਪ੍ਪਤ੍ਤਕਾਲੇ ਤਕ੍ਕਸਿਲਂ ਗਨ੍ਤ੍ਵਾ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਪਚ੍ਚਾਗਤਸ੍ਸ ਅਨਿਚ੍ਛਨ੍ਤਸ੍ਸੇਵ ਮਾਤਾਪਿਤਰੋ ਸਮਾਨਜਾਤਿਕਾ ਕੁਲਾ ਕੁਮਾਰਿਕਂ ਆਨੇਸੁਂ. ਸਾਪਿ ਬ੍ਰਹ੍ਮਲੋਕਾ ਚੁਤਾਵ ਉਤ੍ਤਮਰੂਪਧਰਾ ਦੇਵਚ੍ਛਰਪਟਿਭਾਗਾ. ਤੇਸਂ ਅਨਿਚ੍ਛਮਾਨਾਨਞ੍ਞੇਵ ਅਞ੍ਞਮਞ੍ਞਂ ਆਵਾਹਵਿਵਾਹਂ ਕਰਿਂਸੁ. ਉਭਿਨ੍ਨਂ ਪਨੇਤੇਸਂ ਕਿਲੇਸਸਮੁਦਾਚਾਰੋ ਨਾਮ ਨ ਭੂਤਪੁਬ੍ਬੋ, ਸਂਰਾਗਵਸੇਨ ਅਞ੍ਞਮਞ੍ਞਸ੍ਸ ਓਲੋਕਨਂ ਨਾਮ ਨਾਹੋਸਿ, ਸੁਪਿਨੇਪਿ ਮੇਥੁਨਧਮ੍ਮੋ ਨਾਮ ਨ ਦਿਟ੍ਠਪੁਬ੍ਬੋ, ਏਵਂ ਪਰਿਸੁਦ੍ਧਸੀਲਾ ਅਹੇਸੁਂ.

ਅਥਾਪਰਭਾਗੇ ਮਹਾਸਤ੍ਤੋ ਮਾਤਾਪਿਤੂਸੁ ਕਾਲਕਤੇਸੁ ਤੇਸਂ ਸਰੀਰਕਿਚ੍ਚਂ ਕਤ੍ਵਾ ਤਂ ਪਕ੍ਕੋਸਿਤ੍ਵਾ ‘‘ਭਦ੍ਦੇ, ਤ੍ਵਂ ਇਮਂ ਅਸੀਤਿਕੋਟਿਧਨਂ ਗਹੇਤ੍ਵਾ ਸੁਖੇਨ ਜੀਵਾਹੀ’’ਤਿ ਆਹ. ‘‘ਕਿਂ ਕਰਿਸ੍ਸਥ ਤੁਮ੍ਹੇ ਪਨ, ਅਯ੍ਯਪੁਤ੍ਤਾ’’ਤਿ? ‘‘ਮਯ੍ਹਂ ਧਨੇਨ ਕਿਚ੍ਚਂ ਨਤ੍ਥਿ, ਹਿਮਵਨ੍ਤਪਦੇਸਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਤ੍ਤਨੋ ਪਤਿਟ੍ਠਂ ਕਰਿਸ੍ਸਾਮੀ’’ਤਿ. ‘‘ਕਿਂ ਪਨ ਅਯ੍ਯਪੁਤ੍ਤ ਪਬ੍ਬਜ੍ਜਾ ਨਾਮ ਪੁਰਿਸਾਨਞ੍ਞੇਵ ਵਟ੍ਟਤੀ’’ਤਿ? ‘‘ਇਤ੍ਥੀਨਮ੍ਪਿ ਵਟ੍ਟਤਿ, ਭਦ੍ਦੇ’’ਤਿ. ‘‘ਤੇਨ ਹਿ ਅਹਂ ਤੁਮ੍ਹੇਹਿ ਛਟ੍ਟਿਤਖੇਲ਼ਂ ਨ ਗਣ੍ਹਿਸ੍ਸਾਮਿ, ਮਯ੍ਹਮ੍ਪਿ ਧਨੇਨ ਕਿਚ੍ਚਂ ਨਤ੍ਥਿ, ਅਹਮ੍ਪਿ ਪਬ੍ਬਜਿਸ੍ਸਾਮੀ’’ਤਿ. ‘‘ਸਾਧੁ, ਭਦ੍ਦੇ’’ਤਿ. ਤੇ ਉਭੋਪਿ ਮਹਾਦਾਨਂ ਦਤ੍ਵਾ ਨਿਕ੍ਖਮਿਤ੍ਵਾ ਰਮਣੀਯੇ ਭੂਮਿਭਾਗੇ ਅਸ੍ਸਮਂ ਕਤ੍ਵਾ ਪਬ੍ਬਜਿਤ੍ਵਾ ਉਞ੍ਛਾਚਰਿਯਾਯ ਫਲਾਫਲੇਹਿ ਯਾਪੇਨ੍ਤਾ ਤਤ੍ਥ ਦਸਮਤ੍ਤਾਨਿ ਸਂਵਚ੍ਛਰਾਨਿ ਵਸਿਂਸੁ, ਝਾਨਂ ਪਨ ਨੇਸਂ ਨ ਤਾਵ ਉਪ੍ਪਜ੍ਜਤਿ. ਤੇ ਤਤ੍ਥ ਪਬ੍ਬਜ੍ਜਾਸੁਖੇਨੇਵ ਦਸ ਸਂਵਚ੍ਛਰੇ ਵਸਿਤ੍ਵਾ ਲੋਣਮ੍ਬਿਲਸੇਵਨਤ੍ਥਾਯ ਜਨਪਦਚਾਰਿਕਂ ਚਰਨ੍ਤਾ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਰਾਜੁਯ੍ਯਾਨੇ ਵਸਿਂਸੁ.

ਅਥੇਕਦਿਵਸਂ ਰਾਜਾ ਉਯ੍ਯਾਨਪਾਲਂ ਪਣ੍ਣਾਕਾਰਂ ਆਦਾਯ ਆਗਤਂ ਦਿਸ੍ਵਾ ‘‘ਉਯ੍ਯਾਨਕੀਲ਼ਿਕਂ ਕੀਲ਼ਿਸ੍ਸਾਮ, ਉਯ੍ਯਾਨਂ ਸੋਧੇਹੀ’’ਤਿ ਵਤ੍ਵਾ ਤੇਨ ਸੋਧਿਤਂ ਸਜ੍ਜਿਤਂ ਉਯ੍ਯਾਨਂ ਮਹਨ੍ਤੇਨ ਪਰਿਵਾਰੇਨ ਅਗਮਾਸਿ. ਤਸ੍ਮਿਂ ਖਣੇ ਤੇ ਉਭੋਪਿ ਜਨਾ ਉਯ੍ਯਾਨਸ੍ਸ ਏਕਪਸ੍ਸੇ ਪਬ੍ਬਜ੍ਜਾਸੁਖੇਨ ਵੀਤਿਨਾਮੇਤ੍ਵਾ ਨਿਸਿਨ੍ਨਾ ਹੋਨ੍ਤਿ. ਅਥ ਰਾਜਾ ਉਯ੍ਯਾਨੇ ਵਿਚਰਨ੍ਤੋ ਤੇ ਉਭੋਪਿ ਨਿਸਿਨ੍ਨਕੇ ਦਿਸ੍ਵਾ ਪਰਮਪਾਸਾਦਿਕਂ ਉਤ੍ਤਮਰੂਪਧਰਂ ਪਰਿਬ੍ਬਾਜਿਕਂ ਓਲੋਕੇਨ੍ਤੋ ਪਟਿਬਦ੍ਧਚਿਤ੍ਤੋ ਅਹੋਸਿ. ਸੋ ਕਿਲੇਸਵਸੇਨ ਕਮ੍ਪਨ੍ਤੋ ‘‘ਪੁਚ੍ਛਿਸ੍ਸਾਮਿ ਤਾਵ, ਅਯਂ ਪਰਿਬ੍ਬਾਜਿਕਾ ਇਮਸ੍ਸ ਕਿਂ ਹੋਤੀ’’ਤਿ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ‘‘ਪਬ੍ਬਜਿਤ ਅਯਂ ਤੇ ਪਰਿਬ੍ਬਾਜਿਕਾ ਕਿਂ ਹੋਤੀ’’ਤਿ ਪੁਚ੍ਛਿ. ਮਹਾਰਾਜ, ਕਿਞ੍ਚਿ ਨ ਹੋਤਿ, ਕੇਵਲਂ ਏਕਪਬ੍ਬਜ੍ਜਾਯ ਪਬ੍ਬਜਿਤਾ, ਅਪਿਚ ਖੋ ਪਨ ਮੇ ਗਿਹਿਕਾਲੇ ਪਾਦਪਰਿਚਾਰਿਕਾ ਅਹੋਸੀਤਿ. ਤਂ ਸੁਤ੍ਵਾ ਰਾਜਾ ‘‘ਅਯਂ ਕਿਰੇਤਸ੍ਸ ਕਿਞ੍ਚਿ ਨ ਹੋਤਿ, ਅਪਿਚ ਖੋ ਪਨ ਗਿਹਿਕਾਲੇ ਪਾਦਪਰਿਚਾਰਿਕਾ ਕਿਰਸ੍ਸ ਅਹੋਸਿ, ਸਚੇ ਪਨਾਹਂ ਇਸ੍ਸਰਿਯਬਲੇਨ ਗਹੇਤ੍ਵਾ ਗਚ੍ਛੇਯ੍ਯਂ, ਕਿਂ ਨੁ ਖੋ ਏਸ ਕਰਿਸ੍ਸਤਿ, ਪਰਿਗ੍ਗਣ੍ਹਿਸ੍ਸਾਮਿ ਤਾਵ ਨ’’ਨ੍ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿਤ੍ਵਾ ਪਠਮਂ ਗਾਥਮਾਹ –

੪੯.

‘‘ਯੋ ਤੇ ਇਮਂ ਵਿਸਾਲਕ੍ਖਿਂ, ਪਿਯਂ ਸਂਮ੍ਹਿਤਭਾਸਿਨਿਂ;

ਆਦਾਯ ਬਲਾ ਗਚ੍ਛੇਯ੍ਯ, ਕਿਂ ਨੁ ਕਯਿਰਾਸਿ ਬ੍ਰਾਹ੍ਮਣਾ’’ਤਿ.

ਤਤ੍ਥ ਸਂਮ੍ਹਿਤਭਾਸਿਨਿਨ੍ਤਿ ਮਨ੍ਦਹਸਿਤਭਾਸਿਨਿਂ. ਬਲਾ ਗਚ੍ਛੇਯ੍ਯਾਤਿ ਬਲਕ੍ਕਾਰੇਨ ਆਦਾਯ ਗਚ੍ਛੇਯ੍ਯ. ਕਿਂ ਨੁ ਕਯਿਰਾਸੀਤਿ ਤਸ੍ਸ ਤ੍ਵਂ ਬ੍ਰਾਹ੍ਮਣ ਕਿਂ ਕਰੇਯ੍ਯਾਸੀਤਿ?

ਅਥਸ੍ਸ ਕਥਂ ਸੁਤ੍ਵਾ ਮਹਾਸਤ੍ਤੋ ਦੁਤਿਯਂ ਗਾਥਮਾਹ –

੫੦.

‘‘ਉਪ੍ਪਜ੍ਜੇ ਮੇ ਨ ਮੁਚ੍ਚੇਯ੍ਯ, ਨ ਮੇ ਮੁਚ੍ਚੇਯ੍ਯ ਜੀਵਤੋ;

ਰਜਂਵ ਵਿਪੁਲਾ ਵੁਟ੍ਠਿ, ਖਿਪ੍ਪਮੇਵ ਨਿਵਾਰਯੇ’’ਤਿ.

ਤਸ੍ਸਤ੍ਥੋ – ਮਹਾਰਾਜ, ਸਚੇ ਇਮਂ ਗਹੇਤ੍ਵਾ ਗਚ੍ਛਨ੍ਤੇ ਕਿਸ੍ਮਿਞ੍ਚਿ ਮਮ ਅਬ੍ਭਨ੍ਤਰੇ ਕੋਪੋ ਉਪ੍ਪਜ੍ਜੇਯ੍ਯ, ਸੋ ਮੇ ਅਨ੍ਤੋ ਉਪ੍ਪਜ੍ਜਿਤ੍ਵਾ ਨ ਮੁਚ੍ਚੇਯ੍ਯ, ਯਾਵਾਹਂ ਜੀਵਾਮਿ, ਤਾਵ ਮੇ ਨ ਮੁਚ੍ਚੇਯ੍ਯ. ਨਾਸ੍ਸ ਅਨ੍ਤੋ ਘਨਸਨ੍ਨਿਵਾਸੇਨ ਪਤਿਟ੍ਠਾਤੁਂ ਦਸ੍ਸਾਮਿ, ਅਥ ਖੋ ਯਥਾ ਉਪ੍ਪਨ੍ਨਂ ਰਜਂ ਵਿਪੁਲਾ ਮੇਘਵੁਟ੍ਠਿ ਖਿਪ੍ਪਂ ਨਿਵਾਰੇਤਿ, ਤਥਾ ਖਿਪ੍ਪਮੇਵ ਨਂ ਮੇਤ੍ਤਾਭਾਵਨਾਯ ਨਿਗ੍ਗਹੇਤ੍ਵਾ ਵਾਰੇਸ੍ਸਾਮੀਤਿ.

ਏਵਂ ਮਹਾਸਤ੍ਤੋ ਸੀਹਨਾਦਂ ਨਦਿ. ਰਾਜਾ ਪਨਸ੍ਸ ਕਥਂ ਸੁਤ੍ਵਾਪਿ ਅਨ੍ਧਬਾਲਤਾਯ ਪਟਿਬਦ੍ਧਂ ਅਤ੍ਤਨੋ ਚਿਤ੍ਤਂ ਨਿਵਾਰੇਤੁਂ ਅਸਕ੍ਕੋਨ੍ਤੋ ਅਞ੍ਞਤਰਂ ਅਮਚ੍ਚਂ ਆਣਾਪੇਸਿ ‘‘ਇਮਂ ਪਰਿਬ੍ਬਾਜਿਕਂ ਰਾਜਨਿਵੇਸਨਂ ਨੇਹੀ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ‘‘ਅਧਮ੍ਮੋ ਲੋਕੇ ਵਤ੍ਤਤਿ, ਅਯੁਤ੍ਤ’’ਨ੍ਤਿਆਦੀਨਿ ਵਤ੍ਵਾ ਪਰਿਦੇਵਮਾਨਂਯੇਵ ਨਂ ਆਦਾਯ ਪਾਯਾਸਿ. ਬੋਧਿਸਤ੍ਤੋ ਤਸ੍ਸਾ ਪਰਿਦੇਵਨਸਦ੍ਦਂ ਸੁਤ੍ਵਾ ਏਕਵਾਰਂ ਓਲੋਕੇਤ੍ਵਾ ਪੁਨ ਨ ਓਲੋਕੇਸਿ. ਤਂ ਰੋਦਨ੍ਤਿਂ ਪਰਿਦੇਵਨ੍ਤਿਂ ਰਾਜਨਿਵੇਸਨਮੇਵ ਨਯਿਂਸੁ. ਸੋਪਿ ਬਾਰਾਣਸਿਰਾਜਾ ਉਯ੍ਯਾਨੇ ਪਪਞ੍ਚਂ ਅਕਤ੍ਵਾਵ ਸੀਘਤਰਂ ਗਨ੍ਤ੍ਵਾ ਤਂ ਪਰਿਬ੍ਬਾਜਿਕਂ ਪਕ੍ਕੋਸਾਪੇਤ੍ਵਾ ਮਹਨ੍ਤੇਨ ਯਸੇਨ ਨਿਮਨ੍ਤੇਸਿ. ਸਾ ਯਸਸ੍ਸ ਅਗੁਣਂ ਪਬ੍ਬਜਾਯ ਏਵ ਗੁਣਂ ਕਥੇਸਿ. ਰਾਜਾ ਕੇਨਚਿ ਪਰਿਯਾਯੇਨ ਤਸ੍ਸਾ ਮਨਂ ਅਲਭਨ੍ਤੋ ਤਂ ਏਕਸ੍ਮਿਂ ਗਬ੍ਭੇ ਕਾਰੇਤ੍ਵਾ ਚਿਨ੍ਤੇਸਿ ‘‘ਅਯਂ ਪਰਿਬ੍ਬਾਜਿਕਾ ਏਵਰੂਪਂ ਯਸਂ ਨ ਇਚ੍ਛਤਿ, ਸੋਪਿ ਤਾਪਸੋ ਏਵਰੂਪਂ ਮਾਤੁਗਾਮਂ ਗਹੇਤ੍ਵਾ ਗਚ੍ਛਨ੍ਤੇ ਕੁਜ੍ਝਿਤ੍ਵਾ ਓਲੋਕਿਤਮਤ੍ਤਮ੍ਪਿ ਨ ਅਕਾਸਿ, ਪਬ੍ਬਜਿਤਾ ਖੋ ਪਨ ਬਹੁਮਾਯਾ ਹੋਨ੍ਤਿ, ਕਿਞ੍ਚਿ ਪਯੋਜੇਤ੍ਵਾ ਅਨਤ੍ਥਮ੍ਪਿ ਮੇ ਕਰੇਯ੍ਯ, ਗਚ੍ਛਾਮਿ ਤਾਵ ਜਾਨਾਮਿ ਕਿਂ ਕਰੋਨ੍ਤੋ ਨਿਸਿਨ੍ਨੋ’’ਤਿ ਸਣ੍ਠਾਤੁਂ ਅਸਕ੍ਕੋਨ੍ਤੋ ਉਯ੍ਯਾਨਂ ਅਗਮਾਸਿ. ਬੋਧਿਸਤ੍ਤੋਪਿ ਚੀਵਰਂ ਸਿਬ੍ਬਨ੍ਤੋ ਨਿਸੀਦਿ. ਰਾਜਾ ਮਨ੍ਦਪਰਿਵਾਰੋਵ ਪਦਸਦ੍ਦਂ ਅਕਰੋਨ੍ਤੋ ਸਣਿਕਂ ਉਪਸਙ੍ਕਮਿ. ਬੋਧਿਸਤ੍ਤੋ ਰਾਜਾਨਂ ਅਨੋਲੋਕੇਤ੍ਵਾ ਚੀਵਰਮੇਵ ਸਿਬ੍ਬਿ. ਰਾਜਾ ‘‘ਅਯਂ ਕੁਜ੍ਝਿਤ੍ਵਾ ਮਯਾ ਸਦ੍ਧਿਂ ਨ ਸਲ੍ਲਪਤੀ’’ਤਿ ਮਞ੍ਞਮਾਨੋ ‘‘ਅਯਂ ਕੂਟਤਾਪਸੋ ‘ਕੋਧਸ੍ਸ ਉਪ੍ਪਜ੍ਜਿਤੁਂ ਨ ਦਸ੍ਸਾਮਿ, ਉਪ੍ਪਨ੍ਨਮ੍ਪਿ ਨਂ ਖਿਪ੍ਪਮੇਵ ਨਿਗ੍ਗਣ੍ਹਿਸ੍ਸਾਮੀ’ਤਿ ਪਠਮਮੇਵ ਗਜ੍ਜਿਤ੍ਵਾ ਇਦਾਨਿ ਕੋਧੇਨ ਥਦ੍ਧੋ ਹੁਤ੍ਵਾ ਮਯਾ ਸਦ੍ਧਿਂ ਨ ਸਲ੍ਲਪਤੀ’’ਤਿ ਸਞ੍ਞਾਯ ਤਤਿਯਂ ਗਾਥਮਾਹ –

੫੧.

‘‘ਯਂ ਨੁ ਪੁਬ੍ਬੇ ਵਿਕਤ੍ਥਿਤ੍ਥੋ, ਬਲਮ੍ਹਿਵ ਅਪਸ੍ਸਿਤੋ;

ਸ੍ਵਜ੍ਜ ਤੁਣ੍ਹਿਕਤੋ ਦਾਨਿ, ਸਙ੍ਘਾਟਿਂ ਸਿਬ੍ਬਮਚ੍ਛਸੀ’’ਤਿ.

ਤਤ੍ਥ ਬਲਮ੍ਹਿਵ ਅਪਸ੍ਸਿਤੋਤਿ ਬਲਨਿਸ੍ਸਿਤੋ ਵਿਯ ਹੁਤ੍ਵਾ. ਤੁਣ੍ਹਿਕਤੋਤਿ ਕਿਞ੍ਚਿ ਅਵਦਨ੍ਤੋ. ਸਿਬ੍ਬਮਚ੍ਛਸੀਤਿ ਸਿਬ੍ਬਨ੍ਤੋ ਅਚ੍ਛਸਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਅਯਂ ਰਾਜਾ ਕੋਧਵਸੇਨ ਮਂ ਨਾਲਪਤੀਤਿ ਮਞ੍ਞਤਿ, ਕਥੇਸ੍ਸਾਮਿ ਦਾਨਿਸ੍ਸ ਉਪ੍ਪਨ੍ਨਸ੍ਸ ਕੋਧਸ੍ਸ ਵਸਂ ਅਗਤਭਾਵ’’ਨ੍ਤਿ ਚਿਨ੍ਤੇਤ੍ਵਾ ਚਤੁਤ੍ਥਂ ਗਾਥਮਾਹ –

੫੨.

‘‘ਉਪ੍ਪਜ੍ਜਿ ਮੇ ਨ ਮੁਚ੍ਚਿਤ੍ਥ, ਨ ਮੇ ਮੁਚ੍ਚਿਤ੍ਥ ਜੀਵਤੋ;

ਰਜਂਵ ਵਿਪੁਲਾ ਵੁਟ੍ਠਿ, ਖਿਪ੍ਪਮੇਵ ਨਿਵਾਰਯਿ’’ਨ੍ਤਿ.

ਤਸ੍ਸਤ੍ਥੋ – ਮਹਾਰਾਜ, ਉਪ੍ਪਜ੍ਜਿ ਮੇ, ਨ ਨ ਉਪ੍ਪਜ੍ਜਿ, ਨ ਪਨ ਮੇ ਮੁਚ੍ਚਿਤ੍ਥ, ਨਾਸ੍ਸ ਪਵਿਸਿਤ੍ਵਾ ਹਦਯੇ ਠਾਤੁਂ ਅਦਾਸਿਂ, ਇਤਿ ਸੋ ਮਮ ਜੀਵਤੋ ਨ ਮੁਚ੍ਚਿਤ੍ਥੇਵ, ਰਜਂ ਵਿਪੁਲਾ ਵੁਟ੍ਠਿ ਵਿਯ ਖਿਪ੍ਪਮੇਵ ਨਂ ਨਿਵਾਰੇਸਿਨ੍ਤਿ.

ਤਂ ਸੁਤ੍ਵਾ ਰਾਜਾ ‘‘ਕਿਂ ਨੁ ਖੋ ਏਸ ਕੋਪਮੇਵ ਸਨ੍ਧਾਯ ਵਦਤਿ, ਉਦਾਹੁ ਅਞ੍ਞਂ ਕਿਞ੍ਚਿ ਸਿਪ੍ਪਂ ਸਨ੍ਧਾਯ ਕਥੇਸਿ, ਪੁਚ੍ਛਿਸ੍ਸਾਮਿ ਤਾਵ ਨ’’ਨ੍ਤਿ ਚਿਨ੍ਤੇਤ੍ਵਾ ਪੁਚ੍ਛਨ੍ਤੋ ਪਞ੍ਚਮਂ ਗਾਥਮਾਹ –

੫੩.

‘‘ਕਿਂ ਤੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕਿਂ ਤੇ ਨ ਮੁਚ੍ਚਿ ਜੀਵਤੋ;

ਰਜਂਵ ਵਿਪੁਲਾ ਵੁਟ੍ਠਿ, ਕਤਮਂ ਤਂ ਨਿਵਾਰਯੀ’’ਤਿ.

ਤਤ੍ਥ ਕਿਂ ਤੇ ਉਪ੍ਪਜ੍ਜਿ ਨੋ ਮੁਚ੍ਚੀਤਿ ਕਿਂ ਤਵ ਉਪ੍ਪਜ੍ਜਿ ਚੇਵ ਨ ਮੁਚ੍ਚਿ ਚ.

ਤਂ ਸੁਤ੍ਵਾ ਬੋਧਿਸਤ੍ਤੋ ‘‘ਮਹਾਰਾਜ, ਏਵਂ ਕੋਧੋ ਬਹੁਆਦੀਨਵੋ ਮਹਾਵਿਨਾਸਦਾਯਕੋ, ਏਸੋ ਮਮ ਉਪ੍ਪਜ੍ਜਿ, ਉਪ੍ਪਨ੍ਨਞ੍ਚ ਨਂ ਮੇਤ੍ਤਾਭਾਵਨਾਯ ਨਿਵਾਰੇਸਿ’’ਨ੍ਤਿ ਕੋਧੇ ਆਦੀਨਵਂ ਪਕਾਸੇਨ੍ਤੋ –

੫੪.

‘‘ਯਮ੍ਹਿ ਜਾਤੇ ਨ ਪਸ੍ਸਤਿ, ਅਜਾਤੇ ਸਾਧੁ ਪਸ੍ਸਤਿ;

ਸੋ ਮੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕੋਧੋ ਦੁਮ੍ਮੇਧਗੋਚਰੋ.

੫੫.

‘‘ਯੇਨ ਜਾਤੇਨ ਨਨ੍ਦਨ੍ਤਿ, ਅਮਿਤ੍ਤਾ ਦੁਕ੍ਖਮੇਸਿਨੋ;

ਸੋ ਮੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕੋਧੋ ਦੁਮ੍ਮੇਧਗੋਚਰੋ.

੫੬.

‘‘ਯਸ੍ਮਿਞ੍ਚ ਜਾਯਮਾਨਮ੍ਹਿ, ਸਦਤ੍ਥਂ ਨਾਵਬੁਜ੍ਝਤਿ;

ਸੋ ਮੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕੋਧੋ ਦੁਮ੍ਮੇਧਗੋਚਰੋ.

੫੭.

‘‘ਯੇਨਾਭਿਭੂਤੋ ਕੁਸਲਂ ਜਹਾਤਿ, ਪਰਕ੍ਕਰੇ ਵਿਪੁਲਞ੍ਚਾਪਿ ਅਤ੍ਥਂ;

ਸ ਭੀਮਸੇਨੋ ਬਲਵਾ ਪਮਦ੍ਦੀ, ਕੋਧੋ ਮਹਾਰਾਜ ਨ ਮੇ ਅਮੁਚ੍ਚਥ.

੫੮.

‘‘ਕਟ੍ਠਸ੍ਮਿਂ ਮਤ੍ਥਮਾਨਸ੍ਮਿਂ, ਪਾਵਕੋ ਨਾਮ ਜਾਯਤਿ;

ਤਮੇਵ ਕਟ੍ਠਂ ਡਹਤਿ, ਯਸ੍ਮਾ ਸੋ ਜਾਯਤੇ ਗਿਨਿ.

੫੯.

‘‘ਏਵਂ ਮਨ੍ਦਸ੍ਸ ਪੋਸਸ੍ਸ, ਬਾਲਸ੍ਸ ਅਵਿਜਾਨਤੋ;

ਸਾਰਮ੍ਭਾ ਜਾਯਤੇ ਕੋਧੋ, ਸੋਪਿ ਤੇਨੇਵ ਡਯ੍ਹਤਿ.

੬੦.

‘‘ਅਗ੍ਗੀਵ ਤਿਣਕਟ੍ਠਸ੍ਮਿਂ, ਕੋਧੋ ਯਸ੍ਸ ਪਵਡ੍ਢਤਿ;

ਨਿਹੀਯਤਿ ਤਸ੍ਸ ਯਸੋ, ਕਾਲ਼ਪਕ੍ਖੇਵ ਚਨ੍ਦਿਮਾ.

੬੧.

‘‘ਅਨੇਧੋ ਧੂਮਕੇਤੂਵ, ਕੋਧੋ ਯਸ੍ਸੂਪਸਮ੍ਮਤਿ;

ਆਪੂਰਤਿ ਤਸ੍ਸ ਯਸੋ, ਸੁਕ੍ਕਪਕ੍ਖੇਵ ਚਨ੍ਦਿਮਾ’’ਤਿ. – ਇਮਾ ਗਾਥਾ ਆਹ;

ਤਤ੍ਥ ਨ ਪਸ੍ਸਤੀਤਿ ਅਤ੍ਤਤ੍ਥਮ੍ਪਿ ਨ ਪਸ੍ਸਤਿ, ਪਗੇਵ ਪਰਤ੍ਥਂ. ਸਾਧੁ ਪਸ੍ਸਤੀਤਿ ਅਤ੍ਤਤ੍ਥਂ ਪਰਤ੍ਥਂ ਉਭਯਤ੍ਥਮ੍ਪਿ ਸਾਧੁ ਪਸ੍ਸਤਿ. ਦੁਮ੍ਮੇਧਗੋਚਰੋਤਿ ਨਿਪ੍ਪਞ੍ਞਾਨਂ ਆਧਾਰਭੂਤੋ ਗੋਚਰੋ. ਦੁਕ੍ਖਮੇਸਿਨੋਤਿ ਦੁਕ੍ਖਂ ਇਚ੍ਛਨ੍ਤਾ. ਸਦਤ੍ਥਨ੍ਤਿ ਅਤ੍ਤਨੋ ਅਤ੍ਥਭੂਤਂ ਅਤ੍ਥਤੋ ਚੇਵ ਧਮ੍ਮਤੋ ਚ ਵੁਦ੍ਧਿਂ. ਪਰਕ੍ਕਰੇਤਿ ਵਿਪੁਲਮ੍ਪਿ ਅਤ੍ਥਂ ਉਪ੍ਪਨ੍ਨਂ ਪਰਤੋ ਕਾਰੇਤਿ, ਅਪਨੇਥ, ਨ ਮੇ ਇਮਿਨਾ ਅਤ੍ਥੋਤਿ ਵਦਤਿ. ਸ ਭੀਮਸੇਨੋਤਿ ਸੋ ਕੋਧੋ ਭੀਮਾਯ ਭਯਜਨਨਿਯਾ ਮਹਤਿਯਾ ਕਿਲੇਸਸੇਨਾਯ ਸਮਨ੍ਨਾਗਤੋ. ਪਮਦ੍ਦੀਤਿ ਅਤ੍ਤਨੋ ਬਲਵਭਾਵੇਨ ਉਲ਼ਾਰੇਪਿ ਸਤ੍ਤੇ ਗਹੇਤ੍ਵਾ ਅਤ੍ਤਨੋ ਵਸੇ ਕਰਣੇਨ ਮਦ੍ਦਨਸਮਤ੍ਥੋ. ਨ ਮੇ ਅਮੁਚ੍ਚਥਾਤਿ ਮਮ ਸਨ੍ਤਿਕਾ ਮੋਕ੍ਖਂ ਨ ਲਭਤਿ, ਹਦਯੇ ਵਾ ਪਨ ਮੇ ਖੀਰਂ ਵਿਯ ਮੁਹੁਤ੍ਤਂ ਦਧਿਭਾਵੇਨ ਨ ਪਤਿਟ੍ਠਹਿਤ੍ਥਾਤਿਪਿ ਅਤ੍ਥੋ.

ਕਟ੍ਠਸ੍ਮਿਂ ਮਤ੍ਥਮਾਨਸ੍ਮਿਨ੍ਤਿ ਅਰਣੀਸਹਿਤੇਨ ਮਤ੍ਥਿਯਮਾਨੇ, ‘‘ਮਦ੍ਦਮਾਨਸ੍ਮਿ’’ਨ੍ਤਿਪਿ ਪਾਠੋ. ਯਸ੍ਮਾਤਿ ਯਤੋ ਕਟ੍ਠਾ ਜਾਯਤਿ, ਤਮੇਵ ਡਹਤਿ. ਗਿਨੀਤਿ ਅਗ੍ਗਿ. ਬਾਲਸ੍ਸ ਅਵਿਜਾਨਤੋਤਿ ਬਾਲਸ੍ਸ ਅਵਿਜਾਨਨ੍ਤਸ੍ਸ. ਸਾਰਮ੍ਭਾ ਜਾਯਤੇਤਿ ਅਹਂ ਤ੍ਵਨ੍ਤਿ ਆਕਡ੍ਢਨਵਿਕਡ੍ਢਨਂ ਕਰੋਨ੍ਤਸ੍ਸ ਕਰਣੁਤ੍ਤਰਿਯਲਕ੍ਖਣਾ ਸਾਰਮ੍ਭਾ ਅਰਣੀਮਤ੍ਥਨਾ ਵਿਯ ਪਾਵਕੋ ਕੋਧੋ ਜਾਯਤਿ. ਸੋਪਿ ਤੇਨੇਵਾਤਿ ਸੋਪਿ ਬਾਲੋ ਤੇਨੇਵ ਕੋਧੇਨ ਕਟ੍ਠਂ ਵਿਯ ਅਗ੍ਗਿਨਾ ਡਯ੍ਹਤਿ. ਅਨੇਧੋ ਧੂਮਕੇਤੂਵਾਤਿ ਅਨਿਨ੍ਧਨੋ ਅਗ੍ਗਿ ਵਿਯ. ਤਸ੍ਸਾਤਿ ਤਸ੍ਸ ਅਧਿਵਾਸਨਖਨ੍ਤਿਯਾ ਸਮਨ੍ਨਾਗਤਸ੍ਸ ਪੁਗ੍ਗਲਸ੍ਸ ਸੁਕ੍ਕਪਕ੍ਖੇ ਚਨ੍ਦੋ ਵਿਯ ਲਦ੍ਧੋ ਯਸੋ ਅਪਰਾਪਰਂ ਆਪੂਰਤੀਤਿ.

ਰਾਜਾ ਮਹਾਸਤ੍ਤਸ੍ਸ ਧਮ੍ਮਕਥਂ ਸੁਤ੍ਵਾ ਤੁਟ੍ਠੋ ਏਕਂ ਅਮਚ੍ਚਂ ਆਣਾਪੇਤ੍ਵਾ ਪਰਿਬ੍ਬਾਜਿਕਂ ਆਹਰਾਪੇਤ੍ਵਾ ‘‘ਭਨ੍ਤੇ ਨਿਕ੍ਕੋਧਤਾਪਸ, ਉਭੋਪਿ ਤੁਮ੍ਹੇ ਪਬ੍ਬਜ੍ਜਾਸੁਖੇਨ ਵੀਤਿਨਾਮੇਨ੍ਤਾ ਇਧੇਵ ਉਯ੍ਯਾਨੇ ਵਸਥ, ਅਹਂ ਵੋ ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਂ ਕਰਿਸ੍ਸਾਮੀ’’ਤਿ ਵਤ੍ਵਾ ਖਮਾਪੇਤ੍ਵਾ ਵਨ੍ਦਿਤ੍ਵਾ ਪਕ੍ਕਾਮਿ. ਤੇ ਉਭੋਪਿ ਤਤ੍ਥੇਵ ਵਸਿਂਸੁ. ਅਪਰਭਾਗੇ ਪਰਿਬ੍ਬਾਜਿਕਾ ਕਾਲਮਕਾਸਿ. ਬੋਧਿਸਤ੍ਤੋ ਤਸ੍ਸਾ ਕਾਲਕਤਾਯ ਹਿਮਵਨ੍ਤਂ ਪਵਿਸਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਕੋਧਨੋ ਭਿਕ੍ਖੁ ਅਨਾਗਾਮਿਫਲੇ ਪਤਿਟ੍ਠਹਿ.

ਤਦਾ ਪਰਿਬ੍ਬਾਜਿਕਾ ਰਾਹੁਲਮਾਤਾ ਅਹੋਸਿ, ਰਾਜਾ ਆਨਨ੍ਦੋ, ਪਰਿਬ੍ਬਾਜਕੋ ਪਨ ਅਹਮੇਵ ਅਹੋਸਿਨ੍ਤਿ.

ਚੂਲ਼ਬੋਧਿਜਾਤਕਵਣ੍ਣਨਾ ਪਞ੍ਚਮਾ.

[੪੪੪] ੬. ਕਣ੍ਹਦੀਪਾਯਨਜਾਤਕਵਣ੍ਣਨਾ

ਸਤ੍ਤਾਹਮੇਵਾਹਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਕੁਸਜਾਤਕੇ (ਜਾ. ੨.੨੦.੧ ਆਦਯੋ) ਆਵਿ ਭਵਿਸ੍ਸਤਿ. ਸਤ੍ਥਾ ਤਂ ਭਿਕ੍ਖੁਂ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਪੋਰਾਣਕਪਣ੍ਡਿਤਾ ਅਨੁਪ੍ਪਨ੍ਨੇ ਬੁਦ੍ਧੇ ਬਾਹਿਰਕਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਤਿਰੇਕਪਞ੍ਞਾਸਵਸ੍ਸਾਨਿ ਅਨਭਿਰਤਾ ਬ੍ਰਹ੍ਮਚਰਿਯਂ ਚਰਨ੍ਤਾ ਹਿਰੋਤ੍ਤਪ੍ਪਭੇਦਭਯੇਨ ਅਤ੍ਤਨੋ ਉਕ੍ਕਣ੍ਠਿਤਭਾਵਂ ਨ ਕਸ੍ਸਚਿ ਕਥੇਸੁਂ, ਤ੍ਵਂ ਕਸ੍ਮਾ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਮਾਦਿਸਸ੍ਸ ਗਰੁਨੋ ਬੁਦ੍ਧਸ੍ਸ ਸਮ੍ਮੁਖੇ ਠਤ੍ਵਾ ਚਤੁਪਰਿਸਮਜ੍ਝੇ ਉਕ੍ਕਣ੍ਠਿਤਭਾਵਂ ਆਵਿ ਕਰੋਸਿ, ਕਿਮਤ੍ਥਂ ਅਤ੍ਤਨੋ ਹਿਰੋਤ੍ਤਪ੍ਪਂ ਨ ਰਕ੍ਖਸੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਵਂਸਰਟ੍ਠੇ ਕੋਸਮ੍ਬਿਯਂ ਨਾਮ ਨਗਰੇ ਕੋਸਮ੍ਬਕੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਦਾ ਅਞ੍ਞਤਰਸ੍ਮਿਂ ਨਿਗਮੇ ਦ੍ਵੇ ਬ੍ਰਾਹ੍ਮਣਾ ਅਸੀਤਿਕੋਟਿਧਨਵਿਭਵਾ ਅਞ੍ਞਮਞ੍ਞਂ ਪਿਯਸਹਾਯਕਾ ਕਾਮੇਸੁ ਦੋਸਂ ਦਿਸ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਉਭੋਪਿ ਕਾਮੇ ਪਹਾਯ ਮਹਾਜਨਸ੍ਸ ਰੋਦਨ੍ਤਸ੍ਸ ਪਰਿਦੇਵਨ੍ਤਸ੍ਸ ਨਿਕ੍ਖਮਿਤ੍ਵਾ ਹਿਮਵਨ੍ਤਪਦੇਸੇ ਅਸ੍ਸਮਪਦਂ ਕਤ੍ਵਾ ਪਬ੍ਬਜਿਤ੍ਵਾ ਉਞ੍ਛਾਚਰਿਯਾਯ ਵਨਮੂਲਫਲਾਫਲੇਨ ਯਾਪੇਨ੍ਤਾ ਪਣ੍ਣਾਸ ਵਸ੍ਸਾਨਿ ਵਸਿਂਸੁ, ਝਾਨਂ ਉਪ੍ਪਾਦੇਤੁਂ ਨਾਸਕ੍ਖਿਂਸੁ. ਤੇ ਪਣ੍ਣਾਸਵਸ੍ਸਚ੍ਚਯੇਨ ਲੋਣਮ੍ਬਿਲਸੇਵਨਤ੍ਥਾਯ ਜਨਪਦਂ ਚਰਨ੍ਤਾ ਕਾਸਿਰਟ੍ਠਂ ਸਮ੍ਪਾਪੁਣਿਂਸੁ. ਤਤ੍ਰ ਅਞ੍ਞਤਰਸ੍ਮਿਂ ਨਿਗਮਗਾਮੇ ਦੀਪਾਯਨਤਾਪਸਸ੍ਸ ਗਿਹਿਸਹਾਯੋ ਮਣ੍ਡਬ੍ਯੋ ਨਾਮ ਅਤ੍ਥਿ, ਤੇ ਉਭੋਪਿ ਤਸ੍ਸ ਸਨ੍ਤਿਕਂ ਅਗਮਂਸੁ. ਸੋ ਤੇ ਦਿਸ੍ਵਾਵ ਅਤ੍ਤਮਨੋ ਪਣ੍ਣਸਾਲਂ ਕਾਰੇਤ੍ਵਾ ਉਭੋਪਿ ਤੇ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿ. ਤੇ ਤਤ੍ਥ ਤੀਣਿ ਚਤ੍ਤਾਰਿ ਵਸ੍ਸਾਨਿ ਵਸਿਤ੍ਵਾ ਤਂ ਆਪੁਚ੍ਛਿਤ੍ਵਾ ਚਾਰਿਕਂ ਚਰਨ੍ਤਾ ਬਾਰਾਣਸਿਂ ਪਤ੍ਵਾ ਅਤਿਮੁਤ੍ਤਕਸੁਸਾਨੇ ਵਸਿਂਸੁ. ਤਤ੍ਥ ਦੀਪਾਯਨੋ ਯਥਾਭਿਰਨ੍ਤਂ ਵਿਹਰਿਤ੍ਵਾ ਪੁਨ ਤਸ੍ਸੇਵ ਸਹਾਯਸ੍ਸ ਸਨ੍ਤਿਕਂ ਗਤੋ. ਮਣ੍ਡਬ੍ਯਤਾਪਸੋ ਤਤ੍ਥੇਵ ਵਸਿ.

ਅਥੇਕਦਿਵਸਂ ਏਕੋ ਚੋਰੋ ਅਨ੍ਤੋਨਗਰੇ ਚੋਰਿਕਂ ਕਤ੍ਵਾ ਧਨਸਾਰਂ ਆਦਾਯ ਨਿਕ੍ਖਨ੍ਤੋ ‘‘ਚੋਰੋ’’ਤਿ ਞਤ੍ਵਾ ਪਟਿਬੁਦ੍ਧੇਹਿ ਘਰਸ੍ਸਾਮਿਕੇਹਿ ਚੇਵ ਆਰਕ੍ਖਮਨੁਸ੍ਸੇਹਿ ਚ ਅਨੁਬਦ੍ਧੋ ਨਿਦ੍ਧਮਨੇਨ ਨਿਕ੍ਖਮਿਤ੍ਵਾ ਵੇਗੇਨ ਸੁਸਾਨਂ ਪਵਿਸਿਤ੍ਵਾ ਤਾਪਸਸ੍ਸ ਪਣ੍ਣਸਾਲਦ੍ਵਾਰੇ ਭਣ੍ਡਿਕਂ ਛਟ੍ਟੇਤ੍ਵਾ ਪਲਾਯਿ. ਮਨੁਸ੍ਸਾ ਭਣ੍ਡਿਕਂ ਦਿਸ੍ਵਾ ‘‘ਅਰੇ ਦੁਟ੍ਠਜਟਿਲ, ਤ੍ਵਂ ਰਤ੍ਤਿਂ ਚੋਰਿਕਂ ਕਤ੍ਵਾ ਦਿਵਾ ਤਾਪਸਰੂਪੇਨ ਚਰਸੀ’’ਤਿ ਤਜ੍ਜੇਤ੍ਵਾ ਪੋਥੇਤ੍ਵਾ ਤਂ ਆਦਾਯ ਨੇਤ੍ਵਾ ਰਞ੍ਞੋ ਦਸ੍ਸਯਿਂਸੁ. ਰਾਜਾ ਅਨੁਪਪਰਿਕ੍ਖਿਤ੍ਵਾਵ ‘‘ਗਚ੍ਛਥ, ਨਂ ਸੂਲੇ ਉਤ੍ਤਾਸੇਥਾ’’ਤਿ ਆਹ. ਤੇ ਤਂ ਸੁਸਾਨਂ ਨੇਤ੍ਵਾ ਖਦਿਰਸੂਲਂ ਆਰੋਪਯਿਂਸੁ, ਤਾਪਸਸ੍ਸ ਸਰੀਰੇ ਸੂਲਂ ਨ ਪਵਿਸਤਿ. ਤਤੋ ਨਿਮ੍ਬਸੂਲਂ ਆਹਰਿਂਸੁ, ਤਮ੍ਪਿ ਨ ਪਵਿਸਤਿ. ਅਯਸੂਲਂ ਆਹਰਿਂਸੁ, ਤਮ੍ਪਿ ਨ ਪਵਿਸਤਿ. ਤਾਪਸੋ ‘‘ਕਿਂ ਨੁ ਖੋ ਮੇ ਪੁਬ੍ਬਕਮ੍ਮ’’ਨ੍ਤਿ ਓਲੋਕੇਸਿ, ਅਥਸ੍ਸ ਜਾਤਿਸ੍ਸਰਞਾਣਂ ਉਪ੍ਪਜ੍ਜਿ, ਤੇਨ ਪੁਬ੍ਬਕਮ੍ਮਂ ਓਲੋਕੇਤ੍ਵਾ ਅਦ੍ਦਸ. ਕਿਂ ਪਨਸ੍ਸ ਪੁਬ੍ਬਕਮ੍ਮਨ੍ਤਿ? ਕੋਵਿਲ਼ਾਰਸੂਲੇ ਮਕ੍ਖਿਕਾਵੇਧਨਂ. ਸੋ ਕਿਰ ਪੁਰਿਮਭਵੇ ਵਡ੍ਢਕਿਪੁਤ੍ਤੋ ਹੁਤ੍ਵਾ ਪਿਤੁ ਰੁਕ੍ਖਤਚ੍ਛਨਟ੍ਠਾਨਂ ਗਨ੍ਤ੍ਵਾ ਏਕਂ ਮਕ੍ਖਿਕਂ ਗਹੇਤ੍ਵਾ ਕੋਵਿਲ਼ਾਰਸਲਾਕਾਯ ਸੂਲੇ ਵਿਯ ਵਿਜ੍ਝਿ. ਤਮੇਨਂ ਪਾਪਕਮ੍ਮਂ ਇਮਂ ਠਾਨਂ ਪਤ੍ਵਾ ਗਣ੍ਹਿ. ਸੋ ‘‘ਨ ਸਕ੍ਕਾ ਇਤੋ ਪਾਪਾ ਮਯਾ ਮੁਚ੍ਚਿਤੁ’’ਨ੍ਤਿ ਞਤ੍ਵਾ ਰਾਜਪੁਰਿਸੇ ਆਹ ‘‘ਸਚੇ ਮਂ ਸੂਲੇ ਉਤ੍ਤਾਸੇਤੁਕਾਮਤ੍ਥ, ਕੋਵਿਲ਼ਾਰਸੂਲਂ ਆਹਰਥਾ’’ਤਿ. ਤੇ ਤਥਾ ਕਤ੍ਵਾ ਤਂ ਸੂਲੇ ਉਤ੍ਤਾਸੇਤ੍ਵਾ ਆਰਕ੍ਖਂ ਦਤ੍ਵਾ ਪਕ੍ਕਮਿਂਸੁ.

ਆਰਕ੍ਖਕਾ ਪਟਿਚ੍ਛਨ੍ਨਾ ਹੁਤ੍ਵਾ ਤਸ੍ਸ ਸਨ੍ਤਿਕਂ ਆਗਚ੍ਛਨ੍ਤੇ ਓਲੋਕੇਨ੍ਤਿ. ਤਦਾ ਦੀਪਾਯਨੋ ‘‘ਚਿਰਦਿਟ੍ਠੋ ਮੇ ਸਹਾਯੋ’’ਤਿ ਮਣ੍ਡਬ੍ਯਸ੍ਸ ਸਨ੍ਤਿਕਂ ਆਗਚ੍ਛਨ੍ਤੋ ‘‘ਸੂਲੇ ਉਤ੍ਤਾਸਿਤੋ’’ਤਿ ਤਂ ਦਿਵਸਞ੍ਞੇਵ ਅਨ੍ਤਰਾਮਗ੍ਗੇ ਸੁਤ੍ਵਾ ਤਂ ਠਾਨਂ ਗਨ੍ਤ੍ਵਾ ਏਕਮਨ੍ਤਂ ਠਿਤੋ ‘‘ਕਿਂ ਸਮ੍ਮ ਕਾਰਕੋਸੀ’’ਤਿ ਪੁਚ੍ਛਿਤ੍ਵਾ ‘‘ਅਕਾਰਕੋਮ੍ਹੀ’’ਤਿ ਵੁਤ੍ਤੇ ‘‘ਅਤ੍ਤਨੋ ਮਨੋਪਦੋਸਂ ਰਕ੍ਖਿਤੁਂ ਸਕ੍ਖਿ, ਨਾਸਕ੍ਖੀ’’ਤਿ ਪੁਚ੍ਛਿ. ‘‘ਸਮ੍ਮ, ਯੇਹਿ ਅਹਂ ਗਹਿਤੋ, ਨੇਵ ਤੇਸਂ, ਨ ਰਞ੍ਞੋ ਉਪਰਿ ਮਯ੍ਹਂ ਮਨੋਪਦੋਸੋ ਅਤ੍ਥੀ’’ਤਿ. ‘‘ਏਵਂ ਸਨ੍ਤੇ ਤਾਦਿਸਸ੍ਸ ਸੀਲਵਤੋ ਛਾਯਾ ਮਯ੍ਹਂ ਸੁਖਾ’’ਤਿ ਵਤ੍ਵਾ ਦੀਪਾਯਨੋ ਸੂਲਂ ਨਿਸ੍ਸਾਯ ਨਿਸੀਦਿ. ਅਥਸ੍ਸ ਸਰੀਰੇ ਮਣ੍ਡਬ੍ਯਸ੍ਸ ਸਰੀਰਤੋ ਲੋਹਿਤਬਿਨ੍ਦੂਨਿ ਪਤਿਂਸੁ. ਤਾਨਿ ਸੁਵਣ੍ਣਵਣ੍ਣਸਰੀਰੇ ਪਤਿਤਪਤਿਤਾਨਿ ਸੁਸ੍ਸਿਤ੍ਵਾ ਕਾਲ਼ਕਾਨਿ ਉਪ੍ਪਜ੍ਜਿਂਸੁ. ਤਤੋ ਪਟ੍ਠਾਯੇਵ ਸੋ ਕਣ੍ਹਦੀਪਾਯਨੋ ਨਾਮ ਅਹੋਸਿ. ਸੋ ਸਬ੍ਬਰਤ੍ਤਿਂ ਤਤ੍ਥੇਵ ਨਿਸੀਦਿ.

ਪੁਨਦਿਵਸੇ ਆਰਕ੍ਖਪੁਰਿਸਾ ਆਗਨ੍ਤ੍ਵਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਅਨਿਸਾਮੇਤ੍ਵਾਵ ਮੇ ਕਤ’’ਨ੍ਤਿ ਵੇਗੇਨ ਤਤ੍ਥ ਗਨ੍ਤ੍ਵਾ ‘‘ਪਬ੍ਬਜਿਤ, ਕਸ੍ਮਾ ਸੂਲਂ ਨਿਸ੍ਸਾਯ ਨਿਸਿਨ੍ਨੋਸੀ’’ਤਿ ਦੀਪਾਯਨਂ ਪੁਚ੍ਛਿ. ਮਹਾਰਾਜ, ਇਮਂ ਤਾਪਸਂ ਰਕ੍ਖਨ੍ਤੋ ਨਿਸਿਨ੍ਨੋਮ੍ਹਿ. ਕਿਂ ਪਨ ਤ੍ਵਂ ਮਹਾਰਾਜ, ਇਮਸ੍ਸ ਕਾਰਕਭਾਵਂ ਵਾ ਅਕਾਰਕਭਾਵਂ ਵਾ ਞਤ੍ਵਾ ਏਵਂ ਕਾਰੇਸੀਤਿ? ਸੋ ਕਮ੍ਮਸ੍ਸ ਅਸੋਧਿਤਭਾਵਂ ਆਚਿਕ੍ਖਿ. ਅਥਸ੍ਸ ਸੋ ‘‘ਮਹਾਰਾਜ, ਰਞ੍ਞਾ ਨਾਮ ਨਿਸਮ੍ਮਕਾਰਿਨਾ ਭਵਿਤਬ੍ਬਂ, ਅਲਸੋ ਗਿਹੀ ਕਾਮਭੋਗੀ ਨ ਸਾਧੂ’’ਤਿਆਦੀਨਿ ਵਤ੍ਵਾ ਧਮ੍ਮਂ ਦੇਸੇਸਿ. ਰਾਜਾ ਮਣ੍ਡਬ੍ਯਸ੍ਸ ਨਿਦ੍ਦੋਸਭਾਵਂ ਞਤ੍ਵਾ ‘‘ਸੂਲਂ ਹਰਥਾ’’ਤਿ ਆਣਾਪੇਸਿ. ਸੂਲਂ ਹਰਨ੍ਤਾ ਹਰਿਤੁਂ ਨ ਸਕ੍ਖਿਂਸੁ. ਮਣ੍ਡਬ੍ਯੋ ਆਹ – ‘‘ਮਹਾਰਾਜ, ਅਹਂ ਪੁਬ੍ਬੇ ਕਤਕਮ੍ਮਦੋਸੇਨ ਏਵਰੂਪਂ ਭਯਂ ਸਮ੍ਪਤ੍ਤੋ, ਮਮ ਸਰੀਰਤੋ ਸੂਲਂ ਹਰਿਤੁਂ ਨ ਸਕ੍ਕਾ, ਸਚੇ ਮਯ੍ਹਂ ਜੀਵਿਤਂ ਦਾਤੁਕਾਮੋ, ਕਕਚਂ ਆਹਰਾਪੇਤ੍ਵਾ ਇਮਂ ਸੂਲਂ ਚਮ੍ਮਸਮਂ ਛਿਨ੍ਦਾਪੇਹੀ’’ਤਿ. ਰਾਜਾ ਤਥਾ ਕਾਰੇਸਿ. ਅਨ੍ਤੋਸਰੀਰੇ ਸੂਲੋ ਅਨ੍ਤੋਯੇਵ ਅਹੋਸਿ. ਤਦਾ ਕਿਰ ਸੋ ਸੁਖੁਮਂ ਕੋਵਿਲ਼ਾਰਸਲਾਕਂ ਗਹੇਤ੍ਵਾ ਮਕ੍ਖਿਕਾਯ ਵਚ੍ਚਮਗ੍ਗਂ ਪਵੇਸੇਸਿ, ਤਂ ਤਸ੍ਸ ਅਨ੍ਤੋਸਰੀਰੇਯੇਵ ਅਹੋਸਿ. ਸੋ ਤੇਨ ਕਾਰਣੇਨ ਅਮਰਿਤ੍ਵਾ ਅਤ੍ਤਨੋ ਆਯੁਕ੍ਖਯੇਨੇਵ ਮਰਿ, ਤਸ੍ਮਾ ਅਯਮ੍ਪਿ ਨ ਮਤੋ. ਰਾਜਾ ਤਾਪਸੇ ਵਨ੍ਦਿਤ੍ਵਾ ਖਮਾਪੇਤ੍ਵਾ ਉਭੋਪਿ ਉਯ੍ਯਾਨੇ ਵਸਾਪੇਨ੍ਤੋ ਪਟਿਜਗ੍ਗਿ, ਤਤੋ ਪਟ੍ਠਾਯ ਮਣ੍ਡਬ੍ਯੋ ਆਣਿਮਣ੍ਡਬ੍ਯੋ ਨਾਮ ਜਾਤੋ. ਸੋ ਰਾਜਾਨਂ ਉਪਨਿਸ੍ਸਾਯ ਤਤ੍ਥੇਵ ਵਸਿ, ਦੀਪਾਯਨੋ ਪਨ ਤਸ੍ਸ ਵਣਂ ਫਾਸੁਕਂ ਕਤ੍ਵਾ ਅਤ੍ਤਨੋ ਗਿਹਿਸਹਾਯਮਣ੍ਡਬ੍ਯਸ੍ਸ ਸਨ੍ਤਿਕਮੇਵ ਗਤੋ.

ਤਂ ਪਣ੍ਣਸਾਲਂ ਪਵਿਸਨ੍ਤਂ ਦਿਸ੍ਵਾ ਏਕੋ ਪੁਰਿਸੋ ਸਹਾਯਸ੍ਸ ਆਰੋਚੇਸਿ. ਸੋ ਸੁਤ੍ਵਾਵ ਤੁਟ੍ਠਚਿਤ੍ਤੋ ਸਪੁਤ੍ਤਦਾਰੋ ਬਹੂ ਗਨ੍ਧਮਾਲਤੇਲਫਾਣਿਤਾਦੀਨਿ ਆਦਾਯ ਤਂ ਪਣ੍ਣਸਾਲਂ ਗਨ੍ਤ੍ਵਾ ਦੀਪਾਯਨਂ ਵਨ੍ਦਿਤ੍ਵਾ ਪਾਦੇ ਧੋਵਿਤ੍ਵਾ ਤੇਲੇਨ ਮਕ੍ਖੇਤ੍ਵਾ ਪਾਨਕਂ ਪਾਯੇਤ੍ਵਾ ਆਣਿਮਣ੍ਡਬ੍ਯਸ੍ਸ ਪਵਤ੍ਤਿਂ ਸੁਣਨ੍ਤੋ ਨਿਸੀਦਿ. ਅਥਸ੍ਸ ਪੁਤ੍ਤੋ ਯਞ੍ਞਦਤ੍ਤਕੁਮਾਰੋ ਨਾਮ ਚਙ੍ਕਮਨਕੋਟਿਯਂ ਗੇਣ੍ਡੁਕੇਨ ਕੀਲ਼ਿ, ਤਤ੍ਰ ਚੇਕਸ੍ਮਿਂ ਵਮ੍ਮਿਕੇ ਆਸੀਵਿਸੋ ਵਸਤਿ. ਕੁਮਾਰਸ੍ਸ ਭੂਮਿਯਂ ਪਹਟਗੇਣ੍ਡੁਕੋ ਗਨ੍ਤ੍ਵਾ ਵਮ੍ਮਿਕਬਿਲੇ ਆਸੀਵਿਸਸ੍ਸ ਮਤ੍ਥਕੇ ਪਤਿ. ਸੋ ਅਜਾਨਨ੍ਤੋ ਬਿਲੇ ਹਤ੍ਥਂ ਪਵੇਸੇਸਿ. ਅਥ ਨਂ ਕੁਦ੍ਧੋ ਆਸੀਵਿਸੋ ਹਤ੍ਥੇ ਡਂਸਿ. ਸੋ ਵਿਸਵੇਗੇਨ ਮੁਚ੍ਛਿਤੋ ਤਤ੍ਥੇਵ ਪਤਿ. ਅਥਸ੍ਸ ਮਾਤਾਪਿਤਰੋ ਸਪ੍ਪੇਨ ਡਟ੍ਠਭਾਵਂ ਞਤ੍ਵਾ ਕੁਮਾਰਕਂ ਉਕ੍ਖਿਪਿਤ੍ਵਾ ਤਾਪਸਸ੍ਸ ਸਨ੍ਤਿਕਂ ਆਨੇਤ੍ਵਾ ਪਾਦਮੂਲੇ ਨਿਪਜ੍ਜਾਪੇਤ੍ਵਾ ‘‘ਭਨ੍ਤੇ, ਪਬ੍ਬਜਿਤਾ ਨਾਮ ਓਸਧਂ ਵਾ ਪਰਿਤ੍ਤਂ ਵਾ ਜਾਨਨ੍ਤਿ, ਪੁਤ੍ਤਕਂ ਨੋ ਆਰੋਗਂ ਕਰੋਥਾ’’ਤਿ ਆਹਂਸੁ. ਅਹਂ ਓਸਧਂ ਨ ਜਾਨਾਮਿ, ਨਾਹਂ ਵੇਜ੍ਜਕਮ੍ਮਂ ਕਰਿਸ੍ਸਾਮੀਤਿ. ‘‘ਤੇਨ ਹਿ ਭਨ੍ਤੇ, ਇਮਸ੍ਮਿਂ ਕੁਮਾਰਕੇ ਮੇਤ੍ਤਂ ਕਤ੍ਵਾ ਸਚ੍ਚਕਿਰਿਯਂ ਕਰੋਥਾ’’ਤਿ ਵੁਤ੍ਤੇ ਤਾਪਸੋ ‘‘ਸਾਧੁ, ਸਚ੍ਚਕਿਰਿਯਂ ਕਰਿਸ੍ਸਾਮੀ’’ਤਿ ਵਤ੍ਵਾ ਯਞ੍ਞਦਤ੍ਤਸ੍ਸ ਸੀਸੇ ਹਤ੍ਥਂ ਠਪੇਤ੍ਵਾ ਪਠਮਂ ਗਾਥਮਾਹ –

੬੨.

‘‘ਸਤ੍ਤਾਹਮੇਵਾਹਂ ਪਸਨ੍ਨਚਿਤ੍ਤੋ, ਪੁਞ੍ਞਤ੍ਥਿਕੋ ਆਚਰਿਂ ਬ੍ਰਹ੍ਮਚਰਿਯਂ;

ਅਥਾਪਰਂ ਯਂ ਚਰਿਤਂ ਮਮੇਦਂ, ਵਸ੍ਸਾਨਿ ਪਞ੍ਞਾਸ ਸਮਾਧਿਕਾਨਿ;

ਅਕਾਮਕੋਵਾਪਿ ਅਹਂ ਚਰਾਮਿ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ;

ਹਤਂ ਵਿਸਂ ਜੀਵਤੁ ਯਞ੍ਞਦਤ੍ਤੋ’’ਤਿ.

ਤਤ੍ਥ ਅਥਾਪਰਂ ਯਂ ਚਰਿਤਨ੍ਤਿ ਤਸ੍ਮਾ ਸਤ੍ਤਾਹਾ ਉਤ੍ਤਰਿ ਯਂ ਮਮ ਬ੍ਰਹ੍ਮਚਰਿਯਂ. ਅਕਾਮਕੋਵਾਪੀਤਿ ਪਬ੍ਬਜ੍ਜਂ ਅਨਿਚ੍ਛਨ੍ਤੋਯੇਵ. ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੂਤਿ ਸਚੇ ਅਤਿਰੇਕਪਣ੍ਣਾਸਵਸ੍ਸਾਨਿ ਅਨਭਿਰਤਿਵਾਸਂ ਵਸਨ੍ਤੇਨ ਮਯਾ ਕਸ੍ਸਚਿ ਅਨਾਰੋਚਿਤਭਾਵੋ ਸਚ੍ਚਂ, ਏਤੇਨ ਸਚ੍ਚੇਨ ਯਞ੍ਞਦਤ੍ਤਕੁਮਾਰਸ੍ਸ ਸੋਤ੍ਥਿਭਾਵੋ ਹੋਤੁ, ਜੀਵਿਤਂ ਪਟਿਲਭਤੂਤਿ.

ਅਥਸ੍ਸ ਸਹ ਸਚ੍ਚਕਿਰਿਯਾਯ ਯਞ੍ਞਦਤ੍ਤਸ੍ਸ ਥਨਪ੍ਪਦੇਸਤੋ ਉਦ੍ਧਂ ਵਿਸਂ ਭਸ੍ਸਿਤ੍ਵਾ ਪਥਵਿਂ ਪਾਵਿਸਿ. ਕੁਮਾਰੋ ਅਕ੍ਖੀਨਿ ਉਮ੍ਮੀਲੇਤ੍ਵਾ ਮਾਤਾਪਿਤਰੋ ਓਲੋਕੇਤ੍ਵਾ ‘‘ਅਮ੍ਮਤਾਤਾ’’ਤਿ ਵਤ੍ਵਾ ਪਰਿਵਤ੍ਤਿਤ੍ਵਾ ਨਿਪਜ੍ਜਿ. ਅਥਸ੍ਸ ਪਿਤਰਂ ਕਣ੍ਹਦੀਪਾਯਨੋ ਆਹ – ‘‘ਮਯਾ ਤਾਵ ਮਮ ਬਲਂ ਕਤਂ, ਤ੍ਵਮ੍ਪਿ ਅਤ੍ਤਨੋ ਬਲਂ ਕਰੋਹੀ’’ਤਿ. ਸੋ ‘‘ਅਹਮ੍ਪਿ ਸਚ੍ਚਕਿਰਿਯਂ ਕਰਿਸ੍ਸਾਮੀ’’ਤਿ ਪੁਤ੍ਤਸ੍ਸ ਉਰੇ ਹਤ੍ਥਂ ਠਪੇਤ੍ਵਾ ਦੁਤਿਯਂ ਗਾਥਮਾਹ –

੬੩.

‘‘ਯਸ੍ਮਾ ਦਾਨਂ ਨਾਭਿਨਨ੍ਦਿਂ ਕਦਾਚਿ, ਦਿਸ੍ਵਾਨਹਂ ਅਤਿਥਿਂ ਵਾਸਕਾਲੇ;

ਨ ਚਾਪਿ ਮੇ ਅਪ੍ਪਿਯਤਂ ਅਵੇਦੁਂ, ਬਹੁਸ੍ਸੁਤਾ ਸਮਣਬ੍ਰਾਹ੍ਮਣਾ ਚ;

ਅਕਾਮਕੋਵਾਪਿ ਅਹਂ ਦਦਾਮਿ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ;

ਹਤਂ ਵਿਸਂ ਜੀਵਤੁ ਯਞ੍ਞਦਤ੍ਤੋ’’ਤਿ.

ਤਤ੍ਥ ਵਾਸਕਾਲੇਤਿ ਵਸਨਤ੍ਥਾਯ ਗੇਹਂ ਆਗਤਕਾਲੇ. ਨ ਚਾਪਿ ਮੇ ਅਪ੍ਪਿਯਤਂ ਅਵੇਦੁਨ੍ਤਿ ਬਹੁਸ੍ਸੁਤਾਪਿ ਸਮਣਬ੍ਰਾਹ੍ਮਣਾ ‘‘ਅਯਂ ਨੇਵ ਦਾਨਂ ਅਭਿਨਨ੍ਦਤਿ ਨ ਅਮ੍ਹੇ’’ਤਿ ਇਮਂ ਮਮ ਅਪ੍ਪਿਯਭਾਵਂ ਨੇਵ ਜਾਨਿਂਸੁ. ਅਹਞ੍ਹਿ ਤੇ ਪਿਯਚਕ੍ਖੂਹਿਯੇਵ ਓਲੋਕੇਮੀਤਿ ਦੀਪੇਤਿ. ਏਤੇਨ ਸਚ੍ਚੇਨਾਤਿ ਸਚੇ ਅਹਂ ਦਾਨਂ ਦਦਮਾਨੋ ਵਿਪਾਕਂ ਅਸਦ੍ਦਹਿਤ੍ਵਾ ਅਤ੍ਤਨੋ ਅਨਿਚ੍ਛਾਯ ਦਮ੍ਮਿ, ਅਨਿਚ੍ਛਨਭਾਵਂ ਮਮ ਪਰੇ ਨ ਜਾਨਨ੍ਤਿ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੂਤਿ ਅਤ੍ਥੋ.

ਏਵਂ ਤਸ੍ਸ ਸਚ੍ਚਕਿਰਿਯਾਯ ਸਹ ਕਟਿਤੋ ਉਦ੍ਧਂ ਵਿਸਂ ਭਸ੍ਸਿਤ੍ਵਾ ਪਥਵਿਂ ਪਾਵਿਸਿ. ਕੁਮਾਰੋ ਉਟ੍ਠਾਯ ਨਿਸੀਦਿ, ਠਾਤੁਂ ਪਨ ਨ ਸਕ੍ਕੋਤਿ. ਅਥਸ੍ਸ ਪਿਤਾ ਮਾਤਰਂ ਆਹ ‘‘ਭਦ੍ਦੇ, ਮਯਾ ਅਤ੍ਤਨੋ ਬਲਂ ਕਤਂ, ਤ੍ਵਂ ਇਦਾਨਿ ਸਚ੍ਚਕਿਰਿਯਂ ਕਤ੍ਵਾ ਪੁਤ੍ਤਸ੍ਸ ਉਟ੍ਠਾਯ ਗਮਨਭਾਵਂ ਕਰੋਹੀ’’ਤਿ. ‘‘ਸਾਮਿ, ਅਤ੍ਥਿ ਮਯ੍ਹਂ ਏਕਂ ਸਚ੍ਚਂ, ਤਵ ਪਨ ਸਨ੍ਤਿਕੇ ਕਥੇਤੁਂ ਨ ਸਕ੍ਕੋਮੀ’’ਤਿ. ‘‘ਭਦ੍ਦੇ, ਯਥਾ ਤਥਾ ਮੇ ਪੁਤ੍ਤਂ ਅਰੋਗਂ ਕਰੋਹੀ’’ਤਿ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਸਚ੍ਚਂ ਕਰੋਨ੍ਤੀ ਤਤਿਯਂ ਗਾਥਮਾਹ –

੬੪.

‘‘ਆਸੀਵਿਸੋ ਤਾਤ ਪਹੂਤਤੇਜੋ, ਯੋ ਤਂ ਅਡਂਸੀ ਬਿਲਰਾ ਉਦਿਚ੍ਚ;

ਤਸ੍ਮਿਞ੍ਚ ਮੇ ਅਪ੍ਪਿਯਤਾਯ ਅਜ੍ਜ, ਪਿਤਰਞ੍ਚ ਤੇ ਨਤ੍ਥਿ ਕੋਚਿ ਵਿਸੇਸੋ;

ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ, ਹਤਂ ਵਿਸਂ ਜੀਵਤੁ ਯਞ੍ਞਦਤ੍ਤੋ’’ਤਿ.

ਤਤ੍ਥ ਤਾਤਾਤਿ ਪੁਤ੍ਤਂ ਆਲਪਤਿ. ਪਹੂਤਤੇਜੋਤਿ ਬਲਵਵਿਸੋ. ਬਿਲਰਾਤਿ ਵਿਵਰਾ, ਅਯਮੇਵ ਵਾ ਪਾਠੋ. ਉਦਿਚ੍ਚਾਤਿ ਉਟ੍ਠਹਿਤ੍ਵਾ, ਵਮ੍ਮਿਕਬਿਲਤੋ ਉਟ੍ਠਾਯਾਤਿ ਅਤ੍ਥੋ. ਪਿਤਰਞ੍ਚ ਤੇਤਿ ਪਿਤਰਿ ਚ ਤੇ. ਅਟ੍ਠਕਥਾਯਂ ਪਨ ਅਯਮੇਵ ਪਾਠੋ. ਇਦਂ ਵੁਤ੍ਤਂ ਹੋਤਿ – ‘‘ਤਾਤ, ਯਞ੍ਞਦਤ੍ਤ ਤਸ੍ਮਿਞ੍ਚ ਆਸੀਵਿਸੇ ਤਵ ਪਿਤਰਿ ਚ ਅਪ੍ਪਿਯਭਾਵੇਨ ਮਯ੍ਹਂ ਕੋਚਿ ਵਿਸੇਸੋ ਨਤ੍ਥਿ. ਤਞ੍ਚ ਪਨ ਅਪ੍ਪਿਯਭਾਵਂ ਠਪੇਤ੍ਵਾ ਅਜ੍ਜ ਮਯਾ ਕੋਚਿ ਜਾਨਾਪਿਤਪੁਬ੍ਬੋ ਨਾਮ ਨਤ੍ਥਿ, ਸਚੇ ਏਤਂ ਸਚ੍ਚਂ, ਏਤੇਨ ਸਚ੍ਚੇਨ ਤਵ ਸੋਤ੍ਥਿ ਹੋਤੂ’’ਤਿ.

ਸਹ ਚ ਸਚ੍ਚਕਿਰਿਯਾਯ ਸਬ੍ਬਂ ਵਿਸਂ ਭਸ੍ਸਿਤ੍ਵਾ ਪਥਵਿਂ ਪਾਵਿਸਿ. ਯਞ੍ਞਦਤ੍ਤੋ ਨਿਬ੍ਬਿਸੇਨ ਸਰੀਰੇਨ ਉਟ੍ਠਾਯ ਕੀਲ਼ਿਤੁਂ ਆਰਦ੍ਧੋ. ਏਵਂ ਪੁਤ੍ਤੇ ਉਟ੍ਠਿਤੇ ਮਣ੍ਡਬ੍ਯੋ ਦੀਪਾਯਨਸ੍ਸ ਅਜ੍ਝਾਸਯਂ ਪੁਚ੍ਛਨ੍ਤੋ ਚਤੁਤ੍ਥਂ ਗਾਥਮਾਹ –

੬੫.

‘‘ਸਨ੍ਤਾ ਦਨ੍ਤਾਯੇਵ ਪਰਿਬ੍ਬਜਨ੍ਤਿ, ਅਞ੍ਞਤ੍ਰ ਕਣ੍ਹਾ ਨਤ੍ਥਾਕਾਮਰੂਪਾ;

ਦੀਪਾਯਨ ਕਿਸ੍ਸ ਜਿਗੁਚ੍ਛਮਾਨੋ, ਅਕਾਮਕੋ ਚਰਸਿ ਬ੍ਰਹ੍ਮਚਰਿਯ’’ਨ੍ਤਿ.

ਤਸ੍ਸਤ੍ਥੋ – ਯੇ ਕੇਚਿ ਖਤ੍ਤਿਯਾਦਯੋ ਕਾਮੇ ਪਹਾਯ ਇਧ ਲੋਕੇ ਪਬ੍ਬਜਨ੍ਤਿ, ਤੇ ਅਞ੍ਞਤ੍ਰ ਕਣ੍ਹਾ ਭਵਨ੍ਤਂ ਕਣ੍ਹਂ ਠਪੇਤ੍ਵਾ ਅਞ੍ਞੇ ਅਕਾਮਰੂਪਾ ਨਾਮ ਨਤ੍ਥਿ, ਸਬ੍ਬੇ ਝਾਨਭਾਵਨਾਯ ਕਿਲੇਸਾਨਂ ਸਮਿਤਤ੍ਤਾ ਸਨ੍ਤਾ, ਚਕ੍ਖਾਦੀਨਿ ਦ੍ਵਾਰਾਨਿ ਯਥਾ ਨਿਬ੍ਬਿਸੇਵਨਾਨਿ ਹੋਨ੍ਤਿ, ਤਥਾ ਤੇਸਂ ਦਮਿਤਤ੍ਤਾ ਦਨ੍ਤਾ ਹੁਤ੍ਵਾ ਅਭਿਰਤਾਵ ਬ੍ਰਹ੍ਮਚਰਿਯਂ ਚਰਨ੍ਤਿ, ਤ੍ਵਂ ਪਨ ਭਨ੍ਤੇ ਦੀਪਾਯਨ, ਕਿਂਕਾਰਣਾ ਤਪਂ ਜਿਗੁਚ੍ਛਮਾਨੋ ਅਕਾਮਕੋ ਹੁਤ੍ਵਾ ਬ੍ਰਹ੍ਮਚਰਿਯਂ ਚਰਸਿ, ਕਸ੍ਮਾ ਪੁਨ ਨ ਅਗਾਰਮੇਵ ਅਜ੍ਝਾਵਸਸੀਤਿ.

ਅਥਸ੍ਸ ਸੋ ਕਾਰਣਂ ਕਥੇਨ੍ਤੋ ਪਞ੍ਚਮਂ ਗਾਥਮਾਹ –

੬੬.

‘‘ਸਦ੍ਧਾਯ ਨਿਕ੍ਖਮ੍ਮ ਪੁਨਂ ਨਿਵਤ੍ਤੋ, ਸੋ ਏਲ਼ਮੂਗੋਵ ਬਾਲੋ ਵਤਾਯਂ;

ਏਤਸ੍ਸ ਵਾਦਸ੍ਸ ਜਿਗੁਚ੍ਛਮਾਨੋ, ਅਕਾਮਕੋ ਚਰਾਮਿ ਬ੍ਰਹ੍ਮਚਰਿਯਂ;

ਵਿਞ੍ਞੁਪ੍ਪਸਤ੍ਥਞ੍ਚ ਸਤਞ੍ਚ ਠਾਨਂ, ਏਵਮ੍ਪਹਂ ਪੁਞ੍ਞਕਰੋ ਭਵਾਮੀ’’ਤਿ.

ਤਸ੍ਸਤ੍ਥੋ – ਕਣ੍ਹੋ ਕਮ੍ਮਞ੍ਚ ਫਲਞ੍ਚ ਸਦ੍ਦਹਿਤ੍ਵਾ ਤਾਵ ਮਹਨ੍ਤਂ ਵਿਭਵਂ ਪਹਾਯ ਅਗਾਰਾ ਨਿਕ੍ਖਮਿਤ੍ਵਾ ਯਂ ਜਹਿ, ਪੁਨ ਤਦਤ੍ਥਮੇਵ ਨਿਵਤ੍ਤੋ. ਸੋ ਅਯਂ ਏਲ਼ਮੂਗੋ ਗਾਮਦਾਰਕੋ ਵਿਯ ਬਾਲੋ ਵਤਾਤਿ ਇਮਂ ਵਾਦਂ ਜਿਗੁਚ੍ਛਮਾਨੋ ਅਹਂ ਅਤ੍ਤਨੋ ਹਿਰੋਤ੍ਤਪ੍ਪਭੇਦਭਯੇਨ ਅਨਿਚ੍ਛਮਾਨੋਪਿ ਬ੍ਰਹ੍ਮਚਰਿਯਂ ਚਰਾਮਿ. ਕਿਞ੍ਚ ਭਿਯ੍ਯੋ ਪਬ੍ਬਜ੍ਜਾਪੁਞ੍ਞਞ੍ਚ ਨਾਮੇਤਂ ਵਿਞ੍ਞੂਹਿ ਬੁਦ੍ਧਾਦੀਹਿ ਪਸਤ੍ਥਂ, ਤੇਸਂਯੇਵ ਚ ਸਤਂ ਨਿਵਾਸਟ੍ਠਾਨਂ. ਏਵਂ ਇਮਿਨਾਪਿ ਕਾਰਣੇਨ ਅਹਂ ਪੁਞ੍ਞਕਰੋ ਭਵਾਮਿ, ਅਸ੍ਸੁਮੁਖੋਪਿ ਰੁਦਮਾਨੋ ਬ੍ਰਹ੍ਮਚਰਿਯਂ ਚਰਾਮਿਯੇਵਾਤਿ.

ਏਵਂ ਸੋ ਅਤ੍ਤਨੋ ਅਜ੍ਝਾਸਯਂ ਕਥੇਤ੍ਵਾ ਪੁਨ ਮਣ੍ਡਬ੍ਯਂ ਪੁਚ੍ਛਨ੍ਤੋ ਛਟ੍ਠਂ ਗਾਥਮਾਹ –

੬੭.

‘‘ਸਮਣੇ ਤੁਵਂ ਬ੍ਰਾਹ੍ਮਣੇ ਅਦ੍ਧਿਕੇ ਚ, ਸਨ੍ਤਪ੍ਪਯਾਸਿ ਅਨ੍ਨਪਾਨੇਨ ਭਿਕ੍ਖਂ;

ਓਪਾਨਭੂਤਂਵ ਘਰਂ ਤਵ ਯਿਦਂ, ਅਨ੍ਨੇਨ ਪਾਨੇਨ ਉਪੇਤਰੂਪਂ;

ਅਥ ਕਿਸ੍ਸ ਵਾਦਸ੍ਸ ਜਿਗੁਚ੍ਛਮਾਨੋ, ਅਕਾਮਕੋ ਦਾਨਮਿਮਂ ਦਦਾਸੀ’’ਤਿ.

ਤਤ੍ਥ ਭਿਕ੍ਖਨ੍ਤਿ ਭਿਕ੍ਖਾਯ ਚਰਨ੍ਤਾਨਂ ਭਿਕ੍ਖਞ੍ਚ ਸਮ੍ਪਾਦੇਤ੍ਵਾ ਦਦਾਸਿ. ਓਪਾਨਭੂਤਂਵਾਤਿ ਚਤੁਮਹਾਪਥੇ ਖਤਸਾਧਾਰਣਪੋਕ੍ਖਰਣੀ ਵਿਯ.

ਤਤੋ ਮਣ੍ਡਬ੍ਯੋ ਅਤ੍ਤਨੋ ਅਜ੍ਝਾਸਯਂ ਕਥੇਨ੍ਤੋ ਸਤ੍ਤਮਂ ਗਾਥਮਾਹ –

੬੮.

‘‘ਪਿਤਰੋ ਚ ਮੇ ਆਸੁਂ ਪਿਤਾਮਹਾ ਚ, ਸਦ੍ਧਾ ਅਹੁਂ ਦਾਨਪਤੀ ਵਦਞ੍ਞੂ;

ਤਂ ਕੁਲ੍ਲਵਤ੍ਤਂ ਅਨੁਵਤ੍ਤਮਾਨੋ, ਮਾਹਂ ਕੁਲੇ ਅਨ੍ਤਿਮਗਨ੍ਧਨੋ ਅਹੁਂ;

ਏਤਸ੍ਸ ਵਾਦਸ੍ਸ ਜਿਗੁਚ੍ਛਮਾਨੋ, ਅਕਾਮਕੋ ਦਾਨਮਿਮਂ ਦਦਾਮੀ’’ਤਿ.

ਤਤ੍ਥ ‘‘ਆਸੁ’’ਨ੍ਤਿ ਪਦਸ੍ਸ ‘‘ਸਦ੍ਧਾ’’ਤਿ ਇਮਿਨਾ ਸਮ੍ਬਨ੍ਧੋ, ਸਦ੍ਧਾ ਅਹੇਸੁਨ੍ਤਿ ਅਤ੍ਥੋ. ਅਹੁਨ੍ਤਿ ਸਦ੍ਧਾ ਹੁਤ੍ਵਾ ਤਤੋ ਉਤ੍ਤਰਿ ਦਾਨਜੇਟ੍ਠਕਾ ਚੇਵ ‘‘ਦੇਥ ਕਰੋਥਾ’’ਤਿ ਵੁਤ੍ਤਵਚਨਸ੍ਸ ਅਤ੍ਥਜਾਨਨਕਾ ਚ ਅਹੇਸੁਂ. ਤਂ ਕੁਲ੍ਲਵਤ੍ਤਨ੍ਤਿ ਤਂ ਕੁਲਵਤ੍ਤਂ, ਅਟ੍ਠਕਥਾਯਂ ਪਨ ਅਯਮੇਵ ਪਾਠੋ. ਮਾਹਂ ਕੁਲੇ ਅਨ੍ਤਿਮਗਨ੍ਧਨੋ ਅਹੁਨ੍ਤਿ ‘‘ਅਹਂ ਅਤ੍ਤਨੋ ਕੁਲੇ ਸਬ੍ਬਪਚ੍ਛਿਮਕੋ ਚੇਵ ਕੁਲਪਲਾਪੋ ਚ ਮਾ ਅਹੁ’’ਨ੍ਤਿ ਸਲ੍ਲਕ੍ਖੇਤ੍ਵਾ ਏਤਂ ‘‘ਕੁਲਅਨ੍ਤਿਮੋ ਕੁਲਪਲਾਪੋ’’ਤਿ ਵਾਦਂ ਜਿਗੁਚ੍ਛਮਾਨੋ ਦਾਨਂ ਅਨਿਚ੍ਛਨ੍ਤੋਪਿ ਇਦਂ ਦਾਨਂ ਦਦਾਮੀਤਿ ਦੀਪੇਤਿ.

ਏਵਞ੍ਚ ਪਨ ਵਤ੍ਵਾ ਮਣ੍ਡਬ੍ਯੋ ਅਤ੍ਤਨੋ ਭਰਿਯਂ ਪੁਚ੍ਛਮਾਨੋ ਅਟ੍ਠਮਂ ਗਾਥਮਾਹ –

੬੯.

‘‘ਦਹਰਿਂ ਕੁਮਾਰਿਂ ਅਸਮਤ੍ਥਪਞ੍ਞਂ, ਯਂ ਤਾਨਯਿਂ ਞਾਤਿਕੁਲਾ ਸੁਗਤ੍ਤੇ;

ਨ ਚਾਪਿ ਮੇ ਅਪ੍ਪਿਯਤਂ ਅਵੇਦਿ, ਅਞ੍ਞਤ੍ਰ ਕਾਮਾ ਪਰਿਚਾਰਯਨ੍ਤਾ;

ਅਥ ਕੇਨ ਵਣ੍ਣੇਨ ਮਯਾ ਤੇ ਭੋਤਿ, ਸਂਵਾਸਧਮ੍ਮੋ ਅਹੁ ਏਵਰੂਪੋ’’ਤਿ.

ਤਤ੍ਥ ਅਸਮਤ੍ਥਪਞ੍ਞਨ੍ਤਿ ਕੁਟੁਮ੍ਬਂ ਵਿਚਾਰੇਤੁਂ ਅਪ੍ਪਟਿਬਲਪਞ੍ਞਂ ਅਤਿਤਰੁਣਿਞ੍ਞੇਵ ਸਮਾਨਂ. ਯਂ ਤਾਨਯਿਨ੍ਤਿ ਯਂ ਤਂ ਆਨਯਿਂ, ਅਹਂ ਦਹਰਿਮੇਵ ਸਮਾਨਂ ਤਂ ਞਾਤਿਕੁਲਤੋ ਆਨੇਸਿਨ੍ਤਿ ਵੁਤ੍ਤਂ ਹੋਤਿ. ਅਞ੍ਞਤ੍ਰ ਕਾਮਾ ਪਰਿਚਾਰਯਨ੍ਤਾਤਿ ਏਤ੍ਤਕਂ ਕਾਲਂ ਵਿਨਾ ਕਾਮੇਨ ਅਨਿਚ੍ਛਾਯ ਮਂ ਪਰਿਚਾਰਯਨ੍ਤਾਪਿ ਅਤ੍ਤਨੋ ਅਪ੍ਪਿਯਤਂ ਮਂ ਨ ਜਾਨਾਪੇਸਿ, ਸਮ੍ਪਿਯਾਯਮਾਨਰੂਪਾਵ ਪਰਿਚਰਿ. ਕੇਨ ਵਣ੍ਣੇਨਾਤਿ ਕੇਨ ਕਾਰਣੇਨ. ਭੋਤੀਤਿ ਤਂ ਆਲਪਤਿ. ਏਵਰੂਪੋਤਿ ਆਸੀਵਿਸਸਮਾਨਪਟਿਕੂਲਭਾਵੇਨ ਮਯਾ ਸਦ੍ਧਿਂ ਤਵ ਸਂਵਾਸਧਮ੍ਮੋ ਏਵਰੂਪੋ ਪਿਯਸਂਵਾਸੋ ਵਿਯ ਕਥਂ ਜਾਤੋਤਿ.

ਅਥਸ੍ਸ ਸਾ ਕਥੇਨ੍ਤੀ ਨਵਮਂ ਗਾਥਮਾਹ –

੭੦.

‘‘ਆਰਾ ਦੂਰੇ ਨਯਿਧ ਕਦਾਚਿ ਅਤ੍ਥਿ, ਪਰਮ੍ਪਰਾ ਨਾਮ ਕੁਲੇ ਇਮਸ੍ਮਿਂ;

ਤਂ ਕੁਲ੍ਲਵਤ੍ਤਂ ਅਨੁਵਤ੍ਤਮਾਨਾ, ਮਾਹਂ ਕੁਲੇ ਅਨ੍ਤਿਮਗਨ੍ਧਿਨੀ ਅਹੁਂ;

ਏਤਸ੍ਸ ਵਾਦਸ੍ਸ ਜਿਗੁਚ੍ਛਮਾਨਾ, ਅਕਾਮਿਕਾ ਪਦ੍ਧਚਰਾਮ੍ਹਿ ਤੁਯ੍ਹ’’ਨ੍ਤਿ.

ਤਤ੍ਥ ਆਰਾ ਦੂਰੇਤਿ ਅਞ੍ਞਮਞ੍ਞਵੇਵਚਨਂ. ਅਤਿਦੂਰੇਤਿ ਵਾ ਦਸ੍ਸੇਨ੍ਤੀ ਏਵਮਾਹ. ਇਧਾਤਿ ਨਿਪਾਤਮਤ੍ਤਂ, ਨ ਕਦਾਚੀਤਿ ਅਤ੍ਥੋ. ਪਰਮ੍ਪਰਾਤਿ ਪੁਰਿਸਪਰਮ੍ਪਰਾ. ਇਦਂ ਵੁਤ੍ਤਂ ਹੋਤਿ – ਸਾਮਿ, ਇਮਸ੍ਮਿਂ ਅਮ੍ਹਾਕਂ ਞਾਤਿਕੁਲੇ ਦੂਰਤੋ ਪਟ੍ਠਾਯ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ ਪੁਰਿਸਪਰਮ੍ਪਰਾ ਨਾਮ ਨ ਕਦਾਚਿ ਅਤ੍ਥਿ, ਏਕਿਤ੍ਥਿਯਾਪਿ ਸਾਮਿਕਂ ਛਡ੍ਡੇਤ੍ਵਾ ਅਞ੍ਞੋ ਪੁਰਿਸੋ ਗਹਿਤਪੁਬ੍ਬੋ ਨਾਮ ਨਤ੍ਥੀਤਿ. ਤਂ ਕੁਲ੍ਲਵਤ੍ਤਨ੍ਤਿ ਅਹਮ੍ਪਿ ਤਂ ਕੁਲਵਤ੍ਤਂ ਕੁਲਪਵੇਣਿਂ ਅਨੁਵਤ੍ਤਮਾਨਾ ਅਤ੍ਤਨੋ ਕੁਲੇ ਪਚ੍ਛਿਮਿਕਾ ਪਲਾਲਭੂਤਾ ਮਾ ਅਹੁਨ੍ਤਿ ਸਲ੍ਲਕ੍ਖੇਤ੍ਵਾ ਏਤਂ ਕੁਲਅਨ੍ਤਿਮਾ ਕੁਲਗਨ੍ਧਿਨੀਤਿ ਵਾਦਂ ਜਿਗੁਚ੍ਛਮਾਨਾ ਅਕਾਮਿਕਾਪਿ ਤੁਯ੍ਹਂ ਪਦ੍ਧਚਰਾਮ੍ਹਿ ਵੇਯ੍ਯਾਵਚ੍ਚਕਾਰਿਕਾ ਪਾਦਪਰਿਚਾਰਿਕਾ ਜਾਤਾਮ੍ਹੀਤਿ.

ਏਵਞ੍ਚ ਪਨ ਵਤ੍ਵਾ ‘‘ਮਯਾ ਸਾਮਿਕਸ੍ਸ ਸਨ੍ਤਿਕੇ ਅਭਾਸਿਤਪੁਬ੍ਬਂ ਗੁਯ੍ਹਂ ਭਾਸਿਤਂ, ਕੁਜ੍ਝੇਯ੍ਯਪਿ ਮੇ ਅਯਂ, ਅਮ੍ਹਾਕਂ ਕੁਲੂਪਕਤਾਪਸਸ੍ਸ ਸਮ੍ਮੁਖੇਯੇਵ ਖਮਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਖਮਾਪੇਨ੍ਤੀ ਦਸਮਂ ਗਾਥਮਾਹ –

੭੧.

‘‘ਮਣ੍ਡਬ੍ਯ ਭਾਸਿਂ ਯਮਭਾਸਨੇਯ੍ਯਂ, ਤਂ ਖਮ੍ਯਤਂ ਪੁਤ੍ਤਕਹੇਤੁ ਮਜ੍ਜ;

ਪੁਤ੍ਤਪੇਮਾ ਨ ਇਧ ਪਰਤ੍ਥਿ ਕਿਞ੍ਚਿ, ਸੋ ਨੋ ਅਯਂ ਜੀਵਤਿ ਯਞ੍ਞਦਤ੍ਤੋ’’ਤਿ.

ਤਤ੍ਥ ਤਂ ਖਮ੍ਯਤਨ੍ਤਿ ਤਂ ਖਮਯਤੁ. ਪੁਤ੍ਤਕਹੇਤੁ ਮਜ੍ਜਾਤਿ ਤਂ ਮਮ ਭਾਸਿਤਂ ਅਜ੍ਜ ਇਮਸ੍ਸ ਪੁਤ੍ਤਸ੍ਸ ਹੇਤੁ ਖਮਯਤੁ. ਸੋ ਨੋ ਅਯਨ੍ਤਿ ਯਸ੍ਸ ਪੁਤ੍ਤਸ੍ਸ ਕਾਰਣਾ ਮਯਾ ਏਤਂ ਭਾਸਿਤਂ, ਸੋ ਨੋ ਪੁਤ੍ਤੋ ਜੀਵਤਿ, ਇਮਸ੍ਸ ਜੀਵਿਤਲਾਭਭਾਵੇਨ ਮੇ ਖਮ ਸਾਮਿ, ਅਜ੍ਜਤੋ ਪਟ੍ਠਾਯ ਤਵ ਵਸਵਤ੍ਤਿਨੀ ਭਵਿਸ੍ਸਾਮੀਤਿ.

ਅਥ ਨਂ ਮਣ੍ਡਬ੍ਯੋ ‘‘ਉਟ੍ਠੇਹਿ ਭਦ੍ਦੇ, ਖਮਾਮਿ ਤੇ, ਇਤੋ ਪਨ ਪਟ੍ਠਾਯ ਮਾ ਫਰੁਸਚਿਤ੍ਤਾ ਅਹੋਸਿ, ਅਹਮ੍ਪਿ ਤੇ ਅਪ੍ਪਿਯਂ ਨ ਕਰਿਸ੍ਸਾਮੀ’’ਤਿ ਆਹ. ਬੋਧਿਸਤ੍ਤੋ ਮਣ੍ਡਬ੍ਯਂ ਆਹ – ‘‘ਆਵੁਸੋ, ਤਯਾ ਦੁਸ੍ਸਙ੍ਘਰਂ ਧਨਂ ਸਙ੍ਘਰਿਤ੍ਵਾ ਕਮ੍ਮਞ੍ਚ ਫਲਞ੍ਚ ਅਸਦ੍ਦਹਿਤ੍ਵਾ ਦਾਨਂ ਦਦਨ੍ਤੇਨ ਅਯੁਤ੍ਤਂ ਕਤਂ, ਇਤੋ ਪਟ੍ਠਾਯ ਦਾਨਂ ਸਦ੍ਦਹਿਤ੍ਵਾ ਦੇਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਬੋਧਿਸਤ੍ਤਂ ਆਹ – ‘‘ਭਨ੍ਤੇ, ਤਯਾ ਅਮ੍ਹਾਕਂ ਦਕ੍ਖਿਣੇਯ੍ਯਭਾਵੇ ਠਤ੍ਵਾ ਅਨਭਿਰਤੇਨ ਬ੍ਰਹ੍ਮਚਰਿਯਂ ਚਰਨ੍ਤੇਨ ਅਯੁਤ੍ਤਂ ਕਤਂ, ਇਤੋ ਪਟ੍ਠਾਯ ਇਦਾਨਿ ਯਥਾ ਤਯਿ ਕਤਕਾਰਾ ਮਹਪ੍ਫਲਾ ਹੋਨ੍ਤਿ, ਏਵਂ ਚਿਤ੍ਤਂ ਪਸਾਦੇਤ੍ਵਾ ਸੁਦ੍ਧਚਿਤ੍ਤੋ ਅਭਿਰਤੋ ਹੁਤ੍ਵਾ ਬ੍ਰਹ੍ਮਚਰਿਯਂ ਚਰਾਹੀ’’ਤਿ. ਤੇ ਮਹਾਸਤ੍ਤਂ ਵਨ੍ਦਿਤ੍ਵਾ ਉਟ੍ਠਾਯ ਅਗਮਂਸੁ. ਤਤੋ ਪਟ੍ਠਾਯ ਭਰਿਯਾ ਸਾਮਿਕੇ ਸਸ੍ਨੇਹਾ ਅਹੋਸਿ, ਮਣ੍ਡਬ੍ਯੋ ਪਸਨ੍ਨਚਿਤ੍ਤੋ ਸਦ੍ਧਾਯ ਦਾਨਂ ਅਦਾਸਿ. ਬੋਧਿਸਤ੍ਤੋ ਅਨਭਿਰਤਿਂ ਵਿਨੋਦੇਤ੍ਵਾ ਝਾਨਾਭਿਞ੍ਞਂ ਉਪ੍ਪਾਦੇਤ੍ਵਾ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤੋ ਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਮਣ੍ਡਬ੍ਯੋ ਆਨਨ੍ਦੋ ਅਹੋਸਿ, ਭਰਿਯਾ ਵਿਸਾਖਾ, ਪੁਤ੍ਤੋ ਰਾਹੁਲੋ, ਆਣਿਮਣ੍ਡਬ੍ਯੋ ਸਾਰਿਪੁਤ੍ਤੋ, ਕਣ੍ਹਦੀਪਾਯਨੋ ਪਨ ਅਹਮੇਵ ਅਹੋਸਿਨ੍ਤਿ.

ਕਣ੍ਹਦੀਪਾਯਨਜਾਤਕਵਣ੍ਣਨਾ ਛਟ੍ਠਾ.

[੪੪੫] ੭. ਨਿਗ੍ਰੋਧਜਾਤਕਵਣ੍ਣਨਾ

ਨ ਵਾਹਮੇਤਂ ਜਾਨਾਮੀਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਭਿਕ੍ਖੂ ਤੇਨ ‘‘ਆਵੁਸੋ ਦੇਵਦਤ੍ਤ, ਸਤ੍ਥਾ ਤਵ ਬਹੂਪਕਾਰੋ, ਤ੍ਵਞ੍ਹਿ ਸਤ੍ਥਾਰਂ ਨਿਸ੍ਸਾਯ ਪਬ੍ਬਜ੍ਜਂ ਲਭਿ ਉਪਸਮ੍ਪਦਂ ਲਭਿ, ਤੇਪਿਟਕਂ ਬੁਦ੍ਧਵਚਨਂ ਉਗ੍ਗਣ੍ਹਿ, ਝਾਨਂ ਉਪ੍ਪਾਦੇਸਿ, ਲਾਭਸਕ੍ਕਾਰੋਪਿ ਤੇ ਦਸਬਲਸ੍ਸੇਵ ਸਨ੍ਤਕੋ’’ਤਿ ਭਿਕ੍ਖੂਹਿ ਵੁਤ੍ਤੇ ਤਿਣਸਲਾਕਂ ਉਕ੍ਖਿਪਿਤ੍ਵਾ ‘‘ਏਤ੍ਤਕਮ੍ਪਿ ਸਮਣੇਨ ਗੋਤਮੇਨ ਮਯ੍ਹਂ ਕਤਂ ਗੁਣਂ ਨ ਪਸ੍ਸਾਮੀ’’ਤਿ ਵੁਤ੍ਤੇ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਅਕਤਞ੍ਞੂ ਮਿਤ੍ਤਦੁਬ੍ਭੀ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਰਾਜਗਹੇ ਮਗਧਮਹਾਰਾਜਾ ਨਾਮ ਰਜ੍ਜਂ ਕਾਰੇਸਿ. ਤਦਾ ਰਾਜਗਹਸੇਟ੍ਠਿ ਅਤ੍ਤਨੋ ਪੁਤ੍ਤਸ੍ਸ ਜਨਪਦਸੇਟ੍ਠਿਨੋ ਧੀਤਰਂ ਆਨੇਸਿ, ਸਾ ਵਞ੍ਝਾ ਅਹੋਸਿ. ਅਥਸ੍ਸਾ ਅਪਰਭਾਗੇ ਸਕ੍ਕਾਰੋ ਪਰਿਹਾਯਿ. ‘‘ਅਮ੍ਹਾਕਂ ਪੁਤ੍ਤਸ੍ਸ ਗੇਹੇ ਵਞ੍ਝਿਤ੍ਥਿਯਾ ਵਸਨ੍ਤਿਯਾ ਕਥਂ ਕੁਲਵਂਸੋ ਵਡ੍ਢਿਸ੍ਸਤੀ’’ਤਿ ਯਥਾ ਸਾ ਸੁਣਾਤਿ, ਏਵਮ੍ਪਿ ਕਥਂ ਸਮੁਟ੍ਠਾਪੇਨ੍ਤਿ. ਸਾ ਤਂ ਸੁਤ੍ਵਾ ‘‘ਹੋਤੁ ਗਬ੍ਭਿਨਿਆਲਯਂ ਕਤ੍ਵਾ ਏਤੇ ਵਞ੍ਚੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਅਤ੍ਥਚਾਰਿਕਂ ਧਾਤਿਂ ਆਹ ‘‘ਅਮ੍ਮ, ਗਬ੍ਭਿਨਿਯੋ ਨਾਮ ਕਿਞ੍ਚ ਕਿਞ੍ਚ ਕਰੋਨ੍ਤੀ’’ਤਿ ਗਬ੍ਭਿਨਿਪਰਿਹਾਰਂ ਪੁਚ੍ਛਿਤ੍ਵਾ ਉਤੁਨਿਕਾਲੇ ਪਟਿਚ੍ਛਾਦੇਤ੍ਵਾ ਅਮ੍ਬਿਲਾਦਿਰੁਚਿਕਾ ਹੁਤ੍ਵਾ ਹਤ੍ਥਪਾਦਾਨਂ ਉਦ੍ਧੁਮਾਯਨਕਾਲੇ ਹਤ੍ਥਪਾਦਪਿਟ੍ਠਿਯੋ ਕੋਟ੍ਟਾਪੇਤ੍ਵਾ ਬਹਲਂ ਕਾਰੇਸਿ, ਦਿਵਸੇ ਦਿਵਸੇਪਿ ਪਿਲੋਤਿਕਾਵੇਠਨੇਨ ਚ ਉਦਰਵਡ੍ਢਨਂ ਵਡ੍ਢੇਸਿ, ਥਨਮੁਖਾਨਿ ਕਾਲ਼ਾਨਿ ਕਾਰੇਸਿ, ਸਰੀਰਕਿਚ੍ਚਂ ਕਰੋਨ੍ਤੀਪਿ ਅਞ੍ਞਤ੍ਰ ਤਸ੍ਸਾ ਧਾਤਿਯਾ ਅਞ੍ਞੇਸਂ ਸਮ੍ਮੁਖਟ੍ਠਾਨੇ ਨ ਕਰੋਤਿ. ਸਾਮਿਕੋਪਿਸ੍ਸਾ ਗਬ੍ਭਪਰਿਹਾਰਂ ਅਦਾਸਿ. ਏਵਂ ਨਵ ਮਾਸੇ ਵਸਿਤ੍ਵਾ ‘‘ਇਦਾਨਿ ਜਨਪਦੇ ਪਿਤੁ ਘਰਂ ਗਨ੍ਤ੍ਵਾ ਵਿਜਾਯਿਸ੍ਸਾਮੀ’’ਤਿ ਸਸੁਰੇ ਆਪੁਚ੍ਛਿਤ੍ਵਾ ਰਥਮਾਰੁਹਿਤ੍ਵਾ ਮਹਨ੍ਤੇਨ ਪਰਿਵਾਰੇਨ ਰਾਜਗਹਾ ਨਿਕ੍ਖਮਿਤ੍ਵਾ ਮਗ੍ਗਂ ਪਟਿਪਜ੍ਜਿ. ਤਸ੍ਸਾ ਪਨ ਪੁਰਤੋ ਏਕੋ ਸਤ੍ਥੋ ਗਚ੍ਛਤਿ. ਸਤ੍ਥੇਨ ਵਸਿਤ੍ਵਾ ਗਤਟ੍ਠਾਨਂ ਏਸਾ ਪਾਤਰਾਸਕਾਲੇ ਪਾਪੁਣਾਤਿ.

ਅਥੇਕਦਿਵਸਂ ਤਸ੍ਮਿਂ ਸਤ੍ਥੇ ਏਕਾ ਦੁਗ੍ਗਤਿਤ੍ਥੀ ਰਤ੍ਤਿਯਾ ਏਕਸ੍ਮਿਂ ਨਿਗ੍ਰੋਧਮੂਲੇ ਪੁਤ੍ਤਂ ਵਿਜਾਯਿਤ੍ਵਾ ਪਾਤੋਵ ਸਤ੍ਥੇ ਗਚ੍ਛਨ੍ਤੇ ‘‘ਅਹਂ ਵਿਨਾ ਸਤ੍ਥੇਨ ਗਨ੍ਤੁਂ ਨ ਸਕ੍ਖਿਸ੍ਸਾਮਿ, ਸਕ੍ਕਾ ਖੋ ਪਨ ਜੀਵਨ੍ਤਿਯਾ ਪੁਤ੍ਤਂ ਲਭਿਤੁ’’ਨ੍ਤਿ ਨਿਗ੍ਰੋਧਮੂਲਜਾਲੇ ਜਲਾਬੁਞ੍ਚੇਵ ਗਬ੍ਭਮਲਞ੍ਚ ਅਤ੍ਥਰਿਤ੍ਵਾ ਪੁਤ੍ਤਂ ਛਟ੍ਟੇਤ੍ਵਾ ਅਗਮਾਸਿ. ਦਾਰਕਸ੍ਸਪਿ ਦੇਵਤਾ ਆਰਕ੍ਖਂ ਗਣ੍ਹਿਂਸੁ. ਸੋ ਹਿ ਨ ਯੋ ਵਾ ਸੋ ਵਾ, ਬੋਧਿਸਤ੍ਤੋਯੇਵ. ਸੋ ਪਨ ਤਦਾ ਤਾਦਿਸਂ ਪਟਿਸਨ੍ਧਿਂ ਗਣ੍ਹਿ. ਇਤਰਾ ਪਾਤਰਾਸਕਾਲੇ ਤਂ ਠਾਨਂ ਪਤ੍ਵਾ ‘‘ਸਰੀਰਕਿਚ੍ਚਂ ਕਰਿਸ੍ਸਾਮੀ’’ਤਿ ਤਾਯ ਧਾਤਿਯਾ ਸਦ੍ਧਿਂ ਨਿਗ੍ਰੋਧਮੂਲਂ ਗਤਾ ਸੁਵਣ੍ਣਵਣ੍ਣਂ ਦਾਰਕਂ ਦਿਸ੍ਵਾ ‘‘ਅਮ੍ਮ, ਨਿਪ੍ਫਨ੍ਨਂ ਨੋ ਕਿਚ੍ਚ’’ਨ੍ਤਿ ਪਿਲੋਤਿਕਾਯੋ ਅਪਨੇਤ੍ਵਾ ਉਚ੍ਛਙ੍ਗਪਦੇਸਂ ਲੋਹਿਤੇਨ ਚ ਗਬ੍ਭਮਲੇਨ ਚ ਮਕ੍ਖੇਤ੍ਵਾ ਅਤ੍ਤਨੋ ਗਬ੍ਭਵੁਟ੍ਠਾਨਂ ਆਰੋਚੇਸਿ. ਤਾਵਦੇਵ ਨਂ ਸਾਣਿਯਾ ਪਰਿਕ੍ਖਿਪਿਤ੍ਵਾ ਹਟ੍ਠਤੁਟ੍ਠੋ ਸਪਰਿਜਨੋ ਰਾਜਗਹਂ ਪਣ੍ਣਂ ਪੇਸੇਸਿ. ਅਥਸ੍ਸਾ ਸਸ੍ਸੁਸਸੁਰਾ ਵਿਜਾਤਕਾਲਤੋ ਪਟ੍ਠਾਯ ‘‘ਪਿਤੁ ਕੁਲੇ ਕਿਂ ਕਰਿਸ੍ਸਤਿ, ਇਧੇਵ ਆਗਚ੍ਛਤੂ’’ਤਿ ਪੇਸਯਿਂਸੁ. ਸਾ ਪਟਿਨਿਵਤ੍ਤਿਤ੍ਵਾ ਰਾਜਗਹਮੇਵ ਪਾਵਿਸਿ. ਤਤ੍ਥ ਤਂ ਸਮ੍ਪਟਿਚ੍ਛਿਤ੍ਵਾ ਦਾਰਕਸ੍ਸ ਨਾਮਂ ਕਰੋਨ੍ਤਾ ਨਿਗ੍ਰੋਧਮੂਲੇ ਜਾਤਤ੍ਤਾ ‘‘ਨਿਗ੍ਰੋਧਕੁਮਾਰੋ’’ਤਿ ਨਾਮਂ ਕਰਿਂਸੁ. ਤਂ ਦਿਵਸਞ੍ਞੇਵ ਅਨੁਸੇਟ੍ਠਿਸੁਣਿਸਾਪਿ ਵਿਜਾਯਨਤ੍ਥਾਯ ਕੁਲਘਰਂ ਗਚ੍ਛਨ੍ਤੀ ਅਨ੍ਤਰਾਮਗ੍ਗੇ ਏਕਿਸ੍ਸਾ ਰੁਕ੍ਖਸਾਖਾਯ ਹੇਟ੍ਠਾ ਪੁਤ੍ਤਂ ਵਿਜਾਯਿ, ਤਸ੍ਸ ‘‘ਸਾਖਕੁਮਾਰੋ’’ਤਿ ਨਾਮਂ ਕਰਿਂਸੁ. ਤਂ ਦਿਵਸਞ੍ਞੇਵ ਸੇਟ੍ਠਿਂ ਨਿਸ੍ਸਾਯ ਵਸਨ੍ਤਸ੍ਸ ਤੁਨ੍ਨਕਾਰਸ੍ਸ ਭਰਿਯਾਪਿ ਪਿਲੋਤਿਕਨ੍ਤਰੇ ਪੁਤ੍ਤਂ ਵਿਜਾਯਿ, ਤਸ੍ਸ ‘‘ਪੋਤ੍ਤਿਕੋ’’ਤਿ ਨਾਮਂ ਕਰਿਂਸੁ.

ਮਹਾਸੇਟ੍ਠਿ ਉਭੋਪਿ ਤੇ ਦਾਰਕੇ ‘‘ਨਿਗ੍ਰੋਧਕੁਮਾਰਸ੍ਸ ਜਾਤਦਿਵਸਞ੍ਞੇਵ ਜਾਤਾ’’ਤਿ ਆਣਾਪੇਤ੍ਵਾ ਤੇਨੇਵ ਸਦ੍ਧਿਂ ਸਂਵਡ੍ਢੇਸਿ. ਤੇ ਏਕਤੋ ਵਡ੍ਢਿਤ੍ਵਾ ਵਯਪ੍ਪਤ੍ਤਾ ਤਕ੍ਕਸਿਲਂ ਗਨ੍ਤ੍ਵਾ ਸਿਪ੍ਪਂ ਉਗ੍ਗਣ੍ਹਿਂਸੁ. ਉਭੋਪਿ ਸੇਟ੍ਠਿਪੁਤ੍ਤਾ ਆਚਰਿਯਸ੍ਸ ਦ੍ਵੇ ਸਹਸ੍ਸਾਨਿ ਅਦਂਸੁ. ਨਿਗ੍ਰੋਧਕੁਮਾਰੋ ਪੋਤ੍ਤਿਕਸ੍ਸ ਅਤ੍ਤਨੋ ਸਨ੍ਤਿਕੇ ਸਿਪ੍ਪਂ ਪਟ੍ਠਪੇਸਿ. ਤੇ ਨਿਪ੍ਫਨ੍ਨਸਿਪ੍ਪਾ ਆਚਰਿਯਂ ਆਪੁਚ੍ਛਿਤ੍ਵਾ ਨਿਕ੍ਖਨ੍ਤਾ ‘‘ਜਨਪਦਚਾਰਿਕਂ ਚਰਿਸ੍ਸਾਮਾ’’ਤਿ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਏਕਸ੍ਮਿਂ ਰੁਕ੍ਖਮੂਲੇ ਨਿਪਜ੍ਜਿਂਸੁ. ਤਦਾ ਬਾਰਾਣਸਿਰਞ੍ਞੋ ਕਾਲਕਤਸ੍ਸ ਸਤ੍ਤਮੋ ਦਿਵਸੋ, ‘‘ਸ੍ਵੇ ਫੁਸ੍ਸਰਥਂ ਯੋਜੇਸ੍ਸਾਮਾ’’ਤਿ ਨਗਰੇ ਭੇਰਿਂ ਚਰਾਪੇਸੁਂ. ਤੇਸੁਪਿ ਸਹਾਯੇਸੁ ਰੁਕ੍ਖਮੂਲੇ ਨਿਪਜ੍ਜਿਤ੍ਵਾ ਨਿਦ੍ਦਾਯਨ੍ਤੇਸੁ ਪੋਤ੍ਤਿਕੋ ਪਚ੍ਚੂਸਕਾਲੇ ਉਟ੍ਠਾਯ ਨਿਗ੍ਰੋਧਕੁਮਾਰਸ੍ਸ ਪਾਦੇ ਪਰਿਮਜ੍ਜਨ੍ਤੋ ਨਿਸੀਦਿ. ਤਸ੍ਮਿਂ ਰੁਕ੍ਖੇ ਵੁਤ੍ਥਕੁਕ੍ਕੁਟੇਸੁ ਉਪਰਿਕੁਕ੍ਕੁਟੋ ਹੇਟ੍ਠਾਕੁਕ੍ਕੁਟਸ੍ਸ ਸਰੀਰੇ ਵਚ੍ਚਂ ਪਾਤੇਸਿ. ਅਥ ਨਂ ਸੋ ‘‘ਕੇਨੇਤਂ ਪਾਤਿਤ’’ਨ੍ਤਿ ਆਹ. ‘‘ਸਮ੍ਮ, ਮਾ ਕੁਜ੍ਝਿ, ਮਯਾ ਅਜਾਨਨ੍ਤੇਨ ਪਾਤਿਤ’’ਨ੍ਤਿ ਆਹ. ‘‘ਅਰੇ, ਤ੍ਵਂ ਮਮ ਸਰੀਰਂ ਅਤ੍ਤਨੋ ਵਚ੍ਚਟ੍ਠਾਨਂ ਮਞ੍ਞਸਿ, ਕਿਂ ਮਮ ਪਮਾਣਂ ਨ ਜਾਨਾਸੀ’’ਤਿ. ਅਥ ਨਂ ਇਤਰੋ ‘‘ਅਰੇ ਤ੍ਵਂ ‘ਅਜਾਨਨ੍ਤੇਨ ਮੇ ਕਤ’ਨ੍ਤਿ ਵੁਤ੍ਤੇਪਿ ਕੁਜ੍ਝਸਿਯੇਵ, ਕਿਂ ਪਨ ਤੇ ਪਮਾਣ’’ਨ੍ਤਿ ਆਹ. ‘‘ਯੋ ਮਂ ਮਾਰੇਤ੍ਵਾ ਮਂਸਂ ਖਾਦਤਿ, ਸੋ ਪਾਤੋਵ ਸਹਸ੍ਸਂ ਲਭਤਿ, ਤਸ੍ਮਾ ਅਹਂ ਮਾਨਂ ਕਰੋਮੀ’’ਤਿ. ਅਥ ਨਂ ਇਤਰੋ ‘‘ਅਰੇ ਏਤ੍ਤਕਮਤ੍ਤੇਨ ਤ੍ਵਂ ਮਾਨਂ ਕਰੋਸਿ, ਮਂ ਪਨ ਮਾਰੇਤ੍ਵਾ ਯੋ ਥੂਲਮਂਸਂ ਖਾਦਤਿ, ਸੋ ਪਾਤੋਵ ਰਾਜਾ ਹੋਤਿ, ਯੋ ਮਜ੍ਝਿਮਮਂਸਂ ਖਾਦਤਿ, ਸੋ ਸੇਨਾਪਤਿ, ਯੋ ਅਟ੍ਠਿਨਿਸ੍ਸਿਤਂ ਖਾਦਤਿ, ਸੋ ਭਣ੍ਡਾਗਾਰਿਕੋ ਹੋਤੀ’’ਤਿ ਆਹ.

ਪੋਤ੍ਤਿਕੋ ਤੇਸਂ ਕਥਂ ਸੁਤ੍ਵਾ ‘‘ਕਿਂ ਨੋ ਸਹਸ੍ਸੇਨ, ਰਜ੍ਜਮੇਵ ਵਰ’’ਨ੍ਤਿ ਸਣਿਕਂ ਰੁਕ੍ਖਂ ਅਭਿਰੁਹਿਤ੍ਵਾ ਉਪਰਿਸਯਿਤਕੁਕ੍ਕੁਟਂ ਗਹੇਤ੍ਵਾ ਮਾਰੇਤ੍ਵਾ ਅਙ੍ਗਾਰੇ ਪਚਿਤ੍ਵਾ ਥੂਲਮਂਸਂ ਨਿਗ੍ਰੋਧਸ੍ਸ ਅਦਾਸਿ, ਮਜ੍ਝਿਮਮਂਸਂ ਸਾਖਸ੍ਸ ਅਦਾਸਿ, ਅਟ੍ਠਿਮਂਸਂ ਅਤ੍ਤਨਾ ਖਾਦਿ. ਖਾਦਿਤ੍ਵਾ ਪਨ ‘‘ਸਮ੍ਮ ਨਿਗ੍ਰੋਧ, ਤ੍ਵਂ ਅਜ੍ਜ ਰਾਜਾ ਭਵਿਸ੍ਸਸਿ, ਸਮ੍ਮ ਸਾਖ, ਤ੍ਵਂ ਸੇਨਾਪਤਿ ਭਵਿਸ੍ਸਸਿ, ਅਹਂ ਪਨ ਭਣ੍ਡਾਗਾਰਿਕੋ ਭਵਿਸ੍ਸਾਮੀ’’ਤਿ ਵਤ੍ਵਾ ‘‘ਕਥਂ ਜਾਨਾਸੀ’’ਤਿ ਪੁਟ੍ਠੋ ਤਂ ਪਵਤ੍ਤਿਂ ਆਰੋਚੇਸਿ. ਤੇ ਤਯੋਪਿ ਜਨਾ ਪਾਤਰਾਸਵੇਲਾਯ ਬਾਰਾਣਸਿਂ ਪਵਿਸਿਤ੍ਵਾ ਏਕਸ੍ਸ ਬ੍ਰਾਹ੍ਮਣਸ੍ਸ ਗੇਹੇ ਸਪ੍ਪਿਸਕ੍ਕਰਯੁਤ੍ਤਂ ਪਾਯਾਸਂ ਭੁਞ੍ਜਿਤ੍ਵਾ ਨਗਰਾ ਨਿਕ੍ਖਮਿਤ੍ਵਾ ਉਯ੍ਯਾਨਂ ਪਵਿਸਿਂਸੁ. ਨਿਗ੍ਰੋਧਕੁਮਾਰੋ ਸਿਲਾਪਟ੍ਟੇ ਨਿਪਜ੍ਜਿ, ਇਤਰੇ ਦ੍ਵੇ ਬਹਿ ਨਿਪਜ੍ਜਿਂਸੁ. ਤਸ੍ਮਿਂ ਸਮਯੇ ਪਞ੍ਚ ਰਾਜਕਕੁਧਭਣ੍ਡਾਨਿ ਅਨ੍ਤੋ ਠਪੇਤ੍ਵਾ ਫੁਸ੍ਸਰਥਂ ਵਿਸ੍ਸਜ੍ਜੇਸੁਂ. ਤਤ੍ਥ ਵਿਤ੍ਥਾਰਕਥਾ ਮਹਾਜਨਕਜਾਤਕੇ (ਜਾ. ੨.੨੨.੧੨੩ ਆਦਯੋ) ਆਵਿ ਭਵਿਸ੍ਸਤਿ. ਫੁਸ੍ਸਰਥੋ ਉਯ੍ਯਾਨਂ ਗਨ੍ਤ੍ਵਾ ਨਿਵਤ੍ਤਿਤ੍ਵਾ ਆਰੋਹਨਸਜ੍ਜੋ ਹੁਤ੍ਵਾ ਅਟ੍ਠਾਸਿ. ਪੁਰੋਹਿਤੋ ‘‘ਉਯ੍ਯਾਨੇ ਪੁਞ੍ਞਵਤਾ ਸਤ੍ਤੇਨ ਭਵਿਤਬ੍ਬ’’ਨ੍ਤਿ ਉਯ੍ਯਾਨਂ ਪਵਿਸਿਤ੍ਵਾ ਕੁਮਾਰਂ ਦਿਸ੍ਵਾ ਪਾਦਨ੍ਤਤੋ ਸਾਟਕਂ ਅਪਨੇਤ੍ਵਾ ਪਾਦੇਸੁ ਲਕ੍ਖਣਾਨਿ ਉਪਧਾਰੇਤ੍ਵਾ ‘‘ਤਿਟ੍ਠਤੁ ਬਾਰਾਣਸਿਯਂ ਰਜ੍ਜਂ, ਸਕਲਜਮ੍ਬੁਦੀਪਸ੍ਸ ਅਧਿਪਤਿਰਾਜਾ ਭਵਿਤੁਂ ਯੁਤ੍ਤੋ’’ਤਿ ਸਬ੍ਬਤਾਲਾਵਚਰੇ ਪਗ੍ਗਣ੍ਹਾਪੇਸਿ. ਨਿਗ੍ਰੋਧਕੁਮਾਰੋ ਪਬੁਜ੍ਝਿਤ੍ਵਾ ਮੁਖਤੋ ਸਾਟਕਂ ਅਪਨੇਤ੍ਵਾ ਮਹਾਜਨਂ ਓਲੋਕੇਤ੍ਵਾ ਪਰਿਵਤ੍ਤਿਤ੍ਵਾ ਨਿਪਨ੍ਨੋ ਥੋਕਂ ਵੀਤਿਨਾਮੇਤ੍ਵਾ ਸਿਲਾਪਟ੍ਟੇ ਪਲ੍ਲਙ੍ਕੇਨ ਨਿਸੀਦਿ. ਅਥ ਨਂ ਪੁਰੋਹਿਤੋ ਜਣ੍ਣੁਨਾ ਪਤਿਟ੍ਠਾਯ ‘‘ਰਜ੍ਜਂ ਤੇ ਦੇਵ ਪਾਪੁਣਾਤੀ’’ਤਿ ਵਤ੍ਵਾ ‘‘‘ਸਾਧੂ’’ਤਿ ਵੁਤ੍ਤੇ ਤਤ੍ਥੇਵ ਰਤਨਰਾਸਿਮ੍ਹਿ ਠਪੇਤ੍ਵਾ ਅਭਿਸਿਞ੍ਚਿ. ਸੋ ਰਜ੍ਜਂ ਪਤ੍ਵਾ ਸਾਖਸ੍ਸ ਸੇਨਾਪਤਿਟ੍ਠਾਨਂ ਦਤ੍ਵਾ ਮਹਨ੍ਤੇਨ ਸਕ੍ਕਾਰੇਨ ਨਗਰਂ ਪਾਵਿਸਿ, ਪੋਤ੍ਤਿਕੋਪਿ ਤੇਹਿ ਸਦ੍ਧਿਞ੍ਞੇਵ ਅਗਮਾਸਿ. ਤਤੋ ਪਟ੍ਠਾਯ ਮਹਾਸਤ੍ਤੋ ਬਾਰਾਣਸਿਯਂ ਧਮ੍ਮੇਨ ਰਜ੍ਜਂ ਕਾਰੇਸਿ.

ਸੋ ਏਕਦਿਵਸਂ ਮਾਤਾਪਿਤੂਨਂ ਸਰਿਤ੍ਵਾ ਸਾਖਂ ਆਹ – ‘‘ਸਮ੍ਮ, ਨ ਸਕ੍ਕਾ ਮਾਤਾਪਿਤੂਹਿ ਵਿਨਾ ਵਤ੍ਤਿਤੁਂ, ਮਹਨ੍ਤੇਨ ਪਰਿਵਾਰੇਨ ਗਨ੍ਤ੍ਵਾ ਮਾਤਾਪਿਤਰੋ ਨੋ ਆਨੇਹੀ’’ਤਿ. ਸਾਖੋ ‘‘ਨ ਮੇ ਤਤ੍ਥ ਗਮਨਕਮ੍ਮਂ ਅਤ੍ਥੀ’’ਤਿ ਪਟਿਕ੍ਖਿਪਿ. ਤਤੋ ਪੋਤ੍ਤਿਕਂ ਆਣਾਪੇਸਿ. ਸੋ ‘‘ਸਾਧੂ’’ਤਿ ਤਤ੍ਥ ਗਨ੍ਤ੍ਵਾ ਨਿਗ੍ਰੋਧਸ੍ਸ ਮਾਤਾਪਿਤਰੋ ‘‘ਪੁਤ੍ਤੋ ਵੋ ਰਜ੍ਜੇ ਪਤਿਟ੍ਠਿਤੋ, ਏਥ ਗਚ੍ਛਾਮਾ’’ਤਿ ਆਹ. ਤੇ ‘‘ਅਤ੍ਥਿ ਨੋ ਤਾਵ ਵਿਭਵਮਤ੍ਤਂ, ਅਲਂ ਤਤ੍ਥ ਗਮਨੇਨਾ’’ਤਿ ਪਟਿਕ੍ਖਿਪਿਂਸੁ. ਸਾਖਸ੍ਸਪਿ ਮਾਤਾਪਿਤਰੋ ਅਵੋਚ, ਤੇਪਿ ਨ ਇਚ੍ਛਿਂਸੁ. ਅਤ੍ਤਨੋ ਮਾਤਾਪਿਤਰੋ ਅਵੋਚ, ‘‘ਮਯਂ ਤਾਤ ਤੁਨ੍ਨਕਾਰਕਮ੍ਮੇਨ ਜੀਵਿਸ੍ਸਾਮ ਅਲ’’ਨ੍ਤਿ ਪਟਿਕ੍ਖਿਪਿਂਸੁ. ਸੋ ਤੇਸਂ ਮਨਂ ਅਲਭਿਤ੍ਵਾ ਬਾਰਾਣਸਿਮੇਵ ਪਚ੍ਚਾਗਨ੍ਤ੍ਵਾ ‘‘ਸੇਨਾਪਤਿਸ੍ਸ ਘਰੇ ਮਗ੍ਗਕਿਲਮਥਂ ਵਿਨੋਦੇਤ੍ਵਾ ਪਚ੍ਛਾ ਨਿਗ੍ਰੋਧਸਹਾਯਂ ਪਸ੍ਸਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਸ੍ਸ ਨਿਵੇਸਨਦ੍ਵਾਰਂ ਗਨ੍ਤ੍ਵਾ ‘‘ਸਹਾਯੋ ਕਿਰ ਤੇ ਪੋਤ੍ਤਿਕੋ ਨਾਮ ਆਗਤੋਤਿ ਸੇਨਾਪਤਿਸ੍ਸ ਆਰੋਚੇਹੀ’’ਤਿ ਦੋਵਾਰਿਕਂ ਆਹ, ਸੋ ਤਥਾ ਅਕਾਸਿ. ਸਾਖੋ ਪਨ ‘‘ਅਯਂ ਮਯ੍ਹਂ ਰਜ੍ਜਂ ਅਦਤ੍ਵਾ ਸਹਾਯਨਿਗ੍ਰੋਧਸ੍ਸ ਅਦਾਸੀ’’ਤਿ ਤਸ੍ਮਿਂ ਵੇਰਂ ਬਨ੍ਧਿ. ਸੋ ਤਂ ਕਥਂ ਸੁਤ੍ਵਾਵ ਕੁਦ੍ਧੋ ਆਗਨ੍ਤ੍ਵਾ ‘‘ਕੋ ਇਮਸ੍ਸ ਸਹਾਯੋ ਉਮ੍ਮਤ੍ਤਕੋ ਦਾਸਿਪੁਤ੍ਤੋ, ਗਣ੍ਹਥ ਨ’’ਨ੍ਤਿ ਵਤ੍ਵਾ ਹਤ੍ਥਪਾਦਜਣ੍ਣੁਕਪ੍ਪਰੇਹਿ ਕੋਟ੍ਟਾਪੇਤ੍ਵਾ ਗੀਵਾਯਂ ਗਾਹਾਪੇਤ੍ਵਾ ਨੀਹਰਾਪੇਸਿ.

ਸੋ ਚਿਨ੍ਤੇਸਿ ‘‘ਸਾਖੋ ਮਮ ਸਨ੍ਤਿਕਾ ਸੇਨਾਪਤਿਟ੍ਠਾਨਂ ਲਭਿਤ੍ਵਾ ਅਕਤਞ੍ਞੂ ਮਿਤ੍ਤਦੁਬ੍ਭੀ, ਮਂ ਕੋਟ੍ਟਾਪੇਤ੍ਵਾ ਨੀਹਰਾਪੇਸਿ, ਨਿਗ੍ਰੋਧੋ ਪਨ ਪਣ੍ਡਿਤੋ ਕਤਞ੍ਞੂ ਸਪ੍ਪੁਰਿਸੋ, ਤਸ੍ਸੇਵ ਸਨ੍ਤਿਕਂ ਗਮਿਸ੍ਸਾਮੀ’’ਤਿ. ਸੋ ਰਾਜਦ੍ਵਾਰਂ ਗਨ੍ਤ੍ਵਾ ‘‘ਦੇਵ, ਪੋਤ੍ਤਿਕੋ ਕਿਰ ਨਾਮ ਤੇ ਸਹਾਯੋ ਦ੍ਵਾਰੇ ਠਿਤੋ’’ਤਿ ਰਞ੍ਞੋ ਆਰੋਚਾਪੇਸਿ. ਰਾਜਾ ਪਕ੍ਕੋਸਾਪੇਤ੍ਵਾ ਤਂ ਆਗਚ੍ਛਨ੍ਤਂ ਦਿਸ੍ਵਾ ਆਸਨਾ ਵੁਟ੍ਠਾਯ ਪਚ੍ਚੁਗ੍ਗਨ੍ਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਮਸ੍ਸੁਕਮ੍ਮਾਦੀਨਿ ਕਾਰਾਪੇਤ੍ਵਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤੇਨ ਪਰਿਭੁਤ੍ਤਨਾਨਗ੍ਗਰਸਭੋਜਨੇਨ ਤੇਨ ਸਦ੍ਧਿਂ ਸੁਖਨਿਸਿਨ੍ਨੋ ਮਾਤਾਪਿਤੂਨਂ ਪਵਤ੍ਤਿਂ ਪੁਚ੍ਛਿਤ੍ਵਾ ਅਨਾਗਮਨਭਾਵਂ ਸੁਣਿ. ਸਾਖੋਪਿ ‘‘ਪੋਤ੍ਤਿਕੋ ਮਂ ਰਞ੍ਞੋ ਸਨ੍ਤਿਕੇ ਪਰਿਭਿਨ੍ਦੇਯ੍ਯ, ਮਯਿ ਪਨ ਗਤੇ ਕਿਞ੍ਚਿ ਵਤ੍ਤੁਂ ਨ ਸਕ੍ਖਿਸ੍ਸਤੀ’’ਤਿ ਤਤ੍ਥੇਵ ਅਗਮਾਸਿ. ਪੋਤ੍ਤਿਕੋ ਤਸ੍ਸ ਸਨ੍ਤਿਕੇਯੇਵ ਰਾਜਾਨਂ ਆਮਨ੍ਤੇਤ੍ਵਾ ‘‘ਦੇਵ, ਅਹਂ ਮਗ੍ਗਕਿਲਨ੍ਤੋ ‘ਸਾਖਸ੍ਸ ਗੇਹਂ ਗਨ੍ਤ੍ਵਾ ਵਿਸ੍ਸਮਿਤ੍ਵਾ ਇਧਾਗਮਿਸ੍ਸਾਮੀ’ਤਿ ਅਗਮਿਂ. ਅਥ ਮਂ ਸਾਖੋ ‘ਨਾਹਂ ਤਂ ਜਾਨਾਮੀ’ਤਿ ਵਤ੍ਵਾ ਕੋਟ੍ਟਾਪੇਤ੍ਵਾ ਗੀਵਾਯਂ ਗਾਹਾਪੇਤ੍ਵਾ ਨੀਹਰਾਪੇਸੀਤਿ ਸਦ੍ਦਹੇਯ੍ਯਾਸਿ ਤ੍ਵਂ ਏਤ’’ਨ੍ਤਿ ਵਤ੍ਵਾ ਤਿਸ੍ਸੋ ਗਾਥਾ ਅਭਾਸਿ –

੭੨.

‘‘ਨ ਵਾਹਮੇਤਂ ਜਾਨਾਮਿ, ਕੋ ਵਾਯਂ ਕਸ੍ਸ ਵਾਤਿ ਵਾ;

ਯਥਾ ਸਾਖੋ ਵਦਿ ਏਵ, ਨਿਗ੍ਰੋਧ ਕਿਨ੍ਤਿ ਮਞ੍ਞਸਿ.

੭੩.

‘‘ਤਤੋ ਗਲਵਿਨੀਤੇਨ, ਪੁਰਿਸਾ ਨੀਹਰਿਂਸੁ ਮਂ;

ਦਤ੍ਵਾ ਮੁਖਪਹਾਰਾਨਿ, ਸਾਖਸ੍ਸ ਵਚਨਂਕਰਾ.

੭੪.

‘‘ਏਤਾਦਿਸਂ ਦੁਮ੍ਮਤਿਨਾ, ਅਕਤਞ੍ਞੁਨ ਦੁਬ੍ਭਿਨਾ;

ਕਤਂ ਅਨਰਿਯਂ ਸਾਖੇਨ, ਸਖਿਨਾ ਤੇ ਜਨਾਧਿਪਾ’’ਤਿ.

ਤਤ੍ਥ ਕਿਨ੍ਤਿ ਮਞ੍ਞਸੀਤਿ ਯਥਾ ਮਂ ਸਾਖੋ ਅਚਰਿ, ਕਿਂ ਤ੍ਵਮ੍ਪਿ ਏਵਮੇਵ ਮਞ੍ਞਸਿ, ਉਦਾਹੁ ਅਞ੍ਞਥਾ ਮਞ੍ਞਸਿ, ਮਂ ਸਾਖੋ ਏਵਂ ਵਦੇਯ੍ਯਾਤਿ ਸਦ੍ਦਹਸਿ, ਤਂ ਨ ਸਦ੍ਦਹਸੀਤਿ ਅਧਿਪ੍ਪਾਯੋ. ਗਲਵਿਨੀਤੇਨਾਤਿ ਗਲਗ੍ਗਾਹੇਨ. ਦੁਬ੍ਭਿਨਾਤਿ ਮਿਤ੍ਤਦੁਬ੍ਭਿਨਾ.

ਤਂ ਸੁਤ੍ਵਾ ਨਿਗ੍ਰੋਧੋ ਚਤਸ੍ਸੋ ਗਾਥਾ ਅਭਾਸਿ –

੭੫.

‘‘ਨ ਵਾਹਮੇਤਂ ਜਾਨਾਮਿ, ਨਪਿ ਮੇ ਕੋਚਿ ਸਂਸਤਿ;

ਯਂ ਮੇ ਤ੍ਵਂ ਸਮ੍ਮ ਅਕ੍ਖਾਸਿ, ਸਾਖੇਨ ਕਾਰਣਂ ਕਤਂ.

੭੬.

‘‘ਸਖੀਨਂ ਸਾਜੀਵਕਰੋ, ਮਮ ਸਾਖਸ੍ਸ ਚੂਭਯਂ;

ਤ੍ਵਂ ਨੋਸਿਸ੍ਸਰਿਯਂ ਦਾਤਾ, ਮਨੁਸ੍ਸੇਸੁ ਮਹਨ੍ਤਤਂ;

ਤਯਾਮਾ ਲਬ੍ਭਿਤਾ ਇਦ੍ਧੀ, ਏਤ੍ਥ ਮੇ ਨਤ੍ਥਿ ਸਂਸਯੋ.

੭੭.

‘‘ਯਥਾਪਿ ਬੀਜਮਗ੍ਗਿਮ੍ਹਿ, ਡਯ੍ਹਤਿ ਨ ਵਿਰੂਹਤਿ;

ਏਵਂ ਕਤਂ ਅਸਪ੍ਪੁਰਿਸੇ, ਨਸ੍ਸਤਿ ਨ ਵਿਰੂਹਤਿ.

੭੮.

‘‘ਕਤਞ੍ਞੁਮ੍ਹਿ ਚ ਪੋਸਮ੍ਹਿ, ਸੀਲਵਨ੍ਤੇ ਅਰਿਯਵੁਤ੍ਤਿਨੇ;

ਸੁਖੇਤ੍ਤੇ ਵਿਯ ਬੀਜਾਨਿ, ਕਤਂ ਤਮ੍ਹਿ ਨ ਨਸ੍ਸਤੀ’’ਤਿ.

ਤਤ੍ਥ ਸਂਸਤੀਤਿ ਆਚਿਕ੍ਖਤਿ. ਕਾਰਣਂ ਕਤਨ੍ਤਿ ਆਕਡ੍ਢਨਵਿਕਡ੍ਢਨਪੋਥਨਕੋਟ੍ਟਨਸਙ੍ਖਾਤਂ ਕਾਰਣਂ ਕਤਨ੍ਤਿ ਅਤ੍ਥੋ. ਸਖੀਨਂ ਸਾਜੀਵਕਰੋਤਿ ਸਮ੍ਮ, ਪੋਤ੍ਤਿਕ ਤ੍ਵਂ ਸਹਾਯਕਾਨਂ ਸੁਆਜੀਵਕਰੋ ਜੀਵਿਕਾਯ ਉਪ੍ਪਾਦੇਤਾ. ਮਮ ਸਾਖਸ੍ਸ ਚੂਭਯਨ੍ਤਿ ਮਯ੍ਹਞ੍ਚ ਸਾਖਸ੍ਸ ਚ ਉਭਿਨ੍ਨਮ੍ਪਿ ਸਖੀਨਨ੍ਤਿ ਅਤ੍ਥੋ. ਤ੍ਵਂ ਨੋਸਿਸ੍ਸਰਿਯਨ੍ਤਿ ਤ੍ਵਂ ਨੋ ਅਸਿ ਇਸ੍ਸਰਿਯਂ ਦਾਤਾ, ਤਵ ਸਨ੍ਤਿਕਾ ਇਮਾ ਸਮ੍ਪਤ੍ਤੀ ਅਮ੍ਹੇਹਿ ਲਦ੍ਧਾ. ਮਹਨ੍ਤਤਨ੍ਤਿ ਮਹਨ੍ਤਭਾਵਂ.

ਏਵਞ੍ਚ ਪਨ ਵਤ੍ਵਾ ਏਤ੍ਤਕਂ ਕਥੇਨ੍ਤੇ ਨਿਗ੍ਰੋਧੇ ਸਾਖੋ ਤਤ੍ਥੇਵ ਅਟ੍ਠਾਸਿ. ਅਥ ਨਂ ਰਾਜਾ ‘‘ਸਾਖ ਇਮਂ ਪੋਤ੍ਤਿਕਂ ਸਞ੍ਜਾਨਾਸੀ’’ਤਿ ਪੁਚ੍ਛਿ. ਸੋ ਤੁਣ੍ਹੀ ਅਹੋਸਿ. ਅਥਸ੍ਸ ਰਾਜਾ ਦਣ੍ਡਂ ਆਣਾਪੇਨ੍ਤੋ ਅਟ੍ਠਮਂ ਗਾਥਮਾਹ –

੭੯.

‘‘ਇਮਂ ਜਮ੍ਮਂ ਨੇਕਤਿਕਂ, ਅਸਪ੍ਪੁਰਿਸਚਿਨ੍ਤਕਂ;

ਹਨਨ੍ਤੁ ਸਾਖਂ ਸਤ੍ਤੀਹਿ, ਨਾਸ੍ਸ ਇਚ੍ਛਾਮਿ ਜੀਵਿਤ’’ਨ੍ਤਿ.

ਤਤ੍ਥ ਜਮ੍ਮਨ੍ਤਿ ਲਾਮਕਂ. ਨੇਕਤਿਕਨ੍ਤਿ ਵਞ੍ਚਕਂ.

ਤਂ ਸੁਤ੍ਵਾ ਪੋਤ੍ਤਿਕੋ ‘‘ਮਾ ਏਸ ਬਾਲੋ ਮਂ ਨਿਸ੍ਸਾਯ ਨਸ੍ਸਤੂ’’ਤਿ ਚਿਨ੍ਤੇਤ੍ਵਾ ਨਵਮਂ ਗਾਥਮਾਹ –

੮੦.

‘‘ਖਮਤਸ੍ਸ ਮਹਾਰਾਜ, ਪਾਣਾ ਨ ਪਟਿਆਨਯਾ;

ਖਮ ਦੇਵ ਅਸਪ੍ਪੁਰਿਸਸ੍ਸ, ਨਾਸ੍ਸ ਇਚ੍ਛਾਮਹਂ ਵਧ’’ਨ੍ਤਿ.

ਤਤ੍ਥ ਖਮਤਸ੍ਸਾਤਿ ਖਮਤਂ ਅਸ੍ਸ, ਏਤਸ੍ਸ ਅਸਪ੍ਪੁਰਿਸਸ੍ਸ ਖਮਥਾਤਿ ਅਤ੍ਥੋ. ਨ ਪਟਿਆਨਯਾਤਿ ਮਤਸ੍ਸ ਨਾਮ ਪਾਣਾ ਪਟਿਆਨੇਤੁਂ ਨ ਸਕ੍ਕਾ.

ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਸਾਖਸ੍ਸ ਖਮਿ, ਸੇਨਾਪਤਿਟ੍ਠਾਨਮ੍ਪਿ ਪੋਤ੍ਤਿਕਸ੍ਸੇਵ ਦਾਤੁਕਾਮੋ ਅਹੋਸਿ, ਸੋ ਪਨ ਨ ਇਚ੍ਛਿ. ਅਥਸ੍ਸ ਸਬ੍ਬਸੇਨਾਨੀਨਂ ਵਿਚਾਰਣਾਰਹਂ ਭਣ੍ਡਾਗਾਰਿਕਟ੍ਠਾਨਂ ਨਾਮ ਅਦਾਸਿ. ਪੁਬ੍ਬੇ ਕਿਰੇਤਂ ਠਾਨਨ੍ਤਰਂ ਨਾਹੋਸਿ, ਤਤੋ ਪਟ੍ਠਾਯ ਜਾਤਂ. ਅਪਰਭਾਗੇ ਪੋਤ੍ਤਿਕੋ ਭਣ੍ਡਾਗਾਰਿਕੋ ਪੁਤ੍ਤਧੀਤਾਹਿ ਵਡ੍ਢਮਾਨੋ ਅਤ੍ਤਨੋ ਪੁਤ੍ਤਧੀਤਾਨਂ ਓਵਾਦਵਸੇਨ ਓਸਾਨਗਾਥਮਾਹ –

੮੧.

‘‘ਨਿਗ੍ਰੋਧਮੇਵ ਸੇਵੇਯ੍ਯ, ਨ ਸਾਖਮੁਪਸਂਵਸੇ;

ਨਿਗ੍ਰੋਧਸ੍ਮਿਂ ਮਤਂ ਸੇਯ੍ਯੋ, ਯਞ੍ਚੇ ਸਾਖਸ੍ਮਿ ਜੀਵਿਤ’’ਨ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਦੇਵਦਤ੍ਤੋ ਪੁਬ੍ਬੇਪਿ ਅਕਤਞ੍ਞੂਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਾਖੋ ਦੇਵਦਤ੍ਤੋ ਅਹੋਸਿ, ਪੋਤ੍ਤਿਕੋ ਆਨਨ੍ਦੋ, ਨਿਗ੍ਰੋਧੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਨਿਗ੍ਰੋਧਜਾਤਕਵਣ੍ਣਨਾ ਸਤ੍ਤਮਾ.

[੪੪੬] ੮. ਤਕ੍ਕਲਜਾਤਕਵਣ੍ਣਨਾ

ਨ ਤਕ੍ਕਲਾ ਸਨ੍ਤਿ ਨ ਆਲੁਵਾਨੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਪਿਤੁਪੋਸਕਂ ਉਪਾਸਕਂ ਆਰਬ੍ਭ ਕਥੇਸਿ. ਸੋ ਕਿਰ ਦਲਿਦ੍ਦਕੁਲੇ ਪਚ੍ਚਾਜਾਤੋ ਮਾਤਰਿ ਕਾਲਕਤਾਯ ਪਾਤੋਵ ਉਟ੍ਠਾਯ ਦਨ੍ਤਕਟ੍ਠਮੁਖੋਦਕਦਾਨਾਦੀਨਿ ਕਰੋਨ੍ਤੋ ਭਤਿਂ ਵਾ ਕਸਿਂ ਵਾ ਕਤ੍ਵਾ ਲਦ੍ਧਵਿਭਵਾਨੁਰੂਪੇਨ ਯਾਗੁਭਤ੍ਤਾਦੀਨਿ ਸਮ੍ਪਾਦੇਤ੍ਵਾ ਪਿਤਰਂ ਪੋਸੇਸਿ. ਅਥ ਨਂ ਪਿਤਾ ਆਹ – ‘‘ਤਾਤ, ਤ੍ਵਂ ਏਕਕੋਵ ਅਨ੍ਤੋ ਚ ਬਹਿ ਚ ਕਤ੍ਤਬ੍ਬਂ ਕਰੋਸਿ, ਏਕਂ ਤੇ ਕੁਲਦਾਰਿਕਂ ਆਨੇਸ੍ਸਾਮਿ, ਸਾ ਤੇ ਗੇਹੇ ਕਤ੍ਤਬ੍ਬਂ ਕਰਿਸ੍ਸਤੀ’’ਤਿ. ‘‘ਤਾਤ, ਇਤ੍ਥਿਯੋ ਨਾਮ ਘਰਂ ਆਗਤਾ ਨੇਵ ਮਯ੍ਹਂ, ਨ ਤੁਮ੍ਹਾਕਂ ਚਿਤ੍ਤਸੁਖਂ ਕਰਿਸ੍ਸਨ੍ਤਿ, ਮਾ ਏਵਰੂਪਂ ਚਿਨ੍ਤਯਿਤ੍ਥ, ਅਹਂ ਯਾਵਜੀਵਂ ਤੁਮ੍ਹੇ ਪੋਸੇਤ੍ਵਾ ਤੁਮ੍ਹਾਕਂ ਅਚ੍ਚਯੇਨ ਜਾਨਿਸ੍ਸਾਮੀ’’ਤਿ. ਅਥਸ੍ਸ ਪਿਤਾ ਅਨਿਚ੍ਛਮਾਨਸ੍ਸੇਵ ਏਕਂ ਕੁਮਾਰਿਕਂ ਆਨੇਸਿ. ਸਾ ਸਸੁਰਸ੍ਸ ਚ ਸਾਮਿਕਸ੍ਸ ਚ ਉਪਕਾਰਿਕਾ ਅਹੋਸਿ ਨੀਚਵੁਤ੍ਤਿ. ਸਾਮਿਕੋਪਿਸ੍ਸਾ ‘‘ਮਮ ਪਿਤੁ ਉਪਕਾਰਿਕਾ’’ਤਿ ਤੁਸ੍ਸਿਤ੍ਵਾ ਲਦ੍ਧਂ ਲਦ੍ਧਂ ਮਨਾਪਂ ਆਹਰਿਤ੍ਵਾ ਦੇਤਿ, ਸਾਪਿ ਤਂ ਸਸੁਰਸ੍ਸੇਵ ਉਪਨਾਮੇਸਿ. ਸਾ ਅਪਰਭਾਗੇ ਚਿਨ੍ਤੇਸਿ ‘‘ਮਯ੍ਹਂ ਸਾਮਿਕੋ ਲਦ੍ਧਂ ਲਦ੍ਧਂ ਪਿਤੁ ਅਦਤ੍ਵਾ ਮਯ੍ਹਮੇਵ ਦੇਤਿ, ਅਦ੍ਧਾ ਪਿਤਰਿ ਨਿਸ੍ਨੇਹੋ ਜਾਤੋ, ਇਮਂ ਮਹਲ੍ਲਕਂ ਏਕੇਨੁਪਾਯੇਨ ਮਮ ਸਾਮਿਕਸ੍ਸ ਪਟਿਕ੍ਕੂਲਂ ਕਤ੍ਵਾ ਗੇਹਾ ਨਿਕ੍ਕਡ੍ਢਾਪੇਸ੍ਸਾਮੀ’’ਤਿ.

ਸਾ ਤਤੋ ਪਟ੍ਠਾਯ ਉਦਕਂ ਅਤਿਸੀਤਂ ਵਾ ਅਚ੍ਚੁਣ੍ਹਂ ਵਾ, ਆਹਾਰਂ ਅਤਿਲੋਣਂ ਵਾ ਅਲੋਣਂ ਵਾ, ਭਤ੍ਤਂ ਉਤ੍ਤਣ੍ਡੁਲਂ ਵਾ ਅਤਿਕਿਲਿਨ੍ਨਂ ਵਾਤਿ ਏਵਮਾਦੀਨਿ ਤਸ੍ਸ ਕੋਧੁਪ੍ਪਤ੍ਤਿਕਾਰਣਾਨਿ ਕਤ੍ਵਾ ਤਸ੍ਮਿਂ ਕੁਜ੍ਝਨ੍ਤੇ ‘‘ਕੋ ਇਮਂ ਮਹਲ੍ਲਕਂ ਉਪਟ੍ਠਾਤੁਂ ਸਕ੍ਖਿਸ੍ਸਤੀ’’ਤਿ ਫਰੁਸਾਨਿ ਵਤ੍ਵਾ ਕਲਹਂ ਵਡ੍ਢੇਸਿ. ਤਤ੍ਥ ਤਤ੍ਥ ਖੇਲ਼ਪਿਣ੍ਡਾਦੀਨਿ ਛਡ੍ਡੇਤ੍ਵਾਪਿ ਸਾਮਿਕਂ ਉਜ੍ਝਾਪੇਸਿ ‘‘ਪਸ੍ਸ ਪਿਤੁ ਕਮ੍ਮਂ, ‘ਇਦਞ੍ਚਿਦਞ੍ਚ ਮਾ ਕਰੀ’ਤਿ ਵੁਤ੍ਤੇ ਕੁਜ੍ਝਤਿ, ਇਮਸ੍ਮਿਂ ਗੇਹੇ ਪਿਤਰਂ ਵਾ ਵਸਾਪੇਹਿ ਮਂ ਵਾ’’ਤਿ. ਅਥ ਨਂ ਸੋ ‘‘ਭਦ੍ਦੇ, ਤ੍ਵਂ ਦਹਰਾ ਯਤ੍ਥ ਕਤ੍ਥਚਿ ਜੀਵਿਤੁਂ ਸਕ੍ਖਿਸ੍ਸਸਿ, ਮਯ੍ਹਂ ਪਿਤਾ ਮਹਲ੍ਲਕੋ, ਤ੍ਵਂ ਤਸ੍ਸ ਅਸਹਨ੍ਤੀ ਇਮਮ੍ਹਾ ਗੇਹਾ ਨਿਕ੍ਖਮਾ’’ਤਿ ਆਹ. ਸਾ ਭੀਤਾ ‘‘ਇਤੋ ਪਟ੍ਠਾਯ ਏਵਂ ਨ ਕਰਿਸ੍ਸਾਮੀ’’ਤਿ ਸਸੁਰਸ੍ਸ ਪਾਦੇਸੁ ਪਤਿਤ੍ਵਾ ਖਮਾਪੇਤ੍ਵਾ ਪਕਤਿਨਿਯਾਮੇਨੇਵ ਪਟਿਜਗ੍ਗਿਤੁਂ ਆਰਭਿ. ਅਥ ਸੋ ਉਪਾਸਕੋ ਪੁਰਿਮਦਿਵਸੇਸੁ ਤਾਯ ਉਬ੍ਬਾਲ਼੍ਹੋ ਸਤ੍ਥੁ ਸਨ੍ਤਿਕਂ ਧਮ੍ਮਸ੍ਸਵਨਾਯ ਅਗਨ੍ਤ੍ਵਾ ਤਸ੍ਸਾ ਪਕਤਿਯਾ ਪਤਿਟ੍ਠਿਤਕਾਲੇ ਅਗਮਾਸਿ. ਅਥ ਨਂ ਸਤ੍ਥਾ ‘‘ਕਿਂ, ਉਪਾਸਕ, ਸਤ੍ਤਟ੍ਠ ਦਿਵਸਾਨਿ ਧਮ੍ਮਸ੍ਸਵਨਾਯ ਨਾਗਤੋਸੀ’’ਤਿ ਪੁਚ੍ਛਿ. ਸੋ ਤਂ ਕਾਰਣਂ ਕਥੇਸਿ. ਸਤ੍ਥਾ ‘‘ਇਦਾਨਿ ਤਾਵ ਤਸ੍ਸਾ ਕਥਂ ਅਗ੍ਗਹੇਤ੍ਵਾ ਪਿਤਰਂ ਨ ਨੀਹਰਾਪੇਸਿ, ਪੁਬ੍ਬੇ ਪਨ ਏਤਿਸ੍ਸਾ ਕਥਂ ਗਹੇਤ੍ਵਾ ਪਿਤਰਂ ਆਮਕਸੁਸਾਨਂ ਨੇਤ੍ਵਾ ਆਵਾਟਂ ਖਣਿਤ੍ਵਾ ਤਤ੍ਥ ਨਂ ਪਕ੍ਖਿਪਿਤ੍ਵਾ ਮਾਰਣਕਾਲੇ ਅਹਂ ਸਤ੍ਤਵਸ੍ਸਿਕੋ ਹੁਤ੍ਵਾ ਮਾਤਾਪਿਤੂਨਂ ਗੁਣਂ ਕਥੇਤ੍ਵਾ ਪਿਤੁਘਾਤਕਕਮ੍ਮਾ ਨਿਵਾਰੇਸਿਂ, ਤਦਾ ਤ੍ਵਂ ਮਮ ਕਥਂ ਸੁਤ੍ਵਾ ਤਵ ਪਿਤਰਂ ਯਾਵਜੀਵਂ ਪਟਿਜਗ੍ਗਿਤ੍ਵਾ ਸਗ੍ਗਪਰਾਯਣੋ ਜਾਤੋ, ਸ੍ਵਾਯਂ ਮਯਾ ਦਿਨ੍ਨੋ ਓਵਾਦੋ ਭਵਨ੍ਤਰਗਤਮ੍ਪਿ ਨ ਵਿਜਹਤਿ, ਇਮਿਨਾ ਕਾਰਣੇਨ ਤਸ੍ਸਾ ਕਥਂ ਅਗ੍ਗਹੇਤ੍ਵਾ ਇਦਾਨਿ ਤਯਾ ਪਿਤਾ ਨ ਨੀਹਟੋ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਅਞ੍ਞਤਰਸ੍ਮਿਂ ਕਾਸਿਗਾਮੇ ਏਕਸ੍ਸ ਕੁਲਸ੍ਸ ਘਰੇ ਏਕਪੁਤ੍ਤਕੋ ਅਹੋਸਿ ਨਾਮੇਨ ਸਵਿਟ੍ਠਕੋ ਨਾਮ. ਸੋ ਮਾਤਾਪਿਤਰੋ ਪਟਿਜਗ੍ਗਨ੍ਤੋ ਅਪਰਭਾਗੇ ਮਾਤਰਿ ਕਾਲਕਤਾਯ ਪਿਤਰਂ ਪੋਸੇਸੀਤਿ ਸਬ੍ਬਂ ਵਤ੍ਥੁ ਪਚ੍ਚੁਪ੍ਪਨ੍ਨਵਤ੍ਥੁਨਿਯਾਮੇਨੇਵ ਕਥੇਤਬ੍ਬਂ. ਅਯਂ ਪਨੇਤ੍ਥ ਵਿਸੇਸੋ. ਤਦਾ ਸਾ ਇਤ੍ਥੀ ‘‘ਪਸ੍ਸ ਪਿਤੁ ਕਮ੍ਮਂ, ‘ਇਦਞ੍ਚਿਦਞ੍ਚ ਮਾ ਕਰੀ’ਤਿ ਵੁਤ੍ਤੇ ਕੁਜ੍ਝਤੀ’’ਤਿ ਵਤ੍ਵਾ ‘‘ਸਾਮਿ, ਪਿਤਾ ਤੇ ਚਣ੍ਡੋ ਫਰੁਸੋ ਨਿਚ੍ਚਂ ਕਲਹਂ ਕਰੋਤਿ, ਜਰਾਜਿਣ੍ਣੋ ਬ੍ਯਾਧਿਪੀਲ਼ਿਤੋ ਨ ਚਿਰਸ੍ਸੇਵ ਮਰਿਸ੍ਸਤਿ, ਅਹਞ੍ਚ ਏਤੇਨ ਸਦ੍ਧਿਂ ਏਕਗੇਹੇ ਵਸਿਤੁਂ ਨ ਸਕ੍ਕੋਮਿ, ਸਯਮ੍ਪੇਸ ਕਤਿਪਾਹੇਨ ਮਰਿਸ੍ਸਤਿਯੇਵ, ਤ੍ਵਂ ਏਤਂ ਆਮਕਸੁਸਾਨਂ ਨੇਤ੍ਵਾ ਆਵਾਟਂ ਖਣਿਤ੍ਵਾ ਤਤ੍ਥ ਨਂ ਪਕ੍ਖਿਪਿਤ੍ਵਾ ਕੁਦ੍ਦਾਲੇਨ ਸੀਸਂ ਛਿਨ੍ਦਿਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਉਪਰਿ ਪਂਸੁਨਾ ਛਾਦੇਤ੍ਵਾ ਆਗਚ੍ਛਾਹੀ’’ਤਿ ਆਹ. ਸੋ ਤਾਯ ਪੁਨਪ੍ਪੁਨਂ ਵੁਚ੍ਚਮਾਨੋ ‘‘ਭਦ੍ਦੇ, ਪੁਰਿਸਮਾਰਣਂ ਨਾਮ ਭਾਰਿਯਂ, ਕਥਂ ਨਂ ਮਾਰੇਸ੍ਸਾਮੀ’’ਤਿ ਆਹ. ‘‘ਅਹਂ ਤੇ ਉਪਾਯਂ ਆਚਿਕ੍ਖਿਸ੍ਸਾਮੀ’’ਤਿ. ‘‘ਆਚਿਕ੍ਖ ਤਾਵਾ’’ਤਿ. ‘‘ਸਾਮਿ, ਤ੍ਵਂ ਪਚ੍ਚੂਸਕਾਲੇ ਪਿਤੁ ਨਿਸਿਨ੍ਨਟ੍ਠਾਨਂ ਗਨ੍ਤ੍ਵਾ ਯਥਾ ਸਬ੍ਬੇ ਸੁਣਨ੍ਤਿ, ਏਵਂ ਮਹਾਸਦ੍ਦਂ ਕਤ੍ਵਾ ‘ਤਾਤ, ਅਸੁਕਗਾਮੇ ਤੁਮ੍ਹਾਕਂ ਉਦ੍ਧਾਰਣਕੋ ਅਤ੍ਥਿ, ਮਯਿ ਗਤੇ ਨ ਦੇਤਿ, ਤੁਮ੍ਹਾਕਂ ਅਚ੍ਚਯੇਨ ਨ ਦਸ੍ਸਤੇਵ, ਸ੍ਵੇ ਯਾਨਕੇ ਨਿਸੀਦਿਤ੍ਵਾ ਪਾਤੋਵ ਗਚ੍ਛਿਸ੍ਸਾਮਾ’ਤਿ ਵਤ੍ਵਾ ਤੇਨ ਵੁਤ੍ਤਵੇਲਾਯਮੇਵ ਉਟ੍ਠਾਯ ਯਾਨਕਂ ਯੋਜੇਤ੍ਵਾ ਤਤ੍ਥ ਨਿਸੀਦਾਪੇਤ੍ਵਾ ਆਮਕਸੁਸਾਨਂ ਨੇਤ੍ਵਾ ਆਵਾਟਂ ਖਣਿਤ੍ਵਾ ਚੋਰੇਹਿ ਅਚ੍ਛਿਨ੍ਨਸਦ੍ਦਂ ਕਤ੍ਵਾ ਮਾਰੇਤ੍ਵਾ ਆਵਾਟੇ ਪਕ੍ਖਿਪਿਤ੍ਵਾ ਸੀਸਂ ਛਿਨ੍ਦਿਤ੍ਵਾ ਨ੍ਹਾਯਿਤ੍ਵਾ ਆਗਚ੍ਛਾ’’ਤਿ.

ਸਵਿਟ੍ਠਕੋ ‘‘ਅਤ੍ਥੇਸ ਉਪਾਯੋ’’ਤਿ ਤਸ੍ਸਾ ਵਚਨਂ ਸਮ੍ਪਟਿਚ੍ਛਿਤ੍ਵਾ ਯਾਨਕਂ ਗਮਨਸਜ੍ਜਂ ਅਕਾਸਿ. ਤਸ੍ਸ ਪਨੇਕੋ ਸਤ੍ਤਵਸ੍ਸਿਕੋ ਪੁਤ੍ਤੋ ਅਤ੍ਥਿ ਪਣ੍ਡਿਤੋ ਬ੍ਯਤ੍ਤੋ. ਸੋ ਮਾਤੁ ਵਚਨਂ ਸੁਤ੍ਵਾ ‘‘ਮਯ੍ਹਂ ਮਾਤਾ ਪਾਪਧਮ੍ਮਾ ਪਿਤਰਂ ਮੇ ਪਿਤੁਘਾਤਕਮ੍ਮਂ ਕਾਰੇਤਿ, ਅਹਂ ਇਮਸ੍ਸ ਪਿਤੁਘਾਤਕਮ੍ਮਂ ਕਾਤੁਂ ਨ ਦਸ੍ਸਾਮੀ’’ਤਿ ਸਣਿਕਂ ਗਨ੍ਤ੍ਵਾ ਅਯ੍ਯਕੇਨ ਸਦ੍ਧਿਂ ਨਿਪਜ੍ਜਿ. ਸਵਿਟ੍ਠਕੋਪਿ ਇਤਰਾਯ ਵੁਤ੍ਤਵੇਲਾਯ ਯਾਨਕਂ ਯੋਜੇਤ੍ਵਾ ‘‘ਏਹਿ, ਤਾਤ, ਉਦ੍ਧਾਰਂ ਸੋਧੇਸ੍ਸਾਮਾ’’ਤਿ ਪਿਤਰਂ ਯਾਨਕੇ ਨਿਸੀਦਾਪੇਸਿ. ਕੁਮਾਰੋਪਿ ਪਠਮਤਰਂ ਯਾਨਕਂ ਅਭਿਰੁਹਿ. ਸਵਿਟ੍ਠਕੋ ਤਂ ਨਿਵਾਰੇਤੁਂ ਅਸਕ੍ਕੋਨ੍ਤੋ ਤੇਨੇਵ ਸਦ੍ਧਿਂ ਆਮਕਸੁਸਾਨਂ ਗਨ੍ਤ੍ਵਾ ਪਿਤਰਞ੍ਚ ਕੁਮਾਰਕੇਨ ਸਦ੍ਧਿਂ ਏਕਮਨ੍ਤੇ ਠਪੇਤ੍ਵਾ ਸਯਂ ਓਤਰਿਤ੍ਵਾ ਕੁਦ੍ਦਾਲਪਿਟਕਂ ਆਦਾਯ ਏਕਸ੍ਮਿਂ ਪਟਿਚ੍ਛਨ੍ਨਟ੍ਠਾਨੇ ਚਤੁਰਸ੍ਸਾਵਾਟਂ ਖਣਿਤੁਂ ਆਰਭਿ. ਕੁਮਾਰਕੋ ਓਤਰਿਤ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਜਾਨਨ੍ਤੋ ਵਿਯ ਕਥਂ ਸਮੁਟ੍ਠਾਪੇਤ੍ਵਾ ਪਠਮਂ ਗਾਥਮਾਹ –

੮੨.

‘‘ਨ ਤਕ੍ਕਲਾ ਸਨ੍ਤਿ ਨ ਆਲੁਵਾਨਿ, ਨ ਬਿਲ਼ਾਲਿਯੋ ਨ ਕਲ਼ਮ੍ਬਾਨਿ ਤਾਤ;

ਏਕੋ ਅਰਞ੍ਞਮ੍ਹਿ ਸੁਸਾਨਮਜ੍ਝੇ, ਕਿਮਤ੍ਥਿਕੋ ਤਾਤ ਖਣਾਸਿ ਕਾਸੁ’’ਨ੍ਤਿ.

ਤਤ੍ਥ ਨ ਤਕ੍ਕਲਾ ਸਨ੍ਤੀਤਿ ਪਿਣ੍ਡਾਲੁਕਨ੍ਦਾ ਨ ਸਨ੍ਤਿ. ਆਲੁਵਾਨੀਤਿ ਆਲੁਵਕਨ੍ਦਾ. ਬਿਲ਼ਾਲਿਯੋਤਿ ਬਿਲ਼ਾਰਿਵਲ੍ਲਿਕਨ੍ਦਾ. ਕਲ਼ਮ੍ਬਾਨੀਤਿ ਤਾਲਕਨ੍ਦਾ.

ਅਥਸ੍ਸ ਪਿਤਾ ਦੁਤਿਯਂ ਗਾਥਮਾਹ –

੮੩.

‘‘ਪਿਤਾਮਹੋ ਤਾਤ ਸੁਦੁਬ੍ਬਲੋ ਤੇ, ਅਨੇਕਬ੍ਯਾਧੀਹਿ ਦੁਖੇਨ ਫੁਟ੍ਠੋ;

ਤਮਜ੍ਜਹਂ ਨਿਖਣਿਸ੍ਸਾਮਿ ਸੋਬ੍ਭੇ, ਨ ਹਿਸ੍ਸ ਤਂ ਜੀਵਿਤਂ ਰੋਚਯਾਮੀ’’ਤਿ.

ਤਤ੍ਥ ਅਨੇਕਬ੍ਯਾਧੀਹੀਤਿ ਅਨੇਕੇਹਿ ਬ੍ਯਾਧੀਹਿ ਉਪ੍ਪਨ੍ਨੇਨ ਦੁਕ੍ਖੇਨ ਫੁਟ੍ਠੋ. ਨ ਹਿਸ੍ਸ ਤਨ੍ਤਿ ਅਹਞ੍ਹਿ ਤਸ੍ਸ ਤਵ ਪਿਤਾਮਹਸ੍ਸ ਤਂ ਦੁਜ੍ਜੀਵਿਤਂ ਨ ਇਚ੍ਛਾਮਿ, ‘‘ਏਵਰੂਪਾ ਜੀਵਿਤਾ ਮਰਣਮੇਵਸ੍ਸ ਵਰ’’ਨ੍ਤਿ ਮਞ੍ਞਮਾਨੋ ਤਂ ਸੋਬ੍ਭੇ ਨਿਖਣਿਸ੍ਸਾਮੀਤਿ.

ਤਂ ਸੁਤ੍ਵਾ ਕੁਮਾਰੋ ਉਪਡ੍ਢਂ ਗਾਥਮਾਹ –

੮੪.

‘‘ਸਙ੍ਕਪ੍ਪਮੇਤਂ ਪਟਿਲਦ੍ਧ ਪਾਪਕਂ, ਅਚ੍ਚਾਹਿਤਂ ਕਮ੍ਮ ਕਰੋਸਿ ਲੁਦ੍ਦ’’ਨ੍ਤਿ.

ਤਸ੍ਸਤ੍ਥੋ – ਤਾਤ, ਤ੍ਵਂ ‘‘ਪੀਤਰਂ ਦੁਕ੍ਖਾ ਪਮੋਚੇਸ੍ਸਾਮੀ’’ਤਿ ਮਰਣਦੁਕ੍ਖੇਨ ਯੋਜੇਨ੍ਤੋ ਏਤਂ ਪਾਪਕਂ ਸਙ੍ਕਪ੍ਪਂ ਪਟਿਲਦ੍ਧਾ ਤਸ੍ਸ ਚ ਸਙ੍ਕਪ੍ਪਵਸੇਨ ਹਿਤਂ ਅਤਿਕ੍ਕਮ੍ਮ ਠਿਤਤ੍ਤਾ ਅਚ੍ਚਾਹਿਤਂ ਕਮ੍ਮਂ ਕਰੋਸਿ ਲੁਦ੍ਦਨ੍ਤਿ.

ਏਵਞ੍ਚ ਪਨ ਵਤ੍ਵਾ ਕੁਮਾਰੋ ਪਿਤੁ ਹਤ੍ਥਤੋ ਕੁਦ੍ਦਾਲਂ ਗਹੇਤ੍ਵਾ ਅਵਿਦੂਰੇ ਅਞ੍ਞਤਰਂ ਆਵਾਟਂ ਖਣਿਤੁਂ ਆਰਭਿ. ਅਥ ਨਂ ਪਿਤਾ ਉਪਸਙ੍ਕਮਿਤ੍ਵਾ ‘‘ਕਸ੍ਮਾ, ਤਾਤ, ਆਵਾਟਂ ਖਣਸੀ’’ਤਿ ਪੁਚ੍ਛਿ. ਸੋ ਤਸ੍ਸ ਕਥੇਨ੍ਤੋ ਤਤਿਯਂ ਗਾਥਮਾਹ –

‘‘ਮਯਾਪਿ ਤਾਤ ਪਟਿਲਚ੍ਛਸੇ ਤੁਵਂ, ਏਤਾਦਿਸਂ ਕਮ੍ਮ ਜਰੂਪਨੀਤੋ;

ਤਂ ਕੁਲ੍ਲਵਤ੍ਤਂ ਅਨੁਵਤ੍ਤਮਾਨੋ, ਅਹਮ੍ਪਿ ਤਂ ਨਿਖਣਿਸ੍ਸਾਮਿ ਸੋਬ੍ਭੇ’’ਤਿ.

ਤਸ੍ਸਤ੍ਥੋ – ਤਾਤ, ਅਹਮ੍ਪਿ ਏਤਸ੍ਮਿਂ ਸੋਬ੍ਭੇ ਤਂ ਮਹਲ੍ਲਕਕਾਲੇ ਨਿਖਣਿਸ੍ਸਾਮਿ, ਇਤਿ ਖੋ ਤਾਤ, ਮਯਾਪਿ ਕਤੇ ਇਮਸ੍ਮਿਂ ਸੋਬ੍ਭੇ ਤੁਵਂ ਜਰੂਪਨੀਤੋ ਏਤਾਦਿਸਂ ਕਮ੍ਮਂ ਪਟਿਲਚ੍ਛਸੇ, ਯਂ ਏਤਂ ਤਯਾ ਪਵਤ੍ਤਿਤਂ ਕੁਲਵਤ੍ਤਂ, ਤਂ ਅਨੁਵਤ੍ਤਮਾਨੋ ਵਯਪ੍ਪਤ੍ਤੋ ਭਰਿਯਾਯ ਸਦ੍ਧਿਂ ਵਸਨ੍ਤੋ ਅਹਮ੍ਪਿ ਤਂ ਨਿਖਣਿਸ੍ਸਾਮਿ ਸੋਬ੍ਭੇਤਿ.

ਅਥਸ੍ਸ ਪਿਤਾ ਚਤੁਤ੍ਥਂ ਗਾਥਮਾਹ –

੮੫.

‘‘ਫਰੁਸਾਹਿ ਵਾਚਾਹਿ ਪਕੁਬ੍ਬਮਾਨੋ, ਆਸਜ੍ਜ ਮਂ ਤ੍ਵਂ ਵਦਸੇ ਕੁਮਾਰ;

ਪੁਤ੍ਤੋ ਮਮਂ ਓਰਸਕੋ ਸਮਾਨੋ, ਅਹੀਤਾਨੁਕਮ੍ਪੀ ਮਮ ਤ੍ਵਂਸਿ ਪੁਤ੍ਤਾ’’ਤਿ.

ਤਤ੍ਥ ਪਕੁਬ੍ਬਮਾਨੋਤਿ ਅਭਿਭਵਨ੍ਤੋ. ਆਸਜ੍ਜਾਤਿ ਘਟ੍ਟੇਤ੍ਵਾ.

ਏਵਂ ਵੁਤ੍ਤੇ ਪਣ੍ਡਿਤਕੁਮਾਰਕੋ ਏਕਂ ਪਟਿਵਚਨਗਾਥਂ, ਦ੍ਵੇ ਉਦਾਨਗਾਥਾਤਿ ਤਿਸ੍ਸੋ ਗਾਥਾ ਅਭਾਸਿ –

੮੬.

‘‘ਨ ਤਾਹਂ ਤਾਤ ਅਹਿਤਾਨੁਕਮ੍ਪੀ, ਹਿਤਾਨੁਕਮ੍ਪੀ ਤੇ ਅਹਮ੍ਪਿ ਤਾਤ;

ਪਾਪਞ੍ਚ ਤਂ ਕਮ੍ਮ ਪਕੁਬ੍ਬਮਾਨਂ, ਅਰਹਾਮਿ ਨੋ ਵਾਰਯਿਤੁਂ ਤਤੋ.

੮੭.

‘‘ਯੋ ਮਾਤਰਂ ਵਾ ਪਿਤਰਂ ਸਵਿਟ੍ਠ, ਅਦੂਸਕੇ ਹਿਂਸਤਿ ਪਾਪਧਮ੍ਮੋ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਅਸਂਸਯਂ ਸੋ ਨਿਰਯਂ ਉਪੇਤਿ.

੮੮.

‘‘ਯੋ ਮਾਤਰਂ ਵਾ ਪਿਤਰਂ ਸਵਿਟ੍ਠ, ਅਨ੍ਨੇਨ ਪਾਨੇਨ ਉਪਟ੍ਠਹਾਤਿ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਅਸਂਸਯਂ ਸੋ ਸੁਗਤਿਂ ਉਪੇਤੀ’’ਤਿ. –

ਇਮਂ ਪਨ ਪੁਤ੍ਤਸ੍ਸ ਧਮ੍ਮਕਥਂ ਸੁਤ੍ਵਾ ਪਿਤਾ ਅਟ੍ਠਮਂ ਗਾਥਮਾਹ –

੮੯.

‘‘ਨ ਮੇ ਤ੍ਵਂ ਪੁਤ੍ਤ ਅਹਿਤਾਨੁਕਮ੍ਪੀ, ਹਿਤਾਨੁਕਮ੍ਪੀ ਮੇ ਤ੍ਵਂਸਿ ਪੁਤ੍ਤ;

ਅਹਞ੍ਚ ਤਂ ਮਾਤਰਾ ਵੁਚ੍ਚਮਾਨੋ, ਏਤਾਦਿਸਂ ਕਮ੍ਮ ਕਰੋਮਿ ਲੁਦ੍ਦ’’ਨ੍ਤਿ.

ਤਤ੍ਥ ਅਹਞ੍ਚ ਤਂ ਮਾਤਰਾਤਿ ਅਹਞ੍ਚ ਤੇ ਮਾਤਰਾ, ਅਯਮੇਵ ਵਾ ਪਾਠੋ.

ਤਂ ਸੁਤ੍ਵਾ ਕੁਮਾਰੋ ‘‘ਤਾਤ, ਇਤ੍ਥਿਯੋ ਨਾਮ ਉਪ੍ਪਨ੍ਨੇ ਦੋਸੇ ਅਨਿਗ੍ਗਯ੍ਹਮਾਨਾ ਪੁਨਪ੍ਪੁਨਂ ਪਾਪਂ ਕਰੋਨ੍ਤਿ, ਮਮ ਮਾਤਾ ਯਥਾ ਪੁਨ ਏਵਰੂਪਂ ਨ ਕਰੋਤਿ, ਤਥਾ ਨਂ ਪਣਾਮੇਤੁਂ ਵਟ੍ਟਤੀ’’ਤਿ ਨਵਮਂ ਗਾਥਮਾਹ –

੯੦.

‘‘ਯਾ ਤੇ ਸਾ ਭਰਿਯਾ ਅਨਰਿਯਰੂਪਾ, ਮਾਤਾ ਮਮੇਸਾ ਸਕਿਯਾ ਜਨੇਤ੍ਤਿ;

ਨਿਦ੍ਧਾਪਯੇ ਤਞ੍ਚ ਸਕਾ ਅਗਾਰਾ, ਅਞ੍ਞਮ੍ਪਿ ਤੇ ਸਾ ਦੁਖਮਾਵਹੇਯ੍ਯਾ’’ਤਿ.

ਸਵਿਟ੍ਠਕੋ ਪਣ੍ਡਿਤਪੁਤ੍ਤਸ੍ਸ ਕਥਂ ਸੁਤ੍ਵਾ ਸੋਮਨਸ੍ਸਜਾਤੋ ਹੁਤ੍ਵਾ ‘‘ਗਚ੍ਛਾਮ, ਤਾਤਾ’’ਤਿ ਸਦ੍ਧਿਂ ਪੁਤ੍ਤੇਨ ਚ ਪਿਤਰਾ ਚ ਯਾਨਕੇ ਨਿਸੀਦਿਤ੍ਵਾ ਪਾਯਾਸਿ. ਸਾਪਿ ਖੋ ਅਨਾਚਾਰਾ ‘‘ਨਿਕ੍ਖਨ੍ਤਾ ਨੋ ਗੇਹਾ ਕਾਲ਼ਕਣ੍ਣੀ’’ਤਿ ਹਟ੍ਠਤੁਟ੍ਠਾ ਅਲ੍ਲਗੋਮਯੇਨ ਗੇਹਂ ਉਪਲਿਮ੍ਪੇਤ੍ਵਾ ਪਾਯਾਸਂ ਪਚਿਤ੍ਵਾ ਆਗਮਨਮਗ੍ਗਂ ਓਲੋਕੇਨ੍ਤੀ ਤੇ ਆਗਚ੍ਛਨ੍ਤੇ ਦਿਸ੍ਵਾ ‘‘ਨਿਕ੍ਖਨ੍ਤਂ ਕਾਲ਼ਕਣ੍ਣਿਂ ਪੁਨ ਗਹੇਤ੍ਵਾ ਆਗਤੋ’’ਤਿ ਕੁਜ੍ਝਿਤ੍ਵਾ ‘‘ਅਰੇ ਨਿਕਤਿਕ, ਨਿਕ੍ਖਨ੍ਤਂ ਕਾਲ਼ਕਣ੍ਣਿਂ ਪੁਨ ਆਦਾਯ ਆਗਤੋਸੀ’’ਤਿ ਪਰਿਭਾਸਿ. ਸਵਿਟ੍ਠਕੋ ਕਿਞ੍ਚਿ ਅਵਤ੍ਵਾ ਯਾਨਕਂ ਮੋਚੇਤ੍ਵਾ ‘‘ਅਨਾਚਾਰੇ ਕਿਂ ਵਦੇਸੀ’’ਤਿ ਤਂ ਸੁਕੋਟ੍ਟਿਤਂ ਕੋਟ੍ਟੇਤ੍ਵਾ ‘‘ਇਤੋ ਪਟ੍ਠਾਯ ਮਾ ਇਮਂ ਗੇਹਂ ਪਾਵਿਸੀ’’ਤਿ ਪਾਦੇ ਗਹੇਤ੍ਵਾ ਨਿਕ੍ਕਡ੍ਢਿ. ਤਤੋ ਪਿਤਰਞ੍ਚ ਪੁਤ੍ਤਞ੍ਚ ਨ੍ਹਾਪੇਤ੍ਵਾ ਸਯਮ੍ਪਿ ਨ੍ਹਾਯਿਤ੍ਵਾ ਤਯੋਪਿ ਪਾਯਾਸਂ ਪਰਿਭੁਞ੍ਜਿਂਸੁ. ਸਾਪਿ ਪਾਪਧਮ੍ਮਾ ਕਤਿਪਾਹਂ ਅਞ੍ਞਸ੍ਮਿਂ ਗੇਹੇ ਵਸਿ. ਤਸ੍ਮਿਂ ਕਾਲੇ ਪੁਤ੍ਤੋ ਪਿਤਰਂ ਆਹ – ‘‘ਤਾਤ, ਮਮ ਮਾਤਾ ਏਤ੍ਤਕੇਨ ਨ ਬੁਜ੍ਝਤਿ, ਤੁਮ੍ਹੇ ਮਮ ਮਾਤੁ ਮਙ੍ਕੁਭਾਵਕਰਣਤ੍ਥਂ ‘ਅਸੁਕਗਾਮਕੇ ਮਮ ਮਾਤੁਲਧੀਤਾ ਅਤ੍ਥਿ, ਸਾ ਮਯ੍ਹਂ ਪਿਤਰਞ੍ਚ ਪੁਤ੍ਤਞ੍ਚ ਮਞ੍ਚ ਪਟਿਜਗ੍ਗਿਸ੍ਸਤਿ, ਤਂ ਆਨੇਸ੍ਸਾਮੀ’ਤਿ ਵਤ੍ਵਾ ਮਾਲਾਗਨ੍ਧਾਦੀਨਿ ਆਦਾਯ ਯਾਨਕੇਨ ਨਿਕ੍ਖਮਿਤ੍ਵਾ ਖੇਤ੍ਤਂ ਅਨੁਵਿਚਰਿਤ੍ਵਾ ਸਾਯਂ ਆਗਚ੍ਛਥਾ’’ਤਿ. ਸੋ ਤਥਾ ਅਕਾਸਿ.

ਪਟਿਵਿਸ੍ਸਕਕੁਲੇ ਇਤ੍ਥਿਯੋ ‘‘ਸਾਮਿਕੋ ਕਿਰ ਤੇ ਅਞ੍ਞਂ ਭਰਿਯਂ ਆਨੇਤੁਂ ਅਸੁਕਗਾਮਂ ਨਾਮ ਗਤੋ’’ਤਿ ਤਸ੍ਸਾ ਆਚਿਕ੍ਖਿਂਸੁ. ਸਾ ‘‘ਦਾਨਿਮ੍ਹਿ ਨਟ੍ਠਾ, ਨਤ੍ਥਿ ਮੇ ਪੁਨ ਓਕਾਸੋ’’ਤਿ ਭੀਤਾ ਤਸਿਤਾ ਹੁਤ੍ਵਾ ‘‘ਪੁਤ੍ਤਮੇਵ ਯਾਚਿਸ੍ਸਾਮੀ’’ਤਿ ਪਣ੍ਡਿਤਪੁਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸ ਪਾਦੇਸੁ ਪਤਿਤ੍ਵਾ ‘‘ਤਾਤ, ਤਂ ਠਪੇਤ੍ਵਾ ਅਞ੍ਞੋ ਮਮ ਪਟਿਸਰਣਂ ਨਤ੍ਥਿ, ਇਤੋ ਪਟ੍ਠਾਯ ਤਵ ਪਿਤਰਞ੍ਚ ਪਿਤਾਮਹਞ੍ਚ ਅਲਙ੍ਕਤਚੇਤਿਯਂ ਵਿਯ ਪਟਿਜਗ੍ਗਿਸ੍ਸਾਮਿ, ਪੁਨ ਮਯ੍ਹਂ ਇਮਸ੍ਮਿਂ ਘਰੇ ਪਵੇਸਨਂ ਕਰੋਹੀ’’ਤਿ ਆਹ. ਸੋ ‘‘ਸਾਧੁ, ਅਮ੍ਮ, ਸਚੇ ਪੁਨ ਏਵਰੂਪਂ ਨ ਕਰਿਸ੍ਸਥ, ਕਰਿਸ੍ਸਾਮਿ, ਅਪ੍ਪਮਤ੍ਤਾ ਹੋਥਾ’’ਤਿ ਵਤ੍ਵਾ ਪਿਤੁ ਆਗਤਕਾਲੇ ਦਸਮਂ ਗਾਥਮਾਹ –

੯੧.

‘‘ਯਾ ਤੇ ਸਾ ਭਰਿਯਾ ਅਨਰਿਯਰੂਪਾ, ਮਾਤਾ ਮਮੇਸਾ ਸਕਿਯਾ ਜਨੇਤ੍ਤਿ;

ਦਨ੍ਤਾ ਕਰੇਣੂਵ ਵਸੂਪਨੀਤਾ, ਸਾ ਪਾਪਧਮ੍ਮਾ ਪੁਨਰਾਵਜਾਤੂ’’ਤਿ.

ਤਤ੍ਥ ਕਰੇਣੂਵਾਤਿ ਤਾਤ, ਇਦਾਨਿ ਸਾ ਆਨੇਞ੍ਜਕਾਰਣਂ ਕਾਰਿਕਾ ਹਤ੍ਥਿਨੀ ਵਿਯ ਦਨ੍ਤਾ ਵਸਂ ਉਪਨੀਤਾ ਨਿਬ੍ਬਿਸੇਵਨਾ ਜਾਤਾ. ਪੁਨਰਾਗਜਾਤੂਤਿ ਪੁਨ ਇਮਂ ਗੇਹਂ ਆਗਚ੍ਛਤੂਤਿ.

ਏਵਂ ਸੋ ਪਿਤੁ ਧਮ੍ਮਂ ਕਥੇਤ੍ਵਾ ਗਨ੍ਤ੍ਵਾ ਮਾਤਰਂ ਆਨੇਸਿ. ਸਾ ਸਾਮਿਕਞ੍ਚ ਸਸੁਰਞ੍ਚ ਖਮਾਪੇਤ੍ਵਾ ਤਤੋ ਪਟ੍ਠਾਯ ਦਨ੍ਤਾ ਧਮ੍ਮੇਨ ਸਮਨ੍ਨਾਗਤਾ ਹੁਤ੍ਵਾ ਸਾਮਿਕਞ੍ਚ ਸਸੁਰਞ੍ਚ ਪੁਤ੍ਤਞ੍ਚ ਪਟਿਜਗ੍ਗਿ. ਉਭੋਪਿ ਚ ਪੁਤ੍ਤਸ੍ਸ ਓਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਰਿਤ੍ਵਾ ਸਗ੍ਗਪਰਾਯਣਾ ਅਹੇਸੁਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਪਿਤੁਪੋਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਪਿਤਾ ਚ ਪੁਤ੍ਤੋ ਚ ਸੁਣਿਸਾ ਚ ਤੇਯੇਵ ਅਹੇਸੁਂ, ਪਣ੍ਡਿਤਕੁਮਾਰੋ ਪਨ ਅਹਮੇਵ ਅਹੋਸਿਨ੍ਤਿ.

ਤਕ੍ਕਲਜਾਤਕਵਣ੍ਣਨਾ ਅਟ੍ਠਮਾ.

[੪੪੭] ੯. ਮਹਾਧਮ੍ਮਪਾਲਜਾਤਕਵਣ੍ਣਨਾ

ਕਿਂ ਤੇ ਵਤਨ੍ਤਿ ਇਦਂ ਸਤ੍ਥਾ ਪਠਮਗਮਨੇਨ ਕਪਿਲਪੁਰਂ ਗਨ੍ਤ੍ਵਾ ਨਿਗ੍ਰੋਧਾਰਾਮੇ ਵਿਹਰਨ੍ਤੋ ਪਿਤੁ ਨਿਵੇਸਨੇ ਰਞ੍ਞੋ ਅਸਦ੍ਦਹਨਂ ਆਰਬ੍ਭ ਕਥੇਸਿ. ਤਦਾ ਹਿ ਸੁਦ੍ਧੋਦਨਮਹਾਰਾਜਾ ਵੀਸਤਿਸਹਸ੍ਸਭਿਕ੍ਖੁਪਰਿਵਾਰਸ੍ਸ ਭਗਵਤੋ ਅਤ੍ਤਨੋ ਨਿਵੇਸਨੇ ਯਾਗੁਖਜ੍ਜਕਂ ਦਤ੍ਵਾ ਅਨ੍ਤਰਾਭਤ੍ਤੇ ਸਮ੍ਮੋਦਨੀਯਂ ਕਥਂ ਕਥੇਨ੍ਤੋ ‘‘ਭਨ੍ਤੇ, ਤੁਮ੍ਹਾਕਂ ਪਧਾਨਕਾਲੇ ਦੇਵਤਾ ਆਗਨ੍ਤ੍ਵਾ ਆਕਾਸੇ ਠਤ੍ਵਾ ‘ਪੁਤ੍ਤੋ ਤੇ ਸਿਦ੍ਧਤ੍ਥਕੁਮਾਰੋ ਅਪ੍ਪਾਹਾਰਤਾਯ ਮਤੋ’ਤਿ ਮਯ੍ਹਂ ਆਰੋਚੇਸੁ’’ਨ੍ਤਿ ਆਹ. ਸਤ੍ਥਾਰਾ ਚ ‘‘ਸਦ੍ਦਹਿ, ਮਹਾਰਾਜਾ’’ਤਿ ਵੁਤ੍ਤੇ ‘‘ਨ ਸਦ੍ਦਹਿਂ, ਭਨ੍ਤੇ, ਆਕਾਸੇ ਠਤ੍ਵਾ ਕਥੇਨ੍ਤਿਯੋਪਿ ਦੇਵਤਾ, ‘ਮਮ ਪੁਤ੍ਤਸ੍ਸ ਬੋਧਿਤਲੇ ਬੁਦ੍ਧਤ੍ਤਂ ਅਪ੍ਪਤ੍ਵਾ ਪਰਿਨਿਬ੍ਬਾਨਂ ਨਾਮ ਨਤ੍ਥੀ’ਤਿ ਪਟਿਕ੍ਖਿਪਿ’’ਨ੍ਤਿ ਆਹ. ‘‘ਮਹਾਰਾਜ, ਪੁਬ੍ਬੇਪਿ ਤ੍ਵਂ ਮਹਾਧਮ੍ਮਪਾਲਕਾਲੇਪਿ ‘ਪੁਤ੍ਤੋ ਤੇ ਮਤੋ ਇਮਾਨਿਸ੍ਸ ਅਟ੍ਠੀਨੀ’ਤਿ ਦਸ੍ਸੇਤ੍ਵਾ ਵਦਨ੍ਤਸ੍ਸਪਿ ਦਿਸਾਪਾਮੋਕ੍ਖਾਚਰਿਯਸ੍ਸ ‘ਅਮ੍ਹਾਕਂ ਕੁਲੇ ਤਰੁਣਕਾਲੇ ਕਾਲਕਿਰਿਯਾ ਨਾਮ ਨਤ੍ਥੀ’ਤਿ ਨ ਸਦ੍ਦਹਿ, ਇਦਾਨਿ ਪਨ ਕਸ੍ਮਾ ਸਦ੍ਦਹਿਸ੍ਸਸੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਕਾਸਿਰਟ੍ਠੇ ਧਮ੍ਮਪਾਲਗਾਮੋ ਨਾਮ ਅਹੋਸਿ. ਸੋ ਧਮ੍ਮਪਾਲਕੁਲਸ੍ਸ ਵਸਨਤਾਯ ਏਤਂ ਨਾਮਂ ਲਭਿ. ਤਤ੍ਥ ਦਸਨ੍ਨਂ ਕੁਸਲਕਮ੍ਮਪਥਾਨਂ ਪਾਲਨਤੋ ‘‘ਧਮ੍ਮਪਾਲੋ’’ਤ੍ਵੇਵ ਪਞ੍ਞਾਤੋ ਬ੍ਰਾਹ੍ਮਣੋ ਪਟਿਵਸਤਿ, ਤਸ੍ਸ ਕੁਲੇ ਅਨ੍ਤਮਸੋ ਦਾਸਕਮ੍ਮਕਰਾਪਿ ਦਾਨਂ ਦੇਨ੍ਤਿ, ਸੀਲਂ ਰਕ੍ਖਨ੍ਤਿ, ਉਪੋਸਥਕਮ੍ਮਂ ਕਰੋਨ੍ਤਿ. ਤਦਾ ਬੋਧਿਸਤ੍ਤੋ ਤਸ੍ਮਿਂ ਕੁਲੇ ਨਿਬ੍ਬਤ੍ਤਿ, ‘‘ਧਮ੍ਮਪਾਲਕੁਮਾਰੋ’’ਤ੍ਵੇਵਸ੍ਸ ਨਾਮਂ ਕਰਿਂਸੁ. ਅਥ ਨਂ ਵਯਪ੍ਪਤ੍ਤਂ ਪਿਤਾ ਸਹਸ੍ਸਂ ਦਤ੍ਵਾ ਸਿਪ੍ਪੁਗ੍ਗਹਣਤ੍ਥਾਯ ਤਕ੍ਕਸਿਲਂ ਪੇਸੇਸਿ. ਸੋ ਤਤ੍ਥ ਗਨ੍ਤ੍ਵਾ ਦਿਸਾਪਾਮੋਕ੍ਖਾਚਰਿਯਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਿ, ਪਞ੍ਚਨ੍ਨਂ ਮਾਣਵਕਸਤਾਨਂ ਜੇਟ੍ਠਨ੍ਤੇਵਾਸਿਕੋ ਅਹੋਸਿ. ਤਦਾ ਆਚਰਿਯਸ੍ਸ ਜੇਟ੍ਠਪੁਤ੍ਤੋ ਕਾਲਮਕਾਸਿ. ਆਚਰਿਯੋ ਮਾਣਵਕਪਰਿਵੁਤੋ ਞਾਤਿਗਣੇਨ ਸਦ੍ਧਿਂ ਰੋਦਨ੍ਤੋ ਕਨ੍ਦਨ੍ਤੋ ਸੁਸਾਨੇ ਤਸ੍ਸ ਸਰੀਰਕਿਚ੍ਚਂ ਕਾਰੇਤਿ. ਤਤ੍ਥ ਆਚਰਿਯੋ ਚ ਞਾਤਿਵਗ੍ਗੋ ਚਸ੍ਸ ਅਨ੍ਤੇਵਾਸਿਕਾ ਚ ਰੋਦਨ੍ਤਿ ਪਰਿਦੇਵਨ੍ਤਿ, ਧਮ੍ਮਪਾਲੋਯੇਵੇਕੋ ਨ ਰੋਦਤਿ ਨ ਪਰਿਦੇਵਤਿ. ਅਪਿਚ ਖੋ ਪਨ ਤੇਸੁ ਪਞ੍ਚਸਤੇਸੁ ਮਾਣਵੇਸੁ ਸੁਸਾਨਾ ਆਗਮ੍ਮ ਆਚਰਿਯਸ੍ਸ ਸਨ੍ਤਿਕੇ ਨਿਸੀਦਿਤ੍ਵਾ ‘‘ਅਹੋ ਏਵਰੂਪੋ ਨਾਮ ਆਚਾਰਸਮ੍ਪਨ੍ਨੋ ਤਰੁਣਮਾਣਵੋ ਤਰੁਣਕਾਲੇਯੇਵ ਮਾਤਾਪਿਤੂਹਿ ਵਿਪ੍ਪਯੁਤ੍ਤੋ ਮਰਣਪ੍ਪਤ੍ਤੋ’’ਤਿ ਵਦਨ੍ਤੇਸੁ ‘‘ਸਮ੍ਮਾ, ਤੁਮ੍ਹੇ ‘ਤਰੁਣੋ’ਤਿ ਭਣਥ, ਅਥ ਕਸ੍ਮਾ ਤਰੁਣਕਾਲੇਯੇਵ ਮਰਤਿ, ਨਨੁ ਅਯੁਤ੍ਤਂ ਤਰੁਣਕਾਲੇ ਮਰਿਤੁ’’ਨ੍ਤਿ ਆਹ.

ਅਥ ਨਂ ਤੇ ਆਹਂਸੁ ‘‘ਕਿਂ ਪਨ ਸਮ੍ਮ, ਤ੍ਵਂ ਇਮੇਸਂ ਸਤ੍ਤਾਨਂ ਮਰਣਭਾਵਂ ਨ ਜਾਨਾਸੀ’’ਤਿ? ਜਾਨਾਮਿ, ਤਰੁਣਕਾਲੇ ਪਨ ਨ ਮਰਨ੍ਤਿ, ਮਹਲ੍ਲਕਕਾਲੇਯੇਵ ਮਰਨ੍ਤੀਤਿ. ਨਨੁ ਅਨਿਚ੍ਚਾ ਸਬ੍ਬੇ ਸਙ੍ਖਾਰਾ ਹੁਤ੍ਵਾ ਅਭਾਵਿਨੋਤਿ? ‘‘ਸਚ੍ਚਂ ਅਨਿਚ੍ਚਾ, ਦਹਰਕਾਲੇ ਪਨ ਸਤ੍ਤਾ ਨ ਮਰਨ੍ਤਿ, ਮਹਲ੍ਲਕਕਾਲੇ ਮਰਨ੍ਤਿ, ਅਨਿਚ੍ਚਤਂ ਪਾਪੁਣਨ੍ਤੀ’’ਤਿ. ‘‘ਕਿਂ ਸਮ੍ਮ, ਧਮ੍ਮਪਾਲ, ਤੁਮ੍ਹਾਕਂ ਗੇਹੇ ਨ ਕੇਚਿ ਮਰਨ੍ਤੀ’’ਤਿ? ‘‘ਦਹਰਕਾਲੇ ਪਨ ਨ ਮਰਨ੍ਤਿ, ਮਹਲ੍ਲਕਕਾਲੇਯੇਵ ਮਰਨ੍ਤੀ’’ਤਿ. ‘‘ਕਿਂ ਪਨੇਸਾ ਤੁਮ੍ਹਾਕਂ ਕੁਲਪਵੇਣੀ’’ਤਿ? ‘‘ਆਮ ਕੁਲਪਵੇਣੀ’’ਤਿ. ਮਾਣਵਾ ਤਂ ਤਸ੍ਸ ਕਥਂ ਆਚਰਿਯਸ੍ਸ ਆਰੋਚੇਸੁਂ. ਅਥ ਨਂ ਸੋ ਪਕ੍ਕੋਸਾਪੇਤ੍ਵਾ ਪੁਚ੍ਛਿ ‘‘ਸਚ੍ਚਂ ਕਿਰ ਤਾਤ ਧਮ੍ਮਪਾਲ, ਤੁਮ੍ਹਾਕਂ ਕੁਲੇ ਦਹਰਕਾਲੇ ਨ ਮੀਯਨ੍ਤੀ’’ਤਿ? ‘‘ਸਚ੍ਚਂ ਆਚਰਿਯਾ’’ਤਿ. ਸੋ ਤਸ੍ਸ ਵਚਨਂ ਸੁਤ੍ਵਾ ਚਿਨ੍ਤੇਸਿ ‘‘ਅਯਂ ਅਤਿਵਿਯ ਅਚ੍ਛਰਿਯਂ ਵਦਤਿ, ਇਮਸ੍ਸ ਪਿਤੁ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਿਤ੍ਵਾ ਸਚੇ ਏਤਂ ਸਚ੍ਚਂ, ਅਹਮ੍ਪਿ ਤਮੇਵ ਧਮ੍ਮਂ ਪੂਰੇਸ੍ਸਾਮੀ’’ਤਿ. ਸੋ ਪੁਤ੍ਤਸ੍ਸ ਕਤ੍ਤਬ੍ਬਕਿਚ੍ਚਂ ਕਤ੍ਵਾ ਸਤ੍ਤਟ੍ਠਦਿਵਸਚ੍ਚਯੇਨ ਧਮ੍ਮਪਾਲਂ ਪਕ੍ਕੋਸਾਪੇਤ੍ਵਾ ‘‘ਤਾਤ, ਅਹਂ ਖਿਪ੍ਪਂ ਆਗਮਿਸ੍ਸਾਮਿ, ਯਾਵ ਮਮਾਗਮਨਾ ਇਮੇ ਮਾਣਵੇ ਸਿਪ੍ਪਂ ਵਾਚੇਹੀ’’ਤਿ ਵਤ੍ਵਾ ਏਕਸ੍ਸ ਏਲ਼ਕਸ੍ਸ ਅਟ੍ਠੀਨਿ ਗਹੇਤ੍ਵਾ ਧੋਵਿਤ੍ਵਾ ਪਸਿਬ੍ਬਕੇ ਕਤ੍ਵਾ ਏਕਂ ਚੂਲ਼ੁਪਟ੍ਠਾਕਂ ਆਦਾਯ ਤਕ੍ਕਸਿਲਤੋ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਤਂ ਗਾਮਂ ਪਤ੍ਵਾ ‘‘ਕਤਰਂ ਮਹਾਧਮ੍ਮਪਾਲਸ੍ਸ ਗੇਹ’’ਨ੍ਤਿ ਪੁਚ੍ਛਿਤ੍ਵਾ ਗਨ੍ਤ੍ਵਾ ਦ੍ਵਾਰੇ ਅਟ੍ਠਾਸਿ. ਬ੍ਰਾਹ੍ਮਣਸ੍ਸ ਦਾਸਮਨੁਸ੍ਸੇਸੁ ਯੋ ਯੋ ਪਠਮਂ ਅਦ੍ਦਸ, ਸੋ ਸੋ ਆਚਰਿਯਸ੍ਸ ਹਤ੍ਥਤੋ ਛਤ੍ਤਂ ਗਣ੍ਹਿ, ਉਪਾਹਨਂ ਗਣ੍ਹਿ, ਉਪਟ੍ਠਾਕਸ੍ਸਪਿ ਹਤ੍ਥਤੋ ਪਸਿਬ੍ਬਕਂ ਗਣ੍ਹਿ. ‘‘ਪੁਤ੍ਤਸ੍ਸ ਵੋ ਧਮ੍ਮਪਾਲਕੁਮਾਰਸ੍ਸ ਆਚਰਿਯੋ ਦ੍ਵਾਰੇ ਠਿਤੋਤਿ ਕੁਮਾਰਸ੍ਸ ਪਿਤੁ ਆਰੋਚੇਥਾ’’ਤਿ ਚ ਵੁਤ੍ਤਾ ‘‘ਸਾਧੂ’’ਤਿ ਗਨ੍ਤ੍ਵਾ ਆਰੋਚਯਿਂਸੁ. ਸੋ ਵੇਗੇਨ ਦ੍ਵਾਰਮੂਲਂ ਗਨ੍ਤ੍ਵਾ ‘‘ਇਤੋ ਏਥਾ’’ਤਿ ਤਂ ਘਰਂ ਅਭਿਨੇਤ੍ਵਾ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਸਬ੍ਬਂ ਪਾਦਧੋਵਨਾਦਿਕਿਚ੍ਚਂ ਅਕਾਸਿ.

ਆਚਰਿਯੋ ਭੁਤ੍ਤਭੋਜਨੋ ਸੁਖਕਥਾਯ ਨਿਸਿਨ੍ਨਕਾਲੇ ‘‘ਬ੍ਰਾਹ੍ਮਣ, ਪੁਤ੍ਤੋ ਤੇ ਧਮ੍ਮਪਾਲਕੁਮਾਰੋ ਪਞ੍ਞਵਾ ਤਿਣ੍ਣਂ ਵੇਦਾਨਂ ਅਟ੍ਠਾਰਸਨ੍ਨਞ੍ਚ ਸਿਪ੍ਪਾਨਂ ਨਿਪ੍ਫਤ੍ਤਿਂ ਪਤ੍ਤੋ, ਅਪਿਚ ਖੋ ਪਨੇਕੇਨ ਅਫਾਸੁਕੇਨ ਜੀਵਿਤਕ੍ਖਯਂ ਪਤ੍ਤੋ, ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ, ਮਾ ਸੋਚਿਤ੍ਥਾ’’ਤਿ ਆਹ. ਬ੍ਰਾਹ੍ਮਣੋ ਪਾਣਿਂ ਪਹਰਿਤ੍ਵਾ ਮਹਾਹਸਿਤਂ ਹਸਿ. ‘‘ਕਿਂ ਨੁ ਬ੍ਰਾਹ੍ਮਣ, ਹਸਸੀ’’ਤਿ ਚ ਵੁਤ੍ਤੇ ‘‘ਮਯ੍ਹਂ ਪੁਤ੍ਤੋ ਨ ਮਰਤਿ, ਅਞ੍ਞੋ ਕੋਚਿ ਮਤੋ ਭਵਿਸ੍ਸਤੀ’’ਤਿ ਆਹ. ‘‘ਬ੍ਰਾਹ੍ਮਣ, ਪੁਤ੍ਤੋਯੇਵ ਤੇ ਮਤੋ, ਪੁਤ੍ਤਸ੍ਸੇਵ ਤੇ ਅਟ੍ਠੀਨਿ ਦਿਸ੍ਵਾ ਸਦ੍ਦਹਾ’’ਤਿ ਅਟ੍ਠੀਨਿ ਨੀਹਰਿਤ੍ਵਾ ‘‘ਇਮਾਨਿ ਤੇ ਪੁਤ੍ਤਸ੍ਸ ਅਟ੍ਠੀਨੀ’’ਤਿ ਆਹ. ਏਤਾਨਿ ਏਲ਼ਕਸ੍ਸ ਵਾ ਸੁਨਖਸ੍ਸ ਵਾ ਭਵਿਸ੍ਸਨ੍ਤਿ, ਮਯ੍ਹਂ ਪਨ ਪੁਤ੍ਤੋ ਨ ਮਰਤਿ, ਅਮ੍ਹਾਕਾਞ੍ਹਿ ਕੁਲੇ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ ਤਰੁਣਕਾਲੇ ਮਤਪੁਬ੍ਬਾ ਨਾਮ ਨਤ੍ਥਿ, ਤ੍ਵਂ ਮੁਸਾ ਭਣਸੀਤਿ. ਤਸ੍ਮਿਂ ਖਣੇ ਸਬ੍ਬੇਪਿ ਪਾਣਿਂ ਪਹਰਿਤ੍ਵਾ ਮਹਾਹਸਿਤਂ ਹਸਿਂਸੁ. ਆਚਰਿਯੋ ਤਂ ਅਚ੍ਛਰਿਯਂ ਦਿਸ੍ਵਾ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ‘‘ਬ੍ਰਾਹ੍ਮਣ, ਤੁਮ੍ਹਾਕਂ ਕੁਲਪਵੇਣਿਯਂ ਦਹਰਾਨਂ ਅਮਰਣੇਨ ਨ ਸਕ੍ਕਾ ਅਹੇਤੁਕੇਨ ਭਵਿਤੁਂ, ਕੇਨ ਵੋ ਕਾਰਣੇਨ ਦਹਰਾ ਨ ਮੀਯਨ੍ਤੀ’’ਤਿ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੯੨.

‘‘ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਅਕ੍ਖਾਹਿ ਮੇ ਬ੍ਰਾਹ੍ਮਣ ਏਤਮਤ੍ਥਂ, ਕਸ੍ਮਾ ਨੁ ਤੁਮ੍ਹਂ ਦਹਰਾ ਨ ਮੀਯਰੇ’’ਤਿ.

ਤਤ੍ਥ ਵਤਨ੍ਤਿ ਵਤਸਮਾਦਾਨਂ. ਬ੍ਰਹ੍ਮਚਰਿਯਨ੍ਤਿ ਸੇਟ੍ਠਚਰਿਯਂ. ਕਿਸ੍ਸ ਸੁਚਿਣ੍ਣਸ੍ਸਾਤਿ ਤੁਮ੍ਹਾਕਂ ਕੁਲੇ ਦਹਰਾਨਂ ਅਮਰਣਂ ਨਾਮ ਕਤਰਸੁਚਰਿਤਸ੍ਸ ਵਿਪਾਕੋਤਿ.

ਤਂ ਸੁਤ੍ਵਾ ਬ੍ਰਾਹ੍ਮਣੋ ਯੇਸਂ ਗੁਣਾਨਂ ਆਨੁਭਾਵੇਨ ਤਸ੍ਮਿਂ ਕੁਲੇ ਦਹਰਾ ਨ ਮੀਯਨ੍ਤਿ, ਤੇ ਵਣ੍ਣਯਨ੍ਤੋ –

੯੩.

‘‘ਧਮ੍ਮਂ ਚਰਾਮ ਨ ਮੁਸਾ ਭਣਾਮ, ਪਾਪਾਨਿ ਕਮ੍ਮਾਨਿ ਪਰਿਵਜ੍ਜਯਾਮ;

ਅਨਰਿਯਂ ਪਰਿਵਜ੍ਜੇਮੁ ਸਬ੍ਬਂ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮੀਯਰੇ.

੯੪.

‘‘ਸੁਣੋਮ ਧਮ੍ਮਂ ਅਸਤਂ ਸਤਞ੍ਚ, ਨ ਚਾਪਿ ਧਮ੍ਮਂ ਅਸਤਂ ਰੋਚਯਾਮ;

ਹਿਤ੍ਵਾ ਅਸਨ੍ਤੇ ਨ ਜਹਾਮ ਸਨ੍ਤੇ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮੀਯਰੇ.

੯੫.

‘‘ਪੁਬ੍ਬੇਵ ਦਾਨਾ ਸੁਮਨਾ ਭਵਾਮ, ਦਦਮ੍ਪਿ ਵੇ ਅਤ੍ਤਮਨਾ ਭਵਾਮ;

ਦਤ੍ਵਾਪਿ ਵੇ ਨਾਨੁਤਪ੍ਪਾਮ ਪਚ੍ਛਾ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮੀਯਰੇ.

੯੬.

‘‘ਸਮਣੇ ਮਯਂ ਬ੍ਰਾਹ੍ਮਣੇ ਅਦ੍ਧਿਕੇ ਚ, ਵਨਿਬ੍ਬਕੇ ਯਾਚਨਕੇ ਦਲਿਦ੍ਦੇ;

ਅਨ੍ਨੇਨ ਪਾਨੇਨ ਅਭਿਤਪ੍ਪਯਾਮ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮੀਯਰੇ.

੯੭.

‘‘ਮਯਞ੍ਚ ਭਰਿਯਂ ਨਾਤਿਕ੍ਕਮਾਮ, ਅਮ੍ਹੇ ਚ ਭਰਿਯਾ ਨਾਤਿਕ੍ਕਮਨ੍ਤਿ;

ਅਞ੍ਞਤ੍ਰ ਤਾਹਿ ਬ੍ਰਹ੍ਮਚਰਿਯਂ ਚਰਾਮ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮੀਯਰੇ.

੯੮.

‘‘ਪਾਣਾਤਿਪਾਤਾ ਵਿਰਮਾਮ ਸਬ੍ਬੇ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਾਮ;

ਅਮਜ੍ਜਪਾ ਨੋਪਿ ਮੁਸਾ ਭਣਾਮ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮੀਯਰੇ.

੯੯.

‘‘ਏਤਾਸੁ ਵੇ ਜਾਯਰੇ ਸੁਤ੍ਤਮਾਸੁ, ਮੇਧਾਵਿਨੋ ਹੋਨ੍ਤਿ ਪਹੂਤਪਞ੍ਞਾ;

ਬਹੁਸ੍ਸੁਤਾ ਵੇਦਗੁਨੋ ਚ ਹੋਨ੍ਤਿ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮੀਯਰੇ.

੧੦੦.

‘‘ਮਾਤਾ ਪਿਤਾ ਚ ਭਗਿਨੀ ਭਾਤਰੋ ਚ, ਪੁਤ੍ਤਾ ਚ ਦਾਰਾ ਚ ਮਯਞ੍ਚ ਸਬ੍ਬੇ;

ਧਮ੍ਮਂ ਚਰਾਮ ਪਰਲੋਕਹੇਤੁ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮੀਯਰੇ.

੧੦੧.

‘‘ਦਾਸਾ ਚ ਦਾਸ੍ਯੋ ਅਨੁਜੀਵਿਨੋ ਚ, ਪਰਿਚਾਰਕਾ ਕਮ੍ਮਕਰਾ ਚ ਸਬ੍ਬੇ;

ਧਮ੍ਮਂ ਚਰਨ੍ਤਿ ਪਰਲੋਕਹੇਤੁ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮੀਯਰੇ’’ਤਿ. –

ਇਮਾ ਗਾਥਾ ਆਹ.

ਤਤ੍ਥ ਧਮ੍ਮਂ ਚਰਾਮਾਤਿ ਦਸਕੁਸਲਕਮ੍ਮਪਥਧਮ੍ਮਂ ਚਰਾਮ, ਅਤ੍ਤਨੋ ਜੀਵਿਤਹੇਤੁ ਅਨ੍ਤਮਸੋ ਕੁਨ੍ਥਕਿਪਿਲ੍ਲਿਕਮ੍ਪਿ ਜੀਵਿਤਾ ਨ ਵੋਰੋਪੇਮ, ਪਰਭਣ੍ਡਂ ਲੋਭਚਿਤ੍ਤੇਨ ਨ ਓਲੋਕੇਮਾਤਿ ਸਬ੍ਬਂ ਵਿਤ੍ਥਾਰੇਤਬ੍ਬਂ. ਮੁਸਾਵਾਦੋ ਚੇਤ੍ਥ ਮੁਸਾਵਾਦਿਸ੍ਸ ਅਕਰਣਪਾਪਂ ਨਾਮ ਨਤ੍ਥੀਤਿ ਉਸ੍ਸਨ੍ਨਵਸੇਨ ਪੁਨ ਵੁਤ੍ਤੋ. ਤੇ ਕਿਰ ਹਸਾਧਿਪ੍ਪਾਯੇਨਪਿ ਮੁਸਾ ਨ ਭਣਨ੍ਤਿ. ਪਾਪਾਨੀਤਿ ਸਬ੍ਬਾਨਿ ਨਿਰਯਗਾਮਿਕਮ੍ਮਾਨਿ. ਅਨਰਿਯਨ੍ਤਿ ਅਰਿਯਗਰਹਿਤਂ ਸਬ੍ਬਂ ਅਸੁਨ੍ਦਰਂ ਅਪਰਿਸੁਦ੍ਧਂ ਕਮ੍ਮਂ ਪਰਿਵਜ੍ਜਯਾਮ. ਤਸ੍ਮਾ ਹਿ ਅਮ੍ਹਨ੍ਤਿ ਏਤ੍ਥ ਹਿ-ਕਾਰੋ ਨਿਪਾਤਮਤ੍ਤੋ, ਤੇਨ ਕਾਰਣੇਨ ਅਮ੍ਹਾਕਂ ਦਹਰਾ ਨ ਮੀਯਨ੍ਤਿ, ਅਨ੍ਤਰਾ ਅਕਾਲਮਰਣਂ ਨਾਮ ਨੋ ਨਤ੍ਥੀਤਿ ਅਤ੍ਥੋ. ‘‘ਤਸ੍ਮਾ ਅਮ੍ਹ’’ਨ੍ਤਿਪਿ ਪਾਠੋ. ਸੁਣੋਮਾਤਿ ਮਯਂ ਕਿਰਿਯਵਾਦਾਨਂ ਸਪ੍ਪੁਰਿਸਾਨਂ ਕੁਸਲਦੀਪਨਮ੍ਪਿ ਅਸਪ੍ਪੁਰਿਸਾਨਂ ਅਕੁਸਲਦੀਪਨਮ੍ਪਿ ਧਮ੍ਮਂ ਸੁਣੋਮ, ਸੋ ਪਨ ਨੋ ਸੁਤਮਤ੍ਤਕੋਵ ਹੋਤਿ, ਤਂ ਨ ਰੋਚਯਾਮ. ਤੇਹਿ ਪਨ ਨੋ ਸਦ੍ਧਿਂ ਵਿਗ੍ਗਹੋ ਵਾ ਵਿਵਾਦੋ ਵਾ ਮਾ ਹੋਤੂਤਿ ਧਮ੍ਮਂ ਸੁਣਾਮ, ਸੁਤ੍ਵਾਪਿ ਹਿਤ੍ਵਾ ਅਸਨ੍ਤੇ ਸਨ੍ਤੇ ਵਤ੍ਤਾਮ, ਏਕਮ੍ਪਿ ਖਣਂ ਨ ਜਹਾਮ ਸਨ੍ਤੇ, ਪਾਪਮਿਤ੍ਤੇ ਪਹਾਯ ਕਲ੍ਯਾਣਮਿਤ੍ਤਸੇਵਿਨੋਵ ਹੋਮਾਤਿ.

ਸਮਣੇ ਮਯਂ ਬ੍ਰਾਹ੍ਮਣੇਤਿ ਮਯਂ ਸਮਿਤਪਾਪੇ ਬਾਹਿਤਪਾਪੇ ਪਚ੍ਚੇਕਬੁਦ੍ਧਸਮਣਬ੍ਰਾਹ੍ਮਣੇਪਿ ਅਵਸੇਸਧਮ੍ਮਿਕਸਮਣਬ੍ਰਾਹ੍ਮਣੇਪਿ ਅਦ੍ਧਿਕਯਾਚਕੇ ਸੇਸਜਨੇਪਿ ਅਨ੍ਨਪਾਨੇਨ ਅਭਿਤਪ੍ਪੇਮਾਤਿ ਅਤ੍ਥੋ. ਪਾਲ਼ਿਯਂ ਪਨ ਅਯਂ ਗਾਥਾ ‘‘ਪੁਬ੍ਬੇਵ ਦਾਨਾ’’ਤਿ ਗਾਥਾਯ ਪਚ੍ਛਤੋ ਆਗਤਾ. ਨਾਤਿਕ੍ਕਮਾਮਾਤਿ ਅਤ੍ਤਨੋ ਭਰਿਯਂ ਅਤਿਕ੍ਕਮਿਤ੍ਵਾ ਬਹਿ ਅਞ੍ਞਂ ਮਿਚ੍ਛਾਚਾਰਂ ਨ ਕਰੋਮ. ਅਞ੍ਞਤ੍ਰ ਤਾਹੀਤਿ ਤਾ ਅਤ੍ਤਨੋ ਭਰਿਯਾ ਠਪੇਤ੍ਵਾ ਸੇਸਇਤ੍ਥੀਸੁ ਬ੍ਰਹ੍ਮਚਰਿਯਂ ਚਰਾਮ, ਅਮ੍ਹਾਕਂ ਭਰਿਯਾਪਿ ਸੇਸਪੁਰਿਸੇਸੁ ਏਵਮੇਵ ਵਤ੍ਤਨ੍ਤਿ. ਜਾਯਰੇਤਿ ਜਾਯਨ੍ਤਿ. ਸੁਤ੍ਤਮਾਸੂਤਿ ਸੁਸੀਲਾਸੁ ਉਤ੍ਤਮਿਤ੍ਥੀਸੁ. ਇਦਂ ਵੁਤ੍ਤਂ ਹੋਤਿ – ਯੇ ਏਤਾਸੁ ਸਮ੍ਪਨ੍ਨਸੀਲਾਸੁ ਉਤ੍ਤਮਿਤ੍ਥੀਸੁ ਅਮ੍ਹਾਕਂ ਪੁਤ੍ਤਾ ਜਾਯਨ੍ਤਿ, ਤੇ ਮੇਧਾਵਿਨੋਤਿ ਏਵਂਪਕਾਰਾ ਹੋਨ੍ਤਿ, ਕੁਤੋ ਤੇਸਂ ਅਨ੍ਤਰਾ ਮਰਣਂ, ਤਸ੍ਮਾਪਿ ਅਮ੍ਹਾਕਂ ਕੁਲੇ ਦਹਰਾ ਨ ਮਰਨ੍ਤੀਤਿ. ਧਮ੍ਮਂ ਚਰਾਮਾਤਿ ਪਰਲੋਕਤ੍ਥਾਯ ਤਿਵਿਧਸੁਚਰਿਤਧਮ੍ਮਂ ਚਰਾਮ. ਦਾਸ੍ਯੋਤਿ ਦਾਸਿਯੋ.

ਅਵਸਾਨੇ –

੧੦੨.

‘‘ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿਂ, ਧਮ੍ਮੋ ਸੁਚਿਣ੍ਣੋ ਸੁਖਮਾਵਹਤਿ;

ਏਸਾਨਿਸਂਸੋ ਧਮ੍ਮੇ ਸੁਚਿਣ੍ਣੇ, ਨ ਦੁਗ੍ਗਤਿਂ ਗਚ੍ਛਤਿ ਧਮ੍ਮਚਾਰੀ.

੧੦੩.

‘‘ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿਂ, ਛਤ੍ਤਂ ਮਹਨ੍ਤਂ ਵਿਯ ਵਸ੍ਸਕਾਲੇ;

ਧਮ੍ਮੇਨ ਗੁਤ੍ਤੋ ਮਮ ਧਮ੍ਮਪਾਲੋ, ਅਞ੍ਞਸ੍ਸ ਅਟ੍ਠੀਨਿ ਸੁਖੀ ਕੁਮਾਰੋ’’ਤਿ. –

ਇਮਾਹਿ ਦ੍ਵੀਹਿ ਗਾਥਾਹਿ ਧਮ੍ਮਚਾਰੀਨਂ ਗੁਣਂ ਕਥੇਸਿ.

ਤਤ੍ਥ ਰਕ੍ਖਤੀਤਿ ਧਮ੍ਮੋ ਨਾਮੇਸੋ ਰਕ੍ਖਿਤੋ ਅਤ੍ਤਨੋ ਰਕ੍ਖਿਤਂ ਪਟਿਰਕ੍ਖਤਿ. ਸੁਖਮਾਵਹਤੀਤਿ ਦੇਵਮਨੁਸ੍ਸਸੁਖਞ੍ਚੇਵ ਨਿਬ੍ਬਾਨਸੁਖਞ੍ਚ ਆਵਹਤਿ. ਨ ਦੁਗ੍ਗਤਿਨ੍ਤਿ ਨਿਰਯਾਦਿਭੇਦਂ ਦੁਗ੍ਗਤਿਂ ਨ ਗਚ੍ਛਤਿ. ਏਵਂ ਬ੍ਰਾਹ੍ਮਣ, ਮਯਂ ਧਮ੍ਮਂ ਰਕ੍ਖਾਮ, ਧਮ੍ਮੋਪਿ ਅਮ੍ਹੇ ਰਕ੍ਖਤੀਤਿ ਦਸ੍ਸੇਤਿ. ਧਮ੍ਮੇਨ ਗੁਤ੍ਤੋਤਿ ਮਹਾਛਤ੍ਤਸਦਿਸੇਨ ਅਤ੍ਤਨਾ ਗੋਪਿਤਧਮ੍ਮੇਨ ਗੁਤ੍ਤੋ. ਅਞ੍ਞਸ੍ਸ ਅਟ੍ਠੀਨੀਤਿ ਤਯਾ ਆਨੀਤਾਨਿ ਅਟ੍ਠੀਨਿ ਅਞ੍ਞਸ੍ਸ ਏਲ਼ਕਸ੍ਸ ਵਾ ਸੁਨਖਸ੍ਸ ਵਾ ਅਟ੍ਠੀਨਿ ਭਵਿਸ੍ਸਨ੍ਤਿ, ਛਡ੍ਡੇਥੇਤਾਨਿ, ਮਮ ਪੁਤ੍ਤੋ ਸੁਖੀ ਕੁਮਾਰੋਤਿ.

ਤਂ ਸੁਤ੍ਵਾ ਆਚਰਿਯੋ ‘‘ਮਯ੍ਹਂ ਆਗਮਨਂ ਸੁਆਗਮਨਂ, ਸਫਲਂ, ਨੋ ਨਿਪ੍ਫਲ’’ਨ੍ਤਿ ਸਞ੍ਜਾਤਸੋਮਨਸ੍ਸੋ ਧਮ੍ਮਪਾਲਸ੍ਸ ਪਿਤਰਂ ਖਮਾਪੇਤ੍ਵਾ ‘‘ਮਯਾ ਆਗਚ੍ਛਨ੍ਤੇਨ ਤੁਮ੍ਹਾਕਂ ਵੀਮਂਸਨਤ੍ਥਾਯ ਇਮਾਨਿ ਏਲ਼ਕਅਟ੍ਠੀਨਿ ਆਭਤਾਨਿ, ਪੁਤ੍ਤੋ ਤੇ ਅਰੋਗੋਯੇਵ, ਤੁਮ੍ਹਾਕਂ ਰਕ੍ਖਿਤਧਮ੍ਮਂ ਮਯ੍ਹਮ੍ਪਿ ਦੇਥਾ’’ਤਿ ਪਣ੍ਣੇ ਲਿਖਿਤ੍ਵਾ ਕਤਿਪਾਹਂ ਤਤ੍ਥ ਵਸਿਤ੍ਵਾ ਤਕ੍ਕਸਿਲਂ ਗਨ੍ਤ੍ਵਾ ਧਮ੍ਮਪਾਲਂ ਸਬ੍ਬਸਿਪ੍ਪਾਨਿ ਸਿਕ੍ਖਾਪੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਪੇਸੇਸਿ.

ਸਤ੍ਥਾ ਸੁਦ੍ਧੋਦਨਮਹਾਰਾਜਸ੍ਸ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਰਾਜਾ ਅਨਾਗਾਮਿਫਲੇ ਪਤਿਟ੍ਠਹਿ. ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ, ਆਚਰਿਯੋ ਸਾਰਿਪੁਤ੍ਤੋ, ਪਰਿਸਾ ਬੁਦ੍ਧਪਰਿਸਾ, ਧਮ੍ਮਪਾਲਕੁਮਾਰੋ ਪਨ ਅਹਮੇਵ ਅਹੋਸਿਨ੍ਤਿ.

ਮਹਾਧਮ੍ਮਪਾਲਜਾਤਕਵਣ੍ਣਨਾ ਨਵਮਾ.

[੪੪੮] ੧੦. ਕੁਕ੍ਕੁਟਜਾਤਕਵਣ੍ਣਨਾ

ਨਾਸ੍ਮਸੇ ਕਤਪਾਪਮ੍ਹੀਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਦੇਵਦਤ੍ਤਸ੍ਸ ਵਧਾਯ ਪਰਿਸਕ੍ਕਨਂ ਆਰਬ੍ਭ ਕਥੇਸਿ. ਧਮ੍ਮਸਭਾਯਞ੍ਹਿ ਭਿਕ੍ਖੂ ਦੇਵਦਤ੍ਤਸ੍ਸ ਅਗੁਣਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਦੇਵਦਤ੍ਤੋ ਧਨੁਗ੍ਗਹਾਦਿਪਯੋਜਨੇਨ ਦਸਬਲਸ੍ਸ ਵਧਤ੍ਥਮੇਵ ਉਪਾਯਂ ਕਰੋਤੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਏਸ ਮਯ੍ਹਂ ਵਧਾਯ ਪਰਿਸਕ੍ਕਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕੋਸਮ੍ਬਿਯਂ ਕੋਸਮ੍ਬਕੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਦਾ ਬੋਧਿਸਤ੍ਤੋ ਏਕਸ੍ਮਿਂ ਵੇਲ਼ੁਵਨੇ ਕੁਕ੍ਕੁਟਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਨੇਕਸਤਕੁਕ੍ਕੁਟਪਰਿਵਾਰੋ ਅਰਞ੍ਞੇ ਵਸਤਿ, ਤਸ੍ਸਾਵਿਦੂਰੇ ਏਕੋ ਸੇਨੋ ਵਸਤਿ. ਸੋ ਉਪਾਯੇਨ ਏਕੇਕਂ ਕੁਕ੍ਕੁਟਂ ਗਹੇਤ੍ਵਾ ਖਾਦਨ੍ਤੋ ਠਪੇਤ੍ਵਾ ਬੋਧਿਸਤ੍ਤਂ ਸੇਸੇ ਖਾਦਿ, ਬੋਧਿਸਤ੍ਤੋ ਏਕਕੋਵ ਅਹੋਸਿ. ਸੋ ਅਪ੍ਪਮਤ੍ਤੋ ਵੇਲਾਯ ਗੋਚਰਂ ਗਹੇਤ੍ਵਾ ਵੇਲ਼ੁਵਨਂ ਪਵਿਸਿਤ੍ਵਾ ਵਸਤਿ. ਸੋ ਸੇਨੋ ਤਂ ਗਣ੍ਹਿਤੁਂ ਅਸਕ੍ਕੋਨ੍ਤੋ ‘‘ਏਕੇਨ ਨਂ ਉਪਾਯੇਨ ਉਪਲਾਪੇਤ੍ਵਾ ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਸ੍ਸਾਵਿਦੂਰੇ ਸਾਖਾਯ ਨਿਲੀਯਿਤ੍ਵਾ ‘‘ਸਮ੍ਮ ਕੁਕ੍ਕੁਟਰਾਜ, ਤ੍ਵਂ ਮਯ੍ਹਂ ਕਸ੍ਮਾ ਭਾਯਸਿ, ਅਹਂ ਤਯਾ ਸਦ੍ਧਿਂ ਵਿਸ੍ਸਾਸਂ ਕਤ੍ਤੁਕਾਮੋ, ਅਸੁਕਸ੍ਮਿਂ ਨਾਮ ਪਦੇਸੇ ਸਮ੍ਪਨ੍ਨਗੋਚਰੋ, ਤਤ੍ਥ ਉਭੋਪਿ ਗੋਚਰਂ ਗਹੇਤ੍ਵਾ ਅਞ੍ਞਮਞ੍ਞਂ ਪਿਯਸਂਵਾਸਂ ਵਸਿਸ੍ਸਾਮਾ’’ਤਿ ਆਹ. ਅਥ ਨਂ ਬੋਧਿਸਤ੍ਤੋ ਆਹ ‘‘ਸਮ੍ਮ, ਮਯ੍ਹਂ ਤਯਾ ਸਦ੍ਧਿਂ ਵਿਸ੍ਸਾਸੋ ਨਾਮ ਨਤ੍ਥਿ, ਗਚ੍ਛ ਤ੍ਵ’’ਨ੍ਤਿ. ‘‘ਸਮ੍ਮ, ਤ੍ਵਂ ਮਯਾ ਪੁਬ੍ਬੇ ਕਤਪਾਪਤਾਯ ਨ ਸਦ੍ਦਹਸਿ, ਇਤੋ ਪਟ੍ਠਾਯ ਏਵਰੂਪਂ ਨ ਕਰਿਸ੍ਸਾਮੀ’’ਤਿ. ‘‘ਨ ਮਯ੍ਹਂ ਤਾਦਿਸੇਨ ਸਹਾਯੇਨਤ੍ਥੋ, ਗਚ੍ਛ ਤ੍ਵ’’ਨ੍ਤਿ. ਇਤਿ ਨਂ ਯਾਵਤਤਿਯਂ ਪਟਿਕ੍ਖਿਪਿਤ੍ਵਾ ‘‘ਏਤੇਹਿ ਅਙ੍ਗੇਹਿ ਸਮਨ੍ਨਾਗਤੇਨ ਪੁਗ੍ਗਲੇਨ ਸਦ੍ਧਿਂ ਵਿਸ੍ਸਾਸੋ ਨਾਮ ਕਾਤੁਂ ਨ ਵਟ੍ਟਤੀ’’ਤਿ ਵਨਘਟਂ ਉਨ੍ਨਾਦੇਨ੍ਤੋ ਦੇਵਤਾਸੁ ਸਾਧੁਕਾਰਂ ਦਦਮਾਨਾਸੁ ਧਮ੍ਮਕਥਂ ਸਮੁਟ੍ਠਾਪੇਨ੍ਤੋ –

੧੦੪.

‘‘ਨਾਸ੍ਮਸੇ ਕਤਪਾਪਮ੍ਹਿ, ਨਾਸ੍ਮਸੇ ਅਲਿਕਵਾਦਿਨੇ;

ਨਾਸ੍ਮਸੇ ਅਤ੍ਤਤ੍ਥਪਞ੍ਞਮ੍ਹਿ, ਅਤਿਸਨ੍ਤੇਪਿ ਨਾਸ੍ਮਸੇ.

੧੦੫.

‘‘ਭਵਨ੍ਤਿ ਹੇਕੇ ਪੁਰਿਸਾ, ਗੋਪਿਪਾਸਿਕਜਾਤਿਕਾ;

ਘਸਨ੍ਤਿ ਮਞ੍ਞੇ ਮਿਤ੍ਤਾਨਿ, ਵਾਚਾਯ ਨ ਚ ਕਮ੍ਮੁਨਾ.

੧੦੬.

‘‘ਸੁਕ੍ਖਞ੍ਜਲਿਪਗ੍ਗਹਿਤਾ, ਵਾਚਾਯ ਪਲਿਗੁਣ੍ਠਿਤਾ;

ਮਨੁਸ੍ਸਫੇਗ੍ਗੂ ਨਾਸੀਦੇ, ਯਸ੍ਮਿਂ ਨਤ੍ਥਿ ਕਤਞ੍ਞੁਤਾ.

੧੦੭.

‘‘ਨ ਹਿ ਅਞ੍ਞਞ੍ਞਚਿਤ੍ਤਾਨਂ, ਇਤ੍ਥੀਨਂ ਪੁਰਿਸਾਨ ਵਾ;

ਨਾਨਾਵਿਕਤ੍ਵਾ ਸਂਸਗ੍ਗਂ, ਤਾਦਿਸਮ੍ਪਿ ਚ ਨਾਸ੍ਮਸੇ.

੧੦੮.

‘‘ਅਨਰਿਯਕਮ੍ਮਮੋਕ੍ਕਨ੍ਤਂ, ਅਥੇਤਂ ਸਬ੍ਬਘਾਤਿਨਂ;

ਨਿਸਿਤਂਵ ਪਟਿਚ੍ਛਨ੍ਨਂ, ਤਾਦਿਸਮ੍ਪਿ ਚ ਨਾਸ੍ਮਸੇ.

੧੦੯.

‘‘ਮਿਤ੍ਤਰੂਪੇਨਿਧੇਕਚ੍ਚੇ, ਸਾਖਲ੍ਯੇਨ ਅਚੇਤਸਾ;

ਵਿਵਿਧੇਹਿ ਉਪਾਯਨ੍ਤਿ, ਤਾਦਿਸਮ੍ਪਿ ਚ ਨਾਸ੍ਮਸੇ.

੧੧੦.

‘‘ਆਮਿਸਂ ਵਾ ਧਨਂ ਵਾਪਿ, ਯਤ੍ਥ ਪਸ੍ਸਤਿ ਤਾਦਿਸੋ;

ਦੁਬ੍ਭਿਂ ਕਰੋਤਿ ਦੁਮ੍ਮੇਧੋ, ਤਞ੍ਚ ਹਨ੍ਤ੍ਵਾਨ ਗਚ੍ਛਤੀ’’ਤਿ. – ਇਮਾ ਗਾਥਾ ਆਹ;

ਤਤ੍ਥ ਨਾਸ੍ਮਸੇਤਿ ਨਾਸ੍ਸਸੇ. ਅਯਮੇਵ ਵਾ ਪਾਠੋ, ਨ ਵਿਸ੍ਸਸੇਤਿ ਵੁਤ੍ਤਂ ਹੋਤਿ. ਕਤਪਾਪਮ੍ਹੀਤਿ ਪਠਮਂ ਕਤਪਾਪੇ ਪੁਗ੍ਗਲੇ. ਅਲਿਕਵਾਦਿਨੇਤਿ ਮੁਸਾਵਾਦਿਮ੍ਹਿਪਿ ਨ ਵਿਸ੍ਸਸੇ. ਤਸ੍ਸ ਹਿ ਅਕਤ੍ਤਬ੍ਬਂ ਨਾਮ ਪਾਪਂ ਨਤ੍ਥਿ. ਨਾਸ੍ਮਸੇ ਅਤ੍ਤਤ੍ਥਪਞ੍ਞਮ੍ਹੀਤਿ ਅਤ੍ਤਨੋ ਅਤ੍ਥਾਯ ਏਵ ਯਸ੍ਸ ਪਞ੍ਞਾ ਸ੍ਨੇਹਵਸੇਨ ਨ ਭਜਤਿ, ਧਨਤ੍ਥਿਕੋਵ ਭਜਤਿ, ਤਸ੍ਮਿਂ ਅਤ੍ਤਤ੍ਥਪਞ੍ਞੇਪਿ ਨ ਵਿਸ੍ਸਸੇ. ਅਤਿਸਨ੍ਤੇਤਿ ਅਨ੍ਤੋ ਉਪਸਮੇ ਅਵਿਜ੍ਜਮਾਨੇਯੇਵ ਚ ਬਹਿ ਉਪਸਮਦਸ੍ਸਨੇਨ ਅਤਿਸਨ੍ਤੇ ਵਿਯ ਪਟਿਚ੍ਛਨ੍ਨਕਮ੍ਮਨ੍ਤੇਪਿ ਬਿਲਪਟਿਚ੍ਛਨ੍ਨਆਸੀਵਿਸਸਦਿਸੇ ਕੁਹਕਪੁਗ੍ਗਲੇ. ਗੋਪਿਪਾਸਿਕਜਾਤਿਕਾਤਿ ਗੁਨ੍ਨਂ ਪਿਪਾਸਕਜਾਤਿਕਾ ਵਿਯ, ਪਿਪਾਸਿਤਗੋਸਦਿਸਾਤਿ ਵੁਤ੍ਤਂ ਹੋਤਿ. ਯਥਾ ਪਿਪਾਸਿਤਗਾਵੋ ਤਿਤ੍ਥਂ ਓਤਰਿਤ੍ਵਾ ਮੁਖਪੂਰਂ ਉਦਕਂ ਪਿਵਨ੍ਤਿ, ਨ ਪਨ ਉਦਕਸ੍ਸ ਕਤ੍ਤਬ੍ਬਯੁਤ੍ਤਕਂ ਕਰੋਨ੍ਤਿ, ਏਵਮੇਵ ਏਕਚ੍ਚੇ ‘‘ਇਦਞ੍ਚਿਦਞ੍ਚ ਕਰਿਸ੍ਸਾਮਾ’’ਤਿ ਮਧੁਰਵਚਨੇਨ ਮਿਤ੍ਤਾਨਿ ਘਸਨ੍ਤਿ, ਪਿਯਵਚਨਾਨੁਚ੍ਛਵਿਕਂ ਪਨ ਨ ਕਰੋਨ੍ਤਿ, ਤਾਦਿਸੇਸੁ ਵਿਸ੍ਸਾਸੋ ਮਹਤੋ ਅਨਤ੍ਥਾਯ ਹੋਤੀਤਿ ਦੀਪੇਤਿ.

ਸੁਕ੍ਖਞ੍ਜਲਿਪਗ੍ਗਹਿਤਾਤਿ ਪਗ੍ਗਹਿਤਤੁਚ੍ਛਅਞ੍ਜਲਿਨੋ. ਵਾਚਾਯ ਪਲਿਗੁਣ੍ਠਿਤਾਤਿ ‘‘ਇਦਂ ਦਸ੍ਸਾਮ, ਇਦਂ ਕਰਿਸ੍ਸਾਮਾ’’ਤਿ ਵਚਨੇਨ ਪਟਿਚ੍ਛਾਦਿਕਾ. ਮਨੁਸ੍ਸਫੇਗ੍ਗੂਤਿ ਏਵਰੂਪਾ ਅਸਾਰਕਾ ਮਨੁਸ੍ਸਾ ਮਨੁਸ੍ਸਫੇਗ੍ਗੂ ਨਾਮ. ਨਾਸੀਦੇਤਿ ਨ ਆਸੀਦੇ ਏਵਰੂਪੇ ਨ ਉਪਗਚ੍ਛੇਯ੍ਯ. ਯਸ੍ਮਿਂ ਨਤ੍ਥੀਤਿ ਯਸ੍ਮਿਞ੍ਚ ਪੁਗ੍ਗਲੇ ਕਤਞ੍ਞੁਤਾ ਨਤ੍ਥਿ, ਤਮ੍ਪਿ ਨਾਸੀਦੇਤਿ ਅਤ੍ਥੋ. ਅਞ੍ਞਞ੍ਞਚਿਤ੍ਤਾਨਨ੍ਤਿ ਅਞ੍ਞੇਨਞ੍ਞੇਨ ਚਿਤ੍ਤੇਨ ਸਮਨ੍ਨਾਗਤਾਨਂ, ਲਹੁਚਿਤ੍ਤਾਨਨ੍ਤਿ ਅਤ੍ਥੋ. ਏਵਰੂਪਾਨਂ ਇਤ੍ਥੀਨਂ ਵਾ ਪੁਰਿਸਾਨਂ ਵਾ ਨ ਵਿਸ੍ਸਸੇਤਿ ਦੀਪੇਤਿ. ਨਾਨਾਵਿਕਤ੍ਵਾ ਸਂਸਗ੍ਗਨ੍ਤਿ ਯੋਪਿ ਨ ਸਕ੍ਕਾ ਅਨੁਪਗਨ੍ਤ੍ਵਾ ਏਤਸ੍ਸ ਅਨ੍ਤਰਾਯਂ ਕਾਤੁਨ੍ਤਿ ਅਨ੍ਤਰਾਯਕਰਣਤ੍ਥਂ ਨਾਨਾਕਾਰਣੇਹਿ ਸਂਸਗ੍ਗਮਾਵਿਕਤ੍ਵਾ ਦਲ਼੍ਹਂ ਕਰਿਤ੍ਵਾ ਪਚ੍ਛਾ ਅਨ੍ਤਰਾਯਂ ਕਰੋਤਿ, ਤਾਦਿਸਮ੍ਪਿ ਪੁਗ੍ਗਲਂ ਨਾਸ੍ਮਸੇ ਨ ਵਿਸ੍ਸਸੇਯ੍ਯਾਤਿ ਦੀਪੇਤਿ.

ਅਨਰਿਯਕਮ੍ਮਮੋਕ੍ਕਨ੍ਤਤਿ ਅਨਰਿਯਾਨਂ ਦੁਸ੍ਸੀਲਾਨਂ ਕਮ੍ਮਂ ਓਤਰਿਤ੍ਵਾ ਠਿਤਂ. ਅਥੇਤਨ੍ਤਿ ਅਥਿਰਂ ਅਪ੍ਪਤਿਟ੍ਠਿਤਵਚਨਂ. ਸਬ੍ਬਘਾਤਿਨਨ੍ਤਿ ਓਕਾਸਂ ਲਭਿਤ੍ਵਾ ਸਬ੍ਬੇਸਂ ਉਪਘਾਤਕਰਂ. ਨਿਸਿਤਂਵ ਪਟਿਚ੍ਛਨ੍ਨਨ੍ਤਿ ਕੋਸਿਯਾ ਵਾ ਪਿਲੋਤਿਕਾਯ ਵਾ ਪਟਿਚ੍ਛਨ੍ਨਂ ਨਿਸਿਤਖਗ੍ਗਮਿਵ. ਤਾਦਿਸਮ੍ਪੀਤਿ ਏਵਰੂਪਮ੍ਪਿ ਅਮਿਤ੍ਤਂ ਮਿਤ੍ਤਪਤਿਰੂਪਕਂ ਨ ਵਿਸ੍ਸਸੇਯ੍ਯ. ਸਾਖਲ੍ਯੇਨਾਤਿ ਮਟ੍ਠਵਚਨੇਨ. ਅਚੇਤਸਾਤਿ ਅਚਿਤ੍ਤਕੇਨ. ਵਚਨਮੇਵ ਹਿ ਨੇਸਂ ਮਟ੍ਠਂ, ਚਿਤ੍ਤਂ ਪਨ ਥਦ੍ਧਂ ਫਰੁਸਂ. ਵਿਵਿਧੇਹੀਤਿ ਵਿਵਿਧੇਹਿ ਉਪਾਯੇਹਿ ਓਤਾਰਾਪੇਕ੍ਖਾ ਉਪਗਚ੍ਛਨ੍ਤਿ. ਤਾਦਿਸਮ੍ਪੀਤਿ ਯੋ ਏਤੇਹਿ ਅਮਿਤ੍ਤੇਹਿ ਮਿਤ੍ਤਪਤਿਰੂਪਕੇਹਿ ਸਦਿਸੋ ਹੋਤਿ, ਤਮ੍ਪਿ ਨ ਵਿਸ੍ਸਸੇਤਿ ਅਤ੍ਥੋ. ਆਮਿਸਨ੍ਤਿ ਖਾਦਨੀਯਭੋਜਨੀਯਂ. ਧਨਨ੍ਤਿ ਮਞ੍ਚਪਟਿਪਾਦਕਂ ਆਦਿਂ ਕਤ੍ਵਾ ਅਵਸੇਸਂ. ਯਤ੍ਥ ਪਸ੍ਸਤੀਤਿ ਸਹਾਯਕਗੇਹੇ ਯਸ੍ਮਿਂ ਠਾਨੇ ਪਸ੍ਸਤਿ. ਦੁਬ੍ਭਿਂ ਕਰੋਤੀਤਿ ਦੁਬ੍ਭਿਚਿਤ੍ਤਂ ਉਪ੍ਪਾਦੇਤਿ, ਤਂ ਧਨਂ ਹਰਤਿ. ਤਞ੍ਚ ਹਨ੍ਤ੍ਵਾਨਾਤਿ ਤਞ੍ਚ ਸਹਾਯਕਮ੍ਪਿ ਛੇਤ੍ਵਾ ਗਚ੍ਛਤਿ. ਇਤਿ ਇਮਾ ਸਤ੍ਤ ਗਾਥਾ ਕੁਕ੍ਕੁਟਰਾਜਾ ਕਥੇਸਿ.

੧੧੧.

‘‘ਮਿਤ੍ਤਰੂਪੇਨ ਬਹਵੋ, ਛਨ੍ਨਾ ਸੇਵਨ੍ਤਿ ਸਤ੍ਤਵੋ;

ਜਹੇ ਕਾਪੁਰਿਸੇ ਹੇਤੇ, ਕੁਕ੍ਕੁਟੋ ਵਿਯ ਸੇਨਕਂ.

੧੧੨.

‘‘ਯੋ ਚ ਉਪ੍ਪਤਿਤਂ ਅਤ੍ਥਂ, ਨ ਖਿਪ੍ਪਮਨੁਬੁਜ੍ਝਤਿ;

ਅਮਿਤ੍ਤਵਸਮਨ੍ਵੇਤਿ, ਪਚ੍ਛਾ ਚ ਮਨੁਤਪ੍ਪਤਿ.

੧੧੩.

‘‘ਯੋ ਚ ਉਪ੍ਪਤਿਤਂ ਅਤ੍ਥਂ, ਖਿਪ੍ਪਮੇਵ ਨਿਬੋਧਤਿ;

ਮੁਚ੍ਚਤੇ ਸਤ੍ਤੁਸਮ੍ਬਾਧਾ, ਕੁਕ੍ਕੁਟੋ ਵਿਯ ਸੇਨਕਾ.

੧੧੪.

‘‘ਤਂ ਤਾਦਿਸਂ ਕੂਟਮਿਵੋਡ੍ਡਿਤਂ ਵਨੇ, ਅਧਮ੍ਮਿਕਂ ਨਿਚ੍ਚਵਿਧਂਸਕਾਰਿਨਂ;

ਆਰਾ ਵਿਵਜ੍ਜੇਯ੍ਯ ਨਰੋ ਵਿਚਕ੍ਖਣੋ, ਸੇਨਂ ਯਥਾ ਕੁਕ੍ਕੁਟੋ ਵਂਸਕਾਨਨੇ’’ਤਿ. –

ਇਮਾ ਚਤਸ੍ਸੋ ਧਮ੍ਮਰਾਜੇਨ ਭਾਸਿਤਾ ਅਭਿਸਮ੍ਬੁਦ੍ਧਗਾਥਾ.

ਤਤ੍ਥ ਜਹੇ ਕਾਪੁਰਿਸੇ ਹੇਤੇਤਿ ਭਿਕ੍ਖਵੇ, ਏਤੇ ਕਾਪੁਰਿਸੇ ਪਣ੍ਡਿਤੋ ਜਹੇਯ੍ਯ. ਹ-ਕਾਰੋ ਪਨੇਤ੍ਥ ਨਿਪਾਤਮਤ੍ਤਂ. ਪਚ੍ਛਾ ਚ ਮਨੁਤਪ੍ਪਤੀਤਿ ਪਚ੍ਛਾ ਚ ਅਨੁਤਪ੍ਪਤਿ. ਕੂਟਮਿਵੋਡ੍ਡਿਤਨ੍ਤਿ ਵਨੇ ਮਿਗਾਨਂ ਬਨ੍ਧਨਤ੍ਥਾਯ ਕੂਟਪਾਸਂ ਵਿਯ ਓਡ੍ਡਿਤਂ. ਨਿਚ੍ਚਵਿਧਂਸਕਾਰਿਨਨ੍ਤਿ ਨਿਚ੍ਚਂ ਵਿਦ੍ਧਂਸਨਕਰਂ. ਵਂਸਕਾਨਨੇਤਿ ਯਥਾ ਵਂਸਵਨੇ ਕੁਕ੍ਕੁਟੋ ਸੇਨਂ ਵਿਵਜ੍ਜੇਤਿ, ਏਵਂ ਵਿਚਕ੍ਖਣੋ ਪਾਪਮਿਤ੍ਤੇ ਵਿਵਜ੍ਜੇਯ੍ਯ.

ਸੋਪਿ ਤਾ ਗਾਥਾ ਵਤ੍ਵਾ ਸੇਨਂ ਆਮਨ੍ਤੇਤ੍ਵਾ ‘‘ਸਚੇ ਇਮਸ੍ਮਿਂ ਠਾਨੇ ਵਸਿਸ੍ਸਸਿ, ਜਾਨਿਸ੍ਸਾਮਿ ਤੇ ਕਤ੍ਤਬ੍ਬ’’ਨ੍ਤਿ ਤਜ੍ਜੇਸਿ. ਸੇਨੋ ਤਤੋ ਪਲਾਯਿਤ੍ਵਾ ਅਞ੍ਞਤ੍ਰ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਭਿਕ੍ਖਵੇ ਦੇਵਦਤ੍ਤੋ ਪੁਬ੍ਬੇਪਿ ਮਯ੍ਹਂ ਵਧਾਯ ਪਰਿਸਕ੍ਕੀ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸੇਨੋ ਦੇਵਦਤ੍ਤੋ ਅਹੋਸਿ, ਕੁਕ੍ਕੁਟੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕੁਕ੍ਕੁਟਜਾਤਕਵਣ੍ਣਨਾ ਦਸਮਾ.

[੪੪੯] ੧੧. ਮਟ੍ਠਕੁਣ੍ਡਲੀਜਾਤਕਵਣ੍ਣਨਾ

ਅਲਙ੍ਕਤੋ ਮਟ੍ਠਕੁਣ੍ਡਲੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਮਤਪੁਤ੍ਤਂ ਕੁਟੁਮ੍ਬਿਕਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰੇਕਸ੍ਸ ਬੁਦ੍ਧੁਪਟ੍ਠਾਕਸ੍ਸ ਕੁਟੁਮ੍ਬਿਕਸ੍ਸ ਪਿਯਪੁਤ੍ਤੋ ਕਾਲਮਕਾਸਿ. ਸੋ ਪੁਤ੍ਤਸੋਕਸਮਪ੍ਪਿਤੋ ਨ ਨ੍ਹਾਯਤਿ ਨ ਭੁਞ੍ਜਤਿ ਨ ਕਮ੍ਮਨ੍ਤੇ ਵਿਚਾਰੇਤਿ, ਨ ਬੁਦ੍ਧੁਪਟ੍ਠਾਨਂ ਗਚ੍ਛਤਿ, ਕੇਵਲਂ ‘‘ਪਿਯਪੁਤ੍ਤਕ, ਮਂ ਓਹਾਯ ਪਠਮਤਰਂ ਗਤੋਸੀ’’ਤਿਆਦੀਨਿ ਵਤ੍ਵਾ ਵਿਪ੍ਪਲਪਤਿ. ਸਤ੍ਥਾ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਤਸ੍ਸ ਸੋਤਾਪਤ੍ਤਿਫਲੂਪਨਿਸ੍ਸਯਂ ਦਿਸ੍ਵਾ ਪੁਨਦਿਵਸੇ ਭਿਕ੍ਖੁਸਙ੍ਘਪਰਿਵੁਤੋ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚੋ ਭਿਕ੍ਖੂ ਉਯ੍ਯੋਜੇਤ੍ਵਾ ਆਨਨ੍ਦਤ੍ਥੇਰੇਨ ਪਚ੍ਛਾਸਮਣੇਨ ਤਸ੍ਸ ਘਰਦ੍ਵਾਰਂ ਅਗਮਾਸਿ. ਸਤ੍ਥੁ ਆਗਤਭਾਵਂ ਕੁਟੁਮ੍ਬਿਕਸ੍ਸ ਆਰੋਚੇਸੁਂ. ਅਥਸ੍ਸ ਗੇਹਜਨੋ ਆਸਨਂ ਪਞ੍ਞਪੇਤ੍ਵਾ ਸਤ੍ਥਾਰਂ ਨਿਸੀਦਾਪੇਤ੍ਵਾ ਕੁਟੁਮ੍ਬਿਕਂ ਪਰਿਗ੍ਗਹੇਤ੍ਵਾ ਸਤ੍ਥੁ ਸਨ੍ਤਿਕਂ ਆਨੇਸਿ. ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨਂ ਸਤ੍ਥਾ ਕਰੁਣਾਸੀਤਲੇਨ ਵਚਨੇਨ ਆਮਨ੍ਤੇਤ੍ਵਾ ‘‘ਕਿਂ, ਉਪਾਸਕ, ਪੁਤ੍ਤਕਂ ਅਨੁਸੋਚਸੀ’’ਤਿ ਪੁਚ੍ਛਿਤ੍ਵਾ ‘‘ਆਮ, ਭਨ੍ਤੇ’’ਤਿ ਵੁਤ੍ਤੇ ‘‘ਉਪਾਸਕ, ਪੋਰਾਣਕਪਣ੍ਡਿਤਾ ਪੁਤ੍ਤੇ ਕਾਲਕਤੇ ਸੋਕਸਮਪ੍ਪਿਤਾ ਵਿਚਰਨ੍ਤਾਪਿ ਪਣ੍ਡਿਤਾਨਂ ਕਥਂ ਸੁਤ੍ਵਾ ‘ਅਲਬ੍ਭਨੀਯਟ੍ਠਾਨ’ਨ੍ਤਿ ਤਥਤੋ ਞਤ੍ਵਾ ਅਪ੍ਪਮਤ੍ਤਕਮ੍ਪਿ ਸੋਕਂ ਨ ਕਰਿਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਏਕਸ੍ਸ ਮਹਾਵਿਭਵਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ ਪਞ੍ਚਦਸਸੋਲ਼ਸਵਸ੍ਸਕਾਲੇ ਏਕੇਨ ਬ੍ਯਾਧਿਨਾ ਫੁਟ੍ਠੋ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ. ਬ੍ਰਾਹ੍ਮਣੋ ਤਸ੍ਸ ਕਾਲਕਿਰਿਯਤੋ ਪਟ੍ਠਾਯ ਸੁਸਾਨਂ ਗਨ੍ਤ੍ਵਾ ਛਾਰਿਕਪੁਞ੍ਜਂ ਆਵਿਜ੍ਝਨ੍ਤੋ ਪਰਿਦੇਵਤਿ, ਸਬ੍ਬਕਮ੍ਮਨ੍ਤੇ ਪਰਿਚ੍ਚਜਿਤ੍ਵਾ ਸੋਕਸਮਪ੍ਪਿਤੋ ਵਿਚਰਤਿ. ਤਦਾ ਦੇਵਪੁਤ੍ਤੋ ਅਨੁਵਿਚਰਨ੍ਤੋ ਤਂ ਦਿਸ੍ਵਾ ‘‘ਏਕਂ ਉਪਮਂ ਕਤ੍ਵਾ ਸੋਕਂ ਹਰਿਸ੍ਸਾਮੀ’’ਤਿ ਤਸ੍ਸ ਸੁਸਾਨਂ ਗਨ੍ਤ੍ਵਾ ਪਰਿਦੇਵਨਕਾਲੇ ਤਸ੍ਸੇਵ ਪੁਤ੍ਤਵਣ੍ਣੀ ਹੁਤ੍ਵਾ ਸਬ੍ਬਾਭਰਣਪਟਿਮਣ੍ਡਿਤੋ ਏਕਸ੍ਮਿਂ ਪਦੇਸੇ ਠਤ੍ਵਾ ਉਭੋ ਹਤ੍ਥੇ ਸੀਸੇ ਠਪੇਤ੍ਵਾ ਮਹਾਸਦ੍ਦੇਨ ਪਰਿਦੇਵਿ. ਬ੍ਰਾਹ੍ਮਣੋ ਸਦ੍ਦਂ ਸੁਤ੍ਵਾ ਤਂ ਓਲੋਕੇਤ੍ਵਾ ਪੁਤ੍ਤਪੇਮਂ ਪਟਿਲਭਿਤ੍ਵਾ ਤਸ੍ਸ ਸਨ੍ਤਿਕੇ ਠਤ੍ਵਾ ‘‘ਤਾਤ ਮਾਣਵ, ਇਮਸ੍ਮਿਂ ਸੁਸਾਨਮਜ੍ਝੇ ਕਸ੍ਮਾ ਪਰਿਦੇਵਸੀ’’ਤਿ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੧੧੫.

‘‘ਅਲਙ੍ਕਤੋ ਮਟ੍ਠਕੁਣ੍ਡਲੀ, ਮਾਲਧਾਰੀ ਹਰਿਚਨ੍ਦਨੁਸ੍ਸਦੋ;

ਬਾਹਾ ਪਗ੍ਗਯ੍ਹ ਕਨ੍ਦਸਿ, ਵਨਮਜ੍ਝੇ ਕਿਂ ਦੁਕ੍ਖਿਤੋ ਤੁਵ’’ਨ੍ਤਿ.

ਤਤ੍ਥ ਅਲਙ੍ਕਤੋਤਿ ਨਾਨਾਭਰਣਵਿਭੂਸਿਤੋ. ਮਟ੍ਠਕੁਣ੍ਡਲੀਤਿ ਕਰਣਪਰਿਨਿਟ੍ਠਿਤੇਹਿ ਮਟ੍ਠੇਹਿ ਕੁਣ੍ਡਲੇਹਿ ਸਮਨ੍ਨਾਗਤੋ. ਮਾਲਧਾਰੀਤਿ ਵਿਚਿਤ੍ਰਕੁਸੁਮਮਾਲਧਰੋ. ਹਰਿਚਨ੍ਦਨੁਸ੍ਸਦੋਤਿ ਸੁਵਣ੍ਣਵਣ੍ਣੇਨ ਚਨ੍ਦਨੇਨ ਅਨੁਲਿਤ੍ਤੋ. ਵਨਮਜ੍ਝੇਤਿ ਸੁਸਾਨਮਜ੍ਝੇ. ਕਿਂ ਦੁਕ੍ਖਿਤੋ ਤੁਵਨ੍ਤਿ ਕਿਂਕਾਰਣਾ ਦੁਕ੍ਖਿਤੋ ਤ੍ਵਂ, ਆਚਿਕ੍ਖ, ਅਹਂ ਤੇ ਯਂ ਇਚ੍ਛਸਿ, ਤਂ ਦਸ੍ਸਾਮੀਤਿ ਆਹ.

ਅਥਸ੍ਸ ਕਥੇਨ੍ਤੋ ਮਾਣਵੋ ਦੁਤਿਯਂ ਗਾਥਮਾਹ –

੧੧੬.

‘‘ਸੋਵਣ੍ਣਮਯੋ ਪਭਸ੍ਸਰੋ, ਉਪ੍ਪਨ੍ਨੋ ਰਥਪਞ੍ਜਰੋ ਮਮ;

ਤਸ੍ਸ ਚਕ੍ਕਯੁਗਂ ਨ ਵਿਨ੍ਦਾਮਿ, ਤੇਨ ਦੁਕ੍ਖੇਨ ਜਹਾਮਿ ਜੀਵਿਤ’’ਨ੍ਤਿ.

ਬ੍ਰਾਹ੍ਮਣੋ ਸਮ੍ਪਟਿਚ੍ਛਨ੍ਤੋ ਤਤਿਯਂ ਗਾਥਮਾਹ –

੧੧੭.

‘‘ਸੋਵਣ੍ਣਮਯਂ ਮਣੀਮਯਂ, ਲੋਹਮਯਂ ਅਥ ਰੂਪਿਯਾਮਯਂ;

ਪਾਵਦ ਰਥਂ ਕਰਿਸ੍ਸਾਮਿ ਤੇ, ਚਕ੍ਕਯੁਗਂ ਪਟਿਪਾਦਯਾਮਿ ਤ’’ਨ੍ਤਿ.

ਤਤ੍ਥ ਪਾਵਦਾਤਿ ਯਾਦਿਸੇਨ ਤੇ ਅਤ੍ਥੋ ਯਾਦਿਸਂ ਰੋਚੇਸਿ, ਤਾਦਿਸਂ ਵਦ, ਅਹਂ ਤੇ ਰਥ ਕਰਿਸ੍ਸਾਮਿ. ਪਟਿਪਾਦਯਾਮਿ ਤਨ੍ਤਿ ਤਂ ਪਞ੍ਜਰਾਨੁਰੂਪਂ ਚਕ੍ਕਯੁਗਂ ਅਧਿਗਚ੍ਛਾਪੇਮਿ.

ਤਂ ਸੁਤ੍ਵਾ ਮਾਣਵੇਨ ਕਥਿਤਾਯ ਗਾਥਾਯ ਪਠਮਪਾਦਂ ਸਤ੍ਥਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਕਥੇਸਿ, ਸੇਸਂ ਮਾਣਵੋ.

੧੧੮.

‘‘ਸੋ ਮਾਣਵੋ ਤਸ੍ਸ ਪਾਵਦਿ, ਚਨ੍ਦਸੂਰਿਯਾ ਉਭਯੇਤ੍ਥ ਭਾਤਰੋ;

ਸੋਵਣ੍ਣਮਯੋ ਰਥੋ ਮਮ, ਤੇਨ ਚਕ੍ਕਯੁਗੇਨ ਸੋਭਤੀ’’ਤਿ.

ਬ੍ਰਾਹ੍ਮਣੋ ਤਦਨਨ੍ਤਰਂ ਆਹ –

੧੧੯.

‘‘ਬਾਲੋ ਖੋ ਤ੍ਵਂਸਿ ਮਾਣਵ, ਯੋ ਤ੍ਵਂ ਪਤ੍ਥਯਸਿ ਅਪਤ੍ਥਿਯਂ;

ਮਞ੍ਞਾਮਿ ਤੁਵਂ ਮਰਿਸ੍ਸਸਿ, ਨ ਹਿ ਤ੍ਵਂ ਲਚ੍ਛਸਿ ਚਨ੍ਦਸੂਰਿਯੇ’’ਤਿ. –

ਬ੍ਰਾਹ੍ਮਣੇਨ ਵੁਤ੍ਤਗਾਥਾਯ ਅਪਤ੍ਥਿਯਨ੍ਤਿ ਅਪਤ੍ਥੇਤਬ੍ਬਂ.

ਤਤੋ ਮਾਣਵੋ ਆਹ –

੧੨੦.

‘‘ਗਮਨਾਗਮਨਮ੍ਪਿ ਦਿਸ੍ਸਤਿ, ਵਣ੍ਣਧਾਤੁ ਉਭਯੇਤ੍ਥ ਵੀਥਿਯੋ;

ਪੇਤੋ ਪਨ ਨੇਵ ਦਿਸ੍ਸਤਿ, ਕੋ ਨੁ ਖੋ ਕਨ੍ਦਤਂ ਬਾਲ੍ਯਤਰੋ’’ਤਿ.

ਮਾਣਵੇਨ ਵੁਤ੍ਤਗਾਥਾਯ ਗਮਨਾਗਮਨਨ੍ਤਿ ਉਗ੍ਗਮਨਞ੍ਚ ਅਤ੍ਥਗਮਨਞ੍ਚ. ਵਣ੍ਣੋਯੇਵ ਵਣ੍ਣਧਾਤੁ. ਉਭਯੇਤ੍ਥ ਵੀਥਿਯੋਤਿ ਏਤ੍ਥ ਆਕਾਸੇ ‘‘ਅਯਂ ਚਨ੍ਦਸ੍ਸ ਵੀਥਿ, ਅਯਂ ਸੂਰਿਯਸ੍ਸ ਵੀਥੀ’’ਤਿ ਏਵਂ ਉਭਯਗਮਨਾਗਮਨਭੂਮਿਯੋਪਿ ਪਞ੍ਞਾਯਨ੍ਤਿ. ਪੇਤੋ ਪਨਾਤਿ ਪਰਲੋਕਂ ਗਤਸਤ੍ਤੋ ਪਨ ਨ ਦਿਸ੍ਸਤੇਵ. ਕੋ ਨੁ ਖੋਤਿ ਏਵਂ ਸਨ੍ਤੇ ਅਮ੍ਹਾਕਂ ਦ੍ਵਿਨ੍ਨਂ ਕਨ੍ਦਨ੍ਤਾਨਂ ਕੋ ਨੁ ਖੋ ਬਾਲ੍ਯਤਰੋਤਿ.

ਏਵਂ ਮਾਣਵੇ ਕਥੇਨ੍ਤੇ ਬ੍ਰਾਹ੍ਮਣੋ ਸਲ੍ਲਕ੍ਖੇਤ੍ਵਾ ਗਾਥਮਾਹ –

੧੨੧.

‘‘ਸਚ੍ਚਂ ਖੋ ਵਦੇਸਿ ਮਾਣਵ, ਅਹਮੇਵ ਕਨ੍ਦਤਂ ਬਾਲ੍ਯਤਰੋ;

ਚਨ੍ਦਂ ਵਿਯ ਦਾਰਕੋ ਰੁਦਂ, ਪੇਤਂ ਕਾਲਕਤਾਭਿਪਤ੍ਥਯੇ’’ਤਿ.

ਤਤ੍ਥ ਚਨ੍ਦਂ ਵਿਯ ਦਾਰਕੋਤਿ ਯਥਾ ਦਹਰੋ ਗਾਮਦਾਰਕੋ ‘‘ਚਨ੍ਦਂ ਦੇਥਾ’’ਤਿ ਚਨ੍ਦਸ੍ਸਤ੍ਥਾਯ ਰੋਦੇਯ੍ਯ, ਏਵਂ ਅਹਮ੍ਪਿ ਪੇਤਂ ਕਾਲਕਤਂ ਅਭਿਪਤ੍ਥੇਮੀਤਿ.

ਇਤਿ ਬ੍ਰਾਹ੍ਮਣੋ ਮਾਣਵਸ੍ਸ ਕਥਾਯ ਨਿਸ੍ਸੋਕੋ ਹੁਤ੍ਵਾ ਤਸ੍ਸ ਥੁਤਿਂ ਕਰੋਨ੍ਤੋ ਸੇਸਗਾਥਾ ਅਭਾਸਿ –

੧੨੨.

‘‘ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੧੨੩.

‘‘ਅਬ੍ਬਹੀ ਵਤ ਮੇ ਸਲ੍ਲਂ, ਯਮਾਸਿ ਹਦਯਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪੁਤ੍ਤਸੋਕਂ ਅਪਾਨੁਦਿ.

੧੨੪.

‘‘ਸੋਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਵੀਤਸੋਕੋ ਅਨਾਵਿਲੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਮਾਣਵਾ’’ਤਿ.

ਅਥ ਨਂ ਮਾਣਵੋ ‘‘ਬ੍ਰਾਹ੍ਮਣ, ਯਸ੍ਸਤ੍ਥਾਯ ਤ੍ਵਂ ਰੋਦਸਿ, ਅਹਂ ਤੇ ਪੁਤ੍ਤੋ, ਅਹਂ ਦੇਵਲੋਕੇ ਨਿਬ੍ਬਤ੍ਤੋ, ਇਤੋ ਪਟ੍ਠਾਯ ਮਾ ਮਂ ਅਨੁਸੋਚਿ, ਦਾਨਂ ਦੇਹਿ, ਸੀਲਂ ਰਕ੍ਖਾਹਿ, ਉਪੋਸਥਂ ਕਰੋਹੀ’’ਤਿ ਓਵਦਿਤ੍ਵਾ ਸਕਟ੍ਠਾਨਮੇਵ ਗਤੋ. ਬ੍ਰਾਹ੍ਮਣੋਪਿ ਤਸ੍ਸੋਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਕਾਲਕਤੋ ਦੇਵਲੋਕੇ ਨਿਬ੍ਬਤ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਹਿ, ਸਚ੍ਚਪਰਿਯੋਸਾਨੇ ਕੁਟੁਮ੍ਬਿਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.ਤਦਾ ਧਮ੍ਮਦੇਸਕਦੇਵਪੁਤ੍ਤੋ ਅਹਮੇਵ ਅਹੋਸਿਨ੍ਤਿ.

ਮਟ੍ਠਕੁਣ੍ਡਲੀਜਾਤਕਵਣ੍ਣਨਾ ਏਕਾਦਸਮਾ.

[੪੫੦] ੧੨. ਬਿਲਾਰਕੋਸਿਯਜਾਤਕਵਣ੍ਣਨਾ

ਅਪਚਨ੍ਤਾਪੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਦਾਨਵਿਤ੍ਤਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਕਿਰ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਸਾਸਨੇ ਪਬ੍ਬਜਿਤ੍ਵਾ ਪਬ੍ਬਜਿਤਕਾਲਤੋ ਪਟ੍ਠਾਯ ਦਾਨਵਿਤ੍ਤੋ ਅਹੋਸਿ ਦਾਨਜ੍ਝਾਸਯੋ, ਪਤ੍ਤਪਰਿਯਾਪਨ੍ਨਮ੍ਪਿ ਪਿਣ੍ਡਪਾਤਂ ਅਞ੍ਞਸ੍ਸ ਅਦਤ੍ਵਾ ਨ ਭੁਞ੍ਜਿ, ਅਨ੍ਤਮਸੋ ਪਾਨੀਯਮ੍ਪਿ ਲਭਿਤ੍ਵਾ ਅਞ੍ਞਸ੍ਸ ਅਦਤ੍ਵਾ ਨ ਪਿਵਿ, ਏਵਂ ਦਾਨਾਭਿਰਤੋ ਅਹੋਸਿ. ਅਥਸ੍ਸ ਧਮ੍ਮਸਭਾਯਂ ਭਿਕ੍ਖੂ ਗੁਣਕਥਂ ਕਥੇਸੁਂ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ਤਂ ਭਿਕ੍ਖੁਂ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਦਾਨਵਿਤ੍ਤੋ ਦਾਨਜ੍ਝਾਸਯੋ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖਵੇ ਅਯਂ ਪੁਬ੍ਬੇ ਅਸ੍ਸਦ੍ਧੋ ਅਹੋਸਿ ਅਪ੍ਪਸਨ੍ਨੋ, ਤਿਣਗ੍ਗੇਨ ਤੇਲਬਿਨ੍ਦੁਮ੍ਪਿ ਉਦ੍ਧਰਿਤ੍ਵਾ ਕਸ੍ਸਚਿ ਨ ਅਦਾਸਿ, ਅਥ ਨਂ ਅਹਂ ਦਮੇਤ੍ਵਾ ਨਿਬ੍ਬਿਸੇਵਨਂ ਕਤ੍ਵਾ ਦਾਨਫਲਂ ਞਾਪੇਸਿਂ, ਤਮੇਵ ਦਾਨਨਿਨ੍ਨਂ ਚਿਤ੍ਤਂ ਭਵਨ੍ਤਰੇਪਿ ਨ ਪਜਹਤੀ’’ਤਿ ਵਤ੍ਵਾ ਭਿਕ੍ਖੂਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸੇਟ੍ਠਿਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਕੁਟੁਮ੍ਬਂ ਸਣ੍ਠਪੇਤ੍ਵਾ ਪਿਤੁ ਅਚ੍ਚਯੇਨ ਸੇਟ੍ਠਿਟ੍ਠਾਨਂ ਪਤ੍ਵਾ ਏਕਦਿਵਸਂ ਧਨਵਿਲੋਕਨਂ ਕਤ੍ਵਾ ‘‘ਧਨਂ ਪਞ੍ਞਾਯਤਿ, ਏਤਸ੍ਸ ਉਪ੍ਪਾਦਕਾ ਨ ਪਞ੍ਞਾਯਨ੍ਤਿ, ਇਮਂ ਧਨਂ ਵਿਸ੍ਸਜ੍ਜੇਤ੍ਵਾ ਮਹਾਦਾਨਂ ਦਾਤੁਂ ਵਟ੍ਟਤੀ’’ਤਿ ਦਾਨਸਾਲਂ ਕਾਰੇਤ੍ਵਾ ਯਾਵਜੀਵਂ ਮਹਾਦਾਨਂ ਪਵਤ੍ਤੇਤ੍ਵਾ ਆਯੁਪਰਿਯੋਸਾਨੇ ‘‘ਇਦਂ ਦਾਨਵਤ੍ਤਂ ਮਾ ਉਪਚ੍ਛਿਨ੍ਦੀ’’ਤਿ ਪੁਤ੍ਤਸ੍ਸ ਓਵਾਦਂ ਦਤ੍ਵਾ ਤਾਵਤਿਂਸਭਵਨੇ ਸਕ੍ਕੋ ਹੁਤ੍ਵਾ ਨਿਬ੍ਬਤ੍ਤਿ. ਪੁਤ੍ਤੋਪਿਸ੍ਸ ਤਥੇਵ ਦਾਨਂ ਦਤ੍ਵਾ ਪੁਤ੍ਤਂ ਓਵਦਿਤ੍ਵਾ ਆਯੁਪਰਿਯੋਸਾਨੇ ਚਨ੍ਦੋ ਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਪੁਤ੍ਤੋ ਸੂਰਿਯੋ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸਪਿ ਪੁਤ੍ਤੋ ਮਾਤਲਿਸਙ੍ਗਾਹਕੋ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਪੁਤ੍ਤੋ ਪਞ੍ਚਸਿਖੋ ਗਨ੍ਧਬ੍ਬਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਛਟ੍ਠੋ ਪਨ ਅਸ੍ਸਦ੍ਧੋ ਅਹੋਸਿ ਥਦ੍ਧਚਿਤ੍ਤੋ ਨਿਸ੍ਨੇਹੋ ਮਚ੍ਛਰੀ, ਦਾਨਸਾਲਂ ਵਿਦ੍ਧਂਸੇਤ੍ਵਾ ਝਾਪੇਤ੍ਵਾ ਯਾਚਕੇ ਪੋਥੇਤ੍ਵਾ ਨੀਹਰਾਪੇਸਿ, ਕਸ੍ਸਚਿ ਤਿਣਗ੍ਗੇਨ ਉਦ੍ਧਰਿਤ੍ਵਾ ਤੇਲਬਿਨ੍ਦੁਮ੍ਪਿ ਨ ਦੇਤਿ. ਤਦਾ ਸਕ੍ਕੋ ਦੇਵਰਾਜਾ ਅਤ੍ਤਨੋ ਪੁਬ੍ਬਕਮ੍ਮਂ ਓਲੋਕੇਤ੍ਵਾ ‘‘ਪਵਤ੍ਤਤਿ ਨੁ ਖੋ ਮੇ ਦਾਨਵਂਸੋ, ਉਦਾਹੁ ਨੋ’’ਤਿ ਉਪਧਾਰੇਨ੍ਤੋ ‘‘ਪੁਤ੍ਤੋ ਮੇ ਦਾਨਂ ਪਵਤ੍ਤੇਤ੍ਵਾ ਚਨ੍ਦੋ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਪੁਤ੍ਤੋ ਸੂਰਿਯੋ, ਤਸ੍ਸ ਪੁਤ੍ਤੋ ਮਾਤਲਿ, ਤਸ੍ਸ ਪੁਤ੍ਤੋ ਪਞ੍ਚਸਿਖੋ ਗਨ੍ਧਬ੍ਬਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਛਟ੍ਠੋ ਪਨ ਤਂ ਵਂਸਂ ਉਪਚ੍ਛਿਨ੍ਦੀ’’ਤਿ ਪਸ੍ਸਿ.

ਅਥਸ੍ਸ ਏਤਦਹੋਸਿ ‘‘ਇਮਂ ਪਾਪਧਮ੍ਮਂ ਦਮੇਤ੍ਵਾ ਦਾਨਫਲਂ ਜਾਨਾਪੇਤ੍ਵਾ ਆਗਮਿਸ੍ਸਾਮੀ’’ਤਿ. ਸੋ ਚਨ੍ਦਸੂਰਿਯਮਾਤਲਿਪਞ੍ਚਸਿਖੇ ਪਕ੍ਕੋਸਾਪੇਤ੍ਵਾ ‘‘ਸਮ੍ਮਾ, ਅਮ੍ਹਾਕਂ ਵਂਸੇ ਛਟ੍ਠੋ ਕੁਲਵਂਸਂ ਸਮੁਚ੍ਛਿਨ੍ਦਿਤ੍ਵਾ ਦਾਨਸਾਲਂ ਝਾਪੇਤ੍ਵਾ ਯਾਚਕੇ ਨੀਹਰਾਪੇਸਿ, ਨ ਕਸ੍ਸਚਿ ਕਿਞ੍ਚਿ ਦੇਤਿ, ਏਥ ਨਂ ਦਮੇਸ੍ਸਾਮਾ’’ਤਿ ਤੇਹਿ ਸਦ੍ਧਿਂ ਬਾਰਾਣਸਿਂ ਅਗਮਾਸਿ. ਤਸ੍ਮਿਂ ਖਣੇ ਸੇਟ੍ਠਿ ਰਾਜੁਪਟ੍ਠਾਨਂ ਕਤ੍ਵਾ ਆਗਨ੍ਤ੍ਵਾ ਸਤ੍ਤਮੇ ਦ੍ਵਾਰਕੋਟ੍ਠਕੇ ਅਨ੍ਤਰਵੀਥਿਂ ਓਲੋਕੇਨ੍ਤੋ ਚਙ੍ਕਮਤਿ. ਸਕ੍ਕੋ ‘‘ਤੁਮ੍ਹੇ ਮਮ ਪਵਿਟ੍ਠਕਾਲੇ ਪਚ੍ਛਤੋ ਪਟਿਪਾਟਿਯਾ ਆਗਚ੍ਛਥਾ’’ਤਿ ਵਤ੍ਵਾ ਗਨ੍ਤ੍ਵਾ ਸੇਟ੍ਠਿਸ੍ਸ ਸਨ੍ਤਿਕੇ ਠਤ੍ਵਾ ‘‘ਭੋ ਮਹਾਸੇਟ੍ਠਿ, ਭੋਜਨਂ ਮੇ ਦੇਹੀ’’ਤਿ ਆਹ. ‘‘ਬ੍ਰਾਹ੍ਮਣ ਨਤ੍ਥਿ ਤਵ ਇਧ ਭਤ੍ਤਂ, ਅਞ੍ਞਤ੍ਥ ਗਚ੍ਛਾ’’ਤਿ. ‘‘ਭੋ ਮਹਾਸੇਟ੍ਠਿ, ਬ੍ਰਾਹ੍ਮਣੇਹਿ ਭਤ੍ਤੇ ਯਾਚਿਤੇ ਨ ਦਾਤੁਂ ਨ ਲਬ੍ਭਤੀ’’ਤਿ. ‘‘ਬ੍ਰਾਹ੍ਮਣ, ਮਮ ਗੇਹੇ ਪਕ੍ਕਮ੍ਪਿ ਪਚਿਤਬ੍ਬਮ੍ਪਿ ਭਤ੍ਤਂ ਨਤ੍ਥਿ, ਅਞ੍ਞਤ੍ਥ ਗਚ੍ਛਾ’’ਤਿ. ‘‘ਮਹਾਸੇਟ੍ਠਿ, ਏਕਂ ਤੇ ਸਿਲੋਕਂ ਕਥੇਸ੍ਸਾਮਿ, ਤਂ ਸੁਣਾਹੀ’’ਤਿ. ‘‘ਨਤ੍ਥਿ ਮਯ੍ਹਂ ਤਵ ਸਿਲੋਕੇਨਤ੍ਥੋ, ਮਾ ਇਧ ਤਿਟ੍ਠਾ’’ਤਿ. ਸਕ੍ਕੋ ਤਸ੍ਸ ਕਥਂ ਅਸੁਣਨ੍ਤੋ ਵਿਯ ਦ੍ਵੇ ਗਾਥਾ ਅਭਾਸਿ –

੧੨੫.

‘‘ਅਪਚਨ੍ਤਾਪਿ ਦਿਚ੍ਛਨ੍ਤਿ, ਸਨ੍ਤੋ ਲਦ੍ਧਾਨ ਭੋਜਨਂ;

ਕਿਮੇਵ ਤ੍ਵਂ ਪਚਮਾਨੋ, ਯਂ ਨ ਦਜ੍ਜਾ ਨ ਤਂ ਸਮਂ.

੧੨੬.

‘‘ਮਚ੍ਛੇਰਾ ਚ ਪਮਾਦਾ ਚ, ਏਵਂ ਦਾਨਂ ਨ ਦੀਯਤਿ;

ਪੁਞ੍ਞਂ ਆਕਙ੍ਖਮਾਨੇਨ, ਦੇਯ੍ਯਂ ਹੋਤਿ ਵਿਜਾਨਤਾ’’ਤਿ.

ਤਾਸਂ ਅਤ੍ਥੋ – ਮਹਾਸੇਟ੍ਠਿ ਅਪਚਨ੍ਤਾਪਿ ਸਨ੍ਤੋ ਸਪ੍ਪੁਰਿਸਾ ਭਿਕ੍ਖਾਚਰਿਯਾਯ ਲਦ੍ਧਮ੍ਪਿ ਭੋਜਨਂ ਦਾਤੁਂ ਇਚ੍ਛਨ੍ਤਿ, ਨ ਏਕਕਾ ਪਰਿਭੁਞ੍ਜਨ੍ਤਿ. ਕਿਮੇਵ ਤ੍ਵਂ ਪਚਮਾਨੋ ਯਂ ਨ ਦਦੇਯ੍ਯਾਸਿ, ਨ ਤਂ ਸਮਂ, ਤਂ ਤਵ ਅਨੁਰੂਪਂ ਅਨੁਚ੍ਛਵਿਕਂ ਨ ਹੋਤਿ. ਦਾਨਞ੍ਹਿ ਮਚ੍ਛੇਰੇਨ ਚ ਪਮਾਦੇਨ ਚਾਤਿ ਦ੍ਵੀਹਿ ਦੋਸੇਹਿ ਨ ਦੀਯਤਿ, ਪੁਞ੍ਞਂ ਆਕਙ੍ਖਮਾਨੇਨ ਵਿਜਾਨਤਾ ਪਣ੍ਡਿਤਮਨੁਸ੍ਸੇਨ ਦਾਤਬ੍ਬਮੇਵ ਹੋਤੀਤਿ.

ਸੋ ਤਸ੍ਸ ਵਚਨਂ ਸੁਤ੍ਵਾ ‘‘ਤੇਨ ਹਿ ਗੇਹਂ ਪਵਿਸਿਤ੍ਵਾ ਨਿਸੀਦ, ਥੋਕਂ ਲਚ੍ਛਸੀ’’ਤਿ ਆਹ. ਸਕ੍ਕੋ ਪਵਿਸਿਤ੍ਵਾ ਤੇ ਸਿਲੋਕੇ ਸਜ੍ਝਾਯਨ੍ਤੋ ਨਿਸੀਦਿ. ਅਥ ਨਂ ਚਨ੍ਦੋ ਆਗਨ੍ਤ੍ਵਾ ਭਤ੍ਤਂ ਯਾਚਿ. ‘‘ਨਤ੍ਥਿ ਤੇ ਭਤ੍ਤਂ, ਗਚ੍ਛਾ’’ਤਿ ਚ ਵੁਤ੍ਤੋ ‘‘ਮਹਾਸੇਟ੍ਠਿ ਅਨ੍ਤੋ ਏਕੋ ਬ੍ਰਾਹ੍ਮਣੋ ਨਿਸਿਨ੍ਨੋ, ਬ੍ਰਾਹ੍ਮਣਵਾਚਨਕਂ ਮਞ੍ਞੇ ਭਵਿਸ੍ਸਤਿ, ਅਹਮ੍ਪਿ ਭਵਿਸ੍ਸਾਮੀ’’ਤਿ ਵਤ੍ਵਾ ‘‘ਨਤ੍ਥਿ ਬ੍ਰਾਹ੍ਮਣਵਾਚਨਕਂ, ਨਿਕ੍ਖਮਾ’’ਤਿ ਵੁਚ੍ਚਮਾਨੋਪਿ ‘‘ਮਹਾਸੇਟ੍ਠਿ ਇਙ੍ਘ ਤਾਵ ਸਿਲੋਕਂ ਸੁਣਾਹੀ’’ਤਿ ਦ੍ਵੇ ਗਾਥਾ ਅਭਾਸਿ –

੧੨੭.

‘‘ਯਸ੍ਸੇਵ ਭੀਤੋ ਨ ਦਦਾਤਿ ਮਚ੍ਛਰੀ, ਤਦੇਵਾਦਦਤੋ ਭਯਂ;

ਜਿਘਚ੍ਛਾ ਚ ਪਿਪਾਸਾ ਚ, ਯਸ੍ਸ ਭਾਯਤਿ ਮਚ੍ਛਰੀ;

ਤਮੇਵ ਬਾਲਂ ਫੁਸਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚ.

੧੨੮.

‘‘ਤਸ੍ਮਾ ਵਿਨੇਯ੍ਯ ਮਚ੍ਛੇਰਂ, ਦਜ੍ਜਾ ਦਾਨਂ ਮਲਾਭਿਭੂ;

ਪੁਞ੍ਞਾਨਿ ਪਰਲੋਕਸ੍ਮਿਂ, ਪਤਿਟ੍ਠਾ ਹੋਨ੍ਤਿ ਪਾਣਿਨ’’ਨ੍ਤਿ.

ਤਤ੍ਥ ਯਸ੍ਸ ਭਾਯਤੀਤਿ ‘‘ਅਹਂ ਅਞ੍ਞੇਸਂ ਦਤ੍ਵਾ ਸਯਂ ਜਿਘਚ੍ਛਿਤੋ ਚ ਪਿਪਾਸਿਤੋ ਚ ਭਵਿਸ੍ਸਾਮੀ’’ਤਿ ਯਸ੍ਸਾ ਜਿਘਚ੍ਛਾਯ ਪਿਪਾਸਾਯ ਭਾਯਤਿ. ਤਮੇਵਾਤਿ ਤਞ੍ਞੇਵ ਜਿਘਚ੍ਛਾਪਿਪਾਸਾਸਙ੍ਖਾਤਂ ਭਯਂ ਏਤਂ ਬਾਲਂ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਇਧਲੋਕੇ ਪਰਲੋਕੇ ਚ ਫੁਸਤਿ ਪੀਲ਼ੇਤਿ, ਅਚ੍ਚਨ੍ਤਦਾਲਿਦ੍ਦਿਯਂ ਪਾਪੁਣਾਤਿ. ਮਲਾਭਿਭੂਤਿ ਮਚ੍ਛਰਿਯਮਲਂ ਅਭਿਭਵਨ੍ਤੋ.

ਤਸ੍ਸਪਿ ਵਚਨਂ ਸੁਤ੍ਵਾ ‘‘ਤੇਨ ਹਿ ਪਵਿਸ, ਥੋਕਂ ਲਭਿਸ੍ਸਸੀ’’ਤਿ ਆਹ. ਸੋਪਿ ਪਵਿਸਿਤ੍ਵਾ ਸਕ੍ਕਸ੍ਸ ਸਨ੍ਤਿਕੇ ਨਿਸੀਦਿ. ਤਤੋ ਥੋਕਂ ਵੀਤਿਨਾਮੇਤ੍ਵਾ ਸੂਰਿਯੋ ਆਗਨ੍ਤ੍ਵਾ ਭਤ੍ਤਂ ਯਾਚਨ੍ਤੋ ਦ੍ਵੇ ਗਾਥਾ ਅਭਾਸਿ –

੧੨੯.

‘‘ਦੁਦ੍ਦਦਂ ਦਦਮਾਨਾਨਂ, ਦੁਕ੍ਕਰਂ ਕਮ੍ਮ ਕੁਬ੍ਬਤਂ;

ਅਸਨ੍ਤੋ ਨਾਨੁਕੁਬ੍ਬਨ੍ਤਿ, ਸਤਂ ਧਮ੍ਮੋ ਦੁਰਨ੍ਨਯੋ.

੧੩੦.

‘‘ਤਸ੍ਮਾ ਸਤਞ੍ਚ ਅਸਤਂ, ਨਾਨਾ ਹੋਤਿ ਇਤੋ ਗਤਿ;

ਅਸਨ੍ਤੋ ਨਿਰਯਂ ਯਨ੍ਤਿ, ਸਨ੍ਤੋ ਸਗ੍ਗਪਰਾਯਣਾ’’ਤਿ.

ਤਤ੍ਥ ਦੁਦ੍ਦਦਨ੍ਤਿ ਦਾਨਂ ਨਾਮ ਦੁਦ੍ਦਦਂ ਮਚ੍ਛੇਰਂ ਅਭਿਭਵਿਤ੍ਵਾ ਦਾਤਬ੍ਬਤੋ, ਤਂ ਦਦਮਾਨਾਨਂ. ਦੁਕ੍ਕਰਨ੍ਤਿ ਤਦੇਵ ਦਾਨਕਮ੍ਮਂ ਦੁਕ੍ਕਰਂ ਯੁਦ੍ਧਸਦਿਸਂ, ਤਂ ਕੁਬ੍ਬਤਂ. ਨਾਨੁਕੁਬ੍ਬਨ੍ਤੀਤਿ ਅਸਪ੍ਪੁਰਿਸਾ ਦਾਨਫਲਂ ਅਜਾਨਨ੍ਤਾ ਤੇਸਂ ਗਤਮਗ੍ਗਂ ਨਾਨੁਗਚ੍ਛਨ੍ਤਿ. ਸਤਂ ਧਮ੍ਮੋਤਿ ਸਪ੍ਪੁਰਿਸਾਨਂ ਬੋਧਿਸਤ੍ਤਾਨਂ ਧਮ੍ਮੋ ਅਞ੍ਞੇਹਿ ਦੁਰਨੁਗਮੋ. ਅਸਨ੍ਤੋਤਿ ਮਚ੍ਛਰਿਯਵਸੇਨ ਦਾਨਂ ਅਦਤ੍ਵਾ ਅਸਪ੍ਪੁਰਿਸਾ ਨਿਰਯਂ ਯਨ੍ਤਿ.

ਸੇਟ੍ਠਿ ਗਹੇਤਬ੍ਬਗਹਣਂ ਅਪਸ੍ਸਨ੍ਤੋ ‘‘ਤੇਨ ਹਿ ਪਵਿਸਿਤ੍ਵਾ ਬ੍ਰਾਹ੍ਮਣਾਨਂ ਸਨ੍ਤਿਕੇ ਨਿਸੀਦ, ਥੋਕਂ ਲਚ੍ਛਸੀ’’ਤਿ ਆਹ. ਤਤੋ ਥੋਕਂ ਵੀਤਿਨਾਮੇਤ੍ਵਾ ਮਾਤਲਿ ਆਗਨ੍ਤ੍ਵਾ ਭਤ੍ਤਂ ਯਾਚਿਤ੍ਵਾ ‘‘ਨਤ੍ਥੀ’’ਤਿ ਵਚਨਮਤ੍ਤਕਾਲਮੇਵ ਸਤ੍ਤਮਂ ਗਾਥਮਾਹ –

੧੩੧.

‘‘ਅਪ੍ਪਸ੍ਮੇਕੇ ਪਵੇਚ੍ਛਨ੍ਤਿ, ਬਹੁਨੇਕੇ ਨ ਦਿਚ੍ਛਰੇ;

ਅਪ੍ਪਸ੍ਮਾ ਦਕ੍ਖਿਣਾ ਦਿਨ੍ਨਾ, ਸਹਸ੍ਸੇਨ ਸਮਂ ਮਿਤਾ’’ਤਿ.

ਤਤ੍ਥ ਅਪ੍ਪਸ੍ਮੇਕੇ ਪਵੇਚ੍ਛਨ੍ਤੀਤਿ ਮਹਾਸੇਟ੍ਠਿ ਏਕਚ੍ਚੇ ਪਣ੍ਡਿਤਪੁਰਿਸਾ ਅਪ੍ਪਸ੍ਮਿਮ੍ਪਿ ਦੇਯ੍ਯਧਮ੍ਮੇ ਪਵੇਚ੍ਛਨ੍ਤਿ, ਦਦਨ੍ਤਿਯੇਵਾਤਿ ਅਤ੍ਥੋ. ਬਹੁਨਾਪਿ ਦੇਯ੍ਯਧਮ੍ਮੇਨ ਸਮਨ੍ਨਾਗਤਾ ਏਕੇ ਸਤ੍ਤਾ ਨ ਦਿਚ੍ਛਰੇ ਨ ਦਦਨ੍ਤਿ. ਦਕ੍ਖਿਣਾਤਿ ਕਮ੍ਮਞ੍ਚ ਫਲਞ੍ਚ ਸਦ੍ਦਹਿਤ੍ਵਾ ਦਿਨ੍ਨਦਾਨਂ. ਸਹਸ੍ਸੇਨ ਸਮਂ ਮਿਤਾਤਿ ਏਵਂ ਦਿਨ੍ਨਾ ਕਟਚ੍ਛੁਭਤ੍ਤਮਤ੍ਤਾਪਿ ਦਕ੍ਖਿਣਾ ਸਹਸ੍ਸਦਾਨੇਨ ਸਦ੍ਧਿਂ ਮਿਤਾ, ਮਹਾਫਲਤ੍ਤਾ ਸਹਸ੍ਸਦਾਨਸਦਿਸਾਵ ਹੋਤੀਤਿ ਅਤ੍ਥੋ.

ਤਮ੍ਪਿ ਸੋ ‘‘ਤੇਨ ਹਿ ਪਵਿਸਿਤ੍ਵਾ ਨਿਸੀਦਾ’’ਤਿ ਆਹ. ਤਤੋ ਥੋਕਂ ਵੀਤਿਨਾਮੇਤ੍ਵਾ ਪਞ੍ਚਸਿਖੋ ਆਗਨ੍ਤ੍ਵਾ ਭਤ੍ਤਂ ਯਾਚਿਤ੍ਵਾ ‘‘ਨਤ੍ਥਿ ਗਚ੍ਛਾ’’ਤਿ ਵੁਤ੍ਤੇ ‘‘ਅਹਂ ਨ ਗਤਪੁਬ੍ਬੋ, ਇਮਸ੍ਮਿਂ ਗੇਹੇ ਬ੍ਰਾਹ੍ਮਣਵਾਚਨਕਂ ਭਵਿਸ੍ਸਤਿ ਮਞ੍ਞੇ’’ਤਿ ਤਸ੍ਸ ਧਮ੍ਮਕਥਂ ਆਰਭਨ੍ਤੋ ਅਟ੍ਠਮਂ ਗਾਥਮਾਹ –

੧੩੨.

‘‘ਧਮ੍ਮਂ ਚਰੇ ਯੋਪਿ ਸਮੁਞ੍ਛਕਂ ਚਰੇ, ਦਾਰਞ੍ਚ ਪੋਸਂ ਦਦਮਪ੍ਪਕਸ੍ਮਿਂ;

ਸਤਂ ਸਹਸ੍ਸਾਨਂ ਸਹਸ੍ਸਯਾਗਿਨਂ, ਕਲਮ੍ਪਿ ਨਾਗ੍ਘਨ੍ਤਿ ਤਥਾਵਿਧਸ੍ਸ ਤੇ’’ਤਿ.

ਤਤ੍ਥ ਧਮ੍ਮਨ੍ਤਿ ਤਿਵਿਧਸੁਚਰਿਤਧਮ੍ਮਂ. ਸਮੁਞ੍ਛਕਨ੍ਤਿ ਗਾਮੇ ਵਾ ਆਮਕਪਕ੍ਕਭਿਕ੍ਖਾਚਰਿਯਂ ਅਰਞ੍ਞੇ ਵਾ ਫਲਾਫਲਹਰਣਸਙ੍ਖਾਤਂ ਉਞ੍ਛਂ ਯੋ ਚਰੇਯ੍ਯ, ਸੋਪਿ ਧਮ੍ਮਮੇਵ ਚਰੇ. ਦਾਰਞ੍ਚ ਪੋਸਨ੍ਤਿ ਅਤ੍ਤਨੋ ਚ ਪੁਤ੍ਤਦਾਰਂ ਪੋਸੇਨ੍ਤੋਯੇਵ. ਦਦਮਪ੍ਪਕਸ੍ਮਿਨ੍ਤਿ ਪਰਿਤ੍ਤੇ ਵਾ ਦੇਯ੍ਯਧਮ੍ਮੇ ਧਮ੍ਮਿਕਸਮਣਬ੍ਰਾਹ੍ਮਣਾਨਂ ਦਦਮਾਨੋ ਧਮ੍ਮਂ ਚਰੇਤਿ ਅਤ੍ਥੋ. ਸਤਂ ਸਹਸ੍ਸਾਨਂ ਸਹਸ੍ਸਯਾਗਿਨਨ੍ਤਿ ਪਰਂ ਪੋਥੇਤ੍ਵਾ ਵਿਹੇਠੇਤ੍ਵਾ ਸਹਸ੍ਸੇਨ ਯਾਗਂ ਯਜਨ੍ਤਾਨਂ ਸਹਸ੍ਸਯਾਗੀਨਂ ਇਸ੍ਸਰਾਨਂ ਸਤਸਹਸ੍ਸਮ੍ਪਿ. ਕਲਮ੍ਪਿ ਨਾਗ੍ਘਨ੍ਤਿ ਤਥਾਵਿਧਸ੍ਸ ਤੇਤਿ ਤੇਸਂ ਸਤਸਹਸ੍ਸਸਙ੍ਖਾਤਾਨਂ ਸਹਸ੍ਸਯਾਗੀਨਂ ਯਾਗਾ ਤਥਾਵਿਧਸ੍ਸ ਧਮ੍ਮੇਨ ਸਮੇਨ ਦੇਯ੍ਯਧਮ੍ਮਂ ਉਪ੍ਪਾਦੇਤ੍ਵਾ ਦੇਨ੍ਤਸ੍ਸ ਦੁਗ੍ਗਤਮਨੁਸ੍ਸਸ੍ਸ ਸੋਲ਼ਸਿਂ ਕਲਂ ਨ ਅਗ੍ਘਨ੍ਤੀਤਿ.

ਸੇਟ੍ਠਿ ਪਞ੍ਚਸਿਖਸ੍ਸ ਕਥਂ ਸੁਤ੍ਵਾ ਸਲ੍ਲਕ੍ਖੇਸਿ. ਅਥ ਨਂ ਅਨਗ੍ਘਕਾਰਣਂ ਪੁਚ੍ਛਨ੍ਤੋ ਨਵਮਂ ਗਾਥਮਾਹ –

੧੩੩.

‘‘ਕੇਨੇਸ ਯਞ੍ਞੋ ਵਿਪੁਲੋ ਮਹਗ੍ਘਤੋ, ਸਮੇਨ ਦਿਨ੍ਨਸ੍ਸ ਨ ਅਗ੍ਘਮੇਤਿ;

ਕਥਂ ਸਤਂ ਸਹਸ੍ਸਾਨਂ ਸਹਸ੍ਸਯਾਗਿਨਂ, ਕਲਮ੍ਪਿ ਨਾਗ੍ਘਨ੍ਤਿ ਤਥਾਵਿਧਸ੍ਸ ਤੇ’’ਤਿ.

ਤਤ੍ਥ ਯਞ੍ਞੋਤਿ ਦਾਨਯਾਗੋ ਸਤਸਹਸ੍ਸਪਰਿਚ੍ਚਾਗਵਸੇਨ ਵਿਪੁਲੋ, ਵਿਪੁਲਤ੍ਤਾਵ ਮਹਗ੍ਘਤੋ. ਸਮੇਨ ਦਿਨ੍ਨਸ੍ਸਾਤਿ ਧਮ੍ਮੇਨ ਦਿਨ੍ਨਸ੍ਸ ਕੇਨ ਕਾਰਣੇਨ ਅਗ੍ਘਂ ਨ ਉਪੇਤਿ. ਕਥਂ ਸਤਂ ਸਹਸ੍ਸਾਨਨ੍ਤਿ ਬ੍ਰਾਹ੍ਮਣ, ਕਥਂ ਸਹਸ੍ਸਯਾਗੀਨਂ ਪੁਰਿਸਾਨਂ ਬਹੂਨਂ ਸਹਸ੍ਸਾਨਂ ਸਤਸਹਸ੍ਸਸਙ੍ਖਾਤਾ ਇਸ੍ਸਰਾ ਤਥਾਵਿਧਸ੍ਸ ਧਮ੍ਮੇਨ ਉਪ੍ਪਾਦੇਤ੍ਵਾ ਦਾਯਕਸ੍ਸ ਏਕਸ੍ਸ ਦੁਗ੍ਗਤਮਨੁਸ੍ਸਸ੍ਸ ਕਲਂ ਨਾਗ੍ਘਨ੍ਤੀਤਿ.

ਅਥਸ੍ਸ ਕਥੇਨ੍ਤੋ ਪਞ੍ਚਸਿਖੋ ਓਸਾਨਗਾਥਮਾਹ –

੧੩੪.

‘‘ਦਦਨ੍ਤਿ ਹੇਕੇ ਵਿਸਮੇ ਨਿਵਿਟ੍ਠਾ, ਛੇਤ੍ਵਾ ਵਧਿਤ੍ਵਾ ਅਥ ਸੋਚਯਿਤ੍ਵਾ;

ਸਾ ਦਕ੍ਖਿਣਾ ਅਸ੍ਸੁਮੁਖਾ ਸਦਣ੍ਡਾ, ਸਮੇਨ ਦਿਨ੍ਨਸ੍ਸ ਨ ਅਗ੍ਘਮੇਤਿ;

ਏਵਂ ਸਤਂ ਸਹਸ੍ਸਾਨਂ ਸਹਸ੍ਸਯਾਗਿਨਂ, ਕਲਮ੍ਪਿ ਨਾਗ੍ਘਨ੍ਤਿ ਤਥਾਵਿਧਸ੍ਸ ਤੇ’’ਤਿ.

ਤਤ੍ਥ ਵਿਸਮੇਤਿ ਵਿਸਮੇ ਕਾਯਕਮ੍ਮਾਦਿਮ੍ਹਿ ਨਿਵਿਟ੍ਠਾ. ਛੇਤ੍ਵਾਤਿ ਕਿਲਮੇਤ੍ਵਾ. ਵਧਿਤ੍ਵਾਤਿ ਮਾਰੇਤ੍ਵਾ. ਸੋਚਯਿਤ੍ਵਾਤਿ ਸਸੋਕੇ ਕਤ੍ਵਾ.

ਸੋ ਪਞ੍ਚਸਿਖਸ੍ਸ ਧਮ੍ਮਕਥਂ ਸੁਤ੍ਵਾ ‘‘ਤੇਨ ਹਿ ਗਚ੍ਛ, ਗੇਹਂ ਪਵਿਸਿਤ੍ਵਾ ਨਿਸੀਦ, ਥੋਕਂ ਲਚ੍ਛਸੀ’’ਤਿ ਆਹ. ਸੋਪਿ ਗਨ੍ਤ੍ਵਾ ਤੇਸਂ ਸਨ੍ਤਿਕੇ ਨਿਸੀਦਿ. ਤਤੋ ਬਿਲਾਰਕੋਸਿਯੋ ਸੇਟ੍ਠਿ ਏਕਂ ਦਾਸਿਂ ਆਮਨ੍ਤੇਤ੍ਵਾ ‘‘ਏਤੇਸਂ ਬ੍ਰਾਹ੍ਮਣਾਨਂ ਪਲਾਪਵੀਹੀਨਂ ਨਾਲ਼ਿਂ ਨਾਲ਼ਿਂ ਦੇਹੀ’’ਤਿ ਆਹ. ਸਾ ਵੀਹੀ ਗਹੇਤ੍ਵਾ ਬ੍ਰਾਹ੍ਮਣੇ ਉਪਸਙ੍ਕਮਿਤ੍ਵਾ ‘‘ਇਮੇ ਆਦਾਯ ਯਤ੍ਥ ਕਤ੍ਥਚਿ ਪਚਾਪੇਤ੍ਵਾ ਭੁਞ੍ਜਥਾ’’ਤਿ ਆਹ. ‘‘ਨ ਅਮ੍ਹਾਕਂ ਵੀਹਿਨਾ ਅਤ੍ਥੋ, ਨ ਮਯਂ ਵੀਹਿਂ ਆਮਸਾਮਾ’’ਤਿ. ‘‘ਅਯ੍ਯ, ਵੀਹਿਂ ਕਿਰੇਤੇ ਨਾਮਸਨ੍ਤੀ’’ਤਿ? ‘‘ਤੇਨ ਹਿ ਤੇਸਂ ਤਣ੍ਡੁਲੇ ਦੇਹੀ’’ਤਿ. ਸਾ ਤਣ੍ਡੁਲੇ ਆਦਾਯ ਗਨ੍ਤ੍ਵਾ ‘‘ਬ੍ਰਾਹ੍ਮਣਾ ਤਣ੍ਡੁਲੇ ਗਣ੍ਹਥਾ’’ਤਿ ਆਹ. ‘‘ਮਯਂ ਆਮਕਂ ਨ ਪਟਿਗ੍ਗਣ੍ਹਾਮਾ’’ਤਿ. ‘‘ਅਯ੍ਯ, ਆਮਕਂ ਕਿਰ ਨ ਗਣ੍ਹਨ੍ਤੀ’’ਤਿ. ‘‘ਤੇਨ ਹਿ ਤੇਸਂ ਕਰੋਟਿਯਂ ਵਡ੍ਢੇਤ੍ਵਾ ਗੋਭਤ੍ਤਂ ਦੇਹੀ’’ਤਿ. ਸਾ ਤੇਸਂ ਕਰੋਟਿਯਂ ਵਡ੍ਢੇਤ੍ਵਾ ਮਹਾਗੋਣਾਨਂ ਪਕ੍ਕਭਤ੍ਤਂ ਆਹਰਿਤ੍ਵਾ ਅਦਾਸਿ. ਪਞ੍ਚਪਿ ਜਨਾ ਕਬਲ਼ੇ ਵਡ੍ਢੇਤ੍ਵਾ ਮੁਖੇ ਪਕ੍ਖਿਪਿਤ੍ਵਾ ਗਲੇ ਲਗ੍ਗਾਪੇਤ੍ਵਾ ਅਕ੍ਖੀਨਿ ਪਰਿਵਤ੍ਤੇਤ੍ਵਾ ਵਿਸ੍ਸਟ੍ਠਸਞ੍ਞਾ ਮਤਾ ਵਿਯ ਨਿਪਜ੍ਜਿਂਸੁ. ਦਾਸੀ ਤੇ ਦਿਸ੍ਵਾ ‘‘ਮਤਾ ਭਵਿਸ੍ਸਨ੍ਤੀ’’ਤਿ ਭੀਤਾ ਗਨ੍ਤ੍ਵਾ ਸੇਟ੍ਠਿਨੋ ਆਰੋਚੇਸਿ ‘‘ਅਯ੍ਯ, ਤੇ ਬ੍ਰਾਹ੍ਮਣਾ ਗੋਭਤ੍ਤਂ ਗਿਲਿਤੁਂ ਅਸਕ੍ਕੋਨ੍ਤਾ ਮਤਾ’’ਤਿ.

ਸੋ ਚਿਨ੍ਤੇਸਿ ‘‘ਇਦਾਨਿ ਅਯਂ ਪਾਪਧਮ੍ਮੋ ਸੁਖੁਮਾਲਬ੍ਰਾਹ੍ਮਣਾਨਂ ਗੋਭਤ੍ਤਂ ਦਾਪੇਸਿ, ਤੇ ਤਂ ਗਿਲਿਤੁਂ ਅਸਕ੍ਕੋਨ੍ਤਾ ਮਤਾਤਿ ਮਂ ਗਰਹਿਸ੍ਸਨ੍ਤੀ’’ਤਿ. ਤਤੋ ਦਾਸਿਂ ਆਹ – ‘‘ਖਿਪ੍ਪਂ ਗਨ੍ਤ੍ਵਾ ਏਤੇਸਂ ਕਰੋਟਿਕੇਸੁ ਭਤ੍ਤਂ ਹਰਿਤ੍ਵਾ ਨਾਨਗ੍ਗਰਸਂ ਸਾਲਿਭਤ੍ਤਂ ਵਡ੍ਢੇਹੀ’’ਤਿ. ਸਾ ਤਥਾ ਅਕਾਸਿ. ਸੇਟ੍ਠਿ ਅਨ੍ਤਰਪੀਥਿਂ ਪਟਿਪਨ੍ਨਮਨੁਸ੍ਸੇ ਪਕ੍ਕੋਸਾਪੇਤ੍ਵਾ ‘‘ਅਹਂ ਮਮ ਭੁਞ੍ਜਨਨਿਯਾਮੇਨ ਏਤੇਸਂ ਬ੍ਰਾਹ੍ਮਣਾਨਂ ਭਤ੍ਤਂ ਦਾਪੇਸਿਂ, ਏਤੇ ਲੋਭੇਨ ਮਹਨ੍ਤੇ ਪਿਣ੍ਡੇ ਕਤ੍ਵਾ ਭੁਞ੍ਜਮਾਨਾ ਗਲੇ ਲਗ੍ਗਾਪੇਤ੍ਵਾ ਮਤਾ, ਮਮ ਨਿਦ੍ਦੋਸਭਾਵਂ ਜਾਨਾਥਾ’’ਤਿ ਵਤ੍ਵਾ ਪਰਿਸਂ ਸਨ੍ਨਿਪਾਤੇਸਿ. ਮਹਾਜਨੇ ਸਨ੍ਨਿਪਤਿਤੇ ਬ੍ਰਾਹ੍ਮਣਾ ਉਟ੍ਠਾਯ ਮਹਾਜਨਂ ਓਲੋਕੇਤ੍ਵਾ ‘‘ਪਸ੍ਸਥਿਮਸ੍ਸ ਸੇਟ੍ਠਿਸ੍ਸ ਮੁਸਾਵਾਦਿਤਂ, ‘ਅਮ੍ਹਾਕਂ ਅਤ੍ਤਨੋ ਭੁਞ੍ਜਨਭਤ੍ਤਂ ਦਾਪੇਸਿ’ਨ੍ਤਿ ਵਦਤਿ, ਪਠਮਂ ਗੋਭਤ੍ਤਂ ਅਮ੍ਹਾਕਂ ਦਤ੍ਵਾ ਅਮ੍ਹੇਸੁ ਮਤੇਸੁ ਵਿਯ ਨਿਪਨ੍ਨੇਸੁ ਇਮਂ ਭਤ੍ਤਂ ਵਡ੍ਢਾਪੇਸੀ’’ਤਿ ਵਤ੍ਵਾ ਅਤ੍ਤਨੋ ਮੁਖੇਹਿ ਗਹਿਤਭਤ੍ਤਂ ਭੂਮਿਯਂ ਪਾਤੇਤ੍ਵਾ ਦਸ੍ਸੇਸੁਂ. ਮਹਾਜਨੋ ਸੇਟ੍ਠਿਂ ਗਰਹਿ ‘‘ਅਨ੍ਧਬਾਲ, ਅਤ੍ਤਨੋ ਕੁਲਵਂਸਂ ਨਾਸੇਸਿ, ਦਾਨਸਾਲਂ ਝਾਪੇਸਿ, ਯਾਚਕੇ ਗੀਵਾਯਂ ਗਹੇਤ੍ਵਾ ਨੀਹਰਾਪੇਸਿ, ਇਦਾਨਿ ਇਮੇਸਂ ਸੁਖੁਮਾਲਬ੍ਰਾਹ੍ਮਣਾਨਂ ਭਤ੍ਤਂ ਦੇਨ੍ਤੋ ਗੋਭਤ੍ਤਂ ਦਾਪੇਸਿ, ਪਰਲੋਕਂ ਗਚ੍ਛਨ੍ਤੋ ਤਵ ਘਰੇ ਵਿਭਵਂ ਗੀਵਾਯਂ ਬਨ੍ਧਿਤ੍ਵਾ ਗਮਿਸ੍ਸਸਿ ਮਞ੍ਞੇ’’ਤਿ.

ਤਸ੍ਮਿਂ ਖਣੇ ਸਕ੍ਕੋ ਮਹਾਜਨਂ ਪੁਚ੍ਛਿ ‘‘ਜਾਨਾਥ, ਤੁਮ੍ਹੇ ਇਮਸ੍ਮਿਂ ਗੇਹੇ ਧਨਂ ਕਸ੍ਸ ਸਨ੍ਤਕ’’ਨ੍ਤਿ? ‘‘ਨ ਜਾਨਾਮਾ’’ਤਿ. ‘‘ਇਮਸ੍ਮਿਂ ਨਗਰੇ ਅਸੁਕਕਾਲੇ ਬਾਰਾਣਸਿਯਂ ਮਹਾਸੇਟ੍ਠਿ ਨਾਮ ਦਾਨਸਾਲਂ ਕਾਰੇਤ੍ਵਾ ਮਹਾਦਾਨਂ ਪਵਤ੍ਤਯੀ’’ਤਿ ਸੁਤਪੁਬ੍ਬਂ ਤੁਮ੍ਹੇਹੀਤਿ. ‘‘ਆਮ ਸੁਣਾਮਾ’’ਤਿ. ‘‘ਅਹਂ ਸੋ ਸੇਟ੍ਠਿ, ਦਾਨਂ ਦਤ੍ਵਾ ਸਕ੍ਕੋ ਦੇਵਰਾਜਾ ਹੁਤ੍ਵਾ ਪੁਤ੍ਤੋਪਿ ਮੇ ਤਂ ਵਂਸਂ ਅਵਿਨਾਸੇਤ੍ਵਾ ਦਾਨਂ ਦਤ੍ਵਾ ਚਨ੍ਦੋ ਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੋ, ਤਸ੍ਸ ਪੁਤ੍ਤੋ ਸੂਰਿਯੋ, ਤਸ੍ਸ ਪੁਤ੍ਤੋ ਮਾਤਲਿ, ਤਸ੍ਸ ਪੁਤ੍ਤੋ ਪਞ੍ਚਸਿਖੋ ਗਨ੍ਧਬ੍ਬਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੋ. ਤੇਸੁ ਅਯਂ ਚਨ੍ਦੋ, ਅਯਂ ਸੂਰਿਯੋ, ਅਯਂ ਮਾਤਲਿਸਙ੍ਗਾਹਕੋ, ਅਯਂ ਇਮਸ੍ਸ ਪਾਪਧਮ੍ਮਸ੍ਸ ਪਿਤਾ ਪਞ੍ਚਸਿਖੋ ਗਨ੍ਧਬ੍ਬਦੇਵਪੁਤ੍ਤੋ, ਏਵਂ ਬਹੁਗੁਣਂ ਏਤਂ ਦਾਨਂ ਨਾਮ, ਕਤ੍ਤਬ੍ਬਮੇਵ ਕੁਸਲਂ ਪਣ੍ਡਿਤੇਹੀ’’ਤਿ ਕਥੇਨ੍ਤਾ ਮਹਾਜਨਸ੍ਸ ਕਙ੍ਖਚ੍ਛੇਦਨਤ੍ਥਂ ਆਕਾਸੇ ਉਪ੍ਪਤਿਤ੍ਵਾ ਮਹਨ੍ਤੇਨਾਨੁਭਾਵੇਨ ਮਹਨ੍ਤੇਨ ਪਰਿਵਾਰੇਨ ਜਲਮਾਨਸਰੀਰਾ ਅਟ੍ਠਂਸੁ, ਸਕਲਨਗਰਂ ਪਜ੍ਜਲਨ੍ਤਂ ਵਿਯ ਅਹੋਸਿ. ਸਕ੍ਕੋ ਮਹਾਜਨਂ ਆਮਨ੍ਤੇਤ੍ਵਾ ‘‘ਮਯਂ ਅਤ੍ਤਨੋ ਦਿਬ੍ਬਸਮ੍ਪਤ੍ਤਿਂ ਪਹਾਯ ਆਗਚ੍ਛਨ੍ਤਾ ਇਮਂ ਕੁਲਵਂਸਨਾਸਕਰਂ ਪਾਪਧਮ੍ਮਬਿਲਾਰਕੋਸਿਯਂ ਨਿਸ੍ਸਾਯ ਆਗਤਾ, ਅਯਂ ਪਾਪਧਮ੍ਮੋ ਅਤ੍ਤਨੋ ਕੁਲਵਂਸਂ ਨਾਸੇਤ੍ਵਾ ਦਾਨਸਾਲਂ ਝਾਪੇਤ੍ਵਾ ਯਾਚਕੇ ਗੀਵਾਯਂ ਗਹੇਤ੍ਵਾ ਨੀਹਰਾਪੇਤ੍ਵਾ ਅਮ੍ਹਾਕਂ ਵਂਸਂ ਸਮੁਚ੍ਛਿਨ੍ਦਿ, ‘ਅਯਂ ਅਦਾਨਸੀਲੋ ਹੁਤ੍ਵਾ ਨਿਰਯੇ ਨਿਬ੍ਬਤ੍ਤੇਯ੍ਯਾ’ਤਿ ਇਮਸ੍ਸ ਅਨੁਕਮ੍ਪਾਯ ਆਗਤਾਮ੍ਹਾ’’ਤਿ ਵਤ੍ਵਾ ਦਾਨਗੁਣਂ ਪਕਾਸੇਨ੍ਤੋ ਮਹਾਜਨਸ੍ਸ ਧਮ੍ਮਂ ਦੇਸੇਸਿ. ਬਿਲਾਰਕੋਸਿਯੋ ਸਿਰਸ੍ਮਿਂ ਅਞ੍ਜਲਿਂ ਪਤਿਟ੍ਠਪੇਤ੍ਵਾ ‘‘ਦੇਵ, ਅਹਂ ਇਤੋ ਪਟ੍ਠਾਯ ਪੋਰਾਣਕੁਲਵਂਸਂ ਅਨਾਸਾਪੇਤ੍ਵਾ ਦਾਨਂ ਪਵਤ੍ਤੇਸ੍ਸਾਮਿ, ਅਜ੍ਜ ਆਦਿਂ ਕਤ੍ਵਾ ਅਨ੍ਤਮਸੋ ਉਦਕਦਨ੍ਤਪੋਨਂ ਉਪਾਦਾਯ ਅਤ੍ਤਨੋ ਲਦ੍ਧਾਹਾਰਂ ਪਰਸ੍ਸ ਅਦਤ੍ਵਾ ਨ ਖਾਦਿਸ੍ਸਾਮੀ’’ਤਿ ਸਕ੍ਕਸ੍ਸ ਪਟਿਞ੍ਞਂ ਅਦਾਸਿ. ਸਕ੍ਕੋ ਤਂ ਦਮੇਤ੍ਵਾ ਨਿਬ੍ਬਿਸੇਵਨਂ ਕਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਪੇਤ੍ਵਾ ਚਤ੍ਤਾਰੋ ਦੇਵਪੁਤ੍ਤੇ ਆਦਾਯ ਸਕਟ੍ਠਾਨਮੇਵ ਗਤੋ. ਸੋਪਿ ਸੇਟ੍ਠਿ ਯਾਵਜੀਵਂ ਦਾਨਂ ਦਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਅਯਂ ਭਿਕ੍ਖੁ ਪੁਬ੍ਬੇ ਅਸ੍ਸਦ੍ਧੋ ਅਹੋਸਿ ਕਸ੍ਸਚਿ ਕਿਞ੍ਚਿ ਅਦਾਤਾ, ਅਹਂ ਪਨ ਨਂ ਦਮੇਤ੍ਵਾ ਦਾਨਫਲਂ ਜਾਨਾਪੇਸਿਂ, ਤਮੇਵ ਚਿਤ੍ਤਂ ਭਵਨ੍ਤਰਗਤਮ੍ਪਿ ਨ ਜਹਾਤੀ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸੇਟ੍ਠਿ ਅਯਂ ਦਾਨਪਤਿਕੋ ਭਿਕ੍ਖੁ ਅਹੋਸਿ, ਚਨ੍ਦੋ ਸਾਰਿਪੁਤ੍ਤੋ, ਸੂਰਿਯੋ ਮੋਗ੍ਗਲ੍ਲਾਨੋ, ਮਾਤਲਿ ਕਸ੍ਸਪੋ, ਪਞ੍ਚਸਿਖੋ ਆਨਨ੍ਦੋ, ਸਕ੍ਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਬਿਲਾਰਕੋਸਿਯਜਾਤਕਵਣ੍ਣਨਾ ਦ੍ਵਾਦਸਮਾ.

[੪੫੧] ੧੩. ਚਕ੍ਕਵਾਕਜਾਤਕਵਣ੍ਣਨਾ

ਵਣ੍ਣਵਾ ਅਭਿਰੂਪੋਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਲੋਲਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਕਿਰ ਚੀਵਰਾਦੀਹਿ ਅਤਿਤ੍ਤੋ ‘‘ਕਹਂ ਸਙ੍ਘਭਤ੍ਤਂ, ਕਹਂ ਨਿਮਨ੍ਤਨ’’ਨ੍ਤਿ ਪਰਿਯੇਸਨ੍ਤੋ ਵਿਚਰਤਿ, ਆਮਿਸਕਥਾਯਮੇਵ ਅਭਿਰਮਤਿ. ਅਥਞ੍ਞੇ ਪੇਸਲਾ ਭਿਕ੍ਖੂ ਤਸ੍ਸਾਨੁਗ੍ਗਹੇਨ ਸਤ੍ਥੁ ਆਰੋਚੇਸੁਂ. ਸਤ੍ਥਾ ਤਂ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਲੋਲੋ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਕਸ੍ਮਾ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਲੋਲੋ ਅਹੋਸਿ, ਲੋਲਭਾਵੋ ਚ ਨਾਮ ਪਾਪਕੋ, ਪੁਬ੍ਬੇਪਿ ਤ੍ਵਂ ਲੋਲਭਾਵਂ ਨਿਸ੍ਸਾਯ ਬਾਰਾਣਸਿਯਂ ਹਤ੍ਥਿਕੁਣਪਾਦੀਹਿ ਅਤਿਤ੍ਤੋ ਮਹਾਅਰਞ੍ਞਂ ਪਵਿਟ੍ਠੋ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਏਕੋ ਲੋਲਕਾਕੋ ਬਾਰਾਣਸਿਯਂ ਹਤ੍ਥਿਕੁਣਪਾਦੀਹਿ ਅਤਿਤ੍ਤੋ ‘‘ਅਰਞ੍ਞਂ ਨੁ ਖੋ ਕੀਦਿਸ’’ਨ੍ਤਿ ਅਰਞ੍ਞਂ ਗਨ੍ਤ੍ਵਾ ਤਤ੍ਥਪਿ ਫਲਾਫਲੇਹਿ ਅਸਨ੍ਤੁਟ੍ਠੋ ਗਙ੍ਗਾਯ ਤੀਰਂ ਗਨ੍ਤ੍ਵਾ ਵਿਚਰਨ੍ਤੋ ਜਯਮ੍ਪਤਿਕੇ ਚਕ੍ਕਵਾਕੇ ਦਿਸ੍ਵਾ ‘‘ਇਮੇ ਸਕੁਣਾ ਅਤਿਵਿਯ ਸੋਭਨ੍ਤਿ, ਇਮੇ ਇਮਸ੍ਮਿਂ ਗਙ੍ਗਾਤੀਰੇ ਬਹੁਂ ਮਚ੍ਛਮਂਸਂ ਖਾਦਨ੍ਤਿ ਮਞ੍ਞੇ, ਇਮੇ ਪਟਿਪੁਚ੍ਛਿਤ੍ਵਾ ਮਯਾਪਿ ਇਮੇਸਂ ਭੋਜਨਂ ਗੋਚਰਂ ਖਾਦਿਤ੍ਵਾ ਵਣ੍ਣਵਨ੍ਤੇਨ ਭਵਿਤੁਂ ਵਟ੍ਟਤੀ’’ਤਿ ਤੇਸਂ ਅਵਿਦੂਰੇ ਨਿਸੀਦਿਤ੍ਵਾ ਚਕ੍ਕਵਾਕਂ ਪੁਚ੍ਛਨ੍ਤੋ ਦ੍ਵੇ ਗਾਥਾ ਅਭਾਸਿ –

੧੩੫.

‘‘ਵਣ੍ਣਵਾ ਅਭਿਰੂਪੋਸਿ, ਘਨੋ ਸਞ੍ਜਾਤਰੋਹਿਤੋ;

ਚਕ੍ਕਵਾਕ ਸੁਰੂਪੋਸਿ, ਵਿਪ੍ਪਸਨ੍ਨਮੁਖਿਨ੍ਦ੍ਰਿਯੋ.

੧੩੬.

‘‘ਪਾਠੀਨਂ ਪਾਵੁਸਂ ਮਚ੍ਛਂ, ਬਲਜਂ ਮੁਞ੍ਜਰੋਹਿਤਂ;

ਗਙ੍ਗਾਯ ਤੀਰੇ ਨਿਸਿਨ੍ਨੋ, ਏਵਂ ਭੁਞ੍ਜਸਿ ਭੋਜਨ’’ਨ੍ਤਿ.

ਤਤ੍ਥ ਘਨੋਤਿ ਘਨਸਰੀਰੋ. ਸਞ੍ਜਾਤਰੋਹਿਤੋਤਿ ਉਤ੍ਤਤ੍ਤਸੁਵਣ੍ਣਂ ਵਿਯ ਸੁਟ੍ਠੁਜਾਤਰੋਹਿਤਵਣ੍ਣੋ. ਪਾਠੀਨਨ੍ਤਿ ਪਾਠੀਨਨਾਮਕਂ ਪਾਸਾਣਮਚ੍ਛਂ. ਪਾਵੁਸਨ੍ਤਿ ਮਹਾਮੁਖਮਚ੍ਛਂ, ‘‘ਪਾਹੁਸ’’ਨ੍ਤਿਪਿ ਪਾਠੋ. ਬਲਜਨ੍ਤਿ ਬਲਜਮਚ੍ਛਂ. ਮੁਞ੍ਜਰੋਹਿਤਨ੍ਤਿ ਮੁਞ੍ਜਮਚ੍ਛਞ੍ਚ ਰੋਹਿਤਮਚ੍ਛਞ੍ਚ. ਏਵਂ ਭੁਞ੍ਜਸੀਤਿ ਏਵਰੂਪਂ ਭੋਜਨਂ ਮਞ੍ਞੇ ਭੁਞ੍ਜਸੀਤਿ ਪੁਚ੍ਛਤਿ.

ਚਕ੍ਕਵਾਕੋ ਤਸ੍ਸ ਵਚਨਂ ਪਟਿਕ੍ਖਿਪਨ੍ਤੋ ਤਤਿਯਂ ਗਾਥਮਾਹ –

੧੩੭.

‘‘ਨ ਵਾਹਮੇਤਂ ਭੁਞ੍ਜਾਮਿ, ਜਙ੍ਗਲਾਨੋਦਕਾਨਿ ਵਾ;

ਅਞ੍ਞਤ੍ਰ ਸੇਵਾਲਪਣਕਾ, ਏਤਂ ਮੇ ਸਮ੍ਮ ਭੋਜਨ’’ਨ੍ਤਿ.

ਤਸ੍ਸਤ੍ਥੋ – ਅਹਂ ਸਮ੍ਮ, ਅਞ੍ਞਤ੍ਰ ਸੇਵਾਲਾ ਚ ਪਣਕਾ ਚ ਸੇਸਾਨਿ ਜਙ੍ਗਲਾਨਿ ਵਾ ਓਦਕਾਨਿ ਵਾ ਮਂਸਾਨਿ ਆਦਾਯ ਏਤਂ ਭੋਜਨਂ ਨ ਭੁਞ੍ਜਾਮਿ, ਯਂ ਪਨੇਤਂ ਸੇਵਾਲਪਣਕਂ, ਏਤਂ ਮੇ ਸਮ੍ਮ, ਭੋਜਨਨ੍ਤਿ.

ਤਤੋ ਕਾਕੋ ਦ੍ਵੇ ਗਾਥਾ ਅਭਾਸਿ –

੧੩੮.

‘‘ਨ ਵਾਹਮੇਤਂ ਸਦ੍ਦਹਾਮਿ, ਚਕ੍ਕਵਾਕਸ੍ਸ ਭੋਜਨਂ;

ਅਹਮ੍ਪਿ ਸਮ੍ਮ ਭੁਞ੍ਜਾਮਿ, ਗਾਮੇ ਲੋਣਿਯਤੇਲਿਯਂ.

੧੩੯.

‘‘ਮਨੁਸ੍ਸੇਸੁ ਕਤਂ ਭਤ੍ਤਂ, ਸੁਚਿਂ ਮਂਸੂਪਸੇਚਨਂ;

ਨ ਚ ਮੇ ਤਾਦਿਸੋ ਵਣ੍ਣੋ, ਚਕ੍ਕਵਾਕ ਯਥਾ ਤੁਵ’’ਨ੍ਤਿ.

ਤਤ੍ਥ ਯਥਾ ਤੁਵਨ੍ਤਿ ਯਥਾ ਤੁਵਂ ਸੋਭਗ੍ਗਪ੍ਪਤ੍ਤੋ ਸਰੀਰਵਣ੍ਣੋ, ਤਾਦਿਸੋ ਮਯ੍ਹਂ ਵਣ੍ਣੋ ਨਤ੍ਥਿ, ਏਤੇਨ ਕਾਰਣੇਨ ਅਹਂ ਤਵ ‘‘ਸੇਵਾਲਪਣਕਂ ਮਮ ਭੋਜਨ’’ਨ੍ਤਿ ਵਦਨ੍ਤਸ੍ਸ ਵਚਨਂ ਨ ਸਦ੍ਦਹਾਮੀਤਿ.

ਅਥਸ੍ਸ ਚਕ੍ਕਵਾਕੋ ਦੁਬ੍ਬਣ੍ਣਕਾਰਣਂ ਕਥੇਤ੍ਵਾ ਧਮ੍ਮਂ ਦੇਸੇਨ੍ਤੋ ਸੇਸਗਾਥਾ ਅਭਾਸਿ –

੧੪੦.

‘‘ਸਮ੍ਪਸ੍ਸਂ ਅਤ੍ਤਨਿ ਵੇਰਂ, ਹਿਂਸਯਂ ਮਾਨੁਸਿਂ ਪਜਂ;

ਉਤ੍ਰਸ੍ਤੋ ਘਸਸੀ ਭੀਤੋ, ਤੇਨ ਵਣ੍ਣੋ ਤਵੇਦਿਸੋ.

੧੪੧.

‘‘ਸਬ੍ਬਲੋਕਵਿਰੁਦ੍ਧੋਸਿ, ਧਙ੍ਕ ਪਾਪੇਨ ਕਮ੍ਮੁਨਾ;

ਲਦ੍ਧੋ ਪਿਣ੍ਡੋ ਨ ਪੀਣੇਤਿ, ਤੇਨ ਵਣ੍ਣੋ ਤਵੇਦਿਸੋ.

੧੪੨.

‘‘ਅਹਮ੍ਪਿ ਸਮ੍ਮ ਭੁਞ੍ਜਾਮਿ, ਅਹਿਂਸਂ ਸਬ੍ਬਪਾਣਿਨਂ;

ਅਪ੍ਪੋਸ੍ਸੁਕ੍ਕੋ ਨਿਰਾਸਙ੍ਕੀ, ਅਸੋਕੋ ਅਕੁਤੋਭਯੋ.

੧੪੩.

‘‘ਸੋ ਕਰਸ੍ਸੁ ਆਨੁਭਾਵਂ, ਵੀਤਿਵਤ੍ਤਸ੍ਸੁ ਸੀਲਿਯਂ;

ਅਹਿਂਸਾਯ ਚਰ ਲੋਕੇ, ਪਿਯੋ ਹੋਹਿਸਿ ਮਂਮਿਵ.

੧੪੪.

‘‘ਯੋ ਨ ਹਨ੍ਤਿ ਨ ਘਾਤੇਤਿ, ਨ ਜਿਨਾਤਿ ਨ ਜਾਪਯੇ;

ਮੇਤ੍ਤਂਸੋ ਸਬ੍ਬਭੂਤੇਸੁ, ਵੇਰਂ ਤਸ੍ਸ ਨ ਕੇਨਚੀ’’ਤਿ.

ਤਤ੍ਥ ਸਮ੍ਪਸ੍ਸਨ੍ਤਿ ਸਮ੍ਮ ਕਾਕ ਤ੍ਵਂ ਪਰੇਸੁ ਉਪ੍ਪਨ੍ਨਂ ਅਤ੍ਤਨਿ ਵੇਰਚਿਤ੍ਤਂ ਸਮ੍ਪਸ੍ਸਮਾਨੋ ਮਾਨੁਸਿਂ ਪਜਂ ਹਿਂਸਨ੍ਤੋ ਵਿਹੇਠੇਨ੍ਤੋ. ਉਤ੍ਰਸ੍ਤੋਤਿ ਭੀਤੋ. ਘਸਸੀਤਿ ਭੁਞ੍ਜਸਿ. ਤੇਨ ਤੇ ਏਦਿਸੋ ਬੀਭਚ੍ਛਵਣ੍ਣੋ ਜਾਤੋ. ਧਙ੍ਕਾਤਿ ਕਾਕਂ ਆਲਪਤਿ. ਪਿਣ੍ਡੋਤਿ ਭੋਜਨਂ. ਅਹਿਂਸਂ ਸਬ੍ਬਪਾਣਿਨਨ੍ਤਿ ਅਹਂ ਪਨ ਸਬ੍ਬਸਤ੍ਤੇ ਅਹਿਂਸਨ੍ਤੋ ਭੁਞ੍ਜਾਮੀਤਿ ਵਦਤਿ. ਸੋ ਕਰਸ੍ਸੁ ਆਨੁਭਾਵਨ੍ਤਿ ਸੋ ਤ੍ਵਮ੍ਪਿ ਵੀਰਿਯਂ ਕਰੋਹਿ, ਅਤ੍ਤਨੋ ਸੀਲਿਯਸਙ੍ਖਾਤਂ ਦੁਸ੍ਸੀਲਭਾਵਂ ਵੀਤਿਵਤ੍ਤਸ੍ਸੁ. ਅਹਿਂਸਾਯਾਤਿ ਅਹਿਂਸਾਯ ਸਮਨ੍ਨਾਗਤੋ ਹੁਤ੍ਵਾ ਲੋਕੇ ਚਰ. ਪਿਯੋ ਹੋਹਿਸਿ ਮਂਮਿਵਾਤਿ ਏਵਂ ਸਨ੍ਤੇ ਮਯਾ ਸਦਿਸੋਵ ਲੋਕਸ੍ਸ ਪਿਯੋ ਹੋਹਿਸਿ. ਨ ਜਿਨਾਤੀਤਿ ਧਨਜਾਨਿਂ ਨ ਕਰੋਤਿ. ਨ ਜਾਪਯੇਤਿ ਅਞ੍ਞੇਪਿ ਨ ਕਾਰੇਤਿ. ਮੇਤ੍ਤਂਸੋਤਿ ਮੇਤ੍ਤਕੋਟ੍ਠਾਸੋ ਮੇਤ੍ਤਚਿਤ੍ਤੋ. ਨ ਕੇਨਚੀਤਿ ਕੇਨਚਿ ਏਕਸਤ੍ਤੇਨਪਿ ਸਦ੍ਧਿਂ ਤਸ੍ਸ ਵੇਰਂ ਨਾਮ ਨਤ੍ਥੀਤਿ.

ਤਸ੍ਮਾ ਸਚੇ ਲੋਕਸ੍ਸ ਪਿਯੋ ਭਵਿਤੁਂ ਇਚ੍ਛਸਿ, ਸਬ੍ਬਵੇਰੇਹਿ ਵਿਰਮਾਹੀਤਿ ਏਵਂ ਚਕ੍ਕਵਾਕੋ ਕਾਕਸ੍ਸ ਧਮ੍ਮਂ ਦੇਸੇਸਿ. ਕਾਕੋ ‘‘ਤੁਮ੍ਹੇ ਅਤ੍ਤਨੋ ਗੋਚਰਂ ਮਯ੍ਹਂ ਨ ਕਥੇਥ, ਕਾ ਕਾ’’ਤਿ ਵਸ੍ਸਨ੍ਤੋ ਉਪ੍ਪਤਿਤ੍ਵਾ ਬਾਰਾਣਸਿਯਂ ਉਕ੍ਕਾਰਭੂਮਿਯਞ੍ਞੇਵ ਓਤਰਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਲੋਲਭਿਕ੍ਖੁ ਅਨਾਗਾਮਿਫਲੇ ਪਤਿਟ੍ਠਹਿ. ਤਦਾ ਕਾਕੋ ਲੋਲਭਿਕ੍ਖੁ ਅਹੋਸਿ, ਚਕ੍ਕਵਾਕੀ ਰਾਹੁਲਮਾਤਾ, ਚਕ੍ਕਵਾਕੋ ਪਨ ਅਹਮੇਵ ਅਹੋਸਿਨ੍ਤਿ.

ਚਕ੍ਕਵਾਕਜਾਤਕਵਣ੍ਣਨਾ ਤੇਰਸਮਾ.

[੪੫੨] ੧੪. ਭੂਰਿਪਞ੍ਞਜਾਤਕਵਣ੍ਣਨਾ

੧੪੫-੧੫੪. ਸਚ੍ਚਂ ਕਿਰਾਤਿ ਇਦਂ ਭੂਰਿਪਞ੍ਞਜਾਤਕਂ ਮਹਾਉਮਙ੍ਗਜਾਤਕੇ (ਜਾ. ੨.੨੨.੫੯੦ ਆਦਯੋ) ਆਵਿ ਭਵਿਸ੍ਸਤਿ.

ਭੂਰਿਪਞ੍ਞਜਾਤਕਵਣ੍ਣਨਾ ਚੁਦ੍ਦਸਮਾ.

[੪੫੩] ੧੫. ਮਹਾਮਙ੍ਗਲਜਾਤਕਵਣ੍ਣਨਾ

ਕਿਂਸੁ ਨਰੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਹਾਮਙ੍ਗਲਸੁਤ੍ਤਂ (ਖੁ. ਪਾ. ੫.੧ ਆਦਯੋ) ਆਰਬ੍ਭ ਕਥੇਸਿ. ਰਾਜਗਹਨਗਰਸ੍ਮਿਞ੍ਹਿ ਕੇਨਚਿਦੇਵ ਕਰਣੀਯੇਨ ਸਨ੍ਥਾਗਾਰੇ ਸਨ੍ਨਿਪਤਿਤਸ੍ਸ ਮਹਾਜਨਸ੍ਸ ਮਜ੍ਝੇ ਏਕੋ ਪੁਰਿਸੋ ‘‘ਅਜ੍ਜ ਮੇ ਮਙ੍ਗਲਕਿਰਿਯਾ ਅਤ੍ਥੀ’’ਤਿ ਉਟ੍ਠਾਯ ਅਗਮਾਸਿ. ਅਪਰੋ ਤਸ੍ਸ ਵਚਨਂ ਸੁਤ੍ਵਾ ‘‘ਅਯਂ ‘ਮਙ੍ਗਲ’ਨ੍ਤਿ ਵਤ੍ਵਾਵ ਗਤੋ, ਕਿਂ ਏਤਂ ਮਙ੍ਗਲਂ ਨਾਮਾ’’ਤਿ ਆਹ. ਤਮਞ੍ਞੋ ‘‘ਅਭਿਮਙ੍ਗਲਰੂਪਦਸ੍ਸਨਂ ਮਙ੍ਗਲਂ ਨਾਮ. ਏਕਚ੍ਚੋ ਹਿ ਕਾਲਸ੍ਸੇਵ ਉਟ੍ਠਾਯ ਸਬ੍ਬਸੇਤਂ ਉਸਭਂ ਵਾ ਪਸ੍ਸਤਿ, ਗਬ੍ਭਿਨਿਤ੍ਥਿਂ ਵਾ ਰੋਹਿਤਮਚ੍ਛਂ ਵਾ ਪੁਣ੍ਣਘਟਂ ਵਾ ਨਵਨੀਤਂ ਵਾ ਗੋਸਪ੍ਪਿਂ ਵਾ ਅਹਤਵਤ੍ਥਂ ਵਾ ਪਾਯਾਸਂ ਵਾ ਪਸ੍ਸਤਿ, ਇਤੋ ਉਤ੍ਤਰਿ ਮਙ੍ਗਲਂ ਨਾਮ ਨਤ੍ਥੀ’’ਤਿ ਆਹ. ਤੇਨ ਕਥਿਤਂ ਏਕਚ੍ਚੇ ‘‘ਸੁਕਥਿਤ’’ਨ੍ਤਿ ਅਭਿਨਨ੍ਦਿਂਸੁ. ਅਪਰੋ ‘‘ਨੇਤਂ ਮਙ੍ਗਲਂ, ਸੁਤਂ ਨਾਮ ਮਙ੍ਗਲਂ. ਏਕਚ੍ਚੋ ਹਿ ‘ਪੁਣ੍ਣਾ’ਤਿ ਵਦਨ੍ਤਾਨਂ ਸੁਣਾਤਿ, ਤਥਾ ‘ਵਡ੍ਢਾ’ਤਿ ‘ਵਡ੍ਢਮਾਨਾ’ਤਿ ਸੁਣਾਤਿ, ‘ਭੁਞ੍ਜਾ’ਤਿ ‘ਖਾਦਾ’ਤਿ ਵਦਨ੍ਤਾਨਂ ਸੁਣਾਤਿ, ਇਤੋ ਉਤ੍ਤਰਿ ਮਙ੍ਗਲਂ ਨਾਮ ਨਤ੍ਥੀ’’ਤਿ ਆਹ. ਤੇਨ ਕਥਿਤਮ੍ਪਿ ਏਕਚ੍ਚੇ ‘‘ਸੁਕਥਿਤ’’ਨ੍ਤਿ ਅਭਿਨਨ੍ਦਿਂਸੁ. ਅਪਰੋ ‘‘ਨ ਏਤਂ ਮਙ੍ਗਲਂ, ਮੁਤਂ ਨਾਮ ਮਙ੍ਗਲਂ. ਏਕਚ੍ਚੋ ਹਿ ਕਾਲਸ੍ਸੇਵ ਉਟ੍ਠਾਯ ਪਥਵਿਂ ਆਮਸਤਿ, ਹਰਿਤਤਿਣਂ ਅਲ੍ਲਗੋਮਯਂ ਪਰਿਸੁਦ੍ਧਸਾਟਕਂ ਰੋਹਿਤਮਚ੍ਛਂ ਸੁਵਣ੍ਣਰਜਤਭਾਜਨਂ ਆਮਸਤਿ, ਇਤੋ ਉਤ੍ਤਰਿ ਮਙ੍ਗਲਂ ਨਾਮ ਨਤ੍ਥੀ’’ਤਿ ਆਹ. ਤੇਨ ਕਥਿਤਮ੍ਪਿ ਏਕਚ੍ਚੇ ‘‘ਸੁਕਥਿਤ’’ਨ੍ਤਿ ਅਭਿਨਨ੍ਦਿਂਸੁ. ਏਵਂ ਦਿਟ੍ਠਮਙ੍ਗਲਿਕਾ ਸੁਤਮਙ੍ਗਲਿਕਾ ਮੁਤਮਙ੍ਗਲਿਕਾਤਿ ਤਿਸ੍ਸੋਪਿ ਪਰਿਸਾ ਹੁਤ੍ਵਾ ਅਞ੍ਞਮਞ੍ਞਂ ਸਞ੍ਞਾਪੇਤੁਂ ਨਾਸਕ੍ਖਿਂਸੁ, ਭੁਮ੍ਮਦੇਵਤਾ ਆਦਿਂ ਕਤ੍ਵਾ ਯਾਵ ਬ੍ਰਹ੍ਮਲੋਕਾ ‘‘ਇਦਂ ਮਙ੍ਗਲ’’ਨ੍ਤਿ ਤਥਤੋ ਨ ਜਾਨਿਂਸੁ.

ਸਕ੍ਕੋ ਚਿਨ੍ਤੇਸਿ ‘‘ਇਮਂ ਮਙ੍ਗਲਪਞ੍ਹਂ ਸਦੇਵਕੇ ਲੋਕੇ ਅਞ੍ਞਤ੍ਰ ਭਗਵਤਾ ਅਞ੍ਞੋ ਕਥੇਤੁਂ ਸਮਤ੍ਥੋ ਨਾਮ ਨਤ੍ਥਿ, ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਇਮਂ ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ. ਸੋ ਰਤ੍ਤਿਭਾਗੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ‘‘ਬਹੂ ਦੇਵਾ ਮਨੁਸ੍ਸਾ ਚਾ’’ਤਿ ਪਞ੍ਹਂ ਪੁਚ੍ਛਿ. ਅਥਸ੍ਸ ਸਤ੍ਥਾ ਦ੍ਵਾਦਸਹਿ ਗਾਥਾਹਿ ਅਟ੍ਠਤਿਂਸ ਮਹਾਮਙ੍ਗਲਾਨਿ ਕਥੇਸਿ. ਮਙ੍ਗਲਸੁਤ੍ਤੇ ਵਿਨਿਵਟ੍ਟਨ੍ਤੇਯੇਵ ਕੋਟਿਸਤਸਹਸ੍ਸਮਤ੍ਤਾ ਦੇਵਤਾ ਅਰਹਤ੍ਤਂ ਪਾਪੁਣਿਂਸੁ, ਸੋਤਾਪਨ੍ਨਾਦੀਨਂ ਗਣਨਪਥੋ ਨਤ੍ਥਿ. ਸਕ੍ਕੋ ਮਙ੍ਗਲਂ ਸੁਤ੍ਵਾ ਸਕਟ੍ਠਾਨਮੇਵ ਗਤੋ. ਸਤ੍ਥਾਰਾ ਮਙ੍ਗਲੇ ਕਥਿਤੇ ਸਦੇਵਕੋ ਲੋਕੋ ‘‘ਸੁਕਥਿਤ’’ਨ੍ਤਿ ਅਭਿਨਨ੍ਦਿ. ਤਦਾ ਧਮ੍ਮਸਭਾਯਂ ਤਥਾਗਤਸ੍ਸ ਗੁਣਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਸਤ੍ਥਾ ਅਞ੍ਞੇਸਂ ਅਵਿਸਯਂ ਮਙ੍ਗਲਪਞ੍ਹਂ ਸਦੇਵਕਸ੍ਸ ਲੋਕਸ੍ਸ ਚਿਤ੍ਤਂ ਗਹੇਤ੍ਵਾ ਕੁਕ੍ਕੁਚ੍ਚਂ ਛਿਨ੍ਦਿਤ੍ਵਾ ਗਗਨਤਲੇ ਚਨ੍ਦਂ ਉਟ੍ਠਾਪੇਨ੍ਤੋ ਵਿਯ ਕਥੇਸਿ, ਏਵਂ ਮਹਾਪਞ੍ਞੋ, ਆਵੁਸੋ, ਤਥਾਗਤੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਇਦਾਨੇਵ ਸਮ੍ਬੋਧਿਪ੍ਪਤ੍ਤਸ੍ਸ ਮਮ ਮਙ੍ਗਲਪਞ੍ਹਕਥਨਂ, ਸ੍ਵਾਹਂ ਬੋਧਿਸਤ੍ਤਚਰਿਯਂ ਚਰਨ੍ਤੋਪਿ ਦੇਵਮਨੁਸ੍ਸਾਨਂ ਕਙ੍ਖਂ ਛਿਨ੍ਦਿਤ੍ਵਾ ਮਙ੍ਗਲਪਞ੍ਹਂ ਕਥੇਸਿ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਏਕਸ੍ਮਿਂ ਗਾਮੇ ਵਿਭਵਸਮ੍ਪਨ੍ਨਸ੍ਸ ਬ੍ਰਾਹ੍ਮਣਸ੍ਸ ਕੁਲੇ ਨਿਬ੍ਬਤ੍ਤਿ, ‘‘ਰਕ੍ਖਿਤਕੁਮਾਰੋ’’ਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਉਗ੍ਗਹਿਤਸਿਪ੍ਪੋ ਕਤਦਾਰਪਰਿਗ੍ਗਹੋ ਮਾਤਾਪਿਤੂਨਂ ਅਚ੍ਚਯੇਨ ਰਤਨਵਿਲੋਕਨਂ ਕਤ੍ਵਾ ਸਂਵਿਗ੍ਗਮਾਨਸੋ ਮਹਾਦਾਨਂ ਪਵਤ੍ਤੇਤ੍ਵਾ ਕਾਮੇ ਪਹਾਯ ਹਿਮਵਨ੍ਤਪਦੇਸੇ ਪਬ੍ਬਜਿਤ੍ਵਾ ਝਾਨਾਭਿਞ੍ਞਂ ਨਿਬ੍ਬਤ੍ਤੇਤ੍ਵਾ ਵਨਮੂਲਫਲਾਹਾਰੋ ਏਕਸ੍ਮਿਂ ਪਦੇਸੇ ਵਾਸਂ ਕਪ੍ਪੇਸਿ. ਅਨੁਪੁਬ੍ਬੇਨਸ੍ਸ ਪਰਿਵਾਰੋ ਮਹਾ ਅਹੋਸਿ, ਪਞ੍ਚ ਅਨ੍ਤੇਵਾਸਿਕਸਤਾਨਿ ਅਹੇਸੁਂ. ਅਥੇਕਦਿਵਸਂ ਤੇ ਤਾਪਸਾ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਆਚਰਿਯ, ਵਸ੍ਸਾਰਤ੍ਤਸਮਯੇ ਹਿਮਵਨ੍ਤਤੋ ਓਤਰਿਤ੍ਵਾ ਲੋਣਮ੍ਬਿਲਸੇਵਨਤ੍ਥਾਯ ਜਨਪਦਚਾਰਿਕਂ ਗਚ੍ਛਾਮ, ਏਵਂ ਨੋ ਸਰੀਰਞ੍ਚ ਥਿਰਂ ਭਵਿਸ੍ਸਤਿ, ਜਙ੍ਘਵਿਹਾਰੋ ਚ ਕਤੋ ਭਵਿਸ੍ਸਤੀ’’ਤਿ ਆਹਂਸੁ. ਤੇ ‘‘ਤੇਨ ਹਿ ਤੁਮ੍ਹੇ ਗਚ੍ਛਥ, ਅਹਂ ਇਧੇਵ ਵਸਿਸ੍ਸਾਮੀ’’ਤਿ ਵੁਤ੍ਤੇ ਤਂ ਵਨ੍ਦਿਤ੍ਵਾ ਹਿਮਵਨ੍ਤਾ ਓਤਰਿਤ੍ਵਾ ਚਾਰਿਕਂ ਚਰਮਾਨਾ ਬਾਰਾਣਸਿਂ ਪਤ੍ਵਾ ਰਾਜੁਯ੍ਯਾਨੇ ਵਸਿਂਸੁ. ਤੇਸਂ ਮਹਾਸਕ੍ਕਾਰਸਮ੍ਮਾਨੋ ਅਹੋਸਿ. ਅਥੇਕਦਿਵਸਂ ਬਾਰਾਣਸਿਯਂ ਸਨ੍ਥਾਗਾਰੇ ਸਨ੍ਨਿਪਤਿਤੇ ਮਹਾਜਨਕਾਯੇ ਮਙ੍ਗਲਪਞ੍ਹੋ ਸਮੁਟ੍ਠਾਤਿ. ਸਬ੍ਬਂ ਪਚ੍ਚੁਪ੍ਪਨ੍ਨਵਤ੍ਥੁਨਯੇਨੇਵ ਵੇਦਿਤਬ੍ਬਂ.

ਤਦਾ ਪਨ ਮਨੁਸ੍ਸਾਨਂ ਕਙ੍ਖਂ ਛਿਨ੍ਦਿਤ੍ਵਾ ਮਙ੍ਗਲਪਞ੍ਹਂ ਕਥੇਤੁਂ ਸਮਤ੍ਥਂ ਅਪਸ੍ਸਨ੍ਤੋ ਮਹਾਜਨੋ ਉਯ੍ਯਾਨਂ ਗਨ੍ਤ੍ਵਾ ਇਸਿਗਣਂ ਮਙ੍ਗਲਪਞ੍ਹਂ ਪੁਚ੍ਛਿ. ਇਸਯੋ ਰਾਜਾਨਂ ਆਮਨ੍ਤੇਤ੍ਵਾ ‘‘ਮਹਾਰਾਜ, ਮਯਂ ਏਤਂ ਕਥੇਤੁਂ ਨ ਸਕ੍ਖਿਸ੍ਸਾਮ, ਅਪਿਚ ਖੋ ਅਮ੍ਹਾਕਂ ਆਚਰਿਯੋ ਰਕ੍ਖਿਤਤਾਪਸੋ ਨਾਮ ਮਹਾਪਞ੍ਞੋ ਹਿਮਵਨ੍ਤੇ ਵਸਤਿ, ਸੋ ਸਦੇਵਕਸ੍ਸ ਲੋਕਸ੍ਸ ਚਿਤ੍ਤਂ ਗਹੇਤ੍ਵਾ ਏਤਂ ਮਙ੍ਗਲਪਞ੍ਹਂ ਕਥੇਸ੍ਸਤੀ’’ਤਿ ਵਦਿਂਸੁ. ਰਾਜਾ ‘‘ਭਨ੍ਤੇ, ਹਿਮਵਨ੍ਤੋ ਨਾਮ ਦੂਰੇ ਦੁਗ੍ਗਮੋਵ, ਨ ਸਕ੍ਖਿਸ੍ਸਾਮ ਮਯਂ ਤਤ੍ਥ ਗਨ੍ਤੁਂ, ਸਾਧੁ ਵਤ ਤੁਮ੍ਹੇਯੇਵ ਆਚਰਿਯਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਿਤ੍ਵਾ ਉਗ੍ਗਣ੍ਹਿਤ੍ਵਾ ਪੁਨਾਗਨ੍ਤ੍ਵਾ ਅਮ੍ਹਾਕਂ ਕਥੇਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਆਚਰਿਯਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਕਤਪਟਿਸਨ੍ਥਾਰਾ ਆਚਰਿਯੇਨ ਰਞ੍ਞੋ ਧਮ੍ਮਿਕਭਾਵੇ ਜਨਪਦਚਾਰਿਤ੍ਤੇ ਚ ਪੁਚ੍ਛਿਤੇ ਤਂ ਦਿਟ੍ਠਮਙ੍ਗਲਾਦੀਨਂ ਉਪ੍ਪਤ੍ਤਿਂ ਆਦਿਤੋ ਪਟ੍ਠਾਯ ਕਥੇਤ੍ਵਾ ਰਞ੍ਞੋ ਯਾਚਨਾਯ ਚ ਅਤ੍ਤਨੋ ਪਞ੍ਹਸਵਨਤ੍ਥਂ ਆਗਤਭਾਵਂ ਪਕਾਸੇਤ੍ਵਾ ‘‘ਸਾਧੁ ਨੋ ਭਨ੍ਤੇ, ਮਙ੍ਗਲਪਞ੍ਹਂ ਪਾਕਟਂ ਕਤ੍ਵਾ ਕਥੇਥਾ’’ਤਿ ਯਾਚਿਂਸੁ. ਤਤੋ ਜੇਟ੍ਠਨ੍ਤੇਵਾਸਿਕੋ ਆਚਰਿਯਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੧੫੫.

‘‘ਕਿਂਸੁ ਨਰੋ ਜਪ੍ਪਮਧਿਚ੍ਚ ਕਾਲੇ, ਕਂ ਵਾ ਵਿਜ੍ਜਂ ਕਤਮਂ ਵਾ ਸੁਤਾਨਂ;

ਸੋ ਮਚ੍ਚੋ ਅਸ੍ਮਿਞ੍ਚ ਪਰਮ੍ਹਿ ਲੋਕੇ, ਕਥਂ ਕਰੋ ਸੋਤ੍ਥਾਨੇਨ ਗੁਤ੍ਤੋ’’ਤਿ.

ਤਤ੍ਥ ਕਾਲੇਤਿ ਮਙ੍ਗਲਪਤ੍ਥਨਕਾਲੇ. ਵਿਜ੍ਜਨ੍ਤਿ ਵੇਦਂ. ਸੁਤਾਨਨ੍ਤਿ ਸਿਕ੍ਖਿਤਬ੍ਬਯੁਤ੍ਤਕਪਰਿਯਤ੍ਤੀਨਂ. ਅਸ੍ਮਿਞ੍ਚਾਤਿ ਏਤ੍ਥ ਚਾਤਿ ਨਿਪਾਤਮਤ੍ਤਂ. ਸੋਤ੍ਥਾਨੇਨਾਤਿ ਸੋਤ੍ਥਿਭਾਵਾਵਹੇਨ ਮਙ੍ਗਲੇਨ. ਇਦਂ ਵੁਤ੍ਤਂ ਹੋਤਿ – ‘‘ਆਚਰਿਯ, ਪੁਰਿਸੋ ਮਙ੍ਗਲਂ ਇਚ੍ਛਨ੍ਤੋ ਮਙ੍ਗਲਕਾਲੇ ਕਿਂਸੁ ਨਾਮ ਜਪ੍ਪਨ੍ਤੋ ਤੀਸੁ ਵੇਦੇਸੁ ਕਤਰਂ ਵਾ ਵੇਦਂ ਕਤਰਂ ਵਾ ਸੁਤਾਨਂ ਅਨ੍ਤਰੇ ਸੁਤਪਰਿਯਤ੍ਤਿਂ ਅਧੀਯਿਤ੍ਵਾ ਸੋ ਮਚ੍ਚੋ ਇਮਸ੍ਮਿਞ੍ਚ ਲੋਕੇ ਪਰਮ੍ਹਿ ਚ ਕਥਂ ਕਰੋ ਏਤੇਸੁ ਜਪ੍ਪਾਦੀਸੁ ਕਿਂ ਕੇਨ ਨਿਯਾਮੇਨ ਕਰੋਨ੍ਤੋ ਸੋਤ੍ਥਾਨੇਨ ਨਿਰਪਰਾਧਮਙ੍ਗਲੇਨ ਗੁਤ੍ਤੋ ਰਕ੍ਖਿਤੋ ਹੋਤਿ, ਤਂ ਉਭਯਲੋਕਹਿਤਂ ਗਹੇਤ੍ਵਾ ਠਿਤਮਙ੍ਗਲਂ ਅਮ੍ਹਾਕਂ ਕਥੇਹੀ’’ਤਿ.

ਏਵਂ ਜੇਟ੍ਠਨ੍ਤੇਵਾਸਿਕੇਨ ਮਙ੍ਗਲਪਞ੍ਹਂ ਪੁਟ੍ਠੋ ਮਹਾਸਤ੍ਤੋ ਦੇਵਮਨੁਸ੍ਸਾਨਂ ਕਙ੍ਖਂ ਛਿਨ੍ਦਨ੍ਤੋ ‘‘ਇਦਞ੍ਚਿਦਞ੍ਚ ਮਙ੍ਗਲ’’ਨ੍ਤਿ ਬੁਦ੍ਧਲੀਲ਼ਾਯ ਮਙ੍ਗਲਂ ਕਥੇਨ੍ਤੋ ਆਹ –

੧੫੬.

‘‘ਯਸ੍ਸ ਦੇਵਾ ਪਿਤਰੋ ਚ ਸਬ੍ਬੇ, ਸਰੀਸਪਾ ਸਬ੍ਬਭੂਤਾਨਿ ਚਾਪਿ;

ਮੇਤ੍ਤਾਯ ਨਿਚ੍ਚਂ ਅਪਚਿਤਾਨਿ ਹੋਨ੍ਤਿ, ਭੂਤੇਸੁ ਵੇ ਸੋਤ੍ਥਾਨਂ ਤਦਾਹੂ’’ਤਿ.

ਤਤ੍ਥ ਯਸ੍ਸਾਤਿ ਯਸ੍ਸ ਪੁਗ੍ਗਲਸ੍ਸ. ਦੇਵਾਤਿ ਭੁਮ੍ਮਦੇਵੇ ਆਦਿਂ ਕਤ੍ਵਾ ਸਬ੍ਬੇਪਿ ਕਾਮਾਵਚਰਦੇਵਾ. ਪਿਤਰੋ ਚਾਤਿ ਤਤੁਤ੍ਤਰਿ ਰੂਪਾਵਚਰਬ੍ਰਹ੍ਮਾਨੋ. ਸਰੀਸਪਾਤਿ ਦੀਘਜਾਤਿਕਾ. ਸਬ੍ਬਭੂਤਾਨਿ ਚਾਪੀਤਿ ਵੁਤ੍ਤਾਵਸੇਸਾਨਿ ਚ ਸਬ੍ਬਾਨਿਪਿ ਭੂਤਾਨਿ. ਮੇਤ੍ਤਾਯ ਨਿਚ੍ਚਂ ਅਪਚਿਤਾਨਿ ਹੋਨ੍ਤੀਤਿ ਏਤੇ ਸਬ੍ਬੇ ਸਤ੍ਤਾ ਦਸਦਿਸਾਫਰਣਵਸੇਨ ਪਵਤ੍ਤਾਯ ਅਪ੍ਪਨਾਪ੍ਪਤ੍ਤਾਯ ਮੇਤ੍ਤਾਭਾਵਨਾਯ ਅਪਚਿਤਾ ਹੋਨ੍ਤਿ. ਭੂਤੇਸੁ ਵੇਤਿ ਤਂ ਤਸ੍ਸ ਪੁਗ੍ਗਲਸ੍ਸ ਸਬ੍ਬਸਤ੍ਤੇਸੁ ਸੋਤ੍ਥਾਨਂ ਨਿਰਨ੍ਤਰਂ ਪਵਤ੍ਤਂ ਨਿਰਪਰਾਧਮਙ੍ਗਲਂ ਆਹੁ. ਮੇਤ੍ਤਾਵਿਹਾਰੀ ਹਿ ਪੁਗ੍ਗਲੋ ਸਬ੍ਬੇਸਂ ਪਿਯੋ ਹੋਤਿ ਪਰੂਪਕ੍ਕਮੇਨ ਅਵਿਕੋਪਿਯੋ. ਇਤਿ ਸੋ ਇਮਿਨਾ ਮਙ੍ਗਲੇਨ ਰਕ੍ਖਿਤੋ ਗੋਪਿਤੋ ਹੋਤੀਤਿ.

ਇਤਿ ਮਹਾਸਤ੍ਤੋ ਪਠਮਂ ਮਙ੍ਗਲਂ ਕਥੇਤ੍ਵਾ ਦੁਤਿਯਾਦੀਨਿ ਕਥੇਨ੍ਤੋ –

੧੫੭.

‘‘ਯੋ ਸਬ੍ਬਲੋਕਸ੍ਸ ਨਿਵਾਤਵੁਤ੍ਤਿ, ਇਤ੍ਥੀਪੁਮਾਨਂ ਸਹਦਾਰਕਾਨਂ;

ਖਨ੍ਤਾ ਦੁਰੁਤ੍ਤਾਨਮਪ੍ਪਟਿਕੂਲਵਾਦੀ, ਅਧਿਵਾਸਨਂ ਸੋਤ੍ਥਾਨਂ ਤਦਾਹੁ.

੧੫੮.

‘‘ਯੋ ਨਾਵਜਾਨਾਤਿ ਸਹਾਯਮਤ੍ਤੇ, ਸਿਪ੍ਪੇਨ ਕੁਲ੍ਯਾਹਿ ਧਨੇਨ ਜਚ੍ਚਾ;

ਰੁਚਿਪਞ੍ਞੋ ਅਤ੍ਥਕਾਲੇ ਮਤੀਮਾ, ਸਹਾਯੇਸੁ ਵੇ ਸੋਤ੍ਥਾਨਂ ਤਦਾਹੁ.

੧੫੯.

‘‘ਮਿਤ੍ਤਾਨਿ ਵੇ ਯਸ੍ਸ ਭਵਨ੍ਤਿ ਸਨ੍ਤੋ, ਸਂਵਿਸ੍ਸਤ੍ਥਾ ਅਵਿਸਂਵਾਦਕਸ੍ਸ;

ਨ ਮਿਤ੍ਤਦੁਬ੍ਭੀ ਸਂਵਿਭਾਗੀ ਧਨੇਨ, ਮਿਤ੍ਤੇਸੁ ਵੇ ਸੋਤ੍ਥਾਨਂ ਤਦਾਹੁ.

੧੬੦.

‘‘ਯਸ੍ਸ ਭਰਿਯਾ ਤੁਲ੍ਯਵਯਾ ਸਮਗ੍ਗਾ, ਅਨੁਬ੍ਬਤਾ ਧਮ੍ਮਕਾਮਾ ਪਜਾਤਾ;

ਕੋਲਿਨਿਯਾ ਸੀਲਵਤੀ ਪਤਿਬ੍ਬਤਾ, ਦਾਰੇਸੁ ਵੇ ਸੋਤ੍ਥਾਨਂ ਤਦਾਹੁ.

੧੬੧.

‘‘ਯਸ੍ਸ ਰਾਜਾ ਭੂਤਪਤਿ ਯਸਸ੍ਸੀ, ਜਾਨਾਤਿ ਸੋਚੇਯ੍ਯਂ ਪਰਕ੍ਕਮਞ੍ਚ;

ਅਦ੍ਵੇਜ੍ਝਤਾ ਸੁਹਦਯਂ ਮਮਨ੍ਤਿ, ਰਾਜੂਸੁ ਵੇ ਸੋਤ੍ਥਾਨਂ ਤਦਾਹੁ.

੧੬੨.

‘‘ਅਨ੍ਨਞ੍ਚ ਪਾਨਞ੍ਚ ਦਦਾਤਿ ਸਦ੍ਧੋ, ਮਾਲਞ੍ਚ ਗਨ੍ਧਞ੍ਚ ਵਿਲੇਪਨਞ੍ਚ;

ਪਸਨ੍ਨਚਿਤ੍ਤੋ ਅਨੁਮੋਦਮਾਨੋ, ਸਗ੍ਗੇਸੁ ਵੇ ਸੋਤ੍ਥਾਨਂ ਤਦਾਹੁ.

੧੬੩.

‘‘ਯਮਰਿਯਧਮ੍ਮੇਨ ਪੁਨਨ੍ਤਿ ਵੁਦ੍ਧਾ, ਆਰਾਧਿਤਾ ਸਮਚਰਿਯਾਯ ਸਨ੍ਤੋ;

ਬਹੁਸ੍ਸੁਤਾ ਇਸਯੋ ਸੀਲਵਨ੍ਤੋ, ਅਰਹਨ੍ਤਮਜ੍ਝੇ ਸੋਤ੍ਥਾਨਂ ਤਦਾਹੂ’’ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਨਿਵਾਤਵੁਤ੍ਤੀਤਿ ਮੁਦੁਚਿਤ੍ਤਤਾਯ ਸਬ੍ਬਲੋਕਸ੍ਸ ਨੀਚਵੁਤ੍ਤਿ ਹੋਤਿ. ਖਨ੍ਤਾ ਦੁਰੁਤ੍ਤਾਨਨ੍ਤਿ ਪਰੇਹਿ ਵੁਤ੍ਤਾਨਂ ਦੁਟ੍ਠਵਚਨਾਨਂ ਅਧਿਵਾਸਕੋ ਹੋਤਿ. ਅਪ੍ਪਟਿਕੂਲਵਾਦੀਤਿ ‘‘ਅਕ੍ਕੋਚ੍ਛਿ ਮਂ, ਅਵਧਿ ਮ’’ਨ੍ਤਿ ਯੁਗਗ੍ਗਾਹਂ ਅਕਰੋਨ੍ਤੋ ਅਨੁਕੂਲਮੇਵ ਵਦਤਿ. ਅਧਿਵਾਸਨਨ੍ਤਿ ਇਦਂ ਅਧਿਵਾਸਨਂ ਤਸ੍ਸ ਸੋਤ੍ਥਾਨਂ ਨਿਰਪਰਾਧਮਙ੍ਗਲਂ ਪਣ੍ਡਿਤਾ ਵਦਨ੍ਤਿ.

ਸਹਾਯਮਤ੍ਤੇਤਿ ਸਹਾਯੇ ਚ ਸਹਾਯਮਤ੍ਤੇ ਚ. ਤਤ੍ਥ ਸਹਪਂਸੁਕੀਲ਼ਿਤਾ ਸਹਾਯਾ ਨਾਮ, ਦਸ ਦ੍ਵਾਦਸ ਵਸ੍ਸਾਨਿ ਏਕਤੋ ਵੁਤ੍ਥਾ ਸਹਾਯਮਤ੍ਤਾ ਨਾਮ, ਤੇ ਸਬ੍ਬੇਪਿ ‘‘ਅਹਂ ਸਿਪ੍ਪਵਾ, ਇਮੇ ਨਿਸਿਪ੍ਪਾ’’ਤਿ ਏਵਂ ਸਿਪ੍ਪੇਨ ਵਾ ‘‘ਅਹਂ ਕੁਲੀਨੋ, ਇਮੇ ਨ ਕੁਲੀਨਾ’’ਤਿ ਏਵਂ ਕੁਲਸਮ੍ਪਤ੍ਤਿਸਙ੍ਖਾਤਾਹਿ ਕੁਲ੍ਯਾਹਿ ਵਾ, ‘‘ਅਹਂ ਅਡ੍ਢੋ, ਇਮੇ ਦੁਗ੍ਗਤਾ’’ਤਿ ਏਵਂ ਧਨੇਨ ਵਾ, ‘‘ਅਹਂ ਜਾਤਿਸਮ੍ਪਨ੍ਨੋ, ਇਮੇ ਦੁਜ੍ਜਾਤਾ’’ਤਿ ਏਵਂ ਜਚ੍ਚਾ ਵਾ ਨਾਵਜਾਨਾਤਿ. ਰੁਚਿਪਞ੍ਞੋਤਿ ਸਾਧੁਪਞ੍ਞੋ ਸੁਨ੍ਦਰਪਞ੍ਞੋ. ਅਤ੍ਥਕਾਲੇਤਿ ਕਸ੍ਸਚਿਦੇਵ ਅਤ੍ਥਸ੍ਸ ਕਾਰਣਸ੍ਸ ਉਪ੍ਪਨ੍ਨਕਾਲੇ. ਮਤੀਮਾਤਿ ਤਂ ਤਂ ਅਤ੍ਥਂ ਪਰਿਚ੍ਛਿਨ੍ਦਿਤ੍ਵਾ ਵਿਚਾਰਣਸਮਤ੍ਥਤਾਯ ਮਤਿਮਾ ਹੁਤ੍ਵਾ ਤੇ ਸਹਾਯੇ ਨਾਵਜਾਨਾਤਿ. ਸਹਾਯੇਸੂਤਿ ਤਂ ਤਸ੍ਸ ਅਨਵਜਾਨਨਂ ਸਹਾਯੇਸੁ ਸੋਤ੍ਥਾਨਂ ਨਾਮਾਤਿ ਪੋਰਾਣਕਪਣ੍ਡਿਤਾ ਆਹੁ. ਤੇਨ ਹਿ ਸੋ ਨਿਰਪਰਾਧਮਙ੍ਗਲੇਨ ਇਧਲੋਕੇ ਚ ਪਰਲੋਕੇ ਚ ਗੁਤ੍ਤੋ ਹੋਤਿ. ਤਤ੍ਥ ਪਣ੍ਡਿਤੇ ਸਹਾਯੇ ਨਿਸ੍ਸਾਯ ਸੋਤ੍ਥਿਭਾਵੋ ਕੁਸਨਾਲ਼ਿਜਾਤਕੇਨ (ਜਾ. ੧.੧.੧੨੧ ਆਦਯੋ) ਕਥੇਤਬ੍ਬੋ.

ਸਨ੍ਤੋਤਿ ਪਣ੍ਡਿਤਾ ਸਪ੍ਪੁਰਿਸਾ ਯਸ੍ਸ ਮਿਤ੍ਤਾਨਿ ਭਵਨ੍ਤਿ. ਸਂਵਿਸ੍ਸਤ੍ਥਾਤਿ ਘਰਂ ਪਵਿਸਿਤ੍ਵਾ ਇਚ੍ਛਿਤਿਚ੍ਛਿਤਸ੍ਸੇਵ ਗਹਣਵਸੇਨ ਵਿਸ੍ਸਾਸਮਾਪਨ੍ਨਾ. ਅਵਿਸਂਵਾਦਕਸ੍ਸਾਤਿ ਅਵਿਸਂਵਾਦਨਸੀਲਸ੍ਸ. ਨ ਮਿਤ੍ਤਦੁਬ੍ਭੀਤਿ ਯੋ ਚ ਮਿਤ੍ਤਦੁਬ੍ਭੀ ਨ ਹੋਤਿ. ਸਂਵਿਭਾਗੀ ਧਨੇਨਾਤਿ ਅਤ੍ਤਨੋ ਧਨੇਨ ਮਿਤ੍ਤਾਨਂ ਸਂਵਿਭਾਗਂ ਕਰੋਤਿ. ਮਿਤ੍ਤੇਸੂਤਿ ਮਿਤ੍ਤੇ ਨਿਸ੍ਸਾਯ ਲਦ੍ਧਬ੍ਬਂ ਤਸ੍ਸ ਤਂ ਮਿਤ੍ਤੇਸੁ ਸੋਤ੍ਥਾਨਂ ਨਾਮ ਹੋਤਿ. ਸੋ ਹਿ ਏਵਰੂਪੇਹਿ ਮਿਤ੍ਤੇਹਿ ਰਕ੍ਖਿਤੋ ਸੋਤ੍ਥਿਂ ਪਾਪੁਣਾਤਿ. ਤਤ੍ਥ ਮਿਤ੍ਤੇ ਨਿਸ੍ਸਾਯ ਸੋਤ੍ਥਿਭਾਵੋ ਮਹਾਉਕ੍ਕੁਸਜਾਤਕਾਦੀਹਿ (ਜਾ. ੧.੧੪.੪੪ ਆਦਯੋ) ਕਥੇਤਬ੍ਬੋ.

ਤੁਲ੍ਯਵਯਾਤਿ ਸਮਾਨਵਯਾ. ਸਮਗ੍ਗਾਤਿ ਸਮਗ੍ਗਵਾਸਾ. ਅਨੁਬ੍ਬਤਾਤਿ ਅਨੁਵਤ੍ਤਿਤਾ. ਧਮ੍ਮਕਾਮਾਤਿ ਤਿਵਿਧਸੁਚਰਿਤਧਮ੍ਮਂ ਰੋਚੇਤਿ. ਪਜਾਤਾਤਿ ਵਿਜਾਯਿਨੀ, ਨ ਵਞ੍ਝਾ. ਦਾਰੇਸੂਤਿ ਏਤੇਹਿ ਸੀਲਗੁਣੇਹਿ ਸਮਨ੍ਨਾਗਤੇ ਮਾਤੁਗਾਮੇ ਗੇਹੇ ਵਸਨ੍ਤੇ ਸਾਮਿਕਸ੍ਸ ਸੋਤ੍ਥਿ ਹੋਤੀਤਿ ਪਣ੍ਡਿਤਾ ਕਥੇਨ੍ਤਿ. ਤਤ੍ਥ ਸੀਲਵਨ੍ਤਂ ਮਾਤੁਗਾਮਂ ਨਿਸ੍ਸਾਯ ਸੋਤ੍ਥਿਭਾਵੋ ਮਣਿਚੋਰਜਾਤਕ- (ਜਾ. ੧.੨.੮੭ ਆਦਯੋ) ਸਮ੍ਬੂਲਜਾਤਕ- (ਜਾ. ੧.੧੬.੨੯੭ ਆਦਯੋ) ਖਣ੍ਡਹਾਲਜਾਤਕੇਹਿ (ਜਾ. ੨.੨੨.੯੮੨ ਆਦਯੋ) ਕਥੇਤਬ੍ਬੋ.

ਸੋਚੇਯ੍ਯਨ੍ਤਿ ਸੁਚਿਭਾਵਂ. ਅਦ੍ਵੇਜ੍ਝਤਾਤਿ ਅਦ੍ਵੇਜ੍ਝਤਾਯ ਨ ਏਸ ਮਯਾ ਸਦ੍ਧਿਂ ਭਿਜ੍ਜਿਤ੍ਵਾ ਦ੍ਵਿਧਾ ਭਵਿਸ੍ਸਤੀਤਿ ਏਵਂ ਅਦ੍ਵੇਜ੍ਝਭਾਵੇਨ ਯਂ ਜਾਨਾਤਿ. ਸੁਹਦਯਂ ਮਮਨ੍ਤਿ ਸੁਹਦੋ ਅਯਂ ਮਮਨ੍ਤਿ ਚ ਯਂ ਜਾਨਾਤਿ. ਰਾਜੂਸੁ ਵੇਤਿ ਏਵਂ ਰਾਜੂਸੁ ਸੇਵਕਾਨਂ ਸੋਤ੍ਥਾਨਂ ਨਾਮਾਤਿ ਪਣ੍ਡਿਤਾ ਕਥੇਨ੍ਤਿ. ਦਦਾਤਿ ਸਦ੍ਧੋਤਿ ਕਮ੍ਮਞ੍ਚ ਫਲਞ੍ਚ ਸਦ੍ਦਹਿਤ੍ਵਾ ਦਦਾਤਿ. ਸਗ੍ਗੇਸੁ ਵੇਤਿ ਏਵਂ ਸਗ੍ਗੇ ਦੇਵਲੋਕੇ ਸੋਤ੍ਥਾਨਂ ਨਿਰਪਰਾਧਮਙ੍ਗਲਨ੍ਤਿ ਪਣ੍ਡਿਤਾ ਕਥੇਨ੍ਤਿ, ਤਂ ਪੇਤਵਤ੍ਥੁਵਿਮਾਨਵਤ੍ਥੂਹਿ ਵਿਤ੍ਥਾਰੇਤ੍ਵਾ ਕਥੇਤਬ੍ਬਂ.

ਪੁਨਨ੍ਤਿ ਵੁਦ੍ਧਾਤਿ ਯਂ ਪੁਗ੍ਗਲਂ ਞਾਣਵੁਦ੍ਧਾ ਅਰਿਯਧਮ੍ਮੇਨ ਪੁਨਨ੍ਤਿ ਪਰਿਸੋਧੇਨ੍ਤਿ. ਸਮਚਰਿਯਾਯਾਤਿ ਸਮ੍ਮਾਪਟਿਪਤ੍ਤਿਯਾ. ਬਹੁਸ੍ਸੁਤਾਤਿ ਪਟਿਵੇਧਬਹੁਸ੍ਸੁਤਾ. ਇਸਯੋਤਿ ਏਸਿਤਗੁਣਾ. ਸੀਲਵਨ੍ਤੋਤਿ ਅਰਿਯਸੀਲੇਨ ਸਮਨ੍ਨਾਗਤਾ. ਅਰਹਨ੍ਤਮਜ੍ਝੇਤਿ ਅਰਹਨ੍ਤਾਨਂ ਮਜ੍ਝੇ ਪਟਿਲਭਿਤਬ੍ਬਂ ਤਂ ਸੋਤ੍ਥਾਨਨ੍ਤਿ ਪਣ੍ਡਿਤਾ ਕਥੇਨ੍ਤਿ. ਅਰਹਨ੍ਤੋ ਹਿ ਅਤ੍ਤਨਾ ਪਟਿਵਿਦ੍ਧਮਗ੍ਗਂ ਆਚਿਕ੍ਖਿਤ੍ਵਾ ਪਟਿਪਾਦੇਨ੍ਤਾ ਆਰਾਧਕਂ ਪੁਗ੍ਗਲਂ ਅਰਿਯਮਗ੍ਗੇਨ ਪੁਨਨ੍ਤਿ, ਸੋਪਿ ਅਰਹਾਵ ਹੋਤਿ.

ਏਵਂ ਮਹਾਸਤ੍ਤੋ ਅਰਹਤ੍ਤੇਨ ਦੇਸਨਾਯ ਕੂਟਂ ਗਣ੍ਹਨ੍ਤੋ ਅਟ੍ਠਹਿ ਗਾਥਾਹਿ ਅਟ੍ਠ ਮਹਾਮਙ੍ਗਲਾਨਿ ਕਥੇਤ੍ਵਾ ਤੇਸਞ੍ਞੇਵ ਮਙ੍ਗਲਾਨਂ ਥੁਤਿਂ ਕਰੋਨ੍ਤੋ ਓਸਾਨਗਾਥਮਾਹ –

੧੬੪.

‘‘ਏਤਾਨਿ ਖੋ ਸੋਤ੍ਥਾਨਾਨਿ ਲੋਕੇ, ਵਿਞ੍ਞੁਪ੍ਪਸਤ੍ਥਾਨਿ ਸੁਖੁਦ੍ਰਯਾਨਿ;

ਤਾਨੀਧ ਸੇਵੇਥ ਨਰੋ ਸਪਞ੍ਞੋ, ਨ ਹਿ ਮਙ੍ਗਲੇ ਕਿਞ੍ਚਨਮਤ੍ਥਿ ਸਚ੍ਚ’’ਨ੍ਤਿ.

ਤਤ੍ਥ ਨ ਹਿ ਮਙ੍ਗਲੇਤਿ ਤਸ੍ਮਿਂ ਪਨ ਦਿਟ੍ਠਸੁਤਮੁਤਪ੍ਪਭੇਦੇ ਮਙ੍ਗਲੇ ਕਿਞ੍ਚਨਂ ਏਕਮਙ੍ਗਲਮ੍ਪਿ ਸਚ੍ਚਂ ਨਾਮ ਨਤ੍ਥਿ, ਨਿਬ੍ਬਾਨਮੇਵ ਪਨੇਕਂ ਪਰਮਤ੍ਥਸਚ੍ਚਨ੍ਤਿ.

ਇਸਯੋ ਤਾਨਿ ਮਙ੍ਗਲਾਨਿ ਸੁਤ੍ਵਾ ਸਤ੍ਤਟ੍ਠਦਿਵਸਚ੍ਚਯੇਨ ਆਚਰਿਯਂ ਆਪੁਚ੍ਛਿਤ੍ਵਾ ਤਤ੍ਥੇਵ ਅਗਮਂਸੁ. ਰਾਜਾ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਿ. ਤੇ ਤਸ੍ਸ ਆਚਰਿਯੇਨ ਕਥਿਤਨਿਯਾਮੇਨ ਮਙ੍ਗਲਪਞ੍ਹਂ ਕਥੇਤ੍ਵਾ ਹਿਮਵਨ੍ਤਮੇਵ ਆਗਮਂਸੁ. ਤਤੋ ਪਟ੍ਠਾਯ ਲੋਕੇ ਮਙ੍ਗਲਂ ਪਾਕਟਂ ਅਹੋਸਿ. ਮਙ੍ਗਲੇਸੁ ਵਤ੍ਤਿਤ੍ਵਾ ਮਤਮਤਾ ਸਗ੍ਗਪਥਂ ਪੂਰੇਸੁਂ. ਬੋਧਿਸਤ੍ਤੋ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਇਸਿਗਣਂ ਆਦਾਯ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਾਹਂ ਮਙ੍ਗਲਪਞ੍ਹਂ ਕਥੇਸਿ’’ਨ੍ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਇਸਿਗਣੋ ਬੁਦ੍ਧਪਰਿਸਾ ਅਹੋਸਿ, ਮਙ੍ਗਲਪਞ੍ਹਪੁਚ੍ਛਕੋ ਜੇਟ੍ਠਨ੍ਤੇਵਾਸਿਕੋ ਸਾਰਿਪੁਤ੍ਤੋ, ਆਚਰਿਯੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਹਾਮਙ੍ਗਲਜਾਤਕਵਣ੍ਣਨਾ ਪਨ੍ਨਰਸਮਾ.

[੪੫੪] ੧੬. ਘਟਪਣ੍ਡਿਤਜਾਤਕਵਣ੍ਣਨਾ

ਉਟ੍ਠੇਹਿ ਕਣ੍ਹਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਤਪੁਤ੍ਤਂ ਕੁਟੁਮ੍ਬਿਕਂ ਆਰਬ੍ਭ ਕਥੇਸਿ. ਵਤ੍ਥੁ ਮਟ੍ਠਕੁਣ੍ਡਲਿਸਦਿਸਮੇਵ. ਇਧ ਪਨ ਸਤ੍ਥਾ ਤਂ ਉਪਾਸਕਂ ‘‘ਕਿਂ, ਉਪਾਸਕ, ਸੋਚਸੀ’’ਤਿ ਵਤ੍ਵਾ ‘‘ਆਮ, ਭਨ੍ਤੇ’’ਨ੍ਤਿ ਵੁਤ੍ਤੇ ‘‘ਉਪਾਸਕ, ਪੋਰਾਣਕਪਣ੍ਡਿਤਾ ਪਣ੍ਡਿਤਾਨਂ ਕਥਂ ਸੁਤ੍ਵਾ ਮਤਪੁਤ੍ਤਂ ਨਾਨੁਸੋਚਿਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਉਤ੍ਤਰਪਥੇ ਕਂਸਭੋਗੇ ਅਸਿਤਞ੍ਜਨਨਗਰੇ ਮਹਾਕਂਸੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਕਂਸੋ ਚ, ਉਪਕਂਸੋ ਚਾਤਿ ਦ੍ਵੇ ਪੁਤ੍ਤਾ ਅਹੇਸੁਂ, ਦੇਵਗਬ੍ਭਾ ਨਾਮ ਏਕਾ ਧੀਤਾ. ਤਸ੍ਸਾ ਜਾਤਦਿਵਸੇ ਨੇਮਿਤ੍ਤਕਾ ਬ੍ਰਾਹ੍ਮਣਾ ‘‘ਏਤਿਸ੍ਸਾ ਕੁਚ੍ਛਿਯਂ ਨਿਬ੍ਬਤ੍ਤਪੁਤ੍ਤਾ ਕਂਸਗੋਤ੍ਤਂ ਕਂਸਵਂਸਂ ਨਾਸੇਸ੍ਸਨ੍ਤੀ’’ਤਿ ਬ੍ਯਾਕਰਿਂਸੁ. ਰਾਜਾ ਬਲਵਸਿਨੇਹੇਨ ਧੀਤਰਂ ਵਿਨਾਸੇਤੁਂ ਨਾਸਕ੍ਖਿ, ‘‘ਭਾਤਰੋ ਜਾਨਿਸ੍ਸਨ੍ਤੀ’’ਤਿ ਯਾਵਤਾਯੁਕਂ ਠਤ੍ਵਾ ਕਾਲਮਕਾਸਿ. ਤਸ੍ਮਿਂ ਕਾਲਕਤੇ ਕਂਸੋ ਰਾਜਾ ਅਹੋਸਿ, ਉਪਕਂਸੋ ਉਪਰਾਜਾ. ਤੇ ਚਿਨ੍ਤਯਿਂਸੁ ‘‘ਸਚੇ ਮਯਂ ਭਗਿਨਿਂ ਨਾਸੇਸ੍ਸਾਮ, ਗਾਰਯ੍ਹਾ ਭਵਿਸ੍ਸਾਮ, ਏਤਂ ਕਸ੍ਸਚਿ ਅਦਤ੍ਵਾ ਨਿਸ੍ਸਾਮਿਕਂ ਕਤ੍ਵਾ ਪਟਿਜਗ੍ਗਿਸ੍ਸਾਮਾ’’ਤਿ. ਤੇ ਏਕਥੂਣਕਂ ਪਾਸਾਦਂ ਕਾਰੇਤ੍ਵਾ ਤਂ ਤਤ੍ਥ ਵਸਾਪੇਸੁਂ. ਨਨ੍ਦਿਗੋਪਾ ਨਾਮ ਤਸ੍ਸਾ ਪਰਿਚਾਰਿਕਾ ਅਹੋਸਿ. ਅਨ੍ਧਕਵੇਣ੍ਡੋ ਨਾਮ ਦਾਸੋ ਤਸ੍ਸਾ ਸਾਮਿਕੋ ਆਰਕ੍ਖਮਕਾਸਿ.

ਤਦਾ ਉਤ੍ਤਰਮਧੁਰਾਯ ਮਹਾਸਾਗਰੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਸਾਗਰੋ, ਉਪਸਾਗਰੋ ਚਾਤਿ ਦ੍ਵੇ ਪੁਤ੍ਤਾ ਅਹੇਸੁਂ. ਤੇਸੁ ਪਿਤੁ ਅਚ੍ਚਯੇਨ ਸਾਗਰੋ ਰਾਜਾ ਅਹੋਸਿ, ਉਪਸਾਗਰੋ ਉਪਰਾਜਾ. ਸੋ ਉਪਕਂਸਸ੍ਸ ਸਹਾਯਕੋ ਏਕਾਚਰਿਯਕੁਲੇ ਏਕਤੋ ਉਗ੍ਗਹਿਤਸਿਪ੍ਪੋ. ਸੋ ਸਾਗਰਸ੍ਸ ਭਾਤੁ ਅਨ੍ਤੇਪੁਰੇ ਦੁਬ੍ਭਿਤ੍ਵਾ ਭਾਯਮਾਨੋ ਪਲਾਯਿਤ੍ਵਾ ਕਂਸਭੋਗੇ ਉਪਕਂਸਸ੍ਸ ਸਨ੍ਤਿਕਂ ਅਗਮਾਸਿ. ਉਪਕਂਸੋ ਤਂ ਰਞ੍ਞੋ ਦਸ੍ਸੇਸਿ, ਰਾਜਾ ਤਸ੍ਸ ਮਹਨ੍ਤਂ ਯਸਂ ਅਦਾਸਿ. ਸੋ ਰਾਜੁਪਟ੍ਠਾਨਂ ਗਚ੍ਛਨ੍ਤੋ ਦੇਵਗਬ੍ਭਾਯ ਨਿਵਾਸਂ ਏਕਥਮ੍ਭਂ ਪਾਸਾਦਂ ਦਿਸ੍ਵਾ ‘‘ਕਸ੍ਸੇਸੋ ਨਿਵਾਸੋ’’ਤਿ ਪੁਚ੍ਛਿਤ੍ਵਾ ਤਂ ਕਾਰਣਂ ਸੁਤ੍ਵਾ ਦੇਵਗਬ੍ਭਾਯ ਪਟਿਬਦ੍ਧਚਿਤ੍ਤੋ ਅਹੋਸਿ. ਦੇਵਗਬ੍ਭਾਪਿ ਏਕਦਿਵਸਂ ਤਂ ਉਪਕਂਸੇਨ ਸਦ੍ਧਿਂ ਰਾਜੁਪਟ੍ਠਾਨਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਕੋ ਏਸੋ’’ਤਿ ਪੁਚ੍ਛਿਤ੍ਵਾ ‘‘ਮਹਾਸਾਗਰਸ੍ਸ ਪੁਤ੍ਤੋ ਉਪਸਾਗਰੋ ਨਾਮਾ’’ਤਿ ਨਨ੍ਦਿਗੋਪਾਯ ਸਨ੍ਤਿਕਾ ਸੁਤ੍ਵਾ ਤਸ੍ਮਿਂ ਪਟਿਬਦ੍ਧਚਿਤ੍ਤਾ ਅਹੋਸਿ. ਉਪਸਾਗਰੋ ਨਨ੍ਦਿਗੋਪਾਯ ਲਞ੍ਜਂ ਦਤ੍ਵਾ ‘‘ਭਗਿਨਿ, ਸਕ੍ਖਿਸ੍ਸਸਿ ਮੇ ਦੇਵਗਬ੍ਭਂ ਦਸ੍ਸੇਤੁ’’ਨ੍ਤਿ ਆਹ. ਸਾ ‘‘ਨ ਏਤਂ ਸਾਮਿ, ਗਰੁਕ’’ਨ੍ਤਿ ਵਤ੍ਵਾ ਤਂ ਕਾਰਣਂ ਦੇਵਗਬ੍ਭਾਯ ਆਰੋਚੇਸਿ. ਸਾ ਪਕਤਿਯਾਵ ਤਸ੍ਮਿਂ ਪਟਿਬਦ੍ਧਚਿਤ੍ਤਾ ਤਂ ਵਚਨਂ ਸੁਤ੍ਵਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਨਨ੍ਦਿਗੋਪਾ ਉਪਸਾਗਰਸ੍ਸ ਸਞ੍ਞਂ ਦਤ੍ਵਾ ਰਤ੍ਤਿਭਾਗੇ ਤਂ ਪਾਸਾਦਂ ਆਰੋਪੇਸਿ. ਸੋ ਦੇਵਗਬ੍ਭਾਯ ਸਦ੍ਧਿਂ ਸਂਵਾਸਂ ਕਪ੍ਪੇਸਿ. ਅਥ ਨੇਸਂ ਪੁਨਪ੍ਪੁਨਂ ਸਂਵਾਸੇਨ ਦੇਵਗਬ੍ਭਾ ਗਬ੍ਭਂ ਪਟਿਲਭਿ.

ਅਪਰਭਾਗੇ ਤਸ੍ਸਾ ਗਬ੍ਭਪਤਿਟ੍ਠਾਨਂ ਪਾਕਟਂ ਅਹੋਸਿ. ਭਾਤਰੋ ਨਨ੍ਦਿਗੋਪਂ ਪੁਚ੍ਛਿਂਸੁ, ਸਾ ਅਭਯਂ ਯਾਚਿਤ੍ਵਾ ਤਂ ਅਨ੍ਤਰਂ ਕਥੇਸਿ. ਤੇ ਸੁਤ੍ਵਾ ‘‘ਭਗਿਨਿਂ ਨਾਸੇਤੁਂ ਨ ਸਕ੍ਕਾ, ਸਚੇ ਧੀਤਰਂ ਵਿਜਾਯਿਸ੍ਸਤਿ, ਤਮ੍ਪਿ ਨ ਨਾਸੇਸ੍ਸਾਮ, ਸਚੇ ਪਨ ਪੁਤ੍ਤੋ ਭਵਿਸ੍ਸਤਿ, ਨਾਸੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਦੇਵਗਬ੍ਭਂ ਉਪਸਾਗਰਸ੍ਸੇਵ ਅਦਂਸੁ. ਸਾ ਪਰਿਪੁਣ੍ਣਗਬ੍ਭਾ ਧੀਤਰਂ ਵਿਜਾਯਿ. ਭਾਤਰੋ ਸੁਤ੍ਵਾ ਹਟ੍ਠਤੁਟ੍ਠਾ ਤਸ੍ਸਾ ‘‘ਅਞ੍ਜਨਦੇਵੀ’’ਤਿ ਨਾਮਂ ਕਰਿਂਸੁ. ਤੇਸਂ ਭੋਗਵਡ੍ਢਮਾਨਂ ਨਾਮ ਭੋਗਗਾਮਂ ਅਦਂਸੁ. ਉਪਸਾਗਰੋ ਦੇਵਗਬ੍ਭਂ ਗਹੇਤ੍ਵਾ ਭੋਗਵਡ੍ਢਮਾਨਗਾਮੇ ਵਸਿ. ਦੇਵਗਬ੍ਭਾਯ ਪੁਨਪਿ ਗਬ੍ਭੋ ਪਤਿਟ੍ਠਾਸਿ, ਨਨ੍ਦਿਗੋਪਾਪਿ ਤਂ ਦਿਵਸਮੇਵ ਗਬ੍ਭਂ ਪਟਿਲਭਿ. ਤਾਸੁ ਪਰਿਪੁਣ੍ਣਗਬ੍ਭਾਸੁ ਏਕਦਿਵਸਮੇਵ ਦੇਵਗਬ੍ਭਾ ਪੁਤ੍ਤਂ ਵਿਜਾਯਿ, ਨਨ੍ਦਿਗੋਪਾ ਧੀਤਰਂ ਵਿਜਾਯਿ. ਦੇਵਗਬ੍ਭਾ ਪੁਤ੍ਤਸ੍ਸ ਵਿਨਾਸਨਭਯੇਨ ਪੁਤ੍ਤਂ ਨਨ੍ਦਿਗੋਪਾਯ ਰਹਸ੍ਸੇਨ ਪੇਸੇਤ੍ਵਾ ਤਸ੍ਸਾ ਧੀਤਰਂ ਆਹਰਾਪੇਸਿ. ਤਸ੍ਸਾ ਵਿਜਾਤਭਾਵਂ ਭਾਤਿਕਾਨਂ ਆਰੋਚੇਸੁਂ. ਤੇ ‘‘ਪੁਤ੍ਤਂ ਵਿਜਾਤਾ, ਧੀਤਰ’’ਨ੍ਤਿ ਪੁਚ੍ਛਿਤ੍ਵਾ ‘‘ਧੀਤਰ’’ਨ੍ਤਿ ਵੁਤ੍ਤੇ ‘‘ਤੇਨ ਹਿ ਪੋਸੇਥਾ’’ਤਿ ਆਹਂਸੁ. ਏਤੇਨੁਪਾਯੇਨ ਦੇਵਗਬ੍ਭਾ ਦਸ ਪੁਤ੍ਤੇ ਵਿਜਾਯਿ, ਦਸ ਧੀਤਰੋ ਨਨ੍ਦਿਗੋਪਾ ਵਿਜਾਯਿ. ਦਸ ਪੁਤ੍ਤਾ ਨਨ੍ਦਿਗੋਪਾਯ ਸਨ੍ਤਿਕੇ ਵਡ੍ਢਨ੍ਤਿ, ਧੀਤਰੋ ਦੇਵਗਬ੍ਭਾਯ. ਤਂ ਅਨ੍ਤਰਂ ਕੋਚਿ ਨ ਜਾਨਾਤਿ. ਦੇਵਗਬ੍ਭਾਯ ਜੇਟ੍ਠਪੁਤ੍ਤੋ ਵਾਸੁਦੇਵੋ ਨਾਮ ਅਹੋਸਿ, ਦੁਤਿਯੋ ਬਲਦੇਵੋ, ਤਤਿਯੋ ਚਨ੍ਦਦੇਵੋ, ਚਤੁਤ੍ਥੋ ਸੂਰਿਯਦੇਵੋ, ਪਞ੍ਚਮੋ ਅਗ੍ਗਿਦੇਵੋ, ਛਟ੍ਠੋ ਵਰੁਣਦੇਵੋ, ਸਤ੍ਤਮੋ ਅਜ੍ਜੁਨੋ, ਅਟ੍ਠਮੋ ਪਜ੍ਜੁਨੋ, ਨਵਮੋ ਘਟਪਣ੍ਡਿਤੋ, ਦਸਮੋ ਅਙ੍ਕੁਰੋ ਨਾਮ ਅਹੋਸਿ. ਤੇ ਅਨ੍ਧਕਵੇਣ੍ਡਦਾਸਪੁਤ੍ਤਾ ਦਸ ਭਾਤਿਕਾ ਚੇਟਕਾਤਿ ਪਾਕਟਾ ਅਹੇਸੁਂ.

ਤੇ ਅਪਰਭਾਗੇ ਵੁਦ੍ਧਿਮਨ੍ਵਾਯ ਥਾਮਬਲਸਮ੍ਪਨ੍ਨਾ ਕਕ੍ਖਲ਼ਾ ਫਰੁਸਾ ਹੁਤ੍ਵਾ ਵਿਲੋਪਂ ਕਰੋਨ੍ਤਾ ਵਿਚਰਨ੍ਤਿ, ਰਞ੍ਞੋ ਗਚ੍ਛਨ੍ਤੇ ਪਣ੍ਣਾਕਾਰੇਪਿ ਵਿਲੁਮ੍ਪਨ੍ਤੇਵ. ਮਨੁਸ੍ਸਾ ਸਨ੍ਨਿਪਤਿਤ੍ਵਾ ‘‘ਅਨ੍ਧਕਵੇਣ੍ਡਦਾਸਪੁਤ੍ਤਾ ਦਸ ਭਾਤਿਕਾ ਰਟ੍ਠਂ ਵਿਲੁਮ੍ਪਨ੍ਤੀ’’ਤਿ ਰਾਜਙ੍ਗਣੇ ਉਪਕ੍ਕੋਸਿਂਸੁ. ਰਾਜਾ ਅਨ੍ਧਕਵੇਣ੍ਡਂ ਪਕ੍ਕੋਸਾਪੇਤ੍ਵਾ ‘‘ਕਸ੍ਮਾ ਪੁਤ੍ਤੇਹਿ ਵਿਲੋਪਂ ਕਾਰਾਪੇਸੀ’’ਤਿ ਤਜ੍ਜੇਸਿ. ਏਵਂ ਦੁਤਿਯਮ੍ਪਿ ਤਤਿਯਮ੍ਪਿ ਮਨੁਸ੍ਸੇਹਿ ਉਪਕ੍ਕੋਸੇ ਕਤੇ ਰਾਜਾ ਤਂ ਸਨ੍ਤਜ੍ਜੇਸਿ. ਸੋ ਮਰਣਭਯਭੀਤੋ ਰਾਜਾਨਂ ਅਭਯਂ ਯਾਚਿਤ੍ਵਾ ‘‘ਦੇਵ, ਏਤੇ ਨ ਮਯ੍ਹਂ ਪੁਤ੍ਤਾ, ਉਪਸਾਗਰਸ੍ਸ ਪੁਤ੍ਤਾ’’ਤਿ ਤਂ ਅਨ੍ਤਰਂ ਆਰੋਚੇਸਿ. ਰਾਜਾ ਭੀਤੋ ‘‘ਕੇਨ ਤੇ ਉਪਾਯੇਨ ਗਣ੍ਹਾਮਾ’’ਤਿ ਅਮਚ੍ਚੇ ਪੁਚ੍ਛਿਤ੍ਵਾ ‘‘ਏਤੇ, ਦੇਵ, ਮਲ੍ਲਯੁਦ੍ਧਵਿਤ੍ਤਕਾ, ਨਗਰੇ ਯੁਦ੍ਧਂ ਕਾਰੇਤ੍ਵਾ ਤਤ੍ਥ ਨੇ ਯੁਦ੍ਧਮਣ੍ਡਲਂ ਆਗਤੇ ਗਾਹਾਪੇਤ੍ਵਾ ਮਾਰੇਸ੍ਸਾਮਾ’’ਤਿ ਵੁਤ੍ਤੇ ਚਾਰੁਰਞ੍ਚ, ਮੁਟ੍ਠਿਕਞ੍ਚਾਤਿ ਦ੍ਵੇ ਮਲ੍ਲੇ ਪੋਸੇਤ੍ਵਾ ‘‘ਇਤੋ ਸਤ੍ਤਮੇ ਦਿਵਸੇ ਯੁਦ੍ਧਂ ਭਵਿਸ੍ਸਤੀ’’ਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ਰਾਜਙ੍ਗਣੇ ਯੁਦ੍ਧਮਣ੍ਡਲਂ ਸਜ੍ਜਾਪੇਤ੍ਵਾ ਅਕ੍ਖਵਾਟਂ ਕਾਰੇਤ੍ਵਾ ਯੁਦ੍ਧਮਣ੍ਡਲਂ ਅਲਙ੍ਕਾਰਾਪੇਤ੍ਵਾ ਧਜਪਟਾਕਂ ਬਨ੍ਧਾਪੇਸਿ. ਸਕਲਨਗਰਂ ਸਙ੍ਖੁਭਿ. ਚਕ੍ਕਾਤਿਚਕ੍ਕਂ ਮਞ੍ਚਾਤਿਮਞ੍ਚਂ ਬਨ੍ਧਿਤ੍ਵਾ ਚਾਰੁਰਮੁਟ੍ਠਿਕਾ ਯੁਦ੍ਧਮਣ੍ਡਲਂ ਆਗਨ੍ਤ੍ਵਾ ਵਗ੍ਗਨ੍ਤਾ ਗਜ੍ਜਨ੍ਤਾ ਅਪ੍ਫੋਟੇਨ੍ਤਾ ਵਿਚਰਿਂਸੁ. ਦਸ ਭਾਤਿਕਾਪਿ ਆਗਨ੍ਤ੍ਵਾ ਰਜਕਵੀਥਿਂ ਵਿਲੁਮ੍ਪਿਤ੍ਵਾ ਵਣ੍ਣਸਾਟਕੇ ਨਿਵਾਸੇਤ੍ਵਾ ਗਨ੍ਧਾਪਣੇਸੁ ਗਨ੍ਧਂ, ਮਾਲਾਕਾਰਾਪਣੇਸੁ ਮਾਲਂ ਵਿਲੁਮ੍ਪਿਤ੍ਵਾ ਵਿਲਿਤ੍ਤਗਤ੍ਤਾ ਮਾਲਧਾਰਿਨੋ ਕਤਕਣ੍ਣਪੂਰਾ ਵਗ੍ਗਨ੍ਤਾ ਗਜ੍ਜਨ੍ਤਾ ਅਪ੍ਫੋਟੇਨ੍ਤਾ ਯੁਦ੍ਧਮਣ੍ਡਲਂ ਪਵਿਸਿਂਸੁ.

ਤਸ੍ਮਿਂ ਖਣੇ ਚਾਰੁਰੋ ਅਪ੍ਫੋਟੇਨ੍ਤੋ ਵਿਚਰਤਿ. ਬਲਦੇਵੋ ਤਂ ਦਿਸ੍ਵਾ ‘‘ਨ ਨਂ ਹਤ੍ਥੇਨ ਛੁਪਿਸ੍ਸਾਮੀ’’ਤਿ ਹਤ੍ਥਿਸਾਲਤੋ ਮਹਨ੍ਤਂ ਹਤ੍ਥਿਯੋਤ੍ਤਂ ਆਹਰਿਤ੍ਵਾ ਵਗ੍ਗਿਤ੍ਵਾ ਗਜ੍ਜਿਤ੍ਵਾ ਯੋਤ੍ਤਂ ਖਿਪਿਤ੍ਵਾ ਚਾਰੁਰਂ ਉਦਰੇ ਵੇਠੇਤ੍ਵਾ ਦ੍ਵੇ ਯੋਤ੍ਤਕੋਟਿਯੋ ਏਕਤੋ ਕਤ੍ਵਾ ਵਤ੍ਤੇਤ੍ਵਾ ਉਕ੍ਖਿਪਿਤ੍ਵਾ ਸੀਸਮਤ੍ਥਕੇ ਭਮੇਤ੍ਵਾ ਭੂਮਿਯਂ ਪੋਥੇਤ੍ਵਾ ਬਹਿ ਅਕ੍ਖਵਾਟੇ ਖਿਪਿ. ਚਾਰੁਰੇ ਮਤੇ ਰਾਜਾ ਮੁਟ੍ਠਿਕਮਲ੍ਲਂ ਆਣਾਪੇਸਿ. ਸੋ ਉਟ੍ਠਾਯ ਵਗ੍ਗਿਤ੍ਵਾ ਗਜ੍ਜਿਤ੍ਵਾ ਅਪ੍ਫੋਟੇਸਿ. ਬਲਦੇਵੋ ਤਂ ਪੋਥੇਤ੍ਵਾ ਅਟ੍ਠੀਨਿ ਸਞ੍ਚੁਣ੍ਣੇਤ੍ਵਾ ‘‘ਅਮਲ੍ਲੋਮ੍ਹਿ, ਅਮਲ੍ਲੋਮ੍ਹੀ’’ਤਿ ਵਦਨ੍ਤਮੇਵ ‘‘ਨਾਹਂ ਤਵ ਮਲ੍ਲਭਾਵਂ ਵਾ ਅਮਲ੍ਲਭਾਵਂ ਵਾ ਜਾਨਾਮੀ’’ਤਿ ਹਤ੍ਥੇ ਗਹੇਤ੍ਵਾ ਭੂਮਿਯਂ ਪੋਥੇਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਬਹਿ ਅਕ੍ਖਵਾਟੇ ਖਿਪਿ. ਮੁਟ੍ਠਿਕੋ ਮਰਨ੍ਤੋ ‘‘ਯਕ੍ਖੋ ਹੁਤ੍ਵਾ ਤਂ ਖਾਦਿਤੁਂ ਲਭਿਸ੍ਸਾਮੀ’’ਤਿ ਪਤ੍ਥਨਂ ਪਟ੍ਠਪੇਸਿ. ਸੋ ਕਾਲਮਤ੍ਤਿਕਅਟਵਿਯਂ ਨਾਮ ਯਕ੍ਖੋ ਹੁਤ੍ਵਾ ਨਿਬ੍ਬਤ੍ਤਿ. ਰਾਜਾ ‘‘ਗਣ੍ਹਥ ਦਸ ਭਾਤਿਕੇ ਚੇਟਕੇ’’ਤਿ ਉਟ੍ਠਹਿ. ਤਸ੍ਮਿਂ ਖਣੇ ਵਾਸੁਦੇਵੋ ਚਕ੍ਕਂ ਖਿਪਿ. ਤਂ ਦ੍ਵਿਨ੍ਨਮ੍ਪਿ ਭਾਤਿਕਾਨਂ ਸੀਸਾਨਿ ਪਾਤੇਸਿ. ਮਹਾਜਨੋ ਭੀਤਤਸਿਤੋ ‘‘ਅਵਸ੍ਸਯਾ ਨੋ ਹੋਥਾ’’ਤਿ ਤੇਸਂ ਪਾਦੇਸੁ ਪਤਿਤ੍ਵਾ ਨਿਪਜ੍ਜਿ. ਤੇ ਦ੍ਵੇਪਿ ਮਾਤੁਲੇ ਮਾਰੇਤ੍ਵਾ ਅਸਿਤਞ੍ਜਨਨਗਰੇ ਰਜ੍ਜਂ ਗਹੇਤ੍ਵਾ ਮਾਤਾਪਿਤਰੋ ਤਤ੍ਥ ਕਤ੍ਵਾ ‘‘ਸਕਲਜਮ੍ਬੁਦੀਪੇ ਰਜ੍ਜਂ ਗਣ੍ਹਿਸ੍ਸਾਮਾ’’ਤਿ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਕਾਲਯੋਨਕਰਞ੍ਞੋ ਨਿਵਾਸਂ ਅਯੁਜ੍ਝਨਗਰਂ ਗਨ੍ਤ੍ਵਾ ਤਂ ਪਰਿਕ੍ਖਿਪਿਤ੍ਵਾ ਠਿਤਂ ਪਰਿਖਾਰੁਕ੍ਖਗਹਨਂ ਵਿਦ੍ਧਂਸੇਤ੍ਵਾ ਪਾਕਾਰਂ ਭਿਨ੍ਦਿਤ੍ਵਾ ਰਾਜਾਨਂ ਗਹੇਤ੍ਵਾ ਤਂ ਰਜ੍ਜਂ ਅਤ੍ਤਨੋ ਹਤ੍ਥਗਤਂ ਕਤ੍ਵਾ ਦ੍ਵਾਰਵਤਿਂ ਪਾਪੁਣਿਂਸੁ. ਤਸ੍ਸ ਪਨ ਨਗਰਸ੍ਸ ਏਕਤੋ ਸਮੁਦ੍ਦੋ ਏਕਤੋ ਪਬ੍ਬਤੋ, ਅਮਨੁਸ੍ਸਪਰਿਗ੍ਗਹਿਤਂ ਕਿਰ ਤਂ ਅਹੋਸਿ.

ਤਸ੍ਸ ਆਰਕ੍ਖਂ ਗਹੇਤ੍ਵਾ ਠਿਤਯਕ੍ਖੋ ਪਚ੍ਚਾਮਿਤ੍ਤੇ ਦਿਸ੍ਵਾ ਗਦ੍ਰਭਵੇਸੇਨ ਗਦ੍ਰਭਰਵਂ ਰਵਤਿ. ਤਸ੍ਮਿਂ ਖਣੇ ਯਕ੍ਖਾਨੁਭਾਵੇਨ ਸਕਲਨਗਰਂ ਉਪ੍ਪਤਿਤ੍ਵਾ ਮਹਾਸਮੁਦ੍ਦੇ ਏਕਸ੍ਮਿਂ ਦੀਪਕੇ ਤਿਟ੍ਠਤਿ. ਪਚ੍ਚਾਮਿਤ੍ਤੇਸੁ ਗਤੇਸੁ ਪੁਨਾਗਨ੍ਤ੍ਵਾ ਸਕਟ੍ਠਾਨੇਯੇਵ ਪਤਿਟ੍ਠਾਤਿ. ਤਦਾਪਿ ਸੋ ਗਦ੍ਰਭੋ ਤੇਸਂ ਦਸਨ੍ਨਂ ਭਾਤਿਕਾਨਂ ਆਗਮਨਂ ਞਤ੍ਵਾ ਗਦ੍ਰਭਰਵਂ ਰਵਿ. ਨਗਰਂ ਉਪ੍ਪਤਿਤ੍ਵਾ ਦੀਪਕੇ ਪਤਿਟ੍ਠਾਯ ਤੇਸੁ ਨਗਰਂ ਅਦਿਸ੍ਵਾ ਨਿਵਤ੍ਤਨ੍ਤੇਸੁ ਪੁਨਾਗਨ੍ਤ੍ਵਾ ਸਕਟ੍ਠਾਨੇ ਪਤਿਟ੍ਠਾਸਿ. ਤੇ ਪੁਨ ਨਿਵਤ੍ਤਿਂਸੁ, ਪੁਨਪਿ ਗਦ੍ਰਭੋ ਤਥੇਵ ਅਕਾਸਿ. ਤੇ ਦ੍ਵਾਰਵਤਿਨਗਰੇ ਰਜ੍ਜਂ ਗਣ੍ਹਿਤੁਂ ਅਸਕ੍ਕੋਨ੍ਤਾ ਕਣ੍ਹਦੀਪਾਯਨਸ੍ਸ ਇਸਿਨੋ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਭਨ੍ਤੇ, ਮਯਂ ਦ੍ਵਾਰਵਤਿਯਂ ਰਜ੍ਜਂ ਗਹੇਤੁਂ ਨ ਸਕ੍ਕੋਮ, ਏਕਂ ਨੋ ਉਪਾਯਂ ਕਰੋਥਾ’’ਤਿ ਪੁਚ੍ਛਿਤ੍ਵਾ ‘‘ਪਰਿਖਾਪਿਟ੍ਠੇ ਅਸੁਕਸ੍ਮਿਂ ਨਾਮ ਠਾਨੇ ਏਕੋ ਗਦ੍ਰਭੋ ਚਰਤਿ. ਸੋ ਹਿ ਅਮਿਤ੍ਤੇ ਦਿਸ੍ਵਾ ਵਿਰਵਤਿ, ਤਸ੍ਮਿਂ ਖਣੇ ਨਗਰਂ ਉਪ੍ਪਤਿਤ੍ਵਾ ਗਚ੍ਛਤਿ, ਤੁਮ੍ਹੇ ਤਸ੍ਸ ਪਾਦੇ ਗਣ੍ਹਥ, ਅਯਂ ਵੋ ਨਿਪ੍ਫਜ੍ਜਨੂਪਾਯੋ’’ਤਿ ਵੁਤ੍ਤੇ ਤਾਪਸਂ ਵਨ੍ਦਿਤ੍ਵਾ ਗਨ੍ਤ੍ਵਾ ਗਦ੍ਰਭਸ੍ਸ ਪਾਦੇਸੁ ਗਹੇਤ੍ਵਾ ਨਿਪਤਿਤ੍ਵਾ ‘‘ਸਾਮਿ, ਠਪੇਤ੍ਵਾ ਤੁਮ੍ਹੇ ਅਞ੍ਞੋ ਅਮ੍ਹਾਕਂ ਅਵਸ੍ਸਯੋ ਨਤ੍ਥਿ, ਅਮ੍ਹਾਕਂ ਨਗਰਂ ਗਣ੍ਹਨਕਾਲੇ ਮਾ ਰਵਿਤ੍ਥਾ’’ਤਿ ਯਾਚਿਂਸੁ. ਗਦ੍ਰਭੋ ‘‘ਨ ਸਕ੍ਕਾ ਨ ਵਿਰਵਿਤੁਂ, ਤੁਮ੍ਹੇ ਪਨ ਪਠਮਤਰਂ ਆਗਨ੍ਤ੍ਵਾ ਚਤ੍ਤਾਰੋ ਜਨਾ ਮਹਨ੍ਤਾਨਿ ਅਯਨਙ੍ਗਲਾਨਿ ਗਹੇਤ੍ਵਾ ਚਤੂਸੁ ਨਗਰਦ੍ਵਾਰੇਸੁ ਮਹਨ੍ਤੇ ਅਯਖਾਣੁਕੇ ਭੂਮਿਯਂ ਆਕੋਟੇਤ੍ਵਾ ਨਗਰਸ੍ਸ ਉਪ੍ਪਤਨਕਾਲੇ ਨਙ੍ਗਲਾਨਿ ਗਹੇਤ੍ਵਾ ਨਙ੍ਗਲਬਦ੍ਧਂ ਅਯਸਙ੍ਖਲਿਕਂ ਅਯਖਾਣੁਕੇ ਬਨ੍ਧੇਯ੍ਯਾਥ, ਨਗਰਂ ਉਪ੍ਪਤਿਤੁਂ ਨ ਸਕ੍ਖਿਸ੍ਸਤੀ’’ਤਿ ਆਹ.

ਤੇ ‘‘ਸਾਧੂ’’ਤਿ ਵਤ੍ਵਾ ਤਸ੍ਮਿਂ ਅਵਿਰਵਨ੍ਤੇਯੇਵ ਨਙ੍ਗਲਾਨਿ ਆਦਾਯ ਚਤੂਸੁ ਨਗਰਦ੍ਵਾਰੇਸੁ ਖਾਣੁਕੇ ਭੂਮਿਯਂ ਆਕੋਟੇਤ੍ਵਾ ਅਟ੍ਠਂਸੁ. ਤਸ੍ਮਿਂ ਖਣੇ ਗਦ੍ਰਭੋ ਵਿਰਵਿ, ਨਗਰਂ ਉਪ੍ਪਤਿਤੁਮਾਰਭਿ. ਚਤੂਸੁ ਦ੍ਵਾਰੇਸੁ ਠਿਤਾ ਚਤੂਹਿ ਅਯਨਙ੍ਗਲੇਹਿ ਗਹੇਤ੍ਵਾ ਨਙ੍ਗਲਬਦ੍ਧਾ ਅਯਸਙ੍ਖਲਿਕਾ ਖਾਣੁਕੇਸੁ ਬਨ੍ਧਿਂਸੁ, ਨਗਰਂ ਉਪ੍ਪਤਿਤੁਂ ਨਾਸਕ੍ਖਿ. ਦਸ ਭਾਤਿਕਾ ਤਤੋ ਨਗਰਂ ਪਵਿਸਿਤ੍ਵਾ ਰਾਜਾਨਂ ਮਾਰੇਤ੍ਵਾ ਰਜ੍ਜਂ ਗਣ੍ਹਿਂਸੁ. ਏਵਂ ਤੇ ਸਕਲਜਮ੍ਬੁਦੀਪੇ ਤੇਸਟ੍ਠਿਯਾ ਨਗਰਸਹਸ੍ਸੇਸੁ ਸਬ੍ਬਰਾਜਾਨੋ ਚਕ੍ਕੇਨ ਜੀਵਿਤਕ੍ਖਯਂ ਪਾਪੇਤ੍ਵਾ ਦ੍ਵਾਰਵਤਿਯਂ ਵਸਮਾਨਾ ਰਜ੍ਜਂ ਦਸ ਕੋਟ੍ਠਾਸੇ ਕਤ੍ਵਾ ਵਿਭਜਿਂਸੁ, ਭਗਿਨਿਂ ਪਨ ਅਞ੍ਜਨਦੇਵਿਂ ਨ ਸਰਿਂਸੁ. ਤਤੋ ਪੁਨ ‘‘ਏਕਾਦਸ ਕੋਟ੍ਠਾਸੇ ਕਰੋਮਾ’’ਤਿ ਵੁਤ੍ਤੇ ਅਙ੍ਕੁਰੋ ‘‘ਮਮ ਕੋਟ੍ਠਾਸਂ ਤਸ੍ਸਾ ਦੇਥ, ਅਹਂ ਵੋਹਾਰਂ ਕਤ੍ਵਾ ਜੀਵਿਸ੍ਸਾਮਿ, ਕੇਵਲਂ ਤੁਮ੍ਹੇ ਅਤ੍ਤਨੋ ਜਨਪਦੇ ਮਯ੍ਹਂ ਸੁਙ੍ਕਂ ਵਿਸ੍ਸਜ੍ਜੇਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਸ੍ਸ ਕੋਟ੍ਠਾਸਂ ਭਗਿਨਿਯਾ ਦਤ੍ਵਾ ਸਦ੍ਧਿਂ ਤਾਯ ਨਵ ਰਾਜਾਨੋ ਦ੍ਵਾਰਵਤਿਯਂ ਵਸਿਂਸੁ. ਅਙ੍ਕੁਰੋ ਪਨ ਵਣਿਜ੍ਜਮਕਾਸਿ. ਏਵਂ ਤੇਸੁ ਅਪਰਾਪਰਂ ਪੁਤ੍ਤਧੀਤਾਹਿ ਵਡ੍ਢਮਾਨੇਸੁ ਅਦ੍ਧਾਨੇ ਗਤੇ ਮਾਤਾਪਿਤਰੋ ਕਾਲਮਕਂਸੁ.

ਤਦਾ ਕਿਰ ਮਨੁਸ੍ਸਾਨਂ ਵੀਸਤਿਵਸ੍ਸਸਹਸ੍ਸਾਯੁਕਕਾਲੋ ਅਹੋਸਿ. ਤਦਾ ਵਾਸੁਦੇਵਮਹਾਰਾਜਸ੍ਸ ਏਕੋ ਪੁਤ੍ਤੋ ਕਾਲਮਕਾਸਿ. ਰਾਜਾ ਸੋਕਪਰੇਤੋ ਸਬ੍ਬਕਿਚ੍ਚਾਨਿ ਪਹਾਯ ਮਞ੍ਚਸ੍ਸ ਅਟਨਿਂ ਪਰਿਗ੍ਗਹੇਤ੍ਵਾ ਵਿਲਪਨ੍ਤੋ ਨਿਪਜ੍ਜਿ. ਤਸ੍ਮਿਂ ਕਾਲੇ ਘਟਪਣ੍ਡਿਤੋ ਚਿਨ੍ਤੇਸਿ ‘‘ਠਪੇਤ੍ਵਾ ਮਂ ਅਞ੍ਞੋ ਕੋਚਿ ਮਮ ਭਾਤੁ ਸੋਕਂ ਹਰਿਤੁਂ ਸਮਤ੍ਥੋ ਨਾਮ ਨਤ੍ਥਿ, ਉਪਾਯੇਨਸ੍ਸ ਸੋਕਂ ਹਰਿਸ੍ਸਾਮੀ’’ਤਿ. ਸੋ ਉਮ੍ਮਤ੍ਤਕਵੇਸਂ ਗਹੇਤ੍ਵਾ ‘‘ਸਸਂ ਮੇ ਦੇਥ, ਸਸਂ ਮੇ ਦੇਥਾ’’ਤਿ ਆਕਾਸਂ ਉਲ੍ਲੋਕੇਨ੍ਤੋ ਸਕਲਨਗਰਂ ਵਿਚਰਿ. ‘‘ਘਟਪਣ੍ਡਿਤੋ ਉਮ੍ਮਤ੍ਤਕੋ ਜਾਤੋ’’ਤਿ ਸਕਲਨਗਰਂ ਸਙ੍ਖੁਭਿ. ਤਸ੍ਮਿਂ ਕਾਲੇ ਰੋਹਿਣੇਯ੍ਯੋ ਨਾਮ ਅਮਚ੍ਚੋ ਵਾਸੁਦੇਵਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਤੇਨ ਸਦ੍ਧਿਂ ਕਥਂ ਸਮੁਟ੍ਠਾਪੇਨ੍ਤੋ ਪਠਮਂ ਗਾਥਮਾਹ –

੧੬੫.

‘‘ਉਟ੍ਠੇਹਿ ਕਣ੍ਹ ਕਿਂ ਸੇਸਿ, ਕੋ ਅਤ੍ਥੋ ਸੁਪਨੇਨ ਤੇ;

ਯੋਪਿ ਤੁਯ੍ਹਂ ਸਕੋ ਭਾਤਾ, ਹਦਯਂ ਚਕ੍ਖੁ ਚ ਦਕ੍ਖਿਣਂ;

ਤਸ੍ਸ ਵਾਤਾ ਬਲੀਯਨ੍ਤਿ, ਘਟੋ ਜਪ੍ਪਤਿ ਕੇਸਵਾ’’ਤਿ.

ਤਤ੍ਥ ਕਣ੍ਹਾਤਿ ਗੋਤ੍ਤੇਨਾਲਪਤਿ, ਕਣ੍ਹਾਯਨਗੋਤ੍ਤੋ ਕਿਰੇਸ. ਕੋ ਅਤ੍ਥੋਤਿ ਕਤਰਾ ਨਾਮ ਵਡ੍ਢਿ. ਹਦਯਂ ਚਕ੍ਖੁ ਚ ਦਕ੍ਖਿਣਨ੍ਤਿ ਹਦਯੇਨ ਚੇਵ ਦਕ੍ਖਿਣਚਕ੍ਖੁਨਾ ਚ ਸਮਾਨੋਤਿ ਅਤ੍ਥੋ. ਤਸ੍ਸ ਵਾਤਾ ਬਲੀਯਨ੍ਤੀਤਿ ਤਸ੍ਸ ਹਦਯਂ ਅਪਸ੍ਮਾਰਵਾਤਾ ਅਵਤ੍ਥਰਨ੍ਤੀਤਿ ਅਤ੍ਥੋ. ਜਪ੍ਪਤੀਤਿ ‘‘ਸਸਂ ਮੇ ਦੇਥਾ’’ਤਿ ਵਿਪ੍ਪਲਪਤਿ. ਕੇਸਵਾਤਿ ਸੋ ਕਿਰ ਕੇਸਸੋਭਨਤਾਯ ‘‘ਕੇਸਵਾ’’ਤਿ ਪਞ੍ਞਾਯਿਤ੍ਥ, ਤੇਨ ਤਂ ਨਾਮੇਨਾਲਪਤਿ.

ਏਵਂ ਅਮਚ੍ਚੇਨ ਵੁਤ੍ਤੇ ਤਸ੍ਸ ਉਮ੍ਮਤ੍ਤਕਭਾਵਂ ਞਤ੍ਵਾ ਸਤ੍ਥਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਦੁਤਿਯਂ ਗਾਥਮਾਹ –

੧੬੬.

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਰੋਹਿਣੇਯ੍ਯਸ੍ਸ ਕੇਸਵੋ;

ਤਰਮਾਨਰੂਪੋ ਵੁਟ੍ਠਾਸਿ, ਭਾਤੁਸੋਕੇਨ ਅਟ੍ਟਿਤੋ’’ਤਿ.

ਰਾਜਾ ਉਟ੍ਠਾਯ ਸੀਘਂ ਪਾਸਾਦਾ ਓਤਰਿਤ੍ਵਾ ਘਟਪਣ੍ਡਿਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਉਭੋਸੁ ਹਤ੍ਥੇਸੁ ਦਲ਼੍ਹਂ ਗਹੇਤ੍ਵਾ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਤਤਿਯਂ ਗਾਥਮਾਹ –

੧੬੭.

‘‘ਕਿਂ ਨੁ ਉਮ੍ਮਤ੍ਤਰੂਪੋਵ, ਕੇਵਲਂ ਦ੍ਵਾਰਕਂ ਇਮਂ;

ਸਸੋ ਸਸੋਤਿ ਲਪਸਿ, ਕੋ ਨੁ ਤੇ ਸਸਮਾਹਰੀ’’ਤਿ.

ਤਤ੍ਥ ਕੇਵਲਂ ਦ੍ਵਾਰਕਂ ਇਮਨ੍ਤਿ ਕਸ੍ਮਾ ਉਮ੍ਮਤ੍ਤਕੋ ਵਿਯ ਹੁਤ੍ਵਾ ਸਕਲਂ ਇਮਂ ਦ੍ਵਾਰਵਤਿਨਗਰਂ ਵਿਚਰਨ੍ਤੋ ‘‘ਸਸੋ ਸਸੋ’’ਤਿ ਲਪਸਿ. ਕੋ ਤਵ ਸਸਂ ਹਰਿ, ਕੇਨ ਤੇ ਸਸੋ ਗਹਿਤੋਤਿ ਪੁਚ੍ਛਤਿ.

ਸੋ ਰਞ੍ਞਾ ਏਵਂ ਵੁਤ੍ਤੇਪਿ ਪੁਨਪ੍ਪੁਨਂ ਤਦੇਵ ਵਚਨਂ ਵਦਤਿ. ਰਾਜਾ ਪੁਨ ਦ੍ਵੇ ਗਾਥਾ ਅਭਾਸਿ –

੧੬੮.

‘‘ਸੋਵਣ੍ਣਮਯਂ ਮਣੀਮਯਂ, ਲੋਹਮਯਂ ਅਥ ਰੂਪਿਯਾਮਯਂ;

ਸਙ੍ਖਸਿਲਾਪਵਾਲ਼ਮਯਂ, ਕਾਰਯਿਸ੍ਸਾਮਿ ਤੇ ਸਸਂ.

੧੬੯.

‘‘ਸਨ੍ਤਿ ਅਞ੍ਞੇਪਿ ਸਸਕਾ, ਅਰਞ੍ਞੇ ਵਨਗੋਚਰਾ;

ਤੇਪਿ ਤੇ ਆਨਯਿਸ੍ਸਾਮਿ, ਕੀਦਿਸਂ ਸਸਮਿਚ੍ਛਸੀ’’ਤਿ.

ਤਤ੍ਰਾਯਂ ਸਙ੍ਖੇਪਤ੍ਥੋ – ਤੇਸੁ ਸੁਵਣ੍ਣਮਯਾਦੀਸੁ ਯਂ ਇਚ੍ਛਸਿ, ਤਂ ਵਦ, ਅਹਂ ਤੇ ਕਾਰੇਤ੍ਵਾ ਦਸ੍ਸਾਮਿ, ਅਥਾਪਿ ਤੇ ਨ ਰੋਚੇਸਿ, ਅਞ੍ਞੇਪਿ ਅਰਞ੍ਞੇ ਵਨਗੋਚਰਾ ਸਸਕਾ ਅਤ੍ਥਿ, ਤੇਪਿ ਤੇ ਆਨਯਿਸ੍ਸਾਮਿ, ਵਦ ਭਦ੍ਰਮੁਖ, ਕੀਦਿਸਂ ਸਸਮਿਚ੍ਛਸੀਤਿ.

ਰਞ੍ਞੋ ਕਥਂ ਸੁਤ੍ਵਾ ਘਟਪਣ੍ਡਿਤੋ ਛਟ੍ਠਂ ਗਾਥਮਾਹ –

੧੭੦.

‘‘ਨ ਚਾਹਮੇਤੇ ਇਚ੍ਛਾਮਿ, ਯੇ ਸਸਾ ਪਥਵਿਸ੍ਸਿਤਾ;

ਚਨ੍ਦਤੋ ਸਸਮਿਚ੍ਛਾਮਿ, ਤਂ ਮੇ ਓਹਰ ਕੇਸਵਾ’’ਤਿ.

ਤਤ੍ਥ ਓਹਰਾਤਿ ਓਤਾਰੇਹਿ.

ਰਾਜਾ ਤਸ੍ਸ ਕਥਂ ਸੁਤ੍ਵਾ ‘‘ਨਿਸ੍ਸਂਸਯਂ ਮੇ ਭਾਤਾ ਉਮ੍ਮਤ੍ਤਕੋਵ ਜਾਤੋ’’ਤਿ ਦੋਮਨਸ੍ਸਪ੍ਪਤ੍ਤੋ ਸਤ੍ਤਮਂ ਗਾਥਮਾਹ –

੧੭੧.

‘‘ਸੋ ਨੂਨ ਮਧੁਰਂ ਞਾਤਿ, ਜੀਵਿਤਂ ਵਿਜਹਿਸ੍ਸਸਿ;

ਅਪਤ੍ਥਿਯਂ ਯੋ ਪਤ੍ਥਯਸਿ, ਚਨ੍ਦਤੋ ਸਸਮਿਚ੍ਛਸੀ’’ਤਿ.

ਤਤ੍ਥ ਞਾਤੀਤਿ ਕਨਿਟ੍ਠਂ ਆਲਪਨ੍ਤੋ ਆਹ. ਇਦਂ ਵੁਤ੍ਤਂ ਹੋਤਿ – ‘‘ਤਾਤ, ਮਯ੍ਹਂ ਪਿਯਞਾਤਿ ਸੋ ਤ੍ਵਂ ਨੂਨ ਅਤਿਮਧੁਰਂ ਅਤ੍ਤਨੋ ਜੀਵਿਤਂ ਵਿਜਹਿਸ੍ਸਸਿ, ਯੋ ਅਪਤ੍ਥੇਤਬ੍ਬਂ ਪਤ੍ਥਯਸੀ’’ਤਿ.

ਘਟਪਣ੍ਡਿਤੋ ਰਞ੍ਞੋ ਵਚਨਂ ਸੁਤ੍ਵਾ ਨਿਚ੍ਚਲੋ ਠਤ੍ਵਾ ‘‘ਭਾਤਿਕ, ਤ੍ਵਂ ਚਨ੍ਦਤੋ ਸਸਕਂ ਪਤ੍ਥੇਨ੍ਤਸ੍ਸ ਤਂ ਅਲਭਿਤ੍ਵਾ ਜੀਵਿਤਕ੍ਖਯਭਾਵਂ ਜਾਨਨ੍ਤੋ ਕਿਂ ਕਾਰਣਾ ਮਤਪੁਤ੍ਤਂ ਅਨੁਸੋਚਸੀ’’ਤਿ ਵਤ੍ਵਾ ਅਟ੍ਠਮਂ ਗਾਥਮਾਹ –

੧੭੨.

‘‘ਏਵਂ ਚੇ ਕਣ੍ਹ ਜਾਨਾਸਿ, ਯਦਞ੍ਞਮਨੁਸਾਸਸਿ;

ਕਸ੍ਮਾ ਪੁਰੇ ਮਤਂ ਪੁਤ੍ਤਂ, ਅਜ੍ਜਾਪਿ ਮਨੁਸੋਚਸੀ’’ਤਿ.

ਤਤ੍ਥ ਏਵਨ੍ਤਿ ਇਦਂ ਅਲਬ੍ਭਨੇਯ੍ਯਟ੍ਠਾਨਂ ਨਾਮ ਨ ਪਤ੍ਥੇਤਬ੍ਬਨ੍ਤਿ ਯਦਿ ਏਵਂ ਜਾਨਾਸਿ. ਯਦਞ੍ਞਮਨੁਸਾਸਸੀਤਿ ਏਵਂ ਜਾਨਨ੍ਤੋਵ ਯਦਿ ਅਞ੍ਞਂ ਅਨੁਸਾਸਸੀਤਿ ਅਤ੍ਥੋ. ਪੁਰੇਤਿ ਅਥ ਕਸ੍ਮਾ ਇਤੋ ਚਤੁਮਾਸਮਤ੍ਥਕੇ ਮਤਪੁਤ੍ਤਂ ਅਜ੍ਜਾਪਿ ਅਨੁਸੋਚਸੀਤਿ ਵਦਤਿ.

ਏਵਂ ਸੋ ਅਨ੍ਤਰਵੀਥਿਯਂ ਠਿਤਕੋਵ ‘‘ਭਾਤਿਕ, ਅਹਂ ਤਾਵ ਪਞ੍ਞਾਯਮਾਨਂ ਪਤ੍ਥੇਮਿ, ਤ੍ਵਂ ਪਨ ਅਪਞ੍ਞਾਯਮਾਨਸ੍ਸ ਸੋਚਸੀ’’ਤਿ ਵਤ੍ਵਾ ਤਸ੍ਸ ਧਮ੍ਮਂ ਦੇਸੇਨ੍ਤੋ ਪੁਨ ਦ੍ਵੇ ਗਾਥਾ ਅਭਾਸਿ –

੧੭੩.

‘‘ਯਂ ਨ ਲਬ੍ਭਾ ਮਨੁਸ੍ਸੇਨ, ਅਮਨੁਸ੍ਸੇਨ ਵਾ ਪੁਨ;

ਜਾਤੋ ਮੇ ਮਾ ਮਰੀ ਪੁਤ੍ਤੋ, ਕੁਤੋ ਲਬ੍ਭਾ ਅਲਬ੍ਭਿਯਂ.

੧੭੪.

‘‘ਨ ਮਨ੍ਤਾ ਮੂਲਭੇਸਜ੍ਜਾ, ਓਸਧੇਹਿ ਧਨੇਨ ਵਾ;

ਸਕ੍ਕਾ ਆਨਯਿਤੁਂ ਕਣ੍ਹ, ਯਂ ਪੇਤਮਨੁਸੋਚਸੀ’’ਤਿ.

ਤਤ੍ਥ ਯਨ੍ਤਿ ਭਾਤਿਕ ਯਂ ਏਵਂ ਜਾਤੋ ਮੇ ਪੁਤ੍ਤੋ ਮਾ ਮਰੀਤਿ ਮਨੁਸ੍ਸੇਨ ਵਾ ਦੇਵੇਨ ਵਾ ਪੁਨ ਨ ਲਬ੍ਭਾ ਨ ਸਕ੍ਕਾ ਲਦ੍ਧੁਂ, ਤਂ ਤ੍ਵਂ ਪਤ੍ਥੇਸਿ, ਤਦੇਤਂ ਕੁਤੋ ਲਬ੍ਭਾ ਕੇਨ ਕਾਰਣੇਨ ਸਕ੍ਕਾ ਲਦ੍ਧੁਂ, ਨ ਸਕ੍ਕਾਤਿ ਦੀਪੇਤਿ. ਕਸ੍ਮਾ? ਯਸ੍ਮਾ ਅਲਬ੍ਭਿਯਂ, ਅਲਬ੍ਭਨੇਯ੍ਯਟ੍ਠਾਨਞ੍ਹਿ ਨਾਮੇਤਨ੍ਤਿ ਅਤ੍ਥੋ. ਮਨ੍ਤਾਤਿ ਮਨ੍ਤਪਯੋਗੇਨ. ਮੂਲਭੇਸਜ੍ਜਾਤਿ ਮੂਲਭੇਸਜ੍ਜੇਨ. ਓਸਧੇਹੀਤਿ ਨਾਨਾਵਿਧੋਸਧੇਹਿ. ਧਨੇਨ ਵਾਤਿ ਕੋਟਿਸਤਸਙ੍ਖ੍ਯੇਨਪਿ ਧਨੇਨ ਵਾ. ਇਦਂ ਵੁਤ੍ਤਂ ਹੋਤਿ – ‘‘ਯਂ ਤ੍ਵਂ ਪੇਤਮਨੁਸੋਚਸਿ, ਤਂ ਏਤੇਹਿ ਮਨ੍ਤਪਯੋਗਾਦੀਹਿ ਆਨੇਤੁਂ ਨ ਸਕ੍ਕਾ’’ਤਿ.

ਰਾਜਾ ਤਂ ਸੁਤ੍ਵਾ ‘‘ਯੁਤ੍ਤਂ, ਤਾਤ, ਸਲ੍ਲਕ੍ਖਿਤਂ ਮੇ, ਮਮ ਸੋਕਹਰਣਤ੍ਥਾਯ ਤਯਾ ਇਦਂ ਕਤ’’ਨ੍ਤਿ ਘਟਪਣ੍ਡਿਤਂ ਵਣ੍ਣੇਨ੍ਤੋ ਚਤਸ੍ਸੋ ਗਾਥਾ ਅਭਾਸਿ –

੧੭੫.

‘‘ਯਸ੍ਸ ਏਤਾਦਿਸਾ ਅਸ੍ਸੁ, ਅਮਚ੍ਚਾ ਪੁਰਿਸਪਣ੍ਡਿਤਾ;

ਯਥਾ ਨਿਜ੍ਝਾਪਯੇ ਅਜ੍ਜ, ਘਟੋ ਪੁਰਿਸਪਣ੍ਡਿਤੋ.

੧੭੬.

‘‘ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੧੭੭.

‘‘ਅਬ੍ਬਹੀ ਵਤ ਮੇ ਸਲ੍ਲਂ, ਯਮਾਸਿ ਹਦਯਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪੁਤ੍ਤਸੋਕਂ ਅਪਾਨੁਦਿ.

੧੭੮.

‘‘ਸੋਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਵੀਤਸੋਕੋ ਅਨਾਵਿਲੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਮਾਣਵਾ’’ਤਿ.

ਤਤ੍ਥ ਪਠਮਗਾਥਾਯ ਸਙ੍ਖੇਪਤ੍ਥੋ – ਯਥਾ ਯੇਨ ਕਾਰਣੇਨ ਅਜ੍ਜ ਮਂ ਪੁਤ੍ਤਸੋਕਪਰੇਤਂ ਘਟੋ ਪੁਰਿਸਪਣ੍ਡਿਤੋ ਸੋਕਹਰਣਤ੍ਥਾਯ ਨਿਜ੍ਝਾਪਯੇ ਨਿਜ੍ਝਾਪੇਸਿ ਬੋਧੇਸਿ. ਯਸ੍ਸ ਅਞ੍ਞਸ੍ਸਪਿ ਏਤਾਦਿਸਾ ਪੁਰਿਸਪਣ੍ਡਿਤਾ ਅਮਚ੍ਚਾ ਅਸ੍ਸੁ, ਤਸ੍ਸ ਕੁਤੋ ਸੋਕੋਤਿ. ਸੇਸਗਾਥਾ ਵੁਤ੍ਤਤ੍ਥਾਯੇਵ.

ਅਵਸਾਨੇ –

੧੭੯.

‘‘ਏਵਂ ਕਰੋਨ੍ਤਿ ਸਪ੍ਪਞ੍ਞਾ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਨਿਵਤ੍ਤਯਨ੍ਤਿ ਸੋਕਮ੍ਹਾ, ਘਟੋ ਜੇਟ੍ਠਂਵ ਭਾਤਰ’’ਨ੍ਤਿ. –

ਅਯਂ ਅਭਿਸਮ੍ਬੁਦ੍ਧਗਾਥਾ ਉਤ੍ਤਾਨਤ੍ਥਾਯੇਵ.

ਏਵਂ ਘਟਕੁਮਾਰੇਨ ਵੀਤਸੋਕੇ ਕਤੇ ਵਾਸੁਦੇਵੇ ਰਜ੍ਜਂ ਅਨੁਸਾਸਨ੍ਤੇ ਦੀਘਸ੍ਸ ਅਦ੍ਧੁਨੋ ਅਚ੍ਚਯੇਨ ਦਸਭਾਤਿਕਪੁਤ੍ਤਾ ਕੁਮਾਰਾ ਚਿਨ੍ਤਯਿਂਸੁ ‘‘ਕਣ੍ਹਦੀਪਾਯਨਂ ‘ਦਿਬ੍ਬਚਕ੍ਖੁਕੋ’ਤਿ ਵਦਨ੍ਤਿ, ਵੀਮਂਸਿਸ੍ਸਾਮ ਤਾਵ ਨ’’ਨ੍ਤਿ. ਤੇ ਏਕਂ ਦਹਰਕੁਮਾਰਂ ਅਲਙ੍ਕਰਿਤ੍ਵਾ ਗਬ੍ਭਿਨਿਆਕਾਰੇਨ ਦਸ੍ਸੇਤ੍ਵਾ ਉਦਰੇ ਮਸੂਰਕਂ ਬਨ੍ਧਿਤ੍ਵਾ ਤਸ੍ਸ ਸਨ੍ਤਿਕਂ ਨੇਤ੍ਵਾ ‘‘ਭਨ੍ਤੇ, ਅਯਂ ਕੁਮਾਰਿਕਾ ਕਿਂ ਵਿਜਾਯਿਸ੍ਸਤੀ’’ਤਿ ਪੁਚ੍ਛਿਂਸੁ. ਤਾਪਸੋ ‘‘ਦਸਭਾਤਿਕਰਾਜੂਨਂ ਵਿਨਾਸਕਾਲੋ ਪਤ੍ਤੋ, ਮਯ੍ਹਂ ਨੁ ਖੋ ਆਯੁਸਙ੍ਖਾਰੋ ਕੀਦਿਸੋ ਹੋਤੀ’’ਤਿ ਓਲੋਕੇਨ੍ਤੋ ‘‘ਅਜ੍ਜੇਵ ਮਰਣਂ ਭਵਿਸ੍ਸਤੀ’’ਤਿ ਞਤ੍ਵਾ ‘‘ਕੁਮਾਰਾ ਇਮਿਨਾ ਤੁਮ੍ਹਾਕਂ ਕੋ ਅਤ੍ਥੋ’’ਤਿ ਵਤ੍ਵਾ ‘‘ਕਥੇਥੇਵ ਨੋ, ਭਨ੍ਤੇ’’ਤਿ ਨਿਬਦ੍ਧੋ ‘‘ਅਯਂ ਇਤੋ ਸਤ੍ਤਮੇ ਦਿਵਸੇ ਖਦਿਰਘਟਿਕਂ ਵਿਜਾਯਿਸ੍ਸਤਿ, ਤਾਯ ਵਾਸੁਦੇਵਕੁਲਂ ਨਸ੍ਸਿਸ੍ਸਤਿ, ਅਪਿਚ ਖੋ ਪਨ ਤੁਮ੍ਹੇ ਤਂ ਖਦਿਰਘਟਿਕਂ ਗਹੇਤ੍ਵਾ ਝਾਪੇਤ੍ਵਾ ਛਾਰਿਕਂ ਨਦਿਯਂ ਪਕ੍ਖਿਪੇਯ੍ਯਾਥਾ’’ਤਿ ਆਹ. ਅਥ ਨਂ ਤੇ ‘‘ਕੂਟਜਟਿਲ, ਪੁਰਿਸੋ ਵਿਜਾਯਨਕੋ ਨਾਮ ਨਤ੍ਥੀ’’ਤਿ ਵਤ੍ਵਾ ਤਨ੍ਤਰਜ੍ਜੁਕਂ ਨਾਮ ਕਮ੍ਮਕਰਣਂ ਕਤ੍ਵਾ ਤਤ੍ਥੇਵ ਜੀਵਿਤਕ੍ਖਯਂ ਪਾਪਯਿਂਸੁ. ਰਾਜਾਨੋ ਕੁਮਾਰੇ ਪਕ੍ਕੋਸਾਪੇਤ੍ਵਾ ‘‘ਕਿਂ ਕਾਰਣਾ ਤਾਪਸਂ ਮਾਰਯਿਤ੍ਥਾ’’ਤਿ ਪੁਚ੍ਛਿਤ੍ਵਾ ਸਬ੍ਬਂ ਸੁਤ੍ਵਾ ਭੀਤਾ ਤਸ੍ਸ ਆਰਕ੍ਖਂ ਦਤ੍ਵਾ ਸਤ੍ਤਮੇ ਦਿਵਸੇ ਤਸ੍ਸ ਕੁਚ੍ਛਿਤੋ ਨਿਕ੍ਖਨ੍ਤਂ ਖਦਿਰਘਟਿਕਂ ਝਾਪੇਤ੍ਵਾ ਛਾਰਿਕਂ ਨਦਿਯਂ ਖਿਪਿਂਸੁ. ਸਾ ਨਦਿਯਾ ਵੁਯ੍ਹਮਾਨਾ ਮੁਖਦ੍ਵਾਰੇ ਏਕਪਸ੍ਸੇ ਲਗ੍ਗਿ, ਤਤੋ ਏਰਕਂ ਨਿਬ੍ਬਤ੍ਤਿ.

ਅਥੇਕਦਿਵਸਂ ਤੇ ਰਾਜਾਨੋ ‘‘ਸਮੁਦ੍ਦਕੀਲ਼ਂ ਕੀਲ਼ਿਸ੍ਸਾਮਾ’’ਤਿ ਮੁਖਦ੍ਵਾਰਂ ਗਨ੍ਤ੍ਵਾ ਮਹਾਮਣ੍ਡਪਂ ਕਾਰਾਪੇਤ੍ਵਾ ਅਲਙ੍ਕਤਮਣ੍ਡਪੇ ਖਾਦਨ੍ਤਾ ਪਿਵਨ੍ਤਾ ਕੀਲ਼ਾਵਸੇਨੇਵ ਪਵਤ੍ਤਹਤ੍ਥਪਾਦਪਰਾਮਾਸਾ ਦ੍ਵਿਧਾ ਭਿਜ੍ਜਿਤ੍ਵਾ ਮਹਾਕਲਹਂ ਕਰਿਂਸੁ. ਅਥੇਕੋ ਅਞ੍ਞਂ ਮੁਗ੍ਗਰਂ ਅਲਭਨ੍ਤੋ ਏਰਕਵਨਤੋ ਏਕਂ ਏਰਕਪਤ੍ਤਂ ਗਣ੍ਹਿ. ਤਂ ਗਹਿਤਮਤ੍ਤਮੇਵ ਖਦਿਰਮੁਸਲਂ ਅਹੋਸਿ. ਸੋ ਤੇਨ ਮਹਾਜਨਂ ਪੋਥੇਸਿ. ਅਥਞ੍ਞੇਹਿ ਸਬ੍ਬੇਹਿ ਗਹਿਤਗਹਿਤਂ ਖਦਿਰਮੁਸਲਮੇਵ ਅਹੋਸਿ. ਤੇ ਅਞ੍ਞਮਞ੍ਞਂ ਪਹਰਿਤ੍ਵਾ ਮਹਾਵਿਨਾਸਂ ਪਾਪੁਣਿਂਸੁ. ਤੇਸੁ ਮਹਾਵਿਨਾਸਂ ਵਿਨਸ੍ਸਨ੍ਤੇਸੁ ਵਾਸੁਦੇਵੋ ਚ ਬਲਦੇਵੋ ਚ ਭਗਿਨੀ ਅਞ੍ਜਨਦੇਵੀ ਚ ਪੁਰੋਹਿਤੋ ਚਾਤਿ ਚਤ੍ਤਾਰੋ ਜਨਾ ਰਥਂ ਅਭਿਰੁਹਿਤ੍ਵਾ ਪਲਾਯਿਂਸੁ, ਸੇਸਾ ਸਬ੍ਬੇਪਿ ਵਿਨਟ੍ਠਾ. ਤੇਪਿ ਚਤ੍ਤਾਰੋ ਰਥੇਨ ਪਲਾਯਨ੍ਤਾ ਕਾਲ਼ਮਤ੍ਤਿਕਅਟਵਿਂ ਪਾਪੁਣਿਂਸੁ. ਸੋ ਹਿ ਮੁਟ੍ਠਿਕਮਲ੍ਲੋ ਪਤ੍ਥਨਂ ਕਤ੍ਵਾ ਯਕ੍ਖੋ ਹੁਤ੍ਵਾ ਤਤ੍ਥ ਨਿਬ੍ਬਤ੍ਤੋ ਬਲਦੇਵਸ੍ਸ ਆਗਤਭਾਵਂ ਞਤ੍ਵਾ ਤਤ੍ਥ ਗਾਮਂ ਮਾਪੇਤ੍ਵਾ ਮਲ੍ਲਵੇਸਂ ਗਹੇਤ੍ਵਾ ‘‘ਕੋ ਯੁਜ੍ਝਿਤੁਕਾਮੋ’’ਤਿ ਵਗ੍ਗਨ੍ਤੋ ਗਜ੍ਜਨ੍ਤੋ ਅਪ੍ਫੋਟੇਨ੍ਤੋ ਵਿਚਰਿ. ਬਲਦੇਵੋ ਤਂ ਦਿਸ੍ਵਾਵ ‘‘ਭਾਤਿਕ, ਅਹਂ ਇਮਿਨਾ ਸਦ੍ਧਿਂ ਯੁਜ੍ਝਿਸ੍ਸਾਮੀ’’ਤਿ ਵਤ੍ਵਾ ਵਾਸੁਦੇਵੇ ਵਾਰੇਨ੍ਤੇਯੇਵ ਰਥਾ ਓਰੁਯ੍ਹ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਗ੍ਗਨ੍ਤੋ ਗਜ੍ਜਨ੍ਤੋ ਅਪ੍ਫੋਟੇਸਿ. ਅਥ ਨਂ ਸੋ ਪਸਾਰਿਤਹਤ੍ਥੇਯੇਵ ਗਹੇਤ੍ਵਾ ਮੂਲਕਨ੍ਦਂ ਵਿਯ ਖਾਦਿ. ਵਾਸੁਦੇਵੋ ਤਸ੍ਸ ਮਤਭਾਵਂ ਞਤ੍ਵਾ ਭਗਿਨਿਞ੍ਚ ਪੁਰੋਹਿਤਞ੍ਚ ਆਦਾਯ ਸਬ੍ਬਰਤ੍ਤਿਂ ਗਨ੍ਤ੍ਵਾ ਸੂਰਿਯੋਦਯੇ ਏਕਂ ਪਚ੍ਚਨ੍ਤਗਾਮਂ ਪਤ੍ਵਾ ‘‘ਆਹਾਰਂ ਪਚਿਤ੍ਵਾ ਆਹਰਥਾ’’ਤਿ ਭਗਿਨਿਞ੍ਚ ਪੁਰੋਹਿਤਞ੍ਚ ਗਾਮਂ ਪਹਿਣਿਤ੍ਵਾ ਸਯਂ ਏਕਸ੍ਮਿਂ ਗਚ੍ਛਨ੍ਤਰੇ ਪਟਿਚ੍ਛਨ੍ਨੋ ਨਿਪਜ੍ਜਿ.

ਅਥ ਨਂ ਜਰਾ ਨਾਮ ਏਕੋ ਲੁਦ੍ਦਕੋ ਗਚ੍ਛਂ ਚਲਨ੍ਤਂ ਦਿਸ੍ਵਾ ‘‘ਸੂਕਰੋ ਏਤ੍ਥ ਭਵਿਸ੍ਸਤੀ’’ਤਿ ਸਞ੍ਞਾਯ ਸਤ੍ਤਿਂ ਖਿਪਿਤ੍ਵਾ ਪਾਦੇ ਵਿਜ੍ਝਿਤ੍ਵਾ ‘‘ਕੋ ਮਂ ਵਿਜ੍ਝੀ’’ਤਿ ਵੁਤ੍ਤੇ ਮਨੁਸ੍ਸਸ੍ਸ ਵਿਦ੍ਧਭਾਵਂ ਞਤ੍ਵਾ ਭੀਤੋ ਪਲਾਯਿਤੁਂ ਆਰਭਿ. ਰਾਜਾ ਸਤਿਂ ਪਚ੍ਚੁਪਟ੍ਠਪੇਤ੍ਵਾ ਉਟ੍ਠਾਯ ‘‘ਮਾਤੁਲ, ਮਾ ਭਾਯਿ, ਏਹੀ’’ਤਿ ਪਕ੍ਕੋਸਿਤ੍ਵਾ ਆਗਤਂ ‘‘ਕੋਸਿ ਨਾਮ ਤ੍ਵ’’ਨ੍ਤਿ ਪੁਚ੍ਛਿਤ੍ਵਾ ‘‘ਅਹਂ ਸਾਮਿ, ਜਰਾ ਨਾਮਾ’’ਤਿ ਵੁਤ੍ਤੇ ‘‘ਜਰਾਯ ਵਿਦ੍ਧੋ ਮਰਿਸ੍ਸਤੀਤਿ ਕਿਰ ਮਂ ਪੋਰਾਣਾ ਬ੍ਯਾਕਰਿਂਸੁ, ਨਿਸ੍ਸਂਸਯਂ ਅਜ੍ਜ ਮਯਾ ਮਰਿਤਬ੍ਬ’’ਨ੍ਤਿ ਞਤ੍ਵਾ ‘‘ਮਾਤੁਲ, ਮਾ ਭਾਯਿ, ਏਹਿ ਪਹਾਰਂ ਮੇ ਬਨ੍ਧਾ’’ਤਿ ਤੇਨ ਪਹਾਰਮੁਖਂ ਬਨ੍ਧਾਪੇਤ੍ਵਾ ਤਂ ਉਯ੍ਯੋਜੇਸਿ. ਬਲਵਵੇਦਨਾ ਪਵਤ੍ਤਿਂਸੁ, ਇਤਰੇਹਿ ਆਭਤਂ ਆਹਾਰਂ ਪਰਿਭੁਞ੍ਜਿਤੁਂ ਨਾਸਕ੍ਖਿ. ਅਥ ਤੇ ਆਮਨ੍ਤੇਤ੍ਵਾ ‘‘ਅਜ੍ਜ ਅਹਂ ਮਰਿਸ੍ਸਾਮਿ, ਤੁਮ੍ਹੇ ਪਨ ਸੁਖੁਮਾਲਾ ਅਞ੍ਞਂ ਕਮ੍ਮਂ ਕਤ੍ਵਾ ਜੀਵਿਤੁਂ ਨ ਸਕ੍ਖਿਸ੍ਸਥ, ਇਮਂ ਵਿਜ੍ਜਂ ਸਿਕ੍ਖਥਾ’’ਤਿ ਏਕਂ ਵਿਜ੍ਜਂ ਸਿਕ੍ਖਾਪੇਤ੍ਵਾ ਤੇ ਉਯ੍ਯੋਜੇਤ੍ਵਾ ਤਤ੍ਥੇਵ ਜੀਵਿਤਕ੍ਖਯਂ ਪਾਪੁਣਿ. ਏਵਂ ਅਞ੍ਜਨਦੇਵਿਂ ਠਪੇਤ੍ਵਾ ਸਬ੍ਬੇਵ ਵਿਨਾਸਂ ਪਾਪੁਣਿਂਸੂਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਉਪਾਸਕ, ਏਵਂ ਪੋਰਾਣਕਪਣ੍ਡਿਤਾ ਪਣ੍ਡਿਤਾਨਂ ਕਥਂ ਸੁਤ੍ਵਾ ਅਤ੍ਤਨੋ ਪੁਤ੍ਤਸੋਕਂ ਹਰਿਂਸੁ, ਮਾ ਚਿਨ੍ਤਯੀ’’ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਪਾਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਰੋਹਿਣੇਯ੍ਯੋ ਆਨਨ੍ਦੋ ਅਹੋਸਿ, ਵਾਸੁਦੇਵੋ ਸਾਰਿਪੁਤ੍ਤੋ, ਅਵਸੇਸਾ ਬੁਦ੍ਧਪਰਿਸਾ, ਘਟਪਣ੍ਡਿਤੋ ਪਨ ਅਹਮੇਵ ਅਹੋਸਿਨ੍ਤਿ.

ਘਟਪਣ੍ਡਿਤਜਾਤਕਵਣ੍ਣਨਾ ਸੋਲ਼ਸਮਾ.

ਇਤਿ ਸੋਲ਼ਸਜਾਤਕਪਟਿਮਣ੍ਡਿਤਸ੍ਸ

ਦਸਕਨਿਪਾਤਜਾਤਕਸ੍ਸ ਅਤ੍ਥਵਣ੍ਣਨਾ ਨਿਟ੍ਠਿਤਾ.

ਜਾਤਕੁਦ੍ਦਾਨਂ –

ਚਤੁਦ੍ਵਾਰੋ ਕਣ੍ਹੁਪੋਸੋ, ਸਙ੍ਖ ਬੋਧਿ ਦੀਪਾਯਨੋ;

ਨਿਗ੍ਰੋਧ ਤਕ੍ਕਲ ਧਮ੍ਮ-ਪਾਲੋ ਕੁਕ੍ਕੁਟ ਕੁਣ੍ਡਲੀ;

ਬਿਲਾਰ ਚਕ੍ਕ ਭੂਰਿ ਚ, ਮਙ੍ਗਲ ਘਟ ਸੋਲ਼ਸ.

ਦਸਕਨਿਪਾਤਵਣ੍ਣਨਾ ਨਿਟ੍ਠਿਤਾ.

੧੧. ਏਕਾਦਸਕਨਿਪਾਤੋ

[੪੫੫] ੧. ਮਾਤੁਪੋਸਕਜਾਤਕਵਣ੍ਣਨਾ

ਤਸ੍ਸ ਨਾਗਸ੍ਸ ਵਿਪ੍ਪਵਾਸੇਨਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਾਤੁਪੋਸਕਭਿਕ੍ਖੁਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਸਾਮਜਾਤਕਵਤ੍ਥੁਸਦਿਸਮੇਵ. ਸਤ੍ਥਾ ਪਨ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਮਾ ਭਿਕ੍ਖਵੇ, ਏਤਂ ਭਿਕ੍ਖੁਂ ਉਜ੍ਝਾਯਿਤ੍ਥ, ਪੋਰਾਣਕਪਣ੍ਡਿਤਾ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਾਪਿ ਮਾਤਰਾ ਵਿਯੁਤ੍ਤਾ ਸਤ੍ਤਾਹਂ ਨਿਰਾਹਾਰਤਾਯ ਸੁਸ੍ਸਮਾਨਾ ਰਾਜਾਰਹਂ ਭੋਜਨਂ ਲਭਿਤ੍ਵਾਪਿ ‘ਮਾਤਰਾ ਵਿਨਾ ਨ ਭੁਞ੍ਜਿਸ੍ਸਾਮਾ’ਤਿ ਮਾਤਰਂ ਦਿਸ੍ਵਾਵ ਗੋਚਰਂ ਗਣ੍ਹਿਂਸੂ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਮਾਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਹਿਮਵਨ੍ਤਪਦੇਸੇ ਹਤ੍ਥਿਯੋਨਿਯਂ ਨਿਬ੍ਬਤ੍ਤਿਤ੍ਵਾ ਸਬ੍ਬਸੇਤੋ ਅਹੋਸਿ ਅਭਿਰੂਪੋ ਦਸ੍ਸਨੀਯੋ ਪਾਸਾਦਿਕੋ ਲਕ੍ਖਣਸਮ੍ਪਨ੍ਨੋ ਅਸੀਤਿਹਤ੍ਥਿਸਹਸ੍ਸਪਰਿਵਾਰੋ. ਸੋ ਜਰਾਜਿਣ੍ਣਂ ਮਾਤਰਂ ਪੋਸੇਸਿ, ਮਾਤਾ ਪਨਸ੍ਸ ਅਨ੍ਧਾ. ਸੋ ਮਧੁਰਮਧੁਰਾਨਿ ਫਲਾਫਲਾਨਿ ਹਤ੍ਥੀਨਂ ਦਤ੍ਵਾ ਮਾਤੁ ਸਨ੍ਤਿਕਂ ਪੇਸੇਸਿ. ਹਤ੍ਥੀ ਤਸ੍ਸਾ ਅਦਤ੍ਵਾ ਅਤ੍ਤਨਾਵ ਖਾਦਨ੍ਤਿ. ਸੋ ਪਰਿਗ੍ਗਣ੍ਹਨ੍ਤੋ ਤਂ ਪਵਤ੍ਤਿਂ ਞਤ੍ਵਾ ‘‘ਯੂਥਂ ਛਡ੍ਡੇਤ੍ਵਾ ਮਾਤਰਮੇਵ ਪੋਸੇਸ੍ਸਾਮੀ’’ਤਿ ਰਤ੍ਤਿਭਾਗੇ ਅਞ੍ਞੇਸਂ ਹਤ੍ਥੀਨਂ ਅਜਾਨਨ੍ਤਾਨਂ ਮਾਤਰਂ ਗਹੇਤ੍ਵਾ ਚਣ੍ਡੋਰਣਪਬ੍ਬਤਪਾਦਂ ਗਨ੍ਤ੍ਵਾ ਏਕਂ ਨਲ਼ਿਨਿਂ ਉਪਨਿਸ੍ਸਾਯ ਠਿਤਾਯ ਪਬ੍ਬਤਗੁਹਾਯਂ ਮਾਤਰਂ ਠਪੇਤ੍ਵਾ ਪੋਸੇਸਿ. ਅਥੇਕੋ ਬਾਰਾਣਸਿਵਾਸੀ ਵਨਚਰਕੋ ਮਗ੍ਗਮੂਲ਼੍ਹੋ ਦਿਸਂ ਵਵਤ੍ਥਪੇਤੁਂ ਅਸਕ੍ਕੋਨ੍ਤੋ ਮਹਨ੍ਤੇਨ ਸਦ੍ਦੇਨ ਪਰਿਦੇਵਿ. ਬੋਧਿਸਤ੍ਤੋ ਤਸ੍ਸ ਸਦ੍ਦਂ ਸੁਤ੍ਵਾ ‘‘ਅਯਂ ਪੁਰਿਸੋ ਅਨਾਥੋ, ਨ ਖੋ ਪਨ ਮੇਤਂ ਪਤਿਰੂਪਂ, ਯਂ ਏਸ ਮਯਿ ਠਿਤੇ ਇਧ ਵਿਨਸ੍ਸੇਯ੍ਯਾ’’ਤਿ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਭਯੇਨ ਪਲਾਯਨ੍ਤਂ ਦਿਸ੍ਵਾ ‘‘ਅਮ੍ਭੋ ਪੁਰਿਸ, ਨਤ੍ਥਿ ਤੇ ਮਂ ਨਿਸ੍ਸਾਯ ਭਯਂ, ਮਾ ਪਲਾਯਿ, ਕਸ੍ਮਾ ਤ੍ਵਂ ਪਰਿਦੇਵਨ੍ਤੋ ਵਿਚਰਸੀ’’ਤਿ ਪੁਚ੍ਛਿਤ੍ਵਾ ‘‘ਸਾਮਿ, ਅਹਂ ਮਗ੍ਗਮੂਲ਼੍ਹੋ, ਅਜ੍ਜ ਮੇ ਸਤ੍ਤਮੋ ਦਿਵਸੋ’’ਤਿ ਵੁਤ੍ਤੇ ‘‘ਭੋ ਪੁਰਿਸ, ਮਾ ਭਾਯਿ, ਅਹਂ ਤਂ ਮਨੁਸ੍ਸਪਥੇ ਠਪੇਸ੍ਸਾਮੀ’’ਤਿ ਤਂ ਅਤ੍ਤਨੋ ਪਿਟ੍ਠਿਯਂ ਨਿਸੀਦਾਪੇਤ੍ਵਾ ਅਰਞ੍ਞਾ ਨੀਹਰਿਤ੍ਵਾ ਨਿਵਤ੍ਤਿ. ਸੋਪਿ ਪਾਪੋ ‘‘ਨਗਰਂ ਗਨ੍ਤ੍ਵਾ ਰਞ੍ਞੋ ਆਰੋਚੇਸ੍ਸਾਮੀ’’ਤਿ ਰੁਕ੍ਖਸਞ੍ਞਂ ਪਬ੍ਬਤਸਞ੍ਞਂ ਕਰੋਨ੍ਤੋਵ ਨਿਕ੍ਖਮਿਤ੍ਵਾ ਬਾਰਾਣਸਿਂ ਅਗਮਾਸਿ.

ਤਸ੍ਮਿਂ ਕਾਲੇ ਰਞ੍ਞੋ ਮਙ੍ਗਲਹਤ੍ਥੀ ਕਾਲਮਕਾਸਿ. ਰਾਜਾ ‘‘ਸਚੇ ਕੇਨਚਿ ਕਤ੍ਥਚਿ ਓਪਵਯ੍ਹਂ ਕਾਤੁਂ ਯੁਤ੍ਤਰੂਪੋ ਹਤ੍ਥੀ ਦਿਟ੍ਠੋ ਅਤ੍ਥਿ, ਸੋ ਆਚਿਕ੍ਖਤੂ’’ਤਿ ਭੇਰਿਂ ਚਰਾਪੇਸਿ. ਸੋ ਪੁਰਿਸੋ ਰਾਜਾਨਂ ਉਪਸਙ੍ਕਮਿਤ੍ਵਾ ‘‘ਮਯਾ, ਦੇਵ, ਤੁਮ੍ਹਾਕਂ ਓਪਵਯ੍ਹੋ ਭਵਿਤੁਂ ਯੁਤ੍ਤਰੂਪੋ ਸਬ੍ਬਸੇਤੋ ਸੀਲਵਾ ਹਤ੍ਥਿਰਾਜਾ ਦਿਟ੍ਠੋ, ਅਹਂ ਮਗ੍ਗਂ ਦਸ੍ਸੇਸ੍ਸਾਮਿ, ਮਯਾ ਸਦ੍ਧਿਂ ਹਤ੍ਥਾਚਰਿਯੇ ਪੇਸੇਤ੍ਵਾ ਤਂ ਗਣ੍ਹਾਪੇਥਾ’’ਤਿ ਆਹ. ਰਾਜਾ ‘‘ਸਾਧੂ’’ਤਿ ‘‘ਇਮਂ ਮਗ੍ਗਦੇਸਕਂ ਕਤ੍ਵਾ ਅਰਞ੍ਞਂ ਗਨ੍ਤ੍ਵਾ ਇਮਿਨਾ ਵੁਤ੍ਤਂ ਹਤ੍ਥਿਨਾਗਂ ਆਨੇਥਾ’’ਤਿ ਤੇਨ ਸਦ੍ਧਿਂ ਮਹਨ੍ਤੇਨ ਪਰਿਵਾਰੇਨ ਹਤ੍ਥਾਚਰਿਯਂ ਪੇਸੇਸਿ. ਸੋ ਤੇਨ ਸਦ੍ਧਿਂ ਗਨ੍ਤ੍ਵਾ ਬੋਧਿਸਤ੍ਤਂ ਨਲ਼ਿਨਿਂ ਪਵਿਸਿਤ੍ਵਾ ਗੋਚਰਂ ਗਣ੍ਹਨ੍ਤਂ ਪਸ੍ਸਿ. ਬੋਧਿਸਤ੍ਤੋਪਿ ਹਤ੍ਥਾਚਰਿਯਂ ਦਿਸ੍ਵਾ ‘‘ਇਦਂ ਭਯਂ ਨ ਅਞ੍ਞਤੋ ਉਪ੍ਪਨ੍ਨਂ, ਤਸ੍ਸ ਪੁਰਿਸਸ੍ਸ ਸਨ੍ਤਿਕਾ ਉਪ੍ਪਨ੍ਨਂ ਭਵਿਸ੍ਸਤਿ, ਅਹਂ ਖੋ ਪਨ ਮਹਾਬਲੋ ਹਤ੍ਥਿਸਹਸ੍ਸਮ੍ਪਿ ਵਿਦ੍ਧਂਸੇਤੁਂ ਸਮਤ੍ਥੋ ਹੋਮਿ, ਕੁਜ੍ਝਿਤ੍ਵਾ ਸਰਟ੍ਠਕਂ ਸੇਨਾਵਾਹਨਂ ਨਾਸੇਤੁਂ, ਸਚੇ ਪਨ ਕੁਜ੍ਝਿਸ੍ਸਾਮਿ, ਸੀਲਂ ਮੇ ਭਿਜ੍ਜਿਸ੍ਸਤਿ, ਤਸ੍ਮਾ ਅਜ੍ਜ ਸਤ੍ਤੀਹਿ ਕੋਟ੍ਟਿਯਮਾਨੋਪਿ ਨ ਕੁਜ੍ਝਿਸ੍ਸਾਮੀ’’ਤਿ ਅਧਿਟ੍ਠਾਯ ਸੀਸਂ ਨਾਮੇਤ੍ਵਾ ਨਿਚ੍ਚਲੋਵ ਅਟ੍ਠਾਸਿ. ਹਤ੍ਥਾਚਰਿਯੋ ਪਦੁਮਸਰਂ ਓਤਰਿਤ੍ਵਾ ਤਸ੍ਸ ਲਕ੍ਖਣਸਮ੍ਪਤ੍ਤਿਂ ਦਿਸ੍ਵਾ ‘‘ਏਹਿ ਪੁਤ੍ਤਾ’’ਤਿ ਰਜਤਦਾਮਸਦਿਸਾਯ ਸੋਣ੍ਡਾਯ ਗਹੇਤ੍ਵਾ ਸਤ੍ਤਮੇ ਦਿਵਸੇ ਬਾਰਾਣਸਿਂ ਪਾਪੁਣਿ. ਬੋਧਿਸਤ੍ਤਮਾਤਾ ਪਨ ਪੁਤ੍ਤੇ ਅਨਾਗਚ੍ਛਨ੍ਤੇ ‘‘ਪੁਤ੍ਤੋ ਮੇ ਰਾਜਰਾਜਮਹਾਮਤ੍ਤਾਦੀਹਿ ਨੀਤੋ ਭਵਿਸ੍ਸਤਿ, ਇਦਾਨਿ ਤਸ੍ਸ ਵਿਪ੍ਪਵਾਸੇਨ ਅਯਂ ਵਨਸਣ੍ਡੋ ਵਡ੍ਢਿਸ੍ਸਤੀ’’ਤਿ ਪਰਿਦੇਵਮਾਨਾ ਦ੍ਵੇ ਗਾਥਾ ਅਭਾਸਿ –

੧.

‘‘ਤਸ੍ਸ ਨਾਗਸ੍ਸ ਵਿਪ੍ਪਵਾਸੇਨ, ਵਿਰੂਲ਼੍ਹੋ ਸਲ੍ਲਕੀ ਚ ਕੁਟਜਾ ਚ;

ਕੁਰੁਵਿਨ੍ਦਕਰਵੀਰਾ ਭਿਸਸਾਮਾ ਚ, ਨਿਵਾਤੇ ਪੁਪ੍ਫਿਤਾ ਚ ਕਣਿਕਾਰਾ.

੨.

‘‘ਕੋਚਿਦੇਵ ਸੁਵਣ੍ਣਕਾਯੁਰਾ, ਨਾਗਰਾਜਂ ਭਰਨ੍ਤਿ ਪਿਣ੍ਡੇਨ;

ਯਤ੍ਥ ਰਾਜਾ ਰਾਜਕੁਮਾਰੋ ਵਾ, ਕਵਚਮਭਿਹੇਸ੍ਸਤਿ ਅਛਮ੍ਭਿਤੋ’’ਤਿ.

ਤਤ੍ਥ ਵਿਰੂਲ਼੍ਹਾਤਿ ਵਡ੍ਢਿਤਾ ਨਾਮ, ਨਤ੍ਥੇਤ੍ਥ ਸਂਸਯੋਤਿ ਅਸਂਸਯਵਸੇਨੇਵਮਾਹ. ਸਲ੍ਲਕੀ ਚ ਕੁਟਜਾ ਚਾਤਿ ਇਨ੍ਦਸਾਲਰੁਕ੍ਖਾ ਚ ਕੁਟਜਰੁਕ੍ਖਾ ਚ. ਕੁਰੁਵਿਨ੍ਦਕਰਵੀਰਾ ਭਿਸਸਾਮਾ ਚਾਤਿ ਕੁਰੁਵਿਨ੍ਦਰੁਕ੍ਖਾ ਚ ਕਰਵੀਰਨਾਮਕਾਨਿ ਮਹਾਤਿਣਾਨਿ ਚ ਭਿਸਾਨਿ ਚ ਸਾਮਾਕਾਨਿ ਚਾਤਿ ਅਤ੍ਥੋ. ਏਤੇ ਚ ਸਬ੍ਬੇ ਇਦਾਨਿ ਵਡ੍ਢਿਸ੍ਸਨ੍ਤੀਤਿ ਪਰਿਦੇਵਤਿ. ਨਿਵਾਤੇਤਿ ਪਬ੍ਬਤਪਾਦੇ. ਪੁਪ੍ਫਿਤਾਤਿ ਮਮ ਪੁਤ੍ਤੇਨ ਸਾਖਂ ਭਞ੍ਜਿਤ੍ਵਾ ਅਖਾਦਿਯਮਾਨਾ ਕਣਿਕਾਰਾਪਿ ਪੁਪ੍ਫਿਤਾ ਭਵਿਸ੍ਸਨ੍ਤੀਤਿ ਵੁਤ੍ਤਂ ਹੋਤਿ. ਕੋਚਿਦੇਵਾਤਿ ਕਤ੍ਥਚਿਦੇਵ ਗਾਮੇ ਵਾ ਨਗਰੇ ਵਾ. ਸੁਵਣ੍ਣਕਾਯੁਰਾਤਿ ਸੁਵਣ੍ਣਾਭਰਣਾ ਰਾਜਰਾਜਮਹਾਮਤ੍ਤਾ. ਭਰਨ੍ਤਿ ਪਿਣ੍ਡੇਨਾਤਿ ਅਜ੍ਜ ਮਾਤੁਪੋਸਕਂ ਨਾਗਰਾਜਂ ਰਾਜਾਰਹਸ੍ਸ ਭੋਜਨਸ੍ਸ ਸੁਵਡ੍ਢਿਤੇਨ ਪਿਣ੍ਡੇਨ ਪੋਸੇਨ੍ਤਿ. ਯਤ੍ਥਾਤਿ ਯਸ੍ਮਿਂ ਨਾਗਰਾਜੇ ਰਾਜਾ ਨਿਸੀਦਿਤ੍ਵਾ. ਕਵਚਮਭਿਹੇਸ੍ਸਤੀਤਿ ਸਙ੍ਗਾਮਂ ਪਵਿਸਿਤ੍ਵਾ ਪਚ੍ਚਾਮਿਤ੍ਤਾਨਂ ਕਵਚਂ ਅਭਿਹਨਿਸ੍ਸਤਿ ਭਿਨ੍ਦਿਸ੍ਸਤਿ. ਇਦਂ ਵੁਤ੍ਤਂ ਹੋਤਿ – ‘‘ਯਤ੍ਥ ਮਮ ਪੁਤ੍ਤੇ ਨਿਸਿਨ੍ਨੋ ਰਾਜਾ ਵਾ ਰਾਜਕੁਮਾਰੋ ਵਾ ਅਛਮ੍ਭਿਤੋ ਹੁਤ੍ਵਾ ਸਪਤ੍ਤਾਨਂ ਕਵਚਂ ਹਨਿਸ੍ਸਤਿ, ਤਂ ਮੇ ਪੁਤ੍ਤਂ ਨਾਗਰਾਜਾਨਂ ਸੁਵਣ੍ਣਾਭਰਣਾ ਅਜ੍ਜ ਪਿਣ੍ਡੇਨ ਭਰਨ੍ਤੀ’’ਤਿ.

ਹਤ੍ਥਾਚਰਿਯੋਪਿ ਅਨ੍ਤਰਾਮਗ੍ਗੇਵ ਰਞ੍ਞੋ ਸਾਸਨਂ ਪੇਸੇਸਿ. ਤਂ ਸੁਤ੍ਵਾ ਰਾਜਾ ਨਗਰਂ ਅਲਙ੍ਕਾਰਾਪੇਸਿ. ਹਤ੍ਥਾਚਰਿਯੋ ਬੋਧਿਸਤ੍ਤਂ ਕਤਗਨ੍ਧਪਰਿਭਣ੍ਡਂ ਅਲਙ੍ਕਤਪਟਿਯਤ੍ਤਂ ਹਤ੍ਥਿਸਾਲਂ ਨੇਤ੍ਵਾ ਵਿਚਿਤ੍ਰਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਰਞ੍ਞੋ ਆਰੋਚਾਪੇਸਿ. ਰਾਜਾ ਨਾਨਗ੍ਗਰਸਭੋਜਨਂ ਆਦਾਯ ਗਨ੍ਤ੍ਵਾ ਬੋਧਿਸਤ੍ਤਸ੍ਸ ਦਾਪੇਸਿ. ਸੋ ‘‘ਮਾਤਰਂ ਵਿਨਾ ਗੋਚਰਂ ਨ ਗਣ੍ਹਿਸ੍ਸਾਮੀ’’ਤਿ ਪਿਣ੍ਡਂ ਨ ਗਣ੍ਹਿ. ਅਥ ਨਂ ਯਾਚਨ੍ਤੋ ਰਾਜਾ ਤਤਿਯਂ ਗਾਥਮਾਹ –

੩.

‘‘ਗਣ੍ਹਾਹਿ ਨਾਗ ਕਬਲ਼ਂ, ਮਾ ਨਾਗ ਕਿਸਕੋ ਭਵ;

ਬਹੂਨਿ ਰਾਜਕਿਚ੍ਚਾਨਿ, ਤਾਨਿ ਨਾਗ ਕਰਿਸ੍ਸਸੀ’’ਤਿ.

ਤਂ ਸੁਤ੍ਵਾ ਬੋਧਿਸਤ੍ਤੋ ਚਤੁਤ੍ਥਂ ਗਾਥਮਾਹ –

੪.

‘‘ਸਾ ਨੂਨਸਾ ਕਪਣਿਕਾ, ਅਨ੍ਧਾ ਅਪਰਿਣਾਯਿਕਾ;

ਖਾਣੁਂ ਪਾਦੇਨ ਘਟ੍ਟੇਤਿ, ਗਿਰਿਂ ਚਣ੍ਡੋਰਣਂ ਪਤੀ’’ਤਿ.

ਤਤ੍ਥ ਸਾ ਨੂਨਸਾਤਿ ਮਹਾਰਾਜ, ਨੂਨ ਸਾ ਏਸਾ. ਕਪਣਿਕਾਤਿ ਪੁਤ੍ਤਵਿਯੋਗੇਨ ਕਪਣਾ. ਖਾਣੁਨ੍ਤਿ ਤਤ੍ਥ ਤਤ੍ਥ ਪਤਿਤਂ ਰੁਕ੍ਖਕਲਿਙ੍ਗਰਂ. ਘਟ੍ਟੇਤੀਤਿ ਪਰਿਦੇਵਮਾਨਾ ਤਤ੍ਥ ਤਤ੍ਥ ਪਾਦੇਨ ਪੋਥੇਨ੍ਤੀ ਨੂਨ ਪਾਦੇਨ ਹਨਤਿ. ਗਿਰਿਂ ਚਣ੍ਡੋਰਣਂ ਪਤੀਤਿ ਚਣ੍ਡੋਰਣਪਬ੍ਬਤਾਭਿਮੁਖੀ, ਪਬ੍ਬਤਪਾਦੇ ਪਰਿਪ੍ਫਨ੍ਦਮਾਨਾਤਿ ਅਤ੍ਥੋ.

ਅਥ ਨਂ ਪੁਚ੍ਛਨ੍ਤੋ ਰਾਜਾ ਪਞ੍ਚਮਂ ਗਾਥਮਾਹ –

੫.

‘‘ਕਾ ਨੁ ਤੇ ਸਾ ਮਹਾਨਾਗ, ਅਨ੍ਧਾ ਅਪਰਿਣਾਯਿਕਾ;

ਖਾਣੁਂ ਪਾਦੇਨ ਘਟ੍ਟੇਤਿ, ਗਿਰਿਂ ਚਣ੍ਡੋਰਣਂ ਪਤੀ’’ਤਿ.

ਬੋਧਿਸਤ੍ਤੋ ਛਟ੍ਠਂ ਗਾਥਮਾਹ –

੬.

‘‘ਮਾਤਾ ਮੇ ਸਾ ਮਹਾਰਾਜ, ਅਨ੍ਧਾ ਅਪਰਿਣਾਯਿਕਾ;

ਖਾਣੁਂ ਪਾਦੇਨ ਘਟ੍ਟੇਤਿ, ਗਿਰਿਂ ਚਣ੍ਡੋਰਣਂ ਪਤੀ’’ਤਿ.

ਰਾਜਾ ਛਟ੍ਠਗਾਥਾਯ ਤਮਤ੍ਥਂ ਸੁਤ੍ਵਾ ਮੁਞ੍ਚਾਪੇਨ੍ਤੋ ਸਤ੍ਤਮਂ ਗਾਥਮਾਹ –

੭.

‘‘ਮੁਞ੍ਚਥੇਤਂ ਮਹਾਨਾਗਂ, ਯੋਯਂ ਭਰਤਿ ਮਾਤਰਂ;

ਸਮੇਤੁ ਮਾਤਰਾ ਨਾਗੋ, ਸਹ ਸਬ੍ਬੇਹਿ ਞਾਤਿਭੀ’’ਤਿ.

ਤਤ੍ਥ ਯੋਯਂ ਭਰਤੀਤਿ ਅਯਂ ਨਾਗੋ ‘‘ਅਹਂ, ਮਹਾਰਾਜ, ਅਨ੍ਧਂ ਮਾਤਰਂ ਪੋਸੇਮਿ, ਮਯਾ ਵਿਨਾ ਮਯ੍ਹਂ ਮਾਤਾ ਜੀਵਿਤਕ੍ਖਯਂ ਪਾਪੁਣਿਸ੍ਸਤਿ, ਤਾਯ ਵਿਨਾ ਮਯ੍ਹਂ ਇਸ੍ਸਰਿਯੇਨ ਅਤ੍ਥੋ ਨਤ੍ਥਿ, ਅਜ੍ਜ ਮੇ ਮਾਤੁ ਗੋਚਰਂ ਅਲਭਨ੍ਤਿਯਾ ਸਤ੍ਤਮੋ ਦਿਵਸੋ’’ਤਿ ਵਦਤਿ, ਤਸ੍ਮਾ ਯੋ ਅਯਂ ਮਾਤਰਂ ਭਰਤਿ, ਏਤਂ ਮਹਾਨਾਗਂ ਖਿਪ੍ਪਂ ਮੁਞ੍ਚਥ. ਸਬ੍ਬੇਹਿ ਞਾਤਿਭੀਤਿ ਸਦ੍ਧਿਂ ਏਸ ਮਾਤਰਾ ਸਮੇਤੁ ਸਮਾਗਚ੍ਛਤੂਤਿ.

ਅਟ੍ਠਮਨਵਮਾ ਅਭਿਸਮ੍ਬੁਦ੍ਧਗਾਥਾ ਹੋਨ੍ਤਿ –

੮.

‘‘ਮੁਤ੍ਤੋ ਚ ਬਨ੍ਧਨਾ ਨਾਗੋ, ਮੁਤ੍ਤਮਾਦਾਯ ਕੁਞ੍ਜਰੋ;

ਮੁਹੁਤ੍ਤਂ ਅਸ੍ਸਾਸਯਿਤ੍ਵਾ, ਅਗਮਾ ਯੇਨ ਪਬ੍ਬਤੋ.

੯.

‘‘ਤਤੋ ਸੋ ਨਲ਼ਿਨਿਂ ਗਨ੍ਤ੍ਵਾ, ਸੀਤਂ ਕੁਞ੍ਜਰਸੇਵਿਤਂ;

ਸੋਣ੍ਡਾਯੂਦਕਮਾਹਤ੍ਵਾ, ਮਾਤਰਂ ਅਭਿਸਿਞ੍ਚਥਾ’’ਤਿ.

ਸੋ ਕਿਰ ਨਾਗੋ ਬਨ੍ਧਨਾ ਮੁਤ੍ਤੋ ਥੋਕਂ ਵਿਸ੍ਸਮਿਤ੍ਵਾ ਰਞ੍ਞੋ ਦਸਰਾਜਧਮ੍ਮਗਾਥਾਯ ਧਮ੍ਮਂ ਦੇਸੇਤ੍ਵਾ ‘‘ਅਪ੍ਪਮਤ੍ਤੋ ਹੋਹਿ, ਮਹਾਰਾਜਾ’’ਤਿ ਓਵਾਦਂ ਦਤ੍ਵਾ ਮਹਾਜਨੇਨ ਗਨ੍ਧਮਾਲਾਦੀਹਿ ਪੂਜਿਯਮਾਨੋ ਨਗਰਾ ਨਿਕ੍ਖਮਿਤ੍ਵਾ ਤਦਹੇਵ ਤਂ ਪਦੁਮਸਰਂ ਪਤ੍ਵਾ ‘‘ਮਮ ਮਾਤਰਂ ਗੋਚਰਂ ਗਾਹਾਪੇਤ੍ਵਾਵ ਸਯਂ ਗਣ੍ਹਿਸ੍ਸਾਮੀ’’ਤਿ ਬਹੁਂ ਭਿਸਮੁਲ਼ਾਲਂ ਆਦਾਯ ਸੋਣ੍ਡਪੂਰਂ ਉਦਕਂ ਗਹੇਤ੍ਵਾ ਗੁਹਾਲੇਣਤੋ ਨਿਕ੍ਖਮਿਤ੍ਵਾ ਗੁਹਾਦ੍ਵਾਰੇ ਨਿਸਿਨ੍ਨਾਯ ਮਾਤੁਯਾ ਸਨ੍ਤਿਕਂ ਗਨ੍ਤ੍ਵਾ ਸਤ੍ਤਾਹਂ ਨਿਰਾਹਾਰਤਾਯ ਮਾਤੁ ਸਰੀਰਸ੍ਸ ਫਸ੍ਸਪਟਿਲਾਭਤ੍ਥਂ ਉਪਰਿ ਉਦਕਂ ਸਿਞ੍ਚਿ, ਤਮਤ੍ਥਂ ਆਵਿਕਰੋਨ੍ਤੋ ਸਤ੍ਥਾ ਦ੍ਵੇ ਗਾਥਾ ਅਭਾਸਿ. ਬੋਧਿਸਤ੍ਤਸ੍ਸ ਮਾਤਾਪਿ ‘‘ਦੇਵੋ ਵਸ੍ਸਤੀ’’ਤਿ ਸਞ੍ਞਾਯ ਤਂ ਅਕ੍ਕੋਸਨ੍ਤੀ ਦਸਮਂ ਗਾਥਮਾਹ –

੧੦.

‘‘ਕੋਯਂ ਅਨਰਿਯੋ ਦੇਵੋ, ਅਕਾਲੇਨਪਿ ਵਸ੍ਸਤਿ;

ਗਤੋ ਮੇ ਅਤ੍ਰਜੋ ਪੁਤ੍ਤੋ, ਯੋ ਮਯ੍ਹਂ ਪਰਿਚਾਰਕੋ’’ਤਿ.

ਤਤ੍ਥ ਅਤ੍ਰਜੋਤਿ ਅਤ੍ਤਤੋ ਜਾਤੋ.

ਅਥ ਨਂ ਸਮਸ੍ਸਾਸੇਨ੍ਤੋ ਬੋਧਿਸਤ੍ਤੋ ਏਕਾਦਸਮਂ ਗਾਥਮਾਹ –

੧੧.

‘‘ਉਟ੍ਠੇਹਿ ਅਮ੍ਮ ਕਿਂ ਸੇਸਿ, ਆਗਤੋ ਤ੍ਯਾਹਮਤ੍ਰਜੋ;

ਮੁਤ੍ਤੋਮ੍ਹਿ ਕਾਸਿਰਾਜੇਨ, ਵੇਦੇਹੇਨ ਯਸਸ੍ਸਿਨਾ’’ਤਿ.

ਤਤ੍ਥ ਆਗਤੋ ਤ੍ਯਾਹਨ੍ਤਿ ਆਗਤੋ ਤੇ ਅਹਂ. ਵੇਦੇਹੇਨਾਤਿ ਞਾਣਸਮ੍ਪਨ੍ਨੇਨ. ਯਸਸ੍ਸਿਨਾਤਿ ਮਹਾਪਰਿਵਾਰੇਨ ਤੇਨ ਰਞ੍ਞਾ ਮਙ੍ਗਲਹਤ੍ਥਿਭਾਵਾਯ ਗਹਿਤੋਪਿ ਅਹਂ ਮੁਤ੍ਤੋ, ਇਦਾਨਿ ਤਵ ਸਨ੍ਤਿਕਂ ਆਗਤੋ ਉਟ੍ਠੇਹਿ ਗੋਚਰਂ ਗਣ੍ਹਾਹੀਤਿ.

ਸਾ ਤੁਟ੍ਠਮਾਨਸਾ ਰਞ੍ਞੋ ਅਨੁਮੋਦਨਂ ਕਰੋਨ੍ਤੀ ਓਸਾਨਗਾਥਮਾਹ –

੧੨.

‘‘ਚਿਰਂ ਜੀਵਤੁ ਸੋ ਰਾਜਾ, ਕਾਸੀਨਂ ਰਟ੍ਠਵਡ੍ਢਨੋ;

ਯੋ ਮੇ ਪੁਤ੍ਤਂ ਪਮੋਚੇਸਿ, ਸਦਾ ਵੁਦ੍ਧਾਪਚਾਯਿਕ’’ਨ੍ਤਿ.

ਤਦਾ ਰਾਜਾ ਬੋਧਿਸਤ੍ਤਸ੍ਸ ਗੁਣੇ ਪਸੀਦਿਤ੍ਵਾ ਨਲ਼ਿਨਿਯਾ ਅਵਿਦੂਰੇ ਗਾਮਂ ਮਾਪੇਤ੍ਵਾ ਬੋਧਿਸਤ੍ਤਸ੍ਸ ਚ ਮਾਤੁ ਚਸ੍ਸ ਨਿਬਦ੍ਧਂ ਵਤ੍ਤਂ ਪਟ੍ਠਪੇਸਿ. ਅਪਰਭਾਗੇ ਬੋਧਿਸਤ੍ਤੋ ਮਾਤਰਿ ਕਾਲਕਤਾਯ ਤਸ੍ਸਾ ਸਰੀਰਪਰਿਹਾਰਂ ਕਤ੍ਵਾ ਕਾਰਣ੍ਡਕਅਸ੍ਸਮਪਦਂ ਨਾਮ ਗਤੋ. ਤਸ੍ਮਿਂ ਪਨ ਠਾਨੇ ਹਿਮਵਨ੍ਤਤੋ ਓਤਰਿਤ੍ਵਾ ਪਞ੍ਚਸਤਾ ਇਸਯੋ ਵਸਿਂਸੁ, ਤਂ ਵਤ੍ਤਂ ਤੇਸਂ ਅਦਾਸਿ. ਰਾਜਾ ਬੋਧਿਸਤ੍ਤਸ੍ਸ ਸਮਾਨਰੂਪਂ ਸਿਲਾਪਟਿਮਂ ਕਾਰੇਤ੍ਵਾ ਮਹਾਸਕ੍ਕਾਰਂ ਪਵਤ੍ਤੇਸਿ. ਸਕਲਜਮ੍ਬੁਦੀਪਵਾਸਿਨੋ ਅਨੁਸਂਵਚ੍ਛਰਂ ਸਨ੍ਨਿਪਤਿਤ੍ਵਾ ਹਤ੍ਥਿਮਹਂ ਨਾਮ ਕਰਿਂਸੁ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਮਾਤੁਪੋਸਕਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਰਾਜਾ ਆਨਨ੍ਦੋ ਅਹੋਸਿ, ਪਾਪਪੁਰਿਸੋ ਦੇਵਦਤ੍ਤੋ, ਹਤ੍ਥਾਚਰਿਯੋ ਸਾਰਿਪੁਤ੍ਤੋ, ਮਾਤਾ ਹਤ੍ਥਿਨੀ ਮਹਾਮਾਯਾ, ਮਾਤੁਪੋਸਕਨਾਗੋ ਪਨ ਅਹਮੇਵ ਅਹੋਸਿਨ੍ਤਿ.

ਮਾਤੁਪੋਸਕਜਾਤਕਵਣ੍ਣਨਾ ਪਠਮਾ.

[੪੫੬] ੨. ਜੁਣ੍ਹਜਾਤਕਵਣ੍ਣਨਾ

ਸੁਣੋਹਿ ਮਯ੍ਹਂ ਵਚਨਂ ਜਨਿਨ੍ਦਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਆਨਨ੍ਦਤ੍ਥੇਰੇਨ ਲਦ੍ਧਵਰੇ ਆਰਬ੍ਭ ਕਥੇਸਿ. ਪਠਮਬੋਧਿਯਞ੍ਹਿ ਵੀਸਤਿ ਵਸ੍ਸਾਨਿ ਭਗਵਤੋ ਅਨਿਬਦ੍ਧੁਪਟ੍ਠਾਕਾ ਅਹੇਸੁਂ. ਏਕਦਾ ਥੇਰੋ ਨਾਗਸਮਾਲੋ, ਏਕਦਾ ਨਾਗਿਤੋ, ਏਕਦਾ ਉਪਵਾਣੋ, ਏਕਦਾ ਸੁਨਕ੍ਖਤ੍ਤੋ, ਏਕਦਾ ਚੁਨ੍ਦੋ, ਏਕਦਾ ਨਨ੍ਦੋ, ਏਕਦਾ ਸਾਗਤੋ, ਏਕਦਾ ਮੇਘਿਯੋ ਭਗਵਨ੍ਤਂ ਉਪਟ੍ਠਹਿ. ਅਥੇਕਦਿਵਸਂ ਭਗਵਾ ਭਿਕ੍ਖੂ ਆਮਨ੍ਤੇਸਿ ‘‘ਭਿਕ੍ਖਵੇ, ਇਦਾਨਿਮ੍ਹਿ ਮਹਲ੍ਲਕੋ, ਏਕਚ੍ਚੇ ਭਿਕ੍ਖੂ ‘ਇਮਿਨਾ ਮਗ੍ਗੇਨ ਗਚ੍ਛਾਮਾ’ਤਿ ਵੁਤ੍ਤੇ ਅਞ੍ਞੇਨ ਗਚ੍ਛਨ੍ਤਿ, ਏਕਚ੍ਚੇ ਮਯ੍ਹਂ ਪਤ੍ਤਚੀਵਰਂ ਭੂਮਿਯਂ ਨਿਕ੍ਖਿਪਨ੍ਤਿ, ਨਿਬਦ੍ਧੁਪਟ੍ਠਾਕਂ ਮੇ ਏਕਂ ਭਿਕ੍ਖੁਂ ਜਾਨਾਥਾ’’ਤਿ. ‘‘ਭਨ੍ਤੇ, ਅਹਂ ਉਪਟ੍ਠਹਿਸ੍ਸਾਮਿ, ਅਹਂ ਉਪਟ੍ਠਹਿਸ੍ਸਾਮੀ’’ਤਿ ਸਿਰਸਿ ਅਞ੍ਜਲਿਂ ਕਤ੍ਵਾ ਉਟ੍ਠਿਤੇ ਸਾਰਿਪੁਤ੍ਤਤ੍ਥੇਰਾਦਯੋ ‘‘ਤੁਮ੍ਹਾਕਂ ਪਤ੍ਥਨਾ ਮਤ੍ਥਕਂ ਪਤ੍ਤਾ, ਅਲ’’ਨ੍ਤਿ ਪਟਿਕ੍ਖਿਪਿ. ਤਤੋ ਭਿਕ੍ਖੂ ਆਨਨ੍ਦਤ੍ਥੇਰਂ ‘‘ਤ੍ਵਂ ਆਵੁਸੋ, ਉਪਟ੍ਠਾਕਟ੍ਠਾਨਂ ਯਾਚਾਹੀ’’ਤਿ ਆਹਂਸੁ. ਥੇਰੋ ‘‘ਸਚੇ ਮੇ ਭਨ੍ਤੇ, ਭਗਵਾ ਅਤ੍ਤਨਾ ਲਦ੍ਧਚੀਵਰਂ ਨ ਦਸ੍ਸਤਿ, ਪਿਣ੍ਡਪਾਤਂ ਨ ਦਸ੍ਸਤਿ, ਏਕਗਨ੍ਧਕੁਟਿਯਂ ਵਸਿਤੁਂ ਨ ਦਸ੍ਸਤਿ, ਮਂ ਗਹੇਤ੍ਵਾ ਨਿਮਨ੍ਤਨਂ ਨ ਗਮਿਸ੍ਸਤਿ, ਸਚੇ ਪਨ ਭਗਵਾ ਮਯਾ ਗਹਿਤਂ ਨਿਮਨ੍ਤਨਂ ਗਮਿਸ੍ਸਤਿ, ਸਚੇ ਅਹਂ ਤਿਰੋਰਟ੍ਠਾ ਤਿਰੋਜਨਪਦਾ ਭਗਵਨ੍ਤਂ ਦਟ੍ਠੁਂ ਆਗਤਂ ਪਰਿਸਂ ਆਗਤਕ੍ਖਣੇਯੇਵ ਦਸ੍ਸੇਤੁਂ ਲਭਿਸ੍ਸਾਮਿ, ਯਦਾ ਮੇ ਕਙ੍ਖਾ ਉਪ੍ਪਜ੍ਜਤਿ, ਤਸ੍ਮਿਂ ਖਣੇਯੇਵ ਭਗਵਨ੍ਤਂ ਉਪਸਙ੍ਕਮਿਤੁਂ ਲਭਿਸ੍ਸਾਮਿ, ਸਚੇ ਯਂ ਭਗਵਾ ਮਮ ਪਰਮ੍ਮੁਖਾ ਧਮ੍ਮਂ ਕਥੇਤਿ, ਤਂ ਆਗਨ੍ਤ੍ਵਾ ਮਯ੍ਹਂ ਕਥੇਸ੍ਸਤਿ, ਏਵਾਹਂ ਭਗਵਨ੍ਤਂ ਉਪਟ੍ਠਹਿਸ੍ਸਾਮੀ’’ਤਿ ਇਮੇ ਚਤ੍ਤਾਰੋ ਪਟਿਕ੍ਖੇਪੇ ਚਤਸ੍ਸੋ ਚ ਆਯਾਚਨਾਤਿ ਅਟ੍ਠ ਵਰੇ ਯਾਚਿ, ਭਗਵਾਪਿਸ੍ਸ ਅਦਾਸਿ.

ਸੋ ਤਤੋ ਪਟ੍ਠਾਯ ਪਞ੍ਚਵੀਸਤਿ ਵਸ੍ਸਾਨਿ ਨਿਬਦ੍ਧੁਪਟ੍ਠਾਕੋ ਅਹੋਸਿ. ਸੋ ਪਞ੍ਚਸੁ ਠਾਨੇਸੁ ਏਤਦਗ੍ਗੇ ਠਪਨਂ ਪਤ੍ਵਾ ਆਗਮਸਮ੍ਪਦਾ, ਅਧਿਗਮਸਮ੍ਪਦਾ, ਪੁਬ੍ਬਹੇਤੁਸਮ੍ਪਦਾ, ਅਤ੍ਤਤ੍ਥਪਰਿਪੁਚ੍ਛਾਸਮ੍ਪਦਾ, ਤਿਤ੍ਥਵਾਸਸਮ੍ਪਦਾ, ਯੋਨਿਸੋਮਨਸਿਕਾਰਸਮ੍ਪਦਾ, ਬੁਦ੍ਧੂਪਨਿਸ੍ਸਯਸਮ੍ਪਦਾਤਿ ਇਮਾਹਿ ਸਤ੍ਤਹਿ ਸਮ੍ਪਦਾਹਿ ਸਮਨ੍ਨਾਗਤੋ ਬੁਦ੍ਧਸ੍ਸ ਸਨ੍ਤਿਕੇ ਅਟ੍ਠਵਰਦਾਯਜ੍ਜਂ ਲਭਿਤ੍ਵਾ ਬੁਦ੍ਧਸਾਸਨੇ ਪਞ੍ਞਾਤੋ ਗਗਨਮਜ੍ਝੇ ਚਨ੍ਦੋ ਵਿਯ ਪਾਕਟੋ ਅਹੋਸਿ. ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਤਥਾਗਤੋ ਆਨਨ੍ਦਤ੍ਥੇਰਂ ਵਰਦਾਨੇਨ ਸਨ੍ਤਪ੍ਪੇਸੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਾਹਂ ਆਨਨ੍ਦਂ ਵਰੇਨ ਸਨ੍ਤਪ੍ਪੇਸਿਂ, ਪੁਬ੍ਬੇਪਾਹਂ ਯਂ ਯਂ ਏਸ ਯਾਚਿ, ਤਂ ਤਂ ਅਦਾਸਿਂਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਪੁਤ੍ਤੋ ਜੁਣ੍ਹਕੁਮਾਰੋ ਨਾਮ ਹੁਤ੍ਵਾ ਤਕ੍ਕਸਿਲਾਯਂ ਸਿਪ੍ਪਂ ਉਗ੍ਗਹੇਤ੍ਵਾ ਆਚਰਿਯਸ੍ਸ ਅਨੁਯੋਗਂ ਦਤ੍ਵਾ ਰਤ੍ਤਿਭਾਗੇ ਅਨ੍ਧਕਾਰੇ ਆਚਰਿਯਸ੍ਸ ਘਰਾ ਨਿਕ੍ਖਮਿਤ੍ਵਾ ਅਤ੍ਤਨੋ ਨਿਵਾਸਟ੍ਠਾਨਂ ਵੇਗੇਨ ਗਚ੍ਛਨ੍ਤੋ ਅਞ੍ਞਤਰਂ ਬ੍ਰਾਹ੍ਮਣਂ ਭਿਕ੍ਖਂ ਚਰਿਤ੍ਵਾ ਅਤ੍ਤਨੋ ਨਿਵਾਸਟ੍ਠਾਨਂ ਗਚ੍ਛਨ੍ਤਂ ਅਪਸ੍ਸਨ੍ਤੋ ਬਾਹੁਨਾ ਪਹਰਿਤ੍ਵਾ ਤਸ੍ਸ ਭਤ੍ਤਪਾਤਿਂ ਭਿਨ੍ਦਿਂ, ਬ੍ਰਾਹ੍ਮਣੋ ਪਤਿਤ੍ਵਾ ਵਿਰਵਿ. ਕੁਮਾਰੋ ਕਾਰੁਞ੍ਞੇਨ ਨਿਵਤ੍ਤਿਤ੍ਵਾ ਤਂ ਹਤ੍ਥੇ ਗਹੇਤ੍ਵਾ ਉਟ੍ਠਾਪੇਸਿ. ਬ੍ਰਾਹ੍ਮਣੋ ‘‘ਤਯਾ, ਤਾਤ, ਮਮ ਭਿਕ੍ਖਾਭਾਜਨਂ ਭਿਨ੍ਨਂ, ਭਤ੍ਤਮੂਲਂ ਮੇ ਦੇਹੀ’’ਤਿ ਆਹ. ਕੁਮਾਰੋ ‘‘ਬ੍ਰਾਹ੍ਮਣ, ਨ ਦਾਨਾਹਂ ਤਵ ਭਤ੍ਤਮੂਲਂ ਦਾਤੁਂ ਸਕ੍ਕੋਮਿ, ਅਹਂ ਖੋ ਪਨ ਕਾਸਿਕਰਞ੍ਞੋ ਪੁਤ੍ਤੋ ਜੁਣ੍ਹਕੁਮਾਰੋ ਨਾਮ, ਮਯਿ ਰਜ੍ਜੇ ਪਤਿਟ੍ਠਿਤੇ ਆਗਨ੍ਤ੍ਵਾ ਮਂ ਧਨਂ ਯਾਚੇਯ੍ਯਾਸੀ’’ਤਿ ਵਤ੍ਵਾ ਨਿਟ੍ਠਿਤਸਿਪ੍ਪੋ ਆਚਰਿਯਂ ਵਨ੍ਦਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਪਿਤੁ ਸਿਪ੍ਪਂ ਦਸ੍ਸੇਸਿ. ਪਿਤਾ ‘‘ਜੀਵਨ੍ਤੇਨ ਮੇ ਪੁਤ੍ਤੋ ਦਿਟ੍ਠੋ, ਰਾਜਭੂਤਮ੍ਪਿ ਨਂ ਪਸ੍ਸਿਸ੍ਸਾਮੀ’’ਤਿ ਰਜ੍ਜੇ ਅਭਿਸਿਞ੍ਚਿ. ਸੋ ਜੁਣ੍ਹਰਾਜਾ ਨਾਮ ਹੁਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਸਿ. ਬ੍ਰਾਹ੍ਮਣੋ ਤਂ ਪਵਤ੍ਤਿਂ ਸੁਤ੍ਵਾ ‘‘ਇਦਾਨਿ ਮਮ ਭਤ੍ਤਮੂਲਂ ਆਹਰਿਸ੍ਸਾਮੀ’’ਤਿ ਬਾਰਾਣਸਿਂ ਗਨ੍ਤ੍ਵਾ ਰਾਜਾਨਂ ਅਲਙ੍ਕਤਨਗਰਂ ਪਦਕ੍ਖਿਣਂ ਕਰੋਨ੍ਤਮੇਵ ਦਿਸ੍ਵਾ ਏਕਸ੍ਮਿਂ ਉਨ੍ਨਤਪ੍ਪਦੇਸੇ ਠਿਤੋ ਹਤ੍ਥਂ ਪਸਾਰੇਤ੍ਵਾ ਜਯਾਪੇਸਿ. ਅਥ ਨਂ ਰਾਜਾ ਅਨੋਲੋਕੇਤ੍ਵਾਵ ਅਤਿਕ੍ਕਮਿ. ਬ੍ਰਾਹ੍ਮਣੋ ਤੇਨ ਅਦਿਟ੍ਠਭਾਵਂ ਞਤ੍ਵਾ ਕਥਂ ਸਮੁਟ੍ਠਾਪੇਨ੍ਤੋ ਪਠਮਂ ਗਾਥਮਾਹ –

੧੩.

‘‘ਸੁਣੋਹਿ ਮਯ੍ਹਂ ਵਚਨਂ ਜਨਿਨ੍ਦ, ਅਤ੍ਥੇਨ ਜੁਣ੍ਹਮ੍ਹਿ ਇਧਾਨੁਪਤ੍ਤੋ;

ਨ ਬ੍ਰਾਹ੍ਮਣੇ ਅਦ੍ਧਿਕੇ ਤਿਟ੍ਠਮਾਨੇ, ਗਨ੍ਤਬ੍ਬਮਾਹੁ ਦ੍ਵਿਪਦਿਨ੍ਦ ਸੇਟ੍ਠਾ’’ਤਿ.

ਤਤ੍ਥ ਜੁਣ੍ਹਮ੍ਹੀਤਿ ਮਹਾਰਾਜ, ਤਯਿ ਜੁਣ੍ਹਮ੍ਹਿ ਅਹਂ ਏਕੇਨ ਅਤ੍ਥੇਨ ਇਧਾਨੁਪ੍ਪਤ੍ਤੋ, ਨ ਨਿਕ੍ਕਾਰਣਾ ਇਧਾਗਤੋਮ੍ਹੀਤਿ ਦੀਪੇਤਿ. ਅਦ੍ਧਿਕੇਤਿ ਅਦ੍ਧਾਨਂ ਆਗਤੇ. ਗਨ੍ਤਬ੍ਬਨ੍ਤਿ ਤਂ ਅਦ੍ਧਿਕਂ ਅਦ੍ਧਾਨਮਾਗਤਂ ਯਾਚਮਾਨਂ ਬ੍ਰਾਹ੍ਮਣਂ ਅਨੋਲੋਕੇਤ੍ਵਾਵ ਗਨ੍ਤਬ੍ਬਨ੍ਤਿ ਪਣ੍ਡਿਤਾ ਨ ਆਹੁ ਨ ਕਥੇਨ੍ਤੀਤਿ.

ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਹਤ੍ਥਿਂ ਵਜਿਰਙ੍ਕੁਸੇਨ ਨਿਗ੍ਗਹੇਤ੍ਵਾ ਦੁਤਿਯਂ ਗਾਥਮਾਹ –

੧੪.

‘‘ਸੁਣੋਮਿ ਤਿਟ੍ਠਾਮਿ ਵਦੇਹਿ ਬ੍ਰਹ੍ਮੇ, ਯੇਨਾਸਿ ਅਤ੍ਥੇਨ ਇਧਾਨੁਪਤ੍ਤੋ;

ਕਂ ਵਾ ਤ੍ਵਮਤ੍ਥਂ ਮਯਿ ਪਤ੍ਥਯਾਨੋ, ਇਧਾਗਮੋ ਬ੍ਰਹ੍ਮੇ ਤਦਿਙ੍ਘ ਬ੍ਰੂਹੀ’’ਤਿ.

ਤਤ੍ਥ ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ.

ਤਤੋ ਪਰਂ ਬ੍ਰਾਹ੍ਮਣਸ੍ਸ ਚ ਰਞ੍ਞੋ ਚ ਵਚਨਪਟਿਵਚਨਵਸੇਨ ਸੇਸਗਾਥਾ ਕਥਿਤਾ –

੧੫.

‘‘ਦਦਾਹਿ ਮੇ ਗਾਮਵਰਾਨਿ ਪਞ੍ਚ, ਦਾਸੀਸਤਂ ਸਤ੍ਤ ਗਵਂਸਤਾਨਿ;

ਪਰੋਸਹਸ੍ਸਞ੍ਚ ਸੁਵਣ੍ਣਨਿਕ੍ਖੇ, ਭਰਿਯਾ ਚ ਮੇ ਸਾਦਿਸੀ ਦ੍ਵੇ ਦਦਾਹਿ.

੧੬.

‘‘ਤਪੋ ਨੁ ਤੇ ਬ੍ਰਾਹ੍ਮਣ ਭਿਂਸਰੂਪੋ, ਮਨ੍ਤਾ ਨੁ ਤੇ ਬ੍ਰਾਹ੍ਮਣ ਚਿਤ੍ਤਰੂਪਾ;

ਯਕ੍ਖਾ ਨੁ ਤੇ ਅਸ੍ਸਵਾ ਸਨ੍ਤਿ ਕੇਚਿ, ਅਤ੍ਥਂ ਵਾ ਮੇ ਅਭਿਜਾਨਾਸਿ ਕਤ੍ਤਂ.

੧੭.

‘‘ਨ ਮੇ ਤਪੋ ਅਤ੍ਥਿ ਨ ਚਾਪਿ ਮਨ੍ਤਾ, ਯਕ੍ਖਾਪਿ ਮੇ ਅਸ੍ਸਵਾ ਨਤ੍ਥਿ ਕੇਚਿ;

ਅਤ੍ਥਮ੍ਪਿ ਤੇ ਨਾਭਿਜਾਨਾਮਿ ਕਤ੍ਤਂ, ਪੁਬ੍ਬੇ ਚ ਖੋ ਸਙ੍ਗਤਿਮਤ੍ਤਮਾਸਿ.

੧੮.

‘‘ਪਠਮਂ ਇਦਂ ਦਸ੍ਸਨਂ ਜਾਨਤੋ ਮੇ, ਨ ਤਾਭਿਜਾਨਾਮਿ ਇਤੋ ਪੁਰਤ੍ਥਾ;

ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ, ਕਦਾ ਕੁਹਿਂ ਵਾ ਅਹੁ ਸਙ੍ਗਮੋ ਨੋ.

੧੯.

‘‘ਗਨ੍ਧਾਰਰਾਜਸ੍ਸ ਪੁਰਮ੍ਹਿ ਰਮ੍ਮੇ, ਅਵਸਿਮ੍ਹਸੇ ਤਕ੍ਕਸੀਲਾਯਂ ਦੇਵ;

ਤਤ੍ਥਨ੍ਧਕਾਰਮ੍ਹਿ ਤਿਮੀਸਿਕਾਯਂ, ਅਂਸੇਨ ਅਂਸਂ ਸਮਘਟ੍ਟਯਿਮ੍ਹ.

੨੦.

‘‘ਤੇ ਤਤ੍ਥ ਠਤ੍ਵਾਨ ਉਭੋ ਜਨਿਨ੍ਦ, ਸਾਰਾਣਿਯਂ ਵੀਤਿਸਾਰਯਿਮ੍ਹ ਤਤ੍ਥ;

ਸਾਯੇਵ ਨੋ ਸਙ੍ਗਤਿਮਤ੍ਤਮਾਸਿ, ਤਤੋ ਨ ਪਚ੍ਛਾ ਨ ਪੁਰੇ ਅਹੋਸਿ.

੨੧.

‘‘ਯਦਾ ਕਦਾਚਿ ਮਨੁਜੇਸੁ ਬ੍ਰਹ੍ਮੇ, ਸਮਾਗਮੋ ਸਪ੍ਪੁਰਿਸੇਨ ਹੋਤਿ;

ਨ ਪਣ੍ਡਿਤਾ ਸਙ੍ਗਤਿਸਨ੍ਥਵਾਨਿ, ਪੁਬ੍ਬੇ ਕਤਂ ਵਾਪਿ ਵਿਨਾਸਯਨ੍ਤਿ.

੨੨.

‘‘ਬਾਲਾਵ ਖੋ ਸਙ੍ਗਤਿਸਨ੍ਥਵਾਨਿ, ਪੁਬ੍ਬੇ ਕਤਂ ਵਾਪਿ ਵਿਨਾਸਯਨ੍ਤਿ;

ਬਹੁਮ੍ਪਿ ਬਾਲੇਸੁ ਕਤਂ ਵਿਨਸ੍ਸਤਿ, ਤਥਾ ਹਿ ਬਾਲਾ ਅਕਤਞ੍ਞੁਰੂਪਾ.

੨੩.

‘‘ਧੀਰਾ ਚ ਖੋ ਸਙ੍ਗਤਿਸਨ੍ਥਵਾਨਿ, ਪੁਬ੍ਬੇ ਕਤਂ ਵਾਪਿ ਨ ਨਾਸਯਨ੍ਤਿ;

ਅਪ੍ਪਮ੍ਪਿ ਧੀਰੇਸੁ ਕਤਂ ਨ ਨਸ੍ਸਤਿ, ਤਥਾ ਹਿ ਧੀਰਾ ਸੁਕਤਞ੍ਞੁਰੂਪਾ.

੨੪.

‘‘ਦਦਾਮਿ ਤੇ ਗਾਮਵਰਾਨਿ ਪਞ੍ਚ, ਦਾਸੀਸਤਂ ਸਤ੍ਤ ਗਵਂਸਤਾਨਿ;

ਪਰੋਸਹਸ੍ਸਞ੍ਚ ਸੁਵਣ੍ਣਨਿਕ੍ਖੇ, ਭਰਿਯਾ ਚ ਤੇ ਸਾਦਿਸੀ ਦ੍ਵੇ ਦਦਾਮਿ.

੨੫.

‘‘ਏਵਂ ਸਤਂ ਹੋਤਿ ਸਮੇਚ੍ਚ ਰਾਜ, ਨਕ੍ਖਤ੍ਤਰਾਜਾਰਿਵ ਤਾਰਕਾਨਂ;

ਆਪੂਰਤੀ ਕਾਸਿਪਤੀ ਤਥਾਹਂ, ਤਯਾਪਿ ਮੇ ਸਙ੍ਗਮੋ ਅਜ੍ਜ ਲਦ੍ਧੋ’’ਤਿ.

ਤਤ੍ਥ ਸਾਦਿਸੀਤਿ ਰੂਪਵਣ੍ਣਜਾਤਿਕੁਲਪਦੇਸੇਨ ਮਯਾ ਸਾਦਿਸੀ ਏਕਸਦਿਸਾ ਦ੍ਵੇ ਮਹਾਯਸਾ ਭਰਿਯਾ ਚ ਮੇ ਦੇਹੀਤਿ ਅਤ੍ਥੋ. ਭਿਂਸਰੂਪੋਤਿ ਕਿਂ ਨੁ ਤੇ ਬ੍ਰਾਹ੍ਮਣ ਬਲਵਰੂਪਸੀਲਾਚਾਰਗੁਣਸਙ੍ਖਾਤਂ ਤਪੋਕਮ੍ਮਂ ਅਤ੍ਥੀਤਿ ਪੁਚ੍ਛਤਿ. ਮਨ੍ਤਾ ਨੁ ਤੇਤਿ ਉਦਾਹੁ ਵਿਚਿਤ੍ਰਰੂਪਾ ਸਬ੍ਬਤ੍ਥਸਾਧਕਾ ਮਨ੍ਤਾ ਤੇ ਅਤ੍ਥਿ. ਅਸ੍ਸਵਾਤਿ ਵਚਨਕਾਰਕਾ ਇਚ੍ਛਿਤਿਚ੍ਛਿਤਦਾਯਕਾ ਯਕ੍ਖਾ ਵਾ ਤੇ ਕੇਚਿ ਸਨ੍ਤਿ. ਕਤ੍ਤਨ੍ਤਿ ਕਤਂ, ਉਦਾਹੁ ਤਯਾ ਕਤਂ ਕਿਞ੍ਚਿ ਮਮ ਅਤ੍ਥਂ ਅਭਿਜਾਨਾਸੀਤਿ ਪੁਚ੍ਛਤਿ. ਸਙ੍ਗਤਿਮਤ੍ਤਨ੍ਤਿ ਸਮਾਗਮਮਤ੍ਤਂ ਤਯਾ ਸਦ੍ਧਿਂ ਪੁਬ੍ਬੇ ਮਮ ਆਸੀਤਿ ਵਦਤਿ. ਜਾਨਤੋ ਮੇਤਿ ਜਾਨਨ੍ਤਸ੍ਸ ਮਮ ਇਦਂ ਪਠਮਂ ਤਵ ਦਸ੍ਸਨਂ. ਨ ਤਾਭਿਜਾਨਾਮੀਤਿ ਨ ਤਂ ਅਭਿਜਾਨਾਮਿ. ਤਿਮੀਸਿਕਾਯਨ੍ਤਿ ਬਹਲਤਿਮਿਰਾਯਂ ਰਤ੍ਤਿਯਂ. ਤੇ ਤਤ੍ਥ ਠਤ੍ਵਾਨਾਤਿ ਤੇ ਮਯਂ ਤਸ੍ਮਿਂ ਅਂਸੇਨ ਅਂਸਂ ਘਟ੍ਟਿਤਟ੍ਠਾਨੇ ਠਤ੍ਵਾ ਵੀਤਿਸਾਰਯਿਮ੍ਹ ਤਤ੍ਥਾਤਿ ਤਸ੍ਮਿਂਯੇਵ ਠਾਨੇ ਸਰਿਤਬ੍ਬਯੁਤ੍ਤਕਂ ਕਥਂ ਵੀਤਿਸਾਰਯਿਮ੍ਹ, ਅਹਂ ‘‘ਭਿਕ੍ਖਾਭਾਜਨਂ ਮੇ ਤਯਾ ਭਿਨ੍ਨਂ, ਭਤ੍ਤਮੂਲਂ ਮੇ ਦੇਹੀ’’ਤਿ ਅਵਚਂ, ਤ੍ਵਂ ‘‘ਇਦਾਨਾਹਂ ਤਵ ਭਤ੍ਤਮੂਲਂ ਦਾਤੁਂ ਨ ਸਕ੍ਕੋਮਿ, ਅਹਂ ਖੋ ਪਨ ਕਾਸਿਕਰਞ੍ਞੋ ਪੁਤ੍ਤੋ ਜੁਣ੍ਹਕੁਮਾਰੋ ਨਾਮ, ਮਯਿ ਰਜ੍ਜੇ ਪਤਿਟ੍ਠਿਤੇ ਆਗਨ੍ਤ੍ਵਾ ਮਂ ਧਨਂ ਯਾਚੇਯ੍ਯਾਸੀ’’ਤਿ ਅਵਚਾਤਿ ਇਮਂ ਸਾਰਣੀਯਕਥਂ ਕਰਿਮ੍ਹਾਤਿ ਆਹ. ਸਾਯੇਵ ਨੋ ਸਙ੍ਗਤਿਮਤ੍ਤਮਾਸੀਤਿ ਦੇਵ, ਅਮ੍ਹਾਕਂ ਸਾਯੇਵ ਅਞ੍ਞਮਞ੍ਞਂ ਸਙ੍ਗਤਿਮਤ੍ਤਮਾਸਿ, ਏਕਮੁਹੁਤ੍ਤਿਕਮਹੋਸੀਤਿ ਦੀਪੇਤਿ. ਤਤੋਤਿ ਤਤੋ ਪਨ ਤਂਮੁਹੁਤ੍ਤਿਕਮਿਤ੍ਤਧਮ੍ਮਤੋ ਪਚ੍ਛਾ ਵਾ ਪੁਰੇ ਵਾ ਕਦਾਚਿ ਅਮ੍ਹਾਕਂ ਸਙ੍ਗਤਿ ਨਾਮ ਨ ਭੂਤਪੁਬ੍ਬਾ.

ਨ ਪਣ੍ਡਿਤਾਤਿ ਬ੍ਰਾਹ੍ਮਣ ਪਣ੍ਡਿਤਾ ਨਾਮ ਤਂਮੁਹੁਤ੍ਤਿਕਂ ਸਙ੍ਗਤਿਂ ਵਾ ਚਿਰਕਾਲਸਨ੍ਥਵਾਨਿ ਵਾ ਯਂ ਕਿਞ੍ਚਿ ਪੁਬ੍ਬੇ ਕਤਗੁਣਂ ਵਾ ਨ ਨਾਸੇਨ੍ਤਿ. ਬਹੁਮ੍ਪੀਤਿ ਬਹੁਕਮ੍ਪਿ. ਅਕਤਞ੍ਞੁਰੂਪਾਤਿ ਯਸ੍ਮਾ ਬਾਲਾ ਅਕਤਞ੍ਞੁਸਭਾਵਾ, ਤਸ੍ਮਾ ਤੇਸੁ ਬਹੁਮ੍ਪਿ ਕਤਂ ਨਸ੍ਸਤੀਤਿ ਅਤ੍ਥੋ. ਸੁਕਤਞ੍ਞੁਰੂਪਾਤਿ ਸੁਟ੍ਠੁ ਕਤਞ੍ਞੁਸਭਾਵਾ. ਏਤ੍ਥਾਪਿ ਤਤ੍ਥਾਪਿ ਤਥਾ ਹੀਤਿ ਹਿ-ਕਾਰੋ ਕਾਰਣਤ੍ਥੋ. ਦਦਾਮਿ ਤੇਤਿ ਬ੍ਰਾਹ੍ਮਣੇਨ ਯਾਚਿਤਯਾਚਿਤਂ ਦਦਨ੍ਤੋ ਏਵਮਾਹ. ਏਵਂ ਸਤਨ੍ਤਿ ਬ੍ਰਾਹ੍ਮਣੋ ਰਞ੍ਞੋ ਅਨੁਮੋਦਨਂ ਕਰੋਨ੍ਤੋ ਵਦਤਿ, ਸਤਂ ਸਪ੍ਪੁਰਿਸਾਨਂ ਏਕਵਾਰਮ੍ਪਿ ਸਮੇਚ੍ਚ ਸਙ੍ਗਤਿ ਨਾਮ ਏਵਂ ਹੋਤਿ. ਨਕ੍ਖਤ੍ਤਰਾਜਾਰਿਵਾਤਿ ਏਤ੍ਥ ਰ-ਕਾਰੋ ਨਿਪਾਤਮਤ੍ਤਂ. ਤਾਰਕਾਨਨ੍ਤਿ ਤਾਰਕਗਣਮਜ੍ਝੇ. ਕਾਸਿਪਤੀਤਿ ਰਾਜਾਨਮਾਲਪਤਿ. ਇਦਂ ਵੁਤ੍ਤਂ ਹੋਤਿ – ‘‘ਦੇਵ, ਕਾਸਿਰਟ੍ਠਾਧਿਪਤਿ ਯਥਾ ਚਨ੍ਦੋ ਤਾਰਕਾਨਂ ਮਜ੍ਝੇ ਠਿਤੋ ਤਾਰਕਗਣਪਰਿਵੁਤੋ ਪਾਟਿਪਦਤੋ ਪਟ੍ਠਾਯ ਯਾਵ ਪੁਣ੍ਣਮਾ ਆਪੂਰਤਿ, ਤਥਾ ਅਹਮ੍ਪਿ ਅਜ੍ਜ ਤਯਾ ਦਿਨ੍ਨੇਹਿ ਗਾਮਵਰਾਦੀਹਿ ਆਪੂਰਾਮੀ’’ਤਿ. ਤਯਾਪਿ ਮੇਤਿ ਮਯਾ ਪੁਬ੍ਬੇ ਤਯਾ ਸਦ੍ਧਿਂ ਲਦ੍ਧੋਪਿ ਸਙ੍ਗਮੋ ਅਲਦ੍ਧੋਵ, ਅਜ੍ਜ ਪਨ ਮਮ ਮਨੋਰਥਸ੍ਸ ਨਿਪ੍ਫਨ੍ਨਤ੍ਤਾ ਮਯਾ ਤਯਾ ਸਹ ਸਙ੍ਗਮੋ ਲਦ੍ਧੋ ਨਾਮਾਤਿ ਨਿਪ੍ਫਨ੍ਨਂ ਮੇ ਤਯਾ ਸਦ੍ਧਿਂ ਮਿਤ੍ਤਫਲਨ੍ਤਿ ਵਦਤਿ. ਬੋਧਿਸਤ੍ਤੋ ਤਸ੍ਸ ਮਹਨ੍ਤਂ ਯਸਂ ਅਦਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਾਹਂ ਆਨਨ੍ਦਂ ਵਰੇਨ ਸਨ੍ਤਪ੍ਪੇਸਿਂ ਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਬ੍ਰਾਹ੍ਮਣੋ ਆਨਨ੍ਦੋ ਅਹੋਸਿ, ਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਜੁਣ੍ਹਜਾਤਕਵਣ੍ਣਨਾ ਦੁਤਿਯਾ.

[੪੫੭] ੩. ਧਮ੍ਮਦੇਵਪੁਤ੍ਤਜਾਤਕਵਣ੍ਣਨਾ

ਯਸੋਕਰੋ ਪੁਞ੍ਞਕਰੋਹਮਸ੍ਮੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦੇਵਦਤ੍ਤਸ੍ਸ ਪਥਵਿਪਵੇਸਨਂ ਆਰਬ੍ਭ ਕਥੇਸਿ. ਤਦਾ ਹਿ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਦੇਵਦਤ੍ਤੋ ਤਥਾਗਤੇਨ ਸਦ੍ਧਿਂ ਪਟਿਵਿਰੁਜ੍ਝਿਤ੍ਵਾ ਪਥਵਿਂ ਪਵਿਟ੍ਠੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ ਇਦਾਨੇਵੇਸ, ਭਿਕ੍ਖਵੇ, ਮਮ ਜਿਨਚਕ੍ਕੇ ਪਹਾਰਂ ਦਤ੍ਵਾ ਪਥਵਿਂ ਪਵਿਟ੍ਠੋ, ਪੁਬ੍ਬੇਪਿ ਧਮ੍ਮਚਕ੍ਕੇ ਪਹਾਰਂ ਦਤ੍ਵਾ ਪਥਵਿਂ ਪਵਿਸਿਤ੍ਵਾ ਅਵੀਚਿਪਰਾਯਣੋ ਜਾਤੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਮਾਵਚਰਦੇਵਲੋਕੇ ਧਮ੍ਮੋ ਨਾਮ ਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਦੇਵਦਤ੍ਤੋ ਅਧਮ੍ਮੋ ਨਾਮ. ਤੇਸੁ ਧਮ੍ਮੋ ਦਿਬ੍ਬਾਲਙ੍ਕਾਰਪਟਿਮਣ੍ਡਿਤੋ ਦਿਬ੍ਬਰਥਵਰਮਭਿਰੁਯ੍ਹ ਅਚ੍ਛਰਾਗਣਪਰਿਵੁਤੋ ਮਨੁਸ੍ਸੇਸੁ ਸਾਯਮਾਸਂ ਭੁਞ੍ਜਿਤ੍ਵਾ ਅਤ੍ਤਨੋ ਅਤ੍ਤਨੋ ਘਰਦ੍ਵਾਰੇ ਸੁਖਕਥਾਯ ਨਿਸਿਨ੍ਨੇਸੁ ਪੁਣ੍ਣਮੁਪੋਸਥਦਿਵਸੇ ਗਾਮਨਿਗਮਜਨਪਦਰਾਜਧਾਨੀਸੁ ਆਕਾਸੇ ਠਤ੍ਵਾ ‘‘ਪਾਣਾਤਿਪਾਤਾਦੀਹਿ ਦਸਹਿ ਅਕੁਸਲਕਮ੍ਮਪਥੇਹਿ ਵਿਰਮਿਤ੍ਵਾ ਮਾਤੁਪਟ੍ਠਾਨਧਮ੍ਮਂ ਪਿਤੁਪਟ੍ਠਾਨਧਮ੍ਮਂ ਤਿਵਿਧਸੁਚਰਿਤਧਮ੍ਮਞ੍ਚ ਪੂਰੇਥ, ਏਵਂ ਸਗ੍ਗਪਰਾਯਣਾ ਹੁਤ੍ਵਾ ਮਹਨ੍ਤਂ ਯਸਂ ਅਨੁਭਵਿਸ੍ਸਥਾ’’ਤਿ ਮਨੁਸ੍ਸੇ ਦਸ ਕੁਸਲਕਮ੍ਮਪਥੇ ਸਮਾਦਪੇਨ੍ਤੋ ਜਮ੍ਬੁਦੀਪਂ ਪਦਕ੍ਖਿਣਂ ਕਰੋਤਿ. ਅਧਮ੍ਮੋ ਪਨ ਦੇਵਪੁਤ੍ਤੋ ‘‘ਪਾਣਂ ਹਨਥਾ’’ਤਿਆਦਿਨਾ ਨਯੇਨ ਦਸ ਅਕੁਸਲਕਮ੍ਮਪਥੇ ਸਮਾਦਪੇਨ੍ਤੋ ਜਮ੍ਬੁਦੀਪਂ ਵਾਮਂ ਕਰੋਤਿ. ਅਥ ਤੇਸਂ ਆਕਾਸੇ ਰਥਾ ਸਮ੍ਮੁਖਾ ਅਹੇਸੁਂ. ਅਥ ਨੇਸਂ ਪਰਿਸਾ ‘‘ਤੁਮ੍ਹੇ ਕਸ੍ਸ, ਤੁਮ੍ਹੇ ਕਸ੍ਸਾ’’ਤਿ ਪੁਚ੍ਛਿਤ੍ਵਾ ‘‘ਮਯਂ ਧਮ੍ਮਸ੍ਸ, ਮਯਂ ਅਧਮ੍ਮਸ੍ਸਾ’’ਤਿ ਵਤ੍ਵਾ ਮਗ੍ਗਾ ਓਕ੍ਕਮਿਤ੍ਵਾ ਦ੍ਵਿਧਾ ਜਾਤਾ. ਧਮ੍ਮੋਪਿ ਅਧਮ੍ਮਂ ਆਮਨ੍ਤੇਤ੍ਵਾ ‘‘ਸਮ੍ਮ, ਤ੍ਵਂ ਅਧਮ੍ਮੋ, ਅਹਂ ਧਮ੍ਮੋ, ਮਗ੍ਗੋ ਮਯ੍ਹਂ ਅਨੁਚ੍ਛਵਿਕੋ, ਤਵ ਰਥਂ ਓਕ੍ਕਾਮੇਤ੍ਵਾ ਮਯ੍ਹਂ ਮਗ੍ਗਂ ਦੇਹੀ’’ਤਿ ਪਠਮਂ ਗਾਥਮਾਹ –

੨੬.

‘‘ਯਸੋਕਰੋ ਪੁਞ੍ਞਕਰੋਹਮਸ੍ਮਿ, ਸਦਾਤ੍ਥੁਤੋ ਸਮਣਬ੍ਰਾਹ੍ਮਣਾਨਂ;

ਮਗ੍ਗਾਰਹੋ ਦੇਵਮਨੁਸ੍ਸਪੂਜਿਤੋ, ਧਮ੍ਮੋ ਅਹਂ ਦੇਹਿ ਅਧਮ੍ਮ ਮਗ੍ਗ’’ਨ੍ਤਿ.

ਤਤ੍ਥ ਯਸੋਕਰੋਤਿ ਅਹਂ ਦੇਵਮਨੁਸ੍ਸਾਨਂ ਯਸਦਾਯਕੋ. ਦੁਤਿਯਪਦੇਪਿ ਏਸੇਵ ਨਯੋ. ਸਦਾਤ੍ਥੁਤੋਤਿ ਸਦਾ ਥੁਤੋ ਨਿਚ੍ਚਪਸਤ੍ਥੋ. ਤਤੋ ਪਰਾ –

੨੭.

‘‘ਅਧਮ੍ਮਯਾਨਂ ਦਲ਼੍ਹਮਾਰੁਹਿਤ੍ਵਾ, ਅਸਨ੍ਤਸਨ੍ਤੋ ਬਲਵਾਹਮਸ੍ਮਿ;

ਸ ਕਿਸ੍ਸ ਹੇਤੁਮ੍ਹਿ ਤਵਜ੍ਜ ਦਜ੍ਜਂ, ਮਗ੍ਗਂ ਅਹਂ ਧਮ੍ਮ ਅਦਿਨ੍ਨਪੁਬ੍ਬਂ.

੨੮.

‘‘ਧਮ੍ਮੋ ਹਵੇ ਪਾਤੁਰਹੋਸਿ ਪੁਬ੍ਬੇ, ਪਚ੍ਛਾ ਅਧਮ੍ਮੋ ਉਦਪਾਦਿ ਲੋਕੇ;

ਜੇਟ੍ਠੋ ਚ ਸੇਟ੍ਠੋ ਚ ਸਨਨ੍ਤਨੋ ਚ, ਉਯ੍ਯਾਹਿ ਜੇਟ੍ਠਸ੍ਸ ਕਨਿਟ੍ਠ ਮਗ੍ਗਾ.

੨੯.

‘‘ਨ ਯਾਚਨਾਯ ਨਪਿ ਪਾਤਿਰੂਪਾ, ਨ ਅਰਹਤਾ ਤੇਹਂ ਦਦੇਯ੍ਯਂ ਮਗ੍ਗਂ;

ਯੁਦ੍ਧਞ੍ਚ ਨੋ ਹੋਤੁ ਉਭਿਨ੍ਨਮਜ੍ਜ, ਯੁਦ੍ਧਮ੍ਹਿ ਯੋ ਜੇਸ੍ਸਤਿ ਤਸ੍ਸ ਮਗ੍ਗੋ.

੩੦.

‘‘ਸਬ੍ਬਾ ਦਿਸਾ ਅਨੁਵਿਸਟੋਹਮਸ੍ਮਿ, ਮਹਬ੍ਬਲੋ ਅਮਿਤਯਸੋ ਅਤੁਲ੍ਯੋ;

ਗੁਣੇਹਿ ਸਬ੍ਬੇਹਿ ਉਪੇਤਰੂਪੋ, ਧਮ੍ਮੋ ਅਧਮ੍ਮ ਤ੍ਵਂ ਕਥਂ ਵਿਜੇਸ੍ਸਸਿ.

੩੧.

‘‘ਲੋਹੇਨ ਵੇ ਹਞ੍ਞਤਿ ਜਾਤਰੂਪਂ, ਨ ਜਾਤਰੂਪੇਨ ਹਨਨ੍ਤਿ ਲੋਹਂ;

ਸਚੇ ਅਧਮ੍ਮੋ ਹਞ੍ਛਤਿ ਧਮ੍ਮਮਜ੍ਜ, ਅਯੋ ਸੁਵਣ੍ਣਂ ਵਿਯ ਦਸ੍ਸਨੇਯ੍ਯਂ.

੩੨.

‘‘ਸਚੇ ਤੁਵਂ ਯੁਦ੍ਧਬਲੋ ਅਧਮ੍ਮ, ਨ ਤੁਯ੍ਹ ਵੁਡ੍ਢਾ ਚ ਗਰੂ ਚ ਅਤ੍ਥਿ;

ਮਗ੍ਗਞ੍ਚ ਤੇ ਦਮ੍ਮਿ ਪਿਯਾਪ੍ਪਿਯੇਨ, ਵਾਚਾਦੁਰੁਤ੍ਤਾਨਿਪਿ ਤੇ ਖਮਾਮੀ’’ਤਿ. –

ਇਮਾ ਛ ਗਾਥਾ ਤੇਸਞ੍ਞੇਵ ਵਚਨਪਟਿਵਚਨਵਸੇਨ ਕਥਿਤਾ.

ਤਤ੍ਥ ਸ ਕਿਸ੍ਸ ਹੇਤੁਮ੍ਹਿ ਤਵਜ੍ਜ ਦਜ੍ਜਨ੍ਤਿ ਸੋਮ੍ਹਿ ਅਹਂ ਅਧਮ੍ਮੋ ਅਧਮ੍ਮਯਾਨਂ ਰਥਂ ਆਰੁਲ਼੍ਹੋ ਅਭੀਤੋ ਬਲਵਾ. ਕਿਂਕਾਰਣਾ ਅਜ੍ਜ ਭੋ ਧਮ੍ਮ, ਕਸ੍ਸਚਿ ਅਦਿਨ੍ਨਪੁਬ੍ਬਂ ਮਗ੍ਗਂ ਤੁਯ੍ਹਂ ਦਮ੍ਮੀਤਿ. ਪੁਬ੍ਬੇਤਿ ਪਠਮਕਪ੍ਪਿਕਕਾਲੇ ਇਮਸ੍ਮਿਂ ਲੋਕੇ ਦਸਕੁਸਲਕਮ੍ਮਪਥਧਮ੍ਮੋ ਚ ਪੁਬ੍ਬੇ ਪਾਤੁਰਹੋਸਿ, ਪਚ੍ਛਾ ਅਧਮ੍ਮੋ. ਜੇਟ੍ਠੋ ਚਾਤਿ ਪੁਰੇ ਨਿਬ੍ਬਤ੍ਤਭਾਵੇਨ ਅਹਂ ਜੇਟ੍ਠੋ ਚ ਸੇਟ੍ਠੋ ਚ ਪੋਰਾਣਕੋ ਚ, ਤ੍ਵਂ ਪਨ ਕਨਿਟ੍ਠੋ, ਤਸ੍ਮਾ ਮਗ੍ਗਾ ਉਯ੍ਯਾਹੀਤਿ ਵਦਤਿ. ਨਪਿ ਪਾਤਿਰੂਪਾਤਿ ਅਹਞ੍ਹਿ ਤੇ ਨੇਵ ਯਾਚਨਾਯ ਨ ਪਤਿਰੂਪਵਚਨੇਨ ਮਗ੍ਗਾਰਹਤਾਯ ਮਗ੍ਗਂ ਦਦੇਯ੍ਯਂ. ਅਨੁਵਿਸਟੋਤਿ ਅਹਂ ਚਤਸ੍ਸੋ ਦਿਸਾ ਚਤਸ੍ਸੋ ਅਨੁਦਿਸਾਤਿ ਸਬ੍ਬਾ ਦਿਸਾ ਅਤ੍ਤਨੋ ਗੁਣੇਨ ਪਤ੍ਥਟੋ ਪਞ੍ਞਾਤੋ ਪਾਕਟੋ. ਲੋਹੇਨਾਤਿ ਅਯਮੁਟ੍ਠਿਕੇਨ. ਹਞ੍ਛਤੀਤਿ ਹਨਿਸ੍ਸਤਿ. ਤੁਵਂ ਯੁਦ੍ਧਬਲੋ ਅਧਮ੍ਮਾਤਿ ਸਚੇ ਤ੍ਵਂ ਯੁਦ੍ਧਬਲੋਸਿ ਅਧਮ੍ਮ. ਵੁਡ੍ਢਾ ਚ ਗਰੂ ਚਾਤਿ ਯਦਿ ਤੁਯ੍ਹਂ ‘‘ਇਮੇ ਵੁਡ੍ਢਾ, ਇਮੇ ਗਰੂ ਪਣ੍ਡਿਤਾ’’ਤਿ ਏਵਂ ਨਤ੍ਥਿ. ਪਿਯਾਪ੍ਪਿਯੇਨਾਤਿ ਪਿਯੇਨਾਪਿ ਅਪ੍ਪਿਯੇਨਾਪਿ ਦਦਨ੍ਤੋ ਪਿਯੇਨ ਵਿਯ ਤੇ ਮਗ੍ਗਂ ਦਦਾਮੀਤਿ ਅਤ੍ਥੋ.

ਬੋਧਿਸਤ੍ਤੇਨ ਪਨ ਇਮਾਯ ਗਾਥਾਯ ਕਥਿਤਕ੍ਖਣੇਯੇਵ ਅਧਮ੍ਮੋ ਰਥੇ ਠਾਤੁਂ ਅਸਕ੍ਕੋਨ੍ਤੋ ਅਵਂਸਿਰੋ ਪਥਵਿਯਂ ਪਤਿਤ੍ਵਾ ਪਥਵਿਯਾ ਵਿਵਰੇ ਦਿਨ੍ਨੇ ਗਨ੍ਤ੍ਵਾ ਅਵੀਚਿਮ੍ਹਿਯੇਵ ਨਿਬ੍ਬਤ੍ਤਿ. ਏਤਮਤ੍ਥਂ ਵਿਦਿਤ੍ਵਾ ਭਗਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਸੇਸਗਾਥਾ ਅਭਾਸਿ –

੩੩.

‘‘ਇਦਞ੍ਚ ਸੁਤ੍ਵਾ ਵਚਨਂ ਅਧਮ੍ਮੋ, ਅਵਂਸਿਰੋ ਪਤਿਤੋ ਉਦ੍ਧਪਾਦੋ;

ਯੁਦ੍ਧਤ੍ਥਿਕੋ ਚੇ ਨ ਲਭਾਮਿ ਯੁਦ੍ਧਂ, ਏਤ੍ਤਾਵਤਾ ਹੋਤਿ ਹਤੋ ਅਧਮ੍ਮੋ.

੩੪.

‘‘ਖਨ੍ਤੀਬਲੋ ਯੁਦ੍ਧਬਲਂ ਵਿਜੇਤ੍ਵਾ, ਹਨ੍ਤ੍ਵਾ ਅਧਮ੍ਮਂ ਨਿਹਨਿਤ੍ਵ ਭੂਮ੍ਯਾ;

ਪਾਯਾਸਿ ਵਿਤ੍ਤੋ ਅਭਿਰੁਯ੍ਹ ਸਨ੍ਦਨਂ, ਮਗ੍ਗੇਨੇਵ ਅਤਿਬਲੋ ਸਚ੍ਚਨਿਕ੍ਕਮੋ.

੩੫.

‘‘ਮਾਤਾ ਪਿਤਾ ਸਮਣਬ੍ਰਾਹ੍ਮਣਾ ਚ, ਅਸਮ੍ਮਾਨਿਤਾ ਯਸ੍ਸ ਸਕੇ ਅਗਾਰੇ;

ਇਧੇਵ ਨਿਕ੍ਖਿਪ੍ਪ ਸਰੀਰਦੇਹਂ, ਕਾਯਸ੍ਸ ਭੇਦਾ ਨਿਰਯਂ ਵਜਨ੍ਤਿ ਤੇ;

ਯਥਾ ਅਧਮ੍ਮੋ ਪਤਿਤੋ ਅਵਂਸਿਰੋ.

੩੬.

‘‘ਮਾਤਾ ਪਿਤਾ ਸਮਣਬ੍ਰਾਹ੍ਮਣਾ ਚ, ਸੁਸਮ੍ਮਾਨਿਤਾ ਯਸ੍ਸ ਸਕੇ ਅਗਾਰੇ;

ਇਧੇਵ ਨਿਕ੍ਖਿਪ੍ਪ ਸਰੀਰਦੇਹਂ, ਕਾਯਸ੍ਸ ਭੇਦਾ ਸੁਗਤਿਂ ਵਜਨ੍ਤਿ ਤੇ;

ਯਥਾਪਿ ਧਮ੍ਮੋ ਅਭਿਰੁਯ੍ਹ ਸਨ੍ਦਨ’’ਨ੍ਤਿ.

ਤਤ੍ਥ ਯੁਦ੍ਧਤ੍ਥਿਕੋ ਚੇਤਿ ਅਯਂ ਤਸ੍ਸ ਵਿਲਾਪੋ, ਸੋ ਕਿਰੇਵਂ ਵਿਲਪਨ੍ਤੋਯੇਵ ਪਤਿਤ੍ਵਾ ਪਥਵਿਂ ਪਵਿਟ੍ਠੋ. ਏਤ੍ਤਾਵਤਾਤਿ ਭਿਕ੍ਖਵੇ, ਯਾਵਤਾ ਪਥਵਿਂ ਪਵਿਟ੍ਠੋ, ਤਾਵਤਾ ਅਧਮ੍ਮੋ ਹਤੋ ਨਾਮ ਹੋਤਿ. ਖਨ੍ਤੀਬਲੋਤਿ ਭਿਕ੍ਖਵੇ, ਏਵਂ ਅਧਮ੍ਮੋ ਪਥਵਿਂ ਪਵਿਟ੍ਠੋ ਅਧਿਵਾਸਨਖਨ੍ਤੀਬਲੋ ਤਂ ਯੁਦ੍ਧਬਲਂ ਵਿਜੇਤ੍ਵਾ ਵਧਿਤ੍ਵਾ ਭੂਮਿਯਂ ਨਿਹਨਿਤ੍ਵਾ ਪਾਤੇਤ੍ਵਾ ਵਿਤ੍ਤਜਾਤਤਾਯ ਵਿਤ੍ਤੋ ਅਤ੍ਤਨੋ ਰਥਂ ਆਰੁਯ੍ਹ ਮਗ੍ਗੇਨੇਵ ਸਚ੍ਚਨਿਕ੍ਕਮੋ ਤਥਪਰਕ੍ਕਮੋ ਧਮ੍ਮਦੇਵਪੁਤ੍ਤੋ ਪਾਯਾਸਿ. ਅਸਮ੍ਮਾਨਿਤਾਤਿ ਅਸਕ੍ਕਤਾ. ਸਰੀਰਦੇਹਨ੍ਤਿ ਇਮਸ੍ਮਿਂਯੇਵ ਲੋਕੇ ਸਰੀਰਸਙ੍ਖਾਤਂ ਦੇਹਂ ਨਿਕ੍ਖਿਪਿਤ੍ਵਾ. ਨਿਰਯਂ ਵਜਨ੍ਤੀਤਿ ਯਸ੍ਸ ਪਾਪਪੁਗ੍ਗਲਸ੍ਸ ਏਤੇ ਸਕ੍ਕਾਰਾਰਹਾ ਗੇਹੇ ਅਸਕ੍ਕਤਾ, ਤਥਾਰੂਪਾ ਯਥਾ ਅਧਮ੍ਮੋ ਪਤਿਤੋ ਅਵਂਸਿਰੋ, ਏਵਂ ਅਵਂਸਿਰਾ ਨਿਰਯਂ ਵਜਨ੍ਤੀਤਿ ਅਤ੍ਥੋ. ਸੁਗਤਿਂ ਵਜਨ੍ਤੀਤਿ ਯਸ੍ਸ ਪਨੇਤੇ ਸਕ੍ਕਤਾ, ਤਾਦਿਸਾ ਪਣ੍ਡਿਤਾ ਯਥਾਪਿ ਧਮ੍ਮੋ ਸਨ੍ਦਨਂ ਅਭਿਰੁਯ੍ਹ ਦੇਵਲੋਕਂ ਗਤੋ, ਏਵਂ ਸੁਗਤਿਂ ਵਜਨ੍ਤੀਤਿ.

ਸਤ੍ਥਾ ਏਵਂ ਧਮ੍ਮਂ ਦੇਸੇਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਮਯਾ ਸਦ੍ਧਿਂ ਪਟਿਵਿਰੁਜ੍ਝਿਤ੍ਵਾ ਪਥਵਿਂ ਪਵਿਟ੍ਠੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਅਧਮ੍ਮੋ ਦੇਵਪੁਤ੍ਤੋ ਦੇਵਦਤ੍ਤੋ ਅਹੋਸਿ, ਪਰਿਸਾਪਿਸ੍ਸ ਦੇਵਦਤ੍ਤਪਰਿਸਾ, ਧਮ੍ਮੋ ਪਨ ਅਹਮੇਵ, ਪਰਿਸਾ ਬੁਦ੍ਧਪਰਿਸਾਯੇਵਾ’’ਤਿ.

ਧਮ੍ਮਦੇਵਪੁਤ੍ਤਜਾਤਕਵਣ੍ਣਨਾ ਤਤਿਯਾ.

[੪੫੮] ੪. ਉਦਯਜਾਤਕਵਣ੍ਣਨਾ

ਏਕਾ ਨਿਸਿਨ੍ਨਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਕੁਸਜਾਤਕੇ (ਜਾ. ੨.੨੦.੧ ਆਦਯੋ) ਆਵਿ ਭਵਿਸ੍ਸਤਿ. ਸਤ੍ਥਾ ਪਨ ਤਂ ਭਿਕ੍ਖੁਂ ‘‘ਸਚ੍ਚਂ ਕਿਰ ਤ੍ਵਂ ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਕਸ੍ਮਾ ਕਿਲੇਸਵਸੇਨ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਉਕ੍ਕਣ੍ਠਿਤੋਸਿ? ਪੋਰਾਣਕਪਣ੍ਡਿਤਾ ਸਮਿਦ੍ਧੇ ਦ੍ਵਾਦਸਯੋਜਨਿਕੇ ਸੁਰੁਨ੍ਧਨਨਗਰੇ ਰਜ੍ਜਂ ਕਾਰੇਨ੍ਤਾ ਦੇਵਚ੍ਛਰਪਟਿਭਾਗਾਯ ਇਤ੍ਥਿਯਾ ਸਦ੍ਧਿਂ ਸਤ੍ਤ ਵਸ੍ਸਸਤਾਨਿ ਏਕਗਬ੍ਭੇ ਵਸਨ੍ਤਾਪਿ ਇਨ੍ਦ੍ਰਿਯਾਨਿ ਭਿਨ੍ਦਿਤ੍ਵਾ ਲੋਭਵਸੇਨ ਨ ਓਲੋਕੇਸੁ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕਾਸਿਰਟ੍ਠੇ ਸੁਰੁਨ੍ਧਨਨਗਰੇ ਕਾਸਿਰਾਜਾ ਰਜ੍ਜਂ ਕਾਰੇਸਿ, ਤਸ੍ਸ ਨੇਵ ਪੁਤ੍ਤੋ, ਨ ਧੀਤਾ ਅਹੋਸਿ. ਸੋ ਅਤ੍ਤਨੋ ਦੇਵਿਯੋ ‘‘ਪੁਤ੍ਤੇ ਪਤ੍ਥੇਥਾ’’ਤਿ ਆਹ. ਅਗ੍ਗਮਹੇਸੀਪਿ ਰਞ੍ਞੋ ਵਚਨਂ ਸਮ੍ਪਟਿਚ੍ਛਿਤ੍ਵਾ ਤਥਾ ਅਕਾਸਿ. ਤਦਾ ਬੋਧਿਸਤ੍ਤੋ ਬ੍ਰਹ੍ਮਲੋਕਾ ਚਵਿਤ੍ਵਾ ਤਸ੍ਸੇਵ ਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਅਥਸ੍ਸ ਮਹਾਜਨਸ੍ਸ ਹਦਯਂ ਵਡ੍ਢੇਤ੍ਵਾ ਜਾਤਭਾਵੇਨ ‘‘ਉਦਯਭਦ੍ਦੋ’’ਤਿ ਨਾਮਂ ਕਰਿਂਸੁ. ਕੁਮਾਰਸ੍ਸ ਪਦਸਾ ਚਰਣਕਾਲੇ ਅਞ੍ਞੋਪਿ ਸਤ੍ਤੋ ਬ੍ਰਹ੍ਮਲੋਕਾ ਚਵਿਤ੍ਵਾ ਤਸ੍ਸੇਵ ਰਞ੍ਞੋ ਅਞ੍ਞਤਰਾਯ ਦੇਵਿਯਾ ਕੁਚ੍ਛਿਮ੍ਹਿ ਕੁਮਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸਾਪਿ ‘‘ਉਦਯਭਦ੍ਦਾ’’ਤਿ ਨਾਮਂ ਕਰਿਂਸੁ. ਕੁਮਾਰੋ ਵਯਪ੍ਪਤ੍ਤੋ ਸਬ੍ਬਸਿਪ੍ਪਨਿਪ੍ਫਤ੍ਤਿਂ ਪਾਪੁਣਿ, ਜਾਤਬ੍ਰਹ੍ਮਚਾਰੀ ਪਨ ਅਹੋਸਿ, ਸੁਪਿਨਨ੍ਤੇਨਪਿ ਮੇਥੁਨਧਮ੍ਮਂ ਨ ਜਾਨਾਤਿ, ਨ ਤਸ੍ਸ ਕਿਲੇਸੇਸੁ ਚਿਤ੍ਤਂ ਅਲ੍ਲੀਯਿ. ਰਾਜਾ ਪੁਤ੍ਤਂ ਰਜ੍ਜੇ ਅਭਿਸਿਞ੍ਚਿਤੁਕਾਮੋ ‘‘ਕੁਮਾਰਸ੍ਸ ਇਦਾਨਿ ਰਜ੍ਜਸੁਖਸੇਵਨਕਾਲੋ, ਨਾਟਕਾਪਿਸ੍ਸ ਪਚ੍ਚੁਪਟ੍ਠਾਪੇਸ੍ਸਾਮੀ’’ਤਿ ਸਾਸਨਂ ਪੇਸੇਸਿ. ਬੋਧਿਸਤ੍ਤੋ ‘‘ਨ ਮਯ੍ਹਂ ਰਜ੍ਜੇਨਤ੍ਥੋ, ਕਿਲੇਸੇਸੁ ਮੇ ਚਿਤ੍ਤਂ ਨ ਅਲ੍ਲੀਯਤੀ’’ਤਿ ਪਟਿਕ੍ਖਿਪਿਤ੍ਵਾ ਪੁਨਪ੍ਪੁਨਂ ਵੁਚ੍ਚਮਾਨੋ ਰਤ੍ਤਜਮ੍ਬੁਨਦਮਯਂ ਇਤ੍ਥਿਰੂਪਂ ਕਾਰੇਤ੍ਵਾ ‘‘ਏਵਰੂਪਂ ਇਤ੍ਥਿਂ ਲਭਮਾਨੋ ਰਜ੍ਜਂ ਸਮ੍ਪਟਿਚ੍ਛਿਸ੍ਸਾਮੀ’’ਤਿ ਮਾਤਾਪਿਤੂਨਂ ਪੇਸੇਸਿ. ਤੇ ਤਂ ਸੁਵਣ੍ਣਰੂਪਕਂ ਸਕਲਜਮ੍ਬੁਦੀਪਂ ਪਰਿਹਾਰਾਪੇਤ੍ਵਾ ਤਥਾਰੂਪਂ ਇਤ੍ਥਿਂ ਅਲਭਨ੍ਤਾ ਉਦਯਭਦ੍ਦਂ ਅਲਙ੍ਕਾਰੇਤ੍ਵਾ ਤਸ੍ਸ ਸਨ੍ਤਿਕੇ ਠਪੇਸੁਂ. ਸਾ ਤਂ ਸੁਵਣ੍ਣਰੂਪਕਂ ਅਭਿਭਵਿਤ੍ਵਾ ਅਟ੍ਠਾਸਿ. ਅਥ ਨੇਸਂ ਅਨਿਚ੍ਛਮਾਨਾਨਞ੍ਞੇਵ ਵੇਮਾਤਿਕਂ ਭਗਿਨਿਂ ਉਦਯਭਦ੍ਦਕੁਮਾਰਿਂ ਅਗ੍ਗਮਹੇਸਿਂ ਕਤ੍ਵਾ ਬੋਧਿਸਤ੍ਤਂ ਰਜ੍ਜੇ ਅਭਿਸਿਞ੍ਚਿਂਸੁ. ਤੇ ਪਨ ਦ੍ਵੇਪਿ ਬ੍ਰਹ੍ਮਚਰਿਯਵਾਸਮੇਵ ਵਸਿਂਸੁ.

ਅਪਰਭਾਗੇ ਮਾਤਾਪਿਤੂਨਂ ਅਚ੍ਚਯੇਨ ਬੋਧਿਸਤ੍ਤੋ ਰਜ੍ਜਂ ਕਾਰੇਸਿ. ਉਭੋ ਏਕਗਬ੍ਭੇ ਵਸਮਾਨਾਪਿ ਲੋਭਵਸੇਨ ਇਨ੍ਦ੍ਰਿਯਾਨਿ ਭਿਨ੍ਦਿਤ੍ਵਾ ਅਞ੍ਞਮਞ੍ਞਂ ਨ ਓਲੋਕੇਸੁਂ, ਅਪਿਚ ਖੋ ਪਨ ‘‘ਯੋ ਅਮ੍ਹੇਸੁ ਪਠਮਤਰਂ ਕਾਲਂ ਕਰੋਤਿ, ਸੋ ਨਿਬ੍ਬਤ੍ਤਟ੍ਠਾਨਤੋ ਆਗਨ੍ਤ੍ਵਾ ‘ਅਸੁਕਟ੍ਠਾਨੇ ਨਿਬ੍ਬਤ੍ਤੋਸ੍ਮੀ’ਤਿ ਆਰੋਚੇਤੂ’’ਤਿ ਸਙ੍ਗਰਮਕਂਸੁ. ਅਥ ਖੋ ਬੋਧਿਸਤ੍ਤੋ ਅਭਿਸੇਕਤੋ ਸਤ੍ਤਵਸ੍ਸਸਤਚ੍ਚਯੇਨ ਕਾਲਮਕਾਸਿ. ਅਞ੍ਞੋ ਰਾਜਾ ਨਾਹੋਸਿ, ਉਦਯਭਦ੍ਦਾਯਯੇਵ ਆਣਾ ਪਵਤ੍ਤਿ. ਅਮਚ੍ਚਾ ਰਜ੍ਜਂ ਅਨੁਸਾਸਿਂਸੁ. ਬੋਧਿਸਤ੍ਤੋਪਿ ਚੁਤਿਕ੍ਖਣੇ ਤਾਵਤਿਂਸਭਵਨੇ ਸਕ੍ਕਤ੍ਤਂ ਪਤ੍ਵਾ ਯਸਮਹਨ੍ਤਤਾਯ ਸਤ੍ਤਾਹਂ ਅਨੁਸ੍ਸਰਿਤੁਂ ਨਾਸਕ੍ਖਿ. ਇਤਿ ਸੋ ਮਨੁਸ੍ਸਗਣਨਾਯ ਸਤ੍ਤਵਸ੍ਸਸਤਚ੍ਚਯੇਨ ਆਵਜ੍ਜੇਤ੍ਵਾ ‘‘ਉਦਯਭਦ੍ਦਂ ਰਾਜਧੀਤਰਂ ਧਨੇਨ ਵੀਮਂਸਿਤ੍ਵਾ ਸੀਹਨਾਦਂ ਨਦਾਪੇਤ੍ਵਾ ਧਮ੍ਮਂ ਦੇਸੇਤ੍ਵਾ ਸਙ੍ਗਰਂ ਮੋਚੇਤ੍ਵਾ ਆਗਮਿਸ੍ਸਾਮੀ’’ਤਿ ਚਿਨ੍ਤੇਸਿ. ਤਦਾ ਕਿਰ ਮਨੁਸ੍ਸਾਨਂ ਦਸਵਸ੍ਸਸਹਸ੍ਸਾਯੁਕਕਾਲੋ ਹੋਤਿ. ਰਾਜਧੀਤਾਪਿ ਤਂ ਦਿਵਸਂ ਰਤ੍ਤਿਭਾਗੇ ਪਿਹਿਤੇਸੁ ਦ੍ਵਾਰੇਸੁ ਠਪਿਤਆਰਕ੍ਖੇ ਸਤ੍ਤਭੂਮਿਕਪਾਸਾਦਵਰਤਲੇ ਅਲਙ੍ਕਤਸਿਰਿਗਬ੍ਭੇ ਏਕਿਕਾਵ ਨਿਚ੍ਚਲਾ ਅਤ੍ਤਨੋ ਸੀਲਂ ਆਵਜ੍ਜਮਾਨਾ ਨਿਸੀਦਿ. ਅਥ ਸਕ੍ਕੋ ਸੁਵਣ੍ਣਮਾਸਕਪੂਰਂ ਏਕਂ ਸੁਵਣ੍ਣਪਾਤਿਂ ਆਦਾਯ ਆਗਨ੍ਤ੍ਵਾ ਸਯਨਗਬ੍ਭੇਯੇਵ ਪਾਤੁਭਵਿਤ੍ਵਾ ਏਕਮਨ੍ਤਂ ਠਿਤੋ ਤਾਯ ਸਦ੍ਧਿਂ ਸਲ੍ਲਪਨ੍ਤੋ ਪਠਮਂ ਗਾਥਮਾਹ –

੩੭.

‘‘ਏਕਾ ਨਿਸਿਨ੍ਨਾ ਸੁਚਿ ਸਞ੍ਞਤੂਰੂ, ਪਾਸਾਦਮਾਰੁਯ੍ਹ ਅਨਿਨ੍ਦਿਤਙ੍ਗੀ;

ਯਾਚਾਮਿ ਤਂ ਕਿਨ੍ਨਰਨੇਤ੍ਤਚਕ੍ਖੁ, ਇਮੇਕਰਤ੍ਤਿਂ ਉਭਯੋ ਵਸੇਮਾ’’ਤਿ.

ਤਤ੍ਥ ਸੁਚੀਤਿ ਸੁਚਿਵਤ੍ਥਨਿਵਤ੍ਥਾ. ਸਞ੍ਞਤੂਰੂਤਿ ਸੁਟ੍ਠੁ ਠਪਿਤਊਰੂ, ਇਰਿਯਾਪਥਂ ਸਣ੍ਠਪੇਤ੍ਵਾ ਸੁਚਿਵਤ੍ਥਾ ਏਕਿਕਾਵ ਨਿਸਿਨ੍ਨਾਸੀਤਿ ਵੁਤ੍ਤਂ ਹੋਤਿ. ਅਨਿਨ੍ਦਿਤਙ੍ਗੀਤਿ ਪਾਦਨ੍ਤਤੋ ਯਾਵ ਕੇਸਗ੍ਗਾ ਅਨਿਨ੍ਦਿਤਸਰੀਰਾ ਪਰਮਸੋਭਗ੍ਗਪ੍ਪਤ੍ਤਸਰੀਰਾ. ਕਿਨ੍ਨਰਨੇਤ੍ਤਚਕ੍ਖੂਤਿ ਤੀਹਿ ਮਣ੍ਡਲੇਹਿ ਪਞ੍ਚਹਿ ਚ ਪਸਾਦੇਹਿ ਉਪਸੋਭਿਤਤ੍ਤਾ ਕਿਨ੍ਨਰਾਨਂ ਨੇਤ੍ਤਸਦਿਸੇਹਿ ਚਕ੍ਖੂਹਿ ਸਮਨ੍ਨਾਗਤੇ. ਇਮੇਕਰਤ੍ਤਿਨ੍ਤਿ ਇਮਂ ਏਕਰਤ੍ਤਂ ਅਜ੍ਜ ਇਮਸ੍ਮਿਂ ਅਲਙ੍ਕਤਸਯਨਗਬ੍ਭੇ ਏਕਤੋ ਵਸੇਯ੍ਯਾਮਾਤਿ ਯਾਚਤਿ.

ਤਤੋ ਰਾਜਧੀਤਾ ਦ੍ਵੇ ਗਾਥਾ ਅਭਾਸਿ –

੩੮.

‘‘ਓਕਿਣ੍ਣਨ੍ਤਰਪਰਿਖਂ, ਦਲ਼੍ਹਮਟ੍ਟਾਲਕੋਟ੍ਠਕਂ;

ਰਕ੍ਖਿਤਂ ਖਗ੍ਗਹਤ੍ਥੇਹਿ, ਦੁਪ੍ਪਵੇਸਮਿਦਂ ਪੁਰਂ.

੩੯.

‘‘ਦਹਰਸ੍ਸ ਯੁਵਿਨੋ ਚਾਪਿ, ਆਗਮੋ ਚ ਨ ਵਿਜ੍ਜਤਿ;

ਅਥ ਕੇਨ ਨੁ ਵਣ੍ਣੇਨ, ਸਙ੍ਗਮਂ ਇਚ੍ਛਸੇ ਮਯਾ’’ਤਿ.

ਤਤ੍ਥ ਓਕਿਣ੍ਣਨ੍ਤਰਪਰਿਖਨ੍ਤਿ ਇਦਂ ਦ੍ਵਾਦਸਯੋਜਨਿਕਂ ਸੁਰੁਨ੍ਧਨਪੁਰਂ ਅਨ੍ਤਰਨ੍ਤਰਾ ਉਦਕਪਰਿਖਾਨਂ ਕਦ੍ਦਮਪਰਿਖਾਨਂ ਸੁਕ੍ਖਪਰਿਖਾਨਂ ਓਕਿਣ੍ਣਤ੍ਤਾ ਓਕਿਣ੍ਣਨ੍ਤਰਪਰਿਖਂ. ਦਲ਼੍ਹਮਟ੍ਟਾਲਕੋਟ੍ਠਕਨ੍ਤਿ ਥਿਰਤਰੇਹਿ ਅਟ੍ਟਾਲਕੇਹਿ ਦ੍ਵਾਰਕੋਟ੍ਠਕੇਹਿ ਚ ਸਮਨ੍ਨਾਗਤਂ. ਖਗ੍ਗਹਤ੍ਥੇਹੀਤਿ ਆਵੁਧਹਤ੍ਥੇਹਿ ਦਸਹਿ ਯੋਧਸਹਸ੍ਸੇਹਿ ਰਕ੍ਖਿਤਂ. ਦੁਪ੍ਪਵੇਸਮਿਦਂ ਪੁਰਨ੍ਤਿ ਇਦਂ ਸਕਲਪੁਰਮ੍ਪਿ ਤਸ੍ਸ ਅਨ੍ਤੋ ਮਾਪਿਤਂ ਮਯ੍ਹਂ ਨਿਵਾਸਪੁਰਮ੍ਪਿ ਉਭਯਂ ਕਸ੍ਸਚਿ ਪਵਿਸਿਤੁਂ ਨ ਸਕ੍ਕਾ. ਆਗਮੋ ਚਾਤਿ ਇਧ ਇਮਾਯ ਵੇਲਾਯ ਤਰੁਣਸ੍ਸ ਵਾ ਯੋਬ੍ਬਨਪ੍ਪਤ੍ਤਸ੍ਸ ਵਾ ਥਾਮਸਮ੍ਪਨ੍ਨਯੋਧਸ੍ਸ ਵਾ ਅਞ੍ਞਸ੍ਸ ਵਾ ਮਹਨ੍ਤਮ੍ਪਿ ਪਣ੍ਣਾਕਾਰਂ ਗਹੇਤ੍ਵਾ ਆਗਚ੍ਛਨ੍ਤਸ੍ਸ ਆਗਮੋ ਨਾਮ ਨਤ੍ਥਿ. ਸਙ੍ਗਮਨ੍ਤਿ ਅਥ ਤ੍ਵਂ ਕੇਨ ਕਾਰਣੇਨ ਇਮਾਯ ਵੇਲਾਯ ਮਯਾ ਸਹ ਸਮਾਗਮਂ ਇਚ੍ਛਸੀਤਿ.

ਅਥ ਸਕ੍ਕੋ ਚਤੁਤ੍ਥਂ ਗਾਥਮਾਹ –

੪੦.

‘‘ਯਕ੍ਖੋਹਮਸ੍ਮਿ ਕਲ੍ਯਾਣਿ, ਆਗਤੋਸ੍ਮਿ ਤਵਨ੍ਤਿਕੇ;

ਤ੍ਵਂ ਮਂ ਨਨ੍ਦਯ ਭਦ੍ਦਨ੍ਤੇ, ਪੁਣ੍ਣਕਂਸਂ ਦਦਾਮਿ ਤੇ’’ਤਿ.

ਤਸ੍ਸਤ੍ਥੋ – ਕਲ੍ਯਾਣਿ, ਸੁਨ੍ਦਰਦਸ੍ਸਨੇ ਅਹਮੇਕੋ ਦੇਵਪੁਤ੍ਤੋ ਦੇਵਤਾਨੁਭਾਵੇਨ ਇਧਾਗਤੋ, ਤ੍ਵਂ ਅਜ੍ਜ ਮਂ ਨਨ੍ਦਯ ਤੋਸੇਹਿ, ਅਹਂ ਤੇ ਇਮਂ ਸੁਵਣ੍ਣਮਾਸਕਪੁਣ੍ਣਂ ਸੁਵਣ੍ਣਪਾਤਿਂ ਦਦਾਮੀਤਿ.

ਤਂ ਸੁਤ੍ਵਾ ਰਾਜਧੀਤਾ ਪਞ੍ਚਮਂ ਗਾਥਮਾਹ –

੪੧.

‘‘ਦੇਵਂਵ ਯਕ੍ਖਂ ਅਥ ਵਾ ਮਨੁਸ੍ਸਂ, ਨ ਪਤ੍ਥਯੇ ਉਦਯਮਤਿਚ੍ਚ ਅਞ੍ਞਂ;

ਗਚ੍ਛੇਵ ਤ੍ਵਂ ਯਕ੍ਖ ਮਹਾਨੁਭਾਵ, ਮਾ ਚਸ੍ਸੁ ਗਨ੍ਤ੍ਵਾ ਪੁਨਰਾਵਜਿਤ੍ਥਾ’’ਤਿ.

ਤਸ੍ਸਤ੍ਥੋ – ਅਹਂ ਦੇਵਰਾਜ, ਦੇਵਂ ਵਾ ਯਕ੍ਖਂ ਵਾ ਉਦਯਂ ਅਤਿਕ੍ਕਮਿਤ੍ਵਾ ਅਞ੍ਞਂ ਨ ਪਤ੍ਥੇਮਿ, ਸੋ ਤ੍ਵਂ ਗਚ੍ਛੇਵ, ਮਾ ਇਧ ਅਟ੍ਠਾਸਿ, ਨ ਮੇ ਤਯਾ ਆਭਤੇਨ ਪਣ੍ਣਾਕਾਰੇਨ ਅਤ੍ਥੋ, ਗਨ੍ਤ੍ਵਾ ਚ ਮਾ ਇਮਂ ਠਾਨਂ ਪੁਨਰਾਵਜਿਤ੍ਥਾਤਿ.

ਸੋ ਤਸ੍ਸਾ ਸੀਹਨਾਦਂ ਸੁਤ੍ਵਾ ਅਟ੍ਠਤ੍ਵਾ ਗਤਸਦਿਸੋ ਹੁਤ੍ਵਾ ਤਤ੍ਥੇਵ ਅਨ੍ਤਰਹਿਤੋ ਅਟ੍ਠਾਸਿ. ਸੋ ਪੁਨਦਿਵਸੇ ਤਾਯ ਵੇਲਾਯਮੇਵ ਸੁਵਣ੍ਣਮਾਸਕਪੂਰਂ ਰਜਤਪਾਤਿਂ ਆਦਾਯ ਤਾਯ ਸਦ੍ਧਿਂ ਸਲ੍ਲਪਨ੍ਤੋ ਛਟ੍ਠਂ ਗਾਥਮਾਹ –

੪੨.

‘‘ਯਾ ਸਾ ਰਤਿ ਉਤ੍ਤਮਾ ਕਾਮਭੋਗਿਨਂ, ਯਂਹੇਤੁ ਸਤ੍ਤਾ ਵਿਸਮਂ ਚਰਨ੍ਤਿ;

ਮਾ ਤਂ ਰਤਿਂ ਜੀਯਿ ਤੁਵਂ ਸੁਚਿਮ੍ਹਿਤੇ, ਦਦਾਮਿ ਤੇ ਰੂਪਿਯਂ ਕਂਸਪੂਰ’’ਨ੍ਤਿ.

ਤਸ੍ਸਤ੍ਥੋ – ਭਦ੍ਦੇ, ਰਾਜਧੀਤੇ ਯਾ ਏਸਾ ਕਾਮਭੋਗਿਸਤ੍ਤਾਨਂ ਰਤੀਸੁ ਮੇਥੁਨਕਾਮਰਤਿ ਨਾਮ ਉਤ੍ਤਮਾ ਰਤਿ, ਯਸ੍ਸਾ ਰਤਿਯਾ ਕਾਰਣਾ ਸਤ੍ਤਾ ਕਾਯਦੁਚ੍ਚਰਿਤਾਦਿਵਿਸਮਂ ਚਰਨ੍ਤਿ, ਤਂ ਰਤਿਂ ਤ੍ਵਂ ਭਦ੍ਦੇ, ਸੁਚਿਮ੍ਹਿਤੇ ਮਨਾਪਹਸਿਤੇ ਮਾ ਜੀਯਿ, ਅਹਮ੍ਪਿ ਆਗਚ੍ਛਨ੍ਤੋ ਨ ਤੁਚ੍ਛਹਤ੍ਥੋ ਆਗਤੋ, ਹਿਯ੍ਯੋ ਸੁਵਣ੍ਣਮਾਸਕਪੂਰਂ ਸੁਵਣ੍ਣਪਾਤਿਂ ਆਹਰਿਂ, ਅਜ੍ਜ ਰੂਪਿਯਪਾਤਿਂ, ਇਮਂ ਤੇ ਅਹਂ ਰੂਪਿਯਪਾਤਿਂ ਸੁਵਣ੍ਣਪੂਰਂ ਦਦਾਮੀਤਿ.

ਰਾਜਧੀਤਾ ਚਿਨ੍ਤੇਸਿ ‘‘ਅਯਂ ਕਥਾਸਲ੍ਲਾਪਂ ਲਭਨ੍ਤੋ ਪੁਨਪ੍ਪੁਨਂ ਆਗਮਿਸ੍ਸਤਿ, ਨ ਦਾਨਿ ਤੇਨ ਸਦ੍ਧਿਂ ਕਥੇਸ੍ਸਾਮੀ’’ਤਿ. ਸਾ ਕਿਞ੍ਚਿ ਨ ਕਥੇਸਿ.

ਸਕ੍ਕੋ ਤਸ੍ਸਾ ਅਕਥਿਤਭਾਵਂ ਞਤ੍ਵਾ ਤਤ੍ਥੇਵ ਅਨ੍ਤਰਹਿਤੋ ਹੁਤ੍ਵਾ ਪੁਨਦਿਵਸੇ ਤਾਯਮੇਵ ਵੇਲਾਯ ਲੋਹਪਾਤਿਂ ਕਹਾਪਣਪੂਰਂ ਆਦਾਯ ‘‘ਭਦ੍ਦੇ, ਤ੍ਵਂ ਮਂ ਕਾਮਰਤਿਯਾ ਸਨ੍ਤਪ੍ਪੇਹਿ, ਇਮਂ ਤੇ ਕਹਾਪਣਪੂਰਂ ਲੋਹਪਾਤਿਂ ਦਸ੍ਸਾਮੀ’’ਤਿ ਆਹ. ਤਂ ਦਿਸ੍ਵਾ ਰਾਜਧੀਤਾ ਸਤ੍ਤਮਂ ਗਾਥਮਾਹ –

੪੩.

‘‘ਨਾਰਿਂ ਨਰੋ ਨਿਜ੍ਝਪਯਂ ਧਨੇਨ, ਉਕ੍ਕਂਸਤੀ ਯਤ੍ਥ ਕਰੋਤਿ ਛਨ੍ਦਂ;

ਵਿਪਚ੍ਚਨੀਕੋ ਤਵ ਦੇਵਧਮ੍ਮੋ, ਪਚ੍ਚਕ੍ਖਤੋ ਥੋਕਤਰੇਨ ਏਸੀ’’ਤਿ.

ਤਸ੍ਸਤ੍ਥੋ – ਭੋ ਪੁਰਿਸ, ਤ੍ਵਂ ਜਲ਼ੋ. ਨਰੋ ਹਿ ਨਾਮ ਨਾਰਿਂ ਕਿਲੇਸਰਤਿਕਾਰਣਾ ਧਨੇਨ ਨਿਜ੍ਝਾਪੇਨ੍ਤੋ ਸਞ੍ਞਾਪੇਨ੍ਤੋ ਯਤ੍ਥ ਨਾਰਿਯਾ ਛਨ੍ਦਂ ਕਰੋਤਿ, ਤਂ ਉਕ੍ਕਂਸਤਿ ਵਣ੍ਣੇਤ੍ਵਾ ਥੋਮੇਤ੍ਵਾ ਬਹੁਤਰੇਨ ਧਨੇਨ ਪਲੋਭੇਤਿ, ਤੁਯ੍ਹਂ ਪਨੇਸੋ ਦੇਵਸਭਾਵੋ ਵਿਪਚ੍ਚਨੀਕੋ, ਤ੍ਵਞ੍ਹਿ ਮਯਾ ਪਚ੍ਚਕ੍ਖਤੋ ਥੋਕਤਰੇਨ ਏਸਿ, ਪਠਮਦਿਵਸੇ ਸੁਵਣ੍ਣਪੂਰਂ ਸੁਵਣ੍ਣਪਾਤਿਂ ਆਹਰਿਤ੍ਵਾ, ਦੁਤਿਯਦਿਵਸੇ ਸੁਵਣ੍ਣਪੂਰਂ ਰੂਪਿਯਪਾਤਿਂ, ਤਤਿਯਦਿਵਸੇ ਕਹਾਪਣਪੂਰਂ ਲੋਹਪਾਤਿਂ ਆਹਰਸੀਤਿ.

ਤਂ ਸੁਤ੍ਵਾ ਸਕ੍ਕੋ ‘‘ਭਦ੍ਦੇ ਰਾਜਕੁਮਾਰਿ, ਅਹਂ ਛੇਕਵਾਣਿਜੋ ਨ ਨਿਰਤ੍ਥਕੇਨ ਅਤ੍ਥਂ ਨਾਸੇਮਿ, ਸਚੇ ਤ੍ਵਂ ਆਯੁਨਾ ਵਾ ਵਣ੍ਣੇਨ ਵਾ ਵਡ੍ਢੇਯ੍ਯਾਸਿ, ਅਹਂ ਤੇ ਪਣ੍ਣਾਕਾਰਂ ਵਡ੍ਢੇਤ੍ਵਾ ਆਹਰੇਯ੍ਯਂ, ਤ੍ਵਂ ਪਨ ਪਰਿਹਾਯਸੇਵ, ਤੇਨਾਹਮ੍ਪਿ ਧਨਂ ਪਰਿਹਾਪੇਮੀ’’ਤਿ ਵਤ੍ਵਾ ਤਿਸ੍ਸੋ ਗਾਥਾ ਅਭਾਸਿ –

੪੪.

‘‘ਆਯੁ ਚ ਵਣ੍ਣੋ ਚ ਮਨੁਸ੍ਸਲੋਕੇ, ਨਿਹੀਯਤਿ ਮਨੁਜਾਨਂ ਸੁਗਤ੍ਤੇ;

ਤੇਨੇਵ ਵਣ੍ਣੇਨ ਧਨਮ੍ਪਿ ਤੁਯ੍ਹਂ, ਨਿਹੀਯਤਿ ਜਿਣ੍ਣਤਰਾਸਿ ਅਜ੍ਜ.

੪੫.

‘‘ਏਵਂ ਮੇ ਪੇਕ੍ਖਮਾਨਸ੍ਸ, ਰਾਜਪੁਤ੍ਤਿ ਯਸਸ੍ਸਿਨਿ;

ਹਾਯਤੇਵ ਤਵ ਵਣ੍ਣੋ, ਅਹੋਰਤ੍ਤਾਨਮਚ੍ਚਯੇ.

੪੬.

‘‘ਇਮਿਨਾਵ ਤ੍ਵਂ ਵਯਸਾ, ਰਾਜਪੁਤ੍ਤਿ ਸੁਮੇਧਸੇ;

ਬ੍ਰਹ੍ਮਚਰਿਯਂ ਚਰੇਯ੍ਯਾਸਿ, ਭਿਯ੍ਯੋ ਵਣ੍ਣਵਤੀ ਸਿਯਾ’’ਤਿ.

ਤਤ੍ਥ ਨਿਹੀਯਤੀਤਿ ਪਰਿਸ੍ਸਾਵਨੇ ਆਸਿਤ੍ਤਉਦਕਂ ਵਿਯ ਪਰਿਹਾਯਤਿ. ਮਨੁਸ੍ਸਲੋਕਸ੍ਮਿਞ੍ਹਿ ਸਤ੍ਤਾ ਜੀਵਿਤੇਨ ਵਣ੍ਣੇਨ ਚਕ੍ਖੁਪਸਾਦਾਦੀਹਿ ਚ ਦਿਨੇ ਦਿਨੇ ਪਰਿਹਾਯਨ੍ਤੇਵ. ਜਿਣ੍ਣਤਰਾਸੀਤਿ ਮਮ ਪਠਮਂ ਆਗਤਦਿਵਸੇ ਪਵਤ੍ਤਞ੍ਹਿ ਤੇ ਆਯੁ ਹਿਯ੍ਯੋ ਦਿਵਸਂ ਨ ਪਾਪੁਣਿ, ਕੁਠਾਰਿਯਾ ਛਿਨ੍ਨਂ ਵਿਯ ਤਤ੍ਥੇਵ ਨਿਰੁਜ੍ਝਿ, ਹਿਯ੍ਯੋ ਪਵਤ੍ਤਮ੍ਪਿ ਅਜ੍ਜਦਿਵਸਂ ਨ ਪਾਪੁਣਿ, ਹਿਯ੍ਯੋਵ ਕੁਠਾਰਿਯਾ ਛਿਨ੍ਨਂ ਵਿਯ ਨਿਰੁਜ੍ਝਿ, ਤਸ੍ਮਾ ਅਜ੍ਜ ਜਿਣ੍ਣਤਰਾਸਿ ਜਾਤਾ. ਏਵਂ ਮੇਤਿ ਤਿਟ੍ਠਤੁ ਹਿਯ੍ਯੋ ਚ ਪਰਹਿਯ੍ਯੋ ਚ, ਅਜ੍ਜੇਵ ਪਨ ਮਯ੍ਹਂ ਏਵਂ ਪੇਕ੍ਖਮਾਨਸ੍ਸੇਵ ਹਾਯਤੇਵ ਤਵ ਵਣ੍ਣੋ. ਅਹੋਰਤ੍ਤਾਨਮਚ੍ਚਯੇਤਿ ਇਤੋ ਪਟ੍ਠਾਯ ਰਤ੍ਤਿਨ੍ਦਿਵੇਸੁ ਵੀਤਿਵਤ੍ਤੇਸੁ ਅਹੋਰਤ੍ਤਾਨਂ ਅਚ੍ਚਯੇਨ ਅਪਣ੍ਣਤ੍ਤਿਕਭਾਵਮੇਵ ਗਮਿਸ੍ਸਸੀਤਿ ਦਸ੍ਸੇਤਿ. ਇਮਿਨਾਵਾਤਿ ਤਸ੍ਮਾ ਭਦ੍ਦੇ, ਸਚੇ ਤ੍ਵਂ ਇਮਿਨਾ ਵਯੇਨੇਵ ਇਮਸ੍ਮਿਂ ਸੁਵਣ੍ਣਵਣ੍ਣੇ ਸਰੀਰੇ ਰਜਾਯ ਅਵਿਲੁਤ੍ਤੇਯੇਵ ਸੇਟ੍ਠਚਰਿਯਂ ਚਰੇਯ੍ਯਾਸਿ, ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰੇਯ੍ਯਾਸਿ. ਭਿਯ੍ਯੋ ਵਣ੍ਣਵਤੀ ਸਿਯਾਤਿ ਅਤਿਰੇਕਤਰਵਣ੍ਣਾ ਭਵੇਯ੍ਯਾਸੀਤਿ.

ਤਤੋ ਰਾਜਧੀਤਾ ਇਤਰਂ ਗਾਥਮਾਹ –

੪੭.

‘‘ਦੇਵਾ ਨ ਜੀਰਨ੍ਤਿ ਯਥਾ ਮਨੁਸ੍ਸਾ, ਗਤ੍ਤੇਸੁ ਤੇਸਂ ਵਲਿਯੋ ਨ ਹੋਨ੍ਤਿ;

ਪੁਚ੍ਛਾਮਿ ਤਂ ਯਕ੍ਖ ਮਹਾਨੁਭਾਵ, ਕਥਂ ਨੁ ਦੇਵਾਨ ਸਰੀਰਦੇਹੋ’’ਤਿ.

ਤਤ੍ਥ ਸਰੀਰਦੇਹੋਤਿ ਸਰੀਰਸਙ੍ਖਾਤੋ ਦੇਹੋ, ਦੇਵਾਨਂ ਸਰੀਰਂ ਕਥਂ ਨ ਜੀਰਤਿ, ਇਦਂ ਅਹਂ ਤਂ ਪੁਚ੍ਛਾਮੀਤਿ ਵਦਤਿ.

ਅਥਸ੍ਸਾ ਕਥੇਨ੍ਤੋ ਸਕ੍ਕੋ ਇਤਰਂ ਗਾਥਮਾਹ –

੪੮.

‘‘ਦੇਵਾ ਨ ਜੀਰਨ੍ਤਿ ਯਥਾ ਮਨੁਸ੍ਸਾ, ਗਤ੍ਤੇਸੁ ਤੇਸਂ ਵਲਿਯੋ ਨ ਹੋਨ੍ਤਿ;

ਸੁਵੇ ਸੁਵੇ ਭਿਯ੍ਯਤਰੋਵ ਤੇਸਂ, ਦਿਬ੍ਬੋ ਚ ਵਣ੍ਣੋ ਵਿਪੁਲਾ ਚ ਭੋਗਾ’’ਤਿ.

ਤਤ੍ਥ ਯਥਾ ਮਨੁਸ੍ਸਾਤਿ ਯਥਾ ਮਨੁਸ੍ਸਾ ਜੀਰਨ੍ਤਾ ਰੂਪੇਨ ਵਣ੍ਣੇਨ ਭੋਗੇਨ ਚਕ੍ਖੁਪਸਾਦਾਦੀਹਿ ਚ ਜੀਰਨ੍ਤਿ, ਨ ਏਵਂ ਦੇਵਾ. ਤੇਸਞ੍ਹਿ ਗਤ੍ਤੇਸੁ ਵਲਿਯੋਪਿ ਨ ਸਨ੍ਤਿ, ਮਟ੍ਠਕਞ੍ਚਨਪਟ੍ਟਮਿਵ ਸਰੀਰਂ ਹੋਤਿ. ਸੁਵੇ ਸੁਵੇਤਿ ਦਿਵਸੇ ਦਿਵਸੇ. ਭਿਯ੍ਯਤਰੋਵਾਤਿ ਅਤਿਰੇਕਤਰੋਵ ਤੇਸਂ ਦਿਬ੍ਬੋ ਚ ਵਣ੍ਣੋ ਵਿਪੁਲਾ ਚ ਭੋਗਾ ਹੋਨ੍ਤਿ, ਮਨੁਸ੍ਸੇਸੁ ਹਿ ਰੂਪਪਰਿਹਾਨਿ ਚਿਰਜਾਤਭਾਵਸ੍ਸ ਸਕ੍ਖਿ, ਦੇਵੇਸੁ ਅਤਿਰੇਕਰੂਪਸਮ੍ਪਤ੍ਤਿ ਚ ਅਤਿਰੇਕਪਰਿਵਾਰਸਮ੍ਪਤ੍ਤਿ ਚ. ਏਵਂ ਅਪਰਿਹਾਨਧਮ੍ਮੋ ਨਾਮੇਸ ਦੇਵਲੋਕੋ. ਤਸ੍ਮਾ ਤ੍ਵਂ ਜਰਂ ਅਪ੍ਪਤ੍ਵਾਵ ਨਿਕ੍ਖਮਿਤ੍ਵਾ ਪਬ੍ਬਜ, ਏਵਂ ਪਰਿਹਾਨਿਯਸਭਾਵਾ ਮਨੁਸ੍ਸਲੋਕਾ ਚਵਿਤ੍ਵਾ ਅਪਰਿਹਾਨਿਯਸਭਾਵਂ ਏਵਰੂਪਂ ਦੇਵਲੋਕਂ ਗਮਿਸ੍ਸਸੀਤਿ.

ਸਾ ਦੇਵਲੋਕਸ੍ਸ ਵਣ੍ਣਂ ਸੁਤ੍ਵਾ ਤਸ੍ਸ ਗਮਨਮਗ੍ਗਂ ਪੁਚ੍ਛਨ੍ਤੀ ਇਤਰਂ ਗਾਥਮਾਹ –

੪੯.

‘‘ਕਿਂਸੂਧ ਭੀਤਾ ਜਨਤਾ ਅਨੇਕਾ, ਮਗ੍ਗੋ ਚ ਨੇਕਾਯਤਨਂ ਪਵੁਤ੍ਤੋ;

ਪੁਚ੍ਛਾਮਿ ਤਂ ਯਕ੍ਖ ਮਹਾਨੁਭਾਵ, ਕਤ੍ਥਟ੍ਠਿਤੋ ਪਰਲੋਕਂ ਨ ਭਾਯੇ’’ਤਿ.

ਤਤ੍ਥ ਕਿਂਸੂਧ ਭੀਤਾਤਿ ਦੇਵਰਾਜ, ਅਯਂ ਖਤ੍ਤਿਯਾਦਿਭੇਦਾ ਅਨੇਕਾ ਜਨਤਾ ਕਿਂਭੀਤਾ ਕਸ੍ਸ ਭਯੇਨ ਪਰਿਹਾਨਿਯਸਭਾਵਾ ਮਨੁਸ੍ਸਲੋਕਾ ਦੇਵਲੋਕਂ ਨ ਗਚ੍ਛਤੀਤਿ ਪੁਚ੍ਛਤਿ. ਮਗ੍ਗੋਤਿ ਦੇਵਲੋਕਗਾਮਿਮਗ੍ਗੋ. ਇਧ ਪਨ ‘‘ਕਿ’’ਨ੍ਤਿ ਆਹਰਿਤ੍ਵਾ ‘‘ਕੋ’’ਤਿ ਪੁਚ੍ਛਾ ਕਾਤਬ੍ਬਾ. ਅਯਞ੍ਹੇਤ੍ਥ ਅਤ੍ਥੋ ‘‘ਅਨੇਕਤਿਤ੍ਥਾਯਤਨਵਸੇਨ ਪਣ੍ਡਿਤੇਹਿ ਪਵੁਤ੍ਤੋ ਦੇਵਲੋਕਮਗ੍ਗੋ ਕੋ ਕਤਰੋ’’ਤਿ ਵੁਤ੍ਤੋ. ਕਤ੍ਥਟ੍ਠਿਤੋਤਿ ਪਰਲੋਕਂ ਗਚ੍ਛਨ੍ਤੋ ਕਤਰਸ੍ਮਿਂ ਮਗ੍ਗੇ ਠਿਤੋ ਨ ਭਾਯਤੀਤਿ.

ਅਥਸ੍ਸਾ ਕਥੇਨ੍ਤੋ ਸਕ੍ਕੋ ਇਤਰਂ ਗਾਥਮਾਹ –

੫੦.

‘‘ਵਾਚਂ ਮਨਞ੍ਚ ਪਣਿਧਾਯ ਸਮ੍ਮਾ, ਕਾਯੇਨ ਪਾਪਾਨਿ ਅਕੁਬ੍ਬਮਾਨੋ;

ਬਹੁਨ੍ਨਪਾਨਂ ਘਰਮਾਵਸਨ੍ਤੋ, ਸਦ੍ਧੋ ਮੁਦੂ ਸਂਵਿਭਾਗੀ ਵਦਞ੍ਞੂ;

ਸਙ੍ਗਾਹਕੋ ਸਖਿਲੋ ਸਣ੍ਹਵਾਚੋ, ਏਤ੍ਥਟ੍ਠਿਤੋ ਪਰਲੋਕਂ ਨ ਭਾਯੇ’’ਤਿ.

ਤਸ੍ਸਤ੍ਥੋ – ਭਦ੍ਦੇ, ਉਦਯੇ ਵਾਚਂ ਮਨਞ੍ਚ ਸਮ੍ਮਾ ਠਪੇਤ੍ਵਾ ਕਾਯੇਨ ਪਾਪਾਨਿ ਅਕਰੋਨ੍ਤੋ ਇਮੇ ਦਸ ਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਨ੍ਤੋ ਬਹੁਅਨ੍ਨਪਾਨੇ ਪਹੂਤਦੇਯ੍ਯਧਮ੍ਮੇ ਘਰੇ ਵਸਨ੍ਤੋ ‘‘ਦਾਨਸ੍ਸ ਵਿਪਾਕੋ ਅਤ੍ਥੀ’’ਤਿ ਸਦ੍ਧਾਯ ਸਮਨ੍ਨਾਗਤੋ ਮੁਦੁਚਿਤ੍ਤੋ ਦਾਨਸਂਵਿਭਾਗਤਾਯ ਸਂਵਿਭਾਗੀ ਪਬ੍ਬਜਿਤਾ ਭਿਕ੍ਖਾਯ ਚਰਮਾਨਾ ਵਦਨ੍ਤਿ ਨਾਮ, ਤੇਸਂ ਪਚ੍ਚਯਦਾਨੇਨ ਤਸ੍ਸ ਵਾਦਸ੍ਸ ਜਾਨਨਤੋ ਵਦਞ੍ਞੂ ਚਤੂਹਿ ਸਙ੍ਗਹਵਤ੍ਥੂਹਿ ਸਙ੍ਗਹਤਾਯ ਸਙ੍ਗਾਹਕੋ ਪਿਯਵਾਦਿਤਾਯ ਸਖਿਲੋ ਮਟ੍ਠਵਚਨਤਾਯ ਸਣ੍ਹਵਾਚੋ ਏਤ੍ਥ ਏਤ੍ਤਕੇ ਗੁਣਰਾਸਿਮ੍ਹਿ ਠਿਤੋ ਪਰਲੋਕਂ ਗਚ੍ਛਨ੍ਤੋ ਨ ਭਾਯਤੀਤਿ.

ਤਤੋ ਰਾਜਧੀਤਾ ਤਂ ਤਸ੍ਸ ਵਚਨਂ ਸੁਤ੍ਵਾ ਥੁਤਿਂ ਕਰੋਨ੍ਤੀ ਇਤਰਂ ਗਾਥਮਾਹ –

੫੧.

‘‘ਅਨੁਸਾਸਸਿ ਮਂ ਯਕ੍ਖ, ਯਥਾ ਮਾਤਾ ਯਥਾ ਪਿਤਾ;

ਉਲ਼ਾਰਵਣ੍ਣ ਪੁਚ੍ਛਾਮਿ, ਕੋ ਨੁ ਤ੍ਵਮਸਿ ਸੁਬ੍ਰਹਾ’’ਤਿ.

ਤਸ੍ਸਤ੍ਥੋ – ਯਥਾ ਮਾਤਾਪਿਤਰੋ ਪੁਤ੍ਤਕੇ ਅਨੁਸਾਸਨ੍ਤਿ, ਤਥਾ ਮਂ ਅਨੁਸਾਸਸਿ. ਉਲ਼ਾਰਵਣ੍ਣ ਸੋਭਗ੍ਗਪ੍ਪਤ੍ਤਰੂਪਦਾਰਕ ਕੋ ਨੁ ਅਸਿ ਤ੍ਵਂ ਏਵਂ ਅਚ੍ਚੁਗ੍ਗਤਸਰੀਰੋਤਿ.

ਤਤੋ ਬੋਧਿਸਤ੍ਤੋ ਇਤਰਂ ਗਾਥਮਾਹ –

੫੨.

‘‘ਉਦਯੋਹਮਸ੍ਮਿ ਕਲ੍ਯਾਣਿ, ਸਙ੍ਗਰਤ੍ਤਾ ਇਧਾਗਤੋ;

ਆਮਨ੍ਤ ਖੋ ਤਂ ਗਚ੍ਛਾਮਿ, ਮੁਤ੍ਤੋਸ੍ਮਿ ਤਵ ਸਙ੍ਗਰਾ’’ਤਿ.

ਤਸ੍ਸਤ੍ਥੋ – ਕਲ੍ਯਾਣਦਸ੍ਸਨੇ ਅਹਂ ਪੁਰਿਮਭਵੇ ਤਵ ਸਾਮਿਕੋ ਉਦਯੋ ਨਾਮ ਤਾਵਤਿਂਸਭਵਨੇ ਸਕ੍ਕੋ ਹੁਤ੍ਵਾ ਨਿਬ੍ਬਤ੍ਤੋ, ਇਧਾਗਚ੍ਛਨ੍ਤੋ ਨ ਕਿਲੇਸਵਸੇਨਾਗਤੋ, ਤਂ ਵੀਮਂਸਿਤ੍ਵਾ ਪਨ ਸਙ੍ਗਰਂ ਮੋਚੇਸ੍ਸਾਮੀਤਿ ਸਙ੍ਗਰਤ੍ਤਾ ਪੁਬ੍ਬੇ ਸਙ੍ਗਰਸ੍ਸ ਕਤਤ੍ਤਾ ਆਗਤੋਸ੍ਮਿ, ਇਦਾਨਿ ਤਂ ਆਮਨ੍ਤੇਤ੍ਵਾ ਗਚ੍ਛਾਮਿ, ਮੁਤ੍ਤੋਸ੍ਮਿ ਤਵ ਸਙ੍ਗਰਾਤਿ.

ਰਾਜਧੀਤਾ ਅਸ੍ਸਸਿਤ੍ਵਾ ‘‘ਸਾਮਿ, ਤ੍ਵਂ ਉਦਯਭਦ੍ਦਰਾਜਾ’’ਤਿ ਅਸ੍ਸੁਧਾਰਾ ਪਵਤ੍ਤਯਮਾਨਾ ‘‘ਅਹਂ ਤੁਮ੍ਹੇਹਿ ਵਿਨਾ ਵਸਿਤੁਂ ਨ ਸਕ੍ਕੋਮਿ, ਯਥਾ ਤੁਮ੍ਹਾਕਂ ਸਨ੍ਤਿਕੇ ਵਸਾਮਿ, ਤਥਾ ਮਂ ਅਨੁਸਾਸਥਾ’’ਤਿ ਵਤ੍ਵਾ ਇਤਰਂ ਗਾਥਂ ਅਭਾਸਿ –

੫੩.

‘‘ਸਚੇ ਖੋ ਤ੍ਵਂ ਉਦਯੋਸਿ, ਸਙ੍ਗਰਤ੍ਤਾ ਇਧਾਗਤੋ;

ਅਨੁਸਾਸ ਮਂ ਰਾਜਪੁਤ੍ਤ, ਯਥਾਸ੍ਸ ਪੁਨ ਸਙ੍ਗਮੋ’’ਤਿ.

ਅਥ ਨਂ ਅਨੁਸਾਸਨ੍ਤੋ ਮਹਾਸਤ੍ਤੋ ਚਤਸ੍ਸੋ ਗਾਥਾ ਅਭਾਸਿ –

੫੪.

‘‘ਅਤਿਪਤਤਿ ਵਯੋ ਖਣੋ ਤਥੇਵ, ਠਾਨਂ ਨਤ੍ਥਿ ਧੁਵਂ ਚਵਨ੍ਤਿ ਸਤ੍ਤਾ;

ਪਰਿਜੀਯਤਿ ਅਦ੍ਧੁਵਂ ਸਰੀਰਂ, ਉਦਯੇ ਮਾ ਪਮਾਦ ਚਰਸ੍ਸੁ ਧਮ੍ਮਂ.

੫੫.

‘‘ਕਸਿਣਾ ਪਥਵੀ ਧਨਸ੍ਸ ਪੂਰਾ, ਏਕਸ੍ਸੇਵ ਸਿਯਾ ਅਨਞ੍ਞਧੇਯ੍ਯਾ;

ਤਂ ਚਾਪਿ ਜਹਤਿ ਅਵੀਤਰਾਗੋ, ਉਦਯੇ ਮਾ ਪਮਾਦ ਚਰਸ੍ਸੁ ਧਮ੍ਮਂ.

੫੬.

‘‘ਮਾਤਾ ਚ ਪਿਤਾ ਚ ਭਾਤਰੋ ਚ, ਭਰਿਯਾ ਯਾਪਿ ਧਨੇਨ ਹੋਤਿ ਕੀਤਾ;

ਤੇ ਚਾਪਿ ਜਹਨ੍ਤਿ ਅਞ੍ਞਮਞ੍ਞਂ, ਉਦਯੇ ਮਾ ਪਮਾਦ ਚਰਸ੍ਸੁ ਧਮ੍ਮਂ.

੫੭.

‘‘ਕਾਯੋ ਪਰਭੋਜਨਨ੍ਤਿ ਞਤ੍ਵਾ, ਸਂਸਾਰੇ ਸੁਗਤਿਞ੍ਚ ਦੁਗ੍ਗਤਿਞ੍ਚ;

ਇਤ੍ਤਰਵਾਸੋਤਿ ਜਾਨਿਯਾਨ, ਉਦਯੇ ਮਾ ਪਮਾਦ ਚਰਸ੍ਸੁ ਧਮ੍ਮ’’ਨ੍ਤਿ.

ਤਤ੍ਥ ਅਤਿਪਤਤੀਤਿ ਅਤਿਵਿਯ ਪਤਤਿ, ਸੀਘਂ ਅਤਿਕ੍ਕਮਤਿ. ਵਯੋਤਿ ਪਠਮਵਯਾਦਿਤਿਵਿਧੋਪਿ ਵਯੋ. ਖਣੋ ਤਥੇਵਾਤਿ ਉਪ੍ਪਾਦਟ੍ਠਿਤਿਭਙ੍ਗਕ੍ਖਣੋਪਿ ਤਥੇਵ ਅਤਿਪਤਤਿ. ਉਭਯੇਨਪਿ ਭਿਨ੍ਨੋ ਇਮੇਸਂ ਸਤ੍ਤਾਨਂ ਆਯੁਸਙ੍ਖਾਰੋ ਨਾਮ ਸੀਘਸੋਤਾ ਨਦੀ ਵਿਯ ਅਨਿਵਤ੍ਤਨ੍ਤੋ ਸੀਘਂ ਅਤਿਕ੍ਕਮਤੀਤਿ ਦਸ੍ਸੇਤਿ. ਠਾਨਂ ਨਤ੍ਥੀਤਿ ‘‘ਉਪ੍ਪਨ੍ਨਾ ਸਙ੍ਖਾਰਾ ਅਭਿਜ੍ਜਿਤ੍ਵਾ ਤਿਟ੍ਠਨ੍ਤੂ’’ਤਿ ਪਤ੍ਥਨਾਯਪਿ ਤੇਸਂ ਠਾਨਂ ਨਾਮ ਨਤ੍ਥਿ, ਧੁਵਂ ਏਕਂਸੇਨੇਵ ਬੁਦ੍ਧਂ ਭਗਵਨ੍ਤਂ ਆਦਿਂ ਕਤ੍ਵਾ ਸਬ੍ਬੇਪਿ ਸਤ੍ਤਾ ਚਵਨ੍ਤਿ, ‘‘ਧੁਵਂ ਮਰਣਂ, ਅਦ੍ਧੁਵਂ ਜੀਵਿਤ’’ਨ੍ਤਿ ਏਵਂ ਮਰਣਸ੍ਸਤਿਂ ਭਾਵੇਹੀਤਿ ਦੀਪੇਤਿ. ਪਰਿਜੀਯਤੀਤਿ ਇਦਂ ਸੁਵਣ੍ਣਵਣ੍ਣਮ੍ਪਿ ਸਰੀਰਂ ਜੀਰਤੇਵ, ਏਵਂ ਜਾਨਾਹਿ. ਮਾ ਪਮਾਦਨ੍ਤਿ ਤਸ੍ਮਾ ਤ੍ਵਂ ਉਦਯਭਦ੍ਦੇ ਮਾ ਪਮਾਦਂ ਆਪਜ੍ਜਿ, ਅਪ੍ਪਮਤ੍ਤਾ ਹੁਤ੍ਵਾ ਦਸਕੁਸਲਕਮ੍ਮਪਥਧਮ੍ਮਂ ਚਰਾਹੀਤਿ.

ਕਸਿਣਾਤਿ ਸਕਲਾ. ਏਕਸ੍ਸੇਵਾਤਿ ਯਦਿ ਏਕਸ੍ਸੇਵ ਰਞ੍ਞੋ, ਤਸ੍ਮਿਂ ਏਕਸ੍ਮਿਂਯੇਵ ਅਨਞ੍ਞਾਧੀਨਾ ਅਸ੍ਸ. ਤਂ ਚਾਪਿ ਜਹਤਿ ਅਵੀਤਰਾਗੋਤਿ ਤਣ੍ਹਾਵਸਿਕੋ ਪੁਗ੍ਗਲੋ ਏਤ੍ਤਕੇਨਪਿ ਯਸੇਨ ਅਤਿਤ੍ਤੋ ਮਰਣਕਾਲੇ ਅਵੀਤਰਾਗੋਵ ਤਂ ਵਿਜਹਤਿ. ਏਵਂ ਤਣ੍ਹਾਯ ਅਪੂਰਣੀਯਭਾਵਂ ਜਾਨਾਹੀਤਿ ਦੀਪੇਤਿ. ਤੇ ਚਾਪੀਤਿ ਮਾਤਾ ਪੁਤ੍ਤਂ, ਪੁਤ੍ਤੋ ਮਾਤਰਂ, ਪਿਤਾ ਪੁਤ੍ਤਂ, ਪੁਤ੍ਤੋ ਪਿਤਰਂ, ਭਾਤਾ ਭਗਿਨਿਂ, ਭਗਿਨੀ ਭਾਤਰਂ, ਭਰਿਯਾ ਸਾਮਿਕਂ, ਸਾਮਿਕੋ ਭਰਿਯਨ੍ਤਿ ਏਤੇ ਅਞ੍ਞਮਞ੍ਞਂ ਜਹਨ੍ਤਿ, ਨਾਨਾ ਹੋਨ੍ਤਿ. ਏਵਂ ਸਤ੍ਤਾਨਂ ਨਾਨਾਭਾਵਵਿਨਾਭਾਵਂ ਜਾਨਾਹੀਤਿ ਦੀਪੇਤਿ.

ਪਰਭੋਜਨਨ੍ਤਿ ਵਿਵਿਧਾਨਂ ਕਾਕਾਦੀਨਂ ਪਰਸਤ੍ਤਾਨਂ ਭੋਜਨਂ. ਇਤ੍ਤਰਵਾਸੋਤਿ ਯਾ ਏਸਾ ਇਮਸ੍ਮਿਂ ਸਂਸਾਰੇ ਮਨੁਸ੍ਸਭੂਤਾ ਸੁਗ੍ਗਤਿ ਚ ਤਿਰਚ੍ਛਾਨਭੂਤਾ ਦੁਗ੍ਗਤਿ ਚ, ਏਤਂ ਉਭਯਮ੍ਪਿ ‘‘ਇਤ੍ਤਰਵਾਸੋ’’ਤਿ ਜਾਨਿਤ੍ਵਾ ਮਾ ਪਮਾਦਂ, ਚਰਸ੍ਸੁ ਧਮ੍ਮਂ. ਇਮੇਸਂ ਸਤ੍ਤਾਨਂ ਨਾਨਾਠਾਨਤੋ ਆਗਨ੍ਤ੍ਵਾ ਏਕਸ੍ਮਿਂ ਠਾਨੇ ਸਮਾਗਮੋ ਪਰਿਤ੍ਤੋ, ਇਮੇ ਸਤ੍ਤਾ ਅਪ੍ਪਕਸ੍ਮਿਂਯੇਵ ਕਾਲੇ ਏਕਤੋ ਵਸਨ੍ਤਿ, ਤਸ੍ਮਾ ਅਪ੍ਪਮਤ੍ਤਾ ਹੋਹੀਤਿ.

ਏਵਂ ਮਹਾਸਤ੍ਤੋ ਤਸ੍ਸਾ ਓਵਾਦਮਦਾਸਿ. ਸਾਪਿ ਤਸ੍ਸ ਧਮ੍ਮਕਥਾਯ ਪਸੀਦਿਤ੍ਵਾ ਥੁਤਿਂ ਕਰੋਨ੍ਤੀ ਓਸਾਨਗਾਥਮਾਹ –

੫੮.

‘‘ਸਾਧੁ ਭਾਸਤਿਯਂ ਯਕ੍ਖੋ, ਅਪ੍ਪਂ ਮਚ੍ਚਾਨ ਜੀਵਿਤਂ;

ਕਸਿਰਞ੍ਚ ਪਰਿਤ੍ਤਞ੍ਚ, ਤਞ੍ਚ ਦੁਕ੍ਖੇਨ ਸਂਯੁਤਂ;

ਸਾਹਂ ਏਕਾ ਪਬ੍ਬਜਿਸ੍ਸਾਮਿ, ਹਿਤ੍ਵਾ ਕਾਸਿਂ ਸੁਰੁਨ੍ਧਨ’’ਨ੍ਤਿ.

ਤਤ੍ਥ ਸਾਧੂਤਿ ‘‘ਅਪ੍ਪਂ ਮਚ੍ਚਾਨ ਜੀਵਿਤ’’ਨ੍ਤਿ ਭਾਸਮਾਨੋ ਅਯਂ ਦੇਵਰਾਜਾ ਸਾਧੁ ਭਾਸਤਿ. ਕਿਂਕਾਰਣਾ? ਇਦਞ੍ਹਿ ਕਸਿਰਞ੍ਚ ਦੁਕ੍ਖਂ ਅਸ੍ਸਾਦਰਹਿਤਂ, ਪਰਿਤ੍ਤਞ੍ਚ ਨ ਬਹੁਕਂ ਇਤ੍ਤਰਕਾਲਂ. ਸਚੇ ਹਿ ਕਸਿਰਮ੍ਪਿ ਸਮਾਨਂ ਦੀਘਕਾਲਂ ਪਵਤ੍ਤੇਯ੍ਯ, ਪਰਿਤ੍ਤਕਮ੍ਪਿ ਸਮਾਨਂ ਸੁਖਂ ਭਵੇਯ੍ਯ, ਇਦਂ ਪਨ ਕਸਿਰਞ੍ਚੇਵ ਪਰਿਤ੍ਤਞ੍ਚ ਸਕਲੇਨ ਵਟ੍ਟਦੁਕ੍ਖੇਨ ਸਂਯੁਤਂ ਸਨ੍ਨਿਹਿਤਂ. ਸਾਹਨ੍ਤਿ ਸਾ ਅਹਂ. ਸੁਰੁਨ੍ਧਨਨ੍ਤਿ ਸੁਰੁਨ੍ਧਨਨਗਰਞ੍ਚ ਕਾਸਿਰਟ੍ਠਞ੍ਚ ਛਡ੍ਡੇਤ੍ਵਾ ਏਕਿਕਾਵ ਪਬ੍ਬਜਿਸ੍ਸਾਮੀਤਿ ਆਹ.

ਬੋਧਿਸਤ੍ਤੋ ਤਸ੍ਸਾ ਓਵਾਦਂ ਦਤ੍ਵਾ ਸਕਟ੍ਠਾਨਮੇਵ ਗਤੋ. ਸਾਪਿ ਪੁਨਦਿਵਸੇ ਅਮਚ੍ਚੇ ਰਜ੍ਜਂ ਪਟਿਚ੍ਛਾਪੇਤ੍ਵਾ ਅਨ੍ਤੋਨਗਰੇਯੇਵ ਰਮਣੀਯੇ ਉਯ੍ਯਾਨੇ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਧਮ੍ਮਂ ਚਰਿਤ੍ਵਾ ਆਯੁਪਰਿਯੋਸਾਨੇ ਤਾਵਤਿਂਸਭਵਨੇ ਬੋਧਿਸਤ੍ਤਸ੍ਸ ਪਾਦਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਰਾਜਧੀਤਾ ਰਾਹੁਲਮਾਤਾ ਅਹੋਸਿ, ਸਕ੍ਕੋ ਪਨ ਅਹਮੇਵ ਅਹੋਸਿਨ੍ਤਿ.

ਉਦਯਜਾਤਕਵਣ੍ਣਨਾ ਚਤੁਤ੍ਥਾ.

[੪੫੯] ੫. ਪਾਨੀਯਜਾਤਕਵਣ੍ਣਨਾ

ਮਿਤ੍ਤੋ ਮਿਤ੍ਤਸ੍ਸਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕਿਲੇਸਨਿਗ੍ਗਹਂ ਆਰਬ੍ਭ ਕਥੇਸਿ. ਏਕਸ੍ਮਿਞ੍ਹਿ ਸਮਯੇ ਸਾਵਤ੍ਥਿਵਾਸਿਨੋ ਪਞ੍ਚਸਤਾ ਗਿਹਿਸਹਾਯਕਾ ਤਥਾਗਤਸ੍ਸ ਧਮ੍ਮਦੇਸਨਂ ਸੁਤ੍ਵਾ ਪਬ੍ਬਜਿਤ੍ਵਾ ਉਪਸਮ੍ਪਨ੍ਨਾ ਅਨ੍ਤੋਕੋਟਿਸਨ੍ਥਾਰੇ ਵਸਨ੍ਤਾ ਅਡ੍ਢਰਤ੍ਤਸਮਯੇ ਕਾਮਵਿਤਕ੍ਕਂ ਵਿਤਕ੍ਕੇਸੁਂ. ਸਬ੍ਬਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਭਗਵਤੋ ਆਣਤ੍ਤਿਯਾ ਪਨਾਯਸ੍ਮਤਾ ਆਨਨ੍ਦੇਨ ਭਿਕ੍ਖੁਸਙ੍ਘੇ ਸਨ੍ਨਿਪਾਤਿਤੇ ਸਤ੍ਥਾ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ਅਨੋਦਿਸ੍ਸਕਂ ਕਤ੍ਵਾ ‘‘ਕਾਮਵਿਤਕ੍ਕਂ ਵਿਤਕ੍ਕਯਿਤ੍ਥਾ’’ਤਿ ਅਵਤ੍ਵਾ ਸਬ੍ਬਸਙ੍ਗਾਹਿਕਵਸੇਨੇਵ ‘‘ਭਿਕ੍ਖਵੇ, ਕਿਲੇਸੋ ਖੁਦ੍ਦਕੋ ਨਾਮ ਨਤ੍ਥਿ, ਭਿਕ੍ਖੁਨਾ ਨਾਮ ਉਪ੍ਪਨ੍ਨੁਪ੍ਪਨ੍ਨਾ ਕਿਲੇਸਾ ਨਿਗ੍ਗਹੇਤਬ੍ਬਾ, ਪੋਰਾਣਕਪਣ੍ਡਿਤਾ ਅਨੁਪ੍ਪਨ੍ਨੇਪਿ ਬੁਦ੍ਧੇ ਕਿਲੇਸੇ ਨਿਗ੍ਗਹੇਤ੍ਵਾ ਪਚ੍ਚੇਕਬੋਧਿਞਾਣਂ ਪਤ੍ਤਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਕਾਸਿਰਟ੍ਠੇ ਏਕਸ੍ਮਿਂ ਗਾਮਕੇ ਦ੍ਵੇ ਸਹਾਯਕਾ ਪਾਨੀਯਤੁਮ੍ਬਾਨਿ ਆਦਾਯ ਖੇਤ੍ਤਂ ਗਨ੍ਤ੍ਵਾ ਏਕਮਨ੍ਤਂ ਠਪੇਤ੍ਵਾ ਖੇਤ੍ਤਂ ਕੋਟ੍ਟੇਤ੍ਵਾ ਪਿਪਾਸਿਤਕਾਲੇ ਆਗਨ੍ਤ੍ਵਾ ਪਾਨੀਯਂ ਪਿਵਨ੍ਤਿ. ਤੇਸੁ ਏਕੋ ਪਾਨੀਯਤ੍ਥਾਯ ਆਗਨ੍ਤ੍ਵਾ ਅਤ੍ਤਨੋ ਪਾਨੀਯਂ ਰਕ੍ਖਨ੍ਤੋ ਇਤਰਸ੍ਸ ਤੁਮ੍ਬਤੋ ਪਿਵਿਤ੍ਵਾ ਸਾਯਂ ਅਰਞ੍ਞਾ ਨਿਕ੍ਖਮਿਤ੍ਵਾ ਨ੍ਹਾਯਿਤ੍ਵਾ ਠਿਤੋ ‘‘ਅਤ੍ਥਿ ਨੁ ਖੋ ਮੇ ਕਾਯਦ੍ਵਾਰਾਦੀਹਿ ਅਜ੍ਜ ਕਿਞ੍ਚਿ ਪਾਪਂ ਕਤ’’ਨ੍ਤਿ ਉਪਧਾਰੇਨ੍ਤੋ ਥੇਨੇਤ੍ਵਾ ਪਾਨੀਯਸ੍ਸ ਪਿਵਿਤਭਾਵਂ ਦਿਸ੍ਵਾ ਸਂਵੇਗਪ੍ਪਤ੍ਤੋ ਹੁਤ੍ਵਾ ‘‘ਅਯਂ ਤਣ੍ਹਾ ਵਡ੍ਢਮਾਨਾ ਮਂ ਅਪਾਯੇਸੁ ਖਿਪਿਸ੍ਸਤਿ, ਇਮਂ ਕਿਲੇਸਂ ਨਿਗ੍ਗਣ੍ਹਿਸ੍ਸਾਮੀ’’ਤਿ ਪਾਨੀਯਸ੍ਸ ਥੇਨੇਤ੍ਵਾ ਪਿਵਿਤਭਾਵਂ ਆਰਮ੍ਮਣਂ ਕਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਪਚ੍ਚੇਕਬੋਧਿਞਾਣਂ ਨਿਬ੍ਬਤ੍ਤੇਤ੍ਵਾ ਪਟਿਲਦ੍ਧਗੁਣਂ ਆਵਜ੍ਜੇਨ੍ਤੋ ਅਟ੍ਠਾਸਿ. ਅਥ ਨਂ ਇਤਰੋ ਨ੍ਹਾਯਿਤ੍ਵਾ ਉਟ੍ਠਿਤੋ ‘‘ਏਹਿ, ਸਮ੍ਮ, ਘਰਂ ਗਚ੍ਛਾਮਾ’’ਤਿ ਆਹ. ‘‘ਗਚ੍ਛ ਤ੍ਵਂ, ਮਮ ਘਰੇਨ ਕਿਚ੍ਚਂ ਨਤ੍ਥਿ, ਪਚ੍ਚੇਕਬੁਦ੍ਧਾ ਨਾਮ ਮਯ’’ਨ੍ਤਿ. ‘‘ਪਚ੍ਚੇਕਬੁਦ੍ਧਾ ਨਾਮ ਤੁਮ੍ਹਾਦਿਸਾ ਨ ਹੋਨ੍ਤੀ’’ਤਿ. ‘‘ਅਥ ਕੀਦਿਸਾ ਪਚ੍ਚੇਕਬੁਦ੍ਧਾ ਹੋਨ੍ਤੀ’’ਤਿ? ‘‘ਦ੍ਵਙ੍ਗੁਲਕੇਸਾ ਕਾਸਾਯਵਤ੍ਥਵਸਨਾ ਉਤ੍ਤਰਹਿਮਵਨ੍ਤੇ ਨਨ੍ਦਮੂਲਕਪਬ੍ਭਾਰੇ ਵਸਨ੍ਤੀ’’ਤਿ. ਸੋ ਸੀਸਂ ਪਰਾਮਸਿ, ਤਂ ਖਣਞ੍ਞੇਵਸ੍ਸ ਗਿਹਿਲਿਙ੍ਗਂ ਅਨ੍ਤਰਧਾਯਿ, ਸੁਰਤ੍ਤਦੁਪਟ੍ਟਂ ਨਿਵਤ੍ਥਮੇਵ, ਵਿਜ੍ਜੁਲਤਾਸਦਿਸਂ ਕਾਯਬਨ੍ਧਨਂ ਬਦ੍ਧਮੇਵ, ਅਲਤ੍ਤਕਪਾਟਲਵਣ੍ਣਂ ਉਤ੍ਤਰਾਸਙ੍ਗਚੀਵਰਂ ਏਕਂਸਂ ਕਤਮੇਵ, ਮੇਘਵਣ੍ਣਂ ਪਂਸੁਕੂਲਚੀਵਰਂ ਦਕ੍ਖਿਣਅਂਸਕੂਟੇ ਠਪਿਤਮੇਵ, ਭਮਰਵਣ੍ਣੋ ਮਤ੍ਤਿਕਾਪਤ੍ਤੋ ਵਾਮਅਂਸਕੂਟੇ ਲਗ੍ਗਿਤੋਵ ਅਹੋਸਿ. ਸੋ ਆਕਾਸੇ ਠਤ੍ਵਾ ਧਮ੍ਮਂ ਦੇਸੇਤ੍ਵਾ ਉਪ੍ਪਤਿਤ੍ਵਾ ਨਨ੍ਦਮੂਲਕਪਬ੍ਭਾਰੇਯੇਵ ਓਤਰਿ.

ਅਪਰੋਪਿ ਕਾਸਿਗਾਮੇਯੇਵ ਕੁਟੁਮ੍ਬਿਕੋ ਆਪਣੇ ਨਿਸਿਨ੍ਨੋ ਏਕਂ ਪੁਰਿਸਂ ਅਤ੍ਤਨੋ ਭਰਿਯਂ ਆਦਾਯ ਗਚ੍ਛਨ੍ਤਂ ਦਿਸ੍ਵਾ ਤਂ ਉਤ੍ਤਮਰੂਪਧਰਂ ਇਤ੍ਥਿਂ ਇਨ੍ਦ੍ਰਿਯਾਨਿ ਭਿਨ੍ਦਿਤ੍ਵਾ ਓਲੋਕੇਤ੍ਵਾ ਪੁਨ ਚਿਨ੍ਤੇਸਿ ‘‘ਅਯਂ ਲੋਭੋ ਵਡ੍ਢਮਾਨੋ ਮਂ ਅਪਾਯੇਸੁ ਖਿਪਿਸ੍ਸਤੀ’’ਤਿ ਸਂਵਿਗ੍ਗਮਾਨਸੋ ਵਿਪਸ੍ਸਨਂ ਵਡ੍ਢੇਤ੍ਵਾ ਪਚ੍ਚੇਕਬੋਧਿਞਾਣਂ ਨਿਬ੍ਬਤ੍ਤੇਤ੍ਵਾ ਆਕਾਸੇ ਠਿਤੋ ਧਮ੍ਮਂ ਦੇਸੇਤ੍ਵਾ ਨਨ੍ਦਮੂਲਕਪਬ੍ਭਾਰਮੇਵ ਗਤੋ.

ਅਪਰੇਪਿ ਕਾਸਿਗਾਮਵਾਸਿਨੋਯੇਵ ਦ੍ਵੇ ਪਿਤਾਪੁਤ੍ਤਾ ਏਕਤੋ ਮਗ੍ਗਂ ਪਟਿਪਜ੍ਜਿਂਸੁ. ਅਟਵੀਮੁਖੇ ਪਨ ਚੋਰਾ ਉਟ੍ਠਿਤਾ ਹੋਨ੍ਤਿ. ਤੇ ਪਿਤਾਪੁਤ੍ਤੇ ਲਭਿਤ੍ਵਾ ਪੁਤ੍ਤਂ ਗਹੇਤ੍ਵਾ ‘‘ਧਨਂ ਆਹਰਿਤ੍ਵਾ ਤਵ ਪੁਤ੍ਤਂ ਗਣ੍ਹਾ’’ਤਿ ਪਿਤਰਂ ਵਿਸ੍ਸਜ੍ਜੇਨ੍ਤਿ, ਦ੍ਵੇ ਭਾਤਰੋ ਲਭਿਤ੍ਵਾ ਕਨਿਟ੍ਠਂ ਗਹੇਤ੍ਵਾ ਜੇਟ੍ਠਂ ਵਿਸ੍ਸਜ੍ਜੇਨ੍ਤਿ, ਆਚਰਿਯਨ੍ਤੇਵਾਸਿਕੇ ਲਭਿਤ੍ਵਾ ਆਚਰਿਯਂ ਗਹੇਤ੍ਵਾ ਅਨ੍ਤੇਵਾਸਿਕਂ ਵਿਸ੍ਸਜ੍ਜੇਨ੍ਤਿ, ਅਨ੍ਤੇਵਾਸਿਕੋ ਸਿਪ੍ਪਲੋਭੇਨ ਧਨਂ ਆਹਰਿਤ੍ਵਾ ਆਚਰਿਯਂ ਗਣ੍ਹਿਤ੍ਵਾ ਗਚ੍ਛਤਿ. ਅਥ ਤੇ ਪਿਤਾਪੁਤ੍ਤਾਪਿ ਤਤ੍ਥ ਚੋਰਾਨਂ ਉਟ੍ਠਿਤਭਾਵਂ ਞਤ੍ਵਾ ‘‘ਤ੍ਵਂ ਮਂ ‘ਪਿਤਾ’ਤਿ ਮਾ ਵਦ, ਅਹਮ੍ਪਿ ਤਂ ‘ਪੁਤ੍ਤੋ’ਤਿ ਨ ਵਕ੍ਖਾਮੀ’’ਤਿ ਕਤਿਕਂ ਕਤ੍ਵਾ ਚੋਰੇਹਿ ਗਹਿਤਕਾਲੇ ‘‘ਤੁਮ੍ਹੇ ਅਞ੍ਞਮਞ੍ਞਂ ਕਿਂ ਹੋਥਾ’’ਤਿ ਪੁਟ੍ਠਾ ‘‘ਨ ਕਿਞ੍ਚਿ ਹੋਮਾ’’ਤਿ ਸਮ੍ਪਜਾਨਮੁਸਾਵਾਦਂ ਕਰਿਂਸੁ. ਤੇਸੁ ਅਟਵਿਤੋ ਨਿਕ੍ਖਮਿਤ੍ਵਾ ਸਾਯਂ ਨ੍ਹਾਯਿਤ੍ਵਾ ਠਿਤੇਸੁ ਪੁਤ੍ਤੋ ਅਤ੍ਤਨੋ ਸੀਲਂ ਸੋਧੇਨ੍ਤੋ ਤਂ ਮੁਸਾਵਾਦਂ ਦਿਸ੍ਵਾ ‘‘ਇਦਂ ਪਾਪਂ ਵਡ੍ਢਮਾਨਂ ਮਂ ਅਪਾਯੇਸੁ ਖਿਪਿਸ੍ਸਤਿ, ਇਮਂ ਕਿਲੇਸਂ ਨਿਗ੍ਗਣ੍ਹਿਸ੍ਸਾਮੀ’’ਤਿ ਵਿਪਸ੍ਸਨਂ ਵਡ੍ਢੇਤ੍ਵਾ ਪਚ੍ਚੇਕਬੋਧਿਞਾਣਂ ਨਿਬ੍ਬਤ੍ਤੇਤ੍ਵਾ ਆਕਾਸੇ ਠਿਤੋ ਪਿਤੁ ਧਮ੍ਮਂ ਦੇਸੇਤ੍ਵਾ ਨਨ੍ਦਮੂਲਕਪਬ੍ਭਾਰਮੇਵ ਗਤੋ.

ਅਪਰੋਪਿ ਕਾਸਿਗਾਮੇਯੇਵ ਪਨ ਏਕੋ ਗਾਮਭੋਜਕੋ ਮਾਘਾਤਂ ਕਾਰਾਪੇਸਿ. ਅਥ ਨਂ ਬਲਿਕਮ੍ਮਕਾਲੇ ਮਹਾਜਨੋ ਸਨ੍ਨਿਪਤਿਤ੍ਵਾ ਆਹ ‘‘ਸਾਮਿ, ਮਯਂ ਮਿਗਸੂਕਰਾਦਯੋ ਮਾਰੇਤ੍ਵਾ ਯਕ੍ਖਾਨਂ ਬਲਿਕਮ੍ਮਂ ਕਰਿਸ੍ਸਾਮ, ਬਲਿਕਮ੍ਮਕਾਲੋ ਏਸੋ’’ਤਿ. ਤੁਮ੍ਹਾਕਂ ਪੁਬ੍ਬੇ ਕਰਣਨਿਯਾਮੇਨੇਵ ਕਰੋਥਾਤਿ ਮਨੁਸ੍ਸਾ ਬਹੁਂ ਪਾਣਾਤਿਪਾਤਮਕਂਸੁ. ਸੋ ਬਹੁਂ ਮਚ੍ਛਮਂਸਂ ਦਿਸ੍ਵਾ ‘‘ਇਮੇ ਮਨੁਸ੍ਸਾ ਏਤ੍ਤਕੇ ਪਾਣੇ ਮਾਰੇਨ੍ਤਾ ਮਮੇਵੇਕਸ੍ਸ ਵਚਨੇਨ ਮਾਰਯਿਂਸੂ’’ਤਿ ਕੁਕ੍ਕੁਚ੍ਚਂ ਕਤ੍ਵਾ ਵਾਤਪਾਨਂ ਨਿਸ੍ਸਾਯ ਠਿਤਕੋਵ ਵਿਪਸ੍ਸਨਂ ਵਡ੍ਢੇਤ੍ਵਾ ਪਚ੍ਚੇਕਬੋਧਿਞਾਣਂ ਨਿਬ੍ਬਤ੍ਤੇਤ੍ਵਾ ਆਕਾਸੇ ਠਿਤੋ ਮਹਾਜਨਸ੍ਸ ਧਮ੍ਮਂ ਦੇਸੇਤ੍ਵਾ ਨਨ੍ਦਮੂਲਕਪਬ੍ਭਾਰਮੇਵ ਗਤੋ.

ਅਪਰੋਪਿ ਕਾਸਿਰਟ੍ਠੇਯੇਵ ਗਾਮਭੋਜਕੋ ਮਜ੍ਜਵਿਕ੍ਕਯਂ ਵਾਰੇਤ੍ਵਾ ‘‘ਸਾਮਿ, ਪੁਬ੍ਬੇ ਇਮਸ੍ਮਿਂ ਕਾਲੇ ਸੁਰਾਛਣੋ ਨਾਮ ਹੋਤਿ, ਕਿਂ ਕਰੋਮਾ’’ਤਿ ਮਹਾਜਨੇਨ ਵੁਤ੍ਤੋ ‘‘ਤੁਮ੍ਹਾਕਂ ਪੋਰਾਣਕਨਿਯਾਮੇਨੇਵ ਕਰੋਥਾ’’ਤਿ ਆਹ. ਮਨੁਸ੍ਸਾ ਛਣਂ ਕਤ੍ਵਾ ਸੁਰਂ ਪਿਵਿਤ੍ਵਾ ਕਲਹਂ ਕਰੋਨ੍ਤਾ ਹਤ੍ਥਪਾਦੇ ਭਞ੍ਜਿਤ੍ਵਾ ਸੀਸਂ ਭਿਨ੍ਦਿਤ੍ਵਾ ਕਣ੍ਣੇ ਛਿਨ੍ਦਿਤ੍ਵਾ ਬਹੁਦਣ੍ਡੇਨ ਬਜ੍ਝਿਂਸੁ. ਗਾਮਭੋਜਕੋ ਤੇ ਦਿਸ੍ਵਾ ਚਿਨ੍ਤੇਸਿ ‘‘ਮਯਿ ਅਨਨੁਜਾਨਨ੍ਤੇ ਇਮੇ ਇਮਂ ਦੁਕ੍ਖਂ ਨ ਵਿਨ੍ਦੇਯ੍ਯੁ’’ਨ੍ਤਿ. ਸੋ ਏਤ੍ਤਕੇਨ ਕੁਕ੍ਕੁਚ੍ਚਂ ਕਤ੍ਵਾ ਵਾਤਪਾਨਂ ਨਿਸ੍ਸਾਯ ਠਿਤਕੋਵ ਵਿਪਸ੍ਸਨਂ ਵਡ੍ਢੇਤ੍ਵਾ ਪਚ੍ਚੇਕਬੋਧਿਞਾਣਂ ਨਿਬ੍ਬਤ੍ਤੇਤ੍ਵਾ ‘‘ਅਪ੍ਪਮਤ੍ਤਾ ਹੋਥਾ’’ਤਿ ਆਕਾਸੇ ਠਤ੍ਵਾ ਧਮ੍ਮਂ ਦੇਸੇਤ੍ਵਾ ਨਨ੍ਦਮੂਲਕਪਬ੍ਭਾਰਮੇਵ ਗਤੋ.

ਅਪਰਭਾਗੇ ਤੇ ਪਞ੍ਚ ਪਚ੍ਚੇਕਬੁਦ੍ਧਾ ਭਿਕ੍ਖਾਚਾਰਤ੍ਥਾਯ ਬਾਰਾਣਸਿਦ੍ਵਾਰੇ ਓਤਰਿਤ੍ਵਾ ਸੁਨਿਵਤ੍ਥਾ ਸੁਪਾਰੁਤਾ ਪਾਸਾਦਿਕੇਹਿ ਅਭਿਕ੍ਕਮਾਦੀਹਿ ਪਿਣ੍ਡਾਯ ਚਰਨ੍ਤਾ ਰਾਜਦ੍ਵਾਰਂ ਸਮ੍ਪਾਪੁਣਿਂਸੁ. ਰਾਜਾ ਤੇ ਦਿਸ੍ਵਾ ਪਸਨ੍ਨਚਿਤ੍ਤੋ ਰਾਜਨਿਵੇਸਨਂ ਪਵੇਸੇਤ੍ਵਾ ਪਾਦੇ ਧੋਵਿਤ੍ਵਾ ਗਨ੍ਧਤੇਲੇਨ ਮਕ੍ਖੇਤ੍ਵਾ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਪਰਿਵਿਸਿਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ ‘‘ਭਨ੍ਤੇ, ਤੁਮ੍ਹਾਕਂ ਪਠਮਵਯੇ ਪਬ੍ਬਜ੍ਜਾ ਸੋਭਤਿ, ਇਮਸ੍ਮਿਂ ਵਯੇ ਪਬ੍ਬਜਨ੍ਤਾ ਕਥਂ ਕਾਮੇਸੁ ਆਦੀਨਵਂ ਪਸ੍ਸਿਤ੍ਥ, ਕਿਂ ਵੋ ਆਰਮ੍ਮਣਂ ਅਹੋਸੀ’’ਤਿ ਪੁਚ੍ਛਿ. ਤੇ ਤਸ੍ਸ ਕਥੇਨ੍ਤਾ –

੫੯.

‘‘ਮਿਤ੍ਤੋ ਮਿਤ੍ਤਸ੍ਸ ਪਾਨੀਯਂ, ਅਦਿਨ੍ਨਂ ਪਰਿਭੁਞ੍ਜਿਸਂ;

ਤੇਨ ਪਚ੍ਛਾ ਵਿਜਿਗੁਚ੍ਛਿਂ, ਤਂ ਪਾਪਂ ਪਕਤਂ ਮਯਾ;

ਮਾ ਪੁਨ ਅਕਰਂ ਪਾਪਂ, ਤਸ੍ਮਾ ਪਬ੍ਬਜਿਤੋ ਅਹਂ.

੬੦.

‘‘ਪਰਦਾਰਞ੍ਚ ਦਿਸ੍ਵਾਨ, ਛਨ੍ਦੋ ਮੇ ਉਦਪਜ੍ਜਥ;

ਤੇਨ ਪਚ੍ਛਾ ਵਿਜਿਗੁਚ੍ਛਿਂ, ਤਂ ਪਾਪਂ ਪਕਤਂ ਮਯਾ;

ਮਾ ਪੁਨ ਅਕਰਂ ਪਾਪਂ, ਤਸ੍ਮਾ ਪਬ੍ਬਜਿਤੋ ਅਹਂ.

੬੧.

‘‘ਪਿਤਰਂ ਮੇ ਮਹਾਰਾਜ, ਚੋਰਾ ਅਗਣ੍ਹੁ ਕਾਨਨੇ;

ਤੇਸਾਹਂ ਪੁਚ੍ਛਿਤੋ ਜਾਨਂ, ਅਞ੍ਞਥਾ ਨਂ ਵਿਯਾਕਰਿਂ.

੬੨.

‘‘ਤੇਨ ਪਚ੍ਛਾ ਵਿਜਿਗੁਚ੍ਛਿਂ, ਤਂ ਪਾਪਂ ਪਕਤਂ ਮਯਾ;

ਮਾ ਪੁਨ ਅਕਰਂ ਪਾਪਂ, ਤਸ੍ਮਾ ਪਬ੍ਬਜਿਤੋ ਅਹਂ.

੬੩.

‘‘ਪਾਣਾਤਿਪਾਤਮਕਰੁਂ, ਸੋਮਯਾਗੇ ਉਪਟ੍ਠਿਤੇ;

ਤੇਸਾਹਂ ਸਮਨੁਞ੍ਞਾਸਿਂ.

੬੪.

‘‘ਤੇਨ ਪਚ੍ਛਾ ਵਿਜਿਗੁਚ੍ਛਿਂ, ਤਂ ਪਾਪਂ ਪਕਤਂ ਮਯਾ;

ਮਾ ਪੁਨ ਅਕਰਂ ਪਾਪਂ, ਤਸ੍ਮਾ ਪਬ੍ਬਜਿਤੋ ਅਹਂ.

੬੫.

‘‘ਸੁਰਾਮੇਰਯਮਾਧੁਕਾ, ਯੇ ਜਨਾ ਪਠਮਾਸੁ ਨੋ;

ਬਹੂਨਂ ਤੇ ਅਨਤ੍ਥਾਯ, ਮਜ੍ਜਪਾਨਮਕਪ੍ਪਯੁਂ;

ਤੇਸਾਹਂ ਸਮਨੁਞ੍ਞਾਸਿਂ.

੬੬.

‘‘ਤੇਨ ਪਚ੍ਛਾ ਵਿਜਿਗੁਚ੍ਛਿਂ, ਤਂ ਪਾਪਂ ਪਕਤਂ ਮਯਾ;

ਮਾ ਪੁਨ ਅਕਰਂ ਪਾਪਂ, ਤਸ੍ਮਾ ਪਬ੍ਬਜਿਤੋ ਅਹ’’ਨ੍ਤਿ. –

ਇਮਾ ਪਟਿਪਾਟਿਯਾ ਪਞ੍ਚ ਗਾਥਾ ਅਭਾਸਿਂਸੁ. ਰਾਜਾਪਿ ਏਕਮੇਕਸ੍ਸ ਬ੍ਯਾਕਰਣਂ ਸੁਤ੍ਵਾ ‘‘ਭਨ੍ਤੇ, ਅਯਂ ਪਬ੍ਬਜ੍ਜਾ ਤੁਮ੍ਹਾਕਂ ਯੇਵਾਨੁਚ੍ਛਵਿਕਾ’’ਤਿ ਥੁਤਿਮਕਾਸਿ.

ਤਤ੍ਥ ਮਿਤ੍ਤੋ ਮਿਤ੍ਤਸ੍ਸਾਤਿ ਮਹਾਰਾਜ, ਅਹਂ ਏਕਸ੍ਸ ਮਿਤ੍ਤੋ ਹੁਤ੍ਵਾ ਤਸ੍ਸ ਮਿਤ੍ਤਸ੍ਸ ਸਨ੍ਤਕਂ ਪਾਨੀਯਂ ਇਮਿਨਾ ਨਿਯਾਮੇਨੇਵ ਪਰਿਭੁਞ੍ਜਿਂ. ਤਸ੍ਮਾਤਿ ਯਸ੍ਮਾ ਪੁਥੁਜ੍ਜਨਾ ਨਾਮ ਪਾਪਕਮ੍ਮਂ ਕਰੋਨ੍ਤਿ, ਤਸ੍ਮਾ ਅਹਂ ਮਾ ਪੁਨ ਅਕਰਂ ਪਾਪਂ, ਤਂ ਪਾਪਂ ਆਰਮ੍ਮਣਂ ਕਤ੍ਵਾ ਪਬ੍ਬਜਿਤੋਮ੍ਹਿ. ਛਨ੍ਦੋਤਿ ਮਹਾਰਾਜ, ਇਮਿਨਾਵ ਨਿਯਾਮੇਨ ਮਮ ਪਰਦਾਰਂ ਦਿਸ੍ਵਾ ਕਾਮੇ ਛਨ੍ਦੋ ਉਪ੍ਪਜ੍ਜਿ. ਅਗਣ੍ਹੂਤਿ ਅਗਣ੍ਹਿਂਸੁ. ਜਾਨਨ੍ਤਿ ਤੇਸਂ ਚੋਰਾਨਂ ‘‘ਅਯਂ ਕਿਂ ਤੇ ਹੋਤੀ’’ਤਿ ਪੁਚ੍ਛਿਤੋ ਜਾਨਨ੍ਤੋਯੇਵ ‘‘ਨ ਕਿਞ੍ਚਿ ਹੋਤੀ’’ਤਿ ਅਞ੍ਞਥਾ ਬ੍ਯਾਕਾਸਿਂ. ਸੋਮਯਾਗੇਤਿ ਨਵਚਨ੍ਦੇ ਉਟ੍ਠਿਤੇ ਸੋਮਯਾਗਂ ਨਾਮ ਯਕ੍ਖਬਲਿਂ ਕਰਿਂਸੁ, ਤਸ੍ਮਿਂ ਉਪਟ੍ਠਿਤੇ. ਸਮਨੁਞ੍ਞਾਸਿਨ੍ਤਿ ਸਮਨੁਞ੍ਞੋ ਆਸਿਂ. ਸੁਰਾਮੇਰਯਮਾਧੁਕਾਤਿ ਪਿਟ੍ਠਸੁਰਾਦਿਸੁਰਞ੍ਚ ਪੁਪ੍ਫਾਸਵਾਦਿਮੇਰਯਞ੍ਚ ਪਕ੍ਕਮਧੁ ਵਿਯ ਮਧੁਰਂ ਮਞ੍ਞਮਾਨਾ. ਯੇ ਜਨਾ ਪਠਮਾਸੁ ਨੋਤਿ ਯੇ ਨੋ ਗਾਮੇ ਜਨਾ ਪਠਮਂ ਏਵਰੂਪਾ ਆਸੁਂ ਅਹੇਸੁਂ. ਬਹੂਨਂ ਤੇਤਿ ਤੇ ਏਕਦਿਵਸਂ ਏਕਸ੍ਮਿਂ ਛਣੇ ਪਤ੍ਤੇ ਬਹੂਨਂ ਅਨਤ੍ਥਾਯ ਮਜ੍ਜਪਾਨਂ ਅਕਪ੍ਪਯਿਂਸੁ.

ਰਾਜਾ ਤੇਸਂ ਧਮ੍ਮਂ ਸੁਤ੍ਵਾ ਪਸਨ੍ਨਚਿਤ੍ਤੋ ਚੀਵਰਸਾਟਕੇ ਚ ਭੇਸਜ੍ਜਾਨਿ ਚ ਦਤ੍ਵਾ ਪਚ੍ਚੇਕਬੁਦ੍ਧੇ ਉਯ੍ਯੋਜੇਸਿ. ਤੇਪਿ ਤਸ੍ਸ ਅਨੁਮੋਦਨਂ ਕਤ੍ਵਾ ਤਤ੍ਥੇਵ ਅਗਮਂਸੁ. ਤਤੋ ਪਟ੍ਠਾਯ ਰਾਜਾ ਵਤ੍ਥੁਕਾਮੇਸੁ ਵਿਰਤ੍ਤੋ ਅਨਪੇਕ੍ਖੋ ਹੁਤ੍ਵਾ ਨਾਨਗ੍ਗਰਸਭੋਜਨਂ ਭੁਞ੍ਜਿਤ੍ਵਾ ਇਤ੍ਥਿਯੋ ਅਨਾਲਪਿਤ੍ਵਾ ਅਨੋਲੋਕੇਤ੍ਵਾ ਵਿਰਤ੍ਤਚਿਤ੍ਤੋ ਉਟ੍ਠਾਯ ਸਿਰਿਗਬ੍ਭਂ ਪਵਿਸਿਤ੍ਵਾ ਨਿਸਿਨ੍ਨੋ ਸੇਤਭਿਤ੍ਤਿਯਂ ਕਸਿਣਪਰਿਕਮ੍ਮਂ ਕਤ੍ਵਾ ਝਾਨਂ ਨਿਬ੍ਬਤ੍ਤੇਸਿ. ਸੋ ਝਾਨਪ੍ਪਤ੍ਤੋ ਕਾਮੇ ਗਰਹਨ੍ਤੋ –

੬੭.

‘‘ਧਿਰਤ੍ਥੁ ਸੁਬਹੂ ਕਾਮੇ, ਦੁਗ੍ਗਨ੍ਧੇ ਬਹੁਕਣ੍ਟਕੇ;

ਯੇ ਅਹਂ ਪਟਿਸੇਵਨ੍ਤੋ, ਨਾਲਭਿਂ ਤਾਦਿਸਂ ਸੁਖ’’ਨ੍ਤਿ. – ਗਾਥਮਾਹ;

ਤਤ੍ਥ ਬਹੁਕਣ੍ਟਕੇਤਿ ਬਹੂ ਪਚ੍ਚਾਮਿਤ੍ਤੇ. ਯੇ ਅਹਨ੍ਤਿ ਯੋ ਅਹਂ, ਅਯਮੇਵ ਵਾ ਪਾਠੋ. ਤਾਦਿਸਨ੍ਤਿ ਏਤਾਦਿਸਂ ਕਿਲੇਸਰਹਿਤਂ ਝਾਨਸੁਖਂ.

ਅਥਸ੍ਸ ਅਗ੍ਗਮਹੇਸੀ ‘‘ਅਯਂ ਰਾਜਾ ਪਚ੍ਚੇਕਬੁਦ੍ਧਾਨਂ ਧਮ੍ਮਕਥਂ ਸੁਤ੍ਵਾ ਉਕ੍ਕਣ੍ਠਿਤਰੂਪੋ ਅਹੋਸਿ, ਅਮ੍ਹੇਹਿ ਸਦ੍ਧਿਂ ਅਕਥੇਤ੍ਵਾਵ ਸਿਰਿਗਬ੍ਭਂ ਪਵਿਟ੍ਠੋ, ਪਰਿਗ੍ਗਣ੍ਹਿਸ੍ਸਾਮਿ ਤਾਵ ਨ’’ਨ੍ਤਿ ਚਿਨ੍ਤੇਤ੍ਵਾ ਸਿਰਿਗਬ੍ਭਦ੍ਵਾਰੇ ਠਿਤਾ ਰਞ੍ਞੋ ਕਾਮੇਸੁ ਗਰਹਨ੍ਤਸ੍ਸ ਉਦਾਨਂ ਸੁਤ੍ਵਾ ‘‘ਮਹਾਰਾਜ, ਤ੍ਵਂ ਕਾਮੇ ਗਰਹਸਿ, ਕਾਮਸੁਖਸਦਿਸਂ ਨਾਮ ਸੁਖਂ ਨਤ੍ਥੀ’’ਤਿ ਕਾਮੇ ਵਣ੍ਣੇਨ੍ਤੀ ਇਤਰਂ ਗਾਥਮਾਹ –

੬੮.

‘‘ਮਹਸ੍ਸਾਦਾ ਸੁਖਾ ਕਾਮਾ, ਨਤ੍ਥਿ ਕਾਮਾ ਪਰਂ ਸੁਖਂ;

ਯੇ ਕਾਮੇ ਪਟਿਸੇਵਨ੍ਤਿ, ਸਗ੍ਗਂ ਤੇ ਉਪਪਜ੍ਜਰੇ’’ਤਿ.

ਤਤ੍ਥ ਮਹਸ੍ਸਾਦਾਤਿ ਮਹਾਰਾਜ, ਏਤੇ ਕਾਮਾ ਨਾਮ ਮਹਾਅਸ੍ਸਾਦਾ, ਇਤੋ ਉਤ੍ਤਰਿਂ ਅਞ੍ਞਂ ਸੁਖਂ ਨਤ੍ਥਿ. ਕਾਮਸੇਵਿਨੋ ਹਿ ਅਪਾਯੇ ਅਨੁਪਗਮ੍ਮ ਸਗ੍ਗੇ ਨਿਬ੍ਬਤ੍ਤਨ੍ਤੀਤਿ ਅਤ੍ਥੋ.

ਤਂ ਸੁਤ੍ਵਾ ਬੋਧਿਸਤ੍ਤੋ ਤਸ੍ਸਾ ‘‘ਨਸ੍ਸ ਵਸਲਿ, ਕਿਂ ਕਥੇਸਿ, ਕਾਮੇਸੁ ਸੁਖਂ ਨਾਮ ਕੁਤੋ ਅਤ੍ਥਿ, ਵਿਪਰਿਣਾਮਦੁਕ੍ਖਾ ਏਤੇ’’ਤਿ ਗਰਹਨ੍ਤੋ ਸੇਸਗਾਥਾ ਅਭਾਸਿ –

੬੯.

‘‘ਅਪ੍ਪਸ੍ਸਾਦਾ ਦੁਖਾ ਕਾਮਾ, ਨਤ੍ਥਿ ਕਾਮਾ ਪਰਂ ਦੁਖਂ;

ਯੇ ਕਾਮੇ ਪਟਿਸੇਵਨ੍ਤਿ, ਨਿਰਯਂ ਤੇ ਉਪਪਜ੍ਜਰੇ.

੭੦.

‘‘ਅਸੀ ਯਥਾ ਸੁਨਿਸਿਤੋ, ਨੇਤ੍ਤਿਂਸੋਵ ਸੁਪਾਯਿਕੋ;

ਸਤ੍ਤੀਵ ਉਰਸਿ ਖਿਤ੍ਤਾ, ਕਾਮਾ ਦੁਕ੍ਖਤਰਾ ਤਤੋ.

੭੧.

‘‘ਅਙ੍ਗਾਰਾਨਂਵ ਜਲਿਤਂ, ਕਾਸੁਂ ਸਾਧਿਕਪੋਰਿਸਂ;

ਫਾਲਂਵ ਦਿਵਸਂਤਤ੍ਤਂ, ਕਾਮਾ ਦੁਕ੍ਖਤਰਾ ਤਤੋ.

੭੨.

‘‘ਵਿਸਂ ਯਥਾ ਹਲਾਹਲਂ, ਤੇਲਂ ਪਕ੍ਕੁਥਿਤਂ ਯਥਾ;

ਤਮ੍ਬਲੋਹਵਿਲੀਨਂਵ, ਕਾਮਾ ਦੁਕ੍ਖਤਰਾ ਤਤੋ’’ਤਿ.

ਤਤ੍ਥ ਨੇਤ੍ਤਿਂਸੋਤਿ ਨਿਕ੍ਕਰੁਣੋ, ਇਦਮ੍ਪਿ ਏਕਸ੍ਸ ਖਗ੍ਗਸ੍ਸ ਨਾਮਂ. ਦੁਕ੍ਖਤਰਾਤਿ ਏਵਂ ਜਲਿਤਙ੍ਗਾਰਕਾਸੁਂ ਵਾ ਦਿਵਸਂ ਤਤ੍ਤਂ ਫਾਲਂ ਵਾ ਪਟਿਚ੍ਚ ਯਂ ਦੁਕ੍ਖਂ ਉਪ੍ਪਜ੍ਜਤਿ, ਤਤੋਪਿ ਕਾਮਾਯੇਵ ਦੁਕ੍ਖਤਰਾਤਿ ਅਤ੍ਥੋ. ਅਨਨ੍ਤਰਗਾਥਾਯ ਯਥਾ ਏਤਾਨਿ ਵਿਸਾਦੀਨਿ ਦੁਕ੍ਖਾਵਹਨਤੋ ਦੁਕ੍ਖਾਨਿ, ਏਵਂ ਕਾਮਾਪਿ ਦੁਕ੍ਖਾ, ਤਂ ਪਨ ਕਾਮਦੁਕ੍ਖਂ ਇਤਰੇਹਿ ਦੁਕ੍ਖੇਹਿ ਦੁਕ੍ਖਤਰਨ੍ਤਿ ਅਤ੍ਥੋ.

ਏਵਂ ਮਹਾਸਤ੍ਤੋ ਦੇਵਿਯਾ ਧਮ੍ਮਂ ਦੇਸੇਤ੍ਵਾ ਅਮਚ੍ਚੇ ਸਨ੍ਨਿਪਾਤੇਤ੍ਵਾ ‘‘ਭੋਨ੍ਤੋ ਅਮਚ੍ਚਾ, ਤੁਮ੍ਹੇ ਰਜ੍ਜਂ ਪਟਿਪਜ੍ਜਥ, ਅਹਂ ਪਬ੍ਬਜਿਸ੍ਸਾਮੀ’’ਤਿ ਵਤ੍ਵਾ ਮਹਾਜਨਸ੍ਸ ਰੋਦਨ੍ਤਸ੍ਸ ਪਰਿਦੇਵਨ੍ਤਸ੍ਸ ਉਟ੍ਠਾਯ ਆਕਾਸੇ ਠਤ੍ਵਾ ਓਵਾਦਂ ਦਤ੍ਵਾ ਅਨਿਲਪਥੇਨੇਵ ਉਤ੍ਤਰਹਿਮਵਨ੍ਤਂ ਗਨ੍ਤ੍ਵਾ ਰਮਣੀਯੇ ਪਦੇਸੇ ਅਸ੍ਸਮਂ ਮਾਪੇਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਭਿਕ੍ਖਵੇ, ਕਿਲੇਸੋ ਖੁਦ੍ਦਕੋ ਨਾਮ ਨਤ੍ਥਿ, ਅਪ੍ਪਮਤ੍ਤਕੋਪਿ ਪਣ੍ਡਿਤੇਹਿ ਨਿਗ੍ਗਹਿਤਬ੍ਬੋਯੇਵਾ’’ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਪਞ੍ਚਸਤਾ ਭਿਕ੍ਖੂ ਅਰਹਤ੍ਤੇ ਪਤਿਟ੍ਠਹਿਂਸੁ. ਤਦਾ ਪਚ੍ਚੇਕਬੁਦ੍ਧਾ ਪਰਿਨਿਬ੍ਬਾਯਿਂਸੁ, ਦੇਵੀ ਰਾਹੁਲਮਾਤਾ ਅਹੋਸਿ, ਰਾਜਾ ਪਨ ਅਹਮੇਵ ਅਹੋਸਿਨ੍ਤਿ.

ਪਾਨੀਯਜਾਤਕਵਣ੍ਣਨਾ ਪਞ੍ਚਮਾ.

[੪੬੦] ੬. ਯੁਧਞ੍ਚਯਜਾਤਕਵਣ੍ਣਨਾ

ਮਿਤ੍ਤਾਮਚ੍ਚਪਰਿਬ੍ਯੂਲ਼੍ਹਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਹਾਭਿਨਿਕ੍ਖਮਨਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਧਮ੍ਮਸਭਾਯਂ ਸਨ੍ਨਿਪਤਿਤਾ ਭਿਕ੍ਖੂ ‘‘ਆਵੁਸੋ, ਸਚੇ ਦਸਬਲੋ ਅਗਾਰਂ ਅਜ੍ਝਾਵਸਿਸ੍ਸ, ਸਕਲਚਕ੍ਕਵਾਲ਼ਗਬ੍ਭੇ ਚਕ੍ਕਵਤ੍ਤਿਰਾਜਾ ਅਭਵਿਸ੍ਸ ਸਤ੍ਤਰਤਨਸਮਨ੍ਨਾਗਤੋ ਚਤੁਰਿਦ੍ਧੀਹਿ ਸਮਿਦ੍ਧੋ ਪਰੋਸਹਸ੍ਸਪੁਤ੍ਤਪਰਿਵਾਰੋ, ਸੋ ਏਵਰੂਪਂ ਸਿਰਿਵਿਭਵਂ ਪਹਾਯ ਕਾਮੇਸੁ ਦੋਸਂ ਦਿਸ੍ਵਾ ਅਡ੍ਢਰਤ੍ਤਸਮਯੇ ਛਨ੍ਨਸਹਾਯੋਵ ਕਣ੍ਟਕਮਾਰੁਯ੍ਹ ਨਿਕ੍ਖਮਿਤ੍ਵਾ ਅਨੋਮਨਦੀਤੀਰੇ ਪਬ੍ਬਜਿਤ੍ਵਾ ਛਬ੍ਬਸ੍ਸਾਨਿ ਦੁਕ੍ਕਰਕਾਰਿਕਂ ਕਤ੍ਵਾ ਸਮ੍ਮਾਸਮ੍ਬੋਧਿਂ ਪਤ੍ਤੋ’’ਤਿ ਸਤ੍ਥੁ ਗੁਣਕਥਂ ਕਥਯਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਤਥਾਗਤੋ ਇਦਾਨੇਵ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋ, ਪੁਬ੍ਬੇਪਿ ਦ੍ਵਾਦਸਯੋਜਨਿਕੇ ਬਾਰਾਣਸਿਨਗਰੇ ਰਜ੍ਜਂ ਪਹਾਯ ਨਿਕ੍ਖਨ੍ਤੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਰਮ੍ਮਨਗਰੇ ਸਬ੍ਬਦਤ੍ਤੋ ਨਾਮ ਰਾਜਾ ਅਹੋਸਿ. ਅਯਞ੍ਹਿ ਬਾਰਾਣਸੀ ਉਦਯਜਾਤਕੇ (ਜਾ. ੧.੧੧.੩੭ ਆਦਯੋ) ਸੁਰੁਨ੍ਧਨਨਗਰਂ ਨਾਮ ਜਾਤਾ, ਚੂਲ਼ਸੁਤਸੋਮਜਾਤਕੇ (ਜਾ. ੨.੧੭.੧੯੫ ਆਦਯੋ) ਸੁਦਸ੍ਸਨਂ ਨਾਮ, ਸੋਣਨਨ੍ਦਜਾਤਕੇ (ਜਾ. ੨.੨੦.੯੨ ਆਦਯੋ) ਬ੍ਰਹ੍ਮਵਡ੍ਢਨਂ ਨਾਮ, ਖਣ੍ਡਹਾਲਜਾਤਕੇ (ਜਾ. ੨.੨੨.੯੮੨ ਆਦਯੋ) ਪੁਪ੍ਫਵਤੀ ਨਾਮ, ਸਙ੍ਖਬ੍ਰਾਹ੍ਮਣਜਾਤਕੇ (ਜਾ. ੧.੧੦.੩੯ ਆਦਯੋ) ਮੋਲ਼ਿਨੀ ਨਾਮ, ਇਮਸ੍ਮਿਂ ਪਨ ਯੁਧਞ੍ਚਯਜਾਤਕੇ ਰਮ੍ਮਨਗਰਂ ਨਾਮ ਅਹੋਸਿ. ਏਵਮਸ੍ਸਾ ਕਦਾਚਿ ਨਾਮਂ ਪਰਿਵਤ੍ਤਤਿ. ਤਤ੍ਥ ਸਬ੍ਬਦਤ੍ਤਰਞ੍ਞੋ ਪੁਤ੍ਤਸਹਸ੍ਸਂ ਅਹੋਸਿ. ਯੁਧਞ੍ਚਯਸ੍ਸ ਨਾਮ ਜੇਟ੍ਠਪੁਤ੍ਤਸ੍ਸ ਉਪਰਜ੍ਜਂ ਅਦਾਸਿ. ਸੋ ਦਿਵਸੇ ਦਿਵਸੇ ਮਹਾਦਾਨਂ ਪਵਤ੍ਤੇਸਿ. ਏਵਂ ਗਚ੍ਛਨ੍ਤੇ ਕਾਲੇ ਬੋਧਿਸਤ੍ਤੋ ਏਕਦਿਵਸਂ ਪਾਤੋਵ ਰਥਵਰਮਾਰੁਯ੍ਹ ਮਹਨ੍ਤੇਨ ਸਿਰਿਵਿਭਵੇਨ ਉਯ੍ਯਾਨਕੀਲ਼ਂ ਗਚ੍ਛਨ੍ਤੋ ਰੁਕ੍ਖਗ੍ਗਤਿਣਗ੍ਗਸਾਖਗ੍ਗਮਕ੍ਕਟਕਸੁਤ੍ਤਜਾਲਾਦੀਸੁ ਮੁਤ੍ਤਾਜਾਲਾਕਾਰੇਨ ਲਗ੍ਗਿਤਉਸ੍ਸਵਬਿਨ੍ਦੂਨਿ ਦਿਸ੍ਵਾ ‘‘ਸਮ੍ਮ ਸਾਰਥਿ, ਕਿਂ ਨਾਮੇਤ’’ਨ੍ਤਿ ਪੁਚ੍ਛਿਤ੍ਵਾ ‘‘ਏਤੇ ਦੇਵ, ਹਿਮਸਮਯੇ ਪਤਨਕਉਸ੍ਸਵਬਿਨ੍ਦੂਨਿ ਨਾਮਾ’’ਤਿ ਸੁਤ੍ਵਾ ਦਿਵਸਭਾਗਂ ਉਯ੍ਯਾਨੇ ਕੀਲ਼ਿਤ੍ਵਾ ਸਾਯਨ੍ਹਕਾਲੇ ਪਚ੍ਚਾਗਚ੍ਛਨ੍ਤੋ ਤੇ ਅਦਿਸ੍ਵਾਵ ‘‘ਸਮ੍ਮ ਸਾਰਥਿ, ਕਹਂ ਨੁ ਖੋ ਏਤੇ ਉਸ੍ਸਵਬਿਨ੍ਦੂ, ਨ ਤੇ ਇਦਾਨਿ ਪਸ੍ਸਾਮੀ’’ਤਿ ਪੁਚ੍ਛਿ. ‘‘ਦੇਵ, ਤੇ ਸੂਰਿਯੇ ਉਗ੍ਗਚ੍ਛਨ੍ਤੇ ਸਬ੍ਬੇਵ ਭਿਜ੍ਜਿਤ੍ਵਾ ਪਥਵਿਯਂ ਪਤਨ੍ਤੀ’’ਤਿ ਸੁਤ੍ਵਾ ਸਂਵੇਗਪ੍ਪਤ੍ਤੋ ਹੁਤ੍ਵਾ ‘‘ਇਮੇਸਂ ਸਤ੍ਤਾਨਂ ਜੀਵਿਤਸਙ੍ਖਾਰਾਪਿ ਤਿਣਗ੍ਗੇ ਉਸ੍ਸਵਬਿਨ੍ਦੁਸਦਿਸਾਵ, ਮਯਾ ਬ੍ਯਾਧਿਜਰਾਮਰਣੇਹਿ ਅਪੀਲ਼ਿਤੇਯੇਵ ਮਾਤਾਪਿਤਰੋ ਆਪੁਚ੍ਛਿਤ੍ਵਾ ਪਬ੍ਬਜਿਤੁਂ ਵਟ੍ਟਤੀ’’ਤਿ ਉਸ੍ਸਵਬਿਨ੍ਦੁਮੇਵ ਆਰਮ੍ਮਣਂ ਕਤ੍ਵਾ ਆਦਿਤ੍ਤੇ ਵਿਯ ਤਯੋ ਭਵੇ ਪਸ੍ਸਨ੍ਤੋ ਅਤ੍ਤਨੋ ਗੇਹਂ ਅਗਨ੍ਤ੍ਵਾ ਅਲਙ੍ਕਤਪਟਿਯਤ੍ਤਾਯ ਵਿਨਿਚ੍ਛਯਸਾਲਾਯ ਨਿਸਿਨ੍ਨਸ੍ਸ ਪਿਤੁ ਸਨ੍ਤਿਕਂਯੇਵ ਗਨ੍ਤ੍ਵਾ ਪਿਤਰਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ਪਬ੍ਬਜ੍ਜਂ ਯਾਚਨ੍ਤੋ ਪਠਮਂ ਗਾਥਮਾਹ –

੭੩.

‘‘ਮਿਤ੍ਤਾਮਚ੍ਚਪਰਿਬ੍ਯੂਲ਼੍ਹਂ, ਅਹਂ ਵਨ੍ਦੇ ਰਥੇਸਭਂ;

ਪਬ੍ਬਜਿਸ੍ਸਾਮਹਂ ਰਾਜ, ਤਂ ਦੇਵੋ ਅਨੁਮਞ੍ਞਤੂ’’ਤਿ.

ਤਤ੍ਥ ਪਰਿਬ੍ਯੂਲ਼੍ਹਨ੍ਤਿ ਪਰਿਵਾਰਿਤਂ. ਤਂ ਦੇਵੋਤਿ ਤਂ ਮਮ ਪਬ੍ਬਜ੍ਜਂ ਦੇਵੋ ਅਨੁਜਾਨਾਤੂਤਿ ਅਤ੍ਥੋ.

ਅਥ ਨਂ ਰਾਜਾ ਨਿਵਾਰੇਨ੍ਤੋ ਦੁਤਿਯਂ ਗਾਥਮਾਹ –

੭੪.

‘‘ਸਚੇ ਤੇ ਊਨਂ ਕਾਮੇਹਿ, ਅਹਂ ਪਰਿਪੂਰਯਾਮਿ ਤੇ;

ਯੋ ਤਂ ਹਿਂ ਸਤਿ ਵਾਰੇਮਿ, ਮਾ ਪਬ੍ਬਜ ਯੁਧਞ੍ਚਯਾ’’ਤਿ.

ਤਂ ਸੁਤ੍ਵਾ ਕੁਮਾਰੋ ਤਤਿਯਂ ਗਾਥਮਾਹ –

੭੫.

‘‘ਨ ਮਤ੍ਥਿ ਊਨਂ ਕਾਮੇਹਿ, ਹਿਂਸਿਤਾ ਮੇ ਨ ਵਿਜ੍ਜਤਿ;

ਦੀਪਞ੍ਚ ਕਾਤੁਮਿਚ੍ਛਾਮਿ, ਯਂ ਜਰਾ ਨਾਭਿਕੀਰਤੀ’’ਤਿ.

ਤਤ੍ਥ ਦੀਪਞ੍ਚਾਤਿ ਤਾਤ ਨੇਵ ਮਯ੍ਹਂ ਕਾਮੇਹਿ ਊਨਂ ਅਤ੍ਥਿ, ਨ ਮਂ ਹਿਂਸਨ੍ਤੋ ਕੋਚਿ ਵਿਜ੍ਜਤਿ, ਅਹਂ ਪਨ ਪਰਲੋਕਗਮਨਾਯ ਅਤ੍ਤਨੋ ਪਤਿਟ੍ਠਂ ਕਾਤੁਮਿਚ੍ਛਾਮਿ. ਕੀਦਿਸਂ? ਯਂ ਜਰਾ ਨਾਭਿਕੀਰਤਿ ਨ ਵਿਦ੍ਧਂਸੇਤਿ, ਤਮਹਂ ਕਾਤੁਮਿਚ੍ਛਾਮਿ, ਅਮਤਮਹਾਨਿਬ੍ਬਾਨਂ ਗਵੇਸਿਸ੍ਸਾਮਿ, ਨ ਮੇ ਕਾਮੇਹਿ ਅਤ੍ਥੋ, ਅਨੁਜਾਨਾਥ ਮਂ, ਮਹਾਰਾਜਾਤਿ ਵਦਤਿ.

ਇਤਿ ਪੁਨਪ੍ਪੁਨਂ ਕੁਮਾਰੋ ਪਬ੍ਬਜ੍ਜਂ ਯਾਚਿ, ਰਾਜਾ ‘‘ਮਾ ਪਬ੍ਬਜਾ’’ਤਿ ਵਾਰੇਤਿ. ਤਮਤ੍ਥਮਾਵਿਕਰੋਨ੍ਤੋ ਸਤ੍ਥਾ ਉਪਡ੍ਢਂ ਗਾਥਮਾਹ –

੭੬.

‘‘ਪੁਤ੍ਤੋ ਵਾ ਪਿਤਰਂ ਯਾਚੇ, ਪਿਤਾ ਵਾ ਪੁਤ੍ਤਮੋਰਸ’’ਨ੍ਤਿ.

ਤਤ੍ਥ ਵਾ-ਕਾਰੋ ਸਮ੍ਪਿਣ੍ਡਨਤ੍ਥੋ. ਇਦਂ ਵੁਤ੍ਤਂ ਹੋਤਿ – ‘‘ਏਵਂ, ਭਿਕ੍ਖਵੇ, ਪੁਤ੍ਤੋ ਚ ਪਿਤਰਂ ਯਾਚਤਿ, ਪਿਤਾ ਚ ਓਰਸਂ ਪੁਤ੍ਤਂ ਯਾਚਤੀ’’ਤਿ.

ਸੇਸਂ ਉਪਡ੍ਢਗਾਥਂ ਰਾਜਾ ਆਹ –

‘‘ਨੇਗਮੋ ਤਂ ਯਾਚੇ ਤਾਤ, ਮਾ ਪਬ੍ਬਜ ਯੁਧਞ੍ਚਯਾ’’ਤਿ.

ਤਸ੍ਸਤ੍ਥੋ – ਅਯਂ ਤੇ ਤਾਤ ਨਿਗਮਵਾਸਿਮਹਾਜਨੋ ਯਾਚਤਿ, ਨਗਰਜਨੋਪਿ ਮਾ ਤ੍ਵਂ ਪਬ੍ਬਜਾਤਿ.

ਕੁਮਾਰੋ ਪੁਨਪਿ ਪਞ੍ਚਮਂ ਗਾਥਮਾਹ –

੭੭.

‘‘ਮਾ ਮਂ ਦੇਵ ਨਿਵਾਰੇਹਿ, ਪਬ੍ਬਜਨ੍ਤਂ ਰਥੇਸਭ;

ਮਾਹਂ ਕਾਮੇਹਿ ਸਮ੍ਮਤ੍ਤੋ, ਜਰਾਯ ਵਸਮਨ੍ਵਗੂ’’ਤਿ.

ਤਤ੍ਥ ਵਸਮਨ੍ਵਗੂਤਿ ਮਾ ਅਹਂ ਕਾਮੇਹਿ ਸਮ੍ਮਤ੍ਤੋ ਪਮਤ੍ਤੋ ਜਰਾਯ ਵਸਗਾਮੀ ਨਾਮ ਹੋਮਿ, ਵਟ੍ਟਦੁਕ੍ਖਂ ਪਨ ਖੇਪੇਤ੍ਵਾ ਯਥਾ ਚ ਸਬ੍ਬਞ੍ਞੁਤਞ੍ਞਾਣਪ੍ਪਟਿਵਿਜ੍ਝਨਕੋ ਹੋਮਿ,. ਤਥਾ ਮਂ ਓਲੋਕੇਹੀਤਿ ਅਧਿਪ੍ਪਾਯੋ.

ਏਵਂ ਵੁਤ੍ਤੇ ਰਾਜਾ ਅਪ੍ਪਟਿਭਾਣੋ ਅਹੋਸਿ. ਮਾਤਾ ਪਨਸ੍ਸ ‘‘ਪੁਤ੍ਤੋ ਤੇ, ਦੇਵਿ, ਪਿਤਰਂ ਪਬ੍ਬਜ੍ਜਂ ਅਨੁਜਾਨਾਪੇਤੀ’’ਤਿ ਸੁਤ੍ਵਾ ‘‘ਕਿਂ ਤੁਮ੍ਹੇ ਕਥੇਥਾ’’ਤਿ ਨਿਰਸ੍ਸਾਸੇਨ ਮੁਖੇਨ ਸੁਵਣ੍ਣਸਿਵਿਕਾਯ ਨਿਸੀਦਿਤ੍ਵਾ ਸੀਘਂ ਵਿਨਿਚ੍ਛਯਟ੍ਠਾਨਂ ਗਨ੍ਤ੍ਵਾ ਯਾਚਮਾਨਾ ਛਟ੍ਠਂ ਗਾਥਮਾਹ –

੭੮.

‘‘ਅਹਂ ਤਂ ਤਾਤ ਯਾਚਾਮਿ, ਅਹਂ ਪੁਤ੍ਤ ਨਿਵਾਰਯੇ;

ਚਿਰਂ ਤਂ ਦਟ੍ਠੁਮਿਚ੍ਛਾਮਿ, ਮਾ ਪਬ੍ਬਜ ਯੁਧਞ੍ਚਯਾ’’ਤਿ.

ਤਂ ਸੁਤ੍ਵਾ ਕੁਮਾਰੋ ਸਤ੍ਤਮਂ ਗਾਥਮਾਹ –

੭੯.

‘‘ਉਸ੍ਸਾਵੋਵ ਤਿਣਗ੍ਗਮ੍ਹਿ, ਸੂਰਿਯੁਗ੍ਗਮਨਂ ਪਤਿ;

ਏਵਮਾਯੁ ਮਨੁਸ੍ਸਾਨਂ, ਮਾ ਮਂ ਅਮ੍ਮ ਨਿਵਾਰਯਾ’’ਤਿ.

ਤਸ੍ਸਤ੍ਥੋ – ਅਮ੍ਮ, ਯਥਾ ਤਿਣਗ੍ਗੇ ਉਸ੍ਸਵਬਿਨ੍ਦੁ ਸੂਰਿਯਸ੍ਸ ਉਗ੍ਗਮਨਂ ਪਤਿਟ੍ਠਾਤੁਂ ਨ ਸਕ੍ਕੋਤਿ, ਪਥਵਿਯਂ ਪਤਤਿ, ਏਵਂ ਇਮੇਸਂ ਸਤ੍ਤਾਨਂ ਜੀਵਿਤਂ ਪਰਿਤ੍ਤਂ ਤਾਵਕਾਲਿਕਂ ਅਚਿਰਟ੍ਠਿਤਿਕਂ, ਏਵਰੂਪੇ ਲੋਕਸਨ੍ਨਿਵਾਸੇ ਕਥਂ ਤ੍ਵਂ ਚਿਰਂ ਮਂ ਪਸ੍ਸਸਿ, ਮਾ ਮਂ ਨਿਵਾਰੇਹੀਤਿ.

ਏਵਂ ਵੁਤ੍ਤੇਪਿ ਸਾ ਪੁਨਪ੍ਪੁਨਂ ਯਾਚਿਯੇਵ. ਤਤੋ ਮਹਾਸਤ੍ਤੋ ਪਿਤਰਂ ਆਮਨ੍ਤੇਤ੍ਵਾ ਅਟ੍ਠਮਂ ਗਾਥਮਾਹ –

੮੦.

‘‘ਤਰਮਾਨੋ ਇਮਂ ਯਾਨਂ, ਆਰੋਪੇਤੁ ਰਥੇਸਭ;

ਮਾ ਮੇ ਮਾਤਾ ਤਰਨ੍ਤਸ੍ਸ, ਅਨ੍ਤਰਾਯਕਰਾ ਅਹੂ’’ਤਿ.

ਤਸ੍ਸਤ੍ਥੋ – ਤਾਤ ਰਥੇਸਭ, ਇਮਂ ਮਮ ਮਾਤਰਂ ਤਰਮਾਨੋ ਪੁਰਿਸੋ ਸੁਵਣ੍ਣਸਿਵਿਕਾਯਾਨਂ ਆਰੋਪੇਤੁ, ਮਾ ਮੇ ਜਾਤਿਜਰਾਬ੍ਯਾਧਿਮਰਣਕਨ੍ਤਾਰਂ ਤਰਨ੍ਤਸ੍ਸ ਅਤਿਕ੍ਕਮਨ੍ਤਸ੍ਸ ਮਾਤਾ ਅਨ੍ਤਰਾਯਕਰਾ ਅਹੂਤਿ.

ਰਾਜਾ ਪੁਤ੍ਤਸ੍ਸ ਵਚਨਂ ਸੁਤ੍ਵਾ ‘‘ਗਚ੍ਛ, ਭਦ੍ਦੇ, ਤਵ ਸਿਵਿਕਾਯ ਨਿਸੀਦਿਤ੍ਵਾ ਰਤਿਵਡ੍ਢਨਪਾਸਾਦਂ ਅਭਿਰੁਹਾ’’ਤਿ ਆਹ. ਸਾ ਤਸ੍ਸ ਵਚਨਂ ਸੁਤ੍ਵਾ ਠਾਤੁਂ ਅਸਕ੍ਕੋਨ੍ਤੀ ਨਾਰੀਗਣਪਰਿਵੁਤਾ ਗਨ੍ਤ੍ਵਾ ਪਾਸਾਦਂ ਅਭਿਰੁਹਿਤ੍ਵਾ ‘‘ਕਾ ਨੁ ਖੋ ਪੁਤ੍ਤਸ੍ਸ ਪਵਤ੍ਤੀ’’ਤਿ ਵਿਨਿਚ੍ਛਯਟ੍ਠਾਨਂ ਓਲੋਕੇਨ੍ਤੀ ਅਟ੍ਠਾਸਿ. ਬੋਧਿਸਤ੍ਤੋ ਮਾਤੁ ਗਤਕਾਲੇ ਪੁਨ ਪਿਤਰਂ ਯਾਚਿ. ਰਾਜਾ ਪਟਿਬਾਹਿਤੁਂ ਅਸਕ੍ਕੋਨ੍ਤੋ ‘‘ਤੇਨ ਹਿ ਤਾਤ, ਤਵ ਮਨਂ ਮਤ੍ਥਕਂ ਪਾਪੇਹਿ, ਪਬ੍ਬਜਾਹੀ’’ਤਿ ਅਨੁਜਾਨਿ. ਰਞ੍ਞੋ ਅਨੁਞ੍ਞਾਤਕਾਲੇ ਬੋਧਿਸਤ੍ਤਸ੍ਸ ਕਨਿਟ੍ਠੋ ਯੁਧਿਟ੍ਠਿਲਕੁਮਾਰੋ ਨਾਮ ਪਿਤਰਂ ਵਨ੍ਦਿਤ੍ਵਾ ‘‘ਤਾਤ, ਮਯ੍ਹਂ ਪਬ੍ਬਜ੍ਜਂ ਅਨੁਜਾਨਾਥਾ’’ਤਿ ਅਨੁਜਾਨਾਪੇਸਿ. ਉਭੋਪਿ ਭਾਤਰੋ ਪਿਤਰਂ ਵਨ੍ਦਿਤ੍ਵਾ ਕਾਮੇ ਪਹਾਯ ਮਹਾਜਨਪਰਿਵੁਤਾ ਵਿਨਿਚ੍ਛਯਤੋ ਨਿਕ੍ਖਮਿਂਸੁ. ਦੇਵੀਪਿ ਮਹਾਸਤ੍ਤਂ ਓਲੋਕੇਤ੍ਵਾ ‘‘ਮਮ ਪੁਤ੍ਤੇ ਪਬ੍ਬਜਿਤੇ ਰਮ੍ਮਨਗਰਂ ਤੁਚ੍ਛਂ ਭਵਿਸ੍ਸਤੀ’’ਤਿ ਪਰਿਦੇਵਮਾਨਾ ਗਾਥਾਦ੍ਵਯਮਾਹ –

੮੧.

‘‘ਅਭਿਧਾਵਥ ਭਦ੍ਦਨ੍ਤੇ, ਸੁਞ੍ਞਂ ਹੇਸ੍ਸਤਿ ਰਮ੍ਮਕਂ;

ਯੁਧਞ੍ਚਯੋ ਅਨੁਞ੍ਞਾਤੋ, ਸਬ੍ਬਦਤ੍ਤੇਨ ਰਾਜਿਨਾ.

੮੨.

‘‘ਯੋਹੁ ਸੇਟ੍ਠੋ ਸਹਸ੍ਸਸ੍ਸ, ਯੁਵਾ ਕਞ੍ਚਨਸਨ੍ਨਿਭੋ;

ਸੋਯਂ ਕੁਮਾਰੋ ਪਬ੍ਬਜਿਤੋ, ਕਾਸਾਯਵਸਨੋ ਬਲੀ’’ਤਿ.

ਤਤ੍ਥ ਅਭਿਧਾਵਥਾਤਿ ਪਰਿਵਾਰੇਤ੍ਵਾ ਠਿਤਾ ਨਾਰਿਯੋ ਸਬ੍ਬਾ ਵੇਗੇਨ ਧਾਵਥਾਤਿ ਆਣਾਪੇਤਿ. ਭਦ੍ਦਨ੍ਤੇਤਿ ਏਵਂ ਗਨ੍ਤ੍ਵਾ ‘‘ਭਦ੍ਦਂ ਤਵ ਹੋਤੂ’’ਤਿ ਵਦਥ. ਰਮ੍ਮਕਨ੍ਤਿ ਰਮ੍ਮਨਗਰਂ ਸਨ੍ਧਾਯਾਹ. ਯੋਹੁ ਸੇਟ੍ਠੋਤਿ ਯੋ ਰਞ੍ਞੋ ਪੁਤ੍ਤੋ ਸਹਸ੍ਸਸ੍ਸ ਸੇਟ੍ਠੋ ਅਹੋਸਿ, ਸੋ ਪਬ੍ਬਜਿਤੋਤਿ ਪਬ੍ਬਜ੍ਜਾਯ ਗਚ੍ਛਨ੍ਤਂ ਸਨ੍ਧਾਯੇਵਮਾਹ.

ਬੋਧਿਸਤ੍ਤੋਪਿ ਨ ਤਾਵ ਪਬ੍ਬਜਤਿ. ਸੋ ਹਿ ਮਾਤਾਪਿਤਰੋ ਵਨ੍ਦਿਤ੍ਵਾ ਕਨਿਟ੍ਠਂ ਯੁਧਿਟ੍ਠਿਲਕੁਮਾਰਂ ਗਹੇਤ੍ਵਾ ਨਗਰਾ ਨਿਕ੍ਖਮ੍ਮ ਮਹਾਜਨਂ ਨਿਵਤ੍ਤੇਤ੍ਵਾ ਉਭੋਪਿ ਭਾਤਰੋ ਹਿਮਵਨ੍ਤਂ ਪਵਿਸਿਤ੍ਵਾ ਮਨੋਰਮੇ ਠਾਨੇ ਅਸ੍ਸਮਪਦਂ ਕਰਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਂ ਨਿਬ੍ਬਤ੍ਤੇਤ੍ਵਾ ਵਨਮੂਲਫਲਾਦੀਹਿ ਯਾਵਜੀਵਂ ਯਾਪੇਤ੍ਵਾ ਬ੍ਰਹ੍ਮਲੋਕਪਰਾਯਣਾ ਅਹੇਸੁਂ. ਤਮਤ੍ਥਂ ਓਸਾਨੇ ਅਭਿਸਮ੍ਬੁਦ੍ਧਗਾਥਾਯ ਦੀਪੇਤਿ –

੮੩.

‘‘ਉਭੋ ਕੁਮਾਰਾ ਪਬ੍ਬਜਿਤਾ, ਯੁਧਞ੍ਚਯੋ ਯੁਧਿਟ੍ਠਿਲੋ;

ਪਹਾਯ ਮਾਤਾਪਿਤਰੋ, ਸਙ੍ਗਂ ਛੇਤ੍ਵਾਨ ਮਚ੍ਚੁਨੋ’’ਤਿ.

ਤਤ੍ਥ ਮਚ੍ਚੁਨੋਤਿ ਮਾਰਸ੍ਸ. ਇਦਂ ਵੁਤ੍ਤਂ ਹੋਤਿ – ਭਿਕ੍ਖਵੇ, ਯੁਧਞ੍ਚਯੋ ਚ ਯੁਧਿਟ੍ਠਿਲੋ ਚ ਤੇ ਉਭੋਪਿ ਕੁਮਾਰਾ ਮਾਤਾਪਿਤਰੋ ਪਹਾਯ ਮਾਰਸ੍ਸ ਸਨ੍ਤਕਂ ਰਾਗਦੋਸਮੋਹਸਙ੍ਗਂ ਛਿਨ੍ਦਿਤ੍ਵਾ ਪਬ੍ਬਜਿਤਾਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ‘‘ਨ ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਤਥਾਗਤੋ ਰਜ੍ਜਂ ਛਡ੍ਡੇਤ੍ਵਾ ਪਬ੍ਬਜਿਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ, ਯੁਧਿਟ੍ਠਿਲਕੁਮਾਰੋ ਆਨਨ੍ਦੋ, ਯੁਧਞ੍ਚਯੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਯੁਧਞ੍ਚਯਜਾਤਕਵਣ੍ਣਨਾ ਛਟ੍ਠਾ.

[੪੬੧] ੭. ਦਸਰਥਜਾਤਕਵਣ੍ਣਨਾ

ਏਥ ਲਕ੍ਖਣ ਸੀਤਾ ਚਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਮਤਪਿਤਿਕਂ ਕੁਟੁਮ੍ਬਿਕਂ ਆਰਬ੍ਭ ਕਥੇਸਿ. ਸੋ ਹਿ ਪਿਤਰਿ ਕਾਲਕਤੇ ਸੋਕਾਭਿਭੂਤੋ ਸਬ੍ਬਕਿਚ੍ਚਾਨਿ ਪਹਾਯ ਸੋਕਾਨੁਵਤ੍ਤਕੋਵ ਅਹੋਸਿ. ਸਤ੍ਥਾ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਤਸ੍ਸ ਸੋਤਾਪਤ੍ਤਿਫਲੂਪਨਿਸ੍ਸਯਂ ਦਿਸ੍ਵਾ ਪੁਨਦਿਵਸੇ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚੋ ਭਿਕ੍ਖੂ ਉਯ੍ਯੋਜੇਤ੍ਵਾ ਏਕਂ ਪਚ੍ਛਾਸਮਣਂ ਗਹੇਤ੍ਵਾ ਤਸ੍ਸ ਗੇਹਂ ਗਨ੍ਤ੍ਵਾ ਵਨ੍ਦਿਤ੍ਵਾ ਨਿਸਿਨ੍ਨਂ ਮਧੁਰਵਚਨੇਨ ਆਲਪਨ੍ਤੋ ‘‘ਕਿਂ ਸੋਚਸਿ ਉਪਾਸਕਾ’’ਤਿ ਵਤ੍ਵਾ ‘‘ਆਮ, ਭਨ੍ਤੇ, ਪਿਤੁਸੋਕੋ ਮਂ ਬਾਧਤੀ’’ਤਿ ਵੁਤ੍ਤੇ ‘‘ਉਪਾਸਕ, ਪੋਰਾਣਕਪਣ੍ਡਿਤਾ ਅਟ੍ਠਵਿਧੇ ਲੋਕਧਮ੍ਮੇ ਤਥਤੋ ਜਾਨਨ੍ਤਾ ਪਿਤਰਿ ਕਾਲਕਤੇ ਅਪ੍ਪਮਤ੍ਤਕਮ੍ਪਿ ਸੋਕਂ ਨ ਕਰਿਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਦਸਰਥਮਹਾਰਾਜਾ ਨਾਮ ਅਗਤਿਗਮਨਂ ਪਹਾਯ ਧਮ੍ਮੇਨ ਰਜ੍ਜਂ ਕਾਰੇਸਿ. ਤਸ੍ਸ ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਜੇਟ੍ਠਿਕਾ ਅਗ੍ਗਮਹੇਸੀ ਦ੍ਵੇ ਪੁਤ੍ਤੇ ਏਕਞ੍ਚ ਧੀਤਰਂ ਵਿਜਾਯਿ. ਜੇਟ੍ਠਪੁਤ੍ਤੋ ਰਾਮਪਣ੍ਡਿਤੋ ਨਾਮ ਅਹੋਸਿ, ਦੁਤਿਯੋ ਲਕ੍ਖਣਕੁਮਾਰੋ ਨਾਮ, ਧੀਤਾ ਸੀਤਾ ਦੇਵੀ ਨਾਮ. ਅਪਰਭਾਗੇ ਮਹੇਸੀ ਕਾਲਮਕਾਸਿ. ਰਾਜਾ ਤਸ੍ਸਾ ਕਾਲਕਤਾਯ ਚਿਰਤਰਂ ਸੋਕਵਸਂ ਗਨ੍ਤ੍ਵਾ ਅਮਚ੍ਚੇਹਿ ਸਞ੍ਞਾਪਿਤੋ ਤਸ੍ਸਾ ਕਤ੍ਤਬ੍ਬਪਰਿਹਾਰਂ ਕਤ੍ਵਾ ਅਞ੍ਞਂ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਸਾ ਰਞ੍ਞੋ ਪਿਯਾ ਅਹੋਸਿ ਮਨਾਪਾ. ਸਾਪਿ ਅਪਰਭਾਗੇ ਗਬ੍ਭਂ ਗਣ੍ਹਿਤ੍ਵਾ ਲਦ੍ਧਗਬ੍ਭਪਰਿਹਾਰਾ ਪੁਤ੍ਤਂ ਵਿਜਾਯਿ, ‘‘ਭਰਤਕੁਮਾਰੋ’’ਤਿਸ੍ਸ ਨਾਮਂ ਅਕਂਸੁ. ਰਾਜਾ ਪੁਤ੍ਤਸਿਨੇਹੇਨ ‘‘ਭਦ੍ਦੇ, ਵਰਂ ਤੇ ਦਮ੍ਮਿ, ਗਣ੍ਹਾਹੀ’’ਤਿ ਆਹ. ਸਾ ਗਹਿਤਕਂ ਕਤ੍ਵਾ ਠਪੇਤ੍ਵਾ ਕੁਮਾਰਸ੍ਸ ਸਤ੍ਤਟ੍ਠਵਸ੍ਸਕਾਲੇ ਰਾਜਾਨਂ ਉਪਸਙ੍ਕਮਿਤ੍ਵਾ ‘‘ਦੇਵ, ਤੁਮ੍ਹੇਹਿ ਮਯ੍ਹਂ ਪੁਤ੍ਤਸ੍ਸ ਵਰੋ ਦਿਨ੍ਨੋ, ਇਦਾਨਿਸ੍ਸ ਵਰਂ ਦੇਥਾ’’ਤਿ ਆਹ. ਗਣ੍ਹ, ਭਦ੍ਦੇਤਿ. ‘‘ਦੇਵ, ਪੁਤ੍ਤਸ੍ਸ ਮੇ ਰਜ੍ਜਂ ਦੇਥਾ’’ਤਿ ਵੁਤ੍ਤੇ ਰਾਜਾ ਅਚ੍ਛਰਂ ਪਹਰਿਤ੍ਵਾ ‘‘ਨਸ੍ਸ, ਵਸਲਿ, ਮਯ੍ਹਂ ਦ੍ਵੇ ਪੁਤ੍ਤਾ ਅਗ੍ਗਿਕ੍ਖਨ੍ਧਾ ਵਿਯ ਜਲਨ੍ਤਿ, ਤੇ ਮਾਰਾਪੇਤ੍ਵਾ ਤਵ ਪੁਤ੍ਤਸ੍ਸ ਰਜ੍ਜਂ ਯਾਚਸੀ’’ਤਿ ਤਜ੍ਜੇਸਿ. ਸਾ ਭੀਤਾ ਸਿਰਿਗਬ੍ਭਂ ਪਵਿਸਿਤ੍ਵਾ ਅਞ੍ਞੇਸੁਪਿ ਦਿਵਸੇਸੁ ਰਾਜਾਨਂ ਪੁਨਪ੍ਪੁਨਂ ਰਜ੍ਜਮੇਵ ਯਾਚਿ.

ਰਾਜਾ ਤਸ੍ਸਾ ਤਂ ਵਰਂ ਅਦਤ੍ਵਾਵ ਚਿਨ੍ਤੇਸਿ ‘‘ਮਾਤੁਗਾਮੋ ਨਾਮ ਅਕਤਞ੍ਞੂ ਮਿਤ੍ਤਦੁਬ੍ਭੀ, ਅਯਂ ਮੇ ਕੂਟਪਣ੍ਣਂ ਵਾ ਕੂਟਲਞ੍ਜਂ ਵਾ ਕਤ੍ਵਾ ਪੁਤ੍ਤੇ ਘਾਤਾਪੇਯ੍ਯਾ’’ਤਿ. ਸੋ ਪੁਤ੍ਤੇ ਪਕ੍ਕੋਸਾਪੇਤ੍ਵਾ ਤਮਤ੍ਥਂ ਆਰੋਚੇਤ੍ਵਾ ‘‘ਤਾਤਾ, ਤੁਮ੍ਹਾਕਂ ਇਧ ਵਸਨ੍ਤਾਨਂ ਅਨ੍ਤਰਾਯੋਪਿ ਭਵੇਯ੍ਯ, ਤੁਮ੍ਹੇ ਸਾਮਨ੍ਤਰਜ੍ਜਂ ਵਾ ਅਰਞ੍ਞਂ ਵਾ ਗਨ੍ਤ੍ਵਾ ਮਮ ਮਰਣਕਾਲੇ ਆਗਨ੍ਤ੍ਵਾ ਕੁਲਸਨ੍ਤਕਂ ਰਜ੍ਜਂ ਗਣ੍ਹੇਯ੍ਯਾਥਾ’’ਤਿ ਵਤ੍ਵਾ ਪੁਨ ਨੇਮਿਤ੍ਤਕੇ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ਅਤ੍ਤਨੋ ਆਯੁਪਰਿਚ੍ਛੇਦਂ ਪੁਚ੍ਛਿਤ੍ਵਾ ‘‘ਅਞ੍ਞਾਨਿ ਦ੍ਵਾਦਸ ਵਸ੍ਸਾਨਿ ਪਵਤ੍ਤਿਸ੍ਸਤੀ’’ਤਿ ਸੁਤ੍ਵਾ ‘‘ਤਾਤਾ, ਇਤੋ ਦ੍ਵਾਦਸਵਸ੍ਸਚ੍ਚਯੇਨ ਆਗਨ੍ਤ੍ਵਾ ਛਤ੍ਤਂ ਉਸ੍ਸਾਪੇਯ੍ਯਾਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਵਤ੍ਵਾ ਪਿਤਰਂ ਵਨ੍ਦਿਤ੍ਵਾ ਰੋਦਨ੍ਤਾ ਪਾਸਾਦਾ ਓਤਰਿਂਸੁ. ਸੀਤਾ ਦੇਵੀ ‘‘ਅਹਮ੍ਪਿ ਭਾਤਿਕੇਹਿ ਸਦ੍ਧਿਂ ਗਮਿਸ੍ਸਾਮੀ’’ਤਿ ਪਿਤਰਂ ਵਨ੍ਦਿਤ੍ਵਾ ਰੋਦਨ੍ਤੀ ਨਿਕ੍ਖਮਿ. ਤਯੋਪਿ ਜਨਾ ਮਹਾਪਰਿਵਾਰਾ ਨਿਕ੍ਖਮਿਤ੍ਵਾ ਮਹਾਜਨਂ ਨਿਵਤ੍ਤੇਤ੍ਵਾ ਅਨੁਪੁਬ੍ਬੇਨ ਹਿਮਵਨ੍ਤਂ ਪਵਿਸਿਤ੍ਵਾ ਸਮ੍ਪਨ੍ਨੋਦਕੇ ਸੁਲਭਫਲਾਫਲੇ ਪਦੇਸੇ ਅਸ੍ਸਮਂ ਮਾਪੇਤ੍ਵਾ ਫਲਾਫਲੇਨ ਯਾਪੇਨ੍ਤਾ ਵਸਿਂਸੁ.

ਲਕ੍ਖਣਪਣ੍ਡਿਤੋ ਚ ਸੀਤਾ ਚ ਰਾਮਪਣ੍ਡਿਤਂ ਯਾਚਿਤ੍ਵਾ ‘‘ਤੁਮ੍ਹੇ ਅਮ੍ਹਾਕਂ ਪਿਤੁਟ੍ਠਾਨੇ ਠਿਤਾ, ਤਸ੍ਮਾ ਅਸ੍ਸਮੇਯੇਵ ਹੋਥ, ਮਯਂ ਫਲਾਫਲਂ ਆਹਰਿਤ੍ਵਾ ਤੁਮ੍ਹੇ ਪੋਸੇਸ੍ਸਾਮਾ’’ਤਿ ਪਟਿਞ੍ਞਂ ਗਣ੍ਹਿਂਸੁ. ਤਤੋ ਪਟ੍ਠਾਯ ਰਾਮਪਣ੍ਡਿਤੋ ਤਤ੍ਥੇਵ ਹੋਤਿ. ਇਤਰੇ ਦ੍ਵੇ ਫਲਾਫਲਂ ਆਹਰਿਤ੍ਵਾ ਤਂ ਪਟਿਜਗ੍ਗਿਂਸੁ. ਏਵਂ ਤੇਸਂ ਫਲਾਫਲੇਨ ਯਾਪੇਤ੍ਵਾ ਵਸਨ੍ਤਾਨਂ ਦਸਰਥਮਹਾਰਾਜਾ ਪੁਤ੍ਤਸੋਕੇਨ ਨਵਮੇ ਸਂਵਚ੍ਛਰੇ ਕਾਲਮਕਾਸਿ. ਤਸ੍ਸ ਸਰੀਰਕਿਚ੍ਚਂ ਕਾਰੇਤ੍ਵਾ ਦੇਵੀ ‘‘ਅਤ੍ਤਨੋ ਪੁਤ੍ਤਸ੍ਸ ਭਰਤਕੁਮਾਰਸ੍ਸ ਛਤ੍ਤਂ ਉਸ੍ਸਾਪੇਥਾ’’ਤਿ ਆਹ. ਅਮਚ੍ਚਾ ਪਨ ‘‘ਛਤ੍ਤਸ੍ਸਾਮਿਕਾ ਅਰਞ੍ਞੇ ਵਸਨ੍ਤੀ’’ਤਿ ਨ ਅਦਂਸੁ. ਭਰਤਕੁਮਾਰੋ ‘‘ਮਮ ਭਾਤਰਂ ਰਾਮਪਣ੍ਡਿਤਂ ਅਰਞ੍ਞਤੋ ਆਨੇਤ੍ਵਾ ਛਤ੍ਤਂ ਉਸ੍ਸਾਪੇਸ੍ਸਾਮੀ’’ਤਿ ਪਞ੍ਚਰਾਜਕਕੁਧਭਣ੍ਡਾਨਿ ਗਹੇਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਤਸ੍ਸ ਵਸਨਟ੍ਠਾਨਂ ਪਤ੍ਵਾ ਅਵਿਦੂਰੇ ਖਨ੍ਧਾਵਾਰਂ ਕਤ੍ਵਾ ਤਤ੍ਥ ਨਿਵਾਸੇਤ੍ਵਾ ਕਤਿਪਯੇਹਿ ਅਮਚ੍ਚੇਹਿ ਸਦ੍ਧਿਂ ਲਕ੍ਖਣਪਣ੍ਡਿਤਸ੍ਸ ਚ ਸੀਤਾਯ ਚ ਅਰਞ੍ਞਂ ਗਤਕਾਲੇ ਅਸ੍ਸਮਪਦਂ ਪਵਿਸਿਤ੍ਵਾ ਅਸ੍ਸਮਪਦਦ੍ਵਾਰੇ ਠਪਿਤਕਞ੍ਚਨਰੂਪਕਂ ਵਿਯ ਰਾਮਪਣ੍ਡਿਤਂ ਨਿਰਾਸਙ੍ਕਂ ਸੁਖਨਿਸਿਨ੍ਨਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ਰਞ੍ਞੋ ਪਵਤ੍ਤਿਂ ਆਰੋਚੇਤ੍ਵਾ ਸਦ੍ਧਿਂ ਅਮਚ੍ਚੇਹਿ ਪਾਦੇਸੁ ਪਤਿਤ੍ਵਾ ਰੋਦਤਿ. ਰਾਮਪਣ੍ਡਿਤੋ ਪਨ ਨੇਵ ਸੋਚਿ, ਨ ਪਰਿਦੇਵਿ, ਇਨ੍ਦ੍ਰਿਯਵਿਕਾਰਮਤ੍ਤਮ੍ਪਿਸ੍ਸ ਨਾਹੋਸਿ. ਭਰਤਸ੍ਸ ਪਨ ਰੋਦਿਤ੍ਵਾ ਨਿਸਿਨ੍ਨਕਾਲੇ ਸਾਯਨ੍ਹਸਮਯੇ ਇਤਰੇ ਦ੍ਵੇ ਫਲਾਫਲਂ ਆਦਾਯ ਆਗਮਿਂਸੁ. ਰਾਮਪਣ੍ਡਿਤੋ ਚਿਨ੍ਤੇਸਿ ‘‘ਇਮੇ ਦਹਰਾ ਮਯ੍ਹਂ ਵਿਯ ਪਰਿਗ੍ਗਣ੍ਹਨਪਞ੍ਞਾ ਏਤੇਸਂ ਨਤ੍ਥਿ, ਸਹਸਾ ‘ਪਿਤਾ ਵੋ ਮਤੋ’ਤਿ ਵੁਤ੍ਤੇ ਸੋਕਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤਾਨਂ ਹਦਯਮ੍ਪਿ ਤੇਸਂ ਫਲੇਯ੍ਯ, ਉਪਾਯੇਨ ਤੇ ਉਦਕਂ ਓਤਾਰੇਤ੍ਵਾ ਏਤਂ ਪਵਤ੍ਤਿਂ ਆਰੋਚੇਸ੍ਸਾਮੀ’’ਤਿ. ਅਥ ਨੇਸਂ ਪੁਰਤੋ ਏਕਂ ਉਦਕਟ੍ਠਾਨਂ ਦਸ੍ਸੇਤ੍ਵਾ ‘‘ਤੁਮ੍ਹੇ ਅਤਿਚਿਰੇਨ ਆਗਤਾ, ਇਦਂ ਵੋ ਦਣ੍ਡਕਮ੍ਮਂ ਹੋਤੁ, ਇਮਂ ਉਦਕਂ ਓਤਰਿਤ੍ਵਾ ਤਿਟ੍ਠਥਾ’’ਤਿ ਉਪਡ੍ਢਗਾਥਂ ਤਾਵ ਆਹ –

੮੪.

‘‘ਏਥ ਲਕ੍ਖਣ ਸੀਤਾ ਚ, ਉਭੋ ਓਤਰਥੋਦਕ’’ਨ੍ਤਿ.

ਤਸ੍ਸਤ੍ਥੋ – ਏਥ ਲਕ੍ਖਣ ਸੀਤਾ ਚ ਆਗਚ੍ਛਥ, ਉਭੋਪਿ ਓਤਰਥ ਉਦਕਨ੍ਤਿ;

ਤੇ ਏਕਵਚਨੇਨੇਵ ਓਤਰਿਤ੍ਵਾ ਅਟ੍ਠਂਸੁ. ਅਥ ਨੇਸਂ ਪਿਤੁ ਪਵਤ੍ਤਿਂ ਆਰੋਚੇਨ੍ਤੋ ਸੇਸਂ ਉਪਡ੍ਢਗਾਥਮਾਹ –

‘‘ਏਵਾਯਂ ਭਰਤੋ ਆਹ, ਰਾਜਾ ਦਸਰਥੋ ਮਤੋ’’ਤਿ.

ਤੇ ਪਿਤੁ ਮਤਸਾਸਨਂ ਸੁਤ੍ਵਾਵ ਵਿਸਞ੍ਞਾ ਅਹੇਸੁਂ. ਪੁਨਪਿ ਨੇਸਂ ਕਥੇਸਿ, ਪੁਨਪਿ ਤੇ ਵਿਸਞ੍ਞਾ ਅਹੇਸੁਨ੍ਤਿ ਏਵਂ ਯਾਵਤਤਿਯਂ ਵਿਸਞ੍ਞਿਤਂ ਪਤ੍ਤੇ ਤੇ ਅਮਚ੍ਚਾ ਉਕ੍ਖਿਪਿਤ੍ਵਾ ਉਦਕਾ ਨੀਹਰਿਤ੍ਵਾ ਥਲੇ ਨਿਸੀਦਾਪੇਤ੍ਵਾ ਲਦ੍ਧਸ੍ਸਾਸੇਸੁ ਤੇਸੁ ਸਬ੍ਬੇ ਅਞ੍ਞਮਞ੍ਞਂ ਰੋਦਿਤ੍ਵਾ ਪਰਿਦੇਵਿਤ੍ਵਾ ਨਿਸੀਦਿਂਸੁ. ਤਦਾ ਭਰਤਕੁਮਾਰੋ ਚਿਨ੍ਤੇਸਿ – ‘‘ਮਯ੍ਹਂ ਭਾਤਾ ਲਕ੍ਖਣਕੁਮਾਰੋ ਚ ਭਗਿਨੀ ਚ ਸੀਤਾ ਦੇਵੀ ਪਿਤੁ ਮਤਸਾਸਨਂ ਸੁਤ੍ਵਾਵ ਸੋਕਂ ਸਨ੍ਧਾਰੇਤੁਂ ਨ ਸਕ੍ਕੋਨ੍ਤਿ, ਰਾਮਪਣ੍ਡਿਤੋ ਪਨ ਨੇਵ ਸੋਚਤਿ, ਨ ਪਰਿਦੇਵਤਿ, ਕਿਂ ਨੁ ਖੋ ਤਸ੍ਸ ਅਸੋਚਨਕਾਰਣਂ, ਪੁਚ੍ਛਿਸ੍ਸਾਮਿ ਨ’’ਨ੍ਤਿ. ਸੋ ਤਂ ਪੁਚ੍ਛਨ੍ਤੋ ਦੁਤਿਯਂ ਗਾਥਮਾਹ –

੮੫.

‘‘ਕੇਨ ਰਾਮਪ੍ਪਭਾਵੇਨ, ਸੋਚਿਤਬ੍ਬਂ ਨ ਸੋਚਸਿ;

ਪਿਤਰਂ ਕਾਲਕਤਂ ਸੁਤ੍ਵਾ, ਨ ਤਂ ਪਸਹਤੇ ਦੁਖ’’ਨ੍ਤਿ.

ਤਤ੍ਥ ਪਭਾਵੇਨਾਤਿ ਆਨੁਭਾਵੇਨ. ਨ ਤਂ ਪਸਹਤੇ ਦੁਖਨ੍ਤਿ ਏਵਰੂਪਂ ਦੁਕ੍ਖਂ ਕੇਨ ਕਾਰਣੇਨ ਤਂ ਨ ਪੀਲ਼ੇਤਿ, ਕਿਂ ਤੇ ਅਸੋਚਨਕਾਰਣਂ, ਕਥੇਹਿ ਤਾਵ ਨਨ੍ਤਿ.

ਅਥਸ੍ਸ ਰਾਮਪਣ੍ਡਿਤੋ ਅਤ੍ਤਨੋ ਅਸੋਚਨਕਾਰਣਂ ਕਥੇਨ੍ਤੋ –

੮੬.

‘‘ਯਂ ਨ ਸਕ੍ਕਾ ਨਿਪਾਲੇਤੁਂ, ਪੋਸੇਨ ਲਪਤਂ ਬਹੁਂ;

ਸ ਕਿਸ੍ਸ ਵਿਞ੍ਞੂ ਮੇਧਾਵੀ, ਅਤ੍ਤਾਨਮੁਪਤਾਪਯੇ.

੮੭.

‘‘ਦਹਰਾ ਚ ਹਿ ਵੁਦ੍ਧਾ ਚ, ਯੇ ਬਾਲਾ ਯੇ ਚ ਪਣ੍ਡਿਤਾ;

ਅਡ੍ਢਾ ਚੇਵ ਦਲਿਦ੍ਦਾ ਚ, ਸਬ੍ਬੇ ਮਚ੍ਚੁਪਰਾਯਣਾ.

੮੮.

‘‘ਫਲਾਨਮਿਵ ਪਕ੍ਕਾਨਂ, ਨਿਚ੍ਚਂ ਪਤਨਤੋ ਭਯਂ;

ਏਵਂ ਜਾਤਾਨ ਮਚ੍ਚਾਨਂ, ਨਿਚ੍ਚਂ ਮਰਣਤੋ ਭਯਂ.

੮੯.

‘‘ਸਾਯਮੇਕੇ ਨ ਦਿਸ੍ਸਨ੍ਤਿ, ਪਾਤੋ ਦਿਟ੍ਠਾ ਬਹੁਜ੍ਜਨਾ;

ਪਾਤੋ ਏਕੇ ਨ ਦਿਸ੍ਸਨ੍ਤਿ, ਸਾਯਂ ਦਿਟ੍ਠਾ ਬਹੁਜ੍ਜਨਾ.

੯੦.

‘‘ਪਰਿਦੇਵਯਮਾਨੋ ਚੇ, ਕਿਞ੍ਚਿਦਤ੍ਥਂ ਉਦਬ੍ਬਹੇ;

ਸਮ੍ਮੂਲ਼੍ਹੋ ਹਿਂਸਮਤ੍ਤਾਨਂ, ਕਯਿਰਾ ਤਂ ਵਿਚਕ੍ਖਣੋ.

੯੧.

‘‘ਕਿਸੋ ਵਿਵਣ੍ਣੋ ਭਵਤਿ, ਹਿਂਸਮਤ੍ਤਾਨਮਤ੍ਤਨੋ;

ਨ ਤੇਨ ਪੇਤਾ ਪਾਲੇਨ੍ਤਿ, ਨਿਰਤ੍ਥਾ ਪਰਿਦੇਵਨਾ.

੯੨.

‘‘ਯਥਾ ਸਰਣਮਾਦਿਤ੍ਤਂ, ਵਾਰਿਨਾ ਪਰਿਨਿਬ੍ਬਯੇ;

ਏਵਮ੍ਪਿ ਧੀਰੋ ਸੁਤਵਾ, ਮੇਧਾਵੀ ਪਣ੍ਡਿਤੋ ਨਰੋ;

ਖਿਪ੍ਪਮੁਪ੍ਪਤਿਤਂ ਸੋਕਂ, ਵਾਤੋ ਤੂਲਂਵ ਧਂਸਯੇ.

੯੩.

‘‘ਮਚ੍ਚੋ ਏਕੋਵ ਅਚ੍ਚੇਤਿ, ਏਕੋਵ ਜਾਯਤੇ ਕੁਲੇ;

ਸਂਯੋਗਪਰਮਾਤ੍ਵੇਵ, ਸਮ੍ਭੋਗਾ ਸਬ੍ਬਪਾਣਿਨਂ.

੯੪.

‘‘ਤਸ੍ਮਾ ਹਿ ਧੀਰਸ੍ਸ ਬਹੁਸ੍ਸੁਤਸ੍ਸ, ਸਮ੍ਪਸ੍ਸਤੋ ਲੋਕਮਿਮਂ ਪਰਞ੍ਚ;

ਅਞ੍ਞਾਯ ਧਮ੍ਮਂ ਹਦਯਂ ਮਨਞ੍ਚ, ਸੋਕਾ ਮਹਨ੍ਤਾਪਿ ਨ ਤਾਪਯਨ੍ਤਿ.

੯੫.

‘‘ਸੋਹਂ ਦਸ੍ਸਞ੍ਚ ਭੋਕ੍ਖਞ੍ਚ, ਭਰਿਸ੍ਸਾਮਿ ਚ ਞਾਤਕੇ;

ਸੇਸਞ੍ਚ ਪਾਲਯਿਸ੍ਸਾਮਿ, ਕਿਚ੍ਚਮੇਤਂ ਵਿਜਾਨਤੋ’’ਤਿ. –

ਇਮਾਹਿ ਦਸਹਿ ਗਾਥਾਹਿ ਅਨਿਚ੍ਚਤਂ ਪਕਾਸੇਤਿ.

ਤਤ੍ਥ ਨਿਪਾਲੇਤੁਨ੍ਤਿ ਰਕ੍ਖਿਤੁਂ. ਲਪਤਨ੍ਤਿ ਲਪਨ੍ਤਾਨਂ. ਇਦਂ ਵੁਤ੍ਤਂ ਹੋਤਿ – ‘‘ਤਾਤ ਭਰਤ, ਯਂ ਸਤ੍ਤਾਨਂ ਜੀਵਿਤਂ ਬਹੁਮ੍ਪਿ ਵਿਲਪਨ੍ਤਾਨਂ ਪੁਰਿਸਾਨਂ ਏਕੇਨਾਪਿ ਮਾ ਉਚ੍ਛਿਜ੍ਜੀਤਿ ਨ ਸਕ੍ਕਾ ਰਕ੍ਖਿਤੁਂ, ਸੋ ਦਾਨਿ ਮਾਦਿਸੋ ਅਟ੍ਠ ਲੋਕਧਮ੍ਮੇ ਤਥਤੋ ਜਾਨਨ੍ਤੋ ਵਿਞ੍ਞੂ ਮੇਧਾਵੀ ਪਣ੍ਡਿਤੋ ਮਰਣਪਰਿਯੋਸਾਨਜੀਵਿਤੇਸੁ ਸਤ੍ਤੇਸੁ ਕਿਸ੍ਸ ਅਤ੍ਤਾਨਮੁਪਤਾਪਯੇ, ਕਿਂਕਾਰਣਾ ਅਨੁਪਕਾਰੇਨ ਸੋਕਦੁਕ੍ਖੇਨ ਅਤ੍ਤਾਨਂ ਸਨ੍ਤਾਪੇਯ੍ਯਾ’’ਤਿ.

ਦਹਰਾ ਚਾਤਿ ਗਾਥਾ ‘‘ਮਚ੍ਚੁ ਨਾਮੇਸ ਤਾਤ ਭਰਤ, ਨੇਵ ਸੁਵਣ੍ਣਰੂਪਕਸਦਿਸਾਨਂ ਦਹਰਾਨਂ ਖਤ੍ਤਿਯਕੁਮਾਰਕਾਦੀਨਂ, ਨ ਵੁਦ੍ਧਿਪ੍ਪਤ੍ਤਾਨਂ ਮਹਾਯੋਧਾਨਂ, ਨ ਬਾਲਾਨਂ ਪੁਥੁਜ੍ਜਨਸਤ੍ਤਾਨਂ, ਨ ਬੁਦ੍ਧਾਦੀਨਂ ਪਣ੍ਡਿਤਾਨਂ, ਨ ਚਕ੍ਕਵਤ੍ਤਿਆਦੀਨਂ ਇਸ੍ਸਰਾਨਂ, ਨ ਨਿਦ੍ਧਨਾਨਂ ਦਲਿਦ੍ਦਾਦੀਨਂ ਲਜ੍ਜਤਿ, ਸਬ੍ਬੇਪਿਮੇ ਸਤ੍ਤਾ ਮਚ੍ਚੁਪਰਾਯਣਾ ਮਰਣਮੁਖੇ ਸਂਭਗ੍ਗਵਿਭਗ੍ਗਾ ਭਵਨ੍ਤਿਯੇਵਾ’’ਤਿ ਦਸ੍ਸਨਤ੍ਥਂ ਵੁਤ੍ਤਾ.

ਨਿਚ੍ਚਂ ਪਤਨਤੋਤਿ ਇਦਂ ਵੁਤ੍ਤਂ ਹੋਤਿ – ਯਥਾ ਹਿ ਤਾਤ ਭਰਤ, ਪਕ੍ਕਾਨਂ ਫਲਾਨਂ ਪਕ੍ਕਕਾਲਤੋ ਪਟ੍ਠਾਯ ‘‘ਇਦਾਨਿ ਵਣ੍ਟਾ ਛਿਜ੍ਜਿਤ੍ਵਾ ਪਤਿਸ੍ਸਨ੍ਤਿ, ਇਦਾਨਿ ਪਤਿਸ੍ਸਨ੍ਤੀ’’ਤਿ ਪਤਨਤੋ ਭਯਂ ਨਿਚ੍ਚਂ ਧੁਵਂ ਏਕਂਸਿਕਮੇਵ ਭਵਤਿ, ਏਵਂ ਆਸਙ੍ਕਨੀਯਤੋ ਏਵਂ ਜਾਤਾਨਂ ਮਚ੍ਚਾਨਮ੍ਪਿ ਏਕਂਸਿਕਂਯੇਵ ਮਰਣਤੋ ਭਯਂ, ਨਤ੍ਥਿ ਸੋ ਖਣੋ ਵਾ ਲਯੋ ਵਾ ਯਤ੍ਥ ਤੇਸਂ ਮਰਣਂ ਨ ਆਸਙ੍ਕਿਤਬ੍ਬਂ ਭਵੇਯ੍ਯਾਤਿ.

ਸਾਯਨ੍ਤਿ ਵਿਕਾਲੇ. ਇਮਿਨਾ ਰਤ੍ਤਿਭਾਗੇ ਚ ਦਿਟ੍ਠਾਨਂ ਦਿਵਸਭਾਗੇ ਅਦਸ੍ਸਨਂ, ਦਿਵਸਭਾਗੇ ਚ ਦਿਟ੍ਠਾਨਂ ਰਤ੍ਤਿਭਾਗੇ ਅਦਸ੍ਸਨਂ ਦੀਪੇਤਿ. ਕਿਞ੍ਚਿਦਤ੍ਥਨ੍ਤਿ ‘‘ਪਿਤਾ ਮੇ, ਪੁਤ੍ਤੋ ਮੇ’’ਤਿਆਦੀਹਿ ਪਰਿਦੇਵਮਾਨੋਵ ਪੋਸੋ ਸਮ੍ਮੂਲ਼੍ਹੋ ਅਤ੍ਤਾਨਂ ਹਿਂਸਨ੍ਤੋ ਕਿਲਮੇਨ੍ਤੋ ਅਪ੍ਪਮਤ੍ਤਕਮ੍ਪਿ ਅਤ੍ਥਂ ਆਹਰੇਯ੍ਯ. ਕਯਿਰਾ ਤਂ ਵਿਚਕ੍ਖਣੋਤਿ ਅਥ ਪਣ੍ਡਿਤੋ ਪੁਰਿਸੋ ਏਵਂ ਪਰਿਦੇਵਂ ਕਰੇਯ੍ਯ, ਯਸ੍ਮਾ ਪਨ ਪਰਿਦੇਵਨ੍ਤੋ ਮਤਂ ਵਾ ਆਨੇਤੁਂ ਅਞ੍ਞਂ ਵਾ ਤਸ੍ਸ ਵਡ੍ਢਿਂ ਕਾਤੁਂ ਨ ਸਕ੍ਕੋਤਿ, ਤਸ੍ਮਾ ਨਿਰਤ੍ਥਕਤ੍ਤਾ ਪਰਿਦੇਵਿਤਸ੍ਸ ਪਣ੍ਡਿਤਾ ਨ ਪਰਿਦੇਵਨ੍ਤਿ.

ਅਤ੍ਤਾਨਮਤ੍ਤਨੋਤਿ ਅਤ੍ਤਨੋ ਅਤ੍ਤਭਾਵਂ ਸੋਕਪਰਿਦੇਵਦੁਕ੍ਖੇਨ ਹਿਂਸਨ੍ਤੋ. ਨ ਤੇਨਾਤਿ ਤੇਨ ਪਰਿਦੇਵੇਨ ਪਰਲੋਕਂ ਗਤਾ ਸਤ੍ਤਾ ਨ ਪਾਲੇਨ੍ਤਿ ਨ ਯਾਪੇਨ੍ਤਿ. ਨਿਰਤ੍ਥਾਤਿ ਤਸ੍ਮਾ ਤੇਸਂ ਮਤਸਤ੍ਤਾਨਂ ਅਯਂ ਪਰਿਦੇਵਨਾ ਨਿਰਤ੍ਥਕਾ. ਸਰਣਨ੍ਤਿ ਨਿਵਾਸਗੇਹਂ. ਇਦਂ ਵੁਤ੍ਤਂ ਹੋਤਿ – ਯਥਾ ਪਣ੍ਡਿਤੋ ਪੁਰਿਸੋ ਅਤ੍ਤਨੋ ਵਸਨਾਗਾਰੇ ਆਦਿਤ੍ਤੇ ਮੁਹੁਤ੍ਤਮ੍ਪਿ ਵੋਸਾਨਂ ਅਨਾਪਜ੍ਜਿਤ੍ਵਾ ਘਟਸਤੇਨ ਘਟਸਹਸ੍ਸੇਨ ਵਾਰਿਨਾ ਨਿਬ੍ਬਾਪਯਤੇਵ, ਏਵਂ ਧੀਰੋ ਉਪ੍ਪਤਿਤਂ ਸੋਕਂ ਖਿਪ੍ਪਮੇਵ ਨਿਬ੍ਬਾਪਯੇ. ਤੂਲਂ ਵਿਯ ਚ ਵਾਤੋ ਯਥਾ ਸਣ੍ਠਾਤੁਂ ਨ ਸਕ੍ਕੋਤਿ, ਏਵਂ ਧਂਸਯੇ ਵਿਦ੍ਧਂਸੇਯ੍ਯਾਤਿ ਅਤ੍ਥੋ.

ਮਚ੍ਚੋ ਏਕੋਵ ਅਚ੍ਚੇਤੀਤਿ ਏਤ੍ਥ ਤਾਤ ਭਰਤ, ਇਮੇ ਸਤ੍ਤਾ ਕਮ੍ਮਸ੍ਸਕਾ ਨਾਮ, ਤਥਾ ਹਿ ਇਤੋ ਪਰਲੋਕਂ ਗਚ੍ਛਨ੍ਤੋ ਸਤ੍ਤੋ ਏਕੋਵ ਅਚ੍ਚੇਤਿ ਅਤਿਕ੍ਕਮਤਿ, ਖਤ੍ਤਿਯਾਦਿਕੁਲੇ ਜਾਯਮਾਨੋਪਿ ਏਕੋਵ ਗਨ੍ਤ੍ਵਾ ਜਾਯਤਿ. ਤਤ੍ਥ ਤਤ੍ਥ ਪਨ ਞਾਤਿਮਿਤ੍ਤਸਂਯੋਗੇਨ ‘‘ਅਯਂ ਮੇ ਪਿਤਾ, ਅਯਂ ਮੇ ਮਾਤਾ, ਅਯਂ ਮੇ ਮਿਤ੍ਤੋ’’ਤਿ ਸਂਯੋਗਪਰਮਾਤ੍ਵੇਵ ਸਮ੍ਭੋਗਾ ਸਬ੍ਬਪਾਣੀਨਂ, ਪਰਮਤ੍ਥੇਨ ਪਨ ਤੀਸੁਪਿ ਭਵੇਸੁ ਕਮ੍ਮਸ੍ਸਕਾਵੇਤੇ ਸਤ੍ਤਾਤਿ ਅਤ੍ਥੋ.

ਤਸ੍ਮਾਤਿ ਯਸ੍ਮਾ ਏਤੇਸਂ ਸਤ੍ਤਾਨਂ ਞਾਤਿਮਿਤ੍ਤਸਂਯੋਗਂ ਞਾਤਿਮਿਤ੍ਤਪਰਿਭੋਗਮਤ੍ਤਂ ਠਪੇਤ੍ਵਾ ਇਤੋ ਪਰਂ ਅਞ੍ਞਂ ਨਤ੍ਥਿ, ਤਸ੍ਮਾ. ਸਮ੍ਪਸ੍ਸਤੋਤਿ ਇਮਞ੍ਚ ਪਰਞ੍ਚ ਲੋਕਂ ਨਾਨਾਭਾਵਵਿਨਾਭਾਵਮੇਵ ਸਮ੍ਮਾ ਪਸ੍ਸਤੋ. ਅਞ੍ਞਾਯ ਧਮ੍ਮਨ੍ਤਿ ਅਟ੍ਠਵਿਧਲੋਕਧਮ੍ਮਂ ਜਾਨਿਤ੍ਵਾ. ਹਦਯਂ ਮਨਞ੍ਚਾਤਿ ਇਦਂ ਉਭਯਮ੍ਪਿ ਚਿਤ੍ਤਸ੍ਸੇਵ ਨਾਮਂ. ਇਦਂ ਵੁਤ੍ਤਂ ਹੋਤਿ –

‘‘ਲਾਭੋ ਅਲਾਭੋ ਯਸੋ ਅਯਸੋ ਚ, ਨਿਨ੍ਦਾ ਪਸਂਸਾ ਚ ਸੁਖਞ੍ਚ ਦੁਕ੍ਖਂ;

ਏਤੇ ਅਨਿਚ੍ਚਾ ਮਨੁਜੇਸੁ ਧਮ੍ਮਾ, ਮਾ ਸੋਚ ਕਿਂ ਸੋਚਸਿ ਪੋਟ੍ਠਪਾਦਾ’’ਤਿ. (ਜਾ. ੧.੪.੧੧੪) –

ਇਮੇਸਂ ਅਟ੍ਠਨ੍ਨਂ ਲੋਕਧਮ੍ਮਾਨਂ ਯੇਨ ਕੇਨਚਿ ਚਿਤ੍ਤਂ ਪਰਿਯਾਦੀਯਤਿ, ਤਸ੍ਸ ਚ ਅਨਿਚ੍ਚਤਂ ਞਤ੍ਵਾ ਠਿਤਸ੍ਸ ਧੀਰਸ੍ਸ ਪਿਤੁਪੁਤ੍ਤਮਰਣਾਦਿਵਤ੍ਥੁਕਾ ਮਹਨ੍ਤਾਪਿ ਸੋਕਾ ਹਦਯਂ ਨ ਤਾਪਯਨ੍ਤੀਤਿ. ਏਤਂ ਵਾ ਅਟ੍ਠਵਿਧਂ ਲੋਕਧਮ੍ਮਂ ਞਤ੍ਵਾ ਠਿਤਸ੍ਸ ਹਦਯਵਤ੍ਥੁਞ੍ਚ ਮਨਞ੍ਚ ਮਹਨ੍ਤਾਪਿ ਸੋਕਾ ਨ ਤਾਪਯਨ੍ਤੀਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਸੋਹਂ ਦਸ੍ਸਞ੍ਚ ਭੋਕ੍ਖਞ੍ਚਾਤਿ ਗਾਥਾਯ – ਤਾਤ ਭਰਤ, ਅਨ੍ਧਬਾਲਾਨਂ ਸਤ੍ਤਾਨਂ ਵਿਯ ਮਮ ਰੋਦਨਪਰਿਦੇਵਨਂ ਨਾਮ ਨ ਅਨੁਚ੍ਛਵਿਕਂ, ਅਹਂ ਪਨ ਪਿਤੁ ਅਚ੍ਚਯੇਨ ਤਸ੍ਸ ਠਾਨੇ ਠਤ੍ਵਾ ਕਪਣਾਦੀਨਂ ਦਾਨਾਰਹਾਨਂ ਦਾਨਂ, ਠਾਨਨ੍ਤਰਾਰਹਾਨਂ ਠਾਨਨ੍ਤਰਂ, ਯਸਾਰਹਾਨਂ ਯਸਂ ਦਸ੍ਸਾਮਿ, ਪਿਤਰਾ ਮੇ ਪਰਿਭੁਤ੍ਤਨਯੇਨ ਇਸ੍ਸਰਿਯਂ ਪਰਿਭੁਞ੍ਜਿਸ੍ਸਾਮਿ, ਞਾਤਕੇ ਚ ਪੋਸੇਸ੍ਸਾਮਿ, ਅਵਸੇਸਞ੍ਚ ਅਨ੍ਤੋਪਰਿਜਨਾਦਿਕਂ ਜਨਂ ਪਾਲੇਸ੍ਸਾਮਿ, ਧਮ੍ਮਿਕਸਮਣਬ੍ਰਾਹ੍ਮਣਾਨਂ ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਂ ਕਰਿਸ੍ਸਾਮੀਤਿ ਏਵਞ੍ਹਿ ਜਾਨਤੋ ਪਣ੍ਡਿਤਪੁਰਿਸਸ੍ਸ ਅਨੁਰੂਪਂ ਕਿਚ੍ਚਨ੍ਤਿ ਅਤ੍ਥੋ.

ਪਰਿਸਾ ਇਮਂ ਰਾਮਪਣ੍ਡਿਤਸ੍ਸ ਅਨਿਚ੍ਚਤਾਪਕਾਸਨਂ ਧਮ੍ਮਦੇਸਨਂ ਸੁਤ੍ਵਾ ਨਿਸ੍ਸੋਕਾ ਅਹੇਸੁਂ. ਤਤੋ ਭਰਤਕੁਮਾਰੋ ਰਾਮਪਣ੍ਡਿਤਂ ਵਨ੍ਦਿਤ੍ਵਾ ‘‘ਬਾਰਾਣਸਿਰਜ੍ਜਂ ਸਮ੍ਪਟਿਚ੍ਛਥਾ’’ਤਿ ਆਹ. ਤਾਤ ਲਕ੍ਖਣਞ੍ਚ, ਸੀਤਾਦੇਵਿਞ੍ਚ ਗਹੇਤ੍ਵਾ ਗਨ੍ਤ੍ਵਾ ਰਜ੍ਜਂ ਅਨੁਸਾਸਥਾਤਿ. ਤੁਮ੍ਹੇ ਪਨ, ਦੇਵਾਤਿ. ਤਾਤ, ਮਮ ਪਿਤਾ ‘‘ਦ੍ਵਾਦਸਵਸ੍ਸਚ੍ਚਯੇਨ ਆਗਨ੍ਤ੍ਵਾ ਰਜ੍ਜਂ ਕਾਰੇਯ੍ਯਾਸੀ’’ਤਿ ਮਂ ਅਵੋਚ, ਅਹਂ ਇਦਾਨੇਵ ਗਚ੍ਛਨ੍ਤੋ ਤਸ੍ਸ ਵਚਨਕਰੋ ਨਾਮ ਨ ਹੋਮਿ, ਅਞ੍ਞਾਨਿਪਿ ਤੀਣਿ ਵਸ੍ਸਾਨਿ ਅਤਿਕ੍ਕਮਿਤ੍ਵਾ ਆਗਮਿਸ੍ਸਾਮੀਤਿ. ‘‘ਏਤ੍ਤਕਂ ਕਾਲਂ ਕੋ ਰਜ੍ਜਂ ਕਾਰੇਸ੍ਸਤੀ’’ਤਿ? ‘‘ਤੁਮ੍ਹੇ ਕਾਰੇਥਾ’’ਤਿ. ‘‘ਨ ਮਯਂ ਕਾਰੇਸ੍ਸਾਮਾ’’ਤਿ. ‘‘ਤੇਨ ਹਿ ਯਾਵ ਮਮਾਗਮਨਾ ਇਮਾ ਪਾਦੁਕਾ ਕਾਰੇਸ੍ਸਨ੍ਤੀ’’ਤਿ ਅਤ੍ਤਨੋ ਤਿਣਪਾਦੁਕਾ ਓਮੁਞ੍ਚਿਤ੍ਵਾ ਅਦਾਸਿ. ਤੇ ਤਯੋਪਿ ਜਨਾ ਪਾਦੁਕਾ ਗਹੇਤ੍ਵਾ ਰਾਮਪਣ੍ਡਿਤਂ ਵਨ੍ਦਿਤ੍ਵਾ ਮਹਾਜਨਪਰਿਵੁਤਾ ਬਾਰਾਣਸਿਂ ਅਗਮਂਸੁ. ਤੀਣਿ ਸਂਵਚ੍ਛਰਾਨਿ ਪਾਦੁਕਾ ਰਜ੍ਜਂ ਕਾਰੇਸੁਂ. ਅਮਚ੍ਚਾ ਤਿਣਪਾਦੁਕਾ ਰਾਜਪਲ੍ਲਙ੍ਕੇ ਠਪੇਤ੍ਵਾ ਅਡ੍ਡਂ ਵਿਨਿਚ੍ਛਿਨਨ੍ਤਿ. ਸਚੇ ਦੁਬ੍ਬਿਨਿਚ੍ਛਿਤੋ ਹੋਤਿ, ਪਾਦੁਕਾ ਅਞ੍ਞਮਞ੍ਞਂ ਪਟਿਹਞ੍ਞਨ੍ਤਿ. ਤਾਯ ਸਞ੍ਞਾਯ ਪੁਨ ਵਿਨਿਚ੍ਛਿਨਨ੍ਤਿ. ਸਮ੍ਮਾ ਵਿਨਿਚ੍ਛਿਤਕਾਲੇ ਪਾਦੁਕਾ ਨਿਸ੍ਸਦ੍ਦਾ ਸਨ੍ਨਿਸੀਦਨ੍ਤਿ. ਰਾਮਪਣ੍ਡਿਤੋ ਤਿਣ੍ਣਂ ਸਂਵਚ੍ਛਰਾਨਂ ਅਚ੍ਚਯੇਨ ਅਰਞ੍ਞਾ ਨਿਕ੍ਖਮਿਤ੍ਵਾ ਬਾਰਾਣਸਿਨਗਰਂ ਪਤ੍ਵਾ ਉਯ੍ਯਾਨਂ ਪਾਵਿਸਿ. ਤਸ੍ਸ ਆਗਮਨਭਾਵਂ ਞਤ੍ਵਾ ਕੁਮਾਰਾ ਅਮਚ੍ਚਗਣਪਰਿਵੁਤਾ ਉਯ੍ਯਾਨਂ ਗਨ੍ਤ੍ਵਾ ਸੀਤਂ ਅਗ੍ਗਮਹੇਸਿਂ ਕਤ੍ਵਾ ਉਭਿਨ੍ਨਮ੍ਪਿ ਅਭਿਸੇਕਂ ਅਕਂਸੁ. ਏਵਂ ਅਭਿਸੇਕਪ੍ਪਤ੍ਤੋ ਮਹਾਸਤ੍ਤੋ ਅਲਙ੍ਕਤਰਥੇ ਠਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਗਰਂ ਪਵਿਸਿਤ੍ਵਾ ਪਦਕ੍ਖਿਣਂ ਕਤ੍ਵਾ ਚਨ੍ਦਕਪਾਸਾਦਵਰਸ੍ਸ ਮਹਾਤਲਂ ਅਭਿਰੁਹਿ. ਤਤੋ ਪਟ੍ਠਾਯ ਸੋਲ਼ਸ ਵਸ੍ਸਸਹਸ੍ਸਾਨਿ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਆਯੁਪਰਿਯੋਸਾਨੇ ਸਗ੍ਗਪੁਰਂ ਪੂਰੇਸਿ.

੯੬.

‘‘ਦਸ ਵਸ੍ਸਸਹਸ੍ਸਾਨਿ, ਸਟ੍ਠਿ ਵਸ੍ਸਸਤਾਨਿ ਚ;

ਕਮ੍ਬੁਗੀਵੋ ਮਹਾਬਾਹੁ, ਰਾਮੋ ਰਜ੍ਜਮਕਾਰਯੀ’’ਤਿ. –

ਅਯਂ ਅਭਿਸਮ੍ਬੁਦ੍ਧਗਾਥਾ ਤਮਤ੍ਥਂ ਦੀਪੇਤਿ.

ਤਤ੍ਥ ਕਮ੍ਬੁਗੀਵੋਤਿ ਸੁਵਣ੍ਣਾਲ਼ਿਙ੍ਗਸਦਿਸਗੀਵੋ. ਸੁਵਣ੍ਣਞ੍ਹਿ ਕਮ੍ਬੂਤਿ ਵੁਚ੍ਚਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਕੁਟੁਮ੍ਬਿਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਦਸਰਥਮਹਾਰਾਜਾ ਸੁਦ੍ਧੋਦਨਮਹਾਰਾਜਾ ਅਹੋਸਿ, ਮਾਤਾ ਮਹਾਮਾਯਾਦੇਵੀ, ਸੀਤਾ ਰਾਹੁਲਮਾਤਾ, ਭਰਤੋ ਆਨਨ੍ਦੋ, ਲਕ੍ਖਣੋ ਸਾਰਿਪੁਤ੍ਤੋ, ਪਰਿਸਾ ਬੁਦ੍ਧਪਰਿਸਾ, ਰਾਮਪਣ੍ਡਿਤੋ ਪਨ ਅਹਮੇਵ ਅਹੋਸਿਨ੍ਤਿ.

ਦਸਰਥਜਾਤਕਵਣ੍ਣਨਾ ਸਤ੍ਤਮਾ.

[੪੬੨] ੮. ਸਂਵਰਜਾਤਕਵਣ੍ਣਨਾ

ਜਾਨਨ੍ਤੋ ਨੋ ਮਹਾਰਾਜਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਓਸ੍ਸਟ੍ਠਵੀਰਿਯਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਕਿਰ ਸਾਵਤ੍ਥਿਵਾਸੀ ਕੁਲਪੁਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਆਚਰਿਯੁਪਜ੍ਝਾਯਵਤ੍ਤਂ ਪੂਰੇਨ੍ਤੋ ਉਭਯਾਨਿ ਪਾਤਿਮੋਕ੍ਖਾਨਿ ਪਗੁਣਾਨਿ ਕਤ੍ਵਾ ਪਰਿਪੁਣ੍ਣਪਞ੍ਚਵਸ੍ਸੋ ਕਮ੍ਮਟ੍ਠਾਨਂ ਗਹੇਤ੍ਵਾ ‘‘ਅਰਞ੍ਞੇ ਵਸਿਸ੍ਸਾਮੀ’’ਤਿ ਆਚਰਿਯੁਪਜ੍ਝਾਯੇ ਆਪੁਚ੍ਛਿਤ੍ਵਾ ਕੋਸਲਰਟ੍ਠੇ ਏਕਂ ਪਚ੍ਚਨ੍ਤਗਾਮਂ ਗਨ੍ਤ੍ਵਾ ਤਤ੍ਥ ਇਰਿਯਾਪਥੇ ਪਸਨ੍ਨਮਨੁਸ੍ਸੇਹਿ ਪਣ੍ਣਸਾਲਂ ਕਤ੍ਵਾ ਉਪਟ੍ਠਿਯਮਾਨੋ ਵਸ੍ਸਂ ਉਪਗਨ੍ਤ੍ਵਾ ਯੁਞ੍ਜਨ੍ਤੋ ਘਟੇਨ੍ਤੋ ਵਾਯਮਨ੍ਤੋ ਅਚ੍ਚਾਰਦ੍ਧੇਨ ਵੀਰਿਯੇਨ ਤੇਮਾਸਂ ਕਮ੍ਮਟ੍ਠਾਨਂ ਭਾਵੇਤ੍ਵਾ ਓਭਾਸਮਤ੍ਤਮ੍ਪਿ ਉਪ੍ਪਾਦੇਤੁਂ ਅਸਕ੍ਕੋਨ੍ਤੋ ਚਿਨ੍ਤੇਸਿ ‘‘ਅਦ੍ਧਾ ਅਹਂ ਸਤ੍ਥਾਰਾ ਦੇਸਿਤੇਸੁ ਚਤੂਸੁ ਪੁਗ੍ਗਲੇਸੁ ਪਦਪਰਮੋ, ਕਿਂ ਮੇ ਅਰਞ੍ਞਵਾਸੇਨ, ਜੇਤਵਨਂ ਗਨ੍ਤ੍ਵਾ ਤਥਾਗਤਸ੍ਸ ਰੂਪਸਿਰਿਂ ਪਸ੍ਸਨ੍ਤੋ ਮਧੁਰਧਮ੍ਮਦੇਸਨਂ ਸੁਣਨ੍ਤੋ ਵੀਤਿਨਾਮੇਸ੍ਸਾਮੀ’’ਤਿ. ਸੋ ਵੀਰਿਯਂ ਓਸ੍ਸਜਿਤ੍ਵਾ ਤਤੋ ਨਿਕ੍ਖਨ੍ਤੋ ਅਨੁਪੁਬ੍ਬੇਨ ਜੇਤਵਨਂ ਗਨ੍ਤ੍ਵਾ ਆਚਰਿਯੁਪਜ੍ਝਾਯੇਹਿ ਚੇਵ ਸਨ੍ਦਿਟ੍ਠਸਮ੍ਭਤ੍ਤੇਹਿ ਚ ਆਗਮਨਕਾਰਣਂ ਪੁਟ੍ਠੋ ਤਮਤ੍ਥਂ ਕਥੇਤ੍ਵਾ ਤੇਹਿ ‘‘ਕਸ੍ਮਾ ਏਵਮਕਾਸੀ’’ਤਿ ਗਰਹਿਤ੍ਵਾ ਸਤ੍ਥੁ ਸਨ੍ਤਿਕਂ ਨੇਤ੍ਵਾ ‘‘ਕਿਂ, ਭਿਕ੍ਖਵੇ, ਅਨਿਚ੍ਛਮਾਨਂ ਭਿਕ੍ਖੁਂ ਆਨਯਿਤ੍ਥਾ’’ਤਿ ਵੁਤ੍ਤੇ ‘‘ਅਯਂ, ਭਨ੍ਤੇ, ਵੀਰਿਯਂ ਓਸ੍ਸਜਿਤ੍ਵਾ ਆਗਤੋ’’ਤਿ ਆਰੋਚਿਤੇ ਸਤ੍ਥਾ ‘‘ਸਚ੍ਚਂ ਕਿਰਾ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਕਸ੍ਮਾ ਭਿਕ੍ਖੁ ਵੀਰਿਯਂ ਓਸ੍ਸਜਿ, ਇਮਸ੍ਮਿਞ੍ਹਿ ਸਾਸਨੇ ਨਿਬ੍ਬੀਰਿਯਸ੍ਸ ਕੁਸੀਤਪੁਗ੍ਗਲਸ੍ਸ ਅਗ੍ਗਫਲਂ ਅਰਹਤ੍ਤਂ ਨਾਮ ਨਤ੍ਥਿ, ਆਰਦ੍ਧਵੀਰਿਯਾ ਇਮਂ ਧਮ੍ਮਂ ਆਰਾਧੇਨ੍ਤਿ, ਤ੍ਵਂ ਖੋ ਪਨ ਪੁਬ੍ਬੇ ਵੀਰਿਯਵਾ ਓਵਾਦਕ੍ਖਮੋ, ਤੇਨੇਵ ਕਾਰਣੇਨ ਬਾਰਾਣਸਿਰਞ੍ਞੋ ਪੁਤ੍ਤਸਤਸ੍ਸ ਸਬ੍ਬਕਨਿਟ੍ਠੋ ਹੁਤ੍ਵਾਪਿ ਪਣ੍ਡਿਤਾਨਂ ਓਵਾਦੇ ਠਤ੍ਵਾ ਸੇਤਚ੍ਛਤ੍ਤਂ ਪਤ੍ਤੋਸੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਸਂਵਰਕੁਮਾਰੋ ਨਾਮ ਪੁਤ੍ਤਸਤਸ੍ਸ ਸਬ੍ਬਕਨਿਟ੍ਠੋ ਅਹੋਸਿ. ਰਾਜਾ ਏਕੇਕਂ ਪੁਤ੍ਤਂ ‘‘ਸਿਕ੍ਖਿਤਬ੍ਬਯੁਤ੍ਤਕਂ ਸਿਕ੍ਖਾਪੇਥਾ’’ਤਿ ਏਕੇਕਸ੍ਸ ਅਮਚ੍ਚਸ੍ਸ ਅਦਾਸਿ. ਸਂਵਰਕੁਮਾਰਸ੍ਸ ਆਚਰਿਯੋ ਅਮਚ੍ਚੋ ਬੋਧਿਸਤ੍ਤੋ ਅਹੋਸਿ ਪਣ੍ਡਿਤੋ ਬ੍ਯਤ੍ਤੋ ਰਾਜਪੁਤ੍ਤਸ੍ਸ ਪਿਤੁਟ੍ਠਾਨੇ ਠਿਤੋ. ਅਮਚ੍ਚਾ ਸਿਕ੍ਖਿਤਸਿਪ੍ਪੇ ਰਾਜਪੁਤ੍ਤੇ ਰਞ੍ਞੋ ਦਸ੍ਸੇਸੁਂ. ਰਾਜਾ ਤੇਸਂ ਜਨਪਦਂ ਦਤ੍ਵਾ ਉਯ੍ਯੋਜੇਸਿ. ਸਂਵਰਕੁਮਾਰੋ ਸਬ੍ਬਸਿਪ੍ਪਸ੍ਸ ਨਿਪ੍ਫਤ੍ਤਿਂ ਪਤ੍ਵਾ ਬੋਧਿਸਤ੍ਤਂ ਪੁਚ੍ਛਿ ‘‘ਤਾਤ, ਸਚੇ ਮਂ ਪਿਤਾ ਜਨਪਦਂ ਪੇਸੇਤਿ, ਕਿਂ ਕਰੋਮੀ’’ਤਿ? ‘‘ਤਾਤ, ਤ੍ਵਂ ਜਨਪਦੇ ਦੀਯਮਾਨੇ ਤਂ ਅਗ੍ਗਹੇਤ੍ਵਾ ‘ਦੇਵ ਅਹਂ ਸਬ੍ਬਕਨਿਟ੍ਠੋ, ਮਯਿਪਿ ਗਤੇ ਤੁਮ੍ਹਾਕਂ ਪਾਦਮੂਲਂ ਤੁਚ੍ਛਂ ਭਵਿਸ੍ਸਤਿ, ਅਹਂ ਤੁਮ੍ਹਾਕਂ ਪਾਦਮੂਲੇਯੇਵ ਵਸਿਸ੍ਸਾਮੀ’ਤਿ ਵਦੇਯ੍ਯਾਸੀ’’ਤਿ. ਅਥੇਕਦਿਵਸਂ ਰਾਜਾ ਸਂਵਰਕੁਮਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨਂ ਪੁਚ੍ਛਿ ‘‘ਕਿਂ ਤਾਤ, ਸਿਪ੍ਪਂ ਤੇ ਨਿਟ੍ਠਿਤ’’ਨ੍ਤਿ? ‘‘ਆਮ, ਦੇਵਾ’’ਤਿ. ‘‘ਤੁਯ੍ਹਮ੍ਪਿ ਜਨਪਦਂ ਦੇਮੀ’’ਤਿ. ‘‘ਦੇਵ ਤੁਮ੍ਹਾਕਂ ਪਾਦਮੂਲਂ ਤੁਚ੍ਛਂ ਭਵਿਸ੍ਸਤਿ, ਪਾਦਮੂਲੇਯੇਵ ਵਸਿਸ੍ਸਾਮੀ’’ਤਿ. ਰਾਜਾ ਤੁਸ੍ਸਿਤ੍ਵਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਸੋ ਤਤੋ ਪਟ੍ਠਾਯ ਰਞ੍ਞੋ ਪਾਦਮੂਲੇਯੇਵ ਹੁਤ੍ਵਾ ਪੁਨਪਿ ਬੋਧਿਸਤ੍ਤਂ ਪੁਚ੍ਛਿ ‘‘ਤਾਤ ਅਞ੍ਞਂ ਕਿਂ ਕਰੋਮੀ’’ਤਿ? ‘‘ਤਾਤ ਰਾਜਾਨਂ ਏਕਂ ਪੁਰਾਣੁਯ੍ਯਾਨਂ ਯਾਚਾਹੀ’’ਤਿ. ਸੋ ‘‘ਸਾਧੂ’’ਤਿ ਉਯ੍ਯਾਨਂ ਯਾਚਿਤ੍ਵਾ ਤਤ੍ਥ ਜਾਤਕੇਹਿ ਪੁਪ੍ਫਫਲੇਹਿ ਨਗਰੇ ਇਸ੍ਸਰਜਨਂ ਸਙ੍ਗਣ੍ਹਿਤ੍ਵਾ ਪੁਨ ‘‘ਕਿਂ ਕਰੋਮੀ’’ਤਿ ਪੁਚ੍ਛਿ. ‘‘ਤਾਤ, ਰਾਜਾਨਂ ਆਪੁਚ੍ਛਿਤ੍ਵਾ ਅਨ੍ਤੋਨਗਰੇ ਭਤ੍ਤਵੇਤਨਂ ਤ੍ਵਮੇਵ ਦੇਹੀ’’ਤਿ. ਸੋ ਤਥਾ ਕਤ੍ਵਾ ਅਨ੍ਤੋਨਗਰੇ ਕਸ੍ਸਚਿ ਕਿਞ੍ਚਿ ਅਹਾਪੇਤ੍ਵਾ ਭਤ੍ਤਵੇਤਨਂ ਦਤ੍ਵਾ ਪੁਨ ਬੋਧਿਸਤ੍ਤਂ ਪੁਚ੍ਛਿਤ੍ਵਾ ਰਾਜਾਨਂ ਵਿਞ੍ਞਾਪੇਤ੍ਵਾ ਅਨ੍ਤੋਨਿਵੇਸਨੇ ਦਾਸਪੋਰਿਸਾਨਮ੍ਪਿ ਹਤ੍ਥੀਨਮ੍ਪਿ ਅਸ੍ਸਾਨਮ੍ਪਿ ਬਲਕਾਯਸ੍ਸਪਿ ਵਤ੍ਤਂ ਅਪਰਿਹਾਪੇਤ੍ਵਾ ਅਦਾਸਿ, ਤਿਰੋਜਨਪਦੇਹਿ ਆਗਤਾਨਂ ਦੂਤਾਦੀਨਂ ਨਿਵਾਸਟ੍ਠਾਨਾਦੀਨਿ ਵਾਣਿਜਾਨਂ ਸੁਙ੍ਕਨ੍ਤਿ ਸਬ੍ਬਕਰਣੀਯਾਨਿ ਅਤ੍ਤਨਾਵ ਅਕਾਸਿ. ਏਵਂ ਸੋ ਮਹਾਸਤ੍ਤਸ੍ਸ ਓਵਾਦੇ ਠਤ੍ਵਾ ਸਬ੍ਬਂ ਅਨ੍ਤੋਜਨਞ੍ਚ ਬਹਿਜਨਞ੍ਚ ਨਾਗਰੇ ਚ ਰਟ੍ਠਵਾਸਿਨੋ ਚ ਆਗਨ੍ਤੁਕੇ ਚ ਆਯਵਤ੍ਤਨੇ ਚ ਤੇਨ ਤੇਨ ਸਙ੍ਗਹਵਤ੍ਥੁਨਾ ਆਬਨ੍ਧਿਤ੍ਵਾ ਸਙ੍ਗਣ੍ਹਿ, ਸਬ੍ਬੇਸਂ ਪਿਯੋ ਅਹੋਸਿ ਮਨਾਪੋ.

ਅਪਰਭਾਗੇ ਰਾਜਾਨਂ ਮਰਣਮਞ੍ਚੇ ਨਿਪਨ੍ਨਂ ਅਮਚ੍ਚਾ ਪੁਚ੍ਛਿਂਸੁ ‘‘ਦੇਵ, ਤੁਮ੍ਹਾਕਂ ਅਚ੍ਚਯੇਨ ਸੇਤਚ੍ਛਤ੍ਤਂ ਕਸ੍ਸ ਦੇਮਾ’’ਤਿ? ‘‘ਤਾਤ, ਮਮ ਪੁਤ੍ਤਾ ਸਬ੍ਬੇਪਿ ਸੇਤਚ੍ਛਤ੍ਤਸ੍ਸ ਸਾਮਿਨੋਵ. ਯੋ ਪਨ ਤੁਮ੍ਹਾਕਂ ਮਨਂ ਗਣ੍ਹਾਤਿ, ਤਸ੍ਸੇਵ ਸੇਤਚ੍ਛਤ੍ਥਂ ਦਦੇਯ੍ਯਾਥਾ’’ਤਿ. ਤੇ ਤਸ੍ਮਿਂ ਕਾਲਕਤੇ ਤਸ੍ਸ ਸਰੀਰਪਰਿਹਾਰਂ ਕਤ੍ਵਾ ਸਤ੍ਤਮੇ ਦਿਵਸੇ ਸਨ੍ਨਿਪਤਿਤ੍ਵਾ ‘‘ਰਞ੍ਞਾ ‘ਯੋ ਤੁਮ੍ਹਾਕਂ ਮਨਂ ਗਣ੍ਹਾਤਿ, ਤਸ੍ਸ ਸੇਤਚ੍ਛਤ੍ਤਂ ਉਸ੍ਸਾਪੇਯ੍ਯਾਥਾ’ਤਿ ਵੁਤ੍ਤਂ, ਅਮ੍ਹਾਕਞ੍ਚ ਅਯਂ ਸਂਵਰਕੁਮਾਰੋ ਮਨਂ ਗਣ੍ਹਾਤੀ’’ਤਿ ਞਾਤਕੇਹਿ ਪਰਿਵਾਰਿਤਾ ਤਸ੍ਸ ਕਞ੍ਚਨਮਾਲਂ ਸੇਤਚ੍ਛਤ੍ਤਂ ਉਸ੍ਸਾਪਯਿਂਸੁ. ਸਂਵਰਮਹਾਰਾਜਾ ਬੋਧਿਸਤ੍ਤਸ੍ਸ ਓਵਾਦੇ ਠਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਸਿ. ਇਤਰੇ ਏਕੂਨਸਤਕੁਮਾਰਾ ‘‘ਪਿਤਾ ਕਿਰ ਨੋ ਕਾਲਕਤੋ, ਸਂਵਰਕੁਮਾਰਸ੍ਸ ਕਿਰ ਸੇਤਚ੍ਛਤ੍ਤਂ ਉਸ੍ਸਾਪੇਸੁਂ, ਸੋ ਸਬ੍ਬਕਨਿਟ੍ਠੋ, ਤਸ੍ਸ ਛਤ੍ਤਂ ਨ ਪਾਪੁਣਾਤਿ, ਸਬ੍ਬਜੇਟ੍ਠਕਸ੍ਸ ਛਤ੍ਤਂ ਉਸ੍ਸਾਪੇਸ੍ਸਾਮਾ’’ਤਿ ਏਕਤੋ ਆਗਨ੍ਤ੍ਵਾ ‘‘ਛਤ੍ਤਂ ਵਾ ਨੋ ਦੇਤੁ, ਯੁਦ੍ਧਂ ਵਾ’’ਤਿ ਸਂਵਰਮਹਾਰਾਜਸ੍ਸ ਪਣ੍ਣਂ ਪੇਸੇਤ੍ਵਾ ਨਗਰਂ ਉਪਰੁਨ੍ਧਿਂਸੁ. ਰਾਜਾ ਬੋਧਿਸਤ੍ਤਸ੍ਸ ਤਂ ਪਵਤ੍ਤਿਂ ਆਰੋਚੇਤ੍ਵਾ ‘‘ਇਦਾਨਿ ਕਿਂ ਕਰੋਮਾ’’ਤਿ ਪੁਚ੍ਛਿ. ਮਹਾਰਾਜ, ਤਵ ਭਾਤਿਕੇਹਿ ਸਦ੍ਧਿਂ ਯੁਜ੍ਝਨਕਿਚ੍ਚਂ ਨਤ੍ਥਿ, ਤ੍ਵਂ ਪਿਤੁ ਸਨ੍ਤਕਂ ਧਨਂ ਸਤਕੋਟ੍ਠਾਸੇ ਕਾਰੇਤ੍ਵਾ ਏਕੂਨਸਤਂ ਭਾਤਿਕਾਨਂ ਪੇਸੇਤ੍ਵਾ ‘‘ਇਮਂ ਤੁਮ੍ਹਾਕਂ ਕੋਟ੍ਠਾਸਂ ਪਿਤੁ ਸਨ੍ਤਕਂ ਗਣ੍ਹਥ, ਨਾਹਂ ਤੁਮ੍ਹੇਹਿ ਸਦ੍ਧਿਂ ਯੁਜ੍ਝਾਮੀ’’ਤਿ ਸਾਸਨਂ ਪਹਿਣਾਹੀਤਿ. ਸੋ ਤਥਾ ਅਕਾਸਿ. ਅਥਸ੍ਸ ਸਬ੍ਬਜੇਟ੍ਠਭਾਤਿਕੋ ਉਪੋਸਥਕੁਮਾਰੋ ਨਾਮ ਸੇਸੇ ਆਮਨ੍ਤੇਤ੍ਵਾ ‘‘ਤਾਤਾ, ਰਾਜਾਨਂ ਨਾਮ ਅਭਿਭਵਿਤੁਂ ਸਮਤ੍ਥਾ ਨਾਮ ਨਤ੍ਥਿ, ਅਯਞ੍ਚ ਨੋ ਕਨਿਟ੍ਠਭਾਤਿਕੋ ਪਟਿਸਤ੍ਤੁਪਿ ਹੁਤ੍ਵਾ ਨ ਤਿਟ੍ਠਤਿ, ਅਮ੍ਹਾਕਂ ਪਿਤੁ ਸਨ੍ਤਕਂ ਧਨਂ ਪੇਸੇਤ੍ਵਾ ‘ਨਾਹਂ ਤੁਮ੍ਹੇਹਿ ਸਦ੍ਧਿਂ ਯੁਜ੍ਝਾਮੀ’ਤਿ ਪੇਸੇਸਿ, ਨ ਖੋ ਪਨ ਮਯਂ ਸਬ੍ਬੇਪਿ ਏਕਕ੍ਖਣੇ ਛਤ੍ਤਂ ਉਸ੍ਸਾਪੇਸ੍ਸਾਮ, ਏਕਸ੍ਸੇਵ ਛਤ੍ਤਂ ਉਸ੍ਸਾਪੇਸ੍ਸਾਮ, ਅਯਮੇਵ ਰਾਜਾ ਹੋਤੁ, ਏਥ ਤਂ ਪਸ੍ਸਿਤ੍ਵਾ ਰਾਜਕੁਟੁਮ੍ਬਂ ਪਟਿਚ੍ਛਾਦੇਤ੍ਵਾ ਅਮ੍ਹਾਕਂ ਜਨਪਦਮੇਵ ਗਚ੍ਛਾਮਾ’’ਤਿ ਆਹ. ਅਥ ਤੇ ਸਬ੍ਬੇਪਿ ਕੁਮਾਰਾ ਨਗਰਦ੍ਵਾਰਂ ਵਿਵਰਾਪੇਤ੍ਵਾ ਪਟਿਸਤ੍ਤੁਨੋ ਅਹੁਤ੍ਵਾ ਨਗਰਂ ਪਵਿਸਿਂਸੁ.

ਰਾਜਾਪਿ ਤੇਸਂ ਅਮਚ੍ਚੇਹਿ ਪਣ੍ਣਾਕਾਰਂ ਗਾਹਾਪੇਤ੍ਵਾ ਪਟਿਮਗ੍ਗਂ ਪੇਸੇਤਿ. ਕੁਮਾਰਾ ਨਾਤਿਮਹਨ੍ਤੇਨ ਪਰਿਵਾਰੇਨ ਪਤ੍ਤਿਕਾਵ ਆਗਨ੍ਤ੍ਵਾ ਰਾਜਨਿਵੇਸਨਂ ਅਭਿਰੁਹਿਤ੍ਵਾ ਸਂਵਰਮਹਾਰਾਜਸ੍ਸ ਨਿਪਚ੍ਚਕਾਰਂ ਦਸ੍ਸੇਤ੍ਵਾ ਨੀਚਾਸਨੇ ਨਿਸੀਦਿਂਸੁ. ਸਂਵਰਮਹਾਰਾਜਾ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਸੀਹਾਸਨੇ ਨਿਸੀਦਿ, ਮਹਨ੍ਤੋ ਯਸੋ ਮਹਨ੍ਤਂ ਸਿਰਿਸੋਭਗ੍ਗਂ ਅਹੋਸਿ, ਓਲੋਕਿਤੋਲੋਕਿਤਟ੍ਠਾਨਂ ਕਮ੍ਪਿ. ਉਪੋਸਥਕੁਮਾਰੋ ਸਂਵਰਮਹਾਰਾਜਸ੍ਸ ਸਿਰਿਵਿਭਵਂ ਓਲੋਕੇਤ੍ਵਾ ‘‘ਅਮ੍ਹਾਕਂ ਪਿਤਾ ਅਤ੍ਤਨੋ ਅਚ੍ਚਯੇਨ ਸਂਵਰਕੁਮਾਰਸ੍ਸ ਰਾਜਭਾਵਂ ਞਤ੍ਵਾ ਮਞ੍ਞੇ ਅਮ੍ਹਾਕਂ ਜਨਪਦੇ ਦਤ੍ਵਾ ਇਮਸ੍ਸ ਨ ਅਦਾਸੀ’’ਤਿ ਚਿਨ੍ਤੇਤ੍ਵਾ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੯੭.

‘‘ਜਾਨਨ੍ਤੋ ਨੋ ਮਹਾਰਾਜ, ਤਵ ਸੀਲਂ ਜਨਾਧਿਪੋ;

ਇਮੇ ਕੁਮਾਰੇ ਪੂਜੇਨ੍ਤੋ, ਨ ਤਂ ਕੇਨਚਿ ਮਞ੍ਞਥ.

੯੮.

‘‘ਤਿਟ੍ਠਨ੍ਤੇ ਨੋ ਮਹਾਰਾਜੇ, ਅਦੁ ਦੇਵੇ ਦਿਵਙ੍ਗਤੇ;

ਞਾਤੀ ਤਂ ਸਮਨੁਞ੍ਞਿਂਸੁ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ.

੯੯.

‘‘ਕੇਨ ਸਂਵਰ ਵਤ੍ਤੇਨ, ਸਞ੍ਜਾਤੇ ਅਭਿਤਿਟ੍ਠਸਿ;

ਕੇਨ ਤਂ ਨਾਤਿਵਤ੍ਤਨ੍ਤਿ, ਞਾਤਿਸਙ੍ਘਾ ਸਮਾਗਤਾ’’ਤਿ.

ਤਤ੍ਥ ਜਾਨਨ੍ਤੋ ਨੋਤਿ ਜਾਨਨ੍ਤੋ ਨੁ. ਜਨਾਧਿਪੋਤਿ ਅਮ੍ਹਾਕਂ ਪਿਤਾ ਨਰਿਨ੍ਦੋ. ਇਮੇਤਿ ਇਮੇ ਏਕੂਨਸਤੇ ਕੁਮਾਰੇ. ਪਾਲ਼ਿਪੋਤ੍ਥਕੇਸੁ ਪਨ ‘‘ਅਞ੍ਞੇ ਕੁਮਾਰੇ’’ਤਿ ਲਿਖਿਤਂ. ਪੂਜੇਨ੍ਤੋਤਿ ਤੇਨ ਤੇਨ ਜਨਪਦੇਨ ਮਾਨੇਨ੍ਤੋ. ਨ ਤਂ ਕੇਨਚੀਤਿ ਖੁਦ੍ਦਕੇਨਾਪਿ ਕੇਨਚਿ ਜਨਪਦੇਨ ਤਂ ਪੂਜੇਤਬ੍ਬਂ ਨ ਮਞ੍ਞਿਤ੍ਥ, ‘‘ਅਯਂ ਮਮ ਅਚ੍ਚਯੇਨ ਰਾਜਾ ਭਵਿਸ੍ਸਤੀ’’ਤਿ ਞਤ੍ਵਾ ਮਞ੍ਞੇ ਅਤ੍ਤਨੋ ਪਾਦਮੂਲੇਯੇਵ ਵਾਸੇਸੀਤਿ. ਤਿਟ੍ਠਨ੍ਤੇ ਨੋਤਿ ਤਿਟ੍ਠਨ੍ਤੇ ਨੁ, ਧਰਮਾਨੇਯੇਵ ਨੂਤਿ ਪੁਚ੍ਛਤਿ, ਅਦੁ ਦੇਵੇਤਿ ਉਦਾਹੁ ਅਮ੍ਹਾਕਂ ਪਿਤਰਿ ਦਿਵਙ੍ਗਤੇ ਅਤ੍ਤਨੋ ਅਤ੍ਥਂ ਵੁਡ੍ਢਿਂ ਪਸ੍ਸਨ੍ਤਾ ਸਦ੍ਧਿਂ ਰਾਜਕਾਰਕੇਹਿ ਨੇਗਮਜਾਨਪਦੇਹਿ ਞਾਤਯੋ ਤਂ ‘‘ਰਾਜਾ ਹੋਹੀ’’ਤਿ ਸਮਨੁਞ੍ਞਿਂਸੁ. ਵਤ੍ਤੇਨਾਤਿ ਸੀਲਾਚਾਰੇਨ. ਸਞ੍ਜਾਤੇ ਅਭਿਤਿਟ੍ਠਸੀਤਿ ਸਮਾਨਜਾਤਿਕੇ ਏਕੂਨਸਤਭਾਤਰੋ ਅਭਿਭਵਿਤ੍ਵਾ ਤਿਟ੍ਠਸਿ. ਨਾਤਿਵਤ੍ਤਨ੍ਤੀਤਿ ਨ ਅਭਿਭਵਨ੍ਤਿ.

ਤਂ ਸੁਤ੍ਵਾ ਸਂਵਰਮਹਾਰਾਜਾ ਅਤ੍ਤਨੋ ਗੁਣਂ ਕਥੇਨ੍ਤੋ ਛ ਗਾਥਾ ਅਭਾਸਿ –

੧੦੦.

‘‘ਨ ਰਾਜਪੁਤ੍ਤ ਉਸੂਯਾਮਿ, ਸਮਣਾਨਂ ਮਹੇਸਿਨਂ;

ਸਕ੍ਕਚ੍ਚਂ ਤੇ ਨਮਸ੍ਸਾਮਿ, ਪਾਦੇ ਵਨ੍ਦਾਮਿ ਤਾਦਿਨਂ.

੧੦੧.

‘‘ਤੇ ਮਂ ਧਮ੍ਮਗੁਣੇ ਯੁਤ੍ਤਂ, ਸੁਸ੍ਸੂਸਮਨੁਸੂਯਕਂ;

ਸਮਣਾ ਮਨੁਸਾਸਨ੍ਤਿ, ਇਸੀ ਧਮ੍ਮਗੁਣੇ ਰਤਾ.

੧੦੨.

‘‘ਤੇਸਾਹਂ ਵਚਨਂ ਸੁਤ੍ਵਾ, ਸਮਣਾਨਂ ਮਹੇਸਿਨਂ;

ਨ ਕਿਞ੍ਚਿ ਅਤਿਮਞ੍ਞਾਮਿ, ਧਮ੍ਮੇ ਮੇ ਨਿਰਤੋ ਮਨੋ.

੧੦੩.

‘‘ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਤੇਸਂ ਨਪ੍ਪਟਿਬਨ੍ਧਾਮਿ, ਨਿਵਿਟ੍ਠਂ ਭਤ੍ਤਵੇਤਨਂ.

੧੦੪.

‘‘ਮਹਾਮਤ੍ਤਾ ਚ ਮੇ ਅਤ੍ਥਿ, ਮਨ੍ਤਿਨੋ ਪਰਿਚਾਰਕਾ;

ਬਾਰਾਣਸਿਂ ਵੋਹਰਨ੍ਤਿ, ਬਹੁਮਂਸਸੁਰੋਦਨਂ.

੧੦੫.

‘‘ਅਥੋਪਿ ਵਾਣਿਜਾ ਫੀਤਾ, ਨਾਨਾਰਟ੍ਠੇਹਿ ਆਗਤਾ;

ਤੇਸੁ ਮੇ ਵਿਹਿਤਾ ਰਕ੍ਖਾ, ਏਵਂ ਜਾਨਾਹੁਪੋਸਥਾ’’ਤਿ.

ਤਤ੍ਥ ਨ ਰਾਜਪੁਤ੍ਤਾਤਿ ਅਹਂ ਰਾਜਪੁਤ੍ਤ, ਕਞ੍ਚਿ ਸਤ੍ਤਂ ‘‘ਅਯਂ ਸਮ੍ਪਤ੍ਤਿ ਇਮਸ੍ਸ ਮਾ ਹੋਤੂ’’ਤਿ ਨ ਉਸੂਯਾਮਿ. ਤਾਦਿਨਨ੍ਤਿ ਤਾਦਿਲਕ੍ਖਣਯੁਤ੍ਤਾਨਂ ਸਮਿਤਪਾਪਤਾਯ ਸਮਣਾਨਂ ਮਹਨ੍ਤਾਨਂ ਸੀਲਕ੍ਖਨ੍ਧਾਦੀਨਂ ਗੁਣਾਨਂ ਏਸਿਤਤਾਯ ਮਹੇਸੀਨਂ ਧਮ੍ਮਿਕਸਮਣਬ੍ਰਾਹ੍ਮਣਾਨਂ ਪਞ੍ਚਪਤਿਟ੍ਠਿਤੇਨ ਪਾਦੇ ਵਨ੍ਦਾਮਿ, ਦਾਨਂ ਦਦਨ੍ਤੋ ਧਮ੍ਮਿਕਞ੍ਚ ਨੇਸਂ ਰਕ੍ਖਾਵਰਣਗੁਤ੍ਤਿਂ ਪਚ੍ਚੁਪਟ੍ਠਪੇਨ੍ਤੋ ਸਕ੍ਕਚ੍ਚਂ ਤੇ ਨਮਸ੍ਸਾਮਿ, ਮਨੇਨ ਸਮ੍ਪਿਯਾਯਨ੍ਤੋ ਚ ਪੂਜੇਮੀਤਿ ਅਤ੍ਥੋ. ਤੇ ਮਨ੍ਤਿ ਤੇ ਸਮਣਾ ਮਂ ‘‘ਅਯਂ ਧਮ੍ਮਕੋਟ੍ਠਾਸੇ ਯੁਤ੍ਤਪਯੁਤ੍ਤੋ ਸੁਸ੍ਸੂਸਂ ਅਨੁਸੂਯਕੋ’’ਤਿ ਤਥਤੋ ਞਤ੍ਵਾ ਮਂ ਧਮ੍ਮਗੁਣੇ ਯੁਤ੍ਤਂ ਸੁਸ੍ਸੂਸਂ ਅਨੁਸੂਯਕਂ ਅਨੁਸਾਸਨ੍ਤਿ, ‘‘ਇਦਂ ਕਰ, ਇਦਂ ਮਾ ਕਰੀ’’ਤਿ ਓਵਦਨ੍ਤੀਤਿ ਅਤ੍ਥੋ. ਤੇਸਾਹਨ੍ਤਿ ਤੇਸਂ ਅਹਂ. ਹਤ੍ਥਾਰੋਹਾਤਿ ਹਤ੍ਥਿਂ ਆਰੁਯ੍ਹ ਯੁਜ੍ਝਨਕਾ ਯੋਧਾ. ਅਨੀਕਟ੍ਠਾਤਿ ਹਤ੍ਥਾਨੀਕਾਦੀਸੁ ਠਿਤਾ. ਰਥਿਕਾਤਿ ਰਥਯੋਧਾ. ਪਤ੍ਤਿਕਾਰਕਾਤਿ ਪਤ੍ਤਿਨੋਵ. ਨਿਵਿਟ੍ਠਨ੍ਤਿ ਯਂ ਤੇਹਿ ਸਜ੍ਜਿਤਂ ਭਤ੍ਤਞ੍ਚ ਵੇਤਨਞ੍ਚ, ਅਹਂ ਤਂ ਨਪ੍ਪਟਿਬਨ੍ਧਾਮਿ, ਅਪਰਿਹਾਪੇਤ੍ਵਾ ਦਦਾਮੀਤਿ ਅਤ੍ਥੋ.

ਮਹਾਮਤ੍ਤਾਤਿ ਭਾਤਿਕ, ਮਯ੍ਹਂ ਮਹਾਪਞ੍ਞਾ ਮਨ੍ਤੇਸੁ ਕੁਸਲਾ ਮਹਾਅਮਚ੍ਚਾ ਚੇਵ ਅਵਸੇਸਮਨ੍ਤਿਨੋ ਚ ਪਰਿਚਾਰਕਾ ਅਤ੍ਥਿ. ਇਮਿਨਾ ਇਮਂ ਦਸ੍ਸੇਤਿ ‘‘ਤੁਮ੍ਹੇ ਮਨ੍ਤਸਮ੍ਪਨ੍ਨੇ ਪਣ੍ਡਿਤੇ ਆਚਰਿਯੇ ਨ ਲਭਿਤ੍ਥ, ਅਮ੍ਹਾਕਂ ਪਨ ਆਚਰਿਯਾ ਪਣ੍ਡਿਤਾ ਉਪਾਯਕੁਸਲਾ, ਤੇ ਨੋ ਸੇਤਚ੍ਛਤ੍ਤੇਨ ਯੋਜੇਸੁ’’ਨ੍ਤਿ. ਬਾਰਾਣਸਿਨ੍ਤਿ ਭਾਤਿਕ, ਮਮ ਛਤ੍ਤਂ ਉਸ੍ਸਾਪਿਤਕਾਲਤੋ ਪਟ੍ਠਾਯ ‘‘ਅਮ੍ਹਾਕਂ ਰਾਜਾ ਧਮ੍ਮਿਕੋ ਅਨ੍ਵਦ੍ਧਮਾਸਂ ਦੇਵੋ ਵਸ੍ਸਤਿ, ਤੇਨ ਸਸ੍ਸਾਨਿ ਸਮ੍ਪਜ੍ਜਨ੍ਤਿ, ਬਾਰਾਣਸਿਯਂ ਬਹੁਂ ਖਾਦਿਤਬ੍ਬਯੁਤ੍ਤਕਂ ਮਚ੍ਛਮਂਸਂ ਪਾਯਿਤਬ੍ਬਯੁਤ੍ਤਕਂ ਸੁਰੋਦਕਞ੍ਚ ਜਾਤ’’ਨ੍ਤਿ ਏਵਂ ਰਟ੍ਠਵਾਸਿਨੋ ਬਹੁਮਂਸਸੁਰੋਦਕਂ ਕਤ੍ਵਾ ਬਾਰਾਣਸਿਂ ਵੋਹਰਨ੍ਤਿ. ਫੀਤਾਤਿ ਹਤ੍ਥਿਰਤਨਅਸ੍ਸਰਤਨਮੁਤ੍ਤਰਤਨਾਦੀਨਿ ਆਹਰਿਤ੍ਵਾ ਨਿਰੁਪਦ੍ਦਵਾ ਵੋਹਾਰਂ ਕਰੋਨ੍ਤਾ ਫੀਤਾ ਸਮਿਦ੍ਧਾ. ਏਵਂ ਜਾਨਾਹੀਤਿ ਭਾਤਿਕ ਉਪੋਸਥ ਅਹਂ ਇਮੇਹਿ ਏਤ੍ਤਕੇਹਿ ਕਾਰਣੇਹਿ ਸਬ੍ਬਕਨਿਟ੍ਠੋਪਿ ਹੁਤ੍ਵਾ ਮਮ ਭਾਤਿਕੇ ਅਭਿਭਵਿਤ੍ਵਾ ਸੇਤਚ੍ਛਤ੍ਤਂ ਪਤ੍ਤੋ, ਏਵਂ ਜਾਨਾਹੀਤਿ.

ਅਥਸ੍ਸ ਗੁਣਂ ਸੁਤ੍ਵਾ ਉਪੋਸਥਕੁਮਾਰੋ ਦ੍ਵੇ ਗਾਥਾ ਅਭਾਸਿ –

੧੦੬.

‘‘ਧਮ੍ਮੇਨ ਕਿਰ ਞਾਤੀਨਂ, ਰਜ੍ਜਂ ਕਾਰੇਹਿ ਸਂਵਰ;

ਮੇਧਾਵੀ ਪਣ੍ਡਿਤੋ ਚਾਸਿ, ਅਥੋਪਿ ਞਾਤਿਨਂ ਹਿਤੋ.

੧੦੭.

‘‘ਤਂ ਤਂ ਞਾਤਿਪਰਿਬ੍ਯੂਲ਼੍ਹਂ, ਨਾਨਾਰਤਨਮੋਚਿਤਂ;

ਅਮਿਤ੍ਤਾ ਨਪ੍ਪਸਹਨ੍ਤਿ, ਇਨ੍ਦਂਵ ਅਸੁਰਾਧਿਪੋ’’ਤਿ.

ਤਤ੍ਥ ਧਮ੍ਮੇਨ ਕਿਰ ਞਾਤੀਨਨ੍ਤਿ ਤਾਤ ਸਂਵਰ ਮਹਾਰਾਜ, ਧਮ੍ਮੇਨ ਕਿਰ ਤ੍ਵਂ ਏਕੂਨਸਤਾਨਂ ਞਾਤੀਨਂ ਅਤ੍ਤਨੋ ਜੇਟ੍ਠਭਾਤਿਕਾਨਂ ਆਨੁਭਾਵਂ ਅਭਿਭਵਸਿ, ਇਤੋ ਪਟ੍ਠਾਯ ਤ੍ਵਮੇਵ ਰਜ੍ਜਂ ਕਾਰੇਹਿ, ਤ੍ਵਮੇਵ ਮੇਧਾਵੀ ਚੇਵ ਪਣ੍ਡਿਤੋ ਚ ਞਾਤੀਨਞ੍ਚ ਹਿਤੋਤਿ ਅਤ੍ਥੋ. ਤਂ ਤਨ੍ਤਿ ਏਵਂ ਵਿਵਿਧਗੁਣਸਮ੍ਪਨ੍ਨਂ ਤਂ. ਞਾਤਿਪਰਿਬ੍ਯੂਲ਼੍ਹਨ੍ਤਿ ਅਮ੍ਹੇਹਿ ਏਕੂਨਸਤੇਹਿ ਞਾਤਕੇਹਿ ਪਰਿਵਾਰਿਤਂ. ਨਾਨਾਰਤਨਮੋਚਿਤਨ੍ਤਿ ਨਾਨਾਰਤਨੇਹਿ ਓਚਿਤਂ ਸਞ੍ਚਿਤਂ ਬਹੁਰਤਨਸਞ੍ਚਯਂ. ਅਸੁਰਾਧਿਪੋਤਿ ਯਥਾ ਤਾਵਤਿਂਸੇਹਿ ਪਰਿਵਾਰਿਤਂ ਇਨ੍ਦਂ ਅਸੁਰਰਾਜਾ ਨਪ੍ਪਸਹਤਿ, ਏਵਂ ਅਮ੍ਹੇਹਿ ਆਰਕ੍ਖਂ ਕਰੋਨ੍ਤੇਹਿ ਪਰਿਵਾਰਿਤਂ ਤਂ ਤਿਯੋਜਨਸਤਿਕੇ ਕਾਸਿਰਟ੍ਠੇ ਦ੍ਵਾਦਸਯੋਜਨਿਕਾਯ ਬਾਰਾਣਸਿਯਾ ਰਜ੍ਜਂ ਕਾਰੇਨ੍ਤਂ ਅਮਿਤ੍ਤਾ ਨਪ੍ਪਸਹਨ੍ਤੀਤਿ ਦੀਪੇਤਿ.

ਸਂਵਰਮਹਾਰਾਜਾ ਸਬ੍ਬੇਸਮ੍ਪਿ ਭਾਤਿਕਾਨਂ ਮਹਨ੍ਤਂ ਯਸਂ ਅਦਾਸਿ. ਤੇ ਤਸ੍ਸ ਸਨ੍ਤਿਕੇ ਮਾਸਡ੍ਢਮਾਸਂ ਵਸਿਤ੍ਵਾ ‘‘ਮਹਾਰਾਜ ਜਨਪਦੇਸੁ ਚੋਰੇਸੁ ਉਟ੍ਠਹਨ੍ਤੇਸੁ ਮਯਂ ਜਾਨਿਸ੍ਸਾਮ, ਤ੍ਵਂ ਰਜ੍ਜਸੁਖਂ ਅਨੁਭਵਾ’’ਤਿ ਵਤ੍ਵਾ ਅਤ੍ਤਨੋ ਅਤ੍ਤਨੋ ਜਨਪਦਂ ਗਤਾ. ਰਾਜਾਪਿ ਬੋਧਿਸਤ੍ਤਸ੍ਸ ਓਵਾਦੇ ਠਤ੍ਵਾ ਆਯੁਪਰਿਯੋਸਾਨੇ ਦੇਵਨਗਰਂ ਪੂਰੇਨ੍ਤੋ ਅਗਮਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਭਿਕ੍ਖੁ ਏਵਂ ਤ੍ਵਂ ਪੁਬ੍ਬੇ ਓਵਾਦਕ੍ਖਮੋ, ਇਦਾਨਿ ਕਸ੍ਮਾ ਵੀਰਿਯਂ ਨ ਅਕਾਸੀ’’ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਸੋ ਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.

ਤਦਾ ਸਂਵਰਮਹਾਰਾਜਾ ਅਯਂ ਭਿਕ੍ਖੁ ਅਹੋਸਿ, ਉਪੋਸਥਕੁਮਾਰੋ ਸਾਰਿਪੁਤ੍ਤੋ, ਸੇਸਭਾਤਿਕਾ ਥੇਰਾਨੁਥੇਰਾ, ਪਰਿਸਾ ਬੁਦ੍ਧਪਰਿਸਾ, ਓਵਾਦਦਾਯਕੋ ਅਮਚ੍ਚੋ ਪਨ ਅਹਮੇਵ ਅਹੋਸਿਨ੍ਤਿ.

ਸਂਵਰਜਾਤਕਵਣ੍ਣਨਾ ਅਟ੍ਠਮਾ.

[੪੬੩] ੯. ਸੁਪ੍ਪਾਰਕਜਾਤਕਵਣ੍ਣਨਾ

ਉਮ੍ਮੁਜ੍ਜਨ੍ਤਿ ਨਿਮੁਜ੍ਜਨ੍ਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪਞ੍ਞਾਪਾਰਮਿਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਸਾਯਨ੍ਹਸਮਯੇ ਤਥਾਗਤਸ੍ਸ ਧਮ੍ਮਂ ਦੇਸੇਤੁਂ ਨਿਕ੍ਖਮਨਂ ਆਗਮਯਮਾਨਾ ਭਿਕ੍ਖੂ ਧਮ੍ਮਸਭਾਯਂ ਨਿਸੀਦਿਤ੍ਵਾ ‘‘ਆਵੁਸੋ, ਅਹੋ ਸਤ੍ਥਾ ਮਹਾਪਞ੍ਞੋ ਪੁਥੁਪਞ੍ਞੋ ਹਾਸਪਞ੍ਞੋ ਜਵਨਪਞ੍ਞੋ ਤਿਕ੍ਖਪਞ੍ਞੋ ਨਿਬ੍ਬੇਧਿਕਪਞ੍ਞੋ ਤਤ੍ਰ ਤਤ੍ਰ ਉਪਾਯਪਞ੍ਞਾਯ ਸਮਨ੍ਨਾਗਤੋ ਵਿਪੁਲਾਯ ਪਥਵੀਸਮਾਯ, ਮਹਾਸਮੁਦ੍ਦੋ ਵਿਯ ਗਮ੍ਭੀਰਾਯ, ਆਕਾਸੋ ਵਿਯ ਵਿਤ੍ਥਿਣ੍ਣਾਯ, ਸਕਲਜਮ੍ਬੁਦੀਪਸ੍ਮਿਞ੍ਹਿ ਉਟ੍ਠਿਤਪਞ੍ਹੋ ਦਸਬਲਂ ਅਤਿਕ੍ਕਮਿਤ੍ਵਾ ਗਨ੍ਤੁਂ ਸਮਤ੍ਥੋ ਨਾਮ ਨਤ੍ਥਿ. ਯਥਾ ਮਹਾਸਮੁਦ੍ਦੇ ਉਟ੍ਠਿਤਊਮਿਯੋ ਵੇਲਂ ਨਾਤਿਕ੍ਕਮਨ੍ਤਿ, ਵੇਲਂ ਪਤ੍ਵਾਵ ਭਿਜ੍ਜਨ੍ਤਿ, ਏਵਂ ਨ ਕੋਚਿ ਪਞ੍ਹੋ ਦਸਬਲਂ ਅਤਿਕ੍ਕਮਤਿ, ਸਤ੍ਥੁ ਪਾਦਮੂਲਂ ਪਤ੍ਵਾ ਭਿਜ੍ਜਤੇਵਾ’’ਤਿ ਦਸਬਲਸ੍ਸ ਮਹਾਪਞ੍ਞਾਪਾਰਮਿਂ ਵਣ੍ਣੇਸੁਂ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਤਥਾਗਤੋ ਇਦਾਨੇਵ ਪਞ੍ਞਵਾ, ਪੁਬ੍ਬੇਪਿ ਅਪਰਿਪਕ੍ਕੇ ਞਾਣੇ ਪਞ੍ਞਵਾਵ, ਅਨ੍ਧੋ ਹੁਤ੍ਵਾਪਿ ਮਹਾਸਮੁਦ੍ਦੇ ਉਦਕਸਞ੍ਞਾਯ ‘ਇਮਸ੍ਮਿਂ ਇਮਸ੍ਮਿਂ ਸਮੁਦ੍ਦੇ ਇਦਂ ਨਾਮ ਇਦਂ ਨਾਮ ਰਤਨ’ਨ੍ਤਿ ਅਞ੍ਞਾਸੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕੁਰੁਰਟ੍ਠੇ ਕੁਰੁਰਾਜਾ ਨਾਮ ਰਜ੍ਜਂ ਕਾਰੇਸਿ, ਕੁਰੁਕਚ੍ਛਂ ਨਾਮ ਪਟ੍ਟਨਗਾਮੋ ਅਹੋਸਿ. ਤਦਾ ਬੋਧਿਸਤ੍ਤੋ ਕੁਰੁਕਚ੍ਛੇ ਨਿਯਾਮਕਜੇਟ੍ਠਕਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ ਪਾਸਾਦਿਕੋ ਸੁਵਣ੍ਣਵਣ੍ਣੋ, ‘‘ਸੁਪ੍ਪਾਰਕਕੁਮਾਰੋ’’ਤਿਸ੍ਸ ਨਾਮਂ ਕਰਿਂਸੁ. ਸੋ ਮਹਨ੍ਤੇਨ ਪਰਿਵਾਰੇਨ ਵਡ੍ਢਨ੍ਤੋ ਸੋਲ਼ਸਵਸ੍ਸਕਾਲੇਯੇਵ ਨਿਯਾਮਕਸਿਪ੍ਪੇ ਨਿਪ੍ਫਤ੍ਤਿਂ ਪਤ੍ਵਾ ਅਪਰਭਾਗੇ ਪਿਤੁ ਅਚ੍ਚਯੇਨ ਨਿਯਾਮਕਜੇਟ੍ਠਕੋ ਹੁਤ੍ਵਾ ਨਿਯਾਮਕਕਮ੍ਮਂ ਅਕਾਸਿ, ਪਣ੍ਡਿਤੋ ਞਾਣਸਮ੍ਪਨ੍ਨੋ ਅਹੋਸਿ. ਤੇਨ ਆਰੁਲ਼੍ਹਨਾਵਾਯ ਬ੍ਯਾਪਤ੍ਤਿ ਨਾਮ ਨਤ੍ਥਿ. ਤਸ੍ਸ ਅਪਰਭਾਗੇ ਲੋਣਜਲਪਹਟਾਨਿ ਦ੍ਵੇਪਿ ਚਕ੍ਖੂਨਿ ਨਸ੍ਸਿਂਸੁ. ਸੋ ਤਤੋ ਪਟ੍ਠਾਯ ਨਿਯਾਮਕਜੇਟ੍ਠਕੋ ਹੁਤ੍ਵਾਪਿ ਨਿਯਾਮਕਕਮ੍ਮਂ ਅਕਤ੍ਵਾ ‘‘ਰਾਜਾਨਂ ਨਿਸ੍ਸਾਯ ਜੀਵਿਸ੍ਸਾਮੀ’’ਤਿ ਰਾਜਾਨਂ ਉਪਸਙ੍ਕਮਿ. ਅਥ ਨਂ ਰਾਜਾ ਅਗ੍ਘਾਪਨਿਯਕਮ੍ਮੇ ਠਪੇਸਿ. ਸੋ ਤਤੋ ਪਟ੍ਠਾਯ ਰਞ੍ਞੋ ਹਤ੍ਥਿਰਤਨਅਸ੍ਸਰਤਨਮੁਤ੍ਤਸਾਰਮਣਿਸਾਰਾਦੀਨਿ ਅਗ੍ਘਾਪੇਸਿ.

ਅਥੇਕਦਿਵਸਂ ‘‘ਰਞ੍ਞੋ ਮਙ੍ਗਲਹਤ੍ਥੀ ਭਵਿਸ੍ਸਤੀ’’ਤਿ ਕਾਲ਼ਪਾਸਾਣਕੂਟਵਣ੍ਣਂ ਏਕਂ ਵਾਰਣਂ ਆਨੇਸੁਂ. ਤਂ ਦਿਸ੍ਵਾ ਰਾਜਾ ‘‘ਪਣ੍ਡਿਤਸ੍ਸ ਦਸ੍ਸੇਥਾ’’ਤਿ ਆਹ. ਅਥ ਨਂ ਤਸ੍ਸ ਸਨ੍ਤਿਕਂ ਨਯਿਂਸੁ. ਸੋ ਹਤ੍ਥੇਨ ਤਸ੍ਸ ਸਰੀਰਂ ਪਰਿਮਜ੍ਜਿਤ੍ਵਾ ‘‘ਨਾਯਂ ਮਙ੍ਗਲਹਤ੍ਥੀ ਭਵਿਤੁਂ ਅਨੁਚ੍ਛਵਿਕੋ, ਪਾਦੇਹਿ ਵਾਮਨਧਾਤੁਕੋ ਏਸ, ਏਤਞ੍ਹਿ ਮਾਤਾ ਵਿਜਾਯਮਾਨਾ ਅਙ੍ਕੇਨ ਸਮ੍ਪਟਿਚ੍ਛਿਤੁਂ ਨਾਸਕ੍ਖਿ, ਤਸ੍ਮਾ ਭੂਮਿਯਂ ਪਤਿਤ੍ਵਾ ਪਚ੍ਛਿਮਪਾਦੇਹਿ ਵਾਮਨਧਾਤੁਕੋ ਹੋਤੀ’’ਤਿ ਆਹ. ਹਤ੍ਥਿਂ ਗਹੇਤ੍ਵਾ ਆਗਤੇ ਪੁਚ੍ਛਿਂਸੁ. ਤੇ ‘‘ਸਚ੍ਚਂ ਪਣ੍ਡਿਤੋ ਕਥੇਤੀ’’ਤਿ ਵਦਿਂਸੁ. ਤਂ ਕਾਰਣਂ ਰਾਜਾ ਸੁਤ੍ਵਾ ਤੁਟ੍ਠੋ ਤਸ੍ਸ ਅਟ੍ਠ ਕਹਾਪਣੇ ਦਾਪੇਸਿ.

ਪੁਨੇਕਦਿਵਸਂ ‘‘ਰਞ੍ਞੋ ਮਙ੍ਗਲਅਸ੍ਸੋ ਭਵਿਸ੍ਸਤੀ’’ਤਿ ਏਕਂ ਅਸ੍ਸਂ ਆਨਯਿਂਸੁ. ਤਮ੍ਪਿ ਰਾਜਾ ਪਣ੍ਡਿਤਸ੍ਸ ਸਨ੍ਤਿਕਂ ਪੇਸੇਸਿ. ਸੋ ਤਮ੍ਪਿ ਹਤ੍ਥੇਨ ਪਰਾਮਸਿਤ੍ਵਾ ‘‘ਅਯਂ ਮਙ੍ਗਲਅਸ੍ਸੋ ਭਵਿਤੁਂ ਨ ਯੁਤ੍ਤੋ, ਏਤਸ੍ਸ ਹਿ ਜਾਤਦਿਵਸੇਯੇਵ ਮਾਤਾ ਮਰਿ, ਤਸ੍ਮਾ ਮਾਤੁ ਖੀਰਂ ਅਲਭਨ੍ਤੋ ਨ ਸਮ੍ਮਾ ਵਡ੍ਢਿਤੋ’’ਤਿ ਆਹ. ਸਾਪਿਸ੍ਸ ਕਥਾ ਸਚ੍ਚਾਵ ਅਹੋਸਿ. ਤਮ੍ਪਿ ਸੁਤ੍ਵਾ ਰਾਜਾ ਤੁਸ੍ਸਿਤ੍ਵਾ ਅਟ੍ਠ ਕਹਾਪਣੇ ਦਾਪੇਸਿ. ਅਥੇਕਦਿਵਸਂ ‘‘ਰਞ੍ਞੋ ਮਙ੍ਗਲਰਥੋ ਭਵਿਸ੍ਸਤੀ’’ਤਿ ਰਥਂ ਆਹਰਿਂਸੁ. ਤਮ੍ਪਿ ਰਾਜਾ ਤਸ੍ਸ ਸਨ੍ਤਿਕਂ ਪੇਸੇਸਿ. ਸੋ ਤਮ੍ਪਿ ਹਤ੍ਥੇਨ ਪਰਾਮਸਿਤ੍ਵਾ ‘‘ਅਯਂ ਰਥੋ ਸੁਸਿਰਰੁਕ੍ਖੇਨ ਕਤੋ, ਤਸ੍ਮਾ ਰਞ੍ਞੋ ਨਾਨੁਚ੍ਛਵਿਕੋ’’ਤਿ ਆਹ. ਸਾਪਿਸ੍ਸ ਕਥਾ ਸਚ੍ਚਾਵ ਅਹੋਸਿ. ਰਾਜਾ ਤਮ੍ਪਿ ਸੁਤ੍ਵਾ ਅਟ੍ਠੇਵ ਕਹਾਪਣੇ ਦਾਪੇਸਿ. ਅਥਸ੍ਸ ਮਹਗ੍ਘਂ ਕਮ੍ਬਲਰਤਨਂ ਆਹਰਿਂਸੁ. ਤਮ੍ਪਿ ਤਸ੍ਸੇਵ ਪੇਸੇਸਿ. ਸੋ ਤਮ੍ਪਿ ਹਤ੍ਥੇਨ ਪਰਾਮਸਿਤ੍ਵਾ ‘‘ਇਮਸ੍ਸ ਮੂਸਿਕਚ੍ਛਿਨ੍ਨਂ ਏਕਟ੍ਠਾਨਂ ਅਤ੍ਥੀ’’ਤਿ ਆਹ. ਸੋਧੇਨ੍ਤਾ ਤਂ ਦਿਸ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ਸੁਤ੍ਵਾ ਤੁਸ੍ਸਿਤ੍ਵਾ ਅਟ੍ਠੇਵ ਕਹਾਪਣੇ ਦਾਪੇਸਿ.

ਸੋ ਚਿਨ੍ਤੇਸਿ ‘‘ਅਯਂ ਰਾਜਾ ਏਵਰੂਪਾਨਿਪਿ ਅਚ੍ਛਰਿਯਾਨਿ ਦਿਸ੍ਵਾ ਅਟ੍ਠੇਵ ਕਹਾਪਣੇ ਦਾਪੇਸਿ, ਇਮਸ੍ਸ ਦਾਯੋ ਨ੍ਹਾਪਿਤਦਾਯੋ, ਨ੍ਹਾਪਿਤਜਾਤਿਕੋ ਭਵਿਸ੍ਸਤਿ, ਕਿਂ ਮੇ ਏਵਰੂਪੇਨ ਰਾਜੁਪਟ੍ਠਾਨੇਨ, ਅਤ੍ਤਨੋ ਵਸਨਟ੍ਠਾਨਮੇਵ ਗਮਿਸ੍ਸਾਮੀ’’ਤਿ. ਸੋ ਕੁਰੁਕਚ੍ਛਪਟ੍ਟਨਮੇਵ ਪਚ੍ਚਾਗਮਿ. ਤਸ੍ਮਿਂ ਤਤ੍ਥ ਵਸਨ੍ਤੇ ਵਾਣਿਜਾ ਨਾਵਂ ਸਜ੍ਜੇਤ੍ਵਾ ‘‘ਕਂ ਨਿਯਾਮਕਂ ਕਰਿਸ੍ਸਾਮਾ’’ਤਿ ਮਨ੍ਤੇਸੁਂ. ‘‘ਸੁਪ੍ਪਾਰਕਪਣ੍ਡਿਤੇਨ ਆਰੁਲ਼੍ਹਨਾਵਾ ਨ ਬ੍ਯਾਪਜ੍ਜਤਿ, ਏਸ ਪਣ੍ਡਿਤੋ ਉਪਾਯਕੁਸਲੋ, ਅਨ੍ਧੋ ਸਮਾਨੋਪਿ ਸੁਪ੍ਪਾਰਕਪਣ੍ਡਿਤੋਵ ਉਤ੍ਤਮੋ’’ਤਿ ਤਂ ਉਪਸਙ੍ਕਮਿਤ੍ਵਾ ‘‘ਨਿਯਾਮਕੋ ਨੋ ਹੋਹੀ’’ਤਿ ਵਤ੍ਵਾ ‘‘ਤਾਤਾ, ਅਹਂ ਅਨ੍ਧੋ, ਕਥਂ ਨਿਯਾਮਕਕਮ੍ਮਂ ਕਰਿਸ੍ਸਾਮੀ’’ਤਿ ਵੁਤ੍ਤੇ ‘‘ਸਾਮਿ, ਅਨ੍ਧਾਪਿ ਤੁਮ੍ਹੇਯੇਵ ਅਮ੍ਹਾਕਂ ਉਤ੍ਤਮਾ’’ਤਿ ਪੁਨਪ੍ਪੁਨਂ ਯਾਚਿਯਮਾਨੋ ‘‘ਸਾਧੁ ਤਾਤਾ, ਤੁਮ੍ਹੇਹਿ ਆਰੋਚਿਤਸਞ੍ਞਾਯ ਨਿਯਾਮਕੋ ਭਵਿਸ੍ਸਾਮੀ’’ਤਿ ਤੇਸਂ ਨਾਵਂ ਅਭਿਰੁਹਿ. ਤੇ ਨਾਵਾਯ ਮਹਾਸਮੁਦ੍ਦਂ ਪਕ੍ਖਨ੍ਦਿਂਸੁ. ਨਾਵਾ ਸਤ੍ਤ ਦਿਵਸਾਨਿ ਨਿਰੁਪਦ੍ਦਵਾ ਅਗਮਾਸਿ, ਤਤੋ ਅਕਾਲਵਾਤਂ ਉਪ੍ਪਾਤਿਤਂ ਉਪ੍ਪਜ੍ਜਿ, ਨਾਵਾ ਚਤ੍ਤਾਰੋ ਮਾਸੇ ਪਕਤਿਸਮੁਦ੍ਦਪਿਟ੍ਠੇ ਵਿਚਰਿਤ੍ਵਾ ਖੁਰਮਾਲੀਸਮੁਦ੍ਦਂ ਨਾਮ ਪਤ੍ਤਾ. ਤਤ੍ਥ ਮਚ੍ਛਾ ਮਨੁਸ੍ਸਸਮਾਨਸਰੀਰਾ ਖੁਰਨਾਸਾ ਉਦਕੇ ਉਮ੍ਮੁਜ੍ਜਨਿਮੁਜ੍ਜਂ ਕਰੋਨ੍ਤਿ. ਵਾਣਿਜਾ ਤੇ ਦਿਸ੍ਵਾ ਮਹਾਸਤ੍ਤਂ ਤਸ੍ਸ ਸਮੁਦ੍ਦਸ੍ਸ ਨਾਮਂ ਪੁਚ੍ਛਨ੍ਤਾ ਪਠਮਂ ਗਾਥਮਾਹਂਸੁ –

੧੦੮.

‘‘ਉਮ੍ਮੁਜ੍ਜਨ੍ਤਿ ਨਿਮੁਜ੍ਜਨ੍ਤਿ, ਮਨੁਸ੍ਸਾ ਖੁਰਨਾਸਿਕਾ;

ਸੁਪ੍ਪਾਰਕਂ ਤਂ ਪੁਚ੍ਛਾਮ, ਸਮੁਦ੍ਦੋ ਕਤਮੋ ਅਯ’’ਨ੍ਤਿ.

ਏਵਂ ਤੇਹਿ ਪੁਟ੍ਠੋ ਮਹਾਸਤ੍ਤੋ ਅਤ੍ਤਨੋ ਨਿਯਾਮਕਸੁਤ੍ਤੇਨ ਸਂਸਨ੍ਦਿਤ੍ਵਾ ਦੁਤਿਯਂ ਗਾਥਮਾਹ –

੧੦੯.

‘‘ਕੁਰੁਕਚ੍ਛਾ ਪਯਾਤਾਨਂ, ਵਾਣਿਜਾਨਂ ਧਨੇਸਿਨਂ;

ਨਾਵਾਯ ਵਿਪ੍ਪਨਟ੍ਠਾਯ, ਖੁਰਮਾਲੀਤਿ ਵੁਚ੍ਚਤੀ’’ਤਿ.

ਤਤ੍ਥ ਪਯਾਤਾਨਨ੍ਤਿ ਕੁਰੁਕਚ੍ਛਪਟ੍ਟਨਾ ਨਿਕ੍ਖਮਿਤ੍ਵਾ ਗਚ੍ਛਨ੍ਤਾਨਂ. ਧਨੇਸਿਨਨ੍ਤਿ ਤੁਮ੍ਹਾਕਂ ਵਾਣਿਜਾਨਂ ਧਨਂ ਪਰਿਯੇਸਨ੍ਤਾਨਂ. ਨਾਵਾਯ ਵਿਪ੍ਪਨਟ੍ਠਾਯਾਤਿ ਤਾਤ ਤੁਮ੍ਹਾਕਂ ਇਮਾਯ ਵਿਦੇਸਂ ਪਕ੍ਖਨ੍ਦਨਾਵਾਯ ਕਮ੍ਮਕਾਰਕਂ ਪਕਤਿਸਮੁਦ੍ਦਂ ਅਤਿਕ੍ਕਮਿਤ੍ਵਾ ਸਮ੍ਪਤ੍ਤੋ ਅਯਂ ਸਮੁਦ੍ਦੋ ‘‘ਖੁਰਮਾਲੀ’’ਤਿ ਵੁਚ੍ਚਤਿ, ਏਵਮੇਤਂ ਪਣ੍ਡਿਤਾ ਕਥੇਨ੍ਤੀਤਿ.

ਤਸ੍ਮਿਂ ਪਨ ਸਮੁਦ੍ਦੇ ਵਜਿਰਂ ਉਸ੍ਸਨ੍ਨਂ ਹੋਤਿ. ਮਹਾਸਤ੍ਤੋ ‘‘ਸਚਾਹਂ ‘ਅਯਂ ਵਜਿਰਸਮੁਦ੍ਦੋ’ਤਿ ਏਵਂ ਏਤੇਸਂ ਕਥੇਸ੍ਸਾਮਿ, ਲੋਭੇਨ ਬਹੁਂ ਵਜਿਰਂ ਗਣ੍ਹਿਤ੍ਵਾ ਨਾਵਂ ਓਸੀਦਾਪੇਸ੍ਸਨ੍ਤੀ’’ਤਿ ਤੇਸਂ ਅਨਾਚਿਕ੍ਖਿਤ੍ਵਾਵ ਨਾਵਂ ਲਗ੍ਗਾਪੇਤ੍ਵਾ ਉਪਾਯੇਨੇਕਂ ਯੋਤ੍ਤਂ ਗਹੇਤ੍ਵਾ ਮਚ੍ਛਗਹਣਨਿਯਾਮੇਨ ਜਾਲਂ ਖਿਪਾਪੇਤ੍ਵਾ ਵਜਿਰਸਾਰਂ ਉਦ੍ਧਰਿਤ੍ਵਾ ਨਾਵਾਯਂ ਪਕ੍ਖਿਪਿਤ੍ਵਾ ਅਞ੍ਞਂ ਅਪ੍ਪਗ੍ਘਭਣ੍ਡਂ ਛਡ੍ਡਾਪੇਸਿ. ਨਾਵਾ ਤਂ ਸਮੁਦ੍ਦਂ ਅਤਿਕ੍ਕਮਿਤ੍ਵਾ ਪੁਰਤੋ ਅਗ੍ਗਿਮਾਲਿਂ ਨਾਮ ਗਤਾ. ਸੋ ਪਜ੍ਜਲਿਤਅਗ੍ਗਿਕ੍ਖਨ੍ਧੋ ਵਿਯ ਮਜ੍ਝਨ੍ਹਿਕਸੂਰਿਯੋ ਵਿਯ ਚ ਓਭਾਸਂ ਮੁਞ੍ਚਨ੍ਤੋ ਅਟ੍ਠਾਸਿ. ਵਾਣਿਜਾ –

੧੧੦.

‘‘ਯਥਾ ਅਗ੍ਗੀਵ ਸੂਰਿਯੋਵ, ਸਮੁਦ੍ਦੋ ਪਟਿਦਿਸ੍ਸਤਿ;

ਸੁਪ੍ਪਾਰਕਂ ਤਂ ਪੁਚ੍ਛਾਮ, ਸਮੁਦ੍ਦੋ ਕਤਮੋ ਅਯ’’ਨ੍ਤਿ. – ਗਾਥਾਯ ਤਂ ਪੁਚ੍ਛਿਂਸੁ;

ਮਹਾਸਤ੍ਤੋਪਿ ਤੇਸਂ ਅਨਨ੍ਤਰਗਾਥਾਯ ਕਥੇਸਿ –

੧੧੧.

‘‘ਕੁਰੁਕਚ੍ਛਾ ਪਯਾਤਾਨਂ, ਵਾਣਿਜਾਨਂ ਧਨੇਸਿਨਂ;

ਨਾਵਾਯ ਵਿਪ੍ਪਨਟ੍ਠਾਯ, ਅਗ੍ਗਿਮਾਲੀਤਿ ਵੁਚ੍ਚਤੀ’’ਤਿ.

ਤਸ੍ਮਿਂ ਪਨ ਸਮੁਦ੍ਦੇ ਸੁਵਣ੍ਣਂ ਉਸ੍ਸਨ੍ਨਂ ਅਹੋਸਿ. ਮਹਾਸਤ੍ਤੋ ਪੁਰਿਮਨਯੇਨੇਵ ਤਤੋਪਿ ਸੁਵਣ੍ਣਂ ਗਾਹਾਪੇਤ੍ਵਾ ਨਾਵਾਯਂ ਪਕ੍ਖਿਪਾਪੇਸਿ. ਨਾਵਾ ਤਮ੍ਪਿ ਸਮੁਦ੍ਦਂ ਅਤਿਕ੍ਕਮਿਤ੍ਵਾ ਖੀਰਂ ਵਿਯ ਦਧਿਂ ਵਿਯ ਚ ਓਭਾਸਨ੍ਤਂ ਦਧਿਮਾਲਿਂ ਨਾਮ ਸਮੁਦ੍ਦਂ ਪਾਪੁਣਿ. ਵਾਣਿਜਾ –

੧੧੨.

‘‘ਯਥਾ ਦਧੀਵ ਖੀਰਂਵ, ਸਮੁਦ੍ਦੋ ਪਟਿਦਿਸ੍ਸਤਿ;

ਸੁਪ੍ਪਾਰਕਂ ਤਂ ਪੁਚ੍ਛਾਮ, ਸਮੁਦ੍ਦੋ ਕਤਮੋ ਅਯ’’ਨ੍ਤਿ. –

ਗਾਥਾਯ ਤਸ੍ਸਪਿ ਨਾਮਂ ਪੁਚ੍ਛਿਂਸੁ.

ਮਹਾਸਤ੍ਤੋ ਅਨਨ੍ਤਰਗਾਥਾਯ ਆਚਿਕ੍ਖਿ –

੧੧੩.

‘‘ਕੁਰੁਕਚ੍ਛਾ ਪਯਾਤਾਨਂ, ਵਾਣਿਜਾਨਂ ਧਨੇਸਿਨਂ;

ਨਾਵਾਯ ਵਿਪ੍ਪਨਟ੍ਠਾਯ, ਦਧਿਮਾਲੀਤਿ ਵੁਚ੍ਚਤੀ’’ਤਿ.

ਤਸ੍ਮਿਂ ਪਨ ਸਮੁਦ੍ਦੇ ਰਜਤਂ ਉਸ੍ਸਨ੍ਨਂ ਅਹੋਸਿ. ਸੋ ਤਮ੍ਪਿ ਉਪਾਯੇਨ ਗਾਹਾਪੇਤ੍ਵਾ ਨਾਵਾਯਂ ਪਕ੍ਖਿਪਾਪੇਸਿ. ਨਾਵਾ ਤਮ੍ਪਿ ਸਮੁਦ੍ਦਂ ਅਤਿਕ੍ਕਮਿਤ੍ਵਾ ਨੀਲਕੁਸਤਿਣਂ ਵਿਯ ਸਮ੍ਪਨ੍ਨਸਸ੍ਸਂ ਵਿਯ ਚ ਓਭਾਸਮਾਨਂ ਨੀਲਵਣ੍ਣਂ ਕੁਸਮਾਲਿਂ ਨਾਮ ਸਮੁਦ੍ਦਂ ਪਾਪੁਣਿ. ਵਾਣਿਜਾ –

੧੧੪.

‘‘ਯਥਾ ਕੁਸੋਵ ਸਸ੍ਸੋਵ, ਸਮੁਦ੍ਦੋ ਪਟਿਦਿਸ੍ਸਤਿ;

ਸੁਪ੍ਪਾਰਕਂ ਤਂ ਪੁਚ੍ਛਾਮ, ਸਮੁਦ੍ਦੋ ਕਤਮੋ ਅਯ’’ਨ੍ਤਿ. –

ਗਾਥਾਯ ਤਸ੍ਸਪਿ ਨਾਮਂ ਪੁਚ੍ਛਿਂਸੁ.

ਸੋ ਅਨਨ੍ਤਰਗਾਥਾਯ ਆਚਿਕ੍ਖਿ –

੧੧੫.

‘‘ਕੁਰੁਕਚ੍ਛਾ ਪਯਾਤਾਨਂ, ਵਾਣਿਜਾਨਂ ਧਨੇਸਿਨਂ;

ਨਾਵਾਯ ਵਿਪ੍ਪਨਟ੍ਠਾਯ, ਕੁਸਮਾਲੀਤਿ ਵੁਚ੍ਚਤੀ’’ਤਿ.

ਤਸ੍ਮਿਂ ਪਨ ਸਮੁਦ੍ਦੇ ਨੀਲਮਣਿਰਤਨਂ ਉਸ੍ਸਨ੍ਨਂ ਅਹੋਸਿ. ਸੋ ਤਮ੍ਪਿ ਉਪਾਯੇਨੇਵ ਗਾਹਾਪੇਤ੍ਵਾ ਨਾਵਾਯਂ ਪਕ੍ਖਿਪਾਪੇਸਿ. ਨਾਵਾ ਤਮ੍ਪਿ ਸਮੁਦ੍ਦਂ ਅਤਿਕ੍ਕਮਿਤ੍ਵਾ ਨਲ਼ਵਨਂ ਵਿਯ ਵੇਲ਼ੁਵਨਂ ਵਿਯ ਚ ਖਾਯਮਾਨਂ ਨਲ਼ਮਾਲਿਂ ਨਾਮ ਸਮੁਦ੍ਦਂ ਪਾਪੁਣਿ. ਵਾਣਿਜਾ –

੧੧੬.

‘‘ਯਥਾ ਨਲ਼ੋਵ ਵੇਲ਼ੂਵ, ਸਮੁਦ੍ਦੋ ਪਟਿਦਿਸ੍ਸਤਿ;

ਸੁਪ੍ਪਾਰਕਂ ਤਂ ਪੁਚ੍ਛਾਮ, ਸਮੁਦ੍ਦੋ ਕਤਮੋ ਅਯ’’ਨ੍ਤਿ. –

ਗਾਥਾਯ ਤਸ੍ਸਪਿ ਨਾਮਂ ਪੁਚ੍ਛਿਂਸੁ.

ਮਹਾਸਤ੍ਤੋ ਅਨਨ੍ਤਰਗਾਥਾਯ ਕਥੇਸਿ –

੧੧੭.

‘‘ਕੁਰੁਕਚ੍ਛਾ ਪਯਾਤਾਨਂ, ਵਾਣਿਜਾਨਂ ਧਨੇਸਿਨਂ;

ਨਾਵਾਯ ਵਿਪ੍ਪਨਟ੍ਠਾਯ, ਨਲ਼ਮਾਲੀਤਿ ਵੁਚ੍ਚਤੀ’’ਤਿ.

ਤਸ੍ਮਿਂ ਪਨ ਸਮੁਦ੍ਦੇ ਮਸਾਰਗਲ੍ਲਂ ਵੇਲ਼ੁਰਿਯਂ ਉਸ੍ਸਨ੍ਨਂ ਅਹੋਸਿ. ਸੋ ਤਮ੍ਪਿ ਉਪਾਯੇਨ ਗਾਹਾਪੇਤ੍ਵਾ ਨਾਵਾਯਂ ਪਕ੍ਖਿਪਾਪੇਸਿ. ਅਪਰੋ ਨਯੋ – ਨਲ਼ੋਤਿ ਵਿਚ੍ਛਿਕਨਲ਼ੋਪਿ ਕਕ੍ਕਟਕਨਲ਼ੋਪਿ, ਸੋ ਰਤ੍ਤਵਣ੍ਣੋ ਹੋਤਿ. ਵੇਲ਼ੂਤਿ ਪਨ ਪਵਾਲ਼ਸ੍ਸੇਤਂ ਨਾਮਂ, ਸੋ ਚ ਸਮੁਦ੍ਦੋ ਪਵਾਲ਼ੁਸ੍ਸਨ੍ਨੋ ਰਤ੍ਤੋਭਾਸੋ ਅਹੋਸਿ, ਤਸ੍ਮਾ ‘‘ਯਥਾ ਨਲ਼ੋਵ ਵੇਲ਼ੁਵਾ’’ਤਿ ਪੁਚ੍ਛਿਂਸੁ. ਮਹਾਸਤ੍ਤੋ ਤਤੋ ਪਵਾਲ਼ਂ ਗਾਹਾਪੇਸੀਤਿ.

ਵਾਣਿਜਾ ਨਲ਼ਮਾਲਿਂ ਅਤਿਕ੍ਕਨ੍ਤਾ ਬਲਵਾਮੁਖਸਮੁਦ੍ਦਂ ਨਾਮ ਪਸ੍ਸਿਂਸੁ. ਤਤ੍ਥ ਉਦਕਂ ਕਡ੍ਢਿਤ੍ਵਾ ਕਡ੍ਢਿਤ੍ਵਾ ਸਬ੍ਬਤੋ ਭਾਗੇਨ ਉਗ੍ਗਚ੍ਛਤਿ. ਤਸ੍ਮਿਂ ਸਬ੍ਬਤੋ ਭਾਗੇਨ ਉਗ੍ਗਤੇ ਉਦਕਂ ਸਬ੍ਬਤੋ ਭਾਗੇਨ ਛਿਨ੍ਨਪਪਾਤਮਹਾਸੋਬ੍ਭੋ ਵਿਯ ਪਞ੍ਞਾਯਤਿ, ਊਮਿਯਾ ਉਗ੍ਗਤਾਯ ਏਕਤੋ ਪਪਾਤਸਦਿਸਂ ਹੋਤਿ, ਭਯਜਨਨੋ ਸਦ੍ਦੋ ਉਪ੍ਪਜ੍ਜਤਿ ਸੋਤਾਨਿ ਭਿਨ੍ਦਨ੍ਤੋ ਵਿਯ ਹਦਯਂ ਫਾਲੇਨ੍ਤੋ ਵਿਯ ਚ. ਤਂ ਦਿਸ੍ਵਾ ਵਾਣਿਜਾ ਭੀਤਤਸਿਤਾ –

੧੧੮.

‘‘ਮਹਬ੍ਭਯੋ ਭਿਂਸਨਕੋ, ਸਦ੍ਦੋ ਸੁਯ੍ਯਤਿਮਾਨੁਸੋ;

ਯਥਾ ਸੋਬ੍ਭੋ ਪਪਾਤੋਵ, ਸਮੁਦ੍ਦੋ ਪਟਿਦਿਸ੍ਸਤਿ;

ਸੁਪ੍ਪਾਰਕਂ ਤਂ ਪੁਚ੍ਛਾਮ, ਸਮੁਦ੍ਦੋ ਕਤਮੋ ਅਯ’’ਨ੍ਤਿ. –

ਗਾਥਾਯ ਤਸ੍ਸਪਿ ਨਾਮਂ ਪੁਚ੍ਛਿਂਸੁ.

ਤਤ੍ਥ ਸੁਯ੍ਯਤਿਮਾਨੁਸੋਤਿ ਸੁਯ੍ਯਤਿ ਅਮਾਨੁਸੋ ਸਦ੍ਦੋ.

੧੧੯.

‘‘ਕੁਰੁਕਚ੍ਛਾ ਪਯਾਤਾਨਂ, ਵਾਣਿਜਾਨਂ ਧਨੇਸਿਨਂ;

ਨਾਵਾਯ ਵਿਪ੍ਪਨਟ੍ਠਾਯ, ਬਲਵਾਮੁਖੀਤਿ ਵੁਚ੍ਚਤੀ’’ਤਿ. –

ਬੋਧਿਸਤ੍ਤੋ ਅਨਨ੍ਤਰਗਾਥਾਯ ਤਸ੍ਸ ਨਾਮਂ ਆਚਿਕ੍ਖਿਤ੍ਵਾ ‘‘ਤਾਤਾ, ਇਮਂ ਬਲਵਾਮੁਖਸਮੁਦ੍ਦਂ ਪਤ੍ਵਾ ਨਿਵਤ੍ਤਿਤੁਂ ਸਮਤ੍ਥਾ ਨਾਵਾ ਨਾਮ ਨਤ੍ਥਿ, ਅਯਂ ਸਮ੍ਪਤ੍ਤਨਾਵਂ ਨਿਮੁਜ੍ਜਾਪੇਤ੍ਵਾ ਵਿਨਾਸਂ ਪਾਪੇਤੀ’’ਤਿ ਆਹ. ਤਞ੍ਚ ਨਾਵਂ ਸਤ੍ਤ ਮਨੁਸ੍ਸਸਤਾਨਿ ਅਭਿਰੁਹਿਂਸੁ. ਤੇ ਸਬ੍ਬੇ ਮਰਣਭਯਭੀਤਾ ਏਕਪ੍ਪਹਾਰੇਨੇਵ ਅਵੀਚਿਮ੍ਹਿ ਪਚ੍ਚਮਾਨਸਤ੍ਤਾ ਵਿਯ ਅਤਿਕਾਰੁਞ੍ਞਂ ਰਵਂ ਮੁਞ੍ਚਿਂਸੁ. ਮਹਾਸਤ੍ਤੋ ‘‘ਠਪੇਤ੍ਵਾ ਮਂ ਅਞ੍ਞੋ ਏਤੇਸਂ ਸੋਤ੍ਥਿਭਾਵਂ ਕਾਤੁਂ ਸਮਤ੍ਥੋ ਨਾਮ ਨਤ੍ਥਿ, ਸਚ੍ਚਕਿਰਿਯਾਯ ਤੇਸਂ ਸੋਤ੍ਥਿਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤੇ ਆਮਨ੍ਤੇਤ੍ਵਾ ਆਹ – ‘‘ਤਾਤਾ, ਖਿਪ੍ਪਂ ਮਂ ਗਨ੍ਧੋਦਕੇਨ ਨ੍ਹਾਪੇਤ੍ਵਾ ਅਹਤਵਤ੍ਥਾਨਿ ਨਿਵਾਸਾਪੇਤ੍ਵਾ ਪੁਣ੍ਣਪਾਤਿਂ ਸਜ੍ਜੇਤ੍ਵਾ ਨਾਵਾਯ ਧੁਰੇ ਠਪੇਥਾ’’ਤਿ. ਤੇ ਵੇਗੇਨ ਤਥਾ ਕਰਿਂਸੁ. ਮਹਾਸਤ੍ਤੋ ਉਭੋਹਿ ਹਤ੍ਥੇਹਿ ਪੁਣ੍ਣਪਾਤਿਂ ਗਹੇਤ੍ਵਾ ਨਾਵਾਯ ਧੁਰੇ ਠਿਤੋ ਸਚ੍ਚਕਿਰਿਯਂ ਕਰੋਨ੍ਤੋ ਓਸਾਨਗਾਥਮਾਹ –

੧੨੦.

‘‘ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤੋਸ੍ਮਿ ਵਿਞ੍ਞੁਤਂ;

ਨਾਭਿਜਾਨਾਮਿ ਸਞ੍ਚਿਚ੍ਚ, ਏਕਪਾਣਮ੍ਪਿ ਹਿਂਸਿਤਂ;

ਏਤੇਨ ਸਚ੍ਚਵਜ੍ਜੇਨ, ਸੋਤ੍ਥਿਂ ਨਾਵਾ ਨਿਵਤ੍ਤਤੂ’’ਤਿ.

ਤਤ੍ਥ ਯਤੋਤਿ ਯਤੋ ਪਟ੍ਠਾਯ ਅਹਂ ਅਤ੍ਤਾਨਂ ਸਰਾਮਿ, ਯਤੋ ਪਟ੍ਠਾਯ ਚਮ੍ਹਿ ਵਿਞ੍ਞੁਤਂ ਪਤ੍ਤੋਤਿ ਅਤ੍ਥੋ. ਏਕਪਾਣਮ੍ਪਿ ਹਿਂਸਿਤਨ੍ਤਿ ਏਤ੍ਥਨ੍ਤਰੇ ਸਞ੍ਚਿਚ੍ਚ ਏਕਂ ਕੁਨ੍ਥਕਿਪਿਲ੍ਲਿਕਪਾਣਮ੍ਪਿ ਹਿਂਸਿਤਂ ਨਾਭਿਜਾਨਾਮਿ. ਦੇਸਨਾਮਤ੍ਤਮੇਵੇਤਂ, ਬੋਧਿਸਤ੍ਤੋ ਪਨ ਤਿਣਸਲਾਕਮ੍ਪਿ ਉਪਾਦਾਯ ਮਯਾ ਪਰਸਨ੍ਤਕਂ ਨ ਗਹਿਤਪੁਬ੍ਬਂ, ਲੋਭਵਸੇਨ ਪਰਦਾਰਂ ਨ ਓਲੋਕਿਤਪੁਬ੍ਬਂ, ਮੁਸਾ ਨ ਭਾਸਿਤਪੁਬ੍ਬਾ, ਤਿਣਗ੍ਗੇਨਾਪਿ ਮਜ੍ਜਂ ਨ ਪਿਵਿਤਪੁਬ੍ਬਨ੍ਤਿ ਏਵਂ ਪਞ੍ਚਸੀਲਵਸੇਨ ਪਨ ਸਚ੍ਚਕਿਰਿਯਂ ਅਕਾਸਿ, ਕਤ੍ਵਾ ਚ ਪਨ ਪੁਣ੍ਣਪਾਤਿਯਾ ਉਦਕਂ ਨਾਵਾਯ ਧੁਰੇ ਅਭਿਸਿਞ੍ਚਿ.

ਚਤ੍ਤਾਰੋ ਮਾਸੇ ਵਿਦੇਸਂ ਪਕ੍ਖਨ੍ਦਨਾਵਾ ਨਿਵਤ੍ਤਿਤ੍ਵਾ ਇਦ੍ਧਿਮਾ ਵਿਯ ਸਚ੍ਚਾਨੁਭਾਵੇਨ ਏਕਦਿਵਸੇਨੇਵ ਕੁਰੁਕਚ੍ਛਪਟ੍ਟਨਂ ਅਗਮਾਸਿ. ਗਨ੍ਤ੍ਵਾ ਚ ਪਨ ਥਲੇਪਿ ਅਟ੍ਠੁਸਭਮਤ੍ਤਂ ਠਾਨਂ ਪਕ੍ਖਨ੍ਦਿਤ੍ਵਾ ਨਾਵਿਕਸ੍ਸ ਘਰਦ੍ਵਾਰੇਯੇਵ ਅਟ੍ਠਾਸਿ. ਮਹਾਸਤ੍ਤੋ ਤੇਸਂ ਵਾਣਿਜਾਨਂ ਸੁਵਣ੍ਣਰਜਤਮਣਿਪਵਾਲ਼ਮੁਤ੍ਤਵਜਿਰਾਨਿ ਭਾਜੇਤ੍ਵਾ ਅਦਾਸਿ. ‘‘ਏਤ੍ਤਕੇਹਿ ਵੋ ਰਤਨੇਹਿ ਅਲਂ, ਮਾ ਪੁਨ ਸਮੁਦ੍ਦਂ ਪਵਿਸਥਾ’’ਤਿ ਤੇਸਂ ਓਵਾਦਂ ਦਤ੍ਵਾ ਯਾਵਜੀਵਂ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਦੇਵਪੁਰਂ ਪੂਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇਪਿ ਤਥਾਗਤੋ ਮਹਾਪਞ੍ਞੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪਰਿਸਾ ਬੁਦ੍ਧਪਰਿਸਾ ਅਹੇਸੁਂ, ਸੁਪ੍ਪਾਰਕਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੁਪ੍ਪਾਰਕਜਾਤਕਵਣ੍ਣਨਾ ਨਵਮਾ.

ਜਾਤਕੁਦ੍ਦਾਨਂ –

ਮਾਤੁਪੋਸਕ ਜੁਣ੍ਹੋ ਚ, ਧਮ੍ਮ ਉਦਯ ਪਾਨੀਯੋ;

ਯੁਧਞ੍ਚਯੋ ਦਸਰਥੋ, ਸਂਵਰੋ ਚ ਸੁਪ੍ਪਾਰਕੋ;

ਏਕਾਦਸਨਿਪਾਤਮ੍ਹਿ, ਸਙ੍ਗੀਤਾ ਨਵ ਜਾਤਕਾ.

ਏਕਾਦਸਕਨਿਪਾਤਵਣ੍ਣਨਾ ਨਿਟ੍ਠਿਤਾ.

੧੨. ਦ੍ਵਾਦਸਕਨਿਪਾਤੋ

[੪੬੪] ੧. ਚੂਲ਼ਕੁਣਾਲਜਾਤਕਵਣ੍ਣਨਾ

੧-੧੨.

ਲੁਦ੍ਧਾਨਂ ਲਹੁਚਿਤ੍ਤਾਨਨ੍ਤਿ ਇਦਂ ਜਾਤਕਂ ਕੁਣਾਲਜਾਤਕੇ (ਜਾ. ੨.੨੧.ਕੁਣਾਲਜਾਤਕ) ਆਵਿ ਭਵਿਸ੍ਸਤਿ;

ਚੂਲ਼ਕੁਣਾਲਜਾਤਕਵਣ੍ਣਨਾ ਪਠਮਾ.

[੪੬੫] ੨. ਭਦ੍ਦਸਾਲਜਾਤਕਵਣ੍ਣਨਾ

ਕਾ ਤ੍ਵਂ ਸੁਦ੍ਧੇਹਿ ਵਤ੍ਥੇਹੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਞਾਤਤ੍ਥਚਰਿਯਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਞ੍ਹਿ ਅਨਾਥਪਿਣ੍ਡਿਕਸ੍ਸ ਨਿਵੇਸਨੇ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਨਿਬਦ੍ਧਭੋਜਨਂ ਪਵਤ੍ਤਤਿ, ਤਥਾ ਵਿਸਾਖਾਯ ਚ ਕੋਸਲਰਞ੍ਞੋ ਚ. ਤਤ੍ਥ ਪਨ ਕਿਞ੍ਚਾਪਿ ਨਾਨਗ੍ਗਰਸਭੋਜਨਂ ਦੀਯਤਿ, ਭਿਕ੍ਖੂਨਂ ਪਨੇਤ੍ਥ ਕੋਚਿ ਵਿਸ੍ਸਾਸਿਕੋ ਨਤ੍ਥਿ, ਤਸ੍ਮਾ ਭਿਕ੍ਖੂ ਰਾਜਨਿਵੇਸਨੇ ਨ ਭੁਞ੍ਜਨ੍ਤਿ, ਭਤ੍ਤਂ ਗਹੇਤ੍ਵਾ ਅਨਾਥਪਿਣ੍ਡਿਕਸ੍ਸ ਵਾ ਵਿਸਾਖਾਯ ਵਾ ਅਞ੍ਞੇਸਂ ਵਾ ਵਿਸ੍ਸਾਸਿਕਾਨਂ ਘਰਂ ਗਨ੍ਤ੍ਵਾ ਭੁਞ੍ਜਨ੍ਤਿ. ਰਾਜਾ ਏਕਦਿਵਸਂ ਪਣ੍ਣਾਕਾਰਂ ਆਹਟਂ ‘‘ਭਿਕ੍ਖੂਨਂ ਦੇਥਾ’’ਤਿ ਭਤ੍ਤਗ੍ਗਂ ਪੇਸੇਤ੍ਵਾ ‘‘ਭਤ੍ਤਗ੍ਗੇ ਭਿਕ੍ਖੂ ਨਤ੍ਥੀ’’ਤਿ ਵੁਤ੍ਤੇ ‘‘ਕਹਂ ਗਤਾ’’ਤਿ ਪੁਚ੍ਛਿਤ੍ਵਾ ‘‘ਅਤ੍ਤਨੋ ਵਿਸ੍ਸਾਸਿਕਗੇਹੇਸੁ ਨਿਸੀਦਿਤ੍ਵਾ ਭੁਞ੍ਜਨ੍ਤੀ’’ਤਿ ਸੁਤ੍ਵਾ ਭੁਤ੍ਤਪਾਤਰਾਸੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ‘‘ਭਨ੍ਤੇ, ਭੋਜਨਂ ਨਾਮ ਕਿਂ ਪਰਮ’’ਨ੍ਤਿ ਪੁਚ੍ਛਿ. ਵਿਸ੍ਸਾਸਪਰਮਂ ਮਹਾਰਾਜ, ਕਞ੍ਜਿਕਮਤ੍ਤਕਮ੍ਪਿ ਵਿਸ੍ਸਾਸਿਕੇਨ ਦਿਨ੍ਨਂ ਮਧੁਰਂ ਹੋਤੀਤਿ. ਭਨ੍ਤੇ, ਕੇਨ ਪਨ ਸਦ੍ਧਿਂ ਭਿਕ੍ਖੂਨਂ ਵਿਸ੍ਸਾਸੋ ਹੋਤੀਤਿ? ‘‘ਞਾਤੀਹਿ ਵਾ ਸੇਕ੍ਖਕੁਲੇਹਿ ਵਾ, ਮਹਾਰਾਜਾ’’ਤਿ. ਤਤੋ ਰਾਜਾ ਚਿਨ੍ਤੇਸਿ ‘‘ਏਕਂ ਸਕ੍ਯਧੀਤਰਂ ਆਨੇਤ੍ਵਾ ਅਗ੍ਗਮਹੇਸਿਂ ਕਰਿਸ੍ਸਾਮਿ, ਏਵਂ ਮਯਾ ਸਦ੍ਧਿਂ ਭਿਕ੍ਖੂਨਂ ਞਾਤਕੇ ਵਿਯ ਵਿਸ੍ਸਾਸੋ ਭਵਿਸ੍ਸਤੀ’’ਤਿ. ਸੋ ਉਟ੍ਠਾਯਾਸਨਾ ਅਤ੍ਤਨੋ ਨਿਵੇਸਨਂ ਗਨ੍ਤ੍ਵਾ ਕਪਿਲਵਤ੍ਥੁਂ ਦੂਤਂ ਪੇਸੇਸਿ ‘‘ਧੀਤਰਂ ਮੇ ਦੇਥ, ਅਹਂ ਤੁਮ੍ਹੇਹਿ ਸਦ੍ਧਿਂ ਞਾਤਿਭਾਵਂ ਇਚ੍ਛਾਮੀ’’ਤਿ.

ਸਾਕਿਯਾ ਦੂਤਵਚਨਂ ਸੁਤ੍ਵਾ ਸਨ੍ਨਿਪਤਿਤ੍ਵਾ ਮਨ੍ਤਯਿਂਸੁ ‘‘ਮਯਂ ਕੋਸਲਰਞ੍ਞੋ ਆਣਾਪਵਤ੍ਤਿਟ੍ਠਾਨੇ ਵਸਾਮ, ਸਚੇ ਦਾਰਿਕਂ ਨ ਦਸ੍ਸਾਮ, ਮਹਨ੍ਤਂ ਵੇਰਂ ਭਵਿਸ੍ਸਤਿ, ਸਚੇ ਦਸ੍ਸਾਮ, ਕੁਲਵਂਸੋ ਨੋ ਭਿਜ੍ਜਿਸ੍ਸਤਿ, ਕਿਂ ਨੁ ਖੋ ਕਾਤਬ੍ਬ’’ਨ੍ਤਿ. ਅਥ ਨੇ ਮਹਾਨਾਮੋ ਆਹ – ‘‘ਮਾ ਚਿਨ੍ਤਯਿਤ੍ਥ, ਮਮ ਧੀਤਾ ਵਾਸਭਖਤ੍ਤਿਯਾ ਨਾਮ ਨਾਗਮੁਣ੍ਡਾਯ ਨਾਮ ਦਾਸਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿ. ਸਾ ਸੋਲ਼ਸਵਸ੍ਸੁਦ੍ਦੇਸਿਕਾ ਉਤ੍ਤਮਰੂਪਧਰਾ ਸੋਭਗ੍ਗਪ੍ਪਤ੍ਤਾ ਪਿਤੁ ਵਂਸੇਨ ਖਤ੍ਤਿਯਜਾਤਿਕਾ, ਤਮਸ੍ਸ ‘ਖਤ੍ਤਿਯਕਞ੍ਞਾ’ਤਿ ਪੇਸੇਸ੍ਸਾਮਾ’’ਤਿ. ਸਾਕਿਯਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਦੂਤੇ ਪਕ੍ਕੋਸਾਪੇਤ੍ਵਾ ‘‘ਸਾਧੁ, ਦਾਰਿਕਂ ਦਸ੍ਸਾਮ, ਇਦਾਨੇਵ ਨਂ ਗਹੇਤ੍ਵਾ ਗਚ੍ਛਥਾ’’ਤਿ ਆਹਂਸੁ. ਦੂਤਾ ਚਿਨ੍ਤੇਸੁਂ ‘‘ਇਮੇ ਸਾਕਿਯਾ ਨਾਮ ਜਾਤਿਂ ਨਿਸ੍ਸਾਯ ਅਤਿਮਾਨਿਨੋ, ‘ਸਦਿਸੀ ਨੋ’ਤਿ ਵਤ੍ਵਾ ਅਸਦਿਸਿਮ੍ਪਿ ਦਦੇਯ੍ਯੁਂ, ਏਤੇਹਿ ਸਦ੍ਧਿਂ ਏਕਤੋ ਭੁਞ੍ਜਮਾਨਮੇਵ ਗਣ੍ਹਿਸ੍ਸਾਮਾ’’ਤਿ. ਤੇ ਏਵਮਾਹਂਸੁ ‘‘ਮਯਂ ਗਹੇਤ੍ਵਾ ਗਚ੍ਛਨ੍ਤਾ ਯਾ ਤੁਮ੍ਹੇਹਿ ਸਦ੍ਧਿਂ ਏਕਤੋ ਭੁਞ੍ਜਤਿ, ਤਂ ਗਹੇਤ੍ਵਾ ਗਮਿਸ੍ਸਾਮਾ’’ਤਿ. ਸਾਕਿਯਾ ਤੇਸਂ ਨਿਵਾਸਟ੍ਠਾਨਂ ਦਾਪੇਤ੍ਵਾ ‘‘ਕਿਂ ਕਰਿਸ੍ਸਾਮਾ’’ਤਿ ਚਿਨ੍ਤਯਿਂਸੁ. ਮਹਾਨਾਮੋ ਆਹ – ‘‘ਤੁਮ੍ਹੇ ਮਾ ਚਿਨ੍ਤਯਿਤ੍ਥ, ਅਹਂ ਉਪਾਯਂ ਕਰਿਸ੍ਸਾਮਿ, ਤੁਮ੍ਹੇ ਮਮ ਭੋਜਨਕਾਲੇ ਵਾਸਭਖਤ੍ਤਿਯਂ ਅਲਙ੍ਕਰਿਤ੍ਵਾ ਆਨੇਤ੍ਵਾ ਮਯਾ ਏਕਸ੍ਮਿਂ ਕਬਲ਼ੇ ਗਹਿਤਮਤ੍ਤੇ ‘ਦੇਵ, ਅਸੁਕਰਾਜਾ ਪਣ੍ਣਂ ਪਹਿਣਿ, ਇਮਂ ਤਾਵ ਸਾਸਨਂ ਸੁਣਾਥਾ’ਤਿ ਪਣ੍ਣਂ ਦਸ੍ਸੇਯ੍ਯਾਥਾ’’ਤਿ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਸ੍ਮਿਂ ਭੁਞ੍ਜਮਾਨੇ ਕੁਮਾਰਿਕਂ ਅਲਙ੍ਕਰਿਂਸੁ.

ਮਹਾਨਾਮੋ ‘‘ਧੀਤਰਂ ਮੇ ਆਨੇਥ, ਮਯਾ ਸਦ੍ਧਿਂ ਭੁਞ੍ਜਤੂ’’ਤਿ ਆਹ. ਅਥ ਨਂ ਅਲਙ੍ਕਰਿਤ੍ਵਾ ਤਾਵਦੇਵ ਥੋਕਂ ਪਪਞ੍ਚਂ ਕਤ੍ਵਾ ਆਨਯਿਂਸੁ. ਸਾ ‘‘ਪਿਤਰਾ ਸਦ੍ਧਿਂ ਭੁਞ੍ਜਿਸ੍ਸਾਮੀ’’ਤਿ ਏਕਪਾਤਿਯਂ ਹਤ੍ਥਂ ਓਤਾਰੇਸਿ. ਮਹਾਨਾਮੋਪਿ ਤਾਯ ਸਦ੍ਧਿਂ ਏਕਪਿਣ੍ਡਂ ਗਹੇਤ੍ਵਾ ਮੁਖੇ ਠਪੇਸਿ. ਦੁਤਿਯਪਿਣ੍ਡਾਯ ਹਤ੍ਥੇ ਪਸਾਰਿਤੇ ‘‘ਦੇਵ, ਅਸੁਕਰਞ੍ਞਾ ਪਣ੍ਣਂ ਪਹਿਤਂ, ਇਮਂ ਤਾਵ ਸਾਸਨਂ ਸੁਣਾਥਾ’’ਤਿ ਪਣ੍ਣਂ ਉਪਨਾਮੇਸੁਂ. ਮਹਾਨਾਮੋ ‘‘ਅਮ੍ਮ, ਤ੍ਵਂ ਭੁਞ੍ਜਾਹੀ’’ਤਿ ਦਕ੍ਖਿਣਹਤ੍ਥਂ ਪਾਤਿਯਾਯੇਵ ਕਤ੍ਵਾ ਵਾਮਹਤ੍ਥੇਨ ਗਹੇਤ੍ਵਾ ਪਣ੍ਣਂ ਓਲੋਕੇਸਿ. ਤਸ੍ਸ ਤਂ ਸਾਸਨਂ ਉਪਧਾਰੇਨ੍ਤਸ੍ਸੇਵ ਇਤਰਾ ਭੁਞ੍ਜਿ. ਸੋ ਤਸ੍ਸਾ ਭੁਤ੍ਤਕਾਲੇ ਹਤ੍ਥਂ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਸਿ. ਤਂ ਦਿਸ੍ਵਾ ਦੂਤਾ ‘‘ਨਿਚ੍ਛਯੇਨੇਸਾ ਏਤਸ੍ਸ ਧੀਤਾ’’ਤਿ ਨਿਟ੍ਠਮਕਂਸੁ, ਨ ਤਂ ਅਨ੍ਤਰਂ ਜਾਨਿਤੁਂ ਸਕ੍ਖਿਂਸੁ. ਮਹਾਨਾਮੋ ਮਹਨ੍ਤੇਨ ਪਰਿਵਾਰੇਨ ਧੀਤਰਂ ਪੇਸੇਸਿ. ਦੂਤਾਪਿ ਨਂ ਸਾਵਤ੍ਥਿਂ ਨੇਤ੍ਵਾ ‘‘ਅਯਂ ਕੁਮਾਰਿਕਾ ਜਾਤਿਸਮ੍ਪਨ੍ਨਾ ਮਹਾਨਾਮਸ੍ਸ ਧੀਤਾ’’ਤਿ ਵਦਿਂਸੁ. ਰਾਜਾ ਤੁਸ੍ਸਿਤ੍ਵਾ ਸਕਲਨਗਰਂ ਅਲਙ੍ਕਾਰਾਪੇਤ੍ਵਾ ਤਂ ਰਤਨਰਾਸਿਮ੍ਹਿ ਠਪੇਤ੍ਵਾ ਅਗ੍ਗਮਹੇਸਿਟ੍ਠਾਨੇ ਅਭਿਸਿਞ੍ਚਾਪੇਸਿ. ਸਾ ਰਞ੍ਞੋ ਪਿਯਾ ਅਹੋਸਿ ਮਨਾਪਾ.

ਅਥਸ੍ਸਾ ਨ ਚਿਰਸ੍ਸੇਵ ਗਬ੍ਭੋ ਪਤਿਟ੍ਠਹਿ. ਰਾਜਾ ਗਬ੍ਭਪਰਿਹਾਰਮਦਾਸਿ. ਸਾ ਦਸਮਾਸਚ੍ਚਯੇਨ ਸੁਵਣ੍ਣਵਣ੍ਣਂ ਪੁਤ੍ਤਂ ਵਿਜਾਯਿ. ਅਥਸ੍ਸ ਨਾਮਗ੍ਗਹਣਦਿਵਸੇ ਰਾਜਾ ਅਤ੍ਤਨੋ ਅਯ੍ਯਕਸ੍ਸ ਸਨ੍ਤਿਕਂ ਪੇਸੇਸਿ ‘‘ਸਕ੍ਯਰਾਜਧੀਤਾ ਵਾਸਭਖਤ੍ਤਿਯਾ ਪੁਤ੍ਤਂ ਵਿਜਾਯਿ, ਕਿਮਸ੍ਸ ਨਾਮਂ ਕਰੋਮਾ’’ਤਿ. ਤਂ ਪਨ ਸਾਸਨਂ ਗਹੇਤ੍ਵਾ ਗਤੋ ਅਮਚ੍ਚੋ ਥੋਕਂ ਬਧਿਰਧਾਤੁਕੋ, ਸੋ ਗਨ੍ਤ੍ਵਾ ਰਞ੍ਞੋ ਅਯ੍ਯਕਸ੍ਸਾਰੋਚੇਸਿ. ਸੋ ਤਂ ਸੁਤ੍ਵਾ ‘‘ਵਾਸਭਖਤ੍ਤਿਯਾ ਪੁਤ੍ਤਂ ਅਵਿਜਾਯਿਤ੍ਵਾਪਿ ਸਬ੍ਬਂ ਜਨਂ ਅਭਿਭਵਤਿ, ਇਦਾਨਿ ਪਨ ਅਤਿਵਿਯ ਰਞ੍ਞੋ ਵਲ੍ਲਭਾ ਭਵਿਸ੍ਸਤੀ’’ਤਿ ਆਹ. ਸੋ ਬਧਿਰਅਮਚ੍ਚੋ ‘‘ਵਲ੍ਲਭਾ’’ਤਿ ਵਚਨਂ ਦੁਸ੍ਸੁਤਂ ਸੁਤ੍ਵਾ ‘‘ਵਿਟਟੂਭੋ’’ਤਿ ਸਲ੍ਲਕ੍ਖੇਤ੍ਵਾ ਰਾਜਾਨਂ ਉਪਗਨ੍ਤ੍ਵਾ ‘‘ਦੇਵ, ਕੁਮਾਰਸ੍ਸ ਕਿਰ ‘ਵਿਟਟੂਭੋ’ਤਿ ਨਾਮਂ ਕਰੋਥਾ’’ਤਿ ਆਹ. ਰਾਜਾ ‘‘ਪੋਰਾਣਕਂ ਨੋ ਕੁਲਦਤ੍ਤਿਕਂ ਨਾਮਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ‘‘ਵਿਟਟੂਭੋ’’ਤਿ ਨਾਮਂ ਅਕਾਸਿ. ਤਤੋ ਪਟ੍ਠਾਯ ਕੁਮਾਰੋ ਕੁਮਾਰਪਰਿਹਾਰੇਨ ਵਡ੍ਢਨ੍ਤੋ ਸਤ੍ਤਵਸ੍ਸਿਕਕਾਲੇ ਅਞ੍ਞੇਸਂ ਕੁਮਾਰਾਨਂ ਮਾਤਾਮਹਕੁਲਤੋ ਹਤ੍ਥਿਰੂਪਕਅਸ੍ਸਰੂਪਕਾਦੀਨਿ ਆਹਰਿਯਮਾਨਾਨਿ ਦਿਸ੍ਵਾ ਮਾਤਰਂ ਪੁਚ੍ਛਿ ‘‘ਅਮ੍ਮ, ਅਞ੍ਞੇਸਂ ਮਾਤਾਮਹਕੁਲਤੋ ਪਣ੍ਣਾਕਾਰੋ ਆਹਰਿਯਤਿ, ਮਯ੍ਹਂ ਕੋਚਿ ਕਿਞ੍ਚਿ ਨ ਪੇਸੇਸਿ, ਕਿਂ ਤ੍ਵਂ ਨਿਮ੍ਮਾਤਾ ਨਿਪ੍ਪਿਤਾਸੀ’’ਤਿ? ਅਥ ਨਂ ਸਾ ‘‘ਤਾਤ, ਸਕ੍ਯਰਾਜਾਨੋ ਮਾਤਾਮਹਾ ਦੂਰੇ ਪਨ ਵਸਨ੍ਤਿ, ਤੇਨ ਤੇ ਕਿਞ੍ਚਿ ਨ ਪੇਸੇਨ੍ਤੀ’’ਤਿ ਵਤ੍ਵਾ ਵਞ੍ਚੇਸਿ.

ਪੁਨ ਸੋਲ਼ਸਵਸ੍ਸਿਕਕਾਲੇ ‘‘ਅਮ੍ਮ, ਮਾਤਾਮਹਕੁਲਂ ਪਸ੍ਸਿਤੁਕਾਮੋਮ੍ਹੀ’’ਤਿ ਵਤ੍ਵਾ ‘‘ਅਲਂ ਤਾਤ, ਕਿਂ ਤਤ੍ਥ ਗਨ੍ਤ੍ਵਾ ਕਰਿਸ੍ਸਸੀ’’ਤਿ ਵਾਰਿਯਮਾਨੋਪਿ ਪੁਨਪ੍ਪੁਨਂ ਯਾਚਿ. ਅਥਸ੍ਸ ਮਾਤਾ ‘‘ਤੇਨ ਹਿ ਗਚ੍ਛਾਹੀ’’ਤਿ ਸਮ੍ਪਟਿਚ੍ਛਿ. ਸੋ ਪਿਤੁ ਆਰੋਚੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿ. ਵਾਸਭਖਤ੍ਤਿਯਾ ਪੁਰੇਤਰਂ ਪਣ੍ਣਂ ਪੇਸੇਸਿ ‘‘ਅਹਂ ਇਧ ਸੁਖਂ ਵਸਾਮਿ, ਸਾਮਿਨੋ ਕਿਞ੍ਚਿ ਅਨ੍ਤਰਂ ਮਾ ਦਸ੍ਸਯਿਂਸੂ’’ਤਿ. ਸਾਕਿਯਾ ਵਿਟਟੂਭਸ੍ਸ ਆਗਮਨਂ ਞਤ੍ਵਾ ‘‘ਵਨ੍ਦਿਤੁਂ ਨ ਸਕ੍ਕਾ’’ਤਿ ਤਸ੍ਸ ਦਹਰਦਹਰੇ ਕੁਮਾਰਕੇ ਜਨਪਦਂ ਪਹਿਣਿਂਸੁ. ਕੁਮਾਰੇ ਕਪਿਲਵਤ੍ਥੁਂ ਸਮ੍ਪਤ੍ਤੇ ਸਾਕਿਯਾ ਸਨ੍ਥਾਗਾਰੇ ਸਨ੍ਨਿਪਤਿਂਸੁ. ਕੁਮਾਰੋ ਸਨ੍ਥਾਗਾਰਂ ਗਨ੍ਤ੍ਵਾ ਅਟ੍ਠਾਸਿ. ਅਥ ਨਂ ‘‘ਅਯਂ ਤੇ, ਤਾਤ, ਮਾਤਾਮਹੋ, ਅਯਂ ਮਾਤੁਲੋ’’ਤਿ ਵਦਿਂਸੁ ਸੋ ਸਬ੍ਬੇ ਵਨ੍ਦਮਾਨੋ ਵਿਚਰਿ. ਸੋ ਯਾਵਪਿਟ੍ਠਿਯਾ ਰੁਜਨਪ੍ਪਮਾਣਾ ਵਨ੍ਦਿਤ੍ਵਾ ਏਕਮ੍ਪਿ ਅਤ੍ਤਾਨਂ ਵਨ੍ਦਮਾਨਂ ਅਦਿਸ੍ਵਾ ‘‘ਕਿਂ ਨੁ ਖੋ ਮਂ ਵਨ੍ਦਨ੍ਤਾ ਨਤ੍ਥੀ’’ਤਿ ਪੁਚ੍ਛਿ. ਸਾਕਿਯਾ ‘‘ਤਾਤ, ਤਵ ਕਨਿਟ੍ਠਕੁਮਾਰਾ ਜਨਪਦਂ ਗਤਾ’’ਤਿ ਵਤ੍ਵਾ ਤਸ੍ਸ ਮਹਨ੍ਤਂ ਸਕ੍ਕਾਰਂ ਕਰਿਂਸੁ. ਸੋ ਕਤਿਪਾਹਂ ਵਸਿਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿ. ਅਥੇਕਾ ਦਾਸੀ ਸਨ੍ਥਾਗਾਰੇ ਤੇਨ ਨਿਸਿਨ੍ਨਫਲਕਂ ‘‘ਇਦਂ ਵਾਸਭਖਤ੍ਤਿਯਾਯ ਦਾਸਿਯਾ ਪੁਤ੍ਤਸ੍ਸ ਨਿਸਿਨ੍ਨਫਲਕ’’ਨ੍ਤਿ ਅਕ੍ਕੋਸਿਤ੍ਵਾ ਪਰਿਭਾਸਿਤ੍ਵਾ ਖੀਰੋਦਕੇਨ ਧੋਵਿ. ਏਕੋ ਪੁਰਿਸੋ ਅਤ੍ਤਨੋ ਆਵੁਧਂ ਪਮੁਸ੍ਸਿਤ੍ਵਾ ਨਿਵਤ੍ਤੋ ਤਂ ਗਣ੍ਹਨ੍ਤੋ ਵਿਟਟੂਭਕੁਮਾਰਸ੍ਸ ਅਕ੍ਕੋਸਨਸਦ੍ਦਂ ਸੁਤ੍ਵਾ ਤਂ ਅਨ੍ਤਰਂ ਪੁਚ੍ਛਿਤ੍ਵਾ ‘‘ਵਾਸਭਖਤ੍ਤਿਯਾ ਦਾਸਿਯਾ ਕੁਚ੍ਛਿਸ੍ਮਿਂ ਮਹਾਨਾਮਸਕ੍ਕਸ੍ਸ ਜਾਤਾ’’ਤਿ ਞਤ੍ਵਾ ਗਨ੍ਤ੍ਵਾ ਬਲਕਾਯਸ੍ਸ ਕਥੇਸਿ. ‘‘ਵਾਸਭਖਤ੍ਤਿਯਾ ਕਿਰ ਦਾਸਿਯਾ ਧੀਤਾ’’ਤਿ ਮਹਾਕੋਲਾਹਲਂ ਅਹੋਸਿ.

ਕੁਮਾਰੋ ਤਂ ਸੁਤ੍ਵਾ ‘‘ਏਤੇ ਤਾਵ ਮਮ ਨਿਸਿਨ੍ਨਫਲਕਂ ਖੀਰੋਦਕੇਨ ਧੋਵਨ੍ਤੁ, ਅਹਂ ਪਨ ਰਜ੍ਜੇ ਪਤਿਟ੍ਠਿਤਕਾਲੇ ਏਤੇਸਂ ਗਲਲੋਹਿਤਂ ਗਹੇਤ੍ਵਾ ਮਮ ਨਿਸਿਨ੍ਨਫਲਕਂ ਧੋਵਿਸ੍ਸਾਮੀ’’ਤਿ ਚਿਤ੍ਤਂ ਪਟ੍ਠਪੇਸਿ. ਤਸ੍ਮਿਂ ਸਾਵਤ੍ਥਿਂ ਗਤੇ ਅਮਚ੍ਚਾ ਸਬ੍ਬਂ ਪਵਤ੍ਤਿਂ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਸਬ੍ਬੇ ਮਯ੍ਹਂ ਦਾਸਿਧੀਤਰਂ ਅਦਂਸੂ’’ਤਿ ਸਾਕਿਯਾਨਂ ਕੁਜ੍ਝਿਤ੍ਵਾ ਵਾਸਭਖਤ੍ਤਿਯਾਯ ਚ ਪੁਤ੍ਤਸ੍ਸ ਚ ਦਿਨ੍ਨਪਰਿਹਾਰਂ ਅਚ੍ਛਿਨ੍ਦਿਤ੍ਵਾ ਦਾਸਦਾਸੀਹਿ ਲਦ੍ਧਬ੍ਬਪਰਿਹਾਰਮਤ੍ਤਮੇਵ ਦਾਪੇਸਿ. ਤਤੋ ਕਤਿਪਾਹਚ੍ਚਯੇਨ ਸਤ੍ਥਾ ਰਾਜਨਿਵੇਸਨਂ ਆਗਨ੍ਤ੍ਵਾ ਨਿਸੀਦਿ. ਰਾਜਾ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਭਨ੍ਤੇ, ਤੁਮ੍ਹਾਕਂ ਕਿਰ ਞਾਤਕੇਹਿ ਦਾਸਿਧੀਤਾ ਮਯ੍ਹਂ ਦਿਨ੍ਨਾ, ਤੇਨਸ੍ਸਾ ਅਹਂ ਸਪੁਤ੍ਤਾਯ ਪਰਿਹਾਰਂ ਅਚ੍ਛਿਨ੍ਦਿਤ੍ਵਾ ਦਾਸਦਾਸੀਹਿ ਲਦ੍ਧਬ੍ਬਪਰਿਹਾਰਮਤ੍ਤਮੇਵ ਦਾਪੇਸਿ’’ਨ੍ਤਿ ਆਹ. ਸਤ੍ਥਾ ‘‘ਅਯੁਤ੍ਤਂ, ਮਹਾਰਾਜ, ਸਾਕਿਯੇਹਿ ਕਤਂ, ਦਦਨ੍ਤੇਹਿ ਨਾਮ ਸਮਾਨਜਾਤਿਕਾ ਦਾਤਬ੍ਬਾ ਅਸ੍ਸ. ਤਂ ਪਨ ਮਹਾਰਾਜ, ਵਦਾਮਿ ਵਾਸਭਖਤ੍ਤਿਯਾ ਖਤ੍ਤਿਯਰਾਜਧੀਤਾ ਖਤ੍ਤਿਯਸ੍ਸ ਰਞ੍ਞੋ ਗੇਹੇ ਅਭਿਸੇਕਂ ਲਭਿ, ਵਿਟਟੂਭੋਪਿ ਖਤ੍ਤਿਯਰਾਜਾਨਮੇਵ ਪਟਿਚ੍ਚ ਜਾਤੋ, ਮਾਤੁਗੋਤ੍ਤਂ ਨਾਮ ਕਿਂ ਕਰਿਸ੍ਸਤਿ, ਪਿਤੁਗੋਤ੍ਤਮੇਵ ਪਮਾਣਨ੍ਤਿ ਪੋਰਾਣਕਪਣ੍ਡਿਤਾ ਦਲਿਦ੍ਦਿਤ੍ਥਿਯਾ ਕਟ੍ਠਹਾਰਿਕਾਯਪਿ ਅਗ੍ਗਮਹੇਸਿਟ੍ਠਾਨਂ ਅਦਂਸੁ, ਤਸ੍ਸਾ ਚ ਕੁਚ੍ਛਿਮ੍ਹਿ ਜਾਤਕੁਮਾਰੋ ਦ੍ਵਾਦਸਯੋਜਨਿਕਾਯ ਬਾਰਾਣਸਿਯਾ ਰਜ੍ਜਂ ਕਤ੍ਵਾ ਕਟ੍ਠਵਾਹਨਰਾਜਾ ਨਾਮ ਜਾਤੋ’’ਤਿ ਕਟ੍ਠਵਾਹਨਜਾਤਕਂ (ਜਾ. ੧.੧.੭) ਕਥੇਸਿ. ਰਾਜਾ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ‘‘ਪਿਤੁਗੋਤ੍ਤਮੇਵ ਕਿਰ ਪਮਾਣ’’ਨ੍ਤਿ ਸੁਤ੍ਵਾ ਤੁਸ੍ਸਿਤ੍ਵਾ ਮਾਤਾਪੁਤ੍ਤਾਨਂ ਪਕਤਿਪਰਿਹਾਰਮੇਵ ਦਾਪੇਸਿ.

ਰਞ੍ਞੋ ਪਨ ਬਨ੍ਧੁਲੋ ਨਾਮ ਸੇਨਾਪਤਿ ਮਲ੍ਲਿਕਂ ਨਾਮ ਅਤ੍ਤਨੋ ਭਰਿਯਂ ਵਞ੍ਝਂ ‘‘ਤਵ ਕੁਲਘਰਮੇਵ ਗਚ੍ਛਾਹੀ’’ਤਿ ਕੁਸਿਨਾਰਮੇਵ ਪੇਸੇਸਿ. ਸਾ ‘‘ਸਤ੍ਥਾਰਂ ਦਿਸ੍ਵਾਵ ਗਮਿਸ੍ਸਾਮੀ’’ਤਿ ਜੇਤਵਨਂ ਪਵਿਸਿਤ੍ਵਾ ਤਥਾਗਤਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤਾ ‘‘ਕਹਂ ਗਚ੍ਛਸੀ’’ਤਿ ਚ ਪੁਟ੍ਠਾ ‘‘ਸਾਮਿਕੋ ਮੇ, ਭਨ੍ਤੇ, ਕੁਲਘਰਂ ਪੇਸੇਸੀ’’ਤਿ ਵਤ੍ਵਾ ‘‘ਕਸ੍ਮਾ’’ਤਿ ਵੁਤ੍ਤਾ ‘‘ਵਞ੍ਝਾ ਅਪੁਤ੍ਤਿਕਾ, ਭਨ੍ਤੇ’’ਤਿ ਵਤ੍ਵਾ ਸਤ੍ਥਾਰਾ ‘‘ਯਦਿ ਏਵਂ ਗਮਨਕਿਚ੍ਚਂ ਨਤ੍ਥਿ, ਨਿਵਤ੍ਤਾਹੀ’’ਤਿ ਵੁਤ੍ਤਾ ਤੁਟ੍ਠਾ ਸਤ੍ਥਾਰਂ ਵਨ੍ਦਿਤ੍ਵਾ ਨਿਵੇਸਨਮੇਵ ਪੁਨ ਅਗਮਾਸਿ. ‘‘ਕਸ੍ਮਾ ਨਿਵਤ੍ਤਸੀ’’ਤਿ ਪੁਟ੍ਠਾ ‘‘ਦਸਬਲੇਨ ਨਿਵਤ੍ਤਿਤਾਮ੍ਹੀ’’ਤਿ ਆਹ. ਸੇਨਾਪਤਿ ‘‘ਦਿਟ੍ਠਂ ਭਵਿਸ੍ਸਤਿ ਤਥਾਗਤੇਨ ਕਾਰਣ’’ਨ੍ਤਿ ਆਹ. ਸਾ ਨ ਚਿਰਸ੍ਸੇਵ ਗਬ੍ਭਂ ਪਟਿਲਭਿਤ੍ਵਾ ਉਪ੍ਪਨ੍ਨਦੋਹਲ਼ਾ ‘‘ਦੋਹਲ਼ੋ ਮੇ ਉਪ੍ਪਨ੍ਨੋ’’ਤਿ ਆਰੋਚੇਸਿ. ‘‘ਕਿਂ ਦੋਹਲ਼ੋ’’ਤਿ? ‘‘ਵੇਸਾਲਿਯਾ ਨਗਰੇ ਲਿਚ੍ਛਵਿਰਾਜਾਨਂ ਅਭਿਸੇਕਮਙ੍ਗਲਪੋਕ੍ਖਰਣਿਂ ਓਤਰਿਤ੍ਵਾ ਨ੍ਹਤ੍ਵਾ ਪਾਨੀਯਂ ਪਿਵਿਤੁਕਾਮਾਮ੍ਹਿ, ਸਾਮੀ’’ਤਿ. ਸੇਨਾਪਤਿ ‘‘ਸਾਧੂ’’ਤਿ ਵਤ੍ਵਾ ਸਹਸ੍ਸਥਾਮਧਨੁਂ ਗਹੇਤ੍ਵਾ ਤਂ ਰਥਂ ਆਰੋਪੇਤ੍ਵਾ ਸਾਵਤ੍ਥਿਤੋ ਨਿਕ੍ਖਮਿਤ੍ਵਾ ਰਥਂ ਪਾਜੇਨ੍ਤੋ ਵੇਸਾਲਿਂ ਪਾਵਿਸਿ.

ਤਸ੍ਮਿਞ੍ਚ ਕਾਲੇ ਕੋਸਲਰਞ੍ਞੋ ਬਨ੍ਧੁਲਸੇਨਾਪਤਿਨਾ ਸਦ੍ਧਿਂ ਏਕਾਚਰਿਯਕੁਲੇ ਉਗ੍ਗਹਿਤਸਿਪ੍ਪੋ ਮਹਾਲਿ ਨਾਮ ਲਿਚ੍ਛਵੀ ਅਨ੍ਧੋ ਲਿਚ੍ਛਵੀਨਂ ਅਤ੍ਥਞ੍ਚ ਧਮ੍ਮਞ੍ਚ ਅਨੁਸਾਸਨ੍ਤੋ ਦ੍ਵਾਰਸਮੀਪੇ ਵਸਤਿ. ਸੋ ਰਥਸ੍ਸ ਉਮ੍ਮਾਰੇ ਪਟਿਘਟ੍ਟਨਸਦ੍ਦਂ ਸੁਤ੍ਵਾ ‘‘ਬਨ੍ਧੁਲਮਲ੍ਲਸ੍ਸ ਰਥਪਤਨਸਦ੍ਦੋ ਏਸੋ, ਅਜ੍ਜ ਲਿਚ੍ਛਵੀਨਂ ਭਯਂ ਉਪ੍ਪਜ੍ਜਿਸ੍ਸਤੀ’’ਤਿ ਆਹ. ਪੋਕ੍ਖਰਣਿਯਾ ਅਨ੍ਤੋ ਚ ਬਹਿ ਚ ਆਰਕ੍ਖਾ ਬਲਵਾ, ਉਪਰਿ ਲੋਹਜਾਲਂ ਪਤ੍ਥਟਂ, ਸਕੁਣਾਨਮ੍ਪਿ ਓਕਾਸੋ ਨਤ੍ਥਿ. ਸੇਨਾਪਤਿ ਪਨ ਰਥਾ ਓਤਰਿਤ੍ਵਾ ਆਰਕ੍ਖਕੇ ਖਗ੍ਗੇਨ ਪਹਰਨ੍ਤੋ ਪਲਾਪੇਤ੍ਵਾ ਲੋਹਜਾਲਂ ਛਿਨ੍ਦਿਤ੍ਵਾ ਅਨ੍ਤੋਪੋਕ੍ਖਰਣਿਯਂ ਭਰਿਯਂ ਓਤਾਰੇਤ੍ਵਾ ਨ੍ਹਾਪੇਤ੍ਵਾ ਪਾਯੇਤ੍ਵਾ ਸਯਮ੍ਪਿ ਨ੍ਹਤ੍ਵਾ ਮਲ੍ਲਿਕਂ ਰਥਂ ਆਰੋਪੇਤ੍ਵਾ ਨਗਰਾ ਨਿਕ੍ਖਮਿਤ੍ਵਾ ਆਗਤਮਗ੍ਗੇਨੇਵ ਪਾਯਾਸਿ. ਆਰਕ੍ਖਕਾ ਗਨ੍ਤ੍ਵਾ ਲਿਚ੍ਛਵੀਨਂ ਆਰੋਚੇਸੁਂ. ਲਿਚ੍ਛਵਿਰਾਜਾਨੋ ਕੁਜ੍ਝਿਤ੍ਵਾ ਪਞ੍ਚ ਰਥਸਤਾਨਿ ਆਰੁਯ੍ਹ ‘‘ਬਨ੍ਧੁਲਮਲ੍ਲਂ ਗਣ੍ਹਿਸ੍ਸਾਮਾ’’ਤਿ ਨਿਕ੍ਖਮਿਂਸੁ. ਤਂ ਪਵਤ੍ਤਿਂ ਮਹਾਲਿਸ੍ਸ ਆਰੋਚੇਸੁਂ. ਮਹਾਲਿ ‘‘ਮਾ ਗਮਿਤ੍ਥ, ਸੋ ਹਿ ਵੋ ਸਬ੍ਬੇ ਘਾਤਯਿਸ੍ਸਤੀ’’ਤਿ ਆਹ. ਤੇਪਿ ‘‘ਮਯਂ ਗਮਿਸ੍ਸਾਮਯੇਵਾ’’ਤਿ ਵਦਿਂਸੁ. ਤੇਨ ਹਿ ਚਕ੍ਕਸ੍ਸ ਯਾਵ ਨਾਭਿਤੋ ਪਥਵਿਂ ਪਵਿਟ੍ਠਟ੍ਠਾਨਂ ਦਿਸ੍ਵਾ ਨਿਵਤ੍ਤੇਯ੍ਯਾਥ, ਤਤੋ ਅਨਿਵਤ੍ਤਨ੍ਤਾ ਪੁਰਤੋ ਅਸਨਿਸਦ੍ਦਂ ਵਿਯ ਸੁਣਿਸ੍ਸਥ, ਤਮ੍ਹਾ ਠਾਨਾ ਨਿਵਤ੍ਤੇਯ੍ਯਾਥ, ਤਤੋ ਅਨਿਵਤ੍ਤਨ੍ਤਾ ਤੁਮ੍ਹਾਕਂ ਰਥਧੁਰੇਸੁ ਛਿਦ੍ਦਂ ਪਸ੍ਸਿਸ੍ਸਥ, ਤਮ੍ਹਾ ਠਾਨਾ ਨਿਵਤ੍ਤੇਯ੍ਯਾਥ, ਪੁਰਤੋ ਮਾਗਮਿਤ੍ਥਾਤਿ. ਤੇ ਤਸ੍ਸ ਵਚਨੇਨ ਅਨਿਵਤ੍ਤਿਤ੍ਵਾ ਤਂ ਅਨੁਬਨ੍ਧਿਂਸੁਯੇਵ.

ਮਲ੍ਲਿਕਾ ਦਿਸ੍ਵਾ ‘‘ਰਥਾ, ਸਾਮਿ, ਪਞ੍ਞਾਯਨ੍ਤੀ’’ਤਿ ਆਹ. ਤੇਨ ਹਿ ਏਕਸ੍ਸ ਰਥਸ੍ਸ ਵਿਯ ਪਞ੍ਞਾਯਨਕਾਲੇ ਮਮ ਆਰੋਚੇਯ੍ਯਾਸੀਤਿ. ਸਾ ਯਦਾ ਸਬ੍ਬੇ ਏਕੋ ਵਿਯ ਹੁਤ੍ਵਾ ਪਞ੍ਞਾਯਿਂਸੁ, ਤਦਾ ‘‘ਏਕਮੇਵ ਸਾਮਿ ਰਥਸੀਸਂ ਪਞ੍ਞਾਯਤੀ’’ਤਿ ਆਹ. ਬਨ੍ਧੁਲੋ ‘‘ਤੇਨ ਹਿ ਇਮਾ ਰਸ੍ਮਿਯੋ ਗਣ੍ਹਾਹੀ’’ਤਿ ਤਸ੍ਸਾ ਰਸ੍ਮਿਯੋ ਦਤ੍ਵਾ ਰਥੇ ਠਿਤੋਵ ਧਨੁਂ ਆਰੋਪੇਤਿ, ਰਥਚਕ੍ਕਂ ਯਾਵ ਨਾਭਿਤੋ ਪਥਵਿਂ ਪਾਵਿਸਿ, ਲਿਚ੍ਛਵਿਨੋ ਤਂ ਠਾਨਂ ਦਿਸ੍ਵਾਪਿ ਨ ਨਿਵਤ੍ਤਿਂਸੁ. ਇਤਰੋ ਥੋਕਂ ਗਨ੍ਤ੍ਵਾ ਜਿਯਂ ਪੋਥੇਸਿ, ਅਸਨਿਸਦ੍ਦੋ ਵਿਯ ਅਹੋਸਿ. ਤੇ ਤਤੋਪਿ ਨ ਨਿਵਤ੍ਤਿਂਸੁ, ਅਨੁਬਨ੍ਧਨ੍ਤਾ ਗਚ੍ਛਨ੍ਤੇਵ. ਬਨ੍ਧੁਲੋ ਰਥੇ ਠਿਤਕੋਵ ਏਕਂ ਸਰਂ ਖਿਪਿ. ਸੋ ਪਞ੍ਚਨ੍ਨਂ ਰਥਸਤਾਨਂ ਰਥਸੀਸਂ ਛਿਦ੍ਦਂ ਕਤ੍ਵਾ ਪਞ੍ਚ ਰਾਜਸਤਾਨਿ ਪਰਿਕਰਬਨ੍ਧਨਟ੍ਠਾਨੇ ਵਿਜ੍ਝਿਤ੍ਵਾ ਪਥਵਿਂ ਪਾਵਿਸਿ. ਤੇ ਅਤ੍ਤਨੋ ਵਿਦ੍ਧਭਾਵਂ ਅਜਾਨਿਤ੍ਵਾ ‘‘ਤਿਟ੍ਠ ਰੇ, ਤਿਟ੍ਠ ਰੇ’’ਤਿ ਵਦਨ੍ਤਾ ਅਨੁਬਨ੍ਧਿਂਸੁਯੇਵ. ਬਨ੍ਧੁਲੋ ਰਥਂ ਠਪੇਤ੍ਵਾ ‘‘ਤੁਮ੍ਹੇ ਮਤਕਾ, ਮਤਕੇਹਿ ਸਦ੍ਧਿਂ ਮਯ੍ਹਂ ਯੁਦ੍ਧਂ ਨਾਮ ਨਤ੍ਥੀ’’ਤਿ ਆਹ. ਤੇ ‘‘ਮਤਕਾ ਨਾਮ ਅਮ੍ਹਾਦਿਸਾ ਨੇਵ ਹੋਨ੍ਤੀ’’ਤਿ ਵਦਿਂਸੁ. ‘‘ਤੇਨ ਹਿ ਸਬ੍ਬਪਚ੍ਛਿਮਸ੍ਸ ਪਰਿਕਰਂ ਮੋਚੇਥਾ’’ਤਿ. ਤੇ ਮੋਚਯਿਂਸੁ. ਸੋ ਮੁਤ੍ਤਮਤ੍ਤੇਯੇਵ ਮਰਿਤ੍ਵਾ ਪਤਿਤੋ. ਅਥ ਨੇ ‘‘ਸਬ੍ਬੇਪਿ ਤੁਮ੍ਹੇ ਏਵਰੂਪਾ, ਅਤ੍ਤਨੋ ਘਰਾਨਿ ਗਨ੍ਤ੍ਵਾ ਸਂਵਿਧਾਤਬ੍ਬਂ ਸਂਵਿਦਹਿਤ੍ਵਾ ਪੁਤ੍ਤਦਾਰੇ ਅਨੁਸਾਸਿਤ੍ਵਾ ਸਨ੍ਨਾਹਂ ਮੋਚੇਥਾ’’ਤਿ ਆਹ. ਤੇ ਤਥਾ ਕਤ੍ਵਾ ਸਬ੍ਬੇ ਜੀਵਿਤਕ੍ਖਯਂ ਪਤ੍ਤਾ.

ਬਨ੍ਧੁਲੋਪਿ ਮਲ੍ਲਿਕਂ ਸਾਵਤ੍ਥਿਂ ਆਨੇਸਿ. ਸਾ ਸੋਲ਼ਸਕ੍ਖਤ੍ਤੁਂ ਯਮਕੇ ਪੁਤ੍ਤੇ ਵਿਜਾਯਿ, ਸਬ੍ਬੇਪਿ ਸੂਰਾ ਥਾਮਸਮ੍ਪਨ੍ਨਾ ਅਹੇਸੁਂ, ਸਬ੍ਬਸਿਪ੍ਪੇ ਨਿਪ੍ਫਤ੍ਤਿਂ ਪਾਪੁਣਿਂਸੁ. ਏਕੇਕਸ੍ਸਪਿ ਪੁਰਿਸਸਹਸ੍ਸਪਰਿਵਾਰੋ ਅਹੋਸਿ. ਪਿਤਰਾ ਸਦ੍ਧਿਂ ਰਾਜਨਿਵੇਸਨਂ ਗਚ੍ਛਨ੍ਤੇਹਿ ਤੇਹੇਵ ਰਾਜਙ੍ਗਣਂ ਪਰਿਪੂਰਿ. ਅਥੇਕਦਿਵਸਂ ਵਿਨਿਚ੍ਛਯੇ ਕੂਟਡ੍ਡਪਰਾਜਿਤਾ ਮਨੁਸ੍ਸਾ ਬਨ੍ਧੁਲਂ ਆਗਚ੍ਛਨ੍ਤਂ ਦਿਸ੍ਵਾ ਮਹਾਰਵਂ ਵਿਰਵਨ੍ਤਾ ਵਿਨਿਚ੍ਛਯਅਮਚ੍ਚਾਨਂ ਕੂਟਡ੍ਡਕਾਰਣਂ ਤਸ੍ਸ ਆਰੋਚੇਸੁਂ. ਸੋਪਿ ਵਿਨਿਚ੍ਛਯਂ ਗਨ੍ਤ੍ਵਾ ਤਂ ਅਡ੍ਡਂ ਤੀਰੇਤ੍ਵਾ ਸਾਮਿਕਮੇਵ ਸਾਮਿਕਂ, ਅਸ੍ਸਾਮਿਕਮੇਵ ਅਸ੍ਸਾਮਿਕਂ ਅਕਾਸਿ. ਮਹਾਜਨੋ ਮਹਾਸਦ੍ਦੇਨ ਸਾਧੁਕਾਰਂ ਪਵਤ੍ਤੇਸਿ. ਰਾਜਾ ‘‘ਕਿਮਿਦ’’ਨ੍ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ਤੁਸ੍ਸਿਤ੍ਵਾ ਸਬ੍ਬੇਪਿ ਤੇ ਅਮਚ੍ਚੇ ਹਾਰੇਤ੍ਵਾ ਬਨ੍ਧੁਲਸ੍ਸੇਵ ਵਿਨਿਚ੍ਛਯਂ ਨਿਯ੍ਯਾਦੇਸਿ. ਸੋ ਤਤੋ ਪਟ੍ਠਾਯ ਸਮ੍ਮਾ ਵਿਨਿਚ੍ਛਿਨਿ. ਤਤੋ ਪੋਰਾਣਕਵਿਨਿਚ੍ਛਯਿਕਾ ਲਞ੍ਜਂ ਅਲਭਨ੍ਤਾ ਅਪ੍ਪਲਾਭਾ ਹੁਤ੍ਵਾ ‘‘ਬਨ੍ਧੁਲੋ ਰਜ੍ਜਂ ਪਤ੍ਥੇਤੀ’’ਤਿ ਰਾਜਕੁਲੇ ਪਰਿਭਿਨ੍ਦਿਂਸੁ. ਰਾਜਾ ਤਂ ਕਥਂ ਗਹੇਤ੍ਵਾ ਚਿਤ੍ਤਂ ਨਿਗ੍ਗਹੇਤੁਂ ਨਾਸਕ੍ਖਿ, ‘‘ਇਮਸ੍ਮਿਂ ਇਧੇਵ ਘਾਤਿਯਮਾਨੇ ਗਰਹਾ ਮੇ ਉਪ੍ਪਜ੍ਜਿਸ੍ਸਤੀ’’ਤਿ ਪੁਨ ਚਿਨ੍ਤੇਤ੍ਵਾ ‘‘ਪਯੁਤ੍ਤਪੁਰਿਸੇਹਿ ਪਚ੍ਚਨ੍ਤਂ ਪਹਰਾਪੇਤ੍ਵਾ ਤੇ ਪਲਾਪੇਤ੍ਵਾ ਨਿਵਤ੍ਤਕਾਲੇ ਅਨ੍ਤਰਾਮਗ੍ਗੇ ਪੁਤ੍ਤੇਹਿ ਸਦ੍ਧਿਂ ਮਾਰੇਤੁਂ ਵਟ੍ਟਤੀ’’ਤਿ ਬਨ੍ਧੁਲਂ ਪਕ੍ਕੋਸਾਪੇਤ੍ਵਾ ‘‘ਪਚ੍ਚਨ੍ਤੋ ਕਿਰ ਕੁਪਿਤੋ, ਤਵ ਪੁਤ੍ਤੇਹਿ ਸਦ੍ਧਿਂ ਗਨ੍ਤ੍ਵਾ ਚੋਰੇ ਗਣ੍ਹਾਹੀ’’ਤਿ ਪਹਿਣਿਤ੍ਵਾ ‘‘ਏਤ੍ਥੇਵਸ੍ਸ ਦ੍ਵਤ੍ਤਿਂਸਾਯ ਪੁਤ੍ਤੇਹਿ ਸਦ੍ਧਿਂ ਸੀਸਂ ਛਿਨ੍ਦਿਤ੍ਵਾ ਆਹਰਥਾ’’ਤਿ ਤੇਹਿ ਸਦ੍ਧਿਂ ਅਞ੍ਞੇਪਿ ਸਮਤ੍ਥੇ ਮਹਾਯੋਧੇ ਪੇਸੇਸਿ. ਤਸ੍ਮਿਂ ਪਚ੍ਚਨ੍ਤਂ ਗਚ੍ਛਨ੍ਤੇਯੇਵ ‘‘ਸੇਨਾਪਤਿ ਕਿਰ ਆਗਚ੍ਛਤੀ’’ਤਿ ਸੁਤ੍ਵਾਵ ਪਯੁਤ੍ਤਕਚੋਰਾ ਪਲਾਯਿਂਸੁ. ਸੋ ਤਂ ਪਦੇਸਂ ਆਵਾਸਾਪੇਤ੍ਵਾ ਜਨਪਦਂ ਸਣ੍ਠਪੇਤ੍ਵਾ ਨਿਵਤ੍ਤਿ.

ਅਥਸ੍ਸ ਨਗਰਤੋ ਅਵਿਦੂਰੇ ਠਾਨੇ ਤੇ ਯੋਧਾ ਪੁਤ੍ਤੇਹਿ ਸਦ੍ਧਿਂ ਸੀਸਂ ਛਿਨ੍ਦਿਂਸੁ. ਤਂ ਦਿਵਸਂ ਮਲ੍ਲਿਕਾਯ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਦ੍ਵੇ ਅਗ੍ਗਸਾਵਕਾ ਨਿਮਨ੍ਤਿਤਾ ਹੋਨ੍ਤਿ. ਅਥਸ੍ਸਾ ਪੁਬ੍ਬਣ੍ਹਸਮਯੇ ‘‘ਸਾਮਿਕਸ੍ਸ ਤੇ ਸਦ੍ਧਿਂ ਪੁਤ੍ਤੇਹਿ ਸੀਸਂ ਛਿਨ੍ਦਿਂਸੂ’’ਤਿ ਪਣ੍ਣਂ ਆਹਰਿਤ੍ਵਾ ਅਦਂਸੁ. ਸਾ ਤਂ ਪਵਤ੍ਤਿਂ ਞਤ੍ਵਾ ਕਸ੍ਸਚਿ ਕਿਞ੍ਚਿ ਅਵਤ੍ਵਾ ਪਣ੍ਣਂ ਉਚ੍ਛਙ੍ਗੇ ਕਤ੍ਵਾ ਭਿਕ੍ਖੁਸਙ੍ਘਮੇਵ ਪਰਿਵਿਸਿ. ਅਥਸ੍ਸਾ ਪਰਿਚਾਰਿਕਾ ਭਿਕ੍ਖੂਨਂ ਭਤ੍ਤਂ ਦਤ੍ਵਾ ਸਪ੍ਪਿਚਾਟਿਂ ਆਹਰਨ੍ਤਿਯੋ ਥੇਰਾਨਂ ਪੁਰਤੋ ਚਾਟਿਂ ਭਿਨ੍ਦਿਂਸੁ. ਧਮ੍ਮਸੇਨਾਪਤਿ ‘‘ਉਪਾਸਿਕੇ, ਭੇਦਨਧਮ੍ਮਂ ਭਿਨ੍ਨਂ, ਨ ਚਿਨ੍ਤੇਤਬ੍ਬ’’ਨ੍ਤਿ ਆਹ. ਸਾ ਉਚ੍ਛਙ੍ਗਤੋ ਪਣ੍ਣਂ ਨੀਹਰਿਤ੍ਵਾ ‘‘ਦ੍ਵਤ੍ਤਿਂਸਪੁਤ੍ਤੇਹਿ ਸਦ੍ਧਿਂ ਪਿਤੁ ਸੀਸਂ ਛਿਨ੍ਨਨ੍ਤਿ ਮੇ ਇਮਂ ਪਣ੍ਣਂ ਆਹਰਿਂਸੁ, ਅਹਂ ਇਦਂ ਸੁਤ੍ਵਾਪਿ ਨ ਚਿਨ੍ਤੇਮਿ, ਸਪ੍ਪਿਚਾਟਿਯਾ ਭਿਨ੍ਨਾਯ ਕਿਂ ਚਿਨ੍ਤੇਮਿ, ਭਨ੍ਤੇ’’ਤਿ ਆਹ. ਧਮ੍ਮਸੇਨਾਪਤਿ ‘‘ਅਨਿਮਿਤ੍ਤਮਨਞ੍ਞਾਤ’’ਨ੍ਤਿਆਦੀਨਿ (ਸੁ. ਨਿ. ੫੭੯) ਵਤ੍ਵਾ ਧਮ੍ਮਂ ਦੇਸੇਤ੍ਵਾ ਉਟ੍ਠਾਯਾਸਨਾ ਵਿਹਾਰਂ ਅਗਮਾਸਿ. ਸਾਪਿ ਦ੍ਵਤ੍ਤਿਂਸ ਸੁਣਿਸਾਯੋ ਪਕ੍ਕੋਸਾਪੇਤ੍ਵਾ ‘‘ਤੁਮ੍ਹਾਕਂ ਸਾਮਿਕਾ ਅਤ੍ਤਨੋ ਪੁਰਿਮਕਮ੍ਮਫਲਂ ਲਭਿਂਸੁ, ਤੁਮ੍ਹੇ ਮਾ ਸੋਚਿਤ੍ਥ ਮਾ ਪਰਿਦੇਵਿਤ੍ਥ, ਰਞ੍ਞੋ ਉਪਰਿ ਮਨੋਪਦੋਸਂ ਮਾ ਕਰਿਤ੍ਥਾ’’ਤਿ ਓਵਦਿ.

ਰਞ੍ਞੋ ਚਰਪੁਰਿਸਾ ਤਂ ਕਥਂ ਸੁਤ੍ਵਾ ਤੇਸਂ ਨਿਦ੍ਦੋਸਭਾਵਂ ਰਞ੍ਞੋ ਕਥਯਿਂਸੁ. ਰਾਜਾ ਸਂਵੇਗਪ੍ਪਤ੍ਤੋ ਤਸ੍ਸਾ ਨਿਵੇਸਨਂ ਗਨ੍ਤ੍ਵਾ ਮਲ੍ਲਿਕਞ੍ਚ ਸੁਣਿਸਾਯੋ ਚਸ੍ਸਾ ਖਮਾਪੇਤ੍ਵਾ ਮਲ੍ਲਿਕਾਯ ਵਰਂ ਅਦਾਸਿ. ਸਾ ‘‘ਗਹਿਤੋ ਮੇ ਹੋਤੂ’’ਤਿ ਵਤ੍ਵਾ ਤਸ੍ਮਿਂ ਗਤੇ ਮਤਕਭਤ੍ਤਂ ਦਤ੍ਵਾ ਨ੍ਹਤ੍ਵਾ ਰਾਜਾਨਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਦੇਵ, ਤੁਮ੍ਹੇਹਿ ਮੇ ਵਰੋ ਦਿਨ੍ਨੋ, ਮਯ੍ਹਞ੍ਚ ਅਞ੍ਞੇਨ ਅਤ੍ਥੋ ਨਤ੍ਥਿ, ਦ੍ਵਤ੍ਤਿਂਸਾਯ ਮੇ ਸੁਣਿਸਾਨਂ ਮਮ ਚ ਕੁਲਘਰਗਮਨਂ ਅਨੁਜਾਨਾਥਾ’’ਤਿ ਆਹ. ਰਾਜਾ ਸਮ੍ਪਟਿਚ੍ਛਿ. ਸਾ ਦ੍ਵਤ੍ਤਿਂਸਾਯ ਸੁਣਿਸਾਨਂ ਸਕਕੁਲਂ ਪੇਸੇਤ੍ਵਾ ਸਯਂ ਕੁਸਿਨਾਰਨਗਰੇ ਅਤ੍ਤਨੋ ਕੁਲਘਰਂ ਅਗਮਾਸਿ. ਰਾਜਾ ਬਨ੍ਧੁਲਸੇਨਾਪਤਿਨੋ ਭਾਗਿਨੇਯ੍ਯਸ੍ਸ ਦੀਘਕਾਰਾਯਨਸ੍ਸ ਨਾਮ ਸੇਨਾਪਤਿਟ੍ਠਾਨਂ ਅਦਾਸਿ. ਸੋ ਪਨ ‘‘ਮਾਤੁਲੋ ਮੇ ਇਮਿਨਾ ਮਾਰਿਤੋ’’ਤਿ ਰਞ੍ਞੋ ਓਤਾਰਂ ਗਵੇਸਨ੍ਤੋ ਵਿਚਰਤਿ. ਰਾਜਾਪਿ ਨਿਪ੍ਪਰਾਧਸ੍ਸ ਬਨ੍ਧੁਲਸ੍ਸ ਮਾਰਿਤਕਾਲਤੋ ਪਟ੍ਠਾਯ ਵਿਪ੍ਪਟਿਸਾਰੀ ਚਿਤ੍ਤਸ੍ਸਾਦਂ ਨ ਲਭਤਿ, ਰਜ੍ਜਸੁਖਂ ਨਾਨੁਭੋਤਿ.

ਤਦਾ ਸਤ੍ਥਾ ਸਾਕਿਯਾਨਂ ਵੇਲ਼ੁਂ ਨਾਮ ਨਿਗਮਂ ਉਪਨਿਸ੍ਸਾਯ ਵਿਹਰਤਿ. ਰਾਜਾ ਤਤ੍ਥ ਗਨ੍ਤ੍ਵਾ ਆਰਾਮਤੋ ਅਵਿਦੂਰੇ ਖਨ੍ਧਾਵਾਰਂ ਨਿਵਾਸੇਤ੍ਵਾ ‘‘ਮਹਨ੍ਤੇਨ ਪਰਿਵਾਰੇਨ ਸਤ੍ਥਾਰਂ ਵਨ੍ਦਿਸ੍ਸਾਮਾ’’ਤਿ ਵਿਹਾਰਂ ਗਨ੍ਤ੍ਵਾ ਪਞ੍ਚ ਰਾਜਕਕੁਧਭਣ੍ਡਾਨਿ ਦੀਘਕਾਰਾਯਨਸ੍ਸ ਦਤ੍ਵਾ ਏਕਕੋਵ ਗਨ੍ਧਕੁਟਿਂ ਪਾਵਿਸਿ. ਸਬ੍ਬਂ ਧਮ੍ਮਚੇਤਿਯਸੁਤ੍ਤਨਿਯਾਮੇਨੇਵ (ਮ. ਨਿ. ੨.੩੬੪ ਆਦਯੋ) ਵੇਦਿਤਬ੍ਬਂ. ਤਸ੍ਮਿਂ ਗਨ੍ਧਕੁਟਿਂ ਪਵਿਟ੍ਠੇ ਦੀਘਕਾਰਾਯਨੋ ਤਾਨਿ ਪਞ੍ਚ ਰਾਜਕਕੁਧਭਣ੍ਡਾਨਿ ਗਹੇਤ੍ਵਾ ਵਿਟਟੂਭਂ ਰਾਜਾਨਂ ਕਤ੍ਵਾ ਰਞ੍ਞੋ ਏਕਂ ਅਸ੍ਸਂ ਏਕਞ੍ਚ ਉਪਟ੍ਠਾਨਕਾਰਿਕਂ ਮਾਤੁਗਾਮਂ ਨਿਵਤ੍ਤੇਤ੍ਵਾ ਸਾਵਤ੍ਥਿਂ ਅਗਮਾਸਿ. ਰਾਜਾ ਸਤ੍ਥਾਰਾ ਸਦ੍ਧਿਂ ਪਿਯਕਥਂ ਕਥੇਤ੍ਵਾ ਨਿਕ੍ਖਨ੍ਤੋ ਸੇਨਂ ਅਦਿਸ੍ਵਾ ਤਂ ਮਾਤੁਗਾਮਂ ਪੁਚ੍ਛਿਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ ‘‘ਅਹਂ ਭਾਗਿਨੇਯ੍ਯਂ ਅਜਾਤਸਤ੍ਤੁਂ ਆਦਾਯ ਆਗਨ੍ਤ੍ਵਾ ਵਿਟਟੂਭਂ ਗਹੇਸ੍ਸਾਮੀ’’ਤਿ ਰਾਜਗਹਨਗਰਂ ਗਚ੍ਛਨ੍ਤੋ ਵਿਕਾਲੇ ਦ੍ਵਾਰੇਸੁ ਪਿਹਿਤੇਸੁ ਨਗਰਂ ਪਵਿਸਿਤੁਮਸਕ੍ਕੋਨ੍ਤੋ ਏਕਿਸ੍ਸਾਯ ਸਾਲਾਯ ਨਿਪਜ੍ਜਿਤ੍ਵਾ ਵਾਤਾਤਪੇਨ ਕਿਲਨ੍ਤੋ ਰਤ੍ਤਿਭਾਗੇ ਤਤ੍ਥੇਵ ਕਾਲਮਕਾਸਿ. ਵਿਭਾਤਾਯ ਰਤ੍ਤਿਯਾ ‘‘ਦੇਵ ਕੋਸਲਨਰਿਨ੍ਦ, ਇਦਾਨਿ ਅਨਾਥੋਸਿ ਜਾਤੋ’’ਤਿ ਵਿਲਪਨ੍ਤਿਯਾ ਤਸ੍ਸਾ ਇਤ੍ਥਿਯਾ ਸਦ੍ਦਂ ਸੁਤ੍ਵਾ ਰਞ੍ਞੋ ਆਰੋਚੇਸੁਂ. ਸੋ ਮਾਤੁਲਸ੍ਸ ਮਹਨ੍ਤੇਨ ਸਕ੍ਕਾਰੇਨ ਸਰੀਰਕਿਚ੍ਚਂ ਕਾਰੇਸਿ.

ਵਿਟਟੂਭੋਪਿ ਰਜ੍ਜਂ ਲਭਿਤ੍ਵਾ ਤਂ ਵੇਰਂ ਸਰਿਤ੍ਵਾ ‘‘ਸਬ੍ਬੇਪਿ ਸਾਕਿਯੇ ਮਾਰੇਸ੍ਸਾਮੀ’’ਤਿ ਮਹਤਿਯਾ ਸੇਨਾਯ ਨਿਕ੍ਖਮਿ. ਤਂ ਦਿਵਸਂ ਸਤ੍ਥਾ ਪਚ੍ਚੂਸਸਮਯੇ ਲੋਕਂ ਵੋਲੋਕੇਨ੍ਤੋ ਞਾਤਿਸਙ੍ਘਸ੍ਸ ਵਿਨਾਸਂ ਦਿਸ੍ਵਾ ‘‘ਞਾਤਿਸਙ੍ਗਹਂ ਕਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਬ੍ਬਣ੍ਹਸਮਯੇ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਗਨ੍ਧਕੁਟਿਯਂ ਸੀਹਸੇਯ੍ਯਂ ਕਪ੍ਪੇਤ੍ਵਾ ਸਾਯਨ੍ਹਸਮਯੇ ਆਕਾਸੇਨ ਗਨ੍ਤ੍ਵਾ ਕਪਿਲਵਤ੍ਥੁਸਾਮਨ੍ਤੇ ਏਕਸ੍ਮਿਂ ਕਬਰਚ੍ਛਾਯੇ ਰੁਕ੍ਖਮੂਲੇ ਨਿਸੀਦਿ. ਤਤੋ ਅਵਿਦੂਰੇ ਵਿਟਟੂਭਸ੍ਸ ਰਜ੍ਜਸੀਮਾਯ ਅਨ੍ਤੋ ਸਨ੍ਦਚ੍ਛਾਯੋ ਨਿਗ੍ਰੋਧਰੁਕ੍ਖੋ ਅਤ੍ਥਿ, ਵਿਟਟੂਭੋ ਸਤ੍ਥਾਰਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਭਨ੍ਤੇ, ਕਿਂਕਾਰਣਾ ਏਵਰੂਪਾਯ ਉਣ੍ਹਵੇਲਾਯ ਇਮਸ੍ਮਿਂ ਕਬਰਚ੍ਛਾਯੇ ਰੁਕ੍ਖਮੂਲੇ ਨਿਸੀਦਥ, ਏਤਸ੍ਮਿਂ ਸਨ੍ਦਚ੍ਛਾਯੇ ਨਿਗ੍ਰੋਧਰੁਕ੍ਖਮੂਲੇ ਨਿਸੀਦਥ, ਭਨ੍ਤੇ’’ਤਿ ਵਤ੍ਵਾ ‘‘ਹੋਤੁ, ਮਹਾਰਾਜ, ਞਾਤਕਾਨਂ ਛਾਯਾ ਨਾਮ ਸੀਤਲਾ’’ਤਿ ਵੁਤ੍ਤੇ ‘‘ਞਾਤਕਾਨਂ ਰਕ੍ਖਣਤ੍ਥਾਯ ਸਤ੍ਥਾ ਆਗਤੋ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਸਾਵਤ੍ਥਿਮੇਵ ਪਚ੍ਚਾਗਮਿ. ਸਤ੍ਥਾਪਿ ਉਪ੍ਪਤਿਤ੍ਵਾ ਜੇਤਵਨਮੇਵ ਗਤੋ.

ਰਾਜਾ ਸਾਕਿਯਾਨਂ ਦੋਸਂ ਸਰਿਤ੍ਵਾ ਦੁਤਿਯਂ ਨਿਕ੍ਖਮਿਤ੍ਵਾ ਤਥੇਵ ਸਤ੍ਥਾਰਂ ਪਸ੍ਸਿਤ੍ਵਾ ਪੁਨ ਨਿਵਤ੍ਤਿਤ੍ਵਾ ਤਤਿਯਵਾਰੇ ਨਿਕ੍ਖਮਿਤ੍ਵਾ ਤਤ੍ਥੇਵ ਸਤ੍ਥਾਰਂ ਪਸ੍ਸਿਤ੍ਵਾ ਨਿਵਤ੍ਤਿ. ਚਤੁਤ੍ਥਵਾਰੇ ਪਨ ਤਸ੍ਮਿਂ ਨਿਕ੍ਖਨ੍ਤੇ ਸਤ੍ਥਾ ਸਾਕਿਯਾਨਂ ਪੁਬ੍ਬਕਮ੍ਮਂ ਓਲੋਕੇਤ੍ਵਾ ਤੇਸਂ ਨਦਿਯਂ ਵਿਸਪਕ੍ਖਿਪਨਪਾਪਕਮ੍ਮਸ੍ਸ ਅਪ੍ਪਟਿਬਾਹਿਰਭਾਵਂ ਞਤ੍ਵਾ ਚਤੁਤ੍ਥਵਾਰੇ ਨ ਅਗਮਾਸਿ. ਵਿਟਟੂਭਰਾਜਾ ਖੀਰਪਾਯਕੇ ਦਾਰਕੇ ਆਦਿਂ ਕਤ੍ਵਾ ਸਬ੍ਬੇ ਸਾਕਿਯੇ ਘਾਤੇਤ੍ਵਾ ਗਲਲੋਹਿਤੇਨ ਨਿਸਿਨ੍ਨਫਲਕਂ ਧੋਵਿਤ੍ਵਾ ਪਚ੍ਚਾਗਮਿ. ਸਤ੍ਥਰਿ ਤਤਿਯਵਾਰੇ ਗਮਨਤੋ ਪਚ੍ਚਾਗਨ੍ਤ੍ਵਾ ਪੁਨਦਿਵਸੇ ਪਿਣ੍ਡਾਯ ਚਰਿਤ੍ਵਾ ਨਿਟ੍ਠਾਪਿਤਭਤ੍ਤਕਿਚ੍ਚੇ ਗਨ੍ਧਕੁਟਿਯਂ ਪਵਿਸਨ੍ਤੇ ਦਿਸਾਹਿ ਸਨ੍ਨਿਪਤਿਤਾ ਭਿਕ੍ਖੂ ਧਮ੍ਮਸਭਾਯਂ ਨਿਸੀਦਿਤ੍ਵਾ ‘‘ਆਵੁਸੋ, ਸਤ੍ਥਾ ਅਤ੍ਤਾਨਂ ਦਸ੍ਸੇਤ੍ਵਾ ਰਾਜਾਨਂ ਨਿਵਤ੍ਤਾਪੇਤ੍ਵਾ ਞਾਤਕੇ ਮਰਣਭਯਾ ਮੋਚੇਸਿ, ਏਵਂ ਞਾਤਕਾਨਂ ਅਤ੍ਥਚਰੋ ਸਤ੍ਥਾ’’ਤਿ ਭਗਵਤੋ ਗੁਣਕਥਂ ਕਥਯਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ ਤਥਾਗਤੋ ਞਾਤਕਾਨਂ ਅਤ੍ਥਂ ਚਰਤਿ, ਪੁਬ੍ਬੇਪਿ ਚਰਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਨਾਮ ਰਾਜਾ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਏਕਦਿਵਸਂ ਚਿਨ੍ਤੇਸਿ ‘‘ਜਮ੍ਬੁਦੀਪਤਲੇ ਰਾਜਾਨੋ ਬਹੁਥਮ੍ਭੇਸੁ ਪਾਸਾਦੇਸੁ ਵਸਨ੍ਤਿ, ਤਸ੍ਮਾ ਬਹੂਹਿ ਥਮ੍ਭੇਹਿ ਪਾਸਾਦਕਰਣਂ ਨਾਮ ਅਨਚ੍ਛਰਿਯਂ, ਯਂਨੂਨਾਹਂ ਏਕਥਮ੍ਭਕਂ ਪਾਸਾਦਂ ਕਾਰੇਯ੍ਯਂ, ਏਵਂ ਸਬ੍ਬਰਾਜੂਨਂ ਅਗ੍ਗਰਾਜਾ ਭਵਿਸ੍ਸਾਮੀ’’ਤਿ. ਸੋ ਵਡ੍ਢਕੀ ਪਕ੍ਕੋਸਾਪੇਤ੍ਵਾ ‘‘ਮਯ੍ਹਂ ਸੋਭਗ੍ਗਪ੍ਪਤ੍ਤਂ ਏਕਥਮ੍ਭਕਂ ਪਾਸਾਦਂ ਕਰੋਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਉਜੂ ਮਹਨ੍ਤੇ ਏਕਥਮ੍ਭਕਪਾਸਾਦਾਰਹੇ ਬਹੂ ਰੁਕ੍ਖੇ ਦਿਸ੍ਵਾ ‘‘ਇਮੇ ਰੁਕ੍ਖਾ ਸਨ੍ਤਿ, ਮਗ੍ਗੋ ਪਨ ਵਿਸਮੋ, ਨ ਸਕ੍ਕਾ ਓਤਾਰੇਤੁਂ, ਰਞ੍ਞੋ ਆਚਿਕ੍ਖਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਤਥਾ ਅਕਂਸੁ. ਰਾਜਾ ‘‘ਕੇਨਚਿ ਉਪਾਯੇਨ ਸਣਿਕਂ ਓਤਾਰੇਥਾ’’ਤਿ ਵਤ੍ਵਾ ‘‘ਦੇਵ, ਯੇਨ ਕੇਨਚਿ ਉਪਾਯੇਨ ਨ ਸਕ੍ਕਾ’’ਤਿ ਵੁਤ੍ਤੇ ‘‘ਤੇਨ ਹਿ ਮਮ ਉਯ੍ਯਾਨੇ ਏਕਂ ਰੁਕ੍ਖਂ ਉਪਧਾਰੇਥਾ’’ਤਿ ਆਹ. ਵਡ੍ਢਕੀ ਉਯ੍ਯਾਨਂ ਗਨ੍ਤ੍ਵਾ ਏਕਂ ਸੁਜਾਤਂ ਉਜੁਕਂ ਗਾਮਨਿਗਮਪੂਜਿਤਂ ਰਾਜਕੁਲਤੋਪਿ ਲਦ੍ਧਬਲਿਕਮ੍ਮਂ ਮਙ੍ਗਲਸਾਲਰੁਕ੍ਖਂ ਦਿਸ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸੁਂ. ਰਾਜਾ ‘‘ਉਯ੍ਯਾਨੇ ਰੁਕ੍ਖੋ ਨਾਮ ਮਮ ਪਟਿਬਦ੍ਧੋ, ਗਚ੍ਛਥ ਭੋ ਤਂ ਛਿਨ੍ਦਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਗਨ੍ਧਮਾਲਾਦਿਹਤ੍ਥਾ ਉਯ੍ਯਾਨਂ ਗਨ੍ਤ੍ਵਾ ਰੁਕ੍ਖੇ ਗਨ੍ਧਪਞ੍ਚਙ੍ਗੁਲਿਕਂ ਦਤ੍ਵਾ ਸੁਤ੍ਤੇਨ ਪਰਿਕ੍ਖਿਪਿਤ੍ਵਾ ਪੁਪ੍ਫਕਣ੍ਣਿਕਂ ਬਨ੍ਧਿਤ੍ਵਾ ਦੀਪਂ ਜਾਲੇਤ੍ਵਾ ਬਲਿਕਮ੍ਮਂ ਕਤ੍ਵਾ ‘‘ਇਤੋ ਸਤ੍ਤਮੇ ਦਿਵਸੇ ਆਗਨ੍ਤ੍ਵਾ ਰੁਕ੍ਖਂ ਛਿਨ੍ਦਿਸ੍ਸਾਮ, ਰਾਜਾ ਛਿਨ੍ਦਾਪੇਤਿ, ਇਮਸ੍ਮਿਂ ਰੁਕ੍ਖੇ ਨਿਬ੍ਬਤ੍ਤਦੇਵਤਾ ਅਞ੍ਞਤ੍ਥ ਗਚ੍ਛਤੁ, ਅਮ੍ਹਾਕਂ ਦੋਸੋ ਨਤ੍ਥੀ’’ਤਿ ਸਾਵੇਸੁਂ.

ਅਥ ਤਸ੍ਮਿਂ ਨਿਬ੍ਬਤ੍ਤੋ ਦੇਵਪੁਤ੍ਤੋ ਤਂ ਵਚਨਂ ਸੁਤ੍ਵਾ ‘‘ਨਿਸ੍ਸਂਸਯਂ ਇਮੇ ਵਡ੍ਢਕੀ ਇਮਂ ਰੁਕ੍ਖਂ ਛਿਨ੍ਦਿਸ੍ਸਨ੍ਤਿ, ਵਿਮਾਨਂ ਮੇ ਨਸ੍ਸਿਸ੍ਸਤਿ, ਵਿਮਾਨਪਰਿਯਨ੍ਤਿਕਮੇਵ ਖੋ ਪਨ ਮਯ੍ਹਂ ਜੀਵਿਤਂ, ਇਮਞ੍ਚ ਰਕ੍ਖਂ ਪਰਿਵਾਰੇਤ੍ਵਾ ਠਿਤੇਸੁ ਤਰੁਣਸਾਲਰੁਕ੍ਖੇਸੁ ਨਿਬ੍ਬਤ੍ਤਾਨਂ ਮਮ ਞਾਤਿਦੇਵਤਾਨਮ੍ਪਿ ਬਹੂਨਿ ਵਿਮਾਨਾਨਿ ਨਸ੍ਸਿਸ੍ਸਨ੍ਤਿ. ਵਿਮਾਨਪਰਿਯਨ੍ਤਿਕਮੇਵ ਮਮ ਞਾਤੀਨਂ ਦੇਵਤਾਨਮ੍ਪਿ ਜੀਵਿਤਂ, ਨ ਖੋ ਪਨ ਮਂ ਤਥਾ ਅਤ੍ਤਨੋ ਵਿਨਾਸੋ ਬਾਧਤਿ, ਯਥਾ ਞਾਤੀਨਂ, ਤਸ੍ਮਾ ਨੇਸਂ ਮਯਾ ਜੀਵਿਤਂ ਦਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਅਡ੍ਢਰਤ੍ਤਸਮਯੇ ਦਿਬ੍ਬਾਲਙ੍ਕਾਰਪਟਿਮਣ੍ਡਿਤੋ ਰਞ੍ਞੋ ਸਿਰਿਗਬ੍ਭਂ ਪਵਿਸਿਤ੍ਵਾ ਸਕਲਗਬ੍ਭਂ ਏਕੋਭਾਸਂ ਕਤ੍ਵਾ ਉਸ੍ਸਿਸਕਪਸ੍ਸੇ ਰੋਦਮਾਨੋ ਅਟ੍ਠਾਸਿ. ਰਾਜਾ ਤਂ ਦਿਸ੍ਵਾ ਭੀਤਤਸਿਤੋ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਪਠਮਂ ਗਾਥਮਾਹ –

੧੩.

‘‘ਕਾ ਤ੍ਵਂ ਸੁਦ੍ਧੇਹਿ ਵਤ੍ਥੇਹਿ, ਅਘੇ ਵੇਹਾਯਸਂ ਠਿਤਾ;

ਕੇਨ ਤ੍ਯਾਸ੍ਸੂਨਿ ਵਤ੍ਤਨ੍ਤਿ, ਕੁਤੋ ਤਂ ਭਯਮਾਗਤ’’ਨ੍ਤਿ.

ਤਤ੍ਥ ਕਾ ਤ੍ਵਨ੍ਤਿ ਨਾਗਯਕ੍ਖਸੁਪਣ੍ਣਸਕ੍ਕਾਦੀਸੁ ਕਾ ਨਾਮ ਤ੍ਵਨ੍ਤਿ ਪੁਚ੍ਛਤਿ. ਵਤ੍ਥੇਹੀਤਿ ਵਚਨਮਤ੍ਤਮੇਵੇਤਂ, ਸਬ੍ਬੇਪਿ ਪਨ ਦਿਬ੍ਬਾਲਙ੍ਕਾਰੇ ਸਨ੍ਧਾਯੇਵਮਾਹ. ਅਘੇਤਿ ਅਪ੍ਪਟਿਘੇ ਆਕਾਸੇ. ਵੇਹਾਯਸਨ੍ਤਿ ਤਸ੍ਸੇਵ ਵੇਵਚਨਂ. ਕੇਨ ਤ੍ਯਾਸ੍ਸੂਨਿ ਵਤ੍ਤਨ੍ਤੀਤਿ ਕੇਨ ਕਾਰਣੇਨ ਤਵ ਅਸ੍ਸੂਨਿ ਵਤ੍ਤਨ੍ਤਿ. ਕੁਤੋਤਿ ਞਾਤਿਵਿਯੋਗਧਨਵਿਨਾਸਾਦੀਨਂ ਕਿਂ ਨਿਸ੍ਸਾਯ ਤਂ ਭਯਮਾਗਤਨ੍ਤਿ ਪੁਚ੍ਛਤਿ.

ਤਤੋ ਦੇਵਰਾਜਾ ਦ੍ਵੇ ਗਾਥਾ ਅਭਾਸਿ –

੧੪.

‘‘ਤਵੇਵ ਦੇਵ ਵਿਜਿਤੇ, ਭਦ੍ਦਸਾਲੋਤਿ ਮਂ ਵਿਦੂ;

ਸਟ੍ਠਿ ਵਸ੍ਸਸਹਸ੍ਸਾਨਿ, ਤਿਟ੍ਠਤੋ ਪੂਜਿਤਸ੍ਸ ਮੇ.

੧੫.

‘‘ਕਾਰਯਨ੍ਤਾ ਨਗਰਾਨਿ, ਅਗਾਰੇ ਚ ਦਿਸਮ੍ਪਤਿ;

ਵਿਵਿਧੇ ਚਾਪਿ ਪਾਸਾਦੇ, ਨ ਮਂ ਤੇ ਅਚ੍ਚਮਞ੍ਞਿਸੁਂ;

ਯਥੇਵ ਮਂ ਤੇ ਪੂਜੇਸੁਂ, ਤਥੇਵ ਤ੍ਵਮ੍ਪਿ ਪੂਜਯਾ’’ਤਿ.

ਤਤ੍ਥ ਤਿਟ੍ਠਤੋਤਿ ਸਕਲਬਾਰਾਣਸਿਨਗਰੇਹਿ ਚੇਵ ਗਾਮਨਿਗਮੇਹਿ ਚ ਤਯਾ ਚ ਪੂਜਿਤਸ੍ਸ ਨਿਚ੍ਚਂ ਬਲਿਕਮ੍ਮਞ੍ਚ ਸਕ੍ਕਾਰਞ੍ਚ ਲਭਨ੍ਤਸ੍ਸ ਮਯ੍ਹਂ ਇਮਸ੍ਮਿਂ ਉਯ੍ਯਾਨੇ ਤਿਟ੍ਠਨ੍ਤਸ੍ਸ ਏਤ੍ਤਕੋ ਕਾਲੋ ਗਤੋਤਿ ਦਸ੍ਸੇਤਿ. ਨਗਰਾਨੀਤਿ ਨਗਰਪਟਿਸਙ੍ਖਰਣਕਮ੍ਮਾਨਿ. ਅਗਾਰੇਚਾਤਿ ਭੂਮਿਗੇਹਾਨਿ. ਦਿਸਮ੍ਪਤੀਤਿ ਦਿਸਾਨਂ ਪਤਿ, ਮਹਾਰਾਜ. ਨ ਮਂ ਤੇਤਿ ਤੇ ਨਗਰਪਟਿਸਙ੍ਖਰਣਾਦੀਨਿ ਕਰੋਨ੍ਤਾ ਇਮਸ੍ਮਿਂ ਨਗਰੇ ਪੋਰਾਣਕਰਾਜਾਨੋ ਮਂ ਨਾਤਿਮਞ੍ਞਿਸੁਂ ਨਾਤਿਕ੍ਕਮਿਂਸੁ ਨ ਵਿਹੇਠਯਿਂਸੁ, ਮਮ ਨਿਵਾਸਰੁਕ੍ਖਂ ਛਿਨ੍ਦਿਤ੍ਵਾ ਅਤ੍ਤਨੋ ਕਮ੍ਮਂ ਨ ਕਰਿਂਸੁ, ਮਯ੍ਹਂ ਪਨ ਸਕ੍ਕਾਰਮੇਵ ਕਰਿਂਸੂਤਿ ਅਵਚ. ਯਥੇਵਾਤਿ ਤਸ੍ਮਾ ਯਥੇਵ ਤੇ ਪੋਰਾਣਕਰਾਜਾਨੋ ਮਂ ਪੂਜਯਿਂਸੁ, ਏਕੋਪਿ ਇਮਂ ਰੁਕ੍ਖਂ ਨ ਛਿਨ੍ਦਾਪੇਸਿ, ਤ੍ਵਞ੍ਚਾਪਿ ਮਂ ਤਥੇਵ ਪੂਜਯ, ਮਾ ਮੇ ਰੁਕ੍ਖਂ ਛੇਦਯੀਤਿ.

ਤਤੋ ਰਾਜਾ ਦ੍ਵੇ ਗਾਥਾ ਅਭਾਸਿ –

੧੬.

‘‘ਤਂ ਇਵਾਹਂ ਨ ਪਸ੍ਸਾਮਿ, ਥੂਲਂ ਕਾਯੇਨ ਤੇ ਦੁਮਂ;

ਆਰੋਹਪਰਿਣਾਹੇਨ, ਅਭਿਰੂਪੋਸਿ ਜਾਤਿਯਾ.

੧੭.

‘‘ਪਾਸਾਦਂ ਕਾਰਯਿਸ੍ਸਾਮਿ, ਏਕਤ੍ਥਮ੍ਭਂ ਮਨੋਰਮਂ;

ਤਤ੍ਥ ਤਂ ਉਪਨੇਸ੍ਸਾਮਿ, ਚਿਰਂ ਤੇ ਯਕ੍ਖ ਜੀਵਿਤ’’ਨ੍ਤਿ.

ਤਤ੍ਥ ਕਾਯੇਨਾਤਿ ਪਮਾਣੇਨ. ਇਦਂ ਵੁਤ੍ਤਂ ਹੋਤਿ – ਤਵ ਪਮਾਣੇਨ ਤਂ ਵਿਯ ਥੂਲਂ ਮਹਨ੍ਤਂ ਅਞ੍ਞਂ ਦੁਮਂ ਨ ਪਸ੍ਸਾਮਿ, ਤ੍ਵਞ੍ਞੇਵ ਪਨ ਆਰੋਹਪਰਿਣਾਹੇਨ ਸੁਜਾਤਸਙ੍ਖਾਤਾਯ ਸਮਸਣ੍ਠਾਨਉਜੁਭਾਵਪ੍ਪਕਾਰਾਯ ਜਾਤਿਯਾ ਚ ਅਭਿਰੂਪੋ ਸੋਭਗ੍ਗਪ੍ਪਤ੍ਤੋ ਏਕਥਮ੍ਭਪਾਸਾਦਾਰਹੋਤਿ. ਪਾਸਾਦਨ੍ਤਿ ਤਸ੍ਮਾ ਤਂ ਛੇਦਾਪੇਤ੍ਵਾ ਅਹਂ ਪਾਸਾਦਂ ਕਾਰਾਪੇਸ੍ਸਾਮੇਵ. ਤਤ੍ਥ ਤਨ੍ਤਿ ਤਂ ਪਨਾਹਂ ਸਮ੍ਮ ਦੇਵਰਾਜ, ਤਤ੍ਥ ਪਾਸਾਦੇ ਉਪਨੇਸ੍ਸਾਮਿ, ਸੋ ਤ੍ਵਂ ਮਯਾ ਸਦ੍ਧਿਂ ਏਕਤੋ ਵਸਨ੍ਤੋ ਅਗ੍ਗਗਨ੍ਧਮਾਲਾਦੀਨਿ ਲਭਨ੍ਤੋ ਸਕ੍ਕਾਰਪ੍ਪਤ੍ਤੋ ਸੁਖਂ ਜੀਵਿਸ੍ਸਸਿ, ਨਿਵਾਸਟ੍ਠਾਨਾਭਾਵੇਨ ਮੇ ਵਿਨਾਸੋ ਭਵਿਸ੍ਸਤੀਤਿ ਮਾ ਚਿਨ੍ਤਯਿ, ਚਿਰਂ ਤੇ ਯਕ੍ਖ ਜੀਵਿਤਂ ਭਵਿਸ੍ਸਤੀਤਿ.

ਤਂ ਸੁਤ੍ਵਾ ਦੇਵਰਾਜਾ ਦ੍ਵੇ ਗਾਥਾ ਅਭਾਸਿ –

੧੮.

‘‘ਏਵਂ ਚਿਤ੍ਤਂ ਉਦਪਾਦਿ, ਸਰੀਰੇਨ ਵਿਨਾਭਾਵੋ;

ਪੁਥੁਸੋ ਮਂ ਵਿਕਨ੍ਤਿਤ੍ਵਾ, ਖਣ੍ਡਸੋ ਅਵਕਨ੍ਤਥ.

੧੯.

‘‘ਅਗ੍ਗੇ ਚ ਛੇਤ੍ਵਾ ਮਜ੍ਝੇ ਚ, ਪਚ੍ਛਾ ਮੂਲਮ੍ਹਿ ਛਿਨ੍ਦਥ;

ਏਵਂ ਮੇ ਛਿਜ੍ਜਮਾਨਸ੍ਸ, ਨ ਦੁਕ੍ਖਂ ਮਰਣਂ ਸਿਯਾ’’ਤਿ.

ਤਤ੍ਥ ਏਵਂ ਚਿਤ੍ਤਂ ਉਦਪਾਦੀਤਿ ਯਦਿ ਏਵਂ ਚਿਤ੍ਤਂ ਤਵ ਉਪ੍ਪਨ੍ਨਂ. ਸਰੀਰੇਨ ਵਿਨਾਭਾਵੋਤਿ ਯਦਿ ਤੇ ਮਮ ਸਰੀਰੇਨ ਭਦ੍ਦਸਾਲਰੁਕ੍ਖੇਨ ਸਦ੍ਧਿਂ ਮਮ ਵਿਨਾਭਾਵੋ ਪਤ੍ਥਿਤੋ. ਪੁਥੁਸੋਤਿ ਬਹੁਧਾ. ਵਿਕਨ੍ਤਿਤ੍ਵਾਤਿ ਛਿਨ੍ਦਿਤ੍ਵਾ. ਖਣ੍ਡਸੋਤਿ ਖਣ੍ਡਾਖਣ੍ਡਂ ਕਤ੍ਵਾ ਅਵਕਨ੍ਤਥ. ਅਗ੍ਗੇ ਚਾਤਿ ਅਵਕਨ੍ਤਨ੍ਤਾ ਪਨ ਪਠਮਂ ਅਗ੍ਗੇ, ਤਤੋ ਮਜ੍ਝੇ ਛੇਤ੍ਵਾ ਸਬ੍ਬਪਚ੍ਛਾ ਮੂਲੇ ਛਿਨ੍ਦਥ. ਏਵਞ੍ਹਿ ਮੇ ਛਿਜ੍ਜਮਾਨਸ੍ਸ ਨ ਦੁਕ੍ਖਂ ਮਰਣਂ ਸਿਯਾ, ਸੁਖਂ ਨੁ ਖਣ੍ਡਸੋ ਭਵੇਯ੍ਯਾਤਿ ਯਾਚਤਿ.

ਤਤੋ ਰਾਜਾ ਦ੍ਵੇ ਗਾਥਾ ਅਭਾਸਿ –

੨੦.

‘‘ਹਤ੍ਥਪਾਦਂ ਯਥਾ ਛਿਨ੍ਦੇ, ਕਣ੍ਣਨਾਸਞ੍ਚ ਜੀਵਤੋ;

ਤਤੋ ਪਚ੍ਛਾ ਸਿਰੋ ਛਿਨ੍ਦੇ, ਤਂ ਦੁਕ੍ਖਂ ਮਰਣਂ ਸਿਯਾ.

੨੧.

‘‘ਸੁਖਂ ਨੁ ਖਣ੍ਡਸੋ ਛਿਨ੍ਨਂ, ਭਦ੍ਦਸਾਲ ਵਨਪ੍ਪਤਿ;

ਕਿਂਹੇਤੁ ਕਿਂ ਉਪਾਦਾਯ, ਖਣ੍ਡਸੋ ਛਿਨ੍ਨਮਿਚ੍ਛਸੀ’’ਤਿ.

ਤਤ੍ਥ ਹਤ੍ਥਪਾਦਨ੍ਤਿ ਹਤ੍ਥੇ ਚ ਪਾਦੇ ਚ. ਤਂ ਦੁਕ੍ਖਨ੍ਤਿ ਏਵਂ ਪਟਿਪਾਟਿਯਾ ਛਿਜ੍ਜਨ੍ਤਸ੍ਸ ਚੋਰਸ੍ਸ ਤਂ ਮਰਣਂ ਦੁਕ੍ਖਂ ਸਿਯਾ. ਸੁਖਂ ਨੂਤਿ ਸਮ੍ਮ ਭਦ੍ਦਸਾਲ, ਵਜ੍ਝਪ੍ਪਤ੍ਤਾ ਚੋਰਾ ਸੁਖੇਨ ਮਰਿਤੁਕਾਮਾ ਸੀਸਚ੍ਛੇਦਂ ਯਾਚਨ੍ਤਿ, ਨ ਖਣ੍ਡਸੋ ਛੇਦਨਂ, ਤ੍ਵਂ ਪਨ ਏਵਂ ਯਾਚਸਿ, ਤੇਨ ਤਂ ਪੁਚ੍ਛਾਮਿ ‘‘ਸੁਖਂ ਨੁ ਖਣ੍ਡਸੋ ਛਿਨ੍ਨ’’ਨ੍ਤਿ. ਕਿਂਹੇਤੂਤਿ ਖਣ੍ਡਸੋ ਛਿਨ੍ਨਂ ਨਾਮ ਨ ਸੁਖਂ, ਕਾਰਣੇਨ ਪਨੇਤ੍ਥ ਭਵਿਤਬ੍ਬਨ੍ਤਿ ਤਂ ਪੁਚ੍ਛਨ੍ਤੋ ਏਵਮਾਹ.

ਅਥਸ੍ਸ ਆਚਿਕ੍ਖਨ੍ਤੋ ਭਦ੍ਦਸਾਲੋ ਦ੍ਵੇ ਗਾਥਾ ਅਭਾਸਿ –

੨੨.

‘‘ਯਞ੍ਚ ਹੇਤੁਮੁਪਾਦਾਯ, ਹੇਤੁਂ ਧਮ੍ਮੂਪਸਂਹਿਤਂ;

ਖਣ੍ਡਸੋ ਛਿਨ੍ਨਮਿਚ੍ਛਾਮਿ, ਮਹਾਰਾਜ ਸੁਣੋਹਿ ਮੇ.

੨੩.

‘‘ਞਾਤੀ ਮੇ ਸੁਖਸਂਵਦ੍ਧਾ, ਮਮ ਪਸ੍ਸੇ ਨਿਵਾਤਜਾ;

ਤੇਪਿਹਂ ਉਪਹਿਂਸੇਯ੍ਯ, ਪਰੇਸਂ ਅਸੁਖੋਚਿਤ’’ਨ੍ਤਿ.

ਤਤ੍ਥ ਹੇਤੁਂ ਧਮ੍ਮੂਪਸਂਹਿਤਨ੍ਤਿ ਮਹਾਰਾਜ, ਯਂ ਹੇਤੁਸਭਾਵਯੁਤ੍ਤਮੇਵ, ਨ ਹੇਤੁਪਤਿਰੂਪਕਂ, ਹੇਤੁਂ ਉਪਾਦਾਯ ਆਰਬ੍ਭ ਸਨ੍ਧਾਯਾਹਂ ਖਣ੍ਡਸੋ ਛਿਨ੍ਨਮਿਚ੍ਛਾਮਿ, ਤਂ ਓਹਿਤਸੋਤੋ ਸੁਣੋਹੀਤਿ ਅਤ੍ਥੋ. ਞਾਤੀ ਮੇਤਿ ਮਮ ਭਦ੍ਦਸਾਲਰੁਕ੍ਖਸ੍ਸ ਛਾਯਾਯ ਸੁਖਸਂਵਦ੍ਧਾ ਮਮ ਪਸ੍ਸੇ ਤਰੁਣਸਾਲਰੁਕ੍ਖੇਸੁ ਨਿਬ੍ਬਤ੍ਤਾ ਮਯਾ ਕਤਵਾਤਪਰਿਤ੍ਤਾਣਤ੍ਤਾ ਨਿਵਾਤਜਾ ਮਮ ਞਾਤਕਾ ਦੇਵਸਙ੍ਘਾ ਅਤ੍ਥਿ, ਤੇ ਅਹਂ ਵਿਸਾਲਸਾਖਵਿਟਪੋ ਮੂਲੇ ਛਿਨ੍ਦਿਤ੍ਵਾ ਪਤਨ੍ਤੋ ਉਪਹਿਂਸੇਯ੍ਯਂ, ਸਂਭਗ੍ਗਵਿਮਾਨੇ ਕਰੋਨ੍ਤੋ ਵਿਨਾਸੇਯ੍ਯਨ੍ਤਿ ਅਤ੍ਥੋ. ਪਰੇਸਂ ਅਸੁਖੋਚਿਤਨ੍ਤਿ ਏਵਂ ਸਨ੍ਤੇ ਮਯਾ ਤੇਸਂ ਪਰੇਸਂ ਞਾਤਿਦੇਵਸਙ੍ਘਾਨਂ ਅਸੁਖਂ ਦੁਕ੍ਖਂ ਓਚਿਤਂ ਵਡ੍ਢਿਤਂ, ਨ ਚਾਹਂ ਤੇਸਂ ਦੁਕ੍ਖਕਾਮੋ, ਤਸ੍ਮਾ ਭਦ੍ਦਸਾਲਂ ਖਣ੍ਡਸੋ ਖਣ੍ਡਸੋ ਛਿਨ੍ਦਾਪੇਮੀਤਿ ਅਯਮੇਤ੍ਥਾਧਿਪ੍ਪਾਯੋ.

ਤਂ ਸੁਤ੍ਵਾ ਰਾਜਾ ‘‘ਧਮ੍ਮਿਕੋ ਵਤਾਯਂ, ਦੇਵਪੁਤ੍ਤੋ, ਅਤ੍ਤਨੋ ਵਿਮਾਨਵਿਨਾਸਤੋਪਿ ਞਾਤੀਨਂ ਵਿਮਾਨਵਿਨਾਸਂ ਨ ਇਚ੍ਛਤਿ, ਞਾਤੀਨਂ ਅਤ੍ਥਚਰਿਯਂ ਚਰਤਿ, ਅਭਯਮਸ੍ਸ ਦਸ੍ਸਾਮੀ’’ਤਿ ਤੁਸ੍ਸਿਤ੍ਵਾ ਓਸਾਨਗਾਥਮਾਹ –

੨੪.

‘‘ਚੇਤੇਯ੍ਯਰੂਪਂ ਚੇਤੇਸਿ, ਭਦ੍ਦਸਾਲ ਵਨਪ੍ਪਤਿ;

ਹਿਤਕਾਮੋਸਿ ਞਾਤੀਨਂ, ਅਭਯਂ ਸਮ੍ਮ ਦਮ੍ਮਿ ਤੇ’’ਤਿ.

ਤਤ੍ਥ ਚੇਤੇਯ੍ਯਰੂਪਂ ਚੇਤੇਸੀਤਿ ਞਾਤੀਸੁ ਮੁਦੁਚਿਤ੍ਤਤਾਯ ਚਿਨ੍ਤੇਨ੍ਤੋ ਚਿਨ੍ਤੇਤਬ੍ਬਯੁਤ੍ਤਕਮੇਵ ਚਿਨ੍ਤੇਸਿ. ਛੇਦੇਯ੍ਯਰੂਪਂ ਛੇਦੇਸੀਤਿਪਿ ਪਾਠੋ. ਤਸ੍ਸਤ੍ਥੋ – ਖਣ੍ਡਸੋ ਛਿਨ੍ਨਮਿਚ੍ਛਨ੍ਤੋ ਛੇਦੇਤਬ੍ਬਯੁਤ੍ਤਕਮੇਵ ਛੇਦੇਸੀਤਿ. ਅਭਯਨ੍ਤਿ ਏਤਸ੍ਮਿਂ ਤੇ ਸਮ੍ਮ, ਗੁਣੇ ਪਸੀਦਿਤ੍ਵਾ ਅਭਯਂ ਦਦਾਮਿ, ਨ ਮੇ ਪਾਸਾਦੇਨਤ੍ਥੋ, ਨਾਹਂ ਤਂ ਛੇਦਾਪੇਸ੍ਸਾਮਿ, ਗਚ੍ਛ ਞਾਤਿਸਙ੍ਘਪਰਿਵੁਤੋ ਸਕ੍ਕਤਗਰੁਕਤੋ ਸੁਖਂ ਜੀਵਾਤਿ ਆਹ.

ਦੇਵਰਾਜਾ ਰਞ੍ਞੋ ਧਮ੍ਮਂ ਦੇਸੇਤ੍ਵਾ ਅਗਮਾਸਿ. ਰਾਜਾ ਤਸ੍ਸੋਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਗ੍ਗਪੁਰਂ ਪੂਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇਪਿ ਤਥਾਗਤੋ ਞਾਤਤ੍ਥਚਰਿਯਂ ਅਚਰਿਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਤਰੁਣਸਾਲੇਸੁ ਨਿਬ੍ਬਤ੍ਤਦੇਵਤਾ ਬੁਦ੍ਧਪਰਿਸਾ, ਭਦ੍ਦਸਾਲਦੇਵਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਭਦ੍ਦਸਾਲਜਾਤਕਵਣ੍ਣਨਾ ਦੁਤਿਯਾ.

[੪੬੬] ੩. ਸਮੁਦ੍ਦਵਾਣਿਜਜਾਤਕਵਣ੍ਣਨਾ

ਕਸਨ੍ਤਿ ਵਪਨ੍ਤਿ ਤੇ ਜਨਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦੇਵਦਤ੍ਤਸ੍ਸ ਪਞ੍ਚ ਕੁਲਸਤਾਨਿ ਗਹੇਤ੍ਵਾ ਨਿਰਯੇ ਪਤਿਤਭਾਵਂ ਆਰਬ੍ਭ ਕਥੇਸਿ. ਸੋ ਹਿ ਅਗ੍ਗਸਾਵਕੇਸੁ ਪਰਿਸਂ ਗਹੇਤ੍ਵਾ ਪਕ੍ਕਨ੍ਤੇਸੁ ਸੋਕਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ ਉਣ੍ਹਲੋਹਿਤੇ ਮੁਖਤੋ ਨਿਕ੍ਖਨ੍ਤੇ ਬਲਵਵੇਦਨਾਪੀਲ਼ਿਤੋ ਤਥਾਗਤਸ੍ਸ ਗੁਣਂ ਅਨੁਸ੍ਸਰਿਤ੍ਵਾ ‘‘ਅਹਮੇਵ ਨਵ ਮਾਸੇ ਤਥਾਗਤਸ੍ਸ ਅਨਤ੍ਥਂ ਚਿਨ੍ਤੇਸਿਂ, ਸਤ੍ਥੁ ਪਨ ਮਯਿ ਪਾਪਚਿਤ੍ਤਂ ਨਾਮ ਨਤ੍ਥਿ, ਅਸੀਤਿਮਹਾਥੇਰਾਨਮ੍ਪਿ ਮਯਿ ਆਘਾਤੋ ਨਾਮ ਨਤ੍ਥਿ, ਮਯਾ ਕਤਕਮ੍ਮੇਨ ਅਹਮੇਵ ਇਦਾਨਿ ਅਨਾਥੋ ਜਾਤੋ, ਸਤ੍ਥਾਰਾਪਿਮ੍ਹਿ ਵਿਸ੍ਸਟ੍ਠੋ ਮਹਾਥੇਰੇਹਿਪਿ ਞਾਤਿਸੇਟ੍ਠੇਨ ਰਾਹੁਲਤ੍ਥੇਰੇਨਪਿ ਸਕ੍ਯਰਾਜਕੁਲੇਹਿਪਿ, ਗਨ੍ਤ੍ਵਾ ਸਤ੍ਥਾਰਂ ਖਮਾਪੇਸ੍ਸਾਮੀ’’ਤਿ ਪਰਿਸਾਯ ਸਞ੍ਞਂ ਦਤ੍ਵਾ ਅਤ੍ਤਾਨਂ ਪਞ੍ਚਕੇਨ ਗਾਹਾਪੇਤ੍ਵਾ ਰਤ੍ਤਿਂ ਰਤ੍ਤਿਂ ਗਚ੍ਛਨ੍ਤੋ ਕੋਸਲਰਟ੍ਠਂ ਸਮ੍ਪਾਪੁਣਿ. ਆਨਨ੍ਦਤ੍ਥੇਰੋ ਸਤ੍ਥੁ ਆਰੋਚੇਸਿ ‘‘ਦੇਵਦਤ੍ਤੋ ਕਿਰ, ਭਨ੍ਤੇ, ਤੁਮ੍ਹਾਕਂ ਖਮਾਪੇਤੁਂ ਆਗਚ੍ਛਤੀ’’ਤਿ. ‘‘ਆਨਨ੍ਦ, ਦੇਵਦਤ੍ਤੋ ਮਮ ਦਸ੍ਸਨਂ ਨ ਲਭਿਸ੍ਸਤੀ’’ਤਿ.

ਅਥ ਤਸ੍ਮਿਂ ਸਾਵਤ੍ਥਿਨਗਰਦ੍ਵਾਰਂ ਸਮ੍ਪਤ੍ਤੇ ਪੁਨ ਥੇਰੋ ਆਰੋਚੇਸਿ, ਭਗਵਾਪਿ ਤਥੇਵ ਅਵਚ. ਤਸ੍ਸ ਜੇਤਵਨੇ ਪੋਕ੍ਖਰਣਿਯਾ ਸਮੀਪਂ ਆਗਤਸ੍ਸ ਪਾਪਂ ਮਤ੍ਥਕਂ ਪਾਪੁਣਿ, ਸਰੀਰੇ ਡਾਹੋ ਉਪ੍ਪਜ੍ਜਿ, ਨ੍ਹਤ੍ਵਾ ਪਾਨੀਯਂ ਪਿਵਿਤੁਕਾਮੋ ਹੁਤ੍ਵਾ ‘‘ਮਞ੍ਚਕਤੋ ਮਂ ਆਵੁਸੋ ਓਤਾਰੇਥ, ਪਾਨੀਯਂ ਪਿਵਿਸ੍ਸਾਮੀ’’ਤਿ ਆਹ. ਤਸ੍ਸ ਓਤਾਰੇਤ੍ਵਾ ਭੂਮਿਯਂ ਠਪਿਤਮਤ੍ਤਸ੍ਸ ਚਿਤ੍ਤਸ੍ਸਾਦੇ ਅਲਦ੍ਧੇਯੇਵ ਮਹਾਪਥਵੀ ਵਿਵਰਮਦਾਸਿ. ਤਾਵਦੇਵ ਤਂ ਅਵੀਚਿਤੋ ਅਗ੍ਗਿਜਾਲਾ ਉਟ੍ਠਾਯ ਪਰਿਕ੍ਖਿਪਿਤ੍ਵਾ ਗਣ੍ਹਿ. ਸੋ ‘‘ਪਾਪਕਮ੍ਮਂ ਮੇ ਮਤ੍ਥਕਂ ਪਤ੍ਤ’’ਨ੍ਤਿ ਤਥਾਗਤਸ੍ਸ ਗੁਣੇ ਅਨੁਸ੍ਸਰਿਤ੍ਵਾ –

‘‘ਇਮੇਹਿ ਅਟ੍ਠੀਹਿ ਤਮਗ੍ਗਪੁਗ੍ਗਲਂ, ਦੇਵਾਤਿਦੇਵਂ ਨਰਦਮ੍ਮਸਾਰਥਿਂ;

ਸਮਨ੍ਤਚਕ੍ਖੁਂ ਸਤਪੁਞ੍ਞਲਕ੍ਖਣਂ, ਪਾਣੇਹਿ ਬੁਦ੍ਧਂ ਸਰਣਂ ਉਪੇਮੀ’’ਤਿ. (ਮਿ. ਪ. ੪.੧.੩) –

ਇਮਾਯ ਗਾਥਾਯ ਸਰਣੇ ਪਤਿਟ੍ਠਹਨ੍ਤੋ ਅਵੀਚਿਪਰਾਯਣੋ ਅਹੋਸਿ. ਤਸ੍ਸ ਪਨ ਪਞ੍ਚ ਉਪਟ੍ਠਾਕਕੁਲਸਤਾਨਿ ਅਹੇਸੁਂ. ਤਾਨਿਪਿ ਤਪ੍ਪਕ੍ਖਿਕਾਨਿ ਹੁਤ੍ਵਾ ਦਸਬਲਂ ਅਕ੍ਕੋਸਿਤ੍ਵਾ ਅਵੀਚਿਮ੍ਹਿਯੇਵ ਨਿਬ੍ਬਤ੍ਤਿਂਸੁ. ਏਵਂ ਸੋ ਤਾਨਿ ਪਞ੍ਚ ਕੁਲਸਤਾਨਿ ਗਣ੍ਹਿਤ੍ਵਾ ਅਵੀਚਿਮ੍ਹਿ ਪਤਿਟ੍ਠਿਤੋ.

ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਦੇਵਦਤ੍ਤੋ ਪਾਪੋ ਲਾਭਸਕ੍ਕਾਰਗਿਦ੍ਧਤਾਯ ਸਮ੍ਮਾਸਮ੍ਬੁਦ੍ਧੇ ਅਟ੍ਠਾਨੇ ਕੋਪਂ ਬਨ੍ਧਿਤ੍ਵਾ ਅਨਾਗਤਭਯਮਨੋਲੋਕੇਤ੍ਵਾ ਪਞ੍ਚਹਿ ਕੁਲਸਤੇਹਿ ਸਦ੍ਧਿਂ ਅਵੀਚਿਪਰਾਯਣੋ ਜਾਤੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ ਭਿਕ੍ਖਵੇ, ਇਦਾਨੇਵ ਦੇਵਦਤ੍ਤੋ ਲਾਭਸਕ੍ਕਾਰਗਿਦ੍ਧੋ ਹੁਤ੍ਵਾ ਅਨਾਗਤਭਯਂ ਨ ਓਲੋਕੇਸਿ, ਪੁਬ੍ਬੇਪਿ ਅਨਾਗਤਭਯਂ ਅਨੋਲੋਕੇਤ੍ਵਾ ਪਚ੍ਚੁਪ੍ਪਨ੍ਨਸੁਖਗਿਦ੍ਧੇਨ ਸਦ੍ਧਿਂ ਪਰਿਸਾਯ ਮਹਾਵਿਨਾਸਂ ਪਤ੍ਤੋ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਾਰਾਣਸਿਤੋ ਅਵਿਦੂਰੇ ਕੁਲਸਹਸ੍ਸਨਿਵਾਸੋ ਮਹਾਵਡ੍ਢਕੀਗਾਮੋ ਅਹੋਸਿ. ਤਤ੍ਥ ਵਡ੍ਢਕੀ ‘‘ਤੁਮ੍ਹਾਕਂ ਮਞ੍ਚਂ ਕਰਿਸ੍ਸਾਮ, ਪੀਠਂ ਕਰਿਸ੍ਸਾਮ, ਗੇਹਂ ਕਰਿਸ੍ਸਾਮਾ’’ਤਿ ਵਤ੍ਵਾ ਮਨੁਸ੍ਸਾਨਂ ਹਤ੍ਥਤੋ ਬਹੁਂ ਇਣਂ ਗਹੇਤ੍ਵਾ ਕਿਞ੍ਚਿ ਕਾਤੁਂ ਨ ਸਕ੍ਖਿਂਸੁ. ਮਨੁਸ੍ਸਾ ਦਿਟ੍ਠਦਿਟ੍ਠੇ ਵਡ੍ਢਕੀ ਚੋਦੇਨ੍ਤਿ ਪਲਿਬੁਦ੍ਧਨ੍ਤਿ. ਤੇ ਇਣਾਯਿਕੇਹਿ ਉਪਦ੍ਦੁਤਾ ਸੁਖਂ ਵਸਿਤੁਂ ਅਸਕ੍ਕੋਨ੍ਤਾ ‘‘ਵਿਦੇਸਂ ਗਨ੍ਤ੍ਵਾ ਯਤ੍ਥ ਕਤ੍ਥਚਿ ਵਸਿਸ੍ਸਾਮਾ’’ਤਿ ਅਰਞ੍ਞਂ ਪਵਿਸਿਤ੍ਵਾ ਰੁਕ੍ਖੇ ਛਿਨ੍ਦਿਤ੍ਵਾ ਮਹਤਿਂ ਨਾਵਂ ਬਨ੍ਧਿਤ੍ਵਾ ਨਦਿਂ ਓਤਾਰੇਤ੍ਵਾ ਆਹਰਿਤ੍ਵਾ ਗਾਮਤੋ ਗਾਵੁਤਡ੍ਢਯੋਜਨਮਤ੍ਤੇ ਠਾਨੇ ਠਪੇਤ੍ਵਾ ਅਡ੍ਢਰਤ੍ਤਸਮਯੇ ਗਾਮਂ ਆਗਨ੍ਤ੍ਵਾ ਪੁਤ੍ਤਦਾਰਮਾਦਾਯ ਨਾਵਟ੍ਠਾਨਂ ਗਨ੍ਤ੍ਵਾ ਨਾਵਂ ਆਰੁਯ੍ਹ ਅਨੁਕ੍ਕਮੇਨ ਮਹਾਸਮੁਦ੍ਦਂ ਪਵਿਸਿਤ੍ਵਾ ਵਾਤਵੇਗੇਨ ਵਿਚਰਨ੍ਤਾ ਸਮੁਦ੍ਦਮਜ੍ਝੇ ਏਕਂ ਦੀਪਕਂ ਪਾਪੁਣਿਂਸੁ. ਤਸ੍ਮਿਂ ਪਨ ਦੀਪਕੇ ਸਯਂਜਾਤਸਾਲਿਉਚ੍ਛੁਕਦਲਿਅਮ੍ਬਜਮ੍ਬੁਪਨਸਤਾਲਨਾਲ਼ਿਕੇਰਾਦੀਨਿ ਵਿਵਿਧਫਲਾਨਿ ਅਤ੍ਥਿ, ਅਞ੍ਞਤਰੋ ਪਭਿਨ੍ਨਨਾਵੋ ਪੁਰਿਸੋ ਪਠਮਤਰਂ ਤਂ ਦੀਪਕਂ ਪਤ੍ਵਾ ਸਾਲਿਭਤ੍ਤਂ ਭੁਞ੍ਜਮਾਨੋ ਉਚ੍ਛੁਆਦੀਨਿ ਖਾਦਮਾਨੋ ਥੂਲਸਰੀਰੋ ਨਗ੍ਗੋ ਪਰੂਲ਼੍ਹਕੇਸਮਸ੍ਸੁ ਤਸ੍ਮਿਂ ਦੀਪਕੇ ਪਟਿਵਸਤਿ.

ਵਡ੍ਢਕੀ ਚਿਨ੍ਤਯਿਂਸੁ ‘‘ਸਚੇ ਅਯਂ ਦੀਪਕੋ ਰਕ੍ਖਸਪਰਿਗ੍ਗਹਿਤੋ ਭਵਿਸ੍ਸਤਿ, ਸਬ੍ਬੇਪਿ ਅਮ੍ਹੇ ਵਿਨਾਸਂ ਪਾਪੁਣਿਸ੍ਸਾਮ, ਪਰਿਗ੍ਗਣ੍ਹਿਸ੍ਸਾਮ ਤਾਵ ਨ’’ਨ੍ਤਿ. ਅਥ ਸਤ੍ਤਟ੍ਠ ਪੁਰਿਸਾ ਸੂਰਾ ਬਲਵਨ੍ਤੋ ਸਨ੍ਨਦ੍ਧਪਞ੍ਚਾਵੁਧਾ ਹੁਤ੍ਵਾ ਓਤਰਿਤ੍ਵਾ ਦੀਪਕਂ ਪਰਿਗ੍ਗਣ੍ਹਿਂਸੁ. ਤਸ੍ਮਿਂ ਖਣੇ ਸੋ ਪੁਰਿਸੋ ਭੁਤ੍ਤਪਾਤਰਾਸੋ ਉਚ੍ਛੁਰਸਂ ਪਿਵਿਤ੍ਵਾ ਸੁਖਪ੍ਪਤ੍ਤੋ ਰਮਣੀਯੇ ਪਦੇਸੇ ਰਜਤਪਟ੍ਟਸਦਿਸੇ ਵਾਲੁਕਤਲੇ ਸੀਤਚ੍ਛਾਯਾਯ ਉਤ੍ਤਾਨਕੋ ਨਿਪਜ੍ਜਿਤ੍ਵਾ ‘‘ਜਮ੍ਬੁਦੀਪਵਾਸਿਨੋ ਕਸਨ੍ਤਾ ਵਪਨ੍ਤਾ ਏਵਰੂਪਂ ਸੁਖਂ ਨ ਲਭਨ੍ਤਿ, ਜਮ੍ਬੁਦੀਪਤੋ ਮਯ੍ਹਂ ਅਯਮੇਵ ਦੀਪਕੋ ਵਰ’’ਨ੍ਤਿ ਗਾਯਮਾਨੋ ਉਦਾਨਂ ਉਦਾਨੇਸਿ. ਅਥ ਸਤ੍ਥਾ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਸੋ ਭਿਕ੍ਖਵੇ ਪੁਰਿਸੋ ਇਮਂ ਉਦਾਨਂ ਉਦਾਨੇਸੀ’’ਤਿ ਦਸ੍ਸੇਨ੍ਤੋ ਪਠਮਂ ਗਾਥਮਾਹ –

੨੫.

‘‘ਕਸਨ੍ਤਿ ਵਪਨ੍ਤਿ ਤੇ ਜਨਾ, ਮਨੁਜਾ ਕਮ੍ਮਫਲੂਪਜੀਵਿਨੋ;

ਨਯਿਮਸ੍ਸ ਦੀਪਕਸ੍ਸ ਭਾਗਿਨੋ, ਜਮ੍ਬੁਦੀਪਾ ਇਦਮੇਵ ਨੋ ਵਰ’’ਨ੍ਤਿ.

ਤਤ੍ਥ ਤੇ ਜਨਾਤਿ ਤੇ ਜਮ੍ਬੁਦੀਪਵਾਸਿਨੋ ਜਨਾ. ਕਮ੍ਮਫਲੂਪਜੀਵਿਨੋਤਿ ਨਾਨਾਕਮ੍ਮਾਨਂ ਫਲੂਪਜੀਵਿਨੋ ਸਤ੍ਤਾ.

ਅਥ ਤੇ ਦੀਪਕਂ ਪਰਿਗ੍ਗਣ੍ਹਨ੍ਤਾ ਪੁਰਿਸਾ ਤਸ੍ਸ ਗੀਤਸਦ੍ਦਂ ਸੁਤ੍ਵਾ ‘‘ਮਨੁਸ੍ਸਸਦ੍ਦੋ ਵਿਯ ਸੁਯ੍ਯਤਿ, ਜਾਨਿਸ੍ਸਾਮ ਨ’’ਨ੍ਤਿ ਸਦ੍ਦਾਨੁਸਾਰੇਨ ਗਨ੍ਤ੍ਵਾ ਤਂ ਪੁਰਿਸਂ ਦਿਸ੍ਵਾ ‘‘ਯਕ੍ਖੋ ਭਵਿਸ੍ਸਤੀ’’ਤਿ ਭੀਤਤਸਿਤਾ ਸਰੇ ਸਨ੍ਨਹਿਂਸੁ. ਸੋਪਿ ਤੇ ਦਿਸ੍ਵਾ ਅਤ੍ਤਨੋ ਵਧਭਯੇਨ ‘‘ਨਾਹਂ, ਸਾਮਿ, ਯਕ੍ਖੋ, ਪੁਰਿਸੋਮ੍ਹਿ, ਜੀਵਿਤਂ ਮੇ ਦੇਥਾ’’ਤਿ ਯਾਚਨ੍ਤੋ ‘‘ਪੁਰਿਸਾ ਨਾਮ ਤੁਮ੍ਹਾਦਿਸਾ ਨਗ੍ਗਾ ਨ ਹੋਨ੍ਤੀ’’ਤਿ ਵੁਤ੍ਤੇ ਪੁਨਪ੍ਪੁਨਂ ਯਾਚਿਤ੍ਵਾ ਮਨੁਸ੍ਸਭਾਵਂ ਵਿਞ੍ਞਾਪੇਸਿ. ਤੇ ਤਂ ਪੁਰਿਸਂ ਉਪਸਙ੍ਕਮਿਤ੍ਵਾ ਸਮ੍ਮੋਦਨੀਯਂ ਕਥਂ ਸੁਤ੍ਵਾ ਤਸ੍ਸ ਤਤ੍ਥ ਆਗਤਨਿਯਾਮਂ ਪੁਚ੍ਛਿਂਸੁ. ਸੋਪਿ ਸਬ੍ਬਂ ਤੇਸਂ ਕਥੇਤ੍ਵਾ ‘‘ਤੁਮ੍ਹੇ ਅਤ੍ਤਨੋ ਪੁਞ੍ਞਸਮ੍ਪਤ੍ਤਿਯਾ ਇਧਾਗਤਾ, ਅਯਂ ਉਤ੍ਤਮਦੀਪੋ, ਨ ਏਤ੍ਥ ਸਹਤ੍ਥੇਨ ਕਮ੍ਮਂ ਕਤ੍ਵਾ ਜੀਵਨ੍ਤਿ, ਸਯਂਜਾਤਸਾਲੀਨਞ੍ਚੇਵ ਉਚ੍ਛੁਆਦੀਨਞ੍ਚੇਤ੍ਥ ਅਨ੍ਤੋ ਨਤ੍ਥੀਤਿ ਅਨੁਕ੍ਕਣ੍ਠਨ੍ਤਾ ਵਸਥਾ’’ਤਿ ਆਹ. ਇਧ ਪਨ ਵਸਨ੍ਤਾਨਂ ਅਮ੍ਹਾਕਂ ਅਞ੍ਞੋ ਪਰਿਪਨ੍ਥੋ ਨਤ੍ਥਿ, ਅਞ੍ਞਂ ਭਯਂ ਏਤ੍ਥ ਨਤ੍ਥਿ, ਅਯਂ ਪਨ ਅਮਨੁਸ੍ਸਪਰਿਗ੍ਗਹਿਤੋ, ਅਮਨੁਸ੍ਸਾ ਤੁਮ੍ਹਾਕਂ ਉਚ੍ਚਾਰਪਸ੍ਸਾਵਂ ਦਿਸ੍ਵਾ ਕੁਜ੍ਝੇਯ੍ਯੁਂ, ਤਸ੍ਮਾ ਤਂ ਕਰੋਨ੍ਤਾ ਵਾਲੁਕਂ ਵਿਯੂਹਿਤ੍ਵਾ ਵਾਲੁਕਾਯ ਪਟਿਚ੍ਛਾਦੇਯ੍ਯਾਥ, ਏਤ੍ਤਕਂ ਇਧ ਭਯਂ, ਅਞ੍ਞਂ ਨਤ੍ਥਿ, ਨਿਚ੍ਚਂ ਅਪ੍ਪਮਤ੍ਤਾ ਭਵੇਯ੍ਯਾਥਾਤਿ. ਤੇ ਤਤ੍ਥ ਵਾਸਂ ਉਪਗਚ੍ਛਿਂਸੁ. ਤਸ੍ਮਿਂ ਪਨ ਕੁਲਸਹਸ੍ਸੇ ਪਞ੍ਚਨ੍ਨਂ ਪਞ੍ਚਨ੍ਨਂ ਕੁਲਸਤਾਨਂ ਜੇਟ੍ਠਕਾ ਦ੍ਵੇ ਵਡ੍ਢਕੀ ਅਹੇਸੁਂ. ਤੇਸੁ ਏਕੋ ਬਾਲੋ ਅਹੋਸਿ ਰਸਗਿਦ੍ਧੋ, ਏਕੋ ਪਣ੍ਡਿਤੋ ਰਸੇਸੁ ਅਨਲ੍ਲੀਨੋ.

ਅਪਰਭਾਗੇ ਸਬ੍ਬੇਪਿ ਤੇ ਤਤ੍ਥ ਸੁਖਂ ਵਸਨ੍ਤਾ ਥੂਲਸਰੀਰਾ ਹੁਤ੍ਵਾ ਚਿਨ੍ਤਯਿਂਸੁ ‘‘ਚਿਰਂ ਪੀਤਾ ਨੋ ਸੁਰਾ, ਉਚ੍ਛੁਰਸੇਨ ਮੇਰਯਂ ਕਤ੍ਵਾ ਪਿਵਿਸ੍ਸਾਮਾ’’ਤਿ. ਤੇ ਮੇਰਯਂ ਕਾਰੇਤ੍ਵਾ ਪਿਵਿਤ੍ਵਾ ਮਦਵਸੇਨ ਗਾਯਨ੍ਤਾ ਨਚ੍ਚਨ੍ਤਾ ਕੀਲ਼ਨ੍ਤਾ ਪਮਤ੍ਤਾ ਤਤ੍ਥ ਤਤ੍ਥ ਉਚ੍ਚਾਰਪਸ੍ਸਾਵਂ ਕਤ੍ਵਾ ਅਪ੍ਪਟਿਚ੍ਛਾਦੇਤ੍ਵਾ ਦੀਪਕਂ ਜੇਗੁਚ੍ਛਂ ਪਟਿਕੂਲਂ ਕਰਿਂਸੁ. ਦੇਵਤਾ ‘‘ਇਮੇ ਅਮ੍ਹਾਕਂ ਕੀਲ਼ਾਮਣ੍ਡਲਂ ਪਟਿਕੂਲਂ ਕਰੋਨ੍ਤੀ’’ਤਿ ਕੁਜ੍ਝਿਤ੍ਵਾ ‘‘ਮਹਾਸਮੁਦ੍ਦਂ ਉਤ੍ਤਰਾਪੇਤ੍ਵਾ ਦੀਪਕਧੋਵਨਂ ਕਰਿਸ੍ਸਾਮਾ’’ਤਿ ਮਨ੍ਤੇਤ੍ਵਾ ‘‘ਅਯਂ ਕਾਲ਼ਪਕ੍ਖੋ, ਅਜ੍ਜ ਅਮ੍ਹਾਕਂ ਸਮਾਗਮੋ ਚ ਭਿਨ੍ਨੋ, ਇਤੋ ਦਾਨਿ ਪਨ੍ਨਰਸਮੇ ਦਿਵਸੇ ਪੁਣ੍ਣਮੀਉਪੋਸਥਦਿਵਸੇ ਚਨ੍ਦਸ੍ਸੁਗ੍ਗਮਨਵੇਲਾਯ ਸਮੁਦ੍ਦਂ ਉਬ੍ਬਤ੍ਤੇਤ੍ਵਾ ਸਬ੍ਬੇਪਿਮੇ ਘਾਤੇਸ੍ਸਾਮਾ’’ਤਿ ਦਿਵਸਂ ਠਪਯਿਂਸੁ. ਅਥ ਨੇਸਂ ਅਨ੍ਤਰੇ ਏਕੋ ਧਮ੍ਮਿਕੋ ਦੇਵਪੁਤ੍ਤੋ ‘‘ਮਾ ਇਮੇ ਮਮ ਪਸ੍ਸਨ੍ਤਸ੍ਸ ਨਸ੍ਸਿਂਸੂ’’ਤਿ ਅਨੁਕਮ੍ਪਾਯ ਤੇਸੁ ਸਾਯਮਾਸਂ ਭੁਞ੍ਜਿਤ੍ਵਾ ਘਰਦ੍ਵਾਰੇ ਸੁਖਕਥਾਯ ਨਿਸਿਨ੍ਨੇਸੁ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਸਕਲਦੀਪਂ ਏਕੋਭਾਸਂ ਕਤ੍ਵਾ ਉਤ੍ਤਰਾਯ ਦਿਸਾਯ ਆਕਾਸੇ ਠਤ੍ਵਾ ‘‘ਅਮ੍ਭੋ ਵਡ੍ਢਕੀ, ਦੇਵਤਾ ਤੁਮ੍ਹਾਕਂ ਕੁਦ੍ਧਾ. ਇਮਸ੍ਮਿਂ ਠਾਨੇ ਮਾ ਵਸਿਤ੍ਥ, ਇਤੋ ਅਡ੍ਢਮਾਸਚ੍ਚਯੇਨ ਹਿ ਦੇਵਤਾ ਸਮੁਦ੍ਦਂ ਉਬ੍ਬਤ੍ਤੇਤ੍ਵਾ ਸਬ੍ਬੇਵ ਤੁਮ੍ਹੇ ਘਾਤੇਸ੍ਸਨ੍ਤਿ, ਇਤੋ ਨਿਕ੍ਖਮਿਤ੍ਵਾ ਪਲਾਯਥਾ’’ਤਿ ਵਤ੍ਵਾ ਦੁਤਿਯਂ ਗਾਥਮਾਹ –

੨੬.

‘‘ਤਿਪਞ੍ਚਰਤ੍ਤੂਪਗਤਮ੍ਹਿ ਚਨ੍ਦੇ, ਵੇਗੋ ਮਹਾ ਹੇਹਿਤਿ ਸਾਗਰਸ੍ਸ;

ਉਪ੍ਲਵਿਸ੍ਸਂ ਦੀਪਮਿਮਂ ਉਲ਼ਾਰਂ, ਮਾ ਵੋ ਵਧੀ ਗਚ੍ਛਥ ਲੇਣਮਞ੍ਞ’’ਨ੍ਤਿ.

ਤਤ੍ਥ ਉਪ੍ਲਵਿਸ੍ਸਨ੍ਤਿ ਇਮਂ ਦੀਪਕਂ ਉਪ੍ਲਵਨ੍ਤੋ ਅਜ੍ਝੋਤ੍ਥਰਨ੍ਤੋ ਅਭਿਭਵਿਸ੍ਸਤਿ. ਮਾ ਵੋ ਵਧੀਤਿ ਸੋ ਸਾਗਰਵੇਗੋ ਤੁਮ੍ਹੇ ਮਾ ਵਧਿ.

ਇਤਿ ਸੋ ਤੇਸਂ ਓਵਾਦਂ ਦਤ੍ਵਾ ਅਤ੍ਤਨੋ ਠਾਨਮੇਵ ਗਤੋ. ਤਸ੍ਮਿਂ ਗਤੇ ਅਪਰੋ ਸਾਹਸਿਕੋ ਕਕ੍ਖਲ਼ੋ ਦੇਵਪੁਤ੍ਤੋ ‘‘ਇਮੇ ਇਮਸ੍ਸ ਵਚਨਂ ਗਹੇਤ੍ਵਾ ਪਲਾਯੇਯ੍ਯੁਂ, ਅਹਂ ਨੇਸਂ ਗਮਨਂ ਨਿਵਾਰੇਤ੍ਵਾ ਸਬ੍ਬੇਪਿਮੇ ਮਹਾਵਿਨਾਸਂ ਪਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦਿਬ੍ਬਾਲਙ੍ਕਾਰਪਟਿਮਣ੍ਡਿਤੋ ਸਕਲਦੀਪਂ ਏਕੋਭਾਸਂ ਕਰੋਨ੍ਤੋ ਆਗਨ੍ਤ੍ਵਾ ਦਕ੍ਖਿਣਾਯ ਦਿਸਾਯ ਆਕਾਸੇ ਠਤ੍ਵਾ ‘‘ਏਕੋ ਦੇਵਪੁਤ੍ਤੋ ਇਧਾਗਤੋ, ਨੋ’’ਤਿ ਪੁਚ੍ਛਿਤ੍ਵਾ ‘‘ਆਗਤੋ’’ਤਿ ਵੁਤ੍ਤੇ ‘‘ਸੋ ਵੋ ਕਿਂ ਕਥੇਸੀ’’ਤਿ ਵਤ੍ਵਾ ‘‘ਇਮਂ ਨਾਮ, ਸਾਮੀ’’ਤਿ ਵੁਤ੍ਤੇ ‘‘ਸੋ ਤੁਮ੍ਹਾਕਂ ਇਧ ਨਿਵਾਸਂ ਨ ਇਚ੍ਛਤਿ, ਦੋਸੇਨ ਕਥੇਤਿ, ਤੁਮ੍ਹੇ ਅਞ੍ਞਤ੍ਥ ਅਗਨ੍ਤ੍ਵਾ ਇਧੇਵ ਵਸਥਾ’’ਤਿ ਵਤ੍ਵਾ ਦ੍ਵੇ ਗਾਥਾ ਅਭਾਸਿ –

੨੭.

‘‘ਨ ਜਾਤੁਯਂ ਸਾਗਰਵਾਰਿਵੇਗੋ, ਉਪ੍ਲਵਿਸ੍ਸਂ ਦੀਪਮਿਮਂ ਉਲ਼ਾਰਂ;

ਤਂ ਮੇ ਨਿਮਿਤ੍ਤੇਹਿ ਬਹੂਹਿ ਦਿਟ੍ਠਂ, ਮਾ ਭੇਥ ਕਿਂ ਸੋਚਥ ਮੋਦਥਵ੍ਹੋ.

੨੮.

‘‘ਪਹੂਤਭਕ੍ਖਂ ਬਹੁਅਨ੍ਨਪਾਨਂ, ਪਤ੍ਤਤ੍ਥ ਆਵਾਸਮਿਮਂ ਉਲ਼ਾਰਂ;

ਨ ਵੋ ਭਯਂ ਪਟਿਪਸ੍ਸਾਮਿ ਕਿਞ੍ਚਿ, ਆਪੁਤ੍ਤਪੁਤ੍ਤੇਹਿ ਪਮੋਦਥਵ੍ਹੋ’’ਤਿ.

ਤਤ੍ਥ ਨ ਜਾਤੁਯਨ੍ਤਿ ਨ ਜਾਤੁ ਅਯਂ. ਮਾ ਭੇਥਾਤਿ ਮਾ ਭਾਯਿਤ੍ਥ. ਮੋਦਥਵ੍ਹੋਤਿ ਪਮੋਦਿਤਾ ਪੀਤਿਸੋਮਨਸ੍ਸਜਾਤਾ ਹੋਥ. ਆਪੁਤ੍ਤਪੁਤ੍ਤੇਹੀਤਿ ਯਾਵ ਪੁਤ੍ਤਾਨਮ੍ਪਿ ਪੁਤ੍ਤੇਹਿ ਪਮੋਦਥ, ਨਤ੍ਥਿ ਵੋ ਇਮਸ੍ਮਿਂ ਠਾਨੇ ਭਯਨ੍ਤਿ.

ਏਵਂ ਸੋ ਇਮਾਹਿ ਦ੍ਵੀਹਿ ਗਾਥਾਹਿ ਤੇ ਅਸ੍ਸਾਸੇਤ੍ਵਾ ਪਕ੍ਕਾਮਿ. ਤਸ੍ਸ ਪਕ੍ਕਨ੍ਤਕਾਲੇ ਧਮ੍ਮਿਕਦੇਵਪੁਤ੍ਤਸ੍ਸ ਵਚਨਂ ਅਨਾਦਿਯਨ੍ਤੋ ਬਾਲਵਡ੍ਢਕੀ ‘‘ਸੁਣਨ੍ਤੁ ਮੇ, ਭੋਨ੍ਤੋ, ਵਚਨ’’ਨ੍ਤਿ ਸੇਸਵਡ੍ਢਕੀ ਆਮਨ੍ਤੇਤ੍ਵਾ ਪਞ੍ਚਮਂ ਗਾਥਮਾਹ –

੨੯.

‘‘ਯੋ ਦੇਵੋਯਂ ਦਕ੍ਖਿਣਾਯਂ ਦਿਸਾਯਂ, ਖੇਮਨ੍ਤਿ ਪਕ੍ਕੋਸਤਿ ਤਸ੍ਸ ਸਚ੍ਚਂ;

ਨ ਉਤ੍ਤਰੋ ਵੇਦਿ ਭਯਾਭਯਸ੍ਸ, ਮਾ ਭੇਥ ਕਿਂ ਸੋਚਥ ਮੋਦਥਵ੍ਹੋ’’ਤਿ.

ਤਤ੍ਥ ਦਕ੍ਖਿਣਾਯਨ੍ਤਿ ਦਕ੍ਖਿਣਾਯ, ਅਯਮੇਵ ਵਾ ਪਾਠੋ.

ਤਂ ਸੁਤ੍ਵਾ ਰਸਗਿਦ੍ਧਾ ਪਞ੍ਚਸਤਾ ਵਡ੍ਢਕੀ ਤਸ੍ਸ ਬਾਲਸ੍ਸ ਵਚਨਂ ਆਦਿਯਿਂਸੁ. ਇਤਰੋ ਪਨ ਪਣ੍ਡਿਤਵਡ੍ਢਕੀ ਤਸ੍ਸ ਵਚਨਂ ਅਨਾਦਿਯਨ੍ਤੋ ਤੇ ਵਡ੍ਢਕੀ ਆਮਨ੍ਤੇਤ੍ਵਾ ਚਤਸ੍ਸੋ ਗਾਥਾ ਅਭਾਸਿ –

੩੦.

‘‘ਯਥਾ ਇਮੇ ਵਿਪ੍ਪਵਦਨ੍ਤਿ ਯਕ੍ਖਾ, ਏਕੋ ਭਯਂ ਸਂਸਤਿ ਖੇਮਮੇਕੋ;

ਤਦਿਙ੍ਘ ਮਯ੍ਹਂ ਵਚਨਂ ਸੁਣਾਥ, ਖਿਪ੍ਪਂ ਲਹੁਂ ਮਾ ਵਿਨਸ੍ਸਿਮ੍ਹ ਸਬ੍ਬੇ.

੩੧.

‘‘ਸਬ੍ਬੇ ਸਮਾਗਮ੍ਮ ਕਰੋਮ ਨਾਵਂ, ਦੋਣਿਂ ਦਲ਼੍ਹਂ ਸਬ੍ਬਯਨ੍ਤੂਪਪਨ੍ਨਂ;

ਸਚੇ ਅਯਂ ਦਕ੍ਖਿਣੋ ਸਚ੍ਚਮਾਹ, ਮੋਘਂ ਪਟਿਕ੍ਕੋਸਤਿ ਉਤ੍ਤਰੋਯਂ;

ਸਾ ਚੇਵ ਨੋ ਹੇਹਿਤਿ ਆਪਦਤ੍ਥਾ, ਇਮਞ੍ਚ ਦੀਪਂ ਨ ਪਰਿਚ੍ਚਜੇਮ.

੩੨.

‘‘ਸਚੇ ਚ ਖੋ ਉਤ੍ਤਰੋ ਸਚ੍ਚਮਾਹ, ਮੋਘਂ ਪਟਿਕ੍ਕੋਸਤਿ ਦਕ੍ਖਿਣੋਯਂ;

ਤਮੇਵ ਨਾਵਂ ਅਭਿਰੁਯ੍ਹ ਸਬ੍ਬੇ, ਏਵਂ ਮਯਂ ਸੋਤ੍ਥਿ ਤਰੇਮੁ ਪਾਰਂ.

੩੩.

‘‘ਨ ਵੇ ਸੁਗਣ੍ਹਂ ਪਠਮੇਨ ਸੇਟ੍ਠਂ, ਕਨਿਟ੍ਠਮਾਪਾਥਗਤਂ ਗਹੇਤ੍ਵਾ;

ਯੋ ਚੀਧ ਤਚ੍ਛਂ ਪਵਿਚੇਯ੍ਯ ਗਣ੍ਹਤਿ, ਸ ਵੇ ਨਰੋ ਸੇਟ੍ਠਮੁਪੇਤਿ ਠਾਨ’’ਨ੍ਤਿ.

ਤਤ੍ਥ ਵਿਪ੍ਪਵਦਨ੍ਤੀਤਿ ਅਞ੍ਞਮਞ੍ਞਂ ਵਿਰੁਦ੍ਧਂ ਵਦਨ੍ਤਿ. ਲਹੁਨ੍ਤਿ ਪੁਰਿਮਸ੍ਸ ਅਤ੍ਥਦੀਪਨਂ. ਦੋਣਿਨ੍ਤਿ ਗਮ੍ਭੀਰਂ ਮਹਾਨਾਵਂ. ਸਬ੍ਬਯਨ੍ਤੂਪਪਨ੍ਨਨ੍ਤਿ ਸਬ੍ਬੇਹਿ ਫਿਯਾਰਿਤ੍ਤਾਦੀਹਿ ਯਨ੍ਤੇਹਿ ਉਪਪਨ੍ਨਂ. ਸਾ ਚੇਵ ਨੋ ਹੇਹਿਤਿ ਆਪਦਤ੍ਥਾਤਿ ਸਾ ਚ ਨੋ ਨਾਵਾ ਪਚ੍ਛਾਪਿ ਉਪ੍ਪਨ੍ਨਾਯ ਆਪਦਾਯ ਅਤ੍ਥਾ ਭਵਿਸ੍ਸਤਿ, ਇਮਞ੍ਚ ਦੀਪਂ ਨ ਪਰਿਚ੍ਚਜਿਸ੍ਸਾਮ. ਤਰੇਮੂਤਿ ਤਰਿਸ੍ਸਾਮ. ਨ ਵੇ ਸੁਗਣ੍ਹਨ੍ਤਿ ਨ ਵੇ ਸੁਖੇਨ ਗਣ੍ਹਿਤਬ੍ਬਂ. ਸੇਟ੍ਠਨ੍ਤਿ ਉਤ੍ਤਮਂ ਤਥਂ ਸਚ੍ਚਂ. ਕਨਿਟ੍ਠਨ੍ਤਿ ਪਠਮਵਚਨਂ ਉਪਾਦਾਯ ਪਚ੍ਛਿਮਵਚਨਂ ਕਨਿਟ੍ਠਂ ਨਾਮ. ਇਧਾਪਿ ‘‘ਨ ਵੇ ਸੁਗਣ੍ਹ’’ਨ੍ਤਿ ਅਨੁਵਤ੍ਤਤੇਵ. ਇਦਂ ਵੁਤ੍ਤਂ ਹੋਤਿ – ਅਮ੍ਭੋ ਵਡ੍ਢਕੀ, ਯੇਨ ਕੇਨਚਿ ਪਠਮੇਨ ਵੁਤ੍ਤਵਚਨਂ ‘‘ਇਦਮੇਵ ਸੇਟ੍ਠਂ ਤਥਂ ਸਚ੍ਚ’’ਨ੍ਤਿ ਸੁਖਂ ਨ ਗਣ੍ਹਿਤਬ੍ਬਮੇਵ, ਯਥਾ ਚ ਤਂ, ਏਵਂ ਕਨਿਟ੍ਠਂ ਗਚ੍ਛਾ ਵੁਤ੍ਤਵਚਨਮ੍ਪਿ ‘‘ਇਦਮੇਵ ਤਥਂ ਸਚ੍ਚ’’ਨ੍ਤਿ ਨ ਗਣ੍ਹਿਤਬ੍ਬਂ. ਯਂ ਪਨ ਸੋਤਵਿਸਯਂ ਆਪਾਥਗਤਂ ਹੋਤਿ, ਤਂ ਆਪਾਥਗਤਂ ਗਹੇਤ੍ਵਾ ਯੋ ਇਧ ਪਣ੍ਡਿਤਪੁਰਿਸੋ ਪੁਰਿਮਵਚਨਞ੍ਚ ਪਚ੍ਛਿਮਵਚਨਞ੍ਚ ਪਵਿਚੇਯ੍ਯ ਵਿਚਿਨਿਤ੍ਵਾ ਤੀਰੇਤ੍ਵਾ ਉਪਪਰਿਕ੍ਖਿਤ੍ਵਾ ਤਚ੍ਛਂ ਗਣ੍ਹਾਤਿ, ਯਂ ਤਥਂ ਸਚ੍ਚਂ ਸਭਾਵਭੂਤਂ, ਤਦੇਵ ਪਚ੍ਚਕ੍ਖਂ ਕਤ੍ਵਾ ਗਣ੍ਹਾਤਿ. ਸ ਵੇ ਨਰੋ ਸੇਟ੍ਠਮੁਪੇਤਿ ਠਾਨਨ੍ਤਿ ਸੋ ਉਤ੍ਤਮਂ ਠਾਨਂ ਉਪੇਤਿ ਅਧਿਗਚ੍ਛਤਿ ਵਿਨ੍ਦਤਿ ਲਭਤੀਤਿ.

ਸੋ ਏਵਞ੍ਚ ਪਨ ਵਤ੍ਵਾ ਆਹ – ‘‘ਅਮ੍ਭੋ, ਮਯਂ ਦ੍ਵਿਨ੍ਨਮ੍ਪਿ ਦੇਵਤਾਨਂ ਵਚਨਂ ਕਰਿਸ੍ਸਾਮ, ਨਾਵਂ ਤਾਵ ਸਜ੍ਜੇਯ੍ਯਾਮ. ਸਚੇ ਪਠਮਸ੍ਸ ਵਚਨਂ ਸਚ੍ਚਂ ਭਵਿਸ੍ਸਤਿ, ਤਂ ਨਾਵਂ ਅਭਿਰੁਹਿਤ੍ਵਾ ਪਲਾਯਿਸ੍ਸਾਮ, ਅਥ ਇਤਰਸ੍ਸ ਵਚਨਂ ਸਚ੍ਚਂ ਭਵਿਸ੍ਸਤਿ, ਨਾਵਂ ਏਕਮਨ੍ਤੇ ਠਪੇਤ੍ਵਾ ਇਧੇਵ ਵਸਿਸ੍ਸਾਮਾ’’ਤਿ. ਏਵਂ ਵੁਤ੍ਤੇ ਬਾਲਵਡ੍ਢਕੀ ‘‘ਅਮ੍ਭੋ, ਤ੍ਵਂ ਉਦਕਪਾਤਿਯਂ ਸੁਸੁਮਾਰਂ ਪਸ੍ਸਸਿ, ਅਤੀਵ ਦੀਘਂ ਪਸ੍ਸਸਿ, ਪਠਮਦੇਵਪੁਤ੍ਤੋ ਅਮ੍ਹੇਸੁ ਦੋਸਵਸੇਨ ਕਥੇਸਿ, ਪਚ੍ਛਿਮੋ ਸਿਨੇਹੇਨੇਵ, ਇਮਂ ਏਵਰੂਪਂ ਵਰਦੀਪਂ ਪਹਾਯ ਕੁਹਿਂ ਗਮਿਸ੍ਸਾਮ, ਸਚੇ ਪਨ ਤ੍ਵਂ ਗਨ੍ਤੁਕਾਮੋ, ਤਵ ਪਰਿਸਂ ਗਣ੍ਹਿਤ੍ਵਾ ਨਾਵਂ ਕਰੋਹਿ, ਅਮ੍ਹਾਕਂ ਨਾਵਾਯ ਕਿਚ੍ਚਂ ਨਤ੍ਥੀ’’ਤਿ ਆਹ. ਪਣ੍ਡਿਤੋ ਅਤ੍ਤਨੋ ਪਰਿਸਂ ਗਹੇਤ੍ਵਾ ਨਾਵਂ ਸਜ੍ਜੇਤ੍ਵਾ ਨਾਵਾਯ ਸਬ੍ਬੂਪਕਰਣਾਨਿ ਆਰੋਪੇਤ੍ਵਾ ਸਪਰਿਸੋ ਨਾਵਾਯ ਅਟ੍ਠਾਸਿ.

ਤਤੋ ਪੁਣ੍ਣਮਦਿਵਸੇ ਚਨ੍ਦਸ੍ਸ ਉਗ੍ਗਮਨਵੇਲਾਯ ਸਮੁਦ੍ਦਤੋ ਊਮਿ ਉਤ੍ਤਰਿਤ੍ਵਾ ਜਾਣੁਕਪਮਾਣਾ ਹੁਤ੍ਵਾ ਦੀਪਕਂ ਧੋਵਿਤ੍ਵਾ ਗਤਾ. ਪਣ੍ਡਿਤੋ ਸਮੁਦ੍ਦਸ੍ਸ ਉਤ੍ਤਰਣਭਾਵਂ ਞਤ੍ਵਾ ਨਾਵਂ ਵਿਸ੍ਸਜ੍ਜੇਸਿ. ਬਾਲਵਡ੍ਢਕਿਪਕ੍ਖਿਕਾਨਿ ਪਞ੍ਚ ਕੁਲਸਤਾਨਿ ‘‘ਸਮੁਦ੍ਦਤੋ ਊਮਿ ਦੀਪਧੋਵਨਤ੍ਥਾਯ ਆਗਤਾ, ਏਤ੍ਤਕਮੇਵ ਏਤ’’ਨ੍ਤਿ ਕਥੇਨ੍ਤਾ ਨਿਸੀਦਿਂਸੁ. ਤਤੋ ਪਟਿਪਾਟਿਯਾ ਕਟਿਪ੍ਪਮਾਣਾ ਪੁਰਿਸਪ੍ਪਮਾਣਾ ਤਾਲਪ੍ਪਮਾਣਾ ਸਤ੍ਤਤਾਲਪ੍ਪਮਾਣਾ ਸਾਗਰਊਮਿ ਦੀਪਕਮ੍ਪਿ ਵੁਯ੍ਹਮਾਨਾ ਆਗਞ੍ਛਿ. ਪਣ੍ਡਿਤੋ ਉਪਾਯਕੁਸਲਤਾਯ ਰਸੇ ਅਲਗ੍ਗੋ ਸੋਤ੍ਥਿਨਾ ਗਤੋ, ਬਾਲਵਡ੍ਢਕੀ ਰਸਗਿਦ੍ਧੇਨ ਅਨਾਗਤਭਯਂ ਅਨੋਲੋਕੇਨ੍ਤੋ ਪਞ੍ਚਹਿ ਕੁਲਸਤੇਹਿ ਸਦ੍ਧਿਂ ਵਿਨਾਸਂ ਪਤ੍ਤੋ.

ਇਤੋ ਪਰਾ ਸਾਨੁਸਾਸਨੀ ਤਮਤ੍ਥਂ ਦੀਪਯਮਾਨਾ ਤਿਸ੍ਸੋ ਅਭਿਸਮ੍ਬੁਦ੍ਧਗਾਥਾ ਹੋਨ੍ਤਿ –

੩੪.

‘‘ਯਥਾਪਿ ਤੇ ਸਾਗਰਵਾਰਿਮਜ੍ਝੇ, ਸਕਮ੍ਮੁਨਾ ਸੋਤ੍ਥਿ ਵਹਿਂਸੁ ਵਾਣਿਜਾ;

ਅਨਾਗਤਤ੍ਥਂ ਪਟਿਵਿਜ੍ਝਿਯਾਨ, ਅਪ੍ਪਮ੍ਪਿ ਨਾਚ੍ਚੇਤਿ ਸ ਭੂਰਿਪਞ੍ਞੋ.

੩੫.

‘‘ਬਾਲਾ ਚ ਮੋਹੇਨ ਰਸਾਨੁਗਿਦ੍ਧਾ, ਅਨਾਗਤਂ ਅਪ੍ਪਟਿਵਿਜ੍ਝਿਯਤ੍ਥਂ;

ਪਚ੍ਚੁਪ੍ਪਨ੍ਨੇ ਸੀਦਨ੍ਤਿ ਅਤ੍ਥਜਾਤੇ, ਸਮੁਦ੍ਦਮਜ੍ਝੇ ਯਥਾ ਤੇ ਮਨੁਸ੍ਸਾ.

੩੬.

‘‘ਅਨਾਗਤਂ ਪਟਿਕਯਿਰਾਥ ਕਿਚ੍ਚਂ, ‘ਮਾ ਮਂ ਕਿਚ੍ਚਂ ਕਿਚ੍ਚਕਾਲੇ ਬ੍ਯਧੇਸਿ’;

ਤਂ ਤਾਦਿਸਂ ਪਟਿਕਤਕਿਚ੍ਚਕਾਰਿਂ, ਨ ਤਂ ਕਿਚ੍ਚਂ ਕਿਚ੍ਚਕਾਲੇ ਬ੍ਯਧੇਤੀ’’ਤਿ.

ਤਤ੍ਥ ਸਕਮ੍ਮੁਨਾਤਿ ਅਨਾਗਤਭਯਂ ਦਿਸ੍ਵਾ ਪੁਰੇਤਰਂ ਕਤੇਨ ਅਤ੍ਤਨੋ ਕਮ੍ਮੇਨ. ਸੋਤ੍ਥਿ ਵਹਿਂਸੂਤਿ ਖੇਮੇਨ ਗਮਿਂਸੁ. ਵਾਣਿਜਾਤਿ ਸਮੁਦ੍ਦੇ ਵਿਚਰਣਭਾਵੇਨ ਵਡ੍ਢਕੀ ਵੁਤ੍ਤਾ. ਪਟਿਵਿਜ੍ਝਿਯਾਨਾਤਿ ਏਵਂ, ਭਿਕ੍ਖਵੇ, ਪਠਮਤਰਂ ਕਤ੍ਤਬ੍ਬਂ ਅਨਾਗਤਂ ਅਤ੍ਥਂ ਪਟਿਵਿਜ੍ਝਿਤ੍ਵਾ ਇਧਲੋਕੇ ਭੂਰਿਪਞ੍ਞੋ ਕੁਲਪੁਤ੍ਤੋ ਅਪ੍ਪਮਤ੍ਤਕਮ੍ਪਿ ਅਤ੍ਤਨੋ ਅਤ੍ਥਂ ਨ ਅਚ੍ਚੇਤਿ ਨਾਤਿਵਤ੍ਤਤਿ, ਨ ਹਾਪੇਤੀਤਿ ਅਤ੍ਥੋ. ਅਪ੍ਪਟਿਵਿਜ੍ਝਿਯਤ੍ਥਨ੍ਤਿ ਅਪ੍ਪਟਿਵਿਜ੍ਝਿਤ੍ਵਾ ਅਤ੍ਥਂ, ਪਠਮਮੇਵ ਕਤ੍ਤਬ੍ਬਂ ਅਕਤ੍ਵਾਤਿ ਅਤ੍ਥੋ. ਪਚ੍ਚੁਪ੍ਪਨ੍ਨੇਤਿ ਯਦਾ ਤਂ ਅਨਾਗਤਂ ਅਤ੍ਥਜਾਤਂ ਉਪ੍ਪਜ੍ਜਤਿ, ਤਦਾ ਤਸ੍ਮਿਂ ਪਚ੍ਚੁਪ੍ਪਨ੍ਨੇ ਸੀਦਨ੍ਤਿ, ਅਤ੍ਥੇ ਜਾਤੇ ਅਤ੍ਤਨੋ ਪਤਿਟ੍ਠਂ ਨ ਲਭਨ੍ਤਿ, ਸਮੁਦ੍ਦੇ ਤੇ ਬਾਲਵਡ੍ਢਕੀ ਮਨੁਸ੍ਸਾ ਵਿਯ ਵਿਨਾਸਂ ਪਾਪੁਣਨ੍ਤਿ.

ਅਨਾਗਤਨ੍ਤਿ ਭਿਕ੍ਖਵੇ, ਪਣ੍ਡਿਤਪੁਰਿਸੋ ਅਨਾਗਤਂ ਪਠਮਤਰਂ ਕਤ੍ਤਬ੍ਬਕਿਚ੍ਚਂ ਸਮ੍ਪਰਾਯਿਕਂ ਵਾ ਦਿਟ੍ਠਧਮ੍ਮਿਕਂ ਵਾ ਪਟਿਕਯਿਰਾਥ, ਪੁਰੇਤਰਮੇਵ ਕਰੇਯ੍ਯ. ਕਿਂਕਾਰਣਾ? ਮਾ ਮਂ ਕਿਚ੍ਚਂ ਕਿਚ੍ਚਕਾਲੇ ਬ੍ਯਧੇਸਿ, ਪੁਰੇ ਕਤ੍ਤਬ੍ਬਞ੍ਹਿ ਪੁਰੇ ਅਕਯਿਰਮਾਨਂ ਪਚ੍ਛਾ ਪਚ੍ਚੁਪ੍ਪਨ੍ਨਭਾਵਪ੍ਪਤ੍ਤਂ ਅਤ੍ਤਨੋ ਕਿਚ੍ਚਕਾਲੇ ਕਾਯਚਿਤ੍ਤਾਬਾਧੇਨ ਬ੍ਯਧੇਤਿ, ਤਂ ਮਂ ਮਾ ਬ੍ਯਧੇਸੀਤਿ ਪਠਮਮੇਵ ਨਂ ਪਣ੍ਡਿਤੋ ਕਰੇਯ੍ਯ. ਤਂ ਤਾਦਿਸਨ੍ਤਿ ਯਥਾ ਪਣ੍ਡਿਤਂ ਪੁਰਿਸਂ. ਪਟਿਕਤਕਿਚ੍ਚਕਾਰਿਨ੍ਤਿ ਪਟਿਕਚ੍ਚੇਵ ਕਤ੍ਤਬ੍ਬਕਿਚ੍ਚਕਾਰਿਨਂ. ਤਂ ਕਿਚ੍ਚਂ ਕਿਚ੍ਚਕਾਲੇਤਿ ਅਨਾਗਤਂ ਕਿਚ੍ਚਂ ਕਯਿਰਮਾਨਂ ਪਚ੍ਛਾ ਪਚ੍ਚੁਪ੍ਪਨ੍ਨਭਾਵਪ੍ਪਤ੍ਤਂ ਅਤ੍ਤਨੋ ਕਿਚ੍ਚਕਾਲੇ ਕਾਯਚਿਤ੍ਤਾਬਾਧਕਾਲੇ ਤਾਦਿਸਂ ਪੁਰਿਮਂ ਨ ਬ੍ਯਧੇਤਿ ਨ ਬਾਧਤਿ. ਕਸ੍ਮਾ? ਪੁਰੇਯੇਵ ਕਤਤ੍ਤਾਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਪਚ੍ਚੁਪ੍ਪਨ੍ਨਸੁਖੇ ਲਗ੍ਗੋ ਅਨਾਗਤਭਯਂ ਅਨੋਲੋਕੇਤ੍ਵਾ ਸਪਰਿਸੋ ਵਿਨਾਸਂ ਪਤ੍ਤੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਬਾਲਵਡ੍ਢਕੀ ਦੇਵਦਤ੍ਤੋ ਅਹੋਸਿ, ਦਕ੍ਖਿਣਦਿਸਾਯ ਠਿਤੋ ਅਧਮ੍ਮਿਕਦੇਵਪੁਤ੍ਤੋ ਕੋਕਾਲਿਕੋ, ਉਤ੍ਤਰਦਿਸਾਯ ਠਿਤੋ ਧਮ੍ਮਿਕਦੇਵਪੁਤ੍ਤੋ ਸਾਰਿਪੁਤ੍ਤੋ, ਪਣ੍ਡਿਤਵਡ੍ਢਕੀ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਮੁਦ੍ਦਵਾਣਿਜਜਾਤਕਵਣ੍ਣਨਾ ਤਤਿਯਾ.

[੪੬੭] ੪. ਕਾਮਜਾਤਕਵਣ੍ਣਨਾ

ਕਾਮਂ ਕਾਮਯਮਾਨਸ੍ਸਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਬ੍ਰਾਹ੍ਮਣਂ ਆਰਬ੍ਭ ਕਥੇਸਿ. ਏਕੋ ਕਿਰ ਸਾਵਤ੍ਥਿਵਾਸੀ ਬ੍ਰਾਹ੍ਮਣੋ ਅਚਿਰਵਤੀਤੀਰੇ ਖੇਤ੍ਤਕਰਣਤ੍ਥਾਯ ਅਰਞ੍ਞਂ ਕੋਟੇਸਿ. ਸਤ੍ਥਾ ਤਸ੍ਸ ਉਪਨਿਸ੍ਸਯਂ ਦਿਸ੍ਵਾ ਸਾਵਤ੍ਥਿਂ ਪਿਣ੍ਡਾਯ ਪਵਿਸਨ੍ਤੋ ਮਗ੍ਗਾ ਓਕ੍ਕਮ੍ਮ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ‘‘ਕਿਂ ਕਰੋਸਿ ਬ੍ਰਾਹ੍ਮਣਾ’’ਤਿ ਵਤ੍ਵਾ ‘‘ਖੇਤ੍ਤਟ੍ਠਾਨਂ ਕੋਟਾਪੇਮਿ ਭੋ, ਗੋਤਮਾ’’ਤਿ ਵੁਤ੍ਤੇ ‘‘ਸਾਧੁ, ਬ੍ਰਾਹ੍ਮਣ, ਕਮ੍ਮਂ ਕਰੋਹੀ’’ਤਿ ਵਤ੍ਵਾ ਅਗਮਾਸਿ. ਏਤੇਨੇਵ ਉਪਾਯੇਨ ਛਿਨ੍ਨਰੁਕ੍ਖੇ ਹਾਰੇਤ੍ਵਾ ਖੇਤ੍ਤਸ੍ਸ ਸੋਧਨਕਾਲੇ ਕਸਨਕਾਲੇ ਕੇਦਾਰਬਨ੍ਧਨਕਾਲੇ ਵਪਨਕਾਲੇਤਿ ਪੁਨਪ੍ਪੁਨਂ ਗਨ੍ਤ੍ਵਾ ਤੇਨ ਸਦ੍ਧਿਂ ਪਟਿਸਨ੍ਥਾਰਮਕਾਸਿ. ਵਪਨਦਿਵਸੇ ਪਨ ਸੋ ਬ੍ਰਾਹ੍ਮਣੋ ‘‘ਅਜ੍ਜ, ਭੋ ਗੋਤਮ, ਮਯ੍ਹਂ ਵਪ੍ਪਮਙ੍ਗਲਂ, ਅਹਂ ਇਮਸ੍ਮਿਂ ਸਸ੍ਸੇ ਨਿਪ੍ਫਨ੍ਨੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਸ੍ਸਾਮੀ’’ਤਿ ਆਹ. ਸਤ੍ਥਾ ਤੁਣ੍ਹੀਭਾਵੇਨ ਅਧਿਵਾਸੇਤ੍ਵਾ ਪਕ੍ਕਾਮਿ. ਪੁਨੇਕਦਿਵਸਂ ਬ੍ਰਾਹ੍ਮਣੋ ਸਸ੍ਸਂ ਓਲੋਕੇਨ੍ਤੋ ਅਟ੍ਠਾਸਿ. ਸਤ੍ਥਾਪਿ ਤਤ੍ਥ ਗਨ੍ਤ੍ਵਾ ‘‘ਕਿਂ ਕਰੋਸਿ ਬ੍ਰਾਹ੍ਮਣਾ’’ਤਿ ਪੁਚ੍ਛਿਤ੍ਵਾ ‘‘ਸਸ੍ਸਂ ਓਲੋਕੇਮਿ ਭੋ ਗੋਤਮਾ’’ਤਿ ਵੁਤ੍ਤੇ ‘‘ਸਾਧੁ ਬ੍ਰਾਹ੍ਮਣਾ’’ਤਿ ਵਤ੍ਵਾ ਪਕ੍ਕਾਮਿ. ਤਦਾ ਬ੍ਰਾਹ੍ਮਣੋ ਚਿਨ੍ਤੇਸਿ ‘‘ਸਮਣੋ ਗੋਤਮੋ ਅਭਿਣ੍ਹਂ ਆਗਚ੍ਛਤਿ, ਨਿਸ੍ਸਂਸਯਂ ਭਤ੍ਤੇਨ ਅਤ੍ਥਿਕੋ, ਦਸ੍ਸਾਮਹਂ ਤਸ੍ਸ ਭਤ੍ਤ’’ਨ੍ਤਿ. ਤਸ੍ਸੇਵਂ ਚਿਨ੍ਤੇਤ੍ਵਾ ਗੇਹਂ ਗਤਦਿਵਸੇ ਸਤ੍ਥਾਪਿ ਤਤ੍ਥ ਅਗਮਾਸਿ. ਅਥ ਬ੍ਰਾਹ੍ਮਣਸ੍ਸ ਅਤਿਵਿਯ ਵਿਸ੍ਸਾਸੋ ਅਹੋਸਿ. ਅਪਰਭਾਗੇ ਪਰਿਣਤੇ ਸਸ੍ਸੇ ‘‘ਸ੍ਵੇ ਖੇਤ੍ਤਂ ਲਾਯਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਨਿਪਨ੍ਨੇ ਬ੍ਰਾਹ੍ਮਣੇ ਅਚਿਰਵਤਿਯਾ ਉਪਰਿ ਸਬ੍ਬਰਤ੍ਤਿਂ ਕਰਕਵਸ੍ਸਂ ਵਸ੍ਸਿ. ਮਹੋਘੋ ਆਗਨ੍ਤ੍ਵਾ ਏਕਨਾਲ਼ਿਮਤ੍ਤਮ੍ਪਿ ਅਨਵਸੇਸਂ ਕਤ੍ਵਾ ਸਬ੍ਬਂ ਸਸ੍ਸਂ ਸਮੁਦ੍ਦਂ ਪਵੇਸੇਸਿ. ਬ੍ਰਾਹ੍ਮਣੋ ਓਘਮ੍ਹਿ ਪਤਿਤੇ ਸਸ੍ਸਵਿਨਾਸਂ ਓਲੋਕੇਤ੍ਵਾ ਸਕਭਾਵੇਨ ਸਣ੍ਠਾਤੁਂ ਨਾਹੋਸਿ, ਬਲਵਸੋਕਾਭਿਭੂਤੋ ਹਤ੍ਥੇਨ ਉਰਂ ਪਹਰਿਤ੍ਵਾ ਪਰਿਦੇਵਮਾਨੋ ਰੋਦਨ੍ਤੋ ਨਿਪਜ੍ਜਿ.

ਸਤ੍ਥਾ ਪਚ੍ਚੂਸਸਮਯੇ ਸੋਕਾਭਿਭੂਤਂ ਬ੍ਰਾਹ੍ਮਣਂ ਦਿਸ੍ਵਾ ‘‘ਬ੍ਰਾਹ੍ਮਣਸ੍ਸਾਵਸ੍ਸਯੋ ਭਵਿਸ੍ਸਾਮੀ’’ਤਿ ਪੁਨਦਿਵਸੇ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਭਿਕ੍ਖੂ ਵਿਹਾਰਂ ਪੇਸੇਤ੍ਵਾ ਪਚ੍ਛਾਸਮਣੇਨ ਸਦ੍ਧਿਂ ਤਸ੍ਸ ਗੇਹਦ੍ਵਾਰਂ ਅਗਮਾਸਿ. ਬ੍ਰਾਹ੍ਮਣੋ ਸਤ੍ਥੁ ਆਗਤਭਾਵਂ ਸੁਤ੍ਵਾ ‘‘ਪਟਿਸਨ੍ਥਾਰਤ੍ਥਾਯ ਮੇ ਸਹਾਯੋ ਆਗਤੋ ਭਵਿਸ੍ਸਤੀ’’ਤਿ ਪਟਿਲਦ੍ਧਸ੍ਸਾਸੋ ਆਸਨਂ ਪਞ੍ਞਪੇਸਿ. ਸਤ੍ਥਾ ਪਵਿਸਿਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ‘‘ਬ੍ਰਾਹ੍ਮਣ, ਕਸ੍ਮਾ ਤ੍ਵਂ ਦੁਮ੍ਮਨੋਸਿ, ਕਿਂ ਤੇ ਅਫਾਸੁਕ’’ਨ੍ਤਿ ਪੁਚ੍ਛਿ. ਭੋ ਗੋਤਮ, ਅਚਿਰਵਤੀਤੀਰੇ ਮਯਾ ਰੁਕ੍ਖਚ੍ਛੇਦਨਤੋ ਪਟ੍ਠਾਯ ਕਤਂ ਕਮ੍ਮਂ ਤੁਮ੍ਹੇ ਜਾਨਾਥ, ਅਹਂ ‘‘ਇਮਸ੍ਮਿਂ ਸਸ੍ਸੇ ਨਿਪ੍ਫਨ੍ਨੇ ਤੁਮ੍ਹਾਕਂ ਦਾਨਂ ਦਸ੍ਸਾਮੀ’’ਤਿ ਵਿਚਰਾਮਿ, ਇਦਾਨਿ ਮੇ ਸਬ੍ਬਂ ਤਂ ਸਸ੍ਸਂ ਮਹੋਘੋ ਸਮੁਦ੍ਦਮੇਵ ਪਵੇਸੇਸਿ, ਕਿਞ੍ਚਿ ਅਵਸਿਟ੍ਠਂ ਨਤ੍ਥਿ, ਸਕਟਸਤਮਤ੍ਤਂ ਧਞ੍ਞਂ ਵਿਨਟ੍ਠਂ, ਤੇਨ ਮੇ ਮਹਾਸੋਕੋ ਉਪ੍ਪਨ੍ਨੋਤਿ. ‘‘ਕਿਂ ਪਨ, ਬ੍ਰਾਹ੍ਮਣ, ਸੋਚਨ੍ਤਸ੍ਸ ਨਟ੍ਠਂ ਪੁਨਾਗਚ੍ਛਤੀ’’ਤਿ. ‘‘ਨੋ ਹੇਤਂ ਭੋ ਗੋਤਮਾ’’ਤਿ. ‘‘ਏਵਂ ਸਨ੍ਤੇ ਕਸ੍ਮਾ ਸੋਚਸਿ, ਇਮੇਸਂ ਸਤ੍ਤਾਨਂ ਧਨਧਞ੍ਞਂ ਨਾਮ ਉਪ੍ਪਜ੍ਜਨਕਾਲੇ ਉਪ੍ਪਜ੍ਜਤਿ, ਨਸ੍ਸਨਕਾਲੇ ਨਸ੍ਸਤਿ, ਕਿਞ੍ਚਿ ਸਙ੍ਖਾਰਗਤਂ ਅਨਸ੍ਸਨਧਮ੍ਮਂ ਨਾਮ ਨਤ੍ਥਿ, ਮਾ ਚਿਨ੍ਤਯੀ’’ਤਿ. ਇਤਿ ਨਂ ਸਤ੍ਥਾ ਸਮਸ੍ਸਾਸੇਤ੍ਵਾ ਤਸ੍ਸ ਸਪ੍ਪਾਯਧਮ੍ਮਂ ਦੇਸੇਨ੍ਤੋ ਕਾਮਸੁਤ੍ਤਂ (ਸੁ. ਨਿ. ੭੭੨ ਆਦਯੋ) ਕਥੇਸਿ. ਸੁਤ੍ਤਪਰਿਯੋਸਾਨੇ ਸੋਚਨ੍ਤੋ ਬ੍ਰਾਹ੍ਮਣੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਤ੍ਥਾ ਤਂ ਨਿਸ੍ਸੋਕਂ ਕਤ੍ਵਾ ਉਟ੍ਠਾਯਾਸਨਾ ਵਿਹਾਰਂ ਅਗਮਾਸਿ. ‘‘ਸਤ੍ਥਾ ਅਸੁਕਂ ਨਾਮ ਬ੍ਰਾਹ੍ਮਣਂ ਸੋਕਸਲ੍ਲਸਮਪ੍ਪਿਤਂ ਨਿਸ੍ਸੋਕਂ ਕਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸੀ’’ਤਿ ਸਕਲਨਗਰਂ ਅਞ੍ਞਾਸਿ. ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਦਸਬਲੋ ਬ੍ਰਾਹ੍ਮਣੇਨ ਸਦ੍ਧਿਂ ਮਿਤ੍ਤਂ ਕਤ੍ਵਾ ਵਿਸ੍ਸਾਸਿਕੋ ਹੁਤ੍ਵਾ ਉਪਾਯੇਨੇਵ ਤਸ੍ਸ ਸੋਕਸਲ੍ਲਸਮਪ੍ਪਿਤਸ੍ਸ ਧਮ੍ਮਂ ਦੇਸੇਤ੍ਵਾ ਤਂ ਨਿਸ੍ਸੋਕਂ ਕਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਾਹਂ ਏਤਂ ਨਿਸ੍ਸੋਕਮਕਾਸਿ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤਸ੍ਸ ਰਞ੍ਞੋ ਦ੍ਵੇ ਪੁਤ੍ਤਾ ਅਹੇਸੁਂ. ਸੋ ਜੇਟ੍ਠਕਸ੍ਸ ਉਪਰਜ੍ਜਂ ਅਦਾਸਿ, ਕਨਿਟ੍ਠਸ੍ਸ ਸੇਨਾਪਤਿਟ੍ਠਾਨਂ. ਅਪਰਭਾਗੇ ਬ੍ਰਹ੍ਮਦਤ੍ਤੇ ਕਾਲਕਤੇ ਅਮਚ੍ਚਾ ਜੇਟ੍ਠਕਸ੍ਸ ਅਭਿਸੇਕਂ ਪਟ੍ਠਪੇਸੁਂ. ਸੋ ‘‘ਨ ਮਯ੍ਹਂ ਰਜ੍ਜੇਨਤ੍ਥੋ, ਕਨਿਟ੍ਠਸ੍ਸ ਮੇ ਦੇਥਾ’’ਤਿ ਵਤ੍ਵਾ ਪੁਨਪ੍ਪੁਨਂ ਯਾਚਿਯਮਾਨੋਪਿ ਪਟਿਕ੍ਖਿਪਿਤ੍ਵਾ ਕਨਿਟ੍ਠਸ੍ਸ ਅਭਿਸੇਕੇ ਕਤੇ ‘‘ਨ ਮੇ ਇਸ੍ਸਰਿਯੇਨਤ੍ਥੋ’’ਤਿ ਉਪਰਜ੍ਜਾਦੀਨਿਪਿ ਨ ਇਚ੍ਛਿ. ‘‘ਤੇਨ ਹਿ ਸਾਦੂਨਿ ਭੋਜਨਾਨਿ ਭੁਞ੍ਜਨ੍ਤੋ ਇਧੇਵ ਵਸਾਹੀ’’ਤਿ ਵੁਤ੍ਤੇਪਿ ‘‘ਨ ਮੇ ਇਮਸ੍ਮਿਂ ਨਗਰੇ ਕਿਚ੍ਚਂ ਅਤ੍ਥੀ’’ਤਿ ਬਾਰਾਣਸਿਤੋ ਨਿਕ੍ਖਮਿਤ੍ਵਾ ਪਚ੍ਚਨ੍ਤਂ ਗਨ੍ਤ੍ਵਾ ਏਕਂ ਸੇਟ੍ਠਿਕੁਲਂ ਨਿਸ੍ਸਾਯ ਸਹਤ੍ਥੇਨ ਕਮ੍ਮਂ ਕਰੋਨ੍ਤੋ ਵਸਿ. ਤੇ ਅਪਰਭਾਗੇ ਤਸ੍ਸ ਰਾਜਕੁਮਾਰਭਾਵਂ ਞਤ੍ਵਾ ਕਮ੍ਮਂ ਕਾਤੁਂ ਨਾਦਂਸੁ, ਕੁਮਾਰਪਰਿਹਾਰੇਨੇਵ ਤਂ ਪਰਿਹਰਿਂਸੁ. ਅਪਰਭਾਗੇ ਰਾਜਕਮ੍ਮਿਕਾ ਖੇਤ੍ਤਪ੍ਪਮਾਣਗ੍ਗਹਣਤ੍ਥਾਯ ਤਂ ਗਾਮਂ ਅਗਮਂਸੁ. ਸੇਟ੍ਠਿ ਰਾਜਕੁਮਾਰਂ ਉਪਸਙ੍ਕਮਿਤ੍ਵਾ ‘‘ਸਾਮਿ, ਮਯਂ ਤੁਮ੍ਹੇ ਪੋਸੇਮ, ਕਨਿਟ੍ਠਭਾਤਿਕਸ੍ਸ ਪਣ੍ਣਂ ਪੇਸੇਤ੍ਵਾ ਅਮ੍ਹਾਕਂ ਬਲਿਂ ਹਾਰੇਥਾ’’ਤਿ ਆਹ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਅਹਂ ਅਸੁਕਸੇਟ੍ਠਿਕੁਲਂ ਨਾਮ ਉਪਨਿਸ੍ਸਾਯ ਵਸਾਮਿ, ਮਂ ਨਿਸ੍ਸਾਯ ਏਤੇਸਂ ਬਲਿਂ ਵਿਸ੍ਸਜ੍ਜੇਹੀ’’ਤਿ ਪਣ੍ਣਂ ਪੇਸੇਸਿ. ਰਾਜਾ ‘‘ਸਾਧੂ’’ਤਿ ਵਤ੍ਵਾ ਤਥਾ ਕਾਰੇਸਿ.

ਅਥ ਨਂ ਸਕਲਗਾਮਵਾਸਿਨੋਪਿ ਜਨਪਦਵਾਸਿਨੋਪਿ ਉਪਸਙ੍ਕਮਿਤ੍ਵਾ ‘‘ਮਯਂ ਤੁਮ੍ਹਾਕਞ੍ਞੇਵ ਬਲਿਂ ਦਸ੍ਸਾਮ, ਅਮ੍ਹਾਕਮ੍ਪਿ ਸੁਙ੍ਕਂ ਵਿਸ੍ਸਜ੍ਜਾਪੇਹੀ’’ਤਿ ਆਹਂਸੁ. ਸੋ ਤੇਸਮ੍ਪਿ ਅਤ੍ਥਾਯ ਪਣ੍ਣਂ ਪੇਸੇਤ੍ਵਾ ਵਿਸ੍ਸਜ੍ਜਾਪੇਸਿ. ਤਤੋ ਪਟ੍ਠਾਯ ਤੇ ਤਸ੍ਸੇਵ ਬਲਿਂ ਅਦਂਸੁ. ਅਥਸ੍ਸ ਮਹਾਲਾਭਸਕ੍ਕਾਰੋ ਅਹੋਸਿ, ਤੇਨ ਸਦ੍ਧਿਞ੍ਞੇਵਸ੍ਸ ਤਣ੍ਹਾਪਿ ਮਹਤੀ ਜਾਤਾ. ਸੋ ਅਪਰਭਾਗੇਪਿ ਸਬ੍ਬਂ ਜਨਪਦਂ ਯਾਚਿ, ਉਪਡ੍ਢਰਜ੍ਜਂ ਯਾਚਿ, ਕਨਿਟ੍ਠੋਪਿ ਤਸ੍ਸ ਅਦਾਸਿਯੇਵ. ਸੋ ਤਣ੍ਹਾਯ ਵਡ੍ਢਮਾਨਾਯ ਉਪਡ੍ਢਰਜ੍ਜੇਨਪਿ ਅਸਨ੍ਤੁਟ੍ਠੋ ‘‘ਰਜ੍ਜਂ ਗਣ੍ਹਿਸ੍ਸਾਮੀ’’ਤਿ ਜਨਪਦਪਰਿਵੁਤੋ ਤਂ ਨਗਰਂ ਗਨ੍ਤ੍ਵਾ ਬਹਿਨਗਰੇ ਠਤ੍ਵਾ ‘‘ਰਜ੍ਜਂ ਵਾ ਮੇ ਦੇਤੁ ਯੁਦ੍ਧਂ ਵਾ’’ਤਿ ਕਨਿਟ੍ਠਸ੍ਸ ਪਣ੍ਣਂ ਪਹਿਣਿ. ਕਨਿਟ੍ਠੋ ਚਿਨ੍ਤੇਸਿ ‘‘ਅਯਂ ਬਾਲੋ ਪੁਬ੍ਬੇ ਰਜ੍ਜਮ੍ਪਿ ਉਪਰਜ੍ਜਾਦੀਨਿਪਿ ਪਟਿਕ੍ਖਿਪਿਤ੍ਵਾ ਇਦਾਨਿ ‘ਯੁਦ੍ਧੇਨ ਗਣ੍ਹਾਮੀ’ਤਿ ਵਦਤਿ, ਸਚੇ ਖੋ ਪਨਾਹਂ ਇਮਂ ਯੁਦ੍ਧੇਨ ਮਾਰੇਸ੍ਸਾਮਿ, ਗਰਹਾ ਮੇ ਭਵਿਸ੍ਸਤਿ, ਕਿਂ ਮੇ ਰਜ੍ਜੇਨਾ’’ਤਿ. ਅਥਸ੍ਸ ‘‘ਅਲਂ ਯੁਦ੍ਧੇਨ, ਰਜ੍ਜਂ ਗਣ੍ਹਤੂ’’ਤਿ ਪੇਸੇਸਿ. ਸੋ ਰਜ੍ਜਂ ਗਣ੍ਹਿਤ੍ਵਾ ਕਨਿਟ੍ਠਸ੍ਸ ਉਪਰਜ੍ਜਂ ਦਤ੍ਵਾ ਤਤੋ ਪਟ੍ਠਾਯ ਰਜ੍ਜਂ ਕਾਰੇਨ੍ਤੋ ਤਣ੍ਹਾਵਸਿਕੋ ਹੁਤ੍ਵਾ ਏਕੇਨ ਰਜ੍ਜੇਨ ਅਸਨ੍ਤੁਟ੍ਠੋ ਦ੍ਵੇ ਤੀਣਿ ਰਜ੍ਜਾਨਿ ਪਤ੍ਥੇਤ੍ਵਾ ਤਣ੍ਹਾਯ ਕੋਟਿਂ ਨਾਦ੍ਦਸ.

ਤਦਾ ਸਕ੍ਕੋ ਦੇਵਰਾਜਾ ‘‘ਕੇ ਨੁ ਖੋ ਲੋਕੇ ਮਾਤਾਪਿਤਰੋ ਉਪਟ੍ਠਹਨ੍ਤਿ, ਕੇ ਦਾਨਾਦੀਨਿ ਪੁਞ੍ਞਾਨਿ ਕਰੋਨ੍ਤਿ, ਕੇ ਤਣ੍ਹਾਵਸਿਕਾ’’ਤਿ ਓਲੋਕੇਨ੍ਤੋ ਤਸ੍ਸ ਤਣ੍ਹਾਵਸਿਕਭਾਵਂ ਞਤ੍ਵਾ ‘‘ਅਯਂ ਬਾਲੋ ਬਾਰਾਣਸਿਰਜ੍ਜੇਨਪਿ ਨ ਤੁਸ੍ਸਤਿ, ਅਹਂ ਸਿਕ੍ਖਾਪੇਸ੍ਸਾਮਿ ਨ’’ਨ੍ਤਿ ਮਾਣਵਕਵੇਸੇਨ ਰਾਜਦ੍ਵਾਰੇ ਠਤ੍ਵਾ ‘‘ਏਕੋ ਉਪਾਯਕੁਸਲੋ ਮਾਣਵੋ ਦ੍ਵਾਰੇ ਠਿਤੋ’’ਤਿ ਆਰੋਚਾਪੇਤ੍ਵਾ ‘‘ਪਵਿਸਤੂ’’ਤਿ ਵੁਤ੍ਤੇ ਪਵਿਸਿਤ੍ਵਾ ਰਾਜਾਨਂ ਜਯਾਪੇਤ੍ਵਾ ‘‘ਕਿਂਕਾਰਣਾ ਆਗਤੋਸੀ’’ਤਿ ਵੁਤ੍ਤੇ ‘‘ਮਹਾਰਾਜ ਤੁਮ੍ਹਾਕਂ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥਿ, ਰਹੋ ਪਚ੍ਚਾਸੀਸਾਮੀ’’ਤਿ ਆਹ. ਸਕ੍ਕਾਨੁਭਾਵੇਨ ਤਾਵਦੇਵ ਮਨੁਸ੍ਸਾ ਪਟਿਕ੍ਕਮਿਂਸੁ. ਅਥ ਨਂ ਮਾਣਵੋ ‘‘ਅਹਂ, ਮਹਾਰਾਜ, ਫੀਤਾਨਿ ਆਕਿਣ੍ਣਮਨੁਸ੍ਸਾਨਿ ਸਮ੍ਪਨ੍ਨਬਲਵਾਹਨਾਨਿ ਤੀਣਿ ਨਗਰਾਨਿ ਪਸ੍ਸਾਮਿ, ਅਹਂ ਤੇ ਅਤ੍ਤਨੋ ਆਨੁਭਾਵੇਨ ਤੇਸੁ ਰਜ੍ਜਂ ਗਹੇਤ੍ਵਾ ਦਸ੍ਸਾਮਿ, ਪਪਞ੍ਚਂ ਅਕਤ੍ਵਾ ਸੀਘਂ ਗਨ੍ਤੁਂ ਵਟ੍ਟਤੀ’’ਤਿ ਆਹ. ਸੋ ਤਣ੍ਹਾਵਸਿਕੋ ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਸਕ੍ਕਾਨੁਭਾਵੇਨ ‘‘ਕੋ ਵਾ ਤ੍ਵਂ, ਕੁਤੋ ਵਾ ਆਗਤੋ, ਕਿਂ ਵਾ ਤੇ ਲਦ੍ਧੁਂ ਵਟ੍ਟਤੀ’’ਤਿ ਨ ਪੁਚ੍ਛਿ. ਸੋਪਿ ਏਤ੍ਤਕਂ ਵਤ੍ਵਾ ਤਾਵਤਿਂਸਭਵਨਮੇਵ ਅਗਮਾਸਿ.

ਰਾਜਾ ਅਮਚ੍ਚੇ ਪਕ੍ਕੋਸਾਪੇਤ੍ਵਾ ‘‘ਏਕੋ ਮਾਣਵੋ ‘ਅਮ੍ਹਾਕਂ ਤੀਣਿ ਰਜ੍ਜਾਨਿ ਗਹੇਤ੍ਵਾ ਦਸ੍ਸਾਮੀ’ਤਿ ਆਹ, ਤਂ ਪਕ੍ਕੋਸਥ, ਨਗਰੇ ਭੇਰਿਂ ਚਰਾਪੇਤ੍ਵਾ ਬਲਕਾਯਂ ਸਨ੍ਨਿਪਾਤਾਪੇਥ, ਪਪਞ੍ਚਂ ਅਕਤ੍ਵਾ ਤੀਣਿ ਰਜ੍ਜਾਨਿ ਗਣ੍ਹਿਸ੍ਸਾਮੀ’’ਤਿ ਵਤ੍ਵਾ ‘‘ਕਿਂ ਪਨ ਤੇ, ਮਹਾਰਾਜ, ਤਸ੍ਸ ਮਾਣਵਸ੍ਸ ਸਕ੍ਕਾਰੋ ਵਾ ਕਤੋ, ਨਿਵਾਸਟ੍ਠਾਨਂ ਵਾ ਪੁਚ੍ਛਿਤ’’ਨ੍ਤਿ ਵੁਤ੍ਤੇ ‘‘ਨੇਵ ਸਕ੍ਕਾਰਂ ਅਕਾਸਿਂ, ਨ ਨਿਵਾਸਟ੍ਠਾਨਂ ਪੁਚ੍ਛਿਂ, ਗਚ੍ਛਥ ਨਂ ਉਪਧਾਰੇਥਾ’’ਤਿ ਆਹ. ਉਪਧਾਰੇਨ੍ਤਾ ਨਂ ਅਦਿਸ੍ਵਾ ‘‘ਮਹਾਰਾਜ, ਸਕਲਨਗਰੇ ਮਾਣਵਂ ਨ ਪਸ੍ਸਾਮਾ’’ਤਿ ਆਰੋਚੇਸੁਂ. ਤਂ ਸੁਤ੍ਵਾ ਰਾਜਾ ਦੋਮਨਸ੍ਸਜਾਤੋ ‘‘ਤੀਸੁ ਨਗਰੇਸੁ ਰਜ੍ਜਂ ਨਟ੍ਠਂ, ਮਹਨ੍ਤੇਨਮ੍ਹਿ ਯਸੇਨ ਪਰਿਹੀਨੋ, ‘ਨੇਵ ਮੇ ਪਰਿਬ੍ਬਯਂ ਅਦਾਸਿ, ਨ ਚ ਪੁਚ੍ਛਿ ਨਿਵਾਸਟ੍ਠਾਨ’ਨ੍ਤਿ ਮਯ੍ਹਂ ਕੁਜ੍ਝਿਤ੍ਵਾ ਮਾਣਵੋ ਅਨਾਗਤੋ ਭਵਿਸ੍ਸਤੀ’’ਤਿ ਪੁਨਪ੍ਪੁਨਂ ਚਿਨ੍ਤੇਸਿ. ਅਥਸ੍ਸ ਤਣ੍ਹਾਵਸਿਕਸ੍ਸ ਸਰੀਰੇ ਡਾਹੋ ਉਪ੍ਪਜ੍ਜਿ, ਸਰੀਰੇ ਪਰਿਡਯ੍ਹਨ੍ਤੇ ਉਦਰਂ ਖੋਭੇਤ੍ਵਾ ਲੋਹਿਤਪਕ੍ਖਨ੍ਦਿਕਾ ਉਦਪਾਦਿ. ਏਕਂ ਭਾਜਨਂ ਪਵਿਸਤਿ, ਏਕਂ ਨਿਕ੍ਖਮਤਿ, ਵੇਜ੍ਜਾ ਤਿਕਿਚ੍ਛਿਤੁਂ ਨ ਸਕ੍ਕੋਨ੍ਤਿ, ਰਾਜਾ ਕਿਲਮਤਿ. ਅਥਸ੍ਸ ਬ੍ਯਾਧਿਤਭਾਵੋ ਸਕਲਨਗਰੇ ਪਾਕਟੋ ਅਹੋਸਿ.

ਤਦਾ ਬੋਧਿਸਤ੍ਤੋ ਤਕ੍ਕਸਿਲਤੋ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਬਾਰਾਣਸਿਨਗਰੇ ਮਾਤਾਪਿਤੂਨਂ ਸਨ੍ਤਿਕਂ ਆਗਤੋ ਤਂ ਰਞ੍ਞੋ ਪਵਤ੍ਤਿਂ ਸੁਤ੍ਵਾ ‘‘ਅਹਂ ਤਿਕਿਚ੍ਛਿਸ੍ਸਾਮੀ’’ਤਿ ਰਾਜਦ੍ਵਾਰਂ ਗਨ੍ਤ੍ਵਾ ‘‘ਏਕੋ ਕਿਰ ਤਰੁਣਮਾਣਵੋ ਤੁਮ੍ਹੇ ਤਿਕਿਚ੍ਛਿਤੁਂ ਆਗਤੋ’’ਤਿ ਆਰੋਚਾਪੇਸਿ. ਰਾਜਾ ‘‘ਮਹਨ੍ਤਮਹਨ੍ਤਾ ਦਿਸਾਪਾਮੋਕ੍ਖਵੇਜ੍ਜਾਪਿ ਮਂ ਤਿਕਿਚ੍ਛਿਤੁਂ ਨ ਸਕ੍ਕੋਨ੍ਤਿ, ਕਿਂ ਤਰੁਣਮਾਣਵੋ ਸਕ੍ਖਿਸ੍ਸਤਿ, ਪਰਿਬ੍ਬਯਂ ਦਤ੍ਵਾ ਵਿਸ੍ਸਜ੍ਜੇਥ ਨ’’ਨ੍ਤਿ ਆਹ. ਤਂ ਸੁਤ੍ਵਾ ਮਾਣਵੋ ‘‘ਮਯ੍ਹਂ ਵੇਜ੍ਜਕਮ੍ਮੇਨ ਵੇਤਨਂ ਨਤ੍ਥਿ, ਅਹਂ ਤਿਕਿਚ੍ਛਾਮਿ, ਕੇਵਲਂ ਭੇਸਜ੍ਜਮੂਲਮਤ੍ਤਂ ਦੇਤੂ’’ਤਿ ਆਹ. ਤਂ ਸੁਤ੍ਵਾ ਰਾਜਾ ‘‘ਸਾਧੂ’’ਤਿ ਪਕ੍ਕੋਸਾਪੇਸਿ. ਮਾਣਵੋ ਰਾਜਾਨਂ ਵਨ੍ਦਿਤ੍ਵਾ ‘‘ਮਾ ਭਾਯਿ, ਮਹਾਰਾਜ, ਅਹਂ ਤੇ ਤਿਕਿਚ੍ਛਾਮਿ, ਅਪਿਚ ਖੋ ਪਨ ਮੇ ਰੋਗਸ੍ਸ ਸਮੁਟ੍ਠਾਨਂ ਆਚਿਕ੍ਖਾਹੀ’’ਤਿ ਆਹ. ਰਾਜਾ ਹਰਾਯਮਾਨੋ ‘‘ਕਿਂ ਤੇ ਸਮੁਟ੍ਠਾਨੇਨ, ਭੇਸਜ੍ਜਂ ਏਵ ਕਰੋਹੀ’’ਤਿ ਆਹ. ਮਹਾਰਾਜ, ਵੇਜ੍ਜਾ ਨਾਮ ‘‘ਅਯਂ ਬ੍ਯਾਧਿ ਇਮਂ ਨਿਸ੍ਸਾਯ ਸਮੁਟ੍ਠਿਤੋ’’ਤਿ ਞਤ੍ਵਾ ਅਨੁਚ੍ਛਵਿਕਂ ਭੇਸਜ੍ਜਂ ਕਰੋਨ੍ਤੀਤਿ. ਰਾਜਾ ‘‘ਸਾਧੁ ਤਾਤਾ’’ਤਿ ਸਮੁਟ੍ਠਾਨਂ ਕਥੇਨ੍ਤੋ ‘‘ਏਕੇਨ ਮਾਣਵੇਨ ਆਗਨ੍ਤ੍ਵਾ ਤੀਸੁ ਨਗਰੇਸੁ ਰਜ੍ਜਂ ਗਹੇਤ੍ਵਾ ਦਸ੍ਸਾਮੀ’’ਤਿਆਦਿਂ ਕਤ੍ਵਾ ਸਬ੍ਬਂ ਕਥੇਤ੍ਵਾ ‘‘ਇਤਿ ਮੇ ਤਾਤ, ਤਣ੍ਹਂ ਨਿਸ੍ਸਾਯ ਬ੍ਯਾਧਿ ਉਪ੍ਪਨ੍ਨੋ, ਸਚੇ ਤਿਕਿਚ੍ਛਿਤੁਂ ਸਕ੍ਕੋਸਿ, ਤਿਕਿਚ੍ਛਾਹੀ’’ਤਿ ਆਹ. ਕਿਂ ਪਨ ਮਹਾਰਾਜ, ਸੋਚਨਾਯ ਤਾਨਿ ਨਗਰਾਨਿ ਸਕ੍ਕਾ ਲਦ੍ਧੁਨ੍ਤਿ? ‘‘ਨ ਸਕ੍ਕਾ ਤਾਤਾ’’ਤਿ. ‘‘ਏਵਂ ਸਨ੍ਤੇ ਕਸ੍ਮਾ ਸੋਚਸਿ, ਮਹਾਰਾਜ, ਸਬ੍ਬਮੇਵ ਹਿ ਸਵਿਞ੍ਞਾਣਕਾਵਿਞ੍ਞਾਣਕਵਤ੍ਥੁਂ ਅਤ੍ਤਨੋ ਕਾਯਂ ਆਦਿਂ ਕਤ੍ਵਾ ਪਹਾਯ ਗਮਨੀਯਂ, ਚਤੂਸੁ ਨਗਰੇਸੁ ਰਜ੍ਜਂ ਗਹੇਤ੍ਵਾਪਿ ਤ੍ਵਂ ਏਕਪ੍ਪਹਾਰੇਨੇਵ ਨ ਚਤਸ੍ਸੋ ਭਤ੍ਤਪਾਤਿਯੋ ਭੁਞ੍ਜਿਸ੍ਸਸਿ, ਨ ਚਤੂਸੁ ਸਯਨੇਸੁ ਸਯਿਸ੍ਸਸਿ, ਨ ਚਤ੍ਤਾਰਿ ਵਤ੍ਥਯੁਗਾਨਿ ਅਚ੍ਛਾਦੇਸ੍ਸਸਿ, ਤਣ੍ਹਾਵਸਿਕੇਨ ਨਾਮ ਭਵਿਤੁਂ ਨ ਵਟ੍ਟਤਿ, ਅਯਞ੍ਹਿ ਤਣ੍ਹਾ ਨਾਮ ਵਡ੍ਢਮਾਨਾ ਚਤੂਹਿ ਅਪਾਯੇਹਿ ਮੁਚ੍ਚਿਤੁਂ ਨ ਦੇਤੀਤਿ.

ਇਤਿ ਨਂ ਮਹਾਸਤ੍ਤੋ ਓਵਦਿਤ੍ਵਾ ਅਥਸ੍ਸ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੩੭.

‘‘ਕਾਮਂ ਕਾਮਯਮਾਨਸ੍ਸ, ਤਸ੍ਸ ਚੇ ਤਂ ਸਮਿਜ੍ਝਤਿ;

ਅਦ੍ਧਾ ਪੀਤਿਮਨੋ ਹੋਤਿ, ਲਦ੍ਧਾ ਮਚ੍ਚੋ ਯਦਿਚ੍ਛਤਿ.

੩੮.

‘‘ਕਾਮਂ ਕਾਮਯਮਾਨਸ੍ਸ, ਤਸ੍ਸ ਚੇ ਤਂ ਸਮਿਜ੍ਝਤਿ;

ਤਤੋ ਨਂ ਅਪਰਂ ਕਾਮੇ, ਘਮ੍ਮੇ ਤਣ੍ਹਂਵ ਵਿਨ੍ਦਤਿ.

੩੯.

‘‘ਗਵਂਵ ਸਿਙ੍ਗਿਨੋ ਸਿਙ੍ਗਂ, ਵਡ੍ਢਮਾਨਸ੍ਸ ਵਡ੍ਢਤਿ;

ਏਵਂ ਮਨ੍ਦਸ੍ਸ ਪੋਸਸ੍ਸ, ਬਾਲਸ੍ਸ ਅਵਿਜਾਨਤੋ;

ਭਿਯ੍ਯੋ ਤਣ੍ਹਾ ਪਿਪਾਸਾ ਚ, ਵਡ੍ਢਮਾਨਸ੍ਸ ਵਡ੍ਢਤਿ.

੪੦.

‘‘ਪਥਬ੍ਯਾ ਸਾਲਿਯਵਕਂ, ਗਵਾਸ੍ਸਂ ਦਾਸਪੋਰਿਸਂ;

ਦਤ੍ਵਾ ਚ ਨਾਲਮੇਕਸ੍ਸ, ਇਤਿ ਵਿਦ੍ਵਾ ਸਮਂ ਚਰੇ.

੪੧.

‘‘ਰਾਜਾ ਪਸਯ੍ਹ ਪਥਵਿਂ ਵਿਜਿਤ੍ਵਾ, ਸਸਾਗਰਨ੍ਤਂ ਮਹਿਮਾਵਸਨ੍ਤੋ;

ਓਰਂ ਸਮੁਦ੍ਦਸ੍ਸ ਅਤਿਤ੍ਤਰੂਪੋ, ਪਾਰਂ ਸਮੁਦ੍ਦਸ੍ਸਪਿ ਪਤ੍ਥਯੇਥ.

੪੨.

‘‘ਯਾਵ ਅਨੁਸ੍ਸਰਂ ਕਾਮੇ, ਮਨਸਾ ਤਿਤ੍ਤਿ ਨਾਜ੍ਝਗਾ;

ਤਤੋ ਨਿਵਤ੍ਤਾ ਪਟਿਕ੍ਕਮ੍ਮ ਦਿਸ੍ਵਾ, ਤੇ ਵੇ ਸੁਤਿਤ੍ਤਾ ਯੇ ਪਞ੍ਞਾਯ ਤਿਤ੍ਤਾ.

੪੩.

‘‘ਪਞ੍ਞਾਯ ਤਿਤ੍ਤਿਨਂ ਸੇਟ੍ਠਂ, ਨ ਸੋ ਕਾਮੇਹਿ ਤਪ੍ਪਤਿ;

ਪਞ੍ਞਾਯ ਤਿਤ੍ਤਂ ਪੁਰਿਸਂ, ਤਣ੍ਹਾ ਨ ਕੁਰੁਤੇ ਵਸਂ.

੪੪.

‘‘ਅਪਚਿਨੇਥੇਵ ਕਾਮਾਨਂ, ਅਪ੍ਪਿਚ੍ਛਸ੍ਸ ਅਲੋਲੁਪੋ;

ਸਮੁਦ੍ਦਮਤ੍ਤੋ ਪੁਰਿਸੋ, ਨ ਸੋ ਕਾਮੇਹਿ ਤਪ੍ਪਤਿ.

੪੫.

‘‘ਰਥਕਾਰੋਵ ਚਮ੍ਮਸ੍ਸ, ਪਰਿਕਨ੍ਤਂ ਉਪਾਹਨਂ;

ਯਂ ਯਂ ਚਜਤਿ ਕਾਮਾਨਂ, ਤਂ ਤਂ ਸਮ੍ਪਜ੍ਜਤੇ ਸੁਖਂ;

ਸਬ੍ਬਞ੍ਚੇ ਸੁਖਮਿਚ੍ਛੇਯ੍ਯ, ਸਬ੍ਬੇ ਕਾਮੇ ਪਰਿਚ੍ਚਜੇ’’ਤਿ.

ਤਤ੍ਥ ਕਾਮਨ੍ਤਿ ਵਤ੍ਥੁਕਾਮਮ੍ਪਿ ਕਿਲੇਸਕਾਮਮ੍ਪਿ. ਕਾਮਯਮਾਨਸ੍ਸਾਤਿ ਪਤ੍ਥਯਮਾਨਸ੍ਸ. ਤਸ੍ਸ ਚੇ ਤਂ ਸਮਿਜ੍ਝਤੀਤਿ ਤਸ੍ਸ ਪੁਗ੍ਗਲਸ੍ਸ ਤਂ ਕਾਮਿਤਵਤ੍ਥੁ ਸਮਿਜ੍ਝਤਿ ਚੇ, ਨਿਪ੍ਫਜ੍ਜਤਿ ਚੇਤਿ ਅਤ੍ਥੋ. ਤਤੋ ਨਂ ਅਪਰਂ ਕਾਮੇਤਿ ਏਤ੍ਥ ਨਨ੍ਤਿ ਨਿਪਾਤਮਤ੍ਤਂ. ਅਪਰਨ੍ਤਿ ਪਰਭਾਗਦੀਪਨਂ. ਕਾਮੇਤਿ ਉਪਯੋਗਬਹੁਵਚਨਂ. ਇਦਂ ਵੁਤ੍ਤਂ ਹੋਤਿ – ਸਚੇ ਕਾਮਂ ਕਾਮਯਮਾਨਸ੍ਸ ਤਂ ਕਾਮਿਤਵਤ੍ਥੁ ਸਮਿਜ੍ਝਤਿ, ਤਸ੍ਮਿਂ ਸਮਿਦ੍ਧੇ ਤਤੋ ਪਰਂ ਸੋ ਪੁਗ੍ਗਲੋ ਕਾਮਯਮਾਨੋ ਯਥਾ ਨਾਮ ਘਮ੍ਮੇ ਗਿਮ੍ਹਕਾਲੇ ਵਾਤਾਤਪੇਨ ਕਿਲਨ੍ਤੋ ਤਣ੍ਹਂ ਵਿਨ੍ਦਤਿ, ਪਾਨੀਯਪਿਪਾਸਂ ਪਟਿਲਭਤਿ, ਏਵਂ ਭਿਯ੍ਯੋ ਕਾਮਤਣ੍ਹਾਸਙ੍ਖਾਤੇ ਕਾਮੇ ਵਿਨ੍ਦਤਿ ਪਟਿਲਭਤਿ, ਰੂਪਤਣ੍ਹਾਦਿਕਾ ਤਣ੍ਹਾ ਚਸ੍ਸ ਵਡ੍ਢਤਿਯੇਵਾਤਿ. ਗਵਂਵਾਤਿ ਗੋਰੂਪਸ੍ਸ ਵਿਯ. ਸਿਙ੍ਗਿਨੋਤਿ ਮਤ੍ਥਕਂ ਪਦਾਲੇਤ੍ਵਾ ਉਟ੍ਠਿਤਸਿਙ੍ਗਸ੍ਸ. ਮਨ੍ਦਸ੍ਸਾਤਿ ਮਨ੍ਦਪਞ੍ਞਸ੍ਸ. ਬਾਲਸ੍ਸਾਤਿ ਬਾਲਧਮ੍ਮੇ ਯੁਤ੍ਤਸ੍ਸ. ਇਦਂ ਵੁਤ੍ਤਂ ਹੋਤਿ – ਯਥਾ ਵਚ੍ਛਕਸ੍ਸ ਵਡ੍ਢਨ੍ਤਸ੍ਸ ਸਰੀਰੇਨੇਵ ਸਦ੍ਧਿਂ ਸਿਙ੍ਗਂ ਵਡ੍ਢਤਿ, ਏਵਂ ਅਨ੍ਧਬਾਲਸ੍ਸਪਿ ਅਪ੍ਪਤ੍ਤਕਾਮਤਣ੍ਹਾ ਚ ਪਤ੍ਤਕਾਮਪਿਪਾਸਾ ਚ ਅਪਰਾਪਰਂ ਵਡ੍ਢਤੀਤਿ.

ਸਾਲਿਯਵਕਨ੍ਤਿ ਸਾਲਿਖੇਤ੍ਤਯਵਖੇਤ੍ਤਂ. ਏਤੇਨ ਸਾਲਿਯਵਾਦਿਕਂ ਸਬ੍ਬਂ ਧਞ੍ਞਂ ਦਸ੍ਸੇਤਿ, ਦੁਤਿਯਪਦੇਨ ਸਬ੍ਬਂ ਦ੍ਵਿਪਦਚਤੁਪ੍ਪਦਂ ਦਸ੍ਸੇਤਿ. ਪਠਮਪਦੇਨ ਵਾ ਸਬ੍ਬਂ ਅਵਿਞ੍ਞਾਣਕਂ, ਇਤਰੇਨ ਸਵਿਞ੍ਞਾਣਕਂ. ਦਤ੍ਵਾ ਚਾਤਿ ਦਤ੍ਵਾਪਿ. ਇਦਂ ਵੁਤ੍ਤਂ ਹੋਤਿ – ਤਿਟ੍ਠਨ੍ਤੁ ਤੀਣਿ ਰਜ੍ਜਾਨਿ, ਸਚੇ ਸੋ ਮਾਣਵੋ ਅਞ੍ਞਂ ਵਾ ਸਕਲਮ੍ਪਿ ਪਥਵਿਂ ਸਵਿਞ੍ਞਾਣਕਾਵਿਞ੍ਞਾਣਕਰਤਨਪੂਰਂ ਕਸ੍ਸਚਿ ਦਤ੍ਵਾ ਗਚ੍ਛੇਯ੍ਯ, ਇਦਮ੍ਪਿ ਏਤ੍ਤਕਂ ਵਤ੍ਥੁ ਏਕਸ੍ਸੇਵ ਅਪਰਿਯਨ੍ਤਂ, ਏਵਂ ਦੁਪ੍ਪੂਰਾ ਏਸਾ ਤਣ੍ਹਾ ਨਾਮ. ਇਤਿ ਵਿਦ੍ਵਾ ਸਮਂ ਚਰੇਤਿ ਏਵਂ ਜਾਨਨ੍ਤੋ ਪੁਰਿਸੋ ਤਣ੍ਹਾਵਸਿਕੋ ਅਹੁਤ੍ਵਾ ਕਾਯਸਮਾਚਾਰਾਦੀਨਿ ਪੂਰੇਨ੍ਤੋ ਚਰੇਯ੍ਯ.

ਓਰਨ੍ਤਿ ਓਰਿਮਕੋਟ੍ਠਾਸਂ ਪਤ੍ਵਾ ਤੇਨ ਅਤਿਤ੍ਤਰੂਪੋ ਪੁਨ ਸਮੁਦ੍ਦਪਾਰਮ੍ਪਿ ਪਤ੍ਥਯੇਥ. ਏਵਂ ਤਣ੍ਹਾਵਸਿਕਸਤ੍ਤਾ ਨਾਮ ਦੁਪ੍ਪੂਰਾਤਿ ਦਸ੍ਸੇਤਿ. ਯਾਵਾਤਿ ਅਨਿਯਾਮਿਤਪਰਿਚ੍ਛੇਦੋ. ਅਨੁਸ੍ਸਰਨ੍ਤਿ ਅਨੁਸ੍ਸਰਨ੍ਤੋ. ਨਾਜ੍ਝਗਾਤਿ ਨ ਵਿਨ੍ਦਤਿ. ਇਦਂ ਵੁਤ੍ਤਂ ਹੋਤਿ – ਮਹਾਰਾਜ, ਪੁਰਿਸੋ ਅਪਰਿਯਨ੍ਤੇਪਿ ਕਾਮੇ ਮਨਸਾ ਅਨੁਸ੍ਸਰਨ੍ਤੋ ਤਿਤ੍ਤਿਂ ਨ ਵਿਨ੍ਦਤਿ, ਪਤ੍ਤੁਕਾਮੋਵ ਹੋਤਿ, ਏਵਂ ਕਾਮੇਸੁ ਸਤ੍ਤਾਨਂ ਤਣ੍ਹਾ ਵਡ੍ਢਤੇਵ. ਤਤੋ ਨਿਵਤ੍ਤਾਤਿ ਤਤੋ ਪਨ ਵਤ੍ਥੁਕਾਮਕਿਲੇਸਕਾਮਤੋ ਚਿਤ੍ਤੇਨ ਨਿਵਤ੍ਤਿਤ੍ਵਾ ਕਾਯੇਨ ਪਟਿਕ੍ਕਮ੍ਮ ਞਾਣੇਨ ਆਦੀਨਵਂ ਦਿਸ੍ਵਾ ਯੇ ਪਞ੍ਞਾਯ ਤਿਤ੍ਤਾ ਪਰਿਪੁਣ੍ਣਾ, ਤੇ ਤਿਤ੍ਤਾ ਨਾਮ.

ਪਞ੍ਞਾਯ ਤਿਤ੍ਤਿਨਂ ਸੇਟ੍ਠਨ੍ਤਿ ਪਞ੍ਞਾਯ ਤਿਤ੍ਤੀਨਂ ਅਯਂ ਪਰਿਪੁਣ੍ਣਸੇਟ੍ਠੋ, ਅਯਮੇਵ ਵਾ ਪਾਠੋ. ਨ ਸੋ ਕਾਮੇਹਿ ਤਪ੍ਪਤੀਤਿ ‘‘ਨ ਹੀ’’ਤਿਪਿ ਪਾਠੋ. ਯਸ੍ਮਾ ਪਞ੍ਞਾਯ ਤਿਤ੍ਤੋ ਪੁਰਿਸੋ ਕਾਮੇਹਿ ਨ ਪਰਿਡਯ੍ਹਤੀਤਿ ਅਤ੍ਥੋ. ਨ ਕੁਰੁਤੇ ਵਸਨ੍ਤਿ ਤਾਦਿਸਞ੍ਹਿ ਪੁਰਿਸਂ ਤਣ੍ਹਾ ਵਸੇ ਵਤ੍ਤੇਤੁਂ ਨ ਸਕ੍ਕੋਤਿ, ਸ੍ਵੇਵ ਪਨ ਤਣ੍ਹਾਯ ਆਦੀਨਵਂ ਦਿਸ੍ਵਾ ਸਰਭਙ੍ਗਮਾਣਵੋ ਵਿਯ ਚ ਅਡ੍ਢਮਾਸਕਰਾਜਾ ਵਿਯ ਚ ਤਣ੍ਹਾਵਸੇ ਨ ਪਵਤ੍ਤਤੀਤਿ ਅਤ੍ਥੋ. ਅਪਚਿਨੇਥੇਵਾਤਿ ਵਿਦ੍ਧਂਸੇਥੇਵ. ਸਮੁਦ੍ਦਮਤ੍ਤੋਤਿ ਮਹਤਿਯਾ ਪਞ੍ਞਾਯ ਸਮਨ੍ਨਾਗਤਤ੍ਤਾ ਸਮੁਦ੍ਦਪ੍ਪਮਾਣੋ. ਸੋ ਮਹਨ੍ਤੇਨ ਅਗ੍ਗਿਨਾਪਿ ਸਮੁਦ੍ਦੋ ਵਿਯ ਕਿਲੇਸਕਾਮੇਹਿ ਨ ਤਪ੍ਪਤਿ ਨ ਡਯ੍ਹਤਿ.

ਰਥਕਾਰੋਤਿ ਚਮ੍ਮਕਾਰੋ. ਪਰਿਕਨ੍ਤਨ੍ਤਿ ਪਰਿਕਨ੍ਤਨ੍ਤੋ. ਇਦਂ ਵੁਤ੍ਤਂ ਹੋਤਿ – ਯਥਾ ਚਮ੍ਮਕਾਰੋ ਉਪਾਹਨਂ ਪਰਿਕਨ੍ਤਨ੍ਤੋ ਯਂ ਯਂ ਚਮ੍ਮਸ੍ਸ ਅਗਯ੍ਹੂਪਗਟ੍ਠਾਨਂ ਹੋਤਿ, ਤਂ ਤਂ ਚਜਿਤ੍ਵਾ ਉਪਾਹਨਂ ਕਤ੍ਵਾ ਉਪਾਹਨਮੂਲਂ ਲਭਿਤ੍ਵਾ ਸੁਖਿਤੋ ਹੋਤਿ, ਏਵਮੇਵ ਪਣ੍ਡਿਤੋ ਚਮ੍ਮਕਾਰਸਤ੍ਥਸਦਿਸਾਯ ਪਞ੍ਞਾਯ ਕਨ੍ਤਨ੍ਤੋ ਯਂ ਯਂ ਓਧਿਂ ਕਾਮਾਨਂ ਚਜਤਿ, ਤੇਨ ਤੇਨਸ੍ਸ ਕਾਮੋਧਿਨਾ ਰਹਿਤਂ ਤਂ ਤਂ ਕਾਯਕਮ੍ਮਂ ਵਚੀਕਮ੍ਮਂ ਮਨੋਕਮ੍ਮਞ੍ਚ ਸੁਖਂ ਸਮ੍ਪਜ੍ਜਤਿ ਵਿਗਤਦਰਥਂ, ਸਚੇ ਪਨ ਸਬ੍ਬਮ੍ਪਿ ਕਾਯਕਮ੍ਮਾਦਿਸੁਖਂ ਵਿਗਤਪਰਿਲ਼ਾਹਮੇਵ ਇਚ੍ਛੇਯ੍ਯ, ਕਸਿਣਂ ਭਾਵੇਤ੍ਵਾ ਝਾਨਂ ਨਿਬ੍ਬਤ੍ਤੇਤ੍ਵਾ ਸਬ੍ਬੇ ਕਾਮੇ ਪਰਿਚ੍ਚਜੇਤਿ.

ਬੋਧਿਸਤ੍ਤਸ੍ਸ ਪਨ ਇਮਂ ਗਾਥਂ ਕਥੇਨ੍ਤਸ੍ਸ ਰਞ੍ਞੋ ਸੇਤਚ੍ਛਤ੍ਤਂ ਆਰਮ੍ਮਣਂ ਕਤ੍ਵਾ ਓਦਾਤਕਸਿਣਜ੍ਝਾਨਂ ਉਦਪਾਦਿ, ਰਾਜਾਪਿ ਅਰੋਗੋ ਅਹੋਸਿ. ਸੋ ਤੁਟ੍ਠੋ ਸਯਨਾ ਵੁਟ੍ਠਹਿਤ੍ਵਾ ‘‘ਏਤ੍ਤਕਾ ਵੇਜ੍ਜਾ ਮਂ ਤਿਕਿਚ੍ਛਿਤੁਂ ਨਾਸਕ੍ਖਿਂਸੁ, ਪਣ੍ਡਿਤਮਾਣਵੋ ਪਨ ਅਤ੍ਤਨੋ ਞਾਣੋਸਧੇਨ ਮਂ ਨਿਰੋਗਂ ਅਕਾਸੀ’’ਤਿ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਦਸਮਂ ਗਾਥਮਾਹ –

੪੬.

‘‘ਅਟ੍ਠ ਤੇ ਭਾਸਿਤਾ ਗਾਥਾ, ਸਬ੍ਬਾ ਹੋਨ੍ਤਿ ਸਹਸ੍ਸਿਯਾ;

ਪਟਿਗਣ੍ਹ ਮਹਾਬ੍ਰਹ੍ਮੇ, ਸਾਧੇਤਂ ਤਵ ਭਾਸਿਤ’’ਨ੍ਤਿ.

ਤਤ੍ਥ ਅਟ੍ਠਾਤਿ ਦੁਤਿਯਗਾਥਂ ਆਦਿਂ ਕਤ੍ਵਾ ਕਾਮਾਦੀਨਵਸਂਯੁਤ੍ਤਾ ਅਟ੍ਠ. ਸਹਸ੍ਸਿਯਾਤਿ ਸਹਸ੍ਸਾਰਹਾ. ਪਟਿਗਣ੍ਹਾਤਿ ਅਟ੍ਠ ਸਹਸ੍ਸਾਨਿ ਗਣ੍ਹ. ਸਾਧੇਤਂ ਤਵ ਭਾਸਿਤਨ੍ਤਿ ਸਾਧੁ ਏਤਂ ਤਵ ਵਚਨਂ.

ਤਂ ਸੁਤ੍ਵਾ ਮਹਾਸਤ੍ਤੋ ਏਕਾਦਸਮਂ ਗਾਥਮਾਹ –

੪੭.

‘‘ਨ ਮੇ ਅਤ੍ਥੋ ਸਹਸ੍ਸੇਹਿ, ਸਤੇਹਿ ਨਹੁਤੇਹਿ ਵਾ;

ਪਚ੍ਛਿਮਂ ਭਾਸਤੋ ਗਾਥਂ, ਕਾਮੇ ਮੇ ਨ ਰਤੋ ਮਨੋ’’ਤਿ.

ਤਤ੍ਥ ਪਚ੍ਛਿਮਨ੍ਤਿ ‘‘ਰਥਕਾਰੋਵ ਚਮ੍ਮਸ੍ਸਾ’’ਤਿ ਗਾਥਂ. ਕਾਮੇ ਮੇ ਨ ਰਤੋ ਮਨੋਤਿ ਇਮਂ ਗਾਥਂ ਭਾਸਮਾਨਸ੍ਸੇਵ ਮਮ ਵਤ੍ਥੁਕਾਮੇਪਿ ਕਿਲੇਸਕਾਮੇਪਿ ਮਨੋ ਨਾਭਿਰਮਾਮਿ. ਅਹਞ੍ਹਿ ਇਮਂ ਗਾਥਂ ਭਾਸਮਾਨੋ ਅਤ੍ਤਨੋਵ ਧਮ੍ਮਦੇਸਨਾਯ ਝਾਨਂ ਨਿਬ੍ਬਤ੍ਤੇਸਿਂ, ਮਹਾਰਾਜਾਤਿ.

ਰਾਜਾ ਭਿਯ੍ਯੋਸੋਮਤ੍ਤਾਯ ਤੁਸ੍ਸਿਤ੍ਵਾ ਮਹਾਸਤ੍ਤਂ ਵਣ੍ਣੇਨ੍ਤੋ ਓਸਾਨਗਾਥਮਾਹ –

੪੮.

‘‘ਭਦ੍ਰਕੋ ਵਤਾਯਂ ਮਾਣਵਕੋ, ਸਬ੍ਬਲੋਕਵਿਦੂ ਮੁਨਿ;

ਯੋ ਇਮਂ ਤਣ੍ਹਂ ਦੁਕ੍ਖਜਨਨਿਂ, ਪਰਿਜਾਨਾਤਿ ਪਣ੍ਡਿਤੋ’’ਤਿ.

ਤਤ੍ਥ ਦੁਕ੍ਖਜਨਨਿਨ੍ਤਿ ਸਕਲਵਟ੍ਟਦੁਕ੍ਖਜਨਨਿਂ. ਪਰਿਜਾਨਾਤੀਤਿ ਪਰਿਜਾਨਿ ਪਰਿਚ੍ਛਿਨ੍ਦਿ, ਲੁਞ੍ਚਿਤ੍ਵਾ ਨੀਹਰੀਤਿ ਬੋਧਿਸਤ੍ਤਂ ਵਣ੍ਣੇਨ੍ਤੋ ਏਵਮਾਹ.

ਬੋਧਿਸਤ੍ਤੋਪਿ ‘‘ਮਹਾਰਾਜ, ਅਪ੍ਪਮਤ੍ਤੋ ਹੁਤ੍ਵਾ ਧਮ੍ਮਂ ਚਰਾ’’ਤਿ ਰਾਜਾਨਂ ਓਵਦਿਤ੍ਵਾ ਆਕਾਸੇਨ ਹਿਮਵਨ੍ਤਂ ਗਨ੍ਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਯਾਵਤਾਯੁਕਂ ਠਤ੍ਵਾ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਅਪਰਿਹੀਨਜ੍ਝਾਨੋ ਹੁਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇਪਾਹਂ ਏਤਂ ਬ੍ਰਾਹ੍ਮਣਂ ਨਿਸ੍ਸੋਕਮਕਾਸਿ’’ਨ੍ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਏਸ ਬ੍ਰਾਹ੍ਮਣੋ ਅਹੋਸਿ, ਪਣ੍ਡਿਤਮਾਣਵੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕਾਮਜਾਤਕਵਣ੍ਣਨਾ ਚਤੁਤ੍ਥਾ.

[੪੬੮] ੫. ਜਨਸਨ੍ਧਜਾਤਕਵਣ੍ਣਨਾ

ਦਸ ਖਲੂਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਸਲਰਞ੍ਞੋ ਓਵਾਦਤ੍ਥਾਯ ਕਥੇਸਿ. ਏਕਸ੍ਮਿਞ੍ਹਿ ਕਾਲੇ ਰਾਜਾ ਇਸ੍ਸਰਿਯਮਦਮਤ੍ਤੋ ਕਿਲੇਸਸੁਖਨਿਸ੍ਸਿਤੋ ਵਿਨਿਚ੍ਛਯਮ੍ਪਿ ਨ ਪਟ੍ਠਪੇਸਿ, ਬੁਦ੍ਧੁਪਟ੍ਠਾਨਮ੍ਪਿ ਪਮਜ੍ਜਿ. ਸੋ ਏਕਦਿਵਸੇ ਦਸਬਲਂ ਅਨੁਸ੍ਸਰਿਤ੍ਵਾ ‘‘ਸਤ੍ਥਾਰਂ ਵਨ੍ਦਿਸ੍ਸਾਮੀ’’ਤਿ ਭੁਤ੍ਤਪਾਤਰਾਸੋ ਰਥਵਰਮਾਰੁਯ੍ਹ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਨਿਸੀਦਿ. ਅਥ ਨਂ ਸਤ੍ਥਾ ‘‘ਕਿਂ ਮਹਾਰਾਜ ਚਿਰਂ ਨ ਪਞ੍ਞਾਯਸੀ’’ਤਿ ਵਤ੍ਵਾ ‘‘ਬਹੁਕਿਚ੍ਚਤਾਯ ਨੋ ਭਨ੍ਤੇ ਬੁਦ੍ਧੁਪਟ੍ਠਾਨਸ੍ਸ ਓਕਾਸੋ ਨ ਜਾਤੋ’’ਤਿ ਵੁਤ੍ਤੇ ‘‘ਮਹਾਰਾਜ, ਮਾਦਿਸੇ ਨਾਮ ਓਵਾਦਦਾਯਕੇ ਸਬ੍ਬਞ੍ਞੁਬੁਦ੍ਧੇ ਧੁਰਵਿਹਾਰੇ ਵਿਹਰਨ੍ਤੇ ਅਯੁਤ੍ਤਂ ਤਵ ਪਮਜ੍ਜਿਤੁਂ, ਰਞ੍ਞਾ ਨਾਮ ਰਾਜਕਿਚ੍ਚੇਸੁ ਅਪ੍ਪਮਤ੍ਤੇਨ ਭਵਿਤਬ੍ਬਂ, ਰਟ੍ਠਵਾਸੀਨਂ ਮਾਤਾਪਿਤੁਸਮੇਨ ਅਗਤਿਗਮਨਂ ਪਹਾਯ ਦਸ ਰਾਜਧਮ੍ਮੇ ਅਕੋਪੇਨ੍ਤੇਨ ਰਜ੍ਜਂ ਕਾਰੇਤੁਂ ਵਟ੍ਟਤਿ, ਰਞ੍ਞੋ ਹਿ ਧਮ੍ਮਿਕਭਾਵੇ ਸਤਿ ਪਰਿਸਾਪਿਸ੍ਸ ਧਮ੍ਮਿਕਾ ਹੋਨ੍ਤਿ, ਅਨਚ੍ਛਰਿਯਂ ਖੋ ਪਨੇਤਂ, ਯਂ ਮਯਿ ਅਨੁਸਾਸਨ੍ਤੇ ਤ੍ਵਂ ਧਮ੍ਮੇਨ ਰਜ੍ਜਂ ਕਾਰੇਯ੍ਯਾਸਿ, ਪੋਰਾਣਕਪਣ੍ਡਿਤਾ ਅਨੁਸਾਸਕਆਚਰਿਯੇ ਅਵਿਜ੍ਜਮਾਨੇਪਿ ਅਤ੍ਤਨੋ ਮਤਿਯਾਵ ਤਿਵਿਧਸੁਚਰਿਤਧਮ੍ਮੇ ਪਤਿਟ੍ਠਾਯ ਮਹਾਜਨਸ੍ਸ ਧਮ੍ਮਂ ਦੇਸੇਤ੍ਵਾ ਸਗ੍ਗਪਥਂ ਪੂਰਯਮਾਨਾ ਅਗਮਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ‘‘ਜਨਸਨ੍ਧਕੁਮਾਰੋ’’ਤਿਸ੍ਸ ਨਾਮਂ ਕਰਿਂਸੁ. ਅਥਸ੍ਸ ਵਯਪ੍ਪਤ੍ਤਸ੍ਸ ਤਕ੍ਕਸਿਲਤੋ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਆਗਤਕਾਲੇ ਰਾਜਾ ਸਬ੍ਬਾਨਿ ਬਨ੍ਧਨਾਗਾਰਾਨਿ ਸੋਧਾਪੇਤ੍ਵਾ ਉਪਰਜ੍ਜਂ ਅਦਾਸਿ. ਸੋ ਅਪਰਭਾਗੇ ਪਿਤੁ ਅਚ੍ਚਯੇਨ ਰਜ੍ਜੇ ਪਤਿਟ੍ਠਾਯ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਰਾਜਦ੍ਵਾਰੇ ਚਾਤਿ ਛ ਦਾਨਸਾਲਾਯੋ ਕਾਰਾਪੇਤ੍ਵਾ ਦਿਵਸੇ ਦਿਵਸੇ ਛ ਸਤਸਹਸ੍ਸਾਨਿ ਪਰਿਚ੍ਚਜਿਤ੍ਵਾ ਸਕਲਜਮ੍ਬੁਦੀਪਂ ਸਙ੍ਖੋਭੇਤ੍ਵਾ ਮਹਾਦਾਨਂ ਪਵਤ੍ਤੇਨ੍ਤੋ ਬਨ੍ਧਨਾਗਾਰਾਨਿ ਨਿਚ੍ਚਂ ਵਿਵਟਾਨਿ ਕਾਰਾਪੇਤ੍ਵਾ ਧਮ੍ਮਭਣ੍ਡਿਕਂ ਸੋਧਾਪੇਤ੍ਵਾ ਚਤੂਹਿ ਸਙ੍ਗਹਵਤ੍ਥੂਹਿ ਲੋਕਂ ਸਙ੍ਗਣ੍ਹਨ੍ਤੋ ਪਞ੍ਚ ਸੀਲਾਨਿ ਰਕ੍ਖਨ੍ਤੋ ਉਪੋਸਥਵਾਸਂ ਵਸਨ੍ਤੋ ਧਮ੍ਮੇਨ ਰਜ੍ਜਂ ਕਾਰੇਸਿ. ਅਨ੍ਤਰਨ੍ਤਰਾ ਚ ਰਟ੍ਠਵਾਸਿਨੋ ਸਨ੍ਨਿਪਾਤਾਪੇਤ੍ਵਾ ‘‘ਦਾਨਂ ਦੇਥ, ਸੀਲਂ ਸਮਾਦਿਯਥ, ਭਾਵਨਂ ਭਾਵੇਥ, ਧਮ੍ਮੇਨ ਕਮ੍ਮਨ੍ਤੇ ਚ ਵੋਹਾਰੇ ਚ ਪਯੋਜੇਥ, ਦਹਰਕਾਲੇਯੇਵ ਸਿਪ੍ਪਾਨਿ ਉਗ੍ਗਣ੍ਹਥ, ਧਨਂ ਉਪ੍ਪਾਦੇਥ, ਗਾਮਕੂਟਕਮ੍ਮਂ ਵਾ ਪਿਸੁਣਵਾਚਾਕਮ੍ਮਂ ਵਾ ਮਾ ਕਰਿਤ੍ਥ, ਚਣ੍ਡਾ ਫਰੁਸਾ ਮਾ ਅਹੁਵਤ੍ਥ, ਮਾਤੁਪਟ੍ਠਾਨਂ ਪਿਤੁਪਟ੍ਠਾਨਂ ਪੂਰੇਥ, ਕੁਲੇ ਜੇਟ੍ਠਾਪਚਾਯਿਨੋ ਭਵਥਾ’’ਤਿ ਧਮ੍ਮਂ ਦੇਸੇਤ੍ਵਾ ਮਹਾਜਨੇ ਸੁਚਰਿਤਧਮ੍ਮੇ ਪਤਿਟ੍ਠਾਪੇਸਿ. ਸੋ ਏਕਦਿਵਸਂ ਪਨ੍ਨਰਸੀਉਪੋਸਥੇ ਸਮਾਦਿਨ੍ਨੁਪੋਸਥੋ ‘‘ਮਹਾਜਨਸ੍ਸ ਭਿਯ੍ਯੋ ਹਿਤਸੁਖਤ੍ਥਾਯ ਅਪ੍ਪਮਾਦਵਿਹਾਰਤ੍ਥਾਯ ਧਮ੍ਮਂ ਦੇਸੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਗਰੇ ਭੇਰਿਂ ਚਰਾਪੇਤ੍ਵਾ ਅਤ੍ਤਨੋ ਓਰੋਧੇ ਆਦਿਂ ਕਤ੍ਵਾ ਸਬ੍ਬਨਗਰਜਨਂ ਸਨ੍ਨਿਪਾਤਾਪੇਤ੍ਵਾ ਰਾਜਙ੍ਗਣੇ ਅਲਙ੍ਕਰਿਤ੍ਵਾ ਅਲਙ੍ਕਤਰਤਨਮਣ੍ਡਪਮਜ੍ਝੇ ਸੁਪਞ੍ਞਤ੍ਤਵਰਪਲ੍ਲਙ੍ਕੇ ਨਿਸੀਦਿਤ੍ਵਾ ‘‘ਅਮ੍ਭੋ, ਨਗਰਵਾਸਿਨੋ ਤੁਮ੍ਹਾਕਂ ਤਪਨੀਯੇ ਚ ਅਤਪਨੀਯੇ ਚ ਧਮ੍ਮੇ ਦੇਸੇਸ੍ਸਾਮਿ, ਅਪ੍ਪਮਤ੍ਤਾ ਹੁਤ੍ਵਾ ਓਹਿਤਸੋਤਾ ਸਕ੍ਕਚ੍ਚਂ ਸੁਣਾਥਾ’’ਤਿ ਵਤ੍ਵਾ ਧਮ੍ਮਂ ਦੇਸੇਸਿ.

ਸਤ੍ਥਾ ਸਚ੍ਚਪਰਿਭਾਵਿਤਂ ਮੁਖਰਤਨਂ ਵਿਵਰਿਤ੍ਵਾ ਤਂ ਧਮ੍ਮਦੇਸਨਂ ਮਧੁਰੇਨ ਸਰੇਨ ਕੋਸਲਰਞ੍ਞੋ ਆਵਿ ਕਰੋਨ੍ਤੋ –

੪੯.

‘‘ਦਸ ਖਲੁ ਇਮਾਨਿ ਠਾਨਾਨਿ, ਯਾਨਿ ਪੁਬ੍ਬੇ ਅਕਰਿਤ੍ਵਾ;

ਸ ਪਚ੍ਛਾ ਮਨੁਤਪ੍ਪਤਿ, ਇਚ੍ਚੇਵਾਹ ਜਨਸਨ੍ਧੋ.

੫੦.

‘‘ਅਲਦ੍ਧਾ ਵਿਤ੍ਤਂ ਤਪ੍ਪਤਿ, ਪੁਬ੍ਬੇ ਅਸਮੁਦਾਨਿਤਂ;

ਨ ਪੁਬ੍ਬੇ ਧਨਮੇਸਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.

੫੧.

‘‘ਸਕ੍ਯਰੂਪਂ ਪੁਰੇ ਸਨ੍ਤਂ, ਮਯਾ ਸਿਪ੍ਪਂ ਨ ਸਿਕ੍ਖਿਤਂ;

ਕਿਚ੍ਛਾ ਵੁਤ੍ਤਿ ਅਸਿਪ੍ਪਸ੍ਸ, ਇਤਿ ਪਚ੍ਛਾਨੁਤਪ੍ਪਤਿ.

੫੨.

‘‘ਕੂਟਵੇਦੀ ਪੁਰੇ ਆਸਿਂ, ਪਿਸੁਣੋ ਪਿਟ੍ਠਿਮਂਸਿਕੋ;

ਚਣ੍ਡੋ ਚ ਫਰੁਸੋ ਚਾਪਿ, ਇਤਿ ਪਚ੍ਛਾਨੁਤਪ੍ਪਤਿ.

੫੩.

‘‘ਪਾਣਾਤਿਪਾਤੀ ਪੁਰੇ ਆਸਿਂ, ਲੁਦ੍ਦੋ ਚਾਪਿ ਅਨਾਰਿਯੋ;

ਭੂਤਾਨਂ ਨਾਪਚਾਯਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.

੫੪.

‘‘ਬਹੂਸੁ ਵਤ ਸਨ੍ਤੀਸੁ, ਅਨਾਪਾਦਾਸੁ ਇਤ੍ਥਿਸੁ;

ਪਰਦਾਰਂ ਅਸੇਵਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.

੫੫.

‘‘ਬਹੁਮ੍ਹਿ ਵਤ ਸਨ੍ਤਮ੍ਹਿ, ਅਨ੍ਨਪਾਨੇ ਉਪਟ੍ਠਿਤੇ;

ਨ ਪੁਬ੍ਬੇ ਅਦਦਂ ਦਾਨਂ, ਇਤਿ ਪਚ੍ਛਾਨੁਤਪ੍ਪਤਿ.

੫੬.

‘‘ਮਾਤਰਂ ਪਿਤਰਂ ਚਾਪਿ, ਜਿਣ੍ਣਕਂ ਗਤਯੋਬ੍ਬਨਂ;

ਪਹੁ ਸਨ੍ਤੋ ਨ ਪੋਸਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.

੫੭.

‘‘ਆਚਰਿਯਮਨੁਸਤ੍ਥਾਰਂ, ਸਬ੍ਬਕਾਮਰਸਾਹਰਂ;

ਪਿਤਰਂ ਅਤਿਮਞ੍ਞਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.

੫੮.

‘‘ਸਮਣੇ ਬ੍ਰਾਹ੍ਮਣੇ ਚਾਪਿ, ਸੀਲਵਨ੍ਤੇ ਬਹੁਸ੍ਸੁਤੇ;

ਨ ਪੁਬ੍ਬੇ ਪਯਿਰੁਪਾਸਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.

੫੯.

‘‘ਸਾਧੁ ਹੋਤਿ ਤਪੋ ਚਿਣ੍ਣੋ, ਸਨ੍ਤੋ ਚ ਪਯਿਰੁਪਾਸਿਤੋ;

ਨ ਚ ਪੁਬ੍ਬੇ ਤਪੋ ਚਿਣ੍ਣੋ, ਇਤਿ ਪਚ੍ਛਾਨੁਤਪ੍ਪਤਿ.

੬੦.

‘‘ਯੋ ਚ ਏਤਾਨਿ ਠਾਨਾਨਿ, ਯੋਨਿਸੋ ਪਟਿਪਜ੍ਜਤਿ;

ਕਰਂ ਪੁਰਿਸਕਿਚ੍ਚਾਨਿ, ਸ ਪਚ੍ਛਾ ਨਾਨੁਤਪ੍ਪਤੀ’’ਤਿ. – ਇਮਾ ਗਾਥਾ ਆਹ;

ਤਤ੍ਥ ਠਾਨਾਨੀਤਿ ਕਾਰਣਾਨਿ. ਪੁਬ੍ਬੇਤਿ ਪਠਮਮੇਵ ਅਕਰਿਤ੍ਵਾ. ਸ ਪਚ੍ਛਾ ਮਨੁਤਪ੍ਪਤੀਤਿ ਸੋ ਪਠਮਂ ਕਤ੍ਤਬ੍ਬਾਨਂ ਅਕਾਰਕੋ ਪੁਗ੍ਗਲੋ ਪਚ੍ਛਾ ਇਧਲੋਕੇਪਿ ਪਰਲੋਕੇਪਿ ਤਪ੍ਪਤਿ ਕਿਲਮਤਿ. ‘‘ਪਚ੍ਛਾ ਵਾ ਅਨੁਤਪ੍ਪਤੀ’’ਤਿਪਿ ਪਾਠੋ. ਇਚ੍ਚੇਵਾਹਾਤਿ ਇਤਿ ਏਵਂ ਆਹਾਤਿ ਪਦਚ੍ਛੇਦੋ, ਇਤਿ ਏਵਂ ਰਾਜਾ ਜਨਸਨ੍ਧੋ ਅਵੋਚ. ਇਚ੍ਚਸ੍ਸੁਹਾਤਿਪਿ ਪਾਠੋ. ਤਤ੍ਥ ਅਸ੍ਸੁ-ਕਾਰੋ ਨਿਪਾਤਮਤ੍ਤਂ ਇਤਿ ਅਸ੍ਸੁ ਆਹਾਤਿ ਪਦਚ੍ਛੇਦੋ. ਇਦਾਨਿ ਤਾਨਿ ਦਸ ਤਪਨੀਯਕਾਰਣਾਨਿ ਪਕਾਸੇਤੁਂ ਬੋਧਿਸਤ੍ਤਸ੍ਸ ਧਮ੍ਮਕਥਾ ਹੋਤਿ. ਤਤ੍ਥ ਪੁਬ੍ਬੇਤਿ ਪਠਮਮੇਵ ਤਰੁਣਕਾਲੇ ਪਰਕ੍ਕਮਂ ਕਤ੍ਵਾ ਅਸਮੁਦਾਨਿਤਂ ਅਸਮ੍ਭਤਂ ਧਨਂ ਮਹਲ੍ਲਕਕਾਲੇ ਅਲਭਿਤ੍ਵਾ ਤਪ੍ਪਤਿ ਸੋਚਤਿ, ਪਰੇ ਚ ਸੁਖਿਤੇ ਦਿਸ੍ਵਾ ਸਯਂ ਦੁਕ੍ਖਂ ਜੀਵਨ੍ਤੋ ‘‘ਪੁਬ੍ਬੇ ਧਨਂ ਨ ਪਰਿਯੇਸਿਸ੍ਸ’’ਨ੍ਤਿ ਏਵਂ ਪਚ੍ਛਾ ਅਨੁਤਪ੍ਪਤਿ, ਤਸ੍ਮਾ ਮਹਲ੍ਲਕਕਾਲੇ ਸੁਖਂ ਜੀਵਿਤੁਕਾਮਾ ਦਹਰਕਾਲੇਯੇਵ ਧਮ੍ਮਿਕਾਨਿ ਕਸਿਕਮ੍ਮਾਦੀਨਿ ਕਤ੍ਵਾ ਧਨਂ ਪਰਿਯੇਸਥਾਤਿ ਦਸ੍ਸੇਤਿ.

ਪੁਰੇ ਸਨ੍ਤਨ੍ਤਿ ਪੁਰੇ ਦਹਰਕਾਲੇ ਆਚਰਿਯੇ ਪਯਿਰੁਪਾਸਿਤ੍ਵਾ ਮਯਾ ਕਾਤੁਂ ਸਕ੍ਯਰੂਪਂ ਸਮਾਨਂ ਹਤ੍ਥਿਸਿਪ੍ਪਾਦਿਕਂ ਕਿਞ੍ਚਿ ਸਿਪ੍ਪਂ ਨ ਸਿਕ੍ਖਿਤਂ. ਕਿਚ੍ਛਾਤਿ ਮਹਲ੍ਲਕਕਾਲੇ ਅਸਿਪ੍ਪਸ੍ਸ ਦੁਕ੍ਖਾ ਜੀਵਿਤਵੁਤ੍ਤਿ, ਨੇਵ ਸਕ੍ਕਾ ਤਦਾ ਸਿਪ੍ਪਂ ਸਿਕ੍ਖਿਤੁਂ, ਤਸ੍ਮਾ ਮਹਲ੍ਲਕਕਾਲੇ ਸੁਖਂ ਜੀਵਿਤੁਕਾਮਾ ਤਰੁਣਕਾਲੇਯੇਵ ਸਿਪ੍ਪਂ ਸਿਕ੍ਖਥਾਤਿ ਦਸ੍ਸੇਤਿ. ਕੁਟਵੇਦੀਤਿ ਕੂਟਜਾਨਨਕੋ ਗਾਮਕੂਟਕੋ ਵਾ ਲੋਕਸ੍ਸ ਅਨਤ੍ਥਕਾਰਕੋ ਵਾ ਤੁਲਾਕੂਟਾਦਿਕਾਰਕੋ ਵਾ ਕੂਟਟ੍ਟਕਾਰਕੋ ਵਾਤਿ ਅਤ੍ਥੋ. ਆਸਿਨ੍ਤਿ ਏਵਰੂਪੋ ਅਹਂ ਪੁਬ੍ਬੇ ਅਹੋਸਿਂ. ਪਿਸੁਣੋਤਿ ਪੇਸੁਞ੍ਞਕਾਰਣੋ. ਪਿਟ੍ਠਿਮਂਸਿਕੋਤਿ ਲਞ੍ਜਂ ਗਹੇਤ੍ਵਾ ਅਸਾਮਿਕੇ ਸਾਮਿਕੇ ਕਰੋਨ੍ਤੋ ਪਰੇਸਂ ਪਿਟ੍ਠਿਮਂਸਖਾਦਕੋ. ਇਤਿ ਪਚ੍ਛਾਤਿ ਏਵਂ ਮਰਣਮਞ੍ਚੇ ਨਿਪਨ੍ਨੋ ਅਨੁਤਪ੍ਪਤਿ, ਤਸ੍ਮਾ ਸਚੇ ਨਿਰਯੇ ਨ ਵਸਿਤੁਕਾਮਾਤ੍ਥ, ਮਾ ਏਵਰੂਪਂ ਪਾਪਕਮ੍ਮਂ ਕਰਿਤ੍ਥਾਤਿ ਓਵਦਤਿ.

ਲੁਦ੍ਦੋਤਿ ਦਾਰੁਣੋ. ਅਨਾਰਿਯੋਤਿ ਨ ਅਰਿਯੋ ਨੀਚਸਮਾਚਾਰੋ. ਨਾਪਚਾਯਿਸ੍ਸਨ੍ਤਿ ਖਨ੍ਤਿਮੇਤ੍ਤਾਨੁਦ੍ਦਯਵਸੇਨ ਨੀਚਵੁਤ੍ਤਿਕੋ ਨਾਹੋਸਿਂ. ਸੇਸਂ ਪੁਰਿਮਨਯੇਨੇਵ ਯੋਜੇਤਬ੍ਬਂ. ਅਨਾਪਾਦਾਸੂਤਿ ਆਪਾਦਾਨਂ ਆਪਾਦੋ, ਪਰਿਗ੍ਗਹੋਤਿ ਅਤ੍ਥੋ. ਨਤ੍ਥਿ ਆਪਾਦੋ ਯਾਸਂ ਤਾ ਅਨਾਪਾਦਾ, ਅਞ੍ਞੇਹਿ ਅਕਤਪਰਿਗ੍ਗਹਾਸੂਤਿ ਅਤ੍ਥੋ. ਉਪਟ੍ਠਿਤੇਤਿ ਪਚ੍ਚੁਪਟ੍ਠਿਤੇ. ਨ ਪੁਬ੍ਬੇਤਿ ਇਤੋ ਪੁਬ੍ਬੇ ਦਾਨਂ ਨ ਅਦਦਂ. ਪਹੁ ਸਨ੍ਤੋਤਿ ਧਨਬਲੇਨਾਪਿ ਕਾਯਬਲੇਨਾਪਿ ਪੋਸਿਤੁਂ ਸਮਤ੍ਥੋ ਪਟਿਬਲੋ ਸਮਾਨੋ. ਆਚਰਿਯਨ੍ਤਿ ਆਚਾਰੇ ਸਿਕ੍ਖਾਪਨਤੋ ਇਧ ਪਿਤਾ ‘‘ਆਚਰਿਯੋ’’ਤਿ ਅਧਿਪ੍ਪੇਤੋ. ਅਨੁਸਤ੍ਥਾਰਨ੍ਤਿ ਅਨੁਸਾਸਕਂ. ਸਬ੍ਬਕਾਮਰਸਾਹਰਨ੍ਤਿ ਸਬ੍ਬੇ ਵਤ੍ਥੁਕਾਮਰਸੇ ਆਹਰਿਤ੍ਵਾ ਪੋਸਿਤਾਰਂ. ਅਤਿਮਞ੍ਞਿਸ੍ਸਨ੍ਤਿ ਤਸ੍ਸ ਓਵਾਦਂ ਅਗਣ੍ਹਨ੍ਤੋ ਅਤਿਕ੍ਕਮਿਤ੍ਵਾ ਮਞ੍ਞਿਸ੍ਸਂ.

ਨ ਪੁਬ੍ਬੇਤਿ ਇਤੋ ਪੁਬ੍ਬੇ ਧਮ੍ਮਿਕਸਮਣਬ੍ਰਾਹ੍ਮਣੇਪਿ ਗਿਲਾਨਾਗਿਲਾਨੇਪਿ ਚੀਵਰਾਦੀਨਿ ਦਤ੍ਵਾ ਅਪ੍ਪਟਿਜਗ੍ਗਨੇਨ ਨ ਪਯਿਰੁਪਾਸਿਸ੍ਸਂ. ਤਪੋਤਿ ਸੁਚਰਿਤਤਪੋ. ਸਨ੍ਤੋਤਿ ਤੀਹਿ ਦ੍ਵਾਰੇਹਿ ਉਪਸਨ੍ਤੋ ਸੀਲਵਾ. ਇਦਂ ਵੁਤ੍ਤਂ ਹੋਤਿ – ਤਿਵਿਧਸੁਚਰਿਤਸਙ੍ਖਾਤੋ ਤਪੋ ਚਿਣ੍ਣੋ ਏਵਰੂਪੋ ਚ ਉਪਸਨ੍ਤੋ ਪਯਿਰੁਪਾਸਿਤੋ ਨਾਮ ਸਾਧੁ ਸੁਨ੍ਦਰੋ. ਨ ਪੁਬ੍ਬੇਤਿ ਮਯਾ ਦਹਰਕਾਲੇ ਏਵਰੂਪੋ ਤਪੋ ਨ ਚਿਣ੍ਣੋ, ਇਤਿ ਪਚ੍ਛਾ ਜਰਾਜਿਣ੍ਣੋ ਮਰਣਭਯਤਜ੍ਜਿਤੋ ਅਨੁਤਪ੍ਪਤਿ ਸੋਚਤਿ. ਸਚੇ ਤੁਮ੍ਹੇ ਏਵਂ ਨ ਸੋਚਿਤੁਕਾਮਾ, ਤਪੋਕਮ੍ਮਂ ਕਰੋਥਾਤਿ ਵਦਤਿ. ਯੋ ਚ ਏਤਾਨੀਤਿ ਯੋ ਪਨ ਏਤਾਨਿ ਦਸ ਕਾਰਣਾਨਿ ਪਠਮਮੇਵ ਉਪਾਯੇਨ ਪਟਿਪਜ੍ਜਤਿ ਸਮਾਦਾਯ ਵਤ੍ਤਤਿ, ਪੁਰਿਸੇਹਿ ਕਤ੍ਤਬ੍ਬਾਨਿ ਧਮ੍ਮਿਕਕਿਚ੍ਚਾਨਿ ਕਰੋਨ੍ਤੋ ਸੋ ਅਪ੍ਪਮਾਦਵਿਹਾਰੀ ਪੁਰਿਸੋ ਪਚ੍ਛਾ ਨਾਨੁਤਪ੍ਪਤਿ, ਸੋਮਨਸ੍ਸਪ੍ਪਤ੍ਤੋਵ ਹੋਤੀਤਿ.

ਇਤਿ ਮਹਾਸਤ੍ਤੋ ਅਨ੍ਵਦ੍ਧਮਾਸਂ ਇਮਿਨਾ ਨਿਯਾਮੇਨ ਮਹਾਜਨਸ੍ਸ ਧਮ੍ਮਂ ਦੇਸੇਸਿ. ਮਹਾਜਨੋਪਿਸ੍ਸ ਓਵਾਦੇ ਠਤ੍ਵਾ ਤਾਨਿ ਦਸ ਠਾਨਾਨਿ ਪੂਰੇਤ੍ਵਾ ਸਗ੍ਗਪਰਾਯਣੋਵ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਮਹਾਰਾਜ, ਪੋਰਾਣਕਪਣ੍ਡਿਤਾ ਅਨਾਚਰਿਯਕਾਪਿ ਅਤ੍ਤਨੋ ਮਤਿਯਾਵ ਧਮ੍ਮਂ ਦੇਸੇਤ੍ਵਾ ਮਹਾਜਨਂ ਸਗ੍ਗਪਥੇ ਪਤਿਟ੍ਠਾਪੇਸੁ’’ਨ੍ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪਰਿਸਾ ਬੁਦ੍ਧਪਰਿਸਾ ਅਹੇਸੁਂ, ਜਨਸਨ੍ਧਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਜਨਸਨ੍ਧਜਾਤਕਵਣ੍ਣਨਾ ਪਞ੍ਚਮਾ.

[੪੬੯] ੬. ਮਹਾਕਣ੍ਹਜਾਤਕਵਣ੍ਣਨਾ

ਕਣ੍ਹੋ ਕਣ੍ਹੋ ਚਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਲੋਕਤ੍ਥਚਰਿਯਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਭਿਕ੍ਖੂ ਧਮ੍ਮਸਭਾਯਂ ਨਿਸੀਦਿਤ੍ਵਾ ‘‘ਯਾਵਞ੍ਚਿਦਂ, ਆਵੁਸੋ, ਸਤ੍ਥਾ ਬਹੁਜਨਹਿਤਾਯ ਪਟਿਪਨ੍ਨੋ ਅਤ੍ਤਨੋ ਫਾਸੁਵਿਹਾਰਂ ਪਹਾਯ ਲੋਕਸ੍ਸੇਵ ਅਤ੍ਥਂ ਚਰਤਿ, ਪਰਮਾਭਿਸਮ੍ਬੋਧਿਂ ਪਤ੍ਵਾ ਸਯਂ ਪਤ੍ਤਚੀਵਰਮਾਦਾਯ ਅਟ੍ਠਾਰਸਯੋਜਨਮਗ੍ਗਂ ਗਨ੍ਤ੍ਵਾ ਪਞ੍ਚਵਗ੍ਗਿਯਤ੍ਥੇਰਾਨਂ ਧਮ੍ਮਚਕ੍ਕਂ (ਸਂ. ਨਿ. ੫.੧੦੮੧; ਮਹਾਵ. ੧੩ ਆਦਯੋ; ਪਟਿ. ਮ. ੨.੩੦) ਪਵਤ੍ਤੇਤ੍ਵਾ ਪਞ੍ਚਮਿਯਾ ਪਕ੍ਖਸ੍ਸ ਅਨਤ੍ਤਲਕ੍ਖਣਸੁਤ੍ਤਂ (ਸਂ. ਨਿ. ੩.੫੯; ਮਹਾਵ. ੨੦ ਆਦਯੋ) ਕਥੇਤ੍ਵਾ ਸਬ੍ਬੇਸਂ ਅਰਹਤ੍ਤਂ ਅਦਾਸਿ. ਉਰੁਵੇਲਂ ਗਨ੍ਤ੍ਵਾ ਤੇਭਾਤਿਕਜਟਿਲਾਨਂ ਅਡ੍ਢੁਡ੍ਢਾਨਿ ਪਾਟਿਹਾਰਿਯਸਹਸ੍ਸਾਨਿ ਦਸ੍ਸੇਤ੍ਵਾ ਪਬ੍ਬਾਜੇਤ੍ਵਾ ਗਯਾਸੀਸੇ ਆਦਿਤ੍ਤਪਰਿਯਾਯਂ (ਸਂ. ਨਿ. ੪.੨੩੫; ਮਹਾਵ. ੫੪) ਕਥੇਤ੍ਵਾ ਜਟਿਲਸਹਸ੍ਸਾਨਂ ਅਰਹਤ੍ਤਂ ਅਦਾਸਿ, ਮਹਾਕਸ੍ਸਪਸ੍ਸ ਤੀਣਿ ਗਾਵੁਤਾਨਿ ਪਚ੍ਚੁਗ੍ਗਮਨਂ ਗਨ੍ਤ੍ਵਾ ਤੀਹਿ ਓਵਾਦੇਹਿ ਉਪਸਮ੍ਪਦਂ ਅਦਾਸਿ. ਏਕੋ ਪਚ੍ਛਾਭਤ੍ਤਂ ਪਞ੍ਚਚਤ੍ਤਾਲੀਸਯੋਜਨਮਗ੍ਗਂ ਗਨ੍ਤ੍ਵਾ ਪੁਕ੍ਕੁਸਾਤਿਕੁਲਪੁਤ੍ਤਂ ਅਨਾਗਾਮਿਫਲੇ ਪਤਿਟ੍ਠਾਪੇਸਿ, ਮਹਾਕਪ੍ਪਿਨਸ੍ਸ ਵੀਸਯੋਜਨਸਤਂ ਪਚ੍ਚੁਗ੍ਗਮਨਂ ਕਤ੍ਵਾ ਅਰਹਤ੍ਤਂ ਅਦਾਸਿ, ਏਕੋ ਪਚ੍ਛਾਭਤ੍ਤਂ ਤਿਂਸਯੋਜਨਮਗ੍ਗਂ ਗਨ੍ਤ੍ਵਾ ਤਾਵ ਕਕ੍ਖਲ਼ਂ ਫਰੁਸਂ ਅਙ੍ਗੁਲਿਮਾਲਂ ਅਰਹਤ੍ਤੇ ਪਤਿਟ੍ਠਾਪੇਸਿ, ਤਿਂਸਯੋਜਨਮਗ੍ਗਂ ਗਨ੍ਤ੍ਵਾ ਆਲ਼ਵਕਂ ਯਕ੍ਖਂ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ਕੁਮਾਰਸ੍ਸ ਸੋਤ੍ਥਿਂ ਅਕਾਸਿ. ਤਾਵਤਿਂਸਭਵਨੇ ਤੇਮਾਸਂ ਵਸਨ੍ਤੋ ਅਸੀਤਿਯਾ ਦੇਵਤਾਕੋਟੀਨਂ ਧਮ੍ਮਾਭਿਸਮਯਂ ਸਮ੍ਪਾਦੇਸਿ, ਬ੍ਰਹ੍ਮਲੋਕਂ ਗਨ੍ਤ੍ਵਾ ਬਕਬ੍ਰਹ੍ਮੁਨੋ ਦਿਟ੍ਠਿਂ ਭਿਨ੍ਦਿਤ੍ਵਾ ਦਸਨ੍ਨਂ ਬ੍ਰਹ੍ਮਸਹਸ੍ਸਾਨਂ ਅਰਹਤ੍ਤਂ ਅਦਾਸਿ, ਅਨੁਸਂਵਚ੍ਛਰਂ ਤੀਸੁ ਮਣ੍ਡਲੇਸੁ ਚਾਰਿਕਂ ਚਰਮਾਨੋ ਉਪਨਿਸ੍ਸਯਸਮ੍ਪਨ੍ਨਾਨਂ ਮਨੁਸ੍ਸਾਨਂ ਸਰਣਾਨਿ ਚੇਵ ਸੀਲਾਨਿਚ ਮਗ੍ਗਫਲਾਨਿ ਚ ਦੇਤਿ, ਨਾਗਸੁਪਣ੍ਣਾਦੀਨਮ੍ਪਿ ਨਾਨਪ੍ਪਕਾਰਂ ਅਤ੍ਥਂ ਚਰਤੀ’’ਤਿ ਦਸਬਲਸ੍ਸ ਲੋਕਤ੍ਥਚਰਿਯਗੁਣਂ ਕਥਯਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਸੋਹਂ ਇਦਾਨਿ ਅਭਿਸਮ੍ਬੋਧਿਂ ਪਤ੍ਵਾ ਲੋਕਸ੍ਸ ਅਤ੍ਥਂ ਚਰੇਯ੍ਯਂ, ਪੁਬ੍ਬੇ ਸਰਾਗਕਾਲੇਪਿ ਲੋਕਸ੍ਸ ਅਤ੍ਥਂ ਅਚਰਿ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਬਾਰਾਣਸਿਯਂ ਉਸੀਨਕੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਕਸ੍ਸਪਸਮ੍ਮਾਸਮ੍ਬੁਦ੍ਧੇ ਚਤੁਸਚ੍ਚਦੇਸਨਾਯ ਮਹਾਜਨਂ ਕਿਲੇਸਬਨ੍ਧਨਾ ਮੋਚੇਤ੍ਵਾ ਨਿਬ੍ਬਾਨਨਗਰਂ ਪੂਰੇਤ੍ਵਾ ਪਰਿਨਿਬ੍ਬੁਤੇ ਦੀਘਸ੍ਸ ਅਦ੍ਧੁਨੋ ਅਚ੍ਚਯੇਨ ਸਾਸਨਂ ਓਸਕ੍ਕਿ. ਭਿਕ੍ਖੂ ਏਕਵੀਸਤਿਯਾ ਅਨੇਸਨਾਹਿ ਜੀਵਿਕਂ ਕਪ੍ਪੇਨ੍ਤਿ, ਭਿਕ੍ਖੂ ਗਿਹਿਸਂਸਗ੍ਗਂ ਕਰੋਨ੍ਤਿ, ਪੁਤ੍ਤਧੀਤਾਦੀਹਿ ਵਡ੍ਢਨ੍ਤਿ. ਭਿਕ੍ਖੁਨਿਯੋਪਿ ਗਿਹਿਸਂਸਗ੍ਗਂ ਕਰੋਨ੍ਤਿ, ਪੁਤ੍ਤਧੀਤਾਦੀਹਿ ਵਡ੍ਢਨ੍ਤਿ. ਭਿਕ੍ਖੂ ਭਿਕ੍ਖੁਧਮ੍ਮਂ, ਭਿਕ੍ਖੁਨਿਯੋ ਭਿਕ੍ਖੁਨਿਧਮ੍ਮਂ, ਉਪੋਸਕਾ ਉਪਾਸਕਧਮ੍ਮਂ, ਉਪਾਸਿਕਾ ਉਪਾਸਿਕਧਮ੍ਮਂ, ਬ੍ਰਾਹ੍ਮਣਾ ਬ੍ਰਾਹ੍ਮਣਧਮ੍ਮਂ ਵਿਸ੍ਸਜ੍ਜੇਸੁਂ. ਯੇਭੁਯ੍ਯੇਨ ਮਨੁਸ੍ਸਾ ਦਸ ਅਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਿਂਸੁ, ਮਤਮਤਾ ਅਪਾਯੇਸੁ ਪਰਿਪੂਰੇਸੁਂ. ਤਦਾ ਸਕ੍ਕੋ ਦੇਵਰਾਜਾ ਨਵੇ ਨਵੇ ਦੇਵੇ ਅਪਸ੍ਸਨ੍ਤੋ ਮਨੁਸ੍ਸਲੋਕਂ ਓਲੋਕੇਤ੍ਵਾ ਮਨੁਸ੍ਸਾਨਂ ਅਪਾਯੇਸੁ ਨਿਬ੍ਬਤ੍ਤਿਤਭਾਵਂ ਞਤ੍ਵਾ ਸਤ੍ਥੁ ਸਾਸਨਂ ਓਸਕ੍ਕਿਤਂ ਦਿਸ੍ਵਾ ‘‘ਕਿਂ ਨੁ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਅਤ੍ਥੇਕੋ ਉਪਾਯੋ, ਮਹਾਜਨਂ ਤਾਸੇਤ੍ਵਾ ਭੀਤਭਾਵਂ ਞਤ੍ਵਾ ਪਚ੍ਛਾ ਅਸ੍ਸਾਸੇਤ੍ਵਾ ਧਮ੍ਮਂ ਦੇਸੇਤ੍ਵਾ ਓਸਕ੍ਕਿਤਂ ਸਾਸਨਂ ਪਗ੍ਗਯ੍ਹ ਅਪਰਮ੍ਪਿ ਵਸ੍ਸਸਹਸ੍ਸਂ ਪਵਤ੍ਤਨਕਾਰਣਂ ਕਰਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਮਾਤਲਿਦੇਵਪੁਤ੍ਤਂ ਮੋਚਪ੍ਪਮਾਣਦਾਠਂ ਚਤੂਹਿ ਦਾਠਾਹਿ ਵਿਨਿਗ੍ਗਤਰਸ੍ਮਿਯਾ ਭਯਾਨਕਂ ਕਤ੍ਵਾ ਗਬ੍ਭਿਨੀਨਂ ਦਸ੍ਸਨੇਨੇਵ ਗਬ੍ਭਪਾਤਨਸਮਤ੍ਥਂ ਘੋਰਰੂਪਂ ਆਜਾਨੇਯ੍ਯਪ੍ਪਮਾਣਂ ਕਾਲ਼ਵਣ੍ਣਂ ਮਹਾਕਣ੍ਹਸੁਨਖਂ ਮਾਪੇਤ੍ਵਾ ਪਞ੍ਚਬਨ੍ਧਨੇਨ ਬਨ੍ਧਿਤ੍ਵਾ ਰਤ੍ਤਮਾਲਂ ਕਣ੍ਠੇ ਪਿਲ਼ਨ੍ਧਿਤ੍ਵਾ ਰਜ੍ਜੁਕੋਟਿਕਂ ਆਦਾਯ ਸਯਂ ਦ੍ਵੇ ਕਾਸਾਯਾਨਿ ਨਿਵਾਸੇਤ੍ਵਾ ਪਚ੍ਛਾਮੁਖੇ ਪਞ੍ਚਧਾ ਕੇਸੇ ਬਨ੍ਧਿਤ੍ਵਾ ਰਤ੍ਤਮਾਲਂ ਪਿਲ਼ਨ੍ਧਿਤ੍ਵਾ ਆਰੋਪਿਤਪਵਾਲ਼ਵਣ੍ਣਜਿਯਂ ਮਹਾਧਨੁਂ ਗਹੇਤ੍ਵਾ ਵਜਿਰਗ੍ਗਨਾਰਾਚਂ ਨਖੇਨ ਪਰਿਵਟ੍ਟੇਨ੍ਤੋ ਵਨਚਰਕਵੇਸਂ ਗਹੇਤ੍ਵਾ ਨਗਰਤੋ ਯੋਜਨਮਤ੍ਤੇ ਠਾਨੇ ਓਤਰਿਤ੍ਵਾ ‘‘ਨਸ੍ਸਤਿ ਲੋਕੋ, ਨਸ੍ਸਤਿ ਲੋਕੋ’’ਤਿ ਤਿਕ੍ਖਤ੍ਤੁਂ ਸਦ੍ਦਂ ਅਨੁਸਾਵੇਤ੍ਵਾ ਮਨੁਸ੍ਸੇ ਉਤ੍ਤਾਸੇਤ੍ਵਾ ਨਗਰੂਪਚਾਰਂ ਪਤ੍ਵਾ ਪੁਨ ਸਦ੍ਦਮਕਾਸਿ.

ਮਨੁਸ੍ਸਾ ਸੁਨਖਂ ਦਿਸ੍ਵਾ ਉਤ੍ਰਸ੍ਤਾ ਨਗਰਂ ਪਵਿਸਿਤ੍ਵਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸੁਂ. ਰਾਜਾ ਸੀਘਂ ਨਗਰਦ੍ਵਾਰਾਨਿ ਪਿਦਹਾਪੇਸਿ. ਸਕ੍ਕੋਪਿ ਅਟ੍ਠਾਰਸਹਤ੍ਥਂ ਪਾਕਾਰਂ ਉਲ੍ਲਙ੍ਘਿਤ੍ਵਾ ਸੁਨਖੇਨ ਸਦ੍ਧਿਂ ਅਨ੍ਤੋਨਗਰੇ ਪਤਿਟ੍ਠਹਿ. ਮਨੁਸ੍ਸਾ ਭੀਤਤਸਿਤਾ ਪਲਾਯਿਤ੍ਵਾ ਗੇਹਾਨਿ ਪਵਿਸਿਤ੍ਵਾ ਨਿਲੀਯਿਂਸੁ. ਮਹਾਕਣ੍ਹੋਪਿ ਦਿਟ੍ਠਦਿਟ੍ਠੇ ਮਨੁਸ੍ਸੇ ਉਪਧਾਵਿਤ੍ਵਾ ਸਨ੍ਤਾਸੇਨ੍ਤੋ ਰਾਜਨਿਵੇਸਨਂ ਅਗਮਾਸਿ. ਰਾਜਙ੍ਗਣੇ ਮਨੁਸ੍ਸਾ ਭਯੇਨ ਪਲਾਯਿਤ੍ਵਾ ਰਾਜਨਿਵੇਸਨਂ ਪਵਿਸਿਤ੍ਵਾ ਦ੍ਵਾਰਂ ਪਿਦਹਿਂਸੁ. ਉਸੀਨਕਰਾਜਾਪਿ ਓਰੋਧੇ ਗਹੇਤ੍ਵਾ ਪਾਸਾਦਂ ਅਭਿਰੁਹਿ. ਮਹਾਕਣ੍ਹੋ ਸੁਨਖੋ ਪੁਰਿਮਪਾਦੇ ਉਕ੍ਖਿਪਿਤ੍ਵਾ ਵਾਤਪਾਨੇ ਠਤ੍ਵਾ ਮਹਾਭੁਸ੍ਸਿਤਂ ਭੁਸ੍ਸਿ. ਤਸ੍ਸ ਸਦ੍ਦੋ ਹੇਟ੍ਠਾ ਅਵੀਚਿਂ, ਉਪਰਿ ਭਵਗ੍ਗਂ ਪਤ੍ਵਾ ਸਕਲਚਕ੍ਕਵਾਲ਼ਂ ਏਕਨਿਨ੍ਨਾਦਂ ਅਹੋਸਿ. ਵਿਧੁਰਜਾਤਕੇ (ਜਾ. ੨.੨੨.੧੩੪੬ ਆਦਯੋ) ਹਿ ਪੁਣ੍ਣਕਯਕ੍ਖਰਞ੍ਞੋ, ਕੁਸਜਾਤਕੇ (ਜਾ. ੨.੨੦.੧ ਆਦਯੋ) ਕੁਸਰਞ੍ਞੋ, ਭੂਰਿਦਤ੍ਤਜਾਤਕੇ (ਜਾ. ੨.੨੨.੭੮੪ ਆਦਯੋ) ਸੁਦਸ੍ਸਨਨਾਗਰਞ੍ਞੋ, ਇਮਸ੍ਮਿਂ ਮਹਾਕਣ੍ਹਜਾਤਕੇ ਅਯਂ ਸਦ੍ਦੋਤਿ ਇਮੇ ਚਤ੍ਤਾਰੋ ਸਦ੍ਦਾ ਜਮ੍ਬੁਦਿਪੇ ਮਹਾਸਦ੍ਦਾ ਨਾਮ ਅਹੇਸੁਂ.

ਨਗਰਵਾਸਿਨੋ ਭੀਤਤਸਿਤਾ ਹੁਤ੍ਵਾ ਏਕਪੁਰਿਸੋਪਿ ਸਕ੍ਕੇਨ ਸਦ੍ਧਿਂ ਕਥੇਤੁਂ ਨਾਸਕ੍ਖਿ, ਰਾਜਾਯੇਵ ਸਤਿਂ ਉਪਟ੍ਠਾਪੇਤ੍ਵਾ ਵਾਤਪਾਨਂ ਨਿਸ੍ਸਾਯ ਸਕ੍ਕਂ ਆਮਨ੍ਤੇਤ੍ਵਾ ‘‘ਅਮ੍ਭੋ ਲੁਦ੍ਦਕ, ਕਸ੍ਮਾ ਤੇ ਸੁਨਖੋ ਭੁਸ੍ਸਤੀ’’ਤਿ ਆਹ. ‘‘ਛਾਤਭਾਵੇਨ, ਮਹਾਰਾਜਾ’’ਤਿ. ‘‘ਤੇਨ ਹਿ ਤਸ੍ਸ ਭਤ੍ਤਂ ਦਾਪੇਸ੍ਸਾਮੀ’’ਤਿ ਅਨ੍ਤੋਜਨਸ੍ਸ ਚ ਅਤ੍ਤਨੋ ਚ ਪਕ੍ਕਭਤ੍ਤਂ ਸਬ੍ਬਂ ਦਾਪੇਸਿ. ਤਂ ਸਬ੍ਬਂ ਸੁਨਖੋ ਏਕਕਬਲ਼ਂ ਵਿਯ ਕਤ੍ਵਾ ਪੁਨ ਸਦ੍ਦਮਕਾਸਿ. ਪੁਨ ਰਾਜਾ ਪੁਚ੍ਛਿਤ੍ਵਾ ‘‘ਇਦਾਨਿਪਿ ਮੇ ਸੁਨਖੋ ਛਾਤੋਯੇਵਾ’’ਤਿ ਸੁਤ੍ਵਾ ਹਤ੍ਥਿਅਸ੍ਸਾਦੀਨਂ ਪਕ੍ਕਭਤ੍ਤਂ ਸਬ੍ਬਂ ਆਹਰਾਪੇਤ੍ਵਾ ਦਾਪੇਸਿ. ਤਸ੍ਮਿਂ ਏਕਪ੍ਪਹਾਰੇਨੇਵ ਨਿਟ੍ਠਾਪਿਤੇ ਸਕਲਨਗਰਸ੍ਸ ਪਕ੍ਕਭਤ੍ਤਂ ਦਾਪੇਸਿ. ਤਮ੍ਪਿ ਸੋ ਤਥੇਵ ਭੁਞ੍ਜਿਤ੍ਵਾ ਪੁਨ ਸਦ੍ਦਮਕਾਸਿ. ਰਾਜਾ ‘‘ਨ ਏਸ ਸੁਨਖੋ, ਨਿਸ੍ਸਂਸਯਂ ਏਸ ਯਕ੍ਖੋ ਭਵਿਸ੍ਸਤਿ, ਆਗਮਨਕਾਰਣਂ ਪੁਚ੍ਛਿਸ੍ਸਾਮੀ’’ਤਿ ਭੀਤਤਸਿਤੋ ਹੁਤ੍ਵਾ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੬੧.

‘‘ਕਣ੍ਹੋ ਕਣ੍ਹੋ ਚ ਘੋਰੋ ਚ, ਸੁਕ੍ਕਦਾਠੋ ਪਭਾਸਵਾ;

ਬਦ੍ਧੋ ਪਞ੍ਚਹਿ ਰਜ੍ਜੂਹਿ, ਕਿਂ ਰਵਿ ਸੁਨਖੋ ਤਵਾ’’ਤਿ.

ਤਤ੍ਥ ਕਣ੍ਹੋ ਕਣ੍ਹੋਤਿ ਭਯਵਸੇਨ ਦਲ਼੍ਹੀਵਸੇਨ ਵਾ ਆਮੇਡਿਤਂ. ਘੋਰੋਤਿ ਪਸ੍ਸਨ੍ਤਾਨਂ ਭਯਜਨਕੋ. ਪਭਾਸਵਾਤਿ ਦਾਠਾ ਨਿਕ੍ਖਨ੍ਤਰਂਸਿਪਭਾਸੇਨ ਪਭਾਸਵਾ. ਕਿਂ ਰਵੀਤਿ ਕਿਂ ਵਿਰਵਿ. ਤਵੇਸ ਏਵਰੂਪੋ ਕਕ੍ਖਲ਼ੋ ਸੁਨਖੋ ਕਿਂ ਕਰੋਤਿ, ਕਿਂ ਮਿਗੇ ਗਣ੍ਹਾਤਿ, ਉਦਾਹੁ ਤੇ ਅਮਿਤ੍ਤੇ, ਕਿਂ ਤੇ ਇਮਿਨਾ, ਵਿਸ੍ਸਜ੍ਜੇਹਿ ਨਨ੍ਤਿ ਅਧਿਪ੍ਪਾਯੇਨੇਵਮਾਹ.

ਤਂ ਸੁਤ੍ਵਾ ਸਕ੍ਕੋ ਦੁਤਿਯਂ ਗਾਥਮਾਹ –

੬੨.

‘‘ਨਾਯਂ ਮਿਗਾਨਮਤ੍ਥਾਯ, ਉਸੀਨਕ ਭਵਿਸ੍ਸਤਿ;

ਮਨੁਸ੍ਸਾਨਂ ਅਨਯੋ ਹੁਤ੍ਵਾ, ਤਦਾ ਕਣ੍ਹੋ ਪਮੋਕ੍ਖਤੀ’’ਤਿ.

ਤਸ੍ਸਤ੍ਥੋ – ਅਯਞ੍ਹਿ ‘‘ਮਿਗਮਂਸਂ ਖਾਦਿਸ੍ਸਾਮੀ’’ਤਿ ਇਧ ਨਾਗਤੋ, ਤਸ੍ਮਾ ਮਿਗਾਨਂ ਅਤ੍ਥੋ ਨ ਭਵਿਸ੍ਸਤਿ, ਮਨੁਸ੍ਸਮਂਸਂ ਪਨ ਖਾਦਿਤੁਂ ਆਗਤੋ, ਤਸ੍ਮਾ ਤੇਸਂ ਅਨਯੋ ਮਹਾਵਿਨਾਸਕਾਰਕੋ ਹੁਤ੍ਵਾ ਯਦਾ ਅਨੇਨ ਮਨੁਸ੍ਸਾ ਵਿਨਾਸਂ ਪਾਪਿਤਾ ਭਵਿਸ੍ਸਨ੍ਤਿ, ਤਦਾ ਅਯਂ ਕਣ੍ਹੋ ਪਮੋਕ੍ਖਤਿ, ਮਮ ਹਤ੍ਥਤੋ ਮੁਚ੍ਚਿਸ੍ਸਤੀਤਿ.

ਅਥ ਨਂ ਰਾਜਾ ‘‘ਕਿਂ ਪਨ ਤੇ ਭੋ ਲੁਦ੍ਦਕ-ਸੁਨਖੋ ਸਬ੍ਬੇਸਂਯੇਵ ਮਨੁਸ੍ਸਾਨਂ ਮਂਸਂ ਖਾਦਿਸ੍ਸਤਿ, ਉਦਾਹੁ ਤਵ ਅਮਿਤ੍ਤਾਨਞ੍ਞੇਵਾ’’ਤਿ ਪੁਚ੍ਛਿਤ੍ਵਾ ‘‘ਅਮਿਤ੍ਤਾਨਞ੍ਞੇਵ ਮੇ, ਮਹਾਰਾਜਾ’’ਤਿ ਵੁਤ੍ਤੇ ‘‘ਕੇ ਪਨ ਇਧ ਤੇ ਅਮਿਤ੍ਤਾ’’ਤਿ ਪੁਚ੍ਛਿਤ੍ਵਾ ‘‘ਅਧਮ੍ਮਾਭਿਰਤਾ ਵਿਸਮਚਾਰਿਨੋ, ਮਹਾਰਾਜਾ’’ਤਿ ਵੁਤ੍ਤੇ ‘‘ਕਥੇਹਿ ਤਾਵ ਨੇ ਅਮ੍ਹਾਕ’’ਨ੍ਤਿ ਪੁਚ੍ਛਿ. ਅਥਸ੍ਸ ਕਥੇਨ੍ਤੋ ਦੇਵਰਾਜਾ ਦਸ ਗਾਥਾ ਅਭਾਸਿ –

੬੩.

‘‘ਪਤ੍ਤਹਤ੍ਥਾ ਸਮਣਕਾ, ਮੁਣ੍ਡਾ ਸਙ੍ਘਾਟਿਪਾਰੁਤਾ;

ਨਙ੍ਗਲੇਹਿ ਕਸਿਸ੍ਸਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.

੬੪.

‘‘ਤਪਸ੍ਸਿਨਿਯੋ ਪਬ੍ਬਜਿਤਾ, ਮੁਣ੍ਡਾ ਸਙ੍ਘਾਟਿਪਾਰੁਤਾ;

ਯਦਾ ਲੋਕੇ ਗਮਿਸ੍ਸਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.

੬੫.

‘‘ਦੀਘੋਤ੍ਤਰੋਟ੍ਠਾ ਜਟਿਲਾ, ਪਙ੍ਕਦਨ੍ਤਾ ਰਜਸ੍ਸਿਰਾ;

ਇਣਂ ਚੋਦਾਯ ਗਚ੍ਛਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.

੬੬.

‘‘ਅਧਿਚ੍ਚ ਵੇਦੇ ਸਾਵਿਤ੍ਤਿਂ, ਯਞ੍ਞਤਨ੍ਤਞ੍ਚ ਬ੍ਰਾਹ੍ਮਣਾ;

ਭਤਿਕਾਯ ਯਜਿਸ੍ਸਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.

੬੭.

‘‘ਮਾਤਰਂ ਪਿਤਰਂ ਚਾਪਿ, ਜਿਣ੍ਣਕਂ ਗਤਯੋਬ੍ਬਨਂ;

ਪਹੂ ਸਨ੍ਤੋ ਨ ਭਰਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.

੬੮.

‘‘ਮਾਤਰਂ ਪਿਤਰਂ ਚਾਪਿ, ਜਿਣ੍ਣਕਂ ਗਤਯੋਬ੍ਬਨਂ;

ਬਾਲਾ ਤੁਮ੍ਹੇਤਿ ਵਕ੍ਖਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.

੬੯.

‘‘ਆਚਰਿਯਭਰਿਯਂ ਸਖਿਂ, ਮਾਤੁਲਾਨਿਂ ਪਿਤੁਚ੍ਛਕਿਂ;

ਯਦਾ ਲੋਕੇ ਗਮਿਸ੍ਸਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.

੭੦.

‘‘ਅਸਿਚਮ੍ਮਂ ਗਹੇਤ੍ਵਾਨ, ਖਗ੍ਗਂ ਪਗ੍ਗਯ੍ਹ ਬ੍ਰਾਹ੍ਮਣਾ;

ਪਨ੍ਥਘਾਤਂ ਕਰਿਸ੍ਸਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.

੭੧.

‘‘ਸੁਕ੍ਕਚ੍ਛਵੀ ਵੇਧਵੇਰਾ, ਥੂਲਬਾਹੂ ਅਪਾਤੁਭਾ;

ਮਿਤ੍ਤਭੇਦਂ ਕਰਿਸ੍ਸਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.

੭੨.

‘‘ਮਾਯਾਵਿਨੋ ਨੇਕਤਿਕਾ, ਅਸਪ੍ਪੁਰਿਸਚਿਨ੍ਤਕਾ;

ਯਦਾ ਲੋਕੇ ਭਵਿਸ੍ਸਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤੀ’’ਤਿ.

ਤਤ੍ਥ ਸਮਣਕਾਤਿ ‘‘ਮਯਂ ਸਮਣਾਮ੍ਹਾ’’ਤਿ ਪਟਿਞ੍ਞਾਮਤ੍ਤਕੇਨ ਹੀਲ਼ਿਤਵੋਹਾਰੇਨੇਵਮਾਹ. ਕਸਿਸ੍ਸਨ੍ਤੀਤਿ ਤੇ ਤਦਾਪਿ ਕਸਨ੍ਤਿਯੇਵ. ਅਯਂ ਪਨ ਅਜਾਨਨ੍ਤੋ ਵਿਯ ਏਵਮਾਹ. ਅਯਞ੍ਹਿਸ੍ਸ ਅਧਿਪ੍ਪਾਯੋ – ਏਤੇ ਏਵਰੂਪਾ ਦੁਸ੍ਸੀਲਾ ਮਮ ਅਮਿਤ੍ਤਾ, ਯਦਾ ਮਮ ਸੁਨਖੇਨ ਏਤੇ ਮਾਰੇਤ੍ਵਾ ਮਂਸਂ ਖਾਦਿਤਂ ਭਵਿਸ੍ਸਤਿ, ਤਦਾ ਏਸ ਕਣ੍ਹੋ ਇਤੋ ਪਞ੍ਚਰਜ੍ਜੁਬਨ੍ਧਨਾ ਪਮੋਕ੍ਖਤੀਤਿ. ਇਮਿਨਾ ਉਪਾਯੇਨ ਸਬ੍ਬਗਾਥਾਸੁ ਅਧਿਪ੍ਪਾਯਯੋਜਨਾ ਵੇਦਿਤਬ੍ਬਾ.

ਪਬ੍ਬਜਿਤਾਤਿ ਬੁਦ੍ਧਸਾਸਨੇ ਪਬ੍ਬਜਿਤਾ. ਗਮਿਸ੍ਸਨ੍ਤੀਤਿ ਅਗਾਰਮਜ੍ਝੇ ਪਞ੍ਚ ਕਾਮਗੁਣੇ ਪਰਿਭੁਞ੍ਜਨ੍ਤਿਯੋ ਵਿਚਰਿਸ੍ਸਨ੍ਤਿ. ਦੀਘੋਤ੍ਤਰੋਟ੍ਠਾਤਿ ਦਾਠਿਕਾਨਂ ਵਡ੍ਢਿਤਤ੍ਤਾ ਦੀਘੁਤ੍ਤਰੋਟ੍ਠਾ. ਪਙ੍ਕਦਨ੍ਤਾਤਿ ਪਙ੍ਕੇਨ ਮਲੇਨ ਸਮਨ੍ਨਾਗਤਦਨ੍ਤਾ. ਇਣਂ ਚੋਦਾਯਾਤਿ ਭਿਕ੍ਖਾਚਰਿਯਾਯ ਧਨਂ ਸਂਹਰਿਤ੍ਵਾ ਵਡ੍ਢਿਯਾ ਇਣਂ ਪਯੋਜੇਤ੍ਵਾ ਤਂ ਚੋਦੇਤ੍ਵਾ ਤਤੋ ਲਦ੍ਧੇਨ ਜੀਵਿਕਂ ਕਪ੍ਪੇਨ੍ਤਾ ਯਦਾ ਗਚ੍ਛਨ੍ਤੀਤਿ ਅਤ੍ਥੋ.

ਸਾਵਿਤ੍ਤਿਨ੍ਤਿ ਸਾਵਿਤ੍ਤਿਞ੍ਚ ਅਧਿਯਿਤ੍ਵਾ. ਯਞ੍ਞਤਨ੍ਤਞ੍ਚਾਤਿ ਯਞ੍ਞਵਿਧਾਯਕਤਨ੍ਤਂ, ਯਞ੍ਞਂ ਅਧਿਯਿਤ੍ਵਾਤਿ ਅਤ੍ਥੋ. ਭਤਿਕਾਯਾਤਿ ਤੇ ਤੇ ਰਾਜਰਾਜਮਹਾਮਤ੍ਤੇ ਉਪਸਙ੍ਕਮਿਤ੍ਵਾ ‘‘ਤੁਮ੍ਹਾਕਂ ਯਞ੍ਞਂ ਯਜਿਸ੍ਸਾਮ, ਧਨਂ ਦੇਥਾ’’ਤਿ ਏਵਂ ਭਤਿਅਤ੍ਥਾਯ ਯਦਾ ਯਞ੍ਞਂ ਯਜਿਸ੍ਸਨ੍ਤਿ. ਪਹੂ ਸਨ੍ਤੋਤਿ ਭਰਿਤੁਂ ਪੋਸੇਤੁਂ ਸਮਤ੍ਥਾ ਸਮਾਨਾ. ਬਾਲਾ ਤੁਮ੍ਹੇਤਿ ਤੁਮ੍ਹੇ ਬਾਲਾ ਨ ਕਿਞ੍ਚਿ ਜਾਨਾਥਾਤਿ ਯਦਾ ਵਕ੍ਖਨ੍ਤਿ. ਗਮਿਸ੍ਸਨ੍ਤੀਤਿ ਲੋਕਧਮ੍ਮਸੇਵਨਵਸੇਨ ਗਮਿਸ੍ਸਨ੍ਤਿ. ਪਨ੍ਥਘਾਤਨ੍ਤਿ ਪਨ੍ਥੇ ਠਤ੍ਵਾ ਮਨੁਸ੍ਸੇ ਮਾਰੇਤ੍ਵਾ ਤੇਸਂ ਭਣ੍ਡਗ੍ਗਹਣਂ.

ਸੁਕ੍ਕਚ੍ਛਵੀਤਿ ਕਸਾਵਚੁਣ੍ਣਾਦਿਘਂਸਨੇਨ ਸਮੁਟ੍ਠਾਪਿਤਸੁਕ੍ਕਚ੍ਛਵਿਵਣ੍ਣਾ. ਵੇਧਵੇਰਾਤਿ ਵਿਧਵਾ ਅਪਤਿਕਾ, ਤਾਹਿ ਵਿਧਵਾਹਿ ਵੇਰਂ ਚਰਨ੍ਤੀਤਿ ਵੇਧਵੇਰਾ. ਥੂਲਬਾਹੂਤਿ ਪਾਦਪਰਿਮਦ੍ਦਨਾਦੀਹਿ ਸਮੁਟ੍ਠਾਪਿਤਮਂਸਤਾਯ ਮਹਾਬਾਹੂ. ਅਪਾਤੁਭਾਤਿ ਅਪਾਤੁਭਾਵਾ, ਧਨੁਪ੍ਪਾਦਰਹਿਤਾਤਿ ਅਤ੍ਥੋ. ਮਿਤ੍ਤਭੇਦਨ੍ਤਿ ਮਿਥੁਭੇਦਂ, ਅਯਮੇਵ ਵਾ ਪਾਠੋ. ਇਦਂ ਵੁਤ੍ਤਂ ਹੋਤਿ – ਯਦਾ ਏਵਰੂਪਾ ਇਤ੍ਥਿਧੁਤ੍ਤਾ ‘‘ਇਮਾ ਅਮ੍ਹੇ ਨ ਜਹਿਸ੍ਸਨ੍ਤੀ’’ਤਿ ਸਹਿਰਞ੍ਞਾ ਵਿਧਵਾ ਉਪਗਨ੍ਤ੍ਵਾ ਸਂਵਾਸਂ ਕਪ੍ਪੇਤ੍ਵਾ ਤਾਸਂ ਸਨ੍ਤਕਂ ਖਾਦਿਤ੍ਵਾ ਤਾਹਿ ਸਦ੍ਧਿਂ ਮਿਤ੍ਤਭੇਦਂ ਕਰਿਸ੍ਸਨ੍ਤਿ, ਵਿਸ੍ਸਾਸਂ ਭਿਨ੍ਦਿਤ੍ਵਾ ਅਞ੍ਞਂ ਸਹਿਰਞ੍ਞਂ ਗਮਿਸ੍ਸਨ੍ਤਿ, ਤਦਾ ਏਸ ਤੇ ਚੋਰੇ ਸਬ੍ਬੇਵ ਖਾਦਿਤ੍ਵਾ ਮੁਚ੍ਚਿਸ੍ਸਤਿ. ਅਸਪ੍ਪੁਰਿਸਚਿਨ੍ਤਕਾਤਿ ਅਸਪ੍ਪੁਰਿਸਚਿਤ੍ਤੇਹਿ ਪਰਦੁਕ੍ਖਚਿਨ੍ਤਨਸੀਲਾ. ਤਦਾਤਿ ਤਦਾ ਸਬ੍ਬੇਪਿਮੇ ਘਾਤੇਤ੍ਵਾ ਖਾਦਿਤਮਂਸੋ ਕਣ੍ਹੋ ਪਮੋਕ੍ਖਤੀਤਿ.

ਏਵਞ੍ਚ ਪਨ ਵਤ੍ਵਾ ‘‘ਇਮੇ ਮਯ੍ਹਂ, ਮਹਾਰਾਜ, ਅਮਿਤ੍ਤਾ’’ਤਿ ਤੇ ਤੇ ਅਧਮ੍ਮਕਾਰਕੇ ਪਕ੍ਖਨ੍ਦਿਤ੍ਵਾ ਖਾਦਿਤੁਕਾਮਤਂ ਵਿਯ ਕਤ੍ਵਾ ਦਸ੍ਸੇਤਿ. ਸੋ ਤਤੋ ਮਹਾਜਨਸ੍ਸ ਉਤ੍ਰਸ੍ਤਕਾਲੇ ਸੁਨਖਂ ਰਜ੍ਜੁਯਾ ਆਕਡ੍ਢਿਤ੍ਵਾ ਠਪਿਤਂ ਵਿਯ ਕਤ੍ਵਾ ਲੁਦ੍ਦਕਵੇਸਂ ਵਿਜਹਿਤ੍ਵਾ ਅਤ੍ਤਨੋ ਆਨੁਭਾਵੇਨ ਆਕਾਸੇ ਜਲਮਾਨੋ ਠਤ੍ਵਾ ‘‘ਮਹਾਰਾਜ, ਅਹਂ ਸਕ੍ਕੋ ਦੇਵਰਾਜਾ, ‘ਅਯਂ ਲੋਕੋ ਵਿਨਸ੍ਸਤੀ’ਤਿ ਆਗਤੋ, ਪਮਤ੍ਤਾ ਹਿ ਮਹਾਜਨਾ, ਅਧਮ੍ਮਂ ਵਤ੍ਤਿਤ੍ਵਾ ਮਤਮਤਾ ਸਮ੍ਪਤਿ ਅਪਾਯੇ ਪੂਰੇਨ੍ਤਿ, ਦੇਵਲੋਕੋ ਤੁਚ੍ਛੋ ਵਿਯ ਵਿਤੋ, ਇਤੋ ਪਟ੍ਠਾਯ ਅਧਮ੍ਮਿਕੇਸੁ ਕਤ੍ਤਬ੍ਬਂ ਅਹਂ ਜਾਨਿਸ੍ਸਾਮਿ, ਤ੍ਵਂ ਅਪ੍ਪਮਤ੍ਤੋ ਹੋਹਿ, ਮਹਾਰਾਜਾ’’ਤਿ ਚਤੂਹਿ ਸਤਾਰਹਗਾਥਾਹਿ ਧਮ੍ਮਂ ਦੇਸੇਤ੍ਵਾ ਮਨੁਸ੍ਸਾਨਂ ਦਾਨਸੀਲੇਸੁ ਪਤਿਟ੍ਠਾਪੇਤ੍ਵਾ ਓਸਕ੍ਕਿਤਸਾਸਨਂ ਅਞ੍ਞਂ ਵਸ੍ਸਸਹਸ੍ਸਂ ਪਵਤ੍ਤਨਸਮਤ੍ਥਂ ਕਤ੍ਵਾ ਮਾਤਲਿਂ ਆਦਾਯ ਸਕਟ੍ਠਾਨਮੇਵ ਗਤੋ. ਮਹਾਜਨਾ ਦਾਨਸੀਲਾਦੀਨਿ ਪੁਞ੍ਞਾਨਿ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਂਸੁ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਭਿਕ੍ਖਵੇ ਪੁਬ੍ਬੇਪਾਹਂ ਲੋਕਸ੍ਸ ਅਤ੍ਥਮੇਵ ਚਰਾਮੀ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਾਤਲਿ ਆਨਨ੍ਦੋ ਅਹੋਸਿ, ਸਕ੍ਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਹਾਕਣ੍ਹਜਾਤਕਵਣ੍ਣਨਾ ਛਟ੍ਠਾ.

[੪੭੦] ੭. ਕੋਸਿਯਜਾਤਕਵਣ੍ਣਨਾ

੭੩-੯੩. ਕੋਸਿਯਜਾਤਕਂ ਸੁਧਾਭੋਜਨਜਾਤਕੇ (ਜਾ. ੨.੨੧.੧੯੨ ਆਦਯੋ) ਆਵਿ ਭਵਿਸ੍ਸਤਿ.

ਕੋਸਿਯਜਾਤਕਵਣ੍ਣਨਾ ਸਤ੍ਤਮਾ.

[੪੭੧] ੮. ਮੇਣ੍ਡਕਪਞ੍ਹਜਾਤਕਵਣ੍ਣਨਾ

੯੪-੧੦੫. ਮੇਣ੍ਡਕਪਞ੍ਹਜਾਤਕਂ ਉਮਙ੍ਗਜਾਤਕੇ (ਜਾ. ੨.੨੨.੫੯੦ ਆਦਯੋ) ਆਵਿ ਭਵਿਸ੍ਸਤਿ.

ਮੇਣ੍ਡਕਪਞ੍ਹਜਾਤਕਵਣ੍ਣਨਾ ਅਟ੍ਠਮਾ.

[੪੭੨] ੯. ਮਹਾਪਦੁਮਜਾਤਕਵਣ੍ਣਨਾ

ਨਾਦਟ੍ਠਾ ਪਰਤੋ ਦੋਸਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਚਿਞ੍ਚਮਾਣਵਿਕਂ ਆਰਬ੍ਭ ਕਥੇਸਿ. ਪਠਮਬੋਧਿਯਞ੍ਹਿ ਦਸਬਲਸ੍ਸ ਪੁਥੁਭੂਤੇਸੁ ਸਾਵਕੇਸੁ ਅਪਰਿਮਾਣੇਸੁ ਦੇਵਮਨੁਸ੍ਸੇਸੁ ਅਰਿਯਭੂਮਿਂ ਓਕ੍ਕਨ੍ਤੇਸੁ ਪਤ੍ਥਟੇਸੁ ਗੁਣਸਮੁਦਯੇਸੁ ਮਹਾਲਾਭਸਕ੍ਕਾਰੋ ਉਦਪਾਦਿ. ਤਿਤ੍ਥਿਯਾ ਸੂਰਿਯੁਗ੍ਗਮਨੇ ਖਜ੍ਜੋਪਨਕਸਦਿਸਾ ਅਹੇਸੁਂ ਹਤਲਾਭਸਕ੍ਕਾਰਾ. ਤੇ ਅਨ੍ਤਰਵੀਥਿਯਂ ਠਤ੍ਵਾ ‘‘ਕਿਂ ਸਮਣੋ ਗੋਤਮੋਵ ਬੁਦ੍ਧੋ, ਮਯਮ੍ਪਿ ਬੁਦ੍ਧਾ, ਕਿਂ ਤਸ੍ਸੇਵ ਦਿਨ੍ਨਂ ਮਹਪ੍ਫਲਂ, ਅਮ੍ਹਾਕਮ੍ਪਿ ਦਿਨ੍ਨਂ ਮਹਪ੍ਫਲਮੇਵ, ਅਮ੍ਹਾਕਮ੍ਪਿ ਦੇਥ ਕਰੋਥਾ’’ਤਿ ਏਵਂ ਮਨੁਸ੍ਸੇ ਵਿਞ੍ਞਾਪੇਨ੍ਤਾਪਿ ਲਾਭਸਕ੍ਕਾਰਂ ਅਲਭਨ੍ਤਾ ਰਹੋ ਸਨ੍ਨਿਪਤਿਤ੍ਵਾ ‘‘ਕੇਨ ਨੁ ਖੋ ਉਪਾਯੇਨ ਸਮਣਸ੍ਸ ਗੋਤਮਸ੍ਸ ਮਨੁਸ੍ਸਾਨਂ ਅਨ੍ਤਰੇ ਅਵਣ੍ਣਂ ਉਪ੍ਪਾਦੇਤ੍ਵਾ ਲਾਭਸਕ੍ਕਾਰਂ ਨਾਸੇਯ੍ਯਾਮਾ’’ਤਿ ਮਨ੍ਤਯਿਂਸੁ. ਤਦਾ ਸਾਵਤ੍ਥਿਯਂ ਚਿਞ੍ਚਮਾਣਵਿਕਾ ਨਾਮੇਕਾ ਪਰਿਬ੍ਬਾਜਿਕਾ ਉਤ੍ਤਮਰੂਪਧਰਾ ਸੋਭਗ੍ਗਪ੍ਪਤ੍ਤਾ ਦੇਵਚ੍ਛਰਾ ਵਿਯ. ਤਸ੍ਸਾ ਸਰੀਰਤੋ ਰਸ੍ਮਿਯੋ ਨਿਚ੍ਛਰਨ੍ਤਿ. ਅਥੇਕੋ ਖਰਮਨ੍ਤੀ ਏਵਮਾਹ – ‘‘ਚਿਞ੍ਚਮਾਣਵਿਕਂ ਪਟਿਚ੍ਚ ਸਮਣਸ੍ਸ ਗੋਤਮਸ੍ਸ ਅਵਣ੍ਣਂ ਉਪ੍ਪਾਦੇਤ੍ਵਾ ਲਾਭਸਕ੍ਕਾਰਂ ਨਾਸੇਸ੍ਸਾਮਾ’’ਤਿ. ਤੇ ‘‘ਅਤ੍ਥੇਸੋ ਉਪਾਯੋ’’ਤਿ ਸਮ੍ਪਟਿਚ੍ਛਿਂਸੁ. ਅਥ ਸਾ ਤਿਤ੍ਥਿਯਾਰਾਮਂ ਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ, ਤਿਤ੍ਥਿਯਾ ਤਾਯ ਸਦ੍ਧਿਂ ਨ ਕਥੇਸੁਂ. ਸਾ ‘‘ਕੋ ਨੁ ਖੋ ਮੇ ਦੋਸੋ’’ਤਿ ਯਾਵਤਤਿਯਂ ‘‘ਵਨ੍ਦਾਮਿ ਅਯ੍ਯਾ’’ਤਿ ਵਤ੍ਵਾ ‘‘ਅਯ੍ਯਾ, ਕੋ ਨੁ ਖੋ ਮੇ ਦੋਸੋ, ਕਿਂ ਮਯਾ ਸਦ੍ਧਿਂ ਨ ਕਥੇਥਾ’’ਤਿ ਆਹ. ‘‘ਭਗਿਨਿ, ਸਮਣਂ ਗੋਤਮਂ ਅਮ੍ਹੇ ਵਿਹੇਠੇਨ੍ਤਂ ਹਤਲਾਭਸਕ੍ਕਾਰੇ ਕਤ੍ਵਾ ਵਿਚਰਨ੍ਤਂ ਨ ਜਾਨਾਸੀ’’ਤਿ. ‘‘ਨਾਹਂ ਜਾਨਾਮਿ ਅਯ੍ਯਾ, ਮਯਾ ਕਿਂ ਪਨੇਤ੍ਥ ਕਤ੍ਤਬ੍ਬਨ੍ਤਿ. ਸਚੇ ਤ੍ਵਂ ਭਗਿਨਿ, ਅਮ੍ਹਾਕਂ ਸੁਖਮਿਚ੍ਛਸਿ, ਅਤ੍ਤਾਨਂ ਪਟਿਚ੍ਚ ਸਮਣਸ੍ਸ ਗੋਤਮਸ੍ਸ ਅਵਣ੍ਣਂ ਉਪ੍ਪਾਦੇਤ੍ਵਾ ਲਾਭਸਕ੍ਕਾਰਂ ਨਾਸੇਹੀ’’ਤਿ.

ਸਾ ‘‘ਸਾਧੁ ਅਯ੍ਯਾ, ਮਯ੍ਹਮੇਵੇਸੋ ਭਾਰੋ, ਮਾ ਚਿਨ੍ਤਯਿਤ੍ਥਾ’’ਤਿ ਵਤ੍ਵਾ ਪਕ੍ਕਮਿਤ੍ਵਾ ਇਤ੍ਥਿਮਾਯਾਸੁ ਕੁਸਲਤਾਯ ਤਤੋ ਪਟ੍ਠਾਯ ਸਾਵਤ੍ਥਿਵਾਸੀਨਂ ਧਮ੍ਮਕਥਂ ਸੁਤ੍ਵਾ ਜੇਤਵਨਾ ਨਿਕ੍ਖਮਨਸਮਯੇ ਇਨ੍ਦਗੋਪਕਵਣ੍ਣਂ ਪਟਂ ਪਾਰੁਪਿਤ੍ਵਾ ਗਨ੍ਧਮਾਲਾਦਿਹਤ੍ਥਾ ਜੇਤਵਨਾਭਿਮੁਖੀ ਗਚ੍ਛਨ੍ਤੀ ‘‘ਇਮਾਯ ਵੇਲਾਯ ਕੁਹਿਂ ਗਚ੍ਛਸੀ’’ਤਿ ਵੁਤ੍ਤੇ ‘‘ਕਿਂ ਤੁਮ੍ਹਾਕਂ ਮਮ ਗਮਨਟ੍ਠਾਨੇਨਾ’’ਤਿ ਵਤ੍ਵਾ ਜੇਤਵਨਸਮੀਪੇ ਤਿਤ੍ਥਿਯਾਰਾਮੇ ਵਸਿਤ੍ਵਾ ਪਾਤੋਵ ‘‘ਅਗ੍ਗਵਨ੍ਦਨਂ ਵਨ੍ਦਿਸ੍ਸਾਮਾ’’ਤਿ ਨਗਰਾ ਨਿਕ੍ਖਮਨ੍ਤੇ ਉਪਾਸਕਜਨੇ ਜੇਤਵਨੇ ਵੁਤ੍ਥਾ ਵਿਯ ਹੁਤ੍ਵਾ ਨਗਰਂ ਪਵਿਸਤਿ. ‘‘ਕੁਹਿਂ ਵੁਤ੍ਥਾਸੀ’’ਤਿ ਵੁਤ੍ਤੇ ‘‘ਕਿਂ ਤੁਮ੍ਹਾਕਂ ਮਮ ਵੁਤ੍ਥਟ੍ਠਾਨੇਨਾ’’ਤਿ ਵਤ੍ਵਾ ਮਾਸਡ੍ਢਮਾਸਚ੍ਚਯੇਨ ਪੁਚ੍ਛਿਯਮਾਨਾ ‘‘ਜੇਤਵਨੇ ਸਮਣੇਨ ਗੋਤਮੇਨ ਸਦ੍ਧਿਂ ਏਕਗਨ੍ਧਕੁਟਿਯਾ ਵੁਤ੍ਥਾਮ੍ਹੀ’’ਤਿ ਆਹ. ਪੁਥੁਜ੍ਜਨਾਨਂ ‘‘ਸਚ੍ਚਂ ਨੁ ਖੋ ਏਤਂ, ਨੋ’’ਤਿ ਕਙ੍ਖਂ ਉਪ੍ਪਾਦੇਤ੍ਵਾ ਤੇਮਾਸਚਤੁਮਾਸਚ੍ਚਯੇਨ ਪਿਲੋਤਿਕਾਹਿ ਉਦਰਂ ਵੇਠੇਤ੍ਵਾ ਗਬ੍ਭਿਨਿਵਣ੍ਣਂ ਦਸ੍ਸੇਤ੍ਵਾ ਉਪਰਿ ਰਤ੍ਤਪਟਂ ਪਾਰੁਪਿਤ੍ਵਾ ‘‘ਸਮਣਂ ਗੋਤਮਂ ਪਟਿਚ੍ਚ ਗਬ੍ਭੋ ਮੇ ਲਦ੍ਧੋ’’ਤਿ ਅਨ੍ਧਬਾਲੇ ਗਾਹਾਪੇਤ੍ਵਾ ਅਟ੍ਠਨਵਮਾਸਚ੍ਚਯੇਨ ਉਦਰੇ ਦਾਰੁਮਣ੍ਡਲਿਕਂ ਬਨ੍ਧਿਤ੍ਵਾ ਉਪਰਿ ਰਤ੍ਤਪਟਂ ਪਾਰੁਪਿਤ੍ਵਾ ਹਤ੍ਥਪਾਦਪਿਟ੍ਠਿਯੋ ਗੋਹਨੁਕੇਨ ਕੋਟ੍ਟਾਪੇਤ੍ਵਾ ਉਸ੍ਸਦੇ ਦਸ੍ਸੇਤ੍ਵਾ ਕਿਲਨ੍ਤਿਨ੍ਦ੍ਰਿਯਾ ਹੁਤ੍ਵਾ ਸਾਯਨ੍ਹਸਮਯੇ ਤਥਾਗਤੇ ਅਲਙ੍ਕਤਧਮ੍ਮਾਸਨੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਨ੍ਤੇ ਧਮ੍ਮਸਭਂ ਗਨ੍ਤ੍ਵਾ ਤਥਾਗਤਸ੍ਸ ਪੁਰਤੋ ਠਤ੍ਵਾ ‘‘ਮਹਾਸਮਣ, ਮਹਾਜਨਸ੍ਸ ਤਾਵ ਧਮ੍ਮਂ ਦੇਸੇਸਿ, ਮਧੁਰੋ ਤੇ ਸਦ੍ਦੋ, ਸੁਫੁਸਿਤਂ ਦਨ੍ਤਾਵਰਣਂ, ਅਹਂ ਪਨ ਤਂ ਪਟਿਚ੍ਚ ਗਬ੍ਭਂ ਲਭਿਤ੍ਵਾ ਪਰਿਪੁਣ੍ਣਗਬ੍ਭਾ ਜਾਤਾ, ਨੇਵ ਮੇ ਸੂਤਿਘਰਂ ਜਾਨਾਸਿ, ਨ ਸਪ੍ਪਿਤੇਲਾਦੀਨਿ, ਸਯਂ ਅਕਰੋਨ੍ਤੋ ਉਪਟ੍ਠਾਕਾਨਮ੍ਪਿ ਅਞ੍ਞਤਰਂ ਕੋਸਲਰਾਜਾਨਂ ਵਾ ਅਨਾਥਪਿਣ੍ਡਿਕਂ ਵਾ ਵਿਸਾਖਂ ਉਪਾਸਿਕਂ ਵਾ ‘‘ਇਮਿਸ੍ਸਾ ਚਿਞ੍ਚਮਾਣਵਿਕਾਯ ਕਤ੍ਤਬ੍ਬਯੁਤ੍ਤਂ ਕਰੋਹੀ’ਤਿ ਨ ਵਦਸਿ, ਅਭਿਰਮਿਤੁਂਯੇਵ ਜਾਨਾਸਿ, ਗਬ੍ਭਪਰਿਹਾਰਂ ਨ ਜਾਨਾਸੀ’’ਤਿ ਗੂਥਪਿਣ੍ਡਂ ਗਹੇਤ੍ਵਾ ਚਨ੍ਦਮਣ੍ਡਲਂ ਦੂਸੇਤੁਂ ਵਾਯਮਨ੍ਤੀ ਵਿਯ ਪਰਿਸਮਜ੍ਝੇ ਤਥਾਗਤਂ ਅਕ੍ਕੋਸਿ. ਤਥਾਗਤੋ ਧਮ੍ਮਕਥਂ ਠਪੇਤ੍ਵਾ ਸੀਹੋ ਵਿਯ ਅਭਿਨਦਨ੍ਤੋ ‘‘ਭਗਿਨਿ, ਤਯਾ ਕਥਿਤਸ੍ਸ ਤਥਭਾਵਂ ਵਾ ਅਤਥਭਾਵਂ ਵਾ ਅਹਞ੍ਚੇਵ ਤ੍ਵਞ੍ਚ ਜਾਨਾਮਾ’’ਤਿ ਆਹ. ਆਮ, ਸਮਣ, ਤਯਾ ਚ ਮਯਾ ਚ ਞਾਤਭਾਵੇਨੇਤਂ ਜਾਤਨ੍ਤਿ.

ਤਸ੍ਮਿਂ ਖਣੇ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਸੋ ਆਵਜ੍ਜਮਾਨੋ ‘‘ਚਿਞ੍ਚਮਾਣਵਿਕਾ ਤਥਾਗਤਂ ਅਭੂਤੇਨ ਅਕ੍ਕੋਸਤੀ’’ਤਿ ਞਤ੍ਵਾ ‘‘ਇਮਂ ਵਤ੍ਥੁਂ ਸੋਧੇਸ੍ਸਾਮੀ’’ਤਿ ਚਤੂਹਿ ਦੇਵਪੁਤ੍ਤੇਹਿ ਸਦ੍ਧਿਂ ਆਗਮਿ. ਦੇਵਪੁਤ੍ਤਾ ਮੂਸਿਕਪੋਤਕਾ ਹੁਤ੍ਵਾ ਦਾਰੁਮਣ੍ਡਲਿਕਸ੍ਸ ਬਨ੍ਧਨਰਜ੍ਜੁਕੇ ਏਕਪ੍ਪਹਾਰੇਨੇਵ ਛਿਨ੍ਦਿਂਸੁ, ਪਾਰੁਤਪਟਂ ਵਾਤੋ ਉਕ੍ਖਿਪਿ, ਦਾਰੁਮਣ੍ਡਲਿਕਂ ਪਤਮਾਨਂ ਤਸ੍ਸਾ ਪਾਦਪਿਟ੍ਠਿਯਂ ਪਤਿ, ਉਭੋ ਅਗ੍ਗਪਾਦਾ ਛਿਜ੍ਜਿਂਸੁ. ਮਨੁਸ੍ਸਾ ਉਟ੍ਠਾਯ ‘‘ਕਾਲ਼ਕਣ੍ਣਿ, ਸਮ੍ਮਾਸਮ੍ਬੁਦ੍ਧਂ ਅਕ੍ਕੋਸਸੀ’’ਤਿ ਸੀਸੇ ਖੇਲ਼ਂ ਪਾਤੇਤ੍ਵਾ ਲੇਡ੍ਡੁਦਣ੍ਡਾਦਿਹਤ੍ਥਾ ਜੇਤਵਨਾ ਨੀਹਰਿਂਸੁ. ਅਥਸ੍ਸਾ ਤਥਾਗਤਸ੍ਸ ਚਕ੍ਖੁਪਥਂ ਅਤਿਕ੍ਕਨ੍ਤਕਾਲੇ ਮਹਾਪਥਵੀ ਭਿਜ੍ਜਿਤ੍ਵਾ ਵਿਵਰਮਦਾਸਿ, ਅਵੀਚਿਤੋ ਅਗ੍ਗਿਜਾਲਾ ਉਟ੍ਠਹਿ. ਸਾ ਕੁਲਦਤ੍ਤਿਯਂ ਕਮ੍ਬਲਂ ਪਾਰੁਪਮਾਨਾ ਵਿਯ ਗਨ੍ਤ੍ਵਾ ਅਵੀਚਿਮ੍ਹਿ ਨਿਬ੍ਬਤ੍ਤਿ. ਅਞ੍ਞਤਿਤ੍ਥਿਯਾਨਂ ਲਾਭਸਕ੍ਕਾਰੋ ਪਰਿਹਾਯਿ, ਦਸਬਲਸ੍ਸ ਭਿਯ੍ਯੋਸੋਮਤ੍ਤਾਯ ਵਡ੍ਢਿ. ਪੁਨਦਿਵਸੇ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਚਿਞ੍ਚਮਾਣਵਿਕਾ ਏਵਂ ਉਲ਼ਾਰਗੁਣਂ ਅਗ੍ਗਦਕ੍ਖਿਣੇਯ੍ਯਂ ਸਮ੍ਮਾਸਮ੍ਬੁਦ੍ਧਂ ਅਭੂਤੇਨ ਅਕ੍ਕੋਸਿਤ੍ਵਾ ਮਹਾਵਿਨਾਸਂ ਪਤ੍ਤਾ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਏਸਾ ਮਂ ਅਭੂਤੇਨ ਅਕ੍ਕੋਸਿਤ੍ਵਾ ਮਹਾਵਿਨਾਸਂ ਪਤ੍ਤਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ਫੁਲ੍ਲਪਦੁਮਸਸ੍ਸਿਰਿਕਮੁਖਤ੍ਤਾ ਪਨਸ੍ਸ ‘‘ਪਦੁਮਕੁਮਾਰੋ’’ਤ੍ਵੇਵ ਨਾਮਂ ਕਰਿਂਸੁ. ਸੋ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਗਨ੍ਤ੍ਵਾ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਆਗਮਿ. ਅਥਸ੍ਸ ਮਾਤਾ ਕਾਲਮਕਾਸਿ. ਰਾਜਾ ਅਞ੍ਞਂ ਅਗ੍ਗਮਹੇਸਿਂ ਕਤ੍ਵਾ ਪੁਤ੍ਤਸ੍ਸ ਉਪਰਜ੍ਜਂ ਅਦਾਸਿ. ਅਪਰਭਾਗੇ ਰਾਜਾ ਪਚ੍ਚਨ੍ਤਂ ਕੁਪਿਤਂ ਵੂਪਸਮੇਤੁਂ ਅਗ੍ਗਮਹੇਸਿਂ ਆਹ ‘‘ਭਦ੍ਦੇ, ਇਧੇਵ ਵਸ, ਅਹਂ ਪਚ੍ਚਨ੍ਤਂ ਕੁਪਿਤਂ ਵੂਪਸਮੇਤੁਂ ਗਚ੍ਛਾਮੀ’’ਤਿ ਵਤ੍ਵਾ ‘‘ਨਾਹਂ ਇਧੇਵ ਵਸਿਸ੍ਸਾਮਿ, ਅਹਮ੍ਪਿ ਗਮਿਸ੍ਸਾਮੀ’’ਤਿ ਵੁਤ੍ਤੇ ਯੁਦ੍ਧਭੂਮਿਯਾ ਆਦੀਨਵਂ ਦਸ੍ਸੇਤ੍ਵਾ ‘‘ਯਾਵ ਮਮਾਗਮਨਾ ਅਨੁਕ੍ਕਣ੍ਠਮਾਨਾ ਵਸ, ਅਹਂ ਪਦੁਮਕੁਮਾਰਂ ਯਥਾ ਤਵ ਕਤ੍ਤਬ੍ਬਕਿਚ੍ਚੇਸੁ ਅਪ੍ਪਮਤ੍ਤੋ ਹੋਤਿ, ਏਵਂ ਆਣਾਪੇਤ੍ਵਾ ਗਮਿਸ੍ਸਾਮੀ’’ਤਿ ਵਤ੍ਵਾ ਤਥਾ ਕਤ੍ਵਾ ਗਨ੍ਤ੍ਵਾ ਪਚ੍ਚਾਮਿਤ੍ਤੇ ਪਲਾਪੇਤ੍ਵਾ ਜਨਪਦਂ ਸਨ੍ਤਪ੍ਪੇਤ੍ਵਾ ਪਚ੍ਚਾਗਨ੍ਤ੍ਵਾ ਬਹਿਨਗਰੇ ਖਨ੍ਧਾਵਾਰਂ ਨਿਵਾਸੇਸਿ. ਬੋਧਿਸਤ੍ਤੋ ਪਿਤੁ ਆਗਤਭਾਵਂ ਞਤ੍ਵਾ ਨਗਰਂ ਅਲਙ੍ਕਾਰਾਪੇਤ੍ਵਾ ਰਾਜਗੇਹਂ ਪਟਿਜਗ੍ਗਾਪੇਤ੍ਵਾ ਏਕਕੋਵ ਤਸ੍ਸਾ ਸਨ੍ਤਿਕਂ ਅਗਮਾਸਿ.

ਸਾ ਤਸ੍ਸ ਰੂਪਸਮ੍ਪਤ੍ਤਿਂ ਦਿਸ੍ਵਾ ਪਟਿਬਦ੍ਧਚਿਤ੍ਤਾ ਅਹੋਸਿ. ਬੋਧਿਸਤ੍ਤੋ ਤਂ ਵਨ੍ਦਿਤ੍ਵਾ ‘‘ਅਮ੍ਮ, ਕਿਂ ਅਮ੍ਹਾਕਂ ਕਤ੍ਤਬ੍ਬ’’ਨ੍ਤਿ ਪੁਚ੍ਛਿ. ਅਥ ਨਂ ‘‘ਅਮ੍ਮਾਤਿ ਮਂ ਵਦਸੀ’’ਤਿ ਉਟ੍ਠਾਯ ਹਤ੍ਥੇ ਗਹੇਤ੍ਵਾ ‘‘ਸਯਨਂ ਅਭਿਰੁਹਾ’’ਤਿ ਆਹ. ‘‘ਕਿਂਕਾਰਣਾ’’ਤਿ? ‘‘ਯਾਵ ਰਾਜਾ ਨ ਆਗਚ੍ਛਤਿ, ਤਾਵ ਉਭੋਪਿ ਕਿਲੇਸਰਤਿਯਾ ਰਮਿਸ੍ਸਾਮਾ’’ਤਿ. ‘‘ਅਮ੍ਮ, ਤ੍ਵਂ ਮਮ ਮਾਤਾ ਚ ਸਸਾਮਿਕਾ ਚ, ਮਯਾ ਸਪਰਿਗ੍ਗਹੋ ਮਾਤੁਗਾਮੋ ਨਾਮ ਕਿਲੇਸਵਸੇਨ ਇਨ੍ਦ੍ਰਿਯਾਨਿ ਭਿਨ੍ਦਿਤ੍ਵਾ ਨ ਓਲੋਕਿਤਪੁਬ੍ਬੋ, ਕਥਂ ਤਯਾ ਸਦ੍ਧਿਂ ਏਵਰੂਪਂ ਕਿਲਿਟ੍ਠਕਮ੍ਮਂ ਕਰਿਸ੍ਸਾਮੀ’’ਤਿ. ਸਾ ਦ੍ਵੇ ਤਯੋ ਵਾਰੇ ਕਥੇਤ੍ਵਾ ਤਸ੍ਮਿਂ ਅਨਿਚ੍ਛਮਾਨੇ ‘‘ਮਮ ਵਚਨਂ ਨ ਕਰੋਸੀ’’ਤਿ ਆਹ. ‘‘ਆਮ, ਨ ਕਰੋਮੀ’’ਤਿ. ‘‘ਤੇਨ ਹਿ ਰਞ੍ਞੋ ਕਥੇਤ੍ਵਾ ਸੀਸਂ ਤੇ ਛਿਨ੍ਦਾਪੇਸ੍ਸਾਮੀ’’ਤਿ. ਮਹਾਸਤ੍ਤੋ ‘‘ਤਵ ਰੁਚਿਂ ਕਰੋਹੀ’’ਤਿ ਵਤ੍ਵਾ ਤਂ ਲਜ੍ਜਾਪੇਤ੍ਵਾ ਪਕ੍ਕਾਮਿ.

ਸਾ ਭੀਤਤਸਿਤਾ ਚਿਨ੍ਤੇਸਿ ‘‘ਸਚੇ ਅਯਂ ਪਠਮਂ ਪਿਤੁ ਆਰੋਚੇਸ੍ਸਤਿ, ਜੀਵਿਤਂ ਮੇ ਨਤ੍ਥਿ, ਅਹਮੇਵ ਪੁਰੇਤਰਂ ਕਥੇਸ੍ਸਾਮੀ’’ਤਿ ਭਤ੍ਤਂ ਅਭੁਞ੍ਜਿਤ੍ਵਾ ਕਿਲਿਟ੍ਠਲੋਮਵਤ੍ਥਂ ਨਿਵਾਸੇਤ੍ਵਾ ਸਰੀਰੇ ਨਖਰਾਜਿਯੋ ਦਸ੍ਸੇਤ੍ਵਾ ‘‘ਕੁਹਿਂ ਦੇਵੀਤਿ ਰਞ੍ਞੋ ਪੁਚ੍ਛਨਕਾਲੇ ‘‘ਗਿਲਾਨਾ’ਤਿ ਕਥੇਯ੍ਯਾਥਾ’’ਤਿ ਪਰਿਚਾਰਿਕਾਨਂ ਸਞ੍ਞਂ ਦਤ੍ਵਾ ਗਿਲਾਨਾਲਯਂ ਕਤ੍ਵਾ ਨਿਪਜ੍ਜਿ. ਰਾਜਾਪਿ ਨਗਰਂ ਪਦਕ੍ਖਿਣਂ ਕਤ੍ਵਾ ਨਿਵੇਸਨਂ ਆਰੁਯ੍ਹ ਤਂ ਅਪਸ੍ਸਨ੍ਤੋ ‘‘ਕੁਹਿਂ ਦੇਵੀ’’ਤਿ ਪੁਚ੍ਛਿਤ੍ਵਾ ‘‘ਗਿਲਾਨਾ’’ਤਿ ਸੁਤ੍ਵਾ ਸਿਰਿਗਬ੍ਭਂ ਪਵਿਸਿਤ੍ਵਾ ‘‘ਕਿਂ ਤੇ ਦੇਵਿ, ਅਫਾਸੁਕ’’ਨ੍ਤਿ ਪੁਚ੍ਛਿ. ਸਾ ਤਸ੍ਸ ਵਚਨਂ ਅਸੁਣਨ੍ਤੀ ਵਿਯ ਹੁਤ੍ਵਾ ਦ੍ਵੇ ਤਯੋ ਵਾਰੇ ਪੁਚ੍ਛਿਤਾ ‘‘ਮਹਾਰਾਜ, ਕਸ੍ਮਾ ਕਥੇਸਿ, ਤੁਣ੍ਹੀ ਹੋਹਿ, ਸਸਾਮਿਕਇਤ੍ਥਿਯੋ ਨਾਮ ਮਾਦਿਸਾ ਨ ਹੋਨ੍ਤੀ’’ਤਿ ਵਤ੍ਵਾ ‘‘ਕੇਨ ਤ੍ਵਂ ਵਿਹੇਠਿਤਾਸਿ, ਸੀਘਂ ਮੇ ਕਥੇਹਿ, ਸੀਸਮਸ੍ਸ ਛਿਨ੍ਦਿਸ੍ਸਾਮੀ’’ਤਿ ਵੁਤ੍ਤੇ ‘‘ਕਂਸਿ ਤ੍ਵਂ, ਮਹਾਰਾਜ, ਨਗਰੇ ਠਪੇਤ੍ਵਾ ਗਤੋ’’ਤਿ ਵਤ੍ਵਾ ‘‘ਪਦੁਮਕੁਮਾਰ’’ਨ੍ਤਿ ਵੁਤ੍ਤੇ ‘‘ਸੋ ਮਯ੍ਹਂ ਵਸਨਟ੍ਠਾਨਂ ਆਗਨ੍ਤ੍ਵਾ ‘ਤਾਤ, ਮਾ ਏਵਂ ਕਰੋਹਿ, ਅਹਂ ਤਵ ਮਾਤਾ’ਤਿ ਵੁਚ੍ਚਮਾਨੋਪਿ ‘ਠਪੇਤ੍ਵਾ ਮਂ ਅਞ੍ਞੋ ਰਾਜਾ ਨਤ੍ਥਿ, ਅਹਂ ਤਂ ਗੇਹੇ ਕਰਿਤ੍ਵਾ ਕਿਲੇਸਰਤਿਯਾ ਰਮਿਸ੍ਸਾਮੀ’ਤਿ ਮਂ ਕੇਸੇਸੁ ਗਹੇਤ੍ਵਾ ਅਪਰਾਪਰਂ ਲੁਞ੍ਚਿਤ੍ਵਾ ਅਤ੍ਤਨੋ ਵਚਨਂ ਅਕਰੋਨ੍ਤਿਂ ਮਂ ਪਾਤੇਤ੍ਵਾ ਕੋਟ੍ਟੇਤ੍ਵਾ ਗਤੋ’’ਤਿ ਆਹ.

ਰਾਜਾ ਅਨੁਪਪਰਿਕ੍ਖਿਤ੍ਵਾਵ ਆਸੀਵਿਸੋ ਵਿਯ ਕੁਦ੍ਧੋ ਪੁਰਿਸੇ ਆਣਾਪੇਸਿ ‘‘ਗਚ੍ਛਥ, ਭਣੇ, ਪਦੁਮਕੁਮਾਰਂ ਬਨ੍ਧਿਤ੍ਵਾ ਆਨੇਥਾ’’ਤਿ. ਤੇ ਨਗਰਂ ਅਵਤ੍ਥਰਨ੍ਤਾ ਵਿਯ ਤਸ੍ਸ ਗੇਹਂ ਗਨ੍ਤ੍ਵਾ ਤਂ ਬਨ੍ਧਿਤ੍ਵਾ ਪਹਰਿਤ੍ਵਾ ਪਚ੍ਛਾਬਾਹਂ ਗਾਲ਼੍ਹਬਨ੍ਧਨਂ ਬਨ੍ਧਿਤ੍ਵਾ ਰਤ੍ਤਕਣਵੇਰਮਾਲਂ ਗੀਵਾਯਂ ਪਟਿਮੁਞ੍ਚਿਤ੍ਵਾ ਵਜ੍ਝਂ ਕਤ੍ਵਾ ਆਨਯਿਂਸੁ. ਸੋ ‘‘ਦੇਵਿਯਾ ਇਦਂ ਕਮ੍ਮ’’ਨ੍ਤਿ ਞਤ੍ਵਾ ‘‘ਭੋ ਪੁਰਿਸਾ, ਨਾਹਂ ਰਞ੍ਞੋ ਦੋਸਕਾਰਕੋ, ਨਿਪ੍ਪਰਾਧੋਹਮਸ੍ਮੀ’’ਤਿ ਵਿਲਪਨ੍ਤੋ ਆਗਚ੍ਛਤਿ. ਸਕਲਨਗਰਂ ਸਂਖੁਬ੍ਭਿਤ੍ਵਾ ‘‘ਰਾਜਾ ਕਿਰ ਮਾਤੁਗਾਮਸ੍ਸ ਵਚਨਂ ਗਹੇਤ੍ਵਾ ਮਹਾਪਦੁਮਕੁਮਾਰਂ ਘਾਤਾਪੇਸੀ’’ਤਿ ਸਨ੍ਨਿਪਤਿਤ੍ਵਾ ਰਾਜਕੁਮਾਰਸ੍ਸ ਪਾਦਮੂਲੇ ਨਿਪਤਿਤ੍ਵਾ ‘‘ਇਦਂ ਤੇ ਸਾਮਿ, ਅਨਨੁਚ੍ਛਵਿਕ’’ਨ੍ਤਿ ਮਹਾਸਦ੍ਦੇਨ ਪਰਿਦੇਵਿ. ਅਥ ਨਂ ਨੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ਦਿਸ੍ਵਾਵ ਚਿਤ੍ਤਂ ਨਿਗ੍ਗਣ੍ਹਿਤੁਂ ਅਸਕ੍ਕੋਨ੍ਤੋ ‘‘ਅਯਂ ਅਰਾਜਾਵ ਰਾਜਲੀਲ਼ਂ ਕਰੋਤਿ, ਮਮ ਪੁਤ੍ਤੋ ਹੁਤ੍ਵਾ ਅਗ੍ਗਮਹੇਸਿਯਾ ਅਪਰਜ੍ਝਤਿ, ਗਚ੍ਛਥ ਨਂ ਚੋਰਪਪਾਤੇ ਪਾਤੇਤ੍ਵਾ ਵਿਨਾਸਂ ਪਾਪੇਥਾ’’ਤਿ ਆਹ. ਮਹਾਸਤ੍ਤੋ ‘‘ਨ ਮਯ੍ਹਂ, ਤਾਤ, ਏਵਰੂਪੋ ਅਪਰਾਧੋ ਅਤ੍ਥਿ, ਮਾਤੁਗਾਮਸ੍ਸ ਵਚਨਂ ਗਹੇਤ੍ਵਾ ਮਾ ਮਂ ਨਾਸੇਹੀ’’ਤਿ ਪਿਤਰਂ ਯਾਚਿ. ਸੋ ਤਸ੍ਸ ਕਥਂ ਨ ਗਣ੍ਹਿ.

ਤਤੋ ਸੋਲ਼ਸਸਹਸ੍ਸਾ ਅਨ੍ਤੇਪੁਰਿਕਾ ‘‘ਤਾਤ ਮਹਾਪਦੁਮਕੁਮਾਰ, ਅਤ੍ਤਨੋ ਅਨਨੁਚ੍ਛਵਿਕਂ ਇਦਂ ਲਦ੍ਧ’’ਨ੍ਤਿ ਮਹਾਵਿਰਵਂ ਵਿਰਵਿਂਸੁ. ਸਬ੍ਬੇ ਖਤ੍ਤਿਯਮਹਾਸਾਲਾਦਯੋਪਿ ਅਮਚ੍ਚਪਰਿਜਨਾਪਿ ‘‘ਦੇਵ, ਕੁਮਾਰੋ ਸੀਲਾਚਾਰਗੁਣਸਮ੍ਪਨ੍ਨੋ ਵਂਸਾਨੁਰਕ੍ਖਿਤੋ ਰਜ੍ਜਦਾਯਾਦੋ, ਮਾ ਨਂ ਮਾਤੁਗਾਮਸ੍ਸ ਵਚਨਂ ਗਹੇਤ੍ਵਾ ਅਨੁਪਪਰਿਕ੍ਖਿਤ੍ਵਾਵ ਵਿਨਾਸੇਹਿ, ਰਞ੍ਞਾ ਨਾਮ ਨਿਸਮ੍ਮਕਾਰਿਨਾ ਭਵਿਤਬ੍ਬ’’ਨ੍ਤਿ ਵਤ੍ਵਾ ਸਤ੍ਤ ਗਾਥਾ ਅਭਾਸਿਂਸੁ –

੧੦੬.

‘‘ਨਾਦਟ੍ਠਾ ਪਰਤੋ ਦੋਸਂ, ਅਣੁਂ ਥੂਲਾਨਿ ਸਬ੍ਬਸੋ;

ਇਸ੍ਸਰੋ ਪਣਯੇ ਦਣ੍ਡਂ, ਸਾਮਂ ਅਪ੍ਪਟਿਵੇਕ੍ਖਿਯ.

੧੦੭.

‘‘ਯੋ ਚ ਅਪ੍ਪਟਿਵੇਕ੍ਖਿਤ੍ਵਾ, ਦਣ੍ਡਂ ਕੁਬ੍ਬਤਿ ਖਤ੍ਤਿਯੋ;

ਸਕਣ੍ਟਕਂ ਸੋ ਗਿਲਤਿ, ਜਚ੍ਚਨ੍ਧੋਵ ਸਮਕ੍ਖਿਕਂ.

੧੦੮.

‘‘ਅਦਣ੍ਡਿਯਂ ਦਣ੍ਡਯਤਿ, ਦਣ੍ਡਿਯਞ੍ਚ ਅਦਣ੍ਡਿਯਂ;

ਅਨ੍ਧੋਵ ਵਿਸਮਂ ਮਗ੍ਗਂ, ਨ ਜਾਨਾਤਿ ਸਮਾਸਮਂ.

੧੦੯.

‘‘ਯੋ ਚ ਏਤਾਨਿ ਠਾਨਾਨਿ, ਅਣੁਂ ਥੂਲਾਨਿ ਸਬ੍ਬਸੋ;

ਸੁਦਿਟ੍ਠਮਨੁਸਾਸੇਯ੍ਯ, ਸ ਵੇ ਵੋਹਰਿਤੁ ਮਰਹਤਿ.

੧੧੦.

‘‘ਨੇਕਨ੍ਤਮੁਦੁਨਾ ਸਕ੍ਕਾ, ਏਕਨ੍ਤਤਿਖਿਣੇਨ ਵਾ;

ਅਤ੍ਤਂ ਮਹਨ੍ਤੇ ਠਪੇਤੁਂ, ਤਸ੍ਮਾ ਉਭਯਮਾਚਰੇ.

੧੧੧.

‘‘ਪਰਿਭੂਤੋ ਮੁਦੁ ਹੋਤਿ, ਅਤਿਤਿਕ੍ਖੋ ਚ ਵੇਰਵਾ;

ਏਤਞ੍ਚ ਉਭਯਂ ਞਤ੍ਵਾ, ਅਨੁਮਜ੍ਝਂ ਸਮਾਚਰੇ.

੧੧੨.

‘‘ਬਹੁਮ੍ਪਿ ਰਤ੍ਤੋ ਭਾਸੇਯ੍ਯ, ਦੁਟ੍ਠੋਪਿ ਬਹੁ ਭਾਸਤਿ;

ਨ ਇਤ੍ਥਿਕਾਰਣਾ ਰਾਜ, ਪੁਤ੍ਤਂ ਘਾਤੇਤੁਮਰਹਸੀ’’ਤਿ.

ਤਤ੍ਥ ਨਾਦਟ੍ਠਾਤਿ ਨ ਅਦਿਸ੍ਵਾ. ਪਰਤੋਤਿ ਪਰਸ੍ਸ. ਸਬ੍ਬਸੋਤਿ ਸਬ੍ਬਾਨਿ. ਅਣੁਂਥੂਲਾਨੀਤਿ ਖੁਦ੍ਦਕਮਹਨ੍ਤਾਨਿ ਵਜ੍ਜਾਨਿ. ਸਾਮਂ ਅਪ੍ਪਟਿਵੇਕ੍ਖਿਯਾਤਿ ਪਰਸ੍ਸ ਵਚਨਂ ਗਹੇਤ੍ਵਾ ਅਤ੍ਤਨੋ ਪਚ੍ਚਕ੍ਖਂ ਅਕਤ੍ਵਾ ਪਥਵਿਸ੍ਸਰੋ ਰਾਜਾ ਦਣ੍ਡਂ ਨ ਪਣਯੇ ਨ ਪਟ੍ਠਪੇਯ੍ਯ. ਮਹਾਸਮ੍ਮਤਰਾਜਕਾਲਸ੍ਮਿਞ੍ਹਿ ਸਤਤੋ ਉਤ੍ਤਰਿ ਦਣ੍ਡੋ ਨਾਮ ਨਤ੍ਥਿ, ਤਾਲ਼ਨਗਰਹਣਪਬ੍ਬਾਜਨਤੋ ਉਦ੍ਧਂ ਹਤ੍ਥਪਾਦਚ੍ਛੇਦਨਘਾਤਨਂ ਨਾਮ ਨਤ੍ਥਿ, ਪਚ੍ਛਾ ਕਕ੍ਖਲ਼ਰਾਜੂਨਂਯੇਵ ਕਾਲੇ ਏਤਂ ਉਪ੍ਪਨ੍ਨਂ, ਤਂ ਸਨ੍ਧਾਯ ਤੇ ਅਮਚ੍ਚਾ ‘‘ਏਕਨ੍ਤੇਨੇਵ ਪਰਸ੍ਸ ਦੋਸਂ ਸਾਮਂ ਅਦਿਸ੍ਵਾ ਕਾਤੁਂ ਨ ਯੁਤ੍ਤ’’ਨ੍ਤਿ ਕਥੇਨ੍ਤਾ ਏਵਮਾਹਂਸੁ.

ਯੋ ਚ ਅਪ੍ਪਟਿਵੇਕ੍ਖਿਤ੍ਵਾਤਿ ਮਹਾਰਾਜ, ਏਵਂ ਅਪ੍ਪਟਿਵੇਕ੍ਖਿਤ੍ਵਾ ਦੋਸਾਨੁਚ੍ਛਵਿਕੇ ਦਣ੍ਡੇ ਪਣੇਤਬ੍ਬੇ ਯੋ ਰਾਜਾ ਅਗਤਿਗਮਨੇ ਠਿਤੋ ਤਂ ਦੋਸਂ ਅਪ੍ਪਟਿਵੇਕ੍ਖਿਤ੍ਵਾ ਹਤ੍ਥਚ੍ਛੇਦਾਦਿਦਣ੍ਡਂ ਕਰੋਤਿ, ਸੋ ਅਤ੍ਤਨੋ ਦੁਕ੍ਖਕਾਰਣਂ ਕਰੋਨ੍ਤੋ ਸਕਣ੍ਟਕਂ ਭੋਜਨਂ ਗਿਲਤਿ ਨਾਮ, ਜਚ੍ਚਨ੍ਧੋ ਵਿਯ ਚ ਸਮਕ੍ਖਿਕਂ ਭੁਞ੍ਜਤਿ ਨਾਮ. ਅਦਣ੍ਡਿਯਨ੍ਤਿ ਯੋ ਅਦਣ੍ਡਿਯਂ ਅਦਣ੍ਡਪਣੇਤਬ੍ਬਞ੍ਚ ਦਣ੍ਡੇਤ੍ਵਾ ਦਣ੍ਡਿਯਞ੍ਚ ਦਣ੍ਡਪਣੇਤਬ੍ਬਂ ਅਦਣ੍ਡੇਤ੍ਵਾ ਅਤ੍ਤਨੋ ਰੁਚਿਮੇਵ ਕਰੋਤਿ, ਸੋ ਅਨ੍ਧੋ ਵਿਯ ਵਿਸਮਂ ਮਗ੍ਗਂ ਪਟਿਪਨ੍ਨੋ, ਨ ਜਾਨਾਤਿ ਸਮਾਸਮਂ, ਤਤੋ ਪਾਸਾਣਾਦੀਸੁ ਪਕ੍ਖਲਨ੍ਤੋ ਅਨ੍ਧੋ ਵਿਯ ਚਤੂਸੁ ਅਪਾਯੇਸੁ ਮਹਾਦੁਕ੍ਖਂ ਪਾਪੁਣਾਤੀਤਿ ਅਤ੍ਥੋ. ਏਤਾਨਿ ਠਾਨਾਨੀਤਿ ਏਤਾਨਿ ਦਣ੍ਡਿਯਾਦਣ੍ਡਿਯਕਾਰਣਾਨਿ ਚੇਵ ਦਣ੍ਡਿਯਕਾਰਣੇਸੁਪਿ ਅਣੁਂਥੂਲਾਨਿ ਚ ਸਬ੍ਬਾਨਿ ਸੁਦਿਟ੍ਠਂ ਦਿਸ੍ਵਾ ਅਨੁਸਾਸੇਯ੍ਯ, ਸ ਵੇ ਵੋਹਰਿਤੁਂ ਰਜ੍ਜਮਨੁਸਾਸਿਤੁਂ ਅਰਹਤੀਤਿ ਅਤ੍ਥੋ.

ਅਤ੍ਤਂ ਮਹਨ੍ਤੇ ਠਪੇਤੁਨ੍ਤਿ ਏਵਰੂਪੋ ਅਨੁਪ੍ਪਨ੍ਨੇ ਭੋਗੇ ਉਪ੍ਪਾਦੇਤ੍ਵਾ ਉਪ੍ਪਨ੍ਨੇ ਥਾਵਰੇ ਕਤ੍ਵਾ ਅਤ੍ਤਾਨਂ ਮਹਨ੍ਤੇ ਉਲ਼ਾਰੇ ਇਸ੍ਸਰਿਯੇ ਠਪੇਤੁਂ ਨ ਸਕ੍ਕੋਤੀਤਿ ਅਤ੍ਥੋ. ਮੁਦੂਤਿ ਮੁਦੁਰਾਜਾ ਰਟ੍ਠਵਾਸੀਨਂ ਪਰਿਭੂਤੋ ਹੋਤਿ ਅਵਞ੍ਞਾਤੋ, ਸੋ ਰਜ੍ਜਂ ਨਿਚ੍ਚੋਰਂ ਕਾਤੁਂ ਨ ਸਕ੍ਕੋਤਿ. ਵੇਰਵਾਤਿ ਅਤਿਤਿਕ੍ਖਸ੍ਸ ਪਨ ਸਬ੍ਬੇਪਿ ਰਟ੍ਠਵਾਸਿਨੋ ਵੇਰਿਨੋ ਹੋਨ੍ਤੀਤਿ ਸੋ ਵੇਰਵਾ ਨਾਮ ਹੋਤਿ. ਅਨੁਮਜ੍ਝਨ੍ਤਿ ਅਨੁਭੂਤਂ ਮੁਦੁਤਿਖਿਣਭਾਵਾਨਂ ਮਜ੍ਝਂ ਸਮਾਚਰੇ, ਅਮੁਦੁ ਅਤਿਕ੍ਖੋ ਹੁਤ੍ਵਾ ਰਜ੍ਜਂ ਕਾਰੇਯ੍ਯਾਤਿ ਅਤ੍ਥੋ. ਨ ਇਤ੍ਥਿਕਾਰਣਾਤਿ ਪਾਪਂ ਲਾਮਕਂ ਮਾਤੁਗਾਮਂ ਨਿਸ੍ਸਾਯ ਵਂਸਾਨੁਰਕ੍ਖਕਂ ਛਤ੍ਤਦਾਯਾਦਂ ਪੁਤ੍ਤਂ ਘਾਤੇਤੁਂ ਨਾਰਹਸਿ, ਮਹਾਰਾਜਾਤਿ.

ਏਵਂ ਨਾਨਾਕਾਰਣੇਹਿ ਕਥੇਨ੍ਤਾਪਿ ਅਮਚ੍ਚਾ ਅਤ੍ਤਨੋ ਕਥਂ ਗਾਹਾਪੇਤੁਂ ਨਾਸਕ੍ਖਿਂਸੁ. ਬੋਧਿਸਤ੍ਤੋਪਿ ਯਾਚਨ੍ਤੋ ਅਤ੍ਤਨੋ ਕਥਂ ਗਾਹਾਪੇਤੁਂ ਨਾਸਕ੍ਖਿ. ਅਨ੍ਧਬਾਲੋ ਪਨ ਰਾਜਾ ‘‘ਗਚ੍ਛਥ ਨਂ ਚੋਰਪਪਾਤੇ ਖਿਪਥਾ’’ਤਿ ਆਣਾਪੇਨ੍ਤੋ ਅਟ੍ਠਮਂ ਗਾਥਮਾਹ –

੧੧੩.

‘‘ਸਬ੍ਬੋਵ ਲੋਕੋ ਏਕਤੋ, ਇਤ੍ਥੀ ਚ ਅਯਮੇਕਿਕਾ;

ਤੇਨਾਹਂ ਪਟਿਪਜ੍ਜਿਸ੍ਸਂ, ਗਚ੍ਛਥ ਪਕ੍ਖਿਪਥੇਵ ਤ’’ਨ੍ਤਿ.

ਤਤ੍ਥ ਤੇਨਾਹਨ੍ਤਿ ਯੇਨ ਕਾਰਣੇਨ ਸਬ੍ਬੋ ਲੋਕੋ ਏਕਤੋ ਕੁਮਾਰਸ੍ਸੇਵ ਪਕ੍ਖੋ ਹੁਤ੍ਵਾ ਠਿਤੋ, ਅਯਞ੍ਚ ਇਤ੍ਥੀ ਏਕਿਕਾਵ, ਤੇਨ ਕਾਰਣੇਨ ਅਹਂ ਇਮਿਸ੍ਸਾ ਵਚਨਂ ਪਟਿਪਜ੍ਜਿਸ੍ਸਂ, ਗਚ੍ਛਥ ਤਂ ਪਬ੍ਬਤਂ ਆਰੋਪੇਤ੍ਵਾ ਪਪਾਤੇ ਖਿਪਥੇਵਾਤਿ.

ਏਵਂ ਵੁਤ੍ਤੇ ਸੋਲ਼ਸਸਹਸ੍ਸਾਸੁ ਰਾਜਇਤ੍ਥੀਸੁ ਏਕਾਪਿ ਸਕਭਾਵੇਨ ਸਣ੍ਠਾਤੁਂ ਨਾਸਕ੍ਖਿ, ਸਕਲਨਗਰਵਾਸਿਨੋ ਬਾਹਾ ਪਗ੍ਗਯ੍ਹ ਕਨ੍ਦਿਤ੍ਵਾ ਕੇਸੇ ਵਿਕਿਰਯਮਾਨਾ ਵਿਲਪਿਂਸੁ. ਰਾਜਾ ‘‘ਇਮੇ ਇਮਸ੍ਸ ਪਪਾਤੇ ਖਿਪਨਂ ਪਟਿਬਾਹੇਯ੍ਯੁ’’ਨ੍ਤਿ ਸਪਰਿਵਾਰੋ ਗਨ੍ਤ੍ਵਾ ਮਹਾਜਨਸ੍ਸ ਪਰਿਦੇਵਨ੍ਤਸ੍ਸੇਵ ਨਂ ਉਦ੍ਧਂਪਾਦਂ ਅਵਂਸਿਰਂ ਕਤ੍ਵਾ ਗਾਹਾਪੇਤ੍ਵਾ ਪਪਾਤੇ ਖਿਪਾਪੇਸਿ. ਅਥਸ੍ਸ ਮੇਤ੍ਤਾਨੁਭਾਵੇਨ ਪਬ੍ਬਤੇ ਅਧਿਵਤ੍ਥਾ ਦੇਵਤਾ ‘‘ਮਾ ਭਾਯਿ ਮਹਾਪਦੁਮਾ’’ਤਿ ਤਂ ਸਮਸ੍ਸਾਸੇਤ੍ਵਾ ਉਭੋਹਿ ਹਤ੍ਥੇਹਿ ਗਹੇਤ੍ਵਾ ਹਦਯੇ ਠਪੇਤ੍ਵਾ ਦਿਬ੍ਬਸਮ੍ਫਸ੍ਸਂ ਫਰਾਪੇਤ੍ਵਾ ਓਤਰਿਤ੍ਵਾ ਪਬ੍ਬਤਪਾਦੇ ਪਤਿਟ੍ਠਿਤਨਾਗਰਾਜਸ੍ਸ ਫਣਗਬ੍ਭੇ ਠਪੇਸਿ. ਨਾਗਰਾਜਾ ਬੋਧਿਸਤ੍ਤਂ ਨਾਗਭਵਨਂ ਨੇਤ੍ਵਾ ਅਤ੍ਤਨੋ ਯਸਂ ਮਜ੍ਝੇ ਭਿਨ੍ਦਿਤ੍ਵਾ ਅਦਾਸਿ. ਸੋ ਤਤ੍ਥ ਏਕਸਂਵਚ੍ਛਰਂ ਵਸਿਤ੍ਵਾ ‘‘ਮਨੁਸ੍ਸਪਥਂ ਗਮਿਸ੍ਸਾਮੀ’’ਤਿ ਵਤ੍ਵਾ ‘‘ਕਤਰਂ ਠਾਨ’’ਨ੍ਤਿ ਵੁਤ੍ਤੇ ‘‘ਹਿਮਵਨ੍ਤਂ ਗਨ੍ਤ੍ਵਾ ਪਬ੍ਬਜਿਸ੍ਸਾਮੀ’’ਤਿ ਆਹ. ਨਾਗਰਾਜਾ ‘‘ਸਾਧੂ’’ਤਿ ਤਂ ਗਹੇਤ੍ਵਾ ਮਨੁਸ੍ਸਪਥੇ ਪਤਿਟ੍ਠਾਪੇਤ੍ਵਾ ਪਬ੍ਬਜਿਤਪਰਿਕ੍ਖਾਰੇ ਦਤ੍ਵਾ ਸਕਟ੍ਠਾਨਮੇਵ ਗਤੋ. ਸੋਪਿ ਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਂ ਨਿਬ੍ਬਤ੍ਤੇਤ੍ਵਾ ਵਨਮੂਲਫਲਾਹਾਰੋ ਤਤ੍ਥ ਪਟਿਵਸਤਿ.

ਅਥੇਕੋ ਬਾਰਾਣਸਿਵਾਸੀ ਵਨਚਰਕੋ ਤਂ ਠਾਨਂ ਪਤ੍ਤੋ ਮਹਾਸਤ੍ਤਂ ਸਞ੍ਜਾਨਿਤ੍ਵਾ ‘‘ਨਨੁ ਤ੍ਵਂ ਦੇਵ, ਮਹਾਪਦੁਮਕੁਮਾਰੋ’’ਤਿ ਵਤ੍ਵਾ ‘‘ਆਮ, ਸਮ੍ਮਾ’’ਤਿ ਵੁਤ੍ਤੇ ਤਂ ਵਨ੍ਦਿਤ੍ਵਾ ਕਤਿਪਾਹਂ ਤਤ੍ਥ ਵਸਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ ‘‘ਦੇਵ, ਪੁਤ੍ਤੋ ਤੇ ਹਿਮਵਨ੍ਤਪਦੇਸੇ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਪਣ੍ਣਸਾਲਾਯਂ ਵਸਤਿ, ਅਹਂ ਤਸ੍ਸ ਸਨ੍ਤਿਕੇ ਵਸਿਤ੍ਵਾ ਆਗਤੋ’’ਤਿ. ‘‘ਪਚ੍ਚਕ੍ਖਤੋ ਤੇ ਦਿਟ੍ਠੋ’’ਤਿ? ‘‘ਆਮ ਦੇਵਾ’’ਤਿ. ਰਾਜਾ ਮਹਾਬਲਕਾਯਪਰਿਵੁਤੋ ਤਤ੍ਥ ਗਨ੍ਤ੍ਵਾ ਵਨਪਰਿਯਨ੍ਤੇ ਖਨ੍ਧਾਵਾਰਂ ਬਨ੍ਧਿਤ੍ਵਾ ਅਮਚ੍ਚਗਣਪਰਿਵੁਤੋ ਪਣ੍ਣਸਾਲਂ ਗਨ੍ਤ੍ਵਾ ਕਞ੍ਚਨਰੂਪਸਦਿਸਂ ਪਣ੍ਣਸਾਲਦ੍ਵਾਰੇ ਨਿਸਿਨ੍ਨਂ ਮਹਾਸਤ੍ਤਂ ਦਿਸ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਮਚ੍ਚਾਪਿ ਵਨ੍ਦਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਨਿਸੀਦਿਂਸੁ. ਬੋਧਿਸਤ੍ਤੋਪਿ ਰਾਜਾਨਂ ਪਟਿਪੁਚ੍ਛਿਤ੍ਵਾ ਪਟਿਸਨ੍ਥਾਰਮਕਾਸਿ. ਅਥ ਨਂ ਰਾਜਾ ‘‘ਤਾਤ, ਮਯਾ ਤ੍ਵਂ ਗਮ੍ਭੀਰੇ ਪਪਾਤੇ ਖਿਪਾਪਿਤੋ, ਕਥਂ ਸਜੀਵਿਤੋਸੀ’’ਤਿ ਪੁਚ੍ਛਨ੍ਤੋ ਨਵਮਂ ਗਾਥਮਾਹ –

੧੧੪.

‘‘ਅਨੇਕਤਾਲੇ ਨਰਕੇ, ਗਮ੍ਭੀਰੇ ਚ ਸੁਦੁਤ੍ਤਰੇ;

ਪਾਤਿਤੋ ਗਿਰਿਦੁਗ੍ਗਸ੍ਮਿਂ, ਕੇਨ ਤ੍ਵਂ ਤਤ੍ਥ ਨਾਮਰੀ’’ਤਿ.

ਤਤ੍ਥ ਅਨੇਕਤਾਲੇਤਿ ਅਨੇਕਤਾਲਪ੍ਪਮਾਣੇ. ਨਾਮਰੀਤਿ ਨ ਅਮਰਿ.

ਤਤੋਪਰਂ –

੧੧੫.

‘‘ਨਾਗੋ ਜਾਤਫਣੋ ਤਤ੍ਥ, ਥਾਮਵਾ ਗਿਰਿਸਾਨੁਜੋ;

ਪਚ੍ਚਗ੍ਗਹਿ ਮਂ ਭੋਗੇਹਿ, ਤੇਨਾਹਂ ਤਤ੍ਥ ਨਾਮਰਿਂ.

੧੧੬.

‘‘ਏਹਿ ਤਂ ਪਟਿਨੇਸ੍ਸਾਮਿ, ਰਾਜਪੁਤ੍ਤ ਸਕਂ ਘਰਂ;

ਰਜ੍ਜਂ ਕਾਰੇਹਿ ਭਦ੍ਦਨ੍ਤੇ, ਕਿਂ ਅਰਞ੍ਞੇ ਕਰਿਸ੍ਸਸਿ.

੧੧੭.

‘‘ਯਥਾ ਗਿਲਿਤ੍ਵਾ ਬਲ਼ਿਸਂ, ਉਦ੍ਧਰੇਯ੍ਯ ਸਲੋਹਿਤਂ;

ਉਦ੍ਧਰਿਤ੍ਵਾ ਸੁਖੀ ਅਸ੍ਸ, ਏਵਂ ਪਸ੍ਸਾਮਿ ਅਤ੍ਤਨਂ.

੧੧੮.

‘‘ਕਿਂ ਨੁ ਤ੍ਵਂ ਬਲ਼ਿਸਂ ਬ੍ਰੂਸਿ, ਕਿਂ ਤ੍ਵਂ ਬ੍ਰੂਸਿ ਸਲੋਹਿਤਂ;

ਕਿਂ ਨੁ ਤ੍ਵਂ ਉਬ੍ਭਤਂ ਬ੍ਰੂਸਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.

੧੧੯.

‘‘ਕਾਮਾਹਂ ਬਲ਼ਿਸਂ ਬ੍ਰੂਮਿ, ਹਤ੍ਥਿਅਸ੍ਸਂ ਸਲੋਹਿਤਂ;

ਚਤ੍ਤਾਹਂ ਉਬ੍ਭਤਂ ਬ੍ਰੂਮਿ, ਏਵਂ ਜਾਨਾਹਿ ਖਤ੍ਤਿਯਾ’’ਤਿ. –

ਇਮਾਸੁ ਪਞ੍ਚਸੁ ਏਕਨ੍ਤਰਿਕਾ ਤਿਸ੍ਸੋ ਗਾਥਾ ਬੋਧਿਸਤ੍ਤਸ੍ਸ, ਦ੍ਵੇ ਰਞ੍ਞੋ.

ਤਤ੍ਥ ਪਚ੍ਚਗ੍ਗਹਿ ਮਨ੍ਤਿ ਪਬ੍ਬਤਪਤਨਕਾਲੇ ਦੇਵਤਾਯ ਪਰਿਗ੍ਗਹੇਤ੍ਵਾ ਦਿਬ੍ਬਸਮ੍ਫਸ੍ਸੇਨ ਸਮਸ੍ਸਾਸੇਤ੍ਵਾ ਉਪਨੀਤਂ ਮਂ ਪਟਿਗ੍ਗਣ੍ਹਿ, ਗਹੇਤ੍ਵਾ ਚ ਪਨ ਨਾਗਭਵਨਂ ਆਨੇਤ੍ਵਾ ਮਹਨ੍ਤਂ ਯਸਂ ਦਤ੍ਵਾ ‘‘ਮਨੁਸ੍ਸਪਥਂ ਮਂ ਨੇਹੀ’’ਤਿ ਵੁਤ੍ਤੋ ਮਂ ਮਨੁਸ੍ਸਪਥਂ ਆਨੇਸਿ. ਅਹਂ ਇਧਾਗਨ੍ਤ੍ਵਾ ਪਬ੍ਬਜਿਤੋ, ਇਤਿ ਤੇਨ ਦੇਵਤਾਯ ਚ ਨਾਗਰਾਜਸ੍ਸ ਚ ਆਨੁਭਾਵੇਨ ਅਹਂ ਤਤ੍ਥ ਨਾਮਰਿਨ੍ਤਿ ਸਬ੍ਬਂ ਆਰੋਚੇਸਿ.

ਏਹੀਤਿ ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ‘‘ਤਾਤ, ਅਹਂ ਬਾਲਭਾਵੇਨ ਇਤ੍ਥਿਯਾ ਵਚਨਂ ਗਹੇਤ੍ਵਾ ਏਵਂ ਸੀਲਾਚਾਰਸਮ੍ਪਨ੍ਨੇ ਤਯਿ ਅਪਰਜ੍ਝਿਂ, ਖਮਾਹਿ ਮੇ ਦੋਸ’’ਨ੍ਤਿ ਪਾਦੇਸੁ ਨਿਪਤਿਤ੍ਵਾ ‘‘ਉਟ੍ਠੇਹਿ, ਮਹਾਰਾਜ, ਖਮਾਮ ਤੇ ਦੋਸਂ, ਇਤੋ ਪਰਂ ਪੁਨ ਮਾ ਏਵਂ ਅਨਿਸਮ੍ਮਕਾਰੀ ਭਵੇਯ੍ਯਾਸੀ’’ਤਿ ਵੁਤ੍ਤੇ ‘‘ਤਾਤ, ਤ੍ਵਂ ਅਤ੍ਤਨੋ ਕੁਲਸਨ੍ਤਕਂ ਸੇਤਚ੍ਛਤ੍ਤਂ ਉਸ੍ਸਾਪੇਤ੍ਵਾ ਰਜ੍ਜਂ ਅਨੁਸਾਸਨ੍ਤੋ ਮਯ੍ਹਂ ਖਮਸਿ ਨਾਮਾ’’ਤਿ ਏਵਮਾਹ.

ਉਦ੍ਧਰਿਤ੍ਵਾਤਿ ਹਦਯਵਕ੍ਕਾਦੀਨਿ ਅਸਮ੍ਪਤ੍ਤਮੇਵ ਤਂ ਉਦ੍ਧਰਿਤ੍ਵਾ ਸੁਖੀ ਅਸ੍ਸ. ਏਵਂ ਪਸ੍ਸਾਮਿ ਅਤ੍ਤਨਨ੍ਤਿ ਅਤ੍ਤਾਨਂ ਮਹਾਰਾਜ, ਏਵਂ ਅਹਮ੍ਪਿ ਪੁਨ ਸੋਤ੍ਥਿਭਾਵਪ੍ਪਤ੍ਤਂ ਗਿਲਿਤਬਲ਼ਿਸਂ ਪੁਰਿਸਮਿਵ ਅਤ੍ਤਾਨਂ ਪਸ੍ਸਾਮੀਤਿ. ‘‘ਕਿਂ ਨੁ ਤ੍ਵ’’ਨ੍ਤਿ ਇਦਂ ਰਾਜਾ ਤਮਤ੍ਥਂ ਵਿਤ੍ਥਾਰਤੋ ਸੋਤੁਂ ਪੁਚ੍ਛਤਿ. ਕਾਮਾਹਨ੍ਤਿ ਪਞ੍ਚ ਕਾਮਗੁਣੇ ਅਹਂ. ਹਤ੍ਥਿਅਸ੍ਸਂ ਸਲੋਹਿਤਨ੍ਤਿ ਏਵਂ ਹਤ੍ਥਿਅਸ੍ਸਰਥਵਾਹਨਂ ਸਤ੍ਤਰਤਨਾਦਿਵਿਭਵਂ ‘‘ਸਲੋਹਿਤ’’ਨ੍ਤਿ ਬ੍ਰੂਮਿ. ਚਤ੍ਤਾਹਨ੍ਤਿ ਚਤ੍ਤਂ ਅਹਂ, ਯਦਾ ਤਂ ਸਬ੍ਬਮ੍ਪਿ ਚਤ੍ਤਂ ਹੋਤਿ ਪਰਿਚ੍ਚਤ੍ਤਂ, ਤਂ ਦਾਨਾਹਂ ‘‘ਉਬ੍ਭਤ’’ਨ੍ਤਿ ਬ੍ਰੂਮਿ.

‘‘ਇਤਿ ਖੋ, ਮਹਾਰਾਜ, ਮਯ੍ਹਂ ਰਜ੍ਜੇਨ ਕਿਚ੍ਚਂ ਨਤ੍ਥਿ, ਤ੍ਵਂ ਪਨ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਅਗਤਿਗਮਨਂ ਪਹਾਯ ਧਮ੍ਮੇਨ ਰਜ੍ਜਂ ਕਾਰੇਹੀ’’ਤਿ ਮਹਾਸਤ੍ਤੋ ਪਿਤੁ ਓਵਾਦਂ ਅਦਾਸਿ. ਸੋ ਰਾਜਾ ਰੋਦਿਤ੍ਵਾ ਪਰਿਦੇਵਿਤ੍ਵਾ ਨਗਰਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਅਮਚ੍ਚੇ ਪੁਚ੍ਛਿ. ‘‘ਅਹਂ ਕਂ ਨਿਸ੍ਸਾਯ ਏਵਰੂਪੇਨ ਆਚਾਰਗੁਣਸਮ੍ਪਨ੍ਨੇਨ ਪੁਤ੍ਤੇਨ ਵਿਯੋਗਂ ਪਤ੍ਤੋ’’ਤਿ? ‘‘ਅਗ੍ਗਮਹੇਸਿਂ, ਦੇਵਾ’’ਤਿ. ਰਾਜਾ ਤਂ ਉਦ੍ਧਂਪਾਦਂ ਗਾਹਾਪੇਤ੍ਵਾ ਚੋਰਪਪਾਤੇ ਖਿਪਾਪੇਤ੍ਵਾ ਨਗਰਂ ਪਵਿਸਿਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇਪੇਸਾ ਮਂ ਅਕ੍ਕੋਸਿਤ੍ਵਾ ਮਹਾਵਿਨਾਸਂ ਪਤ੍ਤਾ’’ਤਿ ਵਤ੍ਵਾ –

੧੨੦.

‘‘ਚਿਞ੍ਚਮਾਣਵਿਕਾ ਮਾਤਾ, ਦੇਵਦਤ੍ਤੋ ਚ ਮੇ ਪਿਤਾ;

ਆਨਨ੍ਦੋ ਪਣ੍ਡਿਤੋ ਨਾਗੋ, ਸਾਰਿਪੁਤ੍ਤੋ ਚ ਦੇਵਤਾ;

ਰਾਜਪੁਤ੍ਤੋ ਅਹਂ ਆਸਿਂ, ਏਵਂ ਧਾਰੇਥ ਜਾਤਕ’’ਨ੍ਤਿ. –

ਓਸਾਨਗਾਥਾਯ ਜਾਤਕਂ ਸਮੋਧਾਨੇਸਿ.

ਮਹਾਪਦੁਮਜਾਤਕਵਣ੍ਣਨਾ ਨਵਮਾ.

[੪੭੩] ੧੦. ਮਿਤ੍ਤਾਮਿਤ੍ਤਜਾਤਕਵਣ੍ਣਨਾ

ਕਾਨਿ ਕਮ੍ਮਾਨੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਸਲਰਞ੍ਞੋ ਅਤ੍ਥਚਰਕਂ ਅਮਚ੍ਚਂ ਆਰਬ੍ਭ ਕਥੇਸਿ. ਸੋ ਕਿਰ ਰਞ੍ਞੋ ਬਹੂਪਕਾਰੋ ਅਹੋਸਿ. ਅਥਸ੍ਸ ਰਾਜਾ ਅਤਿਰੇਕਸਮ੍ਮਾਨਂ ਕਾਰੇਸਿ. ਅਵਸੇਸਾ ਨਂ ਅਸਹਮਾਨਾ ‘‘ਦੇਵ, ਅਸੁਕੋ ਨਾਮ ਅਮਚ੍ਚੋ ਤੁਮ੍ਹਾਕਂ ਅਨਤ੍ਥਕਾਰਕੋ’’ਤਿ ਪਰਿਭਿਨ੍ਦਿਂਸੁ. ਰਾਜਾ ਤਂ ਪਰਿਗ੍ਗਣ੍ਹਨ੍ਤੋ ਕਿਞ੍ਚਿ ਦੋਸਂ ਅਦਿਸ੍ਵਾ ‘‘ਅਹਂ ਇਮਸ੍ਸ ਕਿਞ੍ਚਿ ਦੋਸਂ ਨ ਪਸ੍ਸਾਮਿ, ਕਥਂ ਨੁ ਖੋ ਸਕ੍ਕਾ ਮਯਾ ਇਮਸ੍ਸ ਮਿਤ੍ਤਭਾਵਂ ਵਾ ਅਮਿਤ੍ਤਭਾਵਂ ਵਾ ਜਾਨਿਤੁ’’ਨ੍ਤਿ ਚਿਨ੍ਤੇਤ੍ਵਾ ‘‘ਇਮਂ ਪਞ੍ਹਂ ਠਪੇਤ੍ਵਾ ਤਥਾਗਤਂ ਅਞ੍ਞੋ ਜਾਨਿਤੁਂ ਨ ਸਕ੍ਖਿਸ੍ਸਤਿ, ਗਨ੍ਤ੍ਵਾ ਪੁਚ੍ਛਿਸ੍ਸਾਮੀ’’ਤਿ ਭੁਤ੍ਤਪਾਤਰਾਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਕਥਂ ਨੁ ਖੋ ਸਕ੍ਕਾ ਪੁਰਿਸੇਨ ਅਤ੍ਤਨੋ ਮਿਤ੍ਤਭਾਵਂ ਵਾ ਅਮਿਤ੍ਤਭਾਵਂ ਵਾ ਜਾਨਿਤੁ’’ਨ੍ਤਿ ਪੁਚ੍ਛਿ. ਅਥ ਨਂ ਸਤ੍ਥਾ ‘‘ਪੁਬ੍ਬੇਪਿ ਮਹਾਰਾਜ, ਪਣ੍ਡਿਤਾ ਇਮਂ ਪਞ੍ਹਂ ਚਿਨ੍ਤੇਤ੍ਵਾ ਪਣ੍ਡਿਤੇ ਪੁਚ੍ਛਿਤ੍ਵਾ ਤੇਹਿ ਕਥਿਤਵਸੇਨ ਞਤ੍ਵਾ ਅਮਿਤ੍ਤੇ ਵਜ੍ਜੇਤ੍ਵਾ ਮਿਤ੍ਤੇ ਸੇਵਿਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਤ੍ਥਧਮ੍ਮਾਨੁਸਾਸਕੋ ਅਮਚ੍ਚੋ ਅਹੋਸਿ. ਤਦਾ ਬਾਰਾਣਸਿਰਞ੍ਞੋ ਏਕਂ ਅਤ੍ਥਚਰਕਂ ਅਮਚ੍ਚਂ ਸੇਸਾ ਪਰਿਭਿਨ੍ਦਿਂਸੁ. ਰਾਜਾ ਤਸ੍ਸ ਦੋਸਂ ਅਪਸ੍ਸਨ੍ਤੋ ‘‘ਕਥਂ ਨੁ ਖੋ ਸਕ੍ਕਾ ਮਿਤ੍ਤਂ ਵਾ ਅਮਿਤ੍ਤਂ ਵਾ ਞਾਤੁ’’ਨ੍ਤਿ ਮਹਾਸਤ੍ਤਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੧੨੧.

‘‘ਕਾਨਿ ਕਮ੍ਮਾਨਿ ਕੁਬ੍ਬਾਨਂ, ਕਥਂ ਵਿਞ੍ਞੂ ਪਰਕ੍ਕਮੇ;

ਅਮਿਤ੍ਤਂ ਜਾਨੇਯ੍ਯ ਮੇਧਾਵੀ, ਦਿਸ੍ਵਾ ਸੁਤ੍ਵਾ ਚ ਪਣ੍ਡਿਤੋ’’ਤਿ.

ਤਸ੍ਸਤ੍ਥੋ – ਕਾਨਿ ਕਮ੍ਮਾਨਿ ਕਰੋਨ੍ਤਂ ਮੇਧਾਵੀ ਪਣ੍ਡਿਤੋ ਪੁਰਿਸੋ ਚਕ੍ਖੁਨਾ ਦਿਸ੍ਵਾ ਵਾ ਸੋਤੇਨ ਸੁਤ੍ਵਾ ਵਾ ‘‘ਅਯਂ ਮਯ੍ਹਂ ਅਮਿਤ੍ਤੋ’’ਤਿ ਜਾਨੇਯ੍ਯ, ਤਸ੍ਸ ਜਾਨਨਤ੍ਥਾਯ ਕਥਂ ਵਿਞ੍ਞੂ ਪਰਕ੍ਕਮੇਯ੍ਯਾਤਿ.

ਅਥਸ੍ਸ ਅਮਿਤ੍ਤਲਕ੍ਖਣਂ ਕਥੇਨ੍ਤੋ ਆਹ –

੧੨੨.

‘‘ਨ ਨਂ ਉਮ੍ਹਯਤੇ ਦਿਸ੍ਵਾ, ਨ ਚ ਨਂ ਪਟਿਨਨ੍ਦਤਿ;

ਚਕ੍ਖੂਨਿ ਚਸ੍ਸ ਨ ਦਦਾਤਿ, ਪਟਿਲੋਮਞ੍ਚ ਵਤ੍ਤਤਿ.

੧੨੩.

‘‘ਅਮਿਤ੍ਤੇ ਤਸ੍ਸ ਭਜਤਿ, ਮਿਤ੍ਤੇ ਤਸ੍ਸ ਨ ਸੇਵਤਿ;

ਵਣ੍ਣਕਾਮੇ ਨਿਵਾਰੇਤਿ, ਅਕ੍ਕੋਸਨ੍ਤੇ ਪਸਂਸਤਿ.

੧੨੪.

‘‘ਗੁਯ੍ਹਞ੍ਚ ਤਸ੍ਸ ਨਕ੍ਖਾਤਿ, ਤਸ੍ਸ ਗੁਯ੍ਹਂ ਨ ਗੂਹਤਿ;

ਕਮ੍ਮਂ ਤਸ੍ਸ ਨ ਵਣ੍ਣੇਤਿ, ਪਞ੍ਞਸ੍ਸ ਨਪ੍ਪਸਂਸਤਿ.

੧੨੫.

‘‘ਅਭਵੇ ਨਨ੍ਦਤਿ ਤਸ੍ਸ, ਭਵੇ ਤਸ੍ਸ ਨ ਨਨ੍ਦਤਿ;

ਅਚ੍ਛੇਰਂ ਭੋਜਨਂ ਲਦ੍ਧਾ, ਤਸ੍ਸ ਨੁਪ੍ਪਜ੍ਜਤੇ ਸਤਿ;

ਤਤੋ ਨਂ ਨਾਨੁਕਮ੍ਪਤਿ, ਅਹੋ ਸੋਪਿ ਲਭੇਯ੍ਯਿਤੋ.

੧੨੬.

‘‘ਇਚ੍ਚੇਤੇ ਸੋਲ਼ਸਾਕਾਰਾ, ਅਮਿਤ੍ਤਸ੍ਮਿਂ ਪਤਿਟ੍ਠਿਤਾ;

ਯੇਹਿ ਅਮਿਤ੍ਤਂ ਜਾਨੇਯ੍ਯ, ਦਿਸ੍ਵਾ ਸੁਤ੍ਵਾ ਚ ਪਣ੍ਡਿਤੋ’’ਤਿ.

ਮਹਾਸਤ੍ਤੋ ਇਮਾ ਪਞ੍ਚ ਗਾਥਾ ਵਤ੍ਵਾਨ ਪੁਨ –

੧੨੭.

‘‘ਕਾਨਿ ਕਮ੍ਮਾਨਿ ਕੁਬ੍ਬਾਨਂ, ਕਥਂ ਵਿਞ੍ਞੂ ਪਰਕ੍ਕਮੇ;

ਮਿਤ੍ਤਂ ਜਾਨੇਯ੍ਯ ਮੇਧਾਵੀ, ਦਿਸ੍ਵਾ ਸੁਤ੍ਵਾ ਚ ਪਣ੍ਡਿਤੋ’’ਤਿ. –

ਇਮਾਯ ਗਾਥਾਯ ਮਿਤ੍ਤਲਕ੍ਖਣਂ ਪੁਟ੍ਠੋ ਸੇਸਗਾਥਾ ਅਭਾਸਿ –

੧੨੮.

‘‘ਪਵੁਤ੍ਥਂ ਤਸ੍ਸ ਸਰਤਿ, ਆਗਤਂ ਅਭਿਨਨ੍ਦਤਿ;

ਤਤੋ ਕੇਲਾਯਿਤੋ ਹੋਤਿ, ਵਾਚਾਯ ਪਟਿਨਨ੍ਦਤਿ.

੧੨੯.

‘‘ਮਿਤ੍ਤੇ ਤਸ੍ਸੇਵ ਭਜਤਿ, ਅਮਿਤ੍ਤੇ ਤਸ੍ਸ ਨ ਸੇਵਤਿ;

ਅਕ੍ਕੋਸਨ੍ਤੇ ਨਿਵਾਰੇਤਿ, ਵਣ੍ਣਕਾਮੇ ਪਸਂਸਤਿ.

੧੩੦.

‘‘ਗੁਯ੍ਹਞ੍ਚ ਤਸ੍ਸ ਅਕ੍ਖਾਤਿ, ਤਸ੍ਸ ਗੁਯ੍ਹਞ੍ਚ ਗੂਹਤਿ;

ਕਮ੍ਮਞ੍ਚ ਤਸ੍ਸ ਵਣ੍ਣੇਤਿ, ਪਞ੍ਞਂ ਤਸ੍ਸ ਪਸਂਸਤਿ.

੧੩੧.

‘‘ਭਵੇ ਚ ਨਨ੍ਦਤਿ ਤਸ੍ਸ, ਅਭਵੇ ਤਸ੍ਸ ਨ ਨਨ੍ਦਤਿ;

ਅਚ੍ਛੇਰਂ ਭੋਜਨਂ ਲਦ੍ਧਾ, ਤਸ੍ਸ ਉਪ੍ਪਜ੍ਜਤੇ ਸਤਿ;

ਤਤੋ ਨਂ ਅਨੁਕਮ੍ਪਤਿ, ਅਹੋ ਸੋਪਿ ਲਭੇਯ੍ਯਿਤੋ.

੧੩੨.

‘‘ਇਚ੍ਚੇਤੇ ਸੋਲ਼ਸਾਕਾਰਾ, ਮਿਤ੍ਤਸ੍ਮਿਂ ਸੁਪ੍ਪਤਿਟ੍ਠਿਤਾ;

ਯੇਹਿ ਮਿਤ੍ਤਞ੍ਚ ਜਾਨੇਯ੍ਯ, ਦਿਸ੍ਵਾ ਸੁਤ੍ਵਾ ਚ ਪਣ੍ਡਿਤੋ’’ਤਿ.

ਤਤ੍ਥ ਨ ਨਂ ਉਮ੍ਹਯਤੇ ਦਿਸ੍ਵਾਤਿ ਤਂ ਮਿਤ੍ਤਂ ਮਿਤ੍ਤਪਤਿਰੂਪਕੋ ਦਿਸ੍ਵਾ ਸਿਤਂ ਨ ਕਰੋਤਿ, ਪਹਟ੍ਠਾਕਾਰਂ ਨ ਦਸ੍ਸੇਤਿ. ਨ ਚ ਨਂ ਪਟਿਨਨ੍ਦਤੀਤਿ ਤਸ੍ਸ ਕਥਂ ਪਗ੍ਗਣ੍ਹਨ੍ਤੋ ਨ ਪਟਿਨਨ੍ਦਤਿ ਨ ਤੁਸ੍ਸਤਿ. ਚਕ੍ਖੂਨਿ ਚਸ੍ਸ ਨ ਦਦਾਤੀਤਿ ਓਲੋਕੇਨ੍ਤਂ ਨ ਓਲੋਕੇਤਿ. ਪਟਿਲੋਮਞ੍ਚਾਤਿ ਤਸ੍ਸ ਕਥਂ ਪਟਿਪ੍ਫਰਤਿ ਪਟਿਸਤ੍ਤੁ ਹੋਤਿ. ਵਣ੍ਣਕਾਮੇਤਿ ਤਸ੍ਸ ਵਣ੍ਣਂ ਭਣਨ੍ਤੇ. ਨਕ੍ਖਾਤੀਤਿ ਅਤ੍ਤਨੋ ਗੁਯ੍ਹਂ ਤਸ੍ਸ ਨ ਆਚਿਕ੍ਖਤਿ. ਕਮ੍ਮਂ ਤਸ੍ਸਾਤਿ ਤੇਨ ਕਤਕਮ੍ਮਂ ਨ ਵਣ੍ਣਯਤਿ. ਪਞ੍ਞਸ੍ਸਾਤਿ ਅਸ੍ਸ ਪਞ੍ਞਂ ਨਪ੍ਪਸਂਸਤਿ, ਞਾਣਸਮ੍ਪਦਂ ਨ ਪਸਂਸਤਿ. ਅਭਵੇਤਿ ਅਵਡ੍ਢਿਯਂ. ਤਸ੍ਸ ਨੁਪ੍ਪਜ੍ਜਤੇ ਸਤੀਤਿ ਤਸ੍ਸ ਮਿਤ੍ਤਪਤਿਰੂਪਕਸ੍ਸ ‘‘ਮਮ ਮਿਤ੍ਤਸ੍ਸਪਿ ਇਤੋ ਦਸ੍ਸਾਮੀ’’ਤਿ ਸਤਿ ਨ ਉਪ੍ਪਜ੍ਜਤਿ. ਨਾਨੁਕਮ੍ਪਤੀਤਿ ਮੁਦੁਚਿਤ੍ਤੇਨ ਨ ਚਿਨ੍ਤੇਤਿ. ਲਭੇਯ੍ਯਿਤੋਤਿ ਲਭੇਯ੍ਯ ਇਤੋ. ਆਕਾਰਾਤਿ ਕਾਰਣਾਨਿ. ਪਵੁਤ੍ਥਨ੍ਤਿ ਵਿਦੇਸਗਤਂ. ਕੇਲਾਯਿਤੋਤਿ ਕੇਲਾਯਤਿ ਮਮਾਯਤਿ ਪਤ੍ਥੇਤਿ ਪਿਹੇਤਿ ਇਚ੍ਛਤੀਤਿ ਅਤ੍ਥੋ. ਵਾਚਾਯਾਤਿ ਮਧੁਰਵਚਨੇਨ ਤਂ ਸਮੁਦਾਚਰਨ੍ਤੋ ਪਟਿਨਨ੍ਦਤਿ ਤੁਸ੍ਸਤਿ. ਸੇਸਂ ਵੁਤ੍ਤਪਟਿਪਕ੍ਖਨਯੇਨ ਵੇਦਿਤਬ੍ਬਂ. ਰਾਜਾ ਮਹਾਸਤ੍ਤਸ੍ਸ ਕਥਾਯ ਅਤ੍ਤਮਨੋ ਹੁਤ੍ਵਾ ਤਸ੍ਸ ਮਹਨ੍ਤਂ ਯਸਂ ਅਦਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਮਹਾਰਾਜ, ਪੁਬ੍ਬੇਪੇਸ ਪਞ੍ਹੋ ਸਮੁਟ੍ਠਹਿ, ਪਣ੍ਡਿਤਾਵ ਨਂ ਕਥਯਿਂਸੁ, ਇਮੇਹਿ ਦ੍ਵਤ੍ਤਿਂਸਾਯ ਆਕਾਰੇਹਿ ਮਿਤ੍ਤਾਮਿਤ੍ਤੋ ਜਾਨਿਤਬ੍ਬੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਪਣ੍ਡਿਤਾਮਚ੍ਚੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਿਤ੍ਤਾਮਿਤ੍ਤਜਾਤਕਵਣ੍ਣਨਾ ਦਸਮਾ.

ਜਾਤਕੁਦ੍ਦਾਨਂ –

ਕੁਣਾਲਂ ਭਦ੍ਦਸਾਲਞ੍ਚ, ਸਮੁਦ੍ਦਵਾਣਿਜ ਪਣ੍ਡਿਤਂ;

ਜਨਸਨ੍ਧਂ ਮਹਾਕਣ੍ਹਂ, ਕੋਸਿਯਂ ਸਿਰਿਮਨ੍ਤਕਂ.

ਪਦੁਮਂ ਮਿਤ੍ਤਾਮਿਤ੍ਤਞ੍ਚ, ਇਚ੍ਚੇਤੇ ਦਸ ਜਾਤਕੇ;

ਸਙ੍ਗਾਯਿਂਸੁ ਮਹਾਥੇਰਾ, ਦ੍ਵਾਦਸਮ੍ਹਿ ਨਿਪਾਤਕੇ.

ਦ੍ਵਾਦਸਕਨਿਪਾਤਵਣ੍ਣਨਾ ਨਿਟ੍ਠਿਤਾ.

੧੩. ਤੇਰਸਕਨਿਪਾਤੋ

[੪੭੪] ੧. ਅਮ੍ਬਜਾਤਕਵਣ੍ਣਨਾ

ਅਹਾਸਿ ਮੇ ਅਮ੍ਬਫਲਾਨਿ ਪੁਬ੍ਬੇਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਦੇਵਦਤ੍ਤੋ ਹਿ ‘‘ਅਹਂ ਬੁਦ੍ਧੋ ਭਵਿਸ੍ਸਾਮਿ, ਮਯ੍ਹਂ ਸਮਣੋ ਗੋਤਮੋ ਨੇਵ ਆਚਰਿਯੋ ਨ ਉਪਜ੍ਝਾਯੋ’’ਤਿ ਆਚਰਿਯਂ ਪਚ੍ਚਕ੍ਖਾਯ ਝਾਨਪਰਿਹੀਨੋ ਸਙ੍ਘਂ ਭਿਨ੍ਦਿਤ੍ਵਾ ਅਨੁਪੁਬ੍ਬੇਨ ਸਾਵਤ੍ਥਿਂ ਆਗਚ੍ਛਨ੍ਤੋ ਬਹਿਜੇਤਵਨੇ ਪਥਵਿਯਾ ਵਿਵਰੇ ਦਿਨ੍ਨੇ ਅਵੀਚਿਂ ਪਾਵਿਸਿ. ਤਦਾ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਦੇਵਦਤ੍ਤੋ ਆਚਰਿਯਂ ਪਚ੍ਚਕ੍ਖਾਯ ਮਹਾਵਿਨਾਸਂ ਪਤ੍ਤੋ, ਅਵੀਚਿਮਹਾਨਿਰਯੇ ਨਿਬ੍ਬਤ੍ਤੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਆਚਰਿਯਂ ਪਚ੍ਚਕ੍ਖਾਯ ਮਹਾਵਿਨਾਸਂ ਪਤ੍ਤੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਤਸ੍ਸ ਪੁਰੋਹਿਤਕੁਲਂ ਅਹਿਵਾਤਰੋਗੇਨ ਵਿਨਸ੍ਸਿ. ਏਕੋਵ ਪੁਤ੍ਤੋ ਭਿਤ੍ਤਿਂ ਭਿਨ੍ਦਿਤ੍ਵਾ ਪਲਾਤੋ. ਸੋ ਤਕ੍ਕਸਿਲਂ ਗਨ੍ਤ੍ਵਾ ਦਿਸਾਪਾਮੋਕ੍ਖਸ੍ਸਾਚਰਿਯਸ੍ਸ ਸਨ੍ਤਿਕੇ ਤਯੋ ਵੇਦੇ ਚ ਅਵਸੇਸਸਿਪ੍ਪਾਨਿ ਚ ਉਗ੍ਗਹੇਤ੍ਵਾ ਆਚਰਿਯਂ ਵਨ੍ਦਿਤ੍ਵਾ ਨਿਕ੍ਖਨ੍ਤੋ ‘‘ਦੇਸਚਾਰਿਤ੍ਤਂ ਜਾਨਿਸ੍ਸਾਮੀ’’ਤਿ ਚਰਨ੍ਤੋ ਏਕਂ ਪਚ੍ਚਨ੍ਤਨਗਰਂ ਪਾਪੁਣਿ. ਤਂ ਨਿਸ੍ਸਾਯ ਮਹਾਚਣ੍ਡਾਲਗਾਮਕੋ ਅਹੋਸਿ. ਤਦਾ ਬੋਧਿਸਤ੍ਤੋ ਤਸ੍ਮਿਂ ਗਾਮੇ ਪਟਿਵਸਤਿ, ਪਣ੍ਡਿਤੋ ਬ੍ਯਤ੍ਤੋ ਅਕਾਲੇ ਫਲਂ ਗਣ੍ਹਾਪਨਮਨ੍ਤਂ ਜਾਨਾਤਿ. ਸੋ ਪਾਤੋਵ ਵੁਟ੍ਠਾਯ ਕਾਜਂ ਆਦਾਯ ਤਤੋ ਗਾਮਾ ਨਿਕ੍ਖਿਮਿਤ੍ਵਾ ਅਰਞ੍ਞੇ ਏਕਂ ਅਮ੍ਬਰੁਕ੍ਖਂ ਉਪਸਙ੍ਕਮਿਤ੍ਵਾ ਸਤ੍ਤਪਦਮਤ੍ਥਕੇ ਠਿਤੋ ਤਂ ਮਨ੍ਤਂ ਪਰਿਵਤ੍ਤੇਤ੍ਵਾ ਅਮ੍ਬਰੁਕ੍ਖਂ ਏਕੇਨ ਉਦਕਪਸਤੇਨ ਪਹਰਤਿ. ਰੁਕ੍ਖਤੋ ਤਙ੍ਖਣਞ੍ਞੇਵ ਪੁਰਾਣਪਣ੍ਣਾਨਿ ਪਤਨ੍ਤਿ, ਨਵਾਨਿ ਉਟ੍ਠਹਨ੍ਤਿ, ਪੁਪ੍ਫਾਨਿ ਪੁਪ੍ਫਿਤ੍ਵਾ ਪਤਨ੍ਤਿ, ਅਮ੍ਬਫਲਾਨਿ ਉਟ੍ਠਾਯ ਮੁਹੁਤ੍ਤੇਨੇਵ ਪਚ੍ਚਿਤ੍ਵਾ ਮਧੁਰਾਨਿ ਓਜਵਨ੍ਤਾਨਿ ਦਿਬ੍ਬਰਸਸਦਿਸਾਨਿ ਹੁਤ੍ਵਾ ਰੁਕ੍ਖਤੋ ਪਤਨ੍ਤਿ. ਮਹਾਸਤ੍ਤੋ ਤਾਨਿ ਉਚ੍ਚਿਨਿਤ੍ਵਾ ਯਾਵਦਤ੍ਥਂ ਖਾਦਿਤ੍ਵਾ ਕਾਜਂ ਪੂਰਾਪੇਤ੍ਵਾ ਗੇਹਂ ਗਨ੍ਤ੍ਵਾ ਤਾਨਿ ਵਿਕ੍ਕਿਣਿਤ੍ਵਾ ਪੁਤ੍ਤਦਾਰਂ ਪੋਸੇਸਿ.

ਸੋ ਬ੍ਰਾਹ੍ਮਣਕੁਮਾਰੋ ਮਹਾਸਤ੍ਤਂ ਅਕਾਲੇ ਅਮ੍ਬਪਕ੍ਕਾਨਿ ਆਹਰਿਤ੍ਵਾ ਵਿਕ੍ਕਿਣਨ੍ਤਂ ਦਿਸ੍ਵਾ ‘‘ਨਿਸ੍ਸਂਸਯੇਨ ਤੇਹਿ ਮਨ੍ਤਬਲੇਨ ਉਪ੍ਪਨ੍ਨੇਹਿ ਭਵਿਤਬ੍ਬਂ, ਇਮਂ ਪੁਰਿਸਂ ਨਿਸ੍ਸਾਯ ਇਦਂ ਅਨਗ੍ਘਮਨ੍ਤਂ ਲਭਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਮਹਾਸਤ੍ਤਸ੍ਸ ਅਮ੍ਬਾਨਿ ਆਹਰਣਨਿਯਾਮਂ ਪਰਿਗ੍ਗਣ੍ਹਨ੍ਤੋ ਤਥਤੋ ਞਤ੍ਵਾ ਤਸ੍ਮਿਂ ਅਰਞ੍ਞਤੋ ਅਨਾਗਤੇਯੇਵ ਤਸ੍ਸ ਗੇਹਂ ਗਨ੍ਤ੍ਵਾ ਅਜਾਨਨ੍ਤੋ ਵਿਯ ਹੁਤ੍ਵਾ ਤਸ੍ਸ ਭਰਿਯਂ ‘‘ਕੁਹਿਂ ਅਯ੍ਯੋ, ਆਚਰਿਯੋ’’ਤਿ ਪੁਚ੍ਛਿਤ੍ਵਾ ‘‘ਅਰਞ੍ਞਂ ਗਤੋ’’ਤਿ ਵੁਤ੍ਤੇ ਤਂ ਆਗਤਂ ਆਗਮਯਮਾਨੋਵ ਠਤ੍ਵਾ ਆਗਚ੍ਛਨ੍ਤਂ ਦਿਸ੍ਵਾ ਹਤ੍ਥਤੋ ਪਚ੍ਛਿਂ ਗਹੇਤ੍ਵਾ ਆਹਰਿਤ੍ਵਾ ਗੇਹੇ ਠਪੇਸਿ. ਮਹਾਸਤ੍ਤੋ ਤਂ ਓਲੋਕੇਤ੍ਵਾ ਭਰਿਯਂ ਆਹ – ‘‘ਭਦ੍ਦੇ, ਅਯਂ ਮਾਣਵੋ ਮਨ੍ਤਤ੍ਥਾਯ ਆਗਤੋ, ਤਸ੍ਸ ਹਤ੍ਥੇ ਮਨ੍ਤੋ ਨਸ੍ਸਤਿ, ਅਸਪ੍ਪੁਰਿਸੋ ਏਸੋ’’ਤਿ. ਮਾਣਵੋਪਿ ‘‘ਅਹਂ ਇਮਂ ਮਨ੍ਤਂ ਆਚਰਿਯਸ੍ਸ ਉਪਕਾਰਕੋ ਹੁਤ੍ਵਾ ਲਭਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਤੋ ਪਟ੍ਠਾਯ ਤਸ੍ਸ ਗੇਹੇ ਸਬ੍ਬਕਿਚ੍ਚਾਨਿ ਕਰੋਤਿ. ਦਾਰੂਨਿ ਆਹਰਤਿ, ਵੀਹਿਂ ਕੋਟ੍ਟੇਤਿ, ਭਤ੍ਤਂ ਪਚਤਿ, ਦਨ੍ਤਕਟ੍ਠਮੁਖਧੋਵਨਾਦੀਨਿ ਦੇਤਿ, ਪਾਦਂ ਧੋਵਤਿ.

ਏਕਦਿਵਸਂ ਮਹਾਸਤ੍ਤੇਨ ‘‘ਤਾਤ ਮਾਣਵ, ਮਞ੍ਚਪਾਦਾਨਂ ਮੇ ਉਪਧਾਨਂ ਦੇਹੀ’’ਤਿ ਵੁਤ੍ਤੇ ਅਞ੍ਞਂ ਅਪਸ੍ਸਿਤ੍ਵਾ ਸਬ੍ਬਰਤ੍ਤਿਂ ਊਰੁਮ੍ਹਿ ਠਪੇਤ੍ਵਾ ਨਿਸੀਦਿ. ਅਪਰਭਾਗੇ ਮਹਾਸਤ੍ਤਸ੍ਸ ਭਰਿਯਾ ਪੁਤ੍ਤਂ ਵਿਜਾਯਿ. ਤਸ੍ਸਾ ਪਸੂਤਿਕਾਲੇ ਪਰਿਕਮ੍ਮਂ ਸਬ੍ਬਮਕਾਸਿ. ਸਾ ਏਕਦਿਵਸਂ ਮਹਾਸਤ੍ਤਂ ਆਹ ‘‘ਸਾਮਿ, ਅਯਂ ਮਾਣਵੋ ਜਾਤਿਸਮ੍ਪਨ੍ਨੋ ਹੁਤ੍ਵਾ ਮਨ੍ਤਤ੍ਥਾਯ ਅਮ੍ਹਾਕਂ ਵੇਯ੍ਯਾਵਚ੍ਚਂ ਕਰੋਤਿ, ਏਤਸ੍ਸ ਹਤ੍ਥੇ ਮਨ੍ਤੋ ਤਿਟ੍ਠਤੁ ਵਾ ਮਾ ਵਾ, ਦੇਥ ਤਸ੍ਸ ਮਨ੍ਤ’’ਨ੍ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਸ੍ਸ ਮਨ੍ਤਂ ਦਤ੍ਵਾ ਏਵਮਾਹ – ‘‘ਤਾਤ, ਅਨਗ੍ਘੋਯਂ ਮਨ੍ਤੋ, ਤਵ ਇਮਂ ਨਿਸ੍ਸਾਯ ਮਹਾਲਾਭਸਕ੍ਕਾਰੋ ਭਵਿਸ੍ਸਤਿ, ਰਞ੍ਞਾ ਵਾ ਰਾਜਮਹਾਮਤ੍ਤੇਨ ਵਾ ‘ਕੋ ਤੇ ਆਚਰਿਯੋ’ਤਿ ਪੁਟ੍ਠਕਾਲੇ ਮਾ ਮਂ ਨਿਗੂਹਿਤ੍ਥੋ, ਸਚੇ ਹਿ ‘ਚਣ੍ਡਾਲਸ੍ਸ ਮੇ ਸਨ੍ਤਿਕਾ ਮਨ੍ਤੋ ਗਹਿਤੋ’ਤਿ ਲਜ੍ਜਨ੍ਤੋ ‘ਬ੍ਰਾਹ੍ਮਣਮਹਾਸਾਲੋ ਮੇ ਆਚਰਿਯੋ’ਤਿ ਕਥੇਸ੍ਸਸਿ, ਇਮਸ੍ਸ ਮਨ੍ਤਸ੍ਸ ਫਲਂ ਨ ਲਭਿਸ੍ਸਸੀ’’ਤਿ. ਸੋ ‘‘ਕਿਂ ਕਾਰਣਾ ਤਂ ਨਿਗੂਹਿਸ੍ਸਾਮਿ, ਕੇਨਚਿ ਪੁਟ੍ਠਕਾਲੇ ਤੁਮ੍ਹੇਯੇਵ ਕਥੇਸ੍ਸਾਮੀ’’ਤਿ ਵਤ੍ਵਾ ਤਂ ਵਨ੍ਦਿਤ੍ਵਾ ਚਣ੍ਡਾਲਗਾਮਤੋ ਨਿਕ੍ਖਮਿਤ੍ਵਾ ਮਨ੍ਤਂ ਵੀਮਂਸਿਤ੍ਵਾ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਅਮ੍ਬਾਨਿ ਵਿਕ੍ਕਿਣਿਤ੍ਵਾ ਬਹੁਂ ਧਨਂ ਲਭਿ.

ਅਥੇਕਦਿਵਸਂ ਉਯ੍ਯਾਨਪਾਲੋ ਤਸ੍ਸ ਹਤ੍ਥਤੋ ਅਮ੍ਬਂ ਕਿਣਿਤ੍ਵਾ ਰਞ੍ਞੋ ਅਦਾਸਿ. ਰਾਜਾ ਤਂ ਪਰਿਭੁਞ੍ਜਿਤ੍ਵਾ ‘‘ਕੁਤੋ ਸਮ੍ਮ, ਤਯਾ ਏਵਰੂਪਂ ਅਮ੍ਬਂ ਲਦ੍ਧ’’ਨ੍ਤਿ ਪੁਚ੍ਛਿ. ਦੇਵ, ਏਕੋ ਮਾਣਵੋ ਅਕਾਲਅਮ੍ਬਫਲਾਨਿ ਆਨੇਤ੍ਵਾ ਵਿਕ੍ਕਿਣਾਤਿ, ਤਤੋ ਮੇ ਗਹਿਤਨ੍ਤਿ. ਤੇਨ ਹਿ ‘‘ਇਤੋ ਪਟ੍ਠਾਯ ਇਧੇਵ ਅਮ੍ਬਾਨਿ ਆਹਰਤੂ’’ਤਿ ਨਂ ਵਦੇਹੀਤਿ. ਸੋ ਤਥਾ ਅਕਾਸਿ. ਮਾਣਵੋਪਿ ਤਤੋ ਪਟ੍ਠਾਯ ਅਮ੍ਬਾਨਿ ਰਾਜਕੁਲਂ ਹਰਤਿ. ਅਥ ਰਞ੍ਞਾ ‘‘ਉਪਟ੍ਠਹ ਮ’’ਨ੍ਤਿ ਵੁਤ੍ਤੇ ਰਾਜਾਨਂ ਉਪਟ੍ਠਹਨ੍ਤੋ ਬਹੁਂ ਧਨਂ ਲਭਿਤ੍ਵਾ ਅਨੁਕ੍ਕਮੇਨ ਵਿਸ੍ਸਾਸਿਕੋ ਜਾਤੋ. ਅਥ ਨਂ ਏਕਦਿਵਸਂ ਰਾਜਾ ਪੁਚ੍ਛਿ ‘‘ਮਾਣਵ, ਕੁਤੋ ਅਕਾਲੇ ਏਵਂ ਵਣ੍ਣਗਨ੍ਧਰਸਸਮ੍ਪਨ੍ਨਾਨਿ ਅਮ੍ਬਾਨਿ ਲਭਸਿ, ਕਿਂ ਤੇ ਨਾਗੋ ਵਾ ਸੁਪਣ੍ਣੋ ਵਾ ਦੇਵੋ ਵਾ ਕੋਚਿ ਦੇਤਿ, ਉਦਾਹੁ ਮਨ੍ਤਬਲਂ ਏਤ’’ਨ੍ਤਿ? ‘‘ਨ ਮੇ ਮਹਾਰਾਜ, ਕੋਚਿ ਦੇਤਿ, ਅਨਗ੍ਘੋ ਪਨ ਮੇ ਮਨ੍ਤੋ ਅਤ੍ਥਿ, ਤਸ੍ਸੇਵ ਬਲ’’ਨ੍ਤਿ. ‘‘ਤੇਨ ਹਿ ਮਯਮ੍ਪਿ ਤੇ ਏਕਦਿਵਸਂ ਮਨ੍ਤਬਲਂ ਦਟ੍ਠੁਕਾਮਾ’’ਤਿ. ‘‘ਸਾਧੁ, ਦੇਵ, ਦਸ੍ਸੇਸ੍ਸਾਮੀ’’ਤਿ. ਰਾਜਾ ਪੁਨਦਿਵਸੇ ਤੇਨ ਸਦ੍ਧਿਂ ਉਯ੍ਯਾਨਂ ਗਨ੍ਤ੍ਵਾ ‘‘ਦਸ੍ਸੇਹੀ’’ਤਿ ਆਹ. ਸੋ ‘‘ਸਾਧੂ’’ਤਿ ਅਮ੍ਬਰੁਕ੍ਖਂ ਉਪਗਨ੍ਤ੍ਵਾ ਸਤ੍ਤਪਦਮਤ੍ਥਕੇ ਠਿਤੋ ਮਨ੍ਤਂ ਪਰਿਵਤ੍ਤੇਤ੍ਵਾ ਰੁਕ੍ਖਂ ਉਦਕੇਨ ਪਹਰਿ. ਤਙ੍ਖਣਞ੍ਞੇਵ ਅਮ੍ਬਰੁਕ੍ਖੋ ਹੇਟ੍ਠਾ ਵੁਤ੍ਤਨਿਯਾਮੇਨੇਵ ਫਲਂ ਗਹੇਤ੍ਵਾ ਮਹਾਮੇਘੋ ਵਿਯ ਅਮ੍ਬਵਸ੍ਸਂ ਵਸ੍ਸਿ. ਮਹਾਜਨੋ ਸਾਧੁਕਾਰਂ ਅਦਾਸਿ, ਚੇਲੁਕ੍ਖੇਪਾ ਪਵਤ੍ਤਿਂਸੁ.

ਰਾਜਾ ਅਮ੍ਬਫਲਾਨਿ ਖਾਦਿਤ੍ਵਾ ਤਸ੍ਸ ਬਹੁਂ ਧਨਂ ਦਤ੍ਵਾ ‘‘ਮਾਣਵਕ, ਏਵਰੂਪੋ ਤੇ ਅਚ੍ਛਰਿਯਮਨ੍ਤੋ ਕਸ੍ਸ ਸਨ੍ਤਿਕੇ ਗਹਿਤੋ’’ਤਿ ਪੁਚ੍ਛਿ. ਮਾਣਵੋ ‘‘ਸਚਾਹਂ ‘ਚਣ੍ਡਾਲਸ੍ਸ ਸਨ੍ਤਿਕੇ’ਤਿ ਵਕ੍ਖਾਮਿ, ਲਜ੍ਜਿਤਬ੍ਬਕਂ ਭਵਿਸ੍ਸਤਿ, ਮਞ੍ਚ ਗਰਹਿਸ੍ਸਨ੍ਤਿ, ਮਨ੍ਤੋ ਖੋ ਪਨ ਮੇ ਪਗੁਣੋ, ਇਦਾਨਿ ਨ ਨਸ੍ਸਿਸ੍ਸਤਿ, ਦਿਸਾਪਾਮੋਕ੍ਖਂ ਆਚਰਿਯਂ ਅਪਦਿਸਾਮੀ’’ਤਿ ਚਿਨ੍ਤੇਤ੍ਵਾ ਮੁਸਾਵਾਦਂ ਕਤ੍ਵਾ ‘‘ਤਕ੍ਕਸਿਲਾਯਂ ਦਿਸਾਪਾਮੋਕ੍ਖਾਚਰਿਯਸ੍ਸ ਸਨ੍ਤਿਕੇ ਗਹਿਤੋ ਮੇ’’ਤਿ ਵਦਨ੍ਤੋ ਆਚਰਿਯਂ ਪਚ੍ਚਕ੍ਖਾਸਿ. ਤਙ੍ਖਣਞ੍ਞੇਵ ਮਨ੍ਤੋ ਅਨ੍ਤਰਧਾਯਿ. ਰਾਜਾ ਸੋਮਨਸ੍ਸਜਾਤੋ ਤਂ ਆਦਾਯ ਨਗਰਂ ਪਵਿਸਿਤ੍ਵਾ ਪੁਨਦਿਵਸੇ ‘‘ਅਮ੍ਬਾਨਿ ਖਾਦਿਸ੍ਸਾਮੀ’’ਤਿ ਉਯ੍ਯਾਨਂ ਗਨ੍ਤ੍ਵਾ ਮਙ੍ਗਲਸਿਲਾਪਟ੍ਟੇ ਨਿਸੀਦਿਤ੍ਵਾ ਮਾਣਵ, ਅਮ੍ਬਾਨਿ ਆਹਰਾਤਿ ਆਹ. ਸੋ ‘‘ਸਾਧੂ’’ਤਿ ਅਮ੍ਬਂ ਉਪਗਨ੍ਤ੍ਵਾ ਸਤ੍ਤਪਦਮਤ੍ਥਕੇ ਠਿਤੋ ‘‘ਮਨ੍ਤਂ ਪਰਿਵਤ੍ਤੇਸ੍ਸਾਮੀ’’ਤਿ ਮਨ੍ਤੇ ਅਨੁਪਟ੍ਠਹਨ੍ਤੇ ਅਨ੍ਤਰਹਿਤਭਾਵਂ ਞਤ੍ਵਾ ਲਜ੍ਜਿਤੋ ਅਟ੍ਠਾਸਿ. ਰਾਜਾ ‘‘ਅਯਂ ਪੁਬ੍ਬੇ ਪਰਿਸਮਜ੍ਝੇਯੇਵ ਅਮ੍ਬਾਨਿ ਆਹਰਿਤ੍ਵਾ ਅਮ੍ਹਾਕਂ ਦੇਤਿ, ਘਨਮੇਘਵਸ੍ਸਂ ਵਿਯ ਅਮ੍ਬਵਸ੍ਸਂ ਵਸ੍ਸਾਪੇਤਿ, ਇਦਾਨਿ ਥਦ੍ਧੋ ਵਿਯ ਠਿਤੋ, ਕਿਂ ਨੁ ਖੋ ਕਾਰਣ’’ਨ੍ਤਿ ਚਿਨ੍ਤੇਤ੍ਵਾ ਤਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੧.

‘‘ਅਹਾਸਿ ਮੇ ਅਮ੍ਬਫਲਾਨਿ ਪੁਬ੍ਬੇ, ਅਣੂਨਿ ਥੂਲਾਨਿ ਚ ਬ੍ਰਹ੍ਮਚਾਰਿ;

ਤੇਹੇਵ ਮਨ੍ਤੇਹਿ ਨ ਦਾਨਿ ਤੁਯ੍ਹਂ, ਦੁਮਪ੍ਫਲਾ ਪਾਤੁਭਵਨ੍ਤਿ ਬ੍ਰਹ੍ਮੇ’’ਤਿ.

ਤਤ੍ਥ ਅਹਾਸੀਤਿ ਆਹਰਿ. ਦੁਮਪ੍ਫਲਾਤਿ ਰੁਕ੍ਖਫਲਾਨਿ.

ਤਂ ਸੁਤ੍ਵਾ ਮਾਣਵੋ ‘‘ਸਚੇ ‘ਅਜ੍ਜ ਅਮ੍ਬਫਲਂ ਨ ਗਣ੍ਹਾਮੀ’ਤਿ ਵਕ੍ਖਾਮਿ, ਰਾਜਾ ਮੇ ਕੁਜ੍ਝਿਸ੍ਸਤਿ, ਮੁਸਾਵਾਦੇਨ ਨਂ ਵਞ੍ਚੇਸ੍ਸਾਮੀ’’ਤਿ ਦੁਤਿਯਂ ਗਾਥਮਾਹ –

੨.

‘‘ਨਕ੍ਖਤ੍ਤਯੋਗਂ ਪਟਿਮਾਨਯਾਮਿ, ਖਣਂ ਮੁਹੁਤ੍ਤਞ੍ਚ ਮਨ੍ਤੇ ਨ ਪਸ੍ਸਂ;

ਨਕ੍ਖਤ੍ਤਯੋਗਞ੍ਚ ਖਣਞ੍ਚ ਲਦ੍ਧਾ, ਅਦ੍ਧਾ ਹਰਿਸ੍ਸਮ੍ਬਫਲਂ ਪਹੂਤ’’ਨ੍ਤਿ.

ਤਤ੍ਥ ਅਦ੍ਧਾਹਰਿਸ੍ਸਮ੍ਬਫਲਨ੍ਤਿ ਅਦ੍ਧਾ ਅਮ੍ਬਫਲਂ ਆਹਰਿਸ੍ਸਾਮਿ.

ਰਾਜਾ ‘‘ਅਯਂ ਅਞ੍ਞਦਾ ਨਕ੍ਖਤ੍ਤਯੋਗਂ ਨ ਵਦਤਿ, ਕਿਂ ਨੁ ਖੋ ਏਤ’’ਨ੍ਤਿ ਪੁਚ੍ਛਨ੍ਤੋ ਦ੍ਵੇ ਗਾਥਾ ਅਭਾਸਿ –

੩.

‘‘ਨਕ੍ਖਤ੍ਤਯੋਗਂ ਨ ਪੁਰੇ ਅਭਾਣਿ, ਖਣਂ ਮੁਹੁਤ੍ਤਂ ਨ ਪੁਰੇ ਅਸਂਸਿ;

ਸਯਂ ਹਰੀ ਅਮ੍ਬਫਲਂ ਪਹੂਤਂ, ਵਣ੍ਣੇਨ ਗਨ੍ਧੇਨ ਰਸੇਨੁਪੇਤਂ.

੪.

‘‘ਮਨ੍ਤਾਭਿਜਪ੍ਪੇਨ ਪੁਰੇ ਹਿ ਤੁਯ੍ਹਂ, ਦੁਮਪ੍ਫਲਾ ਪਾਤੁਭਵਨ੍ਤਿ ਬ੍ਰਹ੍ਮੇ;

ਸ੍ਵਾਜ੍ਜ ਨ ਪਾਰੇਸਿ ਜਪ੍ਪਮ੍ਪਿ ਮਨ੍ਤਂ, ਅਯਂ ਸੋ ਕੋ ਨਾਮ ਤਵਜ੍ਜ ਧਮ੍ਮੋ’’ਤਿ.

ਤਤ੍ਥ ਨ ਪਾਰੇਸੀਤਿ ਨ ਸਕ੍ਕੋਸਿ. ਜਪ੍ਪਮ੍ਪੀਤਿ ਜਪ੍ਪਨ੍ਤੋਪਿ ਪਰਿਵਤ੍ਤੇਨ੍ਤੋਪਿ. ਅਯਂ ਸੋਤਿ ਅਯਮੇਵ ਸੋ ਤਵ ਸਭਾਵੋ ਅਜ੍ਜ ਕੋ ਨਾਮ ਜਾਤੋਤਿ.

ਤਂ ਸੁਤ੍ਵਾ ਮਾਣਵੋ ‘‘ਨ ਸਕ੍ਕਾ ਰਾਜਾਨਂ ਮੁਸਾਵਾਦੇਨ ਵਞ੍ਚੇਤੁਂ, ਸਚੇਪਿ ਮੇ ਸਭਾਵੇ ਕਥਿਤੇ ਆਣਂ ਕਰੇਯ੍ਯ, ਕਰੋਤੁ, ਸਭਾਵਮੇਵ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦ੍ਵੇ ਗਾਥਾ ਅਭਾਸਿ –

੫.

‘‘ਚਣ੍ਡਾਲਪੁਤ੍ਤੋ ਮਮ ਸਮ੍ਪਦਾਸਿ, ਧਮ੍ਮੇਨ ਮਨ੍ਤੇ ਪਕਤਿਞ੍ਚ ਸਂਸਿ;

ਮਾ ਚਸ੍ਸੁ ਮੇ ਪੁਚ੍ਛਿਤੋ ਨਾਮਗੋਤ੍ਤਂ, ਗੁਯ੍ਹਿਤ੍ਥੋ ਅਤ੍ਥਂ ਵਿਜਹੇਯ੍ਯ ਮਨ੍ਤੋ.

੬.

‘‘ਸੋਹਂ ਜਨਿਨ੍ਦੇਨ ਜਨਮ੍ਹਿ ਪੁਟ੍ਠੋ, ਮਕ੍ਖਾਭਿਭੂਤੋ ਅਲਿਕਂ ਅਭਾਣਿਂ;

‘ਮਨ੍ਤਾ ਇਮੇ ਬ੍ਰਾਹ੍ਮਣਸ੍ਸਾ’ਤਿ ਮਿਚ੍ਛਾ, ਪਹੀਨਮਨ੍ਤੋ ਕਪਣੋ ਰੁਦਾਮੀ’’ਤਿ.

ਤਤ੍ਥ ਧਮ੍ਮੇਨਾਤਿ ਸਮੇਨ ਕਾਰਣੇਨ ਅਪ੍ਪਟਿਚ੍ਛਾਦੇਤ੍ਵਾਵ ਅਦਾਸਿ. ਪਕਤਿਞ੍ਚ ਸਂਸੀਤਿ ‘‘ਮਾ ਮੇ ਪੁਚ੍ਛਿਤੋ ਨਾਮਗੋਤ੍ਤਂ ਗੁਯ੍ਹਿਤ੍ਥੋ, ਸਚੇ ਗੂਹਸਿ, ਮਨ੍ਤਾ ਤੇ ਨਸ੍ਸਿਸ੍ਸਨ੍ਤੀ’’ਤਿ ਤੇਸਂ ਨਸ੍ਸਨਪਕਤਿਞ੍ਚ ਮਯ੍ਹਂ ਸਂਸਿ. ਬ੍ਰਾਹ੍ਮਣਸ੍ਸਾਤਿ ਮਿਚ੍ਛਾਤਿ ‘‘ਬ੍ਰਾਹ੍ਮਣਸ੍ਸ ਸਨ੍ਤਿਕੇ ਮਯਾ ਇਮੇ ਮਨ੍ਤਾ ਗਹਿਤਾ’’ਤਿ ਮਿਚ੍ਛਾਯ ਅਭਣਿਂ, ਤੇਨ ਮੇ ਤੇ ਮਨ੍ਤਾ ਨਟ੍ਠਾ, ਸ੍ਵਾਹਂ ਪਹੀਨਮਨ੍ਤੋ ਇਦਾਨਿ ਕਪਣੋ ਰੁਦਾਮੀਤਿ.

ਤਂ ਸੁਤ੍ਵਾ ਰਾਜਾ ‘‘ਅਯਂ ਪਾਪਧਮ੍ਮੋ ਏਵਰੂਪਂ ਰਤਨਮਨ੍ਤਂ ਨ ਓਲੋਕੇਸਿ, ਏਵਰੂਪਸ੍ਮਿਞ੍ਹਿ ਉਤ੍ਤਮਰਤਨਮਨ੍ਤੇ ਲਦ੍ਧੇ ਜਾਤਿ ਕਿਂ ਕਰਿਸ੍ਸਤੀ’’ਤਿ ਕੁਜ੍ਝਿਤ੍ਵਾ ਤਸ੍ਸ ਗਰਹਨ੍ਤੋ –

੭.

‘‘ਏਰਣ੍ਡਾ ਪੁਚਿਮਨ੍ਦਾ ਵਾ, ਅਥ ਵਾ ਪਾਲਿਭਦ੍ਦਕਾ;

ਮਧੁਂ ਮਧੁਤ੍ਥਿਕੋ ਵਿਨ੍ਦੇ, ਸੋ ਹਿ ਤਸ੍ਸ ਦੁਮੁਤ੍ਤਮੋ.

੮.

‘‘ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਯਮ੍ਹਾ ਧਮ੍ਮਂ ਵਿਜਾਨੇਯ੍ਯ, ਸੋ ਹਿ ਤਸ੍ਸ ਨਰੁਤ੍ਤਮੋ.

੯.

‘‘ਇਮਸ੍ਸ ਦਣ੍ਡਞ੍ਚ ਵਧਞ੍ਚ ਦਤ੍ਵਾ, ਗਲੇ ਗਹੇਤ੍ਵਾ ਖਲਯਾਥ ਜਮ੍ਮਂ;

ਯੋ ਉਤ੍ਤਮਤ੍ਥਂ ਕਸਿਰੇਨ ਲਦ੍ਧਂ, ਮਾਨਾਤਿਮਾਨੇਨ ਵਿਨਾਸਯਿਤ੍ਥਾ’’ਤਿ. –

ਇਮਾ ਗਾਥਾ ਆਹ.

ਤਤ੍ਥ ਮਧੁਤ੍ਥਿਕੋਤਿ ਮਧੁਅਤ੍ਥਿਕੋ ਪੁਰਿਸੋ ਅਰਞ੍ਞੇ ਮਧੁਂ ਓਲੋਕੇਨ੍ਤੋ ਏਤੇਸਂ ਰੁਕ੍ਖਾਨਂ ਯਤੋ ਮਧੁਂ ਲਭਤਿ, ਸੋਵ ਦੁਮੋ ਤਸ੍ਸ ਦੁਮੁਤ੍ਤਮੋ ਨਾਮ. ਤਥੇਵ ਖਤ੍ਤਿਯਾਦੀਸੁ ਯਮ੍ਹਾ ਪੁਰਿਸਾ ਧਮ੍ਮਂ ਕਾਰਣਂ ਯੁਤ੍ਤਂ ਅਤ੍ਥਂ ਵਿਜਾਨੇਯ੍ਯ, ਸੋਵ ਤਸ੍ਸ ਉਤ੍ਤਮੋ ਨਰੋ ਨਾਮ. ਇਮਸ੍ਸ ਦਣ੍ਡਞ੍ਚਾਤਿ ਇਮਸ੍ਸ ਪਾਪਧਮ੍ਮਸ੍ਸ ਸਬ੍ਬਸ੍ਸਹਰਣਦਣ੍ਡਞ੍ਚ ਵੇਲ਼ੁਪੇਸਿਕਾਦੀਹਿ ਪਿਟ੍ਠਿਚਮ੍ਮਂ ਉਪ੍ਪਾਟੇਤ੍ਵਾ ਵਧਞ੍ਚ ਦਤ੍ਵਾ ਇਮਂ ਜਮ੍ਮਂ ਗਲੇ ਗਹੇਤ੍ਵਾ ਖਲਯਾਥ, ਖਲਿਕਾਰਤ੍ਤਂ ਪਾਪੇਤ੍ਵਾ ਨਿਦ੍ਧਮਥ ਨਿਕ੍ਕਡ੍ਢਥ, ਕਿਂ ਇਮਿਨਾ ਇਧ ਵਸਨ੍ਤੇਨਾਤਿ.

ਰਾਜਪੁਰਿਸਾ ਤਥਾ ਕਤ੍ਵਾ ‘‘ਤਵਾਚਰਿਯਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਆਰਾਧੇਤ੍ਵਾਵ ਸਚੇ ਪੁਨ ਮਨ੍ਤੇ ਲਭਿਸ੍ਸਸਿ, ਇਧ ਆਗਚ੍ਛੇਯ੍ਯਾਸਿ, ਨੋ ਚੇ, ਇਮਂ ਦਿਸਂ ਮਾ ਓਲੋਕੇਯ੍ਯਾਸੀ’’ਤਿ ਤਂ ਨਿਬ੍ਬਿਸਯਮਕਂਸੁ. ਸੋ ਅਨਾਥੋ ਹੁਤ੍ਵਾ ‘‘ਠਪੇਤ੍ਵਾ ਆਚਰਿਯਂ ਨ ਮੇ ਅਞ੍ਞਂ ਪਟਿਸਰਣਂ ਅਤ੍ਥਿ, ਤਸ੍ਸੇਵ ਸਨ੍ਤਿਕਂ ਗਨ੍ਤ੍ਵਾ ਤਂ ਆਰਾਧੇਤ੍ਵਾ ਪੁਨ ਮਨ੍ਤਂ ਯਾਚਿਸ੍ਸਾਮੀ’’ਤਿ ਰੋਦਨ੍ਤੋ ਤਂ ਗਾਮਂ ਅਗਮਾਸਿ. ਅਥ ਨਂ ਆਗਚ੍ਛਨ੍ਤਂ ਦਿਸ੍ਵਾ ਮਹਾਸਤ੍ਤੋ ਭਰਿਯਂ ਆਮਨ੍ਤੇਤ੍ਵਾ ‘‘ਭਦ੍ਦੇ, ਪਸ੍ਸ ਤਂ ਪਾਪਧਮ੍ਮਂ ਪਰਿਹੀਨਮਨ੍ਤਂ ਪੁਨ ਆਗਚ੍ਛਨ੍ਤ’’ਨ੍ਤਿ ਆਹ. ਸੋ ਮਹਾਸਤ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ‘‘ਕਿਂਕਾਰਣਾ ਆਗਤੋਸੀ’’ਤਿ ਪੁਟ੍ਠੋ ‘‘ਆਚਰਿਯ, ਮੁਸਾਵਾਦਂ ਕਤ੍ਵਾ ਆਚਰਿਯਂ ਪਚ੍ਚਕ੍ਖਿਤ੍ਵਾ ਮਹਾਵਿਨਾਸਂ ਪਤ੍ਤੋਮ੍ਹੀ’’ਤਿ ਵਤ੍ਵਾ ਅਚ੍ਚਯਂ ਦਸ੍ਸੇਤ੍ਵਾ ਪੁਨ ਮਨ੍ਤੇ ਯਾਚਨ੍ਤੋ –

੧੦.

‘‘ਯਥਾ ਸਮਂ ਮਞ੍ਞਮਾਨੋ ਪਤੇਯ੍ਯ, ਸੋਬ੍ਭਂ ਗੁਹਂ ਨਰਕਂ ਪੂਤਿਪਾਦਂ;

ਰਜ੍ਜੂਤਿ ਵਾ ਅਕ੍ਕਮੇ ਕਣ੍ਹਸਪ੍ਪਂ, ਅਨ੍ਧੋ ਯਥਾ ਜੋਤਿਮਧਿਟ੍ਠਹੇਯ੍ਯ;

ਏਵਮ੍ਪਿ ਮਂ ਤਂ ਖਲਿਤਂ ਸਪਞ੍ਞ, ਪਹੀਨਮਨ੍ਤਸ੍ਸ ਪੁਨਪ੍ਪਦਾਹੀ’’ਤਿ. – ਗਾਥਮਾਹ;

ਤਤ੍ਥ ਯਥਾ ਸਮਨ੍ਤਿ ਯਥਾ ਪੁਰਿਸੋ ਇਦਂ ਸਮਂ ਠਾਨਨ੍ਤਿ ਮਞ੍ਞਮਾਨੋ ਸੋਬ੍ਭਂ ਵਾ ਗੁਹਂ ਵਾ ਭੂਮਿਯਾ ਫਲਿਤਟ੍ਠਾਨਸਙ੍ਖਾਤਂ ਨਰਕਂ ਵਾ ਪੂਤਿਪਾਦਂ ਵਾ ਪਤੇਯ੍ਯ. ਪੂਤਿਪਾਦੋਤਿ ਹਿਮਵਨ੍ਤਪਦੇਸੇ ਮਹਾਰੁਕ੍ਖੇ ਸੁਸ੍ਸਿਤ੍ਵਾ ਮਤੇ ਤਸ੍ਸ ਮੂਲੇਸੁ ਪੂਤਿਕੇਸੁ ਜਾਤੇਸੁ ਤਸ੍ਮਿਂ ਠਾਨੇ ਮਹਾਆਵਾਟੋ ਹੋਤਿ, ਤਸ੍ਸ ਨਾਮਂ. ਜੋਤਿਮਧਿਟ੍ਠਹੇਯ੍ਯਾਤਿ ਅਗ੍ਗਿਂ ਅਕ੍ਕਮੇਯ੍ਯ. ਏਵਮ੍ਪੀਤਿ ਏਵਂ ਅਹਮ੍ਪਿ ਪਞ੍ਞਾਚਕ੍ਖੁਨੋ ਅਭਾਵਾ ਅਨ੍ਧੋ ਤੁਮ੍ਹਾਕਂ ਵਿਸੇਸਂ ਅਜਾਨਨ੍ਤੋ ਤੁਮ੍ਹੇਸੁ ਖਲਿਤੋ, ਤਂ ਮਂ ਖਲਿਤਂ ਵਿਦਿਤ੍ਵਾ ਸਪਞ੍ਞ ਞਾਣਸਮ੍ਪਨ੍ਨ ਪਹੀਨਮਨ੍ਤਸ੍ਸ ਮਮ ਪੁਨਪਿ ਦੇਥਾਤਿ.

ਅਥ ਨਂ ਆਚਰਿਯੋ ‘‘ਤਾਤ, ਕਿਂ ਕਥੇਸਿ, ਅਨ੍ਧੋ ਹਿ ਸਞ੍ਞਾਯ ਦਿਨ੍ਨਾਯ ਸੋਬ੍ਭਾਦੀਨਿ ਪਰਿਹਰਤਿ, ਮਯਾ ਪਠਮਮੇਵ ਤਵ ਕਥਿਤਂ, ਇਦਾਨਿ ਕਿਮਤ੍ਥਂ ਮਮ ਸਨ੍ਤਿਕਂ ਆਗਤੋਸੀ’’ਤਿ ਵਤ੍ਵਾ –

੧੧.

‘‘ਧਮ੍ਮੇਨ ਮਨ੍ਤਂ ਤਵ ਸਮ੍ਪਦਾਸਿਂ, ਤੁਵਮ੍ਪਿ ਧਮ੍ਮੇਨ ਪਟਿਗ੍ਗਹੇਸਿ;

ਪਕਤਿਮ੍ਪਿ ਤੇ ਅਤ੍ਤਮਨੋ ਅਸਂਸਿਂ, ਧਮ੍ਮੇ ਠਿਤਂ ਤਂ ਨ ਜਹੇਯ੍ਯ ਮਨ੍ਤੋ.

੧੨.

‘‘ਯੋ ਬਾਲ-ਮਨ੍ਤਂ ਕਸਿਰੇਨ ਲਦ੍ਧਂ, ਯਂ ਦੁਲ੍ਲਭਂ ਅਜ੍ਜ ਮਨੁਸ੍ਸਲੋਕੇ;

ਕਿਞ੍ਚਾਪਿ ਲਦ੍ਧਾ ਜੀਵਿਤੁਂ ਅਪ੍ਪਪਞ੍ਞੋ, ਵਿਨਾਸਯੀ ਅਲਿਕਂ ਭਾਸਮਾਨੋ.

੧੩.

‘‘ਬਾਲਸ੍ਸ ਮੂਲ਼੍ਹਸ੍ਸ ਅਕਤਞ੍ਞੁਨੋ ਚ, ਮੁਸਾ ਭਣਨ੍ਤਸ੍ਸ ਅਸਞ੍ਞਤਸ੍ਸ;

ਮਨ੍ਤੇ ਮਯਂ ਤਾਦਿਸਕੇ ਨ ਦੇਮ, ਕੁਤੋ ਮਨ੍ਤਾ ਗਚ੍ਛ ਨ ਮਯ੍ਹਂ ਰੁਚ੍ਚਸੀ’’ਤਿ. –

ਇਮਾ ਗਾਥਾ ਆਹ.

ਤਤ੍ਥ ਧਮ੍ਮੇਨਾਤਿ ਅਹਮ੍ਪਿ ਤਵ ਆਚਰਿਯਭਾਗਂ ਹਿਰਞ੍ਞਂ ਵਾ ਸੁਵਣ੍ਣਂ ਵਾ ਅਗ੍ਗਹੇਤ੍ਵਾ ਧਮ੍ਮੇਨੇਵ ਮਨ੍ਤਂ ਸਮ੍ਪਦਾਸਿਂ, ਤ੍ਵਮ੍ਪਿ ਕਿਞ੍ਚਿ ਅਦਤ੍ਵਾ ਧਮ੍ਮੇਨ ਸਮੇਨੇਵ ਪਟਿਗ੍ਗਹੇਸਿ. ਧਮ੍ਮੇ ਠਿਤਨ੍ਤਿ ਆਚਰਿਯਪੂਜਕਧਮ੍ਮੇ ਠਿਤਂ. ਤਾਦਿਸਕੇਤਿ ਤਥਾਰੂਪੇ ਅਕਾਲਫਲਗਣ੍ਹਾਪਕੇ ਮਨ੍ਤੇ ਨ ਦੇਮ, ਗਚ੍ਛ ਨ ਮੇ ਰੁਚ੍ਚਸੀਤਿ.

ਸੋ ਏਵਂ ਆਚਰਿਯੇਨ ਉਯ੍ਯੋਜਿਤੋ ‘‘ਕਿਂ ਮਯ੍ਹਂ ਜੀਵਿਤੇਨਾ’’ਤਿ ਅਰਞ੍ਞਂ ਪਵਿਸਿਤ੍ਵਾ ਅਨਾਥਮਰਣਂ ਮਰਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਆਚਰਿਯਂ ਪਚ੍ਚਕ੍ਖਾਯ ਮਹਾਵਿਨਾਸਂ ਪਤ੍ਤੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਅਕਤਞ੍ਞੂ ਮਾਣਵੋ ਦੇਵਦਤ੍ਤੋ ਅਹੋਸਿ, ਰਾਜਾ ਆਨਨ੍ਦੋ, ਚਣ੍ਡਾਲਪੁਤ੍ਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਮ੍ਬਜਾਤਕਵਣ੍ਣਨਾ ਪਠਮਾ.

[੪੭੫] ੨. ਫਨ੍ਦਨਜਾਤਕਵਣ੍ਣਨਾ

ਕੁਠਾਰਿਹਤ੍ਥੋ ਪੁਰਿਸੋਤਿ ਇਦਂ ਸਤ੍ਥਾ ਰੋਹਿਣੀਨਦੀਤੀਰੇ ਵਿਹਰਨ੍ਤੋ ਞਾਤਕਾਨਂ ਕਲਹਂ ਆਰਬ੍ਭ ਕਥੇਸਿ. ਵਤ੍ਥੁ ਪਨ ਕੁਣਾਲਜਾਤਕੇ (ਜਾ. ੨.੨੧.ਕੁਣਾਲਜਾਤਕ) ਆਵਿ ਭਵਿਸ੍ਸਤਿ. ਤਦਾ ਪਨ ਸਤ੍ਥਾ ਞਾਤਕੇ ਆਮਨ੍ਤੇਤ੍ਵਾ – ਮਹਾਰਾਜਾ, ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਹਿਨਗਰੇ ਵਡ੍ਢਕਿਗਾਮੋ ਅਹੋਸਿ. ਤਤ੍ਰੇਕੋ ਬ੍ਰਾਹ੍ਮਣਵਡ੍ਢਕੀ ਅਰਞ੍ਞਤੋ ਦਾਰੂਨਿ ਆਹਰਿਤ੍ਵਾ ਰਥਂ ਕਤ੍ਵਾ ਜੀਵਿਕਂ ਕਪ੍ਪੇਸਿ. ਤਦਾ ਹਿਮਵਨ੍ਤਪਦੇਸੇ ਮਹਾਫਨ੍ਦਨਰੁਕ੍ਖੋ ਅਹੋਸਿ. ਏਕੋ ਕਾਲ਼ਸੀਹੋ ਗੋਚਰਂ ਪਰਿਯੇਸਿਤ੍ਵਾ ਆਗਨ੍ਤ੍ਵਾ ਤਸ੍ਸ ਮੂਲੇ ਨਿਪਜ੍ਜਿ. ਅਥਸ੍ਸ ਏਕਦਿਵਸਂ ਵਾਤੇ ਪਹਰਨ੍ਤੇ ਏਕੋ ਸੁਕ੍ਖਦਣ੍ਡਕੋ ਪਤਿਤ੍ਵਾ ਖਨ੍ਧੇ ਅਵਤ੍ਥਾਸਿ. ਸੋ ਥੋਕਂ ਖਨ੍ਧੇਨ ਰੁਜਨ੍ਤੇਨ ਭੀਤਤਸਿਤੋ ਉਟ੍ਠਾਯ ਪਕ੍ਖਨ੍ਦਿਤ੍ਵਾ ਪੁਨ ਨਿਵਤ੍ਤੋ ਆਗਤਮਗ੍ਗਂ ਓਲੋਕੇਨ੍ਤੋ ਕਿਞ੍ਚਿ ਅਦਿਸ੍ਵਾ ‘‘ਅਞ੍ਞੋ ਮਂ ਸੀਹੋ ਵਾ ਬ੍ਯਗ੍ਘੋ ਵਾ ਅਨੁਬਨ੍ਧਨ੍ਤੋ ਨਤ੍ਥਿ, ਇਮਸ੍ਮਿਂ ਪਨ ਰੁਕ੍ਖੇ ਨਿਬ੍ਬਤ੍ਤਦੇਵਤਾ ਮਂ ਏਤ੍ਥ ਨਿਪਜ੍ਜਨ੍ਤਂ ਨ ਸਹਤਿ ਮਞ੍ਞੇ, ਹੋਤੁ ਜਾਨਿਸ੍ਸਾਮੀ’’ਤਿ ਅਟ੍ਠਾਨੇ ਕੋਪਂ ਬਨ੍ਧਿਤ੍ਵਾ ਰੁਕ੍ਖਂ ਪਹਰਿਤ੍ਵਾ ‘‘ਨੇਵ ਤਵ ਰੁਕ੍ਖਸ੍ਸ ਪਤ੍ਤਂ ਖਾਦਾਮਿ, ਨ ਸਾਖਂ ਭਞ੍ਜਾਮਿ, ਇਧ ਅਞ੍ਞੇ ਮਿਗੇ ਵਸਨ੍ਤੇ ਸਹਸਿ, ਮਂ ਨ ਸਹਸਿ, ਕੋ ਮਯ੍ਹਂ ਦੋਸੋ ਅਤ੍ਥਿ, ਕਤਿਪਾਹਂ ਆਗਮੇਹਿ, ਸਮੂਲਂ ਤੇ ਰੁਕ੍ਖਂ ਉਪ੍ਪਾਟੇਤ੍ਵਾ ਖਣ੍ਡਾਖਣ੍ਡਿਕਂ ਛੇਦਾਪੇਸ੍ਸਾਮੀ’’ਤਿ ਰੁਕ੍ਖਦੇਵਤਂ ਤਜ੍ਜੇਤ੍ਵਾ ਏਕਂ ਪੁਰਿਸਂ ਉਪਧਾਰੇਨ੍ਤੋ ਵਿਚਰਿ. ਤਦਾ ਸੋ ਬ੍ਰਾਹ੍ਮਣਵਡ੍ਢਕੀ ਦ੍ਵੇ ਤਯੋ ਮਨੁਸ੍ਸੇ ਆਦਾਯ ਰਥਦਾਰੂਨਂ ਅਤ੍ਥਾਯ ਯਾਨਕੇਨ ਤਂ ਪਦੇਸਂ ਗਨ੍ਤ੍ਵਾ ਏਕਸ੍ਮਿਂ ਠਾਨੇ ਯਾਨਕਂ ਠਪੇਤ੍ਵਾ ਵਾਸਿਫਰਸੁਹਤ੍ਥੋ ਰੁਕ੍ਖੇ ਉਪਧਾਰੇਨ੍ਤੋ ਫਨ੍ਦਨਸਮੀਪਂ ਅਗਮਾਸਿ. ਕਾਲ਼ਸੀਹੋ ਤਂ ਦਿਸ੍ਵਾ ‘‘ਅਜ੍ਜ, ਮਯਾ ਪਚ੍ਚਾਮਿਤ੍ਤਸ੍ਸ ਪਿਟ੍ਠਿਂ ਦਟ੍ਠੁਂ ਵਟ੍ਟਤੀ’’ਤਿ ਗਨ੍ਤ੍ਵਾ ਰੁਕ੍ਖਮੂਲੇ ਅਟ੍ਠਾਸਿ. ਵਡ੍ਢਕੀ ਚ ਇਤੋ ਚਿਤੋ ਓਲੋਕੇਤ੍ਵਾ ਫਨ੍ਦਨਸਮੀਪੇਨ ਪਾਯਾਸਿ. ਸੋ ‘‘ਯਾਵ ਏਸੋ ਨਾਤਿਕ੍ਕਮਤਿ, ਤਾਵਦੇਵਸ੍ਸ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਪਠਮਂ ਗਾਥਮਾਹ –

੧੪.

‘‘ਕੁਠਾਰਿਹਤ੍ਥੋ ਪੁਰਿਸੋ, ਵਨਮੋਗਯ੍ਹ ਤਿਟ੍ਠਸਿ;

ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕਿਂ ਦਾਰੁਂ ਛੇਤੁਮਿਚ੍ਛਸੀ’’ਤਿ.

ਤਤ੍ਥ ਪੁਰਿਸੋਤਿ ਤ੍ਵਂ ਕੁਠਾਰਿਹਤ੍ਥੋ ਏਕੋ ਪੁਰਿਸੋ ਇਮਂ ਵਨਂ ਓਗਯ੍ਹ ਤਿਟ੍ਠਸੀਤਿ.

ਸੋ ਤਸ੍ਸ ਵਚਨਂ ਸੁਤ੍ਵਾ ‘‘ਅਚ੍ਛਰਿਯਂ ਵਤ ਭੋ, ਨ ਵਤ ਮੇ ਇਤੋ ਪੁਬ੍ਬੇ ਮਿਗੋ ਮਨੁਸ੍ਸਵਾਚਂ ਭਾਸਨ੍ਤੋ ਦਿਟ੍ਠਪੁਬ੍ਬੋ, ਏਸ ਰਥਾਨੁਚ੍ਛਵਿਕਂ ਦਾਰੁਂ ਜਾਨਿਸ੍ਸਤਿ, ਪੁਚ੍ਛਿਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਦੁਤਿਯਂ ਗਾਥਮਾਹ –

੧੫.

‘‘ਇਸ੍ਸੋ ਵਨਾਨਿ ਚਰਸਿ, ਸਮਾਨਿ ਵਿਸਮਾਨਿ ਚ;

ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕਿਂ ਦਾਰੁਂ ਨੇਮਿਯਾ ਦਲ਼੍ਹ’’ਨ੍ਤਿ.

ਤਤ੍ਥ ਇਸ੍ਸੋਤਿ ਤ੍ਵਮ੍ਪਿ ਏਕੋ ਕਾਲ਼ਸੀਹੋ ਵਨਾਨਿ ਚਰਸਿ, ਤ੍ਵਂ ਰਥਾਨੁਚ੍ਛਵਿਕਂ ਦਾਰੁਂ ਜਾਨਿਸ੍ਸਸੀਤਿ.

ਤਂ ਸੁਤ੍ਵਾ ਕਾਲ਼ਸੀਹੋ ‘‘ਇਦਾਨਿ ਮੇ ਮਨੋਰਥੋ ਮਤ੍ਥਕਂ ਪਾਪੁਣਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਤਤਿਯਂ ਗਾਥਮਾਹ –

੧੬.

‘‘ਨੇਵ ਸਾਲੋ ਨ ਖਦਿਰੋ, ਨਾਸ੍ਸਕਣ੍ਣੋ ਕੁਤੋ ਧਵੋ;

ਰੁਕ੍ਖੋ ਚ ਫਨ੍ਦਨੋ ਨਾਮ, ਤਂ ਦਾਰੁਂ ਨੇਮਿਯਾ ਦਲ਼੍ਹ’’ਨ੍ਤਿ.

ਸੋ ਤਂ ਸੁਤ੍ਵਾ ਸੋਮਨਸ੍ਸਜਾਤੋ ‘‘ਸੁਦਿਵਸੇਨ ਵਤਮ੍ਹਿ ਅਜ੍ਜ ਅਰਞ੍ਞਂ ਪਵਿਟ੍ਠੋ, ਤਿਰਚ੍ਛਾਨਗਤੋ ਮੇ ਰਥਾਨੁਚ੍ਛਵਿਕਂ ਦਾਰੁਂ ਆਚਿਕ੍ਖਤਿ, ਅਹੋ ਸਾਧੂ’’ਤਿ ਪੁਚ੍ਛਨ੍ਤੋ ਚਤੁਤ੍ਥਂ ਗਾਥਮਾਹ –

੧੭.

‘‘ਕੀਦਿਸਾਨਿਸ੍ਸ ਪਤ੍ਤਾਨਿ, ਖਨ੍ਧੋ ਵਾ ਪਨ ਕੀਦਿਸੋ;

ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਯਥਾ ਜਾਨੇਮੁ ਫਨ੍ਦਨ’’ਨ੍ਤਿ.

ਅਥਸ੍ਸ ਸੋ ਆਚਿਕ੍ਖਨ੍ਤੋ ਦ੍ਵੇ ਗਾਥਾ ਅਭਾਸਿ –

੧੮.

‘‘ਯਸ੍ਸ ਸਾਖਾ ਪਲਮ੍ਬਨ੍ਤਿ, ਨਮਨ੍ਤਿ ਨ ਚ ਭਞ੍ਜਰੇ;

ਸੋ ਰੁਕ੍ਖੋ ਫਨ੍ਦਨੋ ਨਾਮ, ਯਸ੍ਸ ਮੂਲੇ ਅਹਂ ਠਿਤੋ.

੧੯.

‘‘ਅਰਾਨਂ ਚਕ੍ਕਨਾਭੀਨਂ, ਈਸਾਨੇਮਿਰਥਸ੍ਸ ਚ;

ਸਬ੍ਬਸ੍ਸ ਤੇ ਕਮ੍ਮਨਿਯੋ, ਅਯਂ ਹੇਸ੍ਸਤਿ ਫਨ੍ਦਨੋ’’ਤਿ.

ਤਤ੍ਥ ‘‘ਅਰਾਨ’’ਨ੍ਤਿ ਇਦਂ ਸੋ ‘‘ਕਦਾਚੇਸ ਇਮਂ ਰੁਕ੍ਖਂ ਨ ਗਣ੍ਹੇਯ੍ਯ, ਗੁਣਮ੍ਪਿਸ੍ਸ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਵਮਾਹ. ਤਤ੍ਥ ਈਸਾਨੇਮਿਰਥਸ੍ਸ ਚਾਤਿ ਈਸਾਯ ਚ ਨੇਮਿਯਾ ਚ ਸੇਸਸ੍ਸ ਚ ਰਥਸ੍ਸ ਸਬ੍ਬਸ੍ਸ ਤੇ ਏਸ ਕਮ੍ਮਨਿਯੋ ਕਮ੍ਮਕ੍ਖਮੋ ਭਵਿਸ੍ਸਤੀਤਿ.

ਸੋ ਏਵਂ ਆਚਿਕ੍ਖਿਤ੍ਵਾ ਤੁਟ੍ਠਮਾਨਸੋ ਏਕਮਨ੍ਤੇ ਵਿਚਰਿ, ਵਡ੍ਢਕੀਪਿ ਰੁਕ੍ਖਂ ਛਿਨ੍ਦਿਤੁਂ ਆਰਭਿ. ਰੁਕ੍ਖਦੇਵਤਾ ਚਿਨ੍ਤੇਸਿ ‘‘ਮਯਾ ਏਤਸ੍ਸ ਉਪਰਿ ਨ ਕਿਞ੍ਚਿ ਪਾਤਿਤਂ, ਅਯਂ ਅਟ੍ਠਾਨੇ ਆਘਾਤਂ ਬਨ੍ਧਿਤ੍ਵਾ ਮਮ ਵਿਮਾਨਂ ਨਾਸੇਤਿ, ਅਹਞ੍ਚ ਵਿਨਸ੍ਸਿਸ੍ਸਾਮਿ, ਏਕੇਨੁਪਾਯੇਨ ਇਮਞ੍ਚ ਇਸ੍ਸਂ ਵਿਨਾਸੇਸ੍ਸਾਮੀ’’ਤਿ. ਸਾ ਵਨਕਮ੍ਮਿਕਪੁਰਿਸੋ ਵਿਯ ਹੁਤ੍ਵਾ ਤਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਪੁਚ੍ਛਿ ‘‘ਭੋ ਪੁਰਿਸ ਮਨਾਪੋ ਤੇ ਰੁਕ੍ਖੋ ਲਦ੍ਧੋ, ਇਮਂ ਛਿਨ੍ਦਿਤ੍ਵਾ ਕਿਂ ਕਰਿਸ੍ਸਸੀ’’ਤਿ? ‘‘ਰਥਨੇਮਿਂ ਕਰਿਸ੍ਸਾਮੀ’’ਤਿ. ‘‘ਇਮਿਨਾ ਰੁਕ੍ਖੇਨ ਰਥੋ ਭਵਿਸ੍ਸਤੀ’’ਤਿ ਕੇਨ ਤੇ ਅਕ੍ਖਾਤਨ੍ਤਿ. ‘‘ਏਕੇਨ ਕਾਲ਼ਸੀਹੇਨਾ’’ਤਿ. ‘‘ਸਾਧੁ ਸੁਟ੍ਠੁ ਤੇਨ ਅਕ੍ਖਾਤਂ, ਇਮਿਨਾ ਰੁਕ੍ਖੇਨ ਰਥੋ ਸੁਨ੍ਦਰੋ ਭਵਿਸ੍ਸਤਿ, ਕਾਲ਼ਸੀਹਸ੍ਸ ਗਲਚਮ੍ਮਂ ਉਪ੍ਪਾਟੇਤ੍ਵਾ ਚਤੁਰਙ੍ਗੁਲਮਤ੍ਤੇ ਠਾਨੇ ਅਯਪਟ੍ਟੇਨ ਵਿਯ ਨੇਮਿਮਣ੍ਡਲੇ ਪਰਿਕ੍ਖਿਤ੍ਤੇ ਨੇਮਿ ਚ ਥਿਰਾ ਭਵਿਸ੍ਸਤਿ, ਬਹੁਞ੍ਚ ਧਨਂ ਲਭਿਸ੍ਸਸੀ’’ਤਿ. ‘‘ਕਾਲ਼ਸੀਹਚਮ੍ਮਂ ਕੁਤੋ ਲਚ੍ਛਾਮੀ’’ਤਿ? ‘‘ਤ੍ਵਂ ਬਾਲਕੋਸਿ, ਅਯਂ ਤਵ ਰੁਕ੍ਖੋ ਵਨੇ ਠਿਤੋ ਨ ਪਲਾਯਤਿ, ਤ੍ਵਂ ਯੇਨ ਤੇ ਰੁਕ੍ਖੋ ਅਕ੍ਖਾਤੋ, ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘ਸਾਮਿ ਤਯਾ ਦਸ੍ਸਿਤਰੁਕ੍ਖਂ ਕਤਰਟ੍ਠਾਨੇ ਛਿਨ੍ਦਾਮੀ’ਤਿ ਵਞ੍ਚੇਤ੍ਵਾ ਆਨੇਹਿ, ਅਥ ਨਂ ਨਿਰਾਸਙ੍ਕਂ ‘ਇਧ ਚ ਏਤ੍ਥ ਚ ਛਿਨ੍ਦਾ’ਤਿ ਮੁਖਤੁਣ੍ਡਂ ਪਸਾਰੇਤ੍ਵਾ ਆਚਿਕ੍ਖਨ੍ਤਂ ਤਿਖਿਣੇਨ ਮਹਾਫਰਸੁਨਾ ਕੋਟ੍ਟੇਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਚਮ੍ਮਂ ਆਦਾਯ ਵਰਮਂਸਂ ਖਾਦਿਤ੍ਵਾ ਰੁਕ੍ਖਂ ਛਿਨ੍ਦਾ’’ਤਿ ਵੇਰਂ ਅਪ੍ਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਇਮਾ ਗਾਥਾ ਆਹ –

੨੦.

‘‘ਇਤਿ ਫਨ੍ਦਨਰੁਕ੍ਖੋਪਿ, ਤਾਵਦੇ ਅਜ੍ਝਭਾਸਥ;

ਮਯ੍ਹਮ੍ਪਿ ਵਚਨਂ ਅਤ੍ਥਿ, ਭਾਰਦ੍ਵਾਜ ਸੁਣੋਹਿ ਮੇ.

੨੧.

‘‘ਇਸ੍ਸਸ੍ਸ ਉਪਕ੍ਖਨ੍ਧਮ੍ਹਾ, ਉਕ੍ਕਚ੍ਚ ਚਤੁਰਙ੍ਗੁਲਂ;

ਤੇਨ ਨੇਮਿਂ ਪਸਾਰੇਸਿ, ਏਵਂ ਦਲ਼੍ਹਤਰਂ ਸਿਯਾ.

੨੨.

‘‘ਇਤਿ ਫਨ੍ਦਨਰੁਕ੍ਖੋਪਿ, ਵੇਰਂ ਅਪ੍ਪੇਸਿ ਤਾਵਦੇ;

ਜਾਤਾਨਞ੍ਚ ਅਜਾਤਾਨਂ, ਇਸ੍ਸਾਨਂ ਦੁਕ੍ਖਮਾਵਹੀ’’ਤਿ.

ਤਤ੍ਥ ਭਾਰਦ੍ਵਾਜਾਤਿ ਤਂ ਗੋਤ੍ਤੇਨ ਆਲਪਤਿ. ਉਪਕ੍ਖਨ੍ਧਮ੍ਹਾਤਿ ਖਨ੍ਧਤੋ. ਉਕ੍ਕਚ੍ਚਾਤਿ ਉਕ੍ਕਨ੍ਤਿਤ੍ਵਾ.

ਵਡ੍ਢਕੀ ਰੁਕ੍ਖਦੇਵਤਾਯ ਵਚਨਂ ਸੁਤ੍ਵਾ ‘‘ਅਹੋ ਅਜ੍ਜ ਮਯ੍ਹਂ ਮਙ੍ਗਲਦਿਵਸੋ’’ਤਿ ਕਾਲ਼ਸੀਹਂ ਘਾਤੇਤ੍ਵਾ ਰੁਕ੍ਖਂ ਛੇਤ੍ਵਾ ਪਕ੍ਕਾਮਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੨੩.

‘‘ਇਚ੍ਚੇਵਂ ਫਨ੍ਦਨੋ ਇਸ੍ਸਂ, ਇਸ੍ਸੋ ਚ ਪਨ ਫਨ੍ਦਨਂ;

ਅਞ੍ਞਮਞ੍ਞਂ ਵਿਵਾਦੇਨ, ਅਞ੍ਞਮਞ੍ਞਮਘਾਤਯੁਂ.

੨੪.

‘‘ਏਵਮੇਵ ਮਨੁਸ੍ਸਾਨਂ, ਵਿਵਾਦੋ ਯਤ੍ਥ ਜਾਯਤਿ;

ਮਯੂਰਨਚ੍ਚਂ ਨਚ੍ਚਨ੍ਤਿ, ਯਥਾ ਤੇ ਇਸ੍ਸਫਨ੍ਦਨਾ.

੨੫.

‘‘ਤਂ ਵੋ ਵਦਾਮਿ ਭਦ੍ਦਂ ਵੋ, ਯਾਵਨ੍ਤੇਤ੍ਥ ਸਮਾਗਤਾ;

ਸਮ੍ਮੋਦਥ ਮਾ ਵਿਵਦਥ, ਮਾ ਹੋਥ ਇਸ੍ਸਫਨ੍ਦਨਾ.

੨੬.

‘‘ਸਾਮਗ੍ਗਿਮੇਵ ਸਿਕ੍ਖੇਥ, ਬੁਦ੍ਧੇਹੇਤਂ ਪਸਂਸਿਤਂ;

ਸਾਮਗ੍ਗਿਰਤੋ ਧਮ੍ਮਟ੍ਠੋ, ਯੋਗਕ੍ਖੇਮਾ ਨ ਧਂਸਤੀ’’ਤਿ.

ਤਤ੍ਥ ਅਘਾਤਯੁਨ੍ਤਿ ਘਾਤਾਪੇਸੁਂ. ਮਯੂਰਨਚ੍ਚਂ ਨਚ੍ਚਨ੍ਤੀਤਿ ਮਹਾਰਾਜਾ ਯਤ੍ਥ ਹਿ ਮਨੁਸ੍ਸਾਨਂ ਵਿਵਾਦੋ ਹੋਤਿ, ਤਤ੍ਥ ਯਥਾ ਨਾਮ ਮਯੂਰਾ ਨਚ੍ਚਨ੍ਤਾ ਪਟਿਚ੍ਛਾਦੇਤਬ੍ਬਂ ਰਹਸ੍ਸਙ੍ਗਂ ਪਾਕਟਂ ਕਰੋਨ੍ਤਿ, ਏਵਂ ਮਨੁਸ੍ਸਾ ਅਞ੍ਞਮਞ੍ਞਸ੍ਸ ਰਨ੍ਧਂ ਪਕਾਸੇਨ੍ਤਾ ਮਯੂਰਨਚ੍ਚਂ ਨਚ੍ਚਨ੍ਤਿ ਨਾਮ. ਯਥਾ ਤੇ ਇਸ੍ਸਫਨ੍ਦਨਾ ਅਞ੍ਞਮਞ੍ਞਸ੍ਸ ਰਨ੍ਧਂ ਪਕਾਸੇਨ੍ਤਾ ਨਚ੍ਚਿਂਸੁ ਨਾਮ. ਤਂ ਵੋਤਿ ਤੇਨ ਕਾਰਣੇਨ ਤੁਮ੍ਹੇ ਵਦਾਮਿ. ਭਦ੍ਦਂ ਵੋਤਿ ਭਦ੍ਦਂ ਤੁਮ੍ਹਾਕਂ ਹੋਤੁ. ਯਾਵਨ੍ਤੇਤ੍ਥਾਤਿ ਯਾਵਨ੍ਤੋ ਏਤ੍ਥ ਇਸ੍ਸਫਨ੍ਦਨਸਦਿਸਾ ਮਾ ਅਹੁਵਤ੍ਥ. ਸਾਮਗ੍ਗਿਮੇਵ ਸਿਕ੍ਖੇਥਾਤਿ ਸਮਗ੍ਗਭਾਵਮੇਵ ਤੁਮ੍ਹੇ ਸਿਕ੍ਖਥ, ਇਦਂ ਪਞ੍ਞਾਵੁਦ੍ਧੇਹਿ ਪਣ੍ਡਿਤੇਹਿ ਪਸਂਸਿਤਂ. ਧਮ੍ਮਟ੍ਠੋਤਿ ਸੁਚਰਿਤਧਮ੍ਮੇ ਠਿਤੋ. ਯੋਗਕ੍ਖੇਮਾ ਨ ਧਂਸਤੀਤਿ ਯੋਗੇਹਿ ਖੇਮਾ ਨਿਬ੍ਬਾਨਾ ਨ ਪਰਿਹਾਯਤੀਤਿ ਨਿਬ੍ਬਾਨੇਨ ਦੇਸਨਾਕੂਟਂ ਗਣ੍ਹਿ. ਸਕ੍ਯਰਾਜਾਨੋ ਧਮ੍ਮਕਥਂ ਸੁਤ੍ਵਾ ਸਮਗ੍ਗਾ ਜਾਤਾ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਤਂ ਕਾਰਣਂ ਵਿਦਿਤ੍ਵਾ ਤਸ੍ਮਿਂ ਵਨਸਣ੍ਡੇ ਨਿਵੁਤ੍ਥਦੇਵਤਾ ਅਹਮੇਵ ਅਹੋਸਿ’’ਨ੍ਤਿ.

ਫਨ੍ਦਨਜਾਤਕਵਣ੍ਣਨਾ ਦੁਤਿਯਾ.

[੪੭੬] ੩. ਜਵਨਹਂਸਜਾਤਕਵਣ੍ਣਨਾ

ਇਧੇਵ ਹਂਸ ਨਿਪਤਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦਲ਼੍ਹਧਮ੍ਮਧਨੁਗ੍ਗਹਸੁਤ੍ਤਨ੍ਤਦੇਸਨਂ (ਸਂ. ਨਿ. ੨.੨੨੮) ਆਰਬ੍ਭ ਕਥੇਸਿ. ਭਗਵਤਾ ਹਿ –

‘‘ਸੇਯ੍ਯਥਾਪਿ, ਭਿਕ੍ਖਵੇ, ਚਤ੍ਤਾਰੋ ਦਲ਼੍ਹਧਮ੍ਮਾ ਧਨੁਗ੍ਗਹਾ ਸੁਸਿਕ੍ਖਿਤਾ ਕਤਹਤ੍ਥਾ ਕਤੂਪਾਸਨਾ ਚਤੁਦ੍ਦਿਸਾ ਠਿਤਾ ਅਸ੍ਸੁ, ਅਥ ਪੁਰਿਸੋ ਆਗਚ੍ਛੇਯ੍ਯ ‘ਅਹਂ ਇਮੇਸਂ ਚਤੁਨ੍ਨਂ ਦਲ਼੍ਹਧਮ੍ਮਾਨਂ ਧਨੁਗ੍ਗਹਾਨਂ ਸੁਸਿਕ੍ਖਿਤਾਨਂ ਕਤਹਤ੍ਥਾਨਂ ਕਤੂਪਾਸਨਾਨਂ ਚਤੁਦ੍ਦਿਸਾ ਕਣ੍ਡੇ ਖਿਤ੍ਤੇ ਅਪਤਿਟ੍ਠਿਤੇ ਪਥਵਿਯਂ ਗਹੇਤ੍ਵਾ ਆਹਰਿਸ੍ਸਾਮੀ’ਤਿ. ‘‘ਤਂ ਕਿਂ ਮਞ੍ਞਥ, ਭਿਕ੍ਖਵੇ, ‘ਜਵਨੋ ਪੁਰਿਸੋ ਪਰਮੇਨ ਜਵੇਨ ਸਮਨ੍ਨਾਗਤੋ’ਤਿ ਅਲਂ ਵਚਨਾਯਾ’’ਤਿ? ‘‘ਏਵਂ ਭਨ੍ਤੇ’’ਤਿ. ਯਥਾ ਚ, ਭਿਕ੍ਖਵੇ, ਤਸ੍ਸ ਪੁਰਿਸਸ੍ਸ ਜਵੋ, ਯਥਾ ਚ ਚਨ੍ਦਿਮਸੂਰਿਯਾਨਂ ਜਵੋ, ਤਤੋ ਸੀਘਤਰੋ. ਯਥਾ ਚ, ਭਿਕ੍ਖਵੇ, ਤਸ੍ਸ ਪੁਰਿਸਸ੍ਸ ਜਵੋ, ਯਥਾ ਚ ਚਨ੍ਦਿਮਸੂਰਿਯਾਨਂ ਜਵੋ, ਯਥਾ ਚ ਯਾ ਦੇਵਤਾ ਚਨ੍ਦਿਮਸੂਰਿਯਾਨਂ ਪੁਰਤੋ ਧਾਵਨ੍ਤਿ, ਤਾਸਂ ਦੇਵਤਾਨਂ ਜਵੋ, ਤਤੋ ਸੀਘਤਰਂ ਆਯੁਸਙ੍ਖਾਰਾ ਖੀਯਨ੍ਤਿ, ਤਸ੍ਮਾਤਿਹ, ਭਿਕ੍ਖਵੇ, ਏਵਂ ਸਿਕ੍ਖਿਤਬ੍ਬਂ ‘ਅਪ੍ਪਮਤ੍ਤਾ ਵਿਹਰਿਸ੍ਸਾਮਾ’ਤਿ. ਏਵਞ੍ਹਿ ਵੋ, ਭਿਕ੍ਖਵੇ, ਸਿਕ੍ਖਿਤਬ੍ਬ’’ਨ੍ਤਿ –

ਇਮਸ੍ਸ ਸੁਤ੍ਤਸ੍ਸ ਕਥਿਤਦਿਵਸਤੋ ਦੁਤਿਯਦਿਵਸੇ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਸਤ੍ਥਾ ਅਤ੍ਤਨੋ ਬੁਦ੍ਧਵਿਸਯੇ ਠਤ੍ਵਾ ਇਮੇਸਂ ਸਤ੍ਤਾਨਂ ਆਯੁਸਙ੍ਖਾਰੇ ਇਤ੍ਤਰੇ ਦੁਬ੍ਬਲੇ ਕਤ੍ਵਾ ਪਰਿਦੀਪੇਨ੍ਤੋ ਪੁਥੁਜ੍ਜਨਭਿਕ੍ਖੂ ਅਤਿਵਿਯ ਸਨ੍ਤਾਸਂ ਪਾਪੇਸਿ, ਅਹੋ ਬੁਦ੍ਧਬਲਂ ਨਾਮਾ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਸ੍ਵਾਹਂ ਇਦਾਨਿ ਸਬ੍ਬਞ੍ਞੁਤਂ ਪਤ੍ਤੋ ਆਯੁਸਙ੍ਖਾਰਾਨਂ ਇਤ੍ਤਰਭਾਵਂ ਦਸ੍ਸੇਤ੍ਵਾ ਭਿਕ੍ਖੂ ਸਂਵੇਜੇਤ੍ਵਾ ਧਮ੍ਮਂ ਦੇਸੇਮਿ, ਮਯਾ ਹਿ ਪੁਬ੍ਬੇ ਅਹੇਤੁਕਹਂਸਯੋਨਿਯਂ ਨਿਬ੍ਬਤ੍ਤੇਨਪਿ ਆਯੁਸਙ੍ਖਾਰਾਨਂ ਇਤ੍ਤਰਭਾਵਂ ਦਸ੍ਸੇਤ੍ਵਾ ਬਾਰਾਣਸਿਰਾਜਾਨਂ ਆਦਿਂ ਕਤ੍ਵਾ ਸਕਲਰਾਜਪਰਿਸਂ ਸਂਵੇਜੇਤ੍ਵਾ ਧਮ੍ਮੋ ਦੇਸਿਤੋ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਜਵਨਹਂਸਯੋਨਿਯਂ ਨਿਬ੍ਬਤ੍ਤਿਤ੍ਵਾ ਨਵੁਤਿਹਂਸਸਹਸ੍ਸਪਰਿਵੁਤੋ ਚਿਤ੍ਤਕੂਟੇ ਪਟਿਵਸਤਿ. ਸੋ ਏਕਦਿਵਸਂ ਜਮ੍ਬੁਦੀਪਤਲੇ ਏਕਸ੍ਮਿਂ ਸਰੇ ਸਪਰਿਵਾਰੋ ਸਯਂਜਾਤਸਾਲਿਂ ਖਾਦਿਤ੍ਵਾ ਆਕਾਸੇ ਸੁਵਣ੍ਣਕਿਲਞ੍ਜਂ ਪਤ੍ਥਰਨ੍ਤੋ ਵਿਯ ਮਹਨ੍ਤੇਨ ਪਰਿਵਾਰੇਨ ਬਾਰਾਣਸਿਨਗਰਸ੍ਸ ਮਤ੍ਥਕੇਨ ਮਨ੍ਦਮਨ੍ਦਾਯ ਵਿਲਾਸਗਤਿਯਾ ਚਿਤ੍ਤਕੂਟਂ ਗਚ੍ਛਤਿ. ਅਥ ਨਂ ਬਾਰਾਣਸਿਰਾਜਾ ਦਿਸ੍ਵਾ ‘‘ਇਮਿਨਾਪਿ ਮਾਦਿਸੇਨ ਰਞ੍ਞਾ ਭਵਿਤਬ੍ਬ’’ਨ੍ਤਿ ਅਮਚ੍ਚਾਨਂ ਵਤ੍ਵਾ ਤਸ੍ਮਿਂ ਸਿਨੇਹਂ ਉਪ੍ਪਾਦੇਤ੍ਵਾ ਮਾਲਾਗਨ੍ਧਵਿਲੇਪਨਂ ਗਹੇਤ੍ਵਾ ਮਹਾਸਤ੍ਤਂ ਓਲੋਕੇਤ੍ਵਾ ਸਬ੍ਬਤੂਰਿਯਾਨਿ ਪਗ੍ਗਣ੍ਹਾਪੇਸਿ. ਮਹਾਸਤ੍ਤੋ ਅਤ੍ਤਨੋ ਸਕ੍ਕਾਰਂ ਕਰੋਨ੍ਤਂ ਦਿਸ੍ਵਾ ਹਂਸੇ ਪੁਚ੍ਛਿ ‘‘ਰਾਜਾ, ਮਮ ਏਵਰੂਪਂ ਸਕ੍ਕਾਰਂ ਕਰੋਨ੍ਤੋ ਕਿਂ ਪਚ੍ਚਾਸੀਸਤੀ’’ਤਿ? ‘‘ਤੁਮ੍ਹੇਹਿ ਸਦ੍ਧਿਂ ਮਿਤ੍ਤਭਾਵਂ ਦੇਵਾ’’ਤਿ. ‘‘ਤੇਨ ਹਿ ਰਞ੍ਞੋ ਅਮ੍ਹੇਹਿ ਸਦ੍ਧਿਂ ਮਿਤ੍ਤਭਾਵੋ ਹੋਤੂ’’ਤਿ ਰਞ੍ਞਾ ਸਦ੍ਧਿਂ ਮਿਤ੍ਤਭਾਵਂ ਕਤ੍ਵਾ ਪਕ੍ਕਾਮਿ. ਅਥੇਕਦਿਵਸਂ ਰਞ੍ਞੋ ਉਯ੍ਯਾਨਂ ਗਤਕਾਲੇ ਅਨੋਤਤ੍ਤਦਹਂ ਗਨ੍ਤ੍ਵਾ ਏਕੇਨ ਪਕ੍ਖੇਨ ਉਦਕਂ, ਏਕੇਨ ਚਨ੍ਦਨਚੁਣ੍ਣਂ ਆਦਾਯ ਆਗਨ੍ਤ੍ਵਾ ਰਾਜਾਨਂ ਤੇਨ ਉਦਕੇਨ ਨ੍ਹਾਪੇਤ੍ਵਾ ਚਨ੍ਦਨਚੁਣ੍ਣੇਨ ਓਕਿਰਿਤ੍ਵਾ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ਸਪਰਿਵਾਰੋ ਚਿਤ੍ਤਕੂਟਂ ਅਗਮਾਸਿ. ਤਤੋ ਪਟ੍ਠਾਯ ਰਾਜਾ ਮਹਾਸਤ੍ਤਂ ਦਟ੍ਠੁਕਾਮੋ ਹੁਤ੍ਵਾ ‘‘ਸਹਾਯੋ ਮੇ ਅਜ੍ਜ ਆਗਮਿਸ੍ਸਤਿ, ਸਹਾਯੋ ਮੇ ਅਜ੍ਜ ਆਗਮਿਸ੍ਸਤੀ’’ਤਿ ਆਗਮਨਮਗ੍ਗਂ ਓਲੋਕੇਨ੍ਤੋ ਅਚ੍ਛਤਿ.

ਤਦਾ ਮਹਾਸਤ੍ਤਸ੍ਸ ਕਨਿਟ੍ਠਾ ਦ੍ਵੇ ਹਂਸਪੋਤਕਾ ‘‘ਸੂਰਿਯੇਨ ਸਦ੍ਧਿਂ ਜਵਿਸ੍ਸਾਮਾ’’ਤਿ ਮਨ੍ਤੇਤ੍ਵਾ ਮਹਾਸਤ੍ਤਸ੍ਸ ਆਰੋਚੇਸੁਂ ‘‘ਮਯਂ ਸੂਰਿਯੇਨ ਸਦ੍ਧਿਂ ਜਵਿਸ੍ਸਾਮਾ’’ਤਿ. ‘‘ਤਾਤਾ, ਸੂਰਿਯਜਵੋ ਨਾਮ ਸੀਘੋ, ਸੂਰਿਯੇਨ ਸਦ੍ਧਿਂ ਜਵਿਤੁਂ ਨ ਸਕ੍ਖਿਸ੍ਸਥ, ਅਨ੍ਤਰਾਵ ਵਿਨਸ੍ਸਿਸ੍ਸਥ, ਮਾ ਗਮਿਤ੍ਥਾ’’ਤਿ. ਤੇ ਦੁਤਿਯਮ੍ਪਿ ਤਤਿਯਮ੍ਪਿ ਯਾਚਿਂਸੁ, ਬੋਧਿਸਤ੍ਤੋਪਿ ਤੇ ਯਾਵਤਤਿਯਂ ਵਾਰੇਸਿਯੇਵ. ਤੇ ਮਾਨਥਦ੍ਧਾ ਅਤ੍ਤਨੋ ਬਲਂ ਅਜਾਨਨ੍ਤਾ ਮਹਾਸਤ੍ਤਸ੍ਸ ਅਨਾਚਿਕ੍ਖਿਤ੍ਵਾਵ ‘‘ਸੂਰਿਯੇਨ ਸਦ੍ਧਿਂ ਜਵਿਸ੍ਸਾਮਾ’’ਤਿ ਸੂਰਿਯੇ ਅਨੁਗ੍ਗਤੇਯੇਵ ਗਨ੍ਤ੍ਵਾ ਯੁਗਨ੍ਧਰਮਤ੍ਥਕੇ ਨਿਸੀਦਿਂਸੁ. ਮਹਾਸਤ੍ਤੋ ਤੇ ਅਦਿਸ੍ਵਾ ‘‘ਕਹਂ ਨੁ ਖੋ ਗਤਾ’’ਤਿ ਪੁਚ੍ਛਿਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ ਚਿਨ੍ਤੇਸਿ ‘‘ਤੇ ਸੂਰਿਯੇਨ ਸਦ੍ਧਿਂ ਜਵਿਤੁਂ ਨ ਸਕ੍ਖਿਸ੍ਸਨ੍ਤਿ, ਅਨ੍ਤਰਾਵ ਵਿਨਸ੍ਸਿਸ੍ਸਨ੍ਤਿ, ਜੀਵਿਤਂ ਤੇਸਂ ਦਸ੍ਸਾਮੀ’’ਤਿ. ਸੋਪਿ ਗਨ੍ਤ੍ਵਾ ਯੁਗਨ੍ਧਰਮਤ੍ਥਕੇਯੇਵ ਨਿਸੀਦਿ. ਅਥ ਉਗ੍ਗਤੇ ਸੂਰਿਯਮਣ੍ਡਲੇ ਹਂਸਪੋਤਕਾ ਉਪ੍ਪਤਿਤ੍ਵਾ ਸੂਰਿਯੇਨ ਸਦ੍ਧਿਂ ਪਕ੍ਖਨ੍ਦਿਂਸੁ, ਮਹਾਸਤ੍ਤੋਪਿ ਤੇਹਿ ਸਦ੍ਧਿਂ ਪਕ੍ਖਨ੍ਦਿ. ਕਨਿਟ੍ਠਭਾਤਿਕੋ ਯਾਵ ਪੁਬ੍ਬਣ੍ਹਸਮਯਾ ਜਵਿਤ੍ਵਾ ਕਿਲਮਿ, ਪਕ੍ਖਸਨ੍ਧੀਸੁ ਅਗ੍ਗਿਉਟ੍ਠਾਨਕਾਲੋ ਵਿਯ ਅਹੋਸਿ. ਸੋ ਬੋਧਿਸਤ੍ਤਸ੍ਸ ਸਞ੍ਞਂ ਅਦਾਸਿ ‘‘ਭਾਤਿਕ, ਨ ਸਕ੍ਕੋਮੀ’’ਤਿ. ਅਥ ਨਂ ਮਹਾਸਤ੍ਤੋ ‘‘ਮਾ ਭਾਯਿ, ਜੀਵਿਤਂ ਤੇ ਦਸ੍ਸਾਮੀ’’ਤਿ ਪਕ੍ਖਪਞ੍ਜਰੇਨ ਪਰਿਕ੍ਖਿਪਿਤ੍ਵਾ ਅਸ੍ਸਾਸੇਤ੍ਵਾ ਚਿਤ੍ਤਕੂਟਪਬ੍ਬਤਂ ਨੇਤ੍ਵਾ ਹਂਸਾਨਂ ਮਜ੍ਝੇ ਠਪੇਤ੍ਵਾ ਪੁਨ ਪਕ੍ਖਨ੍ਦਿਤ੍ਵਾ ਸੂਰਿਯਂ ਪਤ੍ਵਾ ਇਤਰੇਨ ਸਦ੍ਧਿਂ ਪਾਯਾਸਿ. ਸੋਪਿ ਯਾਵ ਉਪਕਟ੍ਠਮਜ੍ਝਨ੍ਹਿਕਾ ਸੂਰਿਯੇਨ ਸਦ੍ਧਿਂ ਜਵਿਤ੍ਵਾ ਕਿਲਮਿ, ਪਕ੍ਖਸਨ੍ਧੀਸੁ ਅਗ੍ਗਿਉਟ੍ਠਾਨਕਾਲੋ ਵਿਯ ਅਹੋਸਿ. ਤਦਾ ਬੋਧਿਸਤ੍ਤਸ੍ਸ ਸਞ੍ਞਂ ਅਦਾਸਿ ‘‘ਭਾਤਿਕ, ਨ ਸਕ੍ਕੋਮੀ’’ਤਿ. ਤਮ੍ਪਿ ਮਹਾਸਤ੍ਤੋ ਤਥੇਵ ਸਮਸ੍ਸਾਸੇਤ੍ਵਾ ਪਕ੍ਖਪਞ੍ਜਰੇਨਾਦਾਯ ਚਿਤ੍ਤਕੂਟਮੇਵ ਅਗਮਾਸਿ. ਤਸ੍ਮਿਂ ਖਣੇ ਸੂਰਿਯੋ ਨਭਮਜ੍ਝਂ ਪਾਪੁਣਿ.

ਅਥ ਮਹਾਸਤ੍ਤੋ ‘‘ਮਮ ਅਜ੍ਜ ਸਰੀਰਬਲਂ ਵੀਮਂਸਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਕਵੇਗੇਨ ਪਕ੍ਖਨ੍ਦਿਤ੍ਵਾ ਯੁਗਨ੍ਧਰਮਤ੍ਥਕੇ ਨਿਸੀਦਿਤ੍ਵਾ ਤਤੋ ਉਪ੍ਪਤਿਤ੍ਵਾ ਏਕਵੇਗੇਨ ਸੂਰਿਯਂ ਪਾਪੁਣਿਤ੍ਵਾ ਕਾਲੇਨ ਪੁਰਤੋ, ਕਾਲੇਨ ਪਚ੍ਛਤੋ ਜਵਿਤ੍ਵਾ ਚਿਨ੍ਤੇਸਿ ‘‘ਮਯ੍ਹਂ ਸੂਰਿਯੇਨ ਸਦ੍ਧਿਂ ਜਵਨਂ ਨਾਮ ਨਿਰਤ੍ਥਕਂ ਅਯੋਨਿਸੋਮਨਸਿਕਾਰਸਮ੍ਭੂਤਂ, ਕਿਂ ਮੇ ਇਮਿਨਾ, ਬਾਰਾਣਸਿਂ ਗਨ੍ਤ੍ਵਾ ਮਮ ਸਹਾਯਕਸ੍ਸ ਰਞ੍ਞੋ ਅਤ੍ਥਯੁਤ੍ਤਂ ਧਮ੍ਮਯੁਤ੍ਤਂ ਕਥਂ ਕਥੇਸ੍ਸਾਮੀ’’ਤਿ. ਸੋ ਨਿਵਤ੍ਤਿਤ੍ਵਾ ਸੂਰਿਯੇ ਨਭਮਜ੍ਝਂ ਅਨਤਿਕ੍ਕਨ੍ਤੇਯੇਵ ਸਕਲਚਕ੍ਕਵਾਲ਼ਗਬ੍ਭਂ ਅਨ੍ਤਨ੍ਤੇਨ ਅਨੁਸਂਯਾਯਿਤ੍ਵਾ ਵੇਗਂ ਪਰਿਹਾਪੇਨ੍ਤੋ ਸਕਲਜਮ੍ਬੁਦੀਪਂ ਅਨ੍ਤਨ੍ਤੇਨ ਅਨੁਸਂਯਾਯਿਤ੍ਵਾ ਬਾਰਾਣਸਿਂ ਪਾਪੁਣਿ. ਦ੍ਵਾਦਸਯੋਜਨਿਕਂ ਸਕਲਨਗਰਂ ਹਂਸਚ੍ਛਨ੍ਨਂ ਵਿਯ ਅਹੋਸਿ, ਛਿਦ੍ਦਂ ਨਾਮ ਨ ਪਞ੍ਞਾਯਿ, ਅਨੁਕ੍ਕਮੇਨ ਵੇਗੇ ਪਰਿਹਾਯਨ੍ਤੇ ਆਕਾਸੇ ਛਿਦ੍ਦਾਨਿ ਪਞ੍ਞਾਯਿਂਸੁ. ਮਹਾਸਤ੍ਤੋ ਵੇਗਂ ਪਰਿਹਾਪੇਤ੍ਵਾ ਆਕਾਸਤੋ ਓਤਰਿਤ੍ਵਾ ਸੀਹਪਞ੍ਜਰਸ੍ਸ ਅਭਿਮੁਖਟ੍ਠਾਨੇ ਅਟ੍ਠਾਸਿ. ਰਾਜਾ ‘‘ਆਗਤੋ ਮੇ ਸਹਾਯੋ’’ਤਿ ਸੋਮਨਸ੍ਸਪ੍ਪਤ੍ਤੋ ਤਸ੍ਸ ਨਿਸੀਦਨਤ੍ਥਾਯ ਕਞ੍ਚਨਪੀਠਂ ਪਞ੍ਞਪੇਤ੍ਵਾ ‘‘ਸਮ੍ਮ, ਪਵਿਸ, ਇਧ ਨਿਸੀਦਾ’’ਤਿ ਵਤ੍ਵਾ ਪਠਮਂ ਗਾਥਮਾਹ –

੨੭.

‘‘ਇਧੇਵ ਹਂਸ ਨਿਪਤ, ਪਿਯਂ ਮੇ ਤਵ ਦਸ੍ਸਨਂ;

ਇਸ੍ਸਰੋਸਿ ਅਨੁਪ੍ਪਤ੍ਤੋ, ਯਮਿਧਤ੍ਥਿ ਪਵੇਦਯਾ’’ਤਿ.

ਤਤ੍ਥ ‘‘ਇਧਾ’’ਤਿ ਕਞ੍ਚਨਪੀਠਂ ਸਨ੍ਧਾਯਾਹ. ਨਿਪਤਾਤਿ ਨਿਸੀਦ. ਇਸ੍ਸਰੋਸੀਤਿ ਤ੍ਵਂ ਇਮਸ੍ਸ ਠਾਨਸ੍ਸ ਇਸ੍ਸਰੋ ਸਾਮਿ ਹੁਤ੍ਵਾ ਆਗਤੋਸੀਤਿ ਵਦਤਿ. ਯਮਿਧਤ੍ਥਿ ਪਵੇਦਯਾਤਿ ਯਂ ਇਮਸ੍ਮਿਂ ਨਿਵੇਸਨੇ ਅਤ੍ਥਿ, ਤਂ ਅਪਰਿਸਙ੍ਕਨ੍ਤੋ ਅਮ੍ਹਾਕਂ ਕਥੇਹੀਤਿ.

ਮਹਾਸਤ੍ਤੋ ਕਞ੍ਚਨਪੀਠੇ ਨਿਸੀਦਿ. ਰਾਜਾ ਸਤਪਾਕਸਹਸ੍ਸਪਾਕੇਹਿ ਤੇਲੇਹਿ ਤਸ੍ਸ ਪਕ੍ਖਨ੍ਤਰਾਨਿ ਮਕ੍ਖੇਤ੍ਵਾ ਕਞ੍ਚਨਤਟ੍ਟਕੇ ਮਧੁਲਾਜੇ ਚ ਮਧੁਰੋਦਕਞ੍ਚ ਸਕ੍ਖਰੋਦਕਞ੍ਚ ਦਾਪੇਤ੍ਵਾ ਮਧੁਰਪਟਿਸਨ੍ਥਾਰਂ ਕਤ੍ਵਾ ‘‘ਸਮ੍ਮ, ਤ੍ਵਂ ਏਕਕੋਵ ਆਗਤੋਸਿ, ਕੁਹਿਂ ਅਗਮਿਤ੍ਥਾ’’ਤਿ ਪੁਚ੍ਛਿ. ਸੋ ਤਂ ਪਵਤ੍ਤਿਂ ਵਿਤ੍ਥਾਰੇਨ ਕਥੇਸਿ. ਅਥ ਨਂ ਰਾਜਾ ਆਹ ‘‘ਸਮ੍ਮ, ਮਮਪਿ ਸੂਰਿਯੇਨ ਸਦ੍ਧਿਂ ਜਵਿਤਵੇਗਂ ਦਸ੍ਸੇਹੀ’’ਤਿ. ਮਹਾਰਾਜ, ਨ ਸਕ੍ਕਾ ਸੋ ਵੇਗੋ ਦਸ੍ਸੇਤੁਨ੍ਤਿ. ਤੇਨ ਹਿ ਮੇ ਸਰਿਕ੍ਖਕਮਤ੍ਤਂ ਦਸ੍ਸੇਹੀਤਿ. ਸਾਧੁ, ਮਹਾਰਾਜ, ਸਰਿਕ੍ਖਕਮਤ੍ਤਂ ਦਸ੍ਸੇਸ੍ਸਾਮਿ, ਅਕ੍ਖਣਵੇਧੀ ਧਨੁਗ੍ਗਹੇ ਸਨ੍ਨਿਪਾਤੇਹੀਤਿ. ਰਾਜਾ ਸਨ੍ਨਿਪਾਤੇਸਿ. ਮਹਾਸਤ੍ਤੋ ਚਤ੍ਤਾਰੋ ਧਨੁਗ੍ਗਹੇ ਗਹੇਤ੍ਵਾ ਨਿਵੇਸਨਾ ਓਰੁਯ੍ਹ ਰਾਜਙ੍ਗਣੇ ਸਿਲਾਥਮ੍ਭਂ ਨਿਖਣਾਪੇਤ੍ਵਾ ਅਤ੍ਤਨੋ ਗੀਵਾਯਂ ਘਣ੍ਟਂ ਬਨ੍ਧਾਪੇਤ੍ਵਾ ਸਿਲਾਥਮ੍ਭਮਤ੍ਥਕੇ ਨਿਸੀਦਿਤ੍ਵਾ ਚਤ੍ਤਾਰੋ ਧਨੁਗ੍ਗਹੇ ਥਮ੍ਭਂ ਨਿਸ੍ਸਾਯ ਚਤੁਦ੍ਦਿਸਾਭਿਮੁਖੇ ਠਪੇਤ੍ਵਾ ‘‘ਮਹਾਰਾਜ, ਇਮੇ ਚਤ੍ਤਾਰੋ ਜਨਾ ਏਕਪ੍ਪਹਾਰੇਨੇਵ ਚਤੁਦ੍ਦਿਸਾਭਿਮੁਖਾ ਚਤ੍ਤਾਰਿ ਕਣ੍ਡਾਨਿ ਖਿਪਨ੍ਤੁ, ਤਾਨਿ ਅਹਂ ਪਥਵਿਂ ਅਪ੍ਪਤ੍ਤਾਨੇਵ ਆਹਰਿਤ੍ਵਾ ਏਤੇਸਂ ਪਾਦਮੂਲੇ ਪਾਤੇਸ੍ਸਾਮਿ. ਮਮ ਕਣ੍ਡਗਹਣਤ੍ਥਾਯ ਗਤਭਾਵਂ ਘਣ੍ਟਸਦ੍ਦਸਞ੍ਞਾਯ ਜਾਨੇਯ੍ਯਾਸਿ, ਮਂ ਪਨ ਨ ਪਸ੍ਸਿਸ੍ਸਸੀ’’ਤਿ ਵਤ੍ਵਾ ਤੇਹਿ ਏਕਪ੍ਪਹਾਰੇਨੇਵ ਖਿਤ੍ਤਕਣ੍ਡਾਨਿ ਆਹਰਿਤ੍ਵਾ ਤੇਸਂ ਪਾਦਮੂਲੇ ਪਾਤੇਤ੍ਵਾ ਸਿਲਾਥਮ੍ਭਮਤ੍ਥਕੇ ਨਿਸਿਨ੍ਨਮੇਵ ਅਤ੍ਤਾਨਂ ਦਸ੍ਸੇਤ੍ਵਾ ‘‘ਦਿਟ੍ਠੋ ਤੇ, ਮਹਾਰਾਜ, ਮਯ੍ਹਂ ਵੇਗੋ’’ਤਿ ਵਤ੍ਵਾ ‘‘ਮਹਾਰਾਜ, ਅਯਂ ਵੇਗੋ ਮਯ੍ਹਂ ਨੇਵ ਉਤ੍ਤਮੋ, ਮਜ੍ਝਿਮੋ, ਪਰਿਤ੍ਤੋ ਲਾਮਕਵੇਗੋ ਏਸ, ਏਵਂ ਸੀਘੋ, ਮਹਾਰਾਜ, ਅਮ੍ਹਾਕਂ ਵੇਗੋ’’ਤਿ ਆਹ.

ਅਥ ਨਂ ਰਾਜਾ ਪੁਚ੍ਛਿ ‘‘ਸਮ੍ਮ, ਅਤ੍ਥਿ ਪਨ ਤੁਮ੍ਹਾਕਂ ਵੇਗਤੋ ਅਞ੍ਞੋ ਸੀਘਤਰੋ ਵੇਗੋ’’ਤਿ? ‘‘ਆਮ, ਮਹਾਰਾਜ, ਅਮ੍ਹਾਕਂ ਉਤ੍ਤਮਵੇਗਤੋਪਿ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਇਮੇਸਂ ਸਤ੍ਤਾਨਂ ਆਯੁਸਙ੍ਖਾਰਾ ਸੀਘਤਰਂ ਖੀਯਨ੍ਤਿ ਭਿਜ੍ਜਨ੍ਤਿ, ਖਯਂ ਗਚ੍ਛਨ੍ਤੀ’’ਤਿ ਖਣਿਕਨਿਰੋਧਵਸੇਨ ਰੂਪਧਮ੍ਮਾਨਂ ਨਿਰੋਧਂ ਦਸ੍ਸੇਤਿ, ਤਤੋ ਨਾਮਧਮ੍ਮਾਨਂ. ਰਾਜਾ ਮਹਾਸਤ੍ਤਸ੍ਸ ਕਥਂ ਸੁਤ੍ਵਾ ਮਰਣਭਯਭੀਤੋ ਸਤਿਂ ਪਚ੍ਚੁਪਟ੍ਠਾਪੇਤੁਂ ਅਸਕ੍ਕੋਨ੍ਤੋ ਭੂਮਿਯਂ ਪਤਿ, ਮਹਾਜਨੋ ਉਤ੍ਰਾਸਂ ਪਤ੍ਤੋ ਅਹੋਸਿ. ਰਞ੍ਞੋ ਮੁਖਂ ਉਦਕੇਨ ਸਿਞ੍ਚਿਤ੍ਵਾ ਸਤਿਂ ਲਭਾਪੇਸਿ. ਅਥ ਨਂ ਮਹਾਸਤ੍ਤੋ ‘‘ਮਹਾਰਾਜ, ਮਾ ਭਾਯਿ, ਮਰਣਸ੍ਸਤਿਂ ਭਾਵੇਹਿ, ਧਮ੍ਮਂ ਚਰਾਹਿ, ਦਾਨਾਦੀਨਿ ਪੁਞ੍ਞਾਨਿ ਕਰੋਹਿ, ਅਪ੍ਪਮਤ੍ਤੋ ਹੋਹਿ, ਦੇਵਾ’’ਤਿ ਓਵਦਿ. ਅਥ ਰਾਜਾ ‘‘ਸਾਮਿ, ਮਯਂ ਤੁਮ੍ਹਾਦਿਸੇਨ ਞਾਣਬਲਸਮ੍ਪਨ੍ਨੇਨ ਆਚਰਿਯੇਨ ਵਿਨਾ ਵਸਿਤੁਂ ਨ ਸਕ੍ਖਿਸ੍ਸਾਮ, ਚਿਤ੍ਤਕੂਟਂ ਅਗਨ੍ਤ੍ਵਾ ਮਯ੍ਹਂ ਧਮ੍ਮਂ ਦੇਸੇਨ੍ਤੋ ਮਯ੍ਹਂ ਓਵਾਦਾਚਰਿਯੋ ਹੁਤ੍ਵਾ ਇਧੇਵ ਵਸਾਹੀ’’ਤਿ ਯਾਚਨ੍ਤੋ ਦ੍ਵੇ ਗਾਥਾ ਅਭਾਸਿ –

੨੮.

‘‘ਸਵਨੇਨ ਏਕਸ੍ਸ ਪਿਯਾ ਭਵਨ੍ਤਿ, ਦਿਸ੍ਵਾ ਪਨੇਕਸ੍ਸ ਵਿਯੇਤਿ ਛਨ੍ਦੋ;

ਦਿਸ੍ਵਾ ਚ ਸੁਤ੍ਵਾ ਚ ਪਿਯਾ ਭਵਨ੍ਤਿ, ਕਚ੍ਚਿਨ੍ਨੁ ਮੇ ਪੀਯਸਿ ਦਸ੍ਸਨੇਨ.

੨੯.

‘‘ਸਵਨੇਨ ਪਿਯੋ ਮੇਸਿ, ਭਿਯ੍ਯੋ ਚਾਗਮ੍ਮ ਦਸ੍ਸਨਂ;

ਏਵਂ ਪਿਯਦਸ੍ਸਨੋ ਮੇ, ਵਸ ਹਂਸ ਮਮਨ੍ਤਿਕੇ’’ਤਿ.

ਤਾਸਂ ਅਤ੍ਥੋ – ਸਮ੍ਮ ਹਂਸਰਾਜ ਸਵਨੇਨ ਏਕਸ੍ਸ ਏਕਚ੍ਚੇ ਪਿਯਾ ਹੋਨ੍ਤਿ, ‘‘ਏਵਂ ਗੁਣੋ ਨਾਮਾ’’ਤਿ ਸੁਤ੍ਵਾ ਸਵਨੇਨ ਪਿਯਾਯਤਿ, ਏਕਸ੍ਸ ਪਨ ਏਕਚ੍ਚੇ ਦਿਸ੍ਵਾਵ ਛਨ੍ਦੋ ਵਿਗਚ੍ਛਤਿ, ਪੇਮਂ ਅਨ੍ਤਰਧਾਯਤਿ, ਖਾਦਿਤੁਂ ਆਗਤਾ ਯਕ੍ਖਾ ਵਿਯ ਉਪਟ੍ਠਹਨ੍ਤਿ, ਏਕਸ੍ਸ ਏਕਚ੍ਚੇ ਦਿਸ੍ਵਾ ਚ ਸੁਤ੍ਵਾ ਚਾਤਿ ਉਭਯਥਾਪਿ ਪਿਯਾ ਹੋਨ੍ਤਿ, ਤੇਨ ਤਂ ਪੁਚ੍ਛਾਮਿ. ਕਚ੍ਚਿਨ੍ਨੁ ਮੇ ਪੀਯਸਿ ਦਸ੍ਸਨੇਨਾਤਿ ਕਚ੍ਚਿ ਨੁ ਤ੍ਵਂ ਮਂ ਪਿਯਾਯਸਿ, ਮਯ੍ਹਂ ਪਨ ਤ੍ਵਂ ਸਵਨੇਨ ਪਿਯੋਵ, ਦਸ੍ਸਨਂ ਪਨਾਗਮ੍ਮ ਅਤਿਪਿਯੋਵ. ਏਵਂ ਮਮ ਪਿਯਦਸ੍ਸਨੋ ਸਮਾਨੋ ਚਿਤ੍ਤਕੂਟਂ ਅਗਨ੍ਤ੍ਵਾ ਇਧ ਮਮ ਸਨ੍ਤਿਕੇ ਵਸਾਤਿ.

ਬੋਧਿਸਤ੍ਤੋ ਆਹ –

੩੦.

‘‘ਵਸੇਯ੍ਯਾਮ ਤਵਾਗਾਰੇ, ਨਿਚ੍ਚਂ ਸਕ੍ਕਤਪੂਜਿਤਾ;

ਮਤ੍ਤੋ ਚ ਏਕਦਾ ਵਜ੍ਜੇ, ਹਂਸਰਾਜਂ ਪਚਨ੍ਤੁ ਮੇ’’ਤਿ.

ਤਤ੍ਥ ਮਤ੍ਤੋ ਚ ਏਕਦਾਤਿ ਮਹਾਰਾਜ, ਮਯਂ ਤਵ ਘਰੇ ਨਿਚ੍ਚਂ ਪੂਜਿਤਾ ਵਸੇਯ੍ਯਾਮ, ਤ੍ਵਂ ਪਨ ਕਦਾਚਿ ਸੁਰਾਮਦਮਤ੍ਤੋ ਮਂਸਖਾਦਨਤ੍ਥਂ ‘‘ਹਂਸਰਾਜਂ ਪਚਨ੍ਤੁ ਮੇ’’ਤਿ ਵਦੇਯ੍ਯਾਸਿ, ਅਥ ਏਵਂ ਤਵ ਅਨੁਜੀਵਿਨੋ ਮਂ ਮਾਰੇਤ੍ਵਾ ਪਚੇਯ੍ਯੁਂ, ਤਦਾਹਂ ਕਿਂ ਕਰਿਸ੍ਸਾਮੀਤਿ.

ਅਥਸ੍ਸ ਰਾਜਾ ‘‘ਤੇਨ ਹਿ ਮਜ੍ਜਮੇਵ ਨ ਪਿਵਿਸ੍ਸਾਮੀ’’ਤਿ ਪਟਿਞ੍ਞਂ ਦਾਤੁਂ ਇਮਂ ਗਾਥਮਾਹ –

੩੧.

‘‘ਧਿਰਤ੍ਥੁ ਤਂ ਮਜ੍ਜਪਾਨਂ, ਯਂ ਮੇ ਪਿਯਤਰਂ ਤਯਾ;

ਨ ਚਾਪਿ ਮਜ੍ਜਂ ਪਿਸ੍ਸਾਮਿ, ਯਾਵ ਮੇ ਵਚ੍ਛਸੀ ਘਰੇ’’ਤਿ.

ਤਤੋ ਪਰਂ ਬੋਧਿਸਤ੍ਤੋ ਛ ਗਾਥਾ ਆਹ –

੩੨.

‘‘ਸੁਵਿਜਾਨਂ ਸਿਙ੍ਗਾਲਾਨਂ, ਸਕੁਣਾਨਞ੍ਚ ਵਸ੍ਸਿਤਂ;

ਮਨੁਸ੍ਸਵਸ੍ਸਿਤਂ ਰਾਜ, ਦੁਬ੍ਬਿਜਾਨਤਰਂ ਤਤੋ.

੩੩.

‘‘ਅਪਿ ਚੇ ਮਞ੍ਞਤੀ ਪੋਸੋ, ਞਾਤਿ ਮਿਤ੍ਤੋ ਸਖਾਤਿ ਵਾ;

ਯੋ ਪੁਬ੍ਬੇ ਸੁਮਨੋ ਹੁਤ੍ਵਾ, ਪਚ੍ਛਾ ਸਮ੍ਪਜ੍ਜਤੇ ਦਿਸੋ.

੩੪.

‘‘ਯਸ੍ਮਿਂ ਮਨੋ ਨਿਵਿਸਤਿ, ਅਵਿਦੂਰੇ ਸਹਾਪਿ ਸੋ;

ਸਨ੍ਤਿਕੇਪਿ ਹਿ ਸੋ ਦੂਰੇ, ਯਸ੍ਮਿਂ ਨਾਵਿਸਤੇ ਮਨੋ.

੩੫.

‘‘ਅਨ੍ਤੋਪਿ ਸੋ ਹੋਤਿ ਪਸਨ੍ਨਚਿਤ੍ਤੋ, ਪਾਰਂ ਸਮੁਦ੍ਦਸ੍ਸ ਪਸਨ੍ਨਚਿਤ੍ਤੋ;

ਅਨ੍ਤੋਪਿ ਸੋ ਹੋਤਿ ਪਦੁਟ੍ਠਚਿਤ੍ਤੋ, ਪਾਰਂ ਸਮੁਦ੍ਦਸ੍ਸ ਪਦੁਟ੍ਠਚਿਤ੍ਤੋ.

੩੬.

‘‘ਸਂਵਸਨ੍ਤਾ ਵਿਵਸਨ੍ਤਿ, ਯੇ ਦਿਸਾ ਤੇ ਰਥੇਸਭ;

ਆਰਾ ਸਨ੍ਤੋ ਸਂਵਸਨ੍ਤਿ, ਮਨਸਾ ਰਟ੍ਠਵਡ੍ਢਨ.

੩੭.

‘‘ਅਤਿਚਿਰਂ ਨਿਵਾਸੇਨ, ਪਿਯੋ ਭਵਤਿ ਅਪ੍ਪਿਯੋ;

ਆਮਨ੍ਤ ਖੋ ਤਂ ਗਚ੍ਛਾਮ, ਪੁਰਾ ਤੇ ਹੋਮ ਅਪ੍ਪਿਯਾ’’ਤਿ.

ਤਤ੍ਥ ਵਸ੍ਸਿਤਨ੍ਤਿ ਮਹਾਰਾਜ, ਤਿਰਚ੍ਛਾਨਗਤਾ ਉਜੁਹਦਯਾ, ਤੇਨ ਤੇਸਂ ਵਸ੍ਸਿਤਂ ਸੁਵਿਜਾਨਂ, ਮਨੁਸ੍ਸਾ ਪਨ ਕਕ੍ਖਲ਼ਾ, ਤਸ੍ਮਾ ਤੇਸਂ ਵਚਨਂ ਦੁਬ੍ਬਿਜਾਨਤਰਨ੍ਤਿ ਅਤ੍ਥੋ. ਯੋ ਪੁਬ੍ਬੇਤਿ ਯੋ ਪੁਗ੍ਗਲੋ ਪਠਮਮੇਵ ਅਤ੍ਤਮਨੋ ਹੁਤ੍ਵਾ ‘‘ਤ੍ਵਂ ਮਯ੍ਹਂ ਞਾਤਕੋ ਮਿਤ੍ਤੋ ਪਾਣਸਮੋ ਸਖਾ’’ਤਿ ਅਪਿ ਏਵਂ ਮਞ੍ਞਤਿ, ਸ੍ਵੇਵ ਪਚ੍ਛਾ ਦਿਸੋ ਵੇਰੀ ਸਮ੍ਪਜ੍ਜਤਿ, ਏਵਂ ਦੁਬ੍ਬਿਜਾਨਂ ਨਾਮ ਮਨੁਸ੍ਸਹਦਯਨ੍ਤਿ. ਨਿਵਿਸਤੀਤਿ ਮਹਾਰਾਜ, ਯਸ੍ਮਿਂ ਪੁਗ੍ਗਲੇ ਪੇਮਵਸੇਨ ਮਨੋ ਨਿਵਿਸਤਿ, ਸੋ ਦੂਰੇ ਵਸਨ੍ਤੋਪਿ ਅਵਿਦੂਰੇ ਸਹਾਪਿ ਵਸਤਿਯੇਵ ਨਾਮ. ਯਸ੍ਮਿਂ ਪਨ ਪੁਗ੍ਗਲੇ ਮਨੋ ਨ ਨਿਵਿਸਤਿ ਅਪੇਤਿ, ਸੋ ਸਨ੍ਤਿਕੇ ਵਸਨ੍ਤੋਪਿ ਦੂਰੇਯੇਵ.

ਅਨ੍ਤੋਪਿ ਸੋ ਹੋਤੀਤਿ ਮਹਾਰਾਜ, ਯੋ ਸਹਾਯੋ ਪਸਨ੍ਨਚਿਤ੍ਤੋ, ਸੋ ਚਿਤ੍ਤੇਨ ਅਲ੍ਲੀਨਤ੍ਤਾ ਪਾਰਂ ਸਮੁਦ੍ਦਸ੍ਸ ਵਸਨ੍ਤੋਪਿ ਅਨ੍ਤੋਯੇਵ ਹੋਤਿ. ਯੋ ਪਨ ਪਦੁਟ੍ਠਚਿਤ੍ਤੋ, ਸੋ ਚਿਤ੍ਤੇਨ ਅਨਲ੍ਲੀਨਤ੍ਤਾ ਅਨ੍ਤੋ ਵਸਨ੍ਤੋਪਿ ਪਾਰਂ ਸਮੁਦ੍ਦਸ੍ਸ ਨਾਮ. ਯੇ ਦਿਸਾ ਤੇਤਿ ਯੇ ਵੇਰਿਨੋ ਪਚ੍ਚਤ੍ਥਿਕਾ, ਤੇ ਏਕਤੋ ਵਸਨ੍ਤਾਪਿ ਦੂਰੇ ਵਸਨ੍ਤਿਯੇਵ ਨਾਮ. ਸਨ੍ਤੋ ਪਨ ਪਣ੍ਡਿਤਾ ਆਰਾ ਠਿਤਾਪਿ ਮੇਤ੍ਤਾਭਾਵਿਤੇਨ ਮਨਸਾ ਆਵਜ੍ਜੇਨ੍ਤਾ ਸਂਵਸਨ੍ਤਿਯੇਵ. ਪੁਰਾ ਤੇ ਹੋਮਾਤਿ ਯਾਵ ਤਵ ਅਪ੍ਪਿਯਾ ਨ ਹੋਮ, ਤਾਵਦੇਵ ਤਂ ਆਮਨ੍ਤੇਤ੍ਵਾ ਗਚ੍ਛਾਮਾਤਿ ਵਦਤਿ.

ਅਥ ਨਂ ਰਾਜਾ ਆਹ –

੩੮.

‘‘ਏਵਂ ਚੇ ਯਾਚਮਾਨਾਨਂ, ਅਞ੍ਜਲਿਂ ਨਾਵਬੁਜ੍ਝਸਿ;

ਪਰਿਚਾਰਕਾਨਂ ਸਤਂ, ਵਚਨਂ ਨ ਕਰੋਸਿ ਨੋ;

ਏਵਂ ਤਂ ਅਭਿਯਾਚਾਮ, ਪੁਨ ਕਯਿਰਾਸਿ ਪਰਿਯਾਯ’’ਨ੍ਤਿ.

ਤਤ੍ਥ ਏਵਂ ਚੇਤਿ ਸਚੇ ਹਂਸਰਾਜ, ਏਵਂ ਅਞ੍ਜਲਿਂ ਪਗ੍ਗਯ੍ਹ ਯਾਚਮਾਨਾਨਂ ਅਮ੍ਹਾਕਂ ਇਮਂ ਅਞ੍ਜਲਿਂ ਨਾਵਬੁਜ੍ਝਸਿ, ਤਵ ਪਰਿਚਾਰਕਾਨਂ ਸਮਾਨਾਨਂ ਵਚਨਂ ਨ ਕਰੋਸਿ, ਅਥ ਨਂ ਏਵਂ ਯਾਚਾਮ. ਪੁਨ ਕਯਿਰਾਸਿ ਪਰਿਯਾਯਨ੍ਤਿ ਕਾਲੇਨ ਕਾਲਂ ਇਧ ਆਗਮਨਾਯ ਵਾਰਂ ਕਰੇਯ੍ਯਾਸੀਤਿ ਅਤ੍ਥੋ.

ਤਤੋ ਬੋਧਿਸਤ੍ਤੋ ਆਹ –

੩੯.

‘‘ਏਵਂ ਚੇ ਨੋ ਵਿਹਰਤਂ, ਅਨ੍ਤਰਾਯੋ ਨ ਹੇਸ੍ਸਤਿ;

ਤੁਯ੍ਹਂ ਚਾਪਿ ਮਹਾਰਾਜ, ਮਯ੍ਹਞ੍ਚ ਰਟ੍ਠਵਡ੍ਢਨ;

ਅਪ੍ਪੇਵ ਨਾਮ ਪਸ੍ਸੇਮੁ, ਅਹੋਰਤ੍ਤਾਨਮਚ੍ਚਯੇ’’ਤਿ.

ਤਤ੍ਥ ਏਵਂ ਚੇ ਨੋਤਿ ਮਹਾਰਾਜ, ਮਾ ਚਿਨ੍ਤਯਿਤ੍ਥ, ਸਚੇ ਅਮ੍ਹਾਕਮ੍ਪਿ ਏਵਂ ਵਿਹਰਨ੍ਤਾਨਂ ਜੀਵਿਤਨ੍ਤਰਾਯੋ ਨ ਭਵਿਸ੍ਸਤਿ, ਅਪ੍ਪੇਵ ਨਾਮ ਉਭੋ ਅਞ੍ਞਮਞ੍ਞਂ ਪਸ੍ਸਿਸ੍ਸਾਮ, ਅਪਿਚ ਤ੍ਵਂ ਮਯਾ ਦਿਨ੍ਨਂ ਓਵਾਦਮੇਵ ਮਮ ਠਾਨੇ ਠਪੇਤ੍ਵਾ ਏਵਂ ਇਤ੍ਤਰਜੀਵਿਤੇ ਲੋਕਸਨ੍ਨਿਵਾਸੇ ਅਪ੍ਪਮਤ੍ਤੋ ਹੁਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਰੋਨ੍ਤੋ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਹਿ, ਏਵਞ੍ਹਿ ਮੇ ਓਵਾਦਂ ਕਰੋਨ੍ਤੋ ਮਂ ਪਸ੍ਸਿਸ੍ਸਤਿਯੇਵਾਤਿ. ਏਵਂ ਮਹਾਸਤ੍ਤੋ ਰਾਜਾਨਂ ਓਵਦਿਤ੍ਵਾ ਚਿਤ੍ਤਕੂਟਪਬ੍ਬਤਮੇਵ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤੇਨਪਿ ਮਯਾ ਆਯੁਸਙ੍ਖਾਰਾਨਂ ਦੁਬ੍ਬਲਭਾਵਂ ਦਸ੍ਸੇਤ੍ਵਾ ਧਮ੍ਮੋ ਦੇਸਿਤੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਕਨਿਟ੍ਠੋ ਮੋਗ੍ਗਲ੍ਲਾਨੋ, ਮਜ੍ਝਿਮੋ ਸਾਰਿਪੁਤ੍ਤੋ, ਸੇਸਹਂਸਗਣਾ ਬੁਦ੍ਧਪਰਿਸਾ, ਜਵਨਹਂਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਜਵਨਹਂਸਜਾਤਕਵਣ੍ਣਨਾ ਤਤਿਯਾ.

[੪੭੭] ੪. ਚੂਲ਼ਨਾਰਦਜਾਤਕਵਣ੍ਣਨਾ

ਨ ਤੇ ਕਟ੍ਠਾਨਿ ਭਿਨ੍ਨਾਨੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਥੁਲ੍ਲਕੁਮਾਰਿਕਾਪਲੋਭਨਂ ਆਰਬ੍ਭ ਕਥੇਸਿ. ਸਾਵਤ੍ਥਿਵਾਸਿਨੋ ਕਿਰੇਕਸ੍ਸ ਕੁਲਸ੍ਸ ਪਨ੍ਨਰਸਸੋਲ਼ਸਵਸ੍ਸੁਦ੍ਦੇਸਿਕਾ ਧੀਤਾ ਅਹੋਸਿ ਸੋਭਗ੍ਗਪ੍ਪਤ੍ਤਾ, ਨ ਚ ਨਂ ਕੋਚਿ ਵਾਰੇਸਿ. ਅਥਸ੍ਸਾ ਮਾਤਾ ਚਿਨ੍ਤੇਸਿ ‘‘ਮਮ ਧੀਤਾ ਵਯਪ੍ਪਤ੍ਤਾ, ਨ ਚ ਨਂ ਕੋਚਿ ਵਾਰੇਤਿ, ਆਮਿਸੇਨ ਮਚ੍ਛਂ ਵਿਯ ਏਤਾਯ ਏਕਂ ਸਾਕਿਯਭਿਕ੍ਖੁਂ ਪਲੋਭੇਤ੍ਵਾ ਉਪ੍ਪਬ੍ਬਾਜੇਤ੍ਵਾ ਤਂ ਨਿਸ੍ਸਾਯ ਜੀਵਿਸ੍ਸਾਮੀ’’ਤਿ. ਤਦਾ ਚ ਸਾਵਤ੍ਥਿਵਾਸੀ ਏਕੋ ਕੁਲਪੁਤ੍ਤੋ ਸਾਸਨੇ ਉਰਂ ਦਤ੍ਵਾ ਪਬ੍ਬਜਿਤ੍ਵਾ ਉਪਸਮ੍ਪਨ੍ਨਕਾਲਤੋ ਪਟ੍ਠਾਯ ਸਿਕ੍ਖਾਕਾਮਤਂ ਪਹਾਯ ਆਲਸਿਯੋ ਸਰੀਰਮਣ੍ਡਨਮਨੁਯੁਤ੍ਤੋ ਵਿਹਾਸਿ. ਮਹਾਉਪਾਸਿਕਾ ਗੇਹੇ ਯਾਗੁਖਾਦਨੀਯਭੋਜਨੀਯਾਨਿ ਸਮ੍ਪਾਦੇਤ੍ਵਾ ਦ੍ਵਾਰੇ ਠਤ੍ਵਾ ਅਨ੍ਤਰਵੀਥਿਯਾ ਗਚ੍ਛਨ੍ਤੇਸੁ ਭਿਕ੍ਖੂਸੁ ਏਕਂ ਭਿਕ੍ਖੁਂ ਰਸਤਣ੍ਹਾਯ ਬਨ੍ਧਿਤ੍ਵਾ ਗਹੇਤੁਂ ਸਕ੍ਕੁਣੇਯ੍ਯਰੂਪਂ ਉਪਧਾਰੇਨ੍ਤੀ ਤੇਪਿਟਕਆਭਿਧਮ੍ਮਿਕਵਿਨਯਧਰਾਨਂ ਮਹਨ੍ਤੇਨ ਪਰਿਵਾਰੇਨ ਗਚ੍ਛਨ੍ਤਾਨਂ ਅਨ੍ਤਰੇ ਕਞ੍ਚਿ ਗਯ੍ਹੁਪਗਂ ਅਦਿਸ੍ਵਾ ਤੇਸਂ ਪਚ੍ਛਤੋ ਗਚ੍ਛਨ੍ਤਾਨਂ ਮਧੁਰਧਮ੍ਮਕਥਿਕਾਨਂ ਅਚ੍ਛਿਨ੍ਨਵਲਾਹਕਸਦਿਸਾਨਂ ਪਿਣ੍ਡਪਾਤਿਕਾਨਮ੍ਪਿ ਅਨ੍ਤਰੇ ਕਞ੍ਚਿ ਅਦਿਸ੍ਵਾਵ ਏਕਂ ਯਾਵ ਬਹਿ ਅਪਙ੍ਗਾ ਅਕ੍ਖੀਨਿ ਅਞ੍ਜੇਤ੍ਵਾ ਕੇਸੇ ਓਸਣ੍ਹੇਤ੍ਵਾ ਦੁਕੂਲਨ੍ਤਰਵਾਸਕਂ ਨਿਵਾਸੇਤ੍ਵਾ ਘਟਿਤਮਟ੍ਠਂ ਚੀਵਰਂ ਪਾਰੁਪਿਤ੍ਵਾ ਮਣਿਵਣ੍ਣਪਤ੍ਤਂ ਆਦਾਯ ਮਨੋਰਮਂ ਛਤ੍ਤਂ ਧਾਰਯਮਾਨਂ ਵਿਸ੍ਸਟ੍ਠਿਨ੍ਦ੍ਰਿਯਂ ਕਾਯਦਲ਼੍ਹਿਬਹੁਲਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਇਮਂ ਸਕ੍ਕਾ ਗਣ੍ਹਿਤੁ’’ਨ੍ਤਿ ਗਨ੍ਤ੍ਵਾ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ‘‘ਏਥ, ਭਨ੍ਤੇ’’ਤਿ ਘਰਂ ਆਨੇਤ੍ਵਾ ਨਿਸੀਦਾਪੇਤ੍ਵਾ ਯਾਗੁਆਦੀਹਿ ਪਰਿਵਿਸਿਤ੍ਵਾ ਕਤਭਤ੍ਤਕਿਚ੍ਚਂ ਤਂ ਭਿਕ੍ਖੁਂ ‘‘ਭਨ੍ਤੇ, ਇਤੋ ਪਟ੍ਠਾਯ ਇਧੇਵਾਗਚ੍ਛੇਯ੍ਯਾਥਾ’’ਤਿ ਆਹ. ਸੋਪਿ ਤਤੋ ਪਟ੍ਠਾਯ ਤਤ੍ਥੇਵ ਗਨ੍ਤ੍ਵਾ ਅਪਰਭਾਗੇ ਵਿਸ੍ਸਾਸਿਕੋ ਅਹੋਸਿ.

ਅਥੇਕਦਿਵਸਂ ਮਹਾਉਪਾਸਿਕਾ ਤਸ੍ਸ ਸਵਨਪਥੇ ਠਤ੍ਵਾ ‘‘ਇਮਸ੍ਮਿਂ ਗੇਹੇ ਉਪਭੋਗਪਰਿਭੋਗਮਤ੍ਤਾ ਅਤ੍ਥਿ, ਤਥਾਰੂਪੋ ਪਨ ਮੇ ਪੁਤ੍ਤੋ ਵਾ ਜਾਮਾਤਾ ਵਾ ਗੇਹਂ ਵਿਚਾਰਿਤੁਂ ਸਮਤ੍ਥੋ ਨਤ੍ਥੀ’’ਤਿ ਆਹ. ਸੋ ਤਸ੍ਸਾ ਵਚਨਂ ਸੁਤ੍ਵਾ ‘‘ਕਿਮਤ੍ਥਂ ਨੁ ਖੋ ਕਥੇਤੀ’’ਤਿ ਥੋਕਂ ਹਦਯੇ ਵਿਦ੍ਧੋ ਵਿਯ ਅਹੋਸਿ. ਸਾ ਧੀਤਰਂ ਆਹ ‘‘ਇਮਂ ਪਲੋਭੇਤ੍ਵਾ ਤਵ ਵਸੇ ਵਤ੍ਤਾਪੇਹੀ’’ਤਿ. ਸਾ ਤਤੋ ਪਟ੍ਠਾਯ ਮਣ੍ਡਿਤਪਸਾਧਿਤਾ ਇਤ੍ਥਿਕੁਤ੍ਤਵਿਲਾਸੇਹਿ ਤਂ ਪਲੋਭੇਸਿ. ਥੁਲ੍ਲਕੁਮਾਰਿਕਾਤਿ ਨ ਚ ਥੂਲਸਰੀਰਾ ਦਟ੍ਠਬ੍ਬਾ, ਥੂਲਾ ਵਾ ਹੋਤੁ ਕਿਸਾ ਵਾ, ਪਞ੍ਚਕਾਮਗੁਣਿਕਰਾਗੇਨ ਪਨ ਥੂਲਤਾਯ ‘‘ਥੁਲ੍ਲਕੁਮਾਰਿਕਾ’’ਤਿ ਵੁਚ੍ਚਤਿ. ਸੋ ਦਹਰੋ ਕਿਲੇਸਵਸਿਕੋ ਹੁਤ੍ਵਾ ‘‘ਨ ਦਾਨਾਹਂ ਬੁਦ੍ਧਸਾਸਨੇ ਪਤਿਟ੍ਠਾਤੁਂ ਸਕ੍ਖਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਵਿਹਾਰਂ ਗਨ੍ਤ੍ਵਾ ਪਤ੍ਤਚੀਵਰਂ ਨਿਯ੍ਯਾਦੇਤ੍ਵਾ ਅਸੁਕਟ੍ਠਾਨਂ ਨਾਮ ਗਮਿਸ੍ਸਾਮਿ, ਤਤ੍ਰ ਮੇ ਵਤ੍ਥਾਨਿ ਪੇਸੇਥਾ’’ਤਿ ਵਤ੍ਵਾ ਵਿਹਾਰਂ ਗਨ੍ਤ੍ਵਾ ਪਤ੍ਤਚੀਵਰਂ ਨਿਯ੍ਯਾਦੇਤ੍ਵਾ ‘‘ਉਕ੍ਕਣ੍ਠਿਤੋਸ੍ਮੀ’’ਤਿ ਆਚਰਿਯੁਪਜ੍ਝਾਯੇ ਆਹ. ਤੇ ਤਂ ਆਦਾਯ ਸਤ੍ਥੁ ਸਨ੍ਤਿਕਂ ਨੇਤ੍ਵਾ ‘‘ਅਯਂ ਭਿਕ੍ਖੁ ਉਕ੍ਕਣ੍ਠਿਤੋ’’ਤਿ ਆਰੋਚੇਸੁਂ. ਸਤ੍ਥਾ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਕੇਨ ਉਕ੍ਕਣ੍ਠਾਪਿਤੋਸੀ’’ਤਿ ਵਤ੍ਵਾ ‘‘ਥੁਲ੍ਲਕੁਮਾਰਿਕਾਯ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਪੁਬ੍ਬੇਪੇਸਾ ਤਵ ਅਰਞ੍ਞੇ ਵਸਨ੍ਤਸ੍ਸ ਬ੍ਰਹ੍ਮਚਰਿਯਨ੍ਤਰਾਯਂ ਕਤ੍ਵਾ ਮਹਨ੍ਤਂ ਅਨਤ੍ਥਮਕਾਸਿ, ਪੁਨ ਤ੍ਵਂ ਏਤਮੇਵ ਨਿਸ੍ਸਾਯ ਕਸ੍ਮਾ ਉਕ੍ਕਣ੍ਠਿਤੋਸੀ’’ਤਿ ਵਤ੍ਵਾ ਭਿਕ੍ਖੂਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਸਿਰਟ੍ਠੇ ਮਹਾਭੋਗੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਉਗ੍ਗਹਿਤਸਿਪ੍ਪੋ ਕੁਟੁਮ੍ਬਂ ਸਣ੍ਠਪੇਸਿ, ਅਥਸ੍ਸ ਭਰਿਯਾ ਏਕਂ ਪੁਤ੍ਤਂ ਵਿਜਾਯਿਤ੍ਵਾ ਕਾਲਮਕਾਸਿ. ਸੋ ‘‘ਯਥੇਵ ਮੇ ਪਿਯਭਰਿਯਾਯ, ਏਵਂ ਮਯਿਪਿ ਮਰਣਂ ਆਗਮਿਸ੍ਸਤਿ, ਕਿਂ ਮੇ ਘਰਾਵਾਸੇਨ, ਪਬ੍ਬਜਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਕਾਮੇ ਪਹਾਯ ਪੁਤ੍ਤਂ ਆਦਾਯ ਹਿਮਵਨ੍ਤਂ ਪਵਿਸਿਤ੍ਵਾ ਤੇਨ ਸਦ੍ਧਿਂ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਾ ਨਿਬ੍ਬਤ੍ਤੇਤ੍ਵਾ ਵਨਮੂਲਫਲਾਹਾਰੋ ਅਰਞ੍ਞੇ ਵਿਹਾਸਿ. ਤਦਾ ਪਚ੍ਚਨ੍ਤਵਾਸਿਨੋ ਚੋਰਾ ਜਨਪਦਂ ਪਵਿਸਿਤ੍ਵਾ ਗਾਮਂ ਪਹਰਿਤ੍ਵਾ ਕਰਮਰੇ ਗਹੇਤ੍ਵਾ ਭਣ੍ਡਿਕਂ ਉਕ੍ਖਿਪਾਪੇਤ੍ਵਾ ਪੁਨ ਪਚ੍ਚਨ੍ਤਂ ਪਾਪਯਿਂਸੁ. ਤੇਸਂ ਅਨ੍ਤਰੇ ਏਕਾ ਅਭਿਰੂਪਾ ਕੁਮਾਰਿਕਾ ਕੇਰਾਟਿਕਪਞ੍ਞਾਯ ਸਮਨ੍ਨਾਗਤਾ ਚਿਨ੍ਤੇਸਿ ‘‘ਇਮੇ ਅਮ੍ਹੇ ਗਹੇਤ੍ਵਾ ਦਾਸਿਭੋਗੇਨ ਪਰਿਭੁਞ੍ਜਿਸ੍ਸਨ੍ਤਿ, ਏਕੇਨ ਉਪਾਯੇਨ ਪਲਾਯਿਤੁਂ ਵਟ੍ਟਤੀ’’ਤਿ. ਸਾ ‘‘ਸਾਮਿ, ਸਰੀਰਕਿਚ੍ਚਂ ਕਾਤੁਕਾਮਾਮ੍ਹਿ, ਥੋਕਂ ਪਟਿਕ੍ਕਮਿਤ੍ਵਾ ਤਿਟ੍ਠਥਾ’’ਤਿ ਵਤ੍ਵਾ ਚੋਰੇ ਵਞ੍ਚੇਤ੍ਵਾ ਪਲਾਯਿਤ੍ਵਾ ਅਰਞ੍ਞਂ ਪਵਿਸਨ੍ਤੀ ਬੋਧਿਸਤ੍ਤਸ੍ਸ ਪੁਤ੍ਤਂ ਅਸ੍ਸਮੇ ਠਪੇਤ੍ਵਾ ਫਲਾਫਲਤ੍ਥਾਯ ਗਤਕਾਲੇ ਪੁਬ੍ਬਣ੍ਹਸਮਯੇ ਤਂ ਅਸ੍ਸਮਂ ਪਾਪੁਣਿਤ੍ਵਾ ਤਂ ਤਾਪਸਕੁਮਾਰਂ ਕਾਮਰਤਿਯਾ ਪਲੋਭੇਤ੍ਵਾ ਸੀਲਮਸ੍ਸ ਭਿਨ੍ਦਿਤ੍ਵਾ ਅਤ੍ਤਨੋ ਵਸੇ ਵਤ੍ਤੇਤ੍ਵਾ ‘‘ਕਿਂ ਤੇ ਅਰਞ੍ਞਵਾਸੇਨ, ਏਹਿ ਗਾਮਂ ਗਨ੍ਤ੍ਵਾ ਵਸਿਸ੍ਸਾਮ, ਤਤ੍ਰ ਹਿ ਰੂਪਾਦਯੋ ਕਾਮਗੁਣਾ ਸੁਲਭਾ’’ਤਿ ਆਹ. ਸੋਪਿ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਪਿਤਾ ਤਾਵ ਮੇ ਅਰਞ੍ਞਤੋ ਫਲਾਫਲਂ ਆਹਰਿਤੁਂ ਗਤੋ, ਤਂ ਦਿਸ੍ਵਾ ਉਭੋਪਿ ਏਕਤੋਵ ਗਮਿਸ੍ਸਾਮਾ’’ਤਿ ਆਹ.

ਸਾ ਚਿਨ੍ਤੇਸਿ – ‘‘ਅਯਂ ਤਰੁਣਦਾਰਕੋ ਨ ਕਿਞ੍ਚਿ ਜਾਨਾਤਿ, ਪਿਤਰਾ ਪਨਸ੍ਸ ਮਹਲ੍ਲਕਕਾਲੇ ਪਬ੍ਬਜਿਤੇਨ ਭਵਿਤਬ੍ਬਂ, ਸੋ ਆਗਨ੍ਤ੍ਵਾ ‘ਇਧ ਕਿਂ ਕਰੋਸੀ’ਤਿ ਮਂ ਪੋਥੇਤ੍ਵਾ ਪਾਦੇ ਗਹੇਤ੍ਵਾ ਕਡ੍ਢੇਤ੍ਵਾ ਅਰਞ੍ਞੇ ਖਿਪਿਸ੍ਸਤਿ, ਤਸ੍ਮਿਂ ਅਨਾਗਤੇਯੇਵ ਪਲਾਯਿਸ੍ਸਾਮੀ’’ਤਿ. ਅਥ ਨਂ ‘‘ਅਹਂ ਪੁਰਤੋ ਗਚ੍ਛਾਮਿ, ਤ੍ਵਂ ਪਚ੍ਛਾ ਆਗਚ੍ਛੇਯ੍ਯਾਸੀ’’ਤਿ ਵਤ੍ਵਾ ਮਗ੍ਗਸਞ੍ਞਂ ਆਚਿਕ੍ਖਿਤ੍ਵਾ ਪਕ੍ਕਾਮਿ. ਸੋ ਤਸ੍ਸਾ ਗਤਕਾਲਤੋ ਪਟ੍ਠਾਯ ਉਪ੍ਪਨ੍ਨਦੋਮਨਸ੍ਸੋ ਯਥਾ ਪੁਰੇ ਕਿਞ੍ਚਿ ਵਤ੍ਤਂ ਅਕਤ੍ਵਾ ਸਸੀਸਂ ਪਾਰੁਪਿਤ੍ਵਾ ਅਨ੍ਤੋਪਣ੍ਣਸਾਲਾਯ ਪਜ੍ਝਾਯਨ੍ਤੋ ਨਿਪਜ੍ਜਿ. ਮਹਾਸਤ੍ਤੋ ਫਲਾਫਲਂ ਆਦਾਯ ਆਗਨ੍ਤ੍ਵਾ ਤਸ੍ਸਾ ਪਦਵਲਞ੍ਜਂ ਦਿਸ੍ਵਾ ‘‘ਅਯਂ ਮਾਤੁਗਾਮਸ੍ਸ ਪਦਵਲਞ੍ਜੋ, ‘‘ਪੁਤ੍ਤਸ੍ਸ ਮਮ ਸੀਲਂ ਭਿਨ੍ਨਂ ਭਵਿਸ੍ਸਤੀ’’ਤਿ ਚਿਨ੍ਤੇਨ੍ਤੋ ਪਣ੍ਣਸਾਲਂ ਪਵਿਸਿਤ੍ਵਾ ਫਲਾਫਲਂ ਓਤਾਰੇਤ੍ਵਾ ਪੁਤ੍ਤਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੪੦.

‘‘ਨ ਤੇ ਕਟ੍ਠਾਨਿ ਭਿਨ੍ਨਾਨਿ, ਨ ਤੇ ਉਦਕਮਾਭਤਂ;

ਅਗ੍ਗੀਪਿ ਤੇ ਨ ਹਾਪਿਤੋ, ਕਿਂ ਨੁ ਮਨ੍ਦੋਵ ਝਾਯਸੀ’’ਤਿ.

ਤਤ੍ਥ ਅਗ੍ਗੀਪਿ ਤੇ ਨ ਹਾਪਿਤੋਤਿ ਅਗ੍ਗਿਪਿ ਤੇ ਨ ਜਾਲਿਤੋ. ਮਨ੍ਦੋਵਾਤਿ ਨਿਪ੍ਪਞ੍ਞੋ ਅਨ੍ਧਬਾਲੋ ਵਿਯ.

ਸੋ ਪਿਤੁ ਕਥਂ ਸੁਤ੍ਵਾ ਉਟ੍ਠਾਯ ਪਿਤਰਂ ਵਨ੍ਦਿਤ੍ਵਾ ਗਾਰਵੇਨੇਵ ਅਰਞ੍ਞਵਾਸੇ ਅਨੁਸ੍ਸਾਹਂ ਪਵੇਦੇਨ੍ਤੋ ਗਾਥਾਦ੍ਵਯਮਾਹ –

੪੧.

‘‘ਨ ਉਸ੍ਸਹੇ ਵਨੇ ਵਤ੍ਥੁਂ, ਕਸ੍ਸਪਾਮਨ੍ਤਯਾਮਿ ਤਂ;

ਦੁਕ੍ਖੋ ਵਾਸੋ ਅਰਞ੍ਞਮ੍ਹਿ, ਰਟ੍ਠਂ ਇਚ੍ਛਾਮਿ ਗਨ੍ਤਵੇ.

੪੨.

‘‘ਯਥਾ ਅਹਂ ਇਤੋ ਗਨ੍ਤ੍ਵਾ, ਯਸ੍ਮਿਂ ਜਨਪਦੇ ਵਸਂ;

ਆਚਾਰਂ ਬ੍ਰਹ੍ਮੇ ਸਿਕ੍ਖੇਯ੍ਯਂ, ਤਂ ਧਮ੍ਮਂ ਅਨੁਸਾਸ ਮ’’ਨ੍ਤਿ.

ਤਤ੍ਥ ਕਸ੍ਸਪਾਮਨ੍ਤਯਾਮਿ ਤਨ੍ਤਿ ਕਸ੍ਸਪ ਆਮਨ੍ਤਯਾਮਿ ਤਂ. ਗਨ੍ਤਵੇਤਿ ਗਨ੍ਤੁਂ. ਆਚਾਰਨ੍ਤਿ ਯਸ੍ਮਿਂ ਜਨਪਦੇ ਵਸਾਮਿ, ਤਤ੍ਥ ਵਸਨ੍ਤੋ ਯਥਾ ਆਚਾਰਂ ਜਨਪਦਚਾਰਿਤ੍ਤਂ ਸਿਕ੍ਖੇਯ੍ਯਂ ਜਾਨੇਯ੍ਯਂ, ਤਂ ਧਮ੍ਮਂ ਅਨੁਸਾਸ ਓਵਦਾਹੀਤਿ ਵਦਤਿ.

ਮਹਾਸਤ੍ਤੋ ‘‘ਸਾਧੁ, ਤਾਤ, ਦੇਸਚਾਰਿਤ੍ਤਂ ਤੇ ਕਥੇਸ੍ਸਾਮੀ’’ਤਿ ਵਤ੍ਵਾ ਗਾਥਾਦ੍ਵਯਮਾਹ –

੪੩.

‘‘ਸਚੇ ਅਰਞ੍ਞਂ ਹਿਤ੍ਵਾਨ, ਵਨਮੂਲਫਲਾਨਿ ਚ;

ਰਟ੍ਠੇ ਰੋਚਯਸੇ ਵਾਸਂ, ਤਂ ਧਮ੍ਮਂ ਨਿਸਾਮੇਹਿ ਮੇ.

੪੪.

‘‘ਵਿਸਂ ਮਾ ਪਟਿਸੇਵਿਤ੍ਥੋ, ਪਪਾਤਂ ਪਰਿਵਜ੍ਜਯ;

ਪਙ੍ਕੇ ਚ ਮਾ ਵਿਸੀਦਿਤ੍ਥੋ, ਯਤ੍ਤੋ ਚਾਸੀਵਿਸੇ ਚਰੇ’’ਤਿ.

ਤਤ੍ਥ ਧਮ੍ਮਨ੍ਤਿ ਸਚੇ ਰਟ੍ਠਵਾਸਂ ਰੋਚੇਸਿ, ਤੇਨ ਹਿ ਤ੍ਵਂ ਜਨਪਦਚਾਰਿਤ੍ਤਂ ਧਮ੍ਮਂ ਨਿਸਾਮੇਹਿ. ਯਤ੍ਤੋ ਚਾਸੀਵਿਸੇਤਿ ਆਸੀਵਿਸਸ੍ਸ ਸਨ੍ਤਿਕੇ ਯਤ੍ਤੋ ਪਟਿਯਤ੍ਤੋ ਚਰੇਯ੍ਯਾਸਿ, ਸਕ੍ਕੋਨ੍ਤੋ ਆਸੀਵਿਸਂ ਪਰਿਵਜ੍ਜੇਯ੍ਯਾਸੀਤਿ ਅਤ੍ਥੋ.

ਤਾਪਸਕੁਮਾਰੋ ਸਂਖਿਤ੍ਤੇਨ ਭਾਸਿਤਸ੍ਸ ਅਤ੍ਥਂ ਅਜਾਨਨ੍ਤੋ ਪੁਚ੍ਛਿ –

੪੫.

‘‘ਕਿਂ ਨੁ ਵਿਸਂ ਪਪਾਤੋ ਵਾ, ਪਙ੍ਕੋ ਵਾ ਬ੍ਰਹ੍ਮਚਾਰਿਨਂ;

ਕਂ ਤ੍ਵਂ ਆਸੀਵਿਸਂ ਬ੍ਰੂਸਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

ਇਤਰੋਪਿਸ੍ਸ ਬ੍ਯਾਕਾਸਿ –

੪੬.

‘‘ਆਸਵੋ ਤਾਤ ਲੋਕਸ੍ਮਿਂ, ਸੁਰਾ ਨਾਮ ਪਵੁਚ੍ਚਤਿ;

ਮਨੁਞ੍ਞੋ ਸੁਰਭੀ ਵਗ੍ਗੁ, ਸਾਦੁ ਖੁਦ੍ਦਰਸੂਪਮੋ;

ਵਿਸਂ ਤਦਾਹੁ ਅਰਿਯਾ ਸੇ, ਬ੍ਰਹ੍ਮਚਰਿਯਸ੍ਸ ਨਾਰਦ.

੪੭.

‘‘ਇਤ੍ਥਿਯੋ ਤਾਤ ਲੋਕਸ੍ਮਿਂ, ਪਮਤ੍ਤਂ ਪਮਥੇਨ੍ਤਿ ਤਾ;

ਹਰਨ੍ਤਿ ਯੁਵਿਨੋ ਚਿਤ੍ਤਂ, ਤੂਲਂ ਭਟ੍ਠਂਵ ਮਾਲੁਤੋ;

ਪਪਾਤੋ ਏਸੋ ਅਕ੍ਖਾਤੋ, ਬ੍ਰਹ੍ਮਚਰਿਯਸ੍ਸ ਨਾਰਦ.

੪੮.

‘‘ਲਾਭੋ ਸਿਲੋਕੋ ਸਕ੍ਕਾਰੋ, ਪੂਜਾ ਪਰਕੁਲੇਸੁ ਚ;

ਪਙ੍ਕੋ ਏਸੋ ਚ ਅਕ੍ਖਾਤੋ, ਬ੍ਰਹ੍ਮਚਰਿਯਸ੍ਸ ਨਾਰਦ.

੪੯.

‘‘ਸਸਤ੍ਥਾ ਤਾਤ ਰਾਜਾਨੋ, ਆਵਸਨ੍ਤਿ ਮਹਿਂ ਇਮਂ;

ਤੇ ਤਾਦਿਸੇ ਮਨੁਸ੍ਸਿਨ੍ਦੇ, ਮਹਨ੍ਤੇ ਤਾਤ ਨਾਰਦ.

੫੦.

‘‘ਇਸ੍ਸਰਾਨਂ ਅਧਿਪਤੀਨਂ, ਨ ਤੇਸਂ ਪਾਦਤੋ ਚਰੇ;

ਆਸੀਵਿਸੋਤਿ ਅਕ੍ਖਾਤੋ, ਬ੍ਰਹ੍ਮਚਰਿਯਸ੍ਸ ਨਾਰਦ.

੫੧.

‘‘ਭਤ੍ਤਤ੍ਥੋ ਭਤ੍ਤਕਾਲੇ ਚ, ਯਂ ਗੇਹਮੁਪਸਙ੍ਕਮੇ;

ਯਦੇਤ੍ਥ ਕੁਸਲਂ ਜਞ੍ਞਾ, ਤਤ੍ਥ ਘਾਸੇਸਨਂ ਚਰੇ.

੫੨.

‘‘ਪਵਿਸਿਤ੍ਵਾ ਪਰਕੁਲਂ, ਪਾਨਤ੍ਥਂ ਭੋਜਨਾਯ ਵਾ;

ਮਿਤਂ ਖਾਦੇ ਮਿਤਂ ਭੁਞ੍ਜੇ, ਨ ਚ ਰੂਪੇ ਮਨਂ ਕਰੇ.

੫੩.

‘‘ਗੋਟ੍ਠਂ ਮਜ੍ਜਂ ਕਿਰਾਟਞ੍ਚ, ਸਭਾ ਨਿਕਿਰਣਾਨਿ ਚ;

ਆਰਕਾ ਪਰਿਵਜ੍ਜੇਹਿ, ਯਾਨੀਵ ਵਿਸਮਂ ਪਥ’’ਨ੍ਤਿ.

ਤਤ੍ਥ ਆਸਵੋਤਿ ਪੁਪ੍ਫਾਸਵਾਦਿ. ਵਿਸਂ ਤਦਾਹੂਤਿ ਤਂ ਆਸਵਸਙ੍ਖਾਤਂ ਸੁਰਂ ਅਰਿਯਾ ‘‘ਬ੍ਰਹ੍ਮਚਰਿਯਸ੍ਸ ਵਿਸ’’ਨ੍ਤਿ ਵਦਨ੍ਤਿ. ਪਮਤ੍ਤਨ੍ਤਿ ਮੁਟ੍ਠਸ੍ਸਤਿਂ. ਤੂਲਂ ਭਟ੍ਠਂਵਾਤਿ ਰੁਕ੍ਖਾ ਭਸ੍ਸਿਤ੍ਵਾ ਪਤਿਤਤੂਲਂ ਵਿਯ. ਅਕ੍ਖਾਤੋਤਿ ਬੁਦ੍ਧਾਦੀਹਿ ਕਥਿਤੋ. ਸਿਲੋਕੋਤਿ ਕਿਤ੍ਤਿਵਣ੍ਣੋ. ਸਕ੍ਕਾਰੋਤਿ ਅਞ੍ਜਲਿਕਮ੍ਮਾਦਿ. ਪੂਜਾਤਿ ਗਨ੍ਧਮਾਲਾਦੀਹਿ ਪੂਜਾ. ਪਙ੍ਕੋਤਿ ਏਸ ਓਸੀਦਾਪਨਟ੍ਠੇਨ ‘‘ਪਙ੍ਕੋ’’ਤਿ ਅਕ੍ਖਾਤੋ. ਮਹਨ੍ਤੇਤਿ ਮਹਨ੍ਤਭਾਵਪ੍ਪਤ੍ਤੇ. ਨ ਤੇਸਂ ਪਾਦਤੋ ਚਰੇਤਿ ਤੇਸਂ ਸਨ੍ਤਿਕੇ ਨ ਚਰੇ, ਰਾਜਕੁਲੂਪਕੋ ਨ ਭਵੇਯ੍ਯਾਸੀਤਿ ਅਤ੍ਥੋ. ਰਾਜਾਨੋ ਹਿ ਆਸੀਵਿਸਾ ਵਿਯ ਮੁਹੁਤ੍ਤੇਨੇਵ ਕੁਜ੍ਝਿਤ੍ਵਾ ਅਨਯਬ੍ਯਸਨਂ ਪਾਪੇਨ੍ਤਿ. ਅਪਿਚ ਅਨ੍ਤੇਪੁਰਪ੍ਪਵੇਸਨੇ ਵੁਤ੍ਤਾਦੀਨਵਵਸੇਨਪੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਭਤ੍ਤਤ੍ਥੋਤਿ ਭਤ੍ਤੇਨ ਅਤ੍ਥਿਕੋ ਹੁਤ੍ਵਾ. ਯਦੇਤ੍ਥ ਕੁਸਲਨ੍ਤਿ ਯਂ ਤੇਸੁ ਉਪਸਙ੍ਕਮਿਤਬ੍ਬੇਸੁ ਗੇਹੇਸੁ ਕੁਸਲਂ ਅਨਵਜ੍ਜਂ ਪਞ੍ਚਅਗੋਚਰਰਹਿਤਂ ਜਾਨੇਯ੍ਯਾਸਿ, ਤਤ੍ਥ ਘਾਸੇਸਨਂ ਚਰੇਯ੍ਯਾਸੀਤਿ ਅਤ੍ਥੋ. ਨ ਚ ਰੂਪੇ ਮਨਂ ਕਰੇਤਿ ਪਰਕੁਲੇ ਮਤ੍ਤਞ੍ਞੂ ਹੁਤ੍ਵਾ ਭੋਜਨਂ ਭੁਞ੍ਜਨ੍ਤੋਪਿ ਤਤ੍ਥ ਇਤ੍ਥਿਰੂਪੇ ਮਨਂ ਮਾ ਕਰੇਯ੍ਯਾਸਿ, ਮਾ ਚਕ੍ਖੁਂ ਉਮ੍ਮੀਲੇਤ੍ਵਾ ਇਤ੍ਥਿਰੂਪੇ ਨਿਮਿਤ੍ਤਂ ਗਣ੍ਹੇਯ੍ਯਾਸੀਤਿ ਵਦਤਿ. ਗੋਟ੍ਠਂ ਮਜ੍ਜਂ ਕਿਰਾਟਨ੍ਤਿ ਅਯਂ ਪੋਤ੍ਥਕੇਸੁ ਪਾਠੋ, ਅਟ੍ਠਕਥਾਯਂ ਪਨ ‘‘ਗੋਟ੍ਠਂ ਮਜ੍ਜਂ ਕਿਰਾਸਞ੍ਚਾ’’ਤਿ ਵਤ੍ਵਾ ‘‘ਗੋਟ੍ਠਨ੍ਤਿ ਗੁਨ੍ਨਂ ਠਿਤਟ੍ਠਾਨਂ. ਮਜ੍ਜਨ੍ਤਿ ਪਾਨਾਗਾਰਂ. ਕਿਰਾਸਨ੍ਤਿ ਧੁਤ੍ਤਕੇਰਾਟਿਕਜਨ’’ਨ੍ਤਿ ਵੁਤ੍ਤਂ. ਸਭਾ ਨਿਕਿਰਣਾਨਿ ਚਾਤਿ ਸਭਾਯੋ ਚ ਹਿਰਞ੍ਞਸੁਵਣ੍ਣਾਨਂ ਨਿਕਿਰਣਟ੍ਠਾਨਾਨਿ ਚ. ਆਰਕਾਤਿ ਏਤਾਨਿ ਸਬ੍ਬਾਨਿ ਦੂਰਤੋ ਪਰਿਵਜ੍ਜੇਯ੍ਯਾਸਿ. ਯਾਨੀਵਾਤਿ ਸਪ੍ਪਿਤੇਲਯਾਨੇਨ ਗਚ੍ਛਨ੍ਤੋ ਵਿਸਮਂ ਮਗ੍ਗਂ ਵਿਯ.

ਮਾਣਵੋ ਪਿਤੁ ਕਥੇਨ੍ਤਸ੍ਸੇਵ ਸਤਿਂ ਪਟਿਲਭਿਤ੍ਵਾ ‘‘ਤਾਤ, ਅਲਂ ਮੇ ਮਨੁਸ੍ਸਪਥੇਨਾ’’ਤਿ ਆਹ. ਅਥਸ੍ਸ ਪਿਤਾ ਮੇਤ੍ਤਾਦਿਭਾਵਨਂ ਆਚਿਕ੍ਖਿ. ਸੋ ਤਸ੍ਸੋਵਾਦੇ ਠਤ੍ਵਾ ਨ ਚਿਰਸ੍ਸੇਵ ਝਾਨਾਭਿਞ੍ਞਾ ਨਿਬ੍ਬਤ੍ਤੇਸਿ. ਉਭੋਪਿ ਪਿਤਾਪੁਤ੍ਤਾ ਅਪਰਿਹੀਨਜ੍ਝਾਨਾ ਕਾਲਂ ਕਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਂਸੁ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਾ ਕੁਮਾਰਿਕਾ ਅਯਂ ਕੁਮਾਰਿਕਾ ਅਹੋਸਿ, ਤਾਪਸਕੁਮਾਰੋ ਉਕ੍ਕਣ੍ਠਿਤਭਿਕ੍ਖੁ, ਪਿਤਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚੂਲ਼ਨਾਰਦਜਾਤਕਵਣ੍ਣਨਾ ਚਤੁਤ੍ਥਾ.

[੪੭੮] ੫. ਦੂਤਜਾਤਕਵਣ੍ਣਨਾ

ਦੂਤੇ ਤੇ ਬ੍ਰਹ੍ਮੇ ਪਾਹੇਸਿਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਤ੍ਤਨੋ ਪਞ੍ਞਾਪਸਂਸਨਂ ਆਰਬ੍ਭ ਕਥੇਸਿ. ਧਮ੍ਮਸਭਾਯਂ ਭਿਕ੍ਖੂ ਕਥਂ ਸਮੁਟ੍ਠਾਪੇਸੁਂ ‘‘ਪਸ੍ਸਥ, ਆਵੁਸੋ, ਦਸਬਲਸ੍ਸ ਉਪਾਯਕੋਸਲ੍ਲਂ, ਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਅਚ੍ਛਰਾਗਣਂ ਦਸ੍ਸੇਤ੍ਵਾ ਅਰਹਤ੍ਤਂ ਅਦਾਸਿ, ਚੂਲ਼ਪਨ੍ਥਕਸ੍ਸ ਪਿਲੋਤਿਕਂ ਦਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਅਦਾਸਿ, ਕਮ੍ਮਾਰਪੁਤ੍ਤਸ੍ਸ ਪਦੁਮਂ ਦਸ੍ਸੇਤ੍ਵਾ ਅਰਹਤ੍ਤਂ ਅਦਾਸਿ, ਏਵਂ ਨਾਨਾਉਪਾਯੇਹਿ ਸਤ੍ਤੇ ਵਿਨੇਤੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਤਥਾਗਤੋ ਇਦਾਨੇਵ ‘ਇਮਿਨਾ ਇਦਂ ਹੋਤੀ’ਤਿ ਉਪਾਯਕੁਸਲੋ, ਪੁਬ੍ਬੇਪਿ ਉਪਾਯਕੁਸਲੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਜਨਪਦੋ ਅਹਿਰਞ੍ਞੋ ਅਹੋਸਿ. ਸੋ ਹਿ ਜਨਪਦਂ ਪੀਲ਼ੇਤ੍ਵਾ ਧਨਮੇਵ ਸਂਕਡ੍ਢਿ. ਤਦਾ ਬੋਧਿਸਤ੍ਤੋ ਕਾਸਿਗਾਮੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਤਕ੍ਕਸਿਲਂ ਗਨ੍ਤ੍ਵਾ ‘‘ਪਚ੍ਛਾ ਧਮ੍ਮੇਨ ਭਿਕ੍ਖਂ ਚਰਿਤ੍ਵਾ ਆਚਰਿਯਧਨਂ ਆਹਰਿਸ੍ਸਾਮੀ’’ਤਿ ਵਤ੍ਵਾ ਸਿਪ੍ਪਂ ਪਟ੍ਠਪੇਤ੍ਵਾ ਨਿਟ੍ਠਿਤਸਿਪ੍ਪੋ ਅਨੁਯੋਗਂ ਦਤ੍ਵਾ ‘‘ਆਚਰਿਯ, ਤੁਮ੍ਹਾਕਂ ਧਨਂ ਆਹਰਿਸ੍ਸਾਮੀ’’ਤਿ ਆਪੁਚ੍ਛਿਤ੍ਵਾ ਨਿਕ੍ਖਮ੍ਮ ਜਨਪਦੇ ਚਰਨ੍ਤੋ ਧਮ੍ਮੇਨ ਸਮੇਨ ਪਰਿਯੇਸਿਤ੍ਵਾ ਸਤ੍ਤ ਨਿਕ੍ਖੇ ਲਭਿਤ੍ਵਾ ‘‘ਆਚਰਿਯਸ੍ਸ ਦਸ੍ਸਾਮੀ’’ਤਿ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਗਙ੍ਗਂ ਓਤਰਿਤੁਂ ਨਾਵਂ ਅਭਿਰੁਹਿ. ਤਸ੍ਸ ਤਤ੍ਥ ਨਾਵਾਯ ਵਿਪਰਿਵਤ੍ਤਮਾਨਾਯ ਤਂ ਸੁਵਣ੍ਣਂ ਉਦਕੇ ਪਤਿ. ਸੋ ਚਿਨ੍ਤੇਸਿ ‘‘ਦੁਲ੍ਲਭਂ ਹਿਰਞ੍ਞਂ, ਜਨਪਦੇ ਪੁਨ ਆਚਰਿਯਧਨੇ ਪਰਿਯੇਸਿਯਮਾਨੇ ਪਪਞ੍ਚੋ ਭਵਿਸ੍ਸਤਿ, ਯਂਨੂਨਾਹਂ ਗਙ੍ਗਾਤੀਰੇਯੇਵ ਨਿਰਾਹਾਰੋ ਨਿਸੀਦੇਯ੍ਯਂ, ਤਸ੍ਸ ਮੇ ਨਿਸਿਨ੍ਨਭਾਵਂ ਅਨੁਪੁਬ੍ਬੇਨ ਰਾਜਾ ਜਾਨਿਸ੍ਸਤਿ, ਤਤੋ ਅਮਚ੍ਚੇ ਪੇਸੇਸ੍ਸਤਿ, ਅਹਂ ਤੇਹਿ ਸਦ੍ਧਿਂ ਨ ਮਨ੍ਤੇਸ੍ਸਾਮਿ, ਤਤੋ ਰਾਜਾ ਸਯਂ ਆਗਮਿਸ੍ਸਤਿ, ਇਮਿਨਾ ਉਪਾਯੇਨ ਤਸ੍ਸ ਸਨ੍ਤਿਕੇ ਆਚਰਿਯਧਨਂ ਲਭਿਸ੍ਸਾਮੀ’’ਤਿ. ਸੋ ਗਙ੍ਗਾਤੀਰੇ ਉਤ੍ਤਰਿਸਾਟਕਂ ਪਾਰੁਪਿਤ੍ਵਾ ਯਞ੍ਞਸੁਤ੍ਤਂ ਬਹਿ ਠਪੇਤ੍ਵਾ ਰਜਤਪਟ੍ਟਵਣ੍ਣੇ ਵਾਲੁਕਤਲੇ ਸੁਵਣ੍ਣਪਟਿਮਾ ਵਿਯ ਨਿਸੀਦਿ. ਤਂ ਨਿਰਾਹਾਰਂ ਨਿਸਿਨ੍ਨਂ ਦਿਸ੍ਵਾ ਮਹਾਜਨੋ ‘‘ਕਸ੍ਮਾ ਨਿਸਿਨ੍ਨੋਸੀ’’ਤਿ ਪੁਚ੍ਛਿ, ਕਸ੍ਸਚਿ ਨ ਕਥੇਸਿ. ਪੁਨਦਿਵਸੇ ਦ੍ਵਾਰਗਾਮਵਾਸਿਨੋ ਤਸ੍ਸ ਤਤ੍ਥ ਨਿਸਿਨ੍ਨਭਾਵਂ ਸੁਤ੍ਵਾ ਆਗਨ੍ਤ੍ਵਾ ਪੁਚ੍ਛਿਂਸੁ, ਤੇਸਮ੍ਪਿ ਨ ਕਥੇਸਿ. ਤੇ ਤਸ੍ਸ ਕਿਲਮਥਂ ਦਿਸ੍ਵਾ ਪਰਿਦੇਵਨ੍ਤਾ ਪਕ੍ਕਮਿਂਸੁ. ਤਤਿਯਦਿਵਸੇ ਨਗਰਵਾਸਿਨੋ ਆਗਮਿਂਸੁ, ਚਤੁਤ੍ਥਦਿਵਸੇ ਨਗਰਤੋ ਇਸ੍ਸਰਜਨਾ, ਪਞ੍ਚਮਦਿਵਸੇ ਰਾਜਪੁਰਿਸਾ. ਛਟ੍ਠਦਿਵਸੇ ਰਾਜਾ ਅਮਚ੍ਚੇ ਪੇਸੇਸਿ, ਤੇਹਿਪਿ ਸਦ੍ਧਿਂ ਨ ਕਥੇਸਿ. ਸਤ੍ਤਮਦਿਵਸੇ ਰਾਜਾ ਭਯਟ੍ਟਿਤੋ ਹੁਤ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੫੪.

‘‘ਦੂਤੇ ਤੇ ਬ੍ਰਹ੍ਮੇ ਪਾਹੇਸਿਂ, ਗਙ੍ਗਾਤੀਰਸ੍ਮਿ ਝਾਯਤੋ;

ਤੇਸਂ ਪੁਟ੍ਠੋ ਨ ਬ੍ਯਾਕਾਸਿ, ਦੁਕ੍ਖਂ ਗੁਯ੍ਹਮਤਂ ਨੁ ਤੇ’’ਤਿ.

ਤਤ੍ਥ ਦੁਕ੍ਖਂ ਗੁਯ੍ਹਮਤਂ ਨੁ ਤੇਤਿ ਕਿਂ ਨੁ ਖੋ, ਬ੍ਰਾਹ੍ਮਣ, ਯਂ ਤਵ ਦੁਕ੍ਖਂ ਉਪ੍ਪਨ੍ਨਂ, ਤਂ ਤੇ ਗੁਯ੍ਹਮੇਵ ਮਤਂ, ਨ ਅਞ੍ਞਸ੍ਸ ਆਚਿਕ੍ਖਿਤਬ੍ਬਨ੍ਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਮਹਾਰਾਜ, ਦੁਕ੍ਖਂ ਨਾਮ ਹਰਿਤੁਂ ਸਮਤ੍ਥਸ੍ਸੇਵ ਆਚਿਕ੍ਖਿਤਬ੍ਬਂ, ਨ ਅਞ੍ਞਸ੍ਸਾ’’ਤਿ ਵਤ੍ਵਾ ਸਤ੍ਤ ਗਾਥਾ ਅਭਾਸਿ –

੫੫.

‘‘ਸਚੇ ਤੇ ਦੁਕ੍ਖਮੁਪ੍ਪਜ੍ਜੇ, ਕਾਸੀਨਂ ਰਟ੍ਠਵਡ੍ਢਨ;

ਮਾ ਖੋ ਨਂ ਤਸ੍ਸ ਅਕ੍ਖਾਹਿ, ਯੋ ਤਂ ਦੁਕ੍ਖਾ ਨ ਮੋਚਯੇ.

੫੬.

‘‘ਯੋ ਤਸ੍ਸ ਦੁਕ੍ਖਜਾਤਸ੍ਸ, ਏਕਙ੍ਗਮਪਿ ਭਾਗਸੋ;

ਵਿਪ੍ਪਮੋਚੇਯ੍ਯ ਧਮ੍ਮੇਨ, ਕਾਮਂ ਤਸ੍ਸ ਪਵੇਦਯ.

੫੭.

‘‘ਸੁਵਿਜਾਨਂ ਸਿਙ੍ਗਾਲਾਨਂ, ਸਕੁਣਾਨਞ੍ਚ ਵਸ੍ਸਿਤਂ;

ਮਨੁਸ੍ਸਵਸ੍ਸਿਤਂ ਰਾਜ, ਦੁਬ੍ਬਿਜਾਨਤਰਂ ਤਤੋ.

੫੮.

‘‘ਅਪਿ ਚੇ ਮਞ੍ਞਤੀ ਪੋਸੋ, ਞਾਤਿ ਮਿਤ੍ਤੋ ਸਖਾਤਿ ਵਾ;

ਯੋ ਪੁਬ੍ਬੇ ਸੁਮਨੋ ਹੁਤ੍ਵਾ, ਪਚ੍ਛਾ ਸਮ੍ਪਜ੍ਜਤੇ ਦਿਸੋ.

੫੯.

‘‘ਯੋ ਅਤ੍ਤਨੋ ਦੁਕ੍ਖਮਨਾਨੁਪੁਟ੍ਠੋ, ਪਵੇਦਯੇ ਜਨ੍ਤੁ ਅਕਾਲਰੂਪੇ;

ਆਨਨ੍ਦਿਨੋ ਤਸ੍ਸ ਭਵਨ੍ਤਿ ਮਿਤ੍ਤਾ, ਹਿਤੇਸਿਨੋ ਤਸ੍ਸ ਦੁਖੀ ਭਵਨ੍ਤਿ.

੬੦.

‘‘ਕਾਲਞ੍ਚ ਞਤ੍ਵਾਨ ਤਥਾਵਿਧਸ੍ਸ, ਮੇਧਾਵਿਨਂ ਏਕਮਨਂ ਵਿਦਿਤ੍ਵਾ;

ਅਕ੍ਖੇਯ੍ਯ ਤਿਬ੍ਬਾਨਿ ਪਰਸ੍ਸ ਧੀਰੋ, ਸਣ੍ਹਂ ਗਿਰਂ ਅਤ੍ਥਵਤਿਂ ਪਮੁਞ੍ਚੇ.

੬੧.

‘‘ਸਚੇ ਚ ਜਞ੍ਞਾ ਅਵਿਸਯ੍ਹਮਤ੍ਤਨੋ, ਨ ਤੇ ਹਿ ਮਯ੍ਹਂ ਸੁਖਾਗਮਾਯ;

ਏਕੋਵ ਤਿਬ੍ਬਾਨਿ ਸਹੇਯ੍ਯ ਧੀਰੋ, ਸਚ੍ਚਂ ਹਿਰੋਤ੍ਤਪ੍ਪਮਪੇਕ੍ਖਮਾਨੋ’’ਤਿ.

ਤਤ੍ਥ ਉਪ੍ਪਜ੍ਜੇਤਿ ਸਚੇ ਤਵ ਉਪ੍ਪਜ੍ਜੇਯ੍ਯ. ਮਾ ਅਕ੍ਖਾਹੀਤਿ ਮਾ ਕਥੇਹਿ. ਦੁਬ੍ਬਿਜਾਨਤਰਂ ਤਤੋਤਿ ਤਤੋ ਤਿਰਚ੍ਛਾਨਗਤਵਸ੍ਸਿਤਤੋਪਿ ਦੁਬ੍ਬਿਜਾਨਤਰਂ, ਤਸ੍ਮਾ ਤਥਤੋ ਅਜਾਨਿਤ੍ਵਾ ਹਰਿਤੁਂ ਅਸਮਤ੍ਥਸ੍ਸ ਅਤ੍ਤਨੋ ਦੁਕ੍ਖਂ ਨ ਕਥੇਤਬ੍ਬਮੇਵਾਤਿ. ਅਪਿ ਚੇਤਿ ਗਾਥਾ ਵੁਤ੍ਤਤ੍ਥਾਵ. ਅਨਾਨੁਪੁਟ੍ਠੋਤਿ ਪੁਨਪ੍ਪੁਨਂ ਪੁਟ੍ਠੋ. ਪਵੇਦਯੇਤਿ ਕਥੇਤਿ. ਅਕਾਲਰੂਪੇਤਿ ਅਕਾਲੇ. ਕਾਲਨ੍ਤਿ ਅਤ੍ਤਨੋ ਗੁਯ੍ਹਸ੍ਸ ਕਥਨਕਾਲਂ. ਤਥਾਵਿਧਸ੍ਸਾਤਿ ਪਣ੍ਡਿਤਪੁਰਿਸਂ ਅਤ੍ਤਨਾ ਸਦ੍ਧਿਂ ਏਕਮਨਂ ਵਿਦਿਤ੍ਵਾ ਤਥਾਵਿਧਸ੍ਸ ਆਚਿਕ੍ਖੇਯ੍ਯ. ਤਿਬ੍ਬਾਨੀਤਿ ਦੁਕ੍ਖਾਨਿ.

ਸਚੇਤਿ ਯਦਿ ਅਤ੍ਤਨੋ ਦੁਕ੍ਖਂ ਅਵਿਸਯ੍ਹਂ ਅਤ੍ਤਨੋ ਵਾ ਪਰੇਸਂ ਵਾ ਪੁਰਿਸਕਾਰੇਨ ਅਤੇਕਿਚ੍ਛਂ ਜਾਨੇਯ੍ਯ. ਤੇ ਹੀਤਿ ਤੇ ਏਵ ਲੋਕਪਵੇਣਿਕਾ, ਅਟ੍ਠਲੋਕਧਮ੍ਮਾਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਅਥ ਅਯਂ ਲੋਕਪਵੇਣੀ ਨ ਮਯ੍ਹਂ ਏਵ ਸੁਖਾਗਮਾਯ ਉਪ੍ਪਨ੍ਨਾ, ਅਟ੍ਠਹਿ ਲੋਕਧਮ੍ਮੇਹਿ ਪਰਿਮੁਤ੍ਤੋ ਨਾਮ ਨਤ੍ਥਿ, ਏਵਂ ਸਨ੍ਤੇ ਸੁਖਮੇਵ ਪਤ੍ਥੇਨ੍ਤੇਨ ਪਰਸ੍ਸ ਦੁਕ੍ਖਾਰੋਪਨਂ ਨਾਮ ਨ ਯੁਤ੍ਤਂ, ਨੇਤਂ ਹਿਰੋਤ੍ਤਪ੍ਪਸਮ੍ਪਨ੍ਨੇਨ ਕਤ੍ਤਬ੍ਬਂ, ਅਤ੍ਥਿ ਚ ਮੇ ਹਿਰੀ ਓਤ੍ਤਪ੍ਪਨ੍ਤਿ ਸਚ੍ਚਂ ਸਂਵਿਜ੍ਜਮਾਨਂ ਅਤ੍ਤਨਿ ਹਿਰੋਤ੍ਤਪ੍ਪਂ ਅਪੇਕ੍ਖਮਾਨੋਵ ਅਞ੍ਞਸ੍ਸ ਅਨਾਰੋਚੇਤ੍ਵਾ ਏਕੋਵ ਤਿਬ੍ਬਾਨਿ ਸਹੇਯ੍ਯ ਧੀਰੋਤਿ.

ਏਵਂ ਮਹਾਸਤ੍ਤੋ ਸਤ੍ਤਹਿ ਗਾਥਾਹਿ ਰਞ੍ਞੋ ਧਮ੍ਮਂ ਦੇਸੇਤ੍ਵਾ ਅਤ੍ਤਨੋ ਆਚਰਿਯਧਨਸ੍ਸ ਪਰਿਯੇਸਿਤਭਾਵਂ ਦਸ੍ਸੇਨ੍ਤੋ ਚਤਸ੍ਸੋ ਗਾਥਾ ਅਭਾਸਿ –

੬੨.

‘‘ਅਹਂ ਰਟ੍ਠੇ ਵਿਚਰਨ੍ਤੋ, ਨਿਗਮੇ ਰਾਜਧਾਨਿਯੋ;

ਭਿਕ੍ਖਮਾਨੋ ਮਹਾਰਾਜ, ਆਚਰਿਯਸ੍ਸ ਧਨਤ੍ਥਿਕੋ.

੬੩.

‘‘ਗਹਪਤੀ ਰਾਜਪੁਰਿਸੇ, ਮਹਾਸਾਲੇ ਚ ਬ੍ਰਾਹ੍ਮਣੇ;

ਅਲਤ੍ਥਂ ਸਤ੍ਤ ਨਿਕ੍ਖਾਨਿ, ਸੁਵਣ੍ਣਸ੍ਸ ਜਨਾਧਿਪ;

ਤੇ ਮੇ ਨਟ੍ਠਾ ਮਹਾਰਾਜ, ਤਸ੍ਮਾ ਸੋਚਾਮਹਂ ਭੁਸਂ.

੬੪.

‘‘ਪੁਰਿਸਾ ਤੇ ਮਹਾਰਾਜ, ਮਨਸਾਨੁਵਿਚਿਨ੍ਤਿਤਾ;

ਨਾਲਂ ਦੁਕ੍ਖਾ ਪਮੋਚੇਤੁਂ, ਤਸ੍ਮਾ ਤੇਸਂ ਨ ਬ੍ਯਾਹਰਿਂ.

੬੫.

‘‘ਤ੍ਵਞ੍ਚ ਖੋ ਮੇ ਮਹਾਰਾਜ, ਮਨਸਾਨੁਵਿਚਿਨ੍ਤਿਤੋ;

ਅਲਂ ਦੁਕ੍ਖਾ ਪਮੋਚੇਤੁਂ, ਤਸ੍ਮਾ ਤੁਯ੍ਹਂ ਪਵੇਦਯਿ’’ਨ੍ਤਿ.

ਤਤ੍ਥ ਭਿਕ੍ਖਮਾਨੋਤਿ ਏਤੇ ਗਹਪਤਿਆਦਯੋ ਯਾਚਮਾਨੋ. ਤੇ ਮੇਤਿ ਤੇ ਸਤ੍ਤ ਨਿਕ੍ਖਾ ਮਮ ਗਙ੍ਗਂ ਤਰਨ੍ਤਸ੍ਸ ਨਟ੍ਠਾ, ਗਙ੍ਗਾਯਂ ਪਤਿਤਾ. ਪੁਰਿਸਾ ਤੇਤਿ ਮਹਾਰਾਜ, ਤਵ ਦੂਤਪੁਰਿਸਾ. ਅਨੁਵਿਚਿਨ੍ਤਿਤਾਤਿ ‘‘ਨਾਲਂ ਇਮੇ ਮਂ ਦੁਕ੍ਖਾ ਮੋਚੇਤੁ’’ਨ੍ਤਿ ਮਯਾ ਞਾਤਾ. ਤਸ੍ਮਾਤਿ ਤੇਨ ਕਾਰਣੇਨ ਤੇਸਂ ਅਤ੍ਤਨੋ ਦੁਕ੍ਖਂ ਨਾਚਿਕ੍ਖਿਂ. ਪਵੇਦਯਿਨ੍ਤਿ ਕਥੇਸਿਂ.

ਰਾਜਾ ਤਸ੍ਸ ਧਮ੍ਮਕਥਂ ਸੁਤ੍ਵਾ ‘‘ਮਾ ਚਿਨ੍ਤਯਿ, ਬ੍ਰਾਹ੍ਮਣ, ਅਹਂ ਤੇ ਆਚਰਿਯਧਨਂ ਦਸ੍ਸਾਮੀ’’ਤਿ ਦ੍ਵਿਗੁਣਧਨਮਦਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਓਸਾਨਗਾਥਮਾਹ –

੬੬.

‘‘ਤਸ੍ਸਾਦਾਸਿ ਪਸਨ੍ਨਤ੍ਤੋ, ਕਾਸੀਨਂ ਰਟ੍ਠਵਡ੍ਢਨੋ;

ਜਾਤਰੂਪਮਯੇ ਨਿਕ੍ਖੇ, ਸੁਵਣ੍ਣਸ੍ਸ ਚਤੁਦ੍ਦਸਾ’’ਤਿ.

ਤਤ੍ਥ ਜਾਤਰੂਪਮਯੇਤਿ ਤੇ ਸੁਵਣ੍ਣਸ੍ਸ ਚਤੁਦ੍ਦਸ ਨਿਕ੍ਖੇ ਜਾਤਰੂਪਮਯੇਯੇਵ ਅਦਾਸਿ, ਨ ਯਸ੍ਸ ਵਾ ਤਸ੍ਸ ਵਾ ਸੁਵਣ੍ਣਸ੍ਸਾਤਿ ਅਤ੍ਥੋ.

ਮਹਾਸਤ੍ਤੋ ਰਞ੍ਞੋ ਓਵਾਦਂ ਦਤ੍ਵਾ ਆਚਰਿਯਸ੍ਸ ਧਨਂ ਦਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਰਾਜਾਪਿ ਤਸ੍ਸੋਵਾਦੇ ਠਿਤੋ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਉਭੋਪਿ ਯਥਾਕਮ੍ਮਂ ਗਤਾ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਤਥਾਗਤੋ ਉਪਾਯਕੁਸਲੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਆਚਰਿਯੋ ਸਾਰਿਪੁਤ੍ਤੋ, ਬ੍ਰਾਹ੍ਮਣਮਾਣਵੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਦੂਤਜਾਤਕਵਣ੍ਣਨਾ ਪਞ੍ਚਮਾ.

[੪੭੯] ੬. ਕਾਲਿਙ੍ਗਬੋਧਿਜਾਤਕਵਣ੍ਣਨਾ

ਰਾਜਾ ਕਾਲਿਙ੍ਗੋ ਚਕ੍ਕਵਤ੍ਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਆਨਨ੍ਦਤ੍ਥੇਰੇਨ ਕਤਂ ਮਹਾਬੋਧਿਪੂਜਂ ਆਰਬ੍ਭ ਕਥੇਸਿ. ਵੇਨੇਯ੍ਯਸਙ੍ਗਹਤ੍ਥਾਯ ਹਿ ਤਥਾਗਤੇ ਜਨਪਦਚਾਰਿਕਂ ਪਕ੍ਕਨ੍ਤੇ ਸਾਵਤ੍ਥਿਵਾਸਿਨੋ ਗਨ੍ਧਮਾਲਾਦਿਹਤ੍ਥਾ ਜੇਤਵਨਂ ਗਨ੍ਤ੍ਵਾ ਅਞ੍ਞਂ ਪੂਜਨੀਯਟ੍ਠਾਨਂ ਅਲਭਿਤ੍ਵਾ ਗਨ੍ਧਕੁਟਿਦ੍ਵਾਰੇ ਪਾਤੇਤ੍ਵਾ ਗਚ੍ਛਨ੍ਤਿ, ਤੇ ਉਲ਼ਾਰਪਾਮੋਜ੍ਜਾ ਨ ਹੋਨ੍ਤਿ. ਤਂ ਕਾਰਣਂ ਞਤ੍ਵਾ ਅਨਾਥਪਿਣ੍ਡਿਕੋ ਤਥਾਗਤਸ੍ਸ ਜੇਤਵਨਂ ਆਗਤਕਾਲੇ ਆਨਨ੍ਦਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਭਨ੍ਤੇ, ਅਯਂ ਵਿਹਾਰੋ ਤਥਾਗਤੇ ਚਾਰਿਕਂ ਪਕ੍ਕਨ੍ਤੇ ਨਿਪਚ੍ਚਯੋ ਹੋਤਿ, ਮਨੁਸ੍ਸਾਨਂ ਗਨ੍ਧਮਾਲਾਦੀਹਿ ਪੂਜਨੀਯਟ੍ਠਾਨਂ ਨ ਹੋਤਿ, ਸਾਧੁ, ਭਨ੍ਤੇ, ਤਥਾਗਤਸ੍ਸ ਇਮਮਤ੍ਥਂ ਆਰੋਚੇਤ੍ਵਾ ਏਕਸ੍ਸ ਪੂਜਨੀਯਟ੍ਠਾਨਸ੍ਸ ਸਕ੍ਕੁਣੇਯ੍ਯਭਾਵਂ ਜਾਨਾਥਾ’’ਤਿ ਆਹ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਥਾਗਤਂ ਪੁਚ੍ਛਿ ‘‘ਕਤਿ ਨੁ ਖੋ, ਭਨ੍ਤੇ, ਚੇਤਿਯਾਨੀ’’ਤਿ? ‘‘ਤੀਣਿ ਆਨਨ੍ਦਾ’’ਤਿ. ‘‘ਕਤਮਾਨਿ, ਭਨ੍ਤੇ, ਤੀਣੀ’’ਤਿ? ‘‘ਸਾਰੀਰਿਕਂ ਪਾਰਿਭੋਗਿਕਂ ਉਦ੍ਦਿਸ੍ਸਕ’’ਨ੍ਤਿ. ‘‘ਸਕ੍ਕਾ ਪਨ, ਭਨ੍ਤੇ, ਤੁਮ੍ਹੇਸੁ ਧਰਨ੍ਤੇਸੁਯੇਵ ਚੇਤਿਯਂ ਕਾਤੁ’’ਨ੍ਤਿ. ‘‘ਆਨਨ੍ਦ, ਸਾਰੀਰਿਕਂ ਨ ਸਕ੍ਕਾ ਕਾਤੁਂ. ਤਞ੍ਹਿ ਬੁਦ੍ਧਾਨਂ ਪਰਿਨਿਬ੍ਬਾਨਕਾਲੇ ਹੋਤਿ, ਉਦ੍ਦਿਸ੍ਸਕਂ ਅਵਤ੍ਥੁਕਂ ਮਮਾਯਨਮਤ੍ਤਮੇਵ ਹੋਤਿ, ਬੁਦ੍ਧੇਹਿ ਪਰਿਭੁਤ੍ਤੋ ਮਹਾਬੋਧਿਰੁਕ੍ਖੋ ਬੁਦ੍ਧੇਸੁ ਧਰਨ੍ਤੇਸੁਪਿ ਚੇਤਿਯਮੇਵਾ’’ਤਿ. ‘‘ਭਨ੍ਤੇ, ਤੁਮ੍ਹੇਸੁ ਪਕ੍ਕਨ੍ਤੇਸੁ ਜੇਤਵਨਵਿਹਾਰੋ ਅਪ੍ਪਟਿਸਰਣੋ ਹੋਤਿ, ਮਹਾਜਨੋ ਪੂਜਨੀਯਟ੍ਠਾਨਂ ਨ ਲਭਤਿ, ਮਹਾਬੋਧਿਤੋ ਬੀਜਂ ਆਹਰਿਤ੍ਵਾ ਜੇਤਵਨਦ੍ਵਾਰੇ ਰੋਪੇਸ੍ਸਾਮਿ, ਭਨ੍ਤੇ’’ਤਿ. ‘‘ਸਾਧੁ, ਆਨਨ੍ਦ, ਰੋਪੇਹਿ, ਏਵਂ ਸਨ੍ਤੇ ਜੇਤਵਨੇ ਮਮ ਨਿਬਦ੍ਧਵਾਸੋ ਵਿਯ ਭਵਿਸ੍ਸਤੀ’’ਤਿ.

ਥੇਰੋ ਕੋਸਲਨਰਿਨ੍ਦਸ੍ਸ ਅਨਾਥਪਿਣ੍ਡਿਕਸ੍ਸ ਵਿਸਾਖਾਦੀਨਞ੍ਚ ਆਰੋਚੇਤ੍ਵਾ ਜੇਤਵਨਦ੍ਵਾਰੇ ਬੋਧਿਰੋਪਨਟ੍ਠਾਨੇ ਆਵਾਟਂ ਖਣਾਪੇਤ੍ਵਾ ਮਹਾਮੋਗ੍ਗਲ੍ਲਾਨਤ੍ਥੇਰਂ ਆਹ – ‘‘ਭਨ੍ਤੇ, ਅਹਂ ਜੇਤਵਨਦ੍ਵਾਰੇ ਬੋਧਿਂ ਰੋਪੇਸ੍ਸਾਮਿ, ਮਹਾਬੋਧਿਤੋ ਮੇ ਬੋਧਿਪਕ੍ਕਂ ਆਹਰਥਾ’’ਤਿ. ਥੇਰੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਆਕਾਸੇਨ ਬੋਧਿਮਣ੍ਡਂ ਗਨ੍ਤ੍ਵਾ ਵਣ੍ਟਾ ਪਰਿਗਲਨ੍ਤਂ ਪਕ੍ਕਂ ਭੂਮਿਂ ਅਸਮ੍ਪਤ੍ਤਮੇਵ ਚੀਵਰੇਨ ਸਮ੍ਪਟਿਚ੍ਛਿਤ੍ਵਾ ਗਹੇਤ੍ਵਾ ਆਨਨ੍ਦਤ੍ਥੇਰਸ੍ਸ ਅਦਾਸਿ. ਆਨਨ੍ਦਤ੍ਥੇਰੋ ‘‘ਅਜ੍ਜ ਬੋਧਿਂ ਰੋਪੇਸ੍ਸਾਮੀ’’ਤਿ ਕੋਸਲਰਾਜਾਦੀਨਂ ਆਰੋਚੇਸਿ. ਰਾਜਾ ਸਾਯਨ੍ਹਸਮਯੇ ਮਹਨ੍ਤੇਨ ਪਰਿਵਾਰੇਨ ਸਬ੍ਬੂਪਕਰਣਾਨਿ ਗਾਹਾਪੇਤ੍ਵਾ ਆਗਮਿ, ਤਥਾ ਅਨਾਥਪਿਣ੍ਡਿਕੋ ਵਿਸਾਖਾ ਚ ਅਞ੍ਞੋ ਚ ਸਦ੍ਧੋ ਜਨੋ. ਥੇਰੋ ਮਹਾਬੋਧਿਰੋਪਨਟ੍ਠਾਨੇ ਮਹਨ੍ਤਂ ਸੁਵਣ੍ਣਕਟਾਹਂ ਠਪੇਤ੍ਵਾ ਹੇਟ੍ਠਾ ਛਿਦ੍ਦਂ ਕਾਰੇਤ੍ਵਾ ਗਨ੍ਧਕਲਲਸ੍ਸ ਪੂਰੇਤ੍ਵਾ ‘‘ਇਦਂ ਬੋਧਿਪਕ੍ਕਂ ਰੋਪੇਹਿ, ਮਹਾਰਾਜਾ’’ਤਿ ਰਞ੍ਞੋ ਅਦਾਸਿ. ਸੋ ਚਿਨ੍ਤੇਸਿ ‘‘ਰਜ੍ਜਂ ਨਾਮ ਨ ਸਬ੍ਬਕਾਲਂ ਅਮ੍ਹਾਕਂ ਹਤ੍ਥੇ ਤਿਟ੍ਠਤਿ, ਇਦਂ ਮਯਾ ਅਨਾਥਪਿਣ੍ਡਿਕੇਨ ਰੋਪਾਪੇਤੁਂ ਵਟ੍ਟਤੀ’’ਤਿ. ਸੋ ਤਂ ਬੋਧਿਪਕ੍ਕਂ ਮਹਾਸੇਟ੍ਠਿਸ੍ਸ ਹਤ੍ਥੇ ਠਪੇਸਿ. ਅਨਾਥਪਿਣ੍ਡਿਕੋ ਗਨ੍ਧਕਲਲਂ ਵਿਯੂਹਿਤ੍ਵਾ ਤਤ੍ਥ ਪਾਤੇਸਿ. ਤਸ੍ਮਿਂ ਤਸ੍ਸ ਹਤ੍ਥਤੋ ਮੁਤ੍ਤਮਤ੍ਤੇਯੇਵ ਸਬ੍ਬੇਸਂ ਪਸ੍ਸਨ੍ਤਾਨਞ੍ਞੇਵ ਨਙ੍ਗਲਸੀਸਪ੍ਪਮਾਣੋ ਬੋਧਿਖਨ੍ਧੋ ਪਣ੍ਣਾਸਹਤ੍ਥੁਬ੍ਬੇਧੋ ਉਟ੍ਠਹਿ, ਚਤੂਸੁ ਦਿਸਾਸੁ ਉਦ੍ਧਞ੍ਚਾਤਿ ਪਞ੍ਚ ਮਹਾਸਾਖਾ ਪਣ੍ਣਾਸਹਤ੍ਥਾਵ ਨਿਕ੍ਖਮਿਂਸੁ. ਇਤਿ ਸੋ ਤਙ੍ਖਣਞ੍ਞੇਵ ਵਨਪ੍ਪਤਿਜੇਟ੍ਠਕੋ ਹੁਤ੍ਵਾ ਅਟ੍ਠਾਸਿ. ਰਾਜਾ ਅਟ੍ਠਾਰਸਮਤ੍ਤੇ ਸੁਵਣ੍ਣਰਜਤਘਟੇ ਗਨ੍ਧੋਦਕੇਨ ਪੂਰੇਤ੍ਵਾ ਨੀਲੁਪ੍ਪਲਹਤ੍ਥਕਾਦਿਪਟਿਮਣ੍ਡਿਤੇ ਮਹਾਬੋਧਿਂ ਪਰਿਕ੍ਖਿਪਿਤ੍ਵਾ ਪੁਣ੍ਣਘਟੇ ਪਟਿਪਾਟਿਯਾ ਠਪੇਸਿ, ਸਤ੍ਤਰਤਨਮਯਂ ਵੇਦਿਕਂ ਕਾਰੇਸਿ, ਸੁਵਣ੍ਣਮਿਸ੍ਸਕਂ ਵਾਲੁਕਂ ਓਕਿਰਿ, ਪਾਕਾਰਪਰਿਕ੍ਖੇਪਂ ਕਾਰੇਸਿ, ਸਤ੍ਤਰਤਨਮਯਂ ਦ੍ਵਾਰਕੋਟ੍ਠਕਂ ਕਾਰੇਸਿ, ਸਕ੍ਕਾਰੋ ਮਹਾ ਅਹੋਸਿ.

ਥੇਰੋ ਤਥਾਗਤਂ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਤੁਮ੍ਹੇਹਿ ਮਹਾਬੋਧਿਮੂਲੇ ਸਮਾਪਨ੍ਨਸਮਾਪਤ੍ਤਿਂ ਮਯਾ ਰੋਪਿਤਬੋਧਿਮੂਲੇ ਨਿਸੀਦਿਤ੍ਵਾ ਮਹਾਜਨਸ੍ਸ ਹਿਤਤ੍ਥਾਯ ਸਮਾਪਜ੍ਜਥਾ’’ਤਿ ਆਹ. ‘‘ਆਨਨ੍ਦ, ਕਿਂ ਕਥੇਸਿ, ਮਯਿ ਮਹਾਬੋਧਿਮੂਲੇ ਸਮਾਪਨ੍ਨਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸਿਨ੍ਨੇ ਅਞ੍ਞੋ ਪਦੇਸੋ ਧਾਰੇਤੁਂ ਨ ਸਕ੍ਕੋਤੀ’’ਤਿ. ‘‘ਭਨ੍ਤੇ, ਮਹਾਜਨਸ੍ਸ ਹਿਤਤ੍ਥਾਯ ਇਮਸ੍ਸ ਭੂਮਿਪ੍ਪਦੇਸਸ੍ਸ ਧੁਵਨਿਯਾਮੇਨ ਸਮਾਪਤ੍ਤਿਸੁਖੇਨ ਤਂ ਬੋਧਿਮੂਲਂ ਪਰਿਭੁਞ੍ਜਥਾ’’ਤਿ. ਸਤ੍ਥਾ ਏਕਰਤ੍ਤਿਂ ਸਮਾਪਤ੍ਤਿਸੁਖੇਨ ਪਰਿਭੁਞ੍ਜਿ. ਥੇਰੋ ਕੋਸਲਰਾਜਾਦੀਨਂ ਕਥੇਤ੍ਵਾ ਬੋਧਿਮਹਂ ਨਾਮ ਕਾਰੇਸਿ. ਸੋਪਿ ਖੋ ਬੋਧਿਰੁਕ੍ਖੋ ਆਨਨ੍ਦਤ੍ਥੇਰੇਨ ਰੋਪਿਤਤ੍ਤਾ ਆਨਨ੍ਦਬੋਧਿਯੇਵਾਤਿ ਪਞ੍ਞਾਯਿਤ੍ਥ. ਤਦਾ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ ਆਯਸ੍ਮਾ ਆਨਨ੍ਦੋ ਧਰਨ੍ਤੇਯੇਵ ਤਥਾਗਤੇ ਬੋਧਿਂ ਰੋਪੇਤ੍ਵਾ ਮਹਾਪੂਜਂ ਕਾਰੇਸਿ, ਅਹੋ ਮਹਾਗੁਣੋ ਥੇਰੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਆਨਨ੍ਦੋ ਸਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਮਨੁਸ੍ਸੇ ਗਹੇਤ੍ਵਾ ਬਹੁਗਨ੍ਧਮਾਲਾਦੀਨਿ ਆਹਰਿਤ੍ਵਾ ਮਹਾਬੋਧਿਮਣ੍ਡੇ ਬੋਧਿਮਹਂ ਕਾਰੇਸਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕਲਿਙ੍ਗਰਟ੍ਠੇ ਦਨ੍ਤਪੁਰਨਗਰੇ ਕਾਲਿਙ੍ਗੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਮਹਾਕਾਲਿਙ੍ਗੋ, ਚੂਲ਼ਕਾਲਿਙ੍ਗੋਤਿ ਦ੍ਵੇ ਪੁਤ੍ਤਾ ਅਹੇਸੁਂ. ਨੇਮਿਤ੍ਤਕਾ ‘‘ਜੇਟ੍ਠਪੁਤ੍ਤੋ ਪਿਤੁ ਅਚ੍ਚਯੇਨ ਰਜ੍ਜਂ ਕਾਰੇਸ੍ਸਤਿ, ਕਨਿਟ੍ਠੋ ਪਨ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਭਿਕ੍ਖਾਯ ਚਰਿਸ੍ਸਤਿ, ਪੁਤ੍ਤੋ ਪਨਸ੍ਸ ਚਕ੍ਕਵਤ੍ਤੀ ਭਵਿਸ੍ਸਤੀ’’ਤਿ ਬ੍ਯਾਕਰਿਂਸੁ. ਅਪਰਭਾਗੇ ਜੇਟ੍ਠਪੁਤ੍ਤੋ ਪਿਤੁ ਅਚ੍ਚਯੇਨ ਰਾਜਾ ਅਹੋਸਿ, ਕਨਿਟ੍ਠੋ ਪਨ ਉਪਰਾਜਾ. ਸੋ ‘‘ਪੁਤ੍ਤੋ ਕਿਰ ਮੇ ਚਕ੍ਕਵਤ੍ਤੀ ਭਵਿਸ੍ਸਤੀ’’ਤਿ ਪੁਤ੍ਤਂ ਨਿਸ੍ਸਾਯ ਮਾਨਂ ਅਕਾਸਿ. ਰਾਜਾ ਅਸਹਨ੍ਤੋ ‘‘ਚੂਲ਼ਕਾਲਿਙ੍ਗਂ ਗਣ੍ਹਾ’’ਤਿ ਏਕਂ ਅਤ੍ਥਚਰਕਂ ਆਣਾਪੇਸਿ. ਸੋ ਗਨ੍ਤ੍ਵਾ ‘‘ਕੁਮਾਰ, ਰਾਜਾ ਤਂ ਗਣ੍ਹਾਪੇਤੁਕਾਮੋ, ਤਵ ਜੀਵਿਤਂ ਰਕ੍ਖਾਹੀ’’ਤਿ ਆਹ. ਸੋ ਅਤ੍ਤਨੋ ਲਞ੍ਜਨਮੁਦ੍ਦਿਕਞ੍ਚ ਸੁਖੁਮਕਮ੍ਬਲਞ੍ਚ ਖਗ੍ਗਞ੍ਚਾਤਿ ਇਮਾਨਿ ਤੀਣਿ ਅਤ੍ਥਚਰਕਾਮਚ੍ਚਸ੍ਸ ਦਸ੍ਸੇਤ੍ਵਾ ‘‘ਇਮਾਯ ਸਞ੍ਞਾਯ ਮਮ ਪੁਤ੍ਤਸ੍ਸ ਰਜ੍ਜਂ ਦਦੇਯ੍ਯਾਥਾ’’ਤਿ ਵਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਰਮਣੀਯੇ ਭੂਮਿਭਾਗੇ ਅਸ੍ਸਮਂ ਕਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਨਦੀਤੀਰੇ ਵਾਸਂ ਕਪ੍ਪੇਸਿ.

ਮਦ੍ਦਰਟ੍ਠੇਪਿ ਸਾਗਲਨਗਰੇ ਮਦ੍ਦਰਞ੍ਞੋ ਅਗ੍ਗਮਹੇਸੀ ਧੀਤਰਂ ਵਿਜਾਯਿ. ਤਂ ਨੇਮਿਤ੍ਤਕਾ ‘‘ਅਯਂ ਭਿਕ੍ਖਂ ਚਰਿਤ੍ਵਾ ਜੀਵਿਕਂ ਕਪ੍ਪੇਸ੍ਸਤਿ, ਪੁਤ੍ਤੋ ਪਨਸ੍ਸਾ ਚਕ੍ਕਵਤ੍ਤੀ ਭਵਿਸ੍ਸਤੀ’’ਤਿ ਬ੍ਯਾਕਰਿਂਸੁ. ਸਕਲਜਮ੍ਬੁਦੀਪੇ ਰਾਜਾਨੋ ਤਂ ਪਵਤ੍ਤਿਂ ਸੁਤ੍ਵਾ ਏਕਪ੍ਪਹਾਰੇਨੇਵ ਆਗਨ੍ਤ੍ਵਾ ਸਾਗਲਨਗਰਂ ਰੁਨ੍ਧਿਂਸੁ. ਮਦ੍ਦਰਾਜਾ ਚਿਨ੍ਤੇਸਿ ‘‘ਸਚਾਹਂ ਇਮਂ ਏਕਸ੍ਸ ਦਸ੍ਸਾਮਿ, ਸੇਸਰਾਜਾਨੋ ਕੁਜ੍ਝਿਸ੍ਸਨ੍ਤਿ, ਮਮ ਧੀਤਰਂ ਰਕ੍ਖਿਸ੍ਸਾਮੀ’’ਤਿ ਧੀਤਰਞ੍ਚ ਭਰਿਯਞ੍ਚ ਗਹੇਤ੍ਵਾ ਅਞ੍ਞਾਤਕਵੇਸੇਨ ਪਲਾਯਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਚੂਲ਼ਕਾਲਿਙ੍ਗਕੁਮਾਰਸ੍ਸ ਅਸ੍ਸਮਪਦਤੋ ਉਪਰਿਭਾਗੇ ਅਸ੍ਸਮਂ ਕਤ੍ਵਾ ਪਬ੍ਬਜਿਤ੍ਵਾ ਉਞ੍ਛਾਚਰਿਯਾਯ ਜੀਵਿਕਂ ਕਪ੍ਪੇਨ੍ਤੋ ਤਤ੍ਥ ਪਟਿਵਸਤਿ. ਮਾਤਾਪਿਤਰੋ ‘‘ਧੀਤਰਂ ਰਕ੍ਖਿਸ੍ਸਾਮਾ’’ਤਿ ਤਂ ਅਸ੍ਸਮਪਦੇ ਕਤ੍ਵਾ ਫਲਾਫਲਤ੍ਥਾਯ ਗਚ੍ਛਨ੍ਤਿ. ਸਾ ਤੇਸਂ ਗਤਕਾਲੇ ਨਾਨਾਪੁਪ੍ਫਾਨਿ ਗਹੇਤ੍ਵਾ ਪੁਪ੍ਫਚੁਮ੍ਬਟਕਂ ਕਤ੍ਵਾ ਗਙ੍ਗਾਤੀਰੇ ਠਪਿਤਸੋਪਾਨਪਨ੍ਤਿ ਵਿਯ ਜਾਤੋ ਏਕੋ ਸੁਪੁਪ੍ਫਿਤੋ ਅਮ੍ਬਰੁਕ੍ਖੋ ਅਤ੍ਥਿ, ਤਂ ਅਭਿਰੁਹਿਤ੍ਵਾ ਕੀਲ਼ਿਤ੍ਵਾ ਪੁਪ੍ਫਚੁਮ੍ਬਟਕਂ ਉਦਕੇ ਖਿਪਿ. ਤਂ ਏਕਦਿਵਸਂ ਗਙ੍ਗਾਯਂ ਨ੍ਹਾਯਨ੍ਤਸ੍ਸ ਚੂਲ਼ਕਾਲਿਙ੍ਗਕੁਮਾਰਸ੍ਸ ਸੀਸੇ ਲਗ੍ਗਿ. ਸੋ ਤਂ ਓਲੋਕੇਤ੍ਵਾ ‘‘ਇਦਂ ਏਕਾਯ ਇਤ੍ਥਿਯਾ ਕਤਂ, ਨੋ ਚ ਖੋ ਮਹਲ੍ਲਿਕਾਯ, ਤਰੁਣਕੁਮਾਰਿਕਾਯ ਕਤਕਮ੍ਮਂ, ਵੀਮਂਸਿਸ੍ਸਾਮਿ ਤਾਵ ਨ’’ਨ੍ਤਿ ਕਿਲੇਸਵਸੇਨ ਉਪਰਿਗਙ੍ਗਂ ਗਨ੍ਤ੍ਵਾ ਤਸ੍ਸਾ ਅਮ੍ਬਰੁਕ੍ਖੇ ਨਿਸੀਦਿਤ੍ਵਾ ਮਧੁਰੇਨ ਸਰੇਨ ਗਾਯਨ੍ਤਿਯਾ ਸਦ੍ਦਂ ਸੁਤ੍ਵਾ ਰੁਕ੍ਖਮੂਲਂ ਗਨ੍ਤ੍ਵਾ ਤਂ ਦਿਸ੍ਵਾ ‘‘ਭਦ੍ਦੇ, ਕਾ ਨਾਮ ਤ੍ਵ’’ਨ੍ਤਿ ਆਹ. ‘‘ਮਨੁਸ੍ਸਿਤ੍ਥੀਹਮਸ੍ਮਿ ਸਾਮੀ’’ਤਿ. ‘‘ਤੇਨ ਹਿ ਓਤਰਾਹੀ’’ਤਿ. ‘‘ਨ ਸਕ੍ਕਾ ਸਾਮਿ, ਅਹਂ ਖਤ੍ਤਿਯਾ’’ਤਿ. ‘‘ਭਦ੍ਦੇ, ਅਹਮ੍ਪਿ ਖਤ੍ਤਿਯੋਯੇਵ, ਓਤਰਾਹੀ’’ਤਿ. ਸਾਮਿ, ਨ ਵਚਨਮਤ੍ਤੇਨੇਵ ਖਤ੍ਤਿਯੋ ਹੋਤਿ, ਯਦਿਸਿ ਖਤ੍ਤਿਯੋ, ਖਤ੍ਤਿਯਮਾਯਂ ਕਥੇਹੀ’’ਤਿ. ਤੇ ਉਭੋਪਿ ਅਞ੍ਞਮਞ੍ਞਂ ਖਤ੍ਤਿਯਮਾਯਂ ਕਥਯਿਂਸੁ. ਰਾਜਧੀਤਾ ਓਤਰਿ.

ਤੇ ਅਞ੍ਞਮਞ੍ਞਂ ਅਜ੍ਝਾਚਾਰਂ ਚਰਿਂਸੁ. ਸਾ ਮਾਤਾਪਿਤੂਸੁ ਆਗਤੇਸੁ ਤਸ੍ਸ ਕਾਲਿਙ੍ਗਰਾਜਪੁਤ੍ਤਭਾਵਞ੍ਚੇਵ ਅਰਞ੍ਞਂ ਪਵਿਟ੍ਠਕਾਰਣਞ੍ਚ ਵਿਤ੍ਥਾਰੇਨ ਤੇਸਂ ਕਥੇਸਿ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਂ ਤਸ੍ਸ ਅਦਂਸੁ. ਤੇਸਂ ਪਿਯਸਂਵਾਸੇਨ ਵਸਨ੍ਤਾਨਂ ਰਾਜਧੀਤਾ ਗਬ੍ਭਂ ਲਭਿਤ੍ਵਾ ਦਸਮਾਸਚ੍ਚਯੇਨ ਧਞ੍ਞਪੁਞ੍ਞਲਕ੍ਖਣਸਮ੍ਪਨ੍ਨਂ ਪੁਤ੍ਤਂ ਵਿਜਾਯਿ, ‘‘ਕਾਲਿਙ੍ਗੋ’’ਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਪਿਤੁ ਚੇਵ ਅਯ੍ਯਕਸ੍ਸ ਚ ਸਨ੍ਤਿਕੇ ਸਬ੍ਬਸਿਪ੍ਪਾਨਂ ਨਿਪ੍ਫਤ੍ਤਿਂ ਪਾਪੁਣਿ. ਅਥਸ੍ਸ ਪਿਤਾ ਨਕ੍ਖਤ੍ਤਯੋਗਵਸੇਨ ਭਾਤੁ ਮਤਭਾਵਂ ਞਤ੍ਵਾ ‘‘ਤਾਤ, ਮਾ ਤ੍ਵਂ ਅਰਞ੍ਞੇ ਵਸ, ਪੇਤ੍ਤੇਯ੍ਯੋ ਤੇ ਮਹਾਕਾਲਿਙ੍ਗੋ ਕਾਲਕਤੋ, ਤ੍ਵਂ ਦਨ੍ਤਪੁਰਨਗਰਂ ਗਨ੍ਤ੍ਵਾ ਕੁਲਸਨ੍ਤਕਂ ਸਕਲਰਜ੍ਜਂ ਗਣ੍ਹਾਹੀ’’ਤਿ ਵਤ੍ਵਾ ਅਤ੍ਤਨਾ ਆਨੀਤਂ ਮੁਦ੍ਦਿਕਞ੍ਚ ਕਮ੍ਬਲਞ੍ਚ ਖਗ੍ਗਞ੍ਚ ਦਤ੍ਵਾ ‘‘ਤਾਤ, ਦਨ੍ਤਪੁਰਨਗਰੇ ਅਸੁਕਵੀਥਿਯਂ ਅਮ੍ਹਾਕਂ ਅਤ੍ਥਚਰਕੋ ਅਮਚ੍ਚੋ ਅਤ੍ਥਿ, ਤਸ੍ਸ ਗੇਹੇ ਸਯਨਮਜ੍ਝੇ ਓਤਰਿਤ੍ਵਾ ਇਮਾਨਿ ਤੀਣਿ ਰਤਨਾਨਿ ਤਸ੍ਸ ਦਸ੍ਸੇਤ੍ਵਾ ਮਮ ਪੁਤ੍ਤਭਾਵਂ ਆਚਿਕ੍ਖ, ਸੋ ਤਂ ਰਜ੍ਜੇ ਪਤਿਟ੍ਠਾਪੇਸ੍ਸਤੀ’’ਤਿ ਉਯ੍ਯੋਜੇਸਿ. ਸੋ ਮਾਤਾਪਿਤਰੋ ਚ ਅਯ੍ਯਕਾਯ੍ਯਿਕੇ ਚ ਵਨ੍ਦਿਤ੍ਵਾ ਪੁਞ੍ਞਮਹਿਦ੍ਧਿਯਾ ਆਕਾਸੇਨ ਗਨ੍ਤ੍ਵਾ ਅਮਚ੍ਚਸ੍ਸ ਸਯਨਪਿਟ੍ਠੇਯੇਵ ਓਤਰਿਤ੍ਵਾ ‘‘ਕੋਸਿ ਤ੍ਵ’’ਨ੍ਤਿ ਪੁਟ੍ਠੋ ‘‘ਚੂਲ਼ਕਾਲਿਙ੍ਗਸ੍ਸ ਪੁਤ੍ਤੋਮ੍ਹੀ’’ਤਿ ਆਚਿਕ੍ਖਿਤ੍ਵਾ ਤਾਨਿ ਰਤਨਾਨਿ ਦਸ੍ਸੇਸਿ. ਅਮਚ੍ਚੋ ਰਾਜਪਰਿਸਾਯ ਆਰੋਚੇਸਿ. ਅਮਚ੍ਚਾ ਨਗਰਂ ਅਲਙ੍ਕਾਰਾਪੇਤ੍ਵਾ ਤਸ੍ਸ ਸੇਤਚ੍ਛਤ੍ਤਂ ਉਸ੍ਸਾਪਯਿਂਸੁ.

ਅਥਸ੍ਸ ਕਾਲਿਙ੍ਗਭਾਰਦ੍ਵਾਜੋ ਨਾਮ ਪੁਰੋਹਿਤੋ ਤਸ੍ਸ ਦਸ ਚਕ੍ਕਵਤ੍ਤਿਵਤ੍ਤਾਨਿ ਆਚਿਕ੍ਖਿ. ਸੋ ਤਂ ਵਤ੍ਤਂ ਪੂਰੇਸਿ. ਅਥਸ੍ਸ ਪਨ੍ਨਰਸਉਪੋਸਥਦਿਵਸੇ ਚਕ੍ਕਦਹਤੋ ਚਕ੍ਕਰਤਨਂ, ਉਪੋਸਥਕੁਲਤੋ ਹਤ੍ਥਿਰਤਨਂ, ਵਲਾਹਕਕੁਲਤੋ ਅਸ੍ਸਰਤਨਂ, ਵੇਪੁਲ੍ਲਪਬ੍ਬਤਤੋ ਮਣਿਰਤਨਂ ਆਗਮਿ, ਇਤ੍ਥਿਰਤਨਗਹਪਤਿਰਤਨਪਰਿਣਾਯਕਰਤਨਾਨਿ ਪਾਤੁਭਵਨ੍ਤਿ. ਸੋ ਸਕਲਚਕ੍ਕਵਾਲ਼ਗਬ੍ਭੇ ਰਜ੍ਜਂ ਗਣ੍ਹਿਤ੍ਵਾ ਏਕਦਿਵਸਞ੍ਚ ਛਤ੍ਤਿਂਸਯੋਜਨਾਯ ਪਰਿਸਾਯ ਪਰਿਵੁਤੋ ਸਬ੍ਬਸੇਤਂ ਕੇਲਾਸਕੂਟਪਟਿਭਾਗਂ ਹਤ੍ਥਿਂ ਆਰੁਯ੍ਹ ਮਹਨ੍ਤੇਨ ਸਿਰਿਵਿਲਾਸੇਨ ਮਾਤਾਪਿਤੂਨਂ ਸਨ੍ਤਿਕਂ ਪਾਯਾਸਿ. ਅਥਸ੍ਸ ਸਬ੍ਬਬੁਦ੍ਧਾਨਂ ਜਯਪਲ੍ਲਙ੍ਕਸ੍ਸ ਪਥਵੀਨਾਭਿਭੂਤਸ੍ਸ ਮਹਾਬੋਧਿਮਣ੍ਡਸ੍ਸ ਉਪਰਿਭਾਗੇ ਨਾਗੋ ਗਨ੍ਤੁਂ ਨਾਸਕ੍ਖਿ. ਰਾਜਾ ਪੁਨਪ੍ਪੁਨਂ ਚੋਦੇਸਿ, ਸੋ ਨਾਸਕ੍ਖਿਯੇਵ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਪਠਮਂ ਗਾਥਮਾਹ –

੬੭.

‘‘ਰਾਜਾ ਕਾਲਿਙ੍ਗੋ ਚਕ੍ਕਵਤ੍ਤਿ, ਧਮ੍ਮੇਨ ਪਥਵਿਮਨੁਸਾਸਂ;

ਅਗਮਾ ਬੋਧਿਸਮੀਪਂ, ਨਾਗੇਨ ਮਹਾਨੁਭਾਵੇਨਾ’’ਤਿ.

ਅਥ ਰਞ੍ਞੋ ਪੁਰੋਹਿਤੋ ਰਞ੍ਞਾ ਸਦ੍ਧਿਂ ਗਚ੍ਛਨ੍ਤੋ ‘‘ਆਕਾਸੇ ਆਵਰਣਂ ਨਾਮ ਨਤ੍ਥਿ, ਕਿਂ ਨੁ ਖੋ ਰਾਜਾ ਹਤ੍ਥਿਂ ਪੇਸੇਤੁਂ ਨ ਸਕ੍ਕੋਤਿ, ਵੀਮਂਸਿਸ੍ਸਾਮੀ’’ਤਿ ਆਕਾਸਤੋ ਓਰੁਯ੍ਹ ਸਬ੍ਬਬੁਦ੍ਧਾਨਂਯੇਵ ਜਯਪਲ੍ਲਙ੍ਕਂ ਪਥਵੀਨਾਭਿਮਣ੍ਡਲਭੂਤਂ ਭੂਮਿਭਾਗਂ ਪਸ੍ਸਿ. ਤਦਾ ਕਿਰ ਤਤ੍ਥ ਅਟ੍ਠਰਾਜਕਰੀਸਮਤ੍ਤੇ ਠਾਨੇ ਕੇਸਮਸ੍ਸੁਮਤ੍ਤਮ੍ਪਿ ਤਿਣਂ ਨਾਮ ਨਤ੍ਥਿ, ਰਜਤਪਟ੍ਟਵਣ੍ਣਵਾਲੁਕਾ ਵਿਪ੍ਪਕਿਣ੍ਣਾ ਹੋਨ੍ਤਿ, ਸਮਨ੍ਤਾ ਤਿਣਲਤਾਵਨਪ੍ਪਤਿਯੋ ਬੋਧਿਮਣ੍ਡਂ ਪਦਕ੍ਖਿਣਂ ਕਤ੍ਵਾ ਆਵਟ੍ਟੇਤ੍ਵਾ ਬੋਧਿਮਣ੍ਡਾਭਿਮੁਖਾਵ ਅਟ੍ਠਂਸੁ. ਬ੍ਰਾਹ੍ਮਣੋ ਤਂ ਭੂਮਿਭਾਗਂ ਓਲੋਕੇਤ੍ਵਾ ‘‘ਇਦਞ੍ਹਿ ਸਬ੍ਬਬੁਦ੍ਧਾਨਂ ਸਬ੍ਬਕਿਲੇਸਵਿਦ੍ਧਂਸਨਟ੍ਠਾਨਂ, ਇਮਸ੍ਸ ਉਪਰਿਭਾਗੇ ਸਕ੍ਕਾਦੀਹਿਪਿ ਨ ਸਕ੍ਕਾ ਗਨ੍ਤੁ’’ਨ੍ਤਿ ਚਿਨ੍ਤੇਤ੍ਵਾ ਕਾਲਿਙ੍ਗਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਬੋਧਿਮਣ੍ਡਸ੍ਸ ਵਣ੍ਣਂ ਕਥੇਤ੍ਵਾ ਰਾਜਾਨਂ ‘‘ਓਤਰਾ’’ਤਿ ਆਹ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਇਮਾ ਗਾਥਾ ਆਹ –

੬੮.

‘‘ਕਾਲਿਙ੍ਗੋ ਭਾਰਦ੍ਵਾਜੋ ਚ, ਰਾਜਾਨਂ ਕਾਲਿਙ੍ਗਂ ਸਮਣਕੋਲਞ੍ਞਂ;

ਚਕ੍ਕਂ ਵਤ੍ਤਯਤੋ ਪਰਿਗ੍ਗਹੇਤ੍ਵਾ, ਪਞ੍ਜਲੀ ਇਦਮਵੋਚ.

੬੯.

‘‘ਪਚ੍ਚੋਰੋਹ ਮਹਾਰਾਜ, ਭੂਮਿਭਾਗੋ ਯਥਾ ਸਮਣੁਗ੍ਗਤੋ;

ਇਧ ਅਨਧਿਵਰਾ ਬੁਦ੍ਧਾ, ਅਭਿਸਮ੍ਬੁਦ੍ਧਾ ਵਿਰੋਚਨ੍ਤਿ.

੭੦.

‘‘ਪਦਕ੍ਖਿਣਤੋ ਆਵਟ੍ਟਾ, ਤਿਣਲਤਾ ਅਸ੍ਮਿਂ ਭੂਮਿਭਾਗਸ੍ਮਿਂ;

ਪਥਵਿਯਾ ਨਾਭਿਯਂ ਮਣ੍ਡੋ, ਇਤਿ ਨੋ ਸੁਤਂ ਮਨ੍ਤੇ ਮਹਾਰਾਜ.

੭੧.

‘‘ਸਾਗਰਪਰਿਯਨ੍ਤਾਯ, ਮੇਦਿਨਿਯਾ ਸਬ੍ਬਭੂਤਧਰਣਿਯਾ;

ਪਥਵਿਯਾ ਅਯਂ ਮਣ੍ਡੋ, ਓਰੋਹਿਤ੍ਵਾ ਨਮੋ ਕਰੋਹਿ.

੭੨.

‘‘ਯੇ ਤੇ ਭਵਨ੍ਤਿ ਨਾਗਾ ਚ, ਅਭਿਜਾਤਾ ਚ ਕੁਞ੍ਜਰਾ;

ਏਤ੍ਤਾਵਤਾ ਪਦੇਸਂ ਤੇ, ਨਾਗਾ ਨੇਵ ਮੁਪਯਨ੍ਤਿ.

੭੩.

‘‘ਅਭਿਜਾਤੋ ਨਾਗੋ ਕਾਮਂ, ਪੇਸੇਹਿ ਕੁਞ੍ਜਰਂ ਦਨ੍ਤਿਂ;

ਏਤ੍ਤਾਵਤਾ ਪਦੇਸੋ, ਸਕ੍ਕਾ ਨਾਗੇਨ ਮੁਪਗਨ੍ਤੁਂ.

੭੪.

‘‘ਤਂ ਸੁਤ੍ਵਾ ਰਾਜਾ ਕਾਲਿਙ੍ਗੋ, ਵੇਯ੍ਯਞ੍ਜਨਿਕਵਚੋ ਨਿਸਾਮੇਤ੍ਵਾ;

ਸਮ੍ਪੇਸੇਸਿ ਨਾਗਂ ਞਸ੍ਸਾਮ, ਮਯਂ ਯਥਿਮਸ੍ਸਿਦਂ ਵਚਨਂ.

੭੫.

‘‘ਸਮ੍ਪੇਸਿਤੋ ਚ ਰਞ੍ਞਾ, ਨਾਗੋ ਕੋਞ੍ਚੋਵ ਅਭਿਨਦਿਤ੍ਵਾਨ;

ਪਟਿਸਕ੍ਕਿਤ੍ਵਾ ਨਿਸੀਦਿ, ਗਰੁਂਵ ਭਾਰਂ ਅਸਹਮਾਨੋ’’ਤਿ.

ਤਤ੍ਥ ਸਮਣਕੋਲਞ੍ਞਨ੍ਤਿ ਤਾਪਸਾਨਂ ਪੁਤ੍ਤਂ. ਚਕ੍ਕਂ ਵਤ੍ਤਯਤੋਤਿ ਚਕ੍ਕਂ ਵਤ੍ਤਯਮਾਨਂ, ਚਕ੍ਕਵਤ੍ਤਿਨ੍ਤਿ ਅਤ੍ਥੋ. ਪਰਿਗ੍ਗਹੇਤ੍ਵਾਤਿ ਭੂਮਿਭਾਗਂ ਵੀਮਂਸਿਤ੍ਵਾ. ਸਮਣੁਗ੍ਗਤੋਤਿ ਸਬ੍ਬਬੁਦ੍ਧੇਹਿ ਵਣ੍ਣਿਤੋ. ਅਨਧਿਵਰਾਤਿ ਅਤੁਲ੍ਯਾ ਅਪ੍ਪਮੇਯ੍ਯਾ. ਵਿਰੋਚਨ੍ਤੀਤਿ ਵਿਹਤਸਬ੍ਬਕਿਲੇਸਨ੍ਧਕਾਰਾ ਤਰੁਣਸੂਰਿਯਾ ਵਿਯ ਇਧ ਨਿਸਿਨ੍ਨਾ ਵਿਰੋਚਨ੍ਤਿ. ਤਿਣਲਤਾਤਿ ਤਿਣਾਨਿ ਚ ਲਤਾਯੋ ਚ. ਮਣ੍ਡੋਤਿ ਚਤੁਨਹੁਤਾਧਿਕਦ੍ਵਿਯੋਜਨਸਤਸਹਸ੍ਸਬਹਲਾਯ ਪਥਵਿਯਾ ਮਣ੍ਡੋ ਸਾਰੋ ਨਾਭਿਭੂਤੋ ਅਚਲਟ੍ਠਾਨਂ, ਕਪ੍ਪੇ ਸਣ੍ਠਹਨ੍ਤੇ ਪਠਮਂ ਸਣ੍ਠਹਤਿ, ਵਿਨਸ੍ਸਨ੍ਤੇ ਪਚ੍ਛਾ ਵਿਨਸ੍ਸਤਿ. ਇਤਿ ਨੋ ਸੁਤਨ੍ਤਿ ਏਵਂ ਅਮ੍ਹੇਹਿ ਲਕ੍ਖਣਮਨ੍ਤਵਸੇਨ ਸੁਤਂ. ਓਰੋਹਿਤ੍ਵਾਤਿ ਆਕਾਸਤੋ ਓਤਰਿਤ੍ਵਾ ਇਮਸ੍ਸ ਸਬ੍ਬਬੁਦ੍ਧਾਨਂ ਕਿਲੇਸਵਿਦ੍ਧਂਸਨਟ੍ਠਾਨਸ੍ਸ ਨਮੋ ਕਰੋਹਿ, ਪੂਜਾਸਕ੍ਕਾਰਂ ਕਰੋਹਿ.

ਯੇ ਤੇਤਿ ਯੇ ਚਕ੍ਕਵਤ੍ਤਿਰਞ੍ਞੋ ਹਤ੍ਥਿਰਤਨਸਙ੍ਖਾਤਾ ਉਪੋਸਥਕੁਲੇ ਨਿਬ੍ਬਤ੍ਤਨਾਗਾ. ਏਤ੍ਤਾਵਤਾਤਿ ਸਬ੍ਬੇਪਿ ਤੇ ਏਤ੍ਤਕਂ ਪਦੇਸਂ ਨੇਵ ਉਪਯਨ੍ਤਿ, ਕੋਟ੍ਟਿਯਮਾਨਾਪਿ ਨ ਉਪਗਚ੍ਛਨ੍ਤਿਯੇਵ. ਅਭਿਜਾਤੋਤਿ ਗੋਚਰਿਯਾਦੀਨਿ ਅਟ੍ਠ ਹਤ੍ਥਿਕੁਲਾਨਿ ਅਭਿਭਵਿਤ੍ਵਾ ਅਤਿਕ੍ਕਮਿਤ੍ਵਾ ਉਪੋਸਥਕੁਲੇ ਜਾਤੋ. ਕੁਞ੍ਜਰਨ੍ਤਿ ਉਤ੍ਤਮਂ. ਏਤ੍ਤਾਵਤਾਤਿ ਏਤ੍ਤਕੋ ਪਦੇਸੋ ਸਕ੍ਕਾ ਏਤੇਨ ਨਾਗੇਨ ਉਪਗਨ੍ਤੁਂ, ਇਤੋ ਉਤ੍ਤਰਿ ਨ ਸਕ੍ਕਾ, ਅਭਿਕਙ੍ਖਨ੍ਤੋ ਵਜਿਰਙ੍ਕੁਸੇਨ ਸਞ੍ਞਂ ਦਤ੍ਵਾ ਪੇਸੇਹੀਤਿ. ਵੇਯ੍ਯਞ੍ਜਨਿਕਵਚੋ ਨਿਸਾਮੇਤ੍ਵਾਤਿ ਭਿਕ੍ਖਵੇ, ਸੋ ਰਾਜਾ ਤਸ੍ਸ ਲਕ੍ਖਣਪਾਠਕਸ੍ਸ ਵੇਯ੍ਯਞ੍ਜਨਿਕਸ੍ਸ ਕਾਲਿਙ੍ਗਭਾਰਦ੍ਵਾਜਸ੍ਸ ਵਚੋ ਨਿਸਾਮੇਤ੍ਵਾ ਉਪਧਾਰੇਤ੍ਵਾ ‘‘ਞਸ੍ਸਾਮ ਮਯਂ ਯਥਾ ਇਮਸ੍ਸ ਵਚਨਂ ਯਦਿ ਵਾ ਸਚ੍ਚਂ ਯਦਿ ਵਾ ਅਲਿਕ’’ਨ੍ਤਿ ਵੀਮਂਸਨ੍ਤੋ ਨਾਗਂ ਪੇਸੇਸੀਤਿ ਅਤ੍ਥੋ. ਕੋਞ੍ਚੋਵ ਅਭਿਨਦਿਤ੍ਵਾਨਾਤਿ ਭਿਕ੍ਖਵੇ, ਸੋ ਨਾਗੋ ਤੇਨ ਰਞ੍ਞਾ ਵਜਿਰਙ੍ਕੁਸੇਨ ਚੋਦੇਤ੍ਵਾ ਪੇਸਿਤੋ ਕੋਞ੍ਚਸਕੁਣੋ ਵਿਯ ਨਦਿਤ੍ਵਾ ਪਟਿਸਕ੍ਕਿਤ੍ਵਾ ਸੋਣ੍ਡਂ ਉਕ੍ਖਿਪਿਤ੍ਵਾ ਗੀਵਂ ਉਨ੍ਨਾਮੇਤ੍ਵਾ ਗਰੁਂ ਭਾਰਂ ਵਹਿਤੁਂ ਅਸਕ੍ਕੋਨ੍ਤੋ ਵਿਯ ਆਕਾਸੇਯੇਵ ਨਿਸੀਦਿ.

ਸੋ ਤੇਨ ਪੁਨਪ੍ਪੁਨਂ ਵਿਜ੍ਝਿਯਮਾਨੋ ਵੇਦਨਂ ਸਹਿਤੁਂ ਅਸਕ੍ਕੋਨ੍ਤੋ ਕਾਲਮਕਾਸਿ. ਰਾਜਾ ਪਨਸ੍ਸ ਮਤਭਾਵਂ ਅਜਾਨਨ੍ਤੋ ਪਿਟ੍ਠੇ ਨਿਸਿਨ੍ਨੋਵ ਅਹੋਸਿ. ਕਾਲਿਙ੍ਗਭਾਰਦ੍ਵਾਜੋ ‘‘ਮਹਾਰਾਜ, ਤਵ ਨਾਗੋ ਨਿਰੁਦ੍ਧੋ, ਅਞ੍ਞਂ ਹਤ੍ਥਿਂ ਸਙ੍ਕਮਾ’’ਤਿ ਆਹ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਦਸਮਂ ਗਾਥਮਾਹ –

੭੬.

‘‘ਕਾਲਿਙ੍ਗਭਾਰਦ੍ਵਾਜੋ, ਨਾਗਂ ਖੀਣਾਯੁਕਂ ਵਿਦਿਤ੍ਵਾਨ;

ਰਾਜਾਨਂ ਕਾਲਿਙ੍ਗਂ, ਤਰਮਾਨੋ ਅਜ੍ਝਭਾਸਿਤ੍ਥ;

ਅਞ੍ਞਂ ਸਙ੍ਕਮ ਨਾਗਂ, ਨਾਗੋ ਖੀਣਾਯੁਕੋ ਮਹਾਰਾਜਾ’’ਤਿ.

ਤਤ੍ਥ ਨਾਗੋ ਖੀਣਾਯੁਕੋਤਿ ਨਾਗੋ ਤੇ ਜੀਵਿਤਕ੍ਖਯਂ ਪਤ੍ਤੋ, ਯਂ ਕਿਞ੍ਚਿ ਕਰੋਨ੍ਤੇਨ ਨ ਸਕ੍ਕਾ ਪਿਟ੍ਠੇ ਨਿਸਿਨ੍ਨੇਨ ਬੋਧਿਮਣ੍ਡਮਤ੍ਥਕੇਨ ਗਨ੍ਤੁਂ. ਅਞ੍ਞਂ ਨਾਗਂ ਸਙ੍ਕਮਾਤਿ ਰਞ੍ਞੋ ਪੁਞ੍ਞਿਦ੍ਧਿਬਲੇਨ ਅਞ੍ਞੋ ਨਾਗੋ ਉਪੋਸਥਕੁਲਤੋ ਆਗਨ੍ਤ੍ਵਾ ਪਿਟ੍ਠਿਂ ਉਪਨਾਮੇਸਿ.

ਰਾਜਾ ਤਸ੍ਸ ਪਿਟ੍ਠਿਯਂ ਨਿਸੀਦਿ. ਤਸ੍ਮਿਂ ਖਣੇ ਮਤਹਤ੍ਥੀ ਭੂਮਿਯਂ ਪਤਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਇਤਰਂ ਗਾਥਮਾਹ –

੭੭.

‘‘ਤਂ ਸੁਤ੍ਵਾ ਕਾਲਿਙ੍ਗੋ, ਤਰਮਾਨੋ ਸਙ੍ਕਮੀ ਨਾਗਂ;

ਸਙ੍ਕਨ੍ਤੇਵ ਰਞ੍ਞੇ ਨਾਗੋ, ਤਤ੍ਥੇਵ ਪਤਿ ਭੁਮ੍ਯਾ;

ਵੇਯ੍ਯਞ੍ਜਨਿਕਵਚੋ, ਯਥਾ ਤਥਾ ਅਹੁ ਨਾਗੋ’’ਤਿ.

ਅਥ ਰਾਜਾ ਆਕਾਸਤੋ ਓਰੁਯ੍ਹ ਬੋਧਿਮਣ੍ਡਂ ਓਲੋਕੇਤ੍ਵਾ ਪਾਟਿਹਾਰਿਯਂ ਦਿਸ੍ਵਾ ਭਾਰਦ੍ਵਾਜਸ੍ਸ ਥੁਤਿਂ ਕਰੋਨ੍ਤੋ ਆਹ –

੭੮.

‘‘ਕਾਲਿਙ੍ਗੋ ਰਾਜਾ ਕਾਲਿਙ੍ਗਂ, ਬ੍ਰਾਹ੍ਮਣਂ ਏਤਦਵੋਚ;

ਤ੍ਵਮੇਵ ਅਸਿ ਸਮ੍ਬੁਦ੍ਧੋ, ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ’’ਤਿ.

ਬ੍ਰਾਹ੍ਮਣੋ ਤਂ ਅਨਧਿਵਾਸੇਨ੍ਤੋ ਅਤ੍ਤਾਨਂ ਨੀਚਟ੍ਠਾਨੇ ਠਪੇਤ੍ਵਾ ਬੁਦ੍ਧੇਯੇਵ ਉਕ੍ਖਿਪਿਤ੍ਵਾ ਵਣ੍ਣੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਇਮਾ ਗਾਥਾ ਅਭਾਸਿ –

੭੯.

‘‘ਤਂ ਅਨਧਿਵਾਸੇਨ੍ਤੋ ਕਾਲਿਙ੍ਗ, ਬ੍ਰਾਹ੍ਮਣੋ ਇਦਮਵੋਚ;

ਵੇਯ੍ਯਞ੍ਜਨਿਕਾ ਹਿ ਮਯਂ, ਬੁਦ੍ਧਾ ਸਬ੍ਬਞ੍ਞੁਨੋ ਮਹਾਰਾਜ.

੮੦.

‘‘ਸਬ੍ਬਞ੍ਞੂ ਸਬ੍ਬਵਿਦੂ ਚ, ਬੁਦ੍ਧਾ ਨ ਲਕ੍ਖਣੇਨ ਜਾਨਨ੍ਤਿ;

ਆਗਮਬਲਸਾ ਹਿ ਮਯਂ, ਬੁਦ੍ਧਾ ਸਬ੍ਬਂ ਪਜਾਨਨ੍ਤੀ’’ਤਿ.

ਤਤ੍ਥ ਵੇਯ੍ਯਞ੍ਜਨਿਕਾਤਿ ਮਹਾਰਾਜ, ਮਯਂ ਬ੍ਯਞ੍ਜਨਂ ਦਿਸ੍ਵਾ ਬ੍ਯਾਕਰਣਸਮਤ੍ਥਾ ਸੁਤਬੁਦ੍ਧਾ ਨਾਮ, ਬੁਦ੍ਧਾ ਪਨ ਸਬ੍ਬਞ੍ਞੂ ਸਬ੍ਬਵਿਦੂ. ਬੁਦ੍ਧਾ ਹਿ ਅਤੀਤਾਦਿਭੇਦਂ ਸਬ੍ਬਂ ਜਾਨਨ੍ਤਿ ਚੇਵ ਪਸ੍ਸਨ੍ਤਿ ਚ, ਸਬ੍ਬਞ੍ਞੁਤਞ੍ਞਾਣੇਨ ਤੇ ਸਬ੍ਬਂ ਜਾਨਨ੍ਤਿ, ਨ ਲਕ੍ਖਣੇਨ. ਮਯਂ ਪਨ ਆਗਮਬਲਸਾ ਅਤ੍ਤਨੋ ਸਿਪ੍ਪਬਲੇਨੇਵ ਜਾਨਾਮ, ਤਞ੍ਚ ਏਕਦੇਸਮੇਵ, ਬੁਦ੍ਧਾ ਪਨ ਸਬ੍ਬਂ ਪਜਾਨਨ੍ਤੀਤਿ.

ਰਾਜਾ ਬੁਦ੍ਧਗੁਣੇ ਸੁਤ੍ਵਾ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਸਕਲਚਕ੍ਕਵਾਲ਼ਵਾਸਿਕੇਹਿ ਬਹੁਗਨ੍ਧਮਾਲਂ ਆਹਰਾਪੇਤ੍ਵਾ ਮਹਾਬੋਧਿਮਣ੍ਡੇ ਸਤ੍ਤਾਹਂ ਵਸਿਤ੍ਵਾ ਮਹਾਬੋਧਿਪੂਜਂ ਕਾਰੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਇਮਂ ਗਾਥਾਦ੍ਵਯਮਾਹ –

੮੧.

‘‘ਮਹਯਿਤ੍ਵਾ ਸਮ੍ਬੋਧਿਂ, ਨਾਨਾਤੁਰਿਯੇਹਿ ਵਜ੍ਜਮਾਨੇਹਿ;

ਮਾਲਾਵਿਲੇਪਨਂ ਅਭਿਹਰਿਤ੍ਵਾ, ਅਥ ਰਾਜਾ ਮਨੁਪਾਯਾਸਿ.

੮੨.

‘‘ਸਟ੍ਠਿ ਵਾਹਸਹਸ੍ਸਾਨਿ, ਪੁਪ੍ਫਾਨਂ ਸਨ੍ਨਿਪਾਤਯਿ;

ਪੂਜੇਸਿ ਰਾਜਾ ਕਾਲਿਙ੍ਗੋ, ਬੋਧਿਮਣ੍ਡਮਨੁਤ੍ਤਰ’’ਨ੍ਤਿ.

ਤਤ੍ਥ ਮਨੁਪਾਯਾਸੀਤਿ ਮਾਤਾਪਿਤੂਨਂ ਸਨ੍ਤਿਕਂ ਅਗਮਾਸਿ. ਸੋ ਮਹਾਬੋਧਿਮਣ੍ਡੇ ਅਟ੍ਠਾਰਸਹਤ੍ਥਂ ਸੁਵਣ੍ਣਤ੍ਥਮ੍ਭਂ ਉਸ੍ਸਾਪੇਸਿ. ਤਸ੍ਸ ਸਤ੍ਤਰਤਨਮਯਾ ਵੇਦਿਕਾ ਕਾਰੇਸਿ, ਰਤਨਮਿਸ੍ਸਕਂ ਵਾਲੁਕਂ ਓਕਿਰਾਪੇਤ੍ਵਾ ਪਾਕਾਰਪਰਿਕ੍ਖਿਤ੍ਤਂ ਕਾਰੇਸਿ, ਸਤ੍ਤਰਤਨਮਯਂ ਦ੍ਵਾਰਕੋਟ੍ਠਕਂ ਕਾਰੇਸਿ, ਦੇਵਸਿਕਂ ਪੁਪ੍ਫਾਨਂ ਸਟ੍ਠਿਵਾਹਸਹਸ੍ਸਾਨਿ ਸਨ੍ਨਿਪਾਤਯਿ, ਏਵਂ ਬੋਧਿਮਣ੍ਡਂ ਪੂਜੇਸਿ. ਪਾਲ਼ਿਯਂ ਪਨ ‘‘ਸਟ੍ਠਿ ਵਾਹਸਹਸ੍ਸਾਨਿ ਪੁਪ੍ਫਾਨ’’ਨ੍ਤਿ ਏਤ੍ਤਕਮੇਵ ਆਗਤਂ.

ਏਵਂ ਮਹਾਬੋਧਿਪੂਜਂ ਕਤ੍ਵਾ ਮਾਤਾਪਿਤਰੋ ਅਯ੍ਯਕਾਯ੍ਯਿਕੇ ਚ ਆਦਾਯ ਦਨ੍ਤਪੁਰਮੇਵ ਆਨੇਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਆਨਨ੍ਦੋ ਬੋਧਿਪੂਜਂ ਕਾਰੇਸਿਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਾਣਵਕਕਾਲਿਙ੍ਗੋ ਆਨਨ੍ਦੋ ਅਹੋਸਿ, ਕਾਲਿਙ੍ਗਭਾਰਦ੍ਵਾਜੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕਾਲਿਙ੍ਗਬੋਧਿਜਾਤਕਵਣ੍ਣਨਾ ਛਟ੍ਠਾ.

[੪੮੦] ੭. ਅਕਿਤ੍ਤਿਜਾਤਕਵਣ੍ਣਨਾ

ਅਕਿਤ੍ਤਿਂ ਦਿਸ੍ਵਾ ਸਮ੍ਮਨ੍ਤਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਸਾਵਤ੍ਥਿਵਾਸਿਂ ਦਾਨਪਤਿਂ ਉਪਾਸਕਂ ਆਰਬ੍ਭ ਕਥੇਸਿ. ਸੋ ਕਿਰ ਸਤ੍ਥਾਰਂ ਨਿਮਨ੍ਤੇਤ੍ਵਾ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਪਰਿਯੋਸਾਨਦਿਵਸੇ ਅਰਿਯਸਙ੍ਘਸ੍ਸ ਸਬ੍ਬਪਰਿਕ੍ਖਾਰੇ ਅਦਾਸਿ. ਅਥਸ੍ਸ ਸਤ੍ਥਾ ਪਰਿਸਮਜ੍ਝੇਯੇਵ ਅਨੁਮੋਦਨਂ ਕਰੋਨ੍ਤੋ ‘‘ਉਪਾਸਕ, ਮਹਾ ਤੇ ਪਰਿਚ੍ਚਾਗੋ, ਅਹੋ ਦੁਕ੍ਕਰਂ ਤਯਾ ਕਤਂ, ਅਯਞ੍ਹਿ ਦਾਨਵਂਸੋ ਨਾਮ ਪੋਰਾਣਕਪਣ੍ਡਿਤਾਨਂ ਵਂਸੋ, ਦਾਨਂ ਨਾਮ ਗਿਹਿਨਾਪਿ ਪਬ੍ਬਜਿਤੇਨਾਪਿ ਦਾਤਬ੍ਬਮੇਵ. ਪੋਰਾਣਕਪਣ੍ਡਿਤਾ ਪਨ ਪਬ੍ਬਜਿਤ੍ਵਾ ਅਰਞ੍ਞੇ ਵਸਨ੍ਤਾਪਿ ਅਲੋਣਕਂ ਵਿਧੂਪਨਂ ਉਦਕਮਤ੍ਤਸਿਤ੍ਤਂ ਕਾਰਪਣ੍ਣਂ ਖਾਦਮਾਨਾਪਿ ਸਮ੍ਪਤ੍ਤਯਾਚਕਾਨਂ ਯਾਵਦਤ੍ਥਂ ਦਤ੍ਵਾ ਸਯਂ ਪੀਤਿਸੁਖੇਨ ਯਾਪਯਿਂਸੂ’’ਤਿ ਵਤ੍ਵਾ ‘‘ਭਨ੍ਤੇ, ਇਦਂ ਤਾਵ ਸਬ੍ਬਪਰਿਕ੍ਖਾਰਦਾਨਂ ਮਹਾਜਨਸ੍ਸ ਪਾਕਟਂ, ਤੁਮ੍ਹੇਹਿ ਵੁਤ੍ਤਂ ਅਪਾਕਟਂ, ਤਂ ਨੋ ਕਥੇਥਾ’’ਤਿ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਸੀਤਿਕੋਟਿਵਿਭਵਸ੍ਸ ਬ੍ਰਾਹ੍ਮਣਮਹਾਸਾਲਸ੍ਸ ਕੁਲੇ ਨਿਬ੍ਬਤ੍ਤਿ, ‘‘ਅਕਿਤ੍ਤੀ’’ਤਿਸ੍ਸ ਨਾਮਂ ਕਰਿਂਸੁ. ਤਸ੍ਸ ਪਦਸਾ ਗਮਨਕਾਲੇ ਭਗਿਨੀਪਿ ਜਾਯਿ, ‘‘ਯਸਵਤੀ’’ਤਿਸ੍ਸਾ ਨਾਮਂ ਕਰਿਂਸੁ. ਮਹਾਸਤ੍ਤੋ ਸੋਲ਼ਸਵਸ੍ਸਕਾਲੇ ਤਕ੍ਕਸਿਲਂ ਗਨ੍ਤ੍ਵਾ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਪਚ੍ਚਾਗਮਿ. ਅਥਸ੍ਸ ਮਾਤਾਪਿਤਰੋ ਕਾਲਮਕਂਸੁ. ਸੋ ਤੇਸਂ ਪੇਤਕਿਚ੍ਚਾਨਿ ਕਾਰੇਤ੍ਵਾ ਧਨਵਿਲੋਕਨਂ ਕਰੋਨ੍ਤੋ ‘‘ਅਸੁਕੋ ਨਾਮ ਏਤ੍ਤਕਂ ਧਨਂ ਸਣ੍ਠਪੇਤ੍ਵਾ ਅਤੀਤੋ, ਅਸੁਕੋ ਏਤ੍ਤਕ’’ਨ੍ਤਿ ਵਚਨਂ ਸੁਤ੍ਵਾ ਸਂਵਿਗ੍ਗਮਾਨਸੋ ਹੁਤ੍ਵਾ ‘‘ਇਦਂ ਧਨਮੇਵ ਪਞ੍ਞਾਯਤਿ, ਨ ਧਨਸ੍ਸ ਸਂਹਾਰਕਾ, ਸਬ੍ਬੇ ਇਮਂ ਧਨਂ ਪਹਾਯੇਵ ਗਤਾ, ਅਹਂ ਪਨ ਤਂ ਆਦਾਯ ਗਮਿਸ੍ਸਾਮੀ’’ਤਿ ਭਗਿਨਿਂ ਪਕ੍ਕੋਸਾਪੇਤ੍ਵਾ ‘‘ਤ੍ਵਂ ਇਮਂ ਧਨਂ ਪਟਿਪਜ੍ਜਾਹੀ’’ਤਿ ਆਹ. ‘‘ਤੁਮ੍ਹਾਕਂ ਪਨ ਕੋ ਅਜ੍ਝਾਸਯੋ’’ਤਿ? ‘‘ਪਬ੍ਬਜਿਤੁਕਾਮੋਮ੍ਹੀ’’ਤਿ. ‘‘ਭਾਤਿਕ, ਅਹਂ ਤੁਮ੍ਹੇਹਿ ਛਡ੍ਡਿਤਂ ਖੇਲ਼ਂ ਨ ਸਿਰਸਾ ਸਮ੍ਪਟਿਚ੍ਛਾਮਿ, ਨ ਮੇ ਇਮਿਨਾ ਅਤ੍ਥੋ, ਅਹਮ੍ਪਿ ਪਬ੍ਬਜਿਸ੍ਸਾਮੀ’’ਤਿ. ਸੋ ਰਾਜਾਨਂ ਆਪੁਚ੍ਛਿਤ੍ਵਾ ਭੇਰਿਂ ਚਰਾਪੇਸਿ ‘‘ਧਨੇਨ ਅਤ੍ਥਿਕਾ ਅਕਿਤ੍ਤਿਪਣ੍ਡਿਤਸ੍ਸ ਗੇਹਂ ਆਗਚ੍ਛਨ੍ਤੂ’’ਤਿ.

ਸੋ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਧਨੇ ਅਖੀਯਮਾਨੇ ਚਿਨ੍ਤੇਸਿ ‘‘ਇਮੇ ਸਙ੍ਖਾਰਾ ਖੀਯਨ੍ਤਿ, ਕਿਂ ਮੇ ਧਨਕੀਲ਼ਾਯ, ਅਤ੍ਥਿਕਾ ਤਂ ਗਣ੍ਹਿਸ੍ਸਨ੍ਤੀ’’ਤਿ ਨਿਵੇਸਨਦ੍ਵਾਰਂ ਵਿਵਰਿਤ੍ਵਾ ‘‘ਦਿਨ੍ਨਞ੍ਞੇਵ ਹਰਨ੍ਤੂ’’ਤਿ ਸਹਿਰਞ੍ਞਸੁਵਣ੍ਣਂ ਗੇਹਂ ਪਹਾਯ ਞਾਤਿਮਣ੍ਡਲਸ੍ਸ ਪਰਿਦੇਵਨ੍ਤਸ੍ਸ ਭਗਿਨਿਂ ਗਹੇਤ੍ਵਾ ਬਾਰਾਣਸਿਤੋ ਨਿਕ੍ਖਮਿ. ਯੇਨ ਦ੍ਵਾਰੇਨ ਨਿਕ੍ਖਮਿ, ਤਂ ਅਕਿਤ੍ਤਿਦ੍ਵਾਰਂ ਨਾਮ ਜਾਤਂ, ਯੇਨ ਤਿਤ੍ਥੇਨ ਨਦਿਂ ਓਤਿਣ੍ਣੋ, ਤਮ੍ਪਿ ਅਕਿਤ੍ਤਿਤਿਤ੍ਥਂ ਨਾਮ ਜਾਤਂ. ਸੋ ਦ੍ਵੇ ਤੀਣਿ ਯੋਜਨਾਨਿ ਗਨ੍ਤ੍ਵਾ ਰਮਣੀਯੇ ਠਾਨੇ ਪਣ੍ਣਸਾਲਂ ਕਤ੍ਵਾ ਭਗਿਨਿਯਾ ਸਦ੍ਧਿਂ ਪਬ੍ਬਜਿ. ਤਸ੍ਸ ਪਬ੍ਬਜਿਤਕਾਲਤੋ ਪਟ੍ਠਾਯ ਬਹੁਗਾਮਨਿਗਮਰਾਜਧਾਨਿਵਾਸਿਨੋ ਪਬ੍ਬਜਿਂਸੁ. ਮਹਾਪਰਿਵਾਰੋ ਅਹੋਸਿ, ਮਹਾਲਾਭਸਕ੍ਕਾਰੋ ਨਿਬ੍ਬਤ੍ਤਿ, ਬੁਦ੍ਧੁਪ੍ਪਾਦਕਾਲੋ ਵਿਯ ਪਵਤ੍ਤਿ. ਅਥ ਮਹਾਸਤ੍ਤੋ ‘‘ਅਯਂ ਲਾਭਸਕ੍ਕਾਰੋ ਮਹਾ, ਪਰਿਵਾਰੋਪਿ ਮਹਨ੍ਤੋ, ਮਯਾ ਏਕਕੇਨੇਵ ਵਿਹਰਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਅਵੇਲਾਯ ਅਨ੍ਤਮਸੋ ਭਗਿਨਿਮ੍ਪਿ ਅਜਾਨਾਪੇਤ੍ਵਾ ਏਕਕੋਵ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਦਮਿਲ਼ਰਟ੍ਠਂ ਪਤ੍ਵਾ ਕਾਵੀਰਪਟ੍ਟਨਸਮੀਪੇ ਉਯ੍ਯਾਨੇ ਵਿਹਰਨ੍ਤੋ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਸਿ. ਤਤ੍ਰਾਪਿਸ੍ਸ ਮਹਾਲਾਭਸਕ੍ਕਾਰੋ ਉਪ੍ਪਜ੍ਜਿ. ਸੋ ਤਂ ਜਿਗੁਚ੍ਛਿਤ੍ਵਾ ਛਡ੍ਡੇਤ੍ਵਾ ਆਕਾਸੇਨ ਗਨ੍ਤ੍ਵਾ ਨਾਗਦੀਪਸਮੀਪੇ ਕਾਰਦੀਪੇ ਓਤਰਿ. ਤਦਾ ਕਾਰਦੀਪੋ ਅਹਿਦੀਪੋ ਨਾਮ ਅਹੋਸਿ. ਸੋ ਤਤ੍ਥ ਮਹਨ੍ਤਂ ਕਾਰਰੁਕ੍ਖਂ ਉਪਨਿਸ੍ਸਾਯ ਪਣ੍ਣਸਾਲਂ ਮਾਪੇਤ੍ਵਾ ਵਾਸਂ ਕਪ੍ਪੇਸਿ. ਤਤ੍ਥ ਤਸ੍ਸ ਵਸਨਭਾਵਂ ਨ ਕੋਚਿ ਜਾਨਾਤਿ. ਅਥਸ੍ਸ ਭਗਿਨੀ ਭਾਤਰਂ ਗਵੇਸਮਾਨਾ ਅਨੁਪੁਬ੍ਬੇਨ ਦਮਿਲ਼ਰਟ੍ਠਂ ਪਤ੍ਵਾ ਤਂ ਅਦਿਸ੍ਵਾ ਤੇਨ ਵਸਿਤਟ੍ਠਾਨੇਯੇਵ ਵਸਿ, ਝਾਨਂ ਪਨ ਨਿਬ੍ਬਤ੍ਤੇਤੁਂ ਨਾਸਕ੍ਖਿ.

ਮਹਾਸਤ੍ਤੋ ਅਪ੍ਪਿਚ੍ਛਤਾਯ ਕਤ੍ਥਚਿ ਅਗਨ੍ਤ੍ਵਾ ਤਸ੍ਸ ਰੁਕ੍ਖਸ੍ਸ ਫਲਕਾਲੇ ਫਲਾਨਿ ਖਾਦਤਿ, ਪਤ੍ਤਕਾਲੇ ਪਤ੍ਤਾਨਿ ਉਦਕਸਿਤ੍ਤਾਨਿ ਖਾਦਤਿ. ਤਸ੍ਸ ਸੀਲਤੇਜੇਨ ਸਕ੍ਕਸ੍ਸ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ‘‘ਕੋ ਨੁ ਖੋ ਮਂ ਠਾਨਾ ਚਾਵੇਤੁਕਾਮੋ’’ਤਿ ਆਵਜ੍ਜੇਨ੍ਤੋ ਅਕਿਤ੍ਤਿਪਣ੍ਡਿਤਂ ਦਿਸ੍ਵਾ ‘‘ਕਿਮਤ੍ਥਂ ਏਸ ਤਾਪਸੋ ਸੀਲਾਨਿ ਰਕ੍ਖਤਿ, ਸਕ੍ਕਤ੍ਤਂ ਨੁ ਖੋ ਪਤ੍ਥੇਤਿ, ਉਦਾਹੁ ਅਞ੍ਞਂ, ਵੀਮਿਂਸਿਸ੍ਸਾਮਿ ਨਂ. ਅਯਞ੍ਹਿ ਦੁਕ੍ਖੇਨ ਜੀਵਿਕਂ ਕਪ੍ਪੇਸਿ, ਉਦਕਸਿਤ੍ਤਾਨਿ ਕਾਰਪਣ੍ਣਾਨਿ ਖਾਦਤਿ, ਸਚੇ ਸਕ੍ਕਤ੍ਤਂ ਪਤ੍ਥੇਤਿ, ਅਤ੍ਤਨੋ ਸਿਤ੍ਤਪਤ੍ਤਾਨਿ ਮਯ੍ਹਂ ਦਸ੍ਸਤਿ, ਨੋ ਚੇ, ਨ ਦਸ੍ਸਤੀ’’ਤਿ ਬ੍ਰਾਹ੍ਮਣਵਣ੍ਣੇਨ ਤਸ੍ਸ ਸਨ੍ਤਿਕਂ ਅਗਮਾਸਿ. ਬੋਧਿਸਤ੍ਤੋ ਕਾਰਪਣ੍ਣਾਨਿ ਸੇਦੇਤ੍ਵਾ ਓਤਾਰੇਤ੍ਵਾ ‘‘ਸੀਤਲਭੂਤਾਨਿ ਖਾਦਿਸ੍ਸਾਮੀ’’ਤਿ ਪਣ੍ਣਸਾਲਦ੍ਵਾਰੇ ਨਿਸੀਦਿ. ਅਥਸ੍ਸ ਪੁਰਤੋ ਸਕ੍ਕੋ ਭਿਕ੍ਖਾਯ ਅਟ੍ਠਾਸਿ. ਮਹਾਸਤ੍ਤੋ ਤਂ ਦਿਸ੍ਵਾ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ‘‘ਲਾਭਾ ਵਤ ਮੇ, ਯੋਹਂ ਯਾਚਕਂ ਪਸ੍ਸਾਮਿ, ਅਜ੍ਜ ਮੇ ਮਨੋਰਥਂ ਮਤ੍ਥਕਂ ਪਾਪੇਤ੍ਵਾ ਦਾਨਂ ਦਸ੍ਸਾਮੀ’’ਤਿ ਪਕ੍ਕਭਾਜਨੇਨੇਵ ਆਦਾਯ ਗਨ੍ਤ੍ਵਾ ‘‘ਇਦਂ ਮੇ ਦਾਨਂ ਸਬ੍ਬਞ੍ਞੁਤਞ੍ਞਾਣਸ੍ਸ ਪਚ੍ਚਯੋ ਹੋਤੂ’’ਤਿ ਅਤ੍ਤਨੋ ਅਸੇਸੇਤ੍ਵਾਵ ਤਸ੍ਸ ਭਾਜਨੇ ਪਕ੍ਖਿਪਿ. ਬ੍ਰਾਹ੍ਮਣੋ ਤਂ ਗਹੇਤ੍ਵਾ ਥੋਕਂ ਗਨ੍ਤ੍ਵਾ ਅਨ੍ਤਰਧਾਯਿ. ਮਹਾਸਤ੍ਤੋਪਿ ਤਸ੍ਸ ਦਤ੍ਵਾ ਪੁਨ ਅਪਚਿਤ੍ਵਾ ਪੀਤਿਸੁਖੇਨੇਵ ਵੀਤਿਨਾਮੇਤ੍ਵਾ ਪੁਨਦਿਵਸੇ ਪਚਿਤ੍ਵਾ ਤਤ੍ਥੇਵ ਪਣ੍ਣਸਾਲਦ੍ਵਾਰੇ ਨਿਸੀਦਿ.

ਸਕ੍ਕੋ ਪੁਨ ਬ੍ਰਾਹ੍ਮਣਵੇਸੇਨ ਅਗਮਾਸਿ. ਪੁਨਪਿਸ੍ਸ ਦਤ੍ਵਾ ਮਹਾਸਤ੍ਤੋ ਤਥੇਵ ਵੀਤਿਨਾਮੇਸਿ. ਤਤਿਯਦਿਵਸੇਪਿ ਤਥੇਵ ਦਤ੍ਵਾ ‘‘ਅਹੋ ਮੇ ਲਾਭਾ ਵਤ, ਕਾਰਪਣ੍ਣਾਨਿ ਨਿਸ੍ਸਾਯ ਮਹਨ੍ਤਂ ਪੁਞ੍ਞਂ ਪਸੁਤ’’ਨ੍ਤਿ ਸੋਮਨਸ੍ਸਪ੍ਪਤ੍ਤੋ ਤਯੋ ਦਿਵਸੇ ਅਨਾਹਾਰਤਾਯ ਦੁਬ੍ਬਲੋਪਿ ਸਮਾਨੋ ਮਜ੍ਝਨ੍ਹਿਕਸਮਯੇ ਪਣ੍ਣਸਾਲਤੋ ਨਿਕ੍ਖਮਿਤ੍ਵਾ ਦਾਨਂ ਆਵਜ੍ਜੇਨ੍ਤੋ ਪਣ੍ਣਸਾਲਦ੍ਵਾਰੇ ਨਿਸੀਦਿ. ਸਕ੍ਕੋਪਿ ਚਿਨ੍ਤੇਸਿ ‘‘ਅਯਂ ਬ੍ਰਾਹ੍ਮਣੋ ਤਯੋ ਦਿਵਸੇ ਨਿਰਾਹਾਰੋ ਹੁਤ੍ਵਾ ਏਵਂ ਦੁਬ੍ਬਲੋਪਿ ਦਾਨਂ ਦੇਨ੍ਤੋ ਤੁਟ੍ਠਚਿਤ੍ਤੋਵ ਦੇਤਿ, ਚਿਤ੍ਤਸ੍ਸ ਅਞ੍ਞਥਤ੍ਤਮ੍ਪਿ ਨਤ੍ਥਿ, ਅਹਂ ਇਮਂ ‘ਇਦਂ ਨਾਮ ਪਤ੍ਥੇਤ੍ਵਾ ਦੇਤੀ’ਤਿ ਨ ਜਾਨਾਮਿ, ਪੁਚ੍ਛਿਤ੍ਵਾ ਅਜ੍ਝਾਸਯਮਸ੍ਸ ਸੁਤ੍ਵਾ ਦਾਨਕਾਰਣਂ ਜਾਨਿਸ੍ਸਾਮੀ’’ਤਿ. ਸੋ ਮਜ੍ਝਨ੍ਹਿਕੇ ਵੀਤਿਵਤ੍ਤੇ ਮਹਨ੍ਤੇਨ ਸਿਰਿਸੋਭਗ੍ਗੇਨ ਗਗਨਤਲੇ ਤਰੁਣਸੂਰਿਯੋ ਵਿਯ ਜਲਮਾਨੋ ਆਗਨ੍ਤ੍ਵਾ ਮਹਾਸਤ੍ਤਸ੍ਸ ਪੁਰਤੋਵ ਠਤ੍ਵਾ ‘‘ਅਮ੍ਭੋ ਤਾਪਸ, ਏਵਂ ਉਣ੍ਹਵਾਤੇ ਪਹਰਨ੍ਤੇ ਏਵਰੂਪੇ ਲੋਣਜਲਪਰਿਕ੍ਖਿਤ੍ਤੇ ਅਰਞ੍ਞੇ ਕਿਮਤ੍ਥਂ ਤਪੋਕਮ੍ਮਂ ਕਰੋਸੀ’’ਤਿ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਪਠਮਂ ਗਾਥਮਾਹ –

੮੩.

‘‘ਅਕਿਤ੍ਤਿਂ ਦਿਸ੍ਵਾ ਸਮ੍ਮਨ੍ਤਂ, ਸਕ੍ਕੋ ਭੂਤਪਤੀ ਬ੍ਰਵਿ;

ਕਿਂ ਪਤ੍ਥਯਂ ਮਹਾਬ੍ਰਹ੍ਮੇ, ਏਕੋ ਸਮ੍ਮਸਿ ਘਮ੍ਮਨੀ’’ਤਿ.

ਤਤ੍ਥ ਕਿਂ ਪਤ੍ਥਯਨ੍ਤਿ ਕਿਂ ਮਨੁਸ੍ਸਸਮ੍ਪਤ੍ਤਿਂ ਪਤ੍ਥੇਨ੍ਤੋ, ਉਦਾਹੁ ਸਕ੍ਕਸਮ੍ਪਤ੍ਤਿਆਦੀਨਂ ਅਞ੍ਞਤਰਨ੍ਤਿ.

ਮਹਾਸਤ੍ਤੋ ਤਂ ਸੁਤ੍ਵਾ ਸਕ੍ਕਭਾਵਞ੍ਚਸ੍ਸ ਞਤ੍ਵਾ ‘‘ਨਾਹਂ ਏਤਾ ਸਮ੍ਪਤ੍ਤਿਯੋ ਪਤ੍ਥੇਮਿ, ਸਬ੍ਬਞ੍ਞੁਤਂ ਪਨ ਪਤ੍ਥੇਨ੍ਤੋ ਤਪੋਕਮ੍ਮਂ ਕਰੋਮੀ’’ਤਿ ਪਕਾਸੇਤੁਂ ਦੁਤਿਯਂ ਗਾਥਮਾਹ –

੮੪.

‘‘ਦੁਕ੍ਖੋ ਪੁਨਬ੍ਭਵੋ ਸਕ੍ਕ, ਸਰੀਰਸ੍ਸ ਚ ਭੇਦਨਂ;

ਸਮ੍ਮੋਹਮਰਣਂ ਦੁਕ੍ਖਂ, ਤਸ੍ਮਾ ਸਮ੍ਮਾਮਿ ਵਾਸਵਾ’’ਤਿ.

ਤਤ੍ਥ ਤਸ੍ਮਾਤਿ ਯਸ੍ਮਾ ਪੁਨਪ੍ਪੁਨਂ ਜਾਤਿ ਖਨ੍ਧਾਨਂ ਭੇਦਨਂ ਸਮ੍ਮੋਹਮਰਣਞ੍ਚ ਦੁਕ੍ਖਂ, ਤਸ੍ਮਾ ਯਤ੍ਥੇਤਾਨਿ ਨਤ੍ਥਿ, ਤਂ ਨਿਬ੍ਬਾਨਂ ਪਤ੍ਥੇਨ੍ਤੋ ਇਧ ਸਮ੍ਮਾਮੀਤਿ ਏਵਂ ਅਤ੍ਤਨੋ ਨਿਬ੍ਬਾਨਜ੍ਝਾਸਯਤਂ ਦੀਪੇਤਿ.

ਤਂ ਸੁਤ੍ਵਾ ਸਕ੍ਕੋ ਤੁਟ੍ਠਮਾਨਸੋ ‘‘ਸਬ੍ਬਭਵੇਸੁ ਕਿਰਾਯਂ ਉਕ੍ਕਣ੍ਠਿਤੋ ਨਿਬ੍ਬਾਨਤ੍ਥਾਯ ਅਰਞ੍ਞੇ ਵਿਹਰਤਿ, ਵਰਮਸ੍ਸ ਦਸ੍ਸਾਮੀ’’ਤਿ ਵਰੇਨ ਨਿਮਨ੍ਤੇਨ੍ਤੋ ਤਤਿਯਂ ਗਾਥਮਾਹ –

੮੫.

‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਕਸ੍ਸਪ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸੀ’’ਤਿ.

ਤਤ੍ਥ ਯਂ ਕਿਞ੍ਚਿ ਮਨਸਿਚ੍ਛਸੀਤਿ ਯਂ ਮਨਸਾ ਇਚ੍ਛਸਿ, ਤਂ ਦਮ੍ਮਿ, ਵਰਂ ਗਣ੍ਹਾਹੀਤਿ.

ਮਹਾਸਤ੍ਤੋ ਵਰਂ ਗਣ੍ਹਨ੍ਤੋ ਚਤੁਤ੍ਥਂ ਗਾਥਮਾਹ –

੮੬.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਯੇਨ ਪੁਤ੍ਤੇ ਚ ਦਾਰੇ ਚ, ਧਨਧਞ੍ਞਂ ਪਿਯਾਨਿ ਚ;

ਲਦ੍ਧਾ ਨਰਾ ਨ ਤਪ੍ਪਨ੍ਤਿ, ਸੋ ਲੋਭੋ ਨ ਮਯੀ ਵਸੇ’’ਤਿ.

ਤਤ੍ਥ ਵਰਞ੍ਚੇ ਮੇ ਅਦੋਤਿ ਸਚੇ ਵਰਂ ਮਯ੍ਹਂ ਦੇਸਿ. ਪਿਯਾਨਿ ਚਾਤਿ ਅਞ੍ਞਾਨਿ ਚ ਯਾਨਿ ਪਿਯਭਣ੍ਡਾਨਿ. ਨ ਤਪ੍ਪਨ੍ਤੀਤਿ ਪੁਨਪ੍ਪੁਨਂ ਪੁਤ੍ਤਾਦਯੋ ਪਤ੍ਥੇਨ੍ਤਿਯੇਵ, ਨ ਤਿਤ੍ਤਿਂ ਉਪਗਚ੍ਛਨ੍ਤਿ. ਨ ਮਯੀ ਵਸੇਤਿ ਮਯਿ ਮਾ ਵਸਤੁ ਮਾ ਉਪ੍ਪਜ੍ਜਤੁ.

ਅਥਸ੍ਸ ਸਕ੍ਕੋ ਤੁਸ੍ਸਿਤ੍ਵਾ ਉਤ੍ਤਰਿਮ੍ਪਿ ਵਰਂ ਦੇਨ੍ਤੋ ਮਹਾਸਤ੍ਤੋ ਚ ਵਰਂ ਗਣ੍ਹਨ੍ਤੋ ਇਮਾ ਗਾਥਾ ਅਭਾਸਿਂਸੁ –

੮੭.

‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਕਸ੍ਸਪ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸਿ.

੮੮.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਖੇਤ੍ਤਂ ਵਤ੍ਥੁਂ ਹਿਰਞ੍ਞਞ੍ਚ, ਗਵਾਸ੍ਸਂ ਦਾਸਪੋਰਿਸਂ;

ਯੇਨ ਜਾਤੇਨ ਜੀਯਨ੍ਤਿ, ਸੋ ਦੋਸੋ ਨ ਮਯੀ ਵਸੇ.

੮੯.

‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਕਸ੍ਸਪ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸਿ.

੯੦.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਬਾਲਂ ਨ ਪਸ੍ਸੇ ਨ ਸੁਣੇ, ਨ ਚ ਬਾਲੇਨ ਸਂਵਸੇ;

ਬਾਲੇਨਲ੍ਲਾਪਸਲ੍ਲਾਪਂ, ਨ ਕਰੇ ਨ ਚ ਰੋਚਯੇ.

੯੧.

‘‘ਕਿਂ ਨੁ ਤੇ ਅਕਰਂ ਬਾਲੋ, ਵਦ ਕਸ੍ਸਪ ਕਾਰਣਂ;

ਕੇਨ ਕਸ੍ਸਪ ਬਾਲਸ੍ਸ, ਦਸ੍ਸਨਂ ਨਾਭਿਕਙ੍ਖਸਿ.

੯੨.

‘‘ਅਨਯਂ ਨਯਤਿ ਦੁਮ੍ਮੇਧੋ, ਅਧੁਰਾਯਂ ਨਿਯੁਞ੍ਜਤਿ;

ਦੁਨ੍ਨਯੋ ਸੇਯ੍ਯਸੋ ਹੋਤਿ, ਸਮ੍ਮਾ ਵੁਤ੍ਤੋ ਪਕੁਪ੍ਪਤਿ;

ਵਿਨਯਂ ਸੋ ਨ ਜਾਨਾਤਿ, ਸਾਧੁ ਤਸ੍ਸ ਅਦਸ੍ਸਨਂ.

੯੩.

‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਕਸ੍ਸਪ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸਿ.

੯੪.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਧੀਰਂ ਪਸ੍ਸੇ ਸੁਣੇ ਧੀਰਂ, ਧੀਰੇਨ ਸਹ ਸਂਵਸੇ;

ਧੀਰੇਨਲ੍ਲਾਪਸਲ੍ਲਾਪਂ, ਤਂ ਕਰੇ ਤਞ੍ਚ ਰੋਚਯੇ.

੯੫.

‘‘ਕਿਂ ਨੁ ਤੇ ਅਕਰਂ ਧੀਰੋ, ਵਦ ਕਸ੍ਸਪ ਕਾਰਣਂ;

ਕੇਨ ਕਸ੍ਸਪ ਧੀਰਸ੍ਸ, ਦਸ੍ਸਨਂ ਅਭਿਕਙ੍ਖਸਿ.

੯੬.

‘‘ਨਯਂ ਨਯਤਿ ਮੇਧਾਵੀ, ਅਧੁਰਾਯਂ ਨ ਯੁਞ੍ਜਤਿ;

ਸੁਨਯੋ ਸੇਯ੍ਯਸੋ ਹੋਤਿ, ਸਮ੍ਮਾ ਵੁਤ੍ਤੋ ਨ ਕੁਪ੍ਪਤਿ;

ਵਿਨਯਂ ਸੋ ਪਜਾਨਾਤਿ, ਸਾਧੁ ਤੇਨ ਸਮਾਗਮੋ.

੯੭.

‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਕਸ੍ਸਪ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸਿ.

੯੮.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਤਤੋ ਰਤ੍ਯਾ ਵਿਵਸਾਨੇ, ਸੂਰਿਯੁਗ੍ਗਮਨਂ ਪਤਿ;

ਦਿਬ੍ਬਾ ਭਕ੍ਖਾ ਪਾਤੁਭਵੇਯ੍ਯੁਂ, ਸੀਲਵਨ੍ਤੋ ਚ ਯਾਚਕਾ.

੯੯.

‘‘ਦਦਤੋ ਮੇ ਨ ਖੀਯੇਥ, ਦਤ੍ਵਾ ਨਾਨੁਤਪੇਯ੍ਯਹਂ;

ਦਦਂ ਚਿਤ੍ਤਂ ਪਸਾਦੇਯ੍ਯਂ, ਏਤਂ ਸਕ੍ਕ ਵਰਂ ਵਰੇ.

੧੦੦.

‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਕਸ੍ਸਪ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸਿ.

੧੦੧.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਨ ਮਂ ਪੁਨ ਉਪੇਯ੍ਯਾਸਿ, ਏਤਂ ਸਕ੍ਕ ਵਰਂ ਵਰੇ.

੧੦੨.

‘‘ਬਹੂਹਿ ਵਤਚਰਿਯਾਹਿ, ਨਰਾ ਚ ਅਥ ਨਾਰਿਯੋ;

ਦਸ੍ਸਨਂ ਅਭਿਕਙ੍ਖਨ੍ਤਿ, ਕਿਂ ਨੁ ਮੇ ਦਸ੍ਸਨੇ ਭਯਂ.

੧੦੩.

‘‘ਤਂ ਤਾਦਿਸਂ ਦੇਵਵਣ੍ਣਂ, ਸਬ੍ਬਕਾਮਸਮਿਦ੍ਧਿਨਂ;

ਦਿਸ੍ਵਾ ਤਪੋ ਪਮਜ੍ਜੇਯ੍ਯਂ, ਏਤਂ ਤੇ ਦਸ੍ਸਨੇ ਭਯ’’ਨ੍ਤਿ.

ਤਤ੍ਥ ਯੇਨ ਜਾਤੇਨਾਤਿ ਯੇਨ ਚਿਤ੍ਤੇਨ ਜਾਤੇਨ ਕੁਦ੍ਧਾ ਸਤ੍ਤਾ ਪਾਣਵਧਾਦੀਨਂ ਕਤਤ੍ਤਾ ਰਾਜਦਣ੍ਡਵਸੇਨ ਵਿਸਖਾਦਨਾਦੀਹਿ ਵਾ ਅਤ੍ਤਨੋ ਮਰਣਵਸੇਨ ਏਤਾਨਿ ਖੇਤ੍ਤਾਦੀਨਿ ਜੀਯਨ੍ਤਿ, ਸੋ ਦੋਸੋ ਮਯਿ ਨ ਵਸੇਯ੍ਯਾਤਿ ਯਾਚਤਿ. ਨ ਸੁਣੇਤਿ ਅਸੁਕਟ੍ਠਾਨੇ ਨਾਮ ਵਸਤੀਤਿਪਿ ਇਮੇਹਿ ਕਾਰਣੇਹਿ ਨ ਸੁਣੇਯ੍ਯਂ. ਕਿਂ ਨੁ ਤੇ ਅਕਰਨ੍ਤਿ ਕਿਂ ਨੁ ਤਵ ਬਾਲੇਨ ਮਾਤਾ ਮਾਰਿਤਾ, ਉਦਾਹੁ ਤਵ ਪਿਤਾ, ਅਞ੍ਞਂ ਵਾ ਪਨ ਤੇ ਕਿਂ ਨਾਮ ਅਨਤ੍ਥਂ ਬਾਲੋ ਅਕਰਂ.

ਅਨਯਂ ਨਯਤੀਤਿ ਅਕਾਰਣਂ ‘‘ਕਾਰਣ’’ਨ੍ਤਿ ਗਣ੍ਹਾਤਿ, ਪਾਣਾਤਿਪਾਤਾਦੀਨਿ ਕਤ੍ਵਾ ਜੀਵਿਕਂ ਕਪ੍ਪੇਸ੍ਸਾਮੀਤਿ ਏਵਰੂਪਾਨਿ ਅਨਤ੍ਥਕਮ੍ਮਾਨਿ ਚਿਨ੍ਤੇਤਿ. ਅਧੁਰਾਯਨ੍ਤਿ ਸਦ੍ਧਾਧੁਰਸੀਲਧੁਰਪਞ੍ਞਾਧੁਰੇਸੁ ਅਯੋਜੇਤ੍ਵਾ ਅਯੋਗੇ ਨਿਯੁਞ੍ਜਤਿ. ਦੁਨ੍ਨਯੋ ਸੇਯ੍ਯਸੋ ਹੋਤੀਤਿ ਦੁਨ੍ਨਯੋਵ ਤਸ੍ਸ ਸੇਯ੍ਯੋ ਹੋਤਿ. ਪਞ੍ਚ ਦੁਸ੍ਸੀਲਕਮ੍ਮਾਨਿ ਸਮਾਦਾਯ ਵਤ੍ਤਨਮੇਵ ਸੇਯ੍ਯੋਤਿ ਗਣ੍ਹਾਤਿ, ਹਿਤਪਟਿਪਤ੍ਤਿਯਾ ਵਾ ਦੁਨ੍ਨਯੋ ਹੋਤਿ ਨੇਤੁਂ ਅਸਕ੍ਕੁਣੇਯ੍ਯੋ. ਸਮ੍ਮਾ ਵੁਤ੍ਤੋਤਿ ਹੇਤੁਨਾ ਕਾਰਣੇਨ ਵੁਤ੍ਤੋ ਕੁਪ੍ਪਤਿ. ਵਿਨਯਨ੍ਤਿ ‘‘ਏਵਂ ਅਭਿਕ੍ਕਮਿਤਬ੍ਬ’’ਨ੍ਤਿਆਦਿਕਂ ਆਚਾਰਵਿਨਯਂ ਨ ਜਾਨਾਤਿ, ਓਵਾਦਞ੍ਚ ਨ ਸਮ੍ਪਟਿਚ੍ਛਤਿ. ਸਾਧੁ ਤਸ੍ਸਾਤਿ ਏਤੇਹਿ ਕਾਰਣੇਹਿ ਤਸ੍ਸ ਅਦਸ੍ਸਨਮੇਵ ਸਾਧੁ.

ਸੂਰਿਯੁਗ੍ਗਮਨਂ ਪਤੀਤਿ ਸੂਰਿਯੁਗ੍ਗਮਨਵੇਲਾਯ. ਦਿਬ੍ਬਾ ਭਕ੍ਖਾਤਿ ਦਿਬ੍ਬਭੋਜਨਂ ਯਾਚਕਾਤਿ ਤਸ੍ਸ ਦਿਬ੍ਬਭੋਜਨਸ੍ਸ ਪਟਿਗ੍ਗਾਹਕਾ. ਵਤਚਰਿਯਾਹੀਤਿ ਦਾਨਸੀਲਉਪੋਸਥਕਮ੍ਮੇਹਿ. ਦਸ੍ਸਨਂ ਅਭਿਕਙ੍ਖਨ੍ਤੀਤਿ ਦਸ੍ਸਨਂ ਮਮ ਅਭਿਕਙ੍ਖਨ੍ਤਿ. ਤਂ ਤਾਦਿਸਨ੍ਤਿ ਏਵਰੂਪਂ ਦਿਬ੍ਬਾਲਙ੍ਕਾਰਵਿਭੂਸਿਤਂ. ਪਮਜ੍ਜੇਯ੍ਯਨ੍ਤਿ ਪਮਾਦਂ ਆਪਜ੍ਜੇਯ੍ਯਂ. ਤਵ ਸਿਰਿਸਮ੍ਪਤ੍ਤਿਂ ਪਤ੍ਥੇਯ੍ਯਂ, ਏਵਂ ਨਿਬ੍ਬਾਨਤ੍ਥਾਯ ਪਵਤ੍ਤਿਤੇ ਤਪੋਕਮ੍ਮੇ ਸਕ੍ਕਟ੍ਠਾਨਂ ਪਤ੍ਥੇਨ੍ਤੋ ਪਮਤ੍ਤੋ ਨਾਮ ਭਵੇਯ੍ਯਂ, ਏਤਂ ਤਵ ਦਸ੍ਸਨੇ ਮਯ੍ਹਂ ਭਯਨ੍ਤਿ.

ਸਕ੍ਕੋ ‘‘ਸਾਧੁ, ਭਨ੍ਤੇ, ਇਤੋ ਪਟ੍ਠਾਯ ਨ ਤੇ ਸਨ੍ਤਿਕਂ ਆਗਮਿਸ੍ਸਾਮਾ’’ਤਿ ਤਂ ਵਨ੍ਦਿਤ੍ਵਾ ਖਮਾਪੇਤ੍ਵਾ ਪਕ੍ਕਾਮਿ. ਮਹਾਸਤ੍ਤੋ ਯਾਵਜੀਵਂ ਤਤ੍ਥੇਵ ਵਸਨ੍ਤੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਕ੍ਕੋ ਅਨੁਰੁਦ੍ਧੋ ਅਹੋਸਿ, ਅਕਿਤ੍ਤਿਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਕਿਤ੍ਤਿਜਾਤਕਵਣ੍ਣਨਾ ਸਤ੍ਤਮਾ.

[੪੮੧] ੮. ਤਕ੍ਕਾਰਿਯਜਾਤਕਵਣ੍ਣਨਾ

ਅਹਮੇਵ ਦੁਬ੍ਭਾਸਿਤਂ ਭਾਸਿ ਬਾਲੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਕਾਲਿਕਂ ਆਰਬ੍ਭ ਕਥੇਸਿ. ਏਕਸ੍ਮਿਞ੍ਹਿ ਅਨ੍ਤੋਵਸ੍ਸੇ ਦ੍ਵੇ ਅਗ੍ਗਸਾਵਕਾ ਗਣਂ ਪਹਾਯ ਵਿਵਿਤ੍ਤਾਵਾਸਂ ਵਸਿਤੁਕਾਮਾ ਸਤ੍ਥਾਰਂ ਆਪੁਚ੍ਛਿਤ੍ਵਾ ਕੋਕਾਲਿਕਰਟ੍ਠੇ ਕੋਕਾਲਿਕਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਤਂ ਏਵਮਾਹਂਸੁ ‘‘ਆਵੁਸੋ ਕੋਕਾਲਿਕ, ਤਂ ਨਿਸ੍ਸਾਯ ਅਮ੍ਹਾਕਂ, ਅਮ੍ਹੇ ਚ ਨਿਸ੍ਸਾਯ ਤਵ ਫਾਸੁਵਿਹਾਰੋ ਭਵਿਸ੍ਸਤਿ, ਇਮਂ ਤੇਮਾਸਂ ਇਧ ਵਸੇਯ੍ਯਾਮਾ’’ਤਿ. ‘‘ਕੋ ਪਨਾਵੁਸੋ, ਮਂ ਨਿਸ੍ਸਾਯ ਤੁਮ੍ਹਾਕਂ ਫਾਸੁਵਿਹਾਰੋ’’ਤਿ. ਸਚੇ ਤ੍ਵਂ ਆਵੁਸੋ ‘‘ਦ੍ਵੇ ਅਗ੍ਗਸਾਵਕਾ ਇਧ ਵਿਹਰਨ੍ਤੀ’’ਤਿ ਕਸ੍ਸਚਿ ਨਾਰੋਚੇਯ੍ਯਾਸਿ, ਮਯਂ ਸੁਖਂ ਵਿਹਰੇਯ੍ਯਾਮ, ਅਯਂ ਤਂ ਨਿਸ੍ਸਾਯ ਅਮ੍ਹਾਕਂ ਫਾਸੁਵਿਹਾਰੋਤਿ. ‘‘ਅਥ ਤੁਮ੍ਹੇ ਨਿਸ੍ਸਾਯ ਮਯ੍ਹਂ ਕੋ ਫਾਸੁਵਿਹਾਰੋ’’ਤਿ? ‘‘ਮਯਂ ਤੁਯ੍ਹਂ ਅਨ੍ਤੋਤੇਮਾਸਂ ਧਮ੍ਮਂ ਵਾਚੇਸ੍ਸਾਮ, ਧਮ੍ਮਕਥਂ ਕਥੇਸ੍ਸਾਮ, ਏਸ ਤੁਯ੍ਹਂ ਅਮ੍ਹੇ ਨਿਸ੍ਸਾਯ ਫਾਸੁਵਿਹਾਰੋ’’ਤਿ. ‘‘ਵਸਥਾਵੁਸੋ, ਯਥਾਜ੍ਝਾਸਯੇਨਾ’’ਤਿ. ਸੋ ਤੇਸਂ ਪਤਿਰੂਪਂ ਸੇਨਾਸਨਂ ਅਦਾਸਿ. ਤੇ ਫਲਸਮਾਪਤ੍ਤਿਸੁਖੇਨ ਸੁਖਂ ਵਸਿਂਸੁ. ਕੋਚਿ ਨੇਸਂ ਤਤ੍ਥ ਵਸਨਭਾਵਂ ਨ ਜਾਨਾਤਿ.

ਤੇ ਵੁਤ੍ਥਵਸ੍ਸਾ ਪਵਾਰੇਤ੍ਵਾ ‘‘ਆਵੁਸੋ, ਤਂ ਨਿਸ੍ਸਾਯ ਸੁਖਂ ਵੁਤ੍ਥਾਮ੍ਹ, ਸਤ੍ਥਾਰਂ ਵਨ੍ਦਿਤੁਂ ਗਚ੍ਛਾਮਾ’’ਤਿ ਤਂ ਆਪੁਚ੍ਛਿਂਸੁ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤੇ ਆਦਾਯ ਧੁਰਗਾਮੇ ਪਿਣ੍ਡਾਯ ਚਰਿ. ਥੇਰਾ ਕਤਭਤ੍ਤਕਿਚ੍ਚਾ ਗਾਮਤੋ ਨਿਕ੍ਖਮਿਂਸੁ. ਕੋਕਾਲਿਕੋ ਤੇ ਉਯ੍ਯੋਜੇਤ੍ਵਾ ਨਿਵਤ੍ਤਿਤ੍ਵਾ ਮਨੁਸ੍ਸਾਨਂ ਆਰੋਚੇਸਿ ‘‘ਉਪਾਸਕਾ, ਤੁਮ੍ਹੇ ਤਿਰਚ੍ਛਾਨਸਦਿਸਾ, ਦ੍ਵੇ ਅਗ੍ਗਸਾਵਕੇ ਤੇਮਾਸਂ ਧੁਰਵਿਹਾਰੇ ਵਸਨ੍ਤੇ ਨ ਜਾਨਿਤ੍ਥ, ਇਦਾਨਿ ਤੇ ਗਤਾ’’ਤਿ. ਮਨੁਸ੍ਸਾ ‘‘ਕਸ੍ਮਾ ਪਨ, ਭਨ੍ਤੇ, ਅਮ੍ਹਾਕਂ ਨਾਰੋਚਿਤ੍ਥਾ’’ਤਿ ਵਤ੍ਵਾ ਬਹੁਂ ਸਪ੍ਪਿਤੇਲਾਦਿਭੇਸਜ੍ਜਞ੍ਚੇਵ ਵਤ੍ਥਚ੍ਛਾਦਨਞ੍ਚ ਗਹੇਤ੍ਵਾ ਥੇਰੇ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਖਮਥ ਨੋ, ਭਨ੍ਤੇ, ਮਯਂ ਤੁਮ੍ਹਾਕਂ ਅਗ੍ਗਸਾਵਕਭਾਵਂ ਨ ਜਾਨਾਮ, ਅਜ੍ਜ ਨੋ ਕੋਕਾਲਿਕਭਦਨ੍ਤਸ੍ਸ ਵਚਨੇਨ ਞਾਤਾ, ਅਮ੍ਹਾਕਂ ਅਨੁਕਮ੍ਪਾਯ ਇਮਾਨਿ ਭੇਸਜ੍ਜਵਤ੍ਥਚ੍ਛਾਦਨਾਨਿ ਗਣ੍ਹਥਾ’’ਤਿ ਆਹਂਸੁ.

ਕੋਕਾਲਿਕੋ ‘‘ਥੇਰਾ ਅਪ੍ਪਿਚ੍ਛਾ ਸਨ੍ਤੁਟ੍ਠਾ, ਇਮਾਨਿ ਵਤ੍ਥਾਨਿ ਅਤ੍ਤਨਾ ਅਗ੍ਗਹੇਤ੍ਵਾ ਮਯ੍ਹਂ ਦਸ੍ਸਨ੍ਤੀ’’ਤਿ ਚਿਨ੍ਤੇਤ੍ਵਾ ਉਪਾਸਕੇਹਿ ਸਦ੍ਧਿਂਯੇਵ ਥੇਰਾਨਂ ਸਨ੍ਤਿਕਂ ਗਤੋ. ਥੇਰਾ ਭਿਕ੍ਖੁਪਰਿਪਾਚਿਤਤ੍ਤਾ ਤਤੋ ਕਿਞ੍ਚਿ ਨੇਵ ਅਤ੍ਤਨਾ ਗਣ੍ਹਿਂਸੁ, ਨ ਕੋਕਾਲਿਕਸ੍ਸ ਦਾਪੇਸੁਂ. ਉਪਾਸਕਾ ‘‘ਭਨ੍ਤੇ, ਇਦਾਨਿ ਅਗਣ੍ਹਨ੍ਤਾ ਪੁਨ ਅਮ੍ਹਾਕਂ ਅਨੁਕਮ੍ਪਾਯ ਇਧ ਆਗਚ੍ਛੇਯ੍ਯਾਥਾ’’ਤਿ ਯਾਚਿਂਸੁ. ਥੇਰਾ ਅਨਧਿਵਾਸੇਤ੍ਵਾ ਸਤ੍ਥੁ ਸਨ੍ਤਿਕਂ ਅਗਮਿਂਸੁ. ਕੋਕਾਲਿਕੋ ‘‘ਇਮੇ ਥੇਰਾ ਅਤ੍ਤਨਾ ਅਗਣ੍ਹਨ੍ਤਾ ਮਯ੍ਹਂ ਨ ਦਾਪੇਸੁ’’ਨ੍ਤਿ ਆਘਾਤਂ ਬਨ੍ਧਿ. ਥੇਰਾਪਿ ਸਤ੍ਥੁ ਸਨ੍ਤਿਕੇ ਥੋਕਂ ਵਸਿਤ੍ਵਾ ਅਤ੍ਤਨੋ ਪਰਿਵਾਰੇ ਪਞ੍ਚਭਿਕ੍ਖੁਸਤੇ ਚ ਆਦਾਯ ਭਿਕ੍ਖੁਸਹਸ੍ਸੇਨ ਸਦ੍ਧਿਂ ਚਾਰਿਕਂ ਚਰਮਾਨਾ ਕੋਕਾਲਿਕਰਟ੍ਠਂ ਪਤ੍ਤਾ. ਤੇ ਉਪਾਸਕਾ ਪਚ੍ਚੁਗ੍ਗਮਨਂ ਕਤ੍ਵਾ ਥੇਰੇ ਆਦਾਯ ਤਮੇਵ ਵਿਹਾਰਂ ਨੇਤ੍ਵਾ ਦੇਵਸਿਕਂ ਮਹਾਸਕ੍ਕਾਰਂ ਕਰਿਂਸੁ. ਪਹੁਤਂ ਭੇਸਜ੍ਜਵਤ੍ਥਚ੍ਛਾਦਨਂ ਉਪ੍ਪਜ੍ਜਿ, ਥੇਰੇਹਿ ਸਦ੍ਧਿਂ ਆਗਤਭਿਕ੍ਖੂ ਚੀਵਰਾਨਿ ਵਿਚਾਰੇਨ੍ਤਾ ਸਦ੍ਧਿਂ ਆਗਤਾਨਂ ਭਿਕ੍ਖੂਨਞ੍ਞੇਵ ਦੇਨ੍ਤਿ, ਕੋਕਾਲਿਕਸ੍ਸ ਨ ਦੇਨ੍ਤਿ, ਥੇਰਾਪਿ ਤਸ੍ਸ ਨ ਦਾਪੇਨ੍ਤਿ. ਕੋਕਾਲਿਕੋ ਚੀਵਰਂ ਅਲਭਿਤ੍ਵਾ ‘‘ਪਾਪਿਚ੍ਛਾ ਸਾਰਿਪੁਤ੍ਤਮੋਗ੍ਗਲ੍ਲਾਨਾ, ਪੁਬ੍ਬੇ ਦੀਯਮਾਨਂ ਲਾਭਂ ਅਗ੍ਗਹੇਤ੍ਵਾ ਇਦਾਨਿ ਗਣ੍ਹਨ੍ਤਿ, ਪੂਰੇਤੁਂ ਨ ਸਕ੍ਕਾ, ਅਞ੍ਞੇ ਨ ਓਲੋਕੇਨ੍ਤੀ’’ਤਿ ਥੇਰੇ ਅਕ੍ਕੋਸਤਿ ਪਰਿਭਾਸਤਿ. ਥੇਰਾ ‘‘ਅਯਂ ਅਮ੍ਹੇ ਨਿਸ੍ਸਾਯ ਅਕੁਸਲਂ ਪਸਵਤੀ’’ਤਿ ਸਪਰਿਵਾਰਾ ਨਿਕ੍ਖਮਿਤ੍ਵਾ ‘‘ਅਞ੍ਞਂ, ਭਨ੍ਤੇ, ਕਤਿਪਾਹਂ ਵਸਥਾ’’ਤਿ ਮਨੁਸ੍ਸੇਹਿ ਯਾਚਿਯਮਾਨਾਪਿ ਨਿਵਤ੍ਤਿਤੁਂ ਨ ਇਚ੍ਛਿਂਸੁ.

ਅਥੇਕੋ ਦਹਰੋ ਭਿਕ੍ਖੁ ਆਹ – ‘‘ਉਪਾਸਕਾ, ਕਥਂ ਥੇਰਾ ਵਸਿਸ੍ਸਨ੍ਤਿ, ਤੁਮ੍ਹਾਕਂ ਕੁਲੂਪਕੋ ਥੇਰੋ ਇਧ ਇਮੇਸਂ ਵਾਸਂ ਨ ਸਹਤੀ’’ਤਿ. ਤੇ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਭਨ੍ਤੇ, ਤੁਮ੍ਹੇ ਕਿਰ ਥੇਰਾਨਂ ਇਧ ਵਾਸਂ ਨ ਸਹਥ, ਗਚ੍ਛਥ ਨੇ ਖਮਾਪੇਤ੍ਵਾ ਨਿਵਤ੍ਤੇਥ, ਸਚੇ ਨ ਨਿਵਤ੍ਤੇਥ, ਪਲਾਯਿਤ੍ਵਾ ਅਞ੍ਞਤ੍ਥ ਵਸਥਾ’’ਤਿ ਆਹਂਸੁ. ਸੋ ਉਪਾਸਕਾਨਂ ਭਯੇਨ ਗਨ੍ਤ੍ਵਾ ਥੇਰੇ ਯਾਚਿ. ਥੇਰਾ ‘‘ਗਚ੍ਛਾਵੁਸੋ, ਨ ਮਯਂ ਨਿਵਤ੍ਤਾਮਾ’’ਤਿ ਪਕ੍ਕਮਿਂਸੁ. ਸੋ ਥੇਰੇ ਨਿਵਤ੍ਤੇਤੁਂ ਅਸਕ੍ਕੋਨ੍ਤੋ ਵਿਹਾਰਮੇਵ ਪਚ੍ਚਾਗਤੋ. ਅਥ ਨਂ ਉਪਾਸਕਾ ਪੁਚ੍ਛਿਂਸੁ ‘‘ਨਿਵਤ੍ਤਿਤਾ ਤੇ, ਭਨ੍ਤੇ, ਥੇਰਾ’’ਤਿ. ‘‘ਨਿਵਤ੍ਤੇਤੁਂ ਨਾਸਕ੍ਖਿਂ ਆਵੁਸੋ’’ਤਿ. ਅਥ ਨਂ ‘‘ਇਮਸ੍ਮਿਂ ਪਾਪਧਮ੍ਮੇ ਵਸਨ੍ਤੇ ਇਧ ਪੇਸਲਾ ਭਿਕ੍ਖੂ ਨ ਵਸਿਸ੍ਸਨ੍ਤਿ, ਨਿਕ੍ਕਡ੍ਢਾਮ ਨ’’ਨ੍ਤਿ ਚਿਨ੍ਤੇਤ੍ਵਾ ‘‘ਭਨ੍ਤੇ, ਮਾ ਤ੍ਵਂ ਇਧ ਵਸਿ, ਅਮ੍ਹੇ ਨਿਸ੍ਸਾਯ ਤੁਯ੍ਹਂ ਕਿਞ੍ਚਿ ਨਤ੍ਥੀ’’ਤਿ ਆਹਂਸੁ. ਸੋ ਤੇਹਿ ਨਿਕ੍ਕਡ੍ਢਿਤੋ ਪਤ੍ਤਚੀਵਰਮਾਦਾਯ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ‘‘ਪਾਪਿਚ੍ਛਾ, ਭਨ੍ਤੇ, ਸਾਰਿਪੁਤ੍ਤਮੋਗ੍ਗਲ੍ਲਾਨਾ, ਪਾਪਿਕਾਨਂ ਇਚ੍ਛਾਨਂ ਵਸਂ ਗਤਾ’’ਤਿ ਆਹ. ਅਥ ਨਂ ਸਤ੍ਥਾ ‘‘ਮਾ ਹੇਵਂ ਕੋਕਾਲਿਕ, ਅਵਚ, ਮਾ ਹੇਵਂ ਕੋਕਾਲਿਕ ਅਵਚ, ਪਸਾਦੇਹਿ ਕੋਕਾਲਿਕ, ਸਾਰਿਪੁਤ੍ਤਮੋਗ੍ਗਲ੍ਲਾਨੇਸੁ ਚਿਤ੍ਤਂ, ਤੇ ਪੇਸਲਾ ਭਿਕ੍ਖੂ’’ਤਿ ਵਾਰੇਤਿ. ਵਾਰਿਤੋਪਿ ਕੋਕਾਲਿਕੋ ‘‘ਤੁਮ੍ਹੇ, ਭਨ੍ਤੇ, ਤੁਮ੍ਹਾਕਂ ਅਗ੍ਗਸਾਵਕਾਨਂ ਸਦ੍ਦਹਥ, ਅਹਂ ਪਚ੍ਚਕ੍ਖਤੋ ਅਦ੍ਦਸਂ, ਪਾਪਿਚ੍ਛਾ ਏਤੇ ਪਟਿਚ੍ਛਨ੍ਨਕਮ੍ਮਨ੍ਤਾ ਦੁਸ੍ਸੀਲਾ’’ਤਿ ਵਤ੍ਵਾ ਯਾਵਤਤਿਯਂ ਸਤ੍ਥਾਰਾ ਵਾਰਿਤੋਪਿ ਤਥੇਵ ਵਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਤਸ੍ਸ ਪਕ੍ਕਨ੍ਤਮਤ੍ਤਸ੍ਸੇਵ ਸਕਲਸਰੀਰੇ ਸਾਸਪਮਤ੍ਤਾ ਪਿਲ਼ਕਾ ਉਟ੍ਠਹਿਤ੍ਵਾ ਅਨੁਪੁਬ੍ਬੇਨ ਵਡ੍ਢਿਤ੍ਵਾ ਬੇਲ਼ੁਵਪਕ੍ਕਮਤ੍ਤਾ ਹੁਤ੍ਵਾ ਭਿਜ੍ਜਿਤ੍ਵਾ ਪੁਬ੍ਬਲੋਹਿਤਾਨਿ ਪਗ੍ਘਰਿਂਸੁ. ਸੋ ਨਿਤ੍ਥੁਨਨ੍ਤੋ ਵੇਦਨਾਪ੍ਪਤ੍ਤੋ ਜੇਤਵਨਦ੍ਵਾਰਕੋਟ੍ਠਕੇ ਨਿਪਜ੍ਜਿ. ‘‘ਕੋਕਾਲਿਕੇਨ ਦ੍ਵੇ ਅਗ੍ਗਸਾਵਕਾ ਅਕ੍ਕੁਟ੍ਠਾ’’ਤਿ ਯਾਵ ਬ੍ਰਹ੍ਮਲੋਕਾ ਏਕਕੋਲਾਹਲਂ ਅਹੋਸਿ.

ਅਥਸ੍ਸ ਉਪਜ੍ਝਾਯੋ ਤੁਰੂ ਨਾਮ ਬ੍ਰਹ੍ਮਾ ਤਂ ਕਾਰਣਂ ਞਤ੍ਵਾ ‘‘ਥੇਰੇ ਖਮਾਪੇਸ੍ਸਾਮੀ’’ਤਿ ਆਗਨ੍ਤ੍ਵਾ ਆਕਾਸੇ ਠਤ੍ਵਾ ‘‘ਕੋਕਾਲਿਕ, ਫਰੁਸਂ ਤੇ ਕਮ੍ਮਂ ਕਤਂ, ਅਗ੍ਗਸਾਵਕੇ ਪਸਾਦੇਹੀ’’ਤਿ ਆਹ. ‘‘ਕੋ ਪਨ ਤ੍ਵਂ ਆਵੁਸੋ’’ਤਿ? ‘‘ਤੁਰੂ ਬ੍ਰਹ੍ਮਾ ਨਾਮਾਹ’’ਨ੍ਤਿ. ‘‘ਨਨੁ ਤ੍ਵਂ, ਆਵੁਸੋ, ਭਗਵਤਾ ਅਨਾਗਾਮੀਤਿ ਬ੍ਯਾਕਤੋ, ਅਨਾਗਾਮੀ ਚ ਅਨਾਵਤ੍ਤਿਧਮ੍ਮੋ ਅਸ੍ਮਾ ਲੋਕਾਤਿ ਵੁਤ੍ਤਂ, ਤ੍ਵਂ ਸਙ੍ਕਾਰਟ੍ਠਾਨੇ ਯਕ੍ਖੋ ਭਵਿਸ੍ਸਸੀ’’ਤਿ ਮਹਾਬ੍ਰਹ੍ਮਂ ਅਪਸਾਦੇਸਿ. ਸੋ ਤਂ ਅਤ੍ਤਨੋ ਵਚਨਂ ਗਾਹਾਪੇਤੁਂ ਅਸਕ੍ਕੋਨ੍ਤੋ ‘‘ਤਵ ਵਾਚਾਯ ਤ੍ਵਞ੍ਞੇਵ ਪਞ੍ਞਾਯਿਸ੍ਸਸੀ’’ਤਿ ਵਤ੍ਵਾ ਸੁਦ੍ਧਾਵਾਸਮੇਵ ਗਤੋ. ਕੋਕਾਲਿਕੋਪਿ ਕਾਲਂ ਕਤ੍ਵਾ ਪਦੁਮਨਿਰਯੇ ਉਪ੍ਪਜ੍ਜਿ. ਤਸ੍ਸ ਤਤ੍ਥ ਨਿਬ੍ਬਤ੍ਤਭਾਵਂ ਞਤ੍ਵਾ ਸਹਮ੍ਪਤਿਬ੍ਰਹ੍ਮਾ ਤਥਾਗਤਸ੍ਸ ਆਰੋਚੇਸਿ, ਸਤ੍ਥਾ ਭਿਕ੍ਖੂਨਂ ਆਰੋਚੇਸਿ. ਭਿਕ੍ਖੂ ਤਸ੍ਸ ਅਗੁਣਂ ਕਥੇਨ੍ਤਾ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਕੋਕਾਲਿਕੋ ਕਿਰ ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਅਕ੍ਕੋਸਿਤ੍ਵਾ ਅਤ੍ਤਨੋ ਮੁਖਂ ਨਿਸ੍ਸਾਯ ਪਦੁਮਨਿਰਯੇ ਉਪ੍ਪਨ੍ਨੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ ਕੋਕਾਲਿਕੋ ਵਚਨੇਨ ਹਤੋ ਅਤ੍ਤਨੋ ਮੁਖਂ ਨਿਸ੍ਸਾਯ ਦੁਕ੍ਖਂ ਅਨੁਭੋਤਿ, ਪੁਬ੍ਬੇਪਿ ਏਸ ਅਤ੍ਤਨੋ ਮੁਖਂ ਨਿਸ੍ਸਾਯ ਦੁਕ੍ਖਂ ਅਨੁਭੋਸਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਤਸ੍ਸ ਪੁਰੋਹਿਤੋ ਪਿਙ੍ਗਲੋ ਨਿਕ੍ਖਨ੍ਤਦਾਠੋ ਅਹੋਸਿ. ਤਸ੍ਸ ਬ੍ਰਾਹ੍ਮਣੀ ਅਞ੍ਞੇਨ ਬ੍ਰਾਹ੍ਮਣੇਨ ਸਦ੍ਧਿਂ ਅਤਿਚਰਿ, ਸੋਪਿ ਤਾਦਿਸੋਵ. ਪੁਰੋਹਿਤੋ ਬ੍ਰਾਹ੍ਮਣਿਂ ਪੁਨਪ੍ਪੁਨਂ ਵਾਰੇਨ੍ਤੋਪਿ ਵਾਰੇਤੁਂ ਅਸਕ੍ਕੋਨ੍ਤੋ ਚਿਨ੍ਤੇਸਿ ‘‘ਇਮਂ ਮਮ ਵੇਰਿਂ ਸਹਤ੍ਥਾ ਮਾਰੇਤੁਂ ਨ ਸਕ੍ਕਾ, ਉਪਾਯੇਨ ਨਂ ਮਾਰੇਸ੍ਸਾਮੀ’’ਤਿ. ਸੋ ਰਾਜਾਨਂ ਉਪਸਙ੍ਕਮਿਤ੍ਵਾ ਆਹ ‘‘ਮਹਾਰਾਜ, ਤਵ ਨਗਰਂ ਸਕਲਜਮ੍ਬੁਦੀਪੇ ਅਗ੍ਗਨਗਰਂ, ਤ੍ਵਂ ਅਗ੍ਗਰਾਜਾ, ਏਵਂ ਅਗ੍ਗਰਞ੍ਞੋ ਨਾਮ ਤਵ ਦਕ੍ਖਿਣਦ੍ਵਾਰਂ ਦੁਯੁਤ੍ਤਂ ਅਵਮਙ੍ਗਲ’’ਨ੍ਤਿ. ‘‘ਆਚਰਿਯ, ਇਦਾਨਿ ਕਿਂ ਕਾਤਬ੍ਬ’’ਨ੍ਤਿ? ‘‘ਮਙ੍ਗਲਂ ਕਤ੍ਵਾ ਯੋਜੇਤਬ੍ਬ’’ਨ੍ਤਿ. ‘‘ਕਿਂ ਲਦ੍ਧੁਂ ਵਟ੍ਟਤੀ’’ਤਿ. ‘‘ਪੁਰਾਣਦ੍ਵਾਰਂ ਹਾਰੇਤ੍ਵਾ ਮਙ੍ਗਲਯੁਤ੍ਤਾਨਿ ਦਾਰੂਨਿ ਗਹੇਤ੍ਵਾ ਨਗਰਪਰਿਗ੍ਗਾਹਕਾਨਂ ਭੂਤਾਨਂ ਬਲਿਂ ਦਤ੍ਵਾ ਮਙ੍ਗਲਨਕ੍ਖਤ੍ਤੇਨ ਪਤਿਟ੍ਠਾਪੇਤੁਂ ਵਟ੍ਟਤੀ’’ਤਿ. ‘‘ਤੇਨ ਹਿ ਏਵਂ ਕਰੋਥਾ’’ਤਿ. ਤਦਾ ਬੋਧਿਸਤ੍ਤੋ ਤਕ੍ਕਾਰਿਯੋ ਨਾਮ ਮਾਣਵੋ ਹੁਤ੍ਵਾ ਤਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਾਤਿ. ਪੁਰੋਹਿਤੋ ਪੁਰਾਣਦ੍ਵਾਰਂ ਹਾਰੇਤ੍ਵਾ ਨਵਂ ਨਿਟ੍ਠਾਪੇਤ੍ਵਾ ਰਾਜਾਨਂ ਆਹ – ‘‘ਨਿਟ੍ਠਿਤਂ, ਦੇਵ, ਦ੍ਵਾਰਂ, ਸ੍ਵੇ ਭਦ੍ਦਕਂ ਨਕ੍ਖਤ੍ਤਂ, ਤਂ ਅਨਤਿਕ੍ਕਮਿਤ੍ਵਾ ਬਲਿਂ ਕਤ੍ਵਾ ਦ੍ਵਾਰਂ ਪਤਿਟ੍ਠਾਪੇਤੁਂ ਵਟ੍ਟਤੀ’’ਤਿ. ‘‘ਆਚਰਿਯ, ਬਲਿਕਮ੍ਮਤ੍ਥਾਯ ਕਿਂ ਲਦ੍ਧੁਂ ਵਟ੍ਟਤੀ’’ਤਿ? ‘‘ਦੇਵ, ਮਹੇਸਕ੍ਖਂ ਦ੍ਵਾਰਂ ਮਹੇਸਕ੍ਖਾਹਿ ਦੇਵਤਾਹਿ ਪਰਿਗ੍ਗਹਿਤਂ, ਏਕਂ ਪਿਙ੍ਗਲਂ ਨਿਕ੍ਖਨ੍ਤਦਾਠਂ ਉਭਤੋਵਿਸੁਦ੍ਧਂ ਬ੍ਰਾਹ੍ਮਣਂ ਮਾਰੇਤ੍ਵਾ ਤਸ੍ਸ ਮਂਸਲੋਹਿਤੇਨ ਬਲਿਂ ਕਤ੍ਵਾ ਸਰੀਰਂ ਹੇਟ੍ਠਾ ਖਿਪਿਤ੍ਵਾ ਦ੍ਵਾਰਂ ਪਤਿਟ੍ਠਾਪੇਤਬ੍ਬਂ, ਏਵਂ ਤੁਮ੍ਹਾਕਞ੍ਚ ਨਗਰਸ੍ਸ ਚ ਵੁਡ੍ਢਿ ਭਵਿਸ੍ਸਤੀ’’ਤਿ. ‘‘ਸਾਧੁ ਆਚਰਿਯ, ਏਵਰੂਪਂ ਬ੍ਰਾਹ੍ਮਣਂ ਮਾਰੇਤ੍ਵਾ ਦ੍ਵਾਰਂ ਪਤਿਟ੍ਠਾਪੇਹੀ’’ਤਿ.

ਸੋ ਤੁਟ੍ਠਮਾਨਸੋ ‘‘ਸ੍ਵੇ ਪਚ੍ਚਾਮਿਤ੍ਤਸ੍ਸ ਪਿਟ੍ਠਿਂ ਪਸ੍ਸਿਸ੍ਸਾਮੀ’’ਤਿ ਉਸ੍ਸਾਹਜਾਤੋ ਅਤ੍ਤਨੋ ਗੇਹਂ ਗਨ੍ਤ੍ਵਾ ਮੁਖਂ ਰਕ੍ਖਿਤੁਂ ਅਸਕ੍ਕੋਨ੍ਤੋ ਤੁਰਿਤਤੁਰਿਤੋ ਭਰਿਯਂ ਆਹ – ‘‘ਪਾਪੇ ਚਣ੍ਡਾਲਿ ਇਤੋ ਪਟ੍ਠਾਯ ਕੇਨ ਸਦ੍ਧਿਂ ਅਭਿਰਮਿਸ੍ਸਸਿ, ਸ੍ਵੇ ਤੇ ਜਾਰਂ ਮਾਰੇਤ੍ਵਾ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ. ‘‘ਨਿਰਪਰਾਧਂ ਕਿਂਕਾਰਣਾ ਮਾਰੇਸ੍ਸਸੀ’’ਤਿ? ਰਾਜਾ ‘‘ਕਲ਼ਾਰਪਿਙ੍ਗਲਸ੍ਸ ਬ੍ਰਾਹ੍ਮਣਸ੍ਸ ਮਂਸਲੋਹਿਤੇਨ ਬਲਿਕਮ੍ਮਂ ਕਤ੍ਵਾ ਨਗਰਦ੍ਵਾਰਂ ਪਤਿਟ੍ਠਾਪੇਹੀ’’ਤਿ ਆਹ, ‘‘ਜਾਰੋ ਚ ਤੇ ਕਲ਼ਾਰਪਿਙ੍ਗਲੋ, ਤਂ ਮਾਰੇਤ੍ਵਾ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ. ਸਾ ਜਾਰਸ੍ਸ ਸਨ੍ਤਿਕਂ ਸਾਸਨਂ ਪਾਹੇਸਿ ‘‘ਰਾਜਾ ਕਿਰ ਕਲ਼ਾਰਪਿਙ੍ਗਲਂ ਬ੍ਰਾਹ੍ਮਣਂ ਮਾਰੇਤ੍ਵਾ ਬਲਿਂ ਕਾਤੁਕਾਮੋ, ਸਚੇ ਜੀਵਿਤੁਕਾਮੋ, ਅਞ੍ਞੇਪਿ ਤਯਾ ਸਦਿਸੇ ਬ੍ਰਾਹ੍ਮਣੇ ਗਹੇਤ੍ਵਾ ਕਾਲਸ੍ਸੇਵ ਪਲਾਯਸ੍ਸੂ’’ਤਿ. ਸੋ ਤਥਾ ਅਕਾਸਿ. ਤਂ ਨਗਰੇ ਪਾਕਟਂ ਅਹੋਸਿ, ਸਕਲਨਗਰਤੋ ਸਬ੍ਬੇ ਕਲ਼ਾਰਪਿਙ੍ਗਲਾ ਪਲਾਯਿਂਸੁ.

ਪੁਰੋਹਿਤੋ ਪਚ੍ਚਾਮਿਤ੍ਤਸ੍ਸ ਪਲਾਤਭਾਵਂ ਅਜਾਨਿਤ੍ਵਾ ਪਾਤੋਵ ਰਾਜਾਨਂ ਉਪਸਙ੍ਕਮਿਤ੍ਵਾ ‘‘ਦੇਵ, ਅਸੁਕਟ੍ਠਾਨੇ ਕਲ਼ਾਰਪਿਙ੍ਗਲੋ ਬ੍ਰਾਹ੍ਮਣੋ ਅਤ੍ਥਿ, ਤਂ ਗਣ੍ਹਾਪੇਥਾ’’ਤਿ ਆਹ. ਰਾਜਾ ਅਮਚ੍ਚੇ ਪੇਸੇਸਿ. ਤੇ ਤਂ ਅਪਸ੍ਸਨ੍ਤਾ ਆਗਨ੍ਤ੍ਵਾ ‘‘ਪਲਾਤੋ ਕਿਰਾ’’ਤਿ ਆਰੋਚੇਸੁਂ. ‘‘ਅਞ੍ਞਤ੍ਥ ਉਪਧਾਰੇਥਾ’’ਤਿ ਸਕਲਨਗਰਂ ਉਪਧਾਰੇਨ੍ਤਾਪਿ ਨ ਪਸ੍ਸਿਂਸੁ. ਤਤੋ ‘‘ਅਞ੍ਞਂ ਉਪਧਾਰੇਥਾ’’ਤਿ ਵੁਤ੍ਤੇ ‘‘ਦੇਵ, ਠਪੇਤ੍ਵਾ ਪੁਰੋਹਿਤਂ ਅਞ੍ਞੋ ਏਵਰੂਪੋ ਨਤ੍ਥੀ’’ਤਿ ਵਦਿਂਸੁ. ਪੁਰੋਹਿਤਂ ਨ ਸਕ੍ਕਾ ਮਾਰੇਤੁਨ੍ਤਿ. ‘‘ਦੇਵ, ਕਿਂ ਕਥੇਥ, ਪੁਰੋਹਿਤਸ੍ਸ ਕਾਰਣਾ ਅਜ੍ਜ ਦ੍ਵਾਰੇ ਅਪ੍ਪਤਿਟ੍ਠਾਪਿਤੇ ਨਗਰਂ ਅਗੁਤ੍ਤਂ ਭਵਿਸ੍ਸਤਿ, ਆਚਰਿਯੋ ਕਥੇਨ੍ਤੋ ‘‘ਅਜ੍ਜ ਨਕ੍ਖਤ੍ਤਂ ਅਤਿਕ੍ਕਮਿਤ੍ਵਾ ਇਤੋ ਸਂਵਚ੍ਛਰਚ੍ਚਯੇਨ ਨਕ੍ਖਤ੍ਤਂ ਲਭਿਸ੍ਸਤੀ’’ਤਿ ਕਥੇਸਿ, ਸਂਵਚ੍ਛਰਂ ਨਗਰੇ ਅਦ੍ਵਾਰਕੇ ਪਚ੍ਚਤ੍ਥਿਕਾਨਂ ਓਕਾਸੋ ਭਵਿਸ੍ਸਤਿ, ਇਮਂ ਮਾਰੇਤ੍ਵਾ ਅਞ੍ਞੇਨ ਬ੍ਯਤ੍ਤੇਨ ਬ੍ਰਾਹ੍ਮਣੇਨ ਬਲਿਕਮ੍ਮਂ ਕਾਰੇਤ੍ਵਾ ਦ੍ਵਾਰਂ ਪਤਿਟ੍ਠਾਪੇਸ੍ਸਾਮਾ’’ਤਿ. ‘‘ਅਤ੍ਥਿ ਪਨ ਅਞ੍ਞੋ ਆਚਰਿਯਸਦਿਸੋ ਪਣ੍ਡਿਤੋ ਬ੍ਰਾਹ੍ਮਣੋ’’ਤਿ? ‘‘ਅਤ੍ਥਿ ਦੇਵ, ਤਸ੍ਸ ਅਨ੍ਤੇਵਾਸੀ ਤਕ੍ਕਾਰਿਯਮਾਣਵੋ ਨਾਮ, ਤਸ੍ਸ ਪੁਰੋਹਿਤਟ੍ਠਾਨਂ ਦਤ੍ਵਾ ਮਙ੍ਗਲਂ ਕਰੋਥਾ’’ਤਿ.

ਰਾਜਾ ਤਂ ਪਕ੍ਕੋਸਾਪੇਤ੍ਵਾ ਸਮ੍ਮਾਨਂ ਕਾਰੇਤ੍ਵਾ ਪੁਰੋਹਿਤਟ੍ਠਾਨਂ ਦਤ੍ਵਾ ਤਥਾ ਕਾਤੁਂ ਆਣਾਪੇਸਿ. ਸੋ ਮਹਨ੍ਤੇਨ ਪਰਿਵਾਰੇਨ ਨਗਰਦ੍ਵਾਰਂ ਅਗਮਾਸਿ. ਪੁਰੋਹਿਤਂ ਰਾਜਾਨੁਭਾਵੇਨ ਬਨ੍ਧਿਤ੍ਵਾ ਆਨਯਿਂਸੁ. ਮਹਾਸਤ੍ਤੋ ਦ੍ਵਾਰਟ੍ਠਪਨਟ੍ਠਾਨੇ ਆਵਾਟਂ ਖਣਾਪੇਤ੍ਵਾ ਸਾਣਿਂ ਪਰਿਕ੍ਖਿਪਾਪੇਤ੍ਵਾ ਆਚਰਿਯੇਨ ਸਦ੍ਧਿਂ ਅਨ੍ਤੋਸਾਣਿਯਂ ਅਟ੍ਠਾਸਿ. ਆਚਰਿਯੋ ਆਵਾਟਂ ਓਲੋਕੇਤ੍ਵਾ ਅਤ੍ਤਨੋ ਪਤਿਟ੍ਠਂ ਅਲਭਨ੍ਤੋ ‘‘ਅਤ੍ਥੋ ਤਾਵ ਮੇ ਨਿਪ੍ਫਾਦਿਤੋ ਅਹੋਸਿ, ਬਾਲਤ੍ਤਾ ਪਨ ਮੁਖਂ ਰਕ੍ਖਿਤੁਂ ਅਸਕ੍ਕੋਨ੍ਤੋ ਵੇਗੇਨ ਪਾਪਿਤ੍ਥਿਯਾ ਕਥੇਸਿਂ, ਅਤ੍ਤਨਾਵ ਅਤ੍ਤਨੋ ਵਧੋ ਆਭਤੋ’’ਤਿ ਮਹਾਸਤ੍ਤਂ ਆਲਪਨ੍ਤੋ ਪਠਮਂ ਗਾਥਮਾਹ –

੧੦੪.

‘‘ਅਹਮੇਵ ਦੁਬ੍ਭਾਸਿਤਂ ਭਾਸਿ ਬਾਲੋ, ਭੇਕੋਵਰਞ੍ਞੇ ਅਹਿਮਵ੍ਹਾਯਮਾਨੋ;

ਤਕ੍ਕਾਰਿਯੇ ਸੋਬ੍ਭਮਿਮਂ ਪਤਾਮਿ, ਨ ਕਿਰੇਵ ਸਾਧੁ ਅਤਿਵੇਲਭਾਣੀ’’ਤਿ.

ਤਤ੍ਥ ਦੁਬ੍ਭਾਸਿਤਂ ਭਾਸੀਤਿ ਦੁਬ੍ਭਾਸਿਤਂ ਭਾਸਿਂ. ਭੇਕੋਵਾਤਿ ਯਥਾ ਅਰਞ੍ਞੇ ਮਣ੍ਡੂਕੋ ਵਸ੍ਸਨ੍ਤੋ ਅਤ੍ਤਨੋ ਖਾਦਕਂ ਅਹਿਂ ਅਵ੍ਹਾਯਮਾਨੋ ਦੁਬ੍ਭਾਸਿਤਂ ਭਾਸਤਿ ਨਾਮ, ਏਵਂ ਅਹਮੇਵ ਦੁਬ੍ਭਾਸਿਤਂ ਭਾਸਿਂ. ਤਕ੍ਕਾਰਿਯੇਤਿ ਤਸ੍ਸ ਨਾਮਂ, ਤਕ੍ਕਾਰਿਯਾਤਿ ਇਤ੍ਥਿਲਿਙ੍ਗਂ ਨਾਮਂ, ਤੇਨੇਵ ਤਂ ਆਲਪਨ੍ਤੋ ਏਵਮਾਹ.

ਤਂ ਸੁਤ੍ਵਾ ਮਹਾਸਤ੍ਤੋ ਦੁਤਿਯਂ ਗਾਥਮਾਹ –

੧੦੫.

‘‘ਪਪ੍ਪੋਤਿ ਮਚ੍ਚੋ ਅਤਿਵੇਲਭਾਣੀ, ਬਨ੍ਧਂ ਵਧਂ ਸੋਕਪਰਿਦ੍ਦਵਞ੍ਚ;

ਅਤ੍ਤਾਨਮੇਵ ਗਰਹਾਸਿ ਏਤ੍ਥ, ਆਚੇਰ ਯਂ ਤਂ ਨਿਖਣਨ੍ਤਿ ਸੋਬ੍ਭੇ’’ਤਿ.

ਤਤ੍ਥ ਅਤਿਵੇਲਭਾਣੀਤਿ ਵੇਲਾਤਿਕ੍ਕਨ੍ਤਂ ਪਮਾਣਾਤਿਕ੍ਕਨ੍ਤਂ ਕਤ੍ਵਾ ਕਥਨਂ ਨਾਮ ਨ ਸਾਧੁ, ਅਤਿਵੇਲਭਾਣੀ ਪੁਰਿਸੋ ਨ ਸਾਧੂਤਿ ਅਤ੍ਥੋ. ਸੋਕਪਰਿਦ੍ਦਵਞ੍ਚਾਤਿ ਆਚਰਿਯ, ਏਵਮੇਵ ਅਤਿਵੇਲਭਾਣੀ ਪੁਰਿਸੋ ਵਧਂ ਬਨ੍ਧਞ੍ਚ ਸੋਕਞ੍ਚ ਮਹਨ੍ਤੇਨ ਸਦ੍ਦੇਨ ਪਰਿਦੇਵਞ੍ਚ ਪਪ੍ਪੋਤਿ. ਗਰਹਾਸੀਤਿ ਪਰਂ ਅਗਰਹਿਤ੍ਵਾ ਅਤ੍ਤਾਨਂਯੇਵ ਗਰਹੇਯ੍ਯਾਸਿ. ਏਤ੍ਥਾਤਿ ਏਤਸ੍ਮਿਂ ਕਾਰਣੇ. ਆਚੇਰ ਯਂ ਤਨ੍ਤਿ ਆਚਰਿਯ, ਯੇਨ ਕਾਰਣੇਨ ਤਂ ਨਿਖਣਨ੍ਤਿ ਸੋਬ੍ਭੇ, ਤਂ ਤਯਾਵ ਕਤਂ, ਤਸ੍ਮਾ ਅਤ੍ਤਾਨਮੇਵ ਗਰਹੇਯ੍ਯਾਸੀਤਿ ਵਦਤਿ.

ਏਵਞ੍ਚ ਪਨ ਵਤ੍ਵਾ ‘‘ਆਚਰਿਯ, ਵਾਚਂ ਅਰਕ੍ਖਿਤ੍ਵਾ ਨ ਕੇਵਲਂ ਤ੍ਵਮੇਵ ਦੁਕ੍ਖਪ੍ਪਤ੍ਤੋ, ਅਞ੍ਞੋਪਿ ਦੁਕ੍ਖਪ੍ਪਤ੍ਤੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿਤ੍ਵਾ ਦਸ੍ਸੇਸਿ.

ਪੁਬ੍ਬੇ ਕਿਰ ਬਾਰਾਣਸਿਯਂ ਕਾਲ਼ੀ ਨਾਮ ਗਣਿਕਾ ਅਹੋਸਿ, ਤਸ੍ਸਾ ਤੁਣ੍ਡਿਲੋ ਨਾਮ ਭਾਤਾ. ਕਾਲ਼ੀ ਏਕਦਿਵਸਂ ਸਹਸ੍ਸਂ ਗਣ੍ਹਾਤਿ. ਤੁਣ੍ਡਿਲੋ ਪਨ ਇਤ੍ਥਿਧੁਤ੍ਤੋ ਸੁਰਾਧੁਤ੍ਤੋ ਅਕ੍ਖਧੁਤ੍ਤੋ ਅਹੋਸਿ. ਸਾ ਤਸ੍ਸ ਧਨਂ ਦੇਤਿ, ਸੋ ਲਦ੍ਧਂ ਲਦ੍ਧਂ ਵਿਨਾਸੇਤਿ. ਸਾ ਤਂ ਵਾਰੇਨ੍ਤੀਪਿ ਵਾਰੇਤੁਂ ਨਾਸਕ੍ਖਿ. ਸੋ ਏਕਦਿਵਸਂ ਜੂਤਪਰਾਜਿਤੋ ਨਿਵਤ੍ਥਵਤ੍ਥਾਨਿ ਦਤ੍ਵਾ ਕਟਸਾਰਕਖਣ੍ਡਂ ਨਿਵਾਸੇਤ੍ਵਾ ਤਸ੍ਸਾ ਗੇਹਂ ਆਗਮਿ. ਤਾਯ ਚ ਦਾਸਿਯੋ ਆਣਤ੍ਤਾ ਹੋਨ੍ਤਿ ‘‘ਤੁਣ੍ਡਿਲਸ੍ਸ ਆਗਤਕਾਲੇ ਕਿਞ੍ਚਿ ਅਦਤ੍ਵਾ ਗੀਵਾਯਂ ਨਂ ਗਹੇਤ੍ਵਾ ਨੀਹਰੇਯ੍ਯਾਥਾ’’ਤਿ. ਤਾ ਤਥਾ ਕਰਿਂਸੁ. ਸੋ ਦ੍ਵਾਰਮੂਲੇ ਰੋਦਨ੍ਤੋ ਅਟ੍ਠਾਸਿ.

ਅਥੇਕੋ ਸੇਟ੍ਠਿਪੁਤ੍ਤੋ ਨਿਚ੍ਚਕਾਲਂ ਕਾਲ਼ਿਯਾ ਸਹਸ੍ਸਂ ਆਹਰਾਪੇਨ੍ਤੋ ਦਿਸ੍ਵਾ ‘‘ਕਸ੍ਮਾ ਤੁਣ੍ਡਿਲ ਰੋਦਸੀ’’ਤਿ ਪੁਚ੍ਛਿ. ‘‘ਸਾਮਿ, ਜੂਤਪਰਾਜਿਤੋ ਮਮ ਭਗਿਨਿਯਾ ਸਨ੍ਤਿਕਂ ਆਗਤੋਮ੍ਹਿ, ਤਂ ਮਂ ਦਾਸਿਯੋ ਗੀਵਾਯਂ ਗਹੇਤ੍ਵਾ ਨੀਹਰਿਂਸੂ’’ਤਿ. ‘‘ਤੇਨ ਹਿ ਤਿਟ੍ਠ, ਭਗਿਨਿਯਾ ਤੇ ਕਥੇਸ੍ਸਾਮੀ’’ਤਿ ਸੋ ਗਨ੍ਤ੍ਵਾ ‘‘ਭਾਤਾ ਤੇ ਕਟਸਾਰਕਖਣ੍ਡਂ ਨਿਵਾਸੇਤ੍ਵਾ ਦ੍ਵਾਰਮੂਲੇ ਠਿਤੋ, ਵਤ੍ਥਾਨਿਸ੍ਸ ਕਿਮਤ੍ਥਂ ਨ ਦੇਸੀ’’ਤਿ ਆਹ. ‘‘ਅਹਂ ਤਾਵ ਨ ਦੇਮਿ, ਸਚੇ ਪਨ ਤੇ ਸਿਨੇਹੋ ਅਤ੍ਥਿ, ਤ੍ਵਂ ਦੇਹੀ’’ਤਿ. ਤਸ੍ਮਿਂ ਪਨ ਗਣਿਕਾਯ ਘਰੇ ਇਦਂਚਾਰਿਤ੍ਤਂ – ਆਭਤਸਹਸ੍ਸਤੋ ਪਞ੍ਚਸਤਾਨਿ ਗਣਿਕਾਯ ਹੋਨ੍ਤਿ, ਪਞ੍ਚਸਤਾਨਿ ਵਤ੍ਥਗਨ੍ਧਮਾਲਮੂਲਾਨਿ ਹੋਨ੍ਤਿ. ਆਗਤਪੁਰਿਸਾ ਤਸ੍ਮਿਂ ਘਰੇ ਲਦ੍ਧਵਤ੍ਥਾਨਿ ਨਿਵਾਸੇਤ੍ਵਾ ਰਤ੍ਤਿਂ ਵਸਿਤ੍ਵਾ ਪੁਨਦਿਵਸੇ ਗਚ੍ਛਨ੍ਤਾ ਆਭਤਵਤ੍ਥਾਨੇਵ ਨਿਵਾਸੇਤ੍ਵਾ ਗਚ੍ਛਨ੍ਤਿ. ਤਸ੍ਮਾ ਸੋ ਸੇਟ੍ਠਿਪੁਤ੍ਤੋ ਤਾਯ ਦਿਨ੍ਨਵਤ੍ਥਾਨਿ ਨਿਵਾਸੇਤ੍ਵਾ ਅਤ੍ਤਨੋ ਸਾਟਕੇ ਤੁਣ੍ਡਿਲਸ੍ਸ ਦਾਪੇਸਿ. ਸੋ ਨਿਵਾਸੇਤ੍ਵਾ ਨਦਨ੍ਤੋ ਗਜ੍ਜਨ੍ਤੋ ਗਨ੍ਤ੍ਵਾ ਸੁਰਾਗੇਹਂ ਪਾਵਿਸਿ. ਕਾਲ਼ੀਪਿ ਦਾਸਿਯੋ ਆਣਾਪੇਸਿ ‘‘ਸ੍ਵੇ ਏਤਸ੍ਸ ਗਮਨਕਾਲੇ ਵਤ੍ਥਾਨਿ ਅਚ੍ਛਿਨ੍ਦੇਯ੍ਯਾਥਾ’’ਤਿ. ਤਾ ਤਸ੍ਸ ਨਿਕ੍ਖਮਨਕਾਲੇ ਇਤੋ ਚਿਤੋ ਚ ਉਪਧਾਵਿਤ੍ਵਾ ਵਿਲੁਮ੍ਪਮਾਨਾ ਸਾਟਕੇ ਗਹੇਤ੍ਵਾ ‘‘ਇਦਾਨਿ ਯਾਹਿ ਕੁਮਾਰਾ’’ਤਿ ਨਗ੍ਗਂ ਕਤ੍ਵਾ ਵਿਸ੍ਸਜ੍ਜੇਸੁਂ. ਸੋ ਨਗ੍ਗੋਵ ਨਿਕ੍ਖਮਿ. ਜਨੋ ਪਰਿਹਾਸਂ ਕਰੋਤਿ. ਸੋ ਲਜ੍ਜਿਤ੍ਵਾ ‘‘ਮਯਾਵੇਤਂ ਕਤਂ, ਅਹਮੇਵ ਅਤ੍ਤਨੋ ਮੁਖਂ ਰਕ੍ਖਿਤੁਂ ਨਾਸਕ੍ਖਿ’’ਨ੍ਤਿ ਪਰਿਦੇਵਿ. ਇਦਂ ਤਾਵ ਦਸ੍ਸੇਤੁਂ ਤਤਿਯਂ ਗਾਥਮਾਹ –

੧੦੬.

‘‘ਕਿਮੇਵਹਂ ਤੁਣ੍ਡਿਲਮਨੁਪੁਚ੍ਛਿਂ, ਕਰੇਯ੍ਯ ਸਂ ਭਾਤਰਂ ਕਾਲ਼ਿਕਾਯਂ;

ਨਗ੍ਗੋਵਹਂ ਵਤ੍ਥਯੁਗਞ੍ਚ ਜੀਨੋ, ਅਯਮ੍ਪਿ ਅਤ੍ਥੋ ਬਹੁਤਾਦਿਸੋਵਾ’’ਤਿ.

ਤਤ੍ਥ ਬਹੁਤਾਦਿਸੋਵਾਤਿ ਸੇਟ੍ਠਿਪੁਤ੍ਤੋ ਹਿ ਅਤ੍ਤਨਾ ਕਤੇਨ ਦੁਕ੍ਖਂ ਪਤ੍ਤੋ, ਤ੍ਵਮ੍ਪਿ ਤਸ੍ਮਾ ਅਯਮ੍ਪਿ ਤੁਯ੍ਹਂ ਦੁਕ੍ਖਪ੍ਪਤ੍ਤਿ ਅਤ੍ਥੋ. ਬਹੂਹਿ ਕਾਰਣੇਹਿ ਤਾਦਿਸੋਵ.

ਅਪਰੋਪਿ ਬਾਰਾਣਸਿਯਂ ਅਜਪਾਲਾਨਂ ਪਮਾਦੇਨ ਗੋਚਰਭੂਮਿਯਂ ਦ੍ਵੀਸੁ ਮੇਣ੍ਡੇਸੁ ਯੁਜ੍ਝਨ੍ਤੇਸੁ ਏਕੋ ਕੁਲਿਙ੍ਗਸਕੁਣੋ ‘‘ਇਮੇ ਦਾਨਿ ਭਿਨ੍ਨੇਹਿ ਸੀਸੇਹਿ ਮਰਿਸ੍ਸਨ੍ਤਿ, ਵਾਰੇਸ੍ਸਾਮਿ ਤੇਤਿ ਮਾਤੁਲਾ ਮਾ ਯੁਜ੍ਝਥਾ’’ਤਿ ਵਾਰੇਤ੍ਵਾ ਤੇਸਂ ਕਥਂ ਅਗ੍ਗਹੇਤ੍ਵਾ ਯੁਜ੍ਝਨ੍ਤਾਨਞ੍ਞੇਵ ਪਿਟ੍ਠਿਯਮ੍ਪਿ ਸੀਸੇਪਿ ਨਿਸੀਦਿਤ੍ਵਾ ਯਾਚਿਤ੍ਵਾ ਵਾਰੇਤੁਂ ਅਸਕ੍ਕੋਨ੍ਤੋ ‘‘ਤੇਨ ਹਿ ਮਂ ਮਾਰੇਤ੍ਵਾ ਯੁਜ੍ਝਥਾ’’ਤਿ ਉਭਿਨ੍ਨਮ੍ਪਿ ਸੀਸਨ੍ਤਰਂ ਪਾਵਿਸਿ. ਤੇ ਅਞ੍ਞਮਞ੍ਞਂ ਯੁਜ੍ਝਿਂਸੁਯੇਵ. ਸੋ ਸਣ੍ਹਕਰਣਿਯਂ ਪਿਸਿਤੋ ਵਿਯ ਅਤ੍ਤਨਾ ਕਤੇਨੇਵ ਵਿਨਾਸਂ ਪਤ੍ਤੋ. ਇਦਮ੍ਪਿ ਅਪਰਂ ਕਾਰਣਂ ਦਸ੍ਸੇਤੁਂ ਚਤੁਤ੍ਥਂ ਗਾਥਮਾਹ –

੧੦੭.

‘‘ਯੋ ਯੁਜ੍ਝਮਾਨਾਨਮਯੁਜ੍ਝਮਾਨੋ, ਮੇਣ੍ਡਨ੍ਤਰਂ ਅਚ੍ਚੁਪਤੀ ਕੁਲਿਙ੍ਗੋ;

ਸੋ ਪਿਂਸਿਤੋ ਮੇਣ੍ਡਸਿਰੇਹਿ ਤਤ੍ਥ, ਅਯਮ੍ਪਿ ਅਤ੍ਥੋ ਬਹੁਤਾਦਿਸੋਵਾ’’ਤਿ.

ਤਤ੍ਥ ਮੇਣ੍ਡਨ੍ਤਰਨ੍ਤਿ ਮੇਣ੍ਡਾਨਂ ਅਨ੍ਤਰਂ. ਅਚ੍ਚੁਪਤੀਤਿ ਅਤਿਗਨ੍ਤ੍ਵਾ ਉਪ੍ਪਤਿ, ਆਕਾਸੇ ਸੀਸਾਨਂ ਵੇਮਜ੍ਝੇ ਅਟ੍ਠਾਸੀਤਿ ਅਤ੍ਥੋ. ਪਿਂਸਿਤੋਤਿ ਪੀਲ਼ਿਤੋ.

ਅਪਰੇਪਿ ਬਾਰਾਣਸਿਵਾਸਿਨੋ ਗੋਪਾਲਕਾ ਫਲਿਤਂ ਤਾਲਰੁਕ੍ਖਂ ਦਿਸ੍ਵਾ ਏਕਂ ਤਾਲਫਲਤ੍ਥਾਯ ਰੁਕ੍ਖਂ ਆਰੋਪੇਸੁਂ. ਤਸ੍ਮਿਂ ਫਲਾਨਿ ਪਾਤੇਨ੍ਤੇ ਏਕੋ ਕਣ੍ਹਸਪ੍ਪੋ ਵਮ੍ਮਿਕਾ ਨਿਕ੍ਖਮਿਤ੍ਵਾ ਤਾਲਰੁਕ੍ਖਂ ਆਰੁਹਿ. ਹੇਟ੍ਠਾ ਪਤਿਟ੍ਠਿਤਾ ਦਣ੍ਡੇਹਿ ਪਹਰਨ੍ਤਾ ਨਿਵਾਰੇਤੁਂ ਨਾਸਕ੍ਖਿਂਸੁ. ਤੇ ‘‘ਸਪ੍ਪੋ ਤਾਲਂ ਅਭਿਰੁਹਤੀ’’ਤਿ ਇਤਰਸ੍ਸ ਆਚਿਕ੍ਖਿਂਸੁ. ਸੋ ਭੀਤੋ ਮਹਾਵਿਰਵਂ ਵਿਰਵਿ. ਹੇਟ੍ਠਾ ਠਿਤਾ ਏਕਂ ਥਿਰਸਾਟਕਂ ਚਤੂਸੁ ਕਣ੍ਣੇਸੁ ਗਹੇਤ੍ਵਾ ‘‘ਇਮਸ੍ਮਿਂ ਸਾਟਕੇ ਪਤਾ’’ਤਿ ਆਹਂਸੁ. ਸੋ ਪਤਨ੍ਤੋ ਚਤੁਨ੍ਨਮ੍ਪਿ ਅਨ੍ਤਰੇ ਸਾਟਕਮਜ੍ਝੇ ਪਤਿ. ਤਸ੍ਸ ਪਨ ਪਾਤਨਵੇਗੇਨ ਤੇ ਸਨ੍ਧਾਰੇਤੁਂ ਅਸਕ੍ਕੋਨ੍ਤਾ ਅਞ੍ਞਮਞ੍ਞਂ ਸੀਸੇਹਿ ਪਹਰਿਤ੍ਵਾ ਭਿਨ੍ਨੇਹਿ ਸੀਸੇਹਿ ਜੀਵਿਤਕ੍ਖਯਂ ਪਤ੍ਤਾ. ਇਦਮ੍ਪਿ ਕਾਰਣਂ ਦਸ੍ਸੇਨ੍ਤੋ ਪਞ੍ਚਮਂ ਗਾਥਮਾਹ –

੧੦੮.

‘‘ਚਤੁਰੋ ਜਨਾ ਪੋਤ੍ਥਕਮਗ੍ਗਹੇਸੁਂ, ਏਕਞ੍ਚ ਪੋਸਂ ਅਨੁਰਕ੍ਖਮਾਨਾ;

ਸਬ੍ਬੇਵ ਤੇ ਭਿਨ੍ਨਸਿਰਾ ਸਯਿਂਸੁ, ਅਯਮ੍ਪਿ ਅਤ੍ਥੋ ਬਹੁਤਾਦਿਸੋਵਾ’’ਤਿ.

ਤਤ੍ਥ ਪੋਤ੍ਥਕਨ੍ਤਿ ਸਾਣਸਾਟਕਂ. ਸਬ੍ਬੇਵ ਤੇਤਿ ਤੇਪਿ ਚਤ੍ਤਾਰੋ ਜਨਾ ਅਤ੍ਤਨਾ ਕਤੇਨੇਵ ਭਿਨ੍ਨਸੀਸਾ ਸਯਿਂਸੁ.

ਅਪਰੇਪਿ ਬਾਰਾਣਸਿਵਾਸਿਨੋ ਏਲ਼ਕਚੋਰਾ ਰਤ੍ਤਿਂ ਏਕਂ ਅਜਂ ਥੇਨੇਤ੍ਵਾ ‘‘ਦਿਵਾ ਅਰਞ੍ਞੇ ਖਾਦਿਸ੍ਸਾਮਾ’’ਤਿ ਤਸ੍ਸਾ ਅਵਸ੍ਸਨਤ੍ਥਾਯ ਮੁਖਂ ਬਨ੍ਧਿਤ੍ਵਾ ਵੇਲ਼ੁਗੁਮ੍ਬੇ ਠਪੇਸੁਂ. ਪੁਨਦਿਵਸੇ ਤਂ ਖਾਦਿਤੁਂ ਗਚ੍ਛਨ੍ਤਾ ਆਵੁਧਂ ਪਮੁਸ੍ਸਿਤ੍ਵਾ ਅਗਮਂਸੁ. ਤੇ ‘‘ਅਜਂ ਮਾਰੇਤ੍ਵਾ ਮਂਸਂ ਪਚਿਤ੍ਵਾ ਖਾਦਿਸ੍ਸਾਮ, ਆਹਰਥਾਵੁਧ’’ਨ੍ਤਿ ਏਕਸ੍ਸਪਿ ਹਤ੍ਥੇ ਆਵੁਧਂ ਅਦਿਸ੍ਵਾ ‘‘ਵਿਨਾ ਆਵੁਧੇਨ ਏਤਂ ਮਾਰੇਤ੍ਵਾਪਿ ਮਂਸਂ ਗਹੇਤੁਂ ਨ ਸਕ੍ਕਾ, ਵਿਸ੍ਸਜ੍ਜੇਥ ਨਂ, ਪੁਞ੍ਞਮਸ੍ਸ ਅਤ੍ਥੀ’’ਤਿ ਵਿਸ੍ਸਜ੍ਜੇਸੁਂ. ਤਦਾ ਏਕੋ ਨਲ਼ਕਾਰੋ ਵੇਲ਼ੁਂ ਗਹੇਤ੍ਵਾ ‘‘ਪੁਨਪਿ ਆਗਨ੍ਤ੍ਵਾ ਗਹੇਸ੍ਸਾਮੀ’’ਤਿ ਨਲ਼ਕਾਰਸਤ੍ਥਂ ਵੇਲ਼ੁਗੁਮ੍ਬਨ੍ਤਰੇ ਠਪੇਤ੍ਵਾ ਪਕ੍ਕਾਮਿ. ਅਜਾ ‘‘ਮੁਤ੍ਤਾਮ੍ਹੀ’’ਤਿ ਤੁਸ੍ਸਿਤ੍ਵਾ ਵੇਲ਼ੁਮੂਲੇ ਕੀਲ਼ਮਾਨਾ ਪਚ੍ਛਿਮਪਾਦੇਹਿ ਪਹਰਿਤ੍ਵਾ ਤਂ ਸਤ੍ਥਂ ਪਾਤੇਸਿ. ਚੋਰਾ ਸਤ੍ਥਸਦ੍ਦਂ ਸੁਤ੍ਵਾ ਉਪਧਾਰੇਨ੍ਤਾ ਤਂ ਦਿਸ੍ਵਾ ਤੁਟ੍ਠਮਾਨਸਾ ਅਜਂ ਮਾਰੇਤ੍ਵਾ ਮਂਸਂ ਖਾਦਿਂਸੁ. ਇਤਿ ‘‘ਸਾਪਿ ਅਜਾ ਅਤ੍ਤਨਾ ਕਤੇਨੇਵ ਮਤਾ’’ਤਿ ਦਸ੍ਸੇਤੁਂ ਛਟ੍ਠਂ ਗਾਥਮਾਹ –

੧੦੯.

‘‘ਅਜਾ ਯਥਾ ਵੇਲ਼ੁਗੁਮ੍ਬਸ੍ਮਿਂ ਬਦ੍ਧਾ, ਅਵਕ੍ਖਿਪਨ੍ਤੀ ਅਸਿਮਜ੍ਝਗਚ੍ਛਿ;

ਤੇਨੇਵ ਤਸ੍ਸਾ ਗਲਕਾਵਕਨ੍ਤਂ, ਅਯਮ੍ਪਿ ਅਤ੍ਥੋ ਬਹੁਤਾਦਿਸੋਵਾ’’ਤਿ.

ਤਤ੍ਥ ਅਵਕ੍ਖਿਪਨ੍ਤੀਤਿ ਕੀਲ਼ਮਾਨਾ ਪਚ੍ਛਿਮਪਾਦੇ ਖਿਪਨ੍ਤੀ.

ਏਵਞ੍ਚ ਪਨ ਵਤ੍ਵਾ ‘‘ਅਤ੍ਤਨੋ ਵਚਨਂ ਰਕ੍ਖਿਤ੍ਵਾ ਮਿਤਭਾਣਿਨੋ ਨਾਮ ਮਰਣਦੁਕ੍ਖਾ ਮੁਚ੍ਚਨ੍ਤੀ’’ਤਿ ਦਸ੍ਸੇਤ੍ਵਾ ਕਿਨ੍ਨਰਵਤ੍ਥੁਂ ਆਹਰਿ.

ਬਾਰਾਣਸਿਵਾਸੀ ਕਿਰੇਕੋ ਲੁਦ੍ਦਕੋ ਹਿਮਵਨ੍ਤਂ ਗਨ੍ਤ੍ਵਾ ਏਕੇਨੁਪਾਯੇਨ ਜਯਮ੍ਪਤਿਕੇ ਦ੍ਵੇ ਕਿਨ੍ਨਰੇ ਗਹੇਤ੍ਵਾ ਆਨੇਤ੍ਵਾ ਰਞ੍ਞੋ ਅਦਾਸਿ. ਰਾਜਾ ਅਦਿਟ੍ਠਪੁਬ੍ਬੇ ਕਿਨ੍ਨਰੇ ਦਿਸ੍ਵਾ ਤੁਸ੍ਸਿਤ੍ਵਾ ‘‘ਲੁਦ੍ਦ, ਇਮੇਸਂ ਕੋ ਗੁਣੋ’’ਤਿ ਪੁਚ੍ਛਿ. ‘‘ਦੇਵ, ਏਤੇ ਮਧੁਰੇਨ ਸਦ੍ਦੇਨ ਗਾਯਨ੍ਤਿ, ਮਨੁਞ੍ਞਂ ਨਚ੍ਚਨ੍ਤਿ, ਮਨੁਸ੍ਸਾ ਏਵਂ ਗਾਯਿਤੁਞ੍ਚ ਨਚ੍ਚਿਤੁਞ੍ਚ ਨ ਜਾਨਨ੍ਤੀ’’ਤਿ. ਰਾਜਾ ਲੁਦ੍ਦਸ੍ਸ ਬਹੁਂ ਧਨਂ ਦਤ੍ਵਾ ਕਿਨ੍ਨਰੇ ‘‘ਗਾਯਥ ਨਚ੍ਚਥਾ’’ਤਿ ਆਹ. ਕਿਨ੍ਨਰਾ ‘‘ਸਚੇ ਮਯਂ ਗਾਯਨ੍ਤਾ ਬ੍ਯਞ੍ਜਨਂ ਪਰਿਪੁਣ੍ਣਂ ਕਾਤੁਂ ਨ ਸਕ੍ਖਿਸ੍ਸਾਮ, ਦੁਗ੍ਗੀਤਂ ਹੋਤਿ, ਅਮ੍ਹੇ ਗਰਹਿਸ੍ਸਨ੍ਤਿ ਵਧਿਸ੍ਸਨ੍ਤਿ, ਬਹੁਂ ਕਥੇਨ੍ਤਾਨਞ੍ਚ ਪਨ ਮੁਸਾਵਾਦੋਪਿ ਹੋਤੀ’’ਤਿ ਮੁਸਾਵਾਦਭਯੇਨ ਰਞ੍ਞਾ ਪੁਨਪ੍ਪੁਨਂ ਵੁਤ੍ਤਾਪਿ ਨ ਗਾਯਿਂਸੁ ਨ ਨਚ੍ਚਿਂਸੁ. ਰਾਜਾ ਕੁਜ੍ਝਿਤ੍ਵਾ ‘‘ਇਮੇ ਮਾਰੇਤ੍ਵਾ ਮਂਸਂ ਪਚਿਤ੍ਵਾ ਆਹਰਥਾ’’ਤਿ ਆਣਾਪੇਨ੍ਤੋ ਸਤ੍ਤਮਂ ਗਾਥਮਾਹ –

੧੧੦.

‘‘ਇਮੇ ਨ ਦੇਵਾ ਨ ਗਨ੍ਧਬ੍ਬਪੁਤ੍ਤਾ, ਮਿਗਾ ਇਮੇ ਅਤ੍ਥਵਸਂ ਗਤਾ ਮੇ;

ਏਕਞ੍ਚ ਨਂ ਸਾਯਮਾਸੇ ਪਚਨ੍ਤੁ, ਏਕਂ ਪੁਨਪ੍ਪਾਤਰਾਸੇ ਪਚਨ੍ਤੂ’’ਤਿ.

ਤਤ੍ਥ ਮਿਗਾ ਇਮੇਤਿ ਇਮੇ ਸਚੇ ਦੇਵਾ ਗਨ੍ਧਬ੍ਬਾ ਵਾ ਭਵੇਯ੍ਯੁਂ, ਨਚ੍ਚੇਯ੍ਯੁਞ੍ਚੇਵ ਗਾਯੇਯ੍ਯੁਞ੍ਚ, ਇਮੇ ਪਨ ਮਿਗਾ ਤਿਰਚ੍ਛਾਨਗਤਾ. ਅਤ੍ਥਵਸਂ ਗਤਾ ਮੇਤਿ ਅਤ੍ਥਂ ਪਚ੍ਚਾਸੀਸਨ੍ਤੇਨ ਲੁਦ੍ਦੇਨ ਆਨੀਤਤ੍ਤਾ ਅਤ੍ਥਵਸੇਨ ਮਮ ਹਤ੍ਥਂ ਗਤਾ. ਏਤੇਸੁ ਏਕਂ ਸਾਯਮਾਸੇ, ਏਕਂ ਪਾਤਰਾਸੇ ਪਚਨ੍ਤੂਤਿ.

ਕਿਨ੍ਨਰੀ ਚਿਨ੍ਤੇਸਿ ‘‘ਰਾਜਾ ਕੁਦ੍ਧੋ ਨਿਸ੍ਸਂਸਯਂ ਮਾਰੇਸ੍ਸਤਿ, ਇਦਾਨਿ ਕਥੇਤੁਂ ਕਾਲੋ’’ਤਿ ਅਟ੍ਠਮਂ ਗਾਥਮਾਹ –

੧੧੧.

‘‘ਸਤਂ ਸਹਸ੍ਸਾਨਿ ਦੁਭਾਸਿਤਾਨਿ, ਕਲਮ੍ਪਿ ਨਾਗ੍ਘਨ੍ਤਿ ਸੁਭਾਸਿਤਸ੍ਸ;

ਦੁਬ੍ਭਾਸਿਤਂ ਸਙ੍ਕਮਾਨੋ ਕਿਲੇਸੋ, ਤਸ੍ਮਾ ਤੁਣ੍ਹੀ ਕਿਮ੍ਪੁਰਿਸਾ ਨ ਬਾਲ੍ਯਾ’’ਤਿ.

ਤਤ੍ਥ ਸਙ੍ਕਮਾਨੋ ਕਿਲੇਸੋਤਿ ਕਦਾਚਿ ਅਹਂ ਭਾਸਮਾਨੋ ਦੁਬ੍ਭਾਸਿਤਂ ਭਾਸੇਯ੍ਯਂ, ਏਵਂ ਦੁਬ੍ਭਾਸਿਤਂ ਸਙ੍ਕਮਾਨੋ ਕਿਲਿਸ੍ਸਤਿ ਕਿਲਮਤਿ. ਤਸ੍ਮਾਤਿ ਤੇਨ ਕਾਰਣੇਨ ਤੁਮ੍ਹਾਕਂ ਨ ਗਾਯਿਂ, ਨ ਬਾਲਭਾਵੇਨਾਤਿ.

ਰਾਜਾ ਕਿਨ੍ਨਰਿਯਾ ਤੁਸ੍ਸਿਤ੍ਵਾ ਅਨਨ੍ਤਰਂ ਗਾਥਮਾਹ –

੧੧੨.

‘‘ਯਾ ਮੇਸਾ ਬ੍ਯਾਹਾਸਿ ਪਮੁਞ੍ਚਥੇਤਂ, ਗਿਰਿਞ੍ਚ ਨਂ ਹਿਮਵਨ੍ਤਂ ਨਯਨ੍ਤੁ;

ਇਮਞ੍ਚ ਖੋ ਦੇਨ੍ਤੁ ਮਹਾਨਸਾਯ, ਪਾਤੋਵ ਨਂ ਪਾਤਰਾਸੇ ਪਚਨ੍ਤੂ’’ਤਿ.

ਤਤ੍ਥ ਯਾ ਮੇਸਾਤਿ ਯਾ ਮੇ ਏਸਾ. ਦੇਨ੍ਤੂਤਿ ਮਹਾਨਸਤ੍ਥਾਯ ਦੇਨ੍ਤੁ.

ਕਿਨ੍ਨਰੋ ਰਞ੍ਞੋ ਵਚਨਂ ਸੁਤ੍ਵਾ ‘‘ਅਯਂ ਮਂ ਅਕਥੇਨ੍ਤਂ ਅਵਸ੍ਸਂ ਮਾਰੇਸ੍ਸਤਿ, ਇਦਾਨਿ ਕਥੇਤੁਂ ਵਟ੍ਟਤੀ’’ਤਿ ਇਤਰਂ ਗਾਥਮਾਹ –

੧੧੩.

‘‘ਪਜ੍ਜੁਨ੍ਨਨਾਥਾ ਪਸਵੋ, ਪਸੁਨਾਥਾ ਅਯਂ ਪਜਾ;

ਤ੍ਵਂ ਨਾਥੋਸਿ ਮਹਾਰਾਜ, ਨਾਥੋਹਂ ਭਰਿਯਾਯ ਮੇ;

ਦ੍ਵਿਨ੍ਨਮਞ੍ਞਤਰਂ ਞਤ੍ਵਾ, ਮੁਤ੍ਤੋ ਗਚ੍ਛੇਯ੍ਯ ਪਬ੍ਬਤ’’ਨ੍ਤਿ.

ਤਤ੍ਥ ਪਜ੍ਜੁਨ੍ਨਨਾਥਾ ਪਸਵੋਤਿ ਤਿਣਭਕ੍ਖਾ ਪਸਵੋ ਮੇਘਨਾਥਾ ਨਾਮ. ਪਸੁਨਾਥਾ ਅਯਂ ਪਜਾਤਿ ਅਯਂ ਪਨ ਮਨੁਸ੍ਸਪਜਾ ਪਞ੍ਚਗੋਰਸੇਨ ਉਪਜੀਵਨ੍ਤੀ ਪਸੁਨਾਥਾ ਪਸੁਪਤਿਟ੍ਠਾ. ਤ੍ਵਂ ਨਾਥੋਸੀਤਿ ਤ੍ਵਂ ਮਮ ਪਤਿਟ੍ਠਾ ਅਸਿ. ਨਾਥੋਹਨ੍ਤਿ ਮਮ ਭਰਿਯਾਯ ਅਹਂ ਨਾਥੋ, ਅਹਮਸ੍ਸਾ ਪਤਿਟ੍ਠਾ. ਦ੍ਵਿਨ੍ਨਮਞ੍ਞਤਰਂ ਞਤ੍ਵਾ, ਮੁਤ੍ਤੋ ਗਚ੍ਛੇਯ੍ਯ ਪਬ੍ਬਤਨ੍ਤਿ ਅਮ੍ਹਾਕਂ ਦ੍ਵਿਨ੍ਨਂ ਅਨ੍ਤਰੇ ਏਕੋ ਏਕਂ ਮਤਂ ਞਤ੍ਵਾ ਸਯਂ ਮਰਣਤੋ ਮੁਤ੍ਤੋ ਹਿਮਵਨ੍ਤਂ ਗਚ੍ਛੇਯ੍ਯ, ਜੀਵਮਾਨਾ ਪਨ ਮਯਂ ਅਞ੍ਞਮਞ੍ਞਂ ਨ ਜਹਾਮ, ਤਸ੍ਮਾ ਸਚੇਪਿ ਇਮਂ ਹਿਮਵਨ੍ਤਂ ਪੇਸੇਤੁਕਾਮੋ, ਮਂ ਪਠਮਂ ਮਾਰੇਤ੍ਵਾ ਪਚ੍ਛਾ ਪੇਸੇਹੀਤਿ.

ਏਵਞ੍ਚ ਪਨ ਵਤ੍ਵਾ ‘‘ਮਹਾਰਾਜ, ਨ ਮਯਂ ਤਵ ਵਚਨਂ ਅਕਾਤੁਕਾਮਤਾਯ ਤੁਣ੍ਹੀ ਅਹੁਮ੍ਹ, ਮਯਂ ਕਥਾਯ ਪਨ ਦੋਸਂ ਦਿਸ੍ਵਾ ਨ ਕਥਯਿਮ੍ਹਾ’’ਤਿ ਦੀਪੇਨ੍ਤੋ ਇਮਂ ਗਾਥਾਦ੍ਵਯਮਾਹ –

੧੧੪.

‘‘ਨ ਵੇ ਨਿਨ੍ਦਾ ਸੁਪਰਿਵਜ੍ਜਯੇਥ, ਨਾਨਾ ਜਨਾ ਸੇਵਿਤਬ੍ਬਾ ਜਨਿਨ੍ਦ;

ਯੇਨੇਵ ਏਕੋ ਲਭਤੇ ਪਸਂਸਂ, ਤੇਨੇਵ ਅਞ੍ਞੋ ਲਭਤੇ ਨਿਨ੍ਦਿਤਾਰਂ.

੧੧੫.

‘‘ਸਬ੍ਬੋ ਲੋਕੋ ਪਰਿਚਿਤ੍ਤੋ ਅਤਿਚਿਤ੍ਤੋ, ਸਬ੍ਬੋ ਲੋਕੋ ਚਿਤ੍ਤਵਾ ਸਮ੍ਹਿ ਚਿਤ੍ਤੇ;

ਪਚ੍ਚੇਕਚਿਤ੍ਤਾ ਪੁਥੁ ਸਬ੍ਬਸਤ੍ਤਾ, ਕਸ੍ਸੀਧ ਚਿਤ੍ਤਸ੍ਸ ਵਸੇਨ ਵਤ੍ਤੇ’’ਤਿ.

ਤਤ੍ਥ ਸੁਪਰਿਵਜ੍ਜਯੇਥਾਤਿ ਮਹਾਰਾਜ, ਨਿਨ੍ਦਾ ਨਾਮ ਸੁਖੇਨ ਪਰਿਵਜ੍ਜੇਤੁਂ ਨ ਸਕ੍ਕਾ. ਨਾਨਾ ਜਨਾਤਿ ਨਾਨਾਛਨ੍ਦਾ ਜਨਾ. ਯੇਨੇਵਾਤਿ ਯੇਨ ਸੀਲਾਦਿਗੁਣੇਨ ਏਕੋ ਪਸਂਸਂ ਲਭਤਿ, ਤੇਨੇਵ ਅਞ੍ਞੋ ਨਿਨ੍ਦਿਤਾਰਂ ਲਭਤਿ. ਅਮ੍ਹਾਕਞ੍ਹਿ ਕਿਨ੍ਨਰਾਨਂ ਅਨ੍ਤਰੇ ਕਥਨੇਨ ਪਸਂਸਂ ਲਭਤਿ, ਮਨੁਸ੍ਸਾਨਂ ਅਨ੍ਤਰੇ ਨਿਨ੍ਦਂ, ਇਤਿ ਨਿਨ੍ਦਾ ਨਾਮ ਦੁਪ੍ਪਰਿਵਜ੍ਜਿਯਾ, ਸ੍ਵਾਹਂ ਕਥਂ ਤਵ ਸਨ੍ਤਿਕਾ ਪਸਂਸਂ ਲਭਿਸ੍ਸਾਮੀਤਿ.

ਸਬ੍ਬੋ ਲੋਕੋ ਪਰਿਚਿਤ੍ਤੋਤਿ ਮਹਾਰਾਜ, ਅਸਪ੍ਪੁਰਿਸੋ ਨਾਮ ਪਾਣਾਤਿਪਾਤਾਦਿਚਿਤ੍ਤੇਨ, ਸਪ੍ਪੁਰਿਸੋ ਪਾਣਾਤਿਪਾਤਾ ਵੇਰਮਣਿ ਆਦਿਚਿਤ੍ਤੇਨ ਅਤਿਚਿਤ੍ਤੋਤਿ, ਏਵਂ ਸਬ੍ਬੋ ਲੋਕੋ ਪਰਿਚਿਤ੍ਤੋ ਅਤਿਚਿਤ੍ਤੋਤਿ ਅਤ੍ਥੋ. ਚਿਤ੍ਤਵਾ ਸਮ੍ਹਿ ਚਿਤ੍ਤੇਤਿ ਸਬ੍ਬੋ ਪਨ ਲੋਕੋ ਅਤ੍ਤਨੋ ਹੀਨੇਨ ਵਾ ਪਣੀਤੇਨ ਵਾ ਚਿਤ੍ਤੇਨ ਚਿਤ੍ਤਵਾ ਨਾਮ. ਪਚ੍ਚੇਕਚਿਤ੍ਤਾਤਿ ਪਾਟਿਯੇਕ੍ਕਚਿਤ੍ਤਾ ਪੁਥੁਪ੍ਪਭੇਦਾ ਸਬ੍ਬੇ ਸਤ੍ਤਾ. ਤੇਸੁ ਕਸ੍ਸੇਕਸ੍ਸ ਤਵ ਵਾ ਅਞ੍ਞਸ੍ਸ ਵਾ ਚਿਤ੍ਤੇਨ ਕਿਨ੍ਨਰੀ ਵਾ ਮਾਦਿਸੋ ਵਾ ਅਞ੍ਞੋ ਵਾ ਵਤ੍ਤੇਯ੍ਯ, ਤਸ੍ਮਾ ‘‘ਅਯਂ ਮਮ ਚਿਤ੍ਤਵਸੇਨ ਨ ਵਤ੍ਤਤੀ’’ਤਿ, ਮਾ ਮਯ੍ਹਂ ਕੁਜ੍ਝਿ. ਸਬ੍ਬਸਤ੍ਤਾ ਹਿ ਅਤ੍ਤਨੋ ਚਿਤ੍ਤਵਸੇਨ ਗਚ੍ਛਨ੍ਤਿ, ਦੇਵਾਤਿ. ਕਿਮ੍ਪੁਰਿਸੋ ਰਞ੍ਞੋ ਧਮ੍ਮਂ ਦੇਸੇਸਿ.

ਰਾਜਾ ‘‘ਸਭਾਵਮੇਵ ਕਥੇਤਿ ਪਣ੍ਡਿਤੋ ਕਿਨ੍ਨਰੋ’’ਤਿ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਓਸਾਨਗਾਥਮਾਹ –

੧੧੬.

‘‘ਤੁਣ੍ਹੀ ਅਹੂ ਕਿਮ੍ਪੁਰਿਸੋ ਸਭਰਿਯੋ, ਯੋ ਦਾਨਿ ਬ੍ਯਾਹਾਸਿ ਭਯਸ੍ਸ ਭੀਤੋ;

ਸੋ ਦਾਨਿ ਮੁਤ੍ਤੋ ਸੁਖਿਤੋ ਅਰੋਗੋ, ਵਾਚਾਕਿਰੇਵਤ੍ਥਵਤੀ ਨਰਾਨ’’ਨ੍ਤਿ.

ਤਤ੍ਥ ਵਾਚਾਕਿਰੇਵਤ੍ਥਵਤੀ ਨਰਾਨਨ੍ਤਿ ਵਾਚਾਗਿਰਾ ਏਵ ਇਮੇਸਂ ਸਤ੍ਤਾਨਂ ਅਤ੍ਥਵਤੀ ਹਿਤਾਵਹਾ ਹੋਤੀਤਿ ਅਤ੍ਥੋ.

ਰਾਜਾ ਕਿਨ੍ਨਰੇ ਸੁਵਣ੍ਣਪਞ੍ਜਰੇ ਨਿਸੀਦਾਪੇਤ੍ਵਾ ਤਮੇਵ ਲੁਦ੍ਦਂ ਪਕ੍ਕੋਸਾਪੇਤ੍ਵਾ ‘‘ਗਚ੍ਛ ਭਣੇ, ਗਹਿਤਟ੍ਠਾਨੇਯੇਵ ਵਿਸ੍ਸਜ੍ਜੇਹੀ’’ਤਿ ਵਿਸ੍ਸਜ੍ਜਾਪੇਸਿ. ਮਹਾਸਤ੍ਤੋਪਿ ‘‘ਆਚਰਿਯ, ਏਵਂ ਕਿਨ੍ਨਰਾ ਵਾਚਂ ਰਕ੍ਖਿਤ੍ਵਾ ਪਤ੍ਤਕਾਲੇ ਕਥਿਤੇਨ ਸੁਭਾਸਿਤੇਨੇਵ ਮੁਤ੍ਤਾ, ਤ੍ਵਂ ਪਨ ਦੁਕ੍ਕਥਿਤੇਨ ਮਹਾਦੁਕ੍ਖਂ ਪਤ੍ਤੋ’’ਤਿ ਇਦਂ ਉਦਾਹਰਣਂ ਦਸ੍ਸੇਤ੍ਵਾ ‘‘ਆਚਰਿਯ, ਮਾ ਭਾਯਿ, ਜੀਵਿਤਂ ਤੇ ਅਹਂ ਦਸ੍ਸਾਮੀ’’ਤਿ ਅਸ੍ਸਾਸੇਸਿ, ‘‘ਅਪਿਚ ਖੋ ਪਨ ਤੁਮ੍ਹੇ ਮਂ ਰਕ੍ਖੇਯ੍ਯਾਥਾ’’ਤਿਵੁਤ੍ਤੇ ‘‘ਨ ਤਾਵ ਨਕ੍ਖਤ੍ਤਯੋਗੋ ਲਬ੍ਭਤੀ’’ਤਿ ਦਿਵਸਂ ਵੀਤਿਨਾਮੇਤ੍ਵਾ ਮਜ੍ਝਿਮਯਾਮਸਮਨਨ੍ਤਰੇ ਮਤਂ ਏਲ਼ਕਂ ਆਹਰਾਪੇਤ੍ਵਾ ‘‘ਬ੍ਰਾਹ੍ਮਣ, ਯਤ੍ਥ ਕਤ੍ਥਚਿ ਗਨ੍ਤ੍ਵਾ ਜੀਵਾਹੀ’’ਤਿ ਕਞ੍ਚਿ ਅਜਾਨਾਪੇਤ੍ਵਾ ਉਯ੍ਯੋਜੇਤ੍ਵਾ ਏਲ਼ਕਮਂਸੇਨ ਬਲਿਂ ਕਤ੍ਵਾ ਦ੍ਵਾਰਂ ਪਤਿਟ੍ਠਾਪੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਕੋਕਾਲਿਕੋ ਵਾਚਾਯ ਹਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕਲ਼ਾਰਪਿਙ੍ਗਲੋ ਕੋਕਾਲਿਕੋ ਅਹੋਸਿ, ਤਕ੍ਕਾਰਿਯਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਤਕ੍ਕਾਰਿਯਜਾਤਕਵਣ੍ਣਨਾ ਅਟ੍ਠਮਾ.

[੪੮੨] ੯. ਰੁਰੁਮਿਗਰਾਜਜਾਤਕਵਣ੍ਣਨਾ

ਤਸ੍ਸ ਗਾਮਵਰਂ ਦਮ੍ਮੀਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਸੋ ਕਿਰ ਭਿਕ੍ਖੂਹਿ ‘‘ਬਹੂਪਕਾਰੋ ਤੇ ਆਵੁਸੋ, ਦੇਵਦਤ੍ਤਸਤ੍ਥਾ, ਤ੍ਵਂ ਤਥਾਗਤਂ ਨਿਸ੍ਸਾਯ ਪਬ੍ਬਜ੍ਜਂ ਲਭਿ, ਤੀਣਿ ਪਿਟਕਾਨਿ ਉਗ੍ਗਣ੍ਹਿ, ਲਾਭਸਕ੍ਕਾਰਂ ਪਾਪੁਣੀ’’ਤਿ ਵੁਤ੍ਤੋ ‘‘ਆਵੁਸੋ, ਸਤ੍ਥਾਰਾ ਮਮ ਤਿਣਗ੍ਗਮਤ੍ਤੋਪਿ ਉਪਕਾਰੋ ਨ ਕਤੋ, ਅਹਂ ਸਯਮੇਵ ਪਬ੍ਬਜਿਂ, ਸਯਂ ਤੀਣਿ ਪਿਟਕਾਨਿ ਉਗ੍ਗਣ੍ਹਿਂ, ਸਯਂ ਲਾਭਸਕ੍ਕਾਰਂ ਪਾਪੁਣਿ’’ਨ੍ਤਿ ਕਥੇਸਿ. ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਅਕਤਞ੍ਞੂ ਆਵੁਸੋ, ਦੇਵਦਤ੍ਤੋ ਅਕਤਵੇਦੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਦੇਵਦਤ੍ਤੋ ਇਦਾਨੇਵ ਅਕਤਞ੍ਞੂ, ਪੁਬ੍ਬੇਪਿ ਅਕਤਞ੍ਞੂਯੇਵ, ਪੁਬ੍ਬੇਪੇਸ ਮਯਾ ਜੀਵਿਤੇ ਦਿਨ੍ਨੇਪਿ ਮਮ ਗੁਣਮਤ੍ਤਂ ਨ ਜਾਨਾਤੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਏਕੋ ਅਸੀਤਿਕੋਟਿਵਿਭਵੋ ਸੇਟ੍ਠਿ ਪੁਤ੍ਤਂ ਲਭਿਤ੍ਵਾ ‘‘ਮਹਾਧਨਕੋ’’ਤਿਸ੍ਸ, ਨਾਮਂ ਕਤ੍ਵਾ ‘‘ਸਿਪ੍ਪਂ ਉਗ੍ਗਣ੍ਹਨ੍ਤੋ ਮਮ ਪੁਤ੍ਤੋ ਕਿਲਮਿਸ੍ਸਤੀ’’ਤਿ ਨ ਕਿਞ੍ਚਿ ਸਿਪ੍ਪਂ ਉਗ੍ਗਣ੍ਹਾਪੇਸਿ. ਸੋ ਗੀਤਨਚ੍ਚਵਾਦਿਤਖਾਦਨਭੋਜਨਤੋ ਉਦ੍ਧਂ ਨ ਕਿਞ੍ਚਿ ਅਞ੍ਞਾਸਿ. ਤਂ ਵਯਪ੍ਪਤ੍ਤਂ ਪਤਿਰੂਪੇਨ ਦਾਰੇਨ ਸਂਯੋਜੇਤ੍ਵਾ ਮਾਤਾਪਿਤਰੋ ਕਾਲਮਕਂਸੁ. ਸੋ ਤੇਸਂ ਅਚ੍ਚਯੇਨ ਇਤ੍ਥਿਧੁਤ੍ਤਸੁਰਾਧੁਤ੍ਤਾਦੀਹਿ ਪਰਿਵੁਤੋ ਨਾਨਾਬ੍ਯਸਨਮੁਖੇਹਿ ਇਣਂ ਆਦਾਯ ਤਂ ਦਾਤੁਂ ਅਸਕ੍ਕੋਨ੍ਤੋ ਇਣਾਯਿਕੇਹਿ ਚੋਦਿਯਮਾਨੋ ਚਿਨ੍ਤੇਸਿ ‘‘ਕਿਂ ਮਯ੍ਹਂ ਜੀਵਿਤੇਨ, ਏਕੇਨਮ੍ਹਿ ਅਤ੍ਤਭਾਵੇਨ ਅਞ੍ਞੋ ਵਿਯ ਜਾਤੋ, ਮਤਂ ਮੇ ਸੇਯ੍ਯੋ’’ਤਿ. ਸੋ ਇਣਾਯਿਕੇ ਆਹ – ‘‘ਤੁਮ੍ਹਾਕਂ ਇਣਪਣ੍ਣਾਨਿ ਗਹੇਤ੍ਵਾ ਆਗਚ੍ਛਥ, ਗਙ੍ਗਾਤੀਰੇ ਮੇ ਨਿਦਹਿਤਂ ਕੁਲਸਨ੍ਤਕਂ ਧਨਂ ਅਤ੍ਥਿ, ਤਂ ਵੋ ਦਸ੍ਸਾਮੀ’’ਤਿ. ਤੇ ਤੇਨ ਸਦ੍ਧਿਂ ਅਗਮਂਸੁ. ਸੋ ‘‘ਇਧ ਧਨ’’ਨ੍ਤਿ ਨਿਧਿਟ੍ਠਾਨਂ ਆਚਿਕ੍ਖਨ੍ਤੋ ਵਿਯ ‘‘ਗਙ੍ਗਾਯਂ ਪਤਿਤ੍ਵਾ ਮਰਿਸ੍ਸਾਮੀ’’ਤਿ ਪਲਾਯਿਤ੍ਵਾ ਗਙ੍ਗਾਯਂ ਪਤਿ. ਸੋ ਚਣ੍ਡਸੋਤੇਨ ਵੁਯ੍ਹਨ੍ਤੋ ਕਾਰੁਞ੍ਞਰਵਂ ਵਿਰਵਿ.

ਤਦਾ ਮਹਾਸਤ੍ਤੋ ਰੁਰੁਮਿਗਯੋਨਿਯਂ ਨਿਬ੍ਬਤ੍ਤਿਤ੍ਵਾ ਪਰਿਵਾਰਂ ਛਡ੍ਡੇਤ੍ਵਾ ਏਕਕੋਵ ਗਙ੍ਗਾਨਿਵਤ੍ਤਨੇ ਰਮਣੀਯੇ ਸਾਲਮਿਸ੍ਸਕੇ ਸੁਪੁਪ੍ਫਿਤਅਮ੍ਬਵਨੇ ਵਸਤਿ ਉਪੋਸਥਂ ਉਪਵੁਤ੍ਥਾਯ. ਤਸ੍ਸ ਸਰੀਰਚ੍ਛਵਿ ਸੁਮਜ੍ਜਿਤਕਞ੍ਚਨਪਟ੍ਟਵਣ੍ਣਾ ਅਹੋਸਿ, ਹਤ੍ਥਪਾਦਾ ਲਾਖਾਰਸਪਰਿਕਮ੍ਮਕਤਾ ਵਿਯ, ਨਙ੍ਗੁਟ੍ਠਂ ਚਾਮਰੀਨਙ੍ਗੁਟ੍ਠਂ ਵਿਯ, ਸਿਙ੍ਗਾਨਿ ਰਜਤਦਾਮਸਦਿਸਾਨਿ, ਅਕ੍ਖੀਨਿ ਸੁਮਜ੍ਜਿਤਮਣਿਗੁਲ਼ਿਕਾ ਵਿਯ, ਮੁਖਂ ਓਦਹਿਤ੍ਵਾ ਠਪਿਤਰਤ੍ਤਕਮ੍ਬਲਗੇਣ੍ਡੁਕਂ ਵਿਯ. ਏਵਰੂਪਂ ਤਸ੍ਸ ਰੂਪਂ ਅਹੋਸਿ. ਸੋ ਅਡ੍ਢਰਤ੍ਤਸਮਯੇ ਤਸ੍ਸ ਕਾਰੁਞ੍ਞਸਦ੍ਦਂ ਸੁਤ੍ਵਾ ‘‘ਮਨੁਸ੍ਸਸਦ੍ਦੋ ਸੂਯਤਿ, ਮਾ ਮਯਿ ਧਰਨ੍ਤੇ ਮਰਤੁ, ਜੀਵਿਤਮਸ੍ਸ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਸਯਨਗੁਮ੍ਬਾ ਉਟ੍ਠਾਯ ਨਦੀਤੀਰਂ ਗਨ੍ਤ੍ਵਾ ‘‘ਅਮ੍ਭੋ ਪੁਰਿਸ, ਮਾ ਭਾਯਿ, ਜੀਵਿਤਂ ਤੇ ਦਸ੍ਸਾਮੀ’’ਤਿ ਅਸ੍ਸਾਸੇਤ੍ਵਾ ਸੋਤਂ ਛਿਨ੍ਦਨ੍ਤੋ ਗਨ੍ਤ੍ਵਾ ਤਂ ਪਿਟ੍ਠਿਯਂ ਆਰੋਪੇਤ੍ਵਾ ਤੀਰਂ ਪਾਪੇਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਨੇਤ੍ਵਾ ਫਲਾਫਲਾਨਿ ਦਤ੍ਵਾ ਦ੍ਵੀਹਤੀਹਚ੍ਚਯੇਨ ‘‘ਭੋ ਪੁਰਿਸ, ਅਹਂ ਤਂ ਇਤੋ ਅਰਞ੍ਞਤੋ ਨੀਹਰਿਤ੍ਵਾ ਬਾਰਾਣਸਿਮਗ੍ਗੇ ਠਪੇਸ੍ਸਾਮਿ, ਤ੍ਵਂ ਸੋਤ੍ਥਿਨਾ ਗਮਿਸ੍ਸਸਿ, ਅਪਿਚ ਖੋ ਪਨ ਤ੍ਵਂ ‘ਅਸੁਕਟ੍ਠਾਨੇ ਨਾਮ ਕਞ੍ਚਨਮਿਗੋ ਵਸਤੀ’ਤਿ ਧਨਕਾਰਣਾ ਮਂ ਰਞ੍ਞੋ ਚੇਵ ਰਾਜਮਹਾਮਤ੍ਤਸ੍ਸ ਚ ਮਾ ਆਚਿਕ੍ਖਾਹੀ’’ਤਿ ਆਹ. ਸੋ ‘‘ਸਾਧੁ ਸਾਮੀ’’ਤਿ ਸਮ੍ਪਟਿਚ੍ਛਿ.

ਮਹਾਸਤ੍ਤੋ ਤਸ੍ਸ ਪਟਿਞ੍ਞਂ ਗਹੇਤ੍ਵਾ ਤਂ ਅਤ੍ਤਨੋ ਪਿਟ੍ਠਿਯਂ ਆਰੋਪੇਤ੍ਵਾ ਬਾਰਾਣਸਿਮਗ੍ਗੇ ਓਤਾਰੇਤ੍ਵਾ ਨਿਵਤ੍ਤਿ. ਤਸ੍ਸ ਬਾਰਾਣਸਿਪਵਿਸਨਦਿਵਸੇਯੇਵ ਖੇਮਾ ਨਾਮ ਰਞ੍ਞੋ ਅਗ੍ਗਮਹੇਸੀ ਪਚ੍ਚੂਸਕਾਲੇ ਸੁਪਿਨਨ੍ਤੇ ਸੁਵਣ੍ਣਵਣ੍ਣਂ ਮਿਗਂ ਅਤ੍ਤਨੋ ਧਮ੍ਮਂ ਦੇਸੇਨ੍ਤਂ ਦਿਸ੍ਵਾ ਚਿਨ੍ਤੇਸਿ ‘‘ਸਚੇ ਏਵਰੂਪੋ ਮਿਗੋ ਨ ਭਵੇਯ੍ਯ, ਨਾਹਂ ਸੁਪਿਨੇ ਪਸ੍ਸੇਯ੍ਯਂ, ਅਦ੍ਧਾ ਭਵਿਸ੍ਸਤਿ, ਰਞ੍ਞੋ ਆਰੋਚੇਸ੍ਸਾਮੀ’’ਤਿ. ਸਾ ਰਾਜਾਨਂ ਉਪਸਙ੍ਕਮਿਤ੍ਵਾ ‘‘ਮਹਾਰਾਜ, ਅਹਂ ਸੁਵਣ੍ਣਵਣ੍ਣਂ ਮਿਗਂ ਪਸ੍ਸਿਤੁਂ ਇਚ੍ਛਾਮਿ, ਸੁਵਣ੍ਣਵਣ੍ਣਮਿਗਸ੍ਸ ਧਮ੍ਮਂ ਸੋਤੁਕਾਮਾਮ੍ਹਿ, ਲਭਿਸ੍ਸਾਮਿ ਚੇ, ਜੀਵੇਯ੍ਯਂ, ਨੋ ਚੇ, ਨਤ੍ਥਿ ਮੇ ਜੀਵਿਤ’’ਨ੍ਤਿ ਆਹ. ਰਾਜਾ ਤਂ ਅਸ੍ਸਾਸੇਤ੍ਵਾ ‘‘ਸਚੇ ਮਨੁਸ੍ਸਲੋਕੇ ਅਤ੍ਥਿ, ਲਭਿਸ੍ਸਸੀ’’ਤਿ ਵਤ੍ਵਾ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ‘‘ਸੁਵਣ੍ਣਵਣ੍ਣਾ ਮਿਗਾ ਨਾਮ ਹੋਨ੍ਤੀ’’ਤਿ ਪੁਚ੍ਛਿਤ੍ਵਾ ‘‘ਆਮ, ਦੇਵ, ਹੋਨ੍ਤੀ’’ਤਿ ਸੁਤ੍ਵਾ ਅਲਙ੍ਕਤਹਤ੍ਥਿਕ੍ਖਨ੍ਧੇ ਸੁਵਣ੍ਣਚਙ੍ਕੋਟਕੇ ਸਹਸ੍ਸਥਵਿਕਂ ਠਪੇਤ੍ਵਾ ਯੋ ਸੁਵਣ੍ਣਵਣ੍ਣਂ ਮਿਗਂ ਆਚਿਕ੍ਖਿਸ੍ਸਤਿ, ਤਸ੍ਸ ਸਦ੍ਧਿਂ ਸਹਸ੍ਸਥਵਿਕਸੁਵਣ੍ਣਚਙ੍ਕੋਟਕੇਨ ਤਞ੍ਚ ਹਤ੍ਥਿਂ ਤਤੋ ਚ ਉਤ੍ਤਰਿ ਦਾਤੁਕਾਮੋ ਹੁਤ੍ਵਾ ਸੁਵਣ੍ਣਪਟ੍ਟੇ ਗਾਥਂ ਲਿਖਾਪੇਤ੍ਵਾ ਏਕਂ ਅਮਚ੍ਚਂ ਪਕ੍ਕੋਸਾਪੇਤ੍ਵਾ ‘‘ਏਹਿ ਤਾਤ, ਮਮ ਵਚਨੇਨ ਇਮਂ ਗਾਥਂ ਨਗਰਵਾਸੀਨਂ ਕਥੇਹੀ’’ਤਿ ਇਮਸ੍ਮਿਂ ਜਾਤਕੇ ਪਠਮਂ ਗਾਥਮਾਹ –

੧੧੭.

‘‘ਤਸ੍ਸ ਗਾਮਵਰਂ ਦਮ੍ਮਿ, ਨਾਰਿਯੋ ਚ ਅਲਙ੍ਕਤਾ;

ਯੋ ਮੇ ਤਂ ਮਿਗਮਕ੍ਖਾਤਿ, ਮਿਗਾਨਂ ਮਿਗਮੁਤ੍ਤਮ’’ਨ੍ਤਿ.

ਅਮਚ੍ਚੋ ਸੁਵਣ੍ਣਪਟ੍ਟਂ ਗਹੇਤ੍ਵਾ ਸਕਲਨਗਰੇ ਵਾਚਾਪੇਸਿ. ਅਥ ਸੋ ਸੇਟ੍ਠਿਪੁਤ੍ਤੋ ਬਾਰਾਣਸਿਂ ਪਵਿਸਨ੍ਤੋਵ ਤਂ ਕਥਂ ਸੁਤ੍ਵਾ ਅਮਚ੍ਚਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਅਹਂ ਰਞ੍ਞੋ ਏਵਰੂਪਂ ਮਿਗਂ ਆਚਿਕ੍ਖਿਸ੍ਸਾਮਿ, ਮਂ ਰਞ੍ਞੋ ਦਸ੍ਸੇਹੀ’’ਤਿ ਆਹ. ਅਮਚ੍ਚੋ ਹਤ੍ਥਿਕ੍ਖਨ੍ਧਤੋ ਓਤਰਿਤ੍ਵਾ ਤਂ ਰਞ੍ਞੋ ਸਨ੍ਤਿਕਂ ਨੇਤ੍ਵਾ ‘‘ਅਯਂ ਕਿਰ, ਦੇਵ, ਤਂ ਮਿਗਂ ਆਚਿਕ੍ਖਿਸ੍ਸਤੀ’’ਤਿ ਦਸ੍ਸੇਸਿ. ਰਾਜਾ ‘‘ਸਚ੍ਚਂ ਅਮ੍ਭੋ ਪੁਰਿਸਾ’’ਤਿ ਪੁਚ੍ਛਿ. ਸੋ ‘‘ਸਚ੍ਚਂ ਮਹਾਰਾਜ, ਤ੍ਵਂ ਏਤਂ ਯਸਂ ਮਯ੍ਹਂ ਦੇਹੀ’’ਤਿ ਵਦਨ੍ਤੋ ਦੁਤਿਯਂ ਗਾਥਮਾਹ –

੧੧੮.

‘‘ਮਯ੍ਹਂ ਗਾਮਵਰਂ ਦੇਹਿ, ਨਾਰਿਯੋ ਚ ਅਲਙ੍ਕਤਾ;

ਅਹਂ ਤੇ ਮਿਗਮਕ੍ਖਿਸ੍ਸਂ, ਮਿਗਾਨਂ ਮਿਗਮੁਤ੍ਤਮ’’ਨ੍ਤਿ.

ਤਂ ਸੁਤ੍ਵਾ ਰਾਜਾ ਤਸ੍ਸ ਮਿਤ੍ਤਦੁਬ੍ਭਿਸ੍ਸ ਤੁਸ੍ਸਿਤ੍ਵਾ ‘‘ਅਬ੍ਭੋ ਕੁਹਿਂ ਸੋ ਮਿਗੋ ਵਸਤੀ’’ਤਿ ਪੁਚ੍ਛਿਤ੍ਵਾ ‘‘ਅਸੁਕਟ੍ਠਾਨੇ ਨਾਮ ਦੇਵਾ’’ਤਿ ਵੁਤ੍ਤੇ ਤਮੇਵ ਮਗ੍ਗਦੇਸਕਂ ਕਤ੍ਵਾ ਮਹਨ੍ਤੇਨ ਪਰਿਵਾਰੇਨ ਤਂ ਠਾਨਂ ਅਗਮਾਸਿ. ਅਥ ਨਂ ਸੋ ਮਿਤ੍ਤਦੁਬ੍ਭੀ ‘‘ਸੇਨਂ, ਦੇਵ, ਸਨ੍ਨਿਸੀਦਾਪੇਹੀ’’ਤਿ ਵਤ੍ਵਾ ਸਨ੍ਨਿਸਿਨ੍ਨਾਯ ਸੇਨਾਯ ਏਸੋ, ਦੇਵ, ਸੁਵਣ੍ਣਮਿਗੋ ਏਤਸ੍ਮਿਂ ਵਨੇ ਵਸਤੀ’’ਤਿ ਹਤ੍ਥਂ ਪਸਾਰੇਤ੍ਵਾ ਆਚਿਕ੍ਖਨ੍ਤੋ ਤਤਿਯਂ ਗਾਥਮਾਹ –

੧੧੯.

‘‘ਏਤਸ੍ਮਿਂ ਵਨਸਣ੍ਡਸ੍ਮਿਂ, ਅਮ੍ਬਾ ਸਾਲਾ ਚ ਪੁਪ੍ਫਿਤਾ;

ਇਨ੍ਦਗੋਪਕਸਞ੍ਛਨ੍ਨਾ, ਏਤ੍ਥੇਸੋ ਤਿਟ੍ਠਤੇ ਮਿਗੋ’’ਤਿ.

ਤਤ੍ਥ ਇਨ੍ਦਗੋਪਕਸਞ੍ਛਨ੍ਨਾਤਿ ਏਤਸ੍ਸ ਵਨਸਣ੍ਡਸ੍ਸ ਭੂਮਿ ਇਨ੍ਦਗੋਪਕਵਣ੍ਣਾਯ ਰਤ੍ਤਾਯ ਸੁਖਸਮ੍ਫਸ੍ਸਾਯ ਤਿਣਜਾਤਿਯਾ ਸਞ੍ਛਨ੍ਨਾ, ਸਸਕੁਚ੍ਛਿ ਵਿਯ ਮੁਦੁਕਾ, ਏਤ੍ਥ ਏਤਸ੍ਮਿਂ ਰਮਣੀਯੇ ਵਨਸਣ੍ਡੇ ਏਸੋ ਤਿਟ੍ਠਤੀਤਿ ਦਸ੍ਸੇਤਿ.

ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਅਮਚ੍ਚੇ ਆਣਾਪੇਸਿ ‘‘ਤਸ੍ਸ ਮਿਗਸ੍ਸ ਪਲਾਯਿਤੁਂ ਅਦਤ੍ਵਾ ਖਿਪ੍ਪਂ ਆਵੁਧਹਤ੍ਥੇਹਿ ਪੁਰਿਸੇਹਿ ਸਦ੍ਧਿਂ ਵਨਸਣ੍ਡਂ ਪਰਿਵਾਰੇਥਾ’’ਤਿ. ਤੇ ਤਥਾ ਕਤ੍ਵਾ ਉਨ੍ਨਦਿਂਸੁ. ਰਾਜਾ ਕਤਿਪਯੇਹਿ ਜਨੇਹਿ ਸਦ੍ਧਿਂ ਏਕਮਨ੍ਤਂ ਅਟ੍ਠਾਸਿ, ਸੋਪਿਸ੍ਸ ਅਵਿਦੂਰੇ ਅਟ੍ਠਾਸਿ. ਮਹਾਸਤ੍ਤੋ ਤਂ ਸਦ੍ਦਂ ਸੁਤ੍ਵਾ ਚਿਨ੍ਤੇਸਿ ‘‘ਮਹਨ੍ਤੋ ਬਲਕਾਯਸਦ੍ਦੋ, ਤਮ੍ਹਾ ਮੇ ਪੁਰਿਸਾ ਭਯੇਨ ਉਪ੍ਪਨ੍ਨੇਨ ਭਵਿਤਬ੍ਬ’’ਨ੍ਤਿ. ਸੋ ਉਟ੍ਠਾਯ ਸਕਲਪਰਿਸਂ ਓਲੋਕੇਤ੍ਵਾ ਰਞ੍ਞੋ ਠਿਤਟ੍ਠਾਨਂ ਦਿਸ੍ਵਾ ‘‘ਰਞ੍ਞੋ ਠਿਤਟ੍ਠਾਨੇਯੇਵ ਮੇ ਸੋਤ੍ਥਿ ਭਵਿਸ੍ਸਤਿ, ਏਤ੍ਥੇਵ ਮਯਾ ਗਨ੍ਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਰਾਜਾਭਿਮੁਖੋ ਪਾਯਾਸਿ. ਰਾਜਾ ਤਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਨਾਗਬਲੋ ਮਿਗੋ ਅਵਤ੍ਥਰਨ੍ਤੋ ਵਿਯ ਆਗਚ੍ਛੇਯ੍ਯ, ਸਰਂ ਸਨ੍ਨਯ੍ਹਿਤ੍ਵਾ ਇਮਂ ਮਿਗਂ ਸਨ੍ਤਾਸੇਤ੍ਵਾ ਸਚੇ ਪਲਾਯਤਿ, ਵਿਜ੍ਝਿਤ੍ਵਾ ਦੁਬ੍ਬਲਂ ਕਤ੍ਵਾ ਗਣ੍ਹਿਸ੍ਸਾਮੀ’’ਤਿ ਧਨੁਂ ਆਰੋਪੇਤ੍ਵਾ ਬੋਧਿਸਤ੍ਤਾਭਿਮੁਖੋ ਅਹੋਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਇਮਂ ਗਾਥਾਦ੍ਵਯਮਾਹ –

੧੨੦.

‘‘ਧਨੁਂ ਅਦ੍ਵੇਜ੍ਝਂ ਕਤ੍ਵਾਨ, ਉਸੁਂ ਸਨ੍ਨਯ੍ਹੁਪਾਗਮਿ;

ਮਿਗੋ ਚ ਦਿਸ੍ਵਾ ਰਾਜਾਨਂ, ਦੂਰਤੋ ਅਜ੍ਝਭਾਸਥ.

੧੨੧.

‘‘ਆਗਮੇਹਿ ਮਹਾਰਾਜ, ਮਾ ਮਂ ਵਿਜ੍ਝਿ ਰਥੇਸਭ;

ਕੋ ਨੁ ਤੇ ਇਦਮਕ੍ਖਾਸਿ, ਏਤ੍ਥੇਸੋ ਤਿਟ੍ਠਤੇ ਮਿਗੋ’’ਤਿ.

ਤਤ੍ਥ ਅਦ੍ਵੇਜ੍ਝਂ ਕਤ੍ਵਾਨਾਤਿ ਜਿਯਾਯ ਚ ਸਰੇਨ ਚ ਸਦ੍ਧਿਂ ਏਕਮੇਵ ਕਤ੍ਵਾ. ਸਨ੍ਨਯ੍ਹਾਤਿ ਸਨ੍ਨਯ੍ਹਿਤ੍ਵਾ. ਆਗਮੇਹੀਤਿ ‘‘ਤਿਟ੍ਠ, ਮਹਾਰਾਜ, ਮਾ ਮਂ ਵਿਜ੍ਝਿ, ਜੀਵਗ੍ਗਾਹਮੇਵ ਗਣ੍ਹਾਹੀ’’ਤਿ ਮਧੁਰਾਯ ਮਨੁਸ੍ਸਵਾਚਾਯ ਅਭਾਸਿ.

ਰਾਜਾ ਤਸ੍ਸ ਮਧੁਰਕਥਾਯ ਬਨ੍ਧਿਤ੍ਵਾ ਧਨੁਂ ਓਤਾਰੇਤ੍ਵਾ ਗਾਰਵੇਨ ਅਟ੍ਠਾਸਿ. ਮਹਾਸਤ੍ਤੋਪਿ ਰਾਜਾਨਂ ਉਪਸਙ੍ਕਮਿਤ੍ਵਾ ਮਧੁਰਪਟਿਸਨ੍ਥਾਰਂ ਕਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਮਹਾਜਨੋਪਿ ਸਬ੍ਬਾਵੁਧਾਨਿ ਛਡ੍ਡੇਤ੍ਵਾ ਆਗਨ੍ਤ੍ਵਾ ਰਾਜਾਨਂ ਪਰਿਵਾਰੇਸਿ. ਤਸ੍ਮਿਂ ਖਣੇ ਮਹਾਸਤ੍ਤੋ ਸੁਵਣ੍ਣਕਿਙ੍ਕਿਣਿਕਂ ਚਾਲੇਨ੍ਤੋ ਵਿਯ ਮਧੁਰੇਨ ਸਰੇਨ ਰਾਜਾਨਂ ਪੁਚ੍ਛਿ ‘‘ਕੋ ਨੁ ਤੇ ਇਦਮਕ੍ਖਾਸਿ, ਏਤ੍ਥੇਸੋ ਤਿਟ੍ਠਤੇ ਮਿਗੋ’’ਤਿ? ਤਸ੍ਮਿਂ ਖਣੇ ਪਾਪਪੁਰਿਸੋ ਥੋਕਂ ਪਟਿਕ੍ਕਮਿਤ੍ਵਾ ਸੋਤਪਥੇਵ ਅਟ੍ਠਾਸਿ. ਰਾਜਾ ‘‘ਇਮਿਨਾ ਮੇ ਦਸ੍ਸਿਤੋ’’ਤਿ ਕਥੇਨ੍ਤੋ ਛਟ੍ਠਂ ਗਾਥਮਾਹ –

੧੨੨.

‘‘ਏਸ ਪਾਪਚਰੋ ਪੋਸੋ, ਸਮ੍ਮ ਤਿਟ੍ਠਤਿ ਆਰਕਾ;

ਸੋਯਂ ਮੇ ਇਦਮਕ੍ਖਾਸਿ, ਏਤ੍ਥੇਸੋ ਤਿਟ੍ਠਤੇ ਮਿਗੋ’’ਤਿ.

ਤਤ੍ਥ ਪਾਪਚਰੋਤਿ ਵਿਸ੍ਸਟ੍ਠਾਚਾਰੋ.

ਤਂ ਸੁਤ੍ਵਾ ਮਹਾਸਤ੍ਤੋ ਤਂ ਮਿਤ੍ਤਦੁਬ੍ਭਿਂ ਗਰਹਿਤ੍ਵਾ ਰਞ੍ਞਾ ਸਦ੍ਧਿਂ ਸਲ੍ਲਪਨ੍ਤੋ ਸਤ੍ਤਮਂ ਗਾਥਮਾਹ –

੧੨੩.

‘‘ਸਚ੍ਚਂ ਕਿਰੇਵ ਮਾਹਂਸੁ, ਨਰਾ ਏਕਚ੍ਚਿਯਾ ਇਧ;

ਕਟ੍ਠਂ ਨਿਪ੍ਲਵਿਤਂ ਸੇਯ੍ਯੋ, ਨ ਤ੍ਵੇਵੇਕਚ੍ਚਿਯੋ ਨਰੋ’’ਤਿ.

ਤਤ੍ਥ ਨਿਪ੍ਲਵਿਤਨ੍ਤਿ ਉਤ੍ਤਾਰਿਤਂ. ਏਕਚ੍ਚਿਯੋਤਿ ਏਕਚ੍ਚੋ ਪਨ ਮਿਤ੍ਤਦੁਬ੍ਭੀ ਪਾਪਪੁਗ੍ਗਲੋ ਉਦਕੇ ਪਤਨ੍ਤੋਪਿ ਉਤ੍ਤਾਰਿਤੋ ਨ ਤ੍ਵੇਵ ਸੇਯ੍ਯੋ. ਕਟ੍ਠਞ੍ਹਿ ਨਾਨਪ੍ਪਕਾਰੇਨ ਉਪਕਾਰਾਯ ਸਂਵਤ੍ਤਤਿ, ਮਿਤ੍ਤਦੁਬ੍ਭੀ ਪਨ ਪਾਪਪੁਗ੍ਗਲੋ ਵਿਨਾਸਾਯ, ਤਸ੍ਮਾ ਤਤੋ ਕਟ੍ਠਮੇਵ ਵਰਤਰਨ੍ਤਿ ਪੋਰਾਣਕਪਣ੍ਡਿਤਾ ਕਥਯਿਂਸੁ, ਮਯਾ ਪਨ ਤੇਸਂ ਵਚਨਂ ਨ ਕਤਨ੍ਤਿ.

ਤਂ ਸੁਤ੍ਵਾ ਰਾਜਾ ਇਤਰਂ ਗਾਥਮਾਹ –

੧੨੪.

‘‘ਕਿਂ ਨੁ ਰੁਰੁ ਗਰਹਸਿ ਮਿਗਾਨਂ, ਕਿਂ ਪਕ੍ਖੀਨਂ ਕਿਂ ਪਨ ਮਾਨੁਸਾਨਂ;

ਭਯਂ ਹਿ ਮਂ ਵਿਨ੍ਦਤਿਨਪ੍ਪਰੂਪਂ, ਸੁਤ੍ਵਾਨ ਤਂ ਮਾਨੁਸਿਂ ਭਾਸਮਾਨ’’ਨ੍ਤਿ.

ਤਤ੍ਥ ਮਿਗਾਨਨ੍ਤਿ ਮਿਗਾਨਮਞ੍ਞਤਰਂ ਗਰਹਸਿ, ਉਦਾਹੁ ਪਕ੍ਖੀਨਂ, ਮਾਨੁਸਾਨਨ੍ਤਿ ਪੁਚ੍ਛਿ. ਭਯਞ੍ਹਿ ਮਂ ਵਿਨ੍ਦਤੀਤਿ ਭਯਂ ਮਂ ਪਟਿਲਭਤਿ, ਅਹਂ ਅਤ੍ਤਨਿ ਅਨਿਸ੍ਸਰੋ ਭਯਸਨ੍ਤਕੋ ਵਿਯ ਹੋਮਿ. ਅਨਪ੍ਪਰੂਪਨ੍ਤਿ ਮਹਨ੍ਤਂ.

ਤਤੋ ਮਹਾਸਤ੍ਤੋ ‘‘ਮਹਾਰਾਜ, ਨ ਮਿਗਂ, ਨ ਪਕ੍ਖਿਂ ਗਰਹਾਮਿ, ਮਨੁਸ੍ਸਂ ਪਨ ਗਰਹਾਮੀ’’ਤਿ ਦਸ੍ਸੇਨ੍ਤੋ ਨਵਮਂ ਗਾਥਮਾਹ –

੧੨੫.

‘‘ਯਮੁਦ੍ਧਰਿਂ ਵਾਹਨੇ ਵੁਯ੍ਹਮਾਨਂ, ਮਹੋਦਕੇ ਸਲਿਲੇ ਸੀਘਸੋਤੇ;

ਤਤੋਨਿਦਾਨਂ ਭਯਮਾਗਤਂ ਮਮ, ਦੁਕ੍ਖੋ ਹਵੇ ਰਾਜ ਅਸਬ੍ਭਿ ਸਙ੍ਗਮੋ’’ਤਿ.

ਤਤ੍ਥ ਵਾਹਨੇਤਿ ਪਤਿਤਪਤਿਤੇ ਵਹਿਤੁਂ ਸਮਤ੍ਥੇ ਗਙ੍ਗਾਵਹੇ. ਮਹੋਦਕੇ ਸਲਿਲੇਤਿ ਮਹਾਉਦਕੇ ਮਹਾਸਲਿਲੇਤਿ ਅਤ੍ਥੋ. ਉਭਯੇਨਾਪਿ ਗਙ੍ਗਾਵਹਸ੍ਸੇਵ ਬਹੁਉਦਕਤਂ ਦਸ੍ਸੇਤਿ. ਤਤੋਨਿਦਾਨਨ੍ਤਿ ਮਹਾਰਾਜ, ਯੋ ਮਯ੍ਹਂ ਤਯਾ ਦਸ੍ਸਿਤੋ ਪੁਰਿਸੋ, ਏਸੋ ਮਯਾ ਗਙ੍ਗਾਯ ਵੁਯ੍ਹਮਾਨੋ ਅਡ੍ਢਰਤ੍ਤਸਮਯੇ ਕਾਰੁਞ੍ਞਰਵਂ ਵਿਰਵਨ੍ਤੋ ਉਦ੍ਧਰਿਤੋ, ਤਤੋਨਿਦਾਨਂ ਮੇ ਇਦਮਜ੍ਜ ਭਯਂ ਆਗਤਂ, ਅਸਪ੍ਪੁਰਿਸੇਹਿ ਸਮਾਗਮੋ ਨਾਮ ਦੁਕ੍ਖੋ, ਮਹਾਰਾਜਾਤਿ.

ਤਂ ਸੁਤ੍ਵਾ ਰਾਜਾ ਤਸ੍ਸ ਕੁਜ੍ਝਿਤ੍ਵਾ ‘‘ਏਵਂ ਬਹੂਪਕਾਰਸ੍ਸ ਨਾਮ ਗੁਣਂ ਨ ਜਾਨਾਤਿ, ਵਿਜ੍ਝਿਤ੍ਵਾ ਨਂ ਜੀਵਿਤਕ੍ਖਯਂ ਪਾਪੇਸ੍ਸਾਮੀ’’ਤਿ ਦਸਮਂ ਗਾਥਮਾਹ –

੧੨੬.

‘‘ਸੋਹਂ ਚਤੁਪ੍ਪਤ੍ਤਮਿਮਂ ਵਿਹਙ੍ਗਮਂ, ਤਨੁਚ੍ਛਿਦਂ ਹਦਯੇ ਓਸ੍ਸਜਾਮਿ;

ਹਨਾਮਿ ਤਂ ਮਿਤ੍ਤਦੁਬ੍ਭਿਂ ਅਕਿਚ੍ਚਕਾਰਿਂ, ਯੋ ਤਾਦਿਸਂ ਕਮ੍ਮਕਤਂ ਨ ਜਾਨੇ’’ਤਿ.

ਤਤ੍ਥ ਚਤੁਪ੍ਪਤ੍ਤਨ੍ਤਿ ਚਤੂਹਿ ਵਾਜਪਤ੍ਤੇਹਿ ਸਮਨ੍ਨਾਗਤਂ. ਵਿਹਙ੍ਗਮਨ੍ਤਿ ਆਕਾਸਗਾਮਿਂ. ਤਨੁਚ੍ਛਿਦਨ੍ਤਿ ਸਰੀਰਛਿਨ੍ਦਨਂ. ਓਸ੍ਸਜਾਮੀਤਿ ਏਤਸ੍ਸ ਹਦਯੇ ਵਿਸ੍ਸਜ੍ਜੇਮਿ.

ਤਤੋ ਮਹਾਸਤ੍ਤੋ ‘‘ਮਾ ਏਸ ਮਂ ਨਿਸ੍ਸਾਯ ਨਸ੍ਸਤੂ’’ਤਿ ਚਿਨ੍ਤੇਤ੍ਵਾ ਏਕਾਦਸਮਂ ਗਾਥਮਾਹ –

੧੨੭.

‘‘ਧੀਰਸ੍ਸ ਬਾਲਸ੍ਸ ਹਵੇ ਜਨਿਨ੍ਦ, ਸਨ੍ਤੋ ਵਧਂ ਨਪ੍ਪਸਂਸਨ੍ਤਿ ਜਾਤੁ;

ਕਾਮਂ ਘਰਂ ਗਚ੍ਛਤੁ ਪਾਪਧਮ੍ਮੋ, ਯਞ੍ਚਸ੍ਸ ਭਟ੍ਠਂ ਤਦੇਤਸ੍ਸ ਦੇਹਿ;

ਅਹਞ੍ਚ ਤੇ ਕਾਮਕਰੋ ਭਵਾਮੀ’’ਤਿ.

ਤਤ੍ਥ ਕਾਮਨ੍ਤਿ ਕਾਮੇਨ ਯਥਾਰੁਚਿਯਾ ਅਤ੍ਤਨੋ ਘਰਂ ਗਚ੍ਛਤੁ. ਯਞ੍ਚਸ੍ਸ ਭਟ੍ਠਂ ਤਦੇਤਸ੍ਸ ਦੇਹੀਤਿ ਯਞ੍ਚ ਤਸ੍ਸ ‘‘ਇਦਂ ਨਾਮ ਤੇ ਦਸ੍ਸਾਮੀ’’ਤਿ ਤਯਾ ਕਥਿਤਂ, ਤਂ ਤਸ੍ਸ ਦੇਹਿ. ਕਾਮਕਰੋਤਿ ਇਚ੍ਛਾਕਰੋ, ਯਂ ਇਚ੍ਛਸਿ, ਤਂ ਕਰੋਹਿ, ਮਂਸਂ ਵਾ ਮੇ ਖਾਦ, ਕੀਲ਼ਾਮਿਗਂ ਵਾ ਕਰੋਹਿ, ਸਬ੍ਬਤ੍ਥ ਤੇ ਅਨੁਕੂਲਵਤ੍ਤੀ ਭਵਿਸ੍ਸਾਮੀਤਿ ਅਤ੍ਥੋ.

ਤਂ ਸੁਤ੍ਵਾ ਰਾਜਾ ਤੁਟ੍ਠਮਾਨਸੋ ਮਹਾਸਤ੍ਤਸ੍ਸ ਥੁਤਿਂ ਕਰੋਨ੍ਤੋ ਅਨਨ੍ਤਰਂ ਗਾਥਮਾਹ –

੧੨੮.

‘‘ਅਦ੍ਧਾ ਰੁਰੂ ਅਞ੍ਞਤਰੋ ਸਤਂ ਸੋ, ਯੋ ਦੁਬ੍ਭਤੋ ਮਾਨੁਸਸ੍ਸ ਨ ਦੁਬ੍ਭਿ;

ਕਾਮਂ ਘਰਂ ਗਚ੍ਛਤੁ ਪਾਪਧਮ੍ਮੋ, ਯਞ੍ਚਸ੍ਸ ਭਟ੍ਠਂ ਤਦੇਤਸ੍ਸ ਦਮ੍ਮਿ;

ਅਹਞ੍ਚ ਤੇ ਕਾਮਚਾਰਂ ਦਦਾਮੀ’’ਤਿ.

ਤਤ੍ਥ ਸਤਂ ਸੋਤਿ ਅਦ੍ਧਾ ਤ੍ਵਂ ਸਤਂ ਪਣ੍ਡਿਤਾਨਂ ਅਞ੍ਞਤਰੋ. ਕਾਮਚਾਰਨ੍ਤਿ ਅਹਂ ਤਵ ਧਮ੍ਮਕਥਾਯ ਪਸੀਦਿਤ੍ਵਾ ਤੁਯ੍ਹਂ ਕਾਮਚਾਰਂ ਅਭਯਂ ਦਦਾਮਿ, ਇਤੋ ਪਟ੍ਠਾਯ ਤੁਮ੍ਹੇ ਨਿਬ੍ਭਯਾ ਯਥਾਰੁਚਿਯਾ ਵਿਹਰਥਾਤਿ ਮਹਾਸਤ੍ਤਸ੍ਸ ਵਰਂ ਅਦਾਸਿ.

ਅਥ ਨਂ ਮਹਾਸਤ੍ਤੋ ‘‘ਮਹਾਰਾਜ, ਮਨੁਸ੍ਸਾ ਨਾਮ ਅਞ੍ਞਂ ਮੁਖੇਨ ਭਾਸਨ੍ਤਿ, ਅਞ੍ਞਂ ਕਾਯੇਨ ਕਰੋਨ੍ਤੀ’’ਤਿ ਪਰਿਗ੍ਗਣ੍ਹਨ੍ਤੋ ਦ੍ਵੇ ਗਾਥਾ ਅਭਾਸਿ –

੧੨੯.

‘‘ਸੁਵਿਜਾਨਂ ਸਿਙ੍ਗਾਲਾਨਂ, ਸਕੁਣਾਨਞ੍ਚ ਵਸ੍ਸਿਤਂ;

ਮਨੁਸ੍ਸਵਸ੍ਸਿਤਂ ਰਾਜ, ਦੁਬ੍ਬਿਜਾਨਤਰਂ ਤਤੋ.

੧੩੦.

‘‘ਅਪਿ ਚੇ ਮਞ੍ਞਤੀ ਪੋਸੋ, ਞਾਤਿ ਮਿਤ੍ਤੋ ਸਖਾਤਿ ਵਾ;

ਯੋ ਪੁਬ੍ਬੇ ਸੁਮਨੋ ਹੁਤ੍ਵਾ, ਪਚ੍ਛਾ ਸਮ੍ਪਜ੍ਜਤੇ ਦਿਸੋ’’ਤਿ.

ਤਂ ਸੁਤ੍ਵਾ ਰਾਜਾ ‘‘ਮਿਗਰਾਜ, ਮਾ ਮਂ ਏਵਂ ਮਞ੍ਞਿ, ਅਹਞ੍ਹਿ ਰਜ੍ਜਂ ਜਹਨ੍ਤੋਪਿ ਨ ਤੁਯ੍ਹਂ ਦਿਨ੍ਨਵਰਂ ਜਹਿਸ੍ਸਂ, ਸਦ੍ਦਹਥ, ਮਯ੍ਹ’’ਨ੍ਤਿ ਵਰਂ ਅਦਾਸਿ. ਮਹਾਸਤ੍ਤੋ ਤਸ੍ਸ ਸਨ੍ਤਿਕੇ ਵਰਂ ਗਣ੍ਹਨ੍ਤੋ ਅਤ੍ਤਾਨਂ ਆਦਿਂ ਕਤ੍ਵਾ ਸਬ੍ਬਸਤ੍ਤਾਨਂ ਅਭਯਦਾਨਂ ਵਰਂ ਗਣ੍ਹਿ. ਰਾਜਾਪਿ ਤਂ ਵਰਂ ਦਤ੍ਵਾ ਬੋਧਿਸਤ੍ਤਂ ਨਗਰਂ ਨੇਤ੍ਵਾ ਮਹਾਸਤ੍ਤਞ੍ਚ ਨਗਰਞ੍ਚ ਅਲਙ੍ਕਾਰਾਪੇਤ੍ਵਾ ਦੇਵਿਯਾ ਧਮ੍ਮਂ ਦੇਸਾਪੇਸਿ. ਮਹਾਸਤ੍ਤੋ ਦੇਵਿਂ ਆਦਿਂ ਕਤ੍ਵਾ ਰਞ੍ਞੋ ਚ ਰਾਜਪਰਿਸਾਯ ਚ ਮਧੁਰਾਯ ਮਨੁਸ੍ਸਭਾਸਾਯ ਧਮ੍ਮਂ ਦੇਸੇਤ੍ਵਾ ਰਾਜਾਨਂ ਦਸਹਿ ਰਾਜਧਮ੍ਮੇਹਿ ਓਵਦਿਤ੍ਵਾ ਮਹਾਜਨਂ ਅਨੁਸਾਸਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਮਿਗਗਣਪਰਿਵੁਤੋ ਵਾਸਂ ਕਪ੍ਪੇਸਿ. ਰਾਜਾ ‘‘ਸਬ੍ਬੇਸਂ ਸਤ੍ਤਾਨਂ ਅਭਯਂ ਦਮ੍ਮੀ’’ਤਿ ਨਗਰੇ ਭੇਰਿਂ ਚਰਾਪੇਸਿ. ਤਤੋ ਪਟ੍ਠਾਯ ਮਿਗਪਕ੍ਖੀਨਂ ਕੋਚਿ ਹਤ੍ਥਂ ਪਸਾਰੇਤੁਂ ਸਮਤ੍ਥੋ ਨਾਮ ਨਾਹੋਸਿ. ਮਿਗਗਣੋ ਮਨੁਸ੍ਸਾਨਂ ਸਸ੍ਸਾਨਿ ਖਾਦਤਿ, ਕੋਚਿ ਵਾਰੇਤੁਂ ਨ ਸਕ੍ਕੋਤਿ. ਮਹਾਜਨੋ ਰਾਜਙ੍ਗਣਂ ਗਨ੍ਤ੍ਵਾ ਉਪਕ੍ਕੋਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਇਮਂ ਗਾਥਮਾਹ –

੧੩੧.

‘‘ਸਮਾਗਤਾ ਜਾਨਪਦਾ, ਨੇਗਮਾ ਚ ਸਮਾਗਤਾ;

ਮਿਗਾ ਸਸ੍ਸਾਨਿ ਖਾਦਨ੍ਤਿ, ਤਂ ਦੇਵੋ ਪਟਿਸੇਧਤੂ’’ਤਿ.

ਤਤ੍ਥ ਤਂ ਦੇਵੋਤਿ ਤਂ ਮਿਗਗਣਂ ਦੇਵੋ ਪਟਿਸੇਧਤੂਤਿ.

ਤਂ ਸੁਤ੍ਵਾ ਰਾਜਾ ਗਾਥਾਦ੍ਵਯਮਾਹ –

੧੩੨.

‘‘ਕਾਮਂ ਜਨਪਦੋ ਮਾਸਿ, ਰਟ੍ਠਞ੍ਚਾਪਿ ਵਿਨਸ੍ਸਤੁ;

ਨ ਤ੍ਵੇਵਾਹਂ ਰੁਰੁਂ ਦੁਬ੍ਭੇ, ਦਤ੍ਵਾ ਅਭਯਦਕ੍ਖਿਣਂ.

੧੩੩.

‘‘ਮਾ ਮੇ ਜਨਪਦੋ ਆਸਿ, ਰਟ੍ਠਞ੍ਚਾਪਿ ਵਿਨਸ੍ਸਤੁ;

ਨ ਤ੍ਵੇਵਾਹਂ ਮਿਗਰਾਜਸ੍ਸ, ਵਰਂ ਦਤ੍ਵਾ ਮੁਸਾ ਭਣੇ’’ਤਿ.

ਤਤ੍ਥ ਮਾਸੀਤਿ ਕਾਮਂ ਮਯ੍ਹਂ ਜਨਪਦੋ ਮਾ ਹੋਤੁ. ਰੁਰੁਨ੍ਤਿ ਨ ਤ੍ਵੇਵ ਅਹਂ ਸੁਵਣ੍ਣਵਣ੍ਣਸ੍ਸ ਰੁਰੁਮਿਗਰਾਜਸ੍ਸ ਅਭਯਦਕ੍ਖਿਣਂ ਦਤ੍ਵਾ ਦੁਬ੍ਭਿਸ੍ਸਾਮੀਤਿ.

ਮਹਾਜਨੋ ਰਞ੍ਞੋ ਵਚਨਂ ਸੁਤ੍ਵਾ ਕਿਞ੍ਚਿ ਵਤ੍ਤੁਂ ਅਵਿਸਹਨ੍ਤੋ ਪਟਿਕ੍ਕਮਿ. ਸਾ ਕਥਾ ਵਿਤ੍ਥਾਰਿਕਾ ਅਹੋਸਿ. ਤਂ ਸੁਤ੍ਵਾ ਮਹਾਸਤ੍ਤੋ ਮਿਗਗਣਂ ਸਨ੍ਨਿਪਾਤਾਪੇਤ੍ਵਾ ‘‘ਇਤੋ ਪਟ੍ਠਾਯ ਮਨੁਸ੍ਸਾਨਂ ਸਸ੍ਸਾਨਿ ਮਾ ਖਾਦਥਾ’’ਤਿ ਓਵਦਿਤ੍ਵਾ ‘‘ਅਤ੍ਤਨੋ ਖੇਤ੍ਤੇਸੁ ਪਣ੍ਣਸਞ੍ਞਂ ਬਨ੍ਧਨ੍ਤੂ’’ਤਿ ਮਨੁਸ੍ਸਾਨਂ ਘੋਸਾਪੇਸਿ. ਤੇ ਤਥਾ ਬਨ੍ਧਿਂਸੁ, ਤਾਯ ਸਞ੍ਞਾਯ ਮਿਗਾ ਯਾਵਜ੍ਜਤਨਾ ਸਸ੍ਸਾਨਿ ਨ ਖਾਦਨ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਅਕਤਞ੍ਞੂਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਸੇਟ੍ਠਿਪੁਤ੍ਤੋ ਦੇਵਦਤ੍ਤੋ ਅਹੋਸਿ, ਰਾਜਾ ਆਨਨ੍ਦੋ, ਰੁਰੁਮਿਗਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਰੁਰੁਮਿਗਰਾਜਜਾਤਕਵਣ੍ਣਨਾ ਨਵਮਾ.

[੪੮੩] ੧੦. ਸਰਭਮਿਗਜਾਤਕਵਣ੍ਣਨਾ

ਆਸੀਸੇਥੇਵ ਪੁਰਿਸੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਤ੍ਤਨਾ ਸਂਖਿਤ੍ਤੇਨ ਪੁਚ੍ਛਿਤਪਞ੍ਹਸ੍ਸ ਧਮ੍ਮਸੇਨਾਪਤਿਨੋ ਵਿਤ੍ਥਾਰੇਨ ਬ੍ਯਾਕਰਣਂ ਆਰਬ੍ਭ ਕਥੇਸਿ. ਕਦਾ ਪਨ ਸਤ੍ਥਾ ਥੇਰਂ ਸਂਖਿਤ੍ਤੇਨ ਪਞ੍ਹਂ ਪੁਚ੍ਛੀਤਿ? ਦੇਵੋਰੋਹਨੇ. ਤਤ੍ਰਾਯਂ ਸਙ੍ਖੇਪਤੋ ਅਨੁਪੁਬ੍ਬਿਕਥਾ. ਰਾਜਗਹਸੇਟ੍ਠਿਨੋ ਹਿ ਸਨ੍ਤਕੇ ਚਨ੍ਦਨਪਤ੍ਤੇ ਆਯਸ੍ਮਤਾ ਪਿਣ੍ਡੋਲਭਾਰਦ੍ਵਾਜੇਨ ਇਦ੍ਧਿਯਾ ਗਹਿਤੇ ਸਤ੍ਥਾ ਭਿਕ੍ਖੂਨਂ ਇਦ੍ਧਿਪਾਟਿਹਾਰਿਯਕਰਣਂ ਪਟਿਕ੍ਖਿਪਿ. ਤਦਾ ਤਿਤ੍ਥਿਯਾ ‘‘ਪਟਿਕ੍ਖਿਤ੍ਤਂ ਸਮਣੇਨ ਗੋਤਮੇਨ ਇਦ੍ਧਿਪਾਟਿਹਾਰਿਯਕਰਣਂ, ਇਦਾਨਿ ਸਯਮ੍ਪਿ ਨ ਕਰਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਮਙ੍ਕੁਭੂਤੇਹਿ ਅਤ੍ਤਨੋ ਸਾਵਕੇਹਿ ‘‘ਕਿਂ, ਭਨ੍ਤੇ, ਇਦ੍ਧਿਯਾ ਪਤ੍ਤਂ ਨ ਗਣ੍ਹਥਾ’’ਤਿ ਵੁਚ੍ਚਮਾਨਾ ‘‘ਨੇਤਂ ਆਵੁਸੋ, ਅਮ੍ਹਾਕਂ ਦੁਕ੍ਕਰਂ, ਛਵਸ੍ਸ ਪਨ ਦਾਰੁਪਤ੍ਤਸ੍ਸਤ੍ਥਾਯ ਅਤ੍ਤਨੋ ਸਣ੍ਹਸੁਖੁਮਗੁਣਂ ਕੋ ਗਿਹੀਨਂ ਪਕਾਸੇਸ੍ਸਤੀਤਿ ਨ ਗਣ੍ਹਿਮ੍ਹ, ਸਮਣਾ ਪਨ ਸਕ੍ਯਪੁਤ੍ਤਿਯਾ ਲੋਲਤਾਯ ਇਦ੍ਧਿਂ ਦਸ੍ਸੇਤ੍ਵਾ ਗਣ੍ਹਿਂਸੁ. ਮਾ ‘ਅਮ੍ਹਾਕਂ ਇਦ੍ਧਿਕਰਣਂ ਭਾਰੋ’ਤਿ ਚਿਨ੍ਤਯਿਤ੍ਥ, ਮਯਞ੍ਹਿ ਤਿਟ੍ਠਨ੍ਤੁ ਸਮਣਸ੍ਸ ਗੋਤਮਸ੍ਸ ਸਾਵਕਾ, ਆਕਙ੍ਖਮਾਨਾ ਪਨ ਸਮਣੇਨ ਗੋਤਮੇਨ ਸਦ੍ਧਿਂ ਇਦ੍ਧਿਂ ਦਸ੍ਸੇਸ੍ਸਾਮ, ਸਚੇ ਹਿ ਸਮਣੋ ਗੋਤਮੋ ਏਕਂ ਪਾਟਿਹਾਰਿਯਂ ਕਰਿਸ੍ਸਤਿ, ਮਯਂ ਦ੍ਵਿਗੁਣਂ ਕਰਿਸ੍ਸਾਮਾ’’ਤਿ ਕਥਯਿਂਸੁ.

ਤਂ ਸੁਤ੍ਵਾ ਭਿਕ੍ਖੂ ਭਗਵਤੋ ਆਰੋਚੇਸੁਂ ‘‘ਭਨ੍ਤੇ, ਤਿਤ੍ਥਿਯਾ ਕਿਰ ਪਾਟਿਹਾਰਿਯਂ ਕਰਿਸ੍ਸਨ੍ਤੀ’’ਤਿ. ਸਤ੍ਥਾ ‘‘ਭਿਕ੍ਖਵੇ, ਕਰੋਨ੍ਤੁ, ਅਹਮ੍ਪਿ ਕਰਿਸ੍ਸਾਮੀ’’ਤਿ ਆਹ. ਤਂ ਸੁਤ੍ਵਾ ਬਿਮ੍ਬਿਸਾਰੋ ਆਗਨ੍ਤ੍ਵਾ ਭਗਵਨ੍ਤਂ ਪੁਚ੍ਛਿ ‘‘ਭਨ੍ਤੇ, ਪਾਟਿਹਾਰਿਯਂ ਕਿਰ ਕਰਿਸ੍ਸਥਾ’’ਤਿ? ‘‘ਆਮ, ਮਹਾਰਾਜਾ’’ਤਿ. ‘‘ਨਨੁ, ਭਨ੍ਤੇ, ਸਿਕ੍ਖਾਪਦਂ ਪਞ੍ਞਤ੍ਤ’’ਨ੍ਤਿ. ‘‘ਮਹਾਰਾਜ, ਤਂ ਮਯਾ ਸਾਵਕਾਨਂ ਪਞ੍ਞਤ੍ਤਂ, ਬੁਦ੍ਧਾਨਂ ਪਨ ਸਿਕ੍ਖਾਪਦਂ ਨਾਮ ਨਤ੍ਥਿ. ‘‘ਯਥਾ ਹਿ, ਮਹਾਰਾਜ, ਤਵ ਉਯ੍ਯਾਨੇ ਪੁਪ੍ਫਫਲਂ ਅਞ੍ਞੇਸਂ ਵਾਰਿਤਂ, ਨ ਤਵ, ਏਵਂਸਮ੍ਪਦਮਿਦਂ ਦਟ੍ਠਬ੍ਬ’’ਨ੍ਤਿ. ‘‘ਕਤ੍ਥ ਪਨ, ਭਨ੍ਤੇ, ਪਾਟਿਹਾਰਿਯਂ ਕਰਿਸ੍ਸਥਾ’’ਤਿ? ‘‘ਸਾਵਤ੍ਥਿਨਗਰਦ੍ਵਾਰੇ ਕਣ੍ਡਮ੍ਬਰੁਕ੍ਖਮੂਲੇ’’ਤਿ. ‘‘ਅਮ੍ਹੇਹਿ ਤਤ੍ਥ ਕਿਂ ਕਤ੍ਤਬ੍ਬ’’ਨ੍ਤਿ? ‘‘ਨਤ੍ਥਿ ਕਿਞ੍ਚਿ ਮਹਾਰਾਜਾ’’ਤਿ. ਪੁਨਦਿਵਸੇ ਸਤ੍ਥਾ ਕਤਭਤ੍ਤਕਿਚ੍ਚੋ ਚਾਰਿਕਂ ਪਕ੍ਕਾਮਿ. ਮਨੁਸ੍ਸਾ ‘‘ਕੁਹਿਂ, ਭਨ੍ਤੇ, ਸਤ੍ਥਾ ਗਚ੍ਛਤੀ’’ਤਿ ਪੁਚ੍ਛਨ੍ਤਿ. ‘‘ਸਾਵਤ੍ਥਿਨਗਰਦ੍ਵਾਰੇ ਕਣ੍ਡਮ੍ਬਰੁਕ੍ਖਮੂਲੇ ਤਿਤ੍ਥਿਯਮਦ੍ਦਨਂ ਯਮਕਪਾਟਿਹਾਰਿਯਂ ਕਾਤੁ’’ਨ੍ਤਿ ਤੇਸਂ ਭਿਕ੍ਖੂ ਕਥਯਨ੍ਤਿ. ਮਹਾਜਨੋ ‘‘ਅਚ੍ਛਰਿਯਰੂਪਂ ਕਿਰ ਪਾਟਿਹਾਰਿਯਂ ਭਵਿਸ੍ਸਤਿ, ਪਸ੍ਸਿਸ੍ਸਾਮ ਨ’’ਨ੍ਤਿ ਘਰਦ੍ਵਾਰਾਨਿ ਛਡ੍ਡੇਤ੍ਵਾ ਸਤ੍ਥਾਰਾ ਸਦ੍ਧਿਂਯੇਵ ਅਗਮਾਸਿ.

ਅਞ੍ਞਤਿਤ੍ਥਿਯਾ ‘‘ਮਯਮ੍ਪਿ ਸਮਣਸ੍ਸ ਗੋਤਮਸ੍ਸ ਪਾਟਿਹਾਰਿਯਕਰਣਟ੍ਠਾਨੇ ਪਾਟਿਹਾਰਿਯਂ ਕਰਿਸ੍ਸਾਮਾ’’ਤਿ ਉਪਟ੍ਠਾਕੇਹਿ ਸਦ੍ਧਿਂ ਸਤ੍ਥਾਰਮੇਵ ਅਨੁਬਨ੍ਧਿਂਸੁ. ਸਤ੍ਥਾ ਅਨੁਪੁਬ੍ਬੇਨ ਸਾਵਤ੍ਥਿਂ ਗਨ੍ਤ੍ਵਾ ਰਞ੍ਞਾ ‘‘ਪਾਟਿਹਾਰਿਯਂ ਕਿਰ, ਭਨ੍ਤੇ, ਕਰਿਸ੍ਸਥਾ’’ਤਿ ਪੁਚ੍ਛਿਤੋ ‘‘ਕਰਿਸ੍ਸਾਮੀ’’ਤਿ ਵਤ੍ਵਾ ‘‘ਕਦਾ, ਭਨ੍ਤੇ’’ਤਿ ਵੁਤ੍ਤੇ ‘‘ਇਤੋ ਸਤ੍ਤਮੇ ਦਿਵਸੇ ਆਸਾਲ਼੍ਹਿਪੁਣ੍ਣਮਾਸਿਯ’’ਨ੍ਤਿ ਆਹ. ‘‘ਮਣ੍ਡਪਂ ਕਰੋਮਿ ਭਨ੍ਤੇ’’ਤਿ? ‘‘ਅਲਂ ਮਹਾਰਾਜ, ਮਮ ਪਾਟਿਹਾਰਿਯਕਰਣਟ੍ਠਾਨੇ ਸਕ੍ਕੋ ਦੇਵਰਾਜਾ ਦ੍ਵਾਦਸਯੋਜਨਿਕਂ ਰਤਨਮਣ੍ਡਪਂ ਕਰਿਸ੍ਸਤੀ’’ਤਿ. ‘‘ਏਤਂ ਕਾਰਣਂ ਨਗਰੇ ਉਗ੍ਘੋਸਾਪੇਮਿ, ਭਨ੍ਤੇ’’ਤਿ? ‘‘ਉਗ੍ਘੋਸਾਪੇਹਿ ਮਹਾਰਾਜਾ’’ਤਿ. ਰਾਜਾ ਧਮ੍ਮਘੋਸਕਂ ਅਲਙ੍ਕਤਹਤ੍ਥਿਪਿਟ੍ਠਿਂ ਆਰੋਪੇਤ੍ਵਾ ‘‘ਭਗਵਾ ਕਿਰ ਸਾਵਤ੍ਥਿਨਗਰਦ੍ਵਾਰੇ ਕਣ੍ਡਮ੍ਬਰੁਕ੍ਖਮੂਲੇ ਤਿਤ੍ਥਿਯਮਦ੍ਦਨਂ ਪਾਟਿਹਾਰਿਯਂ ਕਰਿਸ੍ਸਤਿ ਇਤੋ ਸਤ੍ਤਮੇ ਦਿਵਸੇ’’ਤਿ ਯਾਵ ਛਟ੍ਠਦਿਵਸਾ ਦੇਵਸਿਕਂ ਘੋਸਨਂ ਕਾਰੇਸਿ. ਤਿਤ੍ਥਿਯਾ ‘‘ਕਣ੍ਡਮ੍ਬਰੁਕ੍ਖਮੂਲੇ ਕਿਰ ਕਰਿਸ੍ਸਤੀ’’ਤਿ ਸਾਮਿਕਾਨਂ ਧਨਂ ਦਤ੍ਵਾ ਸਾਵਤ੍ਥਿਸਾਮਨ੍ਤੇ ਅਮ੍ਬਰੁਕ੍ਖੇ ਛਿਨ੍ਦਾਪਯਿਂਸੁ. ਧਮ੍ਮਘੋਸਕੋ ਪੁਣ੍ਣਮੀਦਿਵਸੇ ਪਾਤੋਵ ‘‘ਅਜ੍ਜ, ਭਗਵਤੋ ਪਾਟਿਹਾਰਿਯਂ ਭਵਿਸ੍ਸਤੀ’’ਤਿ ਉਗ੍ਘੋਸੇਸਿ. ਦੇਵਤਾਨੁਭਾਵੇਨ ਸਕਲਜਮ੍ਬੁਦੀਪੇ ਦ੍ਵਾਰੇ ਠਤ੍ਵਾ ਉਗ੍ਘੋਸਿਤਂ ਵਿਯ ਅਹੋਸਿ. ਯੇ ਯੇ ਗਨ੍ਤੁਂ ਚਿਤ੍ਤਂ ਉਪ੍ਪਾਦੇਨ੍ਤਿ, ਤੇ ਤੇ ਸਾਵਤ੍ਥਿਂ ਪਤ੍ਤਮੇਵ ਅਤ੍ਤਾਨਂ ਪਸ੍ਸਿਂਸੁ, ਦ੍ਵਾਦਸਯੋਜਨਿਕਾ ਪਰਿਸਾ ਅਹੋਸਿ.

ਸਤ੍ਥਾ ਪਾਤੋਵ ਸਾਵਤ੍ਥਿਂ ਪਿਣ੍ਡਾਯ ਪਵਿਸਿਤੁਂ ਨਿਕ੍ਖਮਿ. ਕਣ੍ਡੋ ਨਾਮ ਉਯ੍ਯਾਨਪਾਲੋ ਪਿਣ੍ਡਿਪਕ੍ਕਮੇਵ ਕੁਮ੍ਭਪਮਾਣਂ ਮਹਨ੍ਤਂ ਅਮ੍ਬਪਕ੍ਕਂ ਰਞ੍ਞੋ ਹਰਨ੍ਤੋ ਸਤ੍ਥਾਰਂ ਨਗਰਦ੍ਵਾਰੇ ਦਿਸ੍ਵਾ ‘‘ਇਦਂ ਤਥਾਗਤਸ੍ਸੇਵ ਅਨੁਚ੍ਛਵਿਕ’’ਨ੍ਤਿ ਅਦਾਸਿ. ਸਤ੍ਥਾ ਪਟਿਗ੍ਗਹੇਤ੍ਵਾ ਤਤ੍ਥੇਵ ਏਕਮਨ੍ਤਂ ਨਿਸਿਨ੍ਨੋ ਪਰਿਭੁਞ੍ਜਿਤ੍ਵਾ ‘‘ਆਨਨ੍ਦ, ਇਮਂ ਅਮ੍ਬਟ੍ਠਿਂ ਉਯ੍ਯਾਨਪਾਲਕਸ੍ਸ ਇਮਸ੍ਮਿਂ ਠਾਨੇ ਰੋਪਨਤ੍ਥਾਯ ਦੇਹਿ, ਏਸ ਕਣ੍ਡਮ੍ਬੋ ਨਾਮ ਭਵਿਸ੍ਸਤੀ’’ਤਿ ਆਹ. ਥੇਰੋ ਤਥਾ ਅਕਾਸਿ. ਉਯ੍ਯਾਨਪਾਲੋ ਪਂਸੁਂ ਵਿਯੂਹਿਤ੍ਵਾ ਰੋਪੇਸਿ. ਤਙ੍ਖਣਞ੍ਞੇਵ ਅਟ੍ਠਿਂ ਭਿਨ੍ਦਿਤ੍ਵਾ ਮੂਲਾਨਿ ਓਤਰਿਂਸੁ, ਨਙ੍ਗਲਸੀਸਪਮਾਣੋ ਰਤ੍ਤਙ੍ਕੁਰੋ ਉਟ੍ਠਹਿ, ਮਹਾਜਨਸ੍ਸ ਓਲੋਕੇਨ੍ਤਸ੍ਸੇਵ ਪਣ੍ਣਾਸਹਤ੍ਥਕ੍ਖਨ੍ਧੋ ਪਣ੍ਣਾਸਹਤ੍ਥਸਾਖੋ ਉਬ੍ਬੇਧਤੋ ਚ ਹਤ੍ਥਸਤਿਕੋ ਅਮ੍ਬਰੁਕ੍ਖੋ ਸਮ੍ਪਜ੍ਜਿ, ਤਾਵਦੇਵਸ੍ਸ ਪੁਪ੍ਫਾਨਿ ਚ ਫਲਾਨਿ ਚ ਉਟ੍ਠਹਿਂਸੁ. ਸੋ ਮਧੁਕਰਪਰਿਵੁਤੋ ਸੁਵਣ੍ਣਵਣ੍ਣਫਲਭਰਿਤੋ ਨਭਂ ਪੂਰੇਤ੍ਵਾ ਅਟ੍ਠਾਸਿ, ਵਾਤਪ੍ਪਹਰਣਕਾਲੇ ਮਧੁਰਪਕ੍ਕਾਨਿ ਪਤਿਂਸੁ. ਪਚ੍ਛਾ ਆਗਚ੍ਛਨ੍ਤਾ ਭਿਕ੍ਖੂ ਪਰਿਭੁਞ੍ਜਿਤ੍ਵਾਵ ਆਗਮਿਂਸੁ.

ਸਾਯਨ੍ਹਸਮਯੇ ਸਕ੍ਕੋ ਦੇਵਰਾਜਾ ਆਵਜ੍ਜੇਨ੍ਤੋ ‘‘ਸਤ੍ਥੁ ਰਤਨਮਣ੍ਡਪਕਰਣਂ ਅਮ੍ਹਾਕਂ ਭਾਰੋ’’ਤਿ ਞਤ੍ਵਾ ਵਿਸ੍ਸਕਮ੍ਮਦੇਵਪੁਤ੍ਤਂ ਪੇਸੇਤ੍ਵਾ ਦ੍ਵਾਦਸਯੋਜਨਿਕਂ ਨੀਲੁਪ੍ਪਲਸਞ੍ਛਨ੍ਨਂ ਸਤ੍ਤਰਤਨਮਣ੍ਡਪਂ ਕਾਰੇਸਿ. ਏਵਂ ਦਸਸਹਸ੍ਸਚਕ੍ਕਵਾਲ਼ਦੇਵਤਾ ਸਨ੍ਨਿਪਤਿਂਸੁ. ਸਤ੍ਥਾ ਤਿਤ੍ਥਿਯਮਦ੍ਦਨਂ ਅਸਾਧਾਰਣਂ ਸਾਵਕੇਹਿ ਯਮਕਪਾਟਿਹਾਰਿਯਂ ਕਤ੍ਵਾ ਬਹੁਜਨਸ੍ਸ ਪਸਨ੍ਨਭਾਵਂ ਞਤ੍ਵਾ ਓਰੁਯ੍ਹ ਬੁਦ੍ਧਾਸਨੇ ਨਿਸਿਨ੍ਨੋ ਧਮ੍ਮਂ ਦੇਸੇਸਿ. ਵੀਸਤਿ ਪਾਣਕੋਟਿਯੋ ਅਮਤਪਾਨਂ ਪਿਵਿਂਸੁ. ਤਤੋ ‘‘ਪੁਰਿਮਬੁਦ੍ਧਾ ਪਨ ਪਾਟਿਹਾਰਿਯਂ ਕਤ੍ਵਾ ਕਤ੍ਥ ਗਚ੍ਛਨ੍ਤੀ’’ਤਿ ਆਵਜ੍ਜੇਨ੍ਤੋ ‘‘ਤਾਵਤਿਂਸਭਵਨ’’ਨ੍ਤਿ ਞਤ੍ਵਾ ਬੁਦ੍ਧਾਸਨਾ ਉਟ੍ਠਾਯ ਦਕ੍ਖਿਣਪਾਦਂ ਯੁਗਨ੍ਧਰਮੁਦ੍ਧਨਿ ਠਪੇਤ੍ਵਾ ਵਾਮਪਾਦੇਨ ਸਿਨੇਰੁਮਤ੍ਥਕਂ ਅਕ੍ਕਮਿਤ੍ਵਾ ਪਾਰਿਚ੍ਛਤ੍ਤਕਮੂਲੇ ਪਣ੍ਡੁਕਮ੍ਬਲਸਿਲਾਯਂ ਵਸ੍ਸਂ ਉਪਗਨ੍ਤ੍ਵਾ ਅਨ੍ਤੋਤੇਮਾਸਂ ਦੇਵਾਨਂ ਅਭਿਧਮ੍ਮਪਿਟਕਂ ਕਥੇਸਿ. ਪਰਿਸਾ ਸਤ੍ਥੁ ਗਤਟ੍ਠਾਨਂ ਅਜਾਨਨ੍ਤੀ ‘‘ਦਿਸ੍ਵਾਵ ਗਮਿਸ੍ਸਾਮਾ’’ਤਿ ਤਤ੍ਥੇਵ ਤੇਮਾਸਂ ਵਸਿ. ਉਪਕਟ੍ਠਾਯ ਪਵਾਰਣਾਯ ਮਹਾਮੋਗ੍ਗਲ੍ਲਾਨਤ੍ਥੇਰੋ ਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਅਥ ਨਂ ਸਤ੍ਥਾ ਪੁਚ੍ਛਿ ‘‘ਕਹਂ ਪਨ ਏਤਰਹਿ ਸਾਰਿਪੁਤ੍ਤੋ’’ਤਿ? ‘‘ਏਸੋ, ਭਨ੍ਤੇ, ਪਾਟਿਹਾਰਿਯੇ ਪਸੀਦਿਤ੍ਵਾ ਪਬ੍ਬਜਿਤੇਹਿ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸਙ੍ਕਸ੍ਸਨਗਰਦ੍ਵਾਰੇ ਵਸੀ’’ਤਿ. ‘‘ਮੋਗ੍ਗਲ੍ਲਾਨ, ਅਹਂ ਇਤੋ ਸਤ੍ਤਮੇ ਦਿਵਸੇ ਸਙ੍ਕਸ੍ਸਨਗਰਦ੍ਵਾਰੇ ਓਤਰਿਸ੍ਸਾਮਿ, ਤਥਾਗਤਂ ਦਟ੍ਠੁਕਾਮਾ ਸਙ੍ਕਸ੍ਸਨਗਰੇ ਏਕਤੋ ਸਨ੍ਨਿਪਤਨ੍ਤੂ’’ਤਿ. ਥੇਰੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਆਗਨ੍ਤ੍ਵਾ ਪਰਿਸਾਯ ਆਰੋਚੇਤ੍ਵਾ ਸਕਲਪਰਿਸਂ ਸਾਵਤ੍ਥਿਤੋ ਤਿਂਸਯੋਜਨਂ ਸਙ੍ਕਸ੍ਸਨਗਰਂ ਏਕਮੁਹੁਤ੍ਤੇਨੇਵ ਪਾਪੇਸਿ.

ਸਤ੍ਥਾ ਵੁਤ੍ਥਵਸ੍ਸੋ ਪਵਾਰੇਤ੍ਵਾ ‘‘ਮਹਾਰਾਜ, ਮਨੁਸ੍ਸਲੋਕਂ ਗਮਿਸ੍ਸਾਮੀ’’ਤਿ ਸਕ੍ਕਸ੍ਸ ਆਰੋਚੇਸਿ. ਸਕ੍ਕੋ ਵਿਸ੍ਸਕਮ੍ਮਂ ਆਮਨ੍ਤੇਤ੍ਵਾ ‘‘ਦਸਬਲਸ੍ਸ ਮਨੁਸ੍ਸਲੋਕਗਮਨਤ੍ਥਾਯ ਤੀਣਿ ਸੋਪਾਨਾਨਿ ਕਰੋਹੀ’’ਤਿ ਆਹ. ਸੋ ਸਿਨੇਰੁਮਤ੍ਥਕੇ ਸੋਪਾਨਸੀਸਂ ਸਙ੍ਕਸ੍ਸਨਗਰਦ੍ਵਾਰੇ ਧੁਰਸੋਪਾਨਂ ਕਤ੍ਵਾ ਮਜ੍ਝੇ ਮਣਿਮਯਂ, ਏਕਸ੍ਮਿਂ ਪਸ੍ਸੇ ਰਜਤਮਯਂ, ਏਕਸ੍ਮਿਂ ਪਸ੍ਸੇ ਸੁਵਣ੍ਣਮਯਨ੍ਤਿ ਤੀਣਿ ਸੋਪਾਨਾਨਿ ਮਾਪੇਸਿ, ਸਤ੍ਤਰਤਨਮਯਾ ਵੇਦਿਕਾਪਰਿਕ੍ਖੇਪਾ. ਸਤ੍ਥਾ ਲੋਕਵਿਵਰਣਂ ਪਾਟਿਹਾਰਿਯਂ ਕਤ੍ਵਾ ਮਜ੍ਝੇ ਮਣਿਮਯੇਨ ਸੋਪਾਨੇਨ ਓਤਰਿ. ਸਕ੍ਕੋ ਪਤ੍ਤਚੀਵਰਂ ਅਗ੍ਗਹੇਸਿ, ਸੁਯਾਮੋ ਵਾਲਬੀਜਨਿਂ, ਸਹਮ੍ਪਤਿ ਮਹਾਬ੍ਰਹ੍ਮਾ ਛਤ੍ਤਂ ਧਾਰੇਸਿ, ਦਸਸਹਸ੍ਸਚਕ੍ਕਵਾਲ਼ਦੇਵਤਾ ਦਿਬ੍ਬਗਨ੍ਧਮਾਲਾਦੀਹਿ ਪੂਜਯਿਂਸੁ. ਸਤ੍ਥਾਰਂ ਧੁਰਸੋਪਾਨੇ ਪਤਿਟ੍ਠਿਤਂ ਪਠਮਮੇਵ ਸਾਰਿਪੁਤ੍ਤਤ੍ਥੇਰੋ ਵਨ੍ਦਿ, ਪਚ੍ਛਾ ਸੇਸਪਰਿਸਾ. ਤਸ੍ਮਿਂ ਸਮਾਗਮੇ ਸਤ੍ਥਾ ਚਿਨ੍ਤੇਸਿ ‘‘ਮੋਗ੍ਗਲ੍ਲਾਨੋ ‘‘ਇਦ੍ਧਿਮਾ’ਤਿ ਪਾਕਟੋ, ਉਪਾਲਿ ‘ਵਿਨਯਧਰੋ’ਤਿ. ਸਾਰਿਪੁਤ੍ਤਸ੍ਸ ਪਨ ਮਹਾਪਞ੍ਞਗੁਣੋ ਅਪਾਕਟੋ, ਠਪੇਤ੍ਵਾ ਮਂ ਅਞ੍ਞੋ ਏਤੇਨ ਸਦਿਸੋ ਸਮਪਞ੍ਞੋ ਨਾਮ ਨਤ੍ਥਿ, ਪਞ੍ਞਾਗੁਣਮਸ੍ਸ ਪਾਕਟਂ ਕਰਿਸ੍ਸਾਮੀ’’ਤਿ ਪਠਮਂ ਤਾਵ ਪੁਥੁਜ੍ਜਨਾਨਂ ਵਿਸਯੇ ਪਞ੍ਹਂ ਪੁਚ੍ਛਿ, ਤਂ ਪੁਥੁਜ੍ਜਨਾਵ ਕਥਯਿਂਸੁ ਤਤੋ ਸੋਤਾਪਨ੍ਨਾਨਂ ਵਿਸਯੇ ਪਞ੍ਹਂ ਪੁਚ੍ਛਿ, ਤਮ੍ਪਿ ਸੋਤਾਪਨ੍ਨਾਵ ਕਥਯਿਂਸੁ, ਪੁਥੁਜ੍ਜਨਾ ਨ ਜਾਨਿਂਸੁ. ਏਵਂ ਸਕਦਾਗਾਮਿਵਿਸਯੇ ਅਨਾਗਾਮਿਵਿਸਯੇ ਖੀਣਾਸਵਵਿਸਯੇ ਮਹਾਸਾਵਕਵਿਸਯੇ ਚ ਪਞ੍ਹਂ ਪੁਚ੍ਛਿ, ਤਮ੍ਪਿ ਹੇਟ੍ਠਿਮਾ ਹੇਟ੍ਠਿਮਾ ਨ ਜਾਨਿਂਸੁ, ਉਪਰਿਮਾ ਉਪਰਿਮਾਵ ਕਥਯਿਂਸੁ. ਅਗ੍ਗਸਾਵਕਵਿਸਯੇ ਪੁਟ੍ਠਪਞ੍ਹਮ੍ਪਿ ਅਗ੍ਗਸਾਵਕਾਵ ਕਥਯਿਂਸੁ, ਅਞ੍ਞੇ ਨ ਜਾਨਿਂਸੁ. ਤਤੋ ਸਾਰਿਪੁਤ੍ਤਤ੍ਥੇਰਸ੍ਸ ਵਿਸਯੇ ਪਞ੍ਹਂ ਪੁਚ੍ਛਿ, ਤਂ ਥੇਰੋਵ ਕਥੇਸਿ, ਅਞ੍ਞੇ ਨ ਜਾਨਿਂਸੁ.

ਮਨੁਸ੍ਸਾ ‘‘ਕੋ ਨਾਮ ਏਸ ਥੇਰੋ ਸਤ੍ਥਾਰਾ ਸਦ੍ਧਿਂ ਕਥੇਸੀ’’ਤਿ ਪੁਚ੍ਛਿਤ੍ਵਾ ‘‘ਧਮ੍ਮਸੇਨਾਪਤਿ ਸਾਰਿਪੁਤ੍ਤਤ੍ਥੇਰੋ ਨਾਮਾ’’ਤਿ ਸੁਤ੍ਵਾ ‘‘ਅਹੋ ਮਹਾਪਞ੍ਞੋ’’ਤਿ ਵਦਿਂਸੁ. ਤਤੋ ਪਟ੍ਠਾਯ ਦੇਵਮਨੁਸ੍ਸਾਨਂ ਅਨ੍ਤਰੇ ਥੇਰਸ੍ਸ ਮਹਾਪਞ੍ਞਗੁਣੋ ਪਾਕਟੋ ਜਾਤੋ. ਅਥ ਨਂ ਸਤ੍ਥਾ –

‘‘ਯੇ ਚ ਸਙ੍ਖਾਤਧਮ੍ਮਾਸੇ, ਯੇ ਚ ਸੇਖਾ ਪੁਥੂ ਇਧ;

ਤੇਸਂ ਮੇ ਨਿਪਕੋ ਇਰਿਯਂ, ਪੁਟ੍ਠੋ ਪਬ੍ਰੂਹਿ ਮਾਰਿਸਾ’’ਤਿ. (ਸੁ. ਨਿ. ੧੦੪੪; ਚੂਲ਼ਨਿ. ਅਜਿਤਮਾਣਵਪੁਚ੍ਛਾ ੬੩; ਨੇਤ੍ਤਿ. ੧੪) –

ਬੁਦ੍ਧਵਿਸਯੇ ਪਞ੍ਹਂ ਪੁਚ੍ਛਿਤ੍ਵਾ ‘‘ਇਮਸ੍ਸ ਨੁ ਖੋ ਸਾਰਿਪੁਤ੍ਤ, ਸਂਖਿਤ੍ਤੇਨ ਭਾਸਿਤਸ੍ਸ ਕਥਂ ਵਿਤ੍ਥਾਰੇਨ ਅਤ੍ਥੋ ਦਟ੍ਠਬ੍ਬੋ’’ਤਿ ਆਹ. ਥੇਰੋ ਪਞ੍ਹਂ ਓਲੋਕੇਤ੍ਵਾ ‘‘ਸਤ੍ਥਾ ਮਂ ਸੇਖਾਸੇਖਾਨਂ ਭਿਕ੍ਖੂਨਂ ਆਗਮਨਪਟਿਪਦਂ ਪੁਚ੍ਛਤੀ’’ਤਿ ਪਞ੍ਹੇ ਨਿਕ੍ਕਙ੍ਖੋ ਹੁਤ੍ਵਾ ‘‘ਆਗਮਨਪਟਿਪਦਾ ਨਾਮ ਖਨ੍ਧਾਦਿਵਸੇਨ ਬਹੂਹਿ ਮੁਖੇਹਿ ਸਕ੍ਕਾ ਕਥੇਤੁਂ, ਕਤਂ ਨੁ ਖੋ ਕਥੇਨ੍ਤੋ ਸਤ੍ਥੁ ਅਜ੍ਝਾਸਯਂ ਗਣ੍ਹਿਤੁਂ ਸਕ੍ਖਿਸ੍ਸਾਮੀ’’ਤਿ ਅਜ੍ਝਾਸਯੇ ਕਙ੍ਖਿ. ਸਤ੍ਥਾ ‘‘ਸਾਰਿਪੁਤ੍ਤੋ ਪਞ੍ਹੇ ਨਿਕ੍ਕਙ੍ਖੋ, ਅਜ੍ਝਾਸਯੇ ਪਨ ਮੇ ਕਙ੍ਖਤਿ, ਮਯਾ ਨਯੇ ਅਦਿਨ੍ਨੇ ਕਥੇਤੁਂ ਨ ਸਕ੍ਖਿਸ੍ਸਤਿ, ਨਯਮਸ੍ਸ ਦਸ੍ਸਾਮੀ’’ਤਿ ਨਯਂ ਦਦਨ੍ਤੋ ‘‘ਭੂਤਮਿਦਂ ਸਾਰਿਪੁਤ੍ਤ ਸਮਨੁਪਸ੍ਸਾ’’ਤਿ ਆਹ. ਏਵਂ ਕਿਰਸ੍ਸ ਅਹੋਸਿ ‘‘ਸਾਰਿਪੁਤ੍ਤੋ ਮਮ ਅਜ੍ਝਾਸਯਂ ਗਹੇਤ੍ਵਾ ਕਥੇਨ੍ਤੋ ਖਨ੍ਧਵਸੇਨ ਕਥੇਸ੍ਸਤੀ’’ਤਿ. ਥੇਰਸ੍ਸ ਸਹ ਨਯਦਾਨੇਨ ਸੋ ਪਞ੍ਹੋ ਨਯਸਤੇਨ ਨਯਸਹਸ੍ਸੇਨ ਉਪਟ੍ਠਾਸਿ. ਸੋ ਸਤ੍ਥਾਰਾ ਦਿਨ੍ਨਨਯੇ ਠਤ੍ਵਾ ਬੁਦ੍ਧਵਿਸਯੇ ਪਞ੍ਹਂ ਕਥੇਸਿ.

ਸਤ੍ਥਾ ਦ੍ਵਾਦਸਯੋਜਨਿਕਾਯ ਪਰਿਸਾਯ ਧਮ੍ਮਂ ਦੇਸੇਸਿ. ਤਿਂਸ ਪਾਣਕੋਟਿਯੋ ਅਮਤਪਾਨਂ ਪਿਵਿਂਸੁ. ਸਤ੍ਥਾ ਪਰਿਸਂ ਉਯ੍ਯੋਜੇਤ੍ਵਾ ਚਾਰਿਕਂ ਚਰਨ੍ਤੋ ਅਨੁਪੁਬ੍ਬੇਨ ਸਾਵਤ੍ਥਿਂ ਗਨ੍ਤ੍ਵਾ ਪੁਨਦਿਵਸੇ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਭਿਕ੍ਖੂਹਿ ਵਤ੍ਤੇ ਦਸ੍ਸਿਤੇ ਗਨ੍ਧਕੁਟਿਂ ਪਾਵਿਸਿ. ਸਾਯਨ੍ਹਸਮਯੇ ਭਿਕ੍ਖੂ ਥੇਰਸ੍ਸ ਗੁਣਕਥਂ ਕਥੇਨ੍ਤਾ ਧਮ੍ਮਸਭਾਯਂ ਨਿਸੀਦਿਂਸੁ ‘‘ਮਹਾਪਞ੍ਞੋ, ਆਵੁਸੋ, ਸਾਰਿਪੁਤ੍ਤੋ ਪੁਥੁਪਞ੍ਞੋ ਜਵਨਪਞ੍ਞੋ ਤਿਕ੍ਖਪਞ੍ਞੋ ਨਿਬ੍ਬੇਧਿਕਪਞ੍ਞੋ ਦਸਬਲੇਨ ਸਂਖਿਤ੍ਤੇਨ ਪੁਚ੍ਛਿਤਪਞ੍ਹਂ ਵਿਤ੍ਥਾਰੇਨ ਕਥੇਸੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਏਸ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਕਥੇਸਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸਰਭਮਿਗਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਰਞ੍ਞੇ ਵਸਤਿ. ਰਾਜਾ ਮਿਗਵਿਤ੍ਤਕੋ ਅਹੋਸਿ ਥਾਮਸਮ੍ਪਨ੍ਨੋ, ਅਞ੍ਞਂ ਮਨੁਸ੍ਸਂ ‘‘ਮਨੁਸ੍ਸੋ’’ਤਿਪਿ ਨ ਗਣੇਤਿ. ਸੋ ਏਕਦਿਵਸਂ ਮਿਗਵਂ ਗਨ੍ਤ੍ਵਾ ਅਮਚ੍ਚੇ ਆਹ – ‘‘ਯਸ੍ਸ ਪਸ੍ਸੇਨ ਮਿਗੋ ਪਲਾਯਤਿ, ਤੇਨ ਸੋ ਦਣ੍ਡੋ ਦਾਤਬ੍ਬੋ’’ਤਿ. ਤੇ ਚਿਨ੍ਤਯਿਂਸੁ ‘‘ਕਦਾਚਿ ਵੇਮਜ੍ਝੇ ਠਿਤਮਿਗਂ ਵਿਜ੍ਝਨ੍ਤਿ, ਕਦਾਚਿ ਉਟ੍ਠਿਤਂ, ਕਦਾਚਿ ਪਲਾਯਨ੍ਤਮ੍ਪਿ, ਅਜ੍ਜ ਪਨ ਯੇਨ ਕੇਨਚਿ ਉਪਾਯੇਨ ਰਞ੍ਞੋ ਠਿਤਟ੍ਠਾਨਞ੍ਞੇਵ ਆਰੋਪੇਸ੍ਸਾਮਾ’’ਤਿ. ਚਿਨ੍ਤੇਤ੍ਵਾ ਚ ਪਨ ਕਤਿਕਂ ਕਤ੍ਵਾ ਰਞ੍ਞੋ ਧੁਰਮਗ੍ਗਂ ਅਦਂਸੁ. ਤੇ ਮਹਨ੍ਤਂ ਗੁਮ੍ਬਂ ਪਰਿਕ੍ਖਿਪਿਤ੍ਵਾ ਮੁਗ੍ਗਰਾਦੀਹਿ ਭੂਮਿਂ ਪੋਥਯਿਂਸੁ. ਪਠਮਮੇਵ ਸਰਭਮਿਗੋ ਉਟ੍ਠਾਯ ਤਿਕ੍ਖਤ੍ਤੁਂ ਗੁਬ੍ਭਂ ਅਨੁਪਰਿਗਨ੍ਤ੍ਵਾ ਪਲਾਯਨੋਕਾਸਂ ਓਲੋਕੇਨ੍ਤੋ ਸੇਸਦਿਸਾਸੁ ਮਨੁਸ੍ਸੇ ਬਾਹਾਯ ਬਾਹਂ ਧਨੁਨਾ ਧਨੁਂ ਆਹਚ੍ਚ ਨਿਰਨ੍ਤਰੇ ਠਿਤੇ ਦਿਸ੍ਵਾ ਰਞ੍ਞੋ ਠਿਤਟ੍ਠਾਨੇਯੇਵ ਓਕਾਸਂ ਅਦ੍ਦਸ. ਸੋ ਉਮ੍ਮੀਲਿਤੇਸੁ ਅਕ੍ਖੀਸੁ ਵਾਲੁਕਂ ਖਿਪਮਾਨੋ ਵਿਯ ਰਾਜਾਨਂ ਅਭਿਮੁਖੋ ਅਗਮਾਸਿ. ਰਾਜਾ ਤਂ ਲਹੁਸਮ੍ਪਤ੍ਤਂ ਦਿਸ੍ਵਾ ਸਰਂ ਉਕ੍ਖਿਪਿਤ੍ਵਾ ਵਿਜ੍ਝਿ. ਸਰਭਮਿਗਾ ਨਾਮ ਸਰਂ ਵਞ੍ਚੇਤੁਂ ਛੇਕਾ ਹੋਨ੍ਤਿ, ਸਰੇ ਅਭਿਮੁਖਂ ਆਗਚ੍ਛਨ੍ਤੇ ਵੇਗਂ ਹਾਪੇਤ੍ਵਾ ਤਿਟ੍ਠਨ੍ਤਿ, ਪਚ੍ਛਤੋ ਆਗਚ੍ਛਨ੍ਤੇ ਵੇਗੇਨ ਪੁਰਤੋ ਜਵਨ੍ਤਿ, ਉਪਰਿਭਾਗੇਨਾਗਚ੍ਛਨ੍ਤੇ ਪਿਟ੍ਠਿਂ ਨਾਮੇਨ੍ਤਿ, ਪਸ੍ਸੇਨਾਗਚ੍ਛਨ੍ਤੇ ਥੋਕਂ ਅਪਗਚ੍ਛਨ੍ਤਿ, ਕੁਚ੍ਛਿਂ ਸਨ੍ਧਾਯਾਗਚ੍ਛਨ੍ਤੇ ਪਰਿਵਤ੍ਤਿਤ੍ਵਾ ਪਤਨ੍ਤਿ, ਸਰੇ ਅਤਿਕ੍ਕਨ੍ਤੇ ਵਾਤਚ੍ਛਿਨ੍ਨਵਲਾਹਕਵੇਗੇਨ ਪਲਾਯਨ੍ਤਿ.

ਸੋਪਿ ਰਾਜਾ ਤਸ੍ਮਿਂ ਪਰਿਵਤ੍ਤਿਤ੍ਵਾ ਪਤਿਤੇ ‘‘ਸਰਭਮਿਗੋ ਮੇ ਵਿਦ੍ਧੋ’’ਤਿ ਨਾਦਂ ਮੁਞ੍ਚਿ. ਸਰਭੋ ਉਟ੍ਠਾਯ ਵਾਤਵੇਗੇਨ ਪਲਾਯਿ. ਬਲਮਣ੍ਡਲਂ ਭਿਜ੍ਜਿਤ੍ਵਾ ਉਭੋਸੁ ਪਸ੍ਸੇਸੁ ਠਿਤਅਮਚ੍ਚਾ ਸਰਭਂ ਪਲਾਯਮਾਨਂ ਦਿਸ੍ਵਾ ਏਕਤੋ ਹੁਤ੍ਵਾ ਪੁਚ੍ਛਿਂਸੁ ‘‘ਮਿਗੋ ਕਸ੍ਸ ਠਿਤਟ੍ਠਾਨਂ ਅਭਿਰੁਹੀ’’ਤਿ? ‘‘ਰਞ੍ਞੋ ਠਿਤਟ੍ਠਾਨ’’ਨ੍ਤਿ. ‘‘ਰਾਜਾ ‘ਵਿਦ੍ਧੋ ਮੇ’ਤਿ ਵਦਤਿ, ਕੋਨੇਨ ਵਿਦ੍ਧੋ, ਨਿਬ੍ਬਿਰਜ੍ਝੋ ਭੋ ਅਮ੍ਹਾਕਂ ਰਾਜਾ, ਭੂਮਿਨੇਨ ਵਿਦ੍ਧਾ’’ਤਿ ਤੇ ਨਾਨਪ੍ਪਕਾਰੇਨ ਰਞ੍ਞਾ ਸਦ੍ਧਿਂ ਕੇਲ਼ਿਂ ਕਰਿਂਸੁ. ਰਾਜਾ ਚਿਨ੍ਤੇਸਿ ‘‘ਇਮੇ ਮਂ ਪਰਿਹਸਨ੍ਤਿ, ਨ ਮਮ ਪਮਾਣਂ ਜਾਨਨ੍ਤੀ’’ਤਿ ਗਾਲ਼੍ਹਂ ਨਿਵਾਸੇਤ੍ਵਾ ਪਤ੍ਤਿਕੋਵ ਖਗ੍ਗਂ ਆਦਾਯ ‘‘ਸਰਭਂ ਗਣ੍ਹਿਸ੍ਸਾਮੀ’’ਤਿ ਵੇਗੇਨ ਪਕ੍ਖਨ੍ਦਿ. ਅਥ ਨਂ ਦਿਸ੍ਵਾ ਤੀਣਿ ਯੋਜਨਾਨਿ ਅਨੁਬਨ੍ਧਿ. ਸਰਭੋ ਅਰਞ੍ਞਂ ਪਾਵਿਸਿ, ਰਾਜਾਪਿ ਪਾਵਿਸਿ. ਤਤ੍ਥ ਸਰਭਮਿਗਸ੍ਸ ਗਮਨਮਗ੍ਗੇ ਸਟ੍ਠਿਹਤ੍ਥਮਤ੍ਤੋ ਮਹਾਪੂਤਿਪਾਦਨਰਕਾਵਾਟੋ ਅਤ੍ਥਿ, ਸੋ ਤਿਂਸਹਤ੍ਥਮਤ੍ਤਂ ਉਦਕੇਨ ਪੁਣ੍ਣੋ ਤਿਣੇਹਿ ਚ ਪਟਿਚ੍ਛਨ੍ਨੋ. ਸਰਭੋ ਉਦਕਗਨ੍ਧਂ ਘਾਯਿਤ੍ਵਾਵ ਆਵਾਟਭਾਵਂ ਞਤ੍ਵਾ ਥੋਕਂ ਓਸਕ੍ਕਿਤ੍ਵਾ ਗਤੋ. ਰਾਜਾ ਪਨ ਉਜੁਕਮੇਵ ਗਚ੍ਛਨ੍ਤੋ ਤਸ੍ਮਿਂ ਪਤਿ.

ਸਰਭੋ ਤਸ੍ਸ ਪਦਸਦ੍ਦਂ ਅਸੁਣਨ੍ਤੋ ਨਿਵਤ੍ਤਿਤ੍ਵਾ ਤਂ ਅਪਸ੍ਸਨ੍ਤੋ ‘‘ਨਰਕਾਵਾਟੇ ਪਤਿਤੋ ਭਵਿਸ੍ਸਤੀ’’ਤਿ ਞਤ੍ਵਾ ਆਗਨ੍ਤ੍ਵਾ ਓਲੋਕੇਨ੍ਤੋ ਤਂ ਗਮ੍ਭੀਰਉਦਕੇ ਅਪਤਿਟ੍ਠਂ ਕਿਲਮਨ੍ਤਂ ਦਿਸ੍ਵਾ ਤੇਨ ਕਤਂ ਅਪਰਾਧਂ ਹਦਯੇ ਅਕਤ੍ਵਾ ਸਞ੍ਜਾਤਕਾਰੁਞ੍ਞੋ ‘‘ਮਾ ਮਯਿ ਪਸ੍ਸਨ੍ਤੇਵ ਰਾਜਾ ਨਸ੍ਸਤੁ, ਇਮਮ੍ਹਾ ਦੁਕ੍ਖਾ ਨਂ ਮੋਚੇਸ੍ਸਾਮੀ’’ਤਿ ਆਵਾਟਤੀਰੇ ਠਿਤੋ ‘‘ਮਾ ਭਾਯਿ, ਮਹਾਰਾਜ, ਮਹਨ੍ਤਾ ਦੁਕ੍ਖਾ ਤਂ ਮੋਚੇਸ੍ਸਾਮੀ’’ਤਿ ਵਤ੍ਵਾ ਅਤ੍ਤਨੋ ਪਿਯਪੁਤ੍ਤਂ ਉਦ੍ਧਰਿਤੁਂ ਉਸ੍ਸਾਹਂ ਕਰੋਨ੍ਤੋ ਵਿਯ ਤਸ੍ਸੁਦ੍ਧਰਣਤ੍ਥਾਯ ਸਿਲਾਯ ਯੋਗ੍ਗਂ ਕਤ੍ਵਾਵ ‘‘ਵਿਜ੍ਝਿਸ੍ਸਾਮੀ’’ਤਿ ਆਗਤਂ ਰਾਜਾਨਂ ਸਟ੍ਠਿਹਤ੍ਥਾ ਨਰਕਾ ਉਦ੍ਧਰਿਤ੍ਵਾ ਅਸ੍ਸਾਸੇਤ੍ਵਾ ਪਿਟ੍ਠਿਂ ਆਰੋਪੇਤ੍ਵਾ ਅਰਞ੍ਞਾ ਨੀਹਰਿਤ੍ਵਾ ਸੇਨਾਯ ਅਵਿਦੂਰੇ ਓਤਾਰੇਤ੍ਵਾ ਓਵਾਦਮਸ੍ਸ ਦਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਸਿ. ਰਾਜਾ ਮਹਾਸਤ੍ਤਂ ਵਿਨਾ ਵਸਿਤੁਂ ਅਸਕ੍ਕੋਨ੍ਤੋ ਆਹ ‘‘ਸਾਮਿ ਸਰਭਮਿਗਰਾਜ, ਮਯਾ ਸਦ੍ਧਿਂ ਬਾਰਾਣਸਿਂ ਏਹਿ, ਦ੍ਵਾਦਸਯੋਜਨਿਕਾਯ ਤੇ ਬਾਰਾਣਸਿਯਂ ਰਜ੍ਜਂ ਦਮ੍ਮਿ, ਤਂ ਕਾਰੇਹੀ’’ਤਿ. ‘‘ਮਹਾਰਾਜ, ਮਯਂ ਤਿਰਚ੍ਛਾਨਗਤਾ, ਨ ਮੇ ਰਜ੍ਜੇਨਤ੍ਥੋ, ਸਚੇ ਤੇ ਮਯਿ ਸਿਨੇਹੋ ਅਤ੍ਥਿ, ਮਯਾ ਦਿਨ੍ਨਾਨਿ ਸੀਲਾਨਿ ਰਕ੍ਖਨ੍ਤੋ ਰਟ੍ਠਵਾਸਿਨੋਪਿ ਸੀਲਂ ਰਕ੍ਖਾਪੇਹੀ’’ਤਿ ਤਂ ਓਵਦਿਤ੍ਵਾ ਅਰਞ੍ਞਮੇਵ ਪਾਵਿਸਿ.

ਸੋ ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ ਤਸ੍ਸ ਗੁਣਂ ਸਰਨ੍ਤੋਵ ਸੇਨਂ ਪਾਪੁਣਿਤ੍ਵਾ ਸੇਨਙ੍ਗਪਰਿਵੁਤੋ ਨਗਰਂ ਗਨ੍ਤ੍ਵਾ ‘‘ਇਤੋ ਪਟ੍ਠਾਯ ਸਕਲਨਗਰਵਾਸਿਨੋ ਪਞ੍ਚ ਸੀਲਾਨਿ ਰਕ੍ਖਨ੍ਤੂ’’ਤਿ ਧਮ੍ਮਭੇਰਿਂ ਚਰਾਪੇਸਿ. ਮਹਾਸਤ੍ਤੇਨ ਪਨ ਅਤ੍ਤਨੋ ਕਤਗੁਣਂ ਕਸ੍ਸਚਿ ਅਕਥੇਤ੍ਵਾ ਸਾਯਨ੍ਹੇ ਨਾਨਗ੍ਗਰਸਭੋਜਨਂ ਭੁਞ੍ਜਿਤ੍ਵਾ ਅਲਙ੍ਕਤਸਯਨੇ ਸਯਿਤ੍ਵਾ ਪਚ੍ਚੂਸਕਾਲੇ ਮਹਾਸਤ੍ਤਸ੍ਸ ਗੁਣਂ ਸਰਿਤ੍ਵਾ ਉਟ੍ਠਾਯ ਸਯਨਪਿਟ੍ਠੇ ਪਲ੍ਲਙ੍ਕੇਨ ਨਿਸੀਦਿਤ੍ਵਾ ਪੀਤਿਪੁਣ੍ਣੇਨ ਹਦਯੇਨ ਛਹਿ ਗਾਥਾਹਿ ਉਦਾਨੇਸਿ –

੧੩੪.

‘‘ਆਸੀਸੇਥੇਵ ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਪਸ੍ਸਾਮਿ ਵੋਹਂ ਅਤ੍ਤਾਨਂ, ਯਥਾ ਇਚ੍ਛਿਂ ਤਥਾ ਅਹੁ.

੧੩੫.

‘‘ਆਸੀਸੇਥੇਵ ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਪਸ੍ਸਾਮਿ ਵੋਹਂ ਅਤ੍ਤਾਨਂ, ਉਦਕਾ ਥਲਮੁਬ੍ਭਤਂ.

੧੩੬.

‘‘ਵਾਯਮੇਥੇਵ ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਪਸ੍ਸਾਮਿ ਵੋਹਂ ਅਤ੍ਤਾਨਂ, ਯਥਾ ਇਚ੍ਛਿਂ ਤਥਾ ਅਹੁ.

੧੩੭.

‘‘ਵਾਯਮੇਥੇਵ ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਪਸ੍ਸਾਮਿ ਵੋਹਂ ਅਤ੍ਤਾਨਂ, ਉਦਕਾ ਥਲਮੁਬ੍ਭਤਂ.

੧੩੮.

‘‘ਦੁਕ੍ਖੂਪਨੀਤੋਪਿ ਨਰੋ ਸਪਞ੍ਞੋ, ਆਸਂ ਨ ਛਿਨ੍ਦੇਯ੍ਯ ਸੁਖਾਗਮਾਯ;

ਬਹੂ ਹਿ ਫਸ੍ਸਾ ਅਹਿਤਾ ਹਿਤਾ ਚ, ਅਵਿਤਕ੍ਕਿਤਾ ਮਚ੍ਚੁਮੁਪਬ੍ਬਜਨ੍ਤਿ.

੧੩੯.

‘‘ਅਚਿਨ੍ਤਿਤਮ੍ਪਿ ਭਵਤਿ, ਚਿਨ੍ਤਿਤਮ੍ਪਿ ਵਿਨਸ੍ਸਤਿ;

ਨ ਹਿ ਚਿਨ੍ਤਾਮਯਾ ਭੋਗਾ, ਇਤ੍ਥਿਯਾ ਪੁਰਿਸਸ੍ਸ ਵਾ’’ਤਿ.

ਤਤ੍ਥ ਆਸੀਸੇਥੇਵ ਪੁਰਿਸੋਤਿ ਆਸਚ੍ਛੇਦਕਕਮ੍ਮਂ ਅਕਤ੍ਵਾ ਅਤ੍ਤਨੋ ਕਮ੍ਮੇਸੁ ਆਸਂ ਕਰੋਥੇਵ ਨ ਉਕ੍ਕਣ੍ਠੇਯ੍ਯ. ਯਥਾ ਇਚ੍ਛਿਨ੍ਤਿ ਅਹਞ੍ਹਿ ਸਟ੍ਠਿਹਤ੍ਥਾ ਨਰਕਾ ਉਟ੍ਠਾਨਂ ਇਚ੍ਛਿਂ, ਸੋਮ੍ਹਿ ਤਥੇਵ ਜਾਤੋ, ਤਤੋ ਉਟ੍ਠਿਤੋਯੇਵਾਤਿ ਦੀਪੇਤਿ. ਅਹਿਤਾ ਹਿਤਾ ਚਾਤਿ ਦੁਕ੍ਖਫਸ੍ਸਾ ਚ ਸੁਖਫਸ੍ਸਾ ਚ, ‘‘ਮਰਣਫਸ੍ਸਾ ਜੀਵਿਤਫਸ੍ਸਾ ਚਾ’’ਤਿਪਿ ਅਤ੍ਥੋ, ਸਤ੍ਤਾਨਞ੍ਹਿ ਮਰਣਫਸ੍ਸੋ ਅਹਿਤੋ ਜੀਵਿਤਫਸ੍ਸੋ ਹਿਤੋ, ਤੇਸਂ ਅਵਿਤਕ੍ਕਿਤੋ ਅਚਿਨ੍ਤਿਤੋਪਿ ਮਰਣਫਸ੍ਸੋ ਆਗਚ੍ਛਤੀਤਿ ਦਸ੍ਸੇਤਿ. ਅਚਿਨ੍ਤਿ ਤਮ੍ਪੀਤਿ ਮਯਾ ‘‘ਆਵਾਟੇ ਪਤਿਸ੍ਸਾਮੀ’’ਤਿ ਨ ਚਿਨ੍ਤਿਤਂ, ‘‘ਸਰਭਂ ਮਾਰੇਸ੍ਸਾਮੀ’’ਤਿ ਚਿਨ੍ਤਿਤਂ, ਇਦਾਨਿ ਪਨ ਮੇ ਚਿਨ੍ਤਿਤਂ ਨਟ੍ਠਂ, ਅਚਿਨ੍ਤਿਤਮੇਵ ਜਾਤਂ. ਭੋਗਾਤਿ ਯਸਪਰਿਵਾਰਾ. ਏਤੇ ਚਿਨ੍ਤਾਮਯਾ ਨ ਹੋਨ੍ਤਿ, ਤਸ੍ਮਾ ਞਾਣਵਤਾ ਵੀਰਿਯਮੇਵ ਕਾਤਬ੍ਬਂ. ਵੀਰਿਯਵਤੋ ਹਿ ਅਚਿਨ੍ਤਿਤਮ੍ਪਿ ਹੋਤਿਯੇਵ.

ਤਸ੍ਸੇਵਂ ਉਦਾਨਂ ਉਦਾਨੇਨ੍ਤਸ੍ਸੇਵ ਅਰੁਣਂ ਉਟ੍ਠਹਿ. ਪੁਰੋਹਿਤੋ ਚ ਪਾਤੋਵ ਸੁਖਸੇਯ੍ਯਪੁਚ੍ਛਨਤ੍ਥਂ ਆਗਨ੍ਤ੍ਵਾ ਰਾਜਦ੍ਵਾਰੇ ਠਿਤੋ ਤਸ੍ਸ ਉਦਾਨਗੀਤਸਦ੍ਦਂ ਸੁਤ੍ਵਾ ਚਿਨ੍ਤੇਸਿ ‘‘ਰਾਜਾ ਹਿਯ੍ਯੋ ਮਿਗਵਂ ਅਗਮਾਸਿ, ਤਤ੍ਥ ਸਰਭਮਿਗਂ ਵਿਰਦ੍ਧੋ ਭਵਿਸ੍ਸਤਿ, ਤਤੋ ਅਮਚ੍ਚੇਹਿ ਅਵਹਸਿਯਮਾਨੋ ‘ਮਾਰੇਤ੍ਵਾ ਨਂ ਆਹਰਿਸ੍ਸਾਮੀ’ਤਿ ਖਤ੍ਤਿਯਮਾਨੇਨ ਤਂ ਅਨੁਬਨ੍ਧਨ੍ਤੋ ਸਟ੍ਠਿਹਤ੍ਥੇ ਨਰਕੇ ਪਤਿਤੋ ਭਵਿਸ੍ਸਤਿ, ਦਯਾਲੁਨਾ ਸਰਭਰਾਜੇਨ ਰਞ੍ਞੋ ਦੋਸਂ ਅਚਿਨ੍ਤੇਤ੍ਵਾ ਰਾਜਾ ਉਦ੍ਧਰਿਤੋ ਭਵਿਸ੍ਸਤਿ, ਤੇਨ ਮਞ੍ਞੇ ਉਦਾਨਂ ਉਦਾਨੇਤੀ’’ਤਿ. ਏਵਂ ਬ੍ਰਾਹ੍ਮਣਸ੍ਸ ਰਞ੍ਞੋ ਪਰਿਪੁਣ੍ਣਬ੍ਯਞ੍ਜਨਂ ਉਦਾਨਂ ਸੁਤ੍ਵਾ ਸੁਮਜ੍ਜਿਤੇ ਆਦਾਸੇ ਮੁਖਂ ਓਲੋਕੇਨ੍ਤਸ੍ਸ ਛਾਯਾ ਵਿਯ ਰਞ੍ਞਾ ਚ ਸਰਭੇਨ ਚ ਕਤਕਾਰਣਂ ਪਾਕਟਂ ਅਹੋਸਿ. ਸੋ ਨਖਗ੍ਗੇਨ ਦ੍ਵਾਰਂ ਆਕੋਟੇਸਿ. ਰਾਜਾ ‘‘ਕੋ ਏਸੋ’’ਤਿ ਪੁਚ੍ਛਿ. ‘‘ਅਹਂ ਦੇਵ ਪੁਰੋਹਿਤੋ’’ਤਿ. ਅਥਸ੍ਸ ਦ੍ਵਾਰਂ ਵਿਵਰਿਤ੍ਵਾ ‘‘ਇਤੋ ਏਹਾਚਰਿਯਾ’’ਤਿ ਆਹ. ਸੋ ਪਵਿਸਿਤ੍ਵਾ ਰਾਜਾਨਂ ਜਯਾਪੇਤ੍ਵਾ ਏਕਮਨ੍ਤਂ ਠਿਤੋ ‘‘ਅਹਂ, ਮਹਾਰਾਜ, ਤਯਾ ਅਰਞ੍ਞੇ ਕਤਕਾਰਣਂ ਜਾਨਾਮਿ, ਤ੍ਵਂ ਏਕਂ ਸਰਭਮਿਗਂ ਅਨੁਬਨ੍ਧਨ੍ਤੋ ਨਰਕੇ ਪਤਿਤੋ, ਅਥ ਨਂ ਸੋ ਸਰਭੋ ਸਿਲਾਯ ਯੋਗ੍ਗਂ ਕਤ੍ਵਾ ਨਰਕਤੋ ਉਦ੍ਧਰਿ, ਸੋ ਤ੍ਵਂ ਤਸ੍ਸ ਗੁਣਂ ਅਨੁਸ੍ਸਰਿਤ੍ਵਾ ਉਦਾਨਂ ਉਦਾਨੇਸੀ’’ਤਿ ਵਤ੍ਵਾ ਦ੍ਵੇ ਗਾਥਾ ਅਭਾਸਿ –

੧੪੦.

‘‘ਸਰਭਂ ਗਿਰਿਦੁਗ੍ਗਸ੍ਮਿਂ, ਯਂ ਤ੍ਵਂ ਅਨੁਸਰੀ ਪੁਰੇ;

ਅਲੀਨਚਿਤ੍ਤਸ੍ਸ ਤੁਵਂ, ਵਿਕ੍ਕਨ੍ਤਮਨੁਜੀਵਸਿ.

੧੪੧.

‘‘ਯੋ ਤਂ ਵਿਦੁਗ੍ਗਾ ਨਰਕਾ ਸਮੁਦ੍ਧਰਿ, ਸਿਲਾਯ ਯੋਗ੍ਗਂ ਸਰਭੋ ਕਰਿਤ੍ਵਾ;

ਦੁਕ੍ਖੂਪਨੀਤਂ ਮਚ੍ਚੁਮੁਖਾ ਪਮੋਚਯਿ, ਅਲੀਨਚਿਤ੍ਤਂ ਤ ਮਿਗਂ ਵਦੇਸੀ’’ਤਿ.

ਤਤ੍ਥ ਅਨੁਸਰੀਤਿ ਅਨੁਬਨ੍ਧਿ. ਵਿਕ੍ਕਨ੍ਤਨ੍ਤਿ ਉਦ੍ਧਰਣਤ੍ਥਾਯ ਕਤਪਰਕ੍ਕਮਂ. ਅਨੁਜੀਵਸੀਤਿ ਉਪਜੀਵਸਿ, ਤਸ੍ਸਾਨੁਭਾਵੇਨ ਤਯਾ ਜੀਵਿਤਂ ਲਦ੍ਧਨ੍ਤਿ ਅਤ੍ਥੋ. ਸਮੁਦ੍ਧਰੀਤਿ ਉਦ੍ਧਰਿ. ਤ ਮਿਗਂ ਵਦੇਸੀਤਿ ਤਂ ਸੁਵਣ੍ਣਸਰਭਮਿਗਂ ਇਧ ਸਿਰਿਸਯਨੇ ਨਿਸਿਨ੍ਨੋ ਵਣ੍ਣੇਸਿ.

ਤਂ ਸੁਤ੍ਵਾ ਰਾਜਾ ‘‘ਅਯਂ ਮਯਾ ਸਦ੍ਧਿਂ ਨ ਮਿਗਵਂ ਗਤੋ, ਸਬ੍ਬਂ ਪਵਤ੍ਤਿਂ ਜਾਨਾਤਿ, ਕਥਂ ਨੁ ਖੋ ਜਾਨਾਤਿ, ਪੁਚ੍ਛਿਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਨਵਮਂ ਗਾਥਮਾਹ –

੧੪੨.

‘‘ਕਿਂ ਤ੍ਵਂ ਨੁ ਤਤ੍ਥੇਵ ਤਦਾ ਅਹੋਸਿ, ਉਦਾਹੁ ਤੇ ਕੋਚਿ ਨਂ ਏਤਦਕ੍ਖਾ;

ਵਿਵਟਚ੍ਛਦ੍ਦੋ ਨੁਸਿ ਸਬ੍ਬਦਸ੍ਸੀ, ਞਾਣਂ ਨੁ ਤੇ ਬ੍ਰਾਹ੍ਮਣ ਭਿਂਸਰੂਪ’’ਨ੍ਤਿ.

ਤਤ੍ਥ ਭਿਂਸਰੂਪਨ੍ਤਿ ਕਿਂ ਨੁ ਤੇ ਞਾਣਂ ਬਲਵਜਾਤਿਕਂ, ਤੇਨੇਤਂ ਜਾਨਾਸੀਤਿ.

ਬ੍ਰਾਹ੍ਮਣੋ ‘‘ਨਾਹਂ ਸਬ੍ਬਞ੍ਞੁਬੁਦ੍ਧੋ, ਬ੍ਯਞ੍ਜਨਂ ਅਮਕ੍ਖੇਤ੍ਵਾ ਤਯਾ ਕਥਿਤਗਾਥਾਨਂ ਪਨ ਮਯ੍ਹਂ ਅਤ੍ਥੋ ਉਪਟ੍ਠਾਤੀ’’ਤਿ ਦੀਪੇਨ੍ਤੋ ਦਸਮਂ ਗਾਥਮਾਹ –

੧੪੩.

‘‘ਨ ਚੇਵਹਂ ਤਤ੍ਥ ਤਦਾ ਅਹੋਸਿਂ, ਨ ਚਾਪਿ ਮੇ ਕੋਚਿ ਨਂ ਏਤਦਕ੍ਖਾ;

ਗਾਥਾਪਦਾਨਞ੍ਚ ਸੁਭਾਸਿਤਾਨਂ, ਅਤ੍ਥਂ ਤਦਾਨੇਨ੍ਤਿ ਜਨਿਨ੍ਦ ਧੀਰਾ’’ਤਿ.

ਤਤ੍ਥ ਸੁਭਾਸਿਤਾਨਨ੍ਤਿ ਬ੍ਯਞ੍ਜਨਂ ਅਮਕ੍ਖੇਤ੍ਵਾ ਸੁਟ੍ਠੁ ਭਾਸਿਤਾਨਂ. ਅਤ੍ਥਂ ਤਦਾਨੇਨ੍ਤੀਤਿ ਯੋ ਤੇਸਂ ਅਤ੍ਥੋ, ਤਂ ਆਨੇਨ੍ਤਿ ਉਪਧਾਰੇਨ੍ਤੀਤਿ.

ਰਾਜਾ ਤਸ੍ਸ ਤੁਸ੍ਸਿਤ੍ਵਾ ਬਹੁਂ ਧਨਂ ਅਦਾਸਿ. ਤਤੋ ਪਟ੍ਠਾਯ ਦਾਨਾਦਿਪੁਞ੍ਞਾਭਿਰਤੋ ਅਹੋਸਿ, ਮਨੁਸ੍ਸਾਪਿ ਪੁਞ੍ਞਾਭਿਰਤਾ ਹੁਤ੍ਵਾ ਮਤਮਤਾ ਸਗ੍ਗਮੇਵ ਪੂਰਯਿਂਸੁ. ਅਥੇਕਦਿਵਸਂ ਰਾਜਾ ‘‘ਲਕ੍ਖਂ ਵਿਜ੍ਝਿਸ੍ਸਾਮੀ’’ਤਿ ਪੁਰੋਹਿਤਮਾਦਾਯ ਉਯ੍ਯਾਨਂ ਗਤੋ. ਤਦਾ ਸਕ੍ਕੋ ਦੇਵਰਾਜਾ ਬਹੂ ਨਵੇ ਦੇਵੇ ਚ ਦੇਵਕਞ੍ਞਾਯੋ ਚ ਦਿਸ੍ਵਾ ‘‘ਕਿਂ ਨੁ ਖੋ ਕਾਰਣ’’ਨ੍ਤਿ ਆਵਜ੍ਜੇਨ੍ਤੋ ਸਰਭਮਿਗੇਨ ਨਰਕਾ ਉਦ੍ਧਰਿਤ੍ਵਾ ਰਞ੍ਞੋ ਸੀਲੇਸੁ ਪਤਿਟ੍ਠਾਪਿਤਭਾਵਂ ਞਤ੍ਵਾ ‘‘ਰਞ੍ਞੋ ਆਨੁਭਾਵੇਨ ਮਹਾਜਨੋ ਪੁਞ੍ਞਾਨਿ ਕਰੋਤਿ, ਤੇਨ ਦੇਵਲੋਕੋ ਪਰਿਪੂਰਤਿ, ਇਦਾਨਿ ਖੋ ਪਨ ਰਾਜਾ ਲਕ੍ਖਂ ਵਿਜ੍ਝਿਤੁਂ ਉਯ੍ਯਾਨਂ ਗਤੋ, ਤਂ ਵੀਮਂਸਿਤ੍ਵਾ ਸੀਹਨਾਦਂ ਨਦਾਪੇਤ੍ਵਾ ਸਰਭਮਿਗਸ੍ਸ ਗੁਣਂ ਕਥਾਪੇਤ੍ਵਾ ਅਤ੍ਤਨੋ ਚ ਸਕ੍ਕਭਾਵਂ ਜਾਨਾਪੇਤ੍ਵਾ ਆਕਾਸੇ ਠਿਤੋ ਧਮ੍ਮਂ ਦੇਸੇਤ੍ਵਾ ਮੇਤ੍ਤਾਯ ਚੇਵ ਪਞ੍ਚਨ੍ਨਂ ਸੀਲਾਨਞ੍ਚ ਗੁਣਂ ਕਥੇਤ੍ਵਾ ਆਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਉਯ੍ਯਾਨਂ ਅਗਮਾਸਿ. ਰਾਜਾਪਿ ‘‘ਲਕ੍ਖਂ ਵਿਜ੍ਝਿਸ੍ਸਾਮੀ’’ਤਿ ਧਨੁਂ ਆਰੋਪੇਤ੍ਵਾ ਸਰਂ ਸਨ੍ਨਯ੍ਹਿ. ਤਸ੍ਮਿਂ ਖਣੇ ਸਕ੍ਕੋ ਰਞ੍ਞੋ ਚ ਲਕ੍ਖਸ੍ਸ ਚ ਅਨ੍ਤਰੇ ਅਤ੍ਤਨੋ ਆਨੁਭਾਵੇਨ ਸਰਭਂ ਦਸ੍ਸੇਸਿ. ਰਾਜਾ ਤਂ ਦਿਸ੍ਵਾ ਸਰਂ ਨ ਮੁਞ੍ਚਿ. ਅਥ ਨਂ ਸਕ੍ਕੋ ਪੁਰੋਹਿਤਸ੍ਸ ਸਰੀਰੇ ਅਧਿਮੁਚ੍ਚਿਤ੍ਵਾ ਗਾਥਂ ਅਭਾਸਿ –

੧੪੪.

‘‘ਆਦਾਯ ਪਤ੍ਤਿਂ ਪਰਵਿਰਿਯਘਾਤਿਂ, ਚਾਪੇ ਸਰਂ ਕਿਂ ਵਿਚਿਕਿਚ੍ਛਸੇ ਤੁਵਂ;

ਨੁਨ੍ਨੋ ਸਰੋ ਸਰਭਂ ਹਨ੍ਤੁ ਖਿਪ੍ਪਂ, ਅਨ੍ਨਞ੍ਹਿ ਏਤਂ ਵਰਪਞ੍ਞ ਰਞ੍ਞੋ’’ਤਿ.

ਤਤ੍ਥ ਪਤ੍ਤਿਨ੍ਤਿ ਵਾਜਪਤ੍ਤੇਹਿ ਸਮਨ੍ਨਾਗਤਂ. ਪਰਵਿਰਿਯਘਾਤਿਨ੍ਤਿ ਪਰੇਸਂ ਵੀਰਿਯਘਾਤਕਂ. ਚਾਪੇ ਸਰਨ੍ਤਿ ਏਤਂ ਪਤ੍ਤਸਹਿਤਂ ਸਰਂ ਚਾਪੇ ਆਦਾਯ ਸਨ੍ਨਯ੍ਹਿਤ੍ਵਾ ਇਦਾਨਿ ਤ੍ਵਂ ਕਿਂ ਵਿਚਿਕਿਚ੍ਛਸਿ. ਹਨ੍ਤੂਤਿ ਤਯਾ ਵਿਸ੍ਸਟ੍ਠੋ ਹੁਤ੍ਵਾ ਏਸ ਸਰੋ ਖਿਪ੍ਪਂ ਇਮਂ ਸਰਭਂ ਹਨਤੁ. ਅਨ੍ਨਞ੍ਹਿ ਏਤਨ੍ਤਿ ਵਰਪਞ੍ਞ, ਮਹਾਰਾਜ, ਸਰਭੋ ਨਾਮ ਰਞ੍ਞੋ ਆਹਾਰੋ ਭਕ੍ਖੋਤਿ ਅਤ੍ਥੋ.

ਤਤੋ ਰਾਜਾ ਗਾਥਮਾਹ –

੧੪੫.

‘‘ਅਦ੍ਧਾ ਪਜਾਨਾਮਿ ਅਹਮ੍ਪਿ ਏਤਂ, ਅਨ੍ਨਂ ਮਿਗੋ ਬ੍ਰਾਹ੍ਮਣ ਖਤ੍ਤਿਯਸ੍ਸ;

ਪੁਬ੍ਬੇ ਕਤਞ੍ਚ ਅਪਚਾਯਮਾਨੋ, ਤਸ੍ਮਾ ਮਿਗਂ ਸਰਭਂ ਨੋ ਹਨਾਮੀ’’ਤਿ.

ਤਤ੍ਥ ਪੁਬ੍ਬੇ ਕਤਞ੍ਚਾਤਿ ਬ੍ਰਾਹ੍ਮਣ, ਅਹਮੇਤਂ ਏਕਂਸੇਨ ਜਾਨਾਮਿ ਯਥਾ ਮਿਗੋ ਖਤ੍ਤਿਯਸ੍ਸ ਅਨ੍ਨਂ, ਪੁਬ੍ਬੇ ਪਨ ਇਮਿਨਾ ਮਯ੍ਹਂ ਕਤਗੁਣਂ ਪੂਜੇਮਿ, ਤਸ੍ਮਾ ਤਂ ਨ ਹਨਾਮੀਤਿ.

ਤਤੋ ਸਕ੍ਕੋ ਗਾਥਾਦ੍ਵਯਮਾਹ –

੧੪੬.

‘‘ਨੇਸੋ ਮਿਗੋ ਮਹਾਰਾਜ, ਅਸੁਰੇਸੋ ਦਿਸਮ੍ਪਤਿ;

ਏਤਂ ਹਨ੍ਤ੍ਵਾ ਮਨੁਸ੍ਸਿਨ੍ਦ, ਭਵਸ੍ਸੁ ਅਮਰਾਧਿਪੋ.

੧੪੭.

‘‘ਸਚੇ ਚ ਰਾਜਾ ਵਿਚਿਕਿਚ੍ਛਸੇ ਤੁਵਂ, ਹਨ੍ਤੁਂ ਮਿਗਂ ਸਰਭਂ ਸਹਾਯਕਂ;

ਸਪੁਤ੍ਤਦਾਰੋ ਨਰਵੀਰਸੇਟ੍ਠ, ਗਨ੍ਤਾ ਤੁਵਂ ਵੇਤਰਣਿਂ ਯਮਸ੍ਸਾ’’ਤਿ.

ਤਤ੍ਥ ਅਸੁਰੇਸੋਤਿ ਅਸੁਰੋ ਏਸੋ, ਅਸੁਰਜੇਟ੍ਠਕੋ ਸਕ੍ਕੋ ਏਸੋਤਿ ਅਧਿਪ੍ਪਾਯੇਨ ਵਦਤਿ. ਅਮਰਾਧਿਪੋਤਿ ਤ੍ਵਂ ਏਤਂ ਸਕ੍ਕਂ ਮਾਰੇਤ੍ਵਾ ਸਯਂ ਸਕ੍ਕੋ ਦੇਵਰਾਜਾ ਹੋਹੀਤਿ ਵਦਤਿ. ਵੇਤਰਣਿਂ ਯਮਸ੍ਸਾਤਿ ‘‘ਸਚੇ ਏਤਂ ‘ਸਹਾਯੋ ਮੇ’ਤਿ ਚਿਨ੍ਤੇਤ੍ਵਾ ਨ ਮਾਰੇਸ੍ਸਸਿ, ਸਪੁਤ੍ਤਦਾਰੋ ਯਮਸ੍ਸ ਵੇਤਰਣਿਨਿਰਯਂ ਗਤੋ ਭਵਿਸ੍ਸਸੀ’’ਤਿ ਨਂ ਤਾਸੇਸਿ.

ਤਤੋ ਰਾਜਾ ਦ੍ਵੇ ਗਾਥਾ ਅਭਾਸਿ –

੧੪੮.

‘‘ਕਾਮਂ ਅਹਂ ਜਾਨਪਦਾ ਚ ਸਬ੍ਬੇ, ਪੁਤ੍ਤਾ ਚ ਦਾਰਾ ਚ ਸਹਾਯਸਙ੍ਘਾ;

ਗਚ੍ਛੇਮੁ ਤਂ ਵੇਤਰਣਿਂ ਯਮਸ੍ਸ, ਨ ਤ੍ਵੇਵ ਹਞ੍ਞੋ ਮਮ ਪਾਣਦੋ ਯੋ.

੧੪੯.

‘‘ਅਯਂ ਮਿਗੋ ਕਿਚ੍ਛਗਤਸ੍ਸ ਮਯ੍ਹਂ, ਏਕਸ੍ਸ ਕਤ੍ਤਾ ਵਿਵਨਸ੍ਮਿ ਘੋਰੇ;

ਤਂ ਤਾਦਿਸਂ ਪੁਬ੍ਬਕਿਚ੍ਚਂ ਸਰਨ੍ਤੋ, ਜਾਨਂ ਮਹਾਬ੍ਰਹ੍ਮੇ ਕਥਂ ਹਨੇਯ੍ਯ’’ਨ੍ਤਿ.

ਤਤ੍ਥ ਮਮ ਪਾਣਦੋ ਯੋਤਿ ਬ੍ਰਾਹ੍ਮਣ, ਯੋ ਮਮ ਪਾਣਦਦੋ ਯੇਨ ਮੇ ਪਿਯਂ ਜੀਵਿਤਂ ਦਿਨ੍ਨਂ, ਨਰਕਂ ਪਵਿਸਨ੍ਤੇਨ ਮਯਾ ਸੋ ਨ ਤ੍ਵੇਵ ਹਞ੍ਞੋ ਨ ਹਨਿਤਬ੍ਬੋ, ਅਵਜ੍ਝੋ ਏਸੋਤਿ ਵਦਤਿ. ਏਕਸ੍ਸ ਕਤ੍ਤਾ ਵਿਵਨਸ੍ਮਿ ਘੋਰੇਤਿ ਦਾਰੁਣੇ ਅਰਞ੍ਞੇ ਪਵਿਟ੍ਠਸ੍ਸ ਸਤੋ ਏਕਸ੍ਸ ਅਸਹਾਯਕਸ੍ਸ ਮਮ ਕਤ੍ਤਾ ਕਾਰਕੋ ਜੀਵਿਤਸ੍ਸ ਦਾਯਕੋ, ਸ੍ਵਾਹਂ ਤਂ ਇਮਿਨਾ ਕਤਂ ਤਾਦਿਸਂ ਪੁਬ੍ਬਕਿਚ੍ਚਂ ਸਰਨ੍ਤੋਯੇਵ ਤਂ ਗੁਣਂ ਜਾਨਨ੍ਤੋਯੇਵ ਕਥਂ ਹਨੇਯ੍ਯਂ.

ਅਥ ਸਕ੍ਕੋ ਪੁਰੋਹਿਤਸ੍ਸ ਸਰੀਰਤੋ ਅਪਗਨ੍ਤ੍ਵਾ ਸਕ੍ਕਤ੍ਤਭਾਵਂ ਮਾਪੇਤ੍ਵਾ ਆਕਾਸੇ ਠਤ੍ਵਾ ਰਞ੍ਞੋ ਗੁਣਂ ਪਕਾਸੇਨ੍ਤੋ ਗਾਥਾਦ੍ਵਯਮਾਹ –

੧੫੦.

‘‘ਮਿਤ੍ਤਾਭਿਰਾਧੀ ਚਿਰਮੇਵ ਜੀਵ, ਰਜ੍ਜਂ ਇਮਂ ਧਮ੍ਮਗੁਣੇ ਪਸਾਸ;

ਨਾਰੀਗਣੇਹਿ ਪਰਿਚਾਰਿਯਨ੍ਤੋ, ਮੋਦਸ੍ਸੁ ਰਟ੍ਠੇ ਤਿਦਿਵੇਵ ਵਾਸਵੋ.

੧੫੧.

‘‘ਅਕ੍ਕੋਧਨੋ ਨਿਚ੍ਚਪਸਨ੍ਨਚਿਤ੍ਤੋ, ਸਬ੍ਬਾਤਿਥੀ ਯਾਚਯੋਗੋ ਭਵਿਤ੍ਵਾ;

ਦਤ੍ਵਾ ਚ ਭੁਤ੍ਵਾ ਚ ਯਥਾਨੁਭਾਵਂ, ਅਨਿਨ੍ਦਿਤੋ ਸਗ੍ਗਮੁਪੇਹਿ ਠਾਨ’’ਨ੍ਤਿ.

ਤਤ੍ਥ ਮਿਤ੍ਤਾਭਿਰਾਧੀਤਿ ਮਿਤ੍ਤੇ ਆਰਾਧੇਨ੍ਤੋ ਤੋਸੇਨ੍ਤੋ ਤੇਸੁ ਅਦੁਬ੍ਭਮਾਨੋ. ਸਬ੍ਬਾਤਿਥੀਤਿ ਸਬ੍ਬੇ ਧਮ੍ਮਿਕਸਮਣਬ੍ਰਾਹ੍ਮਣੇ ਅਤਿਥੀ ਪਾਹੁਨਕੇਯੇਵ ਕਤ੍ਵਾ ਪਰਿਹਰਨ੍ਤੋ ਯਾਚਿਤਬ੍ਬਯੁਤ੍ਤਕੋ ਹੁਤ੍ਵਾ. ਅਨਿਨ੍ਦਿਤੋਤਿ ਦਾਨਾਦੀਨਿ ਪੁਞ੍ਞਾਨਿ ਕਰਣੇਨ ਪਮੁਦਿਤੋ ਦੇਵਲੋਕੇਨ ਅਭਿਨਨ੍ਦਿਤੋ ਹੁਤ੍ਵਾ ਸਗ੍ਗਟ੍ਠਾਨਂ ਉਪੇਹੀਤਿ.

ਏਵਂ ਵਤ੍ਵਾ ਸਕ੍ਕੋ ‘‘ਅਹਂ ਮਹਾਰਾਜਂ ਤਂ ਪਰਿਗ੍ਗਣ੍ਹਿਤੁਂ ਆਗਤੋ, ਤ੍ਵਂ ਅਤ੍ਤਾਨਂ ਪਰਿਗ੍ਗਣ੍ਹਿਤੁਂ ਨਾਦਾਸਿ, ਅਪ੍ਪਮਤ੍ਤੋ ਹੋਹੀ’’ਤਿ ਤਂ ਓਵਦਿਤ੍ਵਾ ਸਕਟ੍ਠਾਨਮੇਵ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਸਾਰਿਪੁਤ੍ਤੋ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਜਾਨਾਤਿਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਪੁਰੋਹਿਤੋ ਸਾਰਿਪੁਤ੍ਤੋ, ਸਰਭਮਿਗੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਰਭਮਿਗਜਾਤਕਵਣ੍ਣਨਾ ਦਸਮਾ.

ਜਾਤਕੁਦ੍ਦਾਨਂ –

ਅਮ੍ਬ ਫਨ੍ਦਨ ਜਵਨ, ਨਾਰਦ ਦੂਤ ਕਲਿਙ੍ਗਾ;

ਅਕਿਤ੍ਤਿ ਤਕ੍ਕਾਰਿਯਂ ਰੁਰੁ, ਸਰਭਂ ਦਸ ਤੇਰਸੇ.

ਤੇਰਸਕਨਿਪਾਤਵਣ੍ਣਨਾ ਨਿਟ੍ਠਿਤਾ.

੧੪. ਪਕਿਣ੍ਣਕਨਿਪਾਤੋ

[੪੮੪] ੧. ਸਾਲਿਕੇਦਾਰਜਾਤਕਵਣ੍ਣਨਾ

ਸਮ੍ਪਨ੍ਨਂ ਸਾਲਿਕੇਦਾਰਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਾਤੁਪੋਸਕਭਿਕ੍ਖੁਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਸਾਮਜਾਤਕੇ (ਜਾ. ੨.੨੨.੨੯੬ ਆਦਯੋ) ਆਵਿ ਭਵਿਸ੍ਸਤਿ. ਸਤ੍ਥਾ ਪਨ ਤਂ ਭਿਕ੍ਖੁਂ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਗਿਹੀ ਪੋਸੇਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਕਿਂ ਤੇ ਹੋਨ੍ਤੀ’’ਤਿ ਵਤ੍ਵਾ ‘‘ਮਾਤਾਪਿਤਰੋ ਮੇ, ਭਨ੍ਤੇ’’ਤਿ ਵੁਤ੍ਤੇ ‘‘ਸਾਧੁ ਭਿਕ੍ਖੁ, ਪੋਰਾਣਕਪਣ੍ਡਿਤਾ ਤਿਰਚ੍ਛਾਨਾ ਹੁਤ੍ਵਾ ਸੁਵਯੋਨਿਯਂ ਨਿਬ੍ਬਤ੍ਤਿਤ੍ਵਾਪਿ ਜਿਣ੍ਣੇ ਮਾਤਾਪਿਤਰੋ ਕੁਲਾਵਕੇ ਨਿਪਜ੍ਜਾਪੇਤ੍ਵਾ ਮੁਖਤੁਣ੍ਡਕੇਨ ਗੋਚਰਂ ਆਹਰਿਤ੍ਵਾ ਪੋਸੇਸੁ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਰਾਜਗਹੇ ਮਗਧਰਾਜਾ ਨਾਮ ਰਜ੍ਜਂ ਕਾਰੇਸਿ. ਤਦਾ ਨਗਰਤੋ ਪੁਬ੍ਬੁਤ੍ਤਰਦਿਸਾਯ ਸਾਲਿਦ੍ਦਿਯੋ ਨਾਮ ਬ੍ਰਾਹ੍ਮਣਗਾਮੋ ਅਹੋਸਿ. ਤਸ੍ਸ ਪੁਬ੍ਬੁਤ੍ਤਰਦਿਸਾਯ ਮਗਧਖੇਤ੍ਤਂ ਅਤ੍ਥਿ, ਤਤ੍ਥ ਕੋਸਿਯਗੋਤ੍ਤੋ ਨਾਮ ਸਾਲਿਦ੍ਦਿਯਵਾਸੀ ਬ੍ਰਾਹ੍ਮਣੋ ਸਹਸ੍ਸਕਰੀਸਮਤ੍ਤਂ ਖੇਤ੍ਤਂ ਗਹੇਤ੍ਵਾ ਸਾਲਿਂ ਵਪਾਪੇਸਿ. ਉਟ੍ਠਿਤੇ ਚ ਪਨ ਸਸ੍ਸੇ ਵਤਿਂ ਥਿਰਂ ਕਾਰੇਤ੍ਵਾ ਕਸ੍ਸਚਿ ਪਣ੍ਣਾਸਕਰੀਸਮਤ੍ਤਂ, ਕਸ੍ਸਚਿ ਸਟ੍ਠਿਕਰੀਸਮਤ੍ਤਨ੍ਤਿ ਏਵਂ ਪਞ੍ਚਸਤਕਰੀਸਮਤ੍ਤਂ ਖੇਤ੍ਤਂ ਅਤ੍ਤਨੋ ਪੁਰਿਸਾਨਂਯੇਵ ਆਰਕ੍ਖਣਤ੍ਥਾਯ ਦਤ੍ਵਾ ਸੇਸਂ ਪਞ੍ਚਸਤਕਰੀਸਮਤ੍ਤਂ ਖੇਤ੍ਤਂ ਭਤਿਂ ਕਤ੍ਵਾ ਏਕਸ੍ਸ ਭਤਕਸ੍ਸ ਅਦਾਸਿ. ਸੋ ਤਤ੍ਥ ਕੁਟਿਂ ਕਤ੍ਵਾ ਰਤ੍ਤਿਨ੍ਦਿਵਂ ਵਸਤਿ. ਖੇਤ੍ਤਸ੍ਸ ਪਨ ਪੁਬ੍ਬੁਤ੍ਤਰਦਿਸਾਭਾਗੇ ਏਕਸ੍ਮਿਂ ਸਾਨੁਪਬ੍ਬਤੇ ਮਹਨ੍ਤਂ ਸਿਮ੍ਬਲਿਵਨਂ ਅਤ੍ਥਿ, ਤਤ੍ਥ ਅਨੇਕਾਨਿ ਸੁਵਸਤਾਨਿ ਵਸਨ੍ਤਿ. ਤਦਾ ਬੋਧਿਸਤ੍ਤੋ ਤਸ੍ਮਿਂ ਸੁਵਸਙ੍ਘੇ ਸੁਵਰਞ੍ਞੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਵਯਪ੍ਪਤ੍ਤੋ ਅਭਿਰੂਪੋ ਥਾਮਸਮ੍ਪਨ੍ਨੋ ਸਕਟਨਾਭਿਪਮਾਣਸਰੀਰੋ ਅਹੋਸਿ. ਅਥਸ੍ਸ ਪਿਤਾ ਮਹਲ੍ਲਕਕਾਲੇ ‘‘ਅਹਂ ਇਦਾਨਿ ਦੂਰਂ ਗਨ੍ਤੁਂ ਨ ਸਕ੍ਕੋਮਿ, ਤ੍ਵਂ ਇਮਂ ਗਣਂ ਪਰਿਹਰਾ’’ਤਿ ਗਣਂ ਨਿਯ੍ਯਾਦੇਸਿ. ਸੋ ਪੁਨਦਿਵਸਤੋ ਪਟ੍ਠਾਯ ਮਾਤਾਪਿਤੂਨਂ ਗੋਚਰਤ੍ਥਾਯ ਗਨ੍ਤੁਂ ਨਾਦਾਸਿ, ਸੁਵਗਣਂ ਪਰਿਹਰਨ੍ਤੋ ਹਿਮਵਨ੍ਤਂ ਗਨ੍ਤ੍ਵਾ ਸਯਂਜਾਤਸਾਲਿਵਨੇ ਯਾਵਦਤ੍ਥਂ ਸਾਲਿਂ ਖਾਦਿਤ੍ਵਾ ਆਗਮਨਕਾਲੇ ਮਾਤਾਪਿਤੂਨਂ ਪਹੋਨਕਂ ਗੋਚਰਂ ਆਹਰਿਤ੍ਵਾ ਮਾਤਾਪਿਤਰੋ ਪੋਸੇਸਿ.

ਅਥਸ੍ਸ ਏਕਦਿਵਸਂ ਸੁਵਾ ਆਰੋਚੇਸੁਂ ‘‘ਪੁਬ੍ਬੇ ਇਮਸ੍ਮਿਂ ਕਾਲੇ ਮਗਧਖੇਤ੍ਤੇ ਸਾਲਿ ਪਚ੍ਚਤਿ, ਇਦਾਨਿ ਕਿਂ ਨੁ ਖੋ ਜਾਤ’’ਨ੍ਤਿ? ‘‘ਤੇਨ ਹਿ ਜਾਨਾਥਾ’’ਤਿ ਦ੍ਵੇ ਸੁਵੇ ਪਹਿਣਿਂਸੁ. ਤੇ ਗਨ੍ਤ੍ਵਾ ਮਗਧਖੇਤ੍ਤੇ ਓਤਰਨ੍ਤਾ ਤਸ੍ਸ ਭਤਿਯਾ ਰਕ੍ਖਣਪੁਰਿਸਸ੍ਸ ਖੇਤ੍ਤੇ ਓਤਰਿਤ੍ਵਾ ਸਾਲਿਂ ਖਾਦਿਤ੍ਵਾ ਏਕਂ ਸਾਲਿਸੀਸਂ ਆਦਾਯ ਸਿਮ੍ਬਲਿਵਨਂ ਗਨ੍ਤ੍ਵਾ ਸਾਲਿਸੀਸਂ ਮਹਾਸਤ੍ਤਸ੍ਸ ਪਾਦਮੂਲੇ ਠਪੇਤ੍ਵਾ ‘‘ਤਤ੍ਥ ਏਵਰੂਪੋ ਸਾਲੀ’’ਤਿ ਵਦਿਂਸੁ. ਸੋ ਪੁਨਦਿਵਸੇ ਸੁਵਗਣਪਰਿਵੁਤੋ ਤਤ੍ਥ ਗਨ੍ਤ੍ਵਾ ਤਸ੍ਮਿਂ ਭਤਕਸ੍ਸ ਖੇਤ੍ਤੇ ਓਤਰਿ. ਸੋ ਪਨ ਪੁਰਿਸੋ ਸੁਵੇ ਸਾਲਿਂ ਖਾਦਨ੍ਤੇ ਦਿਸ੍ਵਾ ਇਤੋ ਚਿਤੋ ਚ ਧਾਵਿਤ੍ਵਾ ਵਾਰੇਨ੍ਤੋਪਿ ਵਾਰੇਤੁਂ ਨ ਸਕ੍ਕੋਤਿ. ਸੇਸਾ ਸੁਵਾ ਯਾਵਦਤ੍ਥਂ ਸਾਲਿਂ ਖਾਦਿਤ੍ਵਾ ਤੁਚ੍ਛਮੁਖਾਵ ਗਚ੍ਛਨ੍ਤਿ. ਸੁਵਰਾਜਾ ਪਨ ਬਹੂਨਿ ਸਾਲਿਸੀਸਾਨਿ ਏਕਤੋ ਕਤ੍ਵਾ ਤੇਹਿ ਪਰਿਵੁਤੋ ਹੁਤ੍ਵਾ ਆਹਰਿਤ੍ਵਾ ਮਾਤਾਪਿਤੂਨਂ ਦੇਤਿ. ਸੁਵਾ ਪੁਨਦਿਵਸਤੋ ਪਟ੍ਠਾਯ ਤਤ੍ਥੇਵ ਸਾਲਿਂ ਖਾਦਿਂਸੁ. ਅਥ ਸੋ ਪੁਰਿਸੋ ‘‘ਸਚੇ ਇਮੇ ਅਞ੍ਞਂ ਕਤਿਪਾਹਂ ਏਵਂ ਖਾਦਿਸ੍ਸਨ੍ਤਿ, ਕਿਞ੍ਚਿ ਨ ਭਵਿਸ੍ਸਤਿ, ਬ੍ਰਾਹ੍ਮਣੋ ਸਾਲਿਂ ਅਗ੍ਘਾਪੇਤ੍ਵਾ ਮਯ੍ਹਂ ਇਣਂ ਕਰਿਸ੍ਸਤਿ, ਗਨ੍ਤ੍ਵਾ ਤਸ੍ਸ ਆਰੋਚੇਸ੍ਸਾਮੀ’’ਤਿ ਸਾਲਿਮੁਟ੍ਠਿਨਾ ਸਦ੍ਧਿਂ ਤਥਾਰੂਪਂ ਪਣ੍ਣਾਕਾਰਂ ਗਹੇਤ੍ਵਾ ਸਾਲਿਦ੍ਦਿਯਗਾਮਂ ਗਨ੍ਤ੍ਵਾ ਬ੍ਰਾਹ੍ਮਣਂ ਪਸ੍ਸਿਤ੍ਵਾ ਵਨ੍ਦਿਤ੍ਵਾ ਪਣ੍ਣਾਕਾਰਂ ਦਤ੍ਵਾ ਏਕਮਨ੍ਤਂ ਠਿਤੋ ‘‘ਕਿਂ, ਭੋ ਪੁਰਿਸ, ਸਮ੍ਪਨ੍ਨਂ ਸਾਲਿਖੇਤ੍ਤ’’ਨ੍ਤਿ ਪੁਟ੍ਠੋ ‘‘ਆਮ, ਬ੍ਰਾਹ੍ਮਣ, ਸਮ੍ਪਨ੍ਨ’’ਨ੍ਤਿ ਵਤ੍ਵਾ ਦ੍ਵੇ ਗਾਥਾ ਅਭਾਸਿ –

੧.

‘‘ਸਮ੍ਪਨ੍ਨਂ ਸਾਲਿਕੇਦਾਰਂ, ਸੁਵਾ ਭੁਞ੍ਜਨ੍ਤਿ ਕੋਸਿਯ;

ਪਟਿਵੇਦੇਮਿ ਤੇ ਬ੍ਰਹ੍ਮੇ, ਨ ਨੇ ਵਾਰੇਤੁਮੁਸ੍ਸਹੇ.

੨.

‘‘ਏਕੋ ਚ ਤਤ੍ਥ ਸਕੁਣੋ, ਯੋ ਨੇਸਂ ਸਬ੍ਬਸੁਨ੍ਦਰੋ;

ਭੁਤ੍ਵਾ ਸਾਲਿਂ ਯਥਾਕਾਮਂ, ਤੁਣ੍ਡੇਨਾਦਾਯ ਗਚ੍ਛਤੀ’’ਤਿ.

ਤਤ੍ਥ ਸਮ੍ਪਨ੍ਨਨ੍ਤਿ ਪਰਿਪੁਣ੍ਣਂ ਅਵੇਕਲ੍ਲਂ. ਸਾਲਿਕੇਦਾਰਨ੍ਤਿ ਸਾਲਿਖੇਤ੍ਤਂ. ਸਬ੍ਬਸੁਨ੍ਦਰੋਤਿ ਸਬ੍ਬੇਹਿ ਕੋਟ੍ਠਾਸੇਹਿ ਸੁਨ੍ਦਰੋ ਰਤ੍ਤਤੁਣ੍ਡੋ ਜਿਞ੍ਜੁਕਸਨ੍ਨਿਭਅਕ੍ਖਿ ਰਤ੍ਤਪਾਦੋ ਤੀਹਿ ਰਤ੍ਤਰਾਜੀਹਿ ਪਰਿਕ੍ਖਿਤ੍ਤਗੀਵੋ ਮਹਾਮਯੂਰਪਮਾਣੋ ਸੋ ਯਾਵਦਤ੍ਥਂ ਸਾਲਿਂ ਖਾਦਿਤ੍ਵਾ ਅਞ੍ਞਂ ਤੁਣ੍ਡੇਨ ਗਹੇਤ੍ਵਾ ਗਚ੍ਛਤੀਤਿ.

ਬ੍ਰਾਹ੍ਮਣੋ ਤਸ੍ਸ ਕਥਂ ਸੁਤ੍ਵਾ ਸੁਵਰਾਜੇ ਸਿਨੇਹਂ ਉਪ੍ਪਾਦੇਤ੍ਵਾ ਖੇਤ੍ਤਪਾਲਂ ਪੁਚ੍ਛਿ ‘‘ਅਮ੍ਭੋ ਪੁਰਿਸ, ਪਾਸਂ ਓਡ੍ਡੇਤੁਂ ਜਾਨਾਸੀ’’ਤਿ? ‘‘ਆਮ, ਜਾਨਾਮੀ’’ਤਿ. ਅਥ ਨਂ ਗਾਥਾਯ ਅਜ੍ਝਭਾਸਿ –

੩.

‘‘ਓਡ੍ਡੇਨ੍ਤੁ ਵਾਲਪਾਸਾਨਿ, ਯਥਾ ਬਜ੍ਝੇਥ ਸੋ ਦਿਜੋ;

ਜੀਵਞ੍ਚ ਨਂ ਗਹੇਤ੍ਵਾਨ, ਆਨਯੇਹਿ ਮਮਨ੍ਤਿਕੇ’’ਤਿ.

ਤਤ੍ਥ ਓਡ੍ਡੇਨ੍ਤੂਤਿ ਓਡ੍ਡਯਨ੍ਤੁ. ਵਾਲਪਾਸਾਨੀਤਿ ਅਸ੍ਸਵਾਲਾਦਿਰਜ੍ਜੁਮਯਪਾਸਾਨਿ. ਜੀਵਞ੍ਚ ਨਨ੍ਤਿ ਜੀਵਨ੍ਤਂ ਏਵ ਨਂ. ਆਨਯੇਹੀਤਿ ਆਨੇਹਿ.

ਤਂ ਸੁਤ੍ਵਾ ਖੇਤ੍ਤਪਾਲੋ ਸਾਲਿਂ ਅਗ੍ਘਾਪੇਤ੍ਵਾ ਇਣਸ੍ਸ ਅਕਤਭਾਵੇਨ ਤੁਟ੍ਠੋ ਗਨ੍ਤ੍ਵਾ ਅਸ੍ਸਵਾਲੇ ਵਟ੍ਟੇਤ੍ਵਾ ‘‘ਅਜ੍ਜ ਇਮਸ੍ਮਿਂ ਠਾਨੇ ਓਤਰਿਸ੍ਸਤੀ’’ਤਿ ਸੁਵਰਞ੍ਞੋ ਓਤਰਣਟ੍ਠਾਨਂ ਸਲ੍ਲਕ੍ਖੇਤ੍ਵਾ ਪੁਨਦਿਵਸੇ ਪਾਤੋਵ ਚਾਟਿਪਮਾਣਂ ਪਞ੍ਜਰਂ ਕਤ੍ਵਾ ਪਾਸਞ੍ਚ ਓਡ੍ਡੇਤ੍ਵਾ ਸੁਵਾਨਂ ਆਗਮਨਂ ਓਲੋਕੇਨ੍ਤੋ ਕੁਟਿਯਂ ਨਿਸੀਦਿ. ਸੁਵਰਾਜਾਪਿ ਸੁਵਗਣਪਰਿਵੁਤੋ ਆਗਨ੍ਤ੍ਵਾ ਅਲੋਲੁਪ੍ਪਚਾਰਤਾਯ ਹਿਯ੍ਯੋ ਖਾਦਿਤਟ੍ਠਾਨੇ ਓਡ੍ਡਿਤਪਾਸੇ ਪਾਦਂ ਪਵੇਸਨ੍ਤੋਵ ਓਤਰਿ. ਸੋ ਅਤ੍ਤਨੋ ਬਦ੍ਧਭਾਵਂ ਞਤ੍ਵਾ ਚਿਨ੍ਤੇਸਿ ‘‘ਸਚਾਹਂ ਇਦਾਨੇਵ ਬਦ੍ਧਰਵਂ ਰਵਿਸ੍ਸਾਮਿ, ਞਾਤਕਾਮੇ ਭਯਤਜ੍ਜਿਤਾ ਗੋਚਰਂ ਅਗ੍ਗਹੇਤ੍ਵਾਵ ਪਲਾਯਿਸ੍ਸਨ੍ਤਿ, ਯਾਵ ਏਤੇਸਂ ਗੋਚਰਗ੍ਗਹਣਂ, ਤਾਵ ਅਧਿਵਾਸੇਸ੍ਸਾਮੀ’’ਤਿ. ਸੋ ਤੇਸਂ ਸੁਹਿਤਭਾਵਂ ਞਤ੍ਵਾ ਮਰਣਭਯਤਜ੍ਜਿਤੋ ਹੁਤ੍ਵਾ ਤਿਕ੍ਖਤ੍ਤੁਂ ਬਦ੍ਧਰਵਂ ਰਵਿ. ਅਥ ਸਬ੍ਬੇ ਤੇ ਸੁਵਾ ਪਲਾਯਿਂਸੁ. ਸੁਵਰਾਜਾ ‘‘ਏਤ੍ਤਕੇਸੁ ਮੇ ਞਾਤਕੇਸੁ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ਏਕੋਪਿ ਨਤ੍ਥਿ, ਕਿਂ ਨੁ ਖੋ ਮਯਾ ਪਾਪਂ ਕਤ’’ਨ੍ਤਿ ਵਿਲਪਨ੍ਤੋ ਗਾਥਮਾਹ –

੪.

‘‘ਏਤੇ ਭੁਤ੍ਵਾ ਪਿਵਿਤ੍ਵਾ ਚ, ਪਕ੍ਕਮਨ੍ਤਿ ਵਿਹਙ੍ਗਮਾ;

ਏਕੋ ਬਦ੍ਧੋਸ੍ਮਿ ਪਾਸੇਨ, ਕਿਂ ਪਾਪਂ ਪਕਤਂ ਮਯਾ’’ਤਿ.

ਖੇਤ੍ਤਪਾਲੋ ਸੁਵਰਾਜਸ੍ਸ ਬਦ੍ਧਰਵਂ ਸੁਵਾਨਞ੍ਚ ਆਕਾਸੇ ਪਕ੍ਖਨ੍ਦਨਸਦ੍ਦਂ ਸੁਤ੍ਵਾ ‘‘ਕਿਂ ਨੁ ਖੋ’’ਤਿ ਕੁਟਿਯਾ ਓਰੁਯ੍ਹ ਪਾਸਾਟ੍ਠਾਨਂ ਗਨ੍ਤ੍ਵਾ ਸੁਵਰਾਜਾਨਂ ਦਿਸ੍ਵਾ ‘‘ਯਸ੍ਸੇਵ ਮੇ ਪਾਸੋ ਓਡ੍ਡਿਤੋ, ਸ੍ਵੇਵ ਬਦ੍ਧੋ’’ਤਿ ਤੁਟ੍ਠਮਾਨਸੋ ਸੁਵਰਾਜਾਨਂ ਪਾਸਤੋ ਮੋਚੇਤ੍ਵਾ ਦ੍ਵੇ ਪਾਦੇ ਏਕਤੋ ਬਨ੍ਧਿਤ੍ਵਾ ਦਲ਼੍ਹਂ ਆਦਾਯ ਸਾਲਿਦ੍ਦਿਯਗਾਮਂ ਗਨ੍ਤ੍ਵਾ ਸੁਵਰਾਜਂ ਬ੍ਰਾਹ੍ਮਣਸ੍ਸ ਅਦਾਸਿ. ਬ੍ਰਾਹ੍ਮਣੋ ਬਲਵਸਿਨੇਹੇਨ ਮਹਾਸਤ੍ਤਂ ਉਭੋਹਿ ਹਤ੍ਥੇਹਿ ਦਲ਼੍ਹਂ ਗਹੇਤ੍ਵਾ ਅਙ੍ਕੇ ਨਿਸੀਦਾਪੇਤ੍ਵਾ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਦ੍ਵੇ ਗਾਥਾ ਅਭਾਸਿ –

੫.

‘‘ਉਦਰਂ ਨੂਨ ਅਞ੍ਞੇਸਂ, ਸੁਵ ਅਚ੍ਚੋਦਰਂ ਤਵ;

ਭੁਤ੍ਵਾ ਸਾਲਿਂ ਯਥਾਕਾਮਂ, ਤੁਣ੍ਡੇਨਾਦਾਯ ਗਚ੍ਛਸਿ.

੬.

‘‘ਕੋਟ੍ਠਂ ਨੁ ਤਤ੍ਥ ਪੂਰੇਸਿ, ਸੁਵ ਵੇਰਂ ਨੁ ਤੇ ਮਯਾ;

ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕੁਹਿਂ ਸਾਲਿਂ ਨਿਦਾਹਸੀ’’ਤਿ.

ਤਤ੍ਥ ਉਦਰਂ ਨੂਨਾਤਿ ਅਞ੍ਞੇਸਂ ਉਦਰਂ ਉਦਰਮੇਵ ਮਞ੍ਞੇ, ਤਵ ਉਦਰਂ ਪਨ ਅਤਿਉਦਰਂ. ਤਤ੍ਥਾਤਿ ਤਸ੍ਮਿਂ ਸਿਮ੍ਬਲਿਵਨੇ. ਪੂਰੇਸੀਤਿ ਵਸ੍ਸਾਰਤ੍ਤਤ੍ਥਾਯ ਪੂਰੇਸਿ. ਨਿਦਾਹਸੀਤਿ ਨਿਧਾਨਂ ਕਤ੍ਵਾ ਠਪੇਸਿ, ‘‘ਨਿਧੀਯਸੀ’’ਤਿਪਿ ਪਾਠੋ.

ਤਂ ਸੁਤ੍ਵਾ ਸੁਵਰਾਜਾ ਮਧੁਰਾਯ ਮਨੁਸ੍ਸਭਾਸਾਯ ਸਤ੍ਤਮਂ ਗਾਥਮਾਹ –

੭.

‘‘ਨ ਮੇ ਵੇਰਂ ਤਯਾ ਸਦ੍ਧਿਂ, ਕੋਟ੍ਠੋ ਮਯ੍ਹਂ ਨ ਵਿਜ੍ਜਤਿ;

ਇਣਂ ਮੁਞ੍ਚਾਮਿਣਂ ਦਮ੍ਮਿ, ਸਮ੍ਪਤ੍ਤੋ ਕੋਟਸਿਮ੍ਬਲਿਂ;

ਨਿਧਿਮ੍ਪਿ ਤਤ੍ਥ ਨਿਦਹਾਮਿ, ਏਵਂ ਜਾਨਾਹਿ ਕੋਸਿਯਾ’’ਤਿ.

ਤਤ੍ਥ ਇਣਂ ਮੁਞ੍ਚਾਮਿਣਂ ਦਮ੍ਮੀਤਿ ਤਵ ਸਾਲਿਂ ਹਰਿਤ੍ਵਾ ਇਣਂ ਮੁਞ੍ਚਾਮਿ ਚੇਵ ਦਮ੍ਮਿ ਚਾਤਿ ਵਦਤਿ. ਨਿਧਿਮ੍ਪੀਤਿ ਏਕਂ ਤਤ੍ਥ ਸਿਮ੍ਬਲਿਵਨੇ ਅਨੁਗਾਮਿਕਨਿਧਿਮ੍ਪਿ ਨਿਦਹਾਮਿ.

ਅਥ ਨਂ ਬ੍ਰਾਹ੍ਮਣੋ ਪੁਚ੍ਛਿ –

੮.

‘‘ਕੀਦਿਸਂ ਤੇ ਇਣਦਾਨਂ, ਇਣਮੋਕ੍ਖੋ ਚ ਕੀਦਿਸੋ;

ਨਿਧਿਨਿਧਾਨਮਕ੍ਖਾਹਿ, ਅਥ ਪਾਸਾ ਪਮੋਕ੍ਖਸੀ’’ਤਿ.

ਤਤ੍ਥ ਇਣਦਾਨਨ੍ਤਿ ਇਣਸ੍ਸ ਦਾਨਂ. ਨਿਧਿਨਿਧਾਨਨ੍ਤਿ ਨਿਧਿਨੋ ਨਿਧਾਨਂ.

ਏਵਂ ਬ੍ਰਾਹ੍ਮਣੇਨ ਪੁਟ੍ਠੋ ਸੁਵਰਾਜਾ ਤਸ੍ਸ ਬ੍ਯਾਕਰੋਨ੍ਤੋ ਚਤਸ੍ਸੋ ਗਾਥਾ ਅਭਾਸਿ –

੯.

‘‘ਅਜਾਤਪਕ੍ਖਾ ਤਰੁਣਾ, ਪੁਤ੍ਤਕਾ ਮਯ੍ਹ ਕੋਸਿਯ;

ਤੇ ਮਂ ਭਤਾ ਭਰਿਸ੍ਸਨ੍ਤਿ, ਤਸ੍ਮਾ ਤੇਸਂ ਇਣਂ ਦਦੇ.

੧੦.

‘‘ਮਾਤਾ ਪਿਤਾ ਚ ਮੇ ਵੁਦ੍ਧਾ, ਜਿਣ੍ਣਕਾ ਗਤਯੋਬ੍ਬਨਾ;

ਤੇਸਂ ਤੁਣ੍ਡੇਨ ਹਾਤੂਨ, ਮੁਞ੍ਚੇ ਪੁਬ੍ਬਕਤਂ ਇਣਂ.

੧੧.

‘‘ਅਞ੍ਞੇਪਿ ਤਤ੍ਥ ਸਕੁਣਾ, ਖੀਣਪਕ੍ਖਾ ਸੁਦੁਬ੍ਬਲਾ;

ਤੇਸਂ ਪੁਞ੍ਞਤ੍ਥਿਕੋ ਦਮ੍ਮਿ, ਤਂ ਨਿਧਿਂ ਆਹੁ ਪਣ੍ਡਿਤਾ.

੧੨.

‘‘ਈਦਿਸਂ ਮੇ ਇਣਦਾਨਂ, ਇਣਮੋਕ੍ਖੋ ਚ ਈਦਿਸੋ;

ਨਿਧਿਨਿਧਾਨਮਕ੍ਖਾਮਿ, ਏਵਂ ਜਾਨਾਹਿ ਕੋਸਿਯਾ’’ਤਿ.

ਤਤ੍ਥ ਹਾਤੂਨਾਤਿ ਹਰਿਤ੍ਵਾ. ਤਂ ਨਿਧਿਨ੍ਤਿ ਤਂ ਪੁਞ੍ਞਕਮ੍ਮਂ ਪਣ੍ਡਿਤਾ ਅਨੁਗਾਮਿਕਨਿਧਿਂ ਨਾਮ ਕਥੇਨ੍ਤਿ. ਨਿਧਿਨਿਧਾਨਨ੍ਤਿ ਨਿਧਿਨੋ ਨਿਧਾਨਂ, ‘‘ਨਿਧਾਨਨਿਧਿ’’ਨ੍ਤਿਪਿ ਪਾਠੋ, ਅਯਮੇਵਤ੍ਥੋ.

ਬ੍ਰਾਹ੍ਮਣੋ ਮਹਾਸਤ੍ਤਸ੍ਸ ਧਮ੍ਮਕਥਂ ਸੁਤ੍ਵਾ ਪਸਨ੍ਨਚਿਤ੍ਤੋ ਦ੍ਵੇ ਗਾਥਾ ਅਭਾਸਿ.

੧੩.

‘‘ਭਦ੍ਦਕੋ ਵਤਯਂ ਪਕ੍ਖੀ, ਦਿਜੋ ਪਰਮਧਮ੍ਮਿਕੋ;

ਏਕਚ੍ਚੇਸੁ ਮਨੁਸ੍ਸੇਸੁ, ਅਯਂ ਧਮ੍ਮੋ ਨ ਵਿਜ੍ਜਤਿ.

੧੪.

‘‘ਭੁਞ੍ਜ ਸਾਲਿਂ ਯਥਾਕਾਮਂ, ਸਹ ਸਬ੍ਬੇਹਿ ਞਾਤਿਭਿ;

ਪੁਨਾਪਿ ਸੁਵ ਪਸ੍ਸੇਮੁ, ਪਿਯਂ ਮੇ ਤਵ ਦਸ੍ਸਨ’’ਨ੍ਤਿ.

ਤਤ੍ਥ ਭੁਞ੍ਜ ਸਾਲਿਨ੍ਤਿ ਇਤੋ ਪਟ੍ਠਾਯ ਨਿਬ੍ਭਯੋ ਹੁਤ੍ਵਾ ਭੁਞ੍ਜਾਤਿ ਕਰੀਸਸਹਸ੍ਸਮ੍ਪਿ ਤਸ੍ਸੇਵ ਨਿਯ੍ਯਾਦੇਨ੍ਤੋ ਏਵਮਾਹ. ਪਸ੍ਸੇਮੂਤਿ ਅਤ੍ਤਨੋ ਰੁਚਿਯਾ ਆਗਤਂ ਅਞ੍ਞੇਸੁਪਿ ਦਿਵਸੇਸੁ ਤਂ ਪਸ੍ਸੇਯ੍ਯਾਮਾਤਿ.

ਏਵਂ ਬ੍ਰਾਹ੍ਮਣੋ ਮਹਾਸਤ੍ਤਂ ਯਾਚਿਤ੍ਵਾ ਪਿਯਪੁਤ੍ਤਂ ਵਿਯ ਮੁਦੁਚਿਤ੍ਤੇਨ ਓਲੋਕੇਨ੍ਤੋ ਪਾਦਤੋ ਬਨ੍ਧਨਂ ਮੋਚੇਤ੍ਵਾ ਸਤਪਾਕਤੇਲੇਨ ਪਾਦੇ ਮਕ੍ਖੇਤ੍ਵਾ ਭਦ੍ਦਪੀਠੇ ਨਿਸੀਦਾਪੇਤ੍ਵਾ ਕਞ੍ਚਨਤਟ੍ਟਕੇ ਮਧੁਲਾਜੇ ਖਾਦਾਪੇਤ੍ਵਾ ਸਕ੍ਖਰੋਦਕਂ ਪਾਯੇਸਿ. ਅਥਸ੍ਸ ਸੁਵਰਾਜਾ ‘‘ਅਪ੍ਪਮਤ੍ਤੋ ਹੋਹਿ, ਬ੍ਰਾਹ੍ਮਣਾ’’ਤਿ ਵਤ੍ਵਾ ਓਵਾਦਂ ਦੇਨ੍ਤੋ ਆਹ –

੧੫.

‘‘ਭੁਤ੍ਤਞ੍ਚ ਪੀਤਞ੍ਚ ਤਵਸ੍ਸਮਮ੍ਹਿ, ਰਤੀ ਚ ਨੋ ਕੋਸਿਯ ਤੇ ਸਕਾਸੇ;

ਨਿਕ੍ਖਿਤ੍ਤਦਣ੍ਡੇਸੁ ਦਦਾਹਿ ਦਾਨਂ, ਜਿਣ੍ਣੇ ਚ ਮਾਤਾਪਿਤਰੋ ਭਰਸ੍ਸੂ’’ਤਿ.

ਤਤ੍ਥ ਤਵਸ੍ਸਮਮ੍ਹੀਤਿ ਤਵ ਨਿਵੇਸਨੇ. ਰਤੀਤਿ ਅਭਿਰਤਿ.

ਤਂ ਸੁਤ੍ਵਾ ਬ੍ਰਾਹ੍ਮਣੋ ਤੁਟ੍ਠਮਾਨਸੋ ਉਦਾਨਂ ਉਦਾਨੇਨ੍ਤੋ ਗਾਥਮਾਹ –

੧੬.

‘‘ਲਕ੍ਖੀ ਵਤ ਮੇ ਉਦਪਾਦਿ ਅਜ੍ਜ, ਯੋ ਅਦ੍ਦਸਾਸਿਂ ਪਵਰਂ ਦਿਜਾਨਂ;

ਸੁਵਸ੍ਸ ਸੁਤ੍ਵਾਨ ਸੁਭਾਸਿਤਾਨਿ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨੀ’’ਤਿ.

ਤਤ੍ਥ ਲਕ੍ਖੀਤਿ ਸਿਰੀਪਿ ਪੁਞ੍ਞਮ੍ਪਿ ਪਞ੍ਞਾਪਿ.

ਮਹਾਸਤ੍ਤੋ ਬ੍ਰਾਹ੍ਮਣੇਨ ਅਤ੍ਤਨੋ ਦਿਨ੍ਨਂ ਕਰੀਸਸਹਸ੍ਸਮਤ੍ਤਂ ਪਟਿਕ੍ਖਿਪਿਤ੍ਵਾ ਅਟ੍ਠਕਰੀਸਮੇਵ ਗਣ੍ਹਿ. ਬ੍ਰਾਹ੍ਮਣੋ ਥਮ੍ਭੇ ਨਿਖਨਿਤ੍ਵਾ ਤਸ੍ਸ ਖੇਤ੍ਤਂ ਨਿਯ੍ਯਾਦੇਤ੍ਵਾ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਖਮਾਪੇਤ੍ਵਾ ‘‘ਗਚ੍ਛ ਸਾਮਿ, ਅਸ੍ਸੁਮੁਖੇ ਰੋਦਮਾਨੇ ਮਾਤਾਪਿਤਰੋ ਅਸ੍ਸਾਸੇਹੀ’’ਤਿ ਵਤ੍ਵਾ ਤਂ ਉਯ੍ਯੋਜੇਸਿ. ਸੋ ਤੁਟ੍ਠਮਾਨਸੋ ਸਾਲਿਸੀਸਂ ਆਦਾਯ ਗਨ੍ਤ੍ਵਾ ਮਾਤਾਪਿਤੂਨਂ ਪੁਰਤੋ ਨਿਕ੍ਖਿਪਿਤ੍ਵਾ ‘‘ਅਮ੍ਮਤਾਤਾ, ਉਟ੍ਠੇਥਾ’’ਤਿ ਆਹ. ਤੇ ਅਸ੍ਸੁਮੁਖਾ ਰੋਦਮਾਨਾ ਉਟ੍ਠਹਿਂਸੁ, ਤਾਵਦੇਵ ਸੁਵਗਣਾ ਸਨ੍ਨਿਪਤਿਤ੍ਵਾ ‘‘ਕਥਂ ਮੁਤ੍ਤੋਸਿ, ਦੇਵਾ’’ਤਿ ਪੁਚ੍ਛਿਂਸੁ. ਸੋ ਤੇਸਂ ਸਬ੍ਬਂ ਵਿਤ੍ਥਾਰਤੋ ਕਥੇਸਿ. ਕੋਸਿਯੋਪਿ ਸੁਵਰਞ੍ਞੋ ਓਵਾਦਂ ਸੁਤ੍ਵਾ ਤਤੋ ਪਟ੍ਠਾਯ ਧਮ੍ਮਿਕਸਮਣਬ੍ਰਾਹ੍ਮਣਾਨਂ ਮਹਾਦਾਨਂ ਪਟ੍ਠਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਓਸਾਨਗਾਥਮਾਹ –

੧੭.

‘‘ਸੋ ਕੋਸਿਯੋ ਅਤ੍ਤਮਨੋ ਉਦਗ੍ਗੋ, ਅਨ੍ਨਞ੍ਚ ਪਾਨਞ੍ਚਭਿਸਙ੍ਖਰਿਤ੍ਵਾ;

ਅਨ੍ਨੇਨ ਪਾਨੇਨ ਪਸਨ੍ਨਚਿਤ੍ਤੋ, ਸਨ੍ਤਪ੍ਪਯਿ ਸਮਣਬ੍ਰਾਹ੍ਮਣੇ ਚਾ’’ਤਿ.

ਤਤ੍ਥ ਸਨ੍ਤਪ੍ਪਯੀਤਿ ਗਹਿਤਗਹਿਤਾਨਿ ਭਾਜਨਾਨਿ ਪੂਰੇਨ੍ਤੋ ਸਨ੍ਤਪ੍ਪੇਸੀਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਭਿਕ੍ਖੁ ਮਾਤਾਪਿਤੂਨਂ ਪੋਸਨਂ ਨਾਮ ਪਣ੍ਡਿਤਾਨਂ ਵਂਸੋ’’ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਸੋ ਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਸੁਵਗਣਾ ਬੁਦ੍ਧਪਰਿਸਾ ਅਹੇਸੁਂ, ਮਾਤਾਪਿਤਰੋ ਮਹਾਰਾਜਕੁਲਾਨਿ, ਖੇਤ੍ਤਪਾਲੋ ਛਨ੍ਨੋ, ਬ੍ਰਾਹ੍ਮਣੋ ਆਨਨ੍ਦੋ, ਸੁਵਰਾਜਾ ਪਨ ਅਹਮੇਵ ਅਹੋਸਿਨ੍ਤਿ.

ਸਾਲਿਕੇਦਾਰਜਾਤਕਵਣ੍ਣਨਾ ਪਠਮਾ.

[੪੮੫] ੨. ਚਨ੍ਦਕਿਨ੍ਨਰੀਜਾਤਕਵਣ੍ਣਨਾ

ਉਪਨੀਯਤਿਦਂ ਮਞ੍ਞੇਤਿ ਇਦਂ ਸਤ੍ਥਾ ਕਪਿਲਵਤ੍ਥੁਪੁਰਂ ਉਪਨਿਸ੍ਸਾਯ ਨਿਗ੍ਰੋਧਾਰਾਮੇ ਵਿਹਰਨ੍ਤੋ ਰਾਜਨਿਵੇਸਨੇ ਰਾਹੁਲਮਾਤਰਂ ਆਰਬ੍ਭ ਕਥੇਸਿ. ਇਦਂ ਪਨ ਜਾਤਕਂ ਦੂਰੇਨਿਦਾਨਤੋ ਪਟ੍ਠਾਯ ਕਥੇਤਬ੍ਬਂ. ਸਾ ਪਨੇਸਾ ਨਿਦਾਨਕਥਾ ਯਾਵ ਲਟ੍ਠਿਵਨੇ ਉਰੁਵੇਲਕਸ੍ਸਪਸੀਹਨਾਦਾ ਅਪਣ੍ਣਕਜਾਤਕੇ ਕਥਿਤਾ, ਤਤੋ ਪਰਂ ਯਾਵ ਕਪਿਲਵਤ੍ਥੁਗਮਨਾ ਵੇਸ੍ਸਨ੍ਤਰਜਾਤਕੇ ਆਵਿ ਭਵਿਸ੍ਸਤਿ. ਸਤ੍ਥਾ ਪਨ ਪਿਤੁ ਨਿਵੇਸਨੇ ਨਿਸੀਦਿਤ੍ਵਾ ਅਨ੍ਤਰਭਤ੍ਤਸਮਯੇ ਮਹਾਧਮ੍ਮਪਾਲਜਾਤਕਂ (ਜਾ. ੧.੧੦.੯੨ ਆਦਯੋ) ਕਥੇਤ੍ਵਾ ਕਤਭਤ੍ਤਕਿਚ੍ਚੋ ‘‘ਰਾਹੁਲਮਾਤੁ ਨਿਵੇਸਨੇ ਨਿਸੀਦਿਤ੍ਵਾ ਤਸ੍ਸਾ ਗੁਣਂ ਵਣ੍ਣੇਨ੍ਤੋ ਚਨ੍ਦਕਿਨ੍ਨਰੀਜਾਤਕਂ (ਜਾ. ੧.੧੪.੧੮ ਆਦਯੋ) ਕਥੇਸ੍ਸਾਮੀ’’ਤਿ ਰਾਜਾਨਂ ਪਤ੍ਤਂ ਗਾਹਾਪੇਤ੍ਵਾ ਦ੍ਵੀਹਿ ਅਗ੍ਗਸਾਵਕੇਹਿ ਸਦ੍ਧਿਂ ਰਾਹੁਲਮਾਤੁ ਨਿਵੇਸਨਟ੍ਠਾਨਂ ਪਾਯਾਸਿ. ਤਦਾ ਤਸ੍ਸਾ ਸਮ੍ਮੁਖਾ ਚਤ੍ਤਾਲੀਸਸਹਸ੍ਸਨਾਟਕਿਤ੍ਥਿਯੋ ਵਸਨ੍ਤਿ ਤਾਸੁ ਖਤ੍ਤਿਯਕਞ੍ਞਾਨਂਯੇਵ ਨਵੁਤਿਅਧਿਕਸਹਸ੍ਸਂ. ਸਾ ਤਥਾਗਤਸ੍ਸ ਆਗਮਨਂ ਞਤ੍ਵਾ ‘‘ਸਬ੍ਬਾ ਕਾਸਾਵਾਨੇਵ ਨਿਵਾਸੇਨ੍ਤੂ’’ਤਿ ਤਾਸਂ ਆਰੋਚਾਪੇਸਿ. ਤਾ ਤਥਾ ਕਰਿਂਸੁ. ਸਤ੍ਥਾ ਆਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿ. ਅਥ ਤਾ ਸਬ੍ਬਾਪਿ ਏਕਪ੍ਪਹਾਰੇਨੇਵ ਵਿਰਵਿਂਸੁ, ਮਹਾਪਰਿਦੇਵਸਦ੍ਦੋ ਅਹੋਸਿ. ਰਾਹੁਲਮਾਤਾਪਿ ਪਰਿਦੇਵਿਤ੍ਵਾ ਸੋਕਂ ਵਿਨੋਦੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਰਾਜਗਤੇਨ ਬਹੁਮਾਨੇਨ ਸਗਾਰਵੇਨ ਨਿਸੀਦਿ. ਰਾਜਾ ਤਸ੍ਸਾ ਗੁਣਕਥਂ ਆਰਭਿ, ‘‘ਭਨ੍ਤੇ, ਮਮ ਸੁਣ੍ਹਾ ‘ਤੁਮ੍ਹੇਹਿ ਕਾਸਾਵਾਨਿ ਨਿਵਤ੍ਥਾਨੀ’ਤਿ ਸੁਤ੍ਵਾ ਕਾਸਾਵਾਨੇਵ ਨਿਵਾਸੇਸਿ, ‘ਮਾਲਾਦੀਨਿ ਪਰਿਚ੍ਚਤ੍ਤਾਨੀ’ਤਿ ਸੁਤ੍ਵਾ ਮਾਲਾਦੀਨਿ ਪਰਿਚ੍ਚਜਿ, ‘ਭੂਮਿਯਂ ਸਯਤੀ’ਤਿ ਸੁਤ੍ਵਾ ਭੂਮਿਸਯਨਾਵ ਜਾਤਾ, ਤੁਮ੍ਹਾਕਂ ਪਬ੍ਬਜਿਤਕਾਲੇ ਵਿਧਵਾ ਹੁਤ੍ਵਾ ਅਞ੍ਞੇਹਿ ਰਾਜੂਹਿ ਪੇਸਿਤਂ ਪਣ੍ਣਾਕਾਰਂ ਨ ਗਣ੍ਹਿ, ਏਵਂ ਤੁਮ੍ਹੇਸੁ ਅਸਂਹੀਰਚਿਤ੍ਤਾ ਏਸਾ’’ਤਿ ਨਾਨਪ੍ਪਕਾਰੇਹਿ ਤਸ੍ਸਾ ਗੁਣਕਥਂ ਕਥੇਸਿ. ਸਤ੍ਥਾ ‘‘ਅਨਚ੍ਛਰਿਯਂ, ਮਹਾਰਾਜ, ਯਂ ਏਸਾ ਇਦਾਨਿ ਮਮ ਪਚ੍ਛਿਮੇ ਅਤ੍ਤਭਾਵੇ ਮਯਿ ਸਸਿਨੇਹਾ ਅਸਂਹੀਰਚਿਤ੍ਤਾ ਅਨਞ੍ਞਨੇਯ੍ਯਾ ਭਵੇਯ੍ਯ. ਏਸਾ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਾਪਿ ਮਯਿ ਅਸਂਹੀਰਚਿਤ੍ਤਾ ਅਨਞ੍ਞਨੇਯ੍ਯਾ ਅਹੋਸੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਮਹਾਸਤ੍ਤੋ ਹਿਮਵਨ੍ਤਪਦੇਸੇ ਕਿਨ੍ਨਰਯੋਨਿਯਂ ਨਿਬ੍ਬਤ੍ਤਿ, ਚਨ੍ਦਾ ਨਾਮਸ੍ਸ ਭਰਿਯਾ. ਤੇ ਉਭੋਪਿ ਚਨ੍ਦਨਾਮਕੇ ਰਜਤਪਬ੍ਬਤੇ ਵਸਿਂਸੁ. ਤਦਾ ਬਾਰਾਣਸਿਰਾਜਾ ਅਮਚ੍ਚਾਨਂ ਰਜ੍ਜਂ ਨਿਯ੍ਯਾਦੇਤ੍ਵਾ ਦ੍ਵੇ ਕਾਸਾਯਾਨਿ ਨਿਵਾਸੇਤ੍ਵਾ ਸਨ੍ਨਦ੍ਧਪਞ੍ਚਾਵੁਧੋ ਏਕਕੋਵ ਹਿਮਵਨ੍ਤਂ ਪਾਵਿਸਿ. ਸੋ ਮਿਗਮਂਸਂ ਖਾਦਨ੍ਤੋ ਏਕਂ ਖੁਦ੍ਦਕਨਦਿਂ ਅਨੁਸਞ੍ਚਰਨ੍ਤੋ ਉਦ੍ਧਂ ਅਭਿਰੁਹਿ. ਚਨ੍ਦਪਬ੍ਬਤਵਾਸਿਨੋ ਕਿਨ੍ਨਰਾ ਵਸ੍ਸਾਰਤ੍ਤਸਮਯੇ ਅਨੋਤਰਿਤ੍ਵਾ ਪਬ੍ਬਤੇਯੇਵ ਵਸਨ੍ਤਿ, ਨਿਦਾਘਸਮਯੇ ਓਤਰਨ੍ਤਿ. ਤਦਾ ਚ ਸੋ ਚਨ੍ਦਕਿਨ੍ਨਰੋ ਅਤ੍ਤਨੋ ਭਰਿਯਾਯ ਸਦ੍ਧਿਂ ਓਤਰਿਤ੍ਵਾ ਤੇਸੁ ਤੇਸੁ ਠਾਨੇਸੁ ਗਨ੍ਧੇ ਵਿਲਿਮ੍ਪਨ੍ਤੋ ਪੁਪ੍ਫਰੇਣੁਂ ਖਾਦਨ੍ਤੋ ਪੁਪ੍ਫਪਟੇ ਨਿਵਾਸੇਨ੍ਤੋ ਪਾਰੁਪਨ੍ਤੋ ਲਤਾਦੋਲਾਹਿ ਕੀਲ਼ਨ੍ਤੋ ਮਧੁਰਸ੍ਸਰੇਨ ਗਾਯਨ੍ਤੋ ਤਂ ਖੁਦ੍ਦਕਨਦਿਂ ਪਤ੍ਵਾ ਏਕਸ੍ਮਿਂ ਨਿਵਤ੍ਤਨਟ੍ਠਾਨੇ ਓਤਰਿਤ੍ਵਾ ਉਦਕੇ ਪੁਪ੍ਫਾਨਿ ਵਿਕਿਰਿਤ੍ਵਾ ਉਦਕਕੀਲ਼ਂ ਕੀਲ਼ਿਤ੍ਵਾ ਪੁਪ੍ਫਪਟੇ ਨਿਵਾਸੇਤ੍ਵਾ ਪਾਰੁਪਿਤ੍ਵਾ ਰਜਤਪਟ੍ਟਵਣ੍ਣਾਯ ਵਾਲੁਕਾਯ ਪੁਪ੍ਫਾਸਨਂ ਪਞ੍ਞਪੇਤ੍ਵਾ ਏਕਂ ਵੇਲ਼ੁ ਦਣ੍ਡਕਂ ਗਹੇਤ੍ਵਾ ਸਯਨੇ ਨਿਸੀਦਿ. ਤਤੋ ਚਨ੍ਦਕਿਨ੍ਨਰੋ ਵੇਲ਼ੁਂ ਵਾਦੇਨ੍ਤੋ ਮਧੁਰਸਦ੍ਦੇਨ ਗਾਯਿ. ਚਨ੍ਦਕਿਨ੍ਨਰੀ ਮੁਦੁਹਤ੍ਥੇ ਨਾਮੇਤ੍ਵਾ ਤਸ੍ਸ ਅਵਿਦੂਰੇ ਠਿਤਾ ਨਚ੍ਚਿ ਚੇਵ ਗਾਯਿ ਚ. ਸੋ ਰਾਜਾ ਤੇਸਂ ਸਦ੍ਦਂ ਸੁਤ੍ਵਾ ਪਦਸਦ੍ਦਂ ਅਸਾਵੇਨ੍ਤੋ ਸਣਿਕਂ ਗਨ੍ਤ੍ਵਾ ਪਟਿਚ੍ਛਨ੍ਨੇ ਠਤ੍ਵਾ ਤੇ ਕਿਨ੍ਨਰੇ ਦਿਸ੍ਵਾ ਕਿਨ੍ਨਰਿਯਾ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ‘‘ਤਂ ਕਿਨ੍ਨਰਂ ਵਿਜ੍ਝਿਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਇਮਾਯ ਸਦ੍ਧਿਂ ਸਂਵਾਸਂ ਕਪ੍ਪੇਸ੍ਸਾਮੀ’’ਤਿ ਠਤ੍ਵਾ ਚਨ੍ਦਕਿਨ੍ਨਰਂ ਵਿਜ੍ਝਿ. ਸੋ ਵੇਦਨਾਪ੍ਪਤ੍ਤੋ ਪਰਿਦੇਵਮਾਨੋ ਚਤਸ੍ਸੋ ਗਾਥਾ ਅਭਾਸਿ –

੧੮.

‘‘ਉਪਨੀਯਤਿਦਂ ਮਞ੍ਞੇ, ਚਨ੍ਦੇ ਲੋਹਿਤਮਦ੍ਦਨੇ;

ਅਜ੍ਜ ਜਹਾਮਿ ਜੀਵਿਤਂ, ਪਾਣਾ ਮੇ ਚਨ੍ਦੇ ਨਿਰੁਜ੍ਝਨ੍ਤਿ.

੧੯.

‘‘ਓਸੀਦਿ ਮੇ ਦੁਕ੍ਖਂ ਹਦਯਂ, ਮੇ ਡਯ੍ਹਤੇ ਨਿਤਮ੍ਮਾਮਿ;

ਤਵ ਚਨ੍ਦਿਯਾ ਸੋਚਨ੍ਤਿਯਾ, ਨ ਨਂ ਅਞ੍ਞੇਹਿ ਸੋਕੇਹਿ.

੨੦.

‘‘ਤਿਣਮਿਵ ਵਨਮਿਵ ਮਿਲਾਯਾਮਿ, ਨਦੀ ਅਪਰਿਪੁਣ੍ਣਾਵ ਸੁਸ੍ਸਾਮਿ;

ਤਵ ਚਨ੍ਦਿਯਾ ਸੋਚਨ੍ਤਿਯਾ, ਨ ਨਂ ਅਞ੍ਞੇਹਿ ਸੋਕੇਹਿ.

੨੧.

‘‘ਵਸ੍ਸਮਿਵ ਸਰੇ ਪਾਦੇ, ਇਮਾਨਿ ਅਸ੍ਸੂਨਿ ਵਤ੍ਤਰੇ ਮਯ੍ਹਂ;

ਤਵ ਚਨ੍ਦਿਯਾ ਸੋਚਨ੍ਤਿਯਾ, ਨ ਨਂ ਅਞ੍ਞੇਹਿ ਸੋਕੇਹੀ’’ਤਿ.

ਤਤ੍ਥ ਉਪਨੀਯਤੀਤਿ ਸਨ੍ਤਤਿਵਿਚ੍ਛੇਦਂ ਉਪਨੀਯਤਿ. ਇਦਨ੍ਤਿ ਜੀਵਿਤਂ. ਪਾਣਾ ਮੇਤਿ ਭਦ੍ਦੇ, ਚਨ੍ਦੇ ਮਮ ਜੀਵਿਤਪਾਣਾ ਨਿਰੁਜ੍ਝਨ੍ਤਿ. ਓਸੀਦਿ ਮੇਤਿ ਜੀਵਿਤਂ ਮੇ ਓਸੀਦਤਿ. ਨਿਤਮ੍ਮਾਮੀਤਿ ਅਤਿਕਿਲਮਾਮਿ. ਤਵ ਚਨ੍ਦਿਯਾਤਿ ਇਦਂ ਮਮ ਦੁਕ੍ਖਂ, ਨ ਨਂ ਅਞ੍ਞੇਹਿ ਸੋਕੇਹਿ, ਅਥ ਖੋ ਤਵ ਚਨ੍ਦਿਯਾ ਸੋਚਨ੍ਤਿਯਾ ਸੋਕਹੇਤੁ ਯਸ੍ਮਾ ਤ੍ਵਂ ਮਮ ਵਿਯੋਗੇਨ ਸੋਚਿਸ੍ਸਸਿ, ਤਸ੍ਮਾਤਿ ਅਤ੍ਥੋ. ਤਿਣਮਿਵ ਵਨਮਿਵ ਮਿਲਾਯਾਮੀਤਿ ਤਤ੍ਤਪਾਸਾਣੇ ਖਿਤ੍ਤਤਿਣਮਿਵ ਮੂਲਛਿਨ੍ਨਵਨਮਿਵ ਮਿਲਾਯਾਮੀਤਿ ਵਦਤਿ. ਸਰੇ ਪਾਦੇਤਿ ਯਥਾ ਨਾਮ ਪਬ੍ਬਤਪਾਦੇ ਪਤਿਤਵਸ੍ਸਂ ਸਰਿਤ੍ਵਾ ਅਚ੍ਛਿਨ੍ਨਧਾਰਂ ਵਤ੍ਤਤਿ.

ਮਹਾਸਤ੍ਤੋ ਇਮਾਹਿ ਚਤੂਹਿ ਗਾਥਾਹਿ ਪਰਿਦੇਵਿਤ੍ਵਾ ਪੁਪ੍ਫਸਯਨੇ ਨਿਪਨ੍ਨੋਵ ਸਤਿਂ ਵਿਸ੍ਸਜ੍ਜੇਤ੍ਵਾ ਪਰਿਵਤ੍ਤਿ. ਰਾਜਾ ਪਤਿਟ੍ਠਿਤੋਵ. ਇਤਰਾ ਮਹਾਸਤ੍ਤੇ ਪਰਿਦੇਵਨ੍ਤੇ ਅਤ੍ਤਨੋ ਰਤਿਯਾ ਮਤ੍ਤਾ ਹੁਤ੍ਵਾ ਤਸ੍ਸ ਵਿਦ੍ਧਭਾਵਂ ਨ ਜਾਨਾਤਿ, ਵਿਸਞ੍ਞਂ ਪਨ ਨਂ ਪਰਿਵਤ੍ਤਿਤ੍ਵਾ ਨਿਪਨ੍ਨਂ ਦਿਸ੍ਵਾ ‘‘ਕਿਂ ਨੁ ਖੋ ਮੇ ਪਿਯਸਾਮਿਕਸ੍ਸ ਦੁਕ੍ਖ’’ਨ੍ਤਿ ਉਪਧਾਰੇਨ੍ਤੀ ਪਹਾਰਮੁਖਤੋ ਪਗ੍ਘਰਨ੍ਤਂ ਲੋਹਿਤਂ ਦਿਸ੍ਵਾ ਪਿਯਸਾਮਿਕੇ ਉਪ੍ਪਨ੍ਨਂ ਬਲਵਸੋਕਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੀ ਮਹਾਸਦ੍ਦੇਨ ਪਰਿਦੇਵਿ. ਰਾਜਾ ‘‘ਕਿਨ੍ਨਰੋ ਮਤੋ ਭਵਿਸ੍ਸਤੀ’’ਤਿ ਨਿਕ੍ਖਮਿਤ੍ਵਾ ਅਤ੍ਤਾਨਂ ਦਸ੍ਸੇਸਿ. ਚਨ੍ਦਾ ਤਂ ਦਿਸ੍ਵਾ ‘‘ਇਮਿਨਾ ਮੇ ਚੋਰੇਨ ਪਿਯਸਾਮਿਕੋ ਵਿਦ੍ਧੋ ਭਵਿਸ੍ਸਤੀ’’ਤਿ ਕਮ੍ਪਮਾਨਾ ਪਲਾਯਿਤ੍ਵਾ ਪਬ੍ਬਤਮਤ੍ਥਕੇ ਠਤ੍ਵਾ ਰਾਜਾਨਂ ਪਰਿਭਾਸਨ੍ਤੀ ਪਞ੍ਚ ਗਾਥਾ ਅਭਾਸਿ –

੨੨.

‘‘ਪਾਪੋ ਖੋਸਿ ਰਾਜਪੁਤ੍ਤ, ਯੋ ਮੇ ਇਚ੍ਛਿਤਂ ਪਤਿਂ ਵਰਾਕਿਯਾ;

ਵਿਜ੍ਝਸਿ ਵਨਮੂਲਸ੍ਮਿਂ, ਸੋਯਂ ਵਿਦ੍ਧੋ ਛਮਾ ਸੇਤਿ.

੨੩.

‘‘ਇਮਂ ਮਯ੍ਹਂ ਹਦਯਸੋਕਂ, ਪਟਿਮੁਞ੍ਚਤੁ ਰਾਜਪੁਤ੍ਤ ਤਵ ਮਾਤਾ;

ਯੋ ਮਯ੍ਹਂ ਹਦਯਸੋਕੋ, ਕਿਮ੍ਪੁਰਿਸਂ ਅਵੇਕ੍ਖਮਾਨਾਯ.

੨੪.

‘‘ਇਮਂ ਮਯ੍ਹਂ ਹਦਯਸੋਕਂ, ਪਟਿਮੁਞ੍ਚਤੁ ਰਾਜਪੁਤ੍ਤ ਤਵ ਜਾਯਾ;

ਯੋ ਮਯ੍ਹਂ ਹਦਯਸੋਕੋ, ਕਿਮ੍ਪੁਰਿਸਂ ਅਵੇਕ੍ਖਮਾਨਾਯ.

੨੫.

‘‘ਮਾ ਚ ਪੁਤ੍ਤਂ ਮਾ ਚ ਪਤਿਂ, ਅਦ੍ਦਕ੍ਖਿ ਰਾਜਪੁਤ੍ਤ ਤਵ ਮਾਤਾ;

ਯੋ ਕਿਮ੍ਪੁਰਿਸਂ ਅਵਧਿ, ਅਦੂਸਕਂ ਮਯ੍ਹ ਕਾਮਾ ਹਿ.

੨੬.

‘‘ਮਾ ਚ ਪੁਤ੍ਤਂ ਮਾ ਚ ਪਤਿਂ, ਅਦ੍ਦਕ੍ਖਿ ਰਾਜਪੁਤ੍ਤ ਤਵ ਜਾਯਾ;

ਯੋ ਕਿਮ੍ਪੁਰਿਸਂ ਅਵਧਿ, ਅਦੂਸਕਂ ਮਯ੍ਹ ਕਾਮਾ ਹੀ’’ਤਿ.

ਤਤ੍ਥ ਵਰਾਕਿਯਾਤਿ ਕਪਣਾਯ. ਪਟਿਮੁਞ੍ਚਤੂਤਿ ਪਟਿਲਭਤੁ ਫੁਸਤੁ ਪਾਪੁਣਾਤੁ. ਮਯ੍ਹ ਕਾਮਾ ਹੀਤਿ ਮਯ੍ਹਂ ਕਾਮੇਨ.

ਰਾਜਾ ਨਂ ਪਞ੍ਚਹਿ ਗਾਥਾਹਿ ਪਰਿਭਾਸਿਤ੍ਵਾ ਪਬ੍ਬਤਮਤ੍ਥਕੇ ਠਿਤਂਯੇਵ ਅਸ੍ਸਾਸੇਨ੍ਤੋ ਗਾਥਮਾਹ –

੨੭.

‘‘ਮਾ ਤ੍ਵਂ ਚਨ੍ਦੇ ਰੋਦਿ ਮਾ ਸੋਪਿ, ਵਨਤਿਮਿਰਮਤ੍ਤਕ੍ਖਿ;

ਮਮ ਤ੍ਵਂ ਹੇਹਿਸਿ ਭਰਿਯਾ, ਰਾਜਕੁਲੇ ਪੂਜਿਤਾ ਨਾਰੀਭੀ’’ਤਿ.

ਤਤ੍ਥ ਚਨ੍ਦੇਤਿ ਮਹਾਸਤ੍ਤਸ੍ਸ ਪਰਿਦੇਵਨਕਾਲੇ ਨਾਮਸ੍ਸ ਸੁਤਤ੍ਤਾ ਏਵਮਾਹ. ਵਨਤਿਮਿਰਮਤ੍ਤਕ੍ਖੀਤਿ ਵਨਤਿਮਿਰਪੁਪ੍ਫਸਮਾਨਅਕ੍ਖਿ. ਪੂਜਿਤਾ ਨਾਰੀਭੀਤਿ ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਜੇਟ੍ਠਿਕਾ ਅਗ੍ਗਮਹੇਸੀ ਹੇਸ੍ਸਸਿ.

ਚਨ੍ਦਾ ਤਸ੍ਸ ਵਚਨਂ ਸੁਤ੍ਵਾ ‘‘ਤ੍ਵਂ ਕਿਂ ਮਂ ਵਦੇਸੀ’’ਤਿ ਸੀਹਨਾਦਂ ਨਦਨ੍ਤੀ ਅਨਨ੍ਤਰਗਾਥਮਾਹ –

੨੮.

‘‘ਅਪਿ ਨੂਨਹਂ ਮਰਿਸ੍ਸਂ, ਨਾਹਂ ਰਾਜਪੁਤ੍ਤ ਤਵ ਹੇਸ੍ਸਂ;

ਯੋ ਕਿਮ੍ਪੁਰਿਸਂ ਅਵਧਿ, ਅਦੂਸਕਂ ਮਯ੍ਹ ਕਾਮਾ ਹੀ’’ਤਿ.

ਤਤ੍ਥ ਅਪਿ ਨੂਨਹਨ੍ਤਿ ਅਪਿ ਏਕਂਸੇਨੇਵ ਅਹਂ ਮਰਿਸ੍ਸਂ.

ਸੋ ਤਸ੍ਸਾ ਵਚਨਂ ਸੁਤ੍ਵਾ ਨਿਚ੍ਛਨ੍ਦਰਾਗੋ ਹੁਤ੍ਵਾ ਇਤਰਂ ਗਾਥਮਾਹ –

੨੯.

‘‘ਅਪਿ ਭੀਰੁਕੇ ਅਪਿ ਜੀਵਿਤੁਕਾਮਿਕੇ, ਕਿਮ੍ਪੁਰਿਸਿ ਗਚ੍ਛ ਹਿਮਵਨ੍ਤਂ;

ਤਾਲੀਸਤਗਰਭੋਜਨਾ, ਅਞ੍ਞੇ ਤਂ ਮਿਗਾ ਰਮਿਸ੍ਸਨ੍ਤੀ’’ਤਿ.

ਤਤ੍ਥ ਅਪਿ ਭੀਰੁਕੇਤਿ ਭੀਰੁਜਾਤਿਕੇ. ਤਾਲੀਸਤਗਰਭੋਜਨਾਤਿ ਤ੍ਵਂ ਤਾਲੀਸਪਤ੍ਤਤਗਰਪਤ੍ਤਭੋਜਨਾ ਮਿਗੀ, ਤਸ੍ਮਾ ਅਞ੍ਞੇ ਤਂ ਮਿਗਾ ਰਮਿਸ੍ਸਨ੍ਤਿ, ਨ ਤ੍ਵਂ ਰਾਜਕੁਲਾਰਹਾ, ਗਚ੍ਛਾਤਿ ਨਂ ਅਵਚ, ਵਤ੍ਵਾ ਚ ਪਨ ਨਿਰਪੇਕ੍ਖੋ ਹੁਤ੍ਵਾ ਪਕ੍ਕਾਮਿ.

ਸਾ ਤਸ੍ਸ ਗਤਭਾਵਂ ਞਤ੍ਵਾ ਓਰੁਯ੍ਹ ਮਹਾਸਤ੍ਤਂ ਆਲਿਙ੍ਗਿਤ੍ਵਾ ਪਬ੍ਬਤਮਤ੍ਥਕਂ ਆਰੋਪੇਤ੍ਵਾ ਪਬ੍ਬਤਤਲੇ ਨਿਪਜ੍ਜਾਪੇਤ੍ਵਾ ਸੀਸਮਸ੍ਸ ਅਤ੍ਤਨੋ ਊਰੂਸੁ ਕਤ੍ਵਾ ਬਲਵਪਰਿਦੇਵਂ ਪਰਿਦੇਵਮਾਨਾ ਦ੍ਵਾਦਸ ਗਾਥਾ ਅਭਾਸਿ –

੩੦.

‘‘ਤੇ ਪਬ੍ਬਤਾ ਤਾ ਚ ਕਨ੍ਦਰਾ, ਤਾ ਚ ਗਿਰਿਗੁਹਾਯੋ ਤਥੇਵ ਤਿਟ੍ਠਨ੍ਤਿ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੩੧.

‘‘ਤੇ ਪਣ੍ਣਸਨ੍ਥਤਾ ਰਮਣੀਯਾ, ਵਾਲ਼ਮਿਗੇਹਿ ਅਨੁਚਿਣ੍ਣਾ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੩੨.

‘‘ਤੇ ਪੁਪ੍ਫਸਨ੍ਥਤਾ ਰਮਣੀਯਾ, ਵਾਲ਼ਮਿਗੇਹਿ ਅਨੁਚਿਣ੍ਣਾ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੩੩.

‘‘ਅਚ੍ਛਾ ਸਵਨ੍ਤਿ ਗਿਰਿਵਨਨਦਿਯੋ, ਕੁਸੁਮਾਭਿਕਿਣ੍ਣਸੋਤਾਯੋ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੩੪.

‘‘ਨੀਲਾਨਿ ਹਿਮਵਤੋ ਪਬ੍ਬਤਸ੍ਸ, ਕੂਟਾਨਿ ਦਸ੍ਸਨੀਯਾਨਿ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੩੫.

‘‘ਪੀਤਾਨਿ ਹਿਮਵਤੋ ਪਬ੍ਬਤਸ੍ਸ, ਕੂਟਾਨਿ ਦਸ੍ਸਨੀਯਾਨਿ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੩੬.

‘‘ਤਮ੍ਬਾਨਿ ਹਿਮਵਤੋ ਪਬ੍ਬਤਸ੍ਸ, ਕੂਟਾਨਿ ਦਸ੍ਸਨੀਯਾਨਿ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੩੭.

‘‘ਤੁਙ੍ਗਾਨਿ ਹਿਮਵਤੋ ਪਬ੍ਬਤਸ੍ਸ, ਕੂਟਾਨਿ ਦਸ੍ਸਨੀਯਾਨਿ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੩੮.

‘‘ਸੇਤਾਨਿ ਹਿਮਵਤੋ ਪਬ੍ਬਤਸ੍ਸ, ਕੂਟਾਨਿ ਦਸ੍ਸਨੀਯਾਨਿ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੩੯.

‘‘ਚਿਤ੍ਰਾਨਿ ਹਿਮਵਤੋ ਪਬ੍ਬਤਸ੍ਸ, ਕੂਟਾਨਿ ਦਸ੍ਸਨੀਯਾਨਿ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੪੦.

‘‘ਯਕ੍ਖਗਣਸੇਵਿਤੇ ਗਨ੍ਧਮਾਦਨੇ, ਓਸਧੇਭਿ ਸਞ੍ਛਨ੍ਨੇ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੪੧.

‘‘ਕਿਮ੍ਪੁਰਿਸਸੇਵਿਤੇ ਗਨ੍ਧਮਾਦਨੇ, ਓਸਧੇਭਿ ਸਞ੍ਛਨ੍ਨੇ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸ’’ਨ੍ਤਿ.

ਤਤ੍ਥ ਤੇ ਪਬ੍ਬਤਾਤਿ ਯੇਸੁ ਮਯਂ ਏਕਤੋਵ ਅਭਿਰਮਿਮ੍ਹ, ਇਮੇ ਤੇ ਪਬ੍ਬਤਾ ਤਾ ਚ ਕਨ੍ਦਰਾ ਤਾ ਚ ਗਿਰਿਗੁਹਾਯੋ ਤਥੇਵ ਠਿਤਾ. ਤੇਸੁ ਅਹਂ ਇਦਾਨਿ ਤਂ ਅਪਸ੍ਸਨ੍ਤੀ ਕਥਂ ਕਸ੍ਸਂ, ਕਿਂ ਕਰਿਸ੍ਸਾਮਿ, ਤੇਸੁ ਪੁਪ੍ਫਫਲਪਲ੍ਲਵਾਦਿਸੋਭਂ ਤਂ ਅਪਸ੍ਸਨ੍ਤੀ ਕਥਂ ਅਧਿਵਾਸੇਤੁਂ ਸਕ੍ਖਿਸ੍ਸਾਮੀਤਿ ਪਰਿਦੇਵਤਿ. ਪਣ੍ਣਸਨ੍ਥਤਾਤਿ ਤਾਲੀਸਪਤ੍ਤਾਦਿਗਨ੍ਧਪਣ੍ਣਸਨ੍ਥਰਾ. ਅਚ੍ਛਾਤਿ ਵਿਪ੍ਪਸਨ੍ਨੋਦਕਾ. ਨੀਲਾਨੀਤਿ ਨੀਲਮਣਿਮਯਾਨਿ. ਪੀਤਾਨੀਤਿ ਸੋਵਣ੍ਣਮਯਾਨਿ. ਤਮ੍ਬਾਨੀਤਿ ਮਨੋਸਿਲਮਯਾਨਿ. ਤੁਙ੍ਗਾਨੀਤਿ ਉਚ੍ਚਾਨਿ ਤਿਖਿਣਗ੍ਗਾਨਿ. ਸੇਤਾਨੀਤਿ ਰਜਤਮਯਾਨਿ. ਚਿਤ੍ਰਾਨੀਤਿ ਸਤ੍ਤਰਤਨਮਿਸ੍ਸਕਾਨਿ. ਯਕ੍ਖਗਣਸੇਵਿਤੇਤਿ ਭੁਮ੍ਮਦੇਵਤਾਹਿ ਸੇਵਿਤੇ.

ਇਤਿ ਸਾ ਦ੍ਵਾਦਸਹਿ ਗਾਥਾਹਿ ਪਰਿਦੇਵਿਤ੍ਵਾ ਮਹਾਸਤ੍ਤਸ੍ਸ ਉਰੇ ਹਤ੍ਥਂ ਠਪੇਤ੍ਵਾ ਸਨ੍ਤਾਪਭਾਵਂ ਞਤ੍ਵਾ ‘‘ਚਨ੍ਦੋ ਜੀਵਤਿਯੇਵ, ਦੇਵੁਜ੍ਝਾਨਕਮ੍ਮਂ ਕਤ੍ਵਾ ਜੀਵਿਤਮਸ੍ਸ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਕਿਂ ਨੁ ਖੋ ਲੋਕਪਾਲਾ ਨਾਮ ਨਤ੍ਥਿ, ਉਦਾਹੁ ਵਿਪ੍ਪਵੁਤ੍ਥਾ, ਅਦੁ ਮਤਾ, ਤੇ ਮੇ ਪਿਯਸਾਮਿਕਂ ਨ ਰਕ੍ਖਨ੍ਤੀ’’ਤਿ ਦੇਵੁਜ੍ਝਾਨਕਮ੍ਮਂ ਅਕਾਸਿ. ਤਸ੍ਸਾ ਸੋਕਵੇਗੇਨ ਸਕ੍ਕਸ੍ਸ ਆਸਨਂ ਉਣ੍ਹਂ ਅਹੋਸਿ. ਸਕ੍ਕੋ ਆਵਜ੍ਜੇਨ੍ਤੋ ਤਂ ਕਾਰਣਂ ਞਤ੍ਵਾ ਬ੍ਰਾਹ੍ਮਣਵਣ੍ਣੇਨ ਵੇਗੇਨੇਵ ਆਗਨ੍ਤ੍ਵਾ ਕੁਣ੍ਡਿਕਤੋ ਉਦਕਂ ਗਹੇਤ੍ਵਾ ਮਹਾਸਤ੍ਤਂ ਆਸਿਞ੍ਚਿ. ਤਾਵਦੇਵ ਵਿਸਂ ਅਨ੍ਤਰਧਾਯਿ, ਵਣੋ ਰੁਹਿ, ਇਮਸ੍ਮਿਂ ਠਾਨੇ ਵਿਦ੍ਧੋਤਿਪਿ ਨ ਪਞ੍ਞਾਯਿ. ਮਹਾਸਤ੍ਤੋ ਸੁਖਿਤੋ ਉਟ੍ਠਾਸਿ. ਚਨ੍ਦਾ ਪਿਯਸਾਮਿਕਂ ਅਰੋਗਂ ਦਿਸ੍ਵਾ ਸੋਮਨਸ੍ਸਪ੍ਪਤ੍ਤਾ ਸਕ੍ਕਸ੍ਸ ਪਾਦੇ ਵਨ੍ਦਨ੍ਤੀ ਅਨਨ੍ਤਰਗਾਥਮਾਹ –

੪੨.

‘‘ਵਨ੍ਦੇ ਤੇ ਅਯਿਰਬ੍ਰਹ੍ਮੇ, ਯੋ ਮੇ ਇਚ੍ਛਿਤਂ ਪਤਿਂ ਵਰਾਕਿਯਾ;

ਅਮਤੇਨ ਅਭਿਸਿਞ੍ਚਿ, ਸਮਾਗਤਾਸ੍ਮਿ ਪਿਯਤਮੇਨਾ’’ਤਿ.

ਤਤ੍ਥ ਅਮਤੇਨਾਤਿ ਉਦਕਂ ‘‘ਅਮਤ’’ਨ੍ਤਿ ਮਞ੍ਞਮਾਨਾ ਏਵਮਾਹ. ਪਿਯਤਮੇਨਾਤਿ ਪਿਯਤਰੇਨ, ਅਯਮੇਵ ਵਾ ਪਾਠੋ.

ਸਕ੍ਕੋ ਤੇਸਂ ਓਵਾਦਮਦਾਸਿ ‘‘ਇਤੋ ਪਟ੍ਠਾਯ ਚਨ੍ਦਪਬ੍ਬਤਤੋ ਓਰੁਯ੍ਹ ਮਨੁਸ੍ਸਪਥਂ ਮਾ ਗਮਿਤ੍ਥ, ਇਧੇਵ ਵਸਥਾ’’ਤਿ. ਏਵਞ੍ਚ ਪਨ ਵਤ੍ਵਾ ਤੇ ਓਵਦਿਤ੍ਵਾ ਸਕਟ੍ਠਾਨਮੇਵ ਗਤੋ. ਚਨ੍ਦਾਪਿ ‘‘ਕਿਂ ਨੋ ਸਾਮਿ ਇਮਿਨਾ ਪਰਿਪਨ੍ਥਟ੍ਠਾਨੇਨ, ਏਹਿ ਚਨ੍ਦਪਬ੍ਬਤਮੇਵ ਗਚ੍ਛਾਮਾ’’ਤਿ ਵਤ੍ਵਾ ਓਸਾਨਗਾਥਮਾਹ –

੪੩.

‘‘ਵਿਚਰਾਮ ਦਾਨਿ ਗਿਰਿਵਨਨਦਿਯੋ, ਕੁਸੁਮਾਭਿਕਿਣ੍ਣਸੋਤਾਯੋ;

ਨਾਨਾਦੁਮਵਸਨਾਯੋ, ਪਿਯਂਵਦਾ ਅਞ੍ਞਮਞ੍ਞਸ੍ਸਾ’’ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ ਇਦਾਨੇਵ, ਪੁਬ੍ਬੇਪੇਸਾ ਮਯਿ ਅਸਂਹੀਰਚਿਤ੍ਤਾ ਅਨਞ੍ਞਨੇਯ੍ਯਾ ਏਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਦੇਵਦਤ੍ਤੋ ਅਹੋਸਿ, ਸਕ੍ਕੋ ਅਨੁਰੁਦ੍ਧੋ, ਚਨ੍ਦਾ ਰਾਹੁਲਮਾਤਾ, ਚਨ੍ਦਕਿਨ੍ਨਰੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚਨ੍ਦਕਿਨ੍ਨਰੀਜਾਤਕਵਣ੍ਣਨਾ ਦੁਤਿਯਾ.

[੪੮੬] ੩. ਮਹਾਉਕ੍ਕੁਸਜਾਤਕਵਣ੍ਣਨਾ

ਉਕ੍ਕਾ ਚਿਲਾਚਾ ਬਨ੍ਧਨ੍ਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਿਤ੍ਤਬਨ੍ਧਕਉਪਾਸਕਂ ਆਰਬ੍ਭ ਕਥੇਸਿ. ਸੋ ਕਿਰ ਸਾਵਤ੍ਥਿਯਂ ਪਰਿਜਿਣ੍ਣਸ੍ਸ ਕੁਲਸ੍ਸ ਪੁਤ੍ਤੋ ਸਹਾਯਂ ਪੇਸੇਤ੍ਵਾ ਅਞ੍ਞਤਰਂ ਕੁਲਧੀਤਰਂ ਵਾਰਾਪੇਤ੍ਵਾ ‘‘ਅਤ੍ਥਿ ਪਨਸ੍ਸ ਉਪ੍ਪਨ੍ਨਕਿਚ੍ਚਂ ਨਿਤ੍ਥਰਣਸਮਤ੍ਥੋ ਮਿਤ੍ਤੋ ਵਾ ਸਹਾਯੋ ਵਾ’’ਤਿ ਵੁਤ੍ਤੇ ‘‘ਨਤ੍ਥੀ’’ਤਿ ਵਤ੍ਵਾ ‘‘ਤੇਨ ਹਿ ਮਿਤ੍ਤੇ ਤਾਵ ਬਨ੍ਧਤੂ’’ਤਿ ਵੁਤ੍ਤੇ ਤਸ੍ਮਿਂ ਓਵਾਦੇ ਠਤ੍ਵਾ ਪਠਮਂ ਤਾਵ ਚਤੂਹਿ ਦੋਵਾਰਿਕੇਹਿ ਸਦ੍ਧਿਂ ਮੇਤ੍ਤਿਂ ਅਕਾਸਿ, ਅਥਾਨੁਪੁਬ੍ਬੇਨ ਨਗਰਗੁਤ੍ਤਿਕਗਣਕਮਹਾਮਤ੍ਤਾਦੀਹਿ ਸਦ੍ਧਿਂ ਮੇਤ੍ਤਿਂ ਕਤ੍ਵਾ ਸੇਨਾਪਤਿਨਾਪਿ ਉਪਰਾਜੇਨਾਪਿ ਸਦ੍ਧਿਂ ਮੇਤ੍ਤਿਂ ਅਕਾਸਿ. ਤੇਹਿ ਪਨ ਸਦ੍ਧਿਂ ਏਕਤੋ ਹੁਤ੍ਵਾ ਰਞ੍ਞਾ ਸਦ੍ਧਿਂ ਮੇਤ੍ਤਿਂ ਅਕਾਸਿ. ਤਤੋ ਅਸੀਤਿਯਾ ਮਹਾਥੇਰੇਹਿ ਸਦ੍ਧਿਂ ਆਨਨ੍ਦਤ੍ਥੇਰੇਨਪਿ ਸਦ੍ਧਿਂ ਏਕਤੋ ਹੁਤ੍ਵਾ ਤਥਾਗਤੇਨ ਸਦ੍ਧਿਂ ਮੇਤ੍ਤਿਂ ਅਕਾਸਿ. ਅਥ ਨਂ ਸਤ੍ਥਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਪੇਸਿ, ਰਾਜਾਪਿਸ੍ਸ ਇਸ੍ਸਰਿਯਮਦਾਸਿ. ਸੋ ਮਿਤ੍ਤਬਨ੍ਧਕੋਯੇਵਾਤਿ ਪਾਕਟੋ ਜਾਤੋ. ਅਥਸ੍ਸ ਰਾਜਾ ਮਹਨ੍ਤਂ ਗੇਹਂ ਦਤ੍ਵਾ ਆਵਾਹਮਙ੍ਗਲਂ ਕਾਰੇਸਿ. ਰਾਜਾਨਂ ਆਦਿਂ ਕਤ੍ਵਾ ਮਹਾਜਨੋ ਪਣ੍ਣਾਕਾਰੇ ਪਹਿਣਿ. ਅਥਸ੍ਸ ਭਰਿਯਾ ਰਞ੍ਞਾ ਪਹਿਤਂ ਪਣ੍ਣਾਕਾਰਂ ਉਪਰਾਜਸ੍ਸ, ਉਪਰਾਜੇਨ ਪਹਿਤਂ ਪਣ੍ਣਾਕਾਰਂ ਸੇਨਾਪਤਿਸ੍ਸਾਤਿ ਏਤੇਨ ਉਪਾਯੇਨ ਸਕਲਨਗਰਵਾਸਿਨੋ ਆਬਨ੍ਧਿਤ੍ਵਾ ਗਣ੍ਹਿ. ਸਤ੍ਤਮੇ ਦਿਵਸੇ ਮਹਾਸਕ੍ਕਾਰਂ ਕਤ੍ਵਾ ਦਸਬਲਂ ਨਿਮਨ੍ਤੇਤ੍ਵਾ ਪਞ੍ਚਸਤਸ੍ਸ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਭਤ੍ਤਕਿਚ੍ਚਾਵਸਾਨੇ ਸਤ੍ਥਾਰਾ ਕਥਿਤਂ ਅਨੁਮੋਦਨਂ ਸੁਤ੍ਵਾ ਉਭੋਪਿ ਜਯਮ੍ਪਤਿਕਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ.

ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਮਿਤ੍ਤਬਨ੍ਧਕਉਪਾਸਕੋ ਅਤ੍ਤਨੋ ਭਰਿਯਂ ਨਿਸ੍ਸਾਯ ਤਸ੍ਸਾ ਵਚਨਂ ਕਤ੍ਵਾ ਸਬ੍ਬੇਹਿ ਮੇਤ੍ਤਿਂ ਕਤ੍ਵਾ ਰਞ੍ਞੋ ਸਨ੍ਤਿਕਾ ਮਹਨ੍ਤਂ ਸਕ੍ਕਾਰਂ ਲਭਿ, ਤਥਾਗਤੇਨ ਪਨ ਸਦ੍ਧਿਂ ਮੇਤ੍ਤਿਂ ਕਤ੍ਵਾ ਉਭੋਪਿ ਜਯਮ੍ਪਤਿਕਾ ਸੋਤਾਪਤ੍ਤਿਫਲੇ ਪਤਿਟ੍ਠਿਤਾ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ ਸੋ ਏਤਂ ਮਾਤੁਗਾਮਂ ਨਿਸ੍ਸਾਯ ਮਹਨ੍ਤਂ ਯਸਂ ਸਮ੍ਪਤ੍ਤੋ, ਪੁਬ੍ਬੇ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤੋਪਿ ਪਨੇਸ ਏਤਿਸ੍ਸਾ ਵਚਨੇਨ ਬਹੂਹਿ ਸਦ੍ਧਿਂ ਮੇਤ੍ਤਿਂ ਕਤ੍ਵਾ ਪੁਤ੍ਤਸੋਕਤੋ ਮੁਤ੍ਤੋਯੇਵਾ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਏਕਚ੍ਚੇ ਪਚ੍ਚਨ੍ਤਵਾਸਿਨੋ ਯਤ੍ਥ ਯਤ੍ਥ ਬਹੁਂ ਮਂਸਂ ਲਭਨ੍ਤਿ, ਤਤ੍ਥ ਤਤ੍ਥ ਗਾਮਂ ਨਿਵਾਸੇਤ੍ਵਾ ਅਰਞ੍ਞੇ ਚਰਿਤ੍ਵਾ ਮਿਗਾਦਯੋ ਮਾਰੇਤ੍ਵਾ ਮਂਸਂ ਆਹਰਿਤ੍ਵਾ ਪੁਤ੍ਤਦਾਰੇ ਪੋਸੇਨ੍ਤਿ. ਤੇਸਂ ਗਾਮਤੋ ਅਵਿਦੂਰੇ ਮਹਾਜਾਤਸ੍ਸਰੋ ਅਤ੍ਥਿ. ਤਸ੍ਸ ਦਕ੍ਖਿਣਪਸ੍ਸੇ ਏਕੋ ਸੇਨਸਕੁਣੋ, ਪਚ੍ਛਿਮਪਸ੍ਸੇ ਏਕਾ ਸੇਨਸਕੁਣੀ, ਉਤ੍ਤਰਪਸ੍ਸੇ ਸੀਹੋ ਮਿਗਰਾਜਾ, ਪਾਚੀਨਪਸ੍ਸੇ ਉਕ੍ਕੁਸਸਕੁਣਰਾਜਾ ਵਸਤਿ. ਜਾਤਸ੍ਸਰਮਜ੍ਝੇ ਪਨ ਉਨ੍ਨਤਟ੍ਠਾਨੇ ਕਚ੍ਛਪੋ ਵਸਤਿ. ਤਦਾ ਸੇਨੋ ਸੇਨਿਂ ‘‘ਭਰਿਯਾ ਮੇ ਹੋਹੀ’’ਤਿ ਵਦਤਿ. ਅਥ ਨਂ ਸਾ ਆਹ – ‘‘ਅਤ੍ਥਿ ਪਨ ਤੇ ਕੋਚਿ ਮਿਤ੍ਤੋ’’ਤਿ? ‘‘ਨਤ੍ਥਿ ਭਦ੍ਦੇ’’ਤਿ. ਅਮ੍ਹਾਕਂ ਉਪ੍ਪਨ੍ਨਂ ਭਯਂ ਵਾ ਦੁਕ੍ਖਂ ਵਾ ਹਰਣਸਮਤ੍ਥਂ ਮਿਤ੍ਤਂ ਵਾ ਸਹਾਯਂ ਵਾ ਲਦ੍ਧੁਂ ਵਟ੍ਟਤਿ, ਮਿਤ੍ਤੇ ਤਾਵ ਗਣ੍ਹਾਹੀਤਿ. ‘‘ਕੇਹਿ ਸਦ੍ਧਿਂ ਮੇਤ੍ਤਿਂ ਕਰੋਮਿ ਭਦ੍ਦੇ’’ਤਿ? ਪਾਚੀਨਪਸ੍ਸੇ ਵਸਨ੍ਤੇਨ ਉਕ੍ਕੁਸਰਾਜੇਨ, ਉਤ੍ਤਰਪਸ੍ਸੇ ਸੀਹੇਨ, ਜਾਤਸ੍ਸਰਮਜ੍ਝੇ ਕਚ੍ਛਪੇਨ ਸਦ੍ਧਿਂ ਮੇਤ੍ਤਿਂ ਕਰੋਹੀਤਿ. ਸੋ ਤਸ੍ਸਾ ਵਚਨਂ ਸਮ੍ਪਟਿਚ੍ਛਿਤ੍ਵਾ ਤਥਾ ਅਕਾਸਿ. ਤਦਾ ਤੇ ਉਭੋਪਿ ਸਂਵਾਸਂ ਕਪ੍ਪੇਤ੍ਵਾ ਤਸ੍ਮਿਂਯੇਵ ਸਰੇ ਏਕਸ੍ਮਿਂ ਦੀਪਕੇ ਕਦਮ੍ਬਰੁਕ੍ਖੋ ਅਤ੍ਥਿ ਸਮਨ੍ਤਾ ਉਦਕੇਨ ਪਰਿਕ੍ਖਿਤ੍ਤੋ, ਤਸ੍ਮਿਂ ਕੁਲਾਵਕਂ ਕਤ੍ਵਾ ਪਟਿਵਸਿਂਸੁ.

ਤੇਸਂ ਅਪਰਭਾਗੇ ਦ੍ਵੇ ਸਕੁਣਪੋਤਕਾ ਜਾਯਿਂਸੁ. ਤੇਸਂ ਪਕ੍ਖੇਸੁ ਅਸਞ੍ਜਾਤੇਸੁਯੇਵ ਏਕਦਿਵਸਂ ਤੇ ਜਾਨਪਦਾ ਦਿਵਸਂ ਅਰਞ੍ਞੇ ਚਰਿਤ੍ਵਾ ਕਿਞ੍ਚਿ ਅਲਭਿਤ੍ਵਾ ‘‘ਨ ਸਕ੍ਕਾ ਤੁਚ੍ਛਹਤ੍ਥੇਨ ਘਰਂ ਗਨ੍ਤੁਂ, ਮਚ੍ਛੇ ਵਾ ਕਚ੍ਛਪੇ ਵਾ ਗਣ੍ਹਿਸ੍ਸਾਮਾ’’ਤਿ ਸਰਂ ਓਤਰਿਤ੍ਵਾ ਤਂ ਦੀਪਕਂ ਗਨ੍ਤ੍ਵਾ ਤਸ੍ਸ ਕਦਮ੍ਬਸ੍ਸ ਮੂਲੇ ਨਿਪਜ੍ਜਿਤ੍ਵਾ ਮਕਸਾਦੀਹਿ ਖਜ੍ਜਮਾਨਾ ਤੇਸਂ ਪਲਾਪਨਤ੍ਥਾਯ ਅਰਣਿਂ ਮਨ੍ਥੇਤ੍ਵਾ ਅਗ੍ਗਿਂ ਨਿਬ੍ਬਤ੍ਤੇਤ੍ਵਾ ਧੂਮਂ ਕਰਿਂਸੁ. ਧੁਮੋ ਉਗ੍ਗਨ੍ਤ੍ਵਾ ਸਕੁਣੇ ਪਹਰਿ, ਸਕੁਣਪੋਤਕਾ ਵਿਰਵਿਂਸੁ. ਜਾਨਪਦਾ ਤਂ ਸੁਤ੍ਵਾ ‘‘ਅਮ੍ਭੋ, ਸਕੁਣਪੋਤਕਾਨਂ ਸੂਯਤਿ ਸਦ੍ਦੋ, ਉਟ੍ਠੇਥ ਉਕ੍ਕਾ ਬਨ੍ਧਥ, ਛਾਤਾ ਸਯਿਤੁਂ ਨ ਸਕ੍ਕੋਮ, ਸਕੁਣਮਂਸਂ ਖਾਦਿਤ੍ਵਾਵ ਸਯਿਸ੍ਸਾਮਾ’’ਤਿ ਵਤ੍ਵਾ ਅਗ੍ਗਿਂ ਜਾਲੇਤ੍ਵਾ ਉਕ੍ਕਾ ਬਨ੍ਧਿਂਸੁ. ਸਕੁਣਿਕਾ ਤੇਸਂ ਸਦ੍ਦਂ ਸੁਤ੍ਵਾ ‘‘ਇਮੇ ਅਮ੍ਹਾਕਂ ਪੋਤਕੇ ਖਾਦਿਤੁਕਾਮਾ, ਮਯਂ ਏਵਰੂਪਸ੍ਸ ਭਯਸ੍ਸ ਹਰਣਤ੍ਥਾਯ ਮਿਤ੍ਤੇ ਗਣ੍ਹਿਮ੍ਹ, ਸਾਮਿਕਂ ਉਕ੍ਕੁਸਰਾਜਸ੍ਸ ਸਨ੍ਤਿਕਂ ਪੇਸੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਗਚ੍ਛ, ਸਾਮਿ, ਪੁਤ੍ਤਾਨਂ ਨੋ ਉਪ੍ਪਨ੍ਨਭਯਂ ਉਕ੍ਕੁਸਰਾਜਸ੍ਸ ਆਰੋਚੇਹੀ’’ਤਿ ਵਤ੍ਵਾ ਪਠਮਂ ਗਾਥਮਾਹ –

੪੪.

‘‘ਉਕ੍ਕਾ ਚਿਲਾਚਾ ਬਨ੍ਧਨ੍ਤਿ ਦੀਪੇ, ਪਜਾ ਮਮਂ ਖਾਦਿਤੁਂ ਪਤ੍ਥਯਨ੍ਤਿ;

ਮਿਤ੍ਤਂ ਸਹਾਯਞ੍ਚ ਵਦੇਹਿ ਸੇਨਕ, ਆਚਿਕ੍ਖ ਞਾਤਿਬ੍ਯਸਨਂ ਦਿਜਾਨ’’ਨ੍ਤਿ.

ਤਤ੍ਥ ਚਿਲਾਚਾਤਿ ਜਾਨਪਦਾ. ਦੀਪੇਤਿ ਦੀਪਕਮ੍ਹਿ. ਪਜਾ ਮਮਨ੍ਤਿ ਮਮ ਪੁਤ੍ਤਕੇ. ਸੇਨਕਾਤਿ ਸੇਨਕਸਕੁਣਂ ਨਾਮੇਨਾਲਪਤਿ. ਞਾਤਿਬ੍ਯਸਨਨ੍ਤਿ ਪੁਤ੍ਤਾਨਂ ਬ੍ਯਸਨਂ. ਦਿਜਾਨਨ੍ਤਿ ਅਮ੍ਹਾਕਂ ਞਾਤੀਨਂ ਦਿਜਾਨਂ ਇਦਂ ਬ੍ਯਸਨਂ ਉਕ੍ਕੁਸਰਾਜਸ੍ਸ ਸਨ੍ਤਿਕਂ ਗਨ੍ਤ੍ਵਾ ਆਚਿਕ੍ਖਾਹੀਤਿ ਵਦਤਿ.

ਸੋ ਵੇਗੇਨ ਤਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਵਸ੍ਸਿਤ੍ਵਾ ਅਤ੍ਤਨੋ ਆਗਤਭਾਵਂ ਜਾਨਾਪੇਤ੍ਵਾ ਕਤੋਕਾਸੋ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਕਿਂਕਾਰਣਾ ਆਗਤੋਸੀ’’ਤਿ ਪੁਟ੍ਠੋ ਆਗਤਕਾਰਣਂ ਦਸ੍ਸੇਨ੍ਤੋ ਦੁਤਿਯਂ ਗਾਥਮਾਹ –

੪੫.

‘‘ਦਿਜੋ ਦਿਜਾਨਂ ਪਵਰੋਸਿ ਪਕ੍ਖਿਮ, ਉਕ੍ਕੁਸਰਾਜ ਸਰਣਂ ਤਂ ਉਪੇਮ;

ਪਜਾ ਮਮਂ ਖਾਦਿਤੁਂ ਪਤ੍ਥਯਨ੍ਤਿ, ਲੁਦ੍ਦਾ ਚਿਲਾਚਾ ਭਵ ਮੇ ਸੁਖਾਯਾ’’ਤਿ.

ਤਤ੍ਥ ਦਿਜੋਤਿ ਤ੍ਵਂ ਦਿਜੋ ਚੇਵ ਦਿਜਾਨਂ ਪਵਰੋ ਚ.

ਉਕ੍ਕੁਸਰਾਜਾ ‘‘ਸੇਨਕ ਮਾ ਭਾਯੀ’’ਤਿ ਤਂ ਅਸ੍ਸਾਸੇਤ੍ਵਾ ਤਤਿਯਂ ਗਾਥਮਾਹ –

੪੬.

‘‘ਮਿਤ੍ਤਂ ਸਹਾਯਞ੍ਚ ਕਰੋਨ੍ਤਿ ਪਣ੍ਡਿਤਾ, ਕਾਲੇ ਅਕਾਲੇ ਸੁਖਮੇਸਮਾਨਾ;

ਕਰੋਮਿ ਤੇ ਸੇਨਕ ਏਤਮਤ੍ਥਂ, ਅਰਿਯੋ ਹਿ ਅਰਿਯਸ੍ਸ ਕਰੋਤਿ ਕਿਚ੍ਚ’’ਨ੍ਤਿ.

ਤਤ੍ਥ ਕਾਲੇ ਅਕਾਲੇਤਿ ਦਿਵਾ ਚ ਰਤ੍ਤਿਞ੍ਚ. ਅਰਿਯੋਤਿ ਇਧ ਆਚਾਰਅਰਿਯੋ ਅਧਿਪ੍ਪੇਤੋ. ਆਚਾਰਸਮ੍ਪਨ੍ਨੋ ਹਿ ਆਚਾਰਸਮ੍ਪਨ੍ਨਸ੍ਸ ਕਿਚ੍ਚਂ ਕਰੋਤੇਵ, ਕਿਮੇਤ੍ਥ ਕਰਣੀਯਨ੍ਤਿ ਵਦਤਿ.

ਅਥ ਨਂ ਪੁਚ੍ਛਿ ‘‘ਕਿਂ, ਸਮ੍ਮ, ਰੁਕ੍ਖਂ ਅਭਿਰੁਲ਼੍ਹਾ ਚਿਲਾਚਾ’’ਤਿ? ਨ ਤਾਵ ਅਭਿਰੁਲ਼੍ਹਾ, ਉਕ੍ਕਾਯੇਵ ਬਨ੍ਧਨ੍ਤੀਤਿ. ਤੇਨ ਹਿ ਤ੍ਵਂ ਸੀਘਂ ਗਨ੍ਤ੍ਵਾ ਮਮ ਸਹਾਯਿਕਂ ਅਸ੍ਸਾਸੇਤ੍ਵਾ ਮਮਾਗਮਨਭਾਵਂ ਆਚਿਕ੍ਖਾਹੀਤਿ. ਸੋ ਤਥਾ ਅਕਾਸਿ. ਉਕ੍ਕੁਸਰਾਜਾਪਿ ਗਨ੍ਤ੍ਵਾ ਕਦਮ੍ਬਸ੍ਸ ਅਵਿਦੂਰੇ ਚਿਲਾਚਾਨਂ ਅਭਿਰੁਹਨਂ ਓਲੋਕੇਨ੍ਤੋ ਏਕਸ੍ਮਿਂ ਰੁਕ੍ਖਗ੍ਗੇ ਨਿਸੀਦਿਤ੍ਵਾ ਏਕਸ੍ਸ ਚਿਲਾਚਸ੍ਸ ਅਭਿਰੁਹਨਕਾਲੇ ਤਸ੍ਮਿਂ ਕੁਲਾਵਕਸ੍ਸ ਅਵਿਦੂਰਂ ਅਭਿਰੁਲ਼੍ਹੇ ਸਰੇ ਨਿਮੁਜ੍ਜਿਤ੍ਵਾ ਪਕ੍ਖੇਹਿ ਚ ਮੁਖੇਨ ਚ ਉਦਕਂ ਆਹਰਿਤ੍ਵਾ ਉਕ੍ਕਾਯ ਉਪਰਿ ਆਸਿਞ੍ਚਿ, ਸਾ ਨਿਬ੍ਬਾਯਿ. ਚਿਲਾਚਾ ‘‘ਇਮਞ੍ਚ ਸੇਨਕਸਕੁਣਪੋਤਕੇ ਚਸ੍ਸ ਖਾਦਿਸ੍ਸਾਮੀ’’ਤਿ ਓਤਰਿਤ੍ਵਾ ਪੁਨ ਉਕ੍ਕਂ ਜਾਲਾਪੇਤ੍ਵਾ ਅਭਿਰੁਹਿਂਸੁ. ਪੁਨ ਸੋ ਉਕ੍ਕਂ ਵਿਜ੍ਝਾਪੇਸਿ. ਏਤੇਨੁਪਾਯੇਨ ਬਦ੍ਧਂ ਬਦ੍ਧਂ ਵਿਜ੍ਝਾਪੇਨ੍ਤਸ੍ਸੇਵਸ੍ਸ ਅਡ੍ਢਰਤ੍ਤੋ ਜਾਤੋ. ਸੋ ਅਤਿਵਿਯ ਕਿਲਮਿ, ਹੇਟ੍ਠਾਉਦਰੇ ਕਿਲੋਮਕਂ ਤਨੁਤਂ ਗਤਂ, ਅਕ੍ਖੀਨਿ ਰਤ੍ਤਾਨਿ ਜਾਤਾਨਿ. ਤਂ ਦਿਸ੍ਵਾ ਸਕੁਣੀ ਸਾਮਿਕਂ ਆਹ – ‘‘ਸਾਮਿ, ਅਤਿਵਿਯ ਕਿਲਨ੍ਤੋ ਉਕ੍ਕੁਸਰਾਜਾ, ਏਤਸ੍ਸ ਥੋਕਂ ਵਿਸ੍ਸਮਨਤ੍ਥਾਯ ਗਨ੍ਤ੍ਵਾ ਕਚ੍ਛਪਰਾਜਸ੍ਸ ਕਥੇਹੀ’’ਤਿ. ਸੋ ਤਸ੍ਸਾ ਵਚਨਂ ਸੁਤ੍ਵਾ ਉਕ੍ਕੁਸਂ ਉਪਸਙ੍ਕਮਿਤ੍ਵਾ ਗਾਥਾਯ ਅਜ੍ਝਭਾਸਿ –

੪੭.

‘‘ਯਂ ਹੋਤਿ ਕਿਚ੍ਚਂ ਅਨੁਕਮ੍ਪਕੇਨ, ਅਰਿਯਸ੍ਸ ਅਰਿਯੇਨ ਕਤਂ ਤਯੀਦਂ;

ਅਤ੍ਤਾਨੁਰਕ੍ਖੀ ਭਵ ਮਾ ਅਡਯ੍ਹਿ, ਲਚ੍ਛਾਮ ਪੁਤ੍ਤੇ ਤਯਿ ਜੀਵਮਾਨੇ’’ਤਿ.

ਤਤ੍ਥ ਤਯੀਦਨ੍ਤਿ ਤਯਾ ਇਦਂ, ਅਯਮੇਵ ਵਾ ਪਾਠੋ.

ਸੋ ਤਸ੍ਸ ਵਚਨਂ ਸੁਤ੍ਵਾ ਸੀਹਨਾਦਂ ਨਦਨ੍ਤੋ ਪਞ੍ਚਮਂ ਗਾਥਮਾਹ –

੪੮.

‘‘ਤਵੇਵ ਰਕ੍ਖਾਵਰਣਂ ਕਰੋਨ੍ਤੋ, ਸਰੀਰਭੇਦਾਪਿ ਨ ਸਨ੍ਤਸਾਮਿ;

ਕਰੋਨ੍ਤਿ ਹੇਕੇ ਸਖਿਨਂ ਸਖਾਰੋ, ਪਾਣਂ ਚਜਨ੍ਤਾ ਸਤਮੇਸ ਧਮ੍ਮੋ’’ਤਿ.

ਛਟ੍ਠਂ ਪਨ ਸਤ੍ਥਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਤਸ੍ਸ ਗੁਣਂ ਵਣ੍ਣੇਨ੍ਤੋ ਆਹ –

੪੯.

‘‘ਸੁਦੁਕ੍ਕਰਂ ਕਮ੍ਮਮਕਾਸਿ, ਅਣ੍ਡਜਾਯਂ ਵਿਹਙ੍ਗਮੋ;

ਅਤ੍ਥਾਯ ਕੁਰਰੋ ਪੁਤ੍ਤੇ, ਅਡ੍ਢਰਤ੍ਤੇ ਅਨਾਗਤੇ’’ਤਿ.

ਤਤ੍ਥ ਕੁਰਰੋਤਿ ਉਕ੍ਕੁਸਰਾਜਾ. ਪੁਤ੍ਤੇਤਿ ਸੇਨਕਸ੍ਸ ਪੁਤ੍ਤੇ ਰਕ੍ਖਨ੍ਤੋ ਤੇਸਂ ਅਤ੍ਥਾਯ ਅਡ੍ਢਰਤ੍ਤੇ ਅਨਾਗਤੇ ਯਾਵ ਦਿਯਡ੍ਢਯਾਮਾ ਵਾਯਾਮਂ ਕਰੋਨ੍ਤੋ ਦੁਕ੍ਕਰਂ ਅਕਾਸਿ.

ਸੇਨੋਪਿ ਉਕ੍ਕੁਸਂ ‘‘ਥੋਕਂ ਵਿਸ੍ਸਮਾਹਿ, ਸਮ੍ਮਾ’’ਤਿ ਵਤ੍ਵਾ ਕਚ੍ਛਪਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਉਟ੍ਠਾਪੇਤ੍ਵਾ ‘‘ਕਿਂ, ਸਮ੍ਮ, ਆਗਤੋਸੀ’’ਤਿ ਵੁਤ੍ਤੋ ‘‘ਏਵਰੂਪਂ ਨਾਮ ਭਯਂ ਉਪ੍ਪਨ੍ਨਂ, ਉਕ੍ਕੁਸਰਾਜਾ ਪਠਮਯਾਮਤੋ ਪਟ੍ਠਾਯ ਵਾਯਮਨ੍ਤੋ ਕਿਲਮਿ, ਤੇਨਮ੍ਹਿ ਤਵ ਸਨ੍ਤਿਕਂ ਆਗਤੋ’’ਤਿ ਵਤ੍ਵਾ ਸਤ੍ਤਮਂ ਗਾਥਮਾਹ –

੫੦.

‘‘ਚੁਤਾਪਿ ਹੇਕੇ ਖਲਿਤਾ ਸਕਮ੍ਮੁਨਾ, ਮਿਤ੍ਤਾਨੁਕਮ੍ਪਾਯ ਪਤਿਟ੍ਠਹਨ੍ਤਿ;

ਪੁਤ੍ਤਾ ਮਮਟ੍ਟਾ ਗਤਿਮਾਗਤੋਸ੍ਮਿ, ਅਤ੍ਥਂ ਚਰੇਥੋ ਮਮ ਵਾਰਿਚਰਾ’’ਤਿ.

ਤਸ੍ਸਤ੍ਥੋ – ਸਾਮਿ, ਏਕਚ੍ਚੇ ਹਿ ਯਸਤੋ ਵਾ ਧਨਤੋ ਵਾ ਚੁਤਾਪਿ ਸਕਮ੍ਮੁਨਾ ਖਲਿਤਾਪਿ ਮਿਤ੍ਤਾਨਂ ਅਨੁਕਮ੍ਪਾਯ ਪਤਿਟ੍ਠਹਨ੍ਤਿ, ਮਮ ਚ ਪੁਤ੍ਤਾ ਅਟ੍ਟਾ ਆਤੁਰਾ, ਤੇਨਾਹਂ ਤਂ ਗਤਿਂ ਪਟਿਸਰਣਂ ਕਤ੍ਵਾ ਆਗਤੋਸ੍ਮਿ, ਪੁਤ੍ਤਾਨਂ ਜੀਵਿਤਦਾਨਂ ਦਦਨ੍ਤੋ ਅਤ੍ਥਂ ਮੇ ਚਰਾਹਿ ਵਾਰਿਚਰਾਤਿ.

ਤਂ ਸੁਤ੍ਵਾ ਕਚ੍ਛਪੋ ਇਤਰਂ ਗਾਥਮਾਹ –

੫੧.

‘‘ਧਨੇਨ ਧਞ੍ਞੇਨ ਚ ਅਤ੍ਤਨਾ ਚ, ਮਿਤ੍ਤਂ ਸਹਾਯਞ੍ਚ ਕਰੋਨ੍ਤਿ ਪਣ੍ਡਿਤਾ;

ਕਰੋਮਿ ਤੇ ਸੇਨਕ ਏਤਮਤ੍ਥਂ, ਅਰਿਯੋ ਹਿ ਅਰਿਯਸ੍ਸ ਕਰੋਤਿ ਕਿਚ੍ਚ’’ਨ੍ਤਿ.

ਅਥਸ੍ਸ ਪੁਤ੍ਤੋ ਅਵਿਦੂਰੇ ਨਿਪਨ੍ਨੋ ਪਿਤੁ ਵਚਨਂ ਸੁਤ੍ਵਾ ‘‘ਮਾ ਮੇ ਪਿਤਾ ਕਿਲਮਤੁ, ਅਹਂ ਪਿਤੁ ਕਿਚ੍ਚਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਵਮਂ ਗਾਥਮਾਹ –

੫੨.

‘‘ਅਪ੍ਪੋਸ੍ਸੁਕ੍ਕੋ ਤਾਤ ਤੁਵਂ ਨਿਸੀਦ, ਪੁਤ੍ਤੋ ਪਿਤੁ ਚਰਤਿ ਅਤ੍ਥਚਰਿਯਂ;

ਅਹਂ ਚਰਿਸ੍ਸਾਮਿ ਤਵੇਤਮਤ੍ਥਂ, ਸੇਨਸ੍ਸ ਪੁਤ੍ਤੇ ਪਰਿਤਾਯਮਾਨੋ’’ਤਿ.

ਅਥ ਨਂ ਪਿਤਾ ਗਾਥਾਯ ਅਜ੍ਝਭਾਸਿ –

੫੩.

‘‘ਅਦ੍ਧਾ ਹਿ ਤਾਤ ਸਤਮੇਸ ਧਮ੍ਮੋ, ਪੁਤ੍ਤੋ ਪਿਤੁ ਯਂ ਚਰੇ ਅਤ੍ਥਚਰਿਯਂ;

ਅਪ੍ਪੇਵ ਮਂ ਦਿਸ੍ਵਾਨ ਪਵਡ੍ਢਕਾਯਂ, ਸੇਨਸ੍ਸ ਪੁਤ੍ਤਾ ਨ ਵਿਹੇਠਯੇਯ੍ਯੁ’’ਨ੍ਤਿ.

ਤਤ੍ਥ ਸਤਮੇਸ ਧਮ੍ਮੋਤਿ ਪਣ੍ਡਿਤਾਨਂ ਏਸ ਧਮ੍ਮੋ. ਪੁਤ੍ਤਾਤਿ ਸੇਨਸ੍ਸ ਪੁਤ੍ਤੇ ਚਿਲਾਚਾ ਨ ਹੇਠਯੇਯ੍ਯੁਨ੍ਤਿ.

ਏਵਂ ਵਤ੍ਵਾ ਮਹਾਕਚ੍ਛਪੋ ‘‘ਸਮ੍ਮ, ਮਾ ਭਾਯਿ, ਤ੍ਵਂ ਪੁਰਤੋ ਗਚ੍ਛ, ਇਦਾਨਾਹਂ ਆਗਮਿਸ੍ਸਾਮੀ’’ਤਿ ਤਂ ਉਯ੍ਯੋਜੇਤ੍ਵਾ ਉਦਕੇ ਪਤਿਤ੍ਵਾ ਕਲਲਞ੍ਚ ਸੇਵਾਲਞ੍ਚ ਸਂਕਡ੍ਢਿਤ੍ਵਾ ਆਦਾਯ ਦੀਪਕਂ ਗਨ੍ਤ੍ਵਾ ਅਗ੍ਗਿਂ ਵਿਜ੍ਝਾਪੇਤ੍ਵਾ ਨਿਪਜ੍ਜਿ. ਚਿਲਾਚਾ ‘‘ਕਿਂ ਨੋ ਸੇਨਪੋਤਕੇਹਿ, ਇਮਂ ਕਾਲ਼ਕਚ੍ਛਪਂ ਪਰਿਵਤ੍ਤੇਤ੍ਵਾ ਮਾਰੇਸ੍ਸਾਮ, ਅਯਂ ਨੋ ਸਬ੍ਬੇਸਂ ਪਹੋਸ੍ਸਤੀ’’ਤਿ ਵਲ੍ਲਿਯੋ ਉਦ੍ਧਰਿਤ੍ਵਾ ਜਿਯਾ ਗਹੇਤ੍ਵਾ ਨਿਵਤ੍ਥਪਿਲੋਤਿਕਾਪਿ ਮੋਚੇਤ੍ਵਾ ਤੇਸੁ ਤੇਸੁ ਠਾਨੇਸੁ ਬਨ੍ਧਿਤ੍ਵਾ ਕਚ੍ਛਪਂ ਪਰਿਵਤ੍ਤੇਤੁਂ ਨ ਸਕ੍ਕੋਨ੍ਤਿ. ਕਚ੍ਛਪੋ ਤੇ ਆਕਡ੍ਢਨ੍ਤੋ ਗਨ੍ਤ੍ਵਾ ਗਮ੍ਭੀਰਟ੍ਠਾਨੇ ਉਦਕੇ ਪਤਿ. ਤੇਪਿ ਕਚ੍ਛਪਲੋਭੇਨ ਸਦ੍ਧਿਂਯੇਵ ਪਤਿਤ੍ਵਾ ਉਦਕਪੁਣ੍ਣਾਯ ਕੁਚ੍ਛਿਯਾ ਕਿਲਨ੍ਤਾ ਨਿਕ੍ਖਮਿਤ੍ਵਾ ‘‘ਭੋ ਏਕੇਨ ਨੋ ਉਕ੍ਕੁਸੇਨ ਯਾਵ ਅਡ੍ਢਰਤ੍ਤਾ ਉਕ੍ਕਾ ਵਿਜ੍ਝਾਪਿਤਾ, ਇਦਾਨਿ ਇਮਿਨਾ ਕਚ੍ਛਪੇਨ ਉਦਕੇ ਪਾਤੇਤ੍ਵਾ ਉਦਕਂ ਪਾਯੇਤ੍ਵਾ ਮਹੋਦਰਾ ਕਤਮ੍ਹ, ਪੁਨ ਅਗ੍ਗਿਂ ਕਰਿਤ੍ਵਾ ਅਰੁਣੇ ਉਗ੍ਗਤੇਪਿ ਇਮੇ ਸੇਨਕਪੋਤਕੇ ਖਾਦਿਸ੍ਸਾਮਾ’’ਤਿ ਅਗ੍ਗਿਂ ਕਾਤੁਂ ਆਰਭਿਂਸੁ. ਸਕੁਣੀ ਤੇਸਂ ਕਥਂ ਸੁਤ੍ਵਾ ‘‘ਸਾਮਿ, ਇਮੇ ਯਾਯ ਕਾਯਚਿ ਵੇਲਾਯ ਅਮ੍ਹਾਕਂ ਪੁਤ੍ਤਕੇ ਖਾਦਿਤ੍ਵਾ ਗਮਿਸ੍ਸਨ੍ਤਿ, ਸਹਾਯਸ੍ਸ ਨੋ ਸੀਹਸ੍ਸ ਸਨ੍ਤਿਕਂ ਗਚ੍ਛਾਹੀ’’ਤਿ ਆਹ. ਸੋ ਤਙ੍ਖਣਞ੍ਞੇਵ ਸੀਹਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਕਿਂ ਅਵੇਲਾਯ ਆਗਤੋਸੀ’’ਤਿ ਵੁਤ੍ਤੇ ਆਦਿਤੋ ਪਟ੍ਠਾਯ ਤਂ ਪਵਤ੍ਤਿਂ ਆਰੋਚੇਤ੍ਵਾ ਏਕਾਦਸਮਂ ਗਾਥਮਾਹ –

੫੪.

‘‘ਪਸੂ ਮਨੁਸ੍ਸਾ ਮਿਗਵੀਰਸੇਟ੍ਠ, ਭਯਟ੍ਟਿਤਾ ਸੇਟ੍ਠਮੁਪਬ੍ਬਜਨ੍ਤਿ;

ਪੁਤ੍ਤਾ ਮਮਟ੍ਟਾ ਗਤਿਮਾਗਤੋਸ੍ਮਿ, ਤ੍ਵਂ ਨੋਸਿ ਰਾਜਾ ਭਵ ਮੇ ਸੁਖਾਯਾ’’ਤਿ.

ਤਤ੍ਥ ਪਸੂਤਿ ਸਬ੍ਬਤਿਰਚ੍ਛਾਨੇ ਆਹ. ਇਦਂ ਵੁਤ੍ਤਂ ਹੋਤਿ – ‘‘ਸਾਮਿ, ਮਿਗੇਸੁ ਵੀਰਿਯੇਨ ਸੇਟ੍ਠ, ਸਬ੍ਬਲੋਕਸ੍ਮਿਞ੍ਹਿ ਸਬ੍ਬੇ ਤਿਰਚ੍ਛਾਨਾਪਿ ਮਨੁਸ੍ਸਾਪਿ ਭਯਟ੍ਟਿਤਾ ਹੁਤ੍ਵਾ ਸੇਟ੍ਠਂ ਉਪਗਚ੍ਛਨ੍ਤਿ, ਮਮ ਚ ਪੁਤ੍ਤਾ ਅਟ੍ਟਾ ਆਤੁਰਾ. ਤਸ੍ਮਾਹਂ ਤਂ ਗਤਿਂ ਕਤ੍ਵਾ ਆਗਤੋਮ੍ਹਿ, ਤ੍ਵਂ ਅਮ੍ਹਾਕਂ ਰਾਜਾ ਸੁਖਾਯ ਮੇ ਭਵਾਹੀ’’ਤਿ.

ਤਂ ਸੁਤ੍ਵਾ ਸੀਹੋ ਗਾਥਮਾਹ –

੫੫.

‘‘ਕਰੋਮਿ ਤੇ ਸੇਨਕ ਏਤਮਤ੍ਥਂ, ਆਯਾਮਿ ਤੇ ਤਂ ਦਿਸਤਂ ਵਧਾਯ;

ਕਥਞ੍ਹਿ ਵਿਞ੍ਞੂ ਪਹੁ ਸਮ੍ਪਜਾਨੋ, ਨ ਵਾਯਮੇ ਅਤ੍ਤਜਨਸ੍ਸ ਗੁਤ੍ਤਿਯਾ’’ਤਿ.

ਤਤ੍ਥ ਤਂ ਦਿਸਤਨ੍ਤਿ ਤਂ ਦਿਸਸਮੂਹਂ, ਤਂ ਤਵ ਪਚ੍ਚਤ੍ਥਿਕਗਣਨ੍ਤਿ ਅਤ੍ਥੋ. ਪਹੂਤਿ ਅਮਿਤ੍ਤੇ ਹਨ੍ਤੁਂ ਸਮਤ੍ਥੋ. ਸਮ੍ਪਜਾਨੋਤਿ ਮਿਤ੍ਤਸ੍ਸ ਭਯੁਪ੍ਪਤ੍ਤਿਂ ਜਾਨਨ੍ਤੋ. ਅਤ੍ਤਜਨਸ੍ਸਾਤਿ ਅਤ੍ਤਸਮਸ੍ਸ ਅਙ੍ਗਸਮਾਨਸ੍ਸ ਜਨਸ੍ਸ, ਮਿਤ੍ਤਸ੍ਸਾਤਿ ਅਤ੍ਥੋ.

ਏਵਞ੍ਚ ਪਨ ਵਤ੍ਵਾ ‘‘ਗਚ੍ਛ ਤ੍ਵਂ ਪੁਤ੍ਤੇ ਸਮਸ੍ਸਾਸੇਹੀ’’ਤਿ ਤਂ ਉਯ੍ਯੋਜੇਤ੍ਵਾ ਮਣਿਵਣ੍ਣਂ ਉਦਕਂ ਮਦ੍ਦਮਾਨੋ ਪਾਯਾਸਿ. ਚਿਲਾਚਾ ਤਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਕੁਰਰੇਨ ਤਾਵ ਅਮ੍ਹਾਕਂ ਉਕ੍ਕਾ ਵਿਜ੍ਝਾਪਿਤਾ, ਤਥਾ ਕਚ੍ਛਪੇਨ ਅਮ੍ਹੇ ਨਿਵਤ੍ਥਪਿਲੋਤਿਕਾਨਮ੍ਪਿ ਅਸ੍ਸਾਮਿਕਾ ਕਤਾ, ਇਦਾਨਿ ਪਨ ਨਟ੍ਠਮ੍ਹਾ, ਸੀਹੋ ਨੋ ਜੀਵਿਤਕ੍ਖਯਮੇਵ ਪਾਪੇਸ੍ਸਤੀ’’ਤਿ ਮਰਣਭਯਤਜ੍ਜਿਤਾ ਯੇਨ ਵਾ ਤੇਨ ਵਾ ਪਲਾਯਿਂਸੁ. ਸੀਹੋ ਆਗਨ੍ਤ੍ਵਾ ਰੁਕ੍ਖਮੂਲੇ ਨ ਕਿਞ੍ਚਿ ਅਦ੍ਦਸ. ਅਥ ਨਂ ਕੁਰਰੋ ਚ ਕਚ੍ਛਪੋ ਚ ਸੇਨੋ ਚ ਉਪਸਙ੍ਕਮਿਤ੍ਵਾ ਵਨ੍ਦਿਂਸੁ. ਸੋ ਤੇਸਂ ਮਿਤ੍ਤਾਨਿਸਂਸਂ ਕਥੇਤ੍ਵਾ ‘‘ਇਤੋ ਪਟ੍ਠਾਯ ਮਿਤ੍ਤਧਮ੍ਮਂ ਅਭਿਨ੍ਦਿਤ੍ਵਾ ਅਪ੍ਪਮਤ੍ਤਾ ਹੋਥਾ’’ਤਿ ਓਵਦਿਤ੍ਵਾ ਪਕ੍ਕਾਮਿ, ਤੇਪਿ ਸਕਠਾਨਾਨਿ ਗਤਾ. ਸੇਨਸਕੁਣੀ ਅਤ੍ਤਨੋ ਪੁਤ੍ਤੇ ਓਲੋਕੇਤ੍ਵਾ ‘‘ਮਿਤ੍ਤੇ ਨਿਸ੍ਸਾਯ ਅਮ੍ਹੇਹਿ ਦਾਰਕਾ ਲਦ੍ਧਾ’’ਤਿ ਸੁਖਨਿਸਿਨ੍ਨਸਮਯੇ ਸੇਨੇਨ ਸਦ੍ਧਿਂ ਸਲ੍ਲਪਨ੍ਤੀ ਮਿਤ੍ਤਧਮ੍ਮਂ ਪਕਾਸਮਾਨਾ ਛ ਗਾਥਾ ਅਭਾਸਿ –

੫੬.

‘‘ਮਿਤ੍ਤਞ੍ਚ ਕਯਿਰਾਥ ਸੁਹਦਯਞ੍ਚ, ਅਯਿਰਞ੍ਚ ਕਯਿਰਾਥ ਸੁਖਾਗਮਾਯ;

ਨਿਵਤ੍ਥਕੋਚੋਵ ਸਰੇਭਿਹਨ੍ਤ੍ਵਾ, ਮੋਦਾਮ ਪੁਤ੍ਤੇਹਿ ਸਮਙ੍ਗਿਭੂਤਾ.

੫੭.

‘‘ਸਕਮਿਤ੍ਤਸ੍ਸ ਕਮ੍ਮੇਨ, ਸਹਾਯਸ੍ਸਾਪਲਾਯਿਨੋ;

ਕੂਜਨ੍ਤਮੁਪਕੂਜਨ੍ਤਿ, ਲੋਮਸਾ ਹਦਯਙ੍ਗਮਂ.

੫੮.

‘‘ਮਿਤ੍ਤਂ ਸਹਾਯਂ ਅਧਿਗਮ੍ਮ ਪਣ੍ਡਿਤੋ, ਸੋ ਭੁਞ੍ਜਤੀ ਪੁਤ੍ਤ ਪਸੁਂ ਧਨਂ ਵਾ;

ਅਹਞ੍ਚ ਪੁਤ੍ਤਾ ਚ ਪਤੀ ਚ ਮਯ੍ਹਂ, ਮਿਤ੍ਤਾਨੁਕਮ੍ਪਾਯ ਸਮਙ੍ਗਿਭੂਤਾ.

੫੯.

‘‘ਰਾਜਵਤਾ ਸੂਰਵਤਾ ਚ ਅਤ੍ਥੋ, ਸਮ੍ਪਨ੍ਨਸਖਿਸ੍ਸ ਭਵਨ੍ਤਿ ਹੇਤੇ;

ਸੋ ਮਿਤ੍ਤਵਾ ਯਸਵਾ ਉਗ੍ਗਤਤ੍ਤੋ, ਅਸ੍ਮਿਂਧਲੋਕੇ ਮੋਦਤਿ ਕਾਮਕਾਮੀ.

੬੦.

‘‘ਕਰਣੀਯਾਨਿ ਮਿਤ੍ਤਾਨਿ, ਦਲਿਦ੍ਦੇਨਾਪਿ ਸੇਨਕ;

ਪਸ੍ਸ ਮਿਤ੍ਤਾਨੁਕਮ੍ਪਾਯ, ਸਮਗ੍ਗਮ੍ਹਾ ਸਞਾਤਕੇ.

੬੧.

‘‘ਸੂਰੇਨ ਬਲਵਨ੍ਤੇਨ, ਯੋ ਮਿਤ੍ਤੇ ਕੁਰੁਤੇ ਦਿਜੋ;

ਏਵਂ ਸੋ ਸੁਖਿਤੋ ਹੋਤਿ, ਯਥਾਹਂ ਤ੍ਵਞ੍ਚ ਸੇਨਕਾ’’ਤਿ.

ਤਤ੍ਥ ਮਿਤ੍ਤਞ੍ਚਾਤਿ ਯਂਕਿਞ੍ਚਿ ਅਤ੍ਤਨੋ ਮਿਤ੍ਤਞ੍ਚ ਸੁਹਦਯਞ੍ਚ ਸੁਹਦਯਸਹਾਯਞ੍ਚ ਸਾਮਿਕਸਙ੍ਖਾਤਂ ਅਯਿਰਞ੍ਚ ਕਰੋਥੇਵ. ਨਿਵਤ੍ਥਕੋਚੋਵ ਸਰੇਭਿਹਨ੍ਤ੍ਵਾਤਿ ਏਤ੍ਥ ਕੋਚੋਤਿ ਕਵਚੋ. ਯਥਾ ਨਾਮ ਪਟਿਮੁਕ੍ਕਕਵਚੋ ਸਰੇ ਅਭਿਹਨਤਿ ਨਿਵਾਰੇਤਿ, ਏਵਂ ਮਯਮ੍ਪਿ ਮਿਤ੍ਤਬਲੇਨ ਪਚ੍ਚਤ੍ਥਿਕੇ ਅਭਿਹਨ੍ਤ੍ਵਾ ਪੁਤ੍ਤੇਹਿ ਸਦ੍ਧਿਂ ਮੋਦਾਮਾਤਿ ਵਦਤਿ. ਸਕਮਿਤ੍ਤਸ੍ਸ ਕਮ੍ਮੇਨਾਤਿ ਸਕਸ੍ਸ ਮਿਤ੍ਤਸ੍ਸ ਪਰਕ੍ਕਮੇਨ. ਸਹਾਯਸ੍ਸਾਪਲਾਯਿਨੋਤਿ ਸਹਾਯਸ੍ਸ ਅਪਲਾਯਿਨੋ ਮਿਗਰਾਜਸ੍ਸ. ਲੋਮਸਾਤਿ ਪਕ੍ਖਿਨੋ ਅਮ੍ਹਾਕਂ ਪੁਤ੍ਤਕਾ ਮਞ੍ਚ ਤਞ੍ਚ ਕੂਜਨ੍ਤਂ ਹਦਯਙ੍ਗਮਂ ਮਧੁਰਸ੍ਸਰਂ ਨਿਚ੍ਛਾਰੇਤ੍ਵਾ ਉਪਕੂਜਨ੍ਤਿ. ਸਮਙ੍ਗਿਭੂਤਾਤਿ ਏਕਟ੍ਠਾਨੇ ਠਿਤਾ.

ਰਾਜਵਤਾ ਸੂਰਵਤਾ ਚ ਅਤ੍ਥੋਤਿ ਯਸ੍ਸ ਸੀਹਸਦਿਸੋ ਰਾਜਾ ਉਕ੍ਕੁਸਕਚ੍ਛਪਸਦਿਸਾ ਚ ਸੂਰਾ ਮਿਤ੍ਤਾ ਹੋਨ੍ਤਿ, ਤੇਨ ਰਾਜਵਤਾ ਸੂਰਵਤਾ ਚ ਅਤ੍ਥੋ ਸਕ੍ਕਾ ਪਾਪੁਣਿਤੁਂ. ਭਵਨ੍ਤਿ ਹੇਤੇਤਿ ਯੋ ਚ ਸਮ੍ਪਨ੍ਨਸਖੋ ਪਰਿਪੁਣ੍ਣਮਿਤ੍ਤਧਮ੍ਮੋ, ਤਸ੍ਸ ਏਤੇ ਸਹਾਯਾ ਭਵਨ੍ਤਿ. ਉਗ੍ਗਤਤ੍ਤੋਤਿ ਸਿਰਿਸੋਭਗ੍ਗੇਨ ਉਗ੍ਗਤਸਭਾਵੋ. ਅਸ੍ਮਿਂਧਲੋਕੇਤਿ ਇਧਲੋਕਸਙ੍ਖਾਤੇ ਅਸ੍ਮਿਂ ਲੋਕੇ ਮੋਦਤਿ. ਕਾਮਕਾਮੀਤਿ ਸਾਮਿਕਂ ਆਲਪਤਿ. ਸੋ ਹਿ ਕਾਮੇ ਕਾਮਨਤੋ ਕਾਮਕਾਮੀ ਨਾਮ. ਸਮਗ੍ਗਮ੍ਹਾਤਿ ਸਮਗ੍ਗਾ ਜਾਤਮ੍ਹਾ. ਸਞਾਤਕੇਤਿ ਞਾਤਕੇਹਿ ਪੁਤ੍ਤੇਹਿ ਸਦ੍ਧਿਂ.

ਏਵਂ ਸਾ ਛਹਿ ਗਾਥਾਹਿ ਮਿਤ੍ਤਧਮ੍ਮਸ੍ਸ ਗੁਣਕਥਂ ਕਥੇਸਿ. ਤੇ ਸਬ੍ਬੇਪਿ ਸਹਾਯਕਾ ਮਿਤ੍ਤਧਮ੍ਮਂ ਅਭਿਨ੍ਦਿਤ੍ਵਾ ਯਾਵਤਾਯੁਕਂ ਠਤ੍ਵਾ ਯਥਾਕਮ੍ਮਂ ਗਤਾ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ ਸੋ ਭਰਿਯਂ ਨਿਸ੍ਸਾਯ ਸੁਖਪ੍ਪਤ੍ਤੋ, ਪੁਬ੍ਬੇਪਿ ਸੁਖਪ੍ਪਤ੍ਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸੇਨੋ ਚ ਸੇਨੀ ਚ ਜਯਮ੍ਪਤਿਕਾ ਅਹੇਸੁਂ, ਪੁਤ੍ਤਕਚ੍ਛਪੋ ਰਾਹੁਲੋ, ਪਿਤਾ ਮਹਾਮੋਗ੍ਗਲ੍ਲਾਨੋ, ਉਕ੍ਕੁਸੋ ਸਾਰਿਪੁਤ੍ਤੋ, ਸੀਹੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਹਾਉਕ੍ਕੁਸਜਾਤਕਵਣ੍ਣਨਾ ਤਤਿਯਾ.

[੪੮੭] ੪. ਉਦ੍ਦਾਲਕਜਾਤਕਵਣ੍ਣਨਾ

ਖਰਾਜਿਨਾ ਜਟਿਲਾ ਪਙ੍ਕਦਨ੍ਤਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਕੁਹਕਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਹਿ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾਪਿ ਚਤੁਪਚ੍ਚਯਤ੍ਥਾਯ ਤਿਵਿਧਂ ਕੁਹਕਵਤ੍ਥੁਂ ਪੂਰੇਸਿ. ਅਥਸ੍ਸ ਅਗੁਣਂ ਪਕਾਸੇਨ੍ਤਾ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਅਸੁਕੋ ਨਾਮ ਭਿਕ੍ਖੁ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਕੁਹਨਂ ਨਿਸ੍ਸਾਯ ਜੀਵਿਕਂ ਕਪ੍ਪੇਤੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਸ ਕੁਹਕੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਪੁਰੋਹਿਤੋ ਅਹੋਸਿ ਪਣ੍ਡਿਤੋ ਬ੍ਯਤ੍ਤੋ. ਸੋ ਏਕਦਿਵਸਂ ਉਯ੍ਯਾਨਕੀਲ਼ਂ ਗਤੋ ਏਕਂ ਅਭਿਰੂਪਂ ਗਣਿਕਂ ਦਿਸ੍ਵਾ ਪਟਿਬਦ੍ਧਚਿਤ੍ਤੋ ਤਾਯ ਸਦ੍ਧਿਂ ਸਂਵਾਸਂ ਕਪ੍ਪੇਸਿ. ਸਾ ਤਂ ਪਟਿਚ੍ਚ ਗਬ੍ਭਂ ਪਟਿਲਭਿ. ਗਬ੍ਭਸ੍ਸ ਪਤਿਟ੍ਠਿਤਭਾਵਂ ਞਤ੍ਵਾ ਤਂ ਆਹ – ‘‘ਸਾਮਿ, ਗਬ੍ਭੋ ਮੇ ਪਤਿਟ੍ਠਿਤੋ, ਜਾਤਕਾਲੇ ਨਾਮਂ ਕਰੋਨ੍ਤੀ ਅਸ੍ਸ ਕਿਂ ਨਾਮਂ ਕਰੋਮੀ’’ਤਿ? ਸੋ ‘‘ਵਣ੍ਣਦਾਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਤ੍ਤਾ ਨ ਸਕ੍ਕਾ ਕੁਲਨਾਮਂ ਕਾਤੁ’’ਨ੍ਤਿ ਚਿਨ੍ਤੇਤ੍ਵਾ ‘‘ਭਦ੍ਦੇ, ਅਯਂ ਵਾਤਘਾਤਰੁਕ੍ਖੋ ਉਦ੍ਦਾਲੋ ਨਾਮ, ਇਧ ਪਟਿਲਦ੍ਧਤ੍ਤਾ ‘ਉਦ੍ਦਾਲਕੋ’ਤਿਸ੍ਸ ਨਾਮਂ ਕਰੇਯ੍ਯਾਸੀ’’ਤਿ ਵਤ੍ਵਾ ਅਙ੍ਗੁਲਿਮੁਦ੍ਦਿਕਂ ਅਦਾਸਿ. ‘‘ਸਚੇ ਧੀਤਾ ਹੋਤਿ, ਇਮਾਯ ਨਂ ਪੋਸੇਯ੍ਯਾਸਿ, ਸਚੇ ਪੁਤ੍ਤੋ, ਅਥ ਨਂ ਵਯਪ੍ਪਤ੍ਤਂ ਮਯ੍ਹਂ ਦਸ੍ਸੇਯ੍ਯਾਸੀ’’ਤਿ ਆਹ. ਸਾ ਅਪਰਭਾਗੇ ਪੁਤ੍ਤਂ ਵਿਜਾਯਿਤ੍ਵਾ ‘‘ਉਦ੍ਦਾਲਕੋ’’ਤਿਸ੍ਸ ਨਾਮਂ ਅਕਾਸਿ.

ਸੋ ਵਯਪ੍ਪਤ੍ਤੋ ਮਾਤਰਂ ਪੁਚ੍ਛਿ – ‘‘ਅਮ੍ਮ, ਕੋ ਮੇ ਪਿਤਾ’’ਤਿ? ‘‘ਪੁਰੋਹਿਤੋ ਤਾਤਾ’’ਤਿ. ‘‘ਯਦਿ ਏਵਂ ਵੇਦੇ ਉਗ੍ਗਣ੍ਹਿਸ੍ਸਾਮੀ’’ਤਿ ਮਾਤੁ ਹਤ੍ਥਤੋ ਮੁਦ੍ਦਿਕਞ੍ਚ ਆਚਰਿਯਭਾਗਞ੍ਚ ਗਹੇਤ੍ਵਾ ਤਕ੍ਕਸਿਲਂ ਗਨ੍ਤ੍ਵਾ ਦਿਸਾਪਾਮੋਕ੍ਖਾਚਰਿਯਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਨ੍ਤੋ ਏਕਂ ਤਾਪਸਗਣਂ ਦਿਸ੍ਵਾ ‘‘ਇਮੇਸਂ ਸਨ੍ਤਿਕੇ ਵਰਸਿਪ੍ਪਂ ਭਵਿਸ੍ਸਤਿ, ਤਂ ਉਗ੍ਗਣ੍ਹਿਸ੍ਸਾਮੀ’’ਤਿ ਸਿਪ੍ਪਲੋਭੇਨ ਪਬ੍ਬਜਿਤ੍ਵਾ ਤੇਸਂ ਵਤ੍ਤਪਟਿਵਤ੍ਤਂ ਕਤ੍ਵਾ ‘‘ਆਚਰਿਯਾ ਮਂ ਤੁਮ੍ਹਾਕਂ ਜਾਨਨਸਿਪ੍ਪਂ ਸਿਕ੍ਖਾਪੇਥਾ’’ਤਿ ਆਹ. ਤੇ ਅਤ੍ਤਨੋ ਅਤ੍ਤਨੋ ਜਾਨਨਨਿਯਾਮੇਨੇਵ ਤਂ ਸਿਕ੍ਖਾਪੇਸੁਂ. ਪਞ੍ਚਨ੍ਨਂ ਤਾਪਸਸਤਾਨਂ ਏਕੋਪਿ ਤੇਨ ਅਤਿਰੇਕਪਞ੍ਞੋ ਨਾਹੋਸਿ, ਸ੍ਵੇਵ ਤੇਸਂ ਪਞ੍ਞਾਯ ਅਗ੍ਗੋ. ਅਥਸ੍ਸ ਤੇ ਸਨ੍ਨਿਪਤਿਤ੍ਵਾ ਆਚਰਿਯਟ੍ਠਾਨਂ ਅਦਂਸੁ. ਅਥ ਨੇ ਸੋ ਆਹ – ‘‘ਮਾਰਿਸਾ, ਤੁਮ੍ਹੇ ਨਿਚ੍ਚਂ ਵਨਮੂਲਫਲਾਹਾਰਾ ਅਰਞ੍ਞੇਵ ਵਸਥ, ਮਨੁਸ੍ਸਪਥਂ ਕਸ੍ਮਾ ਨ ਗਚ੍ਛਥਾ’’ਤਿ? ‘‘ਮਾਰਿਸ, ਮਨੁਸ੍ਸਾ ਨਾਮ ਮਹਾਦਾਨਂ ਦਤ੍ਵਾ ਅਨੁਮੋਦਨਂ ਕਾਰਾਪੇਨ੍ਤਿ, ਧਮ੍ਮਿਂ ਕਥਂ ਭਣਾਪੇਨ੍ਤਿ, ਪਞ੍ਹਂ ਪੁਚ੍ਛਨ੍ਤਿ, ਮਯਂ ਤੇਨ ਭਯੇਨ ਤਤ੍ਥ ਨ ਗਚ੍ਛਾਮਾ’’ਤਿ. ‘‘ਮਾਰਿਸਾ, ਸਚੇਪਿ ਚਕ੍ਕਵਤ੍ਤਿਰਾਜਾ ਭਵਿਸ੍ਸਤਿ, ਮਨਂ ਗਹੇਤ੍ਵਾ ਕਥਨਂ ਨਾਮ ਮਯ੍ਹਂ ਭਾਰੋ, ਤੁਮ੍ਹੇ ਮਾ ਭਾਯਥਾ’’ਤਿ ਵਤ੍ਵਾ ਤੇਹਿ ਸਦ੍ਧਿਂ ਚਾਰਿਕਂ ਚਰਮਾਨੋ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਰਾਜੁਯ੍ਯਾਨੇ ਵਸਿਤ੍ਵਾ ਪੁਨਦਿਵਸੇ ਸਬ੍ਬੇਹਿ ਸਦ੍ਧਿਂ ਦ੍ਵਾਰਗਾਮੇ ਭਿਕ੍ਖਾਯ ਚਰਿ, ਮਨੁਸ੍ਸਾ ਮਹਾਦਾਨਂ ਅਦਂਸੁ. ਤਾਪਸਾ ਪੁਨਦਿਵਸੇ ਨਗਰਂ ਪਵਿਸਿਂਸੁ ਮਨੁਸ੍ਸਾ ਮਹਾਦਾਨਂ ਅਦਂਸੁ. ਉਦ੍ਦਾਲਕਤਾਪਸੋ ਦਾਨਾਨੁਮੋਦਨਂ ਕਰੋਤਿ, ਮਙ੍ਗਲਂ ਵਦਤਿ, ਪਞ੍ਹਂ ਵਿਸ੍ਸਜ੍ਜੇਤਿ, ਮਨੁਸ੍ਸਾ ਪਸੀਦਿਤ੍ਵਾ ਬਹੁਪਚ੍ਚਯੇ ਅਦਂਸੁ. ਸਕਲਨਗਰਂ ‘‘ਪਣ੍ਡਿਤੋ ਗਣਸਤ੍ਥਾ ਧਮ੍ਮਿਕਤਾਪਸੋ ਆਗਤੋ’’ਤਿ ਸਙ੍ਖੁਭਿ, ਤਂ ਰਞ੍ਞੋਪਿ ਕਥਯਿਂਸੁ.

ਰਾਜਾ ‘‘ਕੁਹਿਂ ਵਸਤੀ’’ਤਿ ਪੁਚ੍ਛਿਤ੍ਵਾ ‘‘ਉਯ੍ਯਾਨੇ’’ਤਿ ਸੁਤ੍ਵਾ ‘‘ਸਾਧੁ ਅਜ੍ਜ ਤੇਸਂ ਦਸ੍ਸਨਾਯ ਗਮਿਸ੍ਸਾਮੀ’’ਤਿ ਆਹ. ਏਕੋ ਪੁਰਿਸੋ ਗਨ੍ਤ੍ਵਾ ‘‘ਰਾਜਾ ਕਿਰ ਵੋ ਪਸ੍ਸਿਤੁਂ ਆਗਚ੍ਛਿਸ੍ਸਤੀ’’ਤਿ ਉਦ੍ਦਾਲਕਸ੍ਸ ਕਥੇਸਿ. ਸੋਪਿ ਇਸਿਗਣਂ ਆਮਨ੍ਤੇਤ੍ਵਾ ‘‘ਮਾਰਿਸਾ, ਰਾਜਾ ਕਿਰ ਆਗਮਿਸ੍ਸਤਿ, ਇਸ੍ਸਰੇ ਨਾਮ ਏਕਦਿਵਸਂ ਆਰਾਧੇਤ੍ਵਾ ਯਾਵਜੀਵਂ ਅਲਂ ਹੋਤੀ’’ਤਿ. ‘‘ਕਿਂ ਪਨ ਕਾਤਬ੍ਬਂ ਆਚਰਿਯਾ’’ਤਿ? ਸੋ ਏਵਮਾਹ – ‘‘ਤੁਮ੍ਹੇਸੁ ਏਕਚ੍ਚੇ ਵਗ੍ਗੁਲਿਵਤਂ ਚਰਨ੍ਤੁ, ਏਕਚ੍ਚੇ ਉਕ੍ਕੁਟਿਕਪ੍ਪਧਾਨਮਨੁਯੁਞ੍ਜਨ੍ਤੁ, ਏਕਚ੍ਚੇ ਕਣ੍ਟਕਾਪਸ੍ਸਯਿਕਾ ਭਵਨ੍ਤੁ, ਏਕਚ੍ਚੇ ਪਞ੍ਚਾਤਪਂ ਤਪਨ੍ਤੁ, ਏਕਚ੍ਚੇ ਉਦਕੋਰੋਹਨਕਮ੍ਮਂ ਕਰੋਨ੍ਤੁ, ਏਕਚ੍ਚੇ ਤਤ੍ਥ ਤਤ੍ਥ ਮਨ੍ਤੇ ਸਜ੍ਝਾਯਨ੍ਤੂ’’ਤਿ. ਤੇ ਤਥਾ ਕਰਿਂਸੁ. ਸਯਂ ਪਨ ਅਟ੍ਠ ਵਾ ਦਸ ਵਾ ਪਣ੍ਡਿਤਵਾਦਿਨੋ ਗਹੇਤ੍ਵਾ ਮਨੋਰਮੇ ਆਧਾਰਕੇ ਰਮਣੀਯਂ ਪੋਤ੍ਥਕਂ ਠਪੇਤ੍ਵਾ ਅਨ੍ਤੇਵਾਸਿਕਪਰਿਵੁਤੋ ਸੁਪਞ੍ਞਤ੍ਤੇ ਸਾਪਸ੍ਸਯੇ ਆਸਨੇ ਨਿਸੀਦਿ. ਤਸ੍ਮਿਂ ਖਣੇ ਰਾਜਾ ਪੁਰੋਹਿਤਂ ਆਦਾਯ ਮਹਨ੍ਤੇਨ ਪਰਿਵਾਰੇਨ ਉਯ੍ਯਾਨਂ ਗਨ੍ਤ੍ਵਾ ਤੇ ਮਿਚ੍ਛਾਤਪਂ ਚਰਨ੍ਤੇ ਦਿਸ੍ਵਾ ‘‘ਅਪਾਯਭਯਮ੍ਹਾ ਮੁਤ੍ਤਾ’’ਤਿ ਪਸੀਦਿਤ੍ਵਾ ਉਦ੍ਦਾਲਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਤੁਟ੍ਠਮਾਨਸੋ ਪੁਰੋਹਿਤੇਨ ਸਦ੍ਧਿਂ ਸਲ੍ਲਪਨ੍ਤੋ ਪਠਮਂ ਗਾਥਮਾਹ –

੬੨.

‘‘ਖਰਾਜਿਨਾ ਜਟਿਲਾ ਪਙ੍ਕਦਨ੍ਤਾ, ਦੁਮ੍ਮਕ੍ਖਰੂਪਾ ਯੇ ਮਨ੍ਤਂ ਜਪ੍ਪਨ੍ਤਿ;

ਕਚ੍ਚਿਨ੍ਨੁ ਤੇ ਮਾਨੁਸਕੇ ਪਯੋਗੇ, ਇਦਂ ਵਿਦੂ ਪਰਿਮੁਤ੍ਤਾ ਅਪਾਯਾ’’ਤਿ.

ਤਤ੍ਥ ਖਰਾਜਿਨਾਤਿ ਸਖੁਰੇਹਿ ਅਜਿਨਚਮ੍ਮੇਹਿ ਸਮਨ੍ਨਾਗਤਾ. ਪਙ੍ਕਦਨ੍ਤਾਤਿ ਦਨ੍ਤਕਟ੍ਠਸ੍ਸ ਅਖਾਦਨੇਨ ਮਲਗ੍ਗਹਿਤਦਨ੍ਤਾ. ਦੁਮ੍ਮਕ੍ਖਰੂਪਾਤਿ ਅਨਞ੍ਜਿਤਕ੍ਖਾ ਅਮਣ੍ਡਿਤਰੂਪਾ ਲੂਖਸਙ੍ਘਾਟਿਧਰਾ. ਮਾਨੁਸਕੇ ਪਯੋਗੇਤਿ ਮਨੁਸ੍ਸੇਹਿ ਕਤ੍ਤਬ੍ਬਵੀਰਿਯੇ. ਇਦਂ ਵਿਦੂਤਿ ਇਦਂ ਤਪਚਰਣਞ੍ਚ ਮਨ੍ਤਸਜ੍ਝਾਯਨਞ੍ਚ ਜਾਨਨ੍ਤਾ. ਅਪਾਯਾਤਿ ਕਚ੍ਚਿ ਆਚਰਿਯ, ਇਮੇ ਚਤੂਹਿ ਅਪਾਯੇਹਿ ਮੁਤ੍ਤਾਤਿ ਪੁਚ੍ਛਤਿ.

ਤਂ ਸੁਤ੍ਵਾ ਪੁਰੋਹਿਤੋ ‘‘ਅਯਂ ਰਾਜਾ ਅਟ੍ਠਾਨੇ ਪਸਨ੍ਨੋ, ਤੁਣ੍ਹੀ ਭਵਿਤੁਂ ਨ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਦੁਤਿਯਂ ਗਾਥਮਾਹ –

੬੩.

‘‘ਪਾਪਾਨਿ ਕਮ੍ਮਾਨਿ ਕਰੇਥ ਰਾਜ, ਬਹੁਸ੍ਸੁਤੋ ਚੇ ਨ ਚਰੇਯ੍ਯ ਧਮ੍ਮਂ;

ਸਹਸ੍ਸਵੇਦੋਪਿ ਨ ਤਂ ਪਟਿਚ੍ਚ, ਦੁਕ੍ਖਾ ਪਮੁਚ੍ਚੇ ਚਰਣਂ ਅਪਤ੍ਵਾ’’ਤਿ.

ਤਤ੍ਥ ਬਹੁਸ੍ਸੁਤੋ ਚੇਤਿ ਸਚੇ ਮਹਾਰਾਜ, ‘‘ਅਹਂ ਬਹੁਸ੍ਸੁਤੋਮ੍ਹੀ’’ਤਿ ਪਗੁਣਵੇਦੋਪਿ ਦਸਕੁਸਲਕਮ੍ਮਪਥਧਮ੍ਮਂ ਨ ਚਰੇਯ੍ਯ, ਤੀਹਿ ਦ੍ਵਾਰੇਹਿ ਪਾਪਾਨੇਵ ਕਰੇਯ੍ਯ, ਤਿਟ੍ਠਨ੍ਤੁ ਤਯੋ ਵੇਦਾ, ਸਹਸ੍ਸਵੇਦੋਪਿ ਸਮਾਨੋ ਤਂ ਬਾਹੁਸਚ੍ਚਂ ਪਟਿਚ੍ਚ ਅਟ੍ਠਸਮਾਪਤ੍ਤਿਸਙ੍ਖਾਤਂ ਚਰਣਂ ਅਪ੍ਪਤ੍ਵਾ ਅਪਾਯਦੁਕ੍ਖਤੋ ਨ ਮੁਚ੍ਚੇਯ੍ਯਾਤਿ.

ਤਸ੍ਸ ਵਚਨਂ ਸੁਤ੍ਵਾ ਉਦ੍ਦਾਲਕੋ ਚਿਨ੍ਤੇਸਿ ‘‘ਰਾਜਾ ਯਥਾ ਵਾ ਤਥਾ ਵਾ ਇਸਿਗਣਸ੍ਸ ਪਸੀਦਿ, ਅਯਂ ਪਨ ਬ੍ਰਾਹ੍ਮਣੋ ਚਰਨ੍ਤਂ ਗੋਣਂ ਦਣ੍ਡੇਨ ਪਹਰਨ੍ਤੋ ਵਿਯ ਵਡ੍ਢਿਤਭਤ੍ਤੇ ਕਚਵਰਂ ਖਿਪਨ੍ਤੋ ਵਿਯ ਕਥੇਸਿ, ਤੇਨ ਸਦ੍ਧਿਂ ਕਥੇਸ੍ਸਾਮੀ’’ਤਿ. ਸੋ ਤੇਨ ਸਦ੍ਧਿਂ ਕਥੇਨ੍ਤੋ ਤਤਿਯਂ ਗਾਥਮਾਹ –

੬੪.

‘‘ਸਹਸ੍ਸਵੇਦੋਪਿ ਨ ਤਂ ਪਟਿਚ੍ਚ, ਦੁਕ੍ਖਾ ਪਮੁਚ੍ਚੇ ਚਰਣਂ ਅਪਤ੍ਵਾ;

ਮਞ੍ਞਾਮਿ ਵੇਦਾ ਅਫਲਾ ਭਵਨ੍ਤਿ, ਸਸਂਯਮਂ ਚਰਣਞ੍ਞੇਵ ਸਚ੍ਚ’’ਨ੍ਤਿ.

ਤਤ੍ਥ ਅਫਲਾਤਿ ਤਵ ਵਾਦੇ ਵੇਦਾ ਚ ਸੇਸਸਿਪ੍ਪਾਨਿ ਚ ਅਫਲਾਨਿ ਆਪਜ੍ਜਨ੍ਤਿ, ਤਾਨਿ ਕਸ੍ਮਾ ਉਗ੍ਗਣ੍ਹਨ੍ਤਿ, ਸੀਲਸਂਯਮੇਨ ਸਦ੍ਧਿਂ ਚਰਣਞ੍ਞੇਵ ਏਕਂ ਸਚ੍ਚਂ ਆਪਜ੍ਜਤੀਤਿ.

ਤਤੋ ਪੁਰੋਹਿਤੋ ਚਤੁਤ੍ਥਂ ਗਾਥਮਾਹ –

੬੫.

‘‘ਨ ਹੇਵ ਵੇਦਾ ਅਫਲਾ ਭਵਨ੍ਤਿ, ਸਸਂਯਮਂ ਚਰਣਞ੍ਞੇਵ ਸਚ੍ਚਂ;

ਕਿਤ੍ਤਿਞ੍ਹਿ ਪਪ੍ਪੋਤਿ ਅਧਿਚ੍ਚ ਵੇਦੇ, ਸਨ੍ਤਿਂ ਪੁਣਾਤਿ ਚਰਣੇਨ ਦਨ੍ਤੋ’’ਤਿ.

ਤਤ੍ਥ ਨ ਹੇਵਾਤਿ ਨਾਹਂ ‘‘ਵੇਦਾ ਅਫਲਾ’’ਤਿ ਵਦਾਮਿ, ਅਪਿਚ ਖੋ ਪਨ ਸਸਂਯਮਂ ਚਰਣਂ ਸਚ੍ਚਮੇਵ ਸਭਾਵਭੂਤਂ ਉਤ੍ਤਮਂ. ਤੇਨ ਹਿ ਸਕ੍ਕਾ ਦੁਕ੍ਖਾ ਮੁਚ੍ਚਿਤੁਂ. ਸਨ੍ਤਿਂ ਪੁਣਾਤੀਤਿ ਸਮਾਪਤ੍ਤਿਸਙ੍ਖਾਤੇਨ ਚਰਣੇਨ ਦਨ੍ਤੋ ਭਯਸਨ੍ਤਿਕਰਂ ਨਿਬ੍ਬਾਨਂ ਪਾਪੁਣਾਤੀਤਿ.

ਤਂ ਸੁਤ੍ਵਾ ਉਦ੍ਦਾਲਕੋ ‘‘ਨ ਸਕ੍ਕਾ ਇਮਿਨਾ ਸਦ੍ਧਿਂ ਪਟਿਪਕ੍ਖਵਸੇਨ ਠਾਤੁਂ, ‘ਪੁਤ੍ਤੋ ਤਵਾਹ’ਨ੍ਤਿ ਵੁਤ੍ਤੇ ਸਿਨੇਹਂ ਅਕਰੋਨ੍ਤੋ ਨਾਮ ਨਤ੍ਥਿ, ਪੁਤ੍ਤਭਾਵਮਸ੍ਸ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਪਞ੍ਚਮਂ ਗਾਥਮਾਹ –

੬੬.

‘‘ਭਚ੍ਚਾ ਮਾਤਾ ਪਿਤਾ ਬਨ੍ਧੂ, ਯੇਨ ਜਾਤੋ ਸਯੇਵ ਸੋ;

ਉਦ੍ਦਾਲਕੋ ਅਹਂ ਭੋਤੋ, ਸੋਤ੍ਤਿਯਾਕੁਲਵਂਸਕੋ’’ਤਿ.

ਤਤ੍ਥ ਭਚ੍ਚਾਤਿ ਮਾਤਾ ਚ ਪਿਤਾ ਚ ਸੇਸਬਨ੍ਧੂ ਚ ਭਰਿਤਬ੍ਬਾ ਨਾਮ. ਯੇਨ ਪਨ ਜਾਤੋ, ਸੋਯੇਵ ਸੋ ਹੋਤਿ. ਅਤ੍ਤਾਯੇਵ ਹਿ ਅਤ੍ਤਨੋ ਜਾਯਤਿ, ਅਹਞ੍ਚ ਤਯਾਵ ਉਦ੍ਦਾਲਕਰੁਕ੍ਖਮੂਲੇ ਜਨਿਤੋ, ਤਯਾ ਵੁਤ੍ਤਮੇਵ ਨਾਮਂ ਕਤਂ, ਉਦ੍ਦਾਲਕੋ ਅਹਂ ਭੋਤਿ.

ਸੋ ‘‘ਏਕਂਸੇਨ ਤ੍ਵਂ ਉਦ੍ਦਾਲਕੋਸੀ’’ਤਿ ਵੁਤ੍ਤੇ ‘‘ਆਮਾ’’ਤਿ ਵਤ੍ਵਾ ‘‘ਮਯਾ ਤੇ ਮਾਤੁ ਸਞ੍ਞਾਣਂ ਦਿਨ੍ਨਂ, ਤਂ ਕੁਹਿ’’ਨ੍ਤਿ ਵੁਤ੍ਤੇ ‘‘ਇਦਂ ਬ੍ਰਾਹ੍ਮਣਾ’’ਤਿ ਮੁਦ੍ਦਿਕਂ ਤਸ੍ਸ ਹਤ੍ਥੇ ਠਪੇਸਿ. ਬ੍ਰਾਹ੍ਮਣੋ ਮੁਦ੍ਦਿਕਂ ਸਞ੍ਜਾਨਿਤ੍ਵਾ ਨਿਚ੍ਛਯੇਨ ‘‘ਤ੍ਵਂ ਬ੍ਰਾਹ੍ਮਣਧਮ੍ਮਂ ਪਜਾਨਾਸੀ’’ਤਿ ਵਤ੍ਵਾ ਬ੍ਰਾਹ੍ਮਣਧਮ੍ਮਂ ਪੁਚ੍ਛਨ੍ਤੋ ਛਟ੍ਠਂ ਗਾਥਮਾਹ –

੬੭.

‘‘ਕਥਂ ਭੋ ਬ੍ਰਾਹ੍ਮਣੋ ਹੋਤਿ, ਕਥਂ ਭਵਤਿ ਕੇਵਲੀ;

ਕਥਞ੍ਚ ਪਰਿਨਿਬ੍ਬਾਨਂ, ਧਮ੍ਮਟ੍ਠੋ ਕਿਨ੍ਤਿ ਵੁਚ੍ਚਤੀ’’ਤਿ.

ਉਦ੍ਦਾਲਕੋਪਿ ਤਸ੍ਸ ਆਚਿਕ੍ਖਨ੍ਤੋ ਸਤ੍ਤਮਂ ਗਾਥਮਾਹ –

੬੮.

‘‘ਨਿਰਂਕਤ੍ਵਾ ਅਗ੍ਗਿਮਾਦਾਯ ਬ੍ਰਾਹ੍ਮਣੋ, ਆਪੋ ਸਿਞ੍ਚਂ ਯਜਂ ਉਸ੍ਸੇਤਿ ਯੂਪਂ;

ਏਵਂਕਰੋ ਬ੍ਰਾਹ੍ਮਣੋ ਹੋਤਿ ਖੇਮੀ, ਧਮ੍ਮੇ ਠਿਤਂ ਤੇਨ ਅਮਾਪਯਿਂਸੂ’’ਤਿ.

ਤਤ੍ਥ ਨਿਰਂਕਤ੍ਵਾ ਅਗ੍ਗਿਮਾਦਾਯਾਤਿ ਨਿਰਨ੍ਤਰਂ ਕਤ੍ਵਾ ਅਗ੍ਗਿਂ ਗਹੇਤ੍ਵਾ ਪਰਿਚਰਤਿ. ਆਪੋ ਸਿਞ੍ਚਂ ਯਜਂ ਉਸ੍ਸੇਤਿ ਯੂਪਨ੍ਤਿ ਅਭਿਸੇਚਨਕਕਮ੍ਮਂ ਕਰੋਨ੍ਤੋ ਸਮ੍ਮਾਪਾਸਂ ਵਾ ਵਾਜਪੇਯ੍ਯਂ ਵਾ ਨਿਰਗ੍ਗਲ਼ਂ ਵਾ ਯਜਨ੍ਤੋ ਸੁਵਣ੍ਣਯੂਪਂ ਉਸ੍ਸਾਪੇਤਿ. ਖੇਮੀਤਿ ਖੇਮਪ੍ਪਤ੍ਤੋ. ਅਮਾਪਯਿਂਸੂਤਿ ਤੇਨੇਵ ਚ ਕਾਰਣੇਨ ਧਮ੍ਮੇ ਠਿਤਂ ਕਥਯਿਂਸੁ.

ਤਂ ਸੁਤ੍ਵਾ ਪੁਰੋਹਿਤੋ ਤੇਨ ਕਥਿਤਂ ਬ੍ਰਾਹ੍ਮਣਧਮ੍ਮਂ ਗਰਹਨ੍ਤੋ ਅਟ੍ਠਮਂ ਗਾਥਮਾਹ –

੬੯.

‘‘ਨ ਸੁਦ੍ਧਿ ਸੇਚਨੇਨਤ੍ਥਿ, ਨਾਪਿ ਕੇਵਲੀ ਬ੍ਰਾਹ੍ਮਣੋ;

ਨ ਖਨ੍ਤੀ ਨਾਪਿ ਸੋਰਚ੍ਚਂ, ਨਾਪਿ ਸੋ ਪਰਿਨਿਬ੍ਬੁਤੋ’’ਤਿ.

ਤਤ੍ਥ ਸੇਚਨੇਨਾਤਿ ਤੇਨ ਵੁਤ੍ਤੇਸੁ ਬ੍ਰਾਹ੍ਮਣਧਮ੍ਮੇਸੁ ਏਕਂ ਦਸ੍ਸੇਤ੍ਵਾ ਸਬ੍ਬਂ ਪਟਿਕ੍ਖਿਪਤਿ. ਇਦਂ ਵੁਤ੍ਤਂ ਹੋਤਿ – ‘‘ਅਗ੍ਗਿਪਰਿਚਰਣੇਨ ਵਾ ਉਦਕਸੇਚਨੇਨ ਵਾ ਪਸੁਘਾਤਯਞ੍ਞੇਨ ਵਾ ਸੁਦ੍ਧਿ ਨਾਮ ਨਤ੍ਥਿ, ਨਾਪਿ ਏਤ੍ਤਕੇਨ ਬ੍ਰਾਹ੍ਮਣੋ ਕੇਵਲਪਰਿਪੁਣ੍ਣੋ ਹੋਤਿ, ਨ ਅਧਿਵਾਸਨਖਨ੍ਤਿ, ਨ ਸੀਲਸੋਰਚ੍ਚਂ, ਨਾਪਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ ਨਾਮ ਹੋਤੀ’’ਤਿ.

ਤਤੋ ਨਂ ਉਦ੍ਦਾਲਕੋ ‘‘ਯਦਿ ਏਵਂ ਬ੍ਰਾਹ੍ਮਣੋ ਨ ਹੋਤਿ, ਅਥ ਕਥਂ ਹੋਤੀ’’ਤਿ ਪੁਚ੍ਛਨ੍ਤੋ ਨਵਮਂ ਗਾਥਮਾਹ –

੭੦.

‘‘ਕਥਂ ਸੋ ਬ੍ਰਾਹ੍ਮਣੋ ਹੋਤਿ, ਕਥਂ ਭਵਤਿ ਕੇਵਲੀ;

ਕਥਞ੍ਚ ਪਰਿਨਿਬ੍ਬਾਨਂ, ਧਮ੍ਮਟ੍ਠੋ ਕਿਨ੍ਤਿ ਵੁਚ੍ਚਤੀ’’ਤਿ.

ਪੁਰੋਹਿਤੋਪਿਸ੍ਸ ਕਥੇਨ੍ਤੋ ਇਤਰਂ ਗਾਥਮਾਹ –

੭੧.

‘‘ਅਖੇਤ੍ਤਬਨ੍ਧੂ ਅਮਮੋ ਨਿਰਾਸੋ, ਨਿਲ੍ਲੋਭਪਾਪੋ ਭਵਲੋਭਖੀਣੋ;

ਏਵਂਕਰੋ ਬ੍ਰਾਹ੍ਮਣੋ ਹੋਤਿ ਖੇਮੀ, ਧਮ੍ਮੇ ਠਿਤਂ ਤੇਨ ਅਮਾਪਯਿਂਸੂ’’ਤਿ.

ਤਤ੍ਥ ਅਖੇਤ੍ਤਬਨ੍ਧੂਤਿ ਅਕ੍ਖੇਤ੍ਤੋ ਅਬਨ੍ਧੁ, ਖੇਤ੍ਤਵਤ੍ਥੁਗਾਮਨਿਗਮਪਰਿਗ੍ਗਹੇਨ ਚੇਵ ਞਾਤਿਬਨ੍ਧਵਗੋਤ੍ਤਬਨ੍ਧਵਮਿਤ੍ਤਬਨ੍ਧਵਸਹਾਯਬਨ੍ਧਵਸਿਪ੍ਪਬਨ੍ਧਵਪਰਿਗ੍ਗਹੇਨ ਚ ਰਹਿਤੋ. ਅਮਮੋਤਿ ਸਤ੍ਤਸਙ੍ਖਾਰੇਸੁ ਤਣ੍ਹਾਦਿਟ੍ਠਿਮਮਾਯਨਰਹਿਤੋ. ਨਿਰਾਸੋਤਿ ਲਾਭਧਨਪੁਤ੍ਤਜੀਵਿਤਾਸਾਯ ਰਹਿਤੋ. ਨਿਲ੍ਲੋਭਪਾਪੋਤਿ ਪਾਪਲੋਭਵਿਸਮਲੋਭੇਨ ਰਹਿਤੋ. ਭਵਲੋਭਖੀਣੋਤਿ ਖੀਣਭਵਰਾਗੋ.

ਤਤੋ ਉਦ੍ਦਾਲਕੋ ਗਾਥਮਾਹ –

੭੨.

‘‘ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਸਬ੍ਬੇਵ ਸੋਰਤਾ ਦਨ੍ਤਾ, ਸਬ੍ਬੇਵ ਪਰਿਨਿਬ੍ਬੁਤਾ;

ਸਬ੍ਬੇਸਂ ਸੀਤਿਭੂਤਾਨਂ, ਅਤ੍ਥਿ ਸੇਯ੍ਯੋਥ ਪਾਪਿਯੋ’’ਤਿ.

ਤਤ੍ਥ ਅਤ੍ਥਿ ਸੇਯ੍ਯੋਥ ਪਾਪਿਯੋਤਿ ਏਤੇ ਖਤ੍ਤਿਯਾਦਯੋ ਸਬ੍ਬੇਪਿ ਸੋਰਚ੍ਚਾਦੀਹਿ ਸਮਨ੍ਨਾਗਤਾ ਹੋਨ੍ਤਿ, ਏਵਂ ਭੂਤਾਨਂ ਪਨ ਤੇਸਂ ਅਯਂ ਸੇਯ੍ਯੋ, ਅਯਂ ਪਾਪਿਯੋਤਿ ਏਵਂ ਹੀਨੁਕ੍ਕਟ੍ਠਤਾ ਅਤ੍ਥਿ, ਨਤ੍ਥੀਤਿ ਪੁਚ੍ਛਤਿ.

ਅਥਸ੍ਸ ‘‘ਅਰਹਤ੍ਤੁਪ੍ਪਤ੍ਤਿਤੋ ਪਟ੍ਠਾਯ ਹੀਨੁਕ੍ਕਟ੍ਠਤਾ ਨਾਮ ਨਤ੍ਥੀ’’ਤਿ ਦਸ੍ਸੇਤੁਂ ਬ੍ਰਾਹ੍ਮਣੋ ਗਾਥਮਾਹ –

੭੩.

‘‘ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਸਬ੍ਬੇਵ ਸੋਰਤਾ ਦਨ੍ਤਾ, ਸਬ੍ਬੇਵ ਪਰਿਨਿਬ੍ਬੁਤਾ;

ਸਬ੍ਬੇਸਂ ਸੀਤਿਭੂਤਾਨਂ, ਨਤ੍ਥਿ ਸੇਯ੍ਯੋਥ ਪਾਪਿਯੋ’’ਤਿ.

ਅਥ ਨਂ ਗਰਹਨ੍ਤੋ ਉਦ੍ਦਾਲਕੋ ਗਾਥਾਦ੍ਵਯਮਾਹ –

੭੪.

‘‘ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਸਬ੍ਬੇਵ ਸੋਰਤਾ ਦਨ੍ਤਾ, ਸਬ੍ਬੇਵ ਪਰਿਨਿਬ੍ਬੁਤਾ.

੭੫.

‘‘ਸਬ੍ਬੇਸਂ ਸੀਤਿਭੂਤਾਨਂ, ਨਤ੍ਥਿ ਸੇਯ੍ਯੋਥ ਪਾਪਿਯੋ;

ਪਨਟ੍ਠਂ ਚਰਸਿ ਬ੍ਰਹ੍ਮਞ੍ਞਂ, ਸੋਤ੍ਤਿਯਾਕੁਲਵਂਸਤ’’ਨ੍ਤਿ.

ਤਸ੍ਸਤ੍ਥੋ – ਯਦਿ ਏਤੇਹਿ ਗੁਣੇਹਿ ਸਮਨ੍ਨਾਗਤਾਨਂ ਵਿਸੇਸੋ ਨਤ੍ਥਿ, ਏਕੋ ਵਣ੍ਣੋਵ ਹੋਤਿ, ਏਵਂ ਸਨ੍ਤੇ ਤ੍ਵਂ ਉਭਤੋ ਸੁਜਾਤਭਾਵਂ ਨਾਸੇਨ੍ਤੋ ਪਨਟ੍ਠਂ ਚਰਸਿ ਬ੍ਰਹ੍ਮਞ੍ਞਂ, ਚਣ੍ਡਾਲਸਮੋ ਹੋਸਿ, ਸੋਤ੍ਤਿਯਕੁਲਵਂਸਤਂ ਨਾਸੇਸੀਤਿ.

ਅਥ ਨਂ ਪੁਰੋਹਿਤੋ ਉਪਮਾਯ ਸਞ੍ਞਾਪੇਨ੍ਤੋ ਗਾਥਾਦ੍ਵਯਮਾਹ –

੭੬.

‘‘ਨਾਨਾਰਤ੍ਤੇਹਿ ਵਤ੍ਥੇਹਿ, ਵਿਮਾਨਂ ਭਵਤਿ ਛਾਦਿਤਂ;

ਨ ਤੇਸਂ ਛਾਯਾ ਵਤ੍ਥਾਨਂ, ਸੋ ਰਾਗੋ ਅਨੁਪਜ੍ਜਥ.

੭੭.

‘‘ਏਵਮੇਵ ਮਨੁਸ੍ਸੇਸੁ, ਯਦਾ ਸੁਜ੍ਝਨ੍ਤਿ ਮਾਣਵਾ;

ਤੇ ਸਜਾਤਿਂ ਪਮੁਞ੍ਚਨ੍ਤਿ, ਧਮ੍ਮਮਞ੍ਞਾਯ ਸੁਬ੍ਬਤਾ’’ਤਿ.

ਤਤ੍ਥ ਵਿਮਾਨਨ੍ਤਿ ਗੇਹਂ ਵਾ ਮਣ੍ਡਪਂ ਵਾ. ਛਾਯਾਤਿ ਤੇਸਂ ਵਤ੍ਥਾਨਂ ਛਾਯਾ ਸੋ ਨਾਨਾਵਿਧੋ ਰਾਗੋ ਨ ਉਪੇਤਿ, ਸਬ੍ਬਾ ਛਾਯਾ ਏਕਵਣ੍ਣਾਵ ਹੋਨ੍ਤਿ. ਏਵਮੇਵਾਤਿ ਮਨੁਸ੍ਸੇਸੁਪਿ ਏਵਮੇਵ ਏਕਚ੍ਚੇ ਅਞ੍ਞਾਣਬ੍ਰਾਹ੍ਮਣਾ ਅਕਾਰਣੇਨੇਵ ਚਾਤੁਵਣ੍ਣੇ ਸੁਦ੍ਧਿਂ ਪਞ੍ਞਾਪੇਨ੍ਤਿ, ਏਸਾ ਅਤ੍ਥੀਤਿ ਮਾ ਗਣ੍ਹਿ. ਯਦਾ ਅਰਿਯਮਗ੍ਗੇਨ ਮਾਣਵਾ ਸੁਜ੍ਝਨ੍ਤਿ, ਤਦਾ ਤੇਹਿ ਪਟਿਵਿਦ੍ਧਂ ਨਿਬ੍ਬਾਨਧਮ੍ਮਂ ਜਾਨਿਤ੍ਵਾ ਸੁਬ੍ਬਤਾ ਸੀਲਵਨ੍ਤਾ ਪਣ੍ਡਿਤਪੁਰਿਸਾ ਤੇ ਸਜਾਤਿਂ ਮੁਞ੍ਚਨ੍ਤਿ. ਨਿਬ੍ਬਾਨਪ੍ਪਤ੍ਤਿਤੋ ਪਟ੍ਠਾਯ ਹਿ ਜਾਤਿ ਨਾਮ ਨਿਰਤ੍ਥਕਾਤਿ.

ਉਦ੍ਦਾਲਕੋ ਪਨ ਪਚ੍ਚਾਹਰਿਤੁਂ ਅਸਕ੍ਕੋਨ੍ਤੋ ਅਪ੍ਪਟਿਭਾਨੋਵ ਨਿਸੀਦਿ. ਅਥ ਬ੍ਰਾਹ੍ਮਣੋ ਰਾਜਾਨਂ ਆਹ – ‘‘ਸਬ੍ਬੇ ਏਤੇ, ਮਹਾਰਾਜ, ਕੁਹਕਾ ਸਕਲਜਮ੍ਬੁਦੀਪੇ ਕੋਹਞ੍ਞੇਨੇਵ ਨਾਸੇਨ੍ਤਿ, ਉਦ੍ਦਾਲਕਂ ਉਪ੍ਪਬ੍ਬਾਜੇਤ੍ਵਾ ਉਪਪੁਰੋਹਿਤਂ ਕਰੋਥ, ਸੇਸੇ ਉਪ੍ਪਬ੍ਬਾਜੇਤ੍ਵਾ ਫਲਕਾਵੁਧਾਨਿ ਦਤ੍ਵਾ ਸੇਵਕੇ ਕਰੋਥਾ’’ਤਿ. ‘‘ਸਾਧੁ, ਆਚਰਿਯਾ’’ਤਿ ਰਾਜਾ ਤਥਾ ਕਾਰੇਸਿ. ਤੇ ਰਾਜਾਨਂ ਉਪਟ੍ਠਹਨ੍ਤਾਵ ਯਥਾਕਮ੍ਮਂ ਗਤਾ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਸ ਕੁਹਕੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਉਦ੍ਦਾਲਕੋ ਕੁਹਕਭਿਕ੍ਖੁ ਅਹੋਸਿ, ਰਾਜਾ ਆਨਨ੍ਦੋ, ਪੁਰੋਹਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਉਦ੍ਦਾਲਕਜਾਤਕਵਣ੍ਣਨਾ ਚਤੁਤ੍ਥਾ.

[੪੮੮] ੫. ਭਿਸਜਾਤਕਵਣ੍ਣਨਾ

ਅਸ੍ਸਂ ਗਵਂ ਰਜਤਂ ਜਾਤਰੂਪਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਪਨ ਕੁਸਜਾਤਕੇ (ਜਾ. ੨.੨੦.੧ ਆਦਯੋ) ਆਵਿ ਭਵਿਸ੍ਸਤਿ. ਤਦਾ ਪਨ ਸਤ੍ਥਾ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਕਿਂ ਪਟਿਚ੍ਚਾ’’ਤਿ ਵਤ੍ਵਾ ‘‘ਕਿਲੇਸਂ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਕਸ੍ਮਾ ਕਿਲੇਸਂ ਪਟਿਚ੍ਚ ਉਕ੍ਕਣ੍ਠਿਤੋਸਿ, ਪੋਰਾਣਕਪਣ੍ਡਿਤਾ ਅਨੁਪ੍ਪਨ੍ਨੇ ਬੁਦ੍ਧੇ ਬਾਹਿਰਕਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਤ੍ਥੁਕਾਮਕਿਲੇਸਕਾਮੇ ਆਰਬ੍ਭ ਉਪ੍ਪਜ੍ਜਨਕਸਞ੍ਞਂ ਸਪਥਂ ਕਤ੍ਵਾ ਵਿਹਰਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਸੀਤਿਕੋਟਿਵਿਭਵਸ੍ਸ ਬ੍ਰਾਹ੍ਮਣਮਹਾਸਾਲਕੁਲਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ‘‘ਮਹਾਕਞ੍ਚਨਕੁਮਾਰੋ’’ਤਿਸ੍ਸ ਨਾਮਂ ਕਰਿਂਸੁ. ਅਥਸ੍ਸ ਪਦਸਾ ਵਿਚਰਣਕਾਲੇ ਅਪਰੋਪਿ ਪੁਤ੍ਤੋ ਜਾਯਿ, ‘‘ਉਪਕਞ੍ਚਨਕੁਮਾਰੋ’’ਤਿਸ੍ਸ ਨਾਮਂ ਕਰਿਂਸੁ. ਏਵਂ ਪਟਿਪਾਟਿਯਾ ਸਤ੍ਤ ਪੁਤ੍ਤਾ ਅਹੇਸੁਂ. ਸਬ੍ਬਕਨਿਟ੍ਠਾ ਪਨੇਕਾ ਧੀਤਾ, ਤਸ੍ਸਾ ‘‘ਕਞ੍ਚਨਦੇਵੀ’’ਤਿ ਨਾਮਂ ਕਰਿਂਸੁ. ਮਹਾਕਞ੍ਚਨਕੁਮਾਰੋ ਵਯਪ੍ਪਤ੍ਤੋ ਤਕ੍ਕਸਿਲਤੋ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਆਗਚ੍ਛਿ. ਅਥ ਨਂ ਮਾਤਾਪਿਤਰੋ ਘਰਾਵਾਸੇਨ ਬਨ੍ਧਿਤੁਕਾਮਾ ‘‘ਅਤ੍ਤਨਾ ਸਮਾਨਜਾਤਿਯਕੁਲਤੋ ਤੇ ਦਾਰਿਕਂ ਆਨੇਸ੍ਸਾਮ, ਘਰਾਵਾਸਂ ਸਣ੍ਠਪੇਹੀ’’ਤਿ ਵਦਿਂਸੁ. ‘‘ਅਮ੍ਮਤਾਤਾ, ਨ ਮਯ੍ਹਂ ਘਰਾਵਾਸੇਨਤ੍ਥੋ, ਮਯ੍ਹਞ੍ਹਿ ਤਯੋ ਭਵਾ ਆਦਿਤ੍ਤਾ ਵਿਯ ਸਪ੍ਪਟਿਭਯਾ, ਬਨ੍ਧਨਾਗਾਰਂ ਵਿਯ ਪਲਿਬੁਦ੍ਧਾ, ਉਕ੍ਕਾਰਭੂਮਿ ਵਿਯ ਜੇਗੁਚ੍ਛਾ ਹੁਤ੍ਵਾ ਉਪਟ੍ਠਹਨ੍ਤਿ, ਮਯਾ ਸੁਪਿਨੇਨਪਿ ਮੇਥੁਨਧਮ੍ਮੋ ਨ ਦਿਟ੍ਠਪੁਬ੍ਬੋ, ਅਞ੍ਞੇ ਵੋ ਪੁਤ੍ਤਾ ਅਤ੍ਥਿ, ਤੇ ਘਰਾਵਾਸੇਨ ਨਿਮਨ੍ਤੇਥਾ’’ਤਿ ਵਤ੍ਵਾ ਪੁਨਪ੍ਪੁਨਂ ਯਾਚਿਤੋਪਿ ਸਹਾਯੇ ਪੇਸੇਤ੍ਵਾ ਤੇਹਿ ਯਾਚਿਤੋਪਿ ਨ ਇਚ੍ਛਿ.

ਅਥ ਨਂ ਸਹਾਯਾ ‘‘ਸਮ੍ਮ, ਕਿਂ ਪਨ ਤ੍ਵਂ ਪਤ੍ਥੇਨ੍ਤੋ ਕਾਮੇ ਪਰਿਭੁਞ੍ਜਿਤੁਂ ਨ ਇਚ੍ਛਸੀ’’ਤਿ ਪੁਚ੍ਛਿਂਸੁ. ਸੋ ਤੇਸਂ ਨੇਕ੍ਖਮ੍ਮਜ੍ਝਾਸਯਤਂ ਆਰੋਚੇਸਿ. ਤਂ ਸੁਤ੍ਵਾ ਮਾਤਾਪਿਤਰੋ ਸੇਸਪੁਤ੍ਤੇ ਨਿਮਨ੍ਤੇਸੁਂ, ਤੇਪਿ ਨ ਇਚ੍ਛਿਂਸੁ. ਕਞ੍ਚਨਦੇਵੀਪਿ ਨ ਇਚ੍ਛਿਯੇਵ. ਅਪਰਭਾਗੇ ਮਾਤਾਪਿਤਰੋ ਕਾਲਮਕਂਸੁ. ਮਹਾਕਞ੍ਚਨਪਣ੍ਡਿਤੋ ਮਾਤਾਪਿਤੂਨਂ ਕਤ੍ਤਬ੍ਬਕਿਚ੍ਚਂ ਕਤ੍ਵਾ ਅਸੀਤਿਕੋਟਿਧਨੇਨ ਕਪਣਦ੍ਧਿਕਾਨਂ ਮਹਾਦਾਨਂ ਦਤ੍ਵਾ ਛ ਭਾਤਰੋ ਭਗਿਨਿਂ ਏਕਂ ਦਾਸਂ ਏਕਂ ਦਾਸਿਂ ਏਕਂ ਸਹਾਯਕਞ੍ਚ ਆਦਾਯ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਹਿਮਵਨ੍ਤਂ ਪਾਵਿਸਿ. ਤੇ ਤਤ੍ਥ ਏਕਂ ਪਦੁਮਸਰਂ ਨਿਸ੍ਸਾਯ ਰਮਣੀਯੇ ਭੂਮਿਭਾਗੇ ਅਸ੍ਸਮਂ ਕਤ੍ਵਾ ਪਬ੍ਬਜਿਤ੍ਵਾ ਵਨਮੂਲਫਲਾਹਾਰੇਹਿ ਯਾਪਯਿਂਸੁ. ਤੇ ਅਰਞ੍ਞਂ ਗਚ੍ਛਨ੍ਤਾ ਏਕਤੋਵ ਗਨ੍ਤ੍ਵਾ ਯਤ੍ਥ ਏਕੋ ਫਲਂ ਵਾ ਪਤ੍ਤਂ ਵਾ ਪਸ੍ਸਤਿ, ਤਤ੍ਥ ਇਤਰੇਪਿ ਪਕ੍ਕੋਸਿਤ੍ਵਾ ਦਿਟ੍ਠਸੁਤਾਦੀਨਿ ਕਥੇਨ੍ਤਾ ਉਚ੍ਚਿਨਨ੍ਤਿ, ਗਾਮਸ੍ਸ ਕਮ੍ਮਨ੍ਤਟ੍ਠਾਨਂ ਵਿਯ ਹੋਤਿ. ਅਥ ਆਚਰਿਯੋ ਮਹਾਕਞ੍ਚਨਤਾਪਸੋ ਚਿਨ੍ਤੇਸਿ ‘‘ਅਮ੍ਹਾਕਂ ਅਸੀਤਿਕੋਟਿਧਨਂ ਛਡ੍ਡੇਤ੍ਵਾ ਪਬ੍ਬਜਿਤਾਨਂ ਏਵਂ ਲੋਲੁਪ੍ਪਚਾਰਵਸੇਨ ਫਲਾਫਲਤ੍ਥਾਯ ਵਿਚਰਣਂ ਨਾਮ ਅਪ੍ਪਤਿਰੂਪਂ, ਇਤੋ ਪਟ੍ਠਾਯ ਅਹਮੇਵ ਫਲਾਫਲਂ ਆਹਰਿਸ੍ਸਾਮੀ’’ਤਿ. ਸੋ ਅਸ੍ਸਮਂ ਪਤ੍ਵਾ ਸਬ੍ਬੇਪਿ ਤੇ ਸਾਯਨ੍ਹਸਮਯੇ ਸਨ੍ਨਿਪਾਤੇਤ੍ਵਾ ਤਮਤ੍ਥਂ ਆਰੋਚੇਤ੍ਵਾ ‘‘ਤੁਮ੍ਹੇ ਇਧੇਵ ਸਮਣਧਮ੍ਮਂ ਕਰੋਨ੍ਤਾ ਅਚ੍ਛਥ, ਅਹਂ ਫਲਾਫਲਂ ਆਹਰਿਸ੍ਸਾਮੀ’’ਤਿ ਆਹ. ਅਥ ਨਂ ਉਪਕਞ੍ਚਨਾਦਯੋ ‘‘ਮਯਂ ਆਚਰਿਯ, ਤੁਮ੍ਹੇ ਨਿਸ੍ਸਾਯ ਪਬ੍ਬਜਿਤਾ, ਤੁਮ੍ਹੇ ਇਧੇਵ ਸਮਣਧਮ੍ਮਂ ਕਰੋਥ, ਭਗਿਨੀਪਿ ਨੋ ਇਧੇਵ ਹੋਤੁ, ਦਾਸੀਪਿ ਤਸ੍ਸਾ ਸਨ੍ਤਿਕੇ ਅਚ੍ਛਤੁ, ਮਯਂ ਅਟ੍ਠ ਜਨਾ ਵਾਰੇਨ ਫਲਾਫਲਂ ਆਹਰਿਸ੍ਸਾਮ, ਤੁਮ੍ਹੇ ਪਨ ਤਯੋ ਵਾਰਮੁਤ੍ਤਾਵ ਹੋਥਾ’’ਤਿ ਵਤ੍ਵਾ ਪਟਿਞ੍ਞਂ ਗਣ੍ਹਿਂਸੁ.

ਤਤੋ ਪਟ੍ਠਾਯ ਅਟ੍ਠਸੁਪਿ ਜਨੇਸੁ ਏਕੇਕੋ ਵਾਰੇਨੇਵ ਫਲਾਫਲਂ ਆਹਰਤਿ. ਸੇਸਾ ਅਤ੍ਤਨੋ ਅਤ੍ਤਨੋ ਪਣ੍ਣਸਾਲਾਯਮੇਵ ਹੋਨ੍ਤਿ, ਅਕਾਰਣੇਨ ਏਕਤੋ ਭਵਿਤੁਂ ਨ ਲਭਨ੍ਤਿ. ਵਾਰਪ੍ਪਤ੍ਤੋ ਫਲਾਫਲਂ ਆਹਰਿਤ੍ਵਾ ਏਕੋ ਮਾਲ਼ਕੋ ਅਤ੍ਥਿ, ਤਤ੍ਥ ਪਾਸਾਣਫਲਕੇ ਏਕਾਦਸ ਕੋਟ੍ਠਾਸੇ ਕਤ੍ਵਾ ਘਣ੍ਡਿਸਞ੍ਞਂ ਕਤ੍ਵਾ ਅਤ੍ਤਨੋ ਕੋਟ੍ਠਾਸਂ ਆਦਾਯ ਵਸਨਟ੍ਠਾਨਂ ਪਵਿਸਤਿ. ਸੇਸਾ ਘਣ੍ਡਿਸਞ੍ਞਾਯ ਨਿਕ੍ਖਮਿਤ੍ਵਾ ਲੋਲੁਪ੍ਪਂ ਅਕਤ੍ਵਾ ਗਾਰਵਪਰਿਹਾਰੇਨ ਗਨ੍ਤ੍ਵਾ ਅਤ੍ਤਨੋ ਪਾਪੁਣਨਕੋਟ੍ਠਾਸਂ ਆਦਾਯ ਵਸਨਟ੍ਠਾਨਂ ਗਨ੍ਤ੍ਵਾ ਪਰਿਭੁਞ੍ਜਿਤ੍ਵਾ ਸਮਣਧਮ੍ਮਂ ਕਰੋਨ੍ਤਿ. ਤੇ ਅਪਰਭਾਗੇ ਭਿਸਾਨਿ ਆਹਰਿਤ੍ਵਾ ਖਾਦਨ੍ਤਾ ਤਤ੍ਤਤਪਾ ਘੋਰਤਪਾ ਪਰਮਾਜਿਤਿਨ੍ਦ੍ਰਿਯਾ ਕਸਿਣਪਰਿਕਮ੍ਮਂ ਕਰੋਨ੍ਤਾ ਵਿਹਰਿਂਸੁ. ਅਥ ਤੇਸਂ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਕਮ੍ਪਿ. ਸਕ੍ਕੋਪਿ ਆਵਜ੍ਜੇਨ੍ਤੋ ਤਂ ਕਾਰਣਂ ਞਤ੍ਵਾ ‘‘ਕਾਮਾਧਿਮੁਤ੍ਤਾ ਨੁ ਖੋ ਇਮੇ ਇਸਯੋ, ਨੋ’’ਤਿ ਆਸਙ੍ਕਂ ਕਰੋਤਿਯੇਵ. ਸੋ ‘‘ਇਮੇ ਤਾਵ ਇਸਯੋ ਪਰਿਗ੍ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਆਨੁਭਾਵੇਨ ਮਹਾਸਤ੍ਤਸ੍ਸ ਕੋਟ੍ਠਾਸਂ ਤਯੋ ਦਿਵਸੇ ਅਨ੍ਤਰਧਾਪੇਸਿ. ਸੋ ਪਠਮਦਿਵਸੇ ਕੋਟ੍ਠਾਸਂ ਅਦਿਸ੍ਵਾ ‘‘ਮਮ ਕੋਟ੍ਠਾਸਂ ਪਮੁਟ੍ਠੋ ਭਵਿਸ੍ਸਤੀ’’ਤਿ ਚਿਨ੍ਤੇਸਿ, ਦੁਤਿਯਦਿਵਸੇ ‘‘ਮਮ ਦੋਸੇਨ ਭਵਿਤਬ੍ਬਂ, ਪਣਾਮਨਵਸੇਨ ਮਮ ਕੋਟ੍ਠਾਸਂ ਨ ਠਪੇਸਿ ਮਞ੍ਞੇ’’ਤਿ ਚਿਨ੍ਤੇਸਿ, ਤਤਿਯਦਿਵਸੇ ‘‘ਕੇਨ ਨੁ ਖੋ ਕਾਰਣੇਨ ਮਯ੍ਹਂ ਕੋਟ੍ਠਾਸਂ ਨ ਠਪੇਨ੍ਤਿ, ਸਚੇ ਮੇ ਦੋਸੋ ਅਤ੍ਥਿ, ਖਮਾਪੇਸ੍ਸਾਮੀ’’ਤਿ ਸਾਯਨ੍ਹਸਮਯੇ ਘਣ੍ਡਿਸਞ੍ਞਂ ਅਦਾਸਿ.

ਸਬ੍ਬੇ ਸਨ੍ਨਿਪਤਿਤ੍ਵਾ ‘‘ਕੇਨ ਘਣ੍ਡਿਸਞ੍ਞਾ ਦਿਨ੍ਨਾ’’ਤਿ ਆਹਂਸੁ. ‘‘ਮਯਾ ਤਾਤਾ’’ਤਿ. ‘‘ਕਿਂਕਾਰਣਾ ਆਚਰਿਯਾ’’ਤਿ? ‘‘ਤਾਤਾ ਤਤਿਯਦਿਵਸੇ ਕੇਨ ਫਲਾਫਲਂ ਆਭਤ’’ਨ੍ਤਿ? ਤੇਸੁ ਏਕੋ ਉਟ੍ਠਾਯ ‘‘ਮਯਾ ਆਚਰਿਯਾ’’ਤਿ ਵਨ੍ਦਿਤ੍ਵਾ ਅਟ੍ਠਾਸਿ. ਕੋਟ੍ਠਾਸੇ ਕਰੋਨ੍ਤੇਨ ਤੇ ਮਯ੍ਹਂ ਕੋਟ੍ਠਾਸੋ ਕਤੋਤਿ. ‘‘ਆਮ, ਆਚਰਿਯ, ਜੇਟ੍ਠਕਕੋਟ੍ਠਾਸੋ ਮੇ ਕਤੋ’’ਤਿ. ‘‘ਹਿਯ੍ਯੋ ਕੇਨਾਭਤ’’ਨ੍ਤਿ? ‘‘ਮਯਾ’’ਤਿ ਅਪਰੋ ਉਟ੍ਠਾਯ ਵਨ੍ਦਿਤ੍ਵਾ ਅਟ੍ਠਾਸਿ. ਕੋਟ੍ਠਾਸਂ ਕਰੋਨ੍ਤੋ ਮਂ ਅਨੁਸ੍ਸਰੀਤਿ. ‘‘ਤੁਮ੍ਹਾਕਂ ਮੇ ਜੇਟ੍ਠਕਕੋਟ੍ਠਾਸੋ ਠਪਿਤੋ’’ਤਿ. ‘‘ਅਜ੍ਜ ਕੇਨਾਭਤ’’ਨ੍ਤਿ. ‘‘ਮਯਾ’’ਤਿ ਅਪਰੋ ਉਟ੍ਠਾਯ ਵਨ੍ਦਿਤ੍ਵਾ ਅਟ੍ਠਾਸਿ. ਕੋਟ੍ਠਾਸਂ ਕਰੋਨ੍ਤੋ ਮਂ ਅਨੁਸ੍ਸਰੀਤਿ. ‘‘ਤੁਮ੍ਹਾਕਂ ਮੇ ਜੇਟ੍ਠਕਕੋਟ੍ਠਾਸੋ ਕਤੋ’’ਤਿ. ‘‘ਤਾਤਾ, ਅਜ੍ਜ ਮਯ੍ਹਂ ਕੋਟ੍ਠਾਸਂ ਅਲਭਨ੍ਤਸ੍ਸ ਤਤਿਯੋ ਦਿਵਸੋ, ਪਠਮਦਿਵਸੇ ਕੋਟ੍ਠਾਸਂ ਅਦਿਸ੍ਵਾ ‘ਕੋਟ੍ਠਾਸਂ ਕਰੋਨ੍ਤੋ ਮਂ ਪਮੁਟ੍ਠੋ ਭਵਿਸ੍ਸਤੀ’ਤਿ ਚਿਨ੍ਤੇਸਿਂ, ਦੁਤਿਯਦਿਵਸੇ ‘‘ਮਮ ਕੋਚਿ ਦੋਸੋ ਭਵਿਸ੍ਸਤੀ’’ਤਿ ਚਿਨ੍ਤੇਸਿਂ, ਅਜ੍ਜ ਪਨ ‘‘ਸਚੇ ਮੇ ਦੋਸੋ ਅਤ੍ਥਿ, ਖਮਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਘਣ੍ਡਿਸਞ੍ਞਾਯ ਤੁਮ੍ਹੇ ਸਨ੍ਨਿਪਾਤੇਸਿਂ. ਏਤੇ ਭਿਸਕੋਟ੍ਠਾਸੇ ਤੁਮ੍ਹੇ ‘‘ਕਰਿਮ੍ਹਾ’’ਤਿ ਵਦਥ, ਅਹਂ ਨ ਲਭਾਮਿ, ਏਤੇਸਂ ਥੇਨੇਤ੍ਵਾ ਖਾਦਕਂ ਞਾਤੁਂ ਵਟ੍ਟਤਿ, ਕਾਮੇ ਪਹਾਯ ਪਬ੍ਬਜਿਤਾਨਂ ਭਿਸਮਤ੍ਤਂ ਥੇਨਨਂ ਨਾਮ ਅਪ੍ਪਤਿਰੂਪਨ੍ਤਿ. ਤੇ ਤਸ੍ਸ ਕਥਂ ਸੁਤ੍ਵਾ ‘‘ਅਹੋ ਸਾਹਸਿਕਕਮ੍ਮ’’ਨ੍ਤਿ ਸਬ੍ਬੇਵ ਉਬ੍ਬੇਗਪ੍ਪਤ੍ਤਾ ਅਹੇਸੁਂ.

ਤਸ੍ਮਿਂ ਅਸ੍ਸਮਪਦੇ ਵਨਜੇਟ੍ਠਕਰੁਕ੍ਖੇ ਨਿਬ੍ਬਤ੍ਤਦੇਵਤਾਪਿ ਓਤਰਿਤ੍ਵਾ ਆਗਨ੍ਤ੍ਵਾ ਤੇਸਂਯੇਵ ਸਨ੍ਤਿਕੇ ਨਿਸੀਦਿ. ਆਨੇਞ੍ਜਕਰਣਂ ਕਾਰਿਯਮਾਨੋ ਦੁਕ੍ਖਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਆਲ਼ਾਨਂ ਭਿਨ੍ਦਿਤ੍ਵਾ ਪਲਾਯਿਤ੍ਵਾ ਅਰਞ੍ਞਂ ਪਵਿਟ੍ਠੋ ਏਕੋ ਵਾਰਣੋ ਕਾਲੇਨ ਕਾਲਂ ਇਸਿਗਣਂ ਵਨ੍ਦਤਿ, ਸੋਪਿ ਆਗਨ੍ਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਸਪ੍ਪਕੀਲ਼ਾਪਨਕੋ ਏਕੋ ਵਾਨਰੋ ਅਹਿਤੁਣ੍ਡਿਕਸ੍ਸ ਹਤ੍ਥਤੋ ਮੁਚ੍ਚਿਤ੍ਵਾ ਪਲਾਯਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਤਤ੍ਥੇਵ ਅਸ੍ਸਮੇ ਵਸਤਿ. ਸੋਪਿ ਤਂ ਦਿਵਸਂ ਇਸਿਗਣਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਕ੍ਕੋ ‘‘ਇਸਿਗਣਂ ਪਰਿਗ੍ਗਣ੍ਹਿਸ੍ਸਾਮੀ’’ਤਿ ਤੇਸਂ ਸਨ੍ਤਿਕੇ ਅਦਿਸ੍ਸਮਾਨਕਾਯੋ ਅਟ੍ਠਾਸਿ. ਤਸ੍ਮਿਂ ਖਣੇਵ ਬੋਧਿਸਤ੍ਤਸ੍ਸ ਕਨਿਟ੍ਠੋ ਉਪਕਞ੍ਚਨਤਾਪਸੋ ਉਟ੍ਠਾਯਾਸਨਾ ਬੋਧਿਸਤ੍ਤਂ ਵਨ੍ਦਿਤ੍ਵਾ ਸੇਸਾਨਂ ਅਪਚਿਤਿਂ ਦਸ੍ਸੇਤ੍ਵਾ ‘‘ਆਚਰਿਯ, ਅਹਂ ਅਞ੍ਞੇ ਅਪਟ੍ਠਪੇਤ੍ਵਾ ਅਤ੍ਤਾਨਞ੍ਞੇਵ ਸੋਧੇਤੁਂ ਲਭਾਮੀ’’ਤਿ ਪੁਚ੍ਛਿ. ‘‘ਆਮ, ਲਭਸੀ’’ਤਿ. ਸੋ ਇਸਿਗਣਮਜ੍ਝੇ ਠਤ੍ਵਾ ‘‘ਸਚੇ ਤੇ ਮਯਾ ਭਿਸਾਨਿ ਖਾਦਿਤਾਨਿ, ਏਵਰੂਪੋ ਨਾਮ ਹੋਤੂ’’ਤਿ ਸਪਥਂ ਕਰੋਨ੍ਤੋ ਪਠਮਂ ਗਾਥਮਾਹ –

੭੮.

‘‘ਅਸ੍ਸਂ ਗਵਂ ਰਜਤਂ ਜਾਤਰੂਪਂ, ਭਰਿਯਞ੍ਚ ਸੋ ਇਧ ਲਭਤਂ ਮਨਾਪਂ;

ਪੁਤ੍ਤੇਹਿ ਦਾਰੇਹਿ ਸਮਙ੍ਗਿ ਹੋਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸੀ’’ਤਿ.

ਤਤ੍ਥ ‘‘ਅਸ੍ਸਂ ਗਵ’’ਨ੍ਤਿ ਇਦਂ ‘‘ਸੋ ‘ਯਤ੍ਤਕਾਨਿ ਪਿਯਵਤ੍ਥੂਨਿ ਹੋਨ੍ਤਿ, ਤੇਹਿ ਵਿਪ੍ਪਯੋਗੇ ਤਤ੍ਤਕਾਨਿ ਸੋਕਦੁਕ੍ਖਾਨਿ ਉਪ੍ਪਜ੍ਜਨ੍ਤੀ’ਤਿ ਵਤ੍ਥੁਕਾਮੇ ਗਰਹਨ੍ਤੋ ਅਭਾਸੀ’’ਤਿ ਵੇਦਿਤਬ੍ਬਂ.

ਤਂ ਸੁਤ੍ਵਾ ਇਸਿਗਣੋ ‘‘ਮਾਰਿਸ, ਮਾ ਏਵਂ ਕਥੇਥ, ਅਤਿਭਾਰਿਯੋ ਤੇ ਸਪਥੋ’’ਤਿ ਕਣ੍ਣੇ ਪਿਦਹਿ. ਬੋਧਿਸਤ੍ਤੋਪਿ ਨਂ ‘‘ਤਾਤ, ਅਤਿਭਾਰਿਯੋ ਤੇ ਸਪਥੋ, ਨ ਤ੍ਵਂ ਖਾਦਸਿ, ਤਵ ਪਤ੍ਤਾਸਨੇ ਨਿਸੀਦਾ’’ਤਿ ਆਹ. ਤਸ੍ਮਿਂ ਪਠਮਂ ਸਪਥਂ ਕਤ੍ਵਾ ਨਿਸਿਨ੍ਨੇ ਦੁਤਿਯੋਪਿ ਭਾਤਾ ਸਹਸਾ ਉਟ੍ਠਾਯ ਮਹਾਸਤ੍ਤਂ ਵਨ੍ਦਿਤ੍ਵਾ ਸਪਥੇਨ ਅਤ੍ਤਾਨਂ ਸੋਧੇਨ੍ਤੋ ਦੁਤਿਯਂ ਗਾਥਮਾਹ –

੭੯.

‘‘ਮਾਲਞ੍ਚ ਸੋ ਕਾਸਿਕਚਨ੍ਦਨਞ੍ਚ, ਧਾਰੇਤੁ ਪੁਤ੍ਤਸ੍ਸ ਬਹੂ ਭਵਨ੍ਤੁ;

ਕਾਮੇਸੁ ਤਿਬ੍ਬਂ ਕੁਰੁਤਂ ਅਪੇਕ੍ਖਂ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸੀ’’ਤਿ.

ਤਤ੍ਥ ਤਿਬ੍ਬਨ੍ਤਿ ਵਤ੍ਥੁਕਾਮਕਿਲੇਸਕਾਮੇਸੁ ਬਹਲਂ ਅਪੇਕ੍ਖਂ ਕਰੋਤੂਤਿ. ਇਦਂ ਸੋ ‘‘ਯਸ੍ਸੇਤੇਸੁ ਤਿਬ੍ਬਾ ਅਪੇਕ੍ਖਾ ਹੋਨ੍ਤਿ, ਸੋ ਤੇਹਿ ਵਿਪ੍ਪਯੋਗੇ ਮਹਨ੍ਤਂ ਦੁਕ੍ਖਂ ਪਾਪੁਣਾਤੀ’’ਤਿ ਦੁਕ੍ਖਪਟਿਕ੍ਖੇਪਵਸੇਨੇਵ ਆਹ.

ਤਸ੍ਮਿਂ ਨਿਸਿਨ੍ਨੇ ਸੇਸਾਪਿ ਅਤ੍ਤਨੋ ਅਤ੍ਤਨੋ ਅਜ੍ਝਾਸਯਾਨੁਰੂਪੇਨ ਤਂ ਤਂ ਗਾਥਂ ਅਭਾਸਿਂਸੁ –

੮੦.

‘‘ਪਹੂਤਧਞ੍ਞੋ ਕਸਿਮਾ ਯਸਸ੍ਸੀ, ਪੁਤ੍ਤੇ ਗਿਹੀ ਧਨਿਮਾ ਸਬ੍ਬਕਾਮੇ;

ਵਯਂ ਅਪਸ੍ਸਂ ਘਰਮਾਵਸਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

੮੧.

‘‘ਸੋ ਖਤ੍ਤਿਯੋ ਹੋਤੁ ਪਸਯ੍ਹਕਾਰੀ, ਰਾਜਾਭਿਰਾਜਾ ਬਲਵਾ ਯਸਸ੍ਸੀ;

ਸ ਚਾਤੁਰਨ੍ਤਂ ਮਹਿਮਾਵਸਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

੮੨.

‘‘ਸੋ ਬ੍ਰਾਹ੍ਮਣੋ ਹੋਤੁ ਅਵੀਤਰਾਗੋ, ਮੁਹੁਤ੍ਤਨਕ੍ਖਤ੍ਤਪਥੇਸੁ ਯੁਤ੍ਤੋ;

ਪੂਜੇਤੁ ਨਂ ਰਟ੍ਠਪਤੀ ਯਸਸ੍ਸੀ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

੮੩.

‘‘ਅਜ੍ਝਾਯਕਂ ਸਬ੍ਬਸਮਨ੍ਤਵੇਦਂ, ਤਪਸ੍ਸਿਨਂ ਮਞ੍ਞਤੁ ਸਬ੍ਬਲੋਕੋ;

ਪੂਜੇਨ੍ਤੁ ਨਂ ਜਾਨਪਦਾ ਸਮੇਚ੍ਚ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

੮੪.

‘‘ਚਤੁਸ੍ਸਦਂ ਗਾਮਵਰਂ ਸਮਿਦ੍ਧਂ, ਦਿਨ੍ਨਞ੍ਹਿ ਸੋ ਭੁਞ੍ਜਤੁ ਵਾਸਵੇਨ;

ਅਵੀਤਰਾਗੋ ਮਰਣਂ ਉਪੇਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

੮੫.

‘‘ਸੋ ਗਾਮਣੀ ਹੋਤੁ ਸਹਾਯਮਜ੍ਝੇ, ਨਚ੍ਚੇਹਿ ਗੀਤੇਹਿ ਪਮੋਦਮਾਨੋ;

ਸੋ ਰਾਜਤੋ ਬ੍ਯਸਨ ਮਾਲਤ੍ਥ ਕਿਞ੍ਚਿ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

੮੬.

‘‘ਯਂ ਏਕਰਾਜਾ ਪਥਵਿਂ ਵਿਜੇਤ੍ਵਾ, ਇਤ੍ਥੀਸਹਸ੍ਸਾਨ ਠਪੇਤੁ ਅਗ੍ਗਂ;

ਸੀਮਨ੍ਤਿਨੀਨਂ ਪਵਰਾ ਭਵਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯਾ ਅਹਾਸਿ.

੮੭.

‘‘ਇਸੀਨਞ੍ਹਿ ਸਾ ਸਬ੍ਬਸਮਾਗਤਾਨਂ, ਭੁਞ੍ਜੇਯ੍ਯ ਸਾਦੁਂ ਅਵਿਕਮ੍ਪਮਾਨਾ;

ਚਰਾਤੁ ਲਾਭੇਨ ਵਿਕਤ੍ਥਮਾਨਾ, ਭਿਸਾਨਿ ਤੇ ਬ੍ਰਾਹ੍ਮਣ ਯਾ ਅਹਾਸਿ.

੮੮.

‘‘ਆਵਾਸਿਕੋ ਹੋਤੁ ਮਹਾਵਿਹਾਰੇ, ਨਵਕਮ੍ਮਿਕੋ ਹੋਤੁ ਗਜਙ੍ਗਲਾਯਂ;

ਆਲੋਕਸਨ੍ਧਿਂ ਦਿਵਸਂ ਕਰੋਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

੮੯.

‘‘ਸੋ ਬਜ੍ਝਤੂ ਪਾਸਸਤੇਹਿ ਛਬ੍ਭਿ, ਰਮ੍ਮਾ ਵਨਾ ਨਿਯ੍ਯਤੁ ਰਾਜਧਾਨਿਂ;

ਤੁਤ੍ਤੇਹਿ ਸੋ ਹਞ੍ਞਤੁ ਪਾਚਨੇਹਿ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

੯੦.

‘‘ਅਲਕ੍ਕਮਾਲੀ ਤਿਪੁਕਣ੍ਣਵਿਦ੍ਧੋ, ਲਟ੍ਠੀਹਤੋ ਸਪ੍ਪਮੁਖਂ ਉਪੇਤੁ;

ਸਕਚ੍ਛਬਨ੍ਧੋ ਵਿਸਿਖਂ ਚਰਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸੀ’’ਤਿ.

ਤਤ੍ਥ ਤਤਿਯੇਨ ਵੁਤ੍ਤਗਾਥਾਯ ਕਸਿਮਾਤਿ ਸਮ੍ਪਨ੍ਨਕਸਿਕਮ੍ਮੋ. ਪੁਤ੍ਤੇ ਗਿਹੀ ਧਨਿਮਾ ਸਬ੍ਬਕਾਮੇਤਿ ਪੁਤ੍ਤੇ ਲਭਤੁ, ਗਿਹੀ ਹੋਤੁ, ਸਤ੍ਤਵਿਧੇਨ ਰਤਨਧਨੇਨ ਧਨਿਮਾ ਹੋਤੁ, ਰੂਪਾਦਿਭੇਦੇ ਸਬ੍ਬਕਾਮੇ ਲਭਤੁ. ਵਯਂ ਅਪਸ੍ਸਨ੍ਤਿ ਮਹਲ੍ਲਕਕਾਲੇ ਪਬ੍ਬਜ੍ਜਾਨੁਰੂਪਮ੍ਪਿ ਅਤ੍ਤਨੋ ਵਯਂ ਅਪਸ੍ਸਨ੍ਤੋ ਪਞ੍ਚਕਾਮਗੁਣਸਮਿਦ੍ਧਂ ਘਰਮੇਵ ਆਵਸਤੂਤਿ. ਇਦਂ ਸੋ ‘‘ਪਞ੍ਚਕਾਮਗੁਣਗਿਦ੍ਧੋ ਕਾਮਗੁਣਵਿਪ੍ਪਯੋਗੇਨ ਮਹਾਵਿਨਾਸਂ ਪਾਪੁਣਾਤੀ’’ਤਿ ਦਸ੍ਸੇਤੁਂ ਕਥੇਸਿ.

ਚਤੁਤ੍ਥੇਨ ਵੁਤ੍ਤਗਾਥਾਯ ਰਾਜਾਭਿਰਾਜਾਤਿ ਰਾਜੂਨਂ ਅਨ੍ਤਰੇ ਅਭਿਰਾਜਾਤਿ. ਇਦਂ ਸੋ ‘‘ਇਸ੍ਸਰਾਨਂ ਨਾਮ ਇਸ੍ਸਰਿਯੇ ਪਰਿਗਲਿਤੇ ਮਹਨ੍ਤਂ ਦੁਕ੍ਖਂ ਉਪ੍ਪਜ੍ਜਤੀ’’ਤਿ ਰਜ੍ਜੇ ਦੋਸਂ ਦਸ੍ਸੇਨ੍ਤੋ ਕਥੇਸਿ. ਪਞ੍ਚਮੇਨ ਵੁਤ੍ਤਗਾਥਾਯ ਅਵੀਤਰਾਗੋਤਿ ਪੁਰੋਹਿਤਟ੍ਠਾਨਤਣ੍ਹਾਯ ਸਤਣ੍ਹੋਤਿ. ਇਦਂ ਸੋ ‘‘ਪੁਰੋਹਿਤਸ੍ਸ ਪੁਰੋਹਿਤਟ੍ਠਾਨੇ ਪਰਿਗਲਿਤੇ ਮਹਨ੍ਤਂ ਦੋਮਨਸ੍ਸਂ ਉਪ੍ਪਜ੍ਜਤੀ’’ਤਿ ਦਸ੍ਸੇਤੁਂ ਕਥੇਸਿ. ਛਟ੍ਠੇਨ ਵੁਤ੍ਤਗਾਥਾਯ ਤਪਸ੍ਸਿਨਨ੍ਤਿ ਤਪਸੀਲਸਮ੍ਪਨ੍ਨੋਤਿ ਤਂ ਮਞ੍ਞਤੁ. ਇਦਂ ਸੋ ‘‘ਲਾਭਸਕ੍ਕਾਰਾਪਗਮੇਨ ਮਹਨ੍ਤਂ ਦੋਮਨਸ੍ਸਂ ਉਪ੍ਪਜ੍ਜਤੀ’’ਤਿ ਲਾਭਸਕ੍ਕਾਰਗਰਹਵਸੇਨ ਕਥੇਸਿ.

ਸਹਾਯਤਾਪਸੇਨ ਵੁਤ੍ਤਗਾਥਾਯ ਚਤੁਸ੍ਸਦਨ੍ਤਿ ਆਕਿਣ੍ਣਮਨੁਸ੍ਸਤਾਯ ਮਨੁਸ੍ਸੇਹਿ, ਪਹੂਤਧਞ੍ਞਤਾਯ ਧਞ੍ਞੇਨ, ਸੁਲਭਦਾਰੁਤਾਯ ਦਾਰੂਹਿ, ਸਮ੍ਪਨ੍ਨੋਦਕਤਾਯ ਉਦਕੇਨਾਤਿ ਚਤੂਹਿ ਉਸ੍ਸਨ੍ਨਂ, ਚਤੁਸ੍ਸਦਸਮਨ੍ਨਾਗਤਨ੍ਤਿ ਅਤ੍ਥੋ. ਵਾਸਵੇਨਾਤਿ ਵਾਸਵੇਨ ਦਿਨ੍ਨਂ ਵਿਯ ਅਚਲਂ, ਵਾਸਵਤੋ ਲਦ੍ਧਵਰਾਨੁਭਾਵੇਨ ਏਕਂ ਰਾਜਾਨਂ ਆਰਾਧੇਤ੍ਵਾ ਤੇਨ ਦਿਨ੍ਨਨ੍ਤਿਪਿ ਅਤ੍ਥੋ. ਅਵੀਤਰਾਗੋਤਿ ਕਦ੍ਦਮੇ ਸੂਕਰੋ ਵਿਯ ਕਾਮਪਙ੍ਕੇ ਨਿਮੁਗ੍ਗੋਵ ਹੁਤ੍ਵਾ. ਇਤਿ ਸੋਪਿ ਕਾਮਾਨਂ ਆਦੀਨਵਂ ਕਥੇਨ੍ਤੋ ਏਵਮਾਹ.

ਦਾਸੇਨ ਵੁਤ੍ਤਗਾਥਾਯ ਗਾਮਣੀਤਿ ਗਾਮਜੇਟ੍ਠਕੋ. ਅਯਮ੍ਪਿ ਕਾਮੇ ਗਰਹਨ੍ਤੋਯੇਵ ਏਵਮਾਹ. ਕਞ੍ਚਨਦੇਵਿਯਾ ਵੁਤ੍ਤਗਾਥਾਯ ਯਨ੍ਤਿ ਯਂ ਇਤ੍ਥਿਨ੍ਤਿ ਅਤ੍ਥੋ. ਏਕਰਾਜਾਤਿ ਅਗ੍ਗਰਾਜਾ. ਇਤ੍ਥਿਸਹਸ੍ਸਾਨਨ੍ਤਿ ਵਚਨਮਟ੍ਠਤਾਯ ਵੁਤ੍ਤਂ, ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਅਗ੍ਗਟ੍ਠਾਨੇ ਠਪੇਤੂਤਿ ਅਤ੍ਥੋ. ਸੀਮਨ੍ਤਿਨੀਨਨ੍ਤਿ ਸੀਮਨ੍ਤਧਰਾਨਂ ਇਤ੍ਥੀਨਨ੍ਤਿ ਅਤ੍ਥੋ. ਇਤਿ ਸਾ ਇਤ੍ਥਿਭਾਵੇ ਠਤ੍ਵਾਪਿ ਦੁਗ੍ਗਨ੍ਧਗੂਥਰਾਸਿਂ ਵਿਯ ਕਾਮੇ ਗਰਹਨ੍ਤੀਯੇਵ ਏਵਮਾਹ. ਦਾਸਿਯਾ ਵੁਤ੍ਤਗਾਥਾਯ ਸਬ੍ਬਸਮਾਗਤਾਨਨ੍ਤਿ ਸਬ੍ਬੇਸਂ ਸਨ੍ਨਿਪਤਿਤਾਨਂ ਮਜ੍ਝੇ ਨਿਸੀਦਿਤ੍ਵਾ ਅਵਿਕਮ੍ਪਮਾਨਾ ਅਨੋਸਕ੍ਕਮਾਨਾ ਸਾਦੁਰਸਂ ਭੁਞ੍ਜਤੂਤਿ ਅਤ੍ਥੋ. ਦਾਸੀਨਂ ਕਿਰ ਸਾਮਿਕਸ੍ਸ ਸਨ੍ਤਿਕੇ ਨਿਸੀਦਿਤ੍ਵਾ ਭੁਞ੍ਜਨਂ ਨਾਮ ਅਪ੍ਪਿਯਂ. ਇਤਿ ਸਾ ਅਤ੍ਤਨੋ ਅਪ੍ਪਿਯਤਾਯ ਏਵਮਾਹ. ਚਰਾਤੂਤਿ ਚਰਤੁ. ਲਾਭੇਨ ਵਿਕਤ੍ਥਮਾਨਾਤਿ ਲਾਭਹੇਤੁ ਕੁਹਨਕਮ੍ਮਂ ਕਰੋਨ੍ਤੀ ਲਾਭਸਕ੍ਕਾਰਂ ਉਪ੍ਪਾਦੇਨ੍ਤੀ ਚਰਤੂਤਿ ਅਤ੍ਥੋ. ਇਮਿਨਾ ਸਾ ਦਾਸਿਭਾਵੇ ਠਿਤਾਪਿ ਕਿਲੇਸਕਾਮਵਤ੍ਥੁਕਾਮੇ ਗਰਹਤਿ.

ਦੇਵਤਾਯ ਵੁਤ੍ਤਗਾਥਾਯ ਆਵਾਸਿਕੋਤਿ ਆਵਾਸਜਗ੍ਗਨਕੋ. ਗਜਙ੍ਗਲਾਯਨ੍ਤਿ ਏਵਂਨਾਮਕੇ ਨਗਰੇ. ਤਤ੍ਥ ਕਿਰ ਦਬ੍ਬਸਮ੍ਭਾਰਾ ਸੁਲਭਾ. ਆਲੋਕਸਨ੍ਧਿਂ ਦਿਵਸਨ੍ਤਿ ਏਕਦਿਵਸੇਨੇਵ ਵਾਤਪਾਨਂ ਕਰੋਤੁ. ਸੋ ਕਿਰ ਦੇਵਪੁਤ੍ਤੋ ਕਸ੍ਸਪਬੁਦ੍ਧਕਾਲੇ ਗਜਙ੍ਗਲਨਗਰਂ ਨਿਸ੍ਸਾਯ ਯੋਜਨਿਕੇ ਜਿਣ੍ਣਮਹਾਵਿਹਾਰੇ ਆਵਾਸਿਕਸਙ੍ਘਤ੍ਥੇਰੋ ਹੁਤ੍ਵਾ ਜਿਣ੍ਣਵਿਹਾਰੇ ਨਵਕਮ੍ਮਂ ਕਰੋਨ੍ਤੋਯੇਵ ਮਹਾਦੁਕ੍ਖਂ ਅਨੁਭਵਿ. ਤਸ੍ਮਾ ਤਦੇਵ ਦੁਕ੍ਖਂ ਆਰਬ੍ਭ ਏਵਮਾਹ. ਹਤ੍ਥਿਨਾ ਵੁਤ੍ਤਗਾਥਾਯ ਪਾਸਸਤੇਹੀਤਿ ਬਹੂਹਿ ਪਾਸੇਹਿ. ਛਬ੍ਭੀਤਿ ਚਤੂਸੁ ਪਾਦੇਸੁ ਗੀਵਾਯ ਕਟਿਭਾਗੇ ਚਾਤਿ ਛਸੁ ਠਾਨੇਸੁ. ਤੁਤ੍ਤੇਹੀਤਿ ਦ੍ਵਿਕਣ੍ਡਕਾਹਿ ਦੀਘਲਟ੍ਠੀਹਿ. ਪਾਚਨੇਹੀਤਿ ਦਸਪਾਚਨੇਹਿ ਅਙ੍ਕੁਸੇਹਿ ਵਾ. ਸੋ ਕਿਰ ਅਤ੍ਤਨੋ ਅਨੁਭੂਤਦੁਕ੍ਖਞ੍ਞੇਵ ਆਰਬ੍ਭ ਏਵਮਾਹ.

ਵਾਨਰੇਨ ਵੁਤ੍ਤਗਾਥਾਯ ਅਲਕ੍ਕਮਾਲੀਤਿ ਅਹਿਤੁਣ੍ਡਿਕੇਨ ਕਣ੍ਠੇ ਪਰਿਕ੍ਖਿਪਿਤ੍ਵਾ ਠਪਿਤਾਯ ਅਲਕ੍ਕਮਾਲਾਯ ਸਮਨ੍ਨਾਗਤੋ. ਤਿਪੁਕਣ੍ਣਵਿਦ੍ਧੋਤਿ ਤਿਪੁਪਿਲ਼ਨ੍ਧਨੇਨ ਪਿਲ਼ਨ੍ਧਕਣ੍ਣੋ. ਲਟ੍ਠੀਹਤੋਤਿ ਸਪ੍ਪਕੀਲ਼ਂ ਸਿਕ੍ਖਾਪਯਮਾਨੋ ਲਟ੍ਠਿਯਾ ਹਤੋ ਹੁਤ੍ਵਾ. ਏਸੋਪਿ ਅਹਿਤੁਣ੍ਡਿਕਸ੍ਸ ਹਤ੍ਥੇ ਅਤ੍ਤਨੋ ਅਨੁਭੂਤਦੁਕ੍ਖਮੇਵ ਸਨ੍ਧਾਯ ਏਵਮਾਹ.

ਏਵਂ ਤੇਹਿ ਤੇਰਸਹਿ ਜਨੇਹਿ ਸਪਥੇ ਕਤੇ ਮਹਾਸਤ੍ਤੋ ਚਿਨ੍ਤੇਸਿ ‘‘ਕਦਾਚਿ ਇਮੇ ‘ਅਯਂ ਅਨਟ੍ਠਮੇਵ ਨਟ੍ਠਨ੍ਤਿ ਕਥੇਤੀ’ਤਿ ਮਯਿ ਆਸਙ੍ਕਂ ਕਰੇਯ੍ਯੁਂ, ਅਹਮ੍ਪਿ ਸਪਥਂ ਕਰੋਮੀ’’ਤਿ. ਅਥ ਨਂ ਕਰੋਨ੍ਤੋ ਚੁਦ੍ਦਸਮਂ ਗਾਥਮਾਹ –

੯੧.

‘‘ਯੋ ਵੇ ਅਨਟ੍ਠਂਵ ਨਟ੍ਠਨ੍ਤਿ ਚਾਹ, ਕਾਮੇਵ ਸੋ ਲਭਤਂ ਭੁਞ੍ਜਤਞ੍ਚ;

ਅਗਾਰਮਜ੍ਝੇ ਮਰਣਂ ਉਪੇਤੁ, ਯੋ ਵਾ ਭੋਨ੍ਤੋ ਸਙ੍ਕਤਿ ਕਞ੍ਚਿਦੇਵਾ’’ਤਿ.

ਤਤ੍ਥ ਭੋਨ੍ਤੋਤਿ ਆਲਪਨਂ. ਇਦਂ ਵੁਤ੍ਤਂ ਹੋਤਿ – ਭਵਨ੍ਤੋ ਯੋ ਅਨਟ੍ਠੇ ਕੋਟ੍ਠਾਸੇ ‘‘ਨਟ੍ਠਂ ਮੇ’’ਤਿ ਵਦਤਿ, ਯੋ ਵਾ ਤੁਮ੍ਹੇਸੁ ਕਞ੍ਚਿ ਆਸਙ੍ਕਤਿ, ਸੋ ਪਞ੍ਚ ਕਾਮਗੁਣੇ ਲਭਤੁ ਚੇਵ ਭੁਞ੍ਜਤੁ ਚ, ਰਮਣੀਯਮੇਵ ਪਬ੍ਬਜ੍ਜਂ ਅਲਭਿਤ੍ਵਾ ਅਗਾਰਮਜ੍ਝੇਯੇਵ ਮਰਤੂਤਿ.

ਏਵਂ ਇਸੀਹਿ ਸਪਥੇ ਕਤੇ ਸਕ੍ਕੋ ਭਾਯਿਤ੍ਵਾ ‘‘ਅਹਂ ਇਮੇ ਵੀਮਂਸਨ੍ਤੋ ਭਿਸਾਨਿ ਅਨ੍ਤਰਧਾਪੇਸਿਂ. ਇਮੇ ਚ ਛਡ੍ਡਿਤਖੇਲ਼ਪਿਣ੍ਡਂ ਵਿਯ ਕਾਮੇ ਗਰਹਨ੍ਤਾ ਸਪਥਂ ਕਰੋਨ੍ਤਿ, ਕਾਮੇ ਗਰਹਕਾਰਣਂ ਤੇ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦਿਸ੍ਸਮਾਨਰੂਪੋ ਬੋਧਿਸਤ੍ਤਂ ਵਨ੍ਦਿਤ੍ਵਾ ਪੁਚ੍ਛਨ੍ਤੋ ਅਨਨ੍ਤਰਂ ਗਾਥਮਾਹ –

੯੨.

‘‘ਯਦੇਸਮਾਨਾ ਵਿਚਰਨ੍ਤਿ ਲੋਕੇ, ਇਟ੍ਠਞ੍ਚ ਕਨ੍ਤਞ੍ਚ ਬਹੂਨਮੇਤਂ;

ਪਿਯਂ ਮਨੁਞ੍ਞਂ ਚਿਧ ਜੀਵਲੋਕੇ, ਕਸ੍ਮਾ ਇਸਯੋ ਨਪ੍ਪਸਂਸਨ੍ਤਿ ਕਾਮੇ’’ਤਿ.

ਤਤ੍ਥ ਯਦੇਸਮਾਨਾਤਿ ਯਂ ਵਤ੍ਥੁਕਾਮਂ ਕਿਲੇਸਕਾਮਞ੍ਚ ਕਸਿਗੋਰਕ੍ਖਾਦੀਹਿ ਸਮਵਿਸਮਕਮ੍ਮੇਹਿ ਪਰਿਯੇਸਮਾਨਾ ਸਤ੍ਤਾ ਲੋਕੇ ਵਿਚਰਨ੍ਤਿ, ਏਤਂ ਬਹੂਨਂ ਦੇਵਮਨੁਸ੍ਸਾਨਂ ਇਟ੍ਠਞ੍ਚ ਕਨ੍ਤਞ੍ਚ ਪਿਯਞ੍ਚ ਮਨੁਞ੍ਞਞ੍ਚ, ਕਸ੍ਮਾ ਇਸਯੋ ਨਪ੍ਪਸਂਸਨ੍ਤਿ ਕਾਮੇਤਿ ਅਤ੍ਥੋ. ‘‘ਕਾਮੇ’’ਤਿ ਇਮਿਨਾ ਤਂ ਵਤ੍ਥੁਂ ਸਰੂਪਤੋ ਦਸ੍ਸੇਤਿ.

ਅਥਸ੍ਸ ਪਞ੍ਹਂ ਵਿਸ੍ਸਜ੍ਜੇਨ੍ਤੋ ਮਹਾਸਤ੍ਤੋ ਦ੍ਵੇ ਗਾਥਾ ਅਭਾਸਿ –

੯੩.

‘‘ਕਾਮੇਸੁ ਵੇ ਹਞ੍ਞਰੇ ਬਜ੍ਝਰੇ ਚ, ਕਾਮੇਸੁ ਦੁਕ੍ਖਞ੍ਚ ਭਯਞ੍ਚ ਜਾਤਂ;

ਕਾਮੇਸੁ ਭੂਤਾਧਿਪਤੀ ਪਮਤ੍ਤਾ, ਪਾਪਾਨਿ ਕਮ੍ਮਾਨਿ ਕਰੋਨ੍ਤਿ ਮੋਹਾ.

੯੪.

‘‘ਤੇ ਪਾਪਧਮ੍ਮਾ ਪਸਵੇਤ੍ਵ ਪਾਪਂ, ਕਾਯਸ੍ਸ ਭੇਦਾ ਨਿਰਯਂ ਵਜਨ੍ਤਿ;

ਆਦੀਨਵਂ ਕਾਮਗੁਣੇਸੁ ਦਿਸ੍ਵਾ, ਤਸ੍ਮਾ ਇਸਯੋ ਨਪ੍ਪਸਂਸਨ੍ਤਿ ਕਾਮੇ’’ਤਿ.

ਤਤ੍ਥ ਕਾਮੇਸੂਤਿ ਕਾਮਹੇਤੁ, ਕਾਮੇ ਨਿਸ੍ਸਾਯ ਕਾਯਦੁਚ੍ਚਰਿਤਾਦੀਨਿ ਕਰੋਨ੍ਤੀਤਿ ਅਤ੍ਥੋ. ਹਞ੍ਞਰੇਤਿ ਦਣ੍ਡਾਦੀਹਿ ਹਞ੍ਞਨ੍ਤਿ. ਬਜ੍ਝਰੇਤਿ ਰਜ੍ਜੁਬਨ੍ਧਨਾਦੀਹਿ ਬਜ੍ਝਨ੍ਤਿ. ਦੁਕ੍ਖਨ੍ਤਿ ਕਾਯਿਕਚੇਤਸਿਕਂ ਅਸਾਤਂ ਦੁਕ੍ਖਂ. ਭਯਨ੍ਤਿ ਅਤ੍ਤਾਨੁਵਾਦਾਦਿਕਂ ਸਬ੍ਬਮ੍ਪਿ ਭਯਂ. ਭੂਤਾਧਿਪਤੀਤਿ ਸਕ੍ਕਂ ਆਲਪਤਿ. ਆਦੀਨਵਨ੍ਤਿ ਏਵਰੂਪਂ ਦੋਸਂ. ਸੋ ਪਨੇਸ ਆਦੀਨਵੋ ਦੁਕ੍ਖਕ੍ਖਨ੍ਧਾਦੀਹਿ ਸੁਤ੍ਤੇਹਿ (ਮ. ਨਿ. ੧.੧੬੩-੧੮੦) ਦੀਪੇਤਬ੍ਬੋ.

ਸਕ੍ਕੋ ਮਹਾਸਤ੍ਤਸ੍ਸ ਕਥਂ ਸੁਤ੍ਵਾ ਸਂਵਿਗ੍ਗਮਾਨਸੋ ਅਨਨ੍ਤਰਂ ਗਾਥਮਾਹ –

੯੫.

‘‘ਵੀਮਂਸਮਾਨੋ ਇਸਿਨੋ ਭਿਸਾਨਿ, ਤੀਰੇ ਗਹੇਤ੍ਵਾਨ ਥਲੇ ਨਿਧੇਸਿਂ;

ਸੁਦ੍ਧਾ ਅਪਾਪਾ ਇਸਯੋ ਵਸਨ੍ਤਿ, ਏਤਾਨਿ ਤੇ ਬ੍ਰਹ੍ਮਚਾਰੀ ਭਿਸਾਨੀ’’ਤਿ.

ਤਤ੍ਥ ਵਿਮਂਸਮਾਨੋਤਿ ਭਨ੍ਤੇ, ਅਹਂ ‘‘ਇਮੇ ਇਸਯੋ ਕਾਮਾਧਿਮੁਤ੍ਤਾ ਵਾ, ਨੋ ਵਾ’’ਤਿ ਵੀਮਂਸਨ੍ਤੋ. ਇਸਿਨੋਤਿ ਤਵ ਮਹੇਸਿਨੋ ਸਨ੍ਤਕਾਨਿ ਭਿਸਾਨਿ. ਤੀਰੇ ਗਹੇਤ੍ਵਾਨਾਤਿ ਤੀਰੇ ਨਿਕ੍ਖਿਤ੍ਤਾਨਿ ਗਹੇਤ੍ਵਾ ਥਲੇ ਏਕਮਨ੍ਤੇ ਨਿਧੇਸਿਂ. ਸੁਦ੍ਧਾਤਿ ਇਦਾਨਿ ਮਯਾ ਤੁਮ੍ਹਾਕਂ ਸਪਥਕਿਰਿਯਾਯ ਞਾਤਂ ‘‘ਇਮੇ ਇਸਯੋ ਸੁਦ੍ਧਾ ਅਪਾਪਾ ਹੁਤ੍ਵਾ ਵਸਨ੍ਤੀ’’ਤਿ.

ਤਂ ਸੁਤ੍ਵਾ ਬੋਧਿਸਤ੍ਤੋ ਗਾਥਮਾਹ –

੯੬.

‘‘ਨ ਤੇ ਨਟਾ ਨੋ ਪਨ ਕੀਲ਼ਨੇਯ੍ਯਾ, ਨ ਬਨ੍ਧਵਾ ਨੋ ਪਨ ਤੇ ਸਹਾਯਾ;

ਕਿਸ੍ਮਿਂ ਵੁਪਤ੍ਥਮ੍ਭ ਸਹਸ੍ਸਨੇਤ੍ਤ, ਇਸੀਹਿ ਤ੍ਵਂ ਕੀਲ਼ਸਿ ਦੇਵਰਾਜਾ’’ਤਿ.

ਤਤ੍ਥ ਨ ਤੇ ਨਟਾ ਨੋਤਿ ਦੇਵਰਾਜ, ਮਯਂ ਤਵ ਨਟਾ ਵਾ ਕੀਲ਼ਿਤਬ੍ਬਯੁਤ੍ਤਕਾ ਵਾ ਕੇਚਿ ਨ ਹੋਮ, ਨਾਪਿ ਤਵ ਞਾਤਕਾ, ਨ ਸਹਾਯਾ, ਅਥ ਤ੍ਵਂ ਕਿਂ ਵਾ ਉਪਤ੍ਥਮ੍ਭਂ ਕਤ੍ਵਾ ਕਿਂ ਨਿਸ੍ਸਾਯ ਇਸੀਹਿ ਸਦ੍ਧਿਂ ਕੀਲ਼ਸੀਤਿ ਅਤ੍ਥੋ.

ਅਥ ਨਂ ਸਕ੍ਕੋ ਖਮਾਪੇਨ੍ਤੋ ਵੀਸਤਿਮਂ ਗਾਥਮਾਹ –

੯੭.

‘‘ਆਚਰਿਯੋ ਮੇਸਿ ਪਿਤਾ ਚ ਮਯ੍ਹਂ, ਏਸਾ ਪਤਿਟ੍ਠਾ ਖਲਿਤਸ੍ਸ ਬ੍ਰਹ੍ਮੇ;

ਏਕਾਪਰਾਧਂ ਖਮ ਭੂਰਿਪਞ੍ਞ, ਨ ਪਣ੍ਡਿਤਾ ਕੋਧਬਲਾ ਭਵਨ੍ਤੀ’’ਤਿ.

ਤਤ੍ਥ ਏਸਾ ਪਤਿਟ੍ਠਾਤਿ ਏਸਾ ਤਵ ਪਾਦਚ੍ਛਾਯਾ ਅਜ੍ਜ ਮਮ ਖਲਿਤਸ੍ਸ ਅਪਰਦ੍ਧਸ੍ਸ ਪਤਿਟ੍ਠਾ ਹੋਤੁ. ਕੋਧਬਲਾਤਿ ਪਣ੍ਡਿਤਾ ਨਾਮ ਖਨ੍ਤਿਬਲਾ ਭਵਨ੍ਤਿ, ਨ ਕੋਧਬਲਾਤਿ.

ਅਥ ਮਹਾਸਤ੍ਤੋ ਸਕ੍ਕਸ੍ਸ ਦੇਵਰਞ੍ਞੋ ਖਮਿਤ੍ਵਾ ਸਯਂ ਇਸਿਗਣਂ ਖਮਾਪੇਨ੍ਤੋ ਇਤਰਂ ਗਾਥਮਾਹ –

੯੮.

‘‘ਸੁਵਾਸਿਤਂ ਇਸਿਨਂ ਏਕਰਤ੍ਤਂ, ਯਂ ਵਾਸਵਂ ਭੂਤਪਤਿਦ੍ਦਸਾਮ;

ਸਬ੍ਬੇਵ ਭੋਨ੍ਤੋ ਸੁਮਨਾ ਭਵਨ੍ਤੁ, ਯਂ ਬ੍ਰਾਹ੍ਮਣੋ ਪਚ੍ਚੁਪਾਦੀ ਭਿਸਾਨੀ’’ਤਿ.

ਤਤ੍ਥ ਸੁਵਾਸਿਤਂ ਇਸਿਨਂ ਏਕਰਤ੍ਤਨ੍ਤਿ ਆਯਸ੍ਮਨ੍ਤਾਨਂ ਇਸੀਨਂ ਏਕਰਤ੍ਤਮ੍ਪਿ ਇਮਸ੍ਮਿਂ ਅਰਞ੍ਞੇ ਵਸਿਤਂ ਸੁਵਸਿਤਮੇਵ. ਕਿਂਕਾਰਣਾ? ਯਂ ਵਾਸਵਂ ਭੂਤਪਤਿਂ ਅਦ੍ਦਸਾਮ, ਸਚੇ ਹਿ ਮਯਂ ਨਗਰੇ ਅਵਸਿਮ੍ਹ, ਇਮਂ ਨ ਅਦ੍ਦਸਾਮ. ਭੋਨ੍ਤੋਤਿ ਭਵਨ੍ਤੋ ਸਬ੍ਬੇਪਿ ਸੁਮਨਾ ਭਵਨ੍ਤੁ, ਤੁਸ੍ਸਨ੍ਤੁ, ਸਕ੍ਕਸ੍ਸ ਦੇਵਰਞ੍ਞੋ ਖਮਨ੍ਤੁ. ਕਿਂਕਾਰਣਾ? ਯਂ ਬ੍ਰਾਹ੍ਮਣੋ ਪਚ੍ਚੁਪਾਦੀ ਭਿਸਾਨਿ, ਯਸ੍ਮਾ ਤੁਮ੍ਹਾਕਂ ਆਚਰਿਯੋ ਭਿਸਾਨਿ ਪਟਿਲਭੀਤਿ.

ਸਕ੍ਕੋ ਇਸਿਗਣਂ ਵਨ੍ਦਿਤ੍ਵਾ ਦੇਵਲੋਕਮੇਵ ਗਤੋ. ਇਸਿਗਣੋਪਿ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਭਿਕ੍ਖੁ ਪੋਰਾਣਕਪਣ੍ਡਿਤਾ ਸਪਥਂ ਕਤ੍ਵਾ ਕਿਲੇਸੇ ਪਜਹਿਂਸੂ’’ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਜਾਤਕਂ ਸਮੋਧਾਨੇਨ੍ਤੋ ਪੁਨ ਸਤ੍ਥਾ ਤਿਸ੍ਸੋ ਗਾਥਾ ਅਭਾਸਿ –

੯੯.

‘‘ਅਹਞ੍ਚ ਸਾਰਿਪੁਤ੍ਤੋ ਚ, ਮੋਗ੍ਗਲ੍ਲਾਨੋ ਚ ਕਸ੍ਸਪੋ;

ਅਨੁਰੁਦ੍ਧੋ ਪੁਣ੍ਣੋ ਆਨਨ੍ਦੋ, ਤਦਾਸੁਂ ਸਤ੍ਤ ਭਾਤਰੋ.

੧੦੦.

‘‘ਭਗਿਨੀ ਉਪ੍ਪਲਵਣ੍ਣਾ ਚ, ਦਾਸੀ ਖੁਜ੍ਜੁਤ੍ਤਰਾ ਤਦਾ;

ਚਿਤ੍ਤੋ ਗਹਪਤਿ ਦਾਸੋ, ਯਕ੍ਖੋ ਸਾਤਾਗਿਰੋ ਤਦਾ.

੧੦੧.

‘‘ਪਾਲਿਲੇਯ੍ਯੋ ਤਦਾ ਨਾਗੋ, ਮਧੁਦੋ ਸੇਟ੍ਠਵਾਨਰੋ;

ਕਾਲ਼ੁਦਾਯੀ ਤਦਾ ਸਕ੍ਕੋ, ਏਵਂ ਧਾਰੇਥ ਜਾਤਕ’’ਨ੍ਤਿ.

ਭਿਸਜਾਤਕਵਣ੍ਣਨਾ ਪਞ੍ਚਮਾ.

[੪੮੯] ੬. ਸੁਰੁਚਿਜਾਤਕਵਣ੍ਣਨਾ

ਮਹੇਸੀ ਸੁਰੁਚਿਨੋ ਭਰਿਯਾਤਿ ਇਦਂ ਸਤ੍ਥਾ ਸਾਵਤ੍ਥਿਂ ਉਪਨਿਸ੍ਸਾਯ ਮਿਗਾਰਮਾਤੁਪਾਸਾਦੇ ਵਿਹਰਨ੍ਤੋ ਵਿਸਾਖਾਯ ਮਹਾਉਪਾਸਿਕਾਯ ਲਦ੍ਧੇ ਅਟ੍ਠ ਵਰੇ ਆਰਬ੍ਭ ਕਥੇਸਿ. ਸਾ ਹਿ ਏਕਦਿਵਸਂ ਜੇਤਵਨੇ ਧਮ੍ਮਕਥਂ ਸੁਤ੍ਵਾ ਭਗਵਨ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਪਕ੍ਕਾਮਿ. ਤਸ੍ਸਾ ਪਨ ਰਤ੍ਤਿਯਾ ਅਚ੍ਚਯੇਨ ਚਾਤੁਦ੍ਦੀਪਿਕੋ ਮਹਾਮੇਘੋ ਪਾਵਸ੍ਸਿ. ਭਗਵਾ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਯਥਾ, ਭਿਕ੍ਖਵੇ, ਜੇਤਵਨੇ ਵਸ੍ਸਤਿ, ਏਵਂ ਚਤੂਸੁ ਦੀਪੇਸੁ ਵਸ੍ਸਤਿ, ਓਵਸ੍ਸਾਪੇਥ, ਭਿਕ੍ਖਵੇ, ਕਾਯਂ, ਅਯਂ ਪਚ੍ਛਿਮਕੋ ਚਾਤੁਦ੍ਦੀਪਿਕੋ ਮਹਾਮੇਘੋ’’ਤਿ ਵਤ੍ਵਾ ਓਵਸ੍ਸਾਪਿਤਕਾਯੇਹਿ ਭਿਕ੍ਖੂਹਿ ਸਦ੍ਧਿਂ ਇਦ੍ਧਿਬਲੇਨ ਜੇਤਵਨੇ ਅਨ੍ਤਰਹਿਤੋ ਵਿਸਾਖਾਯ ਕੋਟ੍ਠਕੇ ਪਾਤੁਰਹੋਸਿ. ਉਪਾਸਿਕਾ ‘‘ਅਚ੍ਛਰਿਯਂ ਵਤ ਭੋ, ਅਬ੍ਭੁਤਂ ਵਤ ਭੋ, ਤਥਾਗਤਸ੍ਸ ਮਹਿਦ੍ਧਿਕਤਾ ਮਹਾਨੁਭਾਵਤਾ, ਯਤ੍ਰ ਹਿ ਨਾਮ ਜਾਣੁਕਮਤ੍ਤੇਸੁਪਿ ਓਘੇਸੁ ਵਤ੍ਤਮਾਨੇਸੁ ਕਟਿਮਤ੍ਤੇਸੁਪਿ ਓਘੇਸੁ ਵਤ੍ਤਮਾਨੇਸੁ ਨ ਹਿ ਨਾਮ ਏਕਭਿਕ੍ਖੁਸ੍ਸਪਿ ਪਾਦਾ ਵਾ ਚੀਵਰਾਨਿ ਵਾ ਅਲ੍ਲਾਨਿ ਭਵਿਸ੍ਸਨ੍ਤੀ’’ਤਿ ਹਟ੍ਠਾ ਉਦਗ੍ਗਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਰਿਵਿਸਿਤ੍ਵਾ ਕਤਭਤ੍ਤਕਿਚ੍ਚਂ ਭਗਵਨ੍ਤਂ ਏਤਦਵੋਚ ‘‘ਅਟ੍ਠਾਹਂ, ਭਨ੍ਤੇ, ਭਗਵਨ੍ਤਂ ਵਰਾਨਿ ਯਾਚਾਮੀ’’ਤਿ. ‘‘ਅਤਿਕ੍ਕਨ੍ਤਵਰਾ ਖੋ, ਵਿਸਾਖੇ, ਤਥਾਗਤਾ’’ਤਿ. ‘‘ਯਾਨਿ ਚ, ਭਨ੍ਤੇ, ਕਪ੍ਪਿਯਾਨਿ ਯਾਨਿ ਚ ਅਨਵਜ੍ਜਾਨੀ’’ਤਿ. ‘‘ਵਦੇਹਿ ਵਿਸਾਖੇ’’ਤਿ. ‘‘ਇਚ੍ਛਾਮਹਂ, ਭਨ੍ਤੇ, ਭਿਕ੍ਖੁਸਙ੍ਘਸ੍ਸ ਯਾਵਜੀਵਂ ਵਸ੍ਸਿਕਸਾਟਿਕਂ ਦਾਤੁਂ, ਆਗਨ੍ਤੁਕਭਤ੍ਤਂ ਦਾਤੁਂ, ਗਮਿਕਭਤ੍ਤਂ ਦਾਤੁਂ, ਗਿਲਾਨਭਤ੍ਤਂ ਦਾਤੁਂ, ਗਿਲਾਨੁਪਟ੍ਠਾਕਭਤ੍ਤਂ ਦਾਤੁਂ, ਗਿਲਾਨਭੇਸਜ੍ਜਂ ਦਾਤੁਂ, ਧੁਵਯਾਗੁਂ ਦਾਤੁਂ, ਭਿਕ੍ਖੁਨਿਸਙ੍ਘਸ੍ਸ ਯਾਵਜੀਵਂ ਉਦਕਸਾਟਿਕਂ ਦਾਤੁ’’ਨ੍ਤਿ.

ਸਤ੍ਥਾ ‘‘ਕਂ ਪਨ ਤ੍ਵਂ, ਵਿਸਾਖੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਤਥਾਗਤਂ ਅਟ੍ਠ ਵਰਾਨਿ ਯਾਚਸੀ’’ਤਿ ਪੁਚ੍ਛਿਤ੍ਵਾ ਤਾਯ ਵਰਾਨਿਸਂਸੇ ਕਥਿਤੇ ‘‘ਸਾਧੁ ਸਾਧੁ, ਵਿਸਾਖੇ, ਸਾਧੁ ਖੋ ਤ੍ਵਂ, ਵਿਸਾਖੇ, ਇਮਂ ਆਨਿਸਂਸਂ ਸਮ੍ਪਸ੍ਸਮਾਨਾ ਤਥਾਗਤਂ ਅਟ੍ਠ ਵਰਾਨਿ ਯਾਚਸੀ’’ਤਿ ਵਤ੍ਵਾ ‘‘ਅਨੁਜਾਨਾਮਿ ਤੇ, ਵਿਸਾਖੇ, ਅਟ੍ਠ ਵਰਾਨੀ’’ਤਿ ਅਟ੍ਠ ਵਰੇ ਦਤ੍ਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਅਥੇਕਦਿਵਸਂ ਸਤ੍ਥਰਿ ਪੁਬ੍ਬਾਰਾਮੇ ਵਿਹਰਨ੍ਤੇ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਵਿਸਾਖਾ ਮਹਾਉਪਾਸਿਕਾ ਮਾਤੁਗਾਮਤ੍ਤਭਾਵੇ ਠਤ੍ਵਾਪਿ ਦਸਬਲਸ੍ਸ ਸਨ੍ਤਿਕੇ ਅਟ੍ਠ ਵਰੇ ਲਭਿ, ਅਹੋ ਮਹਾਗੁਣਾ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਵਿਸਾਖਾ ਇਦਾਨੇਵ ਮਮ ਸਨ੍ਤਿਕਾ ਵਰੇ ਲਭਤਿ, ਪੁਬ੍ਬੇਪੇਸਾ ਲਭਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਮਿਥਿਲਾਯਂ ਸੁਰੁਚਿ ਨਾਮ ਰਾਜਾ ਰਜ੍ਜਂ ਕਾਰੇਨ੍ਤੋ ਪੁਤ੍ਤਂ ਪਟਿਲਭਿਤ੍ਵਾ ਤਸ੍ਸ ‘‘ਸੁਰੁਚਿਕੁਮਾਰੋ’’ਤ੍ਵੇਵ ਨਾਮਂ ਅਕਾਸਿ. ਸੋ ਵਯਪ੍ਪਤ੍ਤੋ ‘‘ਤਕ੍ਕਸਿਲਾਯਂ ਸਿਪ੍ਪਂ ਉਗ੍ਗਣ੍ਹਿਸ੍ਸਾਮੀ’’ਤਿ ਗਨ੍ਤ੍ਵਾ ਨਗਰਦ੍ਵਾਰੇ ਸਾਲਾਯਂ ਨਿਸੀਦਿ. ਬਾਰਾਣਸਿਰਞ੍ਞੋਪਿ ਪੁਤ੍ਤੋ ਬ੍ਰਹ੍ਮਦਤ੍ਤਕੁਮਾਰੋ ਨਾਮ ਤਥੇਵ ਗਨ੍ਤ੍ਵਾ ਸੁਰੁਚਿਕੁਮਾਰਸ੍ਸ ਨਿਸਿਨ੍ਨਫਲਕੇਯੇਵ ਨਿਸੀਦਿ. ਤੇ ਅਞ੍ਞਮਞ੍ਞਂ ਪੁਚ੍ਛਿਤ੍ਵਾ ਵਿਸ੍ਸਾਸਿਕਾ ਹੁਤ੍ਵਾ ਏਕਤੋਵ ਆਚਰਿਯਸ੍ਸ ਸਨ੍ਤਿਕਂ ਗਨ੍ਤ੍ਵਾ ਆਚਰਿਯਭਾਗਂ ਦਤ੍ਵਾ ਸਿਪ੍ਪਂ ਪਟ੍ਠਪੇਤ੍ਵਾ ਨ ਚਿਰਸ੍ਸੇਵ ਨਿਟ੍ਠਿਤਸਿਪ੍ਪਾ ਆਚਰਿਯਂ ਆਪੁਚ੍ਛਿਤ੍ਵਾ ਥੋਕਂ ਮਗ੍ਗਂ ਏਕਤੋਵ ਗਨ੍ਤ੍ਵਾ ਦ੍ਵੇਧਾਪਥੇ ਠਿਤਾ ਅਞ੍ਞਮਞ੍ਞਂ ਆਲਿਙ੍ਗਿਤ੍ਵਾ ਮਿਤ੍ਤਧਮ੍ਮਾਨੁਰਕ੍ਖਣਤ੍ਥਂ ਕਤਿਕਂ ਕਰਿਂਸੁ ‘‘ਸਚੇ ਮਮ ਪੁਤ੍ਤੋ ਜਾਯਤਿ, ਤਵ ਧੀਤਾ, ਤਵ ਪੁਤ੍ਤੋ, ਮਮ ਧੀਤਾ, ਤੇਸਂ ਆਵਾਹਵਿਵਾਹਂ ਕਰਿਸ੍ਸਾਮਾ’’ਤਿ. ਤੇਸੁ ਰਜ੍ਜਂ ਕਾਰੇਨ੍ਤੇਸੁ ਸੁਰੁਚਿਮਹਾਰਾਜਸ੍ਸ ਪੁਤ੍ਤੋ ਜਾਯਿ, ‘‘ਸੁਰੁਚਿਕੁਮਾਰੋ’’ਤ੍ਵੇਵਸ੍ਸ ਨਾਮਂ ਕਰਿਂਸੁ. ਬ੍ਰਹ੍ਮਦਤ੍ਤਸ੍ਸ ਧੀਤਾ ਜਾਯਿ, ‘‘ਸੁਮੇਧਾ’’ਤਿਸ੍ਸਾ ਨਾਮਂ ਕਰਿਂਸੁ.

ਸੁਰੁਚਿਕੁਮਾਰੋ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਗਨ੍ਤ੍ਵਾ ਸਿਪ੍ਪਂ ਉਗ੍ਗਣ੍ਹਿਤ੍ਵਾ ਆਗਚ੍ਛਿ. ਅਥ ਨਂ ਪਿਤਾ ਰਜ੍ਜੇ ਅਭਿਸਿਞ੍ਚਿਤੁਕਾਮੋ ਹੁਤ੍ਵਾ ‘‘ਸਹਾਯਸ੍ਸ ਕਿਰ ਮੇ ਬਾਰਾਣਸਿਰਞ੍ਞੋ ਧੀਤਾ ਅਤ੍ਥਿ, ਤਮੇਵਸ੍ਸ ਅਗ੍ਗਮਹੇਸਿਂ ਕਰਿਸ੍ਸਾਮੀ’’ਤਿ ਤਸ੍ਸਾ ਅਤ੍ਥਾਯ ਬਹੁਂ ਪਣ੍ਣਾਕਾਰਂ ਦਤ੍ਵਾ ਅਮਚ੍ਚੇ ਪੇਸੇਸਿ. ਤੇਸਂ ਅਨਾਗਤਕਾਲੇਯੇਵ ਬਾਰਾਣਸਿਰਾਜਾ ਦੇਵਿਂ ਪੁਚ੍ਛਿ ‘‘ਭਦ੍ਦੇ, ਮਾਤੁਗਾਮਸ੍ਸ ਨਾਮ ਕਿਂ ਅਤਿਰੇਕਦੁਕ੍ਖ’’ਨ੍ਤਿ? ‘‘ਸਪਤ੍ਤਿਰੋਸਦੁਕ੍ਖਂ ਦੇਵਾ’’ਤਿ. ‘‘ਤੇਨ ਹਿ, ਭਦ੍ਦੇ, ਅਮ੍ਹਾਕਂ ਏਕਂ ਧੀਤਰਂ ਸੁਮੇਧਾਦੇਵਿਂ ਤਮ੍ਹਾ ਦੁਕ੍ਖਾ ਮੋਚੇਤ੍ਵਾ ਯੋ ਏਤਂ ਏਕਿਕਮੇਵ ਗਣ੍ਹਿਸ੍ਸਤਿ, ਤਸ੍ਸ ਦਸ੍ਸਾਮਾ’’ਤਿ ਆਹ. ਸੋ ਤੇਹਿ ਅਮਚ੍ਚੇਹਿ ਆਗਨ੍ਤ੍ਵਾ ਤਸ੍ਸਾ ਨਾਮੇ ਗਹਿਤੇ ‘‘ਤਾਤਾ, ਕਾਮਂ ਮਯਾ ਪੁਬ੍ਬੇ ਮਯ੍ਹਂ ਸਹਾਯਸ੍ਸ ਪਟਿਞ੍ਞਾ ਕਤਾ, ਇਮਂ ਪਨ ਮਯਂ ਇਤ੍ਥਿਘਟਾਯ ਅਨ੍ਤਰੇ ਨ ਖਿਪਿਤੁਕਾਮਾ, ਯੋ ਏਤਂ ਏਕਿਕਮੇਵ ਗਣ੍ਹਾਤਿ, ਤਸ੍ਸ ਦਾਤੁਕਾਮਮ੍ਹਾ’’ਤਿ ਆਹ. ਤੇ ਰਞ੍ਞੋ ਸਨ੍ਤਿਕਂ ਪਹਿਣਿਂਸੁ. ਰਾਜਾ ਪਨ ‘‘ਅਮ੍ਹਾਕਂ ਰਜ੍ਜਂ ਮਹਨ੍ਤਂ, ਸਤ੍ਤਯੋਜਨਿਕਂ ਮਿਥਿਲਨਗਰਂ, ਤੀਣਿ ਯੋਜਨਸਤਾਨਿ ਰਟ੍ਠਪਰਿਚ੍ਛੇਦੋ, ਹੇਟ੍ਠਿਮਨ੍ਤੇਨ ਸੋਲ਼ਸ ਇਤ੍ਥਿਸਹਸ੍ਸਾਨਿ ਲਦ੍ਧੁਂ ਵਟ੍ਟਤੀ’’ਤਿ ਵਤ੍ਵਾ ਨ ਰੋਚੇਸਿ.

ਸੁਰੁਚਿਕੁਮਾਰੋ ਪਨ ਸੁਮੇਧਾਯ ਰੂਪਸਮ੍ਪਦਂ ਸੁਤ੍ਵਾ ਸਵਨਸਂਸਗ੍ਗੇਨ ਬਜ੍ਝਿਤ੍ਵਾ ‘‘ਅਹਂ ਤਂ ਏਕਿਕਮੇਵ ਗਣ੍ਹਿਸ੍ਸਾਮਿ, ਨ ਮਯ੍ਹਂ ਇਤ੍ਥਿਘਟਾਯ ਅਤ੍ਥੋ, ਤਮੇਵ ਆਨੇਨ੍ਤੂ’’ਤਿ ਮਾਤਾਪਿਤੂਨਂ ਪੇਸੇਸਿ. ਤੇ ਤਸ੍ਸ ਮਨਂ ਅਭਿਨ੍ਦਿਤ੍ਵਾ ਬਹੁਂ ਧਨਂ ਪੇਸੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਤਂ ਆਨੇਤ੍ਵਾ ਕੁਮਾਰਸ੍ਸ ਅਗ੍ਗਮਹੇਸਿਂ ਕਤ੍ਵਾ ਏਕਤੋਵ ਅਭਿਸਿਞ੍ਚਿਂਸੁ. ਸੋ ਸੁਰੁਚਿਮਹਾਰਾਜਾ ਨਾਮ ਹੁਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਤਾਯ ਸਦ੍ਧਿਂ ਪਿਯਸਂਵਾਸਂ ਵਸਿ. ਸਾ ਪਨ ਦਸ ਵਸ੍ਸਸਹਸ੍ਸਾਨਿ ਤਸ੍ਸ ਗੇਹੇ ਵਸਨ੍ਤੀ ਨੇਵ ਪੁਤ੍ਤਂ, ਨ ਧੀਤਰਂ ਲਭਿ. ਅਥ ਨਾਗਰਾ ਸਨ੍ਨਿਪਤਿਤ੍ਵਾ ਰਾਜਙ੍ਗਣੇ ਉਪਕ੍ਕੋਸਿਤ੍ਵਾ ‘‘ਕਿਮੇਤ’’ਨ੍ਤਿ ਵੁਤ੍ਤੇ ‘‘ਰਞ੍ਞੋ ਦੋਸੋ ਨਤ੍ਥਿ, ਵਂਸਾਨੁਪਾਲਕੋ ਪਨ ਵੋ ਪੁਤ੍ਤੋ ਨ ਵਿਜ੍ਜਤਿ, ਤੁਮ੍ਹਾਕਂ ਏਕਾਵ ਦੇਵੀ, ਰਾਜਕੁਲੇ ਚ ਨਾਮ ਹੇਟ੍ਠਿਮਨ੍ਤੇਨ ਸੋਲ਼ਸਹਿ ਇਤ੍ਥਿਸਹਸ੍ਸੇਹਿ ਭਵਿਤਬ੍ਬਂ, ਇਤ੍ਥਿਘਟਂ ਗਣ੍ਹ, ਦੇਵ, ਅਦ੍ਧਾ ਤਾਸੁ ਪੁਞ੍ਞਵਤੀ ਪੁਤ੍ਤਂ ਲਭਿਸ੍ਸਤੀ’’ਤਿ ਵਤ੍ਵਾ ‘‘ਤਾਤਾ, ਕਿਂ ਕਥੇਥ, ‘ਅਹਂ ਅਞ੍ਞਂ ਨ ਗਣ੍ਹਿਸ੍ਸਾਮੀ’ਤਿ ਪਟਿਞ੍ਞਂ ਦਤ੍ਵਾ ਮਯਾ ਏਸਾ ਆਨੀਤਾ, ਨ ਸਕ੍ਕਾ ਮੁਸਾਵਾਦਂ ਕਾਤੁਂ, ਨ ਮਯ੍ਹਂ ਇਤ੍ਥਿਘਟਾਯ ਅਤ੍ਥੋ’’ਤਿ ਰਞ੍ਞਾ ਪਟਿਕ੍ਖਿਤ੍ਤਾ ਪਕ੍ਕਮਿਂਸੁ.

ਸੁਮੇਧਾ ਤਂ ਕਥਂ ਸੁਤ੍ਵਾ ‘‘ਰਾਜਾ ਤਾਵ ਸਚ੍ਚਵਾਦਿਤਾਯ ਅਞ੍ਞਾ ਇਤ੍ਥਿਯੋ ਨ ਆਨੇਸਿ, ਅਹਮੇਵ ਪਨਸ੍ਸ ਆਨੇਸ੍ਸਾਮੀ’’ਤਿ ਰਞ੍ਞੋ ਮਾਤੁਸਮਭਰਿਯਟ੍ਠਾਨੇ ਠਤ੍ਵਾ ਅਤ੍ਤਨੋ ਰੁਚਿਯਾਵ ਖਤ੍ਤਿਯਕਞ੍ਞਾਨਂ ਸਹਸ੍ਸਂ, ਅਮਚ੍ਚਕਞ੍ਞਾਨਂ ਸਹਸ੍ਸਂ, ਗਹਪਤਿਕਞ੍ਞਾਨਂ ਸਹਸ੍ਸਂ, ਸਬ੍ਬਸਮਯਨਾਟਕਿਤ੍ਥੀਨਂ ਸਹਸ੍ਸਨ੍ਤਿ ਚਤ੍ਤਾਰਿ ਇਤ੍ਥਿਸਹਸ੍ਸਾਨਿ ਆਨੇਸਿ. ਤਾਪਿ ਦਸ ਵਸ੍ਸਸਹਸ੍ਸਾਨਿ ਰਾਜਕੁਲੇ ਵਸਿਤ੍ਵਾ ਨੇਵ ਪੁਤ੍ਤਂ, ਨ ਧੀਤਰਂ ਲਭਿਂਸੁ. ਏਤੇਨੇਵੁਪਾਯੇਨ ਅਪਰਾਨਿਪਿ ਤਿਕ੍ਖਤ੍ਤੁਂ ਚਤ੍ਤਾਰਿ ਚਤ੍ਤਾਰਿ ਸਹਸ੍ਸਾਨਿ ਆਨੇਸਿ. ਤਾਪਿ ਨੇਵ ਪੁਤ੍ਤਂ, ਨ ਧੀਤਰਂ ਲਭਿਂਸੁ. ਏਤ੍ਤਾਵਤਾ ਸੋਲ਼ਸ ਇਤ੍ਥਿਸਹਸ੍ਸਾਨਿ ਅਹੇਸੁਂ. ਚਤ੍ਤਾਲੀਸ ਵਸ੍ਸਸਹਸ੍ਸਾਨਿ ਅਤਿਕ੍ਕਮਿਂਸੁ, ਤਾਨਿ ਤਾਯ ਏਕਿਕਾਯ ਵੁਤ੍ਥੇਹਿ ਦਸਹਿ ਸਹਸ੍ਸੇਹਿ ਸਦ੍ਧਿਂ ਪਞ੍ਞਾਸ ਵਸ੍ਸਸਹਸ੍ਸਾਨਿ ਹੋਨ੍ਤਿ. ਅਥ ਨਾਗਰਾ ਸਨ੍ਨਿਪਤਿਤ੍ਵਾ ਪੁਨ ਉਪਕ੍ਕੋਸਿਤ੍ਵਾ ‘‘ਕਿਮੇਤ’’ਨ੍ਤਿ ਵੁਤ੍ਤੇ ‘‘ਦੇਵ, ਤੁਮ੍ਹਾਕਂ ਇਤ੍ਥਿਯੋ ਪੁਤ੍ਤਂ ਪਤ੍ਥੇਤੁਂ ਆਣਾਪੇਥਾ’’ਤਿ ਵਦਿਂਸੁ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਤੁਮ੍ਹੇ ਪੁਤ੍ਤਂ ਪਤ੍ਥੇਥਾ’’ਤਿ ਆਹ. ਤਾ ਤਤੋ ਪਟ੍ਠਾਯ ਪੁਤ੍ਤਂ ਪਤ੍ਥਯਮਾਨਾ ਨਾਨਾਦੇਵਤਾ ਨਮਸ੍ਸਨ੍ਤਿ, ਨਾਨਾਵਤਾਨਿ ਚਰਨ੍ਤਿ, ਪੁਤ੍ਤੋ ਨੁਪ੍ਪਜ੍ਜਤੇਵ. ਅਥ ਰਾਜਾ ਸੁਮੇਧਂ ਆਹ ‘‘ਭਦ੍ਦੇ, ਤ੍ਵਮ੍ਪਿ ਪੁਤ੍ਤਂ ਪਤ੍ਥੇਹੀ’’ਤਿ. ਸਾ ‘‘ਸਾਧੂ’’ਤਿ ਪਨ੍ਨਰਸਉਪੋਸਥਦਿਵਸੇ ਅਟ੍ਠਙ੍ਗਸਮਨ੍ਨਾਗਤਂ ਉਪੋਸਥਂ ਸਮਾਦਾਯ ਸਿਰਿਗਬ੍ਭੇ ਸੀਲਾਨਿ ਆਵਜ੍ਜਮਾਨਾ ਕਪ੍ਪਿਯਮਞ੍ਚਕੇ ਨਿਸੀਦਿ. ਸੇਸਾ ਅਜਵਤਗੋਵਤਾ ਹੁਤ੍ਵਾ ਪੁਤ੍ਤਂ ਅਲਭਿਤ੍ਵਾ ਉਯ੍ਯਾਨਂ ਅਗਮਂਸੁ.

ਸੁਮੇਧਾਯ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਕਮ੍ਪਿ. ਤਦਾ ਸਕ੍ਕੋ ਆਵਜ੍ਜੇਨ੍ਤੋ ‘‘ਸੁਮੇਧਾ ਪੁਤ੍ਤਂ ਪਤ੍ਥੇਤਿ, ਪੁਤ੍ਤਮਸ੍ਸਾ ਦਸ੍ਸਾਮਿ, ਨ ਖੋ ਪਨ ਸਕ੍ਕਾ ਯਂ ਵਾ ਤਂ ਵਾ ਦਾਤੁਂ, ਅਨੁਚ੍ਛਵਿਕਮਸ੍ਸਾ ਪੁਤ੍ਤਂ ਉਪਧਾਰੇਸ੍ਸਾਮੀ’’ਤਿ ਉਪਧਾਰੇਨ੍ਤੋ ਨਲ਼ਕਾਰਦੇਵਪੁਤ੍ਤਂ ਪਸ੍ਸਿ. ਸੋ ਹਿ ਪੁਞ੍ਞਸਮ੍ਪਨ੍ਨੋ ਸਤ੍ਤੋ ਪੁਰਿਮਤ੍ਤਭਾਵੇ ਬਾਰਾਣਸਿਯਂ ਵਸਨ੍ਤੋ ਵਪ੍ਪਕਾਲੇ ਖੇਤ੍ਤਂ ਗਚ੍ਛਨ੍ਤੋ ਏਕਂ ਪਚ੍ਚੇਕਬੁਦ੍ਧਂ ਦਿਸ੍ਵਾ ਦਾਸਕਮ੍ਮਕਰੇ ‘‘ਵਪਥਾ’’ਤਿ ਪਹਿਣਿ. ਸਯਂ ਨਿਵਤ੍ਤਿਤ੍ਵਾ ਪਚ੍ਚੇਕਬੁਦ੍ਧਂ ਗੇਹਂ ਨੇਤ੍ਵਾ ਭੋਜੇਤ੍ਵਾ ਪੁਨ ਗਙ੍ਗਾਤੀਰਂ ਆਨੇਤ੍ਵਾ ਪੁਤ੍ਤੇਨ ਸਦ੍ਧਿਂ ਏਕਤੋ ਹੁਤ੍ਵਾ ਉਦੁਮ੍ਬਰਭਿਤ੍ਤਿਪਾਦਂ ਨਲ਼ਭਿਤ੍ਤਿਕਂ ਪਣ੍ਣਸਾਲਂ ਕਤ੍ਵਾ ਦ੍ਵਾਰਂ ਯੋਜੇਤ੍ਵਾ ਚਙ੍ਕਮਂ ਕਤ੍ਵਾ ਪਚ੍ਚੇਕਬੁਦ੍ਧਂ ਤਤ੍ਥੇਵ ਤੇਮਾਸਂ ਵਸਾਪੇਤ੍ਵਾ ਵੁਤ੍ਥਵਸ੍ਸਂ ਦ੍ਵੇ ਪਿਤਾਪੁਤ੍ਤਾ ਤਿਚੀਵਰੇਨ ਅਚ੍ਛਾਦੇਤ੍ਵਾ ਉਯ੍ਯੋਜੇਸੁਂ. ਏਤੇਨੇਵ ਨਿਯਾਮੇਨ ਸਤ੍ਤਟ੍ਠ ਪਚ੍ਚੇਕਬੁਦ੍ਧੇ ਤਾਯ ਪਣ੍ਣਸਾਲਾਯ ਵਸਾਪੇਤ੍ਵਾ ਤਿਚੀਵਰਾਨਿ ਅਦਂਸੁ. ‘‘ਦ੍ਵੇ ਪਿਤਾਪੁਤ੍ਤਾ ਨਲ਼ਕਾਰਾ ਹੁਤ੍ਵਾ ਗਙ੍ਗਾਤੀਰੇ ਵੇਲ਼ੁਂ ਉਪਧਾਰੇਨ੍ਤਾ ਪਚ੍ਚੇਕਬੁਦ੍ਧਂ ਦਿਸ੍ਵਾ ਏਵਮਕਂਸੂ’’ਤਿਪਿ ਵਦਨ੍ਤਿਯੇਵ.

ਤੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿਤ੍ਵਾ ਛਸੁ ਕਾਮਾਵਚਰਸਗ੍ਗੇਸੁ ਅਨੁਲੋਮਪਟਿਲੋਮੇਨ ਮਹਨ੍ਤਂ ਦੇਵਿਸ੍ਸਰਿਯਂ ਅਨੁਭਵਨ੍ਤਾ ਵਿਚਰਨ੍ਤਿ. ਤੇ ਤਤੋ ਚਵਿਤ੍ਵਾ ਉਪਰਿਦੇਵਲੋਕੇ ਨਿਬ੍ਬਤ੍ਤਿਤੁਕਾਮਾ ਹੋਨ੍ਤਿ. ਸਕ੍ਕੋ ਤਥਾ ਗਤਭਾਵਂ ਞਤ੍ਵਾ ਤੇਸੁ ਏਕਸ੍ਸ ਵਿਮਾਨਦ੍ਵਾਰਂ ਗਨ੍ਤ੍ਵਾ ਤਂ ਆਗਨ੍ਤ੍ਵਾ ਵਨ੍ਦਿਤ੍ਵਾ ਠਿਤਂ ਆਹ – ‘‘ਮਾਰਿਸ, ਤਯਾ ਮਨੁਸ੍ਸਲੋਕਂ ਗਨ੍ਤੁਂ ਵਟ੍ਟਤੀ’’ਤਿ. ‘‘ਮਹਾਰਾਜ, ਮਨੁਸ੍ਸਲੋਕੋ ਨਾਮ ਜੇਗੁਚ੍ਛੋ ਪਟਿਕੂਲੋ, ਤਤ੍ਥ ਠਿਤਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਦੇਵਲੋਕਂ ਪਤ੍ਥੇਨ੍ਤਿ, ਤਤ੍ਥ ਗਨ੍ਤ੍ਵਾ ਕਿਂ ਕਰਿਸ੍ਸਾਮੀ’’ਤਿ. ‘‘ਮਾਰਿਸ, ਦੇਵਲੋਕੇ ਪਰਿਭੁਞ੍ਜਿਤਬ੍ਬਸਮ੍ਪਤ੍ਤਿਂ ਮਨੁਸ੍ਸਲੋਕੇ ਪਰਿਭੁਞ੍ਜਿਸ੍ਸਸਿ, ਪਞ੍ਚਵੀਸਤਿਯੋਜਨੁਬ੍ਬੇਧੇ ਨਵਯੋਜਨਆਯਾਮੇ ਅਟ੍ਠਯੋਜਨਵਿਤ੍ਥਾਰੇ ਰਤਨਪਾਸਾਦੇ ਵਸਿਸ੍ਸਸਿ, ਅਧਿਵਾਸੇਹੀ’’ਤਿ. ਸੋ ਅਧਿਵਾਸੇਸਿ. ਸਕ੍ਕੋ ਤਸ੍ਸ ਪਟਿਞ੍ਞਂ ਗਹੇਤ੍ਵਾ ਇਸਿਵੇਸੇਨ ਰਾਜੁਯ੍ਯਾਨਂ ਗਨ੍ਤ੍ਵਾ ਤਾਸਂ ਇਤ੍ਥੀਨਂ ਉਪਰਿ ਆਕਾਸੇ ਚਙ੍ਕਮਨ੍ਤੋ ਅਤ੍ਤਾਨਂ ਦਸ੍ਸੇਤ੍ਵਾ ‘‘ਕਸ੍ਸਾਹਂ ਪੁਤ੍ਤਵਰਂ ਦਮ੍ਮਿ, ਕਾ ਪੁਤ੍ਤਵਰਂ ਗਣ੍ਹਿਸ੍ਸਤੀ’’ਤਿ ਆਹ. ‘‘ਭਨ੍ਤੇ, ਮਯ੍ਹਂ ਦੇਹਿ, ਮਯ੍ਹਂ ਦੇਹੀ’’ਤਿ ਸੋਲ਼ਸ ਇਤ੍ਥਿਸਹਸ੍ਸਾਨਿ ਹਤ੍ਥੇ ਉਕ੍ਖਿਪਿਂਸੁ. ਤਤੋ ਸਕ੍ਕੋ ਆਹ – ‘‘ਅਹਂ ਸੀਲਵਤੀਨਂ ਪੁਤ੍ਤਂ ਦਮ੍ਮਿ, ਤੁਮ੍ਹਾਕਂ ਕਿਂ ਸੀਲਂ, ਕੋ ਆਚਾਰੋ’’ਤਿ. ਤਾ ਉਕ੍ਖਿਤ੍ਤਹਤ੍ਥੇ ਸਮਞ੍ਛਿਤ੍ਵਾ ‘‘ਸਚੇ ਸੀਲਵਤਿਯਾ ਦਾਤੁਕਾਮੋ, ਸੁਮੇਧਾਯ ਸਨ੍ਤਿਕਂ ਗਚ੍ਛਾਹੀ’’ਤਿ ਵਦਿਂਸੁ. ਸੋ ਆਕਾਸੇਨੇਵ ਗਨ੍ਤ੍ਵਾ ਤਸ੍ਸਾ ਵਾਸਾਗਾਰੇ ਸੀਹਪਞ੍ਜਰੇ ਅਟ੍ਠਾਸਿ.

ਅਥਸ੍ਸਾ ਤਾ ਇਤ੍ਥਿਯੋ ਆਰੋਚੇਸੁਂ ‘‘ਏਥ, ਦੇਵਿ, ਸਕ੍ਕੋ ਦੇਵਰਾਜਾ ‘ਤੁਮ੍ਹਾਕਂ ਪੁਤ੍ਤਵਰਂ ਦਸ੍ਸਾਮੀ’ਤਿ ਆਕਾਸੇਨਾਗਨ੍ਤ੍ਵਾ ਸੀਹਪਞ੍ਜਰੇ ਠਿਤੋ’’ਤਿ. ਸਾ ਗਰੁਪਰਿਹਾਰੇਨਾਗਨ੍ਤ੍ਵਾ ਸੀਹਪਞ੍ਜਰਂ ਉਗ੍ਘਾਟੇਤ੍ਵਾ ‘‘ਸਚ੍ਚਂ ਕਿਰ, ਭਨ੍ਤੇ, ਤੁਮ੍ਹੇ ਸੀਲਵਤਿਯਾ ਪੁਤ੍ਤਵਰਂ ਦੇਥਾ’’ਤਿ ਆਹ. ‘‘ਆਮ ਦੇਵੀ’’ਤਿ. ‘‘ਤੇਨ ਹਿ ਮਯ੍ਹਂ ਦੇਥਾ’’ਤਿ. ‘‘ਕਿਂ ਪਨ ਤੇ ਸੀਲਂ, ਕਥੇਹਿ, ਸਚੇ ਮੇ ਰੁਚ੍ਚਤਿ, ਦਸ੍ਸਾਮਿ ਤੇ ਪੁਤ੍ਤਵਰ’’ਨ੍ਤਿ. ਸਾ ਤਸ੍ਸ ਵਚਨਂ ਸੁਤ੍ਵਾ ‘‘ਤੇਨ ਹਿ ਸੁਣਾਹੀ’’ਤਿ ਵਤ੍ਵਾ ਅਤ੍ਤਨੋ ਸੀਲਗੁਣਂ ਕਥੇਨ੍ਤੀ ਪਨ੍ਨਰਸ ਗਾਥਾ ਅਭਾਸਿ –

੧੦੨.

‘‘ਮਹੇਸੀ ਸੁਰੁਚਿਨੋ ਭਰਿਯਾ, ਆਨੀਤਾ ਪਠਮਂ ਅਹਂ;

ਦਸ ਵਸ੍ਸਸਹਸ੍ਸਾਨਿ, ਯਂ ਮਂ ਸੁਰੁਚਿਮਾਨਯਿ.

੧੦੩.

‘‘ਸਾਹਂ ਬ੍ਰਾਹ੍ਮਣ ਰਾਜਾਨਂ, ਵੇਦੇਹਂ ਮਿਥਿਲਗ੍ਗਹਂ;

ਨਾਭਿਜਾਨਾਮਿ ਕਾਯੇਨ, ਵਾਚਾਯ ਉਦ ਚੇਤਸਾ;

ਸੁਰੁਚਿਂ ਅਤਿਮਞ੍ਞਿਤ੍ਥ, ਆਵਿ ਵਾ ਯਦਿ ਵਾ ਰਹੋ.

੧੦੪.

‘‘ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੦੫.

‘‘ਭਤ੍ਤੁ ਮਮ ਸਸ੍ਸੁ ਮਾਤਾ, ਪਿਤਾ ਚਾਪਿ ਚ ਸਸ੍ਸੁਰੋ;

ਤੇ ਮਂ ਬ੍ਰਹ੍ਮੇ ਵਿਨੇਤਾਰੋ, ਯਾਵ ਅਟ੍ਠਂਸੁ ਜੀਵਿਤਂ.

੧੦੬.

‘‘ਸਾਹਂ ਅਹਿਂਸਾਰਤਿਨੀ, ਕਾਮਸਾ ਧਮ੍ਮਚਾਰਿਨੀ;

ਸਕ੍ਕਚ੍ਚਂ ਤੇ ਉਪਟ੍ਠਾਸਿਂ, ਰਤ੍ਤਿਨ੍ਦਿਵਮਤਨ੍ਦਿਤਾ.

੧੦੭.

‘‘ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੦੮.

‘‘ਸੋਲ਼ਸਿਤ੍ਥਿਸਹਸ੍ਸਾਨਿ, ਸਹਭਰਿਯਾਨਿ ਬ੍ਰਾਹ੍ਮਣ;

ਤਾਸੁ ਇਸ੍ਸਾ ਵਾ ਕੋਧੋ ਵਾ, ਨਾਹੁ ਮਯ੍ਹਂ ਕੁਦਾਚਨਂ.

੧੦੯.

‘‘ਹਿਤੇਨ ਤਾਸਂ ਨਨ੍ਦਾਮਿ, ਨ ਚ ਮੇ ਕਾਚਿ ਅਪ੍ਪਿਯਾ;

ਅਤ੍ਤਾਨਂਵਾਨੁਕਮ੍ਪਾਮਿ, ਸਦਾ ਸਬ੍ਬਾ ਸਪਤ੍ਤਿਯੋ.

੧੧੦.

‘‘ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੧੧.

‘‘ਦਾਸੇ ਕਮ੍ਮਕਰੇ ਪੇਸ੍ਸੇ, ਯੇ ਚਞ੍ਞੇ ਅਨੁਜੀਵਿਨੋ;

ਪੇਸੇਮਿ ਸਹਧਮ੍ਮੇਨ, ਸਦਾ ਪਮੁਦਿਤਿਨ੍ਦ੍ਰਿਯਾ.

੧੧੨.

‘‘ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੧੩.

‘‘ਸਮਣੇ ਬ੍ਰਾਹ੍ਮਣੇ ਚਾਪਿ, ਅਞ੍ਞੇ ਚਾਪਿ ਵਨਿਬ੍ਬਕੇ;

ਤਪ੍ਪੇਮਿ ਅਨ੍ਨਪਾਨੇਨ, ਸਦਾ ਪਯਤਪਾਣਿਨੀ.

੧੧੪.

‘‘ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੧੫.

‘‘ਚਾਤੁਦ੍ਦਸਿਂ ਪਞ੍ਚਦ੍ਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ;

ਉਪੋਸਥਂ ਉਪਵਸਾਮਿ, ਸਦਾ ਸੀਲੇਸੁ ਸਂਵੁਤਾ.

੧੧੬.

‘‘ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ’’ਤਿ.

ਤਤ੍ਥ ਮਹੇਸੀਤਿ ਅਗ੍ਗਮਹੇਸੀ. ਸੁਰੁਚਿਨੋਤਿ ਸੁਰੁਚਿਰਞ੍ਞੋ. ਪਠਮਨ੍ਤਿ ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਸਬ੍ਬਪਠਮਂ. ਯਂ ਮਨ੍ਤਿ ਯਸ੍ਮਿਂ ਕਾਲੇ ਮਂ ਸੁਰੁਚਿ ਆਨਯਿ, ਤਤੋ ਪਟ੍ਠਾਯ ਅਹਂ ਦਸ ਵਸ੍ਸਸਹਸ੍ਸਾਨਿ ਏਕਿਕਾਵ ਇਮਸ੍ਮਿਂ ਗੇਹੇ ਵਸਿਂ. ਅਤਿਮਞ੍ਞਿਤ੍ਥਾਤਿ ਮੁਹੁਤ੍ਤਮ੍ਪਿ ਸਮ੍ਮੁਖਾ ਵਾ ਪਰਮ੍ਮੁਖਾ ਵਾ ਅਤਿਮਞ੍ਞਿਨ੍ਤਿ ਇਦਂ ਅਤਿਕ੍ਕਮਿਤ੍ਵਾ ਮਞ੍ਞਨਂ ਨ ਜਾਨਾਮਿ ਨ ਸਰਾਮਿ. ਇਸੇਤਿ ਤਂ ਆਲਪਤਿ.

ਤੇ ਮਨ੍ਤਿ ਸਸੁਰੋ ਚ ਸਸ੍ਸੁ ਚਾਤਿ ਤੇ ਉਭੋਪਿ ਮਂ ਵਿਨੇਤਾਰੋ, ਤੇਹਿ ਵਿਨੀਤਾ ਅਮ੍ਹਿ, ਤੇ ਮੇ ਯਾਵ ਜੀਵਿਂਸੁ, ਤਾਵ ਓਵਾਦਮਦਂਸੁ. ਅਹਿਂਸਾਰਤਿਨੀਤਿ ਅਹਿਂਸਾਸਙ੍ਖਾਤਾਯ ਰਤਿਯਾ ਸਮਨ੍ਨਾਗਤਾ. ਮਯਾ ਹਿ ਕੁਨ੍ਥਕਿਪਿਲ੍ਲਿਕੋਪਿ ਨ ਹਿਂਸਿਤਪੁਬ੍ਬੋ. ਕਾਮਸਾਤਿ ਏਕਨ੍ਤੇਨੇਵ. ਧਮ੍ਮਚਾਰਿਨੀਤਿ ਦਸਕੁਸਲਕਮ੍ਮਪਥੇਸੁ ਪੂਰੇਮਿ. ਉਪਟ੍ਠਾਸਿਨ੍ਤਿ ਪਾਦਪਰਿਕਮ੍ਮਾਦੀਨਿ ਕਿਚ੍ਚਾਨਿ ਕਰੋਨ੍ਤੀ ਉਪਟ੍ਠਹਿਂ.

ਸਹਭਰਿਯਾਨੀਤਿ ਮਯਾ ਸਹ ਏਕਸਾਮਿਕਸ੍ਸ ਭਰਿਯਭੂਤਾਨਿ. ਨਾਹੂਤਿ ਕਿਲੇਸਂ ਨਿਸ੍ਸਾਯ ਇਸ੍ਸਾਧਮ੍ਮੋ ਵਾ ਕੋਧਧਮ੍ਮੋ ਵਾ ਮਯ੍ਹਂ ਨ ਭੂਤਪੁਬ੍ਬੋ. ਹਿਤੇਨਾਤਿ ਯਂ ਤਾਸਂ ਹਿਤਂ, ਤੇਨੇਵ ਨਨ੍ਦਾਮਿ, ਉਰੇ ਵੁਤ੍ਥਧੀਤਰੋ ਵਿਯ ਤਾ ਦਿਸ੍ਵਾ ਤੁਸ੍ਸਾਮਿ. ਕਾਚੀਤਿ ਤਾਸੁ ਏਕਾਪਿ ਮਯ੍ਹਂ ਅਪ੍ਪਿਯਾ ਨਾਮ ਨਤ੍ਥਿ, ਸਬ੍ਬਾਪਿ ਪਿਯਕਾਯੇਵ. ਅਨੁਕਮ੍ਪਾਮੀਤਿ ਮੁਦੁਚਿਤ੍ਤੇਨ ਸਬ੍ਬਾ ਸੋਲ਼ਸਸਹਸ੍ਸਾਪਿ ਤਾ ਅਤ੍ਤਾਨਂ ਵਿਯ ਅਨੁਕਮ੍ਪਾਮਿ.

ਸਹਧਮ੍ਮੇਨਾਤਿ ਨਯੇਨ ਕਾਰਣੇਨ ਯੋ ਯਂ ਕਾਤੁਂ ਸਕ੍ਕੋਤਿ, ਤਂ ਤਸ੍ਮਿਂ ਕਮ੍ਮੇ ਪਯੋਜੇਮੀਤਿ ਅਤ੍ਥੋ. ਪਮੁਦਿਤਿਨ੍ਦ੍ਰਿਯਾਤਿ ਪੇਸੇਨ੍ਤੀ ਚ ਨਿਚ੍ਚਂ ਪਮੁਦਿਤਿਨ੍ਦ੍ਰਿਯਾਵ ਹੁਤ੍ਵਾ ਪੇਸੇਮਿ, ‘‘ਅਰੇ ਦੁਟ੍ਠ ਦਾਸ ਇਦਂ ਨਾਮ ਕਰੋਹੀ’ਤਿ ਏਵਂ ਕੁਜ੍ਝਿਤ੍ਵਾ ਨ ਮੇ ਕੋਚਿ ਕਤ੍ਥਚਿ ਪੇਸਿਤਪੁਬ੍ਬੋ. ਪਯਤਪਾਣਿਨੀਤਿ ਧੋਤਹਤ੍ਥਾ ਪਸਾਰਿਤਹਤ੍ਥਾਵ ਹੁਤ੍ਵਾ. ਪਾਟਿਹਾਰਿਯਪਕ੍ਖਞ੍ਚਾਤਿ ਅਟ੍ਠਮੀਚਾਤੁਦ੍ਦਸੀਪਨ੍ਨਰਸੀਨਂ ਪਚ੍ਚੁਗ੍ਗਮਨਾਨੁਗ੍ਗਮਨਵਸੇਨ ਚਤ੍ਤਾਰੋ ਦਿਵਸਾ. ਸਦਾਤਿ ਨਿਚ੍ਚਕਾਲਂ ਪਞ੍ਚਸੁ ਸੀਲੇਸੁ ਸਂਵੁਤਾ, ਤੇਹਿ ਪਿਹਿਤਗੋਪਿਤਤ੍ਤਭਾਵਾਵ ਹੋਮੀਤਿ.

ਏਵਂ ਤਸ੍ਸਾ ਗਾਥਾਯ ਸਤੇਨਪਿ ਸਹਸ੍ਸੇਨਪਿ ਵਣ੍ਣਿਯਮਾਨਾਨਂ ਗੁਣਾਨਂ ਪਮਾਣਂ ਨਾਮ ਨਤ੍ਥਿ, ਤਾਯ ਪਨ੍ਨਰਸਹਿ ਗਾਥਾਹਿ ਅਤ੍ਤਨੋ ਗੁਣਾਨਂ ਵਣ੍ਣਿਤਕਾਲੇਯੇਵ ਸਕ੍ਕੋ ਅਤ੍ਤਨੋ ਬਹੁਕਰਣੀਯਤਾਯ ਤਸ੍ਸਾ ਕਥਂ ਅਵਿਚ੍ਛਿਨ੍ਦਿਤ੍ਵਾ ‘‘ਪਹੂਤਾ ਅਬ੍ਭੁਤਾਯੇਵ ਤੇ ਗੁਣਾ’’ਤਿ ਤਂ ਪਸਂਸਨ੍ਤੋ ਗਾਥਾਦ੍ਵਯਮਾਹ –

੧੧੭.

‘‘ਸਬ੍ਬੇਵ ਤੇ ਧਮ੍ਮਗੁਣਾ, ਰਾਜਪੁਤ੍ਤਿ ਯਸਸ੍ਸਿਨਿ;

ਸਂਵਿਜ੍ਜਨ੍ਤਿ ਤਯਿ ਭਦ੍ਦੇ, ਯੇ ਤ੍ਵਂ ਕਿਤ੍ਤੇਸਿ ਅਤ੍ਤਨਿ.

੧੧੮.

‘‘ਖਤ੍ਤਿਯੋ ਜਾਤਿਸਮ੍ਪਨ੍ਨੋ, ਅਭਿਜਾਤੋ ਯਸਸ੍ਸਿਮਾ;

ਧਮ੍ਮਰਾਜਾ ਵਿਦੇਹਾਨਂ, ਪੁਤ੍ਤੋ ਉਪ੍ਪਜ੍ਜਤੇ ਤਵਾ’’ਤਿ.

ਤਤ੍ਥ ਧਮ੍ਮਗੁਣਾਤਿ ਸਭਾਵਗੁਣਾ ਭੂਤਗੁਣਾ. ਸਂਵਿਜ੍ਜਨ੍ਤੀਤਿ ਯੇ ਤਯਾ ਵੁਤ੍ਤਾ, ਤੇ ਸਬ੍ਬੇਵ ਤਯਿ ਉਪਲਬ੍ਭਨ੍ਤਿ. ਅਭਿਜਾਤੋਤਿ ਅਤਿਜਾਤੋ ਸੁਦ੍ਧਜਾਤੋ. ਯਸਸ੍ਸਿਮਾਤਿ ਯਸਸਮ੍ਪਨ੍ਨੇਨ ਪਰਿਵਾਰਸਮ੍ਪਨ੍ਨੇਨ ਸਮਨ੍ਨਾਗਤੋ. ਉਪ੍ਪਜ੍ਜਤੇਤਿ ਏਵਰੂਪੋ ਪੁਤ੍ਤੋ ਤਵ ਉਪ੍ਪਜ੍ਜਿਸ੍ਸਤਿ, ਮਾ ਚਿਨ੍ਤਯੀਤਿ.

ਸਾ ਤਸ੍ਸ ਵਚਨਂ ਸੁਤ੍ਵਾ ਸੋਮਨਸ੍ਸਜਾਤਾ ਤਂ ਪੁਚ੍ਛਨ੍ਤੀ ਦ੍ਵੇ ਗਾਥਾ ਅਭਾਸਿ –

੧੧੯.

‘‘ਦੁਮ੍ਮੀ ਰਜੋਜਲ੍ਲਧਰੋ, ਅਘੇ ਵੇਹਾਯਸਂ ਠਿਤੋ;

ਮਨੁਞ੍ਞਂ ਭਾਸਸੇ ਵਾਚਂ, ਯਂ ਮਯ੍ਹਂ ਹਦਯਙ੍ਗਮਂ.

੧੨੦.

‘‘ਦੇਵਤਾਨੁਸਿ ਸਗ੍ਗਮ੍ਹਾ, ਇਸਿ ਵਾਸਿ ਮਹਿਦ੍ਧਿਕੋ;

ਕੋ ਵਾਸਿ ਤ੍ਵਂ ਅਨੁਪ੍ਪਤ੍ਤੋ, ਅਤ੍ਤਾਨਂ ਮੇ ਪਵੇਦਯਾ’’ਤਿ.

ਤਤ੍ਥ ਦੁਮ੍ਮੀਤਿ ਅਨਞ੍ਜਿਤਾਮਣ੍ਡਿਤੋ ਸਕ੍ਕੋ ਆਗਚ੍ਛਨ੍ਤੋ ਰਮਣੀਯੇਨ ਤਾਪਸਵੇਸੇਨ ਆਗਤੋ, ਪਬ੍ਬਜਿਤਵੇਸੇਨ ਆਗਤਤ੍ਤਾ ਪਨ ਸਾ ਏਵਮਾਹ. ਅਘੇਤਿ ਅਪ੍ਪਟਿਘੇ ਠਾਨੇ. ਯਂ ਮਯ੍ਹਨ੍ਤਿ ਯਂ ਏਤਂ ਮਨੁਞ੍ਞਂ ਵਾਚਂ ਮਯ੍ਹਂ ਭਾਸਸਿ, ਤਂ ਭਾਸਮਾਨੋ ਤ੍ਵਂ ਦੇਵਤਾਨੁਸਿ ਸਗ੍ਗਮ੍ਹਾ ਇਧਾਗਤੋ. ਇਸਿ ਵਾਸਿ ਮਹਿਦ੍ਧਿਕੋਤਿ ਯਕ੍ਖਾਦੀਸੁ ਕੋ ਵਾ ਤ੍ਵਂ ਅਸਿ ਇਧਾਨੁਪ੍ਪਤ੍ਤੋ, ਅਤ੍ਤਾਨਂ ਮੇ ਪਵੇਦਯ, ਯਥਾਭੂਤਂ ਕਥੇਹੀਤਿ ਵਦਤਿ.

ਸਕ੍ਕੋ ਤਸ੍ਸਾ ਕਥੇਨ੍ਤੋ ਛ ਗਾਥਾ ਅਭਾਸਿ –

੧੨੧.

‘‘ਯਂ ਦੇਵਸਙ੍ਘਾ ਵਨ੍ਦਨ੍ਤਿ, ਸੁਧਮ੍ਮਾਯਂ ਸਮਾਗਤਾ;

ਸੋਹਂ ਸਕ੍ਕੋ ਸਹਸ੍ਸਕ੍ਖੋ, ਆਗਤੋਸ੍ਮਿ ਤਵਨ੍ਤਿਕੇ.

੧੨੨.

‘‘ਇਤ੍ਥਿਯੋ ਜੀਵਲੋਕਸ੍ਮਿਂ, ਯਾ ਹੋਤਿ ਸਮਚਾਰਿਨੀ;

ਮੇਧਾਵਿਨੀ ਸੀਲਵਤੀ, ਸਸ੍ਸੁਦੇਵਾ ਪਤਿਬ੍ਬਤਾ.

੧੨੩.

‘‘ਤਾਦਿਸਾਯ ਸੁਮੇਧਾਯ, ਸੁਚਿਕਮ੍ਮਾਯ ਨਾਰਿਯਾ;

ਦੇਵਾ ਦਸ੍ਸਨਮਾਯਨ੍ਤਿ, ਮਾਨੁਸਿਯਾ ਅਮਾਨੁਸਾ.

੧੨੪.

‘‘ਤ੍ਵਞ੍ਚ ਭਦ੍ਦੇ ਸੁਚਿਣ੍ਣੇਨ, ਪੁਬ੍ਬੇ ਸੁਚਰਿਤੇਨ ਚ;

ਇਧ ਰਾਜਕੁਲੇ ਜਾਤਾ, ਸਬ੍ਬਕਾਮਸਮਿਦ੍ਧਿਨੀ.

੧੨੫.

‘‘ਅਯਞ੍ਚ ਤੇ ਰਾਜਪੁਤ੍ਤਿ, ਉਭਯਤ੍ਥ ਕਟਗ੍ਗਹੋ;

ਦੇਵਲੋਕੂਪਪਤ੍ਤੀ ਚ, ਕਿਤ੍ਤੀ ਚ ਇਧ ਜੀਵਿਤੇ.

੧੨੬.

‘‘ਚਿਰਂ ਸੁਮੇਧੇ ਸੁਖਿਨੀ, ਧਮ੍ਮਮਤ੍ਤਨਿ ਪਾਲਯ;

ਏਸਾਹਂ ਤਿਦਿਵਂ ਯਾਮਿ, ਪਿਯਂ ਮੇ ਤਵ ਦਸ੍ਸਨ’’ਨ੍ਤਿ.

ਤਤ੍ਥ ਸਹਸ੍ਸਕ੍ਖੋਤਿ ਅਤ੍ਥਸਹਸ੍ਸਸ੍ਸ ਤਂਮੁਹੁਤ੍ਤਂ ਦਸ੍ਸਨਵਸੇਨ ਸਹਸ੍ਸਕ੍ਖੋ. ਇਤ੍ਥਿਯੋਤਿ ਇਤ੍ਥੀ. ਸਮਚਾਰਿਨੀਤਿ ਤੀਹਿ ਦ੍ਵਾਰੇਹਿ ਸਮਚਰਿਯਾਯ ਸਮਨ੍ਨਾਗਤਾ. ਤਾਦਿਸਾਯਾਤਿ ਤਥਾਰੂਪਾਯ. ਸੁਮੇਧਾਯਾਤਿ ਸੁਪਞ੍ਞਾਯ. ਉਭਯਤ੍ਥ ਕਟਗ੍ਗਹੋਤਿ ਅਯਂ ਤਵ ਇਮਸ੍ਮਿਞ੍ਚ ਅਤ੍ਤਭਾਵੇ ਅਨਾਗਤੇ ਚ ਜਯਗ੍ਗਾਹੋ. ਤੇਸੁ ਅਨਾਗਤੇ ਦੇਵਲੋਕੁਪ੍ਪਤ੍ਤਿ ਚ ਇਧ ਜੀਵਿਤੇ ਪਵਤ੍ਤਮਾਨੇ ਕਿਤ੍ਤਿ ਚਾਤਿ ਅਯਂ ਉਭਯਤ੍ਥ ਕਟਗ੍ਗਹੋ ਨਾਮ. ਧਮ੍ਮਨ੍ਤਿ ਏਵਂ ਸਭਾਵਗੁਣਂ ਚਿਰਂ ਅਤ੍ਤਨਿ ਪਾਲਯ. ਏਸਾਹਨ੍ਤਿ ਏਸੋ ਅਹਂ. ਪਿਯਂ ਮੇਤਿ ਮਯ੍ਹਂ ਤਵ ਦਸ੍ਸਨਂ ਪਿਯਂ.

ਦੇਵਲੋਕੇ ਪਨ ਮੇ ਕਿਚ੍ਚਕਰਣੀਯਂ ਅਤ੍ਥਿ, ਤਸ੍ਮਾ ਗਚ੍ਛਾਮਿ, ਤ੍ਵਂ ਅਪ੍ਪਮਤ੍ਤਾ ਹੋਹੀਤਿ ਤਸ੍ਸਾ ਓਵਾਦਂ ਦਤ੍ਵਾ ਪਕ੍ਕਾਮਿ. ਨਲ਼ਕਾਰਦੇਵਪੁਤ੍ਤੋ ਪਨ ਪਚ੍ਚੂਸਕਾਲੇ ਚਵਿਤ੍ਵਾ ਤਸ੍ਸਾ ਕੁਚ੍ਛਿਯਂ ਪਟਿਸਨ੍ਧਿਂ ਗਣ੍ਹਿ. ਸਾ ਗਬ੍ਭਸ੍ਸ ਪਤਿਟ੍ਠਿਤਭਾਵਂ ਞਤ੍ਵਾ ਰਞ੍ਞੋ ਆਰੋਚੇਸਿ, ਰਾਜਾ ਗਬ੍ਭਸ੍ਸ ਪਰਿਹਾਰਂ ਅਦਾਸਿ. ਸਾ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿ, ‘‘ਮਹਾਪਨਾਦੋ’’ਤਿਸ੍ਸ ਨਾਮਂ ਕਰਿਂਸੁ. ਉਭਯਰਟ੍ਠਵਾਸਿਨੋ ‘‘ਸਾਮਿਪੁਤ੍ਤਸ੍ਸ ਨੋ ਖੀਰਮੂਲ’’ਨ੍ਤਿ ਏਕੇਕਂ ਕਹਾਪਣਂ ਰਾਜਙ੍ਗਣੇ ਖਿਪਿਂਸੁ, ਮਹਾਧਨਰਾਸਿ ਅਹੋਸਿ. ਰਞ੍ਞਾ ਪਟਿਕ੍ਖਿਤ੍ਤਾਪਿ ‘‘ਸਾਮਿਪੁਤ੍ਤਸ੍ਸ ਨੋ ਵਡ੍ਢਿਤਕਾਲੇ ਪਰਿਬ੍ਬਯੋ ਭਵਿਸ੍ਸਤੀ’’ਤਿ ਅਗ੍ਗਹੇਤ੍ਵਾਵ ਪਕ੍ਕਮਿਂਸੁ. ਕੁਮਾਰੋ ਪਨ ਮਹਾਪਰਿਵਾਰੇਨ ਵਡ੍ਢਿਤ੍ਵਾ ਵਯਪ੍ਪਤ੍ਤੋ ਸੋਲ਼ਸਵਸ੍ਸਕਾਲੇਯੇਵ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਾਪੁਣਿ. ਰਾਜਾ ਪੁਤ੍ਤਸ੍ਸ ਵਯਂ ਓਲੋਕੇਤ੍ਵਾ ਦੇਵਿਂ ਆਹ – ‘‘ਭਦ੍ਦੇ, ਪੁਤ੍ਤਸ੍ਸ ਮੇ ਰਜ੍ਜਾਭਿਸੇਕਕਾਲੋ, ਰਮਣੀਯਮਸ੍ਸ ਪਾਸਾਦਂ ਕਾਰੇਤ੍ਵਾ ਅਭਿਸੇਕਂ ਕਰਿਸ੍ਸਾਮੀ’’ਤਿ. ਸਾ ‘‘ਸਾਧੁ ਦੇਵਾ’’ਤਿ ਸਮ੍ਪਟਿਚ੍ਛਿ. ਰਾਜਾ ਵਤ੍ਥੁਵਿਜ੍ਜਾਚਰਿਯੇ ਪਕ੍ਕੋਸਾਪੇਤ੍ਵਾ ‘‘ਤਾਤਾ, ਵਡ੍ਢਕਿਂ ਗਹੇਤ੍ਵਾ ਅਮ੍ਹਾਕਂ ਨਿਵੇਸਨਤੋ ਅਵਿਦੂਰੇ ਪੁਤ੍ਤਸ੍ਸ ਮੇ ਪਾਸਾਦਂ ਮਾਪੇਥ, ਰਜ੍ਜੇਨ ਨਂ ਅਭਿਸਿਞ੍ਚਿਸ੍ਸਾਮਾ’’ਤਿ ਆਹ. ਤੇ ‘‘ਸਾਧੁ, ਦੇਵਾ’’ਤਿ ਭੂਮਿਪ੍ਪਦੇਸਂ ਵੀਮਂਸਨ੍ਤਿ.

ਤਸ੍ਮਿਂ ਖਣੇ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਸੋ ਤਂ ਕਾਰਣਂ ਞਤ੍ਵਾ ਵਿਸ੍ਸਕਮ੍ਮਂ ਆਮਨ੍ਤੇਤ੍ਵਾ ‘‘ਗਚ੍ਛ, ਤਾਤ, ਮਹਾਪਨਾਦਕੁਮਾਰਸ੍ਸ ਆਯਾਮੇਨ ਨਵਯੋਜਨਿਕਂ, ਵਿਤ੍ਥਾਰਤੋ ਅਟ੍ਠਯੋਜਨਿਕਂ, ਉਬ੍ਬੇਧੇਨ ਪਞ੍ਚਵੀਸਤਿਯੋਜਨਿਕਂ, ਰਤਨਪਾਸਾਦਂ ਮਾਪੇਹੀ’’ਤਿ ਪੇਸੇਸਿ. ਸੋ ਵਡ੍ਢਕੀਵੇਸੇਨ ਵਡ੍ਢਕੀਨਂ ਸਨ੍ਤਿਕਂ ਗਨ੍ਤ੍ਵਾ ‘‘ਤੁਮ੍ਹੇ ਪਾਤਰਾਸਂ ਭੁਞ੍ਜਿਤ੍ਵਾ ਏਥਾ’’ਤਿ ਤੇ ਪੇਸੇਤ੍ਵਾ ਦਣ੍ਡਕੇਨ ਭੂਮਿਂ ਪਹਰਿ, ਤਾਵਦੇਵ ਵੁਤ੍ਤਪ੍ਪਕਾਰੋ ਸਤ੍ਤਭੂਮਿਕੋ ਪਾਸਾਦੋ ਉਟ੍ਠਹਿ. ਮਹਾਪਨਾਦਸ੍ਸ ਪਾਸਾਦਮਙ੍ਗਲਂ, ਛਤ੍ਤਮਙ੍ਗਲਂ, ਆਵਾਹਮਙ੍ਗਲਨ੍ਤਿ ਤੀਣਿ ਮਙ੍ਗਲਾਨਿ ਏਕਤੋਵ ਅਹੇਸੁਂ. ਮਙ੍ਗਲਟ੍ਠਾਨੇ ਉਭਯਰਟ੍ਠਵਾਸਿਨੋ ਸਨ੍ਨਿਪਤਿਤ੍ਵਾ ਮਙ੍ਗਲਚ੍ਛਣੇਨ ਸਤ੍ਤ ਵਸ੍ਸਾਨਿ ਵੀਤਿਨਾਮੇਸੁਂ. ਨੇਵ ਨੇ ਰਾਜਾ ਉਯ੍ਯੋਜੇਸਿ, ਤੇਸਂ ਵਤ੍ਥਾਲਙ੍ਕਾਰਖਾਦਨੀਯਭੋਜਨੀਯਾਦਿ ਸਬ੍ਬਂ ਰਾਜਕੁਲਸਨ੍ਤਕਮੇਵ ਅਹੋਸਿ. ਤੇ ਸਤ੍ਤਸਂਵਚ੍ਛਰਚ੍ਚਯੇਨ ਉਪਕ੍ਕੋਸਿਤ੍ਵਾ ਸੁਰੁਚਿਮਹਾਰਾਜੇਨ ‘‘ਕਿਮੇਤ’’ਨ੍ਤਿ ਪੁਟ੍ਠਾ ‘‘ਮਹਾਰਾਜ, ਅਮ੍ਹਾਕਂ ਮਙ੍ਗਲਂ ਭੁਞ੍ਜਨ੍ਤਾਨਂ ਸਤ੍ਤ ਵਸ੍ਸਾਨਿ ਗਤਾਨਿ, ਕਦਾ ਮਙ੍ਗਲਸ੍ਸ ਓਸਾਨਂ ਭਵਿਸ੍ਸਤੀ’’ਤਿ ਆਹਂਸੁ. ਤਤੋ ਰਾਜਾ ‘‘ਤਾਤਾ, ਪੁਤ੍ਤੇਨ ਮੇ ਏਤ੍ਤਕਂ ਕਾਲਂ ਨ ਹਸਿਤਪੁਬ੍ਬਂ, ਯਦਾ ਸੋ ਹਸਿਸ੍ਸਤਿ, ਤਦਾ ਗਮਿਸ੍ਸਥਾ’’ਤਿ ਆਹ. ਅਥ ਮਹਾਜਨੋ ਭੇਰਿਂ ਚਰਾਪੇਤ੍ਵਾ ਨਟੇ ਸਨ੍ਨਿਪਾਤੇਸਿ. ਛ ਨਟਸਹਸ੍ਸਾਨਿ ਸਨ੍ਨਿਪਤਿਤ੍ਵਾ ਸਤ੍ਤ ਕੋਟ੍ਠਾਸਾ ਹੁਤ੍ਵਾ ਨਚ੍ਚਨ੍ਤਾ ਰਾਜਾਨਂ ਹਸਾਪੇਤੁਂ ਨਾਸਕ੍ਖਿਂਸੁ. ਤਸ੍ਸ ਕਿਰ ਦੀਘਰਤ੍ਤਂ ਦਿਬ੍ਬਨਾਟਕਾਨਂ ਦਿਟ੍ਠਤ੍ਤਾ ਤੇਸਂ ਨਚ੍ਚਂ ਅਮਨੁਞ੍ਞਂ ਅਹੋਸਿ.

ਤਦਾ ਭਣ੍ਡੁਕਣ੍ਡੋ ਚ ਪਣ੍ਡੁਕਣ੍ਡੋ ਚਾਤਿ ਦ੍ਵੇ ਨਾਟਕਜੇਟ੍ਠਕਾ ‘‘ਮਯਂ ਰਾਜਾਨਂ ਹਸਾਪੇਸ੍ਸਾਮਾ’’ਤਿ ਰਾਜਙ੍ਗਣਂ ਪਵਿਸਿਂਸੁ. ਤੇਸੁ ਭਣ੍ਡੁਕਣ੍ਡੋ ਤਾਵ ਰਾਜਦ੍ਵਾਰੇ ਮਹਨ੍ਤਂ ਅਤੁਲਂ ਨਾਮ ਅਮ੍ਬਂ ਮਾਪੇਤ੍ਵਾ ਸੁਤ੍ਤਗੁਲ਼ਂ ਖਿਪਿਤ੍ਵਾ ਤਸ੍ਸ ਸਾਖਾਯ ਲਗ੍ਗਾਪੇਤ੍ਵਾ ਸੁਤ੍ਤੇਨ ਅਤੁਲਮ੍ਬਂ ਅਭਿਰੁਹਿ. ਅਤੁਲਮ੍ਬੋਤਿ ਕਿਰ ਵੇਸ੍ਸਵਣਸ੍ਸ ਅਮ੍ਬੋ. ਅਥ ਤਮ੍ਪਿ ਵੇਸ੍ਸਵਣਸ੍ਸ ਦਾਸਾ ਗਹੇਤ੍ਵਾ ਅਙ੍ਗਪਚ੍ਚਙ੍ਗਾਨਿ ਛਿਨ੍ਦਿਤ੍ਵਾ ਪਾਤੇਸੁਂ, ਸੇਸਨਾਟਕਾ ਤਾਨਿ ਸਮੋਧਾਨੇਤ੍ਵਾ ਉਦਕੇਨ ਅਭਿਸਿਞ੍ਚਿਂਸੁ. ਸੋ ਪੁਪ੍ਫਪਟਂ ਨਿਵਾਸੇਤ੍ਵਾ ਚ ਪਾਰੁਪਿਤ੍ਵਾ ਚ ਨਚ੍ਚਨ੍ਤੋਵ ਉਟ੍ਠਹਿ. ਮਹਾਪਨਾਦੋ ਤਮ੍ਪਿ ਦਿਸ੍ਵਾ ਨੇਵ ਹਸਿ. ਪਣ੍ਡੁਕਣ੍ਡੋ ਨਟੋ ਰਾਜਙ੍ਗਣੇ ਦਾਰੁਚਿਤਕਂ ਕਾਰੇਤ੍ਵਾ ਅਤ੍ਤਨੋ ਪਰਿਸਾਯ ਸਦ੍ਧਿਂ ਅਗ੍ਗਿਂ ਪਾਵਿਸਿ. ਤਸ੍ਮਿਂ ਨਿਬ੍ਬੁਤੇ ਚਿਤਕਂ ਉਦਕੇਨ ਅਭਿਸਿਞ੍ਚਿਂਸੁ. ਸੋ ਸਪਰਿਸੋ ਪੁਪ੍ਫਪਟਂ ਨਿਵਾਸੇਤ੍ਵਾ ਚ ਪਾਰੁਪਿਤ੍ਵਾ ਚ ਨਚ੍ਚਨ੍ਤੋਵ ਉਟ੍ਠਹਿ. ਤਮ੍ਪਿ ਦਿਸ੍ਵਾ ਰਾਜਾ ਨੇਵ ਹਸਿ. ਇਤਿ ਤਂ ਹਸਾਪੇਤੁਂ ਅਸਕ੍ਕੋਨ੍ਤਾ ਮਨੁਸ੍ਸਾ ਉਪਦ੍ਦੁਤਾ ਅਹੇਸੁਂ.

ਸਕ੍ਕੋ ਤਂ ਕਾਰਣਂ ਞਤ੍ਵਾ ‘‘ਗਚ੍ਛ, ਤਾਤ, ਮਹਾਪਨਾਦਂ ਹਸਾਪੇਤ੍ਵਾ ਏਹੀ’’ਤਿ ਦੇਵਨਟਂ ਪੇਸੇਸਿ. ਸੋ ਆਗਨ੍ਤ੍ਵਾ ਰਾਜਙ੍ਗਣੇ ਆਕਾਸੇ ਠਤ੍ਵਾ ਉਪਡ੍ਢਅਙ੍ਗਂ ਨਾਮ ਦਸ੍ਸੇਸਿ, ਏਕੋਵ ਹਤ੍ਥੋ, ਏਕੋਵ ਪਾਦੋ, ਏਕਂ ਅਕ੍ਖਿ, ਏਕਾ ਦਾਠਾ ਨਚ੍ਚਤਿ ਚਲਤਿ ਫਨ੍ਦਤਿ, ਸੇਸਂ ਨਿਚ੍ਚਲਮਹੋਸਿ. ਤਂ ਦਿਸ੍ਵਾ ਮਹਾਪਨਾਦੋ ਥੋਕਂ ਹਸਿਤਂ ਅਕਾਸਿ. ਮਹਾਜਨੋ ਪਨ ਹਸਨ੍ਤੋ ਹਸਨ੍ਤੋ ਹਾਸਂ ਸਨ੍ਧਾਰੇਤੁਂ ਸਤਿਂ ਪਚ੍ਚੁਪਟ੍ਠਾਪੇਤੁਂ ਅਸਕ੍ਕੋਨ੍ਤੋ ਅਙ੍ਗਾਨਿ ਵਿਸ੍ਸਜ੍ਜੇਤ੍ਵਾ ਰਾਜਙ੍ਗਣੇਯੇਵ ਪਤਿ, ਤਸ੍ਮਿਂ ਕਾਲੇ ਮਙ੍ਗਲਂ ਨਿਟ੍ਠਿਤਂ. ਸੇਸਮੇਤ੍ਥ ‘‘ਪਨਾਦੋ ਨਾਮ ਸੋ ਰਾਜਾ, ਯਸ੍ਸ ਯੂਪੋ ਸੁਵਣ੍ਣਯੋ’’ਤਿ ਮਹਾਪਨਾਦਜਾਤਕੇਨ ਵਣ੍ਣੇਤਬ੍ਬਂ. ਰਾਜਾ ਮਹਾਪਨਾਦੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਆਯੁਪਰਿਯੋਸਾਨੇ ਦੇਵਲੋਕਮੇਵ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਵਿਸਾਖਾ ਪੁਬ੍ਬੇਪਿ ਮਮ ਸਨ੍ਤਿਕਾ ਵਰਂ ਲਭਿਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਹਾਪਨਾਦੋ ਭਦ੍ਦਜਿ ਅਹੋਸਿ, ਸੁਮੇਧਾਦੇਵੀ ਵਿਸਾਖਾ, ਵਿਸ੍ਸਕਮ੍ਮੋ ਆਨਨ੍ਦੋ, ਸਕ੍ਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੁਰੁਚਿਜਾਤਕਵਣ੍ਣਨਾ ਛਟ੍ਠਾ.

[੪੯੦] ੭. ਪਞ੍ਚੁਪੋਸਥਜਾਤਕਵਣ੍ਣਨਾ

ਅਪ੍ਪੋਸ੍ਸੁਕ੍ਕੋ ਦਾਨਿ ਤੁਵਂ ਕਪੋਤਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਪੋਸਥਿਕੇ ਪਞ੍ਚਸਤੇ ਉਪਾਸਕੇ ਆਰਬ੍ਭ ਕਥੇਸਿ. ਤਦਾ ਹਿ ਸਤ੍ਥਾ ਧਮ੍ਮਸਭਾਯਂ ਚਤੁਪਰਿਸਮਜ੍ਝੇ ਅਲਙ੍ਕਤਬੁਦ੍ਧਾਸਨੇ ਨਿਸੀਦਿਤ੍ਵਾ ਮੁਦੁਚਿਤ੍ਤੇਨ ਪਰਿਸਂ ਓਲੋਕੇਤ੍ਵਾ ‘‘ਅਜ੍ਜ ਉਪਾਸਕਾਨਂ ਕਥਂ ਪਟਿਚ੍ਚ ਦੇਸਨਾ ਸਮੁਟ੍ਠਹਿਸ੍ਸਤੀ’’ਤਿ ਞਤ੍ਵਾ ਉਪਾਸਕੇ ਆਮਨ੍ਤੇਤ੍ਵਾ ‘‘ਉਪੋਸਥਿਕਤ੍ਥ ਉਪਾਸਕਾ’’ਤਿ ਪੁਚ੍ਛਿਤ੍ਵਾ ‘‘ਆਮ, ਭਨ੍ਤੇ’’ਤਿ ਵੁਤ੍ਤੇ ‘‘ਸਾਧੁ ਵੋ ਕਤਂ, ਉਪੋਸਥੋ ਨਾਮੇਸ ਪੋਰਾਣਕਪਣ੍ਡਿਤਾਨਂ ਵਂਸੋ, ਪੋਰਾਣਕਪਣ੍ਡਿਤਾ ਹਿ ਰਾਗਾਦਿਕਿਲੇਸਨਿਗ੍ਗਹਤ੍ਥਂ ਉਪੋਸਥਵਾਸਂ ਵਸਿਂਸੂ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਮਗਧਰਟ੍ਠਾਦੀਨਂ ਤਿਣ੍ਣਂ ਰਟ੍ਠਾਨਂ ਅਨ੍ਤਰੇ ਅਟਵੀ ਅਹੋਸਿ. ਬੋਧਿਸਤ੍ਤੋ ਮਗਧਰਟ੍ਠੇ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਕਾਮੇ ਪਹਾਯ ਨਿਕ੍ਖਮਿਤ੍ਵਾ ਤਂ ਅਟਵਿਂ ਪਵਿਸਿਤ੍ਵਾ ਅਸ੍ਸਮਂ ਕਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਾਸਂ ਕਪ੍ਪੇਸਿ. ਤਸ੍ਸ ਪਨ ਅਸ੍ਸਮਸ੍ਸ ਅਵਿਦੂਰੇ ਏਕਸ੍ਮਿਂ ਵੇਲ਼ੁਗਹਨੇ ਅਤ੍ਤਨੋ ਭਰਿਯਾਯ ਸਦ੍ਧਿਂ ਕਪੋਤਸਕੁਣੋ ਵਸਤਿ, ਏਕਸ੍ਮਿਂ ਵਮ੍ਮਿਕੇ ਅਹਿ, ਏਕਸ੍ਮਿਂ ਵਨਗੁਮ੍ਬੇ ਸਿਙ੍ਗਾਲੋ, ਏਕਸ੍ਮਿਂ ਵਨਗੁਮ੍ਬੇ ਅਚ੍ਛੋ. ਤੇ ਚਤ੍ਤਾਰੋਪਿ ਕਾਲੇਨ ਕਾਲਂ ਇਸਿਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਣਨ੍ਤਿ.

ਅਥੇਕਦਿਵਸਂ ਕਪੋਤੋ ਭਰਿਯਾਯ ਸਦ੍ਧਿਂ ਕੁਲਾਵਕਾ ਨਿਕ੍ਖਮਿਤ੍ਵਾ ਗੋਚਰਾਯ ਪਕ੍ਕਾਮਿ. ਤਸ੍ਸ ਪਚ੍ਛਤੋ ਗਚ੍ਛਨ੍ਤਿਂ ਕਪੋਤਿਂ ਏਕੋ ਸੇਨੋ ਗਹੇਤ੍ਵਾ ਪਲਾਯਿ. ਤਸ੍ਸਾ ਵਿਰਵਸਦ੍ਦਂ ਸੁਤ੍ਵਾ ਕਪੋਤੋ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ਤਂ ਤੇਨ ਹਰਿਯਮਾਨਂ ਪਸ੍ਸਿ. ਸੇਨੋਪਿ ਨਂ ਵਿਰਵਨ੍ਤਿਂਯੇਵ ਮਾਰੇਤ੍ਵਾ ਖਾਦਿ. ਕਪੋਤੋ ਤਾਯ ਵਿਯੋਗੇਨ ਰਾਗਪਰਿਲ਼ਾਹੇਨ ਪਰਿਡਯ੍ਹਮਾਨੋ ਚਿਨ੍ਤੇਸਿ ‘‘ਅਯਂ ਰਾਗੋ ਮਂ ਅਤਿਵਿਯ ਕਿਲਮੇਤਿ, ਨ ਇਦਾਨਿ ਇਮਂ ਅਨਿਗ੍ਗਹੇਤ੍ਵਾ ਗੋਚਰਾਯ ਪਕ੍ਕਮਿਸ੍ਸਾਮੀ’’ਤਿ. ਸੋ ਗੋਚਰਪਥਂ ਪਚ੍ਛਿਨ੍ਦਿਤ੍ਵਾ ਤਾਪਸਸ੍ਸ ਸਨ੍ਤਿਕਂ ਗਨ੍ਤ੍ਵਾ ਰਾਗਨਿਗ੍ਗਹਾਯ ਉਪੋਸਥਂ ਸਮਾਦਿਯਿਤ੍ਵਾ ਏਕਮਨ੍ਤਂ ਨਿਪਜ੍ਜਿ.

ਸਪ੍ਪੋਪਿ ‘‘ਗੋਚਰਂ ਪਰਿਯੇਸਿਸ੍ਸਾਮੀ’’ਤਿ ਵਸਨਟ੍ਠਾਨਾ ਨਿਕ੍ਖਮਿਤ੍ਵਾ ਪਚ੍ਚਨ੍ਤਗਾਮੇ ਗਾਵੀਨਂ ਵਿਚਰਣਟ੍ਠਾਨੇ ਗੋਚਰਂ ਪਰਿਯੇਸਤਿ. ਤਦਾ ਗਾਮਭੋਜਕਸ੍ਸ ਸਬ੍ਬਸੇਤੋ ਮਙ੍ਗਲਉਸਭੋ ਗੋਚਰਂ ਗਹੇਤ੍ਵਾ ਏਕਸ੍ਮਿਂ ਵਮ੍ਮਿਕਪਾਦੇ ਜਣ੍ਣੁਨਾ ਪਤਿਟ੍ਠਾਯ ਸਿਙ੍ਗੇਹਿ ਮਤ੍ਤਿਕਂ ਗਣ੍ਹਨ੍ਤੋ ਕੀਲ਼ਤਿ, ਸਪ੍ਪੋ ਗਾਵੀਨਂ ਪਦਸਦ੍ਦੇਨ ਭੀਤੋ ਤਂ ਵਮ੍ਮਿਕਂ ਪਵਿਸਿਤੁਂ ਪਕ੍ਕਨ੍ਤੋ. ਅਥ ਨਂ ਉਸਭੋ ਪਾਦੇਨ ਅਕ੍ਕਮਿ. ਸੋ ਤਂ ਕੁਜ੍ਝਿਤ੍ਵਾ ਡਂਸਿ, ਉਸਭੋ ਤਤ੍ਥੇਵ ਜੀਵਿਤਕ੍ਖਯਂ ਪਤ੍ਤੋ. ਗਾਮਵਾਸਿਨੋ ‘‘ਉਸਭੋ ਕਿਰ ਮਤੋ’’ਤਿ ਸੁਤ੍ਵਾ ਸਬ੍ਬੇ ਏਕਤੋ ਆਗਨ੍ਤ੍ਵਾ ਰੋਦਿਤ੍ਵਾ ਕਨ੍ਦਿਤ੍ਵਾ ਤਂ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਆਵਾਟੇ ਨਿਖਣਿਤ੍ਵਾ ਪਕ੍ਕਮਿਂਸੁ. ਸਪ੍ਪੋ ਤੇਸਂ ਗਤਕਾਲੇ ਨਿਕ੍ਖਮਿਤ੍ਵਾ ‘‘ਅਹਂ ਕੋਧਂ ਨਿਸ੍ਸਾਯ ਇਮਂ ਜੀਵਿਤਾ ਵੋਰੋਪੇਤ੍ਵਾ ਮਹਾਜਨਸ੍ਸ ਹਦਯੇ ਸੋਕਂ ਪਵੇਸੇਸਿਂ, ਨ ਦਾਨਿ ਇਮਂ ਕੋਧਂ ਅਨਿਗ੍ਗਹੇਤ੍ਵਾ ਗੋਚਰਾਯ ਪਕ੍ਕਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਿਵਤ੍ਤਿਤ੍ਵਾ ਤਂ ਅਸ੍ਸਮਂ ਗਨ੍ਤ੍ਵਾ ਕੋਧਨਿਗ੍ਗਹਾਯ ਉਪੋਸਥਂ ਸਮਾਦਿਯਿਤ੍ਵਾ ਏਕਮਨ੍ਤਂ ਨਿਪਜ੍ਜਿ.

ਸਿਙ੍ਗਾਲੋਪਿ ਗੋਚਰਂ ਪਰਿਯੇਸਨ੍ਤੋ ਏਕਂ ਮਤਹਤ੍ਥਿਂ ਦਿਸ੍ਵਾ ‘‘ਮਹਾ ਮੇ ਗੋਚਰੋ ਲਦ੍ਧੋ’’ਤਿ ਤੁਟ੍ਠੋ ਗਨ੍ਤ੍ਵਾ ਸੋਣ੍ਡਾਯਂ ਡਂਸਿ, ਥਮ੍ਭੇ ਦਟ੍ਠਕਾਲੋ ਵਿਯ ਅਹੋਸਿ. ਤਤ੍ਥ ਅਸ੍ਸਾਦਂ ਅਲਭਿਤ੍ਵਾ ਦਨ੍ਤੇ ਡਂਸਿ, ਪਾਸਾਣੇ ਦਟ੍ਠਕਾਲੋ ਵਿਯ ਅਹੋਸਿ. ਕੁਚ੍ਛਿਯਂ ਡਂਸਿ, ਕੁਸੁਲੇ ਦਟ੍ਠਕਾਲੋ ਵਿਯ ਅਹੋਸਿ. ਨਙ੍ਗੁਟ੍ਠੇ ਡਂਸਿ, ਅਯਸਲਾਕੇ ਦਟ੍ਠਕਾਲੋ ਵਿਯ ਅਹੋਸਿ. ਵਚ੍ਚਮਗ੍ਗੇ ਡਂਸਿ, ਘਤਪੂਵੇ ਦਟ੍ਠਕਾਲੋ ਵਿਯ ਅਹੋਸਿ. ਸੋ ਲੋਭਵਸੇਨ ਖਾਦਨ੍ਤੋ ਅਨ੍ਤੋਕੁਚ੍ਛਿਯਂ ਪਾਵਿਸਿ, ਤਤ੍ਥ ਛਾਤਕਾਲੇ ਮਂਸਂ ਖਾਦਤਿ, ਪਿਪਾਸਿਤਕਾਲੇ ਲੋਹਿਤਂ ਪਿਵਤਿ, ਨਿਪਜ੍ਜਨਕਾਲੇ ਅਨ੍ਤਾਨਿ ਚ ਪਪ੍ਫਾਸਞ੍ਚ ਅਵਤ੍ਥਰਿਤ੍ਵਾ ਨਿਪਜ੍ਜਿ. ਸੋ ‘‘ਇਧੇਵ ਮੇ ਅਨ੍ਨਪਾਨਞ੍ਚ ਸਯਨਞ੍ਚ ਨਿਪ੍ਫਨ੍ਨਂ, ਅਞ੍ਞਤ੍ਥ ਕਿਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਤ੍ਥੇਵ ਅਭਿਰਤੋ ਬਹਿ ਅਨਿਕ੍ਖਮਿਤ੍ਵਾ ਅਨ੍ਤੋਕੁਚ੍ਛਿਯਂਯੇਵ ਵਸਿ. ਅਪਰਭਾਗੇ ਵਾਤਾਤਪੇਨ ਹਤ੍ਥਿਕੁਣਪੇ ਸੁਕ੍ਖਨ੍ਤੇ ਕਰੀਸਮਗ੍ਗੋ ਪਿਹਿਤੋ, ਸਿਙ੍ਗਾਲੋ ਅਨ੍ਤੋਕੁਚ੍ਛਿਯਂ ਨਿਪਜ੍ਜਮਾਨੋ ਅਪ੍ਪਮਂਸਲੋਹਿਤੋ ਪਣ੍ਡੁਸਰੀਰੋ ਹੁਤ੍ਵਾ ਨਿਕ੍ਖਮਨਮਗ੍ਗਂ ਨ ਪਸ੍ਸਿ. ਅਥੇਕਦਿਵਸਂ ਅਕਾਲਮੇਘੋ ਵਸ੍ਸਿ, ਕਰੀਸਮਗ੍ਗੋ ਤੇਮਿਯਮਾਨੋ ਮੁਦੁ ਹੁਤ੍ਵਾ ਵਿਵਰਂ ਦਸ੍ਸੇਸਿ. ਸਿਙ੍ਗਾਲੋ ਛਿਦ੍ਦਂ ਦਿਸ੍ਵਾ ‘‘ਅਤਿਚਿਰਮ੍ਹਿ ਕਿਲਨ੍ਤੋ, ਇਮਿਨਾ ਛਿਦ੍ਦੇਨ ਪਲਾਯਿਸ੍ਸਾਮੀ’’ਤਿ ਕਰੀਸਮਗ੍ਗਂ ਸੀਸੇਨ ਪਹਰਿ. ਤਸ੍ਸ ਸਮ੍ਬਾਧਟ੍ਠਾਨੇਨ ਵੇਗੇਨ ਨਿਕ੍ਖਨ੍ਤਸ੍ਸ ਸਿਨ੍ਨਸਰੀਰਸ੍ਸ ਸਬ੍ਬਾਨਿ ਲੋਮਾਨਿ ਕਰੀਸਮਗ੍ਗੇ ਲਗ੍ਗਾਨਿ, ਤਾਲਕਨ੍ਦੋ ਵਿਯ ਨਿਲ੍ਲੋਮਸਰੀਰੋ ਹੁਤ੍ਵਾ ਨਿਕ੍ਖਮਿ. ਸੋ ‘‘ਲੋਭਂ ਨਿਸ੍ਸਾਯ ਮਯਾ ਇਦਂ ਦੁਕ੍ਖਂ ਅਨੁਭੂਤਂ, ਨ ਦਾਨਿ ਇਮਂ ਅਨਿਗ੍ਗਹੇਤ੍ਵਾ ਗੋਚਰਂ ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਂ ਅਸ੍ਸਮਂ ਗਨ੍ਤ੍ਵਾ ਲੋਭਨਿਗ੍ਗਹਤ੍ਥਾਯ ਉਪੋਸਥਂ ਸਮਾਦਿਯਿਤ੍ਵਾ ਏਕਮਨ੍ਤਂ ਨਿਪਜ੍ਜਿ.

ਅਚ੍ਛੋਪਿ ਅਰਞ੍ਞਾ ਨਿਕ੍ਖਮਿਤ੍ਵਾ ਅਤ੍ਰਿਚ੍ਛਾਭਿਭੂਤੋ ਮਲ੍ਲਰਟ੍ਠੇ ਪਚ੍ਚਨ੍ਤਗਾਮਂ ਗਤੋ. ਗਾਮਵਾਸਿਨੋ ‘‘ਅਚ੍ਛੋ ਕਿਰ ਆਗਤੋ’’ਤਿ ਧਨੁਦਣ੍ਡਾਦਿਹਤ੍ਥਾ ਨਿਕ੍ਖਮਿਤ੍ਵਾ ਤੇਨ ਪਵਿਟ੍ਠਂ ਗੁਮ੍ਬਂ ਪਰਿਵਾਰੇਸੁਂ. ਸੋ ਮਹਾਜਨੇਨ ਪਰਿਵਾਰਿਤਭਾਵਂ ਞਤ੍ਵਾ ਨਿਕ੍ਖਮਿਤ੍ਵਾ ਪਲਾਯਿ, ਪਲਾਯਨ੍ਤਮੇਵ ਤਂ ਧਨੂਹਿ ਚੇਵ ਦਣ੍ਡਾਦੀਹਿ ਚ ਪੋਥੇਸੁਂ. ਸੋ ਭਿਨ੍ਨੇਨ ਸੀਸੇਨ ਲੋਹਿਤੇਨ ਗਲਨ੍ਤੇਨ ਅਤ੍ਤਨੋ ਵਸਨਟ੍ਠਾਨਂ ਗਨ੍ਤ੍ਵਾ ‘‘ਇਦਂ ਦੁਕ੍ਖਂ ਮਮ ਅਤ੍ਰਿਚ੍ਛਾਲੋਭਵਸੇਨ ਉਪ੍ਪਨ੍ਨਂ, ਨ ਦਾਨਿ ਇਮਂ ਅਨਿਗ੍ਗਹੇਤ੍ਵਾ ਗੋਚਰਂ ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਂ ਅਸ੍ਸਮਂ ਗਨ੍ਤ੍ਵਾ ਅਤ੍ਰਿਚ੍ਛਾਨਿਗ੍ਗਹਾਯ ਉਪੋਸਥਂ ਸਮਾਦਿਯਿਤ੍ਵਾ ਏਕਮਨ੍ਤਂ ਨਿਪਜ੍ਜਿ.

ਤਾਪਸੋਪਿ ਅਤ੍ਤਨੋ ਜਾਤਿਂ ਨਿਸ੍ਸਾਯ ਮਾਨਵਸਿਕੋ ਹੁਤ੍ਵਾ ਝਾਨਂ ਉਪ੍ਪਾਦੇਤੁਂ ਨ ਸਕ੍ਕੋਤਿ. ਅਥੇਕੋ ਪਚ੍ਚੇਕਬੁਦ੍ਧੋ ਤਸ੍ਸ ਮਾਨਨਿਸ੍ਸਿਤਭਾਵਂ ਞਤ੍ਵਾ ‘‘ਅਯਂ ਨ ਲਾਮਕਸਤ੍ਤੋ, ਬੁਦ੍ਧਙ੍ਕੁਰੋ ਏਸ, ਇਮਸ੍ਮਿਂਯੇਵ ਭਦ੍ਦਕਪ੍ਪੇ ਸਬ੍ਬਞ੍ਞੁਤਂ ਪਾਪੁਣਿਸ੍ਸਤਿ, ਇਮਸ੍ਸ ਮਾਨਨਿਗ੍ਗਹਂ ਕਤ੍ਵਾ ਸਮਾਪਤ੍ਤਿਨਿਬ੍ਬਤ੍ਤਨਾਕਾਰਂ ਕਰਿਸ੍ਸਾਮੀ’’ਤਿ ਤਸ੍ਮਿਂ ਪਣ੍ਣਸਾਲਾਯ ਨਿਸਿਨ੍ਨੇਯੇਵ ਉਤ੍ਤਰਹਿਮਵਨ੍ਤਤੋ ਆਗਨ੍ਤ੍ਵਾ ਤਸ੍ਸ ਪਾਸਾਣਫਲਕੇ ਨਿਸੀਦਿ. ਸੋ ਨਿਕ੍ਖਮਿਤ੍ਵਾ ਤਂ ਅਤ੍ਤਨੋ ਆਸਨੇ ਨਿਸਿਨ੍ਨਂ ਦਿਸ੍ਵਾ ਮਾਨਨਿਸ੍ਸਿਤਭਾਵੇਨ ਅਨਤ੍ਤਮਨੋ ਹੁਤ੍ਵਾ ਤਂ ਉਪਸਙ੍ਕਮਿਤ੍ਵਾ ਅਚ੍ਛਰਂ ਪਹਰਿਤ੍ਵਾ ‘‘ਨਸ੍ਸ, ਵਸਲ, ਕਾਲ਼ਕਣ੍ਣਿ, ਮੁਣ੍ਡਕ, ਸਮਣਕ, ਕਿਮਤ੍ਥਂ ਮਮ ਨਿਸਿਨ੍ਨਫਲਕੇ ਨਿਸਿਨ੍ਨੋਸੀ’’ਤਿ ਆਹ. ਅਥ ਨਂ ਸੋ ‘‘ਸਪ੍ਪੁਰਿਸ, ਕਸ੍ਮਾ ਮਾਨਨਿਸ੍ਸਿਤੋਸਿ, ਅਹਂ ਪਟਿਵਿਦ੍ਧਪਚ੍ਚੇਕਬੋਧਿਞਾਣੋ, ਤ੍ਵਂ ਇਮਸ੍ਮਿਂਯੇਵ ਭਦ੍ਦਕਪ੍ਪੇ ਸਬ੍ਬਞ੍ਞੁਬੁਦ੍ਧੋ ਭਵਿਸ੍ਸਸਿ, ਬੁਦ੍ਧਙ੍ਕੁਰੋਸਿ, ਪਾਰਮਿਯੋ ਪੂਰੇਤ੍ਵਾ ਆਗਤੋ ਅਞ੍ਞਂ ਏਤ੍ਤਕਂ ਨਾਮ ਕਾਲਂ ਅਤਿਕ੍ਕਮਿਤ੍ਵਾ ਬੁਦ੍ਧੋ ਭਵਿਸ੍ਸਸਿ, ਬੁਦ੍ਧਤ੍ਤਭਾਵੇ ਠਿਤੋ ਸਿਦ੍ਧਤ੍ਥੋ ਨਾਮ ਭਵਿਸ੍ਸਸੀ’’ਤਿ ਨਾਮਞ੍ਚ ਗੋਤ੍ਤਞ੍ਚ ਕੁਲਞ੍ਚ ਅਗ੍ਗਸਾਵਕਾਦਯੋ ਚ ਸਬ੍ਬੇ ਆਚਿਕ੍ਖਿਤ੍ਵਾ ‘‘ਕਿਮਤ੍ਥਂ ਤ੍ਵਂ ਮਾਨਨਿਸ੍ਸਿਤੋ ਹੁਤ੍ਵਾ ਫਰੁਸੋ ਹੋਸਿ, ਨਯਿਦਂ ਤਵ ਅਨੁਚ੍ਛਵਿਕ’’ਨ੍ਤਿ ਓਵਾਦਮਦਾਸਿ. ਸੋ ਤੇਨ ਏਵਂ ਵੁਤ੍ਤੋਪਿ ਨੇਵ ਨਂ ਵਨ੍ਦਿ, ਨ ਚ ‘‘ਕਦਾਹਂ ਬੁਦ੍ਧੋ ਭਵਿਸ੍ਸਾਮੀ’’ਤਿਆਦੀਨਿ ਪੁਚ੍ਛਿ. ਅਥ ਨਂ ਪਚ੍ਚੇਕਬੁਦ੍ਧੋ ‘‘ਤਵ ਜਾਤਿਯਾ ਮਮ ਗੁਣਾਨਂ ਮਹਨ੍ਤਭਾਵਂ ਜਾਨ, ਸਚੇ ਸਕ੍ਕੋਸਿ, ਅਹਂ ਵਿਯ ਆਕਾਸੇ ਵਿਚਰਾਹੀ’’ਤਿ ਵਤ੍ਵਾ ਆਕਾਸੇ ਉਪ੍ਪਤਿਤ੍ਵਾ ਅਤ੍ਤਨੋ ਪਾਦਪਂਸੁਂ ਤਸ੍ਸ ਜਟਾਮਣ੍ਡਲੇ ਵਿਕਿਰਨ੍ਤੋ ਉਤ੍ਤਰਹਿਮਵਨ੍ਤਮੇਵ ਗਤੋ.

ਤਾਪਸੋ ਤਸ੍ਸ ਗਤਕਾਲੇ ਸਂਵੇਗਪ੍ਪਤ੍ਤੋ ਹੁਤ੍ਵਾ ‘‘ਅਯਂ ਸਮਣੋ ਏਵਂ ਗਰੁਸਰੀਰੋ ਵਾਤਮੁਖੇ ਖਿਤ੍ਤਤੂਲਪਿਚੁ ਵਿਯ ਆਕਾਸੇ ਪਕ੍ਖਨ੍ਦੋ, ਅਹਂ ਜਾਤਿਮਾਨੇਨ ਏਵਰੂਪਸ੍ਸ ਪਚ੍ਚੇਕਬੁਦ੍ਧਸ੍ਸ ਨੇਵ ਪਾਦੇ ਵਨ੍ਦਿਂ, ਨ ਚ ‘‘ਕਦਾਹਂ ਬੁਦ੍ਧੋ ਭਵਿਸ੍ਸਾਮੀ’ਤਿ ਪੁਚ੍ਛਿਂ, ਜਾਤਿ ਨਾਮੇਸਾ ਕਿਂ ਕਰਿਸ੍ਸਤਿ, ਇਮਸ੍ਮਿਂ ਲੋਕੇ ਸੀਲਚਰਣਮੇਵ ਮਹਨ੍ਤਂ, ਅਯਂ ਖੋ ਪਨ ਮੇ ਮਾਨੋ ਵਡ੍ਢਨ੍ਤੋ ਨਿਰਯਂ ਉਪਨੇਸ੍ਸਤਿ, ਨ ਇਦਾਨਿ ਇਮਂ ਮਾਨਂ ਅਨਿਗ੍ਗਹੇਤ੍ਵਾ ਫਲਾਫਲਤ੍ਥਾਯ ਗਮਿਸ੍ਸਾਮੀ’’ਤਿ ਪਣ੍ਣਸਾਲਂ ਪਵਿਸਿਤ੍ਵਾ ਮਾਨਨਿਗ੍ਗਹਾਯ ਉਪੋਸਥਂ ਸਮਾਦਾਯ ਕਟ੍ਠਤ੍ਥਰਿਕਾਯ ਨਿਸਿਨ੍ਨੋ ਮਹਾਞਾਣੋ ਕੁਲਪੁਤ੍ਤੋ ਮਾਨਂ ਨਿਗ੍ਗਹੇਤ੍ਵਾ ਕਸਿਣਂ ਵਡ੍ਢੇਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਨਿਕ੍ਖਮਿਤ੍ਵਾ ਚਙ੍ਕਮਨਕੋਟਿਯਂ ਪਾਸਾਣਫਲਕੇ ਨਿਸੀਦਿ. ਅਥ ਨਂ ਕਪੋਤਾਦਯੋ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਮਹਾਸਤ੍ਤੋ ਕਪੋਤਂ ਪੁਚ੍ਛਿ ‘‘ਤ੍ਵਂ ਅਞ੍ਞੇਸੁ ਦਿਵਸੇਸੁ ਨ ਇਮਾਯ ਵੇਲਾਯ ਆਗਚ੍ਛਸਿ, ਗੋਚਰਂ ਪਰਿਯੇਸਸਿ, ਕਿਂ ਨੁ ਖੋ ਅਜ੍ਜ ਉਪੋਸਥਿਕੋ ਜਾਤੋਸੀ’’ਤਿ? ‘‘ਆਮ ਭਨ੍ਤੇ’’ਤਿ. ਅਥ ਨਂ ‘‘ਕੇਨ ਕਾਰਣੇਨਾ’’ਤਿ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੧੨੭.

‘‘ਅਪ੍ਪੋਸ੍ਸੁਕ੍ਕੋ ਦਾਨਿ ਤੁਵਂ ਕਪੋਤ, ਵਿਹਙ੍ਗਮ ਨ ਤਵ ਭੋਜਨਤ੍ਥੋ;

ਖੁਦਂ ਪਿਪਾਸਂ ਅਧਿਵਾਸਯਨ੍ਤੋ, ਕਸ੍ਮਾ ਭਵਂਪੋਸਥਿਕੋ ਕਪੋਤਾ’’ਤਿ.

ਤਤ੍ਥ ਅਪ੍ਪੋਸ੍ਸੁਕ੍ਕੋਤਿ ਨਿਰਾਲਯੋ. ਨ ਤਵ ਭੋਜਨਤ੍ਥੋਤਿ ਕਿਂ ਅਜ੍ਜ ਤਵ ਭੋਜਨੇਨ ਅਤ੍ਥੋ ਨਤ੍ਥਿ.

ਤਂ ਸੁਤ੍ਵਾ ਕਪੋਤੋ ਦ੍ਵੇ ਗਾਥਾ ਅਭਾਸਿ –

੧੨੮.

‘‘ਅਹਂ ਪੁਰੇ ਗਿਦ੍ਧਿਗਤੋ ਕਪੋਤਿਯਾ, ਅਸ੍ਮਿਂ ਪਦੇਸਸ੍ਮਿਮੁਭੋ ਰਮਾਮ;

ਅਥਗ੍ਗਹੀ ਸਾਕੁਣਿਕੋ ਕਪੋਤਿਂ, ਅਕਾਮਕੋ ਤਾਯ ਵਿਨਾ ਅਹੋਸਿਂ.

੧੨੯.

‘‘ਨਾਨਾਭਵਾ ਵਿਪ੍ਪਯੋਗੇਨ ਤਸ੍ਸਾ, ਮਨੋਮਯਂ ਵੇਦਨ ਵੇਦਯਾਮਿ;

ਤਸ੍ਮਾ ਅਹਂਪੋਸਥਂ ਪਾਲਯਾਮਿ, ਰਾਗੋ ਮਮਂ ਮਾ ਪੁਨਰਾਗਮਾਸੀ’’ਤਿ.

ਤਤ੍ਥ ਰਮਾਮਾਤਿ ਇਮਸ੍ਮਿਂ ਭੂਮਿਭਾਗੇ ਕਾਮਰਤਿਯਾ ਰਮਾਮ. ਸਾਕੁਣਿਕੋਤਿ ਸੇਨਸਕੁਣੋ.

ਕਪੋਤੇਨ ਅਤ੍ਤਨੋ ਉਪੋਸਥਕਮ੍ਮੇ ਵਣ੍ਣਿਤੇ ਮਹਾਸਤ੍ਤੋ ਸਪ੍ਪਾਦੀਸੁ ਏਕੇਕਂ ਪੁਚ੍ਛਿ. ਤੇਪਿ ਯਥਾਭੂਤਂ ਬ੍ਯਾਕਰਿਂਸੁ –

੧੩੦.

‘‘ਅਨੁਜ੍ਜੁਗਾਮੀ ਉਰਗਾ ਦੁਜਿਵ੍ਹ, ਦਾਠਾਵੁਧੋ ਘੋਰਵਿਸੋਸਿ ਸਪ੍ਪ;

ਖੁਦਂ ਪਿਪਾਸਂ ਅਧਿਵਾਸਯਨ੍ਤੋ, ਕਸ੍ਮਾ ਭਵਂਪੋਸਥਿਕੋ ਨੁ ਦੀਘ.

੧੩੧.

‘‘ਉਸਭੋ ਅਹੂ ਬਲਵਾ ਗਾਮਿਕਸ੍ਸ, ਚਲਕ੍ਕਕੂ ਵਣ੍ਣਬਲੂਪਪਨ੍ਨੋ;

ਸੋ ਮਂ ਅਕ੍ਕਮਿ ਤਂ ਕੁਪਿਤੋ ਅਡਂਸਿਂ, ਦੁਕ੍ਖਾਭਿਤੁਣ੍ਣੋ ਮਰਣਂ ਉਪਾਗਾ.

੧੩੨.

‘‘ਤਤੋ ਜਨਾ ਨਿਕ੍ਖਮਿਤ੍ਵਾਨ ਗਾਮਾ, ਕਨ੍ਦਿਤ੍ਵਾ ਰੋਦਿਤ੍ਵਾ ਅਪਕ੍ਕਮਿਂਸੁ;

ਤਸ੍ਮਾ ਅਹਂਪੋਸਥਂ ਪਾਲਯਾਮਿ, ਕੋਧੋ ਮਮਂ ਮਾ ਪੁਨਰਾਗਮਾਸਿ.

੧੩੩.

‘‘ਮਤਾਨ ਮਂਸਾਨਿ ਬਹੂ ਸੁਸਾਨੇ, ਮਨੁਞ੍ਞਰੂਪਂ ਤਵ ਭੋਜਨੇ ਤਂ;

ਖੁਦਂ ਪਿਪਾਸਂ ਅਧਿਵਾਸਯਨ੍ਤੋ, ਕਸ੍ਮਾ ਭਵਂਪੋਸਥਿਕੋ ਸਿਙ੍ਗਾਲ.

੧੩੪.

‘‘ਪਵਿਸਿ ਕੁਚ੍ਛਿਂ ਮਹਤੋ ਗਜਸ੍ਸ, ਕੁਣਪੇ ਰਤੋ ਹਤ੍ਥਿਮਂਸੇਸੁ ਗਿਦ੍ਧੋ;

ਉਣ੍ਹੋ ਚ ਵਾਤੋ ਤਿਖਿਣਾ ਚ ਰਸ੍ਮਿਯੋ, ਤੇ ਸੋਸਯੁਂ ਤਸ੍ਸ ਕਰੀਸਮਗ੍ਗਂ.

੧੩੫.

‘‘ਕਿਸੋ ਚ ਪਣ੍ਡੂ ਚ ਅਹਂ ਭਦਨ੍ਤੇ, ਨ ਮੇ ਅਹੂ ਨਿਕ੍ਖਮਨਾਯ ਮਗ੍ਗੋ;

ਮਹਾ ਚ ਮੇਘੋ ਸਹਸਾ ਪਵਸ੍ਸਿ, ਸੋ ਤੇਮਯੀ ਤਸ੍ਸ ਕਰੀਸਮਗ੍ਗਂ.

੧੩੬.

‘‘ਤਤੋ ਅਹਂ ਨਿਕ੍ਖਮਿਸਂ ਭਦਨ੍ਤੇ, ਚਨ੍ਦੋ ਯਥਾ ਰਾਹੁਮੁਖਾ ਪਮੁਤ੍ਤੋ;

ਤਸ੍ਮਾ ਅਹਂਪੋਸਥਂ ਪਾਲਯਾਮਿ, ਲੋਭੋ ਮਮਂ ਮਾ ਪੁਨਰਾਗਮਾਸਿ.

੧੩੭.

‘‘ਵਮ੍ਮੀਕਥੂਪਸ੍ਮਿਂ ਕਿਪਿਲ੍ਲਿਕਾਨਿ, ਨਿਪ੍ਪੋਥਯਨ੍ਤੋ ਤੁਵਂ ਪੁਰੇ ਚਰਾਸਿ;

ਖੁਦਂ ਪਿਪਾਸਂ ਅਧਿਵਾਸਯਨ੍ਤੋ, ਕਸ੍ਮਾ ਭਵਂਪੋਸਥਿਕੋ ਨੁ ਅਚ੍ਛ.

੧੩੮.

‘‘ਸਕਂ ਨਿਕੇਤਂ ਅਤਿਹੀਲ਼ਯਾਨੋ, ਅਤ੍ਰਿਚ੍ਛਤਾ ਮਲ੍ਲਗਾਮਂ ਅਗਚ੍ਛਿਂ;

ਤਤੋ ਜਨਾ ਨਿਕ੍ਖਮਿਤ੍ਵਾਨ ਗਾਮਾ, ਕੋਦਣ੍ਡਕੇਨ ਪਰਿਪੋਥਯਿਂਸੁ ਮਂ.

੧੩੯.

‘‘ਸੋ ਭਿਨ੍ਨਸੀਸੋ ਰੁਹਿਰਮਕ੍ਖਿਤਙ੍ਗੋ, ਪਚ੍ਚਾਗਮਾਸਿਂ ਸਕਂ ਨਿਕੇਤਂ;

ਤਸ੍ਮਾ ਅਹਂਪੋਸਥਂ ਪਾਲਯਾਮਿ, ਅਤ੍ਰਿਚ੍ਛਤਾ ਮਾ ਪੁਨਰਾਗਮਾਸੀ’’ਤਿ.

ਤਤ੍ਥ ਅਨੁਜ੍ਜੁਗਾਮੀਤਿਆਦੀਹਿ ਤਂ ਆਲਪਤਿ. ਚਲਕ੍ਕਕੂਤਿ ਚਲਮਾਨਕਕੁਧੋ. ਦੁਕ੍ਖਾਭਿਤੁਣ੍ਣੋਤਿ ਸੋ ਉਸਭੋ ਦੁਕ੍ਖੇਨ ਅਭਿਤੁਣ੍ਣੋ ਆਤੁਰੋ ਹੁਤ੍ਵਾ. ਬਹੂਤਿ ਬਹੂਨਿ. ਪਵਿਸੀਤਿ ਪਾਵਿਸਿਂ. ਰਸ੍ਮਿਯੋਤਿ ਸੂਰਿਯਰਸ੍ਮਿਯੋ. ਨਿਕ੍ਖਮਿਸਨ੍ਤਿ ਨਿਕ੍ਖਮਿਂ. ਕਿਪਿਲ੍ਲਿਕਾਨੀਤਿ ਉਪਚਿਕਾਯੋ. ਨਿਪ੍ਪੋਥਯਨ੍ਤੋਤਿ ਖਾਦਮਾਨੋ. ਅਤਿਹੀਲ਼ਯਾਨੋਤਿ ਅਤਿਮਞ੍ਞਨ੍ਤੋ ਨਿਨ੍ਦਨ੍ਤੋ ਗਰਹਨ੍ਤੋ. ਕੋਦਣ੍ਡਕੇਨਾਤਿ ਧਨੁਦਣ੍ਡਕੇਹਿ ਚੇਵ ਮੁਗ੍ਗਰੇਹਿ ਚ.

ਏਵਂ ਤੇ ਚਤ੍ਤਾਰੋਪਿ ਅਤ੍ਤਨੋ ਉਪੋਸਥਕਮ੍ਮਂ ਵਣ੍ਣੇਤ੍ਵਾ ਉਟ੍ਠਾਯ ਮਹਾਸਤ੍ਤਂ ਵਨ੍ਦਿਤ੍ਵਾ ‘‘ਭਨ੍ਤੇ, ਤੁਮ੍ਹੇ ਅਞ੍ਞੇਸੁ ਦਿਵਸੇਸੁ ਇਮਾਯ ਵੇਲਾਯ ਫਲਾਫਲਤ੍ਥਾਯ ਗਚ੍ਛਥ, ਅਜ੍ਜ ਅਗਨ੍ਤ੍ਵਾ ਕਸ੍ਮਾ ਉਪੋਸਥਿਕਤ੍ਥਾ’’ਤਿ ਪੁਚ੍ਛਨ੍ਤਾ ਗਾਥਮਾਹਂਸੁ –

੧੪੦.

‘‘ਯਂ ਨੋ ਅਪੁਚ੍ਛਿਤ੍ਥ ਤੁਵਂ ਭਦਨ੍ਤੇ, ਸਬ੍ਬੇਵ ਬ੍ਯਾਕਰਿਮ੍ਹ ਯਥਾਪਜਾਨਂ;

ਮਯਮ੍ਪਿ ਪੁਚ੍ਛਾਮ ਤੁਵਂ ਭਦਨ੍ਤੇ, ਕਸ੍ਮਾ ਭਵਂਪੋਸਥਿਕੋ ਨੁ ਬ੍ਰਹ੍ਮੇ’’ਤਿ.

ਸੋਪਿ ਨੇਸਂ ਬ੍ਯਾਕਾਸਿ –

੧੪੧.

‘‘ਅਨੂਪਲਿਤ੍ਤੋ ਮਮ ਅਸ੍ਸਮਮ੍ਹਿ, ਪਚ੍ਚੇਕਬੁਦ੍ਧੋ ਮੁਹੁਤ੍ਤਂ ਨਿਸੀਦਿ;

ਸੋ ਮਂ ਅਵੇਦੀ ਗਤਿਮਾਗਤਿਞ੍ਚ, ਨਾਮਞ੍ਚ ਗੋਤ੍ਤਂ ਚਰਣਞ੍ਚ ਸਬ੍ਬਂ.

੧੪੨.

‘‘ਏਵਮ੍ਪਹਂ ਨ ਵਨ੍ਦਿ ਤਸ੍ਸ ਪਾਦੇ, ਨ ਚਾਪਿ ਨਂ ਮਾਨਗਤੇਨ ਪੁਚ੍ਛਿਂ;

ਤਸ੍ਮਾ ਅਹਂਪੋਸਥਂ ਪਾਲਯਾਮਿ, ਮਾਨੋ ਮਮਂ ਮਾ ਪੁਨਰਾਗਮਾਸੀ’’ਤਿ.

ਤਤ੍ਥ ਯਂ ਨੋਤਿ ਯਂ ਅਤ੍ਥਂ ਤ੍ਵਂ ਅਮ੍ਹੇ ਅਪੁਚ੍ਛਿ. ਯਥਾਪਜਾਨਨ੍ਤਿ ਅਤ੍ਤਨੋ ਪਜਾਨਨਨਿਯਾਮੇਨ ਤਂ ਮਯਂ ਬ੍ਯਾਕਰਿਮ੍ਹ. ਅਨੂਪਲਿਤ੍ਤੋਤਿ ਸਬ੍ਬਕਿਲੇਸੇਹਿ ਅਲਿਤ੍ਤੋ. ਸੋ ਮਂ ਅਵੇਦੀਤਿ ਸੋ ਮਮ ਇਦਾਨਿ ਗਨ੍ਤਬ੍ਬਟ੍ਠਾਨਞ੍ਚ ਗਤਟ੍ਠਾਨਞ੍ਚ ‘‘ਅਨਾਗਤੇ ਤ੍ਵਂ ਏਵਂਨਾਮੋ ਬੁਦ੍ਧੋ ਭਵਿਸ੍ਸਸਿ ਏਵਂਗੋਤ੍ਤੋ, ਏਵਰੂਪਂ ਤੇ ਸੀਲਚਰਣਂ ਭਵਿਸ੍ਸਤੀ’’ਤਿ ਏਵਂ ਨਾਮਞ੍ਚ ਗੋਤ੍ਤਞ੍ਚ ਚਰਣਞ੍ਚ ਸਬ੍ਬਂ ਮਂ ਅਵੇਦਿ ਜਾਨਾਪੇਸਿ, ਕਥੇਸੀਤਿ ਅਤ੍ਥੋ. ਏਵਮ੍ਪਹਂ ਨ ਵਨ੍ਦੀਤਿ ਏਵਂ ਕਥੇਨ੍ਤਸ੍ਸਪਿ ਤਸ੍ਸ ਅਹਂ ਅਤ੍ਤਨੋ ਮਾਨਂ ਨਿਸ੍ਸਾਯ ਪਾਦੇ ਨ ਵਨ੍ਦਿਨ੍ਤਿ.

ਏਵਂ ਮਹਾਸਤ੍ਤੋ ਅਤ੍ਤਨੋ ਉਪੋਸਥਕਾਰਣਂ ਕਥੇਤ੍ਵਾ ਤੇ ਓਵਦਿਤ੍ਵਾ ਉਯ੍ਯੋਜੇਤ੍ਵਾ ਪਣ੍ਣਸਾਲਂ ਪਾਵਿਸਿ, ਇਤਰੇਪਿ ਯਥਾਟ੍ਠਾਨਾਨਿ ਅਗਮਂਸੁ. ਮਹਾਸਤ੍ਤੋ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕਪਰਾਯਣੋ ਅਹੋਸਿ, ਇਤਰੇ ਚ ਤਸ੍ਸੋਵਾਦੇ ਠਤ੍ਵਾ ਸਗ੍ਗਪਰਾਯਣਾ ਅਹੇਸੁਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਉਪਾਸਕਾ, ਉਪੋਸਥੋ ਨਾਮੇਸ ਪੋਰਾਣਕਪਣ੍ਡਿਤਾਨਂ ਵਂਸੋ, ਉਪਵਸਿਤਬ੍ਬੋ ਉਪੋਸਥਵਾਸੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕਪੋਤੋ ਅਨੁਰੁਦ੍ਧੋ ਅਹੋਸਿ, ਅਚ੍ਛੋ ਕਸ੍ਸਪੋ, ਸਿਙ੍ਗਾਲੋ ਮੋਗ੍ਗਲ੍ਲਾਨੋ, ਸਪ੍ਪੋ ਸਾਰਿਪੁਤ੍ਤੋ, ਤਾਪਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਪਞ੍ਚੁਪੋਸਥਜਾਤਕਵਣ੍ਣਨਾ ਸਤ੍ਤਮਾ.

[੪੯੧] ੮. ਮਹਾਮੋਰਜਾਤਕਵਣ੍ਣਨਾ

ਸਚੇ ਹਿ ਤ੍ਯਾਹਂ ਧਨਹੇਤੁ ਗਾਹਿਤੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਤਞ੍ਹਿ ਭਿਕ੍ਖੁਂ ਸਤ੍ਥਾ ‘‘ਸਚ੍ਚਂ ਕਿਰ ਤ੍ਵਂ ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਅਯਂ ਨਨ੍ਦੀਰਾਗੋ ਤਾਦਿਸਂ ਕਿਂ ਨਾਮ ਨਾਲੋਲੇਸ੍ਸਤਿ, ਨ ਹਿ ਸਿਨੇਰੁਉਬ੍ਬਾਹਨਕਵਾਤੋ ਸਾਮਨ੍ਤੇ ਪੁਰਾਣਪਣ੍ਣਸ੍ਸ ਲਜ੍ਜਤਿ, ਪੁਬ੍ਬੇ ਸਤ੍ਤ ਵਸ੍ਸਸਤਾਨਿ ਅਨ੍ਤੋਕਿਲੇਸਸਮੁਦਾਚਾਰਂ ਵਾਰੇਤ੍ਵਾ ਵਿਹਰਨ੍ਤੇ ਵਿਸੁਦ੍ਧਸਤ੍ਤੇਪੇਸ ਆਲੋਲੇਸਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਪਚ੍ਚਨ੍ਤਪਦੇਸੇ ਮੋਰਸਕੁਣਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਅਗ੍ਗਹੇਸਿ. ਗਬ੍ਭੇ ਪਰਿਪਾਕਗਤੇ ਮਾਤਾ ਗੋਚਰਭੂਮਿਯਂ ਅਣ੍ਡਂ ਪਾਤੇਤ੍ਵਾ ਪਕ੍ਕਾਮਿ. ਅਣ੍ਡਞ੍ਚ ਨਾਮ ਮਾਤੁ ਅਰੋਗਭਾਵੇ ਸਤਿ ਅਞ੍ਞਸ੍ਮਿਂ ਦੀਘਜਾਤਿਕਾਦਿਪਰਿਪਨ੍ਥੇ ਚ ਅਵਿਜ੍ਜਮਾਨੇ ਨ ਨਸ੍ਸਤਿ. ਤਸ੍ਮਾ ਤਂ ਅਣ੍ਡਂ ਕਣਿਕਾਰਮਕੁਲਂ ਵਿਯ ਸੁਵਣ੍ਣਵਣ੍ਣਂ ਹੁਤ੍ਵਾ ਪਰਿਣਤਕਾਲੇ ਅਤ੍ਤਨੋ ਧਮ੍ਮਤਾਯ ਭਿਜ੍ਜਿ, ਸੁਵਣ੍ਣਵਣ੍ਣੋ ਮੋਰਚ੍ਛਾਪੋ ਨਿਕ੍ਖਮਿ. ਤਸ੍ਸ ਦ੍ਵੇ ਅਕ੍ਖੀਨਿ ਜਿਞ੍ਜੁਕਾਫਲਸਦਿਸਾਨਿ, ਤੁਣ੍ਡਂ ਪਵਾਲ਼ਵਣ੍ਣਂ, ਤਿਸ੍ਸੋ ਰਤ੍ਤਰਾਜਿਯੋ ਗੀਵਂ ਪਰਿਕ੍ਖਿਪਿਤ੍ਵਾ ਪਿਟ੍ਠਿਮਜ੍ਝੇਨ ਅਗਮਂਸੁ. ਸੋ ਵਯਪ੍ਪਤ੍ਤੋ ਭਣ੍ਡਸਕਟਮਤ੍ਤਸਰੀਰੋ ਅਭਿਰੂਪੋ ਅਹੋਸਿ. ਤਂ ਸਬ੍ਬੇ ਨੀਲਮੋਰਾ ਸਨ੍ਨਿਪਤਿਤ੍ਵਾ ਰਾਜਾਨਂ ਕਤ੍ਵਾ ਪਰਿਵਾਰਯਿਂਸੁ.

ਸੋ ਏਕਦਿਵਸਂ ਉਦਕਸੋਣ੍ਡਿਯਂ ਪਾਨੀਯਂ ਪਿਵਨ੍ਤੋ ਅਤ੍ਤਨੋ ਰੂਪਸਮ੍ਪਤ੍ਤਿਂ ਦਿਸ੍ਵਾ ਚਿਨ੍ਤੇਸਿ ‘‘ਅਹਂ ਸਬ੍ਬਮੋਰੇਹਿ ਅਤਿਰੇਕਰੂਪਸੋਭੋ, ਸਚਾਹਂ ਇਮੇਹਿ ਸਦ੍ਧਿਂ ਮਨੁਸ੍ਸਪਥੇ ਵਸਿਸ੍ਸਾਮਿ, ਪਰਿਪਨ੍ਥੋ ਮੇ ਉਪ੍ਪਜ੍ਜਿਸ੍ਸਤਿ, ਹਿਮਵਨ੍ਤਂ ਗਨ੍ਤ੍ਵਾ ਏਕਕੋਵ ਫਾਸੁਕਟ੍ਠਾਨੇ ਵਸਿਸ੍ਸਾਮੀ’’ਤਿ. ਸੋ ਰਤ੍ਤਿਭਾਗੇ ਮੋਰੇਸੁ ਪਟਿਸਲ੍ਲੀਨੇਸੁ ਕਞ੍ਚਿ ਅਜਾਨਾਪੇਤ੍ਵਾ ਉਪ੍ਪਤਿਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਤਿਸ੍ਸੋ ਪਬ੍ਬਤਰਾਜਿਯੋ ਅਤਿਕ੍ਕਮ੍ਮ ਚਤੁਤ੍ਥਾਯ ਪਬ੍ਬਤਰਾਜਿਯਾ ਏਕਸ੍ਮਿਂ ਅਰਞ੍ਞੇ ਪਦੁਮਸਞ੍ਛਨ੍ਨੋ ਜਾਤਸ੍ਸਰੋ ਅਤ੍ਥਿ, ਤਸ੍ਸ ਅਵਿਦੂਰੇ ਏਕਂ ਪਬ੍ਬਤਂ ਨਿਸ੍ਸਾਯ ਠਿਤੋ ਮਹਾਨਿਗ੍ਰੋਧਰੁਕ੍ਖੋ ਅਤ੍ਥਿ, ਤਸ੍ਸ ਸਾਖਾਯ ਨਿਲੀਯਿ. ਤਸ੍ਸ ਪਨ ਪਬ੍ਬਤਸ੍ਸ ਵੇਮਜ੍ਝੇ ਮਨਾਪਾ ਗੁਹਾ ਅਤ੍ਥਿ. ਸੋ ਤਤ੍ਥ ਵਸਿਤੁਕਾਮੋ ਹੁਤ੍ਵਾ ਤਸ੍ਸਾ ਪਮੁਖੇ ਪਬ੍ਬਤਤਲੇ ਨਿਲੀਯਿ. ਤਂ ਪਨ ਠਾਨਂ ਨੇਵ ਹੇਟ੍ਠਾਭਾਗੇਨ ਅਭਿਰੁਹਿਤੁਂ, ਨ ਉਪਰਿਭਾਗੇਨ ਓਤਰਿਤੁਂ ਸਕ੍ਕਾ, ਬਿਲ਼ਾਲਦੀਘਜਾਤਿਕਮਨੁਸ੍ਸਭਯੇਹਿ ਵਿਮੁਤ੍ਤਂ. ਸੋ ‘‘ਇਦਂ ਮੇ ਫਾਸੁਕਟ੍ਠਾਨ’’ਨ੍ਤਿ ਤਂ ਦਿਵਸਂ ਤਤ੍ਥੇਵ ਵਸਿਤ੍ਵਾ ਪੁਨਦਿਵਸੇ ਪਬ੍ਬਤਗੁਹਾਤੋ ਉਟ੍ਠਾਯ ਪਬ੍ਬਤਮਤ੍ਥਕੇ ਪੁਰਤ੍ਥਾਭਿਮੁਖੋ ਨਿਸਿਨ੍ਨੋ ਉਦੇਨ੍ਤਂ ਸੂਰਿਯਮਣ੍ਡਲਂ ਦਿਸ੍ਵਾ ਅਤ੍ਤਨੋ ਦਿਵਾਰਕ੍ਖਾਵਰਣਤ੍ਥਾਯ ‘‘ਉਦੇਤਯਂ ਚਕ੍ਖੁਮਾ ਏਕਰਾਜਾ’’ਤਿ ਪਰਿਤ੍ਤਂ ਕਤ੍ਵਾ ਗੋਚਰਭੂਮਿਯਂ ਓਤਰਿਤ੍ਵਾ ਗੋਚਰਂ ਗਹੇਤ੍ਵਾ ਸਾਯਂ ਆਗਨ੍ਤ੍ਵਾ ਪਬ੍ਬਤਮਤ੍ਥਕੇ ਪਚ੍ਛਾਭਿਮੁਖੋ ਨਿਸਿਨ੍ਨੋ ਅਤ੍ਥਙ੍ਗਤਂ ਸੂਰਿਯਮਣ੍ਡਲਂ ਦਿਸ੍ਵਾ ਅਤ੍ਤਨੋ ਰਤ੍ਤਿਰਕ੍ਖਾਵਰਣਤ੍ਥਾਯ ‘‘ਅਪੇਤਯਂ ਚਕ੍ਖੁਮਾ ਏਕਰਾਜਾ’’ਤਿ ਪਰਿਤ੍ਤਂ ਕਤ੍ਵਾ ਏਤੇਨੁਪਾਯੇਨ ਵਸਤਿ.

ਅਥ ਨਂ ਏਕਦਿਵਸਂ ਏਕੋ ਲੁਦ੍ਦਪੁਤ੍ਤੋ ਅਰਞ੍ਞੇ ਵਿਚਰਨ੍ਤੋ ਪਬ੍ਬਤਮਤ੍ਥਕੇ ਨਿਸਿਨ੍ਨਂ ਮੋਰਂ ਦਿਸ੍ਵਾ ਅਤ੍ਤਨੋ ਨਿਵੇਸਨਂ ਆਗਨ੍ਤ੍ਵਾ ਮਰਣਾਸਨ੍ਨਕਾਲੇ ਪੁਤ੍ਤਂ ਆਹ – ‘‘ਤਾਤ, ਚਤੁਤ੍ਥਾਯ ਪਬ੍ਬਤਰਾਜਿਯਾ ਅਰਞ੍ਞੇ ਸੁਵਣ੍ਣਵਣ੍ਣੋ ਮੋਰੋ ਅਤ੍ਥਿ, ਸਚੇ ਰਾਜਾ ਪੁਚ੍ਛਤਿ, ਆਚਿਕ੍ਖੇਯ੍ਯਾਸੀ’’ਤਿ. ਅਥੇਕਸ੍ਮਿਂ ਦਿਵਸੇ ਬਾਰਾਣਸਿਰਞ੍ਞੋ ਖੇਮਾ ਨਾਮ ਅਗ੍ਗਮਹੇਸੀ ਪਚ੍ਚੂਸਕਾਲੇ ਸੁਪਿਨਂ ਪਸ੍ਸਿ. ਏਵਰੂਪੋ ਸੁਪਿਨੋ ਅਹੋਸਿ – ‘‘ਸੁਵਣ੍ਣਵਣ੍ਣੋ ਮੋਰੋ ਧਮ੍ਮਂ ਦੇਸੇਤਿ, ਸਾ ਸਾਧੁਕਾਰਂ ਦਤ੍ਵਾ ਧਮ੍ਮਂ ਸੁਣਾਤਿ, ਮੋਰੋ ਧਮ੍ਮਂ ਦੇਸੇਤ੍ਵਾ ਉਟ੍ਠਾਯ ਪਕ੍ਕਾਮਿ’’. ਸਾ ‘‘ਮੋਰਰਾਜਾ ਗਚ੍ਛਤਿ, ਗਣ੍ਹਥ ਨ’’ਨ੍ਤਿ ਵਦਨ੍ਤੀਯੇਵ ਪਬੁਜ੍ਝਿ, ਪਬੁਜ੍ਝਿਤ੍ਵਾ ਚ ਪਨ ਸੁਪਿਨਭਾਵਂ ਞਤ੍ਵਾ ‘‘ਸੁਪਿਨੋਤਿ ਵੁਤ੍ਤੇ ਰਾਜਾ ਨ ਆਦਰਂ ਕਰਿਸ੍ਸਤਿ, ‘ਦੋਹਲ਼ੋ ਮੇ’ਤਿ ਵੁਤ੍ਤੇ ਕਰਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਦੋਹਲ਼ਿਨੀ ਵਿਯ ਹੁਤ੍ਵਾ ਨਿਪਜ੍ਜਿ. ਅਥ ਨਂ ਰਾਜਾ ਉਪਸਙ੍ਕਮਿਤ੍ਵਾ ਪੁਚ੍ਛਿ ‘‘ਭਦ੍ਦੇ, ਕਿਂ ਤੇ ਅਫਾਸੁਕ’’ਨ੍ਤਿ. ‘‘ਦੋਹਲ਼ੋ ਮੇ ਉਪ੍ਪਨ੍ਨੋ’’ਤਿ. ‘‘ਕਿਂ ਇਚ੍ਛਸਿ ਭਦ੍ਦੇ’’ਤਿ? ‘‘ਸੁਵਣ੍ਣਵਣ੍ਣਸ੍ਸ ਮੋਰਸ੍ਸ ਧਮ੍ਮਂ ਸੋਤੁਂ ਦੇਵਾ’’ਤਿ. ‘‘ਭਦ੍ਦੇ, ਕੁਤੋ ਏਵਰੂਪਂ ਮੋਰਂ ਲਚ੍ਛਾਮੀ’’ਤਿ? ‘‘ਦੇਵ, ਸਚੇ ਨ ਲਭਾਮਿ, ਜੀਵਿਤਂ ਮੇ ਨਤ੍ਥੀ’’ਤਿ. ‘‘ਭਦ੍ਦੇ, ਮਾ ਚਿਨ੍ਤਯਿ, ਸਚੇ ਕਤ੍ਥਚਿ ਅਤ੍ਥਿ, ਲਭਿਸ੍ਸਸੀ’’ਤਿ ਰਾਜਾ ਨਂ ਅਸ੍ਸਾਸੇਤ੍ਵਾ ਗਨ੍ਤ੍ਵਾ ਰਾਜਾਸਨੇ ਨਿਸਿਨ੍ਨੋ ਅਮਚ੍ਚੇ ਪੁਚ੍ਛਿ ‘‘ਅਮ੍ਭੋ, ਦੇਵੀ ਸੁਵਣ੍ਣਵਣ੍ਣਸ੍ਸ ਮੋਰਸ੍ਸ ਧਮ੍ਮਂ ਸੋਤੁਕਾਮਾ, ਮੋਰਾ ਨਾਮ ਸੁਵਣ੍ਣਵਣ੍ਣਾ ਹੋਨ੍ਤੀ’’ਤਿ? ‘‘ਬ੍ਰਾਹ੍ਮਣਾ ਜਾਨਿਸ੍ਸਨ੍ਤਿ ਦੇਵਾ’’ਤਿ.

ਰਾਜਾ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿ. ਬ੍ਰਾਹ੍ਮਣਾ ਏਵਮਾਹਂਸੁ ‘‘ਮਹਾਰਾਜ ਜਲਜੇਸੁ ਮਚ੍ਛਕਚ੍ਛਪਕਕ੍ਕਟਕਾ, ਥਲਜੇਸੁ ਮਿਗਾ ਹਂਸਾ ਮੋਰਾ ਤਿਤ੍ਤਿਰਾ ਏਤੇ ਤਿਰਚ੍ਛਾਨਗਤਾ ਚ ਮਨੁਸ੍ਸਾ ਚ ਸੁਵਣ੍ਣਵਣ੍ਣਾ ਹੋਨ੍ਤੀਤਿ ਅਮ੍ਹਾਕਂ ਲਕ੍ਖਣਮਨ੍ਤੇਸੁ ਆਗਤ’’ਨ੍ਤਿ. ਰਾਜਾ ਅਤ੍ਤਨੋ ਵਿਜਿਤੇ ਲੁਦ੍ਦਪੁਤ੍ਤੇ ਸਨ੍ਨਿਪਾਤੇਤ੍ਵਾ ‘‘ਸੁਵਣ੍ਣਵਣ੍ਣੋ ਮੋਰੋ ਵੋ ਦਿਟ੍ਠਪੁਬ੍ਬੋ’’ਤਿ ਪੁਚ੍ਛਿ. ਸੇਸਾ ‘‘ਨ ਦਿਟ੍ਠਪੁਬ੍ਬੋ’’ਤਿ ਆਹਂਸੁ. ਯਸ੍ਸ ਪਨ ਪਿਤਰਾ ਆਚਿਕ੍ਖਿਤਂ, ਸੋ ਆਹ – ‘‘ਮਯਾਪਿ ਨ ਦਿਟ੍ਠਪੁਬ੍ਬੋ, ਪਿਤਾ ਪਨ ਮੇ ‘ਅਸੁਕਟ੍ਠਾਨੇ ਨਾਮ ਸੁਵਣ੍ਣਵਣ੍ਣੋ ਮੋਰੋ ਅਤ੍ਥੀ’ਤਿ ਕਥੇਸੀ’’ਤਿ. ਅਥ ਨਂ ਰਾਜਾ ‘‘ਸਮ੍ਮ, ਮਯ੍ਹਞ੍ਚ ਦੇਵਿਯਾ ਚ ਜੀਵਿਤਂ ਦਿਨ੍ਨਂ ਭਵਿਸ੍ਸਤਿ, ਗਨ੍ਤ੍ਵਾ ਤਂ ਬਨ੍ਧਿਤ੍ਵਾ ਆਨੇਹੀ’’ਤਿ ਬਹੁਂ ਧਨਂ ਦਤ੍ਵਾ ਉਯ੍ਯੋਜੇਸਿ. ਸੋ ਪੁਤ੍ਤਦਾਰਸ੍ਸ ਧਨਂ ਦਤ੍ਵਾ ਤਤ੍ਥ ਗਨ੍ਤ੍ਵਾ ਮਹਾਸਤ੍ਤਂ ਦਿਸ੍ਵਾ ਪਾਸੇ ਓਡ੍ਡੇਤ੍ਵਾ ‘‘ਅਜ੍ਜ ਬਜ੍ਝਿਸ੍ਸਤਿ, ਅਜ੍ਜ ਬਜ੍ਝਿਸ੍ਸਤੀ’’ਤਿ ਅਬਜ੍ਝਿਤ੍ਵਾਵ ਮਤੋ, ਦੇਵੀਪਿ ਪਤ੍ਥਨਂ ਅਲਭਨ੍ਤੀ ਮਤਾ. ਰਾਜਾ ‘‘ਤਂ ਮੋਰਂ ਨਿਸ੍ਸਾਯ ਪਿਯਭਰਿਯਾ ਮੇ ਮਤਾ’’ਤਿ ਕੁਜ੍ਝਿਤ੍ਵਾ ਕੋਧਵਸਿਕੋ ਹੁਤ੍ਵਾ ‘‘ਹਿਮਵਨ੍ਤੇ ਚਤੁਤ੍ਥਾਯ ਪਬ੍ਬਤਰਾਜਿਯਾ ਸੁਵਣ੍ਣਵਣ੍ਣੋ ਮੋਰੋ ਚਰਤਿ, ਤਸ੍ਸ ਮਂਸਂ ਖਾਦਿਤ੍ਵਾ ਅਜਰਾ ਅਮਰਾ ਹੋਨ੍ਤੀ’’ਤਿ ਸੁਵਣ੍ਣਪਟ੍ਟੇ ਲਿਖਾਪੇਤ੍ਵਾ ਤਂ ਪਟ੍ਟਂ ਸਾਰਮਞ੍ਜੂਸਾਯਂ ਠਪੇਤ੍ਵਾ ਕਾਲਮਕਾਸਿ.

ਅਥ ਅਞ੍ਞੋ ਰਾਜਾ ਅਹੋਸਿ. ਸੋ ਸੁਵਣ੍ਣਪਟ੍ਟੇ ਅਕ੍ਖਰਾਨਿ ਦਿਸ੍ਵਾ ‘‘ਅਜਰੋ ਅਮਰੋ ਭਵਿਸ੍ਸਾਮੀ’’ਤਿ ਤਸ੍ਸ ਗਹਣਤ੍ਥਾਯ ਏਕਂ ਲੁਦ੍ਦਪੁਤ੍ਤਂ ਪੇਸੇਸਿ. ਸੋਪਿ ਤਤ੍ਥੇਵ ਮਤੋ. ਏਵਂ ਛ ਰਾਜਪਰਿਵਟ੍ਟਾ ਗਤਾ, ਛ ਲੁਦ੍ਦਪੁਤ੍ਤਾ ਹਿਮਵਨ੍ਤੇਯੇਵ ਮਤਾ. ਸਤ੍ਤਮੇਨ ਪਨ ਰਞ੍ਞਾ ਪੇਸਿਤੋ ਸਤ੍ਤਮੋ ਲੁਦ੍ਦੋ ‘‘ਅਜ੍ਜ ਅਜ੍ਜੇਵਾ’’ਤਿ ਸਤ੍ਤ ਸਂਵਚ੍ਛਰਾਨਿ ਬਜ੍ਝਿਤੁਂ ਅਸਕ੍ਕੋਨ੍ਤੋ ਚਿਨ੍ਤੇਸਿ ‘‘ਕਿਂ ਨੁ ਖੋ ਇਮਸ੍ਸ ਮੋਰਰਾਜਸ੍ਸ ਪਾਦੇ ਪਾਸਸ੍ਸ ਅਸਞ੍ਚਰਣਕਾਰਣ’’ਨ੍ਤਿ? ਅਥ ਨਂ ਪਰਿਗ੍ਗਣ੍ਹਨ੍ਤੋ ਸਾਯਂਪਾਤਂ ਪਰਿਤ੍ਤਂ ਕਰੋਨ੍ਤਂ ਦਿਸ੍ਵਾ ‘‘ਇਮਸ੍ਮਿਂ ਠਾਨੇ ਅਞ੍ਞੋ ਮੋਰੋ ਨਤ੍ਥਿ, ਇਮਿਨਾ ਬ੍ਰਹ੍ਮਚਾਰਿਨਾ ਭਵਿਤਬ੍ਬਂ, ਬ੍ਰਹ੍ਮਚਰਿਯਾਨੁਭਾਵੇਨ ਚੇਵ ਪਰਿਤ੍ਤਾਨੁਭਾਵੇਨ ਚਸ੍ਸ ਪਾਦੋ ਪਾਸੇ ਨ ਬਜ੍ਝਤੀ’’ਤਿ ਨਯਤੋ ਪਰਿਗ੍ਗਹੇਤ੍ਵਾ ਪਚ੍ਚਨ੍ਤਜਨਪਦਂ ਗਨ੍ਤ੍ਵਾ ਏਕਂ ਮੋਰਿਂ ਬਨ੍ਧਿਤ੍ਵਾ ਯਥਾ ਸਾ ਅਚ੍ਛਰਾਯ ਪਹਟਾਯ ਵਸ੍ਸਤਿ, ਪਾਣਿਮ੍ਹਿ ਪਹਟੇ ਨਚ੍ਚਤਿ, ਏਵਂ ਸਿਕ੍ਖਾਪੇਤ੍ਵਾ ਆਦਾਯ ਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਰਿਤ੍ਤਕਰਣਤੋ ਪੁਰੇਤਰਮੇਵ ਪਾਸਂ ਓਡ੍ਡੇਤ੍ਵਾ ਅਚ੍ਛਰਂ ਪਹਰਿਤ੍ਵਾ ਮੋਰਿਂ ਵਸ੍ਸਾਪੇਸਿ. ਮੋਰੋ ਤਸ੍ਸਾ ਸਦ੍ਦਂ ਸੁਣਿ, ਤਾਵਦੇਵਸ੍ਸ ਸਤ੍ਤ ਵਸ੍ਸਸਤਾਨਿ ਸਨ੍ਨਿਸਿਨ੍ਨਕਿਲੇਸੋ ਫਣਂ ਕਰਿਤ੍ਵਾ ਦਣ੍ਡੇਨ ਪਹਟਾਸੀਵਿਸੋ ਵਿਯ ਉਟ੍ਠਹਿ. ਸੋ ਕਿਲੇਸਾਤੁਰੋ ਹੁਤ੍ਵਾ ਪਰਿਤ੍ਤਂ ਕਾਤੁਂ ਅਸਕ੍ਕੁਣਿਤ੍ਵਾਵ ਵੇਗੇਨ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ਪਾਸੇ ਪਾਦਂ ਪਵੇਸੇਨ੍ਤੋਯੇਵ ਆਕਾਸਾ ਓਤਰਿ. ਸਤ੍ਤ ਵਸ੍ਸਸਤਾਨਿ ਅਸਞ੍ਚਰਣਕਪਾਸੋ ਤਙ੍ਖਣਞ੍ਞੇਵ ਸਞ੍ਚਰਿਤ੍ਵਾ ਪਾਦਂ ਬਨ੍ਧਿ.

ਅਥ ਨਂ ਲੁਦ੍ਦਪੁਤ੍ਤੋ ਯਟ੍ਠਿਅਗ੍ਗੇ ਓਲਮ੍ਬਨ੍ਤਂ ਦਿਸ੍ਵਾ ਚਿਨ੍ਤੇਸਿ ‘‘ਇਮਂ ਮੋਰਰਾਜਂ ਛ ਲੁਦ੍ਦਪੁਤ੍ਤਾ ਬਨ੍ਧਿਤੁਂ ਨਾਸਕ੍ਖਿਂਸੁ, ਅਹਮ੍ਪਿ ਸਤ੍ਤ ਵਸ੍ਸਾਨਿ ਨਾਸਕ੍ਖਿਂ, ਅਜ੍ਜ ਪਨੇਸ ਇਮਂ ਮੋਰਿਂ ਨਿਸ੍ਸਾਯ ਕਿਲੇਸਾਤੁਰੋ ਹੁਤ੍ਵਾ ਪਰਿਤ੍ਤਂ ਕਾਤੁਂ ਅਸਕ੍ਕੁਣਿਤ੍ਵਾ ਆਗਮ੍ਮ ਪਾਸੇ ਬਦ੍ਧੋ ਹੇਟ੍ਠਾਸੀਸਕੋ ਓਲਮ੍ਬਤਿ, ਏਵਰੂਪੋ ਮੇ ਸੀਲਵਾ ਕਿਲਮਿਤੋ, ਏਵਰੂਪਂ ਰਞ੍ਞੋ ਪਣ੍ਣਾਕਾਰਤ੍ਥਾਯ ਨੇਤੁਂ ਅਯੁਤ੍ਤਂ, ਕਿਂ ਮੇ ਰਞ੍ਞਾ ਦਿਨ੍ਨੇਨ ਸਕ੍ਕਾਰੇਨ, ਵਿਸ੍ਸਜ੍ਜੇਸ੍ਸਾਮਿ ਨ’’ਨ੍ਤਿ. ਪੁਨ ਚਿਨ੍ਤੇਸਿ ‘‘ਅਯਂ ਨਾਗਬਲੋ ਥਾਮਸਮ੍ਪਨ੍ਨੋ ਮਯਿ ਉਪਸਙ੍ਕਮਨ੍ਤੇ ‘ਏਸ ਮਂ ਮਾਰੇਤੁਂ ਆਗਚ੍ਛਤੀ’ਤਿ ਮਰਣਭਯਤਜ੍ਜਿਤੋ ਫਨ੍ਦਮਾਨੋ ਪਾਦਂ ਵਾ ਪਕ੍ਖਂ ਵਾ ਭਿਨ੍ਦੇਯ੍ਯ, ਅਨੁਪਗਨ੍ਤ੍ਵਾ ਪਨ ਪਟਿਚ੍ਛਨ੍ਨੇ ਠਤ੍ਵਾ ਖੁਰਪ੍ਪੇਨਸ੍ਸ ਪਾਸਂ ਛਿਨ੍ਦਿਸ੍ਸਾਮਿ, ਤਤੋ ਸਯਮੇਵ ਯਥਾਰੁਚਿਯਾ ਗਮਿਸ੍ਸਤੀ’’ਤਿ. ਸੋ ਪਟਿਚ੍ਛਨ੍ਨੇ ਠਤ੍ਵਾ ਧਨੁਂ ਆਰੋਪੇਤ੍ਵਾ ਖੁਰਪ੍ਪਂ ਸਨ੍ਨਯ੍ਹਿਤ੍ਵਾ ਆਕਡ੍ਢਿ. ਮੋਰੋਪਿ ‘‘ਅਯਂ ਲੁਦ੍ਦਕੋ ਮਂ ਕਿਲੇਸਾਤੁਰਂ ਕਤ੍ਵਾ ਬਦ੍ਧਭਾਵਂ ਞਤ੍ਵਾ ਨਿਰਾਸਙ੍ਕੋ ਆਗਚ੍ਛਿਸ੍ਸਤਿ, ਕਹਂ ਨੁ ਖੋ ਸੋ’’ਤਿ ਚਿਨ੍ਤੇਤ੍ਵਾ ਇਤੋ ਚਿਤੋ ਚ ਵਿਲੋਕੇਤ੍ਵਾ ਧਨੁਂ ਆਰੋਪੇਤ੍ਵਾ ਠਿਤਂ ਦਿਸ੍ਵਾ ‘‘ਮਾਰੇਤ੍ਵਾ ਮਂ ਆਦਾਯ ਗਨ੍ਤੁਕਾਮੋ ਭਵਿਸ੍ਸਤੀ’’ਤਿ ਮਞ੍ਞਮਾਨੋ ਮਰਣਭਯਤਜ੍ਜਿਤੋ ਹੁਤ੍ਵਾ ਜੀਵਿਤਂ ਯਾਚਨ੍ਤੋ ਪਠਮਂ ਗਾਥਮਾਹ –

੧੪੩.

‘‘ਸਚੇ ਹਿ ਤ੍ਯਾਹਂ ਧਨਹੇਤੁ ਗਾਹਿਤੋ, ਮਾ ਮਂ ਵਧੀ ਜੀਵਗਾਹਂ ਗਹੇਤ੍ਵਾ;

ਰਞ੍ਞੋ ਚ ਮਂ ਸਮ੍ਮ ਉਪਨ੍ਤਿਕਂ ਨੇਹਿ, ਮਞ੍ਞੇ ਧਨਂ ਲਚ੍ਛਸਿਨਪ੍ਪਰੂਪ’’ਨ੍ਤਿ.

ਤਤ੍ਥ ਸਚੇ ਹਿ ਤ੍ਯਾਹਨ੍ਤਿ ਸਚੇ ਹਿ ਤੇ ਅਹਂ. ਉਪਨ੍ਤਿਕਂ ਨੇਹੀਤਿ ਉਪਸਨ੍ਤਿਕਂ ਨੇਹਿ. ਲਚ੍ਛਸਿਨਪ੍ਪਰੂਪਨ੍ਤਿ ਲਚ੍ਛਸਿ ਅਨਪ੍ਪਕਰੂਪਂ.

ਤਂ ਸੁਤ੍ਵਾ ਲੁਦ੍ਦਪੁਤ੍ਤੋ ਚਿਨ੍ਤੇਸਿ – ‘‘ਮੋਰਰਾਜਾ, ‘ਅਯਂ ਮਂ ਵਿਜ੍ਝਿਤੁਕਾਮਤਾਯ ਖੁਰਪ੍ਪਂ ਸਨ੍ਨਯ੍ਹੀ’ਤਿ ਮਞ੍ਞਤਿ, ਅਸ੍ਸਾਸੇਸ੍ਸਾਮਿ ਨ’’ਨ੍ਤਿ. ਸੋ ਅਸ੍ਸਾਸੇਨ੍ਤੋ ਦੁਤਿਯਂ ਗਾਥਮਾਹ –

੧੪੪.

‘‘ਨ ਮੇ ਅਯਂ ਤੁਯ੍ਹ ਵਧਾਯ ਅਜ੍ਜ, ਸਮਾਹਿਤੋ ਚਾਪਧੁਰੇ ਖੁਰਪ੍ਪੋ;

ਪਾਸਞ੍ਚ ਤ੍ਯਾਹਂ ਅਧਿਪਾਤਯਿਸ੍ਸਂ, ਯਥਾਸੁਖਂ ਗਚ੍ਛਤੁ ਮੋਰਰਾਜਾ’’ਤਿ.

ਤਤ੍ਥ ਅਧਿਪਾਤਯਿਸ੍ਸਨ੍ਤਿ ਛਿਨ੍ਦਯਿਸ੍ਸਂ.

ਤਤੋ ਮੋਰਰਾਜਾ ਦ੍ਵੇ ਗਾਥਾ ਅਭਾਸਿ –

੧੪੫.

‘‘ਯਂ ਸਤ੍ਤ ਵਸ੍ਸਾਨਿ ਮਮਾਨੁਬਨ੍ਧਿ, ਰਤ੍ਤਿਨ੍ਦਿਵਂ ਖੁਪ੍ਪਿਪਾਸਂ ਸਹਨ੍ਤੋ;

ਅਥ ਕਿਸ੍ਸ ਮਂ ਪਾਸਵਸੂਪਨੀਤਂ, ਪਮੁਤ੍ਤਵੇ ਇਚ੍ਛਸਿ ਬਨ੍ਧਨਸ੍ਮਾ.

੧੪੬.

‘‘ਪਾਣਾਤਿਪਾਤਾ ਵਿਰਤੋ ਨੁਸਜ੍ਜ, ਅਭਯਂ ਨੁ ਤੇ ਸਬ੍ਬਭੂਤੇਸੁ ਦਿਨ੍ਨਂ;

ਯਂ ਮਂ ਤੁਵਂ ਪਾਸਵਸੂਪਨੀਤਂ, ਪਮੁਤ੍ਤਵੇ ਇਚ੍ਛਸਿ ਬਨ੍ਧਨਸ੍ਮਾ’’ਤਿ.

ਤਤ੍ਥ ਯਨ੍ਤਿ ਯਸ੍ਮਾ ਮਂ ਏਤ੍ਤਕਂ ਕਾਲਂ ਤ੍ਵਂ ਅਨੁਬਨ੍ਧਿ, ਤਸ੍ਮਾ ਤਂ ਪੁਚ੍ਛਾਮਿ, ਅਥ ਕਿਸ੍ਸ ਮਂ ਪਾਸਵਸਂ ਉਪਨੀਤਂ ਬਨ੍ਧਨਸ੍ਮਾ ਪਮੋਚੇਤੁਂ ਇਚ੍ਛਸੀਤਿ ਅਤ੍ਥੋ. ਵਿਰਤੋ ਨੁਸਜ੍ਜਾਤਿ ਵਿਰਤੋ ਨੁਸਿ ਅਜ੍ਜ. ਸਬ੍ਬਭੂਤੇਸੂਤਿ ਸਬ੍ਬਸਤ੍ਤਾਨਂ.

ਇਤੋ ਪਰਂ –

੧੪੭.

‘‘ਪਾਣਾਤਿਪਾਤਾ ਵਿਰਤਸ੍ਸ ਬ੍ਰੂਹਿ, ਅਭਯਞ੍ਚ ਯੋ ਸਬ੍ਬਭੂਤੇਸੁ ਦੇਤਿ;

ਪੁਚ੍ਛਾਮਿ ਤਂ ਮੋਰਰਾਜੇਤਮਤ੍ਥਂ, ਇਤੋ ਚੁਤੋ ਕਿਂ ਲਭਤੇ ਸੁਖਂ ਸੋ.

੧੪੮.

‘‘ਪਾਣਾਤਿਪਾਤਾ ਵਿਰਤਸ੍ਸ ਬ੍ਰੂਮਿ, ਅਭਯਞ੍ਚ ਯੋ ਸਬ੍ਬਭੂਤੇਸੁ ਦੇਤਿ;

ਦਿਟ੍ਠੇਵ ਧਮ੍ਮੇ ਲਭਤੇ ਪਸਂਸਂ, ਸਗ੍ਗਞ੍ਚ ਸੋ ਯਾਤਿ ਸਰੀਰਭੇਦਾ.

੧੪੯.

‘‘ਨ ਸਨ੍ਤਿ ਦੇਵਾ ਇਤਿ ਆਹੁ ਏਕੇ, ਇਧੇਵ ਜੀਵੋ ਵਿਭਵਂ ਉਪੇਤਿ;

ਤਥਾ ਫਲਂ ਸੁਕਤਦੁਕ੍ਕਟਾਨਂ, ਦਤ੍ਤੁਪਞ੍ਞਤ੍ਤਞ੍ਚ ਵਦਨ੍ਤਿ ਦਾਨਂ;

ਤੇਸਂ ਵਚੋ ਅਰਹਤਂ ਸਦ੍ਦਹਾਨੋ, ਤਸ੍ਮਾ ਅਹਂ ਸਕੁਣੇ ਬਾਧਯਾਮੀ’’ਤਿ. –

ਇਮਾ ਉਤ੍ਤਾਨਸਮ੍ਬਨ੍ਧਗਾਥਾ ਪਾਲ਼ਿਨਯੇਨ ਵੇਦਿਤਬ੍ਬਾ.

ਤਤ੍ਥ ਇਤਿ ਆਹੁ ਏਕੇਤਿ ਏਕਚ੍ਚੇ ਸਮਣਬ੍ਰਾਹ੍ਮਣਾ ਏਵਂ ਕਥੇਨ੍ਤਿ. ਤੇਸਂ ਵਚੋ ਅਰਹਤਂ ਸਦ੍ਦਹਾਨੋਤਿ ਤਸ੍ਸ ਕਿਰ ਕੁਲੂਪਕਾ ਉਚ੍ਛੇਦਵਾਦਿਨੋ ਨਗ੍ਗਸਮਣਕਾ. ਤੇ ਤਂ ਪਚ੍ਚੇਕਬੋਧਿਞਾਣਸ੍ਸ ਉਪਨਿਸ੍ਸਯਸਮ੍ਪਨ੍ਨਮ੍ਪਿ ਸਤ੍ਤਂ ਉਚ੍ਛੇਦਵਾਦਂ ਗਣ੍ਹਾਪੇਸੁਂ. ਸੋ ਤੇਹਿ ਸਂਸਗ੍ਗੇਨ ‘‘ਕੁਸਲਾਕੁਸਲਂ ਨਤ੍ਥੀ’’ਤਿ ਗਹੇਤ੍ਵਾ ਸਕੁਣੇ ਮਾਰੇਤਿ. ਏਵਂ ਮਹਾਸਾਵਜ੍ਜਾ ਏਸਾ ਅਸਪ੍ਪੁਰਿਸਸੇਵਨਾ ਨਾਮ. ਤੇਯੇਵ ਅਯਂ ‘‘ਅਰਹਨ੍ਤੋ’’ਤਿ ਮਞ੍ਞਮਾਨੋ ਏਵਮਾਹ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਤਸ੍ਸੇਵ ਪਰਲੋਕਸ੍ਸ ਅਤ੍ਥਿਭਾਵਂ ਕਥੇਸ੍ਸਾਮੀ’’ਤਿ ਪਾਸਯਟ੍ਠਿਯਂ ਅਧੋਸਿਰੋ ਓਲਮ੍ਬਮਾਨੋਵ ਇਮਂ ਗਾਥਮਾਹ –

੧੫੦.

‘‘ਚਨ੍ਦੋ ਚ ਸੁਰਿਯੋ ਚ ਉਭੋ ਸੁਦਸ੍ਸਨਾ, ਗਚ੍ਛਨ੍ਤਿ ਓਭਾਸਯਮਨ੍ਤਲਿਕ੍ਖੇ;

ਇਮਸ੍ਸ ਲੋਕਸ੍ਸ ਪਰਸ੍ਸ ਵਾ ਤੇ, ਕਥਂ ਨੁ ਤੇ ਆਹੁ ਮਨੁਸ੍ਸਲੋਕੇ’’ਤਿ.

ਤਤ੍ਥ ਇਮਸ੍ਸਾਤਿ ਕਿਂ ਨੁ ਤੇ ਇਮਸ੍ਸ ਲੋਕਸ੍ਸ ਸਨ੍ਤਿ, ਉਦਾਹੁ ਪਰਲੋਕਸ੍ਸਾਤਿ. ਭੁਮ੍ਮਤ੍ਥੇ ਵਾ ਏਤਂ ਸਾਮਿਵਚਨਂ. ਕਥਂ ਨੁ ਤੇਤਿ ਏਤੇਸੁ ਵਿਮਾਨੇਸੁ ਚਨ੍ਦਿਮਸੂਰਿਯਦੇਵਪੁਤ੍ਤੇ ਕਥਂ ਨੁ ਕਥੇਨ੍ਤਿ, ਕਿਂ ਅਤ੍ਥੀਤਿ ਕਥੇਨ੍ਤਿ, ਉਦਾਹੁ ਨਤ੍ਥੀਤਿ, ਕਿਂ ਵਾ ਦੇਵਾ, ਉਦਾਹੁ ਮਨੁਸ੍ਸਾਤਿ?

ਲੁਦ੍ਦਪੁਤ੍ਤੋ ਗਾਥਮਾਹ –

੧੫੧.

‘‘ਚਨ੍ਦੋ ਚ ਸੁਰਿਯੋ ਚ ਉਭੋ ਸੁਦਸ੍ਸਨਾ, ਗਚ੍ਛਨ੍ਤਿ ਓਭਾਸਯਮਨ੍ਤਲਿਕ੍ਖੇ;

ਪਰਸ੍ਸ ਲੋਕਸ੍ਸ ਨ ਤੇ ਇਮਸ੍ਸ, ਦੇਵਾਤਿ ਤੇ ਆਹੁ ਮਨੁਸ੍ਸਲੋਕੇ’’ਤਿ.

ਅਥ ਨਂ ਮਹਾਸਤ੍ਤੋ ਆਹ –

੧੫੨.

‘‘ਏਤ੍ਥੇਵ ਤੇ ਨੀਹਤਾ ਹੀਨਵਾਦਾ, ਅਹੇਤੁਕਾ ਯੇ ਨ ਵਦਨ੍ਤਿ ਕਮ੍ਮਂ;

ਤਥਾ ਫਲਂ ਸੁਕਤਦੁਕ੍ਕਟਾਨਂ, ਦਤ੍ਤੁਪਞ੍ਞਤ੍ਤਂ ਯੇ ਚ ਵਦਨ੍ਤਿ ਦਾਨ’’ਨ੍ਤਿ.

ਤਤ੍ਥ ਏਤ੍ਥੇਵ ਤੇ ਨਿਹਤਾ ਹੀਨਵਾਦਾਤਿ ਸਚੇ ਚਨ੍ਦਿਮਸੂਰਿਯਾ ਦੇਵਲੋਕੇ ਠਿਤਾ, ਨ ਮਨੁਸ੍ਸਲੋਕੇ, ਸਚੇ ਚ ਤੇ ਦੇਵਾ, ਨ ਮਨੁਸ੍ਸਾ, ਏਤ੍ਥੇਵ ਏਤ੍ਤਕੇ ਬ੍ਯਾਕਰਣੇ ਤੇ ਤਵ ਕੁਲੂਪਕਾ ਹੀਨਵਾਦਾ ਨੀਹਤਾ ਹੋਨ੍ਤਿ. ਅਹੇਤੁਕਾ ‘‘ਵਿਸੁਦ੍ਧਿਯਾ ਵਾ ਸਂਕਿਲੇਸਸ੍ਸ ਵਾ ਹੇਤੁਭੂਤਂ ਕਮ੍ਮਂ ਨਤ੍ਥੀ’’ਤਿ ਏਵਂਵਾਦਾ. ਦਤ੍ਤੁਪਞ੍ਞਤ੍ਤਨ੍ਤਿ ਯੇ ਚ ਦਾਨਂ ‘‘ਬਾਲਕੇਹਿ ਪਞ੍ਞਤ੍ਤ’’ਨ੍ਤਿ ਵਦਨ੍ਤਿ.

ਸੋ ਮਹਾਸਤ੍ਤੇ ਕਥੇਨ੍ਤੇ ਸਲ੍ਲਕ੍ਖੇਤ੍ਵਾ ਗਾਥਾਦ੍ਵਯਮਾਹ –

੧੫੩.

‘‘ਅਦ੍ਧਾ ਹਿ ਸਚ੍ਚਂ ਵਚਨਂ ਤਵੇਦਂ, ਕਥਞ੍ਹਿ ਦਾਨਂ ਅਫਲਂ ਭਵੇਯ੍ਯ;

ਤਥਾ ਫਲਂ ਸੁਕਤਦੁਕ੍ਕਟਾਨਂ, ਦਤ੍ਤੁਪਞ੍ਞਤ੍ਤਞ੍ਚ ਕਥਂ ਭਵੇਯ੍ਯ.

੧੫੪.

‘‘ਕਥਂਕਰੋ ਕਿਨ੍ਤਿਕਰੋ ਕਿਮਾਚਰਂ, ਕਿਂ ਸੇਵਮਾਨੋ ਕੇਨ ਤਪੋਗੁਣੇਨ;

ਅਕ੍ਖਾਹਿ ਮੇ ਮੋਰਰਾਜੇਤਮਤ੍ਥਂ, ਯਥਾ ਅਹਂ ਨੋ ਨਿਰਯਂ ਪਤੇਯ੍ਯ’’ਨ੍ਤਿ.

ਤਤ੍ਥ ਦਤ੍ਤੁਪਞ੍ਞਤ੍ਤਞ੍ਚਾਤਿ ਦਾਨਞ੍ਚ ਦਤ੍ਤੁਪਞ੍ਞਤ੍ਤਂ ਨਾਮ ਕਥਂ ਭਵੇਯ੍ਯਾਤਿ ਅਤ੍ਥੋ. ਕਥਂਕਰੋਤਿ ਕਤਰਕਮ੍ਮਂ ਕਰੋਨ੍ਤੋ. ਕਿਨ੍ਤਿਕਰੋਤਿ ਕੇਨ ਕਾਰਣੇਨ ਕਰੋਨ੍ਤੋ ਅਹਂ ਨਿਰਯਂ ਨ ਗਚ੍ਛੇਯ੍ਯਂ. ਇਤਰਾਨਿ ਤਸ੍ਸੇਵ ਵੇਵਚਨਾਨਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਸਚਾਹਂ ਇਮਂ ਪਞ੍ਹਂ ਨ ਕਥੇਸ੍ਸਾਮਿ, ਮਨੁਸ੍ਸਲੋਕੋ ਤੁਚ੍ਛੋ ਵਿਯ ਕਤੋ ਭਵਿਸ੍ਸਤਿ, ਤਥੇਵਸ੍ਸ ਧਮ੍ਮਿਕਾਨਂ ਸਮਣਬ੍ਰਾਹ੍ਮਣਾਨਂ ਅਤ੍ਥਿਭਾਵਂ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦ੍ਵੇ ਗਾਥਾ ਅਭਾਸਿ –

੧੫੫.

‘‘ਯੇ ਕੇਚਿ ਅਤ੍ਥਿ ਸਮਣਾ ਪਥਬ੍ਯਾ, ਕਾਸਾਯਵਤ੍ਥਾ ਅਨਗਾਰਿਯਾ ਤੇ;

ਪਾਤੋਵ ਪਿਣ੍ਡਾਯ ਚਰਨ੍ਤਿ ਕਾਲੇ, ਵਿਕਾਲਚਰਿਯਾ ਵਿਰਤਾ ਹਿ ਸਨ੍ਤੋ.

੧੫੬.

‘‘ਤੇ ਤਤ੍ਥ ਕਾਲੇਨੁਪਸਙ੍ਕਮਿਤ੍ਵਾ, ਪੁਚ੍ਛਾਹਿ ਯਂ ਤੇ ਮਨਸੋ ਪਿਯਂ ਸਿਯਾ;

ਤੇ ਤੇ ਪਵਕ੍ਖਨ੍ਤਿ ਯਥਾਪਜਾਨਂ, ਇਮਸ੍ਸ ਲੋਕਸ੍ਸ ਪਰਸ੍ਸ ਚਤ੍ਥ’’ਨ੍ਤਿ.

ਤਤ੍ਥ ਸਨ੍ਤੋਤਿ ਸਨ੍ਤਪਾਪਾ ਪਣ੍ਡਿਤਾ ਪਚ੍ਚੇਕਬੁਦ੍ਧਾ. ਯਥਾਪਜਾਨਨ੍ਤਿ ਤੇ ਤੁਯ੍ਹਂ ਅਤ੍ਤਨੋ ਪਜਾਨਨਨਿਯਾਮੇਨ ਵਕ੍ਖਨ੍ਤਿ, ਕਙ੍ਖਂ ਤੇ ਛਿਨ੍ਦਿਤ੍ਵਾ ਕਥੇਸ੍ਸਨ੍ਤਿ. ਇਮਸ੍ਸ ਲੋਕਸ੍ਸ ਪਰਸ੍ਸ ਚਤ੍ਥਨ੍ਤਿ ਇਮਿਨਾ ਨਾਮ ਕਮ੍ਮੇਨ ਮਨੁਸ੍ਸਲੋਕੇ ਨਿਬ੍ਬਤ੍ਤਨ੍ਤਿ, ਇਮਿਨਾ ਦੇਵਲੋਕੇ, ਇਮਿਨਾ ਨਿਰਯਾਦੀਸੂਤਿ ਏਵਂ ਇਮਸ੍ਸ ਚ ਪਰਸ੍ਸ ਚ ਲੋਕਸ੍ਸ ਅਤ੍ਥਂ ਆਚਿਕ੍ਖਿਸ੍ਸਨ੍ਤਿ, ਤੇ ਪੁਚ੍ਛਾਤਿ.

ਏਵਞ੍ਚ ਪਨ ਵਤ੍ਵਾ ਨਿਰਯਭਯੇਨ ਤਜ੍ਜੇਸਿ. ਸੋ ਪਨ ਪੂਰਿਤਪਾਰਮੀ ਪਚ੍ਚੇਕਬੋਧਿਸਤ੍ਤੋ ਸੂਰਿਯਰਸ੍ਮਿਸਮ੍ਫਸ੍ਸਂ ਓਲੋਕੇਤ੍ਵਾ ਠਿਤਂ ਪਰਿਣਤਪਦੁਮਂ ਵਿਯ ਪਰਿਪਾਕਗਤਞਾਣੋ ਵਿਚਰਤਿ. ਸੋ ਤਸ੍ਸ ਧਮ੍ਮਕਥਂ ਸੁਣਨ੍ਤੋ ਠਿਤਪਦੇਨੇਵ ਠਿਤੋ ਸਙ੍ਖਾਰੇ ਪਰਿਗ੍ਗਣ੍ਹਿਤ੍ਵਾ ਤਿਲਕ੍ਖਣਂ ਸਮ੍ਮਸਨ੍ਤੋ ਪਚ੍ਚੇਕਬੋਧਿਞਾਣਂ ਪਟਿਵਿਜ੍ਝਿ. ਤਸ੍ਸ ਪਟਿਵੇਧੋ ਚ ਮਹਾਸਤ੍ਤਸ੍ਸ ਪਾਸਤੋ ਮੋਕ੍ਖੋ ਚ ਏਕਕ੍ਖਣੇਯੇਵ ਅਹੋਸਿ. ਪਚ੍ਚੇਕਬੁਦ੍ਧੋ ਸਬ੍ਬਕਿਲੇਸੇ ਪਦਾਲੇਤ੍ਵਾ ਭਵਪਰਿਯਨ੍ਤੇ ਠਿਤੋਵ ਉਦਾਨਂ ਉਦਾਨਨ੍ਤੋ ਗਾਥਮਾਹ –

੧੫੭.

‘‘ਤਚਂਵ ਜਿਣ੍ਣਂ ਉਰਗੋ ਪੁਰਾਣਂ, ਪਣ੍ਡੂਪਲਾਸਂ ਹਰਿਤੋ ਦੁਮੋਵ;

ਏਸਪ੍ਪਹੀਨੋ ਮਮ ਲੁਦ੍ਦਭਾਵੋ, ਜਹਾਮਹਂ ਲੁਦ੍ਦਕਭਾਵਮਜ੍ਜਾ’’ਤਿ.

ਤਸ੍ਸਤ੍ਥੋ – ਯਥਾ ਜਿਣ੍ਣਂ ਪੁਰਾਣਂ ਤਚਂ ਉਰਗੋ ਜਹਤਿ, ਯਥਾ ਚ ਹਰਿਤੋ ਸਮ੍ਪਜ੍ਜਮਾਨਨੀਲਪਤ੍ਤੋ ਦੁਮੋ ਕਤ੍ਥਚਿ ਠਿਤਂ ਪਣ੍ਡੁਪਲਾਸਂ ਜਹਤਿ, ਏਵਂ ਅਹਮ੍ਪਿ ਅਜ੍ਜ ਲੁਦ੍ਦਭਾਵਂ ਦਾਰੁਣਭਾਵਂ ਜਹਿਤ੍ਵਾ ਠਿਤੋ, ਸੋ ਦਾਨਿ ਏਸ ਪਹੀਨੋ ਮਮ ਲੁਦ੍ਦਭਾਵੋ, ਸਾਧੁ ਵਤ ਜਹਾਮਹਂ ਲੁਦ੍ਦਕਭਾਵਮਜ੍ਜਾਤਿ. ਜਹਾਮਹਨ੍ਤਿ ਪਜਹਿਂ ਅਹਨ੍ਤਿ ਅਤ੍ਥੋ.

ਸੋ ਇਮਂ ਉਦਾਨਂ ਉਦਾਨੇਤ੍ਵਾ ‘‘ਅਹਂ ਤਾਵ ਸਬ੍ਬਕਿਲੇਸਬਨ੍ਧਨੇਹਿ ਮੁਤ੍ਤੋ, ਨਿਵੇਸਨੇ ਪਨ ਮੇ ਬਨ੍ਧਿਤ੍ਵਾ ਠਪਿਤਾ ਬਹੂ ਸਕੁਣਾ ਅਤ੍ਥਿ, ਤੇ ਕਥਂ ਮੋਚੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਮਹਾਸਤ੍ਤਂ ਪੁਚ੍ਛਿ – ‘‘ਮੋਰਰਾਜ, ਨਿਵੇਸਨੇ ਮੇ ਬਹੂ ਸਕੁਣਾ ਬਦ੍ਧਾ ਅਤ੍ਥਿ, ਤੇ ਕਥਂ ਮੋਚੇਸ੍ਸਾਮੀ’’ਤਿ? ਪਚ੍ਚੇਕਬੁਦ੍ਧਤੋਪਿ ਸਬ੍ਬਞ੍ਞੁਬੋਧਿਸਤ੍ਤਾਨਞ੍ਞੇਵ ਉਪਾਯਪਰਿਗ੍ਗਹਞਾਣਂ ਮਹਨ੍ਤਤਰਂ ਹੋਤਿ, ਤੇਨ ਨਂ ਆਹ ‘‘ਯਂ ਵੋ ਮਗ੍ਗੇਨ ਕਿਲੇਸੇ ਖਣ੍ਡੇਤ੍ਵਾ ਪਚ੍ਚੇਕਬੋਧਿਞਾਣਂ ਪਟਿਵਿਦ੍ਧਂ, ਤਂ ਆਰਬ੍ਭ ਸਚ੍ਚਕਿਰਿਯਂ ਕਰੋਥ, ਸਕਲਜਮ੍ਬੁਦੀਪੇ ਬਨ੍ਧਨਗਤੋ ਸਤ੍ਤੋ ਨਾਮ ਨ ਭਵਿਸ੍ਸਤੀ’’ਤਿ. ਸੋ ਬੋਧਿਸਤ੍ਤੇਨ ਦਿਨ੍ਨਨਯਦ੍ਵਾਰੇ ਠਤ੍ਵਾ ਸਚ੍ਚਕਿਰਿਯਂ ਕਰੋਨ੍ਤੋ ਗਾਥਮਾਹ –

੧੫੮.

‘‘ਯੇ ਚਾਪਿ ਮੇ ਸਕੁਣਾ ਅਤ੍ਥਿ ਬਦ੍ਧਾ, ਸਤਾਨਿਨੇਕਾਨਿ ਨਿਵੇਸਨਸ੍ਮਿਂ;

ਤੇਸਮ੍ਪਹਂ ਜੀਵਿਤਮਜ੍ਜ ਦਮ੍ਮਿ, ਮੋਕ੍ਖਞ੍ਚ ਤੇ ਪਤ੍ਤਾ ਸਕਂ ਨਿਕੇਤ’’ਨ੍ਤਿ.

ਤਤ੍ਥ ਮੋਕ੍ਖਞ੍ਚ ਤੇ ਪਤ੍ਤਾਤਿ ਸ੍ਵਾਹਂ ਮੋਕ੍ਖਂ ਪਤ੍ਤੋ ਪਚ੍ਚੇਕਬੋਧਿਞਾਣਂ ਪਟਿਵਿਜ੍ਝਿਤ੍ਵਾ ਠਿਤੋ, ਤੇ ਸਤ੍ਤੇ ਜੀਵਿਤਦਾਨੇਨ ਅਨੁਕਮ੍ਪਾਮਿ, ਏਤੇਨ ਸਚ੍ਚੇਨ. ਸਕਂ ਨਿਕੇਤਨ੍ਤਿ ਸਬ੍ਬੇਪਿ ਤੇ ਸਤ੍ਤਾ ਅਤ੍ਤਨੋ ਅਤ੍ਤਨੋ ਵਸਨਟ੍ਠਾਨਂ ਗਚ੍ਛਨ੍ਤੂਤਿ ਵਦਤਿ.

ਅਥਸ੍ਸ ਸਚ੍ਚਕਿਰਿਯਾਸਮਕਾਲਮੇਵ ਸਬ੍ਬੇ ਬਨ੍ਧਨਾ ਮੁਚ੍ਚਿਤ੍ਵਾ ਤੁਟ੍ਠਿਰਵਂ ਰਵਨ੍ਤਾ ਸਕਟ੍ਠਾਨਮੇਵ ਅਗਮਿਂਸੁ. ਤਸ੍ਮਿਂ ਖਣੇ ਤੇਸਂ ਤੇਸਂ ਗੇਹੇਸੁ ਬਿਲ਼ਾਲੇ ਆਦਿਂ ਕਤ੍ਵਾ ਸਕਲਜਮ੍ਬੁਦੀਪੇ ਬਨ੍ਧਨਗਤੋ ਸਤ੍ਤੋ ਨਾਮ ਨਾਹੋਸਿ. ਪਚ੍ਚੇਕਬੁਦ੍ਧੋ ਹਤ੍ਥਂ ਉਕ੍ਖਿਪਿਤ੍ਵਾ ਸੀਸਂ ਪਰਾਮਸਿ. ਤਾਵਦੇਵ ਗਿਹਿਲਿਙ੍ਗਂ ਅਨ੍ਤਰਧਾਯਿ, ਪਬ੍ਬਜਿਤਲਿਙ੍ਗਂ ਪਾਤੁਰਹੋਸਿ. ਸੋ ਸਟ੍ਠਿਵਸ੍ਸਿਕਤ੍ਥੇਰੋ ਵਿਯ ਆਕਪ੍ਪਸਮ੍ਪਨ੍ਨੋ ਅਟ੍ਠਪਰਿਕ੍ਖਾਰਧਰੋ ਹੁਤ੍ਵਾ ‘‘ਤ੍ਵਮੇਵ ਮਮ ਪਤਿਟ੍ਠਾ ਅਹੋਸੀ’’ਤਿ ਮੋਰਰਾਜਸ੍ਸ ਅਞ੍ਜਲਿਂ ਪਗ੍ਗਯ੍ਹ ਪਦਕ੍ਖਿਣਂ ਕਤ੍ਵਾ ਆਕਾਸੇ ਉਪ੍ਪਤਿਤ੍ਵਾ ਨਨ੍ਦਮੂਲਕਪਬ੍ਭਾਰਂ ਅਗਮਾਸਿ. ਮੋਰਰਾਜਾਪਿ ਯਟ੍ਠਿਅਗ੍ਗਤੋ ਉਪ੍ਪਤਿਤ੍ਵਾ ਗੋਚਰਂ ਗਹੇਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਗਤੋ. ਇਦਾਨਿ ਲੁਦ੍ਦਸ੍ਸ ਸਤ੍ਤ ਵਸ੍ਸਾਨਿ ਪਾਸਹਤ੍ਥਸ੍ਸ ਚਰਿਤ੍ਵਾਪਿ ਮੋਰਰਾਜਾਨਂ ਨਿਸ੍ਸਾਯ ਦੁਕ੍ਖਾ ਮੁਤ੍ਤਭਾਵਂ ਪਕਾਸੇਨ੍ਤੋ ਸਤ੍ਥਾ ਓਸਾਨਗਾਥਮਾਹ –

੧੫੯.

‘‘ਲੁਦ੍ਦੋ ਚਰੀ ਪਾਸਹਤ੍ਥੋ ਅਰਞ੍ਞੇ, ਬਾਧੇਤੁ ਮੋਰਾਧਿਪਤਿਂ ਯਸਸ੍ਸਿਂ;

ਬਨ੍ਧਿਤ੍ਵਾ ਮੋਰਾਧਿਪਤਿਂ ਯਸਸ੍ਸਿਂ, ਦੁਕ੍ਖਾ ਸ ਪਮੁਚ੍ਚਿ ਯਥਾਹਂ ਪਮੁਤ੍ਤੋ’’ਤਿ.

ਤਤ੍ਥ ਬਾਧੇਤੂਤਿ ਮਾਰੇਤੁਂ, ਅਯਮੇਵ ਵਾ ਪਾਠੋ. ਬਨ੍ਧਿਤ੍ਵਾਤਿ ਬਨ੍ਧਿਤ੍ਵਾ ਠਿਤਸ੍ਸ ਧਮ੍ਮਕਥਂ ਸੁਤ੍ਵਾ ਪਟਿਲਦ੍ਧਸਂਵੇਗੋ ਹੁਤ੍ਵਾਤਿ ਅਤ੍ਥੋ. ਯਥਾਹਨ੍ਤਿ ਯਥਾ ਅਹਂ ਸਯਮ੍ਭੁਞਾਣੇਨ ਮੁਤ੍ਤੋ, ਏਵਮੇਵ ਸੋਪਿ ਮੁਤ੍ਤੋਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਅਰਹਤ੍ਤਂ ਪਾਪੁਣਿ. ਤਦਾ ਮੋਰਰਾਜਾ ਅਹਮੇਵ ਅਹੋਸਿਨ੍ਤਿ.

ਮਹਾਮੋਰਜਾਤਕਵਣ੍ਣਨਾ ਅਟ੍ਠਮਾ.

[੪੯੨] ੯. ਤਚ੍ਛਸੂਕਰਜਾਤਕਵਣ੍ਣਨਾ

ਯਦੇਸਮਾਨਾ ਵਿਚਰਿਮ੍ਹਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦ੍ਵੇ ਮਹਲ੍ਲਕਤ੍ਥੇਰੇ ਆਰਬ੍ਭ ਕਥੇਸਿ. ਮਹਾਕੋਸਲੋ ਕਿਰ ਰਞ੍ਞੋ ਬਿਮ੍ਬਿਸਾਰਸ੍ਸ ਧੀਤਰਂ ਦੇਨ੍ਤੋ ਧੀਤੁ ਨ੍ਹਾਨੀਯਮੂਲਤ੍ਥਾਯ ਕਾਸਿਗਾਮਂ ਅਦਾਸਿ. ਪਸੇਨਦਿ ਰਾਜਾ ਅਜਾਤਸਤ੍ਤੁਨਾ ਪਿਤਰਿ ਮਾਰਿਤੇ ਤਂ ਗਾਮਂ ਅਚ੍ਛਿਨ੍ਦਿ. ਤੇਸੁ ਤਸ੍ਸਤ੍ਥਾਯ ਯੁਜ੍ਝਨ੍ਤੇਸੁ ਪਠਮਂ ਅਜਾਤਸਤ੍ਤੁਸ੍ਸ ਜਯੋ ਅਹੋਸਿ. ਕੋਸਲਰਾਜਾ ਪਰਾਜਯਪ੍ਪਤ੍ਤੋ ਅਮਚ੍ਚੇ ਪੁਚ੍ਛਿ ‘‘ਕੇਨ ਨੁ ਖੋ ਉਪਾਯੇਨ ਅਜਾਤਸਤ੍ਤੁਂ ਗਣ੍ਹੇਯ੍ਯਾਮਾ’’ਤਿ. ਮਹਾਰਾਜ, ਭਿਕ੍ਖੂ ਨਾਮ ਮਨ੍ਤਕੁਸਲਾ ਹੋਨ੍ਤਿ, ਚਰਪੁਰਿਸੇ ਪੇਸੇਤ੍ਵਾ ਵਿਹਾਰੇ ਭਿਕ੍ਖੂਨਂ ਕਥਂ ਪਰਿਗ੍ਗਣ੍ਹਿਤੁਂ ਵਟ੍ਟਤੀਤਿ. ਰਾਜਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ‘‘ਏਥ, ਤੁਮ੍ਹੇ ਵਿਹਾਰਂ ਗਨ੍ਤ੍ਵਾ ਪਟਿਚ੍ਛਨ੍ਨਾ ਹੁਤ੍ਵਾ ਭਦਨ੍ਤਾਨਂ ਕਥਂ ਪਰਿਗ੍ਗਣ੍ਹਥਾ’’ਤਿ ਚਰਪੁਰਿਸੇ ਪਯੋਜੇਸਿ. ਜੇਤਵਨੇਪਿ ਬਹੂ ਰਾਜਪੁਰਿਸਾ ਪਬ੍ਬਜਿਤਾ ਹੋਨ੍ਤਿ. ਤੇਸੁ ਦ੍ਵੇ ਮਹਲ੍ਲਕਤ੍ਥੇਰਾ ਵਿਹਾਰਪਚ੍ਚਨ੍ਤੇ ਪਣ੍ਣਸਾਲਾਯਂ ਵਸਨ੍ਤਿ, ਏਕੋ ਧਨੁਗ੍ਗਹਤਿਸ੍ਸਤ੍ਥੇਰੋ ਨਾਮ, ਏਕੋ ਮਨ੍ਤਿਦਤ੍ਤਤ੍ਥੇਰੋ ਨਾਮ. ਤੇ ਸਬ੍ਬਰਤ੍ਤਿਂ ਸੁਪਿਤ੍ਵਾ ਪਚ੍ਚੂਸਕਾਲੇ ਪਬੁਜ੍ਝਿਂਸੁ.

ਤੇਸੁ ਧਨੁਗ੍ਗਹਤਿਸ੍ਸਤ੍ਥੇਰੋ ਅਗ੍ਗਿਂ ਜਾਲੇਤ੍ਵਾ ਆਹ ‘‘ਭਨ੍ਤੇ, ਮਨ੍ਤਿਦਤ੍ਤਤ੍ਥੇਰਾ’’ਤਿ. ‘‘ਕਿਂ ਭਨ੍ਤੇ’’ਤਿ. ‘‘ਨਿਦ੍ਦਾਯਥ ਤੁਮ੍ਹੇ’’ਤਿ. ‘‘ਨ ਨਿਦ੍ਦਾਯਾਮਿ, ਕਿਂ ਕਾਤਬ੍ਬ’’ਨ੍ਤਿ? ‘‘ਭਨ੍ਤੇ, ਲਾਲਕੋ ਵਤਾਯਂ ਕੋਸਲਰਾਜਾ ਚਾਟਿਮਤ੍ਤਭੋਜਨਮੇਵ ਭੁਞ੍ਜਿਤੁਂ ਜਾਨਾਤੀ’’ਤਿ. ‘‘ਅਥ ਕਿਂ ਭਨ੍ਤੇ’’ਤਿ. ‘‘ਅਤ੍ਤਨੋ ਕੁਚ੍ਛਿਮ੍ਹਿ ਪਾਣਕਮਤ੍ਤੇਨ ਅਜਾਤਸਤ੍ਤੁਨਾ ਪਰਾਜਿਤੋ ਰਾਜਾ’’ਤਿ. ‘‘ਕਿਨ੍ਤਿ ਪਨ ਭਨ੍ਤੇ ਕਾਤੁਂ ਵਟ੍ਟਤੀ’’ਤਿ? ‘‘ਭਨ੍ਤੇ, ਮਨ੍ਤਿਦਤ੍ਤਤ੍ਥੇਰ ਯੁਦ੍ਧਂ ਨਾਮ ਸਕਟਬ੍ਯੂਹਚਕ੍ਕਬ੍ਯੂਹਪਦੁਮਬ੍ਯੂਹਵਸੇਨ ਤਿਵਿਧਂ. ਤੇਸੁ ਭਾਗਿਨੇਯ੍ਯਂ ਅਜਾਤਸਤ੍ਤੁਂ ਗਣ੍ਹਨ੍ਤੇਨ ਸਕਟਬ੍ਯੂਹਂ ਕਤ੍ਵਾ ਗਣ੍ਹਿਤੁਂ ਵਟ੍ਟਤਿ, ਅਸੁਕਸ੍ਮਿਂ ਨਾਮ ਪਬ੍ਬਤਕਣ੍ਣੇ ਦ੍ਵੀਸੁ ਪਸ੍ਸੇਸੁ ਸੂਰਪੁਰਿਸੇ ਠਪੇਤ੍ਵਾ ਪੁਰਤੋ ਬਲਂ ਦਸ੍ਸੇਤ੍ਵਾ ਅਨ੍ਤੋ ਪਵਿਟ੍ਠਭਾਵਂ ਞਤ੍ਵਾ ਨਦਿਤ੍ਵਾ ਵਗ੍ਗਿਤ੍ਵਾ ਕੁਮਿਨੇ ਪਵਿਟ੍ਠਮਚ੍ਛਂ ਵਿਯ ਅਨ੍ਤੋਮੁਟ੍ਠਿਯਂ ਕਤ੍ਵਾਵ ਨਂ ਗਹੇਤੁਂ ਸਕ੍ਕਾ’’ਤਿ.

ਪਯੋਜਿਤਪੁਰਿਸਾ ਤਂ ਕਥਂ ਸੁਤ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ਮਹਤਿਯਾ ਸੇਨਾਯ ਗਨ੍ਤ੍ਵਾ ਤਥਾ ਕਤ੍ਵਾ ਅਜਾਤਸਤ੍ਤੁਂ ਗਹੇਤ੍ਵਾ ਸਙ੍ਖਲਿਕਬਨ੍ਧਨੇਨ ਬਨ੍ਧਿਤ੍ਵਾ ਕਤਿਪਾਹਂ ਨਿਮ੍ਮਦਂ ਕਤ੍ਵਾ ‘‘ਪੁਨ ਏਵਰੂਪਂ ਮਾ ਕਰੀ’’ਤਿ ਅਸ੍ਸਾਸੇਤ੍ਵਾ ਮੋਚੇਤ੍ਵਾ ਧੀਤਰਂ ਵਜਿਰਕੁਮਾਰਿਂ ਨਾਮ ਤਸ੍ਸ ਦਤ੍ਵਾ ਮਹਨ੍ਤੇਨ ਪਰਿਵਾਰੇਨ ਵਿਸ੍ਸਜ੍ਜੇਸਿ. ‘‘ਕੋਸਲਰਞ੍ਞਾ ਧਨੁਗ੍ਗਹਤਿਸ੍ਸਤ੍ਥੇਰਸ੍ਸ ਸਂਵਿਧਾਨੇਨ ਅਜਾਤਸਤ੍ਤੁ ਗਹਿਤੋ’’ਤਿ ਭਿਕ੍ਖੂਨਂ ਅਨ੍ਤਰੇ ਕਥਾ ਸਮੁਟ੍ਠਹਿ, ਧਮ੍ਮਸਭਾਯਮ੍ਪਿ ਤਮੇਵ ਕਥਂ ਸਮੁਟ੍ਠਾਪੇਸੁਂ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਧਨੁਗ੍ਗਹਤਿਸ੍ਸੋ ਯੁਦ੍ਧਸਂਵਿਧਾਨੇ ਛੇਕੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਨਗਰਸ੍ਸ ਦ੍ਵਾਰਗਾਮਵਾਸੀ ਏਕੋ ਵਡ੍ਢਕੀ ਦਾਰੁਅਤ੍ਥਾਯ ਅਰਞ੍ਞਂ ਗਨ੍ਤ੍ਵਾ ਆਵਾਟੇ ਪਤਿਤਂ ਏਕਂ ਸੂਕਰਪੋਤਕਂ ਦਿਸ੍ਵਾ ਆਨੇਤ੍ਵਾ ‘‘ਤਚ੍ਛਸੂਕਰੋ’’ਤਿਸ੍ਸ ਨਾਮਂ ਕਤ੍ਵਾ ਪੋਸੇਸਿ. ਸੋ ਤਸ੍ਸ ਉਪਕਾਰਕੋ ਅਹੋਸਿ. ਤੁਣ੍ਡੇਨ ਰੁਕ੍ਖੇ ਪਰਿਵਤ੍ਤੇਤ੍ਵਾ ਦੇਤਿ, ਦਾਠਾਯ ਵੇਠੇਤ੍ਵਾ ਕਾਲ਼ਸੁਤ੍ਤਂ ਕਡ੍ਢਤਿ, ਮੁਖੇਨ ਡਂਸਿਤ੍ਵਾ ਵਾਸਿਨਿਖਾਦਨਮੁਗ੍ਗਰੇ ਆਹਰਤਿ. ਸੋ ਵੁਡ੍ਢਿਪ੍ਪਤ੍ਤੋ ਮਹਾਬਲੋ ਮਹਾਸਰੀਰੋ ਅਹੋਸਿ. ਅਥ ਵਡ੍ਢਕੀ ਤਸ੍ਮਿਂ ਪੁਤ੍ਤਪੇਮਂ ਪਚ੍ਚੁਪਟ੍ਠਾਪੇਤ੍ਵਾ ‘‘ਇਮਂ ਇਧ ਵਸਨ੍ਤਂ ਕੋਚਿਦੇਵ ਹਿਂਸੇਯ੍ਯਾ’’ਤਿ ਅਰਞ੍ਞੇ ਵਿਸ੍ਸਜ੍ਜੇਸਿ. ਸੋ ਚਿਨ੍ਤੇਸਿ ‘‘ਅਹਂ ਇਮਸ੍ਮਿਂ ਅਰਞ੍ਞੇ ਏਕਕੋਵ ਵਸਿਤੁਂ ਨ ਸਕ੍ਖਿਸ੍ਸਾਮਿ, ਞਾਤਕੇ ਪਰਿਯੇਸਿਤ੍ਵਾ ਤੇਹਿ ਪਰਿਵੁਤੋ ਵਸਿਸ੍ਸਾਮੀ’’ਤਿ. ਸੋ ਵਨਘਟਾਯ ਸੂਕਰੇ ਪਰਿਯੇਸਨ੍ਤੋ ਬਹੂ ਸੂਕਰੇ ਦਿਸ੍ਵਾ ਤੁਸ੍ਸਿਤ੍ਵਾ ਤਿਸ੍ਸੋ ਗਾਥਾ ਅਭਾਸਿ –

੧੬੦.

‘‘ਯਦੇਸਮਾਨਾ ਵਿਚਰਿਮ੍ਹ, ਪਬ੍ਬਤਾਨਿ ਵਨਾਨਿ ਚ;

ਅਨ੍ਵੇਸਂ ਵਿਚਰਿਂ ਞਾਤੀ, ਤੇਮੇ ਅਧਿਗਤਾ ਮਯਾ.

੧੬੧.

‘‘ਬਹੁਞ੍ਚਿਦਂ ਮੂਲਫਲਂ, ਭਕ੍ਖੋ ਚਾਯਂ ਅਨਪ੍ਪਕੋ;

ਰਮ੍ਮਾ ਚਿਮਾ ਗਿਰੀਨਜ੍ਜੋ, ਫਾਸੁਵਾਸੋ ਭਵਿਸ੍ਸਤਿ.

੧੬੨.

‘‘ਇਧੇਵਾਹਂ ਵਸਿਸ੍ਸਾਮਿ, ਸਹ ਸਬ੍ਬੇਹਿ ਞਾਤਿਭਿ;

ਅਪ੍ਪੋਸ੍ਸੁਕ੍ਕੋ ਨਿਰਾਸਙ੍ਕੀ, ਅਸੋਕੋ ਅਕੁਤੋਭਯੋ’’ਤਿ.

ਤਤ੍ਥ ਯਦੇਸਮਾਨਾਤਿ ਯਂ ਞਾਤਿਗਣਂ ਪਰਿਯੇਸਨ੍ਤਾ ਮਯਂ ਵਿਚਰਿਮ੍ਹ. ਅਨ੍ਵੇਸਨ੍ਤਿ ਚਿਰਂ ਵਤ ਅਨ੍ਵੇਸਨ੍ਤੋ ਵਿਚਰਿਂ. ਤੇਮੇਤਿ ਤੇ ਇਮੇ. ਭਕ੍ਖੋਤਿ ਸ੍ਵੇਵ ਵਨਮੂਲਫਲਸਙ੍ਖਾਤੋ ਭਕ੍ਖੋ. ਅਪ੍ਪੋਸ੍ਸੁਕ੍ਕੋਤਿ ਅਨੁਸ੍ਸੁਕ੍ਕੋ ਹੁਤ੍ਵਾ.

ਸੂਕਰਾ ਤਸ੍ਸ ਵਚਨਂ ਸੁਤ੍ਵਾ ਚਤੁਤ੍ਥਂ ਗਾਥਮਾਹਂਸੁ –

੧੬੩.

‘‘ਅਞ੍ਞਮ੍ਪਿ ਲੇਣਂ ਪਰਿਯੇਸ, ਸਤ੍ਤੁ ਨੋ ਇਧ ਵਿਜ੍ਜਤਿ;

ਸੋ ਤਚ੍ਛ ਸੂਕਰੇ ਹਨ੍ਤਿ, ਇਧਾਗਨ੍ਤ੍ਵਾ ਵਰਂ ਵਰ’’ਨ੍ਤਿ.

ਤਤ੍ਥ ਤਚ੍ਛਾਤਿ ਤਂ ਨਾਮੇਨਾਲਪਨ੍ਤਿ. ਵਰਂ ਵਰਨ੍ਤਿ ਸੂਕਰੇ ਹਨਨ੍ਤੋ ਥੂਲਮਂਸਂ ਵਰਂ ਵਰਞ੍ਞੇਵ ਹਨਤਿ.

ਇਤੋ ਪਰਂ ਉਤ੍ਤਾਨਸਮ੍ਬਨ੍ਧਗਾਥਾ ਪਾਲ਼ਿਨਯੇਨ ਵੇਦਿਤਬ੍ਬਾ –

੧੬੪.

‘‘ਕੋ ਨੁਮ੍ਹਾਕਂ ਇਧ ਸਤ੍ਤੁ, ਕੋ ਞਾਤੀ ਸੁਸਮਾਗਤੇ;

ਦੁਪ੍ਪਧਂਸੇ ਪਧਂਸੇਤਿ, ਤਂ ਮੇ ਅਕ੍ਖਾਥ ਪੁਚ੍ਛਿਤਾ.

੧੬੫.

‘‘ਉਦ੍ਧਗ੍ਗਰਾਜੀ ਮਿਗਰਾਜਾ, ਬਲੀ ਦਾਠਾਵੁਧੋ ਮਿਗੋ;

ਸੋ ਤਚ੍ਛ ਸੂਕਰੇ ਹਨ੍ਤਿ, ਇਧਾਗਨ੍ਤ੍ਵਾ ਵਰਂ ਵਰਂ.

੧੬੬.

‘‘ਨ ਨੋ ਦਾਠਾ ਨ ਵਿਜ੍ਜਨ੍ਤਿ, ਬਲਂ ਕਾਯੇ ਸਮੋਹਿਤਂ;

ਸਬ੍ਬੇ ਸਮਗ੍ਗਾ ਹੁਤ੍ਵਾਨ, ਵਸਂ ਕਾਹਾਮ ਏਕਕਂ.

੧੬੭.

‘‘ਹਦਯਙ੍ਗਮਂ ਕਣ੍ਣਸੁਖਂ, ਵਾਚਂ ਭਾਸਸਿ ਤਚ੍ਛਕ;

ਯੋਪਿ ਯੁਦ੍ਧੇ ਪਲਾਯੇਯ੍ਯ, ਤਮ੍ਪਿ ਪਚ੍ਛਾ ਹਨਾਮਸੇ’’ਤਿ.

ਤਤ੍ਥ ਕੋ ਨੁਮ੍ਹਾਕਨ੍ਤਿ ਅਹਂ ਤੁਮ੍ਹੇ ਦਿਸ੍ਵਾਵ ‘‘ਇਮੇ ਸੂਕਰਾ ਅਪ੍ਪਮਂਸਲੋਹਿਤਾ, ਭਯੇਨ ਨੇਸਂ ਭਵਿਤਬ੍ਬ’’ਨ੍ਤਿ ਚਿਨ੍ਤੇਸਿਂ, ਤਸ੍ਮਾ ਮੇ ਆਚਿਕ੍ਖਥ, ਕੋ ਨੁ ਅਮ੍ਹਾਕਂ ਇਧ ਸਤ੍ਤੁ. ਉਦ੍ਧਗ੍ਗਰਾਜੀਤਿ ਉਦ੍ਧਗ੍ਗਾਹਿ ਸਰੀਰਰਾਜੀਹਿ ਸਮਨ੍ਨਾਗਤੋ. ਬ੍ਯਗ੍ਘਂ ਸਨ੍ਧਾਯੇਵਮਾਹਂਸੁ. ਯੋਪੀਤਿ ਯੋ ਅਮ੍ਹਾਕਂ ਅਨ੍ਤਰੇ ਏਕੋਪਿ ਪਲਾਯਿਸ੍ਸਤਿ, ਤਮ੍ਪਿ ਮਯਂ ਪਚ੍ਛਾ ਹਨਿਸ੍ਸਾਮਾਤਿ.

ਤਚ੍ਛਸੂਕਰੋ ਸਬ੍ਬੇ ਸੂਕਰੇ ਏਕਚਿਤ੍ਤੇ ਕਤ੍ਵਾ ਪੁਚ੍ਛਿ ‘‘ਕਾਯ ਵੇਲਾਯ ਬ੍ਯਗ੍ਘੋ ਆਗਮਿਸ੍ਸਤੀ’’ਤਿ. ਅਜ੍ਜ ਪਾਤੋਵ ਏਕਂ ਗਹੇਤ੍ਵਾ ਗਤੋ, ਸ੍ਵੇ ਪਾਤੋਵ ਆਗਮਿਸ੍ਸਤੀਤਿ. ਸੋ ਯੁਦ੍ਧਕੁਸਲੋ ‘‘ਇਮਸ੍ਮਿਂ ਠਾਨੇ ਠਿਤੇਨ ਸਕ੍ਕਾ ਜੇਤੁ’’ਨ੍ਤਿ ਭੂਮਿਸੀਸਂ ਪਜਾਨਾਤਿ, ਤਸ੍ਮਾ ਏਕਂ ਪਦੇਸਂ ਸਲ੍ਲਕ੍ਖੇਤ੍ਵਾ ਰਤ੍ਤਿਮੇਵ ਸੂਕਰੇ ਗੋਚਰਂ ਗਾਹਾਪੇਤ੍ਵਾ ਬਲਵਪਚ੍ਚੂਸਤੋ ਪਟ੍ਠਾਯ ‘‘ਯੁਦ੍ਧਂ ਨਾਮ ਸਕਟਬ੍ਯੂਹਾਦਿਵਸੇਨ ਤਿਵਿਧਂ ਹੋਤੀ’’ਤਿ ਵਤ੍ਵਾ ਪਦੁਮਬ੍ਯੂਹਂ ਸਂਵਿਦਹਤਿ. ਮਜ੍ਝੇ ਠਾਨੇ ਖੀਰਪਿਵਕੇ ਸੂਕਰਪੋਤਕੇ ਠਪੇਸਿ. ਤੇ ਪਰਿਵਾਰੇਤ੍ਵਾ ਤੇਸਂ ਮਾਤਰੋ, ਤਾ ਪਰਿਵਾਰੇਤ੍ਵਾ ਵਞ੍ਝਾ ਸੂਕਰਿਯੋ, ਤਾਸਂ ਅਨਨ੍ਤਰਾ ਸੂਕਰਪੋਤਕੇ, ਤੇਸਂ ਅਨਨ੍ਤਰਾ ਮਕੁਲਦਾਠੇ ਤਰੁਣਸੂਕਰੇ, ਤੇਸਂ ਅਨਨ੍ਤਰਾ ਮਹਾਦਾਠੇ, ਤੇਸਂ ਅਨਨ੍ਤਰਾ ਜਿਣ੍ਣਸੂਕਰੇ, ਤਤੋ ਤਤ੍ਥ ਤਤ੍ਥ ਦਸਵਗ੍ਗਂ ਵੀਸਤਿਵਗ੍ਗਂ ਤਿਂਸਵਗ੍ਗਞ੍ਚ ਕਤ੍ਵਾ ਬਲਗੁਮ੍ਬਂ ਠਪੇਸਿ. ਅਤ੍ਤਨੋ ਅਤ੍ਥਾਯ ਏਕਂ ਆਵਾਟਂ, ਬ੍ਯਗ੍ਘਸ੍ਸ ਪਤਨਤ੍ਥਾਯ ਏਕਂ ਸੁਪ੍ਪਸਣ੍ਠਾਨਂ ਪਬ੍ਭਾਰਂ ਕਤ੍ਵਾ ਖਣਾਪੇਸਿ. ਦ੍ਵਿਨ੍ਨਂ ਆਵਾਟਾਨਂ ਅਨ੍ਤਰੇ ਅਤ੍ਤਨੋ ਵਸਨਤ੍ਥਾਯ ਪੀਠਕਂ ਕਾਰੇਸਿ. ਸੋ ਥਾਮਸਮ੍ਪਨ੍ਨੇ ਯੋਧਸੂਕਰੇ ਗਹੇਤ੍ਵਾ ਤਸ੍ਮਿਂ ਤਸ੍ਮਿਂ ਠਾਨੇ ਸੂਕਰੇ ਅਸ੍ਸਾਸੇਨ੍ਤੋ ਵਿਚਰਿ. ਤਸ੍ਸੇਵਂ ਕਰੋਨ੍ਤਸ੍ਸੇਵ ਸੂਰਿਯੋ ਉਗ੍ਗਚ੍ਛਤਿ.

ਅਥ ਬ੍ਯਗ੍ਘਰਾਜਾ ਕੂਟਜਟਿਲਸ੍ਸ ਅਸ੍ਸਮਪਦਾ ਨਿਕ੍ਖਮਿਤ੍ਵਾ ਪਬ੍ਬਤਤਲੇ ਅਟ੍ਠਾਸਿ. ਤਂ ਦਿਸ੍ਵਾ ਸੂਕਰਾ ‘‘ਆਗਤੋ ਨੋ ਭਨ੍ਤੇ ਵੇਰੀ’’ਤਿ ਵਦਿਂਸੁ. ਮਾ ਭਾਯਥ, ਯਂ ਯਂ ਏਸ ਕਰੋਤਿ, ਤਂ ਸਬ੍ਬਂ ਸਰਿਕ੍ਖਾ ਹੁਤ੍ਵਾ ਕਰੋਥਾਤਿ. ਬ੍ਯਗ੍ਘੋ ਸਰੀਰਂ ਵਿਧੁਨਿਤ੍ਵਾ ਓਸਕ੍ਕਨ੍ਤੋ ਵਿਯ ਪਸ੍ਸਾਵਮਕਾਸਿ, ਸੂਕਰਾਪਿ ਤਥੇਵ ਕਰਿਂਸੁ. ਬ੍ਯਗ੍ਘੋ ਸੂਕਰੇ ਓਲੋਕੇਤ੍ਵਾ ਮਹਾਨਦਂ ਨਦਿ, ਤੇਪਿ ਤਥੇਵ ਕਰਿਂਸੁ. ਸੋ ਤੇਸਂ ਕਿਰਿਯਂ ਦਿਸ੍ਵਾ ਚਿਨ੍ਤੇਸਿ ‘‘ਨ ਇਮੇ ਪੁਬ੍ਬਸਦਿਸਾ, ਅਜ੍ਜ ਮਯ੍ਹਂ ਪਟਿਸਤ੍ਤੁਨੋ ਹੁਤ੍ਵਾ ਵਗ੍ਗਵਗ੍ਗਾ ਠਿਤਾ, ਸਂਵਿਦਹਕੋ ਨੇਸਂ ਸੇਨਾਨਾਯਕੋਪਿ ਅਤ੍ਥਿ, ਅਜ੍ਜ ਮਯਾ ਏਤੇਸਂ ਸਨ੍ਤਿਕਂ ਗਨ੍ਤੁਂ ਨ ਵਟ੍ਟਤੀ’’ਤਿ ਮਰਣਭਯਤਜ੍ਜਿਤੋ ਨਿਵਤ੍ਤਿਤ੍ਵਾ ਕੂਟਜਟਿਲਸ੍ਸ ਸਨ੍ਤਿਕਂ ਗਤੋ. ਅਥ ਨਂ ਸੋ ਤੁਚ੍ਛਹਤ੍ਥਂ ਦਿਸ੍ਵਾ ਨਵਮਂ ਗਾਥਮਾਹ –

੧੬੮.

‘‘ਪਾਣਾਤਿਪਾਤਾ ਵਿਰਤੋ ਨੁ ਅਜ੍ਜ, ਅਭਯਂ ਨੁ ਤੇ ਸਬ੍ਬਭੂਤੇਸੁ ਦਿਨ੍ਨਂ;

ਦਾਠਾ ਨੁ ਤੇ ਮਿਗਵਧਾਯ ਨ ਸਨ੍ਤਿ, ਯੋ ਸਙ੍ਘਪਤ੍ਤੋ ਕਪਣੋਵ ਝਾਯਸੀ’’ਤਿ.

ਤਤ੍ਥ ਸਙ੍ਘਪਤ੍ਤੋਤਿ ਯੋ ਤ੍ਵਂ ਸੂਕਰਸਙ੍ਘਪਤ੍ਤੋ ਹੁਤ੍ਵਾ ਕਿਞ੍ਚਿ ਗੋਚਰਂ ਅਲਭਿਤ੍ਵਾ ਕਪਣੋ ਵਿਯ ਝਾਯਸੀਤਿ.

ਅਥ ਬ੍ਯਗ੍ਘੋ ਤਿਸ੍ਸੋ ਗਾਥਾ ਅਭਾਸਿ –

੧੬੯.

‘‘ਨ ਮੇ ਦਾਠਾ ਨ ਵਿਜ੍ਜਨ੍ਤਿ, ਬਲਂ ਕਾਯੇ ਸਮੋਹਿਤਂ;

ਞਾਤੀ ਚ ਦਿਸ੍ਵਾਨ ਸਾਮਗ੍ਗੀ ਏਕਤੋ, ਤਸ੍ਮਾ ਚ ਝਾਯਾਮਿ ਵਨਮ੍ਹਿ ਏਕਕੋ.

੧੭੦.

‘‘ਇਮਸ੍ਸੁਦਂ ਯਨ੍ਤਿ ਦਿਸੋਦਿਸਂ ਪੁਰੇ, ਭਯਟ੍ਟਿਤਾ ਲੇਣਗਵੇਸਿਨੋ ਪੁਥੁ;

ਤੇ ਦਾਨਿ ਸਙ੍ਗਮ੍ਮ ਵਸਨ੍ਤਿ ਏਕਤੋ, ਯਤ੍ਥਟ੍ਠਿਤਾ ਦੁਪ੍ਪਸਹਜ੍ਜ ਤੇ ਮਯਾ.

੧੭੧.

‘‘ਪਰਿਣਾਯਕਸਮ੍ਪਨ੍ਨਾ, ਸਹਿਤਾ ਏਕਵਾਦਿਨੋ;

ਤੇ ਮਂ ਸਮਗ੍ਗਾ ਹਿਂਸੇਯ੍ਯੁਂ, ਤਸ੍ਮਾ ਨੇਸਂ ਨ ਪਤ੍ਥਯੇ’’ਤਿ.

ਤਤ੍ਥ ਸਾਮਗ੍ਗੀ ਏਕਤੋਤਿ ਸਹਿਤਾ ਹੁਤ੍ਵਾ ਏਕਤੋ ਠਿਤੇ. ਇਮਸ੍ਸੁਦਨ੍ਤਿ ਇਮੇ ਸੁਦਂ ਮਯਾ ਅਕ੍ਖੀਨਿ ਉਮ੍ਮੀਲੇਤ੍ਵਾ ਓਲੋਕਿਤਮਤ੍ਤਾਵ ਪੁਬ੍ਬੇ ਦਿਸੋਦਿਸਂ ਗਚ੍ਛਨ੍ਤਿ. ਪੁਥੂਤਿ ਵਿਸੁਂ ਵਿਸੁਂ. ਯਤ੍ਥਟ੍ਠਿਤਾਤਿ ਯਸ੍ਮਿਂ ਭੂਮਿਭਾਗੇ ਠਿਤਾ. ਪਰਿਣਾਯਕਸਮ੍ਪਨ੍ਨਾਤਿ ਸੇਨਾਨਾਯਕੇਨ ਸਮ੍ਪਨ੍ਨਾ. ਤਸ੍ਮਾ ਨੇਸਂ ਨ ਪਤ੍ਥਯੇਤਿ ਤੇਨ ਕਾਰਣੇਨ ਏਤੇਸਂ ਨ ਪਤ੍ਥੇਮਿ.

ਤਂ ਸੁਤ੍ਵਾ ਕੂਟਜਟਿਲੋ ਤਸ੍ਸ ਉਸ੍ਸਾਹਂ ਜਨਯਨ੍ਤੋ ਗਾਥਮਾਹ –

੧੭੨.

‘‘ਏਕੋਵ ਇਨ੍ਦੋ ਅਸੁਰੇ ਜਿਨਾਤਿ, ਏਕੋਵ ਸੇਨੋ ਹਨ੍ਤਿ ਦਿਜੇ ਪਸਯ੍ਹ;

ਏਕੋਵ ਬ੍ਯਗ੍ਘੋ ਮਿਗਸਙ੍ਘਪਤ੍ਤੋ, ਵਰਂ ਵਰਂ ਹਨ੍ਤਿ ਬਲਞ੍ਹਿ ਤਾਦਿਸ’’ਨ੍ਤਿ.

ਤਤ੍ਥ ਮਿਗਸਙ੍ਘਪਤ੍ਤੋਤਿ ਮਿਗਗਣਪਤ੍ਤੋ ਹੁਤ੍ਵਾ ਵਰਂ ਵਰਂ ਮਿਗਂ ਹਨ੍ਤਿ. ਬਲਞ੍ਹਿ ਤਾਦਿਸਨ੍ਤਿ ਤਾਦਿਸਞ੍ਹਿ ਤਸ੍ਸ ਬਲਂ.

ਅਥ ਬ੍ਯਗ੍ਘੋ ਗਾਥਮਾਹ –

੧੭੩.

‘‘ਨ ਹੇਵ ਇਨ੍ਦੋ ਨ ਸੇਨੋ, ਨਪਿ ਬ੍ਯਗ੍ਘੋ ਮਿਗਾਧਿਪੋ;

ਸਮਗ੍ਗੇ ਸਹਿਤੇ ਞਾਤੀ, ਨ ਬ੍ਯਗ੍ਘੇ ਕੁਰੁਤੇ ਵਸੇ’’ਤਿ.

ਤਤ੍ਥ ਬ੍ਯਗ੍ਘੇਤਿ ਬ੍ਯਗ੍ਘਸਦਿਸੇ ਹੁਤ੍ਵਾ ਸਰੀਰਵਿਧੂਨਨਾਦੀਨਿ ਕਤ੍ਵਾ ਠਿਤੇ ਵਸੇ ਨ ਕੁਰੁਤੇ, ਅਤ੍ਤਨੋ ਵਸੇ ਵਤ੍ਤਾਪੇਤੁਂ ਨ ਸਕ੍ਕੋਤੀਤਿ ਅਤ੍ਥੋ.

ਪੁਨ ਜਟਿਲੋ ਤਂ ਉਸ੍ਸਾਹੇਨ੍ਤੋ ਦ੍ਵੇ ਗਾਥਾ ਅਭਾਸਿ –

੧੭੪.

‘‘ਕੁਮ੍ਭੀਲਕਾ ਸਕੁਣਕਾ, ਸਙ੍ਘਿਨੋ ਗਣਚਾਰਿਨੋ;

ਸਮ੍ਮੋਦਮਾਨਾ ਏਕਜ੍ਝਂ, ਉਪ੍ਪਤਨ੍ਤਿ ਡਯਨ੍ਤਿ ਚ.

੧੭੫.

‘‘ਤੇਸਞ੍ਚ ਡਯਮਾਨਾਨਂ, ਏਕੇਤ੍ਥ ਅਪਸਕ੍ਕਤਿ;

ਤਞ੍ਚ ਸੇਨੋ ਨਿਤਾਲ਼ੇਤਿ, ਵੇਯ੍ਯਗ੍ਘਿਯੇਵ ਸਾ ਗਤੀ’’ਤਿ.

ਤਤ੍ਥ ਕੁਮ੍ਭੀਲਕਾਤਿ ਏਵਂਨਾਮਕਾ ਖੁਦ੍ਦਕਸਕੁਣਾ. ਉਪ੍ਪਤਨ੍ਤੀਤਿ ਗੋਚਰਂ ਚਰਨ੍ਤਾ ਉਪ੍ਪਤਨ੍ਤਿ. ਡਯਨ੍ਤਿ ਚਾਤਿ ਗੋਚਰਂ ਗਹੇਤ੍ਵਾ ਆਕਾਸੇਨ ਗਚ੍ਛਨ੍ਤਿ. ਏਕੇਤ੍ਥ ਅਪਸਕ੍ਕਤੀਤਿ ਏਕੋ ਏਤੇਸੁ ਓਸਕ੍ਕਿਤ੍ਵਾ ਵਾ ਏਕਪਸ੍ਸੇਨ ਵਾ ਵਿਸੁਂ ਗਚ੍ਛਤਿ. ਨਿਤਾਲ਼ੇਤੀਤਿ ਪਹਰਿਤ੍ਵਾ ਗਣ੍ਹਾਤਿ. ਵੇਯ੍ਯਗ੍ਘਿਯੇਵ ਸਾ ਗਤੀਤਿ ਬ੍ਯਗ੍ਘਾਨਂ ਏਸਾਤਿ ਵੇਯ੍ਯਗ੍ਘਿ, ਸਮਗ੍ਗਾਨਂ ਗਚ੍ਛਨ੍ਤਾਨਮ੍ਪਿ ਏਸਾ ਏਵਰੂਪਾ ਗਤਿ ਬ੍ਯਗ੍ਘਾਨਂ ਗਤਿਯੇਵ ਨਾਮ ਹੋਤਿ. ਨ ਹਿ ਸਕ੍ਕਾ ਸਬ੍ਬੇਹਿ ਏਕਤੋਵ ਗਨ੍ਤੁਂ, ਤਸ੍ਮਾ ਯੋ ਏਵਂ ਤਤ੍ਥ ਏਕੋ ਗਚ੍ਛਤਿ, ਤਂ ਗਣ੍ਹਾਤਿ.

ਏਵਞ੍ਚ ਪਨ ਵਤ੍ਵਾ ‘‘ਬ੍ਯਗ੍ਘਰਾਜ ਤ੍ਵਂ ਅਤ੍ਤਨੋ ਬਲਂ ਨ ਜਾਨਾਸਿ, ਮਾ ਭਾਯਿ, ਕੇਵਲਂ ਤ੍ਵਂ ਨਦਿਤ੍ਵਾ ਪਕ੍ਖਨ੍ਦ, ਦ੍ਵੇ ਏਕਤੋ ਗਚ੍ਛਨ੍ਤਾ ਨਾਮ ਨ ਭਵਿਸ੍ਸਨ੍ਤੀ’’ਤਿ ਉਸ੍ਸਾਹੇਸਿ. ਸੋ ਤਥਾ ਅਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੭੬.

‘‘ਉਸ੍ਸਾਹਿਤੋ ਜਟਿਲੇਨ, ਲੁਦ੍ਦੇਨਾਮਿਸਚਕ੍ਖੁਨਾ;

ਦਾਠੀ ਦਾਠੀਸੁ ਪਕ੍ਖਨ੍ਤਿ, ਮਞ੍ਞਮਾਨੋ ਯਥਾ ਪੁਰੇ’’ਤਿ.

ਤਤ੍ਥ ਦਾਠੀਤਿ ਸਯਂ ਦਾਠਾਵੁਧੋ ਇਤਰੇਸੁ ਦਾਠਾਵੁਧੇਸੁ ਪਕ੍ਖਨ੍ਦਿ. ਯਥਾ ਪੁਰੇਤਿ ਯਥਾ ਪੁਬ੍ਬੇ ਮਞ੍ਞਤਿ, ਤਥੇਵ ਮਞ੍ਞਮਾਨੋ.

ਸੋ ਕਿਰ ਗਨ੍ਤ੍ਵਾ ਪਬ੍ਬਤਤਲੇ ਤਾਵ ਅਟ੍ਠਾਸਿ. ਸੂਕਰਾ ‘‘ਪੁਨਾਗਤੋ ਸਾਮਿ, ਚੋਰੋ’’ਤਿ ਤਚ੍ਛਸ੍ਸ ਆਰੋਚੇਸੁਂ. ਸੋ ‘‘ਮਾ ਭਾਯਥਾ’’ਤਿ ਤੇ ਅਸ੍ਸਾਸੇਤ੍ਵਾ ਉਟ੍ਠਾਯ ਦ੍ਵਿਨ੍ਨਂ ਆਵਾਟਾਨਂ ਅਨ੍ਤਰੇ ਪੀਠਕਾਯ ਅਟ੍ਠਾਸਿ. ਬ੍ਯਗ੍ਘੋ ਵੇਗਂ ਜਨੇਤ੍ਵਾ ਤਚ੍ਛਸੂਕਰਂ ਸਨ੍ਧਾਯ ਪਕ੍ਖਨ੍ਦਿ. ਤਚ੍ਛਸੂਕਰੋ ਪਰਿਵਤ੍ਤਿਤ੍ਵਾ ਪਚ੍ਛਾਮੁਖੋ ਪੁਰਿਮਆਵਾਟੇ ਪਤਿ. ਬ੍ਯਗ੍ਘੋ ਚ ਵੇਗਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ ਗਨ੍ਤ੍ਵਾ ਸੁਪ੍ਪਪਬ੍ਭਾਰੇ ਆਵਾਟੇ ਪਤਿਤ੍ਵਾ ਪੁਞ੍ਜਕਿਤੋਵ ਅਟ੍ਠਾਸਿ. ਤਚ੍ਛਸੂਕਰੋ ਵੇਗੇਨ ਉਟ੍ਠਾਯ ਤਸ੍ਸ ਅਨ੍ਤਰਸਤ੍ਥਿਮ੍ਹਿ ਦਾਠਂ ਓਤਾਰੇਤ੍ਵਾ ਯਾਵ ਹਦਯਾ ਫਾਲੇਤ੍ਵਾ ਮਂਸਂ ਖਾਦਿਤ੍ਵਾ ਮੁਖੇਨ ਡਂਸਿਤ੍ਵਾ ਬਹਿਆਵਾਟੇ ਪਾਤੇਤ੍ਵਾ ‘‘ਗਣ੍ਹਥਿਮਂ ਦਾਸ’’ਨ੍ਤਿ ਆਹ. ਪਠਮਾਗਤਾ ਏਕਵਾਰਮੇਵ ਤੁਣ੍ਡੋਤਾਰਣਮਤ੍ਤਂ ਲਭਿਂਸੁ, ਪਚ੍ਛਾ ਆਗਤਾ ਅਲਭਿਤ੍ਵਾ ‘‘ਬ੍ਯਗ੍ਘਮਂਸਂ ਨਾਮ ਕੀਦਿਸ’’ਨ੍ਤਿ ਵਦਿਂਸੁ. ਤਚ੍ਛਸੂਕਰੋ ਆਵਾਟਾ ਉਤ੍ਤਰਿਤ੍ਵਾ ਸੂਕਰੇ ਓਲੋਕੇਤ੍ਵਾ ‘‘ਕਿਂ ਨੁ ਖੋ ਨ ਤੁਸ੍ਸਥਾ’’ਤਿ ਆਹ. ‘‘ਸਾਮਿ, ਏਕੋ ਤਾਵ ਬ੍ਯਗ੍ਘੋ ਗਹਿਤੋ, ਅਞ੍ਞੋ ਪਨੇਕੋ ਦਸਬ੍ਯਗ੍ਘਗ੍ਘਨਕੋ ਅਤ੍ਥੀ’’ਤਿ? ‘‘ਕੋ ਨਾਮੇਸੋ’’ਤਿ? ‘‘ਬ੍ਯਗ੍ਘੇਨ ਆਭਤਾਭਤਮਂਸਂ ਖਾਦਕੋ ਕੂਟਜਟਿਲੋ’’ਤਿ. ‘‘ਤੇਨ ਹਿ ਏਥ, ਗਣ੍ਹਿਸ੍ਸਾਮ ਨ’’ਨ੍ਤਿ ਤੇਹਿ ਸਦ੍ਧਿਂ ਵੇਗੇਨ ਪਕ੍ਖਨ੍ਦਿ.

ਜਟਿਲੋ ‘‘ਬ੍ਯਗ੍ਘੋ ਚਿਰਾਯਤੀ’’ਤਿ ਤਸ੍ਸ ਆਗਮਨਮਗ੍ਗਂ ਓਲੋਕੇਨ੍ਤੋ ਬਹੂ ਸੂਕਰੇ ਆਗਚ੍ਛਨ੍ਤੇ ਦਿਸ੍ਵਾ ‘‘ਇਮੇ ਬ੍ਯਗ੍ਘਂ ਮਾਰੇਤ੍ਵਾ ਮਮ ਮਾਰਣਤ੍ਥਾਯ ਆਗਚ੍ਛਨ੍ਤਿ ਮਞ੍ਞੇ’’ਤਿ ਪਲਾਯਿਤ੍ਵਾ ਏਕਂ ਉਦੁਮ੍ਬਰਰੁਕ੍ਖਂ ਅਭਿਰੁਹਿ. ਸੂਕਰਾ ‘‘ਏਸ ਰੁਕ੍ਖਂ ਆਰੁਲ਼੍ਹੋ’’ਤਿ ਵਦਿਂਸੁ. ‘‘ਕਿਂ ਰੁਕ੍ਖ’’ਨ੍ਤਿ. ‘‘ਉਦੁਮ੍ਬਰਰੁਕ੍ਖ’’ਨ੍ਤਿ. ‘‘ਤੇਨ ਹਿ ਮਾ ਚਿਨ੍ਤਯਿਤ੍ਥ, ਇਦਾਨਿ ਨਂ ਗਣ੍ਹਿਸ੍ਸਾਮਾ’’ਤਿ ਤਰੁਣਸੂਕਰੇ ਪਕ੍ਕੋਸਿਤ੍ਵਾ ਰੁਕ੍ਖਮੂਲਤਾ ਪਂਸੁਂ ਅਪਬ੍ਯੂਹਾਪੇਸਿ, ਸੂਕਰੀਹਿ ਮੁਖਪੂਰਂ ਉਦਕਂ ਆਹਰਾਪੇਸਿ, ਮਹਾਦਾਠਸੂਕਰੇਹਿ ਸਮਨ੍ਤਾ ਮੂਲਾਨਿ ਛਿਨ੍ਦਾਪੇਸਿ. ਏਕਂ ਉਜੁਕਂ ਓਤਿਣ੍ਣਮੂਲਮੇਵ ਅਟ੍ਠਾਸਿ. ਤਤੋ ਸੇਸਸੂਕਰੇ ‘‘ਤੁਮ੍ਹੇ ਅਪੇਥਾ’’ਤਿ ਉਸ੍ਸਾਰੇਤ੍ਵਾ ਜਣ੍ਣੁਕੇਹਿ ਪਤਿਟ੍ਠਹਿਤ੍ਵਾ ਦਾਠਾਯ ਮੂਲਂ ਪਹਰਿ, ਫਰਸੁਨਾ ਪਹਟਂ ਵਿਯ ਛਿਜ੍ਜਿਤ੍ਵਾ ਗਤਂ. ਰੁਕ੍ਖੋ ਪਰਿਵਤ੍ਤਿਤ੍ਵਾ ਪਤਿ. ਤਂ ਕੂਟਜਟਿਲਂ ਪਤਨ੍ਤਮੇਵ ਸਮ੍ਪਟਿਚ੍ਛਿਤ੍ਵਾ ਮਂਸਂ ਭਕ੍ਖੇਸੁਂ. ਤਂ ਅਚ੍ਛਰਿਯਂ ਦਿਸ੍ਵਾ ਰੁਕ੍ਖਦੇਵਤਾ ਗਾਥਮਾਹ –

੧੭੭.

‘‘ਸਾਧੁ ਸਮ੍ਬਹੁਲਾ ਞਾਤੀ, ਅਪਿ ਰੁਕ੍ਖਾ ਅਰਞ੍ਞਜਾ;

ਸੂਕਰੇਹਿ ਸਮਗ੍ਗੇਹਿ, ਬ੍ਯਗ੍ਘੋ ਏਕਾਯਨੇ ਹਤੋ’’ਤਿ.

ਤਤ੍ਥ ਏਕਾਯਨੇ ਹਤੋਤਿ ਏਕਗਮਨਸ੍ਮਿਂਯੇਵ ਹਤੋ.

ਉਭਿਨ੍ਨਂ ਪਨ ਨੇਸਂ ਹਤਭਾਵਂ ਪਕਾਸੇਨ੍ਤੋ ਸਤ੍ਥਾ ਇਤਰਂ ਗਾਥਮਾਹ –

੧੭੮.

‘‘ਬ੍ਰਾਹ੍ਮਣਞ੍ਚੇਵ ਬ੍ਯਗ੍ਘਞ੍ਚ, ਉਭੋ ਹਨ੍ਤ੍ਵਾਨ ਸੂਕਰਾ;

ਆਨਨ੍ਦਿਨੋ ਪਮੁਦਿਤਾ, ਮਹਾਨਾਦਂ ਪਨਾਦਿਸੁ’’ਨ੍ਤਿ.

ਪੁਨ ਤਚ੍ਛਸੂਕਰੋ ਤੇ ਪੁਚ੍ਛਿ ‘‘ਅਞ੍ਞੇਪਿ ਵੋ ਅਮਿਤ੍ਤਾ ਅਤ੍ਥੀ’’ਤਿ? ਸੂਕਰਾ ‘‘ਨਤ੍ਥਿ, ਸਾਮੀ’’ਤਿ ਵਤ੍ਵਾ ‘‘ਤਂ ਅਭਿਸਿਞ੍ਚਿਤ੍ਵਾ ਰਾਜਾਨਂ ਕਰਿਸ੍ਸਾਮਾ’’ਤਿ ਉਦਕਂ ਪਰਿਯੇਸਨ੍ਤਾ ਜਟਿਲਸ੍ਸ ਪਾਨੀਯਸਙ੍ਖਂ ਦਿਸ੍ਵਾ ਤਂ ਦਕ੍ਖਿਣਾਵਟ੍ਟਂ ਸਙ੍ਖਰਤਨਂ ਪੂਰੇਤ੍ਵਾ ਉਦਕਂ ਅਭਿਹਰਿਤ੍ਵਾ ਤਚ੍ਛਸੂਕਰਂ ਉਦੁਮ੍ਬਰਰੁਕ੍ਖਮੂਲੇਯੇਵ ਅਭਿਸਿਞ੍ਚਿਂਸੁ. ਅਭਿਸੇਕਉਦਕਂ ਆਸਿਤ੍ਤਂ, ਸੂਕਰਿਮੇਵਸ੍ਸ ਅਗ੍ਗਮਹੇਸਿਂ ਕਰਿਂਸੁ. ਤਤੋ ਪਟ੍ਠਾਯ ਉਦੁਮ੍ਬਰਭਦ੍ਦਪੀਠੇ ਨਿਸੀਦਾਪੇਤ੍ਵਾ ਦਕ੍ਖਿਣਾਵਟ੍ਟਸਙ੍ਖੇਨ ਅਭਿਸੇਕਕਰਣਂ ਪਵਤ੍ਤਂ. ਤਮ੍ਪਿ ਅਤ੍ਥਂ ਪਕਾਸੇਨ੍ਤੋ ਸਤ੍ਥਾ ਓਸਾਨਗਾਥਮਾਹ –

੧੭੯.

‘‘ਤੇ ਸੁ ਉਦੁਮ੍ਬਰਮੂਲਸ੍ਮਿਂ, ਸੂਕਰਾ ਸੁਸਮਾਗਤਾ;

ਤਚ੍ਛਕਂ ਅਭਿਸਿਞ੍ਚਿਂਸੁ, ਤ੍ਵਂ ਨੋ ਰਾਜਾਸਿ ਇਸ੍ਸਰੋ’’ਤਿ.

ਤਤ੍ਥ ਤੇ ਸੂਤਿ ਤੇ ਸੂਕਰਾ, ਸੁ-ਕਾਰੋ ਨਿਪਾਤਮਤ੍ਤਂ. ਉਦੁਮ੍ਬਰਮੂਲਸ੍ਮਿਨ੍ਤਿ ਉਦੁਮ੍ਬਰਸ੍ਸ ਮੂਲੇ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਧਨੁਗ੍ਗਹਤਿਸ੍ਸਤ੍ਥੇਰੋ ਯੁਦ੍ਧਸਂਵਿਦਹਨੇ ਛੇਕੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕੂਟਜਟਿਲੋ ਦੇਵਦਤ੍ਤੋ ਅਹੋਸਿ, ਤਚ੍ਛਸੂਕਰੋ ਧਨੁਗ੍ਗਹਤਿਸ੍ਸੋ, ਰੁਕ੍ਖਦੇਵਤਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਤਚ੍ਛਸੂਕਰਜਾਤਕਵਣ੍ਣਨਾ ਨਵਮਾ.

[੪੯੩] ੧੦. ਮਹਾਵਾਣਿਜਜਾਤਕਵਣ੍ਣਨਾ

ਵਾਣਿਜਾ ਸਮਿਤਿਂ ਕਤ੍ਵਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਾਵਤ੍ਥਿਵਾਸਿਨੋ ਵਾਣਿਜੇ ਆਰਬ੍ਭ ਕਥੇਸਿ. ਤੇ ਕਿਰ ਵੋਹਾਰਤ੍ਥਾਯ ਗਚ੍ਛਨ੍ਤਾ ਸਤ੍ਥੁ ਮਹਾਦਾਨਂ ਦਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਯ ‘‘ਭਨ੍ਤੇ, ਸਚੇ ਅਰੋਗਾ ਆਗਮਿਸ੍ਸਾਮ, ਪੁਨ ਤੁਮ੍ਹਾਕਂ ਪਾਦੇ ਵਨ੍ਦਿਸ੍ਸਾਮਾ’’ਤਿ ਵਤ੍ਵਾ ਪਞ੍ਚਮਤ੍ਤੇਹਿ ਸਕਟਸਤੇਹਿ ਨਿਕ੍ਖਮਿਤ੍ਵਾ ਕਨ੍ਤਾਰਂ ਪਤ੍ਵਾ ਮਗ੍ਗਂ ਅਸਲ੍ਲਕ੍ਖੇਤ੍ਵਾ ਮਗ੍ਗਮੂਲ਼੍ਹਾ ਨਿਰੁਦਕੇ ਨਿਰਾਹਾਰੇ ਅਰਞ੍ਞੇ ਵਿਚਰਨ੍ਤਾ ਏਕਂ ਨਾਗਪਰਿਗ੍ਗਹਿਤਂ ਨਿਗ੍ਰੋਧਰੁਕ੍ਖਂ ਦਿਸ੍ਵਾ ਸਕਟਾਨਿ ਮੋਚੇਤ੍ਵਾ ਰੁਕ੍ਖਮੂਲੇ ਨਿਸੀਦਿਂਸੁ. ਤੇ ਤਸ੍ਸ ਉਦਕਤਿਨ੍ਤਾਨਿ ਵਿਯ ਨੀਲਾਨਿ ਸਿਨਿਦ੍ਧਾਨਿ ਪਤ੍ਤਾਨਿ ਉਦਕਪੁਣ੍ਣਾ ਵਿਯ ਚ ਸਾਖਾ ਦਿਸ੍ਵਾ ਚਿਨ੍ਤਯਿਂਸੁ ‘‘ਇਮਸ੍ਮਿਂ ਰੁਕ੍ਖੇ ਉਦਕਂ ਸਞ੍ਚਰਨ੍ਤਂ ਵਿਯ ਪਞ੍ਞਾਯਤਿ, ਇਮਸ੍ਸ ਪੁਰਿਮਸਾਖਂ ਛਿਨ੍ਦਾਮ, ਪਾਨੀਯਂ ਨੋ ਦਸ੍ਸਤੀ’’ਤਿ. ਅਥੇਕੋ ਰੁਕ੍ਖਂ ਅਭਿਰੁਹਿਤ੍ਵਾ ਸਾਖਂ ਛਿਨ੍ਦਿ, ਤਤੋ ਤਾਲਕ੍ਖਨ੍ਧਪ੍ਪਮਾਣਾ ਉਦਕਧਾਰਾ ਪਵਤ੍ਤਿ. ਤੇ ਤਤ੍ਥ ਨ੍ਹਤ੍ਵਾ ਪਿਵਿਤ੍ਵਾ ਚ ਦਕ੍ਖਿਣਸਾਖਂ ਛਿਨ੍ਦਿਂਸੁ, ਤਤੋ ਨਾਨਗ੍ਗਰਸਭੋਜਨਂ ਨਿਕ੍ਖਮਿ. ਤਂ ਭੁਞ੍ਜਿਤ੍ਵਾ ਪਚ੍ਛਿਮਸਾਖਂ ਛਿਨ੍ਦਿਂਸੁ, ਤਤੋ ਅਲਙ੍ਕਤਇਤ੍ਥਿਯੋ ਨਿਕ੍ਖਮਿਂਸੁ. ਤਾਹਿ ਸਦ੍ਧਿਂ ਅਭਿਰਮਿਤ੍ਵਾ ਉਤ੍ਤਰਸਾਖਂ ਛਿਨ੍ਦਿਂਸੁ, ਤਤੋ ਸਤ੍ਤ ਰਤਨਾਨਿ ਨਿਕ੍ਖਮਿਂਸੁ. ਤਾਨਿ ਗਹੇਤ੍ਵਾ ਪਞ੍ਚ ਸਕਟਸਤਾਨਿ ਪੂਰੇਤ੍ਵਾ ਸਾਵਤ੍ਥਿਂ ਪਚ੍ਚਾਗਨ੍ਤ੍ਵਾ ਧਨਂ ਗੋਪੇਤ੍ਵਾ ਗਨ੍ਧਮਾਲਾਦਿਹਤ੍ਥਾ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਪੂਜੇਤ੍ਵਾ ਏਕਮਨ੍ਤਂ ਨਿਸਿਨ੍ਨਾ ਧਮ੍ਮਕਥਂ ਸੁਤ੍ਵਾ ਨਿਮਨ੍ਤੇਤ੍ਵਾ ਪੁਨਦਿਵਸੇ ਮਹਾਦਾਨਂ ਦਤ੍ਵਾ ‘‘ਭਨ੍ਤੇ, ਇਮਸ੍ਮਿਂ ਦਾਨੇ ਅਮ੍ਹਾਕਂ ਧਨਦਾਯਿਕਾਯ ਰੁਕ੍ਖਦੇਵਤਾਯ ਪਤ੍ਤਿਂ ਦੇਮਾ’’ਤਿ ਪਤ੍ਤਿਂ ਅਦਂਸੁ. ਸਤ੍ਥਾ ਨਿਟ੍ਠਿਤਭਤ੍ਤਕਿਚ੍ਚੋ ‘‘ਕਤਰਰੁਕ੍ਖਦੇਵਤਾਯ ਪਤ੍ਤਿਂ ਦੇਥਾ’’ਤਿ ਪੁਚ੍ਛਿ. ਵਾਣਿਜਾ ਨਿਗ੍ਰੋਧਰੁਕ੍ਖੇ ਧਨਸ੍ਸ ਲਦ੍ਧਾਕਾਰਂ ਤਥਾਗਤਸ੍ਸਾਰੋਚੇਸੁਂ. ਸਤ੍ਥਾ ‘‘ਤੁਮ੍ਹੇ ਤਾਵ ਮਤ੍ਤਞ੍ਞੁਤਾਯ ਤਣ੍ਹਾਵਸਿਕਾ ਅਹੁਤ੍ਵਾ ਧਨਂ ਲਭਿਤ੍ਥ, ਪੁਬ੍ਬੇ ਪਨ ਅਮਤ੍ਤਞ੍ਞੁਤਾਯ ਤਣ੍ਹਾਵਸਿਕਾ ਧਨਞ੍ਚ ਜੀਵਿਤਞ੍ਚ ਵਿਜਹਿਂਸੂ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਨਗਰੇ ਤਦੇਵ ਪਨ ਕਨ੍ਤਾਰਂ ਸ੍ਵੇਵ ਨਿਗ੍ਰੋਧੋ. ਵਾਣਿਜਾ ਮਗ੍ਗਮੂਲ਼੍ਹਾ ਹੁਤ੍ਵਾ ਤਮੇਵ ਨਿਗ੍ਰੋਧਂ ਪਸ੍ਸਿਂਸੁ. ਤਮਤ੍ਥਂ ਸਤ੍ਥਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਕਥੇਨ੍ਤੋ ਇਮਾ ਗਾਥਾ ਆਹ –

੧੮੦.

‘‘ਵਾਣਿਜਾ ਸਮਿਤਿਂ ਕਤ੍ਵਾ, ਨਾਨਾਰਟ੍ਠਤੋ ਆਗਤਾ;

ਧਨਾਹਰਾ ਪਕ੍ਕਮਿਂਸੁ, ਏਕਂ ਕਤ੍ਵਾਨ ਗਾਮਣਿਂ.

੧੮੧.

‘‘ਤੇ ਤਂ ਕਨ੍ਤਾਰਮਾਗਮ੍ਮ, ਅਪ੍ਪਭਕ੍ਖਂ ਅਨੋਦਕਂ;

ਮਹਾਨਿਗ੍ਰੋਧਮਦ੍ਦਕ੍ਖੁਂ, ਸੀਤਚ੍ਛਾਯਂ ਮਨੋਰਮਂ.

੧੮੨.

‘‘ਤੇ ਚ ਤਤ੍ਥ ਨਿਸੀਦਿਤ੍ਵਾ, ਤਸ੍ਸ ਰੁਕ੍ਖਸ੍ਸ ਛਾਯਯਾ;

ਵਾਣਿਜਾ ਸਮਚਿਨ੍ਤੇਸੁਂ, ਬਾਲਾ ਮੋਹੇਨ ਪਾਰੁਤਾ.

੧੮੩.

‘‘ਅਲ੍ਲਾਯਤੇ ਅਯਂ ਰੁਕ੍ਖੋ, ਅਪਿ ਵਾਰੀਵ ਸਨ੍ਦਤਿ;

ਇਙ੍ਘਸ੍ਸ ਪੁਰਿਮਂ ਸਾਖਂ, ਮਯਂ ਛਿਨ੍ਦਾਮ ਵਾਣਿਜਾ.

੧੮੪.

‘‘ਸਾ ਚ ਛਿਨ੍ਨਾਵ ਪਗ੍ਘਰਿ, ਅਚ੍ਛਂ ਵਾਰਿਂ ਅਨਾਵਿਲਂ;

ਤੇ ਤਤ੍ਥ ਨ੍ਹਤ੍ਵਾ ਪਿਵਿਤ੍ਵਾ, ਯਾਵਤਿਚ੍ਛਿਂਸੁ ਵਾਣਿਜਾ.

੧੮੫.

‘‘ਦੁਤਿਯਂ ਸਮਚਿਨ੍ਤੇਸੁਂ, ਬਾਲਾ ਮੋਹੇਨ ਪਾਰੁਤਾ;

ਇਙ੍ਘਸ੍ਸ ਦਕ੍ਖਿਣਂ ਸਾਖਂ, ਮਯਂ ਛਿਨ੍ਦਾਮ ਵਾਣਿਜਾ.

੧੮੬.

‘‘ਸਾ ਚ ਛਿਨ੍ਨਾਵ ਪਗ੍ਘਰਿ, ਸਾਲਿਮਂਸੋਦਨਂ ਬਹੁਂ;

ਅਪ੍ਪੋਦਵਣ੍ਣੇ ਕੁਮ੍ਮਾਸੇ, ਸਿਙ੍ਗਿਂ ਵਿਦਲਸੂਪਿਯੋ.

੧੮੭.

‘‘ਤੇ ਤਤ੍ਥ ਭੁਤ੍ਵਾ ਖਾਦਿਤ੍ਵਾ, ਯਾਵਤਿਚ੍ਛਿਂਸੁ ਵਾਣਿਜਾ;

ਤਤਿਯਂ ਸਮਚਿਨ੍ਤੇਸੁਂ, ਬਾਲਾ ਮੋਹੇਨ ਪਾਰੁਤਾ;

ਇਙ੍ਘਸ੍ਸ ਪਚ੍ਛਿਮਂ ਸਾਖਂ, ਮਯਂ ਛਿਨ੍ਦਾਮ ਵਾਣਿਜਾ.

੧੮੮.

‘‘ਸਾ ਚ ਛਿਨ੍ਨਾਵ ਪਗ੍ਘਰਿ, ਨਾਰਿਯੋ ਸਮਲਙ੍ਕਤਾ;

ਵਿਚਿਤ੍ਰਵਤ੍ਥਾਭਰਣਾ, ਆਮੁਤ੍ਤਮਣਿਕੁਣ੍ਡਲਾ.

੧੮੯.

‘‘ਅਪਿ ਸੁ ਵਾਣਿਜਾ ਏਕਾ, ਨਾਰਿਯੋ ਪਣ੍ਣਵੀਸਤਿ;

ਸਮਨ੍ਤਾ ਪਰਿਵਾਰਿਂਸੁ, ਤਸ੍ਸ ਰੁਕ੍ਖਸ੍ਸ ਛਾਯਯਾ;

ਤੇ ਤਾਹਿ ਪਰਿਚਾਰੇਤ੍ਵਾ, ਯਾਵਤਿਚ੍ਛਿਂਸੁ ਵਾਣਿਜਾ.

੧੯੦.

‘‘ਚਤੁਤ੍ਥਂ ਸਮਚਿਨ੍ਤੇਸੁਂ, ਬਾਲਾ ਮੋਹੇਨ ਪਾਰੁਤਾ;

ਇਙ੍ਘਸ੍ਸ ਉਤ੍ਤਰਂ ਸਾਖਂ, ਮਯਂ ਛਿਨ੍ਦਾਮ ਵਾਣਿਜਾ.

੧੯੧.

‘‘ਸਾ ਚ ਛਿਨ੍ਨਾਵ ਪਗ੍ਘਰਿ, ਮੁਤ੍ਤਾ ਵੇਲ਼ੁਰਿਯਾ ਬਹੂ;

ਰਜਤਂ ਜਾਤਰੂਪਞ੍ਚ, ਕੁਤ੍ਤਿਯੋ ਪਟਿਯਾਨਿ ਚ.

੧੯੨.

‘‘ਕਾਸਿਕਾਨਿ ਚ ਵਤ੍ਥਾਨਿ, ਉਦ੍ਦਿਯਾਨਿ ਚ ਕਮ੍ਬਲਾ;

ਤੇ ਤਤ੍ਥ ਭਾਰੇ ਬਨ੍ਧਿਤ੍ਵਾ, ਯਾਵਤਿਚ੍ਛਿਂਸੁ ਵਾਣਿਜਾ.

੧੯੩.

‘‘ਪਞ੍ਚਮਂ ਸਮਚਿਨ੍ਤੇਸੁਂ, ਬਾਲਾ ਮੋਹੇਨ ਪਾਰੁਤਾ;

ਇਙ੍ਘਸ੍ਸ ਮੂਲਂ ਛਿਨ੍ਦਾਮ, ਅਪਿ ਭਿਯ੍ਯੋ ਲਭਾਮਸੇ.

੧੯੪.

‘‘ਅਥੁਟ੍ਠਹਿ ਸਤ੍ਥਵਾਹੋ, ਯਾਚਮਾਨੋ ਕਤਞ੍ਜਲੀ;

ਨਿਗ੍ਰੋਧੋ ਕਿਂ ਪਰਜ੍ਝਤਿ, ਵਾਣਿਜਾ ਭਦ੍ਦਮਤ੍ਥੁ ਤੇ.

੧੯੫.

‘‘ਵਾਰਿਦਾ ਪੁਰਿਮਾ ਸਾਖਾ, ਅਨ੍ਨਪਾਨਞ੍ਚ ਦਕ੍ਖਿਣਾ;

ਨਾਰਿਦਾ ਪਚ੍ਛਿਮਾ ਸਾਖਾ, ਸਬ੍ਬਕਾਮੇ ਚ ਉਤ੍ਤਰਾ;

ਨਿਗ੍ਰੋਧੋ ਕਿਂ ਪਰਜ੍ਝਤਿ, ਵਾਣਿਜਾ ਭਦ੍ਦਮਤ੍ਥੁ ਤੇ.

੧੯੬.

‘‘ਯਸ੍ਸ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;

ਨ ਤਸ੍ਸ ਸਾਖਂ ਭਞ੍ਜੇਯ੍ਯ, ਮਿਤ੍ਤਦੁਬ੍ਭੋ ਹਿ ਪਾਪਕੋ.

੧੯੭.

‘‘ਤੇ ਚ ਤਸ੍ਸਾਨਾਦਿਯਿਤ੍ਵਾ, ਏਕਸ੍ਸ ਵਚਨਂ ਬਹੂ;

ਨਿਸਿਤਾਹਿ ਕੁਠਾਰੀਹਿ, ਮੂਲਤੋ ਨਂ ਉਪਕ੍ਕਮੁ’’ਨ੍ਤਿ.

ਤਤ੍ਥ ਸਮਿਤਿਂ ਕਤ੍ਵਾਤਿ ਬਾਰਾਣਸਿਯਂ ਸਮਾਗਮਂ ਕਤ੍ਵਾ, ਬਹੂ ਏਕਤੋ ਹੁਤ੍ਵਾਤਿ ਅਤ੍ਥੋ. ਪਕ੍ਕਮਿਂਸੂਤਿ ਪਞ੍ਚਹਿ ਸਕਟਸਤੇਹਿ ਬਾਰਾਣਸੇਯ੍ਯਕਂ ਭਣ੍ਡਂ ਆਦਾਯ ਪਕ੍ਕਮਿਂਸੁ. ਗਾਮਣਿਨ੍ਤਿ ਏਕਂ ਪਞ੍ਞਵਨ੍ਤਤਰਂ ਸਤ੍ਥਵਾਹਂ ਕਤ੍ਵਾ. ਛਾਯਯਾਤਿ ਛਾਯਾਯ. ਅਲ੍ਲਾਯਤੇਤਿ ਉਦਕਭਰਿਤੋ ਵਿਯ ਅਲ੍ਲੋ ਹੁਤ੍ਵਾ ਪਞ੍ਞਾਯਤਿ. ਛਿਨ੍ਨਾਵ ਪਗ੍ਘਰੀਤਿ ਏਕੋ ਰੁਕ੍ਖਾਰੋਹਨਕੁਸਲੋ ਅਭਿਰੁਹਿਤ੍ਵਾ ਤਂ ਛਿਨ੍ਦਿ, ਸਾ ਛਿਨ੍ਨਮਤ੍ਤਾਵ ਪਗ੍ਘਰੀਤਿ ਦਸ੍ਸੇਤਿ. ਪਰਤੋਪਿ ਏਸੇਵ ਨਯੋ.

ਅਪ੍ਪੋਦਵਣ੍ਣੇ ਕੁਮ੍ਮਾਸੇਤਿ ਅਪ੍ਪੋਦਕਪਾਯਾਸਸਦਿਸੇ ਕੁਮ੍ਮਾਸੇ. ਸਿਙ੍ਗਿਨ੍ਤਿ ਸਿਙ੍ਗਿਵੇਰਾਦਿਕਂ ਉਤ੍ਤਰਿਭਙ੍ਗਂ. ਵਿਦਲਸੂਪਿਯੋਤਿ ਮੁਗ੍ਗਸੂਪਾਦਯੋ. ਵਾਣਿਜਾ ਏਕਾਤਿ ਏਕੇਕਸ੍ਸ ਵਾਣਿਜਸ੍ਸ ਯਤ੍ਤਕਾ ਵਾਣਿਜਾ, ਤੇਸੁ ਏਕੇਕਸ੍ਸ ਏਕੇਕਾਵ, ਸਤ੍ਥਵਾਹਸ੍ਸ ਪਨ ਸਨ੍ਤਿਕੇ ਪਞ੍ਚਵੀਸਤੀਤਿ ਅਤ੍ਥੋ. ਪਰਿਵਾਰਿਂਸੂਤਿ ਪਰਿਵਾਰੇਸੁਂ. ਤਾਹਿ ਪਨ ਸਦ੍ਧਿਂਯੇਵ ਨਾਗਾਨੁਭਾਵੇਨ ਸਾਣਿਵਿਤਾਨਸਯਨਾਦੀਨਿ ਪਗ੍ਘਰਿਂਸੁ.

ਕੁਤ੍ਤਿਯੋਤਿ ਹਤ੍ਥਤ੍ਥਰਾਦਯੋ. ਪਟਿਯਾਨਿਚਾਤਿ ਉਣ੍ਣਾਮਯਪਚ੍ਚਤ੍ਥਰਣਾਨਿ. ‘‘ਸੇਤਕਮ੍ਬਲਾਨੀ’’ਤਿਪਿ ਵਦਨ੍ਤਿਯੇਵ. ਉਦ੍ਦਿਯਾਨਿ ਚ ਕਮ੍ਬਲਾਤਿ ਉਦ੍ਦਿਯਾਨਿ ਨਾਮ ਕਮ੍ਬਲਾ ਅਤ੍ਥਿ. ਤੇ ਤਤ੍ਥ ਭਾਰੇ ਬਨ੍ਧਿਤ੍ਵਾਤਿ ਯਾਵਤਕਂ ਇਚ੍ਛਿਂਸੁ, ਤਾਵਤਕਂ ਗਹੇਤ੍ਵਾ ਪਞ੍ਚ ਸਕਟਸਤਾਨਿ ਪੂਰੇਤ੍ਵਾਤਿ ਅਤ੍ਥੋ. ਵਾਣਿਜਾ ਭਦ੍ਦਮਤ੍ਥੁ ਤੇਤਿ ਏਕੇਕਂ ਵਾਣਿਜਂ ਆਲਪਨ੍ਤੋ ‘‘ਭਦ੍ਦਂ ਤੇ ਅਤ੍ਥੂ’’ਤਿ ਆਹ. ਅਨ੍ਨਪਾਨਞ੍ਚਾਤਿ ਅਨ੍ਨਞ੍ਚ ਪਾਨਞ੍ਚ ਅਦਾਸਿ. ਸਬ੍ਬਕਾਮੇ ਚਾਤਿ ਸਬ੍ਬਕਾਮੇ ਚ ਅਦਾਸਿ. ਮਿਤ੍ਤਦੁਬ੍ਭੋ ਹੀਤਿ ਮਿਤ੍ਤਾਨਂ ਦੁਬ੍ਭਨਪੁਰਿਸੋ ਹਿ ਪਾਪਕੋ ਲਾਮਕੋ ਨਾਮ. ਅਨਾਦਿਯਿਤ੍ਵਾਤਿ ਤਸ੍ਸ ਵਚਨਂ ਅਗ੍ਗਹੇਤ੍ਵਾ. ਉਪਕ੍ਕਮੁਨ੍ਤਿ ਮੋਹਾਵ ਛਿਨ੍ਦਿਤੁਂ ਆਰਭਿਂਸੁ.

ਅਥ ਨੇ ਛਿਨ੍ਦਨਤ੍ਥਾਯ ਰੁਕ੍ਖਂ ਉਪਗਤੇ ਦਿਸ੍ਵਾ ਨਾਗਰਾਜਾ ਚਿਨ੍ਤੇਸਿ ‘‘ਅਹਂ ਏਤੇਸਂ ਪਿਪਾਸਿਤਾਨਂ ਪਾਨੀਯਂ ਦਾਪੇਸਿਂ, ਤਤੋ ਦਿਬ੍ਬਭੋਜਨਂ, ਤਤੋ ਸਯਨਾਦੀਨਿ ਚੇਵ ਪਰਿਚਾਰਿਕਾ ਚ ਨਾਰਿਯੋ, ਤਤੋ ਪਞ੍ਚਸਤਸਕਟਪੂਰਂ ਰਤਨਂ, ਇਦਾਨਿ ਪਨਿਮੇ ‘‘ਰੁਕ੍ਖਂ ਮੂਲਤੋ ਛਿਨ੍ਦਿਸ੍ਸਾਮਾ’ਤਿ ਵਦਨ੍ਤਿ, ਅਤਿਵਿਯ ਲੁਦ੍ਧਾ ਇਮੇ, ਠਪੇਤ੍ਵਾ ਸਤ੍ਥਵਾਹਂ ਅਵਸੇਸੇ ਮਾਰੇਤੁਂ ਵਟ੍ਟਤੀ’’ਤਿ. ਸੋ ‘‘ਏਤ੍ਤਕਾ ਸਨ੍ਨਦ੍ਧਯੋਧਾ ਨਿਕ੍ਖਮਨ੍ਤੁ, ਏਤ੍ਤਕਾ ਧਨੁਗ੍ਗਹਾ, ਏਤ੍ਤਕਾ ਵਮ੍ਮਿਨੋ’’ਤਿ ਸੇਨਂ ਵਿਚਾਰੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਗਾਥਮਾਹ –

੧੯੮.

‘‘ਤਤੋ ਨਾਗਾ ਨਿਕ੍ਖਮਿਂਸੁ, ਸਨ੍ਨਦ੍ਧਾ ਪਣ੍ਣਵੀਸਤਿ;

ਧਨੁਗ੍ਗਹਾਨਂ ਤਿਸਤਾ, ਛਸਹਸ੍ਸਾ ਚ ਵਮ੍ਮਿਨੋ’’ਤਿ.

ਤਤ੍ਥ ਸਨ੍ਨਦ੍ਧਾਤਿ ਸੁਵਣ੍ਣਰਜਤਾਦਿਵਮ੍ਮਕਵਚਿਕਾ. ਧਨੁਗ੍ਗਹਾਨਂ ਤਿਸਤਾਤਿ ਮੇਣ੍ਡਵਿਸਾਣਧਨੁਗ੍ਗਹਾਨਂ ਤੀਣਿ ਸਤਾਨਿ. ਵਮ੍ਮਿਨੋਤਿ ਖੇਟਕਫਲਕਹਤ੍ਥਾ ਛਸਹਸ੍ਸਾ.

੧੯੯.

‘‘ਏਤੇ ਹਨਥ ਬਨ੍ਧਥ, ਮਾ ਵੋ ਮੁਞ੍ਚਿਤ੍ਥ ਜੀਵਿਤਂ;

ਠਪੇਤ੍ਵਾ ਸਤ੍ਥਵਾਹਂਵ, ਸਬ੍ਬੇ ਭਸ੍ਮਂ ਕਰੋਥ ਨੇ’’ਤਿ. – ਅਯਂ ਨਾਗਰਾਜੇਨ ਵੁਤ੍ਤਗਾਥਾ;

ਤਤ੍ਥ ਮਾ ਵੋ ਮੁਞ੍ਚਿਤ੍ਥ ਜੀਵਿਤਨ੍ਤਿ ਕਸ੍ਸਚਿ ਏਕਸ੍ਸਪਿ ਜੀਵਿਤਂ ਮਾ ਮੁਞ੍ਚਿਤ੍ਥ.

ਨਾਗਾ ਤਥਾ ਕਤ੍ਵਾ ਅਤ੍ਥਰਣਾਦੀਨਿ ਪਞ੍ਚਸੁ ਸਕਟਸਤੇਸੁ ਆਰੋਪੇਤ੍ਵਾ ਸਤ੍ਥਵਾਹਂ ਗਹੇਤ੍ਵਾ ਸਯਂ ਤਾਨਿ ਸਕਟਾਨਿ ਪਾਜੇਨ੍ਤਾ ਬਾਰਾਣਸਿਂ ਗਨ੍ਤ੍ਵਾ ਸਬ੍ਬਂ ਧਨਂ ਤਸ੍ਸ ਗੇਹੇ ਪਟਿਸਾਮੇਤ੍ਵਾ ਤਂ ਆਪੁਚ੍ਛਿਤ੍ਵਾ ਅਤ੍ਤਨੋ ਨਾਗਭਵਨਮੇਵ ਗਤਾ. ਤਮਤ੍ਥਂ ਵਿਦਿਤ੍ਵਾ ਸਤ੍ਥਾ ਓਵਾਦਵਸੇਨ ਗਾਥਾਦ੍ਵਯਮਾਹ –

੨੦੦.

‘‘ਤਸ੍ਮਾ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ;

ਲੋਭਸ੍ਸ ਨ ਵਸਂ ਗਚ੍ਛੇ, ਹਨੇਯ੍ਯਾਰਿਸਕਂ ਮਨਂ.

੨੦੧.

‘‘ਏਵਮਾਦੀਨਵਂ ਞਤ੍ਵਾ, ਤਣ੍ਹਾ ਦੁਕ੍ਖਸ੍ਸ ਸਮ੍ਭਵਂ;

ਵੀਤਤਣ੍ਹੋ ਅਨਾਦਾਨੋ, ਸਤੋ ਭਿਕ੍ਖੁ ਪਰਿਬ੍ਬਜੇ’’ਤਿ.

ਤਤ੍ਥ ਤਸ੍ਮਾਤਿ ਯਸ੍ਮਾ ਲੋਭਵਸਿਕਾ ਮਹਾਵਿਨਾਸਂ ਪਤ੍ਤਾ, ਸਤ੍ਥਵਾਹੋ ਉਤ੍ਤਮਸਮ੍ਪਤ੍ਤਿਂ, ਤਸ੍ਮਾ. ਹਨੇਯ੍ਯਾਰਿਸਕਂ ਮਨਨ੍ਤਿ ਅਨ੍ਤੋ ਉਪ੍ਪਜ੍ਜਮਾਨਾਨਂ ਨਾਨਾਵਿਧਾਨਂ ਲੋਭਸਤ੍ਤੂਨਂ ਸਨ੍ਤਕਂ ਮਨਂ, ਲੋਭਸਮ੍ਪਯੁਤ੍ਤਚਿਤ੍ਤਂ ਹਨੇਯ੍ਯਾਤਿ ਅਤ੍ਥੋ. ਏਵਮਾਦੀਨਵਨ੍ਤਿ ਏਵਂ ਲੋਭੇ ਆਦੀਨਵਂ ਜਾਨਿਤ੍ਵਾ. ਤਣ੍ਹਾ ਦੁਕ੍ਖਸ੍ਸ ਸਮ੍ਭਵਨ੍ਤਿ ਜਾਤਿਆਦਿਦੁਕ੍ਖਸ੍ਸ ਤਣ੍ਹਾ ਸਮ੍ਭਵੋ, ਤਤੋ ਏਤਂ ਦੁਕ੍ਖਂ ਨਿਬ੍ਬਤ੍ਤਤਿ, ਏਵਂ ਤਣ੍ਹਾਵ ਦੁਕ੍ਖਸ੍ਸ ਸਮ੍ਭਵਂ ਞਤ੍ਵਾ ਵੀਤਤਣ੍ਹੋ ਤਣ੍ਹਾਆਦਾਨੇਨ ਅਨਾਦਾਨੋ ਮਗ੍ਗੇਨ ਆਗਤਾਯ ਸਤਿਯਾ ਸਤੋ ਹੁਤ੍ਵਾ ਭਿਕ੍ਖੁ ਪਰਿਬ੍ਬਜੇ ਇਰਿਯੇਥ ਵਤ੍ਤੇਥਾਤਿ ਅਰਹਤ੍ਤੇਨ ਦੇਸਨਾਯ ਕੂਟਂ ਗਣ੍ਹਿ.

ਇਮਞ੍ਚ ਪਨ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਉਪਾਸਕਾ ਪੁਬ੍ਬੇ ਲੋਭਵਸਿਕਾ ਵਾਣਿਜਾ ਮਹਾਵਿਨਾਸਂ ਪਤ੍ਤਾ, ਤਸ੍ਮਾ ਲੋਭਵਸਿਕੇਨ ਨ ਭਵਿਤਬ੍ਬ’’ਨ੍ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਤੇ ਵਾਣਿਜਾ ਸੋਤਾਪਤ੍ਤਿਫਲੇ ਪਤਿਟ੍ਠਿਤਾ. ਤਦਾ ਨਾਗਰਾਜਾ ਸਾਰਿਪੁਤ੍ਤੋ ਅਹੋਸਿ, ਸਤ੍ਥਵਾਹੋ ਪਨ ਅਹਮੇਵ ਅਹੋਸਿਨ੍ਤਿ.

ਮਹਾਵਾਣਿਜਜਾਤਕਵਣ੍ਣਨਾ ਦਸਮਾ.

[੪੯੪] ੧੧. ਸਾਧਿਨਜਾਤਕਵਣ੍ਣਨਾ

ਅਬ੍ਭੁਤੋ ਵਤ ਲੋਕਸ੍ਮਿਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਪੋਸਥਿਕੇ ਉਪਾਸਕੇ ਆਰਬ੍ਭ ਕਥੇਸਿ. ਤਦਾ ਹਿ ਸਤ੍ਥਾ ‘‘ਉਪਾਸਕਾ ਪੋਰਾਣਕਪਣ੍ਡਿਤਾ ਅਤ੍ਤਨੋ ਉਪੋਸਥਕਮ੍ਮਂ ਨਿਸ੍ਸਾਯ ਮਨੁਸ੍ਸਸਰੀਰੇਨੇਵ ਦੇਵਲੋਕਂ ਗਨ੍ਤ੍ਵਾ ਚਿਰਂ ਵਸਿਂਸੂ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਮਿਥਿਲਾਯਂ ਸਾਧਿਨੋ ਨਾਮ ਰਾਜਾ ਧਮ੍ਮੇਨ ਰਜ੍ਜਂ ਕਾਰੇਸਿ. ਸੋ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਨਿਵੇਸਨਦ੍ਵਾਰੇ ਚਾਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਸਕਲਜਮ੍ਬੁਦੀਪਂ ਉਨ੍ਨਙ੍ਗਲਂ ਕਤ੍ਵਾ ਮਹਾਦਾਨਂ ਪਵਤ੍ਤੇਸਿ, ਦੇਵਸਿਕਂ ਛ ਸਤਸਹਸ੍ਸਾਨਿ ਵਯਕਰਣਂ ਗਚ੍ਛਨ੍ਤਿ, ਪਞ੍ਚ ਸੀਲਾਨਿ ਰਕ੍ਖਤਿ, ਉਪੋਸਥਂ ਉਪਵਸਤਿ. ਰਟ੍ਠਵਾਸਿਨੋਪਿ ਤਸ੍ਸ ਓਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਮਤਮਤਾ ਦੇਵਨਗਰੇਯੇਵ ਨਿਬ੍ਬਤ੍ਤਿਂਸੁ. ਸੁਧਮ੍ਮਦੇਵਸਭਂ ਪੂਰੇਤ੍ਵਾ ਨਿਸਿਨ੍ਨਾ ਦੇਵਾ ਰਞ੍ਞੋ ਸੀਲਾਦਿਗੁਣਮੇਵ ਵਣ੍ਣਯਨ੍ਤਿ. ਤਂ ਸੁਤ੍ਵਾ ਸੇਸਦੇਵਾਪਿ ਰਾਜਾਨਂ ਦਟ੍ਠੁਕਾਮਾ ਅਹੇਸੁਂ. ਸਕ੍ਕੋ ਦੇਵਰਾਜਾ ਤੇਸਂ ਮਨਂ ਵਿਦਿਤ੍ਵਾ ਆਹ – ‘‘ਸਾਧਿਨਰਾਜਾਨਂ ਦਟ੍ਠੁਕਾਮਤ੍ਥਾ’’ਤਿ. ‘‘ਆਮ ਦੇਵਾ’’ਤਿ. ਸੋ ਮਾਤਲਿਂ ਆਣਾਪੇਸਿ ‘‘ਗਚ੍ਛ ਤ੍ਵਂ ਵੇਜਯਨ੍ਤਰਥਂ ਯੋਜੇਤ੍ਵਾ ਸਾਧਿਨਰਾਜਾਨਂ ਆਨੇਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਰਥਂ ਯੋਜੇਤ੍ਵਾ ਵਿਦੇਹਰਟ੍ਠਂ ਅਗਮਾਸਿ, ਤਦਾ ਪੁਣ੍ਣਮਦਿਵਸੋ ਹੋਤਿ. ਮਾਤਲਿ ਮਨੁਸ੍ਸਾਨਂ ਸਾਯਮਾਸਂ ਭੁਞ੍ਜਿਤ੍ਵਾ ਘਰਦ੍ਵਾਰੇਸੁ ਸੁਖਕਥਾਯ ਨਿਸਿਨ੍ਨਕਾਲੇ ਚਨ੍ਦਮਣ੍ਡਲੇਨ ਸਦ੍ਧਿਂ ਰਥਂ ਪੇਸੇਸਿ. ਮਨੁਸ੍ਸਾ ‘‘ਦ੍ਵੇ ਚਨ੍ਦਾ ਉਟ੍ਠਿਤਾ’’ਤਿ ਵਦਨ੍ਤਾ ਪੁਨ ਚਨ੍ਦਮਣ੍ਡਲਂ ਓਹਾਯ ਰਥਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਨਾਯਂ ਚਨ੍ਦੋ, ਰਥੋ ਏਸੋ, ਦੇਵਪੁਤ੍ਤੋ ਪਞ੍ਞਾਯਤਿ, ਕਸ੍ਸੇਸ ਏਤਂ ਮਨੋਮਯਸਿਨ੍ਧਵਯੁਤ੍ਤਂ ਦਿਬ੍ਬਰਥਂ ਆਨੇਤਿ, ਨ ਅਞ੍ਞਸ੍ਸ, ਅਮ੍ਹਾਕਂ ਰਞ੍ਞੋ ਭਵਿਸ੍ਸਤਿ, ਰਾਜਾ ਹਿ ਨੋ ਧਮ੍ਮਿਕੋ ਧਮ੍ਮਰਾਜਾ’’ਤਿ ਸੋਮਨਸ੍ਸਜਾਤਾ ਹੁਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਠਿਤਾ ਪਠਮਂ ਗਾਥਮਾਹਂਸੁ –

੨੦੨.

‘‘ਅਬ੍ਭੁਤੋ ਵਤ ਲੋਕਸ੍ਮਿਂ, ਉਪ੍ਪਜ੍ਜਿ ਲੋਮਹਂਸਨੋ;

ਦਿਬ੍ਬੋ ਰਥੋ ਪਾਤੁਰਹੁ, ਵੇਦੇਹਸ੍ਸ ਯਸਸ੍ਸਿਨੋ’’ਤਿ.

ਤਸ੍ਸਤ੍ਥੋ – ਅਬ੍ਭੁਤੋ ਵਤੇਸ ਅਮ੍ਹਾਕਂ ਰਾਜਾ, ਲੋਕਸ੍ਮਿਂ ਲੋਮਹਂਸਨੋ ਉਪ੍ਪਜ੍ਜਿ, ਯਸ੍ਸ ਦਿਬ੍ਬੋ ਰਥੋ ਪਾਤੁਰਹੋਸਿ ਵੇਦੇਹਸ੍ਸ ਯਸਸ੍ਸਿਨੋਤਿ.

ਮਾਤਲਿਪਿ ਤਂ ਰਥਂ ਆਨੇਤ੍ਵਾ ਮਨੁਸ੍ਸੇਸੁ ਗਨ੍ਧਮਾਲਾਦੀਹਿ ਪੂਜੇਨ੍ਤੇਸੁ ਤਿਕ੍ਖਤ੍ਤੁਂ ਨਗਰਂ ਪਦਕ੍ਖਿਣਂ ਕਤ੍ਵਾ ਰਞ੍ਞੋ ਨਿਵੇਸਨਦ੍ਵਾਰਂ ਗਨ੍ਤ੍ਵਾ ਰਥਂ ਨਿਵਤ੍ਤੇਤ੍ਵਾ ਪਚ੍ਛਾਭਾਗੇਨ ਸੀਹਪਞ੍ਜਰਉਮ੍ਮਾਰੇ ਠਪੇਤ੍ਵਾ ਆਰੋਹਣਸਜ੍ਜਂ ਕਤ੍ਵਾ ਅਟ੍ਠਾਸਿ. ਤਂ ਦਿਵਸਂ ਰਾਜਾਪਿ ਦਾਨਸਾਲਾਯੋ ਓਲੋਕੇਤ੍ਵਾ ‘‘ਇਮਿਨਾ ਨਿਯਾਮੇਨ ਦਾਨਂ ਦੇਥਾ’’ਤਿ ਆਣਾਪੇਤ੍ਵਾ ਉਪੋਸਥਂ ਸਮਾਦਿਯਿਤ੍ਵਾ ਦਿਵਸਂ ਵੀਤਿਨਾਮੇਤ੍ਵਾ ਅਮਚ੍ਚਗਣਪਰਿਵੁਤੋ ਅਲਙ੍ਕਤਮਹਾਤਲੇ ਪਾਚੀਨਸੀਹਪਞ੍ਜਰਾਭਿਮੁਖੋ ਧਮ੍ਮਯੁਤ੍ਤਂ ਕਥੇਨ੍ਤੋ ਨਿਸਿਨ੍ਨੋ ਹੋਤਿ. ਅਥ ਨਂ ਮਾਤਲਿ ਰਥਾਭਿਰੁਹਨਤ੍ਥਂ ਨਿਮਨ੍ਤੇਤ੍ਵਾ ਆਦਾਯ ਅਗਮਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਇਮਾ ਗਾਥਾ ਅਭਾਸਿ –

੨੦੩.

‘‘ਦੇਵਪੁਤ੍ਤੋ ਮਹਿਦ੍ਧਿਕੋ, ਮਾਤਲਿ ਦੇਵਸਾਰਥਿ;

ਨਿਮਨ੍ਤਯਿਤ੍ਥ ਰਾਜਾਨਂ, ਵੇਦੇਹਂ ਮਿਥਿਲਗ੍ਗਹਂ.

੨੦੪.

‘‘ਏਹਿਮਂ ਰਥਮਾਰੁਯ੍ਹ, ਰਾਜਸੇਟ੍ਠ ਦਿਸਮ੍ਪਤਿ;

ਦੇਵਾ ਦਸ੍ਸਨਕਾਮਾ ਤੇ, ਤਾਵਤਿਂਸਾ ਸਇਨ੍ਦਕਾ;

ਸਰਮਾਨਾ ਹਿ ਤੇ ਦੇਵਾ, ਸੁਧਮ੍ਮਾਯਂ ਸਮਚ੍ਛਰੇ.

੨੦੫.

‘‘ਤਤੋ ਚ ਰਾਜਾ ਸਾਧਿਨੋ, ਵੇਦੇਹੋ ਮਿਥਿਲਗ੍ਗਹੋ;

ਸਹਸ੍ਸਯੁਤ੍ਤਮਾਰੁਯ੍ਹ, ਅਗਾ ਦੇਵਾਨ ਸਨ੍ਤਿਕੇ;

ਤਂ ਦੇਵਾ ਪਟਿਨਨ੍ਦਿਂਸੁ, ਦਿਸ੍ਵਾ ਰਾਜਾਨਮਾਗਤਂ.

੨੦੬.

‘‘ਸ੍ਵਾਗਤਂ ਤੇ ਮਹਾਰਾਜ, ਅਥੋ ਤੇ ਅਦੁਰਾਗਤਂ;

ਨਿਸੀਦ ਦਾਨਿ ਰਾਜੀਸਿ, ਦੇਵਰਾਜਸ੍ਸ ਸਨ੍ਤਿਕੇ.

੨੦੭.

‘‘ਸਕ੍ਕੋਪਿ ਪਟਿਨਨ੍ਦਿਤ੍ਥ, ਵੇਦੇਹਂ ਮਿਥਿਲਗ੍ਗਹਂ;

ਨਿਮਨ੍ਤਯਿਤ੍ਥ ਕਾਮੇਹਿ, ਆਸਨੇਨ ਚ ਵਾਸਵੋ.

੨੦੮.

‘‘ਸਾਧੁ ਖੋਸਿ ਅਨੁਪ੍ਪਤ੍ਤੋ, ਆਵਾਸਂ ਵਸਵਤ੍ਤਿਨਂ;

ਵਸ ਦੇਵੇਸੁ ਰਾਜੀਸਿ, ਸਬ੍ਬਕਾਮਸਮਿਦ੍ਧਿਸੁ;

ਤਾਵਤਿਂਸੇਸੁ ਦੇਵੇਸੁ, ਭੁਞ੍ਜ ਕਾਮੇ ਅਮਾਨੁਸੇ’’ਤਿ.

ਤਤ੍ਥ ਸਮਚ੍ਛਰੇਤਿ ਅਚ੍ਛਨ੍ਤਿ. ਅਗਾ ਦੇਵਾਨ ਸਨ੍ਤਿਕੇਤਿ ਦੇਵਾਨਂ ਸਨ੍ਤਿਕਂ ਅਗਮਾਸਿ. ਤਸ੍ਮਿਞ੍ਹਿ ਰਥਂ ਅਭਿਰੁਹਿਤ੍ਵਾ ਠਿਤੇ ਰਥੋ ਆਕਾਸਂ ਪਕ੍ਖਨ੍ਦਿ, ਸੋ ਮਹਾਜਨਸ੍ਸ ਓਲੋਕੇਨ੍ਤਸ੍ਸੇਵ ਅਨ੍ਤਰਧਾਯਿ. ਮਾਤਲਿ ਰਾਜਾਨਂ ਦੇਵਲੋਕਂ ਨੇਸਿ. ਤਂ ਦਿਸ੍ਵਾ ਦੇਵਤਾ ਚ ਸਕ੍ਕੋ ਚ ਹਟ੍ਠਤੁਟ੍ਠਾ ਪਚ੍ਚੁਗ੍ਗਮਨਂ ਕਤ੍ਵਾ ਪਟਿਸਨ੍ਥਾਰਂ ਕਰਿਂਸੁ. ਤਮਤ੍ਥਂ ਦਸ੍ਸੇਤੁਂ ‘‘ਤਂ ਦੇਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਪਟਿਨਨ੍ਦਿਂਸੂਤਿ ਪੁਨਪ੍ਪੁਨਂ ਨਨ੍ਦਿਂਸੁ. ਆਸਨੇਨ ਚਾਤਿ ਰਾਜਾਨਂ ਆਲਿਙ੍ਗਿਤ੍ਵਾ ‘‘ਇਧ ਨਿਸੀਦਾ’’ਤਿ ਅਤ੍ਤਨੋ ਪਣ੍ਡੁਕਮ੍ਬਲਸਿਲਾਸਨੇਨ ਚ ਕਾਮੇਹਿ ਚ ਨਿਮਨ੍ਤੇਸਿ, ਉਪਡ੍ਢਰਜ੍ਜਂ ਦਤ੍ਵਾ ਏਕਾਸਨੇ ਨਿਸੀਦਾਪੇਸੀਤਿ ਅਤ੍ਥੋ.

ਤਤ੍ਥ ਸਕ੍ਕੇਨ ਦੇਵਰਞ੍ਞਾ ਦਸਯੋਜਨਸਹਸ੍ਸਂ ਦੇਵਨਗਰਂ ਅਡ੍ਢਤਿਯਾ ਚ ਅਚ੍ਛਰਾਕੋਟਿਯੋ ਵੇਜਯਨ੍ਤਪਾਸਾਦਞ੍ਚ ਮਜ੍ਝੇ ਭਿਨ੍ਦਿਤ੍ਵਾ ਦਿਨ੍ਨਂ ਸਮ੍ਪਤ੍ਤਿਂ ਅਨੁਭਵਨ੍ਤਸ੍ਸ ਮਨੁਸ੍ਸਗਣਨਾਯ ਸਤ੍ਤ ਵਸ੍ਸਸਤਾਨਿ ਅਤਿਕ੍ਕਨ੍ਤਾਨਿ. ਤੇਨਤ੍ਤਭਾਵੇਨ ਦੇਵਲੋਕੇ ਵਸਨਕਂ ਪੁਞ੍ਞਂ ਖੀਣਂ, ਅਨਭਿਰਤਿ ਉਪ੍ਪਨ੍ਨਾ, ਤਸ੍ਮਾ ਸਕ੍ਕੇਨ ਸਦ੍ਧਿਂ ਸਲ੍ਲਪਨ੍ਤੋ ਗਾਥਮਾਹ –

੨੦੯.

‘‘ਅਹਂ ਪੁਰੇ ਸਗ੍ਗਗਤੋ ਰਮਾਮਿ, ਨਚ੍ਚੇਹਿ ਗੀਤੇਹਿ ਚ ਵਾਦਿਤੇਹਿ;

ਸੋ ਦਾਨਿ ਅਜ੍ਜ ਨ ਰਮਾਮਿ ਸਗ੍ਗੇ, ਆਯੁਂ ਨੁ ਖੀਣੋ ਮਰਣਂ ਨੁ ਸਨ੍ਤਿਕੇ;

ਉਦਾਹੁ ਮੂਲ਼੍ਹੋਸ੍ਮਿ ਜਨਿਨ੍ਦਸੇਟ੍ਠਾ’’ਤਿ.

ਤਤ੍ਥ ਆਯੁਂ ਨੁ ਖੀਣੋਤਿ ਕਿਂ ਨੁ ਮਮ ਸਰਸੇਨ ਜੀਵਿਤਿਨ੍ਦ੍ਰਿਯਂ ਖੀਣਂ, ਉਦਾਹੁ ਉਪਚ੍ਛੇਦਕਕਮ੍ਮਵਸੇਨ ਮਰਣਂ ਸਨ੍ਤਿਕੇ ਜਾਤਨ੍ਤਿ ਪੁਚ੍ਛਤਿ. ਜਨਿਨ੍ਦਸੇਟ੍ਠਾਤਿ ਜਨਿਨ੍ਦਾਨਂ ਦੇਵਾਨਂ ਸੇਟ੍ਠ.

ਅਥ ਨਂ ਸਕ੍ਕੋ ਆਹ –

੨੧੦.

‘‘ਨ ਤਾਯੁ ਖੀਣਂ ਮਰਣਞ੍ਚ ਦੂਰੇ, ਨ ਚਾਪਿ ਮੂਲ਼੍ਹੋ ਨਰਵੀਰਸੇਟ੍ਠ;

ਤੁਯ੍ਹਞ੍ਚ ਪੁਞ੍ਞਾਨਿ ਪਰਿਤ੍ਤਕਾਨਿ, ਯੇਸਂ ਵਿਪਾਕਂ ਇਧ ਵੇਦਯਿਤ੍ਥੋ.

੨੧੧.

‘‘ਵਸ ਦੇਵਾਨੁਭਾਵੇਨ, ਰਾਜਸੇਟ੍ਠ ਦਿਸਮ੍ਪਤਿ;

ਤਾਵਤਿਂਸੇਸੁ ਦੇਵੇਸੁ, ਭੁਞ੍ਜ ਕਾਮੇ ਅਮਾਨੁਸੇ’’ਤਿ.

ਤਤ੍ਥ ‘‘ਪਰਿਤ੍ਤਕਾਨੀ’’ਤਿ ਇਦਂ ਤੇਨ ਅਤ੍ਤਭਾਵੇਨ ਦੇਵਲੋਕੇ ਵਿਪਾਕਦਾਯਕਾਨਿ ਪੁਞ੍ਞਾਨਿ ਸਨ੍ਧਾਯ ਵੁਤ੍ਤਂ, ਇਤਰਾਨਿ ਪਨਸ੍ਸ ਪੁਞ੍ਞਾਨਿ ਪਥਵਿਯਂ ਪਂਸੁ ਵਿਯ ਅਪ੍ਪਮਾਣਾਨਿ. ਵਸ ਦੇਵਾਨੁਭਾਵੇਨਾਤਿ ਅਹਂ ਤੇ ਅਤ੍ਤਨੋ ਪੁਞ੍ਞਾਨਿ ਮਜ੍ਝੇ ਭਿਨ੍ਦਿਤ੍ਵਾ ਦਸ੍ਸਾਮਿ, ਮਮਾਨੁਭਾਵੇਨ ਵਸਾਤਿ ਤਂ ਸਮਸ੍ਸਾਸੇਨ੍ਤੋ ਆਹ.

ਅਥ ਨਂ ਪਟਿਕ੍ਖਿਪਨ੍ਤੋ ਮਹਾਸਤ੍ਤੋ ਆਹ –

੨੧੨.

‘‘ਯਥਾ ਯਾਚਿਤਕਂ ਯਾਨਂ, ਯਥਾ ਯਾਚਿਤਕਂ ਧਨਂ;

ਏਵਂਸਮ੍ਪਦਮੇਵੇਤਂ, ਯਂ ਪਰਤੋ ਦਾਨਪਚ੍ਚਯਾ.

੨੧੩.

‘‘ਨ ਚਾਹਮੇਤਮਿਚ੍ਛਾਮਿ, ਯਂ ਪਰਤੋ ਦਾਨਪਚ੍ਚਯਾ;

ਸਯਂਕਤਾਨਿ ਪੁਞ੍ਞਾਨਿ, ਤਂ ਮੇ ਆਵੇਣਿਕਂ ਧਨਂ.

੨੧੪.

‘‘ਸੋਹਂ ਗਨ੍ਤ੍ਵਾ ਮਨੁਸ੍ਸੇਸੁ, ਕਾਹਾਮਿ ਕੁਸਲਂ ਬਹੁਂ;

ਦਾਨੇਨ ਸਮਚਰਿਯਾਯ, ਸਂਯਮੇਨ ਦਮੇਨ ਚ;

ਯਂ ਕਤ੍ਵਾ ਸੁਖਿਤੋ ਹੋਤਿ, ਨ ਚ ਪਚ੍ਛਾਨੁਤਪ੍ਪਤੀ’’ਤਿ.

ਤਤ੍ਥ ਯਂ ਪਰਤੋ ਦਾਨਪਚ੍ਚਯਾਤਿ ਯਂ ਪਰੇਨ ਦਿਨ੍ਨਤ੍ਤਾ ਲਬ੍ਭਤਿ, ਤਂ ਯਾਚਿਤਕਸਦਿਸਮੇਵ ਹੋਤਿ. ਯਾਚਿਤਕਞ੍ਹਿ ਤੁਟ੍ਠਕਾਲੇ ਦੇਨ੍ਤਿ, ਅਤੁਟ੍ਠਕਾਲੇ ਅਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤੀਤਿ ਵਦਤਿ. ਸਮਚਰਿਯਾਯਾਤਿ ਕਾਯਾਦੀਹਿ ਪਾਪਸ੍ਸ ਅਕਰਣੇਨ. ਸਂਯਮੇਨਾਤਿ ਸੀਲਸਂਯਮੇਨ. ਦਮੇਨਾਤਿ ਇਨ੍ਦ੍ਰਿਯਦਮਨੇਨ. ਯਂ ਕਤ੍ਵਾਤਿ ਯਂ ਕਰਿਤ੍ਵਾ ਸੁਖਿਤੋ ਚੇਵ ਹੋਤਿ ਨ ਚ ਪਚ੍ਛਾਨੁਤਪ੍ਪਤਿ, ਤਥਾਰੂਪਮੇਵ ਕਮ੍ਮਂ ਕਰਿਸ੍ਸਾਮੀਤਿ.

ਅਥਸ੍ਸ ਵਚਨਂ ਸੁਤ੍ਵਾ ਸਕ੍ਕੋ ਮਾਤਲਿਂ ਆਣਾਪੇਸਿ ‘‘ਗਚ੍ਛ, ਤਾਤ, ਸਾਧਿਨਰਾਜਾਨਂ ਮਿਥਿਲਂ ਨੇਤ੍ਵਾ ਉਯ੍ਯਾਨੇ ਓਤਾਰੇਹੀ’’ਤਿ. ਸੋ ਤਥਾ ਅਕਾਸਿ. ਰਾਜਾ ਉਯ੍ਯਾਨੇ ਚਙ੍ਕਮਤਿ. ਅਥ ਨਂ ਉਯ੍ਯਾਨਪਾਲੋ ਦਿਸ੍ਵਾ ਪੁਚ੍ਛਿਤ੍ਵਾ ਗਨ੍ਤ੍ਵਾ ਨਾਰਦਰਞ੍ਞੋ ਆਰੋਚੇਸਿ. ਸੋ ਰਞ੍ਞੋ ਆਗਤਭਾਵਂ ਸੁਤ੍ਵਾ ‘‘ਤ੍ਵਂ ਪੁਰਤੋ ਗਨ੍ਤ੍ਵਾ ਉਯ੍ਯਾਨਂ ਸਜ੍ਜੇਤ੍ਵਾ ਤਸ੍ਸ ਚ ਮਯ੍ਹਞ੍ਚ ਦ੍ਵੇ ਆਸਨਾਨਿ ਪਞ੍ਞਾਪੇਹੀ’’ਤਿ ਉਯ੍ਯਾਨਪਾਲਂ ਉਯ੍ਯੋਜੇਸਿ. ਸੋ ਤਥਾ ਅਕਾਸਿ. ਅਥ ਨਂ ਰਾਜਾ ਪੁਚ੍ਛਿ ‘‘ਕਸ੍ਸ ਦ੍ਵੇ ਆਸਨਾਨਿ ਪਞ੍ਞਾਪੇਸੀ’’ਤਿ? ‘‘ਏਕਂ ਤੁਮ੍ਹਾਕਂ, ਏਕਂ ਅਮ੍ਹਾਕਂ ਰਞ੍ਞੋ’’ਤਿ. ਅਥ ਨਂ ਰਾਜਾ ‘‘ਕੋ ਅਞ੍ਞੋ ਸਤ੍ਤੋ ਮਮ ਸਨ੍ਤਿਕੇ ਆਸਨੇ ਨਿਸੀਦਿਸ੍ਸਤੀ’’ਤਿ ਵਤ੍ਵਾ ਏਕਸ੍ਮਿਂ ਨਿਸੀਦਿਤ੍ਵਾ ਏਕਸ੍ਮਿਂ ਪਾਦੇ ਠਪੇਸਿ. ਨਾਰਦਰਾਜਾ ਆਗਨ੍ਤ੍ਵਾ ਤਸ੍ਸ ਪਾਦੇ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸੋ ਕਿਰਸ੍ਸ ਸਤ੍ਤਮੋ ਪਨਤ੍ਤਾ. ਤਦਾ ਕਿਰ ਵਸ੍ਸਸਤਾਯੁਕਕਾਲੋਵ ਹੋਤਿ. ਮਹਾਸਤ੍ਤੋ ਪਨ ਅਤ੍ਤਨੋ ਪੁਞ੍ਞਬਲੇਨ ਏਤ੍ਤਕਂ ਕਾਲਂ ਵੀਤਿਨਾਮੇਸਿ. ਸੋ ਨਾਰਦਂ ਹਤ੍ਥੇ ਗਹੇਤ੍ਵਾ ਉਯ੍ਯਾਨੇ ਵਿਚਰਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੨੧੫.

‘‘ਇਮਾਨਿ ਤਾਨਿ ਖੇਤ੍ਤਾਨਿ, ਇਮਂ ਨਿਕ੍ਖਂ ਸੁਕੁਣ੍ਡਲਂ;

ਇਮਾ ਤਾ ਹਰਿਤਾਨੂਪਾ, ਇਮਾ ਨਜ੍ਜੋ ਸਵਨ੍ਤਿਯੋ.

੨੧੬.

‘‘ਇਮਾ ਤਾ ਪੋਕ੍ਖਰਣੀ ਰਮ੍ਮਾ, ਚਕ੍ਕਵਾਕਪਕੂਜਿਤਾ;

ਮਨ੍ਦਾਲਕੇਹਿ ਸਞ੍ਛਨ੍ਨਾ, ਪਦੁਮੁਪ੍ਪਲਕੇਹਿ ਚ;

ਯਸ੍ਸਿਮਾਨਿ ਮਮਾਯਿਂਸੁ, ਕਿਂ ਨੁ ਤੇ ਦਿਸਤਂ ਗਤਾ.

੨੧੭.

‘‘ਤਾਨੀਧ ਖੇਤ੍ਤਾਨਿ ਸੋ ਭੂਮਿਭਾਗੋ, ਤੇਯੇਵ ਆਰਾਮਵਨੂਪਚਾਰਾ;

ਤਮੇਵ ਮਯ੍ਹਂ ਜਨਤਂ ਅਪਸ੍ਸਤੋ, ਸੁਞ੍ਞਂਵ ਮੇ ਨਾਰਦ ਖਾਯਤੇ ਦਿਸਾ’’ਤਿ.

ਤਤ੍ਥ ਖੇਤ੍ਤਾਨੀਤਿ ਭੂਮਿਭਾਗੇ ਸਨ੍ਧਾਯਾਹ. ਇਮਂ ਨਿਕ੍ਖਨ੍ਤਿ ਇਮਂ ਤਾਦਿਸਮੇਵ ਉਦਕਨਿਦ੍ਧਮਨਂ. ਸੁਕੁਣ੍ਡਲਨ੍ਤਿ ਸੋਭਨੇਨ ਮੁਸਲਪਵੇਸਨਕੁਣ੍ਡਲੇਨ ਸਮਨ੍ਨਾਗਤਂ. ਹਰਿਤਾਨੂਪਾਤਿ ਉਦਕਨਿਦ੍ਧਮਨਸ੍ਸ ਉਭੋਸੁ ਪਸ੍ਸੇਸੁ ਹਰਿਤਤਿਣਸਞ੍ਛਨ੍ਨਾ ਅਨੂਪਭੂਮਿਯੋ. ਯਸ੍ਸਿਮਾਨਿ ਮਮਾਯਿਂਸੂਤਿ ਤਾਤ ਨਾਰਦ, ਯੇ ਮਮ ਉਪਟ੍ਠਾਕਾ ਚ ਓਰੋਧਾ ਚ ਇਮਸ੍ਮਿਂ ਉਯ੍ਯਾਨੇ ਮਹਨ੍ਤੇਨ ਯਸੇਨ ਮਯਾ ਸਦ੍ਧਿਂ ਵਿਚਰਨ੍ਤਾ ਇਮਾਨਿ ਠਾਨਾਨਿ ਮਮਾਯਿਂਸੁ ਪਿਯਾਯਿਂਸੁ, ਕਤਰਂ ਨੁ ਤੇ ਦਿਸਤਂ ਗਤਾ, ਕਤ੍ਥ ਤੇ ਪੇਸਿਤਾ. ਤਾਨੀਧ ਖੇਤ੍ਤਾਨੀਤਿ ਇਮਸ੍ਮਿਂ ਉਯ੍ਯਾਨੇ ਤਾਨੇਵ ਏਤਾਨਿ ਉਪਰੋਪਨਕਵਿਰੁਹਨਟ੍ਠਾਨਾਨਿ. ਤੇਯੇਵ ਆਰਾਮਵਨੂਪਚਾਰਾਤਿ ਇਮੇ ਤੇਯੇਵ ਆਰਾਮਵਨੂਪਚਾਰਾ, ਵਿਹਾਰਭੂਮਿਯੋਤਿ ਅਤ੍ਥੋ.

ਅਥ ਨਂ ਨਾਰਦੋ ਆਹ – ‘‘ਦੇਵ, ਤੁਮ੍ਹਾਕਂ ਦੇਵਲੋਕਗਤਾਨਂ ਇਦਾਨਿ ਸਤ੍ਤ ਵਸ੍ਸਸਤਾਨਿ, ਅਹਂ ਵੋ ਸਤ੍ਤਮੋ ਪਨਤ੍ਤਾ, ਤੁਮ੍ਹਾਕਂ ਉਪਟ੍ਠਾਕਾ ਚ ਓਰੋਧਾ ਚ ਮਰਣਮੁਖਂ ਪਤ੍ਤਾ, ਇਦਂ ਵੋ ਅਤ੍ਤਨੋ ਸਨ੍ਤਕਂ ਰਜ੍ਜਂ, ਅਨੁਭਵਥ ਨ’’ਨ੍ਤਿ. ਰਾਜਾ ‘‘ਤਾਤ ਨਾਰਦ, ਨਾਹਂ ਇਧਾਗਚ੍ਛਨ੍ਤੋ ਰਜ੍ਜਤ੍ਥਾਯ ਆਗਤੋ, ਪੁਞ੍ਞਕਰਣਤ੍ਥਾਯਮ੍ਹਿ ਆਗਤੋ, ਅਹਂ ਪੁਞ੍ਞਮੇਵ ਕਰਿਸ੍ਸਾਮੀ’’ਤਿ ਵਤ੍ਵਾ ਗਾਥਾ ਆਹ –

੨੧੮.

‘‘ਦਿਟ੍ਠਾ ਮਯਾ ਵਿਮਾਨਾਨਿ, ਓਭਾਸੇਨ੍ਤਾ ਚਤੁਦ੍ਦਿਸਾ;

ਸਮ੍ਮੁਖਾ ਦੇਵਰਾਜਸ੍ਸ, ਤਿਦਸਾਨਞ੍ਚ ਸਮ੍ਮੁਖਾ.

੨੧੯.

‘‘ਵੁਤ੍ਥਂ ਮੇ ਭਵਨਂ ਦਿਬ੍ਯਂ, ਭੁਤ੍ਤਾ ਕਾਮਾ ਅਮਾਨੁਸਾ;

ਤਾਵਤਿਂਸੇਸੁ ਦੇਵੇਸੁ, ਸਬ੍ਬਕਾਮਸਮਿਦ੍ਧਿਸੁ.

੨੨੦.

‘‘ਸੋਹਂ ਏਤਾਦਿਸਂ ਹਿਤ੍ਵਾ, ਪੁਞ੍ਞਾਯਮ੍ਹਿ ਇਧਾਗਤੋ;

ਧਮ੍ਮਮੇਵ ਚਰਿਸ੍ਸਾਮਿ, ਨਾਹਂ ਰਜ੍ਜੇਨ ਅਤ੍ਥਿਕੋ.

੨੨੧.

‘‘ਅਦਣ੍ਡਾਵਚਰਂ ਮਗ੍ਗਂ, ਸਮ੍ਮਾਸਮ੍ਬੁਦ੍ਧਦੇਸਿਤਂ;

ਤਂ ਮਗ੍ਗਂ ਪਟਿਪਜ੍ਜਿਸ੍ਸਂ, ਯੇਨ ਗਚ੍ਛਨ੍ਤਿ ਸੁਬ੍ਬਤਾ’’ਤਿ.

ਤਤ੍ਥ ਵੁਤ੍ਥਂ ਮੇ ਭਵਨਂ ਦਿਬ੍ਯਨ੍ਤਿ ਵੇਜਯਨ੍ਤਂ ਸਨ੍ਧਾਯ ਆਹ. ਸੋਹਂ ਏਤਾਦਿਸਨ੍ਤਿ ਤਾਤ ਨਾਰਦ, ਸੋਹਂ ਬੁਦ੍ਧਞਾਣੇਨ ਅਪਰਿਚ੍ਛਿਨ੍ਦਨੀਯਂ ਏਵਰੂਪਂ ਕਾਮਗੁਣਸਮ੍ਪਤ੍ਤਿਂ ਪਹਾਯ ਪੁਞ੍ਞਕਰਣਤ੍ਥਾਯ ਇਧਾਗਤੋ. ਅਦਣ੍ਡਾਵਚਰਨ੍ਤਿ ਅਦਣ੍ਡੇਹਿ ਨਿਕ੍ਖਿਤ੍ਤਦਣ੍ਡਹਤ੍ਥੇਹਿ ਅਵਚਰਿਤਬ੍ਬਂ ਸਮ੍ਮਾਦਿਟ੍ਠਿਪੁਰੇਕ੍ਖਾਰਂ ਅਟ੍ਠਙ੍ਗਿਕਂ ਮਗ੍ਗਂ. ਸੁਬ੍ਬਤਾਤਿ ਯੇਨ ਮਗ੍ਗੇਨ ਸੁਬ੍ਬਤਾ ਸਬ੍ਬਞ੍ਞੁਬੁਦ੍ਧਾ ਗਚ੍ਛਨ੍ਤਿ, ਅਹਮ੍ਪਿ ਅਗਤਪੁਬ੍ਬਂ ਦਿਸਂ ਗਨ੍ਤੁਂ ਬੋਧਿਤਲੇ ਨਿਸੀਦਿਤ੍ਵਾ ਤਮੇਵ ਮਗ੍ਗਂ ਪਟਿਪਜ੍ਜਿਸ੍ਸਾਮੀਤਿ.

ਏਵਂ ਬੋਧਿਸਤ੍ਤੋ ਇਮਾ ਗਾਥਾਯੋ ਸਬ੍ਬਞ੍ਞੁਤਞ੍ਞਾਣੇਨ ਸਙ੍ਖਿਪਿਤ੍ਵਾ ਕਥੇਸਿ. ਨਾਰਦੋ ਪੁਨਪਿ ਆਹ – ‘‘ਰਜ੍ਜਂ, ਦੇਵ, ਅਨੁਸਾਸਾ’’ਤਿ. ‘‘ਤਾਤ, ਨ ਮੇ ਰਜ੍ਜੇਨਤ੍ਥੋ, ਸਤ੍ਤ ਵਸ੍ਸਸਤਾਨਿ ਵਿਗਤਂ ਦਾਨਂ ਸਤ੍ਤਾਹੇਨੇਵ ਦਾਤੁਕਾਮਮ੍ਹੀ’’ਤਿ. ਨਾਰਦੋ ‘‘ਸਾਧੂ’’ਤਿ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਮਹਾਦਾਨਂ ਪਟਿਯਾਦੇਸਿ. ਰਾਜਾ ਸਤ੍ਤਾਹਂ ਦਾਨਂ ਦਤ੍ਵਾ ਸਤ੍ਤਮੇ ਦਿਵਸੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇਯੇਵ ਨਿਬ੍ਬਤ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਵਸਿਤਬ੍ਬਯੁਤ੍ਤਕਂ ਉਪੋਸਥਕਮ੍ਮਂ ਨਾਮਾ’’ਤਿ ਦਸ੍ਸੇਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਪੋਸਥਿਕੇਸੁ ਉਪਾਸਕੇਸੁ ਕੇਚਿ ਸੋਤਾਪਤ੍ਤਿਫਲੇ, ਕੇਚਿ ਸਕਦਾਗਾਮਿਫਲੇ, ਕੇਚਿ ਅਨਾਗਾਮਿਫਲੇ ਪਤਿਟ੍ਠਹਿਂਸੁ. ਤਦਾ ਨਾਰਦਰਾਜਾ ਸਾਰਿਪੁਤ੍ਤੋ ਅਹੋਸਿ, ਮਾਤਲਿ ਆਨਨ੍ਦੋ, ਸਕ੍ਕੋ ਅਨੁਰੁਦ੍ਧੋ, ਸਾਧਿਨਰਾਜਾ ਪਨ ਅਹਮੇਵ ਅਹੋਸਿਨ੍ਤਿ.

ਸਾਧਿਨਜਾਤਕਵਣ੍ਣਨਾ ਏਕਾਦਸਮਾ.

[੪੯੫] ੧੨. ਦਸਬ੍ਰਾਹ੍ਮਣਜਾਤਕਵਣ੍ਣਨਾ

ਰਾਜਾ ਅਵੋਚ ਵਿਧੁਰਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਸਦਿਸਦਾਨਂ ਆਰਬ੍ਭ ਕਥੇਸਿ. ਤਂ ਅਟ੍ਠਕਨਿਪਾਤੇ ਆਦਿਤ੍ਤਜਾਤਕੇ (ਜਾ. ੧.੮.੬੯ ਆਦਯੋ) ਵਿਤ੍ਥਾਰਿਤਮੇਵ. ਰਾਜਾ ਕਿਰ ਤਂ ਦਾਨਂ ਦਦਨ੍ਤੋ ਸਤ੍ਥਾਰਂ ਜੇਟ੍ਠਕਂ ਕਤ੍ਵਾ ਪਞ੍ਚ ਭਿਕ੍ਖੁਸਤਾਨਿ ਵਿਚਿਨਿਤ੍ਵਾ ਗਣ੍ਹਿਤ੍ਵਾ ਮਹਾਖੀਣਾਸਵਾਨਂਯੇਵ ਅਦਾਸਿ. ਅਥਸ੍ਸ ਗੁਣਕਥਂ ਕਥੇਨ੍ਤਾ ‘‘ਆਵੁਸੋ, ਰਾਜਾ ਅਸਦਿਸਦਾਨਂ ਦਦਨ੍ਤੋ ਵਿਚਿਨਿਤ੍ਵਾ ਮਹਪ੍ਫਲਟ੍ਠਾਨੇ ਅਦਾਸੀ’’ਤਿ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਯਂ ਕੋਸਲਰਾਜਾ ਮਾਦਿਸਸ੍ਸ ਬੁਦ੍ਧਸ੍ਸ ਉਪਟ੍ਠਾਕੋ ਹੁਤ੍ਵਾ ਵਿਚੇਯ੍ਯਦਾਨਂ ਦੇਤਿ, ਪੋਰਾਣਕਪਣ੍ਡਿਤਾ ਅਨੁਪ੍ਪਨ੍ਨੇ ਬੁਦ੍ਧੇਪਿ ਵਿਚੇਯ੍ਯਦਾਨਂ ਅਦਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕੁਰੁਰਟ੍ਠੇ ਇਨ੍ਦਪਤ੍ਥਨਗਰੇ ਯੁਧਿਟ੍ਠਿਲਗੋਤ੍ਤੋ ਕੋਰਬ੍ਯੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਵਿਧੁਰੋ ਨਾਮ ਅਮਚ੍ਚੋ ਅਤ੍ਥਞ੍ਚ ਧਮ੍ਮਞ੍ਚ ਅਨੁਸਾਸਤਿ. ਰਾਜਾ ਸਕਲਜਮ੍ਬੁਦੀਪਂ ਖੋਭੇਤ੍ਵਾ ਮਹਾਦਾਨਂ ਦੇਤਿ. ਤਂ ਗਹੇਤ੍ਵਾ ਭੁਞ੍ਜਨ੍ਤੇਸੁ ਏਕੋਪਿ ਪਞ੍ਚਸੀਲਮਤ੍ਤਂ ਰਕ੍ਖਨ੍ਤੋ ਨਾਮ ਨਤ੍ਥਿ, ਸਬ੍ਬੇ ਦੁਸ੍ਸੀਲਾਵ, ਦਾਨਂ ਰਾਜਾਨਂ ਨ ਤੋਸੇਤਿ. ਰਾਜਾ ‘‘ਵਿਚੇਯ੍ਯਦਾਨਂ ਮਹਪ੍ਫਲ’’ਨ੍ਤਿ ਸੀਲਵਨ੍ਤਾਨਂ ਦਾਤੁਕਾਮੋ ਹੁਤ੍ਵਾ ਚਿਨ੍ਤੇਸਿ ‘‘ਵਿਧੁਰਪਣ੍ਡਿਤੇਨ ਸਦ੍ਧਿਂ ਮਨ੍ਤਯਿਸ੍ਸਾਮੀ’’ਤਿ. ਸੋ ਤਂ ਉਪਟ੍ਠਾਨਂ ਆਗਤਂ ਆਸਨੇ ਨਿਸੀਦਾਪੇਤ੍ਵਾ ਪਞ੍ਹਂ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਉਪਡ੍ਢਗਾਥਮਾਹ –

੨੨੨.

‘‘ਰਾਜਾ ਅਵੋਚ ਵਿਧੁਰਂ, ਧਮ੍ਮਕਾਮੋ ਯੁਧਿਟ੍ਠਿਲੋ’’ਤਿ;

ਪਰਤੋ ਰਞ੍ਞੋ ਚ ਵਿਧੁਰਸ੍ਸ ਚ ਵਚਨਪਟਿਵਚਨਂ ਹੋਤਿ –

‘‘ਬ੍ਰਾਹ੍ਮਣੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੨੩.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੨੪.

‘‘ਦੁਲ੍ਲਭਾ ਬ੍ਰਾਹ੍ਮਣਾ ਦੇਵ, ਸੀਲਵਨ੍ਤੋ ਬਹੁਸ੍ਸੁਤਾ;

ਵਿਰਤਾ ਮੇਥੁਨਾ ਧਮ੍ਮਾ, ਯੇ ਤੇ ਭੁਞ੍ਜੇਯ੍ਯੁ ਭੋਜਨਂ.

੨੨੫.

‘‘ਦਸ ਖਲੁ ਮਹਾਰਾਜ, ਯਾ ਤਾ ਬ੍ਰਾਹ੍ਮਣਜਾਤਿਯੋ;

ਤੇਸਂ ਵਿਭਙ੍ਗਂ ਵਿਚਯਂ, ਵਿਤ੍ਥਾਰੇਨ ਸੁਣੋਹਿ ਮੇ.

੨੨੬.

‘‘ਪਸਿਬ੍ਬਕੇ ਗਹੇਤ੍ਵਾਨ, ਪੁਣ੍ਣੇ ਮੂਲਸ੍ਸ ਸਂਵੁਤੇ;

ਓਸਧਿਕਾਯੋ ਗਨ੍ਥੇਨ੍ਤਿ, ਨ੍ਹਾਪਯਨ੍ਤਿ ਜਪਨ੍ਤਿ ਚ.

੨੨੭.

‘‘ਤਿਕਿਚ੍ਛਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੨੮.

‘‘ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ, (ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੨੯.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੩੦.

‘‘ਕਿਙ੍ਕਿਣਿਕਾਯੋ ਗਹੇਤ੍ਵਾ, ਘੋਸੇਨ੍ਤਿ ਪੁਰਤੋਪਿ ਤੇ;

ਪੇਸਨਾਨਿਪਿ ਗਚ੍ਛਨ੍ਤਿ, ਰਥਚਰਿਯਾਸੁ ਸਿਕ੍ਖਰੇ.

੨੩੧.

‘‘ਪਰਿਚਾਰਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੩੨.

‘‘ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ, (ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੩੩.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੩੪.

‘‘ਕਮਣ੍ਡਲੁਂ ਗਹੇਤ੍ਵਾਨ, ਵਙ੍ਕਦਣ੍ਡਞ੍ਚ ਬ੍ਰਾਹ੍ਮਣਾ;

ਪਚ੍ਚੁਪੇਸ੍ਸਨ੍ਤਿ ਰਾਜਾਨੋ, ਗਾਮੇਸੁ ਨਿਗਮੇਸੁ ਚ;

ਨਾਦਿਨ੍ਨੇ ਵੁਟ੍ਠਹਿਸ੍ਸਾਮ, ਗਾਮਮ੍ਹਿ ਵਾ ਵਨਮ੍ਹਿ ਵਾ.

੨੩੫.

‘‘ਨਿਗ੍ਗਾਹਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੩੬.

‘‘ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ, (ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੩੭.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੩੮.

‘‘ਪਰੂਲ਼੍ਹਕਚ੍ਛਨਖਲੋਮਾ, ਪਙ੍ਕਦਨ੍ਤਾ ਰਜਸ੍ਸਿਰਾ;

ਓਕਿਣ੍ਣਾ ਰਜਰੇਣੂਹਿ, ਯਾਚਕਾ ਵਿਚਰਨ੍ਤਿ ਤੇ.

੨੩੯.

‘‘ਖਾਣੁਘਾਤਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੪੦.

‘‘ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ, (ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੪੧.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੪੨.

‘‘ਹਰੀਤਕਂ ਆਮਲਕਂ, ਅਮ੍ਬਂ ਜਮ੍ਬੁਂ ਵਿਭੀਤਕਂ;

ਲਬੁਜਂ ਦਨ੍ਤਪੋਣਾਨਿ, ਬੇਲੁਵਾ ਬਦਰਾਨਿ ਚ.

੨੪੩.

‘‘ਰਾਜਾਯਤਨਂ ਉਚ੍ਛੁਪੁਟਂ, ਧੂਮਨੇਤ੍ਤਂ ਮਧੁਅਞ੍ਜਨਂ;

ਉਚ੍ਚਾਵਚਾਨਿ ਪਣਿਯਾਨਿ, ਵਿਪਣੇਨ੍ਤਿ ਜਨਾਧਿਪ.

੨੪੪.

‘‘ਵਾਣਿਜਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੪੫.

‘‘ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ, (ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੪੬.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੪੭.

‘‘ਕਸਿਵਾਣਿਜ੍ਜਂ ਕਾਰੇਨ੍ਤਿ, ਪੋਸਯਨ੍ਤਿ ਅਜੇਲ਼ਕੇ;

ਕੁਮਾਰਿਯੋ ਪਵੇਚ੍ਛਨ੍ਤਿ, ਵਿਵਾਹਨ੍ਤਾਵਹਨ੍ਤਿ ਚ.

੨੪੮.

‘‘ਸਮਾ ਅਮ੍ਬਟ੍ਠਵੇਸ੍ਸੇਹਿ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੪੯.

‘‘ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ, (ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੫੦.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੫੧.

‘‘ਨਿਕ੍ਖਿਤ੍ਤਭਿਕ੍ਖਂ ਭੁਞ੍ਜਨ੍ਤਿ, ਗਾਮੇਸ੍ਵੇਕੇ ਪੁਰੋਹਿਤਾ;

ਬਹੂ ਤੇ ਪਰਿਪੁਚ੍ਛਨ੍ਤਿ, ਅਣ੍ਡਚ੍ਛੇਦਾ ਨਿਲਞ੍ਛਕਾ.

੨੫੨.

‘‘ਪਸੂਪਿ ਤਤ੍ਥ ਹਞ੍ਞਨ੍ਤਿ, ਮਹਿਂਸਾ ਸੂਕਰਾ ਅਜਾ;

ਗੋਘਾਤਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੫੩.

‘‘ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ, (ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੫੪.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੫੫.

‘‘ਅਸਿਚਮ੍ਮਂ ਗਹੇਤ੍ਵਾਨ, ਖਗ੍ਗਂ ਪਗ੍ਗਯ੍ਹ ਬ੍ਰਾਹ੍ਮਣਾ;

ਵੇਸ੍ਸਪਥੇਸੁ ਤਿਟ੍ਠਨ੍ਤਿ, ਸਤ੍ਥਂ ਅਬ੍ਬਾਹਯਨ੍ਤਿਪਿ.

੨੫੬.

‘‘ਸਮਾ ਗੋਪਨਿਸਾਦੇਹਿ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੫੭.

‘‘ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ, (ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੫੮.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੫੯.

‘‘ਅਰਞ੍ਞੇ ਕੁਟਿਕਂ ਕਤ੍ਵਾ, ਕੁਟਾਨਿ ਕਾਰਯਨ੍ਤਿ ਤੇ;

ਸਸਬਿਲ਼ਾਰੇ ਬਾਧੇਨ੍ਤਿ, ਆਗੋਧਾ ਮਚ੍ਛਕਚ੍ਛਪਂ.

੨੬੦.

‘‘ਤੇ ਲੁਦ੍ਦਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੬੧.

‘‘ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ, (ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੬੨.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੬੩.

‘‘ਅਞ੍ਞੇ ਧਨਸ੍ਸ ਕਾਮਾ ਹਿ, ਹੇਟ੍ਠਾਮਞ੍ਚੇ ਪਸਕ੍ਕਿਤਾ;

ਰਾਜਾਨੋ ਉਪਰਿ ਨ੍ਹਾਯਨ੍ਤਿ, ਸੋਮਯਾਗੇ ਉਪਟ੍ਠਿਤੇ.

੨੬੪.

‘‘ਮਲਮਜ੍ਜਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੬੫.

‘‘ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ, (ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੬੬.

‘‘ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲ’’ਨ੍ਤਿ.

ਤਤ੍ਥ ਸੀਲਵਨ੍ਤੇਤਿ ਮਗ੍ਗੇਨਾਗਤਸੀਲੇ. ਬਹੁਸ੍ਸੁਤੇਤਿ ਪਟਿਵੇਧਬਹੁਸ੍ਸੁਤੇ. ਦਕ੍ਖਿਣਨ੍ਤਿ ਦਾਨਂ. ਯੇ ਤੇਤਿ ਯੇ ਧਮ੍ਮਿਕਾ ਸਮਣਬ੍ਰਾਹ੍ਮਣਾ ਤਵ ਦਾਨਂ ਭੁਞ੍ਜੇਯ੍ਯੁਂ, ਤੇ ਦੁਲ੍ਲਭਾ. ਬ੍ਰਾਹ੍ਮਣਜਾਤਿਯੋਤਿ ਬ੍ਰਾਹ੍ਮਣਕੁਲਾਨਿ. ਤੇਸਂ ਵਿਭਙ੍ਗਂ ਵਿਚਯਨ੍ਤਿ ਤੇਸਂ ਬ੍ਰਾਹ੍ਮਣਾਨਂ ਵਿਭਙ੍ਗਂ ਮਮ ਪਞ੍ਞਾਯ ਵਿਚਿਤਭਾਵਂ ਵਿਤ੍ਥਾਰੇਨ ਸੁਣੋਹਿ. ਸਂਵੁਤੇਤਿ ਬਦ੍ਧਮੁਖੇ. ਓਸਧਿਕਾਯੋ ਗਨ੍ਥੇਨ੍ਤੀਤਿ ‘‘ਇਦਂ ਇਮਸ੍ਸ ਰੋਗਸ੍ਸ ਭੇਸਜ੍ਜਂ, ਇਦਂ ਇਮਸ੍ਸ ਰੋਗਸ੍ਸ ਭੇਸਜ੍ਜ’’ਨ੍ਤਿ ਏਵਂ ਸਿਲੋਕੇ ਬਨ੍ਧਿਤ੍ਵਾ ਮਨੁਸ੍ਸਾਨਂ ਦੇਨ੍ਤਿ. ਨ੍ਹਾਪਯਨ੍ਤੀਤਿ ਨਹਾਪਨਂ ਨਾਮ ਕਰੋਨ੍ਤਿ. ਜਪਨ੍ਤਿ ਚਾਤਿ ਭੂਤਵਿਜ੍ਜਂ ਪਰਿਵਤ੍ਤੇਨ੍ਤਿ. ਤਿਕਿਚ੍ਛਕਸਮਾਤਿ ਵੇਜ੍ਜਸਦਿਸਾ. ਤੇਪਿ ਵੁਚ੍ਚਨ੍ਤੀਤਿ ਤੇਪਿ ‘‘ਬ੍ਰਾਹ੍ਮਣਾ ਵਾ ਮਯਂ, ਅਬ੍ਰਾਹ੍ਮਣਾ ਵਾ’’ਤਿ ਅਜਾਨਿਤ੍ਵਾ ਵੇਜ੍ਜਕਮ੍ਮੇਨ ਜੀਵਿਕਂ ਕਪ੍ਪੇਨ੍ਤਾ ਵੋਹਾਰੇਨ ‘‘ਬ੍ਰਾਹ੍ਮਣਾ’’ਤਿ ਵੁਚ੍ਚਨ੍ਤਿ. ਅਕ੍ਖਾਤਾ ਤੇਤਿ ਇਮੇ ਤੇ ਮਯਾ ਵੇਜ੍ਜਬ੍ਰਾਹ੍ਮਣਾ ਨਾਮ ਅਕ੍ਖਾਤਾ. ਨਿਪਤਾਮਸੇਤਿ ਵਦੇਹਿ ਦਾਨਿ, ਕਿਂ ਤਾਦਿਸੇ ਬ੍ਰਾਹ੍ਮਣੇ ਨਿਪਤਾਮ, ਨਿਮਨ੍ਤਨਤ੍ਥਾਯ ਉਪਸਙ੍ਕਮਾਮ, ਅਤ੍ਥਿ ਤੇ ਏਤੇਹਿ ਅਤ੍ਥੋਤਿ ਪੁਚ੍ਛਤਿ. ਬ੍ਰਹ੍ਮਞ੍ਞਾਤਿ ਬ੍ਰਾਹ੍ਮਣਧਮ੍ਮਤੋ. ਨ ਤੇ ਵੁਚ੍ਚਨ੍ਤੀਤਿ ਤੇ ਬਾਹਿਤਪਾਪਤਾਯ ਬ੍ਰਾਹ੍ਮਣਾ ਨਾਮ ਨ ਵੁਚ੍ਚਨ੍ਤਿ.

ਕਿਙ੍ਕਿਣਿਕਾਯੋਤਿ ਮਹਾਰਾਜ, ਅਪਰੇਪਿ ਬ੍ਰਾਹ੍ਮਣਾ ਅਤ੍ਤਨੋ ਬ੍ਰਾਹ੍ਮਣਧਮ੍ਮਂ ਛਡ੍ਡੇਤ੍ਵਾ ਜੀਵਿਕਤ੍ਥਾਯ ਰਾਜਰਾਜਮਹਾਮਤ੍ਤਾਨਂ ਪੁਰਤੋ ਕਂਸਤਾਲ਼ੇ ਗਹੇਤ੍ਵਾ ਵਾਦੇਨ੍ਤਾ ਗਾਯਨ੍ਤਾ ਗਚ੍ਛਨ੍ਤਿ. ਪੇਸਨਾਨਿਪੀਤਿ ਦਾਸਕਮ੍ਮਕਰਾ ਵਿਯ ਪੇਸਨਾਨਿਪਿ ਗਚ੍ਛਨ੍ਤਿ. ਰਥਚਰਿਯਾਸੂਤਿ ਰਥਸਿਪ੍ਪਂ ਸਿਕ੍ਖਨ੍ਤਿ. ਪਰਿਚਾਰਕਸਮਾਤਿ ਦਾਸਕਮ੍ਮਕਰਸਦਿਸਾ. ਵਙ੍ਕਦਣ੍ਡਨ੍ਤਿ ਵਙ੍ਕਦਣ੍ਡਕਟ੍ਠਂ. ਪਚ੍ਚੁਪੇਸ੍ਸਨ੍ਤਿ ਰਾਜਾਨੋਤਿ ਰਾਜਰਾਜਮਹਾਮਤ੍ਤੇ ਪਟਿਚ੍ਚ ਆਗਮ੍ਮ ਸਨ੍ਧਾਯ ਉਪਸੇਵਨ੍ਤਿ. ਗਾਮੇਸੁ ਨਿਗਮੇਸੁ ਚਾਤਿ ਤੇਸਂ ਨਿਵੇਸਨਦ੍ਵਾਰੇ ਨਿਸੀਦਨ੍ਤਿ. ਨਿਗ੍ਗਾਹਕਸਮਾਤਿ ਨਿਗ੍ਗਹਕਾਰਕੇਹਿ ਬਲਿਸਾਧਕਰਾਜਪੁਰਿਸੇਹਿ ਸਮਾ. ਯਥਾ ਤੇ ਪੁਰਿਸਾ ‘‘ਅਗ੍ਗਹੇਤ੍ਵਾ ਨ ਗਮਿਸ੍ਸਾਮਾ’’ਤਿ ਨਿਗ੍ਗਹਂ ਕਤ੍ਵਾ ਗਣ੍ਹਨ੍ਤਿਯੇਵ, ਤਥਾ ‘‘ਗਾਮੇ ਵਾ ਵਨੇ ਵਾ ਅਲਦ੍ਧਾ ਮਰਨ੍ਤਾਪਿ ਨ ਵੁਟ੍ਠਹਿਸ੍ਸਾਮਾ’’ਤਿ ਉਪਵਸਨ੍ਤਿ. ਤੇਪੀਤਿ ਤੇਪਿ ਬਲਿਸਾਧਕਸਦਿਸਾ ਪਾਪਧਮ੍ਮਾ.

ਰਜਰੇਣੂਹੀਤਿ ਰਜੇਹਿ ਚ ਪਂਸੂਹਿ ਚ ਓਕਿਣ੍ਣਾ. ਯਾਚਕਾਤਿ ਧਨਯਾਚਕਾ. ਖਾਣੁਘਾਤਸਮਾਤਿ ਮਲੀਨਸਰੀਰਤਾਯ ਝਾਮਖੇਤ੍ਤੇ ਖਾਣੁਘਾਤਕੇਹਿ ਭੂਮਿਂ ਖਣਿਤ੍ਵਾ ਝਾਮਖਾਣੁਕਉਦ੍ਧਰਣਕਮਨੁਸ੍ਸੇਹਿ ਸਮਾਨਾ, ‘‘ਅਗ੍ਗਹੇਤ੍ਵਾ ਨ ਗਮਿਸ੍ਸਾਮਾ’’ਤਿ ਨਿਚ੍ਚਲਭਾਵੇਨ ਠਿਤਤ੍ਤਾ ਨਿਖਣਿਤ੍ਵਾ ਠਪਿਤਵਤਿਖਾਣੁਕਾ ਵਿਯਾਤਿਪਿ ਅਤ੍ਥੋ. ਤੇਪੀਤਿ ਤੇਪਿ ਤਥਾ ਲਦ੍ਧਂ ਧਨਂ ਵਡ੍ਢਿਯਾ ਪਯੋਜੇਤ੍ਵਾ ਪੁਨ ਤਥੇਵ ਠਿਤਤ੍ਤਾ ਦੁਸ੍ਸੀਲਾ ਬ੍ਰਾਹ੍ਮਣਾ.

ਉਚ੍ਛੁਪੁਟਨ੍ਤਿ ਉਚ੍ਛੁਞ੍ਚੇਵ ਫਾਣਿਤਪੁਟਞ੍ਚ. ਮਧੁਅਞ੍ਜਨਨ੍ਤਿ ਮਧੁਞ੍ਚੇਵ ਅਞ੍ਜਨਞ੍ਚ. ਉਚ੍ਚਾਵਚਾਨੀਤਿ ਮਹਗ੍ਘਅਪ੍ਪਗ੍ਘਾਨਿ. ਪਣਿਯਾਨੀਤਿ ਭਣ੍ਡਾਨਿ. ਵਿਪਣੇਨ੍ਤੀਤਿ ਵਿਕ੍ਕਿਣਨ੍ਤਿ. ਤੇਪੀਤਿ ਤੇਪਿ ਇਮਾਨਿ ਏਤ੍ਤਕਾਨਿ ਵਿਕ੍ਕਿਣਿਤ੍ਵਾ ਜੀਵਿਕਕਪ੍ਪਕਾ ਵਾਣਿਜਕਬ੍ਰਾਹ੍ਮਣਾ. ਪੋਸਯਨ੍ਤੀਤਿ ਗੋਰਸਵਿਕ੍ਕਯੇਨ ਜੀਵਿਕਕਪ੍ਪਨਤ੍ਥਂ ਪੋਸੇਨ੍ਤਿ. ਪਵੇਚ੍ਛਨ੍ਤੀਤਿ ਅਤ੍ਤਨੋ ਧੀਤਰੋ ਹਿਰਞ੍ਞਸੁਵਣ੍ਣਂ ਗਹੇਤ੍ਵਾ ਪਰੇਸਂ ਦੇਨ੍ਤਿ. ਤੇ ਏਵਂ ਪਰੇਸਂ ਦਦਮਾਨਾ ਵਿਵਾਹਨ੍ਤਿ ਨਾਮ, ਅਤ੍ਤਨੋ ਪੁਤ੍ਤਾਨਂ ਅਤ੍ਥਾਯ ਗਣ੍ਹਮਾਨਾ ਆਵਾਹਨ੍ਤਿ ਨਾਮ. ਅਮ੍ਬਟ੍ਠਵੇਸ੍ਸੇਹੀਤਿ ਕੁਟੁਮ੍ਬਿਕੇਹਿ ਚੇਵ ਗਹਪਤੀਹਿ ਚ ਸਮਾ, ਤੇਪਿ ਵੋਹਾਰਵਸੇਨ ‘‘ਬ੍ਰਾਹ੍ਮਣਾ’’ਤਿ ਵੁਚ੍ਚਨ੍ਤਿ.

ਨਿਕ੍ਖਿਤ੍ਤਭਿਕ੍ਖਨ੍ਤਿ ਗਾਮਪੁਰੋਹਿਤਾ ਹੁਤ੍ਵਾ ਅਤ੍ਤਨੋ ਅਤ੍ਥਾਯ ਨਿਬਦ੍ਧਭਿਕ੍ਖਂ. ਬਹੂ ਤੇਤਿ ਬਹੂ ਜਨਾ ਏਤੇ ਗਾਮਪੁਰੋਹਿਤੇ ਨਕ੍ਖਤ੍ਤਮੁਹੁਤ੍ਤਮਙ੍ਗਲਾਨਿ ਪੁਚ੍ਛਨ੍ਤਿ. ਅਣ੍ਡਚ੍ਛੇਦਾ ਨਿਲਞ੍ਛਕਾਤਿ ਭਤਿਂ ਗਹੇਤ੍ਵਾ ਬਲਿਬਦ੍ਦਾਨਂ ਅਣ੍ਡਚ੍ਛੇਦਕਾ ਚੇਵ ਤਿਸੂਲਾਦਿਅਙ੍ਕਕਰਣੇਨ ਲਞ੍ਛਕਾ ਚ, ਲਕ੍ਖਣਕਾਰਕਾਤਿ ਅਤ੍ਥੋ. ਤਤ੍ਥਾਤਿ ਤੇਸਂ ਗਾਮਪੁਰੋਹਿਤਾਨਂ ਗੇਹੇਸੁ ਮਂਸਵਿਕ੍ਕਿਣਨਤ੍ਥਂ ਏਤੇ ਪਸੁਆਦਯੋਪਿ ਹਞ੍ਞਨ੍ਤਿ. ਤੇਪੀਤਿ ਤੇਪਿ ਗੋਘਾਤਕਸਮਾ ਬ੍ਰਾਹ੍ਮਣਾਤਿ ਵੁਚ੍ਚਨ੍ਤਿ.

ਅਸਿਚਮ੍ਮਨ੍ਤਿ ਅਸਿਲਟ੍ਠਿਞ੍ਚੇਵ ਕਣ੍ਡਵਾਰਣਞ੍ਚ. ਵੇਸ੍ਸਪਥੇਸੂਤਿ ਵਾਣਿਜਾਨਂ ਗਮਨਮਗ੍ਗੇਸੁ. ਸਤ੍ਥਂ ਅਬ੍ਬਾਹਯਨ੍ਤੀਤਿ ਸਤ੍ਥਵਾਹਾਨਂ ਹਤ੍ਥਤੋ ਸਤਮ੍ਪਿ ਸਹਸ੍ਸਮ੍ਪਿ ਗਹੇਤ੍ਵਾ ਸਤ੍ਥੇ ਚੋਰਾਟਵਿਂ ਅਤਿਬਾਹੇਨ੍ਤਿ. ਗੋਪਨਿਸਾਦੇਹੀਤਿ ਗੋਪਾਲਕੇਹਿ ਚੇਵ ਨਿਸਾਦੇਹਿ ਚ ਗਾਮਘਾਤਕਚੋਰੇਹਿ ਸਮਾਤਿ ਵੁਤ੍ਤਂ. ਤੇਪੀਤਿ ਤੇਪਿ ਏਵਰੂਪਾ ਬ੍ਰਾਹ੍ਮਣਾਤਿ ਵੁਚ੍ਚਨ੍ਤਿ. ਕੁਟਾਨਿ ਕਾਰਯਨ੍ਤਿ ਤੇਤਿ ਕੂਟਪਾਸਾਦੀਨਿ ਰੋਪੇਨ੍ਤਿ. ਸਸਬਿਲ਼ਾਰੇਤਿ ਸਸੇ ਚੇਵ ਬਿਲ਼ਾਰੇ ਚ. ਏਤੇਨ ਥਲਚਰੇ ਮਿਗੇ ਦਸ੍ਸੇਤਿ. ਆਗੋਧਾ ਮਚ੍ਛਕਚ੍ਛਪਨ੍ਤਿ ਥਲਜੇਸੁ ਤਾਵ ਆਗੋਧਤੋ ਮਹਨ੍ਤੇ ਚ ਖੁਦ੍ਦਕੇ ਚ ਪਾਣਯੋ ਬਾਧੇਨ੍ਤਿ ਮਾਰੇਨ੍ਤਿ, ਜਲਜੇਸੁ ਮਚ੍ਛਕਚ੍ਛਪੇ. ਤੇਪੀਤਿ ਤੇਪਿ ਲੁਦ੍ਦਕਸਮਾ ਬ੍ਰਾਹ੍ਮਣਾਤਿ ਵੁਚ੍ਚਨ੍ਤਿ.

ਅਞ੍ਞੇ ਧਨਸ੍ਸ ਕਾਮਾ ਹੀਤਿ ਅਪਰੇ ਬ੍ਰਾਹ੍ਮਣਾ ਧਨਂ ਪਤ੍ਥੇਨ੍ਤਾ. ਹੇਟ੍ਠਾਮਞ੍ਚੇ ਪਸਕ੍ਕਿਤਾਤਿ ‘‘ਕਲਿਪਵਾਹਕਮ੍ਮਂ ਕਾਰੇਸ੍ਸਾਮਾ’’ਤਿ ਰਤਨਮਯਂ ਮਞ੍ਚਂ ਕਾਰੇਤ੍ਵਾ ਤਸ੍ਸ ਹੇਟ੍ਠਾ ਨਿਪਨ੍ਨਾ ਅਚ੍ਛਨ੍ਤਿ. ਅਥ ਨੇਸਂ ਸੋਮਯਾਗੇ ਉਪਟ੍ਠਿਤੇ ਰਾਜਾਨੋ ਉਪਰਿ ਨਹਾਯਨ੍ਤਿ, ਤੇ ਕਿਰ ਸੋਮਯਾਗੇ ਨਿਟ੍ਠਿਤੇ ਆਗਨ੍ਤ੍ਵਾ ਤਸ੍ਮਿਂ ਮਞ੍ਚੇ ਨਿਸੀਦਨ੍ਤਿ. ਅਥ ਨੇ ਅਞ੍ਞੇ ਬ੍ਰਾਹ੍ਮਣਾ ‘‘ਕਲਿਂ ਪਵਾਹੇਸ੍ਸਾਮਾ’’ਤਿ ਨਹਾਪੇਨ੍ਤਿ. ਰਤਨਮਞ੍ਚੋ ਚੇਵ ਰਞ੍ਞੋ ਰਾਜਾਲਙ੍ਕਾਰੋ ਚ ਸਬ੍ਬੋ ਹੇਟ੍ਠਾਮਞ੍ਚੇ ਨਿਪਨ੍ਨਸ੍ਸੇਵ ਹੋਤਿ. ਤੇਪੀਤਿ ਤੇਪਿ ਮਲਮਜ੍ਜਕੇਹਿ ਨਹਾਪਿਤੇਹਿ ਸਦਿਸਾ ਬ੍ਰਾਹ੍ਮਣਾਤਿ ਵੁਚ੍ਚਨ੍ਤਿ.

ਏਵਞ੍ਚਿਮੇ ਵੋਹਾਰਮਤ੍ਤਬ੍ਰਾਹ੍ਮਣੇ ਦਸ੍ਸੇਤ੍ਵਾ ਇਦਾਨਿ ਪਰਮਤ੍ਥਬ੍ਰਾਹ੍ਮਣੇ ਦਸ੍ਸੇਨ੍ਤੋ ਦ੍ਵੇ ਗਾਥਾ ਅਭਾਸਿ –

੨੬੭.

‘‘ਅਤ੍ਥਿ ਖੋ ਬ੍ਰਾਹ੍ਮਣਾ ਦੇਵ, ਸੀਲਵਨ੍ਤੋ ਬਹੁਸ੍ਸੁਤਾ;

ਵਿਰਤਾ ਮੇਥੁਨਾ ਧਮ੍ਮਾ, ਯੇ ਤੇ ਭੁਞ੍ਜੇਯ੍ਯੁ ਭੋਜਨਂ.

੨੬੮.

‘‘ਏਕਞ੍ਚ ਭਤ੍ਤਂ ਭੁਞ੍ਜਨ੍ਤਿ, ਨ ਚ ਮਜ੍ਜਂ ਪਿਵਨ੍ਤਿ ਤੇ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ’’ਤਿ.

ਤਤ੍ਥ ਸੀਲਵਨ੍ਤੋਤਿ ਅਰਿਯਸੀਲੇਨ ਸਮਨ੍ਨਾਗਤਾ. ਬਹੁਸ੍ਸੁਤਾਤਿ ਪਟਿਵੇਧਬਾਹੁਸਚ੍ਚੇਨ ਸਮਨ੍ਨਾਗਤਾ. ਤਾਦਿਸੇਤਿ ਏਵਰੂਪੇ ਬਾਹਿਤਪਾਪੇ ਪਚ੍ਚੇਕਬੁਦ੍ਧਬ੍ਰਾਹ੍ਮਣੇ ਨਿਮਨ੍ਤਨਤ੍ਥਾਯ ਉਪਸਙ੍ਕਮਾਮਾਤਿ.

ਰਾਜਾ ਤਸ੍ਸ ਕਥਂ ਸੁਤ੍ਵਾ ਪੁਚ੍ਛਿ ‘‘ਸਮ੍ਮ ਵਿਧੁਰ, ਏਵਰੂਪਾ ਅਗ੍ਗਦਕ੍ਖਿਣੇਯ੍ਯਾ ਬ੍ਰਾਹ੍ਮਣਾ ਕਹਂ ਵਸਨ੍ਤੀ’’ਤਿ? ਉਤ੍ਤਰਹਿਮਵਨ੍ਤੇ ਨਨ੍ਦਮੂਲਕਪਬ੍ਭਾਰੇ, ਮਹਾਰਾਜਾਤਿ. ‘‘ਤੇਨ ਹਿ, ਪਣ੍ਡਿਤ, ਤਵ ਬਲੇਨ ਮਯ੍ਹਂ ਤੇ ਬ੍ਰਾਹ੍ਮਣੇ ਪਰਿਯੇਸਾ’’ਤਿ ਤੁਟ੍ਠਮਾਨਸੋ ਗਾਥਮਾਹ –

੨੬੯.

‘‘ਏਤੇ ਖੋ ਬ੍ਰਾਹ੍ਮਣਾ ਵਿਧੁਰ, ਸੀਸਵਨ੍ਤੋ ਬਹੁਸ੍ਸੁਤਾ;

ਏਤੇ ਵਿਧੁਰ ਪਰਿਯੇਸ, ਖਿਪ੍ਪਞ੍ਚ ਨੇ ਨਿਮਨ੍ਤਯਾ’’ਤਿ.

ਮਹਾਸਤ੍ਤੋ ‘‘ਸਾਧੂ’’ਤਿ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ‘‘ਤੇਨ ਹਿ, ਮਹਾਰਾਜ, ਨਗਰਂ ਅਲਙ੍ਕਾਰਾਪੇਤ੍ਵਾ ਸਬ੍ਬੇ ਨਗਰਵਾਸਿਨੋ ਦਾਨਂ ਦਤ੍ਵਾ ਉਪੋਸਥਂ ਅਧਿਟ੍ਠਾਯ ਸਮਾਦਿਨ੍ਨਸੀਲਾ ਹੋਨ੍ਤੂ’’ਤਿ ਭੇਰਿਂ ਚਰਾਪੇਤ੍ਵਾ ‘‘ਤੁਮ੍ਹੇਪਿ ਸਦ੍ਧਿਂ ਪਰਿਜਨੇਨ ਉਪੋਸਥਂ ਸਮਾਦਿਯਥਾ’’ਤਿ ਵਤ੍ਵਾ ਸਯਂ ਪਾਤੋਵ ਭੁਞ੍ਜਿਤ੍ਵਾ ਉਪੋਸਥਂ ਸਮਾਦਾਯ ਸਾਯਨ੍ਹਸਮਯੇ ਜਾਤਿਪੁਪ੍ਫਪੁਣ੍ਣਂ ਸੁਵਣ੍ਣਸਮੁਗ੍ਗਂ ਆਹਰਾਪੇਤ੍ਵਾ ਰਞ੍ਞਾ ਸਦ੍ਧਿਂ ਪਞ੍ਚਪਤਿਟ੍ਠਿਤਂ ਪਤਿਟ੍ਠਹਿਤ੍ਵਾ ਪਚ੍ਚੇਕਬੁਦ੍ਧਾਨਂ ਗੁਣੇ ਅਨੁਸ੍ਸਰਿਤ੍ਵਾ ਵਨ੍ਦਿਤ੍ਵਾ ‘‘ਉਤ੍ਤਰਹਿਮਵਨ੍ਤੇ ਨਨ੍ਦਮੂਲਕਪਬ੍ਭਾਰਵਾਸਿਨੋ ਪਞ੍ਚਸਤਾ ਪਚ੍ਚੇਕਬੁਦ੍ਧਾ ਸ੍ਵੇ ਅਮ੍ਹਾਕਂ ਭਿਕ੍ਖਂ ਗਣ੍ਹਨ੍ਤੂ’’ਤਿ ਨਿਮਨ੍ਤੇਤ੍ਵਾ ਆਕਾਸੇ ਅਟ੍ਠ ਪੁਪ੍ਫਮੁਟ੍ਠਿਯੋ ਵਿਸ੍ਸਜ੍ਜੇਸਿ. ਤਦਾ ਤਤ੍ਥ ਪਞ੍ਚਸਤਾ ਪਚ੍ਚੇਕਬੁਦ੍ਧਾ ਵਸਨ੍ਤਿ, ਪੁਪ੍ਫਾਨਿ ਗਨ੍ਤ੍ਵਾ ਤੇਸਂ ਉਪਰਿ ਪਤਿਂਸੁ. ਤੇ ਆਵਜ੍ਜੇਨ੍ਤਾ ਤਂ ਕਾਰਣਂ ਞਤ੍ਵਾ ‘‘ਮਾਰਿਸਾ, ਵਿਧੁਰਪਣ੍ਡਿਤੇਨ ਨਿਮਨ੍ਤਿਤਮ੍ਹ, ਨ ਖੋ ਪਨੇਸ ਇਤ੍ਤਰਸਤ੍ਤੋ, ਬੁਦ੍ਧਙ੍ਕੁਰੋ ਏਸ, ਇਮਸ੍ਮਿਂਯੇਵ ਕਪ੍ਪੇ ਬੁਦ੍ਧੋ ਭਵਿਸ੍ਸਤਿ, ਕਰਿਸ੍ਸਾਮਸ੍ਸ ਸਙ੍ਗਹ’’ਨ੍ਤਿ ਨਿਮਨ੍ਤਨਂ ਅਧਿਵਾਸਯਿਂਸੁ. ਮਹਾਸਤ੍ਤੋ ਪੁਪ੍ਫਾਨਂ ਅਨਾਗਮਨਸਞ੍ਞਾਯ ਅਧਿਵਾਸਿਤਭਾਵਂ ਞਤ੍ਵਾ ‘‘ਮਹਾਰਾਜ, ਸ੍ਵੇ ਪਚ੍ਚੇਕਬੁਦ੍ਧਾ ਆਗਮਿਸ੍ਸਨ੍ਤਿ, ਸਕ੍ਕਾਰਸਮ੍ਮਾਨਂ ਕਰੋਹੀ’’ਤਿ ਆਹ. ਰਾਜਾ ਪੁਨਦਿਵਸੇ ਮਹਾਸਕ੍ਕਾਰਂ ਕਤ੍ਵਾ ਮਹਾਤਲੇ ਮਹਾਰਹਾਨਿ ਆਸਨਾਨਿ ਪਞ੍ਞਪੇਸਿ. ਪਚ੍ਚੇਕਬੁਦ੍ਧਾ ਅਨੋਤਤ੍ਤਦਹੇ ਕਤਸਰੀਰਪਟਿਜਗ੍ਗਨਾ ਵੇਲਂ ਸਲ੍ਲਕ੍ਖੇਤ੍ਵਾ ਆਕਾਸੇਨਾਗਨ੍ਤ੍ਵਾ ਰਾਜਙ੍ਗਣੇ ਓਤਰਿਂਸੁ. ਰਾਜਾ ਚ ਬੋਧਿਸਤ੍ਤੋ ਚ ਪਸਨ੍ਨਮਾਨਸਾ ਤੇਸਂ ਹਤ੍ਥਤੋ ਪਤ੍ਤਾਨਿ ਗਹੇਤ੍ਵਾ ਪਾਸਾਦਂ ਆਰੋਪੇਤ੍ਵਾ ਨਿਸੀਦਾਪੇਤ੍ਵਾ ਦਕ੍ਖਿਣੋਦਕਂ ਦਤ੍ਵਾ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਪਰਿਵਿਸਿਂਸੁ. ਭਤ੍ਤਕਿਚ੍ਚਪਰਿਯੋਸਾਨੇ ਚ ਪੁਨਦਿਵਸਤ੍ਥਾਯਾਤਿ ਏਵਂ ਸਤ੍ਤ ਦਿਵਸੇ ਨਿਮਨ੍ਤੇਤ੍ਵਾ ਮਹਾਦਾਨਂ ਦਤ੍ਵਾ ਸਤ੍ਤਮੇ ਦਿਵਸੇ ਸਬ੍ਬਪਰਿਕ੍ਖਾਰੇ ਅਦਂਸੁ. ਤੇ ਅਨੁਮੋਦਨਂ ਕਤ੍ਵਾ ਆਕਾਸੇਨ ਤਤ੍ਥੇਵ ਗਤਾ, ਪਰਿਕ੍ਖਾਰਾਪਿ ਤੇਹਿ ਸਦ੍ਧਿਂਯੇਵ ਗਤਾ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਕੋਸਲਰਞ੍ਞੋ ਮਮ ਉਪਟ੍ਠਾਕਸ੍ਸ ਸਤੋ ਵਿਚੇਯ੍ਯਦਾਨਂ ਦਾਤੁਂ, ਪੋਰਾਣਕਪਣ੍ਡਿਤਾ ਅਨੁਪ੍ਪਨ੍ਨੇਪਿ ਬੁਦ੍ਧੇ ਦਾਨਂ ਅਦਂਸੁਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਵਿਧੁਰਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਦਸਬ੍ਰਾਹ੍ਮਣਜਾਤਕਵਣ੍ਣਨਾ ਦ੍ਵਾਦਸਮਾ.

[੪੯੬] ੧੩. ਭਿਕ੍ਖਾਪਰਮ੍ਪਰਜਾਤਕਵਣ੍ਣਨਾ

ਸੁਖੁਮਾਲਰੂਪਂ ਦਿਸ੍ਵਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਕੁਟੁਮ੍ਬਿਕਂ ਆਰਬ੍ਭ ਕਥੇਸਿ. ਸੋ ਕਿਰ ਸਦ੍ਧੋ ਅਹੋਸਿ ਪਸਨ੍ਨੋ, ਤਥਾਗਤਸ੍ਸ ਚੇਵ ਸਙ੍ਘਸ੍ਸ ਚ ਨਿਬਦ੍ਧਂ ਮਹਾਸਕ੍ਕਾਰਂ ਕਰੋਤਿ. ਅਥੇਕਦਿਵਸਂ ਚਿਨ੍ਤੇਸਿ ‘‘ਅਹਂ ਬੁਦ੍ਧਰਤਨਸ੍ਸ ਚੇਵ ਸਙ੍ਘਰਤਨਸ੍ਸ ਚ ਪਣੀਤਾਨਿ ਖਾਦਨੀਯਭੋਜਨੀਯਾਨਿ ਚੇਵ ਸੁਖੁਮਵਤ੍ਥਾਨਿ ਚ ਦੇਨ੍ਤੋ ਨਿਚ੍ਚਂ ਮਹਾਸਕ੍ਕਾਰਂ ਕਰੋਮਿ, ਇਦਾਨਿ ਧਮ੍ਮਰਤਨਸ੍ਸਪਿ ਕਰਿਸ੍ਸਾਮਿ, ਕਥਂ ਨੁ ਖੋ ਤਸ੍ਸ ਸਕ੍ਕਾਰਂ ਕਰੋਨ੍ਤੇਨ ਕਤ੍ਤਬ੍ਬ’’ਨ੍ਤਿ. ਸੋ ਬਹੂਨਿ ਗਨ੍ਧਮਾਲਾਦੀਨਿ ਆਦਾਯ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਪੁਚ੍ਛਿ ‘‘ਅਹਂ, ਭਨ੍ਤੇ, ਧਮ੍ਮਰਤਨਸ੍ਸ ਸਕ੍ਕਾਰਂ ਕਤ੍ਤੁਕਾਮੋਮ੍ਹਿ, ਕਥਂ ਨੁ ਖੋ ਤਸ੍ਸ ਸਕ੍ਕਾਰਂ ਕਰੋਨ੍ਤੇਨ ਕਤ੍ਤਬ੍ਬ’’ਨ੍ਤਿ. ਅਥ ਨਂ ਸਤ੍ਥਾ ਆਹ – ‘‘ਸਚੇ ਧਮ੍ਮਰਤਨਸ੍ਸ ਸਕ੍ਕਾਰਂ ਕਤ੍ਤੁਕਾਮੋ, ਧਮ੍ਮਭਣ੍ਡਾਗਾਰਿਕਸ੍ਸ ਆਨਨ੍ਦਸ੍ਸ ਸਕ੍ਕਾਰਂ ਕਰੋਹੀ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਥੇਰਂ ਨਿਮਨ੍ਤੇਤ੍ਵਾ ਪੁਨਦਿਵਸੇ ਮਹਨ੍ਤੇਨ ਸਕ੍ਕਾਰੇਨ ਅਤ੍ਤਨੋ ਗੇਹਂ ਨੇਤ੍ਵਾ ਮਹਾਰਹੇ ਆਸਨੇ ਨਿਸੀਦਾਪੇਤ੍ਵਾ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਨਾਨਗ੍ਗਰਸਭੋਜਨਂ ਦਤ੍ਵਾ ਮਹਗ੍ਘੇ ਤਿਚੀਵਰਪ੍ਪਹੋਨਕੇ ਸਾਟਕੇ ਅਦਾਸਿ. ਥੇਰੋਪਿ ‘‘ਅਯਂ ਸਕ੍ਕਾਰੋ ਧਮ੍ਮਰਤਨਸ੍ਸ ਕਤੋ, ਨ ਮਯ੍ਹਂ ਅਨੁਚ੍ਛਵਿਕੋ, ਅਗ੍ਗਸਾਵਕਸ੍ਸ ਧਮ੍ਮਸੇਨਾਪਤਿਸ੍ਸ ਅਨੁਚ੍ਛਵਿਕੋ’’ਤਿ ਚਿਨ੍ਤੇਤ੍ਵਾ ਪਿਣ੍ਡਪਾਤਞ੍ਚ ਵਤ੍ਥਾਨਿ ਚ ਵਿਹਾਰਂ ਹਰਿਤ੍ਵਾ ਸਾਰਿਪੁਤ੍ਤਤ੍ਥੇਰਸ੍ਸ ਅਦਾਸਿ. ਸੋਪਿ ‘‘ਅਯਂ ਸਕ੍ਕਾਰੋ ਧਮ੍ਮਰਤਨਸ੍ਸ ਕਤੋ, ਏਕਨ੍ਤੇਨ ਧਮ੍ਮਸ੍ਸਾਮਿਨੋ ਸਮ੍ਮਾਸਮ੍ਬੁਦ੍ਧਸ੍ਸੇਵ ਅਨੁਚ੍ਛਵਿਕੋ’’ਤਿ ਚਿਨ੍ਤੇਤ੍ਵਾ ਦਸਬਲਸ੍ਸ ਅਦਾਸਿ. ਸਤ੍ਥਾ ਅਤ੍ਤਨੋ ਉਤ੍ਤਰਿਤਰਂ ਅਦਿਸ੍ਵਾ ਪਿਣ੍ਡਪਾਤਂ ਪਰਿਭੁਞ੍ਜਿ, ਚੀਵਰਸਾਟਕੇ ਅਗ੍ਗਹੇਸਿ.

ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਅਸੁਕੋ ਨਾਮ ਕੁਟੁਮ੍ਬਿਕੋ ‘ਧਮ੍ਮਰਤਨਸ੍ਸ ਸਕ੍ਕਾਰਂ ਕਰੋਮੀ’ਤਿ ਧਮ੍ਮਭਣ੍ਡਾਗਾਰਿਕਸ੍ਸ ਆਨਨ੍ਦਤ੍ਥੇਰਸ੍ਸ ਅਦਾਸਿ. ਥੇਰੋ ‘ਨਾਯਂ ਮਯ੍ਹਂ ਅਨੁਚ੍ਛਵਿਕੋ’ਤਿ ਧਮ੍ਮਸੇਨਾਪਤਿਨੋ ਅਦਾਸਿ, ਸੋਪਿ ‘ਨਾਯਂ ਮਯ੍ਹਂ ਅਨੁਚ੍ਛਵਿਕੋ’ਤਿ ਤਥਾਗਤਸ੍ਸ ਅਦਾਸਿ. ਤਥਾਗਤੋ ਅਞ੍ਞਂ ਉਤ੍ਤਰਿਤਰਂ ਅਪਸ੍ਸਨ੍ਤੋ ਅਤ੍ਤਨੋ ਧਮ੍ਮਸ੍ਸਾਮਿਤਾਯ ‘ਮਯ੍ਹਮੇਵੇਸੋ ਅਨੁਚ੍ਛਵਿਕੋ’ਤਿ ਤਂ ਪਿਣ੍ਡਪਾਤਂ ਪਰਿਭੁਞ੍ਜਿ, ਚੀਵਰਸਾਟਕੇਪਿ ਗਣ੍ਹਿ, ਏਵਂ ਸੋ ਪਿਣ੍ਡਪਾਤੋ ਯਥਾਨੁਚ੍ਛਵਿਕਤਾਯ ਧਮ੍ਮਸ੍ਸਾਮਿਨੋਵ ਪਾਦਮੂਲਂ ਗਤੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ ਪਿਣ੍ਡਪਾਤੋ ਪਰਮ੍ਪਰਾ ਯਥਾਨੁਚ੍ਛਵਿਕਂ ਗਚ੍ਛਤਿ, ਪੁਬ੍ਬੇਪਿ ਅਨੁਪ੍ਪਨ੍ਨੇ ਬੁਦ੍ਧੇ ਅਗਮਾਸਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਅਗਤਿਗਮਨਂ ਪਹਾਯ ਦਸ ਰਾਜਧਮ੍ਮੇ ਅਕੋਪੇਨ੍ਤੋ ਧਮ੍ਮੇਨ ਰਜ੍ਜਂ ਕਾਰੇਸਿ. ਏਵਂ ਸਨ੍ਤੇਪਿਸ੍ਸ ਵਿਨਿਚ੍ਛਯੋ ਸੁਞ੍ਞੋ ਵਿਯ ਅਹੋਸਿ. ਰਾਜਾ ਅਤ੍ਤਨੋ ਅਗੁਣਗਵੇਸਕੋ ਹੁਤ੍ਵਾ ਅਨ੍ਤੋਨਿਵੇਸਨਾਦੀਨਿ ਪਰਿਗ੍ਗਣ੍ਹਨ੍ਤੋ ਅਨ੍ਤੇਪੁਰੇ ਚ ਅਨ੍ਤੋਨਗਰੇ ਚ ਦ੍ਵਾਰਗਾਮੇਸੁ ਚ ਅਤ੍ਤਨੋ ਅਗੁਣਂ ਕਥੇਨ੍ਤਂ ਅਦਿਸ੍ਵਾ ‘‘ਜਨਪਦੇ ਗਵੇਸਿਸ੍ਸਾਮੀ’’ਤਿ ਅਮਚ੍ਚਾਨਂ ਰਜ੍ਜਂ ਨਿਯ੍ਯਾਦੇਤ੍ਵਾ ਪੁਰੋਹਿਤੇਨ ਸਦ੍ਧਿਂ ਅਞ੍ਞਾਤਕਵੇਸੇਨੇਵ ਕਾਸਿਰਟ੍ਠੇ ਚਰਨ੍ਤੋ ਕਞ੍ਚਿ ਅਗੁਣਂ ਕਥੇਨ੍ਤਂ ਅਦਿਸ੍ਵਾ ਪਚ੍ਚਨ੍ਤੇ ਏਕਂ ਨਿਗਮਂ ਪਤ੍ਵਾ ਬਹਿਦ੍ਵਾਰਸਾਲਾਯਂ ਨਿਸੀਦਿ. ਤਸ੍ਮਿਂ ਖਣੇ ਨਿਗਮਵਾਸੀ ਅਸੀਤਿਕੋਟਿਵਿਭਵੋ ਕੁਟੁਮ੍ਬਿਕੋ ਮਹਨ੍ਤੇਨ ਪਰਿਵਾਰੇਨ ਨ੍ਹਾਨਤਿਤ੍ਥਂ ਗਚ੍ਛਨ੍ਤੋ ਸਾਲਾਯਂ ਨਿਸਿਨ੍ਨਂ ਸੁਵਣ੍ਣਵਣ੍ਣਂ ਸੁਖੁਮਾਲਸਰੀਰਂ ਰਾਜਾਨਂ ਦਿਸ੍ਵਾ ਉਪ੍ਪਨ੍ਨਸਿਨੇਹੋ ਸਾਲਂ ਪਵਿਸਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ‘‘ਇਧੇਵ ਹੋਥਾ’’ਤਿ ਵਤ੍ਵਾ ਗੇਹਂ ਗਨ੍ਤ੍ਵਾ ਨਾਨਗ੍ਗਰਸਭੋਜਨਂ ਸਮ੍ਪਾਦੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਭਤ੍ਤਭਾਜਨਾਨਿ ਗਾਹਾਪੇਤ੍ਵਾ ਅਗਮਾਸਿ. ਤਸ੍ਮਿਂ ਖਣੇ ਹਿਮਵਨ੍ਤਵਾਸੀ ਪਞ੍ਚਾਭਿਞ੍ਞੋ ਤਾਪਸੋ ਆਗਨ੍ਤ੍ਵਾ ਤਤ੍ਥੇਵ ਨਿਸੀਦਿ. ਨਨ੍ਦਮੂਲਕਪਬ੍ਭਾਰਤੋ ਪਚ੍ਚੇਕਬੁਦ੍ਧੋਪਿ ਆਗਨ੍ਤ੍ਵਾ ਤਤ੍ਥੇਵ ਨਿਸੀਦਿ.

ਕੁਟੁਮ੍ਬਿਕੋ ਰਞ੍ਞੋ ਹਤ੍ਥਧੋਵਨਉਦਕਂ ਦਤ੍ਵਾ ਨਾਨਗ੍ਗਰਸੇਹਿ ਸੂਪਬ੍ਯਞ੍ਜਨੇਹਿ ਭਤ੍ਤਪਾਤਿਂ ਸਜ੍ਜੇਤ੍ਵਾ ਰਞ੍ਞੋ ਉਪਨੇਸਿ. ਰਾਜਾ ਨਂ ਗਹੇਤ੍ਵਾ ਪੁਰੋਹਿਤਸ੍ਸ ਬ੍ਰਾਹ੍ਮਣਸ੍ਸ ਅਦਾਸਿ. ਬ੍ਰਾਹ੍ਮਣੋ ਗਹੇਤ੍ਵਾ ਤਾਪਸਸ੍ਸ ਅਦਾਸਿ. ਤਾਪਸੋ ਪਚ੍ਚੇਕਬੁਦ੍ਧਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਾਮਹਤ੍ਥੇਨ ਭਤ੍ਤਪਾਤਿਂ, ਦਕ੍ਖਿਣਹਤ੍ਥੇਨ ਕਮਣ੍ਡਲੁਂ ਗਹੇਤ੍ਵਾ ਦਕ੍ਖਿਣੋਦਕਂ ਦਤ੍ਵਾ ਪਤ੍ਤੇ ਭਤ੍ਤਂ ਪਕ੍ਖਿਪਿ. ਸੋ ਕਞ੍ਚਿ ਅਨਿਮਨ੍ਤੇਤ੍ਵਾ ਅਨਾਪੁਚ੍ਛਿਤ੍ਵਾ ਪਰਿਭੁਞ੍ਜਿ. ਤਸ੍ਸ ਭਤ੍ਤਕਿਚ੍ਚਪਰਿਯੋਸਾਨੇ ਕੁਟੁਮ੍ਬਿਕੋ ਚਿਨ੍ਤੇਸਿ ‘‘ਮਯਾ ਰਞ੍ਞੋ ਭਤ੍ਤਂ ਦਿਨ੍ਨਂ, ਰਞ੍ਞਾ ਬ੍ਰਾਹ੍ਮਣਸ੍ਸ, ਬ੍ਰਾਹ੍ਮਣੇਨ ਤਾਪਸਸ੍ਸ, ਤਾਪਸੇਨ ਪਚ੍ਚੇਕਬੁਦ੍ਧਸ੍ਸ, ਪਚ੍ਚੇਕਬੁਦ੍ਧੋ ਕਞ੍ਚਿ ਅਨਾਪੁਚ੍ਛਿਤ੍ਵਾ ਪਰਿਭੁਞ੍ਜਿ, ਕਿਂ ਨੁ ਖੋ ਇਮੇਸਂ ਏਤ੍ਤਕਂ ਦਾਨਕਾਰਣਂ, ਕਿਂ ਇਮਸ੍ਸ ਕਞ੍ਚਿ ਅਨਾਪੁਚ੍ਛਿਤ੍ਵਾਵ ਭੁਞ੍ਜਨਕਾਰਣਂ, ਅਨੁਪੁਬ੍ਬੇਨ ਤੇ ਪੁਚ੍ਛਿਸ੍ਸਾਮੀ’’ਤਿ. ਸੋ ਏਕੇਕਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਪੁਚ੍ਛਿ. ਤੇਪਿਸ੍ਸ ਕਥੇਸੁਂ –

੨੭੦.

‘‘ਸੁਖੁਮਾਲਰੂਪਂ ਦਿਸ੍ਵਾ, ਰਟ੍ਠਾ ਵਿਵਨਮਾਗਤਂ;

ਕੁਟਾਗਾਰਵਰੂਪੇਤਂ, ਮਹਾਸਯਨਮੁਪਾਸਿਤਂ.

੨੭੧.

‘‘ਤਸ੍ਸ ਤੇ ਪੇਮਕੇਨਾਹਂ, ਅਦਾਸਿਂ ਵਡ੍ਢਮੋਦਨਂ;

ਸਾਲੀਨਂ ਵਿਚਿਤਂ ਭਤ੍ਤਂ, ਸੁਚਿਂ ਮਂਸੂਪਸੇਚਨਂ.

੨੭੨.

‘‘ਤਂ ਤ੍ਵਂ ਭਤ੍ਤਂ ਪਟਿਗ੍ਗਯ੍ਹ, ਬ੍ਰਾਹ੍ਮਣਸ੍ਸ ਅਦਾਸਯਿ;

ਅਤ੍ਤਾਨਂ ਅਨਸਿਤ੍ਵਾਨ, ਕੋਯਂ ਧਮ੍ਮੋ ਨਮਤ੍ਥੁ ਤੇ.

੨੭੩.

‘‘ਆਚਰਿਯੋ ਬ੍ਰਾਹ੍ਮਣੋ ਮਯ੍ਹਂ, ਕਿਚ੍ਚਾਕਿਚ੍ਚੇਸੁ ਬ੍ਯਾਵਟੋ;

ਗਰੁ ਚ ਆਮਨ੍ਤਨੀਯੋ ਚ, ਦਾਤੁਮਰਹਾਮਿ ਭੋਜਨਂ.

੨੭੪.

‘‘ਬ੍ਰਾਹ੍ਮਣਂ ਦਾਨਿ ਪੁਚ੍ਛਾਮਿ, ਗੋਤਮਂ ਰਾਜਪੂਜਿਤਂ;

ਰਾਜਾ ਤੇ ਭਤ੍ਤਂ ਪਾਦਾਸਿ, ਸੁਚਿਂ ਮਂਸੂਪਸੇਚਨਂ.

੨੭੫.

‘‘ਤਂ ਤ੍ਵਂ ਭਤ੍ਤਂ ਪਟਿਗ੍ਗਯ੍ਹ, ਇਸਿਸ੍ਸ ਭੋਜਨਂ ਅਦਾ;

ਅਖੇਤ੍ਤਞ੍ਞੂਸਿ ਦਾਨਸ੍ਸ, ਕੋਯਂ ਧਮ੍ਮੋ ਨਮਤ੍ਥੁ ਤੇ.

੨੭੬.

‘‘ਭਰਾਮਿ ਪੁਤ੍ਤਦਾਰੇ ਚ, ਘਰੇਸੁ ਗਧਿਤੋ ਅਹਂ;

ਭੁਞ੍ਜੇ ਮਾਨੁਸਕੇ ਕਾਮੇ, ਅਨੁਸਾਸਾਮਿ ਰਾਜਿਨੋ.

੨੭੭.

‘‘ਆਰਞ੍ਞਿਕਸ੍ਸ ਇਸਿਨੋ, ਚਿਰਰਤ੍ਤਂ ਤਪਸ੍ਸਿਨੋ;

ਵੁਡ੍ਢਸ੍ਸ ਭਾਵਿਤਤ੍ਤਸ੍ਸ, ਦਾਤੁਮਰਹਾਮਿ ਭੋਜਨਂ.

੨੭੮.

‘‘ਇਸਿਞ੍ਚ ਦਾਨਿ ਪੁਚ੍ਛਾਮਿ, ਕਿਸਂ ਧਮਨਿਸਨ੍ਥਤਂ;

ਪਰੂਲ਼੍ਹਕਚ੍ਛਨਖਲੋਮਂ, ਪਙ੍ਕਦਨ੍ਤਂ ਰਜਸ੍ਸਿਰਂ.

੨੭੯.

‘‘ਏਕੋ ਅਰਞ੍ਞੇ ਵਿਹਰਸਿ, ਨਾਵਕਙ੍ਖਸਿ ਜੀਵਿਤਂ;

ਭਿਕ੍ਖੁ ਕੇਨ ਤਯਾ ਸੇਯ੍ਯੋ, ਯਸ੍ਸ ਤ੍ਵਂ ਭੋਜਨਂ ਅਦਾ.

੨੮੦.

‘‘ਖਣਨ੍ਤਾਲੁਕਲਮ੍ਬਾਨਿ, ਬਿਲਾਲਿਤਕ੍ਕਲਾਨਿ ਚ;

ਧੁਨਂ ਸਾਮਾਕਨੀਵਾਰਂ, ਸਙ੍ਘਾਰਿਯਂ ਪਸਾਰਿਯਂ.

੨੮੧.

‘‘ਸਾਕਂ ਭਿਸਂ ਮਧੁਂ ਮਂਸਂ, ਬਦਰਾਮਲਕਾਨਿ ਚ;

ਤਾਨਿ ਆਹਰਿਤ੍ਵਾ ਭੁਞ੍ਜਾਮਿ, ਅਤ੍ਥਿ ਮੇ ਸੋ ਪਰਿਗ੍ਗਹੋ.

੨੮੨.

‘‘ਪਚਨ੍ਤੋ ਅਪਚਨ੍ਤਸ੍ਸ, ਅਮਮਸ੍ਸ ਸਕਿਞ੍ਚਨੋ;

ਅਨਾਦਾਨਸ੍ਸ ਸਾਦਾਨੋ, ਦਾਤੁਮਰਹਾਮਿ ਭੋਜਨਂ.

੨੮੩.

‘‘ਭਿਕ੍ਖੁਞ੍ਚ ਦਾਨਿ ਪੁਚ੍ਛਾਮਿ, ਤੁਣ੍ਹੀਮਾਸੀਨ ਸੁਬ੍ਬਤਂ;

ਇਸਿ ਤੇ ਭਤ੍ਤਂ ਪਾਦਾਸਿ, ਸੁਚਿਂ ਮਂਸੂਪਸੇਚਨਂ.

੨੮੪.

‘‘ਤਂ ਤ੍ਵਂ ਭਤ੍ਤਂ ਪਟਿਗ੍ਗਯ੍ਹ, ਤੁਣ੍ਹੀ ਭੁਞ੍ਜਸਿ ਏਕਕੋ;

ਨਾਞ੍ਞਂ ਕਞ੍ਚਿ ਨਿਮਨ੍ਤੇਸਿ, ਕੋਯਂ ਧਮ੍ਮੋ ਨਮਤ੍ਥੁ ਤੇ.

੨੮੫.

‘‘ਨ ਪਚਾਮਿ ਨ ਪਾਚੇਮਿ, ਨ ਛਿਨ੍ਦਾਮਿ ਨ ਛੇਦਯੇ;

ਤਂ ਮਂ ਅਕਿਞ੍ਚਨਂ ਞਤ੍ਵਾ, ਸਬ੍ਬਪਾਪੇਹਿ ਆਰਤਂ.

੨੮੬.

‘‘ਵਾਮੇਨ ਭਿਕ੍ਖਮਾਦਾਯ, ਦਕ੍ਖਿਣੇਨ ਕਮਣ੍ਡਲੁਂ;

ਇਸਿ ਮੇ ਭਤ੍ਤਂ ਪਾਦਾਸਿ, ਸੁਚਿਂ ਮਂਸੂਪਸੇਚਨਂ.

੨੮੭.

‘‘ਏਤੇ ਹਿ ਦਾਤੁਮਰਹਨ੍ਤਿ, ਸਮਮਾ ਸਪਰਿਗ੍ਗਹਾ;

ਪਚ੍ਚਨੀਕਮਹਂ ਮਞ੍ਞੇ, ਯੋ ਦਾਤਾਰਂ ਨਿਮਨ੍ਤਯੇ’’ਤਿ.

ਤਤ੍ਥ ਵਿਵਨਨ੍ਤਿ ਨਿਰੁਦਕਾਰਞ੍ਞਸਦਿਸਂ ਇਮਂ ਪਚ੍ਚਨ੍ਤਂ ਆਗਤਂ. ਕੂਟਾਗਾਰਵਰੂਪੇਤਨ੍ਤਿ ਕੂਟਾਗਾਰਵਰੇਨ ਉਪਗਤਂ, ਏਕਂ ਵਰਕੂਟਾਗਾਰਵਾਸਿਨਨ੍ਤਿ ਅਤ੍ਥੋ. ਮਹਾਸਯਨਮੁਪਾਸਿਤਨ੍ਤਿ ਤਤ੍ਥੇਵ ਸੁਪਞ੍ਞਤ੍ਤਂ ਸਿਰਿਸਯਨਂ ਉਪਾਸਿਤਂ. ਤਸ੍ਸ ਤੇਤਿ ਏਵਰੂਪਂ ਤਂ ਦਿਸ੍ਵਾ ਅਹਂ ਪੇਮਮਕਾਸਿਂ, ਤਸ੍ਸ ਤੇ ਪੇਮਕੇਨ. ਵਡ੍ਢਮੋਦਨਨ੍ਤਿ ਉਤ੍ਤਮੋਦਨਂ. ਵਿਚਿਤਨ੍ਤਿ ਅਪਗਤਖਣ੍ਡਕਾਲ਼ਕੇਹਿ ਵਿਚਿਤਤਣ੍ਡੁਲੇਹਿ ਕਤਂ. ਅਦਾਸਯੀਤਿ ਅਦਾਸਿ. ਅਤ੍ਤਾਨਨ੍ਤਿ ਅਤ੍ਤਨਾ, ਅਯਮੇਵ ਵਾ ਪਾਠੋ. ਅਨਸਿਤ੍ਵਾਨਾਤਿ ਅਭੁਞ੍ਜਿਤ੍ਵਾ. ਕੋਯਂ ਧਮ੍ਮੋਤਿ ਮਹਾਰਾਜ, ਕੋ ਏਸ ਤੁਮ੍ਹਾਕਂ ਸਭਾਵੋ. ਨਮਤ੍ਥੁ ਤੇਤਿ ਨਮੋ ਤਵ ਅਤ੍ਥੁ, ਯੋ ਤ੍ਵਂ ਅਤ੍ਤਨਾ ਅਭੁਞ੍ਜਿਤ੍ਵਾ ਪਰਸ੍ਸ ਅਦਾਸਿ.

ਆਚਰਿਯੋਤਿ ਕੁਟੁਮ੍ਬਿਕ ਏਸ ਮਯ੍ਹਂ ਆਚਾਰਸਿਕ੍ਖਾਪਕੋ ਆਚਰਿਯੋ. ਬ੍ਯਾਵਟੋਤਿ ਉਸ੍ਸੁਕੋ. ਆਮਨ੍ਤਨੀਯੋਤਿ ਆਮਨ੍ਤੇਤਬ੍ਬਯੁਤ੍ਤਕੋ ਮਯਾ ਦਿਨ੍ਨਂ ਭਤ੍ਤਂ ਗਹੇਤੁਂ ਅਨੁਰੂਪੋ. ਦਾਤੁਮਰਹਾਮੀਤਿ ‘‘ਅਹਂ ਏਵਰੂਪਸ੍ਸ ਆਚਰਿਯਸ੍ਸ ਭੋਜਨਂ ਦਾਤੁਂ ਅਰਹਾਮੀ’’ਤਿ ਰਾਜਾ ਬ੍ਰਾਹ੍ਮਣਸ੍ਸ ਗੁਣਂ ਵਣ੍ਣੇਸਿ. ਅਖੇਤ੍ਤਞ੍ਞੂਸੀਤਿ ਨਾਹਂ ਦਾਨਸ੍ਸ ਖੇਤ੍ਤਂ, ਮਯਿ ਦਿਨ੍ਨਂ ਮਹਪ੍ਫਲਂ ਨ ਹੋਤੀਤਿ ਏਵਂ ਅਤ੍ਤਾਨਂ ਦਾਨਸ੍ਸ ਅਖੇਤ੍ਤਂ ਜਾਨਾਸਿ ਮਞ੍ਞੇਤਿ. ਅਨੁਸਾਸਾਮੀਤਿ ਅਤ੍ਤਨੋ ਅਤ੍ਥਂ ਪਹਾਯ ਰਞ੍ਞੋ ਅਤ੍ਥਞ੍ਚ ਧਮ੍ਮਞ੍ਚ ਅਨੁਸਾਸਾਮਿ.

ਏਵਂ ਅਤ੍ਤਨੋ ਅਗੁਣਂ ਕਥੇਤ੍ਵਾ ਆਰਞ੍ਞਿਕਸ੍ਸਾਤਿ ਇਸਿਨੋ ਗੁਣਂ ਕਥੇਸਿ. ਇਸਿਨੋਤਿ ਸੀਲਾਦਿਗੁਣਪਰਿਯੇਸਕਸ੍ਸ. ਤਪਸ੍ਸਿਨੋਤਿ ਤਪਨਿਸ੍ਸਿਤਸ੍ਸ. ਵੁਡ੍ਢਸ੍ਸਾਤਿ ਪਣ੍ਡਿਤਸ੍ਸ ਗੁਣਵੁਡ੍ਢਸ੍ਸ. ਨਾਵਕਙ੍ਖਸੀਤਿ ਸਯਂ ਦੁਲ੍ਲਭਭੋਜਨੋ ਹੁਤ੍ਵਾ ਏਵਰੂਪਂ ਭੋਜਨਂ ਅਞ੍ਞਸ੍ਸ ਦੇਸਿ, ਕਿਂ ਅਤ੍ਤਨੋ ਜੀਵਿਤਂ ਨ ਕਙ੍ਖਸਿ. ਭਿਕ੍ਖੁ ਕੇਨਾਤਿ ਅਯਂ ਭਿਕ੍ਖੁ ਕਤਰੇਨ ਗੁਣੇਨ ਤਯਾ ਸੇਟ੍ਠਤਰੋ.

ਖਣਨ੍ਤਾਲੁਕਲਮ੍ਬਾਨੀਤਿ ਖਣਨ੍ਤੋ ਆਲੂਨਿ ਚੇਵ ਤਾਲਕਨ੍ਦਾਨਿ ਚ. ਬਿਲਾਲਿਤਕ੍ਕਲਾਨਿ ਚਾਤਿ ਬਿਲਾਲਿਕਨ੍ਦਤਕ੍ਕਲਕਨ੍ਦਾਨਿ ਚ. ਧੁਨਂ ਸਾਮਾਕਨੀਵਾਰਨ੍ਤਿ ਸਾਮਾਕਞ੍ਚ ਨੀਵਾਰਞ੍ਚ ਧੁਨਿਤ੍ਵਾ. ਸਙ੍ਘਾਰਿਯਂ ਪਸਾਰਿਯਨ੍ਤਿ ਏਤੇ ਸਾਮਾਕਨੀਵਾਰੇ ਧੁਨਨ੍ਤੋ ਸਙ੍ਘਾਰੇਤ੍ਵਾ ਪੁਨ ਸੁਕ੍ਖਾਪਿਤੇ ਪਸਾਰੇਤ੍ਵਾ ਸੁਪ੍ਪੇਨ ਪਪ੍ਫੋਟੇਤ੍ਵਾ ਕੋਟ੍ਟੇਤ੍ਵਾ ਤਣ੍ਡੁਲੇ ਆਦਾਯ ਪਚਿਤ੍ਵਾ ਭੁਞ੍ਜਾਮੀਤਿ ਵਦਤਿ. ਸਾਕਨ੍ਤਿ ਯਂ ਕਿਞ੍ਚਿ ਸੂਪੇਯ੍ਯਪਣ੍ਣਂ. ਮਂਸਨ੍ਤਿ ਸੀਹਬ੍ਯਗ੍ਘਵਿਘਾਸਾਦਿਮਂਸਂ. ਤਾਨਿ ਆਹਰਿਤ੍ਵਾਤਿ ਤਾਨਿ ਸਾਕਾਦੀਨਿ ਆਹਰਿਤ੍ਵਾ. ਅਮਮਸ੍ਸਾਤਿ ਤਣ੍ਹਾਦਿਟ੍ਠਿਮਮਤ੍ਤਰਹਿਤਸ੍ਸ. ਸਕਿਞ੍ਚਨੋਤਿ ਸਪਲਿਬੋਧੋ. ਅਨਾਦਾਨਸ੍ਸਾਤਿ ਨਿਗ੍ਗਹਣਸ੍ਸ. ਦਾਤੁਮਰਹਾਮੀਤਿ ਏਵਰੂਪਸ੍ਸ ਪਚ੍ਚੇਕਬੁਦ੍ਧਸ੍ਸ ਅਤ੍ਤਨਾ ਲਦ੍ਧਭੋਜਨਂ ਦਾਤੁਂ ਅਰਹਾਮਿ.

ਤੁਣ੍ਹੀਮਾਸੀਨਨ੍ਤਿ ਕਿਞ੍ਚਿ ਅਵਤ੍ਵਾ ਨਿਸਿਨ੍ਨਂ. ਅਕਿਞ੍ਚਨਨ੍ਤਿ ਰਾਗਕਿਞ੍ਚਨਾਦੀਹਿ ਰਹਿਤਂ. ਆਰਤਨ੍ਤਿ ਵਿਰਤਂ ਸਬ੍ਬਪਾਪਾਨਿ ਪਹਾਯ ਠਿਤਂ. ਕਮਣ੍ਡਲੁਨ੍ਤਿ ਕੁਣ੍ਡਿਕਂ. ਏਤੇ ਹੀਤਿ ਏਤੇ ਰਾਜਾਦਯੋ ਤਯੋ ਜਨਾਤਿ ਹਤ੍ਥਂ ਪਸਾਰੇਤ੍ਵਾ ਤੇ ਨਿਦ੍ਦਿਸਨ੍ਤੋ ਏਵਮਾਹ. ਦਾਤੁਮਰਹਨ੍ਤੀਤਿ ਮਾਦਿਸਸ੍ਸ ਦਾਤੁਂ ਅਰਹਨ੍ਤਿ. ਪਚ੍ਚਨੀਕਨ੍ਤਿ ਪਚ੍ਚਨੀਕਪਟਿਪਦਂ. ਦਾਯਕਸ੍ਸ ਹਿ ਨਿਮਨ੍ਤਨਂ ਏਕਵੀਸਤਿਯਾ ਅਨੇਸਨਾਸੁ ਅਞ੍ਞਤਰਾਯ ਪਿਣ੍ਡਪਾਤਪਰਿਯੇਸਨਾਯ ਜੀਵਿਕਕਪ੍ਪਨਸਙ੍ਖਾਤਾ ਮਿਚ੍ਛਾਜੀਵਪਟਿਪਤ੍ਤਿ ਨਾਮ ਹੋਤਿ.

ਤਸ੍ਸ ਵਚਨਂ ਸੁਤ੍ਵਾ ਕੁਟੁਮ੍ਬਿਕੋ ਅਤ੍ਤਮਨੋ ਦ੍ਵੇ ਓਸਾਨਗਾਥਾ ਅਭਾਸਿ –

੨੮੮.

‘‘ਅਤ੍ਥਾਯ ਵਤ ਮੇ ਅਜ੍ਜ, ਇਧਾਗਚ੍ਛਿ ਰਥੇਸਭੋ;

ਸੋਹਂ ਅਜ੍ਜ ਪਜਾਨਾਮਿ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੮੯.

‘‘ਰਟ੍ਠੇਸੁ ਗਿਦ੍ਧਾ ਰਾਜਾਨੋ, ਕਿਚ੍ਚਾਕਿਚ੍ਚੇਸੁ ਬ੍ਰਾਹ੍ਮਣਾ;

ਇਸੀ ਮੂਲਫਲੇ ਗਿਦ੍ਧਾ, ਵਿਪ੍ਪਮੁਤ੍ਤਾ ਚ ਭਿਕ੍ਖਵੋ’’ਤਿ.

ਤਤ੍ਥ ਰਥੇਸਭੋਤਿ ਰਾਜਾਨਂ ਸਨ੍ਧਾਯਾਹ. ਕਿਚ੍ਚਾਕਿਚ੍ਚੇਸੂਤਿ ਰਞ੍ਞੋ ਕਿਚ੍ਚਕਰਣੀਯੇਸੁ. ਭਿਕ੍ਖਵੋਤਿ ਪਚ੍ਚੇਕਬੁਦ੍ਧਾ ਭਿਕ੍ਖਵੋ ਪਨ ਸਬ੍ਬਭਵੇਹਿ ਵਿਪ੍ਪਮੁਤ੍ਤਾ.

ਪਚ੍ਚੇਕਬੁਦ੍ਧੋ ਤਸ੍ਸ ਧਮ੍ਮਂ ਦੇਸੇਤ੍ਵਾ ਸਕਟ੍ਠਾਨਮੇਵ ਗਤੋ, ਤਥਾ ਤਾਪਸੋ. ਰਾਜਾ ਪਨ ਕਤਿਪਾਹਂ ਤਸ੍ਸ ਸਨ੍ਤਿਕੇ ਵਸਿਤ੍ਵਾ ਬਾਰਾਣਸਿਮੇਵ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ ਪਿਣ੍ਡਪਾਤੋ ਯਥਾਨੁਚ੍ਛਵਿਕਂ ਗਚ੍ਛਤਿ, ਪੁਬ੍ਬੇਪਿ ਗਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕੁਟੁਮ੍ਬਿਕੋ ਧਮ੍ਮਰਤਨਸ੍ਸ ਸਕ੍ਕਾਰਕਾਰਕੋ ਕੁਟੁਮ੍ਬਿਕੋ ਅਹੋਸਿ, ਰਾਜਾ ਆਨਨ੍ਦੋ, ਪੁਰੋਹਿਤੋ ਸਾਰਿਪੁਤ੍ਤੋ, ਹਿਮਵਨ੍ਤਤਾਪਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਭਿਕ੍ਖਾਪਰਮ੍ਪਰਜਾਤਕਵਣ੍ਣਨਾ ਤੇਰਸਮਾ.

ਜਾਤਕੁਦ੍ਦਾਨਂ –

ਕੇਦਾਰਂ ਚਨ੍ਦਕਿਨ੍ਨਰੀ, ਉਕ੍ਕੁਸੁਦ੍ਦਾਲਭਿਸਕਂ;

ਸੁਰੁਚਿ ਪਞ੍ਚੁਪੋਸਥਂ, ਮਹਾਮੋਰਞ੍ਚ ਤਚ੍ਛਕਂ.

ਮਹਾਵਾਣਿਜ ਸਾਧਿਨਂ, ਦਸਬ੍ਰਾਹ੍ਮਣਜਾਤਕਂ;

ਭਿਕ੍ਖਾਪਰਮ੍ਪਰਾਪਿ ਚ, ਤੇਰਸਾਨਿ ਪਕਿਣ੍ਣਕੇ.

ਪਕਿਣ੍ਣਕਨਿਪਾਤਵਣ੍ਣਨਾ ਨਿਟ੍ਠਿਤਾ.

੧੫. ਵੀਸਤਿਨਿਪਾਤੋ

[੪੯੭] ੧. ਮਾਤਙ੍ਗਜਾਤਕਵਣ੍ਣਨਾ

ਕੁਤੋ ਨੁ ਆਗਚ੍ਛਸਿ ਦੁਮ੍ਮਵਾਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਦੇਨਂ ਨਾਮ ਵਂਸਰਾਜਾਨਂ ਆਰਬ੍ਭ ਕਥੇਸਿ. ਤਸ੍ਮਿਞ੍ਹਿ ਕਾਲੇ ਆਯਸ੍ਮਾ ਪਿਣ੍ਡੋਲਭਾਰਦ੍ਵਾਜੋ ਜੇਤਵਨਤੋ ਆਕਾਸੇਨ ਗਨ੍ਤ੍ਵਾ ਯੇਭੁਯ੍ਯੇਨ ਕੋਸਮ੍ਬਿਯਂ ਉਦੇਨਸ੍ਸ ਰਞ੍ਞੋ ਉਯ੍ਯਾਨਂ ਦਿਵਾਵਿਹਾਰਾਯ ਗਚ੍ਛਤਿ. ਥੇਰੋ ਕਿਰ ਪੁਰਿਮਭਵੇ ਰਜ੍ਜਂ ਕਾਰੇਨ੍ਤੋ ਦੀਘਮਦ੍ਧਾਨਂ ਤਸ੍ਮਿਂ ਉਯ੍ਯਾਨੇ ਮਹਾਪਰਿਵਾਰੋ ਸਮ੍ਪਤ੍ਤਿਂ ਅਨੁਭਵਿ. ਸੋ ਤੇਨ ਪੁਬ੍ਬਾਚਿਣ੍ਣੇਨ ਯੇਭੁਯ੍ਯੇਨ ਤਤ੍ਥੇਵ ਦਿਵਾਵਿਹਾਰਂ ਨਿਸੀਦਿਤ੍ਵਾ ਫਲਸਮਾਪਤ੍ਤਿਸੁਖੇਨ ਵੀਤਿਨਾਮੇਤਿ. ਤਸ੍ਮਿਂ ਏਕਦਿਵਸਂ ਤਤ੍ਥ ਗਨ੍ਤ੍ਵਾ ਸੁਪੁਪ੍ਫਿਤਸਾਲਮੂਲੇ ਨਿਸਿਨ੍ਨੇ ਉਦੇਨੋ ਸਤ੍ਤਾਹਂ ਮਹਾਪਾਨਂ ਪਿਵਿਤ੍ਵਾ ‘‘ਉਯ੍ਯਾਨਕੀਲ਼ਂ ਕੀਲ਼ਿਸ੍ਸਾਮੀ’’ਤਿ ਮਹਨ੍ਤੇਨ ਪਰਿਵਾਰੇਨ ਉਯ੍ਯਾਨਂ ਗਨ੍ਤ੍ਵਾ ਮਙ੍ਗਲਸਿਲਾਪਟ੍ਟੇ ਅਞ੍ਞਤਰਾਯ ਇਤ੍ਥਿਯਾ ਅਙ੍ਕੇ ਨਿਪਨ੍ਨੋ ਸੁਰਾਮਦਮਤ੍ਤਤਾਯ ਨਿਦ੍ਦਂ ਓਕ੍ਕਮਿ. ਗਾਯਨ੍ਤਾ ਨਿਸਿਨ੍ਨਿਤ੍ਥਿਯੋ ਤੂਰਿਯਾਨਿ ਛਡ੍ਡੇਤ੍ਵਾ ਉਯ੍ਯਾਨਂ ਪਵਿਸਿਤ੍ਵਾ ਪੁਪ੍ਫਫਲਾਦੀਨਿ ਵਿਚਿਨਨ੍ਤਿਯੋ ਥੇਰਂ ਦਿਸ੍ਵਾ ਗਨ੍ਤ੍ਵਾ ਵਨ੍ਦਿਤ੍ਵਾ ਨਿਸੀਦਿਂਸੁ. ਥੇਰੋ ਤਾਸਂ ਧਮ੍ਮਕਥਂ ਕਥੇਨ੍ਤੋ ਨਿਸੀਦਿ. ਇਤਰਾਪਿ ਇਤ੍ਥੀ ਅਙ੍ਕਂ ਚਾਲੇਤ੍ਵਾ ਰਾਜਾਨਂ ਪਬੋਧੇਤ੍ਵਾ ‘‘ਕੁਹਿਂ ਤਾ ਵਸਲਿਯੋ ਗਤਾ’’ਤਿ ਵੁਤ੍ਤੇ ‘‘ਏਕਂ ਸਮਣਂ ਪਰਿਵਾਰੇਤ੍ਵਾ ਨਿਸਿਨ੍ਨਾ’’ਤਿ ਆਹ. ਸੋ ਕੁਦ੍ਧੋ ਗਨ੍ਤ੍ਵਾ ਥੇਰਂ ਅਕ੍ਕੋਸਿਤ੍ਵਾ ਪਰਿਭਾਸਿਤ੍ਵਾ ‘‘ਹਨ੍ਦਾਹਂ, ਤਂ ਸਮਣਂ ਤਮ੍ਬਕਿਪਿਲ੍ਲਕੇਹਿ ਖਾਦਾਪੇਸ੍ਸਾਮੀ’’ਤਿ ਕੋਧਵਸੇਨ ਥੇਰਸ੍ਸ ਸਰੀਰੇ ਤਮ੍ਬਕਿਪਿਲ੍ਲਕਪੁਟਂ ਭਿਨ੍ਦਾਪੇਸਿ. ਥੇਰੋ ਆਕਾਸੇ ਠਤ੍ਵਾ ਤਸ੍ਸੋਵਾਦਂ ਦਤ੍ਵਾ ਜੇਤਵਨੇ ਗਨ੍ਧਕੁਟਿਦ੍ਵਾਰੇਯੇਵ ਓਤਰਿਤ੍ਵਾ ਤਥਾਗਤੇਨ ‘‘ਕੁਤੋ ਆਗਤੋਸੀ’’ਤਿ ਪੁਟ੍ਠੋ ਥੇਰੋ ਤਮਤ੍ਥਂ ਆਰੋਚੇਸਿ. ਸਤ੍ਥਾ ‘‘ਨ ਖੋ, ਭਾਰਦ੍ਵਾਜ, ਉਦੇਨੋ ਇਦਾਨੇਵ ਪਬ੍ਬਜਿਤੇ ਵਿਹੇਠੇਤਿ, ਪੁਬ੍ਬੇਪਿ ਵਿਹੇਠੇਸਿਯੇਵਾ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਤਦਾ ਮਹਾਸਤ੍ਤੋ ਬਹਿਨਗਰੇ ਚਣ੍ਡਾਲਯੋਨਿਯਂ ਨਿਬ੍ਬਤ੍ਤਿ, ‘‘ਮਾਤਙ੍ਗੋ’’ਤਿਸ੍ਸ ਨਾਮਂ ਕਰਿਂਸੁ. ਅਪਰਭਾਗੇ ਵਿਞ੍ਞੁਤਂ ਪਤ੍ਤੋ ‘‘ਮਾਤਙ੍ਗਪਣ੍ਡਿਤੋ’’ਤਿ ਪਾਕਟੋ ਅਹੋਸਿ. ਤਦਾ ਬਾਰਾਣਸਿਸੇਟ੍ਠਿਨੋ ਧੀਤਾ ਦਿਟ੍ਠਮਙ੍ਗਲਿਕਾ ਨਾਮ ਏਕਮਾਸਦ੍ਵੇਮਾਸਵਾਰੇਨ ਮਹਾਪਰਿਵਾਰਾ ਉਯ੍ਯਾਨਂ ਕੀਲ਼ਿਤੁਂ ਗਚ੍ਛਤਿ. ਅਥੇਕਦਿਵਸਂ ਮਹਾਸਤ੍ਤੋ ਕੇਨਚਿ ਕਮ੍ਮੇਨ ਨਗਰਂ ਪਵਿਸਨ੍ਤੋ ਅਨ੍ਤਰਦ੍ਵਾਰੇ ਦਿਟ੍ਠਮਙ੍ਗਲਿਕਂ ਦਿਸ੍ਵਾ ਏਕਮਨ੍ਤਂ ਅਪਗਨ੍ਤ੍ਵਾ ਅਲ੍ਲੀਯਿਤ੍ਵਾ ਅਟ੍ਠਾਸਿ. ਦਿਟ੍ਠਮਙ੍ਗਲਿਕਾ ਸਾਣਿਯਾ ਅਨ੍ਤਰੇਨ ਓਲੋਕੇਨ੍ਤੀ ਤਂ ਦਿਸ੍ਵਾ ‘‘ਕੋ ਏਸੋ’’ਤਿ ਪੁਚ੍ਛਿਤ੍ਵਾ ‘‘ਚਣ੍ਡਾਲੋ ਅਯ੍ਯੇ’’ਤਿ ਵੁਤ੍ਤੇ ‘‘ਅਦਿਟ੍ਠਪੁਬ੍ਬਯੁਤ੍ਤਕਂ ਵਤ ਪਸ੍ਸਾਮੀ’’ਤਿ ਗਨ੍ਧੋਦਕੇਨ ਅਕ੍ਖੀਨਿ ਧੋਵਿਤ੍ਵਾ ਤਤੋ ਨਿਵਤ੍ਤਿ. ਤਾਯ ਸਦ੍ਧਿਂ ਨਿਕ੍ਖਨ੍ਤਜਨੋ ‘‘ਅਰੇ, ਦੁਟ੍ਠ ਚਣ੍ਡਾਲ, ਅਜ੍ਜ ਤਂ ਨਿਸ੍ਸਾਯ ਅਮ੍ਹਾਕਂ ਅਮੂਲਕਂ ਸੁਰਾਭਤ੍ਤਂ ਨਟ੍ਠ’’ਨ੍ਤਿ ਕੋਧਾਭਿਭੂਤੋ ਮਾਤਙ੍ਗਪਣ੍ਡਿਤਂ ਹਤ੍ਥੇਹਿ ਚ ਪਾਦੇਹਿ ਚ ਪੋਥੇਤ੍ਵਾ ਵਿਸਞ੍ਞਿਂ ਕਤ੍ਵਾ ਪਕ੍ਕਾਮਿ. ਸੋ ਮੁਹੁਤ੍ਤਂ ਵੀਤਿਨਾਮੇਤ੍ਵਾ ਪਟਿਲਦ੍ਧਸਞ੍ਞੋ ਚਿਨ੍ਤੇਸਿ ‘‘ਦਿਟ੍ਠਮਙ੍ਗਲਿਕਾਯ ਪਰਿਜਨੋ ਮਂ ਨਿਦ੍ਦੋਸਂ ਅਕਾਰਣੇਨ ਪੋਥੇਸਿ, ਦਿਟ੍ਠਮਙ੍ਗਲਿਕਂ ਲਭਿਤ੍ਵਾਵ ਉਟ੍ਠਹਿਸ੍ਸਾਮਿ, ਨੋ ਅਲਭਿਤ੍ਵਾ’’ਤਿ ਅਧਿਟ੍ਠਾਯ ਗਨ੍ਤ੍ਵਾ ਤਸ੍ਸਾ ਪਿਤੁ ਨਿਵੇਸਨਦ੍ਵਾਰੇ ਨਿਪਜ੍ਜਿ. ਸੋ ‘‘ਕੇਨ ਕਾਰਣੇਨ ਨਿਪਨ੍ਨੋਸੀ’’ਤਿ ਵੁਤ੍ਤੇ ‘‘ਅਞ੍ਞਂ ਕਾਰਣਂ ਨਤ੍ਥਿ, ਦਿਟ੍ਠਮਙ੍ਗਲਿਕਾਯ ਮੇ ਅਤ੍ਥੋ’’ਤਿ ਆਹ. ਏਕੋ ਦਿਵਸੋ ਅਤੀਤੋ, ਤਥਾ ਦੁਤਿਯੋ, ਤਤਿਯੋ, ਚਤੁਤ੍ਥੋ, ਪਞ੍ਚਮੋ, ਛਟ੍ਠੋ ਚ. ਬੋਧਿਸਤ੍ਤਾਨਂ ਅਧਿਟ੍ਠਾਨਂ ਨਾਮ ਸਮਿਜ੍ਝਤਿ, ਤਸ੍ਮਾ ਸਤ੍ਤਮੇ ਦਿਵਸੇ ਦਿਟ੍ਠਮਙ੍ਗਲਿਕਂ ਨੀਹਰਿਤ੍ਵਾ ਤਸ੍ਸ ਅਦਂਸੁ.

ਅਥ ਨਂ ਸਾ ‘‘ਉਟ੍ਠੇਹਿ, ਸਾਮਿ, ਤੁਮ੍ਹਾਕਂ ਗੇਹਂ ਗਚ੍ਛਾਮਾ’’ਤਿ ਆਹ. ਭਦ੍ਦੇ, ਤਵ ਪਰਿਜਨੇਨਮ੍ਹਿ ਸੁਪੋਥਿਤੋ ਦੁਬ੍ਬਲੋ, ਮਂ ਉਕ੍ਖਿਪਿਤ੍ਵਾ ਪਿਟ੍ਠਿਂ ਆਰੋਪੇਤ੍ਵਾ ਆਦਾਯ ਗਚ੍ਛਾਹੀਤਿ. ਸਾ ਤਥਾ ਕਤ੍ਵਾ ਨਗਰਵਾਸੀਨਂ ਪਸ੍ਸਨ੍ਤਾਨਞ੍ਞੇਵ ਨਗਰਾ ਨਿਕ੍ਖਮਿਤ੍ਵਾ ਚਣ੍ਡਾਲਗਾਮਕਂ ਗਤਾ. ਅਥ ਨਂ ਮਹਾਸਤ੍ਤੋ ਜਾਤਿਸਮ੍ਭੇਦਵੀਤਿਕ੍ਕਮਂ ਅਕਤ੍ਵਾਵ ਕਤਿਪਾਹਂ ਗੇਹੇ ਵਸਾਪੇਤ੍ਵਾ ਚਿਨ੍ਤੇਸਿ ‘‘ਅਹਮੇਤਂ ਲਾਭਗ੍ਗਯਸਗ੍ਗਪ੍ਪਤ੍ਤਂ ਕਰੋਨ੍ਤੋ ਪਬ੍ਬਜਿਤ੍ਵਾਵ ਕਾਤੁਂ ਸਕ੍ਖਿਸ੍ਸਾਮਿ, ਨ ਇਤਰਥਾ’’ਤਿ. ਅਥ ਨਂ ਆਮਨ੍ਤੇਤ੍ਵਾ ‘ਭਦ੍ਦੇ, ਮਯਿ ਅਰਞ੍ਞਤੋ ਕਿਞ੍ਚਿ ਅਨਾਹਰਨ੍ਤੇ ਅਮ੍ਹਾਕਂ ਜੀਵਿਕਾ ਨਪ੍ਪਵਤ੍ਤਤਿ, ਯਾਵ ਮਮਾਗਮਨਾ ਮਾ ਉਕ੍ਕਣ੍ਠਿ, ਅਹਂ ਅਰਞ੍ਞਂ ਗਮਿਸ੍ਸਾਮੀ’’ਤਿ ਵਤ੍ਵਾ ਗੇਹਵਾਸਿਨੋਪਿ ‘‘ਇਮਂ ਮਾ ਪਮਜ੍ਜਿਤ੍ਥਾ’’ਤਿ ਓਵਦਿਤ੍ਵਾ ਅਰਞ੍ਞਂ ਗਨ੍ਤ੍ਵਾ ਸਮਣਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਪ੍ਪਮਤ੍ਤੋ ਸਤ੍ਤਮੇ ਦਿਵਸੇ ਅਟ੍ਠ ਸਮਾਪਤ੍ਤਿਯੋ ਚ ਪਞ੍ਚ ਅਭਿਞ੍ਞਾਯੋ ਚ ਉਪ੍ਪਾਦੇਤ੍ਵਾ ‘‘ਇਦਾਨਿ ਦਿਟ੍ਠਮਙ੍ਗਲਿਕਾਯ ਅਵਸ੍ਸਯੋ ਭਵਿਤੁਂ ਸਕ੍ਖਿਸ੍ਸਾਮੀ’’ਤਿ ਇਦ੍ਧਿਯਾ ਗਨ੍ਤ੍ਵਾ ਚਣ੍ਡਾਲਗਾਮਦ੍ਵਾਰੇ ਓਤਰਿਤ੍ਵਾ ਦਿਟ੍ਠਮਙ੍ਗਲਿਕਾਯ ਗੇਹਦ੍ਵਾਰਂ ਅਗਮਾਸਿ. ਸਾ ਤਸ੍ਸਾਗਮਨਂ ਸੁਤ੍ਵਾ ਗੇਹਤੋ ਨਿਕ੍ਖਮਿਤ੍ਵਾ ‘‘ਸਾਮਿ, ਕਸ੍ਮਾ ਮਂ ਅਨਾਥਂ ਕਤ੍ਵਾ ਪਬ੍ਬਜਿਤੋਸੀ’’ਤਿ ਪਰਿਦੇਵਿ. ਅਥ ਨਂ ‘‘ਭਦ੍ਦੇ, ਮਾ ਚਿਨ੍ਤਯਿ, ਤਵ ਪੋਰਾਣਕਯਸਤੋ ਇਦਾਨਿ ਮਹਨ੍ਤਤਰਂ ਯਸਂ ਕਰਿਸ੍ਸਾਮਿ, ਅਪਿਚ ਖੋ ਪਨ ‘ਨ ਮਯ੍ਹਂ ਮਾਤਙ੍ਗਪਣ੍ਡਿਤੋ ਸਾਮਿਕੋ, ਮਹਾਬ੍ਰਹ੍ਮਾ ਮੇ ਸਾਮਿਕੋ’ਤਿ ਏਤ੍ਤਕਂ ਪਰਿਸਮਜ੍ਝੇ ਵਤ੍ਤੁਂ ਸਕ੍ਖਿਸ੍ਸਸੀ’ਤਿ ਆਹ. ‘‘ਆਮ, ਸਾਮਿ, ਸਕ੍ਖਿਸ੍ਸਾਮੀ’’ਤਿ. ‘‘ਤੇਨ ਹਿ ‘‘ਇਦਾਨਿ ਤੇ ਸਾਮਿਕੋ ਕੁਹਿਨ੍ਤਿ ਪੁਟ੍ਠਾ ‘ਬ੍ਰਹ੍ਮਲੋਕਂ ਗਤੋ’ਤਿ ਵਤ੍ਵਾ ‘ਕਦਾ ਆਗਮਿਸ੍ਸਤੀ’ਤਿ ਵੁਤ੍ਤੇ ‘ਇਤੋ ਸਤ੍ਤਮੇ ਦਿਵਸੇ ਪੁਣ੍ਣਮਾਯਂ ਚਨ੍ਦਂ ਭਿਨ੍ਦਿਤ੍ਵਾ ਆਗਮਿਸ੍ਸਤੀ’ਤਿ ਵਦੇਯ੍ਯਾਸੀ’’ਤਿ ਨਂ ਵਤ੍ਵਾ ਮਹਾਸਤ੍ਤੋ ਹਿਮਵਨ੍ਤਮੇਵ ਗਤੋ.

ਦਿਟ੍ਠਮਙ੍ਗਲਿਕਾਪਿ ਬਾਰਾਣਸਿਯਂ ਮਹਾਜਨਸ੍ਸ ਮਜ੍ਝੇ ਤੇਸੁ ਤੇਸੁ ਠਾਨੇਸੁ ਤਥਾ ਕਥੇਸਿ. ਮਹਾਜਨੋ ‘‘ਅਹੋ ਮਹਾਬ੍ਰਹ੍ਮਾ ਸਮਾਨੋ ਦਿਟ੍ਠਮਙ੍ਗਲਿਕਂ ਨ ਗਚ੍ਛਤਿ, ਏਵਮੇਤਂ ਭਵਿਸ੍ਸਤੀ’’ਤਿ ਸਦ੍ਦਹਿ. ਬੋਧਿਸਤ੍ਤੋਪਿ ਪੁਣ੍ਣਮਦਿਵਸੇ ਚਨ੍ਦਸ੍ਸ ਗਗਨਮਜ੍ਝੇ ਠਿਤਕਾਲੇ ਬ੍ਰਹ੍ਮਤ੍ਤਭਾਵਂ ਮਾਪੇਤ੍ਵਾ ਸਕਲਂ ਕਾਸਿਰਟ੍ਠਂ ਦ੍ਵਾਦਸਯੋਜਨਿਕਂ ਬਾਰਾਣਸਿਨਗਰਞ੍ਚ ਏਕੋਭਾਸਂ ਕਤ੍ਵਾ ਚਨ੍ਦਮਣ੍ਡਲਂ ਭਿਨ੍ਦਿਤ੍ਵਾ ਓਤਰਿਤ੍ਵਾ ਬਾਰਾਣਸਿਯਾ ਉਪਰੂਪਰਿ ਤਿਕ੍ਖਤ੍ਤੁਂ ਪਰਿਬ੍ਭਮਿਤ੍ਵਾ ਮਹਾਜਨੇਨ ਗਨ੍ਧਮਾਲਾਦੀਹਿ ਪੂਜਿਯਮਾਨੋ ਚਣ੍ਡਾਲਗਾਮਕਾਭਿਮੁਖੋ ਅਹੋਸਿ. ਬ੍ਰਹ੍ਮਭਤ੍ਤਾ ਸਨ੍ਨਿਪਤਿਤ੍ਵਾ ਚਣ੍ਡਾਲਗਾਮਕਂ ਗਨ੍ਤ੍ਵਾ ਦਿਟ੍ਠਮਙ੍ਗਲਿਕਾਯ ਗੇਹਂ ਸੁਦ੍ਧਵਤ੍ਥੇਹਿ ਛਾਦੇਤ੍ਵਾ ਭੂਮਿਂ ਚਤੁਜ੍ਜਾਤਿਯਗਨ੍ਧੇਹਿ ਓਪੁਞ੍ਛਿਤ੍ਵਾ ਪੁਪ੍ਫਾਨਿ ਵਿਕਿਰਿਤ੍ਵਾ ਧੂਮਂ ਦਤ੍ਵਾ ਚੇਲਵਿਤਾਨਂ ਪਸਾਰੇਤ੍ਵਾ ਮਹਾਸਯਨਂ ਪਞ੍ਞਪੇਤ੍ਵਾ ਗਨ੍ਧਤੇਲੇਹਿ ਦੀਪਂ ਜਾਲੇਤ੍ਵਾ ਦ੍ਵਾਰੇ ਰਜਤਪਟ੍ਟਵਣ੍ਣਵਾਲੁਕਂ ਓਕਿਰਿਤ੍ਵਾ ਪੁਪ੍ਫਾਨਿ ਵਿਕਿਰਿਤ੍ਵਾ ਧਜੇ ਬਨ੍ਧਿਂਸੁ. ਏਵਂ ਅਲਙ੍ਕਤੇ ਗੇਹੇ ਮਹਾਸਤ੍ਤੋ ਓਤਰਿਤ੍ਵਾ ਅਨ੍ਤੋ ਪਵਿਸਿਤ੍ਵਾ ਥੋਕਂ ਸਯਨਪਿਟ੍ਠੇ ਨਿਸੀਦਿ.

ਤਦਾ ਦਿਟ੍ਠਮਙ੍ਗਲਿਕਾ ਉਤੁਨੀ ਹੋਤਿ. ਅਥਸ੍ਸਾ ਅਙ੍ਗੁਟ੍ਠਕੇਨ ਨਾਭਿਂ ਪਰਾਮਸਿ, ਕੁਚ੍ਛਿਯਂ ਗਬ੍ਭੋ ਪਤਿਟ੍ਠਾਸਿ. ਅਥ ਨਂ ਮਹਾਸਤ੍ਤੋ ਆਮਨ੍ਤੇਤ੍ਵਾ ‘‘ਭਦ੍ਦੇ, ਗਬ੍ਭੋ ਤੇ ਪਤਿਟ੍ਠਿਤੋ, ਤ੍ਵਂ ਪੁਤ੍ਤਂ ਵਿਜਾਯਿਸ੍ਸਸਿ, ਤ੍ਵਮ੍ਪਿ ਪੁਤ੍ਤੋਪਿ ਤੇ ਲਾਭਗ੍ਗਯਸਗ੍ਗਪ੍ਪਤ੍ਤਾ ਭਵਿਸ੍ਸਥ, ਤਵ ਪਾਦਧੋਵਨਉਦਕਂ ਸਕਲਜਮ੍ਬੁਦੀਪੇ ਰਾਜੂਨਂ ਅਭਿਸੇਕੋਦਕਂ ਭਵਿਸ੍ਸਤਿ, ਨਹਾਨੋਦਕਂ ਪਨ ਤੇ ਅਮਤੋਸਧਂ ਭਵਿਸ੍ਸਤਿ, ਯੇ ਤਂ ਸੀਸੇ ਆਸਿਞ੍ਚਿਸ੍ਸਨ੍ਤਿ, ਤੇ ਸਬ੍ਬਰੋਗੇਹਿ ਮੁਚ੍ਚਿਸ੍ਸਨ੍ਤਿ, ਕਾਲ਼ਕਣ੍ਣਿਂ ਪਰਿਵਜ੍ਜੇਸ੍ਸਨ੍ਤਿ, ਤਵ ਪਾਦਪਿਟ੍ਠੇ ਸੀਸਂ ਠਪੇਤ੍ਵਾ ਵਨ੍ਦਨ੍ਤਾ ਸਹਸ੍ਸਂ ਦਸ੍ਸਨ੍ਤਿ, ਸੋਤਪਥੇ ਠਤ੍ਵਾ ਵਨ੍ਦਨ੍ਤਾ ਸਤਂ ਦਸ੍ਸਨ੍ਤਿ, ਚਕ੍ਖੁਪਥੇ ਠਤ੍ਵਾ ਵਨ੍ਦਨ੍ਤਾ ਏਕਂ ਕਹਾਪਣਂ ਦਤ੍ਵਾ ਵਨ੍ਦਿਸ੍ਸਨ੍ਤਿ, ਅਪ੍ਪਮਤ੍ਤਾ ਹੋਹੀ’’ਤਿ ਨਂ ਓਵਦਿਤ੍ਵਾ ਗੇਹਾ ਨਿਕ੍ਖਮਿਤ੍ਵਾ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ਉਪ੍ਪਤਿਤ੍ਵਾ ਚਨ੍ਦਮਣ੍ਡਲਂ ਪਾਵਿਸਿ. ਬ੍ਰਹ੍ਮਭਤ੍ਤਾ ਸਨ੍ਨਿਪਤਿਤ੍ਵਾ ਠਿਤਕਾਵ ਰਤ੍ਤਿਂ ਵੀਤਿਨਾਮੇਤ੍ਵਾ ਪਾਤੋਵ ਦਿਟ੍ਠਮਙ੍ਗਲਿਕਂ ਸੁਵਣ੍ਣਸਿਵਿਕਂ ਆਰੋਪੇਤ੍ਵਾ ਸੀਸੇਨ ਉਕ੍ਖਿਪਿਤ੍ਵਾ ਨਗਰਂ ਪਵਿਸਿਂਸੁ. ‘‘ਮਹਾਬ੍ਰਹ੍ਮਭਰਿਯਾ’’ਤਿ ਤਂ ਉਪਸਙ੍ਕਮਿਤ੍ਵਾ ਮਹਾਜਨੋ ਗਨ੍ਧਮਾਲਾਦੀਹਿ ਪੂਜੇਸਿ. ਪਾਦਪਿਟ੍ਠੇ ਸੀਸਂ ਠਪੇਤ੍ਵਾ ਵਨ੍ਦਿਤੁਂ ਲਭਨ੍ਤਾ ਸਹਸ੍ਸਤ੍ਥਵਿਕਂ ਦੇਨ੍ਤਿ, ਸੋਤਪਥੇ ਠਤ੍ਵਾ ਵਨ੍ਦਿਤੁਂ ਲਭਨ੍ਤਾ ਸਤਂ ਦੇਨ੍ਤਿ, ਚਕ੍ਖੁਪਥੇ ਠਤ੍ਵਾ ਵਨ੍ਦਿਤੁਂ ਲਭਨ੍ਤਾ ਏਕਂ ਕਹਾਪਣਂ ਦੇਨ੍ਤਿ. ਏਵਂ ਦ੍ਵਾਦਸਯੋਜਨਿਕਂ ਬਾਰਾਣਸਿਂ ਤਂ ਗਹੇਤ੍ਵਾ ਵਿਚਰਨ੍ਤਾ ਅਟ੍ਠਾਰਸਕੋਟਿਧਨਂ ਲਭਿਂਸੁ.

ਅਥ ਨਂ ਨਗਰਂ ਪਰਿਹਰਿਤ੍ਵਾ ਆਨੇਤ੍ਵਾ ਨਗਰਮਜ੍ਝੇ ਮਹਾਮਣ੍ਡਪਂ ਕਾਰੇਤ੍ਵਾ ਸਾਣਿਂ ਪਰਿਕ੍ਖਿਪਿਤ੍ਵਾ ਮਹਾਸਯਨਂ ਪਞ੍ਞਪੇਤ੍ਵਾ ਮਹਨ੍ਤੇਨ ਸਿਰਿਸੋਭਗ੍ਗੇਨ ਤਤ੍ਥ ਵਸਾਪੇਸੁਂ. ਮਣ੍ਡਪਸਨ੍ਤਿਕੇਯੇਵ ਸਤ੍ਤਦ੍ਵਾਰਕੋਟ੍ਠਂ ਸਤ੍ਤਭੂਮਿਕਂ ਪਾਸਾਦਂ ਕਾਤੁਂ ਆਰਭਿਂਸੁ, ਮਹਨ੍ਤਂ ਨਵਕਮ੍ਮਂ ਅਹੋਸਿ. ਦਿਟ੍ਠਮਙ੍ਗਲਿਕਾ ਮਣ੍ਡਪੇਯੇਵ ਪੁਤ੍ਤਂ ਵਿਜਾਯਿ. ਅਥਸ੍ਸ ਨਾਮਗ੍ਗਹਣਦਿਵਸੇ ਬ੍ਰਾਹ੍ਮਣਾ ਸਨ੍ਨਿਪਤਿਤ੍ਵਾ ਮਣ੍ਡਪੇ ਜਾਤਤ੍ਤਾ ‘‘ਮਣ੍ਡਬ੍ਯਕੁਮਾਰੋ’’ਤਿ ਨਾਮਂ ਕਰਿਂਸੁ. ਪਾਸਾਦੋ ਪਨ ਦਸਹਿ ਮਾਸੇਹਿ ਨਿਟ੍ਠਿਤੋ. ਤਤੋ ਪਟ੍ਠਾਯ ਸਾ ਮਹਨ੍ਤੇਨ ਯਸੇਨ ਤਸ੍ਮਿਂ ਵਸਤਿ, ਮਣ੍ਡਬ੍ਯਕੁਮਾਰੋਪਿ ਮਹਨ੍ਤੇਨ ਪਰਿਵਾਰੇਨ ਵਡ੍ਢਤਿ. ਤਸ੍ਸ ਸਤ੍ਤਟ੍ਠਵਸ੍ਸਕਾਲੇਯੇਵ ਜਮ੍ਬੁਦੀਪਤਲੇ ਉਤ੍ਤਮਾਚਰਿਯਾ ਸਨ੍ਨਿਪਤਿਂਸੁ. ਤੇ ਤਂ ਤਯੋ ਵੇਦੇ ਉਗ੍ਗਣ੍ਹਾਪੇਸੁਂ. ਸੋ ਸੋਲ਼ਸਵਸ੍ਸਕਾਲਤੋ ਪਟ੍ਠਾਯ ਬ੍ਰਾਹ੍ਮਣਾਨਂ ਭਤ੍ਤਂ ਪਟ੍ਠਪੇਸਿ, ਨਿਬਦ੍ਧਂ ਸੋਲ਼ਸ ਬ੍ਰਾਹ੍ਮਣਸਹਸ੍ਸਾਨਿ ਭੁਞ੍ਜਨ੍ਤਿ. ਚਤੁਤ੍ਥੇ ਦ੍ਵਾਰਕੋਟ੍ਠਕੇ ਬ੍ਰਾਹ੍ਮਣਾਨਂ ਦਾਨਂ ਦੇਤਿ.

ਅਥੇਕਸ੍ਮਿਂ ਮਹਾਮਹਦਿਵਸੇ ਗੇਹੇ ਬਹੁਂ ਪਾਯਾਸਂ ਪਟਿਯਾਦੇਸੁਂ. ਸੋਲ਼ਸ ਬ੍ਰਾਹ੍ਮਣਸਹਸ੍ਸਾਨਿ ਚਤੁਤ੍ਥੇ ਦ੍ਵਾਰਕੋਟ੍ਠਕੇ ਨਿਸੀਦਿਤ੍ਵਾ ਸੁਵਣ੍ਣਰਸਵਣ੍ਣੇਨ ਨਵਸਪ੍ਪਿਨਾ ਪਕ੍ਕਮਧੁਖਣ੍ਡਸਕ੍ਖਰਾਹਿ ਚ ਅਭਿਸਙ੍ਖਤਂ ਪਾਯਾਸਂ ਪਰਿਭੁਞ੍ਜਨ੍ਤਿ. ਕੁਮਾਰੋਪਿ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਸੁਵਣ੍ਣਪਾਦੁਕਾ ਆਰੁਯ੍ਹ ਹਤ੍ਥੇਨ ਕਞ੍ਚਨਦਣ੍ਡਂ ਗਹੇਤ੍ਵਾ ‘‘ਇਧ ਸਪ੍ਪਿਂ ਦੇਥ, ਇਧ ਮਧੁ’’ਨ੍ਤਿ ਵਿਚਾਰੇਨ੍ਤੋ ਚਰਤਿ. ਤਸ੍ਮਿਂ ਖਣੇ ਮਾਤਙ੍ਗਪਣ੍ਡਿਤੋ ਹਿਮਵਨ੍ਤੇ ਅਸ੍ਸਮਪਦੇ ਨਿਸਿਨ੍ਨੋ ‘‘ਕਾ ਨੁ ਖੋ ਦਿਟ੍ਠਮਙ੍ਗਲਿਕਾਯ ਪੁਤ੍ਤਸ੍ਸ ਪਵਤ੍ਤੀ’’ਤਿ ਓਲੋਕੇਨ੍ਤੋ ਤਸ੍ਸ ਅਤਿਤ੍ਥੇ ਪਕ੍ਖਨ੍ਦਭਾਵਂ ਦਿਸ੍ਵਾ ‘‘ਅਜ੍ਜੇਵ ਗਨ੍ਤ੍ਵਾ ਮਾਣਵਂ ਦਮੇਤ੍ਵਾ ਯਤ੍ਥ ਦਿਨ੍ਨਂ ਮਹਪ੍ਫਲਂ ਹੋਤਿ, ਤਤ੍ਥ ਦਾਨਂ ਦਾਪੇਤ੍ਵਾ ਆਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਆਕਾਸੇਨ ਅਨੋਤਤ੍ਤਦਹਂ ਗਨ੍ਤ੍ਵਾ ਮੁਖਧੋਵਨਾਦੀਨਿ ਕਤ੍ਵਾ ਮਨੋਸਿਲਾਤਲੇ ਠਿਤੋ ਰਤ੍ਤਦੁਪਟ੍ਟਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਪਂਸੁਕੂਲਸਙ੍ਘਾਟਿਂ ਪਾਰੁਪਿਤ੍ਵਾ ਮਤ੍ਤਿਕਾਪਤ੍ਤਂ ਆਦਾਯ ਆਕਾਸੇਨਾਗਨ੍ਤ੍ਵਾ ਚਤੁਤ੍ਥੇ ਦ੍ਵਾਰਕੋਟ੍ਠਕੇ ਦਾਨਗ੍ਗੇਯੇਵ ਓਤਰਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਮਣ੍ਡਬ੍ਯੋ ਕੁਮਾਰੋ ਇਤੋ ਚਿਤੋ ਚ ਓਲੋਕੇਨ੍ਤੋ ਤਂ ਦਿਸ੍ਵਾ ‘‘ਏਵਂਵਿਰੂਪੋ ਸਙ੍ਕਾਰਯਕ੍ਖਸਦਿਸੋ ਅਯਂ ਪਬ੍ਬਜਿਤੋ ਇਮਂ ਠਾਨਂ ਆਗਚ੍ਛਨ੍ਤੋ ਕੁਤੋ ਨੁ ਖੋ ਆਗਚ੍ਛਤੀ’’ਤਿ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਪਠਮਂ ਗਾਥਮਾਹ –

੧.

‘‘ਕੁਤੋ ਨੁ ਆਗਚ੍ਛਸਿ ਦੁਮ੍ਮਵਾਸੀ, ਓਤਲ੍ਲਕੋ ਪਂਸੁਪਿਸਾਚਕੋਵ;

ਸਙ੍ਕਾਰਚੋਲ਼ਂ ਪਟਿਮੁਞ੍ਚ ਕਣ੍ਠੇ, ਕੋ ਰੇ ਤੁਵਂ ਹੋਸਿ ਅਦਕ੍ਖਿਣੇਯ੍ਯੋ’’ਤਿ.

ਤਤ੍ਥ ਦੁਮ੍ਮਵਾਸੀਤਿ ਅਨਞ੍ਜਿਤਅਮਣ੍ਡਿਤਘਟਿਤਸਙ੍ਘਾਟਿਕਪਿਲੋਤਿਕਵਸਨੋ. ਓਤਲ੍ਲਕੋਤਿ ਲਾਮਕੋ ਓਲਮ੍ਬਵਿਲਮ੍ਬਨਨ੍ਤਕਧਰੋ ਵਾ. ਪਂਸੁਪਿਸਾਚਕੋਵਾਤਿ ਸਙ੍ਕਾਰਟ੍ਠਾਨੇ ਪਿਸਾਚਕੋ ਵਿਯ. ਸਙ੍ਕਾਰਚੋਲ਼ਨ੍ਤਿ ਸਙ੍ਕਾਰਟ੍ਠਾਨੇ ਲਦ੍ਧਪਿਲੋਤਿਕਂ. ਪਟਿਮੁਞ੍ਚਾਤਿ ਪਟਿਮੁਞ੍ਚਿਤ੍ਵਾ. ਅਦਕ੍ਖਿਣੇਯ੍ਯੋਤਿ ਤ੍ਵਂ ਅਦਕ੍ਖਿਣੇਯ੍ਯੋ ਇਮੇਸਂ ਪਰਮਦਕ੍ਖਿਣੇਯ੍ਯਾਨਂ ਨਿਸਿਨ੍ਨਟ੍ਠਾਨਂ ਏਕੋ ਹੁਤ੍ਵਾ ਕੁਤੋ ਆਗਤੋ.

ਤਂ ਸੁਤ੍ਵਾ ਮਹਾਸਤ੍ਤੋ ਮੁਦੁਚਿਤ੍ਤੇਨੇਵ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਦੁਤਿਯਂ ਗਾਥਮਾਹ –

੨.

‘‘ਅਨ੍ਨਂ ਤਵੇਦਂ ਪਕਤਂ ਯਸਸ੍ਸਿ, ਤਂ ਖਜ੍ਜਰੇ ਭੁਞ੍ਜਰੇ ਪਿਯ੍ਯਰੇ ਚ;

ਜਾਨਾਸਿ ਮਂ ਤ੍ਵਂ ਪਰਦਤ੍ਤੂਪਜੀਵਿਂ, ਉਤ੍ਤਿਟ੍ਠਪਿਣ੍ਡਂ ਲਭਤਂ ਸਪਾਕੋ’’ਤਿ.

ਤਤ੍ਥ ਪਕਤਨ੍ਤਿ ਪਟਿਯਤ੍ਤਂ. ਯਸਸ੍ਸੀਤਿ ਪਰਿਵਾਰਸਮ੍ਪਨ੍ਨ. ਤਂ ਖਜ੍ਜਰੇਤਿ ਤਂ ਖਜ੍ਜਨ੍ਤਿ ਚ ਭੁਞ੍ਜਨ੍ਤਿ ਚ ਪਿਵਨ੍ਤਿ ਚ. ਕਿਂਕਾਰਣਾ ਮਯ੍ਹਂ ਕੁਜ੍ਝਸਿ? ਉਤ੍ਤਿਟ੍ਠਪਿਣ੍ਡਨ੍ਤਿ ਉਪਤਿਟ੍ਠਿਤ੍ਵਾ ਲਭਿਤਬ੍ਬਪਿਣ੍ਡਂ, ਉਟ੍ਠਾਯ ਠਿਤੇਹਿ ਵਾ ਦੀਯਮਾਨਂ ਹੇਟ੍ਠਾ ਠਤ੍ਵਾ ਲਭਿਤਬ੍ਬਪਿਣ੍ਡਂ. ਲਭਤਂ ਸਪਾਕੋਤਿ ਸਪਾਕੋ ਚਣ੍ਡਾਲੋਪਿ ਲਭਤੁ. ਜਾਤਿਸਮ੍ਪਨ੍ਨਾ ਹਿ ਯਤ੍ਥ ਕਤ੍ਥਚਿ ਲਭਨ੍ਤਿ, ਸਪਾਕਚਣ੍ਡਾਲਸ੍ਸ ਪਨ ਕੋ ਦੇਤਿ, ਦੁਲ੍ਲਭਪਿਣ੍ਡੋ ਅਹਂ, ਤਸ੍ਮਾ ਮੇ ਜੀਵਿਤਪਵਤ੍ਤਨਤ੍ਥਂ ਭੋਜਨਂ ਦਾਪੇਹਿ, ਕੁਮਾਰਾਤਿ.

ਤਤੋ ਮਣ੍ਡਬ੍ਯੋ ਗਾਥਮਾਹ –

੩.

‘‘ਅਨ੍ਨਂ ਮਮੇਦਂ ਪਕਤਂ ਬ੍ਰਾਹ੍ਮਣਾਨਂ, ਅਤ੍ਤਤ੍ਥਾਯ ਸਦ੍ਦਹਤੋ ਮਮੇਦਂ;

ਅਪੇਹਿ ਏਤ੍ਤੋ ਕਿਮਿਧਟ੍ਠਿਤੋਸਿ, ਨ ਮਾਦਿਸਾ ਤੁਮ੍ਹਂ ਦਦਨ੍ਤਿ ਜਮ੍ਮਾ’’ਤਿ.

ਤਤ੍ਥ ਅਤ੍ਤਤ੍ਥਾਯਾਤਿ ਅਤ੍ਤਨੋ ਵਡ੍ਢਿਅਤ੍ਥਾਯ. ਅਪੇਹਿ ਏਤ੍ਤੋਤਿ ਇਮਮ੍ਹਾ ਠਾਨਾ ਅਪਗਚ੍ਛ. ਨ ਮਾਦਿਸਾਤਿ ਮਾਦਿਸਾ ਜਾਤਿਸਮ੍ਪਨ੍ਨਾਨਂ ਉਦਿਚ੍ਚਬ੍ਰਾਹ੍ਮਣਾਨਂ ਦਾਨਂ ਦੇਨ੍ਤਿ, ਨ ਤੁਯ੍ਹਂ ਚਣ੍ਡਾਲਸ੍ਸ, ਗਚ੍ਛ, ਜਮ੍ਮਾਤਿ.

ਤਤੋ ਮਹਾਸਤ੍ਤੋ ਗਾਥਮਾਹ –

੪.

‘‘ਥਲੇ ਚ ਨਿਨ੍ਨੇ ਚ ਵਪਨ੍ਤਿ ਬੀਜਂ, ਅਨੂਪਖੇਤ੍ਤੇ ਫਲਮਾਸਮਾਨਾ;

ਏਤਾਯ ਸਦ੍ਧਾਯ ਦਦਾਹਿ ਦਾਨਂ, ਅਪ੍ਪੇਵ ਆਰਾਧਯੇ ਦਕ੍ਖਿਣੇਯ੍ਯੇ’’ਤਿ.

ਤਸ੍ਸਤ੍ਥੋ – ਕੁਮਾਰ, ਸਸ੍ਸਫਲਂ ਆਸੀਸਮਾਨਾ ਤੀਸੁਪਿ ਖੇਤ੍ਤੇਸੁ ਬੀਜਂ ਵਪਨ੍ਤਿ. ਤਤ੍ਥ ਅਤਿਵੁਟ੍ਠਿਕਾਲੇ ਥਲੇ ਸਸ੍ਸਂ ਸਮ੍ਪਜ੍ਜਤਿ, ਨਿਨ੍ਨੇ ਪੂਤਿਕਂ ਹੋਤਿ, ਅਨੂਪਖੇਤ੍ਤੇ ਨਦਿਞ੍ਚ ਤਲ਼ਾਕਞ੍ਚ ਨਿਸ੍ਸਾਯ ਕਤਂ ਓਘੇਨ ਵੁਯ੍ਹਤਿ. ਮਨ੍ਦਵੁਟ੍ਠਿਕਾਲੇ ਥਲੇ ਖੇਤ੍ਤੇ ਵਿਪਜ੍ਜਤਿ, ਨਿਨ੍ਨੇ ਥੋਕਂ ਸਮ੍ਪਜ੍ਜਤਿ, ਅਨੂਪਖੇਤ੍ਤੇ ਸਮ੍ਪਜ੍ਜਤੇਵ. ਸਮਵੁਟ੍ਠਿਕਾਲੇ ਥਲੇ ਖੇਤ੍ਤੇ ਥੋਕਂ ਸਮ੍ਪਜ੍ਜਤਿ, ਇਤਰੇਸੁ ਸਮ੍ਪਜ੍ਜਤੇਵ. ਤਸ੍ਮਾ ਯਥਾ ਫਲਮਾਸੀਸਮਾਨਾ ਤੀਸੁਪਿ ਖੇਤ੍ਤੇਸੁ ਵਪਨ੍ਤਿ, ਤਥਾ ਤ੍ਵਮ੍ਪਿ ਏਤਾਯ ਫਲਸਦ੍ਧਾਯ ਆਗਤਾਗਤਾਨਂ ਸਬ੍ਬੇਸਂਯੇਵ ਦਾਨਂ ਦੇਹਿ, ਅਪ੍ਪੇਵ ਨਾਮ ਏਵਂ ਦਦਨ੍ਤੋ ਦਕ੍ਖਿਣੇਯ੍ਯੇ ਆਰਾਧੇਯ੍ਯਾਸਿ ਲਭੇਯ੍ਯਾਸੀਤਿ.

ਤਤੋ ਮਣ੍ਡਬ੍ਯੋ ਗਾਥਮਾਹ –

੫.

‘‘ਖੇਤ੍ਤਾਨਿ ਮਯ੍ਹਂ ਵਿਦਿਤਾਨਿ ਲੋਕੇ, ਯੇਸਾਹਂ ਬੀਜਾਨਿ ਪਤਿਟ੍ਠਪੇਮਿ;

ਯੇ ਬ੍ਰਾਹ੍ਮਣਾ ਜਾਤਿਮਨ੍ਤੂਪਪਨ੍ਨਾ, ਤਾਨੀਧ ਖੇਤ੍ਤਾਨਿ ਸੁਪੇਸਲਾਨੀ’’ਤਿ.

ਤਤ੍ਥ ਯੇਸਾਹਨ੍ਤਿ ਯੇਸੁ ਅਹਂ. ਜਾਤਿਮਨ੍ਤੂਪਪਨ੍ਨਾਤਿ ਜਾਤਿਯਾ ਚ ਮਨ੍ਤੇਹਿ ਚ ਉਪਪਨ੍ਨਾ.

ਤਤੋ ਮਹਾਸਤ੍ਤੋ ਦ੍ਵੇ ਗਾਥਾ ਅਭਾਸਿ –

੬.

‘‘ਜਾਤਿਮਦੋ ਚ ਅਤਿਮਾਨਿਤਾ ਚ, ਲੋਭੋ ਚ ਦੋਸੋ ਚ ਮਦੋ ਚ ਮੋਹੋ;

ਏਤੇ ਅਗੁਣਾ ਯੇਸੁ ਚ ਸਨ੍ਤਿ ਸਬ੍ਬੇ, ਤਾਨੀਧ ਖੇਤ੍ਤਾਨਿ ਅਪੇਸਲਾਨਿ.

੭.

‘‘ਜਾਤਿਮਦੋ ਚ ਅਤਿਮਾਨਿਤਾ ਚ, ਲੋਭੋ ਚ ਦੋਸੋ ਚ ਮਦੋ ਚ ਮੋਹੋ;

ਏਤੇ ਅਗੁਣਾ ਯੇਸੁ ਨ ਸਨ੍ਤਿ ਸਬ੍ਬੇ, ਤਾਨੀਧ ਖੇਤ੍ਤਾਨਿ ਸੁਪੇਸਲਾਨੀ’’ਤਿ.

ਤਤ੍ਥ ਜਾਤਿਮਦੋਤਿ ‘‘ਅਹਮਸ੍ਮਿ ਜਾਤਿਸਮ੍ਪਨ੍ਨੋ’’ਤਿ ਏਵਂ ਉਪ੍ਪਨ੍ਨਮਾਨੋ. ਅਤਿਮਾਨਿਤਾ ਚਾਤਿ ‘‘ਅਞ੍ਞੋ ਮਯਾ ਸਦ੍ਧਿਂ ਜਾਤਿਆਦੀਹਿ ਸਦਿਸੋ ਨਤ੍ਥੀ’’ਤਿ ਅਤਿਕ੍ਕਮ੍ਮ ਪਵਤ੍ਤਮਾਨੋ. ਲੋਭਾਦਯੋ ਲੁਬ੍ਭਨਦੁਸ੍ਸਨਮਜ੍ਜਨਮੁਯ੍ਹਨਮਤ੍ਤਾਵ. ਅਪੇਸਲਾਨੀਤਿ ਏਵਰੂਪਾ ਪੁਗ੍ਗਲਾ ਆਸੀਵਿਸਭਰਿਤਾ ਵਿਯ ਵਮ੍ਮਿਕਾ ਅਪ੍ਪਿਯਸੀਲਾ ਹੋਨ੍ਤਿ. ਏਵਰੂਪਾਨਂ ਦਿਨ੍ਨਂ ਨ ਮਹਪ੍ਫਲਂ ਹੋਤਿ, ਤਸ੍ਮਾ ਮਾ ਏਤੇਸਂ ਸੁਪੇਸਲਖੇਤ੍ਤਭਾਵਂ ਮਞ੍ਞਿਤ੍ਥ. ਨ ਹਿ ਜਾਤਿਮਨ੍ਤਾ ਸਗ੍ਗਦਾਯਕਾ. ਯੇ ਪਨ ਜਾਤਿਮਾਨਾਦਿਰਹਿਤਾ ਅਰਿਯਾ, ਤਾਨਿ ਖੇਤ੍ਤਾਨਿ ਸੁਪੇਸਲਾਨਿ, ਤੇਸੁ ਦਿਨ੍ਨਂ ਮਹਪ੍ਫਲਂ, ਤੇ ਸਗ੍ਗਦਾਯਕਾ ਹੋਨ੍ਤੀਤਿ.

ਇਤਿ ਸੋ ਮਹਾਸਤ੍ਤੇ ਪੁਨਪ੍ਪੁਨਂ ਕਥੇਨ੍ਤੇ ਕੁਜ੍ਝਿਤ੍ਵਾ ‘‘ਅਯਂ ਅਤਿਵਿਯ ਬਹੁਂ ਵਿਪ੍ਪਲਪਤਿ, ਕੁਹਿਂ ਗਤਾ ਇਮੇ ਦੋਵਾਰਿਕਾ, ਨਯਿਮਂ ਚਣ੍ਡਾਲਂ ਨੀਹਰਨ੍ਤੀ’’ਤਿ ਗਾਥਮਾਹ –

੮.

‘‘ਕ੍ਵੇਤ੍ਥ ਗਤਾ ਉਪਜੋਤਿਯੋ ਚ, ਉਪਜ੍ਝਾਯੋ ਅਥ ਵਾ ਗਣ੍ਡਕੁਚ੍ਛਿ;

ਇਮਸ੍ਸ ਦਣ੍ਡਞ੍ਚ ਵਧਞ੍ਚ ਦਤ੍ਵਾ, ਗਲੇ ਗਹੇਤ੍ਵਾ ਖਲਯਾਥ ਜਮ੍ਮ’’ਨ੍ਤਿ.

ਤਤ੍ਥ ਕ੍ਵੇਤ੍ਥ ਗਤਾਤਿ ਇਮੇਸੁ ਤੀਸੁ ਦ੍ਵਾਰੇਸੁ ਠਪਿਤਾ ਉਪਜੋਤਿਯੋ ਚ ਉਪਜ੍ਝਾਯੋ ਚ ਗਣ੍ਡਕੁਚ੍ਛਿ ਚਾਤਿ ਤਯੋ ਦੋਵਾਰਿਕਾ ਕੁਹਿਂ ਗਤਾਤਿ ਅਤ੍ਥੋ.

ਤੇਪਿ ਤਸ੍ਸ ਵਚਨਂ ਸੁਤ੍ਵਾ ਵੇਗੇਨਾਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਕਿਂ ਕਰੋਮ ਦੇਵਾ’’ਤਿ ਆਹਂਸੁ. ‘‘ਅਯਂ ਵੋ ਜਮ੍ਮੋ ਚਣ੍ਡਾਲੋ ਦਿਟ੍ਠੋ’’ਤਿ? ‘‘ਨ ਪਸ੍ਸਾਮ ਦੇਵ, ਕੁਤੋਚਿ ਆਗਤਭਾਵਂ ਨ ਜਾਨਾਮਾ’’ਤਿ. ‘‘ਕੋ ਚੇਸ ਮਾਯਾਕਾਰੋ ਵਾ ਵਿਜ੍ਜਾਧਰੋ ਵਾ ਭਵਿਸ੍ਸਤਿ, ਇਦਾਨਿ ਕਿਂ ਤਿਟ੍ਠਥਾ’’ਤਿ. ‘‘ਕਿਂ ਕਰੋਮ ਦੇਵਾ’’ਤਿ? ‘‘ਇਮਸ੍ਸ ਮੁਖਮੇਵ ਪੋਥੇਤ੍ਵਾ ਭਿਨ੍ਦਨ੍ਤਾ ਦਣ੍ਡਵੇਲ਼ੁਪੇਸਿਕਾਹਿ ਪਿਟ੍ਠਿਚਮ੍ਮਂ ਉਪ੍ਪਾਟੇਨ੍ਤਾ ਵਧਞ੍ਚ ਦਤ੍ਵਾ ਗਲੇ ਗਹੇਤ੍ਵਾ ਏਤਂ ਜਮ੍ਮਂ ਖਲਯਾਥ, ਇਤੋ ਨੀਹਰਥਾ’’ਤਿ.

ਮਹਾਸਤ੍ਤੋ ਤੇਸੁ ਅਤ੍ਤਨੋ ਸਨ੍ਤਿਕਂ ਅਨਾਗਤੇਸ੍ਵੇਵ ਉਪ੍ਪਤਿਤ੍ਵਾ ਆਕਾਸੇ ਠਿਤੋ ਗਾਥਮਾਹ –

੯.

‘‘ਗਿਰਿਂ ਨਖੇਨ ਖਣਸਿ, ਅਯੋ ਦਨ੍ਤੇਹਿ ਖਾਦਸਿ;

ਜਾਤਵੇਦਂ ਪਦਹਸਿ, ਯੋ ਇਸਿਂ ਪਰਿਭਾਸਸੀ’’ਤਿ.

ਤਤ੍ਥ ਜਾਤਵੇਦਂ ਪਦਹਸੀਤਿ ਅਗ੍ਗਿਂ ਗਿਲਿਤੁਂ ਵਾਯਮਸਿ.

ਇਮਞ੍ਚ ਪਨ ਗਾਥਂ ਵਤ੍ਵਾ ਮਹਾਸਤ੍ਤੋ ਪਸ੍ਸਨ੍ਤਸ੍ਸੇਵ ਮਾਣਵਸ੍ਸ ਚ ਬ੍ਰਾਹ੍ਮਣਾਨਞ੍ਚ ਆਕਾਸੇ ਪਕ੍ਖਨ੍ਦਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੦.

‘‘ਇਦਂ ਵਤ੍ਵਾਨ ਮਾਤਙ੍ਗੋ, ਇਸਿ ਸਚ੍ਚਪਰਕ੍ਕਮੋ;

ਅਨ੍ਤਲਿਕ੍ਖਸ੍ਮਿਂ ਪਕ੍ਕਾਮਿ, ਬ੍ਰਾਹ੍ਮਣਾਨਂ ਉਦਿਕ੍ਖਤ’’ਨ੍ਤਿ.

ਤਤ੍ਥ ਸਚ੍ਚਪਰਕ੍ਕਮੋਤਿ ਸਭਾਵਪਰਕ੍ਕਮੋ.

ਸੋ ਪਾਚੀਨਦਿਸਾਭਿਮੁਖੋ ਗਨ੍ਤ੍ਵਾ ਏਕਾਯ ਵੀਥਿਯਾ ਓਤਰਿਤ੍ਵਾ ‘‘ਪਦਵਲ਼ਞ੍ਜਂ ਪਞ੍ਞਾਯਤੂ’’ਤਿ ਅਧਿਟ੍ਠਾਯ ਪਾਚੀਨਦ੍ਵਾਰਸਮੀਪੇ ਪਿਣ੍ਡਾਯ ਚਰਨ੍ਤੋ ਮਿਸ੍ਸਕਭਤ੍ਤਂ ਸਂਕਡ੍ਢਿਤ੍ਵਾ ਏਕਿਸ੍ਸਂ ਸਾਲਾਯਂ ਨਿਸੀਦਿਤ੍ਵਾ ਮਿਸ੍ਸਕਭਤ੍ਤਂ ਪਰਿਭੁਞ੍ਜਿ. ਨਗਰਦੇਵਤਾ ‘‘ਅਯਂ ਅਮ੍ਹਾਕਂ ਅਯ੍ਯਂ ਵਿਹੇਠੇਤ੍ਵਾ ਕਥੇਤੀ’’ਤਿ ਅਸਹਮਾਨਾ ਆਗਮਿਂਸੁ. ਅਥਸ੍ਸ ਜੇਟ੍ਠਕਯਕ੍ਖੋ ਮਣ੍ਡਬ੍ਯਸ੍ਸ ਗੀਵਂ ਗਹੇਤ੍ਵਾ ਪਰਿਵਤ੍ਤੇਸਿ, ਸੇਸਦੇਵਤਾ ਸੇਸਬ੍ਰਾਹ੍ਮਣਾਨਂ ਗੀਵਂ ਗਣ੍ਹਿਤ੍ਵਾ ਪਰਿਵਤ੍ਤੇਸੁਂ. ਬੋਧਿਸਤ੍ਤੇ ਮੁਦੁਚਿਤ੍ਤਤਾਯ ਪਨ ‘‘ਤਸ੍ਸ ਪੁਤ੍ਤੋ’’ਤਿ ਨਂ ਨ ਮਾਰੇਨ੍ਤਿ, ਕੇਵਲਂ ਕਿਲਮੇਨ੍ਤਿਯੇਵ. ਮਣ੍ਡਬ੍ਯਸ੍ਸ ਸੀਸਂ ਪਰਿਵਤ੍ਤਿਤ੍ਵਾ ਪਿਟ੍ਠਿਪਸ੍ਸਾਭਿਮੁਖਂ ਜਾਤਂ, ਹਤ੍ਥਪਾਦਾ ਉਜੁਕਾ ਥਦ੍ਧਾਵ ਅਟ੍ਠਂਸੁ, ਅਕ੍ਖੀਨਿ ਕਾਲਕਤਸ੍ਸੇਵ ਪਰਿਵਤ੍ਤਿਂਸੁ. ਸੋ ਥਦ੍ਧਸਰੀਰੋਵ ਨਿਪਜ੍ਜਿ, ਸੇਸਬ੍ਰਾਹ੍ਮਣਾ ਮੁਖੇਨ ਖੇਲ਼ਂ ਵਮਨ੍ਤਾ ਅਪਰਾਪਰਂ ਪਰਿਵਤ੍ਤਨ੍ਤਿ. ਮਾਣਵਾ ‘‘ਅਯ੍ਯੇ, ਪੁਤ੍ਤਸ੍ਸ ਤੇ ਕਿਂ ਜਾਤ’’ਨ੍ਤਿ ਦਿਟ੍ਠਮਙ੍ਗਲਿਕਾਯ ਆਰੋਚਯਿਂਸੁ. ਸਾ ਵੇਗੇਨ ਗਨ੍ਤ੍ਵਾ ਪੁਤ੍ਤਂ ਦਿਸ੍ਵਾ ‘‘ਕਿਮੇਤ’’ਨ੍ਤਿ ਵਤ੍ਵਾ ਗਾਥਮਾਹ –

੧੧.

‘‘ਆਵੇਲ੍ਲਿਤਂ ਪਿਟ੍ਠਿਤੋ ਉਤ੍ਤਮਙ੍ਗਂ, ਬਾਹੁਂ ਪਸਾਰੇਤਿ ਅਕਮ੍ਮਨੇਯ੍ਯਂ;

ਸੇਤਾਨਿ ਅਕ੍ਖੀਨਿ ਯਥਾ ਮਤਸ੍ਸ, ਕੋ ਮੇ ਇਮਂ ਪੁਤ੍ਤਮਕਾਸਿ ਏਵ’’ਨ੍ਤਿ.

ਤਤ੍ਥ ਆਵੇਲ੍ਲਿਤਨ੍ਤਿ ਪਰਿਵਤ੍ਤਿਤਂ.

ਅਥਸ੍ਸਾ ਤਸ੍ਮਿਂ ਠਾਨੇ ਠਿਤਜਨੋ ਆਰੋਚੇਤੁਂ ਗਾਥਮਾਹ –

੧੨.

‘‘ਇਧਾਗਮਾ ਸਮਣੋ ਦੁਮ੍ਮਵਾਸੀ, ਓਤਲ੍ਲਕੋ ਪਂਸੁਪਿਸਾਚਕੋਵ;

ਸਙ੍ਕਾਰਚੋਲ਼ਂ ਪਟਿਮੁਞ੍ਚ ਕਣ੍ਠੇ, ਸੋ ਤੇ ਇਮਂ ਪੁਤ੍ਤਮਕਾਸਿ ਏਵ’’ਨ੍ਤਿ.

ਸਾ ਤਂ ਸੁਤ੍ਵਾਵ ਚਿਨ੍ਤੇਸਿ ‘‘ਅਞ੍ਞਸ੍ਸੇਤਂ ਬਲਂ ਨਤ੍ਥਿ, ਨਿਸ੍ਸਂਸਯਂ ਮਾਤਙ੍ਗਪਣ੍ਡਿਤੋ ਭਵਿਸ੍ਸਤਿ, ਸਮ੍ਪਨ੍ਨਮੇਤ੍ਤਾਭਾਵਨੋ ਖੋ ਪਨ ਧੀਰੋ ਨ ਏਤ੍ਤਕਂ ਜਨਂ ਕਿਲਮੇਤ੍ਵਾ ਗਮਿਸ੍ਸਤਿ, ਕਤਰਂ ਨੁ ਖੋ ਦਿਸਂ ਗਤੋ ਭਵਿਸ੍ਸਤੀ’’ਤਿ. ਤਤੋ ਪੁਚ੍ਛਨ੍ਤੀ ਗਾਥਮਾਹ –

੧੩.

‘‘ਕਤਮਂ ਦਿਸਂ ਅਗਮਾ ਭੂਰਿਪਞ੍ਞੋ, ਅਕ੍ਖਾਥ ਮੇ ਮਾਣਵਾ ਏਤਮਤ੍ਥਂ;

ਗਨ੍ਤ੍ਵਾਨ ਤਂ ਪਟਿਕਰੇਮੁ ਅਚ੍ਚਯਂ, ਅਪ੍ਪੇਵ ਨਂ ਪੁਤ੍ਤ ਲਭੇਮੁ ਜੀਵਿਤ’’ਨ੍ਤਿ.

ਤਤ੍ਥ ਗਨ੍ਤ੍ਵਾਨਾਤਿ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ. ਤਂ ਪਟਿਕਰੇਮੁ ਅਚ੍ਚਯਨ੍ਤਿ ਤਂ ਅਚ੍ਚਯਂ ਪਟਿਕਰਿਸ੍ਸਾਮ ਦੇਸੇਸ੍ਸਾਮ, ਖਮਾਪੇਸ੍ਸਾਮ ਨਨ੍ਤਿ. ਪੁਤ੍ਤ ਲਭੇਮੁ ਜੀਵਿਤਨ੍ਤਿ ਅਪ੍ਪੇਵ ਨਾਮ ਪੁਤ੍ਤਸ੍ਸ ਜੀਵਿਤਂ ਲਭੇਯ੍ਯਾਮ.

ਅਥਸ੍ਸਾ ਤਤ੍ਥ ਠਿਤਾ ਮਾਣਵਾ ਕਥੇਨ੍ਤਾ ਗਾਥਮਾਹਂਸੁ –

੧੪.

‘‘ਵੇਹਾਯਸਂ ਅਗਮਾ ਭੂਰਿਪਞ੍ਞੋ, ਪਥਦ੍ਧੁਨੋ ਪਨ੍ਨਰਸੇਵ ਚਨ੍ਦੋ;

ਅਪਿ ਚਾਪਿ ਸੋ ਪੁਰਿਮਦਿਸਂ ਅਗਚ੍ਛਿ, ਸਚ੍ਚਪ੍ਪਟਿਞ੍ਞੋ ਇਸਿ ਸਾਧੁਰੂਪੋ’’ਤਿ.

ਤਤ੍ਥ ਪਥਦ੍ਧੁਨੋਤਿ ਆਕਾਸਪਥਸਙ੍ਖਾਤਸ੍ਸ ਅਦ੍ਧੁਨੋ ਮਜ੍ਝੇ ਠਿਤੋ ਪਨ੍ਨਰਸੇ ਚਨ੍ਦੋ ਵਿਯ. ਅਪਿ ਚਾਪਿ ਸੋਤਿ ਅਪਿਚ ਖੋ ਪਨ ਸੋ ਪੁਰਤ੍ਥਿਮਂ ਦਿਸਂ ਗਤੋ.

ਸਾ ਤੇਸਂ ਵਚਨਂ ਸੁਤ੍ਵਾ ‘‘ਮਮ ਸਾਮਿਕਂ ਉਪਧਾਰੇਸ੍ਸਾਮੀ’’ਤਿ ਸੁਵਣ੍ਣਕਲਸਸੁਵਣ੍ਣਸਰਕਾਨਿ ਗਾਹਾਪੇਤ੍ਵਾ ਦਾਸਿਗਣਪਰਿਵੁਤਾ ਤੇਨ ਪਦਵਲ਼ਞ੍ਜਸ੍ਸ ਅਧਿਟ੍ਠਿਤਟ੍ਠਾਨਂ ਪਤ੍ਵਾ ਤੇਨਾਨੁਸਾਰੇਨ ਗਚ੍ਛਨ੍ਤੀ ਤਸ੍ਮਿਂ ਪੀਠਿਕਾਯ ਨਿਸੀਦਿਤ੍ਵਾ ਭੁਞ੍ਜਮਾਨੇ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਸੋ ਤਂ ਦਿਸ੍ਵਾ ਥੋਕਂ ਓਦਨਂ ਪਤ੍ਤੇ ਠਪੇਸਿ. ਦਿਟ੍ਠਮਙ੍ਗਲਿਕਾ ਸੁਵਣ੍ਣਕਲਸੇਨ ਤਸ੍ਸ ਉਦਕਂ ਅਦਾਸਿ. ਸੋ ਤਤ੍ਥੇਵ ਹਤ੍ਥਂ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਸਿ. ਅਥ ਨਂ ਸਾ ‘‘ਕੇਨ ਮੇ ਪੁਤ੍ਤਸ੍ਸ ਸੋ ਵਿਪ੍ਪਕਾਰੋ ਕਤੋ’’ਤਿ ਪੁਚ੍ਛਨ੍ਤੀ ਗਾਥਮਾਹ –

੧੫.

‘‘ਆਵੇਲ੍ਲਿਤਂ ਪਿਟ੍ਠਿਤੋ ਉਤ੍ਤਮਙ੍ਗਂ, ਬਾਹੁਂ ਪਸਾਰੇਤਿ ਅਕਮ੍ਮਨੇਯ੍ਯਂ;

ਸੇਤਾਨਿ ਅਕ੍ਖੀਨਿ ਯਥਾ ਮਤਸ੍ਸ, ਕੋ ਮੇ ਇਮਂ ਪੁਤ੍ਤਮਕਾਸਿ ਏਵ’’ਨ੍ਤਿ.

ਤਤੋ ਪਰਾ ਤੇਸਂ ਵਚਨਪਟਿਵਚਨਗਾਥਾ ਹੋਨ੍ਤਿ –

੧੬.

‘‘ਯਕ੍ਖਾ ਹਵੇ ਸਨ੍ਤਿ ਮਹਾਨੁਭਾਵਾ, ਅਨ੍ਵਾਗਤਾ ਇਸਯੋ ਸਾਧੁਰੂਪਾ;

ਤੇ ਦੁਟ੍ਠਚਿਤ੍ਤਂ ਕੁਪਿਤਂ ਵਿਦਿਤ੍ਵਾ, ਯਕ੍ਖਾ ਹਿ ਤੇ ਪੁਤ੍ਤਮਕਂਸੁ ਏਵਂ.

੧੭.

‘‘ਯਕ੍ਖਾ ਚ ਮੇ ਪੁਤ੍ਤਮਕਂਸੁ ਏਵਂ, ਤ੍ਵਞ੍ਞੇਵ ਮੇ ਮਾ ਕੁਦ੍ਧੋ ਬ੍ਰਹ੍ਮਚਾਰਿ;

ਤੁਮ੍ਹੇਵ ਪਾਦੇ ਸਰਣਂ ਗਤਾਸ੍ਮਿ, ਅਨ੍ਵਾਗਤਾ ਪੁਤ੍ਤਸੋਕੇਨ ਭਿਕ੍ਖੁ.

੧੮.

‘‘ਤਦੇਵ ਹਿ ਏਤਰਹਿ ਚ ਮਯ੍ਹਂ, ਮਨੋਪਦੋਸੋ ਨ ਮਮਤ੍ਥਿ ਕੋਚਿ;

ਪੁਤ੍ਤੋ ਚ ਤੇ ਵੇਦਮਦੇਨ ਮਤ੍ਤੋ, ਅਤ੍ਥਂ ਨ ਜਾਨਾਤਿ ਅਧਿਚ੍ਚ ਵੇਦੇ.

੧੯.

‘‘ਅਦ੍ਧਾ ਹਵੇ ਭਿਕ੍ਖੁ ਮੁਹੁਤ੍ਤਕੇਨ, ਸਮ੍ਮੁਯ੍ਹਤੇਵ ਪੁਰਿਸਸ੍ਸ ਸਞ੍ਞਾ;

ਏਕਾਪਰਾਧਂ ਖਮ ਭੂਰਿਪਞ੍ਞ, ਨ ਪਣ੍ਡਿਤਾ ਕੋਧਬਲਾ ਭਵਨ੍ਤੀ’’ਤਿ.

ਤਤ੍ਥ ਯਕ੍ਖਾਤਿ ਨਗਰਪਰਿਗ੍ਗਾਹਕਯਕ੍ਖਾ. ਅਨ੍ਵਾਗਤਾਤਿ ਅਨੁ ਆਗਤਾ, ਇਸਯੋ ਸਾਧੁਰੂਪਾ ਗੁਣਸਮ੍ਪਨ੍ਨਾਤਿ ਏਵਂ ਜਾਨਮਾਨਾਤਿ ਅਤ੍ਥੋ. ਤੇਤਿ ਤੇ ਇਸੀਨਂ ਗੁਣਂ ਞਤ੍ਵਾ ਤਵ ਪੁਤ੍ਤਂ ਦੁਟ੍ਠਚਿਤ੍ਤਂ ਕੁਪਿਤਚਿਤ੍ਤਂ ਵਿਦਿਤ੍ਵਾ. ਤ੍ਵਞ੍ਞੇਵ ਮੇਤਿ ਸਚੇ ਯਕ੍ਖਾ ਕੁਪਿਤਾ ਏਵਮਕਂਸੁ, ਕਰੋਨ੍ਤੁ, ਦੇਵਤਾ ਨਾਮ ਪਾਨੀਯਉਲ਼ੁਙ੍ਕਮਤ੍ਤੇਨ ਸਨ੍ਤਪ੍ਪੇਤੁਂ ਸਕ੍ਕਾ, ਤਸ੍ਮਾਹਂ ਤੇਸਂ ਨ ਭਾਯਾਮਿ, ਕੇਵਲਂ ਤ੍ਵਞ੍ਞੇਵ ਮੇ ਪੁਤ੍ਤਸ੍ਸ ਮਾ ਕੁਜ੍ਝਿ. ਅਨ੍ਵਾਗਤਾਤਿ ਆਗਤਾਸ੍ਮਿ. ਭਿਕ੍ਖੂਤਿ ਮਹਾਸਤ੍ਤਂ ਆਲਪਨ੍ਤੀ ਪੁਤ੍ਤਸ੍ਸ ਜੀਵਿਤਦਾਨਂ ਯਾਚਤਿ. ਤਦੇਵ ਹੀਤਿ ਦਿਟ੍ਠਮਙ੍ਗਲਿਕੇ ਤਦਾ ਤਵ ਪੁਤ੍ਤਸ੍ਸ ਮਂ ਅਕ੍ਕੋਸਨਕਾਲੇ ਚ ਮਯ੍ਹਂ ਮਨੋਪਦੋਸੋ ਨਤ੍ਥਿ, ਏਤਰਹਿ ਚ ਤਯਿ ਯਾਚਮਾਨਾਯਪਿ ਮਮ ਤਸ੍ਮਿਂ ਮਨੋਪਦੋਸੋ ਨਤ੍ਥਿਯੇਵ. ਵੇਦਮਦੇਨਾਤਿ ‘‘ਤਯੋ ਵੇਦਾ ਮੇ ਉਗ੍ਗਹਿਤਾ’’ਤਿ ਮਦੇਨ. ਅਧਿਚ੍ਚਾਤਿ ਵੇਦੇ ਉਗ੍ਗਹੇਤ੍ਵਾਪਿ ਅਤ੍ਥਾਨਤ੍ਥਂ ਨ ਜਾਨਾਤਿ. ਮੁਹੁਤ੍ਤਕੇਨਾਤਿ ਯਂ ਕਿਞ੍ਚਿ ਉਗ੍ਗਹੇਤ੍ਵਾ ਮੁਹੁਤ੍ਤਕੇਨੇਵ.

ਏਵਂ ਤਾਯ ਖਮਾਪਿਯਮਾਨੋ ਮਹਾਸਤ੍ਤੋ ‘‘ਤੇਨ ਹਿ ਏਤੇਸਂ ਯਕ੍ਖਾਨਂ ਪਲਾਯਨਤ੍ਥਾਯ ਅਮਤੋਸਧਂ ਦਸ੍ਸਾਮੀ’’ਤਿ ਵਤ੍ਵਾ ਗਾਥਮਾਹ –

੨੦.

‘‘ਇਦਞ੍ਚ ਮਯ੍ਹਂ ਉਤ੍ਤਿਟ੍ਠਪਿਣ੍ਡਂ, ਤਵ ਮਣ੍ਡਬ੍ਯੋ ਭੁਞ੍ਜਤੁ ਅਪ੍ਪਪਞ੍ਞੋ;

ਯਕ੍ਖਾ ਚ ਤੇ ਨਂ ਨ ਵਿਹੇਠਯੇਯ੍ਯੁਂ, ਪੁਤ੍ਤੋ ਚ ਤੇ ਹੇਸ੍ਸਤਿ ਸੋ ਅਰੋਗੋ’’ਤਿ.

ਤਤ੍ਥ ਉਤ੍ਤਿਟ੍ਠਪਿਣ੍ਡਨ੍ਤਿ ਉਚ੍ਛਿਟ੍ਠਕਪਿਣ੍ਡਂ, ‘‘ਉਚ੍ਛਿਟ੍ਠਪਿਣ੍ਡ’’ਨ੍ਤਿਪਿ ਪਾਠੋ.

ਸਾ ਮਹਾਸਤ੍ਤਸ੍ਸ ਵਚਨਂ ਸੁਤ੍ਵਾ ‘‘ਦੇਥ, ਸਾਮਿ, ਅਮਤੋਸਧ’’ਨ੍ਤਿ ਸੁਵਣ੍ਣਸਰਕਂ ਉਪਨਾਮੇਸਿ. ਮਹਾਸਤ੍ਤੋ ਉਚ੍ਛਿਟ੍ਠਕਕਞ੍ਜਿਕਂ ਤਤ੍ਥ ਆਸਿਞ੍ਚਿਤ੍ਵਾ ‘‘ਪਠਮਞ੍ਞੇਵ ਇਤੋ ਉਪਡ੍ਢਂ ਤਵ ਪੁਤ੍ਤਸ੍ਸ ਮੁਖੇ ਓਸਿਞ੍ਚਿਤ੍ਵਾ ਸੇਸਂ ਚਾਟਿਯਂ ਉਦਕੇਨ ਮਿਸ੍ਸੇਤ੍ਵਾ ਸੇਸਬ੍ਰਾਹ੍ਮਣਾਨਂ ਮੁਖੇ ਓਸਿਞ੍ਚੇਹਿ, ਸਬ੍ਬੇਪਿ ਨਿਰੋਗਾ ਭਵਿਸ੍ਸਨ੍ਤੀ’’ਤਿ ਵਤ੍ਵਾ ਉਪ੍ਪਤਿਤ੍ਵਾ ਹਿਮਵਨ੍ਤਮੇਵ ਗਤੋ. ਸਾਪਿ ਤਂ ਸਰਕਂ ਸੀਸੇਨਾਦਾਯ ‘‘ਅਮਤੋਸਧਂ ਮੇ ਲਦ੍ਧ’’ਨ੍ਤਿ ਵਦਨ੍ਤੀ ਨਿਵੇਸਨਂ ਗਨ੍ਤ੍ਵਾ ਪਠਮਂ ਪੁਤ੍ਤਸ੍ਸ ਮੁਖੇ ਕਞ੍ਜਿਕਂ ਓਸਿਞ੍ਚਿ, ਯਕ੍ਖੋ ਪਲਾਯਿ. ਇਤਰੋ ਪਂਸੁਂ ਪੁਞ੍ਛਨ੍ਤੋ ਉਟ੍ਠਾਯ ‘‘ਅਮ੍ਮ ਕਿਮੇਤ’’ਨ੍ਤਿ ਆਹ. ਤਯਾ ਕਤਂ ਤ੍ਵਮੇਵ ਜਾਨਿਸ੍ਸਸਿ. ਏਹਿ, ਤਾਤ, ਤਵ ਦਕ੍ਖਿਣੇਯ੍ਯਾਨਂ ਤੇਸਂ ਵਿਪ੍ਪਕਾਰਂ ਪਸ੍ਸਾਤਿ. ਸੋ ਤੇ ਦਿਸ੍ਵਾ ਵਿਪ੍ਪਟਿਸਾਰੀ ਅਹੋਸਿ. ਅਥ ਨਂ ਮਾਤਾ ‘‘ਤਾਤ ਮਣ੍ਡਬ੍ਯ, ਤ੍ਵਂ ਬਾਲੋ ਦਾਨਸ੍ਸ ਮਹਪ੍ਫਲਟ੍ਠਾਨਂ ਨ ਜਾਨਾਸਿ, ਦਕ੍ਖਿਣੇਯ੍ਯਾ ਨਾਮ ਏਵਰੂਪਾ ਨ ਹੋਨ੍ਤਿ, ਮਾਤਙ੍ਗਪਣ੍ਡਿਤਸਦਿਸਾਵ ਹੋਨ੍ਤਿ, ਇਤੋ ਪਟ੍ਠਾਯ ਮਾ ਏਤੇਸਂ ਦੁਸ੍ਸੀਲਾਨਂ ਦਾਨਮਦਾਸਿ, ਸੀਲਵਨ੍ਤਾਨਂ ਦੇਹੀ’’ਤਿ ਵਤ੍ਵਾ ਆਹ –

੨੧.

‘‘ਮਣ੍ਡਬ੍ਯ ਬਾਲੋਸਿ ਪਰਿਤ੍ਤਪਞ੍ਞੋ, ਯੋ ਪੁਞ੍ਞਕ੍ਖੇਤ੍ਤਾਨਮਕੋਵਿਦੋਸਿ;

ਮਹਕ੍ਕਸਾਵੇਸੁ ਦਦਾਸਿ ਦਾਨਂ, ਕਿਲਿਟ੍ਠਕਮ੍ਮੇਸੁ ਅਸਞ੍ਞਤੇਸੁ.

੨੨.

‘‘ਜਟਾ ਚ ਕੇਸਾ ਅਜਿਨਾ ਨਿਵਤ੍ਥਾ, ਜਰੂਦਪਾਨਂਵ ਮੁਖਂ ਪਰੂਲ਼੍ਹਂ;

ਪਜਂ ਇਮਂ ਪਸ੍ਸਥ ਦੁਮ੍ਮਰੂਪਂ, ਨ ਜਟਾਜਿਨਂ ਤਾਯਤਿ ਅਪ੍ਪਪਞ੍ਞਂ.

੨੩.

‘‘ਯੇਸਂ ਰਾਗੋ ਚ ਦੋਸੋ ਚ, ਅਵਿਜ੍ਜਾ ਚ ਵਿਰਾਜਿਤਾ;

ਖੀਣਾਸਵਾ ਅਰਹਨ੍ਤੋ, ਤੇਸੁ ਦਿਨ੍ਨਂ ਮਹਪ੍ਫਲ’’ਨ੍ਤਿ.

ਤਤ੍ਥ ਮਹਕ੍ਕਸਾਵੇਸੂਤਿ ਮਹਾਕਸਾਵੇਸੁ ਮਹਨ੍ਤੇਹਿ ਰਾਗਕਸਾਵਾਦੀਹਿ ਸਮਨ੍ਨਾਗਤੇਸੁ. ਜਟਾ ਚ ਕੇਸਾਤਿ ਤਾਤ ਮਣ੍ਡਬ੍ਯ, ਤਵ ਦਕ੍ਖਿਣੇਯ੍ਯੇਸੁ ਏਕਚ੍ਚਾਨਂ ਕੇਸਾ ਜਟਾ ਕਤ੍ਵਾ ਬਦ੍ਧਾ. ਅਜਿਨਾ ਨਿਵਤ੍ਥਾਤਿ ਸਖੁਰਾਨਿ ਅਜਿਨਚਮ੍ਮਾਨਿ ਨਿਵਤ੍ਥਾ. ਜਰੂਦਪਾਨਂ ਵਾਤਿ ਤਿਣਗਹਨੇਨ ਜਿਣ੍ਣਕੂਪੋ ਵਿਯ ਮੁਖਂ ਦੀਘਮਸ੍ਸੁਤਾਯ ਪਰੂਲ਼੍ਹਂ. ਪਜਂ ਇਮਨ੍ਤਿ ਇਮਂ ਏਵਰੂਪਂ ਅਨਞ੍ਜਿਤਾਮਣ੍ਡਿਤਲੂਖਵੇਸਂ ਪਜਂ ਪਸ੍ਸਥ. ਨ ਜਟਾਜਿਨਨ੍ਤਿ ਏਤਂ ਜਟਾਜਿਨਂ ਇਮਂ ਅਪ੍ਪਪਞ੍ਞਂ ਪਜਂ ਤਾਯਿਤੁਂ ਨ ਸਕ੍ਕੋਤਿ, ਸੀਲਪਞ੍ਞਾਣਤਪੋਕਮ੍ਮਾਨੇਵ ਇਮੇਸਂ ਸਤ੍ਤਾਨਂ ਪਤਿਟ੍ਠਾ ਹੋਨ੍ਤਿ. ਯੇਸਨ੍ਤਿ ਯਸ੍ਮਾ ਯੇਸਂ ਏਤੇ ਰਜ੍ਜਨਦੁਸ੍ਸਨਮੁਯ੍ਹਨਸਭਾਵਾ ਰਾਗਾਦਯੋ ਅਟ੍ਠਵਤ੍ਥੁਕਾ ਚ ਅਵਿਜ੍ਜਾ ਵਿਰਾਜਿਤਾ ਵਿਗਤਾ, ਵਿਗਤਤ੍ਤਾਯੇਵ ਚ ਏਤੇਸਂ ਕਿਲੇਸਾਨਂ ਯੇ ਖੀਣਾਸਵਾ ਅਰਹਨ੍ਤੋ, ਤੇਸੁ ਦਿਨ੍ਨਂ ਮਹਪ੍ਫਲਂ, ਤਸ੍ਮਾ ਤ੍ਵਂ, ਤਾਤ, ਇਤੋ ਪਟ੍ਠਾਯ ਏਵਰੂਪਾਨਂ ਦੁਸ੍ਸੀਲਾਨਂ ਅਦਤ੍ਵਾ ਯੇ ਲੋਕੇ ਅਟ੍ਠਸਮਾਪਤ੍ਤਿਲਾਭਿਨੋ ਪਞ੍ਚਾਭਿਞ੍ਞਾ ਧਮ੍ਮਿਕਸਮਣਬ੍ਰਾਹ੍ਮਣਾ ਚ ਪਚ੍ਚੇਕਬੁਦ੍ਧਾ ਚ ਸਨ੍ਤਿ, ਤੇਸਂ ਦਾਨਂ ਦੇਹਿ. ਏਹਿ, ਤਾਤ, ਤਵ ਕੁਲੂਪਕੇ ਅਮਤੋਸਧਂ ਪਾਯੇਤ੍ਵਾ ਅਰੋਗੇ ਕਰਿਸ੍ਸਾਮਾਤਿ ਵਤ੍ਵਾ ਉਚ੍ਛਿਟ੍ਠਕਞ੍ਜਿਕਂ ਗਾਹਾਪੇਤ੍ਵਾ ਉਦਕਚਾਟਿਯਂ ਪਕ੍ਖਿਪਿਤ੍ਵਾ ਸੋਲ਼ਸਨ੍ਨਂ ਬ੍ਰਾਹ੍ਮਣਸਹਸ੍ਸਾਨਂ ਮੁਖੇਸੁ ਆਸਿਞ੍ਚਾਪੇਸਿ.

ਏਕੇਕੋ ਪਂਸੁਂ ਪੁਞ੍ਛਨ੍ਤੋਵ ਉਟ੍ਠਹਿ. ਅਥ ਨੇ ਬ੍ਰਾਹ੍ਮਣਾ ‘‘ਇਮੇਹਿ ਚਣ੍ਡਾਲੁਚ੍ਛਿਟ੍ਠਕਂ ਪੀਤ’’ਨ੍ਤਿ ਅਬ੍ਰਾਹ੍ਮਣੇ ਕਰਿਂਸੁ. ਤੇ ਲਜ੍ਜਿਤਾ ਬਾਰਾਣਸਿਤੋ ਨਿਕ੍ਖਮਿਤ੍ਵਾ ਮਜ੍ਝਰਟ੍ਠਂ ਗਨ੍ਤ੍ਵਾ ਮਜ੍ਝਰਞ੍ਞੋ ਸਨ੍ਤਿਕੇ ਵਸਿਂਸੁ, ਮਣ੍ਡਬ੍ਯੋ ਪਨ ਤਤ੍ਥੇਵ ਵਸਿ. ਤਦਾ ਵੇਤ੍ਤਵਤੀਨਗਰਂ ਉਪਨਿਸ੍ਸਾਯ ਵੇਤ੍ਤਵਤੀਨਦੀਤੀਰੇ ਜਾਤਿਮਨ੍ਤੋ ਨਾਮੇਕੋ ਬ੍ਰਾਹ੍ਮਣੋ ਪਬ੍ਬਜਿਤੋ ਜਾਤਿਂ ਨਿਸ੍ਸਾਯ ਮਹਨ੍ਤਂ ਮਾਨਮਕਾਸਿ. ਮਹਾਸਤ੍ਤੋ ‘‘ਏਤਸ੍ਸ ਮਾਨਂ ਭਿਨ੍ਦਿਸ੍ਸਾਮੀ’’ਤਿ ਤਂ ਠਾਨਂ ਗਨ੍ਤ੍ਵਾ ਤਸ੍ਸ ਸਨ੍ਤਿਕੇ ਉਪਰਿਸੋਤੇ ਵਾਸਂ ਕਪ੍ਪੇਸਿ. ਸੋ ਏਕਦਿਵਸਂ ਦਨ੍ਤਕਟ੍ਠਂ ਖਾਦਿਤ੍ਵਾ ‘‘ਇਮਂ ਦਨ੍ਤਕਟ੍ਠਂ ਜਾਤਿਮਨ੍ਤਸ੍ਸ ਜਟਾਸੁ ਲਗ੍ਗਤੂ’’ਤਿ ਅਧਿਟ੍ਠਾਯ ਨਦਿਯਂ ਪਾਤੇਸਿ. ਤਂ ਤਸ੍ਸ ਉਦਕਂ ਆਚਮਨ੍ਤਸ੍ਸ ਜਟਾਸੁ ਲਗ੍ਗਿ. ਸੋ ਤਂ ਦਿਸ੍ਵਾਵ ‘‘ਨਸ੍ਸ ਵਸਲਾ’’ਤਿ ਵਤ੍ਵਾ ‘‘ਕੁਤੋ ਅਯਂ ਕਾਲ਼ਕਣ੍ਣੀ ਆਗਤੋ, ਉਪਧਾਰੇਸ੍ਸਾਮਿ ਨ’’ਨ੍ਤਿ ਉਦ੍ਧਂਸੋਤਂ ਗਚ੍ਛਨ੍ਤੋ ਮਹਾਸਤ੍ਤਂ ਦਿਸ੍ਵਾ ‘‘ਕਿਂਜਾਤਿਕੋਸੀ’’ਤਿ ਪੁਚ੍ਛਿ. ‘‘ਚਣ੍ਡਾਲੋਸ੍ਮੀ’’ਤਿ. ‘‘ਤਯਾ ਨਦਿਯਾ ਦਨ੍ਤਕਟ੍ਠਂ ਪਾਤਿਤ’’ਨ੍ਤਿ? ‘‘ਆਮ, ਮਯਾ’’ਤਿ. ‘‘ਨਸ੍ਸ, ਵਸਲ, ਚਣ੍ਡਾਲ ਕਾਲ਼ਕਣ੍ਣਿ ਮਾ ਇਧ ਵਸਿ, ਹੇਟ੍ਠਾਸੋਤੇ ਵਸਾਹੀ’’ਤਿ ਵਤ੍ਵਾ ਹੇਟ੍ਠਾਸੋਤੇ ਵਸਨ੍ਤੇਨਪਿ ਤੇਨ ਪਾਤਿਤੇ ਦਨ੍ਤਕਟ੍ਠੇ ਪਟਿਸੋਤਂ ਆਗਨ੍ਤ੍ਵਾ ਜਟਾਸੁ ਲਗ੍ਗਨ੍ਤੇ ਸੋ ‘‘ਨਸ੍ਸ ਵਸਲ, ਸਚੇ ਇਧ ਵਸਿਸ੍ਸਸਿ, ਸਤ੍ਤਮੇ ਦਿਵਸੇ ਸਤ੍ਤਧਾ ਮੁਦ੍ਧਾ ਫਲਿਸ੍ਸਤੀ’’ਤਿ ਆਹ.

ਮਹਾਸਤ੍ਤੋ ‘‘ਸਚਾਹਂ ਏਤਸ੍ਸ ਕੁਜ੍ਝਿਸ੍ਸਾਮਿ, ਸੀਲਂ ਮੇ ਅਰਕ੍ਖਿਤਂ ਭਵਿਸ੍ਸਤਿ, ਉਪਾਯੇਨੇਵਸ੍ਸ ਮਾਨਂ ਭਿਨ੍ਦਿਸ੍ਸਾਮੀ’’ਤਿ ਸਤ੍ਤਮੇ ਦਿਵਸੇ ਸੂਰਿਯੁਗ੍ਗਮਨਂ ਨਿਵਾਰੇਸਿ. ਮਨੁਸ੍ਸਾ ਉਬ੍ਬਾਲ਼੍ਹਾ ਜਾਤਿਮਨ੍ਤਂ ਤਾਪਸਂ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਤੁਮ੍ਹੇ ਸੂਰਿਯੁਗ੍ਗਮਨਂ ਨ ਦੇਥਾ’’ਤਿ ਪੁਚ੍ਛਿਂਸੁ. ਸੋ ਆਹ – ‘‘ਨ ਮੇ ਤਂ ਕਮ੍ਮਂ, ਨਦੀਤੀਰੇ ਪਨੇਕੋ ਚਣ੍ਡਾਲੋ ਵਸਤਿ, ਤਸ੍ਸੇਤਂ ਕਮ੍ਮਂ ਭਵਿਸ੍ਸਤੀ’’ਤਿ. ਮਨੁਸ੍ਸਾ ਮਹਾਸਤ੍ਤਂ ਉਪਸਙ੍ਕਮਿਤ੍ਵਾ ‘‘ਤੁਮ੍ਹੇ, ਭਨ੍ਤੇ, ਸੂਰਿਯੁਗ੍ਗਮਨਂ ਨ ਦੇਥਾ’’ਤਿ ਪੁਚ੍ਛਿਂਸੁ. ‘‘ਆਮਾਵੁਸੋ’’ਤਿ. ‘‘ਕਿਂਕਾਰਣਾ’’ਤਿ. ‘‘ਤੁਮ੍ਹਾਕਂ ਕੁਲੂਪਕੋ ਤਾਪਸੋ ਮਂ ਨਿਰਪਰਾਧਂ ਅਭਿਸਪਿ, ਤਸ੍ਮਿਂ ਆਗਨ੍ਤ੍ਵਾ ਖਮਾਪਨਤ੍ਥਾਯ ਮਮ ਪਾਦੇਸੁ ਪਤਿਤੇ ਸੂਰਿਯਂ ਵਿਸ੍ਸਜ੍ਜੇਸ੍ਸਾਮੀ’’ਤਿ. ਤੇ ਗਨ੍ਤ੍ਵਾ ਤਂ ਕਡ੍ਢਨ੍ਤਾ ਆਨੇਤ੍ਵਾ ਮਹਾਸਤ੍ਤਸ੍ਸ ਪਾਦਮੂਲੇ ਨਿਪਜ੍ਜਾਪੇਤ੍ਵਾ ਖਮਾਪੇਤ੍ਵਾ ਆਹਂਸੁ ‘‘ਸੂਰਿਯਂ ਵਿਸ੍ਸਜ੍ਜੇਥ ਭਨ੍ਤੇ’’ਤਿ. ‘‘ਨ ਸਕ੍ਕਾ ਵਿਸ੍ਸਜ੍ਜੇਤੁਂ, ਸਚਾਹਂ ਵਿਸ੍ਸਜ੍ਜੇਸ੍ਸਾਮਿ, ਇਮਸ੍ਸ ਸਤ੍ਤਧਾ ਮੁਦ੍ਧਾ ਫਲਿਸ੍ਸਤੀ’’ਤਿ. ‘‘ਅਥ, ਭਨ੍ਤੇ, ਕਿਂ ਕਰੋਮਾ’’ਤਿ? ਸੋ ‘‘ਮਤ੍ਤਿਕਾਪਿਣ੍ਡਂ ਆਹਰਥਾ’’ਤਿ ਆਹਰਾਪੇਤ੍ਵਾ ‘‘ਇਮਂ ਤਾਪਸਸ੍ਸ ਸੀਸੇ ਠਪੇਤ੍ਵਾ ਤਾਪਸਂ ਓਤਾਰੇਤ੍ਵਾ ਉਦਕੇ ਠਪੇਥਾ’’ਤਿ ਠਪਾਪੇਤ੍ਵਾ ਸੂਰਿਯਂ ਵਿਸ੍ਸਜ੍ਜੇਸਿ. ਸੂਰਿਯਰਸ੍ਮੀਹਿ ਪਹਟਮਤ੍ਤੇ ਮਤ੍ਤਿਕਾਪਿਣ੍ਡੋ ਸਤ੍ਤਧਾ ਭਿਜ੍ਜਿ, ਤਾਪਸੋ ਉਦਕੇ ਨਿਮੁਜ੍ਜਿ.

ਮਹਾਸਤ੍ਤੋ ਤਂ ਦਮੇਤ੍ਵਾ ‘‘ਕਹਂ ਨੁ ਖੋ ਦਾਨਿ ਸੋਲ਼ਸ ਬ੍ਰਾਹ੍ਮਣਸਹਸ੍ਸਾਨਿ ਵਸਨ੍ਤੀ’’ਤਿ ਉਪਧਾਰੇਨ੍ਤੋ ‘‘ਮਜ੍ਝਰਞ੍ਞੋ ਸਨ੍ਤਿਕੇ’’ਤਿ ਞਤ੍ਵਾ ‘‘ਤੇ ਦਮੇਸ੍ਸਾਮੀ’’ਤਿ ਇਦ੍ਧਿਯਾ ਗਨ੍ਤ੍ਵਾ ਨਗਰਸਾਮਨ੍ਤੇ ਓਤਰਿਤ੍ਵਾ ਪਤ੍ਤਂ ਆਦਾਯ ਨਗਰੇ ਪਿਣ੍ਡਾਯ ਚਰਿ. ਬ੍ਰਾਹ੍ਮਣਾ ਤਂ ਦਿਸ੍ਵਾ ‘‘ਅਯਂ ਇਧ ਏਕਂ ਦ੍ਵੇ ਦਿਵਸੇ ਵਸਨ੍ਤੋਪਿ ਅਮ੍ਹੇ ਅਪ੍ਪਤਿਟ੍ਠੇ ਕਰਿਸ੍ਸਤੀ’’ਤਿ ਵੇਗੇਨ ਗਨ੍ਤ੍ਵਾ ‘‘ਮਹਾਰਾਜ, ਮਾਯਾਕਾਰੋ ਏਕੋ ਵਿਜ੍ਜਾਧਰੋ ਚੋਰੋ ਆਗਤੋ, ਗਣ੍ਹਾਪੇਥ ਨ’’ਨ੍ਤਿ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਮਹਾਸਤ੍ਤੋਪਿ ਮਿਸ੍ਸਕਭਤ੍ਤਂ ਆਦਾਯ ਅਞ੍ਞਤਰਂ ਕੁਟ੍ਟਂ ਨਿਸ੍ਸਾਯ ਪੀਠਿਕਾਯ ਨਿਸਿਨ੍ਨੋ ਭੁਞ੍ਜਤਿ. ਅਥ ਨਂ ਅਞ੍ਞਵਿਹਿਤਕਂ ਆਹਾਰਂ ਪਰਿਭੁਞ੍ਜਮਾਨਮੇਵ ਰਞ੍ਞਾ ਪਹਿਤਪੁਰਿਸਾ ਅਸਿਨਾ ਗੀਵਂ ਪਹਰਿਤ੍ਵਾ ਜੀਵਿਤਕ੍ਖਯਂ ਪਾਪੇਸੁਂ. ਸੋ ਕਾਲਂ ਕਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ. ਇਮਸ੍ਮਿਂ ਕਿਰ ਜਾਤਕੇ ਬੋਧਿਸਤ੍ਤੋ ਕੋਣ੍ਡਦਮਕੋ ਅਹੋਸਿ. ਸੋ ਤੇਨੇਵ ਪਰਤਨ੍ਤਿਯੁਤ੍ਤਭਾਵੇਨ ਜੀਵਿਤਕ੍ਖਯਂ ਪਾਪੁਣਿ. ਦੇਵਤਾ ਕੁਜ੍ਝਿਤ੍ਵਾ ਸਕਲਮੇਵ ਮਜ੍ਝਰਟ੍ਠਂ ਉਣ੍ਹਂ ਕੁਕ੍ਕੁਲ਼ਵਸ੍ਸਂ ਵਸ੍ਸਾਪੇਤ੍ਵਾ ਰਟ੍ਠਂ ਅਰਟ੍ਠਮਕਂਸੁ. ਤੇਨ ਵੁਤ੍ਤਂ –

‘‘ਉਪਹਚ੍ਚ ਮਨਂ ਮਜ੍ਝੋ, ਮਾਤਙ੍ਗਸ੍ਮਿਂ ਯਸਸ੍ਸਿਨੇ;

ਸਪਾਰਿਸਜ੍ਜੋ ਉਚ੍ਛਿਨ੍ਨੋ, ਮਜ੍ਝਾਰਞ੍ਞਂ ਤਦਾ ਅਹੂ’’ਤਿ. (ਜਾ. ੨.੧੯.੯੬);

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ ਇਦਾਨੇਵ, ਪੁਬ੍ਬੇਪਿ ਉਦੇਨੋ ਪਬ੍ਬਜਿਤੇ ਵਿਹੇਠੇਸਿਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਣ੍ਡਬ੍ਯੋ ਉਦੇਨੋ ਅਹੋਸਿ, ਮਾਤਙ੍ਗਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਾਤਙ੍ਗਜਾਤਕਵਣ੍ਣਨਾ ਪਠਮਾ.

[੪੯੮] ੨. ਚਿਤ੍ਤਸਮ੍ਭੂਤਜਾਤਕਵਣ੍ਣਨਾ

ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਆਯਸ੍ਮਤੋ ਮਹਾਕਸ੍ਸਪਸ੍ਸ ਪਿਯਸਂਵਾਸੇ ਦ੍ਵੇ ਸਦ੍ਧਿਵਿਹਾਰਿਕੇ ਭਿਕ੍ਖੂ ਆਰਬ੍ਭ ਕਥੇਸਿ. ਤੇ ਕਿਰ ਅਞ੍ਞਮਞ੍ਞਂ ਅਪ੍ਪਟਿਵਿਭਤ੍ਤਭੋਗਾ ਪਰਮਵਿਸ੍ਸਾਸਿਕਾ ਅਹੇਸੁਂ, ਪਿਣ੍ਡਾਯ ਚਰਨ੍ਤਾਪਿ ਏਕਤੋਵ ਗਚ੍ਛਨ੍ਤਿ, ਏਕਤੋਵ ਆਗਚ੍ਛਨ੍ਤਿ, ਵਿਨਾ ਭਵਿਤੁਂ ਨ ਸਕ੍ਕੋਨ੍ਤਿ. ਧਮ੍ਮਸਭਾਯਂ ਭਿਕ੍ਖੂ ਤੇਸਂਯੇਵ ਵਿਸ੍ਸਾਸਂ ਵਣ੍ਣਯਮਾਨਾ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਇਮੇਸਂ ਏਕਸ੍ਮਿਂ ਅਤ੍ਤਭਾਵੇ ਵਿਸ੍ਸਾਸਿਕਤ੍ਤਂ, ਪੋਰਾਣਕਪਣ੍ਡਿਤਾ ਤੀਣਿ ਚਤ੍ਤਾਰਿ ਭਵਨ੍ਤਰਾਨਿ ਗਚ੍ਛਨ੍ਤਾਪਿ ਮਿਤ੍ਤਭਾਵਂ ਨ ਵਿਜਹਿਂਸੁਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਅਵਨ੍ਤਿਰਟ੍ਠੇ ਉਜ੍ਜੇਨਿਯਂ ਅਵਨ੍ਤਿਮਹਾਰਾਜਾ ਨਾਮ ਰਜ੍ਜਂ ਕਾਰੇਸਿ. ਤਦਾ ਉਜ੍ਜੇਨਿਯਾ ਬਹਿ ਚਣ੍ਡਾਲਗਾਮਕੋ ਅਹੋਸਿ. ਮਹਾਸਤ੍ਤੋ ਤਤ੍ਥ ਨਿਬ੍ਬਤ੍ਤਿ, ਅਪਰੋਪਿ ਸਤ੍ਤੋ ਤਸ੍ਸੇਵ ਮਾਤੁਚ੍ਛਾਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤੇਸੁ ਏਕੋ ਚਿਤ੍ਤੋ ਨਾਮ ਅਹੋਸਿ, ਏਕੋ ਸਮ੍ਭੂਤੋ ਨਾਮ. ਤੇ ਉਭੋਪਿ ਵਯਪ੍ਪਤ੍ਤਾ ਚਣ੍ਡਾਲਵਂਸਧੋਵਨਂ ਨਾਮ ਸਿਪ੍ਪਂ ਉਗ੍ਗਣ੍ਹਿਤ੍ਵਾ ਏਕਦਿਵਸਂ ‘‘ਉਜ੍ਜੇਨੀਨਗਰਦ੍ਵਾਰੇ ਸਿਪ੍ਪਂ ਦਸ੍ਸੇਸ੍ਸਾਮਾ’’ਤਿ ਏਕੋ ਉਤ੍ਤਰਦ੍ਵਾਰੇ ਸਿਪ੍ਪਂ ਦਸ੍ਸੇਸਿ, ਏਕੋ ਪਾਚੀਨਦ੍ਵਾਰੇ. ਤਸ੍ਮਿਞ੍ਚ ਨਗਰੇ ਦ੍ਵੇ ਦਿਟ੍ਠਮਙ੍ਗਲਿਕਾਯੋ ਅਹੇਸੁਂ, ਏਕਾ ਸੇਟ੍ਠਿਧੀਤਾ, ਏਕਾ ਪੁਰੋਹਿਤਧੀਤਾ. ਤਾ ਬਹੁਖਾਦਨੀਯਭੋਜਨੀਯਮਾਲਾਗਨ੍ਧਾਦੀਨਿ ਗਾਹਾਪੇਤ੍ਵਾ ‘‘ਉਯ੍ਯਾਨਕੀਲ਼ਂ ਕੀਲ਼ਿਸ੍ਸਾਮਾ’’ਤਿ ਏਕਾ ਉਤ੍ਤਰਦ੍ਵਾਰੇਨ ਨਿਕ੍ਖਮਿ, ਏਕਾ ਪਾਚੀਨਦ੍ਵਾਰੇਨ. ਤਾ ਤੇ ਚਣ੍ਡਾਲਪੁਤ੍ਤੇ ਸਿਪ੍ਪਂ ਦਸ੍ਸੇਨ੍ਤੇ ਦਿਸ੍ਵਾ ‘‘ਕੇ ਏਤੇ’’ਤਿ ਪੁਚ੍ਛਿਤ੍ਵਾ ‘‘ਚਣ੍ਡਾਲਪੁਤ੍ਤਾ’’ਤਿ ਸੁਤ੍ਵਾ ‘‘ਅਪਸ੍ਸਿਤਬ੍ਬਯੁਤ੍ਤਕਂ ਵਤ ਪਸ੍ਸਿਮ੍ਹਾ’’ਤਿ ਗਨ੍ਧੋਦਕੇਨ ਅਕ੍ਖੀਨਿ ਧੋਵਿਤ੍ਵਾ ਨਿਵਤ੍ਤਿਂਸੁ. ਮਹਾਜਨੋ ‘‘ਅਰੇ ਦੁਟ੍ਠਚਣ੍ਡਾਲ, ਤੁਮ੍ਹੇ ਨਿਸ੍ਸਾਯ ਮਯਂ ਅਮੂਲਕਾਨਿ ਸੁਰਾਭਤ੍ਤਾਦੀਨਿ ਨ ਲਭਿਮ੍ਹਾ’’ਤਿ ਤੇ ਉਭੋਪਿ ਭਾਤਿਕੇ ਪੋਥੇਤ੍ਵਾ ਅਨਯਬ੍ਯਸਨਂ ਪਾਪੇਸਿ.

ਤੇ ਪਟਿਲਦ੍ਧਸਞ੍ਞਾ ਉਟ੍ਠਾਯ ਅਞ੍ਞਮਞ੍ਞਸ੍ਸ ਸਨ੍ਤਿਕਂ ਗਚ੍ਛਨ੍ਤਾ ਏਕਸ੍ਮਿਂ ਠਾਨੇ ਸਮਾਗਨ੍ਤ੍ਵਾ ਅਞ੍ਞਮਞ੍ਞਸ੍ਸ ਤਂ ਦੁਕ੍ਖੁਪ੍ਪਤ੍ਤਿਂ ਆਰੋਚੇਤ੍ਵਾ ਰੋਦਿਤ੍ਵਾ ਪਰਿਦੇਵਿਤ੍ਵਾ ‘‘ਕਿਨ੍ਤਿ ਕਰਿਸ੍ਸਾਮਾ’’ਤਿ ਮਨ੍ਤੇਤ੍ਵਾ ‘‘ਇਮਂ ਅਮ੍ਹਾਕਂ ਜਾਤਿਂ ਨਿਸ੍ਸਾਯ ਦੁਕ੍ਖਂ ਉਪ੍ਪਨ੍ਨਂ, ਚਣ੍ਡਾਲਕਮ੍ਮਂ ਕਾਤੁਂ ਨ ਸਕ੍ਖਿਸ੍ਸਾਮ, ਜਾਤਿਂ ਪਟਿਚ੍ਛਾਦੇਤ੍ਵਾ ਬ੍ਰਾਹ੍ਮਣਮਾਣਵਵਣ੍ਣੇਨ ਤਕ੍ਕਸਿਲਂ ਗਨ੍ਤ੍ਵਾ ਸਿਪ੍ਪਂ ਉਗ੍ਗਣ੍ਹਿਸ੍ਸਾਮਾ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਤਤ੍ਥ ਗਨ੍ਤ੍ਵਾ ਧਮ੍ਮਨ੍ਤੇਵਾਸਿਕਾ ਹੁਤ੍ਵਾ ਦਿਸਾਪਾਮੋਕ੍ਖਾਚਰਿਯਸ੍ਸ ਸਨ੍ਤਿਕੇ ਸਿਪ੍ਪਂ ਪਟ੍ਠਪੇਸੁਂ. ਜਮ੍ਬੁਦੀਪਤਲੇ ‘‘ਦ੍ਵੇ ਕਿਰ ਚਣ੍ਡਾਲਾ ਜਾਤਿਂ ਪਟਿਚ੍ਛਾਦੇਤ੍ਵਾ ਸਿਪ੍ਪਂ ਉਗ੍ਗਣ੍ਹਨ੍ਤੀ’’ਤਿ ਸੂਯਿਤ੍ਥ. ਤੇਸੁ ਚਿਤ੍ਤਪਣ੍ਡਿਤਸ੍ਸ ਸਿਪ੍ਪਂ ਨਿਟ੍ਠਿਤਂ, ਸਮ੍ਭੂਤਸ੍ਸ ਨ ਤਾਵ ਨਿਟ੍ਠਾਤਿ.

ਅਥੇਕਦਿਵਸਂ ਏਕੋ ਗਾਮਵਾਸੀ ‘‘ਬ੍ਰਾਹ੍ਮਣਵਾਚਨਕਂ ਕਰਿਸ੍ਸਾਮੀ’’ਤਿ ਆਚਰਿਯਂ ਨਿਮਨ੍ਤੇਸਿ. ਤਮੇਵ ਰਤ੍ਤਿਂ ਦੇਵੋ ਵਸ੍ਸਿਤ੍ਵਾ ਮਗ੍ਗੇ ਕਨ੍ਦਰਾਦੀਨਿ ਪੂਰੇਸਿ. ਆਚਰਿਯੋ ਪਾਤੋਵ ਚਿਤ੍ਤਪਣ੍ਡਿਤਂ ਪਕ੍ਕੋਸਾਪੇਤ੍ਵਾ ‘‘ਤਾਤ, ਅਹਂ ਗਨ੍ਤੁਂ ਨ ਸਕ੍ਖਿਸ੍ਸਾਮਿ, ਤ੍ਵਂ ਮਾਣਵੇਹਿ ਸਦ੍ਧਿਂ ਗਨ੍ਤਾ ਮਙ੍ਗਲਂ ਵਤ੍ਵਾ ਤੁਮ੍ਹੇਹਿ ਲਦ੍ਧਂ ਭੁਞ੍ਜਿਤ੍ਵਾ ਅਮ੍ਹੇਹਿ ਲਦ੍ਧਂ ਆਹਰਾ’’ਤਿ ਪੇਸੇਸਿ. ਸੋ ‘‘ਸਾਧੂ’’ਤਿ ਮਾਣਵਕੇ ਗਹੇਤ੍ਵਾ ਗਤੋ. ਯਾਵ ਮਾਣਵਾ ਨ੍ਹਾਯਨ੍ਤਿ ਚੇਵ ਮੁਖਾਨਿ ਚ ਧੋਵਨ੍ਤਿ, ਤਾਵ ਮਨੁਸ੍ਸਾ ਪਾਯਾਸਂ ਵਡ੍ਢੇਤ੍ਵਾ ਨਿਬ੍ਬਾਤੂਤਿ ਠਪੇਸੁਂ. ਮਾਣਵਾ ਤਸ੍ਮਿਂ ਅਨਿਬ੍ਬੁਤੇਯੇਵ ਆਗਨ੍ਤ੍ਵਾ ਨਿਸੀਦਿਂਸੁ. ਮਨੁਸ੍ਸਾ ਦਕ੍ਖਿਣੋਦਕਂ ਦਤ੍ਵਾ ਤੇਸਂ ਪੁਰਤੋ ਪਾਤਿਯੋ ਠਪੇਸੁਂ. ਸਮ੍ਭੂਤੋ ਲੁਦ੍ਧਧਾਤੁਕੋ ਵਿਯ ਹੁਤ੍ਵਾ ‘‘ਸੀਤਲੋ’’ਤਿ ਸਞ੍ਞਾਯ ਪਾਯਾਸਪਿਣ੍ਡਂ ਉਕ੍ਖਿਪਿਤ੍ਵਾ ਮੁਖੇ ਠਪੇਸਿ, ਸੋ ਤਸ੍ਸ ਆਦਿਤ੍ਤਅਯੋਗੁਲ਼ੋ ਵਿਯ ਮੁਖਂ ਦਹਿ. ਸੋ ਕਮ੍ਪਮਾਨੋ ਸਤਿਂ ਅਨੁਪਟ੍ਠਾਪੇਤ੍ਵਾ ਚਿਤ੍ਤਪਣ੍ਡਿਤਂ ਓਲੋਕੇਤ੍ਵਾ ਚਣ੍ਡਾਲਭਾਸਾਯ ਏਵ ‘‘ਖਲ਼ੁ ਖਲ਼ੂ’’ਤਿ ਆਹ. ਸੋਪਿ ਤਥੇਵ ਸਤਿਂ ਅਨੁਪਟ੍ਠਾਪੇਤ੍ਵਾ ਚਣ੍ਡਾਲਭਾਸਾਯ ਏਵ ‘‘ਨਿਗ੍ਗਲ ਨਿਗ੍ਗਲਾ’’ਤਿ ਆਹ. ਮਾਣਵਾ ਅਞ੍ਞਮਞ੍ਞਂ ਓਲੋਕੇਤ੍ਵਾ ‘‘ਕਿਂ ਭਾਸਾ ਨਾਮੇਸਾ’’ਤਿ ਵਦਿਂਸੁ. ਚਿਤ੍ਤਪਣ੍ਡਿਤੋ ਮਙ੍ਗਲਂ ਅਭਾਸਿ. ਮਾਣਵਾ ਬਹਿ ਨਿਕ੍ਖਮਿਤ੍ਵਾ ਵਗ੍ਗਵਗ੍ਗਾ ਹੁਤ੍ਵਾ ਤਤ੍ਥ ਤਤ੍ਥ ਨਿਸੀਦਿਤ੍ਵਾ ਭਾਸਂ ਸੋਧੇਨ੍ਤਾ ‘‘ਚਣ੍ਡਾਲਭਾਸਾ’’ਤਿ ਞਤ੍ਵਾ ‘‘ਅਰੇ ਦੁਟ੍ਠਚਣ੍ਡਾਲਾ, ਏਤ੍ਤਕਂ ਕਾਲਂ ‘ਬ੍ਰਾਹ੍ਮਣਾਮ੍ਹਾ’ਤਿ ਵਤ੍ਵਾ ਵਞ੍ਚਯਿਤ੍ਥਾ’’ਤਿ ਉਭੋਪਿ ਤੇ ਪੋਥਯਿਂਸੁ. ਅਥੇਕੋ ਸਪ੍ਪੁਰਿਸੋ ‘‘ਅਪੇਥਾ’’ਤਿ ਵਾਰੇਤ੍ਵਾ ‘‘ਅਯਂ ਤੁਮ੍ਹਾਕਂ ਜਾਤਿਯਾ ਦੋਸੋ, ਗਚ੍ਛਥ ਕਤ੍ਥਚਿ ਦੇਸੇਵ ਪਬ੍ਬਜਿਤ੍ਵਾ ਜੀਵਥਾ’’ਤਿ ਤੇ ਉਭੋ ਉਯ੍ਯੋਜੇਸਿ. ਮਾਣਵਾ ਤੇਸਂ ਚਣ੍ਡਾਲਭਾਵਂ ਆਚਰਿਯਸ੍ਸ ਆਰੋਚੇਸੁਂ.

ਤੇਪਿ ਅਰਞ੍ਞਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਨ ਚਿਰਸ੍ਸੇਵ ਤਤੋ ਚਵਿਤ੍ਵਾ ਨੇਰਞ੍ਜਰਾਯ ਤੀਰੇ ਮਿਗਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿਂਸੁ. ਤੇ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਕਾਲਤੋ ਪਟ੍ਠਾਯ ਏਕਤੋਵ ਵਿਚਰਨ੍ਤਿ, ਵਿਨਾ ਭਵਿਤੁਂ ਨ ਸਕ੍ਕੋਨ੍ਤਿ. ਤੇ ਏਕਦਿਵਸਂ ਗੋਚਰਂ ਗਹੇਤ੍ਵਾ ਏਕਸ੍ਮਿਂ ਰੁਕ੍ਖਮੂਲੇ ਸੀਸੇਨ ਸੀਸਂ, ਸਿਙ੍ਗੇਨ ਸਿਙ੍ਗਂ, ਤੁਣ੍ਡੇਨ ਤੁਣ੍ਡਂ ਅਲ੍ਲੀਯਾਪੇਤ੍ਵਾ ਰੋਮਨ੍ਥਯਮਾਨੇ ਠਿਤੇ ਦਿਸ੍ਵਾ ਏਕੋ ਲੁਦ੍ਦਕੋ ਸਤ੍ਤਿਂ ਖਿਪਿਤ੍ਵਾ ਏਕਪ੍ਪਹਾਰੇਨੇਵ ਜੀਵਿਤਾ ਵੋਰੋਪੇਸਿ. ਤਤੋ ਚਵਿਤ੍ਵਾ ਨਮ੍ਮਦਾਨਦੀਤੀਰੇ ਉਕ੍ਕੁਸਯੋਨਿਯਂ ਨਿਬ੍ਬਤ੍ਤਿਂਸੁ. ਤਤ੍ਰਾਪਿ ਵੁਦ੍ਧਿਪ੍ਪਤ੍ਤੇ ਗੋਚਰਂ ਗਹੇਤ੍ਵਾ ਸੀਸੇਨ ਸੀਸਂ, ਤੁਣ੍ਡੇਨ ਤੁਣ੍ਡਂ ਅਲ੍ਲੀਯਾਪੇਤ੍ਵਾ ਠਿਤੇ ਦਿਸ੍ਵਾ ਏਕੋ ਯਟ੍ਠਿਲੁਦ੍ਦਕੋ ਏਕਪ੍ਪਹਾਰੇਨੇਵ ਬਨ੍ਧਿਤ੍ਵਾ ਵਧਿ. ਤਤੋ ਪਨ ਚਵਿਤ੍ਵਾ ਚਿਤ੍ਤਪਣ੍ਡਿਤੋ ਕੋਸਮ੍ਬਿਯਂ ਪੁਰੋਹਿਤਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਸਮ੍ਭੂਤਪਣ੍ਡਿਤੋ ਉਤ੍ਤਰਪਞ੍ਚਾਲਰਞ੍ਞੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤੇ ਨਾਮਗ੍ਗਹਣਦਿਵਸਤੋ ਪਟ੍ਠਾਯ ਅਤ੍ਤਨੋ ਜਾਤਿਂ ਅਨੁਸ੍ਸਰਿਂਸੁ. ਤੇਸੁ ਸਮ੍ਭੂਤਪਣ੍ਡਿਤੋ ਨਿਰਨ੍ਤਰਂ ਸਰਿਤੁਂ ਅਸਕ੍ਕੋਨ੍ਤੋ ਚਤੁਤ੍ਥਂ ਚਣ੍ਡਾਲਜਾਤਿਮੇਵ ਅਨੁਸ੍ਸਰਤਿ, ਚਿਤ੍ਤਪਣ੍ਡਿਤੋ ਪਟਿਪਾਟਿਯਾ ਚਤਸ੍ਸੋਪਿ ਜਾਤਿਯੋ. ਸੋ ਸੋਲ਼ਸਵਸ੍ਸਕਾਲੇ ਨਿਕ੍ਖਮਿਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਂ ਨਿਬ੍ਬਤ੍ਤੇਤ੍ਵਾ ਝਾਨਸੁਖੇਨ ਵੀਤਿਨਾਮੇਨ੍ਤੋ ਵਸਿ. ਸਮ੍ਭੂਤਪਣ੍ਡਿਤੋਪਿ ਪਿਤੁ ਅਚ੍ਚਯੇਨ ਛਤ੍ਤਂ ਉਸ੍ਸਾਪੇਤ੍ਵਾ ਛਤ੍ਤਮਙ੍ਗਲਦਿਵਸੇਯੇਵ ਮਹਾਜਨਮਜ੍ਝੇ ਮਙ੍ਗਲਗੀਤਂ ਕਤ੍ਵਾ ਉਦਾਨਵਸੇਨ ਦ੍ਵੇ ਗਾਥਾ ਅਭਾਸਿ. ਤਂ ਸੁਤ੍ਵਾ ‘‘ਅਮ੍ਹਾਕਂ ਰਞ੍ਞੋ ਮਙ੍ਗਲਗੀਤ’’ਨ੍ਤਿ ਓਰੋਧਾਪਿ ਗਨ੍ਧਬ੍ਬਾਪਿ ਤਮੇਵ ਗੀਤਂ ਗਾਯਨ੍ਤਿ. ਅਨੁਕ੍ਕਮੇਨੇਵ ‘‘ਰਞ੍ਞੋ ਪਿਯਗੀਤ’’ਨ੍ਤਿ ਸਬ੍ਬੇਪਿ ਨਗਰਵਾਸਿਨੋ ਮਨੁਸ੍ਸਾ ਤਮੇਵ ਗਾਯਨ੍ਤਿ.

ਚਿਤ੍ਤਪਣ੍ਡਿਤੋਪਿ ਹਿਮਵਨ੍ਤਪਦੇਸੇ ਵਸਨ੍ਤੋਯੇਵ ‘‘ਕਿਂ ਨੁ ਖੋ ਮਮ ਭਾਤਿਕੇਨ ਸਮ੍ਭੂਤੇਨ ਛਤ੍ਤਂ ਲਦ੍ਧਂ, ਉਦਾਹੁ ਨ ਵਾ’’ਤਿ ਉਪਧਾਰੇਨ੍ਤੋ ਲਦ੍ਧਭਾਵਂ ਞਤ੍ਵਾ ‘‘ਨਵਰਜ੍ਜਂ ਤਾਵ ਇਦਾਨਿ ਗਨ੍ਤ੍ਵਾਪਿ ਬੋਧੇਤੁਂ ਨ ਸਕ੍ਖਿਸ੍ਸਾਮਿ, ਮਹਲ੍ਲਕਕਾਲੇ ਨਂ ਉਪਸਙ੍ਕਮਿਤ੍ਵਾ ਧਮ੍ਮਂ ਕਥੇਤ੍ਵਾ ਪਬ੍ਬਾਜੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਪਣ੍ਣਾਸ ਵਸ੍ਸਾਨਿ ਅਗਨ੍ਤ੍ਵਾ ਰਞ੍ਞੋ ਪੁਤ੍ਤਧੀਤਾਹਿ ਵਡ੍ਢਿਤਕਾਲੇ ਇਦ੍ਧਿਯਾ ਗਨ੍ਤ੍ਵਾ ਉਯ੍ਯਾਨੇ ਓਤਰਿਤ੍ਵਾ ਮਙ੍ਗਲਸਿਲਾਪਟ੍ਟੇ ਸੁਵਣ੍ਣਪਟਿਮਾ ਵਿਯ ਨਿਸੀਦਿ. ਤਸ੍ਮਿਂ ਖਣੇ ਏਕੋ ਦਾਰਕੋ ਤਂ ਗੀਤਂ ਗਾਯਨ੍ਤੋ ਦਾਰੂਨਿ ਉਦ੍ਧਰਤਿ. ਚਿਤ੍ਤਪਣ੍ਡਿਤੋ ਤਂ ਪਕ੍ਕੋਸਿ. ਸੋ ਆਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਅਥ ਨਂ ਆਹ – ‘‘ਤ੍ਵਂ ਪਾਤੋਵ ਪਟ੍ਠਾਯ ਇਮਮੇਵ ਗੀਤਂ ਗਾਯਸਿ, ਕਿਂ ਅਞ੍ਞਂ ਨ ਜਾਨਾਸੀ’’ਤਿ. ‘‘ਭਨ੍ਤੇ, ਅਞ੍ਞਾਨਿਪਿ ਬਹੂਨਿ ਜਾਨਾਮਿ, ਇਮਾਨਿ ਪਨ ਦ੍ਵੇ ਰਞ੍ਞੋ ਪਿਯਗੀਤਾਨਿ, ਤਸ੍ਮਾ ਇਮਾਨੇਵ ਗਾਯਾਮੀ’’ਤਿ. ‘‘ਅਤ੍ਥਿ ਪਨ ਰਞ੍ਞੋ ਗੀਤਸ੍ਸ ਪਟਿਗੀਤਂ ਗਾਯਨ੍ਤੋ’’ਤਿ? ‘‘ਨਤ੍ਥਿ ਭਨ੍ਤੇ’’ਤਿ. ‘‘ਸਕ੍ਖਿਸ੍ਸਸਿ ਪਨ ਤ੍ਵਂ ਪਟਿਗੀਤਂ ਗਾਯਿਤੁ’’ਨ੍ਤਿ? ‘‘ਜਾਨਨ੍ਤੋ ਸਕ੍ਖਿਸ੍ਸਾਮੀ’’ਤਿ. ‘‘ਤੇਨ ਹਿ ਤ੍ਵਂ ਰਞ੍ਞਾ ਦ੍ਵੀਸੁ ਗੀਤੇਸੁ ਗਾਯਿਤੇਸੁ ਇਦਂ ਤਤਿਯਂ ਕਤ੍ਵਾ ਗਾਯਸ੍ਸੂ’’ਤਿ ਗੀਤਂਦਤ੍ਵਾ ‘‘ਗਨ੍ਤ੍ਵਾ ਰਞ੍ਞੋ ਸਨ੍ਤਿਕੇ ਗਾਯਿਸ੍ਸਸਿ, ਰਾਜਾ ਤੇ ਪਸੀਦਿਤ੍ਵਾ ਮਹਨ੍ਤਂ ਇਸ੍ਸਰਿਯਂ ਦਸ੍ਸਤੀ’’ਤਿ ਉਯ੍ਯੋਜੇਸਿ.

ਸੋ ਸੀਘਂ ਮਾਤੁ ਸਨ੍ਤਿਕਂ ਗਨ੍ਤ੍ਵਾ ਅਤ੍ਤਾਨਂ ਅਲਙ੍ਕਾਰਾਪੇਤ੍ਵਾ ਰਾਜਦ੍ਵਾਰਂ ਗਨ੍ਤ੍ਵਾ ‘‘ਏਕੋ ਕਿਰ ਦਾਰਕੋ ਤੁਮ੍ਹੇਹਿ ਸਦ੍ਧਿਂ ਪਟਿਗੀਤਂ ਗਾਯਿਸ੍ਸਤੀ’’ਤਿ ਰਞ੍ਞੋ ਆਰੋਚਾਪੇਤ੍ਵਾ ‘‘ਆਗਚ੍ਛਤੂ’’ਤਿ ਵੁਤ੍ਤੇ ਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਤ੍ਵਂ ਕਿਰ, ਤਾਤ, ਪਟਿਗੀਤਂ ਗਾਯਿਸ੍ਸਸੀ’’ਤਿ ਪੁਟ੍ਠੋ ‘‘ਆਮ, ਦੇਵ, ਸਬ੍ਬਂ ਰਾਜਪਰਿਸਂ ਸਨ੍ਨਿਪਾਤੇਥਾ’’ਤਿ ਸਨ੍ਨਿਪਤਿਤਾਯ ਪਰਿਸਾਯ ਰਾਜਾਨਂ ਆਹ ‘‘ਤੁਮ੍ਹੇ ਤਾਵ, ਦੇਵ, ਤੁਮ੍ਹਾਕਂ ਗੀਤਂ ਗਾਯਥ, ਅਥਾਹਂ ਪਟਿਗੀਤਂ ਗਾਯਿਸ੍ਸਾਮੀ’’ਤਿ. ਰਾਜਾ ਗਾਥਾਦ੍ਵਯਮਾਹ –

੨੪.

‘‘ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਂ, ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥਿ;

ਪਸ੍ਸਾਮਿ ਸਮ੍ਭੂਤਂ ਮਹਾਨੁਭਾਵਂ, ਸਕਮ੍ਮੁਨਾ ਪੁਞ੍ਞਫਲੂਪਪਨ੍ਨਂ.

੨੫.

‘‘ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਂ, ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥਿ;

ਕਚ੍ਚਿਨ੍ਨੁ ਚਿਤ੍ਤਸ੍ਸਪਿ ਏਵਮੇਵਂ, ਇਦ੍ਧੋ ਮਨੋ ਤਸ੍ਸ ਯਥਾਪਿ ਮਯ੍ਹ’’ਨ੍ਤਿ.

ਤਤ੍ਥ ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥੀਤਿ ਸੁਕਤਦੁਕ੍ਕਟੇਸੁ ਕਮ੍ਮੇਸੁ ਕਿਞ੍ਚਨ ਏਕਕਮ੍ਮਮ੍ਪਿ ਮੋਘਂ ਨਾਮ ਨਤ੍ਥਿ, ਨਿਪ੍ਫਲਂ ਨ ਹੋਤਿ, ਵਿਪਾਕਂ ਦਤ੍ਵਾਵ ਨਸ੍ਸਤੀਤਿ ਅਪਰਾਪਰਿਯਵੇਦਨੀਯਕਮ੍ਮਂ ਸਨ੍ਧਾਯਾਹ. ਸਮ੍ਭੂਤਨ੍ਤਿ ਅਤ੍ਤਾਨਂ ਵਦਤਿ, ਪਸ੍ਸਾਮਹਂ ਆਯਸ੍ਮਨ੍ਤਂ ਸਮ੍ਭੂਤਂ ਸਕੇਨ ਕਮ੍ਮੇਨ ਪੁਞ੍ਞਫਲੂਪਪਨ੍ਨਂ, ਸਕਮ੍ਮਂ ਨਿਸ੍ਸਾਯ ਪੁਞ੍ਞਫਲੇਨ ਉਪਪਨ੍ਨਂ ਤਂ ਪਸ੍ਸਾਮੀਤਿ ਅਤ੍ਥੋ. ਕਚ੍ਚਿਨ੍ਨੁ ਚਿਤ੍ਤਸ੍ਸਪੀਤਿ ਮਯਞ੍ਹਿ ਦ੍ਵੇਪਿ ਜਨਾ ਏਕਤੋ ਹੁਤ੍ਵਾ ਨ ਚਿਰਂ ਸੀਲਂ ਰਕ੍ਖਿਮ੍ਹ, ਅਹਂ ਤਾਵ ਤਸ੍ਸ ਫਲੇਨ ਮਹਨ੍ਤਂ ਯਸਂ ਪਤ੍ਤੋ, ਕਚ੍ਚਿ ਨੁ ਖੋ ਮੇ ਭਾਤਿਕਸ੍ਸ ਚਿਤ੍ਤਸ੍ਸਪਿ ਏਵਮੇਵ ਮਨੋ ਇਦ੍ਧੋ ਸਮਿਦ੍ਧੋਤਿ.

ਤਸ੍ਸ ਗੀਤਾਵਸਾਨੇ ਦਾਰਕੋ ਗਾਯਨ੍ਤੋ ਤਤਿਯਂ ਗਾਥਮਾਹ –

੨੬.

‘‘ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਂ, ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥਿ;

ਚਿਤ੍ਤਮ੍ਪਿ ਜਾਨਾਹਿ ਤਥੇਵ ਦੇਵ, ਇਦ੍ਧੋ ਮਨੋ ਤਸ੍ਸ ਯਥਾਪਿ ਤੁਯ੍ਹ’’ਨ੍ਤਿ.

ਤਂ ਸੁਤ੍ਵਾ ਰਾਜਾ ਚਤੁਤ੍ਥਂ ਗਾਥਮਾਹ –

੨੭.

‘‘ਭਵਂ ਨੁ ਚਿਤ੍ਤੋ ਸੁਤਮਞ੍ਞਤੋ ਤੇ, ਉਦਾਹੁ ਤੇ ਕੋਚਿ ਨਂ ਏਤਦਕ੍ਖਾ;

ਗਾਥਾ ਸੁਗੀਤਾ ਨ ਮਮਤ੍ਥਿ ਕਙ੍ਖਾ, ਦਦਾਮਿ ਤੇ ਗਾਮਵਰਂ ਸਤਞ੍ਚਾ’’ਤਿ.

ਤਤ੍ਥ ਸੁਤਮਞ੍ਞਤੋ ਤੇਤਿ ਅਹਂ ਸਮ੍ਭੂਤਸ੍ਸ ਭਾਤਾ ਚਿਤ੍ਤੋ ਨਾਮਾਤਿ ਵਦਨ੍ਤਸ੍ਸ ਚਿਤ੍ਤਸ੍ਸੇਵ ਨੁ ਤੇ ਸਨ੍ਤਿਕਾ ਸੁਤਨ੍ਤਿ ਅਤ੍ਥੋ. ਕੋਚਿ ਨਨ੍ਤਿ ਉਦਾਹੁ ਮਯਾ ਸਮ੍ਭੂਤਸ੍ਸ ਰਞ੍ਞੋ ਭਾਤਾ ਚਿਤ੍ਤੋ ਦਿਟ੍ਠੋਤਿ ਕੋਚਿ ਤੇ ਏਤਮਤ੍ਥਂ ਆਚਿਕ੍ਖਿ. ਸੁਗੀਤਾਤਿ ਸਬ੍ਬਥਾਪਿ ਅਯਂ ਗਾਥਾ ਸੁਗੀਤਾ, ਨਤ੍ਥੇਤ੍ਥ ਮਮ ਕਙ੍ਖਾ. ਗਾਮਵਰਂ ਸਤਞ੍ਚਾਤਿ ਗਾਮਵਰਾਨਂ ਤੇ ਸਤਂ ਦਦਾਮੀਤਿ ਵਦਤਿ.

ਤਤੋ ਦਾਰਕੋ ਪਞ੍ਚਮਂ ਗਾਥਮਾਹ –

੨੮.

‘‘ਨ ਚਾਹਂ ਚਿਤ੍ਤੋ ਸੁਤਮਞ੍ਞਤੋ ਮੇ, ਇਸੀ ਚ ਮੇ ਏਤਮਤ੍ਥਂ ਅਸਂਸਿ;

ਗਨ੍ਤ੍ਵਾਨ ਰਞ੍ਞੋ ਪਟਿਗਾਹਿ ਗਾਥਂ, ਅਪਿ ਤੇ ਵਰਂ ਅਤ੍ਤਮਨੋ ਦਦੇਯ੍ਯਾ’’ਤਿ.

ਤਤ੍ਥ ਏਤਮਤ੍ਥਨ੍ਤਿ ਤੁਮ੍ਹਾਕਂ ਉਯ੍ਯਾਨੇ ਨਿਸਿਨ੍ਨੋ ਏਕੋ ਇਸਿ ਮਯ੍ਹਂ ਏਤਮਤ੍ਥਂ ਆਚਿਕ੍ਖਿ.

ਤਂ ਸੁਤ੍ਵਾ ਰਾਜਾ ‘‘ਸੋ ਮਮ ਭਾਤਾ ਚਿਤ੍ਤੋ ਭਵਿਸ੍ਸਤਿ, ਇਦਾਨੇਵ ਨਂ ਗਨ੍ਤ੍ਵਾ ਪਸ੍ਸਿਸ੍ਸਾਮੀ’’ਤਿ ਪੁਰਿਸੇ ਆਣਾਪੇਨ੍ਤੋ ਗਾਥਾਦ੍ਵਯਮਾਹ –

੨੯.

‘‘ਯੋਜੇਨ੍ਤੁ ਵੇ ਰਾਜਰਥੇ, ਸੁਕਤੇ ਚਿਤ੍ਤਸਿਬ੍ਬਨੇ;

ਕਚ੍ਛਂ ਨਾਗਾਨਂ ਬਨ੍ਧਥ, ਗੀਵੇਯ੍ਯਂ ਪਟਿਮੁਞ੍ਚਥ.

੩੦.

‘‘ਆਹਞ੍ਞਨ੍ਤੁ ਭੇਰਿਮੁਦਿਙ੍ਗਸਙ੍ਖੇ, ਸੀਘਾਨਿ ਯਾਨਾਨਿ ਚ ਯੋਜਯਨ੍ਤੁ;

ਅਜ੍ਜੇਵਹਂ ਅਸ੍ਸਮਂ ਤਂ ਗਮਿਸ੍ਸਂ, ਯਤ੍ਥੇਵ ਦਕ੍ਖਿਸ੍ਸਮਿਸਿਂ ਨਿਸਿਨ੍ਨ’’ਨ੍ਤਿ.

ਤਤ੍ਥ ਆਹਞ੍ਞਨ੍ਤੂਤਿ ਆਹਨਨ੍ਤੁ. ਅਸ੍ਸਮਂ ਤਨ੍ਤਿ ਤਂ ਅਸ੍ਸਮਂ.

ਸੋ ਏਵਂ ਵਤ੍ਵਾ ਰਥਂ ਅਭਿਰੁਯ੍ਹ ਸੀਘਂ ਗਨ੍ਤ੍ਵਾ ਉਯ੍ਯਾਨਦ੍ਵਾਰੇ ਰਥਂ ਠਪੇਤ੍ਵਾ ਚਿਤ੍ਤਪਣ੍ਡਿਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਤੁਟ੍ਠਮਾਨਸੋ ਅਟ੍ਠਮਂ ਗਾਥਮਾਹ –

੩੧.

‘‘ਸੁਲਦ੍ਧਲਾਭੋ ਵਤ ਮੇ ਅਹੋਸਿ, ਗਾਥਾ ਸੁਗੀਤਾ ਪਰਿਸਾਯ ਮਜ੍ਝੇ;

ਸ੍ਵਾਹਂ ਇਸਿਂ ਸੀਲਵਤੂਪਪਨ੍ਨਂ, ਦਿਸ੍ਵਾ ਪਤੀਤੋ ਸੁਮਨੋਹਮਸ੍ਮੀ’’ਤਿ.

ਤਸ੍ਸਤ੍ਥੋ – ਸੁਲਦ੍ਧਲਾਭੋ ਵਤ ਮਯ੍ਹਂ ਛਤ੍ਤਮਙ੍ਗਲਦਿਵਸੇ ਪਰਿਸਾਯ ਮਜ੍ਝੇ ਗੀਤਗਾਥਾ ਸੁਗੀਤਾਵ ਅਹੋਸਿ, ਸ੍ਵਾਹਂ ਅਜ੍ਜ ਸੀਲਵਤਸਮ੍ਪਨ੍ਨਂ ਇਸਿਂ ਦਿਸ੍ਵਾ ਪੀਤਿਸੋਮਨਸ੍ਸਪ੍ਪਤ੍ਤੋ ਜਾਤੋਤਿ.

ਸੋ ਚਿਤ੍ਤਪਣ੍ਡਿਤਸ੍ਸ ਦਿਟ੍ਠਕਾਲਤੋ ਪਟ੍ਠਾਯ ਸੋਮਨਸ੍ਸਪ੍ਪਤ੍ਤੋ ‘‘ਭਾਤਿਕਸ੍ਸ ਮੇ ਪਲ੍ਲਙ੍ਕਂ ਅਤ੍ਥਰਥਾ’’ਤਿਆਦੀਨਿ ਆਣਾਪੇਨ੍ਤੋ ਨਵਮਂ ਗਾਥਮਾਹ –

੩੨.

‘‘ਆਸਨਂ ਉਦਕਂ ਪਜ੍ਜਂ, ਪਟਿਗ੍ਗਣ੍ਹਾਤੁ ਨੋ ਭਵਂ;

ਅਗ੍ਘੇ ਭਵਨ੍ਤਂ ਪੁਚ੍ਛਾਮ, ਅਗ੍ਘਂ ਕੁਰੁਤੁ ਨੋ ਭਵ’’ਨ੍ਤਿ.

ਤਤ੍ਥ ਅਗ੍ਘੇਤਿ ਅਤਿਥਿਨੋ ਦਾਤਬ੍ਬਯੁਤ੍ਤਕਸ੍ਮਿਂ ਅਗ੍ਘੇ ਭਵਨ੍ਤਂ ਆਪੁਚ੍ਛਾਮ. ਕੁਰੁਤੁ ਨੋਤਿ ਇਮਂ ਨੋ ਅਗ੍ਘਂ ਭਵਂ ਪਟਿਗ੍ਗਣ੍ਹਾਤੁ.

ਏਵਂ ਮਧੁਰਪਟਿਸਨ੍ਥਾਰਂ ਕਤ੍ਵਾ ਰਜ੍ਜਂ ਮਜ੍ਝੇ ਭਿਨ੍ਦਿਤ੍ਵਾ ਦੇਨ੍ਤੋ ਇਤਰਂ ਗਾਥਮਾਹ –

੩੩.

‘‘ਰਮ੍ਮਞ੍ਚ ਤੇ ਆਵਸਥਂ ਕਰੋਨ੍ਤੁ, ਨਾਰੀਗਣੇਹਿ ਪਰਿਚਾਰਯਸ੍ਸੁ;

ਕਰੋਹਿ ਓਕਾਸਮਨੁਗ੍ਗਹਾਯ, ਉਭੋਪਿਮਂ ਇਸ੍ਸਰਿਯਂ ਕਰੋਮਾ’’ਤਿ.

ਤਤ੍ਥ ਇਮਂ ਇਸ੍ਸਰਿਯਨ੍ਤਿ ਕਪਿਲਰਟ੍ਠੇ ਉਤ੍ਤਰਪਞ੍ਚਾਲਨਗਰੇ ਰਜ੍ਜਂ ਮਜ੍ਝੇ ਭਿਨ੍ਦਿਤ੍ਵਾ ਦ੍ਵੇਪਿ ਜਨਾ ਕਰੋਮ ਅਨੁਭਵਾਮ.

ਤਸ੍ਸ ਤਂ ਵਚਨਂ ਸੁਤ੍ਵਾ ਚਿਤ੍ਤਪਣ੍ਡਿਤੋ ਧਮ੍ਮਂ ਦੇਸੇਨ੍ਤੋ ਛ ਗਾਥਾ ਅਭਾਸਿ –

੩੪.

‘‘ਦਿਸ੍ਵਾ ਫਲਂ ਦੁਚ੍ਚਰਿਤਸ੍ਸ ਰਾਜ, ਅਤ੍ਥੋ ਸੁਚਿਣ੍ਣਸ੍ਸ ਮਹਾਵਿਪਾਕਂ;

ਅਤ੍ਤਾਨਮੇਵ ਪਟਿਸਂਯਮਿਸ੍ਸਂ, ਨ ਪਤ੍ਥਯੇ ਪੁਤ੍ਤ ਪਸੁਂ ਧਨਂ ਵਾ.

੩੫.

‘‘ਦਸੇਵਿਮਾ ਵਸ੍ਸਦਸਾ, ਮਚ੍ਚਾਨਂ ਇਧ ਜੀਵਿਤਂ;

ਅਪਤ੍ਤਞ੍ਞੇਵ ਤਂ ਓਧਿਂ, ਨਲ਼ੋ ਛਿਨ੍ਨੋਵ ਸੁਸ੍ਸਤਿ.

੩੬.

‘‘ਤਤ੍ਥ ਕਾ ਨਨ੍ਦਿ ਕਾ ਖਿਡ੍ਡਾ, ਕਾ ਰਤੀ ਕਾ ਧਨੇਸਨਾ;

ਕਿਂ ਮੇ ਪੁਤ੍ਤੇਹਿ ਦਾਰੇਹਿ, ਰਾਜ ਮੁਤ੍ਤੋਸ੍ਮਿ ਬਨ੍ਧਨਾ.

੩੭.

‘‘ਸੋਹਂ ਏਵਂ ਪਜਾਨਾਮਿ, ਮਚ੍ਚੁ ਮੇ ਨਪ੍ਪਮਜ੍ਜਤਿ;

ਅਨ੍ਤਕੇਨਾਧਿਪਨ੍ਨਸ੍ਸ, ਕਾ ਰਤੀ ਕਾ ਧਨੇਸਨਾ.

੩੮.

‘‘ਜਾਤਿ ਨਰਾਨਂ ਅਧਮਾ ਜਨਿਨ੍ਦ, ਚਣ੍ਡਾਲਯੋਨਿ ਦ੍ਵਿਪਦਾਕਨਿਟ੍ਠਾ;

ਸਕੇਹਿ ਕਮ੍ਮੇਹਿ ਸੁਪਾਪਕੇਹਿ, ਚਣ੍ਡਾਲਗਬ੍ਭੇ ਅਵਸਿਮ੍ਹ ਪੁਬ੍ਬੇ.

੩੯.

‘‘ਚਣ੍ਡਾਲਾਹੁਮ੍ਹ ਅਵਨ੍ਤੀਸੁ, ਮਿਗਾ ਨੇਰਞ੍ਜਰਂ ਪਤਿ;

ਉਕ੍ਕੁਸਾ ਨਮ੍ਮਦਾਤੀਰੇ, ਤ੍ਯਜ੍ਜ ਬ੍ਰਾਹ੍ਮਣਖਤ੍ਤਿਯਾ’’ਤਿ.

ਤਤ੍ਥ ਦੁਚ੍ਚਰਿਤਸ੍ਸਾਤਿ ਮਹਾਰਾਜ, ਤ੍ਵਂ ਸੁਚਰਿਤਸ੍ਸੇਵ ਫਲਂ ਜਾਨਾਸਿ, ਅਹਂ ਪਨ ਦੁਚ੍ਚਰਿਤਸ੍ਸਪਿ ਫਲਂ ਪਸ੍ਸਾਮਿਯੇਵ. ਮਯਞ੍ਹਿ ਉਭੋ ਦੁਚ੍ਚਰਿਤਸ੍ਸ ਫਲੇਨ ਇਤੋ ਚਤੁਤ੍ਥੇ ਅਤ੍ਤਭਾਵੇ ਚਣ੍ਡਾਲਯੋਨਿਯਂ ਨਿਬ੍ਬਤ੍ਤਾ. ਤਤ੍ਥ ਨ ਚਿਰਂ ਸੀਲਂ ਰਕ੍ਖਿਤ੍ਵਾ ਤਸ੍ਸ ਫਲੇਨ ਤ੍ਵਂ ਖਤ੍ਤਿਯਕੁਲੇ ਨਿਬ੍ਬਤ੍ਤੋ, ਅਹਂ ਬ੍ਰਾਹ੍ਮਣਕੁਲੇ, ਏਵਾਹਂ ਦੁਚ੍ਚਰਿਤਸ੍ਸ ਚ ਫਲਂ ਸੁਚਿਣ੍ਣਸ੍ਸ ਚ ਮਹਾਵਿਪਾਕਂ ਦਿਸ੍ਵਾ ਅਤ੍ਤਾਨਮੇਵ ਸੀਲਸਂਯਮੇਨ ਪਟਿਸਂਯਮਿਸ੍ਸਂ, ਪੁਤ੍ਤਂ ਵਾ ਪਸੁਂ ਵਾ ਧਨਂ ਵਾ ਨ ਪਤ੍ਥੇਮਿ.

ਦਸੇਵਿਮਾ ਵਸ੍ਸਦਸਾਤਿ ਮਹਾਰਾਜ, ਮਨ੍ਦਦਸਕਂ ਖਿਡ੍ਡਾਦਸਕਂ ਵਣ੍ਣਦਸਕਂ ਬਲਦਸਕਂ ਪਞ੍ਞਾਦਸਕਂ ਹਾਨਿਦਸਕਂ ਪਬ੍ਭਾਰਦਸਕਂ ਵਙ੍ਕਦਸਕਂ ਮੋਮੂਹਦਸਕਂ ਸਯਨਦਸਕਨ੍ਤਿ ਇਮੇਸਞ੍ਹਿ ਦਸਨ੍ਨਂ ਦਸਕਾਨਂ ਵਸੇਨ ਦਸੇਵ ਵਸ੍ਸਦਸਾ ਇਮੇਸਂ ਮਚ੍ਚਾਨਂ ਇਧ ਮਨੁਸ੍ਸਲੋਕੇ ਜੀਵਿਤਂ. ਤਯਿਦਂ ਨ ਨਿਯਮੇਨ ਸਬ੍ਬਾ ਏਵ ਏਤਾ ਦਸਾ ਪਾਪੁਣਾਤਿ, ਅਥ ਖੋ ਅਪ੍ਪਤ੍ਤਞ੍ਞੇਵ ਤਂ ਓਧਿਂ ਨਲ਼ੋ ਛਿਨ੍ਨੋਵ ਸੁਸ੍ਸਤਿ. ਯੇਪਿ ਸਕਲਂ ਵਸ੍ਸਸਤਂ ਜੀਵਨ੍ਤਿ, ਤੇਸਮ੍ਪਿ ਮਨ੍ਦਦਸਕੇ ਪਵਤ੍ਤਾ ਰੂਪਾਰੂਪਧਮ੍ਮਾ ਵਿਚ੍ਛਿਨ੍ਦਿਤ੍ਵਾ ਆਤਪੇ ਖਿਤ੍ਤਨਲ਼ੋ ਵਿਯ ਤਤ੍ਥੇਵ ਸੁਸ੍ਸਨ੍ਤਿ ਅਨ੍ਤਰਧਾਯਨ੍ਤਿ, ਤਂ ਓਧਿਂ ਅਤਿਕ੍ਕਮਿਤ੍ਵਾ ਖਿਡ੍ਡਾਦਸਕਂ ਨ ਪਾਪੁਣਨ੍ਤਿ, ਤਥਾ ਖਿਟ੍ਟਾਦਸਕਾਦੀਸੁ ਪਵਤ੍ਤਾ ਵਣ੍ਣਦਸਕਾਦੀਨਿ.

ਤਤ੍ਥਾਤਿ ਤਸ੍ਮਿਂ ਏਵਂ ਸੁਸ੍ਸਮਾਨੇ ਜੀਵਿਤੇ ਕਾ ਪਞ੍ਚ ਕਾਮਗੁਣੇ ਨਿਸ੍ਸਾਯ ਅਭਿਨਨ੍ਦੀ, ਕਾ ਕਾਯਕੀਲ਼ਾਦਿਵਸੇਨ ਖਿਡ੍ਡਾ, ਕਾ ਸੋਮਨਸ੍ਸਵਸੇਨ ਰਤਿ, ਕਾ ਧਨੇਸਨਾ, ਕਿਂ ਮੇ ਪੁਤ੍ਤੇਹਿ, ਕਿਂ ਦਾਰੇਹਿ, ਮੁਤ੍ਤੋਸ੍ਮਿ ਤਮ੍ਹਾ ਪੁਤ੍ਤਦਾਰਬਨ੍ਧਨਾਤਿ ਅਤ੍ਥੋ. ਅਨ੍ਤਕੇਨਾਧਿਪਨ੍ਨਸ੍ਸਾਤਿ ਜੀਵਿਤਨ੍ਤਕਰੇਨ ਮਚ੍ਚੁਨਾ ਅਭਿਭੂਤਸ੍ਸ. ਦ੍ਵਿਪਦਾਕਨਿਟ੍ਠਾਤਿ ਦ੍ਵਿਪਦਾਨਂ ਅਨ੍ਤਰੇ ਲਾਮਕਾ. ਅਵਸਿਮ੍ਹਾਤਿ ਦ੍ਵੇਪਿ ਮਯਂ ਵਸਿਮ੍ਹ.

ਚਣ੍ਡਾਲਾਹੁਮ੍ਹਾਤਿ ਮਹਾਰਾਜ, ਇਤੋ ਪੁਬ੍ਬੇ ਚਤੁਤ੍ਥਂ ਜਾਤਿਂ ਅਵਨ੍ਤਿਰਟ੍ਠੇ ਉਜ੍ਜੇਨਿਨਗਰੇ ਚਣ੍ਡਾਲਾ ਅਹੁਮ੍ਹ, ਤਤੋ ਚਵਿਤ੍ਵਾ ਨੇਰਞ੍ਜਰਾਯ ਨਦਿਯਾ ਤੀਰੇ ਉਭੋਪਿ ਮਿਗਾ ਅਹੁਮ੍ਹ. ਤਤ੍ਥ ਦ੍ਵੇਪਿ ਅਮ੍ਹੇ ਏਕਸ੍ਮਿਂ ਰੁਕ੍ਖਮੂਲੇ ਅਞ੍ਞਮਞ੍ਞਂ ਨਿਸ੍ਸਾਯ ਠਿਤੇ ਏਕੋ ਲੁਦ੍ਦਕੋ ਏਕੇਨੇਵ ਸਤ੍ਤਿਪਹਾਰੇਨ ਜੀਵਿਤਾ ਵੋਰੋਪੇਸਿ, ਤਤੋ ਚਵਿਤ੍ਵਾ ਨਮ੍ਮਦਾਨਦੀਤੀਰੇ ਕੁਰਰਾ ਅਹੁਮ੍ਹ. ਤਤ੍ਰਾਪਿ ਨੋ ਨਿਸ੍ਸਾਯ ਠਿਤੇ ਏਕੋ ਨੇਸਾਦੋ ਏਕਪ੍ਪਹਾਰੇਨੇਵ ਬਨ੍ਧਿਤ੍ਵਾ ਜੀਵਿਤਕ੍ਖਯਂ ਪਾਪੇਸਿ, ਤਤੋ ਚਵਿਤ੍ਵਾ ਤੇ ਮਯਂ ਅਜ੍ਜ ਬ੍ਰਾਹ੍ਮਣਖਤ੍ਤਿਯਾ ਜਾਤਾ. ਅਹਂ ਕੋਸਮ੍ਬਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ, ਤ੍ਵਂ ਇਧ ਰਾਜਾ ਜਾਤੋਤਿ.

ਏਵਮਸ੍ਸ ਅਤੀਤੇ ਲਾਮਕਜਾਤਿਯੋ ਪਕਾਸੇਤ੍ਵਾ ਇਦਾਨਿ ਇਮਿਸ੍ਸਾਪਿ ਜਾਤਿਯਾ ਆਯੁਸਙ੍ਖਾਰਪਰਿਤ੍ਤਤਂ ਦਸ੍ਸੇਤ੍ਵਾ ਪੁਞ੍ਞੇਸੁ ਉਸ੍ਸਾਹਂ ਜਨੇਨ੍ਤੋ ਚਤਸ੍ਸੋ ਗਾਥਾ ਅਭਾਸਿ –

੪੦.

‘‘ਉਪਨੀਯਤਿ ਜੀਵਿਤਮਪ੍ਪਮਾਯੁ, ਜਰੂਪਨੀਤਸ੍ਸ ਨ ਸਨ੍ਤਿ ਤਾਣਾ;

ਕਰੋਹਿ ਪਞ੍ਚਾਲ ਮਮੇਤ ਵਾਕ੍ਯਂ, ਮਾਕਾਸਿ ਕਮ੍ਮਾਨਿ ਦੁਕ੍ਖੁਦ੍ਰਯਾਨਿ.

੪੧.

‘‘ਉਪਨੀਯਤਿ ਜੀਵਿਤਮਪ੍ਪਮਾਯੁ, ਜਰੂਪਨੀਤਸ੍ਸ ਨ ਸਨ੍ਤਿ ਤਾਣਾ;

ਕਰੋਹਿ ਪਞ੍ਚਾਲ ਮਮੇਤ ਵਾਕ੍ਯਂ, ਮਾਕਾਸਿ ਕਮ੍ਮਾਨਿ ਦੁਕ੍ਖਪ੍ਫਲਾਨਿ.

੪੨.

‘‘ਉਪਨੀਯਤਿ ਜੀਵਿਤਮਪ੍ਪਮਾਯੁ, ਜਰੂਪਨੀਤਸ੍ਸ ਨ ਸਨ੍ਤਿ ਤਾਣਾ;

ਕਰੋਹਿ ਪਞ੍ਚਾਲ ਮਮੇਤ ਵਾਕ੍ਯਂ, ਮਾਕਾਸਿ ਕਮ੍ਮਾਨਿ ਰਜਸ੍ਸਿਰਾਨਿ.

੪੩.

‘‘ਉਪਨੀਯਤਿ ਜੀਵਿਤਮਪ੍ਪਮਾਯੁ, ਵਣ੍ਣਂ ਜਰਾ ਹਨ੍ਤਿ ਨਰਸ੍ਸ ਜਿਯ੍ਯਤੋ;

ਕਰੋਹਿ ਪਞ੍ਚਾਲ ਮਮੇਤ ਵਾਕ੍ਯਂ, ਮਾਕਾਸਿ ਕਮ੍ਮਂ ਨਿਰਯੂਪਪਤ੍ਤਿਯਾ’’ਤਿ.

ਤਤ੍ਥ ਉਪਨੀਯਤੀਤਿ ਮਹਾਰਾਜ, ਇਦਂ ਜੀਵਿਤਂ ਮਰਣਂ ਉਪਗਚ੍ਛਤਿ. ਇਦਞ੍ਹਿ ਇਮੇਸਂ ਸਤ੍ਤਾਨਂ ਅਪ੍ਪਮਾਯੁ ਸਰਸਪਰਿਤ੍ਤਤਾਯਪਿ ਠਿਤਿਪਰਿਤ੍ਤਤਾਯਪਿ ਪਰਿਤ੍ਤਕਂ, ਸੂਰਿਯੁਗ੍ਗਮਨੇ ਤਿਣਗ੍ਗੇ ਉਸ੍ਸਾਵਬਿਨ੍ਦੁਸਦਿਸਂ. ਨ ਸਨ੍ਤਿ ਤਾਣਾਤਿ ਨ ਹਿ ਜਰਾਯ ਮਰਣਂ ਉਪਨੀਤਸ੍ਸ ਪੁਤ੍ਤਾਦਯੋ ਤਾਣਾ ਨਾਮ ਹੋਨ੍ਤਿ. ਮਮੇਤ ਵਾਕ੍ਯਨ੍ਤਿ ਮਮ ਏਤਂ ਵਚਨਂ. ਮਾਕਾਸੀਤਿ ਮਾ ਰੂਪਾਦਿਕਾਮਗੁਣਹੇਤੁ ਪਮਾਦਂ ਆਪਜ੍ਜਿਤ੍ਵਾ ਨਿਰਯਾਦੀਸੁ ਦੁਕ੍ਖਵਡ੍ਢਨਾਨਿ ਕਮ੍ਮਾਨਿ ਕਰਿ. ਦੁਕ੍ਖਪ੍ਫਲਾਨੀਤਿ ਦੁਕ੍ਖਵਿਪਾਕਾਨਿ. ਰਜਸ੍ਸਿਰਾਨੀਤਿ ਕਿਲੇਸਰਜੇਨ ਓਕਿਣ੍ਣਸੀਸਾਨਿ. ਵਣ੍ਣਨ੍ਤਿ ਜੀਰਮਾਨਸ੍ਸ ਨਰਸ੍ਸ ਸਰੀਰਵਣ੍ਣਂ ਜਰਾ ਹਨ੍ਤਿ. ਨਿਰਯੂਪਪਤ੍ਤਿਯਾਤਿ ਨਿਰਸ੍ਸਾਦੇ ਨਿਰਯੇ ਉਪ੍ਪਜ੍ਜਨਤ੍ਥਾਯ.

ਏਵਂ ਮਹਾਸਤ੍ਤੇ ਕਥੇਨ੍ਤੇ ਰਾਜਾ ਤੁਸ੍ਸਿਤ੍ਵਾ ਤਿਸ੍ਸੋ ਗਾਥਾ ਅਭਾਸਿ –

੪੪.

‘‘ਅਦ੍ਧਾ ਹਿ ਸਚ੍ਚਂ ਵਚਨਂ ਤਵੇਤਂ, ਯਥਾ ਇਸੀ ਭਾਸਸਿ ਏਵਮੇਤਂ;

ਕਾਮਾ ਚ ਮੇ ਸਨ੍ਤਿ ਅਨਪ੍ਪਰੂਪਾ, ਤੇ ਦੁਚ੍ਚਜਾ ਮਾਦਿਸਕੇਨ ਭਿਕ੍ਖੁ.

੪੫.

‘‘ਨਾਗੋ ਯਥਾ ਪਙ੍ਕਮਜ੍ਝੇ ਬ੍ਯਸਨ੍ਨੋ, ਪਸ੍ਸਂ ਥਲਂ ਨਾਭਿਸਮ੍ਭੋਤਿ ਗਨ੍ਤੁਂ;

ਏਵਮ੍ਪਹਂ ਕਾਮਪਙ੍ਕੇ ਬ੍ਯਸਨ੍ਨੋ, ਨ ਭਿਕ੍ਖੁਨੋ ਮਗ੍ਗਮਨੁਬ੍ਬਜਾਮਿ.

੪੬.

‘‘ਯਥਾਪਿ ਮਾਤਾ ਚ ਪਿਤਾ ਚ ਪੁਤ੍ਤਂ, ਅਨੁਸਾਸਰੇ ਕਿਨ੍ਤਿ ਸੁਖੀ ਭਵੇਯ੍ਯ;

ਏਵਮ੍ਪਿ ਮਂ ਤ੍ਵਂ ਅਨੁਸਾਸ ਭਨ੍ਤੇ, ਯਥਾ ਚਿਰਂ ਪੇਚ੍ਚ ਸੁਖੀ ਭਵੇਯ੍ਯ’’ਨ੍ਤਿ.

ਤਤ੍ਥ ਅਨਪ੍ਪਰੂਪਾਤਿ ਅਪਰਿਤ੍ਤਜਾਤਿਕਾ ਬਹੂ ਅਪਰਿਮਿਤਾ. ਤੇ ਦੁਚ੍ਚਜਾ ਮਾਦਿਸਕੇਨਾਤਿ ਭਾਤਿਕ, ਤ੍ਵਂ ਕਿਲੇਸੇ ਪਹਾਯ ਠਿਤੋ, ਅਹਂ ਪਨ ਕਾਮਪਙ੍ਕੇ ਨਿਮੁਗ੍ਗੋ, ਤਸ੍ਮਾ ਮਾਦਿਸਕੇਨ ਤੇ ਕਾਮਾ ਦੁਚ੍ਚਜਾ. ‘‘ਨਾਗੋ ਯਥਾ’’ਤਿ ਇਮਿਨਾ ਅਤ੍ਤਨੋ ਕਾਮਪਙ੍ਕੇ ਨਿਮੁਗ੍ਗਭਾਵਸ੍ਸ ਉਪਮਂ ਦਸ੍ਸੇਤਿ. ਤਤ੍ਥ ਬ੍ਯਸਨ੍ਨੋਤਿ ਵਿਸਨ੍ਨੋ ਅਨੁਪਵਿਟ੍ਠੋ ਅਯਮੇਵ ਵਾ ਪਾਠੋ. ਮਗ੍ਗਨ੍ਤਿ ਤੁਮ੍ਹਾਕਂ ਓਵਾਦਾਨੁਸਾਸਨੀਮਗ੍ਗਂ ਨਾਨੁਬ੍ਬਜਾਮਿ ਪਬ੍ਬਜਿਤੁਂ ਨ ਸਕ੍ਕੋਮਿ, ਇਧੇਵ ਪਨ ਮੇ ਠਿਤਸ੍ਸ ਓਵਾਦਂ ਦੇਥਾਤਿ. ਅਨੁਸਾਸਰੇਤਿ ਅਨੁਸਾਸਨ੍ਤਿ.

ਅਥ ਨਂ ਮਹਾਸਤ੍ਤੋ ਆਹ –

੪੭.

‘‘ਨੋ ਚੇ ਤੁਵਂ ਉਸ੍ਸਹਸੇ ਜਨਿਨ੍ਦ, ਕਾਮੇ ਇਮੇ ਮਾਨੁਸਕੇ ਪਹਾਤੁਂ;

ਧਮ੍ਮਿਂ ਬਲਿਂ ਪਟ੍ਠਪਯਸ੍ਸੁ ਰਾਜ, ਅਧਮ੍ਮਕਾਰੋ ਤਵ ਮਾਹੁ ਰਟ੍ਠੇ.

੪੮.

‘‘ਦੂਤਾ ਵਿਧਾਵਨ੍ਤੁ ਦਿਸਾ ਚਤਸ੍ਸੋ, ਨਿਮਨ੍ਤਕਾ ਸਮਣਬ੍ਰਾਹ੍ਮਣਾਨਂ;

ਤੇ ਅਨ੍ਨਪਾਨੇਨ ਉਪਟ੍ਠਹਸ੍ਸੁ, ਵਤ੍ਥੇਨ ਸੇਨਾਸਨਪਚ੍ਚਯੇਨ ਚ.

੪੯.

‘‘ਅਨ੍ਨੇਨ ਪਾਨੇਨ ਪਸਨ੍ਨਚਿਤ੍ਤੋ, ਸਨ੍ਤਪ੍ਪਯ ਸਮਣਬ੍ਰਾਹ੍ਮਣੇ ਚ;

ਦਤ੍ਵਾ ਚ ਭੁਤ੍ਵਾ ਚ ਯਥਾਨੁਭਾਵਂ, ਅਨਿਨ੍ਦਿਤੋ ਸਗ੍ਗਮੁਪੇਹਿ ਠਾਨਂ.

੫੦.

‘‘ਸਚੇ ਚ ਤਂ ਰਾਜ ਮਦੋ ਸਹੇਯ੍ਯ, ਨਾਰੀਗਣੇਹਿ ਪਰਿਚਾਰਯਨ੍ਤਂ;

ਇਮਮੇਵ ਗਾਥਂ ਮਨਸੀ ਕਰੋਹਿ, ਭਾਸੇਸਿ ਚੇਨਂ ਪਰਿਸਾਯ ਮਜ੍ਝੇ.

੫੧.

‘‘ਅਬ੍ਭੋਕਾਸਸਯੋ ਜਨ੍ਤੁ, ਵਜਨ੍ਤ੍ਯਾ ਖੀਰਪਾਯਿਤੋ;

ਪਰਿਕਿਣ੍ਣੋ ਸੁਵਾਨੇਹਿ, ਸ੍ਵਾਜ੍ਜ ਰਾਜਾਤਿ ਵੁਚ੍ਚਤੀ’’ਤਿ.

ਤਤ੍ਥ ਉਸ੍ਸਹਸੇਤਿ ਉਸ੍ਸਹਸਿ. ਧਮ੍ਮਿਂ ਬਲਿਨ੍ਤਿ ਧਮ੍ਮੇਨ ਸਮੇਨ ਅਨਤਿਰਿਤ੍ਤਂ ਬਲਿਂ ਗਣ੍ਹਾਤਿ ਅਤ੍ਥੋ. ਅਧਮ੍ਮਕਾਰੋਤਿ ਪੋਰਾਣਕਰਾਜੂਹਿ ਠਪਿਤਂ ਵਿਨਿਚ੍ਛਯਧਮ੍ਮਂ ਭਿਨ੍ਦਿਤ੍ਵਾ ਪਵਤ੍ਤਾ ਅਧਮ੍ਮਕਿਰਿਯਾ. ਨਿਮਨ੍ਤਕਾਤਿ ਧਮ੍ਮਿਕਸਮਣਬ੍ਰਾਹ੍ਮਣੇ ਨਿਮਨ੍ਤੇਤ੍ਵਾ ਪਕ੍ਕੋਸਕਾ. ਯਥਾਨੁਭਾਵਨ੍ਤਿ ਯਥਾਬਲਂ ਯਥਾਸਤ੍ਤਿਂ. ਇਮਮੇਵ ਗਾਥਨ੍ਤਿ ਇਦਾਨਿ ਵਤ੍ਤਬ੍ਬਂ ਸਨ੍ਧਾਯਾਹ. ਤਤ੍ਰਾਯਂ ਅਧਿਪ੍ਪਾਯੋ – ‘‘ਮਹਾਰਾਜ, ਸਚੇ ਤਂ ਮਦੋ ਅਭਿਭਵੇਯ੍ਯ, ਸਚੇ ਤੇ ਨਾਰੀਗਣਪਰਿਵੁਤਸ੍ਸ ਰੂਪਾਦਯੋ ਵਾ ਕਾਮਗੁਣੇ ਰਜ੍ਜਸੁਖਂ ਵਾ ਆਰਬ੍ਭ ਮਾਨੋ ਉਪ੍ਪਜ੍ਜੇਯ੍ਯ, ਅਥੇਵਂ ਚਿਨ੍ਤੇਯ੍ਯਾਸਿ ‘ਅਹਂ ਪੁਰੇ ਚਣ੍ਡਾਲਯੋਨਿਯਂ ਨਿਬ੍ਬਤ੍ਤੋ ਛਨ੍ਨਸ੍ਸ ਤਿਣਕੁਟਿਮਤ੍ਤਸ੍ਸਪਿ ਅਭਾਵਾ ਅਬ੍ਭੋਕਾਸਸਯੋ ਅਹੋਸਿਂ, ਤਦਾ ਹਿ ਮੇ ਮਾਤਾ ਚਣ੍ਡਾਲੀ ਅਰਞ੍ਞਂ ਦਾਰੁਪਣ੍ਣਾਦੀਨਂ ਅਤ੍ਥਾਯ ਗਚ੍ਛਨ੍ਤੀ ਮਂ ਕੁਕ੍ਕੁਰਗਣਸ੍ਸ ਮਜ੍ਝੇ ਅਬ੍ਭੋਕਾਸੇ ਨਿਪਜ੍ਜਾਪੇਤ੍ਵਾ ਅਤ੍ਤਨੋ ਖੀਰਂ ਪਾਯੇਤ੍ਵਾ ਗਚ੍ਛਤਿ, ਸੋਹਂ ਕੁਕ੍ਕੁਰੇਹਿ ਪਰਿਵਾਰਿਤੋ ਤੇਹਿਯੇਵ ਸਦ੍ਧਿਂ ਸੁਨਖਿਯਾ ਖੀਰਂ ਪਿਵਿਤ੍ਵਾ ਵਡ੍ਢਿਤੋ, ਏਵਂ ਨੀਚਜਚ੍ਚੋ ਹੁਤ੍ਵਾ ਅਜ੍ਜ ਰਾਜਾ ਨਾਮ ਜਾਤੋ’ਤਿ. ‘ਇਤਿ ਖੋ, ਤ੍ਵਂ ਮਹਾਰਾਜ, ਇਮਿਨਾ ਅਤ੍ਥੇਨ ਅਤ੍ਤਾਨਂ ਓਵਦਨ੍ਤੋ ਯੋ ਸੋ ਪੁਬ੍ਬੇ ਅਬ੍ਭੋਕਾਸਸਯੋ ਜਨ੍ਤੁ ਅਰਞ੍ਞੇ ਵਜਨ੍ਤਿਯਾ ਚਣ੍ਡਾਲਿਯਾ ਇਤੋ ਚਿਤੋ ਚ ਅਨੁਸਞ੍ਚਰਨ੍ਤਿਯਾ ਸੁਨਖਿਯਾ ਚ ਖੀਰਂ ਪਾਯਿਤੋ ਸੁਨਖੇਹਿ ਪਰਿਕਿਣ੍ਣੋ ਵਡ੍ਢਿਤੋ, ਸੋ ਅਜ੍ਜ ਰਾਜਾਤਿ ਵੁਚ੍ਚਤੀ’ਤਿ ਇਮਂ ਗਾਥਂ ਭਾਸੇਯ੍ਯਾਸੀ’’ਤਿ.

ਏਵਂ ਮਹਾਸਤ੍ਤੋ ਤਸ੍ਸ ਓਵਾਦਂ ਦਤ੍ਵਾ ‘‘ਦਿਨ੍ਨੋ ਤੇ ਮਯਾ ਓਵਾਦੋ, ਇਦਾਨਿ ਤ੍ਵਂ ਪਬ੍ਬਜ ਵਾ ਮਾ ਵਾ, ਅਤ੍ਤਨਾਵ ਅਤ੍ਤਨੋ ਕਮ੍ਮਸ੍ਸ ਵਿਪਾਕਂ ਪਟਿਸੇਵਿਸ੍ਸਤੀ’’ਤਿ ਵਤ੍ਵਾ ਆਕਾਸੇ ਉਪ੍ਪਤਿਤ੍ਵਾ ਤਸ੍ਸ ਮਤ੍ਥਕੇ ਪਾਦਰਜਂ ਪਾਤੇਨ੍ਤੋ ਹਿਮਵਨ੍ਤਮੇਵ ਗਤੋ. ਰਾਜਾਪਿ ਤਂ ਦਿਸ੍ਵਾ ਉਪ੍ਪਨ੍ਨਸਂਵੇਗੋ ਜੇਟ੍ਠਪੁਤ੍ਤਸ੍ਸ ਰਜ੍ਜਂ ਦਤ੍ਵਾ ਬਲਕਾਯਂ ਨਿਵਤ੍ਤੇਤ੍ਵਾ ਹਿਮਵਨ੍ਤਾਭਿਮੁਖੋ ਪਾਯਾਸਿ. ਮਹਾਸਤ੍ਤੋ ਤਸ੍ਸਾਗਮਨਂ ਞਤ੍ਵਾ ਇਸਿਗਣਪਰਿਵੁਤੋ ਆਗਨ੍ਤ੍ਵਾ ਤਂ ਆਦਾਯ ਗਨ੍ਤ੍ਵਾ ਪਬ੍ਬਾਜੇਤ੍ਵਾ ਕਸਿਣਪਰਿਕਮ੍ਮਂ ਆਚਿਕ੍ਖਿ. ਸੋ ਝਾਨਾਭਿਞ੍ਞਂ ਨਿਬ੍ਬਤ੍ਤੇਸਿ. ਇਤਿ ਤੇ ਉਭੋਪਿ ਬ੍ਰਹ੍ਮਲੋਕੂਪਗਾ ਅਹੇਸੁਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੋਰਾਣਕਪਣ੍ਡਿਤਾ ਤੀਣਿ ਚਤ੍ਤਾਰਿ ਭਵਨ੍ਤਰਾਨਿ ਗਚ੍ਛਨ੍ਤਾਪਿ ਦਲ਼੍ਹਵਿਸ੍ਸਾਸਾਵ ਅਹੇਸੁ’’ਨ੍ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਮ੍ਭੂਤਪਣ੍ਡਿਤੋ ਆਨਨ੍ਦੋ ਅਹੋਸਿ, ਚਿਤ੍ਤਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚਿਤ੍ਤਸਮ੍ਭੂਤਜਾਤਕਵਣ੍ਣਨਾ ਦੁਤਿਯਾ

[੪੯੯] ੩. ਸਿਵਿਜਾਤਕਵਣ੍ਣਨਾ

ਦੂਰੇ ਅਪਸ੍ਸਂ ਥੇਰੋਵਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਸਦਿਸਦਾਨਂ ਆਰਬ੍ਭ ਕਥੇਸਿ. ਤਂ ਅਟ੍ਠਕਨਿਪਾਤੇ ਸਿਵਿਜਾਤਕੇ ਵਿਤ੍ਥਾਰਿਤਮੇਵ. ਤਦਾ ਪਨ ਰਾਜਾ ਸਤ੍ਤਮੇ ਦਿਵਸੇ ਸਬ੍ਬਪਰਿਕ੍ਖਾਰੇ ਦਤ੍ਵਾ ਅਨੁਮੋਦਨਂ ਯਾਚਿ, ਸਤ੍ਥਾ ਅਕਤ੍ਵਾਵ ਪਕ੍ਕਾਮਿ. ਰਾਜਾ ਭੁਤ੍ਤਪਾਤਰਾਸੋ ਵਿਹਾਰਂ ਗਨ੍ਤ੍ਵਾ ‘‘ਕਸ੍ਮਾ, ਭਨ੍ਤੇ, ਅਨੁਮੋਦਨਂ ਨ ਕਰਿਤ੍ਥਾ’’ਤਿ ਆਹ. ਸਤ੍ਥਾ ‘‘ਅਪਰਿਸੁਦ੍ਧਾ, ਮਹਾਰਾਜ, ਪਰਿਸਾ’’ਤਿ ਵਤ੍ਵਾ ‘‘ਨ ਵੇ ਕਦਰਿਯਾ ਦੇਵਲੋਕਂ ਵਜਨ੍ਤੀ’’ਤਿ (ਧ. ਪ. ੧੭੭) ਗਾਥਾਯ ਧਮ੍ਮਂ ਦੇਸੇਸਿ. ਰਾਜਾ ਪਸੀਦਿਤ੍ਵਾ ਸਤਸਹਸ੍ਸਗ੍ਘਨਕੇਨ ਸੀਵੇਯ੍ਯਕੇਨ ਉਤ੍ਤਰਾਸਙ੍ਗੇਨ ਤਥਾਗਤਂ ਪੂਜੇਤ੍ਵਾ ਨਗਰਂ ਪਾਵਿਸਿ. ਪੁਨਦਿਵਸੇ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਕੋਸਲਰਾਜਾ ਅਸਦਿਸਦਾਨਂ ਦਤ੍ਵਾ ਤਾਦਿਸੇਨਪਿ ਦਾਨੇਨ ਅਤਿਤ੍ਤੋ ਦਸਬਲੇਨ ਧਮ੍ਮੇ ਦੇਸਿਤੇ ਪੁਨ ਸਤਸਹਸ੍ਸਗ੍ਘਨਕਂ ਸੀਵੇਯ੍ਯਕਵਤ੍ਥਂ ਅਦਾਸਿ, ਯਾਵ ਅਤਿਤ੍ਤੋ ਵਤ ਆਵੁਸੋ ਦਾਨੇਨ ਰਾਜਾ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਭਿਕ੍ਖਵੇ, ਬਾਹਿਰਭਣ੍ਡਂ ਨਾਮ ਸੁਦਿਨ੍ਨਂ, ਪੋਰਾਣਕਪਣ੍ਡਿਤਾ ਸਕਲਜਮ੍ਬੁਦੀਪਂ ਉਨ੍ਨਙ੍ਗਲਂ ਕਤ੍ਵਾ ਦੇਵਸਿਕਂ ਛਸਤਸਹਸ੍ਸਪਰਿਚ੍ਚਾਗੇਨ ਦਾਨਂ ਦਦਮਾਨਾਪਿ ਬਾਹਿਰਦਾਨੇਨ ਅਤਿਤ੍ਤਾ ‘ਪਿਯਸ੍ਸ ਦਾਤਾ ਪਿਯਂ ਲਭਤੀ’ਤਿ ਸਮ੍ਪਤ੍ਤਯਾਚਕਾਨਂ ਅਕ੍ਖੀਨਿ ਉਪ੍ਪਾਟੇਤ੍ਵਾ ਅਦਂਸੁਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਸਿਵਿਰਟ੍ਠੇ ਅਰਿਟ੍ਠਪੁਰਨਗਰੇ ਸਿਵਿਮਹਾਰਾਜੇ ਰਜ੍ਜਂ ਕਾਰੇਨ੍ਤੇ ਮਹਾਸਤ੍ਤੋ ਤਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ‘‘ਸਿਵਿਕੁਮਾਰੋ’’ਤਿਸ੍ਸ ਨਾਮਂ ਕਰਿਂਸੁ. ਸੋ ਵਯਪ੍ਪਤ੍ਤੋ ਤਕ੍ਕਸਿਲਂ ਗਨ੍ਤ੍ਵਾ ਉਗ੍ਗਹਿਤਸਿਪ੍ਪੋ ਆਗਨ੍ਤ੍ਵਾ ਪਿਤੁ ਸਿਪ੍ਪਂ ਦਸ੍ਸੇਤ੍ਵਾ ਉਪਰਜ੍ਜਂ ਲਭਿਤ੍ਵਾ ਅਪਰਭਾਗੇ ਪਿਤੁ ਅਚ੍ਚਯੇਨ ਰਾਜਾ ਹੁਤ੍ਵਾ ਅਗਤਿਗਮਨਂ ਪਹਾਯ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਚਤੂਸੁ ਦ੍ਵਾਰੇਸੁ ਨਗਰਮਜ੍ਝੇ ਨਿਵੇਸਨਦ੍ਵਾਰੇ ਚਾਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛਸਤਸਹਸ੍ਸਪਰਿਚ੍ਚਾਗੇਨ ਮਹਾਦਾਨਂ ਪਵਤ੍ਤੇਸਿ. ਅਟ੍ਠਮਿਯਂ ਚਾਤੁਦ੍ਦਸਿਯਂ ਪਨ੍ਨਰਸਿਯਞ੍ਚ ਨਿਚ੍ਚਂ ਦਾਨਸਾਲਂ ਗਨ੍ਤ੍ਵਾ ਦਾਨਂ ਓਲੋਕੇਸਿ. ਸੋ ਏਕਦਾ ਪੁਣ੍ਣਮਦਿਵਸੇ ਪਾਤੋਵ ਸਮੁਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲਙ੍ਕੇ ਨਿਸਿਨ੍ਨੋ ਅਤ੍ਤਨਾ ਦਿਨ੍ਨਦਾਨਂ ਆਵਜ੍ਜੇਨ੍ਤੋ ਬਾਹਿਰਵਤ੍ਥੁਂ ਅਤ੍ਤਨਾ ਅਦਿਨ੍ਨਂ ਨਾਮ ਅਦਿਸ੍ਵਾ ‘‘ਮਯਾ ਬਾਹਿਰਵਤ੍ਥੁ ਅਦਿਨ੍ਨਂ ਨਾਮ ਨਤ੍ਥਿ, ਨ ਮਂ ਬਾਹਿਰਦਾਨਂ ਤੋਸੇਤਿ, ਅਹਂ ਅਜ੍ਝਤ੍ਤਿਕਦਾਨਂ ਦਾਤੁਕਾਮੋ, ਅਹੋ ਵਤ ਅਜ੍ਜ ਮਮ ਦਾਨਸਾਲਂ ਗਤਕਾਲੇ ਕੋਚਿਦੇਵ ਯਾਚਕੋ ਬਾਹਿਰਵਤ੍ਥੁਂ ਅਯਾਚਿਤ੍ਵਾ ਅਜ੍ਝਤ੍ਤਿਕਸ੍ਸ ਨਾਮਂ ਗਣ੍ਹੇਯ੍ਯ, ਸਚੇ ਹਿ ਮੇ ਕੋਚਿ ਹਦਯਮਂਸਸ੍ਸ ਨਾਮਂ ਗਣ੍ਹੇਯ੍ਯ, ਕਣਯੇਨ ਉਰਂ ਪਹਰਿਤ੍ਵਾ ਪਸਨ੍ਨਉਦਕਤੋ ਸਨਾਲ਼ਂ ਪਦੁਮਂ ਉਦ੍ਧਰਨ੍ਤੋ ਵਿਯ ਲੋਹਿਤਬਿਨ੍ਦੂਨਿ ਪਗ੍ਘਰਨ੍ਤਂ ਹਦਯਂ ਨੀਹਰਿਤ੍ਵਾ ਦਸ੍ਸਾਮਿ. ਸਚੇ ਸਰੀਰਮਂਸਸ੍ਸ ਨਾਮਂ ਗਣ੍ਹੇਯ੍ਯ, ਅਵਲੇਖਨਸਤ੍ਥਕੇਨ ਤੇਲਸਿਙ੍ਗਂ ਲਿਖਨ੍ਤੋ ਵਿਯ ਸਰੀਰਮਂਸਂ ਓਤਾਰੇਤ੍ਵਾ ਦਸ੍ਸਾਮਿ. ਸਚੇ ਲੋਹਿਤਸ੍ਸ ਨਾਮਂ ਗਣ੍ਹੇਯ੍ਯ, ਯਨ੍ਤਮੁਖੇ ਪਕ੍ਖਨ੍ਦਿਤ੍ਵਾ ਉਪਨੀਤਂ ਭਾਜਨਂ ਪੂਰੇਤ੍ਵਾ ਲੋਹਿਤਂ ਦਸ੍ਸਾਮਿ. ਸਚੇ ਵਾ ਪਨ ਕੋਚਿ ‘ਗੇਹੇ ਮੇ ਕਮ੍ਮਂ ਨਪ੍ਪਵਤ੍ਤਤਿ, ਗੇਹੇ ਮੇ ਦਾਸਕਮ੍ਮਂ ਕਰੋਹੀ’ਤਿ ਵਦੇਯ੍ਯ, ਰਾਜਵੇਸਂ ਅਪਨੇਤ੍ਵਾ ਬਹਿ ਠਤ੍ਵਾ ਅਤ੍ਤਾਨਂ ਸਾਵੇਤ੍ਵਾ ਦਾਸਕਮ੍ਮਂ ਕਰਿਸ੍ਸਾਮਿ. ਸਚੇ ਮੇ ਕੋਚਿ ਅਕ੍ਖਿਨੋ ਨਾਮਂ ਗਣ੍ਹੇਯ੍ਯ, ਤਾਲਮਿਞ੍ਜਂ ਨੀਹਰਨ੍ਤੋ ਵਿਯ ਅਕ੍ਖੀਨਿ ਉਪ੍ਪਾਟੇਤ੍ਵਾ ਦਸ੍ਸਾਮੀ’’ਤਿ ਚਿਨ੍ਤੇਸਿ.

ਇਤਿ ਸੋ –

‘‘ਯਂਕਿਞ੍ਚਿ ਮਾਨੁਸਂ ਦਾਨਂ, ਅਦਿਨ੍ਨਂ ਮੇ ਨ ਵਿਜ੍ਜਤਿ;

ਯੋਪਿ ਯਾਚੇਯ੍ਯ ਮਂ ਚਕ੍ਖੁਂ, ਦਦੇਯ੍ਯਂ ਅਵਿਕਮ੍ਪਿਤੋ’’ਤਿ. (ਚਰਿਯਾ. ੧.੫੨) –

ਚਿਨ੍ਤੇਤ੍ਵਾ ਸੋਲ਼ਸਹਿ ਗਨ੍ਧੋਦਕਘਟੇਹਿ ਨ੍ਹਾਯਿਤ੍ਵਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਨਾਨਗ੍ਗਰਸਭੋਜਨਂ ਭੁਞ੍ਜਿਤ੍ਵਾ ਅਲਙ੍ਕਤਹਤ੍ਥਿਕ੍ਖਨ੍ਧਵਰਗਤੋ ਦਾਨਗ੍ਗਂ ਅਗਮਾਸਿ. ਸਕ੍ਕੋ ਤਸ੍ਸ ਅਜ੍ਝਾਸਯਂ ਵਿਦਿਤ੍ਵਾ ‘‘ਸਿਵਿਰਾਜਾ ‘ਅਜ੍ਜ ਸਮ੍ਪਤ੍ਤਯਾਚਕਾਨਂ ਚਕ੍ਖੂਨਿ ਉਪ੍ਪਾਟੇਤ੍ਵਾ ਦਸ੍ਸਾਮੀ’ਤਿ ਚਿਨ੍ਤੇਸਿ, ਸਕ੍ਖਿਸ੍ਸਤਿ ਨੁ ਖੋ ਦਾਤੁਂ, ਉਦਾਹੁ ਨੋ’’ਤਿ ਤਸ੍ਸ ਵਿਮਂਸਨਤ੍ਥਾਯ ਜਰਾਪਤ੍ਤੋ ਅਨ੍ਧਬ੍ਰਾਹ੍ਮਣੋ ਵਿਯ ਹੁਤ੍ਵਾ ਰਞ੍ਞੋ ਦਾਨਗ੍ਗਗਮਨਕਾਲੇ ਏਕਸ੍ਮਿਂ ਉਨ੍ਨਤਪ੍ਪਦੇਸੇ ਹਤ੍ਥਂ ਪਸਾਰੇਤ੍ਵਾ ਰਾਜਾਨਂ ਜਯਾਪੇਤ੍ਵਾ ਅਟ੍ਠਾਸਿ. ਰਾਜਾ ਤਦਭਿਮੁਖਂ ਵਾਰਣਂ ਪੇਸੇਤ੍ਵਾ ‘‘ਬ੍ਰਾਹ੍ਮਣ, ਕਿਂ ਵਦੇਸੀ’’ਤਿ ਪੁਚ੍ਛਿ. ਅਥ ਨਂ ਸਕ੍ਕੋ ‘‘ਮਹਾਰਾਜ, ਤਵ ਦਾਨਜ੍ਝਾਸਯਂ ਨਿਸ੍ਸਾਯ ਸਮੁਗ੍ਗਤੇਨ ਕਿਤ੍ਤਿਘੋਸੇਨ ਸਕਲਲੋਕਸਨ੍ਨਿਵਾਸੋ ਨਿਰਨ੍ਤਰਂ ਫੁਟੋ, ਅਹਂ ਅਨ੍ਧੋ, ਤ੍ਵਂ ਦ੍ਵਿਚਕ੍ਖੁਕੋ’’ਤਿ ਵਤ੍ਵਾ ਚਕ੍ਖੁਂ ਯਾਚਨ੍ਤੋ ਪਠਮਂ ਗਾਥਮਾਹ –

੫੨.

‘‘ਦੂਰੇ ਅਪਸ੍ਸਂ ਥੇਰੋਵ, ਚਕ੍ਖੁਂ ਯਾਚਿਤੁਮਾਗਤੋ;

ਏਕਨੇਤ੍ਤਾ ਭਵਿਸ੍ਸਾਮ, ਚਕ੍ਖੁਂ ਮੇ ਦੇਹਿ ਯਾਚਿਤੋ’’ਤਿ.

ਤਤ੍ਥ ਦੂਰੇਤਿ ਇਤੋ ਦੂਰੇ ਵਸਨ੍ਤੋ. ਥੇਰੋਤਿ ਜਰਾਜਿਣ੍ਣਥੇਰੋ. ਏਕਨੇਤ੍ਤਾਤਿ ਏਕਂ ਨੇਤ੍ਤਂ ਮਯ੍ਹਂ ਦੇਹਿ, ਏਵਂ ਦ੍ਵੇਪਿ ਏਕੇਕਨੇਤ੍ਤਾ ਭਵਿਸ੍ਸਾਮਾਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਇਦਾਨੇਵਾਹਂ ਪਾਸਾਦੇ ਨਿਸਿਨ੍ਨੋ ਚਿਨ੍ਤੇਤ੍ਵਾ ਆਗਤੋ, ਅਹੋ ਮੇ ਲਾਭੋ, ਅਜ੍ਜੇਵ ਮੇ ਮਨੋਰਥੋ ਮਤ੍ਥਕਂ ਪਾਪੁਣਿਸ੍ਸਤਿ, ਅਦਿਨ੍ਨਪੁਬ੍ਬਂ ਦਾਨਂ ਦਸ੍ਸਾਮੀ’’ਤਿ ਤੁਟ੍ਠਮਾਨਸੋ ਦੁਤਿਯਂ ਗਾਥਮਾਹ –

੫੩.

‘‘ਕੇਨਾਨੁਸਿਟ੍ਠੋ ਇਧ ਮਾਗਤੋਸਿ, ਵਨਿਬ੍ਬਕ ਚਕ੍ਖੁਪਥਾਨਿ ਯਾਚਿਤੁਂ;

ਸੁਦੁਚ੍ਚਜਂ ਯਾਚਸਿ ਉਤ੍ਤਮਙ੍ਗਂ, ਯਮਾਹੁ ਨੇਤ੍ਤਂ ਪੁਰਿਸੇਨ ‘ਦੁਚ੍ਚਜ’ਨ੍ਤਿ.

ਤਤ੍ਥ ਵਨਿਬ੍ਬਕਾਤਿ ਤਂ ਆਲਪਤਿ. ਚਕ੍ਖੁਪਥਾਨੀਤਿ ਚਕ੍ਖੂਨਮੇਤਂ ਨਾਮਂ. ਯਮਾਹੂਤਿ ਯਂ ਪਣ੍ਡਿਤਾ ‘‘ਦੁਚ੍ਚਜ’’ਨ੍ਤਿ ਕਥੇਨ੍ਤਿ.

ਇਤੋ ਪਰਂ ਉਤ੍ਤਾਨਸਮ੍ਬਨ੍ਧਗਾਥਾ ਪਾਲ਼ਿਨਯੇਨੇਵ ਵੇਦਿਤਬ੍ਬਾ –

੫੪.

‘‘ਯਮਾਹੁ ਦੇਵੇਸੁ ਸੁਜਮ੍ਪਤੀਤਿ, ਮਘਵਾਤਿ ਨਂ ਆਹੁ ਮਨੁਸ੍ਸਲੋਕੇ;

ਤੇਨਾਨੁਸਿਟ੍ਠੋ ਇਧ ਮਾਗਤੋਸ੍ਮਿ, ਵਨਿਬ੍ਬਕੋ ਚਕ੍ਖੁਪਥਾਨਿ ਯਾਚਿਤੁਂ.

੫੫.

‘‘ਵਨਿਬ੍ਬਤੋ ਮਯ੍ਹ ਵਨਿਂ ਅਨੁਤ੍ਤਰਂ, ਦਦਾਹਿ ਤੇ ਚਕ੍ਖੁਪਥਾਨਿ ਯਾਚਿਤੋ;

ਦਦਾਹਿ ਮੇ ਚਕ੍ਖੁਪਥਂ ਅਨੁਤ੍ਤਰਂ, ਯਮਾਹੁ ਨੇਤ੍ਤਂ ਪੁਰਿਸੇਨ ਦੁਚ੍ਚਜਂ.

੫੬.

‘‘ਯੇਨ ਅਤ੍ਥੇਨ ਆਗਚ੍ਛਿ, ਯਮਤ੍ਥਮਭਿਪਤ੍ਥਯਂ;

ਤੇ ਤੇ ਇਜ੍ਝਨ੍ਤੁ ਸਙ੍ਕਪ੍ਪਾ, ਲਭ ਚਕ੍ਖੂਨਿ ਬ੍ਰਾਹ੍ਮਣ.

੫੭.

‘‘ਏਕਂ ਤੇ ਯਾਚਮਾਨਸ੍ਸ, ਉਭਯਾਨਿ ਦਦਾਮਹਂ;

ਸ ਚਕ੍ਖੁਮਾ ਗਚ੍ਛ ਜਨਸ੍ਸ ਪੇਕ੍ਖਤੋ, ਯਦਿਚ੍ਛਸੇ ਤ੍ਵਂ ਤਦਤੇ ਸਮਿਜ੍ਝਤੂ’’ਤਿ.

ਤਤ੍ਥ ਵਨਿਬ੍ਬਤੋਤਿ ਯਾਚਨ੍ਤਸ੍ਸ. ਵਨਿਨ੍ਤਿ ਯਾਚਨਂ. ਤੇ ਤੇਤਿ ਤੇ ਤਵ ਤਸ੍ਸ ਅਤ੍ਥਸ੍ਸ ਸਙ੍ਕਪ੍ਪਾ. ਸ ਚਕ੍ਖੁਮਾਤਿ ਸੋ ਤ੍ਵਂ ਮਮ ਚਕ੍ਖੂਹਿ ਚਕ੍ਖੁਮਾ ਹੁਤ੍ਵਾ. ਯਦਿਚ੍ਛਸੇ ਤ੍ਵਂ ਤਦਤੇ ਸਮਿਜ੍ਝਤੂਤਿ ਯਂ ਤ੍ਵਂ ਮਮ ਸਨ੍ਤਿਕਾ ਇਚ੍ਛਸਿ, ਤਂ ਤੇ ਸਮਿਜ੍ਝਤੂਤਿ.

ਰਾਜਾ ਏਤ੍ਤਕਂ ਕਥੇਤ੍ਵਾ ‘‘ਇਧੇਵ ਮਯਾ ਅਕ੍ਖੀਨਿ ਉਪ੍ਪਾਟੇਤ੍ਵਾ ਦਾਤੁਂ ਅਸਾਰੁਪ੍ਪ’’ਨ੍ਤਿ ਚਿਨ੍ਤੇਤ੍ਵਾ ਬ੍ਰਾਹ੍ਮਣਂ ਆਦਾਯ ਅਨ੍ਤੇਪੁਰਂ ਗਨ੍ਤ੍ਵਾ ਰਾਜਾਸਨੇ ਨਿਸੀਦਿਤ੍ਵਾ ਸੀਵਿਕਂ ਨਾਮ ਵੇਜ੍ਜਂ ਪਕ੍ਕੋਸਾਪੇਤ੍ਵਾ ‘‘ਅਕ੍ਖਿਂ ਮੇ ਸੋਧੇਹੀ’’ਤਿ ਆਹ. ‘‘ਅਮ੍ਹਾਕਂ ਕਿਰ ਰਾਜਾ ਅਕ੍ਖੀਨਿ ਉਪ੍ਪਾਟੇਤ੍ਵਾ ਬ੍ਰਾਹ੍ਮਣਸ੍ਸ ਦਾਤੁਕਾਮੋ’’ਤਿ ਸਕਲਨਗਰੇ ਏਕਕੋਲਾਹਲਂ ਅਹੋਸਿ. ਅਥ ਸੇਨਾਪਤਿਆਦਯੋ ਰਾਜਵਲ੍ਲਭਾ ਚ ਨਾਗਰਾ ਚ ਓਰੋਧਾ ਚ ਸਬ੍ਬੇ ਸਨ੍ਨਿਪਤਿਤ੍ਵਾ ਰਾਜਾਨਂ ਵਾਰੇਨ੍ਤਾ ਤਿਸ੍ਸੋ ਗਾਥਾ ਅਵੋਚੁਂ –

੫੮.

‘‘ਮਾ ਨੋ ਦੇਵ ਅਦਾ ਚਕ੍ਖੁਂ, ਮਾ ਨੋ ਸਬ੍ਬੇ ਪਰਾਕਰਿ;

ਧਨਂ ਦੇਹਿ ਮਹਾਰਾਜ, ਮੁਤ੍ਤਾ ਵੇਲ਼ੁਰਿਯਾ ਬਹੂ.

੫੯.

‘‘ਯੁਤ੍ਤੇ ਦੇਵ ਰਥੇ ਦੇਹਿ, ਆਜਾਨੀਯੇ ਚਲਙ੍ਕਤੇ;

ਨਾਗੇ ਦੇਹਿ ਮਹਾਰਾਜ, ਹੇਮਕਪ੍ਪਨਵਾਸਸੇ.

੬੦.

‘‘ਯਥਾ ਤਂ ਸਿਵਯੋ ਸਬ੍ਬੇ, ਸਯੋਗ੍ਗਾ ਸਰਥਾ ਸਦਾ;

ਸਮਨ੍ਤਾ ਪਰਿਕਿਰੇਯ੍ਯੁਂ, ਏਵਂ ਦੇਹਿ ਰਥੇਸਭਾ’’ਤਿ.

ਤਤ੍ਥ ਪਰਾਕਰੀਤਿ ਪਰਿਚ੍ਚਜਿ. ਅਕ੍ਖੀਸੁ ਹਿ ਦਿਨ੍ਨੇਸੁ ਰਜ੍ਜਂ ਤ੍ਵਂ ਨ ਕਾਰੇਸ੍ਸਸਿ, ਅਞ੍ਞੋ ਰਾਜਾ ਭਵਿਸ੍ਸਤਿ, ਏਵਂ ਤਯਾ ਮਯਂ ਪਰਿਚ੍ਚਤ੍ਤਾ ਨਾਮ ਭਵਿਸ੍ਸਾਮਾਤਿ ਅਧਿਪ੍ਪਾਯੇਨੇਵਮਾਹਂਸੁ. ਪਰਿਕਿਰੇਯ੍ਯੁਨ੍ਤਿ ਪਰਿਵਾਰੇਯ੍ਯੁਂ. ਏਵਂ ਦੇਹੀਤਿ ਯਥਾ ਤਂ ਅਵਿਕਲਚਕ੍ਖੁਂ ਸਿਵਯੋ ਪਰਿਵਾਰੇਯ੍ਯੁਂ, ਏਵਂ ਬਾਹਿਰਧਨਮੇਵਸ੍ਸ ਦੇਹਿ, ਮਾ ਅਕ੍ਖੀਨਿ. ਅਕ੍ਖੀਸੁ ਹਿ ਦਿਨ੍ਨੇਸੁ ਨ ਤਂ ਸਿਵਯੋ ਪਰਿਵਾਰੇਸ੍ਸਨ੍ਤੀਤਿ.

ਅਥ ਰਾਜਾ ਤਿਸ੍ਸੋ ਗਾਥਾ ਅਭਾਸਿ –

੬੧.

‘‘ਯੋ ਵੇ ਦਸ੍ਸਨ੍ਤਿ ਵਤ੍ਵਾਨ, ਅਦਾਨੇ ਕੁਰੁਤੇ ਮਨੋ;

ਭੂਮ੍ਯਂ ਸੋ ਪਤਿਤਂ ਪਾਸਂ, ਗੀਵਾਯਂ ਪਟਿਮੁਞ੍ਚਤਿ.

੬੨.

‘‘ਯੋ ਵੇ ਦਸ੍ਸਨ੍ਤਿ ਵਤ੍ਵਾਨਂ, ਅਦਾਨੇ ਕੁਰੁਤੇ ਮਨੋ;

ਪਾਪਾ ਪਾਪਤਰੋ ਹੋਤਿ, ਸਮ੍ਪਤ੍ਤੋ ਯਮਸਾਧਨਂ.

੬੩.

‘‘ਯਞ੍ਹਿ ਯਾਚੇ ਤਞ੍ਹਿ ਦਦੇ, ਯਂ ਨ ਯਾਚੇ ਨ ਤਂ ਦਦੇ;

ਸ੍ਵਾਹਂ ਤਮੇਵ ਦਸ੍ਸਾਮਿ, ਯਂ ਮਂ ਯਾਚਤਿ ਬ੍ਰਾਹ੍ਮਣੋ’’ਤਿ.

ਤਤ੍ਥ ਪਟਿਮੁਞ੍ਚਤੀਤਿ ਪਵੇਸੇਤਿ. ਪਾਪਾ ਪਾਪਤਰੋਤਿ ਲਾਮਕਾਪਿ ਲਾਮਕਤਰੋ ਨਾਮ ਹੋਤਿ. ਸਮ੍ਪਤ੍ਤੋ ਯਮਸਾਧਨਨ੍ਤਿ ਯਮਸ੍ਸ ਆਣਾਪਵਤ੍ਤਿਟ੍ਠਾਨਂ ਉਸ੍ਸਦਨਿਰਯਂ ਏਸ ਪਤ੍ਤੋਯੇਵ ਨਾਮ ਹੋਤਿ. ਯਞ੍ਹਿ ਯਾਚੇਤਿ ਯਂ ਯਾਚਕੋ ਯਾਚੇਯ੍ਯ, ਦਾਯਕੋਪਿ ਤਮੇਵ ਦਦੇਯ੍ਯ, ਨ ਅਯਾਚਿਤਂ, ਅਯਞ੍ਚ ਬ੍ਰਾਹ੍ਮਣੋ ਮਂ ਚਕ੍ਖੁਂ ਯਾਚਤਿ, ਨ ਮੁਤ੍ਤਾਦਿਕਂ ਧਨਂ, ਤਦੇਵਸ੍ਸਾਹਂ ਦਸ੍ਸਾਮੀਤਿ ਵਦਤਿ.

ਅਥ ਨਂ ਅਮਚ੍ਚਾ ‘‘ਕਿਂ ਪਤ੍ਥੇਤ੍ਵਾ ਚਕ੍ਖੂਨਿ ਦੇਸੀ’’ਤਿ ਪੁਚ੍ਛਨ੍ਤਾ ਗਾਥਮਾਹਂਸੁ –

੬੪.

‘‘ਆਯੁਂ ਨੁ ਵਣ੍ਣਂ ਨੁ ਸੁਖਂ ਬਲਂ ਨੁ, ਕਿਂ ਪਤ੍ਥਯਾਨੋ ਨੁ ਜਨਿਨ੍ਦ ਦੇਸਿ;

ਕਥਞ੍ਹਿ ਰਾਜਾ ਸਿਵਿਨਂ ਅਨੁਤ੍ਤਰੋ, ਚਕ੍ਖੂਨਿ ਦਜ੍ਜਾ ਪਰਲੋਕਹੇਤੂ’’ਤਿ.

ਤਤ੍ਥ ਪਰਲੋਕਹੇਤੂਤਿ ਮਹਾਰਾਜ, ਕਥਂ ਨਾਮ ਤੁਮ੍ਹਾਦਿਸੋ ਪਣ੍ਡਿਤਪੁਰਿਸੋ ਸਨ੍ਦਿਟ੍ਠਿਕਂ ਇਸ੍ਸਰਿਯਂ ਪਹਾਯ ਪਰਲੋਕਹੇਤੁ ਚਕ੍ਖੂਨਿ ਦਦੇਯ੍ਯਾਤਿ.

ਅਥ ਨੇਸਂ ਕਥੇਨ੍ਤੋ ਰਾਜਾ ਗਾਥਮਾਹ –

੬੫.

‘‘ਨ ਵਾਹਮੇਤਂ ਯਸਸਾ ਦਦਾਮਿ, ਨ ਪੁਤ੍ਤਮਿਚ੍ਛੇ ਨ ਧਨਂ ਨ ਰਟ੍ਠਂ;

ਸਤਞ੍ਚ ਧਮ੍ਮੋ ਚਰਿਤੋ ਪੁਰਾਣੋ, ਇਚ੍ਚੇਵ ਦਾਨੇ ਰਮਤੇ ਮਨੋ ਮਮਾ’’ਤਿ.

ਤਤ੍ਥ ਨ ਵਾਹਨ੍ਤਿ ਨ ਵੇ ਅਹਂ. ਯਸਸਾਤਿ ਦਿਬ੍ਬਸ੍ਸ ਵਾ ਮਾਨੁਸਸ੍ਸ ਵਾ ਯਸਸ੍ਸ ਕਾਰਣਾ. ਨ ਪੁਤ੍ਤਮਿਚ੍ਛੇਤਿ ਇਮਸ੍ਸ ਚਕ੍ਖੁਦਾਨਸ੍ਸ ਫਲੇਨ ਨੇਵਾਹਂ ਪੁਤ੍ਤਂ ਇਚ੍ਛਾਮਿ, ਨ ਧਨਂ ਨ ਰਟ੍ਠਂ, ਅਪਿਚ ਸਤਂ ਪਣ੍ਡਿਤਾਨਂ ਸਬ੍ਬਞ੍ਞੁਬੋਧਿਸਤ੍ਤਾਨਂ ਏਸ ਆਚਿਣ੍ਣੋ ਸਮਾਚਿਣ੍ਣੋ ਪੋਰਾਣਕਮਗ੍ਗੋ, ਯਦਿਦਂ ਪਾਰਮੀਪੂਰਣਂ ਨਾਮ. ਨ ਹਿ ਪਾਰਮਿਯੋ ਅਪੂਰੇਤ੍ਵਾ ਬੋਧਿਪਲ੍ਲਙ੍ਕੇ ਸਬ੍ਬਞ੍ਞੁਤਂ ਪਾਪੁਣਿਤੁਂ ਸਮਤ੍ਥੋ ਨਾਮ ਅਤ੍ਥਿ, ਅਹਞ੍ਚ ਪਾਰਮਿਯੋ ਪੂਰੇਤ੍ਵਾ ਬੁਦ੍ਧੋ ਭਵਿਤੁਕਾਮੋ. ਇਚ੍ਚੇਵ ਦਾਨੇ ਰਮਤੇ ਮਨੋ ਮਮਾਤਿ ਇਮਿਨਾ ਕਾਰਣੇਨ ਮਮ ਮਨੋ ਦਾਨੇਯੇਵ ਨਿਰਤੋਤਿ ਵਦਤਿ.

ਸਮ੍ਮਾਸਮ੍ਬੁਦ੍ਧੋਪਿ ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰਸ੍ਸ ਚਰਿਯਾਪਿਟਕਂ ਦੇਸੇਨ੍ਤੋ ‘‘ਮਯ੍ਹਂ ਦ੍ਵੀਹਿ ਚਕ੍ਖੂਹਿਪਿ ਸਬ੍ਬਞ੍ਞੁਤਞ੍ਞਾਣਮੇਵ ਪਿਯਤਰ’’ਨ੍ਤਿ ਦੀਪੇਤੁਂ ਆਹ –

‘‘ਨ ਮੇ ਦੇਸ੍ਸਾ ਉਭੋ ਚਕ੍ਖੂ, ਅਤ੍ਤਾਨਂ ਮੇ ਨ ਦੇਸ੍ਸਿਯਂ;

ਸਬ੍ਬਞ੍ਞੁਤਂ ਪਿਯਂ ਮਯ੍ਹਂ, ਤਸ੍ਮਾ ਚਕ੍ਖੁਂ ਅਦਾਸਹ’’ਨ੍ਤਿ. (ਚਰਿਯਾ. ੧.੬੬);

ਮਹਾਸਤ੍ਤਸ੍ਸ ਪਨ ਕਥਂ ਸੁਤ੍ਵਾ ਅਮਚ੍ਚੇਸੁ ਅਪ੍ਪਟਿਭਾਣੇਸੁ ਠਿਤੇਸੁ ਮਹਾਸਤ੍ਤੋ ਸੀਵਿਕਂ ਵੇਜ੍ਜਂ ਗਾਥਾਯ ਅਜ੍ਝਭਾਸਿ –

੬੬.

‘‘ਸਖਾ ਚ ਮਿਤ੍ਤੋ ਚ ਮਮਾਸਿ ਸੀਵਿਕ, ਸੁਸਿਕ੍ਖਿਤੋ ਸਾਧੁ ਕਰੋਹਿ ਮੇ ਵਚੋ;

ਉਦ੍ਧਰਿਤ੍ਵਾ ਚਕ੍ਖੂਨਿ ਮਮਂ ਜਿਗੀਸਤੋ, ਹਤ੍ਥੇਸੁ ਠਪੇਹਿ ਵਨਿਬ੍ਬਕਸ੍ਸਾ’’ਤਿ.

ਤਸ੍ਸਤ੍ਥੋ – ਸਮ੍ਮ ਸੀਵਿਕ, ਤ੍ਵਂ ਮਯ੍ਹਂ ਸਹਾਯੋ ਚ ਮਿਤ੍ਤੋ ਚ ਵੇਜ੍ਜਸਿਪ੍ਪੇ ਚਾਸਿ ਸੁਸਿਕ੍ਖਿਤੋ, ਸਾਧੁ ਮੇ ਵਚਨਂ ਕਰੋਹਿ. ਮਮ ਜਿਗੀਸਤੋ ਉਪਧਾਰੇਨ੍ਤਸ੍ਸ ਓਲੋਕੇਨ੍ਤਸ੍ਸੇਵ ਤਾਲਮਿਞ੍ਜਂ ਵਿਯ ਮੇ ਅਕ੍ਖੀਨਿ ਉਦ੍ਧਰਿਤ੍ਵਾ ਇਮਸ੍ਸ ਯਾਚਕਸ੍ਸ ਹਤ੍ਥੇਸੁ ਠਪੇਹੀਤਿ.

ਅਥ ਨਂ ਸੀਵਿਕੋ ਆਹ ‘‘ਚਕ੍ਖੁਦਾਨਂ ਨਾਮ ਭਾਰਿਯਂ, ਉਪਧਾਰੇਹਿ, ਦੇਵਾ’’ਤਿ. ਸੀਵਿਕ, ਉਪਧਾਰਿਤਂ ਮਯਾ, ਤ੍ਵਂ ਮਾ ਪਪਞ੍ਚਂ ਕਰੋਹਿ, ਮਾ ਮਯਾ ਸਦ੍ਧਿਂ ਬਹੁਂ ਕਥੇਹੀਤਿ. ਸੋ ਚਿਨ੍ਤੇਸਿ ‘‘ਅਯੁਤ੍ਤਂ ਮਾਦਿਸਸ੍ਸ ਸੁਸਿਕ੍ਖਿਤਸ੍ਸ ਵੇਜ੍ਜਸ੍ਸ ਰਞ੍ਞੋ ਅਕ੍ਖੀਸੁ ਸਤ੍ਥਪਾਤਨ’’ਨ੍ਤਿ. ਸੋ ਨਾਨਾਭੇਸਜ੍ਜਾਨਿ ਘਂਸਿਤ੍ਵਾ ਭੇਸਜ੍ਜਚੁਣ੍ਣੇਨ ਨੀਲੁਪ੍ਪਲਂ ਪਰਿਭਾਵੇਤ੍ਵਾ ਦਕ੍ਖਿਣਕ੍ਖਿਂ ਉਪਸਿਙ੍ਘਾਪੇਸਿ, ਅਕ੍ਖਿ ਪਰਿਵਤ੍ਤਿ, ਦੁਕ੍ਖਵੇਦਨਾ ਉਪ੍ਪਜ੍ਜਿ. ‘‘ਸਲ੍ਲਕ੍ਖੇਹਿ, ਮਹਾਰਾਜ, ਪਟਿਪਾਕਤਿਕਕਰਣਂ ਮਯ੍ਹਂ ਭਾਰੋ’’ਤਿ. ‘‘ਅਲਞ੍ਹਿ ਤਾਤ ਮਾ ਪਪਞ੍ਚਂ ਕਰੀ’’ਤਿ. ਸੋ ਪਰਿਭਾਵੇਤ੍ਵਾ ਪੁਨ ਉਪਸਿਙ੍ਘਾਪੇਸਿ, ਅਕ੍ਖਿ ਅਕ੍ਖਿਕੂਪਤੋ ਮੁਚ੍ਚਿ, ਬਲਵਤਰਾ ਵੇਦਨਾ ਉਦਪਾਦਿ. ‘‘ਸਲ੍ਲਕ੍ਖੇਹਿ ਮਹਾਰਾਜ, ਸਕ੍ਕੋਮਹਂ ਪਟਿਪਾਕਤਿਕਂ ਕਾਤੁ’’ਨ੍ਤਿ. ‘‘ਮਾ ਪਪਞ੍ਚਂ ਕਰੀ’’ਤਿ. ਸੋ ਤਤਿਯਵਾਰੇ ਖਰਤਰਂ ਪਰਿਭਾਵੇਤ੍ਵਾ ਉਪਨਾਮੇਸਿ. ਅਕ੍ਖਿ ਓਸਧਬਲੇਨ ਪਰਿਬ੍ਭਮਿਤ੍ਵਾ ਅਕ੍ਖਿਕੂਪਤੋ ਨਿਕ੍ਖਮਿਤ੍ਵਾ ਨ੍ਹਾਰੁਸੁਤ੍ਤਕੇਨ ਓਲਮ੍ਬਮਾਨਂ ਅਟ੍ਠਾਸਿ. ਸਲ੍ਲਕ੍ਖੇਹਿ ਨਰਿਨ੍ਦ, ਪੁਨ ਪਾਕਤਿਕਕਰਣਂ ਮਯ੍ਹਂ ਬਲਨ੍ਤਿ. ਮਾ ਪਪਞ੍ਚਂ ਕਰੀਤਿ. ਅਧਿਮਤ੍ਤਾ ਵੇਦਨਾ ਉਦਪਾਦਿ, ਲੋਹਿਤਂ ਪਗ੍ਘਰਿ, ਨਿਵਤ੍ਥਸਾਟਕਾ ਲੋਹਿਤੇਨ ਤੇਮਿਂਸੁ. ਓਰੋਧਾ ਚ ਅਮਚ੍ਚਾ ਚ ਰਞ੍ਞੋ ਪਾਦਮੂਲੇ ਪਤਿਤ੍ਵਾ ‘‘ਦੇਵ ਅਕ੍ਖੀਨਿ ਮਾ ਦੇਹੀ’’ਤਿ ਮਹਾਪਰਿਦੇਵਂ ਪਰਿਦੇਵਿਂਸੁ.

ਰਾਜਾ ਵੇਦਨਂ ਅਧਿਵਾਸੇਤ੍ਵਾ ‘‘ਤਾਤ, ਮਾ ਪਪਞ੍ਚਂ ਕਰੀ’’ਤਿ ਆਹ. ਸੋ ‘‘ਸਾਧੁ, ਦੇਵਾ’’ਤਿ ਵਾਮਹਤ੍ਥੇਨ ਅਕ੍ਖਿਂ ਧਾਰੇਤ੍ਵਾ ਦਕ੍ਖਿਣਹਤ੍ਥੇਨ ਸਤ੍ਥਕਂ ਆਦਾਯ ਅਕ੍ਖਿਸੁਤ੍ਤਕਂ ਛਿਨ੍ਦਿਤ੍ਵਾ ਅਕ੍ਖਿਂ ਗਹੇਤ੍ਵਾ ਮਹਾਸਤ੍ਤਸ੍ਸ ਹਤ੍ਥੇ ਠਪੇਸਿ. ਸੋ ਵਾਮਕ੍ਖਿਨਾ ਦਕ੍ਖਿਣਕ੍ਖਿਂ ਓਲੋਕੇਤ੍ਵਾ ਵੇਦਨਂ ਅਧਿਵਾਸੇਤ੍ਵਾ ‘‘ਏਹਿ ਬ੍ਰਾਹ੍ਮਣਾ’’ਤਿ ਬ੍ਰਾਹ੍ਮਣਂ ਪਕ੍ਕੋਸਿਤ੍ਵਾ ‘‘ਮਮ ਇਤੋ ਅਕ੍ਖਿਤੋ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਸਬ੍ਬਞ੍ਞੁਤਞ੍ਞਾਣਕ੍ਖਿਮੇਵ ਪਿਯਤਰਂ, ਤਸ੍ਸ ਮੇ ਇਦਂ ਪਚ੍ਚਯੋ ਹੋਤੂ’’ਤਿ ਵਤ੍ਵਾ ਬ੍ਰਾਹ੍ਮਣਸ੍ਸ ਅਕ੍ਖਿਂ ਅਦਾਸਿ. ਸੋ ਤਂ ਉਕ੍ਖਿਪਿਤ੍ਵਾ ਅਤ੍ਤਨੋ ਅਕ੍ਖਿਮ੍ਹਿ ਠਪੇਸਿ. ਤਂ ਤਸ੍ਸਾਨੁਭਾਵੇਨ ਵਿਕਸਿਤਨੀਲੁਪ੍ਪਲਂ ਵਿਯ ਹੁਤ੍ਵਾ ਪਤਿਟ੍ਠਾਸਿ. ਮਹਾਸਤ੍ਤੋ ਵਾਮਕ੍ਖਿਨਾ ਤਸ੍ਸ ਤਂ ਅਕ੍ਖਿਂ ਦਿਸ੍ਵਾ ‘‘ਅਹੋ, ਸੁਦਿਨ੍ਨਂ ਮਯਾ ਅਕ੍ਖਿਦਾਨ’’ਨ੍ਤਿ ਅਨ੍ਤੋ ਸਮੁਗ੍ਗਤਾਯ ਪੀਤਿਯਾ ਨਿਰਨ੍ਤਰਂ ਫੁਟੋ ਹੁਤ੍ਵਾ ਇਤਰਮ੍ਪਿ ਅਕ੍ਖਿਂ ਅਦਾਸਿ. ਸਕ੍ਕੋ ਤਮ੍ਪਿ ਅਤ੍ਤਨੋ ਅਕ੍ਖਿਮ੍ਹਿ ਠਪੇਤ੍ਵਾ ਰਾਜਨਿਵੇਸਨਾ ਨਿਕ੍ਖਮਿਤ੍ਵਾ ਮਹਾਜਨਸ੍ਸ ਓਲੋਕੇਨ੍ਤਸ੍ਸੇਵ ਨਗਰਾ ਨਿਕ੍ਖਮਿਤ੍ਵਾ ਦੇਵਲੋਕਮੇਵ ਗਤੋ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਦਿਯਡ੍ਢਗਾਥਮਾਹ –

੬੭.

‘‘ਚੋਦਿਤੋ ਸਿਵਿਰਾਜੇਨ, ਸੀਵਿਕੋ ਵਚਨਂਕਰੋ;

ਰਞ੍ਞੋ ਚਕ੍ਖੂਨੁਦ੍ਧਰਿਤ੍ਵਾ, ਬ੍ਰਾਹ੍ਮਣਸ੍ਸੂਪਨਾਮਯਿ;

ਸਚਕ੍ਖੁ ਬ੍ਰਾਹ੍ਮਣੋ ਆਸਿ, ਅਨ੍ਧੋ ਰਾਜਾ ਉਪਾਵਿਸੀ’’ਤਿ.

ਰਞ੍ਞੋ ਨ ਚਿਰਸ੍ਸੇਵ ਅਕ੍ਖੀਨਿ ਰੁਹਿਂਸੁ, ਰੁਹਮਾਨਾਨਿ ਚ ਆਵਾਟਭਾਵਂ ਅਪ੍ਪਤ੍ਵਾ ਕਮ੍ਬਲਗੇਣ੍ਡੁਕੇਨ ਵਿਯ ਉਗ੍ਗਤੇਨ ਮਂਸਪਿਣ੍ਡੇਨ ਪੂਰੇਤ੍ਵਾ ਚਿਤ੍ਤਕਮ੍ਮਰੂਪਸ੍ਸ ਵਿਯ ਅਕ੍ਖੀਨਿ ਅਹੇਸੁਂ, ਵੇਦਨਾ ਪਚ੍ਛਿਜ੍ਜਿ. ਅਥ ਮਹਾਸਤ੍ਤੋ ਕਤਿਪਾਹਂ ਪਾਸਾਦੇ ਵਸਿਤ੍ਵਾ ‘‘ਕਿਂ ਅਨ੍ਧਸ੍ਸ ਰਜ੍ਜੇਨ, ਅਮਚ੍ਚਾਨਂ ਰਜ੍ਜਂ ਨਿਯ੍ਯਾਦੇਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਮਚ੍ਚੇ ਪਕ੍ਕੋਸਾਪੇਤ੍ਵਾ ਤੇਸਂ ਤਮਤ੍ਥਂ ਆਰੋਚੇਤ੍ਵਾ ‘‘ਏਕੋ ਮੁਖਧੋਵਨਾਦਿਦਾਯਕੋ ਕਪ੍ਪਿਯਕਾਰਕੋਵ ਮਯ੍ਹਂ ਸਨ੍ਤਿਕੇ ਭਵਿਸ੍ਸਤਿ, ਸਰੀਰਕਿਚ੍ਚਟ੍ਠਾਨੇਸੁਪਿ ਮੇ ਰਜ੍ਜੁਕਂ ਬਨ੍ਧਥਾ’’ਤਿ ਵਤ੍ਵਾ ਸਾਰਥਿਂ ਆਮਨ੍ਤੇਤ੍ਵਾ ‘‘ਰਥਂ ਯੋਜੇਹੀ’’ਤਿ ਆਹ. ਅਮਚ੍ਚਾ ਪਨਸ੍ਸ ਰਥੇਨ ਗਨ੍ਤੁਂ ਅਦਤ੍ਵਾ ਸੁਵਣ੍ਣਸਿਵਿਕਾਯ ਨਂ ਨੇਤ੍ਵਾ ਪੋਕ੍ਖਰਣੀਤੀਰੇ ਨਿਸੀਦਾਪੇਤ੍ਵਾ ਆਰਕ੍ਖਂ ਸਂਵਿਧਾਯ ਪਟਿਕ੍ਕਮਿਂਸੁ. ਰਾਜਾ ਪਲ੍ਲਙ੍ਕੇਨ ਨਿਸਿਨ੍ਨੋ ਅਤ੍ਤਨੋ ਦਾਨਂ ਆਵਜ੍ਜੇਸਿ. ਤਸ੍ਮਿਂ ਖਣੇ ਸਕ੍ਕਸ੍ਸ ਆਸਨਂ ਉਣ੍ਹਂ ਅਹੋਸਿ. ਸੋ ਆਵਜ੍ਜੇਨ੍ਤੋ ਤਂ ਕਾਰਣਂ ਦਿਸ੍ਵਾ ‘‘ਮਹਾਰਾਜਸ੍ਸ ਵਰਂ ਦਤ੍ਵਾ ਚਕ੍ਖੁਂ ਪਟਿਪਾਕਤਿਕਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਤ੍ਥ ਗਨ੍ਤ੍ਵਾ ਮਹਾਸਤ੍ਤਸ੍ਸ ਅਵਿਦੂਰੇ ਅਪਰਾਪਰਂ ਚਙ੍ਕਮਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਇਮਾ ਗਾਥਾ ਆਹ –

੬੮.

‘‘ਤਤੋ ਸੋ ਕਤਿਪਾਹਸ੍ਸ, ਉਪਰੂਲ਼੍ਹੇਸੁ ਚਕ੍ਖੁਸੁ;

ਸੂਤਂ ਆਮਨ੍ਤਯੀ ਰਾਜਾ, ਸਿਵੀਨਂ ਰਟ੍ਠਵਡ੍ਢਨੋ.

੬੯.

‘‘ਯੋਜੇਹਿ ਸਾਰਥਿ ਯਾਨਂ, ਯੁਤ੍ਤਞ੍ਚ ਪਟਿਵੇਦਯ;

ਉਯ੍ਯਾਨਭੂਮਿਂ ਗਚ੍ਛਾਮ, ਪੋਕ੍ਖਰਞ੍ਞੋ ਵਨਾਨਿ ਚ.

੭੦.

‘‘ਸੋ ਚ ਪੋਕ੍ਖਰਣੀਤੀਰੇ, ਪਲ੍ਲਙ੍ਕੇਨ ਉਪਾਵਿਸਿ;

ਤਸ੍ਸ ਸਕ੍ਕੋ ਪਾਤੁਰਹੁ, ਦੇਵਰਾਜਾ ਸੁਜਮ੍ਪਤੀ’’ਤਿ.

ਸਕ੍ਕੋਪਿ ਮਹਾਸਤ੍ਤੇਨ ਪਦਸਦ੍ਦਂ ਸੁਤ੍ਵਾ ‘‘ਕੋ ਏਸੋ’’ਤਿ ਪੁਟ੍ਠੋ ਗਾਥਮਾਹ –

੭੧.

‘‘ਸਕ੍ਕੋਹਮਸ੍ਮਿ ਦੇਵਿਨ੍ਦੋ, ਆਗਤੋਸ੍ਮਿ ਤਵਨ੍ਤਿਕੇ;

ਵਰਂ ਵਰਸ੍ਸੁ ਰਾਜੀਸਿ, ਯਂ ਕਿਞ੍ਚਿ ਮਨਸਿਚ੍ਛਸੀ’’ਤਿ. –

ਏਵਂ ਵੁਤ੍ਤੇ ਰਾਜਾ ਗਾਥਮਾਹ –

੭੨.

‘‘ਪਹੂਤਂ ਮੇ ਧਨਂ ਸਕ੍ਕ, ਬਲਂ ਕੋਸੋ ਚਨਪ੍ਪਕੋ;

ਅਨ੍ਧਸ੍ਸ ਮੇ ਸਤੋ ਦਾਨਿ, ਮਰਣਞ੍ਞੇਵ ਰੁਚ੍ਚਤੀ’’ਤਿ.

ਤਤ੍ਥ ਮਰਣਞ੍ਞੇਵ ਰੁਚ੍ਚਤੀਤਿ ਦੇਵਰਾਜ, ਇਦਾਨਿ ਮਯ੍ਹਂ ਅਨ੍ਧਭਾਵੇਨ ਮਰਣਮੇਵ ਰੁਚ੍ਚਤਿ, ਤਂ ਮੇ ਦੇਹੀਤਿ.

ਅਥ ਨਂ ਸਕ੍ਕੋ ਆਹ ‘‘ਸਿਵਿਰਾਜ, ਕਿਂ ਪਨ ਤ੍ਵਂ ਮਰਿਤੁਕਾਮੋ ਹੁਤ੍ਵਾ ਮਰਣਂ ਰੋਚੇਸਿ, ਉਦਾਹੁ ਅਨ੍ਧਭਾਵੇਨਾ’’ਤਿ? ‘‘ਅਨ੍ਧਭਾਵੇਨ ਦੇਵਾ’’ਤਿ. ‘‘ਮਹਾਰਾਜ, ਦਾਨਂ ਨਾਮ ਨ ਕੇਵਲਂ ਸਮ੍ਪਰਾਯਤ੍ਥਮੇਵ ਦੀਯਤਿ, ਦਿਟ੍ਠਧਮ੍ਮਤ੍ਥਾਯਪਿ ਪਚ੍ਚਯੋ ਹੋਤਿ, ਤ੍ਵਞ੍ਚ ਏਕਂ ਚਕ੍ਖੁਂ ਯਾਚਿਤੋ ਦ੍ਵੇ ਅਦਾਸਿ, ਤੇਨ ਸਚ੍ਚਕਿਰਿਯਂ ਕਰੋਹੀ’’ਤਿ ਕਥਂ ਸਮੁਟ੍ਠਾਪੇਤ੍ਵਾ ਆਹ –

੭੩.

‘‘ਯਾਨਿ ਸਚ੍ਚਾਨਿ ਦ੍ਵਿਪਦਿਨ੍ਦ, ਤਾਨਿ ਭਾਸਸ੍ਸੁ ਖਤ੍ਤਿਯ;

ਸਚ੍ਚਂ ਤੇ ਭਣਮਾਨਸ੍ਸ, ਪੁਨ ਚਕ੍ਖੁ ਭਵਿਸ੍ਸਤੀ’’ਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਸਕ੍ਕ, ਸਚੇਸਿ ਮਮ ਚਕ੍ਖੁਂ ਦਾਤੁਕਾਮੋ, ਅਞ੍ਞਂ ਉਪਾਯਂ ਮਾ ਕਰਿ, ਮਮ ਦਾਨਨਿਸ੍ਸਨ੍ਦੇਨੇਵ ਮੇ ਚਕ੍ਖੁ ਉਪ੍ਪਜ੍ਜਤੂ’’ਤਿ ਵਤ੍ਵਾ ਸਕ੍ਕੇਨ ‘‘ਮਹਾਰਾਜ, ਅਹਂ ਸਕ੍ਕੋ ਦੇਵਰਾਜਾਪਿ ਨ ਪਰੇਸਂ ਚਕ੍ਖੁਂ ਦਾਤੁਂ ਸਕ੍ਕੋਮਿ, ਤਯਾ ਦਿਨ੍ਨਦਾਨਸ੍ਸ ਫਲੇਨੇਵ ਤੇ ਚਕ੍ਖੁ ਉਪ੍ਪਜ੍ਜਿਸ੍ਸਤੀ’’ਤਿ ਵੁਤ੍ਤੇ ‘‘ਤੇਨ ਹਿ ਮਯਾ ਦਾਨਂ ਸੁਦਿਨ੍ਨ’’ਨ੍ਤਿ ਵਤ੍ਵਾ ਸਚ੍ਚਕਿਰਿਯਂ ਕਰੋਨ੍ਤੋ ਗਾਥਮਾਹ –

੭੪.

‘‘ਯੇ ਮਂ ਯਾਚਿਤੁਮਾਯਨ੍ਤਿ, ਨਾਨਾਗੋਤ੍ਤਾ ਵਨਿਬ੍ਬਕਾ;

ਯੋਪਿ ਮਂ ਯਾਚਤੇ ਤਤ੍ਥ, ਸੋਪਿ ਮੇ ਮਨਸੋ ਪਿਯੋ;

ਏਤੇਨ ਸਚ੍ਚਵਜ੍ਜੇਨ, ਚਕ੍ਖੁ ਮੇ ਉਪਪਜ੍ਜਥਾ’’ਤਿ.

ਤਤ੍ਥ ਯੇ ਮਨ੍ਤਿ ਯੇ ਮਂ ਯਾਚਿਤੁਂ ਆਗਚ੍ਛਨ੍ਤਿ, ਤੇਸੁ ਯਾਚਕੇਸੁ ਆਗਚ੍ਛਨ੍ਤੇਸੁ ਯੋਪਿ ਮਂ ਯਾਚਤੇ, ਸੋਪਿ ਮੇ ਮਨਸੋ ਪਿਯੋ. ਏਤੇਨਾਤਿ ਸਚੇ ਮਮ ਸਬ੍ਬੇਪਿ ਯਾਚਕਾ ਪਿਯਾ, ਸਚ੍ਚਮੇਵੇਤਂ ਮਯਾ ਵੁਤ੍ਤਂ, ਏਤੇਨ ਮੇ ਸਚ੍ਚਵਚਨੇਨ ਏਕਂ ਮੇ ਚਕ੍ਖੁ ਉਪਪਜ੍ਜਥ ਉਪਪਜ੍ਜਤੂਤਿ ਆਹ.

ਅਥਸ੍ਸ ਵਚਨਾਨਨ੍ਤਰਮੇਵ ਪਠਮਂ ਚਕ੍ਖੁ ਉਦਪਾਦਿ. ਤਤੋ ਦੁਤਿਯਸ੍ਸ ਉਪ੍ਪਜ੍ਜਨਤ੍ਥਾਯ ਗਾਥਾਦ੍ਵਯਮਾਹ –

੭੫.

‘‘ਯਂ ਮਂ ਸੋ ਯਾਚਿਤੁਂ ਆਗਾ, ਦੇਹਿ ਚਕ੍ਖੁਨ੍ਤਿ ਬ੍ਰਾਹ੍ਮਣੋ;

ਤਸ੍ਸ ਚਕ੍ਖੂਨਿ ਪਾਦਾਸਿਂ, ਬ੍ਰਾਹ੍ਮਣਸ੍ਸ ਵਨਿਬ੍ਬਤੋ.

੭੬.

‘‘ਭਿਯ੍ਯੋ ਮਂ ਆਵਿਸੀ ਪੀਤਿ, ਸੋਮਨਸ੍ਸਞ੍ਚਨਪ੍ਪਕਂ;

ਏਤੇਨ ਸਚ੍ਚਵਜ੍ਜੇਨ, ਦੁਤਿਯਂ ਮੇ ਉਪਪਜ੍ਜਥਾ’’ਤਿ.

ਤਤ੍ਥ ਯਂ ਮਨ੍ਤਿ ਯੋ ਮਂ ਯਾਚਤਿ. ਸੋਤਿ ਸੋ ਚਕ੍ਖੁਵਿਕਲੋ ਬ੍ਰਾਹ੍ਮਣੋ ‘‘ਦੇਹਿ ਮੇ ਚਕ੍ਖੁ’’ਨ੍ਤਿ ਯਾਚਿਤੁਂ ਆਗਤੋ. ਵਨਿਬ੍ਬਤੋਤਿ ਯਾਚਨ੍ਤਸ੍ਸ. ਭਿਯ੍ਯੋ ਮਂ ਆਵਿਸੀਤਿ ਬ੍ਰਾਹ੍ਮਣਸ੍ਸ ਚਕ੍ਖੂਨਿ ਦਤ੍ਵਾ ਅਨ੍ਧਕਾਲਤੋ ਪਟ੍ਠਾਯ ਤਸ੍ਮਿਂ ਅਨ੍ਧਕਾਲੇ ਤਥਾਰੂਪਂ ਵੇਦਨਂ ਅਗਣੇਤ੍ਵਾ ‘‘ਅਹੋ ਸੁਦਿਨ੍ਨਂ ਮੇ ਦਾਨ’’ਨ੍ਤਿ ਪਚ੍ਚਵੇਕ੍ਖਨ੍ਤਂ ਮਂ ਭਿਯ੍ਯੋ ਅਤਿਰੇਕਤਰਾ ਪੀਤਿ ਆਵਿਸਿ, ਮਮ ਹਦਯਂ ਪਵਿਟ੍ਠਾ, ਸੋਮਨਸ੍ਸਞ੍ਚ ਮਮ ਅਨਨ੍ਤਂ ਅਪਰਿਮਾਣਂ ਉਪ੍ਪਜ੍ਜਿ. ਏਤੇਨਾਤਿ ਸਚੇ ਮਮ ਤਦਾ ਅਨਪ੍ਪਕਂ ਪੀਤਿਸੋਮਨਸ੍ਸਂ ਉਪ੍ਪਨ੍ਨਂ, ਸਚ੍ਚਮੇਵੇਤਂ ਮਯਾ ਵੁਤ੍ਤਂ, ਏਤੇਨ ਮੇ ਸਚ੍ਚਵਚਨੇਨ ਦੁਤਿਯਮ੍ਪਿ ਚਕ੍ਖੁ ਉਪਪਜ੍ਜਤੂਤਿ ਆਹ.

ਤਙ੍ਖਣਞ੍ਞੇਵ ਦੁਤਿਯਮ੍ਪਿ ਚਕ੍ਖੁ ਉਦਪਾਦਿ. ਤਾਨਿ ਪਨਸ੍ਸ ਚਕ੍ਖੂਨਿ ਨੇਵ ਪਾਕਤਿਕਾਨਿ, ਨ ਦਿਬ੍ਬਾਨਿ. ਸਕ੍ਕਬ੍ਰਾਹ੍ਮਣਸ੍ਸ ਹਿ ਦਿਨ੍ਨਂ ਚਕ੍ਖੁਂ ਪੁਨ ਪਾਕਤਿਕਂ ਕਾਤੁਂ ਨ ਸਕ੍ਕਾ, ਉਪਹਤਵਤ੍ਥੁਨੋ ਚ ਦਿਬ੍ਬਚਕ੍ਖੁ ਨਾਮ ਨ ਉਪ੍ਪਜ੍ਜਤਿ, ਤਾਨਿ ਪਨਸ੍ਸ ਸਚ੍ਚਪਾਰਮਿਤਾਨੁਭਾਵੇਨ ਸਮ੍ਭੂਤਾਨਿ ਚਕ੍ਖੂਨੀਤਿ ਵੁਤ੍ਤਾਨਿ. ਤੇਸਂ ਉਪ੍ਪਤ੍ਤਿਸਮਕਾਲਮੇਵ ਸਕ੍ਕਾਨੁਭਾਵੇਨ ਸਬ੍ਬਾ ਰਾਜਪਰਿਸਾ ਸਨ੍ਨਿਪਤਿਤਾਵ ਅਹੇਸੁਂ. ਅਥਸ੍ਸ ਸਕ੍ਕੋ ਮਹਾਜਨਮਜ੍ਝੇਯੇਵ ਥੁਤਿਂ ਕਰੋਨ੍ਤੋ ਗਾਥਾਦ੍ਵਯਮਾਹ –

੭੭.

‘‘ਧਮ੍ਮੇਨ ਭਾਸਿਤਾ ਗਾਥਾ, ਸਿਵੀਨਂ ਰਟ੍ਠਵਡ੍ਢਨ;

ਏਤਾਨਿ ਤਵ ਨੇਤ੍ਤਾਨਿ, ਦਿਬ੍ਬਾਨਿ ਪਟਿਦਿਸ੍ਸਰੇ.

੭੮.

‘‘ਤਿਰੋਕੁਟ੍ਟਂ ਤਿਰੋਸੇਲਂ, ਸਮਤਿਗ੍ਗਯ੍ਹ ਪਬ੍ਬਤਂ;

ਸਮਨ੍ਤਾ ਯੋਜਨਸਤਂ, ਦਸ੍ਸਨਂ ਅਨੁਭੋਨ੍ਤੁ ਤੇ’’ਤਿ.

ਤਤ੍ਥ ਧਮ੍ਮੇਨ ਭਾਸਿਤਾਤਿ ਮਹਾਰਾਜ, ਇਮਾ ਤੇ ਗਾਥਾ ਧਮ੍ਮੇਨ ਸਭਾਵੇਨੇਵ ਭਾਸਿਤਾ. ਦਿਬ੍ਬਾਨੀਤਿ ਦਿਬ੍ਬਾਨੁਭਾਵਯੁਤ੍ਤਾਨਿ. ਪਟਿਦਿਸ੍ਸਰੇਤਿ ਪਟਿਦਿਸ੍ਸਨ੍ਤਿ. ਤਿਰੋਕੁਟ੍ਟਨ੍ਤਿ ਮਹਾਰਾਜ, ਇਮਾਨਿ ਤੇ ਚਕ੍ਖੂਨਿ ਦੇਵਤਾਨਂ ਚਕ੍ਖੂਨਿ ਵਿਯ ਪਰਕੁਟ੍ਟਂ ਪਰਸੇਲਂ ਯਂਕਿਞ੍ਚਿ ਪਬ੍ਬਤਮ੍ਪਿ ਸਮਤਿਗ੍ਗਯ੍ਹ ਅਤਿਕ੍ਕਮਿਤ੍ਵਾ ਸਮਨ੍ਤਾ ਦਸ ਦਿਸਾ ਯੋਜਨਸਤਂ ਰੂਪਦਸ੍ਸਨਂ ਅਨੁਭੋਨ੍ਤੁ ਸਾਧੇਨ੍ਤੂਤਿ ਅਤ੍ਥੋ.

ਇਤਿ ਸੋ ਆਕਾਸੇ ਠਤ੍ਵਾ ਮਹਾਜਨਮਜ੍ਝੇ ਇਮਾ ਗਾਥਾ ਭਾਸਿਤ੍ਵਾ ‘‘ਅਪ੍ਪਮਤ੍ਤੋ ਹੋਹੀ’’ਤਿ ਮਹਾਸਤ੍ਤਂ ਓਵਦਿਤ੍ਵਾ ਦੇਵਲੋਕਮੇਵ ਗਤੋ. ਮਹਾਸਤ੍ਤੋਪਿ ਮਹਾਜਨਪਰਿਵੁਤੋ ਮਹਨ੍ਤੇਨ ਸਕ੍ਕਾਰੇਨ ਨਗਰਂ ਪਵਿਸਿਤ੍ਵਾ ਸੁਚਨ੍ਦਕਂ ਪਾਸਾਦਂ ਅਭਿਰੁਹਿ. ਤੇਨ ਚਕ੍ਖੂਨਂ ਪਟਿਲਦ੍ਧਭਾਵੋ ਸਕਲਸਿਵਿਰਟ੍ਠੇ ਪਾਕਟੋ ਜਾਤੋ. ਅਥਸ੍ਸ ਦਸ੍ਸਨਤ੍ਥਂ ਸਕਲਰਟ੍ਠਵਾਸਿਨੋ ਬਹੁਂ ਪਣ੍ਣਾਕਾਰਂ ਗਹੇਤ੍ਵਾ ਆਗਮਿਂਸੁ. ਮਹਾਸਤ੍ਤੋ ‘‘ਇਮਸ੍ਮਿਂ ਮਹਾਜਨਸਨ੍ਨਿਪਾਤੇ ਮਮ ਦਾਨਂ ਵਣ੍ਣਯਿਸ੍ਸਾਮੀ’’ਤਿ ਰਾਜਦ੍ਵਾਰੇ ਮਹਾਮਣ੍ਡਪਂ ਕਾਰੇਤ੍ਵਾ ਸਮੁਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲਙ੍ਕੇ ਨਿਸਿਨ੍ਨੋ ਨਗਰੇ ਭੇਰਿਂ ਚਰਾਪੇਤ੍ਵਾ ਸਬ੍ਬਸੇਨਿਯੋ ਸਨ੍ਨਿਪਾਤੇਤ੍ਵਾ ‘‘ਅਮ੍ਭੋ, ਸਿਵਿਰਟ੍ਠਵਾਸਿਨੋ ਇਮਾਨਿ ਮੇ ਦਿਬ੍ਬਚਕ੍ਖੂਨਿ ਦਿਸ੍ਵਾ ਇਤੋ ਪਟ੍ਠਾਯ ਦਾਨਂ ਅਦਤ੍ਵਾ ਮਾ ਭੁਞ੍ਜਥਾ’’ਤਿ ਧਮ੍ਮਂ ਦੇਸੇਨ੍ਤੋ ਚਤਸ੍ਸੋ ਗਾਥਾ ਅਭਾਸਿ –

੭੯.

‘‘ਕੋ ਨੀਧ ਵਿਤ੍ਤਂ ਨ ਦਦੇਯ੍ਯ ਯਾਚਿਤੋ, ਅਪਿ ਵਿਸਿਟ੍ਠਂ ਸੁਪਿਯਮ੍ਪਿ ਅਤ੍ਤਨੋ;

ਤਦਿਙ੍ਘ ਸਬ੍ਬੇ ਸਿਵਯੋ ਸਮਾਗਤਾ, ਦਿਬ੍ਬਾਨਿ ਨੇਤ੍ਤਾਨਿ ਮਮਜ੍ਜ ਪਸ੍ਸਥ.

੮੦.

‘‘ਤਿਰੋਕੁਟ੍ਟਂ ਤਿਰੋਸੇਲਂ, ਸਮਤਿਗ੍ਗਯ੍ਹ ਪਬ੍ਬਤਂ;

ਸਮਨ੍ਤਾ ਯੋਜਨਸਤਂ, ਦਸ੍ਸਨਂ ਅਨੁਭੋਨ੍ਤਿ ਮੇ.

੮੧.

‘‘ਨ ਚਾਗਮਤ੍ਤਾ ਪਰਮਤ੍ਥਿ ਕਿਞ੍ਚਿ, ਮਚ੍ਚਾਨਂ ਇਧ ਜੀਵਿਤੇ;

ਦਤ੍ਵਾਨ ਮਾਨੁਸਂ ਚਕ੍ਖੁਂ, ਲਦ੍ਧਂ ਮੇ ਚਕ੍ਖੁਂ ਅਮਾਨੁਸਂ.

੮੨.

‘‘ਏਤਮ੍ਪਿ ਦਿਸ੍ਵਾ ਸਿਵਯੋ, ਦੇਥ ਦਾਨਾਨਿ ਭੁਞ੍ਜਥ;

ਦਤ੍ਵਾ ਚ ਭੁਤ੍ਵਾ ਚ ਯਥਾਨੁਭਾਵਂ, ਅਨਿਨ੍ਦਿਤਾ ਸਗ੍ਗਮੁਪੇਥ ਠਾਨ’’ਨ੍ਤਿ.

ਤਤ੍ਥ ਕੋਨੀਧਾਤਿ ਕੋ ਨੁ ਇਧ. ਅਪਿ ਵਿਸਿਟ੍ਠਨ੍ਤਿ ਉਤ੍ਤਮਮ੍ਪਿ ਸਮਾਨਂ. ਚਾਗਮਤ੍ਤਾਤਿ ਚਾਗਪਮਾਣਤੋ ਅਞ੍ਞਂ ਵਰਂ ਨਾਮ ਨਤ੍ਥਿ. ਇਧ ਜੀਵਿਤੇਤਿ ਇਮਸ੍ਮਿਂ ਜੀਵਲੋਕੇ. ‘‘ਇਧ ਜੀਵਤ’’ਨ੍ਤਿਪਿ ਪਾਠੋ, ਇਮਸ੍ਮਿਂ ਲੋਕੇ ਜੀਵਮਾਨਾਨਨ੍ਤਿ ਅਤ੍ਥੋ. ਅਮਾਨੁਸਨ੍ਤਿ ਦਿਬ੍ਬਚਕ੍ਖੁ ਮਯਾ ਲਦ੍ਧਂ, ਇਮਿਨਾ ਕਾਰਣੇਨ ਵੇਦਿਤਬ੍ਬਮੇਤਂ ‘‘ਚਾਗਤੋ ਉਤ੍ਤਮਂ ਨਾਮ ਨਤ੍ਥੀ’’ਤਿ. ਏਤਮ੍ਪਿ ਦਿਸ੍ਵਾਤਿ ਏਤਂ ਮਯਾ ਲਦ੍ਧਂ ਦਿਬ੍ਬਚਕ੍ਖੁਂ ਦਿਸ੍ਵਾਪਿ.

ਇਤਿ ਇਮਾਹਿ ਚਤੂਹਿ ਗਾਥਾਹਿ ਧਮ੍ਮਂ ਦੇਸੇਤ੍ਵਾ ਤਤੋ ਪਟ੍ਠਾਯ ਅਨ੍ਵਦ੍ਧਮਾਸਂ ਪਨ੍ਨਰਸੁਪੋਸਥੇਸੁ ਮਹਾਜਨਂ ਸਨ੍ਨਿਪਾਤਾਪੇਤ੍ਵਾ ਨਿਚ੍ਚਂ ਇਮਾਹਿ ਗਾਥਾਹਿ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਮਹਾਜਨੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਦੇਵਲੋਕਂ ਪੂਰੇਨ੍ਤੋਵ ਅਗਮਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੋਰਾਣਕਪਣ੍ਡਿਤਾ ਬਾਹਿਰਦਾਨੇਨ ਅਸਨ੍ਤੁਟ੍ਠਾ ਸਮ੍ਪਤ੍ਤਯਾਚਕਾਨਂ ਅਤ੍ਤਨੋ ਚਕ੍ਖੂਨਿ ਉਪ੍ਪਾਟੇਤ੍ਵਾ ਅਦਂਸੂ’’ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸੀਵਿਕਵੇਜ੍ਜੋ ਆਨਨ੍ਦੋ ਅਹੋਸਿ, ਸਕ੍ਕੋ ਅਨੁਰੁਦ੍ਧੋ ਅਹੋਸਿ, ਸੇਸਪਰਿਸਾ ਬੁਦ੍ਧਪਰਿਸਾ, ਸਿਵਿਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਿਵਿਜਾਤਕਵਣ੍ਣਨਾ ਤਤਿਯਾ.

[੫੦੦] ੪. ਸਿਰੀਮਨ੍ਤਜਾਤਕਵਣ੍ਣਨਾ

੮੩-੧੦੩. ਪਞ੍ਞਾਯੁਪੇਤਂ ਸਿਰਿਯਾ ਵਿਹੀਨਨ੍ਤਿ ਅਯਂ ਸਿਰੀਮਨ੍ਤਪਞ੍ਹੋ ਮਹਾਉਮਙ੍ਗੇ (ਜਾ. ੨.੨੨.੫੯੦ ਆਦਯੋ) ਆਵਿ ਭਵਿਸ੍ਸਤਿ.

ਸਿਰੀਮਨ੍ਤਜਾਤਕਵਣ੍ਣਨਾ ਚਤੁਤ੍ਥਾ.

[੫੦੧] ੫. ਰੋਹਣਮਿਗਜਾਤਕਵਣ੍ਣਨਾ

ਏਤੇ ਯੂਥਾ ਪਤਿਯਨ੍ਤੀਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਆਯਸ੍ਮਤੋ ਆਨਨ੍ਦਸ੍ਸ ਜੀਵਿਤਪਰਿਚ੍ਚਾਗਂ ਆਰਬ੍ਭ ਕਥੇਸਿ. ਸੋ ਪਨਸ੍ਸ ਜੀਵਿਤਪਰਿਚ੍ਚਾਗੋ ਅਸੀਤਿਨਿਪਾਤੇ ਚੂਲ਼ਹਂਸਜਾਤਕੇ (ਜਾ. ੨.੨੧.੧ ਆਦਯੋ) ਧਨਪਾਲਦਮਨੇ ਆਵਿ ਭਵਿਸ੍ਸਤਿ. ਏਵਂ ਤੇਨਾਯਸ੍ਮਤਾ ਸਤ੍ਥੁ ਅਤ੍ਥਾਯ ਜੀਵਿਤੇ ਪਰਿਚ੍ਚਤ੍ਤੇ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਆਯਸ੍ਮਾ ਆਨਨ੍ਦੋ ਸੇਕ੍ਖਪਟਿਸਮ੍ਭਿਦਪ੍ਪਤ੍ਤੋ ਹੁਤ੍ਵਾ ਦਸਬਲਸ੍ਸਤ੍ਥਾਯ ਜੀਵਿਤਂ ਪਰਿਚ੍ਚਜੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਸ ਮਮਤ੍ਥਾਯ ਜੀਵਿਤਂ ਪਰਿਚ੍ਚਜਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਖੇਮਾ ਨਾਮਸ੍ਸ ਅਗ੍ਗਮਹੇਸੀ ਅਹੋਸਿ. ਤਦਾ ਬੋਧਿਸਤ੍ਤੋ ਹਿਮਵਨ੍ਤਪਦੇਸੇ ਮਿਗਯੋਨਿਯਂ ਨਿਬ੍ਬਤ੍ਤਿਤ੍ਵਾ ਸੁਵਣ੍ਣਵਣ੍ਣੋ ਅਹੋਸਿ ਸੋਭਗ੍ਗਪ੍ਪਤ੍ਤੋ. ਕਨਿਟ੍ਠੋਪਿਸ੍ਸ ਚਿਤ੍ਤਮਿਗੋ ਨਾਮ ਸੁਵਣ੍ਣਵਣ੍ਣੋਵ ਅਹੋਸਿ, ਕਨਿਟ੍ਠਭਗਿਨੀਪਿਸ੍ਸ ਸੁਤਨਾ ਨਾਮ ਸੁਵਣ੍ਣਵਣ੍ਣਾਵ ਅਹੋਸਿ. ਮਹਾਸਤ੍ਤੋ ਪਨ ਰੋਹਣੋ ਨਾਮ ਮਿਗਰਾਜਾ ਅਹੋਸਿ. ਸੋ ਹਿਮਵਨ੍ਤੇ ਦ੍ਵੇ ਪਬ੍ਬਤਰਾਜਿਯੋ ਅਤਿਕ੍ਕਮਿਤ੍ਵਾ ਤਤਿਯਾਯ ਅਨ੍ਤਰੇ ਰੋਹਣਂ ਨਾਮ ਸਰਂ ਨਿਸ੍ਸਾਯ ਅਸੀਤਿਮਿਗਸਹਸ੍ਸਪਰਿਵਾਰੋ ਵਾਸਂ ਕਪ੍ਪੇਸਿ. ਸੋ ਅਨ੍ਧੇ ਜਿਣ੍ਣੇ ਮਾਤਾਪਿਤਰੋ ਪੋਸੇਸਿ. ਅਥੇਕੋ ਬਾਰਾਣਸਿਤੋ ਅਵਿਦੂਰੇ ਨੇਸਾਦਗਾਮਵਾਸੀ ਨੇਸਾਦਪੁਤ੍ਤੋ ਹਿਮਵਨ੍ਤਂ ਪਵਿਟ੍ਠੋ ਮਹਾਸਤ੍ਤਂ ਦਿਸ੍ਵਾ ਅਤ੍ਤਨੋ ਗਾਮਂ ਆਗਨ੍ਤ੍ਵਾ ਅਪਰਭਾਗੇ ਕਾਲਂ ਕਰੋਨ੍ਤੋ ਪੁਤ੍ਤਸ੍ਸਾਰੋਚੇਸਿ ‘‘ਤਾਤ, ਅਮ੍ਹਾਕਂ ਕਮ੍ਮਭੂਮਿਯਂ ਅਸੁਕਸ੍ਮਿਂ ਨਾਮ ਠਾਨੇ ਸੁਵਣ੍ਣਵਣ੍ਣੋ ਮਿਗੋ ਵਸਤਿ, ਸਚੇ ਰਾਜਾ ਪੁਚ੍ਛੇਯ੍ਯ, ਕਥੇਯ੍ਯਾਸੀ’’ਤਿ.

ਅਥੇਕਦਿਵਸਂ ਖੇਮਾ ਦੇਵੀ ਪਚ੍ਚੂਸਕਾਲੇ ਸੁਪਿਨਂ ਅਦ੍ਦਸ. ਏਵਰੂਪੋ ਸੁਪਿਨੋ ਅਹੋਸਿ – ਸੁਵਣ੍ਣਵਣ੍ਣੋ ਮਿਗੋ ਆਗਨ੍ਤ੍ਵਾ ਕਞ੍ਚਨਪੀਠੇ ਨਿਸੀਦਿਤ੍ਵਾ ਸੁਵਣ੍ਣਕਿਙ੍ਕਿਣਿਕਂ ਆਕੋਟੇਨ੍ਤੋ ਵਿਯ ਮਧੁਰਸ੍ਸਰੇਨ ਦੇਵਿਯਾ ਧਮ੍ਮਂ ਦੇਸੇਤਿ, ਸਾ ਸਾਧੁਕਾਰਂ ਦਤ੍ਵਾ ਧਮ੍ਮਂ ਸੁਣਾਤਿ. ਮਿਗੋ ਧਮ੍ਮਕਥਾਯ ਅਨਿਟ੍ਠਿਤਾਯ ਏਵ ਉਟ੍ਠਾਯ ਗਚ੍ਛਤਿ, ਸਾ ‘‘ਮਿਗਂ ਗਣ੍ਹਥ ਗਣ੍ਹਥਾ’’ਤਿ ਵਦਨ੍ਤੀਯੇਵ ਪਬੁਜ੍ਝਿ. ਪਰਿਚਾਰਿਕਾਯੋ ਤਸ੍ਸਾ ਸਦ੍ਦਂ ਸੁਤ੍ਵਾ ‘‘ਪਿਹਿਤਦ੍ਵਾਰਵਾਤਪਾਨਂ ਗੇਹਂ ਵਾਤਸ੍ਸਪਿ ਓਕਾਸੋ ਨਤ੍ਥਿ, ਅਯ੍ਯਾ, ਇਮਾਯ ਵੇਲਾਯ ਮਿਗਂ ਗਣ੍ਹਾਪੇਤੀ’’ਤਿ ਅਵਹਸਿਂਸੁ. ਸਾ ਤਸ੍ਮਿਂ ਖਣੇ ‘‘ਸੁਪਿਨੋ ਅਯ’’ਨ੍ਤਿ ਞਤ੍ਵਾ ਚਿਨ੍ਤੇਸਿ ‘‘ਸੁਪਿਨੋਤਿ ਵੁਤ੍ਤੇ ਰਾਜਾ ਅਨਾਦਰੋ ਭਵਿਸ੍ਸਤਿ, ‘ਦੋਹਲ਼ੋ ਉਪ੍ਪਨ੍ਨੋ’ਤਿ ਵੁਤ੍ਤੇ ਪਨ ਆਦਰੇਨ ਪਰਿਯੇਸਿਸ੍ਸਤਿ, ਸੁਵਣ੍ਣਵਣ੍ਣਸ੍ਸ ਮਿਗਸ੍ਸ ਧਮ੍ਮਕਥਂ ਸੁਣਿਸ੍ਸਾਮੀ’’ਤਿ. ਸਾ ਗਿਲਾਨਾਲਯਂ ਕਤ੍ਵਾ ਨਿਪਜ੍ਜਿ. ਰਾਜਾ ਆਗਨ੍ਤ੍ਵਾ ‘‘ਭਦ੍ਦੇ, ਕਿਂ ਤੇ ਅਫਾਸੁਕ’’ਨ੍ਤਿ ਪੁਚ੍ਛਿ. ‘‘ਦੇਵ, ਅਞ੍ਞਂ ਨਤ੍ਥਿ, ਦੋਹਲ਼ੋ ਪਨ ਮੇ ਉਪ੍ਪਨ੍ਨੋ’’ਤਿ. ‘‘ਕਿਂ ਇਚ੍ਛਸਿ ਦੇਵੀ’’ਤਿ? ‘‘ਸੁਵਣ੍ਣਵਣ੍ਣਸ੍ਸ ਧਮ੍ਮਿਕਮਿਗਸ੍ਸ ਧਮ੍ਮਂ ਸੋਤੁਕਾਮਾ ਦੇਵਾ’’ਤਿ. ‘‘ਭਦ੍ਦੇ, ਯਂ ਨਤ੍ਥਿ, ਤਤ੍ਥ ਤੇ ਦੋਹਲ਼ੋ ਉਪ੍ਪਨ੍ਨੋ, ਸੁਵਣ੍ਣਵਣ੍ਣੋ ਨਾਮ ਮਿਗੋਯੇਵ ਨਤ੍ਥੀ’’ਤਿ. ਸੋ ‘‘ਸਚੇ ਨ ਲਭਾਮਿ, ਇਧੇਵ ਮੇ ਮਰਣ’’ਨ੍ਤਿ ਰਞ੍ਞੋ ਪਿਟ੍ਠਿਂ ਦਤ੍ਵਾ ਨਿਪਜ੍ਜਿ.

ਰਾਜਾ ‘‘ਸਚੇ ਅਤ੍ਥਿ, ਲਭਿਸ੍ਸਸੀ’’ਤਿ ਪਰਿਸਮਜ੍ਝੇ ਨਿਸੀਦਿਤ੍ਵਾ ਮੋਰਜਾਤਕੇ (ਜਾ. ੧.੨.੧੭ ਆਦਯੋ) ਵੁਤ੍ਤਨਯੇਨੇਵ ਅਮਚ੍ਚੇ ਚ ਬ੍ਰਾਹ੍ਮਣੇ ਚ ਪੁਚ੍ਛਿਤ੍ਵਾ ‘‘ਸੁਵਣ੍ਣਵਣ੍ਣਾ ਮਿਗਾ ਨਾਮ ਹੋਨ੍ਤੀ’’ਤਿ ਸੁਤ੍ਵਾ ਲੁਦ੍ਦਕੇ ਸਨ੍ਨਿਪਾਤੇਤ੍ਵਾ ‘‘ਏਵਰੂਪੋ ਮਿਗੋ ਕੇਨ ਦਿਟ੍ਠੋ, ਕੇਨ ਸੁਤੋ’’ਤਿ ਪੁਚ੍ਛਿਤ੍ਵਾ ਤੇਨ ਨੇਸਾਦਪੁਤ੍ਤੇਨ ਪਿਤੁ ਸਨ੍ਤਿਕਾ ਸੁਤਨਿਯਾਮੇਨ ਕਥਿਤੇ ‘‘ਸਮ੍ਮ, ਤਸ੍ਸ ਤੇ ਮਿਗਸ੍ਸ ਆਨੀਤਕਾਲੇ ਮਹਨ੍ਤਂ ਸਕ੍ਕਾਰਂ ਕਰਿਸ੍ਸਾਮਿ, ਗਚ੍ਛ ਆਨੇਹਿ ਨ’’ਨ੍ਤਿ ਵਤ੍ਵਾ ਪਰਿਬ੍ਬਯਂ ਦਤ੍ਵਾ ਤਂ ਪੇਸੇਸਿ. ਸੋਪਿ ‘‘ਸਚਾਹਂ, ਦੇਵ, ਤਂ ਆਨੇਤੁਂ ਨ ਸਕ੍ਖਿਸ੍ਸਾਮਿ, ਚਮ੍ਮਮਸ੍ਸ ਆਨੇਸ੍ਸਾਮਿ, ਤਂ ਆਨੇਤੁਂ ਅਸਕ੍ਕੋਨ੍ਤੋ ਲੋਮਾਨਿਪਿਸ੍ਸ ਆਨੇਸ੍ਸਾਮਿ, ਤੁਮ੍ਹੇ ਮਾ ਚਿਨ੍ਤਯਿਤ੍ਥਾ’’ਤਿ ਵਤ੍ਵਾ ਅਤ੍ਤਨੋ ਨਿਵੇਸਨਂ ਗਨ੍ਤ੍ਵਾ ਪੁਤ੍ਤਦਾਰਸ੍ਸ ਪਰਿਬ੍ਬਯਂ ਦਤ੍ਵਾ ਤਤ੍ਥ ਗਨ੍ਤ੍ਵਾ ਤਂ ਮਿਗਰਾਜਾਨਂ ਦਿਸ੍ਵਾ ‘‘ਕਸ੍ਮਿਂ ਨੁ ਖੋ ਠਾਨੇ ਪਾਸਂ ਓਡ੍ਡੇਤ੍ਵਾ ਇਮਂ ਮਿਗਰਾਜਾਨਂ ਗਣ੍ਹਿਤੁਂ ਸਕ੍ਖਿਸ੍ਸਾਮੀ’’ਤਿ ਵੀਮਂਸਨ੍ਤੋ ਪਾਨੀਯਤਿਤ੍ਥੇ ਓਕਾਸਂ ਪਸ੍ਸਿ. ਸੋ ਦਲ਼੍ਹਂ ਚਮ੍ਮਯੋਤ੍ਤਂ ਵਟ੍ਟੇਤ੍ਵਾ ਮਹਾਸਤ੍ਤਸ੍ਸ ਪਾਨੀਯਪਿਵਨਟ੍ਠਾਨੇ ਯਟ੍ਠਿਪਾਸਂ ਓਡ੍ਡੇਸਿ.

ਪੁਨਦਿਵਸੇ ਮਹਾਸਤ੍ਤੋ ਅਸੀਤਿਯਾ ਮਿਗਸਹਸ੍ਸੇਹਿ ਸਦ੍ਧਿਂ ਗੋਚਰਂ ਚਰਿਤ੍ਵਾ ‘‘ਪਕਤਿਤਿਤ੍ਥੇਯੇਵ ਪਾਨੀਯਂ ਪਿਵਿਸ੍ਸਾਮੀ’’ਤਿ ਤਤ੍ਥ ਗਨ੍ਤ੍ਵਾ ਓਤਰਨ੍ਤੋਯੇਵ ਪਾਸੇ ਬਜ੍ਝਿ. ਸੋ ‘‘ਸਚਾਹਂ ਇਦਾਨੇਵ ਬਦ੍ਧਰਵਂ ਰਵਿਸ੍ਸਾਮਿ, ਞਾਤਿਗਣਾ ਪਾਨੀਯਂ ਅਪਿਵਿਤ੍ਵਾਵ ਭੀਤਾ ਪਲਾਯਿਸ੍ਸਨ੍ਤੀ’’ਤਿ ਚਿਨ੍ਤੇਤ੍ਵਾ ਯਟ੍ਠਿਯਂ ਅਲ੍ਲੀਯਿਤ੍ਵਾ ਅਤ੍ਤਨੋ ਵਸੇ ਵਤ੍ਤੇਤ੍ਵਾ ਪਾਨੀਯਂ ਪਿਵਨ੍ਤੋ ਵਿਯ ਅਹੋਸਿ. ਅਥ ਅਸੀਤਿਯਾ ਮਿਗਸਹਸ੍ਸਾਨਂ ਪਾਨੀਯਂ ਪਿਵਿਤ੍ਵਾ ਉਤ੍ਤਰਿਤ੍ਵਾ ਠਿਤਕਾਲੇ ‘‘ਪਾਸਂ ਛਿਨ੍ਦਿਸ੍ਸਾਮੀ’’ਤਿ ਤਿਕ੍ਖਤ੍ਤੁਂ ਆਕਡ੍ਢਿ. ਪਠਮਵਾਰੇ ਚਮ੍ਮਂ ਛਿਜ੍ਜਿ, ਦੁਤਿਯਵਾਰੇ ਮਂਸਂ ਛਿਜ੍ਜਿ, ਤਤਿਯਵਾਰੇ ਨ੍ਹਾਰੁਂ ਛਿਨ੍ਦਿਤ੍ਵਾ ਪਾਸੋ ਅਟ੍ਠਿਂ ਆਹਚ੍ਚ ਅਟ੍ਠਾਸਿ. ਸੋ ਛਿਨ੍ਦਿਤੁਂ ਅਸਕ੍ਕੋਨ੍ਤੋ ਬਦ੍ਧਰਵਂ ਰਵਿ, ਮਿਗਗਣਾ ਭਾਯਿਤ੍ਵਾ ਤੀਹਿ ਘਟਾਹਿ ਪਲਾਯਿਂਸੁ. ਚਿਤ੍ਤਮਿਗੋ ਤਿਣ੍ਣਮ੍ਪਿ ਘਟਾਨਂ ਅਨ੍ਤਰੇ ਮਹਾਸਤ੍ਤਂ ਅਦਿਸ੍ਵਾ ‘‘ਇਦਂ ਭਯਂ ਉਪ੍ਪਜ੍ਜਮਾਨਂ ਮਮ ਭਾਤੁ ਉਪ੍ਪਨ੍ਨਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਬਦ੍ਧਂ ਪਸ੍ਸਿ. ਅਥ ਨਂ ਮਹਾਸਤ੍ਤੋ ਦਿਸ੍ਵਾ ‘‘ਭਾਤਿਕ, ਮਾ ਇਧ ਤਿਟ੍ਠ, ਸਾਸਙ੍ਕਂ ਇਦਂ ਠਾਨ’’ਨ੍ਤਿ ਵਤ੍ਵਾ ਉਯ੍ਯੋਜੇਨ੍ਤੋ ਪਠਮਂ ਗਾਥਮਾਹ –

੧੦੪.

‘‘ਏਤੇ ਯੂਥਾ ਪਤਿਯਨ੍ਤਿ, ਭੀਤਾ ਮਰਣਸ੍ਸ ਚਿਤ੍ਤਕ;

ਗਚ੍ਛ ਤੁਵਮ੍ਪਿ ਮਾਕਙ੍ਖਿ, ਜੀਵਿਸ੍ਸਨ੍ਤਿ ਤਯਾ ਸਹਾ’’ਤਿ.

ਤਤ੍ਥ ਏਤੇਤਿ ਚਕ੍ਖੁਪਥਂ ਅਤਿਕ੍ਕਮਿਤ੍ਵਾ ਦੂਰਗਤੇ ਸਨ੍ਧਾਯਾਹ. ਪਤਿਯਨ੍ਤੀਤਿ ਪਤਿਗਚ੍ਛਨ੍ਤਿ, ਪਲਾਯਨ੍ਤੀਤਿ ਅਤ੍ਥੋ. ਚਿਤ੍ਤਕਾਤਿ ਤਂ ਆਲਪਤਿ. ਤਯਾ ਸਹਾਤਿ ਤ੍ਵਂ ਏਤੇਸਂ ਮਮ ਠਾਨੇ ਠਤ੍ਵਾ ਰਾਜਾ ਹੋਹਿ, ਏਤੇ ਤਯਾ ਸਦ੍ਧਿਂ ਜੀਵਿਸ੍ਸਨ੍ਤੀਤਿ.

ਤਤੋ ਉਭਿਨ੍ਨਮ੍ਪਿ ਤਿਸ੍ਸੋ ਏਕਨ੍ਤਰਿਕਗਾਥਾਯੋ ਹੋਨ੍ਤਿ –

੧੦੫.

‘‘ਨਾਹਂ ਰੋਹਣ ਗਚ੍ਛਾਮਿ, ਹਦਯਂ ਮੇ ਅਵਕਸ੍ਸਤਿ;

ਨ ਤਂ ਅਹਂ ਜਹਿਸ੍ਸਾਮਿ, ਇਧ ਹਿਸ੍ਸਾਮਿ ਜੀਵਿਤਂ.

੧੦੬.

‘‘ਤੇ ਹਿ ਨੂਨ ਮਰਿਸ੍ਸਨ੍ਤਿ, ਅਨ੍ਧਾ ਅਪਰਿਣਾਯਕਾ;

ਗਚ੍ਛ ਤੁਵਮ੍ਪਿ ਮਾਕਙ੍ਖਿ, ਜੀਵਿਸ੍ਸਨ੍ਤਿ ਤਯਾ ਸਹ.

੧੦੭.

‘‘ਨਾਹਂ ਰੋਹਣ ਗਚ੍ਛਾਮਿ, ਹਦਯਂ ਮੇ ਅਵਕਸ੍ਸਤਿ;

ਨ ਤਂ ਬਦ੍ਧਂ ਜਹਿਸ੍ਸਾਮਿ, ਇਧ ਹਿਸ੍ਸਾਮਿ ਜੀਵਿਤ’’ਨ੍ਤਿ.

ਤਤ੍ਥ ਰੋਹਣਾਤਿ ਮਹਾਸਤ੍ਤਂ ਨਾਮੇਨਾਲਪਤਿ. ਅਵਕਸ੍ਸਤੀਤਿ ਕਡ੍ਢਯਤਿ, ਸੋਕੇਨ ਵਾ ਕਡ੍ਢੀਯਤਿ. ਤੇ ਹਿ ਨੂਨਾਤਿ ਤੇ ਅਮ੍ਹਾਕਂ ਮਾਤਾਪਿਤਰੋ ਏਕਂਸੇਨੇਵ ਦ੍ਵੀਸੁਪਿ ਅਮ੍ਹੇਸੁ ਇਧ ਮਤੇਸੁ ਅਪਰਿਣਾਯਕਾ ਹੁਤ੍ਵਾ ਅਪ੍ਪਟਿਜਗ੍ਗਿਯਮਾਨਾ ਸੁਸ੍ਸਿਤ੍ਵਾ ਮਰਿਸ੍ਸਨ੍ਤਿ, ਤਸ੍ਮਾ ਭਾਤਿਕ ਚਿਤ੍ਤਕ, ਗਚ੍ਛ ਤੁਵਂ, ਤਯਾ ਸਹ ਤੇ ਜੀਵਿਸ੍ਸਨ੍ਤੀਤਿ ਅਤ੍ਥੋ. ਇਧ ਹਿਸ੍ਸਾਮੀਤਿ ਇਮਸ੍ਮਿਂਯੇਵ ਠਾਨੇ ਜੀਵਿਤਂ ਜਹਿਸ੍ਸਾਮੀਤਿ.

ਇਤਿ ਵਤ੍ਵਾ ਬੋਧਿਸਤ੍ਤਸ੍ਸ ਦਕ੍ਖਿਣਪਸ੍ਸਂ ਨਿਸ੍ਸਾਯ ਤਂ ਸਨ੍ਧਾਰੇਤ੍ਵਾ ਅਸ੍ਸਾਸੇਨ੍ਤੋ ਅਟ੍ਠਾਸਿ. ਸੁਤਨਾਪਿ ਮਿਗਪੋਤਿਕਾ ਪਲਾਯਿਤ੍ਵਾ ਮਿਗਾਨਂ ਅਨ੍ਤਰੇ ਉਭੋ ਭਾਤਿਕੇ ਅਪਸ੍ਸਨ੍ਤੀ ‘‘ਇਦਂ ਭਯਂ ਮਮ ਭਾਤਿਕਾਨਂ ਉਪ੍ਪਨ੍ਨਂ ਭਵਿਸ੍ਸਤੀ’’ਤਿ ਨਿਵਤ੍ਤਿਤ੍ਵਾ ਤੇਸਂ ਸਨ੍ਤਿਕਂ ਆਗਤਾ. ਨਂ ਆਗਚ੍ਛਨ੍ਤਿਂ ਦਿਸ੍ਵਾ ਮਹਾਸਤ੍ਤੋ ਪਞ੍ਚਮਂ ਗਾਥਮਾਹ –

੧੦੮.

‘‘ਗਚ੍ਛ ਭੀਰੁ ਪਲਾਯਸ੍ਸੁ, ਕੂਟੇ ਬਦ੍ਧੋਸ੍ਮਿ ਆਯਸੇ;

ਗਚ੍ਛ ਤੁਵਮ੍ਪਿ ਮਾਕਙ੍ਖਿ, ਜੀਵਿਸ੍ਸਨ੍ਤਿ ਤਯਾ ਸਹਾ’’ਤਿ.

ਤਤ੍ਥ ਭੀਰੂਤਿ ਮਾਤੁਗਾਮੋ ਨਾਮ ਅਪ੍ਪਮਤ੍ਤਕੇਨਪਿ ਭਾਯਤਿ, ਤੇਨ ਨਂ ਏਵਂ ਆਲਪਤਿ. ਕੂਟੇਤਿ ਪਟਿਚ੍ਛਨ੍ਨਪਾਸੇ. ਆਯਸੇਤਿ ਸੋ ਹਿ ਅਨ੍ਤੋਉਦਕੇ ਅਯਕ੍ਖਨ੍ਧਂ ਕੋਟ੍ਟੇਤ੍ਵਾ ਤਤ੍ਥ ਸਾਰਦਾਰੁਂ ਯਟ੍ਠਿਂ ਬਨ੍ਧਿਤ੍ਵਾ ਓਡ੍ਡਿਤੋ, ਤਸ੍ਮਾ ਏਵਮਾਹ. ਤਯਾ ਸਹਾਤਿ ਤੇ ਅਸੀਤਿਸਹਸ੍ਸਾ ਮਿਗਾ ਤਯਾ ਸਦ੍ਧਿਂ ਜੀਵਿਸ੍ਸਨ੍ਤੀਤਿ.

ਤਤੋ ਪਰਂ ਪੁਰਿਮਨਯੇਨੇਵ ਤਿਸ੍ਸੋ ਗਾਥਾ ਹੋਨ੍ਤਿ –

੧੦੯.

‘‘ਨਾਹਂ ਰੋਹਣ ਗਚ੍ਛਾਮਿ, ਹਦਯਂ ਮੇ ਅਵਕਸ੍ਸਤਿ;

ਨ ਤਂ ਅਹਂ ਜਹਿਸ੍ਸਾਮਿ, ਇਧ ਹਿਸ੍ਸਾਮਿ ਜੀਵਿਤਂ.

੧੧੦.

‘‘ਤੇ ਹਿ ਨੂਨ ਮਰਿਸ੍ਸਨ੍ਤਿ, ਅਨ੍ਧਾ ਅਪਰਿਣਾਯਕਾ;

ਗਚ੍ਛ ਤੁਵਮ੍ਪਿ ਮਾਕਙ੍ਖਿ, ਜੀਵਿਸ੍ਸਨ੍ਤਿ ਤਯਾ ਸਹ.

੧੧੧.

‘‘ਨਾਹਂ ਰੋਹਣ ਗਚ੍ਛਾਮਿ, ਹਦਯਂ ਮੇ ਅਵਕਸ੍ਸਤਿ;

ਨ ਤਂ ਬਦ੍ਧਂ ਜਹਿਸ੍ਸਾਮਿ, ਇਧ ਹਿਸ੍ਸਾਮਿ ਜੀਵਿਤ’’ਨ੍ਤਿ.

ਤਤ੍ਥ ਤੇ ਹਿ ਨੂਨਾਤਿ ਇਧਾਪਿ ਮਾਤਾਪਿਤਰੋਯੇਵ ਸਨ੍ਧਾਯਾਹ.

ਸਾਪਿ ਤਥੇਵ ਪਟਿਕ੍ਖਿਪਿਤ੍ਵਾ ਮਹਾਸਤ੍ਤਸ੍ਸ ਵਾਮਪਸ੍ਸਂ ਨਿਸ੍ਸਾਯ ਅਸ੍ਸਾਸਯਮਾਨਾ ਅਟ੍ਠਾਸਿ. ਲੁਦ੍ਦੋਪਿ ਤੇ ਮਿਗੇ ਪਲਾਯਨ੍ਤੇ ਦਿਸ੍ਵਾ ਬਦ੍ਧਰਵਞ੍ਚ ਸੁਤ੍ਵਾ ‘‘ਬਦ੍ਧੋ ਭਵਿਸ੍ਸਤਿ ਮਿਗਰਾਜਾ’’ਤਿ ਦਲ਼੍ਹਂ ਕਚ੍ਛਂ ਬਨ੍ਧਿਤ੍ਵਾ ਮਿਗਮਾਰਣਸਤ੍ਤਿਂ ਆਦਾਯ ਵੇਗੇਨਾਗਚ੍ਛਿ. ਮਹਾਸਤ੍ਤੋ ਤਂ ਆਗਚ੍ਛਨ੍ਤਂ ਦਿਸ੍ਵਾ ਨਵਮਂ ਗਾਥਮਾਹ –

੧੧੨.

‘‘ਅਯਂ ਸੋ ਲੁਦ੍ਦਕੋ ਏਤਿ, ਲੁਦ੍ਦਰੂਪੋ ਸਹਾਵੁਧੋ;

ਯੋ ਨੋ ਵਧਿਸ੍ਸਤਿ ਅਜ੍ਜ, ਉਸੁਨਾ ਸਤ੍ਤਿਯਾ ਅਪੀ’’ਤਿ.

ਤਤ੍ਥ ਲੁਦ੍ਦਰੂਪੋਤਿ ਦਾਰੁਣਜਾਤਿਕੋ. ਸਤ੍ਤਿਯਾ ਅਪੀਤਿ ਸਤ੍ਤਿਯਾਪਿ ਨੋ ਪਹਰਿਤ੍ਵਾ ਵਧਿਸ੍ਸਤਿ, ਤਸ੍ਮਾ ਯਾਵ ਸੋ ਨਾਗਚ੍ਛਤਿ, ਤਾਵ ਪਲਾਯਥਾਤਿ.

ਤਂ ਦਿਸ੍ਵਾਪਿ ਚਿਤ੍ਤਮਿਗੋ ਨ ਪਲਾਯਿ. ਸੁਤਨਾ ਪਨ ਸਕਭਾਵੇਨ ਸਣ੍ਠਾਤੁਂ ਅਸਕ੍ਕੋਨ੍ਤੀ ਮਰਣਭਯਭੀਤਾ ਥੋਕਂ ਪਲਾਯਿਤ੍ਵਾ – ‘‘ਅਹਂ ਦ੍ਵੇ ਭਾਤਿਕੇ ਪਹਾਯ ਕੁਹਿਂ ਪਲਾਯਿਸ੍ਸਾਮੀ’’ਤਿ ਅਤ੍ਤਨੋ ਜੀਵਿਤਂ ਜਹਿਤ੍ਵਾ ਨਲਾਟੇਨ ਮਚ੍ਚੁਂ ਆਦਾਯ ਪੁਨਾਗਨ੍ਤ੍ਵਾ ਭਾਤੁ ਵਾਮਪਸ੍ਸੇ ਅਟ੍ਠਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਦਸਮਂ ਗਾਥਮਾਹ –

੧੧੩.

‘‘ਸਾ ਮੁਹੁਤ੍ਤਂ ਪਲਾਯਿਤ੍ਵਾ, ਭਯਟ੍ਟਾ ਭਯਤਜ੍ਜਿਤਾ;

ਸੁਦੁਕ੍ਕਰਂ ਅਕਰਾ ਭੀਰੁ, ਮਰਣਾਯੂਪਨਿਵਤ੍ਤਥਾ’’ਤਿ.

ਤਤ੍ਥ ਮਰਣਾਯੂਪਨਿਵਤ੍ਤਥਾਤਿ ਮਰਣਤ੍ਥਾਯ ਉਪਨਿਵਤ੍ਤਿ.

ਲੁਦ੍ਦੋਪਿ ਆਗਨ੍ਤ੍ਵਾ ਤੇ ਤਯੋ ਜਨੇ ਏਕਤੋ ਠਿਤੇ ਦਿਸ੍ਵਾ ਮੇਤ੍ਤਚਿਤ੍ਤਂ ਉਪ੍ਪਾਦੇਤ੍ਵਾ ਏਕਕੁਚ੍ਛਿਯਂ ਨਿਬ੍ਬਤ੍ਤਭਾਤਰੋ ਵਿਯ ਤੇ ਮਞ੍ਞਮਾਨੋ ਚਿਨ੍ਤੇਸਿ ‘‘ਮਿਗਰਾਜਾ, ਤਾਵ ਪਾਸੇ ਬਦ੍ਧੋ, ਇਮੇ ਪਨ ਦ੍ਵੇ ਜਨਾ ਹਿਰੋਤ੍ਤਪ੍ਪਬਨ੍ਧਨੇਨ ਬਦ੍ਧਾ, ਕਿਂ ਨੁ ਖੋ ਇਮੇ ਏਤਸ੍ਸ ਹੋਨ੍ਤੀ’’ਤਿ? ਅਥ ਨਂ ਪੁਚ੍ਛਨ੍ਤੋ ਗਾਥਮਾਹ –

੧੧੪.

‘‘ਕਿਂ ਨੁ ਤੇਮੇ ਮਿਗਾ ਹੋਨ੍ਤਿ, ਮੁਤ੍ਤਾ ਬਦ੍ਧਂ ਉਪਾਸਰੇ;

ਨ ਤਂ ਚਜਿਤੁਮਿਚ੍ਛਨ੍ਤਿ, ਜੀਵਿਤਸ੍ਸਪਿ ਕਾਰਣਾ’’ਤਿ.

ਤਤ੍ਥ ਕਿਂ ਨੁ ਤੇਮੇਤਿ ਕਿਂ ਨੁ ਤੇ ਇਮੇ. ਉਪਾਸਰੇਤਿ ਉਪਾਸਨ੍ਤਿ.

ਅਥਸ੍ਸ ਬੋਧਿਸਤ੍ਤੋ ਆਚਿਕ੍ਖਿ –

੧੧੫.

‘‘ਭਾਤਰੋ ਹੋਨ੍ਤਿ ਮੇ ਲੁਦ੍ਦ, ਸੋਦਰਿਯਾ ਏਕਮਾਤੁਕਾ;

ਨ ਮਂ ਚਜਿਤੁਮਿਚ੍ਛਨ੍ਤਿ, ਜੀਵਿਤਸ੍ਸਪਿ ਕਾਰਣਾ’’ਤਿ.

ਸੋ ਤਸ੍ਸ ਵਚਨਂ ਸੁਤ੍ਵਾ ਭਿਯ੍ਯੋਸੋਮਤ੍ਤਾਯ ਮੁਦੁਚਿਤ੍ਤੋ ਅਹੋਸਿ. ਚਿਤ੍ਤਮਿਗਰਾਜਾ ਤਸ੍ਸ ਮੁਦੁਚਿਤ੍ਤਭਾਵਂ ਞਤ੍ਵਾ ‘‘ਸਮ੍ਮ ਲੁਦ੍ਦਕ, ਮਾ ਤ੍ਵਂ ਏਤਂ ਮਿਗਰਾਜਾਨਂ ‘ਮਿਗਮਤ੍ਤੋਯੇਵਾ’ਤਿ ਮਞ੍ਞਿਤ੍ਥ, ਅਯਞ੍ਹਿ ਅਸੀਤਿਯਾ ਮਿਗਸਹਸ੍ਸਾਨਂ ਰਾਜਾ ਸੀਲਾਚਾਰਸਮ੍ਪਨ੍ਨੋ ਸਬ੍ਬਸਤ੍ਤੇਸੁ ਮੁਦੁਚਿਤ੍ਤੋ ਮਹਾਪਞ੍ਞੋ ਅਨ੍ਧੇ ਜਿਣ੍ਣੇ ਮਾਤਾਪਿਤਰੋ ਪੋਸੇਤਿ. ਸਚੇ ਤ੍ਵਂ ਏਵਰੂਪਂ ਧਮ੍ਮਿਕਂ ਮਿਗਂ ਮਾਰੇਸਿ, ਏਤਂ ਮਾਰੇਨ੍ਤੋ ਮਾਤਾਪਿਤਰੋ ਚ ਨੋ ਮਞ੍ਚ ਭਗਿਨਿਞ੍ਚ ਮੇਤਿ ਅਮ੍ਹੇ ਪਞ੍ਚਪਿ ਜਨੇ ਮਾਰੇਸਿਯੇਵ. ਮਯ੍ਹਂ ਪਨ ਭਾਤੁ ਜੀਵਿਤਂ ਦੇਨ੍ਤੋ ਪਞ੍ਚਨ੍ਨਮ੍ਪਿ ਜਨਾਨਂ ਜੀਵਿਤਦਾਯਕੋਸੀ’’ਤਿ ਵਤ੍ਵਾ ਗਾਥਮਾਹ –

੧੧੬.

‘‘ਤੇ ਹਿ ਨੂਨ ਮਰਿਸ੍ਸਨ੍ਤਿ, ਅਨ੍ਧਾ ਅਪਰਿਣਾਯਕਾ;

ਪਞ੍ਚਨ੍ਨਂ ਜੀਵਿਤਂ ਦੇਹਿ, ਭਾਤਰਂ ਮੁਞ੍ਚ ਲੁਦ੍ਦਕਾ’’ਤਿ.

ਸੋ ਤਸ੍ਸ ਧਮ੍ਮਕਥਂ ਸੁਤ੍ਵਾ ਪਸਨ੍ਨਚਿਤ੍ਤੋ ‘‘ਮਾ ਭਾਯਿ ਸਾਮੀ’’ਤਿ ਵਤ੍ਵਾ ਅਨਨ੍ਤਰਂ ਗਾਥਮਾਹ –

੧੧੭.

‘‘ਸੋ ਵੋ ਅਹਂ ਪਮੋਕ੍ਖਾਮਿ, ਮਾਤਾਪੇਤ੍ਤਿਭਰਂ ਮਿਗਂ;

ਨਨ੍ਦਨ੍ਤੁ ਮਾਤਾਪਿਤਰੋ, ਮੁਤ੍ਤਂ ਦਿਸ੍ਵਾ ਮਹਾਮਿਗ’’ਨ੍ਤਿ.

ਤਤ੍ਥ ਵੋਤਿ ਨਿਪਾਤਮਤ੍ਤਂ. ਮੁਤ੍ਤਨ੍ਤਿ ਬਨ੍ਧਨਾ ਮੁਤ੍ਤਂ ਪਸ੍ਸਿਤ੍ਵਾ.

ਏਵਞ੍ਚ ਪਨ ਵਤ੍ਵਾ ਚਿਨ੍ਤੇਸਿ ‘‘ਰਞ੍ਞਾ ਦਿਨ੍ਨਯਸੋ ਮਯ੍ਹਂ ਕਿਂ ਕਰਿਸ੍ਸਤਿ, ਸਚਾਹਂ ਇਮਂ ਮਿਗਰਾਜਾਨਂ ਵਧਿਸ੍ਸਾਮਿ, ਅਯਂ ਵਾ ਮੇ ਪਥਵੀ ਭਿਜ੍ਜਿਤ੍ਵਾ ਵਿਵਰਂ ਦਸ੍ਸਤਿ, ਅਸਨਿ ਵਾ ਮੇ ਮਤ੍ਥਕੇ ਪਤਿਸ੍ਸਤਿ, ਵਿਸ੍ਸਜ੍ਜੇਸ੍ਸਾਮਿ ਨ’’ਨ੍ਤਿ. ਸੋ ਮਹਾਸਤ੍ਤਂ ਉਪਸਙ੍ਕਮਿਤ੍ਵਾ ਯਟ੍ਠਿਂ ਪਾਤੇਤ੍ਵਾ ਚਮ੍ਮਯੋਤ੍ਤਂ ਛਿਨ੍ਦਿਤ੍ਵਾ ਮਿਗਰਾਜਾਨਂ ਆਲਿਙ੍ਗਿਤ੍ਵਾ ਉਦਕਪਰਿਯਨ੍ਤੇ ਨਿਪਜ੍ਜਾਪੇਤ੍ਵਾ ਮੁਦੁਚਿਤ੍ਤੇਨ ਸਣਿਕਂ ਪਾਸਾ ਮੋਚੇਤ੍ਵਾ ਨ੍ਹਾਰੂਹਿ ਨ੍ਹਾਰੁਂ, ਮਂਸੇਨ ਮਂਸਂ, ਚਮ੍ਮੇਨ ਚਮ੍ਮਂ ਸਮੋਧਾਨੇਤ੍ਵਾ ਉਦਕੇਨ ਲੋਹਿਤਂ ਧੋਵਿਤ੍ਵਾ ਮੇਤ੍ਤਚਿਤ੍ਤੇਨ ਪੁਨਪ੍ਪੁਨਂ ਪਰਿਮਜ੍ਜਿ. ਤਸ੍ਸ ਮੇਤ੍ਤਾਨੁਭਾਵੇਨੇਵ ਮਹਾਸਤ੍ਤਸ੍ਸ ਪਾਰਮਿਤਾਨੁਭਾਵੇਨ ਚ ਸਬ੍ਬਾਨਿ ਨ੍ਹਾਰੁਮਂਸਚਮ੍ਮਾਨਿ ਸਨ੍ਧੀਯਿਂਸੁ, ਪਾਦੋ ਸਞ੍ਛਨ੍ਨਛਵਿ ਸਞ੍ਛਨ੍ਨਲੋਮੋ ਅਹੋਸਿ, ਅਸੁਕਟ੍ਠਾਨੇ ਬਦ੍ਧੋ ਅਹੋਸੀਤਿਪਿ ਨ ਪਞ੍ਞਾਯਿ. ਮਹਾਸਤ੍ਤੋ ਸੁਖਪ੍ਪਤ੍ਤੋ ਹੁਤ੍ਵਾ ਅਟ੍ਠਾਸਿ. ਤਂ ਦਿਸ੍ਵਾ ਚਿਤ੍ਤਮਿਗੋ ਸੋਮਨਸ੍ਸਜਾਤੋ ਲੁਦ੍ਦਸ੍ਸ ਅਨੁਮੋਦਨਂ ਕਰੋਨ੍ਤੋ ਗਾਥਮਾਹ –

੧੧੮.

‘‘ਏਵਂ ਲੁਦ੍ਦਕ ਨਨ੍ਦਸ੍ਸੁ, ਸਹ ਸਬ੍ਬੇਹਿ ਞਾਤਿਭਿ;

ਯਥਾਹਮਜ੍ਜ ਨਨ੍ਦਾਮਿ, ਮੁਤ੍ਤਂ ਦਿਸ੍ਵਾ ਮਹਾਮਿਗ’’ਨ੍ਤਿ.

ਅਥ ਮਹਾਸਤ੍ਤੋ ‘‘ਕਿਂ ਨੁ ਖੋ ਏਸ ਲੁਦ੍ਦੋ ਮਂ ਗਣ੍ਹਨ੍ਤੋ ਅਤ੍ਤਨੋ ਕਾਮੇਨ ਗਣ੍ਹਿ, ਉਦਾਹੁ ਅਞ੍ਞਸ੍ਸ ਆਣਤ੍ਤਿਯਾ’’ਤਿ ਚਿਨ੍ਤੇਤ੍ਵਾ ਗਹਿਤਕਾਰਣਂ ਪੁਚ੍ਛਿ. ਲੁਦ੍ਦਪੁਤ੍ਤੋ ਆਹ – ‘‘ਸਾਮਿ, ਨ ਮਯ੍ਹਂ ਤੁਮ੍ਹੇਹਿ ਕਮ੍ਮਂ ਅਤ੍ਥਿ, ਰਞ੍ਞੋ ਪਨ ਅਗ੍ਗਮਹੇਸੀ ਖੇਮਾ ਨਾਮ ਤੁਮ੍ਹਾਕਂ ਧਮ੍ਮਕਥਂ ਸੋਤੁਕਾਮਾ, ਤਦਤ੍ਥਾਯ ਰਞ੍ਞੋ ਆਣਤ੍ਤਿਯਾ ਤ੍ਵਂ ਮਯਾ ਗਹਿਤੋ’’ਤਿ. ਸਮ੍ਮ, ਏਵਂ ਸਨ੍ਤੇ ਮਂ ਵਿਸ੍ਸਜ੍ਜੇਨ੍ਤੋ ਅਤਿਦੁਕ੍ਕਰਂ ਕਰੋਸਿ, ਏਹਿ ਮਂ ਨੇਤ੍ਵਾ ਰਞ੍ਞੋ ਦਸ੍ਸੇਹਿ, ਦੇਵਿਯਾ ਧਮ੍ਮਂ ਕਥੇਸ੍ਸਾਮੀਤਿ. ਸਾਮਿ, ਰਾਜਾਨੋ ਨਾਮ ਕਕ੍ਖਲ਼ਾ, ਕੋ ਜਾਨਾਤਿ, ਕਿਂ ਭਵਿਸ੍ਸਤਿ, ਮਯ੍ਹਂ ਰਞ੍ਞਾ ਦਿਨ੍ਨਯਸੇਨ ਕਮ੍ਮਂ ਨਤ੍ਥਿ, ਗਚ੍ਛ ਤ੍ਵਂ ਯਥਾਸੁਖਨ੍ਤਿ. ਪੁਨ ਮਹਾਸਤ੍ਤੋ ‘‘ਇਮਿਨਾ ਮਂ ਵਿਸ੍ਸਜ੍ਜੇਨ੍ਤੇਨ ਅਤਿਦੁਕ੍ਕਰਂ ਕਤਂ, ਯਸਪਟਿਲਾਭਸ੍ਸ ਉਪਾਯਮਸ੍ਸ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਸਮ੍ਮ, ਪਿਟ੍ਠਿਂ ਤਾਵ ਮੇ ਹਤ੍ਥੇਨ ਪਰਿਮਜ੍ਜਾ’’ਤਿ ਆਹ. ‘‘ਸੋ ਪਰਿਮਜ੍ਜਿ, ਹਤ੍ਥੋ ਸੁਵਣ੍ਣਵਣ੍ਣੇਹਿ ਲੋਮੇਹਿ ਪੂਰਿ’’. ‘‘ਸਾਮਿ, ਇਮੇਹਿ ਲੋਮੇਹਿ ਕਿਂ ਕਾਰੋਮੀ’’ਤਿ. ‘‘ਸਮ੍ਮ, ਇਮਾਨਿ ਹਰਿਤ੍ਵਾ ਰਞ੍ਞੋ ਚ ਦੇਵਿਯਾ ਚ ਦਸ੍ਸੇਤ੍ਵਾ ‘ਇਮਾਨਿ ਤਸ੍ਸ ਸੁਵਣ੍ਣਵਣ੍ਣਮਿਗਸ੍ਸ ਲੋਮਾਨੀ’ਤਿ ਵਤ੍ਵਾ ਮਮ ਠਾਨੇ ਠਤ੍ਵਾ ਇਮਾਹਿ ਗਾਥਾਹਿ ਦੇਵਿਯਾ ਧਮ੍ਮਂ ਦੇਸੇਹਿ, ਤਂ ਸੁਤ੍ਵਾਯੇਵ ਚਸ੍ਸਾ ਦੋਹਲ਼ੋ ਪਟਿਪ੍ਪਸ੍ਸਮ੍ਭਿਸ੍ਸਤੀ’’ਤਿ. ‘‘ਧਮ੍ਮਂ ਚਰ ਮਹਾਰਾਜਾ’’ਤਿ ਦਸ ਧਮ੍ਮਚਰਿਯਗਾਥਾ ਉਗ੍ਗਣ੍ਹਾਪੇਤ੍ਵਾ ਪਞ੍ਚ ਸੀਲਾਨਿ ਦਤ੍ਵਾ ਅਪ੍ਪਮਾਦੇਨ ਓਵਦਿਤ੍ਵਾ ਉਯ੍ਯੋਜੇਸਿ. ਲੁਦ੍ਦਪੁਤ੍ਤੋ ਮਹਾਸਤ੍ਤਂ ਆਚਰਿਯਟ੍ਠਾਨੇ ਠਪੇਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਚਤੂਸੁ ਠਾਨੇਸੁ ਵਨ੍ਦਿਤ੍ਵਾ ਲੋਮਾਨਿ ਪਦੁਮਿਨਿਪਤ੍ਤੇਨ ਗਹੇਤ੍ਵਾ ਪਕ੍ਕਾਮਿ. ਤੇਪਿ ਤਯੋ ਜਨਾ ਥੋਕਂ ਅਨੁਗਨ੍ਤ੍ਵਾ ਮੁਖੇਨ ਗੋਚਰਞ੍ਚ ਪਾਨੀਯਞ੍ਚ ਗਹੇਤ੍ਵਾ ਮਾਤਾਪਿਤੂਨਂ ਸਨ੍ਤਿਕਂ ਗਮਿਂਸੁ. ਮਾਤਾਪਿਤਰੋ ‘‘ਤਾਤ ਰੋਹਣ, ਤ੍ਵਂ ਕਿਰ ਪਾਸੇ ਬਦ੍ਧੋ ਕਥਂ ਮੁਤ੍ਤੋਸੀ’’ਤਿ ਪੁਚ੍ਛਨ੍ਤਾ ਗਾਥਮਾਹਂਸੁ –

੧੧੯.

‘‘ਕਥਂ ਤ੍ਵਂ ਪਮੋਕ੍ਖੋ ਆਸਿ, ਉਪਨੀਤਸ੍ਮਿ ਜੀਵਿਤੇ;

ਕਥਂ ਪੁਤ੍ਤ ਅਮੋਚੇਸਿ, ਕੂਟਪਾਸਮ੍ਹ ਲੁਦ੍ਦਕੋ’’ਤਿ.

ਤਤ੍ਥ ਉਪਨੀਤਸ੍ਮੀਤਿ ਤਵ ਜੀਵਿਤੇ ਮਰਣਸਨ੍ਤਿਕਂ ਉਪਨੀਤੇ ਕਥਂ ਪਮੋਕ੍ਖੋ ਆਸਿ.

ਤਂ ਸੁਤ੍ਵਾ ਬੋਧਿਸਤ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੧੨੦.

‘‘ਭਣਂ ਕਣ੍ਣਸੁਖਂ ਵਾਚਂ, ਹਦਯਙ੍ਗਂ ਹਦਯਸ੍ਸਿਤਂ;

ਸੁਭਾਸਿਤਾਹਿ ਵਾਚਾਹਿ, ਚਿਤ੍ਤਕੋ ਮਂ ਅਮੋਚਯਿ.

੧੨੧.

‘‘ਭਣਂ ਕਣ੍ਣਸੁਖਂ ਵਾਚਂ, ਹਦਯਙ੍ਗਂ ਹਦਯਸ੍ਸਿਤਂ;

ਸੁਭਾਸਿਤਾਹਿ ਵਾਚਾਹਿ, ਸੁਤਨਾ ਮਂ ਅਮੋਚਯਿ.

੧੨੨.

‘‘ਸੁਤ੍ਵਾ ਕਣ੍ਣਸੁਖਂ ਵਾਚਂ, ਹਦਯਙ੍ਗਂ ਹਦਯਸ੍ਸਿਤਂ;

ਸੁਭਾਸਿਤਾਨਿ ਸੁਤ੍ਵਾਨ, ਲੁਦ੍ਦਕੋ ਮਂ ਅਮੋਚਯੀ’’ਤਿ.

ਤਤ੍ਥ ਭਣਨ੍ਤਿ ਭਣਨ੍ਤੋ. ਹਦਯਙ੍ਗਨ੍ਤਿ ਹਦਯਙ੍ਗਮਂ. ਦੁਤਿਯਗਾਥਾਯ ਭਣਨ੍ਤਿ ਭਣਮਾਨਾ. ਸੁਤ੍ਵਾਤਿ ਸੋ ਇਮੇਸਂ ਉਭਿਨ੍ਨਂ ਵਾਚਂ ਸੁਤ੍ਵਾ.

ਅਥਸ੍ਸ ਮਾਤਾਪਿਤਰੋ ਅਨੁਮੋਦਨ੍ਤਾ ਆਹਂਸੁ –

੧੨੩.

‘‘ਏਵਂ ਆਨਨ੍ਦਿਤੋ ਹੋਤੁ, ਸਹ ਦਾਰੇਹਿ ਲੁਦ੍ਦਕੋ;

ਯਥਾ ਮਯਜ੍ਜ ਨਨ੍ਦਾਮ, ਦਿਸ੍ਵਾ ਰੋਹਣਮਾਗਤ’’ਨ੍ਤਿ.

ਲੁਦ੍ਦੋਪਿ ਅਰਞ੍ਞਾ ਨਿਕ੍ਖਮਿਤ੍ਵਾ ਰਾਜਕੁਲਂ ਗਨ੍ਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਤਂ ਦਿਸ੍ਵਾ ਰਾਜਾ ਗਾਥਮਾਹ –

੧੨੪.

‘‘ਨਨੁ ਤ੍ਵਂ ਅਵਚ ਲੁਦ੍ਦ, ‘ਮਿਗਚਮ੍ਮਾਨਿ ਆਹਰਿਂ’;

ਅਥ ਕੇਨ ਨੁ ਵਣ੍ਣੇਨ, ਮਿਗਚਮ੍ਮਾਨਿ ਨਾਹਰੀ’’ਤਿ.

ਤਤ੍ਥ ਮਿਗਚਮ੍ਮਾਨੀਤਿ ਮਿਗਂ ਵਾ ਚਮ੍ਮਂ ਵਾ. ਆਹਰਿਨ੍ਤਿ ਆਹਰਿਸ੍ਸਾਮਿ. ਇਦਂ ਵੁਤ੍ਤਂ ਹੋਤਿ – ਅਮ੍ਭੋ ਲੁਦ੍ਦ, ਨਨੁ ਤ੍ਵਂ ਏਵਂ ਅਵਚ ‘‘ਮਿਗਂ ਆਨੇਤੁਂ ਅਸਕ੍ਕੋਨ੍ਤੋ ਚਮ੍ਮਂ ਆਹਰਿਸ੍ਸਾਮਿ, ਤਂ ਅਸਕ੍ਕੋਨ੍ਤੋ ਲੋਮਾਨੀ’’ਤਿ, ਸੋ ਤ੍ਵਂ ਕੇਨ ਕਾਰਣੇਨ ਨੇਵ ਮਿਗਂ, ਨ ਮਿਗਚਮ੍ਮਂ ਆਹਰੀਤਿ?

ਤਂ ਸੁਤ੍ਵਾ ਲੁਦ੍ਦੋ ਗਾਥਮਾਹ –

੧੨੫.

‘‘ਆਗਮਾ ਚੇਵ ਹਤ੍ਥਤ੍ਥਂ, ਕੂਟਪਾਸਞ੍ਚ ਸੋ ਮਿਗੋ;

ਅਬਜ੍ਝਿ ਤਂ ਮਿਗਰਾਜਂ, ਤਞ੍ਚ ਮੁਤ੍ਤਾ ਉਪਾਸਰੇ.

੧੨੬.

‘‘ਤਸ੍ਸ ਮੇ ਅਹੁ ਸਂਵੇਗੋ, ਅਬ੍ਭੁਤੋ ਲੋਮਹਂਸਨੋ;

ਇਮਞ੍ਚਾਹਂ ਮਿਗਂ ਹਞ੍ਞੇ, ਅਜ੍ਜ ਹਿਸ੍ਸਾਮਿ ਜੀਵਿਤ’’ਨ੍ਤਿ.

ਤਤ੍ਥ ਆਗਮਾਤਿ ਮਹਾਰਾਜ, ਸੋ ਮਿਗੋ ਮਮ ਹਤ੍ਥਤ੍ਥਂ ਹਤ੍ਥਪਾਸਞ੍ਚੇਵ ਮਯਾ ਓਡ੍ਡਿਤਂ ਕੂਟਪਾਸਞ੍ਚ ਆਗਤੋ, ਤਸ੍ਮਿਞ੍ਚ ਕੂਟਪਾਸੇ ਅਬਜ੍ਝਿ. ਤਞ੍ਚ ਮੁਤ੍ਤਾ ਉਪਾਸਰੇਤਿ ਤਞ੍ਚ ਬਦ੍ਧਂ ਅਪਰੇ ਮੁਤ੍ਤਾ ਅਬਦ੍ਧਾਵ ਦ੍ਵੇ ਮਿਗਾ ਅਸ੍ਸਾਸੇਨ੍ਤਾ ਤਂ ਨਿਸ੍ਸਾਯ ਅਟ੍ਠਂਸੁ. ਅਬ੍ਭੁਤੋਤਿ ਪੁਬ੍ਬੇ ਅਭੂਤਪੁਬ੍ਬੋ. ਇਮਞ੍ਚਾਹਨ੍ਤਿ ਅਥ ਮੇ ਸਂਵਿਗ੍ਗਸ੍ਸ ਏਤਦਹੋਸਿ ‘‘ਸਚੇ ਅਹਂ ਇਮਂ ਮਿਗਂ ਹਨਿਸ੍ਸਾਮਿ, ਅਜ੍ਜੇਵ ਇਮਸ੍ਮਿਂਯੇਵ ਠਾਨੇ ਜੀਵਿਤਂ ਜਹਿਸ੍ਸਾਮੀ’’ਤਿ.

ਤਂ ਸੁਤ੍ਵਾ ਰਾਜਾ ਆਹ –

੧੨੭.

‘‘ਕੀਦਿਸਾ ਤੇ ਮਿਗਾ ਲੁਦ੍ਦ, ਕੀਦਿਸਾ ਧਮ੍ਮਿਕਾ ਮਿਗਾ;

ਕਥਂਵਣ੍ਣਾ ਕਥਂਸੀਲਾ, ਬਾਲ਼੍ਹਂ ਖੋ ਨੇ ਪਸਂਸਸੀ’’ਤਿ.

ਇਦਂ ਸੋ ਰਾਜਾ ਵਿਮ੍ਹਯਵਸੇਨ ਪੁਨਪ੍ਪੁਨਂ ਪੁਚ੍ਛਤਿ. ਤਂ ਸੁਤ੍ਵਾ ਲੁਦ੍ਦੋ ਗਾਥਮਾਹ –

੧੨੮.

‘‘ਓਦਾਤਸਿਙ੍ਗਾ ਸੁਚਿਵਾਲਾ, ਜਾਤਰੂਪਤਚੂਪਮਾ;

ਪਾਦਾ ਲੋਹਿਤਕਾ ਤੇਸਂ, ਅਞ੍ਜਿਤਕ੍ਖਾ ਮਨੋਰਮਾ’’ਤਿ.

ਤਤ੍ਥ ਓਦਾਤਸਿਙ੍ਗਾਤਿ ਰਜਤਦਾਮਸਦਿਸਸਿਙ੍ਗਾ. ਸੁਚਿਵਾਲਾਤਿ ਚਾਮਰਿਵਾਲਸਦਿਸੇਨ ਸੁਚਿਨਾ ਵਾਲੇਨ ਸਮਨ੍ਨਾਗਤਾ. ਲੋਹਿਤਕਾਤਿ ਰਤ੍ਤਨਖਾ ਪਵਾਲ਼ਸਦਿਸਾ. ਪਾਦਾਤਿ ਖੁਰਪਰਿਯਨ੍ਤਾ. ਅਞ੍ਜਿਤਕ੍ਖਾਤਿ ਅਞ੍ਜਿਤੇਹਿ ਵਿਯ ਵਿਸੁਦ੍ਧਪਞ੍ਚਪਸਾਦੇਹਿ ਅਕ੍ਖੀਹਿ ਸਮਨ੍ਨਾਗਤਾ.

ਇਤਿ ਸੋ ਕਥੇਨ੍ਤੋਵ ਮਹਾਸਤ੍ਤਸ੍ਸ ਸੁਵਣ੍ਣਵਣ੍ਣਾਨਿ ਲੋਮਾਨਿ ਰਞ੍ਞੋ ਹਤ੍ਥੇ ਠਪੇਤ੍ਵਾ ਤੇਸਂ ਮਿਗਾਨਂ ਸਰੀਰਵਣ੍ਣਂ ਪਕਾਸੇਨ੍ਤੋ ਗਾਥਮਾਹ –

੧੨੯.

‘‘ਏਦਿਸਾ ਤੇ ਮਿਗਾ ਦੇਵ, ਏਦਿਸਾ ਧਮ੍ਮਿਕਾ ਮਿਗਾ;

ਮਾਤਾਪੇਤ੍ਤਿਭਰਾ ਦੇਵ, ਨ ਤੇ ਸੋ ਅਭਿਹਾਰਿਤੁ’’ਨ੍ਤਿ.

ਤਤ੍ਥ ਮਾਤਾਪੇਤ੍ਤਿਭਰਾਤਿ ਜਿਣ੍ਣੇ ਅਨ੍ਧੇ ਮਾਤਾਪਿਤਰੋ ਪੋਸੇਨ੍ਤਿ, ਏਤਾਦਿਸਾ ਨੇਸਂ ਧਮ੍ਮਿਕਤਾ. ਨ ਤੇ ਸੋ ਅਭਿਹਾਰਿਤੁਨ੍ਤਿ ਸੋ ਮਿਗਰਾਜਾ ਨ ਸਕ੍ਕਾ ਕੇਨਚਿ ਤਵ ਪਣ੍ਣਾਕਾਰਤ੍ਥਾਯ ਅਭਿਹਰਿਤੁਨ੍ਤਿ ਅਤ੍ਥੋ. ‘‘ਅਭਿਹਾਰਯਿ’’ਨ੍ਤਿਪਿ ਪਾਠੋ, ਸੋ ਅਹਂ ਤਂ ਤੇ ਪਣ੍ਣਾਕਾਰਤ੍ਥਾਯ ਨਾਭਿਹਾਰਯਿਂ ਨ ਆਹਰਿਨ੍ਤਿ ਅਤ੍ਥੋ.

ਇਤਿ ਸੋ ਮਹਾਸਤ੍ਤਸ੍ਸ ਚ ਚਿਤ੍ਤਮਿਗਸ੍ਸ ਚ ਸੁਤਨਾਯ ਮਿਗਪੋਤਿਕਾਯ ਚ ਗੁਣਂ ਕਥੇਤ੍ਵਾ ‘‘ਮਹਾਰਾਜ, ਅਹਂ ਤੇਨ ਮਿਗਰਞ੍ਞਾ ‘ਅਤ੍ਤਨੋ ਲੋਮਾਨਿ ਦਸ੍ਸੇਤ੍ਵਾ ਮਮ ਠਾਨੇ ਠਤ੍ਵਾ ਦਸਹਿ ਰਾਜਧਮ੍ਮਚਰਿਯਗਾਥਾਹਿ ਦੇਵਿਯਾ ਧਮ੍ਮਂ ਕਥੇਯ੍ਯਾਸੀ’ਤਿ ਉਗ੍ਗਣ੍ਹਾਪਿਤੋ ਆਣਤ੍ਤੋ’’ਤਿ ਆਹ. ਤਂ ਸੁਤ੍ਵਾ ਰਾਜਾ ਨਂ ਨ੍ਹਾਪੇਤ੍ਵਾ ਅਹਤਵਤ੍ਥਾਨਿ ਨਿਵਾਸੇਤ੍ਵਾ ਸਤ੍ਤਰਤਨਖਚਿਤੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਸਯਂ ਦੇਵਿਯਾ ਸਦ੍ਧਿਂ ਨੀਚਾਸਨੇ ਏਕਮਨ੍ਤਂ ਨਿਸੀਦਿਤ੍ਵਾ ਤਂ ਅਞ੍ਜਲਿਂ ਪਗ੍ਗਯ੍ਹ ਯਾਚਤਿ. ਸੋ ਧਮ੍ਮਂ ਦੇਸੇਨ੍ਤੋ ਆਹ –

‘‘ਧਮ੍ਮਂ ਚਰ ਮਹਾਰਾਜ, ਮਾਤਾਪਿਤੂਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

‘‘ਧਮ੍ਮਂ ਚਰ ਮਹਾਰਾਜ, ਪੁਤ੍ਤਦਾਰੇਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

‘‘ਧਮ੍ਮਂ ਚਰ ਮਹਾਰਾਜ, ਮਿਤ੍ਤਾਮਚ੍ਚੇਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

‘‘ਧਮ੍ਮਂ ਚਰ ਮਹਾਰਾਜ, ਵਾਹਨੇਸੁ ਬਲੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

‘‘ਧਮ੍ਮਂ ਚਰ ਮਹਾਰਾਜ, ਗਾਮੇਸੁ ਨਿਗਮੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

‘‘ਧਮ੍ਮਂ ਚਰ ਮਹਾਰਾਜ, ਰਟ੍ਠੇਸੁ ਜਨਪਦੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

‘‘ਧਮ੍ਮਂ ਚਰ ਮਹਾਰਾਜ, ਸਮਣਬ੍ਰਾਹ੍ਮਣੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

‘‘ਧਮ੍ਮਂ ਚਰ ਮਹਾਰਾਜ, ਮਿਗਪਕ੍ਖੀਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

‘‘ਧਮ੍ਮਂ ਚਰ ਮਹਾਰਾਜ, ਧਮ੍ਮੋ ਚਿਣ੍ਣੋ ਸੁਖਾਵਹੋ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

‘‘ਧਮ੍ਮਂ ਚਰ ਮਹਾਰਾਜ, ਸਇਨ੍ਦਾ ਦੇਵਾ ਸਬ੍ਰਹ੍ਮਕਾ;

ਸੁਚਿਣ੍ਣੇਨ ਦਿਵਂ ਪਤ੍ਤਾ, ਮਾ ਧਮ੍ਮਂ ਰਾਜ ਪਾਮਦੋ’’ਤਿ. (ਜਾ. ੨.੧੮.੧੧੪-੧੨੩);

ਇਤਿ ਨੇਸਾਦਪੁਤ੍ਤੋ ਮਹਾਸਤ੍ਤੇਨ ਦੇਸਿਤਨਿਯਾਮੇਨ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਬੁਦ੍ਧਲੀਲਾਯ ਧਮ੍ਮਂ ਦੇਸੇਸਿ. ਮਹਾਜਨੋ ਸਾਧੁਕਾਰਸਹਸ੍ਸਾਨਿ ਪਵਤ੍ਤੇਸਿ. ਧਮ੍ਮਕਥਂ ਸੁਤ੍ਵਾਯੇਵ ਦੇਵਿਯਾ ਦੋਹਲ਼ੋ ਪਟਿਪ੍ਪਸ੍ਸਮ੍ਭਿ. ਰਾਜਾ ਤੁਸ੍ਸਿਤ੍ਵਾ ਲੁਦ੍ਦਪੁਤ੍ਤਂ ਮਹਨ੍ਤੇਨ ਯਸੇਨ ਸਨ੍ਤਪ੍ਪੇਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੧੩੦.

‘‘ਦਮ੍ਮਿ ਨਿਕ੍ਖਸਤਂ ਲੁਦ੍ਦ, ਥੂਲਞ੍ਚ ਮਣਿਕੁਣ੍ਡਲਂ;

ਚਤੁਸ੍ਸਦਞ੍ਚ ਪਲ੍ਲਙ੍ਕਂ, ਉਮਾਪੁਪ੍ਫਸਰਿਨ੍ਨਿਭਂ.

੧੩੧.

‘‘ਦ੍ਵੇ ਚ ਸਾਦਿਸਿਯੋ ਭਰਿਯਾ, ਉਸਭਞ੍ਚ ਗਵਂ ਸਤਂ;

ਧਮ੍ਮੇਨ ਰਜ੍ਜਂ ਕਾਰੇਸ੍ਸਂ, ਬਹੁਕਾਰੋ ਮੇਸਿ ਲੁਦ੍ਦਕ.

੧੩੨.

‘‘ਕਸਿਵਾਣਿਜ੍ਜਾ ਇਣਦਾਨਂ, ਉਚ੍ਛਾਚਰਿਯਾ ਚ ਲੁਦ੍ਦਕ;

ਏਤੇਨ ਦਾਰਂ ਪੋਸੇਹਿ, ਮਾ ਪਾਪਂ ਅਕਰੀ ਪੁਨਾ’’ਤਿ.

ਤਤ੍ਥ ਥੂਲਨ੍ਤਿ ਮਹਗ੍ਘਂ ਮਣਿਕੁਣ੍ਡਲਪਸਾਧਨਞ੍ਚ ਤੇ ਦਮ੍ਮਿ. ਚਤੁਸ੍ਸਦਨ੍ਤਿ ਚਤੁਰੁਸ੍ਸਦਂ, ਚਤੁਉਸ੍ਸੀਸਕਨ੍ਤਿ ਅਤ੍ਥੋ. ਉਮਾਪੁਪ੍ਫਸਰਿਨ੍ਨਿਭਨ੍ਤਿ ਨੀਲਪਚ੍ਚਤ੍ਥਰਣਤ੍ਤਾ ਉਮਾਪੁਪ੍ਫਸਦਿਸਾਯ ਨਿਭਾਯ ਓਭਾਸੇਨ ਸਮਨ੍ਨਾਗਤਂ, ਕਾਲ਼ਵਣ੍ਣਦਾਰੁਸਾਰਮਯਂ ਵਾ. ਸਾਦਿਸਿਯੋਤਿ ਅਞ੍ਞਮਞ੍ਞਂ ਰੂਪੇਨ ਚ ਭੋਗੇਨ ਚ ਸਦਿਸਾ. ਉਸਭਞ੍ਚ ਗਵਂ ਸਤਨ੍ਤਿ ਉਸਭਂ ਜੇਟ੍ਠਕਂ ਕਤ੍ਵਾ ਗਵਂ ਸਤਞ੍ਚ ਤੇ ਦਮ੍ਮਿ. ਕਾਰੇਸ੍ਸਨ੍ਤਿ ਦਸ ਰਾਜਧਮ੍ਮੇ ਅਕੋਪੇਨ੍ਤੋ ਧਮ੍ਮੇਨੇਵ ਰਜ੍ਜਂ ਕਾਰੇਸ੍ਸਾਮਿ. ਬਹੁਕਾਰੋ ਮੇਸੀਤਿ ਸੁਵਣ੍ਣਵਣ੍ਣਸ੍ਸ ਮਿਗਰਞ੍ਞੋ ਠਾਨੇ ਠਤ੍ਵਾ ਧਮ੍ਮਸ੍ਸ ਦੇਸਿਤਤ੍ਤਾ ਤ੍ਵਂ ਮਮ ਬਹੁਪਕਾਰੋ, ਮਿਗਰਾਜੇਨ ਵੁਤ੍ਤਨਿਯਾਮੇਨੇਵ ਤੇ ਅਹਂ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪਿਤੋ. ਕਸਿਵਾਣਿਜ੍ਜਾਤਿ ਸਮ੍ਮ ਲੁਦ੍ਦਕ, ਅਹਮ੍ਪਿ ਮਿਗਰਾਜਾਨਂ ਅਦਿਸ੍ਵਾ ਤਸ੍ਸ ਵਚਨਮੇਵ ਸੁਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਿਤੋ, ਤ੍ਵਮ੍ਪਿ ਇਤੋ ਪਟ੍ਠਾਯ ਸੀਲਵਾ ਹੋਹਿ, ਯਾਨਿ ਤਾਨਿ ਕਸਿਵਾਣਿਜ੍ਜਾਨਿ ਇਣਦਾਨਂ ਉਞ੍ਛਾਚਰਿਯਾਤਿ ਆਜੀਵਮੁਖਾਨਿ, ਏਤੇਨੇਵ ਸਮ੍ਮਾਆਜੀਵੇਨ ਤਵ ਪੁਤ੍ਤਦਾਰਂ ਪੋਸੇਹਿ, ਮਾ ਪੁਨ ਪਾਪਂ ਕਰੀਤਿ.

ਸੋ ਰਞ੍ਞੋ ਕਥਂ ਸੁਤ੍ਵਾ ‘‘ਨ ਮੇ ਘਰਾਵਾਸੇਨਤ੍ਥੋ, ਪਬ੍ਬਜ੍ਜਂ ਮੇ ਅਨੁਜਾਨਾਥ ਦੇਵਾ’’ਤਿ ਅਨੁਜਾਨਾਪੇਤ੍ਵਾ ਰਞ੍ਞਾ ਦਿਨ੍ਨਧਨਂ ਪੁਤ੍ਤਦਾਰਸ੍ਸ ਦਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕਪਰਾਯਣੋ ਅਹੋਸਿ. ਰਾਜਾਪਿ ਮਹਾਸਤ੍ਤਸ੍ਸ ਓਵਾਦੇ ਠਤ੍ਵਾ ਸਗ੍ਗਪੁਰਂ ਪੂਰੇਸਿ, ਤਸ੍ਸ ਓਵਾਦੋ ਵਸ੍ਸਸਹਸ੍ਸਂ ਪਵਤ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਭਿਕ੍ਖਵੇ ਪੁਬ੍ਬੇਪਿ ਮਮਤ੍ਥਾਯ ਆਨਨ੍ਦੇਨ ਜੀਵਿਤਂ ਪਰਿਚ੍ਚਤ੍ਤਮੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਲੁਦ੍ਦੋ ਛਨ੍ਨੋ ਅਹੋਸਿ, ਰਾਜਾ ਸਾਰਿਪੁਤ੍ਤੋ, ਦੇਵੀ ਖੇਮਾ ਭਿਕ੍ਖੁਨੀ, ਮਾਤਾਪਿਤਰੋ ਮਹਾਰਾਜਕੁਲਾਨਿ, ਸੁਤਨਾ ਉਪ੍ਪਲਵਣ੍ਣਾ, ਚਿਤ੍ਤਮਿਗੋ ਆਨਨ੍ਦੋ, ਅਸੀਤਿ ਮਿਗਸਹਸ੍ਸਾਨਿ ਸਾਕਿਯਗਣੋ, ਰੋਹਣੋ ਮਿਗਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਰੋਹਣਮਿਗਜਾਤਕਵਣ੍ਣਨਾ ਪਞ੍ਚਮਾ.

[੫੦੨] ੬. ਚੂਲ਼ਹਂਸਜਾਤਕਵਣ੍ਣਨਾ

ਏਤੇ ਹਂਸਾ ਪਕ੍ਕਮਨ੍ਤੀਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਆਨਨ੍ਦਥੇਰਸ੍ਸ ਜੀਵਿਤਪਰਿਚ੍ਚਾਗਮੇਵ ਆਰਬ੍ਭ ਕਥੇਸਿ. ਤਦਾਪਿ ਹਿ ਧਮ੍ਮਸਭਾਯਂ ਥੇਰਸ੍ਸ ਗੁਣਕਥਂ ਕਥੇਨ੍ਤੇਸੁ ਭਿਕ੍ਖੂਸੁ ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਆਨਨ੍ਦੇਨ ਮਮਤ੍ਥਾਯ ਜੀਵਿਤਂ ਪਰਿਚ੍ਚਤ੍ਤਮੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬਹੁਪੁਤ੍ਤਕੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਖੇਮਾ ਨਾਮਸ੍ਸ ਅਗ੍ਗਮਹੇਸੀ ਅਹੋਸਿ. ਤਦਾ ਮਹਾਸਤ੍ਤੋ ਸੁਵਣ੍ਣਹਂਸਯੋਨਿਯਂ ਨਿਬ੍ਬਤ੍ਤਿਤ੍ਵਾ ਨਵੁਤਿਹਂਸਸਹਸ੍ਸਪਰਿਵੁਤੋ ਚਿਤ੍ਤਕੂਟੇ ਵਸਿ. ਤਦਾਪਿ ਦੇਵੀ ਵੁਤ੍ਤਨਯੇਨੇਵ ਸੁਪਿਨਂ ਦਿਸ੍ਵਾ ਰਞ੍ਞੋ ਸੁਵਣ੍ਣਵਣ੍ਣਹਂਸਸ੍ਸ ਧਮ੍ਮਦੇਸਨਾਸਵਨਦੋਹਲ਼ਂ ਆਰੋਚੇਸਿ. ਰਾਜਾਪਿ ਅਮਚ੍ਚੇ ਪੁਚ੍ਛਿਤ੍ਵਾ ‘‘ਸੁਵਣ੍ਣਵਣ੍ਣਹਂਸਾ ਨਾਮ ਚਿਤ੍ਤਕੂਟਪਬ੍ਬਤੇ ਵਸਨ੍ਤੀ’’ਤਿ ਚ ਸੁਤ੍ਵਾ ਖੇਮਂ ਨਾਮ ਸਰਂ ਕਾਰੇਤ੍ਵਾ ਨਾਨਪ੍ਪਕਾਰਾਨਿ ਨਿਵਾਪਧਞ੍ਞਾਨਿ ਰੋਪਾਪੇਤ੍ਵਾ ਚਤੂਸੁ ਕਣ੍ਣੇਸੁ ਦੇਵਸਿਕਂ ਅਭਯਘੋਸਨਂ ਘੋਸਾਪੇਸਿ, ਏਕਞ੍ਚ ਲੁਦ੍ਦਪੁਤ੍ਤਂ ਹਂਸਾਨਂ ਗਹਣਤ੍ਥਾਯ ਪਯੋਜੇਸਿ. ਤਸ੍ਸ ਪਯੋਜਿਤਾਕਾਰੋ ਚ, ਤੇਨ ਤਤ੍ਥ ਸਕੁਣਾਨਂ ਉਪਪਰਿਕ੍ਖਿਤਭਾਵੋ ਚ, ਸੁਵਣ੍ਣਹਂਸਾਨਂ ਆਗਤਕਾਲੇ ਰਞ੍ਞੋ ਆਰੋਚੇਤ੍ਵਾ ਪਾਸਾਨਂ ਓਡ੍ਡਿਤਨਿਯਾਮੋ ਚ, ਮਹਾਸਤ੍ਤਸ੍ਸ ਪਾਸੇ ਬਦ੍ਧਨਿਯਾਮੋ ਚ, ਸੁਮੁਖਸ੍ਸ ਹਂਸਸੇਨਾਪਤਿਨੋ ਤੀਸੁ ਹਂਸਘਟਾਸੁ ਤਂ ਅਦਿਸ੍ਵਾ ਨਿਵਤ੍ਤਨਞ੍ਚ ਸਬ੍ਬਂ ਮਹਾਹਂਸਜਾਤਕੇ (ਜਾ. ੨.੨੧.੮੯ ਆਦਯੋ) ਆਵਿ ਭਵਿਸ੍ਸਤਿ. ਇਧਾਪਿ ਮਹਾਸਤ੍ਤੋ ਯਟ੍ਠਿਪਾਸੇ ਬਜ੍ਝਿਤ੍ਵਾ ਪਾਸਯਟ੍ਠਿਯਂ ਓਲਮ੍ਬਨ੍ਤੋਯੇਵ ਗੀਵਂ ਪਸਾਰੇਤ੍ਵਾ ਹਂਸਾਨਂ ਗਤਮਗ੍ਗਂ ਓਲੋਕੇਨ੍ਤੋ ਸੁਮੁਖਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਆਗਤਕਾਲੇ ਨਂ ਵੀਮਂਸਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਸ੍ਮਿਂ ਆਗਤੇ ਤਿਸ੍ਸੋ ਗਾਥਾ ਅਭਾਸਿ –

੧੩੩.

‘‘ਏਤੇ ਹਂਸਾ ਪਕ੍ਕਮਨ੍ਤਿ, ਵਕ੍ਕਙ੍ਗਾ ਭਯਮੇਰਿਤਾ;

ਹਰਿਤ੍ਤਚ ਹੇਮਵਣ੍ਣ, ਕਾਮਂ ਸੁਮੁਖ ਪਕ੍ਕਮ.

੧੩੪.

‘‘ਓਹਾਯ ਮਂ ਞਾਤਿਗਣਾ, ਏਕਂ ਪਾਸਵਸਂ ਗਤਂ;

ਅਨਪੇਕ੍ਖਮਾਨਾ ਗਚ੍ਛਨ੍ਤਿ, ਕਿਂ ਏਕੋ ਅਵਹਿਯ੍ਯਸਿ.

੧੩੫.

‘‘ਪਤੇਵ ਪਤਤਂ ਸੇਟ੍ਠ, ਨਤ੍ਥਿ ਬਦ੍ਧੇ ਸਹਾਯਤਾ;

ਮਾ ਅਨੀਘਾਯ ਹਾਪੇਸਿ, ਕਾਮਂ ਸੁਮੁਖ ਪਕ੍ਕਮਾ’’ਤਿ.

ਤਤ੍ਥ ਭਯਮੇਰਿਤਾਤਿ ਭਯੇਰਿਤਾ ਭਯਤਜ੍ਜਿਤਾ ਭਯਚਲਿਤਾ. ਹਰਿਤ੍ਤਚ ਹੇਮਵਣ੍ਣਾਤਿ ਦ੍ਵੀਹਿਪਿ ਵਚਨੇਹਿ ਤਮੇਵਾਲਪਤਿ. ਕਾਮਨ੍ਤਿ ਸੁਵਣ੍ਣਤ੍ਤਚ, ਸੁਵਣ੍ਣਵਣ੍ਣ, ਸੁਨ੍ਦਰਮੁਖ ਏਕਂਸੇਨ ਪਕ੍ਕਮਾਹਿਯੇਵ, ਕਿਂ ਤੇ ਇਧਾਗਮਨੇਨਾਤਿ ਵਦਤਿ. ਓਹਾਯਾਤਿ ਮਂ ਜਹਿਤ੍ਵਾ ਉਪ੍ਪਤਿਤਾ. ਅਨਪੇਕ੍ਖਮਾਨਾਤਿ ਤੇ ਮਮ ਞਾਤਕਾ ਮਯਿ ਅਨਪੇਕ੍ਖਾਵ ਗਚ੍ਛਨ੍ਤਿ. ਪਤੇਵਾਤਿ ਉਪ੍ਪਤੇਵ. ਮਾ ਅਨੀਘਾਯਾਤਿ ਇਤੋ ਗਨ੍ਤ੍ਵਾ ਪਤ੍ਤਬ੍ਬਾਯ ਨਿਦ੍ਦੁਕ੍ਖਭਾਵਾਯ ਵੀਰਿਯਂ ਮਾ ਹਾਪੇਸਿ.

ਤਤੋ ਸੁਮੁਖੋ ਪਙ੍ਕਪਿਟ੍ਠੇ ਨਿਸੀਦਿਤ੍ਵਾ ਗਾਥਮਾਹ –

੧੩੬.

‘‘ਨਾਹਂ ਦੁਕ੍ਖਪਰੇਤੋਤਿ, ਧਤਰਟ੍ਠ ਤੁਵਂ ਜਹੇ;

ਜੀਵਿਤਂ ਮਰਣਂ ਵਾ ਮੇ, ਤਯਾ ਸਦ੍ਧਿਂ ਭਵਿਸ੍ਸਤੀ’’ਤਿ.

ਤਤ੍ਥ ਦੁਕ੍ਖਪਰੇਤੋਤਿ ਮਹਾਰਾਜ, ‘‘ਤ੍ਵਂ ਮਰਣਦੁਕ੍ਖਪਰੇਤੋ’’ਤਿ ਏਤ੍ਤਕੇਨੇਵ ਨਾਹਂ ਤਂ ਜਹਾਮਿ.

ਏਵਂ ਸੁਮੁਖੇਨ ਸੀਹਨਾਦੇ ਕਥਿਤੇ ਧਤਰਟ੍ਠੋ ਗਾਥਮਾਹ –

੧੩੭.

‘‘ਏਤਦਰਿਯਸ੍ਸ ਕਲ੍ਯਾਣਂ, ਯਂ ਤ੍ਵਂ ਸੁਮੁਖ ਭਾਸਸਿ;

ਤਞ੍ਚ ਵੀਮਂਸਮਾਨੋਹਂ, ਪਤਤੇਤਂ ਅਵਸ੍ਸਜਿ’’ਨ੍ਤਿ.

ਤਤ੍ਥ ਏਤਦਰਿਯਸ੍ਸਾਤਿ ਯਂ ਤ੍ਵਂ ‘‘ਨਾਹਂ ਤਂ ਜਹੇ’’ਤਿ ਭਾਸਸਿ, ਏਤਂ ਆਚਾਰਸਮ੍ਪਨ੍ਨਸ੍ਸ ਅਰਿਯਸ੍ਸ ਕਲ੍ਯਾਣਂ ਉਤ੍ਤਮਵਚਨਂ. ਪਤਤੇਤਨ੍ਤਿ ਅਹਞ੍ਚ ਨ ਤਂ ਵਿਸ੍ਸਜ੍ਜੇਤੁਕਾਮੋਵ ਏਵਂ ਅਵਚਂ, ਅਥ ਖੋ ਤਂ ਵੀਮਂਸਮਾਨੋ ‘‘ਪਤਤੂ’’ਤਿ ਏਤਂ ਵਚਨਂ ਅਵਸ੍ਸਜਿਂ, ਗਚ੍ਛਾਤਿ ਤਂ ਅਵੋਚਨ੍ਤਿ ਅਤ੍ਥੋ.

ਏਵਂ ਤੇਸਂ ਕਥੇਨ੍ਤਾਨਞ੍ਞੇਵ ਲੁਦ੍ਦਪੁਤ੍ਤੋ ਦਣ੍ਡਮਾਦਾਯ ਵੇਗੇਨਾਗਤੋ. ਸੁਮੁਖੋ ਧਤਰਟ੍ਠਂ ਅਸ੍ਸਾਸੇਤ੍ਵਾ ਤਸ੍ਸਾਭਿਮੁਖੋ ਗਨ੍ਤ੍ਵਾ ਅਪਚਿਤਿਂ ਦਸ੍ਸੇਤ੍ਵਾ ਹਂਸਰਞ੍ਞੋ ਗੁਣੇ ਕਥੇਸਿ. ਤਾਵਦੇਵ ਲੁਦ੍ਦੋ ਮੁਦੁਚਿਤ੍ਤੋ ਅਹੋਸਿ. ਸੋ ਤਸ੍ਸ ਮੁਦੁਚਿਤ੍ਤਕਂ ਞਤ੍ਵਾ ਪੁਨ ਗਨ੍ਤ੍ਵਾ ਹਂਸਰਾਜਮੇਵ ਅਸ੍ਸਾਸੇਨ੍ਤੋ ਅਟ੍ਠਾਸਿ. ਲੁਦ੍ਦੋਪਿ ਹਂਸਰਾਜਾਨਂ ਉਪਸਙ੍ਕਮਿਤ੍ਵਾ ਛਟ੍ਠਂ ਗਾਥਮਾਹ –

੧੩੮.

‘‘ਅਪਦੇਨ ਪਦਂ ਯਾਤਿ, ਅਨ੍ਤਲਿਕ੍ਖਚਰੋ ਦਿਜੋ;

ਆਰਾ ਪਾਸਂ ਨ ਬੁਜ੍ਝਿ ਤ੍ਵਂ, ਹਂਸਾਨਂ ਪਵਰੁਤ੍ਤਮਾ’’ਤਿ.

ਤਤ੍ਥ ਅਪਦੇਨ ਪਦਨ੍ਤਿ ਮਹਾਰਾਜ, ਤੁਮ੍ਹਾਦਿਸੋ ਅਨ੍ਤਲਿਕ੍ਖਚਰੋ ਦਿਜੋ ਅਪਦੇ ਆਕਾਸੇ ਪਦਂ ਕਤ੍ਵਾ ਯਾਤਿ. ਨ ਬੁਜ੍ਝਿ ਤ੍ਵਨ੍ਤਿ ਸੋ ਤ੍ਵਂ ਏਵਰੂਪੋ ਦੂਰਤੋਵ ਇਮਂ ਪਾਸਂ ਨ ਬੁਜ੍ਝਿ ਨ ਜਾਨੀਤਿ ਪੁਚ੍ਛਤਿ.

ਮਹਾਸਤ੍ਤੋ ਆਹ –

੧੩੯.

‘‘ਯਦਾ ਪਰਾਭਵੋ ਹੋਤਿ, ਪੋਸੋ ਜੀਵਿਤਸਙ੍ਖਯੇ;

ਅਥ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਤੀ’’ਤਿ.

ਤਤ੍ਥ ਯਦਾ ਪਰਾਭਵੋਤਿ ਸਮ੍ਮ ਲੁਦ੍ਦਪੁਤ੍ਤ, ਯਦਾ ਪਰਾਭਵੋ ਅਵੁਡ੍ਢਿ ਵਿਨਾਸੋ ਸਮ੍ਪਤ੍ਤੋ ਹੋਤਿ, ਅਥ ਪੋਸੋ ਜੀਵਿਤਸਙ੍ਖਯੇ ਪਤ੍ਤੇ ਜਾਲਞ੍ਚ ਪਾਸਞ੍ਚ ਪਤ੍ਵਾਪਿ ਨ ਜਾਨਾਤੀਤਿ ਅਤ੍ਥੋ.

ਲੁਦ੍ਦੋ ਹਂਸਰਞ੍ਞੋ ਕਥਂ ਅਭਿਨਨ੍ਦਿਤ੍ਵਾ ਸੁਮੁਖੇਨ ਸਦ੍ਧਿਂ ਸਲ੍ਲਪਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੧੪੦.

‘‘ਏਤੇ ਹਂਸਾ ਪਕ੍ਕਮਨ੍ਤਿ, ਵਕ੍ਕਙ੍ਗਾ ਭਯਮੇਰਿਤਾ;

ਹਰਿਤ੍ਤਚ ਹੇਮਵਣ੍ਣ, ਤ੍ਵਞ੍ਞੇਵ ਅਵਹਿਯ੍ਯਸਿ.

੧੪੧.

‘‘ਏਤੇ ਭੁਤ੍ਵਾ ਚ ਪਿਵਿਤ੍ਵਾ ਚ, ਪਕ੍ਕਮਨ੍ਤਿ ਵਿਹਙ੍ਗਮਾ;

ਅਨਪੇਕ੍ਖਮਾਨਾ ਵਕ੍ਕਙ੍ਗਾ, ਤ੍ਵਞ੍ਞੇਵੇਕੋ ਉਪਾਸਸਿ.

੧੪੨.

‘‘ਕਿਂ ਨੁ ਤ੍ਯਾਯਂ ਦਿਜੋ ਹੋਤਿ, ਮੁਤ੍ਤੋ ਬਦ੍ਧਂ ਉਪਾਸਸਿ;

ਓਹਾਯ ਸਕੁਣਾ ਯਨ੍ਤਿ, ਕਿਂ ਏਕੋ ਅਵਹਿਯ੍ਯਸੀ’’ਤਿ.

ਤਤ੍ਥ ਤ੍ਵਞ੍ਞੇਵਾਤਿ ਤ੍ਵਮੇਵ ਓਹਿਯ੍ਯਸੀਤਿ ਪੁਚ੍ਛਤਿ. ਉਪਾਸਸੀਤਿ ਪਯਿਰੁਪਾਸਸਿ.

ਸੁਮੁਖੋ ਆਹ –

੧੪੩.

‘‘ਰਾਜਾ ਮੇ ਸੋ ਦਿਜੋ ਮਿਤ੍ਤੋ, ਸਖਾ ਪਾਣਸਮੋ ਚ ਮੇ;

ਨੇਵ ਨਂ ਵਿਜਹਿਸ੍ਸਾਮਿ, ਯਾਵ ਕਾਲਸ੍ਸ ਪਰਿਯਾਯ’’ਨ੍ਤਿ.

ਤਤ੍ਥ ਯਾਵ ਕਾਲਸ੍ਸ ਪਰਿਯਾਯਨ੍ਤਿ ਲੁਦ੍ਦਪੁਤ੍ਤ, ਯਾਵ ਜੀਵਿਤਕਾਲਸ੍ਸ ਪਰਿਯੋਸਾਨਂ ਅਹਂ ਏਤਂ ਨ ਵਿਜਹਿਸ੍ਸਾਮਿਯੇਵ.

ਤਂ ਸੁਤ੍ਵਾ ਲੁਦ੍ਦੋ ਪਸਨ੍ਨਚਿਤ੍ਤੋ ਹੁਤ੍ਵਾ ‘‘ਸਚਾਹਂ ਏਵਂ ਸੀਲਸਮ੍ਪਨ੍ਨੇਸੁ ਇਮੇਸੁ ਅਪਰਜ੍ਝਿਸ੍ਸਾਮਿ, ਪਥਵੀਪਿ ਮੇ ਵਿਵਰਂ ਦਦੇਯ੍ਯ, ਕਿਂ ਮੇ ਰਞ੍ਞੋ ਸਨ੍ਤਿਕਾ ਲਦ੍ਧੇਨ ਧਨੇਨ, ਵਿਸ੍ਸਜ੍ਜੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੪੪.

‘‘ਯੋ ਚ ਤ੍ਵਂ ਸਖਿਨੋ ਹੇਤੁ, ਪਾਣਂ ਚਜਿਤੁਮਿਚ੍ਛਸਿ;

ਸੋ ਤੇ ਸਹਾਯਂ ਮੁਞ੍ਚਾਮਿ, ਹੋਤੁ ਰਾਜਾ ਤਵਾਨੁਗੋ’’ਤਿ.

ਤਤ੍ਥ ਯੋ ਚ ਤ੍ਵਨ੍ਤਿ ਯੋ ਨਾਮ ਤ੍ਵਂ. ਸੋਤਿ ਸੋ ਅਹਂ. ਤਵਾਨੁਗੋਤਿ ਏਸ ਹਂਸਰਾਜਾ ਤਵ ਵਸਂ ਅਨੁਗਤੋ ਹੋਤੁ, ਤਯਾ ਸਦ੍ਧਿਂ ਏਕਟ੍ਠਾਨੇ ਵਸਤੁ.

ਏਵਞ੍ਚ ਪਨ ਵਤ੍ਵਾ ਧਤਰਟ੍ਠਂ ਯਟ੍ਠਿਪਾਸਤੋ ਓਤਾਰੇਤ੍ਵਾ ਸਰਤੀਰਂ ਨੇਤ੍ਵਾ ਪਾਸਂ ਮੁਞ੍ਚਿਤ੍ਵਾ ਮੁਦੁਚਿਤ੍ਤੇਨ ਲੋਹਿਤਂ ਧੋਵਿਤ੍ਵਾ ਨ੍ਹਾਰੁਆਦੀਨਿ ਪਟਿਪਾਦੇਸਿ. ਤਸ੍ਸ ਮੁਦੁਚਿਤ੍ਤਤਾਯ ਮਹਾਸਤ੍ਤਸ੍ਸ ਪਾਰਮਿਤਾਨੁਭਾਵੇਨ ਚ ਤਾਵਦੇਵ ਪਾਦੋ ਸਚ੍ਛਵਿ ਅਹੋਸਿ, ਬਦ੍ਧਟ੍ਠਾਨਮ੍ਪਿ ਨ ਪਞ੍ਞਾਯਿ. ਸੁਮੁਖੋ ਬੋਧਿਸਤ੍ਤਂ ਓਲੋਕੇਤ੍ਵਾ ਤੁਟ੍ਠਚਿਤ੍ਤੋ ਅਨੁਮੋਦਨਂ ਕਰੋਨ੍ਤੋ ਗਾਥਮਾਹ –

੧੪੫.

‘‘ਏਵਂ ਲੁਦ੍ਦਕ ਨਨ੍ਦਸ੍ਸੁ, ਸਹ ਸਬ੍ਬੇਹਿ ਞਾਤਿਭਿ;

ਯਥਾਹਮਜ੍ਜ ਨਨ੍ਦਾਮਿ, ਮੁਤ੍ਤਂ ਦਿਸ੍ਵਾ ਦਿਜਾਧਿਪ’’ਨ੍ਤਿ.

ਤਂ ਸੁਤ੍ਵਾ ਲੁਦ੍ਦੋ ‘‘ਗਚ੍ਛਥ, ਸਾਮੀ’’ਤਿ ਆਹ. ਅਥ ਨਂ ਮਹਾਸਤ੍ਤੋ ‘‘ਕਿਂ ਪਨ ਤ੍ਵਂ ਸਮ੍ਮ, ਮਂ ਅਤ੍ਤਨੋ ਅਤ੍ਥਾਯ ਬਨ੍ਧਿ, ਉਦਾਹੁ ਅਞ੍ਞਸ੍ਸ ਆਣਤ੍ਤਿਯਾ’’ਤਿ ਪੁਚ੍ਛਿਤ੍ਵਾ ਤੇਨ ਤਸ੍ਮਿਂ ਕਾਰਣੇ ਆਰੋਚਿਤੇ ‘‘ਕਿਂ ਨੁ ਖੋ ਮੇ ਇਤੋਵ ਚਿਤ੍ਤਕੂਟਂ ਗਨ੍ਤੁਂ ਸੇਯ੍ਯੋ, ਉਦਾਹੁ ਨਗਰ’’ਨ੍ਤਿ ਵਿਮਂਸਨ੍ਤੋ ‘‘ਮਯਿ ਨਗਰਂ ਗਤੇ ਲੁਦ੍ਦਪੁਤ੍ਤੋ ਧਨਂ ਲਭਿਸ੍ਸਤਿ, ਦੇਵਿਯਾ ਦੋਹਲ਼ੋ ਪਟਿਪ੍ਪਸ੍ਸਮ੍ਭਿਸ੍ਸਤਿ, ਸੁਮੁਖਸ੍ਸ ਮਿਤ੍ਤਧਮ੍ਮੋ ਪਾਕਟੋ ਭਵਿਸ੍ਸਤਿ, ਤਥਾ ਮਮ ਞਾਣਬਲਂ, ਖੇਮਞ੍ਚ ਸਰਂ ਅਭਯਦਕ੍ਖਿਣਂ ਕਤ੍ਵਾ ਲਭਿਸ੍ਸਾਮਿ, ਤਸ੍ਮਾ ਨਗਰਮੇਵ ਗਨ੍ਤੁਂ ਸੇਯ੍ਯੋ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ‘‘ਲੁਦ੍ਦ, ਤ੍ਵਂ ਅਮ੍ਹੇ ਕਾਜੇਨਾਦਾਯ ਰਞ੍ਞੋ ਸਨ੍ਤਿਕਂ ਨੇਹਿ, ਸਚੇ ਨੋ ਰਾਜਾ ਵਿਸ੍ਸਜ੍ਜੇਤੁਕਾਮੋ ਭਵਿਸ੍ਸਤਿ, ਵਿਸ੍ਸਜ੍ਜੇਸ੍ਸਤੀ’’ਤਿ ਆਹ. ਰਾਜਾਨੋ ਨਾਮ ਸਾਮਿ, ਕਕ੍ਖਲ਼ਾ, ਗਚ੍ਛਥ ਤੁਮ੍ਹੇਤਿ. ਮਯਂ ਤਾਦਿਸਂ ਲੁਦ੍ਦਮ੍ਪਿ ਮੁਦੁਕਂ ਕਰਿਮ੍ਹ, ਰਞ੍ਞੋ ਆਰਾਧਨੇ ਅਮ੍ਹਾਕਂ ਭਾਰੋ, ਨੇਹਿਯੇਵ ਨੋ, ਸਮ੍ਮਾਤਿ. ਸੋ ਤਥਾ ਅਕਾਸਿ. ਰਾਜਾ ਹਂਸੇ ਦਿਸ੍ਵਾਵ ਸੋਮਨਸ੍ਸਜਾਤੋ ਹੁਤ੍ਵਾ ਦ੍ਵੇਪਿ ਹਂਸੇ ਕਞ੍ਚਨਪੀਠੇ ਨਿਸੀਦਾਪੇਤ੍ਵਾ ਮਧੁਲਾਜੇ ਖਾਦਾਪੇਤ੍ਵਾ ਮਧੁਰੋਦਕਂ ਪਾਯੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਧਮ੍ਮਕਥਂ ਆਯਾਚਿ. ਹਂਸਰਾਜਾ ਤਸ੍ਸ ਸੋਤੁਕਾਮਤਂ ਵਿਦਿਤ੍ਵਾ ਪਠਮਂ ਤਾਵ ਪਟਿਸਨ੍ਥਾਰਮਕਾਸਿ. ਤਤ੍ਰਿਮਾ ਹਂਸਸ੍ਸ ਚ ਰਞ੍ਞੋ ਚ ਵਚਨਪਟਿਵਚਨਗਾਥਾਯੋ ਹੋਨ੍ਤਿ –

੧੪੬.

‘‘ਕਚ੍ਚਿਨ੍ਨੁ ਭੋਤੋ ਕੁਸਲਂ, ਕਚ੍ਚਿ ਭੋਤੋ ਅਨਾਮਯਂ;

ਕਚ੍ਚਿ ਰਟ੍ਠਮਿਦਂ ਫੀਤਂ, ਧਮ੍ਮੇਨ ਮਨੁਸਾਸਸਿ.

੧੪੭.

‘‘ਕੁਸਲਂ ਚੇਵ ਮੇ ਹਂਸ, ਅਥੋ ਹਂਸ ਅਨਾਮਯਂ;

ਅਥੋ ਰਟ੍ਠਮਿਦਂ ਫੀਤਂ, ਧਮ੍ਮੇਨ ਮਨੁਸਾਸਹਂ.

੧੪੮.

‘‘ਕਚ੍ਚਿ ਭੋਤੋ ਅਮਚ੍ਚੇਸੁ, ਦੋਸੋ ਕੋਚਿ ਨ ਵਿਜ੍ਜਤਿ;

ਕਚ੍ਚਿ ਆਰਾ ਅਮਿਤ੍ਤਾ ਤੇ, ਛਾਯਾ ਦਕ੍ਖਿਣਤੋਰਿਵ.

੧੪੯.

‘‘ਅਥੋਪਿ ਮੇ ਅਮਚ੍ਚੇਸੁ, ਦੋਸੋ ਕੋਚਿ ਨ ਵਿਜ੍ਜਤਿ;

ਅਥੋ ਆਰਾ ਅਮਿਤ੍ਤਾ ਮੇ, ਛਾਯਾ ਦਕ੍ਖਿਣਤੋਰਿਵ.

੧੫੦.

‘‘ਕਚ੍ਚਿ ਤੇ ਸਾਦਿਸੀ ਭਰਿਯਾ, ਅਸ੍ਸਵਾ ਪਿਯਭਾਣਿਨੀ;

ਪੁਤ੍ਤਰੂਪਯਸੂਪੇਤਾ, ਤਵ ਛਨ੍ਦਵਸਾਨੁਗਾ.

੧੫੧.

‘‘ਅਥੋ ਮੇ ਸਾਦਿਸੀ ਭਰਿਯਾ, ਅਸ੍ਸਵਾ ਪਿਯਭਾਣਿਨੀ;

ਪੁਤ੍ਤਰੂਪਯਸੂਪੇਤਾ, ਮਮ ਛਨ੍ਦਵਸਾਨੁਗਾ.

੧੫੨.

‘‘ਕਚ੍ਚਿ ਤੇ ਬਹਵੋ ਪੁਤ੍ਤਾ, ਸੁਜਾਤਾ ਰਟ੍ਠਵਡ੍ਢਨ;

ਪਞ੍ਞਾਜਵੇਨ ਸਮ੍ਪਨ੍ਨਾ, ਸਮ੍ਮੋਦਨ੍ਤਿ ਤਤੋ ਤਤੋ.

੧੫੩.

‘‘ਸਤਮੇਕੋ ਚ ਮੇ ਪੁਤ੍ਤਾ, ਧਤਰਟ੍ਠ ਮਯਾ ਸੁਤਾ;

ਤੇਸਂ ਤ੍ਵਂ ਕਿਚ੍ਚਮਕ੍ਖਾਹਿ, ਨਾਵਰੁਜ੍ਝਨ੍ਤਿ ਤੇ ਵਚੋ’’ਤਿ.

ਤਤ੍ਥ ਕੁਸਲਨ੍ਤਿ ਆਰੋਗ੍ਯਂ, ਇਤਰਂ ਤਸ੍ਸੇਵ ਵੇਵਚਨਂ. ਫੀਤਨ੍ਤਿ ਕਚ੍ਚਿ ਤੇ ਇਦਂ ਰਟ੍ਠਂ ਫੀਤਂ ਸੁਭਿਕ੍ਖਂ, ਧਮ੍ਮੇਨ ਚ ਨਂ ਅਨੁਸਾਸਸੀਤਿ ਪੁਚ੍ਛਤਿ. ਦੋਸੋਤਿ ਅਪਰਾਧੋ. ਛਾਯਾ ਦਕ੍ਖਿਣਤੋਰਿਵਾਤਿ ਯਥਾ ਨਾਮ ਦਕ੍ਖਿਣਦਿਸਾਭਿਮੁਖਾ ਛਾਯਾ ਨ ਵਡ੍ਢਤਿ, ਏਵਂ ਤੇ ਕਚ੍ਚਿ ਅਮਿਤ੍ਤਾ ਨ ਵਡ੍ਢਨ੍ਤੀਤਿ ਵਦਤਿ. ਸਾਦਿਸੀਤਿ ਜਾਤਿਗੋਤ੍ਤਕੁਲਪਦੇਸੇਹਿ ਸਮਾਨਾ. ਏਵਰੂਪਾ ਹਿ ਅਤਿਚਾਰਿਨੀ ਨ ਹੋਤਿ. ਅਸ੍ਸਵਾਤਿ ਵਚਨਪਟਿਗ੍ਗਾਹਿਕਾ. ਪੁਤ੍ਤਰੂਪਯਸੂਪੇਤਾਤਿ ਪੁਤ੍ਤੇਹਿ ਚ ਰੂਪੇਨ ਚ ਯਸੇਨ ਚ ਉਪੇਤਾ. ਪਞ੍ਞਾਜਵੇਨਾਤਿ ਪਞ੍ਞਾਵੇਗੇਨ ਪਞ੍ਞਂ ਜਵਾਪੇਤ੍ਵਾ ਤਾਨਿ ਤਾਨਿ ਕਿਚ੍ਚਾਨਿ ਪਰਿਚ੍ਛਿਨ੍ਦਿਤੁਂ ਸਮਤ੍ਥਾਤਿ ਪੁਚ੍ਛਤਿ. ਸਮ੍ਮੋਦਨ੍ਤਿ ਤਤੋ ਤਤੋਤਿ ਯਤ੍ਥ ਯਤ੍ਥ ਨਿਯੁਤ੍ਤਾ ਹੋਨ੍ਤਿ, ਤਤੋ ਤਤੋ ਸਮ੍ਮੋਦਨ੍ਤੇਵ, ਨ ਵਿਰੁਜ੍ਝਨ੍ਤੀਤਿ ਪੁਚ੍ਛਤਿ. ਮਯਾ ਸੁਤਾਤਿ ਮਯਾ ਵਿਸ੍ਸੁਤਾ. ਮਞ੍ਹਿ ਲੋਕੋ ‘‘ਬਹੁਪੁਤ੍ਤਰਾਜਾ’’ਤਿ ਵਦਤਿ, ਇਤਿ ਤੇ ਮਂ ਨਿਸ੍ਸਾਯ ਵਿਸ੍ਸੁਤਾ ਪਾਕਟਾ ਜਾਤਾਤਿ ਮਯਾ ਸੁਤਾ ਨਾਮ ਹੋਨ੍ਤੀਤਿ ਵਦਤਿ. ਤੇਸਂ ਤ੍ਵਂ ਕਿਚ੍ਚਮਕ੍ਖਾਹੀਤਿ ਤੇਸਂ ਮਮ ਪੁਤ੍ਤਾਨਂ ‘‘ਇਦਂ ਨਾਮ ਕਰੋਨ੍ਤੂ’’ਤਿ ਤ੍ਵਂ ਕਿਚ੍ਚਮਕ੍ਖਾਹਿ, ਨ ਤੇ ਵਚਨਂ ਅਵਰੁਜ੍ਝਨ੍ਤਿ, ਓਵਾਦਂ ਨੇਸਂ ਦੇਹੀਤਿ ਅਧਿਪ੍ਪਾਯੇਨੇਵਮਾਹ.

ਤਂ ਸੁਤ੍ਵਾ ਮਹਾਸਤ੍ਤੋ ਤਸ੍ਸ ਓਵਾਦਂ ਦੇਨ੍ਤੋ ਪਞ੍ਚ ਗਾਥਾ ਅਭਾਸਿ –

੧੫੪.

‘‘ਉਪਪਨ੍ਨੋਪਿ ਚੇ ਹੋਤਿ, ਜਾਤਿਯਾ ਵਿਨਯੇਨ ਵਾ;

ਅਥ ਪਚ੍ਛਾ ਕੁਰੁਤੇ ਯੋਗਂ, ਕਿਚ੍ਛੇ ਆਪਾਸੁ ਸੀਦਤਿ.

੧੫੫.

‘‘ਤਸ੍ਸ ਸਂਹੀਰਪਞ੍ਞਸ੍ਸ, ਵਿਵਰੋ ਜਾਯਤੇ ਮਹਾ;

ਰਤ੍ਤਿਮਨ੍ਧੋਵ ਰੂਪਾਨਿ, ਥੂਲਾਨਿ ਮਨੁਪਸ੍ਸਤਿ.

੧੫੬.

‘‘ਅਸਾਰੇ ਸਾਰਯੋਗਞ੍ਞੂ, ਮਤਿਂ ਨ ਤ੍ਵੇਵ ਵਿਨ੍ਦਤਿ;

ਸਰਭੋਵ ਗਿਰਿਦੁਗ੍ਗਸ੍ਮਿਂ, ਅਨ੍ਤਰਾਯੇਵ ਸੀਦਤਿ.

੧੫੭.

‘‘ਹੀਨਜਚ੍ਚੋਪਿ ਚੇ ਹੋਤਿ, ਉਟ੍ਠਾਤਾ ਧਿਤਿਮਾ ਨਰੋ;

ਆਚਾਰਸੀਲਸਮ੍ਪਨ੍ਨੋ, ਨਿਸੇ ਅਗ੍ਗੀਵ ਭਾਸਤਿ.

੧੫੮.

‘‘ਏਤਂ ਮੇ ਉਪਮਂ ਕਤ੍ਵਾ, ਪੁਤ੍ਤੇ ਵਿਜ੍ਜਾਸੁ ਵਾਚਯ;

ਸਂਵਿਰੂਲ਼੍ਹੇਥ ਮੇਧਾਵੀ, ਖੇਤ੍ਤੇ ਬੀਜਂਵ ਵੁਟ੍ਠਿਯਾ’’ਤਿ.

ਤਤ੍ਥ ਵਿਨਯੇਨਾਤਿ ਆਚਾਰੇਨ. ਪਚ੍ਛਾ ਕੁਰੁਤੇ ਯੋਗਨ੍ਤਿ ਯੋ ਚੇ ਸਿਕ੍ਖਿਤਬ੍ਬਸਿਕ੍ਖਾਸੁ ਦਹਰਕਾਲੇ ਯੋਗਂ ਵੀਰਿਯਂ ਅਕਤ੍ਵਾ ਪਚ੍ਛਾ ਮਹਲ੍ਲਕਕਾਲੇ ਕਰੋਤਿ, ਏਵਰੂਪੋ ਪਚ੍ਛਾ ਤਥਾਰੂਪੇ ਦੁਕ੍ਖੇ ਵਾ ਆਪਦਾਸੁ ਵਾ ਉਪ੍ਪਨ੍ਨਾਸੁ ਸੀਦਤਿ, ਅਤ੍ਤਾਨਂ ਉਦ੍ਧਰਿਤੁਂ ਨ ਸਕ੍ਕੋਤਿ. ਤਸ੍ਸ ਸਂਹੀਰਪਞ੍ਞਸ੍ਸਾਤਿ ਤਸ੍ਸ ਅਸਿਕ੍ਖਿਤਤ੍ਤਾ ਤਤੋ ਤਤੋ ਹਰਿਤਬ੍ਬਪਞ੍ਞਸ੍ਸ ਨਿਚ੍ਚਂ ਚਲਬੁਦ੍ਧਿਨੋ. ਵਿਵਰੋਤਿ ਭੋਗਾਦੀਨਂ ਛਿਦ੍ਦਂ, ਪਰਿਹਾਨੀਤਿ ਅਤ੍ਥੋ. ਰਤ੍ਤਿਮਨ੍ਧੋਤਿ ਰਤ੍ਤਨ੍ਧੋ. ਇਦਂ ਵੁਤ੍ਤਂ ਹੋਤਿ – ‘‘ਯਥਾ ਰਤ੍ਤਨ੍ਧੋ ਰਤ੍ਤਿਕਾਣੋ ਰਤ੍ਤਿਂ ਚਨ੍ਦੋਭਾਸਾਦੀਹਿ ਥੂਲਰੂਪਾਨੇਵ ਪਸ੍ਸਤਿ, ਸੁਖੁਮਾਨਿ ਪਸ੍ਸਿਤੁਂ ਨ ਸਕ੍ਕੋਤਿ, ਏਵਂ ਅਸਿਕ੍ਖਿਤੋ ਸਂਹੀਰਪਞ੍ਞੋ ਕਿਸ੍ਮਿਞ੍ਚਿਦੇਵ ਭਯੇ ਉਪ੍ਪਨ੍ਨੇ ਸੁਖੁਮਾਨਿ ਕਿਚ੍ਚਾਨਿ ਪਸ੍ਸਿਤੁਂ ਨ ਸਕ੍ਕੋਤਿ, ਓਲ਼ਾਰਿਕੇਯੇਵ ਪਸ੍ਸਤਿ, ਤਸ੍ਮਾ ਤਵ ਪੁਤ੍ਤੇ ਦਹਰਕਾਲੇਯੇਵ ਸਿਕ੍ਖਾਪੇਤੁਂ ਵਟ੍ਟਤੀ’’ਤਿ.

ਅਸਾਰੇਤਿ ਨਿਸ੍ਸਾਰੇ ਲੋਕਾਯਤਵੇਦਸਮਯੇ. ਸਾਰਯੋਗਞ੍ਞੂਤਿ ਸਾਰਯੁਤ੍ਤੋ ਏਸ ਸਮਯੋਤਿ ਮਞ੍ਞਮਾਨੋ. ਮਤਿਂ ਨ ਤ੍ਵੇਵ ਵਿਨ੍ਦਤੀਤਿ ਬਹੁਂ ਸਿਕ੍ਖਿਤ੍ਵਾਪਿ ਪਞ੍ਞਂ ਨ ਲਭਤਿਯੇਵ. ਗਿਰਿਦੁਗ੍ਗਸ੍ਮਿਨ੍ਤਿ ਸੋ ਏਵਰੂਪੋ ਯਥਾ ਨਾਮ ਸਰਭੋ ਅਤ੍ਤਨੋ ਵਸਨਟ੍ਠਾਨਂ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਵਿਸਮਮ੍ਪਿ ਸਮਨ੍ਤਿ ਮਞ੍ਞਮਾਨੋ ਗਿਰਿਦੁਗ੍ਗੇ ਵੇਗੇਨਾਗਚ੍ਛਨ੍ਤੋ ਨਰਕਪਪਾਤਂ ਪਤਿਤ੍ਵਾ ਅਨ੍ਤਰਾਯੇਵ ਸੀਦਤਿ, ਆਵਾਸਂ ਨ ਪਾਪੁਣਾਤਿ, ਏਵਮੇਤਂ ਅਸਾਰਂ ਲੋਕਾਯਤਵੇਦਸਮਯਂ ਸਾਰਸਞ੍ਞਾਯ ਉਗ੍ਗਹੇਤ੍ਵਾ ਮਹਾਵਿਨਾਸਂ ਪਾਪੁਣਾਤਿ. ਤਸ੍ਮਾ ਤਵ ਪੁਤ੍ਤੇ ਅਤ੍ਥਨਿਸ੍ਸਿਤੇਸੁ ਵਡ੍ਢਿਆਵਹੇਸੁ ਕਿਚ੍ਚੇਸੁ ਯੋਜੇਤ੍ਵਾ ਸਿਕ੍ਖਾਪੇਹੀਤਿ. ਨਿਸੇ ਅਗ੍ਗੀਵਾਤਿ ਮਹਾਰਾਜ, ਹੀਨਜਾਤਿਕੋਪਿ ਉਟ੍ਠਾਨਾਦਿਗੁਣਸਮ੍ਪਨ੍ਨੋ ਰਤ੍ਤਿਂ ਅਗ੍ਗਿਕ੍ਖਨ੍ਧੋ ਵਿਯ ਓਭਾਸਤਿ. ਏਤਂ ਮੇਤਿ ਏਤਂ ਮਯਾ ਵੁਤ੍ਤਂ ਰਤ੍ਤਨ੍ਧਞ੍ਚ ਅਗ੍ਗਿਕ੍ਖਨ੍ਧਞ੍ਚ ਉਪਮਂ ਕਤ੍ਵਾ ਤਵ ਪੁਤ੍ਤੇ ਵਿਜ੍ਜਾਸੁ ਵਾਚਯ, ਸਿਕ੍ਖਿਤਬ੍ਬਯੁਤ੍ਤਾਸੁ ਸਿਕ੍ਖਾਸੁ ਯੋਜੇਹਿ. ਏਵਂ ਯੁਤ੍ਤੋ ਹਿ ਯਥਾ ਸੁਖੇਤ੍ਤੇ ਸੁਵੁਟ੍ਠਿਯਾ ਬੀਜਂ ਸਂਵਿਰੂਹਤਿ, ਤਥੇਵ ਮੇਧਾਵੀ ਸਂਵਿਰੂਹਤਿ, ਯਸੇਨ ਚ ਭੋਗੇਹਿ ਚ ਵਡ੍ਢਤੀਤਿ.

ਏਵਂ ਮਹਾਸਤ੍ਤੋ ਸਬ੍ਬਰਤ੍ਤਿਂ ਰਞ੍ਞੋ ਧਮ੍ਮਂ ਦੇਸੇਸਿ, ਦੇਵਿਯਾ ਦੋਹਲ਼ੋ ਪਟਿਪ੍ਪਸ੍ਸਮ੍ਭਿ. ਮਹਾਸਤ੍ਤੋ ਅਰੁਣੁਗ੍ਗਮਨਵੇਲਾਯਮੇਵ ਰਾਜਾਨਂ ਪਞ੍ਚਸੁ ਸੀਲੇਸੁ ਪਤਿਟ੍ਠਪੇਤ੍ਵਾ ਅਪ੍ਪਮਾਦੇਨ ਓਵਦਿਤ੍ਵਾ ਸਦ੍ਧਿਂ ਸੁਮੁਖੇਨ ਉਤ੍ਤਰਸੀਹਪਞ੍ਜਰੇਨ ਨਿਕ੍ਖਮਿਤ੍ਵਾ ਚਿਤ੍ਤਕੂਟਮੇਵ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇਪਿ ਇਮਿਨਾ ਮਮਤ੍ਥਾਯ ਜੀਵਿਤਂ ਪਰਿਚ੍ਚਤ੍ਤਮੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਲੁਦ੍ਦੋ ਛਨ੍ਨੋ ਅਹੋਸਿ, ਰਾਜਾ ਸਾਰਿਪੁਤ੍ਤੋ, ਦੇਵੀ ਖੇਮਾਭਿਕ੍ਖੁਨੀ, ਹਂਸਪਰਿਸਾ ਸਾਕਿਯਗਣੋ, ਸੁਮੁਖੋ ਆਨਨ੍ਦੋ, ਹਂਸਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚੂਲ਼ਹਂਸਜਾਤਕਵਣ੍ਣਨਾ ਛਟ੍ਠਾ.

[੫੦੩] ੭. ਸਤ੍ਤਿਗੁਮ੍ਬਜਾਤਕਵਣ੍ਣਨਾ

ਮਿਗਲੁਦ੍ਦੋ ਮਹਾਰਾਜਾਤਿ ਇਦਂ ਸਤ੍ਥਾ ਮਦ੍ਦਕੁਚ੍ਛਿਸ੍ਮਿਂ ਮਿਗਦਾਯੇ ਵਿਹਰਨ੍ਤੋ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਦੇਵਦਤ੍ਤੇਨ ਹਿ ਸਿਲਾਯ ਪਵਿਦ੍ਧਾਯ ਭਗਵਤੋ ਪਾਦੇ ਸਕਲਿਕਾਯ ਖਤੇ ਬਲਵਵੇਦਨਾ ਉਪ੍ਪਜ੍ਜਿ. ਤਥਾਗਤਸ੍ਸ ਦਸ੍ਸਨਤ੍ਥਾਯ ਬਹੂ ਭਿਕ੍ਖੂ ਸਨ੍ਨਿਪਤਿਂਸੁ. ਅਥ ਭਗਵਾ ਪਰਿਸਂ ਸਨ੍ਨਿਪਤਿਤਂ ਦਿਸ੍ਵਾ ‘‘ਭਿਕ੍ਖਵੇ, ਇਦਂ ਸੇਨਾਸਨਂ ਅਤਿਸਮ੍ਬਾਧਂ, ਸਨ੍ਨਿਪਾਤੋ ਮਹਾ ਭਵਿਸ੍ਸਤਿ, ਮਂ ਮਞ੍ਚਸਿਵਿਕਾਯ ਮਦ੍ਦਕੁਚ੍ਛਿਂ ਨੇਥਾ’’ਤਿ ਆਹ. ਭਿਕ੍ਖੂ ਤਥਾ ਕਰਿਂਸੁ. ਜੀਵਕੋ ਤਥਾਗਤਸ੍ਸ ਪਾਦਂ ਫਾਸੁਕਂ ਅਕਾਸਿ. ਭਿਕ੍ਖੂ ਸਤ੍ਥੁ ਸਨ੍ਤਿਕੇ ਨਿਸਿਨ੍ਨਾਵ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਦੇਵਦਤ੍ਤੋ ਸਯਮ੍ਪਿ ਪਾਪੋ, ਪਰਿਸਾਪਿਸ੍ਸ ਪਾਪਾ, ਇਤਿ ਸੋ ਪਾਪੋ ਪਾਪਪਰਿਵਾਰੋਵ ਵਿਹਰਤੀ’’ਤਿ. ਸਤ੍ਥਾ ‘‘ਕਿਂ ਕਥੇਥ, ਭਿਕ੍ਖਵੇ’’ਤਿ ਪੁਚ੍ਛਿਤ੍ਵਾ ‘‘ਇਦਂ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਪਾਪੋ ਪਾਪਪਰਿਵਾਰੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਉਤ੍ਤਰਪਞ੍ਚਾਲਨਗਰੇ ਪਞ੍ਚਾਲੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਮਹਾਸਤ੍ਤੋ ਅਰਞ੍ਞਾਯਤਨੇ ਏਕਸ੍ਮਿਂ ਸਾਨੁਪਬ੍ਬਤੇ ਸਿਮ੍ਬਲਿਵਨੇ ਏਕਸ੍ਸ ਸੁਵਰਞ੍ਞੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਦ੍ਵੇ ਭਾਤਰੋ ਅਹੇਸੁਂ. ਤਸ੍ਸ ਪਨ ਪਬ੍ਬਤਸ੍ਸ ਉਪਰਿਵਾਤੇ ਚੋਰਗਾਮਕੋ ਅਹੋਸਿ ਪਞ੍ਚਨ੍ਨਂ ਚੋਰਸਤਾਨਂ ਨਿਵਾਸੋ, ਅਧੋਵਾਤੇ ਅਸ੍ਸਮੋ ਪਞ੍ਚਨ੍ਨਂ ਇਸਿਸਤਾਨਂ ਨਿਵਾਸੋ. ਤੇਸਂ ਸੁਵਪੋਤਕਾਨਂ ਪਕ੍ਖਨਿਕ੍ਖਮਨਕਾਲੇ ਵਾਤਮਣ੍ਡਲਿਕਾ ਉਦਪਾਦਿ. ਤਾਯ ਪਹਟੋ ਏਕੋ ਸੁਵਪੋਤਕੋ ਚੋਰਗਾਮਕੇ ਚੋਰਾਨਂ ਆਵੁਧਨ੍ਤਰੇ ਪਤਿਤੋ, ਤਸ੍ਸ ਤਤ੍ਥ ਪਤਿਤਤ੍ਤਾ ‘‘ਸਤ੍ਤਿਗੁਮ੍ਬੋ’’ਤ੍ਵੇਵ ਨਾਮਂ ਕਰਿਂਸੁ. ਏਕੋ ਅਸ੍ਸਮੇ ਵਾਲੁਕਤਲੇ ਪੁਪ੍ਫਨ੍ਤਰੇ ਪਤਿ, ਤਸ੍ਸ ਤਤ੍ਥ ਪਤਿਤਤ੍ਤਾ ‘‘ਪੁਪ੍ਫਕੋ’’ਤ੍ਵੇਵ ਨਾਮਂ ਕਰਿਂਸੁ. ਸਤ੍ਤਿਗੁਮ੍ਬੋ ਚੋਰਾਨਂ ਅਨ੍ਤਰੇ ਵਡ੍ਢਿਤੋ, ਪੁਪ੍ਫਕੋ ਇਸੀਨਂ.

ਅਥੇਕਦਿਵਸਂ ਰਾਜਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਰਥਵਰਂ ਅਭਿਰੁਹਿਤ੍ਵਾ ਮਹਨ੍ਤੇਨ ਪਰਿਵਾਰੇਨ ਮਿਗਵਧਾਯ ਨਗਰਤੋ ਨਾਤਿਦੂਰੇ ਸੁਪੁਪ੍ਫਿਤਫਲਿਤਂ ਰਮਣੀਯਂ ਉਪਗੁਮ੍ਬਵਨਂ ਗਨ੍ਤ੍ਵਾ ‘‘ਯਸ੍ਸ ਪਸ੍ਸੇਨ ਮਿਗੋ ਪਲਾਯਤਿ, ਤਸ੍ਸੇਵ ਗੀਵਾ’’ਤਿ ਵਤ੍ਵਾ ਰਥਾ ਓਰੁਯ੍ਹ ਪਟਿਚ੍ਛਾਦੇਤ੍ਵਾ ਦਿਨ੍ਨੇ ਕੋਟ੍ਠਕੇ ਧਨੁਂ ਆਦਾਯ ਅਟ੍ਠਾਸਿ. ਪੁਰਿਸੇਹਿ ਮਿਗਾਨਂ ਉਟ੍ਠਾਪਨਤ੍ਥਾਯ ਵਨਗੁਮ੍ਬੇਸੁ ਪੋਥਿਯਮਾਨੇਸੁ ਏਕੋ ਏਣਿਮਿਗੋ ਉਟ੍ਠਾਯ ਗਮਨਮਗ੍ਗਂ ਓਲੋਕੇਨ੍ਤੋ ਰਞ੍ਞੋ ਠਿਤਟ੍ਠਾਨਸ੍ਸੇਵ ਵਿਵਿਤ੍ਤਤਂ ਦਿਸ੍ਵਾ ਤਦਭਿਮੁਖੋ ਪਕ੍ਖਨ੍ਦਿਤ੍ਵਾ ਪਲਾਯਿ. ਅਮਚ੍ਚਾ ‘‘ਕਸ੍ਸ ਪਸ੍ਸੇਨ ਮਿਗੋ ਪਲਾਯਿਤੋ’’ਤਿ ਪੁਚ੍ਛਨ੍ਤਾ ‘‘ਰਞ੍ਞੋ ਪਸ੍ਸੇਨਾ’’ਤਿ ਞਤ੍ਵਾ ਰਞ੍ਞਾ ਸਦ੍ਧਿਂ ਕੇਲ਼ਿਂ ਕਰਿਂਸੁ. ਰਾਜਾ ਅਸ੍ਮਿਮਾਨੇਨ ਤੇਸਂ ਕੇਲ਼ਿਂ ਅਸਹਨ੍ਤੋ ‘‘ਇਦਾਨਿ ਤਂ ਮਿਗਂ ਗਹੇਸ੍ਸਾਮੀ’’ਤਿ ਰਥਂ ਆਰੁਯ੍ਹ ‘‘ਸੀਘਂ ਪੇਸੇਹੀ’’ਤਿ ਸਾਰਥਿਂ ਆਣਾਪੇਤ੍ਵਾ ਮਿਗੇਨ ਗਤਮਗ੍ਗਂ ਪਟਿਪਜ੍ਜਿ. ਰਥਂ ਵੇਗੇਨ ਗਚ੍ਛਨ੍ਤਂ ਪਰਿਸਾ ਅਨੁਬਨ੍ਧਿਤੁਂ ਨਾਸਕ੍ਖਿ. ਰਾਜਾ ਸਾਰਥਿਦੁਤਿਯੋ ਯਾਵ ਮਜ੍ਝਨ੍ਹਿਕਾ ਗਨ੍ਤ੍ਵਾ ਤਂ ਮਿਗਂ ਅਦਿਸ੍ਵਾ ਨਿਵਤ੍ਤਨ੍ਤੋ ਤਸ੍ਸ ਚੋਰਗਾਮਸ੍ਸ ਸਨ੍ਤਿਕੇ ਰਮਣੀਯਂ ਕਨ੍ਦਰਂ ਦਿਸ੍ਵਾ ਰਥਾ ਓਰੁਯ੍ਹ ਨ੍ਹਤ੍ਵਾ ਚ ਪਿਵਿਤ੍ਵਾ ਚ ਪਚ੍ਚੁਤ੍ਤਰਿ. ਅਥਸ੍ਸ ਸਾਰਥਿ ਰਥਸ੍ਸ ਉਤ੍ਤਰਤ੍ਥਰਣਂ ਓਤਾਰੇਤ੍ਵਾ ਸਯਨਂ ਰੁਕ੍ਖਚ੍ਛਾਯਾਯ ਪਞ੍ਞਪੇਸਿ, ਸੋ ਤਤ੍ਥ ਨਿਪਜ੍ਜਿ. ਸਾਰਥਿਪਿ ਤਸ੍ਸ ਪਾਦੇ ਸਮ੍ਬਾਹਨ੍ਤੋ ਨਿਸੀਦਿ. ਰਾਜਾ ਅਨ੍ਤਰਨ੍ਤਰਾ ਨਿਦ੍ਦਾਯਤਿ ਚੇਵ ਪਬੁਜ੍ਝਤਿ ਚ.

ਚੋਰਗਾਮਵਾਸਿਨੋ ਚੋਰਾਪਿ ਰਞ੍ਞੋ ਆਰਕ੍ਖਣਤ੍ਥਾਯ ਅਰਞ੍ਞਮੇਵ ਪਵਿਸਿਂਸੁ. ਚੋਰਗਾਮਕੇ ਸਤ੍ਤਿਗੁਮ੍ਬੋ ਚੇਵ ਭਤ੍ਤਰਨ੍ਧਕੋ ਪਤਿਕੋਲਮ੍ਬੋ ਨਾਮੇਕੋ ਪੁਰਿਸੋ ਚਾਤਿ ਦ੍ਵੇਵ ਓਹੀਯਿਂਸੁ. ਤਸ੍ਮਿਂ ਖਣੇ ਸਤ੍ਤਿਗੁਮ੍ਬੋ ਗਾਮਕਾ ਨਿਕ੍ਖਮਿਤ੍ਵਾ ਰਾਜਾਨਂ ਦਿਸ੍ਵਾ ‘‘ਇਮਂ ਨਿਦ੍ਦਾਯਮਾਨਮੇਵ ਮਾਰੇਤ੍ਵਾ ਆਭਰਣਾਨਿ ਗਹੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਪਤਿਕੋਲਮ੍ਬਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਕਾਰਣਂ ਆਰੋਚੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਪਞ੍ਚ ਗਾਥਾ ਅਭਾਸਿ –

੧੫੯.

‘‘ਮਿਗਲੁਦ੍ਦੋ ਮਹਾਰਾਜਾ, ਪਞ੍ਚਾਲਾਨਂ ਰਥੇਸਭੋ;

ਨਿਕ੍ਖਨ੍ਤੋ ਸਹ ਸੇਨਾਯ, ਓਗਣੋ ਵਨਮਾਗਮਾ.

੧੬੦.

‘‘ਤਤ੍ਥਦ੍ਦਸਾ ਅਰਞ੍ਞਸ੍ਮਿਂ, ਤਕ੍ਕਰਾਨਂ ਕੁਟਿਂ ਕਤਂ;

ਤਸ੍ਸਾ ਕੁਟਿਯਾ ਨਿਕ੍ਖਮ੍ਮ, ਸੁਵੋ ਲੁਦ੍ਦਾਨਿ ਭਾਸਤਿ.

੧੬੧.

‘‘ਸਮ੍ਪਨ੍ਨਵਾਹਨੋ ਪੋਸੋ, ਯੁਵਾ ਸਮ੍ਮਟ੍ਠਕੁਣ੍ਡਲੋ;

ਸੋਭਤਿ ਲੋਹਿਤੁਣ੍ਹੀਸੋ, ਦਿਵਾ ਸੂਰਿਯੋਵ ਭਾਸਤਿ.

੧੬੨.

‘‘ਮਜ੍ਝਨ੍ਹਿਕੇ ਸਮ੍ਪਤਿਕੇ, ਸੁਤ੍ਤੋ ਰਾਜਾ ਸਸਾਰਥਿ;

ਹਨ੍ਦਸ੍ਸਾਭਰਣਂ ਸਬ੍ਬਂ, ਗਣ੍ਹਾਮ ਸਾਹਸਾ ਮਯਂ.

੧੬੩.

‘‘ਨਿਸੀਥੇਪਿ ਰਹੋਦਾਨਿ, ਸੁਤ੍ਤੋ ਰਾਜਾ ਸਸਾਰਥਿ;

ਆਦਾਯ ਵਤ੍ਥਂ ਮਣਿਕੁਣ੍ਡਲਞ੍ਚ, ਹਨ੍ਤ੍ਵਾਨ ਸਾਖਾਹਿ ਅਵਤ੍ਥਰਾਮਾ’’ਤਿ.

ਤਤ੍ਥ ਮਿਗਲੁਦ੍ਦੋਤਿ ਲੁਦ੍ਦੋ ਵਿਯ ਮਿਗਾਨਂ ਗਵੇਸਨਤੋ ‘‘ਮਿਗਲੁਦ੍ਦੋ’’ਤਿ ਵੁਤ੍ਤੋ. ਓਗਣੋਤਿ ਗਣਾ ਓਹੀਨੋ ਪਰਿਹੀਨੋ ਹੁਤ੍ਵਾ. ਤਕ੍ਕਰਾਨਂ ਕੁਟਿਂ ਕਤਨ੍ਤਿ ਸੋ ਰਾਜਾ ਤਤ੍ਥ ਅਰਞ੍ਞੇ ਚੋਰਾਨਂ ਵਸਨਤ੍ਥਾਯ ਕਤਂ ਗਾਮਕਂ ਅਦ੍ਦਸ. ਤਸ੍ਸਾਤਿ ਤਤੋ ਚੋਰਕੁਟਿਤੋ. ਲੁਦ੍ਦਾਨਿ ਭਾਸਤੀਤਿ ਪਤਿਕੋਲਮ੍ਬੇਨ ਸਦ੍ਧਿਂ ਦਾਰੁਣਾਨਿ ਵਚਨਾਨਿ ਕਥੇਤਿ. ਸਮ੍ਪਨ੍ਨਵਾਹਨੋਤਿ ਸਮ੍ਪਨ੍ਨਅਸ੍ਸਵਾਹਨੋ. ਲੋਹਿਤੁਣ੍ਹੀਸੋਤਿ ਰਤ੍ਤੇਨ ਉਣ੍ਹੀਸਪਟ੍ਟੇਨ ਸਮਨ੍ਨਾਗਤੋ. ਸਮ੍ਪਤਿਕੇਤਿ ਸਮ੍ਪਤਿ ਇਦਾਨਿ, ਏਵਰੂਪੇ ਠਿਤਮਜ੍ਝਨ੍ਹਿਕਕਾਲੇਤਿ ਅਤ੍ਥੋ. ਸਾਹਸਾਤਿ ਸਾਹਸੇਨ ਪਸਯ੍ਹਾਕਾਰਂ ਕਤ੍ਵਾ ਗਣ੍ਹਾਮਾਤਿ ਵਦਤਿ. ਨਿਸੀਥੇਪਿ ਰਹੋਦਾਨੀਤਿ ਨਿਸੀਥੇਪਿ ਇਦਾਨਿਪਿ ਰਹੋ. ਇਦਂ ਵਦਤਿ – ਯਥਾ ਨਿਸੀਥੇ ਅਡ੍ਢਰਤ੍ਤਸਮਯੇ ਮਨੁਸ੍ਸਾ ਕਿਲਨ੍ਤਾ ਸਯਨ੍ਤਿ, ਰਹੋ ਨਾਮ ਹੋਤਿ, ਇਦਾਨਿ ਠਿਤਮਜ੍ਝਨ੍ਹਿਕੇਪਿ ਕਾਲੇ ਤਥੇਵਾਤਿ. ਹਨ੍ਤ੍ਵਾਨਾਤਿ ਰਾਜਾਨਂ ਮਾਰੇਤ੍ਵਾ ਵਤ੍ਥਾਭਰਣਾਨਿਸ੍ਸ ਗਹੇਤ੍ਵਾ ਅਥ ਨਂ ਪਾਦੇ ਗਹੇਤ੍ਵਾ ਕਡ੍ਢਿਤ੍ਵਾ ਏਕਮਨ੍ਤੇ ਸਾਖਾਹਿ ਪਟਿਚ੍ਛਾਦੇਮਾਤਿ.

ਇਤਿ ਸੋ ਵੇਗੇਨ ਸਕਿਂ ਨਿਕ੍ਖਮਤਿ, ਸਕਿਂ ਪਤਿਕੋਲਮ੍ਬਸ੍ਸ ਸਨ੍ਤਿਕਂ ਗਚ੍ਛਤਿ. ਸੋ ਤਸ੍ਸ ਵਚਨਂ ਸੁਤ੍ਵਾ ਨਿਕ੍ਖਮਿਤ੍ਵਾ ਓਲੋਕੇਨ੍ਤੋ ਰਾਜਭਾਵਂ ਞਤ੍ਵਾ ਭੀਤੋ ਗਾਥਮਾਹ –

੧੬੪.

‘‘ਕਿਨ੍ਨੁ ਉਮ੍ਮਤ੍ਤਰੂਪੋਵ, ਸਤ੍ਤਿਗੁਮ੍ਬ ਪਭਾਸਸਿ;

ਦੁਰਾਸਦਾ ਹਿ ਰਾਜਾਨੋ, ਅਗ੍ਗਿ ਪਜ੍ਜਲਿਤੋ ਯਥਾ’’ਤਿ.

ਅਥ ਨਂ ਸੁਵੋ ਗਾਥਾਯ ਅਜ੍ਝਭਾਸਿ –

੧੬੫.

‘‘ਅਥ ਤ੍ਵਂ ਪਤਿਕੋਲਮ੍ਬ, ਮਤ੍ਤੋ ਥੁਲ੍ਲਾਨਿ ਗਜ੍ਜਸਿ;

ਮਾਤਰਿ ਮਯ੍ਹ ਨਗ੍ਗਾਯ, ਕਿਨ੍ਨੁ ਤ੍ਵਂ ਵਿਜਿਗੁਚ੍ਛਸੇ’’ਤਿ.

ਤਤ੍ਥ ਅਥ ਤ੍ਵਨ੍ਤਿ ਨਨੁ ਤ੍ਵਂ. ਮਤ੍ਤੋਤਿ ਚੋਰਾਨਂ ਉਚ੍ਛਿਟ੍ਠਸੁਰਂ ਲਭਿਤ੍ਵਾ ਤਾਯ ਮਤ੍ਤੋ ਹੁਤ੍ਵਾ ਪੁਬ੍ਬੇ ਮਹਾਗਜ੍ਜਿਤਾਨਿ ਗਜ੍ਜਸਿ. ਮਾਤਰੀਤਿ ਚੋਰਜੇਟ੍ਠਕਸ੍ਸ ਭਰਿਯਂ ਸਨ੍ਧਾਯਾਹ. ਸਾ ਕਿਰ ਤਦਾ ਸਾਖਾਭਙ੍ਗਂ ਨਿਵਾਸੇਤ੍ਵਾ ਚਰਤਿ. ਵਿਜਿਗੁਚ੍ਛਸੇਤਿ ਮਮ ਮਾਤਰਿ ਨਗ੍ਗਾਯ ਕਿਨ੍ਨੁ ਤ੍ਵਂ ਇਦਾਨਿ ਚੋਰਕਮ੍ਮਂ ਜਿਗੁਚ੍ਛਸਿ, ਕਾਤੁਂ ਨ ਇਚ੍ਛਸੀਤਿ.

ਰਾਜਾ ਪਬੁਜ੍ਝਿਤ੍ਵਾ ਤਸ੍ਸ ਤੇਨ ਸਦ੍ਧਿਂ ਮਨੁਸ੍ਸਭਾਸਾਯ ਕਥੇਨ੍ਤਸ੍ਸ ਵਚਨਂ ਸੁਤ੍ਵਾ ‘‘ਸਪ੍ਪਟਿਭਯਂ ਇਦਂ ਠਾਨ’’ਨ੍ਤਿ ਸਾਰਥਿਂ ਉਟ੍ਠਾਪੇਨ੍ਤੋ ਗਾਥਮਾਹ –

੧੬੬.

‘‘ਉਟ੍ਠੇਹਿ ਸਮ੍ਮ ਤਰਮਾਨੋ, ਰਥਂ ਯੋਜੇਹਿ ਸਾਰਥਿ;

ਸਕੁਣੋ ਮੇ ਨ ਰੁਚ੍ਚਤਿ, ਅਞ੍ਞਂ ਗਚ੍ਛਾਮ ਅਸ੍ਸਮ’’ਨ੍ਤਿ.

ਸੋਪਿ ਸੀਘਂ ਉਟ੍ਠਹਿਤ੍ਵਾ ਰਥਂ ਯੋਜੇਤ੍ਵਾ ਗਾਥਮਾਹ –

੧੬੭.

‘‘ਯੁਤ੍ਤੋ ਰਥੋ ਮਹਾਰਾਜ, ਯੁਤ੍ਤੋ ਚ ਬਲਵਾਹਨੋ;

ਅਧਿਤਿਟ੍ਠ ਮਹਾਰਾਜ, ਅਞ੍ਞਂ ਗਚ੍ਛਾਮ ਅਸ੍ਸਮ’’ਨ੍ਤਿ.

ਤਤ੍ਥ ਬਲਵਾਹਨੋਤਿ ਬਲਵਵਾਹਨੋ, ਮਹਾਥਾਮਅਸ੍ਸਸਮ੍ਪਨ੍ਨੋਤਿ ਅਤ੍ਥੋ. ਅਧਿਤਿਟ੍ਠਾਤਿ ਅਭਿਰੁਹ.

ਅਭਿਰੁਲ਼੍ਹਮਤ੍ਤੇਯੇਵ ਚ ਤਸ੍ਮਿਂ ਸਿਨ੍ਧਵਾ ਵਾਤਵੇਗੇਨ ਪਕ੍ਖਨ੍ਦਿਂਸੁ. ਸਤ੍ਤਿਗੁਮ੍ਬੋ ਰਥਂ ਗਚ੍ਛਨ੍ਤਂ ਦਿਸ੍ਵਾ ਸਂਵੇਗਪ੍ਪਤ੍ਤੋ ਦ੍ਵੇ ਗਾਥਾ ਅਭਾਸਿ –

੧੬੮.

‘‘ਕੋ ਨੁਮੇਵ ਗਤਾ ਸਬ੍ਬੇ, ਯੇ ਅਸ੍ਮਿਂ ਪਰਿਚਾਰਕਾ;

ਏਸ ਗਚ੍ਛਤਿ ਪਞ੍ਚਾਲੋ, ਮੁਤ੍ਤੋ ਤੇਸਂ ਅਦਸ੍ਸਨਾ.

੧੬੯.

‘‘ਕੋਦਣ੍ਡਕਾਨਿ ਗਣ੍ਹਥ, ਸਤ੍ਤਿਯੋ ਤੋਮਰਾਨਿ ਚ;

ਏਸ ਗਚ੍ਛਤਿ ਪਞ੍ਚਾਲੋ, ਮਾ ਵੋ ਮੁਞ੍ਚਿਤ੍ਥ ਜੀਵਤ’’ਨ੍ਤਿ.

ਤਤ੍ਥ ਕੋ ਨੁਮੇਤਿ ਕੁਹਿਂ ਨੁ ਇਮੇ. ਅਸ੍ਮਿਨ੍ਤਿ ਇਮਸ੍ਮਿਂ ਅਸ੍ਸਮੇ. ਪਰਿਚਾਰਕਾਤਿ ਚੋਰਾ. ਅਦਸ੍ਸਨਾਤਿ ਏਤੇਸਂ ਚੋਰਾਨਂ ਅਦਸ੍ਸਨੇਨ ਮੁਤ੍ਤੋ ਏਸ ਗਚ੍ਛਤੀਤਿ, ਏਤੇਸਂ ਹਤ੍ਥਤੋ ਮੁਤ੍ਤੋ ਹੁਤ੍ਵਾ ਏਸ ਅਦਸ੍ਸਨਂ ਗਚ੍ਛਤੀਤਿਪਿ ਅਤ੍ਥੋ. ਕੋਦਣ੍ਡਕਾਨੀਤਿ ਧਨੂਨਿ. ਜੀਵਤਨ੍ਤਿ ਤੁਮ੍ਹਾਕਂ ਜੀਵਨ੍ਤਾਨਂ ਮਾ ਮੁਞ੍ਚਿਤ੍ਥ, ਆਵੁਧਹਤ੍ਥਾ ਧਾਵਿਤ੍ਵਾ ਗਣ੍ਹਥ ਨਨ੍ਤਿ.

ਏਵਂ ਤਸ੍ਸ ਵਿਰਵਿਤ੍ਵਾ ਅਪਰਾਪਰਂ ਧਾਵਨ੍ਤਸ੍ਸੇਵ ਰਾਜਾ ਇਸੀਨਂ ਅਸ੍ਸਮਂ ਪਤ੍ਤੋ. ਤਸ੍ਮਿਂ ਖਣੇ ਇਸਯੋ ਫਲਾਫਲਤ੍ਥਾਯ ਗਤਾ. ਏਕੋ ਪੁਪ੍ਫਕਸੁਵੋਵ ਅਸ੍ਸਮਪਦੇ ਠਿਤੋ ਹੋਤਿ. ਸੋ ਰਾਜਾਨਂ ਦਿਸ੍ਵਾ ਪਚ੍ਚੁਗ੍ਗਮਨਂ ਕਤ੍ਵਾ ਪਟਿਸਨ੍ਥਾਰਮਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਚਤਸ੍ਸੋ ਗਾਥਾ ਅਭਾਸਿ –

੧੭੦.

‘‘ਅਥਾਪਰੋ ਪਟਿਨਨ੍ਦਿਤ੍ਥ, ਸੁਵੋ ਲੋਹਿਤਤੁਣ੍ਡਕੋ;

ਸ੍ਵਾਗਤਂ ਤੇ ਮਹਾਰਾਜ, ਅਥੋ ਤੇ ਅਦੁਰਾਗਤਂ;

ਇਸ੍ਸਰੋਸਿ ਅਨੁਪ੍ਪਤ੍ਤੋ, ਯਂ ਇਧਤ੍ਥਿ ਪਵੇਦਯ.

੧੭੧.

‘‘ਤਿਣ੍ਡੁਕਾਨਿ ਪਿਯਾਲਾਨਿ, ਮਧੁਕੇ ਕਾਸੁਮਾਰਿਯੋ;

ਫਲਾਨਿ ਖੁਦ੍ਦਕਪ੍ਪਾਨਿ, ਭੁਞ੍ਜ ਰਾਜ ਵਰਂ ਵਰਂ.

੧੭੨.

‘‘ਇਦਮ੍ਪਿ ਪਾਨੀਯਂ ਸੀਤਂ, ਆਭਤਂ ਗਿਰਿਗਬ੍ਭਰਾ;

ਤਤੋ ਪਿਵ ਮਹਾਰਾਜ, ਸਚੇ ਤ੍ਵਂ ਅਭਿਕਙ੍ਖਸਿ.

੧੭੩.

‘‘ਅਰਞ੍ਞਂ ਉਞ੍ਛਾਯ ਗਤਾ, ਯੇ ਅਸ੍ਮਿਂ ਪਰਿਚਾਰਕਾ;

ਸਯਂ ਉਟ੍ਠਾਯ ਗਣ੍ਹਵ੍ਹੋ, ਹਤ੍ਥਾ ਮੇ ਨਤ੍ਥਿ ਦਾਤਵੇ’’ਤਿ.

ਤਤ੍ਥ ਪਟਿਨਨ੍ਦਿਤ੍ਥਾਤਿ ਰਾਜਾਨਂ ਦਿਸ੍ਵਾਵ ਤੁਸ੍ਸਿ. ਲੋਹਿਤਤੁਣ੍ਡਕੋਤਿ ਰਤ੍ਤਤੁਣ੍ਡੋ ਸੋਭਗ੍ਗਪ੍ਪਤ੍ਤੋ. ਮਧੁਕੇਤਿ ਮਧੁਕਫਲਾਨਿ. ਕਾਸੁਮਾਰਿਯੋਤਿ ਏਵਂਨਾਮਕਾਨਿ ਫਲਾਨਿ, ਕਾਰਫਲਾਨਿ ਵਾ. ਤਤੋ ਪਿਵਾਤਿ ਤਤੋ ਪਾਨੀਯਮਾਲ਼ਤੋ ਗਹੇਤ੍ਵਾ ਪਾਨੀਯਂ ਪਿਵ. ਯੇ ਅਸ੍ਮਿਂ ਪਰਿਚਾਰਕਾਤਿ ਮਹਾਰਾਜ, ਯੇ ਇਮਸ੍ਮਿਂ ਅਸ੍ਸਮੇ ਵਿਚਰਣਕਾ ਇਸਯੋ, ਤੇ ਅਰਞ੍ਞਂ ਉਞ੍ਛਾਯ ਗਤਾ. ਗਣ੍ਹਵ੍ਹੋਤਿ ਫਲਾਫਲਾਨਿ ਗਣ੍ਹਥ. ਦਾਤਵੇਤਿ ਦਾਤੁਂ.

ਰਾਜਾ ਤਸ੍ਸ ਪਟਿਸਨ੍ਥਾਰੇ ਪਸੀਦਿਤ੍ਵਾ ਗਾਥਾਦ੍ਵਯਮਾਹ –

੧੭੪.

‘‘ਭਦ੍ਦਕੋ ਵਤਯਂ ਪਕ੍ਖੀ, ਦਿਜੋ ਪਰਮਧਮ੍ਮਿਕੋ;

ਅਥੇਸੋ ਇਤਰੋ ਪਕ੍ਖੀ, ਸੁਵੋ ਲੁਦ੍ਦਾਨਿ ਭਾਸਤਿ.

੧੭੫.

‘‘‘ਏਤਂ ਹਨਥ ਬਨ੍ਧਥ, ਮਾ ਵੋ ਮੁਞ੍ਚਿਤ੍ਥ ਜੀਵਤਂ’;

ਇਚ੍ਚੇਵਂ ਵਿਲਪਨ੍ਤਸ੍ਸ, ਸੋਤ੍ਥਿਂ ਪਤ੍ਤੋਸ੍ਮਿ ਅਸ੍ਸਮ’’ਨ੍ਤਿ.

ਤਤ੍ਥ ਇਤਰੋਤਿ ਚੋਰਕੁਟਿਯਂ ਸੁਵਕੋ. ਇਚ੍ਚੇਵਨ੍ਤਿ ਅਹਂ ਪਨ ਤਸ੍ਸ ਏਵਂ ਵਿਲਪਨ੍ਤਸ੍ਸੇਵ ਇਮਂ ਅਸ੍ਸਮਂ ਸੋਤ੍ਥਿਨਾ ਪਤ੍ਤੋ.

ਰਞ੍ਞੋ ਕਥਂ ਸੁਤ੍ਵਾ ਪੁਪ੍ਫਕੋ ਦ੍ਵੇ ਗਾਥਾ ਅਭਾਸਿ –

੧੭੬.

‘‘ਭਾਤਰੋਸ੍ਮ ਮਹਾਰਾਜ, ਸੋਦਰਿਯਾ ਏਕਮਾਤੁਕਾ;

ਏਕਰੁਕ੍ਖਸ੍ਮਿਂ ਸਂਵਡ੍ਢਾ, ਨਾਨਾਖੇਤ੍ਤਗਤਾ ਉਭੋ.

੧੭੭.

‘‘ਸਤ੍ਤਿਗੁਮ੍ਬੋ ਚ ਚੋਰਾਨਂ, ਅਹਞ੍ਚ ਇਸਿਨਂ ਇਧ;

ਅਸਤਂ ਸੋ, ਸਤਂ ਅਹਂ, ਤੇਨ ਧਮ੍ਮੇਨ ਨੋ ਵਿਨਾ’’ਤਿ.

ਤਤ੍ਥ ਭਾਤਰੋਸ੍ਮਾਤਿ ਮਹਾਰਾਜ, ਸੋ ਚ ਅਹਞ੍ਚ ਉਭੋ ਭਾਤਰੋ ਹੋਮ. ਚੋਰਾਨਨ੍ਤਿ ਸੋ ਚੋਰਾਨਂ ਸਨ੍ਤਿਕੇ ਸਂਵਡ੍ਢੋ, ਅਹਂ ਇਸੀਨਂ ਸਨ੍ਤਿਕੇ. ਅਸਤਂ ਸੋ, ਸਤਂ ਅਹਨ੍ਤਿ ਸੋ ਅਸਾਧੂਨਂ ਦੁਸ੍ਸੀਲਾਨਂ ਸਨ੍ਤਿਕਂ ਉਪਗਤੋ, ਅਹਂ ਸਾਧੂਨਂ ਸੀਲਵਨ੍ਤਾਨਂ. ਤੇਨ ਧਮ੍ਮੇਨ ਨੋ ਵਿਨਾਤਿ ਮਹਾਰਾਜ, ਤਂ ਸਤ੍ਤਿਗੁਮ੍ਬਂ ਚੋਰਾ ਚੋਰਧਮ੍ਮੇਨ ਚੋਰਕਿਰਿਯਾਯ ਵਿਨੇਸੁਂ, ਮਂ ਇਸਯੋ ਇਸਿਧਮ੍ਮੇਨ ਇਸਿਸੀਲਾਚਾਰੇਨ, ਤਸ੍ਮਾ ਸੋਪਿ ਤੇਨ ਚੋਰਧਮ੍ਮੇਨ ਨੋ ਵਿਨਾ ਹੋਤਿ, ਅਹਮ੍ਪਿ ਇਸਿਧਮ੍ਮੇਨ ਨੋ ਵਿਨਾ ਹੋਮੀਤਿ.

ਇਦਾਨਿ ਤਂ ਧਮ੍ਮਂ ਵਿਭਜਨ੍ਤੋ ਗਾਥਾਦ੍ਵਯਮਾਹ –

੧੭੮.

‘‘ਤਤ੍ਥ ਵਧੋ ਚ ਬਨ੍ਧੋ ਚ, ਨਿਕਤੀ ਵਞ੍ਚਨਾਨਿ ਚ;

ਆਲੋਪਾ ਸਾਹਸਾਕਾਰਾ, ਤਾਨਿ ਸੋ ਤਤ੍ਥ ਸਿਕ੍ਖਤਿ.

੧੭੯.

‘‘ਇਧ ਸਚ੍ਚਞ੍ਚ ਧਮ੍ਮੋ ਚ, ਅਹਿਂਸਾ ਸਂਯਮੋ ਦਮੋ;

ਆਸਨੂਦਕਦਾਯੀਨਂ, ਅਙ੍ਕੇ ਵਦ੍ਧੋਸ੍ਮਿ ਭਾਰਧਾ’’ਤਿ.

ਤਤ੍ਥ ਨਿਕਤੀਤਿ ਪਤਿਰੂਪਕੇਨ ਵਞ੍ਚਨਾ. ਵਞ੍ਚਨਾਨੀਤਿ ਉਜੁਕਵਞ੍ਚਨਾਨੇਵ. ਆਲੋਪਾਤਿ ਦਿਵਾ ਗਾਮਘਾਤਾ. ਸਾਹਸਾਕਾਰਾਤਿ ਗੇਹਂ ਪਵਿਸਿਤ੍ਵਾ ਮਰਣੇਨ ਤਜ੍ਜੇਤ੍ਵਾ ਸਾਹਸਿਕਕਮ੍ਮਕਰਣਾਨਿ. ਸਚ੍ਚਨ੍ਤਿ ਸਭਾਵੋ. ਧਮ੍ਮੋਤਿ ਸੁਚਰਿਤਧਮ੍ਮੋ. ਅਹਿਂਸਾਤਿ ਮੇਤ੍ਤਾਪੁਬ੍ਬਭਾਗੋ. ਸਂਯਮੋਤਿ ਸੀਲਸਂਯਮੋ. ਦਮੋਤਿ ਇਨ੍ਦ੍ਰਿਯਦਮਨਂ. ਆਸਨੂਦਕਦਾਯੀਨਨ੍ਤਿ ਅਬ੍ਭਾਗਤਾਨਂ ਆਸਨਞ੍ਚ ਉਦਕਞ੍ਚ ਦਾਨਸੀਲਾਨਂ. ਭਾਰਧਾਤਿ ਰਾਜਾਨਂ ਆਲਪਤਿ.

ਇਦਾਨਿ ਰਞ੍ਞੋ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੧੮੦.

‘‘ਯਂ ਯਞ੍ਹਿ ਰਾਜ ਭਜਤਿ, ਸਨ੍ਤਂ ਵਾ ਯਦਿ ਵਾ ਅਸਂ;

ਸੀਲਵਨ੍ਤਂ ਵਿਸੀਲਂ ਵਾ, ਵਸਂ ਤਸ੍ਸੇਵ ਗਚ੍ਛਤਿ.

੧੮੧.

‘‘ਯਾਦਿਸਂ ਕੁਰੁਤੇ ਮਿਤ੍ਤਂ, ਯਾਦਿਸਂ ਚੂਪਸੇਵਤਿ;

ਸੋਪਿ ਤਾਦਿਸਕੋ ਹੋਤਿ, ਸਹਵਾਸੋ ਹਿ ਤਾਦਿਸੋ.

੧੮੨.

‘‘ਸੇਵਮਾਨੋ ਸੇਵਮਾਨਂ, ਸਮ੍ਫੁਟ੍ਠੋ ਸਮ੍ਫੁਸਂ ਪਰਂ;

ਸਰੋ ਦਿਦ੍ਧੋ ਕਲਾਪਂਵ, ਅਲਿਤ੍ਤਮੁਪਲਿਮ੍ਪਤਿ;

ਉਪਲੇਪਭਯਾ ਧੀਰੋ, ਨੇਵ ਪਾਪਸਖਾ ਸਿਯਾ.

੧੮੩.

‘‘ਪੂਤਿਮਚ੍ਛਂ ਕੁਸਗ੍ਗੇਨ, ਯੋ ਨਰੋ ਉਪਨਯ੍ਹਤਿ;

ਕੁਸਾਪਿ ਪੂਤਿ ਵਾਯਨ੍ਤਿ, ਏਵਂ ਬਾਲੂਪਸੇਵਨਾ.

੧੮੪.

‘‘ਤਗਰਞ੍ਚ ਪਲਾਸੇਨ, ਯੋ ਨਰੋ ਉਪਨਯ੍ਹਤਿ;

ਪਤ੍ਤਾਪਿ ਸੁਰਭਿ ਵਾਯਨ੍ਤਿ, ਏਵਂ ਧੀਰੂਪਸੇਵਨਾ.

੧੮੫.

‘‘ਤਸ੍ਮਾ ਪਤ੍ਤਪੁਟਸ੍ਸੇਵ, ਞਤ੍ਵਾ ਸਮ੍ਪਾਕਮਤ੍ਤਨੋ;

ਅਸਨ੍ਤੇ ਨੋਪਸੇਵੇਯ੍ਯ, ਸਨ੍ਤੇ ਸੇਵੇਯ੍ਯ ਪਣ੍ਡਿਤੋ;

ਅਸਨ੍ਤੋ ਨਿਰਯਂ ਨੇਨ੍ਤਿ, ਸਨ੍ਤੋ ਪਾਪੇਨ੍ਤਿ ਸੁਗ੍ਗਤਿ’’ਨ੍ਤਿ.

ਤਤ੍ਥ ਸਨ੍ਤਂ ਵਾ ਯਦਿ ਵਾ ਅਸਨ੍ਤਿ ਸਪ੍ਪੁਰਿਸਂ ਵਾ ਅਸਪ੍ਪੁਰਿਸਂ ਵਾ. ਸੇਵਮਾਨੋ ਸੇਵਮਾਨਨ੍ਤਿ ਸੇਵਿਯਮਾਨੋ ਆਚਰਿਯੋ ਸੇਵਮਾਨਂ ਅਨ੍ਤੇਵਾਸਿਕਂ. ਸਮ੍ਫੁਟ੍ਠੋਤਿ ਅਨ੍ਤੇਵਾਸਿਨਾ ਵਾ ਫੁਟ੍ਠੋ ਆਚਰਿਯੋ. ਸਮ੍ਫੁਸਂ ਪਰਨ੍ਤਿ ਪਰਂ ਆਚਰਿਯਂ ਸਮ੍ਫੁਸਨ੍ਤੋ ਅਨ੍ਤੇਵਾਸੀ ਵਾ. ਅਲਿਤ੍ਤਨ੍ਤਿ ਤਂ ਅਨ੍ਤੇਵਾਸਿਕਂ ਪਾਪਧਮ੍ਮੇਨ ਅਲਿਤ੍ਤਂ ਸੋ ਆਚਰਿਯੋ ਵਿਸਦਿਦ੍ਧੋ ਸਰੋ ਸੇਸਂ ਸਰਕਲਾਪਂ ਵਿਯ ਲਿਮ੍ਪਤਿ. ਏਵਂ ਬਾਲੂਪਸੇਵਨਾਤਿ ਬਾਲੂਪਸੇਵੀ ਹਿ ਪੂਤਿਮਚ੍ਛਂ ਉਪਨਯ੍ਹਨਕੁਸਗ੍ਗਂ ਵਿਯ ਹੋਤਿ, ਪਾਪਕਮ੍ਮਂ ਅਕਰੋਨ੍ਤੋਪਿ ਅਵਣ੍ਣਂ ਅਕਿਤ੍ਤਿਂ ਲਭਤਿ. ਧੀਰੂਪਸੇਵਨਾਤਿ ਧੀਰੂਪਸੇਵੀ ਪੁਗ੍ਗਲੋ ਤਗਰਾਦਿਗਨ੍ਧਜਾਤਿਪਲਿਵੇਠਨਪਤ੍ਤਂ ਵਿਯ ਹੋਤਿ, ਪਣ੍ਡਿਤੋ ਭਵਿਤੁਂ ਅਸਕ੍ਕੋਨ੍ਤੋਪਿ ਕਲ੍ਯਾਣਮਿਤ੍ਤਸੇਵੀ ਗੁਣਕਿਤ੍ਤਿਂ ਲਭਤਿ. ਪਤ੍ਤਪੁਟਸ੍ਸੇਵਾਤਿ ਦੁਗ੍ਗਨ੍ਧਸੁਗਨ੍ਧਪਲਿਵੇਠਨਪਣ੍ਣਸ੍ਸੇਵ. ਸਮ੍ਪਾਕਮਤ੍ਤਨੋਤਿ ਕਲ੍ਯਾਣਮਿਤ੍ਤਸਂਸਗ੍ਗਵਸੇਨ ਅਤ੍ਤਨੋ ਪਰਿਪਾਕਂ ਪਰਿਭਾਵਨਂ ਞਤ੍ਵਾਤਿ ਅਤ੍ਥੋ. ਪਾਪੇਨ੍ਤਿ ਸੁਗ੍ਗਤਿਨ੍ਤਿ ਸਨ੍ਤੋ ਸਮ੍ਮਾਦਿਟ੍ਠਿਕਾ ਅਤ੍ਤਾਨਂ ਨਿਸ੍ਸਿਤੇ ਸਤ੍ਤੇ ਸਗ੍ਗਮੇਵ ਪਾਪੇਨ੍ਤੀਤਿ ਦੇਸਨਂ ਯਥਾਨੁਸਨ੍ਧਿਮੇਵ ਪਾਪੇਸਿ.

ਰਾਜਾ ਤਸ੍ਸ ਧਮ੍ਮਕਥਾਯ ਪਸੀਦਿ, ਇਸਿਗਣੋਪਿ ਆਗਤੋ. ਰਾਜਾ ਇਸਯੋ ਵਨ੍ਦਿਤ੍ਵਾ ‘‘ਭਨ੍ਤੇ, ਮਂ ਅਨੁਕਮ੍ਪਮਾਨਾ ਮਮ ਵਸਨਟ੍ਠਾਨੇ ਵਸਥਾ’’ਤਿ ਵਤ੍ਵਾ ਤੇਸਂ ਪਟਿਞ੍ਞਂ ਗਹੇਤ੍ਵਾ ਨਗਰਂ ਗਨ੍ਤ੍ਵਾ ਸੁਵਾਨਂ ਅਭਯਂ ਅਦਾਸਿ. ਇਸਯੋਪਿ ਤਤ੍ਥ ਅਗਮਂਸੁ. ਰਾਜਾ ਇਸਿਗਣਂ ਉਯ੍ਯਾਨੇ ਵਸਾਪੇਨ੍ਤੋ ਯਾਵਜੀਵਂ ਉਪਟ੍ਠਹਿਤ੍ਵਾ ਸਗ੍ਗਪੁਰਂ ਪੂਰੇਸਿ. ਅਥਸ੍ਸ ਪੁਤ੍ਤੋਪਿ ਛਤ੍ਤਂ ਉਸ੍ਸਾਪੇਨ੍ਤੋ ਇਸਿਗਣਂ ਪਟਿਜਗ੍ਗਿਯੇਵਾਤਿ ਤਸ੍ਮਿਂ ਕੁਲਪਰਿਵਟ੍ਟੇ ਸਤ੍ਤ ਰਾਜਾਨੋ ਇਸਿਗਣਸ੍ਸ ਦਾਨਂ ਪਵਤ੍ਤਯਿਂਸੁ. ਮਹਾਸਤ੍ਤੋ ਅਰਞ੍ਞੇ ਵਸਨ੍ਤੋਯੇਵ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇਪਿ ਦੇਵਦਤ੍ਤੋ ਪਾਪੋ ਪਾਪਪਰਿਵਾਰੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਤ੍ਤਿਗੁਮ੍ਬੋ ਦੇਵਦਤ੍ਤੋ ਅਹੋਸਿ, ਚੋਰਾ ਦੇਵਦਤ੍ਤਪਰਿਸਾ, ਰਾਜਾ ਆਨਨ੍ਦੋ, ਇਸਿਗਣਾ ਬੁਦ੍ਧਪਰਿਸਾ, ਪੁਪ੍ਫਕਸੁਵੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਤ੍ਤਿਗੁਮ੍ਬਜਾਤਕਵਣ੍ਣਨਾ ਸਤ੍ਤਮਾ.

[੫੦੪] ੮. ਭਲ੍ਲਾਤਿਯਜਾਤਕਵਣ੍ਣਨਾ

ਭਲ੍ਲਾਤਿਯੋ ਨਾਮ ਅਹੋਸਿ ਰਾਜਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਲ੍ਲਿਕਂ ਦੇਵਿਂ ਆਰਬ੍ਭ ਕਥੇਸਿ. ਤਸ੍ਸਾ ਕਿਰ ਏਕਦਿਵਸਂ ਰਞ੍ਞਾ ਸਦ੍ਧਿਂ ਸਯਨਂ ਨਿਸ੍ਸਾਯ ਕਲਹੋ ਅਹੋਸਿ. ਰਾਜਾ ਕੁਜ੍ਝਿਤ੍ਵਾ ਨਂ ਨ ਓਲੋਕੇਸਿ. ਸਾ ਚਿਨ੍ਤੇਸਿ ‘‘ਨਨੁ ਤਥਾਗਤੋ ਰਞ੍ਞੋ ਮਯਿ ਕੁਦ੍ਧਭਾਵਂ ਨ ਜਾਨਾਤੀ’’ਤਿ. ਸਤ੍ਥਾ ਤਂ ਕਾਰਣਂ ਞਤ੍ਵਾ ਪੁਨਦਿਵਸੇ ਭਿਕ੍ਖੁਸਙ੍ਘਪਰਿਵੁਤੋ ਸਾਵਤ੍ਥਿਂ ਪਿਣ੍ਡਾਯ ਪਵਿਸਿਤ੍ਵਾ ਰਞ੍ਞੋ ਗੇਹਦ੍ਵਾਰਂ ਗਤੋ. ਰਾਜਾ ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਂ ਗਹੇਤ੍ਵਾ ਸਤ੍ਥਾਰਂ ਪਾਸਾਦਂ ਆਰੋਪੇਤ੍ਵਾ ਪਟਿਪਾਟਿਯਾ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਦਕ੍ਖਿਣੋਦਕਂ ਦਤ੍ਵਾ ਪਣੀਤੇਨਾਹਾਰੇਨ ਪਰਿਵਿਸਿਤ੍ਵਾ ਭਤ੍ਤਕਿਚ੍ਚਾਵਸਾਨੇ ਏਕਮਨ੍ਤਂ ਨਿਸੀਦਿ. ਸਤ੍ਥਾ ‘‘ਕਿਂ ਨੁ ਖੋ, ਮਹਾਰਾਜ, ਮਲ੍ਲਿਕਾ ਨ ਪਞ੍ਞਾਯਤੀ’’ਤਿ ਪੁਚ੍ਛਿਤ੍ਵਾ ‘‘ਅਤ੍ਤਨੋ ਸੁਖਮਦਮਤ੍ਤਤਾਯਾ’’ਤਿ ਵੁਤ੍ਤੇ ‘‘ਨਨੁ, ਮਹਾਰਾਜ, ਤ੍ਵਂ ਪੁਬ੍ਬੇ ਕਿਨ੍ਨਰਯੋਨਿਯਂ ਨਿਬ੍ਬਤ੍ਤਿਤ੍ਵਾ ਏਕਰਤ੍ਤਿਂ ਕਿਨ੍ਨਰਿਯਾ ਵਿਨਾ ਹੁਤ੍ਵਾ ਸਤ੍ਤ ਵਸ੍ਸਸਤਾਨਿ ਪਰਿਦੇਵਮਾਨੋ ਵਿਚਰੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਭਲ੍ਲਾਤਿਯੋ ਨਾਮ ਰਾਜਾ ਰਜ੍ਜਂ ਕਾਰੇਨ੍ਤੋ ‘‘ਅਙ੍ਗਾਰਪਕ੍ਕਮਿਗਮਂਸਂ ਖਾਦਿਸ੍ਸਾਮੀ’’ਤਿ ਰਜ੍ਜਂ ਅਮਚ੍ਚਾਨਂ ਨਿਯ੍ਯਾਦੇਤ੍ਵਾ ਸਨ੍ਨਦ੍ਧਪਞ੍ਚਾਵੁਧੋ ਸੁਸਿਕ੍ਖਿਤਕੋਲੇਯ੍ਯਕਸੁਣਖਗਣਪਰਿਵੁਤੋ ਨਗਰਾ ਨਿਕ੍ਖਮਿਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਅਨੁਗਙ੍ਗਂ ਗਨ੍ਤ੍ਵਾ ਉਪਰਿ ਅਭਿਰੁਹਿਤੁਂ ਅਸਕ੍ਕੋਨ੍ਤੋ ਏਕਂ ਗਙ੍ਗਂ ਓਤਿਣ੍ਣਨਦਿਂ ਦਿਸ੍ਵਾ ਤਦਨੁਸਾਰੇਨ ਗਚ੍ਛਨ੍ਤੋ ਮਿਗਸੂਕਰਾਦਯੋ ਵਧਿਤ੍ਵਾ ਅਙ੍ਗਾਰਪਕ੍ਕਮਂਸਂ ਖਾਦਨ੍ਤੋ ਉਚ੍ਚਟ੍ਠਾਨਂ ਅਭਿਰੁਹਿ. ਤਤ੍ਥ ਰਮਣੀਯਾ ਨਦਿਕਾ ਪਰਿਪੁਣ੍ਣਕਾਲੇ ਥਨਪਮਾਣੋਦਕਾ ਹੁਤ੍ਵਾ ਸਨ੍ਦਤਿ, ਅਞ੍ਞਦਾ ਜਣ੍ਣੁਕਪਮਾਣੋਦਕਾ ਹੋਤਿ. ਤਤ੍ਥ ਨਾਨਪ੍ਪਕਾਰਕਾ ਮਚ੍ਛਕਚ੍ਛਪਾ ਵਿਚਰਨ੍ਤਿ. ਉਦਕਪਰਿਯਨ੍ਤੇ ਰਜਤਪਟ੍ਟਵਣ੍ਣਵਾਲੁਕਾ ਉਭੋਸੁ ਤੀਰੇਸੁ ਨਾਨਾਪੁਪ੍ਫਫਲਭਰਿਤਵਿਨਮਿਤਾ ਰੁਕ੍ਖਾ ਪੁਪ੍ਫਫਲਰਸਮਤ੍ਤੇਹਿ ਨਾਨਾਵਿਹਙ੍ਗਮਭਮਰਗਣੇਹਿ ਸਮ੍ਪਰਿਕਿਣ੍ਣਾ ਵਿਵਿਧਮਿਗਸਙ੍ਘਨਿਸੇਵਿਤਾ ਸੀਤਚ੍ਛਾਯਾ. ਏਵਂ ਰਮਣੀਯਾਯ ਹੇਮਵਤਨਦਿਯਾ ਤੀਰੇ ਦ੍ਵੇ ਕਿਨ੍ਨਰਾ ਅਞ੍ਞਮਞ੍ਞਂ ਆਲਿਙ੍ਗਿਤ੍ਵਾ ਪਰਿਚੁਮ੍ਬਿਤ੍ਵਾ ਨਾਨਪ੍ਪਕਾਰੇਹਿ ਪਰਿਦੇਵਨ੍ਤਾ ਰੋਦਨ੍ਤਿ.

ਰਾਜਾ ਤਸ੍ਸਾ ਨਦਿਯਾ ਤੀਰੇਨ ਗਨ੍ਧਮਾਦਨਂ ਅਭਿਰੁਹਨ੍ਤੋ ਤੇ ਕਿਨ੍ਨਰੇ ਦਿਸ੍ਵਾ ‘‘ਕਿਂ ਨੁ ਖੋ ਏਤੇ ਏਵਂ ਪਰਿਦੇਵਨ੍ਤਿ, ਪੁਚ੍ਛਿਸ੍ਸਾਮਿ ਨੇ’’ਤਿ ਚਿਨ੍ਤੇਤ੍ਵਾ ਸੁਨਖੇ ਓਲੋਕੇਤ੍ਵਾ ਅਚ੍ਛਰਂ ਪਹਰਿ. ਸੁਸਿਕ੍ਖਿਤਕੋਲੇਯ੍ਯਕਸੁਨਖਾ ਤਾਯ ਸਞ੍ਞਾਯ ਗੁਮ੍ਬਂ ਪਵਿਸਿਤ੍ਵਾ ਉਰੇਨ ਨਿਪਜ੍ਜਿਂਸੁ. ਸੋ ਤੇਸਂ ਪਟਿਸਲ੍ਲੀਨਭਾਵਂ ਞਤ੍ਵਾ ਧਨੁਕਲਾਪਞ੍ਚੇਵ ਸੇਸਾਵੁਧਾਨਿ ਚ ਰੁਕ੍ਖਂ ਨਿਸ੍ਸਾਯ ਠਪੇਤ੍ਵਾ ਪਦਸਦ੍ਦਂ ਅਕਰੋਨ੍ਤੋ ਸਣਿਕਂ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ‘‘ਕਿਂਕਾਰਣਾ ਤੁਮ੍ਹੇ ਰੋਦਥਾ’’ਤਿ ਕਿਨ੍ਨਰੇ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਤਿਸ੍ਸੋ ਗਾਥਾ ਅਭਾਸਿ –

੧੮੬.

‘‘ਭਲ੍ਲਾਤਿਯੋ ਨਾਮ ਅਹੋਸਿ ਰਾਜਾ, ਰਟ੍ਠਂ ਪਹਾਯ ਮਿਗਵਂ ਅਚਾਰਿ ਸੋ;

ਅਗਮਾ ਗਿਰਿਵਰਂ ਗਨ੍ਧਮਾਦਨਂ, ਸੁਪੁਪ੍ਫਿਤਂ ਕਿਮ੍ਪੁਰਿਸਾਨੁਚਿਣ੍ਣਂ.

੧੮੭.

‘‘ਸਾਲ਼ੂਰਸਙ੍ਘਞ੍ਚ ਨਿਸੇਧਯਿਤ੍ਵਾ, ਧਨੁਂ ਕਲਾਪਞ੍ਚ ਸੋ ਨਿਕ੍ਖਿਪਿਤ੍ਵਾ;

ਉਪਾਗਮਿ ਵਚਨਂ ਵਤ੍ਤੁਕਾਮੋ, ਯਤ੍ਥਟ੍ਠਿਤਾ ਕਿਮ੍ਪੁਰਿਸਾ ਅਹੇਸੁਂ.

੧੮੮.

‘‘ਹਿਮਚ੍ਚਯੇ ਹੇਮਵਤਾਯ ਤੀਰੇ, ਕਿਮਿਧਟ੍ਠਿਤਾ ਮਨ੍ਤਯਵ੍ਹੋ ਅਭਿਣ੍ਹਂ;

ਪੁਚ੍ਛਾਮਿ ਵੋ ਮਾਨੁਸਦੇਹਵਣ੍ਣੇ, ਕਥਂ ਵੋ ਜਾਨਨ੍ਤਿ ਮਨੁਸ੍ਸਲੋਕੇ’’ਤਿ.

ਤਤ੍ਥ ਸਾਲ਼ੂਰਸਙ੍ਘਨ੍ਤਿ ਸੁਨਖਗਣਂ. ਹਿਮਚ੍ਚਯੇਤਿ ਚਤੁਨ੍ਨਂ ਹੇਮਨ੍ਤਮਾਸਾਨਂ ਅਤਿਕ੍ਕਮੇ. ਹੇਮਵਤਾਯਾਤਿ ਇਮਿਸ੍ਸਾ ਹੇਮਵਤਾਯ ਨਦਿਯਾ ਤੀਰੇ.

ਰਞ੍ਞੋ ਵਚਨਂ ਸੁਤ੍ਵਾ ਕਿਨ੍ਨਰੋ ਤੁਣ੍ਹੀ ਅਹੋਸਿ, ਕਿਨ੍ਨਰੀ ਪਨ ਰਞ੍ਞਾ ਸਦ੍ਧਿਂ ਸਲ੍ਲਪਿ –

੧੮੯.

‘‘ਮਲ੍ਲਂ ਗਿਰਿਂ ਪਣ੍ਡਰਕਂ ਤਿਕੂਟਂ, ਸੀਤੋਦਕਾ ਅਨੁਵਿਚਰਾਮ ਨਜ੍ਜੋ;

ਮਿਗਾ ਮਨੁਸ੍ਸਾਵ ਨਿਭਾਸਵਣ੍ਣਾ, ਜਾਨਨ੍ਤਿ ਨੋ ਕਿਮ੍ਪੁਰਿਸਾਤਿ ਲੁਦ੍ਦਾ’’ਤਿ.

ਤਤ੍ਥ ਮਲ੍ਲਂ ਗਿਰਿਨ੍ਤਿ ਸਮ੍ਮ ਲੁਦ੍ਦਕ, ਮਯਂ ਇਮਂ ਮਲ੍ਲਗਿਰਿਞ੍ਚ ਪਣ੍ਡਰਕਞ੍ਚ ਤਿਕੂਟਞ੍ਚ ਇਮਾ ਚ ਨਜ੍ਜੋ ਅਨੁਵਿਚਰਾਮ. ‘‘ਮਾਲਾਗਿਰਿ’’ਨ੍ਤਿਪਿ ਪਾਠੋ. ਨਿਭਾਸਵਣ੍ਣਾਤਿ ਨਿਭਾਸਮਾਨਵਣ੍ਣਾ, ਦਿਸ੍ਸਮਾਨਸਰੀਰਾਤਿ ਅਤ੍ਥੋ.

ਤਤੋ ਰਾਜਾ ਤਿਸ੍ਸੋ ਗਾਥਾ ਅਭਾਸਿ –

੧੯੦.

‘‘ਸੁਕਿਚ੍ਛਰੂਪਂ ਪਰਿਦੇਵਯਵ੍ਹੋ, ਆਲਿਙ੍ਗਿਤੋ ਚਾਸਿ ਪਿਯੋ ਪਿਯਾਯ;

ਪੁਚ੍ਛਾਮਿ ਵੋ ਮਾਨੁਸਦੇਹਵਣ੍ਣੇ, ਕਿਮਿਧ ਵਨੇ ਰੋਦਥ ਅਪ੍ਪਤੀਤਾ.

੧੯੧.

‘‘ਸੁਕਿਚ੍ਛਰੂਪਂ ਪਰਿਦੇਵਯਵ੍ਹੋ, ਆਲਿਙ੍ਗਿਤੋ ਚਾਸਿ ਪਿਯੋ ਪਿਯਾਯ;

ਪੁਚ੍ਛਾਮਿ ਵੋ ਮਾਨੁਸਦੇਹਵਣ੍ਣੇ, ਕਿਮਿਧ ਵਨੇ ਵਿਲਪਥ ਅਪ੍ਪਤੀਤਾ.

੧੯੨.

‘‘ਸੁਕਿਚ੍ਛਰੂਪਂ ਪਰਿਦੇਵਯਵ੍ਹੋ, ਆਲਿਙ੍ਗਿਤੋ ਚਾਸਿ ਪਿਯੋ ਪਿਯਾਯ;

ਪੁਚ੍ਛਾਮਿ ਵੋ ਮਾਨੁਸਦੇਹਵਣ੍ਣੇ, ਕਿਮਿਧ ਵਨੇ ਸੋਚਥ ਅਪ੍ਪਤੀਤਾ’’ਤਿ.

ਤਤ੍ਥ ਸੁਕਿਚ੍ਛਰੂਪਨ੍ਤਿ ਸੁਟ੍ਠੁ ਦੁਕ੍ਖਪ੍ਪਤ੍ਤਾ ਵਿਯ ਹੁਤ੍ਵਾ. ਆਲਿਙ੍ਗਿਤੋ ਚਾਸਿ ਪਿਯੋ ਪਿਯਾਯਾਤਿ ਤਯਾ ਪਿਯਾਯ ਤਵ ਪਿਯੋ ਆਲਿਙ੍ਗਿਤੋ ਚ ਆਸਿ. ‘‘ਆਲਿਙ੍ਗਿਯੋ ਚਾਸੀ’’ਤਿਪਿ ਪਾਠੋ, ਅਯਮੇਵਤ੍ਥੋ. ਕਿਮਿਧ ਵਨੇਤਿ ਕਿਂਕਾਰਣਾ ਇਧ ਵਨੇ ਅਨ੍ਤਰਨ੍ਤਰਾ ਆਲਿਙ੍ਗਿਤ੍ਵਾ ਪਰਿਚੁਮ੍ਬਿਤ੍ਵਾ ਪਿਯਕਥਂ ਕਥੇਤ੍ਵਾ ਪੁਨ ਅਪ੍ਪਤੀਤਾ ਰੋਦਥਾਤਿ.

ਤਤੋ ਪਰਾ ਉਭਿਨ੍ਨਮ੍ਪਿ ਆਲਾਪਸਲ੍ਲਾਪਗਾਥਾ ਹੋਨ੍ਤਿ –

੧੯੩.

‘‘ਮਯੇਕਰਤ੍ਤਂ ਵਿਪ੍ਪਵਸਿਮ੍ਹ ਲੁਦ੍ਦ, ਅਕਾਮਕਾ ਅਞ੍ਞਮਞ੍ਞਂ ਸਰਨ੍ਤਾ;

ਤਮੇਕਰਤ੍ਤਂ ਅਨੁਤਪ੍ਪਮਾਨਾ, ਸੋਚਾਮ ‘ਸਾ ਰਤ੍ਤਿ ਪੁਨਂ ਨ ਹੋਸ੍ਸਤਿ’.

੧੯੪.

‘‘ਯਮੇਕਰਤ੍ਤਂ ਅਨੁਤਪ੍ਪਥੇਤਂ, ਧਨਂਵ ਨਟ੍ਠਂ ਪਿਤਰਂਵ ਪੇਤਂ;

ਪੁਚ੍ਛਾਮਿ ਵੋ ਮਾਨੁਸਦੇਹਵਣ੍ਣੇ, ਕਥਂ ਵਿਨਾ ਵਾਸਮਕਪ੍ਪਯਿਤ੍ਥ.

੧੯੫.

‘‘ਯਮਿਮਂ ਨਦਿਂ ਪਸ੍ਸਸਿ ਸੀਘਸੋਤਂ, ਨਾਨਾਦੁਮਚ੍ਛਾਦਨਂ ਸੇਲਕੂਲਂ;

ਤਂ ਮੇ ਪਿਯੋ ਉਤ੍ਤਰਿ ਵਸ੍ਸਕਾਲੇ, ਮਮਞ੍ਚ ਮਞ੍ਞਂ ਅਨੁਬਨ੍ਧਤੀਤਿ.

੧੯੬.

‘‘ਅਹਞ੍ਚ ਅਙ੍ਕੋਲਕਮੋਚਿਨਾਮਿ, ਅਤਿਮੁਤ੍ਤਕਂ ਸਤ੍ਤਲਿਯੋਥਿਕਞ੍ਚ;

‘ਪਿਯੋ ਚ ਮੇ ਹੇਹਿਤਿ ਮਾਲਭਾਰੀ, ਅਹਞ੍ਚ ਨਂ ਮਾਲਿਨੀ ਅਜ੍ਝੁਪੇਸ੍ਸਂ’.

੧੯੭.

‘‘ਅਹਞ੍ਚਿਦਂ ਕੁਰਵਕਮੋਚਿਨਾਮਿ, ਉਦ੍ਦਾਲਕਾ ਪਾਟਲਿਸਿਨ੍ਧੁਵਾਰਕਾ;

‘ਪਿਯੋ ਚ ਮੇ ਹੇਹਿਤਿ ਮਾਲਭਾਰੀ, ਅਹਞ੍ਚ ਨਂ ਮਾਲਿਨੀ ਅਜ੍ਝੁਪੇਸ੍ਸਂ’.

੧੯੮.

‘‘ਅਹਞ੍ਚ ਸਾਲਸ੍ਸ ਸੁਪੁਪ੍ਫਿਤਸ੍ਸ, ਓਚੇਯ੍ਯ ਪੁਪ੍ਫਾਨਿ ਕਰੋਮਿ ਮਾਲਂ;

‘ਪਿਯੋ ਚ ਮੇ ਹੇਹਿਤਿ ਮਾਲਭਾਰੀ, ਅਹਞ੍ਚ ਨਂ ਮਾਲਿਨੀ ਅਜ੍ਝੁਪੇਸ੍ਸਂ’.

੧੯੯.

‘‘ਅਹਞ੍ਚ ਸਾਲਸ੍ਸ ਸੁਪੁਪ੍ਫਿਤਸ੍ਸ, ਓਚੇਯ੍ਯ ਪੁਪ੍ਫਾਨਿ ਕਰੋਮਿ ਭਾਰਂ;

ਇਦਞ੍ਚ ਨੋ ਹੇਹਿਤਿ ਸਨ੍ਥਰਤ੍ਥਂ, ਯਤ੍ਥਜ੍ਜਿਮਂ ਵਿਹਰਿਸ੍ਸਾਮ ਰਤ੍ਤਿਂ.

੨੦੦.

‘‘ਅਹਞ੍ਚ ਖੋ ਅਗਲ਼ੁਂ ਚਨ੍ਦਨਞ੍ਚ, ਸਿਲਾਯ ਪਿਂਸਾਮਿ ਪਮਤ੍ਤਰੂਪਾ;

‘ਪਿਯੋ ਚ ਮੇ ਹੇਹਿਤਿ ਰੋਸਿਤਙ੍ਗੋ, ਅਹਞ੍ਚ ਨਂ ਰੋਸਿਤਾ ਅਜ੍ਝੁਪੇਸ੍ਸਂ’.

੨੦੧.

‘‘ਅਥਾਗਮਾ ਸਲਿਲਂ ਸੀਘਸੋਤਂ, ਨੁਦਂ ਸਾਲੇ ਸਲਲ਼ੇ ਕਣ੍ਣਿਕਾਰੇ;

ਆਪੂਰਥ ਤੇਨ ਮੁਹੁਤ੍ਤਕੇਨ, ਸਾਯਂ ਨਦੀ ਆਸਿ ਮਯਾ ਸੁਦੁਤ੍ਤਰਾ.

੨੦੨.

‘‘ਉਭੋਸੁ ਤੀਰੇਸੁ ਮਯਂ ਤਦਾ ਠਿਤਾ, ਸਮ੍ਪਸ੍ਸਨ੍ਤਾ ਉਭਯੋ ਅਞ੍ਞਮਞ੍ਞਂ;

ਸਕਿਮ੍ਪਿ ਰੋਦਾਮ ਸਕਿਂ ਹਸਾਮ, ਕਿਚ੍ਛੇਨ ਨੋ ਆਗਮਾ ਸਂਵਰੀ ਸਾ.

੨੦੩.

‘‘ਪਾਤੋਵ ਖੋ ਉਗ੍ਗਤੇ ਸੂਰਿਯਮ੍ਹਿ, ਚਤੁਕ੍ਕਂ ਨਦਿਂ ਉਤ੍ਤਰਿਯਾਨ ਲੁਦ੍ਦ;

ਆਲਿਙ੍ਗਿਯਾ ਅਞ੍ਞਮਞ੍ਞਂ ਮਯਂ ਉਭੋ, ਸਕਿਮ੍ਪਿ ਰੋਦਾਮ ਸਕਿਂ ਹਸਾਮ.

੨੦੪.

‘‘ਤੀਹੂਨਕਂ ਸਤ੍ਤ ਸਤਾਨਿ ਲੁਦ੍ਦ, ਯਮਿਧ ਮਯਂ ਵਿਪ੍ਪਵਸਿਮ੍ਹ ਪੁਬ੍ਬੇ;

ਵਸ੍ਸੇਕਿਮਂ ਜੀਵਿਤਂ ਭੂਮਿਪਾਲ, ਕੋ ਨੀਧ ਕਨ੍ਤਾਯ ਵਿਨਾ ਵਸੇਯ੍ਯ.

੨੦੫.

‘‘ਆਯੁਞ੍ਚ ਵੋ ਕੀਵਤਕੋ ਨੁ ਸਮ੍ਮ, ਸਚੇਪਿ ਜਾਨਾਥ ਵਦੇਥ ਆਯੁਂ;

ਅਨੁਸ੍ਸਵਾ ਵੁਡ੍ਢਤੋ ਆਗਮਾ ਵਾ, ਅਕ੍ਖਾਥ ਮੇਤਂ ਅਵਿਕਮ੍ਪਮਾਨਾ.

੨੦੬.

‘‘ਆਯੁਞ੍ਚ ਨੋ ਵਸ੍ਸਸਹਸ੍ਸਂ ਲੁਦ੍ਦ, ਨ ਚਨ੍ਤਰਾ ਪਾਪਕੋ ਅਤ੍ਥਿ ਰੋਗੋ;

ਅਪ੍ਪਞ੍ਚ ਦੁਕ੍ਖਂ ਸੁਖਮੇਵ ਭਿਯ੍ਯੋ, ਅਵੀਤਰਾਗਾ ਵਿਜਹਾਮ ਜੀਵਿਤ’’ਨ੍ਤਿ.

ਤਤ੍ਥ ਮਯੇਕਰਤ੍ਤਨ੍ਤਿ ਮਯਂ ਏਕਰਤ੍ਤਂ. ਵਿਪ੍ਪਵਸਿਮ੍ਹਾਤਿ ਵਿਪ੍ਪਯੁਤ੍ਤਾ ਹੁਤ੍ਵਾ ਵਸਿਮ੍ਹ. ਅਨੁਤਪ੍ਪਮਾਨਾਤਿ ‘‘ਅਨਿਚ੍ਛਮਾਨਾਨਂ ਨੋ ਏਕਰਤ੍ਤੋ ਅਤੀਤੋ’’ਤਿ ਤਂ ਏਕਰਤ੍ਤਂ ਅਨੁਚਿਨ੍ਤਯਮਾਨਾ. ਪੁਨਂ ਨ ਹੇਸ੍ਸਤੀਤਿ ਪੁਨ ਨ ਭਵਿਸ੍ਸਤਿ ਨਾਗਮਿਸ੍ਸਤੀਤਿ ਸੋਚਾਮ. ਧਨਂਵ ਨਟ੍ਠਂ ਪਿਤਰਂਵ ਪੇਤਨ੍ਤਿ ਧਨਂ ਵਾ ਨਟ੍ਠਂ ਪਿਤਰਂ ਵਾ ਮਾਤਰਂ ਵਾਪੇਤਂ ਕਾਲਕਤਂ ਕਿਂ ਨੁ ਖੋ ਤੁਮ੍ਹੇ ਚਿਨ੍ਤਯਮਾਨਾ ਕੇਨ ਕਾਰਣੇਨ ਤਂ ਏਕਰਤ੍ਤਂ ਵਿਨਾ ਵਾਸਂ ਅਕਪ੍ਪਯਿਤ੍ਥ, ਇਦਂ ਮੇ ਆਚਿਕ੍ਖਥਾਤਿ ਪੁਚ੍ਛਤਿ. ਯਮਿਮਨ੍ਤਿ ਯਂ ਇਮਂ. ਸੇਲਕੂਲਨ੍ਤਿ ਦ੍ਵਿਨ੍ਨਂ ਸੇਲਾਨਂ ਅਨ੍ਤਰੇ ਸਨ੍ਦਮਾਨਂ. ਵਸ੍ਸਕਾਲੇਤਿ ਏਕਸ੍ਸ ਮੇਘਸ੍ਸ ਉਟ੍ਠਾਯ ਵਸ੍ਸਨਕਾਲੇ. ਅਮ੍ਹਾਕਞ੍ਹਿ ਇਮਸ੍ਮਿਂ ਵਨਸਣ੍ਡੇ ਰਤਿਵਸੇਨ ਚਰਨ੍ਤਾਨਂ ਏਕੋ ਮੇਘੋ ਉਟ੍ਠਹਿ. ਅਥ ਮੇ ਪਿਯਸਾਮਿਕੋ ਕਿਨ੍ਨਰੋਮਂ ‘‘ਪਚ੍ਛਤੋ ਆਗਚ੍ਛਤੀ’’ਤਿ ਮਞ੍ਞਮਾਨੋ ਏਤਂ ਨਦਿਂ ਉਤ੍ਤਰੀਤਿ ਆਹ.

ਅਹਞ੍ਚਾਤਿ ਅਹਂ ਪਨੇਤਸ੍ਸ ਪਰਤੀਰਂ ਗਤਭਾਵਂ ਅਜਾਨਨ੍ਤੀ ਸੁਪੁਪ੍ਫਿਤਾਨਿ ਅਙ੍ਕੋਲਕਾਦੀਨਿ ਪੁਪ੍ਫਾਨਿ ਓਚਿਨਾਮਿ. ਤਤ੍ਥ ਸਤ੍ਤਲਿਯੋਥਿਕਞ੍ਚਾਤਿ ਕੁਨ੍ਦਾਲਪੁਪ੍ਫਞ੍ਚ ਸੁਵਣ੍ਣਯੋਥਿਕਞ੍ਚ ਓਚਿਨਨ੍ਤੀ ਪਨ ‘‘ਪਿਯੋ ਚ ਮੇ ਮਾਲਭਾਰੀ ਭਵਿਸ੍ਸਤਿ, ਅਹਞ੍ਚ ਨਂ ਮਾਲਿਨੀ ਹੁਤ੍ਵਾ ਅਜ੍ਝੁਪੇਸ੍ਸ’’ਨ੍ਤਿ ਇਮਿਨਾ ਕਾਰਣੇਨ ਓਚਿਨਾਮਿ. ਉਦ੍ਦਾਲਕਾ ਪਾਟਲਿਸਿਨ੍ਧੁਵਾਰਕਾਤਿ ਤੇਪਿ ਮਯਾ ਓਚਿਤਾਯੇਵਾਤਿ ਵਦਤਿ. ਓਚੇਯ੍ਯਾਤਿ ਓਚਿਨਿਤ੍ਵਾ. ਅਗਲ਼ੁਂ ਚਨ੍ਦਨਞ੍ਚਾਤਿ ਕਾਲ਼ਾਗਲ਼ੁਞ੍ਚ ਰਤ੍ਤਚਨ੍ਦਨਞ੍ਚ. ਰੋਸਿਤਙ੍ਗੋਤਿ ਵਿਲਿਤ੍ਤਸਰੀਰੋ. ਰੋਸਿਤਾਤਿ ਵਿਲਿਤ੍ਤਾ ਹੁਤ੍ਵਾ. ਅਜ੍ਝੁਪੇਸ੍ਸਨ੍ਤਿ ਸਯਨੇ ਉਪਗਮਿਸ੍ਸਾਮਿ. ਨੁਦਂ ਸਾਲੇ ਸਲਲ਼ੇ ਕਣ੍ਣਿਕਾਰੇਤਿ ਏਤਾਨਿ ਮਯਾ ਓਚਿਨਿਤ੍ਵਾ ਤੀਰੇ ਠਪਿਤਾਨਿ ਪੁਪ੍ਫਾਨਿ ਨੁਦਨ੍ਤਂ ਹਰਨ੍ਤਂ. ਸੁਦੁਤ੍ਤਰਾਤਿ ਤਸ੍ਸਾ ਹਿ ਓਰਿਮਤੀਰੇ ਠਿਤਕਾਲੇਯੇਵ ਨਦਿਯਾ ਉਦਕਂ ਆਗਤਂ, ਤਙ੍ਖਣਞ੍ਞੇਵ ਸੂਰਿਯੋ ਅਤ੍ਥਙ੍ਗਤੋ, ਵਿਜ੍ਜੁਲਤਾ ਨਿਚ੍ਛਰਨ੍ਤਿ, ਕਿਨ੍ਨਰਾ ਨਾਮ ਉਦਕਭੀਰੁਕਾ ਹੋਨ੍ਤਿ, ਇਤਿ ਸਾ ਓਤਰਿਤੁਂ ਨ ਵਿਸਹਿ. ਤੇਨਾਹ ‘‘ਸਾਯਂ ਨਦੀ ਆਸਿ ਮਯਾ ਸੁਦੁਤ੍ਤਰਾ’’ਤਿ.

ਸਮ੍ਪਸ੍ਸਨ੍ਤਾਤਿ ਵਿਜ੍ਜੁਲਤਾਨਿਚ੍ਛਰਣਕਾਲੇ ਪਸ੍ਸਨ੍ਤਾ. ਰੋਦਾਮਾਤਿ ਅਨ੍ਧਕਾਰਕਾਲੇ ਅਪਸ੍ਸਨ੍ਤਾ ਰੋਦਾਮ, ਵਿਜ੍ਜੁਲਤਾਨਿਚ੍ਛਰਣਕਾਲੇ ਪਸ੍ਸਨ੍ਤਾ ਹਸਾਮ. ਸਂਵਰੀਤਿ ਰਤ੍ਤਿ. ਚਤੁਕ੍ਕਨ੍ਤਿ ਤੁਚ੍ਛਂ. ਉਤ੍ਤਰਿਯਾਨਾਤਿ ਉਤ੍ਤਰਿਤ੍ਵਾ. ਤੀਹੂਨਕਨ੍ਤਿ ਤੀਹਿ ਊਨਾਨਿ ਸਤ੍ਤ ਵਸ੍ਸਸਤਾਨਿ. ਯਮਿਧ ਮਯਨ੍ਤਿ ਯਂ ਕਾਲਂ ਇਧ ਮਯਂ ਵਿਪ੍ਪਵਸਿਮ੍ਹ, ਸੋ ਇਤੋ ਤੀਹਿ ਊਨਕਾਨਿ ਸਤ੍ਤ ਵਸ੍ਸਸਤਾਨਿ ਹੋਨ੍ਤੀਤਿ ਵਦਤਿ. ਵਸ੍ਸੇਕਿਮਨ੍ਤਿ ਵਸ੍ਸਂ ਏਕਂ ਇਮਂ, ਤੁਮ੍ਹਾਕਂ ਏਕਮੇਵ ਵਸ੍ਸਸਤਂ ਇਮਂ ਜੀਵਿਤਨ੍ਤਿ ਵਦਤਿ. ਕੋ ਨੀਧਾਤਿ ਏਵਂ ਪਰਿਤ੍ਤਕੇ ਜੀਵਿਤੇ ਕੋ ਨੁ ਇਧ ਕਨ੍ਤਾਯ ਵਿਨਾ ਭਵੇਯ੍ਯ, ਅਯੁਤ੍ਤਂ ਤਵ ਪਿਯਭਰਿਯਾਯ ਵਿਨਾ ਭਵਿਤੁਨ੍ਤਿ ਦੀਪੇਤਿ.

ਕੀਵਤਕੋ ਨੂਤਿ ਰਾਜਾ ਕਿਨ੍ਨਰਿਯਾ ਵਚਨਂ ਸੁਤ੍ਵਾ ‘‘ਇਮੇਸਂ ਆਯੁਪ੍ਪਮਾਣਂ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਤੁਮ੍ਹਾਕਂ ਕਿਤ੍ਤਕੋ ਆਯੂ’’ਤਿ ਪੁਚ੍ਛਤਿ. ਅਨੁਸ੍ਸਵਾਤਿ ਸਚੇ ਵੋ ਕਸ੍ਸਚਿ ਵਦਨ੍ਤਸ੍ਸ ਵਾ ਸੁਤਂ, ਮਾਤਾਪਿਤੂਨਂ ਵਾ ਵੁਡ੍ਢਾਨਂ ਮਹਲ੍ਲਕਾਨਂ ਸਨ੍ਤਿਕਾ ਆਗਮੋ ਅਤ੍ਥਿ, ਅਥ ਮੇ ਤਤੋ ਅਨੁਸ੍ਸਵਾ ਵੁਡ੍ਢਤੋ ਆਗਮਾ ਵਾ ਏਤਂ ਅਵਿਕਮ੍ਪਮਾਨਾ ਅਕ੍ਖਾਥ. ਨ ਚਨ੍ਤਰਾਤਿ ਅਮ੍ਹਾਕਂ ਵਸ੍ਸਸਹਸ੍ਸਂ ਆਯੁ, ਅਨ੍ਤਰਾ ਚ ਨੋ ਪਾਪਕੋ ਜੀਵਿਤਨ੍ਤਰਾਯਕਰੋ ਰੋਗੋਪਿ ਨਤ੍ਥਿ. ਅਵੀਤਰਾਗਾਤਿ ਅਞ੍ਞਮਞ੍ਞਂ ਅਵਿਗਤਪੇਮਾਵ ਹੁਤ੍ਵਾ.

ਤਂ ਸੁਤ੍ਵਾ ਰਾਜਾ ‘‘ਇਮੇ ਹਿ ਨਾਮ ਤਿਰਚ੍ਛਾਨਗਤਾ ਹੁਤ੍ਵਾ ਏਕਰਤ੍ਤਿਂ ਵਿਪ੍ਪਯੋਗੇਨ ਸਤ੍ਤ ਵਸ੍ਸਸਤਾਨਿ ਰੋਦਨ੍ਤਾ ਵਿਚਰਨ੍ਤਿ, ਅਹਂ ਪਨ ਤਿਯੋਜਨਸਤਿਕੇ ਰਜ੍ਜੇ ਮਹਾਸਮ੍ਪਤ੍ਤਿਂ ਪਹਾਯ ਅਰਞ੍ਞੇ ਵਿਚਰਾਮਿ, ਅਹੋ ਅਕਿਚ੍ਚਕਾਰਿਮ੍ਹੀ’’ਤਿ ਤਤੋਵ ਨਿਵਤ੍ਤੋ ਬਾਰਾਣਸਿਂ ਗਨ੍ਤ੍ਵਾ ‘‘ਕਿਂ ਤੇ, ਮਹਾਰਾਜ, ਹਿਮਵਨ੍ਤੇ ਅਚ੍ਛਰਿਯਂ ਦਿਟ੍ਠ’’ਨ੍ਤਿ ਅਮਚ੍ਚੇਹਿ ਪੁਟ੍ਠੋ ਸਬ੍ਬਂ ਆਰੋਚੇਤ੍ਵਾ ਤਤੋ ਪਟ੍ਠਾਯ ਦਾਨਾਨਿ ਦਦਨ੍ਤੋ ਭੋਗੇ ਭੁਞ੍ਜਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ –

੨੦੭.

‘‘ਇਦਞ੍ਚ ਸੁਤ੍ਵਾਨ ਅਮਾਨੁਸਾਨਂ, ਭਲ੍ਲਾਤਿਯੋ ਇਤ੍ਤਰਂ ਜੀਵਿਤਨ੍ਤਿ;

ਨਿਵਤ੍ਤਥ ਨ ਮਿਗਵਂ ਅਚਰਿ, ਅਦਾਸਿ ਦਾਨਾਨਿ ਅਭੁਞ੍ਜਿ ਭੋਗੇ’’ਤਿ. –

ਇਮਂ ਗਾਥਂ ਵਤ੍ਵਾ ਪੁਨ ਓਵਦਨ੍ਤੋ ਦ੍ਵੇ ਗਾਥਾ ਅਭਾਸਿ –

੨੦੮.

‘‘ਇਦਞ੍ਚ ਸੁਤ੍ਵਾਨ ਅਮਾਨੁਸਾਨਂ, ਸਮ੍ਮੋਦਥ ਮਾ ਕਲਹਂ ਅਕਤ੍ਥ;

ਮਾ ਵੋ ਤਪੀ ਅਤ੍ਤਕਮ੍ਮਾਪਰਾਧੋ, ਯਥਾਪਿ ਤੇ ਕਿਮ੍ਪੁਰਿਸੇਕਰਤ੍ਤਂ.

੨੦੯.

‘‘ਇਦਞ੍ਚ ਸੁਤ੍ਵਾਨ ਅਮਾਨੁਸਾਨਂ, ਸਮ੍ਮੋਦਥ ਮਾ ਵਿਵਾਦਂ ਅਕਤ੍ਥ;

ਮਾ ਵੋ ਤਪੀ ਅਤ੍ਤਕਮ੍ਮਾਪਰਾਧੋ, ਯਥਾਪਿ ਤੇ ਕਿਮ੍ਪੁਰਿਸੇਕਰਤ੍ਤ’’ਨ੍ਤਿ.

ਤਤ੍ਥ ਅਮਾਨੁਸਾਨਨ੍ਤਿ ਕਿਨ੍ਨਰਾਨਂ. ਅਤ੍ਤਕਮ੍ਮਾਪਰਾਧੋਤਿ ਅਤ੍ਤਨੋ ਕਮ੍ਮਦੋਸੋ. ਕਿਮ੍ਪੁਰਿਸੇਕਰਤ੍ਤਨ੍ਤਿ ਯਥਾ ਤੇ ਕਿਮ੍ਪੁਰਿਸੇ ਏਕਰਤ੍ਤਿਂ ਕਤੋ ਅਤ੍ਤਨੋ ਕਮ੍ਮਦੋਸੋ ਤਪਿ, ਤਥਾ ਤੁਮ੍ਹੇਪਿ ਮਾ ਤਪੀਤਿ ਅਤ੍ਥੋ.

ਮਲ੍ਲਿਕਾ ਦੇਵੀ ਤਥਾਗਤਸ੍ਸ ਧਮ੍ਮਦੇਸਨਂ ਸੁਤ੍ਵਾ ਉਟ੍ਠਾਯਾਸਨਾ ਅਞ੍ਜਲਿਂ ਪਗ੍ਗਯ੍ਹ ਦਸਬਲਸ੍ਸ ਥੁਤਿਂ ਕਰੋਨ੍ਤੀ ਓਸਾਨਗਾਥਮਾਹ –

੨੧੦.

‘‘ਵਿਵਿਧਂ ਅਧਿਮਨਾ ਸੁਣੋਮਹਂ, ਵਚਨਪਥਂ ਤਵ ਅਤ੍ਥਸਂਹਿਤਂ;

ਮੁਞ੍ਚਂ ਗਿਰਂ ਨੁਦਸੇਵ ਮੇ ਦਰਂ, ਸਮਣ ਸੁਖਾਵਹ ਜੀਵ ਮੇ ਚਿਰ’’ਨ੍ਤਿ.

ਤਤ੍ਥ ਵਿਵਿਧਂ ਅਧਿਮਨਾ ਸੁਣੋਮਹਨ੍ਤਿ ਭਨ੍ਤੇ, ਤੁਮ੍ਹੇਹਿ ਵਿਵਿਧੇਹਿ ਨਾਨਾਕਾਰਣੇਹਿ ਅਲਙ੍ਕਰਿਤ੍ਵਾ ਦੇਸਿਤਂ ਧਮ੍ਮਦੇਸਨਂ ਅਹਂ ਅਧਿਮਨਾ ਪਸਨ੍ਨਚਿਤ੍ਤਾ ਹੁਤ੍ਵਾ ਸੁਣੋਮਿ. ਵਚਨਪਥਨ੍ਤਿ ਤਂ ਤੁਮ੍ਹੇਹਿ ਵੁਤ੍ਤਂ ਵਿਵਿਧਵਚਨਂ. ਮੁਞ੍ਚਂ ਗਿਰਂ ਨੁਦਸੇਵ ਮੇ ਦਰਨ੍ਤਿ ਕਣ੍ਣਸੁਖਂ ਮਧੁਰਂ ਗਿਰਂ ਮੁਞ੍ਚਨ੍ਤੋ ਮਮ ਹਦਯੇ ਸੋਕਦਰਥਂ ਨੁਦਸਿਯੇਵ ਹਰਸਿਯੇਵ. ਸਮਣ ਸੁਖਾਵਹ ਜੀਵ ਮੇ ਚਿਰਨ੍ਤਿ ਭਨ੍ਤੇ ਬੁਦ੍ਧਸਮਣ, ਦਿਬ੍ਬਮਾਨੁਸਲੋਕਿਯਲੋਕੁਤ੍ਤਰਸੁਖਾਵਹ ਮਮ ਸਾਮਿ ਧਮ੍ਮਰਾਜ, ਚਿਰਂ ਜੀਵਾਤਿ.

ਕੋਸਲਰਾਜਾ ਤਤੋ ਪਟ੍ਠਾਯ ਤਾਯ ਸਦ੍ਧਿਂ ਸਮਗ੍ਗਵਾਸਂ ਵਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕਿਨ੍ਨਰੋ ਕੋਸਲਰਾਜਾ ਅਹੋਸਿ, ਕਿਨ੍ਨਰੀ ਮਲ੍ਲਿਕਾ ਦੇਵੀ, ਭਲ੍ਲਾਤਿਯਰਾਜਾ ਅਹਮੇਵ ਅਹੋਸਿ’’ਨ੍ਤਿ.

ਭਲ੍ਲਾਤਿਯਜਾਤਕਵਣ੍ਣਨਾ ਅਟ੍ਠਮਾ.

[੫੦੫] ੯. ਸੋਮਨਸ੍ਸਜਾਤਕਵਣ੍ਣਨਾ

ਕੋ ਤਂ ਹਿਂਸਤਿ ਹੇਠੇਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦੇਵਦਤ੍ਤਸ੍ਸ ਵਧਾਯ ਪਰਿਸਕ੍ਕਨਂ ਆਰਬ੍ਭ ਕਥੇਸਿ. ਤਦਾ ਹਿ ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਸ ਮਮ ਵਧਾਯ ਪਰਿਸਕ੍ਕਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕੁਰੁਰਟ੍ਠੇ ਉਤ੍ਤਰਪਞ੍ਚਾਲਨਗਰੇ ਰੇਣੁ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਦਾ ਮਹਾਰਕ੍ਖਿਤੋ ਨਾਮ ਤਾਪਸੋ ਪਞ੍ਚਸਤਤਾਪਸਪਰਿਵਾਰੋ ਹਿਮਵਨ੍ਤੇ ਚਿਰਂ ਵਸਿਤ੍ਵਾ ਲੋਣਮ੍ਬਿਲਸੇਵਨਤ੍ਥਾਯ ਚਾਰਿਕਂ ਚਰਨ੍ਤੋ ਉਤ੍ਤਰਪਞ੍ਚਾਲਨਗਰਂ ਪਤ੍ਵਾ ਰਾਜੁਯ੍ਯਾਨੇ ਵਸਿਤ੍ਵਾ ਸਪਰਿਸੋ ਪਿਣ੍ਡਾਯ ਚਰਨ੍ਤੋ ਰਾਜਦ੍ਵਾਰਂ ਪਾਪੁਣਿ. ਰਾਜਾ ਇਸਿਗਣਂ ਦਿਸ੍ਵਾ ਇਰਿਯਾਪਥੇ ਪਸਨ੍ਨੋ ਅਲਙ੍ਕਤਮਹਾਤਲੇ ਨਿਸੀਦਾਪੇਤ੍ਵਾ ਪਣੀਤੇਨਾਹਾਰੇਨ ਪਰਿਵਿਸਿਤ੍ਵਾ ‘‘ਭਨ੍ਤੇ, ਇਮਂ ਵਸ੍ਸਾਰਤ੍ਤਂ ਮਮ ਉਯ੍ਯਾਨੇਯੇਵ ਵਸਥਾ’’ਤਿ ਵਤ੍ਵਾ ਤੇਹਿ ਸਦ੍ਧਿਂ ਉਯ੍ਯਾਨਂ ਗਨ੍ਤ੍ਵਾ ਵਸਨਟ੍ਠਾਨਾਨਿ ਕਾਰੇਤ੍ਵਾ ਪਬ੍ਬਜਿਤਪਰਿਕ੍ਖਾਰੇ ਦਤ੍ਵਾ ਵਨ੍ਦਿਤ੍ਵਾ ਨਿਕ੍ਖਮਿ. ਤਤੋ ਪਟ੍ਠਾਯ ਸਬ੍ਬੇਪਿ ਤੇ ਰਾਜਨਿਵੇਸਨੇ ਭੁਞ੍ਜਨ੍ਤਿ. ਰਾਜਾ ਪਨ ਅਪੁਤ੍ਤਕੋ ਪੁਤ੍ਤਂ ਪਤ੍ਥੇਤਿ, ਪੁਤ੍ਤਾ ਨੁਪ੍ਪਜ੍ਜਨ੍ਤਿ. ਵਸ੍ਸਾਰਤ੍ਤਚ੍ਚਯੇਨ ਮਹਾਰਕ੍ਖਿਤੋ ‘‘ਇਦਾਨਿ ਹਿਮਵਨ੍ਤੋ ਰਮਣੀਯੋ, ਤਤ੍ਥੇਵ ਗਮਿਸ੍ਸਾਮਾ’’ਤਿ ਰਾਜਾਨਂ ਆਪੁਚ੍ਛਿਤ੍ਵਾ ਰਞ੍ਞਾ ਕਤਸਕ੍ਕਾਰਸਮ੍ਮਾਨੋ ਨਿਕ੍ਖਮਿਤ੍ਵਾ ਅਨ੍ਤਰਾਮਗ੍ਗੇ ਮਜ੍ਝਨ੍ਹਿਕਸਮਯੇ ਮਗ੍ਗਾ ਓਕ੍ਕਮ੍ਮ ਏਕਸ੍ਸ ਸਨ੍ਦਚ੍ਛਾਯਸ੍ਸ ਰੁਕ੍ਖਸ੍ਸ ਹੇਟ੍ਠਾ ਤਰੁਣਤਿਣਪਿਟ੍ਠੇ ਸਪਰਿਵਾਰੋ ਨਿਸੀਦਿ.

ਤਾਪਸਾ ਕਥਂ ਸਮੁਟ੍ਠਾਪੇਸੁਂ ‘‘ਰਾਜਗੇਹੇ ਵਂਸਾਨੁਰਕ੍ਖਿਤੋ ਪੁਤ੍ਤੋ ਨਤ੍ਥਿ, ਸਾਧੁ ਵਤਸ੍ਸ ਸਚੇ ਰਾਜਾ ਪੁਤ੍ਤਂ ਲਭੇਯ੍ਯ, ਪਵੇਣਿ ਘਟੀਯੇਥਾ’’ਤਿ. ਮਹਾਰਕ੍ਖਿਤੋ ਤੇਸਂ ਕਥਂ ਸੁਤ੍ਵਾ ‘‘ਭਵਿਸ੍ਸਤਿ ਨੁ ਖੋ ਰਞ੍ਞੋ ਪੁਤ੍ਤੋ, ਉਦਾਹੁ ਨੋ’’ਤਿ ਉਪਧਾਰੇਨ੍ਤੋ ‘‘ਭਵਿਸ੍ਸਤੀ’’ਤਿ ਞਤ੍ਵਾ ਏਵਮਾਹ ‘‘ਮਾ ਭੋਨ੍ਤੋ ਚਿਨ੍ਤਯਿਤ੍ਥ, ਅਜ੍ਜ ਪਚ੍ਚੂਸਕਾਲੇ ਏਕੋ ਦੇਵਪੁਤ੍ਤੋ ਚਵਿਤ੍ਵਾ ਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿਸ੍ਸਤੀ’’ਤਿ. ਤਂ ਸੁਤ੍ਵਾ ਏਕੋ ਕੁਟਜਟਿਲੋ ‘‘ਇਦਾਨਿ ਰਾਜਕੁਲੂਪਕੋ ਭਵਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਾਪਸਾਨਂ ਗਮਨਕਾਲੇ ਗਿਲਾਨਾਲਯਂ ਕਤ੍ਵਾ ਨਿਪਜ੍ਜਿਤ੍ਵਾ ‘‘ਏਹਿ ਗਚ੍ਛਾਮਾ’’ਤਿ ਵੁਤ੍ਤੋ ‘‘ਨ ਸਕ੍ਕੋਮੀ’’ਤਿ ਆਹ. ਮਹਾਰਕ੍ਖਿਤੋ ਤਸ੍ਸ ਨਿਪਨ੍ਨਕਾਰਣਂ ਞਤ੍ਵਾ ‘‘ਯਦਾ ਸਕ੍ਕੋਸਿ, ਤਦਾ ਆਗਚ੍ਛੇਯ੍ਯਾਸੀ’’ਤਿ ਵਤ੍ਵਾ ਇਸਿਗਣਂ ਆਦਾਯ ਹਿਮਵਨ੍ਤਮੇਵ ਗਤੋ. ਕੁਹਕੋਪਿ ਨਿਵਤ੍ਤਿਤ੍ਵਾ ਵੇਗੇਨਾਗਨ੍ਤ੍ਵਾ ਰਾਜਦ੍ਵਾਰੇ ਠਤ੍ਵਾ ‘‘ਮਹਾਰਕ੍ਖਿਤਸ੍ਸ ਉਪਟ੍ਠਾਕਤਾਪਸੋ ਆਗਤੋ’’ਤਿ ਰਞ੍ਞੋ ਆਰੋਚਾਪੇਤ੍ਵਾ ਰਞ੍ਞਾ ਵੇਗੇਨ ਪਕ੍ਕੋਸਾਪਿਤੋ ਪਾਸਾਦਂ ਅਭਿਰੁਯ੍ਹ ਪਞ੍ਞਤ੍ਤਾਸਨੇ ਨਿਸੀਦਿ. ਰਾਜਾ ਕੁਹਕਂ ਤਾਪਸਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਇਸੀਨਂ ਆਰੋਗ੍ਯਂ ਪੁਚ੍ਛਿਤ੍ਵਾ ‘‘ਭਨ੍ਤੇ, ਅਤਿਖਿਪ੍ਪਂ ਨਿਵਤ੍ਤਿਤ੍ਥ, ਵੇਗੇਨ ਕੇਨਤ੍ਥੇਨਾਗਤਤ੍ਥਾ’’ਤਿ ਆਹ. ‘‘ਆਮ, ਮਹਾਰਾਜ, ਇਸਿਗਣੋ ਸੁਖਨਿਸਿਨ੍ਨੋ ‘ਸਾਧੁ ਵਤਸ੍ਸ, ਸਚੇ ਰਞ੍ਞੋ ਪਵੇਣਿਪਾਲਕੋ ਪੁਤ੍ਤੋ ਉਪ੍ਪਜ੍ਜੇਯ੍ਯਾ’ਤਿ ਕਥਂ ਸਮੁਟ੍ਠਾਪੇਸਿ. ਅਹਂ ਕਥਂ ਸੁਤ੍ਵਾ ‘‘ਭਵਿਸ੍ਸਤਿ ਨੁ ਖੋ ਰਞ੍ਞੋ ਪੁਤ੍ਤੋ, ਉਦਾਹੁ ਨੋ’’ਤਿ ਦਿਬ੍ਬਚਕ੍ਖੁਨਾ ਓਲੋਕੇਨ੍ਤੋ ‘‘ਮਹਿਦ੍ਧਿਕੋ ਦੇਵਪੁਤ੍ਤੋ ਚਵਿਤ੍ਵਾ ਅਗ੍ਗਮਹੇਸਿਯਾ ਸੁਧਮ੍ਮਾਯ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿਸ੍ਸਤੀ’’ਤਿ ਦਿਸ੍ਵਾ ‘‘ਅਜਾਨਨ੍ਤਾ ਗਬ੍ਭਂ ਨਾਸੇਯ੍ਯੁਂ, ਆਚਿਕ੍ਖਿਸ੍ਸਾਮਿ ਨੇਸ’’ਨ੍ਤਿ ਤੁਮ੍ਹਾਕਂ ਕਥਨਤ੍ਥਾਯ ਆਗਤੋ. ਕਥਿਤਂ ਤੇ ਮਯਾ, ਗਚ੍ਛਾਮਹਂ, ਮਹਾਰਾਜਾਤਿ. ਰਾਜਾ ‘‘ਭਨ੍ਤੇ, ਨ ਸਕ੍ਕਾ ਗਨ੍ਤੁ’’ਨ੍ਤਿ ਹਟ੍ਠਤੁਟ੍ਠੋ ਪਸਨ੍ਨਚਿਤ੍ਤੋ ਕੁਹਕਤਾਪਸਂ ਉਯ੍ਯਾਨਂ ਨੇਤ੍ਵਾ ਵਸਨਟ੍ਠਾਨਂ ਸਂਵਿਦਹਿਤ੍ਵਾ ਅਦਾਸਿ. ਸੋ ਤਤੋ ਪਟ੍ਠਾਯ ਰਾਜਕੁਲੇ ਭੁਞ੍ਜਨ੍ਤੋ ਵਸਤਿ, ‘‘ਦਿਬ੍ਬਚਕ੍ਖੁਕੋ’’ਤ੍ਵੇਵਸ੍ਸ ਨਾਮਂ ਅਹੋਸਿ.

ਤਦਾ ਬੋਧਿਸਤ੍ਤੋ ਤਾਵਤਿਂਸਭਵਨਾ ਚਵਿਤ੍ਵਾ ਤਤ੍ਥ ਪਟਿਸਨ੍ਧਿਂ ਗਣ੍ਹਿ. ਜਾਤਸ੍ਸ ਚਸ੍ਸ ਨਾਮਗ੍ਗਹਣਦਿਵਸੇ ‘‘ਸੋਮਨਸ੍ਸਕੁਮਾਰੋ’’ਤ੍ਵੇਵ ਨਾਮਂ ਕਰਿਂਸੁ. ਸੋ ਕੁਮਾਰਪਰਿਹਾਰੇਨ ਵਡ੍ਢਤਿ. ਕੁਹਕਤਾਪਸੋਪਿ ਉਯ੍ਯਾਨਸ੍ਸ ਏਕਸ੍ਮਿਂ ਪਸ੍ਸੇ ਨਾਨਪ੍ਪਕਾਰਂ ਸੂਪੇਯ੍ਯਸਾਕਞ੍ਚ ਵਲ੍ਲਿਫਲਾਨਿ ਚ ਰੋਪੇਤ੍ਵਾ ਪਣ੍ਣਿਕਾਨਂ ਹਤ੍ਥੇ ਵਿਕ੍ਕਿਣਨ੍ਤੋ ਧਨਂ ਸਣ੍ਠਪੇਸਿ. ਬੋਧਿਸਤ੍ਤਸ੍ਸ ਸਤ੍ਤਵਸ੍ਸਿਕਕਾਲੇ ਰਞ੍ਞੋ ਪਚ੍ਚਨ੍ਤੋ ਕੁਪ੍ਪਿ. ‘‘ਦਿਬ੍ਬਚਕ੍ਖੁਤਾਪਸਂ ਮਾ ਪਮਜ੍ਜੀ’’ਤਿ ਕੁਮਾਰਂ ਪਟਿਚ੍ਛਾਪੇਤ੍ਵਾ ‘‘ਪਚ੍ਚਨ੍ਤਂ ਵੂਪਸਮੇਸ੍ਸਾਮੀ’’ਤਿ ਗਤੋ. ਅਥੇਕਦਿਵਸਂ ਕੁਮਾਰੋ ‘‘ਜਟਿਲਂ ਪਸ੍ਸਿਸ੍ਸਾਮੀ’’ਤਿ ਉਯ੍ਯਾਨਂ ਗਨ੍ਤ੍ਵਾ ਕੂਟਜਟਿਲਂ ਏਕਂ ਗਣ੍ਠਿਕਕਾਸਾਵਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਉਭੋਹਿ ਹਤ੍ਥੇਹਿ ਦ੍ਵੇ ਉਦਕਘਟੇ ਗਹੇਤ੍ਵਾ ਸਾਕਵਤ੍ਥੁਸ੍ਮਿਂ ਉਦਕਂ ਆਸਿਞ੍ਚਨ੍ਤਂ ਦਿਸ੍ਵਾ ‘‘ਅਯਂ ਕੂਟਜਟਿਲੋ ਅਤ੍ਤਨੋ ਸਮਣਧਮ੍ਮਂ ਅਕਤ੍ਵਾ ਪਣ੍ਣਿਕਕਮ੍ਮਂ ਕਰੋਤੀ’’ਤਿ ਞਤ੍ਵਾ ‘‘ਕਿਂ ਕਰੋਸਿ ਪਣ੍ਣਿਕਗਹਪਤਿਕਾ’’ਤਿ ਤਂ ਲਜ੍ਜਾਪੇਤ੍ਵਾ ਅਵਨ੍ਦਿਤ੍ਵਾਵ ਨਿਕ੍ਖਮਿ. ਕੂਟਜਟਿਲੋ ‘‘ਅਯਂ ਇਦਾਨੇਵ ਏਵਰੂਪੋ ਪਚ੍ਚਾਮਿਤ੍ਤੋ, ਕੋ ਜਾਨਾਤਿ ਕਿਂ ਕਰਿਸ੍ਸਤਿ, ਇਦਾਨੇਵ ਨਂ ਨਾਸੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਰਞ੍ਞੋ ਆਗਮਨਕਾਲੇ ਪਾਸਾਣਫਲਕਂ ਏਕਮਨ੍ਤਂ ਖਿਪਿਤ੍ਵਾ ਪਾਨੀਯਘਟਂ ਭਿਨ੍ਦਿਤ੍ਵਾ ਪਣ੍ਣਸਾਲਾਯ ਤਿਣਾਨਿ ਵਿਕਿਰਿਤ੍ਵਾ ਸਰੀਰਂ ਤੇਲੇਨ ਮਕ੍ਖੇਤ੍ਵਾ ਪਣ੍ਣਸਾਲਂ ਪਵਿਸਿਤ੍ਵਾ ਸਸੀਸਂ ਪਾਰੁਪਿਤ੍ਵਾ ਮਹਾਦੁਕ੍ਖਪ੍ਪਤ੍ਤੋ ਵਿਯ ਮਞ੍ਚੇ ਨਿਪਜ੍ਜਿ. ਰਾਜਾ ਆਗਨ੍ਤ੍ਵਾ ਨਗਰਂ ਪਦਕ੍ਖਿਣਂ ਕਤ੍ਵਾ ਨਿਵੇਸਨਂ ਅਪਵਿਸਿਤ੍ਵਾਵ ‘‘ਮਮ ਸਾਮਿਕਂ ਦਿਬ੍ਬਚਕ੍ਖੁਕਂ ਪਸ੍ਸਿਸ੍ਸਾਮੀ’’ਤਿ ਪਣ੍ਣਸਾਲਦ੍ਵਾਰਂ ਗਨ੍ਤ੍ਵਾ ਤਂ ਵਿਪ੍ਪਕਾਰਂ ਦਿਸ੍ਵਾ ‘‘ਕਿਂ ਨੁ ਖੋ ਏਤ’’ਨ੍ਤਿ ਅਨ੍ਤੋ ਪਵਿਸਿਤ੍ਵਾ ਤਂ ਨਿਪਨ੍ਨਕਂ ਦਿਸ੍ਵਾ ਪਾਦੇ ਪਰਿਮਜ੍ਜਨ੍ਤੋ ਪਠਮਂ ਗਾਥਮਾਹ –

੨੧੧.

‘‘ਕੋ ਤਂ ਹਿਂਸਤਿ ਹੇਠੇਤਿ, ਕਿਂ ਦੁਮ੍ਮਨੋ ਸੋਚਸਿ ਅਪ੍ਪਤੀਤੋ;

ਕਸ੍ਸਜ੍ਜ ਮਾਤਾਪਿਤਰੋ ਰੁਦਨ੍ਤੁ, ਕ੍ਵਜ੍ਜ ਸੇਤੁ ਨਿਹਤੋ ਪਥਬ੍ਯਾ’’ਤਿ.

ਤਤ੍ਥ ਹਿਂਸਤੀਤਿ ਪਹਰਤਿ. ਹੇਠੇਤੀਤਿ ਅਕ੍ਕੋਸਤਿ. ਕ੍ਵਜ੍ਜ ਸੇਤੂਤਿ ਕੋ ਅਜ੍ਜ ਸਯਤੁ.

ਤਂ ਸੁਤ੍ਵਾ ਕੂਟਜਟਿਲੋ ਨਿਤ੍ਥੁਨਨ੍ਤੋ ਉਟ੍ਠਾਯ ਦੁਤਿਯਂ ਗਾਥਮਾਹ –

੨੧੨.

‘‘ਤੁਟ੍ਠੋਸ੍ਮਿ ਦੇਵ ਤਵ ਦਸ੍ਸਨੇਨ, ਚਿਰਸ੍ਸਂ ਪਸ੍ਸਾਮਿ ਤਂ ਭੂਮਿਪਾਲ;

ਅਹਿਂਸਕੋ ਰੇਣੁਮਨੁਪ੍ਪਵਿਸ੍ਸ, ਪੁਤ੍ਤੇਨ ਤੇ ਹੇਠਯਿਤੋਸ੍ਮਿ ਦੇਵਾ’’ਤਿ.

ਇਤੋ ਪਰਾ ਉਤ੍ਤਾਨਸਮ੍ਬਨ੍ਧਗਾਥਾ ਪਾਲ਼ਿਨਯੇਨੇਵ ਵੇਦਿਤਬ੍ਬਾ –

੨੧੩.

‘‘ਆਯਨ੍ਤੁ ਦੋਵਾਰਿਕਾ ਖਗ੍ਗਬਨ੍ਧਾ, ਕਾਸਾਵਿਯਾ ਯਨ੍ਤੁ ਅਨ੍ਤੇਪੁਰਨ੍ਤਂ;

ਹਨ੍ਤ੍ਵਾਨ ਤਂ ਸੋਮਨਸ੍ਸਂ ਕੁਮਾਰਂ, ਛੇਤ੍ਵਾਨ ਸੀਸਂ ਵਰਮਾਹਰਨ੍ਤੁ.

੨੧੪.

‘‘ਪੇਸਿਤਾ ਰਾਜਿਨੋ ਦੂਤਾ, ਕੁਮਾਰਂ ਏਤਦਬ੍ਰਵੁਂ;

ਇਸ੍ਸਰੇਨ ਵਿਤਿਣ੍ਣੋਸਿ, ਵਧਂ ਪਤ੍ਤੋਸਿ ਖਤ੍ਤਿਯ.

੨੧੫.

‘‘ਸ ਰਾਜਪੁਤ੍ਤੋ ਪਰਿਦੇਵਯਨ੍ਤੋ, ਦਸਙ੍ਗੁਲਿਂ ਅਞ੍ਜਲਿਂ ਪਗ੍ਗਹੇਤ੍ਵਾ;

ਅਹਮ੍ਪਿ ਇਚ੍ਛਾਮਿ ਜਨਿਨ੍ਦ ਦਟ੍ਠੁਂ, ਜੀਵਂ ਮਂ ਨੇਤ੍ਵਾ ਪਟਿਦਸ੍ਸਯੇਥ.

੨੧੬.

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਰਞ੍ਞੋ ਪੁਤ੍ਤਂ ਅਦਸ੍ਸਯੁਂ;

ਪੁਤ੍ਤੋ ਚ ਪਿਤਰਂ ਦਿਸ੍ਵਾ, ਦੂਰਤੋਵਜ੍ਝਭਾਸਥ.

੨੧੭.

‘‘ਆਗਚ੍ਛੁਂ ਦੋਵਾਰਿਕਾ ਖਗ੍ਗਬਨ੍ਧਾ, ਕਾਸਾਵਿਯਾ ਹਨ੍ਤੁ ਮਮਂ ਜਨਿਨ੍ਦ;

ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ, ਅਪਰਾਧੋ ਕੋ ਨਿਧ ਮਮਜ੍ਜ ਅਤ੍ਥੀ’’ਤਿ.

ਤਤ੍ਥ ਅਹਿਂਸਕੋਤਿ ਅਹਂ ਕਸ੍ਸਚਿ ਅਹਿਂਸਕੋ ਸੀਲਾਚਾਰਸਮ੍ਪਨ੍ਨੋ. ਰੇਣੁਮਨੁਪ੍ਪਵਿਸ੍ਸਾਤਿ ਮਹਾਰਾਜ ਰੇਣੁ, ਅਹਂ ਤਵ ਪੁਤ੍ਤੇਨ ਮਹਾਪਰਿਵਾਰੇਨ ਅਨੁਪਵਿਸਿਤ੍ਵਾ ‘‘ਅਰੇ ਕੂਟਤਾਪਸ, ਕਸ੍ਮਾ ਤ੍ਵਂ ਇਧ ਵਸਸੀ’’ਤਿ ਵਤ੍ਵਾ ਪਾਸਾਣਫਲਕਂ ਖਿਪਿਤ੍ਵਾ ਘਟਂ ਭਿਨ੍ਦਿਤ੍ਵਾ ਹਤ੍ਥੇਹਿ ਚ ਪਾਦੇਹਿ ਚ ਕੋਟ੍ਟੇਨ੍ਤੇਨ ਵਿਹੇਠਿਤੋਸ੍ਮੀਤਿ ਏਵਂ ਸੋ ਅਭੂਤਮੇਵ ਭੂਤਂ ਵਿਯ ਕਤ੍ਵਾ ਰਾਜਾਨਂ ਸਦ੍ਦਹਾਪੇਸਿ. ਆਯਨ੍ਤੂਤਿ ਗਚ੍ਛਨ੍ਤੁ. ‘‘ਮਮ ਸਾਮਿਮ੍ਹਿ ਵਿਪ੍ਪਟਿਪਨ੍ਨਕਾਲਤੋ ਪਟ੍ਠਾਯ ਮਯਿਪਿ ਸੋ ਨ ਲਜ੍ਜਿਸ੍ਸਤੀ’’ਤਿ ਕੁਜ੍ਝਿਤ੍ਵਾ ਤਸ੍ਸ ਵਧਂ ਆਣਾਪੇਨ੍ਤੋ ਏਵਮਾਹ. ਕਾਸਾਵਿਯਾਤਿ ਚੋਰਘਾਤਕਾ. ਤੇਪਿ ਫਰਸੁਹਤ੍ਥਾ ਅਤ੍ਤਨੋ ਵਿਧਾਨੇਨ ਗਚ੍ਛਨ੍ਤੂਤਿ ਵਦਤਿ. ਵਰਨ੍ਤਿ ਵਰਂ ਸੀਸਂ ਉਤ੍ਤਮਸੀਸਂ ਛਿਨ੍ਦਿਤ੍ਵਾ ਆਹਰਨ੍ਤੁ.

ਰਾਜਿਨੋਤਿ ਭਿਕ੍ਖਵੇ, ਰਞ੍ਞੋ ਸਨ੍ਤਿਕਾ ਦੂਤਾ ਰਞ੍ਞਾ ਪੇਸਿਤਾ ਵੇਗੇਨ ਗਨ੍ਤ੍ਵਾ ਮਾਤਰਾ ਅਲਙ੍ਕਰਿਤ੍ਵਾ ਅਤ੍ਤਨੋ ਅਙ੍ਕੇ ਨਿਸੀਦਾਪਿਤਂ ਕੁਮਾਰਂ ਪਰਿਵਾਰੇਤ੍ਵਾ ਏਤਦਵੋਚੁਂ. ਇਸ੍ਸਰੇਨਾਤਿ ਰਞ੍ਞਾ. ਵਿਤਿਣ੍ਣੋਸੀਤਿ ਪਰਿਚ੍ਚਤ੍ਤੋਸਿ. ਸ ਰਾਜਪੁਤ੍ਤੋਤਿ ਭਿਕ੍ਖਵੇ, ਤੇਸਂ ਵਚਨਂ ਸੁਤ੍ਵਾ ਮਰਣਭਯਤਜ੍ਜਿਤੋ ਮਾਤੁ ਅਙ੍ਕਤੋ ਉਟ੍ਠਾਯ ਸੋ ਰਾਜਪੁਤ੍ਤੋ. ਪਟਿਦਸ੍ਸਯੇਥਾਤਿ ਦਸ੍ਸੇਥ. ਤਸ੍ਸਾਤਿ ਭਿਕ੍ਖਵੇ, ਤੇ ਦੂਤਾ ਕੁਮਾਰਸ੍ਸ ਤਂ ਵਚਨਂ ਸੁਤ੍ਵਾ ਮਾਰੇਤੁਂ ਅਵਿਸਹਨ੍ਤਾ ਗੋਣਂ ਵਿਯ ਨਂ ਰਜ੍ਜੁਯਾ ਪਰਿਕਡ੍ਢਨ੍ਤਾ ਨੇਤ੍ਵਾ ਰਞ੍ਞੋ ਦਸ੍ਸਯੁਂ. ਕੁਮਾਰੇ ਪਨ ਨੀਯਮਾਨੇ ਦਾਸਿਗਣਪਰਿਵੁਤਾ ਸਦ੍ਧਿਂ ਓਰੋਧੇਹਿ ਸੁਧਮ੍ਮਾਪਿ ਦੇਵੀ ਨਾਗਰਾਪਿ ‘‘ਮਯਂ ਨਿਰਪਰਾਧਂ ਕੁਮਾਰਂ ਮਾਰੇਤੁਂ ਨ ਦਸ੍ਸਾਮਾ’’ਤਿ ਤੇਨ ਸਦ੍ਧਿਂਯੇਵ ਅਗਮਂਸੁ. ਆਗਚ੍ਛੁਨ੍ਤਿ ਤੁਮ੍ਹਾਕਂ ਆਣਾਯ ਮਮ ਸਨ੍ਤਿਕਂ ਆਗਮਿਂਸੁ. ਹਨ੍ਤੁਂ ਮਮਨ੍ਤਿ ਮਂ ਮਾਰੇਤੁਂ. ਕੋ ਨੀਧਾਤਿ ਕੋ ਨੁ ਇਧ ਮਮ ਅਪਰਾਧੋ, ਯੇਨ ਮਂ ਤ੍ਵਂ ਮਾਰੇਸੀਤਿ ਪੁਚ੍ਛਿ.

ਰਾਜਾ ‘‘ਭਵਗ੍ਗਂ ਅਤਿਨੀਚਂ, ਤਵ ਦੋਸੋ ਅਤਿਮਹਨ੍ਤੋ’’ਤਿ ਤਸ੍ਸ ਦੋਸਂ ਕਥੇਨ੍ਤੋ ਗਾਥਮਾਹ –

੨੧੮.

‘‘ਸਾਯਞ੍ਚ ਪਾਤੋ ਉਦਕਂ ਸਜਾਤਿ, ਅਗ੍ਗਿਂ ਸਦਾ ਪਾਰਿਚਰਤਪ੍ਪਮਤ੍ਤੋ;

ਤਂ ਤਾਦਿਸਂ ਸਂਯਤਂ ਬ੍ਰਹ੍ਮਚਾਰਿਂ, ਕਸ੍ਮਾ ਤੁਵਂ ਬ੍ਰੂਸਿ ਗਹਪ੍ਪਤੀ’’ਤਿ.

ਤਤ੍ਥ ਉਦਕਂ ਸਜਾਤੀਤਿ ਉਦਕੋਰੋਹਣਕਮ੍ਮਂ ਕਰੋਤਿ. ਤਂ ਤਾਦਿਸਨ੍ਤਿ ਤਂ ਤਥਾਰੂਪਂ ਮਮ ਸਾਮਿਂ ਦਿਬ੍ਬਚਕ੍ਖੁਤਾਪਸਂ ਕਸ੍ਮਾ ਤ੍ਵਂ ਗਹਪਤਿਵਾਦੇਨ ਸਮੁਦਾਚਰਸੀਤਿ ਵਦਤਿ.

ਤਤੋ ਕੁਮਾਰੋ ‘‘ਦੇਵ, ਮਯ੍ਹਂ ਗਹਪਤਿਞ੍ਞੇਵ ‘ਗਹਪਤੀ’ਤਿ ਵਦਨ੍ਤਸ੍ਸ ਕੋ ਦੋਸੋ’’ਤਿ ਵਤ੍ਵਾ ਗਾਥਮਾਹ –

੨੧੯.

‘‘ਤਾਲਾ ਚ ਮੂਲਾ ਚ ਫਲਾ ਚ ਦੇਵ, ਪਰਿਗ੍ਗਹਾ ਵਿਵਿਧਾ ਸਨ੍ਤਿਮਸ੍ਸ;

ਤੇ ਰਕ੍ਖਤਿ ਗੋਪਯਤਪ੍ਪਮਤ੍ਤੋ, ਤਸ੍ਮਾ ਅਹਂ ਬ੍ਰੂਮਿ ਗਹਪ੍ਪਤੀ’’ਤਿ.

ਤਤ੍ਥ ਮੂਲਾਤਿ ਮੂਲਕਾਦਿਮੂਲਾਨਿ. ਫਲਾਤਿ ਨਾਨਾਵਿਧਾਨਿ ਵਲ੍ਲਿਫਲਾਨਿ. ਤੇ ਰਕ੍ਖਤਿ ਗੋਪਯਤਪ੍ਪਮਤ੍ਤੋਤਿ ਤੇ ਏਸ ਤਵ ਕੁਲੂਪਕਤਾਪਸੋ ਪਣ੍ਣਿਕਕਮ੍ਮਂ ਕਰੋਨ੍ਤੋ ਨਿਸੀਦਿਤ੍ਵਾ ਰਕ੍ਖਤਿ, ਵਤਿਂ ਕਤ੍ਵਾ ਗੋਪਯਤਿ ਅਪ੍ਪਮਤ੍ਤੋ, ਤੇਨ ਕਾਰਣੇਨ ਸੋ ਤਵ ਬ੍ਰਾਹ੍ਮਣੋ ਗਹਪਤਿ ਨਾਮ ਹੋਤਿ.

ਇਤਿ ਨਂ ਅਹਮ੍ਪਿ ‘‘ਗਹਪਤੀ’’ਤਿ ਕਥੇਸਿਂ. ਸਚੇ ਨ ਸਦ੍ਦਹਸਿ, ਚਤੂਸੁ ਦ੍ਵਾਰੇਸੁ ਪਣ੍ਣਿਕੇ ਪੁਚ੍ਛਾਪੇਹੀਤਿ. ਰਾਜਾ ਪੁਚ੍ਛਾਪੇਸਿ. ਤੇ ‘‘ਆਮ, ਮਯਂ ਇਮਸ੍ਸ ਹਤ੍ਥਤੋ ਪਣ੍ਣਞ੍ਚ ਫਲਾਫਲਾਨਿ ਚ ਕਿਣਾਮਾ’’ਤਿ ਆਹਂਸੁ. ਪਣ੍ਣਵਤ੍ਥੁਮ੍ਪਿ ਉਪਧਾਰਾਪੇਤ੍ਵਾ ਪਚ੍ਚਕ੍ਖਮਕਾਸਿ. ਪਣ੍ਣਸਾਲਮ੍ਪਿਸ੍ਸ ਪਵਿਸਿਤ੍ਵਾ ਕੁਮਾਰਸ੍ਸ ਪੁਰਿਸਾ ਪਣ੍ਣਵਿਕ੍ਕਯਲਦ੍ਧਂ ਕਹਾਪਣਮਾਸਕਭਣ੍ਡਿਕਂ ਨੀਹਰਿਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ਮਹਾਸਤ੍ਤਸ੍ਸ ਨਿਦ੍ਦੋਸਭਾਵਂ ਞਤ੍ਵਾ ਗਾਥਮਾਹ –

੨੨੦.

‘‘ਸਚ੍ਚਂ ਖੋ ਏਤਂ ਵਦਸਿ ਕੁਮਾਰ, ਪਰਿਗ੍ਗਹਾ ਵਿਵਿਧਾ ਸਨ੍ਤਿਮਸ੍ਸ;

ਤੇ ਰਕ੍ਖਤਿ ਗੋਪਯਤਪ੍ਪਮਤ੍ਤੋ, ਸ ਬ੍ਰਾਹ੍ਮਣੋ ਗਹਪਤਿ ਤੇਨ ਹੋਤੀ’’ਤਿ.

ਤਤੋ ਮਹਾਸਤ੍ਤੋ ਚਿਨ੍ਤੇਸਿ ‘‘ਏਵਰੂਪਸ੍ਸ ਬਾਲਸ੍ਸ ਰਞ੍ਞੋ ਸਨ੍ਤਿਕੇ ਵਾਸਤੋ ਹਿਮਵਨ੍ਤਂ ਪਵਿਸਿਤ੍ਵਾ ਪਬ੍ਬਜਿਤੁਂ ਵਰਂ, ਪਰਿਸਮਜ੍ਝੇਯੇਵਸ੍ਸ ਦੋਸਂ ਆਵਿਕਤ੍ਵਾ ਆਪੁਚ੍ਛਿਤ੍ਵਾ ਅਜ੍ਜੇਵ ਨਿਕ੍ਖਮਿਤ੍ਵਾ ਪਬ੍ਬਜਿਸ੍ਸਾਮੀ’’ਤਿ. ਸੋ ਪਰਿਸਾਯ ਨਮਕ੍ਕਾਰਂ ਕਤ੍ਵਾ ਗਾਥਮਾਹ –

੨੨੧.

‘‘ਸੁਣਨ੍ਤੁ ਮਯ੍ਹਂ ਪਰਿਸਾ ਸਮਾਗਤਾ, ਸਨੇਗਮਾ ਜਾਨਪਦਾ ਚ ਸਬ੍ਬੇ;

ਬਾਲਾਯਂ ਬਾਲਸ੍ਸ ਵਚੋ ਨਿਸਮ੍ਮ, ਅਹੇਤੁਨਾ ਘਾਤਯਤੇ ਮਂ ਜਨਿਨ੍ਦੋ’’ਤਿ.

ਤਤ੍ਥ ਬਾਲਾਯਂ ਬਾਲਸ੍ਸਾਤਿ ਅਯਂ ਰਾਜਾ ਸਯਂ ਬਾਲੋ ਇਮਸ੍ਸ ਬਾਲਸ੍ਸ ਕੂਟਜਟਿਲਸ੍ਸ ਵਚਨਂ ਸੁਤ੍ਵਾ ਅਹੇਤੁਨਾਵ ਮਂ ਘਾਤਯਤੇਤਿ.

ਏਵਞ੍ਚ ਪਨ ਵਤ੍ਵਾ ਪਿਤਰਂ ਵਨ੍ਦਿਤ੍ਵਾ ਅਤ੍ਤਾਨਂ ਪਬ੍ਬਜ੍ਜਾਯ ਅਨੁਜਾਨਾਪੇਨ੍ਤੋ ਇਤਰਂ ਗਾਥਮਾਹ –

੨੨੨.

‘‘ਦਲ਼੍ਹਸ੍ਮਿ ਮੂਲੇ ਵਿਸਟੇ ਵਿਰੂਲ਼੍ਹੇ, ਦੁਨ੍ਨਿਕ੍ਕਯੋ ਵੇਲ਼ੁ ਪਸਾਖਜਾਤੋ;

ਵਨ੍ਦਾਮਿ ਪਾਦਾਨਿ ਤਵ ਜਨਿਨ੍ਦ, ਅਨੁਜਾਨ ਮਂ ਪਬ੍ਬਜਿਸ੍ਸਾਮਿ ਦੇਵਾ’’ਤਿ.

ਤਤ੍ਥ ਵਿਸਟੇਤਿ ਵਿਸਾਲੇ ਮਹਨ੍ਤੇ ਜਾਤੇ. ਦੁਨ੍ਨਿਕ੍ਕਯੋਤਿ ਦੁਨ੍ਨਿਕ੍ਕਡ੍ਢਿਯੋ.

ਤਤੋ ਪਰਾ ਰਞ੍ਞੋ ਚ ਪੁਤ੍ਤਸ੍ਸ ਚ ਵਚਨਪਟਿਵਚਨਗਾਥਾ ਹੋਨ੍ਤਿ –

੨੨੩.

‘‘ਭੁਞ੍ਜਸ੍ਸੁ ਭੋਗੇ ਵਿਪੁਲੇ ਕੁਮਾਰ, ਸਬ੍ਬਞ੍ਚ ਤੇ ਇਸ੍ਸਰਿਯਂ ਦਦਾਮਿ;

ਅਜ੍ਜੇਵ ਤ੍ਵਂ ਕੁਰੂਨਂ ਹੋਹਿ ਰਾਜਾ, ਮਾ ਪਬ੍ਬਜੀ ਪਬ੍ਬਜ੍ਜਾ ਹਿ ਦੁਕ੍ਖਾ.

੨੨੪.

‘‘ਕਿਨ੍ਨੂਧ ਦੇਵ ਤਵਮਤ੍ਥਿ ਭੋਗਾ, ਪੁਬ੍ਬੇਵਹਂ ਦੇਵਲੋਕੇ ਰਮਿਸ੍ਸਂ;

ਰੂਪੇਹਿ ਸਦ੍ਦੇਹਿ ਅਥੋ ਰਸੇਹਿ, ਗਨ੍ਧੇਹਿ ਫਸ੍ਸੇਹਿ ਮਨੋਰਮੇਹਿ.

੨੨੫.

‘‘ਭੁਤ੍ਤਾ ਚ ਮੇ ਭੋਗਾ ਤਿਦਿਵਸ੍ਮਿਂ ਦੇਵ, ਪਰਿਵਾਰਿਤੋ ਅਚ੍ਛਰਾਨਂ ਗਣੇਨ;

ਤੁਵਞ੍ਚ ਬਾਲਂ ਪਰਨੇਯ੍ਯਂ ਵਿਦਿਤ੍ਵਾ, ਨ ਤਾਦਿਸੇ ਰਾਜਕੁਲੇ ਵਸੇਯ੍ਯਂ.

੨੨੬.

‘‘ਸਚਾਹਂ ਬਾਲੋ ਪਰਨੇਯ੍ਯੋ ਅਸ੍ਮਿ, ਏਕਾਪਰਾਧਂ ਖਮ ਪੁਤ੍ਤ ਮਯ੍ਹਂ;

ਪੁਨਪਿ ਚੇ ਏਦਿਸਕਂ ਭਵੇਯ੍ਯ, ਯਥਾਮਤਿਂ ਸੋਮਨਸ੍ਸ ਕਰੋਹੀ’’ਤਿ.

ਤਤ੍ਥ ਦੁਕ੍ਖਾਤਿ ਤਾਤ, ਪਬ੍ਬਜ੍ਜਾ ਨਾਮ ਪਰਪਟਿਬਦ੍ਧਜੀਵਿਕਤ੍ਤਾ ਦੁਕ੍ਖਾ, ਮਾ ਪਬ੍ਬਜਿ, ਰਾਜਾ ਹੋਹੀਤਿ ਤਂ ਯਾਚਿ. ਕਿਨ੍ਨੂਧ ਦੇਵਾਤਿ ਦੇਵ, ਯੇ ਤਵ ਭੋਗਾ, ਤੇਸੁ ਕਿਂ ਨਾਮ ਭੁਞ੍ਜਿਤਬ੍ਬਂ ਅਤ੍ਥਿ. ਪਰਿਵਾਰਿਤੋਤਿ ਪਰਿਚਾਰਿਤੋ, ਅਯਮੇਵ ਵਾ ਪਾਠੋ. ਤਸ੍ਸ ਕਿਰ ਜਾਤਿਸ੍ਸਰਞਾਣਂ ਉਪ੍ਪਜ੍ਜਿ, ਤਸ੍ਮਾ ਏਵਮਾਹ. ਪਰਨੇਯ੍ਯਨ੍ਤਿ ਅਨ੍ਧਂ ਵਿਯ ਯਟ੍ਠਿਯਾ ਪਰੇਨ ਨੇਤਬ੍ਬਂ. ਤਾਦਿਸੇਤਿ ਤਾਦਿਸਸ੍ਸ ਰਞ੍ਞੋ ਸਨ੍ਤਿਕੇ ਨ ਪਣ੍ਡਿਤੇਨ ਵਸਿਤਬ੍ਬਂ, ਮਯਾ ਅਤ੍ਤਨੋ ਞਾਣਬਲੇਨ ਅਜ੍ਜ ਜੀਵਿਤਂ ਲਦ੍ਧਂ, ਨਾਹਂ ਤਵ ਸਨ੍ਤਿਕੇ ਵਸਿਸ੍ਸਾਮੀਤਿ ਞਾਪੇਤੁਂ ਏਵਮਾਹ. ਯਥਾਮਤਿਨ੍ਤਿ ਸਚੇ ਪੁਨ ਮਯ੍ਹਂ ਏਵਰੂਪੋ ਦੋਸੋ ਹੋਤਿ, ਅਥ ਤ੍ਵਂ ਯਥਾਅਜ੍ਝਾਸਯਂ ਕਰੋਹੀਤਿ ਪੁਤ੍ਤਂ ਖਮਾਪੇਸਿ.

ਮਹਾਸਤ੍ਤੋ ਰਾਜਾਨਂ ਓਵਦਨ੍ਤੋ ਅਟ੍ਠ ਗਾਥਾ ਅਭਾਸਿ –

੨੨੭.

‘‘ਅਨਿਸਮ੍ਮ ਕਤਂ ਕਮ੍ਮਂ, ਅਨਵਤ੍ਥਾਯ ਚਿਨ੍ਤਿਤਂ;

ਭੇਸਜ੍ਜਸ੍ਸੇਵ ਵੇਭਙ੍ਗੋ, ਵਿਪਾਕੋ ਹੋਤਿ ਪਾਪਕੋ.

੨੨੮.

‘‘ਨਿਸਮ੍ਮ ਚ ਕਤਂ ਕਮ੍ਮਂ, ਸਮ੍ਮਾਵਤ੍ਥਾਯ ਚਿਨ੍ਤਿਤਂ;

ਭੇਸਜ੍ਜਸ੍ਸੇਵ ਸਮ੍ਪਤ੍ਤਿ, ਵਿਪਾਕੋ ਹੋਤਿ ਭਦ੍ਰਕੋ.

੨੨੯.

‘‘ਅਲਸੋ ਗਿਹੀ ਕਾਮਭੋਗੀ ਨ ਸਾਧੁ, ਅਸਞ੍ਞਤੋ ਪਬ੍ਬਜਿਤੋ ਨ ਸਾਧੁ;

ਰਾਜਾ ਨ ਸਾਧੁ ਅਨਿਸਮ੍ਮਕਾਰੀ, ਯੋ ਪਣ੍ਡਿਤੋ ਕੋਧਨੋ ਤਂ ਨ ਸਾਧੁ.

੨੩੦.

‘‘ਨਿਸਮ੍ਮ ਖਤ੍ਤਿਯੋ ਕਯਿਰਾ, ਨਾਨਿਸਮ੍ਮ ਦਿਸਮ੍ਪਤਿ;

ਨਿਸਮ੍ਮਕਾਰਿਨੋ ਰਾਜ, ਯਸੋ ਕਿਤ੍ਤਿ ਚ ਵਡ੍ਢਤਿ.

੨੩੧.

‘‘ਨਿਸਮ੍ਮ ਦਣ੍ਡਂ ਪਣਯੇਯ੍ਯ ਇਸ੍ਸਰੋ, ਵੇਗਾ ਕਤਂ ਤਪ੍ਪਤਿ ਭੂਮਿਪਾਲ;

ਸਮ੍ਮਾਪਣੀਧੀ ਚ ਨਰਸ੍ਸ ਅਤ੍ਥਾ, ਅਨਾਨੁਤਪ੍ਪਾ ਤੇ ਭਵਨ੍ਤਿ ਪਚ੍ਛਾ.

੨੩੨.

‘‘ਅਨਾਨੁਤਪ੍ਪਾਨਿ ਹਿ ਯੇ ਕਰੋਨ੍ਤਿ, ਵਿਭਜ੍ਜ ਕਮ੍ਮਾਯਤਨਾਨਿ ਲੋਕੇ;

ਵਿਞ੍ਞੁਪ੍ਪਸਤ੍ਥਾਨਿ ਸੁਖੁਦ੍ਰਯਾਨਿ, ਭਵਨ੍ਤਿ ਬੁਦ੍ਧਾਨੁਮਤਾਨਿ ਤਾਨਿ.

੨੩੩.

‘‘ਆਗਚ੍ਛੁਂ ਦੋਵਾਰਿਕਾ ਖਗ੍ਗਬਨ੍ਧਾ, ਕਾਸਾਵਿਯਾ ਹਨ੍ਤੁ ਮਮਂ ਜਨਿਨ੍ਦ;

ਮਾਤੁਞ੍ਚ ਅਙ੍ਕਸ੍ਮਿਮਹਂ ਨਿਸਿਨ੍ਨੋ, ਆਕਡ੍ਢਿਤੋ ਸਹਸਾ ਤੇਹਿ ਦੇਵ.

੨੩੪.

‘‘ਕਟੁਕਞ੍ਹਿ ਸਮ੍ਬਾਧਂ ਸੁਕਿਚ੍ਛਂ ਪਤ੍ਤੋ, ਮਧੁਰਮ੍ਪਿ ਯਂ ਜੀਵਿਤਂ ਲਦ੍ਧ ਰਾਜ;

ਕਿਚ੍ਛੇਨਹਂ ਅਜ੍ਜ ਵਧਾ ਪਮੁਤ੍ਤੋ, ਪਬ੍ਬਜ੍ਜਮੇਵਾਭਿਮਨੋਹਮਸ੍ਮੀ’’ਤਿ.

ਤਤ੍ਥ ਅਨਿਸਮ੍ਮਾਤਿ ਅਨੋਲੋਕੇਤ੍ਵਾ ਅਨੁਪਧਾਰੇਤ੍ਵਾ. ਅਨਵਤ੍ਥਾਯ ਚਿਨ੍ਤਿਤਨ੍ਤਿ ਅਨਵਤ੍ਥਪੇਤ੍ਵਾ ਅਤੁਲੇਤ੍ਵਾ ਅਤੀਰੇਤ੍ਵਾ ਚਿਨ੍ਤਿਤਂ. ਵਿਪਾਕੋ ਹੋਤਿ ਪਾਪਕੋਤਿ ਤਸ੍ਸ ਹਿ ਯਥਾ ਨਾਮ ਭੇਸਜ੍ਜਸ੍ਸ ਵੇਭਙ੍ਗੋ ਵਿਪਤ੍ਤਿ, ਏਵਮੇਵਂ ਵਿਪਾਕੋ ਹੋਤਿ ਪਾਪਕੋ. ਅਸਞ੍ਞਤੋਤਿ ਕਾਯਾਦੀਹਿ ਅਸਞ੍ਞਤੋ ਦੁਸ੍ਸੀਲੋ. ਤਂ ਨ ਸਾਧੂਤਿ ਤਂ ਤਸ੍ਸ ਕੋਧਨਂ ਨ ਸਾਧੁ. ਨਾਨਿਸਮ੍ਮਾਤਿ ਅਨਿਸਾਮੇਤ੍ਵਾ ਕਿਞ੍ਚਿ ਕਮ੍ਮਂ ਨ ਕਰੇਯ੍ਯ. ਪਣਯੇਯ੍ਯਾਤਿ ਪਟ੍ਠਪੇਯ੍ਯ ਪਵਤ੍ਤੇਯ੍ਯ. ਵੇਗਾਤਿ ਵੇਗੇਨ ਸਹਸਾ. ਸਮ੍ਮਾਪਣੀਧੀ ਚਾਤਿ ਯੋਨਿਸੋ ਠਪਿਤੇਨ ਚਿਤ੍ਤੇਨ ਕਤਾ ਨਰਸ੍ਸ ਅਤ੍ਥਾ ਪਚ੍ਛਾ ਅਨਾਨੁਤਪ੍ਪਾ ਭਵਨ੍ਤੀਤਿ ਅਤ੍ਥੋ. ਵਿਭਜ੍ਜਾਤਿ ‘‘ਇਮਾਨਿ ਕਾਤੁਂ ਯੁਤ੍ਤਾਨਿ, ਇਮਾਨਿ ਅਯੁਤ੍ਤਾਨੀ’’ਤਿ ਏਵਂ ਪਞ੍ਞਾਯ ਵਿਭਜਿਤ੍ਵਾ. ਕਮ੍ਮਾਯਤਨਾਨੀਤਿ ਕਮ੍ਮਾਨਿ. ਬੁਦ੍ਧਾਨੁਮਤਾਨੀਤਿ ਪਣ੍ਡਿਤੇਹਿ ਅਨੁਮਤਾਨਿ ਅਨਵਜ੍ਜਾਨਿ ਹੋਨ੍ਤਿ. ਕਟੁਕਨ੍ਤਿ ਦੇਵ, ਕਟੁਕਂ ਸਮ੍ਬਾਧਂ ਸੁਕਿਚ੍ਛਂ ਮਰਣਭਯਂ ਪਤ੍ਤੋਮ੍ਹਿ. ਲਦ੍ਧਾਤਿ ਅਤ੍ਤਨੋ ਞਾਣਬਲੇਨ ਲਭਿਤ੍ਵਾ. ਪਬ੍ਬਜ੍ਜਮੇਵਾਭਿਮਨੋਹਮਸ੍ਮੀਤਿ ਪਬ੍ਬਜ੍ਜਾਭਿਮੁਖਚਿਤ੍ਤੋਯੇਵਸ੍ਮਿ.

ਏਵਂ ਮਹਾਸਤ੍ਤੇਨ ਧਮ੍ਮੇ ਦੇਸਿਤੇ ਰਾਜਾ ਦੇਵਿਂ ਆਮਨ੍ਤੇਤ੍ਵਾ ਗਾਥਮਾਹ –

੨੩੫.

‘‘ਪੁਤ੍ਤੋ ਤਵਾਯਂ ਤਰੁਣੋ ਸੁਧਮ੍ਮੇ, ਅਨੁਕਮ੍ਪਕੋ ਸੋਮਨਸ੍ਸੋ ਕੁਮਾਰੋ;

ਤਂ ਯਾਚਮਾਨੋ ਨ ਲਭਾਮਿ ਸ੍ਵਜ੍ਜ, ਅਰਹਸਿ ਨਂ ਯਾਚਿਤਵੇ ਤੁਵਮ੍ਪੀ’’ਤਿ.

ਤਤ੍ਥ ਯਾਚਿਤਵੇਤਿ ਯਾਚਿਤੁਂ.

ਸਾ ਪਬ੍ਬਜ੍ਜਾਯਮੇਵ ਉਯੋਜੇਨ੍ਤੀ ਗਾਥਮਾਹ –

੨੩੬.

‘‘ਰਮਸ੍ਸੁ ਭਿਕ੍ਖਾਚਰਿਯਾਯ ਪੁਤ੍ਤ, ਨਿਸਮ੍ਮ ਧਮ੍ਮੇਸੁ ਪਰਿਬ੍ਬਜਸ੍ਸੁ;

ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ, ਅਨਿਨ੍ਦਿਤੋ ਬ੍ਰਹ੍ਮਮੁਪੇਤਿ ਠਾਨ’’ਨ੍ਤਿ.

ਤਤ੍ਥ ਨਿਸਮ੍ਮਾਤਿ ਪਬ੍ਬਜਨ੍ਤੋ ਚ ਨਿਸਾਮੇਤ੍ਵਾ ਮਿਚ੍ਛਾਦਿਟ੍ਠਿਕਾਨਂ ਪਬ੍ਬਜ੍ਜਂ ਪਹਾਯ ਸਮ੍ਮਾਦਿਟ੍ਠਿਯੁਤ੍ਤਂ ਨਿਯ੍ਯਾਨਿਕਪਬ੍ਬਜ੍ਜਂ ਪਬ੍ਬਜ.

ਅਥ ਰਾਜਾ ਗਾਥਮਾਹ –

੨੩੭.

‘‘ਅਚ੍ਛੇਰਰੂਪਂ ਵਤ ਯਾਦਿਸਞ੍ਚ, ਦੁਕ੍ਖਿਤਂ ਮਂ ਦੁਕ੍ਖਾਪਯਸੇ ਸੁਧਮ੍ਮੇ;

ਯਾਚਸ੍ਸੁ ਪੁਤ੍ਤਂ ਇਤਿ ਵੁਚ੍ਚਮਾਨਾ, ਭਿਯ੍ਯੋਵ ਉਸ੍ਸਾਹਯਸੇ ਕੁਮਾਰ’’ਨ੍ਤਿ.

ਤਤ੍ਥ ਯਾਦਿਸਞ੍ਚਾਤਿ ਯਾਦਿਸਂ ਇਦਂ ਤ੍ਵਂ ਵਦੇਸਿ, ਤਂ ਅਚ੍ਛਰਿਯਰੂਪਂ ਵਤ. ਦੁਕ੍ਖਿਤਨ੍ਤਿ ਪਕਤਿਯਾਪਿ ਮਂ ਦੁਕ੍ਖਿਤਂ ਭਿਯ੍ਯੋ ਦੁਕ੍ਖਾਪਯਸਿ.

ਪੁਨ ਦੇਵੀ ਗਾਥਮਾਹ –

੨੩੮.

‘‘ਯੇ ਵਿਪ੍ਪਮੁਤ੍ਤਾ ਅਨਵਜ੍ਜਭੋਗਿਨੋ, ਪਰਿਨਿਬ੍ਬੁਤਾ ਲੋਕਮਿਮਂ ਚਰਨ੍ਤਿ;

ਤਮਰਿਯਮਗ੍ਗਂ ਪਟਿਪਜ੍ਜਮਾਨਂ, ਨ ਉਸ੍ਸਹੇ ਵਾਰਯਿਤੁਂ ਕੁਮਾਰ’’ਨ੍ਤਿ.

ਤਤ੍ਥ ਵਿਪ੍ਪਮੁਤ੍ਤਾਤਿ ਰਾਗਾਦੀਹਿ ਵਿਪ੍ਪਮੁਤ੍ਤਾ. ਪਰਿਨਿਬ੍ਬੁਤਾਤਿ ਕਿਲੇਸਪਰਿਨਿਬ੍ਬਾਨੇਨ ਨਿਬ੍ਬੁਤਾ. ਤਮਰਿਯਮਗ੍ਗਨ੍ਤਿ ਤਂ ਤੇਸਂ ਬੁਦ੍ਧਾਦੀਨਂ ਅਰਿਯਾਨਂ ਸਨ੍ਤਕਂ ਮਗ੍ਗਂ ਪਟਿਪਜ੍ਜਮਾਨਂ ਮਮ ਪੁਤ੍ਤਂ ਵਾਰੇਤੁਂ ਨ ਉਸ੍ਸਹਾਮਿ ਦੇਵਾਤਿ.

ਤਸ੍ਸਾ ਵਚਨਂ ਸੁਤ੍ਵਾ ਰਾਜਾ ਓਸਾਨਗਾਥਮਾਹ –

੨੩੯.

‘‘ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਯੇਸਾਯਂ ਸੁਤ੍ਵਾਨ ਸੁਭਾਸਿਤਾਨਿ, ਅਪ੍ਪੋਸ੍ਸੁਕ੍ਕਾ ਵੀਤਸੋਕਾ ਸੁਧਮ੍ਮਾ’’ਤਿ.

ਤਤ੍ਥ ਬਹੁਠਾਨਚਿਨ੍ਤਿਨੋਤਿ ਬਹੁਕਾਰਣਚਿਨ੍ਤਿਨੋ. ਯੇਸਾਯਨ੍ਤਿ ਯੇਸਂ ਅਯਂ. ਸੋਮਨਸ੍ਸਕੁਮਾਰਸ੍ਸੇਵ ਹਿ ਸਾ ਸੁਭਾਸਿਤਂ ਸੁਤ੍ਵਾ ਅਪ੍ਪੋਸ੍ਸੁਕ੍ਕਾ ਜਾਤਾ, ਰਾਜਾਪਿ ਤਦੇਵ ਸਨ੍ਧਾਯਾਹ.

ਮਹਾਸਤ੍ਤੋ ਮਾਤਾਪਿਤਰੋ ਵਨ੍ਦਿਤ੍ਵਾ ‘‘ਸਚੇ ਮਯ੍ਹਂ ਦੋਸੋ ਅਤ੍ਥਿ, ਖਮਥਾ’’ਤਿ ਮਹਾਜਨਸ੍ਸ ਅਞ੍ਜਲਿਂ ਕਤ੍ਵਾ ਹਿਮਵਨ੍ਤਾਭਿਮੁਖੋ ਗਨ੍ਤ੍ਵਾ ਮਨੁਸ੍ਸੇਸੁ ਨਿਵਤ੍ਤੇਸੁ ਮਨੁਸ੍ਸਵਣ੍ਣੇਨਾਗਨ੍ਤ੍ਵਾ ਦੇਵਤਾਹਿ ਸਤ੍ਤ ਪਬ੍ਬਤਰਾਜਿਯੋ ਅਤਿਕ੍ਕਮਿਤ੍ਵਾ ਹਿਮਵਨ੍ਤਂ ਨੀਤੋ ਵਿਸ੍ਸਕਮ੍ਮੁਨਾ ਨਿਮ੍ਮਿਤਾਯ ਪਣ੍ਣਸਾਲਾਯ ਇਸਿਪਬ੍ਬਜ੍ਜਂ ਪਬ੍ਬਜਿ. ਤਂ ਤਤ੍ਥ ਯਾਵ ਸੋਲ਼ਸਵਸ੍ਸਕਾਲਾ ਰਾਜਕੁਲਪਰਿਚਾਰਿਕਵੇਸੇਨ ਦੇਵਤਾਯੇਵ ਉਪਟ੍ਠਹਿਂਸੁ. ਕੂਟਜਟਿਲਮ੍ਪਿ ਮਹਾਜਨੋ ਪੋਥੇਤ੍ਵਾ ਜੀਵਿਤਕ੍ਖਯਂ ਪਾਪੇਸਿ. ਮਹਾਸਤ੍ਤੋ ਝਾਨਾਭਿਞ੍ਞਂ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇਪੇਸ ਮਯ੍ਹਂ ਵਧਾਯ ਪਰਿਸਕ੍ਕਿਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕੁਹਕੋ ਦੇਵਦਤ੍ਤੋ ਅਹੋਸਿ, ਮਾਤਾ ਮਹਾਮਾਯਾ, ਮਹਾਰਕ੍ਖਿਤੋ ਸਾਰਿਪੁਤ੍ਤੋ, ਸੋਮਨਸ੍ਸਕੁਮਾਰੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੋਮਨਸ੍ਸਜਾਤਕਵਣ੍ਣਨਾ ਨਵਮਾ.

[੫੦੬] ੧੦. ਚਮ੍ਪੇਯ੍ਯਜਾਤਕਵਣ੍ਣਨਾ

ਕਾ ਨੁ ਵਿਜ੍ਜੁਰਿਵਾਭਾਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਪੋਸਥਕਮ੍ਮਂ ਆਰਬ੍ਭ ਕਥੇਸਿ. ਤਦਾ ਹਿ ਸਤ੍ਥਾ ‘‘ਸਾਧੁ ਵੋ ਕਤਂ ਉਪਾਸਕਾ ਉਪੋਸਥਵਾਸਂ ਵਸਨ੍ਤੇਹਿ, ਪੋਰਾਣਕਪਣ੍ਡਿਤਾ ਨਾਗਸਮ੍ਪਤ੍ਤਿਂ ਪਹਾਯ ਉਪੋਸਥਵਾਸਂ ਵਸਿਂਸੁਯੇਵਾ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਅਙ੍ਗਰਟ੍ਠੇ ਅਙ੍ਗੇ ਚ ਮਗਧਰਟ੍ਠੇ ਮਗਧੇ ਚ ਰਜ੍ਜਂ ਕਾਰੇਨ੍ਤੇ ਅਙ੍ਗਮਗਧਰਟ੍ਠਾਨਂ ਅਨ੍ਤਰੇ ਚਮ੍ਪਾ ਨਾਮ ਨਦੀ, ਤਤ੍ਥ ਨਾਗਭਵਨਂ ਅਹੋਸਿ. ਚਮ੍ਪੇਯ੍ਯੋ ਨਾਮ ਨਾਗਰਾਜਾ ਰਜ੍ਜਂ ਕਾਰੇਸਿ. ਕਦਾਚਿ ਮਗਧਰਾਜਾ ਅਙ੍ਗਰਟ੍ਠਂ ਗਣ੍ਹਾਤਿ, ਕਦਾਚਿ ਅਙ੍ਗਰਾਜਾ ਮਗਧਰਟ੍ਠਂ. ਅਥੇਕਦਿਵਸਂ ਮਗਧਰਾਜਾ ਅਙ੍ਗੇਨ ਸਦ੍ਧਿਂ ਯੁਜ੍ਝਿਤ੍ਵਾ ਯੁਦ੍ਧਪਰਾਜਿਤੋ ਅਸ੍ਸਂ ਆਰੁਯ੍ਹ ਪਲਾਯਨ੍ਤੋ ਅਙ੍ਗਰਞ੍ਞੋ ਯੋਧੇਹਿ ਅਨੁਬਦ੍ਧੋ ਪੁਣ੍ਣਂ ਚਮ੍ਪਾਨਦਿਂ ਪਤ੍ਵਾ ‘‘ਪਰਹਤ੍ਥੇ ਮਰਣਤੋ ਨਦਿਂ ਪਵਿਸਿਤ੍ਵਾ ਮਤਂ ਸੇਯ੍ਯੋ’’ਤਿ ਅਸ੍ਸੇਨੇਵ ਸਦ੍ਧਿਂ ਨਦਿਂ ਓਤਰਿ. ਤਦਾ ਚਮ੍ਪੇਯ੍ਯੋ ਨਾਗਰਾਜਾ ਅਨ੍ਤੋਦਕੇ ਰਤਨਮਣ੍ਡਪਂ ਨਿਮ੍ਮਿਨਿਤ੍ਵਾ ਮਹਾਪਰਿਵਾਰੋ ਮਹਾਪਾਨਂ ਪਿਵਤਿ. ਅਸ੍ਸੋ ਰਞ੍ਞਾ ਸਦ੍ਧਿਂ ਉਦਕੇ ਨਿਮੁਜ੍ਜਿਤ੍ਵਾ ਨਾਗਰਞ੍ਞੋ ਪੁਰਤੋ ਓਤਰਿ. ਨਾਗਰਾਜਾ ਅਲਙ੍ਕਤਪਟਿਯਤ੍ਤਂ ਰਾਜਾਨਂ ਦਿਸ੍ਵਾ ਸਿਨੇਹਂ ਉਪ੍ਪਾਦੇਤ੍ਵਾ ਆਸਨਾ ਉਟ੍ਠਾਯ ‘‘ਮਾ ਭਾਯਿ, ਮਹਾਰਾਜਾ’’ਤਿ ਰਾਜਾਨਂ ਅਤ੍ਤਨੋ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਉਦਕੇ ਨਿਮੁਗ੍ਗਕਾਰਣਂ ਪੁਚ੍ਛਿ. ਰਾਜਾ ਯਥਾਭੂਤਂ ਕਥੇਸਿ. ਅਥ ਨਂ ‘‘ਮਾ ਭਾਯਿ, ਮਹਾਰਾਜ, ਅਹਂ ਤਂ ਦ੍ਵਿਨ੍ਨਂ ਰਟ੍ਠਾਨਂ ਸਾਮਿਕਂ ਕਰਿਸ੍ਸਾਮੀ’’ਤਿ ਅਸ੍ਸਾਸੇਤ੍ਵਾ ਸਤ੍ਤਾਹਂ ਮਹਨ੍ਤਂ ਯਸਂ ਅਨੁਭਵਿਤ੍ਵਾ ਸਤ੍ਤਮੇ ਦਿਵਸੇ ਮਗਧਰਾਜੇਨ ਸਦ੍ਧਿਂ ਨਾਗਭਵਨਾ ਨਿਕ੍ਖਮਿ. ਮਗਧਰਾਜਾ ਨਾਗਰਾਜਸ੍ਸਾਨੁਭਾਵੇਨ ਅਙ੍ਗਰਾਜਾਨਂ ਗਹੇਤ੍ਵਾ ਜੀਵਿਤਾ ਵੋਰੋਪੇਤ੍ਵਾ ਦ੍ਵੀਸੁ ਰਟ੍ਠੇਸੁ ਰਜ੍ਜਂ ਕਾਰੇਸਿ. ਤਤੋ ਪਟ੍ਠਾਯ ਰਞ੍ਞੋ ਚ ਨਾਗਰਾਜਸ੍ਸ ਚ ਵਿਸ੍ਸਾਸੋ ਥਿਰੋ ਅਹੋਸਿ. ਰਾਜਾ ਅਨੁਸਂਵਚ੍ਛਰਂ ਚਮ੍ਪਾਨਦੀਤੀਰੇ ਰਤਨਮਣ੍ਡਪਂ ਕਾਰੇਤ੍ਵਾ ਮਹਨ੍ਤੇਨ ਪਰਿਚ੍ਚਾਗੇਨ ਨਾਗਰਞ੍ਞੋ ਬਲਿਕਮ੍ਮਂ ਕਰੋਤਿ. ਸੋਪਿ ਮਹਨ੍ਤੇਨ ਪਰਿਵਾਰੇਨ ਨਾਗਭਵਨਾ ਨਿਕ੍ਖਮਿਤ੍ਵਾ ਬਲਿਕਮ੍ਮਂ ਸਮ੍ਪਟਿਚ੍ਛਤਿ. ਮਹਾਜਨੋ ਨਾਗਰਞ੍ਞੋ ਸਮ੍ਪਤ੍ਤਿਂ ਓਲੋਕੇਤਿ.

ਤਦਾ ਬੋਧਿਸਤ੍ਤੋ ਦਲਿਦ੍ਦਕੁਲੇ ਨਿਬ੍ਬਤ੍ਤੋ ਰਾਜਪਰਿਸਾਯ ਸਦ੍ਧਿਂ ਨਦੀਤੀਰਂ ਗਨ੍ਤ੍ਵਾ ਤਂ ਨਾਗਰਾਜਸ੍ਸ ਸਮ੍ਪਤ੍ਤਿਂ ਦਿਸ੍ਵਾ ਲੋਭਂ ਉਪ੍ਪਾਦੇਤ੍ਵਾ ਤਂ ਪਤ੍ਥਯਮਾਨੋ ਦਾਨਂ ਦਤ੍ਵਾ ਸੀਲਂ ਰਕ੍ਖਿਤ੍ਵਾ ਚਮ੍ਪੇਯ੍ਯਨਾਗਰਾਜਸ੍ਸ ਕਾਲਕਿਰਿਯਤੋ ਸਤ੍ਤਮੇ ਦਿਵਸੇ ਚਵਿਤ੍ਵਾ ਤਸ੍ਸ ਵਸਨਪਾਸਾਦੇ ਸਿਰਿਗਬ੍ਭੇ ਸਿਰਿਸਯਨਪਿਟ੍ਠੇ ਨਿਬ੍ਬਤ੍ਤਿ. ਸਰੀਰਂ ਸੁਮਨਦਾਮਵਣ੍ਣਂ ਮਹਨ੍ਤਂ ਅਹੋਸਿ. ਸੋ ਤਂ ਦਿਸ੍ਵਾ ਵਿਪ੍ਪਟਿਸਾਰੀ ਹੁਤ੍ਵਾ ‘‘ਮਯਾ ਕਤਕੁਸਲਨਿਸ੍ਸਨ੍ਦੇਨ ਛਸੁ ਕਾਮਸਗ੍ਗੇਸੁ ਇਸ੍ਸਰਿਯਂ ਕੋਟ੍ਠੇ ਪਟਿਸਾਮਿਤਂ ਧਞ੍ਞਂ ਵਿਯ ਅਹੋਸਿ. ਸ੍ਵਾਹਂ ਇਮਿਸ੍ਸਾ ਤਿਰਚ੍ਛਾਨਯੋਨਿਯਾ ਪਟਿਸਨ੍ਧਿਂ ਗਣ੍ਹਿਂ, ਕਿਂ ਮੇ ਜੀਵਿਤੇਨਾ’’ਤਿ ਮਰਣਾਯ ਚਿਤ੍ਤਂ ਉਪ੍ਪਾਦੇਸਿ. ਅਥ ਨਂ ਸੁਮਨਾ ਨਾਮ ਨਾਗਮਾਣਵਿਕਾ ਦਿਸ੍ਵਾ ‘‘ਮਹਾਨੁਭਾਵੋ ਸਤ੍ਤੋ ਨਿਬ੍ਬਤ੍ਤੋ ਭਵਿਸ੍ਸਤੀ’’ਤਿ ਸੇਸਨਾਗਮਾਣਵਿਕਾਨਂ ਸਞ੍ਞਂ ਅਦਾਸਿ, ਸਬ੍ਬਾ ਨਾਨਾਤੂਰਿਯਹਤ੍ਥਾ ਆਗਨ੍ਤ੍ਵਾ ਤਸ੍ਸ ਉਪਹਾਰਂ ਕਰਿਂਸੁ. ਤਸ੍ਸ ਤਂ ਨਾਗਭਵਨਂ ਸਕ੍ਕਭਵਨਂ ਵਿਯ ਅਹੋਸਿ, ਮਰਣਚਿਤ੍ਤਂ ਪਟਿਪ੍ਪਸ੍ਸਮ੍ਭਿ, ਸਪ੍ਪਸਰੀਰਂ ਵਿਜਹਿਤ੍ਵਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਸਯਨਪਿਟ੍ਠੇ ਨਿਸੀਦਿ. ਅਥਸ੍ਸ ਤਤੋ ਪਟ੍ਠਾਯ ਯਸੋ ਮਹਾ ਅਹੋਸਿ.

ਸੋ ਤਤ੍ਥ ਨਾਗਰਜ੍ਜਂ ਕਾਰੇਨ੍ਤੋ ਅਪਰਭਾਗੇ ਵਿਪ੍ਪਟਿਸਾਰੀ ਹੁਤ੍ਵਾ ‘‘ਕਿਂ ਮੇ ਇਮਾਯ ਤਿਰਚ੍ਛਾਨਯੋਨਿਯਾ, ਉਪੋਸਥਵਾਸਂ ਵਸਿਤ੍ਵਾ ਇਤੋ ਮੁਚ੍ਚਿਤ੍ਵਾ ਮਨੁਸ੍ਸਪਥਂ ਗਨ੍ਤ੍ਵਾ ਸਚ੍ਚਾਨਿ ਪਟਿਵਿਜ੍ਝਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਤੋ ਪਟ੍ਠਾਯ ਤਸ੍ਮਿਂਯੇਵ ਪਾਸਾਦੇ ਉਪੋਸਥਕਮ੍ਮਂ ਕਰੋਤਿ. ਅਲਙ੍ਕਤਨਾਗਮਾਣਵਿਕਾ ਤਸ੍ਸ ਸਨ੍ਤਿਕਂ ਗਚ੍ਛਨ੍ਤਿ, ਯੇਭੁਯ੍ਯੇਨਸ੍ਸ ਸੀਲਂ ਭਿਜ੍ਜਤਿ. ਸੋ ਤਤੋ ਪਟ੍ਠਾਯ ਪਾਸਾਦਾ ਨਿਕ੍ਖਮਿਤ੍ਵਾ ਉਯ੍ਯਾਨਂ ਗਚ੍ਛਤਿ. ਤਾ ਤਤ੍ਰਾਪਿ ਗਚ੍ਛਨ੍ਤਿ, ਉਪੋਸਥੋ ਭਿਜ੍ਜਤੇਵ. ਸੋ ਚਿਨ੍ਤੇਸਿ ‘‘ਮਯਾ ਇਤੋ ਨਾਗਭਵਨਾ ਨਿਕ੍ਖਮਿਤ੍ਵਾ ਮਨੁਸ੍ਸਲੋਕਂ ਗਨ੍ਤ੍ਵਾ ਉਪੋਸਥਵਾਸਂ ਵਸਿਤੁਂ ਵਟ੍ਟਤੀ’’ਤਿ. ਸੋ ਤਤੋ ਪਟ੍ਠਾਯ ਉਪੋਸਥਦਿਵਸੇਸੁ ਨਾਗਭਵਨਾ ਨਿਕ੍ਖਮਿਤ੍ਵਾ ਏਕਸ੍ਸ ਪਚ੍ਚਨ੍ਤਗਾਮਸ੍ਸ ਅਵਿਦੂਰੇ ਮਹਾਮਗ੍ਗਸਮੀਪੇ ਵਮ੍ਮਿਕਮਤ੍ਥਕੇ ‘‘ਮਮ ਚਮ੍ਮਾਦੀਹਿ ਅਤ੍ਥਿਕਾ ਗਣ੍ਹਨ੍ਤੁ, ਮਂ ਕੀਲ਼ਾਸਪ੍ਪਂ ਵਾ ਕਾਤੁਕਾਮਾ ਕਰੋਨ੍ਤੂ’’ਤਿ ਸਰੀਰਂ ਦਾਨਮੁਖੇ ਵਿਸ੍ਸਜ੍ਜੇਤ੍ਵਾ ਭੋਗੇ ਆਭੁਜਿਤ੍ਵਾ ਨਿਪਨ੍ਨੋ ਉਪੋਸਥਵਾਸਂ ਵਸਤਿ. ਮਹਾਮਗ੍ਗੇਨ ਗਚ੍ਛਨ੍ਤਾ ਚ ਆਗਚ੍ਛਨ੍ਤਾ ਚ ਤਂ ਦਿਸ੍ਵਾ ਗਨ੍ਧਾਦੀਹਿ ਪੂਜੇਤ੍ਵਾ ਪਕ੍ਕਮਨ੍ਤਿ. ਪਚ੍ਚਨ੍ਤਗਾਮਵਾਸਿਨੋ ਗਨ੍ਤ੍ਵਾ ‘‘ਮਹਾਨੁਭਾਵੋ ਨਾਗਰਾਜਾ’’ਤਿ ਤਸ੍ਸ ਉਪਰਿ ਮਣ੍ਡਪਂ ਕਰਿਤ੍ਵਾ ਸਮਨ੍ਤਾ ਵਾਲੁਕਂ ਓਕਿਰਿਤ੍ਵਾ ਗਨ੍ਧਾਦੀਹਿ ਪੂਜਯਿਂਸੁ. ਤਤੋ ਪਟ੍ਠਾਯ ਮਨੁਸ੍ਸਾ ਮਹਾਸਤ੍ਤੇ ਪਸੀਦਿਤ੍ਵਾ ਪੂਜਂ ਕਤ੍ਵਾ ਪੁਤ੍ਤਂ ਪਤ੍ਥੇਨ੍ਤਿ, ਧੀਤਰਂ ਪਤ੍ਥੇਨ੍ਤਿ.

ਮਹਾਸਤ੍ਤੋਪਿ ਉਪੋਸਥਕਮ੍ਮਂ ਕਰੋਨ੍ਤੋ ਚਾਤੁਦ੍ਦਸੀਪਨ੍ਨਰਸੀਸੁ ਵਮ੍ਮਿਕਮਤ੍ਥਕੇ ਨਿਪਜ੍ਜਿਤ੍ਵਾ ਪਾਟਿਪਦੇ ਨਾਗਭਵਨਂ ਗਚ੍ਛਤਿ. ਤਸ੍ਸੇਵਂ ਉਪੋਸਥਂ ਕਰੋਨ੍ਤਸ੍ਸ ਅਦ੍ਧਾ ਵੀਤਿਵਤ੍ਤੋ. ਏਕਦਿਵਸਂ ਸੁਮਨਾ ਅਗ੍ਗਮਹੇਸੀ ਆਹ ‘‘ਦੇਵ, ਤ੍ਵਂ ਮਨੁਸ੍ਸਲੋਕਂ ਗਨ੍ਤ੍ਵਾ ਉਪੋਸਥਂ ਉਪਵਸਸਿ, ਮਨੁਸ੍ਸਲੋਕੋ ਚ ਸਾਸਙ੍ਕੋ ਸਪ੍ਪਟਿਭਯੋ, ਸਚੇ ਤੇ ਭਯਂ ਉਪ੍ਪਜ੍ਜੇਯ੍ਯ, ਅਥ ਮਯਂ ਯੇਨ ਨਿਮਿਤ੍ਤੇਨ ਜਾਨੇਯ੍ਯਾਮ, ਤਂ ਨੋ ਆਚਿਕ੍ਖਾਹੀ’’ਤਿ. ਅਥ ਨਂ ਮਹਾਸਤ੍ਤੋ ਮਙ੍ਗਲਪੋਕ੍ਖਰਣਿਯਾ ਤੀਰਂ ਨੇਤ੍ਵਾ ‘‘ਸਚੇ ਮਂ ਭਦ੍ਦੇ, ਕੋਚਿ ਪਹਰਿਤ੍ਵਾ ਕਿਲਮੇਸ੍ਸਤਿ, ਇਮਿਸ੍ਸਾ ਪੋਕ੍ਖਰਣਿਯਾ ਉਦਕਂ ਆਵਿਲਂ ਭਵਿਸ੍ਸਤਿ, ਸਚੇ ਸੁਪਣ੍ਣੋ ਗਹੇਸ੍ਸਤਿ, ਉਦਕਂ ਪਕ੍ਕੁਥਿਸ੍ਸਤਿ, ਸਚੇ ਅਹਿਤੁਣ੍ਡਿਕੋ ਗਣ੍ਹਿਸ੍ਸਤਿ, ਉਦਕਂ ਲੋਹਿਤਵਣ੍ਣਂ ਭਵਿਸ੍ਸਤੀ’’ਤਿ ਆਹ. ਏਵਂ ਤਸ੍ਸਾ ਤੀਣਿ ਨਿਮਿਤ੍ਤਾਨਿ ਆਚਿਕ੍ਖਿਤ੍ਵਾ ਚਾਤੁਦ੍ਦਸੀਉਪੋਸਥਂ ਅਧਿਟ੍ਠਾਯ ਨਾਗਭਵਨਾ ਨਿਕ੍ਖਮਿਤ੍ਵਾ ਤਤ੍ਥ ਗਨ੍ਤ੍ਵਾ ਵਮ੍ਮਿਕਮਤ੍ਥਕੇ ਨਿਪਜ੍ਜਿ ਸਰੀਰਸੋਭਾਯ ਵਮ੍ਮਿਕਂ ਸੋਭਯਮਾਨੋ. ਸਰੀਰਞ੍ਹਿਸ੍ਸ ਰਜਤਦਾਮਂ ਵਿਯ ਸੇਤਂ ਅਹੋਸਿ ਮਤ੍ਥਕੋ ਰਤ੍ਤਕਮ੍ਬਲਗੇਣ੍ਡੁਕੋ ਵਿਯ. ਇਮਸ੍ਮਿਂ ਪਨ ਜਾਤਕੇ ਬੋਧਿਸਤ੍ਤਸ੍ਸ ਸਰੀਰਂ ਨਙ੍ਗਲਸੀਸਪਮਾਣਂ ਅਹੋਸਿ, ਭੂਰਿਦਤ੍ਤਜਾਤਕੇ (ਜਾ. ੨.੨੨.੭੮੪ ਆਦਯੋ) ਊਰੁਪ੍ਪਮਾਣਂ, ਸਙ੍ਖਪਾਲਜਾਤਕੇ (ਜਾ. ੨.੧੭.੧੪੩ ਆਦਯੋ) ਏਕਦੋਣਿਕਨਾਵਪਮਾਣਂ.

ਤਦਾ ਏਕੋ ਬਾਰਾਣਸਿਵਾਸੀ ਮਾਣਵੋ ਤਕ੍ਕਸਿਲਂ ਗਨ੍ਤ੍ਵਾ ਦਿਸਾਪਾਮੋਕ੍ਖਸ੍ਸ ਆਚਰਿਯਸ੍ਸ ਸਨ੍ਤਿਕੇ ਅਲਮ੍ਪਾਯਨਮਨ੍ਤਂ ਉਗ੍ਗਣ੍ਹਿਤ੍ਵਾ ਤੇਨ ਮਗ੍ਗੇਨ ਅਤ੍ਤਨੋ ਗੇਹਂ ਗਚ੍ਛਨ੍ਤੋ ਮਹਾਸਤ੍ਤਂ ਦਿਸ੍ਵਾ ‘‘ਇਮਂ ਸਪ੍ਪਂ ਗਹੇਤ੍ਵਾ ਗਾਮਨਿਗਮਰਾਜਧਾਨੀਸੁ ਕੀਲ਼ਾਪੇਨ੍ਤੋ ਧਨਂ ਉਪ੍ਪਾਦੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦਿਬ੍ਬੋਸਧਾਨਿ ਗਹੇਤ੍ਵਾ ਦਿਬ੍ਬਮਨ੍ਤਂ ਪਰਿਵਤ੍ਤੇਤ੍ਵਾ ਤਸ੍ਸ ਸਨ੍ਤਿਕਂ ਅਗਮਾਸਿ. ਦਿਬ੍ਬਮਨ੍ਤਸੁਤਕਾਲਤੋ ਪਟ੍ਠਾਯ ਮਹਾਸਤ੍ਤਸ੍ਸ ਕਣ੍ਣੇਸੁ ਅਯਸਲਾਕਪਵੇਸਨਕਾਲੋ ਵਿਯ ਜਾਤੋ, ਮਤ੍ਥਕੋ ਸਿਖਰੇਨ ਅਭਿਮਤ੍ਥਿਯਮਾਨੋ ਵਿਯ ਜਾਤੋ. ਸੋ ‘‘ਕੋ ਨੁ ਖੋ ਏਸੋ’’ਤਿ ਭੋਗਨ੍ਤਰਤੋ ਸੀਸਂ ਉਕ੍ਖਿਪਿਤ੍ਵਾ ਓਲੋਕੇਨ੍ਤੋ ਅਹਿਤੁਣ੍ਡਿਕਂ ਦਿਸ੍ਵਾ ਚਿਨ੍ਤੇਸਿ ‘‘ਮਮ ਵਿਸਂ ਮਹਨ੍ਤਂ, ਸਚਾਹਂ ਕੁਜ੍ਝਿਤ੍ਵਾ ਨਾਸਵਾਤਂ ਵਿਸ੍ਸਜ੍ਜੇਸ੍ਸਾਮਿ, ਏਤਸ੍ਸ ਸਰੀਰਂ ਭਸ੍ਮਮੁਟ੍ਠਿ ਵਿਯ ਵਿਪ੍ਪਕਿਰਿਸ੍ਸਤਿ, ਅਥ ਮੇ ਸੀਲਂ ਖਣ੍ਡਂ ਭਵਿਸ੍ਸਤਿ, ਨ ਦਾਨਿ ਤਂ ਓਲੋਕੇਸ੍ਸਾਮੀ’’ਤਿ. ਸੋ ਅਕ੍ਖੀਨਿ ਨਿਮ੍ਮੀਲੇਤ੍ਵਾ ਸੀਸਂ ਭੋਗਨ੍ਤਰੇ ਠਪੇਸਿ.

ਅਹਿਤੁਣ੍ਡਿਕੋ ਬ੍ਰਾਹ੍ਮਣੋ ਓਸਧਂ ਖਾਦਿਤ੍ਵਾ ਮਨ੍ਤਂ ਪਰਿਵਤ੍ਤੇਤ੍ਵਾ ਖੇਲ਼ਂ ਮਹਾਸਤ੍ਤਸ੍ਸ ਸਰੀਰੇ ਓਪਿ, ਓਸਧਾਨਞ੍ਚ ਮਨ੍ਤਸ੍ਸ ਚਾਨੁਭਾਵੇਨ ਖੇਲ਼ੇਨ ਫੁਟ੍ਠਫੁਟ੍ਠਟ੍ਠਾਨੇ ਫੋਟਾਨਂ ਉਟ੍ਠਾਨਕਾਲੋ ਵਿਯ ਜਾਤੋ. ਅਥ ਨਂ ਸੋ ਨਙ੍ਗੁਟ੍ਠੇ ਗਹੇਤ੍ਵਾ ਕਡ੍ਢਿਤ੍ਵਾ ਦੀਘਸੋ ਨਿਪਜ੍ਜਾਪੇਤ੍ਵਾ ਅਜਪਦੇਨ ਦਣ੍ਡੇਨ ਉਪ੍ਪੀਲ਼ੇਨ੍ਤੋ ਦੁਬ੍ਬਲਂ ਕਤ੍ਵਾ ਸੀਸਂ ਦਲ਼੍ਹਂ ਗਹੇਤ੍ਵਾ ਨਿਪ੍ਪੀਲ਼ਿ, ਮਹਾਸਤ੍ਤਸ੍ਸ ਮੁਖਂ ਵਿਵਰਿ. ਅਥਸ੍ਸ ਮੁਖੇ ਖੇਲ਼ਂ ਓਪਿਤ੍ਵਾ ਓਸਧਮਨ੍ਤਂ ਕਤ੍ਵਾ ਦਨ੍ਤੇ ਭਿਨ੍ਦਿ, ਮੁਖਂ ਲੋਹਿਤਸ੍ਸ ਪੂਰਿ. ਮਹਾਸਤ੍ਤੋ ਅਤ੍ਤਨੋ ਸੀਲਭੇਦਭਯੇਨ ਏਵਰੂਪਂ ਦੁਕ੍ਖਂ ਅਧਿਵਾਸੇਨ੍ਤੋ ਅਕ੍ਖੀਨਿ ਉਮ੍ਮੀਲੇਤ੍ਵਾ ਓਲੋਕਨਮਤ੍ਤਮ੍ਪਿ ਨਾਕਰਿ. ਸੋਪਿ ‘‘ਨਾਗਰਾਜਾਨਂ ਦੁਬ੍ਬਲਂ ਕਰਿਸ੍ਸਾਮੀ’’ਤਿ ਨਙ੍ਗੁਟ੍ਠਤੋ ਪਟ੍ਠਾਯਸ੍ਸ ਅਟ੍ਠੀਨਿ ਚੁਣ੍ਣਯਮਾਨੋ ਵਿਯ ਸਕਲਸਰੀਰਂ ਮਦ੍ਦਿਤ੍ਵਾ ਪਟ੍ਟਕਵੇਠਨਂ ਨਾਮ ਵੇਠੇਸਿ, ਤਨ੍ਤਮਜ੍ਜਿਤਂ ਨਾਮ ਮਜ੍ਜਿ, ਨਙ੍ਗੁਟ੍ਠਂ ਗਹੇਤ੍ਵਾ ਦੁਸ੍ਸਪੋਥਿਮਂ ਨਾਮ ਪੋਥੇਸਿ. ਮਹਾਸਤ੍ਤਸ੍ਸ ਸਕਲਸਰੀਰਂ ਲੋਹਿਤਮਕ੍ਖਿਤਂ ਅਹੋਸਿ. ਸੋ ਮਹਾਵੇਦਨਂ ਅਧਿਵਾਸੇਸਿ.

ਅਥਸ੍ਸ ਦੁਬ੍ਬਲਭਾਵਂ ਞਤ੍ਵਾ ਵਲ੍ਲੀਹਿ ਪੇਲ਼ਂ ਕਰਿਤ੍ਵਾ ਤਤ੍ਥ ਨਂ ਪਕ੍ਖਿਪਿਤ੍ਵਾ ਪਚ੍ਚਨ੍ਤਗਾਮਂ ਨੇਤ੍ਵਾ ਮਹਾਜਨਮਜ੍ਝੇ ਕੀਲ਼ਾਪੇਸਿ. ਨੀਲਾਦੀਸੁ ਵਣ੍ਣੇਸੁ ਵਟ੍ਟਚਤੁਰਸ੍ਸਾਦੀਸੁ ਸਣ੍ਠਾਨੇਸੁ ਅਣੁਂਥੂਲਾਦੀਸੁ ਪਮਾਣੇਸੁ ਯਂ ਯਂ ਬ੍ਰਾਹ੍ਮਣੋ ਇਚ੍ਛਤਿ, ਮਹਾਸਤ੍ਤੋ ਤਂਤਦੇਵ ਕਤ੍ਵਾ ਨਚ੍ਚਤਿ, ਫਣਸਤਂ ਫਣਸਹਸ੍ਸਮ੍ਪਿ ਕਰੋਤਿਯੇਵ. ਮਹਾਜਨੋ ਪਸੀਦਿਤ੍ਵਾ ਬਹੁਂ ਧਨਂ ਅਦਾਸਿ. ਏਕਦਿਵਸਮੇਵ ਕਹਾਪਣਸਹਸ੍ਸਞ੍ਚੇਵ ਸਹਸ੍ਸਗ੍ਘਨਕੇ ਚ ਪਰਿਕ੍ਖਾਰੇ ਲਭਿ. ਬ੍ਰਾਹ੍ਮਣੋ ਆਦਿਤੋਵ ਸਹਸ੍ਸਂ ਲਭਿਤ੍ਵਾ ‘‘ਵਿਸ੍ਸਜ੍ਜੇਸ੍ਸਾਮੀ’’ਤਿ ਚਿਨ੍ਤੇਸਿ, ਤਂ ਪਨ ਧਨਂ ਲਭਿਤ੍ਵਾ ‘‘ਪਚ੍ਚਨ੍ਤਗਾਮੇਯੇਵ ਤਾਵ ਮੇ ਏਤ੍ਤਕਂ ਧਨਂ ਲਦ੍ਧਂ, ਰਾਜਰਾਜਮਹਾਮਚ੍ਚਾਨਂ ਸਨ੍ਤਿਕੇ ਬਹੁਂ ਧਨਂ ਲਭਿਸ੍ਸਾਮੀ’’ਤਿ ਸਕਟਞ੍ਚ ਸੁਖਯਾਨਕਞ੍ਚ ਗਹੇਤ੍ਵਾ ਸਕਟੇ ਪਰਿਕ੍ਖਾਰੇ ਠਪੇਤ੍ਵਾ ਸੁਖਯਾਨਕੇ ਨਿਸਿਨ੍ਨੋ ਮਹਨ੍ਤੇਨ ਪਰਿਵਾਰੇਨ ਮਹਾਸਤ੍ਤਂ ਗਾਮਨਿਗਮਾਦੀਸੁ ਕੀਲ਼ਾਪੇਨ੍ਤੋ ‘‘ਬਾਰਾਣਸਿਯਂ ਉਗ੍ਗਸੇਨਰਞ੍ਞੋ ਸਨ੍ਤਿਕੇ ਕੀਲ਼ਾਪੇਤ੍ਵਾ ਵਿਸ੍ਸਜ੍ਜੇਸ੍ਸਾਮੀ’’ਤਿ ਅਗਮਾਸਿ. ਸੋ ਮਣ੍ਡੂਕੇ ਮਾਰੇਤ੍ਵਾ ਨਾਗਰਞ੍ਞੋ ਦੇਤਿ. ਨਾਗਰਾਜਾ ‘‘ਪੁਨਪ੍ਪੁਨਂ ਏਸ ਮਂ ਨਿਸ੍ਸਾਯ ਮਾਰੇਸ੍ਸਤੀ’’ਤਿ ਨ ਖਾਦਤਿ. ਅਥਸ੍ਸ ਮਧੁਲਾਜੇ ਅਦਾਸਿ. ਮਹਾਸਤ੍ਤੋ ‘‘ਸਚਾਹਂ ਭੋਜਨਂ ਗਣ੍ਹਿਸ੍ਸਾਮਿ, ਅਨ੍ਤੋਪੇਲ਼ਾਯ ਏਵ ਮਰਣਂ ਭਵਿਸ੍ਸਤੀ’’ਤਿ ਤੇਪਿ ਨ ਖਾਦਤਿ. ਬ੍ਰਾਹ੍ਮਣੋ ਮਾਸਮਤ੍ਤੇਨ ਬਾਰਾਣਸਿਂ ਪਤ੍ਵਾ ਦ੍ਵਾਰਗਾਮੇਸੁ ਕੀਲ਼ਾਪੇਨ੍ਤੋ ਬਹੁਂ ਧਨਂ ਲਭਿ.

ਰਾਜਾਪਿ ਨਂ ਪਕ੍ਕੋਸਾਪੇਤ੍ਵਾ ‘‘ਅਮ੍ਹਾਕਂ ਕੀਲ਼ਾਪੇਹੀ’’ਤਿ ਆਹ. ‘‘ਸਾਧੁ, ਦੇਵ, ਸ੍ਵੇ ਪਨ੍ਨਰਸੇ ਤੁਮ੍ਹਾਕਂ ਕੀਲ਼ਾਪੇਸ੍ਸਾਮੀ’’ਤਿ. ਰਾਜਾ ‘‘ਸ੍ਵੇ ਨਾਗਰਾਜਾ ਰਾਜਙ੍ਗਣੇ ਨਚ੍ਚਿਸ੍ਸਤਿ, ਮਹਾਜਨੋ ਸਨ੍ਨਿਪਤਿਤ੍ਵਾ ਪਸ੍ਸਤੂ’’ਤਿ ਭੇਰਿਂ ਚਰਾਪੇਤ੍ਵਾ ਪੁਨਦਿਵਸੇ ਰਾਜਙ੍ਗਣਂ ਅਲਙ੍ਕਾਰਾਪੇਤ੍ਵਾ ਬ੍ਰਾਹ੍ਮਣਂ ਪਕ੍ਕੋਸਾਪੇਸਿ. ਸੋ ਰਤਨਪੇਲ਼ਾਯ ਮਹਾਸਤ੍ਤਂ ਨੇਤ੍ਵਾ ਵਿਚਿਤ੍ਤਤ੍ਥਰੇ ਪੇਲ਼ਂ ਠਪੇਤ੍ਵਾ ਨਿਸੀਦਿ. ਰਾਜਾਪਿ ਪਾਸਾਦਾ ਓਰੁਯ੍ਹ ਮਹਾਜਨਪਰਿਵੁਤੋ ਰਾਜਾਸਨੇ ਨਿਸੀਦਿ. ਬ੍ਰਾਹ੍ਮਣੋ ਮਹਾਸਤ੍ਤਂ ਨੀਹਰਿਤ੍ਵਾ ਨਚ੍ਚਾਪੇਸਿ. ਮਹਾਜਨੋ ਸਕਭਾਵੇਨ ਸਣ੍ਠਾਤੁਂ ਅਸਕ੍ਕੋਨ੍ਤੋ ਚੇਲੁਕ੍ਖੇਪਸਹਸ੍ਸਂ ਪਵਤ੍ਤੇਤਿ. ਬੋਧਿਸਤ੍ਤਸ੍ਸ ਉਪਰਿ ਸਤ੍ਤਰਤਨਵਸ੍ਸਂ ਵਸ੍ਸਤਿ. ਤਸ੍ਸ ਗਹਿਤਸ੍ਸ ਮਾਸੋ ਸਮ੍ਪੂਰਿ. ਏਤ੍ਤਕਂ ਕਾਲਂ ਨਿਰਾਹਾਰੋਵ ਅਹੋਸਿ. ਸੁਮਨਾ ‘‘ਅਤਿਚਿਰਾਯਤਿ ਮੇ ਪਿਯਸਾਮਿਕੋ, ਇਦਾਨਿਸ੍ਸ ਇਧ ਅਨਾਗਚ੍ਛਨ੍ਤਸ੍ਸ ਮਾਸੋ ਸਮ੍ਪੁਣ੍ਣੋ, ਕਿਂ ਨੁ ਖੋ ਕਾਰਣ’’ਨ੍ਤਿ ਗਨ੍ਤ੍ਵਾ ਪੋਕ੍ਖਰਣਿਂ ਓਲੋਕੇਨ੍ਤੀ ਲੋਹਿਤਵਣ੍ਣਂ ਉਦਕਂ ਦਿਸ੍ਵਾ ‘‘ਅਹਿਤੁਣ੍ਡਿਕੇਨ ਗਹਿਤੋ ਭਵਿਸ੍ਸਤੀ’’ਤਿ ਞਤ੍ਵਾ ਨਾਗਭਵਨਾ ਨਿਕ੍ਖਮਿਤ੍ਵਾ ਵਮ੍ਮਿਕਸਨ੍ਤਿਕਂ ਗਨ੍ਤ੍ਵਾ ਮਹਾਸਤ੍ਤਸ੍ਸ ਗਹਿਤਟ੍ਠਾਨਞ੍ਚ ਕਿਲਮਿਤਟ੍ਠਾਨਞ੍ਚ ਦਿਸ੍ਵਾ ਰੋਦਿਤ੍ਵਾ ਕਨ੍ਦਿਤ੍ਵਾ ਪਚ੍ਚਨ੍ਤਗਾਮਂ ਗਨ੍ਤ੍ਵਾ ਪੁਚ੍ਛਿਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਰਾਜਙ੍ਗਣੇ ਪਰਿਸਮਜ੍ਝੇ ਆਕਾਸੇ ਰੋਦਮਾਨਾ ਅਟ੍ਠਾਸਿ. ਮਹਾਸਤ੍ਤੋ ਨਚ੍ਚਨ੍ਤੋਵ ਆਕਾਸਂ ਓਲੋਕੇਤ੍ਵਾ ਤਂ ਦਿਸ੍ਵਾ ਲਜ੍ਜਿਤੋ ਪੇਲ਼ਂ ਪਵਿਸਿਤ੍ਵਾ ਨਿਪਜ੍ਜਿ. ਰਾਜਾ ਤਸ੍ਸ ਪੇਲ਼ਂ ਪਵਿਟ੍ਠਕਾਲੇ ‘‘ਕਿਂ ਨੁ ਖੋ ਕਾਰਣ’’ਨ੍ਤਿ ਇਤੋ ਚਿਤੋ ਚ ਓਲੋਕੇਨ੍ਤੋ ਤਂ ਆਕਾਸੇ ਠਿਤਂ ਦਿਸ੍ਵਾ ਪਠਮਂ ਗਾਥਮਾਹ –

੨੪੦.

‘‘ਕਾ ਨੁ ਵਿਜ੍ਜੁਰਿਵਾਭਾਸਿ, ਓਸਧੀ ਵਿਯ ਤਾਰਕਾ;

ਦੇਵਤਾ ਨੁਸਿ ਗਨ੍ਧਬ੍ਬੀ, ਨ ਤਂ ਮਞ੍ਞਾਮੀ ਮਾਨੁਸਿ’’ਨ੍ਤਿ.

ਤਤ੍ਥ ਨ ਤਂ ਮਞ੍ਞਾਮਿ ਮਾਨੁਸਿਨ੍ਤਿ ਅਹਂ ਤਂ ਮਾਨੁਸੀਤਿ ਨ ਮਞ੍ਞਾਮਿ, ਤਯਾ ਏਕਾਯ ਦੇਵਤਾਯ ਗਨ੍ਧਬ੍ਬਿਯਾ ਵਾ ਭਵਿਤੁਂ ਵਟ੍ਟਤੀਤਿ ਵਦਤਿ.

ਇਦਾਨਿ ਤੇਸਂ ਵਚਨਪਟਿਵਚਨਗਾਥਾ ਹੋਨ੍ਤਿ –

੨੪੧.

‘‘ਨਮ੍ਹਿ ਦੇਵੀ ਨ ਗਨ੍ਧਬ੍ਬੀ, ਨ ਮਹਾਰਾਜ ਮਾਨੁਸੀ;

ਨਾਗਕਞ੍ਞਾਸ੍ਮਿ ਭਦ੍ਦਨ੍ਤੇ, ਅਤ੍ਥੇਨਮ੍ਹਿ ਇਧਾਗਤਾ.

੨੪੨.

‘‘ਵਿਬ੍ਭਨ੍ਤਚਿਤ੍ਤਾ ਕੁਪਿਤਿਨ੍ਦ੍ਰਿਯਾਸਿ, ਨੇਤ੍ਤੇਹਿ ਤੇ ਵਾਰਿਗਣਾ ਸਵਨ੍ਤਿ;

ਕਿਂ ਤੇ ਨਟ੍ਠਂ ਕਿਂ ਪਨ ਪਤ੍ਥਯਾਨਾ, ਇਧਾਗਤਾ ਨਾਰਿ ਤਦਿਙ੍ਘ ਬ੍ਰੂਹਿ.

੨੪੩.

‘‘ਯਮੁਗ੍ਗਤੇਜੋ ਉਰਗੋਤਿ ਚਾਹੁ, ਨਾਗੋਤਿ ਨਂ ਆਹੁ ਜਨਾ ਜਨਿਨ੍ਦ;

ਤਮਗ੍ਗਹੀ ਪੁਰਿਸੋ ਜੀਵਿਕਤ੍ਥੋ, ਤਂ ਬਨ੍ਧਨਾ ਮੁਞ੍ਚ ਪਤੀ ਮਮੇਸੋ.

੨੪੪.

‘‘ਕਥਂ ਨ੍ਵਯਂ ਬਲਵਿਰਿਯੂਪਪਨ੍ਨੋ, ਹਤ੍ਥਤ੍ਤਮਾਗਚ੍ਛਿ ਵਨਿਬ੍ਬਕਸ੍ਸ;

ਅਕ੍ਖਾਹਿ ਮੇ ਨਾਗਕਞ੍ਞੇ ਤਮਤ੍ਥਂ, ਕਥਂ ਵਿਜਾਨੇਮੁ ਗਹੀਤਨਾਗਂ.

੨੪੫.

‘‘ਨਗਰਮ੍ਪਿ ਨਾਗੋ ਭਸ੍ਮਂ ਕਰੇਯ੍ਯ, ਤਥਾ ਹਿ ਸੋ ਬਲਵਿਰਿਯੂਪਪਨ੍ਨੋ;

ਧਮ੍ਮਞ੍ਚ ਨਾਗੋ ਅਪਚਾਯਮਾਨੋ, ਤਸ੍ਮਾ ਪਰਕ੍ਕਮ੍ਮ ਤਪੋ ਕਰੋਤੀ’’ਤਿ.

ਤਤ੍ਥ ਅਤ੍ਥੇਨਮ੍ਹੀਤਿ ਅਹਂ ਏਕਂ ਕਾਰਣਂ ਪਟਿਚ੍ਚ ਇਧਾਗਤਾ. ਕੁਪਿਤਿਨ੍ਦ੍ਰਿਯਾਤਿ ਕਿਲਨ੍ਤਿਨ੍ਦ੍ਰਿਯਾ. ਵਾਰਿਗਣਾਤਿ ਅਸ੍ਸੁਬਿਨ੍ਦੁਘਟਾ. ਉਰਗੋਤਿ ਚਾਹੂਤਿ ਉਰਗੋਤਿ ਚਾਯਂ ਮਹਾਜਨੋ ਕਥੇਸਿ. ਤਮਗ੍ਗਹੀ ਪੁਰਿਸੋਤਿ ਅਯਂ ਪੁਰਿਸੋ ਤਂ ਨਾਗਰਾਜਾਨਂ ਜੀਵਿਕਤ੍ਥਾਯ ਅਗ੍ਗਹੇਸਿ. ਵਨਿਬ੍ਬਕਸ੍ਸਾਤਿ ਇਮਸ੍ਸ ਵਨਿਬ੍ਬਕਸ੍ਸ ਕਥਂ ਨੁ ਏਸ ਮਹਾਨੁਭਾਵੋ ਸਮਾਨੋ ਹਤ੍ਥਤ੍ਤਂ ਆਗਤੋਤਿ ਪੁਚ੍ਛਤਿ. ਧਮ੍ਮਞ੍ਚਾਤਿ ਪਞ੍ਚਸੀਲਧਮ੍ਮਂ ਉਪੋਸਥਵਾਸਧਮ੍ਮਞ੍ਚ ਗਰੁਂ ਕਰੋਨ੍ਤੋ ਵਿਹਰਤਿ, ਤਸ੍ਮਾ ਇਮਿਨਾ ਪੁਰਿਸੇਨ ਗਹਿਤੋਪਿ ‘‘ਸਚਾਹਂ ਇਮਸ੍ਸ ਉਪਰਿ ਨਾਸਵਾਤਂ ਵਿਸ੍ਸਜ੍ਜੇਸ੍ਸਾਮਿ, ਭਸ੍ਮਮੁਟ੍ਠਿ ਵਿਯ ਵਿਕਿਰਿਸ੍ਸਤਿ, ਏਵਂ ਮੇ ਸੀਲਂ ਭਿਜ੍ਜਿਸ੍ਸਤੀ’’ਤਿ ਸੀਲਭੇਦਭਯਾ ਪਰਕ੍ਕਮ੍ਮ ਤਂ ਦੁਕ੍ਖਂ ਅਧਿਵਾਸੇਤ੍ਵਾ ਤਪੋ ਕਰੋਤਿ, ਵੀਰਿਯਮੇਵ ਕਰੋਤੀਤਿ ਆਹ.

ਰਾਜਾ ‘‘ਕਹਂ ਪਨੇਸੋ ਇਮਿਨਾ ਗਹਿਤੋ’’ਤਿ ਪੁਚ੍ਛਿ. ਅਥਸ੍ਸ ਸਾ ਆਚਿਕ੍ਖਨ੍ਤੀ ਗਾਥਮਾਹ –

੨੪੬.

‘‘ਚਾਤੁਦ੍ਦਸਿਂ ਪਞ੍ਚਦਸਿਞ੍ਚ ਰਾਜ, ਚਤੁਪ੍ਪਥੇ ਸਮ੍ਮਤਿ ਨਾਗਰਾਜਾ;

ਤਮਗ੍ਗਹੀ ਪੁਰਿਸੋ ਜੀਵਿਕਤ੍ਥੋ, ਤਂ ਬਨ੍ਧਨਾ ਮੁਞ੍ਚ ਪਤੀ ਮਮੇਸੋ’’ਤਿ.

ਤਤ੍ਥ ਚਤੁਪ੍ਪਥੇਤਿ ਚਤੁਕ੍ਕਮਗ੍ਗਸ੍ਸ ਆਸਨ੍ਨਟ੍ਠਾਨੇ ਏਕਸ੍ਮਿਂ ਵਮ੍ਮਿਕੇ ਚਤੁਰਙ੍ਗਸਮਨ੍ਨਾਗਤਂ ਅਧਿਟ੍ਠਾਨਂ ਅਧਿਟ੍ਠਹਿਤ੍ਵਾ ਉਪੋਸਥਵਾਸਂ ਵਸਨ੍ਤੋ ਨਿਪਜ੍ਜਤੀਤਿ ਅਤ੍ਥੋ. ਤਂ ਬਨ੍ਧਨਾਤਿ ਤਂ ਏਵਂ ਧਮ੍ਮਿਕਂ ਗੁਣਵਨ੍ਤਂ ਨਾਗਰਾਜਾਨਂ ਏਤਸ੍ਸ ਧਨਂ ਦਤ੍ਵਾ ਪੇਲ਼ਬਨ੍ਧਨਾ ਪਮੁਞ੍ਚ.

ਏਵਞ੍ਚ ਪਨ ਵਤ੍ਵਾ ਪੁਨਪਿ ਤਂ ਯਾਚਨ੍ਤੀ ਦ੍ਵੇ ਗਾਥਾ ਅਭਾਸਿ –

੨੪੭.

‘‘ਸੋਲ਼ਸਿਤ੍ਥਿਸਹਸ੍ਸਾਨਿ, ਆਮੁਤ੍ਤਮਣਿਕੁਣ੍ਡਲਾ;

ਵਾਰਿਗੇਹਸਯਾ ਨਾਰੀ, ਤਾਪਿ ਤਂ ਸਰਣਂ ਗਤਾ.

੨੪੮.

‘‘ਧਮ੍ਮੇਨ ਮੋਚੇਹਿ ਅਸਾਹਸੇਨ, ਗਾਮੇਨ ਨਿਕ੍ਖੇਨ ਗਵਂ ਸਤੇਨ;

ਓਸ੍ਸਟ੍ਠਕਾਯੋ ਉਰਗੋ ਚਰਾਤੁ, ਪੁਞ੍ਞਤ੍ਥਿਕੋ ਮੁਞ੍ਚਤੁ ਬਨ੍ਧਨਸ੍ਮਾ’’ਤਿ.

ਤਤ੍ਥ ਸੋਲ਼ਸਿਤ੍ਥਿਸਹਸ੍ਸਾਨੀਤਿ ਮਾ ਤ੍ਵਂ ਏਸ ਯੋ ਵਾ ਸੋ ਵਾ ਦਲਿਦ੍ਦਨਾਗੋਤਿ ਮਞ੍ਞਿਤ੍ਥ. ਏਤਸ੍ਸ ਹਿ ਏਤ੍ਤਕਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਇਤ੍ਥਿਯੋਵ, ਸੇਸਾ ਸਮ੍ਪਤ੍ਤਿ ਅਪਰਿਮਾਣਾਤਿ ਦਸ੍ਸੇਤਿ. ਵਾਰਿਗੇਹਸਯਾਤਿ ਉਦਕਚ੍ਛਦਨਂ ਉਦਕਗਬ੍ਭਂ ਕਤ੍ਵਾ ਤਤ੍ਥ ਸਯਨਸੀਲਾ. ਓਸ੍ਸਟ੍ਠਕਾਯੋਤਿ ਨਿਸ੍ਸਟ੍ਠਕਾਯੋ ਹੁਤ੍ਵਾ. ਚਰਾਤੂਤਿ ਚਰਤੁ.

ਅਥ ਨਂ ਰਾਜਾ ਤਿਸ੍ਸੋ ਗਾਥਾ ਅਭਾਸਿ –

੨੪੯.

‘‘ਧਮ੍ਮੇਨ ਮੋਚੇਮਿ ਅਸਾਹਸੇਨ, ਗਾਮੇਨ ਨਿਕ੍ਖੇਨ ਗਵਂ ਸਤੇਨ;

ਓਸ੍ਸਟ੍ਠਕਾਯੋ ਉਰਗੋ ਚਰਾਤੁ, ਪੁਞ੍ਞਤ੍ਥਿਕੋ ਮੁਞ੍ਚਤੁ ਬਨ੍ਧਨਸ੍ਮਾ.

੨੫੦.

‘‘ਦਮ੍ਮਿ ਨਿਕ੍ਖਸਤਂ ਲੁਦ੍ਦ, ਥੂਲਞ੍ਚ ਮਣਿਕੁਣ੍ਡਲਂ;

ਚਤੁਸ੍ਸਦਞ੍ਚ ਪਲ੍ਲਙ੍ਕਂ, ਉਮਾਪੁਪ੍ਫਸਰਿਨ੍ਨਿਭਂ.

੨੫੧.

‘‘ਦ੍ਵੇ ਚ ਸਾਦਿਸਿਯੋ ਭਰਿਯਾ, ਉਸਭਞ੍ਚ ਗਵਂ ਸਤਂ;

ਓਸ੍ਸਟ੍ਠਕਾਯੋ ਉਰਗੋ ਚਰਾਤੁ, ਪੁਞ੍ਞਤ੍ਥਿਕੋ ਮੁਞ੍ਚਤੁ ਬਨ੍ਧਨਸ੍ਮਾ’’ਤਿ.

ਤਤ੍ਥ ਲੁਦ੍ਦਾਤਿ ਰਾਜਾ ਉਰਗਂ ਮੋਚੇਤੁਂ ਅਹਿਤੁਣ੍ਡਿਕਂ ਆਮਨ੍ਤੇਤ੍ਵਾ ਤਸ੍ਸ ਦਾਤਬ੍ਬਂ ਦੇਯ੍ਯਧਮ੍ਮਂ ਦਸ੍ਸੇਨ੍ਤੋ ਏਵਮਾਹ. ਗਾਥਾ ਪਨ ਹੇਟ੍ਠਾ ਵੁਤ੍ਤਤ੍ਥਾਯੇਵ.

ਅਥ ਨਂ ਲੁਦ੍ਦੋ ਆਹ –

੨੫੨.

‘‘ਵਿਨਾਪਿ ਦਾਨਾ ਤਵ ਵਚਨਂ ਜਨਿਨ੍ਦ, ਮੁਞ੍ਚੇਮੁ ਨਂ ਉਰਗਂ ਬਨ੍ਧਨਸ੍ਮਾ;

ਓਸ੍ਸਟ੍ਠਕਾਯੋ ਉਰਗੋ ਚਰਾਤੁ, ਪੁਞ੍ਞਤ੍ਥਿਕੋ ਮੁਞ੍ਚਤੁ ਬਨ੍ਧਨਸ੍ਮਾ’’ਤਿ.

ਤਤ੍ਥ ਤਵ ਵਚਨਨ੍ਤਿ ਮਹਾਰਾਜ, ਵਿਨਾਪਿ ਦਾਨੇਨ ਤਵ ਵਚਨਮੇਵ ਅਮ੍ਹਾਕਂ ਗਰੁ. ਮੁਞ੍ਚੇਮੁ ਨਨ੍ਤਿ ਮੁਞ੍ਚਿਸ੍ਸਾਮਿ ਏਤਨ੍ਤਿ ਵਦਤਿ.

ਏਵਞ੍ਚ ਪਨ ਵਤ੍ਵਾ ਮਹਾਸਤ੍ਤਂ ਪੇਲ਼ਤੋ ਨੀਹਰਿ. ਨਾਗਰਾਜਾ ਨਿਕ੍ਖਮਿਤ੍ਵਾ ਪੁਪ੍ਫਨ੍ਤਰਂ ਪਵਿਸਿਤ੍ਵਾ ਤਂ ਅਤ੍ਤਭਾਵਂ ਵਿਜਹਿਤ੍ਵਾ ਮਾਣਵਕਵਣ੍ਣੇਨ ਅਲਙ੍ਕਤਸਰੀਰੋ ਹੁਤ੍ਵਾ ਪਥਵਿਂ ਭਿਨ੍ਦਨ੍ਤੋ ਵਿਯ ਨਿਕ੍ਖਨ੍ਤੋ ਅਟ੍ਠਾਸਿ. ਸੁਮਨਾ ਆਕਾਸਤੋ ਓਤਰਿਤ੍ਵਾ ਤਸ੍ਸ ਸਨ੍ਤਿਕੇ ਠਿਤਾ. ਨਾਗਰਾਜਾ ਅਞ੍ਜਲਿਂ ਪਗ੍ਗਯ੍ਹ ਰਾਜਾਨਂ ਨਮਸ੍ਸਮਾਨੋ ਅਟ੍ਠਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਦ੍ਵੇ ਗਾਥਾ ਅਭਾਸਿ –

੨੫੩.

‘‘ਮੁਤ੍ਤੋ ਚਮ੍ਪੇਯ੍ਯਕੋ ਨਾਗੋ, ਰਾਜਾਨਂ ਏਤਦਬ੍ਰਵਿ;

ਨਮੋ ਤੇ ਕਾਸਿਰਾਜਤ੍ਥੁ, ਨਮੋ ਤੇ ਕਾਸਿਵਡ੍ਢਨ;

ਅਞ੍ਜਲਿਂ ਤੇ ਪਗ੍ਗਣ੍ਹਾਮਿ, ਪਸ੍ਸੇਯ੍ਯਂ ਮੇ ਨਿਵੇਸਨਂ.

੨੫੪.

‘‘ਅਦ੍ਧਾ ਹਿ ਦੁਬ੍ਬਿਸ੍ਸਸਮੇਤਮਾਹੁ, ਯਂ ਮਾਨੁਸੋ ਵਿਸ੍ਸਸੇ ਅਮਾਨੁਸਮ੍ਹਿ;

ਸਚੇ ਚ ਮਂ ਯਾਚਸਿ ਏਤਮਤ੍ਥਂ, ਦਕ੍ਖੇਮੁ ਤੇ ਨਾਗ ਨਿਵੇਸਨਾਨੀ’’ਤਿ.

ਤਤ੍ਥ ਪਸ੍ਸੇਯ੍ਯਂ ਮੇ ਨਿਵੇਸਨਨ੍ਤਿ ਮਮ ਨਿਵੇਸਨਂ ਚਮ੍ਪੇਯ੍ਯਨਾਗਭਵਨਂ ਰਮਣੀਯਂ ਪਸ੍ਸਿਤਬ੍ਬਯੁਤ੍ਤਕਂ. ਤਂ ਤੇ ਅਹਂ ਦਸ੍ਸੇਤੁਕਾਮੋ, ਤਂ ਸਬਲਵਾਹਨੋ ਤ੍ਵਂ ਆਗਨ੍ਤ੍ਵਾ ਪਸ੍ਸ, ਨਰਿਨ੍ਦਾਤਿ ਵਦਤਿ. ਦੁਬ੍ਬਿਸ੍ਸਸਨ੍ਤਿ ਦੁਵਿਸ੍ਸਾਸਨੀਯਂ. ਸਚੇ ਚਾਤਿ ਸਚੇ ਮਂ ਯਾਚਸਿ, ਪਸ੍ਸੇਯ੍ਯਾਮ ਤੇ ਨਿਵੇਸਨਾਨਿ, ਅਪਿ ਚ ਖੋ ਪਨ ਤਂ ਨ ਸਦ੍ਦਹਾਮੀਤਿ ਵਦਤਿ.

ਅਥ ਨਂ ਸਦ੍ਦਹਾਪੇਤੁਂ ਸਪਥਂ ਕਰੋਨ੍ਤੋ ਮਹਾਸਤ੍ਤੋ ਦ੍ਵੇ ਗਾਥਾ ਅਭਾਸਿ –

੨੫੫.

‘‘ਸਚੇਪਿ ਵਾਤੋ ਗਿਰਿਮਾਵਹੇਯ੍ਯ, ਚਨ੍ਦੋ ਚ ਸੁਰਿਯੋ ਚ ਛਮਾ ਪਤੇਯ੍ਯੁਂ;

ਸਬ੍ਬਾ ਚ ਨਜ੍ਜੋ ਪਟਿਸੋਤਂ ਵਜੇਯ੍ਯੁਂ, ਨ ਤ੍ਵੇਵਹਂ ਰਾਜ ਮੁਸਾ ਭਣੇਯ੍ਯਂ.

੨੫੬.

‘‘ਨਭਂ ਫਲੇਯ੍ਯ ਉਦਧੀਪਿ ਸੁਸ੍ਸੇ, ਸਂਵਟ੍ਟਯੇ ਭੂਤਧਰਾ ਵਸੁਨ੍ਧਰਾ;

ਸਿਲੁਚ੍ਚਯੋ ਮੇਰੁ ਸਮੂਲਮੁਪ੍ਪਤੇ, ਨ ਤ੍ਵੇਵਹਂ ਰਾਜ ਮੁਸਾ ਭਣੇਯ੍ਯ’’ਨ੍ਤਿ.

ਤਤ੍ਥ ਸਂਵਟ੍ਟਯੇ ਭੂਤਧਰਾ ਵਸੁਨ੍ਧਰਾਤਿ ਅਯਂ ਭੂਤਧਰਾਤਿ ਚ ਵਸੁਨ੍ਧਰਾਤਿ ਚ ਸਙ੍ਖਂ ਗਤਾ ਮਹਾਪਥਵੀ ਕਿਲਞ੍ਜਂ ਵਿਯ ਸਂਵਟ੍ਟੇਯ੍ਯ. ਸਮੂਲਮੁਪ੍ਪਤੇਤਿ ਏਵਂ ਮਹਾਸਿਨੇਰੁਪਬ੍ਬਤੋ ਸਮੂਲੋ ਉਟ੍ਠਾਯ ਪੁਰਾਣਪਣ੍ਣਂ ਵਿਯ ਆਕਾਸੇ ਪਕ੍ਖਨ੍ਦੇਯ੍ਯ.

ਸੋ ਮਹਾਸਤ੍ਤੇਨ ਏਵਂ ਵੁਤ੍ਤੇਪਿ ਅਸਦ੍ਦਹਨ੍ਤੋ –

੨੫੭.

‘‘ਅਦ੍ਧਾ ਹਿ ਦੁਬ੍ਬਿਸ੍ਸਸਮੇਤਮਾਹੁ, ਯਂ ਮਾਨੁਸੋ ਵਿਸ੍ਸਸੇ ਅਮਾਨੁਸਮ੍ਹਿ;

ਸਚੇ ਚ ਮਂ ਯਾਚਸਿ ਏਤਮਤ੍ਥਂ, ਦਕ੍ਖੇਮੁ ਤੇ ਨਾਗ ਨਿਵੇਸਨਾਨੀ’’ਤਿ. –

ਪੁਨਪਿ ਤਮੇਵ ਗਾਥਂ ਵਤ੍ਵਾ ‘‘ਤ੍ਵਂ ਮਯਾ ਕਤਗੁਣਂ ਜਾਨਿਤੁਂ ਅਰਹਸਿ, ਸਦ੍ਦਹਿਤੁਂ ਪਨ ਯੁਤ੍ਤਭਾਵਂ ਵਾ ਅਯੁਤ੍ਤਭਾਵਂ ਵਾ ਅਹਂ ਜਾਨਿਸ੍ਸਾਮੀ’’ਤਿ ਪਕਾਸੇਨ੍ਤੋ ਇਤਰਂ ਗਾਥਮਾਹ –

੨੫੮.

‘‘ਤੁਮ੍ਹੇ ਖੋਤ੍ਥ ਘੋਰਵਿਸਾ ਉਲ਼ਾਰਾ, ਮਹਾਤੇਜਾ ਖਿਪ੍ਪਕੋਪੀ ਚ ਹੋਥ;

ਮਂਕਾਰਣਾ ਬਨ੍ਧਨਸ੍ਮਾ ਪਮੁਤ੍ਤੋ, ਅਰਹਸਿ ਨੋ ਜਾਨਿਤੁਯੇ ਕਤਾਨੀ’’ਤਿ.

ਤਤ੍ਥ ਉਲ਼ਾਰਾਤਿ ਉਲ਼ਾਰਵਿਸਾ. ਜਾਨਿਤੁਯੇਤਿ ਜਾਨਿਤੁਂ.

ਅਥ ਨਂ ਸਦ੍ਦਹਾਪੇਤੁਂ ਪੁਨ ਸਪਥਂ ਕਰੋਨ੍ਤੋ ਮਹਾਸਤ੍ਤੋ ਗਾਥਮਾਹ –

੨੫੯.

‘‘ਸੋ ਪਚ੍ਚਤਂ ਨਿਰਯੇ ਘੋਰਰੂਪੇ, ਮਾ ਕਾਯਿਕਂ ਸਾਤਮਲਤ੍ਥ ਕਿਞ੍ਚਿ;

ਪੇਲ਼ਾਯ ਬਦ੍ਧੋ ਮਰਣਂ ਉਪੇਤੁ, ਯੋ ਤਾਦਿਸਂ ਕਮ੍ਮਕਤਂ ਨ ਜਾਨੇ’’ਤਿ.

ਤਤ੍ਥ ਪਚ੍ਚਤਨ੍ਤਿ ਪਚ੍ਚਤੁ. ਕਮ੍ਮਕਤਨ੍ਤਿ ਕਤਕਮ੍ਮਂ ਏਵਂ ਗੁਣਕਾਰਕਂ ਤੁਮ੍ਹਾਦਿਸਂ ਯੋ ਨ ਜਾਨਾਤਿ, ਸੋ ਏਵਰੂਪੋ ਹੋਤੂਤਿ ਵਦਤਿ.

ਅਥਸ੍ਸ ਰਾਜਾ ਸਦ੍ਦਹਿਤ੍ਵਾ ਥੁਤਿਂ ਕਰੋਨ੍ਤੋ ਗਾਥਮਾਹ –

੨੬੦.

‘‘ਸਚ੍ਚਪ੍ਪਟਿਞ੍ਞਾ ਤਵ ਮੇਸ ਹੋਤੁ, ਅਕ੍ਕੋਧਨੋ ਹੋਹਿ ਅਨੁਪਨਾਹੀ;

ਸਬ੍ਬਞ੍ਚ ਤੇ ਨਾਗਕੁਲਂ ਸੁਪਣ੍ਣਾ, ਅਗ੍ਗਿਂਵ ਗਿਮ੍ਹੇਸੁ ਵਿਵਜ੍ਜਯਨ੍ਤੂ’’ਤਿ.

ਤਤ੍ਥ ਤਵ ਮੇਸ ਹੋਤੂਤਿ ਤਵ ਏਸਾ ਪਟਿਞ੍ਞਾ ਸਚ੍ਚਾ ਹੋਤੁ. ਅਗ੍ਗਿਂਵ ਗਿਮ੍ਹੇਸੁ ਵਿਵਜ੍ਜਯਨ੍ਤੂਤਿ ਯਥਾ ਮਨੁਸ੍ਸਾ ਗਿਮ੍ਹਕਾਲੇ ਸਨ੍ਤਾਪਂ ਅਨਿਚ੍ਛਨ੍ਤਾ ਜਲਮਾਨਂ ਅਗ੍ਗਿਂ ਵਿਵਜ੍ਜੇਨ੍ਤਿ, ਏਵਂ ਵਿਵਜ੍ਜੇਨ੍ਤੁ ਦੂਰਤੋਵ ਪਰਿਹਰਨ੍ਤੁ.

ਮਹਾਸਤ੍ਤੋਪਿ ਰਞ੍ਞੋ ਥੁਤਿਂ ਕਰੋਨ੍ਤੋ ਇਤਰਂ ਗਾਥਮਾਹ –

੨੬੧.

‘‘ਅਨੁਕਮ੍ਪਸੀ ਨਾਗਕੁਲਂ ਜਨਿਨ੍ਦ, ਮਾਤਾ ਯਥਾ ਸੁਪ੍ਪਿਯਂ ਏਕਪੁਤ੍ਤਂ;

ਅਹਞ੍ਚ ਤੇ ਨਾਗਕੁਲੇਨ ਸਦ੍ਧਿਂ, ਕਾਹਾਮਿ ਵੇਯ੍ਯਾਵਟਿਕਂ ਉਲ਼ਾਰ’’ਨ੍ਤਿ.

ਤਂ ਸੁਤ੍ਵਾ ਰਾਜਾ ਨਾਗਭਵਨਂ ਗਨ੍ਤੁਕਾਮੋ ਸੇਨਂ ਗਮਨਸਜ੍ਜਂ ਕਾਤੁਂ ਆਣਾਪੇਨ੍ਤੋ ਗਾਥਮਾਹ –

੨੬੨.

‘‘ਯੋਜੇਨ੍ਤੁ ਵੇ ਰਾਜਰਥੇ ਸੁਚਿਤ੍ਤੇ, ਕਮ੍ਬੋਜਕੇ ਅਸ੍ਸਤਰੇ ਸੁਦਨ੍ਤੇ;

ਨਾਗੇ ਚ ਯੋਜੇਨ੍ਤੁ ਸੁਵਣ੍ਣਕਪ੍ਪਨੇ, ਦਕ੍ਖੇਮੁ ਨਾਗਸ੍ਸ ਨਿਵੇਸਨਾਨੀ’’ਤਿ.

ਤਤ੍ਥ ਕਮ੍ਬੋਜਕੇ ਅਸ੍ਸਤਰੇ ਸੁਦਨ੍ਤੇਤਿ ਸੁਸਿਕ੍ਖਿਤੇ ਕਮ੍ਬੋਜਰਟ੍ਠਸਮ੍ਭਵੇ ਅਸ੍ਸਤਰੇ ਯੋਜੇਨ੍ਤੁ.

ਇਤਰਾ ਅਭਿਸਮ੍ਬੁਦ੍ਧਗਾਥਾ –

੨੬੩.

‘‘ਭੇਰੀ ਮੁਦਿਙ੍ਗਾ ਪਣਵਾ ਚ ਸਙ੍ਖਾ, ਅਵਜ੍ਜਯਿਂਸੁ ਉਗ੍ਗਸੇਨਸ੍ਸ ਰਞ੍ਞੋ;

ਪਾਯਾਸਿ ਰਾਜਾ ਬਹੁ ਸੋਭਮਾਨੋ, ਪੁਰਕ੍ਖਤੋ ਨਾਰਿਗਣਸ੍ਸ ਮਜ੍ਝੇ’’ਤਿ.

ਤਤ੍ਥ ਬਹੁ ਸੋਭਮਾਨੋਤਿ ਭਿਕ੍ਖਵੇ, ਬਾਰਾਣਸਿਰਾਜਾ ਸੋਲ਼ਸਹਿ ਨਾਰੀਸਹਸ੍ਸੇਹਿ ਪੁਰਕ੍ਖਤੋ ਪਰਿਵਾਰਿਤੋ ਤਸ੍ਸ ਨਾਰੀਗਣਸ੍ਸ ਮਜ੍ਝੇ ਬਾਰਾਣਸਿਤੋ ਨਾਗਭਵਨਂ ਗਚ੍ਛਨ੍ਤੋ ਅਤਿਵਿਯ ਸੋਭਮਾਨੋ ਪਾਯਾਸਿ.

ਤਸ੍ਸ ਨਗਰਾ ਨਿਕ੍ਖਨ੍ਤਕਾਲੇਯੇਵ ਮਹਾਸਤ੍ਤੋ ਅਤ੍ਤਨੋ ਆਨੁਭਾਵੇਨ ਨਾਗਭਵਨਂ ਸਬ੍ਬਰਤਨਮਯਂ ਪਾਕਾਰਞ੍ਚ ਦ੍ਵਾਰਟ੍ਟਾਲਕੇ ਚ ਦਿਸ੍ਸਮਾਨਰੂਪੇ ਕਤ੍ਵਾ ਨਾਗਭਵਨਗਾਮਿਂ ਮਗ੍ਗਂ ਅਲਙ੍ਕਤਪਟਿਯਤ੍ਤਂ ਮਾਪੇਸਿ. ਰਾਜਾ ਸਪਰਿਸੋ ਤੇਨ ਮਗ੍ਗੇਨ ਨਾਗਭਵਨਂ ਪਵਿਸਿਤ੍ਵਾ ਰਮਣੀਯਂ ਭੂਮਿਭਾਗਞ੍ਚ ਪਾਸਾਦੇ ਚ ਅਦ੍ਦਸ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੨੬੪.

‘‘ਸੁਵਣ੍ਣਚਿਤਕਂ ਭੂਮਿਂ, ਅਦ੍ਦਕ੍ਖਿ ਕਾਸਿਵਡ੍ਢਨੋ;

ਸੋਵਣ੍ਣਮਯਪਾਸਾਦੇ, ਵੇਲ਼ੁਰਿਯਫਲਕਤ੍ਥਤੇ.

੨੬੫.

‘‘ਸ ਰਾਜਾ ਪਾਵਿਸਿ ਬ੍ਯਮ੍ਹਂ, ਚਮ੍ਪੇਯ੍ਯਸ੍ਸ ਨਿਵੇਸਨਂ;

ਆਦਿਚ੍ਚਵਣ੍ਣਸਨ੍ਨਿਭਂ, ਕਂਸਵਿਜ੍ਜੁਪਭਸ੍ਸਰਂ.

੨੬੬.

‘‘ਨਾਨਾਰੁਕ੍ਖੇਹਿ ਸਞ੍ਛਨ੍ਨਂ, ਨਾਨਾਗਨ੍ਧਸਮੀਰਿਤਂ;

ਸੋ ਪਾਵੇਕ੍ਖਿ ਕਾਸਿਰਾਜਾ, ਚਮ੍ਪੇਯ੍ਯਸ੍ਸ ਨਿਵੇਸਨਂ.

੨੬੭.

‘‘ਪਵਿਟ੍ਠਸ੍ਮਿਂ ਕਾਸਿਰਞ੍ਞੇ, ਚਮ੍ਪੇਯ੍ਯਸ੍ਸ ਨਿਵੇਸਨਂ;

ਦਿਬ੍ਬਾ ਤੂਰਿਯਾ ਪਵਜ੍ਜਿਂਸੁ, ਨਾਗਕਞ੍ਞਾ ਚ ਨਚ੍ਚਿਸੁਂ.

੨੬੮.

‘‘ਤਂ ਨਾਗਕਞ੍ਞਾ ਚਰਿਤਂ ਗਣੇਨ, ਅਨ੍ਵਾਰੁਹੀ ਕਾਸਿਰਾਜਾ ਪਸਨ੍ਨੋ;

ਨਿਸੀਦਿ ਸੋਵਣ੍ਣਮਯਮ੍ਹਿ ਪੀਠੇ, ਸਾਪਸ੍ਸਯੇ ਚਨ੍ਦਨਸਾਰਲਿਤ੍ਤੇ’’ਤਿ.

ਤਤ੍ਥ ਸੁਵਣ੍ਣਚਿਤਕਨ੍ਤਿ ਸੁਵਣ੍ਣਵਾਲੁਕਾਯ ਸਨ੍ਥਤਂ. ਬ੍ਯਮ੍ਹਨ੍ਤਿ ਅਲਙ੍ਕਤਨਾਗਭਵਨਂ. ਚਮ੍ਪੇਯ੍ਯਸ੍ਸਾਤਿ ਨਾਗਭਵਨਂ ਪਵਿਸਿਤ੍ਵਾ ਚਮ੍ਪੇਯ੍ਯਨਾਗਰਾਜਸ੍ਸ ਨਿਵੇਸਨਂ ਪਾਵਿਸਿ. ਕਂਸਵਿਜ੍ਜੁਪਭਸ੍ਸਰਨ੍ਤਿ ਮੇਘਮੁਖੇ ਸਞ੍ਚਰਣਸੁਵਣ੍ਣਵਿਜ੍ਜੁ ਵਿਯ ਓਭਾਸਮਾਨਂ. ਨਾਨਾਗਨ੍ਧਸਮੀਰਿਤਨ੍ਤਿ ਨਾਨਾਵਿਧੇਹਿ ਦਿਬ੍ਬਗਨ੍ਧੇਹਿ ਅਨੁਸਞ੍ਚਰਿਤਂ. ਚਰਿਤਂ ਗਣੇਨਾਤਿ ਤਂ ਨਿਵੇਸਨਂ ਨਾਗਕਞ੍ਞਾਗਣੇਨ ਚਰਿਤਂ ਅਨੁਸਞ੍ਚਰਿਤਂ. ਚਨ੍ਦਨਸਾਰਲਿਤ੍ਤੇਤਿ ਦਿਬ੍ਬਸਾਰਚਨ੍ਦਨੇਨ ਅਨੁਲਿਤ੍ਤੇ.

ਤਤ੍ਥ ਨਿਸਿਨ੍ਨਮਤ੍ਤਸ੍ਸੇਵਸ੍ਸ ਨਾਨਗ੍ਗਰਸਂ ਦਿਬ੍ਬਭੋਜਨਂ ਉਪਨਾਮੇਸੁਂ, ਤਥਾ ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਸੇਸਰਾਜਪਰਿਸਾਯ ਚ. ਸੋ ਸਤ੍ਤਾਹਮਤ੍ਤਂ ਸਪਰਿਸੋ ਦਿਬ੍ਬਨ੍ਨਪਾਨਾਦੀਨਿ ਪਰਿਭੁਞ੍ਜਿਤ੍ਵਾ ਦਿਬ੍ਬੇਹਿ ਕਾਮਗੁਣੇਹਿ ਅਭਿਰਮਿਤ੍ਵਾ ਸੁਖਸਯਨੇ ਨਿਸਿਨ੍ਨੋ ਮਹਾਸਤ੍ਤਸ੍ਸ ਯਸਂ ਵਣ੍ਣੇਤ੍ਵਾ ‘‘ਨਾਗਰਾਜ, ਤ੍ਵਂ ਏਵਰੂਪਂ ਸਮ੍ਪਤ੍ਤਿਂ ਪਹਾਯ ਮਨੁਸ੍ਸਲੋਕੇ ਵਮ੍ਮਿਕਮਤ੍ਥਕੇ ਨਿਪਜ੍ਜਿਤ੍ਵਾ ਕਸ੍ਮਾ ਉਪੋਸਥਵਾਸਂ ਵਸੀ’’ਤਿ ਪੁਚ੍ਛਿ. ਸੋਪਿਸ੍ਸ ਕਥੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੨੬੯.

‘‘ਸੋ ਤਤ੍ਥ ਭੁਤ੍ਵਾ ਚ ਅਥੋ ਰਮਿਤ੍ਵਾ, ਚਮ੍ਪੇਯ੍ਯਕਂ ਕਾਸਿਰਾਜਾ ਅਵੋਚ;

ਵਿਮਾਨਸੇਟ੍ਠਾਨਿ ਇਮਾਨਿ ਤੁਯ੍ਹਂ, ਆਦਿਚ੍ਚਵਣ੍ਣਾਨਿ ਪਭਸ੍ਸਰਾਨਿ;

ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ, ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.

੨੭੦.

‘‘ਤਾ ਕਮ੍ਬੁਕਾਯੂਰਧਰਾ ਸੁਵਤ੍ਥਾ, ਵਟ੍ਟਙ੍ਗੁਲੀ ਤਮ੍ਬਤਲੂਪਪਨ੍ਨਾ;

ਪਗ੍ਗਯ੍ਹ ਪਾਯੇਨ੍ਤਿ ਅਨੋਮਵਣ੍ਣਾ, ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ;

ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.

੨੭੧.

‘‘ਨਜ੍ਜੋ ਚ ਤੇਮਾ ਪੁਥੁਲੋਮਮਚ੍ਛਾ, ਆਟਾਸਕੁਨ੍ਤਾਭਿਰੁਦਾ ਸੁਤਿਤ੍ਥਾ;

ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ, ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.

੨੭੨.

‘‘ਕੋਞ੍ਚਾ ਮਯੂਰਾ ਦਿਵਿਯਾ ਚ ਹਂਸਾ, ਵਗ੍ਗੁਸ੍ਸਰਾ ਕੋਕਿਲਾ ਸਮ੍ਪਤਨ੍ਤਿ;

ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ, ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.

੨੭੩.

‘‘ਅਮ੍ਬਾ ਚ ਸਾਲਾ ਤਿਲਕਾ ਚ ਜਮ੍ਬੁਯੋ, ਉਦ੍ਦਾਲਕਾ ਪਾਟਲਿਯੋ ਚ ਫੁਲ੍ਲਾ;

ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ, ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.

੨੭੪.

‘‘ਇਮਾ ਚ ਤੇ ਪੋਕ੍ਖਰਞ੍ਞੋ ਸਮਨ੍ਤਤੋ, ਦਿਬ੍ਬਾ ਚ ਗਨ੍ਧਾ ਸਤਤਂ ਪਵਾਯਨ੍ਤਿ;

ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ, ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.

੨੭੫.

‘‘ਨ ਪੁਤ੍ਤਹੇਤੁ ਨ ਧਨਸ੍ਸ ਹੇਤੁ, ਨ ਆਯੁਨੋ ਚਾਪਿ ਜਨਿਨ੍ਦ ਹੇਤੁ;

ਮਨੁਸ੍ਸਯੋਨਿਂ ਅਭਿਪਤ੍ਥਯਾਨੋ, ਤਸ੍ਮਾ ਪਰਕ੍ਕਮ੍ਮ ਤਪੋ ਕਰੋਮੀ’’ਤਿ.

ਤਤ੍ਥ ਤਾਤਿ ਸੋਲ਼ਸਸਹਸ੍ਸਨਾਗਕਞ੍ਞਾਯੋ ਸਨ੍ਧਾਯਾਹ. ਕਮ੍ਬੁਕਾਯੂਰਧਰਾਤਿ ਸੁਵਣ੍ਣਾਭਰਣਧਰਾ. ਵਟ੍ਟਙ੍ਗੁਲੀਤਿ ਪਵਾਲ਼ਙ੍ਕੁਰਸਦਿਸਵਟ੍ਟਙ੍ਗੁਲੀ. ਤਮ੍ਬਤਲੂਪਪਨ੍ਨਾਤਿ ਅਭਿਰਤ੍ਤੇਹਿ ਹਤ੍ਥਪਾਦਤਲੇਹਿ ਸਮਨ੍ਨਾਗਤਾ. ਪਾਯੇਨ੍ਤੀਤਿ ਦਿਬ੍ਬਪਾਨਂ ਉਕ੍ਖਿਪਿਤ੍ਵਾ ਤਂ ਪਾਯੇਨ੍ਤਿ. ਪੁਥੁਲੋਮਮਚ੍ਛਾਤਿ ਪੁਥੁਲਪਤ੍ਤੇਹਿ ਨਾਨਾਮਚ੍ਛੇਹਿ ਸਮਨ੍ਨਾਗਤਾ. ਆਟਾਸਕੁਨ੍ਤਾਭਿਰੁਦਾਤਿ ਆਟਾਸਙ੍ਖਾਤੇਹਿ ਸਕੁਣੇਹਿ ਅਭਿਰੁਦਾ. ਸੁਤਿਤ੍ਥਾਤਿ ਸੁਨ੍ਦਰਤਿਤ੍ਥਾ. ਦਿਵਿਯਾ ਚ ਹਂਸਾਤਿ ਦਿਬ੍ਬਹਂਸਾ ਚ. ਸਮ੍ਪਤਨ੍ਤੀਤਿ ਮਨੁਞ੍ਞਰਵਂ ਰਵਨ੍ਤਾ ਰੁਕ੍ਖਤੋ ਰੁਕ੍ਖਂ ਸਮ੍ਪਤਨ੍ਤਿ. ਦਿਬ੍ਬਾ ਚ ਗਨ੍ਧਾਤਿ ਤਾਸੁ ਪੋਕ੍ਖਰਣੀਸੁ ਸਤਤਂ ਦਿਬ੍ਬਗਨ੍ਧਾ ਵਾਯਨ੍ਤਿ. ਅਭਿਪਤ੍ਥਯਾਨੋਤਿ ਪਤ੍ਥਯਨ੍ਤੋ ਵਿਚਰਾਮਿ. ਤਸ੍ਮਾਤਿ ਤੇਨ ਕਾਰਣੇਨ ਪਰਕ੍ਕਮ੍ਮ ਵੀਰਿਯਂ ਪਗ੍ਗਹੇਤ੍ਵਾ ਤਪੋ ਕਰੋਮਿ, ਉਪੋਸਥਂ ਉਪਵਸਾਮੀਤਿ.

ਏਵਂ ਵੁਤ੍ਤੇ ਰਾਜਾ ਆਹ –

੨੭੬.

‘‘ਤ੍ਵਂ ਲੋਹਿਤਕ੍ਖੋ ਵਿਹਤਨ੍ਤਰਂਸੋ, ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੁ;

ਸੁਰੋਸਿਤੋ ਲੋਹਿਤਚਨ੍ਦਨੇਨ, ਗਨ੍ਧਬ੍ਬਰਾਜਾਵ ਦਿਸਾ ਪਭਾਸਸਿ.

੨੭੭.

‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਸਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ;

ਪੁਚ੍ਛਾਮਿ ਤਂ ਨਾਗਰਾਜੇਤਮਤ੍ਥਂ, ਸੇਯ੍ਯੋ ਇਤੋ ਕੇਨ ਮਨੁਸ੍ਸਲੋਕੋ’’ਤਿ.

ਤਤ੍ਥ ਸੁਰੋਸਿਤੋਤਿ ਸੁਵਿਲਿਤ੍ਤੋ.

ਅਥਸ੍ਸ ਆਚਿਕ੍ਖਨ੍ਤੋ ਨਾਗਰਾਜਾ ਆਹ –

੨੭੮.

‘‘ਜਨਿਨ੍ਦ ਨਾਞ੍ਞਤ੍ਰ ਮਨੁਸ੍ਸਲੋਕਾ, ਸੁਦ੍ਧੀਵ ਸਂਵਿਜ੍ਜਤਿ ਸਂਯਮੋ ਵਾ;

ਅਹਞ੍ਚ ਲਦ੍ਧਾਨ ਮਨੁਸ੍ਸਯੋਨਿਂ, ਕਾਹਾਮਿ ਜਾਤਿਮਰਣਸ੍ਸ ਅਨ੍ਤ’’ਨ੍ਤਿ.

ਤਤ੍ਥ ਸੁਦ੍ਧੀ ਵਾਤਿ ਮਹਾਰਾਜ, ਅਞ੍ਞਤ੍ਰ ਮਨੁਸ੍ਸਲੋਕਾ ਅਮਤਮਹਾਨਿਬ੍ਬਾਨਸਙ੍ਖਾਤਾ ਸੁਦ੍ਧਿ ਵਾ ਸੀਲਸਂਯਮੋ ਵਾ ਨਤ੍ਥਿ. ਅਨ੍ਤਨ੍ਤਿ ਮਨੁਸ੍ਸਯੋਨਿਂ ਲਦ੍ਧਾ ਜਾਤਿਮਰਣਸ੍ਸ ਅਨ੍ਤਂ ਕਰਿਸ੍ਸਾਮੀਤਿ ਤਪੋ ਕਰੋਮੀਤਿ.

ਤਂ ਸੁਤ੍ਵਾ ਰਾਜਾ ਆਹ –

੨੭੯.

‘‘ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਨਾਰਿਯੋ ਚ ਦਿਸ੍ਵਾਨ ਤੁਵਞ੍ਚ ਨਾਗ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨੀ’’ਤਿ.

ਤਤ੍ਥ ਨਾਰਿਯੋ ਚਾਤਿ ਇਮਾ ਤਵ ਨਾਗਕਞ੍ਞਾਯੋ ਚ ਤੁਵਞ੍ਚ ਦਿਸ੍ਵਾ ਬਹੂਨਿ ਪੁਞ੍ਞਾਨਿ ਕਰਿਸ੍ਸਾਮੀਤਿ ਵਦਤਿ.

ਅਥ ਨਂ ਨਾਗਰਾਜਾ ਆਹ –

੨੮੦.

‘‘ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਨਾਰਿਯੋ ਚ ਦਿਸ੍ਵਾਨ ਮਮਞ੍ਚ ਰਾਜ, ਕਰੋਹਿ ਪੁਞ੍ਞਾਨਿ ਅਨਪ੍ਪਕਾਨੀ’’ਤਿ.

ਤਤ੍ਥ ਕਰੋਹੀਤਿ ਕਰੇਯ੍ਯਾਸਿ, ਮਹਾਰਾਜਾਤਿ.

ਏਵਂ ਵੁਤ੍ਤੇ ਉਗ੍ਗਸੇਨੋ ਗਨ੍ਤੁਕਾਮੋ ਹੁਤ੍ਵਾ ‘‘ਨਾਗਰਾਜ, ਚਿਰਂ ਵਸਿਮ੍ਹ, ਗਮਿਸ੍ਸਾਮਾ’’ਤਿ ਆਪੁਚ੍ਛਿ. ਅਥ ਨਂ ਮਹਾਸਤ੍ਤੋ ‘‘ਤੇਨ ਹਿ ਮਹਾਰਾਜ, ਯਾਵਦਿਚ੍ਛਕਂ ਧਨਂ ਗਣ੍ਹਾਹੀ’’ਤਿ ਧਨਂ ਦਸ੍ਸੇਨ੍ਤੋ ਆਹ –

੨੮੧.

‘‘ਇਦਞ੍ਚ ਮੇ ਜਾਤਰੂਪਂ ਪਹੂਤਂ, ਰਾਸੀ ਸੁਵਣ੍ਣਸ੍ਸ ਚ ਤਾਲਮਤ੍ਤਾ;

ਇਤੋ ਹਰਿਤ੍ਵਾਨ ਸੁਵਣ੍ਣਘਰਾਨਿ, ਕਰਸ੍ਸੁ ਰੂਪਿਯਪਾਕਾਰਂ ਕਰੋਨ੍ਤੁ.

੨੮੨.

‘‘ਮੁਤ੍ਤਾ ਚ ਵਾਹਸਹਸ੍ਸਾਨਿ ਪਞ੍ਚ, ਵੇਲ਼ੁਰਿਯਮਿਸ੍ਸਾਨਿ ਇਤੋ ਹਰਿਤ੍ਵਾ;

ਅਨ੍ਤੇਪੁਰੇ ਭੂਮਿਯਂ ਸਨ੍ਥਰਨ੍ਤੁ, ਨਿਕ੍ਕਦ੍ਦਮਾ ਹੇਹਿਤਿ ਨੀਰਜਾ ਚ.

੨੮੩.

‘‘ਏਤਾਦਿਸਂ ਆਵਸ ਰਾਜਸੇਟ੍ਠ, ਵਿਮਾਨਸੇਟ੍ਠਂ ਬਹੁ ਸੋਭਮਾਨਂ;

ਬਾਰਾਣਸਿਂ ਨਗਰਂ ਇਦ੍ਧਂ ਫੀਤਂ, ਰਜ੍ਜਞ੍ਚ ਕਾਰੇਹਿ ਅਨੋਮਪਞ੍ਞਾ’’ਤਿ.

ਤਤ੍ਥ ਰਾਸੀਤਿ ਤੇਸੁ ਤੇਸੁ ਠਾਨੇਸੁ ਤਾਲਪਮਾਣਾ ਰਾਸਿਯੋ. ਸੁਵਣ੍ਣਘਰਾਨੀਤਿ ਸੁਵਣ੍ਣਗੇਹਾਨਿ. ਨਿਕ੍ਕਦ੍ਦਮਾਤਿ ਏਵਂ ਤੇ ਅਨ੍ਤੇਪੁਰੇ ਭੂਮਿ ਨਿਕ੍ਕਦ੍ਦਮਾ ਚ ਨਿਰਜਾ ਚ ਭਵਿਸ੍ਸਤਿ. ਏਤਾਦਿਸਨ੍ਤਿ ਏਵਰੂਪਂ ਸੁਵਣ੍ਣਮਯਂ ਰਜਤਪਾਕਾਰਂ ਮੁਤ੍ਤਾਵੇਲ਼ੁਰਿਯਸਨ੍ਥਤਭੂਮਿਭਾਗਂ. ਫੀਤਨ੍ਤਿ ਫੀਤਂ ਬਾਰਾਣਸਿਨਗਰਞ੍ਚ ਆਵਸ. ਅਨੋਮਪਞ੍ਞਾਤਿ ਅਲਾਮਕਪਞ੍ਞਾ.

ਰਾਜਾ ਤਸ੍ਸ ਕਥਂ ਸੁਤ੍ਵਾ ਅਧਿਵਾਸੇਸਿ. ਅਥ ਮਹਾਸਤ੍ਤੋ ਨਾਗਭਵਨੇ ਭੇਰਿਂ ਚਰਾਪੇਸਿ ‘‘ਸਬ੍ਬਾ ਰਾਜਪਰਿਸਾ ਯਾਵਦਿਚ੍ਛਕਂ ਹਿਰਞ੍ਞਸੁਵਣ੍ਣਾਦਿਕਂ ਧਨਂ ਗਣ੍ਹਨ੍ਤੂ’’ਤਿ. ਰਞ੍ਞੋ ਚ ਅਨੇਕੇਹਿ ਸਕਟਸਤੇਹਿ ਧਨਂ ਪੇਸੇਸਿ. ਰਾਜਾ ਮਹਨ੍ਤੇਨ ਯਸੇਨ ਨਾਗਭਵਨਾ ਨਿਕ੍ਖਮਿਤ੍ਵਾ ਬਾਰਾਣਸਿਮੇਵ ਗਤੋ. ਤਤੋ ਪਟ੍ਠਾਯ ਕਿਰ ਜਮ੍ਬੁਦੀਪਤਲਂ ਸਹਿਰਞ੍ਞਂ ਜਾਤਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਪੋਰਾਣਕਪਣ੍ਡਿਤਾ ਨਾਗਸਮ੍ਪਤ੍ਤਿਂ ਪਹਾਯ ਉਪੋਸਥਵਾਸਂ ਵਸਿਂਸੂ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਅਹਿਤੁਣ੍ਡਿਕੋ ਦੇਵਦਤ੍ਤੋ ਅਹੋਸਿ, ਸੁਮਨਾ ਰਾਹੁਲਮਾਤਾ, ਉਗ੍ਗਸੇਨੋ ਸਾਰਿਪੁਤ੍ਤੋ, ਚਮ੍ਪੇਯ੍ਯਨਾਗਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚਮ੍ਪੇਯ੍ਯਜਾਤਕਵਣ੍ਣਨਾ ਦਸਮਾ.

[੫੦੭] ੧੧. ਮਹਾਪਲੋਭਨਜਾਤਕਵਣ੍ਣਨਾ

ਬ੍ਰਹ੍ਮਲੋਕਾ ਚਵਿਤ੍ਵਾਨਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਵਿਸੁਦ੍ਧਸਂਕਿਲੇਸਂ ਆਰਬ੍ਭ ਕਥੇਸਿ. ਵਤ੍ਥੁ ਹੇਟ੍ਠਾ ਵਿਤ੍ਥਾਰਿਤਮੇਵ. ਇਧ ਪਨ ਸਤ੍ਥਾ ‘‘ਭਿਕ੍ਖੁ ਮਾਤੁਗਾਮੋ ਨਾਮੇਸ ਵਿਸੁਦ੍ਧਸਤ੍ਤੇਪਿ ਸਂਕਿਲਿਟ੍ਠੇ ਕਰੋਤੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਨ੍ਤਿ ਚੂਲ਼ਪਲੋਭਨੇ (ਜਾ. ੧.੩.੩੭ ਆਦਯੋ) ਵੁਤ੍ਤਨਯੇਨੇਵ ਅਤੀਤਵਤ੍ਥੁ ਵਿਤ੍ਥਾਰਿਤਬ੍ਬਂ. ਤਦਾ ਪਨ ਮਹਾਸਤ੍ਤੋ ਬ੍ਰਹ੍ਮਲੋਕਾ ਚਵਿਤ੍ਵਾ ਕਾਸਿਰਞ੍ਞੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਅਨਿਤ੍ਥਿਗਨ੍ਧਕੁਮਾਰੋ ਨਾਮ ਅਹੋਸਿ. ਇਤ੍ਥੀਨਂ ਹਤ੍ਥੇ ਨ ਸਣ੍ਠਾਤਿ, ਪੁਰਿਸਵੇਸੇਨ ਨਂ ਥਞ੍ਞਂ ਪਾਯੇਨ੍ਤਿ, ਝਾਨਾਗਾਰੇ ਵਸਤਿ, ਇਤ੍ਥਿਯੋ ਨ ਪਸ੍ਸਤਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਚਤਸ੍ਸੋ ਗਾਥਾ ਅਭਾਸਿ –

੨੮੪.

‘‘ਬ੍ਰਹ੍ਮਲੋਕਾ ਚਵਿਤ੍ਵਾਨ, ਦੇਵਪੁਤ੍ਤੋ ਮਹਿਦ੍ਧਿਕੋ;

ਰਞ੍ਞੋ ਪੁਤ੍ਤੋ ਉਦਪਾਦਿ, ਸਬ੍ਬਕਾਮਸਮਿਦ੍ਧਿਸੁ.

੨੮੫.

‘‘ਕਾਮਾ ਵਾ ਕਾਮਸਞ੍ਞਾ ਵਾ, ਬ੍ਰਹ੍ਮਲੋਕੇ ਨ ਵਿਜ੍ਜਤਿ;

ਸ੍ਵਾਸ੍ਸੁ ਤਾਯੇਵ ਸਞ੍ਞਾਯ, ਕਾਮੇਹਿ ਵਿਜਿਗੁਚ੍ਛਥ.

੨੮੬.

‘‘ਤਸ੍ਸ ਚਨ੍ਤੇਪੁਰੇ ਆਸਿ, ਝਾਨਾਗਾਰਂ ਸੁਮਾਪਿਤਂ;

ਸੋ ਤਤ੍ਥ ਪਟਿਸਲ੍ਲੀਨੋ, ਏਕੋ ਰਹਸਿ ਝਾਯਥ.

੨੮੭.

‘‘ਸ ਰਾਜਾ ਪਰਿਦੇਵੇਸਿ, ਪੁਤ੍ਤਸੋਕੇਨ ਅਟ੍ਟਿਤੋ;

ਏਕਪੁਤ੍ਤੋ ਚਯਂ ਮਯ੍ਹਂ, ਨ ਚ ਕਾਮਾਨਿ ਭੁਞ੍ਜਤੀ’’ਤਿ.

ਤਤ੍ਥ ਸਬ੍ਬਕਾਮਸਮਿਦ੍ਧਿਸੂਤਿ ਸਬ੍ਬਕਾਮਾਨਂ ਸਮਿਦ੍ਧੀਸੁ ਸਮ੍ਪਤ੍ਤੀਸੁ ਠਿਤਸ੍ਸ ਰਞ੍ਞੋ ਪੁਤ੍ਤੋ ਹੁਤ੍ਵਾ ਏਕੋ ਦੇਵਪੁਤ੍ਤੋ ਨਿਬ੍ਬਤ੍ਤਿ. ਸ੍ਵਾਸ੍ਸੂਤਿ ਸੋ ਕੁਮਾਰੋ. ਤਾਯੇਵਾਤਿ ਤਾਯ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਤਾਯ ਝਾਨਸਞ੍ਞਾਯ ਏਵ. ਸੁਮਾਪਿਤਨ੍ਤਿ ਪਿਤਰਾ ਸੁਟ੍ਠੁ ਮਨਾਪਂ ਕਤ੍ਵਾ ਮਾਪਿਤਂ. ਰਹਸਿ ਝਾਯਥਾਤਿ ਮਾਤੁਗਾਮਂ ਅਪਸ੍ਸਨ੍ਤੋ ਵਸਿ. ਪਰਿਦੇਵੇਸੀਤਿ ਵਿਲਪਿ.

ਪਞ੍ਚਮਾ ਰਞ੍ਞੋ ਪਰਿਦੇਵਨਗਾਥਾ –

੨੮੮.

‘‘ਕੋ ਨੁ ਖ੍ਵੇਤ੍ਥ ਉਪਾਯੋ ਸੋ, ਕੋ ਵਾ ਜਾਨਾਤਿ ਕਿਞ੍ਚਨਂ;

ਯੋ ਮੇ ਪੁਤ੍ਤਂ ਪਲੋਭੇਯ੍ਯ, ਯਥਾ ਕਾਮਾਨਿ ਪਤ੍ਥਯੇ’’ਤਿ.

ਤਤ੍ਥ ਕੋ ਨੁ ਖ੍ਵੇਤ੍ਥ ਉਪਾਯੋਤਿ ਕੋ ਨੁ ਖੋ ਏਤ੍ਥ ਏਤਸ੍ਸ ਕਾਮਾਨਂ ਭੁਞ੍ਜਨਉਪਾਯੋ. ‘‘ਕੋ ਨੁ ਖੋ ਇਧੁਪਾਯੋ ਸੋ’’ਤਿਪਿ ਪਾਠੋ, ਅਟ੍ਠਕਥਾਯਂ ਪਨ ‘‘ਕੋ ਨੁ ਖੋ ਏਤਂ ਉਪਵਸਿਤ੍ਵਾ ਉਪਲਾਪਨਕਾਰਣਂ ਜਾਨਾਤੀ’’ਤਿ ਵੁਤ੍ਤਂ. ਕੋ ਵਾ ਜਾਨਾਤਿ ਕਿਞ੍ਚਨਨ੍ਤਿ ਕੋ ਵਾ ਏਤਸ੍ਸ ਪਲਿਬੋਧਕਾਰਣਂ ਜਾਨਾਤੀਤਿ ਅਤ੍ਥੋ.

ਤਤੋ ਪਰਂ ਦਿਯਡ੍ਢਗਾਥਾ ਅਭਿਸਮ੍ਬੁਦ੍ਧਗਾਥਾ –

੨੮੯.

‘‘ਅਹੁ ਕੁਮਾਰੀ ਤਤ੍ਥੇਵ, ਵਣ੍ਣਰੂਪਸਮਾਹਿਤਾ;

ਕੁਸਲਾ ਨਚ੍ਚਗੀਤਸ੍ਸ, ਵਾਦਿਤੇ ਚ ਪਦਕ੍ਖਿਣਾ.

੨੯੦.

‘‘ਸਾ ਤਤ੍ਥ ਉਪਸਙ੍ਕਮ੍ਮ, ਰਾਜਾਨਂ ਏਤਦਬ੍ਰਵੀ’’ਤਿ;

ਤਤ੍ਥ ਅਹੂਤਿ ਭਿਕ੍ਖਵੇ, ਤਤ੍ਥੇਵ ਅਨ੍ਤੇਪੁਰੇ ਚੂਲ਼ਨਾਟਕਾਨਂ ਅਨ੍ਤਰੇ ਏਕਾ ਤਰੁਣਕੁਮਾਰਿਕਾ ਅਹੋਸਿ. ਪਦਕ੍ਖਿਣਾਤਿ ਸੁਸਿਕ੍ਖਿਤਾ.

‘‘ਅਹਂ ਖੋ ਨਂ ਪਲੋਭੇਯ੍ਯਂ, ਸਚੇ ਭਤ੍ਤਾ ਭਵਿਸ੍ਸਤੀ’’ਤਿ. –

ਉਪਡ੍ਢਗਾਥਾ ਕੁਮਾਰਿਕਾਯ ਵੁਤ੍ਤਾ.

ਤਤ੍ਥ ਸਚੇ ਭਤ੍ਤਾਤਿ ਸਚੇ ਏਸ ਮਯ੍ਹਂ ਪਤਿ ਭਵਿਸ੍ਸਤੀਤਿ.

੨੯੧.

‘‘ਤਂ ਤਥਾਵਾਦਿਨਿਂ ਰਾਜਾ, ਕੁਮਾਰਿਂ ਏਤਦਬ੍ਰਵਿ;

ਤ੍ਵਞ੍ਞੇਵ ਨਂ ਪਲੋਭੇਹਿ, ਤਵ ਭਤ੍ਤਾ ਭਵਿਸ੍ਸਤੀਤਿ.

ਤਤ੍ਥ ਤਵ ਭਤ੍ਤਾਤਿ ਤਵੇਸ ਪਤਿ ਭਵਿਸ੍ਸਤਿ, ਤ੍ਵਞ੍ਞੇਵ ਤਸ੍ਸ ਅਗ੍ਗਮਹੇਸੀ ਭਵਿਸ੍ਸਸਿ, ਗਚ੍ਛ ਨਂ ਪਲੋਭੇਹਿ, ਕਾਮਰਸਂ ਜਾਨਾਪੇਹੀਤਿ.

ਏਵਂ ਵਤ੍ਵਾ ਰਾਜਾ ‘‘ਇਮਿਸ੍ਸਾ ਕਿਰ ਓਕਾਸਂ ਕਰੋਨ੍ਤੂ’’ਤਿ ਕੁਮਾਰਸ੍ਸ ਉਪਟ੍ਠਾਕਾਨਂ ਪੇਸੇਸਿ. ਸਾ ਪਚ੍ਚੂਸਕਾਲੇ ਵੀਣਂ ਆਦਾਯ ਗਨ੍ਤ੍ਵਾ ਕੁਮਾਰਸ੍ਸ ਸਯਨਗਬ੍ਭਸ੍ਸ ਬਹਿ ਅਵਿਦੂਰੇ ਠਤ੍ਵਾ ਅਗ੍ਗਨਖੇਹਿ ਵੀਣਂ ਵਾਦੇਨ੍ਤੀ ਮਧੁਰਸਰੇਨ ਗਾਯਿਤ੍ਵਾ ਤਂ ਪਲੋਭੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੨੯੨.

‘‘ਸਾ ਚ ਅਨ੍ਤੇਪੁਰਂ ਗਨ੍ਤ੍ਵਾ, ਬਹੁਂ ਕਾਮੁਪਸਂਹਿਤਂ;

ਹਦਯਙ੍ਗਮਾ ਪੇਮਨੀਯਾ, ਚਿਤ੍ਰਾ ਗਾਥਾ ਅਭਾਸਥ.

੨੯੩.

‘‘ਤਸ੍ਸਾ ਚ ਗਾਯਮਾਨਾਯ, ਸਦ੍ਦਂ ਸੁਤ੍ਵਾਨ ਨਾਰਿਯਾ;

ਕਾਮਚ੍ਛਨ੍ਦਸ੍ਸ ਉਪ੍ਪਜ੍ਜਿ, ਜਨਂ ਸੋ ਪਰਿਪੁਚ੍ਛਥ.

੨੯੪.

‘‘ਕਸ੍ਸੇਸੋ ਸਦ੍ਦੋ ਕੋ ਵਾ ਸੋ, ਭਣਤਿ ਉਚ੍ਚਾਵਚਂ ਬਹੁਂ;

ਹਦਯਙ੍ਗਮਂ ਪੇਮਨੀਯਂ, ਅਹੋ ਕਣ੍ਣਸੁਖਂ ਮਮ.

੨੯੫.

‘‘ਏਸਾ ਖੋ ਪਮਦਾ ਦੇਵ, ਖਿਡ੍ਡਾ ਏਸਾ ਅਨਪ੍ਪਿਕਾ;

ਸਚੇ ਤ੍ਵਂ ਕਾਮੇ ਭੁਞ੍ਜੇਯ੍ਯ, ਭਿਯ੍ਯੋ ਭਿਯ੍ਯੋ ਛਾਦੇਯ੍ਯੁ ਤਂ.

੨੯੬.

‘‘ਇਙ੍ਘ ਆਗਚ੍ਛਤੋਰੇਨ, ਅਵਿਦੂਰਮ੍ਹਿ ਗਾਯਤੁ;

ਅਸ੍ਸਮਸ੍ਸ ਸਮੀਪਮ੍ਹਿ, ਸਨ੍ਤਿਕੇ ਮਯ੍ਹ ਗਾਯਤੁ.

੨੯੭.

‘‘ਤਿਰੋਕੁਟ੍ਟਮ੍ਹਿ ਗਾਯਿਤ੍ਵਾ, ਝਾਨਾਗਾਰਮ੍ਹਿ ਪਾਵਿਸਿ;

ਬਨ੍ਧਿ ਨਂ ਅਨੁਪੁਬ੍ਬੇਨ, ਆਰਞ੍ਞਮਿਵ ਕੁਞ੍ਜਰਂ.

੨੯੮.

‘‘ਤਸ੍ਸ ਕਾਮਰਸਂ ਞਤ੍ਵਾ, ਇਸ੍ਸਾਧਮ੍ਮੋ ਅਜਾਯਥ;

‘ਅਹਮੇਵ ਕਾਮੇ ਭੁਞ੍ਜੇਯ੍ਯਂ, ਮਾ ਅਞ੍ਞੋ ਪੁਰਿਸੋ ਅਹੁ’.

੨੯੯.

‘‘ਤਤੋ ਅਸਿਂ ਗਹੇਤ੍ਵਾਨ, ਪੁਰਿਸੇ ਹਨ੍ਤੁਂ ਉਪਕ੍ਕਮਿ;

ਅਹਮੇਵੇਕੋ ਭੁਞ੍ਜਿਸ੍ਸਂ, ਮਾ ਅਞ੍ਞੋ ਪੁਰਿਸੋ ਸਿਯਾ.

੩੦੦.

‘‘ਤਤੋ ਜਾਨਪਦਾ ਸਬ੍ਬੇ, ਵਿਕ੍ਕਨ੍ਦਿਂਸੁ ਸਮਾਗਤਾ;

ਪੁਤ੍ਤੋ ਤ੍ਯਾਯਂ ਮਹਾਰਾਜ, ਜਨਂ ਹੇਠੇਤ੍ਯਦੂਸਕਂ.

੩੦੧.

‘‘ਤਞ੍ਚ ਰਾਜਾ ਵਿਵਾਹੇਸਿ, ਸਮ੍ਹਾ ਰਟ੍ਠਾ ਚ ਖਤ੍ਤਿਯੋ;

ਯਾਵਤਾ ਵਿਜਿਤਂ ਮਯ੍ਹਂ, ਨ ਤੇ ਵਤ੍ਥਬ੍ਬ ਤਾਵਦੇ.

੩੦੨.

‘‘ਤਤੋ ਸੋ ਭਰਿਯਮਾਦਾਯ, ਸਮੁਦ੍ਦਂ ਉਪਸਙ੍ਕਮਿ;

ਪਣ੍ਣਸਾਲਂ ਕਰਿਤ੍ਵਾਨ, ਵਨਮੁਞ੍ਛਾਯ ਪਾਵਿਸਿ.

੩੦੩.

‘‘ਅਥੇਤ੍ਥ ਇਸਿ ਮਾਗਚ੍ਛਿ, ਸਮੁਦ੍ਦਂ ਉਪਰੂਪਰਿ;

ਸੋ ਤਸ੍ਸ ਗੇਹਂ ਪਾਵੇਕ੍ਖਿ, ਭਤ੍ਤਕਾਲੇ ਉਪਟ੍ਠਿਤੇ.

੩੦੪.

‘‘ਤਞ੍ਚ ਭਰਿਯਾ ਪਲੋਭੇਸਿ, ਪਸ੍ਸ ਯਾਵ ਸੁਦਾਰੁਣਂ;

ਚੁਤੋ ਸੋ ਬ੍ਰਹ੍ਮਚਰਿਯਮ੍ਹਾ, ਇਦ੍ਧਿਯਾ ਪਰਿਹਾਯਥ.

੩੦੫.

‘‘ਰਾਜਪੁਤ੍ਤੋ ਚ ਉਞ੍ਛਾਤੋ, ਵਨਮੂਲਫਲਂ ਬਹੁਂ;

ਸਾਯਂ ਕਾਜੇਨ ਆਦਾਯ, ਅਸ੍ਸਮਂ ਉਪਸਙ੍ਕਮਿ.

੩੦੬.

‘‘ਇਸੀ ਚ ਖਤ੍ਤਿਯਂ ਦਿਸ੍ਵਾ, ਸਮੁਦ੍ਦਂ ਉਪਸਙ੍ਕਮਿ;

‘ਵੇਹਾਯਸਂ ਗਮਿਸ੍ਸ’ਨ੍ਤਿ, ਸੀਦਤੇ ਸੋ ਮਹਣ੍ਣਵੇ.

੩੦੭.

‘‘ਖਤ੍ਤਿਯੋ ਚ ਇਸਿਂ ਦਿਸ੍ਵਾ, ਸੀਦਮਾਨਂ ਮਹਣ੍ਣਵੇ;

ਤਸ੍ਸੇਵ ਅਨੁਕਮ੍ਪਾਯ, ਇਮਾ ਗਾਥਾ ਅਭਾਸਥ.

੩੦੮.

‘‘ਅਭਿਜ੍ਜਮਾਨੇ ਵਾਰਿਸ੍ਮਿਂ, ਸਯਂ ਆਗਮ੍ਮ ਇਦ੍ਧਿਯਾ;

ਮਿਸ੍ਸੀਭਾਵਿਤ੍ਥਿਯਾ ਗਨ੍ਤ੍ਵਾ, ਸਂਸੀਦਸਿ ਮਹਣ੍ਣਵੇ.

੩੦੯.

‘‘ਆਵਟ੍ਟਨੀ ਮਹਾਮਾਯਾ, ਬ੍ਰਹ੍ਮਚਰਿਯਵਿਕੋਪਨਾ;

ਸੀਦਨ੍ਤਿ ਨਂ ਵਿਦਿਤ੍ਵਾਨ, ਆਰਕਾ ਪਰਿਵਜ੍ਜਯੇ.

੩੧੦.

‘‘ਅਨਲਾ ਮੁਦੁਸਮ੍ਭਾਸਾ, ਦੁਪ੍ਪੂਰਾ ਤਾ ਨਦੀਸਮਾ;

ਸੀਦਨ੍ਤਿ ਨਂ ਵਿਦਿਤ੍ਵਾਨ, ਆਰਕਾ ਪਰਿਵਜ੍ਜਯੇ.

੩੧੧.

‘‘ਯਂ ਏਤਾ ਉਪਸੇਵਨ੍ਤਿ, ਛਨ੍ਦਸਾ ਵਾ ਧਨੇਨ ਵਾ;

ਜਾਤਵੇਦੋਵ ਸਂ ਠਾਨਂ, ਖਿਪ੍ਪਂ ਅਨੁਦਹਨ੍ਤਿ ਤਂ.

੩੧੨.

‘‘ਖਤ੍ਤਿਯਸ੍ਸ ਵਚੋ ਸੁਤ੍ਵਾ, ਇਸਿਸ੍ਸ ਨਿਬ੍ਬਿਦਾ ਅਹੁ;

ਲਦ੍ਧਾ ਪੋਰਾਣਕਂ ਮਗ੍ਗਂ, ਗਚ੍ਛਤੇ ਸੋ ਵਿਹਾਯਸਂ.

੩੧੩.

‘‘ਖਤ੍ਤਿਯੋ ਚ ਇਸਿਂ ਦਿਸ੍ਵਾ, ਗਚ੍ਛਮਾਨਂ ਵਿਹਾਯਸਂ;

ਸਂਵੇਗਂ ਅਲਭੀ ਧੀਰੋ, ਪਬ੍ਬਜ੍ਜਂ ਸਮਰੋਚਯਿ.

੩੧੪.

‘‘ਤਤੋ ਸੋ ਪਬ੍ਬਜਿਤ੍ਵਾਨ, ਕਾਮਰਾਗਂ ਵਿਰਾਜਯਿ;

ਕਾਮਰਾਗਂ ਵਿਰਾਜੇਤ੍ਵਾ, ਬ੍ਰਾਹ੍ਮਲੋਕੂਪਗੋ ਅਹੂ’’ਤਿ.

ਤਤ੍ਥ ਅਨ੍ਤੇਪੁਰਨ੍ਤਿ ਕੁਮਾਰਸ੍ਸ ਵਸਨਟ੍ਠਾਨਂ. ਬਹੁਨ੍ਤਿ ਬਹੁਂ ਨਾਨਪ੍ਪਕਾਰਂ. ਕਾਮੁਪਸਂਹਿਤਨ੍ਤਿ ਕਾਮਨਿਸ੍ਸਿਤਂ ਗੀਤਂ ਪਵਤ੍ਤਯਮਾਨਾ. ਕਾਮਚ੍ਛਨ੍ਦਸ੍ਸਾਤਿ ਅਸ੍ਸ ਅਨਿਤ੍ਥਿਗਨ੍ਧਕੁਮਾਰਸ੍ਸ ਕਾਮਚ੍ਛਨ੍ਦੋ ਉਪ੍ਪਜ੍ਜਿ. ਜਨਨ੍ਤਿ ਅਤ੍ਤਨੋ ਸਨ੍ਤਿਕਾਵਚਰਂ ਪਰਿਚਾਰਿਕਜਨਂ. ਉਚ੍ਚਾਵਚਨ੍ਤਿ ਉਗ੍ਗਤਞ੍ਚ ਅਨੁਗ੍ਗਤਞ੍ਚ. ਭੁਞ੍ਜੇਯ੍ਯਾਤਿ ਸਚੇ ਭੁਞ੍ਜੇਯ੍ਯਾਸਿ. ਛਾਦੇਯ੍ਯੁ ਤਨ੍ਤਿ ਏਤੇ ਕਾਮਾ ਨਾਮ ਤਵ ਰੁਚ੍ਚੇਯ੍ਯੁਂ. ਸੋ ‘‘ਪਮਦਾ’’ਤਿ ਵਚਨਂ ਸੁਤ੍ਵਾ ਤੁਣ੍ਹੀ ਅਹੋਸਿ. ਇਤਰਾ ਪੁਨਦਿਵਸੇਪਿ ਗਾਯਿ. ਏਵਂ ਕੁਮਾਰੋ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਤਸ੍ਸਾ ਆਗਮਨਂ ਰੋਚੇਨ੍ਤੋ ਪਰਿਚਾਰਿਕੇ ਆਮਨ੍ਤੇਤ੍ਵਾ ‘‘ਇਙ੍ਘਾ’’ਤਿ ਗਾਥਮਾਹ.

ਤਿਰੋਕੁਟ੍ਟਮ੍ਹੀਤਿ ਸਯਨਗਬ੍ਭਕੁਟ੍ਟਸ੍ਸ ਬਹਿ. ਮਾ ਅਞ੍ਞੋਤਿ ਅਞ੍ਞੋ ਕਾਮੇ ਪਰਿਭੁਞ੍ਜਨ੍ਤੋ ਪੁਰਿਸੋ ਨਾਮ ਮਾ ਸਿਯਾ. ਹਨ੍ਤੁਂ ਉਪਕ੍ਕਮੀਤਿ ਅਨ੍ਤਰਵੀਥਿਂ ਓਤਰਿਤ੍ਵਾ ਮਾਰੇਤੁਂ ਆਰਭਿ. ਵਿਕਨ੍ਦਿਂਸੂਤਿ ਕੁਮਾਰੇਨ ਕਤਿਪਯੇਸੁ ਪੁਰਿਸੇਸੁ ਪਹਤੇਸੁ ਪੁਰਿਸਾ ਪਲਾਯਿਤ੍ਵਾ ਗੇਹਾਨਿ ਪਵਿਸਿਂਸੁ. ਸੋ ਪੁਰਿਸੇ ਅਲਭਨ੍ਤੋ ਥੋਕਂ ਵਿਸ੍ਸਮਿ. ਤਸ੍ਮਿਂ ਖਣੇ ਰਾਜਙ੍ਗਣੇ ਸਨ੍ਨਿਪਤਿਤ੍ਵਾ ਉਪਕ੍ਕੋਸਿਂਸੁ. ਜਨਂ ਹੇਠੇਤ੍ਯਦੂਸਕਨ੍ਤਿ ਨਿਰਪਰਾਧਂ ਜਨਂ ਹੇਠੇਤਿ, ਤਂ ਗਣ੍ਹਾਪੇਥਾਤਿ ਵਦਿਂਸੁ. ਰਾਜਾ ਉਪਾਯੇਨ ਕੁਮਾਰਂ ਗਣ੍ਹਾਪੇਤ੍ਵਾ ‘‘ਇਮਸ੍ਸ ਕਿਂ ਕਤ੍ਤਬ੍ਬ’’ਨ੍ਤਿ ਪੁਚ੍ਛਿ. ‘‘ਦੇਵ, ਅਞ੍ਞਂ ਨਤ੍ਥਿ, ਇਮਂ ਪਨ ਕੁਮਾਰਂ ਤਾਯ ਕੁਮਾਰਿਕਾਯ ਸਦ੍ਧਿਂ ਰਟ੍ਠਾ ਪਬ੍ਬਾਜੇਤੁਂ ਵਟ੍ਟਤੀ’’ਤਿ ਵੁਤ੍ਤੇ ਤਥਾ ਅਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ‘‘ਤਞ੍ਚਾ’’ਤਿਆਦਿਮਾਹ. ਤਤ੍ਥ ਵਿਵਾਹੇਸੀਤਿ ਪਬ੍ਬਾਜੇਸਿ. ਨ ਤੇ ਵਤ੍ਥਬ੍ਬ ਤਾਵਦੇਤਿ ਯਤ੍ਤਕਂ ਮਯ੍ਹਂ ਵਿਜਿਤਂ, ਤਤ੍ਤਕੇ ਤਯਾ ਨ ਵਤ੍ਥਬ੍ਬਂ. ਉਞ੍ਛਾਯਾਤਿ ਫਲਾਫਲਤ੍ਥਾਯ.

ਤਸ੍ਮਿਂ ਪਨ ਵਨਂ ਪਵਿਟ੍ਠੇ ਇਤਰਾ ਯਂ ਤਤ੍ਥ ਪਚਿਤਬ੍ਬਯੁਤ੍ਤਕਂ ਅਤ੍ਥਿ, ਤਂ ਪਚਿਤ੍ਵਾ ਤਸ੍ਸਾਗਮਨਂ ਓਲੋਕੇਨ੍ਤੀ ਪਣ੍ਣਸਾਲਦ੍ਵਾਰੇ ਨਿਸੀਦਤਿ. ਏਵਂ ਕਾਲੇ ਗਚ੍ਛਨ੍ਤੇ ਏਕਦਿਵਸਂ ਅਨ੍ਤਰਦੀਪਕਵਾਸੀ ਏਕੋ ਇਦ੍ਧਿਮਨ੍ਤਤਾਪਸੋ ਅਸ੍ਸਮਪਦਤੋ ਨਿਕ੍ਖਮਿਤ੍ਵਾ ਮਣਿਫਲਕਂ ਵਿਯ ਉਦਕਂ ਮਦ੍ਦਮਾਨੋਵ ਆਕਾਸੇ ਉਪ੍ਪਤਿਤ੍ਵਾ ਭਿਕ੍ਖਾਚਾਰਂ ਗਚ੍ਛਨ੍ਤੋ ਪਣ੍ਣਸਾਲਾਯ ਉਪਰਿਭਾਗਂ ਪਤ੍ਵਾ ਧੂਮਂ ਦਿਸ੍ਵਾ ‘‘ਇਮਸ੍ਮਿਂ ਠਾਨੇ ਮਨੁਸ੍ਸਾ ਵਸਨ੍ਤਿ ਮਞ੍ਞੇ’’ਤਿ ਪਣ੍ਣਸਾਲਦ੍ਵਾਰੇ ਓਤਰਿ. ਸਾ ਤਂ ਦਿਸ੍ਵਾ ਨਿਸੀਦਾਪੇਤ੍ਵਾ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ਇਤ੍ਥਿਕੁਤ੍ਤਂ ਦਸ੍ਸੇਤ੍ਵਾ ਤੇਨ ਸਦ੍ਧਿਂ ਅਨਾਚਾਰਂ ਅਚਰਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ‘‘ਅਥੇਤ੍ਥਾ’’ਤਿਆਦਿਮਾਹ. ਤਤ੍ਥ ਇਸਿ ਮਾਗਚ੍ਛੀਤਿ ਇਸਿ ਆਗਚ੍ਛਿ. ਸਮੁਦ੍ਦਂ ਉਪਰੂਪਰੀਤਿ ਸਮੁਦ੍ਦਸ੍ਸ ਮਤ੍ਥਕਮਤ੍ਥਕੇਨ. ਪਸ੍ਸ ਯਾਵ ਸੁਦਾਰੁਣਨ੍ਤਿ ਪਸ੍ਸਥ, ਭਿਕ੍ਖਵੇ, ਤਾਯ ਕੁਮਾਰਿਕਾਯ ਯਾਵ ਸੁਦਾਰੁਣਂ ਕਮ੍ਮਂ ਕਤਨ੍ਤਿ ਅਤ੍ਥੋ.

ਸਾਯਨ੍ਤਿ ਸਾਯਨ੍ਹਸਮਯੇ. ਦਿਸ੍ਵਾਤਿ ਤਂ ਵਿਜਹਿਤੁਂ ਅਸਕ੍ਕੋਨ੍ਤੋ ਸਕਲਦਿਵਸਂ ਤਤ੍ਥੇਵ ਹੁਤ੍ਵਾ ਸਾਯਨ੍ਹਸਮਯੇ ਰਾਜਪੁਤ੍ਤਂ ਆਗਤਂ ਦਿਸ੍ਵਾ ਪਲਾਯਿਤੁਂ ‘‘ਵੇਹਾਯਸਂ ਗਮਿਸ੍ਸ’’ਨ੍ਤਿ ਉਪ੍ਪਤਨਾਕਾਰਂ ਕਰੋਨ੍ਤੋ ਪਤਿਤ੍ਵਾ ਮਹਣ੍ਣਵੇ ਸੀਦਤਿ. ਇਸਿਂ ਦਿਸ੍ਵਾਤਿ ਅਨੁਬਨ੍ਧਮਾਨੋ ਗਨ੍ਤ੍ਵਾ ਪਸ੍ਸਿਤ੍ਵਾ. ਅਨੁਕਮ੍ਪਾਯਾਤਿ ਸਚਾਯਂ ਭੂਮਿਯਾ ਆਗਤੋ ਅਭਵਿਸ੍ਸ, ਪਲਾਯਿਤ੍ਵਾ ਅਰਞ੍ਞਂ ਪਵਿਸੇਯ੍ਯ, ਆਕਾਸੇਨ ਆਗਤੋ ਭਵਿਸ੍ਸਤਿ, ਤਸ੍ਮਾ ਸਮੁਦ੍ਦੇ ਪਤਿਤੋਪਿ ਉਪ੍ਪਤਨਾਕਾਰਮੇਵ ਕਰੋਤੀਤਿ ਅਨੁਕਮ੍ਪਂ ਉਪ੍ਪਾਦੇਤ੍ਵਾ ਤਸ੍ਸੇਵ ਅਨੁਕਮ੍ਪਾਯ ਅਭਾਸਥ. ਤਾਸਂ ਪਨ ਗਾਥਾਨਂ ਅਤ੍ਥੋ ਤਿਕਨਿਪਾਤੇ ਵੁਤ੍ਤੋਯੇਵ. ਨਿਬ੍ਬਿਦਾ ਅਹੂਤਿ ਕਾਮੇਸੁ ਨਿਬ੍ਬੇਦੋ ਜਾਤੋ. ਪੋਰਾਣਕਂ ਮਗ੍ਗਨ੍ਤਿ ਪੁਬ੍ਬੇ ਅਧਿਗਤਂ ਝਾਨਵਿਸੇਸਂ. ਪਬ੍ਬਜਿਤ੍ਵਾਨਾਤਿ ਤਂ ਇਤ੍ਥਿਂ ਮਨੁਸ੍ਸਾਵਾਸਂ ਨੇਤ੍ਵਾ ਨਿਵਤ੍ਤਿਤ੍ਵਾ ਅਰਞ੍ਞੇ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਕਾਮਰਾਗਂ ਵਿਰਾਜਯਿ, ਵਿਰਾਜੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸੀਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਮਾਤੁਗਾਮਂ ਪਟਿਚ੍ਚ ਵਿਸੁਦ੍ਧਸਤ੍ਤਾਪਿ ਸਂਕਿਲਿਸ੍ਸਨ੍ਤੀ’’ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਅਰਹਤ੍ਤਂ ਪਤ੍ਤੋ. ਤਦਾ ਅਨਿਤ੍ਥਿਗਨ੍ਧਕੁਮਾਰੋ ਅਹਮੇਵ ਅਹੋਸਿਨ੍ਤਿ.

ਮਹਾਪਲੋਭਨਜਾਤਕਵਣ੍ਣਨਾ ਏਕਾਦਸਮਾ.

[੫੦੮] ੧੨. ਪਞ੍ਚਪਣ੍ਡਿਤਜਾਤਕਵਣ੍ਣਨਾ

੩੧੫-੩੩੬. ਪਞ੍ਚਪਣ੍ਡਿਤਜਾਤਕਂ ਮਹਾਉਮਙ੍ਗੇ ਆਵਿ ਭਵਿਸ੍ਸਤਿ.

ਪਞ੍ਚਪਣ੍ਡਿਤਜਾਤਕਵਣ੍ਣਨਾ ਦ੍ਵਾਦਸਮਾ.

[੫੦੯] ੧੩. ਹਤ੍ਥਿਪਾਲਜਾਤਕਵਣ੍ਣਨਾ

ਚਿਰਸ੍ਸਂ ਵਤ ਪਸ੍ਸਾਮਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਹਾਭਿਨਿਕ੍ਖਮਨਂ ਆਰਬ੍ਭ ਕਥੇਸਿ. ਤਦਾ ਹਿ ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਤਥਾਗਤੋ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਏਸੁਕਾਰੀ ਨਾਮ ਰਾਜਾ ਅਹੋਸਿ. ਤਸ੍ਸ ਪੁਰੋਹਿਤੋ ਦਹਰਕਾਲਤੋ ਪਟ੍ਠਾਯ ਪਿਯਸਹਾਯੋ. ਤੇ ਉਭੋਪਿ ਅਪੁਤ੍ਤਕਾ ਅਹੇਸੁਂ. ਤੇ ਏਕਦਿਵਸਂ ਸੁਖਸਯਨੇ ਨਿਸਿਨ੍ਨਾ ਮਨ੍ਤਯਿਂਸੁ ‘‘ਅਮ੍ਹਾਕਂ ਇਸ੍ਸਰਿਯਂ ਮਹਨ੍ਤਂ, ਪੁਤ੍ਤੋ ਵਾ ਧੀਤਾ ਵਾ ਨਤ੍ਥਿ, ਕਿਂ ਨੁ ਖੋ ਕਤ੍ਤਬ੍ਬ’’ਨ੍ਤਿ. ਤਤੋ ਰਾਜਾ ਪੁਰੋਹਿਤਂ ਆਹ – ‘‘ਸਮ੍ਮ, ਸਚੇ ਤਵ ਗੇਹੇ ਪੁਤ੍ਤੋ ਜਾਯਿਸ੍ਸਤਿ, ਮਮ ਰਜ੍ਜਸ੍ਸ ਸਾਮਿਕੋ ਭਵਿਸ੍ਸਤਿ, ਸਚੇ ਮਮ ਪੁਤ੍ਤੋ ਜਾਯਿਸ੍ਸਤਿ, ਤਵ ਗੇਹੇ ਭੋਗਾਨਂ ਸਾਮਿਕੋ ਭਵਿਸ੍ਸਤੀ’’ਤਿ. ਏਵਂ ਉਭੋਪਿ ਅਞ੍ਞਮਞ੍ਞਂ ਸਙ੍ਕਰਿਂਸੁ.

ਅਥੇਕਦਿਵਸਂ ਪੁਰੋਹਿਤੋ ਭੋਗਗਾਮਂ ਗਨ੍ਤ੍ਵਾ ਆਗਮਨਕਾਲੇ ਦਕ੍ਖਿਣਦ੍ਵਾਰੇਨ ਨਗਰਂ ਪਵਿਸਨ੍ਤੋ ਬਹਿਨਗਰੇ ਏਕਂ ਬਹੁਪੁਤ੍ਤਿਕਂ ਨਾਮ ਦੁਗ੍ਗਤਿਤ੍ਥਿਂ ਪਸ੍ਸਿ. ਤਸ੍ਸਾ ਸਤ੍ਤ ਪੁਤ੍ਤਾ ਸਬ੍ਬੇਵ ਅਰੋਗਾ, ਏਕੋ ਪਚਨਭਾਜਨਕਪਲ੍ਲਂ ਗਣ੍ਹਿ, ਏਕੋ ਸਯਨਕਟਸਾਰਕਂ, ਏਕੋ ਪੁਰਤੋ ਗਚ੍ਛਤਿ, ਏਕੋ ਪਚ੍ਛਤੋ, ਏਕੋ ਅਙ੍ਗੁਲਿਂ ਗਣ੍ਹਿ, ਏਕੋ ਅਙ੍ਕੇ ਨਿਸਿਨ੍ਨੋ, ਏਕੋ ਖਨ੍ਧੇ. ਅਥ ਨਂ ਪੁਰੋਹਿਤੋ ਪੁਚ੍ਛਿ ‘‘ਭਦ੍ਦੇ, ਇਮੇਸਂ ਦਾਰਕਾਨਂ ਪਿਤਾ ਕੁਹਿ’’ਨ੍ਤਿ? ‘‘ਸਾਮਿ, ਇਮੇਸਂ ਪਿਤਾ ਨਾਮ ਨਿਬਦ੍ਧੋ ਨਤ੍ਥੀ’’ਤਿ. ‘‘ਏਵਰੂਪੇ ਸਤ੍ਤ ਪੁਤ੍ਤੇ ਕਿਨ੍ਤਿ ਕਤ੍ਵਾ ਅਲਤ੍ਥਾ’’ਤਿ? ਸਾ ਅਞ੍ਞਂ ਗਹਣਂ ਅਪਸ੍ਸਨ੍ਤੀ ਨਗਰਦ੍ਵਾਰੇ ਠਿਤਂ ਨਿਗ੍ਰੋਧਰੁਕ੍ਖਂ ਦਸ੍ਸੇਤ੍ਵਾ ‘‘ਸਾਮਿ ਏਤਸ੍ਮਿਂ ਨਿਗ੍ਰੋਧੇ ਅਧਿਵਤ੍ਥਾਯ ਦੇਵਤਾਯ ਸਨ੍ਤਿਕੇ ਪਤ੍ਥੇਤ੍ਵਾ ਲਭਿਂ, ਏਤਾਯ ਮੇ ਪੁਤ੍ਤਾ ਦਿਨ੍ਨਾ’’ਤਿ ਆਹ. ਪੁਰੋਹਿਤੋ ‘‘ਤੇਨ ਹਿ ਗਚ੍ਛ ਤ੍ਵ’’ਨ੍ਤਿ ਰਥਾ ਓਰੁਯ੍ਹ ਨਿਗ੍ਰੋਧਮੂਲਂ ਗਨ੍ਤ੍ਵਾ ਸਾਖਾਯ ਗਹੇਤ੍ਵਾ ਚਾਲੇਤ੍ਵਾ ‘‘ਅਮ੍ਭੋ ਦੇਵਤੇ, ਤ੍ਵਂ ਰਞ੍ਞੋ ਸਨ੍ਤਿਕਾ ਕਿਂ ਨਾਮ ਨ ਲਭਸਿ, ਰਾਜਾ ਤੇ ਅਨੁਸਂਵਚ੍ਛਰਂ ਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਬਲਿਕਮ੍ਮਂ ਕਰੋਤਿ, ਤਸ੍ਸ ਪੁਤ੍ਤਂ ਨ ਦੇਸਿ, ਏਤਾਯ ਦੁਗ੍ਗਤਿਤ੍ਥਿਯਾ ਤਵ ਕੋ ਉਪਕਾਰੋ ਕਤੋ, ਯੇਨਸ੍ਸਾ ਸਤ੍ਤ ਪੁਤ੍ਤੇ ਅਦਾਸਿ. ਸਚੇ ਅਮ੍ਹਾਕਂ ਰਞ੍ਞੋ ਪੁਤ੍ਤਂ ਨ ਦੇਸਿ, ਇਤੋ ਤਂ ਸਤ੍ਤਮੇ ਦਿਵਸੇ ਸਮੂਲਂ ਛਿਨ੍ਦਾਪੇਤ੍ਵਾ ਖਣ੍ਡਾਖਣ੍ਡਿਕਂ ਕਾਰੇਸ੍ਸਾਮੀ’’ਤਿ ਰੁਕ੍ਖਦੇਵਤਂ ਤਜ੍ਜੇਤ੍ਵਾ ਪਕ੍ਕਾਮਿ. ਸੋ ਏਤੇਨ ਨਿਯਾਮੇਨੇਵ ਪੁਨਦਿਵਸੇਪੀਤਿ ਪਟਿਪਾਟਿਯਾ ਛ ਦਿਵਸੇ ਕਥੇਸਿ. ਛਟ੍ਠੇ ਪਨ ਦਿਵਸੇ ਸਾਖਾਯ ਗਹੇਤ੍ਵਾ ‘‘ਰੁਕ੍ਖਦੇਵਤੇ ਅਜ੍ਜੇਕਰਤ੍ਤਿਮਤ੍ਤਕਮੇਵ ਸੇਸਂ, ਸਚੇ ਮੇ ਰਞ੍ਞੋ ਪੁਤ੍ਤਂ ਨ ਦੇਸਿ, ਸ੍ਵੇ ਤਂ ਨਿਟ੍ਠਾਪੇਸ੍ਸਾਮੀ’’ਤਿ ਆਹ.

ਰੁਕ੍ਖਦੇਵਤਾ ਆਵਜ੍ਜੇਤ੍ਵਾ ਤਂ ਕਾਰਣਂ ਤਥਤੋ ਞਤ੍ਵਾ ‘‘ਅਯਂ ਬ੍ਰਾਹ੍ਮਣੋ ਪੁਤ੍ਤਂ ਅਲਭਨ੍ਤੋ ਮਮ ਵਿਮਾਨਂ ਨਾਸੇਸ੍ਸਤਿ, ਕੇਨ ਨੁ ਖੋ ਉਪਾਯੇਨ ਤਸ੍ਸ ਪੁਤ੍ਤਂ ਦਾਤੁਂ ਵਟ੍ਟਤੀ’’ਤਿ ਚਤੁਨ੍ਨਂ ਮਹਾਰਾਜਾਨਂ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸਿ. ਤੇ ‘‘ਮਯਂ ਤਸ੍ਸ ਪੁਤ੍ਤਂ ਦਾਤੁਂ ਨ ਸਕ੍ਖਿਸ੍ਸਾਮਾ’’ਤਿ ਵਦਿਂਸੁ. ਅਟ੍ਠਵੀਸਤਿਯਕ੍ਖਸੇਨਾਪਤੀਨਂ ਸਨ੍ਤਿਕਂ ਅਗਮਾਸਿ, ਤੇਪਿ ਤਥੇਵਾਹਂਸੁ. ਸਕ੍ਕਸ੍ਸ ਦੇਵਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਕਥੇਸਿ. ਸੋਪਿ ‘‘ਲਭਿਸ੍ਸਤਿ ਨੁ ਖੋ ਰਾਜਾ ਅਨੁਚ੍ਛਵਿਕੇ ਪੁਤ੍ਤੇ, ਉਦਾਹੁ ਨੋ’’ਤਿ ਉਪਧਾਰੇਨ੍ਤੋ ਪੁਞ੍ਞਵਨ੍ਤੇ ਚਤ੍ਤਾਰੋ ਦੇਵਪੁਤ੍ਤੇ ਪਸ੍ਸਿ. ਤੇ ਕਿਰ ਪੁਰਿਮਭਵੇ ਬਾਰਾਣਸਿਯਂ ਪੇਸਕਾਰਾ ਹੁਤ੍ਵਾ ਤੇਨ ਕਮ੍ਮੇਨ ਲਦ੍ਧਕਂ ਪਞ੍ਚਕੋਟ੍ਠਾਸਂ ਕਤ੍ਵਾ ਚਤ੍ਤਾਰੋ ਕੋਟ੍ਠਾਸੇ ਪਰਿਭੁਞ੍ਜਿਂਸੁ. ਪਞ੍ਚਮਂ ਗਹੇਤ੍ਵਾ ਏਕਤੋਵ ਦਾਨਂ ਅਦਂਸੁ. ਤੇ ਤਤੋ ਚੁਤਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿਂਸੁ, ਤਤੋ ਯਾਮਭਵਨੇਤਿ ਏਵਂ ਅਨੁਲੋਮਪਟਿਲੋਮਂ ਛਸੁ ਦੇਵਲੋਕੇਸੁ ਸਮ੍ਪਤ੍ਤਿਂ ਅਨੁਭਵਨ੍ਤਾ ਵਿਚਰਨ੍ਤਿ. ਤਦਾ ਪਨ ਨੇਸਂ ਤਾਵਤਿਂਸਭਵਨਤੋ ਚਵਿਤ੍ਵਾ ਯਾਮਭਵਨਂ ਗਮਨਵਾਰੋ ਹੋਤਿ. ਸਕ੍ਕੋ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਪਕ੍ਕੋਸਿਤ੍ਵਾ ‘‘ਮਾਰਿਸਾ, ਤੁਮ੍ਹੇਹਿ ਮਨੁਸ੍ਸਲੋਕਂ ਗਨ੍ਤੁਂ ਵਟ੍ਟਤਿ, ਏਸੁਕਾਰੀਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਥਾ’’ਤਿ ਆਹ. ਤੇ ਤਸ੍ਸ ਵਚਨਂ ਸੁਤ੍ਵਾ ‘‘ਸਾਧੁ ਦੇਵ, ਗਮਿਸ੍ਸਾਮ, ਨ ਪਨਮ੍ਹਾਕਂ ਰਾਜਕੁਲੇਨਤ੍ਥੋ, ਪੁਰੋਹਿਤਸ੍ਸ ਗੇਹੇ ਨਿਬ੍ਬਤ੍ਤਿਤ੍ਵਾ ਦਹਰਕਾਲੇਯੇਵ ਕਾਮੇ ਪਹਾਯ ਪਬ੍ਬਜਿਸ੍ਸਾਮਾ’’ਤਿ ਵਦਿਂਸੁ. ਸਕ੍ਕੋ ‘‘ਸਾਧੂ’’ਤਿ ਤੇਸਂ ਪਟਿਞ੍ਞਂ ਗਹੇਤ੍ਵਾ ਆਗਨ੍ਤ੍ਵਾ ਰੁਕ੍ਖਦੇਵਤਾਯ ਤਮਤ੍ਥਂ ਆਰੋਚੇਸਿ. ਸਾ ਤੁਟ੍ਠਮਾਨਸਾ ਸਕ੍ਕਂ ਵਨ੍ਦਿਤ੍ਵਾ ਅਤ੍ਤਨੋ ਵਿਮਾਨਮੇਵ ਗਤਾ.

ਪੁਰੋਹਿਤੋਪਿ ਪੁਨਦਿਵਸੇ ਬਲਵਪੁਰਿਸੇ ਸਨ੍ਨਿਪਾਤਾਪੇਤ੍ਵਾ ਵਾਸਿਫਰਸੁਆਦੀਨਿ ਗਾਹਾਪੇਤ੍ਵਾ ਰੁਕ੍ਖਮੂਲਂ ਗਨ੍ਤ੍ਵਾ ਰੁਕ੍ਖਸਾਖਾਯ ਗਹੇਤ੍ਵਾ ‘‘ਅਮ੍ਭੋ ਦੇਵਤੇ, ਅਜ੍ਜ ਮਯ੍ਹਂ ਤਂ ਯਾਚਨ੍ਤਸ੍ਸ ਸਤ੍ਤਮੋ ਦਿਵਸੋ, ਇਦਾਨਿ ਤੇ ਨਿਟ੍ਠਾਨਕਾਲੋ’’ਤਿ ਆਹ. ਤਤੋ ਰੁਕ੍ਖਦੇਵਤਾ ਮਹਨ੍ਤੇਨਾਨੁਭਾਵੇਨ ਖਨ੍ਧਵਿਵਰਤੋ ਨਿਕ੍ਖਮਿਤ੍ਵਾ ਮਧੁਰਸਰੇਨ ਤਂ ਆਮਨ੍ਤੇਤ੍ਵਾ ‘ਬ੍ਰਾਹ੍ਮਣ, ਤਿਟ੍ਠਤੁ ਏਕੋ ਪੁਤ੍ਤੋ, ਚਤ੍ਤਾਰੋ ਤੇ ਪੁਤ੍ਤੇ ਦਸ੍ਸਾਮੀ’’ਤਿ ਆਹ. ‘‘ਮਮ ਪੁਤ੍ਤੇਨਤ੍ਥੋ ਨਤ੍ਥਿ, ਅਮ੍ਹਾਕਂ ਰਞ੍ਞੋ ਪੁਤ੍ਤਂ ਦੇਹੀ’’ਤਿ. ‘‘ਤੁਯ੍ਹਂਯੇਵ ਦੇਮੀ’’ਤਿ. ‘‘ਤੇਨ ਹਿ ਮਮ ਦ੍ਵੇ, ਰਞ੍ਞੋ ਦ੍ਵੇ ਦੇਹੀ’’ਤਿ. ‘‘ਰਞ੍ਞੋ ਨ ਦੇਮਿ, ਚਤ੍ਤਾਰੋਪਿ ਤੁਯ੍ਹਮੇਵ ਦਮ੍ਮਿ, ਤਯਾ ਚ ਲਦ੍ਧਮਤ੍ਤਾਵ ਭਵਿਸ੍ਸਨ੍ਤਿ, ਅਗਾਰੇ ਪਨ ਅਟ੍ਠਤ੍ਵਾ ਦਹਰਕਾਲੇਯੇਵ ਪਬ੍ਬਜਿਸ੍ਸਨ੍ਤੀ’’ਤਿ. ‘‘ਤ੍ਵਂ ਮੇ ਕੇਵਲਂ ਪੁਤ੍ਤੇ ਦੇਹਿ, ਅਪਬ੍ਬਜਨਕਾਰਣਂ ਪਨ ਅਮ੍ਹਾਕਂ ਭਾਰੋ’’ਤਿ. ਸਾ ਤਸ੍ਸ ਪੁਤ੍ਤਵਰਂ ਦਤ੍ਵਾ ਅਤ੍ਤਨੋ ਭਵਨਂ ਪਾਵਿਸਿ. ਤਤੋ ਪਟ੍ਠਾਯ ਦੇਵਤਾਯ ਸਕ੍ਕਾਰੋ ਮਹਾ ਅਹੋਸਿ.

ਜੇਟ੍ਠਕਦੇਵਪੁਤ੍ਤੋ ਚਵਿਤ੍ਵਾ ਪੁਰੋਹਿਤਸ੍ਸ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਤਸ੍ਸ ਨਾਮਗ੍ਗਹਣਦਿਵਸੇ ‘‘ਹਤ੍ਥਿਪਾਲੋ’’ਤਿ ਨਾਮਂ ਕਤ੍ਵਾ ਅਪਬ੍ਬਜਨਤ੍ਥਾਯ ਹਤ੍ਥਿਗੋਪਕੇ ਪਟਿਚ੍ਛਾਪੇਸੁਂ. ਸੋ ਤੇਸਂ ਸਨ੍ਤਿਕੇ ਵਡ੍ਢਤਿ. ਤਸ੍ਸ ਪਦਸਾ ਗਮਨਕਾਲੇ ਦੁਤਿਯੋ ਚਵਿਤ੍ਵਾ ਅਸ੍ਸਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ਤਸ੍ਸਪਿ ਜਾਤਕਾਲੇ ‘‘ਅਸ੍ਸਪਾਲੋ’’ਤਿ ਨਾਮਂ ਕਰਿਂਸੁ. ਸੋ ਅਸ੍ਸਗੋਪਕਾਨਂ ਸਨ੍ਤਿਕੇ ਵਡ੍ਢਤਿ. ਤਤਿਯਸ੍ਸ ਜਾਤਕਾਲੇ ‘‘ਗੋਪਾਲੋ’’ਤਿ ਨਾਮਂ ਕਰਿਂਸੁ. ਸੋ ਗੋਪਾਲੇਹਿ ਸਦ੍ਧਿਂ ਵਡ੍ਢਤਿ. ਚਤੁਤ੍ਥਸ੍ਸ ਜਾਤਕਾਲੇ ‘‘ਅਜਪਾਲੋ’’ਤਿ ਨਾਮਂ ਕਰਿਂਸੁ. ਸੋ ਅਜਪਾਲੇਹਿ ਸਦ੍ਧਿਂ ਵਡ੍ਢਤਿ. ਤੇ ਵੁਡ੍ਢਿਮਨ੍ਵਾਯ ਸੋਭਗ੍ਗਪ੍ਪਤ੍ਤਾ ਅਹੇਸੁਂ.

ਅਥ ਨੇਸਂ ਪਬ੍ਬਜਿਤਭਯੇਨ ਰਞ੍ਞੋ ਵਿਜਿਤਾ ਪਬ੍ਬਜਿਤੇ ਨੀਹਰਿਂਸੁ. ਸਕਲਕਾਸਿਰਟ੍ਠੇ ਏਕਪਬ੍ਬਜਿਤੋਪਿ ਨਾਹੋਸਿ. ਤੇ ਕੁਮਾਰਾ ਅਤਿਫਰੁਸਾ ਅਹੇਸੁਂ, ਯਾਯ ਦਿਸਾਯ ਗਚ੍ਛਨ੍ਤਿ, ਤਾਯ ਆਹਰਿਯਮਾਨਂ ਪਣ੍ਣਾਕਾਰਂ ਵਿਲੁਮ੍ਪਨ੍ਤਿ. ਹਤ੍ਥਿਪਾਲਸ੍ਸ ਸੋਲ਼ਸਵਸ੍ਸਕਾਲੇ ਕਾਯਸਮ੍ਪਤ੍ਤਿਂ ਦਿਸ੍ਵਾ ਰਾਜਾ ਚ ਪੁਰੋਹਿਤੋ ਚ ‘‘ਕੁਮਾਰਾ ਮਹਲ੍ਲਕਾ ਜਾਤਾ, ਛਤ੍ਤੁਸ੍ਸਾਪਨਸਮਯੋ, ਤੇਸਂ ਕਿਂ ਨੁ ਖੋ ਕਾਤਬ੍ਬ’’ਨ੍ਤਿ ਮਨ੍ਤੇਤ੍ਵਾ ‘‘ਏਤੇ ਅਭਿਸਿਤ੍ਤਕਾਲਤੋ ਪਟ੍ਠਾਯ ਅਤਿਸ੍ਸਰਾ ਭਵਿਸ੍ਸਨ੍ਤਿ, ਤਤੋ ਤਤੋ ਪਬ੍ਬਜਿਤਾ ਆਗਮਿਸ੍ਸਨ੍ਤਿ, ਤੇ ਦਿਸ੍ਵਾ ਪਬ੍ਬਜਿਸ੍ਸਨ੍ਤਿ, ਏਤੇਸਂ ਪਬ੍ਬਜਿਤਕਾਲੇ ਜਨਪਦੋ ਉਲ੍ਲੋਲ਼ੋ ਭਵਿਸ੍ਸਤਿ, ਵੀਮਂਸਿਸ੍ਸਾਮ ਤਾਵ ਨੇ, ਪਚ੍ਛਾ ਅਭਿਸਿਞ੍ਚਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਉਭੋਪਿ ਇਸਿਵੇਸਂ ਗਹੇਤ੍ਵਾ ਭਿਕ੍ਖਂ ਚਰਨ੍ਤਾ ਹਤ੍ਥਿਪਾਲਸ੍ਸ ਕੁਮਾਰਸ੍ਸ ਨਿਵੇਸਨਦ੍ਵਾਰਂ ਅਗਮਂਸੁ. ਕੁਮਾਰੋ ਤੇ ਦਿਸ੍ਵਾਵ ਤੁਟ੍ਠੋ ਪਸਨ੍ਨੋ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਤਿਸ੍ਸੋ ਗਾਥਾ ਅਭਾਸਿ –

੩੩੭.

‘‘ਚਿਰਸ੍ਸਂ ਵਤ ਪਸ੍ਸਾਮ, ਬ੍ਰਾਹ੍ਮਣਂ ਦੇਵਵਣ੍ਣਿਨਂ;

ਮਹਾਜਟਂ ਖਾਰਿਧਰਂ, ਪਙ੍ਕਦਨ੍ਤਂ ਰਜਸ੍ਸਿਰਂ.

੩੩੮.

‘‘ਚਿਰਸ੍ਸਂ ਵਤ ਪਸ੍ਸਾਮ, ਇਸਿਂ ਧਮ੍ਮਗੁਣੇ ਰਤਂ;

ਕਾਸਾਯਵਤ੍ਥਵਸਨਂ, ਵਾਕਚੀਰਂ ਪਟਿਚ੍ਛਦਂ.

੩੩੯.

‘‘ਆਸਨਂ ਉਦਕਂ ਪਜ੍ਜਂ, ਪਟਿਗਣ੍ਹਾਤੁ ਨੋ ਭਵਂ;

ਅਗ੍ਘੇ ਭਵਨ੍ਤਂ ਪੁਚ੍ਛਾਮ, ਅਗ੍ਘਂ ਕੁਰੁਤੁ ਨੋ ਭਵ’’ਨ੍ਤਿ.

ਤਤ੍ਥ ਬ੍ਰਾਹ੍ਮਣਨ੍ਤਿ ਬਾਹਿਤਪਾਪਬ੍ਰਾਹ੍ਮਣਂ. ਦੇਵਵਣ੍ਣਿਨਨ੍ਤਿ ਸੇਟ੍ਠਵਣ੍ਣਿਨਂ ਘੋਰਤਪਂ ਪਰਮਤਿਕ੍ਖਿਨ੍ਦ੍ਰਿਯਂ ਪਬ੍ਬਜਿਤਭਾਵਂ ਉਪਗਤਨ੍ਤਿ ਅਤ੍ਥੋ. ਖਾਰਿਧਰਨ੍ਤਿ ਖਾਰਿਭਾਰਧਰਂ. ਇਸਿਨ੍ਤਿ ਸੀਲਕ੍ਖਨ੍ਧਾਦਯੋ ਪਰਿਯੇਸਿਤ੍ਵਾ ਠਿਤਂ. ਧਮ੍ਮਗੁਣੇ ਰਤਨ੍ਤਿ ਸੁਚਰਿਤਕੋਟ੍ਠਾਸੇ ਅਭਿਰਤਂ. ‘‘ਆਸਨ’’ਨ੍ਤਿ ਇਦਂ ਤੇਸਂ ਨਿਸੀਦਨਤ੍ਥਾਯ ਆਸਨਂ ਪਞ੍ਞਪੇਤ੍ਵਾ ਗਨ੍ਧੋਦਕਞ੍ਚ ਪਾਦਬ੍ਭਞ੍ਜਨਞ੍ਚ ਉਪਨੇਤ੍ਵਾ ਆਹ. ਅਗ੍ਘੇਤਿ ਇਮੇ ਸਬ੍ਬੇਪਿ ਆਸਨਾਦਯੋ ਅਗ੍ਘੇ ਭਵਨ੍ਤਂ ਪੁਚ੍ਛਾਮ. ਕੁਰੁਤੁ ਨੋਤਿ ਇਮੇ ਨੋ ਅਗ੍ਘੇ ਭਵਂ ਪਟਿਗ੍ਗਣ੍ਹਤੂਤਿ.

ਏਵਂ ਸੋ ਤੇਸੁ ਏਕੇਕਂ ਵਾਰੇਨਾਹ. ਅਥ ਨਂ ਪੁਰੋਹਿਤੋ ਆਹ – ‘‘ਤਾਤ ਹਤ੍ਥਿਪਾਲ ਤ੍ਵਂ ਅਮ੍ਹੇ ‘ਕੇ ਇਮੇ’ਤਿ ਮਞ੍ਞਮਾਨੋ ਏਵਂ ਕਥੇਸੀ’’ਤਿ. ‘‘ਹੇਮਵਨ੍ਤਕਾ ਇਸਯੋ’’ਤਿ. ‘‘ਨ ਮਯਂ, ਤਾਤ, ਇਸਯੋ, ਏਸ ਰਾਜਾ ਏਸੁਕਾਰੀ, ਅਹਂ ਤੇ ਪਿਤਾ ਪਰੋਹਿਤੋ’’ਤਿ. ‘‘ਅਥ ਕਸ੍ਮਾ ਇਸਿਵੇਸਂ ਗਣ੍ਹਿਤ੍ਥਾ’’ਤਿ? ‘‘ਤਵ ਵੀਮਂਸਨਤ੍ਥਾਯਾ’’ਤਿ. ‘‘ਮਮ ਕਿਂ ਵੀਮਂਸਥਾ’’ਤਿ? ‘‘ਸਚੇ ਅਮ੍ਹੇ ਦਿਸ੍ਵਾ ਨ ਪਬ੍ਬਜਿਸ੍ਸਸਿ, ਅਥ ਤਂ ਰਜ੍ਜੇ ਅਭਿਸਿਞ੍ਚਿਤੁਂ ਆਗਤਾਮ੍ਹਾ’’ਤਿ. ‘‘ਤਾਤ ਨ ਮੇ ਰਜ੍ਜੇਨਤ੍ਥੋ, ਪਬ੍ਬਜਿਸ੍ਸਾਮਹਨ੍ਤਿ. ਅਥ ਨਂ ਪਿਤਾ ‘‘ਤਾਤ ਹਤ੍ਥਿਪਾਲ, ਨਾਯਂ ਕਾਲੋ ਪਬ੍ਬਜ੍ਜਾਯਾ’’ਤਿ ਵਤ੍ਵਾ ਯਥਾਜ੍ਝਾਸਯਂ ਅਨੁਸਾਸਨ੍ਤੋ ਚਤੁਤ੍ਥਗਾਥਮਾਹ –

੩੪੦.

‘‘ਅਧਿਚ੍ਚ ਵੇਦੇ ਪਰਿਯੇਸ ਵਿਤ੍ਤਂ, ਪੁਤ੍ਤੇ ਗੇਹੇ ਤਾਤ ਪਤਿਟ੍ਠਪੇਤ੍ਵਾ;

ਗਨ੍ਧੇ ਰਸੇ ਪਚ੍ਚਨੁਭੁਯ੍ਯ ਸਬ੍ਬਂ, ਅਰਞ੍ਞਂ ਸਾਧੁ ਮੁਨਿ ਸੋ ਪਸਤ੍ਥੋ’’ਤਿ.

ਤਤ੍ਥ ਅਧਿਚ੍ਚਾਤਿ ਸਜ੍ਝਾਯਿਤ੍ਵਾ. ਪੁਤ੍ਤੇਤਿ ਛਤ੍ਤਂ ਉਸ੍ਸਾਪੇਤ੍ਵਾ ਨਾਟਕੇ ਵਾਰੇਨ ਉਪਟ੍ਠਾਪੇਤ੍ਵਾ ਪੁਤ੍ਤਧੀਤਾਹਿ ਵਡ੍ਢਿਤ੍ਵਾ ਤੇ ਪੁਤ੍ਤੇ ਗੇਹੇ ਪਤਿਟ੍ਠਾਪੇਤ੍ਵਾਤਿ ਅਤ੍ਥੋ. ਸਬ੍ਬਨ੍ਤਿ ਏਤੇ ਚ ਗਨ੍ਧਰਸੇ ਸੇਸਞ੍ਚ ਸਬ੍ਬਂ ਵਤ੍ਥੁਕਾਮਂ ਅਨੁਭਵਿਤ੍ਵਾ. ਅਰਞ੍ਞਂ ਸਾਧੁ ਮੁਨਿ ਸੋ ਪਸਤ੍ਥੋਤਿ ਪਚ੍ਛਾ ਮਹਲ੍ਲਕਕਾਲੇ ਪਬ੍ਬਜਿਤਸ੍ਸ ਅਰਞ੍ਞਂ ਸਾਧੁ ਲਦ੍ਧਕਂ ਹੋਤਿ. ਯੋ ਏਵਰੂਪੇ ਕਾਲੇ ਪਬ੍ਬਜਤਿ, ਸੋ ਮੁਨਿ ਬੁਦ੍ਧਾਦੀਹਿ ਅਰਿਯੇਹਿ ਪਸਤ੍ਥੋਤਿ ਵਦਤਿ.

ਤਤੋ ਹਤ੍ਥਿਪਾਲੋ ਗਾਥਮਾਹ –

੩੪੧.

‘‘ਵੇਦਾ ਨ ਸਚ੍ਚਾ ਨ ਚ ਵਿਤ੍ਤਲਾਭੋ, ਨ ਪੁਤ੍ਤਲਾਭੇਨ ਜਰਂ ਵਿਹਨ੍ਤਿ;

ਗਨ੍ਧੇ ਰਸੇ ਮੁਚ੍ਚਨਮਾਹੁ ਸਨ੍ਤੋ, ਸਕਮ੍ਮੁਨਾ ਹੋਤਿ ਫਲੂਪਪਤ੍ਤੀ’’ਤਿ.

ਤਤ੍ਥ ਨ ਸਚ੍ਚਾਤਿ ਯਂ ਸਗ੍ਗਞ੍ਚ ਮਗ੍ਗਞ੍ਚ ਵਦਨ੍ਤਿ, ਨ ਤਂ ਸਾਧੇਨ੍ਤਿ, ਤੁਚ੍ਛਾ ਨਿਸ੍ਸਾਰਾ ਨਿਪ੍ਫਲਾ. ਨ ਚ ਵਿਤ੍ਤਲਾਭੋਤਿ ਧਨਲਾਭੋਪਿ ਪਞ੍ਚਸਾਧਾਰਣਤ੍ਤਾ ਸਬ੍ਬੋ ਏਕਸਭਾਵੋ ਨ ਹੋਤਿ. ਜਰਨ੍ਤਿ ਤਾਤ, ਜਰਂ ਵਾ ਬ੍ਯਾਧਿਮਰਣਂ ਵਾ ਨ ਕੋਚਿ ਪੁਤ੍ਤਲਾਭੇਨ ਪਟਿਬਾਹਿਤੁਂ ਸਮਤ੍ਥੋ ਨਾਮ ਅਤ੍ਥਿ. ਦੁਕ੍ਖਮੂਲਾ ਹੇਤੇ ਉਪਧਯੋ. ਗਨ੍ਧੇ ਰਸੇਤਿ ਗਨ੍ਧੇ ਚ ਰਸੇ ਚ ਸੇਸੇਸੁ ਆਰਮ੍ਮਣੇਸੁ ਚ ਮੁਚ੍ਚਨਂ ਮੁਤ੍ਤਿਮੇਵ ਬੁਦ੍ਧਾਦਯੋ ਪਣ੍ਡਿਤਾ ਕਥੇਨ੍ਤਿ. ਸਕਮ੍ਮੁਨਾਤਿ ਅਤ੍ਤਨਾ ਕਤਕਮ੍ਮੇਨੇਵ ਸਤ੍ਤਾਨਂ ਫਲੂਪਪਤ੍ਤਿ ਫਲਨਿਪ੍ਫਤ੍ਤਿ ਹੋਤਿ. ਕਮ੍ਮਸ੍ਸਕਾ ਹਿ, ਤਾਤ, ਸਤ੍ਤਾਤਿ.

ਕੁਮਾਰਸ੍ਸ ਵਚਨਂ ਸੁਤ੍ਵਾ ਰਾਜਾ ਗਾਥਮਾਹ –

੩੪੨.

‘‘ਅਦ੍ਧਾ ਹਿ ਸਚ੍ਚਂ ਵਚਨਂ ਤਵੇਤਂ, ਸਕਮ੍ਮੁਨਾ ਹੋਤਿ ਫਲੂਪਪਤ੍ਤਿ;

ਜਿਣ੍ਣਾ ਚ ਮਾਤਾਪਿਤਰੋ ਤਵੀਮੇ, ਪਸ੍ਸੇਯ੍ਯੁਂ ਤਂ ਵਸ੍ਸਸਤਂ ਅਰੋਗ’’ਨ੍ਤਿ.

ਤਤ੍ਥ ਵਸ੍ਸਸਤਂ ਅਰੋਗਨ੍ਤਿ ਏਤੇ ਵਸ੍ਸਸਤਂ ਅਰੋਗਂ ਤਂ ਪਸ੍ਸੇਯ੍ਯੁਂ, ਤ੍ਵਮ੍ਪਿ ਵਸ੍ਸਸਤਂ ਜੀਵਨ੍ਤੋ ਮਾਤਾਪਿਤਰੋ ਪੋਸਸ੍ਸੂਤਿ ਵਦਤਿ.

ਤਂ ਸੁਤ੍ਵਾ ਕੁਮਾਰੋ ‘‘ਦੇਵ, ਤ੍ਵਂ ਕਿਂ ਨਾਮੇਤਂ ਵਦਸੀ’’ਤਿ ਵਤ੍ਵਾ ਦ੍ਵੇ ਗਾਥਾ ਅਭਾਸਿ –

੩੪੩.

‘‘ਯਸ੍ਸਸ੍ਸ ਸਕ੍ਖੀ ਮਰਣੇਨ ਰਾਜ, ਜਰਾਯ ਮੇਤ੍ਤੀ ਨਰਵੀਰਸੇਟ੍ਠ;

ਯੋ ਚਾਪਿ ਜਞ੍ਞਾ ਨ ਮਰਿਸ੍ਸਂ ਕਦਾਚਿ, ਪਸ੍ਸੇਯ੍ਯੁਂ ਤਂ ਵਸ੍ਸਸਤਂ ਅਰੋਗਂ.

੩੪੪.

‘‘ਯਥਾਪਿ ਨਾਵਂ ਪੁਰਿਸੋ ਦਕਮ੍ਹਿ, ਏਰੇਤਿ ਚੇ ਨਂ ਉਪਨੇਤਿ ਤੀਰਂ;

ਏਵਮ੍ਪਿ ਬ੍ਯਾਧੀ ਸਤਤਂ ਜਰਾ ਚ, ਉਪਨੇਤਿ ਮਚ੍ਚਂ ਵਸਮਨ੍ਤਕਸ੍ਸਾ’’ਤਿ.

ਤਤ੍ਥ ਸਕ੍ਖੀਤਿ ਮਿਤ੍ਤਧਮ੍ਮੋ. ਮਰਣੇਨਾਤਿ ਦਤ੍ਤੋ ਮਤੋ ਮਿਤ੍ਤੋ ਮਤੋਤਿ ਸਮ੍ਮੁਤਿਮਰਣੇਨ. ਜਰਾਯਾਤਿ ਪਾਕਟਜਰਾਯ ਵਾ ਸਦ੍ਧਿਂ ਯਸ੍ਸ ਮੇਤ੍ਤੀ ਭਵੇਯ੍ਯ, ਯਸ੍ਸੇਤਂ ਮਰਣਞ੍ਚ ਜਰਾ ਚ ਮਿਤ੍ਤਭਾਵੇਨ ਨਾਗਚ੍ਛੇਯ੍ਯਾਤਿ ਅਤ੍ਥੋ. ਏਰੇਤਿ ਚੇ ਨਨ੍ਤਿ ਮਹਾਰਾਜ, ਯਥਾ ਨਾਮ ਪੁਰਿਸੋ ਨਦੀਤਿਤ੍ਥੇ ਉਦਕਮ੍ਹਿ ਨਾਵਂ ਠਪੇਤ੍ਵਾ ਪਰਤੀਰਗਾਮਿਂ ਜਨਂ ਆਰੋਪੇਤ੍ਵਾ ਸਚੇ ਅਰਿਤ੍ਤੇਨ ਉਪ੍ਪੀਲ਼ੇਨ੍ਤੋ ਫਿਯੇਨ ਕਡ੍ਢਨ੍ਤੋ ਚਾਲੇਤਿ ਘਟ੍ਟੇਤਿ, ਅਥ ਨਂ ਪਰਤੀਰਂ ਨੇਤਿ. ਏਵਂ ਬ੍ਯਾਧਿ ਜਰਾ ਚ ਨਿਚ੍ਚਂ ਅਨ੍ਤਕਸ੍ਸ ਮਚ੍ਚੁਨੋ ਵਸਂ ਉਪਨੇਤਿਯੇਵਾਤਿ.

ਏਵਂ ਇਮੇਸਂ ਸਤ੍ਤਾਨਂ ਜੀਵਿਤਸਙ੍ਖਾਰਸ੍ਸ ਪਰਿਤ੍ਤਭਾਵਂ ਦਸ੍ਸੇਤ੍ਵਾ ‘‘ਮਹਾਰਾਜ, ਤੁਮ੍ਹੇ ਤਿਟ੍ਠਥ, ਤੁਮ੍ਹੇਹਿ ਸਦ੍ਧਿਂ ਕਥਯਨ੍ਤਮੇਵ ਮਂ ਬ੍ਯਾਧਿਜਰਾਮਰਣਾਨਿ ਉਪਗਚ੍ਛਨ੍ਤਿ, ਅਪ੍ਪਮਤ੍ਤਾ ਹੋਥਾ’’ਤਿ ਓਵਾਦਂ ਦਤ੍ਵਾ ਰਾਜਾਨਞ੍ਚ ਪਿਤਰਞ੍ਚ ਵਨ੍ਦਿਤ੍ਵਾ ਅਤ੍ਤਨੋ ਪਰਿਚਾਰਕੇ ਗਹੇਤ੍ਵਾ ਬਾਰਾਣਸਿਯਂ ਰਜ੍ਜਂ ਪਹਾਯ ‘‘ਪਬ੍ਬਜਿਸ੍ਸਾਮੀ’’ਤਿ ਨਗਰਤੋ ਨਿਕ੍ਖਮਿ. ‘‘ਪਬ੍ਬਜ੍ਜਾ ਨਾਮੇਸਾ ਸੋਭਨਾ ਭਵਿਸ੍ਸਤੀ’’ਤਿ ਹਤ੍ਥਿਪਾਲਕੁਮਾਰੇਨ ਸਦ੍ਧਿਂ ਮਹਾਜਨੋ ਨਿਕ੍ਖਮਿ. ਯੋਜਨਿਕਾ ਪਰਿਸਾ ਅਹੋਸਿ. ਸੋ ਤਾਯ ਪਰਿਸਾਯ ਸਦ੍ਧਿਂ ਗਙ੍ਗਾਯ ਤੀਰਂ ਪਤ੍ਵਾ ਗਙ੍ਗਾਯ ਉਦਕਂ ਓਲੋਕੇਤ੍ਵਾ ਕਸਿਣਪਰਿਕਮ੍ਮਂ ਕਤ੍ਵਾ ਝਾਨਾਨਿ ਨਿਬ੍ਬਤ੍ਤੇਤ੍ਵਾ ਚਿਨ੍ਤੇਸਿ ‘‘ਅਯਂ ਸਮਾਗਮੋ ਮਹਾ ਭਵਿਸ੍ਸਤਿ, ਮਮ ਤਯੋ ਕਨਿਟ੍ਠਭਾਤਰੋ ਮਾਤਾਪਿਤਰੋ ਰਾਜਾ ਦੇਵੀਤਿ ਸਬ੍ਬੇ ਸਪਰਿਸਾ ਪਬ੍ਬਜਿਸ੍ਸਨ੍ਤਿ, ਬਾਰਾਣਸੀ ਸੁਞ੍ਞਾ ਭਵਿਸ੍ਸਤਿ, ਯਾਵ ਏਤੇਸਂ ਆਗਮਨਾ ਇਧੇਵ ਭਵਿਸ੍ਸਾਮੀ’’ਤਿ. ਸੋ ਤਤ੍ਥੇਵ ਮਹਾਜਨਸ੍ਸ ਓਵਾਦਂ ਦੇਨ੍ਤੋ ਨਿਸੀਦਿ.

ਪੁਨਦਿਵਸੇ ਰਾਜਾ ਚ ਪੁਰੋਹਿਤੋ ਚ ਚਿਨ੍ਤਯਿਂਸੁ ‘‘ਹਤ੍ਥਿਪਾਲਕੁਮਾਰੋ ਤਾਵ ‘ਰਜ੍ਜਂ ਪਹਾਯ ਮਹਾਜਨਂ ਆਦਾਯ ਪਬ੍ਬਜਿਸ੍ਸਾਮੀ’ਤਿ ਗਨ੍ਤ੍ਵਾ ਗਙ੍ਗਾਤੀਰੇ ਨਿਸਿਨ੍ਨੋ, ਅਸ੍ਸਪਾਲਂ ਵੀਮਂਸਿਤ੍ਵਾ ਅਭਿਸਿਞ੍ਚਿਸ੍ਸਾਮਾ’’ਤਿ. ਤੇ ਇਸਿਵੇਸੇਨੇਵ ਤਸ੍ਸਪਿ ਗੇਹਦ੍ਵਾਰਂ ਅਗਮਂਸੁ. ਸੋਪਿ ਤੇ ਦਿਸ੍ਵਾ ਪਸਨ੍ਨਮਾਨਸੋ ਉਪਸਙ੍ਕਮਿਤ੍ਵਾ ‘‘ਚਿਰਸ੍ਸਂ ਵਤ ਪਸ੍ਸਾਮਾ’’ਤਿਆਦੀਨਿ ਵਦਨ੍ਤੋ ਤਥੇਵ ਪਟਿਪਜ੍ਜਿ. ਤੇਪਿ ਤਂ ਤਥੇਵ ਵਤ੍ਵਾ ਅਤ੍ਤਨੋ ਆਗਤਕਾਰਣਂ ਕਥਯਿਂਸੁ. ਸੋ ‘‘ਮਮ ਭਾਤਿਕੇ ਹਤ੍ਥਿਪਾਲਕੁਮਾਰੇ ਸਨ੍ਤੇ ਕਥਂ ਪਠਮਤਰਂ ਮਯ੍ਹਮੇਵ ਸੇਤਚ੍ਛਤ੍ਤਂ ਪਾਪੁਣਾਤੀ’’ਤਿ ਪੁਚ੍ਛਿਤ੍ਵਾ ‘‘ਤਾਤ, ਭਾਤਾ, ਤੇ ‘ਨ ਮਯ੍ਹਂ ਰਜ੍ਜੇਨਤ੍ਥੋ, ਪਬ੍ਬਜਿਸ੍ਸਾਮੀ’ਤਿ ਵਤ੍ਵਾ ਨਿਕ੍ਖਨ੍ਤੋ’’ਤਿ ਵੁਤ੍ਤੇ ‘‘ਕਹਂ ਪਨੇਸੋ ਇਦਾਨੀ’’ਤਿ ਵਤ੍ਵਾ ‘‘ਗਙ੍ਗਾਤੀਰੇ ਨਿਸਿਨ੍ਨੋ’’ਤਿ ਵੁਤ੍ਤੇ ‘‘ਤਾਤ, ਮਮ ਭਾਤਰਾ ਛਡ੍ਡਿਤਖੇਲ਼ੇਨ ਕਮ੍ਮਂ ਨਤ੍ਥਿ, ਬਾਲਾ ਹਿ ਪਰਿਤ੍ਤਕਪਞ੍ਞਾ ਸਤ੍ਤਾ ਏਤਂ ਕਿਲੇਸਂ ਜਹਿਤੁਂ ਨ ਸਕ੍ਕੋਨ੍ਤਿ, ਅਹਂ ਪਨ ਜਹਿਸ੍ਸਾਮੀ’’ਤਿ ਰਞ੍ਞੋ ਚ ਪਿਤੁ ਚ ਧਮ੍ਮਂ ਦੇਸੇਨ੍ਤੋ ਦ੍ਵੇ ਗਾਥਾ ਅਭਾਸਿ –

੩੪੫.

‘‘ਪਙ੍ਕੋ ਚ ਕਾਮਾ ਪਲਿਪੋ ਚ ਕਾਮਾ, ਮਨੋਹਰਾ ਦੁਤ੍ਤਰਾ ਮਚ੍ਚੁਧੇਯ੍ਯਾ;

ਏਤਸ੍ਮਿਂ ਪਙ੍ਕੇ ਪਲਿਪੇ ਬ੍ਯਸਨ੍ਨਾ, ਹੀਨਤ੍ਤਰੂਪਾ ਨ ਤਰਨ੍ਤਿ ਪਾਰਂ.

੩੪੬.

‘‘ਅਯਂ ਪੁਰੇ ਲੁਦ੍ਦਮਕਾਸਿ ਕਮ੍ਮਂ, ਸ੍ਵਾਯਂ ਗਹੀਤੋ ਨ ਹਿ ਮੋਕ੍ਖਿਤੋ ਮੇ;

ਓਰੁਨ੍ਧਿਯਾ ਨਂ ਪਰਿਰਕ੍ਖਿਸ੍ਸਾਮਿ, ਮਾਯਂ ਪੁਨ ਲੁਦ੍ਦਮਕਾਸਿ ਕਮ੍ਮ’’ਨ੍ਤਿ.

ਤਤ੍ਥ ਪਙ੍ਕੋਤਿ ਯੋ ਕੋਚਿ ਕਦ੍ਦਮੋ. ਪਲਿਪੋਤਿ ਸੁਖੁਮਵਾਲੁਕਮਿਸ੍ਸੋ ਸਣ੍ਹਕਦ੍ਦਮੋ. ਤਤ੍ਥ ਕਾਮਾ ਲਗ੍ਗਾਪਨਵਸੇਨ ਪਙ੍ਕੋ ਨਾਮ, ਓਸੀਦਾਪਨਵਸੇਨ ਪਲਿਪੋ ਨਾਮਾਤਿ ਵੁਤ੍ਤਾ. ਦੁਤ੍ਤਰਾਤਿ ਦੁਰਤਿਕ੍ਕਮਾ. ਮਚ੍ਚੁਧੇਯ੍ਯਾਤਿ ਮਚ੍ਚੁਨੋ ਅਧਿਟ੍ਠਾਨਾ. ਏਤੇਸੁ ਹਿ ਲਗ੍ਗਾ ਚੇਵ ਅਨੁਪਵਿਟ੍ਠਾ ਚ ਸਤ੍ਤਾ ਉਤ੍ਤਰਿਤੁਂ ਅਸਕ੍ਕੋਨ੍ਤਾ ਦੁਕ੍ਖਕ੍ਖਨ੍ਧਪਰਿਯਾਯੇ ਵੁਤ੍ਤਪ੍ਪਕਾਰਂ ਦੁਕ੍ਖਞ੍ਚੇਵ ਮਰਣਞ੍ਚ ਪਾਪੁਣਨ੍ਤਿ. ਤੇਨਾਹ – ‘‘ਏਤਸ੍ਮਿਂ ਪਙ੍ਕੇ ਪਲਿਪੇ ਬ੍ਯਸਨ੍ਨਾ ਹੀਨਤ੍ਤਰੂਪਾ ਨ ਤਰਨ੍ਤਿ ਪਾਰ’’ਨ੍ਤਿ. ਤਤ੍ਥ ਬ੍ਯਸਨ੍ਨਾਤਿ ਸਨ੍ਨਾ. ‘‘ਵਿਸਨ੍ਨਾ’’ਤਿਪਿ ਪਾਠੋ, ਅਯਮੇਵਤ੍ਥੋ. ਹੀਨਤ੍ਤਰੂਪਾਤਿ ਹੀਨਚਿਤ੍ਤਸਭਾਵਾ. ਨ ਤਰਨ੍ਤਿ ਪਾਰਨ੍ਤਿ ਨਿਬ੍ਬਾਨਪਾਰਂ ਗਨ੍ਤੁਂ ਨ ਸਕ੍ਕੋਨ੍ਤਿ.

ਅਯਨ੍ਤਿ ਮਹਾਰਾਜ, ਅਯਂ ਮਮਤ੍ਤਭਾਵੋ ਪੁਬ੍ਬੇ ਅਸ੍ਸਗੋਪਕੇਹਿ ਸਦ੍ਧਿਂ ਵਡ੍ਢਨ੍ਤੋ ਮਹਾਜਨਸ੍ਸ ਵਿਲੁਮ੍ਪਨਵਿਹੇਠਨਾਦਿਵਸੇਨ ਬਹੁਂ ਲੁਦ੍ਦਂ ਸਾਹਸਿਕਕਮ੍ਮਂ ਅਕਾਸਿ. ਸ੍ਵਾਯਂ ਗਹੀਤੋਤਿ ਸੋ ਅਯਂ ਤਸ੍ਸ ਕਮ੍ਮਸ੍ਸ ਵਿਪਾਕੋ ਮਯਾ ਗਹਿਤੋ. ਨ ਹਿ ਮੋਕ੍ਖਿਤੋ ਮੇਤਿ ਸਂਸਾਰਵਟ੍ਟੇ ਸਤਿ ਨ ਹਿ ਮੋਕ੍ਖੋ ਇਤੋ ਅਕੁਸਲਫਲਤੋ ਮਮ ਅਤ੍ਥਿ. ਓਰੁਨ੍ਧਿਯਾ ਨਂ ਪਰਿਰਕ੍ਖਿਸ੍ਸਾਮੀਤਿ ਇਦਾਨਿ ਨਂ ਕਾਯਵਚੀਮਨੋਦ੍ਵਾਰਾਨਿ ਪਿਦਹਨ੍ਤੋ ਓਰੁਨ੍ਧਿਤ੍ਵਾ ਪਰਿਰਕ੍ਖਿਸ੍ਸਾਮਿ. ਕਿਂਕਾਰਣਾ? ਮਾਯਂ ਪੁਨ ਲੁਦ੍ਦਮਕਾਸਿ ਕਮ੍ਮਂ. ਅਹਞ੍ਹਿ ਇਤੋ ਪਟ੍ਠਾਯ ਪਾਪਂ ਅਕਤ੍ਵਾ ਕਲ੍ਯਾਣਮੇਵ ਕਰਿਸ੍ਸਾਮਿ.

ਏਵਂ ਅਸ੍ਸਪਾਲਕੁਮਾਰੋ ਦ੍ਵੀਹਿ ਗਾਥਾਹਿ ਧਮ੍ਮਂ ਦੇਸੇਤ੍ਵਾ ‘‘ਤਿਟ੍ਠਥ ਤੁਮ੍ਹੇ, ਤੁਮ੍ਹੇਹਿ ਸਦ੍ਧਿਂ ਕਥੇਨ੍ਤਮੇਵ ਮਂ ਬ੍ਯਾਧਿਜਰਾਮਰਣਾਨਿ ਉਪਗਚ੍ਛਨ੍ਤੀ’’ਤਿ ਓਵਾਦਂ ਦਤ੍ਵਾ ਯੋਜਨਿਕਂ ਪਰਿਸਂ ਗਹੇਤ੍ਵਾ ਨਿਕ੍ਖਮਿਤ੍ਵਾ ਹਤ੍ਥਿਪਾਲਕੁਮਾਰਸ੍ਸੇਵ ਸਨ੍ਤਿਕਂ ਗਤੋ. ਸੋ ਤਸ੍ਸ ਆਕਾਸੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਤ੍ਵਾ ‘‘ਭਾਤਿਕ, ਅਯਂ ਸਮਾਗਮੋ ਮਹਾ ਭਵਿਸ੍ਸਤਿ, ਇਧੇਵ ਤਾਵ ਹੋਮਾ’’ਤਿ ਆਹ. ਇਤਰੋਪਿ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਪੁਨਦਿਵਸੇ ਰਾਜਾ ਚ ਪੁਰੋਹਿਤੋ ਚ ਤੇਨੇਵੁਪਾਯੇਨ ਗੋਪਾਲਕੁਮਾਰਸ੍ਸ ਨਿਵੇਸਨਂ ਗਨ੍ਤ੍ਵਾ ਤੇਨਪਿ ਤਥੇਵ ਪਟਿਨਨ੍ਦਿਤ੍ਵਾ ਅਤ੍ਤਨੋ ਆਗਮਨਕਾਰਣਂ ਆਚਿਕ੍ਖਿਂਸੁ. ਸੋਪਿ ਅਸ੍ਸਪਾਲਕੁਮਾਰੋ ਵਿਯ ਪਟਿਕ੍ਖਿਪਿਤ੍ਵਾ ‘‘ਅਹਂ ਚਿਰਤੋ ਪਟ੍ਠਾਯ ਪਬ੍ਬਜਿਤੁਕਾਮੋ ਵਨੇ ਨਟ੍ਠਗੋਣਂ ਵਿਯ ਪਬ੍ਬਜ੍ਜਂ ਉਪਧਾਰੇਨ੍ਤੋ ਵਿਚਰਾਮਿ, ਤੇਨ ਮੇ ਨਟ੍ਠਗੋਣਸ੍ਸ ਪਦਂ ਵਿਯ ਭਾਤਿਕਾਨਂ ਗਤਮਗ੍ਗੋ ਦਿਟ੍ਠੋ, ਸ੍ਵਾਹਂ ਤੇਨੇਵ ਮਗ੍ਗੇਨ ਗਮਿਸ੍ਸਾਮੀ’’ਤਿ ਵਤ੍ਵਾ ਗਾਥਮਾਹ –

੩੪੭.

‘‘ਗਵਂਵ ਨਟ੍ਠਂ ਪੁਰਿਸੋ ਯਥਾ ਵਨੇ, ਅਨ੍ਵੇਸਤੀ ਰਾਜ ਅਪਸ੍ਸਮਾਨੋ;

ਏਵਂ ਨਟ੍ਠੋ ਏਸੁਕਾਰੀ ਮਮਤ੍ਥੋ, ਸੋਹਂ ਕਥਂ ਨ ਗਵੇਸੇਯ੍ਯਂ ਰਾਜਾ’’ਤਿ.

ਤਤ੍ਥ ਏਸੁਕਾਰੀਤਿ ਰਾਜਾਨਂ ਆਲਪਤਿ. ਮਮਤ੍ਥੋਤਿ ਵਨੇ ਗੋਣੋ ਵਿਯ ਮਮ ਪਬ੍ਬਜ੍ਜਾਸਙ੍ਖਾਤੋ ਅਤ੍ਥੋ ਨਟ੍ਠੋ. ਸੋਹਨ੍ਤਿ ਸੋ ਅਹਂ ਅਜ੍ਜ ਪਬ੍ਬਜਿਤਾਨਂ ਮਗ੍ਗਂ ਦਿਸ੍ਵਾ ਕਥਂ ਪਬ੍ਬਜ੍ਜਂ ਨ ਗਵੇਸੇਯ੍ਯਂ, ਮਮ ਭਾਤਿਕਾਨਂ ਗਤਮਗ੍ਗਮੇਵ ਗਮਿਸ੍ਸਾਮਿ ਨਰਿਨ੍ਦਾਤਿ.

ਅਥ ਨਂ ‘‘ਤਾਤ ਗੋਪਾਲ, ਏਕਾਹਂ ਦ੍ਵੀਹਂ ਆਗਮੇਹਿ, ਅਮ੍ਹੇ ਸਮਸ੍ਸਾਸੇਤ੍ਵਾ ਪਚ੍ਛਾ ਪਬ੍ਬਜਿਸ੍ਸਸੀ’’ਤਿ ਵਦਿਂਸੁ. ਸੋ ‘‘ਮਹਾਰਾਜ, ਅਜ੍ਜ ਕਤ੍ਤਬ੍ਬਕਮ੍ਮਂ ‘ਸ੍ਵੇ ਕਰਿਸ੍ਸਾਮੀ’ਤਿ ਨ ਵਤ੍ਤਬ੍ਬਂ, ਕਲ੍ਯਾਣਕਮ੍ਮਂ ਨਾਮ ਅਜ੍ਜੇਵ ਕਤ੍ਤਬ੍ਬ’’ਨ੍ਤਿ ਵਤ੍ਵਾ ਇਤਰਂ ਗਾਥਮਾਹ –

੩੪੮.

‘‘ਹਿਯ੍ਯੋਤਿ ਹਿਯ੍ਯਤਿ ਪੋਸੋ, ਪਰੇਤਿ ਪਰਿਹਾਯਤਿ;

ਅਨਾਗਤਂ ਨੇਤਮਤ੍ਥੀਤਿ ਞਤ੍ਵਾ, ਉਪ੍ਪਨ੍ਨਛਨ੍ਦਂ ਕੋ ਪਨੁਦੇਯ੍ਯ ਧੀਰੋ’’ਤਿ.

ਤਤ੍ਥ ਹਿਯ੍ਯੋਤਿ ਸ੍ਵੇਤਿ ਅਤ੍ਥੋ. ਪਰੇਤਿ ਪੁਨਦਿਵਸੇ. ਇਦਂ ਵੁਤ੍ਤਂ ਹੋਤਿ – ‘‘ਯੋ ਮਹਾਰਾਜ, ਅਜ੍ਜ ਕਤ੍ਤਬ੍ਬਂ ਕਮ੍ਮਂ ‘ਸ੍ਵੇ’ਤਿ, ਸ੍ਵੇ ਕਤ੍ਤਬ੍ਬਂ ਕਮ੍ਮਂ ‘ਪਰੇ’ਤਿ ਵਤ੍ਵਾ ਨ ਕਰੋਤਿ, ਸੋ ਤਤੋ ਪਰਿਹਾਯਤਿ, ਨ ਤਂ ਕਮ੍ਮਂ ਕਾਤੁਂ ਸਕ੍ਕੋਤੀ’’ਤਿ. ਏਵਂ ਗੋਪਾਲੋ ਭਦ੍ਦੇਕਰਤ੍ਤਸੁਤ੍ਤਂ (ਮ. ਨਿ. ੩.੨੭੨ ਆਦਯੋ) ਨਾਮ ਕਥੇਸਿ. ਸ੍ਵਾਯਮਤ੍ਥੋ ਭਦ੍ਦੇਕਰਤ੍ਤਸੁਤ੍ਤੇਨ ਕਥੇਤਬ੍ਬੋ. ਅਨਾਗਤਂ ਨੇਤਮਤ੍ਥੀਤਿ ਯਂ ਅਨਾਗਤਂ, ਤਂ ‘‘ਨੇਤਂ ਅਤ੍ਥੀ’’ਤਿ ਞਤ੍ਵਾ ਉਪ੍ਪਨ੍ਨਂ ਕੁਸਲਚ੍ਛਨ੍ਦਂ ਕੋ ਪਣ੍ਡਿਤੋ ਪਨੁਦੇਯ੍ਯ ਹਰੇਯ੍ਯ.

ਏਵਂ ਗੋਪਾਲਕੁਮਾਰੋ ਦ੍ਵੀਹਿ ਗਾਥਾਹਿ ਧਮ੍ਮਂ ਦੇਸੇਤ੍ਵਾ ‘‘ਤਿਟ੍ਠਥ ਤੁਮ੍ਹੇ, ਤੁਮ੍ਹੇਹਿ ਸਦ੍ਧਿਂ ਕਥੇਨ੍ਤਮੇਵ ਮਂ ਬ੍ਯਾਧਿਜਰਾਮਰਣਾਨਿ ਉਪਗਚ੍ਛਨ੍ਤੀ’’ਤਿ ਯੋਜਨਿਕਂ ਪਰਿਸਂ ਗਹੇਤ੍ਵਾ ਨਿਕ੍ਖਮਿਤ੍ਵਾ ਦ੍ਵਿਨ੍ਨਂ ਭਾਤਿਕਾਨਂ ਸਨ੍ਤਿਕਂ ਗਤੋ. ਹਤ੍ਥਿਪਾਲੋ ਤਸ੍ਸਪਿ ਧਮ੍ਮਂ ਦੇਸੇਸਿ. ਪੁਨਦਿਵਸੇ ਰਾਜਾ ਚ ਪੁਰੋਹਿਤੋ ਚ ਤੇਨੇਵੁਪਾਯੇਨ ਅਜਪਾਲਕੁਮਾਰਸ੍ਸ ਨਿਵੇਸਨਂ ਗਨ੍ਤ੍ਵਾ ਤੇਨਪਿ ਤਥੇਵ ਪਟਿਨਨ੍ਦਿਤ੍ਵਾ ਅਤ੍ਤਨੋ ਆਗਮਨਕਾਰਣਂ ਆਚਿਕ੍ਖਿਤ੍ਵਾ ‘‘ਛਤ੍ਤਂ ਤੇ ਉਸ੍ਸਾਪੇਸ੍ਸਾਮਾ’’ਤਿ ਵਦਿਂਸੁ. ਕੁਮਾਰੋ ਆਹ – ‘‘ਮਯ੍ਹਂ ਭਾਤਿਕਾ ਕੁਹਿ’’ਨ੍ਤਿ? ਤੇ ‘‘ਅਮ੍ਹਾਕਂ ਰਜ੍ਜੇਨਤ੍ਥੋ ਨਤ੍ਥੀ’’ਤਿ ਸੇਤਚ੍ਛਤ੍ਤਂ ਪਹਾਯ ਤਿਯੋਜਨਿਕਂ ਪਰਿਸਂ ਗਹੇਤ੍ਵਾ ਨਿਕ੍ਖਮਿਤ੍ਵਾ ਗਙ੍ਗਾਤੀਰੇ ਨਿਸਿਨ੍ਨਾਤਿ. ਨਾਹਂ ਮਮ ਭਾਤਿਕੇਹਿ ਛਡ੍ਡਿਤਖੇਲ਼ਂ ਸੀਸੇਨਾਦਾਯ ਵਿਚਰਿਸ੍ਸਾਮਿ, ਅਹਮ੍ਪਿ ਪਬ੍ਬਜਿਸ੍ਸਾਮੀਤਿ. ਤਾਤ, ਤ੍ਵਂ ਤਾਵ ਦਹਰੋ, ਅਮ੍ਹਾਕਂ ਹਤ੍ਥਭਾਰੋ, ਵਯਪ੍ਪਤ੍ਤਕਾਲੇ ਪਬ੍ਬਜਿਸ੍ਸਸੀਤਿ. ਅਥ ਨੇ ਕੁਮਾਰੋ ‘‘ਕਿਂ ਤੁਮ੍ਹੇ ਕਥੇਥ, ਨਨੁ ਇਮੇ ਸਤ੍ਤਾ ਦਹਰਕਾਲੇਪਿ ਮਹਲ੍ਲਕਕਾਲੇਪਿ ਮਰਨ੍ਤਿਯੇਵ, ‘ਅਯਂ ਦਹਰਕਾਲੇ ਮਰਿਸ੍ਸਤਿ, ਅਯਂ ਮਹਲ੍ਲਕਕਾਲੇ’ਤਿ ਕਸ੍ਸਚਿ ਹਤ੍ਥੇ ਵਾ ਪਾਦੇ ਵਾ ਨਿਮਿਤ੍ਤਂ ਨਤ੍ਥਿ, ਅਹਂ ਮਮ ਮਰਣਕਾਲਂ ਨ ਜਾਨਾਮਿ, ਤਸ੍ਮਾ ਇਦਾਨੇਵ ਪਬ੍ਬਜਿਸ੍ਸਾਮੀ’’ਤਿ ਵਤ੍ਵਾ ਦ੍ਵੇ ਗਾਥਾ ਅਭਾਸਿ –

੩੪੯.

‘‘ਪਸ੍ਸਾਮਿ ਵੋਹਂ ਦਹਰਂ ਕੁਮਾਰਿਂ, ਮਤ੍ਤੂਪਮਂ ਕੇਤਕਪੁਪ੍ਫਨੇਤ੍ਤਂ;

ਅਭੁਤ੍ਤਭੋਗੇ ਪਠਮੇ ਵਯਸ੍ਮਿਂ, ਆਦਾਯ ਮਚ੍ਚੁ ਵਜਤੇ ਕੁਮਾਰਿਂ.

੩੫੦.

‘‘ਯੁਵਾ ਸੁਜਾਤੋ ਸੁਮੁਖੋ ਸੁਦਸ੍ਸਨੋ, ਸਾਮੋ ਕੁਸੁਮ੍ਭਪਰਿਕਿਣ੍ਣਮਸ੍ਸੁ;

ਹਿਤ੍ਵਾਨ ਕਾਮੇ ਪਟਿਕਚ੍ਚ ਗੇਹਂ, ਅਨੁਜਾਨ ਮਂ ਪਬ੍ਬਜਿਸ੍ਸਾਮਿ ਦੇਵਾ’’ਤਿ.

ਤਤ੍ਥ ਵੋਤਿ ਨਿਪਾਤਮਤ੍ਤਂ, ਪਸ੍ਸਾਮਿਚ੍ਚੇਵਾਤਿ ਅਤ੍ਥੋ. ਮਤ੍ਤੂਪਮਨ੍ਤਿ ਹਾਸਭਾਸਵਿਲਾਸੇਹਿ ਮਤ੍ਤਂ ਵਿਯ ਚਰਨ੍ਤਿਂ. ਕੇਤਕਪੁਪ੍ਫਨੇਤ੍ਤਨ੍ਤਿ ਕੇਤਕਪੁਪ੍ਫਪਤ੍ਤਂ ਵਿਯ ਪੁਥੁਲਾਯਤਨੇਤ੍ਤਂ. ਅਭੁਤ੍ਤਭੋਗੇਤਿ ਏਵਂ ਉਤ੍ਤਮਰੂਪਧਰਂ ਕੁਮਾਰਿਂ ਪਠਮਵਯੇ ਵਤ੍ਤਮਾਨਂ ਅਭੁਤ੍ਤਭੋਗਮੇਵ ਮਾਤਾਪਿਤੂਨਂ ਉਪਰਿ ਮਹਨ੍ਤਂ ਸੋਕਂ ਪਾਤੇਤ੍ਵਾ ਮਚ੍ਚੁ ਗਹੇਤ੍ਵਾਵ ਗਚ੍ਛਤਿ. ਸੁਜਾਤੋਤਿ ਸੁਸਣ੍ਠਿਤੋ. ਸੁਮੁਖੋਤਿ ਕਞ੍ਚਨਾਦਾਸਪੁਣ੍ਣਚਨ੍ਦਸਦਿਸਮੁਖੋ. ਸੁਦਸ੍ਸਨੋਤਿ ਉਤ੍ਤਮਰੂਪਧਾਰਿਤਾਯ ਸਮ੍ਪਨ੍ਨਦਸ੍ਸਨੋ. ਸਾਮੋਤਿ ਸੁਵਣ੍ਣਸਾਮੋ. ਕੁਸੁਮ੍ਭਪਰਿਕਿਣ੍ਣਮਸ੍ਸੂਤਿ ਸਨ੍ਨਿਸਿਨ੍ਨਟ੍ਠੇਨ ਸੁਖੁਮਟ੍ਠੇਨ ਚ ਤਰੁਣਕੁਸੁਮ੍ਭਕੇਸਰਸਦਿਸਪਰਿਕਿਣ੍ਣਮਸ੍ਸੁ. ਇਮਿਨਾ ਏਵਰੂਪੋਪਿ ਕੁਮਾਰੋ ਮਚ੍ਚੁਵਸਂ ਗਚ੍ਛਤਿ. ਤਥਾਵਿਧਮ੍ਪਿ ਹਿ ਸਿਨੇਰੁਂ ਉਪ੍ਪਾਤੇਨ੍ਤੋ ਵਿਯ ਨਿਕ੍ਕਰੁਣੋ ਮਚ੍ਚੁ ਆਦਾਯ ਗਚ੍ਛਤੀਤਿ ਦਸ੍ਸੇਤਿ. ਹਿਤ੍ਵਾਨ ਕਾਮੇ ਪਟਿਕਚ੍ਚ ਗੇਹਂ, ਅਨੁਜਾਨ ਮਂ ਪਬ੍ਬਜਿਸ੍ਸਾਮਿ ਦੇਵਾਤਿ ਦੇਵ, ਪੁਤ੍ਤਦਾਰਬਨ੍ਧਨਸ੍ਮਿਞ੍ਹਿ ਉਪ੍ਪਨ੍ਨੇ ਤਂ ਬਨ੍ਧਨਂ ਦੁਚ੍ਛੇਦਨੀਯਂ ਹੋਤਿ, ਤੇਨਾਹਂ ਪੁਰੇਤਰਞ੍ਞੇਵ ਕਾਮੇ ਚ ਗੇਹਞ੍ਚ ਹਿਤ੍ਵਾ ਇਦਾਨੇਵ ਪਬ੍ਬਜਿਸ੍ਸਾਮਿ, ਅਨੁਜਾਨ, ਮਨ੍ਤਿ.

ਏਵਞ੍ਚ ਪਨ ਵਤ੍ਵਾ ‘‘ਤਿਟ੍ਠਥ ਤੁਮ੍ਹੇ, ਤੁਮ੍ਹੇਹਿ ਸਦ੍ਧਿਂ ਕਥੇਨ੍ਤਮੇਵ ਮਂ ਬ੍ਯਾਧਿਜਰਾਮਰਣਾਨਿ ਉਪਗਚ੍ਛਨ੍ਤੀ’’ਤਿ ਤੇ ਉਭੋਪਿ ਵਨ੍ਦਿਤ੍ਵਾ ਯੋਜਨਿਕਂ ਪਰਿਸਂ ਗਹੇਤ੍ਵਾ ਨਿਕ੍ਖਮਿਤ੍ਵਾ ਗਙ੍ਗਾਤੀਰਮੇਵ ਅਗਮਾਸਿ. ਹਤ੍ਥਿਪਾਲੋ ਤਸ੍ਸਪਿ ਆਕਾਸੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਤ੍ਵਾ ‘‘ਸਮਾਗਮੋ ਮਹਾ ਭਵਿਸ੍ਸਤੀ’’ਤਿ ਤਤ੍ਥੇਵ ਨਿਸੀਦਿ. ਪੁਨਦਿਵਸੇ ਪੁਰੋਹਿਤੋ ਪਲ੍ਲਙ੍ਕਵਰਮਜ੍ਝਗਤੋ ਨਿਸੀਦਿਤ੍ਵਾ ਚਿਨ੍ਤੇਸਿ ‘‘ਮਮ ਪੁਤ੍ਤਾ ਪਬ੍ਬਜਿਤਾ, ਇਦਾਨਾਹਂ ਏਕਕੋਵ ਮਨੁਸ੍ਸਖਾਣੁਕੋ ਜਾਤੋਮ੍ਹਿ, ਅਹਮ੍ਪਿ ਪਬ੍ਬਜਿਸ੍ਸਾਮੀ’’ਤਿ. ਸੋ ਬ੍ਰਾਹ੍ਮਣਿਯਾ ਸਦ੍ਧਿਂ ਮਨ੍ਤੇਨ੍ਤੋ ਗਾਥਮਾਹ –

੩੫੧.

‘‘ਸਾਖਾਹਿ ਰੁਕ੍ਖੋ ਲਭਤੇ ਸਮਞ੍ਞਂ, ਪਹੀਨਸਾਖਂ ਪਨ ਖਾਣੁਮਾਹੁ;

ਪਹੀਨਪੁਤ੍ਤਸ੍ਸ ਮਮਜ੍ਜ ਭੋਤਿ, ਵਾਸੇਟ੍ਠਿ ਭਿਕ੍ਖਾਚਰਿਯਾਯ ਕਾਲੋ’’ਤਿ.

ਤਤ੍ਥ ਲਭਤੇ ਸਮਞ੍ਞਨ੍ਤਿ ਰੁਕ੍ਖੋਤਿ ਵੋਹਾਰਂ ਲਭਤਿ. ਵਾਸੇਟ੍ਠੀਤਿ ਬ੍ਰਾਹ੍ਮਣਿਂ ਆਲਪਤਿ. ਭਿਕ੍ਖਾਚਰਿਯਾਯਾਤਿ ਮਯ੍ਹਮ੍ਪਿ ਪਬ੍ਬਜ੍ਜਾਯ ਕਾਲੋ, ਪੁਤ੍ਤਾਨਂ ਸਨ੍ਤਿਕਮੇਵ ਗਮਿਸ੍ਸਾਮੀਤਿ.

ਸੋ ਏਵਂ ਵਤ੍ਵਾ ਬ੍ਰਾਹ੍ਮਣੇ ਪਕ੍ਕੋਸਾਪੇਸਿ, ਸਟ੍ਠਿ ਬ੍ਰਾਹ੍ਮਣਸਹਸ੍ਸਾਨਿ ਸਨ੍ਨਿਪਤਿਂਸੁ. ਅਥ ਨੇ ਆਹ – ‘‘ਤੁਮ੍ਹੇ ਕਿਂ ਕਰਿਸ੍ਸਥਾ’’ਤਿ ਤੁਮ੍ਹੇ ਪਨ ਆਚਰਿਯਾਤਿ. ‘‘ਅਹਂ ਮਮ ਪੁਤ੍ਤਸ੍ਸ ਸਨ੍ਤਿਕੇ ਪਬ੍ਬਜਿਸ੍ਸਾਮੀ’’ਤਿ. ‘‘ਨ ਤੁਮ੍ਹਾਕਮੇਵ ਨਿਰਯੋ ਉਣ੍ਹੋ, ਮਯਮ੍ਪਿ ਪਬ੍ਬਜਿਸ੍ਸਾਮਾ’’ਤਿ. ਸੋ ਅਸੀਤਿਕੋਟਿਧਨਂ ਬ੍ਰਾਹ੍ਮਣਿਯਾ ਨਿਯ੍ਯਾਦੇਤ੍ਵਾ ਯੋਜਨਿਕਂ ਬ੍ਰਾਹ੍ਮਣਪਰਿਸਂ ਆਦਾਯ ਨਿਕ੍ਖਮਿਤ੍ਵਾ ਪੁਤ੍ਤਾਨਂ ਸਨ੍ਤਿਕਞ੍ਞੇਵ ਗਤੋ. ਹਤ੍ਥਿਪਾਲੋ ਤਾਯਪਿ ਪਰਿਸਾਯ ਆਕਾਸੇ ਠਤ੍ਵਾ ਧਮ੍ਮਂ ਦੇਸੇਸਿ. ਪੁਨਦਿਵਸੇ ਬ੍ਰਾਹ੍ਮਣੀ ਚਿਨ੍ਤੇਸਿ ‘‘ਮਮ ਚਤ੍ਤਾਰੋ ਪੁਤ੍ਤਾ ਸੇਤਚ੍ਛਤ੍ਤਂ ਪਹਾਯ ‘ਪਬ੍ਬਜਿਸ੍ਸਾਮਾ’ਤਿ ਗਤਾ, ਬ੍ਰਾਹ੍ਮਣੋਪਿ ਪੁਰੋਹਿਤਟ੍ਠਾਨੇਨ ਸਦ੍ਧਿਂ ਅਸੀਤਿਕੋਟਿਧਨਂ ਛਡ੍ਡੇਤ੍ਵਾ ਪੁਤ੍ਤਾਨਞ੍ਞੇਵ ਸਨ੍ਤਿਕਂ ਗਤੋ, ਅਹਮੇਵ ਏਕਾ ਕਿਂ ਕਰਿਸ੍ਸਾਮਿ, ਪੁਤ੍ਤਾਨਂ ਗਤਮਗ੍ਗੇਨੇਵ ਗਮਿਸ੍ਸਾਮੀ’’ਤਿ. ਸਾ ਅਤੀਤਂ ਉਦਾਹਰਣਂ ਆਹਰਨ੍ਤੀ ਉਦਾਨਗਾਥਮਾਹ –

੩੫੨.

‘‘ਅਘਸ੍ਮਿ ਕੋਞ੍ਚਾਵ ਯਥਾ ਹਿਮਚ੍ਚਯੇ, ਕਤਾਨਿ ਜਾਲਾਨਿ ਪਦਾਲਿਯ ਹਂਸਾ;

ਗਚ੍ਛਨ੍ਤਿ ਪੁਤ੍ਤਾ ਚ ਪਤੀ ਚ ਮਯ੍ਹਂ, ਸਾਹਂ ਕਥਂ ਨਾਨੁਵਜੇ ਪਜਾਨ’’ਨ੍ਤਿ.

ਤਤ੍ਥ ਅਘਸ੍ਮਿ ਕੋਞ੍ਚਾਵ ਯਥਾਤਿ ਯਥੇਵ ਆਕਾਸੇ ਕੋਞ੍ਚਸਕੁਣਾ ਅਸਜ੍ਜਮਾਨਾ ਗਚ੍ਛਨ੍ਤਿ. ਹਿਮਚ੍ਚਯੇਤਿ ਵਸ੍ਸਾਨਚ੍ਚਯੇ. ਕਤਾਨਿ ਜਾਲਾਨਿ ਪਦਾਲਿਯ ਹਂਸਾਤਿ ਅਤੀਤੇ ਕਿਰ ਛਨ੍ਨਵੁਤਿਸਹਸ੍ਸਾ ਸੁਵਣ੍ਣਹਂਸਾਵਸ੍ਸਾਰਤ੍ਤਪਹੋਨਕਂ ਸਾਲਿਂ ਕਞ੍ਚਨਗੁਹਾਯਂ ਨਿਕ੍ਖਿਪਿਤ੍ਵਾ ਵਸ੍ਸਭਯੇਨ ਬਹਿ ਅਨਿਕ੍ਖਮਿਤ੍ਵਾ ਚਤੁਮਾਸਂ ਤਤ੍ਥ ਵਸਨ੍ਤਿ. ਅਥ ਨੇਸਂ ਉਣ੍ਣਨਾਭਿ ਨਾਮ ਮਕ੍ਕਟਕੋ ਗੁਹਾਦ੍ਵਾਰੇ ਜਾਲਂ ਬਨ੍ਧਤਿ. ਹਂਸਾ ਦ੍ਵਿਨ੍ਨਂ ਤਰੁਣਹਂਸਾਨਂ ਦ੍ਵਿਗੁਣਂ ਵਟ੍ਟਂ ਦੇਨ੍ਤਿ. ਤੇ ਥਾਮਸਮ੍ਪਨ੍ਨਤਾਯ ਤਂ ਜਾਲਂ ਛਿਨ੍ਦਿਤ੍ਵਾ ਪੁਰਤੋ ਗਚ੍ਛਨ੍ਤਿ, ਸੇਸਾ ਤੇਸਂ ਗਤਮਗ੍ਗੇਨ ਗਚ੍ਛਨ੍ਤਿ. ਸਾ ਤਮਤ੍ਥਂ ਪਕਾਸੇਨ੍ਤੀ ਏਵਮਾਹ. ਇਦਂ ਵੁਤ੍ਤਂ ਹੋਤਿ – ਯਥੇਵ ਆਕਾਸੇ ਕੋਞ੍ਚਸਕੁਣਾ ਅਸਜ੍ਜਮਾਨਾ ਗਚ੍ਛਨ੍ਤਿ, ਤਥਾ ਹਿਮਚ੍ਚਯੇ ਵਸ੍ਸਾਨਾਤਿਕ੍ਕਮੇ ਦ੍ਵੇ ਤਰੁਣਹਂਸਾ ਕਤਾਨਿ ਜਾਲਾਨਿ ਪਦਾਲੇਤ੍ਵਾ ਗਚ੍ਛਨ੍ਤਿ, ਅਥ ਨੇਸਂ ਗਤਮਗ੍ਗੇਨ ਇਤਰੇ ਹਂਸਾ. ਇਦਾਨਿ ਪਨ ਮਮ ਪੁਤ੍ਤਾ ਤਰੁਣਹਂਸਾ ਜਾਲਂ ਵਿਯ ਕਾਮਜਾਲਂ ਛਿਨ੍ਦਿਤ੍ਵਾ ਗਤਾ, ਮਯਾਪਿ ਤੇਸਂ ਗਤਮਗ੍ਗੇਨ ਗਨ੍ਤਬ੍ਬਨ੍ਤਿ ਇਮਿਨਾਧਿਪ੍ਪਾਯੇਨ ‘‘ਗਚ੍ਛਨ੍ਤਿ ਪੁਤ੍ਤਾ ਚ ਪਤੀ ਚ ਮਯ੍ਹਂ, ਸਾਹਂ ਕਥਂ ਨਾਨੁਵਜੇ ਪਜਾਨ’’ਨ੍ਤਿ ਆਹ.

ਇਤਿ ਸਾ ‘‘ਕਥਂ ਅਹਂ ਏਵਂ ਪਜਾਨਨ੍ਤੀ ਨ ਪਬ੍ਬਜਿਸ੍ਸਾਮਿ, ਪਬ੍ਬਜਿਸ੍ਸਾਮਿ ਯੇਵਾ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਬ੍ਰਾਹ੍ਮਣਿਯੋ ਪਕ੍ਕੋਸਾਪੇਤ੍ਵਾ ਏਵਮਾਹ ‘‘ਤੁਮ੍ਹੇ ਕਿਂ ਕਰਿਸ੍ਸਥਾ’’ਤਿ? ‘‘ਤੁਮ੍ਹੇ ਪਨ ਅਯ੍ਯੇ’’ਤਿ. ‘‘ਅਹਂ ਪਬ੍ਬਜਿਸ੍ਸਾਮੀ’’ਤਿ. ‘‘ਮਯਮ੍ਪਿ ਪਬ੍ਬਜਿਸ੍ਸਾਮਾ’’ਤਿ. ਸਾ ਤਂ ਵਿਭਵਂ ਛਡ੍ਡੇਤ੍ਵਾ ਯੋਜਨਿਕਂ ਪਰਿਸਂ ਗਹੇਤ੍ਵਾ ਪੁਤ੍ਤਾਨਂ ਸਨ੍ਤਿਕਮੇਵ ਗਤਾ. ਹਤ੍ਥਿਪਾਲੋ ਤਾਯਪਿ ਪਰਿਸਾਯ ਆਕਾਸੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਸਿ. ਪੁਨਦਿਵਸੇ ਰਾਜਾ ‘‘ਕੁਹਿਂ ਪੁਰੋਹਿਤੋ’’ਤਿ ਪੁਚ੍ਛਿ. ‘‘ਦੇਵ, ਪੁਰੋਹਿਤੋ ਚ ਬ੍ਰਾਹ੍ਮਣੀ ਚ ਸਬ੍ਬਂ ਧਨਂ ਛਡ੍ਡੇਤ੍ਵਾ ਦ੍ਵਿਯੋਜਨਿਕਂ ਪਰਿਸਂ ਗਹੇਤ੍ਵਾ ਪੁਤ੍ਤਾਨਂ ਸਨ੍ਤਿਕਂ ਗਤਾ’’ਤਿ. ਰਾਜਾ ‘‘ਅਸਾਮਿਕਂ ਧਨਂ ਅਮ੍ਹਾਕਂ ਪਾਪੁਣਾਤੀ’’ਤਿ ਤਸ੍ਸ ਗੇਹਤੋ ਧਨਂ ਆਹਰਾਪੇਸਿ. ਅਥਸ੍ਸ ਅਗ੍ਗਮਹੇਸੀ ‘‘ਰਾਜਾ ਕਿਂ ਕਰੋਤੀ’’ਤਿ ਪੁਚ੍ਛਿਤ੍ਵਾ ‘‘ਪੁਰੋਹਿਤਸ੍ਸ ਗੇਹਤੋ ਧਨਂ ਆਹਰਾਪੇਤੀ’’ਤਿ ਵੁਤ੍ਤੇ ‘‘ਪੁਰੋਹਿਤੋ ਕੁਹਿ’’ਨ੍ਤਿ ਵਤ੍ਵਾ ‘‘ਸਪਜਾਪਤਿਕੋ ਪਬ੍ਬਜ੍ਜਤ੍ਥਾਯ ਨਿਕ੍ਖਨ੍ਤੋ’’ਤਿ ਸੁਤ੍ਵਾ ‘‘ਅਯਂ ਰਾਜਾ ਬ੍ਰਾਹ੍ਮਣੇਨ ਚ ਬ੍ਰਾਹ੍ਮਣਿਯਾ ਚ ਚਤੂਹਿ ਪੁਤ੍ਤੇਹਿ ਚ ਜਹਿਤਂ ਉਕ੍ਕਾਰਂ ਮੋਹੇਨ ਮੂਲ਼੍ਹੋ ਅਤ੍ਤਨੋ ਘਰਂ ਆਹਰਾਪੇਤਿ, ਉਪਮਾਯ ਨਂ ਬੋਧੇਸ੍ਸਾਮੀ’’ਤਿ ਸੂਨਤੋ ਮਂਸਂ ਆਹਰਾਪੇਤ੍ਵਾ ਰਾਜਙ੍ਗਣੇ ਰਾਸਿਂ ਕਾਰੇਤ੍ਵਾ ਉਜੁਮਗ੍ਗਂ ਵਿਸ੍ਸਜ੍ਜੇਤ੍ਵਾ ਜਾਲਂ ਪਰਿਕ੍ਖਿਪਾਪੇਸਿ. ਗਿਜ੍ਝਾ ਦੂਰਤੋਵ ਦਿਸ੍ਵਾ ਤਸ੍ਸਤ੍ਥਾਯ ਓਤਰਿਂਸੁ. ਤਤ੍ਥ ਸਪ੍ਪਞ੍ਞਾ ਜਾਲਂ ਪਸਾਰਿਤਂ ਞਤ੍ਵਾ ਅਤਿਭਾਰਿਕਾ ਹੁਤ੍ਵਾ ‘‘ਉਜੁਕਂ ਉਪ੍ਪਤਿਤੁਂ ਨ ਸਕ੍ਖਿਸ੍ਸਾਮਾ’’ਤਿ ਅਤ੍ਤਨਾ ਖਾਦਿਤਮਂਸਂ ਛਡ੍ਡੇਤ੍ਵਾ ਵਮਿਤ੍ਵਾ ਜਾਲਂ ਅਨਲ੍ਲੀਯਿਤ੍ਵਾ ਉਜੁਕਮੇਵ ਉਪ੍ਪਤਿਤ੍ਵਾ ਗਮਿਂਸੁ. ਅਨ੍ਧਬਾਲਾ ਪਨ ਤੇਹਿ ਛਡ੍ਡਿਤਂ ਵਮਿਤਂ ਖਾਦਿਤ੍ਵਾ ਭਾਰਿਯਾ ਹੁਤ੍ਵਾ ਉਜੁਕਂ ਉਪ੍ਪਤਿਤੁਂ ਅਸਕ੍ਕੋਨ੍ਤਾ ਆਗਨ੍ਤ੍ਵਾ ਜਾਲੇ ਬਜ੍ਝਿਂਸੁ. ਅਥੇਕਂ ਗਿਜ੍ਝਂ ਆਨੇਤ੍ਵਾ ਦੇਵਿਯਾ ਦਸ੍ਸਯਿਂਸੁ. ਸਾ ਤਂ ਆਦਾਯ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ‘‘ਏਥ ਤਾਵ, ਮਹਾਰਾਜ, ਰਾਜਙ੍ਗਣੇ ਏਕਂ ਕਿਰਿਯਂ ਪਸ੍ਸਿਸ੍ਸਾਮਾ’’ਤਿ ਸੀਹਪਞ੍ਜਰਂ ਵਿਵਰਿਤ੍ਵਾ ‘‘ਇਮੇ ਗਿਜ੍ਝੇ ਓਲੋਕੇਹਿ ਮਹਾਰਾਜਾ’’ਤਿ ਵਤ੍ਵਾ ਦ੍ਵੇ ਗਾਥਾ ਅਭਾਸਿ –

੩੫੩.

‘‘ਏਤੇ ਭੁਤ੍ਵਾ ਵਮਿਤ੍ਵਾ ਚ, ਪਕ੍ਕਮਨ੍ਤਿ ਵਿਹਙ੍ਗਮਾ;

ਯੇ ਚ ਭੁਤ੍ਵਾ ਨ ਵਮਿਂਸੁ, ਤੇ ਮੇ ਹਤ੍ਥਤ੍ਤਮਾਗਤਾ.

੩੫੪.

‘‘ਅਵਮੀ ਬ੍ਰਾਹ੍ਮਣੋ ਕਾਮੇ, ਸੋ ਤ੍ਵਂ ਪਚ੍ਚਾਵਮਿਸ੍ਸਸਿ;

ਵਨ੍ਤਾਦੋ ਪੁਰਿਸੋ ਰਾਜ, ਨ ਸੋ ਹੋਤਿ ਪਸਂਸਿਯੋ’’ਤਿ.

ਤਤ੍ਥ ਭੁਤ੍ਵਾ ਵਮਿਤ੍ਵਾ ਚਾਤਿ ਮਂਸਂ ਖਾਦਿਤ੍ਵਾ ਵਮਿਤ੍ਵਾ ਚ. ਪਚ੍ਚਾਵਮਿਸ੍ਸਸੀਤਿ ਪਟਿਭੁਞ੍ਜਿਸ੍ਸਸਿ. ਵਨ੍ਤਾਦੋਤਿ ਪਰਸ੍ਸ ਵਮਿਤਖਾਦਕੋ. ਨ ਪਸਂਸਿਯੋਤਿ ਸੋ ਤਣ੍ਹਾਵਸਿਕੋ ਬਾਲੋ ਬੁਦ੍ਧਾਦੀਹਿ ਪਣ੍ਡਿਤੇਹਿ ਪਸਂਸਿਤਬ੍ਬੋ ਨ ਹੋਤਿ.

ਤਂ ਸੁਤ੍ਵਾ ਰਾਜਾ ਵਿਪ੍ਪਟਿਸਾਰੀ ਅਹੋਸਿ, ਤਯੋ ਭਵਾ ਆਦਿਤ੍ਤਾ ਵਿਯ ਉਪਟ੍ਠਹਿਂਸੁ. ਸੋ ‘‘ਅਜ੍ਜੇਵ ਰਜ੍ਜਂ ਪਹਾਯ ਮਮ ਪਬ੍ਬਜਿਤੁਂ ਵਟ੍ਟਤੀ’’ਤਿ ਉਪ੍ਪਨ੍ਨਸਂਵੇਗੋ ਦੇਵਿਯਾ ਥੁਤਿਂ ਕਰੋਨ੍ਤੋ ਗਾਥਮਾਹ –

੩੫੫.

‘‘ਪਙ੍ਕੇ ਚ ਪੋਸਂ ਪਲਿਪੇ ਬ੍ਯਸਨ੍ਨਂ, ਬਲੀ ਯਥਾ ਦੁਬ੍ਬਲਮੁਦ੍ਧਰੇਯ੍ਯ;

ਏਵਮ੍ਪਿ ਮਂ ਤ੍ਵਂ ਉਦਤਾਰਿ ਭੋਤਿ, ਪਞ੍ਚਾਲਿ ਗਾਥਾਹਿ ਸੁਭਾਸਿਤਾਹੀ’’ਤਿ.

ਤਤ੍ਥ ਬ੍ਯਸਨ੍ਨਨ੍ਤਿ ਨਿਮੁਗ੍ਗਂ, ‘‘ਵਿਸਨ੍ਨ’’ਨ੍ਤਿਪਿ ਪਾਠੋ. ਉਦ੍ਧਰੇਯ੍ਯਾਤਿ ਕੇਸੇਸੁ ਵਾ ਹਤ੍ਥੇਸੁ ਵਾ ਗਹੇਤ੍ਵਾ ਉਕ੍ਖਿਪਿਤ੍ਵਾ ਥਲੇ ਠਪੇਯ੍ਯ. ਉਦਤਾਰੀਤਿ ਕਾਮਪਙ੍ਕਤੋ ਉਤ੍ਤਾਰਯਿ. ‘‘ਉਦਤਾਸੀ’’ਤਿਪਿ ਪਾਠੋ, ਅਯਮੇਵਤ੍ਥੋ. ‘‘ਉਦ੍ਧਟਾਸੀ’’ਤਿਪਿ ਪਾਠੋ, ਉਦ੍ਧਰੀਤਿ ਅਤ੍ਥੋ. ਪਞ੍ਚਾਲੀਤਿ ਪਞ੍ਚਾਲਰਾਜਧੀਤੇ.

ਏਵਞ੍ਚ ਪਨ ਵਤ੍ਵਾ ਤਙ੍ਖਣਞ੍ਞੇਵ ਪਬ੍ਬਜਿਤੁਕਾਮੋ ਹੁਤ੍ਵਾ ਅਮਚ੍ਚੇ ਪਕ੍ਕੋਸਾਪੇਤ੍ਵਾ ਆਹ – ‘‘ਤੁਮ੍ਹੇ ਕਿਂ ਕਰਿਸ੍ਸਥਾ’’ਤਿ ਤੁਮ੍ਹੇ ਪਨ, ਦੇਵਾਤਿ? ‘‘ਅਹਂ ਹਤ੍ਥਿਪਾਲਸ੍ਸ ਸਨ੍ਤਿਕੇ ਪਬ੍ਬਜਿਸ੍ਸਾਮੀ’’ਤਿ. ‘‘ਮਯਮ੍ਪਿ ਪਬ੍ਬਜਿਸ੍ਸਾਮ, ਦੇਵਾ’’ਤਿ. ਰਾਜਾ ਦ੍ਵਾਦਸਯੋਜਨਿਕੇ ਬਾਰਾਣਸਿਨਗਰੇ ਰਜ੍ਜਂ ਛਡ੍ਡੇਤ੍ਵਾ ‘‘ਅਤ੍ਥਿਕਾ ਸੇਤਚ੍ਛਤ੍ਤਂ ਉਸ੍ਸਾਪੇਨ੍ਤੂ’’ਤਿ ਅਮਚ੍ਚਪਰਿਵੁਤੋ ਤਿਯੋਜਨਿਕਂ ਪਰਿਸਂ ਗਹੇਤ੍ਵਾ ਕੁਮਾਰਸ੍ਸੇਵ ਸਨ੍ਤਿਕਂ ਗਤੋ. ਹਤ੍ਥਿਪਾਲੋ ਤਸ੍ਸਾਪਿ ਪਰਿਸਾਯ ਆਕਾਸੇ ਨਿਸਿਨ੍ਨੋ ਧਮ੍ਮਂ ਦੇਸੇਸਿ. ਸਤ੍ਥਾ ਰਞ੍ਞੋ ਪਬ੍ਬਜਿਤਭਾਵਂ ਪਕਾਸੇਨ੍ਤੋ ਗਾਥਮਾਹ –

੩੫੬.

‘‘ਇਦਂ ਵਤ੍ਵਾ ਮਹਾਰਾਜਾ, ਏਸੁਕਾਰੀ ਦਿਸਮ੍ਪਤਿ;

ਰਟ੍ਠਂ ਹਿਤ੍ਵਾਨ ਪਬ੍ਬਜਿ, ਨਾਗੋ ਛੇਤ੍ਵਾਵ ਬਨ੍ਧਨ’’ਨ੍ਤਿ.

ਪੁਨਦਿਵਸੇ ਨਗਰੇ ਓਹੀਨਜਨੋ ਸਨ੍ਨਿਪਤਿਤ੍ਵਾ ਰਾਜਦ੍ਵਾਰਂ ਗਨ੍ਤ੍ਵਾ ਦੇਵਿਯਾ ਆਰੋਚੇਤ੍ਵਾ ਨਿਵੇਸਨਂ ਪਵਿਸਿਤ੍ਵਾ ਦੇਵਿਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ਗਾਥਮਾਹ.

੩੫੭.

‘‘ਰਾਜਾ ਚ ਪਬ੍ਬਜ੍ਜਮਰੋਚਯਿਤ੍ਥ, ਰਟ੍ਠਂ ਪਹਾਯ ਨਰਵੀਰਸੇਟ੍ਠੋ;

ਤੁਵਮ੍ਪਿ ਨੋ ਹੋਹਿ ਯਥੇਵ ਰਾਜਾ, ਅਮ੍ਹੇਹਿ ਗੁਤ੍ਤਾ ਅਨੁਸਾਸ ਰਜ੍ਜ’’ਨ੍ਤਿ.

ਤਤ੍ਥ ਅਨੁਸਾਸਾਤਿ ਅਮ੍ਹੇਹਿ ਗੁਤ੍ਤਾ ਹੁਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਹਿ.

ਸਾ ਮਹਾਜਨਸ੍ਸ ਕਥਂ ਸੁਤ੍ਵਾ ਸੇਸਗਾਥਾ ਅਭਾਸਿ –

੩੫੮.

‘‘ਰਾਜਾ ਚ ਪਬ੍ਬਜ੍ਜਮਰੋਚਯਿਤ੍ਥ, ਰਟ੍ਠਂ ਪਹਾਯ ਨਰਵੀਰਸੇਟ੍ਠੋ;

ਅਹਮ੍ਪਿ ਏਕਾ ਚਰਿਸ੍ਸਾਮਿ ਲੋਕੇ, ਹਿਤ੍ਵਾਨ ਕਾਮਾਨਿ ਮਨੋਰਮਾਨਿ.

੩੫੯.

‘‘ਰਾਜਾ ਚ ਪਬ੍ਬਜ੍ਜਮਰੋਚਯਿਤ੍ਥ, ਰਟ੍ਠਂ ਪਹਾਯ ਨਰਵੀਰਸੇਟ੍ਠੋ;

ਅਹਮ੍ਪਿ ਏਕਾ ਚਰਿਸ੍ਸਾਮਿ ਲੋਕੇ, ਹਿਤ੍ਵਾਨ ਕਾਮਾਨਿ ਯਥੋਧਿਕਾਨਿ.

੩੬੦.

‘‘ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ, ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤਿ;

ਅਹਮ੍ਪਿ ਏਕਾ ਚਰਿਸ੍ਸਾਮਿ ਲੋਕੇ, ਹਿਤ੍ਵਾਨ ਕਾਮਾਨਿ ਮਨੋਰਮਾਨਿ.

੩੬੧.

‘‘ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ, ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤਿ;

ਅਹਮ੍ਪਿ ਏਕਾ ਚਰਿਸ੍ਸਾਮਿ ਲੋਕੇ, ਹਿਤ੍ਵਾਨ ਕਾਮਾਨਿ ਯਥੋਧਿਕਾਨਿ.

੩੬੨.

‘‘ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ, ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤਿ;

ਅਹਮ੍ਪਿ ਏਕਾ ਚਰਿਸ੍ਸਾਮਿ ਲੋਕੇ, ਸੀਤਿਭੂਤਾ ਸਬ੍ਬਮਤਿਚ੍ਚ ਸਙ੍ਗ’’ਨ੍ਤਿ.

ਤਤ੍ਥ ਏਕਾਤਿ ਪੁਤ੍ਤਧੀਤੁਕਿਲੇਸਸਮ੍ਬਾਧੇਹਿ ਮੁਚ੍ਚਿਤ੍ਵਾ ਇਮਸ੍ਮਿਂ ਲੋਕੇ ਏਕਿਕਾਵ ਚਰਿਸ੍ਸਾਮਿ. ਕਾਮਾਨੀਤਿ ਰੂਪਾਦਯੋ ਕਾਮਗੁਣੇ. ਯਤੋਧਿਕਾਨੀਤਿ ਯੇਨ ਯੇਨ ਓਧਿਨਾ ਠਿਤਾਨਿ, ਤੇਨ ਤੇਨ ਠਿਤਾਨੇਵ ਜਹਿਸ੍ਸਾਮਿ, ਨ ਕਿਞ੍ਚਿ ਆਮਸਿਸ੍ਸਾਮੀਤਿ ਅਤ੍ਥੋ. ਅਚ੍ਚੇਨ੍ਤਿ ਕਾਲਾਤਿ ਪੁਬ੍ਬਣ੍ਹਾਦਯੋ ਕਾਲਾ ਅਤਿਕ੍ਕਮਨ੍ਤਿ. ਤਰਯਨ੍ਤੀਤਿ ਅਤੁਚ੍ਛਾ ਹੁਤ੍ਵਾ ਆਯੁਸਙ੍ਖਾਰਂ ਖੇਪਯਮਾਨਾ ਖਾਦਯਮਾਨਾ ਗਚ੍ਛਨ੍ਤਿ. ਵਯੋਗੁਣਾਤਿ ਪਠਮਵਯਾਦਯੋ ਤਯੋ, ਮਨ੍ਦਦਸਕਾਦਯੋ ਵਾ ਦਸ ਕੋਟ੍ਠਾਸਾ. ਅਨੁਪੁਬ੍ਬਂ ਜਹਨ੍ਤੀਤਿ ਉਪਰੂਪਰਿਕੋਟ੍ਠਾਸਂ ਅਪ੍ਪਤ੍ਵਾ ਤਤ੍ਥ ਤਤ੍ਥੇਵ ਨਿਰੁਜ੍ਝਨ੍ਤਿ. ਸੀਤਿਭੂਤਾਤਿ ਉਣ੍ਹਕਾਰਕੇ ਉਣ੍ਹਸਭਾਵੇ ਕਿਲੇਸੇ ਪਹਾਯ ਸੀਤਲਾ ਹੁਤ੍ਵਾ. ਸਬ੍ਬਮਤਿਚ੍ਚ ਸਙ੍ਗਨ੍ਤਿ ਰਾਗਸਙ੍ਗਾਦਿਕਂ ਸਬ੍ਬਸਙ੍ਗਂ ਅਤਿਕ੍ਕਮਿਤ੍ਵਾ ਏਕਾ ਚਰਿਸ੍ਸਾਮਿ, ਹਤ੍ਥਿਪਾਲਕੁਮਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਬ੍ਬਜਿਸ੍ਸਾਮੀਤਿ.

ਇਤਿ ਸਾ ਇਮਾਹਿ ਗਾਥਾਹਿ ਮਹਾਜਨਸ੍ਸ ਧਮ੍ਮਂ ਦੇਸੇਤ੍ਵਾ ਅਮਚ੍ਚਭਰਿਯਾਯੋ ਪਕ੍ਕੋਸਾਪੇਤ੍ਵਾ ਆਹ – ‘‘ਤੁਮ੍ਹੇ ਕਿਂ ਕਰਿਸ੍ਸਥਾ’’ਤਿ ਤੁਮ੍ਹੇ ਪਨ ਅਯ੍ਯੇਤਿ? ‘‘ਅਹਂ ਪਬ੍ਬਜਿਸ੍ਸਾਮੀ’’ਤਿ. ‘‘ਮਯਮ੍ਪਿ ਪਬ੍ਬਜਿਸ੍ਸਾਮਾ’’ਤਿ. ਸਾ ‘‘ਸਾਧੂ’’ਤਿ ਰਾਜਨਿਵੇਸਨੇ ਸੁਵਣ੍ਣਕੋਟ੍ਠਾਗਾਰਾਦੀਨਿ ਵਿਵਰਾਪੇਤ੍ਵਾ ‘‘ਅਸੁਕਟ੍ਠਾਨੇ ਚ ਅਸੁਕਟ੍ਠਾਨੇ ਚ ਮਹਾਨਿਧਿ ਨਿਦਹਿਤ’’ਨ੍ਤਿ ਸੁਵਣ੍ਣਪਟ੍ਟੇ ਲਿਖਾਪੇਤ੍ਵਾ ‘‘ਦਿਨ੍ਨਞ੍ਞੇਵ, ਅਤ੍ਥਿਕਾ ਹਰਨ੍ਤੂ’’ਤਿ ਵਤ੍ਵਾ ਸੁਵਣ੍ਣਪਟ੍ਟਂ ਮਹਾਤਲੇ ਥਮ੍ਭੇ ਬਨ੍ਧਾਪੇਤ੍ਵਾ ਨਗਰੇ ਭੇਰਿਂ ਚਰਾਪੇਤ੍ਵਾ ਮਹਾਸਮ੍ਪਤ੍ਤਿਂ ਛਡ੍ਡੇਤ੍ਵਾ ਨਗਰਾ ਨਿਕ੍ਖਮਿ. ਤਸ੍ਮਿਂ ਖਣੇ ਸਕਲਨਗਰਂ ਸਙ੍ਖੁਭਿ. ‘‘ਰਾਜਾ ਚ ਕਿਰ ਦੇਵੀ ਚ ਰਜ੍ਜਂ ਪਹਾਯ ‘ਪਬ੍ਬਜਿਸ੍ਸਾਮਾ’ਤਿ ਨਿਕ੍ਖਮਨ੍ਤਿ, ਮਯਂ ਇਧ ਕਿਂ ਕਰਿਸ੍ਸਾਮਾ’’ਤਿ ਤਤੋ ਤਤੋ ਮਨੁਸ੍ਸਾ ਯਥਾਪੂਰਿਤਾਨੇਵ ਗੇਹਾਨਿ ਛਡ੍ਡੇਤ੍ਵਾ ਪੁਤ੍ਤੇ ਹਤ੍ਥੇਸੁ ਗਹੇਤ੍ਵਾ ਨਿਕ੍ਖਮਿਂਸੁ. ਸਬ੍ਬਾਪਣਾ ਪਸਾਰਿਤਨਿਯਾਮੇਨੇਵ ਠਿਤਾ, ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ਨਾਮ ਨਾਹੋਸਿ. ਸਕਲਨਗਰਂ ਤੁਚ੍ਛਂ ਅਹੋਸਿ, ਦੇਵੀਪਿ ਤਿਯੋਜਨਿਕਂ ਪਰਿਸਂ ਗਹੇਤ੍ਵਾ ਤਤ੍ਥੇਵ ਗਤਾ. ਹਤ੍ਥਿਪਾਲੋ ਤਸ੍ਸਾਪਿ ਪਰਿਸਾਯ ਆਕਾਸੇ ਨਿਸਿਨ੍ਨੋ ਧਮ੍ਮਂ ਦੇਸੇਤ੍ਵਾ ਦ੍ਵਾਦਸਯੋਜਨਿਕਂ ਪਰਿਸਂ ਗਹੇਤ੍ਵਾ ਹਿਮਵਨ੍ਤਾਭਿਮੁਖੋ ਪਾਯਾਸਿ. ‘‘ਹਤ੍ਥਿਪਾਲਕੁਮਾਰੋ ਕਿਰ ਦ੍ਵਾਦਸਯੋਜਨਿਕਂ ਬਾਰਾਣਸਿਂ ਤੁਚ੍ਛਂ ਕਤ੍ਵਾ ‘ਪਬ੍ਬਜਿਸ੍ਸਾਮੀ’ਤਿ ਮਹਾਜਨਂ ਆਦਾਯ ਹਿਮਵਨ੍ਤਂ ਗਚ੍ਛਤਿ, ਕਿਮਙ੍ਗਂ ਪਨ ਮਯ’’ਨ੍ਤਿ ਸਕਲਕਾਸਿਰਟ੍ਠਂ ਸਙ੍ਖੁਭਿ. ਅਪਰਭਾਗੇ ਪਰਿਸਾ ਤਿਂਸਯੋਜਨਿਕਾ ਅਹੇਸੁਂ, ਸੋ ਤਾਯ ਪਰਿਸਾਯ ਸਦ੍ਧਿਂ ਹਿਮਵਨ੍ਤਂ ਪਾਵਿਸਿ.

ਸਕ੍ਕੋ ਆਵਜ੍ਜੇਨ੍ਤੋ ਤਂ ਪਵਤ੍ਤਿਂ ਞਤ੍ਵਾ ‘‘ਹਤ੍ਥਿਪਾਲਕੁਮਾਰੋ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋ, ਸਮਾਗਮੋ ਮਹਾ ਭਵਿਸ੍ਸਤਿ, ਵਸਨਟ੍ਠਾਨਂ ਲਦ੍ਧੁਂ ਵਟ੍ਟਤੀ’’ਤਿ ਵਿਸ੍ਸਕਮ੍ਮਂ ਆਣਾਪੇਸਿ ‘‘ਗਚ੍ਛ, ਆਯਾਮਤੋ ਛਤ੍ਤਿਂਸਯੋਜਨਂ, ਵਿਤ੍ਥਾਰਤੋ ਪਨ੍ਨਰਸਯੋਜਨਂ ਅਸ੍ਸਮਂ ਮਾਪੇਤ੍ਵਾ ਪਬ੍ਬਜਿਤਪਰਿਕ੍ਖਾਰੇ ਸਮ੍ਪਾਦੇਹੀ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਗਙ੍ਗਾਤੀਰੇ ਰਮਣੀਯੇ ਭੂਮਿਭਾਗੇ ਵੁਤ੍ਤਪ੍ਪਮਾਣਂ ਅਸ੍ਸਮਪਦਂ ਮਾਪੇਤ੍ਵਾ ਪਣ੍ਣਸਾਲਾਸੁ ਕਟ੍ਠਤ੍ਥਰਣਪਣ੍ਣਤ੍ਥਰਣਆਸਨਾਦੀਨਿ ਪਞ੍ਞਪੇਤ੍ਵਾ ਸਬ੍ਬੇ ਪਬ੍ਬਜਿਤਪਰਿਕ੍ਖਾਰੇ ਮਾਪੇਸਿ. ਏਕੇਕਿਸ੍ਸਾ ਪਣ੍ਣਸਾਲਾਯ ਦ੍ਵਾਰੇ ਏਕੇਕੋ ਚਙ੍ਕਮੋ ਰਤ੍ਤਿਟ੍ਠਾਨਦਿਵਾਟ੍ਠਾਨਪਰਿਚ੍ਛਿਨ੍ਨੋ ਕਤਸੁਧਾਪਰਿਕਮ੍ਮੋ ਆਲਮ੍ਬਨਫਲਕੋ, ਤੇਸੁ ਤੇਸੁ ਠਾਨੇਸੁ ਨਾਨਾਵਣ੍ਣਸੁਰਭਿਕੁਸੁਮਸਞ੍ਛਨ੍ਨਾ ਪੁਪ੍ਫਗਚ੍ਛਾ, ਏਕੇਕਸ੍ਸ ਚਙ੍ਕਮਸ੍ਸ ਕੋਟਿਯਂ ਏਕੇਕੋ ਉਦਕਭਰਿਤੋ ਕੂਪੋ, ਤਸ੍ਸ ਸਨ੍ਤਿਕੇ ਏਕੇਕੋ ਫਲਰੁਕ੍ਖੋ, ਸੋ ਏਕੋਵ ਸਬ੍ਬਫਲਾਨਿ ਫਲਤਿ. ਇਦਂ ਸਬ੍ਬਂ ਦੇਵਤਾਨੁਭਾਵੇਨ ਅਹੋਸਿ. ਵਿਸ੍ਸਕਮ੍ਮੋ ਅਸ੍ਸਮਪਦਂ ਮਾਪੇਤ੍ਵਾ ਪਣ੍ਣਸਾਲਾਸੁ ਪਬ੍ਬਜਿਤਪਰਿਕ੍ਖਾਰੇ ਠਪੇਤ੍ਵਾ ‘‘ਯੇ ਕੇਚਿ ਪਬ੍ਬਜਿਤੁਕਾਮਾ ਇਮੇ ਪਰਿਕ੍ਖਾਰੇ ਗਣ੍ਹਨ੍ਤੂ’’ਤਿ ਜਾਤਿਹਿਙ੍ਗੁਲਕੇਨ ਭਿਤ੍ਤਿਯਾ ਅਕ੍ਖਰਾਨਿ ਲਿਖਿਤ੍ਵਾ ਅਤ੍ਤਨੋ ਆਨੁਭਾਵੇਨ ਭੇਰਵਸਦ੍ਦੇ ਮਿਗਪਕ੍ਖੀ ਦੁਦ੍ਦਸਿਕੇ ਅਮਨੁਸ੍ਸੇ ਚ ਪਟਿਕ੍ਕਮਾਪੇਤ੍ਵਾ ਸਕਟ੍ਠਾਨਮੇਵ ਗਤੋ.

ਹਤ੍ਥਿਪਾਲਕੁਮਾਰੋ ਏਕਪਦਿਕਮਗ੍ਗੇਨ ਸਕ੍ਕਦਤ੍ਤਿਯਂ ਅਸ੍ਸਮਂ ਪਵਿਸਿਤ੍ਵਾ ਅਕ੍ਖਰਾਨਿ ਦਿਸ੍ਵਾ ‘‘ਸਕ੍ਕੇਨ ਮਮ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤਭਾਵੋ ਞਾਤੋ ਭਵਿਸ੍ਸਤੀ’’ਤਿ ਦ੍ਵਾਰਂ ਵਿਵਰਿਤ੍ਵਾ ਪਣ੍ਣਸਾਲਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਲਿਙ੍ਗਂ ਗਹੇਤ੍ਵਾ ਨਿਕ੍ਖਮਿਤ੍ਵਾ ਚਙ੍ਕਮਂ ਓਤਰਿਤ੍ਵਾ ਕਤਿਪਯੇ ਵਾਰੇ ਅਪਰਾਪਰਂ ਚਙ੍ਕਮਿਤ੍ਵਾ ਸੇਸਜਨਕਾਯਂ ਪਬ੍ਬਾਜੇਤ੍ਵਾ ਅਸ੍ਸਮਪਦਂ ਵਿਚਾਰੇਨ੍ਤੋ ਤਰੁਣਪੁਤ੍ਤਾਨਂ ਇਤ੍ਥੀਨਂ ਮਜ੍ਝਟ੍ਠਾਨੇ ਪਣ੍ਣਸਾਲਂ ਅਦਾਸਿ. ਤਤੋ ਅਨਨ੍ਤਰਂ ਮਹਲ੍ਲਕਿਤ੍ਥੀਨਂ, ਤਤੋ ਅਨਨ੍ਤਰਂ ਮਜ੍ਝਿਮਿਤ੍ਥੀਨਂ, ਸਮਨ੍ਤਾ ਪਰਿਕ੍ਖਿਪਿਤ੍ਵਾ ਪਨ ਪੁਰਿਸਾਨਂ ਅਦਾਸਿ. ਅਥੇਕੋ ਰਾਜਾ ‘‘ਬਾਰਾਣਸਿਯਂ ਕਿਰ ਰਾਜਾ ਨਤ੍ਥੀ’’ਤਿ ਆਗਨ੍ਤ੍ਵਾ ਅਲਙ੍ਕਤਪਟਿਯਤ੍ਤਂ ਨਗਰਂ ਓਲੋਕੇਤ੍ਵਾ ਰਾਜਨਿਵੇਸਨਂ ਆਰੁਯ੍ਹ ਤਤ੍ਥ ਤਤ੍ਥ ਰਤਨਰਾਸਿਂ ਦਿਸ੍ਵਾ ‘‘ਏਵਰੂਪਂ ਨਗਰਂ ਪਹਾਯ ਪਬ੍ਬਜਿਤਕਾਲਤੋ ਪਟ੍ਠਾਯ ਪਬ੍ਬਜ੍ਜਾ ਨਾਮੇਸਾ ਉਲ਼ਾਰਾ ਭਵਿਸ੍ਸਤੀ’’ਤਿ ਸੁਰਾਸੋਣ੍ਡੇ ਮਗ੍ਗਂ ਪੁਚ੍ਛਿਤ੍ਵਾ ਹਤ੍ਥਿਪਾਲਸ੍ਸ ਸਨ੍ਤਿਕਂ ਪਾਯਾਸਿ. ਹਤ੍ਥਿਪਾਲੋ ਤਸ੍ਸ ਵਨਨ੍ਤਰਂ ਆਗਤਭਾਵਂ ਞਤ੍ਵਾ ਪਟਿਮਗ੍ਗਂ ਗਨ੍ਤ੍ਵਾ ਆਕਾਸੇ ਨਿਸਿਨ੍ਨੋ ਪਰਿਸਾਯ ਧਮ੍ਮਂ ਦੇਸੇਤ੍ਵਾ ਅਸ੍ਸਮਪਦਂ ਨੇਤ੍ਵਾ ਸਬ੍ਬਪਰਿਸਂ ਪਬ੍ਬਾਜੇਸਿ. ਏਤੇਨੁਪਾਯੇਨ ਅਞ੍ਞੇਪਿ ਛ ਰਾਜਾਨੋ ਪਬ੍ਬਜਿਂਸੁ. ਸਤ੍ਤ ਰਾਜਾਨੋ ਭੋਗੇ ਛਡ੍ਡਯਿਂਸੁ, ਛਤ੍ਤਿਂਸਯੋਜਨਿਕੋ ਅਸ੍ਸਮੋ ਨਿਰਨ੍ਤਰੋ ਪਰਿਪੂਰਿ. ਯੋ ਕਾਮਵਿਤਕ੍ਕਾਦੀਸੁ ਅਞ੍ਞਤਰਂ ਵਿਤਕ੍ਕੇਤਿ, ਮਹਾਪੁਰਿਸੋ ਤਸ੍ਸ ਧਮ੍ਮਂ ਦੇਸੇਤ੍ਵਾ ਬ੍ਰਹ੍ਮਵਿਹਾਰਭਾਵਨਞ੍ਚੇਵ ਕਸਿਣਭਾਵਨਞ੍ਚ ਆਚਿਕ੍ਖਤਿ. ਤੇ ਯੇਭੁਯ੍ਯੇਨ ਝਾਨਾਭਿਞ੍ਞਾ ਨਿਬ੍ਬਤ੍ਤੇਤ੍ਵਾ ਤੀਸੁ ਕੋਟ੍ਠਾਸੇਸੁ ਦ੍ਵੇ ਕੋਟ੍ਠਾਸਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਂਸੁ. ਤਤਿਯਕੋਟ੍ਠਾਸਂ ਤਿਧਾ ਕਤ੍ਵਾ ਏਕੋ ਕੋਟ੍ਠਾਸੋ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ, ਏਕੋ ਛਸੁ ਕਾਮਸਗ੍ਗੇਸੁ, ਏਕੋ ਇਸੀਨਂ ਪਾਰਿਚਰਿਯਂ ਕਤ੍ਵਾ ਮਨੁਸ੍ਸਲੋਕੇ ਤੀਸੁ ਕੁਲਸਮ੍ਪਤ੍ਤੀਸੁ ਨਿਬ੍ਬਤ੍ਤਿ. ਏਵਂ ਹਤ੍ਥਿਪਾਲਸ੍ਸ ਸਾਸਨਂ ਅਪਗਤਨਿਰਯਤਿਰਚ੍ਛਾਨਯੋਨਿਪੇਤ੍ਤਿਵਿਸਯਾਸੁਰਕਾਯਂ ਅਹੋਸਿ.

ਇਮਸ੍ਮਿਂ ਤਮ੍ਬਪਣ੍ਣਿਦੀਪੇ ਪਥਵਿਚਾਲਕਧਮ੍ਮਗੁਤ੍ਤਤ੍ਥੇਰੋ, ਕਟਕਨ੍ਧਕਾਰਵਾਸੀ ਫੁਸ੍ਸਦੇਵਤ੍ਥੇਰੋ, ਉਪਰਿਮਣ੍ਡਲਵਾਸੀ ਮਹਾਸਙ੍ਘਰਕ੍ਖਿਤਤ੍ਥੇਰੋ, ਮਲਯਮਹਾਦੇਵਤ੍ਥੇਰੋ, ਅਭਯਗਿਰਿਵਾਸੀ ਮਹਾਦੇਵਤ੍ਥੇਰੋ, ਗਾਮਨ੍ਤਪਬ੍ਭਾਰਵਾਸੀ ਮਹਾਸਿਵਤ੍ਥੇਰੋ, ਕਾਲ਼ਵਲ੍ਲਿਮਣ੍ਡਪਵਾਸੀ ਮਹਾਨਾਗਤ੍ਥੇਰੋ ਕੁਦ੍ਦਾਲਸਮਾਗਮੇ ਮੂਗਪਕ੍ਖਸਮਾਗਮੇ ਚੂਲ਼ਸੁਤਸੋਮਸਮਾਗਮੇ ਅਯੋਘਰਪਣ੍ਡਿਤਸਮਾਗਮੇ ਹਤ੍ਥਿਪਾਲਸਮਾਗਮੇ ਚ ਸਬ੍ਬਪਚ੍ਛਾ ਨਿਕ੍ਖਨ੍ਤਪੁਰਿਸਾ ਅਹੇਸੁਂ. ਤੇਨੇਵਾਹ ਭਗਵਾ –

‘‘ਅਭਿਤ੍ਥਰੇਥ ਕਲ੍ਯਾਣੇ, ਪਾਪਾ ਚਿਤ੍ਤਂ ਨਿਵਾਰਯੇ;

ਦਨ੍ਧਞ੍ਹਿ ਕਰੋਤੋ ਪੁਞ੍ਞਂ, ਪਾਪਸ੍ਮਿਂ ਰਮਤੇ ਮਨੋ’’ਤਿ. (ਧ. ਪ. ੧੧੬);

ਤਸ੍ਮਾ ਕਲ੍ਯਾਣਂ ਤੁਰਿਤਤੁਰਿਤੇਨੇਵ ਕਾਤਬ੍ਬਨ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇਪਿ ਤਥਾਗਤੋ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਏਸੁਕਾਰੀ ਰਾਜਾ ਸੁਦ੍ਧੋਦਨਮਹਾਰਾਜਾ ਅਹੋਸਿ, ਦੇਵੀ ਮਹਾਮਾਯਾ, ਪੁਰੋਹਿਤੋ ਕਸ੍ਸਪੋ, ਬ੍ਰਾਹ੍ਮਣੀ ਭਦ੍ਦਕਾਪਿਲਾਨੀ, ਅਜਪਾਲੋ ਅਨੁਰੁਦ੍ਧੋ, ਗੋਪਾਲੋ ਮੋਗ੍ਗਲ੍ਲਾਨੋ, ਅਸ੍ਸਪਾਲੋ ਸਾਰਿਪੁਤ੍ਤੋ, ਸੇਸਪਰਿਸਾ ਬੁਦ੍ਧਪਰਿਸਾ, ਹਤ੍ਥਿਪਾਲੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਹਤ੍ਥਿਪਾਲਜਾਤਕਵਣ੍ਣਨਾ ਤੇਰਸਮਾ.

[੫੧੦] ੧੪. ਅਯੋਘਰਜਾਤਕਵਣ੍ਣਨਾ

ਯਮੇਕਰਤ੍ਤਿਂ ਪਠਮਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਹਾਭਿਨਿਕ੍ਖਮਨਞ੍ਞੇਵ ਆਰਬ੍ਭ ਕਥੇਸਿ. ਤਦਾਪਿ ਹਿ ਸੋ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਤਥਾਗਤੋ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬ੍ਰਹ੍ਮਦਤ੍ਤਸ੍ਸ ਰਞ੍ਞੋ ਅਗ੍ਗਮਹੇਸੀ ਗਬ੍ਭਂ ਪਟਿਲਭਿਤ੍ਵਾ ਲਦ੍ਧਗਬ੍ਭਪਰਿਹਾਰਾ ਪਰਿਣਤਗਬ੍ਭਾ ਪਚ੍ਚੂਸਸਮਨਨ੍ਤਰੇ ਪੁਤ੍ਤਂ ਵਿਜਾਯਿ. ਤਸ੍ਸਾ ਪੁਰਿਮਤ੍ਤਭਾਵੇ ਏਕਾ ਸਪਤ੍ਤਿਕਾ ‘‘ਤਵ ਜਾਤਂ ਜਾਤਂ ਪਜਂ ਖਾਦਿਤੁਂ ਲਭਿਸ੍ਸਾਮੀ’’ਤਿ ਪਤ੍ਥਨਂ ਪਟ੍ਠਪੇਸਿ. ਸਾ ਕਿਰ ਸਯਂ ਵਞ੍ਝਾ ਹੁਤ੍ਵਾ ਪੁਤ੍ਤਮਾਤੁਕੋਧੇਨ ਤਂ ਪਤ੍ਥਨਂ ਕਤ੍ਵਾ ਯਕ੍ਖਯੋਨਿਯਂ ਨਿਬ੍ਬਤ੍ਤਿ. ਇਤਰਾ ਰਞ੍ਞੋ ਅਗ੍ਗਮਹੇਸੀ ਹੁਤ੍ਵਾ ਇਮਂ ਪੁਤ੍ਤਂ ਵਿਜਾਯਿ. ਸਾ ਯਕ੍ਖਿਨੀ ਤਦਾ ਓਕਾਸਂ ਲਭਿਤ੍ਵਾ ਦੇਵਿਯਾ ਪਸ੍ਸਨ੍ਤਿਯਾਵ ਬੀਭਚ੍ਛਰੂਪਾ ਹੁਤ੍ਵਾ ਆਗਨ੍ਤ੍ਵਾ ਤਂ ਦਾਰਕਂ ਗਹੇਤ੍ਵਾ ਪਲਾਯਿ. ਦੇਵੀ ‘‘ਯਕ੍ਖਿਨੀ ਮੇ ਪੁਤ੍ਤਂ ਗਹੇਤ੍ਵਾ ਪਲਾਯੀ’’ਤਿ ਮਹਾਸਦ੍ਦੇਨ ਵਿਰਵਿ. ਇਤਰਾਪਿ ਦਾਰਕਂ ਮੂਲਕਨ੍ਦਂ ਵਿਯ ਮੁਰੁਂ ਮੁਰੁਂ ਕਰੋਨ੍ਤੀ ਖਾਦਿਤ੍ਵਾ ਦੇਵਿਯਾ ਹਤ੍ਥਵਿਕਾਰਾਦੀਹਿ ਭੇਰਵਂ ਪਕਾਸੇਤ੍ਵਾ ਤਜ੍ਜੇਤ੍ਵਾ ਪਕ੍ਕਾਮਿ. ਰਾਜਾ ਤਂ ਵਚਨਂ ਸੁਤ੍ਵਾ ‘‘ਕਿਂ ਸਕ੍ਕਾ ਯਕ੍ਖਿਨਿਯਾ ਕਾਤੁ’’ਨ੍ਤਿ ਤੁਣ੍ਹੀ ਅਹੋਸਿ. ਪੁਨ ਦੇਵਿਯਾ ਵਿਜਾਯਨਕਾਲੇ ਦਲ਼੍ਹਂ ਆਰਕ੍ਖਮਕਾਸਿ. ਦੇਵੀ ਪੁਤ੍ਤਂ ਪੁਨ ਵਿਜਾਯਿ. ਯਕ੍ਖਿਨੀ ਆਗਨ੍ਤ੍ਵਾ ਤਮ੍ਪਿ ਖਾਦਿਤ੍ਵਾ ਗਤਾ. ਤਤਿਯਵਾਰੇ ਤਸ੍ਸਾ ਕੁਚ੍ਛਿਯਂ ਮਹਾਸਤ੍ਤੋ ਪਟਿਸਨ੍ਧਿਂ ਗਣ੍ਹਿ. ਰਾਜਾ ਮਹਾਜਨਂ ਸਨ੍ਨਿਪਾਤੇਤ੍ਵਾ ‘‘ਦੇਵਿਯਾ ਜਾਤਂ ਜਾਤਂ ਪਜਂ ਏਕਾ ਯਕ੍ਖਿਨੀ ਖਾਦਤਿ, ਕਿਂ ਨੁ ਖੋ ਕਾਤਬ੍ਬ’’ਨ੍ਤਿ ਪੁਚ੍ਛਿ. ਅਥੇਕੋ ‘‘ਯਕ੍ਖਾ ਨਾਮ ਤਾਲਪਣ੍ਣਸ੍ਸ ਭਾਯਨ੍ਤਿ, ਦੇਵਿਯਾ ਹਤ੍ਥਪਾਦੇਸੁ ਤਾਲਪਣ੍ਣਂ ਬਨ੍ਧਿਤੁਂ ਵਟ੍ਟਤੀ’’ਤਿ ਆਹ. ਅਥੇਕੋ ‘‘ਅਯੋਘਰਸ੍ਸ ਭਾਯਨ੍ਤਿ, ਅਯੋਘਰਂ ਕਾਤੁਂ ਵਟ੍ਟਤੀ’’ਤਿ ਆਹ. ਰਾਜਾ ‘‘ਸਾਧੂ’’ਤਿ ਅਤ੍ਤਨੋ ਵਿਜਿਤੇ ਕਮ੍ਮਾਰੇ ਸਨ੍ਨਿਪਾਤੇਤ੍ਵਾ ‘‘ਅਯੋਘਰਂ ਕਰੋਥਾ’’ਤਿ ਆਣਾਪੇਤ੍ਵਾ ਆਯੁਤ੍ਤਕੇ ਅਦਾਸਿ. ਅਨ੍ਤੋਨਗਰੇਯੇਵ ਰਮਣੀਯੇ ਭੂਮਿਭਾਗੇ ਗੇਹਂ ਪਟ੍ਠਪੇਸੁਂ, ਥਮ੍ਭੇ ਆਦਿਂ ਕਤ੍ਵਾ ਸਬ੍ਬਗੇਹਸਮ੍ਭਾਰਾ ਅਯੋਮਯਾਵ ਅਹੇਸੁਂ, ਨਵਹਿ ਮਾਸੇਹਿ ਅਯੋਮਯਂ ਮਹਨ੍ਤਂ ਚਤੁਰਸ੍ਸਸਾਲਂ ਨਿਟ੍ਠਾਨਂ ਅਗਮਾਸਿ. ਤਂ ਨਿਚ੍ਚਂ ਪਜ੍ਜਲਿਤਪਦੀਪਮੇਵ ਹੋਤਿ.

ਰਾਜਾ ਦੇਵਿਯਾ ਗਬ੍ਭਪਰਿਪਾਕਂ ਞਤ੍ਵਾ ਅਯੋਘਰਂ ਅਲਙ੍ਕਾਰਾਪੇਤ੍ਵਾ ਤਂ ਆਦਾਯ ਅਯੋਘਰਂ ਪਾਵਿਸਿ. ਸਾ ਤਤ੍ਥ ਧਞ੍ਞਪੁਞ੍ਞਲਕ੍ਖਣਸਮ੍ਪਨ੍ਨਂ ਪੁਤ੍ਤਂ ਵਿਜਾਯਿ, ‘‘ਅਯੋਘਰਕੁਮਾਰੋ’’ਤ੍ਵੇਵਸ੍ਸ ਨਾਮਂ ਕਰਿਂਸੁ. ਤਂ ਧਾਤੀਨਂ ਦਤ੍ਵਾ ਮਹਨ੍ਤਂ ਆਰਕ੍ਖਂ ਸਂਵਿਦਹਿਤ੍ਵਾ ਰਾਜਾ ਦੇਵਿਂ ਆਦਾਯ ਨਗਰਂ ਪਦਕ੍ਖਿਣਂ ਕਤ੍ਵਾ ਅਲਙ੍ਕਤਪਾਸਾਦਤਲਮੇਵ ਅਭਿਰੁਹਿ. ਯਕ੍ਖਿਨੀਪਿ ਉਦਕਵਾਰਂ ਗਨ੍ਤ੍ਵਾ ਵੇਸ੍ਸਵਣਸ੍ਸ ਉਦਕਂ ਵਹਨ੍ਤੀ ਜੀਵਿਤਕ੍ਖਯਂ ਪਤ੍ਤਾ. ਮਹਾਸਤ੍ਤੋ ਅਯੋਘਰੇਯੇਵ ਵਡ੍ਢਿਤ੍ਵਾ ਵਿਞ੍ਞੁਤਂ ਪਤ੍ਤੋ ਤਤ੍ਥੇਵ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿ. ਰਾਜਾ ‘‘ਕੋ ਮੇ ਪੁਤ੍ਤਸ੍ਸ ਵਯਪ੍ਪਦੇਸੋ’’ਤਿ ਅਮਚ੍ਚੇ ਪੁਚ੍ਛਿਤ੍ਵਾ ‘‘ਸੋਲ਼ਸਵਸ੍ਸੋ, ਦੇਵ, ਸੂਰੋ ਥਾਮਸਮ੍ਪਨ੍ਨੋ ਯਕ੍ਖਸਹਸ੍ਸਮ੍ਪਿ ਪਟਿਬਾਹਿਤੁਂ ਸਮਤ੍ਥੋ’’ਤਿ ਸੁਤ੍ਵਾ ‘‘ਰਜ੍ਜਮਸ੍ਸ ਦਸ੍ਸਾਮਿ, ਸਕਲਨਗਰਂ ਅਲਙ੍ਕਰਿਤ੍ਵਾ ਅਯੋਘਰਤੋ ਤਂ ਨੀਹਰਿਤ੍ਵਾ ਆਨੇਥਾ’’ਤਿ ਆਹ. ਅਮਚ੍ਚਾ ‘‘ਸਾਧੁ, ਦੇਵਾ’’ਤਿ ਦ੍ਵਾਦਸਯੋਜਨਿਕਂ ਬਾਰਾਣਸਿਂ ਅਲਙ੍ਕਰਿਤ੍ਵਾ ਸਬ੍ਬਾਲਙ੍ਕਾਰਵਿਭੂਸਿਤਂ ਮਙ੍ਗਲਵਾਰਣਂ ਆਦਾਯ ਤਤ੍ਥ ਗਨ੍ਤ੍ਵਾ ਕੁਮਾਰਂ ਅਲਙ੍ਕਾਰਾਪੇਤ੍ਵਾ ਹਤ੍ਥਿਕ੍ਖਨ੍ਧੇ ਨਿਸੀਦਾਪੇਤ੍ਵਾ ‘‘ਦੇਵ, ਕੁਲਸਨ੍ਤਕਂ ਅਲਙ੍ਕਤਨਗਰਂ ਪਦਕ੍ਖਿਣਂ ਕਤ੍ਵਾ ਪਿਤਰਂ ਕਾਸਿਰਾਜਾਨਂ ਵਨ੍ਦਥ, ਅਜ੍ਜੇਵ ਸੇਤਚ੍ਛਤ੍ਤਂ ਲਭਿਸ੍ਸਥਾ’’ਤਿ ਆਹਂਸੁ.

ਮਹਾਸਤ੍ਤੋ ਨਗਰਂ ਪਦਕ੍ਖਿਣਂ ਕਰੋਨ੍ਤੋ ਆਰਾਮਰਾਮਣੇਯ੍ਯਕਵਨਪੋਕ੍ਖਰਣਿਭੂਮਿਰਾਮਣੇਯ੍ਯਕਪਾਸਾਦਰਾਮਣੇਯ੍ਯਕਾਦੀਨਿ ਦਿਸ੍ਵਾ ਚਿਨ੍ਤੇਸਿ ‘‘ਮਮ ਪਿਤਾ ਮਂ ਏਤ੍ਤਕਂ ਕਾਲਂ ਬਨ੍ਧਨਾਗਾਰੇ ਵਸਾਪੇਸਿ. ਏਵਰੂਪਂ ਅਲਙ੍ਕਤਨਗਰਂ ਦਟ੍ਠੁਂ ਨਾਦਾਸਿ, ਕੋ ਨੁ ਖੋ ਮਯ੍ਹਂ ਦੋਸੋ’’ਤਿ ਅਮਚ੍ਚੇ ਪੁਚ੍ਛਿ. ‘‘ਦੇਵ, ਨਤ੍ਥਿ ਤੁਮ੍ਹਾਕਂ ਦੋਸੋ, ਤੁਮ੍ਹਾਕਂ ਪਨ ਦ੍ਵੇਭਾਤਿਕੇ ਏਕਾ ਯਕ੍ਖਿਨੀ ਖਾਦਿ, ਤੇਨ ਵੋ ਪਿਤਾ ਅਯੋਘਰੇ ਵਸਾਪੇਸਿ, ਅਯੋਘਰੇਨ ਜੀਵਿਤਂ ਤੁਮ੍ਹਾਕਂ ਲਦ੍ਧ’’ਨ੍ਤਿ. ਸੋ ਤੇਸਂ ਵਚਨਂ ਸੁਤ੍ਵਾ ਚਿਨ੍ਤੇਸਿ ‘‘ਅਹਂ ਦਸ ਮਾਸੇ ਲੋਹਕੁਮ੍ਭਿਨਿਰਯੇ ਵਿਯ ਚ ਗੂਥਨਿਰਯੇ ਵਿਯ ਚ ਮਾਤੁਕੁਚ੍ਛਿਮ੍ਹਿ ਵਸਿਤ੍ਵਾ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਕਾਲਤੋ ਪਟ੍ਠਾਯ ਸੋਲ਼ਸ ਵਸ੍ਸਾਨਿ ਏਤਸ੍ਮਿਂ ਬਨ੍ਧਨਾਗਾਰੇ ਵਸਿਂ, ਬਹਿ ਓਲੋਕੇਤੁਮ੍ਪਿ ਨ ਲਭਿਂ, ਉਸ੍ਸਦਨਿਰਯੇ ਖਿਤ੍ਤੋ ਵਿਯ ਅਹੋਸਿਂ, ਯਕ੍ਖਿਨਿਯਾ ਹਤ੍ਥਤੋ ਮੁਤ੍ਤੋਪਿ ਪਨਾਹਂ ਨੇਵ ਅਜਰੋ, ਨ ਅਮਰੋ ਹੋਮਿ, ਕਿਂ ਮੇ ਰਜ੍ਜੇਨ, ਰਜ੍ਜੇ ਠਿਤਕਾਲਤੋ ਪਟ੍ਠਾਯ ਦੁਨ੍ਨਿਕ੍ਖਮਨਂ ਹੋਤਿ, ਅਜ੍ਜੇਵ ਮਮ ਪਿਤਰਂ ਪਬ੍ਬਜ੍ਜਂ ਅਨੁਜਾਨਾਪੇਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਪਬ੍ਬਜਿਸ੍ਸਾਮੀ’’ਤਿ. ਸੋ ਨਗਰਂ ਪਦਕ੍ਖਿਣਂ ਕਤ੍ਵਾ ਰਾਜਕੁਲਂ ਪਵਿਸਿਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ਅਟ੍ਠਾਸਿ.

ਰਾਜਾ ਤਸ੍ਸ ਸਰੀਰਸੋਭਂ ਓਲੋਕੇਤ੍ਵਾ ਬਲਵਸਿਨੇਹੇਨ ਅਮਚ੍ਚੇ ਓਲੋਕੇਸਿ. ਤੇ ‘‘ਕਿਂ ਕਰੋਮ, ਦੇਵਾ’’ਤਿ ਵਦਿਂਸੁ. ਪੁਤ੍ਤਂ ਮੇ ਰਤਨਰਾਸਿਮ੍ਹਿ ਠਪੇਤ੍ਵਾ ਤੀਹਿ ਸਙ੍ਖੇਹਿ ਅਭਿਸਿਞ੍ਚਿਤ੍ਵਾ ਕਞ੍ਚਨਮਾਲਂ ਸੇਤਚ੍ਛਤ੍ਤਂ ਉਸ੍ਸਾਪੇਥਾਤਿ. ਮਹਾਸਤ੍ਤੋ ਪਿਤਰਂ ਵਨ੍ਦਿਤ੍ਵਾ ‘‘ਨ ਮਯ੍ਹਂ ਰਜ੍ਜੇਨਤ੍ਥੋ, ਅਹਂ ਪਬ੍ਬਜਿਸ੍ਸਾਮਿ, ਪਬ੍ਬਜ੍ਜਂ ਮੇ ਅਨੁਜਾਨਾਥਾ’’ਤਿ ਆਹ. ਤਾਤ ਰਜ੍ਜਂ ਪਟਿਕ੍ਖਿਪਿਤ੍ਵਾ ਕਿਂਕਾਰਣਾ ਪਬ੍ਬਜਿਸ੍ਸਸੀਤਿ. ‘‘ਦੇਵ ਅਹਂ ਮਾਤੁਕੁਚ੍ਛਿਮ੍ਹਿ ਦਸ ਮਾਸੇ ਗੂਥਨਿਰਯੇ ਵਿਯ ਵਸਿਤ੍ਵਾ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤੋ ਯਕ੍ਖਿਨਿਭਯੇਨ ਸੋਲ਼ਸ ਵਸ੍ਸਾਨਿ ਬਨ੍ਧਨਾਗਾਰੇ ਵਸਨ੍ਤੋ ਬਹਿ ਓਲੋਕੇਤੁਮ੍ਪਿ ਨ ਅਲਭਿਂ, ਉਸ੍ਸਦਨਿਰਯੇ ਖਿਤ੍ਤੋ ਵਿਯ ਅਹੋਸਿਂ, ਯਕ੍ਖਿਨਿਯਾ ਹਤ੍ਥਤੋ ਮੁਤ੍ਤੋਮ੍ਹੀਤਿਪਿ ਅਜਰੋ ਅਮਰੋ ਨ ਹੋਮਿ. ਮਚ੍ਚੁ ਨਾਮੇਸ ਨ ਸਕ੍ਕਾ ਕੇਨਚਿ ਜਿਨਿਤੁਂ, ਭਵੇ ਉਕ੍ਕਣ੍ਠਿਤੋਮ੍ਹਿ, ਯਾਵ ਮੇ ਬ੍ਯਾਧਿਜਰਾਮਰਣਾਨਿ ਨਾਗਚ੍ਛਨ੍ਤਿ, ਤਾਵਦੇਵ ਪਬ੍ਬਜਿਤ੍ਵਾ ਧਮ੍ਮਂ ਚਰਿਸ੍ਸਾਮਿ, ਅਲਂ ਮੇ ਰਜ੍ਜੇਨ, ਅਨੁਜਾਨਾਥ ਮਂ, ਦੇਵਾ’’ਤਿ ਵਤ੍ਵਾ ਪਿਤੁ ਧਮ੍ਮਂ ਦੇਸੇਨ੍ਤੋ ਆਹ –

੩੬੩.

‘‘ਯਮੇਕਰਤ੍ਤਿਂ ਪਠਮਂ, ਗਬ੍ਭੇ ਵਸਤਿ ਮਾਣਵੋ;

ਅਬ੍ਭੁਟ੍ਠਿਤੋਵ ਸੋ ਯਾਤਿ, ਸ ਗਚ੍ਛਂ ਨ ਨਿਵਤ੍ਤਤਿ.

੩੬੪.

‘‘ਨ ਯੁਜ੍ਝਮਾਨਾ ਨ ਬਲੇਨਵਸ੍ਸਿਤਾ, ਨਰਾ ਨ ਜੀਰਨ੍ਤਿ ਨ ਚਾਪਿ ਮੀਯਰੇ;

ਸਬ੍ਬਂ ਹਿਦਂ ਜਾਤਿਜਰਾਯੁਪਦ੍ਦੁਤਂ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੬੫.

‘‘ਚਤੁਰਙ੍ਗਿਨਿਂ ਸੇਨਂ ਸੁਭਿਂਸਰੂਪਂ, ਜਯਨ੍ਤਿ ਰਟ੍ਠਾਧਿਪਤੀ ਪਸਯ੍ਹ;

ਨ ਮਚ੍ਚੁਨੋ ਜਯਿਤੁਮੁਸ੍ਸਹਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੬੬.

‘‘ਹਤ੍ਥੀਹਿ ਅਸ੍ਸੇਹਿ ਰਥੇਹਿ ਪਤ੍ਤਿਭਿ, ਪਰਿਵਾਰਿਤਾ ਮੁਚ੍ਚਰੇ ਏਕਚ੍ਚੇਯ੍ਯਾ;

ਨ ਮਚ੍ਚੁਨੋ ਮੁਚ੍ਚਿਤੁਮੁਸ੍ਸਹਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੬੭.

‘‘ਹਤ੍ਥੀਹਿ ਅਸ੍ਸੇਹਿ ਰਥੇਹਿ ਪਤ੍ਤਿਭਿ, ਸੂਰਾ ਪਭਞ੍ਜਨ੍ਤਿ ਪਧਂਸਯਨ੍ਤਿ;

ਨ ਮਚ੍ਚੁਨੋ ਭਞ੍ਜਿਤੁਮੁਸ੍ਸਹਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੬੮.

‘‘ਮਤ੍ਤਾ ਗਜਾ ਭਿਨ੍ਨਗਲ਼ਾ ਪਭਿਨ੍ਨਾ, ਨਗਰਾਨਿ ਮਦ੍ਦਨ੍ਤਿ ਜਨਂ ਹਨਨ੍ਤਿ;

ਨ ਮਚ੍ਚੁਨੋ ਮਦ੍ਦਿਤੁਮੁਸ੍ਸਹਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੬੯.

‘‘ਇਸ੍ਸਾਸਿਨੋ ਕਤਹਤ੍ਥਾਪਿ ਵੀਰਾ, ਦੂਰੇਪਾਤੀ ਅਕ੍ਖਣਵੇਧਿਨੋਪਿ;

ਨ ਮਚ੍ਚੁਨੋ ਵਿਜ੍ਝਿਤੁਮੁਸ੍ਸਹਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੭੦.

‘‘ਸਰਾਨਿ ਖੀਯਨ੍ਤਿ ਸਸੇਲਕਾਨਨਾ, ਸਬ੍ਬਂ ਹਿਦਂ ਖੀਯਤਿ ਦੀਘਮਨ੍ਤਰਂ;

ਸਬ੍ਬਂ ਹਿਦਂ ਭਞ੍ਜਰੇ ਕਾਲਪਰਿਯਾਯਂ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੭੧.

‘‘ਸਬ੍ਬੇਸਮੇਵਞ੍ਹਿ ਨਰਾਨ ਨਾਰਿਨਂ, ਚਲਾਚਲਂ ਪਾਣਭੁਨੋਧ ਜੀਵਿਤਂ;

ਪਟੋਵ ਧੁਤ੍ਤਸ੍ਸ, ਦੁਮੋਵ ਕੂਲਜੋ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੭੨.

‘‘ਦੁਮਪ੍ਫਲਾਨੇਵ ਪਤਨ੍ਤਿ ਮਾਣਵਾ, ਦਹਰਾ ਚ ਵੁਦ੍ਧਾ ਚ ਸਰੀਰਭੇਦਾ;

ਨਾਰਿਯੋ ਨਰਾ ਮਜ੍ਝਿਮਪੋਰਿਸਾ ਚ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੭੩.

‘‘ਨਾਯਂ ਵਯੋ ਤਾਰਕਰਾਜਸਨ੍ਨਿਭੋ, ਯਦਬ੍ਭਤੀਤਂ ਗਤਮੇਵ ਦਾਨਿ ਤਂ;

ਜਿਣ੍ਣਸ੍ਸ ਹੀ ਨਤ੍ਥਿ ਰਤੀ ਕੁਤੋ ਸੁਖਂ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੭੪.

‘‘ਯਕ੍ਖਾ ਪਿਸਾਚਾ ਅਥਵਾਪਿ ਪੇਤਾ, ਕੁਪਿਤਾ ਤੇ ਅਸ੍ਸਸਨ੍ਤਿ ਮਨੁਸ੍ਸੇ;

ਨ ਮਚ੍ਚੁਨੋ ਅਸ੍ਸਸਿਤੁਸ੍ਸਹਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੭੫.

‘‘ਯਕ੍ਖੇ ਪਿਸਾਚੇ ਅਥਵਾਪਿ ਪੇਤੇ, ਕੁਪਿਤੇਪਿ ਤੇ ਨਿਜ੍ਝਪਨਂ ਕਰੋਨ੍ਤਿ;

ਨ ਮਚ੍ਚੁਨੋ ਨਿਜ੍ਝਪਨਂ ਕਰੋਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੭੬.

‘‘ਅਪਰਾਧਕੇ ਦੂਸਕੇ ਹੇਠਕੇ ਚ, ਰਾਜਾਨੋ ਦਣ੍ਡੇਨ੍ਤਿ ਵਿਦਿਤ੍ਵਾਨ ਦੋਸਂ;

ਨ ਮਚ੍ਚੁਨੋ ਦਣ੍ਡਯਿਤੁਸ੍ਸਹਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੭੭.

‘‘ਅਪਰਾਧਕਾ ਦੂਸਕਾ ਹੇਠਕਾ ਚ, ਲਭਨ੍ਤਿ ਤੇ ਰਾਜਿਨੋ ਨਿਜ੍ਝਪੇਤੁਂ;

ਨ ਮਚ੍ਚੁਨੋ ਨਿਜ੍ਝਪਨਂ ਕਰੋਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੭੮.

‘‘ਨ ਖਤ੍ਤਿਯੋਤਿ ਨ ਚ ਬ੍ਰਾਹ੍ਮਣੋਤਿ, ਨ ਅਡ੍ਢਕਾ ਬਲਵਾ ਤੇਜਵਾਪਿ;

ਨ ਮਚ੍ਚੁਰਾਜਸ੍ਸ ਅਪੇਕ੍ਖਮਤ੍ਥਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੭੯.

‘‘ਸੀਹਾ ਚ ਬ੍ਯਗ੍ਘਾ ਚ ਅਥੋਪਿ ਦੀਪਿਯੋ, ਪਸਯ੍ਹ ਖਾਦਨ੍ਤਿ ਵਿਪ੍ਫਨ੍ਦਮਾਨਂ;

ਨ ਮਚ੍ਚੁਨੋ ਖਾਦਿਤੁਮੁਸ੍ਸਹਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੮੦.

‘‘ਮਾਯਾਕਾਰਾ ਰਙ੍ਗਮਜ੍ਝੇ ਕਰੋਨ੍ਤਾ, ਮੋਹੇਨ੍ਤਿ ਚਕ੍ਖੂਨਿ ਜਨਸ੍ਸ ਤਾਵਦੇ;

ਨ ਮਚ੍ਚੁਨੋ ਮੋਹਯਿਤੁਸ੍ਸਹਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੮੧.

‘‘ਆਸੀਵਿਸਾ ਕੁਪਿਤਾ ਉਗ੍ਗਤੇਜਾ, ਡਂਸਨ੍ਤਿ ਮਾਰੇਨ੍ਤਿਪਿ ਤੇ ਮਨੁਸ੍ਸੇ;

ਨ ਮਚ੍ਚੁਨੋ ਡਂਸਿਤੁਮੁਸ੍ਸਹਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੮੨.

‘‘ਆਸੀਵਿਸਾ ਕੁਪਿਤਾ ਯਂ ਡਂਸਨ੍ਤਿ, ਤਿਕਿਚ੍ਛਕਾ ਤੇਸ ਵਿਸਂ ਹਨਨ੍ਤਿ;

ਨ ਮਚ੍ਚੁਨੋ ਦਟ੍ਠਵਿਸਂ ਹਨਨ੍ਤਿ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੮੩.

‘‘ਧਮ੍ਮਨ੍ਤਰੀ ਵੇਤ੍ਤਰਣੀ ਚ ਭੋਜੋ, ਵਿਸਾਨਿ ਹਨ੍ਤ੍ਵਾਨ ਭੁਜਙ੍ਗਮਾਨਂ;

ਸੁਯ੍ਯਨ੍ਤਿ ਤੇ ਕਾਲਕਤਾ ਤਥੇਵ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੮੪.

‘‘ਵਿਜ੍ਜਾਧਰਾ ਘੋਰਮਧੀਯਮਾਨਾ, ਅਦਸ੍ਸਨਂ ਓਸਧੇਹਿ ਵਜਨ੍ਤਿ;

ਨ ਮਚ੍ਚੁਰਾਜਸ੍ਸ ਵਜਨ੍ਤਦਸ੍ਸਨਂ, ਤਂ ਮੇ ਮਤੀ ਹੋਤਿ ਚਰਾਮਿ ਧਮ੍ਮਂ.

੩੮੫.

‘‘ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿਂ, ਧਮ੍ਮੋ ਸੁਚਿਣ੍ਣੋ ਸੁਖਮਾਵਹਾਤਿ;

ਏਸਾਨਿਸਂਸੋ ਧਮ੍ਮੇ ਸੁਚਿਣ੍ਣੇ, ਨ ਦੁਗ੍ਗਤਿਂ ਗਚ੍ਛਤਿ ਧਮ੍ਮਚਾਰੀ.

੩੮੬.

‘‘ਨ ਹਿ ਧਮ੍ਮੋ ਅਧਮ੍ਮੋ ਚ, ਉਭੋ ਸਮਵਿਪਾਕਿਨੋ;

ਅਧਮ੍ਮੋ ਨਿਰਯਂ ਨੇਤਿ, ਧਮ੍ਮੋ ਪਾਪੇਤਿ ਸੁਗ੍ਗਤਿ’’ਨ੍ਤਿ.

ਤਤ੍ਥ ਯਮੇਕਰਤ੍ਤਿਨ੍ਤਿ ਯੇਭੁਯ੍ਯੇਨ ਸਤ੍ਤਾ ਮਾਤੁਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਨ੍ਤਾ ਰਤ੍ਤਿਯਂਯੇਵ ਗਣ੍ਹਨ੍ਤਿ, ਤਸ੍ਮਾ ਏਵਮਾਹ. ਅਯਂ ਪਨੇਤ੍ਥ ਅਤ੍ਥੋ – ਯਂ ਏਕਰਤ੍ਤਿਂ ਵਾ ਦਿਵਾ ਵਾ ਪਠਮਮੇਵ ਪਟਿਸਨ੍ਧਿਂ ਗਣ੍ਹਿਤ੍ਵਾ ਮਾਤੁਕੁਚ੍ਛਿਸਙ੍ਖਾਤੇ ਗਬ੍ਭੇ ਵਸਤਿ. ਮਾਣਵੋਤਿ ਸਤ੍ਤੋ ਕਲਲਭਾਵੇਨ ਪਤਿਟ੍ਠਾਤਿ. ਅਬ੍ਭੁਟ੍ਠਿਤੋਵ ਸੋ ਯਾਤੀਤਿ ਸੋ ਮਾਣਵੋ ਯਥਾ ਨਾਮ ਵਲਾਹਕਸਙ੍ਖਾਤੋ ਅਬ੍ਭੋ ਉਟ੍ਠਿਤੋ ਨਿਬ੍ਬਤ੍ਤੋ ਵਾਯੁਵੇਗਾਹਤੋ ਪਟਿਗਚ੍ਛਤਿ, ਤਥੇਵ –

‘‘ਪਠਮਂ ਕਲਲਂ ਹੋਤਿ, ਕਲਲਾ ਹੋਤਿ ਅਬ੍ਬੁਦਂ;

ਅਬ੍ਬੁਦਾ ਜਾਯਤੇ ਪੇਸਿ, ਪੇਸਿ ਨਿਬ੍ਬਤ੍ਤਤੀ ਘਨੋ;

ਘਨਾ ਪਸਾਖਾ ਜਾਯਨ੍ਤਿ, ਕੇਸਾ ਲੋਮਾ ਨਖਾਪਿ ਚ.

‘‘ਯਞ੍ਚਸ੍ਸ ਭੁਞ੍ਜਤੀ ਮਾਤਾ, ਅਨ੍ਨਂ ਪਾਨਞ੍ਚ ਭੋਜਨਂ;

ਤੇਨ ਸੋ ਤਤ੍ਥ ਯਾਪੇਤਿ, ਮਾਤੁਕੁਚ੍ਛਿਗਤੋ ਨਰੋਤਿ. (ਸਂ. ਨਿ. ੧.੨੩੫);

ਇਮਂ ਮਾਤੁਕੁਚ੍ਛਿਯਂ ਕਲਲਾਦਿਭਾਵਂ, ਮਾਤੁਕੁਚ੍ਛਿਤੋ ਚ ਨਿਕ੍ਖਨ੍ਤੋ ਮਨ੍ਦਦਸਕਾਦਿਭਾਵਂ ਆਪਜ੍ਜਮਾਨੋ ਸਤਤਂ ਸਮਿਤਂ ਗਚ੍ਛਤਿ. ਸ ਗਚ੍ਛਂ ਨ ਨਿਵਤ੍ਤਤੀਤਿ ਸਚਾਯਂ ਏਵਂ ਗਚ੍ਛਨ੍ਤੋ ਪੁਨ ਅਬ੍ਬੁਦਤੋ ਕਲਲਭਾਵਂ, ਪੇਸਿਆਦਿਤੋ ਵਾ ਅਬ੍ਬੁਦਾਦਿਭਾਵਂ, ਖਿਡ੍ਡਾਦਸਕਤੋ ਮਨ੍ਦਦਸਕਭਾਵਂ, ਵਣ੍ਣਦਸਕਾਦਿਤੋ ਵਾ ਖਿਡ੍ਡਾਦਸਕਾਦਿਭਾਵਂ ਪਾਪੁਣਿਤੁਂ ਨ ਨਿਵਤ੍ਤਤਿ. ਯਥਾ ਪਨ ਸੋ ਵਲਾਹਕੋ ਵਾਤਵੇਗੇਨ ਸਂਚੁਣ੍ਣਿਯਮਾਨੋ ‘‘ਅਹਂ ਅਸੁਕਟ੍ਠਾਨੇ ਨਾਮ ਉਟ੍ਠਿਤੋ ਪੁਨ ਨਿਵਤ੍ਤਿਤ੍ਵਾ ਤਤ੍ਥੇਵ ਗਨ੍ਤ੍ਵਾ ਪਕਤਿਭਾਵੇਨ ਠਸ੍ਸਾਮੀ’’ਤਿ ਨ ਲਭਤਿ, ਯਂ ਦਿਸਂ ਗਤਂ, ਤਂ ਗਤਮੇਵ, ਯਂ ਅਨ੍ਤਰਹਿਤਂ, ਤਂ ਅਨ੍ਤਰਹਿਤਮੇਵ ਹੋਤਿ, ਤਥਾ ਸੋਪਿ ਕਲਲਾਦਿਭਾਵੇਨ ਗਚ੍ਛਮਾਨੋ ਗਚ੍ਛਤੇਵ, ਤਸ੍ਮਿਂ ਤਸ੍ਮਿਂ ਕੋਟ੍ਠਾਸੇ ਸਙ੍ਖਾਰਾ ਪੁਰਿਮਾਨਂ ਪੁਰਿਮਾਨਂ ਪਚ੍ਚਯਾ ਹੁਤ੍ਵਾ ਪਚ੍ਛਤੋ ਅਨਿਵਤ੍ਤਿਤ੍ਵਾ ਤਤ੍ਥ ਤਤ੍ਥੇਵ ਭਿਜ੍ਜਨ੍ਤਿ, ਜਰਾਕਾਲੇ ਸਙ੍ਖਾਰਾ ‘‘ਅਮ੍ਹੇਹਿ ਏਸ ਪੁਬ੍ਬੇ ਯੁਵਾ ਥਾਮਸਮ੍ਪਨ੍ਨੋ ਕਤੋ, ਪੁਨ ਨਂ ਨਿਵਤ੍ਤਿਤ੍ਵਾ ਤਤ੍ਥੇਵ ਕਰਿਸ੍ਸਾਮਾ’’ਤਿ ਨ ਲਭਨ੍ਤਿ, ਤਤ੍ਥ ਤਤ੍ਥੇਵ ਅਨ੍ਤਰਧਾਯਨ੍ਤੀਤਿ ਦਸ੍ਸੇਤਿ.

ਨ ਯੁਜ੍ਝਮਾਨਾਤਿ ਉਭਤੋ ਬ੍ਯੂਲ਼੍ਹੇ ਸਙ੍ਗਾਮੇ ਯੁਜ੍ਝਨ੍ਤਾ. ਨ ਬਲੇਨਵਸ੍ਸਿਤਾਤਿ ਨ ਕਾਯਬਲੇਨ ਵਾ ਯੋਧਬਲੇਨ ਵਾ ਉਪਗਤਾ ਸਮਨ੍ਨਾਗਤਾ. ਨ ਜੀਰਨ੍ਤੀਤਿ ਪੁਰਿਮ-ਨ-ਕਾਰਂ ਆਹਰਿਤ੍ਵਾ ਏਵਰੂਪਾਪਿ ਨਰਾ ਨ ਜੀਰਨ੍ਤਿ ਨ ਚਾਪਿ ਨ ਮੀਯਰੇਤਿ ਅਤ੍ਥੋ ਵੇਦਿਤਬ੍ਬੋ. ਸਬ੍ਬਂ ਹਿਦਨ੍ਤਿ ਮਹਾਰਾਜ, ਸਬ੍ਬਮੇਵ ਇਦਂ ਪਾਣਮਣ੍ਡਲਂ ਮਹਾਯਨ੍ਤੇਨ ਪੀਲ਼ਿਯਮਾਨਾ ਉਚ੍ਛੁਘਟਿਕਾ ਵਿਯ ਜਾਤਿਯਾ ਚ ਜਰਾਯ ਚ ਉਪਦ੍ਦੁਤਂ ਨਿਚ੍ਚਂ ਪੀਲ਼ਿਤਂ. ਤਂ ਮੇ ਮਤੀ ਹੋਤੀਤਿ ਤੇਨ ਕਾਰਣੇਨ ਮਮ ‘‘ਪਬ੍ਬਜਿਤ੍ਵਾ ਧਮ੍ਮਂ ਚਰਾਮੀ’’ਤਿ ਮਤਿ ਹੋਤਿ ਚਿਤ੍ਤਂ ਉਪ੍ਪਜ੍ਜਤਿ.

ਚਤੁਰਙ੍ਗਿਨਿਨ੍ਤਿ ਹਤ੍ਥਿਆਦੀਹਿ ਚਤੁਰਙ੍ਗੇਹਿ ਸਮਨ੍ਨਾਗਤਂ. ਸੇਨਂ ਸੁਭਿਂਸਰੂਪਨ੍ਤਿ ਸੁਟ੍ਠੁ ਭਿਂਸਨਕਜਾਤਿਕਂ ਸੇਨਂ. ਜਯਨ੍ਤੀਤਿ ਕਦਾਚਿ ਏਕਚ੍ਚੇ ਰਾਜਾਨੋ ਅਤ੍ਤਨੋ ਸੇਨਾਯ ਜਯਨ੍ਤਿ. ਨ ਮਚ੍ਚੁਨੋਤਿ ਤੇਪਿ ਰਾਜਾਨੋ ਮਹਾਸੇਨਸ੍ਸ ਮਚ੍ਚੁਨੋ ਸੇਨਂ ਜਯਿਤੁਂ ਨ ਉਸ੍ਸਹਨ੍ਤਿ, ਨ ਬ੍ਯਾਧਿਜਰਾਮਰਣਾਨਿ ਮਦ੍ਦਿਤੁਂ ਸਕ੍ਕੋਨ੍ਤਿ. ਮੁਚ੍ਚਰੇ ਏਕਚ੍ਚੇਯ੍ਯਾਤਿ ਏਤੇਹਿ ਹਤ੍ਥਿਆਦੀਹਿ ਪਰਿਵਾਰਿਤਾ ਏਕਚ੍ਚੇ ਪਚ੍ਚਾਮਿਤ੍ਤਾਨਂ ਹਤ੍ਥਤੋ ਮੁਚ੍ਚਨ੍ਤਿ, ਮਚ੍ਚੁਨੋ ਪਨ ਸਨ੍ਤਿਕਾ ਮੁਚ੍ਚਿਤੁਂ ਨ ਸਕ੍ਕੋਨ੍ਤਿ. ਪਭਞ੍ਜਨ੍ਤੀਤਿ ਏਤੇਹਿ ਹਤ੍ਥਿਆਦੀਹਿ ਪਚ੍ਚਤ੍ਥਿਕਰਾਜੂਨਂ ਨਗਰਾਨਿ ਪਭਞ੍ਜਨ੍ਤਿ. ਪਧਂਸਯਨ੍ਤੀਤਿ ਮਹਾਜਨਂ ਧਂਸੇਨ੍ਤਾ ਪਧਂਸੇਨ੍ਤਾ ਜੀਵਿਤਕ੍ਖਯਂ ਪਾਪੇਨ੍ਤਿ. ਨ ਮਚ੍ਚੁਨੋਤਿ ਤੇਪਿ ਮਰਣਕਾਲੇ ਪਤ੍ਤੇ ਮਚ੍ਚੁਨੋ ਭਞ੍ਜਿਤੁਂ ਨ ਸਕ੍ਕੋਨ੍ਤਿ.

ਭਿਨ੍ਨਗਲ਼ਾ ਪਭਿਨ੍ਨਾਤਿ ਤੀਸੁ ਠਾਨੇਸੁ ਪਭਿਨ੍ਨਾ ਹੁਤ੍ਵਾ ਮਦਂ ਗਲ਼ਨ੍ਤਾ, ਪਗ੍ਘਰਿਤਮਦਾਤਿ ਅਤ੍ਥੋ. ਨ ਮਚ੍ਚੁਨੋਤਿ ਤੇਪਿ ਮਹਾਮਚ੍ਚੁਂ ਮਦ੍ਦਿਤੁਂ ਨ ਸਕ੍ਕੋਨ੍ਤਿ. ਇਸ੍ਸਾਸਿਨੋਤਿ ਇਸ੍ਸਾਸਾ ਧਨੁਗ੍ਗਹਾ. ਕਤਹਤ੍ਥਾਤਿ ਸੁਸਿਕ੍ਖਿਤਾ. ਦੂਰੇਪਾਤੀਤਿ ਸਰਂ ਦੂਰੇ ਪਾਤੇਤੁਂ ਸਮਤ੍ਥਾ. ਅਕ੍ਖਣਵੇਧਿਨੋਤਿ ਅਵਿਰਦ੍ਧਵੇਧਿਨੋ, ਵਿਜ੍ਜੁਆਲੋਕੇਨ ਵਿਜ੍ਝਨਸਮਤ੍ਥਾ ਵਾ. ਸਰਾਨੀਤਿ ਅਨੋਤਤ੍ਤਾਦੀਨਿ ਮਹਾਸਰਾਨਿ ਖੀਯਨ੍ਤਿਯੇਵ. ਸਸੇਲਕਾਨਨਾਤਿ ਸਪਬ੍ਬਤਵਨਸਣ੍ਡਾ ਮਹਾਪਥਵੀਪਿ ਖੀਯਤਿ. ਸਬ੍ਬਂ ਹਿਦਨ੍ਤਿ ਸਬ੍ਬਮਿਦਂ ਸਙ੍ਖਾਰਗਤਂ ਦੀਘਮਨ੍ਤਰਂ ਠਤ੍ਵਾ ਖੀਯਤੇਵ. ਕਪ੍ਪੁਟ੍ਠਾਨਗ੍ਗਿਂ ਪਤ੍ਵਾ ਮਹਾਸਿਨੇਰੁਪਿ ਅਗ੍ਗਿਮੁਖੇ ਮਧੁਸਿਤ੍ਥਕਂ ਵਿਯ ਵਿਲੀਯਤੇਵ, ਅਣੁਮਤ੍ਤੋਪਿ ਸਙ੍ਖਾਰੋ ਠਾਤੁਂ ਨ ਸਕ੍ਕੋਤਿ. ਕਾਲਪਰਿਯਾਯਨ੍ਤਿ ਕਾਲਪਰਿਯਾਯਂ ਨਸ੍ਸਨਕਾਲਵਾਰਂ ਪਤ੍ਵਾ ਸਬ੍ਬਂ ਭਞ੍ਜਰੇ, ਸਬ੍ਬਂ ਸਙ੍ਖਾਰਗਤਂ ਭਿਜ੍ਜਤੇਵ. ਤਸ੍ਸ ਪਕਾਸਨਤ੍ਥਂ ਸਤ੍ਤਸੂਰਿਯਸੁਤ੍ਤਂ (ਅ. ਨਿ. ੭.੬੬) ਆਹਰਿਤਬ੍ਬਂ.

ਚਲਾਚਲਨ੍ਤਿ ਚਞ੍ਚਲਂ ਸਕਭਾਵੇਨ ਠਾਤੁਂ ਅਸਮਤ੍ਥਂ ਨਾਨਾਭਾਵਵਿਨਾਭਾਵਸਭਾਵਮੇਵ. ਪਾਣਭੁਨੋਧ ਜੀਵਿਤਨ੍ਤਿ ਇਧ ਲੋਕੇ ਇਮੇਸਂ ਪਾਣਭੂਤਾਨਂ ਜੀਵਿਤਂ. ਪਟੋਵ ਧੁਤ੍ਤਸ੍ਸ, ਦੁਮੋਵ ਕੂਲਜੋਤਿ ਸੁਰਧੁਤ੍ਤੋ ਹਿ ਸੁਰਂ ਦਿਸ੍ਵਾਵ ਉਦਰੇ ਬਦ੍ਧਂ ਸਾਟਕਂ ਦਤ੍ਵਾ ਪਿਵਤੇਵ, ਨਦੀਕੂਲੇ ਜਾਤਦੁਮੋਵ ਕੂਲੇ ਲੁਜ੍ਜਮਾਨੇ ਲੁਜ੍ਜਤਿ, ਯਥਾ ਏਸ ਪਟੋ ਚ ਦੁਮੋ ਚ ਚਞ੍ਚਲੋ, ਏਵਂ ਸਤ੍ਤਾਨਂ ਜੀਵਿਤਂ, ਦੇਵਾਤਿ. ਦੁਮਪ੍ਫਲਾਨੇਵਾਤਿ ਯਥਾ ਪਕ੍ਕਾਨਿ ਫਲਾਨਿ ਵਾਤਾਹਤਾਨਿ ਦੁਮਗ੍ਗਤੋ ਭੂਮਿਯਂ ਪਤਨ੍ਤਿ, ਤਥੇਵਿਮੇ ਮਾਣਵਾ ਜਰਾਵਾਤਾਹਤਾ ਜੀਵਿਤਾ ਗਲ਼ਿਤ੍ਵਾ ਮਰਣਪਥਵਿਯਂ ਪਤਨ੍ਤਿ. ਦਹਰਾਤਿ ਅਨ੍ਤਮਸੋ ਕਲਲਭਾਵੇ ਠਿਤਾਪਿ. ਮਜ੍ਝਿਮਪੋਰਿਸਾਤਿ ਨਾਰੀਨਰਾਨਂ ਮਜ੍ਝੇ ਠਿਤਾ ਉਭਤੋਬ੍ਯਞ੍ਜਨਕਨਪੁਂਸਕਾ.

ਤਾਰਕਰਾਜਸਨ੍ਨਿਭੋਤਿ ਯਥਾ ਤਾਰਕਰਾਜਾ ਕਾਲ਼ਪਕ੍ਖੇ ਖੀਣੋ, ਪੁਨ ਜੁਣ੍ਹਪਕ੍ਖੇ ਪੂਰਤਿ, ਨ ਏਵਂ ਸਤ੍ਤਾਨਂ ਵਯੋ. ਸਤ੍ਤਾਨਞ੍ਹਿ ਯਂ ਅਬ੍ਭਤੀਤਂ, ਗਤਮੇਵ ਦਾਨਿ ਤਂ, ਨ ਤਸ੍ਸ ਪੁਨਾਗਮਨਂ ਅਤ੍ਥਿ. ਕੁਤੋ ਸੁਖਨ੍ਤਿ ਜਰਾਜਿਣ੍ਣਸ੍ਸ ਕਾਮਗੁਣੇਸੁ ਰਤਿਪਿ ਨਤ੍ਥਿ, ਤੇ ਪਟਿਚ੍ਚ ਉਪ੍ਪਜ੍ਜਨਕਸੁਖਂ ਕੁਤੋਯੇਵ. ਯਕ੍ਖਾਤਿ ਮਹਿਦ੍ਧਿਕਾ ਯਕ੍ਖਾ. ਪਿਸਾਚਾਤਿ ਪਂਸੁਪਿਸਾਚਕਾ. ਪੇਤਾਤਿ ਪੇਤ੍ਤਿਵਿਸਯਿਕਾ. ਅਸ੍ਸਸਨ੍ਤੀਤਿ ਅਸ੍ਸਾਸਵਾਤੇਨ ਉਪਹਨਨ੍ਤਿ, ਆਵਿਸਨ੍ਤੀਤਿ ਵਾ ਅਤ੍ਥੋ. ਨ ਮਚ੍ਚੁਨੋਤਿ ਮਚ੍ਚੁਂ ਪਨ ਤੇਪਿ ਅਸ੍ਸਾਸੇਨ ਉਪਹਨਿਤੁਂ ਵਾ ਆਵਿਸਿਤੁਂ ਵਾ ਨ ਸਕ੍ਕੋਨ੍ਤਿ. ਨਿਜ੍ਝਪਨਂ ਕਰੋਨ੍ਤੀਤਿ ਬਲਿਕਮ੍ਮਵਸੇਨ ਖਮਾਪੇਨ੍ਤਿ ਪਸਾਦੇਨ੍ਤਿ. ਅਪਰਾਧਕੇਤਿ ਰਾਜਾਪਰਾਧਕਾਰਕੇ. ਦੂਸਕੇਤਿ ਰਜ੍ਜਦੂਸਕੇ. ਹੇਠਕੇਤਿ ਸਨ੍ਧਿਚ੍ਛੇਦਾਦੀਹਿ ਲੋਕਵਿਹੇਠਕੇ. ਰਾਜਾਨੋਤਿ ਰਾਜਾਨੋ. ਵਿਦਿਤ੍ਵਾਨ ਦੋਸਨ੍ਤਿ ਦੋਸਂ ਜਾਨਿਤ੍ਵਾ ਯਥਾਨੁਰੂਪੇਨ ਦਣ੍ਡੇਨ ਦਣ੍ਡੇਨ੍ਤੀਤਿ ਅਤ੍ਥੋ. ਨ ਮਚ੍ਚੁਨੋਤਿ ਤੇਪਿ ਮਚ੍ਚੁਂ ਦਣ੍ਡਯਿਤੁਂ ਨ ਸਕ੍ਕੋਨ੍ਤਿ.

ਨਿਜ੍ਝਪੇਤੁਨ੍ਤਿ ਸਕ੍ਖੀਹਿ ਅਤ੍ਤਨੋ ਨਿਰਪਰਾਧਭਾਵਂ ਪਕਾਸੇਤ੍ਵਾ ਪਸਾਦੇਤੁਂ. ਨ ਅਡ੍ਢਕਾ ਬਲਵਾ ਤੇਜਵਾਪੀਤਿ ‘‘ਇਮੇ ਅਡ੍ਢਾ, ਅਯਂ ਕਾਯਬਲਞਾਣਬਲਾਦੀਹਿ ਬਲਵਾ, ਅਯਂ ਤੇਜਵਾ’’ਤਿ ਏਵਮ੍ਪਿ ਨ ਪਚ੍ਚੁਰਾਜਸ੍ਸ ਅਪੇਕ੍ਖਂ ਅਤ੍ਥਿ, ਏਕਸ੍ਮਿਮ੍ਪਿ ਸਤ੍ਤੇ ਅਪੇਕ੍ਖਂ ਪੇਮਂ ਸਿਨੇਹੋ ਨਤ੍ਥਿ, ਸਬ੍ਬਮੇਵ ਅਭਿਮਦ੍ਦਤੀਤਿ ਦਸ੍ਸੇਤਿ. ਪਸਯ੍ਹਾਤਿ ਬਲਕ੍ਕਾਰੇਨ ਅਭਿਭਵਿਤ੍ਵਾ. ਨ ਮਚ੍ਚੁਨੋਤਿ ਤੇਪਿ ਮਚ੍ਚੁਂ ਖਾਦਿਤੁਂ ਨ ਸਕ੍ਕੋਨ੍ਤਿ. ਕਰੋਨ੍ਤਾਤਿ ਮਾਯਂ ਕਰੋਨ੍ਤਾ. ਮੋਹੇਨ੍ਤੀਤਿ ਅਭੂਤਂ ਭੂਤਂ ਕਤ੍ਵਾ ਦਸ੍ਸੇਨ੍ਤਾ ਮੋਹੇਨ੍ਤਿ. ਉਗ੍ਗਤੇਜਾਤਿ ਉਗ੍ਗਤੇਨ ਵਿਸਤੇਜੇਨ ਸਮਨ੍ਨਾਗਤਾ. ਤਿਕਿਚ੍ਛਕਾਤਿ ਵਿਸਵੇਜ੍ਜਾ. ਧਮ੍ਮਨ੍ਤਰੀ ਵੇਤ੍ਤਰਣੀ ਚ ਭੋਜੋਤਿ ਏਤੇ ਏਵਂਨਾਮਕਾ ਵੇਜ੍ਜਾ. ਘੋਰਮਧੀਯਮਾਨਾਤਿ ਘੋਰਂ ਨਾਮ ਵਿਜ੍ਜਂ ਅਧੀਯਨ੍ਤਾ. ਓਸਧੇਹੀਤਿ ਘੋਰਂ ਵਾ ਗਨ੍ਧਾਰਿਂ ਵਾ ਵਿਜ੍ਜਂ ਸਾਵੇਤ੍ਵਾ ਓਸਧਂ ਆਦਾਯ ਤੇਹਿ ਓਸਧੇਹਿ ਪਚ੍ਚਤ੍ਥਿਕਾਨਂ ਅਦਸ੍ਸਨਂ ਵਜਨ੍ਤਿ.

ਧਮ੍ਮੋਤਿ ਸੁਚਰਿਤਧਮ੍ਮੋ. ਰਕ੍ਖਤੀਤਿ ਯੇਨ ਰਕ੍ਖਿਤੋ, ਤਂ ਪਟਿਰਕ੍ਖਤਿ. ਸੁਖਨ੍ਤਿ ਛਸੁ ਕਾਮਸਗ੍ਗੇਸੁ ਸੁਖਂ ਆਵਹਤਿ. ਪਾਪੇਤੀਤਿ ਪਟਿਸਨ੍ਧਿਵਸੇਨ ਉਪਨੇਤਿ.

ਏਵਂ ਮਹਾਸਤ੍ਤੋ ਚਤੁਵੀਸਤਿਯਾ ਗਾਥਾਹਿ ਪਿਤੁ ਧਮ੍ਮਂ ਦੇਸੇਤ੍ਵਾ ‘‘ਮਹਾਰਾਜ, ਤੁਮ੍ਹਾਕਂ ਰਜ੍ਜਂ ਤੁਮ੍ਹਾਕਮੇਵ ਹੋਤੁ, ਨ ਮਯ੍ਹਂ ਇਮਿਨਾ ਅਤ੍ਥੋ, ਤੁਮ੍ਹੇਹਿ ਪਨ ਸਦ੍ਧਿਂ ਕਥੇਨ੍ਤਮੇਵ ਮਂ ਬ੍ਯਾਧਿਜਰਾਮਰਣਾਨਿ ਉਪਗਚ੍ਛਨ੍ਤਿ, ਤਿਟ੍ਠਥ, ਤੁਮ੍ਹੇ’’ਤਿ ਵਤ੍ਵਾ ਅਯਦਾਮਂ ਛਿਨ੍ਦਿਤ੍ਵਾ ਮਤ੍ਤਹਤ੍ਥੀ ਵਿਯ ਕਞ੍ਚਨਪਞ੍ਜਰਂ ਛਿਨ੍ਦਿਤ੍ਵਾ ਸੀਹਪੋਤਕੋ ਵਿਯ ਕਾਮੇ ਪਹਾਯ ਮਾਤਾਪਿਤਰੋ ਵਨ੍ਦਿਤ੍ਵਾ ਨਿਕ੍ਖਮਿ. ਅਥਸ੍ਸ ਪਿਤਾ ‘‘ਮਮਪਿ ਰਜ੍ਜੇਨਤ੍ਥੋ ਨਤ੍ਥੀ’’ਤਿ ਰਜ੍ਜਂ ਪਹਾਯ ਤੇਨ ਸਦ੍ਧਿਞ੍ਞੇਵ ਨਿਕ੍ਖਮਿ, ਤਸ੍ਮਿਂ ਨਿਕ੍ਖਨ੍ਤੇ ਦੇਵੀਪਿ ਅਮਚ੍ਚਾਪਿ ਬ੍ਰਾਹ੍ਮਣਗਹਪਤਿਕਾਦਯੋਪੀਤਿ ਸਕਲਨਗਰਵਾਸਿਨੋ ਗੇਹਾਨਿ ਛਡ੍ਡੇਤ੍ਵਾ ਨਿਕ੍ਖਮਿਂਸੁ. ਸਮਾਗਮੋ ਮਹਾ ਅਹੋਸਿ, ਪਰਿਸਾ ਦ੍ਵਾਦਸਯੋਜਨਿਕਾ ਜਾਤਾ. ਤਂ ਆਦਾਯ ਮਹਾਸਤ੍ਤੋ ਹਿਮਵਨ੍ਤਂ ਪਾਵਿਸਿ. ਸਕ੍ਕੋ ਤਸ੍ਸ ਨਿਕ੍ਖਨ੍ਤਭਾਵਂ ਞਤ੍ਵਾ ਵਿਸ੍ਸਕਮ੍ਮਂ ਪੇਸੇਤ੍ਵਾ ਦ੍ਵਾਦਸਯੋਜਨਾਯਾਮਂ ਸਤ੍ਤਯੋਜਨਵਿਤ੍ਥਾਰਂ ਅਸ੍ਸਮਪਦਂ ਕਾਰੇਸਿ. ਸਬ੍ਬੇ ਪਬ੍ਬਜਿਤਪਰਿਕ੍ਖਾਰੇ ਪਟਿਯਾਦਾਪੇਸਿ. ਇਤੋ ਪਰਂ ਮਹਾਸਤ੍ਤਸ੍ਸ ਪਬ੍ਬਜ੍ਜਾ ਚ ਓਵਾਦਦਾਨਞ੍ਚ ਬ੍ਰਹ੍ਮਲੋਕਪਰਾਯਣਤਾ ਚ ਪਰਿਸਾਯ ਅਨਪਾਯਗਮਨੀਯਤਾ ਚ ਸਬ੍ਬਾ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇਪਿ ਤਥਾਗਤੋ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ, ਸੇਸਪਰਿਸਾ ਬੁਦ੍ਧਪਰਿਸਾ, ਅਯੋਘਰਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਯੋਘਰਜਾਤਕਵਣ੍ਣਨਾ ਚੁਦ੍ਦਸਮਾ.

ਜਾਤਕੁਦ੍ਦਾਨਂ –

ਮਾਤਙ੍ਗੋ ਚਿਤ੍ਤਸਮ੍ਭੂਤੋ, ਸਿਵਿ ਸਿਰੀ ਚ ਰੋਹਣਂ;

ਹਂਸੋ ਸਤ੍ਤਿਗੁਮ੍ਬੋ ਭਲ੍ਲਾ, ਸੋਮਨਸ੍ਸਂ ਚਮ੍ਪੇਯ੍ਯਕਂ.

ਪਲੋਭਂ ਪਞ੍ਚਪਣ੍ਡਿਤਂ, ਹਤ੍ਥਿਪਾਲਂ ਅਯੋਘਰਂ;

ਵੀਸਤਿਯਮ੍ਹਿ ਜਾਤਕਾ, ਚਤੁਦ੍ਦਸੇਵ ਸਙ੍ਗਿਤਾ.

ਵੀਸਤਿਨਿਪਾਤਵਣ੍ਣਨਾ ਨਿਟ੍ਠਿਤਾ.

(ਚਤੁਤ੍ਥੋ ਭਾਗੋ ਨਿਟ੍ਠਿਤੋ)

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਖੁਦ੍ਦਕਨਿਕਾਯੇ

ਜਾਤਕ-ਅਟ੍ਠਕਥਾ

(ਪਞ੍ਚਮੋ ਭਾਗੋ)

੧੬. ਤਿਂਸਨਿਪਾਤੋ

[੫੧੧] ੧. ਕਿਂਛਨ੍ਦਜਾਤਕਵਣ੍ਣਨਾ

ਕਿਂਛਨ੍ਦੋ ਕਿਮਧਿਪ੍ਪਾਯੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਪੋਸਥਕਮ੍ਮਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਸਤ੍ਥਾ ਬਹੂ ਉਪਾਸਕੇ ਚ ਉਪਾਸਿਕਾਯੋ ਚ ਉਪੋਸਥਿਕੇ ਧਮ੍ਮਸ੍ਸਵਨਤ੍ਥਾਯ ਆਗਨ੍ਤ੍ਵਾ ਧਮ੍ਮਸਭਾਯਂ ਨਿਸਿਨ੍ਨੇ ‘‘ਉਪੋਸਥਿਕਾਤ੍ਥ ਉਪਾਸਕਾ’’ਤਿ ਪੁਚ੍ਛਿਤ੍ਵਾ ‘‘ਆਮ, ਭਨ੍ਤੇ’’ਤਿ ਵੁਤ੍ਤੇ ‘‘ਸਾਧੁ ਵੋ ਕਤਂ ਉਪੋਸਥਂ ਕਰੋਨ੍ਤੇਹਿ, ਪੋਰਾਣਕਾ ਉਪਡ੍ਢੂਪੋਸਥਕਮ੍ਮਸ੍ਸ ਨਿਸ੍ਸਨ੍ਦੇਨ ਮਹਨ੍ਤਂ ਯਸਂ ਪਟਿਲਭਿਂਸੂ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਸਦ੍ਧੋ ਅਹੋਸਿ ਦਾਨਸੀਲਉਪੋਸਥਕਮ੍ਮੇਸੁ ਅਪ੍ਪਮਤ੍ਤੋ. ਸੋ ਸੇਸੇਪਿ ਅਮਚ੍ਚਾਦਯੋ ਦਾਨਾਦੀਸੁ ਸਮਾਦਪੇਸਿ. ਪੁਰੋਹਿਤੋ ਪਨਸ੍ਸ ਪਰਪਿਟ੍ਠਿਮਂਸਿਕੋ ਲਞ੍ਜਖਾਦਕੋ ਕੂਟਵਿਨਿਚ੍ਛਯਿਕੋ ਅਹੋਸਿ. ਰਾਜਾ ਉਪੋਸਥਦਿਵਸੇ ਅਮਚ੍ਚਾਦਯੋ ਪਕ੍ਕੋਸਾਪੇਤ੍ਵਾ ‘‘ਉਪੋਸਥਿਕਾ ਹੋਥਾ’’ਤਿ ਆਹ. ਪੁਰੋਹਿਤੋ ਉਪੋਸਥਂ ਨ ਸਮਾਦਿਯਿ. ਅਥ ਨਂ ਦਿਵਾ ਲਞ੍ਜਂ ਗਹੇਤ੍ਵਾ ਕੂਟਡ੍ਡਂ ਕਤ੍ਵਾ ਉਪਟ੍ਠਾਨਂ ਆਗਤਂ ਰਾਜਾ ‘‘ਤੁਮ੍ਹੇ ਉਪੋਸਥਿਕਾ’’ਤਿ ਅਮਚ੍ਚੇ ਪੁਚ੍ਛਨ੍ਤੋ ‘‘ਤ੍ਵਮ੍ਪਿ ਆਚਰਿਯ ਉਪੋਸਥਿਕੋ’’ਤਿ ਪੁਚ੍ਛਿ. ਸੋ ‘‘ਆਮਾ’’ਤਿ ਮੁਸਾਵਾਦਂ ਕਤ੍ਵਾ ਪਾਸਾਦਾ ਓਤਰਿ. ਅਥ ਨਂ ਏਕੋ ਅਮਚ੍ਚੋ ‘‘ਨਨੁ ਤੁਮ੍ਹੇ ਨ ਉਪੋਸਥਿਕਾ’’ਤਿ ਚੋਦੇਸਿ. ਸੋ ਆਹ – ‘‘ਅਹਂ ਵੇਲਾਯਮੇਵ ਭੁਞ੍ਜਿਂ, ਗੇਹਂ ਪਨ ਗਨ੍ਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਉਪੋਸਥਂ ਅਧਿਟ੍ਠਾਯ ਸਾਯਂ ਨ ਭੁਞ੍ਜਿਸ੍ਸਾਮਿ, ਰਤ੍ਤਿਂ ਸੀਲਂ ਰਕ੍ਖਿਸ੍ਸਾਮਿ, ਏਵਂ ਮੇ ਉਪਡ੍ਢੂਪੋਸਥਕਮ੍ਮਂ ਭਵਿਸ੍ਸਤੀ’’ਤਿ? ‘‘ਸਾਧੁ, ਆਚਰਿਯਾ’’ਤਿ. ਸੋ ਗੇਹਂ ਗਨ੍ਤ੍ਵਾ ਤਥਾ ਅਕਾਸਿ. ਪੁਨੇਕਦਿਵਸਂ ਤਸ੍ਮਿਂ ਵਿਨਿਚ੍ਛਯੇ ਨਿਸਿਨ੍ਨੇ ਅਞ੍ਞਤਰਾ ਸੀਲਵਤੀ ਇਤ੍ਥੀ ਅਡ੍ਡਂ ਕਰੋਨ੍ਤੀ ਘਰਂ ਗਨ੍ਤੁਂ ਅਲਭਮਾਨਾ ‘‘ਉਪੋਸਥਕਮ੍ਮਂ ਨਾਤਿਕ੍ਕਮਿਸ੍ਸਾਮੀ’’ਤਿ ਉਪਕਟ੍ਠੇ ਕਾਲੇ ਮੁਖਂ ਵਿਕ੍ਖਾਲੇਤੁਂ ਆਰਭਿ. ਤਸ੍ਮਿਂ ਖਣੇ ਬ੍ਰਾਹ੍ਮਣਸ੍ਸ ਸੁਪਕ੍ਕਾਨਂ ਅਮ੍ਬਫਲਾਨਂ ਅਮ੍ਬਪਿਣ੍ਡਿ ਆਹਰਿਯਿਤ੍ਥ. ਸੋ ਤਸ੍ਸਾ ਉਪੋਸਥਿਕਭਾਵਂ ਞਤ੍ਵਾ ‘‘ਇਮਾਨਿ ਖਾਦਿਤ੍ਵਾ ਉਪੋਸਥਿਕਾ ਹੋਹੀ’’ਤਿ ਅਦਾਸਿ. ਸਾ ਤਥਾ ਅਕਾਸਿ. ਏਤ੍ਤਕਂ ਬ੍ਰਾਹ੍ਮਣਸ੍ਸ ਕਮ੍ਮਂ.

ਸੋ ਅਪਰਭਾਗੇ ਕਾਲਂ ਕਤ੍ਵਾ ਹਿਮਵਨ੍ਤਪਦੇਸੇ ਕੋਸਿਕਿਗਙ੍ਗਾਯ ਤੀਰੇ ਤਿਯੋਜਨਿਕੇ ਅਮ੍ਬਵਨੇ ਰਮਣੀਯੇ ਭੂਮਿਭਾਗੇ ਸੋਭਗ੍ਗਪ੍ਪਤ੍ਤੇ ਕਨਕਵਿਮਾਨੇ ਅਲਙ੍ਕਤਸਿਰਿਸਯਨੇ ਸੁਤ੍ਤਪ੍ਪਬੁਦ੍ਧੋ ਵਿਯ ਨਿਬ੍ਬਤ੍ਤਿ ਅਲਙ੍ਕਤਪਟਿਯਤ੍ਤੋ ਉਤ੍ਤਮਰੂਪਧਰੋ ਸੋਲ਼ਸਸਹਸ੍ਸਦੇਵਕਞ੍ਞਾਪਰਿਵਾਰੋ. ਸੋ ਰਤ੍ਤਿਞ੍ਞੇਵ ਤਂ ਸਿਰਿਸਮ੍ਪਤ੍ਤਿਂ ਅਨੁਭੋਤਿ. ਵੇਮਾਨਿਕਪੇਤਭਾਵੇਨ ਹਿਸ੍ਸ ਕਮ੍ਮਸਰਿਕ੍ਖਕੋ ਵਿਪਾਕੋ ਅਹੋਸਿ, ਤਸ੍ਮਾ ਅਰੁਣੇ ਉਗ੍ਗਚ੍ਛਨ੍ਤੇ ਅਮ੍ਬਵਨਂ ਪਵਿਸਤਿ, ਪਵਿਟ੍ਠਕ੍ਖਣੇਯੇਵਸ੍ਸ ਦਿਬ੍ਬਤ੍ਤਭਾਵੋ ਅਨ੍ਤਰਧਾਯਤਿ, ਅਸੀਤਿਹਤ੍ਥਤਾਲਕ੍ਖਨ੍ਧਪ੍ਪਮਾਣੋ ਅਤ੍ਤਭਾਵੋ ਨਿਬ੍ਬਤ੍ਤਤਿ, ਸਕਲਸਰੀਰਂ ਝਾਯਤਿ, ਸੁਪੁਪ੍ਫਿਤਕਿਂਸੁਕੋ ਵਿਯ ਹੋਤਿ. ਦ੍ਵੀਸੁ ਹਤ੍ਥੇਸੁ ਏਕੇਕਾਵ ਅਙ੍ਗੁਲਿ, ਤਤ੍ਥ ਮਹਾਕੁਦ੍ਦਾਲਪ੍ਪਮਾਣਾ ਨਖਾ ਹੋਨ੍ਤਿ. ਤੇਹਿ ਨਖੇਹਿ ਅਤ੍ਤਨੋ ਪਿਟ੍ਠਿਮਂਸਂ ਫਾਲੇਤ੍ਵਾ ਉਪ੍ਪਾਟੇਤ੍ਵਾ ਖਾਦਨ੍ਤੋ ਵੇਦਨਾਪ੍ਪਤ੍ਤੋ ਮਹਾਰਵਂ ਰਵਨ੍ਤੋ ਦੁਕ੍ਖਂ ਅਨੁਭੋਤਿ. ਸੂਰਿਯੇ ਅਤ੍ਥਙ੍ਗਤੇ ਤਂ ਸਰੀਰਂ ਅਨ੍ਤਰਧਾਯਤਿ, ਦਿਬ੍ਬਸਰੀਰਂ ਨਿਬ੍ਬਤ੍ਤਤਿ, ਅਲਙ੍ਕਤਪਟਿਯਤ੍ਤਾ ਦਿਬ੍ਬਨਾਟਕਿਤ੍ਥਿਯੋ ਨਾਨਾਤੂਰਿਯਾਨਿ ਗਹੇਤ੍ਵਾ ਪਰਿਵਾਰੇਨ੍ਤਿ. ਸੋ ਮਹਾਸਮ੍ਪਤ੍ਤਿਂ ਅਨੁਭਵਨ੍ਤੋ ਰਮਣੀਯੇ ਅਮ੍ਬਵਨੇ ਦਿਬ੍ਬਪਾਸਾਦਂ ਅਭਿਰੁਹਤਿ. ਇਤਿ ਸੋ ਉਪੋਸਥਿਕਾਯ ਇਤ੍ਥਿਯਾ ਅਮ੍ਬਫਲਦਾਨਸ੍ਸ ਨਿਸ੍ਸਨ੍ਦੇਨ ਤਿਯੋਜਨਿਕਂ ਅਮ੍ਬਵਨਂ ਪਟਿਲਭਤਿ, ਲਞ੍ਜਂ ਗਹੇਤ੍ਵਾ ਕੂਟਡ੍ਡਕਰਣਨਿਸ੍ਸਨ੍ਦੇਨ ਪਨ ਪਿਟ੍ਠਿਮਂਸਂ ਉਪ੍ਪਾਟੇਤ੍ਵਾ ਖਾਦਤਿ, ਉਪਡ੍ਢੂਪੋਸਥਸ੍ਸ ਨਿਸ੍ਸਨ੍ਦੇਨ ਰਤ੍ਤਿਂ ਸਮ੍ਪਤ੍ਤਿਂ ਅਨੁਭੋਤਿ, ਸੋਲ਼ਸਸਹਸ੍ਸਨਾਟਕਿਤ੍ਥੀਹਿ ਪਰਿਵੁਤੋ ਪਰਿਚਾਰੇਸਿ.

ਤਸ੍ਮਿਂ ਕਾਲੇ ਬਾਰਾਣਸਿਰਾਜਾ ਕਾਮੇਸੁ ਦੋਸਂ ਦਿਸ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਧੋਗਙ੍ਗਾਯ ਰਮਣੀਯੇ ਭੂਮਿਪਦੇਸੇ ਪਣ੍ਣਸਾਲਂ ਕਾਰੇਤ੍ਵਾ ਉਞ੍ਛਾਚਰਿਯਾਯ ਯਾਪੇਨ੍ਤੋ ਵਿਹਾਸਿ. ਅਥੇਕਦਿਵਸਂ ਤਮ੍ਹਾ ਅਮ੍ਬਵਨਾ ਮਹਾਘਟਪ੍ਪਮਾਣਂ ਅਮ੍ਬਪਕ੍ਕਂ ਗਙ੍ਗਾਯ ਪਤਿਤ੍ਵਾ ਸੋਤੇਨ ਵੁਯ੍ਹਮਾਨਂ ਤਸ੍ਸ ਤਾਪਸਸ੍ਸ ਪਰਿਭੋਗਤਿਤ੍ਥਾਭਿਮੁਖਂ ਅਗਮਾਸਿ. ਸੋ ਮੁਖਂ ਧੋਵਨ੍ਤੋ ਤਂ ਮਜ੍ਝੇ ਨਦਿਯਾ ਆਗਚ੍ਛਨ੍ਤਂ ਦਿਸ੍ਵਾ ਉਦਕਂ ਤਰਨ੍ਤੋ ਗਨ੍ਤ੍ਵਾ ਆਦਾਯ ਅਸ੍ਸਮਪਦਂ ਆਹਰਿਤ੍ਵਾ ਅਗ੍ਯਾਗਾਰੇ ਠਪੇਤ੍ਵਾ ਸਤ੍ਥਕੇਨ ਫਾਲੇਤ੍ਵਾ ਯਾਪਨਮਤ੍ਤਂ ਖਾਦਿਤ੍ਵਾ ਸੇਸਂ ਕਦਲਿਪਣ੍ਣੇਹਿ ਪਟਿਚ੍ਛਾਦੇਤ੍ਵਾ ਪੁਨਪ੍ਪੁਨਂ ਦਿਵਸੇ ਦਿਵਸੇ ਯਾਵ ਪਰਿਕ੍ਖਯਾ ਖਾਦਿ. ਤਸ੍ਮਿਂ ਪਨ ਖੀਣੇ ਅਞ੍ਞਂ ਫਲਾਫਲਂ ਖਾਦਿਤੁਂ ਨਾਸਕ੍ਖਿ, ਰਸਤਣ੍ਹਾਯ ਬਜ੍ਝਿਤ੍ਵਾ ‘‘ਤਮੇਵ ਅਮ੍ਬਪਕ੍ਕਂ ਖਾਦਿਸ੍ਸਾਮੀ’’ਤਿ ਨਦੀਤੀਰਂ ਗਨ੍ਤ੍ਵਾ ਨਦਿਂ ਓਲੋਕੇਨ੍ਤੋ ‘‘ਅਮ੍ਬਂ ਅਲਭਿਤ੍ਵਾ ਨ ਉਟ੍ਠਹਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਨਿਸੀਦਿ. ਸੋ ਤਤ੍ਥ ਨਿਰਾਹਾਰੋ ਏਕਮ੍ਪਿ ਦਿਵਸਂ, ਦ੍ਵੇਪਿ, ਤੀਣਿ, ਚਤੁ, ਪਞ੍ਚ, ਛ ਦਿਵਸਾਨਿ ਵਾਤਾਤਪੇਨ ਪਰਿਸੁਸ੍ਸਨ੍ਤੋ ਅਮ੍ਬਂ ਓਲੋਕੇਨ੍ਤੋ ਨਿਸੀਦਿ. ਅਥ ਸਤ੍ਤਮੇ ਦਿਵਸੇ ਨਦੀਦੇਵਤਾ ਆਵਜ੍ਜਮਾਨਾ ਤਂ ਕਾਰਣਂ ਞਤ੍ਵਾ ‘‘ਅਯਂ ਤਾਪਸੋ ਤਣ੍ਹਾਵਸਿਕੋ ਹੁਤ੍ਵਾ ਸਤ੍ਤਾਹਂ ਨਿਰਾਹਾਰੋ ਗਙ੍ਗਂ ਓਲੋਕੇਨ੍ਤੋ ਨਿਸੀਦਿ, ਇਮਸ੍ਸ ਅਮ੍ਬਪਕ੍ਕਂ ਅਦਾਤੁਂ ਨ ਯੁਤ੍ਤਂ, ਅਲਭਨ੍ਤੋ ਮਰਿਸ੍ਸਤਿ, ਦਸ੍ਸਾਮਿ ਤਸ੍ਸਾ’’ਤਿ ਆਗਨ੍ਤ੍ਵਾ ਗਙ੍ਗਾਯ ਉਪਰਿ ਆਕਾਸੇ ਠਤ੍ਵਾ ਤੇਨ ਸਦ੍ਧਿਂ ਸਲ੍ਲਪਨ੍ਤੀ ਪਠਮਂ ਗਾਥਮਾਹ –

੧.

‘‘ਕਿਂਛਨ੍ਦੋ ਕਿਮਧਿਪ੍ਪਾਯੋ, ਏਕੋ ਸਮ੍ਮਸਿ ਘਮ੍ਮਨਿ;

ਕਿਂਪਤ੍ਥਯਾਨੋ ਕਿਂ ਏਸਂ, ਕੇਨ ਅਤ੍ਥੇਨ ਬ੍ਰਾਹ੍ਮਣਾ’’ਤਿ.

ਤਤ੍ਥ ਛਨ੍ਦੋਤਿ ਅਜ੍ਝਾਸਯੋ. ਅਧਿਪ੍ਪਾਯੋਤਿ ਚਿਤ੍ਤਂ. ਸਮ੍ਮਸੀਤਿ ਅਚ੍ਛਸਿ. ਘਮ੍ਮਨੀਤਿ ਗਿਮ੍ਹੇ. ਏਸਨ੍ਤਿ ਏਸਨ੍ਤੋ. ਬ੍ਰਾਹ੍ਮਣਾਤਿ ਪਬ੍ਬਜਿਤਤ੍ਤਾ ਤਾਪਸਂ ਆਲਪਤਿ. ਇਦਂ ਵੁਤ੍ਤਂ ਹੋਤਿ – ਬ੍ਰਾਹ੍ਮਣ, ਤ੍ਵਂ ਕਿਂ ਅਧਿਪ੍ਪਾਯੋ ਕਿਂ ਚਿਨ੍ਤੇਨ੍ਤੋ ਕਿਂ ਪਤ੍ਥੇਨ੍ਤੋ ਕਿਂ ਗਵੇਸਨ੍ਤੋ ਕੇਨਤ੍ਥੇਨ ਇਮਸ੍ਮਿਂ ਗਙ੍ਗਾਤੀਰੇ ਗਙ੍ਗਂ ਓਲੋਕੇਨ੍ਤੋ ਨਿਸਿਨ੍ਨੋਤਿ.

ਤਂ ਸੁਤ੍ਵਾ ਤਾਪਸੋ ਨਵ ਗਾਥਾ ਅਭਾਸਿ –

੨.

‘‘ਯਥਾ ਮਹਾ ਵਾਰਿਧਰੋ, ਕੁਮ੍ਭੋ ਸੁਪਰਿਣਾਹਵਾ;

ਤਥੂਪਮਂ ਅਮ੍ਬਪਕ੍ਕਂ, ਵਣ੍ਣਗਨ੍ਧਰਸੁਤ੍ਤਮਂ.

੩.

‘‘ਤਂ ਵੁਯ੍ਹਮਾਨਂ ਸੋਤੇਨ, ਦਿਸ੍ਵਾਨਾਮਲਮਜ੍ਝਿਮੇ;

ਪਾਣੀਭਿ ਨਂ ਗਹੇਤ੍ਵਾਨ, ਅਗ੍ਯਾਯਤਨਮਾਹਰਿਂ.

੪.

‘‘ਤਤੋ ਕਦਲਿਪਤ੍ਤੇਸੁ, ਨਿਕ੍ਖਿਪਿਤ੍ਵਾ ਸਯਂ ਅਹਂ;

ਸਤ੍ਥੇਨ ਨਂ ਵਿਕਪ੍ਪੇਤ੍ਵਾ, ਖੁਪ੍ਪਿਪਾਸਂ ਅਹਾਸਿ ਮੇ.

੫.

‘‘ਸੋਹਂ ਅਪੇਤਦਰਥੋ, ਬ੍ਯਨ੍ਤੀਭੂਤੋ ਦੁਖਕ੍ਖਮੋ;

ਅਸ੍ਸਾਦਂ ਨਾਧਿਗਚ੍ਛਾਮਿ, ਫਲੇਸ੍ਵਞ੍ਞੇਸੁ ਕੇਸੁਚਿ.

੬.

‘‘ਸੋਸੇਤ੍ਵਾ ਨੂਨ ਮਰਣਂ, ਤਂ ਮਮਂ ਆਵਹਿਸ੍ਸਤਿ;

ਅਮ੍ਬਂ ਯਸ੍ਸ ਫਲਂ ਸਾਦੁ, ਮਧੁਰਗ੍ਗਂ ਮਨੋਰਮਂ;

ਯਮੁਦ੍ਧਰਿਂ ਵੁਯ੍ਹਮਾਨਂ, ਉਦਧਿਸ੍ਮਾ ਮਹਣ੍ਣਵੇ.

੭.

‘‘ਅਕ੍ਖਾਤਂ ਤੇ ਮਯਾ ਸਬ੍ਬਂ, ਯਸ੍ਮਾ ਉਪਵਸਾਮਹਂ;

ਰਮ੍ਮਂ ਪਤਿ ਨਿਸਿਨ੍ਨੋਸ੍ਮਿ, ਪੁਥੁਲੋਮਾਯੁਤਾ ਪੁਥੁ.

੮.

‘‘ਤ੍ਵਞ੍ਚ ਖੋ ਮੇਵ ਅਕ੍ਖਾਹਿ, ਅਤ੍ਤਾਨਮਪਲਾਯਿਨਿ;

ਕਾ ਵਾ ਤ੍ਵਮਸਿ ਕਲ੍ਯਾਣਿ, ਕਿਸ੍ਸ ਵਾ ਤ੍ਵਂ ਸੁਮਜ੍ਝਿਮੇ.

੯.

‘‘ਰੁਪ੍ਪਪਟ੍ਟਪਲਿਮਟ੍ਠੀਵ, ਬ੍ਯਗ੍ਘੀਵ ਗਿਰਿਸਾਨੁਜਾ;

ਯਾ ਸਨ੍ਤਿ ਨਾਰਿਯੋ ਦੇਵੇਸੁ, ਦੇਵਾਨਂ ਪਰਿਚਾਰਿਕਾ.

੧੦.

‘‘ਯਾ ਚ ਮਨੁਸ੍ਸਲੋਕਸ੍ਮਿਂ, ਰੂਪੇਨਾਨ੍ਵਾਗਤਿਤ੍ਥਿਯੋ;

ਰੂਪੇਨ ਤੇ ਸਦਿਸੀ ਨਤ੍ਥਿ, ਦੇਵੇਸੁ ਗਨ੍ਧਬ੍ਬਮਨੁਸ੍ਸਲੋਕੇ;

ਪੁਟ੍ਠਾਸਿ ਮੇ ਚਾਰੁਪੁਬ੍ਬਙ੍ਗਿ, ਬ੍ਰੂਹਿ ਨਾਮਞ੍ਚ ਬਨ੍ਧਵੇ’’ਤਿ.

ਤਤ੍ਥ ਵਾਰਿਧਰੋ ਕੁਮ੍ਭੋਤਿ ਉਦਕਘਟੋ. ਸੁਪਰਿਣਾਹਵਾਤਿ ਸੁਸਣ੍ਠਾਨੋ. ਵਣ੍ਣਗਨ੍ਧਰਸੁਤ੍ਤਮਨ੍ਤਿ ਵਣ੍ਣਗਨ੍ਧਰਸੇਹਿ ਉਤ੍ਤਮਂ. ਦਿਸ੍ਵਾਨਾਤਿ ਦਿਸ੍ਵਾ. ਅਮਲਮਜ੍ਝਿਮੇਤਿ ਨਿਮ੍ਮਲਮਜ੍ਝੇ. ਦੇਵਤਂ ਆਲਪਨ੍ਤੋ ਏਵਮਾਹ. ਪਾਣੀਭੀਤਿ ਹਤ੍ਥੇਹਿ. ਅਗ੍ਯਾਯਤਨਮਾਹਰਿਨ੍ਤਿ ਅਤ੍ਤਨੋ ਅਗ੍ਗਿਹੁਤਸਾਲਂ ਆਹਰਿਂ. ਵਿਕਪ੍ਪੇਤ੍ਵਾਤਿ ਵਿਚ੍ਛਿਨ੍ਦਿਤ੍ਵਾ. ‘‘ਵਿਕਨ੍ਤੇਤ੍ਵਾ’’ਤਿਪਿ ਪਾਠੋ. ‘‘ਖਾਦਿ’’ਨ੍ਤਿ ਪਾਠਸੇਸੋ. ਅਹਾਸਿ ਮੇਤਿ ਤਂ ਜਿਵ੍ਹਗ੍ਗੇ ਠਪਿਤਮਤ੍ਤਮੇਵ ਸਤ੍ਤ ਰਸਹਰਣਿਸਹਸ੍ਸਾਨਿ ਫਰਿਤ੍ਵਾ ਮਮ ਖੁਦਞ੍ਚ ਪਿਪਾਸਞ੍ਚ ਹਰਿ. ਅਪੇਤਦਰਥੋਤਿ ਵਿਗਤਕਾਯਚਿਤ੍ਤਦਰਥੋ. ਸੁਧਾਭੋਜਨਂ ਭੁਤ੍ਤਸ੍ਸ ਵਿਯ ਹਿ ਤਸ੍ਸ ਸਬ੍ਬਦਰਥਂ ਅਪਹਰਿ. ਬ੍ਯਨ੍ਤੀਭੂਤੋਤਿ ਤਸ੍ਸ ਅਮ੍ਬਪਕ੍ਕਸ੍ਸ ਵਿਗਤਨ੍ਤੋ ਜਾਤੋ, ਪਰਿਕ੍ਖੀਣਅਮ੍ਬਪਕ੍ਕੋ ਹੁਤ੍ਵਾਤਿ ਅਤ੍ਥੋ. ਦੁਖਕ੍ਖਮੋਤਿ ਦੁਕ੍ਖੇਨ ਅਸਾਤੇਨ ਕਾਯਕ੍ਖਮੇਨ ਚੇਵ ਚਿਤ੍ਤਕ੍ਖਮੇਨ ਚ ਸਮਨ੍ਨਾਗਤੋ. ਅਞ੍ਞੇਸੁ ਪਨ ਕਦਲਿਪਨਸਾਦੀਸੁ ਫਲੇਸੁ ਪਰਿਤ੍ਤਕਮ੍ਪਿ ਅਸ੍ਸਾਦਂ ਨਾਧਿਗਚ੍ਛਾਮਿ, ਸਬ੍ਬਾਨਿ ਮੇ ਜਿਵ੍ਹਾਯ ਠਪਿਤਮਤ੍ਤਾਨਿ ਤਿਤ੍ਤਕਾਨੇਵ ਸਮ੍ਪਜ੍ਜਨ੍ਤੀਤਿ ਦੀਪੇਤਿ.

ਸੋਸੇਤ੍ਵਾਤਿ ਨਿਰਾਹਾਰਤਾਯ ਸੋਸੇਤ੍ਵਾ ਸੁਕ੍ਖਾਪੇਤ੍ਵਾ. ਤਂ ਮਮਨ੍ਤਿ ਤਂ ਮਮ. ਯਸ੍ਸਾਤਿ ਯਂ ਅਸ੍ਸ, ਅਹੋਸੀਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਯਂ ਫਲਂ ਮਮ ਸਾਦੁ ਅਹੋਸਿ, ਯਮਹਂ ਗਮ੍ਭੀਰੇ ਪੁਥੁਲਉਦਕਕ੍ਖਨ੍ਧਸਙ੍ਖਾਤੇ ਮਹਣ੍ਣਵੇ ਵੁਯ੍ਹਮਾਨਂ ਤਤੋ ਉਦਧਿਸ੍ਮਾ ਉਦ੍ਧਰਿਂ, ਤਂ ਅਮ੍ਬਂ ਮਮ ਮਰਣਂ ਆਵਹਿਸ੍ਸਤੀਤਿ ਮਞ੍ਞਾਮਿ, ਮਯ੍ਹਂ ਤਂ ਅਲਭਨ੍ਤਸ੍ਸ ਜੀਵਿਤਂ ਨਪ੍ਪਵਤ੍ਤਿਸ੍ਸਤੀਤਿ. ਉਪਵਸਾਮੀਤਿ ਖੁਪ੍ਪਿਪਾਸਾਹਿ ਉਪਗਤੋ ਵਸਾਮਿ. ਰਮ੍ਮਂ ਪਤਿ ਨਿਸਿਨ੍ਨੋਸ੍ਮੀਤਿ ਰਮਣੀਯਂ ਨਦਿਂ ਪਤਿ ਅਹਂ ਨਿਸਿਨ੍ਨੋ. ਪੁਥੁਲੋਮਾਯੁਤਾ ਪੁਥੂਤਿ ਅਯਂ ਨਦੀ ਪੁਥੁਲੋਮੇਹਿ ਮਚ੍ਛੇਹਿ ਆਯੁਤਾ ਪੁਥੁ ਵਿਪੁਲਾ, ਅਪਿ ਨਾਮ ਮੇ ਇਤੋ ਸੋਤ੍ਥਿ ਭਵੇਯ੍ਯਾਤਿ ਅਧਿਪ੍ਪਾਯੋ. ਅਪਲਾਯਿਨੀਤਿ ਅਪਲਾਯਿਤ੍ਵਾ ਮਮ ਸਮ੍ਮੁਖੇ ਠਿਤੇਤਿ ਤਂ ਦੇਵਤਂ ਆਲਪਤਿ. ‘‘ਅਪਲਾਸਿਨੀ’’ਤਿਪਿ ਪਾਠੋ, ਪਲਾਸਰਹਿਤੇ ਅਨਵਜ੍ਜਸਰੀਰੇਤਿ ਅਤ੍ਥੋ. ਕਿਸ੍ਸ ਵਾਤਿ ਕਿਸ੍ਸ ਵਾ ਕਾਰਣਾ ਇਧਾਗਤਾਸੀਤਿ ਪੁਚ੍ਛਤਿ.

ਰੂਪਪਟ੍ਟਪਲਿਮਟ੍ਠੀਵਾਤਿ ਸੁਟ੍ਠੁ ਪਰਿਮਜ੍ਜਿਤਕਞ੍ਚਨਪਟ੍ਟਸਦਿਸੀ. ਬ੍ਯਗ੍ਘੀਵਾਤਿ ਲੀਲਾਵਿਲਾਸੇਨ ਤਰੁਣਬ੍ਯਗ੍ਘਪੋਤਿਕਾ ਵਿਯ. ਦੇਵਾਨਨ੍ਤਿ ਛਨ੍ਨਂ ਕਾਮਾਵਚਰਦੇਵਾਨਂ. ਯਾ ਚ ਮਨੁਸ੍ਸਲੋਕਸ੍ਮਿਨ੍ਤਿ ਯਾ ਚ ਮਨੁਸ੍ਸਲੋਕੇ. ਰੂਪੇਨਾਨ੍ਵਾਗਤਿਤ੍ਥਿਯੋਤਿ ਰੂਪੇਨ ਅਨ੍ਵਾਗਤਾ ਇਤ੍ਥਿਯੋ ਨਤ੍ਥੀਤਿ ਅਤ੍ਤਨੋ ਸਮ੍ਭਾਵਨਾਯ ਏਵਮਾਹ. ਤਵ ਰੂਪਸਦਿਸਾਯ ਨਾਮ ਨ ਭਵਿਤਬ੍ਬਨ੍ਤਿ ਹਿਸ੍ਸ ਅਧਿਪ੍ਪਾਯੋ. ਗਨ੍ਧਬ੍ਬਮਨੁਸ੍ਸਲੋਕੇਤਿ ਮੂਲਗਨ੍ਧਾਦਿਨਿਸ੍ਸਿਤੇਸੁ ਗਨ੍ਧਬ੍ਬੇਸੁ ਚ ਮਨੁਸ੍ਸਲੋਕੇ ਚ. ਚਾਰੁਪੁਬ੍ਬਙ੍ਗੀਤਿ ਚਾਰੁਨਾ ਪੁਬ੍ਬਙ੍ਗੇਨ ਊਰੁਲਕ੍ਖਣੇਨ ਸਮਨ੍ਨਾਗਤੇ. ਨਾਮਞ੍ਚ ਬਨ੍ਧਵੇਤਿ ਅਤ੍ਤਨੋ ਨਾਮਗੋਤ੍ਤਞ੍ਚ ਬਨ੍ਧਵੇ ਚ ਮਯ੍ਹਂ ਅਕ੍ਖਾਹੀਤਿ ਵਦਤਿ.

ਤਤੋ ਦੇਵਧੀਤਾ ਅਟ੍ਠ ਗਾਥਾ ਅਭਾਸਿ –

੧੧.

‘‘ਯਂ ਤ੍ਵਂ ਪਤਿ ਨਿਸਿਨ੍ਨੋਸਿ, ਰਮ੍ਮਂ ਬ੍ਰਾਹ੍ਮਣ ਕੋਸਿਕਿਂ;

ਸਾਹਂ ਭੁਸਾਲਯਾਵੁਤ੍ਥਾ, ਵਰਵਾਰਿਵਹੋਘਸਾ.

੧੨.

‘‘ਨਾਨਾਦੁਮਗਣਾਕਿਣ੍ਣਾ, ਬਹੁਕਾ ਗਿਰਿਕਨ੍ਦਰਾ;

ਮਮੇਵ ਪਮੁਖਾ ਹੋਨ੍ਤਿ, ਅਭਿਸਨ੍ਦਨ੍ਤਿ ਪਾਵੁਸੇ.

੧੩.

‘‘ਅਥੋ ਬਹੂ ਵਨਤੋਦਾ, ਨੀਲਵਾਰਿਵਹਿਨ੍ਧਰਾ;

ਬਹੁਕਾ ਨਾਗਵਿਤ੍ਤੋਦਾ, ਅਭਿਸਨ੍ਦਨ੍ਤਿ ਵਾਰਿਨਾ.

੧੪.

‘‘ਤਾ ਅਮ੍ਬਜਮ੍ਬੁਲਬੁਜਾ, ਨੀਪਾ ਤਾਲਾ ਚੁਦੁਮ੍ਬਰਾ;

ਬਹੂਨਿ ਫਲਜਾਤਾਨਿ, ਆਵਹਨ੍ਤਿ ਅਭਿਣ੍ਹਸੋ.

੧੫.

‘‘ਯਂ ਕਿਞ੍ਚਿ ਉਭਤੋ ਤੀਰੇ, ਫਲਂ ਪਤਤਿ ਅਮ੍ਬੁਨਿ;

ਅਸਂਸਯਂ ਤਂ ਸੋਤਸ੍ਸ, ਫਲਂ ਹੋਤਿ ਵਸਾਨੁਗਂ.

੧੬.

‘‘ਏਤਦਞ੍ਞਾਯ ਮੇਧਾਵਿ, ਪੁਥੁਪਞ੍ਞ ਸੁਣੋਹਿ ਮੇ;

ਮਾ ਰੋਚਯ ਮਭਿਸਙ੍ਗਂ, ਪਟਿਸੇਧ ਜਨਾਧਿਪ.

੧੭.

‘‘ਨ ਵਾਹਂ ਵਡ੍ਢਵਂ ਮਞ੍ਞੇ, ਯਂ ਤ੍ਵਂ ਰਟ੍ਠਾਭਿਵਡ੍ਢਨ;

ਆਚੇਯ੍ਯਮਾਨੋ ਰਾਜਿਸਿ, ਮਰਣਂ ਅਭਿਕਙ੍ਖਸਿ.

੧੮.

‘‘ਤਸ੍ਸ ਜਾਨਨ੍ਤਿ ਪਿਤਰੋ, ਗਨ੍ਧਬ੍ਬਾ ਚ ਸਦੇਵਕਾ;

ਯੇ ਚਾਪਿ ਇਸਯੋ ਲੋਕੇ, ਸਞ੍ਞਤਤ੍ਤਾ ਤਪਸ੍ਸਿਨੋ;

ਅਸਂਸਯਂ ਤੇਪਿ ਜਾਨਨ੍ਤਿ, ਪਟ੍ਠਭੂਤਾ ਯਸਸ੍ਸਿਨੋ’’ਤਿ.

ਤਤ੍ਥ ਕੋਸਿਕਿਨ੍ਤਿ ਯਂ ਤ੍ਵਂ, ਬ੍ਰਾਹ੍ਮਣ, ਰਮ੍ਮਂ ਕੋਸਿਕਿਂ ਗਙ੍ਗਂ ਪਤਿ ਨਿਸਿਨ੍ਨੋ. ਭੁਸਾਲਯਾਵੁਤ੍ਥਾਤਿ ਭੁਸੇ ਚਣ੍ਡਸੋਤੇ ਆਲਯੋ ਯਸ੍ਸ ਵਿਮਾਨਸ੍ਸ, ਤਸ੍ਮਿਂ ਅਧਿਵਤ੍ਥਾ, ਗਙ੍ਗਟ੍ਠਕਵਿਮਾਨਵਾਸਿਨੀਤਿ ਅਤ੍ਥੋ. ਵਰਵਾਰਿਵਹੋਘਸਾਤਿ ਵਰਵਾਰਿਵਹੇਨ ਓਘੇਨ ਸਮਨ੍ਨਾਗਤਾ. ਪਮੁਖਾਤਿ ਤਾ ਵੁਤ੍ਤਪ੍ਪਕਾਰਾ ਗਿਰਿਕਨ੍ਦਰਾ ਮਂ ਪਮੁਖਂ ਕਰੋਨ੍ਤਿ, ਅਹਂ ਤਾਸਂ ਪਾਮੋਕ੍ਖਾ ਹੋਮੀਤਿ ਦਸ੍ਸੇਤਿ. ਅਭਿਸਨ੍ਦਨ੍ਤੀਤਿ ਸਨ੍ਦਨ੍ਤਿ ਪਵਤ੍ਤਨ੍ਤਿ, ਤਤੋ ਤਤੋ ਆਗਨ੍ਤ੍ਵਾ ਮਂ ਕੋਸਿਕਿਗਙ੍ਗਂ ਪਵਿਸਨ੍ਤੀਤਿ ਅਤ੍ਥੋ. ਵਨਤੋਦਾਤਿ ਨ ਕੇਵਲਂ ਕਨ੍ਦਰਾਵ, ਅਥ ਖੋ ਬਹੂ ਵਨਤੋਦਾ ਤਮ੍ਹਾ ਤਮ੍ਹਾ ਵਨਮ੍ਹਾ ਉਦਕਾਨਿਪਿ ਮਂ ਬਹੂਨਿ ਪਵਿਸਨ੍ਤਿ. ਨੀਲਵਾਰਿਵਹਿਨ੍ਧਰਾਤਿ ਮਣਿਵਣ੍ਣੇਨ ਨੀਲਵਾਰਿਨਾ ਯੁਤ੍ਤੇ ਉਦਕਕ੍ਖਨ੍ਧਸਙ੍ਖਾਤੇ ਵਹੇ ਧਾਰਯਨ੍ਤਿਯੋ. ਨਾਗਵਿਤ੍ਤੋਦਾਤਿ ਨਾਗਾਨਂ ਵਿਤ੍ਤਿਕਾਰੇਨ ਧਨਸਙ੍ਖਾਤੇਨ ਵਾ ਉਦਕੇਨ ਸਮਨ੍ਨਾਗਤਾ. ਵਾਰਿਨਾਤਿ ਏਵਰੂਪਾ ਹਿ ਬਹੂ ਨਦਿਯੋ ਮਂ ਵਾਰਿਨਾਵ ਅਭਿਸਨ੍ਦਨ੍ਤਿ ਪੂਰੇਨ੍ਤੀਤਿ ਦਸ੍ਸੇਤਿ.

ਤਾਤਿ ਤਾ ਨਦਿਯੋ. ਆਵਹਨ੍ਤੀਤਿ ਏਤਾਨਿ ਅਮ੍ਬਾਦੀਨਿ ਆਕਡ੍ਢਨ੍ਤਿ. ਸਬ੍ਬਾਨਿ ਹਿ ਏਤਾਨਿ ਉਪਯੋਗਤ੍ਥੇ ਪਚ੍ਚਤ੍ਤਵਚਨਾਨਿ. ਅਥ ਵਾ ਤਾਤਿ ਉਪਯੋਗਬਹੁਵਚਨਂ. ਆਵਹਨ੍ਤੀਤਿ ਇਮਾਨਿ ਅਮ੍ਬਾਦੀਨਿ ਤਾ ਨਦਿਯੋ ਆਗਚ੍ਛਨ੍ਤਿ, ਉਪਗਚ੍ਛਨ੍ਤੀਤਿ ਅਤ੍ਥੋ, ਏਵਂ ਉਪਗਤਾਨਿ ਪਨ ਮਮ ਸੋਤਂ ਪਵਿਸਨ੍ਤੀਤਿ ਅਧਿਪ੍ਪਾਯੋ. ਸੋਤਸ੍ਸਾਤਿ ਯਂ ਉਭਤੋ ਤੀਰੇ ਜਾਤਰੁਕ੍ਖੇਹਿ ਫਲਂ ਮਮ ਅਮ੍ਬੁਨਿ ਪਤਤਿ, ਸਬ੍ਬਂ ਤਂ ਮਮ ਸੋਤਸ੍ਸੇਵ ਵਸਾਨੁਗਂ ਹੋਤਿ. ਨਤ੍ਥੇਤ੍ਥ ਸਂਸਯੋਤਿ ਏਵਂ ਅਮ੍ਬਪਕ੍ਕਸ੍ਸ ਨਦੀਸੋਤੇਨ ਆਗਮਨਕਾਰਣਂ ਕਥੇਸਿ.

ਮੇਧਾਵਿ ਪੁਥੁਪਞ੍ਞਾਤਿ ਉਭਯਂ ਆਲਪਨਮੇਵ. ਮਾ ਰੋਚਯਾਤਿ ਏਵਂ ਤਣ੍ਹਾਭਿਸਙ੍ਗਂ ਮਾ ਰੋਚਯ. ਪਟਿਸੇਧਾਤਿ ਪਟਿਸੇਧੇਹਿ ਨਨ੍ਤਿ ਰਾਜਾਨਂ ਓਵਦਤਿ. ਵਡ੍ਢਵਨ੍ਤਿ ਪਞ੍ਞਾਵਡ੍ਢਭਾਵਂ ਪਣ੍ਡਿਤਭਾਵਂ. ਰਟ੍ਠਾਭਿਵਡ੍ਢਨਾਤਿ ਰਟ੍ਠਸ੍ਸ ਅਭਿਵਡ੍ਢਨ. ਆਚੇਯ੍ਯਮਾਨੋਤਿ ਮਂਸਲੋਹਿਤੇਹਿ ਆਚਿਯਨ੍ਤੋ ਵਡ੍ਢਨ੍ਤੋ, ਤਰੁਣੋਵ ਹੁਤ੍ਵਾਤਿ ਅਤ੍ਥੋ. ਰਾਜਿਸੀਤਿ ਤਂ ਆਲਪਤਿ. ਇਦਂ ਵੁਤ੍ਤਂ ਹੋਤਿ – ਯਂ ਤ੍ਵਂ ਨਿਰਾਹਾਰਤਾਯ ਸੁਸ੍ਸਮਾਨੋ ਤਰੁਣੋਵ ਸਮਾਨੋ ਅਮ੍ਬਲੋਭੇਨ ਮਰਣਂ ਅਭਿਕਙ੍ਖਸਿ, ਨ ਵੇ ਅਹਂ ਤਵ ਇਮਂ ਪਣ੍ਡਿਤਭਾਵਂ ਮਞ੍ਞਾਮੀਤਿ.

ਤਸ੍ਸਾਤਿ ਯੋ ਪੁਗ੍ਗਲੋ ਤਣ੍ਹਾਵਸਿਕੋ ਹੋਤਿ, ਤਸ੍ਸ ਤਣ੍ਹਾਵਸਿਕਭਾਵਂ ‘‘ਪਿਤਰੋ’’ਤਿ ਸਙ੍ਖਂ ਗਤਾ ਬ੍ਰਹ੍ਮਾਨੋ ਚ ਸਦ੍ਧਿਂ ਕਾਮਾਵਚਰਦੇਵੇਹਿ ਗਨ੍ਧਬ੍ਬਾ ਚ ਵੁਤ੍ਤਪ੍ਪਕਾਰਾ ਦਿਬ੍ਬਚਕ੍ਖੁਕਾ ਇਸਯੋ ਚ ਅਸਂਸਯਂ ਜਾਨਨ੍ਤਿ. ਅਨਚ੍ਛਰਿਯਞ੍ਚੇਤਂ, ਯਂ ਤੇ ਇਦ੍ਧਿਮਨ੍ਤੋ ਜਾਨੇਯ੍ਯੁਂ, ‘‘ਅਸੁਕੋ ਹਿ ਨਾਮ ਤਣ੍ਹਾਵਸਿਕੋ ਹੋਤੀ’’ਤਿ. ਪੁਨ ਤੇਸਂ ਭਾਸਮਾਨਾਨਂ ਵਚਨਂ ਸੁਤ੍ਵਾ ਯੇਪਿ ਤੇਸਂ ਪਟ੍ਠਭੂਤਾ ਯਸਸ੍ਸਿਨੋ ਪਰਿਚਾਰਕਾ, ਤੇਪਿ ਜਾਨਨ੍ਤਿ. ਪਾਪਕਮ੍ਮਂ ਕਰੋਨ੍ਤਸ੍ਸ ਹਿ ਰਹੋ ਨਾਮ ਨਤ੍ਥੀਤਿ ਤਾਪਸਸ੍ਸ ਸਂਵੇਗਂ ਉਪ੍ਪਾਦੇਨ੍ਤੀ ਏਵਮਾਹ.

ਤਤੋ ਤਾਪਸੋ ਚਤਸ੍ਸੋ ਗਾਥਾ ਅਭਾਸਿ –

੧੯.

‘‘ਏਵਂ ਵਿਦਿਤ੍ਵਾ ਵਿਦੂ ਸਬ੍ਬਧਮ੍ਮਂ, ਵਿਦ੍ਧਂਸਨਂ ਚਵਨਂ ਜੀਵਿਤਸ੍ਸ;

ਨ ਚੀਯਤੀ ਤਸ੍ਸ ਨਰਸ੍ਸ ਪਾਪਂ, ਸਚੇ ਨ ਚੇਤੇਤਿ ਵਧਾਯ ਤਸ੍ਸ.

੨੦.

‘‘ਇਸਿਪੂਗਸਮਞ੍ਞਾਤੇ, ਏਵਂ ਲੋਕ੍ਯਾ ਵਿਦਿਤਾ ਸਤਿ;

ਅਨਰਿਯਪਰਿਸਮ੍ਭਾਸੇ, ਪਾਪਕਮ੍ਮਂ ਜਿਗੀਸਸਿ.

੨੧.

‘‘ਸਚੇ ਅਹਂ ਮਰਿਸ੍ਸਾਮਿ, ਤੀਰੇ ਤੇ ਪੁਥੁਸੁਸ੍ਸੋਣਿ;

ਅਸਂਸਯਂ ਤਂ ਅਸਿਲੋਕੋ, ਮਯਿ ਪੇਤੇ ਆਗਮਿਸ੍ਸਤਿ.

੨੨.

‘‘ਤਸ੍ਮਾ ਹਿ ਪਾਪਕਂ ਕਮ੍ਮਂ, ਰਕ੍ਖਸ੍ਸੇਵ ਸੁਮਜ੍ਝਿਮੇ;

ਮਾ ਤਂ ਸਬ੍ਬੋ ਜਨੋ ਪਚ੍ਛਾ, ਪਕੁਟ੍ਠਾਯਿ ਮਯਿ ਮਤੇ’’ਤਿ.

ਤਤ੍ਥ ਏਵਂ ਵਿਦਿਤ੍ਵਾਤਿ ਯਥਾ ਅਹਂ ਸੀਲਞ੍ਚ ਅਨਿਚ੍ਚਤਞ੍ਚ ਜਾਨਾਮਿ, ਏਵਂ ਜਾਨਿਤ੍ਵਾ ਠਿਤਸ੍ਸ. ਵਿਦੂਤਿ ਵਿਦੁਨੋ. ਸਬ੍ਬਧਮ੍ਮਨ੍ਤਿ ਸਬ੍ਬਂ ਸੁਚਰਿਤਧਮ੍ਮਂ. ਤਿਵਿਧਞ੍ਹਿ ਸੁਚਰਿਤਂ ਇਧ ਸਬ੍ਬਧਮ੍ਮੋਤਿ ਅਧਿਪ੍ਪੇਤਂ. ਵਿਦ੍ਧਂਸਨਨ੍ਤਿ ਭਙ੍ਗਂ. ਚਵਨਨ੍ਤਿ ਚੁਤਿਂ. ਜੀਵਿਤਸ੍ਸਾਤਿ ਆਯੁਨੋ. ਇਦਂ ਵੁਤ੍ਤਂ ਹੋਤਿ – ਏਵਂ ਵਿਦਿਤ੍ਵਾ ਠਿਤਸ੍ਸ ਪਣ੍ਡਿਤਸ੍ਸ ਸਬ੍ਬਂ ਸੁਚਰਿਤਧਮ੍ਮਂ ਜੀਵਿਤਸ੍ਸ ਚ ਅਨਿਚ੍ਚਤਂ ਜਾਨਨ੍ਤਸ੍ਸ ਏਵਰੂਪਸ੍ਸ ਨਰਸ੍ਸ ਪਾਪਂ ਨ ਚੀਯਤਿ ਨ ਵਡ੍ਢਤਿ. ਸਚੇ ਨ ਚੇਤੇਤਿ ਵਧਾਯ ਤਸ੍ਸਾਤਿ ਤਸ੍ਸ ਸਙ੍ਖਂ ਗਤਸ੍ਸ ਪਰਪੁਗ੍ਗਲਸ੍ਸ ਵਧਾਯ ਨ ਚੇਤੇਤਿ ਨ ਪਕਪ੍ਪੇਤਿ, ਨੇਵ ਪਰਪੁਗ੍ਗਲਂ ਵਧਾਯ ਚੇਤੇਤਿ, ਨਾਪਿ ਪਰਸਨ੍ਤਕਂ ਵਿਨਾਸੇਤਿ, ਅਹਞ੍ਚ ਕਸ੍ਸਚਿ ਵਧਾਯ ਅਚੇਤੇਤ੍ਵਾ ਕੇਵਲਂ ਅਮ੍ਬਪਕ੍ਕੇ ਆਸਙ੍ਗਂ ਕਤ੍ਵਾ ਗਙ੍ਗਂ ਓਲੋਕੇਨ੍ਤੋ ਨਿਸਿਨ੍ਨੋ, ਤ੍ਵਂ ਮਯ੍ਹਂ ਕਿਂ ਨਾਮ ਅਕੁਸਲਂ ਪਸ੍ਸਸੀਤਿ.

ਇਸਿਪੂਗਸਮਞ੍ਞਾਤੇਤਿ ਇਸਿਗਣੇਨ ਸੁਟ੍ਠੁ ਅਞ੍ਞਾਤੇ ਇਸੀਨਂ ਸਮ੍ਮਤੇ. ਏਵਂ ਲੋਕ੍ਯਾਤਿ ਤ੍ਵਂ ਨਾਮ ਪਾਪਪਵਾਹਨੇਨ ਲੋਕਸ੍ਸ ਹਿਤਾਤਿ ਏਵਂ ਵਿਦਿਤਾ. ਸਤੀਤਿ ਸਤਿ ਸੋਭਨੇ ਉਤ੍ਤਮੇਤਿ ਆਲਪਨਮੇਤਂ. ਅਨਰਿਯਪਰਿਸਮ੍ਭਾਸੇਤਿ ‘‘ਤਸ੍ਸ ਜਾਨਨ੍ਤਿ ਪਿਤਰੋ’’ਤਿਆਦਿਕਾਯ ਅਸੁਨ੍ਦਰਾਯ ਪਰਿਭਾਸਾਯ ਸਮਨ੍ਨਾਗਤੇ. ਜਿਗੀਸਸੀਤਿ ਮਯਿ ਪਾਪੇ ਅਸਂਵਿਜ੍ਜਨ੍ਤੇਪਿ ਮਂ ਏਵਂ ਪਰਿਭਾਸਨ੍ਤੀ ਚ ਪਰਮਰਣਂ ਅਜ੍ਝੁਪੇਕ੍ਖਨ੍ਤੀ ਚ ਅਤ੍ਤਨੋ ਪਾਪਕਮ੍ਮਂ ਗਵੇਸਸਿ ਉਪ੍ਪਾਦੇਸਿ. ਤੀਰੇ ਤੇਤਿ ਤਵ ਗਙ੍ਗਾਤੀਰੇ. ਪੁਥੁਸੁਸ੍ਸੋਣੀਤਿ ਪੁਥੁਲਾਯ ਸੁਨ੍ਦਰਾਯ ਸੋਣਿਯਾ ਸਮਨ੍ਨਾਗਤੇ. ਪੇਤੇਤਿ ਅਮ੍ਬਪਕ੍ਕਂ ਅਲਭਿਤ੍ਵਾ ਪਰਲੋਕਂ ਗਤੇ, ਮਤੇਤਿ ਅਤ੍ਥੋ. ਪਕੁਟ੍ਠਾਯੀਤਿ ਅਕ੍ਕੋਸਿ ਗਰਹਿ ਨਿਨ੍ਦਿ. ‘‘ਪਕ੍ਵਤ੍ਥਾਸੀ’’ਤਿਪਿ ਪਾਠੋ.

ਤਂ ਸੁਤ੍ਵਾ ਦੇਵਧੀਤਾ ਪਞ੍ਚ ਗਾਥਾ ਅਭਾਸਿ –

੨੩.

‘‘ਅਞ੍ਞਾਤਮੇਤਂ ਅਵਿਸਯ੍ਹਸਾਹਿ, ਅਤ੍ਤਾਨਮਮ੍ਬਞ੍ਚ ਦਦਾਮਿ ਤੇ ਤਂ;

ਯੋ ਦੁਬ੍ਬਜੇ ਕਾਮਗੁਣੇ ਪਹਾਯ, ਸਨ੍ਤਿਞ੍ਚ ਧਮ੍ਮਞ੍ਚ ਅਧਿਟ੍ਠਿਤੋਸਿ.

੨੪.

‘‘ਯੋ ਹਿਤ੍ਵਾ ਪੁਬ੍ਬਸਞ੍ਞੋਗਂ, ਪਚ੍ਛਾਸਂਯੋਜਨੇ ਠਿਤੋ;

ਅਧਮ੍ਮਞ੍ਚੇਵ ਚਰਤਿ, ਪਾਪਞ੍ਚਸ੍ਸ ਪਵਡ੍ਢਤਿ.

੨੫.

‘‘ਏਹਿ ਤਂ ਪਾਪਯਿਸ੍ਸਾਮਿ, ਕਾਮਂ ਅਪ੍ਪੋਸ੍ਸੁਕੋ ਭਵ;

ਉਪਨਯਾਮਿ ਸੀਤਸ੍ਮਿਂ, ਵਿਹਰਾਹਿ ਅਨੁਸ੍ਸੁਕੋ.

੨੬.

‘‘ਤਂ ਪੁਪ੍ਫਰਸਮਤ੍ਤੇਭਿ, ਵਕ੍ਕਙ੍ਗੇਹਿ ਅਰਿਨ੍ਦਮ;

ਕੋਞ੍ਚਾ ਮਯੂਰਾ ਦਿਵਿਯਾ, ਕੋਲਟ੍ਠਿਮਧੁਸਾਲ਼ਿਕਾ;

ਕੂਜਿਤਾ ਹਂਸਪੂਗੇਹਿ, ਕੋਕਿਲੇਤ੍ਥ ਪਬੋਧਰੇ.

੨੭.

‘‘ਅਮ੍ਬੇਤ੍ਥ ਵਿਪ੍ਪਸਾਖਗ੍ਗਾ, ਪਲਾਲਖਲਸਨ੍ਨਿਭਾ;

ਕੋਸਮ੍ਬਸਲਲ਼ਾ ਨੀਪਾ, ਪਕ੍ਕਤਾਲਵਿਲਮ੍ਬਿਨੋ’’ਤਿ.

ਤਤ੍ਥ ਅਞ੍ਞਾਤਮੇਤਨ੍ਤਿ ‘‘ਗਰਹਾ ਤੇ ਭਵਿਸ੍ਸਤੀਤਿ ਵਦਨ੍ਤੋ ਅਮ੍ਬਪਕ੍ਕਤ੍ਥਾਯ ਵਦਸੀ’’ਤਿ ਏਤਂ ਕਾਰਣਂ ਮਯਾ ਅਞ੍ਞਾਤਂ. ਅਵਿਸਯ੍ਹਸਾਹੀਤਿ ਰਾਜਾਨੋ ਨਾਮ ਦੁਸ੍ਸਹਂ ਸਹਨ੍ਤਿ, ਤੇਨ ਨਂ ਆਲਪਨ੍ਤੀ ਏਵਮਾਹ. ਅਤ੍ਤਾਨਨ੍ਤਿ ਤਂ ਆਲਿਙ੍ਗਿਤ੍ਵਾ ਅਮ੍ਬਵਨਂ ਨਯਨ੍ਤੀ ਅਤ੍ਤਾਨਞ੍ਚ ਤੇ ਦਦਾਮਿ ਤਞ੍ਚ ਅਮ੍ਬਂ. ਕਾਮਗੁਣੇਤਿ ਕਞ੍ਚਨਮਾਲਾਸੇਤਚ੍ਛਤ੍ਤਪਟਿਮਣ੍ਡਿਤੇ ਵਤ੍ਥੁਕਾਮੇ. ਸਨ੍ਤਿਞ੍ਚ ਧਮ੍ਮਞ੍ਚਾਤਿ ਦੁਸ੍ਸੀਲ੍ਯਵੂਪਸਮੇਨ ਸਨ੍ਤਿਸਙ੍ਖਾਤਂ ਸੀਲਞ੍ਚੇਵ ਸੁਚਰਿਤਧਮ੍ਮਞ੍ਚ. ਅਧਿਟ੍ਠਿਤੋਸੀਤਿ ਯੋ ਤ੍ਵਂ ਇਮੇ ਗੁਣੇ ਉਪਗਤੋ, ਏਤੇਸੁ ਵਾ ਪਤਿਟ੍ਠਿਤੋਤਿ ਅਤ੍ਥੋ.

ਪੁਬ੍ਬਸਞ੍ਞੋਗਨ੍ਤਿ ਪੁਰਿਮਬਨ੍ਧਨਂ. ਪਚ੍ਛਾਸਂਯੋਜਨੇਤਿ ਪਚ੍ਛਿਮਬਨ੍ਧਨੇ. ਇਦਂ ਵੁਤ੍ਤਂ ਹੋਤਿ – ਅਮ੍ਭੋ ਤਾਪਸ ਯੋ ਮਹਨ੍ਤਂ ਰਜ੍ਜਸਿਰਿਵਿਭਵਂ ਪਹਾਯ ਅਮ੍ਬਪਕ੍ਕਮਤ੍ਤੇ ਰਸਤਣ੍ਹਾਯ ਬਜ੍ਝਿਤ੍ਵਾ ਵਾਤਾਤਪਂ ਅਗਣੇਤ੍ਵਾ ਨਦੀਤੀਰੇ ਸੁਸ੍ਸਮਾਨੋ ਨਿਸੀਦਤਿ, ਸੋ ਮਹਾਸਮੁਦ੍ਦਂ ਤਰਿਤ੍ਵਾ ਵੇਲਨ੍ਤੇ ਸਂਸੀਦਨਪੁਗ੍ਗਲਸਦਿਸੋ. ਯੋ ਪੁਗ੍ਗਲੋ ਰਸਤਣ੍ਹਾਵਸਿਕੋ ਅਧਮ੍ਮਞ੍ਚੇਵ ਚਰਤਿ, ਰਸਤਣ੍ਹਾਵਸੇਨ ਕਰਿਯਮਾਨਂ ਪਾਪਞ੍ਚਸ੍ਸ ਪਵਡ੍ਢਤੀਤਿ. ਇਤਿ ਸਾ ਤਾਪਸਂ ਗਰਹਨ੍ਤੀ ਏਵਮਾਹ.

ਕਾਮਂ ਅਪ੍ਪੋਸ੍ਸੁਕੋ ਭਵਾਤਿ ਏਕਂਸੇਨੇਵ ਅਮ੍ਬਪਕ੍ਕੇ ਨਿਰਾਲਯੋ ਹੋਹਿ. ਸੀਤਸ੍ਮਿਨ੍ਤਿ ਸੀਤਲੇ ਅਮ੍ਬਵਨੇ. ਤਨ੍ਤਿ ਏਵਂ ਵਦਮਾਨਾਵ ਦੇਵਤਾ ਤਾਪਸਂ ਆਲਿਙ੍ਗਿਤ੍ਵਾ ਉਰੇ ਨਿਪਜ੍ਜਾਪੇਤ੍ਵਾ ਆਕਾਸੇ ਪਕ੍ਖਨ੍ਤਾ ਤਿਯੋਜਨਿਕਂ ਦਿਬ੍ਬਅਮ੍ਬਵਨਂ ਦਿਸ੍ਵਾ ਸਕੁਣਸਦ੍ਦਞ੍ਚ ਸੁਤ੍ਵਾ ਤਾਪਸਸ੍ਸ ਆਚਿਕ੍ਖਨ੍ਤੀ ‘‘ਤ’’ਨ੍ਤਿ ਏਵਮਾਹ. ਪੁਪ੍ਫਰਸਮਤ੍ਤੇਭੀਤਿ ਪੁਪ੍ਫਰਸੇਨ ਮਤ੍ਤੇਹਿ. ਵਕ੍ਕਙ੍ਗੇਹੀਤਿ ਵਙ੍ਕਗੀਵੇਹਿ ਸਕੁਣੇਹਿ ਅਭਿਨਾਦਿਤਨ੍ਤਿ ਅਤ੍ਥੋ. ਇਦਾਨਿ ਤੇ ਸਕੁਣੇ ਆਚਿਕ੍ਖਨ੍ਤੀ ‘‘ਕੋਞ੍ਚਾ’’ਤਿਆਦਿਮਾਹ. ਤਤ੍ਥ ਦਿਵਿਯਾਤਿ ਦਿਬ੍ਯਾ. ਕੋਲਟ੍ਠਿਮਧੁਸਾਲ਼ਿਕਾਤਿ ਕੋਲਟ੍ਠਿਸਕੁਣਾ ਚ ਨਾਮ ਸੁਵਣ੍ਣਸਾਲ਼ਿਕਾ ਸਕੁਣਾ ਚ. ਏਤੇ ਦਿਬ੍ਬਸਕੁਣਾ ਏਤ੍ਥ ਵਸਨ੍ਤੀਤਿ ਦਸ੍ਸੇਤਿ. ਕੂਜਿਤਾ ਹਂਸਪੂਗੇਹੀਤਿ ਹਂਸਗਣੇਹਿ ਉਪਕੂਜਿਤਾ ਵਿਰਵਸਙ੍ਘਟ੍ਟਿਤਾ. ਕੋਕਿਲੇਤ੍ਥ ਪਬੋਧਰੇਤਿ ਏਤ੍ਥ ਅਮ੍ਬਵਨੇ ਕੋਕਿਲਾ ਵਸ੍ਸਨ੍ਤਿਯੋ ਅਤ੍ਤਾਨਂ ਪਬੋਧੇਨ੍ਤਿ ਞਾਪੇਨ੍ਤਿ. ਅਮ੍ਬੇਤ੍ਥਾਤਿ ਅਮ੍ਬਾ ਏਤ੍ਥ. ਵਿਪ੍ਪਸਾਖਗ੍ਗਾਤਿ ਫਲਭਾਰੇਨ ਓਨਮਿਤਸਾਖਗ੍ਗਾ. ਪਲਾਲਖਲਸਨ੍ਨਿਭਾਤਿ ਪੁਪ੍ਫਸਨ੍ਨਿਚਯੇਨ ਸਾਲਿਪਲਾਲਖਲਸਦਿਸਾ. ਪਕ੍ਕਤਾਲਵਿਲਮ੍ਬਿਨੋਤਿ ਪਕ੍ਕਤਾਲਫਲਵਿਲਮ੍ਬਿਨੋ. ਏਵਰੂਪਾ ਰੁਕ੍ਖਾ ਚ ਏਤ੍ਥ ਅਤ੍ਥੀਤਿ ਅਮ੍ਬਵਨਂ ਵਣ੍ਣੇਤਿ.

ਵਣ੍ਣਯਿਤ੍ਵਾ ਚ ਪਨ ਤਾਪਸਂ ਤਤ੍ਥ ਓਤਾਰੇਤ੍ਵਾ ‘‘ਇਮਸ੍ਮਿਂ ਅਮ੍ਬਵਨੇ ਅਮ੍ਬਾਨਿ ਖਾਦਨ੍ਤੋ ਅਤ੍ਤਨੋ ਤਣ੍ਹਂ ਪੂਰੇਹੀ’’ਤਿ ਵਤ੍ਵਾ ਪਕ੍ਕਾਮਿ. ਤਾਪਸੋ ਅਮ੍ਬਾਨਿ ਖਾਦਿਤ੍ਵਾ ਤਣ੍ਹਂ ਪੂਰੇਤ੍ਵਾ ਵਿਸ੍ਸਮਿਤ੍ਵਾ ਅਮ੍ਬਵਨੇ ਵਿਚਰਨ੍ਤੋ ਤਂ ਪੇਤਂ ਦੁਕ੍ਖਂ ਅਨੁਭਵਨ੍ਤਂ ਦਿਸ੍ਵਾ ਕਿਞ੍ਚਿ ਵਤ੍ਤੁਂ ਨਾਸਕ੍ਖਿ. ਸੂਰਿਯੇ ਪਨ ਅਤ੍ਥਙ੍ਗਤੇ ਤਂ ਨਾਟਕਿਤ੍ਥਿਪਰਿਵਾਰਿਤਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਮਾਨਂ ਦਿਸ੍ਵਾ ਤਿਸ੍ਸੋ ਗਾਥਾ ਅਭਾਸਿ –

੨੮.

‘‘ਮਾਲੀ ਕਿਰਿਟੀ ਕਾਯੂਰੀ, ਅਙ੍ਗਦੀ ਚਨ੍ਦਨੁਸ੍ਸਦੋ;

ਰਤ੍ਤਿਂ ਤ੍ਵਂ ਪਰਿਚਾਰੇਸਿ, ਦਿਵਾ ਵੇਦੇਸਿ ਵੇਦਨਂ.

੨੯.

‘‘ਸੋਲ਼ਸਿਤ੍ਥਿਸਹਸ੍ਸਾਨਿ, ਯਾ ਤੇਮਾ ਪਰਿਚਾਰਿਕਾ;

ਏਵਂ ਮਹਾਨੁਭਾਵੋਸਿ, ਅਬ੍ਭੁਤੋ ਲੋਮਹਂਸਨੋ.

੩੦.

‘‘ਕਿਂ ਕਮ੍ਮਮਕਰੀ ਪੁਬ੍ਬੇ, ਪਾਪਂ ਅਤ੍ਤਦੁਖਾਵਹਂ;

ਯਂ ਕਰਿਤ੍ਵਾ ਮਨੁਸ੍ਸੇਸੁ, ਪਿਟ੍ਠਿਮਂਸਾਨਿ ਖਾਦਸੀ’’ਤਿ.

ਤਤ੍ਥ ਮਾਲੀਤਿ ਦਿਬ੍ਬਮਾਲਾਧਰੋ. ਕਿਰਿਟੀਤਿ ਦਿਬ੍ਬਵੇਠਨਧਰੋ. ਕਾਯੂਰੀਤਿ ਦਿਬ੍ਬਾਭਰਣਪਟਿਮਣ੍ਡਿਤੋ. ਅਙ੍ਗਦੀਤਿ ਦਿਬ੍ਬਙ੍ਗਦਸਮਨ੍ਨਾਗਤੋ. ਚਨ੍ਦਨੁਸ੍ਸਦੋਤਿ ਦਿਬ੍ਬਚਨ੍ਦਨਵਿਲਿਤ੍ਤੋ. ਪਰਿਚਾਰੇਸੀਤਿ ਇਨ੍ਦ੍ਰਿਯਾਨਿ ਦਿਬ੍ਬਵਿਸਯੇਸੁ ਚਾਰੇਸਿ. ਦਿਵਾਤਿ ਦਿਵਾ ਪਨ ਮਹਾਦੁਕ੍ਖਂ ਅਨੁਭੋਸਿ. ਯਾ ਤੇਮਾਤਿ ਯਾ ਤੇ ਇਮਾ. ਅਬ੍ਭੁਤੋਤਿ ਮਨੁਸ੍ਸਲੋਕੇ ਅਭੂਤਪੁਬ੍ਬੋ. ਲੋਮਹਂਸਨੋਤਿ ਯੇ ਤਂ ਪਸ੍ਸਨ੍ਤਿ, ਤੇਸਂ ਲੋਮਾਨਿ ਹਂਸਨ੍ਤਿ. ਪੁਬ੍ਬੇਤਿ ਪੁਰਿਮਭਵੇ. ਅਤ੍ਤਦੁਖਾਵਹਨ੍ਤਿ ਅਤ੍ਤਨੋ ਦੁਕ੍ਖਾਵਹਂ. ਮਨੁਸ੍ਸੇਸੂਤਿ ਯਂ ਮਨੁਸ੍ਸਲੋਕੇ ਕਤ੍ਵਾ ਇਦਾਨਿ ਅਤ੍ਤਨੋ ਪਿਟ੍ਠਿਮਂਸਾਨਿ ਖਾਦਸੀਤਿ ਪੁਚ੍ਛਤਿ.

ਪੇਤੋ ਤਂ ਸਞ੍ਜਾਨਿਤ੍ਵਾ ‘‘ਤੁਮ੍ਹੇ ਮਂ ਨ ਸਞ੍ਜਾਨਾਥ, ਅਹਂ ਤੁਮ੍ਹਾਕਂ ਪੁਰੋਹਿਤੋ ਅਹੋਸਿਂ, ਇਦਂ ਮੇ ਰਤ੍ਤਿਂ ਸੁਖਾਨੁਭਵਨਂ ਤੁਮ੍ਹੇ ਨਿਸ੍ਸਾਯ ਕਤਸ੍ਸ ਉਪਡ੍ਢੂਪੋਸਥਸ੍ਸ ਨਿਸ੍ਸਨ੍ਦੇਨ ਲਦ੍ਧਂ, ਦਿਵਾ ਦੁਕ੍ਖਾਨੁਭਵਨਂ ਪਨ ਮਯਾ ਪਕਤਸ੍ਸ ਪਾਪਸ੍ਸੇਵ ਨਿਸ੍ਸਨ੍ਦੇਨ. ਅਹਞ੍ਹਿ ਤੁਮ੍ਹੇਹਿ ਵਿਨਿਚ੍ਛਯੇ ਠਪਿਤੋ ਕੂਟਡ੍ਡਂ ਕਰਿਤ੍ਵਾ ਲਞ੍ਜਂ ਗਹੇਤ੍ਵਾ ਪਰਪਿਟ੍ਠਿਮਂਸਿਕੋ ਹੁਤ੍ਵਾ ਤਸ੍ਸ ਦਿਵਾ ਕਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਇਦਂ ਦੁਕ੍ਖਂ ਅਨੁਭਵਾਮੀ’’ਤਿ ਵਤ੍ਵਾ ਗਾਥਾਦ੍ਵਯਮਾਹ –

੩੧.

‘‘ਅਜ੍ਝੇਨਾਨਿ ਪਟਿਗ੍ਗਯ੍ਹ, ਕਾਮੇਸੁ ਗਧਿਤੋ ਅਹਂ;

ਅਚਰਿਂ ਦੀਘਮਦ੍ਧਾਨਂ, ਪਰੇਸਂ ਅਹਿਤਾਯਹਂ.

੩੨.

‘‘ਯੋ ਪਿਟ੍ਠਿਮਂਸਿਕੋ ਹੋਤਿ, ਏਵਂ ਉਕ੍ਕਚ੍ਚ ਖਾਦਤਿ;

ਯਥਾਹਂ ਅਜ੍ਜ ਖਾਦਾਮਿ, ਪਿਟ੍ਠਿਮਂਸਾਨਿ ਅਤ੍ਤਨੋ’’ਤਿ.

ਤਤ੍ਥ ਅਜ੍ਝੇਨਾਨੀਤਿ ਵੇਦੇ. ਪਟਿਗ੍ਗਯ੍ਹਾਤਿ ਪਟਿਗ੍ਗਹੇਤ੍ਵਾ ਅਧੀਯਿਤ੍ਵਾ. ਅਚਰਿਨ੍ਤਿ ਪਟਿਪਜ੍ਜਿਂ. ਅਹਿਤਾਯਹਨ੍ਤਿ ਅਹਿਤਾਯ ਅਤ੍ਥਨਾਸਨਾਯ ਅਹਂ. ਯੋ ਪਿਟ੍ਠਿਮਂਸਿਕੋਤਿ ਯੋ ਪੁਗ੍ਗਲੋ ਪਰੇਸਂ ਪਿਟ੍ਠਿਮਂਸਖਾਦਕੋ ਪਿਸੁਣੋ ਹੋਤਿ. ਉਕ੍ਕਚ੍ਚਾਤਿ ਉਕ੍ਕਨ੍ਤਿਤ੍ਵਾ.

ਇਦਞ੍ਚ ਪਨ ਵਤ੍ਵਾ ਤਾਪਸਂ ਪੁਚ੍ਛਿ – ‘‘ਤੁਮ੍ਹੇ ਕਥਂ ਇਧਾਗਤਾ’’ਤਿ. ਤਾਪਸੋ ਸਬ੍ਬਂ ਵਿਤ੍ਥਾਰੇਨ ਕਥੇਸਿ. ‘‘ਇਦਾਨਿ ਪਨ, ਭਨ੍ਤੇ, ਇਧੇਵ ਵਸਿਸ੍ਸਥ, ਗਮਿਸ੍ਸਥਾ’’ਤਿ. ‘‘ਨ ਵਸਿਸ੍ਸਾਮਿ, ਅਸ੍ਸਮਪਦਂਯੇਵ ਗਮਿਸ੍ਸਾਮੀ’’ਤਿ. ਪੇਤੋ ‘‘ਸਾਧੁ, ਭਨ੍ਤੇ, ਅਹਂ ਵੋ ਨਿਬਦ੍ਧਂ ਅਮ੍ਬਪਕ੍ਕੇਨ ਉਪਟ੍ਠਹਿਸ੍ਸਾਮੀ’’ਤਿ ਵਤ੍ਵਾ ਅਤ੍ਤਨੋ ਆਨੁਭਾਵੇਨ ਅਸ੍ਸਮਪਦੇਯੇਵ ਓਤਾਰੇਤ੍ਵਾ ‘‘ਅਨੁਕ੍ਕਣ੍ਠਾ ਇਧੇਵ ਵਸਥਾ’’ਤਿ ਪਟਿਞ੍ਞਂ ਗਹੇਤ੍ਵਾ ਗਤੋ. ਤਤੋ ਪਟ੍ਠਾਯ ਨਿਬਦ੍ਧਂ ਅਮ੍ਬਪਕ੍ਕੇਨ ਉਪਟ੍ਠਹਿ. ਤਾਪਸੋ ਤਂ ਪਰਿਭੁਞ੍ਜਨ੍ਤੋ ਕਸਿਣਪਰਿਕਮ੍ਮਂ ਕਤ੍ਵਾ ਝਾਨਾਭਿਞ੍ਞਾ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਸਤ੍ਥਾ ਉਪਾਸਕਾਨਂ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਕੇਚਿ ਸੋਤਾਪਨ੍ਨਾ ਅਹੇਸੁਂ, ਕੇਚਿ ਸਕਦਾਗਾਮਿਨੋ, ਕੇਚਿ ਅਨਾਗਾਮਿਨੋ. ਤਦਾ ਦੇਵਧੀਤਾ ਉਪ੍ਪਲਵਣ੍ਣਾ ਅਹੋਸਿ, ਤਾਪਸੋ ਪਨ ਅਹਮੇਵ ਅਹੋਸਿਨ੍ਤਿ.

ਕਿਂਛਨ੍ਦਜਾਤਕਵਣ੍ਣਨਾ ਪਠਮਾ.

[੫੧੨] ੨. ਕੁਮ੍ਭਜਾਤਕਵਣ੍ਣਨਾ

ਕੋ ਪਾਤੁਰਾਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਵਿਸਾਖਾਯ ਸਹਾਯਿਕਾ ਸੁਰਾਪੀਤਾ ਪਞ੍ਚਸਤਾ ਇਤ੍ਥਿਯੋ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਸੁਰਾਛਣੇ ਸਙ੍ਘੁਟ੍ਠੇ ਤਾ ਪਞ੍ਚਸਤਾ ਇਤ੍ਥਿਯੋ ਸਾਮਿਕਾਨਂ ਛਣੇ ਕੀਲ਼ਮਾਨਾਨਂ ਤਿਕ੍ਖਸੁਰਂ ਪਟਿਯਾਦੇਤ੍ਵਾ ‘‘ਛਣਂ ਕੀਲ਼ਿਸ੍ਸਾਮਾ’’ਤਿ ਸਬ੍ਬਾਪਿ ਵਿਸਾਖਾਯ ਸਨ੍ਤਿਕਂ ਗਨ੍ਤ੍ਵਾ ‘‘ਸਹਾਯਿਕੇ ਛਣਂ ਕੀਲ਼ਿਸ੍ਸਾਮਾ’’ਤਿ ਵਤ੍ਵਾ ‘‘ਅਯਂ ਸੁਰਾਛਣੋ, ਨ ਅਹਂ ਸੁਰਂ ਪਿਵਿਸ੍ਸਾਮੀ’’ਤਿ ਵੁਤ੍ਤੇ – ‘‘ਤੁਮ੍ਹੇ ਸਮ੍ਮਾਸਮ੍ਬੁਦ੍ਧਸ੍ਸ ਦਾਨਂ ਦੇਥ, ਮਯਂ ਛਣਂ ਕਰਿਸ੍ਸਾਮਾ’’ਤਿ ਆਹਂਸੁ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਾ ਉਯ੍ਯੋਜੇਤ੍ਵਾ ਸਤ੍ਥਾਰਂ ਨਿਮਨ੍ਤਾਪੇਤ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਬਹੁਂ ਗਨ੍ਧਮਾਲਂ ਆਦਾਯ ਸਾਯਨ੍ਹਸਮਯੇ ਧਮ੍ਮਕਥਂ ਸੋਤੁਂ ਤਾਹਿ ਪਰਿਵੁਤਾ ਜੇਤਵਨਂ ਅਗਮਾਸਿ. ਤਾ ਪਨਿਤ੍ਥਿਯੋ ਸੁਰਂ ਪਿਵਮਾਨਾਵ ਤਾਯ ਸਦ੍ਧਿਂ ਗਨ੍ਤ੍ਵਾ ਦ੍ਵਾਰਕੋਟ੍ਠਕੇ ਠਤ੍ਵਾ ਸੁਰਂ ਪਿਵਿਤ੍ਵਾਵ ਤਾਯ ਸਦ੍ਧਿਂ ਸਤ੍ਥੁ ਸਨ੍ਤਿਕਂ ਅਗਮਂਸੁ. ਵਿਸਾਖਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ, ਇਤਰਾਸੁ ਏਕਚ੍ਚਾ ਸਤ੍ਥੁ ਸਨ੍ਤਿਕੇਯੇਵ ਨਚ੍ਚਿਂਸੁ, ਏਕਚ੍ਚਾ ਗਾਯਿਂਸੁ, ਏਕਚ੍ਚਾ ਹਤ੍ਥਕੁਕ੍ਕੁਚ੍ਚਪਾਦਕੁਕ੍ਕੁਚ੍ਚਾਨਿ, ਏਕਚ੍ਚਾ ਕਲਹਂ ਅਕਂਸੁ.

ਸਤ੍ਥਾ ਤਾਸਂ ਸਂਵੇਗਜਨਨਤ੍ਥਾਯ ਭਮੁਕਲੋਮਤੋ ਰਂਸੀ ਵਿਸ੍ਸਜ੍ਜੇਸਿ, ਅਨ੍ਧਕਾਰਤਿਮਿਸਾ ਅਹੋਸਿ. ਤਾ ਭੀਤਾ ਅਹੇਸੁਂ ਮਰਣਭਯਤਜ੍ਜਿਤਾ, ਤੇਨ ਤਾਸਂ ਸੁਰਾ ਜੀਰਿ. ਸਤ੍ਥਾ ਨਿਸਿਨ੍ਨਪਲ੍ਲਙ੍ਕੇ ਅਨ੍ਤਰਹਿਤੋ ਸਿਨੇਰੁਮੁਦ੍ਧਨਿ ਠਤ੍ਵਾ ਉਣ੍ਣਲੋਮਤੋ ਰਂਸੀ ਵਿਸ੍ਸਜ੍ਜੇਸਿ, ਚਨ੍ਦਸੂਰਿਯਸਹਸ੍ਸੁਗ੍ਗਮਨਂ ਵਿਯ ਅਹੋਸਿ. ਸਤ੍ਥਾ ਤਤ੍ਥ ਠਿਤੋਵ ਤਾਸਂ ਸਂਵੇਗਜਨਨਤ੍ਥਾਯ –

‘‘ਕੋ ਨੁ ਹਾਸੋ ਕਿਮਾਨਨ੍ਦੋ, ਨਿਚ੍ਚਂ ਪਜ੍ਜਲਿਤੇ ਸਤਿ;

ਅਨ੍ਧਕਾਰੇਨ ਓਨਦ੍ਧਾ, ਪਦੀਪਂ ਨ ਗਵੇਸਥਾ’’ਤਿ. (ਧ. ਪ. ੧੪੬) –

ਇਮਂ ਗਾਥਮਾਹ. ਗਾਥਾਪਰਿਯੋਸਾਨੇ ਤਾ ਪਞ੍ਚਸਤਾਪਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ. ਸਤ੍ਥਾ ਆਗਨ੍ਤ੍ਵਾ ਗਨ੍ਧਕੁਟਿਛਾਯਾਯ ਬੁਦ੍ਧਾਸਨੇ ਨਿਸੀਦਿ. ਅਥ ਨਂ ਵਿਸਾਖਾ ਵਨ੍ਦਿਤ੍ਵਾ, ‘‘ਭਨ੍ਤੇ, ਇਦਂ ਹਿਰੋਤ੍ਤਪ੍ਪਭੇਦਕਂ ਸੁਰਾਪਾਨਂ ਨਾਮ ਕਦਾ ਉਪ੍ਪਨ੍ਨ’’ਨ੍ਤਿ ਪੁਚ੍ਛਿ. ਸੋ ਤਸ੍ਸਾ ਆਚਿਕ੍ਖਨ੍ਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਏਕੋ ਕਾਸਿਰਟ੍ਠਵਾਸੀ ਸੁਰੋ ਨਾਮ ਵਨਚਰਕੋ ਭਣ੍ਡਪਰਿਯੇਸਨਤ੍ਥਾਯ ਹਿਮਵਨ੍ਤਂ ਅਗਮਾਸਿ. ਤਤ੍ਥੇਕੋ ਰੁਕ੍ਖੋ ਉਗ੍ਗਨ੍ਤ੍ਵਾ ਪੋਰਿਸਮਤ੍ਤੇ ਠਾਨੇ ਤਿਧਾਕਪ੍ਪੋ ਅਹੋਸਿ. ਤਸ੍ਸ ਤਿਣ੍ਣਂ ਕਪ੍ਪਾਨਂ ਅਨ੍ਤਰੇ ਚਾਟਿਪ੍ਪਮਾਣੋ ਆਵਾਟੋ ਅਹੋਸਿ. ਸੋ ਦੇਵੇ ਵਸ੍ਸਨ੍ਤੇ ਉਦਕੇਨ ਪੂਰਿਤੋ, ਤਂ ਪਰਿਵਾਰੇਤ੍ਵਾ ਹਰੀਤਕੀ ਆਮਲਕੀ ਮਰਿਚਗਚ੍ਛੋ ਚ ਅਹੋਸਿ, ਤੇਸਂ ਪਕ੍ਕਾਨਿ ਫਲਾਨਿ ਛਿਜ੍ਜਿਤ੍ਵਾ ਤਤ੍ਥ ਪਤਨ੍ਤਿ. ਤਸ੍ਸਾਵਿਦੂਰੇ ਸਯਂਜਾਤਸਾਲਿ ਜਾਤੋ, ਤਤੋ ਸੁਵਕਾ ਸਾਲਿਸੀਸਾਨਿ ਆਹਰਿਤ੍ਵਾ ਤਸ੍ਮਿਂ ਰੁਕ੍ਖੇ ਨਿਸੀਦਿਤ੍ਵਾ ਖਾਦਨ੍ਤਿ. ਤੇਸਂ ਖਾਦਮਾਨਾਨਂ ਸਾਲੀਪਿ ਤਣ੍ਡੁਲਾਪਿ ਤਤ੍ਥ ਪਤਨ੍ਤਿ. ਇਤਿ ਤਂ ਉਦਕਂ ਸੂਰਿਯਸਨ੍ਤਾਪੇਨ ਪਚ੍ਚਮਾਨਂ ਰਸਂ ਲੋਹਿਤਵਣ੍ਣਂ ਅਹੋਸਿ. ਨਿਦਾਘਸਮਯੇ ਪਿਪਾਸਿਤਾ ਸਕੁਣਗਣਾ ਆਗਨ੍ਤ੍ਵਾ ਤਂ ਪਿਵਿਤ੍ਵਾ ਮਤ੍ਤਾ ਪਰਿਵਤ੍ਤਿਤ੍ਵਾ ਰੁਕ੍ਖਮੂਲੇ ਪਤਿਂਸੁ, ਤਸ੍ਮਿਂ ਥੋਕਂ ਨਿਦ੍ਦਾਯਿਤ੍ਵਾ ਵਿਕੂਜਮਾਨਾ ਪਕ੍ਕਮਨ੍ਤਿ. ਰੁਕ੍ਖਸੁਨਖਮਕ੍ਕਟਾਦੀਸੁਪਿ ਏਸੇਵ ਨਯੋ. ਵਨਚਰਕੋ ਤਂ ਦਿਸ੍ਵਾ ‘‘ਸਚੇ ਇਦਂ ਵਿਸਂ ਭਵੇਯ੍ਯ, ਇਮੇ ਮਰੇਯ੍ਯੁਂ, ਇਮੇ ਪਨ ਥੋਕਂ ਨਿਦ੍ਦਾਯਿਤ੍ਵਾ ਯਥਾਸੁਖਂ ਗਚ੍ਛਨ੍ਤਿ, ਨਯਿਦਂ ਵਿਸ’’ਨ੍ਤਿ ਸਯਂ ਪਿਵਿਤ੍ਵਾ ਮਤ੍ਤੋ ਹੁਤ੍ਵਾ ਮਂਸਂ ਖਾਦਿਤੁਕਾਮੋ ਅਹੋਸਿ. ਤਤੋ ਅਗ੍ਗਿਂ ਕਤ੍ਵਾ ਰੁਕ੍ਖਮੂਲੇ ਪਤਿਤੇ ਤਿਤ੍ਤਿਰਕੁਕ੍ਕੁਟਾਦਯੋ ਮਾਰੇਤ੍ਵਾ ਮਂਸਂ ਅਙ੍ਗਾਰੇ ਪਚਿਤ੍ਵਾ ਏਕੇਨ ਹਤ੍ਥੇਨ ਨਚ੍ਚਨ੍ਤੋ ਏਕੇਨ ਮਂਸਂ ਖਾਦਨ੍ਤੋ ਏਕਾਹਦ੍ਵੀਹਂ ਤਤ੍ਥੇਵ ਅਹੋਸਿ.

ਤਤੋ ਪਨ ਅਵਿਦੂਰੇ ਏਕੋ ਵਰੁਣੋ ਨਾਮ ਤਾਪਸੋ ਵਸਤਿ. ਵਨਚਰਕੋ ਅਞ੍ਞਦਾਪਿ ਤਸ੍ਸ ਸਨ੍ਤਿਕਂ ਗਚ੍ਛਤਿ. ਅਥਸ੍ਸ ਏਤਦਹੋਸਿ – ‘‘ਇਦਂ ਪਾਨਂ ਤਾਪਸੇਨ ਸਦ੍ਧਿਂ ਪਿਵਿਸ੍ਸਾਮੀ’’ਤਿ. ਸੋ ਏਕਂ ਵੇਲ਼ੁਨਾਲ਼ਿਕਂ ਪੂਰੇਤ੍ਵਾ ਪਕ੍ਕਮਂਸੇਨ ਸਦ੍ਧਿਂ ਆਹਰਿਤ੍ਵਾ ਪਣ੍ਣਸਾਲਂ ਗਨ੍ਤ੍ਵਾ, ‘‘ਭਨ੍ਤੇ, ਇਮਂ ਪਿਵਥਾ’’ਤਿ ਵਤ੍ਵਾ ਉਭੋਪਿ ਮਂਸਂ ਖਾਦਨ੍ਤਾ ਪਿਵਿਂਸੁ. ਇਤਿ ਸੁਰੇਨ ਚ ਵਰੁਣੇਨ ਚ ਦਿਟ੍ਠਤ੍ਤਾ ਤਸ੍ਸ ਪਾਨਸ੍ਸ ‘‘ਸੁਰਾ’’ਤਿ ਚ ‘‘ਵਰੁਣਾ’’ਤਿ ਚ ਨਾਮਂ ਜਾਤਂ. ਤੇ ਉਭੋਪਿ ‘‘ਅਤ੍ਥੇਸੋ ਉਪਾਯੋ’’ਤਿ ਵੇਲ਼ੁਨਾਲ਼ਿਯੋ ਪੂਰੇਤ੍ਵਾ ਕਾਜੇਨਾਦਾਯ ਪਚ੍ਚਨ੍ਤਨਗਰਂ ਗਨ੍ਤ੍ਵਾ ‘‘ਪਾਨਕਾਰਕਾ ਨਾਮ ਆਗਤਾ’’ਤਿ ਰਞ੍ਞੋ ਆਰੋਚਾਪੇਸੁਂ. ਰਾਜਾ ਨੇ ਪਕ੍ਕੋਸਾਪੇਸਿ, ਤੇ ਤਸ੍ਸ ਪਾਨਂ ਉਪਨੇਸੁਂ. ਰਾਜਾ ਦ੍ਵੇ ਤਯੋ ਵਾਰੇ ਪਿਵਿਤ੍ਵਾ ਮਜ੍ਜਿ, ਤਸ੍ਸ ਤਂ ਏਕਾਹਦ੍ਵੀਹਮਤ੍ਤਮੇਵ ਅਹੋਸਿ. ਅਥ ਨੇ ‘‘ਅਞ੍ਞਮ੍ਪਿ ਅਤ੍ਥੀ’’ਤਿ ਪੁਚ੍ਛਿ. ‘‘ਅਤ੍ਥਿ, ਦੇਵਾ’’ਤਿ. ‘‘ਕੁਹਿ’’ਨ੍ਤਿ? ‘‘ਹਿਮਵਨ੍ਤੇ ਦੇਵਾ’’ਤਿ. ‘‘ਤੇਨ ਹਿ ਆਨੇਥਾ’’ਤਿ. ਤੇ ਗਨ੍ਤ੍ਵਾ ਏਕਦ੍ਵੇ ਵਾਰੇ ਆਨੇਤ੍ਵਾ ‘‘ਨਿਬਦ੍ਧਂ ਗਨ੍ਤੁਂ ਨ ਸਕ੍ਖਿਸ੍ਸਾਮਾ’’ਤਿ ਸਮ੍ਭਾਰੇ ਸਲ੍ਲਕ੍ਖੇਤ੍ਵਾ ਤਸ੍ਸ ਰੁਕ੍ਖਸ੍ਸ ਤਚਂ ਆਦਿਂ ਕਤ੍ਵਾ ਸਬ੍ਬਸਮ੍ਭਾਰੇ ਪਕ੍ਖਿਪਿਤ੍ਵਾ ਨਗਰੇ ਸੁਰਂ ਕਰਿਂਸੁ. ਨਾਗਰਾ ਸੁਰਂ ਪਿਵਿਤ੍ਵਾ ਪਮਾਦਂ ਆਪਨ੍ਨਾ ਦੁਗ੍ਗਤਾ ਅਹੇਸੁਂ, ਨਗਰਂ ਸੁਞ੍ਞਂ ਵਿਯ ਅਹੋਸਿ, ਤੇਨ ਪਾਨਕਾਰਕਾ ਤਤੋ ਪਲਾਯਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ‘‘ਪਾਨਕਾਰਕਾ ਆਗਤਾ’’ਤਿ ਰਞ੍ਞੋ ਆਰੋਚਾਪੇਸੁਂ. ਰਾਜਾ ਨੇ ਪਕ੍ਕੋਸਾਪੇਤ੍ਵਾ ਪਰਿਬ੍ਬਯਂ ਅਦਾਸਿ. ਤੇ ਤਤ੍ਥਾਪਿ ਸੁਰਂ ਅਕਂਸੁ, ਤਮ੍ਪਿ ਨਗਰਂ ਤਥੇਵ ਵਿਨਸ੍ਸਿ, ਤਤੋ ਪਲਾਯਿਤ੍ਵਾ ਸਾਕੇਤਂ, ਸਾਕੇਤਤੋ ਸਾਵਤ੍ਥਿਂ ਅਗਮਂਸੁ.

ਤਦਾ ਸਾਵਤ੍ਥਿਯਂ ਸਬ੍ਬਮਿਤ੍ਤੋ ਨਾਮ ਰਾਜਾ ਅਹੋਸਿ. ਸੋ ਤੇਸਂ ਸਙ੍ਗਹਂ ਕਤ੍ਵਾ ‘‘ਕੇਨ ਵੋ ਅਤ੍ਥੋ’’ਤਿ ਪੁਚ੍ਛਿਤ੍ਵਾ ‘‘ਸਮ੍ਭਾਰਮੂਲੇਨ ਚੇਵ ਸਾਲਿਪਿਟ੍ਠੇਨ ਚ ਪਞ੍ਚਹਿ ਚਾਟਿਸਤੇਹਿ ਚਾ’’ਤਿ ਵੁਤ੍ਤੇ ਸਬ੍ਬਂ ਦਾਪੇਸਿ. ਤੇ ਪਞ੍ਚਸੁ ਚਾਟਿਸਤੇਸੁ ਸੁਰਂ ਸਣ੍ਠਾਪੇਤ੍ਵਾ ਮੂਸਿਕਭਯੇਨ ਚਾਟਿਰਕ੍ਖਣਤ੍ਥਾਯ ਏਕੇਕਾਯ ਚਾਟਿਯਾ ਸਨ੍ਤਿਕੇ ਏਕੇਕਂ ਬਿਲ਼ਾਰਂ ਬਨ੍ਧਿਂਸੁ. ਤੇ ਪਚ੍ਚਿਤ੍ਵਾ ਉਤ੍ਤਰਣਕਾਲੇ ਚਾਟਿਕੁਚ੍ਛੀਸੁ ਪਗ੍ਘਰਨ੍ਤਂ ਸੁਰਂ ਪਿਵਿਤ੍ਵਾ ਮਤ੍ਤਾ ਨਿਦ੍ਦਾਯਿਂਸੁ. ਮੂਸਿਕਾ ਆਗਨ੍ਤ੍ਵਾ ਤੇਸਂ ਕਣ੍ਣਨਾਸਿਕਦਾਠਿਕਨਙ੍ਗੁਟ੍ਠੇ ਖਾਦਿਤ੍ਵਾ ਅਗਮਂਸੁ. ‘‘ਬਿਲ਼ਾਰਾ ਸੁਰਂ ਪਿਵਿਤ੍ਵਾ ਮਤਾ’’ਤਿ ਆਯੁਤ੍ਤਕਪੁਰਿਸਾ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਵਿਸਕਾਰਕਾ ਏਤੇ ਭਵਿਸ੍ਸਨ੍ਤੀ’’ਤਿ ਤੇਸਂ ਦ੍ਵਿਨ੍ਨਮ੍ਪਿ ਜਨਾਨਂ ਸੀਸਾਨਿ ਛਿਨ੍ਦਾਪੇਸਿ. ਤੇ ‘‘ਸੁਰਂ ਦੇਵ, ਮਧੁਰਂ ਦੇਵਾ’’ਤਿ ਵਿਰਵਨ੍ਤਾਵ ਮਰਿਂਸੁ. ਰਾਜਾ ਤੇ ਮਾਰਾਪੇਤ੍ਵਾ ‘‘ਚਾਟਿਯੋ ਭਿਨ੍ਦਥਾ’’ਤਿ ਆਣਾਪੇਸਿ. ਬਿਲ਼ਾਰਾਪਿ ਸੁਰਾਯ ਜਿਣ੍ਣਾਯ ਉਟ੍ਠਹਿਤ੍ਵਾ ਕੀਲ਼ਨ੍ਤਾ ਵਿਚਰਿਂਸੁ, ਤੇ ਦਿਸ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਸਚੇ ਵਿਸਂ ਅਸ੍ਸ, ਏਤੇ ਮਰੇਯ੍ਯੁਂ, ਮਧੁਰੇਨੇਵ ਭਵਿਤਬ੍ਬਂ, ਪਿਵਿਸ੍ਸਾਮਿ ਨ’’ਨ੍ਤਿ ਨਗਰਂ ਅਲਙ੍ਕਾਰਾਪੇਤ੍ਵਾ ਰਾਜਙ੍ਗਣੇ ਮਣ੍ਡਪਂ ਕਾਰਾਪੇਤ੍ਵਾ ਅਲਙ੍ਕਤਮਣ੍ਡਪੇ ਸਮੁਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲਙ੍ਕੇ ਨਿਸੀਦਿਤ੍ਵਾ ਅਮਚ੍ਚਗਣਪਰਿਵੁਤੋ ਸੁਰਂ ਪਾਤੁਂ ਆਰਭਿ.

ਤਦਾ ਸਕ੍ਕੋ ਦੇਵਰਾਜਾ ‘‘ਕੇ ਨੁ ਖੋ ਮਾਤੁਪਟ੍ਠਾਨਾਦੀਸੁ ਅਪ੍ਪਮਤ੍ਤਾ ਤੀਣਿ ਸੁਚਰਿਤਾਨਿ ਪੂਰੇਨ੍ਤੀ’’ਤਿ ਲੋਕਂ ਵੋਲੋਕੇਨ੍ਤੋ ਤਂ ਰਾਜਾਨਂ ਸੁਰਂ ਪਾਤੁਂ ਨਿਸਿਨ੍ਨਂ ਦਿਸ੍ਵਾ ‘‘ਸਚਾਯਂ ਸੁਰਂ ਪਿਵਿਸ੍ਸਤਿ, ਸਕਲਜਮ੍ਬੁਦੀਪੋ ਨਸ੍ਸਿਸ੍ਸਤਿ. ਯਥਾ ਨ ਪਿਵਿਸ੍ਸਤਿ, ਤਥਾ ਨਂ ਕਰਿਸ੍ਸਾਮੀ’’ਤਿ ਏਕਂ ਸੁਰਾਪੁਣ੍ਣਂ ਕੁਮ੍ਭਂ ਹਤ੍ਥਤਲੇ ਠਪੇਤ੍ਵਾ ਬ੍ਰਾਹ੍ਮਣਵੇਸੇਨਾਗਨ੍ਤ੍ਵਾ ਰਞ੍ਞੋ ਸਮ੍ਮੁਖਟ੍ਠਾਨੇ ਆਕਾਸੇ ਠਤ੍ਵਾ ‘‘ਇਮਂ ਕੁਮ੍ਭਂ ਕਿਣਾਥ, ਇਮਂ ਕੁਮ੍ਭਂ ਕਿਣਾਥਾ’’ਤਿ ਆਹ. ਸਬ੍ਬਮਿਤ੍ਤਰਾਜਾ ਤਂ ਤਥਾ ਵਦਨ੍ਤਂ ਆਕਾਸੇ ਠਿਤਂ ਦਿਸ੍ਵਾ ‘‘ਕੁਤੋ ਨੁ ਖੋ ਬ੍ਰਾਹ੍ਮਣੋ ਆਗਚ੍ਛਤੀ’’ਤਿ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੩੩.

‘‘ਕੋ ਪਾਤੁਰਾਸੀ ਤਿਦਿਵਾ ਨਭਮ੍ਹਿ, ਓਭਾਸਯਂ ਸਂਵਰਿਂ ਚਨ੍ਦਿਮਾਵ;

ਗਤ੍ਤੇਹਿ ਤੇ ਰਸ੍ਮਿਯੋ ਨਿਚ੍ਛਰਨ੍ਤਿ, ਸਤੇਰਤਾ ਵਿਜ੍ਜੁਰਿਵਨ੍ਤਲਿਕ੍ਖੇ.

੩੪.

‘‘ਸੋ ਛਿਨ੍ਨਵਾਤਂ ਕਮਸੀ ਅਘਮ੍ਹਿ, ਵੇਹਾਯਸਂ ਗਚ੍ਛਸਿ ਤਿਟ੍ਠਸੀ ਚ;

ਇਦ੍ਧੀ ਨੁ ਤੇ ਵਤ੍ਥੁਕਤਾ ਸੁਭਾਵਿਤਾ, ਅਨਦ੍ਧਗੂਨਂ ਅਪਿ ਦੇਵਤਾਨਂ.

੩੫.

‘‘ਵੇਹਾਯਸਂ ਗਮ੍ਮਮਾਗਮ੍ਮ ਤਿਟ੍ਠਸਿ, ਕੁਮ੍ਭਂ ਕਿਣਾਥਾਤਿ ਯਮੇਤਮਤ੍ਥਂ;

ਕੋ ਵਾ ਤੁਵਂ ਕਿਸ੍ਸ ਵਾ ਤਾਯ ਕੁਮ੍ਭੋ, ਅਕ੍ਖਾਹਿ ਮੇ ਬ੍ਰਾਹ੍ਮਣ ਏਤਮਤ੍ਥ’’ਨ੍ਤਿ.

ਤਤ੍ਥ ਕੋ ਪਾਤੁਰਾਸੀਤਿ ਕੁਤੋ ਪਾਤੁਭੂਤੋਸਿ, ਕੁਤੋ ਆਗਤੋਸੀਤਿ ਅਤ੍ਥੋ. ਤਿਦਿਵਾ ਨਭਮ੍ਹੀਤਿ ਕਿਂ ਤਾਵਤਿਂਸਭਵਨਾ ਆਗਨ੍ਤ੍ਵਾ ਇਧ ਨਭਮ੍ਹਿ ਆਕਾਸੇ ਪਾਕਟੋ ਜਾਤੋਸੀਤਿ ਪੁਚ੍ਛਤਿ. ਸਂਵਰਿਨ੍ਤਿ ਰਤ੍ਤਿਂ. ਸਤੇਰਤਾਤਿ ਏਵਂਨਾਮਿਕਾ. ਸੋਤਿ ਸੋ ਤ੍ਵਂ. ਛਿਨ੍ਨਵਾਤਨ੍ਤਿ ਵਲਾਹਕੋਪਿ ਤਾਵ ਵਾਤੇਨ ਕਮਤਿ, ਤਸ੍ਸ ਪਨ ਸੋਪਿ ਵਾਤੋ ਨਤ੍ਥਿ, ਤੇਨੇਵਮਾਹ. ਕਮਸੀਤਿ ਪਵਤ੍ਤੇਸਿ. ਅਘਮ੍ਹੀਤਿ ਅਪ੍ਪਟਿਘੇ ਆਕਾਸੇ. ਵਤ੍ਥੁਕਤਾਤਿ ਵਤ੍ਥੁ ਵਿਯ ਪਤਿਟ੍ਠਾ ਵਿਯ ਕਤਾ. ਅਨਦ੍ਧਗੂਨਂ ਅਪਿ ਦੇਵਤਾਨਨ੍ਤਿ ਯਾ ਪਦਸਾ ਅਦ੍ਧਾਨਂ ਅਗਮਨੇਨ ਅਨਦ੍ਧਗੂਨਂ ਦੇਵਤਾਨਂ ਇਦ੍ਧਿ, ਸਾ ਅਪਿ ਤਵ ਸੁਭਾਵਿਤਾਤਿ ਪੁਚ੍ਛਤਿ. ਵੇਹਾਯਸਂ ਗਮ੍ਮਮਾਗਮ੍ਮਾਤਿ ਆਕਾਸੇ ਪਵਤ੍ਤਂ ਪਦਵੀਤਿਹਾਰਂ ਪਟਿਚ੍ਚ ਨਿਸ੍ਸਾਯ. ‘‘ਤਿਟ੍ਠਸੀ’’ਤਿ ਇਮਸ੍ਸ ‘‘ਕੋ ਵਾ ਤੁਵ’’ਨ੍ਤਿ ਇਮਿਨਾ ਸਮ੍ਬਨ੍ਧੋ, ਏਵਂ ਤਿਟ੍ਠਮਾਨੋ ਕੋ ਵਾ ਤ੍ਵਨ੍ਤਿ ਅਤ੍ਥੋ. ਯਮੇਤਮਤ੍ਥਨ੍ਤਿ ਯਂ ਏਤਂ ਵਦਸਿ. ਇਮਸ੍ਸ ‘‘ਕਿਸ੍ਸ ਵਾ ਤਾਯ’’ਨ੍ਤਿ ਇਮਿਨਾ ਸਮ੍ਬਨ੍ਧੋ, ਯਂ ਏਤਂ ਕੁਮ੍ਭਂ ਕਿਣਾਥਾਤਿ ਵਦਸਿ, ਕਿਸ੍ਸ ਵਾ ਤੇ ਅਯਂ ਕੁਮ੍ਭੋਤਿ ਅਤ੍ਥੋ.

ਤਤੋ ਸਕ੍ਕੋ ‘‘ਤੇਨ ਹਿ ਸੁਣਾਹੀ’’ਤਿ ਵਤ੍ਵਾ ਸੁਰਾਯ ਦੋਸੇ ਦਸ੍ਸੇਨ੍ਤੋ ਆਹ –

੩੬.

‘‘ਨ ਸਪ੍ਪਿਕੁਮ੍ਭੋ ਨਪਿ ਤੇਲਕੁਮ੍ਭੋ, ਨ ਫਾਣਿਤਸ੍ਸ ਨ ਮਧੁਸ੍ਸ ਕੁਮ੍ਭੋ;

ਕੁਮ੍ਭਸ੍ਸ ਵਜ੍ਜਾਨਿ ਅਨਪ੍ਪਕਾਨਿ, ਦੋਸੇ ਬਹੂ ਕੁਮ੍ਭਗਤੇ ਸੁਣਾਥ.

੩੭.

‘‘ਗਲ਼ੇਯ੍ਯ ਯਂ ਪਿਤ੍ਵਾ ਪਤੇ ਪਪਾਤਂ, ਸੋਬ੍ਭਂ ਗੁਹਂ ਚਨ੍ਦਨਿਯੋਲ਼ਿਗਲ੍ਲਂ;

ਬਹੁਮ੍ਪਿ ਭੁਞ੍ਜੇਯ੍ਯ ਅਭੋਜਨੇਯ੍ਯਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੩੮.

‘‘ਯਂ ਪਿਤ੍ਵਾ ਚਿਤ੍ਤਸ੍ਮਿਂ ਅਨੇਸਮਾਨੋ, ਆਹਿਣ੍ਡਤੀ ਗੋਰਿਵ ਭਕ੍ਖਸਾਦੀ;

ਅਨਾਥਮਾਨੋ ਉਪਗਾਯਤਿ ਨਚ੍ਚਤਿ ਚ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੩੯.

‘‘ਯਂ ਵੇ ਪਿਵਿਤ੍ਵਾ ਅਚੇਲੋਵ ਨਗ੍ਗੋ, ਚਰੇਯ੍ਯ ਗਾਮੇ ਵਿਸਿਖਨ੍ਤਰਾਨਿ;

ਸਮ੍ਮੂਲ਼੍ਹਚਿਤ੍ਤੋ ਅਤਿਵੇਲਸਾਯੀ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੦.

‘‘ਯਂ ਪਿਤ੍ਵਾ ਉਟ੍ਠਾਯ ਪਵੇਧਮਾਨੋ, ਸੀਸਞ੍ਚ ਬਾਹੁਞ੍ਚ ਪਚਾਲਯਨ੍ਤੋ;

ਸੋ ਨਚ੍ਚਤੀ ਦਾਰੁਕਟਲ੍ਲਕੋਵ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੧.

‘‘ਯਂ ਵੇ ਪਿਵਿਤ੍ਵਾ ਅਗ੍ਗਿਦਡ੍ਢਾ ਸਯਨ੍ਤਿ, ਅਥੋ ਸਿਗਾਲੇਹਿਪਿ ਖਾਦਿਤਾਸੇ;

ਬਨ੍ਧਂ ਵਧਂ ਭੋਗਜਾਨਿਞ੍ਚੁਪੇਨ੍ਤਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੨.

‘‘ਯਂ ਪਿਤ੍ਵਾ ਭਾਸੇਯ੍ਯ ਅਭਾਸਨੇਯ੍ਯਂ, ਸਭਾਯਮਾਸੀਨੋ ਅਪੇਤਵਤ੍ਥੋ;

ਸਮ੍ਮਕ੍ਖਿਤੋ ਵਨ੍ਤਗਤੋ ਬ੍ਯਸਨ੍ਨੋ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੩.

‘‘ਯਂ ਵੇ ਪਿਵਿਤ੍ਵਾ ਉਕ੍ਕਟ੍ਠੋ ਆਵਿਲਕ੍ਖੋ, ਮਮੇਵ ਸਬ੍ਬਪਥਵੀਤਿ ਮਞ੍ਞੇ;

ਨ ਮੇ ਸਮੋ ਚਾਤੁਰਨ੍ਤੋਪਿ ਰਾਜਾ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੪.

‘‘ਮਾਨਾਤਿਮਾਨਾ ਕਲਹਾਨਿ ਪੇਸੁਣੀ, ਦੁਬ੍ਬਣ੍ਣਿਨੀ ਨਗ੍ਗਯਿਨੀ ਪਲਾਯਿਨੀ;

ਚੋਰਾਨ ਧੁਤ੍ਤਾਨ ਗਤੀ ਨਿਕੇਤੋ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੫.

‘‘ਇਦ੍ਧਾਨਿ ਫੀਤਾਨਿ ਕੁਲਾਨਿ ਅਸ੍ਸੁ, ਅਨੇਕਸਾਹਸ੍ਸਧਨਾਨਿ ਲੋਕੇ;

ਉਚ੍ਛਿਨ੍ਨਦਾਯਜ੍ਜਕਤਾਨਿਮਾਯ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੬.

‘‘ਧਞ੍ਞਂ ਧਨਂ ਰਜਤਂ ਜਾਤਰੂਪਂ, ਖੇਤ੍ਤਂ ਗਵਂ ਯਤ੍ਥ ਵਿਨਾਸਯਨ੍ਤਿ;

ਉਚ੍ਛੇਦਨੀ ਵਿਤ੍ਤਗਤਂ ਕੁਲਾਨਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੭.

‘‘ਯਂ ਵੇ ਪਿਤ੍ਵਾ ਦਿਤ੍ਤਰੂਪੋਵ ਪੋਸੋ, ਅਕ੍ਕੋਸਤਿ ਮਾਤਰਂ ਪਿਤਰਞ੍ਚ;

ਸਸ੍ਸੁਮ੍ਪਿ ਗਣ੍ਹੇਯ੍ਯ ਅਥੋਪਿ ਸੁਣ੍ਹਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੮.

‘‘ਯਂ ਵੇ ਪਿਤ੍ਵਾ ਦਿਤ੍ਤਰੂਪਾਵ ਨਾਰੀ, ਅਕ੍ਕੋਸਤੀ ਸਸ੍ਸੁਰਂ ਸਾਮਿਕਞ੍ਚ;

ਦਾਸਮ੍ਪਿ ਗਣ੍ਹੇ ਪਰਿਚਾਰਿਕਮ੍ਪਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੪੯.

‘‘ਯਂ ਵੇ ਪਿਵਿਤ੍ਵਾਨ ਹਨੇਯ੍ਯ ਪੋਸੋ, ਧਮ੍ਮੇ ਠਿਤਂ ਸਮਣਂ ਬ੍ਰਾਹ੍ਮਣਂ ਵਾ;

ਗਚ੍ਛੇ ਅਪਾਯਮ੍ਪਿ ਤਤੋਨਿਦਾਨਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੦.

‘‘ਯਂ ਵੇ ਪਿਵਿਤ੍ਵਾ ਦੁਚ੍ਚਰਿਤਂ ਚਰਨ੍ਤਿ, ਕਾਯੇਨ ਵਾਚਾਯ ਚ ਚੇਤਸਾ ਚ;

ਨਿਰਯਂ ਵਜਨ੍ਤਿ ਦੁਚ੍ਚਰਿਤਂ ਚਰਿਤ੍ਵਾ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੧.

‘‘ਯਂ ਯਾਚਮਾਨਾ ਨ ਲਭਨ੍ਤਿ ਪੁਬ੍ਬੇ, ਬਹੁਂ ਹਿਰਞ੍ਞਮ੍ਪਿ ਪਰਿਚ੍ਚਜਨ੍ਤਾ;

ਸੋ ਤਂ ਪਿਵਿਤ੍ਵਾ ਅਲਿਕਂ ਭਣਾਤਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੨.

‘‘ਯਂ ਵੇ ਪਿਤ੍ਵਾ ਪੇਸਨੇ ਪੇਸਿਯਨ੍ਤੋ, ਅਚ੍ਚਾਯਿਕੇ ਕਰਣੀਯਮ੍ਹਿ ਜਾਤੇ;

ਅਤ੍ਥਮ੍ਪਿ ਸੋ ਨਪ੍ਪਜਾਨਾਤਿ ਵੁਤ੍ਤੋ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੩.

‘‘ਹਿਰੀਮਨਾਪਿ ਅਹਿਰੀਕਭਾਵਂ, ਪਾਤੁਂ ਕਰੋਨ੍ਤਿ ਮਦਨਾਯ ਮਤ੍ਤਾ;

ਧੀਰਾਪਿ ਸਨ੍ਤਾ ਬਹੁਕਂ ਭਣਨ੍ਤਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੪.

‘‘ਯਂ ਵੇ ਪਿਤ੍ਵਾ ਏਕਥੂਪਾ ਸਯਨ੍ਤਿ, ਅਨਾਸਕਾ ਥਣ੍ਡਿਲਦੁਕ੍ਖਸੇਯ੍ਯਂ;

ਦੁਬ੍ਬਣ੍ਣਿਯਂ ਆਯਸਕ੍ਯਞ੍ਚੁਪੇਨ੍ਤਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੫.

‘‘ਯਂ ਵੇ ਪਿਤ੍ਵਾ ਪਤ੍ਤਖਨ੍ਧਾ ਸਯਨ੍ਤਿ, ਗਾਵੋ ਕੂਟਹਤਾਵ ਨ ਹਿ ਵਾਰੁਣਿਯਾ;

ਵੇਗੋ ਨਰੇਨ ਸੁਸਹੋਰਿਵ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੬.

‘‘ਯਂ ਮਨੁਸ੍ਸਾ ਵਿਵਜ੍ਜਨ੍ਤਿ, ਸਪ੍ਪਂ ਘੋਰਵਿਸਮਿਵ;

ਤਂ ਲੋਕੇ ਵਿਸਸਮਾਨਂ, ਕੋ ਨਰੋ ਪਾਤੁਮਰਹਤਿ.

੫੭.

‘‘ਯਂ ਵੇ ਪਿਤ੍ਵਾ ਅਨ੍ਧਕਵੇਣ੍ਡਪੁਤ੍ਤਾ, ਸਮੁਦ੍ਦਤੀਰੇ ਪਰਿਚਾਰਯਨ੍ਤਾ;

ਉਪਕ੍ਕਮੁਂ ਮੁਸਲੇਭਿ ਅਞ੍ਞਮਞ੍ਞਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.

੫੮.

‘‘ਯਂ ਵੇ ਪਿਤ੍ਵਾ ਪੁਬ੍ਬਦੇਵਾ ਪਮਤ੍ਤਾ, ਤਿਦਿਵਾ ਚੁਤਾ ਸਸ੍ਸਤਿਯਾ ਸਮਾਯਾ;

ਤਂ ਤਾਦਿਸਂ ਮਜ੍ਜਮਿਮਂ ਨਿਰਤ੍ਥਕਂ, ਜਾਨਂ ਮਹਾਰਾਜ ਕਥਂ ਪਿਵੇਯ੍ਯ.

੫੯.

‘‘ਨਯਿਮਸ੍ਮਿਂ ਕੁਮ੍ਭਸ੍ਮਿਂ ਦਧਿ ਵਾ ਮਧੁ ਵਾ, ਏਵਂ ਅਭਿਞ੍ਞਾਯ ਕਿਣਾਹਿ ਰਾਜ;

ਏਵਞ੍ਹਿਮਂ ਕੁਮ੍ਭਗਤਾ ਮਯਾ ਤੇ, ਅਕ੍ਖਾਤਰੂਪਂ ਤਵ ਸਬ੍ਬਮਿਤ੍ਤਾ’’ਤਿ.

ਤਤ੍ਥ ਵਜ੍ਜਾਨੀਤਿਆਦੀਨਵਾ. ਗਲ਼ੇਯ੍ਯਾਤਿ ਗਚ੍ਛਨ੍ਤੋ ਪਦੇ ਪਦੇ ਪਰਿਵਤ੍ਤੇਯ੍ਯ. ਯਂ ਪਿਤ੍ਵਾ ਪਤੇਤਿ ਯਂ ਪਿਵਿਤ੍ਵਾ ਪਤੇਯ੍ਯ. ਸੋਬ੍ਭਨ੍ਤਿ ਆਵਾਟਂ. ਚਨ੍ਦਨਿਯੋਲ਼ਿਗਲ੍ਲਨ੍ਤਿ ਚਨ੍ਦਨਿਕਞ੍ਚ ਓਲ਼ਿਗਲ੍ਲਞ੍ਚ. ਅਭੋਜਨੇਯ੍ਯਨ੍ਤਿ ਭੁਞ੍ਜਿਤੁਂ ਅਯੁਤ੍ਤਂ. ਅਨੇਸਮਾਨੋਤਿ ਅਨਿਸ੍ਸਰੋ. ਗੋਰਿਵਾਤਿ ਗੋਣੋ ਵਿਯ. ਭਕ੍ਖਸਾਦੀਤਿ ਪੁਰਾਣਕਸਟਖਾਦਕੋ, ਯਥਾ ਸੋ ਤਤ੍ਥ ਤਤ੍ਥ ਭਕ੍ਖਸਂ ਪਰਿਯੇਸਨ੍ਤੋ ਆਹਿਣ੍ਡਤਿ, ਏਵਂ ਆਹਿਣ੍ਡਤੀਤਿ ਅਤ੍ਥੋ. ਅਨਾਥਮਾਨੋਤਿ ਨਿਰਵਸ੍ਸਯੋ ਅਨਾਥੋ ਵਿਯ. ਉਪਗਾਯਤੀਤਿ ਅਞ੍ਞਂ ਗਾਯਨ੍ਤਂ ਦਿਸ੍ਵਾ ਉਪਗਨ੍ਤ੍ਵਾ ਗਾਯਤਿ. ਅਚੇਲੋਵਾਤਿ ਅਚੇਲਕੋ ਵਿਯ. ਵਿਸਿਖਨ੍ਤਰਾਨੀਤਿ ਅਨ੍ਤਰਵੀਥਿਯੋ. ਅਤਿਵੇਲਸਾਯੀਤਿ ਅਤਿਚਿਰਮ੍ਪਿ ਨਿਦ੍ਦਂ ਓਕ੍ਕਮੇਯ੍ਯ. ‘‘ਅਤਿਵੇਲਚਾਰੀ’’ਤਿਪਿ ਪਾਠੋ, ਅਤਿਵੇਲਚਾਰੀ ਹੁਤ੍ਵਾ ਚਰੇਯ੍ਯਾਤਿ ਅਤ੍ਥੋ.

ਦਾਰੁਕਟਲ੍ਲਕੋ ਵਾਤਿ ਦਾਰੁਮਯਯਨ੍ਤਰੂਪਕਂ ਵਿਯ. ਭੋਗਜਾਨਿਞ੍ਚੁਪੇਨ੍ਤੀਤਿ ਭੋਗਜਾਨਿਞ੍ਚ ਉਪੇਨ੍ਤਿ, ਪਾਣਾਤਿਪਾਤਾਦੀਨਿ ਕਤ੍ਵਾ ਦਣ੍ਡਪੀਲ਼ਿਤਾ ਧਨਜਾਨਿਞ੍ਚ ਅਞ੍ਞਞ੍ਚ ਵਧਬਨ੍ਧਨਾਦਿਦੁਕ੍ਖਂ ਪਾਪੁਣਨ੍ਤੀਤਿ ਅਤ੍ਥੋ. ਵਨ੍ਤਗਤੋਤਿ ਅਤ੍ਤਨੋ ਵਨ੍ਤਸ੍ਮਿਂ ਗਤੋ. ਬ੍ਯਸਨ੍ਨੋਤਿ ਬ੍ਯਸਨਾਪਨ੍ਨੋ. ‘‘ਵਿਸਨ੍ਨੋ’’ਤਿਪਿ ਪਾਠੋ, ਤਸ੍ਮਿਂ ਵਨ੍ਤੇ ਓਸਨ੍ਨੋਤਿ ਅਤ੍ਥੋ. ਉਕ੍ਕਟ੍ਠੋਤਿ ਅਹਂ ਮਹਾਯੋਧੋ, ਕੋ ਮਯਾ ਸਦਿਸੋ ਅਤ੍ਥੀਤਿ ਏਵਂ ਉਕ੍ਕਂਸਗਤੋ ਹੁਤ੍ਵਾ. ਆਵਿਲਕ੍ਖੋਤਿ ਰਤ੍ਤਕ੍ਖੋ. ਸਬ੍ਬਪਥਵੀਤਿ ਸਬ੍ਬਾ ਪਥਵੀ. ‘‘ਸਬ੍ਬਪੁਥੁਵੀ’’ਤਿਪਿ ਪਾਠੋ. ਚਾਤੁਰਨ੍ਤੋਤਿ ਚਤੁਸਮੁਦ੍ਦਪਰਿਯਨ੍ਤਾਯ ਪਥਵਿਯਾ ਇਸ੍ਸਰੋ. ਮਾਨਾਤਿਮਾਨਾਤਿ ਮਾਨਕਾਰਿਕਾ. ਸੇਸਪਦੇਸੁਪਿ ਏਸੇਵ ਨਯੋ. ਗਤੀਤਿ ਨਿਬ੍ਬਤ੍ਤਿ. ਨਿਕੇਤੋਤਿ ਨਿਵਾਸੋ. ਤਸ੍ਸਾ ਪੁਣ੍ਣਨ੍ਤਿ ਯਾ ਏਵਰੂਪਾ, ਤਸ੍ਸਾ ਪੁਣ੍ਣਂ. ਇਦ੍ਧਾਨੀਤਿ ਸਮਿਦ੍ਧਾਨਿ. ਫੀਤਾਨੀਤਿ ਵਤ੍ਥਾਲਙ੍ਕਾਰਕਪ੍ਪਭਣ੍ਡੇਹਿ ਪੁਪ੍ਫਿਤਾਨਿ. ਉਚ੍ਛਿਨ੍ਨਦਾਯਜ੍ਜਕਤਾਨੀਤਿ ਉਚ੍ਛਿਨ੍ਨਦਾਯਾਦਾਨਿ ਨਿਦ੍ਧਨਾਨਿ ਕਤਾਨਿ. ਯਤ੍ਥ ਵਿਨਾਸਯਨ੍ਤੀਤਿ ਯਂ ਨਿਸ੍ਸਾਯ ਯਤ੍ਥ ਪਤਿਟ੍ਠਿਤਾ, ਏਵਂ ਬਹੁਮ੍ਪਿ ਧਨਧਞ੍ਞਾਦਿਸਾਪਤੇਯ੍ਯਂ ਨਾਸਯਨ੍ਤਿ, ਕਪਣਾ ਹੋਨ੍ਤਿ.

ਦਿਤ੍ਤਰੂਪੋਤਿ ਦਪ੍ਪਿਤਰੂਪੋ. ਗਣ੍ਹੇਯ੍ਯਾਤਿ ਭਰਿਯਸਞ੍ਞਾਯ ਕਿਲੇਸਵਸੇਨ ਹਤ੍ਥੇ ਗਣ੍ਹੇਯ੍ਯ. ਦਾਸਮ੍ਪਿ ਗਣ੍ਹੇਤਿ ਅਤ੍ਤਨੋ ਦਾਸਮ੍ਪਿ ਕਿਲੇਸਵਸੇਨ ‘‘ਸਾਮਿਕੋ ਮੇ’’ਤਿ ਗਣ੍ਹੇਯ੍ਯ. ਪਿਵਿਤ੍ਵਾਨਾਤਿ ਪਿਵਿਤ੍ਵਾ. ਦੁਚ੍ਚਰਿਤਂ ਚਰਿਤ੍ਵਾਤਿ ਏਵਂ ਤੀਹਿ ਦ੍ਵਾਰੇਹਿ ਦਸਵਿਧਮ੍ਪਿ ਅਕੁਸਲਂ ਕਤ੍ਵਾ. ਯਂ ਯਾਚਮਾਨਾਤਿ ਯਂ ਪੁਰਿਸਂ ਪੁਬ੍ਬੇ ਸੁਰਂ ਅਪਿਵਨ੍ਤਂ ਬਹੁਂ ਹਿਰਞ੍ਞਂ ਪਰਿਚ੍ਚਜਨ੍ਤਾ ਮੁਸਾਵਾਦਂ ਕਰੋਹੀਤਿ ਯਾਚਮਾਨਾ ਨ ਲਭਨ੍ਤਿ. ਪਿਤ੍ਵਾਤਿ ਪਿਵਿਤ੍ਵਾ ਠਿਤੋ. ਨਪ੍ਪਜਾਨਾਤਿ ਵੁਤ੍ਤੋਤਿ ‘‘ਕੇਨਟ੍ਠੇਨ ਆਗਤੋਸੀ’’ਤਿ ਵੁਤ੍ਤੋ ਸਾਸਨਸ੍ਸ ਦੁਗ੍ਗਹਿਤਤ੍ਤਾ ਤਂ ਅਤ੍ਥਂ ਨ ਜਾਨਾਤਿ. ਹਿਰੀਮਨਾਪੀਤਿ ਹਿਰੀਯੁਤ੍ਤਚਿਤ੍ਤਾਪਿ. ਏਕਥੂਪਾਤਿ ਸੂਕਰਪੋਤਕਾ ਵਿਯ ਹੀਨਜਚ੍ਚੇਹਿਪਿ ਸਦ੍ਧਿਂ ਏਕਰਾਸੀ ਹੁਤ੍ਵਾ. ਅਨਾਸਕਾਤਿ ਨਿਰਾਹਾਰਾ. ਥਣ੍ਡਿਲਦੁਕ੍ਖਸੇਯ੍ਯਨ੍ਤਿ ਭੂਮਿਯਂ ਦੁਕ੍ਖਸੇਯ੍ਯਂ ਸਯਨ੍ਤਿ. ਆਯਸਕ੍ਯਨ੍ਤਿ ਗਰਹਂ.

ਪਤ੍ਤਖਨ੍ਧਾਤਿ ਪਤਿਤਕ੍ਖਨ੍ਧਾ. ਕੂਟਹਤਾਵਾਤਿ ਗੀਵਾਯ ਬਦ੍ਧੇਨ ਕੂਟੇਨ ਹਤਾ ਗਾਵੋ ਵਿਯ, ਯਥਾ ਤਾ ਤਿਣਂ ਅਖਾਦਨ੍ਤਿਯੋ ਪਾਨੀਯਂ ਅਪਿਵਨ੍ਤਿਯੋ ਸਯਨ੍ਤਿ, ਤਥਾ ਸਯਨ੍ਤੀਤਿ ਅਤ੍ਥੋ. ਘੋਰਵਿਸਮਿਵਾਤਿ ਘੋਰਵਿਸਂ ਵਿਯ. ਵਿਸਸਮਾਨਨ੍ਤਿ ਵਿਸਸਦਿਸਂ. ਅਨ੍ਧਕਵੇਣ੍ਡਪੁਤ੍ਤਾਤਿ ਦਸ ਭਾਤਿਕਰਾਜਾਨੋ. ਉਪਕ੍ਕਮੁਨ੍ਤਿ ਪਹਰਿਂਸੁ. ਪੁਬ੍ਬਦੇਵਾਤਿ ਅਸੁਰਾ. ਤਿਦਿਵਾਤਿ ਤਾਵਤਿਂਸਦੇਵਲੋਕਾ. ਸਸ੍ਸਤਿਯਾਤਿ ਸਸ੍ਸਤਾ, ਦੀਘਾਯੁਕਭਾਵੇਨ ਨਿਚ੍ਚਸਮ੍ਮਤਾ ਦੇਵਲੋਕਾਤਿ ਅਤ੍ਥੋ. ਸਮਾਯਾਤਿ ਸਦ੍ਧਿਂ ਅਸੁਰਮਾਯਾਹਿ. ਜਾਨਨ੍ਤਿ ਏਵਂ ‘‘ਨਿਰਤ੍ਥਕਂ ਏਤ’’ਨ੍ਤਿ ਜਾਨਨ੍ਤੋ ਤੁਮ੍ਹਾਦਿਸੋ ਪਣ੍ਡਿਤੋ ਪੁਰਿਸੋ ਕਥਂ ਪਿਵੇਯ੍ਯ. ਕੁਮ੍ਭਗਤਾ ਮਯਾਤਿ ਕੁਮ੍ਭਗਤਂ ਮਯਾ, ਅਯਮੇਵ ਵਾ ਪਾਠੋ. ਅਕ੍ਖਾਤਰੂਪਨ੍ਤਿ ਸਭਾਵਤੋ ਅਕ੍ਖਾਤਂ.

ਤਂ ਸੁਤ੍ਵਾ ਰਾਜਾ ਸੁਰਾਯ ਆਦੀਨਵਂ ਞਤ੍ਵਾ ਤੁਟ੍ਠੋ ਸਕ੍ਕਸ੍ਸ ਥੁਤਿਂ ਕਰੋਨ੍ਤੋ ਦ੍ਵੇ ਗਾਥਾ ਅਭਾਸਿ –

੬੦.

‘‘ਨ ਮੇ ਪਿਤਾ ਵਾ ਅਥਵਾਪਿ ਮਾਤਾ, ਏਤਾਦਿਸਾ ਯਾਦਿਸਕੋ ਤੁਵਂਸਿ;

ਹਿਤਾਨੁਕਮ੍ਪੀ ਪਰਮਤ੍ਥਕਾਮੋ, ਸੋਹਂ ਕਰਿਸ੍ਸਂ ਵਚਨਂ ਤਵਜ੍ਜ.

੬੧.

‘‘ਦਦਾਮਿ ਤੇ ਗਾਮਵਰਾਨਿ ਪਞ੍ਚ, ਦਾਸੀਸਤਂ ਸਤ੍ਤ ਗਵਂਸਤਾਨਿ;

ਆਜਞ੍ਞਯੁਤ੍ਤੇ ਚ ਰਥੇ ਦਸ ਇਮੇ, ਆਚਰਿਯੋ ਹੋਸਿ ਮਮਤ੍ਥਕਾਮੋ’’ਤਿ.

ਤਤ੍ਥ ਗਾਮਵਰਾਨੀਤਿ, ਬ੍ਰਾਹ੍ਮਣ, ਆਚਰਿਯਸ੍ਸ ਨਾਮ ਆਚਰਿਯਭਾਗੋ ਇਚ੍ਛਿਤਬ੍ਬੋ, ਸਂਵਚ੍ਛਰੇ ਸਂਵਚ੍ਛਰੇ ਸਤਸਹਸ੍ਸੁਟ੍ਠਾਨਕੇ ਤੁਯ੍ਹਂ ਪਞ੍ਚ ਗਾਮੇ ਦਦਾਮੀਤਿ ਵਦਤਿ. ਦਸ ਇਮੇਤਿ ਇਮੇ ਦਸ ਪੁਰਤੋ ਠਿਤੇ ਕਞ੍ਚਨਵਿਚਿਤ੍ਤੇ ਰਥੇ ਦਸ੍ਸੇਨ੍ਤੋ ਏਵਮਾਹ.

ਤਂ ਸੁਤ੍ਵਾ ਸਕ੍ਕੋ ਦੇਵਤ੍ਤਭਾਵਂ ਦਸ੍ਸੇਤ੍ਵਾ ਅਤ੍ਤਾਨਂ ਜਾਨਾਪੇਨ੍ਤੋ ਆਕਾਸੇ ਠਤ੍ਵਾ ਦ੍ਵੇ ਗਾਥਾ ਅਭਾਸਿ –

੬੨.

‘‘ਤਵੇਵ ਦਾਸੀਸਤਮਤ੍ਥੁ ਰਾਜ, ਗਾਮਾ ਚ ਗਾਵੋ ਚ ਤਵੇਵ ਹੋਨ੍ਤੁ;

ਆਜਞ੍ਞਯੁਤ੍ਤਾ ਚ ਰਥਾ ਤਵੇਵ, ਸਕ੍ਕੋਹਮਸ੍ਮੀ ਤਿਦਸਾਨਮਿਨ੍ਦੋ.

੬੩.

‘‘ਮਂਸੋਦਨਂ ਸਪ੍ਪਿਪਾਯਾਸਂ ਭੁਞ੍ਜ, ਖਾਦਸ੍ਸੁ ਚ ਤ੍ਵਂ ਮਧੁਮਾਸਪੂਵੇ;

ਏਵਂ ਤੁਵਂ ਧਮ੍ਮਰਤੋ ਜਨਿਨ੍ਦ, ਅਨਿਨ੍ਦਿਤੋ ਸਗ੍ਗਮੁਪੇਹਿ ਠਾਨ’’ਨ੍ਤਿ.

ਤਤ੍ਥ ਏਵਂ ਤੁਵਂ ਧਮ੍ਮਰਤੋਤਿ ਏਵਂ ਤ੍ਵਂ ਨਾਨਗ੍ਗਰਸਭੋਜਨਂ ਭੁਞ੍ਜਨ੍ਤੋ ਸੁਰਾਪਾਨਾ ਵਿਰਤੋ ਤੀਣਿ ਦੁਚ੍ਚਰਿਤਾਨਿ ਪਹਾਯ ਤਿਵਿਧਸੁਚਰਿਤਧਮ੍ਮਰਤੋ ਹੁਤ੍ਵਾ ਕੇਨਚਿ ਅਨਿਨ੍ਦਿਤੋ ਸਗ੍ਗਟ੍ਠਾਨਂ ਉਪੇਹੀਤਿ.

ਇਤਿ ਸਕ੍ਕੋ ਤਸ੍ਸ ਓਵਾਦਂ ਦਤ੍ਵਾ ਸਕਟ੍ਠਾਨਮੇਵ ਗਤੋ. ਸੋਪਿ ਸੁਰਂ ਅਪਿਵਿਤ੍ਵਾ ਸੁਰਾਭਾਜਨਾਨਿ ਭਿਨ੍ਦਾਪੇਤ੍ਵਾ ਸੀਲਂ ਸਮਾਦਾਯ ਦਾਨਂ ਦਤ੍ਵਾ ਸਗ੍ਗਪਰਾਯਣੋ ਅਹੋਸਿ. ਜਮ੍ਬੁਦੀਪੇਪਿ ਅਨੁਕ੍ਕਮੇਨ ਸੁਰਾਪਾਨਂ ਵੇਪੁਲ੍ਲਪ੍ਪਤ੍ਤਂ ਜਾਤਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਸਕ੍ਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕੁਮ੍ਭਜਾਤਕਵਣ੍ਣਨਾ ਦੁਤਿਯਾ.

[੫੧੩] ੩. ਜਯਦ੍ਦਿਸਜਾਤਕਵਣ੍ਣਨਾ

ਚਿਰਸ੍ਸਂ ਵਤ ਮੇਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਮਾਤੁਪੋਸਕਭਿਕ੍ਖੁਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਸਾਮਜਾਤਕਸਦਿਸਂ (ਜਾ. ੨.੨੨.੨੯੬ ਆਦਯੋ). ਤਦਾ ਪਨ ਸਤ੍ਥਾ ‘‘ਪੋਰਾਣਕਪਣ੍ਡਿਤਾ ਕਞ੍ਚਨਮਾਲਂ ਸੇਤਚ੍ਛਤ੍ਤਂ ਪਹਾਯ ਮਾਤਾਪਿਤਰੋ ਪੋਸੇਸੁ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕਪਿਲਰਟ੍ਠੇ ਉਤ੍ਤਰਪਞ੍ਚਾਲਨਗਰੇ ਪਞ੍ਚਾਲੋ ਨਾਮ ਰਾਜਾ ਅਹੋਸਿ. ਤਸ੍ਸ ਅਗ੍ਗਮਹੇਸੀ ਗਬ੍ਭਂ ਪਟਿਲਭਿਤ੍ਵਾ ਪੁਤ੍ਤਂ ਵਿਜਾਯਿ. ਤਸ੍ਸਾ ਪੁਰਿਮਭਵੇ ਏਕਾ ਸਪਤ੍ਤਿਕਾ ਕੁਜ੍ਝਿਤ੍ਵਾ ‘‘ਤੁਯ੍ਹਂ ਜਾਤਂ ਜਾਤਂ ਪਜਂ ਖਾਦਿਤੁਂ ਸਮਤ੍ਥਾ ਭਵਿਸ੍ਸਾਮੀ’’ਤਿ ਪਤ੍ਥਨਂ ਠਪੇਤ੍ਵਾ ਯਕ੍ਖਿਨੀ ਅਹੋਸਿ. ਸਾ ਤਦਾ ਓਕਾਸਂ ਲਭਿਤ੍ਵਾ ਤਸ੍ਸਾ ਪਸ੍ਸਨ੍ਤਿਯਾਵ ਤਂ ਅਲ੍ਲਮਂਸਪੇਸਿਵਣ੍ਣਂ ਕੁਮਾਰਕਂ ਗਹੇਤ੍ਵਾ ਮੁਰੁਮੁਰਾਯਨ੍ਤੀ ਖਾਦਿਤ੍ਵਾ ਪਕ੍ਕਾਮਿ. ਦੁਤਿਯਵਾਰੇਪਿ ਤਥੇਵ ਅਕਾਸਿ. ਤਤਿਯਵਾਰੇ ਪਨ ਤਸ੍ਸਾ ਪਸੂਤਿਘਰਂ ਪਵਿਟ੍ਠਕਾਲੇ ਗੇਹਂ ਪਰਿਵਾਰੇਤ੍ਵਾ ਗਾਲ਼੍ਹਂ ਆਰਕ੍ਖਂ ਅਕਂਸੁ. ਵਿਜਾਤਦਿਵਸੇ ਯਕ੍ਖਿਨੀ ਆਗਨ੍ਤ੍ਵਾ ਪੁਨ ਦਾਰਕਂ ਅਗ੍ਗਹੇਸਿ. ਦੇਵੀ ‘‘ਯਕ੍ਖਿਨੀ’’ਤਿ ਮਹਾਸਦ੍ਦਮਕਾਸਿ. ਆਵੁਧਹਤ੍ਥਾ ਪੁਰਿਸਾ ਆਗਨ੍ਤ੍ਵਾ ਦੇਵਿਯਾ ਦਿਨ੍ਨਸਞ੍ਞਾਯ ਯਕ੍ਖਿਨਿਂ ਅਨੁਬਨ੍ਧਿਂਸੁ. ਸਾ ਖਾਦਿਤੁਂ ਓਕਾਸਂ ਅਲਭਨ੍ਤੀ ਤਤੋ ਪਲਾਯਿਤ੍ਵਾ ਉਦਕਨਿਦ੍ਧਮਨਂ ਪਾਵਿਸਿ. ਦਾਰਕੋ ਮਾਤੁਸਞ੍ਞਾਯ ਤਸ੍ਸਾ ਥਨਂ ਮੁਖੇਨ ਗਣ੍ਹਿ. ਸਾ ਪੁਤ੍ਤਸਿਨੇਹਂ ਉਪ੍ਪਾਦੇਤ੍ਵਾ ਤਤੋ ਪਲਾਯਿਤ੍ਵਾ ਸੁਸਾਨਂ ਗਨ੍ਤ੍ਵਾ ਦਾਰਕਂ ਪਾਸਾਣਲੇਣੇ ਠਪੇਤ੍ਵਾ ਪਟਿਜਗ੍ਗਿ. ਅਥਸ੍ਸ ਅਨੁਕ੍ਕਮੇਨ ਵਡ੍ਢਮਾਨਸ੍ਸ ਮਨੁਸ੍ਸਮਂਸਂ ਆਹਰਿਤ੍ਵਾ ਅਦਾਸਿ. ਉਭੋਪਿ ਮਨੁਸ੍ਸਮਂਸਂ ਖਾਦਿਤ੍ਵਾ ਤਤ੍ਥ ਵਸਿਂਸੁ. ਦਾਰਕੋ ਅਤ੍ਤਨੋ ਮਨੁਸ੍ਸਭਾਵਂ ਨ ਜਾਨਾਤਿ ‘‘ਯਕ੍ਖਿਨਿਪੁਤ੍ਤੋਸ੍ਮੀ’’ਤਿ ਸਞ੍ਞਾਯ. ਸੋ ਅਤ੍ਤਭਾਵਂ ਜਹਿਤ੍ਵਾ ਅਨ੍ਤਰਧਾਯਿਤੁਂ ਨ ਸਕ੍ਕੋਤਿ. ਅਥਸ੍ਸ ਸਾ ਅਨ੍ਤਰਧਾਨਤ੍ਥਾਯ ਏਕਂ ਮੂਲਂ ਅਦਾਸਿ. ਸੋ ਮੂਲਾਨੁਭਾਵੇਨ ਅਨ੍ਤਰਧਾਯਿਤ੍ਵਾ ਮਨੁਸ੍ਸਮਂਸਂ ਖਾਦਨ੍ਤੋ ਵਿਚਰਤਿ. ਯਕ੍ਖਿਨੀ ਵੇਸ੍ਸਵਣਸ੍ਸ ਮਹਾਰਾਜਸ੍ਸ ਵੇਯ੍ਯਾਵਚ੍ਚਤ੍ਥਾਯ ਗਤਾ ਤਤ੍ਥੇਵ ਕਾਲਮਕਾਸਿ. ਦੇਵੀਪਿ ਚਤੁਤ੍ਥਵਾਰੇ ਅਞ੍ਞਂ ਪੁਤ੍ਤਂ ਵਿਜਾਯਿ. ਸੋ ਯਕ੍ਖਿਨਿਯਾ ਮੁਤ੍ਤਤ੍ਤਾ ਅਰੋਗੋ ਅਹੋਸਿ. ਪਚ੍ਚਾਮਿਤ੍ਤਂ ਯਕ੍ਖਿਨਿਂ ਜਿਨਿਤ੍ਵਾ ਜਾਤਤ੍ਤਾ ‘‘ਜਯਦ੍ਦਿਸਕੁਮਾਰੋ’’ਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਵਾ ਛਤ੍ਤਂ ਉਸ੍ਸਾਪੇਤ੍ਵਾ ਰਜ੍ਜਮਨੁਸਾਸਿ.

ਤਦਾ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ‘‘ਅਲੀਨਸਤ੍ਤੁਕੁਮਾਰੋ’’ਤਿਸ੍ਸ ਨਾਮਂ ਕਰਿਂਸੁ. ਸੋ ਵਯਪ੍ਪਤ੍ਤੋ ਉਗ੍ਗਹਿਤਸਬ੍ਬਸਿਪ੍ਪੋ ਉਪਰਾਜਾ ਅਹੋਸਿ. ਸੋਪਿ ਯਕ੍ਖਿਨਿਪੁਤ੍ਤੋ ਅਪਰਭਾਗੇ ਪਮਾਦੇਨ ਤਂ ਮੂਲਂ ਨਾਸੇਤ੍ਵਾ ਅਨ੍ਤਰਧਾਯਿਤੁਂ ਅਸਕ੍ਕੋਨ੍ਤੋ ਦਿਸ੍ਸਮਾਨਰੂਪੋਵ ਸੁਸਾਨੇ ਮਨੁਸ੍ਸਮਂਸਂ ਖਾਦਿ. ਮਨੁਸ੍ਸਾ ਤਂ ਦਿਸ੍ਵਾ ਭੀਤਾ ਆਗਨ੍ਤ੍ਵਾ ਰਞ੍ਞੋ ਉਪਕ੍ਕੋਸਿਂਸੁ ‘‘ਦੇਵ ਏਕੋ ਯਕ੍ਖੋ ਦਿਸ੍ਸਮਾਨਰੂਪੋ ਸੁਸਾਨੇ ਮਨੁਸ੍ਸਮਂਸਂ ਖਾਦਤਿ, ਸੋ ਅਨੁਕ੍ਕਮੇਨ ਨਗਰਂ ਪਵਿਸਿਤ੍ਵਾ ਮਨੁਸ੍ਸੇ ਮਾਰੇਤ੍ਵਾ ਖਾਦਿਸ੍ਸਤਿ, ਤਂ ਗਾਹਾਪੇਤੁਂ ਵਟ੍ਟਤੀ’’ਤਿ. ਰਾਜਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ‘‘ਗਣ੍ਹਥ ਨ’’ਨ੍ਤਿ ਆਣਾਪੇਸਿ. ਬਲਕਾਯੋ ਗਨ੍ਤ੍ਵਾ ਸੁਸਾਨਂ ਪਰਿਵਾਰੇਤ੍ਵਾ ਅਟ੍ਠਾਸਿ. ਯਕ੍ਖਿਨਿਪੁਤ੍ਤੋ ਨਗ੍ਗੋ ਉਬ੍ਬਿਗ੍ਗਰੂਪੋ ਮਰਣਭਯਭੀਤੋ ਵਿਰਵਨ੍ਤੋ ਮਨੁਸ੍ਸਾਨਂ ਅਨ੍ਤਰਂ ਪਕ੍ਖਨ੍ਦਿ. ਮਨੁਸ੍ਸਾ ‘‘ਯਕ੍ਖੋ’’ਤਿ ਮਰਣਭਯਭੀਤਾ ਦ੍ਵਿਧਾ ਭਿਜ੍ਜਿਂਸੁ. ਸੋਪਿ ਤਤੋ ਪਲਾਯਿਤ੍ਵਾ ਅਰਞ੍ਞਂ ਪਾਵਿਸਿ, ਨ ਪੁਨ ਮਨੁਸ੍ਸਪਥਂ ਆਗਚ੍ਛਿ. ਸੋ ਏਕਂ ਮਹਾਵਤ੍ਤਨਿਅਟਵਿਂ ਨਿਸ੍ਸਾਯ ਮਗ੍ਗਪਟਿਪਨ੍ਨੇਸੁ ਮਨੁਸ੍ਸੇਸੁ ਏਕੇਕਂ ਗਹੇਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਮਾਰੇਤ੍ਵਾ ਖਾਦਨ੍ਤੋ ਏਕਸ੍ਮਿਂ ਨਿਗ੍ਰੋਧਮੂਲੇ ਵਾਸਂ ਕਪ੍ਪੇਸਿ.

ਅਥੇਕੋ ਸਤ੍ਥਵਾਹਬ੍ਰਾਹ੍ਮਣੋ ਅਟਵਿਪਾਲਾਨਂ ਸਹਸ੍ਸਂ ਦਤ੍ਵਾ ਪਞ੍ਚਹਿ ਸਕਟਸਤੇਹਿ ਤਂ ਮਗ੍ਗਂ ਪਟਿਪਜ੍ਜਿ. ਮਨੁਸ੍ਸਯਕ੍ਖੋ ਵਿਰਵਨ੍ਤੋ ਪਕ੍ਖਨ੍ਦਿ, ਭੀਤਾ ਮਨੁਸ੍ਸਾ ਉਰੇਨ ਨਿਪਜ੍ਜਿਂਸੁ. ਸੋ ਬ੍ਰਾਹ੍ਮਣਂ ਗਹੇਤ੍ਵਾ ਪਲਾਯਨ੍ਤੋ ਖਾਣੁਨਾ ਪਾਦੇ ਵਿਦ੍ਧੋ ਅਟਵਿਪਾਲੇਸੁ ਅਨੁਬਨ੍ਧਨ੍ਤੇਸੁ ਬ੍ਰਾਹ੍ਮਣਂ ਛਡ੍ਡੇਤ੍ਵਾ ਅਤ੍ਤਨੋ ਵਸਨਟ੍ਠਾਨਰੁਕ੍ਖਮੂਲੇ ਨਿਪਜ੍ਜਿ. ਤਸ੍ਸ ਤਤ੍ਥ ਨਿਪਨ੍ਨਸ੍ਸ ਸਤ੍ਤਮੇ ਦਿਵਸੇ ਜਯਦ੍ਦਿਸਰਾਜਾ ਮਿਗਵਧਂ ਆਣਾਪੇਤ੍ਵਾ ਨਗਰਾ ਨਿਕ੍ਖਮਿ. ਤਂ ਨਗਰਾ ਨਿਕ੍ਖਨ੍ਤਮਤ੍ਤਮੇਵ ਤਕ੍ਕਸਿਲਵਾਸੀ ਨਨ੍ਦੋ ਨਾਮ ਮਾਤੁਪੋਸਕਬ੍ਰਾਹ੍ਮਣੋ ਚਤਸ੍ਸੋ ਸਤਾਰਹਗਾਥਾਯੋ ਆਦਾਯ ਆਗਨ੍ਤ੍ਵਾ ਰਾਜਾਨਂ ਅਦ੍ਦਸ. ਰਾਜਾ ‘‘ਨਿਵਤ੍ਤਿਤ੍ਵਾ ਸੁਣਿਸ੍ਸਾਮੀ’’ਤਿ ਤਸ੍ਸ ਨਿਵਾਸਗੇਹਂ ਦਾਪੇਤ੍ਵਾ ਮਿਗਵਂ ਗਨ੍ਤ੍ਵਾ ‘‘ਯਸ੍ਸ ਪਸ੍ਸੇਨ ਮਿਗੋ ਪਲਾਯਤਿ, ਤਸ੍ਸੇਵ ਗੀਵਾ’’ਤਿ ਆਹ. ਅਥੇਕੋ ਪਸਦਮਿਗੋ ਉਟ੍ਠਹਿਤ੍ਵਾ ਰਞ੍ਞੋ ਅਭਿਮੁਖੋ ਗਨ੍ਤ੍ਵਾ ਪਲਾਯਿ. ਅਮਚ੍ਚਾ ਪਰਿਹਾਸਂ ਕਰਿਂਸੁ. ਰਾਜਾ ਖਗ੍ਗਂ ਗਹੇਤ੍ਵਾ ਤਂ ਅਨੁਬਨ੍ਧਿਤ੍ਵਾ ਤਿਯੋਜਨਮਤ੍ਥਕੇ ਪਤ੍ਵਾ ਖਗ੍ਗੇਨ ਪਹਰਿਤ੍ਵਾ ਦ੍ਵੇ ਖਣ੍ਡਾਨਿ ਕਰਿਤ੍ਵਾ ਕਾਜੇਨਾਦਾਯ ਆਗਚ੍ਛਨ੍ਤੋ ਮਨੁਸ੍ਸਯਕ੍ਖਸ੍ਸ ਨਿਪਨ੍ਨਟ੍ਠਾਨਂ ਪਤ੍ਵਾ ਦਬ੍ਬਤਿਣੇਸੁ ਨਿਸੀਦਿਤ੍ਵਾ ਥੋਕਂ ਵਿਸ੍ਸਮਿਤ੍ਵਾ ਗਨ੍ਤੁਂ ਆਰਭਿ. ਅਥ ਨਂ ਸੋ ਉਟ੍ਠਾਯ ‘‘ਤਿਟ੍ਠ ਕੁਹਿਂ ਗਚ੍ਛਸਿ, ਭਕ੍ਖੋਸਿ ਮੇ’’ਤਿ ਹਤ੍ਥੇ ਗਹੇਤ੍ਵਾ ਪਠਮਂ ਗਾਥਮਾਹ –

੬੪.

‘‘ਚਿਰਸ੍ਸਂ ਵਤ ਮੇ ਉਦਪਾਦਿ ਅਜ੍ਜ, ਭਕ੍ਖੋ ਮਹਾ ਸਤ੍ਤਮਿਭਤ੍ਤਕਾਲੇ;

ਕੁਤੋਸਿ ਕੋਵਾਸਿ ਤਦਿਙ੍ਘ ਬ੍ਰੂਹਿ, ਆਚਿਕ੍ਖ ਜਾਤਿਂ ਵਿਦਿਤੋ ਯਥਾਸੀ’’ਤਿ.

ਤਤ੍ਥ ਭਕ੍ਖੋ ਮਹਾਤਿ ਮਹਾਭਕ੍ਖੋ. ਸਤ੍ਤਮਿਭਤ੍ਤਕਾਲੇਤਿ ਪਾਟਿਪਦਤੋ ਪਟ੍ਠਾਯ ਨਿਰਾਹਾਰਸ੍ਸ ਸਤ੍ਤਮਿਯਂ ਭਤ੍ਤਕਾਲੇ. ਕੁਤੋਸੀਤਿ ਕੁਤੋ ਆਗਤੋਸੀਤਿ.

ਰਾਜਾ ਯਕ੍ਖਂ ਦਿਸ੍ਵਾ ਭੀਤੋ ਊਰੁਤ੍ਥਮ੍ਭਂ ਪਤ੍ਵਾ ਪਲਾਯਿਤੁਂ ਨਾਸਕ੍ਖਿ, ਸਤਿਂ ਪਨ ਪਚ੍ਚੁਪਟ੍ਠਾਪੇਤ੍ਵਾ ਦੁਤਿਯਂ ਗਾਥਮਾਹ –

੬੫.

‘‘ਪਞ੍ਚਾਲਰਾਜਾ ਮਿਗਵਂ ਪਵਿਟ੍ਠੋ, ਜਯਦ੍ਦਿਸੋ ਨਾਮ ਯਦਿਸ੍ਸੁਤੋ ਤੇ;

ਚਰਾਮਿ ਕਚ੍ਛਾਨਿ ਵਨਾਨਿ ਚਾਹਂ, ਪਸਦਂ ਇਮਂ ਖਾਦ ਮਮਜ੍ਜ ਮੁਞ੍ਚਾ’’ਤਿ.

ਤਤ੍ਥ ਮਿਗਵਂ ਪਵਿਟ੍ਠੋਤਿ ਮਿਗਵਧਾਯ ਰਟ੍ਠਾ ਨਿਕ੍ਖਨ੍ਤੋ. ਕਚ੍ਛਾਨੀਤਿ ਪਬ੍ਬਤਪਸ੍ਸਾਨਿ. ਪਸਦਨ੍ਤਿ ਪਸਦਮਿਗਂ.

ਤਂ ਸੁਤ੍ਵਾ ਯਕ੍ਖੋ ਤਤਿਯਂ ਗਾਥਮਾਹ –

੬੬.

‘‘ਸੇਨੇਵ ਤ੍ਵਂ ਪਣਸਿ ਸਸ੍ਸਮਾਨੋ, ਮਮੇਸ ਭਕ੍ਖੋ ਪਸਦੋ ਯਂ ਵਦੇਸਿ;

ਤਂ ਖਾਦਿਯਾਨ ਪਸਦਂ ਜਿਘਞ੍ਞਂ, ਖਾਦਿਸ੍ਸਂ ਪਚ੍ਛਾ ਨ ਵਿਲਾਪਕਾਲੋ’’ਤਿ.

ਤਤ੍ਥ ਸੇਨੇਵਾਤਿ ਮਮ ਸਨ੍ਤਕੇਨੇਵ. ਪਣਸੀਤਿ ਵੋਹਰਸਿ ਅਤ੍ਤਾਨਂ ਵਿਕ੍ਕਿਣਾਸਿ. ਸਸ੍ਸਮਾਨੋਤਿ ਵਿਹਿਂਸਯਮਾਨੋ. ਤਂ ਖਾਦਿਯਾਨਾਤਿ ਤਂ ਪਠਮਂ ਖਾਦਿਤ੍ਵਾ. ਜਿਘਞ੍ਞਨ੍ਤਿ ਘਸਿਤੁਕਾਮੋ. ਖਾਦਿਸ੍ਸਨ੍ਤਿ ਏਤਂ ਪਚ੍ਛਾ ਖਾਦਿਸ੍ਸਾਮਿ. ਨ ਵਿਲਾਪਕਾਲੋਤਿ ਮਾ ਵਿਲਪਿ. ਨਾਯਂ ਵਿਲਾਪਕਾਲੋਤਿ ਵਦਤਿ.

ਤਂ ਸੁਤ੍ਵਾ ਰਾਜਾ ਨਨ੍ਦਬ੍ਰਾਹ੍ਮਣਂ ਸਰਿਤ੍ਵਾ ਚਤੁਤ੍ਥਂ ਗਾਥਮਾਹ –

੬੭.

‘‘ਨ ਚਤ੍ਥਿ ਮੋਕ੍ਖੋ ਮਮ ਨਿਕ੍ਕਯੇਨ, ਗਨ੍ਤ੍ਵਾਨ ਪਚ੍ਛਾਗਮਨਾਯ ਪਣ੍ਹੇ;

ਤਂ ਸਙ੍ਗਰਂ ਬ੍ਰਾਹ੍ਮਣਸ੍ਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸ’’ਨ੍ਤਿ.

ਤਤ੍ਥ ਨ ਚਤ੍ਥੀਤਿ ਨ ਚੇ ਮਯ੍ਹਂ ਨਿਕ੍ਕਯੇਨ ਵਿਮੋਕ੍ਖੋ ਅਤ੍ਥਿ. ਗਨ੍ਤ੍ਵਾਨਾਤਿ ਏਵਂ ਸਨ੍ਤੇ ਅਜ੍ਜ ਇਮਂ ਮਿਗਮਂਸਂ ਖਾਦਿਤ੍ਵਾ ਮਮ ਨਗਰਂ ਗਨ੍ਤ੍ਵਾ. ਪਣ੍ਹੇਤਿ ਪਗੇਯੇਵ, ਸ੍ਵੇਵ ਪਾਤਰਾਸਕਾਲੇ ਪਚ੍ਚਾਗਮਨਤ੍ਥਾਯ ਪਟਿਞ੍ਞਂ ਗਣ੍ਹਾਹੀਤਿ ਅਧਿਪ੍ਪਾਯੋ. ਤਂ ਸਙ੍ਗਰਨ੍ਤਿ ਮਯਾ ‘‘ਧਨਂ ਤੇ ਦਸ੍ਸਾਮੀ’’ਤਿ ਬ੍ਰਾਹ੍ਮਣਸ੍ਸ ਸਙ੍ਗਰੋ ਕਤੋ, ਤਂ ਤਸ੍ਸ ਦਤ੍ਵਾ ਇਮਂ ਮਯਾ ਵੁਤ੍ਤਂ ਸਚ੍ਚਂ ਅਨੁਰਕ੍ਖਨ੍ਤੋ ਅਹਂ ਪੁਨ ਆਗਮਿਸ੍ਸਾਮੀਤਿ ਅਤ੍ਥੋ.

ਤਂ ਸੁਤ੍ਵਾ ਯਕ੍ਖੋ ਪਞ੍ਚਮਂ ਗਾਥਮਾਹ –

੬੮.

‘‘ਕਿਂ ਕਮ੍ਮਜਾਤਂ ਅਨੁਤਪ੍ਪਤੇ ਤ੍ਵਂ, ਪਤ੍ਤਂ ਸਮੀਪਂ ਮਰਣਸ੍ਸ ਰਾਜ;

ਆਚਿਕ੍ਖ ਮੇ ਤਂ ਅਪਿ ਸਕ੍ਕੁਣੇਮੁ, ਅਨੁਜਾਨਿਤੁਂ ਆਗਮਨਾਯ ਪਣ੍ਹੇ’’ਤਿ.

ਤਤ੍ਥ ਕਮ੍ਮਮੇਵ ਕਮ੍ਮਜਾਤਂ. ਅਨੁਤਪ੍ਪਤੇਤਿ ਤਂ ਅਨੁਤਪ੍ਪਤਿ. ਪਤ੍ਤਨ੍ਤਿ ਉਪਗਤਂ. ਅਪਿ ਸਕ੍ਕੁਣੇਮੂਤਿ ਅਪਿ ਨਾਮ ਤਂ ਤਵ ਸੋਕਕਾਰਣਂ ਸੁਤ੍ਵਾ ਪਾਤੋਵ ਆਗਮਨਾਯ ਤਂ ਅਨੁਜਾਨਿਤੁਂ ਸਕ੍ਕੁਣੇਯ੍ਯਾਮਾਤਿ ਅਤ੍ਥੋ.

ਰਾਜਾ ਤਂ ਕਾਰਣਂ ਕਥੇਨ੍ਤੋ ਛਟ੍ਠਂ ਗਾਥਮਾਹ –

੬੯.

‘‘ਕਤਾ ਮਯਾ ਬ੍ਰਾਹ੍ਮਣਸ੍ਸ ਧਨਾਸਾ, ਤਂ ਸਙ੍ਗਰਂ ਪਟਿਮੁਕ੍ਕਂ ਨ ਮੁਤ੍ਤਂ;

ਤਂ ਸਙ੍ਗਰਂ ਬ੍ਰਾਹ੍ਮਣਸ੍ਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸ’’ਨ੍ਤਿ.

ਤਤ੍ਥ ਪਟਿਮੁਕ੍ਕਂ ਨ ਮੁਤ੍ਤਨ੍ਤਿ ਚਤਸ੍ਸੋ ਸਤਾਰਹਾ ਗਾਥਾ ਸੁਤ੍ਵਾ ‘‘ਧਨਂ ਤੇ ਦਸ੍ਸਾਮੀ’’ਤਿ ਪਟਿਞ੍ਞਾਯ ਮਯਾ ਅਤ੍ਤਨਿ ਪਟਿਮੁਞ੍ਚਿਤ੍ਵਾ ਠਪਿਤਂ, ਨ ਪਨ ਤਂ ਮੁਤ੍ਤਂ ਧਨਸ੍ਸ ਅਦਿਨ੍ਨਤ੍ਤਾ.

ਤਂ ਸੁਤ੍ਵਾ ਯਕ੍ਖੋ ਸਤ੍ਤਮਂ ਗਾਥਮਾਹ –

੭੦.

‘‘ਯਾ ਤੇ ਕਤਾ ਬ੍ਰਾਹ੍ਮਣਸ੍ਸ ਧਨਾਸਾ, ਤਂ ਸਙ੍ਗਰਂ ਪਟਿਮੁਕ੍ਕਂ ਨ ਮੁਤ੍ਤਂ;

ਤਂ ਸਙ੍ਗਰਂ ਬ੍ਰਾਹ੍ਮਣਸ੍ਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਸ੍ਸੂ’’ਤਿ.

ਤਤ੍ਥ ਪੁਨਰਾਵਜਸ੍ਸੂਤਿ ਪੁਨ ਆਗਚ੍ਛਸ੍ਸੁ.

ਏਵਞ੍ਚ ਪਨ ਵਤ੍ਵਾ ਰਾਜਾਨਂ ਵਿਸ੍ਸਜ੍ਜੇਸਿ. ਸੋ ਤੇਨ ਵਿਸ੍ਸਟ੍ਠੋ ‘‘ਤ੍ਵਂ ਮਾ ਚਿਨ੍ਤਯਿ, ਅਹਂ ਪਾਤੋਵ ਆਗਮਿਸ੍ਸਾਮੀ’’ਤਿ ਵਤ੍ਵਾ ਮਗ੍ਗਨਿਮਿਤ੍ਤਾਨਿ ਸਲ੍ਲਕ੍ਖੇਨ੍ਤੋ ਅਤ੍ਤਨੋ ਬਲਕਾਯਂ ਉਪਗਨ੍ਤ੍ਵਾ ਬਲਕਾਯਪਰਿਵੁਤੋ ਨਗਰਂ ਪਵਿਸਿਤ੍ਵਾ ਨਨ੍ਦਬ੍ਰਾਹ੍ਮਣਂ ਪਕ੍ਕੋਸਾਪੇਤ੍ਵਾ ਮਹਾਰਹੇ ਆਸਨੇ ਨਿਸੀਦਾਪੇਤ੍ਵਾ ਤਾ ਗਾਥਾ ਸੁਤ੍ਵਾ ਚਤ੍ਤਾਰਿ ਸਹਸ੍ਸਾਨਿ ਦਤ੍ਵਾ ਯਾਨਂ ਆਰੋਪੇਤ੍ਵਾ ‘‘ਇਮਂ ਤਕ੍ਕਸਿਲਮੇਵ ਨੇਥਾ’’ਤਿ ਮਨੁਸ੍ਸੇ ਦਤ੍ਵਾ ਬ੍ਰਾਹ੍ਮਣਂ ਉਯ੍ਯੋਜੇਤ੍ਵਾ ਦੁਤਿਯਦਿਵਸੇ ਪਟਿਗਨ੍ਤੁਕਾਮੋ ਹੁਤ੍ਵਾ ਪੁਤ੍ਤਂ ਆਮਨ੍ਤੇਤ੍ਵਾ ਅਨੁਸਾਸਿ. ਤਮਤ੍ਥਂ ਦੀਪੇਨ੍ਤੋ ਸਤ੍ਥਾ ਦ੍ਵੇ ਗਾਥਾ ਅਭਾਸਿ –

੭੧.

‘‘ਮੁਤ੍ਤੋਚ ਸੋ ਪੋਰਿਸਾਦਸ੍ਸ ਹਤ੍ਥਾ, ਗਨ੍ਤ੍ਵਾ ਸਕਂ ਮਨ੍ਦਿਰਂ ਕਾਮਕਾਮੀ;

ਤਂ ਸਙ੍ਗਰਂ ਬ੍ਰਾਹ੍ਮਣਸ੍ਸਪ੍ਪਦਾਯ, ਆਮਨ੍ਤਯੀ ਪੁਤ੍ਤਮਲੀਨਸਤ੍ਤੁਂ.

੭੨.

‘‘ਅਜ੍ਜੇਵ ਰਜ੍ਜਂ ਅਭਿਸਿਞ੍ਚਯਸ੍ਸੁ, ਧਮ੍ਮਂ ਚਰ ਸੇਸੁ ਪਰੇਸੁ ਚਾਪਿ;

ਅਧਮ੍ਮਕਾਰੋ ਚ ਤੇ ਮਾਹੁ ਰਟ੍ਠੇ, ਗਚ੍ਛਾਮਹਂ ਪੋਰਿਸਾਦਸ੍ਸ ਞਤ੍ਤੇ’’ਤਿ.

ਤਤ੍ਥ ਅਲੀਨਸਤ੍ਤੁਨ੍ਤਿ ਏਵਂਨਾਮਕਂ ਕੁਮਾਰਂ. ਪਾਲ਼ਿਯਂ ਪਨ ‘‘ਅਰਿਨਸਤ੍ਤੁ’’ਨ੍ਤਿ ਲਿਖਿਤਂ. ਅਜ੍ਜੇਵ ਰਜ੍ਜਨ੍ਤਿ ਪੁਤ੍ਤ ਰਜ੍ਜਂ ਤੇ ਦਮ੍ਮਿ, ਤ੍ਵਂ ਅਜ੍ਜੇਵ ਮੁਦ੍ਧਨਿ ਅਭਿਸੇਕਂ ਅਭਿਸਿਞ੍ਚਯਸ੍ਸੁ. ਞਤ੍ਤੇਤਿ ਅਭ੍ਯਾਸੇ, ਸਨ੍ਤਿਕੇਤਿ ਅਤ੍ਥੋ.

ਤਂ ਸੁਤ੍ਵਾ ਕੁਮਾਰੋ ਦਸਮਂ ਗਾਥਮਾਹ –

੭੩.

‘‘ਕਿਂ ਕਮ੍ਮ ਕ੍ਰੁਬ੍ਬਂ ਤਵ ਦੇਵ ਪਾਵ, ਨਾਰਾਧਯੀ ਤਂ ਤਦਿਚ੍ਛਾਮਿ ਸੋਤੁਂ;

ਯਮਜ੍ਜ ਰਜ੍ਜਮ੍ਹਿ ਉਦਸ੍ਸਯੇ ਤੁਵਂ, ਰਜ੍ਜਮ੍ਪਿ ਨਿਚ੍ਛੇਯ੍ਯਂ, ਤਯਾ ਵਿਨਾਹ’’ਨ੍ਤਿ.

ਤਤ੍ਥ ਕ੍ਰੁਬ੍ਬਨ੍ਤਿ ਕਰੋਨ੍ਤੋ. ਯਮਜ੍ਜਾਤਿ ਯੇਨ ਅਨਾਰਾਧਕਮ੍ਮੇਨ ਅਜ੍ਜ ਮਂ ਰਜ੍ਜਮ੍ਹਿ ਤ੍ਵਂ ਉਦਸ੍ਸਯੇ ਉਸ੍ਸਾਪੇਸਿ ਪਤਿਟ੍ਠਾਪੇਸਿ, ਤਂ ਮੇ ਆਚਿਕ੍ਖ, ਅਹਞ੍ਹਿ ਤਯਾ ਵਿਨਾ ਰਜ੍ਜਮ੍ਪਿ ਨ ਇਚ੍ਛਾਮੀਤਿ ਅਤ੍ਥੋ.

ਤਂ ਸੁਤ੍ਵਾ ਰਾਜਾ ਅਨਨ੍ਤਰਂ ਗਾਥਮਾਹ –

੭੪.

‘‘ਨ ਕਮ੍ਮੁਨਾ ਵਾ ਵਚਸਾਵ ਤਾਤ, ਅਪਰਾਧਿਤੋਹਂ ਤੁਵਿਯਂ ਸਰਾਮਿ;

ਸਨ੍ਧਿਞ੍ਚ ਕਤ੍ਵਾ ਪੁਰਿਸਾਦਕੇਨ, ਸਚ੍ਚਾਨੁਰਕ੍ਖੀ ਪੁਨਾਹਂ ਗਮਿਸ੍ਸ’’ਨ੍ਤਿ.

ਤਤ੍ਥ ਅਪਰਾਧਿਤੋਤਿ ਅਪਰਾਧਂ ਇਤੋ. ਤੁਵਿਯਨ੍ਤਿ ਤਵ ਸਨ੍ਤਕਂ. ਇਦਂ ਵੁਤ੍ਤਂ ਹੋਤਿ – ਤਾਤ, ਅਹਂ ਇਤੋ ਤਵ ਕਮ੍ਮਤੋ ਵਾ ਤਵ ਵਚਨਤੋ ਵਾ ਕਿਞ੍ਚਿ ਮਮ ਅਪ੍ਪਿਯਂ ਅਪਰਾਧਂ ਨ ਸਰਾਮੀਤਿ. ਸਨ੍ਧਿਞ੍ਚ ਕਤ੍ਵਾਤਿ ਮਂ ਪਨ ਮਿਗਵਂ ਗਤਂ ਏਕੋ ਯਕ੍ਖੋ ‘‘ਖਾਦਿਸ੍ਸਾਮੀ’’ਤਿ ਗਣ੍ਹਿ. ਅਥਾਹਂ ਬ੍ਰਾਹ੍ਮਣਸ੍ਸ ਧਮ੍ਮਕਥਂ ਸੁਤ੍ਵਾ ਤਸ੍ਸ ਸਕ੍ਕਾਰਂ ਕਤ੍ਵਾ ‘‘ਸ੍ਵੇ ਤਵ ਪਾਤਰਾਸਕਾਲੇ ਆਗਮਿਸ੍ਸਾਮੀ’’ਤਿ ਤੇਨ ਪੁਰਿਸਾਦਕੇਨ ਸਨ੍ਧਿਂ ਸਚ੍ਚਂ ਕਤ੍ਵਾ ਆਗਤੋ, ਤਸ੍ਮਾ ਤਂ ਸਚ੍ਚਂ ਅਨੁਰਕ੍ਖਨ੍ਤੋ ਪੁਨ ਤਤ੍ਥ ਗਮਿਸ੍ਸਾਮਿ, ਤ੍ਵਂ ਰਜ੍ਜਂ ਕਾਰੇਹੀਤਿ ਵਦਤਿ.

ਤਂ ਸੁਤ੍ਵਾ ਕੁਮਾਰੋ ਗਾਥਮਾਹ –

੭੫.

‘‘ਅਹਂ ਗਮਿਸ੍ਸਾਮਿ ਇਧੇਵ ਹੋਹਿ, ਨਤ੍ਥਿ ਤਤੋ ਜੀਵਤੋ ਵਿਪ੍ਪਮੋਕ੍ਖੋ;

ਸਚੇ ਤੁਵਂ ਗਚ੍ਛਸਿਯੇਵ ਰਾਜ, ਅਹਮ੍ਪਿ ਗਚ੍ਛਾਮਿ ਉਭੋ ਨ ਹੋਮਾ’’ਤਿ.

ਤਤ੍ਥ ਇਧੇਵਾਤਿ ਤ੍ਵਂ ਇਧੇਵ ਹੋਤਿ. ਤਤੋਤਿ ਤਸ੍ਸ ਸਨ੍ਤਿਕਾ ਜੀਵਨ੍ਤਸ੍ਸ ਮੋਕ੍ਖੋ ਨਾਮ ਨਤ੍ਥਿ. ਉਭੋਤਿ ਏਵਂ ਸਨ੍ਤੇ ਉਭੋਪਿ ਨ ਭਵਿਸ੍ਸਾਮ.

ਤਂ ਸੁਤ੍ਵਾ ਰਾਜਾ ਗਾਥਮਾਹ –

੭੬.

‘‘ਅਦ੍ਧਾ ਹਿ ਤਾਤ ਸਤਾਨੇਸ ਧਮ੍ਮੋ, ਮਰਣਾ ਚ ਮੇ ਦੁਕ੍ਖਤਰਂ ਤਦਸ੍ਸ;

ਕਮ੍ਮਾਸਪਾਦੋ ਤਂ ਯਦਾ ਪਚਿਤ੍ਵਾ, ਪਸਯ੍ਹ ਖਾਦੇ ਭਿਦਾ ਰੁਕ੍ਖਸੂਲੇ’’ਤਿ.

ਤਸ੍ਸਤ੍ਥੋ – ਅਦ੍ਧਾ ਏਕਂਸੇਨ ਏਸ, ਤਾਤ, ਸਤਾਨਂ ਪਣ੍ਡਿਤਾਨਂ ਧਮ੍ਮੋ ਸਭਾਵੋ, ਯੁਤ੍ਤਂ ਤ੍ਵਂ ਵਦਸਿ, ਅਪਿ ਚ ਖੋ ਪਨ ਮਯ੍ਹਂ ਮਰਣਤੋਪੇਤਂ ਦੁਕ੍ਖਤਰਂ ਅਸ੍ਸ, ਯਦਾ ਤਂ ਸੋ ਕਮ੍ਮਾਸਪਾਦੋ. ਭਿਦਾ ਰੁਕ੍ਖਸੂਲੇਤਿ ਤਿਖਿਣਰੁਕ੍ਖਸੂਲੇ ਭਿਤ੍ਵਾ ਪਚਿਤ੍ਵਾ ਪਸਯ੍ਹ ਬਲਕ੍ਕਾਰੇਨ ਖਾਦੇਯ੍ਯਾਤਿ.

ਤਂ ਸੁਤ੍ਵਾ ਕੁਮਾਰੋ ਗਾਥਮਾਹ –

੭੭.

‘‘ਪਾਣੇਨ ਤੇ ਪਾਣਮਹਂ ਨਿਮਿਸ੍ਸਂ, ਮਾ ਤ੍ਵਂ ਅਗਾ ਪੋਰਿਸਾਦਸ੍ਸ ਞਤ੍ਤੇ;

ਏਵਞ੍ਚ ਤੇ ਪਾਣਮਹਂ ਨਿਮਿਸ੍ਸਂ, ਤਸ੍ਮਾ ਮਤਂ ਜੀਵਿਤਸ੍ਸ ਵਣ੍ਣੇਮੀ’’ਤਿ.

ਤਤ੍ਥ ਨਿਮਿਸ੍ਸਨ੍ਤਿ ਅਹਂ ਇਧੇਵ ਤਵ ਪਾਣੇਨ ਮਮ ਪਾਣਂ ਪਰਿਵਤ੍ਤੇਸ੍ਸਂ. ਤਸ੍ਮਾਤਿ ਯਸ੍ਮਾ ਏਤਂ ਪਾਣਂ ਤਵ ਪਾਣੇਨਾਹਂ ਨਿਮਿਸ੍ਸਂ, ਤਸ੍ਮਾ ਤਵ ਜੀਵਿਤਸ੍ਸਤ੍ਥਾਯ ਮਮ ਮਰਣਂ ਵਣ੍ਣੇਮਿ ਮਰਣਮੇਵ ਵਰੇਮਿ, ਇਚ੍ਛਾਮੀਤਿ ਅਤ੍ਥੋ.

ਤਂ ਸੁਤ੍ਵਾ ਰਾਜਾ ਪੁਤ੍ਤਸ੍ਸ ਬਲਂ ਜਾਨਨ੍ਤੋ ‘‘ਸਾਧੁ ਤਾਤ, ਗਚ੍ਛਾਹੀ’’ਤਿ ਸਮ੍ਪਟਿਚ੍ਛਿ. ਸੋ ਮਾਤਾਪਿਤਰੋ ਵਨ੍ਦਿਤ੍ਵਾ ਨਗਰਮ੍ਹਾ ਨਿਕ੍ਖਮਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਉਪਡ੍ਢਗਾਥਮਾਹ –

੭੮.

‘‘ਤਤੋ ਹਵੇ ਧਿਤਿਮਾ ਰਾਜਪੁਤ੍ਤੋ, ਵਨ੍ਦਿਤ੍ਵਾ ਮਾਤੁ ਚ ਪਿਤੁ ਚ ਪਾਦੇ’’ਤਿ.

ਤਤ੍ਥ ਪਾਦੇਤਿ ਪਾਦੇ ਵਨ੍ਦਿਤ੍ਵਾ ਨਿਕ੍ਖਨ੍ਤੋਤਿ ਅਤ੍ਥੋ;

ਅਥਸ੍ਸ ਮਾਤਾਪਿਤਰੋਪਿ ਭਗਿਨੀਪਿ ਭਰਿਯਾਪਿ ਅਮਚ੍ਚਪਰਿਜਨੇਹਿ ਸਦ੍ਧਿਂਯੇਵ ਨਿਕ੍ਖਮਿਂਸੁ. ਸੋ ਨਗਰਾ ਨਿਕ੍ਖਮਿਤ੍ਵਾ ਪਿਤਰਂ ਮਗ੍ਗਂ ਪੁਚ੍ਛਿਤ੍ਵਾ ਸੁਟ੍ਠੁ ਵਵਤ੍ਥਪੇਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਸੇਸਾਨਂ ਓਵਾਦਂ ਦਤ੍ਵਾ ਅਚ੍ਛਮ੍ਭਿਤੋ ਕੇਸਰਸੀਹੋ ਵਿਯ ਮਗ੍ਗਂ ਆਰੁਯ੍ਹ ਯਕ੍ਖਾਵਾਸਂ ਪਾਯਾਸਿ. ਤਂ ਗਚ੍ਛਨ੍ਤਂ ਦਿਸ੍ਵਾ ਮਾਤਾ ਸਕਭਾਵੇਨ ਸਣ੍ਠਾਤੁਂ ਅਸਕ੍ਕੋਨ੍ਤੀ ਪਥਵਿਯਂ ਪਤਿ. ਪਿਤਾ ਬਾਹਾ ਪਗ੍ਗਯ੍ਹ ਮਹਨ੍ਤੇਨ ਸਦ੍ਦੇਨ ਕਨ੍ਦਿ. ਤਮ੍ਪਿ ਅਤ੍ਥਂ ਪਕਾਸੇਨ੍ਤੋ ਸਤ੍ਥਾ –

‘‘ਦੁਖਿਨਿਸ੍ਸ ਮਾਤਾ ਨਿਪਤਾ ਪਥਬ੍ਯਾ, ਪਿਤਾਸ੍ਸ ਪਗ੍ਗਯ੍ਹ ਭੁਜਾਨਿ ਕਨ੍ਦਤੀ’’ਤਿ. –

ਉਪਡ੍ਢਗਾਥਂ ਵਤ੍ਵਾ ਤਸ੍ਸ ਪਿਤਰਾ ਪਯੁਤ੍ਤਂ ਆਸੀਸਵਾਦਂ ਅਭਿਵਾਦਨਵਾਦਂ ਮਾਤਰਾ ਭਗਿਨੀਭਰਿਯਾਹਿ ਚ ਕਤਂ ਸਚ੍ਚਕਿਰਿਯਂ ਪਕਾਸੇਨ੍ਤੋ ਅਪਰਾਪਿ ਚਤਸ੍ਸੋ ਗਾਥਾ ਅਭਾਸਿ –

੭੯.

‘‘ਤਂ ਗਚ੍ਛਨ੍ਤਂ ਤਾਵ ਪਿਤਾ ਵਿਦਿਤ੍ਵਾ, ਪਰਮ੍ਮੁਖੋ ਵਨ੍ਦਤਿ ਪਞ੍ਜਲੀਕੋ;

ਸੋਮੋ ਚ ਰਾਜਾ ਵਰੁਣੋ ਚ ਰਾਜਾ, ਪਜਾਪਤੀ ਚਨ੍ਦਿਮਾ ਸੂਰਿਯੋ ਚ;

ਏਤੇਹਿ ਗੁਤ੍ਤੋ ਪੁਰਿਸਾਦਕਮ੍ਹਾ, ਅਨੁਞ੍ਞਾਤੋ ਸੋਤ੍ਥਿ ਪਚ੍ਚੇਹਿ ਤਾਤ.

੮੦.

‘‘ਯਂ ਦਣ੍ਡਕਿਰਞ੍ਞੋ ਗਤਸ੍ਸ ਮਾਤਾ, ਰਾਮਸ੍ਸਕਾਸਿ ਸੋਤ੍ਥਾਨਂ ਸੁਗੁਤ੍ਤਾ;

ਤਂ ਤੇ ਅਹਂ ਸੋਤ੍ਥਾਨਂ ਕਰੋਮਿ, ਏਤੇਨ ਸਚ੍ਚੇਨ ਸਰਨ੍ਤੁ ਦੇਵਾ;

ਅਨੁਞ੍ਞਾਤੋ ਸੋਤ੍ਥਿ ਪਚ੍ਚੇਹਿ ਪੁਤ੍ਤ.

੮੧.

‘‘ਆਵੀ ਰਹੋ ਵਾਪਿ ਮਨੋਪਦੋਸਂ, ਨਾਹਂ ਸਰੇ ਜਾਤੁ ਮਲੀਨਸਤ੍ਤੇ;

ਏਤੇਨ ਸਚ੍ਚੇਨ ਸਰਨ੍ਤੁ ਦੇਵਾ, ਅਨੁਞ੍ਞਾਤੋ ਸੋਤ੍ਥਿ ਪਚ੍ਚੇਹਿ ਭਾਤਿਕ.

੮੨.

‘‘ਯਸ੍ਮਾ ਚ ਮੇ ਅਨਧਿਮਨੋਸਿ ਸਾਮਿ, ਨ ਚਾਪਿ ਮੇ ਮਨਸਾ ਅਪ੍ਪਿਯੋਸਿ;

ਏਤੇਨ ਸਚ੍ਚੇਨ ਸਰਨ੍ਤੁ ਦੇਵਾ, ਅਨੁਞ੍ਞਾਤੋ ਸੋਤ੍ਥਿ ਪਚ੍ਚੇਹਿ ਸਾਮੀ’’ਤਿ.

ਤਤ੍ਥ ਪਰਮ੍ਮੁਖੋਤਿ ਅਯਂ ਮੇ ਪੁਤ੍ਤੋ ਪਰਮ੍ਮੁਖੋ ਮਾਤਾਪਿਤਰੋ ਵਨ੍ਦਿਤ੍ਵਾ ਗਚ੍ਛਤਿ, ਇਤਿ ਏਤਂ ਪਰਮ੍ਮੁਖਂ ਗਚ੍ਛਨ੍ਤਂ ਦਿਸ੍ਵਾ ਵਿਦਿਤ੍ਵਾ. ਪਞ੍ਜਲੀਕੋਤਿ ਤਸ੍ਮਿਂ ਕਾਲੇ ਸਿਰਸਿ ਅਞ੍ਜਲਿਂ ਠਪੇਤ੍ਵਾ ਵਨ੍ਦਤਿ ਦੇਵਤਾ ਨਮਸ੍ਸਤਿ. ਪੁਰਿਸਾਦਕਮ੍ਹਾਤਿ ਪੁਰਿਸਾਦਸ੍ਸ ਸਨ੍ਤਿਕਾ ਤੇਨ ਅਨੁਞ੍ਞਾਤੋ ਸੋਤ੍ਥਿਨਾ ਪਚ੍ਚੇਹਿ.

ਰਾਮਸ੍ਸਕਾਸੀਤਿ ਰਾਮਸ੍ਸ ਅਕਾਸਿ. ਏਕੋ ਕਿਰ ਬਾਰਾਣਸਿਵਾਸੀ ਰਾਮੋ ਨਾਮ ਮਾਤੁਪੋਸਕੋ ਮਾਤਾਪਿਤਰੋ ਪਟਿਜਗ੍ਗਨ੍ਤੋ ਵੋਹਾਰਤ੍ਥਾਯ ਗਤੋ ਦਣ੍ਡਕਿਰਞ੍ਞੋ ਵਿਜਿਤੇ ਕੁਮ੍ਭਵਤੀਨਗਰਂ ਗਨ੍ਤ੍ਵਾ ਨਵਵਿਧੇਨ ਵਸ੍ਸੇਨ ਸਕਲਰਟ੍ਠੇ ਵਿਨਾਸਿਯਮਾਨੇ ਮਾਤਾਪਿਤੂਨਂ ਗੁਣਂ ਸਰਿ. ਅਥ ਨਂ ਮਾਤੁਪਟ੍ਠਾਨਕਮ੍ਮਸ੍ਸ ਫਲੇਨ ਦੇਵਤਾ ਸੋਤ੍ਥਿਨਾ ਆਨਯਿਤ੍ਵਾ ਮਾਤੁ ਅਦਂਸੁ. ਤਂ ਕਾਰਣਂ ਸੁਤਵਸੇਨਾਹਰਿਤ੍ਵਾ ਏਵਮਾਹ. ਸੋਤ੍ਥਾਨਨ੍ਤਿ ਸੋਤ੍ਥਿਭਾਵਂ. ਤਂ ਪਨ ਕਿਞ੍ਚਾਪਿ ਦੇਵਤਾ ਕਰਿਂਸੁ, ਮਾਤੁਪਟ੍ਠਾਨਂ ਨਿਸ੍ਸਾਯ ਨਿਬ੍ਬਤ੍ਤਤ੍ਤਾ ਪਨ ਮਾਤਾ ਅਕਾਸੀਤਿ ਵੁਤ੍ਤਂ. ਤਂ ਤੇ ਅਹਨ੍ਤਿ ਅਹਮ੍ਪਿ ਤੇ ਤਮੇਵ ਸੋਤ੍ਥਾਨਂ ਕਰੋਮਿ, ਮਂ ਨਿਸ੍ਸਾਯ ਤਥੇਵ ਤਵ ਸੋਤ੍ਥਿਭਾਵੋ ਹੋਤੂਤਿ ਅਤ੍ਥੋ. ਅਥ ਵਾ ਕਰੋਮੀਤਿ ਇਚ੍ਛਾਮਿ. ਏਤੇਨ ਸਚ੍ਚੇਨਾਤਿ ਸਚੇ ਦੇਵਤਾਹਿ ਤਸ੍ਸ ਸੋਤ੍ਥਿਨਾ ਆਨੀਤਭਾਵੋ ਸਚ੍ਚੋ, ਏਤੇਨ ਸਚ੍ਚੇਨ ਮਮਪਿ ਪੁਤ੍ਤਂ ਸਰਨ੍ਤੁ ਦੇਵਾ, ਰਾਮਂ ਵਿਯ ਤਮ੍ਪਿ ਆਹਰਿਤ੍ਵਾ ਮਮ ਦਸ੍ਸਨ੍ਤੂਤਿ ਅਤ੍ਥੋ. ਅਨੁਞ੍ਞਾਤੋਤਿ ਪੋਰਿਸਾਦੇਨ ‘‘ਗਚ੍ਛਾ’’ਤਿ ਅਨੁਞ੍ਞਾਤੋ ਦੇਵਤਾਨਂ ਆਨੁਭਾਵੇਨ ਸੋਤ੍ਥਿ ਪਟਿਆਗਚ੍ਛ ਪੁਤ੍ਤਾਤਿ ਵਦਤਿ.

ਜਾਤੁ ਮਲੀਨਸਤ੍ਤੇਤਿ ਜਾਤੁ ਏਕਂਸੇਨ ਅਲੀਨਸਤ੍ਤੇ ਮਮ ਭਾਤਿਕੇ ਅਹਂ ਸਮ੍ਮੁਖਾ ਵਾ ਪਰਮ੍ਮੁਖਾ ਵਾ ਮਨੋਪਦੋਸਂ ਨ ਸਰਾਮਿ, ਨ ਮਯਾ ਤਮ੍ਹਿ ਮਨੋਪਦੋਸੋ ਕਤਪੁਬ੍ਬੋਤਿ ਏਵਮਸ੍ਸ ਕਨਿਟ੍ਠਾ ਸਚ੍ਚਮਕਾਸਿ. ਯਸ੍ਮਾ ਚ ਮੇ ਅਨਧਿਮਨੋਸਿ, ਸਾਮੀਤਿ ਮਮ, ਸਾਮਿ ਅਲੀਨਸਤ੍ਤੁ ਯਸ੍ਮਾ ਤ੍ਵਂ ਅਨਧਿਮਨੋਸਿ, ਮਂ ਅਭਿਭਵਿਤ੍ਵਾ ਅਤਿਕ੍ਕਮਿਤ੍ਵਾ ਅਞ੍ਞਂ ਮਨੇਨ ਨ ਪਤ੍ਥੇਸਿ. ਨ ਚਾਪਿ ਮੇ ਮਨਸਾ ਅਪ੍ਪਿਯੋਸੀਤਿ ਮਯ੍ਹਮ੍ਪਿ ਚ ਮਨਸਾ ਤ੍ਵਂ ਅਪ੍ਪਿਯੋ ਨ ਹੋਸਿ, ਅਞ੍ਞਮਞ੍ਞਂ ਪਿਯਸਂਵਾਸਾਵ ਮਯਨ੍ਤਿ ਏਵਮਸ੍ਸ ਅਗ੍ਗਮਹੇਸੀ ਸਚ੍ਚਮਕਾਸਿ.

ਕੁਮਾਰੋਪਿ ਪਿਤਰਾ ਅਕ੍ਖਾਤਨਯੇਨ ਰਕ੍ਖਾਵਾਸਮਗ੍ਗਂ ਪਟਿਪਜ੍ਜਿ. ਯਕ੍ਖੋਪਿ ‘‘ਖਤ੍ਤਿਯਾ ਨਾਮ ਬਹੁਮਾਯਾ ਹੋਨ੍ਤਿ, ਕੋ ਜਾਨਾਤਿ, ਕਿਂ ਭਵਿਸ੍ਸਤੀ’’ਤਿ ਰੁਕ੍ਖਂ ਅਭਿਰੁਹਿਤ੍ਵਾ ਰਞ੍ਞੋ ਆਗਮਨਂ ਓਲੋਕੇਨ੍ਤੋ ਨਿਸੀਦਿ. ਸੋ ਕੁਮਾਰਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਪਿਤਰਂ ਨਿਵਤ੍ਤੇਤ੍ਵਾ ਪੁਤ੍ਤੋ ਆਗਤੋ ਭਵਿਸ੍ਸਤਿ, ਨਤ੍ਥਿ ਮੇ ਭਯ’’ਨ੍ਤਿ ਓਤਰਿਤ੍ਵਾ ਤਸ੍ਸ ਪਿਟ੍ਠਿਂ ਦਸ੍ਸੇਨ੍ਤੋ ਨਿਸੀਦਿ. ਸੋ ਆਗਨ੍ਤ੍ਵਾ ਤਸ੍ਸ ਪੁਰਤੋ ਅਟ੍ਠਾਸਿ. ਅਥ ਯਕ੍ਖੋ ਗਾਥਮਾਹ –

੮੩.

‘‘ਬ੍ਰਹਾ ਉਜੂ ਚਾਰੁਮੁਖੋ ਕੁਤੋਸਿ, ਨ ਮਂ ਪਜਾਨਾਸਿ ਵਨੇ ਵਸਨ੍ਤਂ;

ਲੁਦ੍ਦਂ ਮਂ ਞਤ੍ਵਾ ‘ਪੁਰਿਸਾਦਕੋ’ਸਿ, ਕੋ ਸੋਤ੍ਥਿਮਾਜਾਨਮਿਧਾਵਜੇਯ੍ਯਾ’’ਤਿ.

ਤਤ੍ਥ ਕੋ ਸੋਤ੍ਥਿਮਾਜਾਨਮਿਧਾਵਜੇਯ੍ਯਾਤਿ ਕੁਮਾਰ ਕੋ ਨਾਮ ਪੁਰਿਸੋ ਅਤ੍ਤਨੋ ਸੋਤ੍ਥਿਭਾਵਂ ਜਾਨਨ੍ਤੋ ਇਚ੍ਛਨ੍ਤੋ ਇਧਾਗਚ੍ਛੇਯ੍ਯ, ਤ੍ਵਂ ਅਜਾਨਨ੍ਤੋ ਆਗਤੋ ਮਞ੍ਞੇਤਿ.

ਤਂ ਸੁਤ੍ਵਾ ਕੁਮਾਰੋ ਗਾਥਮਾਹ –

੮੪.

‘‘ਜਾਨਾਮਿ ਲੁਦ੍ਦ ਪੁਰਿਸਾਦਕੋ ਤ੍ਵਂ, ਨ ਤਂ ਨ ਜਾਨਾਮਿ ਵਨੇ ਵਸਨ੍ਤਂ;

ਅਹਞ੍ਚ ਪੁਤ੍ਤੋਸ੍ਮਿ ਜਯਦ੍ਦਿਸਸ੍ਸ, ਮਮਜ੍ਜ ਖਾਦ ਪਿਤੁਨੋ ਪਮੋਕ੍ਖਾ’’ਤਿ.

ਤਤ੍ਥ ਪਮੋਕ੍ਖਾਤਿ ਪਮੋਕ੍ਖਹੇਤੁ ਅਹਂ ਪਿਤੁ ਜੀਵਿਤਂ ਦਤ੍ਵਾ ਇਧਾਗਤੋ, ਤਸ੍ਮਾ ਤਂ ਮੁਞ੍ਚ, ਮਂ ਖਾਦਾਹੀਤਿ ਅਤ੍ਥੋ.

ਤਤੋ ਯਕ੍ਖੋ ਗਾਥਮਾਹ –

੮੫.

‘‘ਜਾਨਾਮਿ ਪੁਤ੍ਤੋਤਿ ਜਯਦ੍ਦਿਸਸ੍ਸ, ਤਥਾ ਹਿ ਵੋ ਮੁਖਵਣ੍ਣੋ ਉਭਿਨ੍ਨਂ;

ਸੁਦੁਕ੍ਕਰਞ੍ਞੇਵ ਕਤਂ ਤਵੇਦਂ, ਯੋ ਮਤ੍ਤੁਮਿਚ੍ਛੇ ਪਿਤੁਨੋ ਪਮੋਕ੍ਖਾ’’ਤਿ.

ਤਤ੍ਥ ਤਥਾ ਹਿ ਵੋਤਿ ਤਾਦਿਸੋ ਵੋ ਤੁਮ੍ਹਾਕਂ. ਉਭਿਨ੍ਨਮ੍ਪਿ ਸਦਿਸੋਵ ਮੁਖਵਣ੍ਣੋ ਹੋਤੀਤਿ ਅਤ੍ਥੋ. ਕਤਂ ਤਵੇਦਨ੍ਤਿ ਇਦਂ ਤਵ ਕਮ੍ਮਂ ਸੁਦੁਕ੍ਕਰਂ.

ਤਤੋ ਕੁਮਾਰੋ ਗਾਥਮਾਹ –

੮੬.

‘‘ਨ ਦੁਕ੍ਕਰਂ ਕਿਞ੍ਚਿ ਮਹੇਤ੍ਥ ਮਞ੍ਞੇ, ਯੋ ਮਤ੍ਤੁਮਿਚ੍ਛੇ ਪਿਤੁਨੋ ਪਮੋਕ੍ਖਾ;

ਮਾਤੁ ਚ ਹੇਤੁ ਪਰਲੋਕ ਗਨ੍ਤ੍ਵਾ, ਸੁਖੇਨ ਸਗ੍ਗੇਨ ਚ ਸਮ੍ਪਯੁਤ੍ਤੋ’’ਤਿ.

ਤਤ੍ਥ ਕਿਞ੍ਚਿ ਮਹੇਤ੍ਥ ਮਞ੍ਞੇਤਿ ਕਿਞ੍ਚਿ ਅਹਂ ਏਤ੍ਥ ਨ ਮਞ੍ਞਾਮਿ. ਇਦਂ ਵੁਤ੍ਤਂ ਹੋਤਿ – ਯਕ੍ਖ ਯੋ ਪੁਗ੍ਗਲੋ ਪਿਤੁ ਵਾ ਪਮੋਕ੍ਖਤ੍ਥਾਯ ਮਾਤੁ ਵਾ ਹੇਤੁ ਪਰਲੋਕਂ ਗਨ੍ਤ੍ਵਾ ਸੁਖੇਨ ਸਗ੍ਗੇ ਨਿਬ੍ਬਤ੍ਤਨਕਸੁਖੇਨ ਸਮ੍ਪਯੁਤ੍ਤੋ ਭਵਿਤੁਂ ਮਤ੍ਤੁਮਿਚ੍ਛੇ ਮਰਿਤੁਂ ਇਚ੍ਛਤਿ, ਤਸ੍ਮਾ ਅਹਂ ਏਤ੍ਥ ਮਾਤਾਪਿਤੂਨਂ ਅਤ੍ਥਾਯ ਜੀਵਿਤਪਰਿਚ੍ਚਾਗੇ ਕਿਞ੍ਚਿ ਦੁਕ੍ਕਰਂ ਨ ਮਞ੍ਞਾਮੀਤਿ.

ਤਂ ਸੁਤ੍ਵਾ ਯਕ੍ਖੋ ‘‘ਕੁਮਾਰ, ਮਰਣਸ੍ਸ ਅਭਯਾਨਕਸਤ੍ਤੋ ਨਾਮ ਨਤ੍ਥਿ, ਤ੍ਵਂ ਕਸ੍ਮਾ ਨ ਭਾਯਸੀ’’ਤਿ ਪੁਚ੍ਛਿ. ਸੋ ਤਸ੍ਸ ਕਥੇਨ੍ਤੋ ਦ੍ਵੇ ਗਾਥਾ ਅਭਾਸਿ –

੮੭.

‘‘ਅਹਞ੍ਚ ਖੋ ਅਤ੍ਤਨੋ ਪਾਪਕਿਰਿਯਂ, ਆਵੀ ਰਹੋ ਵਾਪਿ ਸਰੇ ਨ ਜਾਤੁ;

ਸਙ੍ਖਾਤਜਾਤੀਮਰਣੋਹਮਸ੍ਮਿ, ਯਥੇਵ ਮੇ ਇਧ ਤਥਾ ਪਰਤ੍ਥ.

੮੮.

‘‘ਖਾਦਜ੍ਜ ਮਂ ਦਾਨਿ ਮਹਾਨੁਭਾਵ, ਕਰਸ੍ਸੁ ਕਿਚ੍ਚਾਨਿ ਇਮਂ ਸਰੀਰਂ;

ਰੁਕ੍ਖਸ੍ਸ ਵਾ ਤੇ ਪਪਤਾਮਿ ਅਗ੍ਗਾ, ਛਾਦਯਮਾਨੋ ਮਯ੍ਹਂ ਤ੍ਵਮਦੇਸਿ ਮਂਸ’’ਨ੍ਤਿ.

ਤਤ੍ਥ ਸਰੇ ਨ ਜਾਤੂਤਿ ਏਕਂਸੇਨੇਵ ਨ ਸਰਾਮਿ. ਸਙ੍ਖਾਤਜਾਤੀਮਰਣੋਹਮਸ੍ਮੀਤਿ ਅਹਂ ਞਾਣੇਨ ਸੁਪਰਿਚ੍ਛਿਨ੍ਨਜਾਤਿਮਰਣੋ, ਜਾਤਸਤ੍ਤੋ ਅਮਰਣਧਮ੍ਮੋ ਨਾਮ ਨਤ੍ਥੀਤਿ ਜਾਨਾਮਿ. ਯਥੇਵ ਮੇ ਇਧਾਤਿ ਯਥੇਵ ਮਮ ਇਧ, ਤਥਾ ਪਰਲੋਕੇ, ਯਥਾ ਚ ਪਰਲੋਕੇ, ਤਥਾ ਇਧਾਪਿ ਮਰਣਤੋ ਮੁਤ੍ਤਿ ਨਾਮ ਨਤ੍ਥੀਤਿ ਇਦਮ੍ਪਿ ਮਮ ਞਾਣੇਨ ਸੁਪਰਿਚ੍ਛਿਨ੍ਨਂ. ਕਰਸ੍ਸੁ ਕਿਚ੍ਚਾਨੀਤਿ ਇਮਿਨਾ ਸਰੀਰੇਨ ਕਤ੍ਤਬ੍ਬਕਿਚ੍ਚਾਨਿ ਕਰ, ਇਮਂ ਤੇ ਮਯਾ ਨਿਸ੍ਸਟ੍ਠਂ ਸਰੀਰਂ. ਛਾਦਯਮਾਨੋ ਮਯ੍ਹਂ ਤ੍ਵਮਦੇਸਿ ਮਂਸਨ੍ਤਿ ਮਯਿ ਰੁਕ੍ਖਗ੍ਗਾ ਪਤਿਤ੍ਵਾ ਮਤੇ ਮਮ ਸਰੀਰਤੋ ਤ੍ਵਂ ਛਾਦਯਮਾਨੋ ਰੋਚਯਮਾਨੋ ਯਂ ਯਂ ਇਚ੍ਛਸਿ, ਤਂ ਤਂ ਮਂਸਂ ਅਦੇਸਿ, ਖਾਦੇਯ੍ਯਾਸੀਤਿ ਅਤ੍ਥੋ.

ਯਕ੍ਖੋ ਤਸ੍ਸ ਵਚਨਂ ਸੁਤ੍ਵਾ ਭੀਤੋ ਹੁਤ੍ਵਾ ‘‘ਨ ਸਕ੍ਕਾ ਇਮਸ੍ਸ ਮਂਸਂ ਖਾਦਿਤੁਂ, ਉਪਾਯੇਨ ਨਂ ਪਲਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਇਮਂ ਗਾਥਮਾਹ –

੮੯.

‘‘ਇਦਞ੍ਚ ਤੇ ਰੁਚ੍ਚਤਿ ਰਾਜਪੁਤ੍ਤ, ਚਜੇਸਿ ਪਾਣਂ ਪਿਤੁਨੋ ਪਮੋਕ੍ਖਾ;

ਤਸ੍ਮਾ ਹਿ ਸੋ ਤ੍ਵਂ ਤਰਮਾਨਰੂਪੋ, ਸਮ੍ਭਞ੍ਜ ਕਟ੍ਠਾਨਿ ਜਲੇਹਿ ਅਗ੍ਗਿ’’ਨ੍ਤਿ.

ਤਤ੍ਥ ਜਲੇਹੀਤਿ ਅਰਞ੍ਞਂ ਪਵਿਸਿਤ੍ਵਾ ਸਾਰਦਾਰੂਨਿ ਆਹਰਿਤ੍ਵਾ ਅਗ੍ਗਿਂ ਜਾਲੇਤ੍ਵਾ ਨਿਦ੍ਧੂਮੇ ਅਙ੍ਗਾਰੇ ਕਰ, ਤਤ੍ਥ ਤੇ ਮਂਸਂ ਪਚਿਤ੍ਵਾ ਖਾਦਿਸ੍ਸਾਮੀਤਿ ਦੀਪੇਤਿ.

ਸੋ ਤਥਾ ਕਤ੍ਵਾ ਤਸ੍ਸ ਸਨ੍ਤਿਕਂ ਅਗਮਾਸਿ. ਤਂ ਕਾਰਣਂ ਪਕਾਸੇਨ੍ਤੋ ਸਤ੍ਥਾ ਇਤਰਂ ਗਾਥਮਾਹ –

੯੦.

‘‘ਤਤੋ ਹਵੇ ਧਿਤਿਮਾ ਰਾਜਪੁਤ੍ਤੋ, ਦਾਰੁਂ ਸਮਾਹਰਿਤ੍ਵਾ ਮਹਨ੍ਤਮਗ੍ਗਿਂ;

ਸਨ੍ਤੀਪਯਿਤ੍ਵਾ ਪਟਿਵੇਦਯਿਤ੍ਥ, ਆਦੀਪਿਤੋ ਦਾਨਿ ਮਹਾਯਮਗ੍ਗੀ’’ਤਿ.

ਯਕ੍ਖੋ ਅਗ੍ਗਿਂ ਕਤ੍ਵਾ ਆਗਤਂ ਕੁਮਾਰਂ ਓਲੋਕੇਤ੍ਵਾ ‘‘ਅਯਂ ਪੁਰਿਸਸੀਹੋ, ਮਰਣਾਪਿਸ੍ਸ ਭਯਂ ਨਤ੍ਥਿ, ਮਯਾ ਏਤ੍ਤਕਂ ਕਾਲਂ ਏਵਂ ਨਿਬ੍ਭਯੋ ਨਾਮ ਨ ਦਿਟ੍ਠਪੁਬ੍ਬੋ’’ਤਿ ਲੋਮਹਂਸਜਾਤੋ ਕੁਮਾਰਂ ਪੁਨਪ੍ਪੁਨਂ ਓਲੋਕੇਨ੍ਤੋ ਨਿਸੀਦਿ. ਕੁਮਾਰੋ ਤਸ੍ਸ ਕਿਰਿਯਂ ਦਿਸ੍ਵਾ ਗਾਥਮਾਹ –

੯੧.

‘‘ਖਾਦਜ੍ਜ ਮਂ ਦਾਨਿ ਪਸਯ੍ਹਕਾਰਿ, ਕਿਂ ਮਂ ਮੁਹੁਂ ਪੇਕ੍ਖਸਿ ਹਟ੍ਠਲੋਮੋ;

ਤਥਾ ਤਥਾ ਤੁਯ੍ਹਮਹਂ ਕਰੋਮਿ, ਯਥਾ ਯਥਾ ਮਂ ਛਾਦਯਮਾਨੋ ਅਦੇਸੀ’’ਤਿ.

ਤਤ੍ਥ ਮੁਹੁਨ੍ਤਿ ਪੁਨਪ੍ਪੁਨਂ. ਤਥਾ ਤਥਾ ਤੁਯ੍ਹਮਹਨ੍ਤਿ ਅਹਂ ਤੁਯ੍ਹਂ ਤਥਾ ਤਥਾ ਵਚਨਂ ਕਰੋਮਿ, ਇਦਾਨਿ ਕਿਂ ਕਰਿਸ੍ਸਾਮਿ, ਯਥਾ ਯਥਾ ਮਂ ਛਾਦਯਮਾਨੋ ਰੋਚਯਮਾਨੋ ਅਦੇਸਿ ਖਾਦਿਸ੍ਸਸਿ, ਤਸ੍ਮਾ ਖਾਦਜ੍ਜ ਮਨ੍ਤਿ.

ਅਥਸ੍ਸ ਵਚਨਂ ਸੁਤ੍ਵਾ ਯਕ੍ਖੋ ਗਾਥਮਾਹ –

੯੨.

‘‘ਕੋ ਤਾਦਿਸਂ ਅਰਹਤਿ ਖਾਦਿਤਾਯੇ, ਧਮ੍ਮੇ ਠਿਤਂ ਸਚ੍ਚਵਾਦਿਂ ਵਦਞ੍ਞੁਂ;

ਮੁਦ੍ਧਾਪਿ ਤਸ੍ਸ ਵਿਫਲੇਯ੍ਯ ਸਤ੍ਤਧਾ, ਯੋ ਤਾਦਿਸਂ ਸਚ੍ਚਵਾਦਿਂ ਅਦੇਯ੍ਯਾ’’ਤਿ.

ਤਂ ਸੁਤ੍ਵਾ ਕੁਮਾਰੋ ‘‘ਸਚੇ ਮਂ ਨ ਖਾਦਿਤੁਕਾਮੋਸਿ, ਅਥ ਕਸ੍ਮਾ ਦਾਰੂਨਿ ਭਞ੍ਜਾਪੇਤ੍ਵਾ ਅਗ੍ਗਿਂ ਕਾਰੇਸੀ’’ਤਿ ਵਤ੍ਵਾ ‘‘ਪਲਾਯਿਸ੍ਸਤਿ ਨੁ ਖੋ, ਨੋਤਿ ਤਵ ਪਰਿਗ੍ਗਣ੍ਹਨਤ੍ਥਾਯਾ’’ਤਿ ਵੁਤ੍ਤੇ ‘‘ਤ੍ਵਂ ਇਦਾਨਿ ਮਂ ਕਥਂ ਪਰਿਗ੍ਗਣ੍ਹਿਸ੍ਸਸਿ, ਯੋਹਂ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤੋ ਸਕ੍ਕਸ੍ਸ ਦੇਵਰਞ੍ਞੋ ਅਤ੍ਤਾਨਂ ਪਰਿਗ੍ਗਣ੍ਹਿਤੁਂ ਨਾਦਾਸਿ’’ਨ੍ਤਿ ਵਤ੍ਵਾ ਆਹ –

੯੩.

‘‘ਇਦਞ੍ਹਿ ਸੋ ਬ੍ਰਾਹ੍ਮਣਂ ਮਞ੍ਞਮਾਨੋ, ਸਸੋ ਅਵਾਸੇਸਿ ਸਕੇ ਸਰੀਰੇ;

ਤੇਨੇਵ ਸੋ ਚਨ੍ਦਿਮਾ ਦੇਵਪੁਤ੍ਤੋ, ਸਸਤ੍ਥੁਤੋ ਕਾਮਦੁਹਜ੍ਜ ਯਕ੍ਖਾ’’ਤਿ.

ਤਸ੍ਸਤ੍ਥੋ – ਇਦਞ੍ਹਿ ਸੋ ਸਸਪਣ੍ਡਿਤੋ ‘‘ਬ੍ਰਾਹ੍ਮਣੋ ਏਸੋ’’ਤਿ ਬ੍ਰਾਹ੍ਮਣਂ ਮਞ੍ਞਮਾਨੋ ‘‘ਅਜ੍ਜ ਇਮਂ ਸਰੀਰਂ ਖਾਦਿਤ੍ਵਾ ਇਧੇਵ ਵਸਾ’’ਤਿ ਏਵਂ ਸਕੇ ਸਰੀਰੇ ਅਤ੍ਤਨੋ ਸਰੀਰਂ ਦਾਤੁਂ ਅਵਾਸੇਸਿ, ਵਸਾਪੇਸੀਤਿ ਅਤ੍ਥੋ. ਸਰੀਰਞ੍ਚਸ੍ਸ ਭਕ੍ਖਤ੍ਥਾਯ ਅਦਾਸਿ. ਸਕ੍ਕੋ ਪਬ੍ਬਤਰਸਂ ਪੀਲ਼ੇਤ੍ਵਾ ਆਦਾਯ ਚਨ੍ਦਮਣ੍ਡਲੇ ਸਸਲਕ੍ਖਣਂ ਅਕਾਸਿ. ਤਤੋ ਪਟ੍ਠਾਯ ਤੇਨੇਵ ਸਸਲਕ੍ਖਣੇਨ ਸੋ ਚਨ੍ਦਿਮਾ ਦੇਵਪੁਤ੍ਤੋ ‘‘ਸਸੀ ਸਸੀ’’ਤਿ ਏਵਂ ਸਸਤ੍ਥੁਤੋ ਲੋਕਸ੍ਸ ਕਾਮਦੁਹੋ ਪੇਮਵਡ੍ਢਨੋ ਅਜ੍ਜ ਯਕ੍ਖ ਵਿਰੋਚਤਿ. ਕਪ੍ਪਟ੍ਠਿਯਞ੍ਹੇਤਂ ਪਾਟਿਹਾਰਿਯਨ੍ਤਿ.

ਤਂ ਸੁਤ੍ਵਾ ਯਕ੍ਖੋ ਕੁਮਾਰਂ ਵਿਸ੍ਸਜ੍ਜੇਨ੍ਤੋ ਗਾਥਮਾਹ –

੯੪.

‘‘ਚਨ੍ਦੋ ਯਥਾ ਰਾਹੁਮੁਖਾ ਪਮੁਤ੍ਤੋ, ਵਿਰੋਚਤੇ ਪਨ੍ਨਰਸੇਵ ਭਾਣੁਮਾ;

ਏਵਂ ਤੁਵਂ ਪੋਰਿਸਾਦਾ ਪਮੁਤ੍ਤੋ, ਵਿਰੋਚ ਕਪ੍ਪਿਲੇ ਮਹਾਨੁਭਾਵ;

ਆਮੋਦਯਂ ਪਿਤਰਂ ਮਾਤਰਞ੍ਚ, ਸਬ੍ਬੋ ਚ ਤੇ ਨਨ੍ਦਤੁ ਞਾਤਿਪਕ੍ਖੋ’’ਤਿ.

ਤਤ੍ਥ ਭਾਣੁਮਾਤਿ ਸੂਰਿਯੋ. ਇਦਂ ਵੁਤ੍ਤਂ ਹੋਤਿ – ਯਥਾ ਪਨ੍ਨਰਸੇ ਰਾਹੁਮੁਖਾ ਮੁਤ੍ਤੋ ਚਨ੍ਦੋ ਵਾ ਭਾਣੁਮਾ ਵਾ ਵਿਰੋਚਤਿ, ਏਵਂ ਤ੍ਵਮ੍ਪਿ ਮਮ ਸਨ੍ਤਿਕਾ ਮੁਤ੍ਤੋ ਕਪਿਲਰਟ੍ਠੇ ਵਿਰੋਚ ਮਹਾਨੁਭਾਵਾਤਿ. ਨਨ੍ਦਤੂਤਿ ਤੁਸ੍ਸਤੁ.

ਗਚ੍ਛ ਮਹਾਵੀਰਾਤਿ ਮਹਾਸਤ੍ਤਂ ਉਯ੍ਯੋਜੇਸਿ. ਸੋਪਿ ਤਂ ਨਿਬ੍ਬਿਸੇਵਨਂ ਕਤ੍ਵਾ ਪਞ੍ਚ ਸੀਲਾਨਿ ਦਤ੍ਵਾ ‘‘ਯਕ੍ਖੋ ਨੁ ਖੋ ਏਸ, ਨੋ’’ਤਿ ਪਰਿਗ੍ਗਣ੍ਹਨ੍ਤੋ ‘‘ਯਕ੍ਖਾਨਂ ਅਕ੍ਖੀਨਿ ਰਤ੍ਤਾਨਿ ਹੋਨ੍ਤਿ ਅਨਿਮ੍ਮਿਸਾਨਿ ਚ, ਛਾਯਾ ਨ ਪਞ੍ਞਾਯਤਿ, ਅਚ੍ਛਮ੍ਭਿਤਾ ਹੋਨ੍ਤਿ. ਨਾਯਂ ਯਕ੍ਖੋ, ਮਨੁਸ੍ਸੋ ਏਸੋ. ਮਯ੍ਹਂ ਪਿਤੁ ਕਿਰ ਤਯੋ ਭਾਤਰੋ ਯਕ੍ਖਿਨਿਯਾ ਗਹਿਤਾ. ਤੇਸੁ ਏਤਾਯ ਦ੍ਵੇ ਖਾਦਿਤਾ ਭਵਿਸ੍ਸਨ੍ਤਿ, ਏਕੋ ਪੁਤ੍ਤਸਿਨੇਹੇਨ ਪਟਿਜਗ੍ਗਿਤੋ ਭਵਿਸ੍ਸਤਿ, ਇਮਿਨਾ ਤੇਨ ਭਵਿਤਬ੍ਬਂ, ਇਮਂ ਨੇਤ੍ਵਾ ਮਯ੍ਹਂ ਪਿਤੁ ਆਚਿਕ੍ਖਿਤ੍ਵਾ ਰਜ੍ਜੇ ਪਤਿਟ੍ਠਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਏਹਿ ਅਮ੍ਭੋ, ਨ ਤ੍ਵਂ ਯਕ੍ਖੋ, ਪਿਤੁ ਮੇ ਜੇਟ੍ਠਭਾਤਿਕੋਸਿ, ਏਹਿ ਮਯਾ ਸਦ੍ਧਿਂ ਗਨ੍ਤ੍ਵਾ ਕੁਲਸਨ੍ਤਕੇ ਰਜ੍ਜੇ ਛਤ੍ਤਂ ਉਸ੍ਸਾਪੇਹੀ’’ਤਿ ਵਤ੍ਵਾ ਇਤਰੇਨ ‘‘ਨਾਹਂ ਮਨੁਸ੍ਸੋ’’ਤਿ ਵੁਤ੍ਤੇ ‘‘ਨ ਤ੍ਵਂ ਮਯ੍ਹਂ ਸਦ੍ਦਹਸਿ, ਅਤ੍ਥਿ ਪਨ ਸੋ, ਯਸ੍ਸ ਸਦ੍ਦਹਸੀ’’ਤਿ ਪੁਚ੍ਛਿਤ੍ਵਾ ‘‘ਅਤ੍ਥਿ ਅਸੁਕਟ੍ਠਾਨੇ ਦਿਬ੍ਬਚਕ੍ਖੁਕਤਾਪਸੋ’’ਤਿ ਵੁਤ੍ਤੇ ਤਂ ਆਦਾਯ ਤਤ੍ਥ ਅਗਮਾਸਿ. ਤਾਪਸੋ ਤੇ ਦਿਸ੍ਵਾਵ ‘‘ਕਿਂ ਕਰੋਨ੍ਤਾ ਪਿਤਾਪੁਤ੍ਤਾ ਅਰਞ੍ਞੇ ਚਰਥਾ’’ਤਿ ਵਤ੍ਵਾ ਤੇਸਂ ਞਾਤਿਭਾਵਂ ਕਥੇਸਿ. ਪੋਰਿਸਾਦੋ ਤਸ੍ਸ ਸਦ੍ਦਹਿਤ੍ਵਾ ‘‘ਤਾਤ, ਤ੍ਵਂ ਗਚ੍ਛ, ਅਹਂ ਏਕਸ੍ਮਿਞ੍ਞੇਵ ਅਤ੍ਤਭਾਵੇ ਦ੍ਵਿਧਾ ਜਾਤੋ, ਨ ਮੇ ਰਜ੍ਜੇਨਤ੍ਥੋ, ਪਬ੍ਬਜਿਸ੍ਸਾਮਹ’’ਨ੍ਤਿ ਤਾਪਸਸ੍ਸ ਸਨ੍ਤਿਕੇ ਇਸਿਪਬ੍ਬਜ੍ਜਂ ਪਬ੍ਬਜਿ. ਅਥ ਨਂ ਕੁਮਾਰੋ ਵਨ੍ਦਿਤ੍ਵਾ ਨਗਰਂ ਅਗਮਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ –

੯੫.

‘‘ਤਤੋ ਹਵੇ ਧਿਤਿਮਾ ਰਾਜਪੁਤ੍ਤੋ, ਕਤਞ੍ਜਲੀ ਪਰਿਯਾਯ ਪੋਰਿਸਾਦਂ;

ਅਨੁਞ੍ਞਾਤੋ ਸੋਤ੍ਥਿ ਸੁਖੀ ਅਰੋਗੋ, ਪਚ੍ਚਾਗਮਾ ਕਪਿਲਮਲੀਨਸਤ੍ਤਾ’’ਤਿ. –

ਗਾਥਂ ਵਤ੍ਵਾ ਤਸ੍ਸ ਨਗਰਂ ਗਤਸ੍ਸ ਨੇਗਮਾਦੀਹਿ ਕਤਕਿਰਿਯਂ ਦਸ੍ਸੇਨ੍ਤੋ ਓਸਾਨਗਾਥਮਾਹ –

੯੬.

‘‘ਤਂ ਨੇਗਮਾ ਜਾਨਪਦਾ ਚ ਸਬ੍ਬੇ, ਹਤ੍ਥਾਰੋਹਾ ਰਥਿਕਾ ਪਤ੍ਤਿਕਾ ਚ;

ਨਮਸ੍ਸਮਾਨਾ ਪਞ੍ਜਲਿਕਾ ਉਪਾਗਮੁਂ, ਨਮਤ੍ਥੁ ਤੇ ਦੁਕ੍ਕਰਕਾਰਕੋਸੀ’’ਤਿ.

ਰਾਜਾ ‘‘ਕੁਮਾਰੋ ਕਿਰ ਆਗਤੋ’’ਤਿ ਸੁਤ੍ਵਾ ਪਚ੍ਚੁਗ੍ਗਮਨਂ ਅਕਾਸਿ. ਕੁਮਾਰੋ ਮਹਾਜਨਪਰਿਵਾਰੋ ਗਨ੍ਤ੍ਵਾ ਰਾਜਾਨਂ ਵਨ੍ਦਿ. ਅਥ ਨਂ ਸੋ ਪੁਚ੍ਛਿ – ‘‘ਤਾਤ, ਕਥਂ ਤਾਦਿਸਾ ਪੋਰਿਸਾਦਾ ਮੁਤ੍ਤੋਸੀ’’ਤਿ. ‘‘ਤਾਤ, ਨਾਯਂ ਯਕ੍ਖੋ, ਤੁਮ੍ਹਾਕਂ ਜੇਟ੍ਠਭਾਤਿਕੋ, ਏਸ ਮਯ੍ਹਂ ਪੇਤ੍ਤੇਯ੍ਯੋ’’ਤਿ ਸਬ੍ਬਂ ਪਵਤ੍ਤਿਂ ਆਰੋਚੇਤ੍ਵਾ ‘‘ਤੁਮ੍ਹੇਹਿ ਮਮ ਪੇਤ੍ਤੇਯ੍ਯਂ ਦਟ੍ਠੁਂ ਵਟ੍ਟਤੀ’’ਤਿ ਆਹ. ਰਾਜਾ ਤਙ੍ਖਣਞ੍ਞੇਵ ਭੇਰਿਂ ਚਰਾਪੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਤਾਪਸਾਨਂ ਸਨ੍ਤਿਕਂ ਅਗਮਾਸਿ. ਮਹਾਤਾਪਸੋ ਤਸ੍ਸ ਯਕ੍ਖਿਨਿਯਾ ਆਨੇਤ੍ਵਾ ਅਖਾਦਿਤ੍ਵਾ ਪੋਸਿਤਕਾਰਣਞ੍ਚ ਯਕ੍ਖਾਭਾਵਕਾਰਣਞ੍ਚ ਤੇਸਂ ਞਾਤਿਭਾਵਞ੍ਚ ਸਬ੍ਬਂ ਵਿਤ੍ਥਾਰਤੋ ਕਥੇਸਿ. ਰਾਜਾ ‘‘ਏਹਿ, ਭਾਤਿਕ, ਰਜ੍ਜਂ ਕਾਰੇਹੀ’’ਤਿ ਆਹ. ‘‘ਅਲਂ ਮਹਾਰਾਜਾ’’ਤਿ. ‘‘ਤੇਨ ਹਿ ਏਥ ਉਯ੍ਯਾਨੇ ਵਸਿਸ੍ਸਥ, ਅਹਂ ਵੋ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿਸ੍ਸਾਮੀ’’ਤਿ? ‘‘ਨ ਆਗਚ੍ਛਾਮਿ ਮਹਾਰਾਜਾ’’ਤਿ. ਰਾਜਾ ਤੇਸਂ ਅਸ੍ਸਮਪਦਤੋ ਅਵਿਦੂਰੇ ਏਕਂ ਪਬ੍ਬਤਨ੍ਤਰਂ ਬਨ੍ਧਿਤ੍ਵਾ ਮਹਨ੍ਤਂ ਤਲ਼ਾਕਂ ਕਾਰੇਤ੍ਵਾ ਕੇਦਾਰੇ ਸਮ੍ਪਾਦੇਤ੍ਵਾ ਮਹਡ੍ਢਕੁਲਸਹਸ੍ਸਂ ਆਨੇਤ੍ਵਾ ਮਹਾਗਾਮਂ ਨਿਵਾਸੇਤ੍ਵਾ ਤਾਪਸਾਨਂ ਭਿਕ੍ਖਾਚਾਰਂ ਪਟ੍ਠਪੇਸਿ. ਸੋ ਗਾਮੋ ਚੂਲ਼ਕਮ੍ਮਾਸਦਮ੍ਮਨਿਗਮੋ ਨਾਮ ਜਾਤੋ. ਸੁਤਸੋਮਮਹਾਸਤ੍ਤੇਨ ਪੋਰਿਸਾਦਸ੍ਸ ਦਮਿਤਪਦੇਸੋ ਪਨ ਮਹਾਕਮ੍ਮਾਸਦਮ੍ਮਨਿਗਮੋਤਿ ਵੇਦਿਤਬ੍ਬੋ.

ਸਤ੍ਥਾ ਇਦਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਮਾਤੁਪੋਸਕਤ੍ਥੇਰੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ, ਤਾਪਸੋ ਸਾਰਿਪੁਤ੍ਤੋ, ਪੋਰਿਸਾਦੋ ਅਙ੍ਗੁਲਿਮਾਲੋ, ਕਨਿਟ੍ਠਾ ਉਪ੍ਪਲਵਣ੍ਣਾ, ਅਗ੍ਗਮਹੇਸੀ ਰਾਹੁਲਮਾਤਾ, ਅਲੀਨਸਤ੍ਤੁਕੁਮਾਰੋ ਪਨ ਅਹਮੇਵ ਅਹੋਸਿਨ੍ਤਿ.

ਜਯਦ੍ਦਿਸਜਾਤਕਵਣ੍ਣਨਾ ਤਤਿਯਾ.

[੫੧੪] ੪. ਛਦ੍ਦਨ੍ਤਜਾਤਕਵਣ੍ਣਨਾ

ਕਿਂ ਨੁ ਸੋਚਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਦਹਰਭਿਕ੍ਖੁਨਿਂ ਆਰਬ੍ਭ ਕਥੇਸਿ. ਸਾ ਕਿਰ ਸਾਵਤ੍ਥਿਯਂ ਕੁਲਧੀਤਾ ਘਰਾਵਾਸੇ ਆਦੀਨਵਂ ਦਿਸ੍ਵਾ ਸਾਸਨੇ ਪਬ੍ਬਜਿਤ੍ਵਾ ਏਕਦਿਵਸਂ ਭਿਕ੍ਖੁਨੀਹਿ ਸਦ੍ਧਿਂ ਧਮ੍ਮਸਵਨਾਯ ਗਨ੍ਤ੍ਵਾ ਅਲਙ੍ਕਤਧਮ੍ਮਾਸਨੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਨ੍ਤਸ੍ਸ ਦਸਬਲਸ੍ਸ ਅਪਰਿਮਾਣਪੁਞ੍ਞਪਭਾਵਾਭਿਨਿਬ੍ਬਤ੍ਤਂ ਉਤ੍ਤਮਰੂਪਸਮ੍ਪਤ੍ਤਿਯੁਤ੍ਤਂ ਅਤ੍ਤਭਾਵਂ ਓਲੋਕੇਤ੍ਵਾ ‘‘ਪਰਿਚਿਣ੍ਣਪੁਬ੍ਬਾ ਨੁ ਖੋ ਮੇ ਭਵਸ੍ਮਿਂ ਵਿਚਰਨ੍ਤਿਯਾ ਇਮਸ੍ਸ ਮਹਾਪੁਰਿਸਸ੍ਸ ਪਾਦਪਰਿਚਾਰਿਕਾ’’ਤਿ ਚਿਨ੍ਤੇਸਿ. ਅਥਸ੍ਸਾ ਤਙ੍ਖਣਞ੍ਞੇਵ ਜਾਤਿਸ੍ਸਰਞਾਣਂ ਉਪ੍ਪਜ੍ਜਿ – ‘‘ਛਦ੍ਦਨ੍ਤਵਾਰਣਕਾਲੇ ਅਹਂ ਇਮਸ੍ਸ ਮਹਾਪੁਰਿਸਸ੍ਸ ਪਾਦਪਰਿਚਾਰਿਕਾ ਭੂਤਪੁਬ੍ਬਾ’’ਤਿ. ਅਥਸ੍ਸਾ ਸਰਨ੍ਤਿਯਾ ਮਹਨ੍ਤਂ ਪੀਤਿਪਾਮੋਜ੍ਜਂ ਉਪ੍ਪਜ੍ਜਿ. ਸਾ ਪੀਤਿਵੇਗੇਨ ਮਹਾਹਸਿਤਂ ਹਸਿਤ੍ਵਾ ਪੁਨ ਚਿਨ੍ਤੇਸਿ – ‘‘ਪਾਦਪਰਿਚਾਰਿਕਾ ਨਾਮ ਸਾਮਿਕਾਨਂ ਹਿਤਜ੍ਝਾਸਯਾ ਅਪ੍ਪਕਾ, ਅਹਿਤਜ੍ਝਾਸਯਾਵ ਬਹੁਤਰਾ, ਹਿਤਜ੍ਝਾਸਯਾ ਨੁ ਖੋ ਅਹਂ ਇਮਸ੍ਸ ਮਹਾਪੁਰਿਸਸ੍ਸ ਅਹੋਸਿਂ, ਅਹਿਤਜ੍ਝਾਸਯਾ’’ਤਿ. ਸਾ ਅਨੁਸ੍ਸਰਮਾਨਾ ‘‘ਅਹਂ ਅਪ੍ਪਮਤ੍ਤਕਂ ਦੋਸਂ ਹਦਯੇ ਠਪੇਤ੍ਵਾ ਵੀਸਰਤਨਸਤਿਕਂ ਛਦ੍ਦਨ੍ਤਮਹਾਗਜਿਸ੍ਸਰਂ ਸੋਨੁਤ੍ਤਰਂ ਨਾਮ ਨੇਸਾਦਂ ਪੇਸੇਤ੍ਵਾ ਵਿਸਪੀਤਸਲ੍ਲੇਨ ਵਿਜ੍ਝਾਪੇਤ੍ਵਾ ਜੀਵਿਤਕ੍ਖਯਂ ਪਾਪੇਸਿ’’ਨ੍ਤਿ ਅਦ੍ਦਸ. ਅਥਸ੍ਸਾ ਸੋਕੋ ਉਦਪਾਦਿ, ਹਦਯਂ ਉਣ੍ਹਂ ਅਹੋਸਿ, ਸੋਕਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੀ ਅਸ੍ਸਸਿਤ੍ਵਾ ਪਸ੍ਸਸਿਤ੍ਵਾ ਮਹਾਸਦ੍ਦੇਨ ਪਰੋਦਿ. ਤਂ ਦਿਸ੍ਵਾ ਸਤ੍ਥਾ ਸਿਤਂ ਪਾਤੁ ਕਰਿਤ੍ਵਾ ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ ਸਿਤਸ੍ਸ ਪਾਤੁਕਮ੍ਮਾਯਾ’’ਤਿ ਭਿਕ੍ਖੁਸਙ੍ਘੇਨ ਪੁਟ੍ਠੋ ‘‘ਭਿਕ੍ਖਵੇ, ਅਯਂ ਦਹਰਭਿਕ੍ਖੁਨੀ ਪੁਬ੍ਬੇ ਮਯਿ ਕਤਂ ਅਪਰਾਧਂ ਸਰਿਤ੍ਵਾ ਰੋਦਤੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਹਿਮਵਨ੍ਤਪਦੇਸੇ ਛਦ੍ਦਨ੍ਤਦਹਂ ਉਪਨਿਸ੍ਸਾਯ ਅਟ੍ਠਸਹਸ੍ਸਾ ਹਤ੍ਥਿਨਾਗਾ ਵਸਿਂਸੁ ਇਦ੍ਧਿਮਨ੍ਤਾ ਵੇਹਾਸਙ੍ਗਮਾ. ਤਦਾ ਬੋਧਿਸਤ੍ਤੋ ਜੇਟ੍ਠਕਵਾਰਣਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਸੋ ਸਬ੍ਬਸੇਤੋ ਅਹੋਸਿ ਰਤ੍ਤਮੁਖਪਾਦੋ. ਸੋ ਅਪਰਭਾਗੇ ਵੁਦ੍ਧਿਪ੍ਪਤ੍ਤੋ ਅਟ੍ਠਾਸੀਤਿਹਤ੍ਥੁਬ੍ਬੇਧੋ ਅਹੋਸਿ ਵੀਸਰਤਨਸਤਾਯਾਮੋ. ਅਟ੍ਠਪਣ੍ਣਾਸਹਤ੍ਥਾਯ ਰਜਤਦਾਮਸਦਿਸਾਯ ਸੋਣ੍ਡਾਯ ਸਮਨ੍ਨਾਗਤੋ. ਦਨ੍ਤਾ ਪਨਸ੍ਸ ਪਰਿਕ੍ਖੇਪਤੋ ਪਨ੍ਨਰਸਹਤ੍ਥਾ ਅਹੇਸੁਂ ਦੀਘਤੋ ਤਿਂਸਹਤ੍ਥਾ ਛਬ੍ਬਣ੍ਣਰਂਸੀਹਿ ਸਮਨ੍ਨਾਗਤਾ. ਸੋ ਅਟ੍ਠਨ੍ਨਂ ਨਾਗਸਹਸ੍ਸਾਨਂ ਜੇਟ੍ਠਕੋ ਅਹੋਸਿ, ਪਞ੍ਚਸਤੇ ਪਚ੍ਚੇਕਬੁਦ੍ਧੇ ਪੂਜੇਸਿ. ਤਸ੍ਸ ਦ੍ਵੇ ਅਗ੍ਗਮਹੇਸਿਯੋ ਅਹੇਸੁਂ – ਚੂਲ਼ਸੁਭਦ੍ਦਾ, ਮਹਾਸੁਭਦ੍ਦਾ ਚਾਤਿ. ਨਾਗਰਾਜਾ ਅਟ੍ਠਨਾਗਸਹਸ੍ਸਪਰਿਵਾਰੋ ਕਞ੍ਚਨਗੁਹਾਯਂ ਵਸਤਿ. ਸੋ ਪਨ ਛਦ੍ਦਨ੍ਤਦਹੋ ਆਯਾਮਤੋ ਚ ਵਿਤ੍ਥਾਰਤੋ ਚ ਪਣ੍ਣਾਸਯੋਜਨੋ ਹੋਤਿ. ਤਸ੍ਸ ਮਜ੍ਝੇ ਦ੍ਵਾਦਸਯੋਜਨਪ੍ਪਮਾਣੇ ਠਾਨੇ ਸੇਵਾਲੋ ਵਾ ਪਣਕਂ ਵਾ ਨਤ੍ਥਿ, ਮਣਿਕ੍ਖਨ੍ਧਵਣ੍ਣਉਦਕਮੇਵ ਸਨ੍ਤਿਟ੍ਠਤਿ, ਤਦਨਨ੍ਤਰਂ ਯੋਜਨਵਿਤ੍ਥਤਂ ਸੁਦ੍ਧਂ ਕਲ੍ਲਹਾਰਵਨਂ, ਤਂ ਉਦਕਂ ਪਰਿਕ੍ਖਿਪਿਤ੍ਵਾ ਠਿਤਂ, ਤਦਨਨ੍ਤਰਂ ਯੋਜਨਵਿਤ੍ਥਤਮੇਵ ਸੁਦ੍ਧਂ ਨੀਲੁਪ੍ਪਲਵਨਂ ਤਂ ਪਰਿਕ੍ਖਿਪਿਤ੍ਵਾ ਠਿਤਂ, ਤਤੋ ਯੋਜਨਯੋਜਨਵਿਤ੍ਥਤਾਨੇਵ ਰਤ੍ਤੁਪ੍ਪਲਸੇਤੁਪ੍ਪਲਰਤ੍ਤਪਦੁਮਸੇਤਪਦੁਮਕੁਮੁਦਵਨਾਨਿ ਪੁਰਿਮਂ ਪੁਰਿਮਂ ਪਰਿਕ੍ਖਿਪਿਤ੍ਵਾ ਠਿਤਾਨਿ. ਇਮੇਸਂ ਪਨ ਸਤ੍ਤਨ੍ਨਂ ਵਨਾਨਂ ਅਨਨ੍ਤਰਂ ਸਬ੍ਬੇਸਮ੍ਪਿ ਤੇਸਂ ਕਲ੍ਲਹਾਰਾਦਿਵਨਾਨਂ ਵਸੇਨ ਓਮਿਸ੍ਸਕਵਨਂ ਯੋਜਨਵਿਤ੍ਥਤਮੇਵ ਤਾਨਿ ਪਰਿਕ੍ਖਿਪਿਤ੍ਵਾ ਠਿਤਂ. ਤਦਨਨ੍ਤਰਂ ਨਾਗਾਨਂ ਕਟਿਪ੍ਪਮਾਣੇ ਉਦਕੇ ਯੋਜਨਵਿਤ੍ਥਤਮੇਵ ਰਤ੍ਤਸਾਲਿਵਨਂ, ਤਦਨਨ੍ਤਰਂ ਉਦਕਪਰਿਯਨ੍ਤੇ ਯੋਜਨਵਿਤ੍ਥਤਮੇਵ ਨੀਲਪੀਤਲੋਹਿਤਓਦਾਤਸੁਰਭਿਸੁਖੁਮਕੁਸੁਮਸਮਾਕਿਣ੍ਣਂ ਖੁਦ੍ਦਕਗਚ੍ਛਵਨਂ, ਇਤਿ ਇਮਾਨਿ ਦਸ ਵਨਾਨਿ ਯੋਜਨਵਿਤ੍ਥਤਾਨੇਵ. ਤਤੋ ਖੁਦ੍ਦਕਰਾਜਮਾਸਮਹਾਰਾਜਮਾਸਮੁਗ੍ਗਵਨਂ, ਤਦਨਨ੍ਤਰਂ ਤਿਪੁਸਏਲਾਲੁਕਲਾਬੁਕੁਮ੍ਭਣ੍ਡਵਲ੍ਲਿਵਨਾਨਿ, ਤਤੋ ਪੂਗਰੁਕ੍ਖਪ੍ਪਮਾਣਂ ਉਚ੍ਛੁਵਨਂ, ਤਤੋ ਹਤ੍ਥਿਦਨ੍ਤਪ੍ਪਮਾਣਫਲਂ ਕਦਲਿਵਨਂ, ਤਤੋ ਸਾਲਵਨਂ, ਤਦਨਨ੍ਤਰਂ ਚਾਟਿਪ੍ਪਮਾਣਫਲਂ ਪਨਸਵਨਂ, ਤਤੋ ਮਧੁਰਫਲਂ ਚਿਞ੍ਚਵਨਂ, ਤਤੋ ਅਮ੍ਬਵਨਂ, ਤਤੋ ਕਪਿਟ੍ਠਵਨਂ, ਤਤੋ ਓਮਿਸ੍ਸਕੋ ਮਹਾਵਨਸਣ੍ਡੋ, ਤਤੋ ਵੇਲ਼ੁਵਨਂ, ਅਯਮਸ੍ਸ ਤਸ੍ਮਿਂ ਕਾਲੇ ਸਮ੍ਪਤ੍ਤਿ. ਸਂਯੁਤ੍ਤਟ੍ਠਕਥਾਯਂ ਪਨ ਇਦਾਨਿ ਪਵਤ੍ਤਮਾਨਸਮ੍ਪਤ੍ਤਿਯੇਵ ਕਥਿਤਾ.

ਵੇਲ਼ੁਵਨਂ ਪਨ ਪਰਿਕ੍ਖਿਪਿਤ੍ਵਾ ਸਤ੍ਤ ਪਬ੍ਬਤਾ ਠਿਤਾ. ਤੇਸਂ ਬਾਹਿਰਨ੍ਤਤੋ ਪਟ੍ਠਾਯ ਪਠਮੋ ਚੂਲ਼ਕਾਲ਼ਪਬ੍ਬਤੋ ਨਾਮ, ਦੁਤਿਯੋ ਮਹਾਕਾਲ਼ਪਬ੍ਬਤੋ ਨਾਮ, ਤਤੋ ਉਦਕਪਬ੍ਬਤੋ ਨਾਮ, ਤਤੋ ਚਨ੍ਦਿਮਪਸ੍ਸਪਬ੍ਬਤੋ ਨਾਮ, ਤਤੋ ਸੂਰਿਯਪਸ੍ਸਪਬ੍ਬਤੋ ਨਾਮ, ਤਤੋ ਮਣਿਪਸ੍ਸਪਬ੍ਬਤੋ ਨਾਮ, ਸਤ੍ਤਮੋ ਸੁਵਣ੍ਣਪਸ੍ਸਪਬ੍ਬਤੋ ਨਾਮ. ਸੋ ਉਬ੍ਬੇਧਤੋ ਸਤ੍ਤਯੋਜਨਿਕੋ ਛਦ੍ਦਨ੍ਤਦਹਂ ਪਰਿਕ੍ਖਿਪਿਤ੍ਵਾ ਪਤ੍ਤਸ੍ਸ ਮੁਖਵਟ੍ਟਿ ਵਿਯ ਠਿਤੋ. ਤਸ੍ਸ ਅਬ੍ਭਨ੍ਤਰਿਮਂ ਪਸ੍ਸਂ ਸੁਵਣ੍ਣਵਣ੍ਣਂ, ਤਤੋ ਨਿਕ੍ਖਨ੍ਤੇਨ ਓਭਾਸੇਨ ਛਦ੍ਦਨ੍ਤਦਹੋ ਸਮੁਗ੍ਗਤਬਾਲਸੂਰਿਯੋ ਵਿਯ ਹੋਤਿ. ਬਾਹਿਰਪਬ੍ਬਤੇਸੁ ਪਨ ਏਕੋ ਉਬ੍ਬੇਧਤੋ ਛਯੋਜਨਿਕੋ, ਏਕੋ ਪਞ੍ਚ, ਏਕੋ ਚਤ੍ਤਾਰਿ, ਏਕੋ ਤੀਣਿ, ਏਕੋ ਦ੍ਵੇ, ਏਕੋ ਯੋਜਨਿਕੋ, ਏਵਂ ਸਤ੍ਤਪਬ੍ਬਤਪਰਿਕ੍ਖਿਤ੍ਤਸ੍ਸ ਪਨ ਤਸ੍ਸ ਦਹਸ੍ਸ ਪੁਬ੍ਬੁਤ੍ਤਰਕਣ੍ਣੇ ਉਦਕਵਾਤਪ੍ਪਹਰਣੋਕਾਸੇ ਮਹਾਨਿਗ੍ਰੋਧਰੁਕ੍ਖੋ ਅਤ੍ਥਿ. ਤਸ੍ਸ ਖਨ੍ਧੋ ਪਰਿਕ੍ਖੇਪਤੋ ਪਞ੍ਚਯੋਜਨਿਕੋ, ਉਬ੍ਬੇਧਤੋ ਸਤ੍ਤਯੋਜਨਿਕੋ, ਚਤੂਸੁ ਦਿਸਾਸੁ ਚਤਸ੍ਸੋ ਸਾਖਾ ਛਯੋਜਨਿਕਾ, ਉਦ੍ਧਂ ਉਗ੍ਗਤਸਾਖਾਪਿ ਛਯੋਜਨਿਕਾਵ, ਇਤਿ ਸੋ ਮੂਲਤੋ ਪਟ੍ਠਾਯ ਉਬ੍ਬੇਧੇਨ ਤੇਰਸਯੋਜਨਿਕੋ, ਸਾਖਾਨਂ ਓਰਿਮਨ੍ਤਤੋ ਯਾਵ ਪਾਰਿਮਨ੍ਤਾ ਦ੍ਵਾਦਸਯੋਜਨਿਕੋ, ਅਟ੍ਠਹਿ ਪਾਰੋਹਸਹਸ੍ਸੇਹਿ ਪਟਿਮਣ੍ਡਿਤੋ ਮੁਣ੍ਡਮਣਿਪਬ੍ਬਤੋ ਵਿਯ ਵਿਲਾਸਮਾਨੋ ਤਿਟ੍ਠਤਿ. ਛਦ੍ਦਨ੍ਤਦਹਸ੍ਸ ਪਨ ਪਚ੍ਛਿਮਦਿਸਾਭਾਗੇ ਸੁਵਣ੍ਣਪਸ੍ਸਪਬ੍ਬਤੇ ਦ੍ਵਾਦਸਯੋਜਨਿਕਾ ਕਞ੍ਚਨਗੁਹਾ ਤਿਟ੍ਠਤਿ. ਛਦ੍ਦਨ੍ਤੋ ਨਾਮ ਨਾਗਰਾਜਾ ਵਸ੍ਸਾਰਤ੍ਤੇ ਹੇਮਨ੍ਤੇ ਅਟ੍ਠਸਹਸ੍ਸਨਾਗਪਰਿਵੁਤੋ ਕਞ੍ਚਨਗੁਹਾਯਂ ਵਸਤਿ. ਗਿਮ੍ਹਕਾਲੇ ਉਦਕਵਾਤਂ ਸਮ੍ਪਟਿਚ੍ਛਮਾਨੋ ਮਹਾਨਿਗ੍ਰੋਧਮੂਲੇ ਪਾਰੋਹਨ੍ਤਰੇ ਤਿਟ੍ਠਤੀ.

ਅਥਸ੍ਸ ਏਕਦਿਵਸਂ ‘‘ਮਹਾਸਾਲਵਨਂ ਪੁਪ੍ਫਿਤ’’ਨ੍ਤਿ ਤਰੁਣਨਾਗਾ ਆਗਨ੍ਤ੍ਵਾ ਆਰੋਚਯਿਂਸੁ. ਸੋ ਸਪਰਿਵਾਰੋ ‘‘ਸਾਲਕੀਲ਼ਂ ਕੀਲ਼ਿਸ੍ਸਾਮੀ’’ਤਿ ਸਾਲਵਨਂ ਗਨ੍ਤ੍ਵਾ ਏਕਂ ਸੁਪੁਪ੍ਫਿਤਂ ਸਾਲਰੁਕ੍ਖਂ ਕੁਮ੍ਭੇਨ ਪਹਰਿ. ਤਦਾ ਚੂਲ਼ਸੁਭਦ੍ਦਾ ਪਟਿਵਾਤਪਸ੍ਸੇ ਠਿਤਾ, ਤਸ੍ਸਾ ਸਰੀਰੇ ਸੁਕ੍ਖਦਣ੍ਡਕਮਿਸ੍ਸਕਾਨਿ ਪੁਰਾਣਪਣ੍ਣਾਨਿ ਚੇਵ ਤਮ੍ਬਕਿਪਿਲ੍ਲਿਕਾਨਿ ਚ ਪਤਿਂਸੁ. ਮਹਾਸੁਭਦ੍ਦਾ ਅਧੋਵਾਤਪਸ੍ਸੇ ਠਿਤਾ, ਤਸ੍ਸਾ ਸਰੀਰੇ ਪੁਪ੍ਫਰੇਣੁਕਿਞ੍ਜਕ੍ਖਪਤ੍ਤਾਨਿ ਪਤਿਂਸੁ. ਚੂਲ਼ਸੁਭਦ੍ਦਾ ‘‘ਅਯਂ ਨਾਗਰਾਜਾ ਅਤ੍ਤਨੋ ਪਿਯਭਰਿਯਾਯ ਉਪਰਿ ਪੁਪ੍ਫਰੇਣੁਕਿਞ੍ਜਕ੍ਖਪਤ੍ਤਾਨਿ ਪਾਤੇਸਿ, ਮਮ ਸਰੀਰੇ ਸੁਕ੍ਖਦਣ੍ਡਕਮਿਸ੍ਸਾਨਿ ਪੁਰਾਣਪਣ੍ਣਾਨਿ ਚੇਵ ਤਮ੍ਬਕਿਪਿਲ੍ਲਿਕਾਨਿ ਚ ਪਾਤੇਸਿ, ਹੋਤੁ, ਕਾਤਬ੍ਬਂ ਜਾਨਿਸ੍ਸਾਮੀ’’ਤਿ ਮਹਾਸਤ੍ਤੇ ਵੇਰਂ ਬਨ੍ਧਿ.

ਅਪਰਮ੍ਪਿ ਦਿਵਸਂ ਨਾਗਰਾਜਾ ਸਪਰਿਵਾਰੋ ਨ੍ਹਾਨਤ੍ਥਾਯ ਛਦ੍ਦਨ੍ਤਦਹਂ ਓਤਰਿ. ਅਥ ਦ੍ਵੇ ਤਰੁਣਨਾਗਾ ਸੋਣ੍ਡਾਹਿ ਉਸਿਰਕਲਾਪੇ ਗਹੇਤ੍ਵਾ ਕੇਲਾਸਕੂਟਂ ਮਜ੍ਜਨ੍ਤਾ ਵਿਯ ਨ੍ਹਾਪੇਸੁਂ. ਤਸ੍ਮਿਂ ਨ੍ਹਤ੍ਵਾ ਉਤ੍ਤਿਣ੍ਣੇ ਦ੍ਵੇ ਕਰੇਣੁਯੋ ਨ੍ਹਾਪੇਸੁਂ. ਤਾਪਿ ਉਤ੍ਤਰਿਤ੍ਵਾ ਮਹਾਸਤ੍ਤਸ੍ਸ ਸਨ੍ਤਿਕੇ ਅਟ੍ਠਂਸੁ. ਤਤੋ ਅਟ੍ਠਸਹਸ੍ਸਨਾਗਾਸਰਂ ਓਤਰਿਤ੍ਵਾ ਉਦਕਕੀਲ਼ਂ ਕੀਲ਼ਿਤ੍ਵਾ ਸਰਤੋ ਨਾਨਾਪੁਪ੍ਫਾਨਿ ਆਹਰਿਤ੍ਵਾ ਰਜਤਥੂਪਂ ਅਲਙ੍ਕਰੋਨ੍ਤਾ ਵਿਯ ਮਹਾਸਤ੍ਤਂ ਅਲਙ੍ਕਰਿਤ੍ਵਾ ਪਚ੍ਛਾ ਦ੍ਵੇ ਕਰੇਣੁਯੋ ਅਲਙ੍ਕਰਿਂਸੁ. ਅਥੇਕੋ ਹਤ੍ਥੀ ਸਰੇ ਵਿਚਰਨ੍ਤੋ ਸਤ੍ਤੁਦ੍ਦਯਂ ਨਾਮ ਮਹਾਪਦੁਮਂ ਲਭਿਤ੍ਵਾ ਆਹਰਿਤ੍ਵਾ ਮਹਾਸਤ੍ਤਸ੍ਸ ਅਦਾਸਿ. ਸੋ ਤਂ ਸੋਣ੍ਡਾਯ ਗਹੇਤ੍ਵਾ ਰੇਣੁਂ ਕੁਮ੍ਭੇ ਓਕਿਰਿਤ੍ਵਾ ਜੇਟ੍ਠਕਾਯ ਮਹਾਸੁਭਦ੍ਦਾਯ ਅਦਾਸਿ. ਤਂ ਦਿਸ੍ਵਾ ਇਤਰਾ ‘‘ਇਦਮ੍ਪਿ ਸਤ੍ਤੁਦ੍ਦਯਂ ਮਹਾਪਦੁਮਂ ਅਤ੍ਤਨੋ ਪਿਯਭਰਿਯਾਯ ਏਵ ਅਦਾਸਿ, ਨ ਮਯ੍ਹ’’ਨ੍ਤਿ ਪੁਨਪਿ ਤਸ੍ਮਿਂ ਵੇਰਂ ਬਨ੍ਧਿ.

ਅਥੇਕਦਿਵਸਂ ਬੋਧਿਸਤ੍ਤੇ ਮਧੁਰਫਲਾਨਿ ਚੇਵ ਭਿਸਮੁਲ਼ਾਲਾਨਿ ਚ ਪੋਕ੍ਖਰਮਧੁਨਾ ਯੋਜੇਤ੍ਵਾ ਪਞ੍ਚਸਤੇ ਪਚ੍ਚੇਕਬੁਦ੍ਧੇ ਭੋਜੇਨ੍ਤੇ ਚੂਲ਼ਸੁਭਦ੍ਦਾ ਅਤ੍ਤਨਾ ਲਦ੍ਧਫਲਾਫਲਂ ਪਚ੍ਚੇਕਬੁਦ੍ਧਾਨਂ ਦਤ੍ਵਾ ‘‘ਭਨ੍ਤੇ, ਇਤੋ ਚਵਿਤ੍ਵਾ ਮਦ੍ਦਰਾਜਕੁਲੇ ਨਿਬ੍ਬਤ੍ਤਿਤ੍ਵਾ ਸੁਭਦ੍ਦਾ ਨਾਮ ਰਾਜਕਞ੍ਞਾ ਹੁਤ੍ਵਾ ਵਯਪ੍ਪਤ੍ਤਾ ਬਾਰਾਣਸਿਰਞ੍ਞੋ ਅਗ੍ਗਮਹੇਸਿਭਾਵਂ ਪਤ੍ਵਾ ਤਸ੍ਸ ਪਿਯਾ ਮਨਾਪਾ ਤਂ ਅਤ੍ਤਨੋ ਰੁਚਿਂ ਕਾਰੇਤੁਂ ਸਮਤ੍ਥਾ ਹੁਤ੍ਵਾ ਤਸ੍ਸ ਆਚਿਕ੍ਖਿਤ੍ਵਾ ਏਕਂ ਲੁਦ੍ਦਕਂ ਪੇਸੇਤ੍ਵਾ ਇਮਂ ਹਤ੍ਥਿਂ ਵਿਸਪੀਤੇਨ ਸਲ੍ਲੇਨ ਵਿਜ੍ਝਾਪੇਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਛਬ੍ਬਣ੍ਣਰਂਸਿਂ ਵਿਸ੍ਸਜ੍ਜੇਨ੍ਤੇ ਯਮਕਦਨ੍ਤੇ ਆਹਰਾਪੇਤੁਂ ਸਮਤ੍ਥਾ ਹੋਮੀ’’ਤਿ ਪਤ੍ਥਨਂ ਠਪੇਸਿ. ਸਾ ਤਤੋ ਪਟ੍ਠਾਯ ਗੋਚਰਂ ਅਗ੍ਗਹੇਤ੍ਵਾ ਸੁਸ੍ਸਿਤ੍ਵਾ ਨਚਿਰਸ੍ਸੇਵ ਕਾਲਂ ਕਤ੍ਵਾ ਮਦ੍ਦਰਟ੍ਠੇ ਰਾਜਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ਸੁਭਦ੍ਦਾਤਿਸ੍ਸਾ ਨਾਮਂ ਕਰਿਂਸੁ. ਅਥ ਨਂ ਵਯਪ੍ਪਤ੍ਤਂ ਬਾਰਾਣਸਿਰਞ੍ਞੋ ਅਦਂਸੁ. ਸਾ ਤਸ੍ਸ ਪਿਯਾ ਅਹੋਸਿ ਮਨਾਪਾ, ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਜੇਟ੍ਠਿਕਾ ਹੁਤ੍ਵਾ ਜਾਤਿਸ੍ਸਰਞਾਣਞ੍ਚ ਪਟਿਲਭਿ. ਸਾ ਚਿਨ੍ਤੇਸਿ – ‘‘ਸਮਿਦ੍ਧਾ ਮੇ ਪਤ੍ਥਨਾ, ਇਦਾਨਿ ਤਸ੍ਸ ਨਾਗਸ੍ਸ ਯਮਕਦਨ੍ਤੇ ਆਹਰਾਪੇਸ੍ਸਾਮੀ’’ਤਿ. ਤਤੋ ਸਰੀਰਂ ਤੇਲੇਨ ਮਕ੍ਖੇਤ੍ਵਾ ਕਿਲਿਟ੍ਠਵਤ੍ਥਂ ਨਿਵਾਸੇਤ੍ਵਾ ਗਿਲਾਨਾਕਾਰਂ ਦਸ੍ਸੇਤ੍ਵਾ ਸਿਰਿਗਬ੍ਭਂ ਪਵਿਸਿਤ੍ਵਾ ਮਞ੍ਚਕੇ ਨਿਪਜ੍ਜਿ. ਰਾਜਾ ‘‘ਕੁਹਿਂ ਸੁਭਦ੍ਦਾ’’ਤਿ ਵਤ੍ਵਾ ‘‘ਗਿਲਾਨਾ’’ਤਿ ਸੁਤ੍ਵਾ ਸਿਰਿਗਬ੍ਭਂ ਪਵਿਸਿਤ੍ਵਾ ਮਞ੍ਚਕੇ ਨਿਸੀਦਿਤ੍ਵਾ ਤਸ੍ਸਾ ਪਿਟ੍ਠਿਂ ਪਰਿਮਜ੍ਜਨ੍ਤੋ ਪਠਮਂ ਗਾਥਮਾਹ –

੯੭.

‘‘ਕਿਂ ਨੁ ਸੋਚਸਿਨੁਚ੍ਚਙ੍ਗਿ, ਪਣ੍ਡੂਸਿ ਵਰਵਣ੍ਣਿਨਿ;

ਮਿਲਾਯਸਿ ਵਿਸਾਲਕ੍ਖਿ, ਮਾਲਾਵ ਪਰਿਮਦ੍ਦਿਤਾ’’ਤਿ.

ਤਤ੍ਥ ਅਨੁਚ੍ਚਙ੍ਗੀਤਿ ਕਞ੍ਚਨਸਨ੍ਨਿਭਸਰੀਰੇ. ਮਾਲਾਵ ਪਰਿਮਦ੍ਦਿਤਾਤਿ ਹਤ੍ਥੇਹਿ ਪਰਿਮਦ੍ਦਿਤਾ ਪਦੁਮਮਾਲਾ ਵਿਯ.

ਤਂ ਸੁਤ੍ਵਾ ਸਾ ਇਤਰਂ ਗਾਥਮਾਹ –

੯੮.

‘‘ਦੋਹਲ਼ੋ ਮੇ ਮਹਾਰਾਜ, ਸੁਪਿਨਨ੍ਤੇਨੁਪਜ੍ਝਗਾ;

ਨ ਸੋ ਸੁਲਭਰੂਪੋਵ, ਯਾਦਿਸੋ ਮਮ ਦੋਹਲ਼ੋ’’ਤਿ.

ਤਤ੍ਥ ਨ ਸੋਤਿ ਯਾਦਿਸੋ ਮਮ ਸੁਪਿਨਨ੍ਤੇਨੁਪਜ੍ਝਗਾ ਸੁਪਿਨੇ ਪਸ੍ਸਨ੍ਤਿਯਾ ਮਯਾ ਦਿਟ੍ਠੋ ਦੋਹਲ਼ੋ, ਸੋ ਸੁਲਭਰੂਪੋ ਵਿਯ ਨ ਹੋਤਿ, ਦੁਲ੍ਲਭੋ ਸੋ, ਮਯ੍ਹਂ ਪਨ ਤਂ ਅਲਭਨ੍ਤਿਯਾ ਜੀਵਿਤਂ ਨਤ੍ਥੀਤਿ ਅਵਚ.

ਤਂ ਸੁਤ੍ਵਾ ਰਾਜਾ ਗਾਥਮਾਹ –

੯੯.

‘‘ਯੇ ਕੇਚਿ ਮਾਨੁਸਾ ਕਾਮਾ, ਇਧ ਲੋਕਮ੍ਹਿ ਨਨ੍ਦਨੇ;

ਸਬ੍ਬੇ ਤੇ ਪਚੁਰਾ ਮਯ੍ਹਂ, ਅਹਂ ਤੇ ਦਮ੍ਮਿ ਦੋਹਲ਼’’ਨ੍ਤਿ.

ਤਤ੍ਥ ਪਚੁਰਾਤਿ ਬਹੂ ਸੁਲਭਾ.

ਤਂ ਸੁਤ੍ਵਾ ਦੇਵੀ, ‘‘ਮਹਾਰਾਜ, ਦੁਲ੍ਲਭੋ ਮਮ ਦੋਹਲ਼ੋ, ਨ ਤਂ ਇਦਾਨਿ ਕਥੇਮਿ, ਯਾਵਤ੍ਤਕਾ ਪਨ ਤੇ ਵਿਜਿਤੇ ਲੁਦ੍ਦਾ, ਤੇ ਸਬ੍ਬੇ ਸਨ੍ਨਿਪਾਤੇਥ, ਤੇਸਂ ਮਜ੍ਝੇ ਕਥੇਸ੍ਸਾਮੀ’’ਤਿ ਦੀਪੇਨ੍ਤੀ ਅਨਨ੍ਤਰਂ ਗਾਥਮਾਹ –

੧੦੦.

‘‘ਲੁਦ੍ਦਾ ਦੇਵ ਸਮਾਯਨ੍ਤੁ, ਯੇ ਕੇਚਿ ਵਿਜਿਤੇ ਤਵ;

ਏਤੇਸਂ ਅਹਮਕ੍ਖਿਸ੍ਸਂ, ਯਾਦਿਸੋ ਮਮ ਦੋਹਲ਼ੋ’’ਤਿ.

ਰਾਜਾ ‘‘ਸਾਧੂ’’ਤਿ ਸਿਰਿਗਬ੍ਭਾ ਨਿਕ੍ਖਮਿਤ੍ਵਾ ‘‘ਯਾਵਤਿਕਾ ਤਿਯੋਜਨਸਤਿਕੇ ਕਾਸਿਕਰਟ੍ਠੇ ਲੁਦ੍ਦਾ, ਤੇਸਂ ਸਨ੍ਨਿਪਾਤਤ੍ਥਾਯ ਭੇਰਿਂ ਚਰਾਪੇਥਾ’’ਤਿ ਅਮਚ੍ਚੇ ਆਣਾਪੇਸਿ. ਤੇ ਤਥਾ ਅਕਂਸੁ. ਨਚਿਰਸ੍ਸੇਵ ਕਾਸਿਰਟ੍ਠਵਾਸਿਨੋ ਲੁਦ੍ਦਾ ਯਥਾਬਲਂ ਪਣ੍ਣਾਕਾਰਂ ਗਹੇਤ੍ਵਾ ਆਗਨ੍ਤ੍ਵਾ ਆਗਤਭਾਵਂ ਰਞ੍ਞੋ ਆਰੋਚਾਪੇਸੁਂ. ਤੇ ਸਬ੍ਬੇਪਿ ਸਟ੍ਠਿਸਹਸ੍ਸਮਤ੍ਤਾ ਅਹੇਸੁਂ. ਰਾਜਾ ਤੇਸਂ ਆਗਤਭਾਵਂ ਞਤ੍ਵਾ ਵਾਤਪਾਨੇ ਠਿਤੋ ਹਤ੍ਥਂ ਪਸਾਰੇਤ੍ਵਾ ਤੇਸਂ ਆਗਤਭਾਵਂ ਦੇਵਿਯਾ ਕਥੇਨ੍ਤੋ ਆਹ –

੧੦੧.

‘‘ਇਮੇ ਤੇ ਲੁਦ੍ਦਕਾ ਦੇਵਿ, ਕਤਹਤ੍ਥਾ ਵਿਸਾਰਦਾ;

ਵਨਞ੍ਞੂ ਚ ਮਿਗਞ੍ਞੂ ਚ, ਮਮਤ੍ਥੇ ਚਤ੍ਤਜੀਵਿਤਾ’’ਤਿ.

ਤਤ੍ਥ ਇਮੇ ਤੇਤਿ ਯੇ ਤ੍ਵਂ ਸਨ੍ਨਿਪਾਤਾਪੇਸਿ, ਇਮੇ ਤੇ. ਕਤਹਤ੍ਥਾਤਿ ਵਿਜ੍ਝਨਛੇਦਨੇਸੁ ਕਤਹਤ੍ਥਾ ਕੁਸਲਾ ਸੁਸਿਕ੍ਖਿਤਾ. ਵਿਸਾਰਦਾਤਿ ਨਿਬ੍ਭਯਾ. ਵਨਞ੍ਞੂ ਚ ਮਿਗਞ੍ਞੂ ਚਾਤਿ ਵਨਾਨਿ ਚ ਮਿਗੇ ਚ ਜਾਨਨ੍ਤਿ. ਮਮਤ੍ਥੇਤਿ ਸਬ੍ਬੇਪਿ ਚੇਤੇ ਮਮਤ੍ਥੇ ਚਤ੍ਤਜੀਵਿਤਾ, ਯਮਹਂ ਇਚ੍ਛਾਮਿ, ਤਂ ਕਰੋਨ੍ਤੀਤਿ.

ਤਂ ਸੁਤ੍ਵਾ ਦੇਵੀ ਤੇ ਆਮਨ੍ਤੇਤ੍ਵਾ ਇਤਰਂ ਗਾਥਮਾਹ –

੧੦੨.

‘‘ਲੁਦ੍ਦਪੁਤ੍ਤਾ ਨਿਸਾਮੇਥ, ਯਾਵਨ੍ਤੇਤ੍ਥ ਸਮਾਗਤਾ;

ਛਬ੍ਬਿਸਾਣਂ ਗਜਂ ਸੇਤਂ, ਅਦ੍ਦਸਂ ਸੁਪਿਨੇ ਅਹਂ;

ਤਸ੍ਸ ਦਨ੍ਤੇਹਿ ਮੇ ਅਤ੍ਥੋ, ਅਲਾਭੇ ਨਤ੍ਥਿ ਜੀਵਿਤ’’ਨ੍ਤਿ.

ਤਤ੍ਥ ਨਿਸਾਮੇਥਾਤਿ ਸੁਣਾਥ. ਛਬ੍ਬਿਸਾਣਨ੍ਤਿ ਛਬ੍ਬਣ੍ਣਵਿਸਾਣਂ.

ਤਂ ਸੁਤ੍ਵਾ ਲੁਦ੍ਦਪੁਤ੍ਤਾ ਆਹਂਸੁ –

੧੦੩.

‘‘ਨ ਨੋ ਪਿਤੂਨਂ ਨ ਪਿਤਾਮਹਾਨਂ, ਦਿਟ੍ਠੋ ਸੁਤੋ ਕੁਞ੍ਜਰੋ ਛਬ੍ਬਿਸਾਣੋ;

ਯਮਦ੍ਦਸਾ ਸੁਪਿਨੇ ਰਾਜਪੁਤ੍ਤੀ, ਅਕ੍ਖਾਹਿ ਨੋ ਯਾਦਿਸੋ ਹਤ੍ਥਿਨਾਗੋ’’ਤਿ.

ਤਤ੍ਥ ਪਿਤੂਨਨ੍ਤਿ ਕਰਣਤ੍ਥੇ ਸਾਮਿਵਚਨਂ. ਇਦਂ ਵੁਤ੍ਤਂ ਹੋਤਿ – ਦੇਵਿ ਨੇਵ ਅਮ੍ਹਾਕਂ ਪਿਤੂਹਿ, ਨ ਪਿਤਾਮਹੇਹਿ ਏਵਰੂਪੋ ਕੁਞ੍ਜਰੋ ਦਿਟ੍ਠਪੁਬ੍ਬੋ, ਪਗੇਵ ਅਮ੍ਹੇਹਿ, ਤਸ੍ਮਾ ਅਤ੍ਤਨਾ ਦਿਟ੍ਠਲਕ੍ਖਣਵਸੇਨ ਅਕ੍ਖਾਹਿ ਨੋ, ਯਾਦਿਸੋ ਤਯਾ ਦਿਟ੍ਠੋ ਹਤ੍ਥਿਨਾਗੋਤਿ.

ਅਨਨ੍ਤਰਗਾਥਾਪਿ ਤੇਹੇਵ ਵੁਤ੍ਤਾ –

੧੦੪.

‘‘ਦਿਸਾ ਚਤਸ੍ਸੋ ਵਿਦਿਸਾ ਚਤਸ੍ਸੋ, ਉਦ੍ਧਂ ਅਧੋ ਦਸ ਦਿਸਾ ਇਮਾਯੋ;

ਕਤਮਂ ਦਿਸਂ ਤਿਟ੍ਠਤਿ ਨਾਗਰਾਜਾ, ਯਮਦ੍ਦਸਾ ਸੁਪਿਨੇ ਛਬ੍ਬਿਸਾਣ’’ਨ੍ਤਿ.

ਤਤ੍ਥ ਦਿਸਾਤਿ ਦਿਸਾਸੁ. ਕਤਮਨ੍ਤਿ ਏਤਾਸੁ ਦਿਸਾਸੁ ਕਤਮਾਯ ਦਿਸਾਯਾਤਿ.

ਏਵਂ ਵੁਤ੍ਤੇ ਸੁਭਦ੍ਦਾ ਸਬ੍ਬੇ ਲੁਦ੍ਦੇ ਓਲੋਕੇਤ੍ਵਾ ਤੇਸਂ ਅਨ੍ਤਰੇ ਪਤ੍ਥਟਪਾਦਂ ਭਤ੍ਤਪੁਟਸਦਿਸਜਙ੍ਘਂ ਮਹਾਜਾਣੁਕਂ ਮਹਾਫਾਸੁਕਂ ਬਹਲਮਸ੍ਸੁਤਮ੍ਬਦਾਠਿਕਂ ਨਿਬ੍ਬਿਦ੍ਧਪਿਙ੍ਗਲਂ ਦੁਸ੍ਸਣ੍ਠਾਨਂ ਬੀਭਚ੍ਛਂ ਸਬ੍ਬੇਸਂ ਮਤ੍ਥਕਮਤ੍ਥਕੇਨ ਪਞ੍ਞਾਯਮਾਨਂ ਮਹਾਸਤ੍ਤਸ੍ਸ ਪੁਬ੍ਬਵੇਰਿਂ ਸੋਨੁਤ੍ਤਰਂ ਨਾਮ ਨੇਸਾਦਂ ਦਿਸ੍ਵਾ ‘‘ਏਸ ਮਮ ਵਚਨਂ ਕਾਤੁਂ ਸਕ੍ਖਿਸ੍ਸਤੀ’’ਤਿ ਰਾਜਾਨਂ ਅਨੁਜਾਨਾਪੇਤ੍ਵਾ ਤਂ ਆਦਾਯ ਸਤ੍ਤਭੂਮਿਕਪਾਸਾਦਸ੍ਸ ਉਪਰਿਮਤਲਂ ਆਰੁਯ੍ਹ ਉਤ੍ਤਰਸੀਹਪਞ੍ਜਰਂ ਵਿਵਰਿਤ੍ਵਾ ਉਤ੍ਤਰਹਿਮਵਨ੍ਤਾਭਿਮੁਖਂ ਹਤ੍ਥਂ ਪਸਾਰੇਤ੍ਵਾ ਚਤਸ੍ਸੋ ਗਾਥਾ ਅਭਾਸਿ –

੧੦੫.

‘‘ਇਤੋ ਉਜੁਂ ਉਤ੍ਤਰਿਯਂ ਦਿਸਾਯਂ, ਅਤਿਕ੍ਕਮ੍ਮ ਸੋ ਸਤ੍ਤ ਗਿਰੀ ਬ੍ਰਹ੍ਮਨ੍ਤੇ;

ਸੁਵਣ੍ਣਪਸ੍ਸੋ ਨਾਮ ਗਿਰੀ ਉਲ਼ਾਰੋ, ਸੁਪੁਪ੍ਫਿਤੋ ਕਿਮ੍ਪੁਰਿਸਾਨੁਚਿਣ੍ਣੋ.

੧੦੬.

‘‘ਆਰੁਯ੍ਹ ਸੇਲਂ ਭਵਨਂ ਕਿਨ੍ਨਰਾਨਂ, ਓਲੋਕਯ ਪਬ੍ਬਤਪਾਦਮੂਲਂ;

ਅਥ ਦਕ੍ਖਸੀ ਮੇਘਸਮਾਨਵਣ੍ਣਂ, ਨਿਗ੍ਰੋਧਰਾਜਂ ਅਟ੍ਠਸਹਸ੍ਸਪਾਦਂ.

੧੦੭.

‘‘ਤਤ੍ਥਚ੍ਛਤੀ ਕੁਞ੍ਜਰੋ ਛਬ੍ਬਿਸਾਣੋ, ਸਬ੍ਬਸੇਤੋ ਦੁਪ੍ਪਸਹੋ ਪਰੇਭਿ;

ਰਕ੍ਖਨ੍ਤਿ ਨਂ ਅਟ੍ਠਸਹਸ੍ਸਨਾਗਾ, ਈਸਾਦਨ੍ਤਾ ਵਾਤਜਵਪ੍ਪਹਾਰਿਨੋ.

੧੦੮.

‘‘ਤਿਟ੍ਠਨ੍ਤਿ ਤੇ ਤੁਮੂਲਂ ਪਸ੍ਸਸਨ੍ਤਾ, ਕੁਪ੍ਪਨ੍ਤਿ ਵਾਤਸ੍ਸਪਿ ਏਰਿਤਸ੍ਸ;

ਮਨੁਸ੍ਸਭੂਤਂ ਪਨ ਤਤ੍ਥ ਦਿਸ੍ਵਾ, ਭਸ੍ਮਂ ਕਰੇਯ੍ਯੁਂ ਨਾਸ੍ਸ ਰਜੋਪਿ ਤਸ੍ਸਾ’’ਤਿ.

ਤਤ੍ਥ ਇਤੋਤਿ ਇਮਮ੍ਹਾ ਠਾਨਾ. ਉਤ੍ਤਰਿਯਨ੍ਤਿ ਉਤ੍ਤਰਾਯ. ਉਲ਼ਾਰੋਤਿ ਮਹਾ ਇਤਰੇਹਿ ਛਹਿ ਪਬ੍ਬਤੇਹਿ ਉਚ੍ਚਤਰੋ. ਓਲੋਕਯਾਤਿ ਆਲੋਕੇਯ੍ਯਾਸਿ. ਤਤ੍ਥਚ੍ਛਤੀਤਿ ਤਸ੍ਮਿਂ ਨਿਗ੍ਰੋਧਮੂਲੇ ਗਿਮ੍ਹਸਮਯੇ ਉਦਕਵਾਤਂ ਸਮ੍ਪਟਿਚ੍ਛਨ੍ਤੋ ਤਿਟ੍ਠਤਿ. ਦੁਪ੍ਪਸਹੋਤਿ ਅਞ੍ਞੇ ਤਂ ਉਪਗਨ੍ਤ੍ਵਾ ਪਸਯ੍ਹਕਾਰਂ ਕਾਤੁਂ ਸਮਤ੍ਥਾ ਨਾਮ ਨਤ੍ਥੀਤਿ ਦੁਪ੍ਪਸਹੋ ਪਰੇਭਿ. ਈਸਾਦਨ੍ਤਾਤਿ ਰਥੀਸਾਯ ਸਮਾਨਦਨ੍ਤਾ. ਵਾਤਜਵਪ੍ਪਹਾਰਿਨੋਤਿ ਵਾਤਜਵੇਨ ਗਨ੍ਤ੍ਵਾ ਪਚ੍ਚਾਮਿਤ੍ਤੇ ਪਹਰਣਸੀਲਾ ਏਵਰੂਪਾ ਅਟ੍ਠਸਹਸ੍ਸਨਾਗਾ ਨਾਗਰਾਜਾਨਂ ਰਕ੍ਖਨ੍ਤਿ. ਤੁਮੂਲਨ੍ਤਿ ਭਿਂਸਨਕਂ ਮਹਾਸਦ੍ਦਾਨੁਬਨ੍ਧਂ ਅਸ੍ਸਾਸਂ ਮੁਞ੍ਚਨ੍ਤਾ ਤਿਟ੍ਠਨ੍ਤਿ. ਏਰਿਤਸ੍ਸਾਤਿ ਵਾਤਪਹਰਿਤਸ੍ਸ ਯਂ ਸਦ੍ਦਾਨੁਬਨ੍ਧਂ ਏਰਿਤਂ ਚਲਨਂ ਕਮ੍ਪਨਂ, ਤਸ੍ਸਪਿ ਕੁਪ੍ਪਨ੍ਤਿ, ਏਵਂਫਰੁਸਾ ਤੇ ਨਾਗਾ. ਨਾਸ੍ਸਾਤਿ ਤਸ੍ਸ ਨਾਸਵਾਤੇਨ ਵਿਦ੍ਧਂਸੇਤ੍ਵਾ ਭਸ੍ਮਂ ਕਤਸ੍ਸ ਤਸ੍ਸ ਰਜੋਪਿ ਨ ਭਵੇਯ੍ਯਾਤਿ.

ਤਂ ਸੁਤ੍ਵਾ ਸੋਨੁਤ੍ਤਰੋ ਮਰਣਭਯਭੀਤੋ ਆਹ –

੧੦੯.

‘‘ਬਹੂ ਹਿਮੇ ਰਾਜਕੁਲਮ੍ਹਿ ਸਨ੍ਤਿ, ਪਿਲ਼ਨ੍ਧਨਾ ਜਾਤਰੂਪਸ੍ਸ ਦੇਵਿ;

ਮੁਤ੍ਤਾ ਮਣੀ ਵੇਲ਼ੁਰਿਯਾਮਯਾ ਚ, ਕਿਂ ਕਾਹਸਿ ਦਨ੍ਤਪਿਲ਼ਨ੍ਧਨੇਨ;

ਮਾਰੇਤੁਕਾਮਾ ਕੁਞ੍ਜਰਂ ਛਬ੍ਬਿਸਾਣਂ, ਉਦਾਹੁ ਘਾਤੇਸ੍ਸਸਿ ਲੁਦ੍ਦਪੁਤ੍ਤੇ’’ਤਿ.

ਤਤ੍ਥ ਪਿਲ਼ਨ੍ਧਨਾਤਿ ਆਭਰਣਾਨਿ. ਵੇਲ਼ੁਰਿਯਾਮਯਾਤਿ ਵੇਲ਼ੁਰਿਯਮਯਾਨਿ. ਘਾਤੇਸ੍ਸਸੀਤਿ ਉਦਾਹੁ ਪਿਲ਼ਨ੍ਧਨਾਪਦੇਸੇਨ ਲੁਦ੍ਦਪੁਤ੍ਤੇ ਘਾਤਾਪੇਤੁਕਾਮਾਸੀਤਿ ਪੁਚ੍ਛਤਿ.

ਤਤੋ ਦੇਵੀ ਗਾਥਮਾਹ –

੧੧੦.

‘‘ਸਾ ਇਸ੍ਸਿਤਾ ਦੁਕ੍ਖਿਤਾ ਚਸ੍ਮਿ ਲੁਦ੍ਦ, ਉਦ੍ਧਞ੍ਚ ਸੁਸ੍ਸਾਮਿ ਅਨੁਸ੍ਸਰਨ੍ਤੀ;

ਕਰੋਹਿ ਮੇ ਲੁਦ੍ਦਕ ਏਤਮਤ੍ਥਂ, ਦਸ੍ਸਾਮਿ ਤੇ ਗਾਮਵਰਾਨਿ ਪਞ੍ਚਾ’’ਤਿ.

ਤਤ੍ਥ ਸਾਤਿ ਸਾ ਅਹਂ. ਅਨੁਸ੍ਸਰਨ੍ਤੀਤਿ ਤੇਨ ਵਾਰਣੇਨ ਪੁਰੇ ਮਯਿ ਕਤਂ ਵੇਰਂ ਅਨੁਸ੍ਸਰਮਾਨਾ. ਦਸ੍ਸਾਮਿ ਤੇਤਿ ਏਤਸ੍ਮਿਂ ਤੇ ਅਤ੍ਥੇ ਨਿਪ੍ਫਾਦਿਤੇ ਸਂਵਚ੍ਛਰੇ ਸਤਸਹਸ੍ਸੁਟ੍ਠਾਨਕੇ ਪਞ੍ਚ ਗਾਮਵਰੇ ਦਦਾਮੀਤਿ.

ਏਵਞ੍ਚ ਪਨ ਵਤ੍ਵਾ ‘‘ਸਮ੍ਮ ਲੁਦ੍ਦਪੁਤ੍ਤ ਅਹਂ ‘ਏਤਂ ਛਦ੍ਦਨ੍ਤਹਤ੍ਥਿਂ ਮਾਰਾਪੇਤ੍ਵਾ ਯਮਕਦਨ੍ਤੇ ਆਹਰਾਪੇਤੁਂ ਸਮਤ੍ਥਾ ਹੋਮੀ’ਤਿ ਪੁਬ੍ਬੇ ਪਚ੍ਚੇਕਬੁਦ੍ਧਾਨਂ ਦਾਨਂ ਦਤ੍ਵਾ ਪਤ੍ਥਨਂ ਪਟ੍ਠਪੇਸਿਂ, ਮਯਾ ਸੁਪਿਨਨ੍ਤੇਨ ਦਿਟ੍ਠਂ ਨਾਮ ਨਤ੍ਥਿ, ਸਾ ਪਨ ਮਯਾ ਪਤ੍ਥਿਤਪਤ੍ਥਨਾ ਸਮਿਜ੍ਝਿਸ੍ਸਤਿ, ਤ੍ਵਂ ਗਚ੍ਛਨ੍ਤੋ ਮਾ ਭਾਯੀ’’ਤਿ ਤਂ ਸਮਸ੍ਸਾਸੇਤ੍ਵਾ ਪੇਸੇਸਿ. ਸੋ ‘‘ਸਾਧੁ, ਅਯ੍ਯੇ’’ਤਿ ਤਸ੍ਸਾ ਵਚਨਂ ਸਮ੍ਪਟਿਚ੍ਛਿਤ੍ਵਾ ‘‘ਤੇਨ ਹਿ ਮੇ ਪਾਕਟਂ ਕਤ੍ਵਾ ਤਸ੍ਸ ਵਸਨਟ੍ਠਾਨਂ ਕਥੇਹੀ’’ਤਿ ਪੁਚ੍ਛਨ੍ਤੋ ਇਮਂ ਗਾਥਮਾਹ –

੧੧੧.

‘‘ਕਤ੍ਥਚ੍ਛਤੀ ਕਤ੍ਥ ਮੁਪੇਤਿ ਠਾਨਂ, ਵੀਥਿਸ੍ਸ ਕਾ ਨ੍ਹਾਨਗਤਸ੍ਸ ਹੋਤਿ;

ਕਥਞ੍ਹਿ ਸੋ ਨ੍ਹਾਯਤਿ ਨਾਗਰਾਜਾ, ਕਥਂ ਵਿਜਾਨੇਮੁ ਗਤਿਂ ਗਜਸ੍ਸਾ’’ਤਿ.

ਤਤ੍ਥ ਕਤ੍ਥਚ੍ਛਤੀਤਿ ਕਤ੍ਥ ਵਸਤਿ. ਕਤ੍ਥ ਮੁਪੇਤੀਤਿ ਕਤ੍ਥ ਉਪੇਤਿ, ਕਤ੍ਥ ਤਿਟ੍ਠਤੀਤਿ ਅਤ੍ਥੋ. ਵੀਥਿਸ੍ਸ ਕਾਤਿ ਤਸ੍ਸ ਨ੍ਹਾਨਗਤਸ੍ਸ ਕਾ ਵੀਥਿ ਹੋਤਿ, ਕਤਰਮਗ੍ਗੇਨ ਸੋ ਗਚ੍ਛਤਿ. ਕਥਂ ਵਿਜਾਨੇਮੁ ਗਤਿਨ੍ਤਿ ਤਯਾ ਅਕਥਿਤੇ ਮਯਂ ਕਥਂ ਤਸ੍ਸ ਨਾਗਰਾਜਸ੍ਸ ਗਤਿਂ ਵਿਜਾਨਿਸ੍ਸਾਮ, ਤਸ੍ਮਾ ਕਥੇਹਿ ਨੋਤਿ ਅਤ੍ਥੋ.

ਤਤੋ ਸਾ ਜਾਤਿਸ੍ਸਰਞਾਣੇਨ ਪਚ੍ਚਕ੍ਖਤੋ ਦਿਟ੍ਠਟ੍ਠਾਨਂ ਤਸ੍ਸ ਆਚਿਕ੍ਖਨ੍ਤੀ ਦ੍ਵੇ ਗਾਥਾ ਅਭਾਸਿ –

੧੧੨.

‘‘ਤਤ੍ਥੇਵ ਸਾ ਪੋਕ੍ਖਰਣੀ ਅਦੂਰੇ, ਰਮ੍ਮਾ ਸੁਤਿਤ੍ਥਾ ਚ ਮਹੋਦਿਕਾ ਚ;

ਸਮ੍ਪੁਪ੍ਫਿਤਾ ਭਮਰਗਣਾਨੁਚਿਣ੍ਣਾ, ਏਤ੍ਥ ਹਿ ਸੋ ਨ੍ਹਾਯਤਿ ਨਾਗਰਾਜਾ.

੧੧੩.

‘‘ਸੀਸਂ ਨਹਾਤੁਪ੍ਪਲਮਾਲਭਾਰੀ, ਸਬ੍ਬਸੇਤੋ ਪੁਣ੍ਡਰੀਕਤ੍ਤਚਙ੍ਗੀ;

ਆਮੋਦਮਾਨੋ ਗਚ੍ਛਤਿ ਸਨ੍ਨਿਕੇਤਂ, ਪੁਰਕ੍ਖਤ੍ਵਾ ਮਹੇਸਿਂ ਸਬ੍ਬਭਦ੍ਦ’’ਨ੍ਤਿ.

ਤਤ੍ਥ ਤਤ੍ਥੇਵਾਤਿ ਤਸ੍ਸ ਵਸਨਟ੍ਠਾਨੇਯੇਵ. ਪੋਕ੍ਖਰਣੀਤਿ ਛਦ੍ਦਨ੍ਤਦਹਂ ਸਨ੍ਧਾਯਾਹ. ਸਮ੍ਪੁਪ੍ਫਿਤਾਤਿ ਦੁਵਿਧੇਹਿ ਕੁਮੁਦੇਹਿ ਤਿਵਿਧੇਹਿ ਉਪ੍ਪਲੇਹਿ ਪਞ੍ਚਵਣ੍ਣੇਹਿ ਚ ਪਦੁਮੇਹਿ ਸਮਨ੍ਤਤੋ ਪੁਪ੍ਫਿਤਾ. ਏਤ੍ਥ ਹਿ ਸੋਤਿ ਸੋ ਨਾਗਰਾਜਾ ਏਤ੍ਥ ਛਦ੍ਦਨ੍ਤਦਹੇ ਨ੍ਹਾਯਤਿ. ਉਪ੍ਪਲਮਾਲਭਾਰੀਤਿ ਉਪ੍ਪਲਾਦੀਨਂ ਜਲਜਥਲਜਾਨਂ ਪੁਪ੍ਫਾਨਂ ਮਾਲਂ ਧਾਰੇਨ੍ਤੋ. ਪੁਣ੍ਡਰੀਕਤ੍ਤਚਙ੍ਗੀਤਿ ਪੁਣ੍ਡਰੀਕਸਦਿਸਤਚੇਨ ਓਦਾਤੇਨ ਅਙ੍ਗੇਨ ਸਮਨ੍ਨਾਗਤੋ. ਆਮੋਦਮਾਨੋਤਿ ਆਮੋਦਿਤਪਮੋਦਿਤੋ. ਸਨ੍ਨਿਕੇਤਨ੍ਤਿ ਅਤ੍ਤਨੋ ਵਸਨਟ੍ਠਾਨਂ. ਪੁਰਕ੍ਖਤ੍ਵਾਤਿ ਸਬ੍ਬਭਦ੍ਦਂ ਨਾਮ ਮਹੇਸਿਂ ਪੁਰਤੋ ਕਤ੍ਵਾ ਅਟ੍ਠਹਿ ਨਾਗਸਹਸ੍ਸੇਹਿ ਪਰਿਵੁਤੋ ਅਤ੍ਤਨੋ ਵਸਨਟ੍ਠਾਨਂ ਗਚ੍ਛਤੀਤਿ.

ਤਂ ਸੁਤ੍ਵਾ ਸੋਨੁਤ੍ਤਰੋ ‘‘ਸਾਧੁ ਅਯ੍ਯੇ, ਅਹਂ ਤਂ ਵਾਰਣਂ ਮਾਰੇਤ੍ਵਾ ਤਸ੍ਸ ਦਨ੍ਤੇ ਆਹਰਿਸ੍ਸਾਮੀ’’ਤਿ ਸਮ੍ਪਟਿਚ੍ਛਿ. ਅਥਸ੍ਸ ਸਾ ਤੁਟ੍ਠਾ ਸਹਸ੍ਸਂ ਦਤ੍ਵਾ ‘‘ਗੇਹਂ ਤਾਵ ਗਚ੍ਛ, ਇਤੋ ਸਤ੍ਤਾਹਚ੍ਚਯੇਨ ਤਤ੍ਥ ਗਮਿਸ੍ਸਸੀ’’ਤਿ ਤਂ ਉਯ੍ਯੋਜੇਤ੍ਵਾ ਕਮ੍ਮਾਰੇ ਪਕ੍ਕੋਸਾਪੇਤ੍ਵਾ ‘‘ਤਾਤਾ ਅਮ੍ਹਾਕਂ ਵਾਸਿਫਰਸੁ-ਕੁਦ੍ਦਾਲ-ਨਿਖਾਦਨ-ਮੁਟ੍ਠਿਕਵੇਲ਼ੁਗੁਮ੍ਬਚ੍ਛੇਦਨ-ਸਤ੍ਥ-ਤਿਣਲਾਯਨ-ਅਸਿਲੋਹਦਣ੍ਡਕਕਚਖਾਣੁਕ- ਅਯਸਿਙ੍ਘਾਟਕੇਹਿ ਅਤ੍ਥੋ, ਸਬ੍ਬਂ ਸੀਘਂ ਕਤ੍ਵਾ ਆਹਰਥਾ’’ਤਿ ਆਣਾਪੇਤ੍ਵਾ ਚਮ੍ਮਕਾਰੇ ਪਕ੍ਕੋਸਾਪੇਤ੍ਵਾ ‘‘ਤਾਤਾ ਅਮ੍ਹਾਕਂ ਕੁਮ੍ਭਭਾਰਗਾਹਿਤਂ ਚਮ੍ਮਭਸ੍ਤਂ ਕਾਤੁਂ ਵਟ੍ਟਤਿ, ਚਮ੍ਮਯੋਤ੍ਤਵਰਤ੍ਤਹਤ੍ਥਿਪਾਦਉਪਾਹਨਚਮ੍ਮਛਤ੍ਤੇਹਿਪਿ ਨੋ ਅਤ੍ਥੋ, ਸਬ੍ਬਂ ਸੀਘਂ ਕਤ੍ਵਾ ਆਹਰਥਾ’’ਤਿ ਆਣਾਪੇਸਿ. ਤੇ ਉਭੋਪਿ ਸਬ੍ਬਾਨਿ ਤਾਨਿ ਸੀਘਂ ਕਤ੍ਵਾ ਆਹਰਿਤ੍ਵਾ ਅਦਂਸੁ. ਸਾ ਤਸ੍ਸ ਪਾਥੇਯ੍ਯਂ ਸਂਵਿਦਹਿਤ੍ਵਾ ਅਰਣਿਸਹਿਤਂ ਆਦਿਂ ਕਤ੍ਵਾ ਸਬ੍ਬਂ ਉਪਕਰਣਞ੍ਚ ਬਦ੍ਧਸਤ੍ਤੁਮਾਦਿਂ ਕਤ੍ਵਾ ਪਾਥੇਯ੍ਯਞ੍ਚ ਚਮ੍ਮਭਸ੍ਤਾਯਂ ਪਕ੍ਖਿਪਿ, ਤਂ ਸਬ੍ਬਮ੍ਪਿ ਕੁਮ੍ਭਭਾਰਮਤ੍ਤਂ ਅਹੋਸਿ.

ਸੋਨੁਤ੍ਤਰੋਪਿ ਅਤ੍ਤਨੋ ਪਰਿਵਚ੍ਛਂ ਕਤ੍ਵਾ ਸਤ੍ਤਮੇ ਦਿਵਸੇ ਆਗਨ੍ਤ੍ਵਾ ਦੇਵਿਂ ਵਨ੍ਦਿਤ੍ਵਾ ਅਟ੍ਠਾਸਿ. ਅਥ ਨਂ ਸਾ ‘‘ਨਿਟ੍ਠਿਤਂ ਤੇ ਸਮ੍ਮ ਸਬ੍ਬੂਪਕਰਣਂ, ਇਮਂ ਤਾਵ ਪਸਿਬ੍ਬਕਂ ਗਣ੍ਹਾ’’ਤਿ ਆਹ. ਸੋ ਪਨ ਮਹਾਥਾਮੋ ਪਞ੍ਚਨ੍ਨਂ ਹਤ੍ਥੀਨਂ ਬਲਂ ਧਾਰੇਤਿ, ਤਸ੍ਮਾ ਤਮ੍ਬੂਲਪਸਿਬ੍ਬਕਂ ਵਿਯ ਉਕ੍ਖਿਪਿਤ੍ਵਾ ਉਪਕਚ੍ਛਨ੍ਤਰੇ ਠਪੇਤ੍ਵਾ ਰਿਤ੍ਤਹਤ੍ਥੋ ਵਿਯ ਅਟ੍ਠਾਸਿ. ਸੁਭਦ੍ਦਾ ਲੁਦ੍ਦਸ੍ਸ ਪੁਤ੍ਤਦਾਰਾਨਂ ਪਰਿਬ੍ਬਯਂ ਦਤ੍ਵਾ ਰਞ੍ਞੋ ਆਚਿਕ੍ਖਿਤ੍ਵਾ ਸੋਨੁਤ੍ਤਰਂ ਉਯ੍ਯੋਜੇਸਿ. ਸੋਪਿ ਰਾਜਾਨਞ੍ਚ ਦੇਵਿਞ੍ਚ ਵਨ੍ਦਿਤ੍ਵਾ ਰਾਜਨਿਵੇਸਨਾ ਓਰੁਯ੍ਹ ਰਥੇ ਠਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਗਰਾ ਨਿਕ੍ਖਮਿਤ੍ਵਾ ਗਾਮਨਿਗਮਜਨਪਦਪਰਮ੍ਪਰਾਯ ਪਚ੍ਚਨ੍ਤਂ ਪਤ੍ਵਾ ਜਾਨਪਦੇ ਨਿਵਤ੍ਤੇਤ੍ਵਾ ਪਚ੍ਚਨ੍ਤਵਾਸੀਹਿ ਸਦ੍ਧਿਂ ਅਰਞ੍ਞਂ ਪਵਿਸਿਤ੍ਵਾ ਮਨੁਸ੍ਸਪਥਂ ਅਤਿਕ੍ਕਮ੍ਮ ਪਚ੍ਚਨ੍ਤਵਾਸਿਨੋਪਿ ਨਿਵਤ੍ਤੇਤ੍ਵਾ ਏਕਕੋਵ ਗਚ੍ਛਨ੍ਤੋ ਤਿਂਸਯੋਜਨਂ ਪਤ੍ਵਾ ਪਠਮਂ ਦਬ੍ਬਗਹਨਂ ਕਾਸਗਹਨਂ ਤਿਣਗਹਨਂ ਤੁਲਸਿਗਹਨਂ ਸਰਗਹਨਂ ਤਿਰਿਵਚ੍ਛਗਹਨਨ੍ਤਿ ਛ ਗਹਨਾਨਿ, ਕਣ੍ਟਕਵੇਲ਼ੁਗੁਮ੍ਬਗਹਨਾਨਿ ਵੇਤ੍ਤਗਹਨਂ ਓਮਿਸ੍ਸਕਗਹਨਂ ਨਲ਼ਗਹਨਂ ਸਰਗਹਨਸਦਿਸਂ ਉਰਗੇਨਪਿ ਦੁਬ੍ਬਿਨਿਵਿਜ੍ਝਂ ਘਨਵਨਗਹਨਂ ਰੁਕ੍ਖਗਹਨਂ ਵੇਲ਼ੁਗਹਨਂ ਅਪਰਮ੍ਪਿ ਵੇਲ਼ੁਗੁਮ੍ਬਗਹਨਂ ਕਲਲਗਹਨਂ ਉਦਕਗਹਨਂ ਪਬ੍ਬਤਗਹਨਨ੍ਤਿ ਅਟ੍ਠਾਰਸ ਗਹਨਾਨਿ ਪਟਿਪਾਟਿਯਾ ਪਤ੍ਵਾ ਦਬ੍ਬਗਹਨਾਦੀਨਿ ਅਸਿਤੇਨ ਲਾਯਿਤ੍ਵਾ ਤੁਲਸਿਗਹਨਾਦੀਨਿ ਵੇਲ਼ੁਗੁਮ੍ਬਚ੍ਛੇਦਨਸਤ੍ਥੇਨ ਛਿਨ੍ਦਿਤ੍ਵਾ ਰੁਕ੍ਖੇ ਫਰਸੁਨਾ ਕੋਟ੍ਟੇਤ੍ਵਾ ਅਤਿਮਹਨ੍ਤੇ ਰੁਕ੍ਖੇ ਨਿਖਾਦਨੇਨ ਵਿਜ੍ਝਿਤ੍ਵਾ ਮਗ੍ਗਂ ਕਰੋਨ੍ਤੋ ਵੇਲ਼ੁਵਨੇ ਨਿਸ੍ਸੇਣਿਂ ਕਤ੍ਵਾ ਵੇਲ਼ੁਗੁਮ੍ਬਂ ਆਰੁਯ੍ਹ ਵੇਲ਼ੁਂ ਛਿਨ੍ਦਿਤ੍ਵਾ ਅਪਰਸ੍ਸ ਵੇਲ਼ੁਗੁਮ੍ਬਸ੍ਸ ਉਪਰਿ ਪਾਤੇਤ੍ਵਾ ਵੇਲ਼ੁਗੁਮ੍ਬਮਤ੍ਥਕੇਨ ਗਨ੍ਤ੍ਵਾ ਕਲਲਗਹਨੇ ਸੁਕ੍ਖਰੁਕ੍ਖਪਦਰਂ ਅਤ੍ਥਰਿਤ੍ਵਾ ਤੇਨ ਗਨ੍ਤ੍ਵਾ ਅਪਰਂ ਅਤ੍ਥਰਿਤ੍ਵਾ ਇਤਰਂ ਉਕ੍ਖਿਪਿਤ੍ਵਾ ਪੁਨ ਪੁਰਤੋ ਅਤ੍ਥਰਨ੍ਤੋ ਤਂ ਅਤਿਕ੍ਕਮਿਤ੍ਵਾ ਉਦਕਗਹਨੇ ਦੋਣਿਂ ਕਤ੍ਵਾ ਤਾਯ ਉਦਕਗਹਨਂ ਤਰਿਤ੍ਵਾ ਪਬ੍ਬਤਪਾਦੇ ਠਤ੍ਵਾ ਅਯਸਿਙ੍ਘਾਟਕਂ ਯੋਤ੍ਤੇਨ ਬਨ੍ਧਿਤ੍ਵਾ ਉਦ੍ਧਂ ਖਿਪਿਤ੍ਵਾ ਪਬ੍ਬਤੇ ਲਗ੍ਗਾਪੇਤ੍ਵਾ ਯੋਤ੍ਤੇਨਾਰੁਯ੍ਹ ਵਜਿਰਗ੍ਗੇਨ ਲੋਹਦਣ੍ਡੇਨ ਪਬ੍ਬਤਂ ਵਿਜ੍ਝਿਤ੍ਵਾ ਖਾਣੁਕਂ ਕੋਟ੍ਟੇਤ੍ਵਾ ਤਤ੍ਥ ਠਤ੍ਵਾ ਸਿਙ੍ਘਾਟਕਂ ਆਕਡ੍ਢਿਤ੍ਵਾ ਪੁਨ ਉਪਰਿ ਲਗ੍ਗਾਪੇਤ੍ਵਾ ਤਤ੍ਥ ਠਿਤੋ ਚਮ੍ਮਯੋਤ੍ਤਂ ਓਲਮ੍ਬੇਤ੍ਵਾ ਤਂ ਆਦਾਯ ਓਤਰਿਤ੍ਵਾ ਹੇਟ੍ਠਿਮਖਾਣੁਕੇ ਬਨ੍ਧਿਤ੍ਵਾ ਵਾਮਹਤ੍ਥੇਨ ਯੋਤ੍ਤਂ ਗਹੇਤ੍ਵਾ ਦਕ੍ਖਿਣਹਤ੍ਥੇਨ ਮੁਗ੍ਗਰਂ ਆਦਾਯ ਯੋਤ੍ਤਂ ਪਹਰਿਤ੍ਵਾ ਖਾਣੁਕਂ ਨੀਹਰਿਤ੍ਵਾ ਪੁਨ ਅਭਿਰੁਹਤਿ. ਏਤੇਨੁਪਾਯੇਨ ਪਬ੍ਬਤਮਤ੍ਥਕਂ ਅਭਿਰੁਯ੍ਹ ਪਰਤੋ ਓਤਰਨ੍ਤੋ ਪੁਰਿਮਨਯੇਨੇਵ ਪਠਮਂ ਪਬ੍ਬਤਮਤ੍ਥਕੇ ਖਾਣੁਕਂ ਕੋਟ੍ਟੇਤ੍ਵਾ ਚਮ੍ਮਪਸਿਬ੍ਬਕੇ ਯੋਤ੍ਤਂ ਬਨ੍ਧਿਤ੍ਵਾ ਖਾਣੁਕੇ ਵੇਠੇਤ੍ਵਾ ਸਯਂ ਅਨ੍ਤੋਪਸਿਬ੍ਬਕੇ ਨਿਸੀਦਿਤ੍ਵਾ ਮਕ੍ਕਟਕਾਨਂ ਮਕ੍ਕਟਸੁਤ੍ਤਵਿਸ੍ਸਜ੍ਜਨਾਕਾਰੇਨ ਯੋਤ੍ਤਂ ਵਿਨਿਵੇਠੇਨ੍ਤੋ ਓਤਰਤਿ. ਚਮ੍ਮਛਤ੍ਤੇਨ ਵਾਤਂ ਗਾਹਾਪੇਤ੍ਵਾ ਸਕੁਣੋ ਵਿਯ ਓਤਰਤੀਤਿਪਿ ਵਦਨ੍ਤਿਯੇਵ.

ਏਵਂ ਤਸ੍ਸ ਸੁਭਦ੍ਦਾਯ ਵਚਨਂ ਆਦਾਯ ਨਗਰਾ ਨਿਕ੍ਖਮਿਤ੍ਵਾ ਸਤ੍ਤਰਸ ਗਹਨਾਨਿ ਅਤਿਕ੍ਕਮਿਤ੍ਵਾ ਪਬ੍ਬਤਗਹਨਂ ਪਤ੍ਵਾ ਤਤ੍ਰਾਪਿ ਛ ਪਬ੍ਬਤੇ ਅਤਿਕ੍ਕਮਿਤ੍ਵਾ ਸੁਵਣ੍ਣਪਸ੍ਸਪਬ੍ਬਤਮਤ੍ਥਕਂ ਆਰੁਲ਼੍ਹਭਾਵਂ ਆਵਿਕਰੋਨ੍ਤੋ ਸਤ੍ਥਾ ਆਹ –

੧੧੪.

‘‘ਤਤ੍ਥੇਵ ਸੋ ਉਗ੍ਗਹੇਤ੍ਵਾਨ ਵਾਕ੍ਯਂ, ਆਦਾਯ ਤੂਣਿਞ੍ਚ ਧਨੁਞ੍ਚ ਲੁਦ੍ਦੋ;

ਵਿਤੁਰਿਯਤਿ ਸਤ੍ਤ ਗਿਰੀ ਬ੍ਰਹਨ੍ਤੇ, ਸੁਵਣ੍ਣਪਸ੍ਸਂ ਨਾਮ ਗਿਰਿਂ ਉਲ਼ਾਰਂ.

੧੧੫.

‘‘ਆਰੁਯ੍ਹ ਸੇਲਂ ਭਵਨਂ ਕਿਨ੍ਨਰਾਨਂ, ਓਲੋਕਯੀ ਪਬ੍ਬਤਪਾਦਮੂਲਂ;

ਤਤ੍ਥਦ੍ਦਸਾ ਮੇਘਸਮਾਨਵਣ੍ਣਂ, ਨਿਗ੍ਰੋਧਰਾਜਂ ਅਟ੍ਠਸਹਸ੍ਸਪਾਦਂ.

੧੧੬.

‘‘ਤਤ੍ਥਦ੍ਦਸਾ ਕੁਞ੍ਜਰਂ ਛਬ੍ਬਿਸਾਣਂ, ਸਬ੍ਬਸੇਤਂ ਦੁਪ੍ਪਸਹਂ ਪਰੇਭਿ;

ਰਕ੍ਖਨ੍ਤਿ ਨਂ ਅਟ੍ਠਸਹਸ੍ਸਨਾਗਾ, ਈਸਾਦਨ੍ਤਾ ਵਾਤਜਵਪ੍ਪਹਾਰਿਨੋ.

੧੧੭.

‘‘ਤਤ੍ਥਦ੍ਦਸਾ ਪੋਕ੍ਖਰਣਿਂ ਅਦੂਰੇ, ਰਮ੍ਮਂ ਸੁਤਿਤ੍ਥਞ੍ਚ ਮਹੋਦਿਕਞ੍ਚ;

ਸਮ੍ਪੁਪ੍ਫਿਤਂ ਭਮਰਗਣਾਨੁਚਿਣ੍ਣਂ, ਯਤ੍ਥ ਹਿ ਸੋ ਨ੍ਹਾਯਤਿ ਨਾਗਰਾਜਾ.

੧੧੮.

‘‘ਦਿਸ੍ਵਾਨ ਨਾਗਸ੍ਸ ਗਤਿਂ ਠਿਤਿਞ੍ਚ, ਵੀਥਿਸ੍ਸਯਾ ਨ੍ਹਾਨਗਤਸ੍ਸ ਹੋਤਿ;

ਓਪਾਤਮਾਗਚ੍ਛਿ ਅਨਰਿਯਰੂਪੋ, ਪਯੋਜਿਤੋ ਚਿਤ੍ਤਵਸਾਨੁਗਾਯਾ’’ਤਿ.

ਤਤ੍ਥ ਸੋਤਿ, ਭਿਕ੍ਖਵੇ, ਸੋ ਲੁਦ੍ਦੋ ਤਤ੍ਥੇਵ ਸਤ੍ਤਭੂਮਿਕਪਾਸਾਦਤਲੇ ਠਿਤਾਯ ਤਸ੍ਸਾ ਸੁਭਦ੍ਦਾਯ ਵਚਨਂ ਉਗ੍ਗਹੇਤ੍ਵਾ ਸਰਤੂਣਿਞ੍ਚ ਮਹਾਧਨੁਞ੍ਚ ਆਦਾਯ ਪਬ੍ਬਤਗਹਨਂ ਪਤ੍ਵਾ ‘‘ਕਤਰੋ ਨੁ ਖੋ ਸੁਵਣ੍ਣਪਸ੍ਸਪਬ੍ਬਤੋ ਨਾਮਾ’’ਤਿ ਸਤ੍ਤ ਮਹਾਪਬ੍ਬਤੇ ਵਿਤੁਰਿਯਤਿ, ਤਸ੍ਮਿਂ ਕਾਲੇ ਤੁਲੇਤਿ ਤੀਰੇਤਿ. ਸੋ ਏਵਂ ਤੀਰੇਨ੍ਤੋ ਸੁਵਣ੍ਣਪਸ੍ਸਂ ਨਾਮ ਗਿਰਿਂ ਉਲ਼ਾਰਂ ਦਿਸ੍ਵਾ ‘‘ਅਯਂ ਸੋ ਭਵਿਸ੍ਸਤੀ’’ਤਿ ਚਿਨ੍ਤੇਸਿ. ਓਲੋਕਯੀਤਿ ਤਂ ਕਿਨ੍ਨਰਾਨਂ ਭਵਨਭੂਤਂ ਪਬ੍ਬਤਂ ਆਰੁਯ੍ਹ ਸੁਭਦ੍ਦਾਯ ਦਿਨ੍ਨਸਞ੍ਞਾਵਸੇਨ ਹੇਟ੍ਠਾ ਓਲੋਕੇਸਿ. ਤਤ੍ਥਾਤਿ ਤਸ੍ਮਿਂ ਪਬ੍ਬਤਪਾਦਮੂਲੇ ਅਵਿਦੂਰੇਯੇਵ ਤਂ ਨਿਗ੍ਰੋਧਂ ਅਦ੍ਦਸ.

ਤਤ੍ਥਾਤਿ ਤਸ੍ਮਿਂ ਨਿਗ੍ਰੋਧਰੁਕ੍ਖਮੂਲੇ ਠਿਤਂ. ਤਤ੍ਥਾਤਿ ਤਤ੍ਥੇਵ ਅਨ੍ਤੋਪਬ੍ਬਤੇ ਤਸ੍ਸ ਨਿਗ੍ਰੋਧਸ੍ਸਾਵਿਦੂਰੇ ਯਤ੍ਥ ਸੋ ਨ੍ਹਾਯਤਿ, ਤਂ ਪੋਕ੍ਖਰਣਿਂ ਅਦ੍ਦਸ. ਦਿਸ੍ਵਾਨਾਤਿ ਸੁਵਣ੍ਣਪਸ੍ਸਪਬ੍ਬਤਾ ਓਰੁਯ੍ਹ ਹਤ੍ਥੀਨਂ ਗਤਕਾਲੇ ਹਤ੍ਥਿਪਾਦਉਪਾਹਨਂ ਆਰੁਯ੍ਹ ਤਸ੍ਸ ਨਾਗਰਞ੍ਞੋ ਗਤਟ੍ਠਾਨਂ ਨਿਬਦ੍ਧਵਸਨਟ੍ਠਾਨਂ ਉਪਧਾਰੇਨ੍ਤੋ ‘‘ਇਮਿਨਾ ਮਗ੍ਗੇਨ ਗਚ੍ਛਤਿ, ਇਧ ਨ੍ਹਾਯਤਿ, ਨ੍ਹਤ੍ਵਾ ਉਤ੍ਤਿਣ੍ਣੋ, ਇਧ ਤਿਟ੍ਠਤੀ’’ਤਿ ਸਬ੍ਬਂ ਦਿਸ੍ਵਾ ਅਹਿਰਿਕਭਾਵੇਨ ਅਨਰਿਯਰੂਪੋ ਤਾਯ ਚਿਤ੍ਤਵਸਾਨੁਗਾਯ ਪਯੋਜਿਤੋ, ਤਸ੍ਮਾ ਓਪਾਤਂ ਆਗਚ੍ਛਿ ਪਟਿਪਜ੍ਜਿ, ਆਵਾਟਂ ਖਣੀਤਿ ਅਤ੍ਥੋ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ‘‘ਸੋ ਕਿਰ ਮਹਾਸਤ੍ਤਸ੍ਸ ਵਸਨੋਕਾਸਂ ਸਤ੍ਤਮਾਸਾਧਿਕੇਹਿ ਸਤ੍ਤਹਿ ਸਂਵਚ੍ਛਰੇਹਿ ਸਤ੍ਤਹਿ ਚ ਦਿਵਸੇਹਿ ਪਤ੍ਵਾ ਵੁਤ੍ਤਨਯੇਨੇਵ ਤਸ੍ਸ ਵਸਨੋਕਾਸਂ ਸਲ੍ਲਕ੍ਖੇਤ੍ਵਾ ‘‘ਇਧ ਆਵਾਟਂ ਖਣਿਤ੍ਵਾ ਤਸ੍ਮਿਂ ਠਿਤੋ ਵਾਰਣਾਧਿਪਤਿਂ ਵਿਸਪੀਤੇਨ ਸਲ੍ਲੇਨ ਵਿਜ੍ਝਿਤ੍ਵਾ ਜੀਵਿਤਕ੍ਖਯਂ ਪਾਪੇਸ੍ਸਾਮੀ’’ਤਿ ਵਵਤ੍ਥਪੇਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਥਮ੍ਭਾਦੀਨਂ ਅਤ੍ਥਾਯ ਰੁਕ੍ਖੇ ਛਿਨ੍ਦਿਤ੍ਵਾ ਦਬ੍ਬਸਮ੍ਭਾਰੇ ਸਜ੍ਜੇਤ੍ਵਾ ਹਤ੍ਥੀਸੁ ਨ੍ਹਾਨਤ੍ਥਾਯ ਗਤੇਸੁ ਤਸ੍ਸ ਵਸਨੋਕਾਸੇ ਮਹਾਕੁਦ੍ਦਾਲੇਨ ਚਤੁਰਸ੍ਸਂ ਆਵਾਟਂ ਖਣਿਤ੍ਵਾ ਉਦ੍ਧਤਪਂਸੁਂ ਬੀਜਂ ਵਪਨ੍ਤੋ ਵਿਯ ਉਦਕੇਨ ਵਿਕਿਰਿਤ੍ਵਾ ਉਦੁਕ੍ਖਲਪਾਸਾਣਾਨਂ ਉਪਰਿ ਥਮ੍ਭੇ ਪਤਿਟ੍ਠਪੇਤ੍ਵਾ ਤੁਲਾ ਚ ਕਾਜੇ ਚ ਦਤ੍ਵਾ ਪਦਰਾਨਿ ਅਤ੍ਥਰਿਤ੍ਵਾ ਕਣ੍ਡਪ੍ਪਮਾਣਂ ਛਿਦ੍ਦਂ ਕਤ੍ਵਾ ਉਪਰਿ ਪਂਸੁਞ੍ਚ ਕਚਵਰਞ੍ਚ ਪਕ੍ਖਿਪਿਤ੍ਵਾ ਏਕੇਨ ਪਸ੍ਸੇਨ ਅਤ੍ਤਨੋ ਪਵਿਸਨਟ੍ਠਾਨਂ ਕਤ੍ਵਾ ਏਵਂ ਨਿਟ੍ਠਿਤੇ ਆਵਾਟੇ ਪਚ੍ਚੂਸਕਾਲੇਯੇਵ ਪਤਿਸੀਸਕਂ ਪਟਿਮੁਞ੍ਚਿਤ੍ਵਾ ਕਾਸਾਯਾਨਿ ਪਰਿਦਹਿਤ੍ਵਾ ਸਦ੍ਧਿਂ ਵਿਸਪੀਤੇਨ ਸਲ੍ਲੇਨ ਧਨੁਂ ਆਦਾਯ ਆਵਾਟਂ ਓਤਰਿਤ੍ਵਾ ਅਟ੍ਠਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੯.

‘‘ਖਣਿਤ੍ਵਾਨ ਕਾਸੁਂ ਫਲਕੇਹਿ ਛਾਦਯਿ, ਅਤ੍ਤਾਨਮੋਧਾਯ ਧਨੁਞ੍ਚ ਲੁਦ੍ਦੋ;

ਪਸ੍ਸਾਗਤਂ ਪੁਥੁਸਲ੍ਲੇਨ ਨਾਗਂ, ਸਮਪ੍ਪਯੀ ਦੁਕ੍ਕਟਕਮ੍ਮਕਾਰੀ.

੧੨੦.

‘‘ਵਿਦ੍ਧੋ ਚ ਨਾਗੋ ਕੋਞ੍ਚਮਨਾਦਿ ਘੋਰਂ, ਸਬ੍ਬੇ ਚ ਨਾਗਾ ਨਿਨ੍ਨਦੁਂ ਘੋਰਰੂਪਂ;

ਤਿਣਞ੍ਚ ਕਟ੍ਠਞ੍ਚ ਰਣਂ ਕਰੋਨ੍ਤਾ, ਧਾਵਿਂਸੁ ਤੇ ਅਟ੍ਠ ਦਿਸਾ ਸਮਨ੍ਤਤੋ.

੧੨੧.

‘‘ਵਧਿਸ੍ਸਮੇਤਨ੍ਤਿ ਪਰਾਮਸਨ੍ਤੋ, ਕਾਸਾਵਮਦ੍ਦਕ੍ਖਿ ਧਜਂ ਇਸੀਨਂ;

ਦੁਕ੍ਖੇਨ ਫੁਟ੍ਠਸ੍ਸੁਦਪਾਦਿ ਸਞ੍ਞਾ, ਅਰਹਦ੍ਧਜੋ ਸਬ੍ਭਿ ਅਵਜ੍ਝਰੂਪੋ’’ਤਿ.

ਤਤ੍ਥ ਓਧਾਯਾਤਿ ਓਦਹਿਤ੍ਵਾ ਪਵੇਸੇਤ੍ਵਾ. ਪਸ੍ਸਾਗਤਨ੍ਤਿ ਅਤ੍ਤਨੋ ਆਵਾਟਸ੍ਸ ਪਸ੍ਸਂ ਆਗਤਂ. ਸੋ ਕਿਰ ਦੁਤਿਯਦਿਵਸੇ ਆਗਨ੍ਤ੍ਵਾ ਨ੍ਹਤ੍ਵਾ ਉਤ੍ਤਿਣ੍ਣੋ ਤਸ੍ਮਿਂ ਮਹਾਵਿਸਾਲਮਾਲਕੇ ਨਾਮ ਪਦੇਸੇ ਅਟ੍ਠਾਸਿ. ਅਥਸ੍ਸ ਸਰੀਰਤੋ ਉਦਕਂ ਨਾਭਿਪਦੇਸੇਨ ਓਗਲਿਤ੍ਵਾ ਤੇਨ ਛਿਦ੍ਦੇਨ ਲੁਦ੍ਦਸ੍ਸ ਸਰੀਰੇ ਪਤਿ. ਤਾਯ ਸਞ੍ਞਾਯ ਸੋ ਮਹਾਸਤ੍ਤਸ੍ਸ ਆਗਨ੍ਤ੍ਵਾ ਠਿਤਭਾਵਂ ਞਤ੍ਵਾ ਤਂ ਪਸ੍ਸਾਗਤਂ ਪੁਥੁਨਾ ਸਲ੍ਲੇਨ ਸਮਪ੍ਪਯਿ ਵਿਜ੍ਝਿ. ਦੁਕ੍ਕਟਕਮ੍ਮਕਾਰੀਤਿ ਤਸ੍ਸ ਮਹਾਸਤ੍ਤਸ੍ਸ ਕਾਯਿਕਚੇਤਸਿਕਸ੍ਸ ਦੁਕ੍ਖਸ੍ਸ ਉਪ੍ਪਾਦਨੇਨ ਦੁਕ੍ਕਟਸ੍ਸ ਕਮ੍ਮਸ੍ਸ ਕਾਰਕੋ.

ਕੋਞ੍ਚਮਨਾਦੀਤਿ ਕੋਞ੍ਚਨਾਦਂ ਅਕਰਿ. ਤਸ੍ਸ ਕਿਰ ਤਂ ਸਲ੍ਲਂ ਨਾਭਿਯਂ ਪਵਿਸਿਤ੍ਵਾ ਪਿਹਕਾਦੀਨਿ ਸਞ੍ਚੁਣ੍ਣੇਤ੍ਵਾ ਅਨ੍ਤਾਨਿ ਛਿਨ੍ਦਿਤ੍ਵਾ ਪਿਟ੍ਠਿਭਾਗਂ ਫਰਸੁਨਾ ਪਦਾਲੇਨ੍ਤਂ ਵਿਯ ਉਗ੍ਗਨ੍ਤ੍ਵਾ ਆਕਾਸੇ ਪਕ੍ਖਨ੍ਦਿ. ਭਿਨ੍ਨਰਜਤਕੁਮ੍ਭਤੋ ਰਜਨਂ ਵਿਯ ਪਹਾਰਮੁਖੇਨ ਲੋਹਿਤਂ ਪਗ੍ਘਰਿ, ਬਲਵਵੇਦਨਾ ਉਪ੍ਪਜ੍ਜਿ. ਸੋ ਵੇਦਨਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਵੇਦਨਾਪ੍ਪਤ੍ਤੋ ਸਕਲਪਬ੍ਬਤਂ ਏਕਨਿਨ੍ਨਾਦਂ ਕਰੋਨ੍ਤੋ ਤਿਕ੍ਖਤ੍ਤੁਂ ਮਹਨ੍ਤਂ ਕੋਞ੍ਚਨਾਦਂ ਨਦਿ. ਸਬ੍ਬੇ ਚਾਤਿ ਤੇਪਿ ਸਬ੍ਬੇ ਅਟ੍ਠਸਹਸ੍ਸਨਾਗਾ ਤਂ ਸਦ੍ਦਂ ਸੁਤ੍ਵਾ ਮਰਣਭਯਭੀਤਾ ਘੋਰਰੂਪਂ ਨਿਨ੍ਨਦੁਂ ਅਨੁਰਵਂ ਕਰਿਂਸੁ. ਰਣਂ ਕਰੋਨ੍ਤਾਤਿ ਤੇਨ ਸਦ੍ਦੇਨ ਗਨ੍ਤ੍ਵਾ ਛਦ੍ਦਨ੍ਤਵਾਰਣਂ ਵੇਦਨਾਪ੍ਪਤ੍ਤਂ ਦਿਸ੍ਵਾ ‘‘ਪਚ੍ਚਾਮਿਤ੍ਤਂ ਗਣ੍ਹਿਸ੍ਸਾਮਾ’’ਤਿ ਤਿਣਞ੍ਚ ਕਟ੍ਠਞ੍ਚ ਚੁਣ੍ਣਵਿਚੁਣ੍ਣਂ ਕਰੋਨ੍ਤਾ ਸਮਨ੍ਤਾ ਧਾਵਿਂਸੁ.

ਵਧਿਸ੍ਸਮੇਤਨ੍ਤਿ ‘‘ਭਿਕ੍ਖਵੇ, ਸੋ ਛਦ੍ਦਨ੍ਤਵਾਰਣੋ ਦਿਸਾ ਪਕ੍ਕਨ੍ਤੇਸੁ ਨਾਗੇਸੁ ਸੁਭਦ੍ਦਾਯ ਕਰੇਣੁਯਾ ਪਸ੍ਸੇ ਠਤ੍ਵਾ ਸਨ੍ਧਾਰੇਤ੍ਵਾ ਸਮਸ੍ਸਾਸਯਮਾਨਾਯ ਵੇਦਨਂ ਅਧਿਵਾਸੇਤ੍ਵਾ ਕਣ੍ਡਸ੍ਸ ਆਗਤਟ੍ਠਾਨਂ ਸਲ੍ਲਕ੍ਖੇਨ੍ਤੋ ‘ਸਚੇ ਇਦਂ ਪੁਰਤ੍ਥਿਮਦਿਸਾਦੀਹਿ ਆਗਤਂ ਅਭਵਿਸ੍ਸ, ਕੁਮ੍ਭਾਦੀਹਿ ਪਵਿਸਿਤ੍ਵਾ ਪਚ੍ਛਿਮਕਾਯੀਦੀਹਿ ਨਿਕ੍ਖਮਿਸ੍ਸ, ਇਦਂ ਪਨ ਨਾਭਿਯਾ ਪਵਿਸਿਤ੍ਵਾ ਆਕਾਸਂ ਪਕ੍ਖਨ੍ਦਿ, ਤਸ੍ਮਾ ਪਥਵਿਯਂ ਠਿਤੇਨ ਵਿਸ੍ਸਟ੍ਠਂ ਭਵਿਸ੍ਸਤੀ’ਤਿ ਉਪਧਾਰੇਤ੍ਵਾ ਠਿਤਟ੍ਠਾਨਂ ਉਪਪਰਿਕ੍ਖਿਤੁਕਾਮੋ ‘‘ਕੋ ਜਾਨਾਤਿ, ਕਿਂ ਭਵਿਸ੍ਸਤਿ, ਸੁਭਦ੍ਦਂ ਅਪਨੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ‘‘ਭਦ੍ਦੇ, ਅਟ੍ਠਸਹਸ੍ਸਨਾਗਾ ਮਮ ਪਚ੍ਚਾਮਿਤ੍ਤਂ ਪਰਿਯੇਸਨ੍ਤਾ ਦਿਸਾ ਪਕ੍ਖਨ੍ਦਾ, ਤ੍ਵਂ ਇਧ ਕਿਂ ਕਰੋਸੀ’’ਤਿ ਵਤ੍ਵਾ, ‘‘ਦੇਵ, ਅਹਂ ਤੁਮ੍ਹੇ ਸਨ੍ਧਾਰੇਤ੍ਵਾ ਸਮਸ੍ਸਾਸੇਨ੍ਤੀ ਠਿਤਾ, ਖਮਥ ਮੇ’’ਤਿ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਚਤੂਸੁ ਠਾਨੇਸੁ ਵਨ੍ਦਿਤ੍ਵਾ ਤਾਯ ਆਕਾਸਂ ਪਕ੍ਖਨ੍ਦਾਯ ਨਾਗਰਾਜਾ ਭੂਮਿਂ ਪਾਦਨਖੇਨ ਪਹਰਿ, ਪਦਰਂ ਉਪ੍ਪਤਿਤ੍ਵਾ ਗਤਂ. ਸੋ ਛਿਦ੍ਦੇਨ ਓਲੋਕੇਨ੍ਤੋ ਸੋਨੁਤ੍ਤਰਂ ਦਿਸ੍ਵਾ ‘‘ਵਧਿਸ੍ਸਾਮਿ ਨ’’ਨ੍ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ਰਜਤਦਾਮਵਣ੍ਣਸੋਣ੍ਡਂ ਪਵੇਸੇਤ੍ਵਾ ਪਰਾਮਸਨ੍ਤੋ ਬੁਦ੍ਧਾਨਂ ਇਸੀਨਂ ਧਜਂ ਕਾਸਾਵਂ ਅਦ੍ਦਕ੍ਖਿ. ਲੁਦ੍ਦੋ ਕਾਸਾਵਂ ਮਹਾਸਤ੍ਤਸ੍ਸ ਹਤ੍ਥੇ ਠਪੇਸਿ. ਸੋ ਤਂ ਉਕ੍ਖਿਪਿਤ੍ਵਾ ਪੁਰਤੋ ਠਪੇਸਿ. ਅਥਸ੍ਸ ਤੇਨ ਤਥਾਰੂਪੇਨਪਿ ਦੁਕ੍ਖੇਨ ਫੁਟ੍ਠਸ੍ਸ ‘‘ਅਰਹਦ੍ਧਜੋ ਨਾਮ ਸਬ੍ਭਿ ਪਣ੍ਡਿਤੇਹਿ ਅਵਜ੍ਝਰੂਪੋ, ਅਞ੍ਞਦਤ੍ਥੁ ਸਕ੍ਕਾਤਬ੍ਬੋ ਗਰੁਕਾਤਬ੍ਬੋਯੇਵਾ’’ਤਿ ਅਯਂ ਸਞ੍ਞਾ ਉਦਪਾਦਿ.

ਸੋ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਗਾਥਾਦ੍ਵਯਮਾਹ –

੧੨੨.

‘‘ਅਨਿਕ੍ਕਸਾਵੋ ਕਾਸਾਵਂ, ਯੋ ਵਤ੍ਥਂ ਪਰਿਦਹਿਸ੍ਸਤਿ;

ਅਪੇਤੋ ਦਮਸਚ੍ਚੇਨ, ਨ ਸੋ ਕਾਸਾਵਮਰਹਤਿ.

੧੨੩.

‘‘ਯੋ ਚ ਵਨ੍ਤਕਸਾਵਸ੍ਸ, ਸੀਲੇਸੁ ਸੁਸਮਾਹਿਤੋ;

ਉਪੇਤੋ ਦਮਸਚ੍ਚੇਨ, ਸ ਵੇ ਕਾਸਾਵਮਰਹਤੀ’’ਤਿ.

ਤਸ੍ਸਤ੍ਥੋ – ਸਮ੍ਮ ਲੁਦ੍ਦਪੁਤ੍ਤ ਯੋ ਪੁਰਿਸੋ ਰਾਗਾਦੀਹਿ ਕਸਾਵੇਹਿ ਅਨਿਕ੍ਕਸਾਵੋ ਇਨ੍ਦ੍ਰਿਯਦਮੇਨ ਚੇਵ ਵਚੀਸਚ੍ਚੇਨ ਚ ਅਪੇਤੋ ਅਨੁਪਗਤੋ ਤੇਹਿ ਗੁਣੇਹਿ ਕਸਾਵਰਸਪੀਤਂ ਕਾਸਾਵਵਤ੍ਥਂ ਪਰਿਦਹਤਿ, ਸੋ ਤਂ ਕਾਸਾਵਂ ਨਾਰਹਤਿ, ਨਾਨੁਚ੍ਛਵਿਕੋ ਸੋ ਤਸ੍ਸ ਵਤ੍ਥਸ੍ਸ. ਯੋ ਪਨ ਤੇਸਂ ਕਸਾਵਾਨਂ ਵਨ੍ਤਤ੍ਤਾ ਵਨ੍ਤਕਸਾਵੋ ਅਸ੍ਸ ਸੀਲੇਸੁ ਸੁਸਮਾਹਿਤੋ ਸੁਪਤਿਟ੍ਠਿਤੋ ਪਰਿਪੁਣ੍ਣਸੀਲਾਚਾਰੋ, ਸੋ ਤਂ ਕਾਸਾਵਂ ਅਰਹਤਿ ਨਾਮਾਤਿ.

ਏਵਂ ਵਤ੍ਵਾ ਮਹਾਸਤ੍ਤੋ ਤਸ੍ਮਿਂ ਚਿਤ੍ਤਂ ਨਿਬ੍ਬਾਪੇਤ੍ਵਾ ‘‘ਸਮ੍ਮ ਕਿਮਤ੍ਥਂ ਤ੍ਵਂ ਮਂ ਵਿਜ੍ਝਸਿ, ਕਿਂ ਅਤ੍ਤਨੋ ਅਤ੍ਥਾਯ, ਉਦਾਹੁ ਅਞ੍ਞੇਨ ਪਯੋਜਿਤੋਸੀ’’ਤਿ ਪੁਚ੍ਛਿ. ਤਮਤ੍ਥਂ ਆਵੀਕਰੋਨ੍ਤੋ ਸਤ੍ਥਾ ਆਹ –

੧੨੪.

‘‘ਸਮਪ੍ਪਿਤੋ ਪੁਥੁਸਲ੍ਲੇਨ ਨਾਗੋ, ਅਦੁਟ੍ਠਚਿਤ੍ਤੋ ਲੁਦ੍ਦਕਮਜ੍ਝਭਾਸਿ;

ਕਿਮਤ੍ਥਯਂ ਕਿਸ੍ਸ ਵਾ ਸਮ੍ਮ ਹੇਤੁ, ਮਮਂ ਵਧੀ ਕਸ੍ਸ ਵਾਯਂ ਪਯੋਗੋ’’ਤਿ.

ਤਤ੍ਥ ਕਿਮਤ੍ਥਯਨ੍ਤਿ ਆਯਤਿਂ ਕਿਂ ਪਤ੍ਥੇਨ੍ਤੋ. ਕਿਸ੍ਸ ਵਾਤਿ ਕਿਸ੍ਸ ਹੇਤੁ ਕੇਨ ਕਾਰਣੇਨ, ਕਿਂ ਨਾਮ ਤਵ ਮਯਾ ਸਦ੍ਧਿਂ ਵੇਰਨ੍ਤਿ ਅਧਿਪ੍ਪਾਯੋ. ਕਸ੍ਸ ਵਾਤਿ ਕਸ੍ਸ ਵਾ ਅਞ੍ਞਸ੍ਸ ਅਯਂ ਪਯੋਗੋ, ਕੇਨ ਪਯੋਜਿਤੋ ਮਂ ਅਵਧੀਤਿ ਅਤ੍ਥੋ.

ਅਥਸ੍ਸ ਆਚਿਕ੍ਖਨ੍ਤੋ ਲੁਦ੍ਦੋ ਗਾਥਮਾਹ –

੧੨੫.

‘‘ਕਾਸਿਸ੍ਸ ਰਞ੍ਞੋ ਮਹੇਸੀ ਭਦਨ੍ਤੇ, ਸਾ ਪੂਜਿਤਾ ਰਾਜਕੁਲੇ ਸੁਭਦ੍ਦਾ;

ਤਂ ਅਦ੍ਦਸਾ ਸਾ ਚ ਮਮਂ ਅਸਂਸਿ, ਦਨ੍ਤੇਹਿ ਅਤ੍ਥੋਤਿ ਚ ਮਂ ਅਵੋਚਾ’’ਤਿ.

ਤਤ੍ਥ ਪੂਜਿਤਾਤਿ ਅਗ੍ਗਮਹੇਸਿਟ੍ਠਾਨੇ ਠਪੇਤ੍ਵਾ ਪੂਜਿਤਾ. ਅਦ੍ਦਸਾਤਿ ਸਾ ਕਿਰ ਤਂ ਸੁਪਿਨਨ੍ਤੇ ਅਦ੍ਦਸ. ਅਸਂਸੀਤਿ ਸਾ ਚ ਮਮ ਸਕ੍ਕਾਰਂ ਕਾਰੇਤ੍ਵਾ ‘‘ਹਿਮਵਨ੍ਤਪਦੇਸੇ ਏਵਰੂਪੋ ਨਾਮ ਨਾਗੋ ਅਸੁਕਸ੍ਮਿਂ ਨਾਮ ਠਾਨੇ ਵਸਤੀ’’ਤਿ ਮਮਂ ਆਚਿਕ੍ਖਿ. ਦਨ੍ਤੇਹੀਤਿ ਤਸ੍ਸ ਨਾਗਸ੍ਸ ਛਬ੍ਬਣ੍ਣਰਂਸਿਸਮੁਜ੍ਜਲਾ ਦਨ੍ਤਾ, ਤੇਹਿ ਮਮ ਅਤ੍ਥੋ, ਪਿਲ਼ਨ੍ਧਨਂ ਕਾਰੇਤੁਕਾਮਾਮ੍ਹਿ, ਤੇ ਮੇ ਆਹਰਾਤਿ ਮਂ ਅਵੋਚਾਤਿ.

ਤਂ ਸੁਤ੍ਵਾ ‘‘ਇਦਂ ਚੂਲ਼ਸੁਭਦ੍ਦਾਯ ਕਮ੍ਮ’’ਨ੍ਤਿ ਞਤ੍ਵਾ ਮਹਾਸਤ੍ਤੋ ਵੇਦਨਂ ਅਧਿਵਾਸੇਤ੍ਵਾ ‘‘ਤਸ੍ਸਾ ਮਮ ਦਨ੍ਤੇਹਿ ਅਤ੍ਥੋ ਨਤ੍ਥਿ, ਮਂ ਮਾਰੇਤੁਕਾਮਤਾਯ ਪਨ ਪਹਿਣੀ’’ਤਿ ਦੀਪੇਨ੍ਤੋ ਗਾਥਾਦ੍ਵਯਮਾਹ –

੧੨੬.

‘‘ਬਹੂ ਹਿਮੇ ਦਨ੍ਤਯੁਗਾ ਉਲ਼ਾਰਾ, ਯੇ ਮੇ ਪਿਤੂਨਞ੍ਚ ਪਿਤਾਮਹਾਨਂ;

ਜਾਨਾਤਿ ਸਾ ਕੋਧਨਾ ਰਾਜਪੁਤ੍ਤੀ, ਵਧਤ੍ਥਿਕਾ ਵੇਰਮਕਾਸਿ ਬਾਲਾ.

੧੨੭.

‘‘ਉਟ੍ਠੇਹਿ ਤ੍ਵਂ ਲੁਦ੍ਦ ਖਰਂ ਗਹੇਤ੍ਵਾ, ਦਨ੍ਤੇ ਇਮੇ ਛਿਨ੍ਦ ਪੁਰਾ ਮਰਾਮਿ;

ਵਜ੍ਜਾਸਿ ਤਂ ਕੋਧਨਂ ਰਾਜਪੁਤ੍ਤਿਂ, ਨਾਗੋ ਹਤੋ ਹਨ੍ਦ ਇਮਸ੍ਸ ਦਨ੍ਤਾ’’ਤਿ.

ਤਤ੍ਥ ਇਮੇਤਿ ਤਸ੍ਸ ਕਿਰ ਪਿਤੁ ਪਿਤਾਮਹਾਨਂ ਦਨ੍ਤਾ ਮਾ ਵਿਨਸ੍ਸਨ੍ਤੂਤਿ ਗੁਹਾਯਂ ਸਨ੍ਨਿਚਿਤਾ, ਤੇ ਸਨ੍ਧਾਯ ਏਵਮਾਹ. ਜਾਨਾਤੀਤਿ ਬਹੂਨਂ ਵਾਰਣਾਨਂ ਇਧ ਸਨ੍ਨਿਚਿਹੇ ਦਨ੍ਤੇ ਜਾਨਾਤਿ. ਵਧਤ੍ਥਿਕਾਤਿ ਕੇਵਲਂ ਪਨ ਸਾ ਮਂ ਮਾਰੇਤੁਕਾਮਾ ਅਪ੍ਪਮਤ੍ਤਕਂ ਦੋਸਂ ਹਦਯੇ ਠਪੇਤ੍ਵਾ ਅਤ੍ਤਨੋ ਵੇਰਂ ਅਕਾਸਿ, ਏਵਰੂਪੇਨ ਫਰੁਸਕਮ੍ਮੇਨ ਮਤ੍ਥਕਂ ਪਾਪੇਸਿ. ਖਰਨ੍ਤਿ ਕਕਚਂ. ਪੁਰਾ ਮਰਾਮੀਤਿ ਯਾਵ ਨ ਮਰਾਮਿ. ਵਜ੍ਜਸੀਤਿ ਵਦੇਯ੍ਯਾਸਿ. ਹਨ੍ਦ ਇਮਸ੍ਸ ਦਨ੍ਤਾਤਿ ਹਤੋ ਸੋ ਮਯਾ ਨਾਗੋ, ਮਨੋਰਥੋ ਤੇ ਮਤ੍ਥਕਪ੍ਪਤ੍ਤੋ, ਗਣ੍ਹ, ਇਮੇ ਤਸ੍ਸ ਦਨ੍ਤਾਤਿ.

ਸੋ ਤਸ੍ਸ ਵਚਨਂ ਸੁਤ੍ਵਾ ਨਿਸੀਦਨਟ੍ਠਾਨਾ ਵੁਟ੍ਠਾਯ ਕਕਚਂ ਆਦਾਯ ‘‘ਦਨ੍ਤੇ ਛਿਨ੍ਦਿਸ੍ਸਾਮੀ’’ਤਿ ਤਸ੍ਸ ਸਨ੍ਤਿਕਂ ਉਪਗਤੋ. ਸੋ ਪਨ ਉਬ੍ਬੇਧਤੋ ਅਟ੍ਠਾਸੀਤਿਹਤ੍ਥੋ ਰਜਤਪਬ੍ਬਤੋ ਵਿਯ ਠਿਤੋ, ਤੇਨਸ੍ਸ ਸੋ ਦਨ੍ਤਟ੍ਠਾਨਂ ਨ ਪਾਪੁਣਿ. ਅਥ ਮਹਾਸਤ੍ਤੋ ਕਾਯਂ ਉਪਨਾਮੇਨ੍ਤੋ ਹੇਟ੍ਠਾਸੀਸਕੋ ਨਿਪਜ੍ਜਿ. ਤਦਾ ਨੇਸਾਦੋ ਮਹਾਸਤ੍ਤਸ੍ਸ ਰਜਤਦਾਮਸਦਿਸਂ ਸੋਣ੍ਡਂ ਮਦ੍ਦਨ੍ਤੋ ਅਭਿਰੁਹਿਤ੍ਵਾ ਕੇਲਾਸਕੂਟੇ ਵਿਯ ਕੁਮ੍ਭੇ ਠਤ੍ਵਾ ਮੁਖਕੋਟਿਮਂਸਂ ਧਨੁਕੇਨ ਪਹਰਿਤ੍ਵਾ ਅਨ੍ਤੋ ਪਕ੍ਖਿਪਿਤ੍ਵਾ ਕੁਮ੍ਭਤੋ ਓਰੁਯ੍ਹ ਕਕਚਂ ਅਨ੍ਤੋਮੁਖੇ ਪਵੇਸੇਸਿ, ਉਭੋਹਿ ਹਤ੍ਥੇਹਿ ਦਲ਼੍ਹਂ ਅਪਰਾਪਰਂ ਕਡ੍ਢਿ. ਮਹਾਸਤ੍ਤਸ੍ਸ ਬਲਵਵੇਦਨਾ ਉਪ੍ਪਜ੍ਜਿ, ਮੁਖਂ ਲੋਹਿਤੇਨ ਪੂਰਿ. ਨੇਸਾਦੋ ਇਤੋ ਚਿਤੋ ਚ ਸਞ੍ਚਾਰੇਨ੍ਤੋ ਕਕਚੇਨ ਛਿਨ੍ਦਿਤੁਂ ਨਾਸਕ੍ਖਿ. ਅਥ ਨਂ ਮਹਾਸਤ੍ਤੋ ਮੁਖਤੋ ਲੋਹਿਤਂ ਛਡ੍ਡੇਤ੍ਵਾ ਵੇਦਨਂ ਅਧਿਵਾਸੇਤ੍ਵਾ ‘‘ਕਿਂ ਸਮ੍ਮ ਛਿਨ੍ਦਿਤੁਂ ਨ ਸਕ੍ਕੋਸੀ’’ਤਿ ਪੁਚ੍ਛਿ. ‘‘ਆਮ, ਸਾਮੀ’’ਤਿ. ਮਹਾਸਤ੍ਤੋ ਸਤਿਂ ਪਚ੍ਚੁਪਟ੍ਠਪੇਤ੍ਵਾ ‘‘ਤੇਨ ਹਿ ਸਮ੍ਮ ਮਮ ਸੋਣ੍ਡਂ ਉਕ੍ਖਿਪਿਤ੍ਵਾ ਕਕਚਕੋਟਿਂ ਗਣ੍ਹਾਪੇਹਿ, ਮਮ ਸਯਂ ਸੋਣ੍ਡਂ ਉਕ੍ਖਿਪਿਤੁਂ ਬਲਂ ਨਤ੍ਥੀ’’ਤਿ ਆਹ. ਨੇਸਾਦੋ ਤਥਾ ਅਕਾਸਿ.

ਮਹਾਸਤ੍ਤੋ ਸੋਣ੍ਡਾਯ ਕਕਚਂ ਗਹੇਤ੍ਵਾ ਅਪਰਾਪਰਂ ਚਾਰੇਸਿ, ਦਨ੍ਤਾ ਕਲ਼ੀਰਾ ਵਿਯ ਛਿਜ੍ਜਿਂਸੁ. ਅਥ ਨਂ ਤੇ ਆਹਰਾਪੇਤ੍ਵਾ ਗਣ੍ਹਿਤ੍ਵਾ ‘‘ਸਮ੍ਮ ਲੁਦ੍ਦਪੁਤ੍ਤ ਅਹਂ ਇਮੇ ਦਨ੍ਤੇ ਤੁਯ੍ਹਂ ਦਦਮਾਨੋ ਨੇਵ ‘ਮਯ੍ਹਂ ਅਪ੍ਪਿਯਾ’ਤਿ ਦਮ੍ਮਿ, ਨ ਸਕ੍ਕਤ੍ਤਮਾਰਤ੍ਤਬ੍ਰਹ੍ਮਤ੍ਤਾਨਿ ਪਤ੍ਥੇਨ੍ਤੋ, ਇਮੇਹਿ ਪਨ ਮੇ ਦਨ੍ਤੇਹਿ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਸਬ੍ਬਞ੍ਞੁਤਞ੍ਞਾਣਦਨ੍ਤਾਵ ਪਿਯਤਰਾ, ਸਬ੍ਬਞ੍ਞੁਤਞ੍ਞਾਣਪ੍ਪਟਿਵੇਧਾਯ ਮੇ ਇਦਂ ਪੁਞ੍ਞਂ ਪਚ੍ਚਯੋ ਹੋਤੂ’’ਤਿ ਦਨ੍ਤੇ ਦਤ੍ਵਾ ‘‘ਸਮ੍ਮ ਇਦਂ ਠਾਨਂ ਕਿਤ੍ਤਕੇਨ ਕਾਲੇਨ ਆਗਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਤ੍ਤਮਾਸਸਤ੍ਤਦਿਵਸਾਧਿਕੇਹਿ ਸਤ੍ਤਹਿ ਸਂਵਚ੍ਛਰੇਹੀ’’ਤਿ ਵੁਤ੍ਤੇ – ‘‘ਗਚ੍ਛ ਇਮੇਸਂ ਦਨ੍ਤਾਨਂ ਆਨੁਭਾਵੇਨ ਸਤ੍ਤਦਿਵਸਬ੍ਭਨ੍ਤਰੇਯੇਵ ਬਾਰਾਣਸਿਂ ਪਾਪੁਣਿਸ੍ਸਸੀ’’ਤਿ ਵਤ੍ਵਾ ਤਸ੍ਸ ਪਰਿਤ੍ਤਂ ਕਤ੍ਵਾ ਤਂ ਉਯ੍ਯੋਜੇਸਿ. ਉਯ੍ਯੋਜੇਤ੍ਵਾ ਚ ਪਨ ਅਨਾਗਤੇਸੁਯੇਵ ਤੇਸੁ ਨਾਗੇਸੁ ਸੁਭਦ੍ਦਾਯ ਚ ਅਨਾਗਤਾਯ ਕਾਲਮਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੨੮.

‘‘ਉਟ੍ਠਾਯ ਸੋ ਲੁਦ੍ਦੋ ਖਰਂ ਗਹੇਤ੍ਵਾ, ਛੇਤ੍ਵਾਨ ਦਨ੍ਤਾਨਿ ਗਜੁਤ੍ਤਮਸ੍ਸ;

ਵਗ੍ਗੂ ਸੁਭੇ ਅਪ੍ਪਟਿਮੇ ਪਥਬ੍ਯਾ, ਆਦਾਯ ਪਕ੍ਕਾਮਿ ਤਤੋ ਹਿ ਖਿਪ੍ਪ’’ਨ੍ਤਿ.

ਤਤ੍ਥ ਵਗ੍ਗੂਤਿ ਵਿਲਾਸਵਨ੍ਤੇ. ਸੁਭੇਤਿ ਸੁਨ੍ਦਰੇ. ਅਪ੍ਪਟਿਮੇਤਿ ਇਮਿਸ੍ਸਂ ਪਥਵਿਯਂ ਅਞ੍ਞੇਹਿ ਦਨ੍ਤੇਹਿ ਅਸਦਿਸੇਤਿ.

ਤਸ੍ਮਿਂ ਪਕ੍ਕਨ੍ਤੇ ਤੇ ਨਾਗਾ ਪਚ੍ਚਾਮਿਤ੍ਤਂ ਅਦਿਸ੍ਵਾ ਆਗਮਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੨੯.

‘‘ਭਯਟ੍ਟਿਤਾ ਨਾਗਵਧੇਨ ਅਟ੍ਟਾ, ਯੇ ਤੇ ਨਾਗਾ ਅਟ੍ਠ ਦਿਸਾ ਵਿਧਾਵੁਂ;

ਅਦਿਸ੍ਵਾਨ ਪੋਸਂ ਗਜਪਚ੍ਚਮਿਤ੍ਤਂ, ਪਚ੍ਚਾਗਮੁਂ ਯੇਨ ਸੋ ਨਾਗਰਾਜਾ’’ਤਿ.

ਤਤ੍ਥ ਭਯਟ੍ਟਿਤਾਤਿ ਮਰਣਭਯੇਨ ਉਪਦ੍ਦੁਤਾ. ਅਟ੍ਟਾਤਿ ਦੁਕ੍ਖਿਤਾ. ਗਜਪਚ੍ਚਮਿਤ੍ਤਨ੍ਤਿ ਗਜਸ੍ਸ ਪਚ੍ਚਾਮਿਤ੍ਤਂ. ਯੇਨ ਸੋਤਿ ਯਤ੍ਥ ਵਿਸਾਲਮਾਲਕੇ ਸੋ ਨਾਗਰਾਜਾ ਕਾਲਂ ਕਤ੍ਵਾ ਕੇਲਾਸਪਬ੍ਬਤੋ ਵਿਯ ਪਤਿਤੋ, ਤਂ ਠਾਨਂ ਪਚ੍ਚਾਗਮੁਨ੍ਤਿ ਅਤ੍ਥੋ.

ਤੇਹਿ ਪਨ ਸਦ੍ਧਿਂ ਮਹਾਸੁਭਦ੍ਦਾਪਿ ਆਗਤਾ. ਤੇ ਸਬ੍ਬੇਪਿ ਅਟ੍ਠਸਹਸ੍ਸਨਾਗਾ ਤਤ੍ਥ ਰੋਦਿਤ੍ਵਾ ਕਨ੍ਦਿਤ੍ਵਾ ਮਹਾਸਤ੍ਤਸ੍ਸ ਕੁਲੁਪਕਾਨਂ ਪਚ੍ਚੇਕਬੁਦ੍ਧਾਨਂ ਸਨ੍ਤਿਕਂ ਗਨ੍ਤ੍ਵਾ, ‘‘ਭਨ੍ਤੇ, ਤੁਮ੍ਹਾਕਂ ਪਚ੍ਚਯਦਾਯਕੋ ਵਿਸਪੀਤੇਨ ਸਲ੍ਲੇਨ ਵਿਦ੍ਧੋ ਕਾਲਕਤੋ, ਸੀਵਥਿਕਦਸ੍ਸਨਮਸ੍ਸ ਆਗਚ੍ਛਥਾ’’ਤਿ ਵਦਿਂਸੁ. ਪਞ੍ਚਸਤਾ ਪਚ੍ਚੇਕਬੁਦ੍ਧਾਪਿ ਆਕਾਸੇਨਾਗਨ੍ਤ੍ਵਾ ਵਿਸਾਲਮਾਲਕੇ ਓਤਰਿਂਸੁ. ਤਸ੍ਮਿਂ ਖਣੇ ਦ੍ਵੇ ਤਰੁਣਨਾਗਾ ਨਾਗਰਞ੍ਞੋ ਸਰੀਰਂ ਦਨ੍ਤੇਹਿ ਉਕ੍ਖਿਪਿਤ੍ਵਾ ਪਚ੍ਚੇਕਬੁਦ੍ਧੇ ਵਨ੍ਦਾਪੇਤ੍ਵਾ ਚਿਤਕਂ ਆਰੋਪੇਤ੍ਵਾ ਝਾਪਯਿਂਸੁ. ਪਚ੍ਚੇਕਬੁਦ੍ਧਾ ਸਬ੍ਬਰਤ੍ਤਿਂ ਆਲ਼ਾਹਨੇ ਧਮ੍ਮਸਜ੍ਝਾਯਮਕਂਸੁ. ਅਟ੍ਠਸਹਸ੍ਸਨਾਗਾ ਆਲ਼ਾਹਨਂ ਨਿਬ੍ਬਾਪੇਤ੍ਵਾ ਵਨ੍ਦਿਤ੍ਵਾ ਨ੍ਹਤ੍ਵਾ ਮਹਾਸੁਭਦ੍ਦਂ ਪੁਰਤੋ ਕਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਅਗਮਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੦.

‘‘ਤੇ ਤਤ੍ਥ ਕਨ੍ਦਿਤ੍ਵਾ ਰੋਦਿਤ੍ਵਾਨ ਨਾਗਾ, ਸੀਸੇ ਸਕੇ ਪਂਸੁਕਂ ਓਕਿਰਿਤ੍ਵਾ;

ਅਗਮਂਸੁ ਤੇ ਸਬ੍ਬੇ ਸਕਂ ਨਿਕੇਤਂ, ਪੁਰਕ੍ਖਤ੍ਵਾ ਮਹੇਸਿਂ ਸਬ੍ਬਭਦ੍ਦ’’ਨ੍ਤਿ.

ਤਤ੍ਥ ਪਂਸੁਕਨ੍ਤਿ ਆਲ਼ਾਹਨਪਂਸੁਕਂ.

ਸੋਨੁਤ੍ਤਰੋਪਿ ਅਪ੍ਪਤ੍ਤੇਯੇਵ ਸਤ੍ਤਮੇ ਦਿਵਸੇ ਦਨ੍ਤੇ ਆਦਾਯ ਬਾਰਾਣਸਿਂ ਸਮ੍ਪਾਪੁਣਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੧.

‘‘ਆਦਾਯ ਦਨ੍ਤਾਨਿ ਗਜੁਤ੍ਤਮਸ੍ਸ, ਵਗ੍ਗੂ ਸੁਭੇ ਅਪ੍ਪਟਿਮੇ ਪਥਬ੍ਯਾ;

ਸੁਵਣ੍ਣਰਾਜੀਹਿ ਸਮਨ੍ਤਮੋਦਰੇ, ਸੋ ਲੁਦ੍ਦਕੋ ਕਾਸਿਪੁਰਂ ਉਪਾਗਮਿ;

ਉਪਨੇਸਿ ਸੋ ਰਾਜਕਞ੍ਞਾਯ ਦਨ੍ਤੇ, ਨਾਗੋ ਹਤੋ ਹਨ੍ਦ ਇਮਸ੍ਸ ਦਨ੍ਤਾ’’ਤਿ.

ਤਤ੍ਥ ਸੁਵਣ੍ਣਰਾਜੀਹੀਤਿ ਸੁਵਣ੍ਣਰਾਜਿਰਂਸੀਹਿ. ਸਮਨ੍ਤਮੋਦਰੇਤਿ ਸਮਨ੍ਤਤੋ ਓਭਾਸਨ੍ਤੇ ਸਕਲਵਨਸਣ੍ਡਂ ਸੁਵਣ੍ਣਵਣ੍ਣਂ ਵਿਯ ਕਰੋਨ੍ਤੇ. ਉਪਨੇਸੀਤਿ ਅਹਂ ਛਦ੍ਦਨ੍ਤਵਾਰਣਸ੍ਸ ਛਬ੍ਬਣ੍ਣਰਂਸਿਵਿਸ੍ਸਜ੍ਜਨੇ ਯਮਕਦਨ੍ਤੇ ਆਦਾਯ ਆਗਚ੍ਛਾਮਿ, ਨਗਰਂ ਅਲਙ੍ਕਾਰਾਪੇਥਾਤਿ ਦੇਵਿਯਾ ਸਾਸਨਂ ਪੇਸੇਤ੍ਵਾ ਤਾਯ ਰਞ੍ਞੋ ਆਰੋਚਾਪੇਤ੍ਵਾ ਦੇਵਨਗਰਂ ਵਿਯ ਨਗਰੇ ਅਲਙ੍ਕਾਰਾਪਿਤੇ ਸੋਨੁਤ੍ਤਰੋਪਿ ਨਗਰਂ ਪਵਿਸਿਤ੍ਵਾ ਪਾਸਾਦਂ ਆਰੁਹਿਤ੍ਵਾ ਦਨ੍ਤੇ ਉਪਨੇਸਿ, ਉਪਨੇਤ੍ਵਾ ਚ ਪਨ, ‘‘ਅਯ੍ਯੇ, ਯਸ੍ਸ ਕਿਰ ਤੁਮ੍ਹੇ ਅਪ੍ਪਮਤ੍ਤਕਂ ਦੋਸਂ ਹਦਯੇ ਕਰਿਤ੍ਥ, ਸੋ ਨਾਗੋ ਮਯਾ ਹਤੋ ਮਤੋ, ‘ਮਤਭਾਵਂ ਮੇ ਆਰੋਚੇਯ੍ਯਾਸੀ’ਤਿ ਆਹ, ਤਸ੍ਸ ਮਤਭਾਵਂ ਤੁਮ੍ਹੇ ਜਾਨਾਥ, ਗਣ੍ਹਥ, ਇਮੇ ਤਸ੍ਸ ਦਨ੍ਤਾ’’ਤਿ ਦਨ੍ਤੇ ਅਦਾਸਿ.

ਸਾ ਮਹਾਸਤ੍ਤਸ੍ਸ ਛਬ੍ਬਣ੍ਣਰਂਸਿਵਿਚਿਤ੍ਤਦਨ੍ਤੇ ਮਣਿਤਾਲਵਣ੍ਟੇਨ ਗਹੇਤ੍ਵਾ ਊਰੂਸੁ ਠਪੇਤ੍ਵਾ ਪੁਰਿਮਭਵੇ ਅਤ੍ਤਨੋ ਪਿਰਸਾਮਿਕਸ੍ਸ ਦਨ੍ਤੇ ਓਲੋਕੇਨ੍ਤੀ ‘‘ਏਵਰੂਪਂ ਸੋਭਗ੍ਗਪ੍ਪਤ੍ਤਂ ਵਾਰਣਂ ਵਿਸਪੀਤੇਨ ਸਲ੍ਲੇਨ ਜੀਵਿਤਕ੍ਖਯਂ ਪਾਪੇਤ੍ਵਾ ਇਮੇ ਦਨ੍ਤੇ ਛਿਨ੍ਦਿਤ੍ਵਾ ਸੋਨੁਤ੍ਤਰੋ ਆਗਤੋ’’ਤਿ ਮਹਾਸਤ੍ਤਂ ਅਨੁਸ੍ਸਰਨ੍ਤੀ ਸੋਕਂ ਉਪ੍ਪਾਦੇਤ੍ਵਾ ਅਧਿਵਾਸੇਤੁਂ ਨਾਸਕ੍ਖਿ. ਅਥਸ੍ਸਾ ਤਤ੍ਥੇਵ ਹਦਯਂ ਫਲਿ, ਤਂ ਦਿਵਸਮੇਵ ਕਾਲਮਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੨.

‘‘ਦਿਸ੍ਵਾਨ ਦਨ੍ਤਾਨਿ ਗਜੁਤ੍ਤਮਸ੍ਸ, ਭਤ੍ਤੁਪ੍ਪਿਯਸ੍ਸ ਪੁਰਿਮਾਯ ਜਾਤਿਯਾ;

ਤਤ੍ਥੇਵ ਤਸ੍ਸਾ ਹਦਯਂ ਅਫਾਲਿ, ਤੇਨੇਵ ਸਾ ਕਾਲਮਕਾਸਿ ਬਾਲਾ’’ਤਿ.

੧੩੩.

‘‘ਸਮ੍ਬੋਧਿਪਤ੍ਤੋ ਸ ਮਹਾਨੁਭਾਵੋ, ਸਿਤਂ ਅਕਾਸੀ ਪਰਿਸਾਯ ਮਜ੍ਝੇ;

ਪੁਚ੍ਛਿਂਸੁ ਭਿਕ੍ਖੂ ਸੁਵਿਮੁਤ੍ਤਚਿਤ੍ਤਾ, ਨਾਕਾਰਣੇ ਪਾਤੁਕਰੋਨ੍ਤਿ ਬੁਦ੍ਧਾ.

੧੩੪.

‘‘ਯਮਦ੍ਦਸਾਥ ਦਹਰਿਂ ਕੁਮਾਰਿਂ, ਕਾਸਾਯਵਤ੍ਥਂ ਅਨਗਾਰਿਯਂ ਚਰਨ੍ਤਿਂ;

ਸਾ ਖੋ ਤਦਾ ਰਾਜਕਞ੍ਞਾ ਅਹੋਸਿ, ਅਹਂ ਤਦਾ ਨਾਗਰਾਜਾ ਅਹੋਸਿਂ.

੧੩੫.

‘‘ਆਦਾਯ ਦਨ੍ਤਾਨਿ ਗਜੁਤ੍ਤਮਸ੍ਸ, ਵਗ੍ਗੂ ਸੁਭੇ ਅਪ੍ਪਟਿਮੇ ਪਥਬ੍ਯਾ;

ਯੋ ਲੁਦ੍ਦਕੋ ਕਾਸਿਪੁਰਂ ਉਪਾਗਮਿ, ਸੋ ਖੋ ਤਦਾ ਦੇਵਦਤ੍ਤੋ ਅਹੋਸਿ.

੧੩੬.

‘‘ਅਨਾਵਸੂਰਂ ਚਿਰਰਤ੍ਤਸਂਸਿਤਂ, ਉਚ੍ਚਾਵਚਂ ਚਰਿਤਮਿਦਂ ਪੁਰਾਣਂ;

ਵੀਤਦ੍ਦਰੋ ਵੀਤਸੋਕੋ ਵਿਸਲ੍ਲੋ, ਸਯਂ ਅਭਿਞ੍ਞਾਯ ਅਭਾਸਿ ਬੁਦ੍ਧੋ.

੧੩੭.

‘‘ਅਹਂ ਵੋ ਤੇਨ ਕਾਲੇਨ, ਅਹੋਸਿਂ ਤਤ੍ਥ ਭਿਕ੍ਖਵੋ;

ਨਾਗਰਾਜਾ ਤਦਾ ਹੋਮਿ, ਏਵਂ ਧਾਰੇਥ ਜਾਤਕ’’ਨ੍ਤਿ. –

ਇਮਾ ਗਾਥਾ ਦਸਬਲਸ੍ਸ ਗੁਣੇ ਵਣ੍ਣੇਨ੍ਤੇਹਿ ਧਮ੍ਮਸਙ੍ਗਾਹਕਤ੍ਥੇਰੇਹਿ ਠਪਿਤਾ.

ਤਤ੍ਥ ਸਿਤਂ ਅਕਾਸੀਤਿ ਸੋ ਸਮ੍ਬੋਧਿਪ੍ਪਤ੍ਤੋ ਸਤ੍ਥਾ ਮਹਾਨੁਭਾਵੋ ਅਲਙ੍ਕਤਧਮ੍ਮਸਭਾਯਂ ਅਲਙ੍ਕਤਧਮ੍ਮਾਸਨੇ ਪਰਿਸਮਜ੍ਝੇ ਨਿਸਿਨ੍ਨੋ ਏਕਦਿਵਸਂ ਸਿਤਂ ਅਕਾਸਿ. ਨਾਕਾਰਣੇਤਿ ‘‘ਭਨ੍ਤੇ, ਬੁਦ੍ਧਾ ਨਾਮ ਅਕਾਰਣੇ ਸਿਤਂ ਨ ਕਰੋਨ੍ਤਿ, ਤੁਮ੍ਹੇਹਿ ਚ ਸਿਤਂ ਕਤਂ, ਕੇਨ ਨੁ ਖੋ ਕਾਰਣੇਨ ਸਿਤਂ ਕਤ’’ਨ੍ਤਿ ਮਹਾਖੀਣਾਸਵਾ ਭਿਕ੍ਖੂ ਪੁਚ੍ਛਿਂਸੁ. ਯਮਦ੍ਦਸਾਥਾਤਿ ਏਵਂ ਪੁਟ੍ਠੋ, ਆਵੁਸੋ, ਸਤ੍ਥਾ ਅਤ੍ਤਨੋ ਸਿਤਕਾਰਣਂ ਆਚਿਕ੍ਖਨ੍ਤੋ ਏਕਂ ਦਹਰਭਿਕ੍ਖੁਨਿਂ ਦਸ੍ਸੇਤ੍ਵਾ ਏਵਮਾਹ – ‘‘ਭਿਕ੍ਖਵੇ, ਯਂ ਏਕਂ ਦਹਰਂ ਯੋਬ੍ਬਨਪ੍ਪਤ੍ਤਂ ਕੁਮਾਰਿਂ ਕਾਸਾਯਵਤ੍ਥਂ ਅਨਗਾਰਿਯਂ ਉਪੇਤਂ ਪਬ੍ਬਜਿਤ੍ਵਾ ਇਮਸ੍ਮਿਂ ਸਾਸਨੇ ਚਰਨ੍ਤਿਂ ਅਦ੍ਦਸਾਥ ਪਸ੍ਸਥ, ਸਾ ਤਦਾ ‘ਵਿਸਪੀਤੇਨ ਸਲ੍ਲੇਨ ਨਾਗਰਾਜਂ ਵਿਜ੍ਝਿਤ੍ਵਾ ਵਧੇਹੀ’’’ਤਿ ਸੋਨੁਤ੍ਤਰਸ੍ਸ ਪੇਸੇਤਾ ਰਾਜਕਞ੍ਞਾ ਅਹੋਸਿ. ਤੇਨ ਗਨ੍ਤ੍ਵਾ ਜੀਵਿਤਕ੍ਖਯਂ ਪਾਪਿਤੋ ਅਹਂ ਤਦਾ ਸੋ ਨਾਗਰਾਜਾ ਅਹੋਸਿਨ੍ਤਿ ਅਤ੍ਥੋ. ਦੇਵਦਤ੍ਤੋਤਿ, ਭਿਕ੍ਖਵੇ, ਇਦਾਨਿ ਦੇਵਦਤ੍ਤੋ ਤਦਾ ਸੋ ਲੁਦ੍ਦਕੋ ਅਹੋਸਿ.

ਅਨਾਵਸੂਰਨ੍ਤਿ ਨ ਅਵਸੂਰਂ, ਅਨਤ੍ਥਙ੍ਗਤਸੂਰਿਯਨ੍ਤਿ ਅਤ੍ਥੋ. ਚਿਰਰਤ੍ਤਸਂਸਿਤਨ੍ਤਿ ਇਤੋ ਚਿਰਰਤ੍ਤੇ ਅਨੇਕਵਸ੍ਸਕੋਟਿਮਤ੍ਥਕੇ ਸਂਸਿਤਂ ਸਂਸਰਿਤਂ ਅਨੁਚਿਣ੍ਣਂ. ਇਦਂ ਵੁਤ੍ਤਂ ਹੋਤਿ – ਆਵੁਸੋ, ਇਤੋ ਅਨੇਕਵਸ੍ਸਕੋਟਿਮਤ੍ਥਕੇ ਸਂਸਰਿਤਮ੍ਪਿ ਪੁਬ੍ਬਣ੍ਹੇ ਕਤਂ ਤਂ ਦਿਵਸਮੇਵ ਸਾਯਨ੍ਹੇ ਸਰਨ੍ਤੋ ਵਿਯ ਅਤ੍ਤਨੋ ਚਰਿਤਵਸੇਨ ਉਚ੍ਚਤ੍ਤਾ ਤਾਯ ਰਾਜਧੀਤਾਯ ਚ ਸੋਨੁਤ੍ਤਰਸ੍ਸ ਚ ਚਰਿਤਵਸੇਨ ਨੀਚਤ੍ਤਾ ਉਚ੍ਚਾਨੀਚਂ ਚਰਿਤਂ ਇਦਂ ਪੁਰਾਣਂ ਰਾਗਾਦੀਨਂ ਦਰਾਨਂ ਵਿਗਤਤਾਯ ਵੀਤਦ੍ਦਰੋ, ਞਾਤਿਧਨਸੋਕਾਦੀਨਂ ਅਭਾਵੇਨ ਵੀਤਸੋਕੋ, ਰਾਗਸਲ੍ਲਾਦੀਨਂ ਵਿਗਤਤ੍ਤਾ ਵਿਸਲ੍ਲੋ ਅਤ੍ਤਨਾਵ ਜਾਨਿਤ੍ਵਾ ਬੁਦ੍ਧੋ ਅਭਾਸੀਤਿ. ਅਹਂ ਵੋਤਿ ਏਤ੍ਥ ਵੋਤਿ ਨਿਪਾਤਮਤ੍ਤਂ, ਭਿਕ੍ਖਵੇ, ਅਹਂ ਤੇਨ ਕਾਲੇਨ ਤਤ੍ਥ ਛਦ੍ਦਨ੍ਤਦਹੇ ਅਹੋਸਿਨ੍ਤਿ ਅਤ੍ਥੋ. ਨਾਗਰਾਜਾਤਿ ਹੋਨ੍ਤੋ ਚ ਪਨ ਨ ਅਞ੍ਞੋ ਕੋਚਿ ਤਦਾ ਹੋਮਿ, ਅਥ ਖੋ ਨਾਗਰਾਜਾ ਹੋਮੀਤਿ ਅਤ੍ਥੋ. ਏਵਂ ਚਾਰੇਥਾਤਿ ਤੁਮ੍ਹੇ ਤਂ ਜਾਤਕਂ ਏਵਂ ਧਾਰੇਥ ਉਗ੍ਗਣ੍ਹਾਥ ਪਰਿਯਾਪੁਣਾਥਾਤਿ.

ਇਮਞ੍ਚ ਪਨ ਧਮ੍ਮਦੇਸਨਂ ਸੁਤ੍ਵਾ ਬਹੂ ਸੋਤਾਪਨ੍ਨਾਦਯੋ ਅਹੇਸੁਂ. ਸਾ ਪਨ ਭਿਕ੍ਖੁਨੀ ਪਚ੍ਛਾ ਵਿਪਸ੍ਸਿਤ੍ਵਾ ਅਰਹਤ੍ਤਂ ਪਤ੍ਤਾਤਿ.

ਛਦ੍ਦਨ੍ਤਜਾਤਕਵਣ੍ਣਨਾ ਚਤੁਤ੍ਥਾ.

[੫੧੫] ੫. ਸਮ੍ਭਵਜਾਤਕਵਣ੍ਣਨਾ

ਰਜ੍ਜਞ੍ਚ ਪਟਿਪਨ੍ਨਾਸ੍ਮਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪਞ੍ਞਾਪਾਰਮਿਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਮਹਾਉਮਙ੍ਗਜਾਤਕੇ (ਜਾ. ੨.੨੨.੫੯੦ ਆਦਯੋ) ਆਵਿ ਭਵਿਸ੍ਸਤਿ.

ਅਤੀਤੇ ਪਨ ਕੁਰੁਰਟ੍ਠੇ ਇਨ੍ਦਪਤ੍ਥਨਗਰੇ ਧਨਞ੍ਚਯਕੋਰਬ੍ਯੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਸੁਚਿਰਤੋ ਨਾਮ ਬ੍ਰਾਹ੍ਮਣੋ ਪੁਰੋਹਿਤੋ ਅਤ੍ਥਧਮ੍ਮਾਨੁਸਾਸਕੋ ਅਹੋਸਿ. ਰਾਜਾ ਦਾਨਾਦੀਨਿ ਪੁਞ੍ਞਾਨਿ ਕਰੋਨ੍ਤੋ ਧਮ੍ਮੇਨ ਰਜ੍ਜਮਨੁਸਾਸਿ. ਸੋ ਏਕਦਿਵਸਂ ਧਮ੍ਮਯਾਗਂ ਨਾਮ ਪਞ੍ਹਂ ਅਭਿਸਙ੍ਖਰਿਤ੍ਵਾ ਸੁਚਿਰਤਂ ਨਾਮ ਬ੍ਰਾਹ੍ਮਣਂ ਪੁਰੋਹਿਤਂ ਆਸਨੇ ਨਿਸੀਦਾਪੇਤ੍ਵਾ ਸਕ੍ਕਾਰਂ ਕਤ੍ਵਾ ਪਞ੍ਹਂ ਪੁਚ੍ਛਨ੍ਤੋ ਚਤਸ੍ਸੋ ਗਾਥਾਯੋ ਅਭਾਸਿ –

੧੩੮.

‘‘ਰਜ੍ਜਞ੍ਚ ਪਟਿਪਨ੍ਨਾਸ੍ਮ, ਆਧਿਪਚ੍ਚਂ ਸੁਚੀਰਤ;

ਮਹਤ੍ਤਂ ਪਤ੍ਤੁਮਿਚ੍ਛਾਮਿ, ਵਿਜੇਤੁਂ ਪਥਵਿਂ ਇਮਂ.

੧੩੯.

‘‘ਧਮ੍ਮੇਨ ਨੋ ਅਧਮ੍ਮੇਨ, ਅਧਮ੍ਮੋ ਮੇ ਨ ਰੁਚ੍ਚਤਿ;

ਕਿਚ੍ਚੋਵ ਧਮ੍ਮੋ ਚਰਿਤੋ, ਰਞ੍ਞੋ ਹੋਤਿ ਸੁਚੀਰਤ.

੧੪੦.

‘‘ਇਧ ਚੇਵਾਨਿਨ੍ਦਿਤਾ ਯੇਨ, ਪੇਚ੍ਚ ਯੇਨ ਅਨਿਨ੍ਦਿਤਾ;

ਯਸਂ ਦੇਵਮਨੁਸ੍ਸੇਸੁ, ਯੇਨ ਪਪ੍ਪੋਮੁ ਬ੍ਰਾਹ੍ਮਣ.

੧੪੧.

‘‘ਯੋਹਂ ਅਤ੍ਥਞ੍ਚ ਧਮ੍ਮਞ੍ਚ, ਕਤ੍ਤੁਮਿਚ੍ਛਾਮਿ ਬ੍ਰਾਹ੍ਮਣ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਬ੍ਰਾਹ੍ਮਣਕ੍ਖਾਹਿ ਪੁਚ੍ਛਿਤੋ’’ਤਿ.

ਤਤ੍ਥ ਰਜ੍ਜਨ੍ਤਿ, ਆਚਰਿਯ, ਮਯਂ ਇਮਸ੍ਮਿਂ ਸਤ੍ਤਯੋਜਨਿਕੇ ਇਨ੍ਦਪਤ੍ਥਨਗਰੇ ਰਜ੍ਜਞ੍ਚ, ਤਿਯੋਜਨਸਤਿਕੇ ਕੁਰੁਰਟ੍ਠੇ ਇਸ੍ਸਰਭਾਵਸਙ੍ਖਾਤਂ ਆਧਿਪਚ੍ਚਞ੍ਚ. ਪਟਿਪਨ੍ਨਾਸ੍ਮਾਤਿ ਅਧਿਗਤਾ ਭਵਾਮ. ਮਹਤ੍ਤਨ੍ਤਿ ਇਦਾਨਿ ਮਹਨ੍ਤਭਾਵਂ. ਪਤ੍ਤੁਮਿਚ੍ਛਾਮਿ ਵਿਜੇਤੁਨ੍ਤਿ ਇਮਂ ਪਥਵਿਂ ਧਮ੍ਮੇਨ ਅਭਿਭਵਿਤੁਂ ਅਜ੍ਝੋਤ੍ਥਰਿਤੁਂ ਇਚ੍ਛਾਮਿ. ਕਿਚ੍ਚੋਵਾਤਿ ਅਵਸੇਸਜਨੇਹਿ ਰਞ੍ਞੋ ਚਰਿਤੋ ਧਮ੍ਮੋ ਕਿਚ੍ਚੋ ਕਰਣੀਯਤਰੋ. ਰਾਜਾਨੁਵਤ੍ਤਕੋ ਹਿ ਲੋਕੋ, ਸੋ ਤਸ੍ਮਿਂ ਧਮ੍ਮਿਕੇ ਸਬ੍ਬੋਪਿ ਧਮ੍ਮਿਕੋ ਹੋਤਿ. ਤਸ੍ਮਾ ਏਸ ਧਮ੍ਮੋ ਨਾਮ ਰਞ੍ਞੋਵ ਕਿਚ੍ਚੋਤਿ.

ਇਧ ਚੇਵਾਨਿਨ੍ਦਿਤਾਤਿ ਯੇਨ ਮਯਂ ਇਧਲੋਕੇ ਪਰਲੋਕੇ ਚ ਅਨਿਨ੍ਦਿਤਾ. ਯੇਨ ਪਪ੍ਪੋਮੂਤਿ ਯੇਨ ਮਯਂ ਨਿਰਯਾਦੀਸੁ ਅਨਿਬ੍ਬਤ੍ਤਿਤ੍ਵਾ ਦੇਵੇਸੁ ਚ ਮਨੁਸ੍ਸੇਸੁ ਚ ਯਸਂ ਇਸ੍ਸਰਿਯਂ ਸੋਭਗ੍ਗਂ ਪਾਪੁਣੇਯ੍ਯਾਮ, ਤਂ ਨੋ ਕਾਰਣਂ ਕਥੇਹੀਤਿ. ਯੋਹਨ੍ਤਿ, ਬ੍ਰਾਹ੍ਮਣ, ਯੋ ਅਹਂ ਫਲਵਿਪਾਕਸਙ੍ਖਾਤਂ ਅਤ੍ਥਞ੍ਚ ਤਸ੍ਸ ਅਤ੍ਥਸ੍ਸ ਹੇਤੁਭੂਤਂ ਧਮ੍ਮਞ੍ਚ ਕਤ੍ਤੁਂ ਸਮਾਦਾਯ ਵਤ੍ਤਿਤੁਂ ਉਪ੍ਪਾਦੇਤੁਞ੍ਚ ਇਚ੍ਛਾਮਿ. ਤਂ ਤ੍ਵਨ੍ਤਿ ਤਸ੍ਸ ਮਯ੍ਹਂ ਤ੍ਵਂ ਸੁਖੇਨੇਵ ਨਿਬ੍ਬਾਨਗਾਮਿਮਗ੍ਗਂ ਆਰੁਯ੍ਹ ਅਪਟਿਸਨ੍ਧਿਕਭਾਵਂ ਪਤ੍ਥੇਨ੍ਤਸ੍ਸ ਤਂ ਅਤ੍ਥਞ੍ਚ ਧਮ੍ਮਞ੍ਚ ਪੁਚ੍ਛਿਤੋ ਅਕ੍ਖਾਹਿ, ਪਾਕਟਂ ਕਤ੍ਵਾ ਕਥੇਹੀਤਿ ਬ੍ਰਾਹ੍ਮਣਂ ਧਮ੍ਮਯਾਗਪਞ੍ਹਂ ਪੁਚ੍ਛਿ.

ਅਯਂ ਪਨ ਪਞ੍ਹੋ ਗਮ੍ਭੀਰੋ ਬੁਦ੍ਧਵਿਸਯੋ, ਸਬ੍ਬਞ੍ਞੁਬੁਦ੍ਧਮੇਵ ਤਂ ਪੁਚ੍ਛਿਤੁਂ ਯੁਤ੍ਤਂ, ਤਸ੍ਮਿਂ ਅਸਤਿ ਸਬ੍ਬਞ੍ਞੁਤਞ੍ਞਾਣਪਰਿਯੇਸਕਂ ਬੋਧਿਸਤ੍ਤਨ੍ਤਿ. ਸੁਚਿਰਤੋ ਪਨ ਅਤ੍ਤਨੋ ਅਬੋਧਿਸਤ੍ਤਤਾਯ ਪਞ੍ਹਂ ਕਥੇਤੁਂ ਨਾਸਕ੍ਖਿ, ਅਸਕ੍ਕੋਨ੍ਤੋ ਚ ਪਣ੍ਡਿਤਮਾਨਂ ਅਕਤ੍ਵਾ ਅਤ੍ਤਨੋ ਅਸਮਤ੍ਥਭਾਵਂ ਕਥੇਨ੍ਤੋ ਗਾਥਮਾਹ –

੧੪੨.

‘‘ਨਾਞ੍ਞਤ੍ਰ ਵਿਧੁਰਾ ਰਾਜ, ਏਤਦਕ੍ਖਾਤੁਮਰਹਤਿ;

ਯਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਕਤ੍ਤੁਮਿਚ੍ਛਸਿ ਖਤ੍ਤਿਯਾ’’ਤਿ.

ਤਸ੍ਸਤ੍ਥੋ – ਅਵਿਸਯੋ ਏਸ, ਮਹਾਰਾਜ, ਪਞ੍ਹੋ ਮਾਦਿਸਾਨਂ. ਅਹਞ੍ਹਿ ਨੇਵਸ੍ਸ ਆਦਿਂ, ਨ ਪਰਿਯੋਸਾਨਂ ਪਸ੍ਸਾਮਿ, ਅਨ੍ਧਕਾਰਂ ਪਵਿਟ੍ਠੋ ਵਿਯ ਹੋਮਿ. ਬਾਰਾਣਸਿਰਞ੍ਞੋ ਪਨ ਪੁਰੋਹਿਤੋ ਵਿਧੁਰੋ ਨਾਮ ਬ੍ਰਾਹ੍ਮਣੋ ਅਤ੍ਥਿ, ਸੋ ਏਤਂ ਆਚਿਕ੍ਖੇਯ੍ਯ, ਤਂ ਠਪੇਤ੍ਵਾ ਯਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ ਕਤ੍ਤੁਮਿਚ੍ਛਸਿ, ਏਤਂ ਅਕ੍ਖਾਤੁਂ ਨ ਅਞ੍ਞੋ ਅਰਹਤੀਤਿ.

ਰਾਜਾ ਤਸ੍ਸ ਵਚਨਂ ਸੁਤ੍ਵਾ ‘‘ਤੇਨ ਹਿ, ਬ੍ਰਾਹ੍ਮਣ, ਖਿਪ੍ਪਂ ਤਸ੍ਸ ਸਨ੍ਤਿਕਂ ਗਚ੍ਛਾਹੀ’’ਤਿ ਪਣ੍ਣਾਕਾਰਂ ਦਤ੍ਵਾ ਤਂ ਪੇਸੇਤੁਕਾਮੋ ਹੁਤ੍ਵਾ ਗਾਥਮਾਹ –

੧੪੩.

‘‘ਏਹਿ ਖੋ ਪਹਿਤੋ ਗਚ੍ਛ, ਵਿਧੁਰਸ੍ਸ ਉਪਨ੍ਤਿਕਂ;

ਨਿਕ੍ਖਞ੍ਚਿਮਂ ਸੁਵਣ੍ਣਸ੍ਸ, ਹਰਂ ਗਚ੍ਛ ਸੁਚੀਰਤ;

ਅਭਿਹਾਰਂ ਇਮਂ ਦਜ੍ਜਾ, ਅਤ੍ਥਧਮ੍ਮਾਨੁਸਿਟ੍ਠਿਯਾ’’ਤਿ.

ਤਤ੍ਥ ਉਪਨ੍ਤਿਕਨ੍ਤਿ ਸਨ੍ਤਿਕਂ. ਨਿਕ੍ਖਨ੍ਤਿ ਪਞ੍ਚਸੁਵਣ੍ਣੋ ਏਕੋ ਨਿਕ੍ਖੋ. ਅਯਂ ਪਨ ਰਤ੍ਤਸੁਵਣ੍ਣਸ੍ਸ ਨਿਕ੍ਖਸਹਸ੍ਸਂ ਦਤ੍ਵਾ ਏਵਮਾਹ. ਇਮਂ ਦਜ੍ਜਾਤਿ ਤੇਨ ਇਮਸ੍ਮਿਂ ਧਮ੍ਮਯਾਗਪਞ੍ਹੇ ਕਥਿਤੇ ਤਸ੍ਸ ਅਤ੍ਥਧਮ੍ਮਾਨੁਸਿਟ੍ਠਿਯਾ ਅਭਿਹਾਰਪੂਜਂ ਕਰੋਨ੍ਤੋ ਇਮਂ ਨਿਕ੍ਖਸਹਸ੍ਸਂ ਦਦੇਯ੍ਯਾਸੀਤਿ.

ਏਵਞ੍ਚ ਪਨ ਵਤ੍ਵਾ ਪਞ੍ਹਵਿਸ੍ਸਜ੍ਜਨਸ੍ਸ ਲਿਖਨਤ੍ਥਾਯ ਸਤਸਹਸ੍ਸਗ੍ਘਨਕਂ ਸੁਵਣ੍ਣਪਟ੍ਟਞ੍ਚ ਗਮਨਤ੍ਥਾਯ ਯਾਨਂ, ਪਰਿਵਾਰਤ੍ਥਾਯ ਬਲਕਾਯਂ, ਤਞ੍ਚ ਪਣ੍ਣਾਕਾਰਂ ਦਤ੍ਵਾ ਤਙ੍ਖਣਞ੍ਞੇਵ ਉਯ੍ਯੋਜੇਸਿ. ਸੋ ਪਨ ਇਨ੍ਦਪਤ੍ਥਨਗਰਾ ਨਿਕ੍ਖਮਿਤ੍ਵਾ ਉਜੁਕਮੇਵ ਬਾਰਾਣਸਿਂ ਅਗਨ੍ਤ੍ਵਾ ਯਤ੍ਥ ਯਤ੍ਥ ਪਣ੍ਡਿਤਾ ਵਸਨ੍ਤਿ, ਸਬ੍ਬਾਨਿ ਤਾਨਿ ਠਾਨਾਨਿ ਉਪਸਙ੍ਕਮਿਤ੍ਵਾ ਸਕਲਜਮ੍ਬੁਦੀਪੇ ਪਞ੍ਹਸ੍ਸ ਵਿਸ੍ਸਜ੍ਜੇਤਾਰਂ ਅਲਭਿਤ੍ਵਾ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਏਕਸ੍ਮਿਂ ਠਾਨੇ ਨਿਵਾਸਂ ਗਹੇਤ੍ਵਾ ਕਤਿਪਯੇਹਿ ਜਨੇਹਿ ਸਦ੍ਧਿਂ ਪਾਤਰਾਸਭੁਞ੍ਜਨਵੇਲਾਯ ਵਿਧੁਰਸ੍ਸ ਨਿਵੇਸਨਂ ਗਨ੍ਤ੍ਵਾ ਆਗਤਭਾਵਂ ਆਰੋਚਾਪੇਤ੍ਵਾ ਤੇਨ ਪਕ੍ਕੋਸਾਪਿਤੋ ਤਂ ਸਕੇ ਘਰੇ ਭੁਞ੍ਜਮਾਨਂ ਅਦ੍ਦਸ. ਤਮਤ੍ਥਂ ਆਵਿਕਰੋਨ੍ਤੋ ਸਤ੍ਥਾ ਸਤ੍ਤਮਂ ਗਾਥਮਾਹ –

੧੪੪.

‘‘ਸ੍ਵਾਧਿਪ੍ਪਾਗਾ ਭਾਰਦ੍ਵਾਜੋ, ਵਿਧੁਰਸ੍ਸ ਉਪਨ੍ਤਿਕਂ;

ਤਮਦ੍ਦਸ ਮਹਾਬ੍ਰਹ੍ਮਾ, ਅਸਮਾਨਂ ਸਕੇ ਘਰੇ’’ਤਿ.

ਤਤ੍ਥ ਸ੍ਵਾਧਿਪ੍ਪਾਗਾਤਿ ਸੋ ਭਾਰਦ੍ਵਾਜਗੋਤ੍ਤੋ ਸੁਚਿਰਤੋ ਅਧਿਪ੍ਪਾਗਾ, ਗਤੋਤਿ ਅਤ੍ਥੋ. ਮਹਾਬ੍ਰਹ੍ਮਾਤਿ ਮਹਾਬ੍ਰਾਹ੍ਮਣੋ. ਅਸਮਾਨਨ੍ਤਿ ਭੁਞ੍ਜਮਾਨਂ.

ਸੋ ਪਨ ਤਸ੍ਸ ਬਾਲਸਹਾਯਕੋ ਏਕਾਚਰਿਯਕੁਲੇ ਉਗ੍ਗਹਿਤਸਿਪ੍ਪੋ, ਤਸ੍ਮਾ ਤੇਨ ਸਦ੍ਧਿਂ ਏਕਤੋ ਭੁਞ੍ਜਿਤ੍ਵਾ ਭਤ੍ਤਕਿਚ੍ਚਪਰਿਯੋਸਾਨੇ ਸੁਖਨਿਸਿਨ੍ਨੋ ‘‘ਸਮ੍ਮ ਕਿਮਤ੍ਥਂ ਆਗਤੋਸੀ’’ਤਿ ਪੁਟ੍ਠੋ ਆਗਮਨਕਾਰਣਂ ਆਚਿਕ੍ਖਨ੍ਤੋ ਅਟ੍ਠਮਂ ਗਾਥਮਾਹ –

੧੪੫.

‘‘ਰਞ੍ਞੋਹਂ ਪਹਿਤੋ ਦੂਤੋ, ਕੋਰਬ੍ਯਸ੍ਸ ਯਸਸ੍ਸਿਨੋ;

‘ਅਤ੍ਥਂ ਧਮ੍ਮਞ੍ਚ ਪੁਚ੍ਛੇਸਿ’, ਇਚ੍ਚਬ੍ਰਵਿ ਯੁਧਿਟ੍ਠਿਲੋ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਵਿਧੁਰਕ੍ਖਾਹਿ ਪੁਚ੍ਛਿਤੋ’’ਤਿ.

ਤਤ੍ਥ ਰਞ੍ਞੋਹਨ੍ਤਿ ਅਹਂ ਰਞ੍ਞੋ ਕੋਰਬ੍ਯਸ੍ਸ ਯਸਸ੍ਸਿਨੋ ਦੂਤੋ. ਪਹਿਤੋਤਿ ਤੇਨ ਪੇਸਿਤੋ ਇਧਾਗਮਿਂ. ਪੁਚ੍ਛੇਸੀਤਿ ਸੋ ਯੁਧਿਟ੍ਠਿਲਗੋਤ੍ਤੋ ਧਨਞ੍ਚਯਰਾਜਾ ਮਂ ਧਮ੍ਮਯਾਗਪਞ੍ਹਂ ਨਾਮ ਪੁਚ੍ਛਿ, ਅਹਂ ਕਥੇਤੁਂ ਅਸਕ੍ਕੋਨ੍ਤੋ ‘‘ਤ੍ਵਂ ਸਕ੍ਖਿਸ੍ਸਸੀ’’ਤਿ ਞਤ੍ਵਾ ਤਸ੍ਸ ਆਰੋਚੇਸਿਂ, ਸੋ ਚ ਪਣ੍ਣਾਕਾਰਂ ਦਤ੍ਵਾ ਪਞ੍ਹਪੁਚ੍ਛਨਤ੍ਥਾਯ ਮਂ ਤਵ ਸਨ੍ਤਿਕਂ ਪੇਸੇਨ੍ਤੋ ‘‘ਵਿਧੁਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਇਮਸ੍ਸ ਪਞ੍ਹਸ੍ਸ ਅਤ੍ਥਞ੍ਚ ਪਾਲ਼ਿਧਮ੍ਮਞ੍ਚ ਪੁਚ੍ਛੇਯ੍ਯਾਸੀ’’ਤਿ ਅਬ੍ਰਵਿ. ‘‘ਤਂ ਤ੍ਵਂ ਇਦਾਨਿ ਮਯਾ ਪੁਚ੍ਛਿਤੋ ਅਕ੍ਖਾਹੀ’’ਤਿ.

ਤਦਾ ਪਨ ਸੋ ਬ੍ਰਾਹ੍ਮਣੋ ‘‘ਮਹਾਜਨਸ੍ਸ ਚਿਤ੍ਤਂ ਗਣ੍ਹਿਸ੍ਸਾਮੀ’’ਤਿ ਗਙ੍ਗਂ ਪਿਦਹਨ੍ਤੋ ਵਿਯ ਵਿਨਿਚ੍ਛਯਂ ਵਿਚਾਰੇਤਿ. ਤਸ੍ਸ ਪਞ੍ਹਵਿਸ੍ਸਜ੍ਜਨੇ ਓਕਾਸੋ ਨਤ੍ਥਿ. ਸੋ ਤਮਤ੍ਥਂ ਆਚਿਕ੍ਖਨ੍ਤੋ ਨਵਮਂ ਗਾਥਮਾਹ –

੧੪੬.

‘‘ਗਙ੍ਗਂ ਮੇ ਪਿਦਹਿਸ੍ਸਨ੍ਤਿ, ਨ ਤਂ ਸਕ੍ਕੋਮਿ ਬ੍ਰਾਹ੍ਮਣ;

ਅਪਿਧੇਤੁਂ ਮਹਾਸਿਨ੍ਧੁਂ, ਤਂ ਕਥਂ ਸੋ ਭਵਿਸ੍ਸਤਿ;

ਨ ਤੇ ਸਕ੍ਕੋਮਿ ਅਕ੍ਖਾਤੁਂ, ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤੋ’’ਤਿ.

ਤਸ੍ਸਤ੍ਥੋ – ਬ੍ਰਾਹ੍ਮਣ, ਮਯ੍ਹਂ ‘‘ਮਹਾਜਨਸ੍ਸ ਨਾਨਾਚਿਤ੍ਤਗਤਿਸਙ੍ਖਾਤਂ ਗਙ੍ਗਂ ਪਿਦਹਿਸ੍ਸ’’ਨ੍ਤਿ ਬ੍ਯਾਪਾਰੋ ਉਪ੍ਪਨ੍ਨੋ, ਤਮਹਂ ਮਹਾਸਿਨ੍ਧੁਂ ਅਪਿਧੇਤੁਂ ਨ ਸਕ੍ਕੋਮਿ, ਤਸ੍ਮਾ ਕਥਂ ਸੋ ਓਕਾਸੋ ਭਵਿਸ੍ਸਤਿ, ਯਸ੍ਮਾ ਤੇ ਅਹਂ ਪਞ੍ਹਂ ਵਿਸ੍ਸਜ੍ਜੇਯ੍ਯਂ. ਇਤਿ ਚਿਤ੍ਤੇਕਗ੍ਗਤਞ੍ਚੇਵ ਓਕਾਸਞ੍ਚ ਅਲਭਨ੍ਤੋ ਨ ਤੇ ਸਕ੍ਕੋਮਿ ਅਕ੍ਖਾਤੁਂ ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤੋਤਿ.

ਏਵਞ੍ਚ ਪਨ ਵਤ੍ਵਾ ‘‘ਪੁਤ੍ਤੋ ਮੇ ਪਣ੍ਡਿਤੋ ਮਯਾ ਞਾਣਵਨ੍ਤਤਰੋ, ਸੋ ਤੇ ਬ੍ਯਾਕਰਿਸ੍ਸਤਿ, ਤਸ੍ਸ ਸਨ੍ਤਿਕਂ ਗਚ੍ਛਾਹੀ’’ਤਿ ਵਤ੍ਵਾ ਦਸਮਂ ਗਾਥਮਾਹ –

੧੪੭.

‘‘ਭਦ੍ਰਕਾਰੋ ਚ ਮੇ ਪੁਤ੍ਤੋ, ਓਰਸੋ ਮਮ ਅਤ੍ਰਜੋ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਗਨ੍ਤ੍ਵਾ ਪੁਚ੍ਛਸ੍ਸੁ ਬ੍ਰਾਹ੍ਮਣਾ’’ਤਿ.

ਤਤ੍ਥ ਓਰਸੋਤਿ ਉਰੇ ਸਂਵਡ੍ਢੋ. ਅਤ੍ਰਜੋਤਿ ਅਤ੍ਤਨਾ ਜਾਤੋਤਿ.

ਤਂ ਸੁਤ੍ਵਾ ਸੁਚਿਰਤੋ ਵਿਧੁਰਸ੍ਸ ਘਰਾ ਨਿਕ੍ਖਮਿਤ੍ਵਾ ਭਦ੍ਰਕਾਰਸ੍ਸ ਭੁਤ੍ਤਪਾਤਰਾਸਸ੍ਸ ਅਤ੍ਤਨੋ ਪਰਿਸਮਜ੍ਝੇ ਨਿਸਿਨ੍ਨਕਾਲੇ ਨਿਵੇਸਨਂ ਅਗਮਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਏਕਾਦਸਮਂ ਗਾਥਮਾਹ –

੧੪੮.

‘‘ਸ੍ਵਾਧਿਪ੍ਪਾਗਾ ਭਾਰਦ੍ਵਾਜੋ, ਭਦ੍ਰਕਾਰਸ੍ਸੁਪਨ੍ਤਿਕਂ;

ਤਮਦ੍ਦਸ ਮਹਾਬ੍ਰਹ੍ਮਾ, ਨਿਸਿਨ੍ਨਂ ਸਮ੍ਹਿ ਵੇਸ੍ਮਨੀ’’ਤਿ.

ਤਤ੍ਥ ਵੇਸ੍ਮਨੀਤਿ ਘਰੇ.

ਸੋ ਤਤ੍ਥ ਗਨ੍ਤ੍ਵਾ ਭਦ੍ਰਕਾਰਮਾਣਵੇਨ ਕਤਾਸਨਾਭਿਹਾਰਸਕ੍ਕਾਰੋ ਨਿਸੀਦਿਤ੍ਵਾ ਆਗਮਨਕਾਰਣਂ ਪੁਟ੍ਠੋ ਦ੍ਵਾਦਸਮਂ ਗਾਥਮਾਹ –

੧੪੯.

‘‘ਰਞ੍ਞੋਹਂ ਪਹਿਤੋ ਦੂਤੋ, ਕੋਰਬ੍ਯਸ੍ਸ ਯਸਸ੍ਸਿਨੋ;

‘ਅਤ੍ਥਂ ਧਮ੍ਮਞ੍ਚ ਪੁਚ੍ਛੇਸਿ’, ਇਚ੍ਚਬ੍ਰਵਿ ਯੁਧਿਟ੍ਠਿਲੋ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਭਦ੍ਰਕਾਰ ਪਬ੍ਰੂਹਿ ਮੇ’’ਤਿ.

ਅਥ ਨਂ ਭਦ੍ਰਕਾਰੋ, ‘‘ਤਾਤ, ਅਹਂ ਇਮੇਸੁ ਦਿਵਸੇਸੁ ਪਰਦਾਰਿਕਕਮ੍ਮੇ ਅਭਿਨਿਵਿਟ੍ਠੋ, ਚਿਤ੍ਤਂ ਮੇ ਬ੍ਯਾਕੁਲਂ, ਤੇਨ ਤ੍ਯਾਹਂ ਵਿਸ੍ਸਜ੍ਜੇਤੁਂ ਨ ਸਕ੍ਖਿਸ੍ਸਾਮਿ, ਮਯ੍ਹਂ ਪਨ ਕਨਿਟ੍ਠੋ ਸਞ੍ਚਯਕੁਮਾਰੋ ਨਾਮ ਮਯਾ ਅਤਿਵਿਯ ਞਾਣਵਨ੍ਤਤਰੋ, ਤਂ ਪੁਚ੍ਛ, ਸੋ ਤੇ ਪਞ੍ਹਂ ਵਿਸ੍ਸਜ੍ਜੇਸ੍ਸਤੀ’’ਤਿ ਤਸ੍ਸ ਸਨ੍ਤਿਕਂ ਪੇਸੇਨ੍ਤੋ ਦ੍ਵੇ ਗਾਥਾ ਅਭਾਸਿ –

੧੫੦.

‘‘ਮਂਸਕਾਜਂ ਅਵਹਾਯ, ਗੋਧਂ ਅਨੁਪਤਾਮਹਂ;

ਨ ਤੇ ਸਕ੍ਕੋਮਿ ਅਕ੍ਖਾਤੁਂ, ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤੋ.

੧੫੧.

‘‘ਸਞ੍ਚਯੋ ਨਾਮ ਮੇ ਭਾਤਾ, ਕਨਿਟ੍ਠੋ ਮੇ ਸੁਚੀਰਤ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਗਨ੍ਤ੍ਵਾ ਪੁਚ੍ਛਸ੍ਸੁ ਬ੍ਰਾਹ੍ਮਣਾ’’ਤਿ.

ਤਤ੍ਥ ਮਂਸਕਾਜਨ੍ਤਿ ਯਥਾ ਨਾਮ ਪੁਰਿਸੋ ਥੂਲਮਿਗਮਂਸਂ ਕਾਜੇਨਾਦਾਯ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਗੋਧਪੋਤਕਂ ਦਿਸ੍ਵਾ ਮਂਸਕਾਜਂ ਛਡ੍ਡੇਤ੍ਵਾ ਤਂ ਅਨੁਬਨ੍ਧੇਯ੍ਯ, ਏਵਮੇਵ ਅਤ੍ਤਨੋ ਘਰੇ ਵਸਵਤ੍ਤਿਨਿਂ ਭਰਿਯਂ ਛਡ੍ਡੇਤ੍ਵਾ ਪਰਸ੍ਸ ਰਕ੍ਖਿਤਗੋਪਿਤਂ ਇਤ੍ਥਿਂ ਅਨੁਬਨ੍ਧਨ੍ਤੋ ਹੋਮੀਤਿ ਦੀਪੇਨ੍ਤੋ ਏਵਮਾਹਾਤਿ.

ਸੋ ਤਸ੍ਮਿਂ ਖਣੇ ਸਞ੍ਚਯਸ੍ਸ ਨਿਵੇਸਨਂ ਗਨ੍ਤ੍ਵਾ ਤੇਨ ਕਤਸਕ੍ਕਾਰੋ ਆਗਮਨਕਾਰਣਂ ਪੁਟ੍ਠੋ ਆਚਿਕ੍ਖਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਦ੍ਵੇ ਗਾਥਾ ਅਭਾਸਿ –

੧੫੨.

‘‘ਸ੍ਵਾਧਿਪ੍ਪਾਗਾ ਭਾਰਦ੍ਵਾਜੋ, ਸਞ੍ਚਯਸ੍ਸ ਉਪਨ੍ਤਿਕਂ;

ਤਮਦ੍ਦਸ ਮਹਾਬ੍ਰਹ੍ਮਾ, ਨਿਸਿਨ੍ਨਂ ਸਮ੍ਹਿ ਵੇਸ੍ਮਨਿ.

੧੫੩.

‘‘ਰਞ੍ਞੋਹਂ ਪਹਿਤੋ ਦੂਤੋ, ਕੋਰਬ੍ਯਸ੍ਸ ਯਸਸ੍ਸਿਨੋ;

‘ਅਤ੍ਥਂ ਧਮ੍ਮਞ੍ਚ ਪੁਚ੍ਛੇਸਿ’, ਇਚ੍ਚਬ੍ਰਵਿ ਯੁਧਿਟ੍ਠਿਲੋ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਸਞ੍ਚਯਕ੍ਖਾਹਿ ਪੁਚ੍ਛਿਤੋ’’ਤਿ.

ਸਞ੍ਚਯਕੁਮਾਰੋ ਪਨ ਤਦਾ ਪਰਦਾਰਮੇਵ ਸੇਵਤਿ. ਅਥਸ੍ਸ ਸੋ ‘‘ਅਹਂ, ਤਾਤ, ਪਰਦਾਰਂ ਸੇਵਾਮਿ, ਸੇਵਨ੍ਤੋ ਚ ਪਨ ਗਙ੍ਗਂ ਓਤਰਿਤ੍ਵਾ ਪਰਤੀਰਂ ਗਚ੍ਛਾਮਿ, ਤਂ ਮਂ ਸਾਯਞ੍ਚ ਪਾਤੋ ਚ ਨਦਿਂ ਤਰਨ੍ਤਂ ਮਚ੍ਚੁ ਗਿਲਤਿ ਨਾਮ, ਤੇਨ ਚਿਤ੍ਤਂ ਮੇ ਬ੍ਯਾਕੁਲਂ, ਨ ਤ੍ਯਾਹਂ ਆਚਿਕ੍ਖਿਤੁਂ ਸਕ੍ਖਿਸ੍ਸਾਮਿ, ਕਨਿਟ੍ਠੋ ਪਨ ਮੇ ਸਮ੍ਭਵਕੁਮਾਰੋ ਨਾਮ ਅਤ੍ਥਿ ਜਾਤਿਯਾ ਸਤ੍ਤਵਸ੍ਸਿਕੋ, ਮਯਾ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨਾਧਿਕਞਾਣਤਰੋ, ਸੋ ਤੇ ਆਚਿਕ੍ਖਿਸ੍ਸਤਿ, ਗਚ੍ਛ ਤਂ ਪੁਚ੍ਛਾਹੀ’’ਤਿ ਆਹ. ਇਮਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਦ੍ਵੇ ਗਾਥਾ ਅਭਾਸਿ –

੧੫੪.

‘‘ਸਦਾ ਮਂ ਗਿਲਤੇ ਮਚ੍ਚੁ, ਸਾਯਂ ਪਾਤੋ ਸੁਚੀਰਤ;

ਨ ਤੇ ਸਕ੍ਕੋਮਿ ਅਕ੍ਖਾਤੁਂ, ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤੋ.

੧੫੫.

‘‘ਸਮ੍ਭਵੋ ਨਾਮ ਮੇ ਭਾਤਾ, ਕਨਿਟ੍ਠੋ ਮੇ ਸੁਚੀਰਤ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਗਨ੍ਤ੍ਵਾ ਪੁਚ੍ਛਸ੍ਸੁ ਬ੍ਰਾਹ੍ਮਣਾ’’ਤਿ.

ਤਂ ਸੁਤ੍ਵਾ ਸੁਚਿਰਤੋ ‘‘ਅਯਂ ਪਞ੍ਹੋ ਇਮਸ੍ਮਿਂ ਲੋਕੇ ਅਬ੍ਭੁਤੋ ਭਵਿਸ੍ਸਤਿ, ਇਮਂ ਪਞ੍ਹਂ ਵਿਸ੍ਸਜ੍ਜੇਤੁਂ ਸਮਤ੍ਥੋ ਨਾਮ ਨਤ੍ਥਿ ਮਞ੍ਞੇ’’ਤਿ ਚਿਨ੍ਤੇਤ੍ਵਾ ਦ੍ਵੇ ਗਾਥਾ ਅਭਾਸਿ –

੧੫੬.

‘‘ਅਬ੍ਭੁਤੋ ਵਤ ਭੋ ਧਮ੍ਮੋ, ਨਾਯਂ ਅਸ੍ਮਾਕ ਰੁਚ੍ਚਤਿ;

ਤਯੋ ਜਨਾ ਪਿਤਾਪੁਤ੍ਤਾ, ਤੇ ਸੁ ਪਞ੍ਞਾਯ ਨੋ ਵਿਦੂ.

੧੫੭.

‘‘ਨ ਤਂ ਸਕ੍ਕੋਥ ਅਕ੍ਖਾਤੁਂ, ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤਾ;

ਕਥਂ ਨੁ ਦਹਰੋ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤੋ’’ਤਿ.

ਤਤ੍ਥ ਨਾਯਨ੍ਤਿ ਅਯਂ ਪਞ੍ਹਧਮ੍ਮੋ ਅਬ੍ਭੁਤੋ, ਇਮਂ ਕਥੇਤੁਂ ਸਮਤ੍ਥੇਨ ਨਾਮ ਨ ਭਵਿਤਬ੍ਬਂ, ਤਸ੍ਮਾ ਯਂ ਤ੍ਵਂ ‘‘ਕੁਮਾਰੋ ਕਥੇਸ੍ਸਤੀ’’ਤਿ ਵਦਤਿ, ਨਾਯਂ ਅਸ੍ਮਾਕਂ ਰੁਚ੍ਚਤਿ. ਤੇ ਸੂਤਿ ਏਤ੍ਥ ਸੁ-ਕਾਰੋ ਨਿਪਾਤਮਤ੍ਤਂ. ਪਿਤਾਤਿ ਵਿਧੁਰੋ ਪਣ੍ਡਿਤੋ, ਪੁਤ੍ਤਾ ਭਦ੍ਰਕਾਰੋ ਸਞ੍ਚਯੋ ਚਾਤਿ ਤੇਪਿ ਤਯੋ ਪਿਤਾਪੁਤ੍ਤਾ ਪਞ੍ਞਾਯ ਇਮਂ ਧਮ੍ਮਂ ਨੋ ਵਿਦੂ, ਨ ਵਿਜਾਨਨ੍ਤਿ, ਅਞ੍ਞੋ ਕੋ ਜਾਨਿਸ੍ਸਤੀਤਿ ਅਤ੍ਥੋ. ਨ ਤਨ੍ਤਿ ਤੁਮ੍ਹੇ ਤਯੋ ਜਨਾ ਪੁਚ੍ਛਿਤਾ ਏਤਂ ਅਕ੍ਖਾਤੁਂ ਨ ਸਕ੍ਕੋਥ, ਦਹਰੋ ਸਤ੍ਤਵਸ੍ਸਿਕੋ ਕੁਮਾਰੋ ਪੁਚ੍ਛਿਤੋ ਕਥਂ ਨੁ ਜਞ੍ਞਾ, ਕੇਨ ਕਾਰਣੇਨ ਜਾਨਿਤੁਂ ਸਕ੍ਖਿਸ੍ਸਤੀਤਿ ਅਤ੍ਥੋ.

ਤਂ ਸੁਤ੍ਵਾ ਸਞ੍ਚਯਕੁਮਾਰੋ, ‘‘ਤਾਤ, ਸਮ੍ਭਵਕੁਮਾਰਂ ‘ਦਹਰੋ’ਤਿ ਮਾ ਉਞ੍ਞਾਸਿ, ਸਚੇਪਿ ਪਞ੍ਹਵਿਸ੍ਸਜ੍ਜਨੇਨਾਤ੍ਥਿਕੋ, ਗਚ੍ਛ ਨਂ ਪੁਚ੍ਛਾ’’ਤਿ ਅਤ੍ਥਦੀਪਨਾਹਿ ਉਪਮਾਹਿ ਕੁਮਾਰਸ੍ਸ ਵਣ੍ਣਂ ਪਕਾਸੇਨ੍ਤੋ ਦ੍ਵਾਦਸ ਗਾਥਾ ਅਭਾਸਿ –

੧੫੮.

‘‘ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੫੯.

‘‘ਯਥਾਪਿ ਚਨ੍ਦੋ ਵਿਮਲੋ, ਗਚ੍ਛਂ ਆਕਾਸਧਾਤੁਯਾ;

ਸਬ੍ਬੇ ਤਾਰਾਗਣੇ ਲੋਕੇ, ਆਭਾਯ ਅਤਿਰੋਚਤਿ.

੧੬੦.

‘‘ਏਵਮ੍ਪਿ ਦਹਰੂਪੇਤੋ, ਪਞ੍ਞਾਯੋਗੇਨ ਸਮ੍ਭਵੋ;

ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੬੧.

‘‘ਯਥਾਪਿ ਰਮ੍ਮਕੋ ਮਾਸੋ, ਗਿਮ੍ਹਾਨਂ ਹੋਤਿ ਬ੍ਰਾਹ੍ਮਣ;

ਅਤੇਵਞ੍ਞੇਹਿ ਮਾਸੇਹਿ, ਦੁਮਪੁਪ੍ਫੇਹਿ ਸੋਭਤਿ.

੧੬੨.

‘‘ਏਵਮ੍ਪਿ ਦਹਰੂਪੇਤੋ, ਪਞ੍ਞਾਯੋਗੇਨ ਸਮ੍ਭਵੋ;

ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੬੩.

‘‘ਯਥਾਪਿ ਹਿਮਵਾ ਬ੍ਰਹ੍ਮੇ, ਪਬ੍ਬਤੋ ਗਨ੍ਧਮਾਦਨੋ;

ਨਾਨਾਰੁਕ੍ਖੇਹਿ ਸਞ੍ਛਨ੍ਨੋ, ਮਹਾਭੂਤਗਣਾਲਯੋ;

ਓਸਧੇਹਿ ਚ ਦਿਬ੍ਬੇਹਿ, ਦਿਸਾ ਭਾਤਿ ਪਵਾਤਿ ਚ.

੧੬੪.

‘‘ਏਵਮ੍ਪਿ ਦਹਰੂਪੇਤੋ, ਪਞ੍ਞਾਯੋਗੇਨ ਸਮ੍ਭਵੋ;

ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੬੫.

‘‘ਯਥਾਪਿ ਪਾਵਕੋ ਬ੍ਰਹ੍ਮੇ, ਅਚ੍ਚਿਮਾਲੀ ਯਸਸ੍ਸਿਮਾ;

ਜਲਮਾਨੋ ਵਨੇ ਗਚ੍ਛੇ, ਅਨਲੋ ਕਣ੍ਹਵਤ੍ਤਨੀ.

੧੬੬.

‘‘ਘਤਾਸਨੋ ਧੂਮਕੇਤੁ, ਉਤ੍ਤਮਾਹੇਵਨਨ੍ਦਹੋ;

ਨਿਸੀਥੇ ਪਬ੍ਬਤਗ੍ਗਸ੍ਮਿਂ, ਪਹੂਤੇਧੋ ਵਿਰੋਚਤਿ.

੧੬੭.

‘‘ਏਵਮ੍ਪਿ ਦਹਰੂਪੇਤੋ, ਪਞ੍ਞਾਯੋਗੇਨ ਸਮ੍ਭਵੋ;

ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੬੮.

‘‘ਜਵੇਨ ਭਦ੍ਰਂ ਜਾਨਨ੍ਤਿ, ਬਲਿਬਦ੍ਦਞ੍ਚ ਵਾਹਿਯੇ;

ਦੋਹੇਨ ਧੇਨੁਂ ਜਾਨਨ੍ਤਿ, ਭਾਸਮਾਨਞ੍ਚ ਪਣ੍ਡਿਤਂ.

੧੬੯.

‘‘ਏਵਮ੍ਪਿ ਦਹਰੂਪੇਤੋ, ਪਞ੍ਞਾਯੋਗੇਨ ਸਮ੍ਭਵੋ;

ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣਾ’’ਤਿ.

ਤਤ੍ਥ ਜਞ੍ਞਾਤਿ ਜਾਨਿਸ੍ਸਸਿ. ਚਨ੍ਦੋਤਿ ਪੁਣ੍ਣਚਨ੍ਦੋ. ਵਿਮਲੋਤਿ ਅਬ੍ਭਾਦਿਮਲਵਿਰਹਿਤੋ. ਏਵਮ੍ਪਿ ਦਹਰੂਪੇਤੋਤਿ ਏਵਂ ਸਮ੍ਭਵਕੁਮਾਰੋ ਦਹਰਭਾਵੇਨ ਉਪੇਤੋਪਿ ਪਞ੍ਞਾਯੋਗੇਨ ਸਕਲਜਮ੍ਬੁਦੀਪਤਲੇ ਅਵਸੇਸੇ ਪਣ੍ਡਿਤੇ ਅਤਿਕ੍ਕਮਿਤ੍ਵਾ ਵਿਰੋਚਤਿ. ਰਮ੍ਮਕੋਤਿ ਚਿਤ੍ਤਮਾਸੋ. ਅਤੇਵਞ੍ਞੇਹੀਤਿ ਅਤਿਵਿਯ ਅਞ੍ਞੇਹਿ ਏਕਾਦਸਹਿ ਮਾਸੇਹਿ. ਏਵਨ੍ਤਿ ਏਵਂ ਸਮ੍ਭਵੋਪਿ ਪਞ੍ਞਾਯੋਗੇਨ ਸੋਭਤਿ. ਹਿਮਵਾਤਿ ਹਿਮਪਾਤਸਮਯੇ ਹਿਮਯੁਤ੍ਤੋਤਿ ਹਿਮਵਾ, ਗਿਮ੍ਹਕਾਲੇ ਹਿਮਂ ਵਮਤੀਤਿ ਹਿਮਵਾ. ਸਮ੍ਪਤ੍ਤਂ ਜਨਂ ਗਨ੍ਧੇਨ ਮਦਯਤੀਤਿ ਗਨ੍ਧਮਾਦਨੋ. ਮਹਾਭੂਤਗਣਾਲਯੋਤਿ ਦੇਵਗਣਾਨਂ ਨਿਵਾਸੋ. ਦਿਸਾ ਭਾਤੀਤਿ ਸਬ੍ਬਦਿਸਾ ਏਕੋਭਾਸਾ ਵਿਯ ਕਰੋਤਿ. ਪਵਾਤੀਤਿ ਗਨ੍ਧੇਨ ਸਬ੍ਬਦਿਸਾ ਵਾਯਤਿ. ਏਵਨ੍ਤਿ ਏਵਂ ਸਮ੍ਭਵੋਪਿ ਪਞ੍ਞਾਯੋਗੇਨ ਸਬ੍ਬਦਿਸਾ ਭਾਤਿ ਚੇਵ ਪਵਾਤਿ ਚ.

ਯਸਸ੍ਸਿਮਾਤਿ ਤੇਜਸਮ੍ਪਤ੍ਤਿਯਾ ਯਸਸ੍ਸਿਮਾ. ਅਚ੍ਚਿਮਾਲੀਤਿ ਅਚ੍ਚੀਹਿ ਯੁਤ੍ਤੋ. ਜਲਮਾਨੋ ਵਨੇ ਗਚ੍ਛੇਤਿ ਗਚ੍ਛਸਙ੍ਖਾਤੇ ਮਹਾਵਨੇ ਜਲਨ੍ਤੋ ਚਰਤਿ. ਅਨਲੋਤਿ ਅਤਿਤ੍ਤੋ. ਗਤਮਗ੍ਗਸ੍ਸ ਕਣ੍ਹਭਾਵੇਨ ਕਣ੍ਹਵਤ੍ਤਨੀ. ਯਞ੍ਞੇ ਆਹੁਤਿਵਸੇਨ ਆਹੁਤਂ ਘਤਂ ਅਸ੍ਨਾਤੀਤਿ ਘਤਾਸਨੋ. ਧੂਮੋ ਕੇਤੁਕਿਚ੍ਚਂ ਅਸ੍ਸ ਸਾਧੇਤੀਤਿ ਧੂਮਕੇਤੁ. ਉਤ੍ਤਮਾਹੇਵਨਨ੍ਦਹੋਤਿ ਅਹੇਵਨਂ ਵੁਚ੍ਚਤਿ ਵਨਸਣ੍ਡੋ, ਉਤ੍ਤਮਂ ਵਨਸਣ੍ਡਂ ਦਹਤੀਤਿ ਅਤ੍ਥੋ. ਨਿਸੀਥੇਤਿ ਰਤ੍ਤਿਭਾਗੇ. ਪਬ੍ਬਤਗ੍ਗਸ੍ਮਿਨ੍ਤਿ ਪਬ੍ਬਤਸਿਖਰੇ. ਪਹੂਤੇਧੋਤਿ ਪਹੂਤਇਨ੍ਧਨੋ. ਵਿਰੋਚਤੀਤਿ ਸਬ੍ਬਦਿਸਾਸੁ ਓਭਾਸਤਿ. ਏਵਨ੍ਤਿ ਏਵਂ ਮਮ ਕਨਿਟ੍ਠੋ ਸਮ੍ਭਵਕੁਮਾਰੋ ਦਹਰੋਪਿ ਪਞ੍ਞਾਯੋਗੇਨ ਵਿਰੋਚਤਿ. ਭਦ੍ਰਨ੍ਤਿ ਭਦ੍ਰਂ ਅਸ੍ਸਾਜਾਨੀਯਂ ਜਵਸਮ੍ਪਤ੍ਤਿਯਾ ਜਾਨਨ੍ਤਿ, ਨ ਸਰੀਰੇਨ. ਵਾਹਿਯੇਤਿ ਵਹਿਤਬ੍ਬਭਾਰੇ ਸਤਿ ਭਾਰਵਹਤਾਯ ‘‘ਅਹਂ ਉਤ੍ਤਮੋ’’ਤਿ ਬਲਿਬਦ੍ਦਂ ਜਾਨਨ੍ਤਿ. ਦੋਹੇਨਾਤਿ ਦੋਹਸਮ੍ਪਤ੍ਤਿਯਾ ਧੇਨੁਂ ‘‘ਸੁਖੀਰਾ’’ਤਿ ਜਾਨਨ੍ਤਿ. ਭਾਸਮਾਨਨ੍ਤਿ ਏਤ੍ਥ ‘‘ਨਾਭਾਸਮਾਨਂ ਜਾਨਨ੍ਤਿ, ਮਿਸ੍ਸਂ ਬਾਲੇਹਿ ਪਣ੍ਡਿਤ’’ਨ੍ਤਿ ਸੁਤ੍ਤਂ (ਸਂ. ਨਿ. ੨.੨੪੧) ਆਹਰਿਤਬ੍ਬਂ.

ਸੁਚਿਰਤੋ ਏਵਂ ਤਸ੍ਮਿਂ ਸਮ੍ਭਵਂ ਵਣ੍ਣੇਨ੍ਤੇ ‘‘ਪਞ੍ਹਂ ਪੁਚ੍ਛਿਤ੍ਵਾ ਜਾਨਿਸ੍ਸਾਮੀ’’ਤਿ ‘‘ਕਹਂ ਪਨ ਤੇ ਕੁਮਾਰ ਕਨਿਟ੍ਠੋ’’ਤਿ ਪੁਚ੍ਛਿ. ਅਥਸ੍ਸ ਸੋ ਸੀਹਪਞ੍ਜਰਂ ਵਿਵਰਿਤ੍ਵਾ ਹਤ੍ਥਂ ਪਸਾਰੇਤ੍ਵਾ ‘‘ਯੋ ਏਸ ਪਾਸਾਦਦ੍ਵਾਰੇ ਅਨ੍ਤਰਵੀਥਿਯਾ ਕੁਮਾਰਕੇਹਿ ਸਦ੍ਧਿਂ ਸੁਵਣ੍ਣਵਣ੍ਣੋ ਕੀਲ਼ਤਿ, ਅਯਂ ਮਮ ਕਨਿਟ੍ਠੋ, ਉਪਸਙ੍ਕਮਿਤ੍ਵਾ ਤਂ ਪੁਚ੍ਛ, ਬੁਦ੍ਧਲੀਲ਼ਾਯ ਤੇ ਪਞ੍ਹਂ ਕਥੇਸ੍ਸਤੀ’’ਤਿ ਆਹ. ਸੁਚਿਰਤੋ ਤਸ੍ਸ ਵਚਨਂ ਸੁਤ੍ਵਾ ਪਾਸਾਦਾ ਓਰੁਯ੍ਹ ਕੁਮਾਰਸ੍ਸ ਸਨ੍ਤਿਕਂ ਅਗਮਾਸਿ. ਕਾਯ ਵੇਲਾਯਾਤਿ? ਕੁਮਾਰਸ੍ਸ ਨਿਵਤ੍ਥਸਾਟਕਂ ਮੋਚੇਤ੍ਵਾ ਖਨ੍ਧੇ ਖਿਪਿਤ੍ਵਾ ਉਭੋਹਿ ਹਤ੍ਥੇਹਿ ਪਂਸੁਂ ਗਹੇਤ੍ਵਾ ਠਿਤਵੇਲਾਯ. ਤਮਤ੍ਥਂ ਆਵਿਕਰੋਨ੍ਤੋ ਸਤ੍ਥਾ ਗਾਥਮਾਹ –

੧੭੦.

‘‘ਸ੍ਵਾਧਿਪ੍ਪਾਗਾ ਭਾਰਦ੍ਵਾਜੋ, ਸਮ੍ਭਵਸ੍ਸ ਉਪਨ੍ਤਿਕਂ;

ਤਮਦ੍ਦਸ ਮਹਾਬ੍ਰਹ੍ਮਾ, ਕੀਲ਼ਮਾਨਂ ਬਹੀਪੁਰੇ’’ਤਿ.

ਤਤ੍ਥ ਬਹੀਪੁਰੇਤਿ ਬਹਿਨਿਵੇਸਨੇ.

ਮਹਾਸਤ੍ਤੋਪਿ ਬ੍ਰਾਹ੍ਮਣਂ ਆਗਨ੍ਤ੍ਵਾ ਪੁਰਤੋ ਠਿਤਂ ਦਿਸ੍ਵਾ ‘‘ਤਾਤ, ਕੇਨਤ੍ਥੇਨਾਗਤੋਸੀ’’ਤਿ ਪੁਚ੍ਛਿਤ੍ਵਾ, ‘‘ਤਾਤ, ਕੁਮਾਰ ਅਹਂ ਜਮ੍ਬੁਦੀਪਤਲੇ ਆਹਿਣ੍ਡਨ੍ਤੋ ਮਯਾ ਪੁਚ੍ਛਿਤਂ ਪਞ੍ਹਂ ਕਥੇਤੁਂ ਸਮਤ੍ਥਂ ਅਲਭਿਤ੍ਵਾ ਤਵ ਸਨ੍ਤਿਕਂ ਆਗਤੋਮ੍ਹੀ’’ਤਿ ਵੁਤ੍ਤੇ ‘‘ਸਕਲਜਮ੍ਬੁਦੀਪੇ ਕਿਰ ਅਵਿਨਿਚ੍ਛਿਤੋ ਪਞ੍ਹੋ ਮਮ ਸਨ੍ਤਿਕਂ ਆਗਤੋ, ਅਹਂ ਞਾਣੇਨ ਮਹਲ੍ਲਕੋ’’ਤਿ ਹਿਰੋਤ੍ਤਪ੍ਪਂ ਪਟਿਲਭਿਤ੍ਵਾ ਹਤ੍ਥਗਤਂ ਪਂਸੁਂ ਛਡ੍ਡੇਤ੍ਵਾ ਖਨ੍ਧਤੋ ਸਾਟਕਂ ਆਦਾਯ ਨਿਵਾਸੇਤ੍ਵਾ ‘‘ਪੁਚ੍ਛ, ਬ੍ਰਾਹ੍ਮਣ, ਬੁਦ੍ਧਲੀਲ਼ਾਯ ਤੇ ਕਥੇਸ੍ਸਾਮੀ’’ਤਿ ਸਬ੍ਬਞ੍ਞੁਪਵਾਰਣਂ ਪਵਾਰੇਸਿ. ਤਤੋ ਬ੍ਰਾਹ੍ਮਣੋ –

੧੭੧.

‘‘ਰਞ੍ਞੋਹਂ ਪਹਿਤੋ ਦੂਤੋ, ਕੋਰਬ੍ਯਸ੍ਸ ਯਸਸ੍ਸਿਨੋ;

‘ਅਤ੍ਥਂ ਧਮ੍ਮਞ੍ਚ ਪੁਚ੍ਛੇਸਿ’, ਇਚ੍ਚਬ੍ਰਵਿ ਯੁਧਿਟ੍ਠਿਲੋ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਸਮ੍ਭਵਕ੍ਖਾਹਿ ਪੁਚ੍ਛਿਤੋ’’ਤਿ. –

ਗਾਥਾਯ ਪਞ੍ਹਂ ਪੁਚ੍ਛਿ.

ਤਸ੍ਸ ਅਤ੍ਥੋ ਸਮ੍ਭਵਪਣ੍ਡਿਤਸ੍ਸ ਗਗਨਮਜ੍ਝੇ ਪੁਣ੍ਣਚਨ੍ਦੋ ਵਿਯ ਪਾਕਟੋ ਅਹੋਸਿ.

ਅਥ ਨਂ ‘‘ਤੇਨ ਹਿ ਸੁਣੋਹੀ’’ਤਿ ਵਤ੍ਵਾ ਧਮ੍ਮਯਾਗਪਞ੍ਹਂ ਵਿਸ੍ਸਜ੍ਜੇਨ੍ਤੋ ਗਾਥਮਾਹ –

੧੭੨.

‘‘ਤਗ੍ਘ ਤੇ ਅਹਮਕ੍ਖਿਸ੍ਸਂ, ਯਥਾਪਿ ਕੁਸਲੋ ਤਥਾ;

ਰਾਜਾ ਚ ਖੋ ਤਂ ਜਾਨਾਤਿ, ਯਦਿ ਕਾਹਤਿ ਵਾ ਨ ਵਾ’’ਤਿ.

ਤਸ੍ਸ ਅਨ੍ਤਰਵੀਥਿਯਂ ਠਤ੍ਵਾ ਮਧੁਰਸ੍ਸਰੇਨ ਧਮ੍ਮਂ ਦੇਸੇਨ੍ਤਸ੍ਸ ਸਦ੍ਦੋ ਦ੍ਵਾਦਸਯੋਜਨਿਕਂ ਸਕਲਬਾਰਾਣਸਿਨਗਰਂ ਅਵਤ੍ਥਰਿ. ਅਥ ਰਾਜਾ ਚ ਉਪਰਾਜਾਦਯੋ ਚ ਸਬ੍ਬੇ ਸਨ੍ਨਿਪਤਿਂਸੁ. ਮਹਾਸਤ੍ਤੋ ਮਹਾਜਨਸ੍ਸ ਮਜ੍ਝੇ ਧਮ੍ਮਦੇਸਨਂ ਪਟ੍ਠਪੇਸਿ.

ਤਤ੍ਥ ਤਗ੍ਘਾਤਿ ਏਕਂਸਵਚਨਂ. ਯਥਾਪਿ ਕੁਸਲੋਤਿ ਯਥਾ ਅਤਿਕੁਸਲੋ ਸਬ੍ਬਞ੍ਞੁਬੁਦ੍ਧੋ ਆਚਿਕ੍ਖਤਿ, ਤਥਾ ਤੇ ਏਕਂਸੇਨੇਵ ਅਹਮਕ੍ਖਿਸ੍ਸਨ੍ਤਿ ਅਤ੍ਥੋ. ਰਾਜਾ ਚ ਖੋ ਤਨ੍ਤਿ ਅਹਂ ਤਂ ਪਞ੍ਹਂ ਯਥਾ ਤੁਮ੍ਹਾਕਂ ਰਾਜਾ ਜਾਨਿਤੁਂ ਸਕ੍ਕੋਤਿ, ਤਥਾ ਕਥੇਸ੍ਸਾਮਿ. ਤਤੋ ਉਤ੍ਤਰਿ ਰਾਜਾ ਏਵ ਤਂ ਜਾਨਾਤਿ, ਯਦਿ ਕਰਿਸ੍ਸਤਿ ਵਾ ਨ ਵਾ ਕਰਿਸ੍ਸਤਿ, ਕਰੋਨ੍ਤਸ੍ਸ ਵਾ ਅਕਰੋਨ੍ਤਸ੍ਸ ਵਾ ਤਸ੍ਸੇਵੇਤਂ ਭਵਿਸ੍ਸਤਿ, ਮਯ੍ਹਂ ਪਨ ਦੋਸੋ ਨਤ੍ਥੀਤਿ ਦੀਪੇਤਿ.

ਏਵਂ ਇਮਾਯ ਗਾਥਾਯ ਪਞ੍ਹਕਥਨਂ ਪਟਿਜਾਨਿਤ੍ਵਾ ਇਦਾਨਿ ਧਮ੍ਮਯਾਗਪਞ੍ਹਂ ਕਥੇਨ੍ਤੋ ਆਹ –

੧੭੩.

‘‘ਅਜ੍ਜ ਸੁਵੇਤਿ ਸਂਸੇਯ੍ਯ, ਰਞ੍ਞਾ ਪੁਟ੍ਠੋ ਸੁਚੀਰਤ;

ਮਾ ਕਤ੍ਵਾ ਅਵਸੀ ਰਾਜਾ, ਅਤ੍ਥੇ ਜਾਤੇ ਯੁਧਿਟ੍ਠਿਲੋ.

੧੭੪.

‘‘ਅਜ੍ਝਤ੍ਤਞ੍ਞੇਵ ਸਂਸੇਯ੍ਯ, ਰਞ੍ਞਾ ਪੁਟ੍ਠੋ ਸੁਚੀਰਤ;

ਕੁਮ੍ਮਗ੍ਗਂ ਨ ਨਿਵੇਸੇਯ੍ਯ, ਯਥਾ ਮੂਲ਼੍ਹੋ ਅਚੇਤਸੋ.

੧੭੫.

‘‘ਅਤ੍ਤਾਨਂ ਨਾਤਿਵਤ੍ਤੇਯ੍ਯ, ਅਧਮ੍ਮਂ ਨ ਸਮਾਚਰੇ;

ਅਤਿਤ੍ਥੇ ਨਪ੍ਪਤਾਰੇਯ੍ਯ, ਅਨਤ੍ਥੇ ਨ ਯੁਤੋ ਸਿਯਾ.

੧੭੬.

‘‘ਯੋ ਚ ਏਤਾਨਿ ਠਾਨਾਨਿ, ਕਤ੍ਤੁਂ ਜਾਨਾਤਿ ਖਤ੍ਤਿਯੋ;

ਸਦਾ ਸੋ ਵਡ੍ਢਤੇ ਰਾਜਾ, ਸੁਕ੍ਕਪਕ੍ਖੇਵ ਚਨ੍ਦਿਮਾ.

੧੭੭.

‘‘ਞਾਤੀਨਞ੍ਚ ਪਿਯੋ ਹੋਤਿ, ਮਿਤ੍ਤੇਸੁ ਚ ਵਿਰੋਚਤਿ;

ਕਾਯਸ੍ਸ ਭੇਦਾ ਸਪ੍ਪਞ੍ਞੋ, ਸਗ੍ਗਂ ਸੋ ਉਪਪਜ੍ਜਤੀ’’ਤਿ.

ਤਤ੍ਥ ਸਂਸੇਯ੍ਯਾਤਿ ਕਥੇਯ੍ਯ. ਇਦਂ ਵੁਤ੍ਤਂ ਹੋਤਿ – ਤਾਤ, ਸੁਚਿਰਤ ਸਚੇ ਤੁਮ੍ਹਾਕਂ ਰਞ੍ਞਾ ‘‘ਅਜ੍ਜ ਦਾਨਂ ਦੇਮ, ਸੀਲਂ ਰਕ੍ਖਾਮ, ਉਪੋਸਥਕਮ੍ਮਂ ਕਰੋਮਾ’’ਤਿ ਕੋਚਿ ਪੁਟ੍ਠੋ, ‘‘ਮਹਾਰਾਜ, ਅਜ੍ਜ ਤਾਵ ਪਾਣਂ ਹਨਾਮ, ਕਾਮੇ ਪਰਿਭੁਞ੍ਜਾਮ, ਸੁਰਂ ਪਿਵਾਮ, ਕੁਸਲਂ ਪਨ ਕਰਿਸ੍ਸਾਮ ਸੁਵੇ’’ਤਿ ਰਞ੍ਞੋ ਕਥੇਯ੍ਯ, ਤਸ੍ਸ ਅਤਿਮਹਨ੍ਤਸ੍ਸਪਿ ਅਮਚ੍ਚਸ੍ਸ ਵਚਨਂ ਕਤ੍ਵਾ ਤੁਮ੍ਹਾਕਂ ਰਾਜਾ ਯੁਧਿਟ੍ਠਿਲਗੋਤ੍ਤੋ ਤਥਾਰੂਪੇ ਅਤ੍ਥੇ ਜਾਤੇ ਤਂ ਦਿਵਸਂ ਪਮਾਦੇਨ ਵੀਤਿਨਾਮੇਨ੍ਤੋ ਮਾ ਅਵਸਿ, ਤਸ੍ਸ ਵਚਨਂ ਅਕਤ੍ਵਾ ਉਪ੍ਪਨ੍ਨਂ ਕੁਸਲਚਿਤ੍ਤਂ ਅਪਰਿਹਾਪੇਤ੍ਵਾ ਕੁਸਲਪਟਿਸਂਯੁਤ੍ਤਂ ਕਮ੍ਮਂ ਕਰੋਤੁਯੇਵ, ਇਦਮਸ੍ਸ ਕਥੇਯ੍ਯਾਸੀਤਿ. ਏਵਂ ਮਹਾਸਤ੍ਤੋ ਇਮਾਯ ਗਾਥਾਯ –

‘‘ਅਜ੍ਜੇਵ ਕਿਚ੍ਚਮਾਤਪ੍ਪਂ, ਕੋ ਜਞ੍ਞਾ ਮਰਣਂ ਸੁਵੇ’’ਤਿ. (ਮ. ਨਿ. ੩.੨੭੨) –

ਭਦ੍ਦੇਕਰਤ੍ਤਸੁਤ੍ਤਞ੍ਚੇਵ,

‘‘ਅਪ੍ਪਮਾਦੋ ਅਮਤਪਦਂ, ਪਮਾਦੋ ਮਚ੍ਚੁਨੋ ਪਦ’’ਨ੍ਤਿ. (ਧ. ਪ. ੨੧) –

ਅਪ੍ਪਮਾਦੋਵਾਦਞ੍ਚ ਕਥੇਸਿ.

ਅਜ੍ਝਤ੍ਤਞ੍ਞੇਵਾਤਿ, ਤਾਤ, ਸੁਚਿਰਤ ਸਮ੍ਭਵਪਣ੍ਡਿਤੋ ਤਯਾ ਧਮ੍ਮਯਾਗਪਞ੍ਹੇ ਪੁਚ੍ਛਿਤੇ ਕਿਂ ਕਥੇਸੀਤਿ ਰਞ੍ਞਾ ਪੁਟ੍ਠੋ ਸਮਾਨੋ ਤੁਮ੍ਹਾਕਂ ਰਞ੍ਞੋ ਅਜ੍ਝਤ੍ਤਞ੍ਞੇਵ ਸਂਸੇਯ੍ਯ, ਨਿਯਕਜ੍ਝਤ੍ਤਸਙ੍ਖਾਤਂ ਖਨ੍ਧਪਞ੍ਚਕਂ ਹੁਤ੍ਵਾ ਅਭਾਵਤੋ ਅਨਿਚ੍ਚਨ੍ਤਿ ਕਥੇਯ੍ਯਾਸਿ. ਏਤ੍ਤਾਵਤਾ ਮਹਾਸਤ੍ਤੋ –

‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾਤਿ, ਯਦਾ ਪਞ੍ਞਾਯ ਪਸ੍ਸਤਿ’’. (ਧ. ਪ. ੨੭੭) –

‘‘ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ’’ਤਿ. (ਦੀ. ਨਿ. ੨.੨੨੧) –

ਏਵਂ ਵਿਭਾਵਿਤਂ ਅਨਿਚ੍ਚਤਂ ਕਥੇਸੀਤਿ.

ਕੁਮ੍ਮਗ੍ਗਨ੍ਤਿ, ਬ੍ਰਾਹ੍ਮਣ, ਯਥਾ ਮੂਲ਼੍ਹੋ ਅਚੇਤਨੋ ਅਨ੍ਧਬਾਲਪੁਥੁਜ੍ਜਨੋ ਦ੍ਵਾਸਟ੍ਠਿਦਿਟ੍ਠਿਗਤਸਙ੍ਖਾਤਂ ਕੁਮ੍ਮਗ੍ਗਂ ਸੇਵਤਿ, ਏਵਂ ਤਵ ਰਾਜਾ ਤਂ ਕੁਮ੍ਮਗ੍ਗਂ ਨ ਸੇਵੇਯ੍ਯ, ਨਿਯ੍ਯਾਨਿਕਂ ਦਸਕੁਸਲਕਮ੍ਮਪਥਮਗ੍ਗਮੇਵ ਸੇਵਤੁ, ਏਵਮਸ੍ਸ ਵਦੇਯ੍ਯਾਸੀਤਿ.

ਅਤ੍ਤਾਨਨ੍ਤਿ ਇਮਂ ਸੁਗਤਿਯਂ ਠਿਤਂ ਅਤ੍ਤਭਾਵਂ ਨਾਤਿਵਤ੍ਤੇਯ੍ਯ, ਯੇਨ ਕਮ੍ਮੇਨ ਤਿਸ੍ਸੋ ਕੁਸਲਸਮ੍ਪਤ੍ਤਿਯੋ ਸਬ੍ਬਕਾਮਸਗ੍ਗੇ ਅਤਿਕ੍ਕਮਿਤ੍ਵਾ ਅਪਾਯੇ ਨਿਬ੍ਬਤ੍ਤਨ੍ਤਿ, ਤਂ ਕਮ੍ਮਂ ਨ ਕਰੇਯ੍ਯਾਤਿ ਅਤ੍ਥੋ. ਅਧਮ੍ਮਨ੍ਤਿ ਤਿਵਿਧਦੁਚ੍ਚਰਿਤਸਙ੍ਖਾਤਂ ਅਧਮ੍ਮਂ ਨ ਸਮਾਚਰੇਯ੍ਯ. ਅਤਿਤ੍ਥੇਤਿ ਦ੍ਵਾਸਟ੍ਠਿਦਿਟ੍ਠਿਸਙ੍ਖਾਤੇ ਅਤਿਤ੍ਥੇ ਨਪ੍ਪਤਾਰੇਯ੍ਯ ਨ ਓਤਾਰੇਯ੍ਯ. ‘‘ਨ ਤਾਰੇਯ੍ਯਾ’’ਤਿਪਿ ਪਾਠੋ, ਅਤ੍ਤਨੋ ਦਿਟ੍ਠਾਨੁਗਤਿਮਾਪਜ੍ਜਨ੍ਤਂ ਜਨਂ ਨ ਓਤਾਰੇਯ੍ਯ. ਅਨਤ੍ਥੇਤਿ ਅਕਾਰਣੇ. ਨ ਯੁਤੋਤਿ ਯੁਤ੍ਤਪਯੁਤ੍ਤੋ ਨ ਸਿਯਾ. ਬ੍ਰਾਹ੍ਮਣ, ਯਦਿ ਤੇ ਰਾਜਾ ਧਮ੍ਮਯਾਗਪਞ੍ਹੇ ਵਤ੍ਤਿਤੁਕਾਮੋ, ‘‘ਇਮਸ੍ਮਿਂ ਓਵਾਦੇ ਵਤ੍ਤਤੂ’’ਤਿ ਤਸ੍ਸ ਕਥੇਯ੍ਯਾਸੀਤਿ ਅਯਮੇਤ੍ਥ ਅਧਿਪ੍ਪਾਯੋ.

ਸਦਾਤਿ ਸਤਤਂ. ਇਦਂ ਵੁਤ੍ਤਂ ਹੋਤਿ – ‘‘ਯੋ ਖਤ੍ਤਿਯੋ ਏਤਾਨਿ ਕਾਰਣਾਨਿ ਕਾਤੁਂ ਜਾਨਾਤਿ, ਸੋ ਰਾਜਾ ਸੁਕ੍ਕਪਕ੍ਖੇ ਚਨ੍ਦੋ ਵਿਯ ਸਦਾ ਵਡ੍ਢਤੀ’’ਤਿ. ਵਿਰੋਚਤੀਤਿ ਮਿਤ੍ਤਾਮਚ੍ਚਾਨਂ ਮਜ੍ਝੇ ਅਤ੍ਤਨੋ ਸੀਲਾਚਾਰਞਾਣਾਦੀਹਿ ਗੁਣੇਹਿ ਸੋਭਤਿ ਵਿਰੋਚਤੀਤਿ.

ਏਵਂ ਮਹਾਸਤ੍ਤੋ ਗਗਨਤਲੇ ਚਨ੍ਦਂ ਉਟ੍ਠਾਪੇਨ੍ਤੋ ਵਿਯ ਬੁਦ੍ਧਲੀਲ਼ਾਯ ਬ੍ਰਾਹ੍ਮਣਸ੍ਸ ਪਞ੍ਹਂ ਕਥੇਸਿ. ਮਹਾਜਨੋ ਨਦਨ੍ਤੋ ਸੇਲੇਨ੍ਤੋ ਅਪ੍ਫੋਟੇਨ੍ਤੋ ਸਾਧੁਕਾਰਸਹਸ੍ਸਾਨਿ ਅਦਾਸਿ, ਚੇਲੁਕ੍ਖੇਪੇ ਚ ਅਙ੍ਗੁਲਿਫੋਟੇ ਚ ਪਵਤ੍ਤੇਸਿ, ਹਤ੍ਥਪਿਲ਼ਨ੍ਧਨਾਦੀਨਿ ਖਿਪਿ. ਏਵਂ ਖਿਤ੍ਤਧਨਂ ਕੋਟਿਮਤ੍ਤਂ ਅਹੋਸਿ. ਰਾਜਾਪਿਸ੍ਸ ਤੁਟ੍ਠੋ ਮਹਨ੍ਤਂ ਯਸਂ ਅਦਾਸਿ. ਸੁਚਿਰਤੋਪਿ ਨਿਕ੍ਖਸਹਸ੍ਸੇਨ ਪੂਜਂ ਕਤ੍ਵਾ ਸੁਵਣ੍ਣਪਟ੍ਟੇ ਜਾਤਿਹਿਙ੍ਗੁਲਕੇਨ ਪਞ੍ਹਵਿਸ੍ਸਜ੍ਜਨਂ ਲਿਖਿਤ੍ਵਾ ਇਨ੍ਦਪਤ੍ਥਨਗਰਂ ਗਨ੍ਤ੍ਵਾ ਰਞ੍ਞੋ ਧਮ੍ਮਯਾਗਪਞ੍ਹਂ ਕਥੇਸਿ. ਰਾਜਾ ਤਸ੍ਮਿਂ ਧਮ੍ਮੇ ਵਤ੍ਤਿਤ੍ਵਾ ਸਗ੍ਗਪੁਰਂ ਪੂਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਤਥਾਗਤੋ ਮਹਾਪਞ੍ਞੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਧਨਞ੍ਚਯਰਾਜਾ ਆਨਨ੍ਦੋ ਅਹੋਸਿ, ਸੁਚਿਰਤੋ ਅਨੁਰੁਦ੍ਧੋ, ਵਿਧੁਰੋ ਕਸ੍ਸਪੋ, ਭਦ੍ਰਕਾਰੋ ਮੋਗ੍ਗਲ੍ਲਾਨੋ, ਸਞ੍ਚਯਮਾਣਵੋ ਸਾਰਿਪੁਤ੍ਤੋ, ਸਮ੍ਭਵਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਮ੍ਭਵਜਾਤਕਵਣ੍ਣਨਾ ਪਞ੍ਚਮਾ.

[੫੧੬] ੬. ਮਹਾਕਪਿਜਾਤਕਵਣ੍ਣਨਾ

ਬਾਰਾਣਸ੍ਯਂ ਅਹੂ ਰਾਜਾਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਦੇਵਦਤ੍ਤਸ੍ਸ ਸਿਲਾਪਵਿਜ੍ਝਨਂ ਆਰਬ੍ਭ ਕਥੇਸਿ. ਤੇਨ ਹਿ ਧਨੁਗ੍ਗਹੇ ਪਯੋਜੇਤ੍ਵਾ ਅਪਰਭਾਗੇ ਸਿਲਾਯ ਪਵਿਦ੍ਧਾਯ ਭਿਕ੍ਖੂਹਿ ਦੇਵਦਤ੍ਤਸ੍ਸ ਅਵਣ੍ਣੇ ਕਥਿਤੇ ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਮਯ੍ਹਂ ਸਿਲਂ ਪਵਿਜ੍ਝਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਕਾਸਿਕਗਾਮਕੇ ਏਕੋ ਕਸ੍ਸਕਬ੍ਰਾਹ੍ਮਣੋ ਖੇਤ੍ਤਂ ਕਸਿਤ੍ਵਾ ਗੋਣੇ ਵਿਸ੍ਸਜ੍ਜੇਤ੍ਵਾ ਕੁਦ੍ਦਾਲਕਮ੍ਮਂ ਕਾਤੁਂ ਆਰਭਿ. ਗੋਣਾ ਏਕਸ੍ਮਿਂ ਗਚ੍ਛੇ ਪਣ੍ਣਾਨਿ ਖਾਦਨ੍ਤਾ ਅਨੁਕ੍ਕਮੇਨ ਅਟਵਿਂ ਪਵਿਸਿਤ੍ਵਾ ਪਲਾਯਿਂਸੁ. ਸੋ ਵੇਲਂ ਸਲ੍ਲਕ੍ਖੇਤ੍ਵਾ ਕੁਦ੍ਦਾਲਂ ਠਪੇਤ੍ਵਾ ਗੋਣੇ ਓਲੋਕੇਨ੍ਤੋ ਅਦਿਸ੍ਵਾ ਦੋਮਨਸ੍ਸਪ੍ਪਤ੍ਤੋ ਤੇ ਪਰਿਯੇਸਨ੍ਤੋ ਅਨ੍ਤੋਅਟਵਿਂ ਪਵਿਸਿਤ੍ਵਾ ਆਹਿਣ੍ਡਨ੍ਤੋ ਹਿਮਵਨ੍ਤਂ ਪਾਵਿਸਿ. ਸੋ ਤਤ੍ਥ ਦਿਸਾਮੂਲ਼੍ਹੋ ਹੁਤ੍ਵਾ ਸਤ੍ਤਾਹਂ ਨਿਰਾਹਾਰੋ ਵਿਚਰਨ੍ਤੋ ਏਕਂ ਤਿਨ੍ਦੁਕਰੁਕ੍ਖਂ ਦਿਸ੍ਵਾ ਅਭਿਰੁਯ੍ਹ ਫਲਾਨਿ ਖਾਦਨ੍ਤੋ ਤਿਨ੍ਦੁਕਰੁਕ੍ਖਤੋ ਪਰਿਗਲ਼ਿਤ੍ਵਾ ਸਟ੍ਠਿਹਤ੍ਥੇ ਨਰਕਪਪਾਤੇ ਪਤਿ. ਤਤ੍ਰਸ੍ਸ ਦਸ ਦਿਵਸਾ ਵੀਤਿਵਤ੍ਤਾ. ਤਦਾ ਬੋਧਿਸਤ੍ਤੋ ਕਪਿਯੋਨਿਯਂ ਨਿਬ੍ਬਤ੍ਤਿਤ੍ਵਾ ਫਲਾਫਲਾਨਿ ਖਾਦਨ੍ਤੋ ਤਂ ਪੁਰਿਸਂ ਦਿਸ੍ਵਾ ਸਿਲਾਯ ਯੋਗ੍ਗਂ ਕਤ੍ਵਾ ਤਂ ਪੁਰਿਸਂ ਉਦ੍ਧਰਿਤ੍ਵਾ ਸਿਲਾਯ ਮਤ੍ਥਕੇ ਨਿਸੀਦਾਪੇਤ੍ਵਾ ਏਵਮਾਹ – ‘‘ਭੋ ਬ੍ਰਾਹ੍ਮਣ, ਅਹਂ ਕਿਲਮਾਮਿ, ਮੁਹੁਤ੍ਤਂ ਨਿਦ੍ਦਾਯਿਸ੍ਸਾਮਿ, ਮਂ ਰਕ੍ਖਾਹੀ’’ਤਿ. ਸੋ ਤਸ੍ਸ ਨਿਦ੍ਦਾਯਨ੍ਤਸ੍ਸ ਸਿਲਾਯ ਮਤ੍ਥਕਂ ਪਦਾਲੇਸਿ. ਮਹਾਸਤ੍ਤੋ ਤਸ੍ਸ ਤਂ ਕਮ੍ਮਂ ਞਤ੍ਵਾ ਉਪ੍ਪਤਿਤ੍ਵਾ ਸਾਖਾਯ ਨਿਸੀਦਿਤ੍ਵਾ ‘‘ਭੋ ਪੁਰਿਸ, ਤ੍ਵਂ ਭੂਮਿਯਾ ਗਚ੍ਛ, ਅਹਂ ਸਾਖਗ੍ਗੇਨ ਤੁਯ੍ਹਂ ਮਗ੍ਗਂ ਆਚਿਕ੍ਖਨ੍ਤੋ ਗਮਿਸ੍ਸਾਮੀ’’ਤਿ ਤਂ ਪੁਰਿਸਂ ਅਰਞ੍ਞਤੋ ਨੀਹਰਿਤ੍ਵਾ ਮਗ੍ਗੇ ਠਪੇਤ੍ਵਾ ਪਬ੍ਬਤਪਾਦਮੇਵ ਪਾਵਿਸਿ. ਸੋ ਪੁਰਿਸੋ ਮਹਾਸਤ੍ਤੇ ਅਪਰਜ੍ਝਿਤ੍ਵਾ ਕੁਟ੍ਠੀ ਹੁਤ੍ਵਾ ਦਿਟ੍ਠਧਮ੍ਮੇਯੇਵ ਮਨੁਸ੍ਸਪੇਤੋ ਅਹੋਸਿ.

ਸੋ ਸਤ੍ਤ ਵਸ੍ਸਾਨਿ ਦੁਕ੍ਖਪੀਲ਼ਿਤੋ ਵਿਚਰਨ੍ਤੋ ਬਾਰਾਣਸਿਯਂ ਮਿਗਾਜਿਨਂ ਨਾਮ ਉਯ੍ਯਾਨਂ ਪਵਿਸਿਤ੍ਵਾ ਪਾਕਾਰਨ੍ਤਰੇ ਕਦਲਿਪਣ੍ਣਂ ਅਤ੍ਥਰਿਤ੍ਵਾ ਵੇਦਨਾਪ੍ਪਤ੍ਤੋ ਨਿਪਜ੍ਜਿ. ਤਦਾ ਬਾਰਾਣਸਿਰਾਜਾ ਉਯ੍ਯਾਨਂ ਗਨ੍ਤ੍ਵਾ ਤਤ੍ਥ ਵਿਚਰਨ੍ਤੋ ਤਂ ਦਿਸ੍ਵਾ ‘‘ਕੋਸਿ ਤ੍ਵਂ, ਕਿਂ ਵਾ ਕਤ੍ਵਾ ਇਮਂ ਦੁਕ੍ਖਂ ਪਤ੍ਤੋ’’ਤਿ ਪੁਚ੍ਛਿ. ਸੋਪਿਸ੍ਸ ਸਬ੍ਬਂ ਵਿਤ੍ਥਾਰਤੋ ਆਚਿਕ੍ਖਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੭੮.

‘‘ਬਾਰਾਣਸ੍ਯਂ ਅਹੂ ਰਾਜਾ, ਕਾਸੀਨਂ ਰਟ੍ਠਵਡ੍ਢਨੋ;

ਮਿਤ੍ਤਾਮਚ੍ਚਪਰਿਬ੍ਯੂਲ਼੍ਹੋ, ਅਗਮਾਸਿ ਮਿਗਾਜਿਨਂ.

੧੭੯.

‘‘ਤਤ੍ਥ ਬ੍ਰਾਹ੍ਮਣਮਦ੍ਦਕ੍ਖਿ, ਸੇਤਂ ਚਿਤ੍ਰਂ ਕਿਲਾਸਿਨਂ;

ਵਿਦ੍ਧਸ੍ਤਂ ਕੋਵਿਲ਼ਾਰਂਵ, ਕਿਸਂ ਧਮਨਿਸਨ੍ਥਤਂ.

੧੮੦.

‘‘ਪਰਮਕਾਰੁਞ੍ਞਤਂ ਪਤ੍ਤਂ, ਦਿਸ੍ਵਾ ਕਿਚ੍ਛਗਤਂ ਨਰਂ;

ਅਵਚ ਬ੍ਯਮ੍ਹਿਤੋ ਰਾਜਾ, ਯਕ੍ਖਾਨਂ ਕਤਮੋ ਨੁਸਿ.

੧੮੧.

‘‘ਹਤ੍ਥਪਾਦਾ ਚ ਤੇ ਸੇਤਾ, ਤਤੋ ਸੇਤਤਰਂ ਸਿਰੋ;

ਗਤ੍ਤਂ ਕਮ੍ਮਾਸਵਣ੍ਣਂ ਤੇ, ਕਿਲਾਸਬਹੁਲੋ ਚਸਿ.

੧੮੨.

‘‘ਵਟ੍ਟਨਾਵਲ਼ਿਸਙ੍ਕਾਸਾ, ਪਿਟ੍ਠਿ ਤੇ ਨਿਨ੍ਨਤੁਨ੍ਨਤਾ;

ਕਾਲ਼ਪਬ੍ਬਾਵ ਤੇ ਅਙ੍ਗਾ, ਨਾਞ੍ਞਂ ਪਸ੍ਸਾਮਿ ਏਦਿਸਂ.

੧੮੩.

‘‘ਉਗ੍ਘਟ੍ਟਪਾਦੋ ਤਸਿਤੋ, ਕਿਸੋ ਧਮਨਿਸਨ੍ਥਤੋ;

ਛਾਤੋ ਆਤਤ੍ਤਰੂਪੋਸਿ, ਕੁਤੋਸਿ ਕਤ੍ਥ ਗਚ੍ਛਤਿ.

੧੮੪.

‘‘ਦੁਦ੍ਦਸੀ ਅਪ੍ਪਕਾਰੋਸਿ, ਦੁਬ੍ਬਣ੍ਣੋ ਭੀਮਦਸ੍ਸਨੋ;

ਜਨੇਤ੍ਤਿ ਯਾਪਿ ਤੇ ਮਾਤਾ, ਨ ਤਂ ਇਚ੍ਛੇਯ੍ਯ ਪਸ੍ਸਿਤੁਂ.

੧੮੫.

‘‘ਕਿਂ ਕਮ੍ਮਮਕਰਂ ਪੁਬ੍ਬੇ, ਕਂ ਅਵਜ੍ਝਂ ਅਘਾਤਯਿ;

ਕਿਬ੍ਬਿਸਂ ਯਂ ਕਰਿਤ੍ਵਾਨ, ਇਦਂ ਦੁਕ੍ਖਂ ਉਪਾਗਮੀ’’ਤਿ.

ਤਤ੍ਥ ਬਾਰਾਣਸ੍ਯਨ੍ਤਿ ਬਾਰਾਣਸਿਯਂ. ਮਿਤ੍ਤਾਮਚ੍ਚਪਰਿਬ੍ਯੂਲ਼੍ਹੋਤਿ ਮਿਤ੍ਤੇਹਿ ਚ ਦਲ਼੍ਹਭਤ੍ਤੀਹਿ ਅਮਚ੍ਚੇਹਿ ਚ ਪਰਿਵੁਤੋ. ਮਿਗਾਜਿਨਨ੍ਤਿ ਏਵਂਨਾਮਕਂ ਉਯ੍ਯਾਨਂ. ਸੇਤਨ੍ਤਿ ਸੇਤਕੁਟ੍ਠੇਨ ਸੇਤਂ ਕਬਰਕੁਟ੍ਠੇਨ ਵਿਚਿਤ੍ਰਂ ਪਰਿਭਿਨ੍ਨੇਨ ਕਣ੍ਡੂਯਨਕਿਲਾਸਕੁਟ੍ਠੇਨ ਕਿਲਾਸਿਨਂ ਵੇਦਨਾਪ੍ਪਤ੍ਤਂ ਕਦਲਿਪਣ੍ਣੇ ਨਿਪਨ੍ਨਂ ਅਦ੍ਦਸ. ਵਿਦ੍ਧਸ੍ਤਂ ਕੋਵਿਲ਼ਾਰਂਵਾਤਿ ਵਣਮੁਖੇਹਿ ਪਗ੍ਘਰਨ੍ਤੇਨ ਮਂਸੇਨ ਵਿਦ੍ਧਸ੍ਤਂ ਪੁਪ੍ਫਿਤਕੋਵਿਲ਼ਾਰਸਦਿਸਂ. ਕਿਸਨ੍ਤਿ ਏਕਚ੍ਚੇਸੁ ਪਦੇਸੇਸੁ ਅਟ੍ਠਿਚਮ੍ਮਮਤ੍ਤਸਰੀਰਂ ਸਿਰਾਜਾਲਸਨ੍ਥਤਂ. ਬ੍ਯਮ੍ਹਿਤੋਤਿ ਭੀਤੋ ਵਿਮ੍ਹਯਮਾਪਨ੍ਨੋ ਵਾ. ਯਕ੍ਖਾਨਨ੍ਤਿ ਯਕ੍ਖਾਨਂ ਅਨ੍ਤਰੇ ਤ੍ਵਂ ਕਤਰਯਕ੍ਖੋ ਨਾਮਾਸਿ. ਵਟ੍ਟਨਾਵਲ਼ਿਸਙ੍ਕਾਸਾਤਿ ਪਿਟ੍ਠਿਕਣ੍ਟਕਟ੍ਠਾਨੇ ਆਵੁਨਿਤ੍ਵਾ ਠਪਿਤਾਵਟ੍ਟਨਾਵਲ਼ਿਸਦਿਸਾ. ਅਙ੍ਗਾਤਿ ਕਾਲ਼ਪਬ੍ਬਵਲ੍ਲਿਸਦਿਸਾਨਿ ਤੇ ਅਙ੍ਗਾਨਿ. ਨਾਞ੍ਞਨ੍ਤਿ ਅਞ੍ਞਂ ਪੁਰਿਸਂ ਏਦਿਸਂ ਨ ਪਸ੍ਸਾਮਿ. ਉਗ੍ਘਟ੍ਟਪਾਦੋਤਿ ਰਜੋਕਿਣ੍ਣਪਾਦੋ. ਆਤਤ੍ਤਰੂਪੋਤਿ ਸੁਕ੍ਖਸਰੀਰੋ. ਦੁਦ੍ਦਸੀਤਿ ਦੁਕ੍ਖੇਨ ਪਸ੍ਸਿਤਬ੍ਬੋ. ਅਪ੍ਪਕਾਰੋਸੀਤਿ ਸਰੀਰਪ੍ਪਕਾਰਰਹਿਤੋਸਿ, ਦੁਸ੍ਸਣ੍ਠਾਨੋਸੀਤਿ ਅਤ੍ਥੋ. ਕਿਂ ਕਮ੍ਮਮਕਰਨ੍ਤਿ ਇਤੋ ਪੁਬ੍ਬੇ ਕਿਂ ਕਮ੍ਮਂ ਅਕਰਂ, ਅਕਾਸੀਤਿ ਅਤ੍ਥੋ. ਕਿਬ੍ਬਿਸਨ੍ਤਿ ਦਾਰੁਣਕਮ੍ਮਂ.

ਤਤੋ ਪਰਂ ਬ੍ਰਾਹ੍ਮਣੋ ਆਹ –

੧੮੬.

‘‘ਤਗ੍ਘ ਤੇ ਅਹਮਕ੍ਖਿਸ੍ਸਂ, ਯਥਾਪਿ ਕੁਸਲੋ ਤਥਾ;

ਸਚ੍ਚਵਾਦਿਞ੍ਹਿ ਲੋਕਸ੍ਮਿਂ, ਪਸਂਸਨ੍ਤੀਧ ਪਣ੍ਡਿਤਾ.

੧੮੭.

‘‘ਏਕੋ ਚਰਂ ਗੋਗਵੇਸੋ, ਮੂਲ਼੍ਹੋ ਅਚ੍ਚਸਰਿਂ ਵਨੇ;

ਅਰਞ੍ਞੇ ਇਰੀਣੇ ਵਿਵਨੇ, ਨਾਨਾਕੁਞ੍ਜਰਸੇਵਿਤੇ.

੧੮੮.

‘‘ਵਾਲ਼ਮਿਗਾਨੁਚਰਿਤੇ, ਵਿਪ੍ਪਨਟ੍ਠੋਸ੍ਮਿ ਕਾਨਨੇ;

ਅਚਰਿਂ ਤਤ੍ਥ ਸਤ੍ਤਾਹਂ, ਖੁਪ੍ਪਿਪਾਸਸਮਪ੍ਪਿਤੋ.

੧੮੯.

‘‘ਤਤ੍ਥ ਤਿਨ੍ਦੁਕਮਦ੍ਦਕ੍ਖਿਂ, ਵਿਸਮਟ੍ਠਂ ਬੁਭੁਕ੍ਖਿਤੋ;

ਪਪਾਤਮਭਿਲਮ੍ਬਨ੍ਤਂ, ਸਮ੍ਪਨ੍ਨਫਲਧਾਰਿਨਂ.

੧੯੦.

‘‘ਵਾਤਸ੍ਸਿਤਾਨਿ ਭਕ੍ਖੇਸਿਂ, ਤਾਨਿ ਰੁਚ੍ਚਿਂਸੁ ਮੇ ਭੁਸਂ;

ਅਤਿਤ੍ਤੋ ਰੁਕ੍ਖਮਾਰੂਹਿਂ, ਤਤ੍ਥ ਹੇਸ੍ਸਾਮਿ ਆਸਿਤੋ.

੧੯੧.

‘‘ਏਕਂ ਮੇ ਭਕ੍ਖਿਤਂ ਆਸਿ, ਦੁਤਿਯਂ ਅਭਿਪਤ੍ਥਿਤਂ;

ਤਤੋ ਸਾ ਭਞ੍ਜਥ ਸਾਖਾ, ਛਿਨ੍ਨਾ ਫਰਸੁਨਾ ਵਿਯ.

੧੯੨.

‘‘ਸੋਹਂ ਸਹਾਵ ਸਾਖਾਹਿ, ਉਦ੍ਧਂਪਾਦੋ ਅਵਂਸਿਰੋ;

ਅਪ੍ਪਤਿਟ੍ਠੇ ਅਨਾਲਮ੍ਬੇ, ਗਿਰਿਦੁਗ੍ਗਸ੍ਮਿ ਪਾਪਤਂ.

੧੯੩.

‘‘ਯਸ੍ਮਾ ਚ ਵਾਰਿ ਗਮ੍ਭੀਰਂ, ਤਸ੍ਮਾ ਨ ਸਮਪਜ੍ਜਿਸਂ;

ਤਤ੍ਥ ਸੇਸਿਂ ਨਿਰਾਨਨ੍ਦੋ, ਅਨੂਨਾ ਦਸ ਰਤ੍ਤਿਯੋ.

੧੯੪.

‘‘ਅਥੇਤ੍ਥ ਕਪਿ ਮਾਗਞ੍ਛਿ, ਗੋਨਙ੍ਗੁਲੋ ਦਰੀਚਰੋ;

ਸਾਖਾਹਿ ਸਾਖਂ ਵਿਚਰਨ੍ਤੋ, ਖਾਦਮਾਨੋ ਦੁਮਪ੍ਫਲਂ.

੧੯੫.

‘‘ਸੋ ਮਂ ਦਿਸ੍ਵਾ ਕਿਸਂ ਪਣ੍ਡੁਂ, ਕਾਰੁਞ੍ਞਮਕਰਂ ਮਯਿ;

ਅਮ੍ਭੋ ਕੋ ਨਾਮ ਸੋ ਏਤ੍ਥ, ਏਵਂ ਦੁਕ੍ਖੇਨ ਅਟ੍ਟਿਤੋ.

੧੯੬.

‘‘ਮਨੁਸ੍ਸੋ ਅਮਨੁਸ੍ਸੋ ਵਾ, ਅਤ੍ਤਾਨਂ ਮੇ ਪਵੇਦਯ;

ਤਸ੍ਸਞ੍ਜਲਿਂ ਪਣਾਮੇਤ੍ਵਾ, ਇਦਂ ਵਚਨਮਬ੍ਰਵਿਂ.

੧੯੭.

‘‘ਮਨੁਸ੍ਸੋਹਂ ਬ੍ਯਸਮ੍ਪਤ੍ਤੋ, ਸਾ ਮੇ ਨਤ੍ਥਿ ਇਤੋ ਗਤਿ;

ਤਂ ਵੋ ਵਦਾਮਿ ਭਦ੍ਦਂ ਵੋ, ਤ੍ਵਞ੍ਚ ਮੇ ਸਰਣਂ ਭਵ.

੧੯੮.

‘‘ਗਰੁਂ ਸਿਲਂ ਗਹੇਤ੍ਵਾਨ, ਵਿਚਰੀ ਪਬ੍ਬਤੇ ਕਪਿ;

ਸਿਲਾਯ ਯੋਗ੍ਗਂ ਕਤ੍ਵਾਨ, ਨਿਸਭੋ ਏਤਦਬ੍ਰਵਿ.

੧੯੯.

‘‘ਏਹਿ ਮੇ ਪਿਟ੍ਠਿਮਾਰੁਯ੍ਹ, ਗੀਵਂ ਗਣ੍ਹਾਹਿ ਬਾਹੁਭਿ;

ਅਹਂ ਤਂ ਉਦ੍ਧਰਿਸ੍ਸਾਮਿ, ਗਿਰਿਦੁਗ੍ਗਤ ਵੇਗਸਾ.

੨੦੦.

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਵਾਨਰਿਨ੍ਦਸ੍ਸ ਸਿਰੀਮਤੋ;

ਪਿਟ੍ਠਿਮਾਰੁਯ੍ਹ ਧੀਰਸ੍ਸ, ਗੀਵਂ ਬਾਹਾਹਿ ਅਗ੍ਗਹਿਂ.

੨੦੧.

‘‘ਸੋ ਮਂ ਤਤੋ ਸਮੁਟ੍ਠਾਸਿ, ਤੇਜਸ੍ਸੀ ਬਲਵਾ ਕਪਿ;

ਵਿਹਞ੍ਞਮਾਨੋ ਕਿਚ੍ਛੇਨ, ਗਿਰਿਦੁਗ੍ਗਤ ਵੇਗਸਾ.

੨੦੨.

‘‘ਉਦ੍ਧਰਿਤ੍ਵਾਨ ਮਂ ਸਨ੍ਤੋ, ਨਿਸਭੋ ਏਤਦਬ੍ਰਵਿ;

ਇਙ੍ਘ ਮਂ ਸਮ੍ਮ ਰਕ੍ਖਸ੍ਸੁ, ਪਸੁਪਿਸ੍ਸਂ ਮੁਹੁਤ੍ਤਕਂ.

੨੦੩.

‘‘ਸੀਹਾ ਬ੍ਯਗ੍ਘਾ ਚ ਦੀਪੀ ਚ, ਅਚ੍ਛਕੋਕਤਰਚ੍ਛਯੋ;

ਤੇ ਮਂ ਪਮਤ੍ਤਂ ਹਿਂਸੇਯ੍ਯੁਂ, ਤੇ ਤ੍ਵਂ ਦਿਸ੍ਵਾ ਨਿਵਾਰਯ.

੨੦੪.

‘‘ਏਵਂ ਮੇ ਪਰਿਤ੍ਤਾਤੂਨ, ਪਸੁਪੀ ਸੋ ਮੁਹੁਤ੍ਤਕਂ;

ਤਦਾਹਂ ਪਾਪਿਕਂ ਦਿਟ੍ਠਿਂ, ਪਟਿਲਚ੍ਛਿਂ ਅਯੋਨਿਸੋ.

੨੦੫.

‘‘ਭਕ੍ਖੋ ਅਯਂ ਮਨੁਸ੍ਸਾਨਂ, ਯਥਾ ਚਞ੍ਞੇ ਵਨੇ ਮਿਗਾ;

ਯਂ ਨੂਨਿਮਂ ਵਧਿਤ੍ਵਾਨ, ਛਾਤੋ ਖਾਦੇਯ੍ਯ ਵਾਨਰਂ.

੨੦੬.

‘‘ਅਸਿਤੋ ਚ ਗਮਿਸ੍ਸਾਮਿ, ਮਂਸਮਾਦਾਯ ਸਮ੍ਬਲਂ;

ਕਨ੍ਤਾਰਂ ਨਿਤ੍ਥਰਿਸ੍ਸਾਮਿ, ਪਾਥੇਯ੍ਯਂ ਮੇ ਭਵਿਸ੍ਸਤਿ.

੨੦੭.

‘‘ਤਤੋ ਸਿਲਂ ਗਹੇਤ੍ਵਾਨ, ਮਤ੍ਥਕਂ ਸਨ੍ਨਿਤਾਲ਼ਯਿਂ;

ਮਮ ਗਤ੍ਤਕਿਲਨ੍ਤਸ੍ਸ, ਪਹਾਰੋ ਦੁਬ੍ਬਲੋ ਅਹੁ.

੨੦੮.

‘‘ਸੋ ਚ ਵੇਗੇਨੁਦਪ੍ਪਤ੍ਤੋ, ਕਪਿ ਰੁਹਿਰਮਕ੍ਖਿਤੋ;

ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ, ਰੋਦਨ੍ਤੋ ਮਂ ਉਦਿਕ੍ਖਤਿ.

੨੦੯.

‘‘ਮਾਯ੍ਯੋ ਮਂ ਕਰਿ ਭਦ੍ਦਨ੍ਤੇ, ਤ੍ਵਞ੍ਚ ਨਾਮੇਦਿਸਂ ਕਰਿ;

ਤ੍ਵਞ੍ਚ ਖੋ ਨਾਮ ਦੀਘਾਵੁ, ਅਞ੍ਞੇ ਵਾਰੇਤੁਮਰਹਸਿ.

੨੧੦.

‘‘ਅਹੋ ਵਤ ਰੇ ਪੁਰਿਸ, ਤਾਵਦੁਕ੍ਕਰਕਾਰਕ;

ਏਦਿਸਾ ਵਿਸਮਾ ਦੁਗ੍ਗਾ, ਪਪਾਤਾ ਉਦ੍ਧਤੋ ਮਯਾ.

੨੧੧.

‘‘ਆਨੀਤੋ ਪਰਲੋਕਾਵ, ਦੁਬ੍ਭੇਯ੍ਯਂ ਮਂ ਅਮਞ੍ਞਥ;

ਤਂ ਤੇਨ ਪਾਪਕਮ੍ਮੇਨ, ਪਾਪਂ ਪਾਪੇਨ ਚਿਨ੍ਤਿਤਂ.

੨੧੨.

‘‘ਮਾ ਹੇਵ ਤ੍ਵਂ ਅਧਮ੍ਮਟ੍ਠ, ਵੇਦਨਂ ਕਟੁਕਂ ਫੁਸਿ;

ਮਾ ਹੇਵ ਪਾਪਕਮ੍ਮਂ ਤਂ, ਫਲਂ ਵੇਲ਼ੁਂਵ ਤਂ ਵਧਿ.

੨੧੩.

‘‘ਤਯਿ ਮੇ ਨਤ੍ਥਿ ਵਿਸ੍ਸਾਸੋ, ਪਾਪਧਮ੍ਮ ਅਸਞ੍ਞਤ;

ਏਹਿ ਮੇ ਪਿਟ੍ਠਿਤੋ ਗਚ੍ਛ, ਦਿਸ੍ਸਮਾਨੋਵ ਸਨ੍ਤਿਕੇ.

੨੧੪.

‘‘ਮੁਤ੍ਤੋਸਿ ਹਤ੍ਥਾ ਵਾਲ਼ਾਨਂ, ਪਤ੍ਤੋਸਿ ਮਾਨੁਸਿਂ ਪਦਂ;

ਏਸ ਮਗ੍ਗੋ ਅਧਮ੍ਮਟ੍ਠ, ਤੇਨ ਗਚ੍ਛ ਯਥਾਸੁਖਂ.

੨੧੫.

‘‘ਇਦਂ ਵਤ੍ਵਾ ਗਿਰਿਚਰੋ, ਰਹਦੇ ਪਕ੍ਖਲ੍ਯ ਮਤ੍ਥਕਂ;

ਅਸ੍ਸੂਨਿ ਸਮ੍ਪਮਜ੍ਜਿਤ੍ਵਾ, ਤਤੋ ਪਬ੍ਬਤਮਾਰੁਹਿ.

੨੧੬.

‘‘ਸੋਹਂ ਤੇਨਾਭਿਸਤ੍ਤੋਸ੍ਮਿ, ਪਰਿਲ਼ਾਹੇਨ ਅਟ੍ਟਿਤੋ;

ਡਯ੍ਹਮਾਨੇਨ ਗਤ੍ਤੇਨ, ਵਾਰਿਂ ਪਾਤੁਂ ਉਪਾਗਮਿਂ.

੨੧੭.

‘‘ਅਗ੍ਗਿਨਾ ਵਿਯ ਸਨ੍ਤਤ੍ਤੋ, ਰਹਦੋ ਰੁਹਿਰਮਕ੍ਖਿਤੋ;

ਪੁਬ੍ਬਲੋਹਿਤਸਙ੍ਕਾਸੋ, ਸਬ੍ਬੋ ਮੇ ਸਮਪਜ੍ਜਥ.

੨੧੮.

‘‘ਯਾਵਨ੍ਤੋ ਉਦਬਿਨ੍ਦੂਨਿ, ਕਾਯਸ੍ਮਿਂ ਨਿਪਤਿਂਸੁ ਮੇ;

ਤਾਵਨ੍ਤੋ ਗਣ੍ਡ ਜਾਯੇਥ, ਅਦ੍ਧਬੇਲੁਵਸਾਦਿਸਾ.

੨੧੯.

‘‘ਪਭਿਨ੍ਨਾ ਪਗ੍ਘਰਿਂਸੁ ਮੇ, ਕੁਣਪਾ ਪੁਬ੍ਬਲੋਹਿਤਾ;

ਯੇਨ ਯੇਨੇਵ ਗਚ੍ਛਾਮਿ, ਗਾਮੇਸੁ ਨਿਗਮੇਸੁ ਚ.

੨੨੦.

‘‘ਦਣ੍ਡਹਤ੍ਥਾ ਨਿਵਾਰੇਨ੍ਤਿ, ਇਤ੍ਥਿਯੋ ਪੁਰਿਸਾ ਚ ਮਂ;

ਓਕ੍ਕਿਤਾ ਪੂਤਿਗਨ੍ਧੇਨ, ਮਾਸ੍ਸੁ ਓਰੇਨ ਆਗਮਾ.

੨੨੧.

‘‘ਏਤਾਦਿਸਂ ਇਦਂ ਦੁਕ੍ਖਂ, ਸਤ੍ਤ ਵਸ੍ਸਾਨਿ ਦਾਨਿ ਮੇ;

ਅਨੁਭੋਮਿ ਸਕਂ ਕਮ੍ਮਂ, ਪੁਬ੍ਬੇ ਦੁਕ੍ਕਟਮਤ੍ਤਨੋ.

੨੨੨.

‘‘ਤਂ ਵੋ ਵਦਾਮਿ ਭਦ੍ਦਨ੍ਤੇ, ਯਾਵਨ੍ਤੇਤ੍ਥ ਸਮਾਗਤਾ;

ਮਾਸ੍ਸੁ ਮਿਤ੍ਤਾਨ ਦੁਬ੍ਭਿਤ੍ਥੋ, ਮਿਤ੍ਤਦੁਬ੍ਭੋ ਹਿ ਪਾਪਕੋ.

੨੨੩.

‘‘ਕੁਟ੍ਠੀ ਕਿਲਾਸੀ ਭਵਤਿ, ਯੋ ਮਿਤ੍ਤਾਨਿਧ ਦੁਬ੍ਭਤਿ;

ਕਾਯਸ੍ਸ ਭੇਦਾ ਮਿਤ੍ਤਦ੍ਦੁ, ਨਿਰਯਂ ਸੋਪਪਜ੍ਜਤੀ’’ਤਿ.

ਤਤ੍ਥ ਕੁਸਲੋਤਿ ਯਥਾ ਛੇਕੋ ਕੁਸਲੋ ਕਥੇਤਿ, ਤਥਾ ਵੋ ਕਥੇਸ੍ਸਾਮਿ. ਗੋਗਵੇਸੋਤਿ ਨਟ੍ਠੇ ਗੋਣੇ ਗਵੇਸਨ੍ਤੋ. ਅਚ੍ਚਸਰਿਨ੍ਤਿ ਮਨੁਸ੍ਸਪਥਂ ਅਤਿਕ੍ਕਮਿਤ੍ਵਾ ਹਿਮਵਨ੍ਤਂ ਪਾਵਿਸਿਂ. ਅਰਞ੍ਞੇਤਿ ਅਰਾਜਕੇ ਸੁਞ੍ਞੇ. ਇਰੀਣੇਤਿ ਸੁਕ੍ਖਕਨ੍ਤਾਰੇ. ਵਿਵਨੇਤਿ ਵਿਵਿਤ੍ਤੇ. ਵਿਪ੍ਪਨਟ੍ਠੋਤਿ ਮਗ੍ਗਮੂਲ਼੍ਹੋ. ਬੁਭੁਕ੍ਖਿਤੋਤਿ ਸਞ੍ਜਾਤਬੁਭੁਕ੍ਖੋ ਛਾਤਜ੍ਝਤ੍ਤੋ. ਪਪਾਤਮਭਿਲਮ੍ਬਨ੍ਤਨ੍ਤਿ ਪਪਾਤਾਭਿਮੁਖਂ ਓਲਮ੍ਬਨ੍ਤਂ. ਸਮ੍ਪਨ੍ਨਫਲਧਾਰਿਨਨ੍ਤਿ ਮਧੁਰਫਲਧਾਰਿਨਂ. ਵਾਤਸ੍ਸਿਤਾਨੀਤਿ ਪਠਮਂ ਤਾਵ ਵਾਤਪਤਿਤਾਨਿ ਖਾਦਿਂ. ਤਤ੍ਥ ਹੇਸ੍ਸਾਮੀਤਿ ਤਸ੍ਮਿਂ ਰੁਕ੍ਖੇ ਸੁਹਿਤੋ ਭਵਿਸ੍ਸਾਮੀਤਿ ਆਰੁਲ਼੍ਹੋਮ੍ਹਿ. ਤਤੋ ਸਾ ਭਞ੍ਜਥ ਸਾਖਾਤਿ ਤਸ੍ਸ ਅਭਿਪਤ੍ਥਿਤਸ੍ਸ ਅਤ੍ਥਾਯ ਹਤ੍ਥੇ ਪਸਾਰਿਤੇ ਸਾ ਮਯਾ ਅਭਿਰੁਲ਼੍ਹਾ ਸਾਖਾ ਫਰਸੁਨਾ ਛਿਨ੍ਨਾ ਵਿਯ ਅਭਞ੍ਜਥ. ਅਨਾਲਮ੍ਬੇਤਿ ਆਲਮ੍ਬਿਤਬ੍ਬਟ੍ਠਾਨਰਹਿਤੇ. ਗਿਰਿਦੁਗ੍ਗਸ੍ਮਿਨ੍ਤਿ ਗਿਰਿਵਿਸਮੇ. ਸੇਸਿਨ੍ਤਿ ਸਯਿਤੋਮ੍ਹਿ.

ਕਪਿ ਮਾਗਞ੍ਛੀਤਿ ਕਪਿ ਆਗਞ੍ਛਿ. ਗੋਨਙ੍ਗੁਲੋਤਿ ਗੁਨ੍ਨਂ ਨਙ੍ਗੁਟ੍ਠਸਦਿਸਨਙ੍ਗੁਟ੍ਠੋ. ‘‘ਗੋਨਙ੍ਗੁਟ੍ਠੋ’’ਤਿਪਿ ਪਾਠੋ. ‘‘ਗੋਨਙ੍ਗੁਲੀ’’ਤਿਪਿ ਪਠਨ੍ਤਿ. ਅਕਰਂ ਮਯੀਤਿ ਅਕਰਾ ਮਯਿ. ਅਮ੍ਭੋਤਿ, ਮਹਾਰਾਜ, ਸੋ ਕਪਿਰਾਜਾ ਤਸ੍ਮਿਂ ਨਰਕਪਪਾਤੇ ਮਮ ਉਦਕਪੋਥਨਸਦ੍ਦਂ ਸੁਤ੍ਵਾ ਮਂ ‘‘ਅਮ੍ਭੋ’’ਤਿ ਆਲਪਿਤ੍ਵਾ ‘‘ਕੋ ਨਾਮੇਸੋ’’ਤਿ ਪੁਚ੍ਛਿ. ਬ੍ਯਸਮ੍ਪਤ੍ਤੋਤਿ ਬ੍ਯਸਨਂ ਪਤ੍ਤੋ, ਪਪਾਤਸ੍ਸ ਵਸਂ ਪਤ੍ਤੋਤਿ ਵਾ ਅਤ੍ਥੋ. ਭਦ੍ਦਂ ਵੋਤਿ ਤਸ੍ਮਾ ਤੁਮ੍ਹੇ ਵਦਾਮਿ – ‘‘ਭਦ੍ਦਂ ਤੁਮ੍ਹਾਕਂ ਹੋਤੂ’’ਤਿ. ਗਰੁਂ ਸਿਲਨ੍ਤਿ, ਮਹਾਰਾਜ, ਸੋ ਕਪਿਰਾਜਾ ਮਯਾ ਏਵਂ ਵੁਤ੍ਤੇ ‘‘ਮਾ ਭਾਯੀ’’ਤਿ ਮਂ ਅਸ੍ਸਾਸੇਤ੍ਵਾ ਪਠਮਂ ਤਾਵ ਗਰੁਂ ਸਿਲਂ ਗਹੇਤ੍ਵਾ ਯੋਗ੍ਗਂ ਕਰੋਨ੍ਤੋ ਪਬ੍ਬਤੇ ਵਿਚਰਿ. ਨਿਸਭੋਤਿ ਪੁਰਿਸਨਿਸਭੋ ਉਤ੍ਤਮਵਾਨਰਿਨ੍ਦੋ ਪਬ੍ਬਤਪਪਾਤੇ ਠਤ੍ਵਾ ਮਂ ਏਤਦਬ੍ਰਵੀਤਿ.

ਬਾਹੁਭੀਤਿ ਦ੍ਵੀਹਿ ਬਾਹਾਹਿ ਮਮ ਗੀਵਂ ਸੁਗ੍ਗਹਿਤਂ ਗਣ੍ਹ. ਵੇਗਸਾਤਿ ਵੇਗੇਨ. ਸਿਰੀਮਤੋਤਿ ਪੁਞ੍ਞਵਨ੍ਤਸ੍ਸ. ਅਗ੍ਗਹਿਨ੍ਤਿ ਸਟ੍ਠਿਹਤ੍ਥਂ ਨਰਕਪਪਾਤਂ ਵਾਤਵੇਗੇਨ ਓਤਰਿਤ੍ਵਾ ਉਦਕਪਿਟ੍ਠੇ ਠਿਤਸ੍ਸ ਅਹਂ ਵੇਗੇਨ ਪਿਟ੍ਠਿਮਭਿਰੁਹਿਤ੍ਵਾ ਉਭੋਹਿ ਬਾਹਾਹਿ ਗੀਵਂ ਅਗ੍ਗਹੇਸਿਂ. ਵਿਹਞ੍ਞਮਾਨੋਤਿ ਕਿਲਮਨ੍ਤੋ. ਕਿਚ੍ਛੇਨਾਤਿ ਦੁਕ੍ਖੇਨ. ਸਨ੍ਤੋਤਿ ਪਣ੍ਡਿਤੋ, ਅਥ ਵਾ ਪਰਿਸਨ੍ਤੋ ਕਿਲਨ੍ਤੋ. ਰਕ੍ਖਸ੍ਸੂਤਿ ਅਹਂ ਤਂ ਉਦ੍ਧਰਨ੍ਤੋ ਕਿਲਨ੍ਤੋ ਮੁਹੁਤ੍ਤਂ ਵਿਸ੍ਸਮਨ੍ਤੋ ਪਸੁਪਿਸ੍ਸਂ, ਤਸ੍ਮਾ ਮਂ ਰਕ੍ਖਾਹਿ. ਯਥਾ ਚਞ੍ਞੇ ਵਨੇ ਮਿਗਾਤਿ ਸੀਹਾਦੀਹਿ ਅਞ੍ਞੇਪਿ ਯੇ ਇਮਸ੍ਮਿਂ ਵਨੇ ਵਾਲ਼ਮਿਗਾ. ਪਾਲ਼ਿਯਂ ਪਨ ‘‘ਅਚ੍ਛਕੋਕਤਰਚ੍ਛਯੋ’’ਤਿ ਲਿਖਨ੍ਤਿ. ਪਰਿਤ੍ਤਾਤੂਨਾਤਿ, ਮਹਾਰਾਜ, ਏਵਂ ਸੋ ਕਪਿਰਾਜਾ ਮਂ ਅਤ੍ਤਨੋ ਪਰਿਤ੍ਤਾਣਂ ਕਤ੍ਵਾ ਮੁਹੁਤ੍ਤਂ ਪਸੁਪਿ. ਅਯੋਨਿਸੋਤਿ ਅਯੋਨਿਸੋਮਨਸਿਕਾਰੇਨ. ਭਕ੍ਖੋਤਿ ਖਾਦਿਤਬ੍ਬਯੁਤ੍ਤਕੋ. ਅਸਿਤੋ ਧਾਤੋ ਸੁਹਿਤੋ. ਸਮ੍ਬਲਨ੍ਤਿ ਪਾਥੇਯ੍ਯਂ. ਮਤ੍ਥਕਂ ਸਨ੍ਨਿਤਾਲ਼ਯਿਨ੍ਤਿ ਤਸ੍ਸ ਵਾਨਰਿਨ੍ਦਸ੍ਸ ਮਤ੍ਥਕਂ ਪਹਰਿਂ. ‘‘ਸਨ੍ਨਿਤਾਲ਼ਯ’’ਨ੍ਤਿਪਿ ਪਾਠੋ. ਦੁਬ੍ਬਲੋ ਅਹੂਤਿ ਨ ਬਲਵਾ ਆਸਿ, ਯਥਾਧਿਪ੍ਪਾਯਂ ਨ ਅਗਮਾਸੀਤਿ.

ਵੇਗੇਨਾਤਿ ਮਯਾ ਪਹਟਪਾਸਾਣਵੇਗੇਨ. ਉਦਪ੍ਪਤ੍ਤੋਤਿ ਉਟ੍ਠਿਤੋ. ਮਾਯ੍ਯੋਤਿ ਤੇਨ ਮਿਤ੍ਤਦੁਬ੍ਭਿਪੁਰਿਸੇਨ ਸਿਲਾਯ ਪਵਿਦ੍ਧਾਯ ਮਹਾਚਮ੍ਮਂ ਛਿਨ੍ਦਿਤ੍ਵਾ ਓਲਮ੍ਬਿ, ਰੁਹਿਰਂ ਪਗ੍ਘਰਿ. ਮਹਾਸਤ੍ਤੋ ਵੇਦਨਾਪ੍ਪਤ੍ਤੋ ਚਿਨ੍ਤੇਸਿ – ‘‘ਇਮਸ੍ਮਿਂ ਠਾਨੇ ਅਞ੍ਞੋ ਨਤ੍ਥਿ, ਇਦਂ ਭਯਂ ਇਮਂ ਪੁਰਿਸਂ ਨਿਸ੍ਸਾਯ ਉਪ੍ਪਨ੍ਨ’’ਨ੍ਤਿ. ਸੋ ਮਰਣਭਯਭੀਤੋ ਓਲਮ੍ਬਨ੍ਤਂ ਚਮ੍ਮਬਨ੍ਧਂ ਹਤ੍ਥੇਨ ਗਹੇਤ੍ਵਾ ਉਪ੍ਪਤਿਤ੍ਵਾ ਸਾਖਂ ਅਭਿਰੁਯ੍ਹ ਤੇਨ ਪਾਪਪੁਰਿਸੇਨ ਸਦ੍ਧਿਂ ਸਲ੍ਲਪਨ੍ਤੋ ‘‘ਮਾਯ੍ਯੋ ਮ’’ਨ੍ਤਿਆਦਿਮਾਹ. ਤਤ੍ਥ ਮਾਯ੍ਯੋ ਮਂ ਕਰਿ ਭਦ੍ਦਨ੍ਤੇਤਿ ਮਾ ਅਕਰਿ ਅਯ੍ਯੋ ਮਂ ਭਦ੍ਦਨ੍ਤੇਤਿ ਤਂ ਨਿਵਾਰੇਤਿ. ਤ੍ਵਞ੍ਚ ਖੋ ਨਾਮਾਤਿ ਤ੍ਵਂ ਨਾਮ ਏਵਂ ਮਯਾ ਪਪਾਤਾ ਉਦ੍ਧਟੋ ਏਦਿਸਂ ਫਰੁਸਕਮ੍ਮਂ ਮਯਿ ਕਰਿ, ਅਹੋ ਤੇ ਅਯੁਤ੍ਤਂ ਕਤਨ੍ਤਿ. ਅਹੋ ਵਤਾਤਿ ਤਂ ਗਰਹਨ੍ਤੋ ਏਵਮਾਹ. ਤਾਵਦੁਕ੍ਕਰਕਾਰਕਾਤਿ ਮਯਿ ਅਪਰਜ੍ਝਨੇਨ ਅਤਿਦੁਕ੍ਕਰਕਮ੍ਮਕਾਰਕ. ਪਰਲੋਕਾਵਾਤਿ ਪਰਲੋਕਤੋ ਵਿਯ ਆਨੀਤੋ. ਦੁਬ੍ਭੇਯ੍ਯਨ੍ਤਿ ਦੁਬ੍ਭਿਤਬ੍ਬਂ ਵਧਿਤਬ੍ਬਂ. ਵੇਦਨਂ ਕਟੁਕਨ੍ਤਿ ਏਵਂ ਸਨ੍ਤੇਪਿ ਤ੍ਵਂ ਅਧਮ੍ਮਟ੍ਠ ਯਾਦਿਸਂ ਵੇਦਨਂ ਅਹਂ ਫੁਸਾਮਿ, ਏਦਿਸਂ ਵੇਦਨਂ ਕਟੁਕਂ ਮਾ ਫੁਸਿ, ਤਂ ਪਾਪਕਮ੍ਮਂ ਫਲਂ ਵੇਲ਼ੁਂਵ ਤਂ ਮਾ ਵਧਿ. ਇਤਿ ਮਂ, ਮਹਾਰਾਜ, ਸੋ ਪਿਯਪੁਤ੍ਤਕਂ ਵਿਯ ਅਨੁਕਮ੍ਪਿ.

ਅਥ ਨਂ ਅਹਂ ਏਤਦਵੋਚਂ – ‘‘ਅਯ੍ਯ, ਮਯਾ ਕਤਂ ਦੋਸਂ ਹਦਯੇ ਮਾ ਕਰਿ, ਮਾ ਮਂ ਅਸਪ੍ਪੁਰਿਸਂ ਏਵਰੂਪੇ ਅਰਞ੍ਞੇ ਨਾਸਯ, ਅਹਂ ਦਿਸਾਮੂਲ਼੍ਹੋ ਮਗ੍ਗਂ ਨ ਜਾਨਾਮਿ, ਅਤ੍ਤਨਾ ਕਤਂ ਕਮ੍ਮਂ ਮਾ ਨਾਸੇਥ, ਜੀਵਿਤਦਾਨਂ ਮੇ ਦੇਥ, ਅਰਞ੍ਞਾ ਨੀਹਰਿਤ੍ਵਾ ਮਨੁਸ੍ਸਪਥੇ ਠਪੇਥਾ’’ਤਿ. ਏਵਂ ਵੁਤ੍ਤੇ ਸੋ ਮਯਾ ਸਦ੍ਧਿਂ ਸਲ੍ਲਪਨ੍ਤੋ ‘‘ਤਯਿ ਮੇ ਨਤ੍ਥਿ ਵਿਸ੍ਸਾਸੋ’’ਤਿ ਆਦਿਮਾਹ. ਤਤ੍ਥ ਤਯੀਤਿ ਇਤੋ ਪਟ੍ਠਾਯ ਮਯ੍ਹਂ ਤਯਿ ਵਿਸ੍ਸਾਸੋ ਨਤ੍ਥਿ. ਏਹੀਤਿ, ਭੋ ਪੁਰਿਸ, ਅਹਂ ਤਯਾ ਸਦ੍ਧਿਂ ਮਗ੍ਗੇਨ ਨ ਗਮਿਸ੍ਸਾਮਿ, ਤ੍ਵਂ ਪਨ ਏਹਿ ਮਮ ਪਿਟ੍ਠਿਤੋ ਅਵਿਦੂਰੇ ਦਿਸ੍ਸਮਾਨਸਰੀਰੋਵ ਗਚ੍ਛ, ਅਹਂ ਰੁਕ੍ਖਗ੍ਗੇਹੇਵ ਗਮਿਸ੍ਸਾਮੀਤਿ. ਮੁਤ੍ਤੋਸੀਤਿ ਅਥ ਸੋ ਮਂ, ਮਹਾਰਾਜ, ਅਰਞ੍ਞਾ ਨੀਹਰਿਤ੍ਵਾ, ਭੋ ਪੁਰਿਸ, ਵਾਲ਼ਮਿਗਾਨਂ ਹਤ੍ਥਾ ਮੁਤ੍ਤੋਸਿ. ਪਤ੍ਤੋਸਿ ਮਾਨੁਸਿਂ ਪਦਨ੍ਤਿ ਮਨੁਸ੍ਸੂਪਚਾਰਂ ਪਤ੍ਤੋ ਆਗਤੋਸਿ, ਏਸ ਤੇ ਮਗ੍ਗੋ, ਏਤੇਨ ਗਚ੍ਛਾਤਿ ਆਹ.

ਗਿਰਿਚਰੋਤਿ ਗਿਰਿਚਾਰੀ ਵਾਨਰੋ. ਪਕ੍ਖਲ੍ਯਾਤਿ ਧੋਵਿਤ੍ਵਾ. ਤੇਨਾਭਿਸਤ੍ਤੋਸ੍ਮੀਤਿ ਸੋ ਅਹਂ, ਮਹਾਰਾਜ, ਤੇਨ ਵਾਨਰੇਨ ਅਭਿਸਤ੍ਤੋ, ਪਾਪਕਮ੍ਮੇ ਪਰਿਣਤੇ ਤੇਨਾਭਿਸਤ੍ਤੋਸ੍ਮੀਤਿ ਮਞ੍ਞਮਾਨੋ ਏਵਮਾਹ. ਅਟ੍ਟਿਤੋਤਿ ਉਪਦ੍ਦੁਤੋ. ਉਪਾਗਮਿਨ੍ਤਿ ਏਕਂ ਰਹਦਂ ਉਪਗਤੋਸ੍ਮਿ. ਸਮਪਜ੍ਜਥਾਤਿ ਜਾਤੋ, ਏਵਰੂਪੋ ਹੁਤ੍ਵਾ ਉਪਟ੍ਠਾਸਿ. ਯਾਵਨ੍ਤੋਤਿ ਯਤ੍ਤਕਾਨਿ. ਗਣ੍ਡ ਜਾਯੇਥਾਤਿ ਗਣ੍ਡਾ ਜਾਯਿਂਸੁ. ਸੋ ਕਿਰ ਪਿਪਾਸਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ ਉਦਕਞ੍ਜਲਿਂ ਉਕ੍ਖਿਪਿਤ੍ਵਾ ਥੋਕਂ ਪਿਵਿਤ੍ਵਾ ਸੇਸਂ ਸਰੀਰੇ ਸਿਞ੍ਚਿ. ਅਥਸ੍ਸ ਤਾਵਦੇਵ ਉਦਕਬਿਨ੍ਦੁਗਣਨਾਯ ਅਡ੍ਢਬੇਲੁਵਪਕ੍ਕਪ੍ਪਮਾਣਾ ਗਣ੍ਡਾ ਉਟ੍ਠਹਿਂਸੁ, ਤਸ੍ਮਾ ਏਵਮਾਹ. ਪਭਿਨ੍ਨਾਤਿ ਤੇ ਗਣ੍ਡਾ ਤਂ ਦਿਵਸਮੇਵ ਭਿਜ੍ਜਿਤ੍ਵਾ ਕੁਣਪਾ ਪੂਤਿਗਨ੍ਧਿਕਾ ਹੁਤ੍ਵਾ ਪੁਬ੍ਬਲੋਹਿਤਾਨਿ ਪਗ੍ਘਰਿਂਸੁ. ਯੇਨ ਯੇਨਾਤਿ ਯੇਨ ਯੇਨ ਮਗ੍ਗੇਨ. ਓਕ੍ਕਿਤਾਤਿ ਪੂਤਿਗਨ੍ਧੇਨ ਓਕਿਣ੍ਣਾ ਪਰਿਕ੍ਖਿਤ੍ਤਾ ਪਰਿਵਾਰਿਤਾ. ਮਾਸ੍ਸੁ ਓਰੇਨ ਆਗਮਾਤਿ ਦੁਟ੍ਠਸਤ੍ਤ ਓਰੇਨ ਮਾਸ੍ਸੁ ਆਗਮਾ, ਅਮ੍ਹਾਕਂ ਸਨ੍ਤਿਕਂ ਮਾ ਆਗਮੀਤਿ ਏਵਂ ਵਦਨ੍ਤਾ ਮਂ ਨਿਵਾਰੇਨ੍ਤੀਤਿ ਅਤ੍ਥੋ. ਸਤ੍ਤ ਵਸ੍ਸਾਨਿ ਦਾਨਿ ਮੇਤਿ, ਮਹਾਰਾਜ, ਤਤੋ ਪਟ੍ਠਾਯ ਇਦਾਨਿ ਸਤ੍ਤ ਵਸ੍ਸਾਨਿ ਮਮ ਏਤ੍ਤਕਂ ਕਾਲਂ ਸਕਂ ਕਮ੍ਮਂ ਅਨੁਭੋਮਿ.

ਇਤਿ ਸੋ ਅਤ੍ਤਨੋ ਮਿਤ੍ਤਦੁਬ੍ਭਿਕਮ੍ਮਂ ਵਿਤ੍ਥਾਰੇਤ੍ਵਾ, ‘‘ਮਹਾਰਾਜ, ਮਞ੍ਞੇਵ ਓਲੋਕੇਤ੍ਵਾ ਏਵਰੂਪਂ ਕਮ੍ਮਂ ਨ ਕੇਨਚਿ ਕਤ੍ਤਬ੍ਬ’’ਨ੍ਤਿ ਵਤ੍ਵਾ ‘‘ਤਂ ਵੋ’’ਤਿਆਦਿਮਾਹ. ਤਤ੍ਥ ਤਨ੍ਤਿ ਤਸ੍ਮਾ. ਯਸ੍ਮਾ ਏਵਰੂਪਂ ਕਮ੍ਮਂ ਏਵਂ ਦੁਕ੍ਖਵਿਪਾਕਂ, ਤਸ੍ਮਾਤਿ ਅਤ੍ਥੋ.

੨੨੩.

‘‘ਕੁਟ੍ਠੀ ਕਿਲਾਸੀ ਭਵਤਿ, ਯੋ ਮਿਤ੍ਤਾਨਿਧ ਦੁਬ੍ਭਤਿ;

ਕਾਯਸ੍ਸ ਭੇਦਾ ਮਿਤ੍ਤਦ੍ਦੁ, ਨਿਰਯਂ ਸੋਪਪਜ੍ਜਤੀ’’ਤਿ. –

ਅਯਂ ਅਭਿਸਮ੍ਬੁਦ੍ਧਗਾਥਾ. ਭਿਕ੍ਖਵੇ, ਯੋ ਇਧ ਲੋਕੇ ਮਿਤ੍ਤਾਨਿ ਦੁਬ੍ਭਤਿ ਹਿਂਸਤਿ, ਸੋ ਏਵਰੂਪੋ ਹੋਤੀਤਿ ਅਤ੍ਥੋ.

ਤਸ੍ਸਪਿ ਪੁਰਿਸਸ੍ਸ ਰਞ੍ਞਾ ਸਦ੍ਧਿਂ ਕਥੇਨ੍ਤਸ੍ਸੇਵ ਪਥਵੀ ਵਿਵਰਂ ਅਦਾਸਿ. ਤਙ੍ਖਣਞ੍ਞੇਵ ਚਵਿਤ੍ਵਾ ਅਵੀਚਿਮ੍ਹਿ ਨਿਬ੍ਬਤ੍ਤੋ. ਰਾਜਾ ਤਸ੍ਮਿਂ ਪਥਵਿਂ ਪਵਿਟ੍ਠੇ ਉਯ੍ਯਾਨਾ ਨਿਕ੍ਖਮਿਤ੍ਵਾ ਨਗਰਂ ਪਵਿਟ੍ਠੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਮਯ੍ਹਂ ਸਿਲਂ ਪਟਿਵਿਜ੍ਝਿਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਿਤ੍ਤਦੁਬ੍ਭੀ ਪੁਰਿਸੋ ਦੇਵਦਤ੍ਤੋ ਅਹੋਸਿ, ਕਪਿਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਹਾਕਪਿਜਾਤਕਵਣ੍ਣਨਾ ਛਟ੍ਠਾ.

[੫੧੭] ੭. ਦਕਰਕ੍ਖਸਜਾਤਕਵਣ੍ਣਨਾ

੨੨੪-੨੫੭. ਸਚੇ ਵੋ ਵੁਯ੍ਹਮਾਨਾਨਨ੍ਤਿ ਦਕਰਕ੍ਖਸਜਾਤਕਂ. ਤਂ ਸਬ੍ਬਂ ਮਹਾਉਮਙ੍ਗਜਾਤਕੇ ਆਵਿ ਭਵਿਸ੍ਸਤੀਤਿ.

ਦਕਰਕ੍ਖਸਜਾਤਕਵਣ੍ਣਨਾ ਸਤ੍ਤਮਾ.

[੫੧੮] ੮. ਪਣ੍ਡਰਨਾਗਰਾਜਜਾਤਕਵਣ੍ਣਨਾ

ਵਿਕਿਣ੍ਣਵਾਚਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮੁਸਾਵਾਦਂ ਕਤ੍ਵਾ ਦੇਵਦਤ੍ਤਸ੍ਸ ਪਥਵਿਪ੍ਪਵੇਸਨਂ ਆਰਬ੍ਭ ਕਥੇਸਿ. ਤਦਾ ਹਿ ਸਤ੍ਥਾ ਭਿਕ੍ਖੂਹਿ ਤਸ੍ਸ ਅਵਣ੍ਣੇ ਕਥਿਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਮੁਸਾਵਾਦਂ ਕਤ੍ਵਾ ਪਥਵਿਂ ਪਵਿਟ੍ਠੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਪਞ੍ਚਸਤਵਾਣਿਜਾ ਨਾਵਾਯ ਸਮੁਦ੍ਦਂ ਪਕ੍ਖਨ੍ਦਿਤ੍ਵਾ ਸਤ੍ਤਮੇ ਦਿਵਸੇ ਅਤੀਰਦਸ੍ਸਨਿਯਾ ਨਾਵਾਯ ਸਮੁਦ੍ਦਪਿਟ੍ਠੇ ਭਿਨ੍ਨਾਯ ਠਪੇਤ੍ਵਾ ਏਕਂ ਅਵਸੇਸਾ ਮਚ੍ਛਕਚ੍ਛਪਭਕ੍ਖਾ ਅਹੇਸੁਂ, ਏਕੋ ਪਨ ਵਾਤਵੇਗੇਨ ਕਰਮ੍ਪਿਯਪਟ੍ਟਨਂ ਨਾਮ ਪਾਪੁਣਿ. ਸੋ ਸਮੁਦ੍ਦਤੋ ਉਤ੍ਤਰਿਤ੍ਵਾ ਨਗ੍ਗਭੋਗੋ ਤਸ੍ਮਿਂ ਪਟ੍ਟਨੇਯੇਵ ਭਿਕ੍ਖਾਯ ਚਰਿ. ਤਮੇਨਂ ਮਨੁਸ੍ਸਾ ‘‘ਅਯਂ ਸਮਣੋ ਅਪ੍ਪਿਚ੍ਛੋ ਸਨ੍ਤੁਟ੍ਠੋ’’ਤਿ ਸਮ੍ਭਾਵੇਤ੍ਵਾ ਸਕ੍ਕਾਰਂ ਕਰਿਂਸੁ. ਸੋ ‘‘ਲਦ੍ਧੋ ਮੇ ਜੀਵਿਕੂਪਾਯੋ’’ਤਿ ਤੇਸੁ ਨਿਵਾਸਨਪਾਰੁਪਨਂ ਦੇਨ੍ਤੇਸੁਪਿ ਨ ਇਚ੍ਛਿ. ਤੇ ‘‘ਨਤ੍ਥਿ ਇਤੋ ਉਤ੍ਤਰਿ ਅਪ੍ਪਿਚ੍ਛੋ ਸਮਣੋ’’ਤਿ ਭਿਯ੍ਯੋ ਭਿਯ੍ਯੋ ਪਸੀਦਿਤ੍ਵਾ ਤਸ੍ਸ ਅਸ੍ਸਮਪਦਂ ਕਤ੍ਵਾ ਤਤ੍ਥ ਨਂ ਨਿਵਾਸਾਪੇਸੁਂ. ਸੋ ‘‘ਕਰਮ੍ਪਿਯਅਚੇਲੋ’’ਤਿ ਪਞ੍ਞਾਯਿ. ਤਸ੍ਸ ਤਤ੍ਥ ਵਸਨ੍ਤਸ੍ਸ ਮਹਾਲਾਭਸਕ੍ਕਾਰੋ ਉਦਪਾਦਿ.

ਏਕੋ ਨਾਗਰਾਜਾਪਿਸ੍ਸ ਸੁਪਣ੍ਣਰਾਜਾ ਚ ਉਪਟ੍ਠਾਨਂ ਆਗਚ੍ਛਨ੍ਤਿ. ਤੇਸੁ ਨਾਗਰਾਜਾ ਨਾਮੇਨ ਪਣ੍ਡਰੋ ਨਾਮ. ਅਥੇਕਦਿਵਸਂ ਸੁਪਣ੍ਣਰਾਜਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਏਵਮਾਹ – ‘‘ਭਨ੍ਤੇ, ਅਮ੍ਹਾਕਂ ਞਾਤਕਾ ਨਾਗੇ ਗਣ੍ਹਨ੍ਤਾ ਬਹੂ ਵਿਨਸ੍ਸਨ੍ਤਿ, ਏਤੇਸਂ ਨਾਗਾਨਂ ਗਹਣਨਿਯਾਮਂ ਮਯਂ ਨ ਜਾਨਾਮ, ਗੁਯ੍ਹਕਾਰਣਂ ਕਿਰ ਤੇਸਂ ਅਤ੍ਥਿ, ਸਕ੍ਕੁਣੇਯ੍ਯਾਥ ਨੁ ਖੋ ਤੁਮ੍ਹੇ ਏਤੇ ਪਿਯਾਯਮਾਨਾ ਵਿਯ ਤਂ ਕਾਰਣਂ ਪੁਚ੍ਛਿਤੁ’’ਨ੍ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਸੁਪਣ੍ਣਰਾਜੇ ਵਨ੍ਦਿਤ੍ਵਾ ਪਕ੍ਕਨ੍ਤੇ ਨਾਗਰਾਜਸ੍ਸ ਆਗਤਕਾਲੇ ਵਨ੍ਦਿਤ੍ਵਾ ਨਿਸਿਨ੍ਨਂ ਨਾਗਰਾਜਾਨਂ ਪੁਚ੍ਛਿ – ‘‘ਨਾਗਰਾਜ, ਸੁਪਣ੍ਣਾ ਕਿਰ ਤੁਮ੍ਹੇ ਗਣ੍ਹਨ੍ਤਾ ਬਹੂ ਵਿਨਸ੍ਸਨ੍ਤਿ, ਤੁਮ੍ਹੇ ਗਣ੍ਹਨ੍ਤਾ ਕਥਂ ਗਣ੍ਹਿਤੁਂ ਨ ਸਕ੍ਕੋਨ੍ਤੀ’’ਤਿ. ਭਨ੍ਤੇ, ਇਦਂ ਅਮ੍ਹਾਕਂ ਗੁਯ੍ਹਂ ਰਹਸ੍ਸਂ, ਮਯਾ ਇਮਂ ਕਥੇਨ੍ਤੇਨ ਞਾਤਿਸਙ੍ਘਸ੍ਸ ਮਰਣਂ ਆਹਟਂ ਹੋਤੀਤਿ. ਕਿਂ ਪਨ ਤ੍ਵਂ, ਆਵੁਸੋ, ‘‘ਅਯਂ ਅਞ੍ਞਸ੍ਸ ਕਥੇਸ੍ਸਤੀ’’ਤਿ ਏਵਂਸਞ੍ਞੀ ਹੋਸਿ, ਨਾਹਂ ਅਞ੍ਞਸ੍ਸ ਕਥੇਸ੍ਸਾਮਿ, ਅਤ੍ਤਨਾ ਪਨ ਜਾਨਿਤੁਕਾਮਤਾਯ ਪੁਚ੍ਛਾਮਿ, ਤ੍ਵਂ ਮਯ੍ਹਂ ਸਦ੍ਦਹਿਤ੍ਵਾ ਨਿਬ੍ਭਯੋ ਹੁਤ੍ਵਾ ਕਥੇਹੀਤਿ. ਨਾਗਰਾਜਾ ‘‘ਨ ਕਥੇਸ੍ਸਾਮਿ, ਭਨ੍ਤੇ’’ਤਿ ਵਨ੍ਦਿਤ੍ਵਾ ਪਕ੍ਕਾਮਿ. ਪੁਨਦਿਵਸੇਪਿ ਪੁਚ੍ਛਿ, ਤਥਾਪਿਸ੍ਸ ਨ ਕਥੇਸਿ.

ਅਥ ਨਂ ਤਤਿਯਦਿਵਸੇ ਆਗਨ੍ਤ੍ਵਾ ਨਿਸਿਨ੍ਨਂ, ‘‘ਨਾਗਰਾਜ, ਅਜ੍ਜ ਤਤਿਯੋ ਦਿਵਸੋ, ਮਮ ਪੁਚ੍ਛਨ੍ਤਸ੍ਸ ਕਿਮਤ੍ਥਂ ਨ ਕਥੇਸੀ’’ਤਿ ਆਹ. ‘‘ਤੁਮ੍ਹੇ ਅਞ੍ਞਸ੍ਸ ਆਚਿਕ੍ਖਿਸ੍ਸਥਾ’’ਤਿ ਭਯੇਨ, ਭਨ੍ਤੇਤਿ. ਕਸ੍ਸਚਿ ਨ ਕਥੇਸ੍ਸਾਮਿ, ਨਿਬ੍ਭਯੋ ਕਥੇਹੀਤਿ. ‘‘ਤੇਨ ਹਿ, ਭਨ੍ਤੇ, ਅਞ੍ਞਸ੍ਸ ਮਾ ਕਥਯਿਤ੍ਥਾ’’ਤਿ ਪਟਿਞ੍ਞਂ ਗਹੇਤ੍ਵਾ, ‘‘ਭਨ੍ਤੇ, ਮਯਂ ਮਹਨ੍ਤੇ ਮਹਨ੍ਤੇ ਪਾਸਾਣੇ ਗਿਲਿਤ੍ਵਾ ਭਾਰਿਯਾ ਹੁਤ੍ਵਾ ਨਿਪਜ੍ਜਿਤ੍ਵਾ ਸੁਪਣ੍ਣਾਨਂ ਆਗਮਨਕਾਲੇ ਮੁਖਂ ਨਿਬ੍ਬਾਹੇਤ੍ਵਾ ਦਨ੍ਤੇ ਵਿਵਰਿਤ੍ਵਾ ਸੁਪਣ੍ਣੇ ਡਂਸਿਤੁਂ ਅਚ੍ਛਾਮ, ਤੇ ਆਗਨ੍ਤ੍ਵਾ ਅਮ੍ਹਾਕਂ ਸੀਸਂ ਗਣ੍ਹਨ੍ਤਿ, ਤੇਸਂ ਅਮ੍ਹੇ ਗਰੁਭਾਰੇ ਹੁਤ੍ਵਾ ਨਿਪਨ੍ਨੇ ਉਦ੍ਧਰਿਤੁਂ ਵਾਯਮਨ੍ਤਾਨਞ੍ਞੇਵ ਉਦਕਂ ਓਤ੍ਥਰਤਿ. ਤੇ ਸੀਦਨ੍ਤਾ ਅਨ੍ਤੋਉਦਕੇਯੇਵ ਮਰਨ੍ਤਿ, ਇਮਿਨਾ ਕਾਰਣੇਨ ਬਹੂ ਸੁਪਣ੍ਣਾ ਵਿਨਸ੍ਸਨ੍ਤਿ, ਤੇਸਂ ਅਮ੍ਹੇ ਗਣ੍ਹਨ੍ਤਾਨਂ ਕਿਂ ਸੀਸੇਨ ਗਹਿਤੇਨ, ਬਾਲਾ ਨਙ੍ਗੁਟ੍ਠੇ ਗਹੇਤ੍ਵਾ ਅਮ੍ਹੇ ਹੇਟ੍ਠਾਸੀਸਕੇ ਕਤ੍ਵਾ ਗਹਿਤਂ ਗੋਚਰਂ ਮੁਖੇਨ ਛਡ੍ਡਾਪੇਤ੍ਵਾ ਲਹੁਕੇ ਕਤ੍ਵਾ ਗਨ੍ਤੁਂ ਸਕ੍ਕੋਨ੍ਤੀ’’ਤਿ ਸੋ ਅਤ੍ਤਨੋ ਰਹਸ੍ਸਕਾਰਣਂ ਤਸ੍ਸ ਦੁਸ੍ਸੀਲਸ੍ਸ ਕਥੇਸਿ.

ਅਥ ਤਸ੍ਮਿਂ ਪਕ੍ਕਨ੍ਤੇ ਸੁਪਣ੍ਣਰਾਜਾ ਆਗਨ੍ਤ੍ਵਾ ਕਰਮ੍ਪਿਯਅਚੇਲਂ ਵਨ੍ਦਿਤ੍ਵਾ ‘‘ਕਿਂ, ਭਨ੍ਤੇ, ਪੁਚ੍ਛਿਤਂ ਤੇ ਨਾਗਰਾਜਸ੍ਸ ਗੁਯ੍ਹਕਾਰਣ’’ਨ੍ਤਿ ਆਹ. ਸੋ ‘‘ਆਮਾਵੁਸੋ’’ਤਿ ਵਤ੍ਵਾ ਸਬ੍ਬਂ ਤੇਨ ਕਥਿਤਨਿਯਾਮੇਨੇਵ ਕਥੇਸਿ. ਤਂ ਸੁਤ੍ਵਾ ਸੁਪਣ੍ਣੋ ‘‘ਨਾਗਰਾਜੇਨ ਅਯੁਤ੍ਤਂ ਕਤਂ, ਞਾਤੀਨਂ ਨਾਮ ਨਸ੍ਸਨਨਿਯਾਮੋ ਪਰਸ੍ਸ ਨ ਕਥੇਤਬ੍ਬੋ, ਹੋਤੁ, ਅਜ੍ਜੇਵ ਮਯਾ ਸੁਪਣ੍ਣਵਾਤਂ ਕਤ੍ਵਾ ਪਠਮਂ ਏਤਮੇਵ ਗਹੇਤੁਂ ਵਟ੍ਟਤੀ’’ਤਿ ਸੁਪਣ੍ਣਵਾਤਂ ਕਤ੍ਵਾ ਪਣ੍ਡਰਨਾਗਰਾਜਾਨਂ ਨਙ੍ਗੁਟ੍ਠੇ ਗਹੇਤ੍ਵਾ ਹੇਟ੍ਠਾਸੀਸਂ ਕਤ੍ਵਾ ਗਹਿਤਗੋਚਰਂ ਛਡ੍ਡਾਪੇਤ੍ਵਾ ਉਪ੍ਪਤਿਤ੍ਵਾ ਆਕਾਸਂ ਪਕ੍ਖਨ੍ਦਿ. ਪਣ੍ਡਰੋ ਆਕਾਸੇ ਹੇਟ੍ਠਾਸੀਸਕਂ ਓਲਮ੍ਬਨ੍ਤੋ ‘‘ਮਯਾਵ ਮਮ ਦੁਕ੍ਖਂ ਆਭਤ’’ਨ੍ਤਿ ਪਰਿਦੇਵਨ੍ਤੋ ਆਹ –

੨੫੮.

‘‘ਵਿਕਿਣ੍ਣਵਾਚਂ ਅਨਿਗੁਯ੍ਹਮਨ੍ਤਂ, ਅਸਞ੍ਞਤਂ ਅਪਰਿਚਕ੍ਖਿਤਾਰਂ;

ਭਯਂ ਤਮਨ੍ਵੇਤਿ ਸਯਂ ਅਬੋਧਂ, ਨਾਗਂ ਯਥਾ ਪਣ੍ਡਰਕਂ ਸੁਪਣ੍ਣੋ.

੨੫੯.

‘‘ਯੋ ਗੁਯ੍ਹਮਨ੍ਤਂ ਪਰਿਰਕ੍ਖਣੇਯ੍ਯਂ, ਮੋਹਾ ਨਰੋ ਸਂਸਤਿ ਹਾਸਮਾਨੋ;

ਤਂ ਭਿਨ੍ਨਮਨ੍ਤਂ ਭਯਮਨ੍ਵੇਤਿ ਖਿਪ੍ਪਂ, ਨਾਗਂ ਯਥਾ ਪਣ੍ਡਰਕਂ ਸੁਪਣ੍ਣੋ.

੨੬੦.

‘‘ਨਾਨੁਮਿਤ੍ਤੋ ਗਰੁਂ ਅਤ੍ਥਂ, ਗੁਯ੍ਹਂ ਵੇਦਿਤੁਮਰਹਤਿ;

ਸੁਮਿਤ੍ਤੋ ਚ ਅਸਮ੍ਬੁਦ੍ਧਂ, ਸਮ੍ਬੁਦ੍ਧਂ ਵਾ ਅਨਤ੍ਥਵਾ.

੨੬੧.

‘‘ਵਿਸ੍ਸਾਸਮਾਪਜ੍ਜਿਮਹਂ ਅਚੇਲਂ, ਸਮਣੋ ਅਯਂ ਸਮ੍ਮਤੋ ਭਾਵਿਤਤ੍ਤੋ;

ਤਸ੍ਸਾਹਮਕ੍ਖਿਂ ਵਿਵਰਿਂ ਗੁਯ੍ਹਮਤ੍ਥਂ, ਅਤੀਤਮਤ੍ਥੋ ਕਪਣਂ ਰੁਦਾਮਿ.

੨੬੨.

‘‘ਤਸ੍ਸਾਹਂ ਪਰਮਂ ਬ੍ਰਹ੍ਮੇ ਗੁਯ੍ਹਂ, ਵਾਚਂ ਹਿਮਂ ਨਾਸਕ੍ਖਿਂ ਸਂਯਮੇਤੁਂ;

ਤਪ੍ਪਕ੍ਖਤੋ ਹਿ ਭਯਮਾਗਤਂ ਮਮਂ, ਅਤੀਤਮਤ੍ਥੋ ਕਪਣਂ ਰੁਦਾਮਿ.

੨੬੩.

‘‘ਯੋ ਵੇ ਨਰੋ ਸੁਹਦਂ ਮਞ੍ਞਮਾਨੋ, ਗੁਯ੍ਹਮਤ੍ਥਂ ਸਂਸਤਿ ਦੁਕ੍ਕੁਲੀਨੇ;

ਦੋਸਾ ਭਯਾ ਅਥਵਾ ਰਾਗਰਤ੍ਤਾ, ਪਲ੍ਲਤ੍ਥਿਤੋ ਬਾਲੋ ਅਸਂਸਯਂ ਸੋ.

੨੬੪.

‘‘ਤਿਰੋਕ੍ਖਵਾਚੋ ਅਸਤਂ ਪਵਿਟ੍ਠੋ, ਯੋ ਸਙ੍ਗਤੀਸੁ ਮੁਦੀਰੇਤਿ ਵਾਕ੍ਯਂ;

ਆਸੀਵਿਸੋ ਦੁਮ੍ਮੁਖੋਤ੍ਯਾਹੁ ਤਂ ਨਰਂ, ਆਰਾ ਆਰਾ ਸਂਯਮੇ ਤਾਦਿਸਮ੍ਹਾ.

੨੬੫.

‘‘ਅਨ੍ਨਂ ਪਾਨਂ ਕਾਸਿਕਚਨ੍ਦਨਞ੍ਚ, ਮਨਾਪਿਤ੍ਥਿਯੋ ਮਾਲਮੁਚ੍ਛਾਦਨਞ੍ਚ;

ਓਹਾਯ ਗਚ੍ਛਾਮਸੇ ਸਬ੍ਬਕਾਮੇ, ਸੁਪਣ੍ਣ ਪਾਣੂਪਗਤਾਵ ਤ੍ਯਮ੍ਹਾ’’ਤਿ.

ਤਤ੍ਥ ਵਿਕਿਣ੍ਣਵਾਚਨ੍ਤਿ ਪਤ੍ਥਟਵਚਨਂ. ਅਨਿਗੁਯ੍ਹਮਨ੍ਤਨ੍ਤਿ ਅਪ੍ਪਟਿਚ੍ਛਨ੍ਨਮਨ੍ਤਂ. ਅਸਞ੍ਞਤਨ੍ਤਿ ਕਾਯਦ੍ਵਾਰਾਦੀਨਿ ਰਕ੍ਖਿਤੁਂ ਅਸਕ੍ਕੋਨ੍ਤਂ. ਅਪਰਿਚਕ੍ਖਿਤਾਰਨ੍ਤਿ ‘‘ਅਯਂ ਮਯਾ ਕਥਿਤਮਨ੍ਤਂ ਰਕ੍ਖਿਤੁਂ ਸਕ੍ਖਿਸ੍ਸਤਿ, ਨ ਸਕ੍ਖਿਸ੍ਸਤੀ’’ਤਿ ਪੁਗ੍ਗਲਂ ਓਲੋਕੇਤੁਂ ਉਪਪਰਿਕ੍ਖਿਤੁਂ ਅਸਕ੍ਕੋਨ੍ਤਂ. ਭਯਂ ਤਮਨ੍ਵੇਤੀਤਿ ਤਂ ਇਮੇਹਿ ਚਤੂਹਿ ਅਙ੍ਗੇਹਿ ਸਮਨ੍ਨਾਗਤਂ ਅਬੋਧਂ ਦੁਪ੍ਪਞ੍ਞਂ ਪੁਗ੍ਗਲਂ ਸਯਂਕਤਮੇਵ ਭਯਂ ਅਨ੍ਵੇਤਿ, ਯਥਾ ਮਂ ਪਣ੍ਡਰਕਨਾਗਂ ਸੁਪਣ੍ਣੋ ਅਨ੍ਵਾਗਤੋਤਿ. ਸਂਸਤਿ ਹਾਸਮਾਨੋਤਿ ਰਕ੍ਖਿਤੁਂ ਅਸਮਤ੍ਥਸ੍ਸ ਪਾਪਪੁਰਿਸਸ੍ਸ ਹਾਸਮਾਨੋ ਕਥੇਤਿ. ਨਾਨੁਮਿਤ੍ਤੋਤਿ ਅਨੁਵਤ੍ਤਨਮਤ੍ਤੇਨ ਯੋ ਮਿਤ੍ਤੋ, ਨ ਹਦਯੇਨ, ਸੋ ਗੁਯ੍ਹਂ ਅਤ੍ਥਂ ਜਾਨਿਤੁਂ ਨਾਰਹਤੀਤਿ ਪਰਿਦੇਵਤਿ. ਅਸਮ੍ਬੁਦ੍ਧਨ੍ਤਿ ਅਸਮ੍ਬੁਦ੍ਧਨ੍ਤੋ ਅਜਾਨਨ੍ਤੋ, ਅਪ੍ਪਞ੍ਞੋਤਿ ਅਤ੍ਥੋ. ਸਮ੍ਬੁਦ੍ਧਨ੍ਤਿ ਸਮ੍ਬੁਦ੍ਧਨ੍ਤੋ ਜਾਨਨ੍ਤੋ, ਸਪ੍ਪਞ੍ਞੋਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ‘‘ਯੋਪਿ ਸੁਹਦਯੋ ਮਿਤ੍ਤੋ ਵਾ ਅਮਿਤ੍ਤੋ ਵਾ ਅਪ੍ਪਞ੍ਞੋ ਸਪ੍ਪਞ੍ਞੋਪਿ ਵਾ ਯੋ ਅਨਤ੍ਥਵਾ ਅਨਤ੍ਥਚਰੋ, ਸੋਪਿ ਗੁਯ੍ਹਂ ਵੇਦਿਤੁਂ ਨਾਰਹਤੇ’’ਤਿ.

ਸਮਣੋ ਅਯਨ੍ਤਿ ਅਯਂ ਸਮਣੋਤਿ ਚ ਲੋਕਸਮ੍ਮਤੋਤਿ ਚ ਭਾਵਿਤਤ੍ਤੋਤਿ ਚ ਮਞ੍ਞਮਾਨੋ ਅਹਂ ਏਤਸ੍ਮਿਂ ਵਿਸ੍ਸਾਸਮਾਪਜ੍ਜਿਂ. ਅਕ੍ਖਿਨ੍ਤਿ ਕਥੇਸਿਂ. ਅਤੀਤਮਤ੍ਥੋਤਿ ਅਤੀਤਤ੍ਥੋ, ਅਤਿਕ੍ਕਨ੍ਤਤ੍ਥੋ ਹੁਤ੍ਵਾ ਇਦਾਨਿ ਕਪਣਂ ਰੁਦਾਮੀਤਿ ਪਰਿਦੇਵਤਿ. ਤਸ੍ਸਾਤਿ ਤਸ੍ਸ ਅਚੇਲਕਸ੍ਸ. ਬ੍ਰਹ੍ਮੇਤਿ ਸੁਪਣ੍ਣਂ ਆਲਪਤਿ. ਸਂਯਮੇਤੁਨ੍ਤਿ ਇਮਂ ਗੁਯ੍ਹਵਾਚਂ ਰਹਸ੍ਸਕਾਰਣਂ ਰਕ੍ਖਿਤੁਂ ਨਾਸਕ੍ਖਿਂ. ਤਪ੍ਪਕ੍ਖਤੋ ਹੀਤਿ ਇਦਾਨਿ ਇਦਂ ਭਯਂ ਮਮ ਤਸ੍ਸ ਅਚੇਲਕਸ੍ਸ ਪਕ੍ਖਤੋ ਕੋਟ੍ਠਾਸਤੋ ਸਨ੍ਤਿਕਾ ਆਗਤਂ, ਇਤਿ ਅਤੀਤਤ੍ਥੋ ਕਪਣਂ ਰੁਦਾਮੀਤਿ. ਸੁਹਦਨ੍ਤਿ ‘‘ਸੁਹਦੋ ਮਮ ਅਯ’’ਨ੍ਤਿ ਮਞ੍ਞਮਾਨੋ. ਦੁਕ੍ਕੁਲੀਨੇਤਿ ਅਕੁਲਜੇ ਨੀਚੇ. ਦੋਸਾਤਿ ਏਤੇਹਿ ਦੋਸਾਦੀਹਿ ਕਾਰਣੇਹਿ ਯੋ ਏਵਰੂਪਂ ਗੁਯ੍ਹਂ ਸਂਸਤਿ, ਸੋ ਬਾਲੋ ਅਸਂਸਯਂ ਪਲ੍ਲਤ੍ਥਿਤੋ ਪਰਿਵਤ੍ਤੇਤ੍ਵਾ ਪਾਪਿਤੋ, ਹਤੋਯੇਵ ਨਾਮਾਤਿ ਅਤ੍ਥੋ.

ਤਿਰੋਕ੍ਖਵਾਚੋਤਿ ਅਤ੍ਤਨੋ ਯਂ ਵਾਚਂ ਕਥੇਤੁਕਾਮੋ, ਤਸ੍ਸਾ ਤਿਰੋਕ੍ਖਕਤਤ੍ਤਾ ਪਟਿਚ੍ਛਨ੍ਨਵਾਚੋ. ਅਸਤਂ ਪਵਿਟ੍ਠੋਤਿ ਅਸਪ੍ਪੁਰਿਸਾਨਂ ਅਨ੍ਤਰਂ ਪਵਿਟ੍ਠੋ ਅਸਪ੍ਪੁਰਿਸੇਸੁ ਪਰਿਯਾਪਨ੍ਨੋ. ਸਙ੍ਗਤੀਸੁ ਮੁਦੀਰੇਤੀਤਿ ਯੋ ਏਵਰੂਪੋ ਪਰੇਸਂ ਰਹਸ੍ਸਂ ਸੁਤ੍ਵਾਵ ਪਰਿਸਮਜ੍ਝੇਸੁ ‘‘ਅਸੁਕੇਨ ਅਸੁਕਂ ਨਾਮ ਕਤਂ ਵਾ ਵੁਤ੍ਤਂ ਵਾ’’ਤਿ ਵਾਕ੍ਯਂ ਉਦੀਰੇਤਿ, ਤਂ ਨਰਂ ‘‘ਆਸੀਵਿਸੋ ਦੁਮ੍ਮੁਖੋ ਪੂਤਿਮੁਖੋ’’ਤਿ ਆਹੁ, ਤਾਦਿਸਮ੍ਹਾ ਪੁਰਿਸਾ ਆਰਾ ਆਰਾ ਸਂਯਮੇ, ਦੂਰਤੋ ਦੂਰਤੋਵ ਵਿਰਮੇਯ੍ਯ, ਪਰਿਵਜ੍ਜੇਯ੍ਯ ਨਨ੍ਤਿ ਅਤ੍ਥੋ. ਮਾਲਮੁਚ੍ਛਾਦਨਞ੍ਚਾਤਿ ਮਾਲਞ੍ਚ ਦਿਬ੍ਬਂ ਚਤੁਜ੍ਜਾਤਿਯਗਨ੍ਧਞ੍ਚ ਉਚ੍ਛਾਦਨਞ੍ਚ. ਓਹਾਯਾਤਿ ਏਤੇ ਦਿਬ੍ਬਅਨ੍ਨਾਦਯੋ ਸਬ੍ਬਕਾਮੇ ਅਜ੍ਜ ਮਯਂ ਓਹਾਯ ਛਡ੍ਡੇਤ੍ਵਾ ਗਮਿਸ੍ਸਾਮ. ਸੁਪਣ੍ਣ, ਪਾਣੂਪਗਤਾਵ ਤ੍ਯਮ੍ਹਾਤਿ, ਭੋ ਸੁਪਣ੍ਣ, ਪਾਣੇਹਿ ਉਪਗਤਾਵ ਤੇ ਅਮ੍ਹਾ, ਸਰਣਂ ਨੋ ਹੋਹੀਤਿ.

ਏਵਂ ਪਣ੍ਡਰਕੋ ਆਕਾਸੇ ਹੇਟ੍ਠਾਸੀਸਕੋ ਓਲਮ੍ਬਨ੍ਤੋ ਅਟ੍ਠਹਿ ਗਾਥਾਹਿ ਪਰਿਦੇਵਿ. ਸੁਪਣ੍ਣੋ ਤਸ੍ਸ ਪਰਿਦੇਵਨਸਦ੍ਦਂ ਸੁਤ੍ਵਾ, ‘‘ਨਾਗਰਾਜ ਅਤ੍ਤਨੋ ਰਹਸ੍ਸਂ ਅਚੇਲਕਸ੍ਸ ਕਥੇਤ੍ਵਾ ਇਦਾਨਿ ਕਿਮਤ੍ਥਂ ਪਰਿਦੇਵਸੀ’’ਤਿ ਤਂ ਗਰਹਿਤ੍ਵਾ ਗਾਥਮਾਹ –

੨੬੬.

‘‘ਕੋ ਨੀਧ ਤਿਣ੍ਣਂ ਗਰਹਂ ਉਪੇਤਿ, ਅਸ੍ਮਿਂਧ ਲੋਕੇ ਪਾਣਭੂ ਨਾਗਰਾਜ;

ਸਮਣੋ ਸੁਪਣ੍ਣੋ ਅਥਵਾ ਤ੍ਵਮੇਵ, ਕਿਂਕਾਰਣਾ ਪਣ੍ਡਰਕਗ੍ਗਹੀਤੋ’’ਤਿ.

ਤਤ੍ਥ ਕੋ ਨੀਧਾਤਿ ਇਧ ਅਮ੍ਹੇਸੁ ਤੀਸੁ ਜਨੇਸੁ ਕੋ ਨੁ. ਅਸ੍ਮਿਂਧਾਤਿ ਏਤ੍ਥ ਇਧਾਤਿ ਨਿਪਾਤਮਤ੍ਤਂ, ਅਸ੍ਮਿਂ ਲੋਕੇਤਿ ਅਤ੍ਥੋ. ਪਾਣਭੂਤਿ ਪਾਣਭੂਤੋ. ਅਥਵਾ ਤ੍ਵਮੇਵਾਤਿ ਉਦਾਹੁ ਤ੍ਵਂਯੇਵ. ਤਤ੍ਥ ਸਮਣਂ ਤਾਵ ਮਾ ਗਰਹ, ਸੋ ਹਿ ਉਪਾਯੇਨ ਤਂ ਰਹਸ੍ਸਂ ਪੁਚ੍ਛਿ. ਸੁਪਣ੍ਣਮ੍ਪਿ ਮਾ ਗਰਹ, ਅਹਞ੍ਹਿ ਤਵ ਪਚ੍ਚਤ੍ਥਿਕੋਵ. ਪਣ੍ਡਰਕਗ੍ਗਹੀਤੋਤਿ, ਸਮ੍ਮ ਪਣ੍ਡਰਕ, ‘‘ਅਹਂ ਕਿਂਕਾਰਣਾ ਸੁਪਣ੍ਣੇਨ ਗਹਿਤੋ’’ਤਿ ਚਿਨ੍ਤੇਤ੍ਵਾ ਚ ਪਨ ਅਤ੍ਤਾਨਮੇਵ ਗਰਹ, ਤਯਾ ਹਿ ਰਹਸ੍ਸਂ ਕਥੇਨ੍ਤੇਨ ਅਤ੍ਤਨਾਵ ਅਤ੍ਤਨੋ ਅਨਤ੍ਥੋ ਕਤੋਤਿ ਅਯਮੇਤ੍ਥ ਅਧਿਪ੍ਪਾਯੋ.

ਤਂ ਸੁਤ੍ਵਾ ਪਣ੍ਡਰਕੋ ਇਤਰਂ ਗਾਥਮਾਹ –

੨੬੭.

‘‘ਸਮਣੋਤਿ ਮੇ ਸਮ੍ਮਤਤ੍ਤੋ ਅਹੋਸਿ, ਪਿਯੋ ਚ ਮੇ ਮਨਸਾ ਭਾਵਿਤਤ੍ਤੋ;

ਤਸ੍ਸਾਹਮਕ੍ਖਿਂ ਵਿਵਰਿਂ ਗੁਯ੍ਹਮਤ੍ਥਂ, ਅਤੀਤਮਤ੍ਥੋ ਕਪਣਂ ਰੁਦਾਮੀ’’ਤਿ.

ਤਤ੍ਥ ਸਮ੍ਮਤਤ੍ਤੋਤਿ ਸੋ ਸਮਣੋ ਮਯ੍ਹਂ ‘‘ਸਪ੍ਪੁਰਿਸੋ ਅਯ’’ਨ੍ਤਿ ਸਮ੍ਮਤਭਾਵੋ ਅਹੋਸਿ. ਭਾਵਿਤਤ੍ਤੋਤਿ ਸਮ੍ਭਾਵਿਤਭਾਵੋ ਚ ਮੇ ਅਹੋਸੀਤਿ.

ਤਤੋ ਸੁਪਣ੍ਣੋ ਚਤਸ੍ਸੋ ਗਾਥਾ ਅਭਾਸਿ –

੨੬੮.

‘‘ਨ ਚਤ੍ਥਿ ਸਤ੍ਤੋ ਅਮਰੋ ਪਥਬ੍ਯਾ, ਪਞ੍ਞਾਵਿਧਾ ਨਤ੍ਥਿ ਨ ਨਿਨ੍ਦਿਤਬ੍ਬਾ;

ਸਚ੍ਚੇਨ ਧਮ੍ਮੇਨ ਧਿਤਿਯਾ ਦਮੇਨ, ਅਲਬ੍ਭਮਬ੍ਯਾਹਰਤੀ ਨਰੋ ਇਧ.

੨੬੯.

‘‘ਮਾਤਾ ਪਿਤਾ ਪਰਮਾ ਬਨ੍ਧਵਾਨਂ, ਨਾਸ੍ਸ ਤਤਿਯੋ ਅਨੁਕਮ੍ਪਕਤ੍ਥਿ;

ਤੇਸਮ੍ਪਿ ਗੁਯ੍ਹਂ ਪਰਮਂ ਨ ਸਂਸੇ, ਮਨ੍ਤਸ੍ਸ ਭੇਦਂ ਪਰਿਸਙ੍ਕਮਾਨੋ.

੨੭੦.

‘‘ਮਾਤਾ ਪਿਤਾ ਭਗਿਨੀ ਭਾਤਰੋ ਚ, ਸਹਾਯਾ ਵਾ ਯਸ੍ਸ ਹੋਨ੍ਤਿ ਸਪਕ੍ਖਾ;

ਤੇਸਮ੍ਪਿ ਗੁਯ੍ਹਂ ਪਰਮਂ ਨ ਸਂਸੇ, ਮਨ੍ਤਸ੍ਸ ਭੇਦਂ ਪਰਿਸਙ੍ਕਮਾਨੋ.

੨੭੧.

‘‘ਭਰਿਯਾ ਚੇ ਪੁਰਿਸਂ ਵਜ੍ਜਾ, ਕੋਮਾਰੀ ਪਿਯਭਾਣਿਨੀ;

ਪੁਤ੍ਤਰੂਪਯਸੂਪੇਤਾ, ਞਾਤਿਸਙ੍ਘਪੁਰਕ੍ਖਤਾ;

ਤਸ੍ਸਾਪਿ ਗੁਯ੍ਹਂ ਪਰਮਂ ਨ ਸਂਸੇ, ਮਨ੍ਤਸ੍ਸ ਭੇਦਂ ਪਰਿਸਙ੍ਕਮਾਨੋ’’ਤਿ.

ਤਤ੍ਥ ਅਮਰੋਤਿ ਅਮਰਣਸਭਾਵੋ ਸਤ੍ਤੋ ਨਾਮ ਨਤ੍ਥਿ. ਪਞ੍ਞਾਵਿਧਾ ਨਤ੍ਥੀਤਿ ਨ-ਕਾਰੋ ਪਦਸਨ੍ਧਿਕਰੋ, ਪਞ੍ਞਾਵਿਧਾ ਅਤ੍ਥੀਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਨਾਗਰਾਜ, ਲੋਕੇ ਅਮਰੋਪਿ ਨਤ੍ਥਿ, ਪਞ੍ਞਾਵਿਧਾਪਿ ਅਤ੍ਥਿ, ਸਾ ਅਞ੍ਞੇਸਂ ਪਞ੍ਞਾਕੋਟ੍ਠਾਸਸਙ੍ਖਾਤਾ ਪਞ੍ਞਾਵਿਧਾ ਅਤ੍ਤਨੋ ਜੀਵਿਤਹੇਤੁ ਨ ਨਿਨ੍ਦਿਤਬ੍ਬਾਤਿ. ਅਥ ਵਾ ਪਞ੍ਞਾਵਿਧਾਤਿ ਪਞ੍ਞਾਸਦਿਸਾ ਨ ਨਿਨ੍ਦਿਤਬ੍ਬਾ ਨਾਮ ਅਞ੍ਞਾ ਧਮ੍ਮਜਾਤਿ ਨਤ੍ਥਿ, ਤਂ ਕਸ੍ਮਾ ਨਿਨ੍ਦਸੀਤਿ. ਯੇਸਂ ਪਨ ‘‘ਪਞ੍ਞਾਵਿਧਾਨਮ੍ਪਿ ਨ ਨਿਨ੍ਦਿਤਬ੍ਬ’’ਨ੍ਤਿਪਿ ਪਾਠੋ, ਤੇਸਂ ਉਜੁਕਮੇਵ. ਸਚ੍ਚੇਨਾਤਿਆਦੀਸੁ ਵਚੀਸਚ੍ਚੇਨ ਚ ਸੁਚਰਿਤਧਮ੍ਮੇਨ ਚ ਪਞ੍ਞਾਸਙ੍ਖਾਤਾਯ ਧਿਤਿਯਾ ਚ ਇਨ੍ਦ੍ਰਿਯਦਮੇਨ ਚ ਅਲਬ੍ਭਂ ਦੁਲ੍ਲਭਂ ਅਟ੍ਠਸਮਾਪਤ੍ਤਿਮਗ੍ਗਫਲਨਿਬ੍ਬਾਨਸਙ੍ਖਾਤਮ੍ਪਿ ਵਿਸੇਸਂ ਅਬ੍ਯਾਹਰਤਿ ਆਵਹਤਿ ਤਂ ਨਿਪ੍ਫਾਦੇਤਿ ਨਰੋ ਇਧ, ਤਸ੍ਮਾ ਨਾਰਹਸਿ ਅਚੇਲਂ ਨਿਨ੍ਦਿਤੁਂ, ਅਤ੍ਤਾਨਮੇਵ ਗਰਹ. ਅਚੇਲੇਨ ਹਿ ਅਤ੍ਤਨੋ ਪਞ੍ਞਵਨ੍ਤਤਾਯ ਉਪਾਯਕੁਸਲਤਾਯ ਚ ਵਞ੍ਚੇਤ੍ਵਾ ਤ੍ਵਂ ਰਹਸ੍ਸਂ ਗੁਯ੍ਹਂ ਮਨ੍ਤਂ ਪੁਚ੍ਛਿਤੋਤਿ ਅਤ੍ਥੋ.

ਪਰਮਾਤਿ ਏਤੇ ਉਭੋ ਬਨ੍ਧਵਾਨਂ ਉਤ੍ਤਮਬਨ੍ਧਵਾ ਨਾਮ. ਨਾਸ੍ਸ ਤਤਿਯੋਤਿ ਅਸ੍ਸ ਪੁਗ੍ਗਲਸ੍ਸ ਮਾਤਾਪਿਤੂਹਿ ਅਞ੍ਞੋ ਤਤਿਯੋ ਸਤ੍ਤੋ ਅਨੁਕਮ੍ਪਕੋ ਨਾਮ ਨਤ੍ਥਿ, ਮਨ੍ਤਸ੍ਸ ਭੇਦਂ ਪਰਿਸਙ੍ਕਮਾਨੋ ਪਣ੍ਡਿਤੋ ਤੇਸਂ ਮਾਤਾਪਿਤੂਨਮ੍ਪਿ ਪਰਮਂ ਗੁਯ੍ਹਂ ਨ ਸਂਸੇਯ੍ਯ, ਤ੍ਵਂ ਪਨ ਮਾਤਾਪਿਤੂਨਮ੍ਪਿ ਅਕਥੇਤਬ੍ਬਂ ਅਚੇਲਕਸ੍ਸ ਕਥੇਸੀਤਿ ਅਤ੍ਥੋ. ਸਹਾਯਾ ਵਾਤਿ ਸੁਹਦਯਮਿਤ੍ਤਾ ਵਾ. ਸਪਕ੍ਖਾਤਿ ਪੇਤ੍ਤੇਯ੍ਯਮਾਤੁਲਪਿਤੁਚ੍ਛਾਦਯੋ ਸਮਾਨਪਕ੍ਖਾ ਞਾਤਯੋ. ਤੇਸਮ੍ਪੀਤਿ ਏਤੇਸਮ੍ਪਿ ਞਾਤਿਮਿਤ੍ਤਾਨਂ ਨ ਕਥੇਯ੍ਯ, ਤ੍ਵਂ ਪਨ ਅਚੇਲਕਸ੍ਸ ਕਥੇਸਿ, ਅਤ੍ਤਨੋਵ ਕੁਜ੍ਝਸ੍ਸੂਤਿ ਦੀਪੇਤਿ. ਭਰਿਯਾ ਚੇਤਿ ਕੋਮਾਰੀ ਪਿਯਭਾਣਿਨੀ ਪੁਤ੍ਤੇਹਿ ਚ ਰੂਪੇਨ ਚ ਯਸੇਨ ਚ ਉਪੇਤਾ ਏਵਰੂਪਾ ਭਰਿਯਾਪਿ ਚੇ ‘‘ਆਚਿਕ੍ਖਾਹਿ ਮੇ ਤਵ ਗੁਯ੍ਹ’’ਨ੍ਤਿ ਵਦੇਯ੍ਯ, ਤਸ੍ਸਾਪਿ ਨ ਸਂਸੇਯ੍ਯ.

ਤਤੋ ਪਰਾ –

੨੭੨.

‘‘ਨ ਗੁਯ੍ਹਮਤ੍ਥਂ ਵਿਵਰੇਯ੍ਯ, ਰਕ੍ਖੇਯ੍ਯ ਨਂ ਯਥਾ ਨਿਧਿਂ;

ਨ ਹਿ ਪਾਤੁਕਤੋ ਸਾਧੁ, ਗੁਯ੍ਹੋ ਅਤ੍ਥੋ ਪਜਾਨਤਾ.

੨੭੩.

‘‘ਥਿਯਾ ਗੁਯ੍ਹਂ ਨ ਸਂਸੇਯ੍ਯ, ਅਮਿਤ੍ਤਸ੍ਸ ਚ ਪਣ੍ਡਿਤੋ;

ਯੋ ਚਾਮਿਸੇਨ ਸਂਹੀਰੋ, ਹਦਯਤ੍ਥੇਨੋ ਚ ਯੋ ਨਰੋ.

੨੭੪.

‘‘ਗੁਯ੍ਹਮਤ੍ਥਂ ਅਸਮ੍ਬੁਦ੍ਧਂ, ਸਮ੍ਬੋਧਯਤਿ ਯੋ ਨਰੋ;

ਮਨ੍ਤਭੇਦਭਯਾ ਤਸ੍ਸ, ਦਾਸਭੂਤੋ ਤਿਤਿਕ੍ਖਤਿ.

੨੭੫.

‘‘ਯਾਵਨ੍ਤੋ ਪੁਰਿਸਸ੍ਸਤ੍ਥਂ, ਗੁਯ੍ਹਂ ਜਾਨਨ੍ਤਿ ਮਨ੍ਤਿਨਂ;

ਤਾਵਨ੍ਤੋ ਤਸ੍ਸ ਉਬ੍ਬੇਗਾ, ਤਸ੍ਮਾ ਗੁਯ੍ਹਂ ਨ ਵਿਸ੍ਸਜੇ;

੨੭੬.

‘‘ਵਿਵਿਚ੍ਚ ਭਾਸੇਯ੍ਯ ਦਿਵਾ ਰਹਸ੍ਸਂ, ਰਤ੍ਤਿਂ ਗਿਰਂ ਨਾਤਿਵੇਲਂ ਪਮੁਞ੍ਚੇ;

ਉਪਸ੍ਸੁਤਿਕਾ ਹਿ ਸੁਣਨ੍ਤਿ ਮਨ੍ਤਂ, ਤਸ੍ਮਾ ਮਨ੍ਤੋ ਖਿਪ੍ਪਮੁਪੇਤਿ ਭੇਦ’’ਨ੍ਤਿ. –

ਪਞ੍ਚ ਗਾਥਾ ਉਮਙ੍ਗਜਾਤਕੇ ਪਞ੍ਚਪਣ੍ਡਿਤਪਞ੍ਹੇ ਆਵਿ ਭਵਿਸ੍ਸਨ੍ਤਿ.

ਤਤੋ ਪਰਾਸੁ –

੨੭੭.

‘‘ਯਥਾਪਿ ਅਸ੍ਸ ਨਗਰਂ ਮਹਨ੍ਤਂ, ਅਦ੍ਵਾਰਕਂ ਆਯਸਂ ਭਦ੍ਦਸਾਲਂ;

ਸਮਨ੍ਤਖਾਤਾਪਰਿਖਾਉਪੇਤਂ, ਏਵਮ੍ਪਿ ਮੇ ਤੇ ਇਧ ਗੁਯ੍ਹਮਨ੍ਤਾ.

੨੭੮.

‘‘ਯੇ ਗੁਯ੍ਹਮਨ੍ਤਾ ਅਵਿਕਿਣ੍ਣਵਾਚਾ, ਦਲ਼੍ਹਾ ਸਦਤ੍ਥੇਸੁ ਨਰਾ ਦੁਜਿਵ੍ਹ;

ਆਰਾ ਅਮਿਤ੍ਤਾ ਬ੍ਯਵਜਨ੍ਤਿ ਤੇਹਿ, ਆਸੀਵਿਸਾ ਵਾ ਰਿਵ ਸਤ੍ਤੁਸਙ੍ਘਾ’’ਤਿ. –

ਦ੍ਵੀਸੁ ਗਾਥਾਸੁ ਭਦ੍ਦਸਾਲਨ੍ਤਿ ਆਪਣਾਦੀਹਿ ਸਾਲਾਹਿ ਸਮ੍ਪਨ੍ਨਂ. ਸਮਨ੍ਤਖਾਤਾਪਰਿਖਾਉਪੇਤਨ੍ਤਿ ਸਮਨ੍ਤਖਾਤਾਹਿ ਤੀਹਿ ਪਰਿਖਾਹਿ ਉਪਗਤਂ. ਏਵਮ੍ਪਿ ਮੇਤਿ ਏਵਮ੍ਪਿ ਮਯ੍ਹਂ ਤੇ ਪੁਰਿਸਾ ਖਾਯਨ੍ਤਿ. ਕਤਰੇ? ਯੇ ਇਧ ਗੁਯ੍ਹਮਨ੍ਤਾ. ਇਦਂ ਵੁਤ੍ਤਂ ਹੋਤਿ – ਯਥਾ ਅਦ੍ਵਾਰਕਸ੍ਸ ਅਯੋਮਯਨਗਰਸ੍ਸ ਮਨੁਸ੍ਸਾਨਂ ਉਪਭੋਗਪਰਿਭੋਗੋ ਅਨ੍ਤੋਵ ਹੋਤਿ, ਨ ਅਬ੍ਭਨ੍ਤਰਿਮਾ ਬਹਿ ਨਿਕ੍ਖਮਨ੍ਤਿ, ਨ ਬਾਹਿਰਾ ਅਨ੍ਤੋ ਪਵਿਸਨ੍ਤਿ, ਅਪਰਾਪਰਂ ਸਞ੍ਚਾਰੋ ਛਿਜ੍ਜਤਿ, ਗੁਯ੍ਹਮਨ੍ਤਾ ਪੁਰਿਸਾ ਏਵਰੂਪਾ ਹੋਨ੍ਤਿ, ਅਤ੍ਤਨੋ ਗੁਯ੍ਹਂ ਅਤ੍ਤਨੋ ਅਨ੍ਤੋਯੇਵ ਜੀਰਾਪੇਨ੍ਤਿ, ਨ ਅਞ੍ਞਸ੍ਸ ਕਥੇਨ੍ਤੀਤਿ. ਦਲ਼੍ਹਾ ਸਦਤ੍ਥੇਸੂਤਿ ਅਤ੍ਤਨੋ ਅਤ੍ਥੇਸੁ ਥਿਰਾ. ਦੁਜਿਵ੍ਹਾਤਿ ਪਣ੍ਡਰਕਨਾਗਂ ਆਲਪਤਿ. ਬ੍ਯਵਜਨ੍ਤੀਤਿ ਪਟਿਕ੍ਕਮਨ੍ਤਿ. ਆਸੀਵਿਸਾ ਵਾ ਰਿਵ ਸਤ੍ਤੁਸਙ੍ਘਾਤਿ ਏਤ੍ਥ ਵਾਤਿ ਨਿਪਾਤਮਤ੍ਤਂ, ਆਸੀਵਿਸਾ ਸਤ੍ਤੁਸਙ੍ਘਾ ਰਿਵਾਤਿ ਅਤ੍ਥੋ. ਯਥਾ ਆਸੀਵਿਸਤੋ ਸਤ੍ਤੁਸਙ੍ਘਾ ਜੀਵਿਤੁਕਾਮਾ ਮਨੁਸ੍ਸਾ ਆਰਾ ਪਟਿਕ੍ਕਮਨ੍ਤਿ, ਏਵਂ ਤੇਹਿ ਗੁਯ੍ਹਮਨ੍ਤੇਹਿ ਨਰੇਹਿ ਆਰਾ ਅਮਿਤ੍ਤਾ ਪਟਿਕ੍ਕਮਨ੍ਤਿ, ਉਪਗਨ੍ਤੁਂ ਓਕਾਸਂ ਨ ਲਭਨ੍ਤੀਤਿ ਵੁਤ੍ਤਂ ਹੋਤਿ.

ਏਵਂ ਸੁਪਣ੍ਣੇਨ ਧਮ੍ਮੇ ਕਥਿਤੇ ਪਣ੍ਡਰਕੋ ਆਹ –

੨੭੯.

‘‘ਹਿਤ੍ਵਾ ਘਰਂ ਪਬ੍ਬਜਿਤੋ ਅਚੇਲੋ, ਨਗ੍ਗੋ ਮੁਣ੍ਡੋ ਚਰਤਿ ਘਾਸਹੇਤੁ;

ਤਮ੍ਹਿ ਨੁ ਖੋ ਵਿਵਰਿਂ ਗੁਯ੍ਹਮਤ੍ਥਂ, ਅਤ੍ਥਾ ਚ ਧਮ੍ਮਾ ਚ ਅਪਗ੍ਗਤਾਮ੍ਹਾ.

੨੮੦.

‘‘ਕਥਂਕਰੋ ਹੋਤਿ ਸੁਪਣ੍ਣਰਾਜ, ਕਿਂਸੀਲੋ ਕੇਨ ਵਤੇਨ ਵਤ੍ਤਂ;

ਸਮਣੋ ਚਰਂ ਹਿਤ੍ਵਾ ਮਮਾਯਿਤਾਨਿ, ਕਥਂਕਰੋ ਸਗ੍ਗਮੁਪੇਤਿ ਠਾਨ’’ਨ੍ਤਿ.

ਤਤ੍ਥ ਘਾਸਹੇਤੂਤਿ ਨਿਸ੍ਸਿਰਿਕੋ ਕੁਚ੍ਛਿਪੂਰਣਤ੍ਥਾਯ ਖਾਦਨੀਯਭੋਜਨੀਯੇ ਪਰਿਯੇਸਨ੍ਤੋ ਚਰਤਿ. ਅਪਗ੍ਗਤਾਮ੍ਹਾਤਿ ਅਪਗਤਾ ਪਰਿਹੀਨਾਮ੍ਹਾ. ਕਥਂਕਰੋਤਿ ਇਦਂ ਨਾਗਰਾਜਾ ਤਸ੍ਸ ਨਗ੍ਗਸ੍ਸ ਸਮਣਭਾਵਂ ਞਤ੍ਵਾ ਸਮਣਪਟਿਪਤ੍ਤਿਂ ਪੁਚ੍ਛਨ੍ਤੋ ਆਹ. ਤਤ੍ਥ ਕਿਂਸੀਲੋਤਿ ਕਤਰੇਨ ਆਚਾਰੇਨ ਸਮਨ੍ਨਾਗਤੋ. ਕੇਨ ਵਤੇਨਾਤਿ ਕਤਰੇਨ ਵਤਸਮਾਦਾਨੇਨ ਵਤ੍ਤਨ੍ਤੋ. ਸਮਣੋ ਚਰਨ੍ਤਿ ਪਬ੍ਬਜ੍ਜਾਯ ਚਰਨ੍ਤੋ ਤਣ੍ਹਾਮਮਾਯਿਤਾਨਿ ਹਿਤ੍ਵਾ ਕਥਂ ਸਮਿਤਪਾਪਸਮਣੋ ਨਾਮ ਹੋਤਿ. ਸਗ੍ਗਨ੍ਤਿ ਕਥਂ ਕਰੋਨ੍ਤੋ ਚ ਸੁਟ੍ਠੁ ਅਗ੍ਗਂ ਦੇਵਨਗਰਂ ਸੋ ਸਮਣੋ ਉਪੇਤੀਤਿ.

ਸੁਪਣ੍ਣੋ ਆਹ –

੨੮੧.

‘‘ਹਿਰਿਯਾ ਤਿਤਿਕ੍ਖਾਯ ਦਮੇਨੁਪੇਤੋ, ਅਕ੍ਕੋਧਨੋ ਪੇਸੁਣਿਯਂ ਪਹਾਯ;

ਸਮਣੋ ਚਰਂ ਹਿਤ੍ਵਾ ਮਮਾਯਿਤਾਨਿ, ਏਵਂਕਰੋ ਸਗ੍ਗਮੁਪੇਤਿ ਠਾਨ’’ਨ੍ਤਿ.

ਤਤ੍ਥ ਹਿਰਿਯਾਤਿ, ਸਮ੍ਮ ਨਾਗਰਾਜ, ਅਜ੍ਝਤ੍ਤਬਹਿਦ੍ਧਾਸਮੁਟ੍ਠਾਨੇਹਿ ਹਿਰੋਤ੍ਤਪ੍ਪੇਹਿ ਤਿਤਿਕ੍ਖਾਸਙ੍ਖਾਤਾਯ ਅਧਿਵਾਸਨਖਨ੍ਤਿਯਾ ਇਨ੍ਦ੍ਰਿਯਦਮੇਨ ਚ ਉਪੇਤੋ ਅਕੁਜ੍ਝਨਸੀਲੋ ਪਿਸੁਣਵਾਚਂ ਪਹਾਯ ਤਣ੍ਹਾਮਮਾਯਿਤਾਨਿ ਚ ਹਿਤ੍ਵਾ ਪਬ੍ਬਜ੍ਜਾਯ ਚਰਨ੍ਤੋ ਸਮਣੋ ਨਾਮ ਹੋਤਿ, ਏਵਂਕਰੋਯੇਵ ਚ ਏਤਾਨਿ ਹਿਰੀਆਦੀਨਿ ਕੁਸਲਾਨਿ ਕਰੋਨ੍ਤੋ ਸਗ੍ਗਮੁਪੇਤਿ ਠਾਨਨ੍ਤਿ.

ਇਦਂ ਸੁਪਣ੍ਣਰਾਜਸ੍ਸ ਧਮ੍ਮਕਥਂ ਸੁਤ੍ਵਾ ਪਣ੍ਡਰਕੋ ਜੀਵਿਤਂ ਯਾਚਨ੍ਤੋ ਗਾਥਮਾਹ –

੨੮੨.

‘‘ਮਾਤਾਵ ਪੁਤ੍ਤਂ ਤਰੁਣਂ ਤਨੁਜ੍ਜਂ, ਸਮ੍ਫਸ੍ਸਤਾ ਸਬ੍ਬਗਤ੍ਤਂ ਫਰੇਤਿ;

ਏਵਮ੍ਪਿ ਮੇ ਤ੍ਵਂ ਪਾਤੁਰਹੁ ਦਿਜਿਨ੍ਦ, ਮਾਤਾਵ ਪੁਤ੍ਤਂ ਅਨੁਕਮ੍ਪਮਾਨੋ’’ਤਿ.

ਤਸ੍ਸਤ੍ਥੋ – ਯਥਾ ਮਾਤਾ ਤਨੁਜਂ ਅਤ੍ਤਨੋ ਸਰੀਰਜਾਤਂ ਤਰੁਣਂ ਪੁਤ੍ਤਂ ਸਮ੍ਫਸ੍ਸਤਂ ਦਿਸ੍ਵਾ ਤਂ ਉਰੇ ਨਿਪਜ੍ਜਾਪੇਤ੍ਵਾ ਥਞ੍ਞਂ ਪਾਯੇਨ੍ਤੀ ਪੁਤ੍ਤਸਮ੍ਫਸ੍ਸੇਨ ਸਬ੍ਬਂ ਅਤ੍ਤਨੋ ਗਤ੍ਤਂ ਫਰੇਤਿ, ਨਪਿ ਮਾਤਾ ਪੁਤ੍ਤਤੋ ਭਾਯਤਿ ਨਪਿ ਪੁਤ੍ਤੋ ਮਾਤਿਤੋ, ਏਵਮ੍ਪਿ ਮੇ ਤ੍ਵਂ ਪਾਤੁਰਹੁ ਪਾਤੁਭੂਤੋ ਦਿਜਿਨ੍ਦ ਦਿਜਰਾਜ, ਤਸ੍ਮਾ ਮਾਤਾਵ ਪੁਤ੍ਤਂ ਮੁਦੁਕੇਨ ਹਦਯੇਨ ਅਨੁਕਮ੍ਪਮਾਨੋ ਮਂ ਪਸ੍ਸ, ਜੀਵਿਤਂ ਮੇ ਦੇਹੀਤਿ.

ਅਥਸ੍ਸ ਸੁਪਣ੍ਣੋ ਜੀਵਿਤਂ ਦੇਨ੍ਤੋ ਇਤਰਂ ਗਾਥਮਾਹ –

੨੮੩.

‘‘ਹਨ੍ਦਜ੍ਜ ਤ੍ਵਂ ਮੁਞ੍ਚ ਵਧਾ ਦੁਜਿਵ੍ਹ, ਤਯੋ ਹਿ ਪੁਤ੍ਤਾ ਨ ਹਿ ਅਞ੍ਞੋ ਅਤ੍ਥਿ;

ਅਨ੍ਤੇਵਾਸੀ ਦਿਨ੍ਨਕੋ ਅਤ੍ਰਜੋ ਚ, ਰਜ੍ਜਸ੍ਸੁ ਪੁਤ੍ਤਞ੍ਞਤਰੋ ਮੇ ਅਹੋਸੀ’’ਤਿ.

ਤਤ੍ਥ ਮੁਞ੍ਚਾਤਿ ਮੁਚ੍ਚ, ਅਯਮੇਵ ਵਾ ਪਾਠੋ. ਦੁਜਿਵ੍ਹਾਤਿ ਤਂ ਆਲਪਤਿ. ਅਞ੍ਞੋਤਿ ਅਞ੍ਞੋ ਚਤੁਤ੍ਥੋ ਪੁਤ੍ਤੋ ਨਾਮ ਨਤ੍ਥਿ. ਅਨ੍ਤੇਵਾਸੀਤਿ ਸਿਪ੍ਪਂ ਵਾ ਉਗ੍ਗਣ੍ਹਮਾਨੋ ਪਞ੍ਹਂ ਵਾ ਸੁਣਨ੍ਤੋ ਸਨ੍ਤਿਕੇ ਨਿਵੁਤ੍ਥੋ. ਦਿਨ੍ਨਕੋਤਿ ‘‘ਅਯਂ ਤੇ ਪੁਤ੍ਤੋ ਹੋਤੂ’’ਤਿ ਪਰੇਹਿ ਦਿਨ੍ਨੋ. ਰਜ੍ਜਸ੍ਸੂਤਿ ਅਭਿਰਮਸ੍ਸੁ. ਅਞ੍ਞਤਰੋਤਿ ਤੀਸੁ ਪੁਤ੍ਤੇਸੁ ਅਞ੍ਞਤਰੋ ਅਨ੍ਤੇਵਾਸੀ ਪੁਤ੍ਤੋ ਮੇ ਤ੍ਵਂ ਜਾਤੋਤਿ ਦੀਪੇਤਿ.

ਏਵਞ੍ਚ ਪਨ ਵਤ੍ਵਾ ਆਕਾਸਾ ਓਤਰਿਤ੍ਵਾ ਤਂ ਭੂਮਿਯਂ ਪਤਿਟ੍ਠਾਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਦ੍ਵੇ ਗਾਥਾ ਅਭਾਸਿ –

੨੮੪.

‘‘ਇਚ੍ਚੇਵ ਵਾਕ੍ਯਂ ਵਿਸਜ੍ਜੀ ਸੁਪਣ੍ਣੋ, ਭੁਮ੍ਯਂ ਪਤਿਟ੍ਠਾਯ ਦਿਜੋ ਦੁਜਿਵ੍ਹਂ;

ਮੁਤ੍ਤਜ੍ਜ ਤ੍ਵਂ ਸਬ੍ਬਭਯਾਤਿਵਤ੍ਤੋ, ਥਲੂਦਕੇ ਹੋਹਿ ਮਯਾਭਿਗੁਤ੍ਤੋ.

੨੮੫.

‘‘ਆਤਙ੍ਕਿਨਂ ਯਥਾ ਕੁਸਲੋ ਭਿਸਕ੍ਕੋ, ਪਿਪਾਸਿਤਾਨਂ ਰਹਦੋਵ ਸੀਤੋ;

ਵੇਸ੍ਮਂ ਯਥਾ ਹਿਮਸੀਤਟ੍ਟਿਤਾਨਂ, ਏਵਮ੍ਪਿ ਤੇ ਸਰਣਮਹਂ ਭਵਾਮੀ’’ਤਿ.

ਤਤ੍ਥ ਇਚ੍ਚੇਵ ਵਾਕ੍ਯਨ੍ਤਿ ਇਤਿ ਏਵਂ ਵਚਨਂ ਵਤ੍ਵਾ ਤਂ ਨਾਗਰਾਜਂ ਵਿਸ੍ਸਜ੍ਜਿ. ਭੁਮ੍ਯਨ੍ਤਿ ਸੋ ਸਯਮ੍ਪਿ ਭੂਮਿਯਂ ਪਤਿਟ੍ਠਾਯ ਦਿਜੋ ਤਂ ਦੁਜਿਵ੍ਹਂ ਸਮਸ੍ਸਾਸੇਨ੍ਤੋ ਮੁਤ੍ਤੋ ਅਜ੍ਜ ਤ੍ਵਂ ਇਤੋ ਪਟ੍ਠਾਯ ਸਬ੍ਬਭਯਾਨਿ ਅਤਿਵਤ੍ਤੋ ਥਲੇ ਚ ਉਦਕੇ ਚ ਮਯਾ ਅਭਿਗੁਤ੍ਤੋ ਰਕ੍ਖਿਤੋ ਹੋਹੀਤਿ ਆਹ. ਆਤਙ੍ਕਿਨਨ੍ਤਿ ਗਿਲਾਨਾਨਂ. ਏਵਮ੍ਪਿ ਤੇਤਿ ਏਵਂ ਅਹਂ ਤਵ ਸਰਣਂ ਭਵਾਮਿ.

ਗਚ੍ਛ ਤ੍ਵਨ੍ਤਿ ਉਯ੍ਯੋਜੇਸਿ. ਸੋ ਨਾਗਰਾਜਾ ਨਾਗਭਵਨਂ ਪਾਵਿਸਿ. ਇਤਰੋਪਿ ਸੁਪਣ੍ਣਭਵਨਂ ਗਨ੍ਤ੍ਵਾ ‘‘ਮਯਾ ਪਣ੍ਡਰਕਨਾਗੋ ਸਪਥਂ ਕਤ੍ਵਾ ਸਦ੍ਦਹਾਪੇਤ੍ਵਾ ਵਿਸ੍ਸਜ੍ਜਿਤੋ, ਕੀਦਿਸਂ ਨੁ ਖੋ ਮਯਿ ਤਸ੍ਸ ਹਦਯਂ, ਵੀਮਂਸਿਸ੍ਸਾਮਿ ਨ’’ਨ੍ਤਿ ਨਾਗਭਵਨਂ ਗਨ੍ਤ੍ਵਾ ਸੁਪਣ੍ਣਵਾਤਂ ਅਕਾਸਿ. ਤਂ ਦਿਸ੍ਵਾ ਨਾਗੋ ‘‘ਸੁਪਣ੍ਣਰਾਜਾ ਮਂ ਗਹੇਤੁਂ ਆਗਤੋ ਭਵਿਸ੍ਸਤੀ’’ਤਿ ਮਞ੍ਞਮਾਨੋ ਬ੍ਯਾਮਸਹਸ੍ਸਮਤ੍ਤਂ ਅਤ੍ਤਭਾਵਂ ਮਾਪੇਤ੍ਵਾ ਪਾਸਾਣੇ ਚ ਵਾਲੁਕਞ੍ਚ ਗਿਲਿਤ੍ਵਾ ਭਾਰਿਯੋ ਹੁਤ੍ਵਾ ਨਙ੍ਗੁਟ੍ਠਂ ਹੇਟ੍ਠਾਕਤ੍ਵਾ ਭੋਗਮਤ੍ਥਕੇ ਫਣਂ ਧਾਰਯਮਾਨੋ ਨਿਪਜ੍ਜਿਤ੍ਵਾ ਸੁਪਣ੍ਣਰਾਜਾਨਂ ਡਂਸਿਤੁਕਾਮੋ ਵਿਯ ਅਹੋਸਿ. ਤਂ ਦਿਸ੍ਵਾ ਸੁਪਣ੍ਣੋ ਇਤਰਂ ਗਾਥਮਾਹ –

੨੮੬.

‘‘ਸਨ੍ਧਿਂ ਕਤ੍ਵਾ ਅਮਿਤ੍ਤੇਨ, ਅਣ੍ਡਜੇਨ ਜਲਾਬੁਜ;

ਵਿਵਰਿਯ ਦਾਠਂ ਸੇਸਿ, ਕੁਤੋ ਤਂ ਭਯਮਾਗਤ’’ਨ੍ਤਿ.

ਤਂ ਸੁਤ੍ਵਾ ਨਾਗਰਾਜਾ ਤਿਸ੍ਸੋ ਗਾਥਾ ਅਭਾਸਿ –

੨੮੭.

‘‘ਸਙ੍ਕੇਥੇਵ ਅਮਿਤ੍ਤਸ੍ਮਿਂ, ਮਿਤ੍ਤਸ੍ਮਿਮ੍ਪਿ ਨ ਵਿਸ੍ਸਸੇ;

ਅਭਯਾ ਭਯਮੁਪ੍ਪਨ੍ਨਂ, ਅਪਿ ਮੂਲਾਨਿ ਕਨ੍ਤਤਿ.

੨੮੮.

‘‘ਕਥਂ ਨੁ ਵਿਸ੍ਸਸੇ ਤ੍ਯਮ੍ਹਿ, ਯੇਨਾਸਿ ਕਲਹੋ ਕਤੋ;

ਨਿਚ੍ਚਯਤ੍ਤੇਨ ਠਾਤਬ੍ਬਂ, ਸੋ ਦਿਸਬ੍ਭਿ ਨ ਰਜ੍ਜਤਿ.

੨੮੯.

‘‘ਵਿਸ੍ਸਾਸਯੇ ਨ ਚ ਤਂ ਵਿਸ੍ਸਯੇਯ੍ਯ, ਅਸਙ੍ਕਿਤੋ ਸਙ੍ਕਿਤੋ ਚ ਭਵੇਯ੍ਯ;

ਤਥਾ ਤਥਾ ਵਿਞ੍ਞੂ ਪਰਕ੍ਕਮੇਯ੍ਯ, ਯਥਾ ਯਥਾ ਭਾਵਂ ਪਰੋ ਨ ਜਞ੍ਞਾ’’ਤਿ.

ਤਤ੍ਥ ਅਭਯਾਤਿ ਅਭਯਟ੍ਠਾਨਭੂਤਾ ਮਿਤ੍ਤਮ੍ਹਾ ਭਯਂ ਉਪ੍ਪਨ੍ਨਂ ਜੀਵਿਤਸਙ੍ਖਾਤਾਨਿ ਮੂਲਾਨੇਵ ਕਨ੍ਤਤਿ. ਤ੍ਯਮ੍ਹੀਤਿ ਤਸ੍ਮਿਂ. ਯੇਨਾਸੀਤਿ ਯੇਨ ਸਦ੍ਧਿਂ ਕਲਹੋ ਕਤੋ ਅਹੋਸਿ. ਨਿਚ੍ਚਯਤ੍ਤੇਨਾਤਿ ਨਿਚ੍ਚਪਟਿਯਤ੍ਤੇਨ. ਸੋ ਦਿਸਬ੍ਭਿ ਨ ਰਜ੍ਜਤੀਤਿ ਯੋ ਨਿਚ੍ਚਯਤ੍ਤੇਨ ਅਭਿਤਿਟ੍ਠਤਿ, ਸੋ ਅਤ੍ਤਨੋ ਸਤ੍ਤੂਹਿ ਸਦ੍ਧਿਂ ਵਿਸ੍ਸਾਸਵਸੇਨ ਨ ਰਜ੍ਜਤਿ, ਤਤੋ ਤੇਸਂ ਯਥਾਕਾਮਕਰਣੀਯੋ ਨ ਹੋਤੀਤਿ ਅਤ੍ਥੋ. ਵਿਸ੍ਸਾਸਯੇਤਿ ਪਰਂ ਅਤ੍ਤਨਿ ਵਿਸ੍ਸਾਸਯੇ, ਤਂ ਪਨ ਸਯਂ ਨ ਵਿਸ੍ਸਸੇਯ੍ਯ. ਪਰੇਨ ਅਸਙ੍ਕਿਤੋ ਅਤ੍ਤਨਾ ਚ ਸੋ ਸਙ੍ਕਿਤੋ ਭਵੇਯ੍ਯ. ਭਾਵਂ ਪਰੋਤਿ ਯਥਾ ਯਥਾ ਪਣ੍ਡਿਤੋ ਪਰਕ੍ਕਮਤਿ, ਤਥਾ ਤਥਾ ਤਸ੍ਸ ਪਰੋ ਭਾਵਂ ਨ ਜਾਨਾਤਿ, ਤਸ੍ਮਾ ਪਣ੍ਡਿਤੇਨ ਵੀਰਿਯਂ ਕਾਤਬ੍ਬਮੇਵਾਤਿ ਦੀਪੇਤਿ.

ਇਤਿ ਤੇ ਅਞ੍ਞਮਞ੍ਞਂ ਸਲ੍ਲਪਿਤ੍ਵਾ ਸਮਗ੍ਗਾ ਸਮ੍ਮੋਦਮਾਨਾ ਉਭੋਪਿ ਅਚੇਲਕਸ੍ਸ ਅਸ੍ਸਮਂ ਅਗਮਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੨੯੦.

‘‘ਤੇ ਦੇਵਵਣ੍ਣਾ ਸੁਖੁਮਾਲਰੂਪਾ, ਉਭੋ ਸਮਾ ਸੁਜਯਾ ਪੁਞ੍ਞਖਨ੍ਧਾ;

ਉਪਾਗਮੁਂ ਕਰਮ੍ਪਿਯਂ ਅਚੇਲਂ, ਮਿਸ੍ਸੀਭੂਤਾ ਅਸ੍ਸਵਾਹਾਵ ਨਾਗਾ’’ਤਿ.

ਤਤ੍ਥ ਸਮਾਤਿ ਸਮਾਨਰੂਪਾ ਸਦਿਸਸਣ੍ਠਾਨਾ ਹੁਤ੍ਵਾ. ਸੁਜਯਾਤਿ ਸੁਵਯਾ ਪਰਿਸੁਦ੍ਧਾ, ਅਯਮੇਵ ਵਾ ਪਾਠੋ. ਪੁਞ੍ਞਖਨ੍ਧਾਤਿ ਕਤਕੁਸਲਤਾਯ ਪੁਞ੍ਞਕ੍ਖਨ੍ਧਾ ਵਿਯ. ਮਿਸ੍ਸੀਭੂਤਾਤਿ ਹਤ੍ਥੇਨ ਹਤ੍ਥਂ ਗਹੇਤ੍ਵਾ ਕਾਯਮਿਸ੍ਸੀਭਾਵਂ ਉਪਗਤਾ. ਅਸ੍ਸਵਾਹਾਵ ਨਾਗਾਤਿ ਧੁਰੇ ਯੁਤ੍ਤਕਾ ਰਥਵਾਹਾ ਦ੍ਵੇ ਅਸ੍ਸਾ ਵਿਯ ਪੁਰਿਸਨਾਗਾ ਤਸ੍ਸ ਅਸ੍ਸਮਂ ਅਗਮਿਂਸੁ.

ਗਨ੍ਤ੍ਵਾ ਚ ਪਨ ਸੁਪਣ੍ਣਰਾਜਾ ਚਿਨ੍ਤੇਸਿ – ‘‘ਅਯਂ ਨਾਗਰਾਜਾ ਅਚੇਲਕਸ੍ਸ ਜੀਵਿਤਂ ਨ ਦਸ੍ਸਤਿ, ਏਤਂ ਦੁਸ੍ਸੀਲਂ ਨ ਵਨ੍ਦਿਸ੍ਸਾਮੀ’’ਤਿ. ਸੋ ਬਹਿ ਠਤ੍ਵਾ ਨਾਗਰਾਜਾਨਮੇਵ ਤਸ੍ਸ ਸਨ੍ਤਿਕਂ ਪੇਸੇਸਿ. ਤਂ ਸਨ੍ਧਾਯ ਸਤ੍ਥਾ ਇਤਰਂ ਗਾਥਮਾਹ.

੨੯੧.

‘‘ਤਤੋ ਹਵੇ ਪਣ੍ਡਰਕੋ ਅਚੇਲਂ, ਸਯਮੇਵੁਪਾਗਮ੍ਮ ਇਦਂ ਅਵੋਚ;

ਮੁਤ੍ਤਜ੍ਜਹਂ ਸਬ੍ਬਭਯਾਤਿਵਤ੍ਤੋ, ਨ ਹਿ ਨੂਨ ਤੁਯ੍ਹਂ ਮਨਸੋ ਪਿਯਮ੍ਹਾ’’ਤਿ.

ਤਤ੍ਥ ਪਿਯਮ੍ਹਾਤਿ ਦੁਸ੍ਸੀਲਨਗ੍ਗਭੋਗ੍ਗਮੁਸਾਵਾਦਿ ਨੂਨ ਮਯਂ ਤਵ ਮਨਸੋ ਨ ਪਿਯਾ ਅਹੁਮ੍ਹਾਤਿ ਪਰਿਭਾਸਿ.

ਤਤੋ ਅਚੇਲੋ ਇਤਰਂ ਗਾਥਮਾਹ –

੨੯੨.

‘‘ਪਿਯੋ ਹਿ ਮੇ ਆਸਿ ਸੁਪਣ੍ਣਰਾਜਾ, ਅਸਂਸਯਂ ਪਣ੍ਡਰਕੇਨ ਸਚ੍ਚਂ;

ਸੋ ਰਾਗਰਤ੍ਤੋਵ ਅਕਾਸਿਮੇਤਂ, ਪਾਪਕਮ੍ਮਂ ਸਮ੍ਪਜਾਨੋ ਨ ਮੋਹਾ’’ਤਿ.

ਤਤ੍ਥ ਪਣ੍ਡਰਕੇਨਾਤਿ ਤਯਾ ਪਣ੍ਡਰਕੇਨ ਸੋ ਮਮ ਪਿਯਤਰੋ ਅਹੋਸਿ, ਸਚ੍ਚਮੇਤਂ. ਸੋਤਿ ਸੋ ਅਹਂ ਤਸ੍ਮਿਂ ਸੁਪਣ੍ਣੇ ਰਾਗੇਨ ਰਤ੍ਤੋ ਹੁਤ੍ਵਾ ਏਤਂ ਪਾਪਕਮ੍ਮਂ ਜਾਨਨ੍ਤੋਵ ਅਕਾਸਿਂ, ਨ ਮੋਹੇਨ ਅਜਾਨਨ੍ਤੋਤਿ.

ਤਂ ਸੁਤ੍ਵਾ ਨਾਗਰਾਜਾ ਦ੍ਵੇ ਗਾਥਾ ਅਭਾਸਿ –

੨੯੩.

‘‘ਨ ਮੇ ਪਿਯਂ ਅਪ੍ਪਿਯਂ ਵਾਪਿ ਹੋਤਿ, ਸਮ੍ਪਸ੍ਸਤੋ ਲੋਕਮਿਮਂ ਪਰਞ੍ਚ;

ਸੁਸਞ੍ਞਤਾਨਞ੍ਹਿ ਵਿਯਞ੍ਜਨੇਨ, ਅਸਞ੍ਞਤੋ ਲੋਕਮਿਮਂ ਚਰਾਸਿ.

੨੯੪.

‘‘ਅਰਿਯਾਵਕਾਸੋਸਿ ਅਨਰਿਯੋਵਾਸਿ, ਅਸਞ੍ਞਤੋ ਸਞ੍ਞਤਸਨ੍ਨਿਕਾਸੋ;

ਕਣ੍ਹਾਭਿਜਾਤਿਕੋਸਿ ਅਨਰਿਯਰੂਪੋ, ਪਾਪਂ ਬਹੁਂ ਦੁਚ੍ਚਰਿਤਂ ਅਚਾਰੀ’’ਤਿ.

ਤਤ੍ਥ ਨ ਮੇਤਿ ਅਮ੍ਭੋ ਦੁਸ੍ਸੀਲਨਗ੍ਗਮੁਸਾਵਾਦਿ ਪਬ੍ਬਜਿਤਸ੍ਸ ਹਿ ਇਮਞ੍ਚ ਪਰਞ੍ਚ ਲੋਕਂ ਸਮ੍ਪਸ੍ਸਤੋ ਪਿਯਂ ਵਾ ਮੇ ਅਪ੍ਪਿਯਂ ਵਾਪਿ ਮੇਤਿ ਨ ਹੋਤਿ, ਤ੍ਵਂ ਪਨ ਸੁਸਞ੍ਞਤਾਨਂ ਸੀਲਵਨ੍ਤਾਨਂ ਬ੍ਯਞ੍ਜਨੇਨ ਪਬ੍ਬਜਿਤਲਿਙ੍ਗੇਨ ਅਸਞ੍ਞਤੋ ਹੁਤ੍ਵਾ ਇਮਂ ਲੋਕਂ ਵਞ੍ਚੇਨ੍ਤੋ ਚਰਸਿ. ਅਰਿਯਾਵਕਾਸੋਸੀਤਿ ਅਰਿਯਪਟਿਰੂਪਕੋਸਿ. ਅਸਞ੍ਞਤੋਤਿ ਕਾਯਾਦੀਹਿ ਅਸਞ੍ਞਤੋਸਿ. ਕਣ੍ਹਾਭਿਜਾਤਿਕੋਤਿ ਕਾਲ਼ਕਸਭਾਵੋ. ਅਨਰਿਯਰੂਪੋਤਿ ਅਹਿਰਿਕਸਭਾਵੋ. ਅਚਾਰੀਤਿ ਅਕਾਸਿ.

ਇਤਿ ਤਂ ਗਰਹਿਤ੍ਵਾ ਇਦਾਨਿ ਅਭਿਸਪਨ੍ਤੋ ਇਮਂ ਗਾਥਮਾਹ –

੨੯੫.

‘‘ਅਦੁਟ੍ਠਸ੍ਸ ਤੁਵਂ ਦੁਬ੍ਭਿ, ਦੁਬ੍ਭੀ ਚ ਪਿਸੁਣੋ ਚਸਿ;

ਏਤੇਨ ਸਚ੍ਚਵਜ੍ਜੇਨ, ਮੁਦ੍ਧਾ ਤੇ ਫਲਤੁ ਸਤ੍ਤਧਾ’’ਤਿ.

ਤਸ੍ਸਤ੍ਥੋ – ਅਮ੍ਭੋ ਦੁਬ੍ਭਿ ਤ੍ਵਂ ਅਦੁਟ੍ਠਸ੍ਸ ਮਿਤ੍ਤਸ੍ਸ ਦੁਬ੍ਭੀ ਚਾਸਿ, ਪਿਸੁਣੋ ਚਾਸਿ, ਏਤੇਨ ਸਚ੍ਚਵਜ੍ਜੇਨ ਮੁਦ੍ਧਾ ਤੇ ਸਤ੍ਤਧਾ ਫਲਤੂਤਿ.

ਇਤਿ ਨਾਗਰਾਜਸ੍ਸ ਸਪਨ੍ਤਸ੍ਸੇਵ ਅਚੇਲਕਸ੍ਸ ਸੀਸਂ ਸਤ੍ਤਧਾ ਫਲਿ. ਨਿਸਿਨ੍ਨਟ੍ਠਾਨੇਯੇਵਸ੍ਸ ਭੂਮਿ ਵਿਵਰਂ ਅਦਾਸਿ. ਸੋ ਪਥਵਿਂ ਪਵਿਸਿਤ੍ਵਾ ਅਵੀਚਿਮ੍ਹਿ ਨਿਬ੍ਬਤ੍ਤਿ, ਨਾਗਰਾਜਸੁਪਣ੍ਣਰਾਜਾਨੋਪਿ ਅਤ੍ਤਨੋ ਭਵਨਮੇਵ ਅਗਮਿਂਸੁ. ਸਤ੍ਥਾ ਤਸ੍ਸ ਪਥਵਿਂ ਪਵਿਟ੍ਠਭਾਵਂ ਪਕਾਸੇਨ੍ਤੋ ਓਸਾਨਗਾਥਮਾਹ –

੨੯੬.

‘‘ਤਸ੍ਮਾ ਹਿ ਮਿਤ੍ਤਾਨਂ ਨ ਦੁਬ੍ਭਿਤਬ੍ਬਂ, ਮਿਤ੍ਤਦੁਬ੍ਭਾ ਪਾਪਿਯੋ ਨਤ੍ਥਿ ਅਞ੍ਞੋ;

ਆਸਿਤ੍ਤਸਤ੍ਤੋ ਨਿਹਤੋ ਪਥਬ੍ਯਾ, ਇਨ੍ਦਸ੍ਸ ਵਾਕ੍ਯੇਨ ਹਿ ਸਂਵਰੋ ਹਤੋ’’ਤਿ.

ਤਤ੍ਥ ਤਸ੍ਮਾਤਿ ਯਸ੍ਮਾ ਮਿਤ੍ਤਦੁਬ੍ਭਿਕਮ੍ਮਸ੍ਸ ਫਰੁਸੋ ਵਿਪਾਕੋ, ਤਸ੍ਮਾ. ਆਸਿਤ੍ਤਸਤ੍ਤੋਤਿ ਆਸਿਤ੍ਤਵਿਸੇਨ ਸਤ੍ਤੋ. ਇਨ੍ਦਸ੍ਸਾਤਿ ਨਾਗਿਨ੍ਦਸ੍ਸ ਵਾਕ੍ਯੇਨ. ਸਂਵਰੋਤਿ ‘‘ਅਹਂ ਸਂਵਰੇ ਠਿਤੋਸ੍ਮੀ’’ਤਿ ਪਟਿਞ੍ਞਾਯ ਏਵਂ ਪਞ੍ਞਾਤੋ ਆਜੀਵਕੋ ਹਤੋਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਮੁਸਾਵਾਦਂ ਕਤ੍ਵਾ ਪਥਵਿਂ ਪਵਿਟ੍ਠੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਅਚੇਲਕੋ ਦੇਵਦਤ੍ਤੋ ਅਹੋਸਿ, ਨਾਗਰਾਜਾ ਸਾਰਿਪੁਤ੍ਤੋ, ਸੁਪਣ੍ਣਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਪਣ੍ਡਰਨਾਗਰਾਜਜਾਤਕਵਣ੍ਣਨਾ ਅਟ੍ਠਮਾ.

[੫੧੯] ੯. ਸਮ੍ਬੁਲਾਜਾਤਕਵਣ੍ਣਨਾ

ਕਾ ਵੇਧਮਾਨਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਲ੍ਲਿਕਂ ਦੇਵਿਂ ਆਰਬ੍ਭ ਕਥੇਸਿ. ਵਤ੍ਥੁ ਕੁਮ੍ਮਾਸਪਿਣ੍ਡਿਜਾਤਕੇ (ਜਾ. ੧.੭.੧੪੨ ਆਦਯੋ) ਵਿਤ੍ਥਾਰਿਤਮੇਵ. ਸਾ ਪਨ ਤਥਾਗਤਸ੍ਸ ਤਿਣ੍ਣਂ ਕੁਮ੍ਮਾਸਪਿਣ੍ਡਿਕਾਨਂ ਦਾਨਾਨੁਭਾਵੇਨ ਤਂ ਦਿਵਸਞ੍ਞੇਵ ਰਞ੍ਞੋ ਅਗ੍ਗਮਹੇਸਿਭਾਵਂ ਪਤ੍ਵਾ ਪੁਬ੍ਬੁਟ੍ਠਾਯਿਤਾਦੀਹਿ ਪਞ੍ਚਹਿ ਕਲ੍ਯਾਣਧਮ੍ਮੇਹਿ ਸਮਨ੍ਨਾਗਤਾ ਞਾਣਸਮ੍ਪਨ੍ਨਾ ਬੁਦ੍ਧੁਪਟ੍ਠਾਯਿਕਾ ਪਤਿਦੇਵਤਾ ਅਹੋਸਿ. ਤਸ੍ਸਾ ਪਤਿਦੇਵਤਾਭਾਵੋ ਸਕਲਨਗਰੇ ਪਾਕਟੋ ਅਹੋਸਿ. ਅਥੇਕਦਿਵਸਂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਆਵੁਸੋ, ਮਲ੍ਲਿਕਾ ਦੇਵੀ ਕਿਰ ਵਤ੍ਤਸਮ੍ਪਨ੍ਨਾ ਞਾਣਸਮ੍ਪਨ੍ਨਾ ਪਤਿਦੇਵਤਾ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਸਾ ਵਤ੍ਤਸਮ੍ਪਨ੍ਨਾ ਪਤਿਦੇਵਤਾਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤਸ੍ਸ ਰਞ੍ਞੋ ਸੋਤ੍ਥਿਸੇਨੋ ਨਾਮ ਪੁਤ੍ਤੋ ਅਹੋਸਿ. ਤਂ ਰਾਜਾ ਵਯਪ੍ਪਤ੍ਤਂ ਉਪਰਜ੍ਜੇ ਪਤਿਟ੍ਠਪੇਸਿ, ਸਮ੍ਬੁਲਾ ਨਾਮਸ੍ਸ ਅਗ੍ਗਮਹੇਸੀ ਅਹੋਸਿ ਉਤ੍ਤਮਰੂਪਧਰਾ ਸਰੀਰਪ੍ਪਭਾਸਮ੍ਪਨ੍ਨਾ, ਨਿਵਾਤੇ ਜਲਮਾਨਾ ਦੀਪਸਿਖਾ ਵਿਯ ਖਾਯਤਿ. ਅਪਰਭਾਗੇ ਸੋਤ੍ਥਿਸੇਨਸ੍ਸ ਸਰੀਰੇ ਕੁਟ੍ਠਂ ਉਪ੍ਪਜ੍ਜਤਿ, ਵੇਜ੍ਜਾ ਤਿਕਿਚ੍ਛਿਤੁਂ ਨਾਸਕ੍ਖਿਂਸੁ. ਸੋ ਭਿਜ੍ਜਮਾਨੇ ਕੁਟ੍ਠੇ ਪਟਿਕੂਲੋ ਹੁਤ੍ਵਾ ਵਿਪ੍ਪਟਿਸਾਰਂ ਪਤ੍ਵਾ ‘‘ਕੋ ਮੇ ਰਜ੍ਜੇਨ ਅਤ੍ਥੋ, ਅਰਞ੍ਞੇ ਅਨਾਥਮਰਣਂ ਮਰਿਸ੍ਸਾਮੀ’’ਤਿ ਰਞ੍ਞੋ ਆਰੋਚਾਪੇਤ੍ਵਾ ਇਤ੍ਥਾਗਾਰਂ ਛਡ੍ਡੇਤ੍ਵਾ ਨਿਕ੍ਖਮਿ. ਸਮ੍ਬੁਲਾ ਬਹੂਹਿ ਉਪਾਯੇਹਿ ਨਿਵਤ੍ਤਿਯਮਾਨਾਪਿ ਅਨਿਵਤ੍ਤਿਤ੍ਵਾਵ ‘‘ਅਹਂ ਤਂ ਸਾਮਿਕਂ ਅਰਞ੍ਞੇ ਪਟਿਜਗ੍ਗਿਸ੍ਸਾਮੀ’’ਤਿ ਵਤ੍ਵਾ ਸਦ੍ਧਿਞ੍ਞੇਵ ਨਿਕ੍ਖਮਿ. ਸੋ ਅਰਞ੍ਞਂ ਪਵਿਸਿਤ੍ਵਾ ਸੁਲਭਮੂਲਫਲਾਫਲੇ ਛਾਯੂਦਕਸਮ੍ਪਨ੍ਨੇ ਪਦੇਸੇ ਪਣ੍ਣਸਾਲਂ ਕਤ੍ਵਾ ਵਾਸਂ ਕਪ੍ਪੇਸਿ. ਰਾਜਧੀਤਾ ਤਂ ਪਟਿਜਗ੍ਗਿ. ਕਥਂ? ਸਾ ਹਿ ਪਾਤੋ ਵੁਟ੍ਠਾਯ ਅਸ੍ਸਮਪਦਂ ਸਮ੍ਮਜ੍ਜਿਤ੍ਵਾ ਪਾਨੀਯਪਰਿਭੋਜਨੀਯਂ ਉਪਟ੍ਠਪੇਤ੍ਵਾ ਦਨ੍ਤਕਟ੍ਠਞ੍ਚ ਮੁਖਧੋਵਨਞ੍ਚ ਉਪਨਾਮੇਤ੍ਵਾ ਮੁਖੇ ਧੋਤੇ ਨਾਨਾਓਸਧਾਨਿ ਪਿਸਿਤ੍ਵਾ ਤਸ੍ਸ ਵਣੇ ਮਕ੍ਖੇਤ੍ਵਾ ਮਧੁਰਮਧੁਰਾਨਿ ਫਲਾਫਲਾਨਿ ਖਾਦਾਪੇਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਹਤ੍ਥੇਸੁ ਧੋਤੇਸੁ ‘‘ਅਪ੍ਪਮਤ੍ਤੋ ਹੋਹਿ ਦੇਵਾ’’ਤਿ ਵਤ੍ਵਾ ਵਨ੍ਦਿਤ੍ਵਾ ਪਚ੍ਛਿਖਣਿਤ੍ਤਿਅਙ੍ਕੁਸਕੇ ਆਦਾਯ ਫਲਾਫਲਤ੍ਥਾਯ ਅਰਞ੍ਞਂ ਪਵਿਸਿਤ੍ਵਾ ਫਲਾਫਲਾਨਿ ਆਹਰਿਤ੍ਵਾ ਏਕਮਨ੍ਤੇ ਠਪੇਤ੍ਵਾ ਘਟੇਨ ਉਦਕਂ ਆਹਰਿਤ੍ਵਾ ਨਾਨਾਚੁਣ੍ਣੇਹਿ ਚ ਮਤ੍ਤਿਕਾਹਿ ਚ ਸੋਤ੍ਥਿਸੇਨਂ ਨ੍ਹਾਪੇਤ੍ਵਾ ਪੁਨ ਮਧੁਰਫਲਾਫਲਾਨਿ ਉਪਨਾਮੇਤਿ. ਪਰਿਭੋਗਾਵਸਾਨੇ ਵਾਸਿਤਪਾਨੀਯਂ ਉਪਨੇਤ੍ਵਾ ਸਯਂ ਫਲਾਫਲਾਨਿ ਪਰਿਭੁਞ੍ਜਿਤ੍ਵਾ ਪਦਰਸਨ੍ਥਰਂ ਸਂਵਿਦਹਿਤ੍ਵਾ ਤਸ੍ਮਿਂ ਤਤ੍ਥ ਨਿਪਨ੍ਨੇ ਤਸ੍ਸ ਪਾਦੇ ਧੋਵਿਤ੍ਵਾ ਸੀਸਪਰਿਕਮ੍ਮਪਿਟ੍ਠਿਪਰਿਕਮ੍ਮਪਾਦਪਰਿਕਮ੍ਮਾਨਿ ਕਤ੍ਵਾ ਸਯਨਪਸ੍ਸਂ ਉਪਗਨ੍ਤ੍ਵਾ ਨਿਪਜ੍ਜਤਿ. ਏਤੇਨੁਪਾਯੇਨ ਸਾਮਿਕਂ ਪਟਿਜਗ੍ਗਿ.

ਸਾ ਏਕਦਿਵਸਂ ਅਰਞ੍ਞੇ ਫਲਾਫਲਂ ਆਹਰਨ੍ਤੀ ਏਕਂ ਗਿਰਿਕਨ੍ਦਰਂ ਦਿਸ੍ਵਾ ਸੀਸਤੋ ਪਚ੍ਛਿਂ ਓਤਾਰੇਤ੍ਵਾ ਕਨ੍ਦਰਤੀਰੇ ਠਪੇਤ੍ਵਾ ‘‘ਨ੍ਹਾਯਿਸ੍ਸਾਮੀ’’ਤਿ ਓਤਰਿਤ੍ਵਾ ਹਲਿਦ੍ਦਾਯ ਸਰੀਰਂ ਉਬ੍ਬਟ੍ਟੇਤ੍ਵਾ ਨ੍ਹਤ੍ਵਾ ਸੁਧੋਤਸਰੀਰਾ ਉਤ੍ਤਰਿਤ੍ਵਾ ਵਾਕਚੀਰਂ ਨਿਵਾਸੇਤ੍ਵਾ ਕਨ੍ਦਰਤੀਰੇ ਅਟ੍ਠਾਸਿ. ਅਥਸ੍ਸਾ ਸਰੀਰਪ੍ਪਭਾਯ ਵਨਂ ਏਕੋਭਾਸਂ ਅਹੋਸਿ. ਤਸ੍ਮਿਂ ਖਣੇ ਏਕੋ ਦਾਨਵੋ ਗੋਚਰਤ੍ਥਾਯ ਚਰਨ੍ਤੋ ਤਂ ਦਿਸ੍ਵਾ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਗਾਥਾਦ੍ਵਯਂ ਆਹ –

੨੯੭.

‘‘ਕਾ ਵੇਧਮਾਨਾ ਗਿਰਿਕਨ੍ਦਰਾਯਂ, ਏਕਾ ਤੁਵਂ ਤਿਟ੍ਠਸਿ ਸਂਹਿਤੂਰੁ;

ਪੁਟ੍ਠਾਸਿ ਮੇ ਪਾਣਿਪਮੇਯ੍ਯਮਜ੍ਝੇ, ਅਕ੍ਖਾਹਿ ਮੇ ਨਾਮਞ੍ਚ ਬਨ੍ਧਵੇ ਚ.

੨੯੮.

‘‘ਓਭਾਸਯਂ ਵਨਂ ਰਮ੍ਮਂ, ਸੀਹਬ੍ਯਗ੍ਘਨਿਸੇਵਿਤਂ;

ਕਾ ਵਾ ਤ੍ਵਮਸਿ ਕਲ੍ਯਾਣਿ, ਕਸ੍ਸ ਵਾ ਤ੍ਵਂ ਸੁਮਜ੍ਝਿਮੇ;

ਅਭਿਵਾਦੇਮਿ ਤਂ ਭਦ੍ਦੇ, ਦਾਨਵਾਹਂ ਨਮਤ੍ਥੁ ਤੇ’’ਤਿ.

ਤਤ੍ਥ ਕਾ ਵੇਧਮਾਨਾਤਿ ਨ੍ਹਾਨਮਤ੍ਤਤਾਯ ਸੀਤਭਾਵੇਨ ਕਮ੍ਪਮਾਨਾ. ਸਂਹਿਤੂਰੂਤਿ ਸਮ੍ਪਿਣ੍ਡਿਤੂਰੁ ਉਤ੍ਤਮਊਰੁਲਕ੍ਖਣੇ. ਪਾਣਿਪਮੇਯ੍ਯਮਜ੍ਝੇਤਿ ਹਤ੍ਥੇਨ ਮਿਨਿਤਬ੍ਬਮਜ੍ਝੇ. ਕਾ ਵਾ ਤ੍ਵਨ੍ਤਿ ਕਾ ਨਾਮ ਵਾ ਤ੍ਵਂ ਭਵਸਿ. ਅਭਿਵਾਦੇਮੀਤਿ ਵਨ੍ਦਾਮਿ. ਦਾਨਵਾਹਨ੍ਤਿ ਅਹਂ ਏਕੋ ਦਾਨਵੋ, ਅਯਂ ਨਮਕ੍ਕਾਰੋ ਤਵ ਅਤ੍ਥੁ, ਅਞ੍ਜਲਿਂ ਤੇ ਪਗ੍ਗਣ੍ਹਾਮੀਤਿ ਅਵਚ.

ਸਾ ਤਸ੍ਸ ਵਚਨਂ ਸੁਤ੍ਵਾ ਤਿਸ੍ਸੋ ਗਾਥਾ ਅਭਾਸਿ –

੨੯੯.

‘‘ਯੋ ਪੁਤ੍ਤੋ ਕਾਸਿਰਾਜਸ੍ਸ, ਸੋਤ੍ਥਿਸੇਨੋਤਿ ਤਂ ਵਿਦੂ;

ਤਸ੍ਸਾਹਂ ਸਮ੍ਬੁਲਾ ਭਰਿਯਾ, ਏਵਂ ਜਾਨਾਹਿ ਦਾਨਵ;

ਅਭਿਵਾਦੇਮਿ ਤਂ ਭਨ੍ਤੇ, ਸਮ੍ਬੁਲਾਹਂ ਨਮਤ੍ਥੁ ਤੇ.

੩੦੦.

‘‘ਵੇਦੇਹਪੁਤ੍ਤੋ ਭਦ੍ਦਨ੍ਤੇ, ਵਨੇ ਵਸਤਿ ਆਤੁਰੋ;

ਤਮਹਂ ਰੋਗਸਮ੍ਮਤ੍ਤਂ, ਏਕਾ ਏਕਂ ਉਪਟ੍ਠਹਂ.

੩੦੧.

‘‘ਅਹਞ੍ਚ ਵਨਮੁਞ੍ਛਾਯ, ਮਧੁਮਂਸਂ ਮਿਗਾਬਿਲਂ;

ਯਦਾਹਰਾਮਿ ਤਂ ਭਕ੍ਖੋ, ਤਸ੍ਸ ਨੂਨਜ੍ਜ ਨਾਧਤੀ’’ਤਿ.

ਤਤ੍ਥ ਵੇਦੇਹਪੁਤ੍ਤੋਤਿ ਵੇਦੇਹਰਾਜਧੀਤਾਯ ਪੁਤ੍ਤੋ. ਰੋਗਸਮ੍ਮਤ੍ਤਨ੍ਤਿ ਰੋਗਪੀਲ਼ਿਤਂ. ਉਪਟ੍ਠਹਨ੍ਤਿ ਉਪਟ੍ਠਹਾਮਿ ਪਟਿਜਗ੍ਗਾਮਿ. ‘‘ਉਪਟ੍ਠਿਤਾ’’ਤਿਪਿ ਪਾਠੋ. ਵਨਮੁਞ੍ਛਾਯਾਤਿ ਵਨਂ ਉਞ੍ਛੇਤ੍ਵਾ ਉਞ੍ਛਾਚਰਿਯਂ ਚਰਿਤ੍ਵਾ. ਮਧੁਮਂਸਨ੍ਤਿ ਨਿਮ੍ਮਕ੍ਖਿਕਂ ਮਧੁਞ੍ਚ ਮਿਗਾਬਿਲਮਂਸਞ੍ਚ ਸੀਹਬ੍ਯਗ੍ਘਮਿਗੇਹਿ ਖਾਦਿਤਮਂਸਤੋ ਅਤਿਰਿਤ੍ਤਕੋਟ੍ਠਾਸਂ. ਤਂ ਭਕ੍ਖੋਤਿ ਯਂ ਅਹਂ ਆਹਰਾਮਿ, ਤਂ ਭਕ੍ਖੋਵ ਸੋ ਮਮ ਸਾਮਿਕੋ. ਤਸ੍ਸ ਨੂਨਜ੍ਜਾਤਿ ਤਸ੍ਸ ਮਞ੍ਞੇ ਅਜ੍ਜ ਆਹਾਰਂ ਅਲਭਮਾਨਸ੍ਸ ਸਰੀਰਂ ਆਤਪੇ ਪਕ੍ਖਿਤ੍ਤਪਦੁਮਂ ਵਿਯ ਨਾਧਤਿ ਉਪਤਪ੍ਪਤਿ ਮਿਲਾਯਤਿ.

ਤਤੋ ਪਰਂ ਦਾਨਵਸ੍ਸ ਚ ਤਸ੍ਸਾ ਚ ਵਚਨਪਟਿਵਚਨਗਾਥਾਯੋ ਹੋਨ੍ਤਿ –

੩੦੨.

‘‘ਕਿਂ ਵਨੇ ਰਾਜਪੁਤ੍ਤੇਨ, ਆਤੁਰੇਨ ਕਰਿਸ੍ਸਸਿ;

ਸਮ੍ਬੁਲੇ ਪਰਿਚਿਣ੍ਣੇਨ, ਅਹਂ ਭਤ੍ਤਾ ਭਵਾਮਿ ਤੇ.

੩੦੩.

‘‘ਸੋਕਟ੍ਟਾਯ ਦੁਰਤ੍ਤਾਯ, ਕਿਂ ਰੂਪਂ ਵਿਜ੍ਜਤੇ ਮਮ;

ਅਞ੍ਞਂ ਪਰਿਯੇਸ ਭਦ੍ਦਨ੍ਤੇ, ਅਭਿਰੂਪਤਰਂ ਮਯਾ.

੩੦੪.

‘‘ਏਹਿਮਂ ਗਿਰਿਮਾਰੁਯ੍ਹ, ਭਰਿਯਾ ਮੇ ਚਤੁਸ੍ਸਤਾ;

ਤਾਸਂ ਤ੍ਵਂ ਪਵਰਾ ਹੋਹਿ, ਸਬ੍ਬਕਾਮਸਮਿਦ੍ਧਿਨੀ.

੩੦੫.

‘‘ਨੂਨ ਤਾਰਕਵਣ੍ਣਾਭੇ, ਯਂ ਕਿਞ੍ਚਿ ਮਨਸਿਚ੍ਛਸਿ;

ਸਬ੍ਬਂ ਤਂ ਪਚੁਰਂ ਮਯ੍ਹਂ, ਰਮਸ੍ਸ੍ਵਜ੍ਜ ਮਯਾ ਸਹ.

੩੦੬.

‘‘ਨੋ ਚੇ ਤੁਵਂ ਮਹੇਸੇਯ੍ਯਂ, ਸਮ੍ਬੁਲੇ ਕਾਰਯਿਸ੍ਸਸਿ;

ਅਲਂ ਤ੍ਵਂ ਪਾਤਰਾਸਾਯ, ਪਣ੍ਹੇ ਭਕ੍ਖਾ ਭਵਿਸ੍ਸਸਿ.

੩੦੭.

‘‘ਤਞ੍ਚ ਸਤ੍ਤਜਟੋ ਲੁਦ੍ਦੋ, ਕਲ਼ਾਰੋ ਪੁਰਿਸਾਦਕੋ;

ਵਨੇ ਨਾਥਂ ਅਪਸ੍ਸਨ੍ਤਿਂ, ਸਮ੍ਬੁਲਂ ਅਗ੍ਗਹੀ ਭੁਜੇ.

੩੦੮.

‘‘ਅਧਿਪਨ੍ਨਾ ਪਿਸਾਚੇਨ, ਲੁਦ੍ਦੇਨਾਮਿਸਚਕ੍ਖੁਨਾ;

ਸਾ ਚ ਸਤ੍ਤੁਵਸਂ ਪਤ੍ਤਾ, ਪਤਿਮੇਵਾਨੁਸੋਚਤਿ.

੩੦੯.

‘‘ਨ ਮੇ ਇਦਂ ਤਥਾ ਦੁਕ੍ਖਂ, ਯਂ ਮਂ ਖਾਦੇਯ੍ਯ ਰਕ੍ਖਸੋ;

ਯਞ੍ਚ ਮੇ ਅਯ੍ਯਪੁਤ੍ਤਸ੍ਸ, ਮਨੋ ਹੇਸ੍ਸਤਿ ਅਞ੍ਞਥਾ.

੩੧੦.

‘‘ਨ ਸਨ੍ਤਿ ਦੇਵਾ ਪਵਸਨ੍ਤਿ ਨੂਨ, ਨ ਹਿ ਨੂਨ ਸਨ੍ਤਿ ਇਧ ਲੋਕਪਾਲਾ;

ਸਹਸਾ ਕਰੋਨ੍ਤਾਨਮਸਞ੍ਞਤਾਨਂ, ਨ ਹਿ ਨੂਨ ਸਨ੍ਤਿ ਪਟਿਸੇਧਿਤਾਰੋ’’ਤਿ.

ਤਤ੍ਥ ਪਰਿਚਿਣ੍ਣੇਨਾਤਿ ਤੇਨ ਆਤੁਰੇਨ ਪਰਿਚਿਣ੍ਣੇਨ ਕਿਂ ਕਰਿਸ੍ਸਸਿ. ਸੋਕਟ੍ਟਾਯਾਤਿ ਸੋਕਾਤੁਰਾਯ. ‘‘ਸੋਕਟ੍ਠਾਯਾ’’ਤਿਪਿ ਪਾਠੋ, ਸੋਕੇ ਠਿਤਾਯਾਤਿ ਅਤ੍ਥੋ. ਦੁਰਤ੍ਤਾਯਾਤਿ ਦੁਗ੍ਗਤਕਪਣਭਾਵਪ੍ਪਤ੍ਤਾਯ ਅਤ੍ਤਭਾਵਾਯ. ਏਹਿਮਨ੍ਤਿ ਮਾ ਤ੍ਵਂ ਦੁਰਤ੍ਤਾਮ੍ਹੀਤਿ ਚਿਨ੍ਤਯਿ, ਏਤਂ ਮਮ ਗਿਰਿਮ੍ਹਿ ਦਿਬ੍ਬਵਿਮਾਨਂ, ਏਹਿ ਇਮਂ ਗਿਰਿਂ ਆਰੁਹ. ਚਤੁਸ੍ਸਤਾਤਿ ਤਸ੍ਮਿਂ ਮੇ ਵਿਮਾਨੇ ਅਪਰਾਪਿ ਚਤੁਸ੍ਸਤਾ ਭਰਿਯਾਯੋ ਅਤ੍ਥਿ. ਸਬ੍ਬਂ ਤਨ੍ਤਿ ਯਂ ਕਿਞ੍ਚਿ ਉਪਭੋਗਪਰਿਭੋਗਵਤ੍ਥਾਭਰਣਾਦਿਕਂ ਇਚ੍ਛਸਿ, ਸਬ੍ਬਂ ਤਂ ਨੂਨ ਮਯ੍ਹਂ ਪਚੁਰਂ ਬਹੁਂ ਸੁਲਭਂ, ਤਸ੍ਮਾ ਮਾ ਕਪਣਾਮ੍ਹੀਤਿ ਚਿਨ੍ਤਯਿ, ਏਹਿ ਮਯਾ ਸਹ ਰਮਸ੍ਸੂਤਿ ਵਦਤਿ.

ਮਹੇਸੇਯ੍ਯਨ੍ਤਿ, ‘‘ਭਦ੍ਦੇ, ਸਮ੍ਬੁਲੇ ਨੋ ਚੇ ਮੇ ਤ੍ਵਂ ਮਹੇਸਿਭਾਵਂ ਕਾਰੇਸ੍ਸਸਿ, ਪਰਿਯਤ੍ਤਾ ਤ੍ਵਂ ਮਮ ਪਾਤਰਾਸਾਯ, ਤੇਨ ਤਂ ਬਲਕ੍ਕਾਰੇਨ ਵਿਮਾਨਂ ਨੇਸ੍ਸਾਮਿ, ਤਤ੍ਰ ਮਂ ਅਸਙ੍ਗਣ੍ਹਨ੍ਤੀ ਮਮ ਸ੍ਵੇ ਪਾਤੋਵ ਭਕ੍ਖਾ ਭਵਿਸ੍ਸਸੀ’’ਤਿ ਏਵਂ ਵਤ੍ਵਾ ਸੋ ਸਤ੍ਤਹਿ ਜਟਾਹਿ ਸਮਨ੍ਨਾਗਤੋ ਲੁਦ੍ਦਕੋ ਦਾਰੁਣੋ ਨਿਕ੍ਖਨ੍ਤਦਨ੍ਤੋ ਤਂ ਤਸ੍ਮਿਂ ਵਨੇ ਕਿਞ੍ਚਿ ਅਤ੍ਤਨੋ ਨਾਥਂ ਅਪਸ੍ਸਨ੍ਤਿਂ ਸਮ੍ਬੁਲਂ ਭੁਜੇ ਅਗ੍ਗਹੇਸਿ. ਅਧਿਪਨ੍ਨਾਤਿ ਅਜ੍ਝੋਤ੍ਥਟਾ. ਆਮਿਸਚਕ੍ਖੁਨਾਤਿ ਕਿਲੇਸਲੋਲੇਨ. ਪਤਿਮੇਵਾਤਿ ਅਤ੍ਤਨੋ ਅਚਿਨ੍ਤੇਤ੍ਵਾ ਪਤਿਮੇਵ ਅਨੁਸੋਚਤਿ. ਮਨੋ ਹੇਸ੍ਸਤੀਤਿ ਮਂ ਚਿਰਾਯਨ੍ਤਿਂ ਵਿਦਿਤ੍ਵਾ ਅਞ੍ਞਥਾ ਚਿਤ੍ਤਂ ਭਵਿਸ੍ਸਤਿ. ਨ ਸਨ੍ਤਿ ਦੇਵਾਤਿ ਇਦਂ ਸਾ ਦਾਨਵੇਨ ਭੁਜੇ ਗਹਿਤਾ ਦੇਵਤੁਜ੍ਝਾਪਨਂ ਕਰੋਨ੍ਤੀ ਆਹ. ਲੋਕਪਾਲਾਤਿ ਏਵਰੂਪਾਨਂ ਸੀਲਵਨ੍ਤੀਨਂ ਪਤਿਦੇਵਤਾਨਂ ਪਾਲਕਾ ਲੋਕਪਾਲਾ ਨੂਨ ਇਧ ਲੋਕੇ ਨ ਸਨ੍ਤੀਤਿ ਪਰਿਦੇਵਤਿ.

ਅਥਸ੍ਸਾ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਕਮ੍ਪਿ, ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ਆਵਜ੍ਜੇਨ੍ਤੋ ਤਂ ਕਾਰਣਂ ਞਤ੍ਵਾ ਵਜਿਰਂ ਆਦਾਯ ਵੇਗੇਨ ਗਨ੍ਤ੍ਵਾ ਦਾਨਵਸ੍ਸ ਮਤ੍ਥਕੇ ਠਤ੍ਵਾ ਇਤਰਂ ਗਾਥਮਾਹ –

੩੧੧.

‘‘ਇਤ੍ਥੀਨਮੇਸਾ ਪਵਰਾ ਯਸਸ੍ਸਿਨੀ, ਸਨ੍ਤਾ ਸਮਾ ਅਗ੍ਗਿਰਿਵੁਗ੍ਗਤੇਜਾ;

ਤਞ੍ਚੇ ਤੁਵਂ ਰਕ੍ਖਸਾਦੇਸਿ ਕਞ੍ਞਂ, ਮੁਦ੍ਧਾ ਚ ਹਿ ਸਤ੍ਤਧਾ ਤੇ ਫਲੇਯ੍ਯ;

ਮਾ ਤ੍ਵਂ ਦਹੀ ਮੁਞ੍ਚ ਪਤਿਬ੍ਬਤਾਯਾ’’ਤਿ.

ਤਤ੍ਥ ਸਨ੍ਤਾਤਿ ਉਪਸਨ੍ਤਾ, ਅਥ ਵਾ ਪਣ੍ਡਿਤਾ ਞਾਣਸਮ੍ਪਨ੍ਨਾ. ਸਮਾਤਿ ਕਾਯਵਿਸਮਾਦਿਵਿਰਹਿਤਾ. ਅਦੇਸੀਤਿ ਖਾਦਸਿ. ਫਲੇਯ੍ਯਾਤਿ ਇਮਿਨਾ ਮੇ ਇਨ੍ਦਵਜਿਰੇਨ ਪਹਰਿਤ੍ਵਾ ਮੁਦ੍ਧਾ ਭਿਜ੍ਜੇਥ. ਮਾ ਤ੍ਵਂ ਦਹੀਤਿ ਤ੍ਵਂ ਇਮਂ ਪਤਿਬ੍ਬਤਂ ਮਾ ਤਾਪੇਯ੍ਯਾਸੀਤਿ.

ਤਂ ਸੁਤ੍ਵਾ ਦਾਨਵੋ ਸਮ੍ਬੁਲਂ ਵਿਸ੍ਸਜ੍ਜੇਸਿ. ਸਕ੍ਕੋ ‘‘ਪੁਨਪਿ ਏਸ ਏਵਰੂਪਂ ਕਰੇਯ੍ਯਾ’’ਤਿ ਚਿਨ੍ਤੇਤ੍ਵਾ ਦਾਨਵਂ ਦੇਵਸਙ੍ਖਲਿਕਾਯ ਬਨ੍ਧਿਤ੍ਵਾ ਪੁਨ ਅਨਾਗਮਨਾਯ ਤਤਿਯੇ ਪਬ੍ਬਤਨ੍ਤਰੇ ਵਿਸ੍ਸਜ੍ਜੇਸਿ, ਰਾਜਧੀਤਰਂ ਅਪ੍ਪਮਾਦੇਨ ਓਵਦਿਤ੍ਵਾ ਸਕਟ੍ਠਾਨਮੇਵ ਗਤੋ. ਰਾਜਧੀਤਾਪਿ ਅਤ੍ਥਙ੍ਗਤੇ ਸੂਰਿਯੇ ਚਨ੍ਦਾਲੋਕੇਨ ਅਸ੍ਸਮਂ ਪਾਪੁਣਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਅਟ੍ਠ ਗਾਥਾ ਅਭਾਸਿ –

੩੧੨.

‘‘ਸਾ ਚ ਅਸ੍ਸਮਮਾਗਚ੍ਛਿ, ਪਮੁਤ੍ਤਾ ਪੁਰਿਸਾਦਕਾ;

ਨੀਲ਼ਂ ਪਲ਼ਿਨਂ ਸਕੁਣੀਵ, ਗਤਸਿਙ੍ਗਂਵ ਆਲਯਂ.

੩੧੩.

‘‘ਸਾ ਤਤ੍ਥ ਪਰਿਦੇਵੇਸਿ, ਰਾਜਪੁਤ੍ਤੀ ਯਸਸ੍ਸਿਨੀ;

ਸਮ੍ਬੁਲਾ ਉਤੁਮਤ੍ਤਕ੍ਖਾ, ਵਨੇ ਨਾਥਂ ਅਪਸ੍ਸਨ੍ਤੀ.

੩੧੪.

‘‘ਸਮਣੇ ਬ੍ਰਾਹ੍ਮਣੇ ਵਨ੍ਦੇ, ਸਮ੍ਪਨ੍ਨਚਰਣੇ ਇਸੇ;

ਰਾਜਪੁਤ੍ਤਂ ਅਪਸ੍ਸਨ੍ਤੀ, ਤੁਮ੍ਹਂਮ੍ਹਿ ਸਰਣਂ ਗਤਾ.

੩੧੫.

‘‘ਵਨ੍ਦੇ ਸੀਹੇ ਚ ਬ੍ਯਗ੍ਘੇ ਚ, ਯੇ ਚ ਅਞ੍ਞੇ ਵਨੇ ਮਿਗਾ;

ਰਾਜਪੁਤ੍ਤਂ ਅਪਸ੍ਸਨ੍ਤੀ, ਤੁਮ੍ਹਂਮ੍ਹਿ ਸਰਣਂ ਗਤਾ.

੩੧੬.

‘‘ਤਿਣਾ ਲਤਾਨਿ ਓਸਝੋ, ਪਬ੍ਬਤਾਨਿ ਵਨਾਨਿ ਚ;

ਰਾਜਪੁਤ੍ਤਂ ਅਪਸ੍ਸਨ੍ਤੀ, ਤੁਮ੍ਹਂਮ੍ਹਿ ਸਰਣਂ ਗਤਾ.

੩੧੭.

‘‘ਵਨ੍ਦੇ ਇਨ੍ਦੀਵਰੀਸਾਮਂ, ਰਤ੍ਤਿਂ ਨਕ੍ਖਤ੍ਤਮਾਲਿਨਿਂ;

ਰਾਜਪੁਤ੍ਤਂ ਅਪਸ੍ਸਨ੍ਤੀ, ਤੁਮ੍ਹਂਮ੍ਹਿ ਸਰਣਂ ਗਤਾ.

੩੧੮.

‘‘ਵਨ੍ਦੇ ਭਾਗੀਰਥਿਂ ਗਙ੍ਗਂ, ਸਵਨ੍ਤੀਨਂ ਪਟਿਗ੍ਗਹਂ;

ਰਾਜਪੁਤ੍ਤਂ ਅਪਸ੍ਸਨ੍ਤੀ, ਤੁਮ੍ਹਂਮ੍ਹਿ ਸਰਣਂ ਗਤਾ.

੩੧੯.

‘‘ਵਨ੍ਦੇ ਅਹਂ ਪਬ੍ਬਤਰਾਜਸੇਟ੍ਠਂ, ਹਿਮਵਨ੍ਤਂ ਸਿਲੁਚ੍ਚਯਂ;

ਰਾਜਪੁਤ੍ਤਂ ਅਪਸ੍ਸਨ੍ਤੀ, ਤੁਮ੍ਹਂਮ੍ਹਿ ਸਰਣਂ ਗਤਾ’’ਤਿ.

ਤਤ੍ਥ ਨੀਲ਼ਂ ਪਲ਼ਿਨਂ ਸਕੁਣੀਵਾਤਿ ਯਥਾ ਸਕੁਣਿਕਾ ਮੁਖਤੁਣ੍ਡਕੇਨ ਗੋਚਰਂ ਗਹੇਤ੍ਵਾ ਕੇਨਚਿ ਉਪਦ੍ਦਵੇਨ ਸਕੁਣਪੋਤਕਾਨਂ ਪਲ਼ਿਨਤ੍ਤਾ ਪਲ਼ਿਨਂ ਸਕੁਣਿਨੀਲ਼ਂ ਆਗਚ੍ਛੇਯ੍ਯ, ਯਥਾ ਵਾ ਗਤਸਿਙ੍ਗਂ ਨਿਕ੍ਖਨ੍ਤਵਚ੍ਛਕਂ ਆਲਯਂ ਸੁਞ੍ਞਂ ਵਚ੍ਛਕਸਾਲਂ ਵਚ੍ਛਗਿਦ੍ਧਿਨੀ ਧੇਨੁ ਆਗਚ੍ਛੇਯ੍ਯ, ਏਵਂ ਸੁਞ੍ਞਂ ਅਸ੍ਸਮਂ ਆਗਚ੍ਛੀਤਿ ਅਤ੍ਥੋ. ਤਦਾ ਹਿ ਸੋਤ੍ਥਿਸੇਨੋ ਸਮ੍ਬੁਲਾਯ ਚਿਰਮਾਨਾਯ ‘‘ਇਤ੍ਥਿਯੋ ਨਾਮ ਲੋਲਾ, ਪਚ੍ਚਾਮਿਤ੍ਤਮ੍ਪਿ ਮੇ ਗਹੇਤ੍ਵਾ ਆਗਚ੍ਛੇਯ੍ਯਾ’’ਤਿ ਪਰਿਸਙ੍ਕਨ੍ਤੋ ਪਣ੍ਣਸਾਲਤੋ ਨਿਕ੍ਖਮਿਤ੍ਵਾ ਗਚ੍ਛਨ੍ਤਰਂ ਪਵਿਸਿਤ੍ਵਾ ਨਿਸੀਦਿ. ਤੇਨੇਤਂ ਵੁਤ੍ਤਂ. ਉਤੁਮਤ੍ਤਕ੍ਖਾਤਿ ਸੋਕਵੇਗਸਞ੍ਜਾਤੇਨ ਉਣ੍ਹੇਨ ਉਤੁਨਾ ਮਨ੍ਦਲੋਚਨਾ. ਅਪਸ੍ਸਨ੍ਤੀਤਿ ਤਸ੍ਮਿਂ ਵਨੇ ਨਾਥਂ ਅਤ੍ਤਨੋ ਪਤਿਂ ਅਪਸ੍ਸਨ੍ਤੀ ਇਤੋ ਚਿਤੋ ਚ ਸਨ੍ਧਾਵਮਾਨਾ ਪਰਿਦੇਵੇਸਿ.

ਤਤ੍ਥ ਸਮਣੇ ਬ੍ਰਾਹ੍ਮਣੇਤਿ ਸਮਿਤਪਾਪਬਾਹਿਤਪਾਪੇ ਸਮਣੇ ਬ੍ਰਾਹ੍ਮਣੇ. ਸਮ੍ਪਨ੍ਨਚਰਣੇਤਿ ਸਹ ਸੀਲੇਨ ਅਟ੍ਠਨ੍ਨਂ ਸਮਾਪਤ੍ਤੀਨਂ ਵਸੇਨ ਚ ਸਮ੍ਪਨ੍ਨਚਰਣੇ ਇਸੇ ਵਨ੍ਦੇਤਿ ਏਵਂ ਵਤ੍ਵਾ ਰਾਜਪੁਤ੍ਤਂ ਅਪਸ੍ਸਨ੍ਤੀ ਤੁਮ੍ਹਾਕਂ ਸਰਣਂ ਗਤਾ ਅਮ੍ਹਿ. ਸਚੇ ਮੇ ਸਾਮਿਕਸ੍ਸ ਨਿਸਿਨ੍ਨਟ੍ਠਾਨਂ ਜਾਨਾਥ, ਆਚਿਕ੍ਖਥਾਤਿ ਪਰਿਦੇਵੇਸੀਤਿ ਅਤ੍ਥੋ. ਸੇਸਗਾਥਾਸੁਪਿ ਏਸੇਵ ਨਯੋ. ਤਿਣਾ ਲਤਾਨਿ ਓਸਝੋਤਿ ਅਨ੍ਤੋਫੇਗ੍ਗੁਬਹਿਸਾਰਤਿਣਾਨਿ ਚ ਲਤਾਨਿ ਚ ਅਨ੍ਤੋਸਾਰਓਸਧਿਯੋ ਚ. ਇਮਂ ਗਾਥਂ ਤਿਣਾਦੀਸੁ ਨਿਬ੍ਬਤ੍ਤਦੇਵਤਾ ਸਨ੍ਧਾਯਾਹ. ਇਨ੍ਦੀਵਰੀਸਾਮਨ੍ਤਿ ਇਨ੍ਦੀਵਰੀਪੁਪ੍ਫਸਮਾਨਵਣ੍ਣਂ. ਨਕ੍ਖਤ੍ਤਮਾਲਿਨਿਨ੍ਤਿ ਨਕ੍ਖਤ੍ਤਪਟਿਪਾਟਿਸਮਨ੍ਨਾਗਤਂ. ਤੁਮ੍ਹਂਮ੍ਹੀਤਿ ਰਤ੍ਤਿਂ ਸਨ੍ਧਾਯ ਤਮ੍ਪਿ ਅਮ੍ਹੀਤਿ ਆਹ. ਭਾਗੀਰਥਿਂ ਗਙ੍ਗਨ੍ਤਿ ਏਵਂਪਰਿਯਾਯਨਾਮਿਕਂ ਗਙ੍ਗਂ. ਸਵਨ੍ਤੀਨਨ੍ਤਿ ਅਞ੍ਞਾਸਂ ਬਹੂਨਂ ਨਦੀਨਂ ਪਟਿਗ੍ਗਾਹਿਕਂ. ਗਙ੍ਗਾਯ ਨਿਬ੍ਬਤ੍ਤਦੇਵਤਂ ਸਨ੍ਧਾਯੇਵਮਾਹ. ਹਿਮਵਨ੍ਤੇਪਿ ਏਸੇਵ ਨਯੋ.

ਤਂ ਏਵਂ ਪਰਿਦੇਵਮਾਨਂ ਦਿਸ੍ਵਾ ਸੋਤ੍ਥਿਸੇਨੋ ਚਿਨ੍ਤੇਸਿ – ‘‘ਅਯਂ ਅਤਿਵਿਯ ਪਰਿਦੇਵਤਿ, ਨ ਖੋ ਪਨਸ੍ਸਾ ਭਾਵਂ ਜਾਨਾਮਿ, ਸਚੇ ਮਯਿ ਸਿਨੇਹੇਨ ਏਵਂ ਕਰੋਤਿ, ਹਦਯਮ੍ਪਿਸ੍ਸਾ ਫਲੇਯ੍ਯ, ਪਰਿਗ੍ਗਣ੍ਹਿਸ੍ਸਾਮਿ ਤਾਵ ਨ’’ਨ੍ਤਿ ਗਨ੍ਤ੍ਵਾ ਪਣ੍ਣਸਾਲਦ੍ਵਾਰੇ ਨਿਸੀਦਿ. ਸਾਪਿ ਪਰਿਦੇਵਮਾਨਾਵ ਪਣ੍ਣਸਾਲਦ੍ਵਾਰਂ ਗਨ੍ਤ੍ਵਾ ਤਸ੍ਸ ਪਾਦੇ ਵਨ੍ਦਿਤ੍ਵਾ ‘‘ਕੁਹਿਂ ਗਤੋਸਿ, ਦੇਵਾ’’ਤਿ ਆਹ. ਅਥ ਨਂ ਸੋ, ‘‘ਭਦ੍ਦੇ, ਤ੍ਵਂ ਅਞ੍ਞੇਸੁ ਦਿਵਸੇਸੁ ਨ ਇਮਾਯ ਵੇਲਾਯ ਆਗਚ੍ਛਸਿ, ਅਜ੍ਜ ਅਤਿਸਾਯਂ ਆਗਤਾਸੀ’’ਤਿ ਪੁਚ੍ਛਨ੍ਤੋ ਗਾਥਮਾਹ –

੩੨੦.

‘‘ਅਤਿਸਾਯਂ ਵਤਾਗਞ੍ਛਿ, ਰਾਜਪੁਤ੍ਤਿ ਯਸਸ੍ਸਿਨਿ;

ਕੇਨ ਨੁਜ੍ਜ ਸਮਾਗਚ੍ਛਿ, ਕੋ ਤੇ ਪਿਯਤਰੋ ਮਯਾ’’ਤਿ.

ਅਥ ਨਂ ਸਾ ‘‘ਅਹਂ, ਅਯ੍ਯਪੁਤ੍ਤ, ਫਲਾਫਲਾਨਿ ਆਦਾਯ ਆਗਚ੍ਛਨ੍ਤੀ ਏਕਂ ਦਾਨਵਂ ਪਸ੍ਸਿਂ, ਸੋ ਮਯਿ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਮਂ ਹਤ੍ਥੇ ਗਣ੍ਹਿਤ੍ਵਾ ‘ਸਚੇ ਮਮ ਵਚਨਂ ਨ ਕਰੋਸਿ, ਖਾਦਿਸ੍ਸਾਮਿ ਤ’ਨ੍ਤਿ ਆਹ, ਅਹਂ ਤਾਯ ਵੇਲਾਯ ਤਞ੍ਞੇਵ ਅਨੁਸੋਚਨ੍ਤੀ ਏਵਂ ਪਰਿਦੇਵਿ’’ਨ੍ਤਿ ਵਤ੍ਵਾ ਗਾਥਮਾਹ –

੩੨੧.

‘‘ਇਦਂ ਖੋਹਂ ਤਦਾਵੋਚਂ, ਗਹਿਤਾ ਤੇਨ ਸਤ੍ਤੁਨਾ;

ਨ ਮੇ ਇਦਂ ਤਥਾ ਦੁਕ੍ਖਂ, ਯਂ ਮਂ ਖਾਦੇਯ੍ਯ ਰਕ੍ਖਸੋ;

ਯਞ੍ਚ ਮੇ ਅਯ੍ਯਪੁਤ੍ਤਸ੍ਸ, ਮਨੋ ਹੇਸ੍ਸਤਿ ਅਞ੍ਞਥਾ’’ਤਿ.

ਅਥਸ੍ਸ ਸੇਸਮ੍ਪਿ ਪਵਤ੍ਤਿਂ ਆਰੋਚੇਨ੍ਤੀ ‘‘ਤੇਨ ਪਨਾਹਂ, ਦੇਵ, ਦਾਨਵੇਨ ਗਹਿਤਾ ਅਤ੍ਤਾਨਂ ਵਿਸ੍ਸਜ੍ਜਾਪੇਤੁਂ ਅਸਕ੍ਕੋਨ੍ਤੀ ਦੇਵਤੁਜ੍ਝਾਪਨਕਮ੍ਮਂ ਅਕਾਸਿਂ, ਅਥ ਸਕ੍ਕੋ ਵਜਿਰਹਤ੍ਥੋ ਆਗਨ੍ਤ੍ਵਾ ਆਕਾਸੇ ਠਿਤੋ ਦਾਨਵਂ ਸਨ੍ਤਜ੍ਜੇਤ੍ਵਾ ਮਂ ਵਿਸ੍ਸਜ੍ਜਾਪੇਤ੍ਵਾ ਤਂ ਦੇਵਸਙ੍ਖਲਿਕਾਯ ਬਨ੍ਧਿਤ੍ਵਾ ਤਤਿਯੇ ਪਬ੍ਬਤਨ੍ਤਰੇ ਖਿਪਿਤ੍ਵਾ ਪਕ੍ਕਾਮਿ, ਏਵਾਹਂ ਸਕ੍ਕਂ ਨਿਸ੍ਸਾਯ ਜੀਵਿਤਂ ਲਭਿ’’ਨ੍ਤਿ ਆਹ. ਤਂ ਸੁਤ੍ਵਾ ਸੋਤ੍ਥਿਸੇਨੋ, ‘‘ਭਦ੍ਦੇ, ਹੋਤੁ, ਮਾਤੁਗਾਮਸ੍ਸ ਅਨ੍ਤਰੇ ਸਚ੍ਚਂ ਨਾਮ ਦੁਲ੍ਲਭਂ, ਹਿਮਵਨ੍ਤੇ ਹਿ ਬਹੂ ਵਨਚਰਕਤਾਪਸਵਿਜ੍ਜਾਧਰਾਦਯੋ ਸਨ੍ਤਿ, ਕੋ ਤੁਯ੍ਹਂ ਸਦ੍ਦਹਿਸ੍ਸਤੀ’’ਤਿ ਵਤ੍ਵਾ ਗਾਥਮਾਹ –

੩੨੨.

‘‘ਚੋਰੀਨਂ ਬਹੁਬੁਦ੍ਧੀਨਂ, ਯਾਸੁ ਸਚ੍ਚਂ ਸੁਦੁਲ੍ਲਭਂ;

ਥੀਨਂ ਭਾਵੋ ਦੁਰਾਜਾਨੋ, ਮਚ੍ਛਸ੍ਸੇਵੋਦਕੇ ਗਤ’’ਨ੍ਤਿ.

ਸਾ ਤਸ੍ਸ ਵਚਨਂ ਸੁਤ੍ਵਾ, ‘‘ਅਯ੍ਯਪੁਤ੍ਤ, ਅਹਂ ਤਂ ਅਸਦ੍ਦਹਨ੍ਤਂ ਮਮ ਸਚ੍ਚਬਲੇਨੇਵ ਤਿਕਿਚ੍ਛਿਸ੍ਸਾਮੀ’’ਤਿ ਉਦਕਸ੍ਸ ਕਲਸਂ ਪੂਰੇਤ੍ਵਾ ਸਚ੍ਚਕਿਰਿਯਂ ਕਤ੍ਵਾ ਤਸ੍ਸ ਸੀਸੇ ਉਦਕਂ ਆਸਿਞ੍ਚਨ੍ਤੀ ਗਾਥਮਾਹ –

੩੨੩.

‘‘ਤਥਾ ਮਂ ਸਚ੍ਚਂ ਪਾਲੇਤੁ, ਪਾਲਯਿਸ੍ਸਤਿ ਚੇ ਮਮਂ;

ਯਥਾਹਂ ਨਾਭਿਜਾਨਾਮਿ, ਅਞ੍ਞਂ ਪਿਯਤਰਂ ਤਯਾ;

ਏਤੇਨ ਸਚ੍ਚਵਜ੍ਜੇਨ, ਬ੍ਯਾਧਿ ਤੇ ਵੂਪਸਮ੍ਮਤੂ’’ਤਿ.

ਤਤ੍ਥ ਤਥਾ-ਸਦ੍ਦੋ ‘‘ਚੇ ਮਮ’’ਨ੍ਤਿ ਇਮਿਨਾ ਸਦ੍ਧਿਂ ਯੋਜੇਤਬ੍ਬੋ. ਇਦਂ ਵੁਤ੍ਤਂ ਹੋਤਿ – ਯਥਾਹਂ ਵਦਾਮਿ, ਤਥਾ ਚੇ ਮਮ ਵਚਨਂ ਸਚ੍ਚਂ, ਅਥ ਮਂ ਇਦਾਨਿਪਿ ਪਾਲੇਤੁ, ਆਯਤਿਮ੍ਪਿ ਪਾਲੇਸ੍ਸਤਿ, ਇਦਾਨਿ ਮੇ ਵਚਨਂ ਸੁਣਾਥ ‘‘ਯਥਾਹਂ ਨਾਭਿਜਾਨਾਮੀ’’ਤਿ. ਪੋਤ੍ਥਕੇਸੁ ਪਨ ‘‘ਤਥਾ ਮਂ ਸਚ੍ਚਂ ਪਾਲੇਤੀ’’ਤਿ ਲਿਖਿਤਂ, ਤਂ ਅਟ੍ਠਕਥਾਯਂ ਨਤ੍ਥਿ.

ਏਵਂ ਤਾਯ ਸਚ੍ਚਕਿਰਿਯਂ ਕਤ੍ਵਾ ਉਦਕੇ ਆਸਿਤ੍ਤਮਤ੍ਤੇਯੇਵ ਸੋਤ੍ਥਿਸੇਨਸ੍ਸ ਕੁਟ੍ਠਂ ਅਮ੍ਬਿਲੇਨ ਧੋਤਂ ਵਿਯ ਤਮ੍ਬਮਲਂ ਤਾਵਦੇਵ ਅਪਗਚ੍ਛਿ. ਤੇ ਕਤਿਪਾਹਂ ਤਤ੍ਥ ਵਸਿਤ੍ਵਾ ਅਰਞ੍ਞਾ ਨਿਕ੍ਖਮ੍ਮ ਬਾਰਾਣਸਿਂ ਪਤ੍ਵਾ ਉਯ੍ਯਾਨਂ ਪਵਿਸਿਂਸੁ. ਰਾਜਾ ਤੇਸਂ ਆਗਤਭਾਵਂ ਞਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਤਤ੍ਥੇਵ ਸੋਤ੍ਥਿਸੇਨਸ੍ਸ ਛਤ੍ਤਂ ਉਸ੍ਸਾਪੇਤ੍ਵਾ ਸਮ੍ਬੁਲਂ ਅਗ੍ਗਮਹੇਸਿਟ੍ਠਾਨੇ ਅਭਿਸਿਞ੍ਚਾਪੇਤ੍ਵਾ ਨਗਰਂ ਪਵੇਸੇਤ੍ਵਾ ਸਯਂ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਉਯ੍ਯਾਨੇ ਵਾਸਂ ਕਪ੍ਪੇਸਿ, ਰਾਜਨਿਵੇਸਨੇਯੇਵ ਚ ਨਿਬਦ੍ਧਂ ਭੁਞ੍ਜਿ. ਸੋਤ੍ਥਿਸੇਨੋਪਿ ਸਮ੍ਬੁਲਾਯ ਅਗ੍ਗਮਹੇਸਿਟ੍ਠਾਨਮਤ੍ਤਮੇਵ ਅਦਾਸਿ, ਨ ਪੁਨਸ੍ਸਾ ਕੋਚਿ ਸਕ੍ਕਾਰੋ ਅਹੋਸਿ, ਅਤ੍ਥਿਭਾਵਮ੍ਪਿਸ੍ਸਾ ਨ ਅਞ੍ਞਾਸਿ, ਅਞ੍ਞਾਹੇਵ ਇਤ੍ਥੀਹਿ ਸਦ੍ਧਿਂ ਅਭਿਰਮਿ. ਸਮ੍ਬੁਲਾ ਸਪਤ੍ਤਿਦੋਸਵਸੇਨ ਕਿਸਾ ਅਹੋਸਿ ਉਪਣ੍ਡੁਪਣ੍ਡੁਕਜਾਤਾ ਧਮਨੀਸਨ੍ਥਤਗਤ੍ਤਾ. ਸਾ ਏਕਦਿਵਸਂ ਸੋਕਵਿਨੋਦਨਤ੍ਥਂ ਭੁਞ੍ਜਿਤੁਂ ਆਗਤਸ੍ਸ ਸਸੁਰਤਾਪਸਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਕਤਭਤ੍ਤਕਿਚ੍ਚਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸੋ ਤਂ ਮਿਲਾਤਿਨ੍ਦ੍ਰਿਯਂ ਦਿਸ੍ਵਾ ਗਾਥਮਾਹ –

੩੨੪.

‘‘ਯੇ ਕੁਞ੍ਜਰਾ ਸਤ੍ਤਸਤਾ ਉਲ਼ਾਰਾ, ਰਕ੍ਖਨ੍ਤਿ ਰਤ੍ਤਿਨ੍ਦਿਵਮੁਯ੍ਯੁਤਾਵੁਧਾ;

ਧਨੁਗ੍ਗਹਾਨਞ੍ਚ ਸਤਾਨਿ ਸੋਲ਼ਸ, ਕਥਂਵਿਧੇ ਪਸ੍ਸਸਿ ਭਦ੍ਦੇ ਸਤ੍ਤਵੋ’’ਤਿ.

ਤਸ੍ਸਤ੍ਥੋ – ਭਦ੍ਦੇ, ਸਮ੍ਬੁਲੇ ਯੇ ਅਮ੍ਹਾਕਂ ਸਤ੍ਤਸਤਾ ਕੁਞ੍ਜਰਾ, ਤੇਸਞ੍ਞੇਵ ਖਨ੍ਧਗਤਾਨਂ ਯੋਧਾਨਂ ਵਸੇਨ ਉਯ੍ਯੁਤ੍ਤਾਵੁਧਾ, ਅਪਰਾਨਿ ਚ ਸੋਲ਼ਸਧਨੁਗ੍ਗਹਸਤਾਨਿ ਰਤ੍ਤਿਨ੍ਦਿਵਂ ਬਾਰਾਣਸਿਂ ਰਕ੍ਖਨ੍ਤਿ. ਏਵਂ ਸੁਰਕ੍ਖਿਤੇ ਨਗਰੇ ਕਥਂਵਿਧੇ ਤ੍ਵਂ ਸਤ੍ਤਵੋ ਪਸ੍ਸਸਿ. ਭਦ੍ਦੇ, ਯਸ੍ਸਾ ਤਵ ਸਾਸਙ੍ਕਾ ਸਪ੍ਪਟਿਭਯਾ ਅਰਞ੍ਞਾ ਆਗਤਕਾਲੇਪਿ ਪਭਾਸਮ੍ਪਨ੍ਨਂ ਸਰੀਰਂ, ਇਦਾਨਿ ਪਨ ਮਿਲਾਤਾ ਪਣ੍ਡੁਪਲਾਸਵਣ੍ਣਾ ਅਤਿਵਿਯ ਕਿਲਨ੍ਤਿਨ੍ਦ੍ਰਿਯਾਸਿ, ਕਸ੍ਸ ਨਾਮ ਤ੍ਵਂ ਭਾਯਸੀ’’ਤਿ ਪੁਚ੍ਛਿ.

ਸਾ ਤਸ੍ਸ ਵਚਨਂ ਸੁਤ੍ਵਾ ‘‘ਪੁਤ੍ਤੋ ਤੇ, ਦੇਵ, ਮਯਿ ਨ ਪੁਰਿਮਸਦਿਸੋ’’ਤਿ ਵਤ੍ਵਾ ਪਞ੍ਚ ਗਾਥਾ ਅਭਾਸਿ –

੩੨੫.

‘‘ਅਲਙ੍ਕਤਾਯੋ ਪਦੁਮੁਤ੍ਤਰਤ੍ਤਚਾ, ਵਿਰਾਗਿਤਾ ਪਸ੍ਸਤਿ ਹਂਸਗਗ੍ਗਰਾ;

ਤਾਸਂ ਸੁਣਿਤ੍ਵਾ ਮਿਤਗੀਤਵਾਦਿਤਂ, ਨ ਦਾਨਿ ਮੇ ਤਾਤ ਤਥਾ ਯਥਾ ਪੁਰੇ.

੩੨੬.

‘‘ਸੁਵਣ੍ਣਸਂਕਚ੍ਚਧਰਾ ਸੁਵਿਗ੍ਗਹਾ, ਅਲਙ੍ਕਤਾ ਮਾਨੁਸਿਯਚ੍ਛਰੂਪਮਾ;

ਸੇਨੋਪਿਯਾ ਤਾਤ ਅਨਿਨ੍ਦਿਤਙ੍ਗਿਯੋ, ਖਤ੍ਤਿਯਕਞ੍ਞਾ ਪਟਿਲੋਭਯਨ੍ਤਿ ਨਂ.

੩੨੭.

‘‘ਸਚੇ ਅਹਂ ਤਾਤ ਤਥਾ ਯਥਾ ਪੁਰੇ, ਪਤਿਂ ਤਮੁਞ੍ਛਾਯ ਪੁਨਾ ਵਨੇ ਭਰੇ;

ਸਮ੍ਮਾਨਯੇ ਮਂ ਨ ਚ ਮਂ ਵਿਮਾਨਯੇ, ਇਤੋਪਿ ਮੇ ਤਾਤ ਤਤੋ ਵਰਂ ਸਿਯਾ.

੩੨੮.

‘‘ਯਮਨ੍ਨਪਾਨੇ ਵਿਪੁਲਸ੍ਮਿ ਓਹਿਤੇ, ਨਾਰੀ ਵਿਮਟ੍ਠਾਭਰਣਾ ਅਲਙ੍ਕਤਾ;

ਸਬ੍ਬਙ੍ਗੁਪੇਤਾ ਪਤਿਨੋ ਚ ਅਪ੍ਪਿਯਾ, ਅਬਜ੍ਝ ਤਸ੍ਸਾ ਮਰਣਂ ਤਤੋ ਵਰਂ.

੩੨੯.

‘‘ਅਪਿ ਚੇ ਦਲਿਦ੍ਦਾ ਕਪਣਾ ਅਨਾਲ਼੍ਹਿਯਾ, ਕਟਾਦੁਤੀਯਾ ਪਤਿਨੋ ਚ ਸਾ ਪਿਯਾ;

ਸਬ੍ਬਙ੍ਗੁਪੇਤਾਯਪਿ ਅਪ੍ਪਿਯਾਯ, ਅਯਮੇਵ ਸੇਯ੍ਯਾ ਕਪਣਾਪਿ ਯਾ ਪਿਯਾ’’ਤਿ.

ਤਤ੍ਥ ਪਦੁਮੁਤ੍ਤਰਤ੍ਤਚਾਤਿ ਪਦੁਮਗਬ੍ਭਸਦਿਸਉਤ੍ਤਰਤ੍ਤਚਾ. ਸਬ੍ਬਾਸਂ ਸਰੀਰਤੋ ਸੁਵਣ੍ਣਪਭਾ ਨਿਚ੍ਛਰਨ੍ਤੀਤਿ ਦੀਪੇਤਿ. ਵਿਰਾਗਿਤਾਤਿ ਵਿਲਗ੍ਗਸਰੀਰਾ, ਤਨੁਮਜ੍ਝਾਤਿ ਅਤ੍ਥੋ. ਹਂਸਗਗ੍ਗਰਾਤਿ ਏਵਰੂਪਾ ਹਂਸਾ ਵਿਯ ਮਧੁਰਸ੍ਸਰਾ ਨਾਰਿਯੋ ਪਸ੍ਸਤਿ. ਤਾਸਨ੍ਤਿ ਸੋ ਤਵ ਪੁਤ੍ਤੋ ਤਾਸਂ ਨਾਰੀਨਂ ਮਿਤਗੀਤਵਾਦਿਤਾਦੀਨਿ ਸੁਣਿਤ੍ਵਾ ਇਦਾਨਿ ਮੇ, ਤਾਤ, ਯਥਾ ਪੁਰੇ, ਤਥਾ ਨ ਪਵਤ੍ਤਤੀਤਿ ਵਦਤਿ. ਸੁਵਣ੍ਣਸਂਕਚ੍ਚਧਰਾਤਿ ਸੁਵਣ੍ਣਮਯਸਂਕਚ੍ਚਾਲਙ੍ਕਾਰਧਰਾ. ਅਲਙ੍ਕਤਾਤਿ ਨਾਨਾਲਙ੍ਕਾਰਪਟਿਮਣ੍ਡਿਤਾ. ਮਾਨੁਸਿਯਚ੍ਛਰੂਪਮਾਤਿ ਮਾਨੁਸਿਯੋ ਅਚ੍ਛਰੂਪਮਾ. ਸੇਨੋਪਿਯਾਤਿ ਸੋਤ੍ਥਿਸੇਨਸ੍ਸ ਪਿਯਾ. ਪਟਿਲੋਭਯਨ੍ਤਿ ਨਨ੍ਤਿ ਨਂ ਤਵ ਪੁਤ੍ਤਂ ਪਟਿਲੋਭਯਨ੍ਤਿ.

ਸਚੇ ਅਹਨ੍ਤਿ, ਤਾਤ, ਯਥਾ ਪੁਰੇ ਸਚੇ ਅਹਂ ਪੁਨਪਿ ਤਂ ਪਤਿਂ ਤਥੇਵ ਕੁਟ੍ਠਰੋਗੇਨ ਵਨਂ ਪਵਿਟ੍ਠਂ ਉਞ੍ਛਾਯ ਤਸ੍ਮਿਂ ਵਨੇ ਭਰੇਯ੍ਯਂ, ਪੁਨਪਿ ਮਂ ਸੋ ਸਮ੍ਮਾਨੇਯ੍ਯ ਨ ਵਿਮਾਨੇਯ੍ਯ, ਤਤੋ ਮੇ ਇਤੋਪਿ ਬਾਰਾਣਸਿਰਜ੍ਜਤੋ ਤਂ ਅਰਞ੍ਞਮੇਵ ਵਰਂ ਸਿਯਾ ਸਪਤ੍ਤਿਦੋਸੇਨ ਸੁਸ੍ਸਨ੍ਤਿਯਾਤਿ ਦੀਪੇਤਿ. ਯਮਨ੍ਨਪਾਨੇਤਿ ਯਂ ਅਨ੍ਨਪਾਨੇ. ਓਹਿਤੇਤਿ ਠਪਿਤੇ ਪਟਿਯਤ੍ਤੇ. ਇਮਿਨਾ ਬਹੁਨ੍ਨਪਾਨਘਰਂ ਦਸ੍ਸੇਤਿ. ਅਯਂ ਕਿਰਸ੍ਸਾ ਅਧਿਪ੍ਪਾਯੋ – ਯਾ ਨਾਰੀ ਵਿਪੁਲਨ੍ਨਪਾਨੇ ਘਰੇ ਏਕਿਕਾਵ ਅਸਪਤ੍ਤਿ ਸਮਾਨਾ ਵਿਮਟ੍ਠਾਭਰਣਾ ਨਾਨਾਲਙ੍ਕਾਰੇਹਿ ਅਲਙ੍ਕਤਾ ਸਬ੍ਬੇਹਿ ਗੁਣਙ੍ਗੇਹਿ ਉਪੇਤਾ ਪਤਿਨੋ ਚ ਅਪ੍ਪਿਯਾ ਹੋਤਿ, ਅਬਜ੍ਝ ਗੀਵਾਯ ਵਲ੍ਲਿਯਾ ਵਾ ਰਜ੍ਜੁਯਾ ਵਾ ਬਨ੍ਧਿਤ੍ਵਾ ਤਸ੍ਸਾ ਤਤੋ ਘਰਾਵਾਸਤੋ ਮਰਣਮੇਵ ਵਰਤਰਨ੍ਤਿ. ਅਨਾਲ਼੍ਹੀਯਾਤਿ ਅਨਾਲ਼੍ਹਾ. ਕਟਾਦੁਤੀਯਾਤਿ ਨਿਪਜ੍ਜਨਕਟਸਾਰਕਦੁਤਿਯਾ. ਸੇਯ੍ਯਾਤਿ ਕਪਣਾਪਿ ਸਮਾਨਾ ਯਾ ਪਤਿਨੋ ਪਿਯਾ, ਅਯਮੇਵ ਉਤ੍ਤਮਾਤਿ.

ਏਵਂ ਤਾਯ ਅਤ੍ਤਨੋ ਪਰਿਸੁਸ੍ਸਨਕਾਰਣੇ ਤਾਪਸਸ੍ਸ ਕਥਿਤੇ ਤਾਪਸੋ ਰਾਜਾਨਂ ਪਕ੍ਕੋਸਾਪੇਤ੍ਵਾ ‘‘ਤਾਤ, ਸੋਤ੍ਥਿਸੇਨ ਤਯਿ ਕੁਟ੍ਠਰੋਗਾਭਿਭੂਤੇ ਅਰਞ੍ਞਂ ਪਵਿਸਨ੍ਤੇ ਤਯਾ ਸਦ੍ਧਿਂ ਪਵਿਸਿਤ੍ਵਾ ਤਂ ਉਪਟ੍ਠਹਨ੍ਤੀ ਅਤ੍ਤਨੋ ਸਚ੍ਚਬਲੇਨ ਤਵ ਰੋਗਂ ਵੂਪਸਮੇਤ੍ਵਾ ਯਾ ਤੇ ਰਜ੍ਜੇ ਪਤਿਟ੍ਠਾਨਕਾਰਣਮਕਾਸਿ, ਤਸ੍ਸਾ ਨਾਮ ਤ੍ਵਂ ਨੇਵ ਠਿਤਟ੍ਠਾਨਂ, ਨ ਨਿਸਿਨ੍ਨਟ੍ਠਾਨਂ ਜਾਨਾਸਿ, ਅਯੁਤ੍ਤਂ ਤੇ ਕਤਂ, ਮਿਤ੍ਤਦੁਬ੍ਭਿਕਮ੍ਮਂ ਨਾਮੇਤਂ ਪਾਪਕ’’ਨ੍ਤਿ ਵਤ੍ਵਾ ਪੁਤ੍ਤਂ ਓਵਦਨ੍ਤੋ ਗਾਥਮਾਹ –

੩੩੦.

‘‘ਸੁਦੁਲ੍ਲਭਿਤ੍ਥੀ ਪੁਰਿਸਸ੍ਸ ਯਾ ਹਿਤਾ, ਭਤ੍ਤਿਤ੍ਥਿਯਾ ਦੁਲ੍ਲਭੋ ਯੋ ਹਿਤੋ ਚ;

ਹਿਤਾ ਚ ਤੇ ਸੀਲਵਤੀ ਚ ਭਰਿਯਾ, ਜਨਿਨ੍ਦ ਧਮ੍ਮਂ ਚਰ ਸਮ੍ਬੁਲਾਯਾ’’ਤਿ.

ਤਸ੍ਸਤ੍ਥੋ – ਤਾਤ, ਯਾ ਪੁਰਿਸਸ੍ਸ ਹਿਤਾ ਮੁਦੁਚਿਤ੍ਤਾ ਅਨੁਕਮ੍ਪਿਕਾ ਇਤ੍ਥੀ, ਯੋ ਚ ਭਤ੍ਤਾ ਇਤ੍ਥਿਯਾ ਹਿਤੋ ਕਤਗੁਣਂ ਜਾਨਾਤਿ, ਉਭੋਪੇਤੇ ਸੁਦੁਲ੍ਲਭਾ. ਅਯਞ੍ਚ ਸਮ੍ਬੁਲਾ ਤੁਯ੍ਹਂ ਹਿਤਾ ਚੇਵ ਸੀਲਸਮ੍ਪਨ੍ਨਾ ਚ, ਤਸ੍ਮਾ ਏਤਿਸ੍ਸਾ ਧਮ੍ਮਂ ਚਰ, ਕਤਗੁਣਂ ਜਾਨਿਤ੍ਵਾ ਮੁਦੁਚਿਤ੍ਤੋ ਹੋਹਿ, ਚਿਤ੍ਤਮਸ੍ਸਾ ਪਰਿਤੋਸੇਹੀਤਿ.

ਏਵਂ ਸੋ ਪੁਤ੍ਤਸ੍ਸ ਓਵਾਦਂ ਦਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਰਾਜਾ ਪਿਤਰਿ ਗਤੇ ਸਮ੍ਬੁਲਂ ਪਕ੍ਕੋਸਾਪੇਤ੍ਵਾ, ‘‘ਭਦ੍ਦੇ, ਏਤ੍ਤਕਂ ਕਾਲਂ ਮਯਾ ਕਤਂ ਦੋਸਂ ਖਮ, ਇਤੋ ਪਟ੍ਠਾਯ ਸਬ੍ਬਿਸ੍ਸਰਿਯਂ ਤੁਯ੍ਹਮੇਵ ਦਮ੍ਮੀ’’ਤਿ ਵਤ੍ਵਾ ਓਸਾਨਗਾਥਮਾਹ –

੩੩੧.

‘‘ਸਚੇ ਤੁਵਂ ਵਿਪੁਲੇ ਲਦ੍ਧਭੋਗੇ, ਇਸ੍ਸਾਵਤਿਣ੍ਣਾ ਮਰਣਂ ਉਪੇਸਿ;

ਅਹਞ੍ਚ ਤੇ ਭਦ੍ਦੇ ਇਮਾ ਰਾਜਕਞ੍ਞਾ, ਸਬ੍ਬੇ ਤੇ ਵਚਨਕਰਾ ਭਵਾਮਾ’’ਤਿ.

ਤਸ੍ਸਤ੍ਥੋ – ਭਦ੍ਦੇ, ਸਮ੍ਬੁਲੇ ਸਚੇ ਤ੍ਵਂ ਰਤਨਰਾਸਿਮ੍ਹਿ ਠਪੇਤ੍ਵਾ ਅਭਿਸਿਤ੍ਤਾ ਅਗ੍ਗਮਹੇਸਿਟ੍ਠਾਨਵਸੇਨ ਵਿਪੁਲੇ ਭੋਗੇ ਲਭਿਤ੍ਵਾਪਿ ਇਸ੍ਸਾਯ ਓਤਿਣ੍ਣਾ ਮਰਣਂ ਉਪੇਸਿ, ਅਹਞ੍ਚ ਇਮਾ ਚ ਰਾਜਕਞ੍ਞਾ ਸਬ੍ਬੇ ਤਵ ਵਚਨਕਰਾ ਭਵਾਮ, ਤ੍ਵਂ ਯਥਾਧਿਪ੍ਪਾਯਂ ਇਮਂ ਰਜ੍ਜਂ ਵਿਚਾਰੇਹੀਤਿ ਸਬ੍ਬਿਸ੍ਸਰਿਯਂ ਤਸ੍ਸਾ ਅਦਾਸਿ.

ਤਤੋ ਪਟ੍ਠਾਯ ਉਭੋ ਸਮਗ੍ਗਵਾਸਂ ਵਸਨ੍ਤਾ ਦਾਨਾਦੀਨਿ ਪੁਞ੍ਞਾਨਿ ਕਰਿਤ੍ਵਾ ਯਥਾਕਮ੍ਮਂ ਗਮਿਂਸੁ. ਤਾਪਸੋ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਮਲ੍ਲਿਕਾ ਪਤਿਦੇਵਤਾਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਸਮ੍ਬੁਲਾ ਮਲ੍ਲਿਕਾ ਅਹੋਸਿ, ਸੋਤ੍ਥਿਸੇਨੋ ਕੋਸਲਰਾਜਾ, ਪਿਤਾ ਤਾਪਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਮ੍ਬੁਲਾਜਾਤਕਵਣ੍ਣਨਾ ਨਵਮਾ.

[੫੨੦] ੧੦. ਗਨ੍ਧਤਿਨ੍ਦੁਕਜਾਤਕਵਣ੍ਣਨਾ

ਅਪ੍ਪਮਾਦੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਰਾਜੋਵਾਦਂ ਆਰਬ੍ਭ ਕਥੇਸਿ. ਰਾਜੋਵਾਦੋ ਹੇਟ੍ਠਾ ਵਿਤ੍ਥਾਰਿਤੋਵ. ਅਤੀਤੇ ਪਨ ਕਪਿਲਰਟ੍ਠੇ ਉਤ੍ਤਰਪਞ੍ਚਾਲਨਗਰੇ ਪਞ੍ਚਾਲੋ ਨਾਮ ਰਾਜਾ ਅਗਤਿਗਮਨੇ ਠਿਤੋ ਅਧਮ੍ਮੇਨ ਪਮਤ੍ਤੋ ਰਜ੍ਜਂ ਕਾਰੇਸਿ. ਅਥਸ੍ਸ ਅਮਚ੍ਚਾਦਯੋ ਸਬ੍ਬੇਪਿ ਅਧਮ੍ਮਿਕਾਵ ਜਾਤਾ. ਬਲਿਪੀਲ਼ਿਤਾ ਰਟ੍ਠਵਾਸਿਨੋ ਪੁਤ੍ਤਦਾਰੇ ਆਦਾਯ ਅਰਞ੍ਞੇ ਮਿਗਾ ਵਿਯ ਚਰਿਂਸੁ, ਗਾਮਟ੍ਠਾਨੇ ਗਾਮੋ ਨਾਮ ਨਾਹੋਸਿ. ਮਨੁਸ੍ਸਾ ਰਾਜਪੁਰਿਸਾਨਂ ਭਯੇਨ ਦਿਵਾ ਗੇਹੇ ਵਸਿਤੁਂ ਅਸਕ੍ਕੋਨ੍ਤਾ ਗੇਹਾਨਿ ਕਣ੍ਟਕਸਾਖਾਹਿ ਪਰਿਕ੍ਖਿਪਿਤ੍ਵਾ ਗੇਹੇ ਰਤ੍ਤਿਂ ਵਸਿਤ੍ਵਾ ਅਰੁਣੇ ਉਗ੍ਗਚ੍ਛਨ੍ਤੇਯੇਵ ਅਰਞ੍ਞਂ ਪਵਿਸਨ੍ਤਿ. ਦਿਵਾ ਰਾਜਪੁਰਿਸਾ ਵਿਲੁਮ੍ਪਨ੍ਤਿ, ਰਤ੍ਤਿਂ ਚੋਰਾ. ਤਦਾ ਬੋਧਿਸਤ੍ਤੋ ਬਹਿਨਗਰੇ ਗਨ੍ਧਤਿਨ੍ਦੁਕਰੁਕ੍ਖੇ ਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ, ਅਨੁਸਂਵਚ੍ਛਰਂ ਰਞ੍ਞੋ ਸਨ੍ਤਿਕਾ ਸਹਸ੍ਸਗ੍ਘਨਕਂ ਬਲਿਕਮ੍ਮਂ ਲਭਤਿ. ਸੋ ਚਿਨ੍ਤੇਸਿ – ‘‘ਅਯਂ ਰਾਜਾ ਪਮਤ੍ਤੋ ਰਜ੍ਜਂ ਕਾਰੇਤਿ, ਸਕਲਰਟ੍ਠਂ ਵਿਨਸ੍ਸਤਿ, ਠਪੇਤ੍ਵਾ ਮਂ ਅਞ੍ਞੋ ਰਾਜਾਨਂ ਪਤਿਰੂਪੇ ਨਿਵੇਸੇਤੁਂ ਸਮਤ੍ਥੋ ਨਾਮ ਨਤ੍ਥਿ, ਉਪਕਾਰਕੋ ਚਾਪਿ ਮੇ ਅਨੁਸਂਵਚ੍ਛਰਂ ਸਹਸ੍ਸਗ੍ਘਨਕਬਲਿਨਾ ਪੂਜੇਤਿ, ਓਵਦਿਸ੍ਸਾਮਿ ਨ’’ਨ੍ਤਿ.

ਸੋ ਰਤ੍ਤਿਭਾਗੇ ਰਞ੍ਞੋ ਸਿਰਿਗਬ੍ਭਂ ਪਵਿਸਿਤ੍ਵਾ ਉਸ੍ਸੀਸਕਪਸ੍ਸੇ ਠਤ੍ਵਾ ਓਭਾਸਂ ਵਿਸ੍ਸਜ੍ਜੇਤ੍ਵਾ ਆਕਾਸੇ ਅਟ੍ਠਾਸਿ. ਰਾਜਾ ਤਂ ਬਾਲਸੂਰਿਯਂ ਵਿਯ ਜਲਮਾਨਂ ਦਿਸ੍ਵਾ ‘‘ਕੋਸਿ ਤ੍ਵਂ, ਕੇਨ ਵਾ ਕਾਰਣੇਨ ਇਧਾਗਤੋਸੀ’’ਤਿ ਪੁਚ੍ਛਿ. ਸੋ ਤਸ੍ਸ ਵਚਨਂ ਸੁਤ੍ਵਾ, ‘‘ਮਹਾਰਾਜ, ਅਹਂ ਗਨ੍ਧਤਿਨ੍ਦੁਕਦੇਵਤਾ, ‘ਤੁਯ੍ਹਂ ਓਵਾਦਂ ਦਸ੍ਸਾਮੀ’ਤਿ ਆਗਤੋਮ੍ਹੀ’’ਤਿ ਆਹ. ‘‘ਕਿਂ ਨਾਮ ਓਵਾਦਂ ਦਸ੍ਸਸੀ’’ਤਿ ਏਵਂ ਵੁਤ੍ਤੇ ਮਹਾਸਤ੍ਤੋ, ‘‘ਮਹਾਰਾਜ, ਤ੍ਵਂ ਪਮਤ੍ਤੋ ਹੁਤ੍ਵਾ ਰਜ੍ਜਂ ਕਾਰੇਸਿ, ਤੇਨ ਤੇ ਸਕਲਰਟ੍ਠਂ ਹਤਵਿਲੁਤ੍ਤਂ ਵਿਯ ਵਿਨਟ੍ਠਂ, ਰਾਜਾਨੋ ਨਾਮ ਪਮਾਦੇਨ ਰਜ੍ਜਂ ਕਾਰੇਨ੍ਤਾ ਸਕਲਰਟ੍ਠਸ੍ਸ ਸਾਮਿਨੋ ਨ ਹੋਨ੍ਤਿ, ਦਿਟ੍ਠੇਵ ਧਮ੍ਮੇ ਵਿਨਾਸਂ ਪਤ੍ਵਾ ਸਮ੍ਪਰਾਯੇ ਪੁਨ ਮਹਾਨਿਰਯੇ ਨਿਬ੍ਬਤ੍ਤਨ੍ਤਿ. ਤੇਸੁ ਚ ਪਮਾਦਂ ਆਪਨ੍ਨੇਸੁ ਅਨ੍ਤੋਜਨਾ ਬਹਿਜਨਾਪਿਸ੍ਸ ਪਮਤ੍ਤਾਵ ਹੋਨ੍ਤਿ, ਤਸ੍ਮਾ ਰਞ੍ਞਾ ਅਤਿਰੇਕੇਨ ਅਪ੍ਪਮਤ੍ਤੇਨ ਭਵਿਤਬ੍ਬ’’ਨ੍ਤਿ ਵਤ੍ਵਾ ਧਮ੍ਮਦੇਸਨਂ ਪਟ੍ਠਪੇਨ੍ਤੋ ਇਮਾ ਏਕਾਦਸ ਗਾਥਾ ਆਹ –

੩੩੨.

‘‘ਅਪ੍ਪਮਾਦੋ ਅਮਤਪਦਂ, ਪਮਾਦੋ ਮਚ੍ਚੁਨੋ ਪਦਂ;

ਅਪ੍ਪਮਤ੍ਤਾ ਨ ਮੀਯਨ੍ਤਿ, ਯੇ ਪਮਤ੍ਤਾ ਯਥਾ ਮਤਾ.

੩੩੩.

‘‘ਮਦਾ ਪਮਾਦੋ ਜਾਯੇਥ, ਪਮਾਦਾ ਜਾਯਤੇ ਖਯੋ;

ਖਯਾ ਪਦੋਸਾ ਜਾਯਨ੍ਤਿ, ਮਾ ਮਦੋ ਭਰਤੂਸਭ.

੩੩੪.

‘‘ਬਹੂ ਹਿ ਖਤ੍ਤਿਯਾ ਜੀਨਾ, ਅਤ੍ਥਂ ਰਟ੍ਠਂ ਪਮਾਦਿਨੋ;

ਅਥੋਪਿ ਗਾਮਿਨੋ ਗਾਮਾ, ਅਨਗਾਰਾ ਅਗਾਰਿਨੋ.

੩੩੫.

‘‘ਖਤ੍ਤਿਯਸ੍ਸ ਪਮਤ੍ਤਸ੍ਸ, ਰਟ੍ਠਸ੍ਮਿਂ ਰਟ੍ਠਵਡ੍ਢਨ;

ਸਬ੍ਬੇ ਭੋਗਾ ਵਿਨਸ੍ਸਨ੍ਤਿ, ਰਞ੍ਞੋ ਤਂ ਵੁਚ੍ਚਤੇ ਅਘਂ.

੩੩੬.

‘‘ਨੇਸ ਧਮ੍ਮੋ ਮਹਾਰਾਜ, ਅਤਿਵੇਲਂ ਪਮਜ੍ਜਸਿ;

ਇਦ੍ਧਂ ਫੀਤਂ ਜਨਪਦਂ, ਚੋਰਾ ਵਿਦ੍ਧਂਸਯਨ੍ਤਿ ਨਂ.

੩੩੭.

‘‘ਨ ਤੇ ਪੁਤ੍ਤਾ ਭਵਿਸ੍ਸਨ੍ਤਿ, ਨ ਹਿਰਞ੍ਞਂ ਨ ਧਾਨਿਯਂ;

ਰਟ੍ਠੇ ਵਿਲੁਪ੍ਪਮਾਨਮ੍ਹਿ, ਸਬ੍ਬਭੋਗੇਹਿ ਜੀਯਸਿ.

੩੩੮.

‘‘ਸਬ੍ਬਭੋਗਾ ਪਰਿਜਿਣ੍ਣਂ, ਰਾਜਾਨਂ ਵਾਪਿ ਖਤ੍ਤਿਯਂ;

ਞਾਤਿਮਿਤ੍ਤਾ ਸੁਹਜ੍ਜਾ ਚ, ਨ ਤਂ ਮਞ੍ਞਨ੍ਤਿ ਮਾਨਿਯਂ.

੩੩੯.

‘‘ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਤਮੇਵਮੁਪਜੀਵਨ੍ਤਾ, ਨ ਤਂ ਮਞ੍ਞਨ੍ਤਿ ਮਾਨਿਯਂ.

੩੪੦.

‘‘ਅਸਂਵਿਹਿਤਕਮ੍ਮਨ੍ਤਂ, ਬਾਲਂ ਦੁਮ੍ਮਨ੍ਤਿਮਨ੍ਤਿਨਂ;

ਸਿਰੀ ਜਹਤਿ ਦੁਮ੍ਮੇਧਂ, ਜਿਣ੍ਣਂਵ ਉਰਗੋ ਤਚਂ.

੩੪੧.

‘‘ਸੁਸਂਵਿਹਿਤਕਮ੍ਮਨ੍ਤਂ, ਕਾਲੁਟ੍ਠਾਯਿਂ ਅਤਨ੍ਦਿਤਂ;

ਸਬ੍ਬੇ ਭੋਗਾਭਿਵਡ੍ਢਨ੍ਤਿ, ਗਾਵੋ ਸਉਸਭਾਮਿਵ.

੩੪੨.

‘‘ਉਪਸ੍ਸੁਤਿਂ ਮਹਾਰਾਜ, ਰਟ੍ਠੇ ਜਨਪਦੇ ਚਰ;

ਤਤ੍ਥ ਦਿਸ੍ਵਾ ਚ ਸੁਤ੍ਵਾ ਚ, ਤਤੋ ਤਂ ਪਟਿਪਜ੍ਜਸੀ’’ਤਿ.

ਤਤ੍ਥ ਅਪ੍ਪਮਾਦੋਤਿ ਸਤਿਯਾ ਅਵਿਪ੍ਪਵਾਸੋ. ਅਮਤਪਦਨ੍ਤਿ ਅਮਤਸ੍ਸ ਨਿਬ੍ਬਾਨਸ੍ਸ ਪਦਂ ਅਧਿਗਮਕਾਰਣਂ. ਮਚ੍ਚੁਨੋ ਪਦਨ੍ਤਿ ਮਰਣਸ੍ਸ ਕਾਰਣਂ. ਪਮਤ੍ਤਾ ਹਿ ਵਿਪਸ੍ਸਨਂ ਅਵਡ੍ਢੇਤ੍ਵਾ ਅਪ੍ਪਟਿਸਨ੍ਧਿਕਭਾਵਂ ਪਤ੍ਤੁਂ ਅਸਕ੍ਕੋਨ੍ਤਾ ਪੁਨਪ੍ਪੁਨਂ ਸਂਸਾਰੇ ਜਾਯਨ੍ਤਿ ਚੇਵ ਮੀਯਨ੍ਤਿ ਚ, ਤਸ੍ਮਾ ਪਮਾਦੋ ਮਚ੍ਚੁਨੋ ਪਦਂ ਨਾਮ. ਨ ਮੀਯਨ੍ਤੀਤਿ ਵਿਪਸ੍ਸਨਂ ਵਡ੍ਢੇਤ੍ਵਾ ਅਪ੍ਪਟਿਸਨ੍ਧਿਕਭਾਵਂ ਪਤ੍ਤਾ ਪੁਨ ਸਂਸਾਰੇ ਅਨਿਬ੍ਬਤ੍ਤਤ੍ਤਾ ਨ ਮੀਯਨ੍ਤਿ ਨਾਮ. ਯੇ ਪਮਤ੍ਤਾਤਿ, ਮਹਾਰਾਜ, ਯੇ ਪੁਗ੍ਗਲਾ ਪਮਤ੍ਤਾ, ਤੇ ਯਥਾ ਮਤਾ, ਤਥੇਵ ਦਟ੍ਠਬ੍ਬਾ. ਕਸ੍ਮਾ? ਅਕਿਚ੍ਚਸਾਧਨਤਾਯ. ਮਤਸ੍ਸਪਿ ਹਿ ‘‘ਅਹਂ ਦਾਨਂ ਦਸ੍ਸਾਮਿ, ਸੀਲਂ ਰਕ੍ਖਿਸ੍ਸਾਮਿ, ਉਪੋਸਥਕਮ੍ਮਂ ਕਰਿਸ੍ਸਾਮਿ, ਕਲ੍ਯਾਣਕਮ੍ਮਂ ਪੂਰੇਸ੍ਸਾਮੀ’’ਤਿ ਆਭੋਗੋ ਵਾ ਪਤ੍ਥਨਾ ਵਾ ਪਰਿਯੁਟ੍ਠਾਨਂ ਵਾ ਨਤ੍ਥਿ ਅਪਗਤਵਿਞ੍ਞਾਣਤ੍ਤਾ, ਪਮਤ੍ਤਸ੍ਸਪਿ ਅਪ੍ਪਮਾਦਾਭਾਵਾਤਿ ਤਸ੍ਮਾ ਉਭੋਪੇਤੇ ਏਕਸਦਿਸਾਵ.

ਮਦਾਤਿ, ਮਹਾਰਾਜ, ਆਰੋਗ੍ਯਯੋਬ੍ਬਨਜੀਵਿਤਮਦਸਙ੍ਖਾਤਾ ਤਿਵਿਧਾ ਮਦਾ ਪਮਾਦੋ ਨਾਮ ਜਾਯਤਿ. ਸੋ ਮਦਪ੍ਪਤ੍ਤੋ ਪਮਾਦਾਪਨ੍ਨੋ ਪਾਣਾਤਿਪਾਤਾਦੀਨਿ ਪਾਪਕਮ੍ਮਾਨਿ ਕਰੋਤਿ. ਅਥ ਨਂ ਰਾਜਾਨੋ ਛਿਨ੍ਦਾਪੇਨ੍ਤਿ ਵਾ ਹਨਾਪੇਨ੍ਤਿ ਵਾ, ਸਬ੍ਬਂ ਵਾ ਧਨਮਸ੍ਸ ਹਰਨ੍ਤਿ, ਏਵਮਸ੍ਸ ਪਮਾਦਾ ਞਾਤਿਧਨਜੀਵਿਤਕ੍ਖਯੋ ਜਾਯਤਿ. ਪੁਨ ਸੋ ਧਨਕ੍ਖਯਂ ਵਾ ਯਸਕ੍ਖਯਂ ਵਾ ਪਤ੍ਤੋ ਜੀਵਿਤੁਂ ਅਸਕ੍ਕੋਨ੍ਤੋ ਜੀਵਿਤਵੁਤ੍ਤਤ੍ਥਾਯ ਕਾਯਦੁਚ੍ਚਰਿਤਾਦੀਨਿ ਕਰੋਤਿ, ਇਚ੍ਚਸ੍ਸ ਖਯਾ ਪਦੋਸਾ ਜਾਯਨ੍ਤਿ, ਤੇਨ ਤਂ ਵਦਾਮਿ ਮਾ ਮਦੋ ਭਰਤੂਸਭਾਤਿ, ਰਟ੍ਠਭਾਰਕਜੇਟ੍ਠਕ ਭਰਤੂਸਭ ਮਾ ਪਮਾਦਮਾਪਜ੍ਜੀਤਿ ਅਤ੍ਥੋ. ਅਤ੍ਥਂ ਰਟ੍ਠਨ੍ਤਿ ਜਨਪਦਵਾਸੀਨਂ ਵੁਦ੍ਧਿਞ੍ਚੇਵ ਸਕਲਰਟ੍ਠਞ੍ਚ ਬਹੂ ਪਮਾਦਿਨੋ ਜੀਨਾ. ਤੇਸਂ ਆਵਿਭਾਵਤ੍ਥਾਯ ਖਨ੍ਤਿਵਾਦਿਜਾਤਕ-ਮਾਤਙ੍ਗਜਾਤਕ-ਭਰੁਜਾਤਕ-ਸਰਭਙ੍ਗਜਾਤਕ-ਚੇਤਿਯਜਾਤਕਾਨਿ ਕਥੇਤਬ੍ਬਾਨਿ. ਗਾਮਿਨੋਤਿ ਗਾਮਭੋਜਕਾਪਿ ਤੇ ਗਾਮਾਪਿ ਬਹੂ ਪਮਾਦਦੋਸੇਨ ਜੀਨਾ ਪਰਿਹੀਨਾ ਵਿਨਟ੍ਠਾ. ਅਨਗਾਰਾ ਅਗਾਰਿਨੋਤਿ ਪਬ੍ਬਜਿਤਾਪਿ ਪਬ੍ਬਜਿਤਪਟਿਪਤ੍ਤਿਤੋ, ਗਿਹੀਪਿ ਘਰਾਵਾਸਤੋ ਚੇਵ ਧਨਧਞ੍ਞਾਦੀਹਿ ਚ ਬਹੂ ਜੀਨਾ ਪਰਿਹੀਨਾਤਿ ਵਦਤਿ. ਤਂ ਵੁਚ੍ਚਤੇ ਅਘਨ੍ਤਿ, ਮਹਾਰਾਜ, ਯਸਭੋਗਪਰਿਹਾਨਿ ਨਾਮੇਤਂ ਰਞ੍ਞੋ ਦੁਕ੍ਖਂ ਵੁਚ੍ਚਤਿ. ਭੋਗਾਭਾਵੇਨ ਹਿ ਨਿਦ੍ਧਨਸ੍ਸ ਯਸੋ ਹਾਯਤਿ, ਹੀਨਯਸੋ ਮਹਨ੍ਤਂ ਕਾਯਿਕਚੇਤਸਿਕਦੁਕ੍ਖਂ ਪਾਪੁਣਾਤਿ.

ਨੇਸ ਧਮ੍ਮੋਤਿ, ਮਹਾਰਾਜ, ਏਸ ਪੋਰਾਣਕਰਾਜੂਨਂ ਧਮ੍ਮੋ ਨ ਹੋਤਿ. ਇਦ੍ਧਂ ਫੀਤਨ੍ਤਿ ਅਨ੍ਨਪਾਨਾਦਿਨਾ ਸਮਿਦ੍ਧਂ ਹਿਰਞ੍ਞਸੁਵਣ੍ਣਾਦਿਨਾ ਫੀਤਂ ਪੁਪ੍ਫਿਤਂ. ਨ ਤੇ ਪੁਤ੍ਤਾਤਿ, ਮਹਾਰਾਜ, ਪਵੇਣਿਪਾਲਕਾ ਤੇ ਪੁਤ੍ਤਾ ਨ ਭਵਿਸ੍ਸਨ੍ਤਿ. ਰਟ੍ਠਵਾਸਿਨੋ ਹਿ ‘‘ਅਧਮ੍ਮਿਕਰਞ੍ਞੋ ਏਸ ਪੁਤ੍ਤੋ, ਕਿਂ ਅਮ੍ਹਾਕਂ ਵੁਡ੍ਢਿਂ ਕਰਿਸ੍ਸਤਿ, ਨਾਸ੍ਸ ਛਤ੍ਤਂ ਦਸ੍ਸਾਮਾ’’ਤਿ ਛਤ੍ਤਂ ਨ ਦੇਨ੍ਤਿ. ਏਵਮੇਤੇਸਂ ਪਵੇਣਿਪਾਲਕਾ ਪੁਤ੍ਤਾ ਨ ਹੋਨ੍ਤਿ ਨਾਮ. ਪਰਿਜਿਣ੍ਣਨ੍ਤਿ ਪਰਿਹੀਨਂ. ਰਾਜਾਨਂ ਵਾਪੀਤਿ ਸਚੇਪਿ ਸੋ ਰਾਜਾ ਹੋਤਿ, ਅਥ ਨਂ ਰਾਜਾਨਂ ਸਮਾਨਮ੍ਪਿ. ਮਾਨਿਯਨ੍ਤਿ ‘‘ਅਯਂ ਰਾਜਾ’’ਤਿ ਗਰੁਚਿਤ੍ਤੇਨ ਸਮ੍ਮਾਨੇਤਬ੍ਬਂ ਕਤ੍ਵਾ ਨ ਮਞ੍ਞਨ੍ਤਿ. ਉਪਜੀਵਨ੍ਤਾਤਿ ਉਪਨਿਸ੍ਸਾਯ ਜੀਵਨ੍ਤਾਪਿ ਏਤੇ ਏਤ੍ਤਕਾ ਜਨਾ ਗਰੁਚਿਤ੍ਤੇਨ ਮਞ੍ਞਿਤਬ੍ਬਂ ਨ ਮਞ੍ਞਨ੍ਤਿ. ਕਿਂਕਾਰਣਾ? ਅਧਮ੍ਮਿਕਭਾਵੇਨ.

ਸਿਰੀਤਿ ਯਸਵਿਭਵੋ. ਤਚਨ੍ਤਿ ਯਥਾ ਉਰਗੋ ਜਿਣ੍ਣਤਚਂ ਜਿਗੁਚ੍ਛਨ੍ਤੋ ਜਹਤਿ, ਨ ਪੁਨ ਓਲੋਕੇਤਿ, ਏਵਂ ਤਾਦਿਸਂ ਰਾਜਾਨਂ ਸਿਰੀ ਜਹਤਿ. ਸੁਸਂਵਿਹਿਤਕਮ੍ਮਨ੍ਤਨ੍ਤਿ ਕਾਯਦ੍ਵਾਰਾਦੀਹਿ ਪਾਪਕਮ੍ਮਂ ਅਕਰੋਨ੍ਤਂ. ਅਭਿਵਡ੍ਢਨ੍ਤੀਤਿ ਅਭਿਮੁਖਂ ਗਚ੍ਛਨ੍ਤਾ ਵਡ੍ਢਨ੍ਤਿ. ਸਉਸਭਾਮਿਵਾਤਿ ਸਉਸਭਾ ਇਵ. ਅਪ੍ਪਮਤ੍ਤਸ੍ਸ ਹਿ ਸਉਸਭਜੇਟ੍ਠਕੋ ਗੋਗਣੋ ਵਿਯ ਭੋਗਾ ਵਡ੍ਢਨ੍ਤਿ. ਉਪਸ੍ਸੁਤਿਨ੍ਤਿ ਜਨਪਦਚਾਰਿਤ੍ਤਸਵਨਾਯ ਚਾਰਿਕਂ ਅਤ੍ਤਨੋ ਸਕਲਰਟ੍ਠੇ ਚ ਜਨਪਦੇ ਚ ਚਰ. ਤਤ੍ਥਾਤਿ ਤਸ੍ਮਿਂ ਰਟ੍ਠੇ ਚਰਨ੍ਤੋ ਦਟ੍ਠਬ੍ਬਂ ਦਿਸ੍ਵਾ ਸੋਤਬ੍ਬਂ ਸੁਤ੍ਵਾ ਅਤ੍ਤਨੋ ਗੁਣਾਗੁਣਂ ਪਚ੍ਚਕ੍ਖਂ ਕਤ੍ਵਾ ਤਤੋ ਅਤ੍ਤਨੋ ਹਿਤਪਟਿਪਤ੍ਤਿਂ ਪਟਿਪਜ੍ਜਿਸ੍ਸਸੀਤਿ.

ਇਤਿ ਮਹਾਸਤ੍ਤੋ ਏਕਾਦਸਹਿ ਗਾਥਾਹਿ ਰਾਜਾਨਂ ਓਵਦਿਤ੍ਵਾ ‘‘ਗਚ੍ਛ ਪਪਞ੍ਚਂ ਅਕਤ੍ਵਾ ਪਰਿਗ੍ਗਣ੍ਹ ਰਟ੍ਠਂ, ਮਾ ਨਾਸਯੀ’’ਤਿ ਵਤ੍ਵਾ ਸਕਟ੍ਠਾਨਮੇਵ ਗਤੋ. ਰਾਜਾਪਿ ਤਸ੍ਸ ਵਚਨਂ ਸੁਤ੍ਵਾ ਸਂਵੇਗਪ੍ਪਤ੍ਤੋ ਪੁਨਦਿਵਸੇ ਰਜ੍ਜਂ ਅਮਚ੍ਚੇ ਪਟਿਚ੍ਛਾਪੇਤ੍ਵਾ ਪੁਰੋਹਿਤੇਨ ਸਦ੍ਧਿਂ ਕਾਲਸ੍ਸੇਵ ਪਾਚੀਨਦ੍ਵਾਰੇਨ ਨਗਰਾ ਨਿਕ੍ਖਮਿਤ੍ਵਾ ਯੋਜਨਮਤ੍ਤਂ ਗਤੋ. ਤਤ੍ਥੇਕੋ ਗਾਮਵਾਸੀ ਮਹਲ੍ਲਕੋ ਅਟਵਿਤੋ ਕਣ੍ਟਕਸਾਖਂ ਆਹਰਿਤ੍ਵਾ ਗੇਹਦ੍ਵਾਰਂ ਪਰਿਕ੍ਖਿਪਿਤ੍ਵਾ ਪਿਦਹਿਤ੍ਵਾ ਪੁਤ੍ਤਦਾਰਂ ਆਦਾਯ ਅਰਞ੍ਞਂ ਪਵਿਸਿਤ੍ਵਾ ਸਾਯਂ ਰਾਜਪੁਰਿਸੇਸੁ ਪਕ੍ਕਨ੍ਤੇਸੁ ਅਤ੍ਤਨੋ ਘਰਂ ਆਗਚ੍ਛਨ੍ਤੋ ਗੇਹਦ੍ਵਾਰੇ ਪਾਦੇ ਕਣ੍ਟਕੇਨ ਵਿਦ੍ਧੋ ਉਕ੍ਕੁਟਿਕਂ ਨਿਸੀਦਿਤ੍ਵਾ ਕਣ੍ਟਕਂ ਨੀਹਰਨ੍ਤੋ –

੩੪੩.

‘‘ਏਵਂ ਵੇਦੇਤੁ ਪਞ੍ਚਾਲੋ, ਸਙ੍ਗਾਮੇ ਸਰਮਪ੍ਪਿਤੋ;

ਯਥਾਹਮਜ੍ਜ ਵੇਦੇਮਿ, ਕਣ੍ਟਕੇਨ ਸਮਪ੍ਪਿਤੋ’’ਤਿ. –

ਇਮਾਯ ਗਾਥਾਯ ਰਾਜਾਨਂ ਅਕ੍ਕੋਸਿ. ਤਂ ਪਨਸ੍ਸ ਅਕ੍ਕੋਸਨਂ ਬੋਧਿਸਤ੍ਤਾਨੁਭਾਵੇਨ ਅਹੋਸਿ. ਬੋਧਿਸਤ੍ਤੇਨ ਅਧਿਗ੍ਗਹਿਤੋਵ ਸੋ ਅਕ੍ਕੋਸੀਤਿ ਵੇਦਿਤਬ੍ਬੋ. ਤਸ੍ਮਿਂ ਪਨ ਸਮਯੇ ਰਾਜਾ ਚ ਪੁਰੋਹਿਤੋ ਚ ਅਞ੍ਞਾਤਕਵੇਸੇਨ ਤਸ੍ਸ ਸਨ੍ਤਿਕੇਵ ਅਟ੍ਠਂਸੁ. ਅਥਸ੍ਸ ਵਚਨਂ ਸੁਤ੍ਵਾ ਪੁਰੋਹਿਤੋ ਇਤਰਂ ਗਾਥਮਾਹ –

੩੪੪.

‘‘ਜਿਣ੍ਣੋ ਦੁਬ੍ਬਲਚਕ੍ਖੂਸਿ, ਨ ਰੂਪਂ ਸਾਧੁ ਪਸ੍ਸਸਿ;

ਕਿਂ ਤਤ੍ਥ ਬ੍ਰਹ੍ਮਦਤ੍ਤਸ੍ਸ, ਯਂ ਤਂ ਮਗ੍ਗੇਯ੍ਯ ਕਣ੍ਟਕੋ’’ਤਿ.

ਤਤ੍ਥ ਮਗ੍ਗੇਯ੍ਯਾਤਿ ਵਿਜ੍ਝੇਯ੍ਯ. ਇਦਂ ਵੁਤ੍ਤਂ ਹੋਤਿ – ਯਦਿ ਤ੍ਵਂ ਅਤ੍ਤਨੋ ਅਬ੍ਯਤ੍ਤਤਾਯ ਕਣ੍ਟਕੇਨ ਵਿਦ੍ਧੋ, ਕੋ ਏਤ੍ਥ ਰਞ੍ਞੋ ਦੋਸੋ. ਯੇਨ ਰਾਜਾਨਂ ਅਕ੍ਕੋਸਿ, ਕਿਂ ਤੇ ਰਞ੍ਞਾ ਕਣ੍ਟਕੋ ਓਲੋਕੇਤ੍ਵਾਵ ਆਚਿਕ੍ਖਿਤਬ੍ਬੋਤਿ.

ਤਂ ਸੁਤ੍ਵਾ ਮਹਲ੍ਲਕੋ ਤਿਸ੍ਸੋ ਗਾਥਾ ਅਭਾਸਿ –

੩੪੫.

‘‘ਬਹ੍ਵੇਤ੍ਥ ਬ੍ਰਹ੍ਮਦਤ੍ਤਸ੍ਸ, ਸੋਹਂ ਮਗ੍ਗਸ੍ਮਿ ਬ੍ਰਾਹ੍ਮਣ;

ਅਰਕ੍ਖਿਤਾ ਜਾਨਪਦਾ, ਅਧਮ੍ਮਬਲਿਨਾ ਹਤਾ.

੩੪੬.

‘‘ਰਤ੍ਤਿਞ੍ਹਿ ਚੋਰਾ ਖਾਦਨ੍ਤਿ, ਦਿਵਾ ਖਾਦਨ੍ਤਿ ਤੁਣ੍ਡਿਯਾ;

ਰਟ੍ਠਸ੍ਮਿਂ ਕੂਟਰਾਜਸ੍ਸ, ਬਹੁ ਅਧਮ੍ਮਿਕੋ ਜਨੋ.

੩੪੭.

‘‘ਏਤਾਦਿਸੇ ਭਯੇ ਜਾਤੇ, ਭਯਟ੍ਟਾ ਤਾਤ ਮਾਣਵਾ;

ਨਿਲ੍ਲੇਨਕਾਨਿ ਕੁਬ੍ਬਨ੍ਤਿ, ਵਨੇ ਆਹਤ੍ਵ ਕਣ੍ਟਕ’’ਨ੍ਤਿ.

ਤਤ੍ਥ ਬਹ੍ਵੇਤ੍ਥਾਤਿ, ਬ੍ਰਾਹ੍ਮਣ, ਸੋਹਂ ਸਕਣ੍ਟਕੇ ਮਗ੍ਗੇ ਪਤਿਤੋ ਸਨ੍ਨਿਸਿਨ੍ਨੋ, ਬਹੁ ਏਤ੍ਥ ਬ੍ਰਹ੍ਮਦਤ੍ਤਸ੍ਸ ਦੋਸੋ, ਤ੍ਵਂ ਏਤ੍ਤਕਂ ਕਾਲਂ ਰਞ੍ਞੋ ਦੋਸੇਨ ਮਮ ਸਕਣ੍ਟਕੇ ਮਗ੍ਗੇ ਵਿਚਰਣਭਾਵਂ ਨ ਜਾਨਾਸਿ. ਤਸ੍ਸ ਹਿ ਅਰਕ੍ਖਿਤਾ ਜਾਨਪਦਾ…ਪੇ… ਕਣ੍ਟਕਨ੍ਤਿ. ਤਤ੍ਥ ਖਾਦਨ੍ਤੀਤਿ ਵਿਲੁਮ੍ਪਨ੍ਤਿ. ਤੁਣ੍ਡਿਯਾਤਿ ਵਧਬਨ੍ਧਾਦੀਹਿ ਪੀਲ਼ੇਤ੍ਵਾ ਅਧਮ੍ਮੇਨ ਬਲਿਸਾਧਕਾ. ਕੂਟਰਾਜਸ੍ਸਾਤਿ ਪਾਪਰਞ੍ਞੋ. ਅਧਮ੍ਮਿਕੋਤਿ ਪਟਿਚ੍ਛਨ੍ਨਕਮ੍ਮਨ੍ਤੋ. ਤਾਤਾਤਿ ਪੁਰੋਹਿਤਂ ਆਲਪਤਿ. ਮਾਣਵਾਤਿ ਮਨੁਸ੍ਸਾ. ਨਿਲ੍ਲੇਨਕਾਨੀਤਿ ਨਿਲੀਯਨਟ੍ਠਾਨਾਨਿ. ਵਨੇ ਆਹਤ੍ਵ ਕਣ੍ਟਕਨ੍ਤਿ ਕਣ੍ਟਕਂ ਆਹਰਿਤ੍ਵਾ ਦ੍ਵਾਰਾਨਿ ਪਿਦਹਿਤ੍ਵਾ ਘਰਂ ਛਡ੍ਡੇਤ੍ਵਾ ਪੁਤ੍ਤਦਾਰਂ ਆਦਾਯ ਵਨਂ ਪਵਿਸਿਤ੍ਵਾ ਤਸ੍ਮਿਂ ਵਨੇ ਅਤ੍ਤਨੋ ਨਿਲੀਯਨਟ੍ਠਾਨਾਨਿ ਕਰੋਨ੍ਤਿ. ਅਥ ਵਾ ਵਨੇ ਯੋ ਕਣ੍ਟਕੋ, ਤਂ ਆਹਰਿਤ੍ਵਾ ਘਰਾਨਿ ਪਰਿਕ੍ਖਿਪਨ੍ਤਿ. ਇਤਿ ਰਞ੍ਞੋ ਦੋਸੇਨੇਵਮ੍ਹਿ ਕਣ੍ਟਕੇਨ ਵਿਦ੍ਧੋ, ਮਾ ਏਵਰੂਪਸ੍ਸ ਰਞ੍ਞੋ ਉਪਤ੍ਥਮ੍ਭੋ ਹੋਹੀਤਿ.

ਤਂ ਸੁਤ੍ਵਾ ਰਾਜਾ ਪੁਰੋਹਿਤਂ ਆਮਨ੍ਤੇਤ੍ਵਾ, ‘‘ਆਚਰਿਯ, ਮਹਲ੍ਲਕੋ ਯੁਤ੍ਤਂ ਭਣਤਿ, ਅਮ੍ਹਾਕਮੇਵ ਦੋਸੋ, ਏਹਿ ਨਿਵਤ੍ਤਾਮ, ਧਮ੍ਮੇਨ ਰਜ੍ਜਂ ਕਾਰੇਸ੍ਸਾਮਾ’’ਤਿ ਆਹ. ਬੋਧਿਸਤ੍ਤੋ ਪੁਰੋਹਿਤਸ੍ਸ ਸਰੀਰੇ ਅਧਿਮੁਚ੍ਚਿਤ੍ਵਾ ਪੁਰਤੋ ਗਨ੍ਤ੍ਵਾ ‘‘ਪਰਿਗ੍ਗਣ੍ਹਿਸ੍ਸਾਮ ਤਾਵ, ਮਹਾਰਾਜਾ’’ਤਿ ਆਹ. ਤੇ ਤਮ੍ਹਾ ਗਾਮਾ ਅਞ੍ਞਂ ਗਾਮਂ ਗਚ੍ਛਨ੍ਤਾ ਅਨ੍ਤਰਾਮਗ੍ਗੇ ਏਕਿਸ੍ਸਾ ਮਹਲ੍ਲਿਕਾਯ ਸਦ੍ਦਂ ਅਸ੍ਸੋਸੁਂ. ਸਾ ਕਿਰੇਕਾ ਦਲਿਦ੍ਦਿਤ੍ਥੀ ਦ੍ਵੇ ਧੀਤਰੋ ਵਯਪ੍ਪਤ੍ਤਾ ਰਕ੍ਖਮਾਨਾ ਤਾਸਂ ਅਰਞ੍ਞਂ ਗਨ੍ਤੁਂ ਨ ਦੇਤਿ. ਸਯਂ ਅਰਞ੍ਞਤੋ ਦਾਰੂਨਿ ਚੇਵ ਸਾਕਞ੍ਚ ਆਹਰਿਤ੍ਵਾ ਧੀਤਰੋ ਪਟਿਜਗ੍ਗਤਿ. ਸਾ ਤਂ ਦਿਵਸਂ ਏਕਂ ਗੁਮ੍ਬਂ ਆਰੁਯ੍ਹ ਸਾਕਂ ਗਣ੍ਹਨ੍ਤੀ ਪਵਟ੍ਟਮਾਨਾ ਭੂਮਿਯਂ ਪਤਿਤ੍ਵਾ ਰਾਜਾਨਂ ਮਰਣੇਨ ਅਕ੍ਕੋਸਨ੍ਤੀ ਗਾਥਮਾਹ –

੩੪੮.

‘‘ਕਦਾਸ੍ਸੁ ਨਾਮਯਂ ਰਾਜਾ, ਬ੍ਰਹ੍ਮਦਤ੍ਤੋ ਮਰਿਸ੍ਸਤਿ;

ਯਸ੍ਸ ਰਟ੍ਠਮ੍ਹਿ ਜੀਯਨ੍ਤਿ, ਅਪ੍ਪਤਿਕਾ ਕੁਮਾਰਿਕਾ’’ਤਿ.

ਤਤ੍ਥ ਅਪ੍ਪਤਿਕਾਤਿ ਅਸ੍ਸਾਮਿਕਾ. ਸਚੇ ਹਿ ਤਾਸਂ ਸਾਮਿਕਾ ਅਸ੍ਸੁ, ਮਂ ਪੋਸੇਯ੍ਯੁਂ. ਪਾਪਰਞ੍ਞੋ ਪਨ ਰਜ੍ਜੇ ਅਹਂ ਦੁਕ੍ਖਂ ਅਨੁਭੋਮਿ, ਕਦਾ ਨੁ ਖੋ ਏਸ ਮਰਿਸ੍ਸਤੀਤਿ.

ਏਵਂ ਬੋਧਿਸਤ੍ਤਾਨੁਭਾਵੇਨੇਵ ਸਾ ਅਕ੍ਕੋਸਿ. ਅਥ ਨਂ ਪੁਰੋਹਿਤੋ ਪਟਿਸੇਧੇਨ੍ਤੋ ਗਾਥਮਾਹ –

੩੪੯.

‘‘ਦੁਬ੍ਭਾਸਿਤਞ੍ਹਿ ਤੇ ਜਮ੍ਮਿ, ਅਨਤ੍ਥਪਦਕੋਵਿਦੇ;

ਕੁਹਿਂ ਰਾਜਾ ਕੁਮਾਰੀਨਂ, ਭਤ੍ਤਾਰਂ ਪਰਿਯੇਸਤੀ’’ਤਿ.

ਤਂ ਸੁਤ੍ਵਾ ਮਹਲ੍ਲਿਕਾ ਦ੍ਵੇ ਗਾਥਾ ਅਭਾਸਿ –

੩੫੦.

‘‘ਨ ਮੇ ਦੁਬ੍ਭਾਸਿਤਂ ਬ੍ਰਹ੍ਮੇ, ਕੋਵਿਦਤ੍ਥਪਦਾ ਅਹਂ;

ਅਰਕ੍ਖਿਤਾ ਜਾਨਪਦਾ, ਅਧਮ੍ਮਬਲਿਨਾ ਹਤਾ.

੩੫੧.

‘‘ਰਤ੍ਤਿਞ੍ਹਿ ਚੋਰਾ ਖਾਦਨ੍ਤਿ, ਦਿਵਾ ਖਾਦਨ੍ਤਿ ਤੁਣ੍ਡਿਯਾ;

ਰਟ੍ਠਸ੍ਮਿਂ ਕੂਟਰਾਜਸ੍ਸ, ਬਹੁ ਅਧਮ੍ਮਿਕੋ ਜਨੋ;

ਦੁਜ੍ਜੀਵੇ ਦੁਬ੍ਭਰੇ ਦਾਰੇ, ਕੁਤੋ ਭਤ੍ਤਾ ਕੁਮਾਰਿਯੋ’’ਤਿ.

ਤਤ੍ਥ ਕੋਵਿਦਤ੍ਥਪਦਾਤਿ ਅਹਂ ਅਤ੍ਥਪਦੇ ਕਾਰਣਪਦੇ ਕੋਵਿਦਾ ਛੇਕਾ, ਮਾ ਤ੍ਵਂ ਏਤਂ ਪਾਪਰਾਜਾਨਂ ਪਸਂਸਿ. ਦੁਜ੍ਜੀਵੇਤਿ ਦੁਜ੍ਜੀਵੇ ਰਟ੍ਠੇ ਦੁਬ੍ਭਰੇ ਦਾਰੇ ਜਾਤੇ ਮਨੁਸ੍ਸੇਸੁ ਭੀਤਤਸਿਤੇਸੁ ਅਰਞ੍ਞੇ ਵਸਨ੍ਤੇਸੁ ਕੁਤੋ ਭਤ੍ਤਾ ਕੁਮਾਰਿਯੋ, ਕੁਤੋ ਕੁਮਾਰਿਯੋ ਭਤ੍ਤਾਰਂ ਲਭਿਸ੍ਸਨ੍ਤੀਤਿ ਅਤ੍ਥੋ.

ਤੇ ਤਸ੍ਸਾ ਵਚਨਂ ਸੁਤ੍ਵਾ ‘‘ਯੁਤ੍ਤਂ ਸਾ ਕਥੇਤੀ’’ਤਿ ਤਤੋ ਪਰਂ ਗਚ੍ਛਨ੍ਤਾ ਏਕਸ੍ਸ ਕਸ੍ਸਕਸ੍ਸ ਸਦ੍ਦਂ ਅਸ੍ਸੋਸੁਂ. ਤਸ੍ਸ ਕਿਰ ਕਸਨ੍ਤਸ੍ਸ ਸਾਲਿਯੋ ਨਾਮ ਬਲਿਬਦ੍ਦੋ ਫਾਲੇਨ ਪਹਟੋ ਸਯਿ. ਸੋ ਰਾਜਾਨਂ ਅਕ੍ਕੋਸਨ੍ਤੋ ਗਾਥਮਾਹ –

੩੫੨.

‘‘ਏਵਂ ਸਯਤੁ ਪਞ੍ਚਾਲੋ, ਸਙ੍ਗਾਮੇ ਸਤ੍ਤਿਯਾ ਹਤੋ;

ਯਥਾਯਂ ਕਪਣੋ ਸੇਤਿ, ਹਤੋ ਫਾਲੇਨ ਸਾਲਿਯੋ’’ਤਿ.

ਤਤ੍ਥ ਯਥਾਤਿ ਯਥਾ ਅਯਂ ਵੇਦਨਾਪ੍ਪਤ੍ਤੋ ਸਾਲਿਯਬਲਿਬਦ੍ਦੋ ਸੇਤਿ, ਏਵਂ ਸਯਤੂਤਿ ਅਤ੍ਥੋ.

ਅਥ ਨਂ ਪੁਰੋਹਿਤੋ ਪਟਿਸੇਧੇਨ੍ਤੋ ਗਾਥਮਾਹ –

੩੫੩.

‘‘ਅਧਮ੍ਮੇਨ ਤੁਵਂ ਜਮ੍ਮ, ਬ੍ਰਹ੍ਮਦਤ੍ਤਸ੍ਸ ਕੁਜ੍ਝਸਿ;

ਯੋ ਤ੍ਵਂ ਸਪਸਿ ਰਾਜਾਨਂ, ਅਪਰਜ੍ਝਿਤ੍ਵਾਨ ਅਤ੍ਤਨੋ’’ਤਿ.

ਤਤ੍ਥ ਅਧਮ੍ਮੇਨਾਤਿ ਅਕਾਰਣੇਨ ਅਸਭਾਵੇਨ.

ਤਂ ਸੁਤ੍ਵਾ ਸੋ ਤਿਸ੍ਸੋ ਗਾਥਾ ਅਭਾਸਿ –

੩੫੪.

‘‘ਧਮ੍ਮੇਨ ਬ੍ਰਹ੍ਮਦਤ੍ਤਸ੍ਸ, ਅਹਂ ਕੁਜ੍ਝਾਮਿ ਬ੍ਰਾਹ੍ਮਣ;

ਅਰਕ੍ਖਿਤਾ ਜਾਨਪਦਾ ਅਧਮ੍ਮਬਲਿਨਾ ਹਤਾ.

੩੫੫.

‘‘ਰਤ੍ਤਿਞ੍ਹਿ ਚੋਰਾ ਖਾਦਨ੍ਤਿ, ਦਿਵਾ ਖਾਦਨ੍ਤਿ ਤੁਣ੍ਡਿਯਾ;

ਰਟ੍ਠਸ੍ਮਿਂ ਕੂਟਰਾਜਸ੍ਸ, ਬਹੁ ਅਧਮ੍ਮਿਕੋ ਜਨੋ.

੩੫੬.

‘‘ਸਾ ਨੂਨ ਪੁਨ ਰੇ ਪਕ੍ਕਾ, ਵਿਕਾਲੇ ਭਤ੍ਤਮਾਹਰਿ;

ਭਤ੍ਤਹਾਰਿਂ ਅਪੇਕ੍ਖਨ੍ਤੋ, ਹਤੋ ਫਾਲੇਨ ਸਾਲਿਯੋ’’ਤਿ.

ਤਤ੍ਥ ਧਮ੍ਮੇਨਾਤਿ ਕਾਰਣੇਨੇਵ, ਅਕਾਰਣੇਨ ਅਕ੍ਕੋਸਤੀਤਿ ਸਞ੍ਞਂ ਮਾ ਕਰਿ. ਸਾ ਨੂਨ ਪੁਨ ਰੇ ਪਕ੍ਕਾ, ਵਿਕਾਲੇ ਭਤ੍ਤਮਾਹਰੀਤਿ, ਬ੍ਰਾਹ੍ਮਣ, ਸਾ ਭਤ੍ਤਹਾਰਿਕਾ ਇਤ੍ਥੀ ਪਾਤੋਵ ਮਮ ਭਤ੍ਤਂ ਪਚਿਤ੍ਵਾ ਆਹਰਨ੍ਤੀ ਅਧਮ੍ਮਬਲਿਸਾਧਕੇਹਿ ਬ੍ਰਹ੍ਮਦਤ੍ਤਸ੍ਸ ਦਾਸੇਹਿ ਪਲਿਬੁਦ੍ਧਾ ਭਵਿਸ੍ਸਤਿ, ਤੇ ਪਰਿਵਿਸਿਤ੍ਵਾ ਪੁਨ ਮਯ੍ਹਂ ਭਤ੍ਤਂ ਪਕ੍ਕਂ ਭਵਿਸ੍ਸਤਿ, ਤੇਨ ਕਾਰਣੇਨ ਵਿਕਾਲੇ ਭਤ੍ਤਂ ਆਹਰਿ, ‘‘ਅਜ੍ਜ ਵਿਕਾਲੇ ਭਤ੍ਤਂ ਆਹਰੀ’’ਤਿ ਚਿਨ੍ਤੇਤ੍ਵਾ ਛਾਤਜ੍ਝਤ੍ਤੋ ਅਹਂ ਤਂ ਭਤ੍ਤਹਾਰਿਂ ਓਲੋਕੇਨ੍ਤੋ ਗੋਣਂ ਅਟ੍ਠਾਨੇ ਪਤੋਦੇਨ ਵਿਜ੍ਝਿਂ, ਤੇਨੇਸ ਪਾਦਂ ਉਕ੍ਖਿਪਿਤ੍ਵਾ ਫਾਲਂ ਪਹਰਨ੍ਤੋ ਹਤੋ ਫਾਲੇਨ ਸਾਲਿਯੋ. ਤਸ੍ਮਾ ‘‘ਏਸ ਮਯਾ ਹਤੋ’’ਤਿ ਸਞ੍ਞਂ ਮਾ ਕਰਿ, ਪਾਪਰਞ੍ਞੋਯੇਵ ਹਤੋ ਨਾਮੇਸ, ਮਾ ਤਸ੍ਸ ਵਣ੍ਣਂ ਭਣੀਤਿ.

ਤੇ ਪੁਰਤੋ ਗਨ੍ਤ੍ਵਾ ਏਕਸ੍ਮਿਂ ਗਾਮੇ ਵਸਿਂਸੁ. ਪੁਨਦਿਵਸੇ ਪਾਤੋਵ ਏਕਾ ਕੂਟਧੇਨੁ ਗੋਦੋਹਕਂ ਪਾਦੇਨ ਪਹਰਿਤ੍ਵਾ ਸਦ੍ਧਿਂ ਖੀਰੇਨ ਪਵਟ੍ਟੇਸਿ. ਸੋ ਬ੍ਰਹ੍ਮਦਤ੍ਤਂ ਅਕ੍ਕੋਸਨ੍ਤੋ ਗਾਥਮਾਹ –

੩੫੭.

‘‘ਏਵਂ ਹਞ੍ਞਤੁ ਪਞ੍ਚਾਲੋ, ਸਙ੍ਗਾਮੇ ਅਸਿਨਾ ਹਤੋ;

ਯਥਾਹਮਜ੍ਜ ਪਹਤੋ, ਖੀਰਞ੍ਚ ਮੇ ਪਵਟ੍ਟਿਤ’’ਨ੍ਤਿ.

ਤਂ ਸੁਤ੍ਵਾ ਪੁਰੋਹਿਤੋ ਪਟਿਸੇਧੇਨ੍ਤੋ ਗਾਥਮਾਹ –

੩੫੮.

‘‘ਯਂ ਪਸੁ ਖੀਰਂ ਛਡ੍ਡੇਤਿ, ਪਸੁਪਾਲਂ ਵਿਹਿਂਸਤਿ;

ਕਿਂ ਤਤ੍ਥ ਬ੍ਰਹ੍ਮਦਤ੍ਤਸ੍ਸ, ਯਂ ਨੋ ਗਰਹਤੇ ਭਵ’’ਨ੍ਤਿ.

ਬ੍ਰਾਹ੍ਮਣੇਨ ਗਾਥਾਯ ਵੁਤ੍ਤਾਯ ਪੁਨ ਸੋ ਤਿਸ੍ਸੋ ਗਾਥਾ ਅਭਾਸਿ –

੩੫੯.

‘‘ਗਾਰਯ੍ਹੋ ਬ੍ਰਹ੍ਮੇ ਪਞ੍ਚਾਲੋ, ਬ੍ਰਹ੍ਮਦਤ੍ਤਸ੍ਸ ਰਾਜਿਨੋ;

ਅਰਕ੍ਖਿਤਾ ਜਾਨਪਦਾ, ਅਧਮ੍ਮਬਲਿਨਾ ਹਤਾ.

੩੬੦.

‘‘ਰਤ੍ਤਿਞ੍ਹਿ ਚੋਰਾ ਖਾਦਨ੍ਤਿ, ਦਿਵਾ ਖਾਦਨ੍ਤਿ ਤੁਣ੍ਡਿਯਾ;

ਰਟ੍ਠਸ੍ਮਿਂ ਕੂਟਰਾਜਸ੍ਸ, ਬਹੁ ਅਧਮ੍ਮਿਕੋ ਜਨੋ.

੩੬੧.

‘‘ਚਣ੍ਡਾ ਅਟਨਕਾ ਗਾਵੀ, ਯਂ ਪੁਰੇ ਨ ਦੁਹਾਮਸੇ;

ਤਂ ਦਾਨਿ ਅਜ੍ਜ ਦੋਹਾਮ, ਖੀਰਕਾਮੇਹੁਪਦ੍ਦੁਤਾ’’ਤਿ.

ਤਤ੍ਥ ਚਣ੍ਡਾਤਿ ਫਰੁਸਾ. ਅਟਨਕਾਤਿ ਪਲਾਯਨਸੀਲਾ. ਖੀਰਕਾਮੇਹੀਤਿ ਅਧਮ੍ਮਿਕਰਞ੍ਞੋ ਪੁਰਿਸੇਹਿ ਬਹੁਂ ਖੀਰਂ ਆਹਰਾਪੇਨ੍ਤੇਹਿ ਉਪਦ੍ਦੁਤਾ ਦੁਹਾਮ. ਸਚੇ ਹਿ ਸੋ ਧਮ੍ਮੇਨ ਰਜ੍ਜਂ ਕਾਰੇਯ੍ਯ, ਨ ਨੋ ਏਵਰੂਪਂ ਭਯਂ ਆਗਚ੍ਛੇਯ੍ਯਾਤਿ.

ਤੇ ‘‘ਸੋ ਯੁਤ੍ਤਂ ਕਥੇਤੀ’’ਤਿ ਤਮ੍ਹਾ ਗਾਮਾ ਨਿਕ੍ਖਮ੍ਮ ਮਹਾਮਗ੍ਗਂ ਆਰੁਯ੍ਹ ਨਗਰਾਭਿਮੁਖਾ ਗਮਿਂਸੁ. ਏਕਸ੍ਮਿਞ੍ਚ ਗਾਮੇ ਬਲਿਸਾਧਕਾ ਅਸਿਕੋਸਤ੍ਥਾਯ ਏਕਂ ਤਰੁਣਂ ਕਬਰਵਚ੍ਛਕਂ ਮਾਰੇਤ੍ਵਾ ਚਮ੍ਮਂ ਗਣ੍ਹਿਂਸੁ. ਵਚ੍ਛਕਮਾਤਾ ਧੇਨੁ ਪੁਤ੍ਤਸੋਕੇਨ ਤਿਣਂ ਨ ਖਾਦਤਿ ਪਾਨੀਯਂ ਨ ਪਿਵਤਿ, ਪਰਿਦੇਵਮਾਨਾ ਆਹਿਣ੍ਡਤਿ. ਤਂ ਦਿਸ੍ਵਾ ਗਾਮਦਾਰਕਾ ਰਾਜਾਨਂ ਅਕ੍ਕੋਸਨ੍ਤਾ ਗਾਥਮਾਹਂਸੁ –

੩੬੨.

‘‘ਏਵਂ ਕਨ੍ਦਤੁ ਪਞ੍ਚਾਲੋ, ਵਿਪੁਤ੍ਤੋ ਵਿਪ੍ਪਸੁਕ੍ਖਤੁ;

ਯਥਾਯਂ ਕਪਣਾ ਗਾਵੀ, ਵਿਪੁਤ੍ਤਾ ਪਰਿਧਾਵਤੀ’’ਤਿ.

ਤਤ੍ਥ ਪਰਿਧਾਵਤੀਤਿ ਪਰਿਦੇਵਮਾਨੋ ਧਾਵਤਿ.

ਤਤੋ ਪੁਰੋਹਿਤੋ ਇਤਰਂ ਗਾਥਮਾਹ –

੩੬੩.

‘‘ਯਂ ਪਸੁ ਪਸੁਪਾਲਸ੍ਸ, ਸਮ੍ਭਮੇਯ੍ਯ ਰਵੇਯ੍ਯ ਵਾ;

ਕੋਨੀਧ ਅਪਰਾਧਤ੍ਥਿ, ਬ੍ਰਹ੍ਮਦਤ੍ਤਸ੍ਸ ਰਾਜਿਨੋ’’ਤਿ.

ਤਤ੍ਥ ਸਮ੍ਭਮੇਯ੍ਯ ਰਵੇਯ੍ਯ ਵਾਤਿ ਭਮੇਯ੍ਯ ਵਾ ਵਿਰਵੇਯ੍ਯ ਵਾ. ਇਦਂ ਵੁਤ੍ਤਂ ਹੋਤਿ – ਤਾਤਾ, ਪਸੁ ਨਾਮ ਪਸੁਪਾਲਸ੍ਸ ਰਕ੍ਖਨ੍ਤਸ੍ਸੇਵ ਧਾਵਤਿਪਿ ਵਿਰਵਤਿਪਿ, ਤਿਣਮ੍ਪਿ ਨ ਖਾਦਤਿ ਪਾਨੀਯਮ੍ਪਿ ਨ ਪਿਵਤਿ, ਇਧ ਰਞ੍ਞੋ ਕੋ ਨੁ ਅਪਰਾਧੋਤਿ.

ਤਤੋ ਗਾਮਦਾਰਕਾ ਦ੍ਵੇ ਗਾਥਾ ਅਭਾਸਿਂਸੁ –

੩੬੪.

‘‘ਅਪਰਾਧੋ ਮਹਾਬ੍ਰਹ੍ਮੇ, ਬ੍ਰਹ੍ਮਦਤ੍ਤਸ੍ਸ ਰਾਜਿਨੋ;

ਅਰਕ੍ਖਿਤਾ ਜਾਨਪਦਾ, ਅਧਮ੍ਮਬਲਿਨਾ ਹਤਾ.

੩੬੫.

‘‘ਰਤ੍ਤਿਞ੍ਹਿ ਚੋਰਾ ਖਾਦਨ੍ਤਿ, ਦਿਵਾ ਖਾਦਨ੍ਤਿ ਤੁਣ੍ਡਿਯਾ;

ਰਟ੍ਠਸ੍ਮਿਂ ਕੂਟਰਾਜਸ੍ਸ, ਬਹੁ ਅਧਮ੍ਮਿਕੋ ਜਨੋ;

ਕਥਂ ਨੋ ਅਸਿਕੋਸਤ੍ਥਾ, ਖੀਰਪਾ ਹਞ੍ਞਤੇ ਪਜਾ’’ਤਿ.

ਤਤ੍ਥ ਮਹਾਬ੍ਰਹ੍ਮੇਤਿ ਮਹਾਬ੍ਰਾਹ੍ਮਣ. ਰਾਜਿਨੋਤਿ ਰਞ੍ਞੋ. ਕਥਂ ਨੋਤਿ ਕਥਂ ਨੁ ਕੇਨ ਨਾਮ ਕਾਰਣੇਨ. ਖੀਰਪਾ ਹਞ੍ਞਤੇ ਪਜਾਤਿ ਪਾਪਰਾਜਸ੍ਸ ਸੇਵਕੇਹਿ ਖੀਰਪਕੋ ਵਚ੍ਛਕੋ ਹਞ੍ਞਤਿ, ਇਦਾਨਿ ਸਾ ਧੇਨੁ ਪੁਤ੍ਤਸੋਕੇਨ ਪਰਿਦੇਵਤਿ, ਸੋਪਿ ਰਾਜਾ ਅਯਂ ਧੇਨੁ ਵਿਯ ਪਰਿਦੇਵਤੂਤਿ ਰਾਜਾਨਂ ਅਕ੍ਕੋਸਿਂਸੁਯੇਵ.

ਤੇ ‘‘ਸਾਧੁ ਵੋ ਕਾਰਣਂ ਵਦਥਾ’’ਤਿ ਵਤ੍ਵਾ ਪਕ੍ਕਮਿਂਸੁ. ਅਥਨ੍ਤਰਾਮਗ੍ਗੇ ਏਕਿਸ੍ਸਾ ਸੁਕ੍ਖਪੋਕ੍ਖਰਣਿਯਾ ਕਾਕਾ ਤੁਣ੍ਡੇਹਿ ਵਿਜ੍ਝਿਤ੍ਵਾ ਮਣ੍ਡੂਕੇ ਖਾਦਨ੍ਤਿ. ਬੋਧਿਸਤ੍ਤੋ ਤੇਸੁ ਤਂ ਠਾਨਂ ਸਮ੍ਪਤ੍ਤੇਸੁ ਅਤ੍ਤਨੋ ਆਨੁਭਾਵੇਨ ਮਣ੍ਡੂਕੇਨ –

੩੬੬.

‘‘ਏਵਂ ਖਜ੍ਜਤੁ ਪਞ੍ਚਾਲੋ, ਹਤੋ ਯੁਦ੍ਧੇ ਸਪੁਤ੍ਤਕੋ;

ਯਥਾਹਮਜ੍ਜ ਖਜ੍ਜਾਮਿ, ਗਾਮਿਕੇਹਿ ਅਰਞ੍ਞਜੋ’’ਤਿ. –

ਰਾਜਾਨਂ ਅਕ੍ਕੋਸਾਪੇਸਿ.

ਤਤ੍ਥ ਗਾਮਿਕੇਹੀਤਿ ਗਾਮਵਾਸੀਹਿ.

ਤਂ ਸੁਤ੍ਵਾ ਪੁਰੋਹਿਤੋ ਮਣ੍ਡੂਕੇਨ ਸਦ੍ਧਿਂ ਸਲ੍ਲਪਨ੍ਤੋ ਗਾਥਮਾਹ –

੩੬੭.

‘‘ਨ ਸਬ੍ਬਭੂਤੇਸੁ ਵਿਧੇਨ੍ਤਿ ਰਕ੍ਖਂ, ਰਾਜਾਨੋ ਮਣ੍ਡੂਕ ਮਨੁਸ੍ਸਲੋਕੇ;

ਨੇਤ੍ਤਾਵਤਾ ਰਾਜਾ ਅਧਮ੍ਮਚਾਰੀ, ਯਂ ਤਾਦਿਸਂ ਜੀਵਮਦੇਯ੍ਯੁ ਧਙ੍ਕਾ’’ਤਿ.

ਤਤ੍ਥ ਜੀਵਨ੍ਤਿ ਜੀਵਨ੍ਤਂ. ਅਦੇਯ੍ਯੁਨ੍ਤਿ ਖਾਦੇਯ੍ਯੁਂ. ਧਙ੍ਕਾਤਿ ਕਾਕਾ. ਏਤ੍ਤਾਵਤਾ ਰਾਜਾ ਅਧਮ੍ਮਿਕੋ ਨਾਮ ਨ ਹੋਤਿ, ਕਿਂ ਸਕ੍ਕਾ ਅਰਞ੍ਞਂ ਪਵਿਸਿਤ੍ਵਾ ਰਞ੍ਞਾ ਤਂ ਰਕ੍ਖਨ੍ਤੇਨ ਚਰਿਤੁਨ੍ਤਿ.

ਤਂ ਸੁਤ੍ਵਾ ਮਣ੍ਡੂਕੋ ਦ੍ਵੇ ਗਾਥਾ ਅਭਾਸਿ –

੩੬੮.

‘‘ਅਧਮ੍ਮਰੂਪੋ ਵਤ ਬ੍ਰਹ੍ਮਚਾਰੀ, ਅਨੁਪ੍ਪਿਯਂ ਭਾਸਸਿ ਖਤ੍ਤਿਯਸ੍ਸ;

ਵਿਲੁਪ੍ਪਮਾਨਾਯ ਪੁਥੁਪ੍ਪਜਾਯ, ਪੂਜੇਸਿ ਰਾਜਂ ਪਰਮਪ੍ਪਮਾਦਂ.

੩੬੯.

‘‘ਸਚੇ ਇਦਂ ਬ੍ਰਹ੍ਮੇ ਸੁਰਜ੍ਜਕਂ ਸਿਯਾ, ਫੀਤਂ ਰਟ੍ਠਂ ਮੁਦਿਤਂ ਵਿਪ੍ਪਸਨ੍ਨਂ;

ਭੁਤ੍ਵਾ ਬਲਿਂ ਅਗ੍ਗਪਿਣ੍ਡਞ੍ਚ ਕਾਕਾ, ਨ ਮਾਦਿਸਂ ਜੀਵਮਦੇਯ੍ਯੁ ਧਙ੍ਕਾ’’ਤਿ.

ਤਤ੍ਥ ਬ੍ਰਹ੍ਮਚਾਰੀਤਿ ਪੁਰੋਹਿਤਂ ਗਰਹਨ੍ਤੋ ਆਹ. ਖਤ੍ਤਿਯਸ੍ਸਾਤਿ ਏਵਰੂਪਸ੍ਸ ਪਾਪਰਞ੍ਞੋ. ਵਿਲੁਪ੍ਪਮਾਨਾਯਾਤਿ ਵਿਲੁਮ੍ਪਮਾਨਾਯ, ਅਯਮੇਵ ਵਾ ਪਾਠੋ. ਪੁਥੁਪ੍ਪਜਾਯਾਤਿ ਵਿਪੁਲਾਯ ਪਜਾਯ ਵਿਨਾਸਿਯਮਾਨਾਯ. ਪੂਜੇਸੀਤਿ ਪਸਂਸਿ. ਸੁਰਜ੍ਜਕਨ੍ਤਿ ਛਨ੍ਦਾਦਿਵਸੇਨ ਅਗਨ੍ਤ੍ਵਾ ਦਸ ਰਾਜਧਮ੍ਮੇ ਅਕੋਪੇਨ੍ਤੇਨ ਅਪ੍ਪਮਤ੍ਤੇਨ ਰਞ੍ਞਾ ਰਕ੍ਖਿਯਮਾਨਂ ਸਚੇ ਇਦਂ ਸੁਰਜ੍ਜਕਂ ਭਵੇਯ੍ਯ. ਫੀਤਨ੍ਤਿ ਦੇਵੇਸੁ ਸਮ੍ਮਾਧਾਰਂ ਅਨੁਪ੍ਪਵੇਚ੍ਛਨ੍ਤੇਸੁ ਸਮ੍ਪਨ੍ਨਸਸ੍ਸਂ. ਨ ਮਾਦਿਸਨ੍ਤਿ ਏਵਂ ਸਨ੍ਤੇ ਮਾਦਿਸਂ ਜੀਵਮਾਨਞ੍ਞੇਵ ਕਾਕਾ ਨ ਖਾਦੇਯ੍ਯੁਂ.

ਏਵਂ ਛਸੁਪਿ ਠਾਨੇਸੁ ਅਕ੍ਕੋਸਨਂ ਬੋਧਿਸਤ੍ਤਸ੍ਸੇਵ ਆਨੁਭਾਵੇਨ ਅਹੋਸਿ;

ਤਂ ਸੁਤ੍ਵਾ ਰਾਜਾ ਚ ਪੁਰੋਹਿਤੋ ਚ ‘‘ਅਰਞ੍ਞਵਾਸਿਂ ਤਿਰਚ੍ਛਾਨਗਤਂ ਮਣ੍ਡੂਕਂ ਉਪਾਦਾਯ ਸਬ੍ਬੇ ਅਮ੍ਹੇਯੇਵ ਅਕ੍ਕੋਸਨ੍ਤੀ’’ਤਿ ਵਤ੍ਵਾ ਤਤੋ ਨਗਰਂ ਗਨ੍ਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਮਹਾਸਤ੍ਤਸ੍ਸੋਵਾਦੇ ਠਿਤਾ ਦਾਨਾਦੀਨਿ ਪੁਞ੍ਞਾਨਿ ਕਰਿਂਸੁ.

ਸਤ੍ਥਾ ਕੋਸਲਰਞ੍ਞੋ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ, ‘‘ਮਹਾਰਾਜ, ਰਞ੍ਞਾ ਨਾਮ ਅਗਤਿਗਮਨਂ ਪਹਾਯ ਧਮ੍ਮੇਨ ਰਜ੍ਜਂ ਕਾਰੇਤਬ੍ਬ’’ਨ੍ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਗਨ੍ਧਤਿਨ੍ਦੁਕਦੇਵਤਾ ਅਹਮੇਵ ਅਹੋਸਿ’’ਨ੍ਤਿ.

ਗਨ੍ਧਤਿਨ੍ਦੁਕਜਾਤਕਵਣ੍ਣਨਾ ਦਸਮਾ.

ਜਾਤਕੁਦ੍ਦਾਨਂ

ਕਿਂਛਨ੍ਦ ਕੁਮ੍ਭ ਜਯਦ੍ਦਿਸ ਛਦ੍ਦਨ੍ਤ, ਅਥ ਪਣ੍ਡਿਤਸਮ੍ਭਵ ਸਿਰਕਪਿ;

ਦਕਰਕ੍ਖਸ ਪਣ੍ਡਰਨਾਗਵਰੋ, ਅਥ ਸਮ੍ਬੁਲ ਤਿਨ੍ਦੁਕਦੇਵਸੁਤੋਤਿ.

ਤਿਂਸਨਿਪਾਤਵਣ੍ਣਨਾ ਨਿਟ੍ਠਿਤਾ.