📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧੭. ਚਤ੍ਤਾਲੀਸਨਿਪਾਤੋ

[੫੨੧] ੧. ਤੇਸਕੁਣਜਾਤਕਵਣ੍ਣਨਾ

ਵੇਸ੍ਸਨ੍ਤਰਂ ਤਂ ਪੁਚ੍ਛਾਮੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਸਲਰਞ੍ਞੋ ਓਵਾਦਵਸੇਨ ਕਥੇਸਿ. ਤਞ੍ਹਿ ਰਾਜਾਨਂ ਧਮ੍ਮਸ੍ਸਵਨਤ੍ਥਾਯ ਆਗਤਂ ਸਤ੍ਥਾ ਆਮਨ੍ਤੇਤ੍ਵਾ ‘‘ਮਹਾਰਾਜ, ਰਞ੍ਞਾ ਨਾਮ ਧਮ੍ਮੇਨ ਰਜ੍ਜਂ ਕਾਰੇਤਬ੍ਬਂ, ਯਸ੍ਮਿਞ੍ਹਿ ਸਮਯੇ ਰਾਜਾਨੋ ਅਧਮ੍ਮਿਕਾ ਹੋਨ੍ਤਿ, ਰਾਜਯੁਤ੍ਤਾਪਿ ਤਸ੍ਮਿਂ ਸਮਯੇ ਅਧਮ੍ਮਿਕਾ ਹੋਨ੍ਤੀ’’ਤਿ ਚਤੁਕ੍ਕਨਿਪਾਤੇ (ਅ. ਨਿ. ੪.੭੦) ਆਗਤਸੁਤ੍ਤਨਯੇਨ ਓਵਦਿਤ੍ਵਾ ਅਗਤਿਗਮਨੇ ਅਗਤਿਅਗਮਨੇ ਚ ਆਦੀਨਵਞ੍ਚ ਆਨਿਸਂਸਞ੍ਚ ਕਥੇਤ੍ਵਾ ‘‘ਸੁਪਿਨਕੂਪਮਾ ਕਾਮਾ’’ਤਿਆਦਿਨਾ ਨਯੇਨ ਕਾਮੇਸੁ ਆਦੀਨਵਂ ਵਿਤ੍ਥਾਰੇਤ੍ਵਾ, ‘‘ਮਹਾਰਾਜ, ਇਮੇਸਞ੍ਹਿ ਸਤ੍ਤਾਨਂ –

‘ਮਚ੍ਚੁਨਾ ਸਙ੍ਗਰੋ ਨਤ੍ਥਿ, ਲਞ੍ਜਗ੍ਗਾਹੋ ਨ ਵਿਜ੍ਜਤਿ;

ਯੁਦ੍ਧਂ ਨਤ੍ਥਿ ਜਯੋ ਨਤ੍ਥਿ, ਸਬ੍ਬੇ ਮਚ੍ਚੁਪਰਾਯਣਾ’.

ਤੇਸਂ ਪਰਲੋਕਂ ਗਚ੍ਛਨ੍ਤਾਨਂ ਠਪੇਤ੍ਵਾ ਅਤ੍ਤਨਾ ਕਤਂ ਕਲ੍ਯਾਣਕਮ੍ਮਂ ਅਞ੍ਞਾ ਪਤਿਟ੍ਠਾ ਨਾਮ ਨਤ੍ਥਿ. ਏਵਂ ਇਤ੍ਤਰਪਚ੍ਚੁਪਟ੍ਠਾਨਂ ਅਵਸ੍ਸਂ ਪਹਾਤਬ੍ਬਂ, ਨ ਯਸਂ ਨਿਸ੍ਸਾਯ ਪਮਾਦਂ ਕਾਤੁਂ ਵਟ੍ਟਤਿ, ਅਪ੍ਪਮਤ੍ਤੇਨੇਵ ਹੁਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਤੁਂ ਵਟ੍ਟਤਿ. ਪੋਰਾਣਕਰਾਜਾਨੋ ਅਨੁਪ੍ਪਨ੍ਨੇਪਿ ਬੁਦ੍ਧੇ ਪਣ੍ਡਿਤਾਨਂ ਓਵਾਦੇ ਠਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਦੇਵਨਗਰਂ ਪੂਰਯਮਾਨਾ ਗਮਿਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਰਜ੍ਜਂ ਕਾਰੇਨ੍ਤੋ ਅਪੁਤ੍ਤਕੋ ਅਹੋਸਿ, ਪਤ੍ਥੇਨ੍ਤੋਪਿ ਪੁਤ੍ਤਂ ਵਾ ਧੀਤਰਂ ਵਾ ਨ ਲਭਿ. ਸੋ ਏਕਦਿਵਸਂ ਮਹਨ੍ਤੇਨ ਪਰਿਵਾਰੇਨ ਉਯ੍ਯਾਨਂ ਗਨ੍ਤ੍ਵਾ ਦਿਵਸਭਾਗਂ ਉਯ੍ਯਾਨੇ ਕੀਲ਼ਿਤ੍ਵਾ ਮਙ੍ਗਲਸਾਲਰੁਕ੍ਖਮੂਲੇ ਸਯਨਂ ਅਤ੍ਥਰਾਪੇਤ੍ਵਾ ਥੋਕਂ ਨਿਦ੍ਦਾਯਿਤ੍ਵਾ ਪਬੁਦ੍ਧੋ ਸਾਲਰੁਕ੍ਖਂ ਓਲੋਕੇਤ੍ਵਾ ਤਤ੍ਥ ਸਕੁਣਕੁਲਾਵਕਂ ਪਸ੍ਸਿ, ਸਹ ਦਸ੍ਸਨੇਨੇਵਸ੍ਸ ਸਿਨੇਹੋ ਉਪ੍ਪਜ੍ਜਿ. ਸੋ ਏਕਂ ਪੁਰਿਸਂ ਪਕ੍ਕੋਸਾਪੇਤ੍ਵਾ ‘‘ਇਮਂ ਰੁਕ੍ਖਂ ਅਭਿਰੁਹਿਤ੍ਵਾ ਏਤਸ੍ਮਿਂ ਕੁਲਾਵਕੇ ਕਸ੍ਸਚਿ ਅਤ੍ਥਿਤਂ ਵਾ ਨਤ੍ਥਿਤਂ ਵਾ ਜਾਨਾਹੀ’’ਤਿ ਆਹ. ਸੋ ‘‘ਸਾਧੁ, ਦੇਵਾ’’ਤਿ ਵਤ੍ਵਾ ਅਭਿਰੁਹਿਤ੍ਵਾ ਤਤ੍ਥ ਤੀਣਿ ਅਣ੍ਡਕਾਨਿ ਦਿਸ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ‘‘ਤੇਨ ਹਿ ਏਤੇਸਂ ਉਪਰਿ ਨਾਸਵਾਤਂ ਮਾ ਵਿਸ੍ਸਜ੍ਜੇਸੀ’’ਤਿ ਵਤ੍ਵਾ ‘‘ਚਙ੍ਕੋਟਕੇ ਕਪ੍ਪਾਸਪਿਚੁਂ ਅਤ੍ਥਰਿਤ੍ਵਾ ਤਤ੍ਥੇਵ ਤਾਨਿ ਅਣ੍ਡਕਾਨਿ ਠਪੇਤ੍ਵਾ ਸਣਿਕਂ ਓਤਰਾਹੀ’’ਤਿ ਓਤਾਰਾਪੇਤ੍ਵਾ ਚਙ੍ਕੋਟਕਂ ਹਤ੍ਥੇਨ ਗਹੇਤ੍ਵਾ ‘‘ਕਤਰਸਕੁਣਣ੍ਡਕਾਨਿ ਨਾਮੇਤਾਨੀ’’ਤਿ ਅਮਚ੍ਚੇ ਪੁਚ੍ਛਿ. ਤੇ ‘‘ਮਯਂ ਨ ਜਾਨਾਮ, ਨੇਸਾਦਾ ਜਾਨਿਸ੍ਸਨ੍ਤੀ’’ਤਿ ਵਦਿਂਸੁ. ਰਾਜਾ ਨੇਸਾਦੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿ. ਨੇਸਾਦਾ, ‘‘ਮਹਾਰਾਜ, ਤੇਸੁ ਏਕਂ ਉਲੂਕਅਣ੍ਡਂ, ਏਕਂ ਸਾਲਿਕਾਅਣ੍ਡਂ, ਏਕਂ ਸੁਵਕਅਣ੍ਡ’’ਨ੍ਤਿ ਕਥਯਿਂਸੁ. ਕਿਂ ਪਨ ਏਕਸ੍ਮਿਂ ਕੁਲਾਵਕੇ ਤਿਣ੍ਣਂ ਸਕੁਣਿਕਾਨਂ ਅਣ੍ਡਾਨਿ ਹੋਨ੍ਤੀਤਿ. ਆਮ, ਦੇਵ, ਪਰਿਪਨ੍ਥੇ ਅਸਤਿ ਸੁਨਿਕ੍ਖਿਤ੍ਤਾਨਿ ਨ ਨਸ੍ਸਨ੍ਤੀਤਿ. ਰਾਜਾ ਤੁਸ੍ਸਿਤ੍ਵਾ ‘‘ਇਮੇ ਮਮ ਪੁਤ੍ਤਾ ਭਵਿਸ੍ਸਨ੍ਤੀ’’ਤਿ ਤਾਨਿ ਤੀਣਿ ਅਣ੍ਡਾਨਿ ਤਯੋ ਅਮਚ੍ਚੇ ਪਟਿਚ੍ਛਾਪੇਤ੍ਵਾ ‘‘ਇਮੇ ਮਯ੍ਹਂ ਪੁਤ੍ਤਾ ਭਵਿਸ੍ਸਨ੍ਤਿ, ਤੁਮ੍ਹੇ ਸਾਧੁਕਂ ਪਟਿਜਗ੍ਗਿਤ੍ਵਾ ਅਣ੍ਡਕੋਸਤੋ ਨਿਕ੍ਖਨ੍ਤਕਾਲੇ ਮਮਾਰੋਚੇਯ੍ਯਾਥਾ’’ਤਿ ਆਹ. ਤੇ ਤਾਨਿ ਸਾਧੁਕਂ ਰਕ੍ਖਿਂਸੁ.

ਤੇਸੁ ਪਠਮਂ ਉਲੂਕਅਣ੍ਡਂ ਭਿਜ੍ਜਿ. ਅਮਚ੍ਚੋ ਏਕਂ ਨੇਸਾਦਂ ਪਕ੍ਕੋਸਾਪੇਤ੍ਵਾ ‘‘ਤ੍ਵਂ ਇਤ੍ਥਿਭਾਵਂ ਵਾ ਪੁਰਿਸਭਾਵਂ ਵਾ ਜਾਨਾਹੀ’’ਤਿ ਵਤ੍ਵਾ ਤੇਨ ਤਂ ਵੀਮਂਸਿਤ੍ਵਾ ‘‘ਪੁਰਿਸੋ’’ਤਿ ਵੁਤ੍ਤੇ ਰਾਜਾਨਂ ਉਪਸਙ੍ਕਮਿਤ੍ਵਾ ‘‘ਪੁਤ੍ਤੋ ਤੇ, ਦੇਵ, ਜਾਤੋ’’ਤਿ ਆਹ. ਰਾਜਾ ਤੁਟ੍ਠੋ ਤਸ੍ਸ ਬਹੁਂ ਧਨਂ ਦਤ੍ਵਾ ‘‘ਪੁਤ੍ਤਕਂ ਮੇ ਸਾਧੁਕਂ ਪਟਿਜਗ੍ਗ, ‘ਵੇਸ੍ਸਨ੍ਤਰੋ’ਤਿ ਚਸ੍ਸ ਨਾਮਂ ਕਰੋਹੀ’’ਤਿ ਵਤ੍ਵਾ ਉਯ੍ਯੋਜੇਸਿ. ਸੋ ਤਥਾ ਅਕਾਸਿ. ਤਤੋ ਕਤਿਪਾਹਚ੍ਚਯੇਨ ਸਾਲਿਕਾਅਣ੍ਡਂ ਭਿਜ੍ਜਿ. ਸੋਪਿ ਅਮਚ੍ਚੋ ਤਂ ਨੇਸਾਦੇਨ ਵੀਮਂਸਾਪੇਤ੍ਵਾ ‘‘ਇਤ੍ਥੀ’’ਤਿ ਸੁਤ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ‘‘ਧੀਤਾ ਤੇ, ਦੇਵ, ਜਾਤਾ’’ਤਿ ਆਹ. ਰਾਜਾ ਤੁਟ੍ਠੋ ਤਸ੍ਸਪਿ ਬਹੁਂ ਧਨਂ ਦਤ੍ਵਾ ‘‘ਧੀਤਰਂ ਮੇ ਸਾਧੁਕਂ ਪਟਿਜਗ੍ਗ, ‘ਕੁਣ੍ਡਲਿਨੀ’ਤਿ ਚਸ੍ਸਾ ਨਾਮਂ ਕਰੋਹੀ’’ਤਿ ਵਤ੍ਵਾ ਉਯ੍ਯੋਜੇਸਿ. ਸੋਪਿ ਤਥਾ ਅਕਾਸਿ. ਪੁਨ ਕਤਿਪਾਹਚ੍ਚਯੇਨ ਸੁਵਕਅਣ੍ਡਂ ਭਿਜ੍ਜਿ. ਸੋਪਿ ਅਮਚ੍ਚੋ ਨੇਸਾਦੇਨ ਤਂ ਵੀਮਂਸਿਤ੍ਵਾ ‘‘ਪੁਰਿਸੋ’’ਤਿ ਵੁਤ੍ਤੇ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ‘‘ਪੁਤ੍ਤੋ ਤੇ, ਦੇਵ, ਜਾਤੋ’’ਤਿ ਆਹ. ਰਾਜਾ ਤੁਟ੍ਠੋ ਤਸ੍ਸਪਿ ਬਹੁਂ ਧਨਂ ਦਤ੍ਵਾ ‘‘ਪੁਤ੍ਤਸ੍ਸ ਮੇ ਮਹਨ੍ਤੇਨ ਪਰਿਵਾਰੇਨ ਮਙ੍ਗਲਂ ਕਤ੍ਵਾ ‘ਜਮ੍ਬੁਕੋ’ਤਿਸ੍ਸ ਨਾਮਂ ਕਰੋਹੀ’’ਤਿ ਵਤ੍ਵਾ ਉਯ੍ਯੋਜੇਸਿ. ਸੋਪਿ ਤਥਾ ਅਕਾਸਿ. ਤੇ ਤਯੋਪਿ ਸਕੁਣਾ ਤਿਣ੍ਣਂ ਅਮਚ੍ਚਾਨਂ ਗੇਹੇਸੁ ਰਾਜਕੁਮਾਰਪਰਿਹਾਰੇਨੇਵ ਵਡ੍ਢਨ੍ਤਿ. ਰਾਜਾ ‘‘ਮਮ ਪੁਤ੍ਤੋ, ਮਮ ਧੀਤਾ’’ਤਿ ਵੋਹਰਤਿ. ਅਥਸ੍ਸ ਅਮਚ੍ਚਾ ਅਞ੍ਞਮਞ੍ਞਂ ਅਵਹਸਨ੍ਤਿ ‘‘ਪਸ੍ਸਥ, ਭੋ, ਰਞ੍ਞੋ ਕਿਰਿਯਂ, ਤਿਰਚ੍ਛਾਨਗਤੇਪਿ ‘ਪੁਤ੍ਤੋ ਮੇ, ਧੀਤਾ ਮੇ’ਤਿ ਵਦਨ੍ਤੋ ਵਿਚਰਤੀ’’ਤਿ.

ਤਂ ਸੁਤ੍ਵਾ ਰਾਜਾ ਚਿਨ੍ਤੇਸਿ – ‘‘ਇਮੇ ਅਮਚ੍ਚਾ ਏਤੇਸਂ ਮਮ ਪੁਤ੍ਤਾਨਂ ਪਞ੍ਞਾਸਮ੍ਪਦਂ ਨ ਜਾਨਨ੍ਤਿ, ਪਾਕਟਂ ਨੇਸਂ ਕਰਿਸ੍ਸਾਮੀ’’ਤਿ. ਅਥੇਕਂ ਅਮਚ੍ਚਂ ਵੇਸ੍ਸਨ੍ਤਰਸ੍ਸ ਸਨ੍ਤਿਕਂ ਪੇਸੇਸਿ – ‘‘ਤੁਮ੍ਹਾਕਂ ਪਿਤਾ ਪਞ੍ਹਂ ਪੁਚ੍ਛਿਤੁਕਾਮੋ, ਕਦਾ ਕਿਰ ਆਗਨ੍ਤ੍ਵਾ ਪੁਚ੍ਛਤੂ’’ਤਿ. ਸੋ ਅਮਚ੍ਚੋ ਗਨ੍ਤ੍ਵਾ ਵੇਸ੍ਸਨ੍ਤਰਂ ਵਨ੍ਦਿਤ੍ਵਾ ਤਂ ਸਾਸਨਂ ਆਰੋਚੇਸਿ. ਤਂ ਸੁਤ੍ਵਾ ਵੇਸ੍ਸਨ੍ਤਰੋ ਅਤ੍ਤਨੋ ਪਟਿਜਗ੍ਗਕਂ ਅਮਚ੍ਚਂ ਪਕ੍ਕੋਸਿਤ੍ਵਾ ‘‘ਮਯ੍ਹਂ ਕਿਰ ਪਿਤਾ ਮਂ ਪਞ੍ਹਂ ਪੁਚ੍ਛਿਤੁਕਾਮੋ, ਤਸ੍ਸ ਇਧਾਗਤਸ੍ਸ ਸਕ੍ਕਾਰਂ ਕਾਤੁਂ ਵਟ੍ਟਤਿ, ਕਦਾ ਆਗਚ੍ਛਤੂ’’ਤਿ ਪੁਚ੍ਛਿ. ਅਮਚ੍ਚੋ ‘‘ਇਤੋ ਸਤ੍ਤਮੇ ਦਿਵਸੇ ਤਵ ਪਿਤਾ ਆਗਚ੍ਛਤੂ’’ਤਿ ਆਹ. ਤਂ ਸੁਤ੍ਵਾ ਵੇਸ੍ਸਨ੍ਤਰੋ ‘‘ਪਿਤਾ ਮੇ ਇਤੋ ਸਤ੍ਤਮੇ ਦਿਵਸੇ ਆਗਚ੍ਛਤੂ’’ਤਿ ਵਤ੍ਵਾ ਉਯ੍ਯੋਜੇਸਿ. ਸੋ ਆਗਨ੍ਤ੍ਵਾ ਰਞ੍ਞੋ ਆਚਿਕ੍ਖਿ. ਰਾਜਾ ਸਤ੍ਤਮੇ ਦਿਵਸੇ ਨਗਰੇ ਭੇਰਿਂ ਚਰਾਪੇਤ੍ਵਾ ਪੁਤ੍ਤਸ੍ਸ ਨਿਵੇਸਨਂ ਅਗਮਾਸਿ. ਵੇਸ੍ਸਨ੍ਤਰੋ ਰਞ੍ਞੋ ਮਹਨ੍ਤਂ ਸਕ੍ਕਾਰਂ ਕਾਰੇਸਿ, ਅਨ੍ਤਮਸੋ ਦਾਸਕਮ੍ਮਕਾਰਾਨਮ੍ਪਿ ਸਕ੍ਕਾਰਂ ਕਾਰੇਸਿ. ਰਾਜਾ ਵੇਸ੍ਸਨ੍ਤਰਸਕੁਣਸ੍ਸ ਗੇਹੇ ਭੁਞ੍ਜਿਤ੍ਵਾ ਮਹਨ੍ਤਂ ਯਸਂ ਅਨੁਭਵਿਤ੍ਵਾ ਸਕਂ ਨਿਵੇਸਨਂ ਆਗਨ੍ਤ੍ਵਾ ਰਾਜਙ੍ਗਣੇ ਮਹਨ੍ਤਂ ਮਣ੍ਡਪਂ ਕਾਰਾਪੇਤ੍ਵਾ ਨਗਰੇ ਭੇਰਿਂ ਚਰਾਪੇਤ੍ਵਾ ਅਲਙ੍ਕਤਮਣ੍ਡਪਮਜ੍ਝੇ ਮਹਾਜਨਪਰਿਵਾਰੋ ਨਿਸੀਦਿਤ੍ਵਾ ‘‘ਵੇਸ੍ਸਨ੍ਤਰਂ ਆਨੇਤੂ’’ਤਿ ਅਮਚ੍ਚਸ੍ਸ ਸਨ੍ਤਿਕਂ ਪੇਸੇਸਿ. ਅਮਚ੍ਚੋ ਵੇਸ੍ਸਨ੍ਤਰਂ ਸੁਵਣ੍ਣਪੀਠੇ ਨਿਸੀਦਾਪੇਤ੍ਵਾ ਆਨੇਸਿ. ਵੇਸ੍ਸਨ੍ਤਰਸਕੁਣੋ ਪਿਤੁ ਅਙ੍ਕੇ ਨਿਸੀਦਿਤ੍ਵਾ ਪਿਤਰਾ ਸਹ ਕੀਲ਼ਿਤ੍ਵਾ ਗਨ੍ਤ੍ਵਾ ਤਤ੍ਥੇਵ ਸੁਵਣ੍ਣਪੀਠੇ ਨਿਸੀਦਿ. ਅਥ ਨਂ ਰਾਜਾ ਮਹਾਜਨਮਜ੍ਝੇ ਰਾਜਧਮ੍ਮਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੧.

‘‘ਵੇਸ੍ਸਨ੍ਤਰਂ ਤਂ ਪੁਚ੍ਛਾਮਿ, ਸਕੁਣ ਭਦ੍ਦਮਤ੍ਥੁ ਤੇ;

ਰਜ੍ਜਂ ਕਾਰੇਤੁਕਾਮੇਨ, ਕਿਂ ਸੁ ਕਿਚ੍ਚਂ ਕਤਂ ਵਰ’’ਨ੍ਤਿ.

ਤਤ੍ਥ ਸਕੁਣਾਤਿ ਤਂ ਆਲਪਤਿ. ਕਿਂ ਸੂਤਿ ਕਤਰਂ ਕਿਚ੍ਚਂ ਕਤਂ ਵਰਂ ਉਤ੍ਤਮਂ ਹੋਤਿ, ਕਥੇਹਿ ਮੇ, ਤਾਤ, ਸਕਲਂ ਰਾਜਧਮ੍ਮਨ੍ਤਿ ਏਵਂ ਕਿਰ ਤਂ ਸੋ ਪੁਚ੍ਛਿ.

ਤਂ ਸੁਤ੍ਵਾ ਵੇਸ੍ਸਨ੍ਤਰੋ ਪਞ੍ਹਂ ਅਕਥੇਤ੍ਵਾਵ ਰਾਜਾਨਂ ਤਾਵ ਪਮਾਦੇਨ ਚੋਦੇਨ੍ਤੋ ਦੁਤਿਯਂ ਗਾਥਮਾਹ –

੨.

‘‘ਚਿਰਸ੍ਸਂ ਵਤ ਮਂ ਤਾਤੋ, ਕਂਸੋ ਬਾਰਾਣਸਿਗ੍ਗਹੋ;

ਪਮਤ੍ਤੋ ਅਪ੍ਪਮਤ੍ਤਂ ਮਂ, ਪਿਤਾ ਪੁਤ੍ਤਂ ਅਚੋਦਯੀ’’ਤਿ.

ਤਤ੍ਥ ਤਾਤੋਤਿ ਪਿਤਾ. ਕਂਸੋਤਿ ਇਦਂ ਤਸ੍ਸ ਨਾਮਂ. ਬਾਰਾਣਸਿਗ੍ਗਹੋਤਿ ਚਤੂਹਿ ਸਙ੍ਗਹਵਤ੍ਥੂਹਿ ਬਾਰਾਣਸਿਂ ਸਙ੍ਗਹੇਤ੍ਵਾ ਵਤ੍ਤਨ੍ਤੋ. ਪਮਤ੍ਤੋਤਿ ਏਵਰੂਪਾਨਂ ਪਣ੍ਡਿਤਾਨਂ ਸਨ੍ਤਿਕੇ ਵਸਨ੍ਤੋ ਪਞ੍ਹਸ੍ਸ ਅਪੁਚ੍ਛਨੇਨ ਪਮਤ੍ਤੋ. ਅਪ੍ਪਮਤ੍ਤਂ ਮਨ੍ਤਿ ਸੀਲਾਦਿਗੁਣਯੋਗੇਨ ਮਂ ਅਪ੍ਪਮਤ੍ਤਂ. ਪਿਤਾਤਿ ਪੋਸਕਪਿਤਾ. ਅਚੋਦਯੀਤਿ ਅਮਚ੍ਚੇਹਿ ‘‘ਤਿਰਚ੍ਛਾਨਗਤੇ ਪੁਤ੍ਤੇ ਕਤ੍ਵਾ ਵੋਹਰਤੀ’’ਤਿ ਅਵਹਸਿਯਮਾਨੋ ਪਮਾਦਂ ਆਪਜ੍ਜਿਤ੍ਵਾ ਚਿਰਸ੍ਸਂ ਅਜ੍ਜ ਚੋਦੇਸਿ, ਪਞ੍ਹਂ ਪੁਚ੍ਛੀਤਿ ਵਦਤਿ.

ਏਵਂ ਸੋ ਇਮਾਯ ਗਾਥਾਯ ਚੋਦੇਤ੍ਵਾ ‘‘ਮਹਾਰਾਜ, ਰਞ੍ਞਾ ਨਾਮ ਤੀਸੁ ਧਮ੍ਮੇਸੁ ਠਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਤਬ੍ਬ’’ਨ੍ਤਿ ਵਤ੍ਵਾ ਰਾਜਧਮ੍ਮਂ ਕਥੇਨ੍ਤੋ ਇਮਾ ਗਾਥਾਯੋ ਆਹ –

੩.

‘‘ਪਠਮੇਨੇਵ ਵਿਤਥਂ, ਕੋਧਂ ਹਾਸਂ ਨਿਵਾਰਯੇ;

ਤਤੋ ਕਿਚ੍ਚਾਨਿ ਕਾਰੇਯ੍ਯ, ਤਂ ਵਤਂ ਆਹੁ ਖਤ੍ਤਿਯ.

੪.

‘‘ਯਂ ਤ੍ਵਂ ਤਾਤ ਤਪੋਕਮ੍ਮਂ, ਪੁਬ੍ਬੇ ਕਤਮਸਂਸਯਂ;

ਰਤ੍ਤੋ ਦੁਟ੍ਠੋ ਚ ਯਂ ਕਯਿਰਾ, ਨ ਤਂ ਕਯਿਰਾ ਤਤੋ ਪੁਨ.

੫.

‘‘ਖਤ੍ਤਿਯਸ੍ਸ ਪਮਤ੍ਤਸ੍ਸ, ਰਟ੍ਠਸ੍ਮਿਂ ਰਟ੍ਠਵਡ੍ਢਨ;

ਸਬ੍ਬੇ ਭੋਗਾ ਵਿਨਸ੍ਸਨ੍ਤਿ, ਰਞ੍ਞੋ ਤਂ ਵੁਚ੍ਚਤੇ ਅਘਂ.

੬.

‘‘ਸਿਰੀ ਤਾਤ ਅਲਕ੍ਖੀ ਚ, ਪੁਚ੍ਛਿਤਾ ਏਤਦਬ੍ਰਵੁਂ;

ਉਟ੍ਠਾਨਵੀਰਿਯੇ ਪੋਸੇ, ਰਮਾਹਂ ਅਨੁਸੂਯਕੇ.

੭.

‘‘ਉਸੂਯਕੇ ਦੁਹਦਯੇ, ਪੁਰਿਸੇ ਕਮ੍ਮਦੁਸ੍ਸਕੇ;

ਕਾਲ਼ਕਣ੍ਣੀ ਮਹਾਰਾਜ, ਰਮਤਿ ਚਕ੍ਕਭਞ੍ਜਨੀ.

੮.

‘‘ਸੋ ਤ੍ਵਂ ਸਬ੍ਬੇ ਸੁਹਦਯੋ, ਸਬ੍ਬੇਸਂ ਰਕ੍ਖਿਤੋ ਭਵ;

ਅਲਕ੍ਖਿਂ ਨੁਦ ਮਹਾਰਾਜ, ਲਕ੍ਖ੍ਯਾ ਭਵ ਨਿਵੇਸਨਂ.

੯.

‘‘ਸ ਲਕ੍ਖੀਧਿਤਿਸਮ੍ਪਨ੍ਨੋ, ਪੁਰਿਸੋ ਹਿ ਮਹਗ੍ਗਤੋ;

ਅਮਿਤ੍ਤਾਨਂ ਕਾਸਿਪਤਿ, ਮੂਲਂ ਅਗ੍ਗਞ੍ਚ ਛਿਨ੍ਦਤਿ.

੧੦.

‘‘ਸਕ੍ਕੋਪਿ ਹਿ ਭੂਤਪਤਿ, ਉਟ੍ਠਾਨੇ ਨਪ੍ਪਮਜ੍ਜਤਿ;

ਸ ਕਲ੍ਯਾਣੇ ਧਿਤਿਂ ਕਤ੍ਵਾ, ਉਟ੍ਠਾਨੇ ਕੁਰੁਤੇ ਮਨੋ.

੧੧.

‘‘ਗਨ੍ਧਬ੍ਬਾ ਪਿਤਰੋ ਦੇਵਾ, ਸਾਜੀਵਾ ਹੋਨ੍ਤਿ ਤਾਦਿਨੋ;

ਉਟ੍ਠਾਹਤੋ ਅਪ੍ਪਮਜ੍ਜਤੋ, ਅਨੁਤਿਟ੍ਠਨ੍ਤਿ ਦੇਵਤਾ.

੧੨.

‘‘ਸੋ ਅਪ੍ਪਮਤ੍ਤੋ ਅਕ੍ਕੁਦ੍ਧੋ, ਤਾਤ ਕਿਚ੍ਚਾਨਿ ਕਾਰਯ;

ਵਾਯਮਸ੍ਸੁ ਚ ਕਿਚ੍ਚੇਸੁ, ਨਾਲਸੋ ਵਿਨ੍ਦਤੇ ਸੁਖਂ.

੧੩.

‘‘ਤਤ੍ਥੇਵ ਤੇ ਵਤ੍ਤਪਦਾ, ਏਸਾਵ ਅਨੁਸਾਸਨੀ;

ਅਲਂ ਮਿਤ੍ਤੇ ਸੁਖਾਪੇਤੁਂ, ਅਮਿਤ੍ਤਾਨਂ ਦੁਖਾਯ ਚਾ’’ਤਿ.

ਤਤ੍ਥ ਪਠਮੇਨੇਵ ਵਿਤਥਨ੍ਤਿ, ਤਾਤ, ਰਾਜਾ ਨਾਮ ਆਦਿਤੋਵ ਮੁਸਾਵਾਦਂ ਨਿਵਾਰਯੇ. ਮੁਸਾਵਾਦਿਨੋ ਹਿ ਰਞ੍ਞੋ ਰਟ੍ਠਂ ਨਿਰੋਜਂ ਹੋਤਿ, ਪਥਵਿਯਾ ਓਜਾ ਕਮ੍ਮਕਰਣਟ੍ਠਾਨਤੋ ਸਤ੍ਤਰਤਨਮਤ੍ਤਂ ਹੇਟ੍ਠਾ ਭਸ੍ਸਤਿ, ਤਤੋ ਆਹਾਰੇ ਵਾ ਤੇਲਮਧੁਫਾਣਿਤਾਦੀਸੁ ਵਾ ਓਸਧੇਸੁ ਓਜਾ ਨ ਹੋਤਿ. ਨਿਰੋਜਾਹਾਰਭੋਜਨਾ ਮਨੁਸ੍ਸਾ ਬਹ੍ਵਾਬਾਧਾ ਹੋਨ੍ਤਿ, ਰਟ੍ਠੇ ਥਲਜਲਪਥੇਸੁ ਆਯੋ ਨੁਪ੍ਪਜ੍ਜਤਿ, ਤਸ੍ਮਿਂ ਅਨੁਪ੍ਪਜ੍ਜਨ੍ਤੇ ਰਾਜਾਨੋ ਦੁਗ੍ਗਤਾ ਹੋਨ੍ਤਿ. ਤੇ ਸੇਵਕੇ ਸਙ੍ਗਣ੍ਹਿਤੁਂ ਨ ਸਕ੍ਕੋਨ੍ਤਿ, ਅਸਙ੍ਗਹਿਤਾ ਸੇਵਕਾ ਰਾਜਾਨਂ ਗਰੁਚਿਤ੍ਤੇਨ ਨ ਓਲੋਕੇਨ੍ਤਿ. ਏਵਂ, ਤਾਤ, ਮੁਸਾਵਾਦੋ ਨਾਮੇਸ ਨਿਰੋਜੋ, ਨ ਸੋ ਜੀਵਿਤਹੇਤੁਪਿ ਕਾਤਬ੍ਬੋ, ਸਚ੍ਚਂ ਪਨ ਸਾਦੁਤਰਂ ਰਸਾਨਨ੍ਤਿ ਤਦੇਵ ਪਟਿਗ੍ਗਹੇਤਬ੍ਬਂ. ਅਪਿਚ ਮੁਸਾਵਾਦੋ ਨਾਮ ਗੁਣਪਰਿਧਂਸਕੋ ਵਿਪਤ੍ਤਿਪਰਿਯੋਸਾਨੋ, ਦੁਤਿਯਚਿਤ੍ਤਵਾਰੇ ਅਵੀਚਿਪਰਾਯਣਂ ਕਰੋਤਿ. ਇਮਸ੍ਮਿਂ ਪਨਤ੍ਥੇ ‘‘ਧਮ੍ਮੋ ਹਵੇ ਹਤੋ ਹਨ੍ਤੀ’’ਤਿ ਚੇਤਿਯਜਾਤਕਂ (ਜਾ. ੧.੮.੪੫ ਆਦਯੋ) ਕਥੇਤਬ੍ਬਂ.

ਕੋਧਨ੍ਤਿ, ਤਾਤ, ਰਾਜਾ ਨਾਮ ਪਠਮਮੇਵ ਕੁਜ੍ਝਨਲਕ੍ਖਣਂ ਕੋਧਮ੍ਪਿ ਨਿਵਾਰੇਯ੍ਯ. ਤਾਤ, ਅਞ੍ਞੇਸਞ੍ਹਿ ਕੋਧੋ ਖਿਪ੍ਪਂ ਮਤ੍ਥਕਂ ਨ ਪਾਪੁਣਾਤਿ, ਰਾਜੂਨਂ ਪਾਪੁਣਾਤਿ. ਰਾਜਾਨੋ ਨਾਮ ਵਾਚਾਵੁਧਾ ਕੁਜ੍ਝਿਤ੍ਵਾ ਓਲੋਕਿਤਮਤ੍ਤੇਨਾਪਿ ਪਰਂ ਵਿਨਾਸੇਨ੍ਤਿ, ਤਸ੍ਮਾ ਰਞ੍ਞਾ ਅਞ੍ਞੇਹਿ ਮਨੁਸ੍ਸੇਹਿ ਅਤਿਰੇਕਤਰਂ ਨਿਕ੍ਕੋਧੇਨ ਭਵਿਤਬ੍ਬਂ, ਖਨ੍ਤਿਮੇਤ੍ਤਾਨੁਦ੍ਦਯਾਸਮ੍ਪਨ੍ਨੇਨ ਅਤ੍ਤਨੋ ਪਿਯਪੁਤ੍ਤਂ ਵਿਯ ਲੋਕਂ ਵੋਲੋਕੇਨ੍ਤੇਨ ਭਵਿਤਬ੍ਬਂ. ਤਾਤ, ਅਤਿਕੋਧਨੋ ਨਾਮ ਰਾਜਾ ਉਪ੍ਪਨ੍ਨਂ ਯਸਂ ਰਕ੍ਖਿਤੁਂ ਨ ਸਕ੍ਕੋਤਿ. ਇਮਸ੍ਸ ਪਨਤ੍ਥਸ੍ਸ ਦੀਪਨਤ੍ਥਂ ਖਨ੍ਤਿਵਾਦਿਜਾਤਕ- (ਜਾ. ੧.੪.੪੯ ਆਦਯੋ) ਚੂਲ਼ਧਮ੍ਮਪਾਲਜਾਤਕਾਨਿ (ਜਾ. ੧.੫.੪੪ ਆਦਯੋ) ਕਥੇਤਬ੍ਬਾਨਿ. ਚੂਲ਼ਧਮ੍ਮਪਾਲਜਾਤਕਸ੍ਮਿਞ੍ਹਿ ਮਹਾਪਤਾਪਨੋ ਨਾਮ ਰਾਜਾ ਪੁਤ੍ਤਂ ਘਾਤੇਤ੍ਵਾ ਪੁਤ੍ਤਸੋਕੇਨ ਹਦਯੇਨ ਫਲਿਤੇਨ ਮਤਾਯ ਦੇਵਿਯਾ ਸਯਮ੍ਪਿ ਦੇਵਿਂ ਅਨੁਸੋਚਨ੍ਤੋ ਹਦਯੇਨ ਫਲਿਤੇਨੇਵ ਮਰਿ. ਅਥ ਤੇ ਤਯੋਪਿ ਏਕਆਲ਼ਾਹਨੇਵ ਝਾਪੇਸੁਂ. ਤਸ੍ਮਾ ਰਞ੍ਞਾ ਪਠਮਮੇਵ ਮੁਸਾਵਾਦਂ ਵਜ੍ਜੇਤ੍ਵਾ ਦੁਤਿਯਂ ਕੋਧੋ ਵਜ੍ਜੇਤਬ੍ਬੋ.

ਹਾਸਨ੍ਤਿ ਹਸ੍ਸਂ, ਅਯਮੇਵ ਵਾ ਪਾਠੋ. ਤੇਸੁ ਤੇਸੁ ਕਿਚ੍ਚੇਸੁ ਉਪ੍ਪਿਲਾਵਿਤਚਿਤ੍ਤਤਾਯ ਕੇਲ਼ਿਸੀਲਤਂ ਪਰਿਹਾਸਂ ਨਿਵਾਰੇਯ੍ਯ. ਤਾਤ, ਰਞ੍ਞਾ ਨਾਮ ਕੇਲ਼ਿਸੀਲੇਨ ਨ ਭਵਿਤਬ੍ਬਂ, ਅਪਰਪਤ੍ਤਿਯੇਨ ਹੁਤ੍ਵਾ ਸਬ੍ਬਾਨਿ ਕਿਚ੍ਚਾਨਿ ਅਤ੍ਤਪਚ੍ਚਕ੍ਖੇਨੇਵ ਕਾਤਬ੍ਬਾਨਿ. ਉਪ੍ਪਿਲਾਵਿਤਚਿਤ੍ਤੋ ਹਿ ਰਾਜਾ ਅਤੁਲੇਤ੍ਵਾ ਕਮ੍ਮਾਨਿ ਕਰੋਨ੍ਤੋ ਲਦ੍ਧਂ ਯਸਂ ਵਿਨਾਸੇਤਿ. ਇਮਸ੍ਮਿਂ ਪਨਤ੍ਥੇ ਸਰਭਙ੍ਗਜਾਤਕੇ (ਜਾ. ੨.੧੭.੫੦ ਆਦਯੋ) ਪੁਰੋਹਿਤਸ੍ਸ ਵਚਨਂ ਗਹੇਤ੍ਵਾ ਦਣ੍ਡਕਿਰਞ੍ਞੋ ਕਿਸਵਚ੍ਛੇ ਅਪਰਜ੍ਝਿਤ੍ਵਾ ਸਹ ਰਟ੍ਠੇਨ ਉਚ੍ਛਿਜ੍ਜਿਤ੍ਵਾ ਕੁਕ੍ਕੁਲ਼ਨਿਰਯੇ ਨਿਬ੍ਬਤ੍ਤਭਾਵੋ ਚ ਮਾਤਙ੍ਗਜਾਤਕੇ (ਜਾ. ੧.੧੫.੧ ਆਦਯੋ) ਮਜ੍ਝਰਞ੍ਞੋ ਬ੍ਰਾਹ੍ਮਣਾਨਂ ਕਥਂ ਗਹੇਤ੍ਵਾ ਮਾਤਙ੍ਗਤਾਪਸੇ ਅਪਰਜ੍ਝਿਤ੍ਵਾ ਸਹ ਰਟ੍ਠੇਨ ਉਚ੍ਛਿਜ੍ਜਿਤ੍ਵਾ ਨਿਰਯੇ ਨਿਬ੍ਬਤ੍ਤਭਾਵੋ ਚ ਘਟਪਣ੍ਡਿਤਜਾਤਕੇ (ਜਾ. ੧.੧੦.੧੬੫ ਆਦਯੋ) ਦਸਭਾਤਿਕਰਾਜਦਾਰਕਾਨਂ ਮੋਹਮੂਲ਼੍ਹਾਨਂ ਵਚਨਂ ਗਹੇਤ੍ਵਾ ਕਣ੍ਹਦੀਪਾਯਨੇ ਅਪਰਜ੍ਝਿਤ੍ਵਾ ਵਾਸੁਦੇਵਕੁਲਸ੍ਸ ਨਾਸਿਤਭਾਵੋ ਚ ਕਥੇਤਬ੍ਬੋ.

ਤਤੋ ਕਿਚ੍ਚਾਨਿ ਕਾਰੇਯ੍ਯਾਤਿ ਏਵਂ, ਤਾਤ, ਪਠਮਂ ਮੁਸਾਵਾਦਂ ਦੁਤਿਯਂ ਕੋਧਂ ਤਤਿਯਂ ਅਧਮ੍ਮਹਾਸਂ ਵਜ੍ਜੇਤ੍ਵਾ ਤਤੋ ਪਚ੍ਛਾ ਰਾਜਾ ਰਟ੍ਠਵਾਸੀਨਂ ਕਤ੍ਤਬ੍ਬਕਿਚ੍ਚਾਨਿ ਕਾਰੇਯ੍ਯ. ਤਂ ਵਤਂ ਆਹੁ ਖਤ੍ਤਿਯਾਤਿ, ਖਤ੍ਤਿਯਮਹਾਰਾਜ, ਯਂ ਮਯਾ ਵੁਤ੍ਤਂ, ਏਤਂ ਰਞ੍ਞੋ ਵਤਸਮਾਦਾਨਨ੍ਤਿ ਪੋਰਾਣਕਪਣ੍ਡਿਤਾ ਕਥਯਿਂਸੁ.

ਨ ਤਂ ਕਯਿਰਾਤਿ ਯਂ ਤਯਾ ਰਾਗਾਦਿਵਸੇਨ ਪਚ੍ਛਾ ਤਾਪਕਰਂ ਕਮ੍ਮਂ ਕਤਂ ਹੋਤਿ, ਤਤੋ ਪੁਬ੍ਬੇ ਕਤਤੋ ਪੁਨ ਤਾਦਿਸਂ ਕਮ੍ਮਂ ਨ ਕਯਿਰਾ, ਮਾ ਕਰੇਯ੍ਯਾਸਿ, ਤਾਤਾਤਿ. ਵੁਚ੍ਚਤੇਤਿ ਤਂ ਰਞ੍ਞੋ ਅਘਨ੍ਤਿ ਵੁਚ੍ਚਤਿ, ਏਵਂ ਪੋਰਾਣਕਪਣ੍ਡਿਤਾ ਕਥਯਿਂਸੁ. ਸਿਰੀਤਿ ਇਦਂ ਵੇਸ੍ਸਨ੍ਤਰਸਕੁਣੋ ਪੁਬ੍ਬੇ ਬਾਰਾਣਸਿਯਂ ਪਵਤ੍ਤਿਤਕਾਰਣਂ ਆਹਰਿਤ੍ਵਾ ਦਸ੍ਸੇਨ੍ਤੋ ਆਹ. ਤਤ੍ਥ ਅਬ੍ਰਵੁਨ੍ਤਿ ਸੁਚਿਪਰਿਵਾਰਸੇਟ੍ਠਿਨਾ ਪੁਚ੍ਛਿਤਾ ਕਥਯਿਂਸੁ. ਉਟ੍ਠਾਨਵੀਰਿਯੇਤਿ ਯੋ ਪੋਸੋ ਉਟ੍ਠਾਨੇ ਵੀਰਿਯੇ ਚ ਪਤਿਟ੍ਠਿਤੋ, ਨ ਚ ਪਰੇਸਂ ਸਮ੍ਪਤ੍ਤਿਂ ਦਿਸ੍ਵਾ ਉਸੂਯਤਿ, ਤਸ੍ਮਿਂ ਅਹਂ ਅਭਿਰਮਾਮੀਤਿ ਆਹ. ਏਵਂ ਤਾਵ ਤਾਤ ਸਿਰੀ ਕਥੇਸਿ. ਉਸੂਯਕੇਤਿ ਅਲਕ੍ਖੀ ਪਨ, ਤਾਤ, ਪੁਚ੍ਛਿਤਾ ਅਹਂ ਪਰਸਮ੍ਪਤ੍ਤਿਉਸੂਯਕੇ ਦੁਹਦਯੇ ਦੁਚਿਤ੍ਤੇ ਕਲ੍ਯਾਣਕਮ੍ਮਦੂਸਕੇ ਯੋ ਕਲ੍ਯਾਣਕਮ੍ਮਂ ਦੁਸ੍ਸਨ੍ਤੋ ਅਪ੍ਪਿਯਾਯਨ੍ਤੋ ਅਟ੍ਟੀਯਨ੍ਤੋ ਨ ਕਰੋਤਿ, ਤਸ੍ਮਿਂ ਅਭਿਰਮਾਮੀਤਿ ਆਹ. ਏਵਂ ਸਾ ਕਾਲ਼ਕਣ੍ਣੀ, ਮਹਾਰਾਜ, ਰਮਤਿ ਪਤਿਰੂਪਦੇਸਵਾਸਾਦਿਨੋ ਕੁਸਲਚਕ੍ਕਸ੍ਸ ਭਞ੍ਜਨੀ.

ਸੁਹਦਯੋਤਿ ਸੁਨ੍ਦਰਚਿਤ੍ਤੋ ਹਿਤਚਿਤ੍ਤਕੋ. ਨੁਦਾਤਿ ਨੀਹਰ. ਨਿਵੇਸਨਨ੍ਤਿ ਲਕ੍ਖਿਯਾ ਪਨ ਨਿਵੇਸਨਂ ਭਵ ਪਤਿਟ੍ਠਾ ਹੋਹਿ. ਸ ਲਕ੍ਖੀਧਿਤਿਸਮ੍ਪਨ੍ਨੋਤਿ, ਮਹਾਰਾਜ, ਕਾਸਿਪਤਿ ਸੋ ਪੁਰਿਸੋ ਪਞ੍ਞਾਯ ਚੇਵ ਵੀਰਿਯੇਨ ਚ ਸਮ੍ਪਨ੍ਨੋ. ਮਹਗ੍ਗਤੋਤਿ ਮਹਜ੍ਝਾਸਯੋ ਚੋਰਾਨਂ ਪਚ੍ਚਯਭੂਤੇ ਗਣ੍ਹਨ੍ਤੋ ਅਮਿਤ੍ਤਾਨਂ ਮੂਲਂ ਚੋਰੇ ਗਣ੍ਹਨ੍ਤੋ ਅਮਿਤ੍ਤਾਨਂ ਅਗ੍ਗਂ ਛਿਨ੍ਦਤੀਤਿ ਵਦਤਿ. ਸਕ੍ਕੋਤਿ ਇਨ੍ਦੋ. ਭੂਤਪਤੀਤਿ ਰਾਜਾਨਂ ਆਲਪਤਿ. ਉਟ੍ਠਾਨੇਤਿ ਉਟ੍ਠਾਨਵੀਰਿਯੇ. ਨਪ੍ਪਮਜ੍ਜਤੀਤਿ ਨ ਪਮਜ੍ਜਤਿ, ਸਬ੍ਬਕਿਚ੍ਚਾਨਿ ਕਰੋਤਿ. ਸ ਕਲ੍ਯਾਣੇਤਿ ਸੋ ਦੇਵਰਾਜਾ ਉਟ੍ਠਾਨਵੀਰਿਯੇ ਮਨਂ ਕਰੋਨ੍ਤੋ ਪਾਪਕਮ੍ਮਂ ਅਕਤ੍ਵਾ ਕਲ੍ਯਾਣੇ ਪੁਞ੍ਞਕਮ੍ਮਸ੍ਮਿਞ੍ਞੇਵ ਧਿਤਿਂ ਕਤ੍ਵਾ ਅਪ੍ਪਮਤ੍ਤੋ ਉਟ੍ਠਾਨੇ ਮਨਂ ਕਰੋਤਿ, ਤਸ੍ਸ ਪਨ ਕਲ੍ਯਾਣਕਮ੍ਮੇ ਵੀਰਿਯਕਰਣਭਾਵਦਸ੍ਸਨਤ੍ਥਂ ਸਰਭਙ੍ਗਜਾਤਕੇ ਦ੍ਵੀਸੁ ਦੇਵਲੋਕੇਸੁ ਦੇਵਤਾਹਿ ਸਦ੍ਧਿਂ ਕਪਿਟ੍ਠਾਰਾਮਂ ਆਗਨ੍ਤ੍ਵਾ ਪਞ੍ਹਂ ਪੁਚ੍ਛਿਤ੍ਵਾ ਧਮ੍ਮਸ੍ਸ ਸੁਤਭਾਵੋ, ਮਹਾਕਣ੍ਹਜਾਤਕੇ (ਜਾ. ੧.੧੨.੬੧ ਆਦਯੋ) ਅਤ੍ਤਨੋ ਆਨੁਭਾਵੇਨ ਜਨਂ ਤਾਸੇਤ੍ਵਾ ਓਸਕ੍ਕਨ੍ਤਸ੍ਸ ਸਾਸਨਸ੍ਸ ਪਵਤ੍ਤਿਤਭਾਵੋ ਚਾਤਿ ਏਵਮਾਦੀਨਿ ਵਤ੍ਥੂਨਿ ਕਥੇਤਬ੍ਬਾਨਿ.

ਗਨ੍ਧਬ੍ਬਾਤਿ ਚਾਤੁਮਹਾਰਾਜਿਕਾਨਂ ਹੇਟ੍ਠਾ ਚਤੁਯੋਨਿਕਾ ਦੇਵਾ, ਚਤੁਯੋਨਿਕਤ੍ਤਾਯੇਵ ਕਿਰ ਤੇ ਗਨ੍ਧਬ੍ਬਾ ਨਾਮ ਜਾਤਾ. ਪਿਤਰੋਤਿ ਬ੍ਰਹ੍ਮਾਨੋ. ਦੇਵਾਤਿ ਉਪਪਤ੍ਤਿਦੇਵਵਸੇਨ ਛ ਕਾਮਾਵਚਰਦੇਵਾ. ਤਾਦਿਨੋਤਿ ਤਥਾਵਿਧਸ੍ਸ ਕੁਸਲਾਭਿਰਤਸ੍ਸ ਰਞ੍ਞੋ. ਸਾਜੀਵਾ ਹੋਨ੍ਤੀਤਿ ਸਮਾਨਜੀਵਿਕਾ ਉਪਜੀਵਿਤਬ੍ਬਾ. ਤਾਦਿਸਾ ਹਿ ਰਾਜਾਨੋ ਦਾਨਾਦੀਨਿ ਪੁਞ੍ਞਾਨਿ ਕਰੋਨ੍ਤਾ ਦੇਵਤਾਨਂ ਪਤ੍ਤਿਂ ਦੇਨ੍ਤਿ, ਤਾ ਤਂ ਪਤ੍ਤਿਂ ਅਨੁਮੋਦਿਤ੍ਵਾ ਸਮ੍ਪਟਿਚ੍ਛਿਤ੍ਵਾ ਦਿਬ੍ਬਯਸੇਨ ਵਡ੍ਢਨ੍ਤਿ. ਅਨੁਤਿਟ੍ਠਨ੍ਤੀਤਿ ਤਾਦਿਸਸ੍ਸ ਰਞ੍ਞੋ ਵੀਰਿਯਂ ਕਰੋਨ੍ਤਸ੍ਸ ਅਪ੍ਪਮਾਦਂ ਆਪਜ੍ਜਨ੍ਤਸ੍ਸ ਦੇਵਤਾ ਅਨੁਤਿਟ੍ਠਨ੍ਤਿ ਅਨੁਗਚ੍ਛਨ੍ਤਿ, ਧਮ੍ਮਿਕਂ ਰਕ੍ਖਂ ਸਂਵਿਦਹਨ੍ਤੀਤਿ ਅਤ੍ਥੋ.

ਸੋਤਿ ਸੋ ਤ੍ਵਂ. ਵਾਯਮਸ੍ਸੂਤਿ ਤਾਨਿ ਰਟ੍ਠਕਿਚ੍ਚਾਨਿ ਕਰੋਨ੍ਤੋ ਤੁਲਨਵਸੇਨ ਤੀਰਣਵਸੇਨ ਪਚ੍ਚਕ੍ਖਕਮ੍ਮਵਸੇਨ ਤੇਸੁ ਤੇਸੁ ਕਿਚ੍ਚੇਸੁ ਵੀਰਿਯਂ ਕਰਸ੍ਸੁ. ਤਤ੍ਥੇਵ ਤੇ ਵਤ੍ਤਪਦਾਤਿ, ਤਾਤ, ਯਂ ਮਂ ਤ੍ਵਂ ਕਿਂਸੁ ਕਿਚ੍ਚਂ ਕਤਂ ਵਰਨ੍ਤਿ ਪੁਚ੍ਛਿ, ਤਤ੍ਥ ਤਵ ਪਞ੍ਹੇਯੇਵ ਏਤੇ ਮਯਾ ‘‘ਪਠਮੇਨੇਵ ਵਿਤਥ’’ਨ੍ਤਿਆਦਯੋ ਵੁਤ੍ਤਾ, ਏਤੇ ਵਤ੍ਤਪਦਾ ਵਤ੍ਤਕੋਟ੍ਠਾਸਾ, ਏਵਂ ਤਤ੍ਥ ਵਤ੍ਤਸ੍ਸੁ. ਏਸਾਤਿ ਯਾ ਤੇ ਮਯਾ ਕਥਿਤਾ, ਏਸਾਵ ਤਵ ਅਨੁਸਾਸਨੀ. ਅਲਨ੍ਤਿ ਏਵਂ ਵਤ੍ਤਮਾਨੋ ਹਿ ਰਾਜਾ ਅਤ੍ਤਨੋ ਮਿਤ੍ਤੇ ਸੁਖਾਪੇਤੁਂ, ਅਮਿਤ੍ਤਾਨਞ੍ਚ ਦੁਕ੍ਖਾਯ ਅਲਂ ਪਰਿਯਤ੍ਤੋ ਸਮਤ੍ਥੋਤਿ.

ਏਵਂ ਵੇਸ੍ਸਨ੍ਤਰਸਕੁਣੇਨ ਏਕਾਯ ਗਾਥਾਯ ਰਞ੍ਞੋ ਪਮਾਦਂ ਚੋਦੇਤ੍ਵਾ ਏਕਾਦਸਹਿ ਗਾਥਾਹਿ ਧਮ੍ਮੇ ਕਥਿਤੇ ‘‘ਬੁਦ੍ਧਲੀਲ਼ਾਯ ਪਞ੍ਹੋ ਕਥਿਤੋ’’ਤਿ ਮਹਾਜਨੋ ਅਚ੍ਛਰਿਯਬ੍ਭੁਤਚਿਤ੍ਤਜਾਤੋ ਸਾਧੁਕਾਰਸਤਾਨਿ ਪਵਤ੍ਤੇਸਿ. ਰਾਜਾ ਸੋਮਨਸ੍ਸਪ੍ਪਤ੍ਤੋ ਅਮਚ੍ਚੇ ਆਮਨ੍ਤੇਤ੍ਵਾ ਪੁਚ੍ਛਿ – ‘‘ਭੋਨ੍ਤੋ! ਅਮਚ੍ਚਾ ਮਮ ਪੁਤ੍ਤੇਨ ਵੇਸ੍ਸਨ੍ਤਰੇਨ ਏਵਂ ਕਥੇਨ੍ਤੇਨ ਕੇਨ ਕਤ੍ਤਬ੍ਬਂ ਕਿਚ੍ਚਂ ਕਤ’’ਨ੍ਤਿ. ਮਹਾਸੇਨਗੁਤ੍ਤੇਨ, ਦੇਵਾਤਿ. ‘‘ਤੇਨ ਹਿਸ੍ਸ ਮਹਾਸੇਨਗੁਤ੍ਤਟ੍ਠਾਨਂ ਦਮ੍ਮੀ’’ਤਿ ਵੇਸ੍ਸਨ੍ਤਰਂ ਠਾਨਨ੍ਤਰੇ ਠਪੇਸਿ. ਸੋ ਤਤੋ ਪਟ੍ਠਾਯ ਮਹਾਸੇਨਗੁਤ੍ਤਟ੍ਠਾਨੇ ਠਿਤੋ ਪਿਤੁ ਕਮ੍ਮਂ ਅਕਾਸੀਤਿ.

ਵੇਸ੍ਸਨ੍ਤਰਪਞ੍ਹੋ ਨਿਟ੍ਠਿਤੋ.

ਪੁਨ ਰਾਜਾ ਕਤਿਪਾਹਚ੍ਚਯੇਨ ਪੁਰਿਮਨਯੇਨੇਵ ਕੁਣ੍ਡਲਿਨਿਯਾ ਸਨ੍ਤਿਕਂ ਦੂਤਂ ਪੇਸੇਤ੍ਵਾ ਸਤ੍ਤਮੇ ਦਿਵਸੇ ਤਤ੍ਥ ਗਨ੍ਤ੍ਵਾ ਪਚ੍ਚਾਗਨ੍ਤ੍ਵਾ ਤਤ੍ਥੇਵ ਮਣ੍ਡਪਮਜ੍ਝੇ ਨਿਸੀਦਿਤ੍ਵਾ ਕੁਣ੍ਡਲਿਨਿਂ ਆਹਰਾਪੇਤ੍ਵਾ ਸੁਵਣ੍ਣਪੀਠੇ ਨਿਸਿਨ੍ਨਂ ਰਾਜਧਮ੍ਮਂ ਪੁਚ੍ਛਨ੍ਤੋ ਗਾਥਮਾਹ –

੧੪.

‘‘ਸਕ੍ਖਿਸਿ ਤ੍ਵਂ ਕੁਣ੍ਡਲਿਨਿ, ਮਞ੍ਞਸਿ ਖਤ੍ਤਬਨ੍ਧੁਨਿ;

ਰਜ੍ਜਂ ਕਾਰੇਤੁਕਾਮੇਨ, ਕਿਂ ਸੁ ਕਿਚ੍ਚਂ ਕਤਂ ਵਰ’’ਨ੍ਤਿ.

ਤਤ੍ਥ ਸਕ੍ਖਿਸੀਤਿ ਮਯਾ ਪੁਟ੍ਠਪਞ੍ਹਂ ਕਥੇਤੁਂ ਸਕ੍ਖਿਸ੍ਸਸੀਤਿ ਪੁਚ੍ਛਤਿ. ਕੁਣ੍ਡਲਿਨੀਤਿ ਤਸ੍ਸਾ ਸਲਿਙ੍ਗਤੋ ਆਗਤਨਾਮੇਨਾਲਪਤਿ. ਤਸ੍ਸਾ ਕਿਰ ਦ੍ਵੀਸੁ ਕਣ੍ਣਪਿਟ੍ਠੇਸੁ ਕੁਣ੍ਡਲਸਣ੍ਠਾਨਾ ਦ੍ਵੇ ਲੇਖਾ ਅਹੇਸੁਂ, ਤੇਨਸ੍ਸਾ ‘‘ਕੁਣ੍ਡਲਿਨੀ’’ਤਿ ਨਾਮਂ ਕਾਰੇਸਿ. ਮਞ੍ਞਸੀਤਿ ਜਾਨਿਸ੍ਸਸਿ ਮਯਾ ਪੁਟ੍ਠਪਞ੍ਹਸ੍ਸ ਅਤ੍ਥਨ੍ਤਿ. ਖਤ੍ਤਬਨ੍ਧੁਨੀਤਿ ਖਤ੍ਤਸ੍ਸ ਮਹਾਸੇਨਗੁਤ੍ਤਸ੍ਸ ਭਗਿਨਿਭਾਵੇਨ ਨਂ ਏਵਂ ਆਲਪਤਿ. ਕਸ੍ਮਾ ਪਨੇਸ ਵੇਸ੍ਸਨ੍ਤਰਸਕੁਣਂ ਏਵਂ ਅਪੁਚ੍ਛਿਤ੍ਵਾ ਇਮਮੇਵ ਪੁਚ੍ਛਤੀਤਿ? ਇਤ੍ਥਿਭਾਵੇਨ. ਇਤ੍ਥਿਯੋ ਹਿ ਪਰਿਤ੍ਤਪਞ੍ਞਾ, ਤਸ੍ਮਾ ‘‘ਸਚੇ ਸਕ੍ਕੋਤਿ, ਪੁਚ੍ਛਿਸ੍ਸਾਮਿ, ਨੋ ਚੇ, ਨ ਪੁਚ੍ਛਿਸ੍ਸਾਮੀ’’ਤਿ ਵੀਮਂਸਨਵਸੇਨ ਏਵਂ ਪੁਚ੍ਛਿਤ੍ਵਾ ਤਞ੍ਞੇਵ ਪਞ੍ਹਂ ਪੁਚ੍ਛਿ.

ਸਾ ਏਵਂ ਰਞ੍ਞਾ ਰਾਜਧਮ੍ਮੇ ਪੁਚ੍ਛਿਤੇ, ‘‘ਤਾਤ, ਤ੍ਵਂ ਮਂ ‘ਇਤ੍ਥਿਕਾ ਨਾਮ ਕਿਂ ਕਥੇਸ੍ਸਤੀ’ਤਿ ਵੀਮਂਸਸਿ ਮਞ੍ਞੇ, ਸਕਲਂ ਤੇ ਰਾਜਧਮ੍ਮਂ ਦ੍ਵੀਸੁਯੇਵ ਪਦੇਸੁ ਪਕ੍ਖਿਪਿਤ੍ਵਾ ਕਥੇਸ੍ਸਾਮੀ’’ਤਿ ਵਤ੍ਵਾ ਆਹ –

੧੫.

‘‘ਦ੍ਵੇਵ ਤਾਤ ਪਦਕਾਨਿ, ਯਤ੍ਥ ਸਬ੍ਬਂ ਪਤਿਟ੍ਠਿਤਂ;

ਅਲਦ੍ਧਸ੍ਸ ਚ ਯੋ ਲਾਭੋ, ਲਦ੍ਧਸ੍ਸ ਚਾਨੁਰਕ੍ਖਣਾ.

੧੬.

‘‘ਅਮਚ੍ਚੇ ਤਾਤ ਜਾਨਾਹਿ, ਧੀਰੇ ਅਤ੍ਥਸ੍ਸ ਕੋਵਿਦੇ;

ਅਨਕ੍ਖਾਕਿਤਵੇ ਤਾਤ, ਅਸੋਣ੍ਡੇ ਅਵਿਨਾਸਕੇ.

੧੭.

‘‘ਯੋ ਚ ਤਂ ਤਾਤ ਰਕ੍ਖੇਯ੍ਯ, ਧਨਂ ਯਞ੍ਚੇਵ ਤੇ ਸਿਯਾ;

ਸੂਤੋਵ ਰਥਂ ਸਙ੍ਗਣ੍ਹੇ, ਸੋ ਤੇ ਕਿਚ੍ਚਾਨਿ ਕਾਰਯੇ.

੧੮.

‘‘ਸੁਸਙ੍ਗਹਿਤਨ੍ਤਜਨੋ, ਸਯਂ ਵਿਤ੍ਤਂ ਅਵੇਕ੍ਖਿਯ;

ਨਿਧਿਞ੍ਚ ਇਣਦਾਨਞ੍ਚ, ਨ ਕਰੇ ਪਰਪਤ੍ਤਿਯਾ.

੧੯.

‘‘ਸਯਂ ਆਯਂ ਵਯਂ ਜਞ੍ਞਾ, ਸਯਂ ਜਞ੍ਞਾ ਕਤਾਕਤਂ;

ਨਿਗ੍ਗਣ੍ਹੇ ਨਿਗ੍ਗਹਾਰਹਂ, ਪਗ੍ਗਣ੍ਹੇ ਪਗ੍ਗਹਾਰਹਂ.

੨੦.

‘‘ਸਯਂ ਜਾਨਪਦਂ ਅਤ੍ਥਂ, ਅਨੁਸਾਸ ਰਥੇਸਭ;

ਮਾ ਤੇ ਅਧਮ੍ਮਿਕਾ ਯੁਤ੍ਤਾ, ਧਨਂ ਰਟ੍ਠਞ੍ਚ ਨਾਸਯੁਂ.

੨੧.

‘‘ਮਾ ਚ ਵੇਗੇਨ ਕਿਚ੍ਚਾਨਿ, ਕਰੋਸਿ ਕਾਰਯੇਸਿ ਵਾ;

ਵੇਗਸਾ ਹਿ ਕਤਂ ਕਮ੍ਮਂ, ਮਨ੍ਦੋ ਪਚ੍ਛਾਨੁਤਪ੍ਪਤਿ.

੨੨.

‘‘ਮਾ ਤੇ ਅਧਿਸਰੇ ਮੁਞ੍ਚ, ਸੁਬਾਲ਼੍ਹਮਧਿਕੋਪਿਤਂ;

ਕੋਧਸਾ ਹਿ ਬਹੂ ਫੀਤਾ, ਕੁਲਾ ਅਕੁਲਤਂ ਗਤਾ.

੨੩.

‘‘‘ਮਾ ਤਾਤ ਇਸ੍ਸਰੋਮ੍ਹੀ’ਤਿ, ਅਨਤ੍ਥਾਯ ਪਤਾਰਯਿ;

ਇਤ੍ਥੀਨਂ ਪੁਰਿਸਾਨਞ੍ਚ, ਮਾ ਤੇ ਆਸਿ ਦੁਖੁਦ੍ਰਯੋ.

੨੪.

‘‘ਅਪੇਤਲੋਮਹਂਸਸ੍ਸ, ਰਞ੍ਞੋ ਕਾਮਾਨੁਸਾਰਿਨੋ;

ਸਬ੍ਬੇ ਭੋਗਾ ਵਿਨਸ੍ਸਨ੍ਤਿ, ਰਞ੍ਞੋ ਤਂ ਵੁਚ੍ਚਤੇ ਅਘਂ.

੨੫.

‘‘ਤਤ੍ਥੇਵ ਤੇ ਵਤ੍ਤਪਦਾ, ਏਸਾਵ ਅਨੁਸਾਸਨੀ;

ਦਕ੍ਖਸ੍ਸੁਦਾਨਿ ਪੁਞ੍ਞਕਰੋ, ਅਸੋਣ੍ਡੋ ਅਵਿਨਾਸਕੋ;

ਸੀਲਵਾਸ੍ਸੁ ਮਹਾਰਾਜ, ਦੁਸ੍ਸੀਲੋ ਵਿਨਿਪਾਤਿਕੋ’’ਤਿ.

ਤਤ੍ਥ ਪਦਕਾਨੀਤਿ ਕਾਰਣਪਦਾਨਿ. ਯਤ੍ਥਾਤਿ ਯੇਸੁ ਦ੍ਵੀਸੁ ਪਦੇਸੁ ਸਬ੍ਬਂ ਅਤ੍ਥਜਾਤਂ ਹਿਤਸੁਖਂ ਪਤਿਟ੍ਠਿਤਂ. ਅਲਦ੍ਧਸ੍ਸਾਤਿ ਯੋ ਚ ਪੁਬ੍ਬੇ ਅਲਦ੍ਧਸ੍ਸ ਲਾਭਸ੍ਸ ਲਾਭੋ, ਯਾ ਚ ਲਦ੍ਧਸ੍ਸ ਅਨੁਰਕ੍ਖਣਾ. ਤਾਤ, ਅਨੁਪ੍ਪਨ੍ਨਸ੍ਸ ਹਿ ਲਾਭਸ੍ਸ ਉਪ੍ਪਾਦਨਂ ਨਾਮ ਨ ਭਾਰੋ, ਉਪ੍ਪਨ੍ਨਸ੍ਸ ਪਨ ਅਨੁਰਕ੍ਖਣਮੇਵ ਭਾਰੋ. ਏਕਚ੍ਚੋ ਹਿ ਯਸਂ ਉਪ੍ਪਾਦੇਤ੍ਵਾਪਿ ਯਸੇ ਪਮਤ੍ਤੋ ਪਮਾਦਂ ਉਪ੍ਪਾਦੇਤ੍ਵਾ ਪਾਣਾਤਿਪਾਤਾਦੀਨਿ ਕਰੋਤਿ, ਮਹਾਚੋਰੋ ਹੁਤ੍ਵਾ ਰਟ੍ਠਂ ਵਿਲੁਮ੍ਪਮਾਨੋ ਚਰਤਿ. ਅਥ ਨਂ ਰਾਜਾਨੋ ਗਾਹਾਪੇਤ੍ਵਾ ਮਹਾਵਿਨਾਸਂ ਪਾਪੇਨ੍ਤਿ. ਅਥ ਵਾ ਉਪ੍ਪਨ੍ਨਰੂਪਾਦੀਸੁ ਕਾਮਗੁਣੇਸੁ ਪਮਤ੍ਤੋ ਅਯੋਨਿਸੋ ਧਨਂ ਨਾਸੇਨ੍ਤੋ ਸਬ੍ਬਸਾਪਤੇਯ੍ਯੇ ਖੀਣੇ ਕਪਣੋ ਹੁਤ੍ਵਾ ਚੀਰਕਵਸਨੋ ਕਪਾਲਮਾਦਾਯ ਚਰਤਿ. ਪਬ੍ਬਜਿਤੋ ਵਾ ਪਨ ਗਨ੍ਥਧੁਰਾਦਿਵਸੇਨ ਲਾਭਸਕ੍ਕਾਰਂ ਨਿਬ੍ਬਤ੍ਤੇਤ੍ਵਾ ਪਮਤ੍ਤੋ ਹੀਨਾਯਾਵਤ੍ਤਤਿ. ਅਪਰੋ ਪਠਮਝਾਨਾਦੀਨਿ ਨਿਬ੍ਬਤ੍ਤੇਤ੍ਵਾਪਿ ਮੁਟ੍ਠਸ੍ਸਤਿਤਾਯ ਤਥਾਰੂਪੇ ਆਰਮ੍ਮਣੇ ਬਜ੍ਝਿਤ੍ਵਾ ਝਾਨਾ ਪਰਿਹਾਯਤਿ. ਏਵਂ ਉਪ੍ਪਨ੍ਨਸ੍ਸ ਯਸਸ੍ਸ ਵਾ ਝਾਨਾਦਿਲਾਭਸ੍ਸ ਵਾ ਰਕ੍ਖਣਮੇਵ ਦੁਕ੍ਕਰਂ. ਤਦਤ੍ਥਦੀਪਨਤ੍ਥਂ ਪਨ ਦੇਵਦਤ੍ਤਸ੍ਸ ਵਤ੍ਥੁ ਚ, ਮੁਦੁਲਕ੍ਖਣ- (ਜਾ. ੧.੧.੬੬) ਲੋਮਸਕਸ੍ਸਪ- (ਜਾ. ੧.੯.੬੦ ਆਦਯੋ) ਹਰਿਤਚਜਾਤਕ- (ਜਾ. ੧.੯.੪੦ ਆਦਯੋ) ਸਙ੍ਕਪ੍ਪਜਾਤਕਾਦੀਨਿ (ਜਾ. ੧.੩.੧ ਆਦਯੋ) ਚ ਕਥੇਤਬ੍ਬਾਨਿ. ਏਕੋ ਪਨ ਲਾਭਸਕ੍ਕਾਰਂ ਉਪ੍ਪਾਦੇਤ੍ਵਾ ਅਪ੍ਪਮਾਦੇ ਠਤ੍ਵਾ ਕਲ੍ਯਾਣਕਮ੍ਮਂ ਕਰੋਤਿ, ਤਸ੍ਸ ਸੋ ਯਸੋ ਸੁਕ੍ਕਪਕ੍ਖੇ ਚਨ੍ਦੋ ਵਿਯ ਵਡ੍ਢਤਿ, ਤਸ੍ਮਾ ਤ੍ਵਂ, ਮਹਾਰਾਜ, ਅਪ੍ਪਮਤ੍ਤੋ ਪਯੋਗਸਮ੍ਪਤ੍ਤਿਯਾ ਠਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਤਵ ਉਪ੍ਪਨ੍ਨਂ ਯਸਂ ਅਨੁਰਕ੍ਖਾਹੀਤਿ.

ਜਾਨਾਹੀਤਿ ਭਣ੍ਡਾਗਾਰਿਕਕਮ੍ਮਾਦੀਨਂ ਕਰਣਤ੍ਥਂ ਉਪਧਾਰੇਹਿ. ਅਨਕ੍ਖਾਕਿਤਵੇਤਿ ਅਨਕ੍ਖੇ ਅਕਿਤਵੇ ਅਜੁਤਕਰੇ ਚੇਵ ਅਕੇਰਾਟਿਕੇ ਚ. ਅਸੋਣ੍ਡੇਤਿ ਪੂਵਸੁਰਾਗਨ੍ਧਮਾਲਾਸੋਣ੍ਡਭਾਵਰਹਿਤੇ. ਅਵਿਨਾਸਕੇਤਿ ਤਵ ਸਨ੍ਤਕਾਨਂ ਧਨਧਞ੍ਞਾਦੀਨਂ ਅਵਿਨਾਸਕੇ. ਯੋਤਿ ਯੋ ਅਮਚ੍ਚੋ. ਯਞ੍ਚੇਵਾਤਿ ਯਞ੍ਚ ਤੇ ਘਰੇ ਧਨਂ ਸਿਯਾ, ਤਂ ਰਕ੍ਖੇਯ੍ਯ. ਸੂਤੋਵਾਤਿ ਰਥਸਾਰਥਿ ਵਿਯ. ਯਥਾ ਸਾਰਥਿ ਵਿਸਮਮਗ੍ਗਨਿਵਾਰਣਤ੍ਥਂ ਅਸ੍ਸੇ ਸਙ੍ਗਣ੍ਹਨ੍ਤੋ ਰਥਂ ਸਙ੍ਗਣ੍ਹੇਯ੍ਯ, ਏਵਂ ਯੋ ਸਹ ਭੋਗੇਹਿ ਤਂ ਰਕ੍ਖਿਤੁਂ ਸਕ੍ਕੋਤਿ, ਸੋ ਤੇ ਅਮਚ੍ਚੋ ਨਾਮ ਤਾਦਿਸਂ ਸਙ੍ਗਹੇਤ੍ਵਾ ਭਣ੍ਡਾਗਾਰਿਕਾਦਿਕਿਚ੍ਚਾਨਿ ਕਾਰਯੇ.

ਸੁਸਙ੍ਗਹਿਤਨ੍ਤਜਨੋਤਿ, ਤਾਤ, ਯਸ੍ਸ ਹਿ ਰਞ੍ਞੋ ਅਤ੍ਤਨੋ ਅਨ੍ਤੋਜਨੋ ਅਤ੍ਤਨੋ ਵਲਞ੍ਜਨਕਪਰਿਜਨੋ ਚ ਦਾਨਾਦੀਹਿ ਅਸਙ੍ਗਹਿਤੋ ਹੋਤਿ, ਤਸ੍ਸ ਅਨ੍ਤੋਨਿਵੇਸਨੇ ਸੁਵਣ੍ਣਹਿਰਞ੍ਞਾਦੀਨਿ ਤੇਸਂ ਅਸਙ੍ਗਹਿਤਮਨੁਸ੍ਸਾਨਂ ਵਸੇਨ ਨਸ੍ਸਨ੍ਤਿ, ਅਨ੍ਤੋਜਨਾ ਬਹਿ ਗਚ੍ਛਨ੍ਤਿ, ਤਸ੍ਮਾ ਤ੍ਵਂ ਸੁਟ੍ਠੁਸਙ੍ਗਹਿਤਅਨ੍ਤੋਜਨੋ ਹੁਤ੍ਵਾ ‘‘ਏਤ੍ਤਕਂ ਨਾਮ ਮੇ ਵਿਤ੍ਤ’’ਨ੍ਤਿ ਸਯਂ ਅਤ੍ਤਨੋ ਧਨਂ ਅਵੇਕ੍ਖਿਤ੍ਵਾ ‘‘ਅਸੁਕਟ੍ਠਾਨੇ ਨਾਮ ਨਿਧਿਂ ਨਿਧੇਮ, ਅਸੁਕਸ੍ਸ ਇਣਂ ਦੇਮਾ’’ਤਿ ਇਦਂ ਉਭਯਮ੍ਪਿ ਨ ਕਰੇ ਪਰਪਤ੍ਤਿਯਾ, ਪਰਪਤ੍ਤਿਯਾਪਿ ਤ੍ਵਂ ਮਾ ਕਰਿ, ਸਬ੍ਬਂ ਅਤ੍ਤਪਚ੍ਚਕ੍ਖਮੇਵ ਕਰੇਯ੍ਯਾਸੀਤਿ ਵਦਤਿ.

ਆਯਂ ਵਯਨ੍ਤਿ ਤਤੋ ਉਪ੍ਪਜ੍ਜਨਕਂ ਆਯਞ੍ਚ ਤੇਸਂ ਤੇਸਂ ਦਾਤਬ੍ਬਂ ਵਯਞ੍ਚ ਸਯਮੇਵ ਜਾਨੇਯ੍ਯਾਸੀਤਿ. ਕਤਾਕਤਨ੍ਤਿ ਸਙ੍ਗਾਮੇ ਵਾ ਨਵਕਮ੍ਮੇ ਵਾ ਅਞ੍ਞੇਸੁ ਵਾ ਕਿਚ੍ਚੇਸੁ ‘‘ਇਮਿਨਾ ਇਦਂ ਨਾਮ ਮਯ੍ਹਂ ਕਤਂ, ਇਮਿਨਾ ਨ ਕਤ’’ਨ੍ਤਿ ਏਤਮ੍ਪਿ ਸਯਮੇਵ ਜਾਨੇਯ੍ਯਾਸਿ, ਮਾ ਪਰਪਤ੍ਤਿਯੋ ਹੋਹਿ. ਨਿਗ੍ਗਣ੍ਹੇਤਿ, ਤਾਤ, ਰਾਜਾ ਨਾਮ ਸਨ੍ਧਿਚ੍ਛੇਦਾਦਿਕਾਰਕਂ ਨਿਗ੍ਗਹਾਰਹਂ ਆਨੇਤ੍ਵਾ ਦਸ੍ਸਿਤਂ ਉਪਪਰਿਕ੍ਖਿਤ੍ਵਾ ਸੋਧੇਤ੍ਵਾ ਪੋਰਾਣਕਰਾਜੂਹਿ ਠਪਿਤਦਣ੍ਡਂ ਓਲੋਕੇਤ੍ਵਾ ਦੋਸਾਨੁਰੂਪਂ ਨਿਗ੍ਗਣ੍ਹੇਯ੍ਯ. ਪਗ੍ਗਣ੍ਹੇਤਿ ਯੋ ਪਨ ਪਗ੍ਗਹਾਰਹੋ ਹੋਤਿ, ਅਭਿਨ੍ਨਸ੍ਸ ਵਾ ਪਰਬਲਸ੍ਸ ਭੇਦੇਤਾ, ਭਿਨ੍ਨਸ੍ਸ ਵਾ ਸਕਬਲਸ੍ਸ ਆਰਾਧਕੋ, ਅਲਦ੍ਧਸ੍ਸ ਵਾ ਰਜ੍ਜਸ੍ਸ ਆਹਰਕੋ, ਲਦ੍ਧਸ੍ਸ ਵਾ ਥਾਵਰਕਾਰਕੋ, ਯੇਨ ਵਾ ਪਨ ਜੀਵਿਤਂ ਦਿਨ੍ਨਂ ਹੋਤਿ, ਏਵਰੂਪਂ ਪਗ੍ਗਹਾਰਹਂ ਪਗ੍ਗਹੇਤ੍ਵਾ ਮਹਨ੍ਤਂ ਸਕ੍ਕਾਰਸਮ੍ਮਾਨਂ ਕਰੇਯ੍ਯ. ਏਵਂ ਹਿਸ੍ਸ ਕਿਚ੍ਚੇਸੁ ਅਞ੍ਞੇਪਿ ਉਰਂ ਦਤ੍ਵਾ ਕਤ੍ਤਬ੍ਬਂ ਕਰਿਸ੍ਸਨ੍ਤਿ.

ਜਾਨਪਦਨ੍ਤਿ ਜਨਪਦਵਾਸੀਨਂ ਅਤ੍ਥਂ ਸਯਂ ਅਤ੍ਤਪਚ੍ਚਕ੍ਖੇਨੇਵ ਅਨੁਸਾਸ. ਅਧਮ੍ਮਿਕਾ ਯੁਤ੍ਤਾਤਿ ਅਧਮ੍ਮਿਕਾ ਤਤ੍ਥ ਤਤ੍ਥ ਨਿਯੁਤ੍ਤਾ ਆਯੁਤ੍ਤਕਾ ਲਞ੍ਜਂ ਗਹੇਤ੍ਵਾ ਵਿਨਿਚ੍ਛਯਂ ਭਿਨ੍ਦਨ੍ਤਾ ਤਵ ਧਨਞ੍ਚ ਰਟ੍ਠਞ੍ਚ ਮਾ ਨਾਸਯੁਂ. ਇਮਿਨਾ ਕਾਰਣੇਨ ਅਪ੍ਪਮਤ੍ਤੋ ਹੁਤ੍ਵਾ ਸਯਮੇਵ ਅਨੁਸਾਸ. ਵੇਗੇਨਾਤਿ ਸਹਸਾ ਅਤੁਲੇਤ੍ਵਾ ਅਤੀਰੇਤ੍ਵਾ. ਵੇਗਸਾਤਿ ਅਤੁਲੇਤ੍ਵਾ ਅਤੀਰੇਤ੍ਵਾ ਛਨ੍ਦਾਦਿਵਸੇਨ ਸਹਸਾ ਕਤਂ ਕਮ੍ਮਞ੍ਹਿ ਨ ਸਾਧੁ ਨ ਸੁਨ੍ਦਰਂ. ਕਿਂਕਾਰਣਾ? ਤਾਦਿਸਞ੍ਹਿ ਕਤ੍ਵਾ ਮਨ੍ਦੋ ਪਚ੍ਛਾ ਵਿਪ੍ਪਟਿਸਾਰਵਸੇਨ ਇਧ ਲੋਕੇ ਅਪਾਯਦੁਕ੍ਖਂ ਅਨੁਭਵਨ੍ਤੋ ਪਰਲੋਕੇ ਚ ਅਨੁਤਪ੍ਪਤਿ. ਅਯਂ ਪਨੇਤ੍ਥ ਅਤ੍ਥੋ ‘‘ਇਸੀਨਮਨ੍ਤਰਂ ਕਤ੍ਵਾ, ਭਰੁਰਾਜਾਤਿ ਮੇ ਸੁਤ’’ਨ੍ਤਿ ਭਰੁਜਾਤਕੇਨ (ਜਾ. ੧.੨.੧੨੫-੧੨੬) ਦੀਪੇਤਬ੍ਬੋ.

ਮਾ ਤੇ ਅਧਿਸਰੇ ਮੁਞ੍ਚ, ਸੁਬਾਲ਼੍ਹਮਧਿਕੋਪਿਤਨ੍ਤਿ, ਤਾਤ, ਤਵ ਹਦਯਂ ਕੁਸਲਂ ਅਧਿਸਰਿਤ੍ਵਾ ਅਤਿਕ੍ਕਮਿਤ੍ਵਾ ਪਵਤ੍ਤੇ ਪਰੇਸਂ ਅਕੁਸਲਕਮ੍ਮੇ ਸੁਟ੍ਠੁ ਬਾਲ਼੍ਹਂ ਅਧਿਕੋਪਿਤਂ ਕੁਜ੍ਝਾਪਿਤਂ ਹੁਤ੍ਵਾ ਮਾ ਮੁਞ੍ਚ, ਮਾ ਪਤਿਟ੍ਠਾਯਤੂਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਤਾਤ, ਯਦਾ ਤੇ ਵਿਨਿਚ੍ਛਯੇ ਠਿਤਸ੍ਸ ਇਮਿਨਾ ਪੁਰਿਸੋ ਵਾ ਹਤੋ ਸਨ੍ਧਿ ਵਾ ਛਿਨ੍ਨੋਤਿ ਚੋਰਂ ਦਸ੍ਸੇਨ੍ਤਿ, ਤਦਾ ਤੇ ਪਰੇਸਂ ਵਚਨੇਹਿ ਸੁਟ੍ਠੁ ਕੋਪਿਤਮ੍ਪਿ ਹਦਯਂ ਕੋਧਵਸੇਨ ਮਾ ਮੁਞ੍ਚ, ਅਪਰਿਗ੍ਗਹੇਤ੍ਵਾ ਮਾ ਦਣ੍ਡਂ ਪਣੇਹਿ. ਕਿਂਕਾਰਣਾ? ਅਚੋਰਮ੍ਪਿ ਹਿ ‘‘ਚੋਰੋ’’ਤਿ ਗਹੇਤ੍ਵਾ ਆਨੇਨ੍ਤਿ, ਤਸ੍ਮਾ ਅਕੁਜ੍ਝਿਤ੍ਵਾ ਉਭਿਨ੍ਨਂ ਅਤ੍ਤਪਚ੍ਚਤ੍ਥਿਕਾਨਂ ਕਥਂ ਸੁਤ੍ਵਾ ਸੁਟ੍ਠੁ ਸੋਧੇਤ੍ਵਾ ਅਤ੍ਤਪਚ੍ਚਕ੍ਖੇਨ ਤਸ੍ਸ ਚੋਰਭਾਵਂ ਞਤ੍ਵਾ ਪਵੇਣਿਯਾ ਠਪਿਤਦਣ੍ਡਵਸੇਨ ਕਤ੍ਤਬ੍ਬਂ ਕਰੋਹਿ. ਰਞ੍ਞਾ ਹਿ ਉਪ੍ਪਨ੍ਨੇਪਿ ਕੋਧੇ ਹਦਯਂ ਸੀਤਲਂ ਅਕਤ੍ਵਾ ਕਮ੍ਮਂ ਨ ਕਾਤਬ੍ਬਂ. ਯਦਾ ਪਨਸ੍ਸ ਹਦਯਂ ਨਿਬ੍ਬੁਤਂ ਹੋਤਿ ਮੁਦੁਕਂ, ਤਦਾ ਵਿਨਿਚ੍ਛਯਕਮ੍ਮਂ ਕਾਤਬ੍ਬਂ. ਫਰੁਸੇ ਹਿ ਚਿਤ੍ਤੇ ਪਕ੍ਕੁਥਿਤੇ ਉਦਕੇ ਮੁਖਨਿਮਿਤ੍ਤਂ ਵਿਯ ਕਾਰਣਂ ਨ ਪਞ੍ਞਾਯਤਿ. ਕੋਧਸਾ ਹੀਤਿ, ਤਾਤ, ਕੋਧੇਨ ਹਿ ਬਹੂਨਿ ਫੀਤਾਨਿ ਰਾਜਕੁਲਾਨਿ ਅਕੁਲਭਾਵਂ ਗਤਾਨਿ ਮਹਾਵਿਨਾਸਮੇਵ ਪਤ੍ਤਾਨੀਤਿ. ਇਮਸ੍ਸ ਪਨਤ੍ਥਸ੍ਸ ਦੀਪਨਤ੍ਥਂ ਖਨ੍ਤਿਵਾਦਿਜਾਤਕ- (ਜਾ. ੧.੪.੪੯ ਆਦਯੋ) ਨਾਲ਼ਿਕੇਰਰਾਜਵਤ੍ਥੁਸਹਸ੍ਸਬਾਹੁਅਜ੍ਜੁਨਵਤ੍ਥੁਆਦੀਨਿ ਕਥੇਤਬ੍ਬਾਨਿ.

ਮਾ, ਤਾਤ, ਇਸ੍ਸਰੋਮ੍ਹੀਤਿ, ਅਨਤ੍ਥਾਯ ਪਤਾਰਯੀਤਿ, ਤਾਤ, ‘‘ਅਹਂ ਪਥਵਿਸ੍ਸਰੋ’’ਤਿ ਮਾ ਮਹਾਜਨਂ ਕਾਯਦੁਚ੍ਚਰਿਤਾਦਿਅਨਤ੍ਥਾਯ ਪਤਾਰਯਿ ਮਾ ਓਤਾਰਯਿ, ਯਥਾ ਤਂ ਅਨਤ੍ਥਂ ਸਮਾਦਾਯ ਵਤ੍ਤਤਿ, ਮਾ ਏਵਮਕਾਸੀਤਿ ਅਤ੍ਥੋ. ਮਾ ਤੇ ਆਸੀਤਿ, ਤਾਤ, ਤਵ ਵਿਜਿਤੇ ਮਨੁਸ੍ਸਜਾਤਿਕਾਨਂ ਵਾ ਤਿਰਚ੍ਛਾਨਜਾਤਿਕਾਨਂ ਵਾ ਇਤ੍ਥਿਪੁਰਿਸਾਨਂ ਦੁਖੁਦ੍ਰਯੋ ਦੁਕ੍ਖੁਪ੍ਪਤ੍ਤਿ ਮਾ ਆਸਿ. ਯਥਾ ਹਿ ਅਧਮ੍ਮਿਕਰਾਜੂਨਂ ਵਿਜਿਤੇ ਮਨੁਸ੍ਸਾ ਕਾਯਦੁਚ੍ਚਰਿਤਾਦੀਨਿ ਕਤ੍ਵਾ ਨਿਰਯੇ ਉਪ੍ਪਜ੍ਜਨ੍ਤਿ, ਤਵ ਰਟ੍ਠਵਾਸੀਨਂ ਤਂ ਦੁਕ੍ਖਂ ਯਥਾ ਨ ਹੋਤਿ, ਤਥਾ ਕਰੋਹੀਤਿ ਅਤ੍ਥੋ.

ਅਪੇਤਲੋਮਹਂਸਸ੍ਸਾਤਿ ਅਤ੍ਤਾਨੁਵਾਦਾਦਿਭਯੇਹਿ ਨਿਬ੍ਭਯਸ੍ਸ. ਇਮਿਨਾ ਇਮਂ ਦਸ੍ਸੇਤਿ – ਤਾਤ, ਯੋ ਰਾਜਾ ਕਿਸ੍ਮਿਞ੍ਚਿ ਆਸਙ੍ਕਂ ਅਕਤ੍ਵਾ ਅਤ੍ਤਨੋ ਕਾਮਮੇਵ ਅਨੁਸ੍ਸਰਤਿ, ਛਨ੍ਦਵਸੇਨ ਯਂ ਯਂ ਇਚ੍ਛਤਿ, ਤਂ ਤਂ ਕਰੋਤਿ, ਵਿਸ੍ਸਟ੍ਠਯਟ੍ਠਿ ਵਿਯ ਅਨ੍ਧੋ ਨਿਰਙ੍ਕੁਸੋ ਵਿਯ ਚ ਚਣ੍ਡਹਤ੍ਥੀ ਹੋਤਿ, ਤਸ੍ਸ ਸਬ੍ਬੇ ਭੋਗਾ ਵਿਨਸ੍ਸਨ੍ਤਿ, ਤਸ੍ਸ ਤਂ ਭੋਗਬ੍ਯਸਨਂ ਅਘਂ ਦੁਕ੍ਖਨ੍ਤਿ ਵੁਚ੍ਚਤਿ.

ਤਤ੍ਥੇਵ ਤੇ ਵਤ੍ਤਪਦਾਤਿ ਪੁਰਿਮਨਯੇਨੇਵ ਯੋਜੇਤਬ੍ਬਂ. ਦਕ੍ਖਸ੍ਸੁਦਾਨੀਤਿ, ਤਾਤ, ਤ੍ਵਂ ਇਮਂ ਅਨੁਸਾਸਨਿਂ ਸੁਤ੍ਵਾ ਇਦਾਨਿ ਦਕ੍ਖੋ ਅਨਲਸੋ ਪੁਞ੍ਞਾਨਂ ਕਰਣੇਨ ਪੁਞ੍ਞਕਰੋ ਸੁਰਾਦਿਪਰਿਹਰਣੇਨ. ਅਸੋਣ੍ਡੋ ਦਿਟ੍ਠਧਮ੍ਮਿਕਸਮ੍ਪਰਾਯਿਕਸ੍ਸ ਅਤ੍ਥਸ੍ਸ ਅਵਿਨਾਸਨੇਨ ਅਵਿਨਾਸਕੋ ਭਵੇਯ੍ਯਾਸੀਤਿ. ਸੀਲਵਾਸ੍ਸੂਤਿ ਸੀਲਵਾ ਆਚਾਰਸਮ੍ਪਨ੍ਨੋ ਭਵ, ਦਸਸੁ ਰਾਜਧਮ੍ਮੇਸੁ ਪਤਿਟ੍ਠਾਯ ਰਜ੍ਜਂ ਕਾਰੇਹਿ. ਦੁਸ੍ਸੀਲੋ ਵਿਨਿਪਾਤਿਕੋਤਿ ਦੁਸ੍ਸੀਲੋ ਹਿ, ਮਹਾਰਾਜ, ਅਤ੍ਤਾਨਂ ਨਿਰਯੇ ਵਿਨਿਪਾਤੇਨ੍ਤੋ ਵਿਨਿਪਾਤਿਕੋ ਨਾਮ ਹੋਤੀਤਿ.

ਏਵਂ ਕੁਣ੍ਡਲਿਨੀਪਿ ਏਕਾਦਸਹਿ ਗਾਥਾਹਿ ਧਮ੍ਮਂ ਦੇਸੇਸਿ. ਰਾਜਾ ਤੁਟ੍ਠੋ ਅਮਚ੍ਚੇ ਆਮਨ੍ਤੇਤ੍ਵਾ ਪੁਚ੍ਛਿ – ‘‘ਭੋਨ੍ਤੋ! ਅਮਚ੍ਚਾ ਮਮ ਧੀਤਾਯ ਕੁਣ੍ਡਲਿਨਿਯਾ ਏਵਂ ਕਥਯਮਾਨਾਯ ਕੇਨ ਕਤ੍ਤਬ੍ਬਂ ਕਿਚ੍ਚਂ ਕਤ’’ਨ੍ਤਿ. ਭਣ੍ਡਾਗਾਰਿਕੇਨ, ਦੇਵਾਤਿ. ‘‘ਤੇਨ ਹਿਸ੍ਸਾ ਭਣ੍ਡਾਗਾਰਿਕਟ੍ਠਾਨਂ ਦਮ੍ਮੀ’’ਤਿ ਕੁਣ੍ਡਲਿਨਿਂ ਠਾਨਨ੍ਤਰੇ ਠਪੇਸਿ. ਸਾ ਤਤੋ ਪਟ੍ਠਾਯ ਭਣ੍ਡਾਗਾਰਿਕਟ੍ਠਾਨੇ ਠਤ੍ਵਾ ਪਿਤੁ ਕਮ੍ਮਂ ਅਕਾਸੀਤਿ.

ਕੁਣ੍ਡਲਿਨਿਪਞ੍ਹੋ ਨਿਟ੍ਠਿਤੋ.

ਪੁਨ ਰਾਜਾ ਕਤਿਪਾਹਚ੍ਚਯੇਨ ਪੁਰਿਮਨਯੇਨੇਵ ਜਮ੍ਬੁਕਪਣ੍ਡਿਤਸ੍ਸ ਸਨ੍ਤਿਕਂ ਦੂਤਂ ਪੇਸੇਤ੍ਵਾ ਸਤ੍ਤਮੇ ਦਿਵਸੇ ਤਤ੍ਥ ਗਨ੍ਤ੍ਵਾ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਪਚ੍ਚਾਗਤੋ ਤਤ੍ਥੇਵ ਮਣ੍ਡਪਮਜ੍ਝੇ ਨਿਸੀਦਿ. ਅਮਚ੍ਚੋ ਜਮ੍ਬੁਕਪਣ੍ਡਿਤਂ ਕਞ੍ਚਨਭਦ੍ਦਪੀਠੇ ਨਿਸੀਦਾਪੇਤ੍ਵਾ ਪੀਠਂ ਸੀਸੇਨਾਦਾਯ ਆਗਚ੍ਛਿ. ਪਣ੍ਡਿਤੋ ਪਿਤੁ ਅਙ੍ਕੇ ਨਿਸੀਦਿਤ੍ਵਾ ਕੀਲ਼ਿਤ੍ਵਾ ਗਨ੍ਤ੍ਵਾ ਕਞ੍ਚਨਪੀਠੇਯੇਵ ਨਿਸੀਦਿ. ਅਥ ਨਂ ਰਾਜਾ ਪਞ੍ਹਂ ਪੁਚ੍ਛਨ੍ਤੋ ਗਾਥਮਾਹ –

੨੬.

‘‘ਅਪੁਚ੍ਛਿਮ੍ਹ ਕੋਸਿਯਗੋਤ੍ਤਂ, ਕੁਣ੍ਡਲਿਨਿਂ ਤਥੇਵ ਚ;

ਤ੍ਵਂ ਦਾਨਿ ਵਦੇਹਿ ਜਮ੍ਬੁਕ, ਬਲਾਨਂ ਬਲਮੁਤ੍ਤਮ’’ਨ੍ਤਿ.

ਤਸ੍ਸਤ੍ਥੋ – ਤਾਤ, ਜਮ੍ਬੁਕ, ਅਹਂ ਤਵ ਭਾਤਰਂ ਕੋਸਿਯਗੋਤ੍ਤਂ ਵੇਸ੍ਸਨ੍ਤਰਂ ਭਗਿਨਿਞ੍ਚ ਤੇ ਕੁਣ੍ਡਲਿਨਿਂ ਰਾਜਧਮ੍ਮਂ ਅਪੁਚ੍ਛਿਂ, ਤੇ ਅਤ੍ਤਨੋ ਬਲੇਨ ਕਥੇਸੁਂ, ਯਥਾ ਪਨ ਤੇ ਪੁਚ੍ਛਿਂ, ਤਥੇਵ ਇਦਾਨਿ, ਪੁਤ੍ਤ ਜਮ੍ਬੁਕ, ਤਂ ਪੁਚ੍ਛਾਮਿ, ਤ੍ਵਂ ਮੇ ਰਾਜਧਮ੍ਮਞ੍ਚ ਬਲਾਨਂ ਉਤ੍ਤਮਂ ਬਲਞ੍ਚ ਕਥੇਹੀਤਿ.

ਏਵਂ ਰਾਜਾ ਮਹਾਸਤ੍ਤਂ ਪਞ੍ਹਂ ਪੁਚ੍ਛਨ੍ਤੋ ਅਞ੍ਞੇਸਂ ਪੁਚ੍ਛਿਤਨਿਯਾਮੇਨ ਅਪੁਚ੍ਛਿਤ੍ਵਾ ਵਿਸੇਸੇਤ੍ਵਾ ਪੁਚ੍ਛਿ. ਅਥਸ੍ਸ ਪਣ੍ਡਿਤੋ ‘‘ਤੇਨ ਹਿ, ਮਹਾਰਾਜ, ਓਹਿਤਸੋਤੋ ਸੁਣਾਹਿ, ਸਬ੍ਬਂ ਤੇ ਕਥੇਸ੍ਸਾਮੀ’’ਤਿ ਪਸਾਰਿਤਹਤ੍ਥੇ ਸਹਸ੍ਸਤ੍ਥਵਿਕਂ ਠਪੇਨ੍ਤੋ ਵਿਯ ਧਮ੍ਮਦੇਸਨਂ ਆਰਭਿ –

੨੭.

‘‘ਬਲਂ ਪਞ੍ਚਵਿਧਂ ਲੋਕੇ, ਪੁਰਿਸਸ੍ਮਿਂ ਮਹਗ੍ਗਤੇ;

ਤਤ੍ਥ ਬਾਹੁਬਲਂ ਨਾਮ, ਚਰਿਮਂ ਵੁਚ੍ਚਤੇ ਬਲਂ.

੨੮.

‘‘ਭੋਗਬਲਞ੍ਚ ਦੀਘਾਵੁ, ਦੁਤਿਯਂ ਵੁਚ੍ਚਤੇ ਬਲਂ;

ਅਮਚ੍ਚਬਲਞ੍ਚ ਦੀਘਾਵੁ, ਤਤਿਯਂ ਵੁਚ੍ਚਤੇ ਬਲਂ.

੨੯.

‘‘ਅਭਿਜਚ੍ਚਬਲਞ੍ਚੇਵ, ਤਂ ਚਤੁਤ੍ਥਂ ਅਸਂਸਯਂ;

ਯਾਨਿ ਚੇਤਾਨਿ ਸਬ੍ਬਾਨਿ, ਅਧਿਗਣ੍ਹਾਤਿ ਪਣ੍ਡਿਤੋ.

੩੦.

‘‘ਤਂ ਬਲਾਨਂ ਬਲਂ ਸੇਟ੍ਠਂ, ਅਗ੍ਗਂ ਪਞ੍ਞਾਬਲਂ ਬਲਂ;

ਪਞ੍ਞਾਬਲੇਨੁਪਤ੍ਥਦ੍ਧੋ, ਅਤ੍ਥਂ ਵਿਨ੍ਦਤਿ ਪਣ੍ਡਿਤੋ.

੩੧.

‘‘ਅਪਿ ਚੇ ਲਭਤਿ ਮਨ੍ਦੋ, ਫੀਤਂ ਧਰਣਿਮੁਤ੍ਤਮਂ;

ਅਕਾਮਸ੍ਸ ਪਸਯ੍ਹਂ ਵਾ, ਅਞ੍ਞੋ ਤਂ ਪਟਿਪਜ੍ਜਤਿ.

੩੨.

‘‘ਅਭਿਜਾਤੋਪਿ ਚੇ ਹੋਤਿ, ਰਜ੍ਜਂ ਲਦ੍ਧਾਨ ਖਤ੍ਤਿਯੋ;

ਦੁਪ੍ਪਞ੍ਞੋ ਹਿ ਕਾਸਿਪਤਿ, ਸਬ੍ਬੇਨਪਿ ਨ ਜੀਵਤਿ.

੩੩.

‘‘ਪਞ੍ਞਾਵ ਸੁਤਂ ਵਿਨਿਚ੍ਛਿਨੀ, ਪਞ੍ਞਾ ਕਿਤ੍ਤਿਸਿਲੋਕਵਡ੍ਢਨੀ;

ਪਞ੍ਞਾਸਹਿਤੋ ਨਰੋ ਇਧ, ਅਪਿ ਦੁਕ੍ਖੇ ਸੁਖਾਨਿ ਵਿਨ੍ਦਤਿ.

੩੪.

‘‘ਪਞ੍ਞਞ੍ਚ ਖੋ ਅਸੁਸ੍ਸੂਸਂ, ਨ ਕੋਚਿ ਅਧਿਗਚ੍ਛਤਿ;

ਬਹੁਸ੍ਸੁਤਂ ਅਨਾਗਮ੍ਮ, ਧਮ੍ਮਟ੍ਠਂ ਅਵਿਨਿਬ੍ਭੁਜਂ.

੩੫.

‘‘ਯੋ ਚ ਧਮ੍ਮਵਿਭਙ੍ਗਞ੍ਞੂ, ਕਾਲੁਟ੍ਠਾਯੀ ਅਤਨ੍ਦਿਤੋ;

ਅਨੁਟ੍ਠਹਤਿ ਕਾਲੇਨ, ਕਮ੍ਮਫਲਂ ਤਸ੍ਸਿਜ੍ਝਤਿ.

੩੬.

‘‘ਅਨਾਯਤਨਸੀਲਸ੍ਸ, ਅਨਾਯਤਨਸੇਵਿਨੋ;

ਨ ਨਿਬ੍ਬਿਨ੍ਦਿਯਕਾਰਿਸ੍ਸ, ਸਮ੍ਮਦਤ੍ਥੋ ਵਿਪਚ੍ਚਤਿ.

੩੭.

‘‘ਅਜ੍ਝਤ੍ਤਞ੍ਚ ਪਯੁਤ੍ਤਸ੍ਸ, ਤਥਾਯਤਨਸੇਵਿਨੋ;

ਅਨਿਬ੍ਬਿਨ੍ਦਿਯਕਾਰਿਸ੍ਸ, ਸਮ੍ਮਦਤ੍ਥੋ ਵਿਪਚ੍ਚਤਿ.

੩੮.

‘‘ਯੋਗਪ੍ਪਯੋਗਸਙ੍ਖਾਤਂ, ਸਮ੍ਭਤਸ੍ਸਾਨੁਰਕ੍ਖਣਂ;

ਤਾਨਿ ਤ੍ਵਂ ਤਾਤ ਸੇਵਸ੍ਸੁ, ਮਾ ਅਕਮ੍ਮਾਯ ਰਨ੍ਧਯਿ;

ਅਕਮ੍ਮੁਨਾ ਹਿ ਦੁਮ੍ਮੇਧੋ, ਨਲ਼ਾਗਾਰਂਵ ਸੀਦਤੀ’’ਤਿ.

ਤਤ੍ਥ ਮਹਗ੍ਗਤੇਤਿ, ਮਹਾਰਾਜ, ਇਮਸ੍ਮਿਂ ਸਤ੍ਤਲੋਕੇ ਮਹਜ੍ਝਾਸਯੇ ਪੁਰਿਸੇ ਪਞ੍ਚਵਿਧਂ ਬਲਂ ਹੋਤਿ. ਬਾਹੁਬਲਨ੍ਤਿ ਕਾਯਬਲਂ. ਚਰਿਮਨ੍ਤਿ ਤਂ ਅਤਿਮਹਨ੍ਤਮ੍ਪਿ ਸਮਾਨਂ ਲਾਮਕਮੇਵ. ਕਿਂਕਾਰਣਾ? ਅਨ੍ਧਬਾਲਭਾਵੇਨ. ਸਚੇ ਹਿ ਕਾਯਬਲਂ ਮਹਨ੍ਤਂ ਨਾਮ ਭਵੇਯ੍ਯ, ਵਾਰਣਬਲਤੋ ਲਟੁਕਿਕਾਯ ਬਲਂ ਖੁਦ੍ਦਕਂ ਭਵੇਯ੍ਯ, ਵਾਰਣਬਲਂ ਪਨ ਅਨ੍ਧਬਾਲਭਾਵੇਨ ਮਰਣਸ੍ਸ ਪਚ੍ਚਯਂ ਜਾਤਂ, ਲਟੁਕਿਕਾ ਅਤ੍ਤਨੋ ਞਾਣਕੁਸਲਤਾਯ ਵਾਰਣਂ ਜੀਵਿਤਕ੍ਖਯਂ ਪਾਪੇਸਿ. ਇਮਸ੍ਮਿਂ ਪਨਤ੍ਥੇ ‘‘ਨ ਹੇਵ ਸਬ੍ਬਤ੍ਥ ਬਲੇਨ ਕਿਚ੍ਚਂ, ਬਲਞ੍ਹਿ ਬਾਲਸ੍ਸ ਵਧਾਯ ਹੋਤੀ’’ਤਿ ਸੁਤ੍ਤਂ (ਜਾ. ੧.੫.੪੨) ਆਹਰਿਤਬ੍ਬਂ.

ਭੋਗਬਲਨ੍ਤਿ ਉਪਤ੍ਥਮ੍ਭਨਵਸੇਨ ਸਬ੍ਬਂ ਹਿਰਞ੍ਞਸੁਵਣ੍ਣਾਦਿ ਉਪਭੋਗਜਾਤਂ ਭੋਗਬਲਂ ਨਾਮ, ਤਂ ਕਾਯਬਲਤੋ ਮਹਨ੍ਤਤਰਂ. ਅਮਚ੍ਚਬਲਨ੍ਤਿ ਅਭੇਜ੍ਜਮਨ੍ਤਸ੍ਸ ਸੂਰਸ੍ਸ ਸੁਹਦਯਸ੍ਸ ਅਮਚ੍ਚਮਣ੍ਡਲਸ੍ਸ ਅਤ੍ਥਿਤਾ, ਤਂ ਬਲਂ ਸਙ੍ਗਾਮਸੂਰਤਾਯ ਪੁਰਿਮੇਹਿ ਬਲੇਹਿ ਮਹਨ੍ਤਤਰਂ. ਅਭਿਜਚ੍ਚਬਲਨ੍ਤਿ ਤੀਣਿ ਕੁਲਾਨਿ ਅਤਿਕ੍ਕਮਿਤ੍ਵਾ ਖਤ੍ਤਿਯਕੁਲਵਸੇਨ ਜਾਤਿਸਮ੍ਪਤ੍ਤਿ, ਤਂ ਇਤਰੇਹਿ ਬਲੇਹਿ ਮਹਨ੍ਤਤਰਂ. ਜਾਤਿਸਮ੍ਪਨ੍ਨਾ ਏਵ ਹਿ ਸੁਜ੍ਝਨ੍ਤਿ, ਨ ਇਤਰੇਤਿ. ਯਾਨਿ ਚੇਤਾਨੀਤਿ ਯਾਨਿ ਚ ਏਤਾਨਿ ਚਤ੍ਤਾਰਿਪਿ ਬਲਾਨਿ ਪਣ੍ਡਿਤੋ ਪਞ੍ਞਾਨੁਭਾਵੇਨ ਅਧਿਗਣ੍ਹਾਤਿ ਅਭਿਭਵਤਿ, ਤਂ ਸਬ੍ਬਬਲਾਨਂ ਪਞ੍ਞਾਬਲਂ ਸੇਟ੍ਠਨ੍ਤਿ ਚ ਅਗ੍ਗਨ੍ਤਿ ਚ ਵੁਚ੍ਚਤਿ. ਕਿਂਕਾਰਣਾ? ਤੇਨ ਹਿ ਬਲੇਨ ਉਪਤ੍ਥਦ੍ਧੋ ਪਣ੍ਡਿਤੋ ਅਤ੍ਥਂ ਵਿਨ੍ਦਤਿ, ਵੁਡ੍ਢਿਂ ਪਾਪੁਣਾਤਿ. ਤਦਤ੍ਥਜੋਤਨਤ੍ਥਂ ‘‘ਪੁਣ੍ਣਂ ਨਦਿਂ ਯੇਨ ਚ ਪੇਯ੍ਯਮਾਹੂ’’ਤਿ ਪੁਣ੍ਣਨਦੀਜਾਤਕਞ੍ਚ (ਜਾ. ੧.੨.੧੨੭ ਆਦਯੋ) ਸਿਰੀਕਾਲ਼ਕਣ੍ਣਿਪਞ੍ਹਂ ਪਞ੍ਚਪਣ੍ਡਿਤਪਞ੍ਹਞ੍ਚ ਸਤ੍ਤੁਭਸ੍ਤਜਾਤਕ- (ਜਾ. ੧.੭.੪੬ ਆਦਯੋ) ਸਮ੍ਭਵਜਾਤਕ- (ਜਾ. ੧.੧੬.੧੩੮ ਆਦਯੋ) ਸਰਭਙ੍ਗਜਾਤਕਾਦੀਨਿ (ਜਾ. ੨.੧੭.੫੦ ਆਦਯੋ) ਚ ਕਥੇਤਬ੍ਬਾਨਿ.

ਮਨ੍ਦੋਤਿ ਮਨ੍ਦਪਞ੍ਞੋ ਬਾਲੋ. ਫੀਤਨ੍ਤਿ, ਤਾਤ, ਮਨ੍ਦਪਞ੍ਞੋ ਪੁਗ੍ਗਲੋ ਸਤ੍ਤਰਤਨਪੁਣ੍ਣਂ ਚੇਪਿ ਉਤ੍ਤਮਂ ਧਰਣਿਂ ਲਭਤਿ, ਤਸ੍ਸ ਅਨਿਚ੍ਛਮਾਨਸ੍ਸੇਵ ਪਸਯ੍ਹਕਾਰਂ ਵਾ ਪਨ ਕਤ੍ਵਾ ਅਞ੍ਞੋ ਪਞ੍ਞਾਸਮ੍ਪਨ੍ਨੋ ਤਂ ਪਟਿਪਜ੍ਜਤਿ. ਮਨ੍ਦੋ ਹਿ ਲਦ੍ਧਂ ਯਸਂ ਰਕ੍ਖਿਤੁਂ ਕੁਲਸਨ੍ਤਕਂ ਵਾ ਪਨ ਪਵੇਣਿਆਗਤਮ੍ਪਿ ਰਜ੍ਜਂ ਅਧਿਗਨ੍ਤੁਂ ਨ ਸਕ੍ਕੋਤਿ. ਤਦਤ੍ਥਜੋਤਨਤ੍ਥਂ ‘‘ਅਦ੍ਧਾ ਪਾਦਞ੍ਜਲੀ ਸਬ੍ਬੇ, ਪਞ੍ਞਾਯ ਅਤਿਰੋਚਤੀ’’ਤਿ ਪਾਦਞ੍ਜਲੀਜਾਤਕਂ (ਜਾ. ੧.੨.੧੯੪-੧੯੫) ਕਥੇਤਬ੍ਬਂ. ਲਦ੍ਧਾਨਾਤਿ ਜਾਤਿਸਮ੍ਪਤ੍ਤਿਂ ਨਿਸ੍ਸਾਯ ਕੁਲਸਨ੍ਤਕਂ ਰਜ੍ਜਂ ਲਭਿਤ੍ਵਾਪਿ. ਸਬ੍ਬੇਨਪੀਤਿ ਤੇਨ ਸਕਲੇਨਪਿ ਰਜ੍ਜੇਨ ਨ ਜੀਵਤਿ, ਅਨੁਪਾਯਕੁਸਲਤਾਯ ਦੁਗ੍ਗਤੋਵ ਹੋਤੀਤਿ.

ਏਵਂ ਮਹਾਸਤ੍ਤੋ ਏਤ੍ਤਕੇਨ ਠਾਨੇਨ ਅਪਣ੍ਡਿਤਸ੍ਸ ਅਗੁਣਂ ਕਥੇਤ੍ਵਾ ਇਦਾਨਿ ਪਞ੍ਞਂ ਪਸਂਸਨ੍ਤੋ ‘‘ਪਞ੍ਞਾ’’ਤਿਆਦਿਮਾਹ. ਤਤ੍ਥ ਸੁਤਨ੍ਤਿ ਸੁਤਪਰਿਯਤ੍ਤਿ. ਤਞ੍ਹਿ ਪਞ੍ਞਾਵ ਵਿਨਿਚ੍ਛਿਨਤਿ. ਕਿਤ੍ਤਿਸਿਲੋਕਵਡ੍ਢਨੀਤਿ ਕਿਤ੍ਤਿਘੋਸਸ੍ਸ ਚ ਲਾਭਸਕ੍ਕਾਰਸ੍ਸ ਚ ਵਡ੍ਢਨੀ. ਦੁਕ੍ਖੇ ਸੁਖਾਨਿ ਵਿਨ੍ਦਤੀਤਿ ਦੁਕ੍ਖੇ ਉਪ੍ਪਨ੍ਨੇਪਿ ਨਿਬ੍ਭਯੋ ਹੁਤ੍ਵਾ ਉਪਾਯਕੁਸਲਤਾਯ ਸੁਖਂ ਪਟਿਲਭਤਿ. ਤਦਤ੍ਥਦੀਪਨਤ੍ਥਂ –

‘‘ਯਸ੍ਸੇਤੇ ਚਤੁਰੋ ਧਮ੍ਮਾ, ਵਾਨਰਿਨ੍ਦ ਯਥਾ ਤਵ’’. (ਜਾ. ੧.੧.੫੭);

ਅਲਮੇਤੇਹਿ ਅਮ੍ਬੇਹਿ, ਜਮ੍ਬੂਹਿ ਪਨਸੇਹਿ ਚਾ’’ਤਿ. (ਜਾ. ੧.੨.੧੧੫) –

ਆਦੀਨਿ ਜਾਤਕਾਨਿ ਕਥੇਤਬ੍ਬਾਨਿ.

ਅਸੁਸ੍ਸੂਸਨ੍ਤਿ ਪਣ੍ਡਿਤਪੁਗ੍ਗਲੇ ਅਪਯਿਰੁਪਾਸਨ੍ਤੋ ਅਸ੍ਸੁਣਨ੍ਤੋ. ਧਮ੍ਮਟ੍ਠਨ੍ਤਿ ਸਭਾਵਕਾਰਣੇ ਠਿਤਂ ਬਹੁਸ੍ਸੁਤਂ ਅਨਾਗਮ੍ਮ ਤਂ ਅਸਦ੍ਦਹਨ੍ਤੋ. ਅਵਿਨਿਬ੍ਭੁਜਨ੍ਤਿ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਅਨੋਗਾਹਨ੍ਤੋ ਅਤੀਰੇਨ੍ਤੋ ਨ ਕੋਚਿ ਪਞ੍ਞਂ ਅਧਿਗਚ੍ਛਤਿ, ਤਾਤਾਤਿ.

ਧਮ੍ਮਵਿਭਙ੍ਗਞ੍ਞੂਤਿ ਦਸਕੁਸਲਕਮ੍ਮਪਥਵਿਭਙ੍ਗਕੁਸਲੋ. ਕਾਲੁਟ੍ਠਾਯੀਤਿ ਵੀਰਿਯਂ ਕਾਤੁਂ ਯੁਤ੍ਤਕਾਲੇ ਵੀਰਿਯਸ੍ਸ ਕਾਰਕੋ. ਅਨੁਟ੍ਠਹਤੀਤਿ ਤਸ੍ਮਿਂ ਤਸ੍ਮਿਂ ਕਾਲੇ ਤਂ ਤਂ ਕਿਚ੍ਚਂ ਕਰੋਤਿ. ਤਸ੍ਸਾਤਿ ਤਸ੍ਸ ਪੁਗ੍ਗਲਸ੍ਸ ਕਮ੍ਮਫਲਂ ਸਮਿਜ੍ਝਤਿ ਨਿਪ੍ਫਜ੍ਜਤਿ. ਅਨਾਯਤਨਸੀਲਸ੍ਸਾਤਿ ਅਨਾਯਤਨਂ ਵੁਚ੍ਚਤਿ ਲਾਭਯਸਸੁਖਾਨਂ ਅਨਾਕਰੋ ਦੁਸ੍ਸੀਲ੍ਯਕਮ੍ਮਂ, ਤਂਸੀਲਸ੍ਸ ਤੇਨ ਦੁਸ੍ਸੀਲ੍ਯਕਮ੍ਮੇਨ ਸਮਨ੍ਨਾਗਤਸ੍ਸ, ਅਨਾਯਤਨਭੂਤਮੇਵ ਦੁਸ੍ਸੀਲਪੁਗ੍ਗਲਂ ਸੇਵਨ੍ਤਸ੍ਸ, ਕੁਸਲਸ੍ਸ ਕਮ੍ਮਸ੍ਸ ਕਰਣਕਾਲੇ ਨਿਬ੍ਬਿਨ੍ਦਿਯਕਾਰਿਸ੍ਸ ਨਿਬ੍ਬਿਨ੍ਦਿਤ੍ਵਾ ਉਕ੍ਕਣ੍ਠਿਤ੍ਵਾ ਕਰੋਨ੍ਤਸ੍ਸ ਏਵਰੂਪਸ੍ਸ, ਤਾਤ, ਪੁਗ੍ਗਲਸ੍ਸ ਕਮ੍ਮਾਨਂ ਅਤ੍ਥੋ ਸਮ੍ਮਾ ਨ ਵਿਪਚ੍ਚਤਿ ਨ ਸਮ੍ਪਜ੍ਜਤਿ, ਤੀਣਿ ਕੁਲਗ੍ਗਾਨਿ ਚ ਛ ਕਾਮਸਗ੍ਗਾਨਿ ਚ ਨ ਉਪਨੇਤੀਤਿ ਅਤ੍ਥੋ. ਅਜ੍ਝਤ੍ਤਞ੍ਚਾਤਿ ਅਤ੍ਤਨੋ ਨਿਯਕਜ੍ਝਤ੍ਤਂ ਅਨਿਚ੍ਚਭਾਵਨਾਦਿਵਸੇਨ ਪਯੁਤ੍ਤਸ੍ਸ. ਤਥਾਯਤਨਸੇਵਿਨੋਤਿ ਤਥੇਵ ਸੀਲਵਨ੍ਤੇ ਪੁਗ੍ਗਲੇ ਸੇਵਮਾਨਸ੍ਸ. ਵਿਪਚ੍ਚਤੀਤਿ ਸਮ੍ਪਜ੍ਜਤਿ ਮਹਨ੍ਤਂ ਯਸਂ ਦੇਤਿ.

ਯੋਗਪ੍ਪਯੋਗਸਙ੍ਖਾਤਨ੍ਤਿ ਯੋਗੇ ਯੁਞ੍ਜਿਤਬ੍ਬਯੁਤ੍ਤਕੇ ਕਾਰਣੇ ਪਯੋਗਕੋਟ੍ਠਾਸਭੂਤਂ ਪਞ੍ਞਂ. ਸਮ੍ਭਤਸ੍ਸਾਤਿ ਰਾਸਿਕਤਸ੍ਸ ਧਨਸ੍ਸ ਅਨੁਰਕ੍ਖਣਂ. ਤਾਨਿ ਤ੍ਵਨ੍ਤਿ ਏਤਾਨਿ ਚ ਦ੍ਵੇ ਪੁਰਿਮਾਨਿ ਚ ਮਯਾ ਵੁਤ੍ਤਕਾਰਣਾਨਿ ਸਬ੍ਬਾਨਿ, ਤਾਤ, ਤ੍ਵਂ ਸੇਵਸ੍ਸੁ, ਮਯਾ ਵੁਤ੍ਤਂ ਓਵਾਦਂ ਹਦਯੇ ਕਤ੍ਵਾ ਅਤ੍ਤਨੋ ਘਰੇ ਧਨਂ ਰਕ੍ਖ. ਮਾ ਅਕਮ੍ਮਾਯ ਰਨ੍ਧਯੀਤਿ ਅਯੁਤ੍ਤੇਨ ਅਕਾਰਣੇਨ ਮਾ ਰਨ੍ਧਯਿ, ਤਂ ਧਨਂ ਮਾ ਝਾਪਯਿ ਮਾ ਨਾਸਯਿ. ਕਿਂਕਾਰਣਾ? ਅਕਮ੍ਮੁਨਾ ਹੀਤਿ ਅਯੁਤ੍ਤਕਮ੍ਮਕਰਣੇਨ ਦੁਮ੍ਮੇਧੋ ਪੁਗ੍ਗਲੋ ਸਕਂ ਧਨਂ ਨਾਸੇਤ੍ਵਾ ਪਚ੍ਛਾ ਦੁਗ੍ਗਤੋ. ਨਲ਼ਾਗਾਰਂਵ ਸੀਦਤੀਤਿ ਯਥਾ ਨਲ਼ਾਗਾਰਂ ਮੂਲਤੋ ਪਟ੍ਠਾਯ ਜੀਰਮਾਨਂ ਅਪ੍ਪਤਿਟ੍ਠਂ ਪਤਤਿ, ਏਵਂ ਅਕਾਰਣੇਨ ਧਨਂ ਨਾਸੇਤ੍ਵਾ ਅਪਾਯੇਸੁ ਨਿਬ੍ਬਤ੍ਤਤੀਤਿ.

ਏਵਮ੍ਪਿ ਬੋਧਿਸਤ੍ਤੋ ਏਤ੍ਤਕੇਨ ਠਾਨੇਨ ਪਞ੍ਚ ਬਲਾਨਿ ਵਣ੍ਣੇਤ੍ਵਾ ਪਞ੍ਞਾਬਲਂ ਉਕ੍ਖਿਪਿਤ੍ਵਾ ਚਨ੍ਦਮਣ੍ਡਲਂ ਨੀਹਰਨ੍ਤੋ ਵਿਯ ਕਥੇਤ੍ਵਾ ਇਦਾਨਿ ਦਸਹਿ ਗਾਥਾਹਿ ਰਞ੍ਞੋ ਓਵਾਦਂ ਦੇਨ੍ਤੋ ਆਹ –

੩੯.

‘‘ਧਮ੍ਮਂ ਚਰ ਮਹਾਰਾਜ, ਮਾਤਾਪਿਤੂਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੪੦.

‘‘ਧਮ੍ਮਂ ਚਰ ਮਹਾਰਾਜ, ਪੁਤ੍ਤਦਾਰੇਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੪੧.

‘‘ਧਮ੍ਮਂ ਚਰ ਮਹਾਰਾਜ, ਮਿਤ੍ਤਾਮਚ੍ਚੇਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੪੨.

‘‘ਧਮ੍ਮਂ ਚਰ ਮਹਾਰਾਜ, ਵਾਹਨੇਸੁ ਬਲੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੪੩.

‘‘ਧਮ੍ਮਂ ਚਰ ਮਹਾਰਾਜ, ਗਾਮੇਸੁ ਨਿਗਮੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੪੪.

‘‘ਧਮ੍ਮਂ ਚਰ ਮਹਾਰਾਜ, ਰਟ੍ਠੇ ਜਨਪਦੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੪੫.

‘‘ਧਮ੍ਮਂ ਚਰ ਮਹਾਰਾਜ, ਸਮਣੇ ਬ੍ਰਾਹ੍ਮਣੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੪੬.

‘‘ਧਮ੍ਮਂ ਚਰ ਮਹਾਰਾਜ, ਮਿਗਪਕ੍ਖੀਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੪੭.

‘‘ਧਮ੍ਮਂ ਚਰ ਮਹਾਰਾਜ, ਧਮ੍ਮੋ ਚਿਣ੍ਣੋ ਸੁਖਾਵਹੋ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੪੮.

‘‘ਧਮ੍ਮਂ ਚਰ ਮਹਾਰਾਜ, ਸਇਨ੍ਦਾ ਦੇਵਾ ਸਬ੍ਰਹ੍ਮਕਾ;

ਸੁਚਿਣ੍ਣੇਨ ਦਿਵਂ ਪਤ੍ਤਾ, ਮਾ ਧਮ੍ਮਂ ਰਾਜ ਪਾਮਦੋ’’ਤਿ.

ਤਤ੍ਥ ਪਠਮਗਾਥਾਯ ਤਾਵ ਇਧ ਧਮ੍ਮਨ੍ਤਿ ਮਾਤਾਪਿਤੁਪਟ੍ਠਾਨਧਮ੍ਮਂ. ਤਂ ਕਾਲਸ੍ਸੇਵ ਵੁਟ੍ਠਾਯ ਮਾਤਾਪਿਤੂਨਂ ਮੁਖੋਦਕਦਨ੍ਤਕਟ੍ਠਦਾਨਮਾਦਿਂ ਕਤ੍ਵਾ ਸਬ੍ਬਸਰੀਰਕਿਚ੍ਚਪਰਿਹਰਣਂ ਕਰੋਨ੍ਤੋਵ ਪੂਰੇਹੀਤਿ ਵਦਤਿ. ਪੁਤ੍ਤਦਾਰੇਸੂਤਿ ਪੁਤ੍ਤਧੀਤਰੋ ਤਾਵ ਪਾਪਾ ਨਿਵਾਰੇਤ੍ਵਾ ਕਲ੍ਯਾਣੇ ਨਿਵੇਸੇਨ੍ਤੋ ਸਿਪ੍ਪਂ ਉਗ੍ਗਣ੍ਹਾਪੇਨ੍ਤੋ ਵਯਪ੍ਪਤ੍ਤਕਾਲੇ ਪਤਿਰੂਪਕੁਲਵਂਸੇਨ ਆਵਾਹਵਿਵਾਹਂ ਕਰੋਨ੍ਤੋ ਸਮਯੇ ਧਨਂ ਦੇਨ੍ਤੋ ਪੁਤ੍ਤੇਸੁ ਧਮ੍ਮਂ ਚਰਤਿ ਨਾਮ, ਭਰਿਯਂ ਸਮ੍ਮਾਨੇਨ੍ਤੋ ਅਨਵਮਾਨੇਨ੍ਤੋ ਅਨਤਿਚਰਨ੍ਤੋ ਇਸ੍ਸਰਿਯਂ ਵੋਸ੍ਸਜ੍ਜੇਨ੍ਤੋ ਅਲਙ੍ਕਾਰਂ ਅਨੁਪ੍ਪਦੇਨ੍ਤੋ ਦਾਰੇਸੁ ਧਮ੍ਮਂ ਚਰਤਿ ਨਾਮ. ਮਿਤ੍ਤਾਮਚ੍ਚੇਸੂਤਿ ਮਿਤ੍ਤਾਮਚ੍ਚੇ ਚਤੂਹਿ ਸਙ੍ਗਹਵਤ੍ਥੂਹਿ ਸਙ੍ਗਣ੍ਹਨ੍ਤੋ ਅਵਿਸਂਵਾਦੇਨ੍ਤੋ ਏਤੇਸੁ ਧਮ੍ਮਂ ਚਰਤਿ ਨਾਮ. ਵਾਹਨੇਸੁ ਬਲੇਸੁ ਚਾਤਿ ਹਤ੍ਥਿਅਸ੍ਸਾਦੀਨਂ ਵਾਹਨਾਨਂ ਬਲਕਾਯਸ੍ਸ ਚ ਦਾਤਬ੍ਬਯੁਤ੍ਤਕਂ ਦੇਨ੍ਤੋ ਸਕ੍ਕਾਰਂ ਕਰੋਨ੍ਤੋ ਹਤ੍ਥਿਅਸ੍ਸਾਦਯੋ ਮਹਲ੍ਲਕਕਾਲੇ ਕਮ੍ਮੇਸੁ ਅਯੋਜੇਨ੍ਤੋ ਤੇਸੁ ਧਮ੍ਮਂ ਚਰਤਿ ਨਾਮ.

ਗਾਮੇਸੁ ਨਿਗਮੇਸੁ ਚਾਤਿ ਗਾਮਨਿਗਮਵਾਸਿਨੋ ਦਣ੍ਡਬਲੀਹਿ ਅਪੀਲ਼ੇਨ੍ਤੋਵ ਤੇਸੁ ਧਮ੍ਮਂ ਚਰਤਿ ਨਾਮ. ਰਟ੍ਠੇ ਜਨਪਦੇਸੁ ਚਾਤਿ ਰਟ੍ਠਞ੍ਚ ਜਨਪਦਞ੍ਚ ਅਕਾਰਣੇਨ ਕਿਲਮੇਨ੍ਤੋ ਹਿਤਚਿਤ੍ਤਂ ਅਪਚ੍ਚੁਪਟ੍ਠਪੇਨ੍ਤੋ ਤਤ੍ਥ ਅਧਮ੍ਮਂ ਚਰਤਿ ਨਾਮ, ਅਪੀਲ਼ੇਨ੍ਤੋ ਪਨ ਹਿਤਚਿਤ੍ਤੇਨ ਫਰਨ੍ਤੋ ਤਤ੍ਥ ਧਮ੍ਮਂ ਚਰਤਿ ਨਾਮ. ਸਮਣੇ ਬ੍ਰਾਹ੍ਮਣੇਸੁ ਚਾਤਿ ਤੇਸਂ ਚਤ੍ਤਾਰੋ ਪਚ੍ਚਯੇ ਦੇਨ੍ਤੋਵ ਤੇਸੁ ਧਮ੍ਮਂ ਚਰਤਿ ਨਾਮ. ਮਿਗਪਕ੍ਖੀਸੂਤਿ ਸਬ੍ਬਚਤੁਪ੍ਪਦਸਕੁਣਾਨਂ ਅਭਯਂ ਦੇਨ੍ਤੋ ਤੇਸੁ ਧਮ੍ਮਂ ਚਰਤਿ ਨਾਮ. ਧਮ੍ਮੋ ਚਿਣ੍ਣੋਤਿ ਸੁਚਰਿਤਧਮ੍ਮੋ ਚਿਣ੍ਣੋ. ਸੁਖਾਵਹੋਤਿ ਤੀਸੁ ਕੁਲਸਮ੍ਪਦਾਸੁ ਛਸੁ ਕਾਮਸਗ੍ਗੇਸੁ ਸੁਖਂ ਆਵਹਤਿ. ਸੁਚਿਣ੍ਣੇਨਾਤਿ ਇਧ ਚਿਣ੍ਣੇਨ ਕਾਯਸੁਚਰਿਤਾਦਿਨਾ ਸੁਚਿਣ੍ਣੇਨ. ਦਿਵਂ ਪਤ੍ਤਾਤਿ ਦੇਵਲੋਕਬ੍ਰਹ੍ਮਲੋਕਸਙ੍ਖਾਤਂ ਦਿਵਂ ਗਤਾ, ਤਤ੍ਥ ਦਿਬ੍ਬਸਮ੍ਪਤ੍ਤਿਲਾਭਿਨੋ ਜਾਤਾ. ਮਾ ਧਮ੍ਮਂ ਰਾਜ ਪਾਮਦੋਤਿ ਤਸ੍ਮਾ ਤ੍ਵਂ, ਮਹਾਰਾਜ, ਜੀਵਿਤਂ ਜਹਨ੍ਤੋਪਿ ਧਮ੍ਮਂ ਮਾ ਪਮਜ੍ਜੀਤਿ.

ਏਵਂ ਦਸ ਧਮ੍ਮਚਰਿਯਗਾਥਾਯੋ ਵਤ੍ਵਾ ਉਤ੍ਤਰਿਪਿ ਓਵਦਨ੍ਤੋ ਓਸਾਨਗਾਥਮਾਹ –

੪੯.

‘‘ਤਤ੍ਥੇਵ ਤੇ ਵਤ੍ਤਪਦਾ, ਏਸਾਵ ਅਨੁਸਾਸਨੀ;

ਸਪ੍ਪਞ੍ਞਸੇਵੀ ਕਲ੍ਯਾਣੀ, ਸਮਤ੍ਤਂ ਸਾਮ ਤਂ ਵਿਦੂ’’ਤਿ.

ਤਤ੍ਥ ਤਤ੍ਥੇਵ ਤੇ ਵਤ੍ਤਪਦਾਤਿ ਇਦਂ ਪੁਰਿਮਨਯੇਨੇਵ ਯੋਜੇਤਬ੍ਬਂ. ਸਪ੍ਪਞ੍ਞਸੇਵੀ ਕਲ੍ਯਾਣੀ, ਸਮਤ੍ਤਂ ਸਾਮ ਤਂ ਵਿਦੂਤਿ, ਮਹਾਰਾਜ, ਤਂ ਮਯਾ ਵੁਤ੍ਤਂ ਓਵਾਦਂ ਤ੍ਵਂ ਨਿਚ੍ਚਕਾਲਂ ਸਪ੍ਪਞ੍ਞਪੁਗ੍ਗਲਸੇਵੀ ਕਲ੍ਯਾਣਗੁਣਸਮਨ੍ਨਾਗਤੋ ਹੁਤ੍ਵਾ ਸਮਤ੍ਤਂ ਪਰਿਪੁਣ੍ਣਂ ਸਾਮਂ ਵਿਦੂ ਅਤ੍ਤਪਚ੍ਚਕ੍ਖਤੋਵ ਜਾਨਿਤ੍ਵਾ ਯਥਾਨੁਸਿਟ੍ਠਂ ਪਟਿਪਜ੍ਜਾਤਿ.

ਏਵਂ ਮਹਾਸਤ੍ਤੋ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਬੁਦ੍ਧਲੀਲ਼ਾਯ ਧਮ੍ਮਂ ਦੇਸੇਸਿ. ਮਹਾਜਨੋ ਮਹਾਸਕ੍ਕਾਰਂ ਅਕਾਸਿ, ਸਾਧੁਕਾਰਸਹਸ੍ਸਾਨਿ ਅਦਾਸਿ. ਰਾਜਾ ਤੁਟ੍ਠੋ ਅਮਚ੍ਚੇ ਆਮਨ੍ਤੇਤ੍ਵਾ ਪੁਚ੍ਛਿ – ‘‘ਭੋਨ੍ਤੋ! ਅਮਚ੍ਚਾ ਮਮ ਪੁਤ੍ਤੇਨ ਤਰੁਣਜਮ੍ਬੁਫਲਸਮਾਨਤੁਣ੍ਡੇਨ ਜਮ੍ਬੁਕਪਣ੍ਡਿਤੇਨ ਏਵਂ ਕਥੇਨ੍ਤੇਨ ਕੇਨ ਕਤ੍ਤਬ੍ਬਂ ਕਿਚ੍ਚਂ ਕਤ’’ਨ੍ਤਿ. ਸੇਨਾਪਤਿਨਾ, ਦੇਵਾਤਿ. ‘‘ਤੇਨ ਹਿਸ੍ਸ ਸੇਨਾਪਤਿਟ੍ਠਾਨਂ ਦਮ੍ਮੀ’’ਤਿ ਜਮ੍ਬੁਕਂ ਠਾਨਨ੍ਤਰੇ ਠਪੇਸਿ. ਸੋ ਤਤੋ ਪਟ੍ਠਾਯ ਸੇਨਾਪਤਿਟ੍ਠਾਨੇ ਠਤ੍ਵਾ ਪਿਤੁ ਕਮ੍ਮਾਨਿ ਅਕਾਸਿ. ਤਿਣ੍ਣਂ ਸਕੁਣਾਨਂ ਮਹਨ੍ਤੋ ਸਕ੍ਕਾਰੋ ਅਹੋਸਿ. ਤਯੋਪਿ ਜਨਾ ਰਞ੍ਞੋ ਅਤ੍ਥਞ੍ਚ ਧਮ੍ਮਞ੍ਚ ਅਨੁਸਾਸਿਂਸੁ. ਮਹਾਸਤ੍ਤਸ੍ਸੋਵਾਦੇ ਠਤ੍ਵਾ ਰਾਜਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਗ੍ਗਪਰਾਯਣੋ ਅਹੋਸਿ. ਅਮਚ੍ਚਾ ਰਞ੍ਞੋ ਸਰੀਰਕਿਚ੍ਚਂ ਕਤ੍ਵਾ ਸਕੁਣਾਨਂ ਆਰੋਚੇਤ੍ਵਾ ‘‘ਸਾਮਿ, ਜਮ੍ਬੁਕਸਕੁਣ ਰਾਜਾ ਤੁਮ੍ਹਾਕਂ ਛਤ੍ਤਂ ਉਸ੍ਸਾਪੇਤਬ੍ਬਂ ਅਕਾਸੀ’’ਤਿ ਵਦਿਂਸੁ. ਮਹਾਸਤ੍ਤੋ ‘‘ਨ ਮਯ੍ਹਂ ਰਜ੍ਜੇਨਤ੍ਥੋ, ਤੁਮ੍ਹੇ ਅਪ੍ਪਮਤ੍ਤਾ ਰਜ੍ਜਂ ਕਾਰੇਥਾ’’ਤਿ ਮਹਾਜਨਂ ਸੀਲੇਸੁ ਪਤਿਟ੍ਠਾਪੇਤ੍ਵਾ ‘‘ਏਵਂ ਵਿਨਿਚ੍ਛਯਂ ਪਵਤ੍ਤੇਯ੍ਯਾਥਾ’’ਤਿ ਵਿਨਿਚ੍ਛਯਧਮ੍ਮਂ ਸੁਵਣ੍ਣਪਟ੍ਟੇ ਲਿਖਾਪੇਤ੍ਵਾ ਅਰਞ੍ਞਂ ਪਾਵਿਸਿ. ਤਸ੍ਸੋਵਾਦੋ ਚਤ੍ਤਾਲੀਸ ਵਸ੍ਸਸਹਸ੍ਸਾਨਿ ਪਵਤ੍ਤਤਿ.

ਸਤ੍ਥਾ ਰਞ੍ਞੋ ਓਵਾਦਵਸੇਨ ਇਮਂ ਧਮ੍ਮਦੇਸਨਂ ਦੇਸੇਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਕੁਣ੍ਡਲਿਨੀ ਉਪ੍ਪਲਵਣ੍ਣਾ, ਵੇਸ੍ਸਨ੍ਤਰੋ ਸਾਰਿਪੁਤ੍ਤੋ, ਜਮ੍ਬੁਕਸਕੁਣੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਤੇਸਕੁਣਜਾਤਕਵਣ੍ਣਨਾ ਪਠਮਾ.

[੫੨੨] ੨. ਸਰਭਙ੍ਗਜਾਤਕਵਣ੍ਣਨਾ

ਅਲਙ੍ਕਤਾ ਕੁਣ੍ਡਲਿਨੋ ਸੁਵਤ੍ਥਾਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਪਰਿਨਿਬ੍ਬਾਨਂ ਆਰਬ੍ਭ ਕਥੇਸਿ. ਸਾਰਿਪੁਤ੍ਤਤ੍ਥੇਰੋ ਤਥਾਗਤਂ ਜੇਤਵਨੇ ਵਿਹਰਨ੍ਤਂ ਅਤ੍ਤਨੋ ਪਰਿਨਿਬ੍ਬਾਨਂ ਅਨੁਜਾਨਾਪੇਤ੍ਵਾ ਗਨ੍ਤ੍ਵਾ ਨਾਲ਼ਕਗਾਮਕੇ ਜਾਤੋਵਰਕੇ ਪਰਿਨਿਬ੍ਬਾਯਿ. ਤਸ੍ਸ ਪਰਿਨਿਬ੍ਬੁਤਭਾਵਂ ਸੁਤ੍ਵਾ ਸਤ੍ਥਾ ਰਾਜਗਹਂ ਗਨ੍ਤ੍ਵਾ ਵੇਲ਼ੁਵਨੇ ਵਿਹਾਸਿ. ਤਦਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਇਸਿਗਿਲਿਪਸ੍ਸੇ ਕਾਲ਼ਸਿਲਾਯਂ ਵਿਹਰਤਿ. ਸੋ ਪਨ ਇਦ੍ਧਿਬਲੇਨ ਕੋਟਿਪ੍ਪਤ੍ਤਭਾਵੇਨ ਦੇਵਲੋਕਚਾਰਿਕਞ੍ਚ ਉਸ੍ਸਦਨਿਰਯਚਾਰਿਕਞ੍ਚ ਗਚ੍ਛਤਿ. ਦੇਵਲੋਕੇ ਬੁਦ੍ਧਸਾਵਕਾਨਂ ਮਹਨ੍ਤਂ ਇਸ੍ਸਰਿਯਂ ਦਿਸ੍ਵਾ ਉਸ੍ਸਦਨਿਰਯੇਸੁ ਚ ਤਿਤ੍ਥਿਯਸਾਵਕਾਨਂ ਮਹਨ੍ਤਂ ਦੁਕ੍ਖਂ ਦਿਸ੍ਵਾ ਮਨੁਸ੍ਸਲੋਕਂ ਆਗਨ੍ਤ੍ਵਾ ‘‘ਅਸੁਕੋ ਉਪਾਸਕੋ ਅਸੁਕਾ ਚ ਉਪਾਸਿਕਾ ਅਸੁਕਸ੍ਮਿਂ ਨਾਮ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਮਹਾਸਮ੍ਪਤ੍ਤਿਂ ਅਨੁਭਵਨ੍ਤਿ, ਤਿਤ੍ਥਿਯਸਾਵਕੇਸੁ ਅਸੁਕੋ ਚ ਅਸੁਕਾ ਚ ਨਿਰਯਾਦੀਸੁ ਅਸੁਕਅਪਾਯੇ ਨਾਮ ਨਿਬ੍ਬਤ੍ਤਾ’’ਤਿ ਮਨੁਸ੍ਸਾਨਂ ਕਥੇਸਿ. ਮਨੁਸ੍ਸਾ ਸਾਸਨੇ ਪਸੀਦਨ੍ਤਿ, ਤਿਤ੍ਥਿਯੇ ਪਰਿਵਜ੍ਜੇਨ੍ਤਿ. ਬੁਦ੍ਧਸਾਵਕਾਨਂ ਸਕ੍ਕਾਰੋ ਮਹਨ੍ਤੋ ਅਹੋਸਿ, ਤਿਤ੍ਥਿਯਾਨਂ ਪਰਿਹਾਯਤਿ.

ਤੇ ਥੇਰੇ ਆਘਾਤਂ ਬਨ੍ਧਿਤ੍ਵਾ ‘‘ਇਮਸ੍ਮਿਂ ਜੀਵਨ੍ਤੇ ਅਮ੍ਹਾਕਂ ਉਪਟ੍ਠਾਕਾ ਭਿਜ੍ਜਨ੍ਤਿ, ਸਕ੍ਕਾਰੋ ਚ ਪਰਿਹਾਯਤਿ, ਮਾਰਾਪੇਸ੍ਸਾਮ ਨ’’ਨ੍ਤਿ ਥੇਰਸ੍ਸ ਮਾਰਣਤ੍ਥਂ ਸਮਣਗੁਤ੍ਤਕਸ੍ਸ ਨਾਮ ਚੋਰਸ੍ਸ ਸਹਸ੍ਸਂ ਅਦਂਸੁ. ਸੋ ‘‘ਥੇਰਂ ਮਾਰੇਸ੍ਸਾਮੀ’’ਤਿ ਮਹਨ੍ਤੇਨ ਪਰਿਵਾਰੇਨ ਸਦ੍ਧਿਂ ਕਾਲ਼ਸਿਲਂ ਅਗਮਾਸਿ. ਥੇਰੋ ਤਂ ਆਗਚ੍ਛਨ੍ਤਂ ਦਿਸ੍ਵਾਵ ਇਦ੍ਧਿਯਾ ਉਪ੍ਪਤਿਤ੍ਵਾ ਪਕ੍ਕਾਮਿ. ਚੋਰੋ ਤਂ ਦਿਵਸਂ ਥੇਰਂ ਅਦਿਸ੍ਵਾ ਨਿਵਤ੍ਤਿਤ੍ਵਾ ਪੁਨਦਿਵਸੇਪੀਤਿ ਛ ਦਿਵਸੇ ਅਗਮਾਸਿ. ਥੇਰੋਪਿ ਤਥੇਵ ਇਦ੍ਧਿਯਾ ਪਕ੍ਕਾਮਿ. ਸਤ੍ਤਮੇ ਪਨ ਦਿਵਸੇ ਥੇਰਸ੍ਸ ਪੁਬ੍ਬੇ ਕਤਂ ਅਪਰਾਪਰਿਯਵੇਦਨੀਯਕਮ੍ਮਂ ਓਕਾਸਂ ਲਭਿ. ਸੋ ਕਿਰ ਪੁਬ੍ਬੇ ਭਰਿਯਾਯ ਵਚਨਂ ਗਹੇਤ੍ਵਾ ਮਾਤਾਪਿਤਰੋ ਮਾਰੇਤੁਕਾਮੋ ਯਾਨਕੇਨ ਅਰਞ੍ਞਂ ਨੇਤ੍ਵਾ ਚੋਰਾਨਂ ਉਟ੍ਠਿਤਾਕਾਰਂ ਕਤ੍ਵਾ ਮਾਤਾਪਿਤਰੋ ਪੋਥੇਸਿ ਪਹਰਿ. ਤੇ ਚਕ੍ਖੁਦੁਬ੍ਬਲਤਾਯ ਰੂਪਦਸ੍ਸਨਰਹਿਤਾ ਤਂ ਅਤ੍ਤਨੋ ਪੁਤ੍ਤਂ ਅਸਞ੍ਜਾਨਨ੍ਤਾ ‘‘ਚੋਰਾ ਏਵ ਏਤੇ’’ਤਿ ਸਞ੍ਞਾਯ, ‘‘ਤਾਤ, ਅਸੁਕਾ ਨਾਮ ਚੋਰਾ ਨੋ ਘਾਤੇਨ੍ਤਿ, ਤ੍ਵਂ ਪਟਿਕ੍ਕਮਾਹੀ’’ਤਿ ਤਸ੍ਸੇਵਤ੍ਥਾਯ ਪਰਿਦੇਵਿਂਸੁ. ਸੋ ਚਿਨ੍ਤੇਸਿ – ‘‘ਇਮੇ ਮਯਾ ਪੋਥਿਯਮਾਨਾਪਿ ਮਯ੍ਹਂ ਯੇਵਤ੍ਥਾਯ ਪਰਿਦੇਵਨ੍ਤਿ, ਅਯੁਤ੍ਤਂ ਕਮ੍ਮਂ ਕਰੋਮੀ’’ਤਿ. ਅਥ ਨੇ ਅਸ੍ਸਾਸੇਤ੍ਵਾ ਚੋਰਾਨਂ ਪਲਾਯਨਾਕਾਰਂ ਦਸ੍ਸੇਤ੍ਵਾ ਤੇਸਂ ਹਤ੍ਥਪਾਦੇ ਸਮ੍ਬਾਹਿਤ੍ਵਾ ‘‘ਅਮ੍ਮ, ਤਾਤਾ, ਮਾ ਭਾਯਿਤ੍ਥ, ਚੋਰਾ ਪਲਾਤਾ’’ਤਿ ਵਤ੍ਵਾ ਪੁਨ ਅਤ੍ਤਨੋ ਗੇਹਮੇਵ ਆਨੇਸਿ. ਤਂ ਕਮ੍ਮਂ ਏਤ੍ਤਕਂ ਕਾਲਂ ਓਕਾਸਂ ਅਲਭਿਤ੍ਵਾ ਭਸ੍ਮਪਟਿਚ੍ਛਨ੍ਨੋ ਅਙ੍ਗਾਰਰਾਸਿ ਵਿਯ ਠਤ੍ਵਾ ਇਮਂ ਅਨ੍ਤਿਮਸਰੀਰਂ ਉਪਧਾਵਿਤ੍ਵਾ ਗਣ੍ਹਿ. ਯਥਾ ਹਿ ਪਨ ਸੁਨਖਲੁਦ੍ਦਕੇਨ ਮਿਗਂ ਦਿਸ੍ਵਾ ਸੁਨਖੋ ਵਿਸ੍ਸਜ੍ਜਿਤੋ ਮਿਗਂ ਅਨੁਬਨ੍ਧਿਤ੍ਵਾ ਯਸ੍ਮਿਂ ਠਾਨੇ ਪਾਪੁਣਾਤਿ, ਤਸ੍ਮਿਂਯੇਵ ਗਣ੍ਹਾਤਿ, ਏਵਂ ਇਦਂ ਕਮ੍ਮਂ ਯਸ੍ਮਿਂ ਠਾਨੇ ਓਕਾਸਂ ਲਭਤਿ, ਤਸ੍ਮਿਂ ਵਿਪਾਕਂ ਦੇਤਿ, ਤੇਨ ਮੁਤ੍ਤੋ ਨਾਮ ਨਤ੍ਥਿ.

ਥੇਰੋ ਅਤ੍ਤਨਾ ਕਤਕਮ੍ਮਸ੍ਸ ਆਕਡ੍ਢਿਤਭਾਵਂ ਞਤ੍ਵਾ ਨ ਅਪਗਚ੍ਛਿ. ਥੇਰੋ ਤਸ੍ਸ ਨਿਸ੍ਸਨ੍ਦੇਨ ਆਕਾਸੇ ਉਪ੍ਪਤਿਤੁਂ ਨਾਸਕ੍ਖਿ. ਨਨ੍ਦੋਪਨਨ੍ਦਦਮਨਸਮਤ੍ਥਵੇਜਯਨ੍ਤਕਮ੍ਪਨਸਮਤ੍ਥਾਪਿਸ੍ਸ ਇਦ੍ਧਿ ਕਮ੍ਮਬਲੇਨ ਦੁਬ੍ਬਲਤਂ ਪਤ੍ਤਾ. ਚੋਰੋ ਥੇਰਂ ਗਹੇਤ੍ਵਾ ਥੇਰਸ੍ਸ ਅਟ੍ਠੀਨਿ ਤਣ੍ਡੁਲਕਣਮਤ੍ਤਾਨਿ ਕਰੋਨ੍ਤੋ ਭਿਨ੍ਦਿਤ੍ਵਾ ਸਞ੍ਚੁਣ੍ਣੇਤ੍ਵਾ ਪਲਾਲਪਿਟ੍ਠਿਕਕਰਣਂ ਨਾਮ ਕਤ੍ਵਾ ‘‘ਮਤੋ’’ਤਿ ਸਞ੍ਞਾਯ ਏਕਸ੍ਮਿਂ ਗੁਮ੍ਬਪਿਟ੍ਠੇ ਖਿਪਿਤ੍ਵਾ ਸਪਰਿਵਾਰੋ ਪਕ੍ਕਾਮਿ. ਥੇਰੋ ਸਤਿਂ ਪਟਿਲਭਿਤ੍ਵਾ ‘‘ਸਤ੍ਥਾਰਂ ਪਸ੍ਸਿਤ੍ਵਾ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਸਰੀਰਂ ਝਾਨਵੇਠਨੇਨ ਵੇਠੇਤ੍ਵਾ ਥਿਰਂ ਕਤ੍ਵਾ ਆਕਾਸਂ ਉਪ੍ਪਤਿਤ੍ਵਾ ਆਕਾਸੇਨ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਭਨ੍ਤੇ, ਆਯੁਸਙ੍ਖਾਰੋ ਮੇ ਓਸ੍ਸਟ੍ਠੋ, ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਆਹ. ‘‘ਪਰਿਨਿਬ੍ਬਾਯਿਸ੍ਸਸਿ, ਮੋਗ੍ਗਲ੍ਲਾਨ’’ਆਤਿ. ‘‘ਆਮ, ਭਨ੍ਤੇ’’ਤਿ. ‘‘ਕਤ੍ਥ ਗਨ੍ਤ੍ਵਾ ਪਰਿਨਿਬ੍ਬਾਯਿਸ੍ਸਸੀ’’ਤਿ. ‘‘ਕਾਲ਼ਸਿਲਾਪਟ੍ਟੇ, ਭਨ੍ਤੇ’’ਤਿ. ਤੇਨ ਹਿ, ਮੋਗ੍ਗਲ੍ਲਾਨ, ਧਮ੍ਮਂ ਮਯ੍ਹਂ ਕਥੇਤ੍ਵਾ ਯਾਹਿ, ਤਾਦਿਸਸ੍ਸ ਸਾਵਕਸ੍ਸ ਇਦਾਨਿ ਦਸ੍ਸਨਂ ਨਤ੍ਥੀਤਿ. ਸੋ ‘‘ਏਵਂ ਕਰਿਸ੍ਸਾਮਿ, ਭਨ੍ਤੇ’’ਤਿ ਸਤ੍ਥਾਰਂ ਵਨ੍ਦਿਤ੍ਵਾ ਤਾਲਪ੍ਪਮਾਣਂ ਆਕਾਸੇ ਉਪ੍ਪਤਿਤ੍ਵਾ ਪਰਿਨਿਬ੍ਬਾਨਦਿਵਸੇ ਸਾਰਿਪੁਤ੍ਤਤ੍ਥੇਰੋ ਵਿਯ ਨਾਨਪ੍ਪਕਾਰਾ ਇਦ੍ਧਿਯੋ ਕਤ੍ਵਾ ਧਮ੍ਮਂ ਕਥੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਕਾਲ਼ਸਿਲਾਯਂ ਅਟਵਿਯਂ ਪਰਿਨਿਬ੍ਬਾਯਿ.

ਤਙ੍ਖਣਞ੍ਞੇਵ ਛ ਦੇਵਲੋਕਾ ਏਕਕੋਲਾਹਲਾ ਅਹੇਸੁਂ, ‘‘ਅਮ੍ਹਾਕਂ ਕਿਰ ਆਚਰਿਯੋ ਪਰਿਨਿਬ੍ਬੁਤੋ’’ਤਿ ਦਿਬ੍ਬਗਨ੍ਧਮਾਲਾਵਾਸਧੂਮਚਨ੍ਦਨਚੁਣ੍ਣਾਨਿ ਚੇਵ ਨਾਨਾਦਾਰੂਨਿ ਚ ਗਹੇਤ੍ਵਾ ਆਗਮਿਂਸੁ, ਏਕੂਨਸਤਰਤਨਚਨ੍ਦਨਚਿਤਕਾ ਅਹੋਸਿ. ਸਤ੍ਥਾ ਥੇਰਸ੍ਸ ਸਨ੍ਤਿਕੇ ਠਤ੍ਵਾ ਸਰੀਰਨਿਕ੍ਖੇਪਂ ਕਾਰੇਸਿ. ਆਲ਼ਾਹਨਸ੍ਸ ਸਮਨ੍ਤਤੋ ਯੋਜਨਮਤ੍ਤੇ ਪਦੇਸੇ ਪੁਪ੍ਫਵਸ੍ਸਂ ਵਸ੍ਸਿ. ਦੇਵਾਨਂ ਅਨ੍ਤਰੇ ਮਨੁਸ੍ਸਾ, ਮਨੁਸ੍ਸਾਨਂ ਅਨ੍ਤਰੇ ਦੇਵਾ ਅਹੇਸੁਂ. ਯਥਾਕ੍ਕਮੇਨ ਦੇਵਾਨਂ ਅਨ੍ਤਰੇ ਯਕ੍ਖਾ ਤਿਟ੍ਠਨ੍ਤਿ, ਯਕ੍ਖਾਨਂ ਅਨ੍ਤਰੇ ਗਨ੍ਧਬ੍ਬਾ ਤਿਟ੍ਠਨ੍ਤਿ, ਗਨ੍ਧਬ੍ਬਾਨਂ ਅਨ੍ਤਰੇ ਨਾਗਾ ਤਿਟ੍ਠਨ੍ਤਿ, ਨਾਗਾਨਂ ਅਨ੍ਤਰੇ ਵੇਨਤੇਯ੍ਯਾ ਤਿਟ੍ਠਨ੍ਤਿ, ਵੇਨਤੇਯ੍ਯਾਨਂ ਅਨ੍ਤਰੇ ਕਿਨ੍ਨਰਾ ਤਿਟ੍ਠਨ੍ਤਿ, ਕਿਨ੍ਨਰਾਨਂ ਅਨ੍ਤਰੇ ਛਤ੍ਤਾ ਤਿਟ੍ਠਨ੍ਤਿ, ਛਤ੍ਤਾਨਂ ਅਨ੍ਤਰੇ ਸੁਵਣ੍ਣਚਾਮਰਾ ਤਿਟ੍ਠਨ੍ਤਿ, ਤੇਸਂ ਅਨ੍ਤਰੇ ਧਜਾ ਤਿਟ੍ਠਨ੍ਤਿ, ਤੇਸਂ ਅਨ੍ਤਰੇ ਪਟਾਕਾ ਤਿਟ੍ਠਨ੍ਤਿ. ਸਤ੍ਤ ਦਿਵਸਾਨਿ ਸਾਧੁਕੀਲ਼ਂ ਕੀਲ਼ਿਂਸੁ. ਸਤ੍ਥਾ ਥੇਰਸ੍ਸ ਧਾਤੁਂ ਗਾਹਾਪੇਤ੍ਵਾ ਵੇਲ਼ੁਵਨਦ੍ਵਾਰਕੋਟ੍ਠਕੇ ਚੇਤਿਯਂ ਕਾਰਾਪੇਸਿ. ਤਦਾ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਸਾਰਿਪੁਤ੍ਤਤ੍ਥੇਰੋ ਤਥਾਗਤਸ੍ਸ ਸਨ੍ਤਿਕੇ ਅਪਰਿਨਿਬ੍ਬੁਤਤ੍ਤਾ ਬੁਦ੍ਧਾਨਂ ਸਨ੍ਤਿਕਾ ਮਹਨ੍ਤਂ ਸਮ੍ਮਾਨਂ ਨ ਲਭਿ, ਮੋਗ੍ਗਲ੍ਲਾਨਤ੍ਥੇਰੋ ਪਨ ਬੁਦ੍ਧਾਨਂ ਸਮੀਪੇ ਪਰਿਨਿਬ੍ਬੁਤਤ੍ਤਾ ਮਹਾਸਮ੍ਮਾਨਂ ਲਭੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ ਮੋਗ੍ਗਲ੍ਲਾਨੋ ਮਮ ਸਨ੍ਤਿਕਾ ਸਮ੍ਮਾਨਂ ਲਭਤਿ, ਪੁਬ੍ਬੇਪਿ ਲਭਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਪੁਰੋਹਿਤਸ੍ਸ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿਤ੍ਵਾ ਦਸਮਾਸਚ੍ਚਯੇਨ ਪਚ੍ਚੂਸਸਮਯੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਤਸ੍ਮਿਂ ਖਣੇ ਦ੍ਵਾਦਸਯੋਜਨਿਕੇ ਬਾਰਾਣਸਿਨਗਰੇ ਸਬ੍ਬਾਵੁਧਾਨਿ ਪਜ੍ਜਲਿਂਸੁ. ਪੁਰੋਹਿਤੋ ਪੁਤ੍ਤਸ੍ਸ ਜਾਤਕ੍ਖਣੇ ਬਹਿ ਨਿਕ੍ਖਮਿਤ੍ਵਾ ਆਕਾਸਂ ਓਲੋਕੇਨ੍ਤੋ ਨਕ੍ਖਤ੍ਤਯੋਗਂ ਦਿਸ੍ਵਾ ‘‘ਇਮਿਨਾ ਨਕ੍ਖਤ੍ਤੇਨ ਜਾਤਤ੍ਤਾ ਏਸੋ ਕੁਮਾਰੋ ਸਕਲਜਮ੍ਬੁਦੀਪੇ ਧਨੁਗ੍ਗਹਾਨਂ ਅਗ੍ਗੋ ਭਵਿਸ੍ਸਤੀ’’ਤਿ ਞਤ੍ਵਾ ਕਾਲਸ੍ਸੇਵ ਰਾਜਕੁਲਂ ਗਨ੍ਤ੍ਵਾ ਰਾਜਾਨਂ ਸੁਖਸਯਿਤਭਾਵਂ ਪੁਚ੍ਛਿ. ‘‘ਕੁਤੋ ਮੇ, ਆਚਰਿਯ, ਸੁਖਂ, ਅਜ੍ਜ ਸਕਲਨਿਵੇਸਨੇ ਆਵੁਧਾਨਿ ਪਜ੍ਜਲਿਤਾਨੀ’’ਤਿ ਵੁਤ੍ਤੇ ‘‘ਮਾ ਭਾਯਿ, ਦੇਵ, ਨ ਤੁਮ੍ਹਾਕਂ ਨਿਵੇਸਨੇਯੇਵ, ਸਕਲਨਗਰੇਪਿ ਪਜ੍ਜਲਿਂਸੁਯੇਵ, ਅਜ੍ਜ ਅਮ੍ਹਾਕਂ ਗੇਹੇ ਕੁਮਾਰਸ੍ਸ ਜਾਤਤ੍ਤਾ ਏਵਂ ਅਹੋਸੀ’’ਤਿ. ‘‘ਆਚਰਿਯ, ਏਵਂ ਜਾਤਕੁਮਾਰਸ੍ਸ ਪਨ ਕਿਂ ਭਵਿਸ੍ਸਤੀ’’ਤਿ? ‘‘ਨ ਕਿਞ੍ਚਿ, ਮਹਾਰਾਜ, ਸੋ ਪਨ ਸਕਲਜਮ੍ਬੁਦੀਪੇ ਧਨੁਗ੍ਗਹਾਨਂ ਅਗ੍ਗੋ ਭਵਿਸ੍ਸਤੀ’’ਤਿ. ‘‘ਸਾਧੁ, ਆਚਰਿਯ, ਤੇਨ ਹਿ ਨਂ ਪਟਿਜਗ੍ਗਿਤ੍ਵਾ ਵਯਪ੍ਪਤ੍ਤਕਾਲੇ ਅਮ੍ਹਾਕਂ ਦਸ੍ਸੇਯ੍ਯਾਸੀ’’ਤਿ ਵਤ੍ਵਾ ਖੀਰਮੂਲਂ ਤਾਵ ਸਹਸ੍ਸਂ ਦਾਪੇਸਿ. ਪੁਰੋਹਿਤੋ ਤਂ ਗਹੇਤ੍ਵਾ ਨਿਵੇਸਨਂ ਗਨ੍ਤ੍ਵਾ ਬ੍ਰਾਹ੍ਮਣਿਯਾ ਦਤ੍ਵਾ ਪੁਤ੍ਤਸ੍ਸ ਨਾਮਗ੍ਗਹਣਦਿਵਸੇ ਜਾਤਕ੍ਖਣੇ ਆਵੁਧਾਨਂ ਪਜ੍ਜਲਿਤਤ੍ਤਾ ‘‘ਜੋਤਿਪਾਲੋ’’ਤਿਸ੍ਸ ਨਾਮਂ ਅਕਾਸਿ.

ਸੋ ਮਹਨ੍ਤੇਨ ਪਰਿਵਾਰੇਨ ਵਡ੍ਢਮਾਨੋ ਸੋਲ਼ਸਵਸ੍ਸਕਾਲੇ ਉਤ੍ਤਮਰੂਪਧਰੋ ਅਹੋਸਿ. ਅਥਸ੍ਸ ਪਿਤਾ ਸਰੀਰਸਮ੍ਪਤ੍ਤਿਂ ਓਲੋਕੇਤ੍ਵਾ ਸਹਸ੍ਸਂ ਦਤ੍ਵਾ, ‘‘ਤਾਤ, ਤਕ੍ਕਸਿਲਂ ਗਨ੍ਤ੍ਵਾ ਦਿਸਾਪਾਮੋਕ੍ਖਸ੍ਸ ਆਚਰਿਯਸ੍ਸ ਸਨ੍ਤਿਕੇ ਸਿਪ੍ਪਂ ਉਪ੍ਪਣ੍ਹਾਹੀ’’ਤਿ ਆਹ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਆਚਰਿਯਭਾਗਂ ਗਹੇਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਤਤ੍ਥ ਗਨ੍ਤ੍ਵਾ ਸਹਸ੍ਸਂ ਦਤ੍ਵਾ ਸਿਪ੍ਪਂ ਪਟ੍ਠਪੇਤ੍ਵਾ ਸਤ੍ਤਾਹੇਨੇਵ ਨਿਪ੍ਫਤ੍ਤਿਂ ਪਾਪੁਣਿ. ਅਥਸ੍ਸ ਆਚਰਿਯੋ ਤੁਸ੍ਸਿਤ੍ਵਾ ਅਤ੍ਤਨੋ ਸਨ੍ਤਕਂ ਖਗ੍ਗਰਤਨਂ ਸਨ੍ਧਿਯੁਤ੍ਤਂ ਮੇਣ੍ਡਕਸਿਙ੍ਗਧਨੁਂ ਸਨ੍ਧਿਯੁਤ੍ਤਂ ਤੂਣੀਰਂ ਅਤ੍ਤਨੋ ਸਨ੍ਨਾਹਕਞ੍ਚੁਕਂ ਉਣ੍ਹੀਸਞ੍ਚ ਦਤ੍ਵਾ ‘‘ਤਾਤ ਜੋਤਿਪੋਲ, ਅਹਂ ਮਹਲ੍ਲਕੋ, ਇਦਾਨਿ ਤ੍ਵਂ ਇਮੇ ਮਾਣਵਕੇ ਸਿਕ੍ਖਾਪੇਹੀ’’ਤਿ ਪਞ੍ਚਸਤਮਾਣਵਕੇਪਿ ਤਸ੍ਸੇਵ ਨਿਯ੍ਯਾਦੇਸਿ. ਬੋਧਿਸਤ੍ਤੋ ਸਬ੍ਬਂ ਉਪਕਰਣਂ ਗਹੇਤ੍ਵਾ ਆਚਰਿਯਂ ਵਨ੍ਦਿਤ੍ਵਾ ਬਾਰਾਣਸਿਮੇਵ ਆਗਨ੍ਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਅਟ੍ਠਾਸਿ. ਅਥ ਨਂ ਵਨ੍ਦਿਤ੍ਵਾ ਠਿਤਂ ਪਿਤਾ ਅਵੋਚ ‘‘ਉਗ੍ਗਹਿਤਂ ਤੇ, ਤਾਤ, ਸਿਪ੍ਪ’’ਨ੍ਤਿ. ‘‘ਆਮ, ਤਾਤਾ’’ਤਿ. ਸੋ ਤਸ੍ਸ ਵਚਨਂ ਸੁਤ੍ਵਾ ਰਾਜਕੁਲਂ ਗਨ੍ਤ੍ਵਾ ‘‘ਪੁਤ੍ਤੋ ਮੇ, ਦੇਵ, ਸਿਪ੍ਪਂ ਸਿਕ੍ਖਿਤ੍ਵਾ ਆਗਤੋ, ਕਿਂ ਕਰੋਤੂ’’ਤਿ ਆਹ. ‘‘ਆਚਰਿਯ, ਅਮ੍ਹੇ ਉਪਟ੍ਠਹਤੂ’’ਤਿ. ‘‘ਪਰਿਬ੍ਬਯਮਸ੍ਸ ਜਾਨਾਥ, ਦੇਵਾ’’ਤਿ. ‘‘ਸੋ ਦੇਵਸਿਕਂ ਸਹਸ੍ਸਂ ਲਭਤੂ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਗੇਹਂ ਗਨ੍ਤ੍ਵਾ ਕੁਮਾਰਂ ਪਕ੍ਕੋਸਾਪੇਤ੍ਵਾ ‘‘ਤਾਤ, ਰਾਜਾਨਂ ਉਪਟ੍ਠਹਾ’’ਤਿ ਆਹ. ਸੋ ਤਤੋ ਪਟ੍ਠਾਯ ਦੇਵਸਿਕਂ ਸਹਸ੍ਸਂ ਲਭਿਤ੍ਵਾ ਰਾਜਾਨਂ ਉਪਟ੍ਠਹਿ.

ਰਾਜਪਾਦਮੂਲਿਕਾ ਉਜ੍ਝਾਯਿਂਸੁ – ‘‘ਮਯਂ ਜੋਤਿਪਾਲੇਨ ਕਤਕਮ੍ਮਂ ਨ ਪਸ੍ਸਾਮ, ਦੇਵਸਿਕਂ ਸਹਸ੍ਸਂ ਗਣ੍ਹਾਤਿ, ਮਯਮਸ੍ਸ ਸਿਪ੍ਪਂ ਪਸ੍ਸਿਤੁਕਾਮਾ’’ਤਿ. ਰਾਜਾ ਤੇਸਂ ਵਚਨਂ ਸੁਤ੍ਵਾ ਪੁਰੋਹਿਤਸ੍ਸ ਕਥੇਸਿ. ਪੁਰੋਹਿਤੋ ‘‘ਸਾਧੁ, ਦੇਵਾ’’ਤਿ ਪੁਤ੍ਤਸ੍ਸਾਰੋਚੇਸਿ. ਸੋ ‘‘ਸਾਧੁ, ਤਾਤ, ਇਤੋ ਸਤ੍ਤਮੇ ਦਿਵਸੇ ਦਸ੍ਸੇਸ੍ਸਾਮਿ ਸਿਪ੍ਪਂ, ਅਪਿਚ ਰਾਜਾ ਅਤ੍ਤਨੋ ਵਿਜਿਤੇ ਧਨੁਗ੍ਗਹੇ ਸਨ੍ਨਿਪਾਤਾਪੇਤੂ’’ਤਿ ਆਹ. ਪੁਰੋਹਿਤੋ ਗਨ੍ਤ੍ਵਾ ਰਞ੍ਞੋ ਤਮਤ੍ਥਂ ਆਰੋਚੇਸਿ. ਰਾਜਾ ਨਗਰੇ ਭੇਰਿਂ ਚਰਾਪੇਤ੍ਵਾ ਧਨੁਗ੍ਗਹੇ ਸਨ੍ਨਿਪਾਤਾਪੇਸਿ. ਸਟ੍ਠਿਸਹਸ੍ਸਾ ਧਨੁਗ੍ਗਹਾ ਸਨ੍ਨਿਪਤਿਂਸੁ. ਰਾਜਾ ਤੇਸਂ ਸਨ੍ਨਿਪਤਿਤਭਾਵਂ ਞਤ੍ਵਾ ‘‘ਨਗਰਵਾਸਿਨੋ ਜੋਤਿਪਾਲਸ੍ਸ ਸਿਪ੍ਪਂ ਪਸ੍ਸਨ੍ਤੂ’’ਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ਰਾਜਙ੍ਗਣਂ ਸਜ੍ਜਾਪੇਤ੍ਵਾ ਮਹਾਜਨਪਰਿਵੁਤੋ ਪਲ੍ਲਙ੍ਕਵਰੇ ਨਿਸੀਦਿਤ੍ਵਾ ਧਨੁਗ੍ਗਹੇ ਪਕ੍ਕੋਸਾਪੇਤ੍ਵਾ ‘‘ਜੋਤਿਪਾਲੋ ਆਗਚ੍ਛਤੂ’’ਤਿ ਪੇਸੇਸਿ. ਸੋ ਆਚਰਿਯੇਨ ਦਿਨ੍ਨਾਨਿ ਧਨੁਤੂਣੀਰਸਨ੍ਨਾਹਕਞ੍ਚੁਕਉਣ੍ਹੀਸਾਨਿ ਨਿਵਾਸਨਨ੍ਤਰੇ ਠਪੇਤ੍ਵਾ ਖਗ੍ਗਂ ਗਾਹਾਪੇਤ੍ਵਾ ਪਕਤਿਵੇਸੇਨ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਏਕਮਨ੍ਤਂ ਅਟ੍ਠਾਸਿ.

ਧਨੁਗ੍ਗਹਾ ‘‘ਜੋਤਿਪਾਲੋ ਕਿਰ ਧਨੁਸਿਪ੍ਪਂ ਦਸ੍ਸੇਤੁਂ ਆਗਤੋ, ਧਨੁਂ ਅਗ੍ਗਹੇਤ੍ਵਾ ਪਨ ਆਗਤਤ੍ਤਾ ਅਮ੍ਹਾਕਂ ਹਤ੍ਥਤੋ ਧਨੁਂ ਗਹੇਤੁਕਾਮੋ ਭਵਿਸ੍ਸਤਿ, ਨਾਸ੍ਸ ਦਸ੍ਸਾਮਾ’’ਤਿ ਕਤਿਕਂ ਕਰਿਂਸੁ. ਰਾਜਾ ਜੋਤਿਪਾਲਂ ਆਮਨ੍ਤੇਤ੍ਵਾ ‘‘ਸਿਪ੍ਪਂ ਦਸ੍ਸੇਹੀ’’ਤਿ ਆਹ. ਸੋ ਸਾਣਿਂ ਪਰਿਕ੍ਖਿਪਾਪੇਤ੍ਵਾ ਅਨ੍ਤੋਸਾਣਿਯਂ ਠਿਤੋ ਸਾਟਕਂ ਅਪਨੇਤ੍ਵਾ ਸਨ੍ਨਾਹਕਞ੍ਚੁਕਂ ਪਵੇਸੇਤ੍ਵਾ ਉਣ੍ਹੀਸਂ ਸੀਸੇ ਪਟਿਮੁਞ੍ਚਿਤ੍ਵਾ ਮੇਣ੍ਡਕਸਿਙ੍ਗਧਨੁਮ੍ਹਿ ਪਵਾਲਵਣ੍ਣਂ ਜਿਯਂ ਆਰੋਪੇਤ੍ਵਾ ਤੂਣੀਰਂ ਪਿਟ੍ਠੇ ਬਨ੍ਧਿਤ੍ਵਾ ਖਗ੍ਗਂ ਵਾਮਤੋ ਕਤ੍ਵਾ ਵਜਿਰਗ੍ਗਂ ਨਾਰਾਚਂ ਨਖਪਿਟ੍ਠੇਨ ਪਰਿਵਤ੍ਤੇਤ੍ਵਾ ਸਾਣਿਂ ਵਿਵਰਿਤ੍ਵਾ ਪਥਵਿਂ ਭਿਨ੍ਦਿਤ੍ਵਾ ਅਲਙ੍ਕਤਨਾਗਕੁਮਾਰੋ ਵਿਯ ਨਿਕ੍ਖਮਿਤ੍ਵਾ ਗਨ੍ਤ੍ਵਾ ਰਞ੍ਞੋ ਅਪਚਿਤਿਂ ਦਸ੍ਸੇਤ੍ਵਾ ਅਟ੍ਠਾਸਿ. ਤਂ ਦਿਸ੍ਵਾ ਮਹਾਜਨਾ ਵਗ੍ਗਨ੍ਤਿ ਨਦਨ੍ਤਿ ਅਪ੍ਫੋਟੇਨ੍ਤਿ ਸੇਲ਼ੇਨ੍ਤਿ. ਰਾਜਾ ‘‘ਦਸ੍ਸੇਹਿ, ਜੋਤਿਪਾਲ, ਸਿਪ੍ਪ’’ਨ੍ਤਿ ਆਹ. ਦੇਵ, ਤੁਮ੍ਹਾਕਂ ਧਨੁਗ੍ਗਹੇਸੁ ਅਕ੍ਖਣਵੇਧਿਵਾਲਵੇਧਿਸਰਵੇਧਿਸਦ੍ਦਵੇਧਿਨੋ ਚਤ੍ਤਾਰੋ ਧਨੁਗ੍ਗਹੇ ਪਕ੍ਕੋਸਾਪੇਹੀਤਿ. ਅਥ ਰਾਜਾ ਪਕ੍ਕੋਸਾਪੇਸਿ.

ਮਹਾਸਤ੍ਤੋ ਰਾਜਙ੍ਗਣੇ ਚਤੁਰਸ੍ਸਪਰਿਚ੍ਛੇਦਬ੍ਭਨ੍ਤਰੇ ਮਣ੍ਡਲਂ ਕਤ੍ਵਾ ਚਤੂਸੁ ਕਣ੍ਣੇਸੁ ਚਤ੍ਤਾਰੋ ਧਨੁਗ੍ਗਹੇ ਠਪੇਤ੍ਵਾ ਏਕੇਕਸ੍ਸ ਤਿਂਸ ਤਿਂਸ ਕਣ੍ਡਸਹਸ੍ਸਾਨਿ ਦਾਪੇਤ੍ਵਾ ਏਕੇਕਸ੍ਸ ਸਨ੍ਤਿਕੇ ਏਕੇਕਂ ਕਣ੍ਡਦਾਯਕਂ ਠਪੇਤ੍ਵਾ ਸਯਂ ਵਜਿਰਗ੍ਗਂ ਨਾਰਾਚਂ ਗਹੇਤ੍ਵਾ ਮਣ੍ਡਲਮਜ੍ਝੇ ਠਤ੍ਵਾ ‘‘ਮਹਾਰਾਜ, ਇਮੇ ਚਤ੍ਤਾਰੋ ਧਨੁਗ੍ਗਹਾ ਏਕਪ੍ਪਹਾਰੇਨੇਵ ਸਰੇ ਖਿਪਿਤ੍ਵਾ ਮਂ ਵਿਜ੍ਝਨ੍ਤੁ, ਅਹਂ ਏਤੇਹਿ ਖਿਤ੍ਤਕਣ੍ਡਾਨਿ ਨਿਵਾਰੇਸ੍ਸਾਮੀ’’ਤਿ ਆਹ. ਰਾਜਾ ‘‘ਏਵਂ ਕਰੋਥਾ’’ਤਿ ਆਣਾਪੇਸਿ. ਧਨੁਗ੍ਗਹਾ ਆਹਂਸੁ, ‘‘ਮਹਾਰਾਜ, ਮਯਂ ਅਕ੍ਖਣਵੇਧਿਵਾਲਵੇਧਿਸਰਵੇਧਿਸਦ੍ਦਵੇਧਿਨੋ, ਜੋਤਿਪਾਲੋ ਤਰੁਣਦਾਰਕੋ, ਨ ਮਯਂ ਵਿਜ੍ਝਿਸ੍ਸਾਮਾ’’ਤਿ. ਮਹਾਸਤ੍ਤੋ ‘‘ਸਚੇ ਸਕ੍ਕੋਥ, ਵਿਜ੍ਝਥ ਮ’’ਨ੍ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਏਕਪ੍ਪਹਾਰੇਨੇਵ ਕਣ੍ਡਾਨਿ ਖਿਪਿਂਸੁ. ਮਹਾਸਤ੍ਤੋ ਤਾਨਿ ਨਾਰਾਚੇਨ ਪਹਰਿਤ੍ਵਾ ਯਥਾ ਵਾ ਤਥਾ ਵਾ ਨ ਪਾਤੇਸਿ, ਬੋਧਿਕੋਟ੍ਠਕਂ ਪਨ ਪਰਿਕ੍ਖਿਪਨ੍ਤੋ ਵਿਯ ਤਾਲੇਨ ਤਾਲਂ, ਵਾਲੇਨ ਵਾਲਂ, ਦਣ੍ਡਕੇਨ ਦਣ੍ਡਕਂ, ਵਾਜੇਨ ਵਾਜਂ ਅਨਤਿਕ੍ਕਮਨ੍ਤੋ ਖਿਪਿਤ੍ਵਾ ਸਰਗਬ੍ਭਂ ਅਕਾਸਿ. ਧਨੁਗ੍ਗਹਾਨਂ ਕਣ੍ਡਾਨਿ ਖੀਣਾਨਿ. ਸੋ ਤੇਸਂ ਕਣ੍ਡਖੀਣਭਾਵਂ ਞਤ੍ਵਾ ਸਰਗਬ੍ਭਂ ਅਵਿਨਾਸੇਨ੍ਤੋਵ ਉਪ੍ਪਤਿਤ੍ਵਾ ਗਨ੍ਤ੍ਵਾ ਰਞ੍ਞੋ ਸਨ੍ਤਿਕੇ ਅਟ੍ਠਾਸਿ. ਮਹਾਜਨੋ ਉਨ੍ਨਾਦੇਨ੍ਤੋ ਵਗ੍ਗਨ੍ਤੋ ਅਪ੍ਫੋਟੇਨ੍ਤੋ ਸੇਲ਼ੇਨ੍ਤੋ ਅਚ੍ਛਰਂ ਪਹਰਨ੍ਤੋ ਮਹਾਕੋਲਾਹਲਂ ਕਤ੍ਵਾ ਵਤ੍ਥਾਭਰਣਾਦੀਨਿ ਖਿਪਿ. ਏਵਂ ਏਕਰਾਸਿਭੂਤਂ ਅਟ੍ਠਾਰਸਕੋਟਿਸਙ੍ਖ੍ਯਂ ਧਨਂ ਅਹੋਸਿ.

ਅਥ ਨਂ ਰਾਜਾ ਪੁਚ੍ਛਿ – ‘‘ਕਿਂ ਸਿਪ੍ਪਂ ਨਾਮੇਤਂ ਜੋਤਿਪਾਲਾ’’ਤਿ? ਸਰਪਟਿਬਾਹਨਂ ਨਾਮ, ਦੇਵਾਤਿ. ਅਞ੍ਞੇ ਏਤਂ ਜਾਨਨ੍ਤਾ ਅਤ੍ਥੀਤਿ. ਸਕਲਜਮ੍ਬੁਦੀਪੇ ਮਂ ਠਪੇਤ੍ਵਾ ਅਞ੍ਞੋ ਨਤ੍ਥਿ, ਦੇਵਾਤਿ. ਅਪਰਂ ਦਸ੍ਸੇਹਿ, ਤਾਤਾਤਿ. ਦੇਵ, ਏਤੇ ਤਾਵ ਚਤੂਸੁ ਕਣ੍ਣੇਸੁ ਠਤ੍ਵਾ ਚਤ੍ਤਾਰੋਪਿ ਜਨਾ ਮਂ ਵਿਜ੍ਝਿਤੁਂ ਨ ਸਕ੍ਖਿਂਸੁ, ਅਹਂ ਪਨੇਤੇ ਚਤੂਸੁ ਕਣ੍ਣੇਸੁ ਠਿਤੇ ਏਕੇਨੇਵ ਸਰੇਨ ਵਿਜ੍ਝਿਸ੍ਸਾਮੀਤਿ. ਧਨੁਗ੍ਗਹਾ ਠਾਤੁਂ ਨ ਉਸ੍ਸਹਿਂਸੁ. ਮਹਾਸਤ੍ਤੋ ਚਤੂਸੁ ਕਣ੍ਣੇਸੁ ਚਤਸ੍ਸੋ ਕਦਲਿਯੋ ਠਪਾਪੇਤ੍ਵਾ ਨਾਰਾਚਪੁਙ੍ਖੇ ਰਤ੍ਤਸੁਤ੍ਤਕਂ ਬਨ੍ਧਿਤ੍ਵਾ ਏਕਂ ਕਦਲਿਂ ਸਨ੍ਧਾਯ ਖਿਪਿ. ਨਾਰਾਚੋ ਤਂ ਕਦਲਿਂ ਵਿਜ੍ਝਿਤ੍ਵਾ ਤਤੋ ਦੁਤਿਯਂ, ਤਤੋ ਤਤਿਯਂ, ਤਤੋ ਚਤੁਤ੍ਥਂ, ਤਤੋ ਪਠਮਂ ਵਿਦ੍ਧਮੇਵ ਵਿਜ੍ਝਿਤ੍ਵਾ ਪੁਨ ਤਸ੍ਸ ਹਤ੍ਥੇਯੇਵ ਪਤਿਟ੍ਠਹਿ. ਕਦਲਿਯੋ ਸੁਤ੍ਤਪਰਿਕ੍ਖਿਤ੍ਤਾ ਅਟ੍ਠਂਸੁ. ਮਹਾਜਨੋ ਉਨ੍ਨਾਦਸਹਸ੍ਸਾਨਿ ਪਵਤ੍ਤੇਸਿ. ਰਾਜਾ ‘‘ਕਿਂ ਸਿਪ੍ਪਂ ਨਾਮੇਤਂ, ਤਾਤਾ’’ਤਿ? ਚਕ੍ਕਵਿਦ੍ਧਂ ਨਾਮ, ਦੇਵਾਤਿ. ਅਪਰਮ੍ਪਿ ਦਸ੍ਸੇਹਿ, ਤਾਤਾਤਿ. ਮਹਾਸਤ੍ਤੋ ਸਰਲਟ੍ਠਿਂ ਨਾਮ, ਸਰਰਜ੍ਜੁਂ ਨਾਮ, ਸਰਵੇਧਿਂ ਨਾਮ ਦਸ੍ਸੇਸਿ, ਸਰਪਾਸਾਦਂ ਨਾਮ, ਸਰਸੋਪਾਨਂ ਨਾਮ, ਸਰਮਣ੍ਡਪਂ ਨਾਮ, ਸਰਪਾਕਾਰਂ ਨਾਮ, ਸਰਪੋਕ੍ਖਰਣਿਂ ਨਾਮ ਅਕਾਸਿ, ਸਰਪਦੁਮਂ ਨਾਮ ਪੁਪ੍ਫਾਪੇਸਿ, ਸਰਵਸ੍ਸਂ ਨਾਮ ਵਸ੍ਸਾਪੇਸਿ. ਇਤਿ ਅਞ੍ਞੇਹਿ ਅਸਾਧਾਰਣਾਨਿ ਇਮਾਨਿ ਦ੍ਵਾਦਸ ਸਿਪ੍ਪਾਨਿ ਦਸ੍ਸੇਤ੍ਵਾ ਪੁਨ ਅਞ੍ਞੇਹਿ ਅਸਾਧਾਰਣੇਯੇਵ ਸਤ੍ਤ ਮਹਾਕਾਯੇ ਪਦਾਲੇਸਿ, ਅਟ੍ਠਙ੍ਗੁਲਬਹਲਂ ਉਦੁਮ੍ਬਰਪਦਰਂ ਵਿਜ੍ਝਿ, ਚਤੁਰਙ੍ਗੁਲਬਹਲਂ ਅਸਨਪਦਰਂ, ਦ੍ਵਙ੍ਗੁਲਬਹਲਂ ਤਮ੍ਬਪਟ੍ਟਂ, ਏਕਙ੍ਗੁਲਬਹਲਂ ਅਯਪਟ੍ਟਂ, ਏਕਾਬਦ੍ਧਂ ਫਲਕਸਤਂ ਵਿਨਿਵਿਜ੍ਝਿਤ੍ਵਾ ਪਲਾਲਸਕਟਵਾਲੁਕਸਕਟਪਦਰਸਕਟਾਨਂ ਪੁਰਿਮਭਾਗੇਨ ਸਰਂ ਖਿਪਿਤ੍ਵਾ ਪਚ੍ਛਾਭਾਗੇਨ ਨਿਕ੍ਖਮਾਪੇਸਿ, ਪਚ੍ਛਾਭਾਗੇਨ ਸਰਂ ਖਿਪਿਤ੍ਵਾ ਪੁਰਿਮਭਾਗੇਨ ਨਿਕ੍ਖਮਾਪੇਸਿ, ਉਦਕੇ ਚਤੁਉਸਭਂ, ਥਲੇ ਅਟ੍ਠਉਸਭਟ੍ਠਾਨਂ ਕਣ੍ਡਂ ਪੇਸੇਸਿ. ਵਾਤਿਙ੍ਗਣਸਞ੍ਞਾਯ ਉਸਭਮਤ੍ਤਕੇ ਵਾਲਂ ਵਿਜ੍ਝਿ. ਬੋਧਿਸਤ੍ਤੋ ਸਰੇ ਖਿਪਿਤ੍ਵਾ ਆਕਾਸੇ ਸਰਪਾਸਾਦਾਦੀਨਿ ਕਤ੍ਵਾ ਪੁਨ ਏਕੇਨ ਸਰੇਨ ਤੇ ਸਰੇ ਪਾਤੇਨ੍ਤੋ ਭਙ੍ਗਵਿਭਙ੍ਗੇ ਅਕਾਸੀਤਿ ‘‘ਸਰਭਙ੍ਗੋ’’ਤਿ ਨਾਮ ਪਞ੍ਞਾਤੋ. ਤਸ੍ਸ ਏਤ੍ਤਕਾਨਿ ਸਿਪ੍ਪਾਨਿ ਦਸ੍ਸੇਨ੍ਤਸ੍ਸੇਵ ਸੂਰਿਯੋ ਅਤ੍ਥਙ੍ਗਤੋ.

ਅਥਸ੍ਸ ਰਾਜਾ ਸੇਨਾਪਤਿਟ੍ਠਾਨਂ ਪਟਿਜਾਨਿਤ੍ਵਾ ‘‘ਜੋਤਿਪਾਲ, ਅਜ੍ਜ ਵਿਕਾਲੋ, ਸ੍ਵੇ ਤ੍ਵਂ ਸੇਨਾਪਤਿਟ੍ਠਾਨਂ ਸਕ੍ਕਾਰਂ ਗਣ੍ਹਿਸ੍ਸਸਿ, ਕੇਸਮਸ੍ਸੁਂ ਕਾਰੇਤ੍ਵਾ ਨ੍ਹਤ੍ਵਾ ਏਹੀ’’ਤਿ ਤਂ ਦਿਵਸਂ ਪਰਿਬ੍ਬਯਤ੍ਥਾਯ ਸਤਸਹਸ੍ਸਂ ਅਦਾਸਿ. ਮਹਾਸਤ੍ਤੋ ‘‘ਇਮਿਨਾ ਮਯ੍ਹਂ ਅਤ੍ਥੋ ਨਤ੍ਥੀ’’ਤਿ ਅਟ੍ਠਾਰਸਕੋਟਿਸਙ੍ਖ੍ਯਂ ਧਨਂ ਸਾਮਿਕਾਨਞ੍ਞੇਵ ਦਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨ੍ਹਾਯਿਤੁਂ ਨਦਿਂ ਗਨ੍ਤ੍ਵਾ ਕੇਸਮਸ੍ਸੁਂ ਕਾਰੇਤ੍ਵਾ ਨ੍ਹਤ੍ਵਾ ਸਬ੍ਬਾਲਙ੍ਕਾਰਪ੍ਪਟਿਮਣ੍ਡਿਤੋ ਅਨੋਪਮਾਯ ਸਿਰਿਯਾ ਨਿਵੇਸਨਂ ਪਵਿਸਿਤ੍ਵਾ ਨਾਨਗ੍ਗਰਸਭੋਜਨਂ ਭੁਞ੍ਜਿਤ੍ਵਾ ਸਿਰਿਸਯਨਂ ਅਭਿਰੁਯ੍ਹ ਨਿਪਨ੍ਨੋ ਦ੍ਵੇ ਯਾਮੇ ਸਯਿਤ੍ਵਾ ਪਚ੍ਛਿਮਯਾਮੇ ਪਬੁਦ੍ਧੋ ਉਟ੍ਠਾਯ ਪਲ੍ਲਙ੍ਕਂ ਆਭੁਜਿਤ੍ਵਾ ਸਯਨਪਿਟ੍ਠੇ ਨਿਸਿਨ੍ਨੋਵ ਅਤ੍ਤਨੋ ਸਿਪ੍ਪਸ੍ਸ ਆਦਿਮਜ੍ਝਪਰਿਯੋਸਾਨਂ ਓਲੋਕੇਨ੍ਤੋ ‘‘ਮਮ ਸਿਪ੍ਪਸ੍ਸ ਆਦਿਤੋਵ ਪਰਮਾਰਣਂ ਪਞ੍ਞਾਯਤਿ, ਮਜ੍ਝੇ ਕਿਲੇਸਪਰਿਭੋਗੋ, ਪਰਿਯੋਸਾਨੇ ਨਿਰਯਮ੍ਹਿ ਪਟਿਸਨ੍ਧਿ, ਪਾਣਾਤਿਪਾਤੋ ਕਿਲੇਸਪਰਿਭੋਗੇਸੁ ਚ ਅਧਿਮਤ੍ਤਪ੍ਪਮਾਦੋ ਨਿਰਯੇ ਪਟਿਸਨ੍ਧਿਂ ਦੇਤਿ, ਰਞ੍ਞਾ ਮਯ੍ਹਂ ਮਹਨ੍ਤਂ ਸੇਨਾਪਤਿਟ੍ਠਾਨਂ ਦਿਨ੍ਨਂ, ਮਹਨ੍ਤਂ ਮੇ ਇਸ੍ਸਰਿਯਂ ਭਵਿਸ੍ਸਤਿ, ਭਰਿਯਾ ਚ ਪੁਤ੍ਤਧੀਤਰੋ ਚ ਬਹੂ ਭਵਿਸ੍ਸਨ੍ਤਿ. ਕਿਲੇਸਵਤ੍ਥੁ ਖੋ ਪਨ ਵੇਪੁਲ੍ਲਗਤਂ ਦੁਚ੍ਚਜਂ ਹੋਤਿ, ਇਦਾਨੇਵ ਨਿਕ੍ਖਮਿਤ੍ਵਾ ਏਕਕੋਵ ਅਰਞ੍ਞਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤੁਂ ਯੁਤ੍ਤਂ ਮਯ੍ਹ’’ਨ੍ਤਿ ਮਹਾਸਯਨਤੋ ਉਟ੍ਠਾਯ ਕਞ੍ਚਿ ਅਜਾਨਾਪੇਨ੍ਤੋ ਪਾਸਾਦਾ ਓਰੁਯ੍ਹ ਅਗ੍ਗਦ੍ਵਾਰੇਨ ਨਿਕ੍ਖਮਿਤ੍ਵਾ ਏਕਕੋਵ ਅਰਞ੍ਞਂ ਪਵਿਸਿਤ੍ਵਾ ਗੋਧਾਵਰਿਨਦੀਤੀਰੇ ਤਿਯੋਜਨਿਕਂ ਕਪਿਟ੍ਠਵਨਂ ਸਨ੍ਧਾਯ ਪਾਯਾਸਿ.

ਤਸ੍ਸ ਨਿਕ੍ਖਨ੍ਤਭਾਵਂ ਞਤ੍ਵਾ ਸਕ੍ਕੋ ਵਿਸ੍ਸਕਮ੍ਮਂ ਪਕ੍ਕੋਸਾਪੇਤ੍ਵਾ ‘‘ਤਾਤ, ਜਾਤਿਪਾਲੋ ਅਭਿਨਿਕ੍ਖਮਨਂ ਨਿਕ੍ਖਨ੍ਤੋ, ਮਹਾਸਮਾਗਮੋ ਭਵਿਸ੍ਸਤਿ, ਗੋਧਾਵਰਿਨਦੀਤੀਰੇ ਕਪਿਟ੍ਠਵਨੇ ਅਸ੍ਸਮਂ ਮਾਪੇਤ੍ਵਾ ਪਬ੍ਬਜਿਤਪਰਿਕ੍ਖਾਰੇ ਪਟਿਯਾਦੇਹੀ’’ਤਿ ਆਹ. ਸੋ ਤਥਾ ਅਕਾਸਿ. ਮਹਾਸਤ੍ਤੋ ਤਂ ਠਾਨਂ ਪਤ੍ਵਾ ਏਕਪਦਿਕਮਗ੍ਗਂ ਦਿਸ੍ਵਾ ‘‘ਪਬ੍ਬਜਿਤਾਨਂ ਵਸਨਟ੍ਠਾਨੇਨ ਭਵਿਤਬ੍ਬ’’ਨ੍ਤਿ ਤੇਨ ਮਗ੍ਗੇਨ ਤਤ੍ਥ ਗਨ੍ਤ੍ਵਾ ਕਞ੍ਚਿ ਅਪਸ੍ਸਨ੍ਤੋ ਪਣ੍ਣਸਾਲਂ ਪਵਿਸਿਤ੍ਵਾ ਪਬ੍ਬਜਿਤਪਰਿਕ੍ਖਾਰੇ ਦਿਸ੍ਵਾ ‘‘ਸਕ੍ਕੋ ਦੇਵਰਾਜਾ ਮਮ ਨਿਕ੍ਖਨ੍ਤਭਾਵਂ ਅਞ੍ਞਾਸਿ ਮਞ੍ਞੇ’’ਤਿ ਚਿਨ੍ਤੇਤ੍ਵਾ ਸਾਟਕਂ ਅਪਨੇਤ੍ਵਾ ਰਤ੍ਤਵਾਕਚਿਰਂ ਨਿਵਾਸੇਤ੍ਵਾ ਚ ਪਾਰੁਪਿਤ੍ਵਾ ਚ ਅਜਿਨਚਮ੍ਮਂ ਏਕਂਸਗਤਂ ਅਕਾਸਿ, ਜਟਾਮਣ੍ਡਲਂ ਬਨ੍ਧਿਤ੍ਵਾ ਖਾਰਿਕਾਜਂ ਅਂਸੇ ਕਤ੍ਵਾ ਕਤ੍ਤਰਦਣ੍ਡਂ ਗਹੇਤ੍ਵਾ ਪਣ੍ਣਸਾਲਤੋ ਨਿਕ੍ਖਮਿਤ੍ਵਾ ਚਙ੍ਕਮਂ ਆਰੁਯ੍ਹ ਕਤਿਪਯਵਾਰੇ ਅਪਰਾਪਰਂ ਚਙ੍ਕਮਿਤ੍ਵਾ ਪਬ੍ਬਜ੍ਜਾਸਿਰਿਯਾ ਵਨਂ ਉਪਸੋਭਯਮਾਨੋ ਕਸਿਣਪਰਿਕਮ੍ਮਂ ਕਤ੍ਵਾ ਪਬ੍ਬਜਿਤਤੋ ਸਤ੍ਤਮੇ ਦਿਵਸੇ ਅਟ੍ਠ ਸਮਾਪਤ੍ਤਿਯੋ ਪਞ੍ਚ ਅਭਿਞ੍ਞਾਯੋ ਚ ਨਿਬ੍ਬਤ੍ਤੇਤ੍ਵਾ ਉਞ੍ਛਾਚਰਿਯਾਯ ਵਨਮੂਲਫਲਾਹਾਰੋ ਏਕਕੋਵ ਵਿਹਾਸਿ. ਮਾਤਾਪਿਤਰੋ ਮਿਤ੍ਤਸੁਹਜ੍ਜਾਦਯੋ ਞਾਤਿਵਗ੍ਗਾਪਿਸ੍ਸ ਤਂ ਅਪਸ੍ਸਨ੍ਤਾ ਰੋਦਨ੍ਤਾ ਪਰਿਦੇਵਨ੍ਤਾ ਵਿਚਰਨ੍ਤਿ.

ਅਥੇਕੋ ਵਨਚਰਕੋ ਅਰਞ੍ਞਂ ਪਵਿਸਿਤ੍ਵਾ ਕਪਿਟ੍ਠਕਅਸ੍ਸਮਪਦੇ ਨਿਸਿਨ੍ਨਂ ਮਹਾਸਤ੍ਤਂ ਦਿਸ੍ਵਾ ਸਞ੍ਜਾਨਿਤ੍ਵਾ ਗਨ੍ਤ੍ਵਾ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਨਗਰਂ ਗਨ੍ਤ੍ਵਾ ਤਸ੍ਸ ਮਾਤਾਪਿਤੂਨਂ ਆਰੋਚੇਸਿ. ਤੇ ਰਞ੍ਞੋ ਆਰੋਚਯਿਂਸੁ. ਰਾਜਾ ‘‘ਏਥ ਨਂ ਪਸ੍ਸਿਸ੍ਸਾਮਾ’’ਤਿ ਤਸ੍ਸ ਮਾਤਾਪਿਤਰੋ ਗਹੇਤ੍ਵਾ ਮਹਾਜਨਪਰਿਵੁਤੋ ਵਨਚਰਕੇਨ ਦੇਸਿਤੇਨ ਮਗ੍ਗੇਨ ਗੋਧਾਵਰਿਨਦੀਤੀਰਂ ਪਾਪੁਣਿ. ਬੋਧਿਸਤ੍ਤੋ ਨਦੀਤੀਰਂ ਆਗਨ੍ਤ੍ਵਾ ਆਕਾਸੇ ਨਿਸਿਨ੍ਨੋ ਧਮ੍ਮਂ ਦੇਸੇਤ੍ਵਾ ਤੇ ਸਬ੍ਬੇ ਅਸ੍ਸਮਪਦਂ ਪਵੇਸੇਤ੍ਵਾ ਤਤ੍ਰਪਿ ਤੇਸਂ ਆਕਾਸੇ ਨਿਸਿਨ੍ਨੋਵ ਕਾਮੇਸੁ ਆਦੀਨਵਂ ਪਕਾਸੇਤ੍ਵਾ ਧਮ੍ਮਂ ਦੇਸੇਸਿ. ਰਾਜਾਨਂ ਆਦਿਂ ਕਤ੍ਵਾ ਸਬ੍ਬੇਵ ਪਬ੍ਬਜਿਂਸੁ. ਬੋਧਿਸਤ੍ਤੋ ਇਸਿਗਣਪਰਿਵੁਤੋ ਤਤ੍ਥੇਵ ਵਸਿ. ਅਥਸ੍ਸ ਤਤ੍ਥ ਵਸਨਭਾਵੋ ਸਕਲਜਮ੍ਬੁਦੀਪੇ ਪਾਕਟੋ ਅਹੋਸਿ. ਅਞ੍ਞੇਪਿ ਰਾਜਾਨੋ ਰਟ੍ਠਵਾਸੀਹਿ ਸਦ੍ਧਿਂ ਆਗਨ੍ਤ੍ਵਾ ਤਸ੍ਸ ਸਨ੍ਤਿਕੇ ਪਬ੍ਬਜਿਂਸੁ, ਸਮਾਗਮੋ ਮਹਾ ਅਹੋਸਿ. ਅਨੁਪੁਬ੍ਬੇਨ ਅਨੇਕਸਤਸਹਸ੍ਸਪਰਿਸਾ ਅਹੇਸੁਂ. ਯੋ ਕਾਮਵਿਤਕ੍ਕਂ ਵਾ ਬ੍ਯਾਪਾਦਵਿਤਕ੍ਕਂ ਵਾ ਵਿਹਿਂਸਾਵਿਤਕ੍ਕਂ ਵਾ ਵਿਤਕ੍ਕੇਤਿ, ਮਹਾਸਤ੍ਤੋ ਗਨ੍ਤ੍ਵਾ ਤਸ੍ਸ ਪੁਰਤੋ ਆਕਾਸੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਤਿ, ਕਸਿਣਪਰਿਕਮ੍ਮਂ ਆਚਿਕ੍ਖਤਿ. ਤਸ੍ਸੋਵਾਦੇ ਠਤ੍ਵਾ ਅਟ੍ਠ ਸਮਾਪਤ੍ਤਿਯੋ ਉਪ੍ਪਾਦੇਤ੍ਵਾ ਝਾਨਨਿਪ੍ਫਤ੍ਤਿਂ ਪਤ੍ਤਾ ਸਾਲਿਸ੍ਸਰੋ ਮੇਣ੍ਡਿਸ੍ਸਰੋ ਪਬ੍ਬਤੋ ਕਾਲ਼ਦੇਵਿਲੋ ਕਿਸਵਚ੍ਛੋ ਅਨੁਸਿਸ੍ਸੋ ਨਾਰਦੋਤਿ ਸਤ੍ਤ ਜੇਟ੍ਠਨ੍ਤੇਵਾਸਿਨੋ ਅਹੇਸੁਂ. ਅਪਰਭਾਗੇ ਕਪਿਟ੍ਠਕਅਸ੍ਸਮੋ ਪਰਿਪੂਰਿ. ਇਸਿਗਣਸ੍ਸ ਵਸਨੋਕਾਸੋ ਨਪ੍ਪਹੋਤਿ.

ਅਥ ਮਹਾਸਤ੍ਤੋ ਸਾਲਿਸ੍ਸਰਂ ਆਮਨ੍ਤੇਤ੍ਵਾ ‘‘ਸਾਲਿਸ੍ਸਰ, ਅਯਂ ਅਸ੍ਸਮੋ ਇਸਿਗਣਸ੍ਸ ਨਪ੍ਪਹੋਤਿ, ਤ੍ਵਂ ਇਮਂ ਇਸਿਗਣਂ ਗਹੇਤ੍ਵਾ ਮਜ੍ਝਰਞ੍ਞੋ ਵਿਜਿਤੇ ਕਲਪ੍ਪਚੁਲ੍ਲਕਨਿਗਮਂ ਉਪਨਿਸ੍ਸਾਯ ਵਸਾਹੀ’’ਤਿ ਆਹ. ਸੋ ‘‘ਸਾਧੂ’’ਤਿ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਨੇਕਸਹਸ੍ਸਂ ਇਸਿਗਣਂ ਗਹੇਤ੍ਵਾ ਗਨ੍ਤ੍ਵਾ ਤਤ੍ਥ ਵਾਸਂ ਕਪ੍ਪੇਸਿ. ਮਨੁਸ੍ਸੇਸੁ ਆਗਨ੍ਤ੍ਵਾ ਪਬ੍ਬਜਨ੍ਤੇਸੁ ਪੁਨ ਅਸ੍ਸਮੋ ਪਰਿਪੂਰਿ. ਬੋਧਿਸਤ੍ਤੋ ਮੇਣ੍ਡਿਸ੍ਸਰਂ ਆਮਨ੍ਤੇਤ੍ਵਾ, ‘‘ਮੇਣ੍ਡਿਸ੍ਸਰ, ਤ੍ਵਂ ਇਮਂ ਇਸਿਗਣਂ ਆਦਾਯ ਸੁਰਟ੍ਠਜਨਪਦਸ੍ਸ ਸੀਮਨ੍ਤਰੇ ਸਾਤੋਦਿਕਾ ਨਾਮ ਨਦੀ ਅਤ੍ਥਿ, ਤਸ੍ਸਾ ਤੀਰੇ ਵਸਾਹੀ’’ਤਿ ਉਯ੍ਯੋਜੇਸਿ, ਪੁਨ ਕਪਿਟ੍ਠਕਅਸ੍ਸਮੋ ਪਰਿਪੂਰਿ. ਏਤੇਨੁਪਾਯੇਨ ਤਤਿਯਵਾਰੇ ਪਬ੍ਬਤਂ ਆਮਨ੍ਤੇਤ੍ਵਾ ‘‘ਪਬ੍ਬਤ, ਤ੍ਵਂ ਮਹਾਅਟਵਿਯਂ ਅਞ੍ਜਨਪਬ੍ਬਤੋ ਨਾਮ ਅਤ੍ਥਿ, ਤਂ ਉਪਨਿਸ੍ਸਾਯ ਵਸਾਹੀ’’ਤਿ ਪੇਸੇਸਿ. ਚਤੁਤ੍ਥਵਾਰੇ ਕਾਲ਼ਦੇਵਿਲਂ ਆਮਨ੍ਤੇਤ੍ਵਾ ‘‘ਕਾਲ਼ਦੇਵਿਲ, ਤ੍ਵਂ ਦਕ੍ਖਿਣਪਥੇ ਅਵਨ੍ਤਿਰਟ੍ਠੇ ਘਨਸੇਲਪਬ੍ਬਤੋ ਨਾਮ ਅਤ੍ਥਿ, ਤਂ ਉਪਨਿਸ੍ਸਾਯ ਵਸਾਹੀ’’ਤਿ ਪੇਸੇਸਿ. ਪੁਨ ਕਪਿਟ੍ਠਕਅਸ੍ਸਮੋ ਪਰਿਪੂਰਿ, ਪਞ੍ਚਸੁ ਠਾਨੇਸੁ ਅਨੇਕਸਤਸਹਸ੍ਸਇਸਿਗਣੋ ਅਹੋਸਿ. ਕਿਸਵਚ੍ਛੋ ਪਨ ਮਹਾਸਤ੍ਤਂ ਆਪੁਚ੍ਛਿਤ੍ਵਾ ਦਣ੍ਡਕਿਰਞ੍ਞੋ ਵਿਜਿਤੇ ਕੁਮ੍ਭਵਤਿਨਗਰਂ ਨਾਮ ਅਤ੍ਥਿ, ਤਂ ਉਪਨਿਸ੍ਸਾਯ ਉਯ੍ਯਾਨੇ ਵਿਹਾਸਿ. ਨਾਰਦੋ ਮਜ੍ਝਿਮਦੇਸੇ ਅਞ੍ਜਨਗਿਰਿਨਾਮਕੇ ਪਬ੍ਬਤਜਾਲਨ੍ਤਰੇ ਵਿਹਾਸਿ. ਅਨੁਸਿਸ੍ਸੋ ਪਨ ਮਹਾਸਤ੍ਤਸ੍ਸ ਸਨ੍ਤਿਕੇਵ ਅਹੋਸਿ.

ਤਸ੍ਮਿਂ ਕਾਲੇ ਦਣ੍ਡਕਿਰਾਜਾ ਏਕਂ ਲਦ੍ਧਸਕ੍ਕਾਰਂ ਗਣਿਕਂ ਠਾਨਾ ਚਾਵੇਸਿ. ਸਾ ਅਤ੍ਤਨੋ ਧਮ੍ਮਤਾਯ ਵਿਚਰਨ੍ਤੀ ਉਯ੍ਯਾਨਂ ਗਨ੍ਤ੍ਵਾ ਕਿਸਵਚ੍ਛਤਾਪਸਂ ਦਿਸ੍ਵਾ ‘‘ਅਯਂ ਕਾਲ਼ਕਣ੍ਣੀ ਭਵਿਸ੍ਸਤਿ, ਇਮਸ੍ਸ ਸਰੀਰੇ ਕਲਿਂ ਪਵਾਹੇਤ੍ਵਾ ਨ੍ਹਤ੍ਵਾ ਗਮਿਸ੍ਸਾਮੀ’’ਤਿ ਦਨ੍ਤਕਟ੍ਠਂ ਖਾਦਿਤ੍ਵਾ ਸਬ੍ਬਪਠਮਂ ਤਸ੍ਸੂਪਰਿ ਬਹਲਖੇਲ਼ਂ ਨਿਟ੍ਠੁਭਨ੍ਤੀ ਕਿਸਵਚ੍ਛਤਾਪਸਸ੍ਸ ਜਟਨ੍ਤਰੇ ਨਿਟ੍ਠੁਭਿਤ੍ਵਾ ਦਨ੍ਤਕਟ੍ਠਮ੍ਪਿਸ੍ਸ ਸੀਸੇਯੇਵ ਖਿਪਿਤ੍ਵਾ ਸਯਂ ਸੀਸਂ ਨ੍ਹਾਯਿਤ੍ਵਾ ਗਤਾ. ਰਾਜਾਪਿ ਤਂ ਸਰਿਤ੍ਵਾ ਪੁਨ ਪਾਕਤਿਕਮੇਵ ਅਕਾਸਿ. ਸਾ ਮੋਹਮੂਲ਼੍ਹਾ ਹੁਤ੍ਵਾ ‘‘ਕਾਲ਼ਕਣ੍ਣਿਸਰੀਰੇ ਕਲਿਂ ਪਵਾਹੇਤ੍ਵਾ ਮਮ੍ਪਿ ਰਾਜਾ ਪੁਨ ਠਾਨੇ ਠਪੇਤਿ ਮਯਾ ਯਸੋ ਲਦ੍ਧੋ’’ਤਿ ਸਞ੍ਞਮਕਾਸਿ. ਤਤੋ ਨਚਿਰਸ੍ਸੇਵ ਰਾਜਾ ਪੁਰੋਹਿਤਂ ਠਾਨਤੋ ਚਾਵੇਸਿ. ਸੋ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ‘‘ਤ੍ਵਂ ਕੇਨ ਕਾਰਣੇਨ ਪੁਨ ਠਾਨਂ ਲਭਸੀ’’ਤਿ ਪੁਚ੍ਛਿ. ਅਥਸ੍ਸ ਸਾ ‘‘ਰਾਜੁਯ੍ਯਾਨੇ ਕਾਲ਼ਕਣ੍ਣਿਸਰੀਰੇ ਕਲਿਸ੍ਸ ਪਵਾਹਿਤਤ੍ਤਾ’’ਤਿ ਆਰੋਚੇਸਿ. ਪੁਰੋਹਿਤੋ ਗਨ੍ਤ੍ਵਾ ਤਥੇਵ ਤਸ੍ਸ ਸਰੀਰੇ ਕਲਿਂ ਪਵਾਹੇਸਿ, ਤਮ੍ਪਿ ਰਾਜਾ ਪੁਨ ਠਾਨੇ ਠਪੇਸਿ. ਅਥਸ੍ਸ ਅਪਰਭਾਗੇ ਪਚ੍ਚਨ੍ਤੋ ਕੁਪ੍ਪਿ. ਸੋ ਸੇਨਙ੍ਗਪਰਿਵੁਤੋ ਯੁਦ੍ਧਾਯ ਨਿਕ੍ਖਮਿ. ਅਥ ਨਂ ਮੋਹਮੂਲ਼੍ਹੋ ਪੁਰੋਹਿਤੋ, ‘‘ਮਹਾਰਾਜ, ਕਿਂ ਤੁਮ੍ਹੇ ਜਯਂ ਇਚ੍ਛਥ, ਉਦਾਹੁ ਪਰਾਜਯ’’ਨ੍ਤਿ ਪੁਚ੍ਛਿਤ੍ਵਾ ‘‘ਜਯ’’ਨ੍ਤਿ ਵੁਤ੍ਤੇ – ‘‘ਤੇਨ ਹਿ ਰਾਜੁਯ੍ਯਾਨੇ ਕਾਲ਼ਕਣ੍ਣੀ ਵਸਤਿ, ਤਸ੍ਸ ਸਰੀਰੇ ਕਲਿਂ ਪਵਾਹੇਤ੍ਵਾ ਯਾਹੀ’’ਤਿ ਆਹ. ਸੋ ਤਸ੍ਸ ਕਥਂ ਗਹੇਤ੍ਵਾ ‘‘ਯੇ ਮਯਾ ਸਦ੍ਧਿਂ ਆਗਚ੍ਛਨ੍ਤਿ, ਤੇ ਉਯ੍ਯਾਨੇ ਕਾਲ਼ਕਣ੍ਣਿਸਰੀਰੇ ਕਲਿਂ ਪਵਾਹੇਨ੍ਤੂ’’ਤਿ ਵਤ੍ਵਾ ਉਯ੍ਯਾਨਂ ਪਵਿਸਿਤ੍ਵਾ ਦਨ੍ਤਕਟ੍ਠਂ ਖਾਦਿਤ੍ਵਾ ਸਬ੍ਬਪਠਮਂ ਸਯਮੇਵ ਤਸ੍ਸ ਜਟਨ੍ਤਰੇ ਖੇਲ਼ਂ ਨਿਟ੍ਠੁਭਿਤ੍ਵਾ ਦਨ੍ਤਕਟ੍ਠਞ੍ਚ ਖਿਪਿਤ੍ਵਾ ਸੀਸਂ ਨ੍ਹਾਯਿ. ਬਲਕਾਯੋਪਿਸ੍ਸ ਤਥਾ ਅਕਾਸਿ.

ਤਸ੍ਮਿਂ ਪਕ੍ਕਨ੍ਤੇ ਸੇਨਾਪਤਿ ਗਨ੍ਤ੍ਵਾ ਤਾਪਸਂ ਦਿਸ੍ਵਾ ਦਨ੍ਤਕਟ੍ਠਾਦੀਨਿ ਨੀਹਰਿਤ੍ਵਾ ਸਾਧੁਕਂ ਨ੍ਹਾਪੇਤ੍ਵਾ ‘‘ਭਨ੍ਤੇ, ਰਞ੍ਞੋ ਕਿਂ ਭਵਿਸ੍ਸਤੀ’’ਤਿ ਪੁਚ੍ਛਿ. ਆਵੁਸਾ ਮਯ੍ਹਂ ਮਨੋਪਦੋਸੋ ਨਤ੍ਥਿ, ਦੇਵਤਾ ਪਨ ਕੁਪਿਤਾ ਇਤੋ ਸਤ੍ਤਮੇ ਦਿਵਸੇ ਸਕਲਰਟ੍ਠਂ ਅਰਟ੍ਠਂ ਕਰਿਸ੍ਸਨ੍ਤਿ, ਤ੍ਵਂ ਪੁਤ੍ਤਦਾਰਂ ਗਹੇਤ੍ਵਾ ਸੀਘਂ ਪਲਾਯਿਤ੍ਵਾ ਅਞ੍ਞਤ੍ਥ ਯਾਹੀਤਿ. ਸੋ ਭੀਤਤਸਿਤੋ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ, ਰਾਜਾ ਤਸ੍ਸ ਵਚਨਂ ਨ ਗਣ੍ਹਿ. ਸੋ ਨਿਵਤ੍ਤਿਤ੍ਵਾ ਅਤ੍ਤਨੋ ਗੇਹਂ ਗਨ੍ਤ੍ਵਾ ਪੁਤ੍ਤਦਾਰਂ ਆਦਾਯ ਪਲਾਯਿਤ੍ਵਾ ਅਞ੍ਞਂ ਰਟ੍ਠਂ ਅਗਮਾਸਿ. ਸਰਭਙ੍ਗਸਤ੍ਥਾ ਤਂ ਕਾਰਣਂ ਞਤ੍ਵਾ ਦ੍ਵੇ ਤਰੁਣਤਾਪਸੇ ਪੇਸੇਤ੍ਵਾ ‘‘ਕਿਸਵਚ੍ਛਂ ਮਞ੍ਚਸਿਵਿਕਾਯ ਆਨੇਥਾ’’ਤਿ ਆਕਾਸੇਨ ਆਣਾਪੇਸਿ. ਰਾਜਾ ਯੁਜ੍ਝਿਤ੍ਵਾ ਚੋਰੇ ਗਹੇਤ੍ਵਾ ਨਗਰਮੇਵ ਪਚ੍ਚਾਗਮਿ. ਤਸ੍ਮਿਂ ਆਗਤੇ ਦੇਵਤਾ ਪਠਮਂ ਦੇਵਂ ਵਸ੍ਸਾਪੇਸੁਂ, ਵਸ੍ਸੋਘੇਨ ਸਬ੍ਬਕੁਣਪੇਸੁ ਅਵਹਟੇਸੁ ਸੁਦ੍ਧਵਾਲੁਕਵਸ੍ਸਂ ਵਸ੍ਸਿ, ਸੁਦ੍ਧਵਾਲੁਕਮਤ੍ਥਕੇ ਦਿਬ੍ਬਪੁਪ੍ਫਵਸ੍ਸਂ ਵਸ੍ਸਿ, ਦਿਬ੍ਬਪੁਪ੍ਫਮਤ੍ਥਕੇ ਮਾਸਕਵਸ੍ਸਂ, ਮਾਸਕਮਤ੍ਥਕੇ ਕਹਾਪਣਵਸ੍ਸਂ, ਕਹਾਪਣਮਤ੍ਥਕੇ ਦਿਬ੍ਬਾਭਰਣਵਸ੍ਸਂ ਵਸ੍ਸਿ, ਮਨੁਸ੍ਸਾ ਸੋਮਨਸ੍ਸਪ੍ਪਤ੍ਤਾ ਹਿਰਞ੍ਞਸੁਵਣ੍ਣਾਭਰਣਾਨਿ ਗਣ੍ਹਿਤੁਂ ਆਰਭਿਂਸੁ. ਅਥ ਨੇਸਂ ਸਰੀਰੇ ਸਮ੍ਪਜ੍ਜਲਿਤਂ ਨਾਨਪ੍ਪਕਾਰਂ ਆਵੁਧਵਸ੍ਸਂ ਵਸ੍ਸਿ, ਮਨੁਸ੍ਸਾ ਖਣ੍ਡਾਖਣ੍ਡਿਕਂ ਛਿਜ੍ਜਿਂਸੁ. ਅਥ ਨੇਸਂ ਉਪਰਿ ਮਹਨ੍ਤਮਹਨ੍ਤਾ ਵੀਤਚ੍ਚਿਤਙ੍ਗਾਰਾ ਪਤਿਂਸੁ, ਤੇਸਂ ਉਪਰਿ ਮਹਨ੍ਤਮਹਨ੍ਤਾਨਿ ਪਜ੍ਜਲਿਤਪਬ੍ਬਤਕੂਟਾਨਿ ਪਤਿਂਸੁ, ਤੇਸਂ ਉਪਰਿ ਸਟ੍ਠਿਹਤ੍ਥਟ੍ਠਾਨਂ ਪੂਰਯਨ੍ਤਂ ਸੁਖੁਮਵਾਲੁਕਵਸ੍ਸਂ ਵਸ੍ਸਿ. ਏਵਂ ਸਟ੍ਠਿਯੋਜਨਟ੍ਠਾਨਂ ਅਰਟ੍ਠਂ ਅਹੋਸਿ, ਤਸ੍ਸ ਏਵਂ ਅਰਟ੍ਠਭਾਵੋ ਸਕਲਜਮ੍ਬੁਦੀਪੇ ਪਞ੍ਞਾਯਿ.

ਅਥ ਤਸ੍ਸ ਰਟ੍ਠਸ੍ਸ ਅਨਨ੍ਤਰਰਟ੍ਠਾਧਿਪਤਿਨੋ ਕਾਲਿਙ੍ਗੋ, ਅਟ੍ਠਕੋ, ਭੀਮਰਥੋਤਿ ਤਯੋ ਰਾਜਾਨੋ ਚਿਨ੍ਤਯਿਂਸੁ – ‘‘ਪੁਬ੍ਬੇ ਬਾਰਾਣਸਿਯਂ ਕਲਾਬੁਕਾਸਿਕਰਾਜਾ ਖਨ੍ਤਿਵਾਦਿਤਾਪਸੇ ਅਪਰਜ੍ਝਿਤ੍ਵਾ ਪਥਵਿਂ ਪਵਿਟ੍ਠੋਤਿ ਸੂਯਤਿ, ਤਥਾ ‘‘ਨਾਲ਼ਿਕੇਰਰਾਜਾ ਤਾਪਸੇ ਸੁਨਖੇਹਿ ਖਾਦਾਪੇਤ੍ਵਾ, ਸਹਸ੍ਸਬਾਹੁ ਅਜ੍ਜੁਨੋ ਚ ਅਙ੍ਗੀਰਸੇ ਅਪਰਜ੍ਝਿਤ੍ਵਾ, ਇਦਾਨਿ ਦਣ੍ਡਕਿਰਾਜਾ ਕਿਸਵਚ੍ਛੇ ਅਪਰਜ੍ਝਿਤ੍ਵਾ ਸਹ ਰਟ੍ਠੇਨ ਵਿਨਾਸਂ ਪਤ੍ਤੋ’’ਤਿ ਸੂਯਤਿ. ਇਮੇਸਂ ਪਨ ਚਤੁਨ੍ਨਂ ਰਾਜੂਨਂ ਨਿਬ੍ਬਤ੍ਤਟ੍ਠਾਨਂ ਮਯਂ ਨ ਜਾਨਾਮ, ਤਂ ਨੋ ਠਪੇਤ੍ਵਾ ਸਰਭਙ੍ਗਸਤ੍ਥਾਰਂ ਅਞ੍ਞੋ ਕਥੇਤੁਂ ਸਮਤ੍ਥੋ ਨਾਮ ਨਤ੍ਥਿ, ਤਂ ਉਪਸਙ੍ਕਮਿਤ੍ਵਾ ਇਮੇ ਪਞ੍ਹੇ ਪੁਚ੍ਛਿਸ੍ਸਾਮਾ’’ਤਿ. ਤੇ ਤਯੋਪਿ ਮਹਨ੍ਤੇਨ ਪਰਿਵਾਰੇਨ ਪਞ੍ਹਪੁਚ੍ਛਨਤ੍ਥਾਯ ਨਿਕ੍ਖਮਿਂਸੁ. ਤੇ ਪਨ ‘‘ਅਸੁਕੋਪਿ ਨਿਕ੍ਖਨ੍ਤੋ’’ਤਿ ਨ ਜਾਨਨ੍ਤਿ, ਏਕੇਕੋ ‘‘ਅਹਮੇਵ ਗਚ੍ਛਾਮੀ’’ਤਿ ਮਞ੍ਞਤਿ, ਤੇਸਂ ਗੋਧਾਵਰਿਨਦਿਤੋ ਅਵਿਦੂਰੇ ਸਮਾਗਮੋ ਅਹੋਸਿ. ਤੇ ਰਥੇਹਿ ਓਤਰਿਤ੍ਵਾ ਤਯੋਪਿ ਏਕਮੇਵ ਰਥਂ ਅਭਿਰੁਯ੍ਹ ਗੋਧਾਵਰਿਨਦੀਤੀਰਂ ਸਮ੍ਪਾਪੁਣਿਂਸੁ.

ਤਸ੍ਮਿਂ ਖਣੇ ਸਕ੍ਕੋ ਪਣ੍ਡੁਕਮ੍ਬਲਸਿਲਾਸਨੇ ਨਿਸਿਨ੍ਨੋ ਸਤ੍ਤ ਪਞ੍ਹੇ ਚਿਨ੍ਤੇਤ੍ਵਾ ‘‘ਇਮੇ ਪਞ੍ਹੇ ਠਪੇਤ੍ਵਾ ਸਰਭਙ੍ਗਸਤ੍ਥਾਰਂ ਅਞ੍ਞੋ ਸਦੇਵਕੇ ਲੋਕੇ ਕਥੇਤੁਂ ਸਮਤ੍ਥੋ ਨਾਮ ਨਤ੍ਥਿ, ਤਂ ਇਮੇ ਪਞ੍ਹੇ ਪੁਚ੍ਛਿਸ੍ਸਾਮਿ, ਇਮੇਪਿ ਤਯੋ ਰਾਜਾਨੋ ਸਰਭਙ੍ਗਸਤ੍ਥਾਰਂ ਪਞ੍ਹਂ ਪੁਚ੍ਛਿਤੁਂ ਗੋਧਾਵਰਿਨਦੀਤੀਰਂ ਪਤ੍ਤਾ, ਏਤੇਸਂ ਪਞ੍ਹੇਪਿ ਅਹਮੇਵ ਪੁਚ੍ਛਿਸ੍ਸਾਮੀ’’ਤਿ ਦ੍ਵੀਸੁ ਦੇਵਲੋਕੇਸੁ ਦੇਵਤਾਹਿ ਪਰਿਵੁਤੋ ਦੇਵਲੋਕਤੋ ਓਤਰਿ. ਤਂ ਦਿਵਸਮੇਵ ਕਿਸਵਚ੍ਛੋ ਕਾਲਮਕਾਸਿ. ਤਸ੍ਸ ਸਰੀਰਕਿਚ੍ਚਂ ਕਾਰੇਤੁਂ ਚਤੂਸੁ ਠਾਨੇਸੁ ਅਨੇਕਸਹਸ੍ਸਾ ਇਸਯੋ ਤਤ੍ਥੇਵ ਗਨ੍ਤ੍ਵਾ ਪਞ੍ਚਸੁ ਠਾਨੇਸੁ ਮਣ੍ਡਪਞ੍ਚ ਕਾਰੇਤ੍ਵਾ ਅਨੇਕਸਹਸ੍ਸਾ ਇਸਿਗਣਾ ਕਿਸਵਚ੍ਛਸ੍ਸ ਤਾਪਸਸ੍ਸ ਚਨ੍ਦਨਚਿਤਕਂ ਕਤ੍ਵਾ ਸਰੀਰਂ ਝਾਪੇਸੁਂ. ਆਲ਼ਾਹਨਸ੍ਸ ਸਮਨ੍ਤਾ ਅਡ੍ਢਯੋਜਨਮਤ੍ਤੇ ਠਾਨੇ ਦਿਬ੍ਬਕੁਸੁਮਵਸ੍ਸਂ ਵਸ੍ਸਿ. ਮਹਾਸਤ੍ਤੋ ਤਸ੍ਸ ਸਰੀਰਨਿਕ੍ਖੇਪਂ ਕਾਰਾਪੇਤ੍ਵਾ ਅਸ੍ਸਮਂ ਪਵਿਸਿਤ੍ਵਾ ਤੇਹਿ ਇਸਿਗਣੇਹਿ ਪਰਿਵੁਤੋ ਨਿਸੀਦਿ. ਤੇਸਮ੍ਪਿ ਰਾਜੂਨਂ ਨਦੀਤੀਰਂ ਆਗਤਕਾਲੇ ਮਹਾਸੇਨਾਵਾਹਨਤੂਰਿਯਸਦ੍ਦੋ ਅਹੋਸਿ. ਮਹਾਸਤ੍ਤੋ ਤਂ ਸੁਤ੍ਵਾ ਅਨੁਸਿਸ੍ਸਂ ਤਾਪਸਂ ਆਮਨ੍ਤੇਤ੍ਵਾ ‘‘ਤਾਤ, ਤ੍ਵਂ ਗਨ੍ਤ੍ਵਾ ਤਾਵ ਜਾਨਾਹਿ, ਕਿਂ ਸਦ੍ਦੋ ਨਾਮੇਸੋ’’ਤਿ ਆਹ. ਸੋ ਪਾਨੀਯਘਟਂ ਆਦਾਯ ਤਤ੍ਥ ਗਨ੍ਤ੍ਵਾ ਤੇ ਰਾਜਾਨੋ ਦਿਸ੍ਵਾ ਪੁਚ੍ਛਨਵਸੇਨ ਪਠਮਂ ਗਾਥਮਾਹ –

੫੦.

‘‘ਅਲਙ੍ਕਤਾ ਕੁਣ੍ਡਲਿਨੋ ਸੁਵਤ੍ਥਾ, ਵੇਲ਼ੁਰਿਯਮੁਤ੍ਤਾਥਰੁਖਗ੍ਗਬਨ੍ਧਾ;

ਰਥੇਸਭਾ ਤਿਟ੍ਠਥ ਕੇ ਨੁ ਤੁਮ੍ਹੇ, ਕਥਂ ਵੋ ਜਾਨਨ੍ਤਿ ਮਨੁਸ੍ਸਲੋਕੇ’’ਤਿ.

ਤਤ੍ਥ ਵੇਲ਼ੁਰਿਯਮੁਤ੍ਤਾਥਰੁਖਗ੍ਗਬਨ੍ਧਾਤਿ ਵੇਲ਼ੁਰਿਯਮਣੀਹਿ ਚੇਵ ਮੁਤ੍ਤਾਲਮ੍ਬਕੇਹਿ ਚ ਅਲਙ੍ਕਤਥਰੂਹਿ ਖਗ੍ਗਰਤਨੇਹਿ ਸਮਨ੍ਨਾਗਤਾ. ਤਿਟ੍ਠਥਾਤਿ ਏਕਸ੍ਮਿਂ ਰਥੇ ਤਿਟ੍ਠਥ. ਕੇ ਨੂਤਿ ਕੇ ਨਾਮ ਤੁਮ੍ਹੇ, ਕਥਂ ਵੋ ਸਞ੍ਜਾਨਨ੍ਤੀਤਿ?

ਤੇ ਤਸ੍ਸ ਵਚਨਂ ਸੁਤ੍ਵਾ ਰਥਾ ਓਤਰਿਤ੍ਵਾ ਵਨ੍ਦਿਤ੍ਵਾ ਅਟ੍ਠਂਸੁ. ਤੇਸੁ ਅਟ੍ਠਕਰਾਜਾ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਦੁਤਿਯਂ ਗਾਥਮਾਹ –

੫੧.

‘‘ਅਹਮਟ੍ਠਕੋ ਭੀਮਰਥੋ ਪਨਾਯਂ, ਕਾਲਿਙ੍ਗਰਾਜਾ ਪਨ ਉਗ੍ਗਤੋਯਂ;

ਸੁਸਞ੍ਞਤਾਨਂ ਇਸੀਨਂ ਦਸ੍ਸਨਾਯ, ਇਧਾਗਤਾ ਪੁਚ੍ਛਿਤਾਯੇਮ੍ਹ ਪਞ੍ਹੇ’’ਤਿ.

ਤਤ੍ਥ ਉਗ੍ਗਤੋਤਿ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਪਾਕਟੋ ਪਞ੍ਞਾਤੋ. ਸੁਸਞ੍ਞਤਾਨਂ ਇਸੀਨਨ੍ਤਿ, ਭਨ੍ਤੇ, ਨ ਮਯਂ ਵਨਕੀਲ਼ਾਦੀਨਂ ਅਤ੍ਥਾਯ ਆਗਤਾ, ਅਥ ਖੋ ਕਾਯਾਦੀਹਿ ਸੁਸਞ੍ਞਤਾਨਂ ਸੀਲਸਮ੍ਪਨ੍ਨਾਨਂ ਇਸੀਨਂ ਦਸ੍ਸਨਤ੍ਥਾਯ ਇਧਾਗਤਾ. ਪੁਚ੍ਛਿਤਾਯੇਮ੍ਹ ਪਞ੍ਹੇਤਿ ਸਰਭਙ੍ਗਸਤ੍ਥਾਰਂ ਪਞ੍ਹੇ ਪੁਚ੍ਛਿਤੁਂ ਏਮ੍ਹ, ਆਗਤਾਮ੍ਹਾਤਿ ਅਤ੍ਥੋ. ਯ-ਕਾਰੋ ਬ੍ਯਞ੍ਜਨਸਨ੍ਧਿਕਰੋਤਿ ਵੇਦਿਤਬ੍ਬੋ.

ਅਥ ਨੇ ਤਾਪਸੋ ‘‘ਸਾਧੁ ਮਹਾਰਾਜਾ, ਆਗਨ੍ਤਬ੍ਬਟ੍ਠਾਨਞ੍ਞੇਵ ਆਗਤਾਤ੍ਥ, ਤੇਨ ਹਿ ਨ੍ਹਤ੍ਵਾ ਵਿਸ੍ਸਮਿਤ੍ਵਾ ਅਸ੍ਸਮਪਦਂ ਪਵਿਸਿਤ੍ਵਾ ਇਸਿਗਣਂ ਵਨ੍ਦਿਤ੍ਵਾ ਸਰਭਙ੍ਗਸਤ੍ਥਾਰਮੇਵ ਪਞ੍ਹਂ ਪੁਚ੍ਛਥਾ’’ਤਿ ਤੇਹਿ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਪਾਨੀਯਘਟਂ ਉਕ੍ਖਿਪਿਤ੍ਵਾ ਉਦਕਥੇਵੇ ਪੁਞ੍ਛਨ੍ਤੋ ਆਕਾਸਂ ਓਲੋਕੇਨ੍ਤੋ ਸਕ੍ਕਂ ਦੇਵਰਾਜਾਨਂ ਦੇਵਗਣਪਰਿਵੁਤਂ ਏਰਾਵਣਕ੍ਖਨ੍ਧਵਰਗਤਂ ਓਤਰਨ੍ਤਂ ਦਿਸ੍ਵਾ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਤਤਿਯਂ ਗਾਥਮਾਹ –

੫੨.

‘‘ਵੇਹਾਯਸਂ ਤਿਟ੍ਠਸਿ ਅਨ੍ਤਲਿਕ੍ਖੇ, ਪਥਦ੍ਧੁਨੋ ਪਨ੍ਨਰਸੇਵ ਚਨ੍ਦੋ;

ਪੁਚ੍ਛਾਮਿ ਤਂ ਯਕ੍ਖ ਮਹਾਨੁਭਾਵ, ਕਤਂ ਤਂ ਜਾਨਨ੍ਤਿ ਮਨੁਸ੍ਸਲੋਕੇ’’ਤਿ.

ਤਤ੍ਥ ਵੇਹਾਯਸਨ੍ਤਿ ਅਬ੍ਭੁਗ੍ਗਨ੍ਤ੍ਵਾ ਅਨ੍ਤਲਿਕ੍ਖੇ ਆਕਾਸੇ ਤਿਟ੍ਠਸਿ. ਪਥਦ੍ਧੁਨੋਤਿ ਪਥਦ੍ਧਗਤੋ, ਅਦ੍ਧਪਥੇ ਗਗਨਮਜ੍ਝੇ ਠਿਤੋਤਿ ਅਤ੍ਥੋ.

ਤਂ ਸੁਤ੍ਵਾ ਸਕ੍ਕੋ ਚਤੁਤ੍ਥਂ ਗਾਥਮਾਹ –

੫੩.

‘‘ਯਮਾਹੁ ਦੇਵੇਸੁ ‘ਸੁਜਮ੍ਪਤੀ’ਤਿ, ‘ਮਘਵਾ’ਤਿ ਤਂ ਆਹੁ ਮਨੁਸ੍ਸਲੋਕੇ;

ਸ ਦੇਵਰਾਜਾ ਇਦਮਜ੍ਜ ਪਤ੍ਤੋ, ਸੁਸਞ੍ਞਤਾਨਂ ਇਸੀਨਂ ਦਸ੍ਸਨਾਯਾ’’ਤਿ.

ਤਤ੍ਥ ਸ ਦੇਵਰਾਜਾਤਿ ਸੋ ਅਹਂ ਸਕ੍ਕੋ ਦੇਵਰਾਜਾ. ਇਦਮਜ੍ਜ ਪਤ੍ਤੋਤਿ ਇਦਂ ਠਾਨਂ ਅਜ੍ਜ ਆਗਤੋ. ਦਸ੍ਸਨਾਯਾਤਿ ਦਸ੍ਸਨਤ੍ਥਾਯ ਵਨ੍ਦਨਤ੍ਥਾਯ ਸਰਭਙ੍ਗਸਤ੍ਥਾਰਞ੍ਚ ਪਞ੍ਹਂ ਪੁਚ੍ਛਨਤ੍ਥਾਯਾਤਿ ਆਹ.

ਅਥ ਨਂ ਅਨੁਸਿਸ੍ਸੋ ‘‘ਸਾਧੁ, ਮਹਾਰਾਜ, ਤੁਮ੍ਹੇ ਪਚ੍ਛਾ ਆਗਚ੍ਛਥਾ’’ਤਿ ਵਤ੍ਵਾ ਪਾਨੀਯਘਟਂ ਆਦਾਯ ਅਸ੍ਸਮਪਦਂ ਪਵਿਸਿਤ੍ਵਾ ਪਾਨੀਯਘਟਂ ਪਟਿਸਾਮੇਤ੍ਵਾ ਤਿਣ੍ਣਂ ਰਾਜੂਨਂ ਦੇਵਰਾਜਸ੍ਸ ਚ ਪਞ੍ਹਪੁਚ੍ਛਨਤ੍ਥਾਯ ਆਗਤਭਾਵਂ ਮਹਾਸਤ੍ਤਸ੍ਸ ਆਰੋਚੇਸਿ. ਸੋ ਇਸਿਗਣਪਰਿਵੁਤੋ ਮਹਾਵਿਸਾਲਮਾਲ਼ਕੇ ਨਿਸੀਦਿ. ਤਯੋ ਰਾਜਾਨੋ ਆਗਨ੍ਤ੍ਵਾ ਇਸਿਗਣਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਸਕ੍ਕੋਪਿ ਓਤਰਿਤ੍ਵਾ ਇਸਿਗਣਂ ਉਪਸਙ੍ਕਮਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਠਿਤੋ ਇਸਿਗਣਂ ਵਣ੍ਣੇਤ੍ਵਾ ਵਨ੍ਦਮਾਨੋ ਪਞ੍ਚਮਂ ਗਾਥਮਾਹ –

੫੪.

‘‘ਦੂਰੇ ਸੁਤਾ ਨੋ ਇਸਯੋ ਸਮਾਗਤਾ, ਮਹਿਦ੍ਧਿਕਾ ਇਦ੍ਧਿਗੁਣੂਪਪਨ੍ਨਾ;

ਵਨ੍ਦਾਮਿ ਤੇ ਅਯਿਰੇ ਪਸਨ੍ਨਚਿਤ੍ਤੋ, ਯੇ ਜੀਵਲੋਕੇਤ੍ਥ ਮਨੁਸ੍ਸਸੇਟ੍ਠਾ’’ਤਿ.

ਤਤ੍ਥ ਦੂਰੇ ਸੁਤਾ ਨੋਤਿ, ਭਨ੍ਤੇ, ਅਮ੍ਹੇਹਿ ਤੁਮ੍ਹੇ ਦੂਰੇ ਦੇਵਲੋਕੇ ਠਿਤੇਹਿਯੇਵ ਸੁਤਾਤਿ ਮਮਾਯਨ੍ਤੋ ਏਵਮਾਹ. ਇਦਂ ਵੁਤ੍ਤਂ ਹੋਤਿ – ਇਮੇ ਇਧ ਸਮਾਗਤਾ ਅਮ੍ਹਾਕਂ ਇਸਯੋ ਦੂਰੇ ਸੁਤਾ ਯਾਵ ਬ੍ਰਹ੍ਮਲੋਕਾ ਵਿਸ੍ਸੁਤਾ ਪਾਕਟਾਤਿ. ਮਹਿਦ੍ਧਿਕਾਤਿ ਮਹਾਨੁਭਾਵਾ. ਇਦ੍ਧਿਗੁਣੂਪਪਨ੍ਨਾਤਿ ਪਞ੍ਚਵਿਧੇਨ ਇਦ੍ਧਿਗੁਣੇਨ ਸਮਨ੍ਨਾਗਤਾ. ਅਯਿਰੇਤਿ, ਅਯ੍ਯੇ. ਯੇਤਿ ਯੇ ਤੁਮ੍ਹੇ ਇਮਸ੍ਮਿਂ ਜੀਵਲੋਕੇ ਮਨੁਸ੍ਸੇਸੁ ਸੇਟ੍ਠਾਤਿ.

ਏਵਂ ਇਸਿਗਣਂ ਵਣ੍ਣੇਤ੍ਵਾ ਸਕ੍ਕੋ ਛ ਨਿਸਜ੍ਜਦੋਸੇ ਪਰਿਹਰਨ੍ਤੋ ਏਕਮਨ੍ਤਂ ਨਿਸੀਦਿ. ਅਥ ਨਂ ਇਸੀਨਂ ਅਧੋਵਾਤੇ ਨਿਸਿਨ੍ਨਂ ਦਿਸ੍ਵਾ ਅਨੁਸਿਸ੍ਸੋ ਛਟ੍ਠਂ ਗਾਥਮਾਹ –

੫੫.

‘‘ਗਨ੍ਧੋ ਇਸੀਨਂ ਚਿਰਦਿਕ੍ਖਿਤਾਨਂ, ਕਾਯਾ ਚੁਤੋ ਗਚ੍ਛਤਿ ਮਾਲੁਤੇਨ;

ਇਤੋ ਪਟਿਕ੍ਕਮ੍ਮ ਸਹਸ੍ਸਨੇਤ੍ਤ, ਗਨ੍ਧੋ ਇਸੀਨਂ ਅਸੁਚਿ ਦੇਵਰਾਜਾ’’ਤਿ.

ਤਤ੍ਥ ਚਿਰਦਿਕ੍ਖਿਤਾਨਨ੍ਤਿ ਚਿਰਪਬ੍ਬਜਿਤਾਨਂ. ਪਟਿਕ੍ਕਮ੍ਮਾਤਿ ਪਟਿਕ੍ਕਮ ਅਪੇਹਿ. ਸਹਸ੍ਸਨੇਤ੍ਤਾਤਿ ਆਲਪਨਮੇਤਂ. ਸਕ੍ਕੋ ਹਿ ਅਮਚ੍ਚਸਹਸ੍ਸੇਹਿ ਚਿਨ੍ਤਿਤਂ ਅਤ੍ਥਂ ਏਕਕੋਵ ਪਸ੍ਸਤਿ, ਤਸ੍ਮਾ ‘‘ਸਹਸ੍ਸਨੇਤ੍ਤੋ’’ਤਿ ਵੁਚ੍ਚਤਿ. ਅਥ ਵਾ ਸਹਸ੍ਸਨੇਤ੍ਤਾਨਂ ਪਨ ਦੇਵਾਨਂ ਦਸ੍ਸਨੂਪਚਾਰਾਤਿਕ੍ਕਮਨਸਮਤ੍ਥੋਤਿ ਸਹਸ੍ਸਨੇਤ੍ਤਾ. ਅਸੁਚੀਤਿ ਸੇਦਮਲਾਦੀਹਿ ਪਰਿਭਾਵਿਤਤ੍ਤਾ ਦੁਗ੍ਗਨ੍ਧੋ, ਤੁਮ੍ਹੇ ਚ ਸੁਚਿਕਾਮਾ, ਤੇਨ ਵੋ ਏਸ ਗਨ੍ਧੋ ਬਾਧਤੀਤਿ.

ਤਂ ਸੁਤ੍ਵਾ ਸਕ੍ਕੋ ਇਤਰਂ ਗਾਥਮਾਹ –

੫੬.

‘‘ਗਨ੍ਧੋ ਇਸੀਨਂ ਚਿਰਦਿਕ੍ਖਿਤਾਨਂ, ਕਾਯਾ ਚੁਤੋ ਗਚ੍ਛਤੁ ਮਾਲੁਤੇਨ;

ਵਿਚਿਤ੍ਤਪੁਪ੍ਫਂ ਸੁਰਭਿਂਵ ਮਾਲਂ, ਗਨ੍ਧਞ੍ਚ ਏਤਂ ਪਾਟਿਕਙ੍ਖਾਮ ਭਨ੍ਤੇ;

ਨ ਹੇਤ੍ਥ ਦੇਵਾ ਪਟਿਕ੍ਕੂਲਸਞ੍ਞਿਨੋ’’ਤਿ.

ਤਤ੍ਥ ਗਚ੍ਛਤੂਤਿ ਯਥਾਸੁਖਂ ਪਵਤ੍ਤਤੁ, ਨਾਸਪੁਟਂ ਨੋ ਪਹਰਤੂਤਿ ਅਤ੍ਥੋ. ਪਾਟਿਕਙ੍ਖਾਮਾਤਿ ਇਚ੍ਛਾਮ ਪਤ੍ਥੇਮ. ਏਤ੍ਥਾਤਿ ਏਤਸ੍ਮਿਂ ਗਨ੍ਧੇ ਦੇਵਾ ਜਿਗੁਚ੍ਛਸਞ੍ਞਿਨੋ ਨ ਹੋਨ੍ਤਿ. ਦੁਸ੍ਸੀਲੇਯੇਵ ਹਿ ਦੇਵਾ ਜਿਗੁਚ੍ਛਨ੍ਤਿ, ਨ ਸੀਲਵਨ੍ਤੇਤਿ.

ਏਵਞ੍ਚ ਪਨ ਵਤ੍ਵਾ ‘‘ਭਨ੍ਤੇ, ਅਨੁਸਿਸ੍ਸ ਅਹਂ ਮਹਨ੍ਤੇਨ ਉਸ੍ਸਾਹੇਨ ਪਞ੍ਹਂ ਪੁਚ੍ਛਿਤੁਂ ਆਗਤੋ, ਓਕਾਸਂ ਮੇ ਕਰੋਹੀ’’ਤਿ ਆਹ. ਸੋ ਤਸ੍ਸ ਵਚਨਂ ਸੁਤ੍ਵਾ ਉਟ੍ਠਾਯਾਸਨਾ ਇਸਿਗਣਂ ਓਕਾਸਂ ਕਰੋਨ੍ਤੋ ਗਾਥਾਦ੍ਵਯਮਾਹ –

੫੭.

‘‘ਪੁਰਿਨ੍ਦਦੋ ਭੂਤਪਤੀ ਯਸਸ੍ਸੀ, ਦੇਵਾਨਮਿਨ੍ਦੋ ਸਕ੍ਕੋ ਮਘਵਾ ਸੁਜਮ੍ਪਤਿ;

ਸ ਦੇਵਰਾਜਾ ਅਸੁਰਗਣਪ੍ਪਮਦ੍ਦਨੋ, ਓਕਾਸਮਾਕਙ੍ਖਤਿ ਪਞ੍ਹ ਪੁਚ੍ਛਿਤੁਂ.

੫੮.

‘‘ਕੋ ਨੇਵਿਮੇਸਂ ਇਧ ਪਣ੍ਡਿਤਾਨਂ, ਪਞ੍ਹੇ ਪੁਟ੍ਠੋ ਨਿਪੁਣੇ ਬ੍ਯਾਕਰਿਸ੍ਸਤਿ;

ਤਿਣਞ੍ਚ ਰਞ੍ਞਂ ਮਨੁਜਾਧਿਪਾਨਂ, ਦੇਵਾਨਮਿਨ੍ਦਸ੍ਸ ਚ ਵਾਸਵਸ੍ਸਾ’’ਤਿ.

ਤਤ੍ਥ ‘‘ਪੁਰਿਨ੍ਦਦੋ’’ਤਿਆਦੀਨਿ ਸਕ੍ਕਸ੍ਸੇਵ ਗੁਣਨਾਮਾਨਿ. ਸੋ ਹਿ ਪੁਰੇ ਦਾਨਂ ਦਿਨ੍ਨਤ੍ਤਾ ਪੁਰਿਨ੍ਦਦੋ, ਭੂਤੇਸੁ ਜੇਟ੍ਠਕਤ੍ਤਾ ਭੂਤਪਤਿ, ਪਰਿਵਾਰਸਮ੍ਪਦਾਯ ਯਸਸ੍ਸੀ, ਪਰਮਿਸ੍ਸਰਤਾਯ ਦੇਵਾਨਮਿਨ੍ਦੋ, ਸਤ੍ਤਨ੍ਨਂ ਵਤ੍ਤਪਦਾਨਂ ਸੁਟ੍ਠੁ ਕਤਤ੍ਤਾ ਸਕ੍ਕੋ, ਪੁਰਿਮਜਾਤਿਵਸੇਨ ਮਘਵਾ, ਸੁਜਾਯ ਅਸੁਰਕਞ੍ਞਾਯ ਪਤਿਭਾਵੇਨ ਸੁਜਮ੍ਪਤਿ, ਦੇਵਾਨਂ ਰਞ੍ਜਨਤਾਯ ਦੇਵਰਾਜਾ. ਕੋ ਨੇਵਾਤਿ ਕੋ ਨੁ ਏਵ. ਨਿਪੁਣੇਤਿ ਸਣ੍ਹਸੁਖੁਮੇ ਪਞ੍ਹੇ. ਰਞ੍ਞਨ੍ਤਿ ਰਾਜੂਨਂ. ਇਮੇਸਂ ਚਤੁਨ੍ਨਂ ਰਾਜੂਨਂ ਮਨਂ ਗਹੇਤ੍ਵਾ ਕੋ ਇਮੇਸਂ ਪਣ੍ਡਿਤਾਨਂ ਇਸੀਨਂ ਪਞ੍ਹੇ ਕਥੇਸ੍ਸਤਿ, ਪਞ੍ਹਂ ਨੇਸਂ ਕਥੇਤੁਂ ਸਮਤ੍ਥਂ ਜਾਨਾਥਾਤਿ ਵਦਤਿ.

ਤਂ ਸੁਤ੍ਵਾ ਇਸਿਗਣੋ, ‘‘ਮਾਰਿਸ, ਅਨੁਸਿਸ੍ਸ ਤ੍ਵਂ ਪਥਵਿਯਂ ਠਤ੍ਵਾ ਪਥਵਿਂ ਅਪਸ੍ਸਨ੍ਤੋ ਵਿਯ ਕਥੇਸਿ, ਠਪੇਤ੍ਵਾ ਸਰਭਙ੍ਗਸਤ੍ਥਾਰਂ ਕੋ ਅਞ੍ਞੋ ਏਤੇਸਂ ਪਞ੍ਹਂ ਕਥੇਤੁਂ ਸਮਤ੍ਥੋ’’ਤਿ ਵਤ੍ਵਾ ਗਾਥਮਾਹ –

੫੯.

‘‘ਅਯਂ ਇਸਿ ਸਰਭਙ੍ਗੋ ਤਪਸ੍ਸੀ, ਯਤੋ ਜਾਤੋ ਵਿਰਤੋ ਮੇਥੁਨਸ੍ਮਾ;

ਆਚੇਰਪੁਤ੍ਤੋ ਸੁਵਿਨੀਤਰੂਪੋ, ਸੋ ਨੇਸਂ ਪਞ੍ਹਾਨਿ ਵਿਯਾਕਰਿਸ੍ਸਤੀ’’ਤਿ.

ਤਤ੍ਥ ਸਰਭਙ੍ਗੋਤਿ ਸਰੇ ਖਿਪਿਤ੍ਵਾ ਆਕਾਸੇ ਸਰਪਾਸਾਦਾਦੀਨਿ ਕਤ੍ਵਾ ਪੁਨ ਏਕੇਨ ਸਰੇਨ ਤੇ ਸਰੇ ਪਾਤੇਨ੍ਤੋ ਭਙ੍ਗਵਿਭਙ੍ਗੇ ਅਕਾਸੀਤਿ ਸਰਭਙ੍ਗੋ. ਮੇਥੁਨਸ੍ਮਾਤਿ ਮੇਥੁਨਧਮ੍ਮਤੋ. ਸੋ ਕਿਰ ਮੇਥੁਨਂ ਅਸੇਵਿਤ੍ਵਾ ਪਬ੍ਬਜਿਤੋ. ਆਚੇਰਪੁਤ੍ਤੋਤਿ ਰਞ੍ਞੋ ਆਚਰਿਯਸ੍ਸ ਪੁਰੋਹਿਤਸ੍ਸ ਪੁਤ੍ਤੋ.

ਏਵਞ੍ਚ ਪਨ ਵਤ੍ਵਾ ਇਸਿਗਣੋ ਅਨੁਸਿਸ੍ਸਂ ਆਹ – ‘‘ਮਾਰਿਸ, ਤ੍ਵਮੇਵ ਸਤ੍ਥਾਰਂ ਵਨ੍ਦਿਤ੍ਵਾ ਇਸਿਗਣਸ੍ਸ ਵਚਨੇਨ ਸਕ੍ਕੇਨ ਪੁਚ੍ਛਿਤਪਞ੍ਹਕਥਨਾਯ ਓਕਾਸਂ ਕਾਰੇਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਓਕਾਸਂ ਕਾਰੇਨ੍ਤੋ ਅਨਨ੍ਤਰਂ ਗਾਥਮਾਹ –

੬੦.

‘‘ਕੋਣ੍ਡਞ੍ਞ ਪਞ੍ਹਾਨਿ ਵਿਯਾਕਰੋਹਿ, ਯਾਚਨ੍ਤਿ ਤਂ ਇਸਯੋ ਸਾਧੁਰੂਪਾ;

ਕੋਣ੍ਡਞ੍ਞ ਏਸੋ ਮਨੁਜੇਸੁ ਧਮ੍ਮੋ, ਯਂ ਵੁਦ੍ਧਮਾਗਚ੍ਛਤਿ ਏਸ ਭਾਰੋ’’ਤਿ.

ਤਤ੍ਥ ਕੋਣ੍ਡਞ੍ਞਾਤਿ ਤਂ ਗੋਤ੍ਤੇਨਾਲਪਤਿ. ਧਮ੍ਮੋਤਿ ਸਭਾਵੋ. ਯਂ ਵੁਦ੍ਧਨ੍ਤਿ ਯਂ ਪਞ੍ਞਾਯ ਵੁਦ੍ਧਂ ਪੁਰਿਸਂ ਏਸ ਪਞ੍ਹਾਨਂ ਵਿਸ੍ਸਜ੍ਜਨਭਾਰੋ ਨਾਮ ਆਗਚ੍ਛਤਿ, ਏਸੋ ਮਨੁਜੇਸੁ ਸਭਾਵੋ, ਤਸ੍ਮਾ ਚਨ੍ਦਿਮਸੂਰਿਯਸਹਸ੍ਸਂ ਉਟ੍ਠਾਪੇਨ੍ਤੋ ਵਿਯ ਪਾਕਟਂ ਕਤ੍ਵਾ ਦੇਵਰਞ੍ਞੋ ਪਞ੍ਹੇ ਕਥੇਹੀਤਿ.

ਤਤੋ ਮਹਾਪੁਰਿਸੋ ਓਕਾਸਂ ਕਰੋਨ੍ਤੋ ਅਨਨ੍ਤਰਂ ਗਾਥਮਾਹ –

੬੧.

‘‘ਕਤਾਵਕਾਸਾ ਪੁਚ੍ਛਨ੍ਤੁ ਭੋਨ੍ਤੋ, ਯਂ ਕਿਞ੍ਚਿ ਪਞ੍ਹਂ ਮਨਸਾਭਿਪਤ੍ਥਿਤਂ;

ਅਹਞ੍ਹਿ ਤਂ ਤਂ ਵੋ ਵਿਯਾਕਰਿਸ੍ਸਂ, ਞਤ੍ਵਾ ਸਯਂ ਲੋਕਮਿਮਂ ਪਰਞ੍ਚਾ’’ਤਿ.

ਤਤ੍ਥ ਯਂ ਕਿਞ੍ਚੀਤਿ ਨ ਕੇਵਲਂ ਤੁਮ੍ਹਾਕਂਯੇਵ, ਅਥ ਖੋ ਸਦੇਵਕਸ੍ਸਪਿ ਲੋਕਸ੍ਸ ਯਂ ਮਨਸਾਭਿਪਤ੍ਥਿਤਂ, ਤਂ ਮਂ ਭਵਨ੍ਤੋ ਪੁਚ੍ਛਨ੍ਤੁ. ਅਹਞ੍ਹਿ ਵੋ ਇਧਲੋਕਨਿਸ੍ਸਿਤਂ ਵਾ ਪਰਲੋਕਨਿਸ੍ਸਿਤਂ ਵਾ ਸਬ੍ਬਂ ਪਞ੍ਹਂ ਇਮਞ੍ਚ ਪਰਞ੍ਚ ਲੋਕਂ ਸਯਂ ਪਞ੍ਞਾਯ ਸਚ੍ਛਿਕਤ੍ਵਾ ਕਥੇਸ੍ਸਾਮੀਤਿ ਸਬ੍ਬਞ੍ਞੁਪਵਾਰਣਂ ਸਮ੍ਪਵਾਰੇਸਿ.

ਏਵਂ ਤੇਨ ਓਕਾਸੇ ਕਤੇ ਸਕ੍ਕੋ ਅਤ੍ਤਨਾ ਅਭਿਸਙ੍ਖਤਂ ਪਞ੍ਹਂ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੬੨.

‘‘ਤਤੋ ਚ ਮਘਵਾ ਸਕ੍ਕੋ, ਅਤ੍ਥਦਸ੍ਸੀ ਪੁਰਿਨ੍ਦਦੋ;

ਅਪੁਚ੍ਛਿ ਪਠਮਂ ਪਞ੍ਹਂ, ਯਞ੍ਚਾਸਿ ਅਭਿਪਤ੍ਥਿਤਂ.

੬੩.

‘‘ਕਿਂ ਸੂ ਵਧਿਤ੍ਵਾ ਨ ਕਦਾਚਿ ਸੋਚਤਿ, ਕਿਸ੍ਸਪ੍ਪਹਾਨਂ ਇਸਯੋ ਵਣ੍ਣਯਨ੍ਤਿ;

ਕਸ੍ਸੀਧ ਵੁਤ੍ਤਂ ਫਰੁਸਂ ਖਮੇਥ, ਅਕ੍ਖਾਹਿ ਮੇ ਕੋਣ੍ਡਞ੍ਞ ਏਤਮਤ੍ਥ’’ਨ੍ਤਿ.

ਤਤ੍ਥ ਯਞ੍ਚਾਸੀਤਿ ਯਂ ਤਸ੍ਸ ਮਨਸਾ ਅਭਿਪਤ੍ਥਿਤਂ ਆਸਿ, ਤਂ ਪੁਚ੍ਛੀਤਿ ਅਤ੍ਥੋ. ਏਤਨ੍ਤਿ ਏਤਂ ਮਯਾ ਪੁਚ੍ਛਿਤਮਤ੍ਥਂ ਅਕ੍ਖਾਹਿ ਮੇਤਿ ਏਕਗਾਥਾਯ ਤਯੋ ਪਞ੍ਹੇ ਪੁਚ੍ਛਿ.

ਤਤੋ ਪਰਂ ਬ੍ਯਾਕਰੋਨ੍ਤੋ ਆਹ –

੬੪.

‘‘ਕੋਧਂ ਵਧਿਤ੍ਵਾ ਨ ਕਦਾਚਿ ਸੋਚਤਿ, ਮਕ੍ਖਪ੍ਪਹਾਨਂ ਇਸਯੋ ਵਣ੍ਣਯਨ੍ਤਿ;

ਸਬ੍ਬੇਸਂ ਵੁਤ੍ਤਂ ਫਰੁਸਂ ਖਮੇਥ, ਏਤਂ ਖਨ੍ਤਿਂ ਉਤ੍ਤਮਮਾਹੁ ਸਨ੍ਤੋ’’ਤਿ.

ਤਤ੍ਥ ਕੋਧਂ ਵਧਿਤ੍ਵਾਤਿ ਕੋਧਂ ਮਾਰੇਤ੍ਵਾ ਛਡ੍ਡੇਤ੍ਵਾ. ਸੋਚਨ੍ਤੋ ਹਿ ਪਟਿਘਚਿਤ੍ਤੇਨੇਵ ਸੋਚਤਿ, ਕੋਧਾਭਾਵਾ ਕੁਤੋ ਸੋਕੋ. ਤੇਨ ਵੁਤ੍ਤਂ ‘‘ਨ ਕਦਾਚਿ ਸੋਚਤੀ’’ਤਿ. ਮਕ੍ਖਪ੍ਪਹਾਨਨ੍ਤਿ ਪਰੇਹਿ ਅਤ੍ਤਨੋ ਕਤਗੁਣਮਕ੍ਖਨਲਕ੍ਖਣਸ੍ਸ ਅਕਤਞ੍ਞੁਭਾਵਸਙ੍ਖਾਤਸ੍ਸ ਮਕ੍ਖਸ੍ਸ ਪਹਾਨਂ ਇਸਯੋ ਵਣ੍ਣਯਨ੍ਤਿ. ਸਬ੍ਬੇਸਨ੍ਤਿ ਹੀਨਮਜ੍ਝਿਮੁਕ੍ਕਟ੍ਠਾਨਂ ਸਬ੍ਬੇਸਮ੍ਪਿ ਫਰੁਸਂ ਵਚਨਂ ਖਮੇਥ. ਸਨ੍ਤੋਤਿ ਪੋਰਾਣਕਾ ਪਣ੍ਡਿਤਾ ਏਵਂ ਕਥੇਨ੍ਤਿ.

ਸਕ੍ਕੋ ਆਹ –

੬੫.

‘‘ਸਕ੍ਕਾ ਉਭਿਨ੍ਨਂ ਵਚਨਂ ਤਿਤਿਕ੍ਖਿਤੁਂ, ਸਦਿਸਸ੍ਸ ਵਾ ਸੇਟ੍ਠਤਰਸ੍ਸ ਵਾਪਿ;

ਕਥਂ ਨੁ ਹੀਨਸ੍ਸ ਵਚੋ ਖਮੇਥ, ਅਕ੍ਖਾਹਿ ਮੇ ਕੋਣ੍ਡਞ੍ਞ ਏਤਮਤ੍ਥ’’ਨ੍ਤਿ.

ਸਰਭਙ੍ਗੋ ਆਹ –

੬੬.

‘‘ਭਯਾ ਹਿ ਸੇਟ੍ਠਸ੍ਸ ਵਚੋ ਖਮੇਥ, ਸਾਰਮ੍ਭਹੇਤੂ ਪਨ ਸਾਦਿਸਸ੍ਸ;

ਯੋ ਚੀਧ ਹੀਨਸ੍ਸ ਵਚੋ ਖਮੇਥ, ਏਤਂ ਖਨ੍ਤਿਂ ਉਤ੍ਤਮਮਾਹੁ ਸਨ੍ਤੋ’’ਤਿ. –

ਏਵਮਾਦੀਨਂ ਗਾਥਾਨਂ ਵਚਨਪ੍ਪਟਿਵਚਨਵਸੇਨ ਸਮ੍ਬਨ੍ਧੋ ਵੇਦਿਤਬ੍ਬੋ.

ਤਤ੍ਥ ਅਕ੍ਖਾਹਿ ਮੇਤਿ, ਭਨ੍ਤੇ ਕੋਣ੍ਡਞ੍ਞ, ਤੁਮ੍ਹੇਹਿ ਦ੍ਵੇ ਪਞ੍ਹਾ ਸੁਕਥਿਤਾ, ਏਕੋ ਮੇ ਚਿਤ੍ਤਂ ਨ ਗਣ੍ਹਾਤਿ, ਕਥਂ ਸਕ੍ਕਾ ਅਤ੍ਤਨੋ ਹੀਨਤਰਸ੍ਸ ਵਚਨਂ ਅਧਿਵਾਸੇਤੁਂ, ਤਂ ਮਮ ਅਕ੍ਖਾਹੀਤਿ ਪੁਚ੍ਛਨ੍ਤੋ ਏਵਮਾਹ. ਏਤਂ ਖਨ੍ਤਿਨ੍ਤਿ ਯਦੇਤਂ ਜਾਤਿਗੋਤ੍ਤਾਦਿਹੀਨਸ੍ਸ ਵਚਨਂ ਖਮਨਂ, ਏਤਂ ਖਨ੍ਤਿਂ ਉਤ੍ਤਮਨ੍ਤਿ ਪੋਰਾਣਕਪਣ੍ਡਿਤਾ ਵਦਨ੍ਤਿ. ਯਂ ਪਨੇਤਂ ਜਾਤਿਆਦੀਹਿ ਸੇਟ੍ਠਸ੍ਸ ਭਯੇਨ, ਸਦਿਸਸ੍ਸ ਕਰਣੁਤ੍ਤਰਿਯਲਕ੍ਖਣੇ ਸਾਰਮ੍ਭੇ ਆਦੀਨਵਦਸ੍ਸਨੇਨ ਖਮਨਂ, ਨੇਸਾ ਅਧਿਵਾਸਨਖਨ੍ਤਿ ਨਾਮਾਤਿ ਅਤ੍ਥੋ.

ਏਵਂ ਵੁਤ੍ਤੇ ਸਕ੍ਕੋ ਮਹਾਸਤ੍ਤਂ ਆਹ – ‘‘ਭਨ੍ਤੇ, ਪਠਮਂ ਤੁਮ੍ਹੇ ‘ਸਬ੍ਬੇਸਂ ਵੁਤ੍ਤਂ ਫਰੁਸਂ ਖਮੇਥ, ਏਤਂ ਖਨ੍ਤਿਂ ਉਤ੍ਤਮਮਾਹੁ ਸਨ੍ਤੋ’ਤਿ ਵਤ੍ਵਾ ਇਦਾਨਿ ‘ਯੋ ਚੀਧ ਹੀਨਸ੍ਸ ਵਚੋ ਖਮੇਥ, ਏਤਂ ਖਨ੍ਤਿਂ ਉਤ੍ਤਮਮਾਹੁ ਸਨ੍ਤੋ’ਤਿ ਵਦਥ, ਨ ਵੋ ਪੁਰਿਮੇਨ ਪਚ੍ਛਿਮਂ ਸਮੇਤੀ’’ਤਿ. ਅਥ ਨਂ ਮਹਾਸਤ੍ਤੋ, ‘‘ਸਕ੍ਕ, ਪਚ੍ਛਿਮਂ ਮਯਾ ‘ਅਯਂ ਹੀਨੋ’ਤਿ ਞਤ੍ਵਾ ਫਰੁਸਵਚਨਂ ਅਧਿਵਾਸੇਨ੍ਤਸ੍ਸ ਵਸੇਨ ਵੁਤ੍ਤਂ, ਯਸ੍ਮਾ ਪਨ ਨ ਸਕ੍ਕਾ ਰੂਪਦਸ੍ਸਨਮਤ੍ਤੇਨ ਸਤ੍ਤਾਨਂ ਸੇਟ੍ਠਾਦਿਭਾਵੋ ਞਾਤੁਂ, ਤਸ੍ਮਾ ਪੁਰਿਮਂ ਵੁਤ੍ਤ’’ਨ੍ਤਿ ਵਤ੍ਵਾ ਸਤ੍ਤਾਨਂ ਅਞ੍ਞਤ੍ਰ ਸਂਵਾਸਾ ਰੂਪਦਸ੍ਸਨਮਤ੍ਤੇਨ ਸੇਟ੍ਠਾਦਿਭਾਵਸ੍ਸ ਦੁਵਿਞ੍ਞੇਯ੍ਯਤਂ ਪਕਾਸੇਨ੍ਤੋ ਗਾਥਮਾਹ –

੬੭.

‘‘ਕਥਂ ਵਿਜਞ੍ਞਾ ਚਤੁਪਤ੍ਥਰੂਪਂ, ਸੇਟ੍ਠਂ ਸਰਿਕ੍ਖਂ ਅਥਵਾਪਿ ਹੀਨਂ;

ਵਿਰੂਪਰੂਪੇਨ ਚਰਨ੍ਤਿ ਸਨ੍ਤੋ, ਤਸ੍ਮਾ ਹਿ ਸਬ੍ਬੇਸਂ ਵਚੋ ਖਮੇਥਾ’’ਤਿ.

ਤਤ੍ਥ ਚਤੁਪਤ੍ਥਰੂਪਨ੍ਤਿ ਚਤੂਹਿ ਇਰਿਯਾਪਥੇਹਿ ਪਟਿਚ੍ਛਨ੍ਨਸਭਾਵਂ. ਵਿਰੂਪਰੂਪੇਨਾਤਿ ਵਿਰੂਪਾਨਂ ਲਾਮਕਪੁਗ੍ਗਲਾਨਂ ਰੂਪੇਨ ਉਤ੍ਤਮਗੁਣਾ ਸਨ੍ਤੋਪਿ ਵਿਚਰਨ੍ਤਿ. ਇਮਸ੍ਮਿਂ ਪਨਤ੍ਥੇ ਮਜ੍ਝਨ੍ਤਿਕਤ੍ਥੇਰਸ੍ਸ ਵਤ੍ਥੁ ਕਥੇਤਬ੍ਬਂ.

ਤਂ ਸੁਤ੍ਵਾ ਸਕ੍ਕੋ ਨਿਕ੍ਕਙ੍ਖੋ ਹੁਤ੍ਵਾ, ‘‘ਭਨ੍ਤੇ, ਏਤਾਯ ਨੋ ਖਨ੍ਤਿਯਾ ਆਨਿਸਂਸਂ ਕਥੇਹੀ’’ਤਿ ਯਾਚਿ. ਅਥਸ੍ਸ ਮਹਾਸਤ੍ਤੋ ਗਾਥਮਾਹ –

੬੮.

‘‘ਨ ਹੇਤਮਤ੍ਥਂ ਮਹਤੀਪਿ ਸੇਨਾ, ਸਰਾਜਿਕਾ ਯੁਜ੍ਝਮਾਨਾ ਲਭੇਥ;

ਯਂ ਖਨ੍ਤਿਮਾ ਸਪ੍ਪੁਰਿਸੋ ਲਭੇਥ, ਖਨ੍ਤੀਬਲਸ੍ਸੂਪਸਮਨ੍ਤਿ ਵੇਰਾ’’ਤਿ.

ਤਤ੍ਥ ਏਤਮਤ੍ਥਨ੍ਤਿ ਏਤਂ ਵੇਰਵੂਪਸਮਨਿਪ੍ਪਟਿਘਸਭਾਵਸਙ੍ਖਾਤਂ ਅਤ੍ਥਂ.

ਏਵਂ ਮਹਾਸਤ੍ਤੇਨ ਖਨ੍ਤਿਗੁਣੇ ਕਥਿਤੇ ਤੇ ਰਾਜਾਨੋ ਚਿਨ੍ਤਯਿਂਸੁ – ‘‘ਸਕ੍ਕੋ ਅਤ੍ਤਨੋਵ ਪਞ੍ਹੇ ਪੁਚ੍ਛਤਿ, ਅਮ੍ਹਾਕਂ ਪੁਚ੍ਛਨੋਕਾਸਂ ਨ ਦਸ੍ਸਤੀ’’ਤਿ. ਅਥ ਨੇਸਂ ਅਜ੍ਝਾਸਯਂ ਵਿਦਿਤ੍ਵਾ ਸਕ੍ਕੋ ਅਤ੍ਤਨਾ ਅਭਿਸਙ੍ਖਤੇ ਚਤ੍ਤਾਰੋ ਪਞ੍ਹੇ ਠਪੇਤ੍ਵਾਵ ਤੇਸਂ ਕਙ੍ਖਂ ਪੁਚ੍ਛਨ੍ਤੋ ਗਾਥਮਾਹ –

੬੯.

‘‘ਸੁਭਾਸਿਤਂ ਤੇ ਅਨੁਮੋਦਿਯਾਨ, ਅਞ੍ਞਂ ਤਂ ਪੁਚ੍ਛਾਮਿ ਤਦਿਙ੍ਘ ਬ੍ਰੂਹਿ;

ਯਥਾ ਅਹੁਂ ਦਣ੍ਡਕੀ ਨਾਲ਼ਿਕੇਰੋ, ਅਥਜ੍ਜੁਨੋ ਕਲਾਬੁ ਚਾਪਿ ਰਾਜਾ;

ਤੇਸਂ ਗਤਿਂ ਬ੍ਰੂਹਿ ਸੁਪਾਪਕਮ੍ਮਿਨਂ, ਕਤ੍ਥੂਪਪਨ੍ਨਾ ਇਸੀਨਂ ਵਿਹੇਠਕਾ’’ਤਿ.

ਤਤ੍ਥ ਅਨੁਮੋਦਿਯਾਨਾਤਿ ਇਦਂ ਮਯਾ ਪੁਟ੍ਠਾਨਂ ਤਿਣ੍ਣਂ ਪਞ੍ਹਾਨਂ ਵਿਸ੍ਸਜ੍ਜਨਸਙ੍ਖਾਤਂ ਤਵ ਸੁਭਾਸਿਤਂ ਅਨੁਮੋਦਿਤ੍ਵਾ. ਯਥਾ ਅਹੁਨ੍ਤਿ ਯਥਾ ਚਤ੍ਤਾਰੋ ਜਨਾ ਅਹੇਸੁਂ. ਕਲਾਬੁ ਚਾਤਿ ਕਲਾਬੁਰਾਜਾ ਚ. ਅਥਜ੍ਜੁਨੋਤਿ ਅਥ ਅਜ੍ਜੁਨਰਾਜਾ.

ਅਥਸ੍ਸ ਵਿਸ੍ਸਜ੍ਜੇਨ੍ਤੋ ਮਹਾਸਤ੍ਤੋ ਪਞ੍ਚ ਗਾਥਾਯੋ ਅਭਾਸਿ –

੭੦.

‘‘ਕਿਸਞ੍ਹਿ ਵਚ੍ਛਂ ਅਵਕਿਰਿਯ ਦਣ੍ਡਕੀ, ਉਚ੍ਛਿਨ੍ਨਮੂਲੋ ਸਜਨੋ ਸਰਟ੍ਠੋ;

ਕੁਕ੍ਕੁਲ਼ਨਾਮੇ ਨਿਰਯਮ੍ਹਿ ਪਚ੍ਚਤਿ, ਤਸ੍ਸ ਫੁਲਿਙ੍ਗਾਨਿ ਪਤਨ੍ਤਿ ਕਾਯੇ.

੭੧.

‘‘ਯੋ ਸਞ੍ਞਤੇ ਪਬ੍ਬਜਿਤੇ ਅਹੇਠਯਿ, ਧਮ੍ਮਂ ਭਣਨ੍ਤੇ ਸਮਣੇ ਅਦੂਸਕੇ;

ਤਂ ਨਾਲ਼ਿਕੇਰਂ ਸੁਨਖਾ ਪਰਤ੍ਥ, ਸਙ੍ਗਮ੍ਮ ਖਾਦਨ੍ਤਿ ਵਿਫਨ੍ਦਮਾਨਂ.

੭੨.

‘‘ਅਥਜ੍ਜੁਨੋ ਨਿਰਯੇ ਸਤ੍ਤਿਸੂਲੇ, ਅਵਂਸਿਰੋ ਪਤਿਤੋ ਉਦ੍ਧਂਪਾਦੋ;

ਅਙ੍ਗੀਰਸਂ ਗੋਤਮਂ ਹੇਠਯਿਤ੍ਵਾ, ਖਨ੍ਤਿਂ ਤਪਸ੍ਸਿਂ ਚਿਰਬ੍ਰਹ੍ਮਚਾਰਿਂ.

੭੩.

‘‘ਯੋ ਖਣ੍ਡਸੋ ਪਬ੍ਬਜਿਤਂ ਅਛੇਦਯਿ, ਖਨ੍ਤਿਂ ਵਦਨ੍ਤਂ ਸਮਣਂ ਅਦੂਸਕਂ;

ਕਲਾਬੁਵੀਚਿਂ ਉਪਪਜ੍ਜ ਪਚ੍ਚਤਿ, ਮਹਾਪਤਾਪਂ ਕਟੁਕਂ ਭਯਾਨਕਂ.

੭੪.

‘‘ਏਤਾਨਿ ਸੁਤ੍ਵਾ ਨਿਰਯਾਨਿ ਪਣ੍ਡਿਤੋ, ਅਞ੍ਞਾਨਿ ਪਾਪਿਟ੍ਠਤਰਾਨਿ ਚੇਤ੍ਥ;

ਧਮ੍ਮਂ ਚਰੇ ਸਮਣਬ੍ਰਾਹ੍ਮਣੇਸੁ, ਏਵਂਕਰੋ ਸਗ੍ਗਮੁਪੇਤਿ ਠਾਨ’’ਨ੍ਤਿ.

ਤਤ੍ਥ ਕਿਸਨ੍ਤਿ ਅਪ੍ਪਮਂਸਲੋਹਿਤਤ੍ਤਾ ਕਿਸਸਰੀਰਂ. ਅਵਕਿਰਿਯਾਤਿ ਅਵਕਿਰਿਤ੍ਵਾ ਨਿਟ੍ਠੁਭਨਦਨ੍ਤਕਟ੍ਠਪਾਤਨੇਨ ਤਸ੍ਸ ਸਰੀਰੇ ਕਲਿਂ ਪਵਾਹੇਤ੍ਵਾ. ਉਚ੍ਛਿਨ੍ਨਮੂਲੋਤਿ ਉਚ੍ਛਿਨ੍ਨਮੂਲੋ ਹੁਤ੍ਵਾ. ਸਜਨੋਤਿ ਸਪਰਿਸੋ. ਕੁਕ੍ਕੁਲ਼ਨਾਮੇ ਨਿਰਯਮ੍ਹੀਤਿ ਯੋਜਨਸਤਪ੍ਪਮਾਣੇ ਕਪ੍ਪਸਣ੍ਠਿਤੇ ਉਣ੍ਹਛਾਰਿਕਨਿਰਯੇ. ਫੁਲਿਙ੍ਗਾਨੀਤਿ ਵੀਤਚ੍ਚਿਤਙ੍ਗਾਰਾ. ਤਸ੍ਸ ਕਿਰ ਤਤ੍ਥ ਉਣ੍ਹਕੁਕ੍ਕੁਲ਼ੇ ਨਿਮੁਗ੍ਗਸ੍ਸ ਨਵਹਿ ਵਣਮੁਖੇਹਿ ਉਣ੍ਹਾ ਛਾਰਿਕਾ ਪਵਿਸਨ੍ਤਿ, ਸੀਸੇ ਮਹਨ੍ਤਮਹਨ੍ਤਾ ਅਙ੍ਗਾਰਾ ਪਤਨ੍ਤਿ. ਤੇਸਂ ਪਨ ਪਤਨਕਾਲੇ ਸਕਲਸਰੀਰਂ ਦੀਪਰੁਕ੍ਖੋ ਵਿਯ ਜਲਤਿ, ਬਲਵਵੇਦਨਾ ਵਤ੍ਤਨ੍ਤਿ. ਸੋ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਮਹਾਵਿਰਵਂ ਰਵਤਿ. ਸਰਭਙ੍ਗਸਤ੍ਥਾ ਪਥਵਿਂ ਭਿਨ੍ਦਿਤ੍ਵਾ ਤਂ ਤਤ੍ਥ ਤਥਾਪਚ੍ਚਮਾਨਂ ਦਸ੍ਸੇਸਿ, ਮਹਾਜਨੋ ਭਯਸਨ੍ਤਾਸਮਾਪਜ੍ਜਿ. ਤਸ੍ਸ ਅਤਿਵਿਯ ਭੀਤਭਾਵਂ ਞਤ੍ਵਾ ਮਹਾਸਤ੍ਤੋ ਤਂ ਨਿਰਯਂ ਅਨ੍ਤਰਧਾਪੇਸਿ.

ਧਮ੍ਮਂ ਭਣਨ੍ਤੇਤਿ ਦਸਕੁਸਲਕਮ੍ਮਪਥਧਮ੍ਮਂ ਭਾਸਨ੍ਤੇ. ਸਮਣੇਤਿ ਸਮਿਤਪਾਪੇ. ਅਦੂਸਕੇਤਿ ਨਿਰਪਰਾਧੇ. ਨਾਲ਼ਿਕੇਰਨ੍ਤਿ ਏਵਂਨਾਮਕਂ ਰਾਜਾਨਂ. ਪਰਤ੍ਥਾਤਿ ਪਰਲੋਕੇ ਨਿਰਯੇ ਨਿਬ੍ਬਤ੍ਤਂ. ਸਙ੍ਗਮ੍ਮਾਤਿ ਇਤੋ ਚਿਤੋ ਚ ਸਮਾਗਨ੍ਤ੍ਵਾ ਛਿਨ੍ਦਿਤ੍ਵਾ ਮਹਨ੍ਤਮਹਨ੍ਤਾ ਸੁਨਖਾ ਖਾਦਨ੍ਤਿ. ਤਸ੍ਮਿਂ ਕਿਰ ਕਲਿਙ੍ਗਰਟ੍ਠੇ ਦਨ੍ਤਪੁਰਨਗਰੇ ਨਾਲ਼ਿਕੇਰੇ ਨਾਮ ਰਞ੍ਞੇ ਰਜ੍ਜਂ ਕਾਰਯਮਾਨੇ ਏਕੋ ਮਹਾਤਾਪਸੋ ਪਞ੍ਚਸਤਤਾਪਸਪਰਿਵੁਤੋ ਹਿਮਵਨ੍ਤਾ ਆਗਮ੍ਮ ਰਾਜੁਯ੍ਯਾਨੇ ਵਾਸਂ ਕਪ੍ਪੇਤ੍ਵਾ ਮਹਾਜਨਸ੍ਸ ਧਮ੍ਮਂ ਦੇਸੇਸਿ. ‘‘ਧਮ੍ਮਿਕਤਾਪਸੋ ਉਯ੍ਯਾਨੇ ਵਸਤੀ’’ਤਿ ਰਞ੍ਞੋਪਿ ਆਰੋਚਯਿਂਸੁ. ਰਾਜਾ ਪਨ ਅਧਮ੍ਮਿਕੋ ਅਧਮ੍ਮੇਨ ਰਜ੍ਜਂ ਕਾਰੇਸਿ. ਸੋ ਅਮਚ੍ਚੇਸੁ ਤਾਪਸਂ ਪਸਂਸਨ੍ਤੇਸੁ ‘‘ਅਹਮ੍ਪਿ ਧਮ੍ਮਂ ਸੁਣਿਸ੍ਸਾਮੀ’’ਤਿ ਉਯ੍ਯਾਨਂ ਗਨ੍ਤ੍ਵਾ ਤਾਪਸਂ ਵਨ੍ਦਿਤ੍ਵਾ ਨਿਸੀਦਿ. ਤਾਪਸੋ ਰਞ੍ਞਾ ਸਦ੍ਧਿਂ ਪਟਿਸਨ੍ਥਾਰਂ ਕਰੋਨ੍ਤੋ ‘‘ਕਿਂ, ਮਹਾਰਾਜ, ਧਮ੍ਮੇਨ ਰਜ੍ਜਂ ਕਾਰੇਸਿ, ਜਨਂ ਨ ਪੀਲ਼ੇਸੀ’’ਤਿ ਆਹ. ਸੋ ਤਸ੍ਸ ਕੁਜ੍ਝਿਤ੍ਵਾ ‘‘ਅਯਂ ਕੂਟਜਟਿਲੋ ਏਤ੍ਤਕਂ ਕਾਲਂ ਨਾਗਰਾਨਂ ਸਨ੍ਤਿਕੇ ਮਮਞ੍ਞੇਵ ਅਗੁਣਂ ਕਥੇਸਿ ਮਞ੍ਞੇ, ਹੋਤੁ ਜਾਨਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਸ੍ਵੇ ਅਮ੍ਹਾਕਂ ਘਰਦ੍ਵਾਰਂ ਆਗਚ੍ਛੇਯ੍ਯਾਥਾ’’ਤਿ ਨਿਮਨ੍ਤੇਤ੍ਵਾ ਪੁਨਦਿਵਸੇ ਪੁਰਾਣਗੂਥਸ੍ਸ ਚਾਟਿਯੋ ਪਰਿਪੂਰਾਪੇਤ੍ਵਾ ਤਾਪਸੇਸੁ ਆਗਤੇਸੁ ਤੇਸਂ ਭਿਕ੍ਖਾਭਾਜਨਾਨਿ ਗੂਥਸ੍ਸ ਪੂਰਾਪੇਤ੍ਵਾ ਦ੍ਵਾਰਂ ਪਿਦਹਾਪੇਤ੍ਵਾ ਮੁਸਲਾਨਿ ਚ ਲੋਹਦਣ੍ਡੇ ਚ ਗਾਹਾਪੇਤ੍ਵਾ ਇਸੀਨਂ ਸੀਸਾਨਿ ਭਿਨ੍ਦਾਪੇਤ੍ਵਾ ਜਟਾਸੁ ਗਾਹਾਪੇਤ੍ਵਾ ਕਡ੍ਢਾਪੇਤ੍ਵਾ ਸੁਨਖੇਹਿ ਖਾਦਾਪੇਤ੍ਵਾ ਤਤ੍ਥੇਵ ਭਿਨ੍ਨਂ ਪਥਵਿਂ ਪਵਿਸਿਤ੍ਵਾ ਸੁਨਖਮਹਾਨਿਰਯੇ ਨਿਬ੍ਬਤ੍ਤਤਿ, ਤਤ੍ਰਸ੍ਸ ਤਿਗਾਵੁਤਪ੍ਪਮਾਣਸਰੀਰਂ ਅਹੋਸਿ. ਅਥ ਨਂ ਮਹਨ੍ਤਮਹਨ੍ਤਾ ਮਹਾਹਤ੍ਥਿਪ੍ਪਮਾਣਾ ਪਞ੍ਚਵਣ੍ਣਾ ਸੁਨਖਾ ਅਨੁਬਨ੍ਧਿਤ੍ਵਾ ਡਂਸਿਤ੍ਵਾ ਨਵਯੋਜਨਾਯ ਜਲਿਤਅਯਪਥਵਿਯਾ ਪਾਤੇਤ੍ਵਾ ਮੁਖਪੂਰਂ ਲੁਞ੍ਚਨ੍ਤਾ ਵਿਪ੍ਫਨ੍ਦਮਾਨਂ ਖਾਦਿਂਸੁ. ਮਹਾਸਤ੍ਤੋ ਪਥਵਿਂ ਦ੍ਵਿਧਾ ਭਿਨ੍ਦਿਤ੍ਵਾ ਤਂ ਨਿਰਯਂ ਦਸ੍ਸੇਤ੍ਵਾ ਮਹਾਜਨਸ੍ਸ ਭੀਤਭਾਵਂ ਞਤ੍ਵਾ ਅਨ੍ਤਰਧਾਪੇਸਿ.

ਅਥਜ੍ਜੁਨੋਤਿ ਸਹਸ੍ਸਬਾਹੁਰਾਜਾ. ਅਙ੍ਗੀਰਸਨ੍ਤਿ ਅਙ੍ਗੇਹਿ ਰਂਸੀਨਂ ਨਿਚ੍ਛਰਣਤੋ ਏਵਂਲਦ੍ਧਨਾਮਂ. ਹੇਠਯਿਤ੍ਵਾਤਿ ਵਿਹੇਠੇਤ੍ਵਾ ਵਿਸਪੀਤਕਣ੍ਡੇਨ ਵਿਜ੍ਝਿਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ. ਸੋ ਕਿਰ ਅਜ੍ਜੁਨੋ ਨਾਮ ਰਾਜਾ ਮਹਿਸਕਰਟ੍ਠੇ ਕੇਤਕਰਾਜਧਾਨਿਯਂ ਰਜ੍ਜਂ ਕਾਰੇਨ੍ਤੋ ਮਿਗਵਂ ਗਨ੍ਤ੍ਵਾ ਮਿਗੇ ਵਧਿਤ੍ਵਾ ਅਙ੍ਗਾਰਪਕ੍ਕਮਂਸਂ ਖਾਦਨ੍ਤੋ ਵਿਚਰਿ. ਅਥੇਕਦਿਵਸਂ ਮਿਗਾਨਂ ਆਗਮਨਟ੍ਠਾਨੇ ਕੋਟ੍ਠਕਂ ਕਤ੍ਵਾ ਮਿਗੇ ਓਲੋਕਯਮਾਨੋ ਅਟ੍ਠਾਸਿ. ਤਦਾ ਸੋ ਤਾਪਸੋ ਤਸ੍ਸ ਰਞ੍ਞੋ ਅਵਿਦੂਰੇ ਏਕਂ ਕਾਰਰੁਕ੍ਖਂ ਅਭਿਰੁਹਿਤ੍ਵਾ ਫਲਾਨਿ ਓਚਿਨਨ੍ਤੋ ਓਚਿਨਿਤਫਲਸਾਖਂ ਮੁਞ੍ਚਿ. ਤਸ੍ਸਾ ਵਿਸ੍ਸਟ੍ਠਾਯ ਸਦ੍ਦੇਨ ਤਂਠਾਨਂ ਪਤ੍ਤਾ ਮਿਗਾ ਪਲਾਯਿਂਸੁ. ਰਾਜਾ ਕੁਜ੍ਝਿਤ੍ਵਾ ਤਾਪਸਂ ਵਿਸਮਿਸ੍ਸਿਤੇਨ ਸਲ੍ਲੇਨ ਵਿਜ੍ਝਿ. ਸੋ ਪਰਿਗਲਿਤ੍ਵਾ ਪਤਨ੍ਤੋ ਮਤ੍ਥਕੇਨ ਖਦਿਰਖਾਣੁਕਂ ਆਸਾਦੇਤ੍ਵਾ ਸੂਲਗ੍ਗੇਯੇਵ ਕਾਲਮਕਾਸਿ. ਰਾਜਾ ਤਙ੍ਖਣੇਯੇਵ ਦ੍ਵਿਧਾ ਭਿਨ੍ਨਂ ਪਥਵਿਂ ਪਵਿਸਿਤ੍ਵਾ ਸਤ੍ਤਿਸੂਲਨਿਰਯੇ ਨਿਬ੍ਬਤ੍ਤਿ, ਤਿਗਾਵੁਤਪ੍ਪਮਾਣਂ ਸਰੀਰਂ ਅਹੋਸਿ. ਤਤ੍ਰ ਤਂ ਨਿਰਯਪਾਲਾ ਜਲਿਤੇਹਿ ਆਵੁਧੇਹਿ ਕੋਟ੍ਟੇਤ੍ਵਾ ਜਲਿਤਂ ਅਯਪਬ੍ਬਤਂ ਆਰੋਪੇਨ੍ਤਿ. ਪਬ੍ਬਤਮਤ੍ਥਕੇ ਠਿਤਕਾਲੇ ਵਾਤੋ ਪਹਰਤਿ, ਸੋ ਵਾਤਪ੍ਪਹਾਰੇਨ ਪਰਿਗਲਿਤ੍ਵਾ ਪਤਤਿ. ਤਸ੍ਮਿਂ ਖਣੇ ਹੇਟ੍ਠਾ ਨਵਯੋਜਨਾਯ ਜਲਿਤਅਯਪਥਵਿਯਾ ਮਹਾਤਾਲਕ੍ਖਨ੍ਧਪ੍ਪਮਾਣਂ ਜਲਿਤਂ ਅਯਸੂਲਂ ਉਟ੍ਠਹਤਿ. ਸੋ ਸੂਲਗ੍ਗਮਤ੍ਥਕੇਯੇਵ ਆਸਾਦੇਤ੍ਵਾ ਸੂਲਾਵੁਤੋ ਤਿਟ੍ਠਤਿ. ਤਸ੍ਮਿਂ ਖਣੇ ਪਥਵੀ ਜਲਤਿ, ਸੂਲਂ ਜਲਤਿ, ਤਸ੍ਸ ਸਰੀਰਂ ਜਲਤਿ. ਸੋ ਤਤ੍ਥ ਮਹਾਰਵਂ ਰਵਨ੍ਤੋ ਪਚ੍ਚਤਿ. ਮਹਾਸਤ੍ਤੋ ਪਥਵਿਂ ਦ੍ਵਿਧਾ ਕਤ੍ਵਾ ਤਂ ਨਿਰਯਂ ਦਸ੍ਸੇਤ੍ਵਾ ਮਹਾਜਨਸ੍ਸ ਭੀਤਭਾਵਂ ਞਤ੍ਵਾ ਅਨ੍ਤਰਧਾਪੇਸਿ.

ਖਣ੍ਡਸੋਤਿ ਚਤ੍ਤਾਰੋ ਹਤ੍ਥਪਾਦੇ ਕਣ੍ਣਨਾਸਞ੍ਚ ਖਣ੍ਡਾਖਣ੍ਡਂ ਕਤ੍ਵਾ. ਅਦੂਸਕਨ੍ਤਿ ਨਿਰਪਰਾਧਂ. ਤਥਾ ਛੇਦਾਪੇਤ੍ਵਾ ਦ੍ਵੀਹਿ ਕਸਾਹਿ ਪਹਾਰਸਹਸ੍ਸੇਹਿ ਤਾਲ਼ਾਪੇਤ੍ਵਾ ਜਟਾਸੁ ਗਹੇਤ੍ਵਾ ਆਕਡ੍ਢਾਪੇਤ੍ਵਾ ਪਟਿਕੁਜ੍ਜਂ ਨਿਪਜ੍ਜਾਪੇਤ੍ਵਾ ਪਿਟ੍ਠਿਯਂ ਪਣ੍ਹਿਯਾ ਪਹਰਿਤ੍ਵਾ ਮਹਾਦੁਕ੍ਖਸਮਪ੍ਪਿਤਂ ਅਕਾਸਿ. ਕਲਾਬੁਵੀਚਿਨ੍ਤਿ ਕਲਾਬੁ ਅਵੀਚਿਂ. ਕਟੁਕਨ੍ਤਿ ਤਿਖਿਣਵੇਦਨਂ, ਏਵਰੂਪਂ ਨਿਰਯਂ ਉਪਪਜ੍ਜਿਤ੍ਵਾ ਛਨ੍ਨਂ ਜਾਲਾਨਂ ਅਨ੍ਤਰੇ ਪਚ੍ਚਤਿ. ਵਿਤ੍ਥਾਰਤੋ ਪਨ ਕਲਾਬੁਰਞ੍ਞੋ ਵਤ੍ਥੁ ਖਨ੍ਤਿਵਾਦਿਜਾਤਕੇ (ਜਾ. ੧.੪.੪੯-੫੨) ਕਥਿਤਮੇਵ. ਅਞ੍ਞਾਨਿ ਪਾਪਿਟ੍ਠਤਰਾਨਿ ਚੇਤ੍ਥਾਤਿ ਏਤੇਹਿ ਨਿਰਯੇਹਿ ਪਾਪਿਟ੍ਠਤਰਾਨਿ ਚ ਅਞ੍ਞਾਨਿ ਨਿਰਯਾਨਿ ਸੁਤ੍ਵਾ. ਧਮ੍ਮਂ ਚਰੇਤਿ, ਸਕ੍ਕ ਦੇਵਰਾਜ, ਪਣ੍ਡਿਤੋ ਕੁਲਪੁਤ੍ਤੋ ਨ ਕੇਵਲਂ ਏਤੇਯੇਵ ਚਤ੍ਤਾਰੋ ਨਿਰਯਾ, ਏਤੇਯੇਵ ਚ ਰਾਜਾਨੋ ਨੇਰਯਿਕਾ, ਅਥ ਖੋ ਅਞ੍ਞੇਪਿ ਨਿਰਯਾ, ਅਞ੍ਞੇਪਿ ਚ ਰਾਜਾਨੋ ਨਿਰਯੇਸੁ ਉਪ੍ਪਨ੍ਨਾਤਿ ਵਿਦਿਤ੍ਵਾ ਚਤੁਪਚ੍ਚਯਦਾਨਧਮ੍ਮਿਕਾਰਕ੍ਖਾਵਰਣਸਂਵਿਧਾਨਸਙ੍ਖਾਤਂ ਸਮਣਬ੍ਰਾਹ੍ਮਣੇਸੁ ਧਮ੍ਮਂ ਚਰੇਯ੍ਯਾਤਿ.

ਏਵਂ ਮਹਾਸਤ੍ਤੇਨ ਚਤੁਨ੍ਨਂ ਰਾਜੂਨਂ ਨਿਬ੍ਬਤ੍ਤਟ੍ਠਾਨੇ ਦਸ੍ਸਿਤੇ ਤਯੋ ਰਾਜਾਨੋ ਨਿਕ੍ਕਙ੍ਖਾ ਅਹੇਸੁਂ. ਤਤੋ ਸਕ੍ਕੋ ਅਵਸੇਸੇ ਚਤ੍ਤਾਰੋ ਪਞ੍ਹੇ ਪੁਚ੍ਛਨ੍ਤੋ ਗਾਥਮਾਹ –

੭੫.

‘‘ਸੁਭਾਸਿਤਂ ਤੇ ਅਨੁਮੋਦਿਯਾਨ, ਅਞ੍ਞਂ ਤਂ ਪੁਚ੍ਛਾਮਿ ਤਦਿਙ੍ਘ ਬ੍ਰੂਹਿ;

ਕਥਂਵਿਧਂ ਸੀਲਵਨ੍ਤਂ ਵਦਨ੍ਤਿ, ਕਥਂਵਿਧਂ ਪਞ੍ਞਵਨ੍ਤਂ ਵਦਨ੍ਤਿ;

ਕਥਂਵਿਧਂ ਸਪ੍ਪੁਰਿਸਂ ਵਦਨ੍ਤਿ, ਕਥਂਵਿਧਂ ਨੋ ਸਿਰਿ ਨੋ ਜਹਾਤੀ’’ਤਿ.

ਤਤ੍ਥ ਕਥਂਵਿਧਂ ਨੋ ਸਿਰਿ ਨੋ ਜਹਾਤੀਤਿ ਕਥਂਵਿਧਂ ਨੁ ਪੁਰਿਸਂ ਪਟਿਲਦ੍ਧਸਿਰੀ ਨ ਜਹਾਤੀਤਿ.

ਅਥਸ੍ਸ ਵਿਸ੍ਸਜ੍ਜੇਨ੍ਤੋ ਮਹਾਸਤ੍ਤੋ ਚਤਸ੍ਸੋ ਗਾਥਾਯੋ ਅਭਾਸਿ –

੭੬.

‘‘ਕਾਯੇਨ ਵਾਚਾਯ ਚ ਯੋਧ ਸਞ੍ਞਤੋ, ਮਨਸਾ ਚ ਕਿਞ੍ਚਿ ਨ ਕਰੋਤਿ ਪਾਪਂ;

ਨ ਅਤ੍ਤਹੇਤੂ ਅਲਿਕਂ ਭਣੇਤਿ, ਤਥਾਵਿਧਂ ਸੀਲਵਨ੍ਤਂ ਵਦਨ੍ਤਿ.

੭੭.

‘‘ਗਮ੍ਭੀਰਪਞ੍ਹਂ ਮਨਸਾਭਿਚਿਨ੍ਤਯਂ, ਨਾਚ੍ਚਾਹਿਤਂ ਕਮ੍ਮ ਕਰੋਤਿ ਲੁਦ੍ਦਂ;

ਕਾਲਾਗਤਂ ਅਤ੍ਥਪਦਂ ਨ ਰਿਞ੍ਚਤਿ, ਤਥਾਵਿਧਂ ਪਞ੍ਞਵਨ੍ਤਂ ਵਦਨ੍ਤਿ.

੭੮.

‘‘ਯੋ ਵੇ ਕਤਞ੍ਞੂ ਕਤਵੇਦਿ ਧੀਰੋ, ਕਲ੍ਯਾਣਮਿਤ੍ਤੋ ਦਲ਼੍ਹਭਤ੍ਤਿ ਚ ਹੋਤਿ;

ਦੁਖਿਤਸ੍ਸ ਸਕ੍ਕਚ੍ਚ ਕਰੋਤਿ ਕਿਚ੍ਚਂ, ਤਥਾਵਿਧਂ ਸਪ੍ਪੁਰਿਸਂ ਵਦਨ੍ਤਿ.

੭੯.

‘‘ਏਤੇਹਿ ਸਬ੍ਬੇਹਿ ਗੁਣੇਹੁਪੇਤੋ, ਸਦ੍ਧੋ ਮੁਦੂ ਸਂਵਿਭਾਗੀ ਵਦਞ੍ਞੂ;

ਸਙ੍ਗਾਹਕਂ ਸਖਿਲਂ ਸਣ੍ਹਵਾਚਂ, ਤਥਾਵਿਧਂ ਨੋ ਸਿਰਿ ਨੋ ਜਹਾਤੀ’’ਤਿ.

ਤਤ੍ਥ ‘‘ਕਾਯੇਨਾ’’ਤਿਆਦੀਨਿ ਪਦਾਨਿ ਤਿਵਿਧਸੁਚਰਿਤਦ੍ਵਾਰਵਸੇਨ ਵੁਤ੍ਤਾਨਿ. ਨ ਅਤ੍ਤਹੇਤੂਤਿ ਦੇਸਨਾਸੀਸਮੇਵੇਤਂ, ਅਤ੍ਤਹੇਤੁ ਵਾ ਪਰਹੇਤੁ ਵਾ ਯਸਹੇਤੁ ਵਾ ਧਨਹੇਤੁ ਵਾ ਲਾਭਹੇਤੁ ਵਾ ਆਮਿਸਕਿਞ੍ਚਿਕ੍ਖਹੇਤੁ ਵਾ ਅਲਿਕਂ ਨ ਕਥੇਤੀਤਿ ਅਤ੍ਥੋ. ਕਾਮਞ੍ਚੇਸ ਅਤ੍ਥੋ ‘‘ਵਾਚਾਯ ਸਞ੍ਞਤੋ’’ਤਿ ਇਮਿਨਾਵ ਸਿਦ੍ਧੋ, ਮੁਸਾਵਾਦਿਨੋ ਪਨ ਅਕਤ੍ਤਬ੍ਬਂ ਪਾਪਂ ਨਾਮ ਨਤ੍ਥੀਤਿ ਗਰੁਭਾਵਦੀਪਨਤ੍ਥਂ ਪੁਨ ਏਵਮਾਹਾਤਿ ਵੇਦਿਤਬ੍ਬੋ. ਤਂ ਪੁਗ੍ਗਲਂ ਸੀਲਵਨ੍ਤਂ ਵਦਨ੍ਤਿ.

ਗਮ੍ਭੀਰਪਞ੍ਹਨ੍ਤਿ ਅਤ੍ਥਤੋ ਚ ਪਾਲ਼ਿਤੋ ਚ ਗਮ੍ਭੀਰਂ ਗੁਲ਼੍ਹਂ ਪਟਿਚ੍ਛਨ੍ਨਂ ਸਤ੍ਤੁਭਸ੍ਤਜਾਤਕ- (ਜਾ. ੧.੭.੪੬ ਆਦਯੋ) ਸਮ੍ਭਵਜਾਤਕ- (ਜਾ. ੧.੧੬.੧੩੮ ਆਦਯੋ) ਮਹਾਉਮਙ੍ਗਜਾਤਕੇਸੁ (ਜਾ. ੨.੨੨.੫੯੦ ਆਦਯੋ) ਆਗਤਸਦਿਸਂ ਪਞ੍ਹਂ. ਮਨਸਾਭਿਚਿਨ੍ਤਯਨ੍ਤਿ ਮਨਸਾ ਅਭਿਚਿਨ੍ਤੇਨ੍ਤੋ ਅਤ੍ਥਂ ਪਟਿਵਿਜ੍ਝਿਤ੍ਵਾ ਚਨ੍ਦਸਹਸ੍ਸਂ ਸੂਰਿਯਸਹਸ੍ਸਂ ਉਟ੍ਠਾਪੇਨ੍ਤੋ ਵਿਯ ਪਾਕਟਂ ਕਤ੍ਵਾ ਯੋ ਕਥੇਤੁਂ ਸਕ੍ਕੋਤੀਤਿ ਅਤ੍ਥੋ. ਨਾਚ੍ਚਾਹਿਤਨ੍ਤਿ ਨ ਅਤਿਅਹਿਤਂ, ਹਿਤਾਤਿਕ੍ਕਨ੍ਤਂ ਲੁਦ੍ਦਂ ਫਰੁਸਂ ਸਾਹਸਿਕਕਮ੍ਮਞ੍ਚ ਯੋ ਨ ਕਰੋਤੀਤਿ ਅਤ੍ਥੋ. ਇਮਸ੍ਸ ਪਨਤ੍ਥਸ੍ਸ ਆਵਿਭਾਵਤ੍ਥਂ –

‘‘ਨ ਪਣ੍ਡਿਤਾ ਅਤ੍ਤਸੁਖਸ੍ਸ ਹੇਤੁ, ਪਾਪਾਨਿ ਕਮ੍ਮਾਨਿ ਸਮਾਚਰਨ੍ਤਿ;

ਦੁਕ੍ਖੇਨ ਫੁਟ੍ਠਾ ਪਿਲ਼ਿਤਾਪਿ ਸਨ੍ਤਾ, ਛਨ੍ਦਾ ਦੋਸਾ ਚ ਨ ਜਹਨ੍ਤਿ ਧਮ੍ਮ’’ਨ੍ਤਿ. –

ਭੂਰਿਪਞ੍ਹੋ ਕਥੇਤਬ੍ਬੋ.

ਕਾਲਾਗਤਨ੍ਤਿ ਏਤ੍ਥ ਦਾਨਂ ਦਾਤਬ੍ਬਕਾਲੇ, ਸੀਲਂ ਰਕ੍ਖਣਕਾਲੇ, ਉਪੋਸਥਂ ਉਪਵਾਸਕਾਲੇ, ਸਰਣੇਸੁ ਪਤਿਟ੍ਠਾਨਕਾਲੇ, ਪਬ੍ਬਜਿਤਕਾਲੇ, ਸਮਣਧਮ੍ਮਕਰਣਕਾਲੇ, ਵਿਪਸ੍ਸਨਾਚਾਰਸ੍ਮਿਂ ਯੁਞ੍ਜਨਕਾਲੇ ਚਾਤਿ ਇਮਾਨਿ ਦਾਨਾਦੀਨਿ ਸਮ੍ਪਾਦੇਨ੍ਤੋ ਕਾਲਾਗਤਂ ਅਤ੍ਥਪਦਂ ਨ ਰਿਞ੍ਚਤਿ ਨ ਹਾਪੇਤਿ ਨ ਗਲ਼ਾਪੇਤਿ ਨਾਮ. ਤਥਾਵਿਧਨ੍ਤਿ ਸਕ੍ਕ ਸਬ੍ਬਞ੍ਞੁਬੁਦ੍ਧਾ ਚ ਪਚ੍ਚੇਕਬੁਦ੍ਧਾ ਚ ਬੋਧਿਸਤ੍ਤਾ ਚ ਪਞ੍ਞਵਨ੍ਤਂ ਕਥੇਨ੍ਤਾ ਏਵਰੂਪਂ ਪੁਗ੍ਗਲਂ ਕਥੇਨ੍ਤਿ.

‘‘ਯੋ ਵੇ’’ਤਿ ਗਾਥਾਯ ਪਰੇਨ ਅਤ੍ਤਨੋ ਕਤਗੁਣਂ ਜਾਨਾਤੀਤਿ ਕਤਞ੍ਞੂ. ਏਵਂ ਞਤ੍ਵਾ ਪਨ ਯੇਨਸ੍ਸ ਗੁਣੋ ਕਤੋ, ਤਸ੍ਸ ਗੁਣਂ ਪਟਿਕਰੋਨ੍ਤੋ ਕਤਵੇਦੀ ਨਾਮ. ਦੁਖਿਤਸ੍ਸਾਤਿ ਅਤ੍ਤਨੋ ਸਹਾਯਸ੍ਸ ਦੁਕ੍ਖਪ੍ਪਤ੍ਤਸ੍ਸ ਦੁਕ੍ਖਂ ਅਤ੍ਤਨਿ ਆਰੋਪੇਤ੍ਵਾ ਯੋ ਤਸ੍ਸ ਉਪ੍ਪਨ੍ਨਕਿਚ੍ਚਂ ਸਹਤ੍ਥੇਨ ਸਕ੍ਕਚ੍ਚਂ ਕਰੋਤਿ, ਬੁਦ੍ਧਾਦਯੋ ਏਵਰੂਪਂ ਸਪ੍ਪੁਰਿਸਂ ਨਾਮ ਕਥੇਨ੍ਤਿ. ਅਪਿਚ ਸਪ੍ਪੁਰਿਸਾ ਨਾਮ ਕਤਞ੍ਞੂ ਕਤਵੇਦਿਨੋ ਹੋਨ੍ਤੀਤਿ ਸਤਪਤ੍ਤਜਾਤਕ- (ਜਾ. ੧.੩.੮੫-੮੭) ਚੂਲ਼ਹਂਸਜਾਤਕ- (ਜਾ. ੧.੧੫.੧੩੩ ਆਦਯੋ) ਮਹਾਹਂਸਜਾਤਕਾਦੀਨਿ (ਜਾ. ੨.੨੧.੮੯ ਆਦਯੋ) ਕਥੇਤਬ੍ਬਾਨਿ. ਏਤੇਹਿ ਸਬ੍ਬੇਹੀਤਿ ਸਕ੍ਕ ਯੋ ਏਤੇਹਿ ਹੇਟ੍ਠਾ ਵੁਤ੍ਤੇਹਿ ਸੀਲਾਦੀਹਿ ਸਬ੍ਬੇਹਿਪਿ ਗੁਣੇਹਿ ਉਪੇਤੋ. ਸਦ੍ਧੋਤਿ ਓਕਪ੍ਪਨਸਦ੍ਧਾਯ ਸਮਨ੍ਨਾਗਤੋ. ਮੁਦੂਤਿ ਪਿਯਭਾਣੀ. ਸਂਵਿਭਾਗੀਤਿ ਸੀਲਸਂਵਿਭਾਗਦਾਨਸਂਵਿਭਾਗਾਭਿਰਤਤ੍ਤਾ ਸਂਵਿਭਾਗੀ. ਯਾਚਕਾਨਂ ਵਚਨਂ ਞਤ੍ਵਾ ਦਾਨਵਸੇਨ ਵਦਞ੍ਞੂ. ਚਤੂਹਿ ਸਙ੍ਗਹਵਤ੍ਥੂਹਿ ਤੇਸਂ ਤੇਸਂ ਸਙ੍ਗਣ੍ਹਨਤੋ ਸਙ੍ਗਾਹਕਂ, ਮਧੁਰਵਚਨਤਾਯ ਸਖਿਲਂ, ਮਟ੍ਠਵਚਨਤਾਯ ਸਣ੍ਹਵਾਚਂ ਤਥਾਵਿਧਂ ਨੁ ਪੁਗ੍ਗਲਂ ਅਧਿਗਤਯਸਸੋਭਗ੍ਗਸਙ੍ਖਾਤਾ ਸਿਰੀ ਨੋ ਜਹਾਤਿ, ਨਾਸ੍ਸ ਸਿਰੀ ਵਿਨਸ੍ਸਤੀਤਿ.

ਏਵਂ ਮਹਾਸਤ੍ਤੋ ਗਗਨਤਲੇ ਪੁਣ੍ਣਚਨ੍ਦਂ ਉਟ੍ਠਾਪੇਨ੍ਤੋ ਵਿਯ ਚਤ੍ਤਾਰੋ ਪਞ੍ਹੇ ਵਿਸ੍ਸਜ੍ਜੇਸਿ. ਤਤੋ ਪਰਂ ਸੇਸਪਞ੍ਹਾਨਂ ਪੁਚ੍ਛਾ ਚ ਵਿਸ੍ਸਜ੍ਜਨਞ੍ਚ ਹੋਤਿ –

੮੦.

‘‘ਸੁਭਾਸਿਤਂ ਤੇ ਅਨੁਮੋਦਿਯਾਨ, ਅਞ੍ਞਂ ਤਂ ਪੁਚ੍ਛਾਮਿ ਤਦਿਙ੍ਘ ਬ੍ਰੂਹਿ;

ਸੀਲਂ ਸਿਰਿਞ੍ਚਾਪਿ ਸਤਞ੍ਚ ਧਮ੍ਮਂ, ਪਞ੍ਞਞ੍ਚ ਕਂ ਸੇਟ੍ਠਤਰਂ ਵਦਨ੍ਤਿ.

੮੧.

‘‘ਪਞ੍ਞਾ ਹਿ ਸੇਟ੍ਠਾ ਕੁਸਲਾ ਵਦਨ੍ਤਿ, ਨਕ੍ਖਤ੍ਤਰਾਜਾਰਿਵ ਤਾਰਕਾਨਂ;

ਸੀਲਂ ਸਿਰੀ ਚਾਪਿ ਸਤਞ੍ਚ ਧਮ੍ਮੋ, ਅਨ੍ਵਾਯਿਕਾ ਪਞ੍ਞਵਤੋ ਭਵਨ੍ਤਿ.

੮੨.

‘‘ਸੁਭਾਸਿਤਂ ਤੇ ਅਨੁਮੋਦਿਯਾਨ, ਅਞ੍ਞਂ ਤਂ ਪੁਚ੍ਛਾਮਿ ਤਦਿਙ੍ਘ ਬ੍ਰੂਹਿ;

ਕਥਂਕਰੋ ਕਿਨ੍ਤਿਕਰੋ ਕਿਮਾਚਰਂ, ਕਿਂ ਸੇਵਮਾਨੋ ਲਭਤੀਧ ਪਞ੍ਞਂ;

ਪਞ੍ਞਾਯ ਦਾਨਿਪ੍ਪਟਿਪਦਂ ਵਦੇਹਿ, ਕਥਂਕਰੋ ਪਞ੍ਞਵਾ ਹੋਤਿ ਮਚ੍ਚੋ.

੮੩.

‘‘ਸੇਵੇਥ ਵੁਦ੍ਧੇ ਨਿਪੁਣੇ ਬਹੁਸ੍ਸੁਤੇ, ਉਗ੍ਗਾਹਕੋ ਚ ਪਰਿਪੁਚ੍ਛਕੋ ਸਿਯਾ;

ਸੁਣੇਯ੍ਯ ਸਕ੍ਕਚ੍ਚ ਸੁਭਾਸਿਤਾਨਿ, ਏਵਂਕਰੋ ਪਞ੍ਞਵਾ ਹੋਤਿ ਮਚ੍ਚੋ.

੮੪.

‘‘ਸ ਪਞ੍ਞਵਾ ਕਾਮਗੁਣੇ ਅਵੇਕ੍ਖਤਿ, ਅਨਿਚ੍ਚਤੋ ਦੁਕ੍ਖਤੋ ਰੋਗਤੋ ਚ;

ਏਵਂ ਵਿਪਸ੍ਸੀ ਪਜਹਾਤਿ ਛਨ੍ਦਂ, ਦੁਕ੍ਖੇਸੁ ਕਾਮੇਸੁ ਮਹਬ੍ਭਯੇਸੁ.

੮੫.

‘‘ਸ ਵੀਤਰਾਗੋ ਪਵਿਨੇਯ੍ਯ ਦੋਸਂ, ਮੇਤ੍ਤਂ ਚਿਤ੍ਤਂ ਭਾਵਯੇ ਅਪ੍ਪਮਾਣਂ;

ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ, ਅਨਿਨ੍ਦਿਤੋ ਬ੍ਰਹ੍ਮਮੁਪੇਤਿ ਠਾਨ’’ਨ੍ਤਿ.

ਤਤ੍ਥ ਸੀਲਨ੍ਤਿ ਆਚਾਰਸੀਲਂ. ਸਿਰਿਨ੍ਤਿ ਇਸ੍ਸਰਿਯਸਿਰਿਂ. ਸਤਞ੍ਚ ਧਮ੍ਮਨ੍ਤਿ ਸਪ੍ਪੁਰਿਸਧਮ੍ਮਂ. ਪਞ੍ਞਨ੍ਤਿ ਸੁਪਞ੍ਞਂ. ਏਵਂ ਇਮੇਸਂ ਚਤੁਨ੍ਨਂ ਧਮ੍ਮਾਨਂ ਕਤਰਂ ਧਮ੍ਮਂ ਸੇਟ੍ਠਤਰਂ ਵਦਨ੍ਤੀਤਿ ਪੁਚ੍ਛਤਿ. ਪਞ੍ਞਾ ਹੀਤਿ, ਸਕ੍ਕ, ਏਤੇਸੁ ਚਤੂਸੁ ਧਮ੍ਮੇਸੁ ਯਾ ਏਸਾ ਪਞ੍ਞਾ ਨਾਮ, ਸਾਵ ਸੇਟ੍ਠਾ, ਇਤਿ ਬੁਦ੍ਧਾਦਯੋ ਕੁਸਲਾ ਵਦਨ੍ਤਿ. ਯਥਾ ਹਿ ਤਾਰਕਗਣਾ ਚਨ੍ਦਂ ਪਰਿਵਾਰੇਨ੍ਤਿ, ਚਨ੍ਦੋਵ ਤੇਸਂ ਉਤ੍ਤਮੋ. ਏਵਂ ਸੀਲਞ੍ਚ ਸਿਰੀ ਚਾਪਿ ਸਤਞ੍ਚ ਧਮ੍ਮੋਤਿ ਏਤੇ ਤਯੋਪਿ ਅਨ੍ਵਾਯਿਕਾ ਪਞ੍ਞਵਤੋ ਭਵਨ੍ਤਿ ਪਞ੍ਞਵਨ੍ਤਮੇਵ ਅਨੁਗਚ੍ਛਨ੍ਤਿ, ਪਞ੍ਞਾਯ ਏਵ ਪਰਿਵਾਰਾ ਹੋਨ੍ਤੀਤਿ ਅਤ੍ਥੋ.

‘‘ਕਥਂਕਰੋ’’ਤਿਆਦੀਨਿ ਅਞ੍ਞਮਞ੍ਞਵੇਵਚਨਾਨੇਵ. ਕਥਂਕਰੋਤਿ ਕਿਂ ਨਾਮ ਕਮ੍ਮਂ ਕਰੋਨ੍ਤੋ ਕਿਂ ਆਚਰਨ੍ਤੋ ਕਿਂ ਸੇਵਮਾਨੋ ਭਜਮਾਨੋ ਪਯਿਰੁਪਾਸਮਾਨੋ ਇਧਲੋਕੇ ਪਞ੍ਞਂ ਲਭਤਿ, ਪਞ੍ਞਾਯਮੇਵ ਪਟਿਪਦਂ ਵਦੇਹਿ, ਜਾਨਿਤੁਕਾਮੋਮ੍ਹਿ, ਕਥਂਕਰੋ ਮਚ੍ਚੋ ਪਞ੍ਞਵਾ ਨਾਮ ਹੋਤੀਤਿ ਪੁਚ੍ਛਤਿ. ਵੁਦ੍ਧੇਤਿ ਪਞ੍ਞਾਵੁਦ੍ਧਿਪ੍ਪਤ੍ਤੇ ਪਣ੍ਡਿਤੇ. ਨਿਪੁਣੇਤਿ ਸੁਖੁਮਕਾਰਣਜਾਨਨਸਮਤ੍ਥੇ. ਏਵਂਕਰੋਤਿ ਯੋ ਪੁਗ੍ਗਲੋ ਏਵਂ ਵੁਤ੍ਤਪ੍ਪਕਾਰੇ ਪੁਗ੍ਗਲੇ ਸੇਵਤਿ ਭਜਤਿ ਪਯਿਰੁਪਾਸਤਿ, ਪਾਲ਼ਿਂ ਉਗ੍ਗਣ੍ਹਾਤਿ, ਪੁਨਪ੍ਪੁਨਂ ਅਤ੍ਥਂ ਪੁਚ੍ਛਤਿ, ਪਾਸਾਣੇ ਲੇਖਂ ਖਣਨ੍ਤੋ ਵਿਯ ਕਞ੍ਚਨਨਾਲ਼ਿਯਾ ਸੀਹਵਸਂ ਸਮ੍ਪਟਿਚ੍ਛਨ੍ਤੋ ਵਿਯ ਓਹਿਤਸੋਤੋ ਸਕ੍ਕਚ੍ਚਂ ਸੁਭਾਸਿਤਾਨਿ ਸੁਣਾਤਿ, ਅਯਂ ਏਵਂਕਰੋ ਮਚ੍ਚੋ ਪਞ੍ਞਵਾ ਹੋਤੀਤਿ.

ਏਵਂ ਮਹਾਸਤ੍ਤੋ ਪਾਚੀਨਲੋਕਧਾਤੁਤੋ ਸੂਰਿਯਂ ਉਟ੍ਠਾਪੇਨ੍ਤੋ ਵਿਯ ਪਞ੍ਞਾਯ ਪਟਿਪਦਂ ਕਥੇਤ੍ਵਾ ਇਦਾਨਿ ਤਸ੍ਸਾ ਪਞ੍ਞਾਯ ਗੁਣਂ ਕਥੇਨ੍ਤੋ ‘‘ਸ ਪਞ੍ਞਵਾ’’ਤਿਆਦਿਮਾਹ. ਤਤ੍ਥ ਕਾਮਗੁਣੇਤਿ ਕਾਮਕੋਟ੍ਠਾਸੇ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਤੋ, ਦਿਟ੍ਠਧਮ੍ਮਿਕਸਮ੍ਪਰਾਯਿਕਾਨਂ ਦੁਕ੍ਖਾਨਂ ਵਤ੍ਥੁਭਾਵੇਨ ਦੁਕ੍ਖਤੋ, ਅਟ੍ਠਨਵੁਤਿਯਾ ਰੋਗਮੁਖਾਨਂ ਕਾਮੇ ਨਿਸ੍ਸਾਯ ਉਪ੍ਪਤ੍ਤਿਸਮ੍ਭਵੇਨ ਰੋਗਤੋ ਚ ਅਵੇਕ੍ਖਤਿ ਓਲੋਕੇਤਿ, ਸੋ ਏਵਂ ਵਿਪਸ੍ਸੀ ਏਤੇਹਿ ਕਾਰਣੇਹਿ ਕਾਮਾਨਂ ਅਨਿਚ੍ਚਾਦਿਤਂ ਪਸ੍ਸਨ੍ਤੋ ‘‘ਕਾਮੇ ਨਿਸ੍ਸਾਯ ਉਪ੍ਪਜ੍ਜਨਕਦੁਕ੍ਖਾਨਂ ਅਨ੍ਤੋ ਨਤ੍ਥਿ, ਕਾਮਾਨਂ ਪਹਾਨਮੇਵ ਸੁਖ’’ਨ੍ਤਿ ਵਿਦਿਤ੍ਵਾ ਦੁਕ੍ਖੇਸੁ ਕਾਮੇਸੁ ਮਹਬ੍ਭਯੇਸੁ ਛਨ੍ਦਂ ਪਜਹਾਤਿ. ਸ ਵੀਤਰਾਗੋਤਿ, ‘‘ਸਕ੍ਕ, ਸੋ ਪੁਗ੍ਗਲੋ ਏਵਂ ਵੀਤਰਾਗੋ ਨਵਾਘਾਤਵਤ੍ਥੁਵਸੇਨ ਉਪ੍ਪਜ੍ਜਨਕਸਭਾਵਦੋਸਂ ਵਿਨੇਤ੍ਵਾ ਮੇਤ੍ਤਚਿਤ੍ਤਂ ਭਾਵੇਯ੍ਯ, ਅਪ੍ਪਮਾਣਸਤ੍ਤਾਰਮ੍ਮਣਤ੍ਤਾ ਅਪ੍ਪਮਾਣਂ ਤਂ ਭਾਵੇਤ੍ਵਾ ਅਪਰਿਹੀਨਜ੍ਝਾਨੋ ਅਗਰਹਿਤੋ ਬ੍ਰਹ੍ਮਲੋਕੇ ਉਪ੍ਪਜ੍ਜਤੀ’’ਤਿ.

ਏਵਂ ਮਹਾਸਤ੍ਤੇ ਕਾਮਾਨਂ ਦੋਸਂ ਕਥੇਨ੍ਤੇਯੇਵ ਤੇਸਂ ਤਿਣ੍ਣਮ੍ਪਿ ਰਾਜੂਨਂ ਸਬਲਕਾਯਾਨਂ ਤਦਙ੍ਗਪ੍ਪਹਾਨੇਨ ਪਞ੍ਚਕਾਮਗੁਣਰਾਗੋ ਪਹੀਨੋ. ਤਂ ਞਤ੍ਵਾ ਮਹਾਸਤ੍ਤੋ ਤੇਸਂ ਪਹਂਸਨਵਸੇਨ ਗਾਥਮਾਹ –

੮੬.

‘‘ਮਹਤ੍ਥਿਯਂ ਆਗਮਨਂ ਅਹੋਸਿ, ਤਵਮਟ੍ਠਕਾ ਭੀਮਰਥਸ੍ਸ ਚਾਪਿ;

ਕਾਲਿਙ੍ਗਰਾਜਸ੍ਸ ਚ ਉਗ੍ਗਤਸ੍ਸ, ਸਬ੍ਬੇਸ ਵੋ ਕਾਮਰਾਗੋ ਪਹੀਨੋ’’ਤਿ.

ਤਤ੍ਥ ਮਹਤ੍ਥਿਯਨ੍ਤਿ ਮਹਤ੍ਥਂ ਮਹਾਵਿਪ੍ਫਾਰਂ ਮਹਾਜੁਤਿਕਂ. ਤਵਮਟ੍ਠਕਾਤਿ ਤਵ ਅਟ੍ਠਕਾ. ਪਹੀਨੋਤਿ ਤਦਙ੍ਗਪ੍ਪਹਾਨੇਨ ਪਹੀਨੋ.

ਤਂ ਸੁਤ੍ਵਾ ਰਾਜਾਨੋ ਮਹਾਸਤ੍ਤਸ੍ਸ ਥੁਤਿਂ ਕਰੋਨ੍ਤਾ ਗਾਥਮਾਹਂਸੁ –

੮੭.

‘‘ਏਵਮੇਤਂ ਪਰਚਿਤ੍ਤਵੇਦਿ, ਸਬ੍ਬੇਸ ਨੋ ਕਾਮਰਾਗੋ ਪਹੀਨੋ;

ਕਰੋਹਿ ਓਕਾਸਮਨੁਗ੍ਗਹਾਯ, ਯਥਾ ਗਤਿਂ ਤੇ ਅਭਿਸਮ੍ਭਵੇਮਾ’’ਤਿ.

ਤਤ੍ਥ ਅਨੁਗ੍ਗਹਾਯਾਤਿ ਪਬ੍ਬਜ੍ਜਤ੍ਥਾਯ ਓਕਾਸਂ ਨੋ ਕਰੋਹਿ. ਯਥਾ ਮਯਂ ਪਬ੍ਬਜਿਤ੍ਵਾ ਤਵ ਗਤਿਂ ਨਿਪ੍ਫਤ੍ਤਿਂ ਅਭਿਸਮ੍ਭਵੇਮ ਪਾਪੁਣੇਯ੍ਯਾਮ, ਤਯਾ ਪਟਿਵਿਦ੍ਧਗੁਣਂ ਪਟਿਵਿਜ੍ਝੇਯ੍ਯਾਮਾਤਿ ਵਦਿਂਸੁ.

ਅਥ ਨੇਸਂ ਓਕਾਸਂ ਕਰੋਨ੍ਤੋ ਮਹਾਸਤ੍ਤੋ ਇਤਰਂ ਗਾਥਮਾਹ –

੮੮.

‘‘ਕਰੋਮਿ ਓਕਾਸਮਨੁਗ੍ਗਹਾਯ, ਤਥਾ ਹਿ ਵੋ ਕਾਮਰਾਗੋ ਪਹੀਨੋ;

ਫਰਾਥ ਕਾਯਂ ਵਿਪੁਲਾਯ ਪੀਤਿਯਾ, ਯਥਾ ਗਤਿਂ ਮੇ ਅਭਿਸਮ੍ਭਵੇਥਾ’’ਤਿ.

ਤਤ੍ਥ ਫਰਾਥ ਕਾਯਨ੍ਤਿ ਝਾਨਪੀਤਿਯਾ ਵਿਪੁਲਾਯ ਕਾਯਂ ਫਰਥਾਤਿ.

ਤਂ ਸੁਤ੍ਵਾ ਤੇ ਸਮ੍ਪਟਿਚ੍ਛਨ੍ਤਾ ਗਾਥਮਾਹਂਸੁ –

੮੯.

‘‘ਸਬ੍ਬਂ ਕਰਿਸ੍ਸਾਮ ਤਵਾਨੁਸਾਸਨਿਂ, ਯਂ ਯਂ ਤੁਵਂ ਵਕ੍ਖਸਿ ਭੂਰਿਪਞ੍ਞ;

ਫਰਾਮ ਕਾਯਂ ਵਿਪੁਲਾਯ ਪੀਤਿਯਾ, ਯਥਾ ਗਤਿਂ ਤੇ ਅਭਿਸਮ੍ਭਵੇਮਾ’’ਤਿ.

ਅਥ ਨੇਸਂ ਸਬਲਕਾਯਾਨਂ ਮਹਾਸਤ੍ਤੋ ਪਬ੍ਬਜ੍ਜਂ ਦਾਪੇਤ੍ਵਾ ਇਸਿਗਣਂ ਉਯ੍ਯੋਜੇਨ੍ਤੋ ਗਾਥਮਾਹ –

੯੦.

‘‘ਕਤਾਯ ਵਚ੍ਛਸ੍ਸ ਕਿਸਸ੍ਸ ਪੂਜਾ, ਗਚ੍ਛਨ੍ਤੁ ਭੋਨ੍ਤੋ ਇਸਯੋ ਸਾਧੁਰੂਪਾ;

ਝਾਨੇ ਰਤਾ ਹੋਥ ਸਦਾ ਸਮਾਹਿਤਾ, ਏਸਾ ਰਤੀ ਪਬ੍ਬਜਿਤਸ੍ਸ ਸੇਟ੍ਠਾ’’ਤਿ.

ਤਤ੍ਥ ਗਚ੍ਛਨ੍ਤੂਤਿ ਅਤ੍ਤਨੋ ਅਤ੍ਤਨੋ ਵਸਨਟ੍ਠਾਨਾਨਿ ਗਚ੍ਛਨ੍ਤੁ.

ਇਸਯੋ ਤਸ੍ਸ ਸਰਭਙ੍ਗਸਤ੍ਥੁਨੋ ਵਚਨਂ ਸਿਰਸਾ ਸਮ੍ਪਟਿਚ੍ਛਿਤ੍ਵਾ ਵਨ੍ਦਿਤ੍ਵਾ ਆਕਾਸਂ ਉਪ੍ਪਤਿਤ੍ਵਾ ਸਕਾਨਿ ਵਸਨਟ੍ਠਾਨਾਨਿ ਗਮਿਂਸੁ. ਸਕ੍ਕੋਪਿ ਉਟ੍ਠਾਯਾਸਨਾ ਮਹਾਸਤ੍ਤਸ੍ਸ ਥੁਤਿਂ ਕਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਸੂਰਿਯਂ ਨਮਸ੍ਸਨ੍ਤੋ ਵਿਯ ਮਹਾਸਤ੍ਤਂ ਨਮਸ੍ਸਮਾਨੋ ਸਪਰਿਸੋ ਪਕ੍ਕਾਮਿ. ਏਤਮਤ੍ਥਂ ਵਿਦਿਤ੍ਵਾ ਸਤ੍ਥਾ ਇਮਾ ਗਾਥਾਯੋ ਅਭਾਸਿ –

੯੧.

‘‘ਸੁਤ੍ਵਾਨ ਗਾਥਾ ਪਰਮਤ੍ਥਸਂਹਿਤਾ, ਸੁਭਾਸਿਤਾ ਇਸਿਨਾ ਪਣ੍ਡਿਤੇਨ;

ਤੇ ਵੇਦਜਾਤਾ ਅਨੁਮੋਦਮਾਨਾ, ਪਕ੍ਕਾਮੁ ਦੇਵਾ ਦੇਵਪੁਰਂ ਯਸਸ੍ਸਿਨੋ.

੯੨.

‘‘ਗਾਥਾ ਇਮਾ ਅਤ੍ਥਵਤੀ ਸੁਬ੍ਯਞ੍ਜਨਾ, ਸੁਭਾਸਿਤਾ ਇਸਿਨਾ ਪਣ੍ਡਿਤੇਨ;

ਯੋ ਕੋਚਿਮਾ ਅਟ੍ਠਿਕਤ੍ਵਾ ਸੁਣੇਯ੍ਯ, ਲਭੇਥ ਪੁਬ੍ਬਾਪਰਿਯਂ ਵਿਸੇਸਂ;

ਲਦ੍ਧਾਨ ਪੁਬ੍ਬਾਪਰਿਯਂ ਵਿਸੇਸਂ, ਅਦਸ੍ਸਨਂ ਮਚ੍ਚੁਰਾਜਸ੍ਸ ਗਚ੍ਛੇ’’ਤਿ.

ਤਤ੍ਥ ਪਰਮਤ੍ਥਸਂਹਿਤਾਤਿ ਅਨਿਚ੍ਚਾਦਿਦੀਪਨੇਨ ਨਿਬ੍ਬਾਨਨਿਸ੍ਸਿਤਾ. ਗਾਥਾ ਇਮਾਤਿ ਇਦਂ ਸਤ੍ਥਾ ਸਰਭਙ੍ਗਸਤ੍ਥੁਨੋ ਨਿਬ੍ਬਾਨਦਾਯਕਂ ਸੁਭਾਸਿਤਂ ਵਣ੍ਣੇਨ੍ਤੋ ਆਹ. ਤਤ੍ਥ ਅਤ੍ਥਵਤੀਤਿ ਨਿਬ੍ਬਾਨਦਾਯਕਟ੍ਠੇਨ ਪਰਮਤ੍ਥਨਿਸ੍ਸਿਤਾ. ਸੁਬ੍ਯਞ੍ਜਨਾਤਿ ਪਰਿਸੁਦ੍ਧਬ੍ਯਞ੍ਜਨਾ. ਸੁਭਾਸਿਤਾਤਿ ਸੁਕਥਿਤਾ. ਅਟ੍ਠਿਕਤ੍ਵਾਤਿ ਅਤ੍ਤਨੋ ਅਤ੍ਥਿਕਭਾਵਂ ਕਤ੍ਵਾ ਅਤ੍ਥਿਕੋ ਹੁਤ੍ਵਾ ਸਕ੍ਕਚ੍ਚਂ ਸੁਣੇਯ੍ਯ. ਪੁਬ੍ਬਾਪਰਿਯਨ੍ਤਿ ਪਠਮਜ੍ਝਾਨਂ ਪੁਬ੍ਬਵਿਸੇਸੋ, ਦੁਤਿਯਜ੍ਝਾਨਂ ਅਪਰਵਿਸੇਸੋ. ਦੁਤਿਯਜ੍ਝਾਨਂ ਪੁਬ੍ਬਵਿਸੇਸੋ, ਤਤਿਯਜ੍ਝਾਨਂ ਅਪਰਵਿਸੇਸੋਤਿ ਏਵਂ ਅਟ੍ਠਸਮਾਪਤ੍ਤਿਚਤੁਮਗ੍ਗਵਸੇਨ ਪੁਬ੍ਬਾਪਰਭਾਵੇਨ ਠਿਤਂ ਵਿਸੇਸਂ. ਅਦਸ੍ਸਨਨ੍ਤਿ ਪਰਿਯੋਸਾਨੇ ਅਪਰਵਿਸੇਸਂ ਅਰਹਤ੍ਤਂ ਲਭਿਤ੍ਵਾ ਨਿਬ੍ਬਾਨਂ ਪਾਪੁਣੇਯ੍ਯ. ਨਿਬ੍ਬਾਨਪ੍ਪਤ੍ਤੋ ਹਿ ਪੁਗ੍ਗਲੋ ਮਚ੍ਚੁਰਾਜਸ੍ਸ ਅਦਸ੍ਸਨਂ ਗਤੋ ਨਾਮ ਹੋਤੀਤਿ.

ਏਵਂ ਸਤ੍ਥਾ ਅਰਹਤ੍ਤੇਨ ਦੇਸਨਾਯ ਕੂਟਂ ਗਣ੍ਹਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਮੋਗ੍ਗਲ੍ਲਾਨਸ੍ਸ ਆਲ਼ਾਹਨੇ ਪੁਪ੍ਫਵਸ੍ਸਂ ਵਸ੍ਸੀ’’ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਨ੍ਤੋ ਆਹ –

੯੩.

‘‘ਸਾਲਿਸ੍ਸਰੋ ਸਾਰਿਪੁਤ੍ਤੋ, ਮੇਣ੍ਡਿਸ੍ਸਰੋ ਚ ਕਸ੍ਸਪੋ;

ਪਬ੍ਬਤੋ ਅਨੁਰੁਦ੍ਧੋ ਚ, ਕਚ੍ਚਾਯਨੋ ਚ ਦੇਵਲੋ;

੯੪.

‘‘ਅਨੁਸਿਸ੍ਸੋ ਚ ਆਨਨ੍ਦੋ, ਕਿਸਵਚ੍ਛੋ ਚ ਕੋਲਿਤੋ;

ਨਾਰਦੋ ਉਦਾਯਿਤ੍ਥੇਰੋ, ਪਰਿਸਾ ਬੁਦ੍ਧਪਰਿਸਾ;

ਸਰਭਙ੍ਗੋ ਲੋਕਨਾਥੋ, ਏਵਂ ਧਾਰੇਥ ਜਾਤਕ’’ਨ੍ਤਿ.

ਸਰਭਙ੍ਗਜਾਤਕਵਣ੍ਣਨਾ ਦੁਤਿਯਾ.

[੫੨੩] ੩. ਅਲਮ੍ਬੁਸਾਜਾਤਕਵਣ੍ਣਨਾ

ਅਥਬ੍ਰਵੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪੁਰਾਣਦੁਤਿਯਿਕਾਪਲੋਭਨਂ ਆਰਬ੍ਭ ਕਥੇਸਿ. ਵਤ੍ਥੁ ਇਨ੍ਦ੍ਰਿਯਜਾਤਕੇ (ਜਾ. ੧.੮.੬੦ ਆਦਯੋ) ਵਿਤ੍ਥਾਰਿਤਮੇਵ. ਸਤ੍ਥਾ ਪਨ ਤਂ ਭਿਕ੍ਖੁਂ ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਕੇਨ ਉਕ੍ਕਣ੍ਠਾਪਿਤੋਸੀ’’ਤਿ ਵਤ੍ਵਾ ‘‘ਪੁਰਾਣਦੁਤਿਯਿਕਾਯਾ’’ਤਿ ਵੁਤ੍ਤੇ ‘‘ਭਿਕ੍ਖੁ ਏਸਾ ਇਤ੍ਥੀ ਤੁਯ੍ਹਂ ਅਨਤ੍ਥਕਾਰਿਕਾ, ਤ੍ਵਂ ਏਤਂ ਨਿਸ੍ਸਾਯ ਝਾਨਂ ਨਾਸੇਤ੍ਵਾ ਤੀਣਿ ਸਂਵਚ੍ਛਰਾਨਿ ਮੂਲ਼੍ਹੋ ਵਿਸਞ੍ਞੀ ਨਿਪਜ੍ਜਿਤ੍ਵਾ ਉਪ੍ਪਨ੍ਨਾਯ ਸਞ੍ਞਾਯ ਮਹਾਪਰਿਦੇਵਂ ਪਰਿਦੇਵੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਸਿਰਟ੍ਠੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਰਞ੍ਞਾਯਤਨੇ ਵਨਮੂਲਫਲਾਹਾਰੋ ਯਾਪੇਸਿ. ਅਥੇਕਾ ਮਿਗੀ ਤਸ੍ਸ ਪਸ੍ਸਾਵਟ੍ਠਾਨੇ ਸਮ੍ਭਵਮਿਸ੍ਸਕਂ ਤਿਣਂ ਖਾਦਿਤ੍ਵਾ ਉਦਕਂ ਪਿਵਿ. ਏਤ੍ਤਕੇਨੇਵ ਚ ਤਸ੍ਮਿਂ ਪਟਿਬਦ੍ਧਚਿਤ੍ਤਾ ਗਬ੍ਭਂ ਪਟਿਲਭਿਤ੍ਵਾ ਤਤੋ ਪਟ੍ਠਾਯ ਕਤ੍ਥਚਿ ਅਗਨ੍ਤ੍ਵਾ ਤਤ੍ਥੇਵ ਤਿਣਂ ਖਾਦਿਤ੍ਵਾ ਅਸ੍ਸਮਸ੍ਸ ਸਾਮਨ੍ਤੇਯੇਵ ਵਿਚਰਤਿ. ਮਹਾਸਤ੍ਤੋ ਪਰਿਗ੍ਗਣ੍ਹਨ੍ਤੋ ਤਂ ਕਾਰਣਂ ਅਞ੍ਞਾਸਿ. ਸਾ ਅਪਰਭਾਗੇ ਮਨੁਸ੍ਸਦਾਰਕਂ ਵਿਜਾਯਿ. ਮਹਾਸਤ੍ਤੋ ਤਂ ਪੁਤ੍ਤਸਿਨੇਹੇਨ ਪਟਿਜਗ੍ਗਿ, ‘‘ਇਸਿਸਿਙ੍ਗੋ’’ਤਿਸ੍ਸ ਨਾਮਂ ਅਕਾਸਿ. ਅਥ ਨਂ ਮਹਾਸਤ੍ਤੋ ਵਿਞ੍ਞੁਤਪ੍ਪਤ੍ਤਂ ਪਬ੍ਬਾਜੇਤ੍ਵਾ ਅਤ੍ਤਨੋ ਮਹਲ੍ਲਕਕਾਲੇ ਤਂ ਆਦਾਯ ਨਾਰਿਵਨਂ ਨਾਮ ਗਨ੍ਤ੍ਵਾ, ‘‘ਤਾਤ, ਇਮਸ੍ਮਿਂ ਹਿਮਵਨ੍ਤੇ ਇਮੇਹਿ ਪੁਪ੍ਫੇਹਿ ਸਦਿਸਾ ਇਤ੍ਥਿਯੋ ਨਾਮ ਹੋਨ੍ਤਿ, ਤਾ ਅਤ੍ਤਨੋ ਵਸਂ ਗਤੇ ਮਹਾਵਿਨਾਸਂ ਪਾਪੇਨ੍ਤਿ, ਨ ਤਾਸਂ ਵਸਂ ਨਾਮ ਗਨ੍ਤੁਂ ਵਟ੍ਟਤੀ’’ਤਿ ਓਵਦਿਤ੍ਵਾ ਅਪਰਭਾਗੇ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਇਸਿਸਿਙ੍ਗੋਪਿ ਝਾਨਕੀਲ਼ਂ ਕੀਲ਼ਨ੍ਤੋ ਹਿਮਵਨ੍ਤਪ੍ਪਦੇਸੇ ਵਾਸਂ ਕਪ੍ਪੇਸਿ. ਘੋਰਤਪੋ ਪਰਮਧਿਤਿਨ੍ਦ੍ਰਿਯੋ ਅਹੋਸਿ. ਅਥਸ੍ਸ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਕਮ੍ਪਿ, ਸਕ੍ਕੋ ਆਵਜ੍ਜੇਨ੍ਤੋ ਤਂ ਕਾਰਣਂ ਞਤ੍ਵਾ ‘‘ਅਯਂ ਮਂ ਸਕ੍ਕਤ੍ਤਾ ਚਾਵੇਯ੍ਯ, ਏਕਂ ਅਚ੍ਛਰਂ ਪੇਸੇਤ੍ਵਾ ਸੀਲਮਸ੍ਸ ਭਿਨ੍ਦਾਪੇਸ੍ਸਾਮੀ’’ਤਿ ਸਕਲਦੇਵਲੋਕਂ ਉਪਪਰਿਕ੍ਖਨ੍ਤੋ ਅਤ੍ਤਨੋ ਅਡ੍ਢਤੇਯ੍ਯਕੋਟਿਸਙ੍ਖਾਨਂ ਪਰਿਚਾਰਿਕਾਨਂ ਮਜ੍ਝੇ ਏਕਂ ਅਲਮ੍ਬੁਸਂ ਨਾਮ ਅਚ੍ਛਰਂ ਠਪੇਤ੍ਵਾ ਅਞ੍ਞਂ ਤਸ੍ਸ ਸੀਲਂ ਭਿਨ੍ਦਿਤੁਂ ਸਮਤ੍ਥਂ ਅਦਿਸ੍ਵਾ ਤਂ ਪਕ੍ਕੋਸਾਪੇਤ੍ਵਾ ਤਸ੍ਸ ਸੀਲਭੇਦਂ ਕਾਤੁਂ ਆਣਾਪੇਸਿ. ਤਮਤ੍ਥਂ ਆਵਿਕਰੋਨ੍ਤੋ ਸਤ੍ਥਾ ਪਠਮਂ ਗਾਥਮਾਹ –

੯੫.

‘‘ਅਥਬ੍ਰਵਿ ਬ੍ਰਹਾ ਇਨ੍ਦੋ, ਵਤ੍ਰਭੂ ਜਯਤਂ ਪਿਤਾ;

ਦੇਵਕਞ੍ਞਂ ਪਰਾਭੇਤ੍ਵਾ, ਸੁਧਮ੍ਮਾਯਂ ਅਲਮ੍ਬੁਸ’’ਨ੍ਤਿ.

ਤਤ੍ਥ ਬ੍ਰਹਾਤਿ ਮਹਾ. ਵਤ੍ਰਭੂਤਿ ਵਤ੍ਰਸ੍ਸ ਨਾਮ ਅਸੁਰਸ੍ਸ ਅਭਿਭਵਿਤਾ. ਜਯਤਂ ਪਿਤਾਤਿ ਜਯਨ੍ਤਾਨਂ ਜਯਪ੍ਪਤ੍ਤਾਨਂ ਸੇਸਾਨਂ ਤੇਤ੍ਤਿਂਸਾਯ ਦੇਵਪੁਤ੍ਤਾਨਂ ਪਿਤੁਕਿਚ੍ਚਸਾਧਨੇਨ ਪਿਤਾ. ਪਰਾਭੇਤ੍ਵਾਤਿ ਹਦਯਂ ਭਿਨ੍ਦਿਤ੍ਵਾ ਓਲੋਕੇਨ੍ਤੋ ਵਿਯ ਤਂ ‘‘ਪਟਿਬਲਾ ਅਯ’’ਨ੍ਤਿ ਞਤ੍ਵਾਤਿ ਅਤ੍ਥੋ. ਸੁਧਮ੍ਮਾਯਨ੍ਤਿ ਸੁਧਮ੍ਮਾਯਂ ਦੇਵਸਭਾਯਂ.

ਪਣ੍ਡੁਕਮ੍ਬਲਸਿਲਾਸਨੇ ਨਿਸਿਨ੍ਨੋ ਤਂ ਅਲਮ੍ਬੁਸਂ ਪਕ੍ਕੋਸਾਪੇਤ੍ਵਾ ਇਦਮਾਹ –

੯੬.

‘‘ਮਿਸ੍ਸੇ ਦੇਵਾ ਤਂ ਯਾਚਨ੍ਤਿ, ਤਾਵਤਿਂਸਾ ਸਇਨ੍ਦਕਾ;

ਇਸਿਪ੍ਪਲੋਭਨੇ ਗਚ੍ਛ, ਇਸਿਸਿਙ੍ਗਂ ਅਲਮ੍ਬੁਸੇ’’ਤਿ.

ਤਤ੍ਥ ਮਿਸ੍ਸੇਤਿ ਤਂ ਆਲਪਤਿ, ਇਦਞ੍ਚ ਤਸ੍ਸਾ ਨਾਮਂ, ਸਬ੍ਬਾ ਪਨਿਤ੍ਥਿਯੋ ਪੁਰਿਸੇ ਕਿਲੇਸਮਿਸ੍ਸਨੇਨ ਮਿਸ੍ਸਨਤੋ ‘‘ਮਿਸ੍ਸਾ’’ਤਿ ਵੁਚ੍ਚਨ੍ਤਿ, ਤੇਨ ਸਾਧਾਰਣੇਨ ਗੁਣਨਾਮੇਨਾਲਪਨ੍ਤੋ ਏਵਮਾਹ. ਇਸਿਪ੍ਪਲੋਭਨੇਤਿ ਇਸੀਨਂ ਪਲੋਭਨਸਮਤ੍ਥੇ. ਇਸਿਸਿਙ੍ਗਨ੍ਤਿ ਤਸ੍ਸ ਕਿਰ ਮਤ੍ਥਕੇ ਮਿਗਸਿਙ੍ਗਾਕਾਰੇਨ ਦ੍ਵੇ ਚੂਲ਼ਾ ਉਟ੍ਠਹਿਂਸੁ, ਤਸ੍ਮਾ ਏਵਂ ਵੁਚ੍ਚਤਿ.

ਇਤਿ ਸਕ੍ਕੋ ‘‘ਗਚ੍ਛ ਇਸਿਸਿਙ੍ਗਂ ਉਪਸਙ੍ਕਮਿਤ੍ਵਾ ਅਤ੍ਤਨੋ ਵਸਂ ਆਨੇਤ੍ਵਾ ਸੀਲਮਸ੍ਸ ਭਿਨ੍ਦਾ’’ਤਿ ਅਲਮ੍ਬੁਸਂ ਆਣਾਪੇਸਿ.

੯੭.

‘‘ਪੁਰਾਯਂ ਅਮ੍ਹੇ ਅਚ੍ਚੇਤਿ, ਵਤ੍ਤਵਾ ਬ੍ਰਹ੍ਮਚਰਿਯਵਾ;

ਨਿਬ੍ਬਾਨਾਭਿਰਤੋ ਵੁਦ੍ਧੋ, ਤਸ੍ਸ ਮਗ੍ਗਾਨਿ ਆਵਰਾ’’ਤਿ. – ਵਚਨਂ ਆਹ;

ਤਤ੍ਥ ਪੁਰਾਯਨ੍ਤਿ ਅਯਂ ਤਾਪਸੋ ਵਤ੍ਤਸਮ੍ਪਨ੍ਨੋ ਚ ਬ੍ਰਹ੍ਮਚਰਿਯਵਾ ਚ, ਸੋ ਪਨੇਸ ਦੀਘਾਯੁਕਤਾਯ ਨਿਬ੍ਬਾਨਸਙ੍ਖਾਤੇ ਮਗ੍ਗੇ ਅਭਿਰਤੋ ਗੁਣਵੁਦ੍ਧਿਯਾ ਚ ਵੁਦ੍ਧੋ. ਤਸ੍ਮਾ ਯਾਵ ਏਸ ਅਮ੍ਹੇ ਨਾਤਿਕ੍ਕਮਤਿ, ਨ ਅਭਿਭਵਿਤ੍ਵਾ ਇਮਮ੍ਹਾ ਠਾਨਾ ਚਾਵੇਤਿ, ਤਾਵਦੇਵ ਤ੍ਵਂ ਗਨ੍ਤ੍ਵਾ ਤਸ੍ਸ ਦੇਵਲੋਕਗਮਨਾਨਿ ਮਗ੍ਗਾਨਿ ਆਵਰ, ਯਥਾ ਇਧ ਨਾਗਚ੍ਛਤਿ, ਏਵਂ ਕਰੋਹੀਤਿ ਅਤ੍ਥੋ.

ਤਂ ਸੁਤ੍ਵਾ ਅਲਮ੍ਬੁਸਾ ਗਾਥਾਦ੍ਵਯਮਾਹ –

੯੮.

‘‘ਦੇਵਰਾਜ ਕਿਮੇਵ ਤ੍ਵਂ, ਮਮੇਵ ਤੁਵਂ ਸਿਕ੍ਖਸਿ;

ਇਸਿਪ੍ਪਲੋਭਨੇ ਗਚ੍ਛ, ਸਨ੍ਤਿ ਅਞ੍ਞਾਪਿ ਅਚ੍ਛਰਾ.

੯੯.

‘‘ਮਾਦਿਸਿਯੋ ਪਵਰਾ ਚੇਵ, ਅਸੋਕੇ ਨਨ੍ਦਨੇ ਵਨੇ;

ਤਾਸਮ੍ਪਿ ਹੋਤੁ ਪਰਿਯਾਯੋ, ਤਾਪਿ ਯਨ੍ਤੁ ਪਲੋਭਨਾ’’ਤਿ.

ਤਤ੍ਥ ਕਿਮੇਵ ਤ੍ਵਨ੍ਤਿ ਕਿਂ ਨਾਮੇਤਂ ਤ੍ਵਂ ਕਰੋਸੀਤਿ ਦੀਪੇਤਿ. ਮਮੇਵ ਤੁਵਂ ਸਿਕ੍ਖਸੀਤਿ ਇਮਸ੍ਮਿਂ ਸਕਲਦੇਵਲੋਕੇ ਮਮੇਵ ਤੁਵਂ ਇਕ੍ਖਸਿ, ਅਞ੍ਞਂ ਨ ਪਸ੍ਸਸੀਤਿ ਅਧਿਪ੍ਪਾਯੇਨ ਵਦਤਿ. ਸ-ਕਾਰੋ ਪਨੇਤ੍ਥ ਬ੍ਯਞ੍ਜਨਸਨ੍ਧਿਕਰੋ. ਇਸਿਪ੍ਪਲੋਭਨੇ ਗਚ੍ਛਾਤਿ ਕਿਂਕਾਰਣਾ ਮਞ੍ਞੇਵ ਏਵਂ ਵਦੇਸੀਤਿ ਅਧਿਪ੍ਪਾਯੋ. ਪਵਰਾ ਚੇਵਾਤਿ ਮਯਾ ਉਤ੍ਤਰਿਤਰਾ ਚੇਵ. ਅਸੋਕੇਤਿ ਸੋਕਰਹਿਤੇ. ਨਨ੍ਦਨੇਤਿ ਨਨ੍ਦਿਜਨਕੇ. ਪਰਿਯਾਯੋਤਿ ਗਮਨਵਾਰੋ.

ਤਤੋ ਸਕ੍ਕੋ ਤਿਸ੍ਸੋ ਗਾਥਾਯੋ ਅਭਾਸਿ –

੧੦੦.

‘‘ਅਦ੍ਧਾ ਹਿ ਸਚ੍ਚਂ ਭਣਸਿ, ਸਨ੍ਤਿ ਅਞ੍ਞਾਪਿ ਅਚ੍ਛਰਾ;

ਤਾਦਿਸਿਯੋ ਪਵਰਾ ਚੇਵ, ਅਸੋਕੇ ਨਨ੍ਦਨੇ ਵਨੇ.

੧੦੧.

‘‘ਨ ਤਾ ਏਵਂ ਪਜਾਨਨ੍ਤਿ, ਪਾਰਿਚਰਿਯਂ ਪੁਮਂ ਗਤਾ;

ਯਾਦਿਸਂ ਤ੍ਵਂ ਪਜਾਨਾਸਿ, ਨਾਰਿ ਸਬ੍ਬਙ੍ਗਸੋਭਨੇ.

੧੦੨.

‘‘ਤ੍ਵਮੇਵ ਗਚ੍ਛ ਕਲ੍ਯਾਣਿ, ਇਤ੍ਥੀਨਂ ਪਵਰਾ ਚਸਿ;

ਤਵੇਵ ਵਣ੍ਣਰੂਪੇਨ, ਸਵਸਮਾਨਯਿਸ੍ਸਸੀ’’ਤਿ.

ਤਤ੍ਥ ਪੁਮਂ ਗਤਾਤਿ ਪੁਰਿਸਂ ਉਪਸਙ੍ਕਮਨ੍ਤਾ ਸਮਾਨਾ ਪੁਰਿਸਪਲੋਭਿਨਿਪਾਰਿਚਰਿਯਂ ਨ ਜਾਨਨ੍ਤਿ. ਵਣ੍ਣਰੂਪੇਨਾਤਿ ਸਰੀਰਵਣ੍ਣੇਨ ਚੇਵ ਰੂਪਸਮ੍ਪਤ੍ਤਿਯਾ ਚ. ਸਵਸਮਾਨਯਿਸ੍ਸਸੀਤਿ ਤਂ ਤਾਪਸਂ ਅਤ੍ਤਨੋ ਵਸਂ ਆਨੇਸ੍ਸਸੀਤਿ.

ਤਂ ਸੁਤ੍ਵਾ ਅਲਮ੍ਬੁਸਾ ਦ੍ਵੇ ਗਾਥਾ ਅਭਾਸਿ –

੧੦੩.

‘‘ਨ ਵਾਹਂ ਨ ਗਮਿਸ੍ਸਾਮਿ, ਦੇਵਰਾਜੇਨ ਪੇਸਿਤਾ;

ਵਿਭੇਮਿ ਚੇਤਂ ਆਸਾਦੁਂ, ਉਗ੍ਗਤੇਜੋ ਹਿ ਬ੍ਰਾਹ੍ਮਣੋ.

੧੦੪.

‘‘ਅਨੇਕੇ ਨਿਰਯਂ ਪਤ੍ਤਾ, ਇਸਿਮਾਸਾਦਿਯਾ ਜਨਾ;

ਆਪਨ੍ਨਾ ਮੋਹਸਂਸਾਰਂ, ਤਸ੍ਮਾ ਲੋਮਾਨਿ ਹਂਸਯੇ’’ਤਿ.

ਤਤ੍ਥ ਨ ਵਾਹਨ੍ਤਿ ਨ ਵੇ ਅਹਂ. ਵਿਭੇਮੀਤਿ ਭਾਯਾਮਿ. ਆਸਾਦੁਨ੍ਤਿ ਆਸਾਦਿਤੁਂ. ਇਦਂ ਵੁਤ੍ਤਂ ਹੋਤਿ – ਨਾਹਂ, ਦੇਵ, ਤਯਾ ਪੇਸਿਤਾ ਨ ਗਮਿਸ੍ਸਾਮਿ, ਅਪਿਚਾਹਂ ਤਂ ਇਸਿਂ ਸੀਲਭੇਦਨਤ੍ਥਾਯ ਅਲ੍ਲੀਯਿਤੁਂ ਭਾਯਾਮਿ, ਉਗ੍ਗਤੇਜੋ ਹਿ ਸੋਤਿ. ਆਸਾਦਿਯਾਤਿ ਆਸਾਦੇਤ੍ਵਾ. ਮੋਹਸਂਸਾਰਨ੍ਤਿ ਮੋਹੇਨ ਸਂਸਾਰਂ, ਮੋਹੇਨ ਇਸਿਂ ਪਲੋਭੇਤ੍ਵਾ ਸਂਸਾਰਂ ਆਪਨ੍ਨਾ ਵਟ੍ਟਦੁਕ੍ਖੇ ਪਤਿਟ੍ਠਿਤਾ ਸਤ੍ਤਾ ਗਣਨਪਥਂ ਅਤਿਕ੍ਕਨ੍ਤਾ. ਤਸ੍ਮਾਤਿ ਤੇਨ ਕਾਰਣੇਨ. ਲੋਮਾਨਿ ਹਂਸਯੇਤਿ ਅਹਂ ਲੋਮਾਨਿ ਉਟ੍ਠਪੇਮਿ, ‘‘ਤਸ੍ਸ ਕਿਰਾਹਂ ਸੀਲਂ ਭਿਨ੍ਦਿਸ੍ਸਾਮੀ’’ਤਿ ਚਿਨ੍ਤਯਮਾਨਾਯ ਮੇ ਲੋਮਾਨਿ ਪਹਂਸਨ੍ਤੀਤਿ ਵਦਤਿ.

੧੦੫.

‘‘ਇਦਂ ਵਤ੍ਵਾਨ ਪਕ੍ਕਾਮਿ, ਅਚ੍ਛਰਾ ਕਾਮਵਣ੍ਣਿਨੀ;

ਮਿਸ੍ਸਾ ਮਿਸ੍ਸਿਤੁਮਿਚ੍ਛਨ੍ਤੀ, ਇਸਿਸਿਙ੍ਗਂ ਅਲਮ੍ਬੁਸਾ.

੧੦੬.

‘‘ਸਾ ਚ ਤਂ ਵਨਮੋਗਯ੍ਹ, ਇਸਿਸਿਙ੍ਗੇਨ ਰਕ੍ਖਿਤਂ;

ਬਿਮ੍ਬਿਜਾਲਕਸਞ੍ਛਨ੍ਨਂ, ਸਮਨ੍ਤਾ ਅਦ੍ਧਯੋਜਨਂ.

੧੦੭.

‘‘ਪਾਤੋਵ ਪਾਤਰਾਸਮ੍ਹਿ, ਉਦਣ੍ਹਸਮਯਂ ਪਤਿ;

ਅਗ੍ਗਿਟ੍ਠਂ ਪਰਿਮਜ੍ਜਨ੍ਤਂ, ਇਸਿਸਿਙ੍ਗਂ ਉਪਾਗਮੀ’’ਤਿ. – ਇਮਾ ਅਭਿਸਮ੍ਬੁਦ੍ਧਗਾਥਾ;

ਤਤ੍ਥ ਪਕ੍ਕਾਮੀਤਿ ਤੇਨ ਹਿ, ਦੇਵਰਾਜ, ਆਵਜ੍ਜੇਯ੍ਯਾਸਿ ਮਨ੍ਤਿ ਅਤ੍ਤਨੋ ਸਯਨਗਬ੍ਭਂ ਪਵਿਸਿਤ੍ਵਾ ਅਲਙ੍ਕਰਿਤ੍ਵਾ ਇਸਿਸਿਙ੍ਗਂ ਕਿਲੇਸੇਨ ਮਿਸ੍ਸਿਤੁਂ ਇਚ੍ਛਨ੍ਤੀ ਪਕ੍ਕਾਮਿ, ਭਿਕ੍ਖਵੇ, ਸਾ ਅਚ੍ਛਰਾ ਤਸ੍ਸ ਅਸ੍ਸਮਂ ਗਤਾਤਿ. ਬਿਮ੍ਬਿਜਾਲਕਸਞ੍ਛਨ੍ਨਨ੍ਤਿ ਰਤ੍ਤਙ੍ਕੁਰਵਨੇਨ ਸਞ੍ਛਨ੍ਨਂ. ਪਾਤੋਵ ਪਾਤਰਾਸਮ੍ਹੀਤਿ, ਭਿਕ੍ਖਵੇ, ਪਾਤਰਾਸਵੇਲਾਯ ਪਾਤੋਵ ਪਗੇਯੇਵ ਅਤਿਪਗੇਵ. ਉਦਣ੍ਹਸਮਯਂ ਪਤੀਤਿ ਸੂਰਿਯੁਗ੍ਗਮਨਵੇਲਾਯਮੇਵ. ਅਗ੍ਗਿਟ੍ਠਨ੍ਤਿ ਅਗ੍ਗਿਸਾਲਂ. ਰਤ੍ਤਿਂ ਪਧਾਨਮਨੁਯੁਞ੍ਜਿਤ੍ਵਾ ਪਾਤੋਵ ਨ੍ਹਤ੍ਵਾ ਉਦਕਕਿਚ੍ਚਂ ਕਤ੍ਵਾ ਪਣ੍ਣਸਾਲਾਯਂ ਥੋਕਂ ਝਾਨਸੁਖੇਨ ਵੀਤਿਨਾਮੇਤ੍ਵਾ ਨਿਕ੍ਖਮਿਤ੍ਵਾ ਅਗ੍ਗਿਸਾਲਂ ਸਮ੍ਮਜ੍ਜਨ੍ਤਂ ਤਂ ਇਸਿਸਿਙ੍ਗਂ ਸਾ ਉਪਾਗਮਿ, ਇਤ੍ਥਿਵਿਲਾਸਂ ਦਸ੍ਸੇਨ੍ਤੀ ਤਸ੍ਸ ਪੁਰਤੋ ਅਟ੍ਠਾਸਿ.

ਅਥ ਨਂ ਤਾਪਸੋ ਪੁਚ੍ਛਨ੍ਤੋ ਆਹ –

੧੦੮.

‘‘ਕਾ ਨੁ ਵਿਜ੍ਜੁਰਿਵਾਭਾਸਿ, ਓਸਧੀ ਵਿਯ ਤਾਰਕਾ;

ਵਿਚਿਤ੍ਤਹਤ੍ਥਾਭਰਣਾ, ਆਮੁਤ੍ਤਮਣਿਕੁਣ੍ਡਲਾ.

੧੦੯.

‘‘ਆਦਿਚ੍ਚਵਣ੍ਣਸਙ੍ਕਾਸਾ, ਹੇਮਚਨ੍ਦਨਗਨ੍ਧਿਨੀ;

ਸਞ੍ਞਤੂਰੂ ਮਹਾਮਾਯਾ, ਕੁਮਾਰੀ ਚਾਰੁਦਸ੍ਸਨਾ.

੧੧੦.

‘‘ਵਿਲਗ੍ਗਾ ਮੁਦੁਕਾ ਸੁਦ੍ਧਾ, ਪਾਦਾ ਤੇ ਸੁਪ੍ਪਤਿਟ੍ਠਿਤਾ;

ਗਮਨਾ ਕਾਮਨੀਯਾ ਤੇ, ਹਰਨ੍ਤਿਯੇਵ ਮੇ ਮਨੋ.

੧੧੧.

‘‘ਅਨੁਪੁਬ੍ਬਾ ਚ ਤੇ ਊਰੂ, ਨਾਗਨਾਸਸਮੂਪਮਾ;

ਵਿਮਟ੍ਠਾ ਤੁਯ੍ਹਂ ਸੁਸ੍ਸੋਣੀ, ਅਕ੍ਖਸ੍ਸ ਫਲਕਂ ਯਥਾ.

੧੧੨.

‘‘ਉਪ੍ਪਲਸ੍ਸੇਵ ਕਿਞ੍ਜਕ੍ਖਾ, ਨਾਭਿ ਤੇ ਸਾਧੁਸਣ੍ਠਿਤਾ;

ਪੁਰਾ ਕਣ੍ਹਞ੍ਜਨਸ੍ਸੇਵ, ਦੂਰਤੋ ਪਤਿਦਿਸ੍ਸਤਿ.

੧੧੩.

‘‘ਦੁਵਿਧਾ ਜਾਤਾ ਉਰਜਾ, ਅਵਣ੍ਟਾ ਸਾਧੁਪਚ੍ਚੁਦਾ;

ਪਯੋਧਰਾ ਅਪਤਿਤਾ, ਅਡ੍ਢਲਾਬੁਸਮਾ ਥਨਾ.

੧੧੪.

‘‘ਦੀਘਾ ਕਮ੍ਬੁਤਲਾਭਾਸਾ, ਗੀਵਾ ਏਣੇਯ੍ਯਕਾ ਯਥਾ;

ਪਣ੍ਡਰਾਵਰਣਾ ਵਗ੍ਗੁ, ਚਤੁਤ੍ਥਮਨਸਨ੍ਨਿਭਾ.

੧੧੫.

‘‘ਉਦ੍ਧਗ੍ਗਾ ਚ ਅਧਗ੍ਗਾ ਚ, ਦੁਮਗ੍ਗਪਰਿਮਜ੍ਜਿਤਾ;

ਦੁਵਿਜਾ ਨੇਲਸਮ੍ਭੂਤਾ, ਦਨ੍ਤਾ ਤਵ ਸੁਦਸ੍ਸਨਾ.

੧੧੬.

‘‘ਅਪਣ੍ਡਰਾ ਲੋਹਿਤਨ੍ਤਾ, ਜਿਞ੍ਜੂਕਫਲਸਨ੍ਨਿਭਾ;

ਆਯਤਾ ਚ ਵਿਸਾਲਾ ਚ, ਨੇਤ੍ਤਾ ਤਵ ਸੁਦਸ੍ਸਨਾ.

੧੧੭.

‘‘ਨਾਤਿਦੀਘਾ ਸੁਸਮ੍ਮਟ੍ਠਾ, ਕਨਕਬ੍ਯਾਸਮੋਚਿਤਾ;

ਉਤ੍ਤਮਙ੍ਗਰੁਹਾ ਤੁਯ੍ਹਂ, ਕੇਸਾ ਚਨ੍ਦਨਗਨ੍ਧਿਕਾ.

੧੧੮.

‘‘ਯਾਵਤਾ ਕਸਿਗੋਰਕ੍ਖਾ, ਵਾਣਿਜਾਨਞ੍ਚ ਯਾ ਗਤਿ;

ਇਸੀਨਞ੍ਚ ਪਰਕ੍ਕਨ੍ਤਂ, ਸਞ੍ਞਤਾਨਂ ਤਪਸ੍ਸਿਨਂ.

੧੧੯.

‘‘ਨ ਤੇ ਸਮਸਮਂ ਪਸ੍ਸੇ, ਅਸ੍ਮਿਂ ਪਥਵਿਮਣ੍ਡਲੇ;

ਕੋ ਵਾ ਤ੍ਵਂ ਕਸ੍ਸ ਵਾ ਪੁਤ੍ਤੋ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ.

ਤਤ੍ਥ ਵਿਚਿਤ੍ਤਹਤ੍ਥਾਭਰਣਾਤਿ ਵਿਚਿਤ੍ਤੇਹਿ ਹਤ੍ਥਾਭਰਣੇਹਿ ਸਮਨ੍ਨਾਗਤਾ. ਹੇਮਚਨ੍ਦਨਗਨ੍ਧਿਨੀਤਿ ਸੁਵਣ੍ਣਵਣ੍ਣਚਨ੍ਦਨਗਨ੍ਧਵਿਲੇਪਨਾ. ਸਞ੍ਞਤੂਰੂਤਿ ਸੁਵਟ੍ਟਿਤਘਨਊਰੁ ਸਮ੍ਪਨ੍ਨਊਰੁਲਕ੍ਖਣਾ. ਵਿਲਗ੍ਗਾਤਿ ਸਂਖਿਤ੍ਤਮਜ੍ਝਾ. ਮੁਦੁਕਾਤਿ ਮੁਦੁ ਸੁਖੁਮਾਲਾ. ਸੁਦ੍ਧਾਤਿ ਨਿਮ੍ਮਲਾ. ਸੁਪ੍ਪਤਿਟ੍ਠਿਤਾਤਿ ਸਮਂ ਪਥਵਿਂ ਫੁਸਨ੍ਤਾ ਸੁਟ੍ਠੁ ਪਤਿਟ੍ਠਿਤਾ. ਗਮਨਾਤਿ ਗਚ੍ਛਮਾਨਾ. ਕਾਮਨੀਯਾਤਿ ਕਨ੍ਤਾ ਕਾਮਿਤਬ੍ਬਯੁਤ੍ਤਕਾ. ਹਰਨ੍ਤਿਯੇਵ ਮੇ ਮਨੋਤਿ ਏਤੇ ਏਵਰੂਪੇਨ ਪਰਮੇਨ ਇਤ੍ਥਿਵਿਲਾਸੇਨ ਚਙ੍ਕਮਨ੍ਤਿਯਾ ਤਵ ਪਾਦਾ ਮਮ ਚਿਤ੍ਤਂ ਹਰਨ੍ਤਿਯੇਵ. ਵਿਮਟ੍ਠਾਤਿ ਵਿਸਾਲਾ. ਸੁਸ੍ਸੋਣੀਤਿ ਸੁਨ੍ਦਰਸੋਣੀ. ਅਕ੍ਖਸ੍ਸਾਤਿ ਸੁਨ੍ਦਰਵਣ੍ਣਸ੍ਸ ਅਕ੍ਖਸ੍ਸ ਸੁਵਣ੍ਣਫਲਕਂ ਵਿਯ ਵਿਸਾਲਾ ਤੇ ਸੋਣੀਤਿ ਵਦਤਿ. ਉਪ੍ਪਲਸ੍ਸੇਵ ਕਿਞ੍ਜਕ੍ਖਾਤਿ ਨੀਲੁਪ੍ਪਲਕਣ੍ਣਿਕਾ ਵਿਯ. ਕਣ੍ਹਞ੍ਜਨਸ੍ਸੇਵਾਤਿ ਸੁਖੁਮਕਣ੍ਹਲੋਮਚਿਤ੍ਤਤ੍ਤਾ ਏਵਮਾਹ.

‘‘ਦੁਵਿਧਾ’’ਤਿਗਾਥਂ ਥਨੇ ਵਣ੍ਣਯਨ੍ਤੋ ਆਹ. ਤੇ ਹਿ ਦ੍ਵੇ ਹੁਤ੍ਵਾ ਉਰੇ ਜਾਤਾ ਵਣ੍ਟਸ੍ਸ ਅਭਾਵਾ ਅਵਣ੍ਟਾ, ਉਰੇ ਲਗ੍ਗਾ ਏਵ ਹੁਤ੍ਵਾ ਸੁਟ੍ਠੁ ਨਿਕ੍ਖਨ੍ਤਤ੍ਤਾ ਸਾਧੁਪਚ੍ਚੁਦਾ, ਪਯਸ੍ਸ ਧਾਰਣਤੋ ਪਯੋਧਰਾ, ਅਪਤਿਤਾਤਿ ਨ ਪਤਿਤਾ, ਅਮਿਲਾਤਤਾਯ ਵਾ ਅਲਮ੍ਬਨਤਾਯ ਵਾ ਨ ਅਨ੍ਤੋ ਪਵਿਟ੍ਠਾਤਿ ਅਪਤਿਤਾ, ਸੁਵਣ੍ਣਫਲਕੇ ਠਪਿਤਸੁਵਣ੍ਣਮਯਵਟ੍ਟਅਲਾਬੁਨੋ ਅਡ੍ਢੇਨ ਸਦਿਸਤਾਯ ਅਡ੍ਢਲਾਬੁਸਮਾ ਥਨਾ. ਏਣੇਯ੍ਯਕਾ ਯਥਾਤਿ ਏਣੀਮਿਗਸ੍ਸ ਹਿ ਦੀਘਾ ਚ ਵਟ੍ਟਾ ਚ ਗੀਵਾ ਸੋਭਤਿ ਯਥਾ, ਏਵਂ ਤਵ ਗੀਵਾ ਥੋਕਂ ਦੀਘਾ. ਕਮ੍ਬੁਤਲਾਭਾਸਾਤਿ ਸੁਵਣ੍ਣਾਲਿਙ੍ਗਤਲਸਨ੍ਨਿਭਾ ਗੀਵਾਤਿ ਅਤ੍ਥੋ. ਪਣ੍ਡਰਾਵਰਣਾਤਿ ਦਨ੍ਤਾਵਰਣਾ. ਚਤੁਤ੍ਥਮਨਸਨ੍ਨਿਭਾਤਿ ਚਤੁਤ੍ਥਮਨੋ ਵੁਚ੍ਚਤਿ ਚਤੁਤ੍ਥਮਨਵਤ੍ਥੁਭੂਤਾ ਜਿਵ੍ਹਾ. ਅਭਿਰਤ੍ਤਭਾਵੇਨ ਜਿਵ੍ਹਾਸਦਿਸਂ ਤੇ ਓਟ੍ਠਪਰਿਯੋਸਾਨਨ੍ਤਿ ਵਦਤਿ. ਉਦ੍ਧਗ੍ਗਾਤਿ ਹੇਟ੍ਠਿਮਦਨ੍ਤਾ. ਅਧਗ੍ਗਾਤਿ ਉਪਰਿਮਦਨ੍ਤਾ. ਦੁਮਗ੍ਗਪਰਿਮਜ੍ਜਿਤਾਤਿ ਦਨ੍ਤਕਟ੍ਠਪਰਿਮਜ੍ਜਿਤਾ ਪਰਿਸੁਦ੍ਧਾ. ਦੁਵਿਜਾਤਿ ਦ੍ਵਿਜਾ. ਨੇਲਸਮ੍ਭੂਤਾਤਿ ਨਿਦ੍ਦੋਸੇਸੁ ਹਨੁਮਂਸਪਰਿਯੋਸਾਨੇਸੁ ਸਮ੍ਭੂਤਾ.

ਅਪਣ੍ਡਰਾਤਿ ਕਣ੍ਹਾ. ਲੋਹਿਤਨ੍ਤਾਤਿ ਰਤ੍ਤਪਰਿਯਨ੍ਤਾ. ਜਿਞ੍ਜੂਕਫਲਸਨ੍ਨਿਭਾਤਿ ਰਤ੍ਤਟ੍ਠਾਨੇ ਜਿਞ੍ਜੁਕਫਲਸਦਿਸਾ. ਸੁਦਸ੍ਸਨਾਤਿ ਪਸ੍ਸਨ੍ਤਾਨਂ ਅਤਿਤ੍ਤਿਕਰਾ ਪਞ੍ਚਪਸਾਦਸਮਨ੍ਨਾਗਤਾ. ਨਾਤਿਦੀਘਾਤਿ ਪਮਾਣਯੁਤ੍ਤਾ. ਸੁਸਮ੍ਮਟ੍ਠਾਤਿ ਸੁਟ੍ਠੁ ਸਮ੍ਮਟ੍ਠਾ. ਕਨਕਬ੍ਯਾਸਮੋਚਿਤਾਤਿ ਕਨਕਬ੍ਯਾ ਵੁਚ੍ਚਤਿ ਸੁਵਣ੍ਣਫਣਿਕਾ, ਤਾਯ ਗਨ੍ਧਤੇਲਂ ਆਦਾਯ ਪਹਰਿਤਾ ਸੁਰਚਿਤਾ. ਕਸਿਗੋਰਕ੍ਖਾਤਿ ਇਮਿਨਾ ਕਸਿਞ੍ਚ ਗੋਰਕ੍ਖਞ੍ਚ ਨਿਸ੍ਸਾਯ ਜੀਵਨਕਸਤ੍ਤੇ ਦਸ੍ਸੇਤਿ. ਯਾ ਗਤੀਤਿ ਯਤ੍ਤਕਾ ਨਿਪ੍ਫਤ੍ਤਿ. ਪਰਕ੍ਕਨ੍ਤਨ੍ਤਿ ਯਤ੍ਤਕਂ ਇਸੀਨਂ ਪਰਕ੍ਕਨ੍ਤਂ, ਵਿਤ੍ਥਾਰੀਕਤਾ ਇਮਸ੍ਮਿਂ ਹਿਮਵਨ੍ਤੇ ਯਤ੍ਤਕਾ ਇਸਯੋ ਵਸਨ੍ਤੀਤਿ ਅਤ੍ਥੋ. ਨ ਤੇ ਸਮਸਮਨ੍ਤਿ ਤੇਸੁ ਸਬ੍ਬੇਸੁ ਏਕਮ੍ਪਿ ਰੂਪਲੀਲ਼ਾਵਿਲਾਸਾਦਿਸਮਤਾਯ ਤਯਾ ਸਮਾਨਂ ਨ ਪਸ੍ਸਾਮਿ. ਕੋ ਵਾ ਤ੍ਵਨ੍ਤਿ ਇਦਂ ਤਸ੍ਸਾ ਇਤ੍ਥਿਭਾਵਂ ਜਾਨਨ੍ਤੋ ਪੁਰਿਸਵੋਹਾਰਵਸੇਨ ਪੁਚ੍ਛਤਿ.

ਏਵਂ ਪਾਦਤੋ ਪਟ੍ਠਾਯ ਯਾਵ ਕੇਸਾ ਅਤ੍ਤਨੋ ਵਣ੍ਣਂ ਭਾਸਨ੍ਤੇ ਤਾਪਸੇ ਅਲਮ੍ਬੁਸਾ ਤੁਣ੍ਹੀ ਹੁਤ੍ਵਾ ਤਸ੍ਸਾ ਕਥਾਯ ਯਥਾਨੁਸਨ੍ਧਿਂ ਗਤਾਯ ਤਸ੍ਸ ਸਮ੍ਮੂਲ਼੍ਹਭਾਵਂ ਞਤ੍ਵਾ ਗਾਥਮਾਹ –

੧੨੦.

‘‘ਨ ਪਞ੍ਹਕਾਲੋ ਭਦ੍ਦਨ੍ਤੇ, ਕਸ੍ਸਪੇਵਂ ਗਤੇ ਸਤਿ;

ਏਹਿ ਸਮ੍ਮ ਰਮਿਸ੍ਸਾਮ, ਉਭੋ ਅਸ੍ਮਾਕਮਸ੍ਸਮੇ;

ਏਹਿ ਤਂ ਉਪਗੂਹਿਸ੍ਸਂ, ਰਤੀਨਂ ਕੁਸਲੋ ਭਵਾ’’ਤਿ.

ਤਤ੍ਥ ਕਸ੍ਸਪੇਵਂ ਗਤੇ ਸਤੀਤਿ ਕਸ੍ਸਪਗੋਤ੍ਤ ਏਵਂ ਤਵ ਚਿਤ੍ਤੇ ਪਵਤ੍ਤੇ ਸਤਿ ਪਞ੍ਹਕਾਲੋ ਨ ਹੋਤਿ. ਸਮ੍ਮਾਤਿ ਵਯਸ੍ਸ, ਪਿਯਵਚਨਾਲਪਨਮੇਤਂ. ਰਤੀਨਨ੍ਤਿ ਪਞ੍ਚਕਾਮਗੁਣਰਤੀਨਂ.

ਏਵਂ ਵਤ੍ਵਾ ਅਲਮ੍ਬੁਸਾ ਚਿਨ੍ਤੇਸਿ – ‘‘ਨਾਯਂ ਮਯਿ ਠਿਤਾਯ ਹਤ੍ਥਪਾਸਂ ਆਗਮਿਸ੍ਸਤਿ, ਗਚ੍ਛਨ੍ਤੀ ਵਿਯ ਭਵਿਸ੍ਸਾਮੀ’’ਤਿ. ਸਾ ਇਤ੍ਥਿਮਾਯਾਕੁਸਲਤਾਯ ਤਾਪਸਂ ਅਨੁਪਸਙ੍ਕਮਿਤ੍ਵਾ ਆਗਤਮਗ੍ਗਾਭਿਮੁਖੀ ਪਾਯਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੨੧.

‘‘ਇਦਂ ਵਤ੍ਵਾਨ ਪਕ੍ਕਾਮਿ, ਅਚ੍ਛਰਾ ਕਾਮਵਣ੍ਣਿਨੀ;

ਮਿਸ੍ਸਾ ਮਿਸ੍ਸਿਤੁਮਿਚ੍ਛਨ੍ਤੀ, ਇਸਿਸਿਙ੍ਗਂ ਅਲਮ੍ਬੁਸਾ’’ਤਿ.

ਅਥ ਨਂ ਤਾਪਸੋ ਗਚ੍ਛਨ੍ਤਿਂ ਦਿਸ੍ਵਾ ‘‘ਅਯਂ ਗਚ੍ਛਤੀ’’ਤਿ ਅਤ੍ਤਨੋ ਦਨ੍ਧਪਰਕ੍ਕਮਂ ਮਨ੍ਦਗਮਨਂ ਛਿਨ੍ਦਿਤ੍ਵਾ ਵੇਗੇਨ ਧਾਵਿਤ੍ਵਾ ਕੇਸੇਸੁ ਹਤ੍ਥੇਨ ਪਰਾਮਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੨੨.

‘‘ਸੋ ਚ ਵੇਗੇਨ ਨਿਕ੍ਖਮ੍ਮ, ਛੇਤ੍ਵਾ ਦਨ੍ਧਪਰਕ੍ਕਮਂ;

ਤਮੁਤ੍ਤਮਾਸੁ ਵੇਣੀਸੁ, ਅਜ੍ਝਪ੍ਪਤ੍ਤੋ ਪਰਾਮਸਿ.

੧੨੩.

‘‘ਤਮੁਦਾਵਤ੍ਤ ਕਲ੍ਯਾਣੀ, ਪਲਿਸ੍ਸਜਿ ਸੁਸੋਭਨਾ;

ਚਵਿਤਮ੍ਹਿ ਬ੍ਰਹ੍ਮਚਰਿਯਾ, ਯਥਾ ਤਂ ਅਥ ਤੋਸਿਤਾ.

੧੨੪.

‘‘ਮਨਸਾ ਅਗਮਾ ਇਨ੍ਦਂ, ਵਸਨ੍ਤਂ ਨਨ੍ਦਨੇ ਵਨੇ;

ਤਸ੍ਸਾ ਸਙ੍ਕਪ੍ਪਮਞ੍ਞਾਯ, ਮਘਵਾ ਦੇਵਕੁਞ੍ਜਰੋ.

੧੨੫.

‘‘ਪਲ੍ਲਙ੍ਕਂ ਪਹਿਣੀ ਖਿਪ੍ਪਂ, ਸੋਵਣ੍ਣਂ ਸੋਪਵਾਹਨਂ;

ਸਉਤ੍ਤਰਚ੍ਛਦਪਞ੍ਞਾਸਂ, ਸਹਸ੍ਸਪਟਿਯਤ੍ਥਤਂ.

੧੨੬.

‘‘ਤਮੇਨਂ ਤਤ੍ਥ ਧਾਰੇਸਿ, ਉਰੇ ਕਤ੍ਵਾਨ ਸੋਭਨਾ;

ਯਥਾ ਏਕਮੁਹੁਤ੍ਤਂਵ, ਤੀਣਿ ਵਸ੍ਸਾਨਿ ਧਾਰਯਿ.

੧੨੭.

‘‘ਵਿਮਦੋ ਤੀਹਿ ਵਸ੍ਸੇਹਿ, ਪਬੁਜ੍ਝਿਤ੍ਵਾਨ ਬ੍ਰਾਹ੍ਮਣੋ;

ਅਦ੍ਦਸਾਸਿ ਹਰਿਤਰੁਕ੍ਖੇ, ਸਮਨ੍ਤਾ ਅਗ੍ਗਿਯਾਯਨਂ.

੧੨੮.

‘‘ਨਵਪਤ੍ਤਵਨਂ ਫੁਲ੍ਲਂ, ਕੋਕਿਲਗ੍ਗਣਘੋਸਿਤਂ;

ਸਮਨ੍ਤਾ ਪਵਿਲੋਕੇਤ੍ਵਾ, ਰੁਦਂ ਅਸ੍ਸੂਨਿ ਵਤ੍ਤਯਿ.

੧੨੯.

‘‘ਨ ਜੁਹੇ ਨ ਜਪੇ ਮਨ੍ਤੇ, ਅਗ੍ਗਿਹੁਤ੍ਤਂ ਪਹਾਪਿਤਂ;

ਕੋ ਨੁ ਮੇ ਪਾਰਿਚਰਿਯਾਯ, ਪੁਬ੍ਬੇ ਚਿਤ੍ਤਂ ਪਲੋਭਯਿ.

੧੩੦.

‘‘ਅਰਞ੍ਞੇ ਮੇ ਵਿਹਰਤੋ, ਯੋ ਮੇ ਤੇਜਾ ਹ ਸਮ੍ਭੁਤਂ;

ਨਾਨਾਰਤਨਪਰਿਪੂਰਂ, ਨਾਵਂਵ ਗਣ੍ਹਿ ਅਣ੍ਣਵੇ’’ਤਿ.

ਤਤ੍ਥ ਅਜ੍ਝਪ੍ਪਤ੍ਤੋਤਿ ਸਮ੍ਪਤ੍ਤੋ. ਤਮੁਦਾਵਤ੍ਤ ਕਲ੍ਯਾਣੀਤਿ ਤਂ ਕੇਸੇ ਪਰਾਮਸਿਤ੍ਵਾ ਠਿਤਂ ਇਸਿਂ ਉਦਾਵਤ੍ਤਿਤ੍ਵਾ ਨਿਵਤ੍ਤਿਤ੍ਵਾ ਕਲ੍ਯਾਣਦਸ੍ਸਨਾ ਸਾ ਸੁਟ੍ਠੁ ਸੋਭਨਾ. ਪਲਿਸ੍ਸਜੀਤਿ ਆਲਿਙ੍ਗਿ. ਚਵਿਤਮ੍ਹਿ ਬ੍ਰਹ੍ਮਚਰਿਯਾ, ਯਥਾ ਤਂ ਅਥ ਤੋਸਿਤਾਤਿ, ਭਿਕ੍ਖਵੇ, ਤਸ੍ਸ ਇਸਿਨੋ ਤਾਵਦੇਵ ਝਾਨਂ ਅਨ੍ਤਰਧਾਯਿ. ਤਸ੍ਮਿਂ ਤਮ੍ਹਾ ਝਾਨਾ ਬ੍ਰਹ੍ਮਚਰਿਯਾ ਚਵਿਤੇ ਯਥਾ ਤਂ ਸਕ੍ਕੇਨ ਪਤ੍ਥਿਤਂ, ਤਥੇਵ ਅਹੋਸਿ. ਅਥ ਸਕ੍ਕਸ੍ਸ ਪਤ੍ਥਨਾਯ ਸਮਿਦ੍ਧਭਾਵਂ ਵਿਦਿਤ੍ਵਾ ਸਾ ਦੇਵਕਞ੍ਞਾ ਤੋਸਿਤਾ, ਤਸ੍ਸ ਤੇਨ ਬ੍ਰਹ੍ਮਚਰਿਯਵਿਨਾਸੇਨ ਸਞ੍ਜਨਿਤਪੀਤਿਪਾਮੋਜ੍ਜਾਤਿ ਅਤ੍ਥੋ.

ਮਨਸਾ ਅਗਮਾਤਿ ਸਾ ਤਂ ਆਲਿਙ੍ਗਿਤ੍ਵਾ ਠਿਤਾ ‘‘ਅਹੋ ਵਤ ਸਕ੍ਕੋ ਪਲ੍ਲਙ੍ਕਂ ਮੇ ਪੇਸੇਯ੍ਯਾ’’ਤਿ ਏਵਂ ਪਵਤ੍ਤੇਨ ਮਨਸਾ ਇਨ੍ਦਂ ਅਗਮਾ. ਨਨ੍ਦਨੇ ਵਨੇਤਿ ਨਨ੍ਦਿਜਨਨਸਮਤ੍ਥਤਾਯ ਨਨ੍ਦਨਵਨਸਙ੍ਖਾਤੇ ਤਾਵਤਿਂਸਭਵਨੇ ਵਸਨ੍ਤਂ. ਦੇਵਕੁਞ੍ਜਰੋਤਿ ਦੇਵਸੇਟ੍ਠੋ. ਪਹਿਣੀਤਿ ਪੇਸੇਸਿ. ‘‘ਪਾਹਿਣੀ’’ਤਿਪਿ ਪਾਠੋ. ਸੋਪਵਾਹਨਨ੍ਤਿ ਸਪਰਿਵਾਰਂ. ਸਉਤ੍ਤਰਚ੍ਛਦਪਞ੍ਞਾਸਨ੍ਤਿ ਪਞ੍ਞਾਸਾਯ ਉਤ੍ਤਰਚ੍ਛਦੇਹਿ ਪਟਿਚ੍ਛਾਦਿਤਂ. ਸਹਸ੍ਸਪਟਿਯਤ੍ਥਤਨ੍ਤਿ ਸਹਸ੍ਸਦਿਬ੍ਬਕੋਜਵਤ੍ਥਤਂ. ਤਮੇਨਂ ਤਤ੍ਥਾਤਿ ਤਂ ਇਸਿਸਿਙ੍ਗਂ ਤਤ੍ਥ ਦਿਬ੍ਬਪਲ੍ਲਙ੍ਕੇ ਨਿਸਿਨ੍ਨਾ ਸਾ ਉਰੇ ਕਤ੍ਵਾ ਧਾਰੇਸਿ. ਤੀਣਿ ਵਸ੍ਸਾਨੀਤਿ ਏਕਮੁਹੁਤ੍ਤਂ ਵਿਯ ਮਨੁਸ੍ਸਗਣਨਾਯ ਤੀਣਿ ਵਸ੍ਸਾਨਿ ਤਂ ਉਰੇ ਨਿਪਜ੍ਜਾਪੇਤ੍ਵਾ ਤਤ੍ਥ ਨਿਸਿਨ੍ਨਾ ਧਾਰੇਸਿ.

ਵਿਮਦੋਤਿ ਨਿਮ੍ਮਦੋ ਵਿਗਤਸਞ੍ਞਭਾਵੋ. ਸੋ ਹਿ ਤੀਣਿ ਸਂਵਚ੍ਛਰਾਨਿ ਵਿਸਞ੍ਞੋ ਸਯਿਤ੍ਵਾ ਪਚ੍ਛਾ ਪਟਿਲਦ੍ਧਸਞ੍ਞੋ ਪਬੁਜ੍ਝਿ. ਤਸ੍ਮਿਂ ਪਬੁਜ੍ਝਮਾਨੇ ਹਤ੍ਥਾਦਿਫਨ੍ਦਨਂ ਦਿਸ੍ਵਾਵ ਅਲਮ੍ਬੁਸਾ ਤਸ੍ਸ ਪਬੁਜ੍ਝਨਭਾਵਂ ਞਤ੍ਵਾ ਪਲ੍ਲਙ੍ਕਂ ਅਨ੍ਤਰਧਾਪੇਤ੍ਵਾ ਸਯਮ੍ਪਿ ਅਨ੍ਤਰਹਿਤਾ ਅਟ੍ਠਾਸਿ. ਅਦ੍ਦਸਾਸੀਤਿ ਸੋ ਅਸ੍ਸਮਪਦਂ ਓਲੋਕੇਨ੍ਤੋ ‘‘ਕੇਨ ਨੁ ਖੋਮ੍ਹਿ ਸੀਲਵਿਨਾਸਂ ਪਾਪਿਤੋ’’ਤਿ ਚਿਨ੍ਤੇਤ੍ਵਾ ਮਹਨ੍ਤੇਨ ਸਦ੍ਦੇਨ ਪਰਿਦੇਵਮਾਨੋ ਅਦ੍ਦਸਾਸਿ. ਹਰਿਤਰੁਕ੍ਖੇਤਿ ਅਗ੍ਗਿਯਾਯਨਸਙ੍ਖਾਤਂ ਅਗ੍ਗਿਸਾਲਂ ਸਮਨ੍ਤਾ ਪਰਿਵਾਰੇਤ੍ਵਾ ਠਿਤੇ ਹਰਿਤਪਤ੍ਤਰੁਕ੍ਖੇ. ਨਵਪਤ੍ਤਵਨਨ੍ਤਿ ਤਰੁਣੇਹਿ ਨਵਪਤ੍ਤੇਹਿ ਸਞ੍ਛਨ੍ਨਂ ਵਨਂ. ਰੁਦਨ੍ਤਿ ਪਰਿਦੇਵਨ੍ਤੋ.

ਨ ਜੁਹੇ ਨ ਜਪੇ ਮਨ੍ਤੇਤਿ ਅਯਮਸ੍ਸ ਪਰਿਦੇਵਨਗਾਥਾ. ਪਹਾਪਿਤਨ੍ਤਿ ਹਾਪਿਤਂ, ਪ-ਕਾਰੋ ਉਪਸਗ੍ਗਮਤ੍ਤਂ. ਪਾਰਿਚਰਿਯਾਯਾਤਿ ਕੋ ਨੁ ਕਿਲੇਸਪਾਰਿਚਰਿਯਾਯ ਇਤੋ ਪੁਬ੍ਬੇ ਮਮ ਚਿਤ੍ਤਂ ਪਲੋਭਯੀਤਿ ਪਰਿਦੇਵਤਿ. ਯੋ ਮੇ ਤੇਜਾ ਹ ਸਮ੍ਭੁਤਨ੍ਤਿ ਹ-ਕਾਰੋ ਨਿਪਾਤਮਤ੍ਤਂ. ਯੋ ਮਮ ਸਮਣਤੇਜੇਨ ਸਮ੍ਭੂਤਂ ਝਾਨਗੁਣਂ ਨਾਨਾਰਤਨਪਰਿਪੁਣ੍ਣਂ ਮਹਨ੍ਤਂ ਮਹਣ੍ਣਵੇ ਨਾਵਂ ਵਿਯ ਗਣ੍ਹਿ, ਵਿਨਾਸਂ ਪਾਪੇਸਿ, ਕੋ ਨਾਮੇਸੋਤਿ ਪਰਿਦੇਵਤੀਤਿ.

ਤਂ ਸੁਤ੍ਵਾ ਅਲਮ੍ਬੁਸਾ ਚਿਨ੍ਤੇਸਿ – ‘‘ਸਚਾਹਂ ਨ ਕਥੇਸ੍ਸਾਮਿ, ਅਯਂ ਮੇ ਅਭਿਸਪਿਸ੍ਸਤਿ, ਹਨ੍ਦਸ੍ਸ ਕਥੇਸ੍ਸਾਮੀ’’ਤਿ. ਸਾ ਦਿਸ੍ਸਮਾਨੇਨ ਕਾਯੇਨ ਠਤ੍ਵਾ ਗਾਥਮਾਹ –

੧੩੧.

‘‘ਅਹਂ ਤੇ ਪਾਰਿਚਰਿਯਾਯ, ਦੇਵਰਾਜੇਨ ਪੇਸਿਤਾ;

ਅਵਧਿਂ ਚਿਤ੍ਤਂ ਚਿਤ੍ਤੇਨ, ਪਮਾਦੋ ਤ੍ਵਂ ਨ ਬੁਜ੍ਝਸੀ’’ਤਿ.

ਸੋ ਤਸ੍ਸਾ ਕਥਂ ਸੁਤ੍ਵਾ ਪਿਤਰਾ ਦਿਨ੍ਨਓਵਾਦਂ ਸਰਿਤ੍ਵਾ ‘‘ਪਿਤੁ ਵਚਨਂ ਅਕਤ੍ਵਾ ਮਹਾਵਿਨਾਸਂ ਪਤ੍ਤੋਮ੍ਹੀ’’ਤਿ ਪਰਿਦੇਵਨ੍ਤੋ ਚਤਸ੍ਸੋ ਗਾਥਾਯੋ ਅਭਾਸਿ –

੧੩੨.

‘‘ਇਮਾਨਿ ਕਿਰ ਮਂ ਤਾਤੋ, ਕਸ੍ਸਪੋ ਅਨੁਸਾਸਤਿ;

ਕਮਲਾਸਦਿਸਿਤ੍ਥਿਯੋ, ਤਾਯੋ ਬੁਜ੍ਝੇਸਿ ਮਾਣਵ.

੧੩੩.

‘‘ਉਰੇਗਣ੍ਡਾਯੋ ਬੁਜ੍ਝੇਸਿ, ਤਾਯੋ ਬੁਜ੍ਝੇਸਿ ਮਾਣਵ;

ਇਚ੍ਚਾਨੁਸਾਸਿ ਮਂ ਤਾਤੋ, ਯਥਾ ਮਂ ਅਨੁਕਮ੍ਪਕੋ.

੧੩੪.

‘‘ਤਸ੍ਸਾਹਂ ਵਚਨਂ ਨਾਕਂ, ਪਿਤੁ ਵੁਦ੍ਧਸ੍ਸ ਸਾਸਨਂ;

ਅਰਞ੍ਞੇ ਨਿਮ੍ਮਨੁਸ੍ਸਮ੍ਹਿ, ਸ੍ਵਜ੍ਜ ਝਾਯਾਮਿ ਏਕਕੋ.

੧੩੫.

‘‘ਸੋਹਂ ਤਥਾ ਕਰਿਸ੍ਸਾਮਿ, ਧਿਰਤ੍ਥੁ ਜੀਵਿਤੇਨ ਮੇ;

ਪੁਨ ਵਾ ਤਾਦਿਸੋ ਹੇਸ੍ਸਂ, ਮਰਣਂ ਮੇ ਭਵਿਸ੍ਸਤੀ’’ਤਿ.

ਤਤ੍ਥ ਇਮਾਨੀਤਿ ਇਮਾਨਿ ਵਚਨਾਨਿ. ਕਮਲਾਸਦਿਸਿਤ੍ਥਿਯੋਤਿ ਕਮਲਾ ਵੁਚ੍ਚਤਿ ਨਾਰਿਪੁਪ੍ਫਲਤਾ, ਤਾਸਂ ਪੁਪ੍ਫਸਦਿਸਾ ਇਤ੍ਥਿਯੋ. ਤਾਯੋ ਬੁਜ੍ਝੇਸਿ ਮਾਣਵਾਤਿ ਮਾਣਵ ਤ੍ਵਂ ਤਾਯੋ ਜਾਨੇਯ੍ਯਾਸਿ, ਞਤ੍ਵਾ ਦਸ੍ਸਨਪਥਂ ਅਗਨ੍ਤ੍ਵਾ ਪਲਾਪੇਯ੍ਯਾਸੀਤਿ ਯਾਨਿ ਏਵਰੂਪਾਨਿ ਵਚਨਾਨਿ ਤਦਾ ਮਂ ਤਾਤੋ ਅਨੁਸਾਸਤਿ, ਇਮਾਨਿ ਕਿਰ ਤਾਨੀਤਿ. ਉਰੇਗਣ੍ਡਾਯੋਤਿ ਉਰਮ੍ਹਿ ਦ੍ਵੀਹਿ ਗਣ੍ਡੇਹਿ ਸਮਨ੍ਨਾਗਤਾ. ਤਾਯੋ ਬੁਜ੍ਝੇਸਿ, ਮਾਣਵਾਤਿ, ਮਾਣਵ, ਤਾਯੋ ਅਤ੍ਤਨੋ ਵਸਂ ਗਤੇ ਵਿਨਾਸਂ ਪਾਪੇਨ੍ਤੀਤਿ ਤ੍ਵਂ ਜਾਨੇਯ੍ਯਾਸਿ. ਨਾਕਨ੍ਤਿ ਨਾਕਰਿਂ. ਝਾਯਾਮੀਤਿ ਪਜ੍ਝਾਯਾਮਿ ਪਰਿਦੇਵਾਮਿ. ਧਿਰਤ੍ਥੁ ਜੀਵਿਤੇਨ ਮੇਤਿ ਧਿਰਤ੍ਥੁ ਗਰਹਿਤਂ ਮਮ ਜੀਵਿਤਂ, ਜੀਵਿਤੇਨ ਮੇ ਕੋ ਅਤ੍ਥੋ. ਪੁਨ ਵਾਤਿ ਤਥਾ ਕਰਿਸ੍ਸਾਮਿ, ਯਥਾ ਪੁਨ ਵਾ ਤਾਦਿਸੋ ਭਵਿਸ੍ਸਾਮਿ, ਨਟ੍ਠਂ ਝਾਨਂ ਉਪ੍ਪਾਦੇਤ੍ਵਾ ਵੀਤਰਾਗੋ ਭਵਿਸ੍ਸਾਮਿ, ਮਰਣਂ ਵਾ ਮੇ ਭਵਿਸ੍ਸਤੀਤਿ.

ਸੋ ਕਾਮਰਾਗਂ ਪਹਾਯ ਪੁਨ ਝਾਨਂ ਉਪ੍ਪਾਦੇਸਿ. ਅਥਸ੍ਸ ਸਮਣਤੇਜਂ ਦਿਸ੍ਵਾ ਝਾਨਸ੍ਸ ਚ ਉਪ੍ਪਾਦਿਤਭਾਵਂ ਞਤ੍ਵਾ ਅਲਮ੍ਬੁਸਾ ਭੀਤਾ ਖਮਾਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਦ੍ਵੇ ਗਾਥਾਯੋ ਅਭਾਸਿ –

੧੩੬.

‘‘ਤਸ੍ਸ ਤੇਜਂ ਵੀਰਿਯਞ੍ਚ, ਧਿਤਿਂ ਞਤ੍ਵਾ ਅਵਟ੍ਠਿਤਂ;

ਸਿਰਸਾ ਅਗ੍ਗਹੀ ਪਾਦੇ, ਇਸਿਸਿਙ੍ਗਂ ਅਲਮ੍ਬੁਸਾ.

੧੩੭.

‘‘ਮਾ ਮੇ ਕੁਜ੍ਝ ਮਹਾਵੀਰ, ਮਾ ਮੇ ਕੁਜ੍ਝ ਮਹਾਇਸੇ;

ਮਹਾ ਅਤ੍ਥੋ ਮਯਾ ਚਿਣ੍ਣੋ, ਤਿਦਸਾਨਂ ਯਸਸ੍ਸਿਨਂ;

ਤਯਾ ਪਕਮ੍ਪਿਤਂ ਆਸਿ, ਸਬ੍ਬਂ ਦੇਵਪੁਰਂ ਤਦਾ’’ਤਿ.

ਅਥ ਨਂ ਸੋ ‘‘ਖਮਾਮਿ ਤੇ, ਭਦ੍ਦੇ, ਯਥਾਸੁਖਂ ਗਚ੍ਛਾ’’ਤਿ ਵਿਸ੍ਸਜ੍ਜੇਨ੍ਤੋ ਗਾਥਮਾਹ –

੧੩੮.

‘‘ਤਾਵਤਿਂਸਾ ਚ ਯੇ ਦੇਵਾ, ਤਿਦਸਾਨਞ੍ਚ ਵਾਸਵੋ;

ਤ੍ਵਞ੍ਚ ਭਦ੍ਦੇ ਸੁਖੀ ਹੋਹਿ, ਗਚ੍ਛ ਕਞ੍ਞੇ ਯਥਾਸੁਖ’’ਨ੍ਤਿ.

ਸਾ ਤਂ ਵਨ੍ਦਿਤ੍ਵਾ ਤੇਨੇਵ ਸੁਵਣ੍ਣਪਲ੍ਲਙ੍ਕੇਨ ਦੇਵਪੁਰਂ ਗਤਾ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਤਿਸ੍ਸੋ ਗਾਥਾਯੋ ਅਭਾਸਿ –

੧੩੯.

‘‘ਤਸ੍ਸ ਪਾਦੇ ਗਹੇਤ੍ਵਾਨ, ਕਤ੍ਵਾ ਚ ਨਂ ਪਦਕ੍ਖਿਣਂ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਤਮ੍ਹਾ ਠਾਨਾ ਅਪਕ੍ਕਮਿ.

੧੪੦.

‘‘ਯੋ ਚ ਤਸ੍ਸਾਸਿ ਪਲ੍ਲਙ੍ਕੋ, ਸੋਵਣ੍ਣੋ ਸੋਪਵਾਹਨੋ;

ਸਉਤ੍ਤਰਚ੍ਛਦਪਞ੍ਞਾਸੋ, ਸਹਸ੍ਸਪਟਿਯਤ੍ਥਤੋ;

ਤਮੇਵ ਪਲ੍ਲਙ੍ਕਮਾਰੁਯ੍ਹ, ਅਗਾ ਦੇਵਾਨ ਸਨ੍ਤਿਕੇ.

੧੪੧.

‘‘ਤਮੋਕ੍ਕਮਿਵ ਆਯਨ੍ਤਿਂ, ਜਲਨ੍ਤਿਂ ਵਿਜ੍ਜੁਤਂ ਯਥਾ;

ਪਤੀਤੋ ਸੁਮਨੋ ਵਿਤ੍ਤੋ, ਦੇਵਿਨ੍ਦੋ ਅਦਦਾ ਵਰ’’ਨ੍ਤਿ.

ਤਤ੍ਥ ਓਕ੍ਕਮਿਵਾਤਿ ਦੀਪਕਂ ਵਿਯ. ‘‘ਪਤੀਤੋ’’ਤਿਆਦੀਹਿ ਤੁਟ੍ਠਾਕਾਰੋਵ ਦਸ੍ਸਿਤੋ ਅਦਦਾ ਵਰਨ੍ਤਿ ਆਗਨ੍ਤ੍ਵਾ ਵਨ੍ਦਿਤ੍ਵਾ ਠਿਤਾਯ ਤੁਟ੍ਠੋ ਵਰਂ ਅਦਾਸਿ.

ਸਾ ਤਸ੍ਸ ਸਨ੍ਤਿਕੇ ਵਰਂ ਗਣ੍ਹਨ੍ਤੀ ਓਸਾਨਗਾਥਮਾਹ –

੧੪੨.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਨਿਸਿਪ੍ਪਲੋਭਿਕਾ ਗਚ੍ਛੇ, ਏਤਂ ਸਕ੍ਕ ਵਰਂ ਵਰੇ’’ਤਿ.

ਤਸ੍ਸਤ੍ਥੋ – ‘‘ਸਕ੍ਕ ਦੇਵਰਾਜ, ਸਚੇ ਮੇ ਤ੍ਵਂ ਵਰਂ ਅਦੋ, ਪੁਨ ਇਸਿਪਲੋਭਿਕਾਯ ਨ ਗਚ੍ਛੇਯ੍ਯਂ, ਮਾ ਮਂ ਏਤਦਤ੍ਥਾਯ ਪਹਿਣੇਯ੍ਯਾਸਿ, ਏਤਂ ਵਰਂ ਵਰੇ ਯਾਚਾਮੀ’’ਤਿ.

ਸਤ੍ਥਾ ਤਸ੍ਸ ਭਿਕ੍ਖੁਨੋ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਸੋ ਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਅਲਮ੍ਬੁਸਾ ਪੁਰਾਣਦੁਤਿਯਿਕਾ ਅਹੋਸਿ, ਇਸਿਸਿਙ੍ਗੋ ਉਕ੍ਕਣ੍ਠਿਤਭਿਕ੍ਖੁ, ਪਿਤਾ ਮਹਾਇਸਿ ਪਨ ਅਹਮੇਵ ਅਹੋਸਿਨ੍ਤਿ.

ਅਲਮ੍ਬੁਸਾਜਾਤਕਵਣ੍ਣਨਾ ਤਤਿਯਾ.

[੫੨੪] ੪. ਸਙ੍ਖਪਾਲਜਾਤਕਵਣ੍ਣਨਾ

ਅਰਿਯਾਵਕਾਸੋਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਪੋਸਥਕਮ੍ਮਂ ਆਰਬ੍ਭ ਕਥੇਸਿ. ਤਦਾ ਹਿ ਸਤ੍ਥਾ ਉਪੋਸਥਿਕੇ ਉਪਾਸਕੇ ਸਮ੍ਪਹਂਸੇਤ੍ਵਾ ‘‘ਪੋਰਾਣਕਪਣ੍ਡਿਤਾ ਮਹਤਿਂ ਨਾਗਸਮ੍ਪਤ੍ਤਿਂ ਪਹਾਯ ਉਪੋਸਥਵਾਸਂ ਉਪਵਸਿਂਸੁਯੇਵਾ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਰਾਜਗਹੇ ਮਗਧਰਾਜਾ ਨਾਮ ਰਜ੍ਜਂ ਕਾਰੇਸਿ. ਤਦਾ ਬੋਧਿਸਤ੍ਤੋ ਤਸ੍ਸ ਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ‘‘ਦੁਯ੍ਯੋਧਨੋ’’ਤਿਸ੍ਸ ਨਾਮਂ ਕਰਿਂਸੁ. ਸੋ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਆਗਨ੍ਤ੍ਵਾ ਪਿਤੁ ਸਿਪ੍ਪਂ ਦਸ੍ਸੇਸਿ. ਅਥ ਨਂ ਪਿਤਾ ਰਜ੍ਜੇ ਅਭਿਸਿਞ੍ਚਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਉਯ੍ਯਾਨੇ ਵਸਿ. ਬੋਧਿਸਤ੍ਤੋ ਦਿਵਸਸ੍ਸ ਤਿਕ੍ਖਤ੍ਤੁਂ ਪਿਤੁ ਸਨ੍ਤਿਕਂ ਅਗਮਾਸਿ. ਤਸ੍ਸ ਮਹਾਲਾਭਸਕ੍ਕਾਰੋ ਉਦਪਾਦਿ. ਸੋ ਤੇਨੇਵ ਪਲਿਬੋਧੇਨ ਕਸਿਣਪਰਿਕਮ੍ਮਮਤ੍ਤਮ੍ਪਿ ਕਾਤੁਂ ਅਸਕ੍ਕੋਨ੍ਤੋ ਚਿਨ੍ਤੇਸਿ – ‘‘ਮਹਾ ਮੇ ਲਾਭਸਕ੍ਕਾਰੋ, ਨ ਸਕ੍ਕਾ ਮਯਾ ਇਧ ਵਸਨ੍ਤੇਨ ਇਮਂ ਜਟਂ ਛਿਨ੍ਦਿਤੁਂ, ਪੁਤ੍ਤਸ੍ਸ ਮੇ ਅਨਾਰੋਚੇਤ੍ਵਾਵ ਅਞ੍ਞਤ੍ਥ ਗਮਿਸ੍ਸਾਮੀ’’ਤਿ. ਸੋ ਕਞ੍ਚਿ ਅਜਾਨਾਪੇਤ੍ਵਾ ਉਯ੍ਯਾਨਾ ਨਿਕ੍ਖਮਿਤ੍ਵਾ ਮਗਧਰਟ੍ਠਂ ਅਤਿਕ੍ਕਮਿਤ੍ਵਾ ਮਹਿਸਕਰਟ੍ਠੇ ਸਙ੍ਖਪਾਲਦਹਤੋ ਨਾਮ ਨਿਕ੍ਖਨ੍ਤਾਯ ਕਣ੍ਣਵੇਣ੍ਣਾਯ ਨਦਿਯਾ ਨਿਵਤ੍ਤਨੇ ਚਨ੍ਦਕਪਬ੍ਬਤਂ ਉਪਨਿਸ੍ਸਾਯ ਪਣ੍ਣਸਾਲਂ ਕਤ੍ਵਾ ਤਤ੍ਥ ਵਸਨ੍ਤੋ ਕਸਿਣਪਰਿਕਮ੍ਮਂ ਕਤ੍ਵਾ ਝਾਨਾਭਿਞ੍ਞਾ ਨਿਬ੍ਬਤ੍ਤੇਤ੍ਵਾ ਉਞ੍ਛਾਚਰਿਯਾਯ ਯਾਪੇਸਿ. ਤਮੇਨਂ ਸਙ੍ਖਪਾਲੋ ਨਾਮ ਨਾਗਰਾਜਾ ਮਹਨ੍ਤੇਨ ਪਰਿਵਾਰੇਨ ਕਣ੍ਣਵੇਣ੍ਣਨਦਿਤੋ ਨਿਕ੍ਖਮਿਤ੍ਵਾ ਅਨ੍ਤਰਨ੍ਤਰਾ ਉਪਸਙ੍ਕਮਤਿ. ਸੋ ਤਸ੍ਸ ਧਮ੍ਮਂ ਦੇਸੇਸਿ. ਅਥਸ੍ਸ ਪੁਤ੍ਤੋ ਪਿਤਰਂ ਦਟ੍ਠੁਕਾਮੋ ਗਤਟ੍ਠਾਨਂ ਅਜਾਨਨ੍ਤੋ ਅਨੁਵਿਚਾਰਾਪੇਤ੍ਵਾ ‘‘ਅਸੁਕਟ੍ਠਾਨੇ ਨਾਮ ਵਸਤੀ’’ਤਿ ਞਤ੍ਵਾ ਤਸ੍ਸ ਦਸ੍ਸਨਤ੍ਥਾਯ ਮਹਨ੍ਤੇਨ ਪਰਿਵਾਰੇਨ ਤਤ੍ਥ ਗਨ੍ਤ੍ਵਾ ਏਕਮਨ੍ਤੇ ਖਨ੍ਧਵਾਰਂ ਨਿਵਾਸੇਤ੍ਵਾ ਕਤਿਪਯੇਹਿ ਅਮਚ੍ਚੇਹਿ ਸਦ੍ਧਿਂ ਅਸ੍ਸਮਪਦਾਭਿਮੁਖੋ ਪਾਯਾਸਿ.

ਤਸ੍ਮਿਂ ਖਣੇ ਸਙ੍ਖਪਾਲੋ ਮਹਨ੍ਤੇਨ ਪਰਿਵਾਰੇਨ ਧਮ੍ਮਂ ਸੁਣਨ੍ਤੋ ਨਿਸੀਦਿ. ਸੋ ਤਂ ਰਾਜਾਨਂ ਆਗਚ੍ਛਨ੍ਤਂ ਦਿਸ੍ਵਾ ਇਸਿਂ ਵਨ੍ਦਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਰਾਜਾ ਪਿਤਰਂ ਵਨ੍ਦਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਨਿਸੀਦਿਤ੍ਵਾ ਪੁਚ੍ਛਿ – ‘‘ਭਨ੍ਤੇ, ਕਤਰਰਾਜਾ ਨਾਮੇਸ ਤੁਮ੍ਹਾਕਂ ਸਨ੍ਤਿਕਂ ਆਗਤੋ’’ਤਿ. ਤਾਤ, ਸਙ੍ਖਪਾਲਨਾਗਰਾਜਾ ਨਾਮੇਸੋਤਿ. ਸੋ ਤਸ੍ਸ ਸਮ੍ਪਤ੍ਤਿਂ ਨਿਸ੍ਸਾਯ ਨਾਗਭਵਨੇ ਲੋਭਂ ਕਤ੍ਵਾ ਕਤਿਪਾਹਂ ਵਸਿਤ੍ਵਾ ਪਿਤੁ ਭਿਕ੍ਖਾਹਾਰਂ ਨਿਬਦ੍ਧਂ ਦਾਪੇਤ੍ਵਾ ਅਤ੍ਤਨੋ ਨਗਰਮੇਵ ਗਨ੍ਤ੍ਵਾ ਚਤੂਸੁ ਦ੍ਵਾਰੇਸੁ ਦਾਨਸਾਲਾਯੋ ਕਾਰੇਤ੍ਵਾ ਸਕਲਜਮ੍ਬੁਦੀਪਂ ਸਙ੍ਖੋਭੇਨ੍ਤੋ ਦਾਨਂ ਦਤ੍ਵਾ ਸੀਲਂ ਰਕ੍ਖਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਨਾਗਭਵਨਂ ਪਤ੍ਥੇਤ੍ਵਾ ਆਯੁਪਰਿਯੋਸਾਨੇ ਨਾਗਭਵਨੇ ਨਿਬ੍ਬਤ੍ਤਿਤ੍ਵਾ ਸਙ੍ਖਪਾਲਨਾਗਰਾਜਾ ਅਹੋਸਿ. ਸੋ ਗਚ੍ਛਨ੍ਤੇ ਕਾਲੇ ਤਾਯ ਸਮ੍ਪਤ੍ਤਿਯਾ ਵਿਪ੍ਪਟਿਸਾਰੀ ਹੁਤ੍ਵਾ ਤਤੋ ਪਟ੍ਠਾਯ ਮਨੁਸ੍ਸਯੋਨਿਂ ਪਤ੍ਥੇਨ੍ਤੋ ਉਪੋਸਥਵਾਸਂ ਵਸਿ. ਅਥਸ੍ਸ ਨਾਗਭਵਨੇ ਵਸਨ੍ਤਸ੍ਸ ਉਪੋਸਥਵਾਸੋ ਨ ਸਮ੍ਪਜ੍ਜਤਿ, ਸੀਲਵਿਨਾਸਂ ਪਾਪੁਣਾਤਿ. ਸੋ ਤਤੋ ਪਟ੍ਠਾਯ ਨਾਗਭਵਨਾ ਨਿਕ੍ਖਮਿਤ੍ਵਾ ਕਣ੍ਣਵੇਣ੍ਣਾਯ ਨਦਿਯਾ ਅਵਿਦੂਰੇ ਮਹਾਮਗ੍ਗਸ੍ਸ ਚ ਏਕਪਦਿਕਮਗ੍ਗਸ੍ਸ ਚ ਅਨ੍ਤਰੇ ਏਕਂ ਵਮ੍ਮਿਕਂ ਪਰਿਕ੍ਖਿਪਿਤ੍ਵਾ ਉਪੋਸਥਂ ਅਧਿਟ੍ਠਾਯ ਸਮਾਦਿਨ੍ਨਸੀਲੋ ‘‘ਮਮ ਚਮ੍ਮਮਂਸਾਦੀਹਿ ਅਤ੍ਥਿਕਾ ਚਮ੍ਮਮਂਸਾਦੀਨਿ ਹਰਨ੍ਤੂ’’ਤਿ ਅਤ੍ਤਾਨਂ ਦਾਨਮੁਖੇ ਵਿਸ੍ਸਜ੍ਜੇਤ੍ਵਾ ਵਮ੍ਮਿਕਮਤ੍ਥਕੇ ਨਿਪਨ੍ਨੋ ਸਮਣਧਮ੍ਮਂ ਕਰੋਨ੍ਤੋ ਚਾਤੁਦ੍ਦਸੇ ਪਨ੍ਨਰਸੇ ਵਸਿਤ੍ਵਾ ਪਾਟਿਪਦੇ ਨਾਗਭਵਨਂ ਗਚ੍ਛਤਿ.

ਤਸ੍ਮਿਂ ਏਕਦਿਵਸਂ ਏਵਂ ਸੀਲਂ ਸਮਾਦਿਯਿਤ੍ਵਾ ਨਿਪਨ੍ਨੇ ਪਚ੍ਚਨ੍ਤਗਾਮਵਾਸਿਨੋ ਸੋਲ਼ਸ ਜਨਾ ‘‘ਮਂਸਂ ਆਹਰਿਸ੍ਸਾਮਾ’’ਤਿ ਆਵੁਧਹਤ੍ਥਾ ਅਰਞ੍ਞੇ ਵਿਚਰਨ੍ਤਾ ਕਿਞ੍ਚਿ ਅਲਭਿਤ੍ਵਾ ਨਿਕ੍ਖਨ੍ਤਾ ਤਂ ਵਮ੍ਮਿਕਮਤ੍ਥਕੇ ਨਿਪਨ੍ਨਂ ਦਿਸ੍ਵਾ ‘‘ਮਯਂ ਅਜ੍ਜ ਗੋਧਾਪੋਤਕਮ੍ਪਿ ਨ ਲਭਿਮ੍ਹਾ, ਇਮਂ ਨਾਗਰਾਜਾਨਂ ਵਧਿਤ੍ਵਾ ਖਾਦਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ‘‘ਮਹਾ ਖੋ ਪਨੇਸ ਗਯ੍ਹਮਾਨੋ ਪਲਾਯੇਯ੍ਯ, ਯਥਾਨਿਪਨ੍ਨਮੇਵ ਤਂ ਭੋਗੇਸੁ ਸੂਲੇਹਿ ਵਿਜ੍ਝਿਤ੍ਵਾ ਦੁਬ੍ਬਲਂ ਕਤ੍ਵਾ ਗਣ੍ਹਿਸ੍ਸਾਮਾ’’ਤਿ ਸੂਲਾਨਿ ਆਦਾਯ ਉਪਸਙ੍ਕਮਿਂਸੁ. ਬੋਧਿਸਤ੍ਤਸ੍ਸ ਸਰੀਰਂ ਮਹਨ੍ਤਂ ਏਕਦੋਣਿਕਨਾਵਪ੍ਪਮਾਣਂ ਵਟ੍ਟੇਤ੍ਵਾ ਠਪਿਤਸੁਮਨਪੁਪ੍ਫਦਾਮਂ ਵਿਯ ਜਿਞ੍ਜੁਕਫਲਸਨ੍ਨਿਭੇਹਿ ਅਕ੍ਖੀਹਿ ਜਯਸੁਮਨਪੁਪ੍ਫਸਦਿਸੇਨ ਚ ਸੀਸੇਨ ਸਮਨ੍ਨਾਗਤਂ ਅਤਿਵਿਯ ਸੋਭਤਿ. ਸੋ ਤੇਸਂ ਸੋਲ਼ਸਨ੍ਨਂ ਜਨਾਨਂ ਪਦਸਦ੍ਦੇਨ ਭੋਗਨ੍ਤਰਤੋ ਸੀਸਂ ਨੀਹਰਿਤ੍ਵਾ ਰਤ੍ਤਕ੍ਖੀਨਿ ਉਮ੍ਮੀਲੇਤ੍ਵਾ ਤੇ ਸੂਲਹਤ੍ਥੇ ਆਗਚ੍ਛਨ੍ਤੇ ਦਿਸ੍ਵਾ ਚਿਨ੍ਤੇਸਿ – ‘‘ਅਜ੍ਜ ਮਯ੍ਹਂ ਮਨੋਰਥੋ ਮਤ੍ਥਕਂ ਪਾਪੁਣਿਸ੍ਸਤਿ, ਅਹਂ ਅਤ੍ਤਾਨਂ ਦਾਨਮੁਖੇ ਨਿਯ੍ਯਾਦੇਤ੍ਵਾ ਵੀਰਿਯਂ ਅਧਿਟ੍ਠਹਿਤ੍ਵਾ ਨਿਪਨ੍ਨੋ, ਇਮੇ ਮਮ ਸਰੀਰਂ ਸਤ੍ਤੀਹਿ ਕੋਟ੍ਟੇਤ੍ਵਾ ਛਿਦ੍ਦਾਵਛਿਦ੍ਦਂ ਕਰੋਨ੍ਤੇ ਕੋਧਵਸੇਨ ਅਕ੍ਖੀਨਿ ਉਮ੍ਮੀਲੇਤ੍ਵਾ ਨ ਓਲੋਕੇਸ੍ਸਾਮੀ’’ਤਿ ਅਤ੍ਤਨੋ ਸੀਲਭੇਦਭਯੇਨ ਦਲ਼੍ਹਂ ਅਧਿਟ੍ਠਾਯ ਸੀਸਂ ਭੋਗਨ੍ਤਰੇਯੇਵ ਪਵੇਸੇਤ੍ਵਾ ਨਿਪਜ੍ਜਿ. ਅਥ ਨਂ ਤੇ ਉਪਗਨ੍ਤ੍ਵਾ ਨਙ੍ਗੁਟ੍ਠੇ ਗਹੇਤ੍ਵਾ ਕਡ੍ਢਨ੍ਤਾ ਭੂਮਿਯਂ ਪੋਥੇਤ੍ਵਾ ਤਿਖਿਣਸੂਲੇਹਿ ਅਟ੍ਠਸੁ ਠਾਨੇਸੁ ਵਿਜ੍ਝਿਤ੍ਵਾ ਸਕਣ੍ਟਕਕਾਲ਼ਵੇਤ੍ਤਯਟ੍ਠਿਯੋ ਪਹਾਰਮੁਖੇਹਿ ਪਵੇਸੇਤ੍ਵਾ ਅਟ੍ਠਸੁ ਠਾਨੇਸੁ ਕਾਜੇਨਾਦਾਯ ਮਹਾਮਗ੍ਗਂ ਪਟਿਪਜ੍ਜਿਂਸੁ, ਮਹਾਸਤ੍ਤੋ ਸੂਲੇਹਿ ਵਿਜ੍ਝਨਤੋ ਪਟ੍ਠਾਯ ਏਕਟ੍ਠਾਨੇਪਿ ਕੋਧਵਸੇਨ ਅਕ੍ਖੀਨਿ ਉਮ੍ਮੀਲੇਤ੍ਵਾ ਤੇ ਨ ਓਲੋਕੇਸਿ. ਤਸ੍ਸ ਅਟ੍ਠਹਿ ਕਾਜੇਹਿ ਆਦਾਯ ਨੀਯਮਾਨਸ੍ਸ ਸੀਸਂ ਓਲਮ੍ਬੇਤ੍ਵਾ ਭੂਮਿਯਂ ਪਹਰਿ. ਅਥ ਨਂ ‘‘ਸੀਸਮਸ੍ਸ ਓਲਮ੍ਬਤੀ’’ਤਿ ਮਹਾਮਗ੍ਗੇ ਨਿਪਜ੍ਜਾਪੇਤ੍ਵਾ ਤਰੁਣਸੂਲੇਨ ਨਾਸਾਪੁਟਂ ਵਿਜ੍ਝਿਤ੍ਵਾ ਰਜ੍ਜੁਕਂ ਪਵੇਸੇਤ੍ਵਾ ਸੀਸਂ ਉਕ੍ਖਿਪਿਤ੍ਵਾ ਕਾਜਕੋਟਿਯਂ ਲਗ੍ਗਿਤ੍ਵਾ ਪੁਨਪਿ ਉਕ੍ਖਿਪਿਤ੍ਵਾ ਮਗ੍ਗਂ ਪਟਿਪਜ੍ਜਿਂਸੁ.

ਤਸ੍ਮਿਂ ਖਣੇ ਵਿਦੇਹਰਟ੍ਠੇ ਮਿਥਿਲਨਗਰਵਾਸੀ ਆਲ਼ਾਰੋ ਨਾਮ ਕੁਟੁਮ੍ਬਿਕੋ ਪਞ੍ਚ ਸਕਟਸਤਾਨਿ ਆਦਾਯ ਸੁਖਯਾਨਕੇ ਨਿਸੀਦਿਤ੍ਵਾ ਗਚ੍ਛਨ੍ਤੋ ਤੇ ਭੋਜਪੁਤ੍ਤੇ ਬੋਧਿਸਤ੍ਤਂ ਤਥਾ ਗਣ੍ਹਿਤ੍ਵਾ ਗਚ੍ਛਨ੍ਤੇ ਦਿਸ੍ਵਾ ਤੇਸਂ ਸੋਲ਼ਸਨ੍ਨਮ੍ਪਿ ਸੋਲ਼ਸਹਿ ਵਾਹਗੋਣੇਹਿ ਸਦ੍ਧਿਂ ਪਸਤਂ ਪਸਤਂ ਸੁਵਣ੍ਣਮਾਸਕੇ ਸਬ੍ਬੇਸਂ ਨਿਵਾਸਨਪਾਰੁਪਨਾਨਿ ਭਰਿਯਾਨਮ੍ਪਿ ਨੇਸਂ ਵਤ੍ਥਾਭਰਣਾਨਿ ਦਤ੍ਵਾ ਵਿਸ੍ਸਜ੍ਜਾਪੇਸਿ. ਅਥ ਸੋ ਨਾਗਭਵਨਂ ਗਨ੍ਤ੍ਵਾ ਤਤ੍ਥ ਪਪਞ੍ਚਂ ਅਕਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿਤ੍ਵਾ ਆਲ਼ਾਰਂ ਉਪਸਙ੍ਕਮਿਤ੍ਵਾ ਨਾਗਭਵਨਸ੍ਸ ਵਣ੍ਣਂ ਕਥੇਤ੍ਵਾ ਤਂ ਆਦਾਯ ਨਾਗਭਵਨਂ ਗਨ੍ਤ੍ਵਾ ਤੀਹਿ ਨਾਗਕਞ੍ਞਾਸਤੇਹਿ ਸਦ੍ਧਿਂ ਮਹਨ੍ਤਮਸ੍ਸ ਯਸਂ ਦਤ੍ਵਾ ਦਿਬ੍ਬੇਹਿ ਕਾਮੇਹਿ ਸਨ੍ਤਪ੍ਪੇਸਿ. ਆਲ਼ਾਰੋ ਨਾਗਭਵਨੇ ਏਕਵਸ੍ਸਂ ਵਸਿਤ੍ਵਾ ਦਿਬ੍ਬਕਾਮੇ ਪਰਿਭੁਞ੍ਜਿਤ੍ਵਾ ‘‘ਇਚ੍ਛਾਮਹਂ, ਸਮ੍ਮ, ਪਬ੍ਬਜਿਤੁ’’ਨ੍ਤਿ ਨਾਗਰਾਜਸ੍ਸ ਕਥੇਤ੍ਵਾ ਪਬ੍ਬਜਿਤਪਰਿਕ੍ਖਾਰੇ ਗਹੇਤ੍ਵਾ ਨਾਗਭਵਨਤੋ ਹਿਮਵਨ੍ਤਪ੍ਪਦੇਸਂ ਗਨ੍ਤ੍ਵਾ ਪਬ੍ਬਜਿਤ੍ਵਾ ਤਤ੍ਥ ਚਿਰਂ ਵਸਿਤ੍ਵਾ ਅਪਰਭਾਗੇ ਚਾਰਿਕਂ ਚਰਨ੍ਤੋ ਬਾਰਾਣਸਿਂ ਪਤ੍ਵਾ ਰਾਜੁਯ੍ਯਾਨੇ ਵਸਿਤ੍ਵਾ ਪੁਨਦਿਵਸੇ ਭਿਕ੍ਖਾਯ ਨਗਰਂ ਪਵਿਸਿਤ੍ਵਾ ਰਾਜਦ੍ਵਾਰਂ ਅਗਮਾਸਿ. ਅਥ ਨਂ ਬਾਰਾਣਸਿਰਾਜਾ ਦਿਸ੍ਵਾ ਇਰਿਯਾਪਥੇ ਪਸੀਦਿਤ੍ਵਾ ਪਕ੍ਕੋਸਾਪੇਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਾਪੇਤ੍ਵਾ ਨਾਨਗ੍ਗਰਸਭੋਜਨਂ ਭੋਜੇਤ੍ਵਾ ਅਞ੍ਞਤਰਸ੍ਮਿਂ ਨੀਚੇ ਆਸਨੇ ਨਿਸਿਨ੍ਨੋ ਵਨ੍ਦਿਤ੍ਵਾ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਪਠਮਂ ਗਾਥਮਾਹ –

੧੪੩.

‘‘ਅਰਿਯਾਵਕਾਸੋਸਿ ਪਸਨ੍ਨਨੇਤ੍ਤੋ, ਮਞ੍ਞੇ ਭਵਂ ਪਬ੍ਬਜਿਤੋ ਕੁਲਮ੍ਹਾ;

ਕਥਂ ਨੁ ਵਿਤ੍ਤਾਨਿ ਪਹਾਯ ਭੋਗੇ, ਪਬ੍ਬਜਿ ਨਿਕ੍ਖਮ੍ਮ ਘਰਾ ਸਪਞ੍ਞਾ’’ਤਿ.

ਤਤ੍ਥ ਅਰਿਯਾਵਕਾਸੋਸੀਤਿ ਨਿਦ੍ਦੋਸਸੁਨ੍ਦਰਸਰੀਰਾਵਕਾਸੋਸਿ, ਅਭਿਰੂਪੋਸੀਤਿ ਅਤ੍ਥੋ. ਪਸਨ੍ਨਨੇਤ੍ਤੋਤਿ ਪਞ੍ਚਹਿ ਪਸਾਦੇਹਿ ਯੁਤ੍ਤਨੇਤ੍ਤੋ. ਕੁਲਮ੍ਹਾਤਿ ਖਤ੍ਤਿਯਕੁਲਾ ਵਾ ਬ੍ਰਾਹ੍ਮਣਕੁਲਾ ਵਾ ਸੇਟ੍ਠਿਕੁਲਾ ਵਾ ਪਬ੍ਬਜਿਤੋਸੀਤਿ ਮਞ੍ਞਾਮਿ. ਕਥਂ ਨੂਤਿ ਕੇਨ ਕਾਰਣੇਨ ਕਿਂ ਆਰਮ੍ਮਣਂ ਕਤ੍ਵਾ ਧਨਞ੍ਚ ਉਪਭੋਗੇ ਚ ਪਹਾਯ ਘਰਾ ਨਿਕ੍ਖਮਿਤ੍ਵਾ ਪਬ੍ਬਜਿਤੋਸਿ ਸਪਞ੍ਞ ਪਣ੍ਡਿਤਪੁਰਿਸਾਤਿ ਪੁਚ੍ਛਤਿ.

ਤਤੋ ਪਰਂ ਤਾਪਸਸ੍ਸ ਚ ਰਞ੍ਞੋ ਚ ਵਚਨਪ੍ਪਟਿਵਚਨਵਸੇਨ ਗਾਥਾਨਂ ਸਮ੍ਬਨ੍ਧੋ ਵੇਦਿਤਬ੍ਬੋ –

੧੪੪.

‘‘ਸਯਂ ਵਿਮਾਨਂ ਨਰਦੇਵ ਦਿਸ੍ਵਾ, ਮਹਾਨੁਭਾਵਸ੍ਸ ਮਹੋਰਗਸ੍ਸ;

ਦਿਸ੍ਵਾਨ ਪੁਞ੍ਞਾਨ ਮਹਾਵਿਪਾਕਂ, ਸਦ੍ਧਾਯਹਂ ਪਬ੍ਬਜਿਤੋਮ੍ਹਿ ਰਾਜ.

੧੪੫.

‘‘ਨ ਕਾਮਕਾਮਾ ਨ ਭਯਾ ਨ ਦੋਸਾ, ਵਾਚਂ ਮੁਸਾ ਪਬ੍ਬਜਿਤਾ ਭਣਨ੍ਤਿ;

ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ, ਸੁਤ੍ਵਾਨ ਮੇ ਜਾਯਿਹਿਤਿਪ੍ਪਸਾਦੋ.

੧੪੬.

‘‘ਵਾਣਿਜ੍ਜ ਰਟ੍ਠਾਧਿਪ ਗਚ੍ਛਮਾਨੋ, ਪਥੇ ਅਦ੍ਦਸਾਸਿਮ੍ਹਿ ਭੋਜਪੁਤ੍ਤੇ;

ਪਵਡ੍ਢਕਾਯਂ ਉਰਗਂ ਮਹਨ੍ਤਂ, ਆਦਾਯ ਗਚ੍ਛਨ੍ਤੇ ਪਮੋਦਮਾਨੇ.

੧੪੭.

‘‘ਸੋਹਂ ਸਮਾਗਮ੍ਮ ਜਨਿਨ੍ਦ ਤੇਹਿ, ਪਹਟ੍ਠਲੋਮੋ ਅਵਚਮ੍ਹਿ ਭੀਤੋ;

ਕੁਹਿਂ ਅਯਂ ਨੀਯਤਿ ਭੀਮਕਾਯੋ, ਨਾਗੇਨ ਕਿਂ ਕਾਹਥ ਭੋਜਪੁਤ੍ਤਾ.

੧੪੮.

‘‘ਨਾਗੋ ਅਯਂ ਨੀਯਤਿ ਭੋਜਨਤ੍ਥਾ, ਪਵਡ੍ਢਕਾਯੋ ਉਰਗੋ ਮਹਨ੍ਤੋ;

ਸਾਦੁਞ੍ਚ ਥੂਲਞ੍ਚ ਮੁਦੁਞ੍ਚ ਮਂਸਂ, ਨ ਤ੍ਵਂ ਰਸਞ੍ਞਾਸਿ ਵਿਦੇਹਪੁਤ੍ਤ.

੧੪੯.

‘‘ਇਤੋ ਮਯਂ ਗਨ੍ਤ੍ਵਾ ਸਕਂ ਨਿਕੇਤਂ, ਆਦਾਯ ਸਤ੍ਥਾਨਿ ਵਿਕੋਪਯਿਤ੍ਵਾ;

ਮਂਸਾਨਿ ਭੋਕ੍ਖਾਮ ਪਮੋਦਮਾਨਾ, ਮਯਞ੍ਹਿ ਵੇ ਸਤ੍ਤਵੋ ਪਨ੍ਨਗਾਨਂ.

੧੫੦.

‘‘ਸਚੇ ਅਯਂ ਨੀਯਤਿ ਭੋਜਨਤ੍ਥਾ, ਪਵਡ੍ਢਕਾਯੋ ਉਰਗੋ ਮਹਨ੍ਤੋ;

ਦਦਾਮਿ ਵੋ ਬਲਿਬਦ੍ਦਾਨਿ ਸੋਲ਼ਸ, ਨਾਗਂ ਇਮਂ ਮੁਞ੍ਚਥ ਬਨ੍ਧਨਸ੍ਮਾ.

੧੫੧.

‘‘ਅਦ੍ਧਾ ਹਿ ਨੋ ਭਕ੍ਖੋ ਅਯਂ ਮਨਾਪੋ, ਬਹੂ ਚ ਨੋ ਉਰਗਾ ਭੁਤ੍ਤਪੁਬ੍ਬਾ;

ਕਰੋਮ ਤੇ ਤਂ ਵਚਨਂ ਅਲ਼ਾਰ, ਮਿਤ੍ਤਞ੍ਚ ਨੋ ਹੋਹਿ ਵਿਦੇਹਪੁਤ੍ਤ.

੧੫੨.

‘‘ਤਦਾਸ੍ਸੁ ਤੇ ਬਨ੍ਧਨਾ ਮੋਚਯਿਂਸੁ, ਯਂ ਨਤ੍ਥੁਤੋ ਪਟਿਮੋਕ੍ਕਸ੍ਸ ਪਾਸੇ;

ਮੁਤ੍ਤੋ ਚ ਸੋ ਬਨ੍ਧਨਾ ਨਾਗਰਾਜਾ, ਪਕ੍ਕਾਮਿ ਪਾਚੀਨਮੁਖੋ ਮੁਹੁਤ੍ਤਂ.

੧੫੩.

‘‘ਗਨ੍ਤ੍ਵਾਨ ਪਾਚੀਨਮੁਖੋ ਮੁਹੁਤ੍ਤਂ, ਪੁਣ੍ਣੇਹਿ ਨੇਤ੍ਤੇਹਿ ਪਲੋਕਯੀ ਮਂ;

ਤਦਾਸ੍ਸਹਂ ਪਿਟ੍ਠਿਤੋ ਅਨ੍ਵਗਚ੍ਛਿਂ, ਦਸਙ੍ਗੁਲਿਂ ਅਞ੍ਜਲਿਂ ਪਗ੍ਗਹੇਤ੍ਵਾ.

੧੫੪.

‘‘ਗਚ੍ਛੇਵ ਖੋ ਤ੍ਵਂ ਤਰਮਾਨਰੂਪੋ, ਮਾ ਤਂ ਅਮਿਤ੍ਤਾ ਪੁਨਰਗ੍ਗਹੇਸੁਂ;

ਦੁਕ੍ਖੋ ਹਿ ਲੁਦ੍ਦੇਹਿ ਪੁਨਾ ਸਮਾਗਮੋ, ਅਦਸ੍ਸਨਂ ਭੋਜਪੁਤ੍ਤਾਨ ਗਚ੍ਛ.

੧੫੫.

‘‘ਅਗਮਾਸਿ ਸੋ ਰਹਦਂ ਵਿਪ੍ਪਸਨ੍ਨਂ, ਨੀਲੋਭਾਸਂ ਰਮਣੀਯਂ ਸੁਤਿਤ੍ਥਂ;

ਸਮੋਤਤਂ ਜਮ੍ਬੁਹਿ ਵੇਤਸਾਹਿ, ਪਾਵੇਕ੍ਖਿ ਨਿਤ੍ਤਿਣ੍ਣਭਯੋ ਪਤੀਤੋ.

੧੫੬.

‘‘ਸੋ ਤਂ ਪਵਿਸ੍ਸ ਨਚਿਰਸ੍ਸ ਨਾਗੋ, ਦਿਬ੍ਬੇਨ ਮੇ ਪਾਤੁਰਹੂ ਜਨਿਨ੍ਦ;

ਉਪਟ੍ਠਹੀ ਮਂ ਪਿਤਰਂਵ ਪੁਤ੍ਤੋ, ਹਦਯਙ੍ਗਮਂ ਕਣ੍ਣਸੁਖਂ ਭਣਨ੍ਤੋ.

੧੫੭.

‘‘ਤ੍ਵਂ ਮੇਸਿ ਮਾਤਾ ਚ ਪਿਤਾ ਅਲ਼ਾਰ, ਅਬ੍ਭਨ੍ਤਰੋ ਪਾਣਦਦੋ ਸਹਾਯੋ;

ਸਕਞ੍ਚ ਇਦ੍ਧਿਂ ਪਟਿਲਾਭਕੋਸ੍ਮਿ, ਅਲ਼ਾਰ ਪਸ੍ਸ ਮੇ ਨਿਵੇਸਨਾਨਿ;

ਪਹੂਤਭਕ੍ਖਂ ਬਹੁਅਨ੍ਨਪਾਨਂ, ਮਸਕ੍ਕਸਾਰਂ ਵਿਯ ਵਾਸਵਸ੍ਸਾ’’ਤਿ.

ਤਤ੍ਥ ਵਿਮਾਨਨ੍ਤਿ ਸਙ੍ਖਪਾਲਨਾਗਰਞ੍ਞੋ ਅਨੇਕਸਤਨਾਟਕਸਮ੍ਪਤ੍ਤਿਸਮ੍ਪਨ੍ਨਂ ਕਞ੍ਚਨਮਣਿਵਿਮਾਨਂ. ਪੁਞ੍ਞਾਨਨ੍ਤਿ ਤੇਨ ਕਤਪੁਞ੍ਞਾਨਂ ਮਹਨ੍ਤਂ ਵਿਪਾਕਂ ਦਿਸ੍ਵਾ ਕਮ੍ਮਞ੍ਚ ਫਲਞ੍ਚ ਪਰਲੋਕਞ੍ਚ ਸਦ੍ਦਹਿਤ੍ਵਾ ਪਵਤ੍ਤਾਯ ਸਦ੍ਧਾਯ ਅਹਂ ਪਬ੍ਬਜਿਤੋ. ਨ ਕਾਮਕਾਮਾਤਿ ਨ ਵਤ੍ਥੁਕਾਮੇਨਪਿ ਭਯੇਨਪਿ ਦੋਸੇਨਪਿ ਮੁਸਾ ਭਣਨ੍ਤਿ. ਜਾਯਿਹਿਤੀਤਿ, ਭਨ੍ਤੇ, ਤੁਮ੍ਹਾਕਂ ਵਚਨਂ ਸੁਤ੍ਵਾ ਮਯ੍ਹਮ੍ਪਿ ਪਸਾਦੋ ਸੋਮਨਸ੍ਸਂ ਜਾਯਿਸ੍ਸਤਿ. ਵਾਣਿਜ੍ਜਨ੍ਤਿ ਵਾਣਿਜ੍ਜਕਮ੍ਮਂ ਕਰਿਸ੍ਸਾਮੀਤਿ ਗਚ੍ਛਨ੍ਤੋ. ਪਥੇ ਅਦ੍ਦਸਾਸਿਮ੍ਹੀਤਿ ਪਞ੍ਚਨ੍ਨਂ ਸਕਟਸਤਾਨਂ ਪੁਰਤੋ ਸੁਖਯਾਨਕੇ ਨਿਸੀਦਿਤ੍ਵਾ ਗਚ੍ਛਨ੍ਤੋ ਮਹਾਮਗ੍ਗੇ ਜਨਪਦਮਨੁਸ੍ਸੇ ਅਦ੍ਦਸਂ. ਪਵਡ੍ਢਕਾਯਨ੍ਤਿ ਵਡ੍ਢਿਤਕਾਯਂ. ਆਦਾਯਾਤਿ ਅਟ੍ਠਹਿ ਕਾਜੇਹਿ ਗਹੇਤ੍ਵਾ. ਅਵਚਮ੍ਹੀਤਿ ਅਭਾਸਿਂ. ਭੀਮਕਾਯੋਤਿ ਭਯਜਨਕਕਾਯੋ. ਭੋਜਪੁਤ੍ਤਾਤਿ ਲੁਦ੍ਦਪੁਤ੍ਤਕੇ ਪਿਯਸਮੁਦਾਚਾਰੇਨਾਲਪਤਿ. ਵਿਦੇਹਪੁਤ੍ਤਾਤਿ ਵਿਦੇਹਰਟ੍ਠਵਾਸਿਤਾਯ ਆਲ਼ਾਰਂ ਆਲਪਿਂਸੁ. ਵਿਕੋਪਯਿਤ੍ਵਾਤਿ ਛਿਨ੍ਦਿਤ੍ਵਾ. ਮਯਞ੍ਹਿ ਵੋ ਸਤ੍ਤਵੋਤਿ ਮਯਂ ਪਨ ਨਾਗਾਨਂ ਵੇਰਿਨੋ ਨਾਮ. ਭੋਜਨਤ੍ਥਾਤਿ ਭੋਜਨਤ੍ਥਾਯ. ਮਿਤ੍ਤਞ੍ਚ ਨੋ ਹੋਹੀਤਿ ਤ੍ਵਂ ਅਮ੍ਹਾਕਂ ਮਿਤ੍ਤੋ ਹੋਹਿ, ਕਤਗੁਣਂ ਜਾਨ.

ਤਦਾਸ੍ਸੁ ਤੇਤਿ, ਮਹਾਰਾਜ, ਤੇਹਿ ਭੋਜਪੁਤ੍ਤੇਹਿ ਏਵਂ ਵੁਤ੍ਤੇ ਅਹਂ ਤੇਸਂ ਸੋਲ਼ਸ ਵਾਹਗੋਣੇ ਨਿਵਾਸਨਪਾਰੁਪਨਾਨਿ ਪਸਤਂ ਪਸਤਂ ਸੁਵਣ੍ਣਮਾਸਕੇ ਭਰਿਯਾਨਞ੍ਚ ਨੇਸਂ ਵਤ੍ਥਾਲਙ੍ਕਾਰਂ ਅਦਾਸਿਂ, ਅਥ ਤੇ ਸਙ੍ਖਪਾਲਨਾਗਰਾਜਾਨਂ ਭੂਮਿਯਂ ਨਿਪਜ੍ਜਾਪੇਤ੍ਵਾ ਅਤ੍ਤਨੋ ਕਕ੍ਖਲ਼ਤਾਯ ਸਕਣ੍ਟਕਕਾਲ਼ਵੇਤ੍ਤਲਤਾਯ ਕੋਟਿਯਂ ਗਹੇਤ੍ਵਾ ਆਕਡ੍ਢਿਤੁਂ ਆਰਭਿਂਸੁ. ਅਥਾਹਂ ਨਾਗਰਾਜਾਨਂ ਕਿਲਮਨ੍ਤਂ ਦਿਸ੍ਵਾ ਅਕਿਲਮੇਨ੍ਤੋਵ ਅਸਿਨਾ ਤਾ ਲਤਾ ਛਿਨ੍ਦਿਤ੍ਵਾ ਦਾਰਕਾਨਂ ਕਣ੍ਣਵੇਧਤੋ ਵਟ੍ਟਿਨੀਹਰਣਨਿਯਾਮੇਨ ਅਦੁਕ੍ਖਾਪੇਨ੍ਤੋ ਸਣਿਕਂ ਨੀਹਰਿਂ, ਤਸ੍ਮਿਂ ਕਾਲੇ ਤੇ ਭੋਜਪੁਤ੍ਤਾ ਯਂ ਬਨ੍ਧਨਂ ਅਸ੍ਸ ਨਤ੍ਥੁਤੋ ਪਵੇਸੇਤ੍ਵਾ ਪਾਸੇ ਪਟਿਮੋਕ੍ਕਂ, ਤਸ੍ਮਾ ਬਨ੍ਧਨਾ ਤਂ ਉਰਗਂ ਮੋਚਯਿਂਸੁ. ਤਸ੍ਸ ਨਾਸਤੋ ਸਹ ਪਾਸੇਨ ਤਂ ਰਜ੍ਜੁਕਂ ਨੀਹਰਿਂਸੂਤਿ ਦੀਪੇਤਿ. ਇਤਿ ਤੇ ਉਰਗਂ ਵਿਸ੍ਸਜ੍ਜੇਤ੍ਵਾ ਥੋਕਂ ਗਨ੍ਤ੍ਵਾ ‘‘ਅਯਂ ਉਰਗੋ ਦੁਬ੍ਬਲੋ, ਮਤਕਾਲੇ ਨਂ ਗਹੇਤ੍ਵਾ ਗਮਿਸ੍ਸਾਮਾ’’ਤਿ ਨਿਲੀਯਿਂਸੁ.

ਪੁਣ੍ਣੇਹੀਤਿ ਸੋਪਿ ਮੁਹੁਤ੍ਤਂ ਪਾਚੀਨਾਭਿਮੁਖੋ ਗਨ੍ਤ੍ਵਾ ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ ਮਂ ਪਲੋਕਯਿ. ਤਦਾਸ੍ਸਹਨ੍ਤਿ ਤਦਾ ਅਸ੍ਸ ਅਹਂ. ਗਚ੍ਛੇਵਾਤਿ ਏਵਂ ਤਂ ਅਵਚਨ੍ਤਿ ਵਦਤਿ. ਰਹਦਨ੍ਤਿ ਕਣ੍ਣਵੇਣ੍ਣਦਹਂ. ਸਮੋਤਤਨ੍ਤਿ ਉਭਯਤੀਰੇਸੁ ਜਮ੍ਬੁਰੁਕ੍ਖਵੇਤਸਰੁਕ੍ਖੇਹਿ ਓਤਤਂ ਵਿਤਤਂ. ਨਿਤ੍ਤਿਣ੍ਣਭਯੋ ਪਤੀਤੋਤਿ ਸੋ ਕਿਰ ਤਂ ਦਹਂ ਪਵਿਸਨ੍ਤੋ ਆਲ਼ਾਰਸ੍ਸ ਨਿਪਚ੍ਚਕਾਰਂ ਦਸ੍ਸੇਤ੍ਵਾ ਯਾਵ ਨਙ੍ਗੁਟ੍ਠਾ ਓਤਰਿ, ਉਦਕੇ ਪਵਿਟ੍ਠਟ੍ਠਾਨਮੇਵਸ੍ਸ ਨਿਬ੍ਭਯਂ ਅਹੋਸਿ, ਤਸ੍ਮਾ ਨਿਤ੍ਤਿਣ੍ਣਭਯੋ ਪਤੀਤੋ ਹਟ੍ਠਤੁਟ੍ਠੋ ਪਾਵੇਕ੍ਖੀਤਿ. ਪਵਿਸ੍ਸਾਤਿ ਪਵਿਸਿਤ੍ਵਾ. ਦਿਬ੍ਬੇਨ ਮੇਤਿ ਨਾਗਭਵਨੇ ਪਮਾਦਂ ਅਨਾਪਜ੍ਜਿਤ੍ਵਾ ਮਯਿ ਕਣ੍ਣਵੇਣ੍ਣਤੀਰਂ ਅਨਤਿਕ੍ਕਨ੍ਤੇਯੇਵ ਦਿਬ੍ਬੇਨ ਪਰਿਵਾਰੇਨ ਮਮ ਪੁਰਤੋ ਪਾਤੁਰਹੋਸਿ. ਉਪਟ੍ਠਹੀਤਿ ਉਪਾਗਮਿ. ਅਬ੍ਭਨ੍ਤਰੋਤਿ ਹਦਯਮਂਸਸਦਿਸੋ. ਤ੍ਵਂ ਮਮ ਬਹੁਪਕਾਰੋ, ਸਕ੍ਕਾਰਂ ਤੇ ਕਰਿਸ੍ਸਾਮਿ. ਪਸ੍ਸ ਮੇ ਨਿਵੇਸਨਾਨੀਤਿ ਮਮ ਨਾਗਭਵਨਂ ਪਸ੍ਸ. ਮਸਕ੍ਕਸਾਰਂ ਵਿਯਾਤਿ ਮਸਕ੍ਕਸਾਰੋ ਵੁਚ੍ਚਤਿ ਓਸਕ੍ਕਨਪਰਿਸਕ੍ਕਨਾਭਾਵੇਨ ਘਨਸਾਰਤਾਯ ਚ ਸਿਨੇਰੁਪਬ੍ਬਤਰਾਜਾ. ਅਯਂ ਤਤ੍ਥ ਮਾਪਿਤਂ ਤਾਵਤਿਂਸਭਵਨਂ ਸਨ੍ਧਾਯੇਵਮਾਹ.

ਮਹਾਰਾਜ! ਏਵਂ ਵਤ੍ਵਾ ਸੋ ਨਾਗਰਾਜਾ ਉਤ੍ਤਰਿ ਅਤ੍ਤਨੋ ਨਾਗਭਵਨਂ ਵਣ੍ਣੇਨ੍ਤੋ ਗਾਥਾਦ੍ਵਯਮਾਹ –

੧੫੮.

‘‘ਤਂ ਭੂਮਿਭਾਗੇਹਿ ਉਪੇਤਰੂਪਂ, ਅਸਕ੍ਖਰਾ ਚੇਵ ਮੁਦੂ ਸੁਭਾ ਚ;

ਨੀਚਤ੍ਤਿਣਾ ਅਪ੍ਪਰਜਾ ਚ ਭੂਮਿ, ਪਾਸਾਦਿਕਾ ਯਤ੍ਥ ਜਹਨ੍ਤਿ ਸੋਕਂ.

੧੫੯.

‘‘ਅਨਾਵਕੁਲਾ ਵੇਲ਼ੁਰਿਯੂਪਨੀਲਾ, ਚਤੁਦ੍ਦਿਸਂ ਅਮ੍ਬਵਨਂ ਸੁਰਮ੍ਮਂ;

ਪਕ੍ਕਾ ਚ ਪੇਸੀ ਚ ਫਲਾ ਸੁਫੁਲ੍ਲਾ, ਨਿਚ੍ਚੋਤੁਕਾ ਧਾਰਯਨ੍ਤੀ ਫਲਾਨੀ’’ਤਿ.

ਤਤ੍ਥ ਅਸਕ੍ਖਰਾਤਿ ਯਾ ਤਤ੍ਥ ਭੂਮਿ ਪਾਸਾਣਸਕ੍ਖਰਰਹਿਤਾ ਮੁਦੁ ਸੁਭਾ ਕਞ੍ਚਨਰਜਤਮਣਿਮਯਾ ਸਤ੍ਤਰਤਨਵਾਲੁਕਾਕਿਣ੍ਣਾ. ਨੀਚਤ੍ਤਿਣਾਤਿ ਇਨ੍ਦਗੋਪਕਪਿਟ੍ਠਿਸਦਿਸਵਣ੍ਣੇਹਿ ਨੀਚਤਿਣੇਹਿ ਸਮਨ੍ਨਾਗਤਾ. ਅਪ੍ਪਰਜਾਤਿ ਪਂਸੁਰਹਿਤਾ. ਯਤ੍ਥ ਜਹਨ੍ਤਿ ਸੋਕਨ੍ਤਿ ਯਤ੍ਥ ਪਵਿਟ੍ਠਮਤ੍ਤਾਵ ਨਿਸ੍ਸੋਕਾ ਹੋਨ੍ਤਿ. ਅਨਾਵਕੁਲਾਤਿ ਨ ਅਵਕੁਲਾ ਅਖਾਣੁਮਾ ਉਪਰਿ ਉਕ੍ਕੁਲਵਿਕੁਲਭਾਵਰਹਿਤਾ ਵਾ ਸਮਸਣ੍ਠਿਤਾ. ਵੇਲ਼ੁਰਿਯੂਪਨੀਲਾਤਿ ਵੇਲ਼ੁਰਿਯੇਨ ਉਪਨੀਲਾ, ਤਸ੍ਮਿਂ ਨਾਗਭਵਨੇ ਵੇਲ਼ੁਰਿਯਮਯਾ ਪਸਨ੍ਨਸਲਿਲਾ ਨੀਲੋਭਾਸਾ ਅਨੇਕਵਣ੍ਣਕਮਲੁਪ੍ਪਲਸਞ੍ਛਨ੍ਨਾ ਪੋਕ੍ਖਰਣੀਤਿ ਅਤ੍ਥੋ. ਚਤੁਦ੍ਦਿਸਨ੍ਤਿ ਤਸ੍ਸਾ ਪੋਕ੍ਖਰਣਿਯਾ ਚਤੂਸੁ ਦਿਸਾਸੁ. ਪਕ੍ਕਾ ਚਾਤਿ ਤਸ੍ਮਿਂ ਅਮ੍ਬਵਨੇ ਅਮ੍ਬਰੁਕ੍ਖਾ ਪਕ੍ਕਫਲਾ ਚ ਅਡ੍ਢਪਕ੍ਕਫਲਾ ਚ ਤਰੁਣਫਲਾ ਚ ਫੁਲ੍ਲਿਤਾਯੇਵਾਤਿ ਅਤ੍ਥੋ. ਨਿਚ੍ਚੋਤੁਕਾਤਿ ਛਨ੍ਨਮ੍ਪਿ ਉਤੂਨਂ ਅਨੁਰੂਪੇਹਿ ਪੁਪ੍ਫਫਲੇਹਿ ਸਮਨ੍ਨਾਗਤਾਤਿ.

੧੬੦.

ਤੇਸਂ ਵਨਾਨਂ ਨਰਦੇਵ ਮਜ੍ਝੇ, ਨਿਵੇਸਨਂ ਭਸ੍ਸਰਸਨ੍ਨਿਕਾਸਂ;

ਰਜਤਗ੍ਗਲ਼ਂ ਸੋਵਣ੍ਣਮਯਂ ਉਲ਼ਾਰਂ, ਓਭਾਸਤੀ ਵਿਜ੍ਜੁਰਿਵਨ੍ਤਲਿਕ੍ਖੇ.

੧੬੧.

‘‘ਮਣੀਮਯਾ ਸੋਣ੍ਣਮਯਾ ਉਲ਼ਾਰਾ, ਅਨੇਕਚਿਤ੍ਤਾ ਸਤਤਂ ਸੁਨਿਮ੍ਮਿਤਾ;

ਪਰਿਪੂਰਾ ਕਞ੍ਞਾਹਿ ਅਲਙ੍ਕਤਾਹਿ, ਸੁਵਣ੍ਣਕਾਯੂਰਧਰਾਹਿ ਰਾਜ.

੧੬੨.

‘‘ਸੋ ਸਙ੍ਖਪਾਲੋ ਤਰਮਾਨਰੂਪੋ, ਪਾਸਾਦਮਾਰੁਯ੍ਹ ਅਨੋਮਵਣ੍ਣੋ;

ਸਹਸ੍ਸਥਮ੍ਭਂ ਅਤੁਲਾਨੁਭਾਵਂ, ਯਤ੍ਥਸ੍ਸ ਭਰਿਯਾ ਮਹੇਸੀ ਅਹੋਸਿ.

੧੬੩.

‘‘ਏਕਾ ਚ ਨਾਰੀ ਤਰਮਾਨਰੂਪਾ, ਆਦਾਯ ਵੇਲ਼ੁਰਿਯਮਯਂ ਮਹਗ੍ਘਂ;

ਸੁਭਂ ਮਣਿਂ ਜਾਤਿਮਨ੍ਤੂਪਪਨ੍ਨਂ, ਅਚੋਦਿਤਾ ਆਸਨਮਬ੍ਭਿਹਾਸਿ.

੧੬੪.

‘‘ਤਤੋ ਮਂ ਉਰਗੋ ਹਤ੍ਥੇ ਗਹੇਤ੍ਵਾ, ਨਿਸੀਦਯੀ ਪਾਮੁਖਆਸਨਸ੍ਮਿਂ;

ਇਦਮਾਸਨਂ ਅਤ੍ਰ ਭਵਂ ਨਿਸੀਦਤੁ, ਭਵਞ੍ਹਿ ਮੇ ਅਞ੍ਞਤਰੋ ਗਰੂਨਂ.

੧੬੫.

‘‘ਅਞ੍ਞਾ ਚ ਨਾਰੀ ਤਰਮਾਨਰੂਪਾ, ਆਦਾਯ ਵਾਰਿਂ ਉਪਸਙ੍ਕਮਿਤ੍ਵਾ;

ਪਾਦਾਨਿ ਪਕ੍ਖਾਲਯੀ ਮੇ ਜਨਿਨ੍ਦ, ਭਰਿਯਾਵ ਭਤ੍ਤੂ ਪਤਿਨੋ ਪਿਯਸ੍ਸ.

੧੬੬.

‘‘ਅਪਰਾ ਚ ਨਾਰੀ ਤਰਮਾਨਰੂਪਾ, ਪਗ੍ਗਯ੍ਹ ਸੋਵਣ੍ਣਮਯਾਯ ਪਾਤਿਯਾ;

ਅਨੇਕਸੂਪਂ ਵਿਵਿਧਂ ਵਿਯਞ੍ਜਨਂ, ਉਪਨਾਮਯੀ ਭਤ੍ਤ ਮਨੁਞ੍ਞਰੂਪਂ.

੧੬੭.

‘‘ਤੁਰਿਯੇਹਿ ਮਂ ਭਾਰਤ ਭੁਤ੍ਤਵਨ੍ਤਂ, ਉਪਟ੍ਠਹੁਂ ਭਤ੍ਤੁ ਮਨੋ ਵਿਦਿਤ੍ਵਾ;

ਤਤੁਤ੍ਤਰਿਂ ਮਂ ਨਿਪਤੀ ਮਹਨ੍ਤਂ, ਦਿਬ੍ਬੇਹਿ ਕਾਮੇਹਿ ਅਨਪ੍ਪਕੇਹੀ’’ਤਿ.

ਤਤ੍ਥ ਨਿਵੇਸਨਨ੍ਤਿ ਪਾਸਾਦੋ. ਭਸ੍ਸਰਸਨ੍ਨਿਕਾਸਨ੍ਤਿ ਪਭਸ੍ਸਰਦਸ੍ਸਨਂ. ਰਜਤਗ੍ਗਲ਼ਨ੍ਤਿ ਰਜਤਦ੍ਵਾਰਕਵਾਟਂ. ਮਣੀਮਯਾਤਿ ਏਵਰੂਪਾ ਤਤ੍ਥ ਕੂਟਾਗਾਰਾ ਚ ਗਬ੍ਭਾ ਚ. ਪਰਿਪੂਰਾਤਿ ਸਮ੍ਪੁਣ੍ਣਾ. ਸੋ ਸਙ੍ਖਪਾਲੋਤਿ, ਮਹਾਰਾਜ, ਅਹਂ ਏਵਂ ਤਸ੍ਮਿਂ ਨਾਗਭਵਨਂ ਵਣ੍ਣੇਨ੍ਤੇ ਤਂ ਦਟ੍ਠੁਕਾਮੋ ਅਹੋਸਿਂ, ਅਥ ਮਂ ਤਤ੍ਥ ਨੇਤ੍ਵਾ ਸੋ ਸਙ੍ਖਪਾਲੋ ਹਤ੍ਥੇ ਗਹੇਤ੍ਵਾ ਤਰਮਾਨੋ ਵੇਲ਼ੁਰਿਯਥਮ੍ਭੇਹਿ ਸਹਸ੍ਸਥਮ੍ਭਂ ਪਾਸਾਦਂ ਆਰੁਯ੍ਹ ਯਸ੍ਮਿਂ ਠਾਨੇ ਅਸ੍ਸ ਮਹੇਸੀ ਅਹੋਸਿ, ਤਂ ਠਾਨਂ ਨੇਤੀਤਿ ਦੀਪੇਤਿ. ਏਕਾ ਚਾਤਿ ਮਯਿ ਪਾਸਾਦਂ ਅਭਿਰੁਲ਼੍ਹੇ ਏਕਾ ਇਤ੍ਥੀ ਅਞ੍ਞੇਹਿ ਮਣੀਹਿ ਜਾਤਿਮਹਨ੍ਤੇਹਿ ਉਪੇਤਂ ਸੁਭਂ ਵੇਲ਼ੁਰਿਯਾਸਨਂ ਤੇਨ ਨਾਗਰਾਜੇਨ ਅਵੁਤ੍ਤਾਵ. ਅਬ੍ਭਿਹਾਸੀਤਿ ਅਭਿਹਰਿ, ਅਤ੍ਥਰੀਤਿ ਵੁਤ੍ਤਂ ਹੋਤਿ.

ਪਾਮੁਖਆਸਨਸ੍ਮਿਨ੍ਤਿ ਪਮੁਖਾਸਨਸ੍ਮਿਂ, ਉਤ੍ਤਮਾਸਨੇ ਨਿਸੀਦਾਪੇਸੀਤਿ ਅਤ੍ਥੋ. ਗਰੂਨਨ੍ਤਿ ਮਾਤਾਪਿਤੂਨਂ ਮੇ ਤ੍ਵਂ ਅਞ੍ਞਤਰੋਤਿ ਏਵਂ ਵਤ੍ਵਾ ਨਿਸੀਦਾਪੇਸਿ. ਵਿਵਿਧਂ ਵਿਯਞ੍ਜਨਨ੍ਤਿ ਵਿਵਿਧਂ ਬ੍ਯਞ੍ਜਨਂ. ਭਤ੍ਤ ਮਨੁਞ੍ਞਰੂਪਨ੍ਤਿ ਭਤ੍ਤਂ ਮਨੁਞ੍ਞਰੂਪਂ. ਭਾਰਤਾਤਿ ਰਾਜਾਨਂ ਆਲਪਤਿ. ਭੁਤ੍ਤਵਨ੍ਤਨ੍ਤਿ ਭੁਤ੍ਤਾਵਿਂ ਕਤਭਤ੍ਤਕਿਚ੍ਚਂ. ਉਪਟ੍ਠਹੁਨ੍ਤਿ ਅਨੇਕਸਤੇਹਿ ਤੁਰਿਯੇਹਿ ਗਨ੍ਧਬ੍ਬਂ ਕੁਰੁਮਾਨਾ ਉਪਟ੍ਠਹਿਂਸੁ. ਭਤ੍ਤੁ ਮਨੋ ਵਿਦਿਤ੍ਵਾਤਿ ਅਤ੍ਤਨੋ ਪਤਿਨੋ ਚਿਤ੍ਤਂ ਜਾਨਿਤ੍ਵਾ. ਤਤੁਤ੍ਤਰਿਨ੍ਤਿ ਤਤੋ ਗਨ੍ਧਬ੍ਬਕਰਣਤੋ ਉਤ੍ਤਰਿਂ. ਮਂ ਨਿਪਤੀਤਿ ਸੋ ਨਾਗਰਾਜਾ ਮਂ ਉਪਸਙ੍ਕਮਿ. ਮਹਨ੍ਤਂ ਦਿਬ੍ਬੇਹੀਤਿ ਮਹਨ੍ਤੇਹਿ ਉਲ਼ਾਰੇਹਿ ਦਿਬ੍ਬੇਹਿ ਕਾਮੇਹਿ ਤੇਹਿ ਚ ਅਨਪ੍ਪਕੇਹਿ.

ਏਵਂ ਉਪਸਙ੍ਕਮਿਤ੍ਵਾ ਚ ਪਨ ਗਾਥਮਾਹ –

੧੬੮.

‘‘ਭਰਿਯਾ ਮਮੇਤਾ ਤਿਸਤਾ ਅਲ਼ਾਰ, ਸਬ੍ਬਤ੍ਤਮਜ੍ਝਾ ਪਦੁਮੁਤ੍ਤਰਾਭਾ;

ਅਲ਼ਾਰ ਏਤਾਸ੍ਸੁ ਤੇ ਕਾਮਕਾਰਾ, ਦਦਾਮਿ ਤੇ ਤਾ ਪਰਿਚਾਰਯਸ੍ਸੂ’’ਤਿ.

ਤਤ੍ਥ ਸਬ੍ਬਤ੍ਤਮਜ੍ਝਾਤਿ ਸਬ੍ਬਾ ਅਤ੍ਤਮਜ੍ਝਾ, ਪਾਣਿਨਾ ਗਹਿਤਪ੍ਪਮਾਣਮਜ੍ਝਾਤਿ ਅਤ੍ਥੋ. ਅਟ੍ਠਕਥਾਯਂ ਪਨ ‘‘ਸੁਮਜ੍ਝਾ’’ਤਿ ਪਾਠੋ. ਪਦੁਮੁਤ੍ਤਰਾਭਾਤਿ ਪਦੁਮਵਣ੍ਣਉਤ੍ਤਰਾਭਾ, ਪਦੁਮਵਣ੍ਣਉਤ੍ਤਰਚ੍ਛਵਿਯੋਤਿ ਅਤ੍ਥੋ. ਪਰਿਚਾਰਯਸ੍ਸੂਤਿ ਤਾ ਅਤ੍ਤਨੋ ਪਾਦਪਰਿਚਾਰਿਕਾ ਕਰੋਹੀਤਿ ਵਤ੍ਵਾ ਤੀਹਿ ਇਤ੍ਥਿਸਤੇਹਿ ਸਦ੍ਧਿਂ ਮਹਾਸਮ੍ਪਤ੍ਤਿਂ ਮਯ੍ਹਂ ਅਦਾਸਿ.

ਸੋ ਆਹ –

੧੬੯.

‘‘ਸਂਵਚ੍ਛਰਂ ਦਿਬ੍ਬਰਸਾਨੁਭੁਤ੍ਵਾ, ਤਦਾਸ੍ਸੁਹਂ ਉਤ੍ਤਰਿਮਜ੍ਝਭਾਸਿਂ;

ਨਾਗਸ੍ਸਿਦਂ ਕਿਨ੍ਤਿ ਕਥਞ੍ਚ ਲਦ੍ਧਂ, ਕਥਜ੍ਝਗਮਾਸਿ ਵਿਮਾਨਸੇਟ੍ਠਂ.

੧੭੦.

‘‘ਅਧਿਚ੍ਚਲਦ੍ਧਂ ਪਰਿਣਾਮਜਂ ਤੇ, ਸਯਂਕਤਂ ਉਦਾਹੁ ਦੇਵੇਹਿ ਦਿਨ੍ਨਂ;

ਪੁਚ੍ਛਾਮਿ ਤਂ ਨਾਗਰਾਜੇਤਮਤ੍ਥਂ, ਕਥਜ੍ਝਗਮਾਸਿ ਵਿਮਾਨਸੇਟ੍ਠ’’ਨ੍ਤਿ.

ਤਤ੍ਥ ਦਿਬ੍ਬਰਸਾਨੁਭੁਤ੍ਵਾਤਿ ਦਿਬ੍ਬੇ ਕਾਮਗੁਣਰਸੇ ਅਨੁਭਵਿਤ੍ਵਾ. ਤਦਾਸ੍ਸੁਹਨ੍ਤਿ ਤਦਾ ਅਸ੍ਸੁ ਅਹਂ. ਨਾਗਸ੍ਸਿਦਨ੍ਤਿ ਭਦ੍ਰਮੁਖਸ੍ਸ ਸਙ੍ਖਪਾਲਨਾਗਰਾਜਸ੍ਸ ਇਦਂ ਸਮ੍ਪਤ੍ਤਿਜਾਤਂ ਕਿਨ੍ਤਿ ਕਿਂ ਨਾਮ ਕਮ੍ਮਂ ਕਤ੍ਵਾ ਕਥਞ੍ਚ ਕਤ੍ਵਾ ਲਦ੍ਧਂ, ਕਥਮੇਤਂ ਵਿਮਾਨਸੇਟ੍ਠਂ ਤ੍ਵਂ ਅਜ੍ਝਗਮਾਸਿ, ਇਤਿ ਨਂ ਅਹਂ ਪੁਚ੍ਛਿਂ. ਅਧਿਚ੍ਚਲਦ੍ਧਨ੍ਤਿ ਅਹੇਤੁਨਾ ਲਦ੍ਧਂ. ਪਰਿਣਾਮਜਂ ਤੇਤਿ ਕੇਨਚਿ ਤਵ ਅਤ੍ਥਾਯ ਪਰਿਣਾਮਿਤਤ੍ਤਾ ਪਰਿਣਾਮਤੋ ਜਾਤਂ. ਸਯਂਕਤਨ੍ਤਿ ਕਾਰਕੇ ਪਕ੍ਕੋਸਾਪੇਤ੍ਵਾ ਰਤਨਾਨਿ ਦਤ੍ਵਾ ਕਾਰਿਤਨ੍ਤਿ.

ਤਤੋ ਪਰਾ ਦ੍ਵਿਨ੍ਨਮ੍ਪਿ ਵਚਨਪ੍ਪਟਿਵਚਨਗਾਥਾਵ –

੧੭੧.

‘‘ਨਾਧਿਚ੍ਚਲਦ੍ਧਂ ਨ ਪਰਿਣਾਮਜਂ ਮੇ, ਨ ਸਯਂਕਤਂ ਨਾਪਿ ਦੇਵੇਹਿ ਦਿਨ੍ਨਂ;

ਸਕੇਹਿ ਕਮ੍ਮੇਹਿ ਅਪਾਪਕੇਹਿ, ਪੁਞ੍ਞੇਹਿ ਮੇ ਲਦ੍ਧਮਿਦਂ ਵਿਮਾਨਂ.

੧੭੨.

‘‘ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਅਕ੍ਖਾਹਿ ਮੇ ਨਾਗਰਾਜੇਤਮਤ੍ਥਂ, ਕਥਂ ਨੁ ਤੇ ਲਦ੍ਧਮਿਦਂ ਵਿਮਾਨਂ.

੧੭੩.

‘‘ਰਾਜਾ ਅਹੋਸਿਂ ਮਗਧਾਨਮਿਸ੍ਸਰੋ, ਦੁਯ੍ਯੋਧਨੋ ਨਾਮ ਮਹਾਨੁਭਾਵੋ;

ਸੋ ਇਤ੍ਤਰਂ ਜੀਵਿਤਂ ਸਂਵਿਦਿਤ੍ਵਾ, ਅਸਸ੍ਸਤਂ ਵਿਪਰਿਣਾਮਧਮ੍ਮਂ.

੧੭੪.

‘‘ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ;

ਓਪਾਨਭੂਤਂ ਮੇ ਘਰਂ ਤਦਾਸਿ, ਸਨ੍ਤਪ੍ਪਿਤਾ ਸਮਣਬ੍ਰਾਹ੍ਮਣਾ ਚ.

੧੭੫.

‘‘ਮਾਲਞ੍ਚ ਗਨ੍ਧਞ੍ਚ ਵਿਲੇਪਨਞ੍ਚ, ਪਦੀਪਿਯਂ ਯਾਨਮੁਪਸ੍ਸਯਞ੍ਚ;

ਅਚ੍ਛਾਦਨਂ ਸਯਨਮਥਨ੍ਨਪਾਨਂ, ਸਕ੍ਕਚ੍ਚ ਦਾਨਾਨਿ ਅਦਮ੍ਹ ਤਤ੍ਥ.

੧੭੬.

‘‘ਤਂ ਮੇ ਵਤਂ ਤਂ ਪਨ ਬ੍ਰਹ੍ਮਚਰਿਯਂ, ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਤੇਨੇਵ ਮੇ ਲਦ੍ਧਮਿਦਂ ਵਿਮਾਨਂ, ਪਹੂਤਭਕ੍ਖਂ ਬਹੁਅਨ੍ਨਪਾਨਂ;

ਨਚ੍ਚੇਹਿ ਗੀਤੇਹਿ ਚੁਪੇਤਰੂਪਂ, ਚਿਰਟ੍ਠਿਤਿਕਂ ਨ ਚ ਸਸ੍ਸਤਾਯਂ.

੧੭੭.

‘‘ਅਪ੍ਪਾਨੁਭਾਵਾ ਤਂ ਮਹਾਨੁਭਾਵਂ, ਤੇਜਸ੍ਸਿਨਂ ਹਨ੍ਤਿ ਅਤੇਜਵਨ੍ਤੋ;

ਕਿਮੇਵ ਦਾਠਾਵੁਧ ਕਿਂ ਪਟਿਚ੍ਚ, ਹਤ੍ਥਤ੍ਤਮਾਗਚ੍ਛਿ ਵਨਿਬ੍ਬਕਾਨਂ.

੧੭੮.

‘‘ਭਯਂ ਨੁ ਤੇ ਅਨ੍ਵਗਤਂ ਮਹਨ੍ਤਂ, ਤੇਜੋ ਨੁ ਤੇ ਨਾਨ੍ਵਗਂ ਦਨ੍ਤਮੂਲਂ;

ਕਿਮੇਵ ਦਾਠਾਵੁਧ ਕਿਂ ਪਟਿਚ੍ਚ, ਕਿਲੇਸਮਾਪਜ੍ਜਿ ਵਨਿਬ੍ਬਕਾਨਂ.

੧੭੯.

‘‘ਨ ਮੇ ਭਯਂ ਅਨ੍ਵਗਤਂ ਮਹਨ੍ਤਂ, ਤੇਜੋ ਨ ਸਕ੍ਕਾ ਮਮ ਤੇਹਿ ਹਨ੍ਤੁਂ;

ਸਤਞ੍ਚ ਧਮ੍ਮਾਨਿ ਸੁਕਿਤ੍ਤਿਤਾਨਿ, ਸਮੁਦ੍ਦਵੇਲਾਵ ਦੁਰਚ੍ਚਯਾਨਿ.

੧੮੦.

‘‘ਚਾਤੁਦ੍ਦਸਿਂ ਪਞ੍ਚਦਸਿਂ ਅਲ਼ਾਰ, ਉਪੋਸਥਂ ਨਿਚ੍ਚਮੁਪਾਵਸਾਮਿ;

ਅਥਾਗਮੁਂ ਸੋਲ਼ਸ ਭੋਜਪੁਤ੍ਤਾ, ਰਜ੍ਜੁਂ ਗਹੇਤ੍ਵਾਨ ਦਲ਼੍ਹਞ੍ਚ ਪਾਸਂ.

੧੮੧.

‘‘ਭੇਤ੍ਵਾਨ ਨਾਸਂ ਅਤਿਕਸ੍ਸ ਰਜ੍ਜੁਂ, ਨਯਿਂਸੁ ਮਂ ਸਮ੍ਪਰਿਗਯ੍ਹ ਲੁਦ੍ਦਾ;

ਏਤਾਦਿਸਂ ਦੁਕ੍ਖਮਹਂ ਤਿਤਿਕ੍ਖਂ, ਉਪੋਸਥਂ ਅਪ੍ਪਟਿਕੋਪਯਨ੍ਤੋ.

੧੮੨.

‘‘ਏਕਾਯਨੇ ਤਂ ਪਥੇ ਅਦ੍ਦਸਂਸੁ, ਬਲੇਨ ਵਣ੍ਣੇਨ ਚੁਪੇਤਰੂਪਂ;

ਸਿਰਿਯਾ ਪਞ੍ਞਾਯ ਚ ਭਾਵਿਤੋਸਿ, ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.

੧੮੩.

‘‘ਨ ਪੁਤ੍ਤਹੇਤੂ ਨ ਧਨਸ੍ਸ ਹੇਤੂ, ਨ ਆਯੁਨੋ ਚਾਪਿ ਅਲ਼ਾਰ ਹੇਤੁ;

ਮਨੁਸ੍ਸਯੋਨਿਂ ਅਭਿਪਤ੍ਥਯਾਨੋ, ਤਸ੍ਮਾ ਪਰਕ੍ਕਮ ਤਪੋ ਕਰੋਮਿ.

੧੮੪.

‘‘ਤ੍ਵਂ ਲੋਹਿਤਕ੍ਖੋ ਵਿਹਤਨ੍ਤਰਂਸੋ, ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੁ;

ਸੁਰੋਸਿਤੋ ਲੋਹਿਤਚਨ੍ਦਨੇਨ, ਗਨ੍ਧਬ੍ਬਰਾਜਾਵ ਦਿਸਾ ਪਭਾਸਸਿ.

੧੮੫.

‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਸਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ;

ਪੁਚ੍ਛਾਮਿ ਤਂ ਨਾਗਰਾਜੇਤਮਤ੍ਥਂ, ਸੇਯ੍ਯੋ ਇਤੋ ਕੇਨ ਮਨੁਸ੍ਸਲੋਕੋ.

੧੮੬.

‘‘ਅਲ਼ਾਰ ਨਾਞ੍ਞਤ੍ਰ ਮਨੁਸ੍ਸਲੋਕਾ, ਸੁਦ੍ਧੀਵ ਸਂਵਿਜ੍ਜਤਿ ਸਂਯਮੋ ਵਾ;

ਅਹਞ੍ਚ ਲਦ੍ਧਾਨ ਮਨੁਸ੍ਸਯੋਨਿਂ, ਕਾਹਾਮਿ ਜਾਤਿਮਰਣਸ੍ਸ ਅਨ੍ਤਂ.

੧੮੭.

‘‘ਸਂਵਚ੍ਛਰੋ ਮੇ ਵਸਤੋ ਤਵਨ੍ਤਿਕੇ, ਅਨ੍ਨੇਨ ਪਾਨੇਨ ਉਪਟ੍ਠਿਤੋਸ੍ਮਿ;

ਆਮਨ੍ਤਯਿਤ੍ਵਾਨ ਪਲੇਮਿ ਨਾਗ, ਚਿਰਪ੍ਪਵੁਟ੍ਠੋਸ੍ਮਿ ਅਹਂ ਜਨਿਨ੍ਦ.

੧੮੮.

‘‘ਪੁਤ੍ਤਾ ਚ ਦਾਰਾ ਅਨੁਜੀਵਿਨੋ ਚ, ਨਿਚ੍ਚਾਨੁਸਿਟ੍ਠਾ ਉਪਤਿਟ੍ਠਥੇਤਂ;

ਕਚ੍ਚਿਨ੍ਨੁ ਤਂ ਨਾਭਿਸਪਿਤ੍ਥ ਕੋਚਿ, ਪਿਯਞ੍ਹਿ ਮੇ ਦਸ੍ਸਨਂ ਤੁਯ੍ਹਂ ਅਲ਼ਾਰ.

੧੮੯.

‘‘ਯਥਾਪਿ ਮਾਤੂ ਚ ਪਿਤੂ ਅਗਾਰੇ, ਪੁਤ੍ਤੋ ਪਿਯੋ ਪਟਿਵਿਹਿਤੋ ਵਸੇਯ੍ਯ;

ਤਤੋਪਿ ਮਯ੍ਹਂ ਇਧਮੇਵ ਸੇਯ੍ਯੋ, ਚਿਤ੍ਤਞ੍ਹਿ ਤੇ ਨਾਗ ਮਯੀ ਪਸਨ੍ਨਂ.

੧੯੦.

‘‘ਮਣੀ ਮਮਂ ਵਿਜ੍ਜਤਿ ਲੋਹਿਤਙ੍ਕੋ, ਧਨਾਹਰੋ ਮਣਿਰਤਨਂ ਉਲ਼ਾਰਂ;

ਆਦਾਯ ਤ੍ਵਂ ਗਚ੍ਛ ਸਕਂ ਨਿਕੇਤਂ, ਲਦ੍ਧਾ ਧਨਂ ਤਂ ਮਣਿਮੋਸ੍ਸਜਸ੍ਸੂ’’ਤਿ.

ਤਤ੍ਥ ਕਿਂ ਤੇ ਵਤਨ੍ਤਿ ਕਿਂ ਤਵ ਵਤਸਮਾਦਾਨਂ. ਬ੍ਰਹ੍ਮਚਰਿਯਨ੍ਤਿ ਸੇਟ੍ਠਚਰਿਯਂ. ਓਪਾਨਭੂਤਨ੍ਤਿ ਚਤੁਮਹਾਪਥੇ ਖਤਪੋਕ੍ਖਰਣੀ ਵਿਯ ਧਮ੍ਮਿਕਸਮਣਬ੍ਰਾਹ੍ਮਣਾਨਂ ਯਥਾਸੁਖਂ ਪਰਿਭੁਞ੍ਜਿਤਬ੍ਬਵਿਭਵਂ. ਨ ਚ ਸਸ੍ਸਤਾਯਨ੍ਤਿ ਚਿਰਟ੍ਠਿਤਿਕਂ ਸਮਾਨਮ੍ਪਿ ਚੇ ਤਂ ਮਯ੍ਹਂ ਸਸ੍ਸਤਂ ਨ ਹੋਤੀਤਿ ਮੇ ਕਥੇਤਿ.

ਅਪ੍ਪਾਨੁਭਾਵਾਤਿ ਭੋਜਪੁਤ੍ਤੇ ਸਨ੍ਧਾਯਾਹ. ਹਨ੍ਤੀਤਿ ਅਟ੍ਠਸੁ ਠਾਨੇਸੁ ਸੂਲੇਹਿ ਵਿਜ੍ਝਨ੍ਤਾ ਕਿਂਕਾਰਣਾ ਹਨਿਂਸੁ. ਕਿਂ ਪਟਿਚ੍ਚਾਤਿ ਕਿਂ ਸਨ੍ਧਾਯ ਤ੍ਵਂ ਤਦਾ ਤੇਸਂ ਹਤ੍ਥਤ੍ਤਂ ਆਗਚ੍ਛਿ ਵਸਂ ਉਪਗਤੋ. ਵਨਿਬ੍ਬਕਾਨਨ੍ਤਿ ਭੋਜਪੁਤ੍ਤਾ ਇਧ ‘‘ਵਨਿਬ੍ਬਕਾ’’ਤਿ ਵੁਤ੍ਤਾ. ਤੇਜੋ ਨੁ ਤੇ ਨਾਨ੍ਵਗਂ ਦਨ੍ਤਮੂਲਨ੍ਤਿ ਕਿਂ ਨੁ ਤਵ ਤੇਜੋ ਭੋਜਪੁਤ੍ਤੇ ਦਿਸ੍ਵਾ ਤਦਾ ਭਯਂ ਮਹਨ੍ਤਂ ਅਨ੍ਵਗਤਂ, ਉਦਾਹੁ ਵਿਸਂ ਦਨ੍ਤਮੂਲਂ ਨ ਅਨ੍ਵਗਤਂ. ਕਿਲੇਸਨ੍ਤਿ ਦੁਕ੍ਖਂ. ਵਨਿਬ੍ਬਕਾਨਨ੍ਤਿ ਭੋਜਪੁਤ੍ਤਾਨਂ ਸਨ੍ਤਿਕੇ, ਭੋਜਪੁਤ੍ਤੇ ਨਿਸ੍ਸਾਯਾਤਿ ਅਤ੍ਥੋ.

ਤੇਜੋ ਨ ਸਕ੍ਕਾ ਮਮ ਤੇਹਿ ਹਨ੍ਤੁਨ੍ਤਿ ਮਮ ਵਿਸਤੇਜੋ ਅਞ੍ਞਸ੍ਸ ਤੇਜੇਨ ਅਭਿਹਨ੍ਤੁਮ੍ਪਿ ਨ ਸਕ੍ਕਾ. ਸਤਨ੍ਤਿ ਬੁਦ੍ਧਾਦੀਨਂ. ਧਮ੍ਮਾਨੀਤਿ ਸੀਲਸਮਾਧਿਪਞ੍ਞਾਖਨ੍ਤਿਅਨੁਦ੍ਦਯਮੇਤ੍ਤਾਭਾਵਨਾਸਙ੍ਖਾਤਾਨਿ ਧਮ੍ਮਾਨਿ. ਸੁਕਿਤ੍ਤਿਤਾਨੀਤਿ ਸੁਵਣ੍ਣਿਤਾਨਿ ਸੁਕਥਿਤਾਨਿ. ਕਿਨ੍ਤਿ ਕਤ੍ਵਾ? ਸਮੁਦ੍ਦਵੇਲਾਵ ਦੁਰਚ੍ਚਯਾਨੀਤਿ ਤੇਹਿ ਸਮੁਦ੍ਦਵੇਲਾ ਵਿਯ ਸਪ੍ਪੁਰਿਸੇਹਿ ਜੀਵਿਤਤ੍ਥਮ੍ਪਿ ਦੁਰਚ੍ਚਯਾਨੀਤਿ ਵਣ੍ਣਿਤਾਨਿ, ਤਸ੍ਮਾ ਅਹਂ ਸੀਲਭੇਦਭਯੇਨ ਖਨ੍ਤਿਮੇਤ੍ਤਾਦਿਸਮਨ੍ਨਾਗਤੋ ਹੁਤ੍ਵਾ ਮਮ ਕੋਪਸ੍ਸ ਸੀਲਵੇਲਨ੍ਤਂ ਅਤਿਕ੍ਕਮਿਤੁਂ ਨ ਅਦਾਸਿਨ੍ਤਿ ਆਹ.

‘‘ਇਮਿਸ੍ਸਾ ਪਨ ਸਙ੍ਖਪਾਲਧਮ੍ਮਦੇਸਨਾਯ ਦਸਪਿ ਪਾਰਮਿਯੋ ਲਬ੍ਭਨ੍ਤਿ. ਤਦਾ ਹਿ ਮਹਾਸਤ੍ਤੇਨ ਸਰੀਰਸ੍ਸ ਪਰਿਚ੍ਚਤ੍ਤਭਾਵੋ ਦਾਨਪਾਰਮੀ ਨਾਮ ਹੋਤਿ, ਤਥਾਰੂਪੇਨਾਪਿ ਵਿਸਤੇਜੇਨ ਸੀਲਸ੍ਸ ਅਭਿਨ੍ਨਤਾ ਸੀਲਪਾਰਮੀ, ਨਾਗਭਵਨਤੋ ਨਿਕ੍ਖਮਿਤ੍ਵਾ ਸਮਣਧਮ੍ਮਕਰਣਂ ਨੇਕ੍ਖਮ੍ਮਪਾਰਮੀ, ‘ਇਦਞ੍ਚਿਦਞ੍ਚ ਕਾਤੁਂ ਵਟ੍ਟਤੀ’ਤਿ ਸਂਵਿਦਹਨਂ ਪਞ੍ਞਾਪਾਰਮੀ, ਅਧਿਵਾਸਨਵੀਰਿਯਂ ਵੀਰਿਯਪਾਰਮੀ, ਅਧਿਵਾਸਨਖਨ੍ਤਿ ਖਨ੍ਤਿਪਾਰਮੀ, ਸਚ੍ਚਸਮਾਦਾਨਂ ਸਚ੍ਚਪਾਰਮੀ, ‘ਮਮ ਸੀਲਂ ਨ ਭਿਨ੍ਦਿਸ੍ਸਾਮੀ’ਤਿ ਅਧਿਟ੍ਠਾਨਂ ਅਧਿਟ੍ਠਾਨਪਾਰਮੀ, ਅਨੁਦ੍ਦਯਭਾਵੋ ਮੇਤ੍ਤਾਪਾਰਮੀ, ਵੇਦਨਾਯ ਮਜ੍ਝਤ੍ਤਭਾਵੋ ਉਪੇਕ੍ਖਾਪਾਰਮੀ’’ਤਿ.

ਅਥਾਗਮੁਨ੍ਤਿ ਅਥੇਕਦਿਵਸਂ ਵਮ੍ਮਿਕਮਤ੍ਥਕੇ ਨਿਪਨ੍ਨਂ ਦਿਸ੍ਵਾ ਸੋਲ਼ਸ ਭੋਜਪੁਤ੍ਤਾ ਖਰਰਜ੍ਜੁਞ੍ਚ ਦਲ਼੍ਹਪਾਸਞ੍ਚ ਸੂਲਾਨਿ ਚ ਗਹੇਤ੍ਵਾ ਮਮ ਸਨ੍ਤਿਕਂ ਆਗਤਾ. ਭੇਤ੍ਵਾਨਾਤਿ ਮਮ ਸਰੀਰਂ ਅਟ੍ਠਸੁ ਠਾਨੇਸੁ ਭਿਨ੍ਦਿਤ੍ਵਾ ਸਕਣ੍ਟਕਕਾਲ਼ਵੇਤ੍ਤਲਤਾ ਪਵੇਸੇਤ੍ਵਾ. ਨਾਸਂ ਅਤਿਕਸ੍ਸ ਰਜ੍ਜੁਨ੍ਤਿ ਥੋਕਂ ਗਨ੍ਤ੍ਵਾ ਸੀਸਂ ਮੇ ਓਲਮ੍ਬਨ੍ਤਂ ਦਿਸ੍ਵਾ ਮਹਾਮਗ੍ਗੇ ਨਿਪਜ੍ਜਾਪੇਤ੍ਵਾ ਪੁਨ ਨਾਸਮ੍ਪਿ ਮੇ ਭਿਨ੍ਦਿਤ੍ਵਾ ਵਟ੍ਟਰਜ੍ਜੁਂ ਅਤਿਕਸ੍ਸ ਆਵੁਨਿਤ੍ਵਾ ਕਾਜਕੋਟਿਯਂ ਲਗ੍ਗੇਤ੍ਵਾ ਸਮਨ੍ਤਤੋ ਪਰਿਗ੍ਗਹੇਤ੍ਵਾ ਮਂ ਨਯਿਂਸੁ.

ਅਦ੍ਦਸਂਸੂਤਿ, ਸਮ੍ਮ ਸਙ੍ਖਪਾਲ, ਤੇ ਭੋਜਪੁਤ੍ਤਾ ਏਕਾਯਨੇ ਏਕਗਮਨੇ ਜਙ੍ਘਪਦਿਕਮਗ੍ਗੇ ਤਂ ਬਲੇਨ ਚ ਵਣ੍ਣੇਨ ਚ ਉਪੇਤਰੂਪਂ ਪਸ੍ਸਿਂਸੁ, ਤ੍ਵਂ ਪਨ ਇਸ੍ਸਰਿਯਸੋਭਗ੍ਗਸਿਰਿਯਾ ਚ ਪਞ੍ਞਾਯ ਚ ਭਾਵਿਤੋ ਵਡ੍ਢਿਤੋ, ਸੋ ਤ੍ਵਂ ਏਵਰੂਪੋ ਸਮਾਨੋਪਿ ਕਿਮਤ੍ਥਂ ਤਪਂ ਕਰੋਸਿ, ਕਿਮਿਚ੍ਛਨ੍ਤੋ ਉਪੋਸਥਵਾਸਂ ਵਸਸਿ, ਸੀਲਂ ਰਕ੍ਖਸਿ. ‘‘ਅਦ੍ਦਸਾਸਿ’’ਨ੍ਤਿਪਿ ਪਾਠੋ, ਅਹਂ ਏਕਾਯਨੇ ਮਹਾਮਗ੍ਗੇ ਤਂ ਅਦ੍ਦਸਿਨ੍ਤਿ ਅਤ੍ਥੋ. ਅਭਿਪਤ੍ਥਯਾਨੋਤਿ ਪਤ੍ਥੇਨ੍ਤੋ. ਤਸ੍ਮਾਤਿ ਯਸ੍ਮਾ ਮਨੁਸ੍ਸਯੋਨਿਂ ਪਤ੍ਥੇਮਿ, ਤਸ੍ਮਾ ਵੀਰਿਯੇਨ ਪਰਕ੍ਕਮਿਤ੍ਵਾ ਤਪੋਕਮ੍ਮਂ ਕਰੋਮਿ.

ਸੁਰੋਸਿਤੋਤਿ ਸੁਟ੍ਠੁ ਮਨੁਲਿਤ੍ਤੋ. ਇਤੋਤਿ ਇਮਮ੍ਹਾ ਨਾਗਭਵਨਾ ਮਨੁਸ੍ਸਲੋਕੋ ਕੇਨ ਉਤ੍ਤਰਿਤਰੋ. ਸੁਦ੍ਧੀਤਿ ਮਗ੍ਗਫਲਨਿਬ੍ਬਾਨਸਙ੍ਖਾਤਾ ਵਿਸੁਦ੍ਧਿ. ਸਂਯਮੋਤਿ ਸੀਲਂ. ਇਦਂ ਸੋ ਮਨੁਸ੍ਸਲੋਕੇਯੇਵ ਬੁਦ੍ਧਪਚ੍ਚੇਕਬੁਦ੍ਧਾਨਂ ਉਪ੍ਪਤ੍ਤਿਂ ਸਨ੍ਧਾਯਾਹ. ਕਾਹਾਮੀਤਿ ਅਤ੍ਤਨੋ ਅਪ੍ਪਟਿਸਨ੍ਧਿਕਭਾਵਂ ਕਰੋਨ੍ਤੋ ਜਾਤਿਜਰਾਮਰਣਸ੍ਸਨ੍ਤਂ ਕਰਿਸ੍ਸਾਮੀਤਿ. ਏਵਂ, ਮਹਾਰਾਜ, ਸੋ ਸਙ੍ਖਪਾਲੋ ਮਨੁਸ੍ਸਲੋਕਂ ਵਣ੍ਣੇਸਿ. ਸਂਵਚ੍ਛਰੋ ਮੇਤਿ ਏਵਂ, ਮਹਾਰਾਜ, ਤਸ੍ਮਿਂ ਮਨੁਸ੍ਸਲੋਕਂ ਵਣ੍ਣੇਨ੍ਤੇ ਅਹਂ ਪਬ੍ਬਜ੍ਜਾਯ ਸਿਨੇਹਂ ਕਤ੍ਵਾ ਏਤਦਵੋਚਂ. ਤਤ੍ਥ ਉਪਟ੍ਠਿਤੋਸ੍ਮੀਤਿ ਅਨ੍ਨਪਾਨੇਨ ਚੇਵ ਦਿਬ੍ਬੇਹਿ ਚ ਕਾਮਗੁਣੇਹਿ ਪਰਿਚਿਣ੍ਣੋ ਮਾਨਿਤੋ ਅਸ੍ਮਿ. ਪਲੇਮੀਤਿ ਪਰੇਮਿ ਗਚ੍ਛਾਮਿ. ਚਿਰਪ੍ਪਵੁਟ੍ਠੋਸ੍ਮੀਤਿ ਅਹਂ ਮਨੁਸ੍ਸਲੋਕਤੋ ਚਿਰਪ੍ਪਵੁਟ੍ਠੋ ਅਸ੍ਮਿ.

ਨਾਭਿਸਪਿਤ੍ਥਾਤਿ ਕਚ੍ਚਿ ਨੁ ਖੋ ਮਮ ਪੁਤ੍ਤਾਦੀਸੁ ਕੋਚਿ ਤਂ ਨ ਅਕ੍ਕੋਸਿ ਨ ਪਰਿਭਾਸੀਤਿ ਪੁਚ੍ਛਤਿ. ‘‘ਨਾਭਿਸਜ੍ਜੇਥਾ’’ਤਿਪਿ ਪਾਠੋ, ਨ ਕੋਪੇਸੀਤਿ ਅਤ੍ਥੋ. ਪਟਿਵਿਹਿਤੋਤਿ ਪਟਿਜਗ੍ਗਿਤੋ. ਮਣੀ ਮਮਨ੍ਤਿ ਸਚੇ, ਸਮ੍ਮ ਆਲ਼ਾਰ, ਗਚ੍ਛਸਿਯੇਵ, ਏਵਂ ਸਨ੍ਤੇ ਮਮ ਲੋਹਿਤਙ੍ਕੋ ਧਨਹਾਰਕੋ ਸਬ੍ਬਕਾਮਦਦੋ ਮਣਿ ਸਂਵਿਜ੍ਜਤਿ, ਤਂ ਉਲ਼ਾਰਂ ਮਣਿਰਤਨਂ ਆਦਾਯ ਤਵ ਗੇਹਂ ਗਚ੍ਛ, ਤਤ੍ਥ ਇਮਸ੍ਸਾਨੁਭਾਵੇਨ ਯਾਵਦਿਚ੍ਛਕਂ ਧਨਂ ਲਦ੍ਧਾ ਪੁਨ ਇਮਂ ਮਣਿਂ ਓਸ੍ਸਜਸ੍ਸੁ, ਓਸ੍ਸਜਨ੍ਤੋ ਚ ਅਞ੍ਞਤ੍ਥ ਅਨੋਸ੍ਸਜਿਤ੍ਵਾ ਅਤ੍ਤਨੋ ਉਦਕਚਾਟਿਯਂ ਓਸ੍ਸਜੇਯ੍ਯਾਸੀਤਿ ਵਤ੍ਵਾ ਮਯ੍ਹਂ ਮਣਿਰਤਨਂ ਉਪਨੇਸੀਤਿ ਵਦਤਿ.

ਏਵਂ ਵਤ੍ਵਾ ਆਲ਼ਾਰੋ ‘‘ਅਥਾਹਂ, ਮਹਾਰਾਜ, ਨਾਗਰਾਜਾਨਂ ਏਤਦਵੋਚਂ – ‘ਸਮ੍ਮ, ਨਾਹਂ ਧਨੇਨਤ੍ਥਿਕੋ, ਪਬ੍ਬਜਿਤੁਂ ਪਨ ਇਚ੍ਛਾਮੀ’ਤਿ ਪਬ੍ਬਜਿਤਪਰਿਕ੍ਖਾਰਂ ਯਾਚਿਤ੍ਵਾ ਤੇਨੇਵ ਸਦ੍ਧਿਂ ਨਾਗਭਵਨਾ ਨਿਕ੍ਖਮਿਤ੍ਵਾ ਤਂ ਨਿਵਤ੍ਤੇਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਪਬ੍ਬਜਿਤੋਮ੍ਹੀ’’ਤਿ ਵਤ੍ਵਾ ਰਞ੍ਞੋ ਧਮ੍ਮਕਥਂ ਕਥੇਨ੍ਤੋ ਗਾਥਾਦ੍ਵਯਮਾਹ –

੧੯੧.

‘‘ਦਿਟ੍ਠਾ ਮਯਾ ਮਾਨੁਸਕਾਪਿ ਕਾਮਾ, ਅਸਸ੍ਸਤਾ ਵਿਪਰਿਣਾਮਧਮ੍ਮਾ;

ਆਦੀਨਵਂ ਕਾਮਗੁਣੇਸੁ ਦਿਸ੍ਵਾ, ਸਦ੍ਧਾਯਹਂ ਪਬ੍ਬਜਿਤੋਮ੍ਹਿ ਰਾਜ.

੧੯੨.

‘‘ਦੁਮਪ੍ਫਲਾਨੀਵ ਪਤਨ੍ਤਿ ਮਾਣਵਾ, ਦਹਰਾ ਚ ਵੁਦ੍ਧਾ ਚ ਸਰੀਰਭੇਦਾ;

ਏਤਮ੍ਪਿ ਦਿਸ੍ਵਾ ਪਬ੍ਬਜਿਤੋਮ੍ਹਿ ਰਾਜ, ਅਪਣ੍ਣਕਂ ਸਾਮਞ੍ਞਮੇਵ ਸੇਯ੍ਯੋ’’ਤਿ.

ਤਤ੍ਥ ਸਦ੍ਧਾਯਾਤਿ ਕਮ੍ਮਞ੍ਚ ਫਲਞ੍ਚ ਨਿਬ੍ਬਾਨਞ੍ਚ ਸਦ੍ਦਹਿਤ੍ਵਾ. ਦੁਮਪ੍ਫਲਾਨੀਵ ਪਤਨ੍ਤੀਤਿ ਯਥਾ ਰੁਕ੍ਖਫਲਾਨਿ ਪਕ੍ਕਾਨਿਪਿ ਅਪਕ੍ਕਾਨਿਪਿ ਪਤਨ੍ਤਿ, ਤਥਾ ਮਾਣਵਾ ਦਹਰਾ ਚ ਵੁਦ੍ਧਾ ਚ ਪਤਨ੍ਤਿ. ਅਪਣ੍ਣਕਨ੍ਤਿ ਅਵਿਰਦ੍ਧਂ ਨਿਯ੍ਯਾਨਿਕਂ. ਸਾਮਞ੍ਞਮੇਵ ਸੇਯ੍ਯੋਤਿ ਪਬ੍ਬਜ੍ਜਾਵ ਉਤ੍ਤਮਾਤਿ ਪਬ੍ਬਜ੍ਜਾਯ ਗੁਣਂ ਦਿਸ੍ਵਾ ਪਬ੍ਬਜਿਤੋਮ੍ਹਿ, ਮਹਾਰਾਜਾਤਿ.

ਤਂ ਸੁਤ੍ਵਾ ਰਾਜਾ ਅਨਨ੍ਤਰਂ ਗਾਥਮਾਹ –

੧੯੩.

‘‘ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਨਾਗਞ੍ਚ ਸੁਤ੍ਵਾਨ ਤਵਞ੍ਚਲ਼ਾਰ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨੀ’’ਤਿ.

ਤਤ੍ਥ ਯੇ ਬਹੁਠਾਨਚਿਨ੍ਤਿਨੋਤਿ ਯੇ ਬਹੂਨਿ ਕਾਰਣਾਨਿ ਜਾਨਨ੍ਤਿ. ਨਾਗਞ੍ਚਾਤਿ ਤਥਾ ਅਪ੍ਪਮਾਦਵਿਹਾਰਿਨਂ ਨਾਗਰਾਜਾਨਞ੍ਚ ਤਵ ਚ ਵਚਨਂ ਸੁਤ੍ਵਾ.

ਅਥਸ੍ਸ ਉਸ੍ਸਾਹਂ ਜਨੇਨ੍ਤੋ ਤਾਪਸੋ ਓਸਾਨਗਾਥਮਾਹ –

੧੯੪.

‘‘ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਨਾਗਞ੍ਚ ਸੁਤ੍ਵਾਨ ਮਮਞ੍ਚ ਰਾਜ, ਕਰੋਹਿ ਪੁਞ੍ਞਾਨਿ ਅਨਪ੍ਪਕਾਨੀ’’ਤਿ.

ਏਵਂ ਸੋ ਰਞ੍ਞੋ ਧਮ੍ਮਂ ਦੇਸੇਤ੍ਵਾ ਤਤ੍ਥੇਵ ਚਤ੍ਤਾਰੋ ਵਸ੍ਸਾਨਮਾਸੇ ਵਸਿਤ੍ਵਾ ਪੁਨ ਹਿਮਵਨ੍ਤਂ ਗਨ੍ਤ੍ਵਾ ਯਾਵਜੀਵਂ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ. ਸਙ੍ਖਪਾਲੋਪਿ ਯਾਵਜੀਵਂ ਉਪੋਸਥਵਾਸਂ ਵਸਿਤ੍ਵਾ ਰਾਜਾ ਚ ਦਾਨਾਦੀਨਿ ਪੁਞ੍ਞਾਨਿ ਕਰਿਤ੍ਵਾ ਯਥਾਕਮ੍ਮਂ ਗਤਾ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪਿਤਾ ਤਾਪਸੋ ਕਸ੍ਸਪੋ ਅਹੋਸਿ, ਬਾਰਾਣਸਿਰਾਜਾ ਆਨਨ੍ਦੋ, ਆਲ਼ਾਰੋ ਸਾਰਿਪੁਤ੍ਤੋ, ਸਙ੍ਖਪਾਲਨਾਗਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਙ੍ਖਪਾਲਜਾਤਕਵਣ੍ਣਨਾ ਚਤੁਤ੍ਥਾ.

[੫੨੫] ੫. ਚੂਲ਼ਸੁਤਸੋਮਜਾਤਕਵਣ੍ਣਨਾ

ਆਮਨ੍ਤਯਾਮਿ ਨਿਗਮਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਨੇਕ੍ਖਮ੍ਮਪਾਰਮਿਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਮਹਾਨਾਰਦਕਸ੍ਸਪਜਾਤਕਸਦਿਸਮੇਵ (ਜਾ. ੨.੨੨.੧੧੫੩ ਆਦਯੋ). ਅਤੀਤੇ ਪਨ ਬਾਰਾਣਸੀ ਸੁਦਸ੍ਸਨਂ ਨਾਮ ਨਗਰਂ ਅਹੋਸਿ, ਤਤ੍ਥ ਬ੍ਰਹ੍ਮਦਤ੍ਤੋ ਨਾਮ ਰਾਜਾ ਅਜ੍ਝਾਵਸਿ. ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ਦਸਮਾਸਚ੍ਚਯੇਨ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਤਸ੍ਸ ਪਨ ਪੁਣ੍ਣਚਨ੍ਦਸਸ੍ਸਿਰਿਕਂ ਮੁਖਂ ਅਹੋਸਿ, ਤੇਨਸ੍ਸ ‘‘ਸੋਮਕੁਮਾਰੋ’’ਤਿ ਨਾਮਂ ਕਰਿਂਸੁ. ਸੋ ਵਿਞ੍ਞੁਤਂ ਪਤ੍ਤੋ ਸੁਤਵਿਤ੍ਤਕੋ ਸਵਨਸੀਲੋ ਅਹੋਸਿ, ਤੇਨ ਨਂ ‘‘ਸੁਤਸੋਮੋ’’ਤਿ ਸਞ੍ਜਾਨਿਂਸੁ. ਸੋ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਸਬ੍ਬਸਿਪ੍ਪਾਨਿ ਉਗ੍ਗਹੇਤ੍ਵਾ ਆਗਤੋ ਪਿਤੁ ਸਨ੍ਤਕਂ ਸੇਤਚ੍ਛਤ੍ਤਂ ਲਭਿਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਸਿ, ਮਹਨ੍ਤਂ ਇਸ੍ਸਰਿਯਂ ਅਹੋਸਿ. ਤਸ੍ਸ ਚਨ੍ਦਾਦੇਵਿਪ੍ਪਮੁਖਾਨਿ ਸੋਲ਼ਸ ਇਤ੍ਥਿਸਹਸ੍ਸਾਨਿ ਅਹੇਸੁਂ. ਸੋ ਅਪਰਭਾਗੇ ਪੁਤ੍ਤਧੀਤਾਹਿ ਵਡ੍ਢਨ੍ਤੋ ਘਰਾਵਾਸੇ ਅਨਭਿਰਤੋ ਅਰਞ੍ਞਂ ਪਵਿਸਿਤ੍ਵਾ ਪਬ੍ਬਜਿਤੁਕਾਮੋ ਅਹੋਸਿ.

ਸੋ ਏਕਦਿਵਸਂ ਕਪ੍ਪਕਂ ਆਮਨ੍ਤੇਤ੍ਵਾ ‘‘ਯਦਾ ਮੇ, ਸਮ੍ਮ, ਸਿਰਸ੍ਮਿਂ ਪਲਿਤਂ ਪਸ੍ਸੇਯ੍ਯਾਸਿ, ਤਦਾ ਮੇ ਆਰੋਚੇਯ੍ਯਾਸੀ’’ਤਿ ਆਹ. ਕਪ੍ਪਕੋ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਪਰਭਾਗੇ ਪਲਿਤਂ ਦਿਸ੍ਵਾ ਆਰੋਚੇਤ੍ਵਾ ‘‘ਤੇਨ ਹਿ ਨਂ, ਸਮ੍ਮ ਕਪ੍ਪਕ, ਉਦ੍ਧਰਿਤ੍ਵਾ ਮਮ ਹਤ੍ਥੇ ਪਤਿਟ੍ਠਪੇਹੀ’’ਤਿ ਵੁਤ੍ਤੇ ਸੁਵਣ੍ਣਸਣ੍ਡਾਸੇਨ ਉਦ੍ਧਰਿਤ੍ਵਾ ਰਞ੍ਞੋ ਹਤ੍ਥੇ ਠਪੇਸਿ. ਤਂ ਦਿਸ੍ਵਾ ਮਹਾਸਤ੍ਤੋ ‘‘ਜਰਾਯ ਮੇ ਸਰੀਰਂ ਅਭਿਭੂਤ’’ਨ੍ਤਿ ਭੀਤੋ ਤਂ ਪਲਿਤਂ ਗਹੇਤ੍ਵਾਵ ਪਾਸਾਦਾ ਓਤਰਿਤ੍ਵਾ ਮਹਾਜਨਸ੍ਸ ਦਸ੍ਸਨਟ੍ਠਾਨੇ ਪਞ੍ਞਤ੍ਤੇ ਰਾਜਪਲ੍ਲਙ੍ਕੇ ਨਿਸੀਦਿਤ੍ਵਾ ਸੇਨਾਪਤਿਪ੍ਪਮੁਖਾਨਿ ਅਸੀਤਿਅਮਚ੍ਚਸਹਸ੍ਸਾਨਿ ਪੁਰੋਹਿਤਪ੍ਪਮੁਖਾਨਿ ਸਟ੍ਠਿਬ੍ਰਾਹ੍ਮਣਸਹਸ੍ਸਾਨਿ ਅਞ੍ਞੇ ਚ ਰਟ੍ਠਿਕਜਾਨਪਦਨੇਗਮਾਦਯੋ ਬਹੂ ਜਨੇ ਪਕ੍ਕੋਸਾਪੇਤ੍ਵਾ ‘‘ਸਿਰਸ੍ਮਿਂ ਮੇ ਪਲਿਤਂ ਜਾਤਂ, ਅਹਂ ਮਹਲ੍ਲਕੋਸ੍ਮਿ, ਮਮ ਪਬ੍ਬਜਿਤਭਾਵਂ ਜਾਨਾਥਾ’’ਤਿ ਵਤ੍ਵਾ ਪਠਮਂ ਗਾਥਮਾਹ –

੧੯੫.

‘‘ਆਮਨ੍ਤਯਾਮਿ ਨਿਗਮਂ, ਮਿਤ੍ਤਾਮਚ੍ਚੇ ਪਰਿਸ੍ਸਜੇ;

ਸਿਰਸ੍ਮਿਂ ਪਲਿਤਂ ਜਾਤਂ, ਪਬ੍ਬਜ੍ਜਂ ਦਾਨਿ ਰੋਚਹ’’ਨ੍ਤਿ.

ਤਤ੍ਥ ਆਮਨ੍ਤਯਾਮੀਤਿ ਜਾਨਾਪੇਮਿ. ਰੋਚਹਨ੍ਤਿ ‘‘ਰੋਚੇਮਿ ਅਹਂ, ਤਸ੍ਸ ਮੇ, ਭੋਨ੍ਤੋ! ਪਬ੍ਬਜਿਤਭਾਵਂ ਜਾਨਾਥਾ’’ਤਿ.

ਤਂ ਸੁਤ੍ਵਾ ਤੇਸੁ ਏਕੋ ਵਿਸਾਰਦਪ੍ਪਤ੍ਤੋ ਹੁਤ੍ਵਾ ਗਾਥਮਾਹ –

੧੯੬.

‘‘ਅਭੁਂ ਮੇ ਕਥਂ ਨੁ ਭਣਸਿ, ਸਲ੍ਲਂ ਮੇ ਦੇਵ ਉਰਸਿ ਕਪ੍ਪੇਸਿ;

ਸਤ੍ਤਸਤਾ ਤੇ ਭਰਿਯਾ, ਕਥਂ ਨੁ ਤੇ ਤਾ ਭਵਿਸ੍ਸਨ੍ਤੀ’’ਤਿ.

ਤਤ੍ਥ ਅਭੁਨ੍ਤਿ ਅਵਡ੍ਢਿਂ. ਉਰਸਿ ਕਪ੍ਪੇਸੀਤਿ ਉਰਸ੍ਮਿਂ ਸੁਨਿਸਿਤਧੋਤਸਤ੍ਤਿਂ ਚਾਰੇਸਿ. ਸਤ੍ਤਸਤਾਤਿ ਸਮਜਾਤਿਕਾ ਖਤ੍ਤਿਯਕਞ੍ਞਾ ਸਨ੍ਧਾਯੇਤਂ ਵੁਤ੍ਤਂ. ਕਥਂ ਨੁ ਤੇ ਤਾ ਭਵਿਸ੍ਸਨ੍ਤੀਤਿ ਤਾ ਤਵ ਭਰਿਯਾ ਤਯਿ ਪਬ੍ਬਜਿਤੇ ਅਨਾਥਾ ਨਿਪ੍ਪਚ੍ਚਯਾ ਕਥਂ ਭਵਿਸ੍ਸਨ੍ਤਿ, ਏਤਾ ਅਨਾਥਾ ਕਤ੍ਵਾ ਤੁਮ੍ਹਾਕਂ ਪਬ੍ਬਜ੍ਜਾ ਨਾਮ ਨ ਯੁਤ੍ਤਾਤਿ.

ਤਤੋ ਮਹਾਸਤ੍ਤੋ ਤਤਿਯਂ ਗਾਥਮਾਹ –

੧੯੭.

‘‘ਪਞ੍ਞਾਯਿਹਿਨ੍ਤਿ ਏਤਾ, ਦਹਰਾ ਅਞ੍ਞਮ੍ਪਿ ਤਾ ਗਮਿਸ੍ਸਨ੍ਤਿ;

ਸਗ੍ਗਞ੍ਚ ਪਤ੍ਥਯਾਨੋ, ਤੇਨ ਅਹਂ ਪਬ੍ਬਜਿਸ੍ਸਾਮੀ’’ਤਿ.

ਤਤ੍ਥ ਪਞ੍ਞਾਯਿਹਿਨ੍ਤੀਤਿ ਅਤ੍ਤਨੋ ਕਮ੍ਮੇਨ ਪਞ੍ਞਾਯਿਸ੍ਸਨ੍ਤਿ. ਅਹਂ ਏਤਾਸਂ ਕਿਂ ਹੋਮਿ, ਸਬ੍ਬਾਪੇਤਾ ਦਹਰਾ, ਯੋ ਅਞ੍ਞੋ ਰਾਜਾ ਭਵਿਸ੍ਸਤਿ, ਤਂ ਏਤਾ ਗਮਿਸ੍ਸਨ੍ਤੀਤਿ.

ਅਮਚ੍ਚਾਦਯੋ ਬੋਧਿਸਤ੍ਤਸ੍ਸ ਪਟਿਵਚਨਂ ਦਾਤੁਂ ਅਸਕ੍ਕੋਨ੍ਤਾ ਤਸ੍ਸ ਮਾਤੁ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸੁਂ. ਸਾ ਤੁਰਿਤਤੁਰਿਤਾ ਆਗਨ੍ਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ, ਤਾਤ, ਪਬ੍ਬਜਿਤੁਕਾਮੋਸੀ’’ਤਿ ਵਤ੍ਵਾ ਦ੍ਵੇ ਗਾਥਾਯੋ ਅਭਾਸਿ –

੧੯੮.

‘‘ਦੁਲ੍ਲਦ੍ਧਂ ਮੇ ਆਸਿ ਸੁਤਸੋਮ, ਯਸ੍ਸ ਤੇ ਹੋਮਹਂ ਮਾਤਾ;

ਯਂ ਮੇ ਵਿਲਪਨ੍ਤਿਯਾ, ਅਨਪੇਕ੍ਖੋ ਪਬ੍ਬਜਸਿ ਦੇਵ.

੧੯੯.

‘‘ਦੁਲ੍ਲਦ੍ਧਂ ਮੇ ਆਸਿ ਸੁਤਸੋਮ, ਯਂ ਤਂ ਅਹਂ ਵਿਜਾਯਿਸ੍ਸਂ;

ਯਂ ਮੇ ਵਿਲਪਨ੍ਤਿਯਾ, ਅਨਪੇਕ੍ਖੋ ਪਬ੍ਬਜਸਿ ਦੇਵਾ’’ਤਿ.

ਤਤ੍ਥ ਦੁਲ੍ਲਦ੍ਧਨ੍ਤਿ ਯਂ ਏਤਂ ਮਯਾ ਲਭਨ੍ਤਿਯਾ ਪੁਤ੍ਤਂ ਜਮ੍ਮਂ ਲਦ੍ਧਂ ਦੁਲ੍ਲਦ੍ਧਂ. ਯਂ ਮੇਤਿ ਯੇਨ ਕਾਰਣੇਨ ਮਯਿ ਨਾਨਪ੍ਪਕਾਰਕਂ ਵਿਪਲਨ੍ਤਿਯਾ ਤ੍ਵਂ ਪਬ੍ਬਜਿਤੁਂ ਇਚ੍ਛਸਿ, ਤੇਨ ਕਾਰਣੇਨ ਤਾਦਿਸਸ੍ਸ ਪੁਤ੍ਤਸ੍ਸ ਲਭਨਂ ਮਮ ਦੁਲ੍ਲਦ੍ਧਂ ਨਾਮਾਤਿ.

ਬੋਧਿਸਤ੍ਤੋ ਏਵਂ ਪਰਿਦੇਵਮਾਨਾਯਪਿ ਮਾਤਰਾ ਸਦ੍ਧਿਂ ਕਿਞ੍ਚਿ ਨ ਕਥੇਸਿ. ਸਾ ਰੋਦਿਤ੍ਵਾ ਕਨ੍ਦਿਤ੍ਵਾ ਸਯਮੇਵ ਏਕਮਨ੍ਤਂ ਅਟ੍ਠਾਸਿ. ਅਥਸ੍ਸ ਪਿਤੁ ਆਰੋਚੇਸੁਂ. ਸੋ ਆਗਨ੍ਤ੍ਵਾ ਏਕਂ ਤਾਵ ਗਾਥਮਾਹ –

੨੦੦.

‘‘ਕੋ ਨਾਮੇਸੋ ਧਮ੍ਮੋ, ਸੁਤਸੋਮ ਕਾ ਚ ਨਾਮ ਪਬ੍ਬਜ੍ਜਾ;

ਯਂ ਨੋ ਅਮ੍ਹੇ ਜਿਣ੍ਣੇ, ਅਨਪੇਕ੍ਖੋ ਪਬ੍ਬਜਸਿ ਦੇਵਾ’’ਤਿ.

ਤਤ੍ਥ ਯਂ ਨੋ ਅਮ੍ਹੇਤਿ ਯਂ ਤ੍ਵਂ ਅਮ੍ਹਾਕਂ ਪੁਤ੍ਤੋ ਸਮਾਨੋ ਅਮ੍ਹੇ ਜਿਣ੍ਣੇ ਪਟਿਜਗ੍ਗਿਤਬ੍ਬਕਾਲੇ ਅਪ੍ਪਟਿਜਗ੍ਗਿਤ੍ਵਾ ਪਪਾਤੇ ਸਿਲਂ ਪਵਟ੍ਟੇਨ੍ਤੋ ਵਿਯ ਛਡ੍ਡੇਤ੍ਵਾ ਅਨਪੇਕ੍ਖੋ ਪਬ੍ਬਜਸਿ, ਤੇਨ ਤਂ ਵਦਾਮਿ ਕੋ ਨਾਮੇਸੋ ਤਵ ਧਮ੍ਮੋਤਿ ਅਧਿਪ੍ਪਾਯੋ.

ਤਂ ਸੁਤ੍ਵਾ ਮਹਾਸਤ੍ਤੋ ਤੁਣ੍ਹੀ ਅਹੋਸਿ. ਅਥ ਨਂ ਪਿਤਾ, ‘‘ਤਾਤ ਸੁਤਸੋਮ, ਸਚੇਪਿ ਤੇ ਮਾਤਾਪਿਤੂਸੁ ਸਿਨੇਹੋ ਨਤ੍ਥਿ, ਪੁਤ੍ਤਧੀਤਰੋ ਤੇ ਬਹੂ ਤਰੁਣਾ, ਤਯਾ ਵਿਨਾ ਵਤ੍ਤਿਤੁਂ ਨ ਸਕ੍ਖਿਸ੍ਸਨ੍ਤਿ, ਤੇਸਂ ਵੁਡ੍ਢਿਪ੍ਪਤ੍ਤਕਾਲੇ ਪਬ੍ਬਜਿਸ੍ਸਸੀ’’ਤਿ ਵਤ੍ਵਾ ਸਤ੍ਤਮਂ ਗਾਥਮਾਹ –

੨੦੧.

‘‘ਪੁਤ੍ਤਾਪਿ ਤੁਯ੍ਹਂ ਬਹਵੋ, ਦਹਰਾ ਅਪ੍ਪਤ੍ਤਯੋਬ੍ਬਨਾ;

ਮਞ੍ਜੂ ਤੇਪਿਤਂ ਅਪਸ੍ਸਨ੍ਤਾ, ਮਞ੍ਞੇ ਦੁਕ੍ਖਂ ਨਿਗਚ੍ਛਨ੍ਤੀ’’ਤਿ.

ਤਤ੍ਥ ਮਞ੍ਜੂਤਿ ਮਧੁਰਵਚਨਾ. ਨਿਗਚ੍ਛਨ੍ਤੀਤਿ ਨਿਗਚ੍ਛਿਸ੍ਸਨ੍ਤਿ ਕਾਯਿਕਚੇਤਸਿਕਦੁਕ੍ਖਂ ਪਟਿਲਭਿਸ੍ਸਨ੍ਤੀਤਿ ਮਞ੍ਞਾਮਿ.

ਤਂ ਸੁਤ੍ਵਾ ਮਹਾਸਤ੍ਤੋ ਗਾਥਮਾਹ –

੨੦੨.

‘‘ਪੁਤ੍ਤੇਹਿ ਚ ਮੇ ਏਤੇਹਿ, ਦਹਰੇਹਿ ਅਪ੍ਪਤ੍ਤਯੋਬ੍ਬਨੇਹਿ;

ਮਞ੍ਜੂਹਿ ਸਬ੍ਬੇਹਿਪਿ ਤੁਮ੍ਹੇਹਿ, ਚਿਰਮ੍ਪਿ ਠਤ੍ਵਾ ਵਿਨਾਸਭਾਵੋ’’ਤਿ.

ਤਤ੍ਥ ਸਬ੍ਬੇਹਿਪਿ ਤੁਮ੍ਹੇਹੀਤਿ, ਤਾਤ, ਨ ਕੇਵਲਂ ਪੁਤ੍ਤੇਹੇਵ, ਅਥ ਖੋ ਤੁਮ੍ਹੇਹਿਪਿ ਅਞ੍ਞੇਹਿਪਿ ਸਬ੍ਬਸਙ੍ਖਾਰੇਹਿ ਚਿਰਂ ਠਤ੍ਵਾਪਿ ਦੀਘਮਦ੍ਧਾਨਂ ਠਤ੍ਵਾਪਿ ਵਿਨਾਸਭਾਵੋਵ ਨਿਯਤੋ. ਸਕਲਸ੍ਮਿਮ੍ਪਿ ਹਿ ਲੋਕਸਨ੍ਨਿਵਾਸੇ ਏਕਸਙ੍ਖਾਰੋਪਿ ਨਿਚ੍ਚੋ ਨਾਮ ਨਤ੍ਥੀਤਿ.

ਏਵਂ ਮਹਾਸਤ੍ਤੋ ਪਿਤੁ ਧਮ੍ਮਕਥਂ ਕਥੇਸਿ. ਸੋ ਤਸ੍ਸ ਧਮ੍ਮਕਥਂ ਸੁਤ੍ਵਾ ਤੁਣ੍ਹੀ ਅਹੋਸਿ. ਅਥਸ੍ਸ ਸਤ੍ਤਸਤਾਨਂ ਭਰਿਯਾਨਂ ਆਰੋਚਯਿਂਸੁ. ਤਾ ਚ ਪਾਸਾਦਾ ਓਰੁਯ੍ਹ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਗੋਪ੍ਫਕੇਸੁ ਗਹੇਤ੍ਵਾ ਪਰਿਦੇਵਮਾਨਾ ਗਾਥਮਾਹਂਸੁ –

੨੦੩.

‘‘ਛਿਨ੍ਨਂ ਨੁ ਤੁਯ੍ਹਂ ਹਦਯਂ, ਅਦੁ ਤੇ ਕਰੁਣਾ ਚ ਨਤ੍ਥਿ ਅਮ੍ਹੇਸੁ;

ਯਂ ਨੋ ਵਿਕਨ੍ਦਨ੍ਤਿਯੋ, ਅਨਪੇਕ੍ਖੋ ਪਬ੍ਬਜਸਿ ਦੇਵਾ’’ਤਿ.

ਤਸ੍ਸਤ੍ਥੋ – ਸਾਮਿ ਸੁਤਸੋਮ, ਅਮ੍ਹੇ ਵਿਧਵਾ ਕਤ੍ਵਾ ਗਚ੍ਛਨ੍ਤਸ੍ਸ ਅਪ੍ਪਮਤ੍ਤਕਸ੍ਸਪਿ ਸਿਨੇਹਸ੍ਸ ਅਭਾਵੇਨ ਤਵ ਹਦਯਂ ਅਮ੍ਹੇਸੁ ਛਿਨ੍ਨਂ ਨੁ, ਉਦਾਹੁ ਕਰੁਣਾਯ ਅਭਾਵੇਨ ਕਾਰੁਞ੍ਞਂ ਵਾ ਨਤ੍ਥਿ, ਯਂ ਨੋ ਏਵਂ ਵਿਕਨ੍ਦਨ੍ਤਿਯੋ ਪਹਾਯ ਪਬ੍ਬਜਸੀਤਿ.

ਮਹਾਸਤ੍ਤੋ ਤਾਸਂ ਪਾਦਮੂਲੇ ਪਰਿਵਤ੍ਤਿਤ੍ਵਾ ਪਰਿਦੇਵਮਾਨਾਨਂ ਪਰਿਦੇਵਨਸਦ੍ਦਂ ਸੁਤ੍ਵਾ ਅਨਨ੍ਤਰਂ ਗਾਥਮਾਹ –

੨੦੪.

‘‘ਨ ਚ ਮਯ੍ਹਂ ਛਿਨ੍ਨਂ ਹਦਯਂ, ਅਤ੍ਥਿ ਕਰੁਣਾਪਿ ਮਯ੍ਹਂ ਤੁਮ੍ਹੇਸੁ;

ਸਗ੍ਗਞ੍ਚ ਪਤ੍ਥਯਾਨੋ, ਤੇਨ ਅਹਂ ਪਬ੍ਬਜਿਸ੍ਸਾਮੀ’’ਤਿ.

ਤਤ੍ਥ ਸਗ੍ਗਞ੍ਚਾਤਿ ਅਹਂ ਸਗ੍ਗਞ੍ਚ ਪਤ੍ਥਯਨ੍ਤੋ ਯਸ੍ਮਾ ਅਯਂ ਪਬ੍ਬਜ੍ਜਾ ਨਾਮ ਬੁਦ੍ਧਾਦੀਹਿ ਵਣ੍ਣਿਤਾ, ਤਸ੍ਮਾ ਪਬ੍ਬਜਿਸ੍ਸਾਮਿ, ਤੁਮ੍ਹੇ ਮਾ ਚਿਨ੍ਤਯਿਤ੍ਥਾਤਿ ਤਾ ਅਸ੍ਸਾਸੇਸਿ.

ਅਥਸ੍ਸ ਅਗ੍ਗਮਹੇਸਿਯਾ ਆਰੋਚੇਸੁਂ. ਸਾ ਗਰੁਭਾਰਾ ਪਰਿਪੁਣ੍ਣਗਬ੍ਭਾਪਿ ਸਮਾਨਾ ਆਗਨ੍ਤ੍ਵਾ ਮਹਾਸਤ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤਾ ਤਿਸ੍ਸੋ ਗਾਥਾਯੋ ਅਭਾਸਿ –

੨੦੫.

‘‘ਦੁਲ੍ਲਦ੍ਧਂ ਮੇ ਆਸਿ ਸੁਤਸੋਮ, ਯਸ੍ਸ ਤੇ ਅਹਂ ਭਰਿਯਾ;

ਯਂ ਮੇ ਵਿਲਪਨ੍ਤਿਯਾ, ਅਨਪੇਕ੍ਖੋ ਪਬ੍ਬਜਸਿ ਦੇਵ.

੨੦੬.

‘‘ਦੁਲ੍ਲਦ੍ਧਂ ਮੇ ਆਸਿ ਸੁਤਸੋਮ, ਯਸ੍ਸ ਤੇ ਅਹਂ ਭਰਿਯਾ;

ਯਂ ਮੇ ਕੁਚ੍ਛਿਪਟਿਸਨ੍ਧਿਂ, ਅਨਪੇਕ੍ਖੋ ਪਬ੍ਬਜਸਿ ਦੇਵ.

੨੦੭.

‘‘ਪਰਿਪਕ੍ਕੋ ਮੇ ਗਬ੍ਭੋ, ਕੁਚ੍ਛਿਗਤੋ ਯਾਵ ਨਂ ਵਿਜਾਯਾਮਿ;

ਮਾਹਂ ਏਕਾ ਵਿਧਵਾ, ਪਚ੍ਛਾ ਦੁਕ੍ਖਾਨਿ ਅਦ੍ਦਕ੍ਖਿ’’ਨ੍ਤਿ.

ਤਤ੍ਥ ਯਂ ਮੇਤਿ ਯਸ੍ਮਾ ਮਮ ਵਿਲਪਨ੍ਤਿਯਾ ਤ੍ਵਂ ਅਨਪੇਕ੍ਖੋ ਪਬ੍ਬਜਸਿ, ਤਸ੍ਮਾ ਯਂ ਮਯਾ ਤਵ ਸਨ੍ਤਿਕਾ ਅਗ੍ਗਮਹੇਸਿਟ੍ਠਾਨਂ ਲਦ੍ਧਂ, ਤਂ ਦੁਲ੍ਲਦ੍ਧਮੇਵ ਆਸਿ. ਦੁਤਿਯਗਾਥਾਯ ਯਸ੍ਮਾ ਮਂ ਤ੍ਵਂ ਕੁਚ੍ਛਿਪਟਿਸਨ੍ਧਿਂ ਪਹਾਯ ਅਨਪੇਕ੍ਖੋ ਪਬ੍ਬਜਸਿ, ਤਸ੍ਮਾ ਯਂ ਮਯਾ ਤਵ ਭਰਿਯਤ੍ਤਂ ਲਦ੍ਧਂ, ਤਂ ਦੁਲ੍ਲਦ੍ਧਂ ਮੇਤਿ ਅਤ੍ਥੋ. ਯਾਵ ਨਨ੍ਤਿ ਯਾਵਾਹਂ ਤਂ ਗਬ੍ਭਂ ਵਿਜਾਯਾਮਿ, ਤਾਵ ਅਧਿਵਾਸੇਹੀਤਿ.

ਤਤੋ ਮਹਾਸਤ੍ਤੋ ਗਾਥਮਾਹ –

੨੦੮.

‘‘ਪਰਿਪਕ੍ਕੋ ਤੇ ਗਬ੍ਭੋ, ਕੁਚ੍ਛਿਗਤੋ ਇਙ੍ਘ ਤ੍ਵਂ ਵਿਜਾਯਸ੍ਸੁ;

ਪੁਤ੍ਤਂ ਅਨੋਮਵਣ੍ਣਂ, ਤਂ ਹਿਤ੍ਵਾ ਪਬ੍ਬਜਿਸ੍ਸਾਮੀ’’ਤਿ.

ਤਤ੍ਥ ਪੁਤ੍ਤਨ੍ਤਿ, ਭਦ੍ਦੇ, ਤਵ ਗਬ੍ਭੋ ਪਰਿਪਕ੍ਕੋਤਿ ਜਾਨਾਮਿ, ਤ੍ਵਂ ਪਨ ਵਿਜਾਯਮਾਨਾ ਪੁਤ੍ਤਂ ਵਿਜਾਯਿਸ੍ਸਸਿ, ਨ ਧੀਤਰਂ, ਸਾ ਤ੍ਵਂ ਸੋਤ੍ਥਿਨਾ ਵਿਜਾਯਸ੍ਸੁ ਪੁਤ੍ਤਂ, ਅਹਂ ਪਨ ਸਦ੍ਧਿਂ ਤਯਾ ਤਂ ਪੁਤ੍ਤਂ ਹਿਤ੍ਵਾ ਪਬ੍ਬਜਿਸ੍ਸਾਮਿਯੇਵਾਤਿ.

ਸਾ ਤਸ੍ਸ ਵਚਨਂ ਸੁਤ੍ਵਾ ਸੋਕਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੀ ‘‘ਇਤੋ ਦਾਨਿ ਪਟ੍ਠਾਯ, ਦੇਵ, ਅਮ੍ਹਾਕਂ ਸਿਰੀ ਨਾਮ ਨਤ੍ਥੀ’’ਤਿ ਉਭੋਹਿ ਹਤ੍ਥੇਹਿ ਹਦਯਂ ਧਾਰਯਮਾਨਾ ਅਸ੍ਸੂਨਿ ਮੁਞ੍ਚਨ੍ਤੀ ਮਹਾਸਦ੍ਦੇਨ ਪਰਿਦੇਵਿ. ਅਥ ਨਂ ਸਮਸ੍ਸਾਸੇਨ੍ਤੋ ਮਹਾਸਤ੍ਤੋ ਗਾਥਮਾਹ –

੨੦੯.

‘‘ਮਾ ਤ੍ਵਂ ਚਨ੍ਦੇ ਰੁਦਿ, ਮਾ ਸੋਚਿ ਵਨਤਿਮਿਰਮਤ੍ਤਕ੍ਖਿ;

ਆਰੋਹ ਵਰਪਾਸਾਦਂ, ਅਨਪੇਕ੍ਖੋ ਅਹਂ ਗਮਿਸ੍ਸਾਮੀ’’ਤਿ.

ਤਤ੍ਥ ਮਾ ਤ੍ਵਂ ਚਨ੍ਦੇ ਰੁਦੀਤਿ, ਭਦ੍ਦੇ ਚਨ੍ਦਾਦੇਵਿ, ਤ੍ਵਂ ਮਾ ਰੋਦਿ ਮਾ ਸੋਚਿ. ਵਨਤਿਮਿਰਮਤ੍ਤਕ੍ਖੀਤਿ ਗਿਰਿਕਣ੍ਣਿਕਪੁਪ੍ਫਸਮਾਨਨੇਤ੍ਤੇ. ਪਾਲ਼ਿਯਂ ਪਨ ‘‘ਕੋਵਿਲ਼ਾਰਤਮ੍ਬਕ੍ਖੀ’’ਤਿ ਲਿਖਿਤਂ, ਤਸ੍ਸਾ ਕੋਵਿਲ਼ਾਰਪੁਪ੍ਫਂ ਵਿਯ ਤਮ੍ਬਨੇਤ੍ਤੇਤਿ ਅਤ੍ਥੋ.

ਸਾ ਤਸ੍ਸ ਵਚਨਂ ਸੁਤ੍ਵਾ ਠਾਤੁਂ ਅਸਕ੍ਕੋਨ੍ਤੀ ਪਾਸਾਦਂ ਆਰੁਯ੍ਹ ਰੋਦਮਾਨਾ ਨਿਸੀਦਿ. ਅਥ ਨਂ ਬੋਧਿਸਤ੍ਤਸ੍ਸ ਜੇਟ੍ਠਪੁਤ੍ਤੋ ਦਿਸ੍ਵਾ ‘‘ਕਿਂ ਨੁ ਖੋ ਮੇ ਮਾਤਾ ਰੋਦਨ੍ਤੀ ਨਿਸਿਨ੍ਨਾ’’ਤਿ ਤਂ ਪੁਚ੍ਛਨ੍ਤੋ ਗਾਥਮਾਹ –

੨੧੦.

‘‘ਕੋ ਤਂ ਅਮ੍ਮ ਕੋਪੇਸਿ, ਕਿਂ ਰੋਦਸਿ ਪੇਕ੍ਖਸਿ ਚ ਮਂ ਬਾਲ਼੍ਹਂ;

ਕਂ ਅਵਜ੍ਝਂ ਘਾਤੇਮਿ, ਞਾਤੀਨਂ ਉਦਿਕ੍ਖਮਾਨਾਨ’’ਨ੍ਤਿ.

ਤਤ੍ਥ ਕੋਪੇਸੀਤਿ, ਅਮ੍ਮ! ਕੋ ਨਾਮ ਤਂ ਕੋਪੇਸਿ, ਕੋ ਤੇ ਅਪ੍ਪਿਯਂ ਅਕਾਸਿ. ਪੇਕ੍ਖਸਿ ਚਾਤਿ ਮਂ ਬਾਲ਼੍ਹਂ ਪੇਕ੍ਖਨ੍ਤੀ ਕਿਂਕਾਰਣਾ ਰੋਦਸੀਤਿ ਅਧਿਪ੍ਪਾਯੋ. ਕਂ ਅਵਜ੍ਝਂ ਘਾਤੇਮੀਤਿ ਅਘਾਤੇਤਬ੍ਬਮ੍ਪਿ ਕਂ ਘਾਤੇਮਿ ਅਤ੍ਤਨੋ ਞਾਤੀਨਂ ਉਦਿਕ੍ਖਮਾਨਾਨਞ੍ਞੇਵ, ਅਕ੍ਖਾਹਿ ਮੇਤਿ ਪੁਚ੍ਛਤਿ.

ਤਤੋ ਦੇਵੀ ਗਾਥਮਾਹ –

੨੧੧.

‘‘ਨ ਹਿ ਸੋ ਸਕ੍ਕਾ ਹਨ੍ਤੁਂ, ਵਿਜਿਤਾਵੀ ਯੋ ਮਂ ਤਾਤ ਕੋਪੇਸਿ;

ਪਿਤਾ ਤੇ ਮਂ ਤਾਤ ਅਵਚ, ਅਨਪੇਕ੍ਖੋ ਅਹਂ ਗਮਿਸ੍ਸਾਮੀ’’ਤਿ.

ਤਤ੍ਥ ਵਿਜਿਤਾਵੀਤਿ, ਤਾਤ, ਯੋ ਮਂ ਇਮਿਸ੍ਸਾ ਪਥਵਿਯਾ ਵਿਜਿਤਾਵੀ ਕੋਪੇਸਿ, ਅਪ੍ਪਿਯਸਮੁਦਾਚਾਰੇਨ ਮੇ ਹਦਯੇ ਕੋਪਞ੍ਚ ਸੋਕਞ੍ਚ ਪਵੇਸੇਸਿ, ਸੋ ਤਯਾ ਹਨ੍ਤੁਂ ਨ ਸਕ੍ਕਾ, ਮਞ੍ਹਿ, ਤਾਤ, ਤਵ ਪਿਤਾ ‘‘ਅਹਂ ਰਜ੍ਜਸਿਰਿਞ੍ਚ ਤਞ੍ਚ ਪਹਾਯ ਅਰਞ੍ਞਂ ਪਵਿਸਿਤ੍ਵਾ ਪਬ੍ਬਜਿਸ੍ਸਾਮੀ’’ਤਿ ਅਵਚ, ਇਦਂ ਮੇ ਰੋਦਨਕਾਰਣਨ੍ਤਿ.

ਸੋ ਤਸ੍ਸਾ ਵਚਨਂ ਸੁਤ੍ਵਾ ‘‘ਅਮ੍ਮ! ਕਿਂ ਨਾਮ ਤ੍ਵਂ ਕਥੇਸਿ, ਨਨੁ ਏਵਂ ਸਨ੍ਤੇ ਮਯਂ ਅਨਾਥਾ ਨਾਮ ਭਵਿਸ੍ਸਾਮਾ’’ਤਿ ਪਰਿਦੇਵਨ੍ਤੋ ਗਾਥਮਾਹ –

੨੧੨.

‘‘ਯੋਹਂ ਪੁਬ੍ਬੇ ਨਿਯ੍ਯਾਮਿ, ਉਯ੍ਯਾਨਂ ਮਤ੍ਤਕੁਞ੍ਜਰੇ ਚ ਯੋਧੇਮਿ;

ਸੁਤਸੋਮੇ ਪਬ੍ਬਜਿਤੇ, ਕਥਂ ਨੁ ਦਾਨਿ ਕਰਿਸ੍ਸਾਮੀ’’ਤਿ.

ਤਸ੍ਸਤ੍ਥੋ – ਯੋ ਅਹਂ ਪੁਬ੍ਬੇ ਚਤੁਆਜਞ੍ਞਯੁਤ੍ਤਂ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਰਥਂ ਅਭਿਰੁਯ੍ਹ ਉਯ੍ਯਾਨਂ ਗਚ੍ਛਾਮਿ, ਮਤ੍ਤਕੁਞ੍ਜਰੇ ਚ ਯੋਧੇਮਿ, ਅਞ੍ਞੇਹਿ ਚ ਅਸ੍ਸਕੀਲ਼ਾਦੀਹਿ ਕੀਲ਼ਾਮਿ, ਸ੍ਵਾਹਂ ਇਦਾਨਿ ਸੁਤਸੋਮੇ ਪਬ੍ਬਜਿਤੇ ਕਥਂ ਕਰਿਸ੍ਸਾਮੀਤਿ?

ਅਥਸ੍ਸ ਕਨਿਟ੍ਠਭਾਤਾ ਸਤ੍ਤਵਸ੍ਸਿਕੋ ਤੇ ਉਭੋਪਿ ਰੋਦਨ੍ਤੇ ਦਿਸ੍ਵਾ ਮਾਤਰਂ ਉਪਸਙ੍ਕਮਿਤ੍ਵਾ, ‘‘ਅਮ੍ਮ! ਕਿਂਕਾਰਣਾ ਤੁਮ੍ਹੇ ਰੋਦਥਾ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਤੇਨ ਹਿ ਮਾ ਰੋਦਥ, ਅਹਂ ਤਾਤਸ੍ਸ ਪਬ੍ਬਜਿਤੁਂ ਨ ਦਸ੍ਸਾਮੀ’’ਤਿ ਉਭੋਪਿ ਤੇ ਅਸ੍ਸਾਸੇਤ੍ਵਾ ਧਾਤਿਯਾ ਸਦ੍ਧਿਂ ਪਾਸਾਦਾ ਓਰੁਯ੍ਹ ਪਿਤੁ ਸਨ੍ਤਿਕਂ ਗਨ੍ਤ੍ਵਾ, ‘‘ਤਾਤ, ਤ੍ਵਂ ਕਿਰ ਅਮ੍ਹੇ ਅਕਾਮਕੇ ਪਹਾਯ ‘ਪਬ੍ਬਜਾਮੀ’ਤਿ ਵਦਸਿ, ਅਹਂ ਤੇ ਪਬ੍ਬਜਿਤੁਂ ਨ ਦਸ੍ਸਾਮੀ’’ਤਿ ਪਿਤਰਂ ਗੀਵਾਯ ਦਲ਼੍ਹਂ ਗਹੇਤ੍ਵਾ ਗਾਥਮਾਹ –

੨੧੩.

‘‘ਮਾਤੁਚ੍ਚ ਮੇ ਰੁਦਨ੍ਤ੍ਯਾ, ਜੇਟ੍ਠਸ੍ਸ ਚ ਭਾਤੁਨੋ ਅਕਾਮਸ੍ਸ;

ਹਤ੍ਥੇਪਿ ਤੇ ਗਹੇਸ੍ਸਂ, ਨ ਹਿ ਗਚ੍ਛਸਿ ਨੋ ਅਕਾਮਾਨ’’ਨ੍ਤਿ.

ਮਹਾਸਤ੍ਤੋ ਚਿਨ੍ਤੇਸਿ – ‘‘ਅਯਂ ਮੇ ਪਰਿਪਨ੍ਥਂ ਕਰੋਤਿ, ਕੇਨ ਨੁ ਖੋ ਨਂ ਉਪਾਯੇਨ ਪਟਿਕ੍ਕਮਾਪੇਯ੍ਯ’’ਨ੍ਤਿ. ਤਤੋ ਧਾਤਿਂ ਓਲੋਕੇਤ੍ਵਾ, ‘‘ਅਮ੍ਮ! ਧਾਤਿ ਹਨ੍ਦਿਮਂ ਮਣਿਕ੍ਖਨ੍ਧਪਿਲ਼ਨ੍ਧਨਂ, ਤਵੇਸੋ ਹੋਤੁ ਹਤ੍ਥੇ, ਪੁਤ੍ਤਂ ਅਪਨੇਹਿ, ਮਾ ਮੇ ਅਨ੍ਤਰਾਯਂ ਕਰੀ’’ਤਿ ਸਯਂ ਪੁਤ੍ਤਂ ਹਤ੍ਥੇ ਗਹੇਤ੍ਵਾ ਅਪਨੇਤੁਂ ਅਸਕ੍ਕੋਨ੍ਤੋ ਤਸ੍ਸਾ ਲਞ੍ਜਂ ਪਟਿਜਾਨੇਤ੍ਵਾ ਗਾਥਮਾਹ –

੨੧੪.

‘‘ਉਟ੍ਠੇਹਿ ਤ੍ਵਂ ਧਾਤਿ, ਇਮਂ ਕੁਮਾਰਂ ਰਮੇਹਿ ਅਞ੍ਞਤ੍ਥ;

ਮਾ ਮੇ ਪਰਿਪਨ੍ਥਮਕਾਸਿ, ਸਗ੍ਗਂ ਮਮ ਪਤ੍ਥਯਾਨਸ੍ਸਾ’’ਤਿ.

ਤਤ੍ਥ ਇਮਂ ਕੁਮਾਰਨ੍ਤਿ, ਅਮ੍ਮ! ਧਾਤਿ ਤ੍ਵਂ ਉਟ੍ਠੇਹਿ, ਇਮਂ ਕੁਮਾਰਂ ਅਪਨੇਤ੍ਵਾ ਆਗਨ੍ਤ੍ਵਾ ਇਮਂ ਮਣਿਂ ਗਹੇਤ੍ਵਾ ਅਞ੍ਞਤ੍ਥ ਨਂ ਅਭਿਰਮੇਹੀਤਿ.

ਸਾ ਲਞ੍ਜਂ ਲਭਿਤ੍ਵਾ ਕੁਮਾਰਂ ਸਞ੍ਞਾਪੇਤ੍ਵਾ ਆਦਾਯ ਅਞ੍ਞਤ੍ਥ ਗਨ੍ਤ੍ਵਾ ਪਰਿਦੇਵਮਾਨਾ ਗਾਥਮਾਹ –

੨੧੫.

‘‘ਯਂ ਨੂਨਿਮਂ ਦਦੇਯ੍ਯਂ ਪਭਙ੍ਕਰਂ, ਕੋ ਨੁ ਮੇ ਇਮਿਨਾਤ੍ਥੋ;

ਸੁਤਸੋਮੇ ਪਬ੍ਬਜਿਤੇ, ਕਿਂ ਨੁ ਮੇਨਂ ਕਰਿਸ੍ਸਾਮੀ’’ਤਿ.

ਤਸ੍ਸਤ੍ਥੋ – ਯਂ ਨੂਨ ਅਹਂ ਇਮਂ ਲਞ੍ਜਤ੍ਥਾਯ ਗਹਿਤਂ ਪਭਙ੍ਕਰਂ ਸੁਪ੍ਪਭਾਸਂ ਮਣਿਂ ਦਦੇਯ੍ਯਂ, ਕੋ ਨੁ ਮਯ੍ਹਂ ਸੁਤਸੋਮਨਰਿਨ੍ਦੇ ਪਬ੍ਬਜਿਤੇ ਇਮਿਨਾ ਅਤ੍ਥੋ, ਕਿਂ ਨੁ ਮੇਨਂ ਕਰਿਸ੍ਸਾਮਿ, ਅਹਂ ਤਸ੍ਮਿਂ ਪਬ੍ਬਜਿਤੇ ਇਮਂ ਲਭਿਸ੍ਸਾਮਿ, ਲਭਨ੍ਤੀਪਿ ਚ ਕਿਂ ਨੁ ਖੋ ਏਤਂ ਕਰਿਸ੍ਸਾਮਿ, ਪਸ੍ਸਥ ਮੇ ਕਮ੍ਮਨ੍ਤਿ.

ਤਤੋ ਮਹਾਸੇਨਗੁਤ੍ਤੋ ਚਿਨ੍ਤੇਸਿ – ‘‘ਅਯਂ ਰਾਜਾ ‘‘ਗੇਹੇ ਮੇ ਧਨਂ ਮਨ੍ਦ’ਨ੍ਤਿ ਸਞ੍ਞਂ ਕਰੋਤਿ ਮਞ੍ਞੇ, ਬਹੁਭਾਵਮਸ੍ਸ ਕਥੇਸ੍ਸਾਮੀ’’ਤਿ. ਸੋ ਉਟ੍ਠਾਯ ਵਨ੍ਦਿਤ੍ਵਾ ਗਾਥਮਾਹ –

੨੧੬.

‘‘ਕੋਸੋ ਚ ਤੁਯ੍ਹਂ ਵਿਪੁਲੋ, ਕੋਟ੍ਠਾਗਾਰਞ੍ਚ ਤੁਯ੍ਹਂ ਪਰਿਪੂਰਂ;

ਪਥਵੀ ਚ ਤੁਯ੍ਹਂ ਵਿਜਿਤਾ, ਰਮਸ੍ਸੁ ਮਾ ਪਬ੍ਬਜਿ ਦੇਵਾ’’ਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ਗਾਥਮਾਹ –

੨੧੭.

‘‘ਕੋਸੋ ਚ ਮਯ੍ਹਂ ਵਿਪੁਲੋ, ਕੋਟ੍ਠਾਗਾਰਞ੍ਚ ਮਯ੍ਹਂ ਪਰਿਪੂਰਂ;

ਪਥਵੀ ਚ ਮਯ੍ਹਂ ਵਿਜਿਤਾ, ਤਂ ਹਿਤ੍ਵਾ ਪਬ੍ਬਜਿਸ੍ਸਾਮੀ’’ਤਿ.

ਤਂ ਸੁਤ੍ਵਾ ਤਸ੍ਮਿਂ ਅਪਗਤੇ ਕੁਲਵਡ੍ਢਨਸੇਟ੍ਠਿ ਨਾਮ ਉਟ੍ਠਾਯ ਵਨ੍ਦਿਤ੍ਵਾ ਗਾਥਮਾਹ –

੨੧੮.

‘‘ਮਯ੍ਹਮ੍ਪਿ ਧਨਂ ਪਹੂਤਂ, ਸਙ੍ਖ੍ਯਾਤੁਂ ਨੋਪਿ ਦੇਵ ਸਕ੍ਕੋਮਿ;

ਤਂ ਤੇ ਦਦਾਮਿ ਸਬ੍ਬਮ੍ਪਿ, ਰਮਸ੍ਸੁ ਮਾ ਪਬ੍ਬਜਿ ਦੇਵਾ’’ਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ਗਾਥਮਾਹ –

੨੧੯.

‘‘ਜਾਨਾਮਿ ਧਨਂ ਪਹੂਤਂ, ਕੁਲਵਡ੍ਢਨ ਪੂਜਿਤੋ ਤਯਾ ਚਸ੍ਮਿ;

ਸਗ੍ਗਞ੍ਚ ਪਤ੍ਥਯਾਨੋ, ਤੇਨ ਅਹਂ ਪਬ੍ਬਜਿਸ੍ਸਾਮੀ’’ਤਿ.

ਤਂ ਸੁਤ੍ਵਾ ਕੁਲਵਡ੍ਢਨੇ ਅਪਗਤੇ ਮਹਾਸਤ੍ਤੋ ਸੋਮਦਤ੍ਤਂ ਕਨਿਟ੍ਠਭਾਤਰਂ ਆਮਨ੍ਤੇਤ੍ਵਾ, ‘‘ਤਾਤ, ਅਹਂ ਪਞ੍ਜਰਪਕ੍ਖਿਤ੍ਤੋ ਵਨਕੁਕ੍ਕੁਟੋ ਵਿਯ ਉਕ੍ਕਣ੍ਠਿਤੋ, ਮਂ ਘਰਾਵਾਸੇ ਅਨਭਿਰਤਿ ਅਭਿਭਵਤਿ, ਅਜ੍ਜੇਵ ਪਬ੍ਬਜਿਸ੍ਸਾਮਿ, ਤ੍ਵਂ ਇਮਂ ਰਜ੍ਜਂ ਪਟਿਪਜ੍ਜਾ’’ਤਿ ਰਜ੍ਜਂ ਨਿਯ੍ਯਾਦੇਨ੍ਤੋ ਗਾਥਮਾਹ –

੨੨੦.

‘‘ਉਕ੍ਕਣ੍ਠਿਤੋਸ੍ਮਿ ਬਾਲ਼੍ਹਂ, ਅਰਤਿ ਮਂ ਸੋਮਦਤ੍ਤ ਆਵਿਸਤਿ;

ਬਹੁਕਾਪਿ ਮੇ ਅਨ੍ਤਰਾਯਾ, ਅਜ੍ਜੇਵਾਹਂ ਪਬ੍ਬਜਿਸ੍ਸਾਮੀ’’ਤਿ.

ਤਂ ਸੁਤ੍ਵਾ ਸੋਪਿ ਪਬ੍ਬਜਿਤੁਕਾਮੋ ਤਂ ਦੀਪੇਨ੍ਤੋ ਇਤਰਂ ਗਾਥਮਾਹ –

੨੨੧.

‘‘ਇਦਞ੍ਚ ਤੁਯ੍ਹਂ ਰੁਚਿਤਂ, ਸੁਤਸੋਮ ਅਜ੍ਜੇਵ ਦਾਨਿ ਤ੍ਵਂ ਪਬ੍ਬਜ;

ਅਹਮ੍ਪਿ ਪਬ੍ਬਜਿਸ੍ਸਾਮਿ, ਨ ਉਸ੍ਸਹੇ ਤਯਾ ਵਿਨਾ ਅਹਂ ਠਾਤੁ’’ਨ੍ਤਿ.

ਅਥ ਨਂ ਸੋ ਪਟਿਕ੍ਖਿਪਿਤ੍ਵਾ ਉਪਡ੍ਢਂ ਗਾਥਮਾਹ –

੨੨੨.

‘‘ਨ ਹਿ ਸਕ੍ਕਾ ਪਬ੍ਬਜਿਤੁਂ, ਨਗਰੇ ਨ ਹਿ ਪਚ੍ਚਤਿ ਜਨਪਦੇ ਚਾ’’ਤਿ.

ਤਤ੍ਥ ਨ ਹਿ ਪਚ੍ਚਤੀਤਿ ਇਦਾਨੇਵ ਤਾਵ ਮਮ ਪਬ੍ਬਜ੍ਜਾਧਿਪ੍ਪਾਯਂ ਸੁਤ੍ਵਾਵ ਇਮਸ੍ਮਿਂ ਦ੍ਵਾਦਸਯੋਜਨਿਕੇ ਸੁਦਸ੍ਸਨਨਗਰੇ ਚ ਸਕਲਜਨਪਦੇ ਚ ਨ ਪਚ੍ਚਤਿ, ਕੋਚਿ ਉਦ੍ਧਨੇ ਅਗ੍ਗਿਂ ਨ ਜਾਲੇਤਿ, ਅਮ੍ਹੇਸੁ ਪਨ ਦ੍ਵੀਸੁ ਪਬ੍ਬਜਿਤੇਸੁ ਅਨਾਥਾਵ ਰਟ੍ਠਵਾਸਿਨੋ ਭਵਿਸ੍ਸਨ੍ਤਿ, ਤਸ੍ਮਾ ਨ ਹਿ ਸਕ੍ਕਾ ਤਯਾ ਪਬ੍ਬਜਿਤੁਂ, ਅਹਮੇਵ ਪਬ੍ਬਜਿਸ੍ਸਾਮੀਤਿ.

ਤਂ ਸੁਤ੍ਵਾ ਮਹਾਜਨੋ ਮਹਾਸਤ੍ਤਸ੍ਸ ਪਾਦਮੂਲੇ ਪਰਿਵਤ੍ਤਿਤ੍ਵਾ ਪਰਿਦੇਵਨ੍ਤੋ ਉਪਡ੍ਢਗਾਥਮਾਹ –

‘‘ਸੁਤਸੋਮੇ ਪਬ੍ਬਜਿਤੇ, ਕਥਂ ਨੁ ਦਾਨਿ ਕਰਿਸ੍ਸਾਮਾ’’ਤਿ.

ਤਤੋ ਮਹਾਸਤ੍ਤੋ ‘‘ਅਲਂ ਮਾ ਸੋਚਯਿਤ੍ਥ, ਅਹਂ ਚਿਰਮ੍ਪਿ ਠਤ੍ਵਾ ਤੁਮ੍ਹੇਹਿ ਵਿਨਾ ਭਵਿਸ੍ਸਾਮਿ, ਉਪ੍ਪਨ੍ਨਸਙ੍ਖਾਰੋ ਹਿ ਨਿਚ੍ਚੋ ਨਾਮ ਨਤ੍ਥੀ’’ਤਿ ਮਹਾਜਨਸ੍ਸ ਧਮ੍ਮਂ ਕਥੇਨ੍ਤੋ ਆਹ –

੨੨੩.

‘‘ਉਪਨੀਯਤਿਦਂ ਮਞ੍ਞੇ, ਪਰਿਤ੍ਤਂ ਉਦਕਂਵ ਚਙ੍ਕਵਾਰਮ੍ਹਿ;

ਏਵਂ ਸੁਪਰਿਤ੍ਤਕੇ ਜੀਵਿਤੇ, ਨ ਚ ਪਮਜ੍ਜਿਤੁਂ ਕਾਲੋ.

੨੨੪.

‘‘ਉਪਨੀਯਤਿਦਂ ਮਞ੍ਞੇ, ਪਰਿਤ੍ਤਂ ਉਦਕਂਵ ਚਙ੍ਕਵਾਰਮ੍ਹਿ;

ਏਵਂ ਸੁਪਰਿਤ੍ਤਕੇ ਜੀਵਿਤੇ, ਅਨ੍ਧਬਾਲਾ ਪਮਜ੍ਜਨ੍ਤਿ.

੨੨੫.

‘‘ਤੇ ਵਡ੍ਢਯਨ੍ਤਿ ਨਿਰਯਂ, ਤਿਰਚ੍ਛਾਨਯੋਨਿਞ੍ਚ ਪੇਤ੍ਤਿਵਿਸਯਞ੍ਚ;

ਤਣ੍ਹਾਯ ਬਨ੍ਧਨਬਦ੍ਧਾ, ਵਡ੍ਢੇਨ੍ਤਿ ਅਸੁਰਕਾਯ’’ਨ੍ਤਿ.

ਤਤ੍ਥ ਉਪਨੀਯਤਿਦਂ ਮਞ੍ਞੇਤਿ, ਤਾਤ, ‘‘ਇਦਂ ਜੀਵਿਤਂ ਉਪਨੀਯਤੀ’’ਤਿ ਅਹਂ ਮਞ੍ਞਾਮਿ. ਅਞ੍ਞੇਸੁ ਸੁਤ੍ਤੇਸੁ ਉਪਸਂਹਰਣਤ੍ਥੋ ਉਪਨਿਯ੍ਯਨਤ੍ਥੋ, ਇਧ ਪਨ ਪਰਿਯਾਦਾਨਤ੍ਥੋ. ਤਸ੍ਮਾ ਯਥਾ ਪਰਿਤ੍ਤਂ ਉਦਕਂ ਰਜਕਾਨਂ ਖਾਰਚਙ੍ਕਵਾਰੇ ਪਕ੍ਖਿਤ੍ਤਂ ਸੀਘਂ ਪਰਿਯਾਦਿਯਤਿ, ਤਥਾ ਜੀਵਿਤਮ੍ਪਿ. ਏਵਂ ਸੁਪਰਿਤ੍ਤਕੇ ਜੀਵਿਤੇ ਤਂ ਪਰਿਤ੍ਤਕਂ ਆਯੁਸਙ੍ਖਾਰਂ ਗਹੇਤ੍ਵਾ ਵਿਚਰਨ੍ਤਾਨਂ ਸਤ੍ਤਾਨਂ ਨ ਪੁਞ੍ਞਕਿਰਿਯਾਯ ਪਮਜ੍ਜਿਤੁਂ ਕਾਲੋ, ਅਪ੍ਪਮਾਦੋਵ ਕਾਤੁਂ ਵਟ੍ਟਤੀਤਿ ਅਯਮੇਤ੍ਥ ਅਤ੍ਥੋ. ਅਨ੍ਧਬਾਲਾ ਪਮਜ੍ਜਨ੍ਤੀਤਿ ਅਜਰਾਮਰਾ ਵਿਯ ਹੁਤ੍ਵਾ ਗੂਥਕਲਲੇ ਸੂਕਰਾ ਵਿਯ ਹੁਤ੍ਵਾ ਕਾਮਪਙ੍ਕੇ ਨਿਮੁਜ੍ਜਨ੍ਤਾ ਪਮਜ੍ਜਨ੍ਤਿ. ਅਸੁਰਕਾਯਨ੍ਤਿ ਕਾਲ਼ਕਞ੍ਜਿਕਅਸੁਰਯੋਨਿਞ੍ਚ ਵਡ੍ਢੇਨ੍ਤੀਤਿ ਅਤ੍ਥੋ.

ਏਵਂ ਮਹਾਸਤ੍ਤੋ ਮਹਾਜਨਸ੍ਸ ਧਮ੍ਮਂ ਦੇਸੇਤ੍ਵਾ ਪੁਬ੍ਬਕਂ ਨਾਮ ਪਾਸਾਦਂ ਆਰੁਯ੍ਹ ਸਤ੍ਤਮਾਯ ਭੂਮਿਯਾ ਠਿਤੋ ਖਗ੍ਗੇਨ ਚੂਲ਼ਂ ਛਿਨ੍ਦਿਤ੍ਵਾ ‘‘ਅਹਂ ਤੁਮ੍ਹਾਕਂ ਕਿਞ੍ਚਿ ਨ ਹੋਮਿ, ਅਤ੍ਤਨੋ ਰਾਜਾਨਂ ਗਣ੍ਹਥਾ’’ਤਿ ਸਵੇਠਨਂ ਚੂਲ਼ਂ ਮਹਾਜਨਸ੍ਸ ਅਨ੍ਤਰੇ ਖਿਪਿ. ਤਂ ਗਹੇਤ੍ਵਾ ਮਹਾਜਨੋ ਭੂਮਿਯਂ ਪਰਿਵਟ੍ਟੇਨ੍ਤੋ ਪਰਿਵਟ੍ਟੇਨ੍ਤੋ ਪਰਿਦੇਵਿ. ਤਸ੍ਮਿਂ ਠਾਨੇ ਮਹਨ੍ਤਂ ਰਜਗ੍ਗਂ ਉਟ੍ਠਹਿ. ਪਟਿਕ੍ਕਮਿਤ੍ਵਾ ਠਿਤਜਨੋ ਤਂ ਓਲੋਕੇਤ੍ਵਾ ‘‘ਰਞ੍ਞਾ ਚੂਲ਼ਂ ਛਿਨ੍ਦਿਤ੍ਵਾ ਸਵੇਠਨਾ ਚੂਲ਼ਾ ਮਹਾਜਨਸ੍ਸ ਅਨ੍ਤਰੇ ਖਿਤ੍ਤਾ ਭਵਿਸ੍ਸਤਿ, ਤੇਨਾਯਂ ਪਾਸਾਦਸ੍ਸ ਅਵਿਦੂਰੇ ਰਜਵਟ੍ਟਿ ਉਗ੍ਗਤਾ’’ਤਿ ਪਰਿਦੇਵਨ੍ਤੋ ਗਾਥਮਾਹ –

੨੨੬.

‘‘ਊਹਞ੍ਞਤੇ ਰਜਗ੍ਗਂ ਅਵਿਦੂਰੇ, ਪੁਬ੍ਬਕਮ੍ਹਿ ਚ ਪਾਸਾਦੇ;

ਮਞ੍ਞੇ ਨੋ ਕੇਸਾ ਛਿਨ੍ਨਾ, ਯਸਸ੍ਸਿਨੋ ਧਮ੍ਮਰਾਜਸ੍ਸਾ’’ਤਿ.

ਤਤ੍ਥ ਊਹਞ੍ਞਤੇਤਿ ਉਟ੍ਠਹਤਿ. ਰਜਗ੍ਗਨ੍ਤਿ ਰਜਕ੍ਖਨ੍ਧੋ. ਅਵਿਦੂਰੇਤਿ ਇਤੋ ਅਮ੍ਹਾਕਂ ਠਿਤਟ੍ਠਾਨਤੋ ਅਵਿਦੂਰੇ. ਪੁਬ੍ਬਕਮ੍ਹੀਤਿ ਪੁਬ੍ਬਕਪਾਸਾਦਸ੍ਸ ਸਮੀਪੇ. ਮਞ੍ਞੇ ਨੋਤਿ ਅਮ੍ਹਾਕਂ ਧਮ੍ਮਰਾਜਸ੍ਸ ਕੇਸਾ ਛਿਨ੍ਨਾ ਭਵਿਸ੍ਸਨ੍ਤੀਤਿ ਮਞ੍ਞਾਮ.

ਮਹਾਸਤ੍ਤੋ ਪਰਿਚਾਰਿਕਂ ਪੇਸੇਤ੍ਵਾ ਪਬ੍ਬਜਿਤਪਰਿਕ੍ਖਾਰੇ ਆਹਰਾਪੇਤ੍ਵਾ ਕਪ੍ਪਕੇਨ ਕੇਸਮਸ੍ਸੁਂ ਓਹਾਰਾਪੇਤ੍ਵਾ ਅਲਙ੍ਕਾਰਂ ਸਯਨਪਿਟ੍ਠੇ ਪਾਤੇਤ੍ਵਾ ਰਤ੍ਤਪਟਾਨਂ ਦਸਾਨਿ ਛਿਨ੍ਦਿਤ੍ਵਾ ਤਾਨਿ ਕਾਸਾਯਾਨਿ ਨਿਵਾਸੇਤ੍ਵਾ ਮਤ੍ਤਿਕਾਪਤ੍ਤਂ ਵਾਮਅਂਸਕੂਟੇ ਲਗ੍ਗੇਤ੍ਵਾ ਕਤ੍ਤਰਦਣ੍ਡਂ ਆਦਾਯ ਮਹਾਤਲੇ ਅਪਰਾਪਰਂ ਚਙ੍ਕਮਿਤ੍ਵਾ ਪਾਸਾਦਾ ਓਤਰਿਤ੍ਵਾ ਅਨ੍ਤਰਵੀਥਿਂ ਪਟਿਪਜ੍ਜਿ. ਗਚ੍ਛਨ੍ਤਂ ਪਨ ਨਂ ਨ ਕੋਚਿ ਸਞ੍ਜਾਨਿ. ਅਥਸ੍ਸ ਸਤ੍ਤਸਤਾ ਖਤ੍ਤਿਯਕਞ੍ਞਾ ਪਾਸਾਦਂ ਅਭਿਰੁਹਿਤ੍ਵਾ ਤਂ ਅਦਿਸ੍ਵਾ ਆਭਰਣਭਣ੍ਡਮੇਵ ਦਿਸ੍ਵਾ ਓਤਰਿਤ੍ਵਾ ਅਵਸੇਸਾਨਂ ਸੋਲ਼ਸਸਹਸ੍ਸਾਨਂ ਇਤ੍ਥੀਨਂ ਸਨ੍ਤਿਕਂ ਗਨ੍ਤ੍ਵਾ ‘‘ਅਮ੍ਹਾਕਂ ਪਿਯਸਾਮਿਕੋ ਸੁਤਸੋਮਮਹਿਸ੍ਸਰੋ ਪਬ੍ਬਜਿਤੋ’’ਤਿ ਮਹਾਸਦ੍ਦੇਨ ਪਰਿਦੇਵਮਾਨਾਵ ਬਹਿ ਨਿਕ੍ਖਮਿਂਸੁ. ਤਸ੍ਮਿਂ ਖਣੇ ਮਹਾਜਨੋ ਤਸ੍ਸ ਪਬ੍ਬਜਿਤਭਾਵਂ ਅਞ੍ਞਾਸਿ, ਸਕਲਨਗਰਂ ਸਙ੍ਖੁਭਿਤ੍ਵਾ ‘‘ਰਾਜਾ ਕਿਰ ਨੋ ਪਬ੍ਬਜਿਤੋ’’ਤਿ ਰਾਜਦ੍ਵਾਰੇ ਸਨ੍ਨਿਪਤਿ, ਮਹਾਜਨੋ ‘‘ਇਧ ਰਾਜਾ ਭਵਿਸ੍ਸਤਿ, ਏਤ੍ਥ ਭਵਿਸ੍ਸਤੀ’’ਤਿ ਪਾਸਾਦਾਦੀਨਿ ਰਞ੍ਞੋ ਪਰਿਭੋਗਟ੍ਠਾਨਾਨਿ ਗਨ੍ਤ੍ਵਾ ਰਾਜਾਨਂ ਅਦਿਸ੍ਵਾ –

੨੨੭.

‘‘ਅਯਮਸ੍ਸ ਪਾਸਾਦੋ, ਸੋਵਣ੍ਣਪੁਪ੍ਫਮਾਲ੍ਯਵੀਤਿਕਿਣ੍ਣੋ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਇਤ੍ਥਾਗਾਰੇਹਿ.

੨੨੮.

‘‘ਅਯਮਸ੍ਸ ਪਾਸਾਦੋ, ਸੋਵਣ੍ਣਪੁਪ੍ਫਮਾਲ੍ਯਵੀਤਿਕਿਣ੍ਣੋ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਞਾਤਿਸਙ੍ਘੇਨ.

੨੨੯.

‘‘ਇਦਮਸ੍ਸ ਕੂਟਾਗਾਰਂ, ਸੋਵਣ੍ਣਪੁਪ੍ਫਮਾਲ੍ਯਵੀਤਿਕਿਣ੍ਣਂ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਇਤ੍ਥਾਗਾਰੇਹਿ.

੨੩੦.

‘‘ਇਦਮਸ੍ਸ ਕੂਟਾਗਾਰਂ, ਸੋਵਣ੍ਣਪੁਪ੍ਫਮਾਲ੍ਯਵੀਤਿਕਿਣ੍ਣਂ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਞਾਤਿਸਙ੍ਘੇਨ.

੨੩੧.

‘‘ਅਯਮਸ੍ਸ ਅਸੋਕਵਨਿਕਾ, ਸੁਪੁਪ੍ਫਿਤਾ ਸਬ੍ਬਕਾਲਿਕਾ ਰਮ੍ਮਾ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਇਤ੍ਥਾਗਾਰੇਹਿ.

੨੩੨.

‘‘ਅਯਮਸ੍ਸ ਅਸੋਕਵਨਿਕਾ, ਸੁਪੁਪ੍ਫਿਤਾ ਸਬ੍ਬਕਾਲਿਕਾ ਰਮ੍ਮਾ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਞਾਤਿਸਙ੍ਘੇਨ.

੨੩੩.

‘‘ਇਦਮਸ੍ਸ ਉਯ੍ਯਾਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਇਤ੍ਥਾਗਾਰੇਹਿ.

੨੩੪.

‘‘ਇਦਮਸ੍ਸ ਉਯ੍ਯਾਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਞਾਤਿਸਙ੍ਘੇਨ.

੨੩੫.

‘‘ਇਦਮਸ੍ਸ ਕਣਿਕਾਰਵਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਇਤ੍ਥਾਗਾਰੇਹਿ.

੨੩੬.

‘‘ਇਦਮਸ੍ਸ ਕਣਿਕਾਰਵਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਞਾਤਿਸਙ੍ਘੇਨ.

੨੩੭.

‘‘ਇਦਮਸ੍ਸ ਪਾਟਲਿਵਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਇਤ੍ਥਾਗਾਰੇਹਿ.

੨੩੮.

‘‘ਇਦਮਸ੍ਸ ਪਾਟਲਿਵਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਞਾਤਿਸਙ੍ਘੇਨ.

੨੩੯.

‘‘ਇਦਮਸ੍ਸ ਅਮ੍ਬਵਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਇਤ੍ਥਾਗਾਰੇਹਿ.

੨੪੦.

‘‘ਇਦਮਸ੍ਸ ਅਮ੍ਬਵਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਞਾਤਿਸਙ੍ਘੇਨ.

੨੪੧.

‘‘ਅਯਮਸ੍ਸ ਪੋਕ੍ਖਰਣੀ, ਸਞ੍ਛਨ੍ਨਾ ਅਣ੍ਡਜੇਹਿ ਵੀਤਿਕਿਣ੍ਣਾ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਇਤ੍ਥਾਗਾਰੇਹਿ.

੨੪੨.

‘‘ਅਯਮਸ੍ਸ ਪੋਕ੍ਖਰਣੀ, ਸਞ੍ਛਨ੍ਨਾ ਅਣ੍ਡਜੇਹਿ ਵੀਤਿਕਿਣ੍ਣਾ;

ਯਹਿਮਨੁਵਿਚਰਿ ਰਾਜਾ, ਪਰਿਕਿਣ੍ਣੋ ਞਾਤਿਸਙ੍ਘੇਨਾ’’ਤਿ. –

ਇਮਾਹਿ ਗਾਥਾਹਿ ਪਰਿਦੇਵਨ੍ਤੋ ਵਿਚਰਿ.

ਤਤ੍ਥ ਵੀਤਿਕਿਣ੍ਣੋਤਿ ਸੋਵਣ੍ਣਪੁਪ੍ਫੇਹਿ ਚ ਨਾਨਾਮਾਲ੍ਯੇਹਿ ਚ ਸਮੋਕਿਣ੍ਣੋ. ਪਰਿਕਿਣ੍ਣੋਤਿ ਪਰਿਵਾਰਿਤੋ. ਇਤ੍ਥਾਗਾਰੇਹੀਤਿ ਦਾਸਿਯੋ ਉਪਾਦਾਯ ਇਤ੍ਥਿਯੋ ਇਤ੍ਥਾਗਾਰਾ ਨਾਮ. ਞਾਤਿਸਙ੍ਘੇਨਾਤਿ ਅਮਚ੍ਚਾਪਿ ਇਧ ਞਾਤਯੋ ਏਵ. ਕੂਟਾਗਾਰਨ੍ਤਿ ਸਤ੍ਤਰਤਨਵਿਚਿਤ੍ਤੋ ਸਯਨਕੂਟਾਗਾਰਗਬ੍ਭੋ. ਅਸੋਕਵਨਿਕਾਤਿ ਅਸੋਕਵਨਭੂਮਿ. ਸਬ੍ਬਕਾਲਿਕਾਤਿ ਸਬ੍ਬਕਾਲਪਰਿਭੋਗਕ੍ਖਮਾ ਨਿਚ੍ਚਪੁਪ੍ਫਿਤਾ ਵਾ. ਉਯ੍ਯਾਨਨ੍ਤਿ ਨਨ੍ਦਨਵਨਚਿਤ੍ਤਲਤਾਵਨਸਦਿਸਂ ਉਯ੍ਯਾਨਂ. ਸਬ੍ਬਕਾਲਿਕਨ੍ਤਿ ਛਸੁਪਿ ਉਤੂਸੁ ਉਪ੍ਪਜ੍ਜਨਕਪੁਪ੍ਫਫਲਸਞ੍ਛਨ੍ਨਂ. ਕਣਿਕਾਰਵਨਾਦੀਸੁ ਸਬ੍ਬਕਾਲਿਕਨ੍ਤਿ ਸਬ੍ਬਕਾਲੇ ਸੁਪੁਪ੍ਫਿਤਫਲਿਤਮੇਵ. ਸਞ੍ਛਨ੍ਨਾਤਿ ਨਾਨਾਵਿਧੇਹਿ ਜਲਜਥਲਜਕੁਸੁਮੇਹਿ ਸੁਟ੍ਠੁ ਸਞ੍ਛਨ੍ਨਾ. ਅਣ੍ਡਜੇਹਿ ਵੀਤਿਕਿਣ੍ਣਾਤਿ ਸਕੁਣਸਙ੍ਘੇਹਿ ਓਕਿਣ੍ਣਾ.

ਏਵਂ ਤੇਸੁ ਤੇਸੁ ਠਾਨੇਸੁ ਪਰਿਦੇਵਿਤ੍ਵਾ ਮਹਾਜਨੋ ਪੁਨ ਰਾਜਙ੍ਗਣਂ ਆਗਨ੍ਤ੍ਵਾ –

੨੪੩.

‘‘ਰਾਜਾ ਵੋ ਖੋ ਪਬ੍ਬਜਿਤੋ, ਸੁਤਸੋਮੋ ਰਜ੍ਜਂ ਇਮਂ ਪਹਤ੍ਵਾਨ;

ਕਾਸਾਯਵਤ੍ਥਵਸਨੋ, ਨਾਗੋਵ ਏਕਕੋ ਚਰਤੀ’’ਤਿ. –

ਗਾਥਂ ਵਤ੍ਵਾ ਅਤ੍ਤਨੋ ਘਰੇ ਵਿਭਵਂ ਪਹਾਯ ਪੁਤ੍ਤਧੀਤਰੋ ਹਤ੍ਥੇਸੁ ਗਹੇਤ੍ਵਾ ਨਿਕ੍ਖਮਿਤ੍ਵਾ ਬੋਧਿਸਤ੍ਤਸ੍ਸੇਵ ਸਨ੍ਤਿਕਂ ਅਗਮਾਸਿ, ਤਥਾ ਮਾਤਾਪਿਤਰੋ ਪੁਤ੍ਤਦਾਰਾ ਸੋਲ਼ਸਸਹਸ੍ਸਾ ਚ ਨਾਟਕਿਤ੍ਥਿਯੋ. ਸਕਲਨਗਰਂ ਤੁਚ੍ਛਂ ਵਿਯ ਅਹੋਸਿ, ਜਨਪਦਵਾਸਿਨੋਪਿ ਤੇਸਂ ਪਚ੍ਛਤੋ ਪਚ੍ਛਤੋ ਗਮਿਂਸੁ. ਬੋਧਿਸਤ੍ਤੋ ਦ੍ਵਾਦਸਯੋਜਨਿਕਂ ਪਰਿਸਂ ਗਹੇਤ੍ਵਾ ਹਿਮਵਨ੍ਤਾਭਿਮੁਖੋ ਪਾਯਾਸਿ. ਅਥਸ੍ਸ ਅਭਿਨਿਕ੍ਖਮਨਂ ਞਤ੍ਵਾ ਸਕ੍ਕੋ ਵਿਸ੍ਸਕਮ੍ਮਂ ਆਮਨ੍ਤੇਤ੍ਵਾ, ‘‘ਤਾਤ ਵਿਸ੍ਸਕਮ੍ਮ, ਸੁਤਸੋਮਮਹਾਰਾਜਾ ਅਭਿਨਿਕ੍ਖਮਨਂ ਨਿਕ੍ਖਨ੍ਤੋ, ਵਸਨਟ੍ਠਾਨਂ ਲਦ੍ਧੁਂ ਵਟ੍ਟਤਿ, ਸਮਾਗਮੋ ਚ ਮਹਾ ਭਵਿਸ੍ਸਤਿ, ਗਚ੍ਛ ਹਿਮਵਨ੍ਤਪਦੇਸੇ ਗਙ੍ਗਾਤੀਰੇ ਤਿਂਸਯੋਜਨਾਯਾਮਂ ਪਞ੍ਚਦਸਯੋਜਨਵਿਤ੍ਥਤਂ ਅਸ੍ਸਮਪਦਂ ਮਾਪੇਹੀ’’ਤਿ ਪੇਸੇਸਿ. ਸੋ ਤਥਾ ਕਤ੍ਵਾ ਤਸ੍ਮਿਂ ਅਸ੍ਸਮਪਦੇ ਪਬ੍ਬਜਿਤਪਰਿਕ੍ਖਾਰੇ ਪਟਿਯਾਦੇਤ੍ਵਾ ਏਕਪਦਿਕਮਗ੍ਗਂ ਮਾਪੇਤ੍ਵਾ ਦੇਵਲੋਕਮੇਵ ਗਤੋ.

ਮਹਾਸਤ੍ਤੋ ਤੇਨ ਮਗ੍ਗੇਨ ਗਨ੍ਤ੍ਵਾ ਤਂ ਅਸ੍ਸਮਪਦਂ ਪਵਿਸਿਤ੍ਵਾ ਪਠਮਂ ਸਯਂ ਪਬ੍ਬਜਿਤ੍ਵਾ ਪਚ੍ਛਾ ਸੇਸੇ ਪਬ੍ਬਾਜੇਸਿ, ਅਪਰਭਾਗੇ ਬਹੂ ਪਬ੍ਬਜਿਂਸੁ. ਤਿਂਸਯੋਜਨਿਕਂ ਠਾਨਂ ਪਰਿਪੂਰਿ. ਵਿਸ੍ਸਕਮ੍ਮੇਨ ਪਨ ਅਸ੍ਸਮਮਾਪਿਤਨਿਯਾਮੋ ਚ ਬਹੂਨਂ ਪਬ੍ਬਜਿਤਨਿਯਾਮੋ ਚ ਬੋਧਿਸਤ੍ਤਸ੍ਸ ਅਸ੍ਸਮਪਦਸਂਵਿਦਹਿਤਨਿਯਾਮੋ ਚ ਹਤ੍ਥਿਪਾਲਜਾਤਕੇ (ਜਾ. ੧.੧੫.੩੩੭ ਆਦਯੋ) ਆਗਤਨਯੇਨੇਵ ਵੇਦਿਤਬ੍ਬੋ. ਤਤ੍ਥ ਮਹਾਸਤ੍ਤੋ ਯਸ੍ਸ ਯਸ੍ਸੇਵ ਕਾਮਵਿਤਕ੍ਕਾਦਿ ਮਿਚ੍ਛਾਵਿਤਕ੍ਕੋ ਉਪ੍ਪਜ੍ਜਤਿ, ਤਂ ਤਂ ਆਕਾਸੇਨ ਉਪਸਙ੍ਕਮਿਤ੍ਵਾ ਆਕਾਸੇ ਪਲ੍ਲਙ੍ਕੇਨ ਨਿਸੀਦਿਤ੍ਵਾ ਓਵਦਨ੍ਤੋ ਗਾਥਾਦ੍ਵਯਮਾਹ –

੨੪੪.

‘‘ਮਾਸ੍ਸੁ ਪੁਬ੍ਬੇ ਰਤਿਕੀਲ਼ਿਤਾਨਿ, ਹਸਿਤਾਨਿ ਚ ਅਨੁਸ੍ਸਰਿਤ੍ਥ;

ਮਾ ਵੋ ਕਾਮਾ ਹਨਿਂਸੁ, ਰਮ੍ਮਞ੍ਹਿ ਸੁਦਸ੍ਸਨਂ ਨਗਰਂ.

੨੪੫.

‘‘ਮੇਤ੍ਤਚਿਤ੍ਤਞ੍ਚ ਭਾਵੇਥ, ਅਪ੍ਪਮਾਣਂ ਦਿਵਾ ਚ ਰਤ੍ਤੋ ਚ;

ਅਗਚ੍ਛਿਤ੍ਥ ਦੇਵਪੁਰਂ, ਆਵਾਸਂ ਪੁਞ੍ਞਕਮ੍ਮਿਨ’’ਨ੍ਤਿ.

ਤਤ੍ਥ ਰਤਿਕੀਲ਼ਿਤਾਨੀਤਿ ਕਾਮਰਤਿਯੋ ਚ ਕਾਯਵਾਚਾਖਿਡ੍ਡਾਵਸੇਨ ਪਵਤ੍ਤਕੀਲ਼ਿਤਾਨਿ ਚ. ਮਾ ਵੋ ਕਾਮਾ ਹਨਿਂਸੂਤਿ ਮਾ ਤੁਮ੍ਹੇ ਵਤ੍ਥੁਕਾਮਕਿਲੇਸਕਾਮਾ ਹਨਿਂਸੁ. ਰਮ੍ਮਂ ਹੀਤਿ ਸੁਦਸ੍ਸਨਨਗਰਂ ਨਾਮ ਰਮਣੀਯਂ, ਤਂ ਮਾ ਅਨੁਸ੍ਸਰਿਤ੍ਥ. ਮੇਤ੍ਤਚਿਤ੍ਤਨ੍ਤਿ ਇਦਂ ਦੇਸਨਾਮਤ੍ਤਮੇਵ, ਸੋ ਪਨ ਚਤ੍ਤਾਰੋਪਿ ਬ੍ਰਹ੍ਮਵਿਹਾਰੇ ਆਚਿਕ੍ਖਿ. ਅਪ੍ਪਮਾਣਨ੍ਤਿ ਅਪ੍ਪਮਾਣਸਤ੍ਤਾਰਮ੍ਮਣਂ. ਅਗਚ੍ਛਿਤ੍ਥਾਤਿ ਗਮਿਸ੍ਸਥ. ਦੇਵਪੁਰਨ੍ਤਿ ਬ੍ਰਹ੍ਮਲੋਕਂ.

ਸੋਪਿ ਇਸਿਗਣੋ ਤਸ੍ਸੋਵਾਦੇ ਠਤ੍ਵਾ ਬ੍ਰਹ੍ਮਲੋਕਪਰਾਯਣੋ ਅਹੋਸੀਤਿ ਸਬ੍ਬਂ ਹਤ੍ਥਿਪਾਲਜਾਤਕੇ ਆਗਤਨਯੇਨੇਵ ਕਥੇਤਬ੍ਬਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਤਥਾਗਤੋ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ, ਚਨ੍ਦਾਦੇਵੀ ਰਾਹੁਲਮਾਤਾ, ਜੇਟ੍ਠਪੁਤ੍ਤੋ ਸਾਰਿਪੁਤ੍ਤੋ, ਕਨਿਟ੍ਠਪੁਤ੍ਤੋ ਰਾਹੁਲੋ, ਧਾਤਿ ਖੁਜ੍ਜੁਤ੍ਤਰਾ, ਕੁਲਵਡ੍ਢਨਸੇਟ੍ਠਿ ਕਸ੍ਸਪੋ, ਮਹਾਸੇਨਗੁਤ੍ਤੋ ਮੋਗ੍ਗਲ੍ਲਾਨੋ, ਸੋਮਦਤ੍ਤਕੁਮਾਰੋ ਆਨਨ੍ਦੋ, ਸੇਸਪਰਿਸਾ ਬੁਦ੍ਧਪਰਿਸਾ, ਸੁਤਸੋਮਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚੂਲ਼ਸੁਤਸੋਮਜਾਤਕਵਣ੍ਣਨਾ ਪਞ੍ਚਮਾ.

ਜਾਤਕੁਦ੍ਦਾਨਂ –

ਸੁਵਪਣ੍ਡਿਤਜਮ੍ਬੁਕਕੁਣ੍ਡਲਿਨੋ, ਵਰਕਞ੍ਞਮਲਮ੍ਬੁਸਜਾਤਕਞ੍ਚ;

ਪਵਰੁਤ੍ਤਮਸਙ੍ਖਸਿਰੀਵ੍ਹਯਕੋ, ਸੁਤਸੋਮਅਰਿਨ੍ਦਮਰਾਜਵਰੋ.

ਚਤ੍ਤਾਲੀਸਨਿਪਾਤਵਣ੍ਣਨਾ ਨਿਟ੍ਠਿਤਾ.

੧੮. ਪਣ੍ਣਾਸਨਿਪਾਤੋ

[੫੨੬] ੧. ਨਿਲ਼ਿਨਿਕਾਜਾਤਕਵਣ੍ਣਨਾ

ਉਦ੍ਦਯ੍ਹਤੇ ਜਨਪਦੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪੁਰਾਣਦੁਤਿਯਿਕਾਪਲੋਭਨਂ ਆਰਬ੍ਬ ਕਥੇਸਿ. ਕਥੇਨ੍ਤੋ ਚ ਤਂ ਭਿਕ੍ਖੁਂ ‘‘ਕੇਨ ਉਕ੍ਕਣ੍ਠਾਪਿਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਪੁਰਾਣਦੁਤਿਯਿਕਾਯਾ’’ਤਿ ਵੁਤ੍ਤੇ ‘‘ਨ ਏਸਾ ਖੋ, ਭਿਕ੍ਖੁ, ਇਦਾਨੇਵ ਤਵ ਅਨਤ੍ਥਕਾਰਿਕਾ, ਪੁਬ੍ਬੇਪਿ ਤ੍ਵਂ ਏਤਂ ਨਿਸ੍ਸਾਯ ਝਾਨਾ ਪਰਿਹਾਯਿਤ੍ਵਾ ਮਹਾਵਿਨਾਸਂ ਪਤ੍ਤੋ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਉਦਿਚ੍ਚਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਉਗ੍ਗਹਿਤਸਿਪ੍ਪੋ ਇਸਿਪਬ੍ਬਜ੍ਜਂ ਪਬ੍ਬਿਜਿਤ੍ਵਾ ਝਾਨਾਭਿਞ੍ਞਾ ਨਿਬ੍ਬਤ੍ਤੇਤ੍ਵਾ ਹਿਮਵਨ੍ਤਪਦੇਸੇ ਵਾਸਂ ਕਪ੍ਪੇਸਿ. ਅਲਮ੍ਬੁਸਾਜਾਤਕੇ ਵੁਤ੍ਤਨਯੇਨੇਵ ਤਂ ਪਟਿਚ੍ਚ ਏਕਾ ਮਿਗੀ ਗਬ੍ਭਂ ਪਟਿਲਭਿਤ੍ਵਾ ਪੁਤ੍ਤਂ ਵਿਜਾਯਿ, ‘‘ਇਸਿਸਿਙ੍ਗੋ’’ਤ੍ਵੇਵਸ੍ਸ ਨਾਮਂ ਅਹੋਸਿ. ਅਥ ਨਂ ਪਿਤਾ ਵਯਪ੍ਪਤ੍ਤਂ ਪਬ੍ਬਾਜੇਤ੍ਵਾ ਕਸਿਣਪਰਿਕਮ੍ਮਂ ਉਗ੍ਗਣ੍ਹਾਪੇਸਿ. ਸੋ ਨਚਿਰਸ੍ਸੇਵ ਝਾਨਾਭਿਞ੍ਞਾ ਉਪ੍ਪਾਦੇਤ੍ਵਾ ਝਾਨਸੁਖੇਨ ਕੀਲ਼ਿ, ਘੋਰਤਪੋ ਪਰਮਧਿਤਿਨ੍ਦ੍ਰਿਯੋ ਅਹੋਸਿ. ਤਸ੍ਸ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਕਮ੍ਪਿ. ਸਕ੍ਕੋ ਆਵਜ੍ਜੇਨ੍ਤੋ ਤਂ ਕਾਰਣਂ ਞਤ੍ਵਾ ‘‘ਉਪਾਯੇਨਸ੍ਸ ਸੀਲਂ ਭਿਨ੍ਦਿਸ੍ਸਾਮੀ’’ਤਿ ਤੀਣਿ ਸਂਵਚ੍ਛਰਾਨਿ ਸਕਲਕਾਸਿਰਟ੍ਠੇ ਵੁਟ੍ਠਿਂ ਨਿਵਾਰੇਸਿ, ਰਟ੍ਠਂ ਅਗ੍ਗਿਦਡ੍ਢਂ ਵਿਯ ਅਹੋਸਿ. ਸਸ੍ਸੇ ਅਸਮ੍ਪਜ੍ਜਮਾਨੇ ਦੁਬ੍ਭਿਕ੍ਖਪੀਲ਼ਿਤਾ ਮਨੁਸ੍ਸਾ ਸਨ੍ਨਿਪਤਿਤ੍ਵਾ ਰਾਜਙ੍ਗਣੇ ਉਪਕ੍ਕੋਸਿਂਸੁ. ਅਥ ਨੇ ਰਾਜਾ ਵਾਤਪਾਨੇ ਠਿਤੋ ‘‘ਕਿਂ ਏਤ’’ਨ੍ਤਿ ਪੁਚ੍ਛਿ. ‘‘ਮਹਾਰਾਜ, ਤੀਣਿ ਸਂਵਚ੍ਛਰਾਨਿ ਦੇਵਸ੍ਸ ਅਵਸ੍ਸਨ੍ਤਤ੍ਤਾ ਸਕਲਰਟ੍ਠਂ ਉਦ੍ਦਯ੍ਹਤਿ, ਮਨੁਸ੍ਸਾ ਦੁਕ੍ਖਿਤਾ, ਦੇਵਂ ਵਸ੍ਸਾਪੇਹਿ, ਦੇਵਾ’’ਤਿ. ਰਾਜਾ ਸੀਲਂ ਸਮਾਦਿਯਿਤ੍ਵਾ ਉਪੋਸਥਂ ਉਪਵਸਨ੍ਤੋਪਿ ਵਸ੍ਸਂ ਵਸ੍ਸਾਪੇਤੁਂ ਨਾਸਕ੍ਖਿ.

ਤਸ੍ਮਿਂ ਕਾਲੇ ਸਕ੍ਕੋ ਅਡ੍ਢਰਤ੍ਤਸਮਯੇ ਤਸ੍ਸ ਸਿਰਿਗਬ੍ਭਂ ਪਵਿਸਿਤ੍ਵਾ ਏਕੋਭਾਸਂ ਕਤ੍ਵਾ ਵੇਹਾਸੇ ਅਟ੍ਠਾਸਿ. ਰਾਜਾ ਤਂ ਦਿਸ੍ਵਾ ‘‘ਕੋਸਿ ਤ੍ਵ’’ਨ੍ਤਿ ਪੁਚ੍ਛਿ. ‘‘ਸਕ੍ਕੋਹਮਸ੍ਮੀ’’ਤਿ. ‘‘ਕੇਨਤ੍ਥੇਨਾਗਤੋਸੀ’’ਤਿ? ‘‘ਵਸ੍ਸਤਿ ਤੇ, ਮਹਾਰਾਜ, ਰਟ੍ਠੇ ਦੇਵੋ’’ਤਿ? ‘‘ਨ ਵਸ੍ਸਤੀ’’ਤਿ. ‘‘ਜਾਨਾਸਿ ਪਨਸ੍ਸ ਅਵਸ੍ਸਨਕਾਰਣ’’ਨ੍ਤਿ? ‘‘ਨ ਜਾਨਾਮਿ, ਸਕ੍ਕਾ’’ਤਿ. ‘‘ਮਹਾਰਾਜ, ਹਿਮਵਨ੍ਤਪਦੇਸੇ ਇਸਿਸਿਙ੍ਗੋ ਨਾਮ ਤਾਪਸੋ ਪਟਿਵਸਤਿ ਘੋਰਤਪੋ ਪਰਮਧਿਤਿਨ੍ਦ੍ਰਿਯੋ. ਸੋ ਨਿਬਦ੍ਧਂ ਦੇਵੇ ਵਸ੍ਸਨ੍ਤੇ ਕੁਜ੍ਝਿਤ੍ਵਾ ਆਕਾਸਂ ਓਲੋਕੇਸਿ, ਤਸ੍ਮਾ ਦੇਵੋ ਨ ਵਸ੍ਸਤੀ’’ਤਿ. ‘‘ਇਦਾਨਿ ਪਨੇਤ੍ਥ ਕਿਂ ਕਾਤਬ੍ਬ’’ਨ੍ਤਿ? ‘‘ਤਸ੍ਸ ਤਪੇ ਭਿਨ੍ਨੇ ਦੇਵੋ ਵਸ੍ਸਿਸ੍ਸਤੀ’’ਤਿ. ‘‘ਕੋ ਪਨਸ੍ਸ ਤਪਂ ਭਿਨ੍ਦਿਤੁਂ ਸਮਤ੍ਥੋ’’ਤਿ? ‘‘ਧੀਤਾ ਤੇ, ਮਹਾਰਾਜ, ਨਿਲ਼ਿਨਿਕਾ ਸਮਤ੍ਥਾ, ਤਂ ਪਕ੍ਕੋਸਾਪੇਤ੍ਵਾ ‘ਅਸੁਕਟ੍ਠਾਨਂ ਨਾਮ ਗਨ੍ਤ੍ਵਾ ਤਾਪਸਸ੍ਸ ਤਪਂ ਭਿਨ੍ਦਾਹੀ’ਤਿ ਪੇਸੇਹੀ’’ਤਿ. ਏਵਂ ਸੋ ਰਾਜਾਨਂ ਅਨੁਸਾਸਿਤ੍ਵਾ ਸਕਟ੍ਠਾਨਮੇਵ ਅਗਮਾਸਿ. ਰਾਜਾ ਪੁਨਦਿਵਸੇ ਅਮਚ੍ਚੇਹਿ ਸਦ੍ਧਿਂ ਮਨ੍ਤੇਤ੍ਵਾ ਧੀਤਰਂ ਪਕ੍ਕੋਸਾਪੇਤ੍ਵਾ ਪਠਮਂ ਗਾਥਮਾਹ –

੧.

‘‘ਉਦ੍ਦਯ੍ਹਤੇ ਜਨਪਦੋ, ਰਟ੍ਠਞ੍ਚਾਪਿ ਵਿਨਸ੍ਸਤਿ;

ਏਹਿ ਨਿਲ਼ਿਨਿਕੇ ਗਚ੍ਛ, ਤਂ ਮੇ ਬ੍ਰਾਹ੍ਮਣਮਾਨਯਾ’’ਤਿ.

ਤਤ੍ਥ ਤਂ ਮੇਤਿ ਤਂ ਮਮ ਅਨਤ੍ਥਕਾਰਿਂ ਬ੍ਰਾਹ੍ਮਣਂ ਅਤ੍ਤਨੋ ਵਸਂ ਆਨੇਹਿ, ਕਿਲੇਸਰਤਿਵਸੇਨਸ੍ਸ ਸੀਲਂ ਭਿਨ੍ਦਾਹੀਤਿ.

ਤਂ ਸੁਤ੍ਵਾ ਸਾ ਦੁਤਿਯਂ ਗਾਥਮਾਹ –

੨.

‘‘ਨਾਹਂ ਦੁਕ੍ਖਕ੍ਖਮਾ ਰਾਜ, ਨਾਹਂ ਅਦ੍ਧਾਨਕੋਵਿਦਾ;

ਕਥਂ ਅਹਂ ਗਮਿਸ੍ਸਾਮਿ, ਵਨਂ ਕੁਞ੍ਜਰਸੇਵਿਤ’’ਨ੍ਤਿ.

ਤਤ੍ਥ ਦੁਕ੍ਖਕ੍ਖਮਾਤਿ ਅਹਂ, ਮਹਾਰਾਜ, ਦੁਕ੍ਖਸ੍ਸ ਖਮਾ ਨ ਹੋਮਿ, ਅਦ੍ਧਾਨਮ੍ਪਿ ਨ ਜਾਨਾਮਿ, ਸਾਹਂ ਕਥਂ ਗਮਿਸ੍ਸਾਮੀਤਿ.

ਤਤੋ ਰਾਜਾ ਦ੍ਵੇ ਗਾਥਾਯੋ ਅਭਾਸਿ –

੩.

‘‘ਫੀਤਂ ਜਨਪਦਂ ਗਨ੍ਤ੍ਵਾ, ਹਤ੍ਥਿਨਾ ਚ ਰਥੇਨ ਚ;

ਦਾਰੁਸਙ੍ਘਾਟਯਾਨੇਨ, ਏਵਂ ਗਚ੍ਛ ਨਿਲ਼ਿਨਿਕੇ.

੪.

‘‘ਹਤ੍ਥਿਅਸ੍ਸਰਥੇ ਪਤ੍ਤੀ, ਗਚ੍ਛੇਵਾਦਾਯ ਖਤ੍ਤਿਯੇ;

ਤਵੇਵ ਵਣ੍ਣਰੂਪੇਨ, ਵਸਂ ਤਮਾਨਯਿਸ੍ਸਸੀ’’ਤਿ.

ਤਤ੍ਥ ਦਾਰੁਸਙ੍ਘਾਟਯਾਨੇਨਾਤਿ, ਅਮ੍ਮ, ਨਿਲ਼ਿਨਿਕੇ ਨ ਤ੍ਵਂ ਪਦਸਾ ਗਮਿਸ੍ਸਸਿ, ਫੀਤਂ ਪਨ ਸੁਭਿਕ੍ਖਂ ਖੇਮਂ ਅਤ੍ਤਨੋ ਜਨਪਦਂ ਹਤ੍ਥਿਵਾਹਨੇਹਿ ਚ ਰਥਵਾਹਨੇਹਿ ਚ ਗਨ੍ਤ੍ਵਾ ਤਤੋ ਪਰਮ੍ਪਿ ਅਜ੍ਝੋਕਾਸੇ ਪਟਿਚ੍ਛਨ੍ਨੇਨ ਵਯ੍ਹਾਦਿਨਾ ਉਦਕਟ੍ਠਾਨੇ ਨਾਵਾਸਙ੍ਖਾਤੇਨ ਦਾਰੁਸਙ੍ਘਾਟਯਾਨੇਨ ਗਚ੍ਛ. ਵਣ੍ਣਰੂਪੇਨਾਤਿ ਏਵਂ ਅਕਿਲਮਮਾਨਾ ਗਨ੍ਤ੍ਵਾ ਤਵ ਵਣ੍ਣੇਨ ਚੇਵ ਰੂਪਸਮ੍ਪਦਾਯ ਚ ਤਂ ਬ੍ਰਾਹ੍ਮਣਂ ਅਤ੍ਤਨੋ ਵਸਂ ਆਨਯਿਸ੍ਸਸੀਤਿ.

ਏਵਂ ਸੋ ਧੀਤਰਾ ਸਦ੍ਧਿਂ ਅਕਥੇਤਬ੍ਬਮ੍ਪਿ ਰਟ੍ਠਪਰਿਪਾਲਨਂ ਨਿਸ੍ਸਾਯ ਕਥੇਸਿ. ਸਾਪਿ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਅਥਸ੍ਸਾ ਸਬ੍ਬਂ ਦਾਤਬ੍ਬਯੁਤ੍ਤਕਂ ਦਤ੍ਵਾ ਅਮਚ੍ਚੇਹਿ ਸਦ੍ਧਿਂ ਉਯ੍ਯੋਜੇਸਿ. ਅਮਚ੍ਚਾ ਤਂ ਆਦਾਯ ਪਚ੍ਚਨ੍ਤਂ ਪਤ੍ਵਾ ਤਤ੍ਥ ਖਨ੍ਧਾਵਾਰਂ ਨਿਵਾਸਾਪੇਤ੍ਵਾ ਰਾਜਧੀਤਰਂ ਉਕ੍ਖਿਪਾਪੇਤ੍ਵਾ ਵਨਚਰਕੇਨ ਦੇਸਿਤੇਨ ਮਗ੍ਗੇਨ ਹਿਮਵਨ੍ਤਂ ਪਵਿਸਿਤ੍ਵਾ ਪੁਬ੍ਬਣ੍ਹਸਮਯੇ ਤਸ੍ਸ ਅਸ੍ਸਮਪਦਸ੍ਸ ਸਮੀਪਂ ਪਾਪੁਣਿਂਸੁ. ਤਸ੍ਮਿਂ ਖਣੇ ਬੋਧਿਸਤ੍ਤੋ ਪੁਤ੍ਤਂ ਅਸ੍ਸਮਪਦੇ ਨਿਵਾਸਾਪੇਤ੍ਵਾ ਸਯਂ ਫਲਾਫਲਤ੍ਥਾਯ ਅਰਞ੍ਞਂ ਪਵਿਟ੍ਠੋ ਹੋਤਿ. ਵਨਚਰਕੋ ਸਯਂ ਅਸ੍ਸਮਂ ਅਗਨ੍ਤ੍ਵਾ ਤਸ੍ਸ ਪਨ ਦਸ੍ਸਨਟ੍ਠਾਨੇ ਠਤ੍ਵਾ ਨਿਲ਼ਿਨਿਕਾਯ ਤਂ ਦਸ੍ਸੇਨ੍ਤੋ ਦ੍ਵੇ ਗਾਥਾ ਅਭਾਸਿ –

੫.

‘‘ਕਦਲੀਧਜਪਞ੍ਞਾਣੋ, ਆਭੁਜੀਪਰਿਵਾਰਿਤੋ;

ਏਸੋ ਪਦਿਸ੍ਸਤਿ ਰਮ੍ਮੋ, ਇਸਿਸਿਙ੍ਗਸ੍ਸ ਅਸ੍ਸਮੋ.

੬.

‘‘ਏਸੋ ਅਗ੍ਗਿਸ੍ਸ ਸਙ੍ਖਾਤੋ, ਏਸੋ ਧੂਮੋ ਪਦਿਸ੍ਸਤਿ;

ਮਞ੍ਞੇ ਨੋ ਅਗ੍ਗਿਂ ਹਾਪੇਤਿ, ਇਸਿਸਿਙ੍ਗੋ ਮਹਿਦ੍ਧਿਕੋ’’ਤਿ.

ਤਤ੍ਥ ਕਦਲੀਸਙ੍ਖਾਤਾ ਧਜਾ ਪਞ੍ਞਾਣਂ ਅਸ੍ਸਾਤਿ ਕਦਲੀਧਜਪਞ੍ਞਾਣੋ. ਆਭੁਜੀਪਰਿਵਾਰਿਤੋਤਿ ਭੁਜਪਤ੍ਤਵਨਪਰਿਕ੍ਖਿਤ੍ਤੋ. ਸਙ੍ਖਾਤੋਤਿ ਏਸੋ ਅਗ੍ਗਿ ਅਸ੍ਸ ਇਸਿਸਿਙ੍ਗਸ੍ਸ ਝਾਨੇਨ ਸਙ੍ਖਾਤੋ ਪਚ੍ਚਕ੍ਖਗਤੋ ਜਲਤਿ. ਮਞ੍ਞੇ ਨੋ ਅਗ੍ਗਿਨ੍ਤਿ ਅਗ੍ਗਿਂ ਨੋ ਹਾਪੇਤਿ ਜੁਹਤਿ ਪਰਿਚਰਤੀਤਿ ਮਞ੍ਞਾਮਿ.

ਅਮਚ੍ਚਾਪਿ ਬੋਧਿਸਤ੍ਤਸ੍ਸ ਅਰਞ੍ਞਂ ਪਵਿਟ੍ਠਵੇਲਾਯ ਅਸ੍ਸਮਂ ਪਰਿਵਾਰੇਤ੍ਵਾ ਆਰਕ੍ਖਂ ਠਪੇਤ੍ਵਾ ਰਾਜਧੀਤਰਂ ਇਸਿਵੇਸਂ ਗਾਹਾਪੇਤ੍ਵਾ ਸੁਵਣ੍ਣਚੀਰਕੇਨ ਨਿਵਾਸਨਪਾਰੁਪਨਂ ਕਤ੍ਵਾ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਤਨ੍ਤੁਬਦ੍ਧਂ ਚਿਤ੍ਤਗੇਣ੍ਡੁਕਂ ਗਾਹਾਪੇਤ੍ਵਾ ਅਸ੍ਸਮਪਦਂ ਪੇਸੇਤ੍ਵਾ ਸਯਂ ਬਹਿ ਰਕ੍ਖਨ੍ਤਾ ਅਟ੍ਠਂਸੁ. ਸਾ ਤੇਨ ਗੇਣ੍ਡੁਕੇਨ ਕੀਲ਼ਨ੍ਤੀ ਚਙ੍ਕਮਕੋਟਿਯਂ ਓਤਰਿ. ਤਸ੍ਮਿਂ ਖਣੇ ਇਸਿਸਿਙ੍ਗੋ ਪਣ੍ਣਸਾਲਦ੍ਵਾਰੇ ਪਾਸਾਣਫਲਕੇ ਨਿਸਿਨ੍ਨੋ ਹੋਤਿ. ਸੋ ਤਂ ਆਗਚ੍ਛਨ੍ਤਿਂ ਦਿਸ੍ਵਾ ਭੀਤਤਸਿਤੋ ਉਟ੍ਠਾਯ ਪਣ੍ਣਸਾਲਂ ਪਵਿਸਿਤ੍ਵਾ ਅਟ੍ਠਾਸਿ. ਸਾਪਿਸ੍ਸ ਪਣ੍ਣਸਾਲਦ੍ਵਾਰਂ ਗਨ੍ਤ੍ਵਾ ਕੀਲ਼ਿਯੇਵ. ਸਤ੍ਥਾ ਤਞ੍ਚ ਤਤੋ ਉਤ੍ਤਰਿ ਚ ਅਤ੍ਥਂ ਪਕਾਸੇਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੭.

‘‘ਤਞ੍ਚ ਦਿਸ੍ਵਾਨ ਆਯਨ੍ਤਿਂ, ਆਮੁਤ੍ਤਮਣਿਕੁਣ੍ਡਲਂ;

ਇਸਿਸਿਙ੍ਗੋ ਪਾਵਿਸਿ ਭੀਤੋ, ਅਸ੍ਸਮਂ ਪਣ੍ਣਛਾਦਨਂ.

੮.

‘‘ਅਸ੍ਸਮਸ੍ਸ ਚ ਸਾ ਦ੍ਵਾਰੇ, ਗੇਣ੍ਡੁਕੇਨਸ੍ਸ ਕੀਲ਼ਤਿ;

ਵਿਦਂਸਯਨ੍ਤੀ ਅਙ੍ਗਾਨਿ, ਗੁਯ੍ਹਂ ਪਕਾਸਿਤਾਨਿ ਚ.

੯.

‘‘ਤਞ੍ਚ ਦਿਸ੍ਵਾਨ ਕੀਲ਼ਨ੍ਤਿਂ, ਪਣ੍ਣਸਾਲਗਤੋ ਜਟੀ;

ਅਸ੍ਸਮਾ ਨਿਕ੍ਖਮਿਤ੍ਵਾਨ, ਇਦਂ ਵਚਨਮਬ੍ਰਵੀ’’ਤਿ.

ਤਤ੍ਥ ਗੇਣ੍ਡੁਕੇਨਸ੍ਸਾਤਿ ਅਸ੍ਸ ਇਸਿਸਿਙ੍ਗਸ੍ਸ ਅਸ੍ਸਮਦ੍ਵਾਰੇ ਗੇਣ੍ਡੁਕੇਨ ਕੀਲ਼ਤਿ. ਵਿਦਂਸਯਨ੍ਤੀਤਿ ਦਸ੍ਸੇਨ੍ਤੀ. ਗੁਯ੍ਹਂ ਪਕਾਸਿਤਾਨਿ ਚਾਤਿ ਗੁਯ੍ਹਞ੍ਚ ਰਹਸ੍ਸਙ੍ਗਂ ਪਕਾਸਿਤਾਨਿ ਚ ਪਾਕਟਾਨਿ ਮੁਖਹਤ੍ਥਾਦੀਨਿ. ਅਬ੍ਰਵੀਤਿ ਸੋ ਕਿਰ ਪਣ੍ਣਸਾਲਾਯ ਠਤ੍ਵਾ ਚਿਨ੍ਤੇਸਿ – ‘‘ਸਚਾਯਂ ਯਕ੍ਖੋ ਭਵੇਯ੍ਯ, ਪਣ੍ਣਸਾਲਂ ਪਵਿਸਿਤ੍ਵਾ ਮਂ ਮੁਰੁਮੁਰਾਪੇਤ੍ਵਾ ਖਾਦੇਯ੍ਯ, ਨਾਯਂ ਯਕ੍ਖੋ, ਤਾਪਸੋ ਭਵਿਸ੍ਸਤੀ’’ਤਿ ਅਸ੍ਸਮਾ ਨਿਕ੍ਖਮਿਤ੍ਵਾ ਪੁਚ੍ਛਨ੍ਤੋ ਗਾਥਮਾਹ –

੧੦.

‘‘ਅਮ੍ਭੋ ਕੋ ਨਾਮ ਸੋ ਰੁਕ੍ਖੋ, ਯਸ੍ਸ ਤੇਵਂਗਤਂ ਫਲਂ;

ਦੂਰੇਪਿ ਖਿਤ੍ਤਂ ਪਚ੍ਚੇਤਿ, ਨ ਤਂ ਓਹਾਯ ਗਚ੍ਛਤੀ’’ਤਿ.

ਤਤ੍ਥ ਯਸ੍ਸ ਤੇਵਂਗਤਂ ਫਲਨ੍ਤਿ ਯਸ੍ਸ ਤਵ ਰੁਕ੍ਖਸ੍ਸ ਏਵਂਗਤਿਕਂ ਮਨੋਰਮਂ ਫਲਂ. ਕੋ ਨਾਮ ਸੋ ਰੁਕ੍ਖੋਤਿ ਚਿਤ੍ਰਗੇਣ੍ਡੁਕਸ੍ਸ ਅਦਿਟ੍ਠਪੁਬ੍ਬਤ੍ਤਾ ‘‘ਰੁਕ੍ਖਫਲੇਨ ਤੇਨ ਭਵਿਤਬ੍ਬ’’ਨ੍ਤਿ ਮਞ੍ਞਮਾਨੋ ਏਵਂ ਪੁਚ੍ਛਤਿ.

ਅਥਸ੍ਸ ਸਾ ਰੁਕ੍ਖਂ ਆਚਿਕ੍ਖਨ੍ਤੀ ਗਾਥਮਾਹ –

੧੧.

‘‘ਅਸ੍ਸਮਸ੍ਸ ਮਮ ਬ੍ਰਹ੍ਮੇ, ਸਮੀਪੇ ਗਨ੍ਧਮਾਦਨੇ;

ਬਹਵੋ ਤਾਦਿਸਾ ਰੁਕ੍ਖਾ, ਯਸ੍ਸ ਤੇਵਂਗਤਂ ਫਲਂ;

ਦੂਰੇਪਿ ਖਿਤ੍ਤਂ ਪਚ੍ਚੇਤਿ, ਨ ਮਂ ਓਹਾਯ ਗਚ੍ਛਤੀ’’ਤਿ.

ਤਤ੍ਥ ਸਮੀਪੇ ਗਨ੍ਧਮਾਦਨੇਤਿ ਗਨ੍ਧਮਾਦਨਪਬ੍ਬਤੇ ਮਮ ਅਸ੍ਸਮਸ੍ਸ ਸਮੀਪੇ. ਯਸ੍ਸ ਤੇਵਂਗਤਨ੍ਤਿ ਯਸ੍ਸ ਏਵਂਗਤਂ, ਤ-ਕਾਰੋ ਬ੍ਯਞ੍ਜਨਸਨ੍ਧਿਕਰੋਤਿ.

ਇਤਿ ਸਾ ਮੁਸਾਵਾਦਂ ਅਭਾਸਿ. ਇਤਰੋਪਿ ਸਦ੍ਦਹਿਤ੍ਵਾ ‘‘ਤਾਪਸੋ ਏਸੋ’’ਤਿ ਸਞ੍ਞਾਯ ਪਟਿਸਨ੍ਥਾਰਂ ਕਰੋਨ੍ਤੋ ਗਾਥਮਾਹ –

੧੨.

‘‘ਏਤੂ ਭਵਂ ਅਸ੍ਸਮਿਮਂ ਅਦੇਤੁ, ਪਜ੍ਜਞ੍ਚ ਭਕ੍ਖਞ੍ਚ ਪਟਿਚ੍ਛ ਦਮ੍ਮਿ;

ਇਦਮਾਸਨਂ ਅਤ੍ਰ ਭਵਂ ਨਿਸੀਦਤੁ, ਇਤੋ ਭਵਂ ਮੂਲਫਲਾਨਿ ਭੁਞ੍ਜਤੂ’’ਤਿ.

ਤਤ੍ਥ ਅਸ੍ਸਮਿਮਨ੍ਤਿ ਅਸ੍ਸਮਂ ਇਮਂ ਭਵਂ ਪਵਿਸਤੁ. ਅਦੇਤੂਤਿ ਯਥਾਸਨ੍ਨਿਹਿਤਂ ਆਹਾਰਂ ਪਰਿਭੁਞ੍ਜਤੁ. ਪਜ੍ਜਨ੍ਤਿ ਪਾਦਬ੍ਭਞ੍ਜਨਂ. ਭਕ੍ਖਨ੍ਤਿ ਮਧੁਰਫਲਾਫਲਂ. ਪਟਿਚ੍ਛਾਤਿ ਪਟਿਗ੍ਗਣ੍ਹ. ਇਦਮਾਸਨਨ੍ਤਿ ਪਵਿਟ੍ਠਕਾਲੇ ਏਵਮਾਹ.

ਤਸ੍ਸਾ ਪਣ੍ਣਸਾਲਂ ਪਵਿਸਿਤ੍ਵਾ ਕਟ੍ਠਤ੍ਥਰਣੇ ਨਿਸੀਦਨ੍ਤਿਯਾ ਸੁਵਣ੍ਣਚੀਰਕੇ ਦ੍ਵਿਧਾ ਗਤੇ ਸਰੀਰਂ ਅਪ੍ਪਟਿਚ੍ਛਨ੍ਨਂ ਅਹੋਸਿ. ਤਾਪਸੋ ਮਾਤੁਗਾਮਸਰੀਰਸ੍ਸ ਅਦਿਟ੍ਠਪੁਬ੍ਬਤ੍ਤਾ ਤਂ ਦਿਸ੍ਵਾ ‘‘ਵਣ੍ਣੋ ਏਸੋ’’ਤਿ ਸਞ੍ਞਾਯ ਏਵਮਾਹ –

੧੩.

‘‘ਕਿਂ ਤੇ ਇਦਂ ਊਰੂਨਮਨ੍ਤਰਸ੍ਮਿਂ, ਸੁਪਿਚ੍ਛਿਤਂ ਕਣ੍ਹਰਿਵਪ੍ਪਕਾਸਤਿ;

ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ, ਕੋਸੇ ਨੁ ਤੇ ਉਤ੍ਤਮਙ੍ਗਂ ਪਵਿਟ੍ਠ’’ਨ੍ਤਿ.

ਤਤ੍ਥ ਸੁਪਿਚ੍ਛਿਤਨ੍ਤਿ ਦ੍ਵਿਨ੍ਨਂ ਊਰੂਨਂ ਸਮਾਗਮਕਾਲੇ ਸੁਫੁਸਿਤਂ ਸਿਪ੍ਪਿਪੁਟਮੁਖਸਣ੍ਠਾਨਂ. ਸੁਭਲਕ੍ਖਣੇਨ ਹਿ ਅਸਮਨ੍ਨਾਗਤਾਯ ਤਂ ਠਾਨਂ ਆਵਾਟਧਾਤੁਕਂ ਹੋਤਿ, ਸਮਨ੍ਨਾਗਤਾਯ ਅਬ੍ਭੁਨ੍ਨਤਂ ਸਿਪ੍ਪਿਪੁਟਮੁਖਸਣ੍ਠਾਨਂ. ਕਣ੍ਹਰਿਵਪ੍ਪਕਾਸਤੀਤਿ ਉਭੋਸੁ ਪਸ੍ਸੇਸੁ ਕਾਲ਼ਕਂ ਵਿਯ ਖਾਯਤਿ. ਕੋਸੇ ਨੁ ਤੇ ਉਤ੍ਤਮਙ੍ਗਂ ਪਵਿਟ੍ਠਨ੍ਤਿ ਤਵ ਉਤ੍ਤਮਙ੍ਗਂ ਲਿਙ੍ਗਸਣ੍ਠਾਨਂ ਨ ਪਞ੍ਞਾਯਤਿ, ਕਿਂ ਨੁ ਤਂ ਤਵ ਸਰੀਰਸਙ੍ਖਾਤੇ ਕੋਸੇ ਪਵਿਟ੍ਠਨ੍ਤਿ ਪੁਚ੍ਛਤਿ.

ਅਥ ਨਂ ਸਾ ਵਞ੍ਚਯਨ੍ਤੀ ਗਾਥਾਦ੍ਵਯਮਾਹ –

੧੪.

‘‘ਅਹਂ ਵਨੇ ਮੂਲਫਲੇਸਨਂ ਚਰਂ, ਆਸਾਦਯਿਂ ਅਚ੍ਛਂ ਸੁਘੋਰਰੂਪਂ;

ਸੋ ਮਂ ਪਤਿਤ੍ਵਾ ਸਹਸਾਜ੍ਝਪਤ੍ਤੋ, ਪਨੁਜ੍ਜ ਮਂ ਅਬ੍ਬਹਿ ਉਤ੍ਤਮਙ੍ਗਂ.

੧੫.

‘‘ਸ੍ਵਾਯਂ ਵਣੋ ਖਜ੍ਜਤਿ ਕਣ੍ਡੁਵਾਯਤਿ, ਸਬ੍ਬਞ੍ਚ ਕਾਲਂ ਨ ਲਭਾਮਿ ਸਾਤਂ;

ਪਹੋ ਭਵਂ ਕਣ੍ਡੁਮਿਮਂ ਵਿਨੇਤੁਂ, ਕੁਰੁਤਂ ਭਵਂ ਯਾਚਿਤੋ ਬ੍ਰਾਹ੍ਮਣਤ੍ਥ’’ਨ੍ਤਿ.

ਤਤ੍ਥ ਆਸਾਦਯਿਨ੍ਤਿ ਘਟ੍ਟੇਸਿਂ, ਆਗਚ੍ਛਨ੍ਤਂ ਦਿਸ੍ਵਾ ਲੇਡ੍ਡੁਨਾ ਪਹਰਿਨ੍ਤਿ ਅਤ੍ਥੋ. ਪਤਿਤ੍ਵਾਤਿ ਉਪਧਾਵਿਤ੍ਵਾ. ਸਹਸਾਜ੍ਝਪ੍ਪਤ੍ਤੋਤਿ ਮਮਂ ਸਹਸਾ ਅਜ੍ਝਪ੍ਪਤ੍ਤੋ ਸਮ੍ਪਤ੍ਤੋ. ਪਨੁਜ੍ਜਾਤਿ ਅਥ ਮਂ ਪੋਤੇਤ੍ਵਾ. ਅਬ੍ਬਹੀਤਿ ਮੁਖੇਨ ਮਮ ਉਤ੍ਤਮਙ੍ਗਂ ਲੁਞ੍ਚਿਤ੍ਵਾ ਪਕ੍ਕਾਮਿ, ਤਤੋ ਪਟ੍ਠਾਯ ਇਮਸ੍ਮਿਂ ਠਾਨੇ ਵਣੋ ਜਾਤੋ. ਸ੍ਵਾਯਨ੍ਤਿ ਸੋ ਅਯਂ ਤਤੋ ਪਟ੍ਠਾਯ ਮਯ੍ਹਂ ਵਣੋ ਖਜ੍ਜਤਿ ਚੇਵ ਕਣ੍ਡੁਵਞ੍ਚ ਕਰੋਤਿ, ਤਪ੍ਪਚ੍ਚਯਾ ਸਾਹਂ ਸਬ੍ਬਕਾਲਂ ਕਾਯਿਕਚੇਤਸਿਕਸੁਖਂ ਨ ਲਭਾਮਿ. ਪਹੋਤਿ ਪਹੁ ਸਮਤ੍ਥੋ. ਬ੍ਰਾਹ੍ਮਣਤ੍ਥਨ੍ਤਿ ਭਵਂ ਮਯਾ ਯਾਚਿਤੋ ਇਮਂ ਬ੍ਰਾਹ੍ਮਣਸ੍ਸ ਅਤ੍ਥਂ ਕਰੋਤੁ, ਇਦਂ ਮੇ ਦੁਕ੍ਖਂ ਹਰਾਹੀਤਿ ਵਦਤਿ.

ਸੋ ਤਸ੍ਸਾ ਮੁਸਾਵਾਦਂ ‘‘ਸਭਾਵੋ’’ਤਿ ਸਦ੍ਦਹਿਤ੍ਵਾ ‘‘ਸਚੇ ਤੇ ਏਵਂ ਸੁਖਂ ਹੋਤਿ, ਕਰਿਸ੍ਸਾਮੀ’’ਤਿ ਤਂ ਪਦੇਸਂ ਓਲੋਕੇਤ੍ਵਾ ਅਨਨ੍ਤਰਂ ਗਾਥਮਾਹ –

੧੬.

‘‘ਗਮ੍ਭੀਰਰੂਪੋ ਤੇ ਵਣੋ ਸਲੋਹਿਤੋ, ਅਪੂਤਿਕੋ ਵਣਗਨ੍ਧੋ ਮਹਾ ਚ;

ਕਰੋਮਿ ਤੇ ਕਿਞ੍ਚਿ ਕਸਾਯਯੋਗਂ, ਯਥਾ ਭਵਂ ਪਰਮਸੁਖੀ ਭਵੇਯ੍ਯਾ’’ਤਿ.

ਤਤ੍ਥ ਸਲੋਹਿਤੋਤਿ ਰਤ੍ਤੋਭਾਸੋ. ਅਪੂਤਿਕੋਤਿ ਪੂਤਿਮਂਸਰਹਿਤੋ. ਵਣਗਨ੍ਧੋਤਿ ਥੋਕਂ ਦੁਗ੍ਗਨ੍ਧੋ. ਕਸਾਯਯੋਗਨ੍ਤਿ ਅਹਂ ਕੇਚਿ ਰੁਕ੍ਖਕਸਾਯੇ ਗਹੇਤ੍ਵਾ ਤਵ ਏਕਂ ਕਸਾਯਯੋਗਂ ਕਰੋਮੀਤਿ.

ਤਤੋ ਨਿਲ਼ਿਨਿਕਾ ਗਾਥਮਾਹ

੧੭.

‘‘ਨ ਮਨ੍ਤਯੋਗਾ ਨ ਕਸਾਯਯੋਗਾ, ਨ ਓਸਧਾ ਬ੍ਰਹ੍ਮਚਾਰਿ ਕਮਨ੍ਤਿ;

ਯਂ ਤੇ ਮੁਦੁ ਤੇਨ ਵਿਨੇਹਿ ਕਣ੍ਡੁਂ, ਯਥਾ ਅਹਂ ਪਰਮਸੁਖੀ ਭਵੇਯ੍ਯ’’ਨ੍ਤਿ.

ਤਤ੍ਥ ਕਮਨ੍ਤੀਤਿ, ਭੋ ਬ੍ਰਹ੍ਮਚਾਰਿ, ਇਮਸ੍ਮਿਂ ਮਮ ਵਣੇ ਨੇਵ ਮਨ੍ਤਯੋਗਾ, ਨ ਕਸਾਯਯੋਗਾ, ਨ ਪੁਪ੍ਫਫਲਾਦੀਨਿ ਓਸਧਾਨਿ ਕਮਨ੍ਤਿ, ਅਨੇਕਵਾਰਂ ਕਤੇਹਿਪਿ ਤੇਹਿ ਏਤਸ੍ਸ ਫਾਸੁਕਭਾਵੋ ਨ ਭੂਤਪੁਬ੍ਬੋ. ਯਂ ਪਨ ਤੇ ਏਤਂ ਮੁਦੁ ਅਙ੍ਗਜਾਤਂ, ਤੇਨ ਘਟ੍ਟਿਯਮਾਨਸ੍ਸੇਵ ਤਸ੍ਸ ਕਣ੍ਡੁ ਨ ਹੋਤਿ, ਤਸ੍ਮਾ ਤੇਨ ਵਿਨੇਹਿ ਕਣ੍ਡੁਨ੍ਤਿ.

ਸੋ ‘‘ਸਚ੍ਚਂ ਏਸੋ ਭਣਤੀ’’ਤਿ ਸਲ੍ਲਕ੍ਖੇਤ੍ਵਾ ‘‘ਮੇਥੁਨਸਂਸਗ੍ਗੇਨ ਸੀਲਂ ਭਿਜ੍ਜਤਿ, ਝਾਨਂ ਅਨ੍ਤਰਧਾਯਤੀ’’ਤਿ ਅਜਾਨਨ੍ਤੋ ਮਾਤੁਗਾਮਸ੍ਸ ਅਦਿਟ੍ਠਪੁਬ੍ਬਤ੍ਤਾ ਮੇਥੁਨਧਮ੍ਮਸ੍ਸ ਚ ਅਜਾਨਨਭਾਵੇਨ ‘‘ਭੇਸਜ੍ਜ’’ਨ੍ਤਿ ਵਦਨ੍ਤਿਯਾ ਤਾਯ ਮੇਥੁਨਂ ਪਟਿਸੇਵਿ. ਤਾਵਦੇਵਸ੍ਸ ਸੀਲਂ ਭਿਜ੍ਜਿ, ਝਾਨਂ ਪਰਿਹਾਯਿ. ਸੋ ਦ੍ਵੇ ਤਯੋ ਵਾਰੇ ਸਂਸਗ੍ਗਂ ਕਤ੍ਵਾ ਕਿਲਨ੍ਤੋ ਹੁਤ੍ਵਾ ਨਿਕ੍ਖਮਿਤ੍ਵਾ ਸਰਂ ਓਰੁਯ੍ਹ ਨ੍ਹਤ੍ਵਾ ਪਟਿਪ੍ਪਸ੍ਸਦ੍ਧਦਰਥੋ ਆਗਨ੍ਤ੍ਵਾ ਪਣ੍ਣਸਾਲਾਯਂ ਨਿਸੀਦਿਤ੍ਵਾ ਪੁਨਪਿ ਤਂ ‘‘ਤਾਪਸੋ’’ਤਿ ਮਞ੍ਞਮਾਨੋ ਵਸਨਟ੍ਠਾਨਂ ਪੁਚ੍ਛਨ੍ਤੋ ਗਾਥਮਾਹ –

੧੮.

‘‘ਇਤੋ ਨੁ ਭੋਤੋ ਕਤਮੇਨ ਅਸ੍ਸਮੋ, ਕਚ੍ਚਿ ਭਵਂ ਅਭਿਰਮਸਿ ਅਰਞ੍ਞੇ;

ਕਚ੍ਚਿ ਨੁ ਤੇ ਮੂਲਫਲਂ ਪਹੂਤਂ, ਕਚ੍ਚਿ ਭਵਨ੍ਤਂ ਨ ਵਿਹਿਂਸਨ੍ਤਿ ਵਾਲ਼ਾ’’ਤਿ.

ਤਤ੍ਥ ਕਤਮੇਨਾਤਿ ਇਤੋ ਕਤਮੇਨ ਦਿਸਾਭਾਗੇਨ ਭੋਤੋ ਅਸ੍ਸਮੋ. ਭਵਨ੍ਤਿ ਆਲਪਨਮੇਤਂ.

ਤਤੋ ਨਿਲ਼ਿਨਿਕਾ ਚਤਸ੍ਸੋ ਗਾਥਾਯੋ ਅਭਾਸਿ –

੧੯.

‘‘ਇਤੋ ਉਜੁਂ ਉਤ੍ਤਰਾਯਂ ਦਿਸਾਯਂ, ਖੇਮਾ ਨਦੀ ਹਿਮਵਤਾ ਪਭਾਵੀ;

ਤਸ੍ਸਾ ਤੀਰੇ ਅਸ੍ਸਮੋ ਮਯ੍ਹ ਰਮ੍ਮੋ, ਅਹੋ ਭਵਂ ਅਸ੍ਸਮਂ ਮਯ੍ਹਂ ਪਸ੍ਸੇ.

੨੦.

‘‘ਅਮ੍ਬਾ ਚ ਸਾਲਾ ਤਿਲਕਾ ਚ ਜਮ੍ਬੁਯੋ, ਉਦ੍ਦਾਲਕਾ ਪਾਟਲਿਯੋ ਚ ਫੁਲ੍ਲਾ;

ਸਮਨ੍ਤਤੋ ਕਿਮ੍ਪੁਰਿਸਾਭਿਗੀਤਂ, ਅਹੋ ਭਵਂ ਅਸ੍ਸਮਂ ਮਯ੍ਹਂ ਪਸ੍ਸੇ.

੨੧.

‘‘ਤਾਲਾ ਚ ਮੂਲਾ ਚ ਫਲਾ ਚ ਮੇਤ੍ਥ, ਵਣ੍ਣੇਨ ਗਨ੍ਧੇਨ ਉਪੇਤਰੂਪਂ;

ਤਂ ਭੂਮਿਭਾਗੇਹਿ ਉਪੇਤਰੂਪਂ, ਅਹੋ ਭਵਂ ਅਸ੍ਸਮਂ ਮਯ੍ਹਂ ਪਸ੍ਸੇ.

੨੨.

‘‘ਫਲਾ ਚ ਮੂਲਾ ਚ ਪਹੂਤਮੇਤ੍ਥ, ਵਣ੍ਣੇਨ ਗਨ੍ਧੇਨ ਰਸੇਨੁਪੇਤਾ;

ਆਯਨ੍ਤਿ ਚ ਲੁਦ੍ਦਕਾ ਤਂ ਪਦੇਸਂ, ਮਾ ਮੇ ਤਤੋ ਮੂਲਫਲਂ ਅਹਾਸੁ’’ਨ੍ਤਿ.

ਤਤ੍ਥ ਉਤ੍ਤਰਾਯਨ੍ਤਿ ਉਤ੍ਤਰਾਯ. ਖੇਮਾਤਿ ਏਵਂਨਾਮਿਕਾ ਨਦੀ. ਹਿਮਵਤਾ ਪਭਾਵੀਤਿ ਹਿਮਵਨ੍ਤਤੋ ਪਵਤ੍ਤਤਿ. ਅਹੋਤਿ ਪਤ੍ਥਨਤ੍ਥੇ ਨਿਪਾਤੋ. ਉਦ੍ਦਾਲਕਾਤਿ ਵਾਤਘਾਤਕਾ. ਕਿਮ੍ਪੁਰਿਸਾਭਿਗੀਤਨ੍ਤਿ ਸਮਨ੍ਤਤੋ ਪਰਿਵਾਰੇਤ੍ਵਾ ਮਧੁਰਸਦ੍ਦੇਨ ਗਾਯਨ੍ਤੇਹਿ ਕਿਮ੍ਪੁਰਿਸੇਹਿ ਅਭਿਗੀਤਂ. ਤਾਲਾ ਚ ਮੂਲਾ ਚ ਫਲਾ ਚ ਮੇਤ੍ਥਾਤਿ ਏਤ੍ਥ ਮਮ ਅਸ੍ਸਮੇ ਪਾਸਾਦਿਕਾ ਤਾਲਰੁਕ੍ਖਾ ਚ ਤੇਸਞ੍ਞੇਵ ਵਣ੍ਣਗਨ੍ਧਾਦਿਸਮ੍ਪਨ੍ਨਾ ਕਨ੍ਦਸਙ੍ਖਾਤਾ ਮੂਲਾ ਚ ਫਲਾ ਚ. ਪਹੂਤਮੇਤ੍ਥਾਤਿ ਨਾਨਾਰੁਕ੍ਖਫਲਾ ਚ ਰੁਕ੍ਖਵਲ੍ਲਿਮੂਲਾ ਚ ਪਹੂਤਾ ਏਤ੍ਥ. ਮਾ ਮੇ ਤਤੋਤਿ ਤਂ ਮਮ ਅਸ੍ਸਮਪਦਂ ਸਮ੍ਬਹੁਲਾ ਲੁਦ੍ਦਕਾ ਆਗਚ੍ਛਨ੍ਤਿ, ਮਯਾ ਚੇਤ੍ਥ ਆਹਰਿਤ੍ਵਾ ਠਪਿਤਂ ਬਹੁ ਮਧੁਰਸਮੂਲਫਲਾਫਲਂ ਅਤ੍ਥਿ, ਤੇ ਮਯਿ ਚਿਰਾਯਨ੍ਤੇ ਮੂਲਫਲਾਫਲਂ ਹਰੇਯ੍ਯੁਂ. ਤੇ ਤਤੋ ਮਮ ਮੂਲਫਲਾਫਲਂ ਮਾ ਹਰਿਂਸੁ, ਤਸ੍ਮਾ ਸਚੇਪਿ ਮਯਾ ਸਦ੍ਧਿਂ ਆਗਨ੍ਤੁਕਾਮੋ, ਏਹਿ, ਨੋ ਚੇ, ਅਹਂ ਗਮਿਸ੍ਸਾਮੀਤਿ ਆਹ.

ਤਂ ਸੁਤ੍ਵਾ ਤਾਪਸੋ ਯਾਵ ਪਿਤੁ ਆਗਮਨਾ ਅਧਿਵਾਸਾਪੇਤੁਂ ਗਾਥਮਾਹ –

੨੩.

‘‘ਪਿਤਾ ਮਮਂ ਮੂਲਫਲੇਸਨਂ ਗਤੋ, ਇਦਾਨਿ ਆਗਚ੍ਛਤਿ ਸਾਯਕਾਲੇ;

ਉਭੋਵ ਗਚ੍ਛਾਮਸੇ ਅਸ੍ਸਮਂ ਤਂ, ਯਾਵ ਪਿਤਾ ਮੂਲਫਲਤੋ ਏਤੂ’’ਤਿ.

ਤਤ੍ਥ ਉਭੋਵ ਗਚ੍ਛਾਮਸੇਤਿ ਮਮ ਪਿਤੁ ਆਰੋਚੇਤ੍ਵਾ ਉਭੋਵ ਗਮਿਸ੍ਸਾਮ.

ਤਤੋ ਸਾ ਚਿਨ੍ਤੇਸਿ – ‘‘ਅਯਂ ਤਾਵ ਅਰਞ੍ਞੇਵ ਵਡ੍ਢਿਤਭਾਵੇਨ ਮਮ ਇਤ੍ਥਿਭਾਵਂ ਨ ਜਾਨਾਤਿ, ਪਿਤਾ ਪਨਸ੍ਸ ਮਂ ਦਿਸ੍ਵਾਵ ਜਾਨਿਤ੍ਵਾ ‘ਤ੍ਵਂ ਇਧ ਕਿਂ ਕਰੋਸੀ’ਤਿ ਕਾਜਕੋਟਿਯਾ ਪਹਰਿਤ੍ਵਾ ਸੀਸਮ੍ਪਿ ਮੇ ਭਿਨ੍ਦੇਯ੍ਯ, ਤਸ੍ਮਿਂ ਅਨਾਗਤੇਯੇਵ ਮਯਾ ਗਨ੍ਤੁਂ ਵਟ੍ਟਤਿ, ਆਗਮਨਕਮ੍ਮਮ੍ਪਿ ਮੇ ਨਿਟ੍ਠਿਤ’’ਨ੍ਤਿ. ਸਾ ਤਸ੍ਸ ਆਗਮਨੂਪਾਯਂ ਆਚਿਕ੍ਖਨ੍ਤੀ ਇਤਰਂ ਗਾਥਮਾਹ –

੨੪.

‘‘ਅਞ੍ਞੇ ਬਹੂ ਇਸਯੋ ਸਾਧੁਰੂਪਾ, ਰਾਜੀਸਯੋ ਅਨੁਮਗ੍ਗੇ ਵਸਨ੍ਤਿ;

ਤੇਯੇਵ ਪੁਚ੍ਛੇਸਿ ਮਮਸ੍ਸਮਂ ਤਂ, ਤੇ ਤਂ ਨਯਿਸ੍ਸਨ੍ਤਿ ਮਮਂ ਸਕਾਸੇ’’ਤਿ.

ਤਤ੍ਥ ਰਾਜੀਸਯੋਤਿ, ਸਮ੍ਮ, ਮਯਾ ਨ ਸਕ੍ਕਾ ਚਿਰਾਯਿਤੁਂ, ਅਞ੍ਞੇ ਪਨ ਸਾਧੁਸਭਾਵਾ ਰਾਜਿਸਯੋ ਚ ਬ੍ਰਾਹ੍ਮਣਿਸਯੋ ਚ ਅਨੁਮਗ੍ਗੇ ਮਮ ਅਸ੍ਸਮਮਗ੍ਗਪਸ੍ਸੇ ਵਸਨ੍ਤਿ, ਅਹਂ ਤੇਸਂ ਆਚਿਕ੍ਖਿਤ੍ਵਾ ਗਮਿਸ੍ਸਾਮਿ, ਤ੍ਵਂ ਤੇ ਪੁਚ੍ਛੇਯ੍ਯਾਸਿ, ਤੇ ਤਂ ਮਮ ਸਨ੍ਤਿਕਂ ਨਯਿਸ੍ਸਨ੍ਤੀਤਿ.

ਏਵਂ ਸਾ ਅਤ੍ਤਨੋ ਪਲਾਯਨੂਪਾਯਂ ਕਤ੍ਵਾ ਪਣ੍ਣਸਾਲਤੋ ਨਿਕ੍ਖਮਿਤ੍ਵਾ ਤਂ ਓਲੋਕੇਨ੍ਤਮੇਵ ‘‘ਤ੍ਵਂ ਨਿਵਤ੍ਤਾ’’ਤਿ ਵਤ੍ਵਾ ਆਗਮਨਮਗ੍ਗੇਨੇਵ ਅਮਚ੍ਚਾਨਂ ਸਨ੍ਤਿਕਂ ਅਗਮਾਸਿ. ਤੇ ਤਂ ਗਹੇਤ੍ਵਾ ਖਨ੍ਧਾਵਾਰਂ ਗਨ੍ਤ੍ਵਾ ਅਨੁਪੁਬ੍ਬੇਨ ਬਾਰਾਣਸਿਂ ਪਾਪੁਣਿਂਸੁ. ਸਕ੍ਕੋਪਿ ਤਂ ਦਿਵਸਮੇਵ ਤੁਸ੍ਸਿਤ੍ਵਾ ਸਕਲਰਟ੍ਠੇ ਦੇਵਂ ਵਸ੍ਸਾਪੇਸਿ, ਤਤੋ ਸੁਭਿਕ੍ਖਂ ਜਨਪਦਂ ਅਹੋਸਿ. ਇਸਿਸਿਙ੍ਗਤਾਪਸਸ੍ਸਪਿ ਤਾਯ ਪਕ੍ਕਨ੍ਤਮਤ੍ਤਾਯ ਏਵ ਕਾਯੇ ਡਾਹੋ ਉਪ੍ਪਜ੍ਜਿ. ਸੋ ਕਮ੍ਪਨ੍ਤੋ ਪਣ੍ਣਸਾਲਂ ਪਵਿਸਿਤ੍ਵਾ ਵਾਕਚੀਰਂ ਪਾਰੁਪਿਤ੍ਵਾ ਸੋਚਨ੍ਤੋ ਨਿਪਜ੍ਜਿ. ਬੋਧਿਸਤ੍ਤੋ ਸਾਯਂ ਆਗਨ੍ਤ੍ਵਾ ਪੁਤ੍ਤਂ ਅਪਸ੍ਸਨ੍ਤੋ ‘‘ਕਹਂ ਨੁ ਖੋ ਗਤੋ’’ਤਿ ਕਾਜਂ ਓਤਾਰੇਤ੍ਵਾ ਪਣ੍ਣਸਾਲਂ ਪਵਿਸਿਤ੍ਵਾ ਤਂ ਨਿਪਨ੍ਨਕਂ ਦਿਸ੍ਵਾ ‘‘ਤਾਤ, ਕਿਂ ਕਰੋਸੀ’’ਤਿ ਪਿਟ੍ਠਿਂ ਪਰਿਮਜ੍ਜਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੨੫.

‘‘ਨ ਤੇ ਕਟ੍ਠਾਨਿ ਭਿਨ੍ਨਾਨਿ, ਨ ਤੇ ਉਦਕਮਾਭਤਂ;

ਅਗ੍ਗੀਪਿ ਤੇ ਨ ਹਾਪਿਤੋ, ਕਿਂ ਨੁ ਮਨ੍ਦੋਵ ਝਾਯਸਿ.

੨੬.

‘‘ਭਿਨ੍ਨਾਨਿ ਕਟ੍ਠਾਨਿ ਹੁਤੋ ਚ ਅਗ੍ਗਿ, ਤਪਨੀਪਿ ਤੇ ਸਮਿਤਾ ਬ੍ਰਹ੍ਮਚਾਰੀ;

ਪੀਠਞ੍ਚ ਮਯ੍ਹਂ ਉਦਕਞ੍ਚ ਹੋਤਿ, ਰਮਸਿ ਤੁਵਂ ਬ੍ਰਹ੍ਮਭੂਤੋ ਪੁਰਤ੍ਥਾ.

੨੭.

‘‘ਅਭਿਨ੍ਨਕਟ੍ਠੋਸਿ ਅਨਾਭਤੋਦਕੋ, ਅਹਾਪਿਤਗ੍ਗੀਸਿ ਅਸਿਦ੍ਧਭੋਜਨੋ;

ਨ ਮੇ ਤੁਵਂ ਆਲਪਸੀ ਮਮਜ੍ਜ, ਨਟ੍ਠਂ ਨੁ ਕਿਂ ਚੇਤਸਿਕਞ੍ਚ ਦੁਕ੍ਖ’’ਨ੍ਤਿ.

ਤਤ੍ਥ ਭਿਨ੍ਨਾਨੀਤਿ ਅਰਞ੍ਞਤੋ ਉਦ੍ਧਟਾਨਿ. ਨ ਹਾਪਿਤੋਤਿ ਨ ਜਲਿਤੋ. ਭਿਨ੍ਨਾਨੀਤਿ ਪੁਬ੍ਬੇ ਤਯਾ ਮਮਾਗਮਨਵੇਲਾਯ ਕਟ੍ਠਾਨਿ ਉਦ੍ਧਟਾਨੇਵ ਹੋਨ੍ਤਿ. ਹੁਤੋ ਚ ਅਗ੍ਗੀਤਿ ਅਗ੍ਗਿ ਚ ਹੁਤੋ ਹੋਤਿ. ਤਪਨੀਤਿ ਵਿਸਿਬ੍ਬਨਅਗ੍ਗਿਸਙ੍ਖਾਤਾ ਤਪਨੀਪਿ ਤੇ ਸਮਿਤਾਵ ਸਯਮੇਵ ਸਂਵਿਦਹਿਤਾਵ ਹੋਤਿ. ਪੀਠਨ੍ਤਿ ਮਮ ਆਸਨਤ੍ਥਾਯ ਪੀਠਞ੍ਚ ਪਞ੍ਞਤ੍ਤਮੇਵ ਹੋਤਿ. ਉਦਕਞ੍ਚਾਤਿ ਪਾਦਧੋਵਨਉਦਕਮ੍ਪਿ ਉਪਟ੍ਠਾਪਿਤਮੇਵ ਹੋਤਿ. ਬ੍ਰਹ੍ਮਭੂਤੋਤਿ ਤੁਵਮ੍ਪਿ ਇਤੋ ਪੁਰਤ੍ਥਾ ਸੇਟ੍ਠਭੂਤੋ ਇਮਸ੍ਮਿਂ ਅਸ੍ਸਮੇ ਅਭਿਰਮਸਿ. ਅਭਿਨ੍ਨਕਟ੍ਠੋਸੀਤਿ ਸੋ ਦਾਨਿ ਅਜ੍ਜ ਅਨੁਦ੍ਧਟਕਟ੍ਠੋਸਿ. ਅਸਿਦ੍ਧਭੋਜਨੋਤਿ ਨ ਤੇ ਕਿਞ੍ਚਿ ਅਮ੍ਹਾਕਂ ਕਨ੍ਦਮੂਲਂ ਵਾ ਪਣ੍ਣਂ ਵਾ ਸੇਦਿਤਂ. ਮਮਜ੍ਜਾਤਿ, ਮਮ ਪੁਤ੍ਤ, ਅਜ੍ਜ ਨ ਮੇ ਤ੍ਵਂ ਆਲਪਸਿ. ਨਟ੍ਠਂ ਨੁ ਕਿਨ੍ਤਿ ਕਿਂ ਨੁ ਤੇ ਨਟ੍ਠਂ ਵਾ, ਕਿਂ ਚੇਤਸਿਕਂ ਵਾ ਦੁਕ੍ਖਂ, ਅਕ੍ਖਾਹਿ ਮੇ ਨਿਪਨ੍ਨਕਾਰਣਨ੍ਤਿ ਪੁਚ੍ਛਤਿ.

ਸੋ ਪਿਤੁ ਵਚਨਂ ਸੁਤ੍ਵਾ ਤਂ ਕਾਰਣਂ ਕਥੇਨ੍ਤੋ ਆਹ –

੨੮.

‘‘ਇਧਾਗਮਾ ਜਟਿਲੋ ਬ੍ਰਹ੍ਮਚਾਰੀ, ਸੁਦਸ੍ਸਨੇਯ੍ਯੋ ਸੁਤਨੂ ਵਿਨੇਤਿ;

ਨੇਵਾਤਿਦੀਘੋ ਨ ਪਨਾਤਿਰਸ੍ਸੋ, ਸੁਕਣ੍ਹਕਣ੍ਹਚ੍ਛਦਨੇਹਿ ਭੋਤੋ.

੨੯.

‘‘ਅਮਸ੍ਸੁਜਾਤੋ ਅਪੁਰਾਣਵਣ੍ਣੀ, ਆਧਾਰਰੂਪਞ੍ਚ ਪਨਸ੍ਸ ਕਣ੍ਠੇ;

ਦ੍ਵੇ ਯਮਾ ਗਣ੍ਡਾ ਉਰੇ ਸੁਜਾਤਾ, ਸੁਵਣ੍ਣਤਿਨ੍ਦੁਕਨਿਭਾ ਪਭਸ੍ਸਰਾ.

੩੦.

‘‘ਮੁਖਞ੍ਚ ਤਸ੍ਸ ਭੁਸਦਸ੍ਸਨੇਯ੍ਯਂ, ਕਣ੍ਣੇਸੁ ਲਮ੍ਬਨ੍ਤਿ ਚ ਕੁਞ੍ਚਿਤਗ੍ਗਾ;

ਤੇ ਜੋਤਰੇ ਚਰਤੋ ਮਾਣਵਸ੍ਸ, ਸੁਤ੍ਤਞ੍ਚ ਯਂ ਸਂਯਮਨਂ ਜਟਾਨਂ.

੩੧.

‘‘ਅਞ੍ਞਾ ਚ ਤਸ੍ਸ ਸਂਯਮਾਨਿ ਚਤਸ੍ਸੋ, ਨੀਲਾ ਪੀਤਾ ਲੋਹਿਤਿਕਾ ਚ ਸੇਤਾ;

ਤਾ ਪਿਂਸਰੇ ਚਰਤੋ ਮਾਣਵਸ੍ਸ, ਤਿਰਿਟਿਸਙ੍ਘਾਰਿਵ ਪਾਵੁਸਮ੍ਹਿ.

੩੨.

‘‘ਨ ਮਿਖਲਂ ਮੁਞ੍ਜਮਯਂ ਧਾਰੇਤਿ, ਨ ਸਨ੍ਥਰੇ ਨੋ ਪਨ ਪਬ੍ਬਜਸ੍ਸ;

ਤਾ ਜੋਤਰੇ ਜਘਨਨ੍ਤਰੇ ਵਿਲਗ੍ਗਾ, ਸਤੇਰਤਾ ਵਿਜ੍ਜੁਰਿਵਨ੍ਤਲਿਕ੍ਖੇ.

੩੩.

‘‘ਅਖੀਲਕਾਨਿ ਚ ਅਵਣ੍ਟਕਾਨਿ, ਹੇਟ੍ਠਾ ਨਭ੍ਯਾ ਕਟਿਸਮੋਹਿਤਾਨਿ;

ਅਘਟ੍ਟਿਤਾ ਨਿਚ੍ਚਕੀਲ਼ਂ ਕਰੋਨ੍ਤਿ, ਹਂ ਤਾਤ ਕਿਂਰੁਕ੍ਖਫਲਾਨਿ ਤਾਨਿ.

੩੪.

‘‘ਜਟਾ ਚ ਤਸ੍ਸ ਭੁਸਦਸ੍ਸਨੇਯ੍ਯਾ, ਪਰੋਸਤਂ ਵੇਲ੍ਲਿਤਗ੍ਗਾ ਸੁਗਨ੍ਧਾ;

ਦ੍ਵੇਧਾ ਸਿਰੋ ਸਾਧੁ ਵਿਭਤ੍ਤਰੂਪੋ, ਅਹੋ ਨੁ ਖੋ ਮਯ੍ਹ ਤਥਾ ਜਟਾਸ੍ਸੁ.

੩੫.

‘‘ਯਦਾ ਚ ਸੋ ਪਕਿਰਤਿ ਤਾ ਜਟਾਯੋ, ਵਣ੍ਣੇਨ ਗਨ੍ਧੇਨ ਉਪੇਤਰੂਪਾ;

ਨੀਲੁਪ੍ਪਲਂ ਵਾਤਸਮੇਰਿਤਂਵ, ਤਥੇਵ ਸਂਵਾਤਿ ਪਨਸ੍ਸਮੋ ਅਯਂ.

੩੬.

‘‘ਪਙ੍ਕੋ ਚ ਤਸ੍ਸ ਭੁਸਦਸ੍ਸਨੇਯ੍ਯੋ, ਨੇਤਾਦਿਸੋ ਯਾਦਿਸੋ ਮਯ੍ਹਂ ਕਾਯੇ;

ਸੋ ਵਾਯਤਿ ਏਰਿਤੋ ਮਾਲੁਤੇਨ, ਵਨਂ ਯਥਾ ਅਗ੍ਗਗਿਮ੍ਹੇ ਸੁਫੁਲ੍ਲਂ.

੩੭.

‘‘ਨਿਹਨ੍ਤਿ ਸੋ ਰੁਕ੍ਖਫਲਂ ਪਥਬ੍ਯਾ, ਸੁਚਿਤ੍ਤਰੂਪਂ ਰੁਚਿਰਂ ਦਸ੍ਸਨੇਯ੍ਯਂ;

ਖਿਤ੍ਤਞ੍ਚ ਤਸ੍ਸ ਪੁਨਰੇਹਿ ਹਤ੍ਥਂ, ਹਂ ਤਾਤ ਕਿਂਰੁਕ੍ਖਫਲਂ ਨੁ ਖੋ ਤਂ.

੩੮.

‘‘ਦਨ੍ਤਾ ਚ ਤਸ੍ਸ ਭੁਸਦਸ੍ਸਨੇਯ੍ਯਾ, ਸੁਦ੍ਧਾ ਸਮਾ ਸਙ੍ਖਵਰੂਪਪਨ੍ਨਾ;

ਮਨੋ ਪਸਾਦੇਨ੍ਤਿ ਵਿਵਰਿਯਮਾਨਾ, ਨ ਹਿ ਨੂਨ ਸੋ ਸਾਕਮਖਾਦਿ ਤੇਹਿ.

੩੯.

‘‘ਅਕਕ੍ਕਸਂ ਅਗ੍ਗਲ਼ਿਤਂ ਮੁਹੁਂ ਮੁਦੁਂ, ਉਜੁਂ ਅਨੁਦ੍ਧਤਂ ਅਚਪਲਮਸ੍ਸ ਭਾਸਿਤਂ;

ਰੁਦਂ ਮਨੁਞ੍ਞਂ ਕਰਵੀਕਸੁਸ੍ਸਰਂ, ਹਦਯਙ੍ਗਮਂ ਰਞ੍ਜਯਤੇਵ ਮੇ ਮਨੋ.

੪੦.

‘‘ਬਿਨ੍ਦੁਸ੍ਸਰੋ ਨਾਤਿਵਿਸਟ੍ਠਵਾਕ੍ਯੋ, ਨ ਨੂਨ ਸਜ੍ਝਾਯਮਤਿਪ੍ਪਯੁਤ੍ਤੋ;

ਇਚ੍ਛਾਮਿ ਭੋ ਤਂ ਪੁਨਦੇਵ ਦਟ੍ਠੁਂ, ਮਿਤ੍ਤੋ ਹਿ ਮੇ ਮਾਣਵੋਹੁ ਪੁਰਤ੍ਥਾ.

੪੧.

‘‘ਸੁਸਨ੍ਧਿ ਸਬ੍ਬਤ੍ਥ ਵਿਮਟ੍ਠਿਮਂ ਵਣਂ, ਪੁਥੂ ਸੁਜਾਤਂ ਖਰਪਤ੍ਤਸਨ੍ਨਿਭਂ;

ਤੇਨੇਵ ਮਂ ਉਤ੍ਤਰਿਯਾਨ ਮਾਣਵੋ, ਵਿਵਰਿਤਂ ਊਰੁਂ ਜਘਨੇਨ ਪਿਲ਼ਯਿ.

੪੨.

‘‘ਤਪਨ੍ਤਿ ਆਭਨ੍ਤਿ ਵਿਰੋਚਰੇ ਚ, ਸਤੇਰਤਾ ਵਿਜ੍ਜੁਰਿਵਨ੍ਤਲਿਕ੍ਖੇ;

ਬਾਹਾ ਮੁਦੂ ਅਞ੍ਜਨਲੋਮਸਾਦਿਸਾ, ਵਿਚਿਤ੍ਰਵਟ੍ਟਙ੍ਗੁਲਿਕਾਸ੍ਸ ਸੋਭਰੇ.

੪੩.

‘‘ਅਕਕ੍ਕਸਙ੍ਗੋ ਨ ਚ ਦੀਘਲੋਮੋ, ਨਖਾਸ੍ਸ ਦੀਘਾ ਅਪਿ ਲੋਹਿਤਗ੍ਗਾ;

ਮੁਦੂਹਿ ਬਾਹਾਹਿ ਪਲਿਸ੍ਸਜਨ੍ਤੋ, ਕਲ੍ਯਾਣਰੂਪੋ ਰਮਯਂ ਉਪਟ੍ਠਹਿ.

੪੪.

‘‘ਦੁਮਸ੍ਸ ਤੂਲੂਪਨਿਭਾ ਪਭਸ੍ਸਰਾ, ਸੁਵਣ੍ਣਕਮ੍ਬੁਤਲਵਟ੍ਟਸੁਚ੍ਛਵਿ;

ਹਤ੍ਥਾ ਮੁਦੂ ਤੇਹਿ ਮਂ ਸਮ੍ਫੁਸਿਤ੍ਵਾ, ਇਤੋ ਗਤੋ ਤੇਨ ਮਂ ਦਹਨ੍ਤਿ ਤਾਤ.

੪੫.

‘‘ਨ ਨੂਨ ਸੋ ਖਾਰਿਵਿਧਂ ਅਹਾਸਿ, ਨ ਨੂਨ ਸੋ ਕਟ੍ਠਾਨਿ ਸਯਂ ਅਭਞ੍ਜਿ;

ਨ ਨੂਨ ਸੋ ਹਨ੍ਤਿ ਦੁਮੇ ਕੁਠਾਰਿਯਾ, ਨ ਹਿਸ੍ਸ ਹਤ੍ਥੇਸੁ ਖਿਲਾਨਿ ਅਤ੍ਥਿ.

੪੬.

‘‘ਅਚ੍ਛੋ ਚ ਖੋ ਤਸ੍ਸ ਵਣਂ ਅਕਾਸਿ, ਸੋ ਮਂਬ੍ਰਵਿ ‘ਸੁਖਿਤਂ ਮਂ ਕਰੋਹਿ’;

ਤਾਹਂ ਕਰਿਂ ਤੇਨ ਮਮਾਸਿ ਸੋਖ੍ਯਂ, ਸੋ ਚਬ੍ਰਵਿ ‘ਸੁਖਿਤੋਸ੍ਮੀ’ਤਿ ਬ੍ਰਹ੍ਮੇ.

੪੭.

‘‘ਅਯਞ੍ਚ ਤੇ ਮਾਲੁਵਪਣ੍ਣਸਨ੍ਥਤਾ, ਵਿਕਿਣ੍ਣਰੂਪਾਵ ਮਯਾ ਚ ਤੇਨ ਚ;

ਕਿਲਨ੍ਤਰੂਪਾ ਉਦਕੇ ਰਮਿਤ੍ਵਾ, ਪੁਨਪ੍ਪੁਨਂ ਪਣ੍ਣਕੁਟਿਂ ਵਜਾਮ.

੪੮.

‘‘ਨ ਮਜ੍ਜ ਮਨ੍ਤਾ ਪਟਿਭਨ੍ਤਿ ਤਾਤ, ਨ ਅਗ੍ਗਿਹੁਤ੍ਤਂ ਨਪਿ ਯਞ੍ਞਤਨ੍ਤਂ;

ਨ ਚਾਪਿ ਤੇ ਮੂਲਫਲਾਨਿ ਭੁਞ੍ਜੇ, ਯਾਵ ਨ ਪਸ੍ਸਾਮਿ ਤਂ ਬ੍ਰਹ੍ਮਚਾਰਿਂ.

੪੯.

‘‘ਅਦ੍ਧਾ ਪਜਾਨਾਸਿ ਤੁਵਮ੍ਪਿ ਤਾਤ, ਯਸ੍ਸਂ ਦਿਸਂ ਵਸਤੇ ਬ੍ਰਹ੍ਮਚਾਰੀ;

ਤਂ ਮਂ ਦਿਸਂ ਪਾਪਯ ਤਾਤ ਖਿਪ੍ਪਂ, ਮਾ ਤੇ ਅਹਂ ਅਮਰਿਮਸ੍ਸਮਮ੍ਹਿ.

੫੦.

‘‘ਵਿਚਿਤ੍ਰਫੁਲ੍ਲਞ੍ਹਿ ਵਨਂ ਸੁਤਂ ਮਯਾ, ਦਿਜਾਭਿਘੁਟ੍ਠਂ ਦਿਜਸਙ੍ਘਸੇਵਿਤਂ;

ਤਂ ਮਂ ਵਨਂ ਪਾਪਯ ਤਾਤ ਖਿਪ੍ਪਂ, ਪੁਰਾ ਤੇ ਪਾਣਂ ਵਿਜਹਾਮਿ ਅਸ੍ਸਮੇ’’ਤਿ.

ਤਤ੍ਥ ਇਧਾਗਮਾਤਿ, ਤਾਤ, ਇਮਂ ਅਸ੍ਸਮਪਦਂ ਆਗਤੋ. ਸੁਦਸ੍ਸਨੇਯ੍ਯੋਤਿ ਸੁਟ੍ਠੁ ਦਸ੍ਸਨੇਯ੍ਯੋ. ਸੁਤਨੂਤਿ ਸੁਟ੍ਠੁ ਤਨੁਕੋ ਨਾਤਿਕਿਸੋ ਨਾਤਿਥੂਲੋ. ਵਿਨੇਤੀਤਿ ਅਤ੍ਤਨੋ ਸਰੀਰਪ੍ਪਭਾਯ ਅਸ੍ਸਮਪਦਂ ਏਕੋਭਾਸਂ ਵਿਯ ਵਿਨੇਤਿ ਪੂਰੇਤਿ. ਸੁਕਣ੍ਹਕਣ੍ਹਚ੍ਛਦਨੇਹਿ ਭੋਤੋਤਿ, ਤਾਤ, ਤਸ੍ਸ ਭੋਤੋ ਸੁਕਣ੍ਹੇਹਿ ਕਣ੍ਹਚ੍ਛਦਨੇਹਿ ਭਮਰਵਣ੍ਣੇਹਿ ਕੇਸੇਹਿ ਸੁਕਣ੍ਹਸੀਸਂ ਸੁਮਜ੍ਜਿਤਮਣਿਮਯਂ ਵਿਯ ਖਾਯਤਿ. ਅਮਸ੍ਸੂਜਾਤੋਤਿ ਨ ਤਾਵਸ੍ਸ ਮਸ੍ਸੁ ਜਾਯਤਿ, ਤਰੁਣੋਯੇਵ. ਅਪੁਰਾਣਵਣ੍ਣੀਤਿ ਅਚਿਰਪਬ੍ਬਜਿਤੋ. ਆਧਾਰਰੂਪਞ੍ਚ ਪਨਸ੍ਸ ਕਣ੍ਠੇਤਿ ਕਣ੍ਠੇ ਚ ਪਨਸ੍ਸ ਅਮ੍ਹਾਕਂ ਭਿਕ੍ਖਾਭਾਜਨਟ੍ਠਪਨਂ ਪਤ੍ਤਾਧਾਰਸਦਿਸਂ ਪਿਲ਼ਨ੍ਧਨਂ ਅਤ੍ਥੀਤਿ ਮੁਤ੍ਤਾਹਾਰਂ ਸਨ੍ਧਾਯ ਵਦਤਿ. ਗਣ੍ਡਾਤਿ ਥਨੇ ਸਨ੍ਧਾਯਾਹ. ਉਰੇ ਸੁਜਾਤਾਤਿ ਉਰਮ੍ਹਿ ਸੁਜਾਤਾ. ‘‘ਉਰਤੋ’’ਤਿਪਿ ਪਾਠੋ. ਪਭਸ੍ਸਰਾਤਿ ਪਭਾਸਮ੍ਪਨ੍ਨਾ. ‘‘ਪਭਾਸਰੇ’’ਤਿਪਿ ਪਾਠੋ, ਓਭਾਸਨ੍ਤੀਤਿ ਅਤ੍ਥੋ.

ਭੁਸਦਸ੍ਸਨੇਯ੍ਯਨ੍ਤਿ ਅਤਿਵਿਯ ਦਸ੍ਸਨੀਯਂ. ਕੁਞ੍ਚਿਤਗ੍ਗਾਤਿ ਸੀਹਕੁਣ੍ਡਲਂ ਸਨ੍ਧਾਯ ਵਦਤਿ. ਸੁਤ੍ਤਞ੍ਚਾਤਿ ਯਂ ਤਸ੍ਸ ਜਟਾਬਨ੍ਧਨਸੁਤ੍ਤਂ, ਤਮ੍ਪਿ ਜੋਤਤਿ ਪਭਂ ਮੁਞ੍ਚਤਿ. ‘‘ਸਂਯਮਾਨਿ ਚਤਸ੍ਸੋ’’ਤਿ ਇਮਿਨਾ ਮਣਿਸੁਵਣ੍ਣਪਵਾਲ਼ਰਜਤਮਯਾਨਿ ਚਤ੍ਤਾਰਿ ਪਿਲ਼ਨ੍ਧਨਾਨਿ ਦਸ੍ਸੇਤਿ. ਤਾ ਪਿਂਸਰੇਤਿ ਤਾਨਿ ਪਿਲ਼ਨ੍ਧਨਾਨਿ ਪਾਵੁਸਮ੍ਹਿ ਪਵੁਟ੍ਠੇ ਦੇਵੇ ਤਿਰਿਟਿਸਙ੍ਘਾ ਵਿਯ ਵਿਰਵਨ੍ਤਿ. ਮਿਖਲਨ੍ਤਿ ਮੇਖਲਂ, ਅਯਮੇਵ ਵਾ ਪਾਠੋ. ਇਦਂ ਨਿਵਤ੍ਥਕਞ੍ਚਨਚੀਰਕਂ ਸਨ੍ਧਾਯਾਹ. ਨ ਸਨ੍ਥਰੇਤਿ ਨ ਵਾਕੇ. ਇਦਂ ਵੁਤ੍ਤਂ ਹੋਤਿ – ਤਾਤ, ਯਥਾ ਮਯਂ ਤਿਣਮਯਂ ਵਾ ਵਾਕਮਯਂ ਵਾ ਚੀਰਕਂ ਧਾਰੇਮ, ਨ ਤਥਾ ਸੋ, ਸੋ ਪਨ ਸੁਵਣ੍ਣਚੀਰਕਂ ਧਾਰੇਤੀਤਿ. ਅਖੀਲਕਾਨੀਤਿ ਅਤਚਾਨਿ ਨਿਪ੍ਪਣ੍ਣਾਨਿ. ਕਟਿਸਮੋਹਿਤਾਨੀਤਿ ਕਟਿਯਂ ਬਦ੍ਧਾਨਿ. ਨਿਚ੍ਚਕੀਲ਼ਂ ਕਰੋਨ੍ਤੀਤਿ ਅਘਟ੍ਟਿਤਾਨਿਪਿ ਨਿਚ੍ਚਕਾਲਂ ਕੀਲ਼ਾਯਨ੍ਤਿ. ਹਂ, ਤਾਤਾਤਿ ਹਮ੍ਭੋ, ਤਾਤ. ਕਿਂ ਰੁਕ੍ਖਫਲਾਨਿ ਤਾਨੀਤਿ ਤਾਨਿ ਤਸ੍ਸ ਮਾਣਵਸ੍ਸ ਸੁਤ੍ਤਾਰੁਲ਼੍ਹਾਨਿ ਕਟਿਯਂ ਬਦ੍ਧਾਨਿ ਕਤਰਰੁਕ੍ਖਫਲਾਨਿ ਨਾਮਾਤਿ ਮਣਿਸਙ੍ਘਾਟਿਂ ਸਨ੍ਧਾਯਾਹ.

ਜਟਾਤਿ ਜਟਾਮਣ੍ਡਲਾਕਾਰੇਨ ਬਦ੍ਧਰਤਨਮਿਸ੍ਸਕਕੇਸਵਟ੍ਟਿਯੋ ਸਨ੍ਧਾਯਾਹ. ਵੇਲ੍ਲਿਤਗ੍ਗਾਤਿ ਕੁਞ੍ਚਿਤਗ੍ਗਾ. ਦ੍ਵੇਧਾਸਿਰੋਤਿ ਤਸ੍ਸ ਸੀਸਂ ਦ੍ਵੇਧਾ ਕਤ੍ਵਾ ਬਦ੍ਧਾਨਂ ਜਟਾਨਂ ਵਸੇਨ ਸੁਟ੍ਠੁ ਵਿਭਤ੍ਤਰੂਪਂ. ਤਥਾਤਿ ਯਥਾ ਤਸ੍ਸ ਮਾਣਵਸ੍ਸ ਜਟਾ, ਤਥਾ ਤੁਮ੍ਹੇਹਿ ਮਮ ਨ ਬਦ੍ਧਾ, ਅਹੋ ਵਤ ਮਮਪਿ ਤਥਾ ਅਸ੍ਸੂਤਿ ਪਤ੍ਥੇਨ੍ਤੋ ਆਹ. ਉਪੇਤਰੂਪਾਤਿ ਉਪੇਤਸਭਾਵਾ. ਵਾਤਸਮੇਰਿਤਂਵਾਤਿ ਯਥਾ ਨਾਮ ਨੀਲੁਪ੍ਪਲਂ ਵਾਤੇਨ ਸਮੀਰਿਤਂ, ਤਥੇਵ ਅਯਂ ਇਮਸ੍ਮਿਂ ਵਨਸਣ੍ਡੇ ਅਸ੍ਸਮੋ ਸਂਵਾਤਿ. ਨੇਤਾਦਿਸੋਤਿ, ਤਾਤ, ਯਾਦਿਸੋ ਮਮ ਕਾਯੇ ਪਙ੍ਕੋ, ਨੇਤਾਦਿਸੋ ਤਸ੍ਸ ਸਰੀਰੇ. ਸੋ ਹਿ ਦਸ੍ਸਨੀਯੋ ਚੇਵ ਸੁਗਨ੍ਧੋ ਚ. ਅਗ੍ਗਗਿਮ੍ਹੇਤਿ ਵਸਨ੍ਤਸਮਯੇ.

ਨਿਹਨ੍ਤੀਤਿ ਪਹਰਤਿ. ਕਿਂ ਰੁਕ੍ਖਫਲਂ ਨੁ ਖੋ ਤਨ੍ਤਿ ਕਤਰਰੁਕ੍ਖਸ੍ਸ ਨੁ ਖੋ ਤਂ ਫਲਂ. ਸਙ੍ਖਵਰੂਪਪਨ੍ਨਾਤਿ ਸੁਧੋਤਸਙ੍ਖਪਟਿਭਾਗਾ. ਨ ਹਿ ਨੂਨ ਸੋ ਸਾਕਮਖਾਦਿ ਤੇਹੀਤਿ ਨ ਨੂਨ ਸੋ ਮਾਣਵੋ ਮਯਂ ਵਿਯ ਤੇਹਿ ਦਨ੍ਤੇਹਿ ਰੁਕ੍ਖਪਣ੍ਣਾਨਿ ਚੇਵ ਮੂਲਫਲਾਫਲਾਨਿ ਚ ਖਾਦਿ. ਅਮ੍ਹਾਕਞ੍ਹਿ ਤਾਨਿ ਖਾਦਨ੍ਤਾਨਂ ਸਬਲਾ ਪਣ੍ਣਵਣ੍ਣਾ ਦਨ੍ਤਾਤਿ ਦੀਪੇਤਿ.

ਅਕਕ੍ਕਸਨ੍ਤਿ, ਤਾਤ, ਤਸ੍ਸ ਭਾਸਿਤਂ ਅਫਰੁਸਂ ਅਗਲ਼ਿਤਂ, ਪੁਨਪ੍ਪੁਨਂ ਵਦਨ੍ਤਸ੍ਸਾਪਿ ਮਧੁਰਤਾਯ ਮੁਹੁਂ ਮੁਦੁਂ, ਅਪਮੁਸ੍ਸਤਾਯ ਉਜੁਂ, ਅਵਿਕ੍ਖਿਤ੍ਤਤਾਯ ਅਨੁਦ੍ਧਟਂ, ਪਤਿਟ੍ਠਿਤਤਾਯ ਅਚਪਲਂ. ਰੁਦਨ੍ਤਿ ਭਾਸਮਾਨਸ੍ਸ ਸਰਸਙ੍ਖਾਤਂ ਰੁਦਮ੍ਪਿ ਮਨੋਹਰਂ ਕਰਵੀਕਸ੍ਸ ਵਿਯ ਸੁਸ੍ਸਰਂ ਸੁਮਧੁਰਂ. ਰਞ੍ਜਯਤੇਵਾਤਿ ਮਮ ਮਨੋ ਰਞ੍ਜਤਿਯੇਵ. ਬਿਨ੍ਦੁਸ੍ਸਰੋਤਿ ਪਿਣ੍ਡਿਤਸ੍ਸਰੋ. ਮਾਣਵੋਹੂਤਿ ਸੋ ਹਿ ਮਾਣਵੋ ਪੁਰਤ੍ਥਾ ਮਮ ਮਿਤ੍ਤੋ ਅਹੁ.

ਸੁਸਨ੍ਧਿ ਸਬ੍ਬਤ੍ਥ ਵਿਮਟ੍ਠਿਮਂ ਵਣਨ੍ਤਿ ਤਾਤ ਤਸ੍ਸ ਮਾਣਵਸ੍ਸ ਊਰੂਨਂ ਅਨ੍ਤਰੇ ਏਕਂ ਵਣਂ ਅਤ੍ਥਿ, ਤਂ ਸੁਸਨ੍ਧਿ ਸੁਫੁਸਿਤਂ ਸਿਪ੍ਪਿਪੁਟਮੁਖਸਦਿਸਂ, ਸਬ੍ਬਤ੍ਥ ਵਿਮਟ੍ਠਂ ਸਮਨ੍ਤਤੋ ਮਟ੍ਠਂ. ਪੁਥੂਤਿ ਮਹਨ੍ਤਂ. ਸੁਜਾਤਨ੍ਤਿ ਸੁਸਣ੍ਠਿਤਂ. ਖਰਪਤ੍ਤਸਨ੍ਨਿਭਨ੍ਤਿ ਸੁਪੁਪ੍ਫਿਤਪਦੁਮਮਕੁਲ਼ਸਨ੍ਨਿਭਂ. ਉਤ੍ਤਰਿਯਾਨਾਤਿ ਉਤ੍ਤਰਿਤ੍ਵਾ ਅਵਤ੍ਥਰਿਤ੍ਵਾ. ਪਿਲ਼ਯੀਤਿ ਪੀਲ਼ੇਸਿ. ਤਪਨ੍ਤੀਤਿ ਤਸ੍ਸ ਮਾਣਵਸ੍ਸ ਸਰੀਰਤੋ ਨਿਚ੍ਛਰਨ੍ਤਾ ਸੁਵਣ੍ਣਵਣ੍ਣਰਂਸਿਯੋ ਜਲਨ੍ਤਿ ਓਭਾਸਨ੍ਤਿ ਵਿਰੋਚਨ੍ਤਿ ਚ. ਬਾਹਾਤਿ ਬਾਹਾਪਿਸ੍ਸ ਮੁਦੂ. ਅਞ੍ਜਨਲੋਮਸਾਦਿਸਾਤਿ ਅਞ੍ਜਨਸਦਿਸੇਹਿ ਲੋਮੇਹਿ ਸਮਨ੍ਨਾਗਤਾ. ਵਿਚਿਤ੍ਰਵਟ੍ਟਙ੍ਗੁਲਿਕਾਸ੍ਸ ਸੋਭਰੇਤਿ ਹਤ੍ਥਾਪਿਸ੍ਸ ਵਰਲਕ੍ਖਣਵਿਚਿਤ੍ਰਾਹਿ ਪਵਾਲਙ੍ਕੁਰਸਦਿਸਾਹਿ ਵਟ੍ਟਙ੍ਗੁਲੀਹਿ ਸਮਨ੍ਨਾਗਤਾ ਸੋਭਨ੍ਤਿ.

ਅਕਕ੍ਕਸਙ੍ਗੋਤਿ ਕਚ੍ਛੁਪੀਲ਼ਕਾਦਿਰਹਿਤਅਙ੍ਗਪਚ੍ਚਙ੍ਗੋ. ਰਮਯਂ ਉਪਟ੍ਠਹੀਤਿ ਮਂ ਰਮਯਨ੍ਤੋ ਉਪਟ੍ਠਹਿ ਪਰਿਚਰਿ. ਤੂਲੂਪਨਿਭਾਤਿ ਮੁਦੁਭਾਵਸ੍ਸ ਉਪਮਾ. ਸੁਵਣ੍ਣਕਮ੍ਬੁਤਲਵਟ੍ਟਸੁਚ੍ਛਵੀਤਿ ਸੁਵਣ੍ਣਮਯਂ ਆਦਾਸਤਲਂ ਵਿਯ ਵਟ੍ਟਾ ਚ ਸੁਚ੍ਛਵਿ ਚ, ਪਰਿਮਣ੍ਡਲਤਲਾ ਚੇਵ ਸੁਨ੍ਦਰਚ੍ਛਵਿ ਚਾਤਿ ਅਤ੍ਥੋ. ਸਮ੍ਫੁਸਿਤ੍ਵਾਤਿ ਸੁਟ੍ਠੁ ਫੁਸਿਤ੍ਵਾ ਅਤ੍ਤਨੋ ਹਤ੍ਥਸਮ੍ਫਸ੍ਸਂ ਮਮ ਸਰੀਰੇ ਫਰਾਪੇਤ੍ਵਾ. ਇਤੋ ਗਤੋਤਿ ਮਮ ਓਲੋਕੇਨ੍ਤਸ੍ਸੇਵ ਇਤੋ ਗਤੋ. ਤੇਨ ਮਂ ਦਹਨ੍ਤੀਤਿ ਤੇਨ ਤਸ੍ਸ ਹਤ੍ਥਸਮ੍ਫਸ੍ਸੇਨ ਇਦਾਨਿ ਮਂ ਦਹਨ੍ਤਿ. ਤਥਾ ਹਿ ਤਸ੍ਸ ਗਤਕਾਲਤੋ ਪਟ੍ਠਾਯ ਮਮ ਸਰੀਰੇ ਡਾਹੋ ਉਟ੍ਠਿਤੋ, ਤੇਨਮ੍ਹਿ ਦੋਮਨਸ੍ਸਪ੍ਪਤ੍ਤੋ ਨਿਪਨ੍ਨੋਤਿ.

ਨ ਨੂਨ ਸੋ ਖਾਰਿਵਿਧਨ੍ਤਿ, ਤਾਤ, ਨੂਨ ਸੋ ਮਾਣਵੋ ਨ ਖਾਰਿਭਾਰਂ ਉਕ੍ਖਿਪਿਤ੍ਵਾ ਵਿਚਰਿ. ਖਿਲਾਨੀਤਿ ਕਿਲਾਨਿ, ‘‘ਅਯਮੇਵ ਵਾ ਪਾਠੋ. ਸੋਖ੍ਯਨ੍ਤਿ ਸੁਖਂ. ਮਾਲੁਵਪਣ੍ਣਸਨ੍ਥਤਾ ਵਿਕਿਣ੍ਣਰੂਪਾਵਾਤਿ, ਤਾਤ, ਅਯਂ ਤਵ ਮਾਲੁਵਪਣ੍ਣਸਨ੍ਥਤਾ ਅਜ੍ਜ ਮਯਾ ਚ ਤੇਨ ਚ ਅਞ੍ਞਮਞ੍ਞਂ ਪਰਾਮਸਨਾਲਿਙ੍ਗਨਵਸੇਨ ਪਰਿਵਤ੍ਤਨ੍ਤੇਹਿ ਵਿਕਿਣ੍ਣਾ ਵਿਯ ਆਕੁਲਬ੍ਯਾਕੁਲਾ ਜਾਤਾ. ਪੁਨਪ੍ਪੁਨਂ ਪਣ੍ਣਕੁਟਿਂ ਵਜਾਮਾਤਿ, ਤਾਤ, ਅਹਞ੍ਚ ਸੋ ਚ ਅਭਿਰਮਿਤ੍ਵਾ ਕਿਲਨ੍ਤਰੂਪਾ ਪਣ੍ਣਸਾਲਤੋ ਨਿਕ੍ਖਮਿਤ੍ਵਾ ਉਦਕਂ ਪਵਿਸਿਤ੍ਵਾ ਰਮਿਤ੍ਵਾ ਵਿਗਤਦਰਥਾ ਪੁਨਪ੍ਪੁਨਂ ਇਮਮੇਵ ਕੁਟਿਂ ਪਵਿਸਾਮਾਤਿ ਵਦਤਿ.

ਨ ਮਜ੍ਜ ਮਨ੍ਤਾਤਿ ਅਜ੍ਜ ਮਮ ਤਸ੍ਸ ਗਤਕਾਲਤੋ ਪਟ੍ਠਾਯ ਨੇਵ ਮਨ੍ਤਾ ਪਟਿਭਨ੍ਤਿ ਨ ਉਪਟ੍ਠਹਨ੍ਤਿ ਨ ਰੁਚ੍ਚਨ੍ਤਿ. ਨ ਅਗ੍ਗਿਹੁਤ੍ਤਂ ਨਪਿ ਯਞ੍ਞਤਨ੍ਤਨ੍ਤਿ ਮਹਾਬ੍ਰਹ੍ਮੁਨੋ ਆਰਾਧਨਤ੍ਥਾਯ ਕਤ੍ਤਬ੍ਬਹੋਮਵਿਧੂਪਨਾਦਿਯਞ੍ਞਕਿਰਿਯਾਪਿ ਮੇ ਨ ਪਟਿਭਾਤਿ ਨ ਉਪਟ੍ਠਾਤਿ ਨ ਰੁਚ੍ਚਤਿ. ਨ ਚਾਪਿ ਤੇਤਿ ਤਯਾ ਆਭਤਮੂਲਫਲਾਫਲਾਨਿਪਿ ਨ ਭੁਞ੍ਜਾਮਿ. ਯਸ੍ਸਂ ਦਿਸਨ੍ਤਿ ਯਸ੍ਸਂ ਦਿਸਾਯਂ. ਵਨਨ੍ਤਿ ਤਸ੍ਸ ਮਾਣਵਸ੍ਸ ਅਸ੍ਸਮਂ ਪਰਿਵਾਰੇਤ੍ਵਾ ਠਿਤਵਨਨ੍ਤਿ.

ਤਸ੍ਸੇਵਂ ਵਿਲਪਨ੍ਤਸ੍ਸ ਤਂ ਵਿਲਾਪਂ ਸੁਤ੍ਵਾ ਮਹਾਸਤ੍ਤੋ ‘‘ਏਕਾਯ ਇਤ੍ਥਿਯਾ ਇਮਸ੍ਸ ਸੀਲਂ ਭਿਨ੍ਨਂ ਭਵਿਸ੍ਸਤੀ’’ਤਿ ਞਤ੍ਵਾ ਤਂ ਓਵਦਨ੍ਤੋ ਛ ਗਾਥਾਯੋ ਅਭਾਸਿ –

੫੧.

‘‘ਇਮਸ੍ਮਾਹਂ ਜੋਤਿਰਸੇ ਵਨਮ੍ਹਿ, ਗਨ੍ਧਬ੍ਬਦੇਵਚ੍ਛਰਸਙ੍ਘਸੇਵਿਤੇ;

ਇਸੀਨਮਾਵਾਸੇ ਸਨਨ੍ਤਨਮ੍ਹਿ, ਨੇਤਾਦਿਸਂ ਅਰਤਿਂ ਪਾਪੁਣੇਥ.

੫੨.

‘‘ਭਵਨ੍ਤਿ ਮਿਤ੍ਤਾਨਿ ਅਥੋ ਨ ਹੋਨ੍ਤਿ, ਞਾਤੀਸੁ ਮਿਤ੍ਤੇਸੁ ਕਰੋਨ੍ਤਿ ਪੇਮਂ;

ਅਯਞ੍ਚ ਜਮ੍ਮੋ ਕਿਸ੍ਸ ਵਾ ਨਿਵਿਟ੍ਠੋ, ਯੋ ਨੇਵ ਜਾਨਾਤਿ ‘ਕੁਤੋਮ੍ਹਿ ਆਗਤੋ’.

੫੩.

‘‘ਸਂਵਾਸੇਨ ਹਿ ਮਿਤ੍ਤਾਨਿ, ਸਨ੍ਧੀਯਨ੍ਤਿ ਪੁਨਪ੍ਪੁਨਂ;

ਸ੍ਵੇਵ ਮਿਤ੍ਤੋ ਅਸਂਗਨ੍ਤੁ, ਅਸਂਵਾਸੇਨ ਜੀਰਤਿ.

੫੪.

‘‘ਸਚੇ ਤੁਵਂ ਦਕ੍ਖਸਿ ਬ੍ਰਹ੍ਮਚਾਰਿਂ, ਸਚੇ ਤੁਵਂ ਸਲ੍ਲਪੇ ਬ੍ਰਹ੍ਮਚਾਰਿਨਾ;

ਸਮ੍ਪਨ੍ਨਸਸ੍ਸਂਵ ਮਹੋਦਕੇਨ, ਤਪੋਗੁਣਂ ਖਿਪ੍ਪਮਿਮਂ ਪਹਿਸ੍ਸਸਿ.

੫੫.

‘‘ਪੁਨਪਿ ਚੇ ਦਕ੍ਖਸਿ ਬ੍ਰਹ੍ਮਚਾਰਿਂ, ਪੁਨਪਿ ਚੇ ਸਲ੍ਲਪੇ ਬ੍ਰਹ੍ਮਚਾਰਿਨਾ;

ਸਮ੍ਪਨ੍ਨਸਸ੍ਸਂਵ ਮਹੋਦਕੇਨ, ਉਸ੍ਮਾਗਤਂ ਖਿਪ੍ਪਮਿਮਂ ਪਹਿਸ੍ਸਸਿ.

੫੬.

‘‘ਭੂਤਾਨਿ ਹੇਤਾਨਿ ਚਰਨ੍ਤਿ ਤਾਤ, ਵਿਰੂਪਰੂਪੇਨ ਮਨੁਸ੍ਸਲੋਕੇ;

ਨ ਤਾਨਿ ਸੇਵੇਥ ਨਰੋ ਸਪਞ੍ਞੋ, ਆਸਜ੍ਜ ਨਂ ਨਸ੍ਸਤਿ ਬ੍ਰਹ੍ਮਚਾਰੀ’’ਤਿ.

ਤਤ੍ਥ ਇਮਸ੍ਮਾਤਿ ਇਮਸ੍ਮਿਂ. ਹਨ੍ਤਿ ਨਿਪਾਤਮਤ੍ਤਂ. ਜੋਤਿਰਸੇਤਿ ਹੂਯਮਾਨਸ੍ਸ ਜੋਤਿਨੋ ਰਂਸਿਓਭਾਸਿਤੇ. ਸਨਨ੍ਤਨਮ੍ਹੀਤਿ ਪੋਰਾਣਕੇ. ਪਾਪੁਣੇਥਾਤਿ ਪਾਪੁਣੇਯ੍ਯ. ਇਦਂ ਵੁਤ੍ਤਂ ਹੋਤਿ – ਤਾਤ, ਏਵਰੂਪੇ ਵਨੇ ਵਸਨ੍ਤੋ ਯਂ ਅਰਤਿਂ ਤ੍ਵਂ ਪਤ੍ਤੋ, ਏਤਾਦਿਸਂ ਨ ਪਾਪੁਣੇਯ੍ਯ ਪਣ੍ਡਿਤੋ ਕੁਲਪੁਤ੍ਤੋ, ਪਤ੍ਤੁਂ ਨਾਰਹਤੀਤਿ ਅਤ੍ਥੋ.

‘‘ਭਵਨ੍ਤੀ’’ਤਿ ਇਮਂ ਗਾਥਂ ਮਹਾਸਤ੍ਤੋ ਅਨ੍ਤੋਗਤਮੇਵ ਭਾਸਤਿ. ਅਯਮੇਤ੍ਥ ਅਧਿਪ੍ਪਾਯੋ – ਲੋਕੇ ਸਤ੍ਤਾਨਂ ਮਿਤ੍ਤਾਨਿ ਨਾਮ ਹੋਨ੍ਤਿਪਿ ਨ ਹੋਨ੍ਤਿਪਿ ਤਤ੍ਥ ਯੇਸਂ ਹੋਨ੍ਤਿ, ਤੇ ਅਤ੍ਤਨੋ ਞਾਤੀਸੁ ਚ ਮਿਤ੍ਤੇਸੁ ਚ ਪੇਮਂ ਕਰੋਨ੍ਤਿ. ਅਯਞ੍ਚ ਜਮ੍ਮੋਤਿ ਮਿਗਸਿਙ੍ਗੋ ਲਾਮਕੋ. ਕਿਸ੍ਸ ਵਾ ਨਿਵਿਟ੍ਠੋਤਿ ਕੇਨ ਨਾਮ ਕਾਰਣੇਨ ਤਸ੍ਮਿਂ ਮਾਤੁਗਾਮੇ ਮਿਤ੍ਤਸਞ੍ਞਾਯ ਨਿਵਿਟ੍ਠੋ, ਸੋ ਮਿਗਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿਤ੍ਵਾ ਅਰਞ੍ਞੇ ਵਡ੍ਢਿਤਤ੍ਤਾ ‘‘ਕੁਤੋਮ੍ਹਿ ਆਗਤੋ’’ਤਿ ਅਤ੍ਤਨੋ ਆਗਤਟ੍ਠਾਨਮਤ੍ਤਮ੍ਪਿ ਨ ਜਾਨਾਤਿ, ਪਗੇਵ ਞਾਤਿਮਿਤ੍ਤੇਤਿ.

ਪੁਨਪ੍ਪੁਨਨ੍ਤਿ, ਤਾਤ, ਮਿਤ੍ਤਾਨਿ ਨਾਮ ਪੁਨਪ੍ਪੁਨਂ ਸਂਵਾਸੇਨ ਸਂਸੇਵਨੇਨ ਸਨ੍ਧੀਯਨ੍ਤਿ ਘਟੀਯਨ੍ਤਿ. ਸ੍ਵੇਵ ਮਿਤ੍ਤੋਤਿ ਸੋ ਏਵ ਮਿਤ੍ਤੋ ਅਸਂਗਨ੍ਤੁ ਅਸਮਾਗਚ੍ਛਨ੍ਤਸ੍ਸ ਪੁਰਿਸਸ੍ਸ ਤੇਨ ਅਸਮਾਗਮਸਙ੍ਖਾਤੇਨ ਅਸਂਵਾਸੇਨ ਜੀਰਤਿ ਵਿਨਸ੍ਸਤਿ. ਸਚੇਤਿ ਤਸ੍ਮਾ, ਤਾਤ, ਸਚੇ ਤ੍ਵਂ ਪੁਨਪਿ ਤਂ ਦਕ੍ਖਸਿ, ਤੇਨ ਵਾ ਸਲ੍ਲਪਿਸ੍ਸਸਿ, ਅਥ ਯਥਾ ਨਾਮ ਨਿਪ੍ਫਨ੍ਨਸਸ੍ਸਂ ਮਹੋਘੇਨ ਹਰੀਯਤਿ, ਏਵਂ ਇਮਂ ਅਤ੍ਤਨੋ ਤਪੋਗੁਣਂ ਪਹਿਸ੍ਸਸਿ ਹਾਰੇਸ੍ਸਸੀਤਿ ਅਤ੍ਥੋ. ਉਸ੍ਮਾਗਤਨ੍ਤਿ ਸਮਣਤੇਜਂ.

ਵਿਰੂਪਰੂਪੇਨਾਤਿ ਵਿਵਿਧਰੂਪੇਨ. ਇਦਂ ਵੁਤ੍ਤਂ ਹੋਤਿ – ਤਾਤ, ਮਨੁਸ੍ਸਲੋਕਸ੍ਮਿਞ੍ਹਿ ਏਤਾਨਿ ਯਕ੍ਖਿਨਿਸਙ੍ਖਾਤਾਨਿ ਭੂਤਾਨਿ ਵਿਵਿਧਰੂਪਪਟਿਚ੍ਛਨ੍ਨੇਨ ਅਤ੍ਤਨੋ ਰੂਪੇਨ ਅਤ੍ਤਨੋ ਵਸਂ ਗਤੇ ਖਾਦਿਤੁਂ ਚਰਨ੍ਤਿ, ਤਾਨਿ ਸਪਞ੍ਞੋ ਨਰੋ ਨ ਸੇਵੇਥ. ਤਾਦਿਸਞ੍ਹਿ ਭੂਤਂ ਆਸਜ੍ਜ ਨਂ ਪਤ੍ਵਾ ਨਸ੍ਸਤਿ ਬ੍ਰਹ੍ਮਚਾਰੀ, ਦਿਟ੍ਠੋਸਿ ਤਾਯ ਯਕ੍ਖਿਨਿਯਾ ਨ ਖਾਦਿਤੋਤਿ ਪੁਤ੍ਤਂ ਓਵਦਿ.

ਸੋ ਪਿਤੁ ਕਥਂ ਸੁਤ੍ਵਾ ‘‘ਯਕ੍ਖਿਨੀ ਕਿਰ ਸਾ’’ਤਿ ਭੀਤੋ ਚਿਤ੍ਤਂ ਨਿਵਤ੍ਤੇਤ੍ਵਾ ‘‘ਤਾਤ, ਏਤ੍ਤੋ ਨ ਗਮਿਸ੍ਸਾਮਿ, ਖਮਥ ਮੇ’’ਤਿ ਖਮਾਪੇਸਿ. ਸੋਪਿ ਨਂ ਸਮਸ੍ਸਾਸੇਤ੍ਵਾ ‘‘ਏਹਿ ਤ੍ਵਂ, ਮਾਣਵ, ਮੇਤ੍ਤਂ ਭਾਵੇਹਿ, ਕਰੁਣਂ, ਮੁਦਿਤਂ, ਉਪੇਕ੍ਖ’’ਨ੍ਤਿ ਬ੍ਰਹ੍ਮਵਿਹਾਰਭਾਵਨਂ ਆਚਿਕ੍ਖਿ. ਸੋ ਤਥਾ ਪਟਿਪਜ੍ਜਿਤ੍ਵਾ ਪੁਨ ਝਾਨਾਭਿਞ੍ਞਾ ਨਿਬ੍ਬਤ੍ਤੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਨਿਲ਼ਿਨਿਕਾ ਪੁਰਾਣਦੁਤਿਯਿਕਾ ਅਹੋਸਿ, ਇਸਿਸਿਙ੍ਗੋ ਉਕ੍ਕਣ੍ਠਿਤਭਿਕ੍ਖੁ, ਪਿਤਾ ਪਨ ਅਹਮੇਵ ਅਹੋਸਿਨ੍ਤਿ.

ਨਿਲ਼ਿਨਿਕਾਜਾਤਕਵਣ੍ਣਨਾ ਪਠਮਾ.

[੫੨੭] ੨. ਉਮ੍ਮਾਦਨ੍ਤੀਜਾਤਕਵਣ੍ਣਨਾ

ਨਿਵੇਸਨਂ ਕਸ੍ਸਨੁਦਂ ਸੁਨਨ੍ਦਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਕਿਰੇਕਦਿਵਸਂ ਸਾਵਤ੍ਥਿਯਂ ਪਿਣ੍ਡਾਯ ਚਰਨ੍ਤੋ ਏਕਂ ਅਲਙ੍ਕਤਪਟਿਯਤ੍ਤਂ ਉਤ੍ਤਮਰੂਪਧਰਂ ਇਤ੍ਥਿਂ ਓਲੋਕੇਤ੍ਵਾ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਚਿਤ੍ਤਂ ਨਿਵਤ੍ਤੇਤੁਂ ਅਸਕ੍ਕੋਨ੍ਤੋ ਵਿਹਾਰਮੇਵ ਆਗਨ੍ਤ੍ਵਾ ਤਤੋ ਪਟ੍ਠਾਯ ਸਲ੍ਲਵਿਦ੍ਧੋ ਵਿਯ ਰਾਗਾਤੁਰੋ ਭਨ੍ਤਮਿਗਪਟਿਭਾਗੋ ਕਿਸੋ ਧਮਨੀਸਨ੍ਥਤਗਤ੍ਤੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਅਨਭਿਰਤੋ ਏਕਿਰਿਯਾਪਥੇਪਿ ਚਿਤ੍ਤਸ੍ਸਾਦਂ ਅਲਭਨ੍ਤੋ ਆਚਰਿਯਵਤ੍ਤਾਦੀਨਿ ਪਹਾਯ ਉਦ੍ਦੇਸਪਰਿਪੁਚ੍ਛਾਕਮ੍ਮਟ੍ਠਾਨਾਨੁਯੋਗਰਹਿਤੋ ਵਿਹਾਸਿ. ਸੋ ਸਹਾਯਭਿਕ੍ਖੂਹਿ ‘‘ਪੁਬ੍ਬੇ ਤ੍ਵਂ, ਆਵੁਸੋ, ਸਨ੍ਤਿਨ੍ਦ੍ਰਿਯੋ ਵਿਪ੍ਪਸਨ੍ਨਮੁਖਵਣ੍ਣੋ, ਇਦਾਨਿ ਨੋ ਤਥਾ, ਕਿਂ ਨੁ ਖੋ ਕਾਰਣ’’ਨ੍ਤਿ ਪੁਟ੍ਠੋ, ‘‘ਆਵੁਸੋ, ਅਨਭਿਰਤੋਮ੍ਹੀ’’ਤਿ ਆਹ. ਅਥ ਨਂ ਤੇ ‘‘ਅਭਿਰਮਾਵੁਸੋ, ਸਾਸਨੇ, ਬੁਦ੍ਧੁਪ੍ਪਾਦੋ ਨਾਮ ਦੁਲ੍ਲਭੋ, ਤਥਾ ਸਦ੍ਧਮ੍ਮਸ੍ਸਵਨਂ ਮਨੁਸ੍ਸਪਟਿਲਾਭੋ ਚ, ਸੋ ਤ੍ਵਂ ਮਨੁਸ੍ਸਪਟਿਲਾਭਂ ਪਟਿਲਭਿਤ੍ਵਾ ਦੁਕ੍ਖਸ੍ਸਨ੍ਤਕਿਰਿਯਂ ਪਤ੍ਥਯਮਾਨੋ ਅਸ੍ਸੁਮੁਖਂ ਞਾਤਿਜਨਂ ਪਹਾਯ ਸਦ੍ਧਾਯ ਪਬ੍ਬਜਿਤ੍ਵਾ ਕਿਂਕਾਰਣਾ ਕਿਲੇਸਵਸਂ ਯਾਸਿ, ਕਿਲੇਸਾ ਨਾਮੇਤੇ ਗਣ੍ਡੁਪ੍ਪਾਦਕਪਾਣਕਂ ਉਪਾਦਾਯ ਸਬ੍ਬਬਾਲਜਨਸਾਧਾਰਣਾ, ਯੇ ਤੇਸਂ ਵਤ੍ਥੁਭੂਤਾ, ਤੇਪਿ ਅਪ੍ਪਸ੍ਸਾਦਾ ਕਾਮਾ ਬਹੁਦੁਕ੍ਖਾ ਬਹੁਪਾਯਾਸਾ, ਆਦੀਨਵੋ ਏਤ੍ਥ ਭਿਯ੍ਯੋ. ਅਟ੍ਠਿਕਙ੍ਕਲੂਪਮਾ ਕਾਮਾ, ਮਂਸਪੇਸੂਪਮਾ ਕਾਮਾ, ਤਿਣੁਕ੍ਕੂਪਮਾ ਕਾਮਾ, ਅਙ੍ਗਾਰਕਾਸੂਪਮਾ ਕਾਮਾ, ਸੁਪਿਨਕੂਪਮਾ ਕਾਮਾ, ਯਾਚਿਤਕੂਪਮਾ ਕਾਮਾ, ਰੁਕ੍ਖਫਲੂਪਮਾ ਕਾਮਾ, ਅਸਿਸੂਨੂਪਮਾ ਕਾਮਾ, ਸਤ੍ਤਿਸੂਲੂਪਮਾ ਕਾਮਾ, ਸਪ੍ਪਸਿਰੂਪਮਾ ਕਾਮਾ, ਅਗ੍ਗਿਕ੍ਖਨ੍ਧੂਪਮਾ ਕਾਮਾ, ਤ੍ਵਂ ਨਾਮ ਏਵਰੂਪੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾ ਏਵਂ ਅਨਤ੍ਥਕਾਰਕਾਨਂ ਕਿਲੇਸਾਨਂ ਵਸਂ ਗਤੋਸੀ’’ਤਿ ਓਵਦਿਤ੍ਵਾ ਅਤ੍ਤਨੋ ਕਥਂ ਗਾਹਾਪੇਤੁਂ ਅਸਕ੍ਕੋਨ੍ਤਾ ਸਤ੍ਥੁ ਸਨ੍ਤਿਕਂ ਧਮ੍ਮਸਭਂ ਨੇਤ੍ਵਾ ‘‘ਕਿਂ, ਭਿਕ੍ਖਵੇ, ਅਨਿਚ੍ਛਮਾਨਕਂ ਭਿਕ੍ਖੁਂ ਆਨਯਿਤ੍ਥਾ’’ਤਿ ਵੁਤ੍ਤੇ, ‘‘ਭਨ੍ਤੇ, ਅਯਂ ਕਿਰ ਭਿਕ੍ਖੁ ਉਕ੍ਕਣ੍ਠਿਤੋ’’ਤਿ ਆਹਂਸੁ. ਸਤ੍ਥਾ ‘‘ਸਚ੍ਚਂ ਕਿਰਾ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਪੋਰਾਣਕਪਣ੍ਡਿਤਾ ਰਜ੍ਜਂ ਅਨੁਸਾਸਨ੍ਤਾਪਿ ਕਿਲੇਸੇ ਉਪ੍ਪਨ੍ਨੇ ਤਸ੍ਸ ਵਸਂ ਅਗਨ੍ਤ੍ਵਾ ਚਿਤ੍ਤਂ ਨਿਵਾਰੇਤ੍ਵਾ ਨ ਅਯੁਤ੍ਤਕਂ ਕਰਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਸਿਵਿਰਟ੍ਠੇ ਅਰਿਟ੍ਠਪੁਰਨਗਰੇ ਸਿਵਿ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿ, ‘‘ਸਿਵਿਕੁਮਾਰੋ’’ਤ੍ਵੇਵਸ੍ਸ ਨਾਮਂ ਕਰਿਂਸੁ. ਸੇਨਾਪਤਿਸ੍ਸਪਿ ਪੁਤ੍ਤੋ ਜਾਯਿ, ‘‘ਅਭਿਪਾਰਕੋ’’ਤਿਸ੍ਸ ਨਾਮਂ ਕਰਿਂਸੁ. ਤੇ ਉਭੋਪਿ ਸਹਾਯਾ ਹੁਤ੍ਵਾ ਅਭਿਵਡ੍ਢਨ੍ਤਾ ਸੋਲ਼ਸਵਸ੍ਸਿਕਾ ਹੁਤ੍ਵਾ ਤਕ੍ਕਸਿਲਂ ਗਨ੍ਤ੍ਵਾ ਸਿਪ੍ਪਂ ਉਗ੍ਗਣ੍ਹਿਤ੍ਵਾ ਆਗਮਿਂਸੁ. ਰਾਜਾ ਪੁਤ੍ਤਸ੍ਸ ਰਜ੍ਜਂ ਅਦਾਸਿ. ਸੋਪਿ ਅਭਿਪਾਰਕਂ ਸੇਨਾਪਤਿਟ੍ਠਾਨੇ ਠਪੇਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਸਿ. ਤਸ੍ਮਿਂਯੇਵ ਨਗਰੇ ਤਿਰਿਟਿਵਚ੍ਛਸ੍ਸ ਨਾਮ ਅਸੀਤਿਕੋਟਿਵਿਭਵਸ੍ਸ ਸੇਟ੍ਠਿਨੋ ਧੀਤਾ ਨਿਬ੍ਬਤ੍ਤਿ ਉਤ੍ਤਮਰੂਪਧਰਾ ਸੋਭਗ੍ਗਪ੍ਪਤ੍ਤਾ ਸੁਭਲਕ੍ਖਣੇਨ ਸਮਨ੍ਨਾਗਤਾ, ਤਸ੍ਸਾ ਨਾਮਗ੍ਗਹਣਦਿਵਸੇ ‘‘ਉਮ੍ਮਾਦਨ੍ਤੀ’’ਤਿ ਨਾਮਂ ਕਰਿਂਸੁ. ਸਾ ਸੋਲ਼ਸਵਸ੍ਸਿਕਕਾਲੇ ਅਤਿਕ੍ਕਨ੍ਤਮਾਨੁਸਵਣ੍ਣਾ ਦੇਵਚ੍ਛਰਾ ਵਿਯ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ ਅਹੋਸਿ. ਯੇ ਯੇ ਪੁਥੁਜ੍ਜਨਾ ਤਂ ਪਸ੍ਸਨ੍ਤਿ, ਤੇ ਤੇ ਸਕਭਾਵੇਨ ਸਣ੍ਠਾਤੁਂ ਅਸਕ੍ਕੋਨ੍ਤਾ ਸੁਰਾਪਾਨਮਦਮਤ੍ਤਾ ਵਿਯ ਕਿਲੇਸਮਦੇਨ ਮਤ੍ਤਾ ਹੁਤ੍ਵਾ ਸਤਿਂ ਪਚ੍ਚੁਪਟ੍ਠਾਪੇਤੁਂ ਸਮਤ੍ਥਾ ਨਾਮ ਨਾਹੇਸੁਂ.

ਅਥਸ੍ਸਾ ਪਿਤਾ ਤਿਰਿਟਿਵਚ੍ਛੋ ਰਾਜਾਨਂ ਉਪਸਙ੍ਕਮਿਤ੍ਵਾ ‘‘ਦੇਵ, ਮਮ ਗੇਹੇ ਇਤ੍ਥਿਰਤਨਂ ਉਪ੍ਪਨ੍ਨਂ, ਰਞ੍ਞੋਵ ਅਨੁਚ੍ਛਵਿਕਂ, ਲਕ੍ਖਣਪਾਠਕੇ ਬ੍ਰਾਹ੍ਮਣੇ ਪੇਸੇਤ੍ਵਾ ਤਂ ਵੀਮਂਸਾਪੇਤ੍ਵਾ ਯਥਾਰੁਚਿ ਕਰੋਹੀ’’ਤਿ ਆਹ. ਰਾਜਾ ‘‘ਸਾਧੂ’’ਤਿ ਵਤ੍ਵਾ ਬ੍ਰਾਹ੍ਮਣੇ ਪੇਸੇਸਿ. ਤੇ ਸੇਟ੍ਠਿਗੇਹਂ ਗਨ੍ਤ੍ਵਾ ਕਤਸਕ੍ਕਾਰਸਮ੍ਮਾਨਾ ਪਾਯਾਸਂ ਪਰਿਭੁਞ੍ਜਿਂਸੁ. ਤਸ੍ਮਿਂ ਖਣੇ ਉਮ੍ਮਾਦਨ੍ਤੀ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਤੇਸਂ ਸਨ੍ਤਿਕਂ ਅਗਮਾਸਿ. ਤੇ ਤਂ ਦਿਸ੍ਵਾ ਸਤਿਂ ਪਚ੍ਚੁਪਟ੍ਠਾਪੇਤੁਂ ਅਸਕ੍ਕੋਨ੍ਤਾ ਕਿਲੇਸਮਦਮਤ੍ਤਾ ਹੁਤ੍ਵਾ ਅਤ੍ਤਨੋ ਵਿਪ੍ਪਕਤਭੋਜਨਭਾਵਂ ਨ ਜਾਨਿਂਸੁ. ਏਕਚ੍ਚੇ ਆਲੋਪਂ ਗਹੇਤ੍ਵਾ ‘‘ਭੁਞ੍ਜਿਸ੍ਸਾਮਾ’’ਤਿ ਸਞ੍ਞਾਯ ਸੀਸੇ ਠਪੇਸੁਂ, ਏਕਚ੍ਚੇ ਉਪਕਚ੍ਛਨ੍ਤਰੇ ਖਿਪਿਂਸੁ, ਏਕਚ੍ਚੇ ਭਿਤ੍ਤਿਂ ਪਹਰਿਂਸੁ, ਸਬ੍ਬੇਵ ਉਮ੍ਮਤ੍ਤਕਾ ਅਹੇਸੁਂ. ਸਾ ਤੇ ਦਿਸ੍ਵਾ ‘‘ਇਮੇ ਕਿਰ ਮਮ ਲਕ੍ਖਣਂ ਵੀਮਂਸਿਸ੍ਸਨ੍ਤਿ, ਗੀਵਾਯਂ ਨੇ ਗਹੇਤ੍ਵਾ ਨੀਹਰਥਾ’’ਤਿ ਨੀਹਰਾਪੇਸਿ. ਤੇ ਮਙ੍ਕੁਭੂਤਾ ਰਾਜਨਿਵੇਸਨਂ ਗਨ੍ਤ੍ਵਾ ਉਮ੍ਮਾਦਨ੍ਤਿਯਾ ਕੁਦ੍ਧਾ ‘‘ਦੇਵ, ਸਾ ਇਤ੍ਥੀ ਕਾਲ਼ਕਣ੍ਣੀ, ਨ ਤੁਮ੍ਹਾਕਂ ਅਨੁਚ੍ਛਵਿਕਾ’’ਤਿ ਵਦਿਂਸੁ. ਰਾਜਾ ‘‘ਕਾਲ਼ਕਣ੍ਣੀ ਕਿਰਾ’’ਤਿ ਨ ਤਂ ਆਣਾਪੇਸਿ. ਸਾ ਤਂ ਪਵਤ੍ਤਿਂ ਸੁਤ੍ਵਾ ‘‘ਅਹਂ ਕਿਰ ਕਾਲ਼ਕਣ੍ਣੀਤਿ ਰਞ੍ਞਾ ਨ ਗਹਿਤਾ, ਕਾਲ਼ਕਣ੍ਣਿਯੋ ਨਾਮ ਨ ਏਵਰੂਪਾ ਹੋਨ੍ਤੀ’’ਤਿ ਵਤ੍ਵਾ ‘‘ਹੋਤੁ, ਸਚੇ ਪਨ ਤਂ ਰਾਜਾਨਂ ਪਸ੍ਸਿਸ੍ਸਾਮਿ, ਜਾਨਿਸ੍ਸਾਮੀ’’ਤਿ ਤਸ੍ਮਿਂ ਆਘਾਤਂ ਬਨ੍ਧਿ. ਅਥ ਨਂ ਪਿਤਾ ਅਭਿਪਾਰਕਸ੍ਸ ਅਦਾਸਿ, ਸਾ ਤਸ੍ਸ ਪਿਯਾ ਅਹੋਸਿ ਮਨਾਪਾ.

ਕਸ੍ਸ ਪਨ ਕਮ੍ਮਸ੍ਸ ਨਿਸ੍ਸਨ੍ਦੇਨ ਸਾ ਏਵਂ ਅਭਿਰੂਪਾ ਅਹੋਸੀਤਿ? ਰਤ੍ਤਵਤ੍ਥਦਾਨਸ੍ਸ ਨਿਸ੍ਸਨ੍ਦੇਨਾਤਿ. ਸਾ ਕਿਰ ਅਤੀਤੇ ਬਾਰਾਣਸਿਯਂ ਦਲਿਦ੍ਦਕੁਲੇ ਨਿਬ੍ਬਤ੍ਤਿਤ੍ਵਾ ਉਸ੍ਸਵਦਿਵਸੇ ਪੁਞ੍ਞਸਮ੍ਪਨ੍ਨਾ ਇਤ੍ਥਿਯੋ ਕੁਸੁਮ੍ਭਰਤ੍ਤਵਤ੍ਥਂ ਨਿਵਾਸੇਤ੍ਵਾ ਅਲਙ੍ਕਤਾ ਕੀਲ਼ਨ੍ਤਿਯੋ ਦਿਸ੍ਵਾ ਤਾਦਿਸਂ ਵਤ੍ਥਂ ਨਿਵਾਸੇਤ੍ਵਾ ਕੀਲ਼ਿਤੁਕਾਮਾ ਹੁਤ੍ਵਾ ਮਾਤਾਪਿਤੂਨਂ ਆਰੋਚੇਤ੍ਵਾ ਤੇਹਿ, ‘‘ਅਮ੍ਮ, ਮਯਂ ਦਲਿਦ੍ਦਾ, ਕੁਤੋ ਨੋ ਏਵਰੂਪਂ ਵਤ੍ਥ’’ਨ੍ਤਿ ਵੁਤ੍ਤੇ ‘‘ਤੇਨ ਹਿ ਮਂ ਏਕਸ੍ਮਿਂ ਅਡ੍ਢਕੁਲੇ ਭਤਿਂ ਕਾਤੁਂ ਅਨੁਜਾਨਾਥ, ਤੇ ਮਮ ਗੁਣਂ ਞਤ੍ਵਾ ਦਸ੍ਸਨ੍ਤੀ’’ਤਿ ਵਤ੍ਵਾ ਤੇਹਿ ਅਨੁਞ੍ਞਾਤਾ ਏਕਂ ਕੁਲਂ ਉਪਸਙ੍ਕਮਿਤ੍ਵਾ ‘‘ਕੁਸੁਮ੍ਭਰਤ੍ਤਵਤ੍ਥੇਨ ਭਤਿਂ ਕਰੋਮੀ’’ਤਿ ਆਹ. ਅਥ ਨਂ ਤੇ ‘‘ਤੀਣਿ ਸਂਵਚ੍ਛਰਾਨਿ ਕਮ੍ਮੇ ਕਤੇ ਤਵ ਗੁਣਂ ਞਤ੍ਵਾ ਦਸ੍ਸਾਮਾ’’ਤਿ ਵਦਿਂਸੁ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਕਮ੍ਮਂ ਪਟਿਪਜ੍ਜਿ. ਤੇ ਤਸ੍ਸਾ ਗੁਣਂ ਞਤ੍ਵਾ ਅਪਰਿਪੁਣ੍ਣੇਸੁਯੇਵ ਤੀਸੁ ਸਂਵਚ੍ਛਰੇਸੁ ਤਸ੍ਸਾ ਘਨਕੁਸੁਮ੍ਭਰਤ੍ਤਵਤ੍ਥੇਨ ਸਦ੍ਧਿਂ ਅਞ੍ਞਮ੍ਪਿ ਵਤ੍ਥਂ ਦਤ੍ਵਾ ‘‘ਤਵ ਸਹਾਯਿਕਾਹਿ ਸਦ੍ਧਿਂ ਗਨ੍ਤ੍ਵਾ ਨ੍ਹਤ੍ਵਾ ਨਿਵਾਸੇਹੀ’’ਤਿ ਤਂ ਪੇਸਯਿਂਸੁ. ਸਾ ਸਹਾਯਿਕਾ ਆਦਾਯ ਗਨ੍ਤ੍ਵਾ ਰਤ੍ਤਵਤ੍ਥਂ ਨਦੀਤੀਰੇ ਠਪੇਤ੍ਵਾ ਨ੍ਹਾਯਿ.

ਤਸ੍ਮਿਂ ਖਣੇ ਏਕੋ ਕਸ੍ਸਪਦਸਬਲਸ੍ਸ ਸਾਵਕੋ ਅਚ੍ਛਿਨ੍ਨਚੀਵਰੋ ਸਾਖਾਭਙ੍ਗਂ ਨਿਵਾਸੇਤ੍ਵਾ ਚ ਪਾਰੁਪਿਤ੍ਵਾ ਚ ਤਂ ਪਦੇਸਂ ਪਾਪੁਣਿ. ਸਾ ਤਂ ਦਿਸ੍ਵਾ ‘‘ਅਯਂ ਭਦਨ੍ਤੋ ਅਚ੍ਛਿਨ੍ਨਚੀਵਰੋ ਭਵਿਸ੍ਸਤਿ, ਪੁਬ੍ਬੇਪਿ ਅਦਿਨ੍ਨਭਾਵੇਨ ਮੇ ਨਿਵਾਸਨਂ ਦੁਲ੍ਲਭਂ ਜਾਤ’’ਨ੍ਤਿ ਤਂ ਵਤ੍ਥਂ ਦ੍ਵਿਧਾ ਫਾਲੇਤ੍ਵਾ ‘‘ਏਕਂ ਕੋਟ੍ਠਾਸਂ ਅਯ੍ਯਸ੍ਸ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਉਤ੍ਤਰਿਤ੍ਵਾ ਅਤ੍ਤਨੋ ਨਿਵਾਸਨਂ ਨਿਵਾਸੇਤ੍ਵਾ ‘‘ਤਿਟ੍ਠਥ, ਭਨ੍ਤੇ’’ਤਿ ਵਤ੍ਵਾ ਥੇਰਂ ਵਨ੍ਦਿਤ੍ਵਾ ਰਤ੍ਤਵਤ੍ਥਂ ਮਜ੍ਝੇ ਫਾਲੇਤ੍ਵਾ ਤਸ੍ਸੇਕਂ ਕੋਟ੍ਠਾਸਂ ਅਦਾਸਿ. ਸੋ ਏਕਮਨ੍ਤੇ ਪਟਿਚ੍ਛਨ੍ਨੇ ਠਤ੍ਵਾ ਸਾਖਾਭਙ੍ਗਂ ਛਡ੍ਡੇਤ੍ਵਾ ਤਸ੍ਸੇਕਂ ਕਣ੍ਣਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਨਿਕ੍ਖਮਿ. ਅਥਸ੍ਸ ਵਤ੍ਥੋਭਾਸੇਨ ਸਕਲਸਰੀਰਂ ਤਰੁਣਸੂਰਿਯੋ ਵਿਯ ਏਕੋਭਾਸਂ ਅਹੋਸਿ. ਸਾ ਤਂ ਦਿਸ੍ਵਾ ‘‘ਮਯ੍ਹਂ ਅਯ੍ਯੋ ਪਠਮਂ ਨ ਸੋਭਤਿ, ਇਦਾਨਿ ਤਰੁਣਸੂਰਿਯੋ ਵਿਯ ਵਿਰੋਚਤਿ, ਇਦਮ੍ਪਿ ਏਤਸ੍ਸੇਵ ਦਸ੍ਸਾਮੀ’’ਤਿ ਦੁਤਿਯਮ੍ਪਿ ਕੋਟ੍ਠਾਸਂ ਦਤ੍ਵਾ ‘‘ਭਨ੍ਤੇ, ਅਹਂ ਭਵੇ ਭਵੇ ਵਿਚਰਨ੍ਤੀ ਉਤ੍ਤਮਰੂਪਧਰਾ ਭਵੇਯ੍ਯਂ, ਮਂ ਦਿਸ੍ਵਾ ਕੋਚਿ ਪੁਰਿਸੋ ਸਕਭਾਵੇਨ ਸਣ੍ਠਾਤੁਂ ਮਾ ਅਸਕ੍ਖਿ, ਮਯਾ ਅਭਿਰੂਪਤਰਾ ਨਾਮ ਅਞ੍ਞਾ ਮਾ ਹੋਤੂ’’ਤਿ ਪਤ੍ਥਨਂ ਪਟ੍ਠਪੇਸਿ. ਥੇਰੋਪਿ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ.

ਸਾ ਦੇਵਲੋਕੇ ਸਂਸਰਨ੍ਤੀ ਤਸ੍ਮਿਂ ਕਾਲੇ ਅਰਿਟ੍ਠਪੁਰੇ ਨਿਬ੍ਬਤ੍ਤਿਤ੍ਵਾ ਤਥਾ ਅਭਿਰੂਪਾ ਅਹੋਸਿ. ਅਥ ਤਸ੍ਮਿਂ ਨਗਰੇ ਕਤ੍ਤਿਕਛਣਂ ਘੋਸਯਿਂਸੁ, ਕਤ੍ਤਿਕਪੁਣ੍ਣਮਾਯਂ ਨਗਰਂ ਸਜ੍ਜਯਿਂਸੁ. ਅਭਿਪਾਰਕੋ ਅਤ੍ਤਨੋ ਆਰਕ੍ਖਟ੍ਠਾਨਂ ਗਚ੍ਛਨ੍ਤੋ ਤਂ ਆਮਨ੍ਤੇਤ੍ਵਾ ‘‘ਭਦ੍ਦੇ, ਉਮ੍ਮਾਦਨ੍ਤਿ ਅਜ੍ਜ ਕਤ੍ਤਿਕਰਤ੍ਤਿਵਾਰੋ ਛਣੋ, ਰਾਜਾ ਨਗਰਂ ਪਦਕ੍ਖਿਣਂ ਕਰੋਨ੍ਤੋ ਪਠਮਂ ਇਮਂ ਗੇਹਦ੍ਵਾਰਂ ਆਗਮਿਸ੍ਸਤਿ, ਮਾ ਖੋ ਤਸ੍ਸ ਅਤ੍ਤਾਨਂ ਦਸ੍ਸੇਸਿ, ਸੋਪਿ ਤਂ ਦਿਸ੍ਵਾ ਸਤਿਂ ਉਪਟ੍ਠਾਪੇਤੁਂ ਨ ਸਕ੍ਖਿਸ੍ਸਤੀ’’ਤਿ ਆਹ. ਸਾ ‘‘ਗਚ੍ਛ ਤ੍ਵਂ, ਸਾਮਿ, ਅਹਂ ਜਾਨਿਸ੍ਸਾਮੀ’’ਤਿ ਸਮ੍ਪਟਿਚ੍ਛਿਤ੍ਵਾ ਤਸ੍ਮਿਂ ਗਤੇ ਦਾਸਿਂ ਆਣਾਪੇਸਿ ‘‘ਰਞ੍ਞੋ ਇਮਂ ਗੇਹਦ੍ਵਾਰਂ ਆਗਤਕਾਲੇ ਮਯ੍ਹਂ ਆਰੋਚੇਯ੍ਯਾਸੀ’’ਤਿ. ਅਥ ਸੂਰਿਯੇ ਅਤ੍ਥਙ੍ਗਤੇ ਉਗ੍ਗਹੇ ਪੁਣ੍ਣਚਨ੍ਦੇ ਦੇਵਨਗਰੇ ਵਿਯ ਨਗਰੇ ਅਲਙ੍ਕਤੇ ਸਬ੍ਬਦਿਸਾਸੁ ਦੀਪੇਸੁ ਜਲਿਤੇਸੁ ਰਾਜਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਆਜਞ੍ਞਰਥਵਰਗਤੋ ਅਮਚ੍ਚਗਣਪਰਿਵੁਤੋ ਮਹਨ੍ਤੇਨ ਯਸੇਨ ਨਗਰਂ ਪਦਕ੍ਖਿਣਂ ਕਰੋਨ੍ਤੋ ਪਠਮਮੇਵ ਅਭਿਪਾਰਕਸ੍ਸ ਗੇਹਦ੍ਵਾਰਂ ਅਗਮਾਸਿ. ਤਂ ਪਨ ਗੇਹਂ ਮਨੋਸਿਲਾਵਣ੍ਣਪਾਕਾਰਪਰਿਕ੍ਖਿਤ੍ਤਂ ਅਲਙ੍ਕਤਦ੍ਵਾਰਟ੍ਟਾਲਕਂ ਸੋਭਗ੍ਗਪ੍ਪਤ੍ਤਂ ਪਾਸਾਦਿਕਂ. ਤਸ੍ਮਿਂ ਖਣੇ ਦਾਸੀ ਉਮ੍ਮਾਦਨ੍ਤਿਯਾ ਆਰੋਚੇਸਿ. ਸਾ ਪੁਪ੍ਫਸਮੁਗ੍ਗਂ ਗਾਹਾਪੇਤ੍ਵਾ ਕਿਨ੍ਨਰਿਲੀਲ਼ਾਯ ਵਾਤਪਾਨਂ ਨਿਸ੍ਸਾਯ ਠਿਤਾ ਰਞ੍ਞੋ ਪੁਪ੍ਫਾਨਿ ਖਿਪਿ. ਸੋ ਤਂ ਉਲ੍ਲੋਕੇਤ੍ਵਾ ਕਿਲੇਸਮਦਮਤ੍ਤੋ ਸਤਿਂ ਉਪਟ੍ਠਾਪੇਤੁਂ ਅਸਕ੍ਕੋਨ੍ਤੋ ‘‘ਅਭਿਪਾਰਕਸ੍ਸੇਤਂ ਗੇਹ’’ਨ੍ਤਿ ਸਞ੍ਜਾਨਿਤੁਮ੍ਪਿ ਨਾਸਕ੍ਖਿ, ਅਥ ਸਾਰਥਿਂ ਆਮਨ੍ਤੇਤ੍ਵਾ ਪੁਚ੍ਛਨ੍ਤੋ ਦ੍ਵੇ ਗਾਥਾ ਅਭਾਸਿ –

੫੭.

‘‘ਨਿਵੇਸਨਂ ਕਸ੍ਸ ਨੁਦਂ ਸੁਨਨ੍ਦ, ਪਾਕਾਰੇਨ ਪਣ੍ਡੁਮਯੇਨ ਗੁਤ੍ਤਂ;

ਕਾ ਦਿਸ੍ਸਤਿ ਅਗ੍ਗਿਸਿਖਾਵ ਦੂਰੇ, ਵੇਹਾਯਸਂ ਪਬ੍ਬਤਗ੍ਗੇਵ ਅਚ੍ਚਿ.

੫੮.

‘‘ਧੀਤਾ ਨ੍ਵਯਂ ਕਸ੍ਸ ਸੁਨਨ੍ਦ ਹੋਤਿ, ਸੁਣਿਸਾ ਨ੍ਵਯਂ ਕਸ੍ਸ ਅਥੋਪਿ ਭਰਿਯਾ;

ਅਕ੍ਖਾਹਿ ਮੇ ਖਿਪ੍ਪਮਿਧੇਵ ਪੁਟ੍ਠੋ, ਅਵਾਵਟਾ ਯਦਿ ਵਾ ਅਤ੍ਥਿ ਭਤ੍ਤਾ’’ਤਿ.

ਤਤ੍ਥ ਕਸ੍ਸ ਨੁਦਨ੍ਤਿ ਕਸ੍ਸ ਨੁ ਇਦਂ. ਪਣ੍ਡੁਮਯੇਨਾਤਿ ਰਤ੍ਤਿਟ੍ਠਕਮਯੇਨ. ਦਿਸ੍ਸਤੀਤਿ ਵਾਤਪਾਨੇ ਠਿਤਾ ਪਞ੍ਞਾਯਤਿ. ਅਚ੍ਚੀਤਿ ਅਨਲਜਾਲਕ੍ਖਨ੍ਧੋ. ਧੀਤਾ ਨ੍ਵਯਨ੍ਤਿ ਧੀਤਾ ਨੁ ਅਯਂ. ਅਵਾਵਟਾਤਿ ਅਪੇਤਾਵਰਣਾ ਅਪਰਿਗ੍ਗਹਾ. ਭਤ੍ਤਾਤਿ ਯਦਿ ਵਾ ਅਸ੍ਸਾ ਸਾਮਿਕੋ ਅਤ੍ਥਿ, ਏਤਂ ਮੇ ਅਕ੍ਖਾਹੀਤਿ.

ਅਥਸ੍ਸ ਸੋ ਆਚਿਕ੍ਖਨ੍ਤੋ ਦ੍ਵੇ ਗਾਥਾ ਅਭਾਸਿ –

੫੯.

‘‘ਅਹਞ੍ਹਿ ਜਾਨਾਮਿ ਜਨਿਨ੍ਦ ਏਤਂ, ਮਤ੍ਯਾ ਚ ਪੇਤ੍ਯਾ ਚ ਅਥੋਪਿ ਅਸ੍ਸਾ;

ਤਵੇਵ ਸੋ ਪੁਰਿਸੋ ਭੂਮਿਪਾਲ, ਰਤ੍ਤਿਨ੍ਦਿਵਂ ਅਪ੍ਪਮਤ੍ਤੋ ਤਵਤ੍ਥੇ.

੬੦.

‘‘ਇਦ੍ਧੋ ਚ ਫੀਤੋ ਚ ਸੁਵਡ੍ਢਿਤੋ ਚ, ਅਮਚ੍ਚੋ ਚ ਤੇ ਅਞ੍ਞਤਰੋ ਜਨਿਨ੍ਦ;

ਤਸ੍ਸੇਸਾ ਭਰਿਯਾਭਿਪਾਰਕਸ੍ਸ, ਉਮ੍ਮਾਦਨ੍ਤੀ ਨਾਮਧੇਯ੍ਯੇਨ ਰਾਜਾ’’ਤਿ.

ਤਤ੍ਥ ਮਤ੍ਯਾ ਚ ਪੇਤ੍ਯਾ ਚਾਤਿ ਮਾਤਿਤੋ ਚ ਪਿਤਿਤੋ ਚੇਤਂ ਜਾਨਾਮਿ. ਅਥੋਪਿ ਅਸ੍ਸਾਤਿ ਅਥ ਸਾਮਿਕਮ੍ਪਿ ਅਸ੍ਸਾ ਜਾਨਾਮੀਤਿ ਵਦਤਿ. ਇਦ੍ਧੋਤਿ ਸਮਿਦ੍ਧੋ. ਫੀਤੋਤਿ ਵਤ੍ਥਾਲਙ੍ਕਾਰੇਹਿ ਸੁਪੁਪ੍ਫਿਤੋ. ਸੁਵਡ੍ਢਿਤੋਤਿ ਸੁਟ੍ਠੁ ਵੁਦ੍ਧੋ. ਨਾਮਧੇਯ੍ਯੇਨਾਤਿ ਨਾਮੇਨ. ਅਯਞ੍ਹਿ ਯੋ ਨਂ ਪਸ੍ਸਤਿ, ਤਂ ਉਮ੍ਮਾਦੇਤਿ, ਸਤਿਮਸ੍ਸ ਪਚ੍ਚੁਪਟ੍ਠਾਪੇਤੁਂ ਨ ਦੇਤਿ, ਤਸ੍ਮਾ ਉਮ੍ਮਾਦਨ੍ਤੀਤਿ ਵੁਚ੍ਚਤਿ.

ਤਂ ਸੁਤ੍ਵਾ ਰਾਜਾ ਨਾਮਮਸ੍ਸਾ ਥੋਮੇਨ੍ਤੋ ਅਨਨ੍ਤਰਂ ਗਾਥਮਾਹ –

੬੧.

‘‘ਅਮ੍ਭੋ ਅਮ੍ਭੋ ਨਾਮਮਿਦਂ ਇਮਿਸ੍ਸਾ, ਮਤ੍ਯਾ ਚ ਪੇਤ੍ਯਾ ਚ ਕਤਂ ਸੁਸਾਧੁ;

ਤਦਾ ਹਿ ਮਯ੍ਹਂ ਅਵਲੋਕਯਨ੍ਤੀ, ਉਮ੍ਮਤ੍ਤਕਂ ਉਮ੍ਮਦਨ੍ਤੀ ਅਕਾਸੀ’’ਤਿ.

ਤਤ੍ਥ ਮਤ੍ਯਾ ਚ ਪੇਤ੍ਯਾ ਚਾਤਿ ਮਾਤਰਾ ਚ ਪਿਤਰਾ ਚ. ਮਯ੍ਹਨ੍ਤਿ ਉਪਯੋਗਤ੍ਥੇ ਸਮ੍ਪਦਾਨਵਚਨਂ. ਅਵਲੋਕਯਨ੍ਤੀਤਿ ਮਯਾ ਅਵਲੋਕਿਤਾ ਸਯਮ੍ਪਿ ਮਂ ਅਵਲੋਕਯਨ੍ਤੀ ਮਂ ਉਮ੍ਮਤ੍ਤਕਂ ਅਕਾਸੀਤਿ ਅਤ੍ਥੋ.

ਸਾ ਤਸ੍ਸ ਕਮ੍ਪਿਤਭਾਵਂ ਞਤ੍ਵਾ ਵਾਤਪਾਨਂ ਥਕੇਤ੍ਵਾ ਸਿਰਿਗਬ੍ਭਮੇਵ ਅਗਮਾਸਿ. ਰਞ੍ਞੋਪਿ ਤਸ੍ਸਾ ਦਿਟ੍ਠਕਾਲਤੋ ਪਟ੍ਠਾਯ ਨਗਰਂ ਪਦਕ੍ਖਿਣਕਰਣੇ ਚਿਤ੍ਤਮੇਵ ਨਾਹੋਸਿ. ਸੋ ਸਾਰਥਿਂ ਆਮਨ੍ਤੇਤ੍ਵਾ, ‘‘ਸਮ੍ਮ ਸੁਨਨ੍ਦ, ਰਥਂ ਨਿਵਤ੍ਤੇਹਿ, ਅਯਂ ਛਣੋ ਅਮ੍ਹਾਕਂ ਨਾਨੁਚ੍ਛਵਿਕੋ, ਅਭਿਪਾਰਕਸ੍ਸ ਸੇਨਾਪਤਿਸ੍ਸੇਵਾਨੁਚ੍ਛਵਿਕੋ, ਰਜ੍ਜਮ੍ਪਿ ਤਸ੍ਸੇਵਾਨੁਚ੍ਛਵਿਕ’’ਨ੍ਤਿ ਰਥਂ ਨਿਵਤ੍ਤਾਪੇਤ੍ਵਾ ਪਾਸਾਦਂ ਅਭਿਰੁਯ੍ਹ ਸਿਰਿਸਯਨੇ ਨਿਪਜ੍ਜਿਤ੍ਵਾ ਵਿਪ੍ਪਲਪਨ੍ਤੋ ਆਹ –

੬੨.

‘‘ਯਾ ਪੁਣ੍ਣਮਾਸੇ ਮਿਗਮਨ੍ਦਲੋਚਨਾ, ਉਪਾਵਿਸਿ ਪੁਣ੍ਡਰੀਕਤ੍ਤਚਙ੍ਗੀ;

ਦ੍ਵੇ ਪੁਣ੍ਣਮਾਯੋ ਤਦਹੂ ਅਮਞ੍ਞਹਂ, ਦਿਸ੍ਵਾਨ ਪਾਰਾਵਤਰਤ੍ਤਵਾਸਿਨਿਂ.

੬੩.

‘‘ਅਲ਼ਾਰਪਮ੍ਹੇਹਿ ਸੁਭੇਹਿ ਵਗ੍ਗੁਭਿ, ਪਲੋਭਯਨ੍ਤੀ ਮਂ ਯਦਾ ਉਦਿਕ੍ਖਤਿ;

ਵਿਜਮ੍ਭਮਾਨਾ ਹਰਤੇਵ ਮੇ ਮਨੋ, ਜਾਤਾ ਵਨੇ ਕਿਮ੍ਪੁਰਿਸੀਵ ਪਬ੍ਬਤੇ.

੬੪.

‘‘ਤਦਾ ਹਿ ਬ੍ਰਹਤੀ ਸਾਮਾ, ਆਮੁਤ੍ਤਮਣਿਕੁਣ੍ਡਲਾ;

ਏਕਚ੍ਚਵਸਨਾ ਨਾਰੀ, ਮਿਗੀ ਭਨ੍ਤਾਵੁਦਿਕ੍ਖਤਿ.

੬੫.

‘‘ਕਦਾਸ੍ਸੁ ਮਂ ਤਮ੍ਬਨਖਾ ਸੁਲੋਮਾ, ਬਾਹਾ ਮੁਦੂ ਚਨ੍ਦਨਸਾਰਲਿਤ੍ਤਾ;

ਵਟ੍ਟਙ੍ਗੁਲੀ ਸਨ੍ਨਤਧੀਰਕੁਤ੍ਤਿਯਾ, ਨਾਰੀ ਉਪਞ੍ਞਿਸ੍ਸਤਿ ਸੀਸਤੋ ਸੁਭਾ.

੬੬.

‘‘ਕਦਾਸ੍ਸੁ ਮਂ ਕਞ੍ਚਨਜਾਲੁਰਚ੍ਛਦਾ, ਧੀਤਾ ਤਿਰੀਟਿਸ੍ਸ ਵਿਲਗ੍ਗਮਜ੍ਝਾ;

ਮੁਦੂਹਿ ਬਾਹਾਹਿ ਪਲਿਸ੍ਸਜਿਸ੍ਸਤਿ, ਬ੍ਰਹਾਵਨੇ ਜਾਤਦੁਮਂਵ ਮਾਲੁਵਾ.

੬੭.

‘‘ਕਦਾਸ੍ਸੁ ਲਾਖਾਰਸਰਤ੍ਤਸੁਚ੍ਛਵੀ, ਬਿਨ੍ਦੁਤ੍ਥਨੀ ਪੁਣ੍ਡਰੀਕਤ੍ਤਚਙ੍ਗੀ;

ਮੁਖਂ ਮੁਖੇਨ ਉਪਨਾਮਯਿਸ੍ਸਤਿ, ਸੋਣ੍ਡੋਵ ਸੋਣ੍ਡਸ੍ਸ ਸੁਰਾਯ ਥਾਲਂ.

੬੮.

‘‘ਯਦਾਦ੍ਦਸਂ ਤਂ ਤਿਟ੍ਠਨ੍ਤਿਂ, ਸਬ੍ਬਭਦ੍ਦਂ ਮਨੋਰਮਂ;

ਤਤੋ ਸਕਸ੍ਸ ਚਿਤ੍ਤਸ੍ਸ, ਨਾਵਬੋਧਾਮਿ ਕਞ੍ਚਿਨਂ.

੬੯.

‘‘ਉਮ੍ਮਾਦਨ੍ਤਿਮਹਂ ਦਟ੍ਠਾ, ਆਮੁਤ੍ਤਮਣਿਕੁਣ੍ਡਲਂ;

ਨ ਸੁਪਾਮਿ ਦਿਵਾਰਤ੍ਤਿਂ, ਸਹਸ੍ਸਂਵ ਪਰਾਜਿਤੋ.

੭੦.

‘‘ਸਕ੍ਕੋ ਚੇ ਮੇ ਵਰਂ ਦਜ੍ਜਾ, ਸੋ ਚ ਲਬ੍ਭੇਥ ਮੇ ਵਰੋ;

ਏਕਰਤ੍ਤਂ ਦਿਰਤ੍ਤਂ ਵਾ, ਭਵੇਯ੍ਯਂ ਅਭਿਪਾਰਕੋ;

ਉਮ੍ਮਾਦਨ੍ਤ੍ਯਾ ਰਮਿਤ੍ਵਾਨ, ਸਿਵਿਰਾਜਾ ਤਤੋ ਸਿਯ’’ਨ੍ਤਿ.

ਤਤ੍ਥ ਪੁਣ੍ਣਮਾਸੇਤਿ ਪੁਣ੍ਣਚਨ੍ਦਾਯ ਰਤ੍ਤਿਯਾ. ਮਿਗਮਨ੍ਦਲੋਚਨਾਤਿ ਕਣ੍ਡਸਨ੍ਤਾਸੇਨ ਪਲਾਯਿਤ੍ਵਾ ਵਨਨ੍ਤਰੇ ਠਤ੍ਵਾ ਲੁਦ੍ਦਂ ਓਲੋਕੇਨ੍ਤਿਯਾ ਮਿਗਿਯਾ ਵਿਯ ਮਨ੍ਦਾਨਿ ਲੋਚਨਾਨਿ ਅਸ੍ਸਾਤਿ ਮਿਗਮਨ੍ਦਲੋਚਨਾ. ਉਪਾਵਿਸੀਤਿ ਪਦੁਮਵਣ੍ਣੇਨ ਕਰਤਲੇਨ ਪੁਪ੍ਫਾਨਿ ਖਿਪਿਤ੍ਵਾ ਮਂ ਓਲੋਕੇਨ੍ਤੀ ਵਾਤਪਾਨੇ ਨਿਸੀਦਿ. ਪੁਣ੍ਡਰੀਕਤ੍ਤਚਙ੍ਗੀਤਿ ਰਤ੍ਤਪਦੁਮਵਣ੍ਣਸਰੀਰਾ. ਦ੍ਵੇ ਪੁਣ੍ਣਮਾਯੋਤਿ ਅਹਂ ਤਦਹੁ ਤਸ੍ਮਿਂ ਛਣਦਿਵਸੇ ਤਂ ਪਾਰਾਵਤਪਾਦਸਮਾਨਵਣ੍ਣਰਤ੍ਤਵਤ੍ਥਨਿਵਤ੍ਥਂ ਦਿਸ੍ਵਾ ਤਸ੍ਸਾ ਮੁਖਸੋਭਂ ਓਲੋਕੇਨ੍ਤੋ ਏਕਸ੍ਸ ਪਾਚੀਨਲੋਕਧਾਤੁਤੋ ਏਕਸ੍ਸ ਅਭਿਪਾਰਕਸ੍ਸ ਸੇਨਾਪਤਿਨੋ ਨਿਵੇਸਨੇਤਿ ਦ੍ਵਿਨ੍ਨਂ ਪੁਣ੍ਣਚਨ੍ਦਾਨਂ ਉਗ੍ਗਤਤ੍ਤਾ ਦ੍ਵੇ ਪੁਣ੍ਣਮਾਯੋ ਅਮਞ੍ਞਿਂ. ਅਲ਼ਾਰਪਮ੍ਹੇਹੀਤਿ ਵਿਸਾਲਪਖੁਮੇਹਿ. ਸੁਭੇਹੀਤਿ ਪਰਿਸੁਦ੍ਧੇਹਿ. ਵਗ੍ਗੁਭੀਤਿ ਮਧੁਰਾਕਾਰੇਹਿ. ਉਦਿਕ੍ਖਤੀਤਿ ਏਵਰੂਪੇਹਿ ਨੇਤ੍ਤੇਹਿ ਯਸ੍ਮਿਂ ਖਣੇ ਓਲੋਕੇਤਿ. ਪਬ੍ਬਤੇਤਿ ਯਥਾ ਹਿਮਵਨ੍ਤਪਬ੍ਬਤੇ ਸੁਪੁਪ੍ਫਿਤਵਨੇ ਵੀਣਂ ਆਦਾਯ ਤਨ੍ਤਿਸ੍ਸਰੇਨ ਅਤ੍ਤਨੋ ਸਰਂ ਸਂਸਨ੍ਦਨ੍ਤੀ ਕਿਮ੍ਪੁਰਿਸੀ ਕਿਮ੍ਪੁਰਿਸਸ੍ਸ ਮਨਂ ਹਰਤਿ, ਏਵਂ ਹਰਤੇਵ ਮੇ ਮਨੋਤਿ ਵਿਪ੍ਪਲਪਤਿ.

ਬ੍ਰਹਤੀਤਿ ਉਲ਼ਾਰਾ. ਸਾਮਾਤਿ ਸੁਵਣ੍ਣਵਣ੍ਣਸਾਮਾ. ਏਕਚ੍ਚਵਸਨਾਤਿ ਏਕਚ੍ਚਿਕਵਸਨਾ, ਏਕਵਤ੍ਥਨਿਵਤ੍ਥਾਤਿ ਅਤ੍ਥੋ. ਭਨ੍ਤਾਵੁਦਿਕ੍ਖਤੀਤਿ ਸਣ੍ਹਕੇਸਾ ਪੁਥੁਨਲਾਟਾ ਆਯਤਭਮੂ ਵਿਸਾਲਕ੍ਖੀ ਤੁਙ੍ਗਨਾਸਾ ਰਤ੍ਤੋਟ੍ਠਾ ਸੇਤਦਨ੍ਤਾ ਤਿਖਿਣਦਾਠਾ ਸੁਵਟ੍ਟਿਤਗੀਵਾ ਸੁਤਨੁਬਾਹੁ ਸੁਸਣ੍ਠਿਤਪਯੋਧਰਾ ਕਰਮਿਤਮਜ੍ਝਾ ਵਿਸਾਲਸੋਣੀ ਸੁਵਣ੍ਣਕਦਲਿਸਮਾਨੋਰੁ ਸਾ ਉਤ੍ਤਮਿਤ੍ਥੀ ਤਸ੍ਮਿਂ ਖਣੇ ਮਂ ਉਦਿਕ੍ਖਨ੍ਤੀ ਭਯੇਨ ਵਨਂ ਪਵਿਸਿਤ੍ਵਾ ਪੁਨ ਨਿਵਤ੍ਤਿਤ੍ਵਾ ਲੁਦ੍ਦਂ ਉਦਿਕ੍ਖਨ੍ਤੀ ਭਨ੍ਤਾ ਮਿਗੀਵ ਮਂ ਉਦਿਕ੍ਖਤੀਤਿ ਵਦਤਿ. ਬਾਹਾਮੁਦੂਤਿ ਮੁਦੁਬਾਹਾ. ਸਨ੍ਨਤਧੀਰਕੁਤ੍ਤਿਯਾਤਿ ਸੁਫੁਸਿਤਛੇਕਕਰਣਾ. ਉਪਞ੍ਞਿਸ੍ਸਤਿ ਮਨ੍ਤਿ ਸਾ ਸੁਭਾ ਨਾਰੀ ਕਦਾ ਨੁ ਮਂ ਤੇਹਿ ਤਮ੍ਬਨਖੇਹਿ ਸੀਸਤੋ ਪਟ੍ਠਾਯ ਸਨ੍ਨਤੇਨ ਧੀਰੇਨ ਕਰਣੇਨ ਪਰਿਤੋਸੇਸ੍ਸਤੀਤਿ ਪਤ੍ਥੇਨ੍ਤੋ ਵਿਲਪਤਿ.

ਕਞ੍ਚਨਜਾਲੁਰਚ੍ਛਦਾਤਿ ਕਞ੍ਚਨਮਯਉਰਚ੍ਛਦਾਲਙ੍ਕਾਰਾ. ਵਿਲਗ੍ਗਮਜ੍ਝਾਤਿ ਵਿਲਗ੍ਗਸਰੀਰਾ ਤਨੁਮਜ੍ਝਿਮਾ. ਬ੍ਰਹਾਵਨੇਤਿ ਮਹਾਵਨੇ. ਲਾਖਾਰਸਰਤ੍ਤਸੁਚ੍ਛਵੀਤਿ ਹਤ੍ਥਪਾਦਤਲਅਗ੍ਗਨਖਓਟ੍ਠਮਂਸੇਸੁ ਲਾਖਾਰਸਰਤ੍ਤਮਣਿਪਵਾਲਵਣ੍ਣਾ. ਬਿਨ੍ਦੁਤ੍ਥਨੀਤਿ ਉਦਕਪੁਪ੍ਫੁਲ਼ਪਰਿਮਣ੍ਡਲਤ੍ਥਨੀ. ਤਤੋਤਿ ਯਦਾ ਤਂ ਤਿਟ੍ਠਨ੍ਤਿਂ ਅਦ੍ਦਸਂ, ਤਤੋ ਪਟ੍ਠਾਯ. ਸਕਸ੍ਸ ਚਿਤ੍ਤਸ੍ਸਾਤਿ ਅਤ੍ਤਨੋ ਚਿਤ੍ਤਸ੍ਸ ਅਨਿਸ੍ਸਰੋ ਜਾਤੋਮ੍ਹੀਤਿ ਅਧਿਪ੍ਪਾਯੋ. ਕਞ੍ਚਿਨਨ੍ਤਿ ਕਞ੍ਚਿ ‘‘ਅਯਂ ਅਸੁਕੋ ਨਾਮਾ’’ਤਿ ਨ ਜਾਨਾਮਿ, ਉਮ੍ਮਤ੍ਤਕੋ ਜਾਤੋਮ੍ਹੀਤਿ ਵਦਤਿ. ਦਟ੍ਠਾਤਿ ਦਿਸ੍ਵਾ. ਨ ਸੁਪਾਮੀਤਿ ਨੇਵ ਰਤ੍ਤਿਂ, ਨ ਦਿਵਾ ਨਿਦ੍ਦਂ ਲਭਾਮਿ. ਸੋ ਚ ਲਬ੍ਭੇਥਾਤਿ ਯਂ ਮੇ ਸਕ੍ਕੋ ਵਰਂ ਦਦੇਯ੍ਯ, ਸੋ ਚ ਮੇ ਵਰੋ ਲਬ੍ਭੇਥ, ਲਭੇਯ੍ਯਾਹਂ ਤਂ ਵਰਨ੍ਤਿ ਅਤ੍ਥੋ.

ਅਥ ਤੇ ਅਮਚ੍ਚਾ ਅਭਿਪਾਰਕਸ੍ਸਪਿ ਆਰੋਚਯਿਂਸੁ – ‘‘ਸਾਮਿ ਰਾਜਾ, ਨਗਰਂ ਪਦਕ੍ਖਿਣਂ ਕਰੋਨ੍ਤੋ ਤੁਮ੍ਹਾਕਂ ਘਰਦ੍ਵਾਰਂ ਪਤ੍ਵਾ ਨਿਵਤ੍ਤਿਤ੍ਵਾ ਪਾਸਾਦਂ ਅਭਿਰੁਹੀ’’ਤਿ. ਸੋ ਅਤ੍ਤਨੋ ਗੇਹਂ ਗਨ੍ਤ੍ਵਾ ਉਮ੍ਮਾਦਨ੍ਤਿਂ ਆਮਨ੍ਤੇਤ੍ਵਾ ‘‘ਭਦ੍ਦੇ, ਕਚ੍ਚਿ ਰਞ੍ਞੋ ਅਤ੍ਤਾਨਂ ਦਸ੍ਸੇਸੀ’’ਤਿ ਪੁਚ੍ਛਿ. ‘‘ਸਾਮਿ, ਏਕੋ ਮਹੋਦਰੋ ਮਹਾਦਾਠਿਕੋ ਰਥੇ ਠਤ੍ਵਾ ਆਗਤੋ ਪੁਰਿਸੋ ਅਤ੍ਥਿ, ਅਹਂ ਤਂ ਰਾਜਾ ਵਾ ਅਰਾਜਾ ਵਾਤਿ ਨ ਜਾਨਾਮਿ, ਏਕੋ ਇਸ੍ਸਰੋਤਿ ਪਨ ਵੁਤ੍ਤੇ ਵਾਤਪਾਨੇ ਠਤ੍ਵਾ ਪੁਪ੍ਫਾਨਿ ਖਿਪਿਂ, ਸੋ ਤਾਵਦੇਵ ਨਿਵਤ੍ਤਿਤ੍ਵਾ ਗਤੋ’’ਤਿ. ਸੋ ਤਂ ਸੁਤ੍ਵਾ ‘‘ਨਾਸਿਤੋਮ੍ਹਿ ਤਯਾ’’ਤਿ ਪੁਨਦਿਵਸੇ ਪਾਤੋਵ ਰਾਜਨਿਵੇਸਨਂ ਆਰੁਯ੍ਹ ਸਿਰਿਗਬ੍ਭਦ੍ਵਾਰੇ ਠਤ੍ਵਾ ਰਞ੍ਞੋ ਉਮ੍ਮਾਦਨ੍ਤਿਂ ਨਿਸ੍ਸਾਯ ਵਿਪ੍ਪਲਾਪਂ ਸੁਤ੍ਵਾ ‘‘ਅਯਂ ਉਮ੍ਮਾਦਨ੍ਤਿਯਾ ਪਟਿਬਦ੍ਧਚਿਤ੍ਤੋ ਜਾਤੋ, ਤਂ ਅਲਭਨ੍ਤੋ ਮਰਿਸ੍ਸਤਿ, ਰਞ੍ਞੋ ਚ ਮਮ ਚ ਅਗੁਣਂ ਮੋਚੇਤ੍ਵਾ ਇਮਸ੍ਸ ਮਯਾ ਜੀਵਿਤਂ ਦਾਤੁਂ ਵਟ੍ਟਤੀ’’ਤਿ ਅਤ੍ਤਨੋ ਨਿਵੇਸਨਂ ਗਨ੍ਤ੍ਵਾ ਏਕਂ ਦਲ਼੍ਹਮਨ੍ਤਂ ਉਪਟ੍ਠਾਕਂ ਪਕ੍ਕੋਸਾਪੇਤ੍ਵਾ, ‘‘ਤਾਤ, ਅਸੁਕਟ੍ਠਾਨੇ ਸੁਸਿਰਚੇਤਿਯਰੁਕ੍ਖੋ ਅਤ੍ਥਿ, ਤ੍ਵਂ ਕਞ੍ਚਿ ਅਜਾਨਾਪੇਤ੍ਵਾ ਅਤ੍ਥਙ੍ਗਤੇ ਸੂਰਿਯੇ ਤਤ੍ਥ ਗਨ੍ਤ੍ਵਾ ਅਨ੍ਤੋਰੁਕ੍ਖੇ ਨਿਸੀਦ, ਅਹਂ ਤਤ੍ਥ ਬਲਿਕਮ੍ਮਂ ਕਰੋਨ੍ਤੋ ਤਂ ਠਾਨਂ ਪਤ੍ਵਾ ਦੇਵਤਾ ਨਮਸ੍ਸਨ੍ਤੋ, ‘ਸਾਮਿ ਦੇਵਰਾਜ, ਅਮ੍ਹਾਕਂ ਰਾਜਾ ਨਗਰਮ੍ਹਿ ਛਣੇ ਵਤ੍ਤਮਾਨੇ ਅਕੀਲ਼ਿਤ੍ਵਾ ਸਿਰਿਗਬ੍ਭਂ ਪਵਿਸਿਤ੍ਵਾ ਵਿਪ੍ਪਲਪਨ੍ਤੋਵ ਨਿਪਨ੍ਨੋ, ਮਯਂ ਤਤ੍ਥ ਕਾਰਣਂ ਨ ਜਾਨਾਮ, ਰਾਜਾ ਦੇਵਤਾਨਂ ਬਹੂਪਕਾਰੋ, ਅਨੁਸਂਵਚ੍ਛਰਂ ਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਬਲਿਕਮ੍ਮਂ ਕਰੋਤਿ, ਇਦਂ ਨਾਮ ਨਿਸ੍ਸਾਯ ਰਾਜਾ ਵਿਪ੍ਪਲਪਤੀਤਿ ਆਚਿਕ੍ਖਥ, ਰਞ੍ਞੋ ਨੋ ਜੀਵਿਤਦਾਨਂ ਦੇਥਾ’ਤਿ ਯਾਚਿਸ੍ਸਾਮਿ, ਤ੍ਵਂ ਤਸ੍ਮਿਂ ਖਣੇ ਸਦ੍ਦਂ ਪਰਿਵਤ੍ਤਿਤ੍ਵਾ, ‘ਸੇਨਾਪਤਿ, ਤੁਮ੍ਹਾਕਂ ਰਞ੍ਞੋ ਬ੍ਯਾਧਿ ਨਾਮ ਨਤ੍ਥਿ, ਸੋ ਪਨ ਤਵ ਭਰਿਯਾਯ ਉਮ੍ਮਾਦਨ੍ਤਿਯਾ ਪਟਿਬਦ੍ਧਚਿਤ੍ਤੋ. ਸਚੇ ਨਂ ਲਭਿਸ੍ਸਤਿ, ਜੀਵਿਸ੍ਸਤਿ, ਨੋ ਚੇ, ਮਰਿਸ੍ਸਤਿ. ਸਚੇ ਤਸ੍ਸ ਜੀਵਿਤਂ ਇਚ੍ਛਸਿ, ਉਮ੍ਮਾਦਨ੍ਤਿਮਸ੍ਸ ਦੇਹੀ’ਤਿ ਵਦੇਯ੍ਯਾਸੀ’’ਤਿ ਏਵਂ ਤਂ ਉਗ੍ਗਣ੍ਹਾਪੇਤ੍ਵਾ ਉਯ੍ਯੋਜੇਸਿ.

ਸੋ ਗਨ੍ਤ੍ਵਾ ਤਸ੍ਮਿਂ ਰੁਕ੍ਖੇ ਨਿਸੀਦਿਤ੍ਵਾ ਪੁਨਦਿਵਸੇ ਸੇਨਾਪਤਿਨਾ ਅਮਚ੍ਚਗਣਪਰਿਵੁਤੇਨ ਤਂ ਠਾਨਂ ਗਨ੍ਤ੍ਵਾ ਯਾਚਿਤੋ ਤਥਾ ਅਭਾਸਿ. ਸੇਨਾਪਤਿ ‘‘ਸਾਧੂ’’ਤਿ ਵਤ੍ਵਾ ਦੇਵਤਂ ਵਨ੍ਦਿਤ੍ਵਾ ਅਮਚ੍ਚੇ ਜਾਨਾਪੇਤ੍ਵਾ ਨਗਰਂ ਪਵਿਸਿਤ੍ਵਾ ਰਾਜਨਿਵੇਸਨਂ ਆਰੁਯ੍ਹ ਸਿਰਿਗਬ੍ਭਦ੍ਵਾਰਂ ਆਕੋਟੇਸਿ. ਰਾਜਾ ਸਤਿਂ ਉਪਟ੍ਠਪੇਤ੍ਵਾ ‘‘ਕੋ ਏਸੋ’’ਤਿ ਪੁਚ੍ਛਿ. ਅਹਂ, ਦੇਵ, ਅਭਿਪਾਰਕੋਤਿ. ਅਥਸ੍ਸ ਰਾਜਾ ਦ੍ਵਾਰਂ ਵਿਵਰਿ. ਸੋ ਪਵਿਸਿਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ਗਾਥਮਾਹ –

੭੧.

‘‘ਭੂਤਾਨਿ ਮੇ ਭੂਤਪਤੀ ਨਮਸ੍ਸਤੋ, ਆਗਮ੍ਮ ਯਕ੍ਖੋ ਇਦਮੇਤਦਬ੍ਰਵਿ;

ਰਞ੍ਞੋ ਮਨੋ ਉਮ੍ਮਦਨ੍ਤ੍ਯਾ ਨਿਵਿਟ੍ਠੋ, ਦਦਾਮਿ ਤੇ ਤਂ ਪਰਿਚਾਰਯਸ੍ਸੂ’’ਤਿ.

ਤਤ੍ਥ ਨਮਸ੍ਸਤੋਤਿ ਤੁਮ੍ਹਾਕਂ ਵਿਪ੍ਪਲਾਪਕਾਰਣਜਾਨਨਤ੍ਥਂ ਬਲਿਕਮ੍ਮਂ ਕਤ੍ਵਾ ਨਮਸ੍ਸਨ੍ਤਸ੍ਸ. ਤਨ੍ਤਿ ਅਹਂ ਤਂ ਉਮ੍ਮਾਦਨ੍ਤਿਂ ਤੁਮ੍ਹਾਕਂ ਪਰਿਚਾਰਿਕਂ ਕਤ੍ਵਾ ਦਦਾਮੀਤਿ.

ਅਥ ਨਂ ਰਾਜਾ, ‘‘ਸਮ੍ਮ ਅਭਿਪਾਰਕ, ਮਮ ਉਮ੍ਮਾਦਨ੍ਤਿਯਾ ਪਟਿਬਦ੍ਧਚਿਤ੍ਤਤਾਯ ਵਿਪ੍ਪਲਪਿਤਭਾਵਂ ਯਕ੍ਖਾਪਿ ਜਾਨਨ੍ਤੀ’’ਤਿ ਪੁਚ੍ਛਿ. ਆਮ, ਦੇਵਾਤਿ. ਸੋ ‘‘ਸਬ੍ਬਲੋਕੇਨ ਕਿਰ ਮੇ ਲਾਮਕਭਾਵੋ ਞਾਤੋ’’ਤਿ ਲਜ੍ਜਿਧਮ੍ਮੇ ਪਤਿਟ੍ਠਾਯ ਅਨਨ੍ਤਰਂ ਗਾਥਮਾਹ –

੭੨.

‘‘ਪੁਞ੍ਞਾ ਚ ਧਂਸੇ ਅਮਰੋ ਨ ਚਮ੍ਹਿ, ਜਨੋ ਚ ਮੇ ਪਾਪਮਿਦਞ੍ਚ ਜਞ੍ਞਾ;

ਭੁਸੋ ਚ ਤ੍ਯਸ੍ਸ ਮਨਸੋ ਵਿਘਾਤੋ, ਦਤ੍ਵਾ ਪਿਯਂ ਉਮ੍ਮਦਨ੍ਤਿਂ ਅਦਟ੍ਠਾ’’ਤਿ.

ਤਤ੍ਥ ਧਂਸੇਤਿ, ਸਮ੍ਮ ਅਭਿਪਾਰਕ, ਅਹਂ ਤਾਯ ਸਦ੍ਧਿਂ ਕਿਲੇਸਵਸੇਨ ਪਰਿਚਾਰੇਨ੍ਤੋ ਪੁਞ੍ਞਤੋ ਚ ਧਂਸੇਯ੍ਯਂ, ਤਾਯ ਸਦ੍ਧਿਂ ਪਰਿਚਾਰਿਤਮਤ੍ਤੇਨ ਅਮਰੋ ਚ ਨ ਹੋਮਿ, ਮਹਾਜਨੋ ਚ ਮੇ ਇਮਂ ਲਾਮਕਭਾਵਂ ਜਾਨੇਯ੍ਯ, ਤਤੋ ‘‘ਅਯੁਤ੍ਤਂ ਰਞ੍ਞਾ ਕਤ’’ਨ੍ਤਿ ਗਰਹੇਯ੍ਯ, ਤਞ੍ਚ ਮਮ ਦਤ੍ਵਾ ਪਚ੍ਛਾ ਪਿਯਭਰਿਯਂ ਅਦਟ੍ਠਾ ਤਵ ਮਨਸੋ ਵਿਘਾਤੋ ਚਸ੍ਸਾਤਿ ਅਤ੍ਥੋ.

ਸੇਸਾ ਉਭਿਨ੍ਨਮ੍ਪਿ ਵਚਨਪਟਿਵਚਨਗਾਥਾ ਹੋਨ੍ਤਿ –

੭੩.

‘‘ਜਨਿਨ੍ਦ ਨਾਞ੍ਞਤ੍ਰ ਤਯਾ ਮਯਾ ਵਾ, ਸਬ੍ਬਾਪਿ ਕਮ੍ਮਸ੍ਸ ਕਤਸ੍ਸ ਜਞ੍ਞਾ;

ਯਂ ਤੇ ਮਯਾ ਉਮ੍ਮਦਨ੍ਤੀ ਪਦਿਨ੍ਨਾ, ਭੁਸੇਹਿ ਰਾਜਾ ਵਨਥਂ ਸਜਾਹਿ.

੭੪.

‘‘ਯੋ ਪਾਪਕਂ ਕਮ੍ਮਕਰਂ ਮਨੁਸ੍ਸੋ, ਸੋ ਮਞ੍ਞਤਿ ਮਾਯਿਦ ਮਞ੍ਞਿਂਸੁ ਅਞ੍ਞੇ;

ਪਸ੍ਸਨ੍ਤਿ ਭੂਤਾਨਿ ਕਰੋਨ੍ਤਮੇਤਂ, ਯੁਤ੍ਤਾ ਚ ਯੇ ਹੋਨ੍ਤਿ ਨਰਾ ਪਥਬ੍ਯਾ.

੭੫.

‘‘ਅਞ੍ਞੋ ਨੁ ਤੇ ਕੋਚਿ ਨਰੋ ਪਥਬ੍ਯਾ, ਸਦ੍ਧੇਯ੍ਯ ਲੋਕਸ੍ਮਿ ਨ ਮੇ ਪਿਯਾਤਿ;

ਭੁਸੋ ਚ ਤ੍ਯਸ੍ਸ ਮਨੁਸੋ ਵਿਘਾਤੋ, ਦਤ੍ਵਾ ਪਿਯਂ ਉਮ੍ਮਦਨ੍ਤਿਂ ਅਦਟ੍ਠਾ.

੭੬.

‘‘ਅਦ੍ਧਾ ਪਿਯਾ ਮਯ੍ਹ ਜਨਿਨ੍ਦ ਏਸਾ, ਨ ਸਾ ਮਮਂ ਅਪ੍ਪਿਯਾ ਭੂਮਿਪਾਲ;

ਗਚ੍ਛੇਵ ਤ੍ਵਂ ਉਮ੍ਮਦਨ੍ਤਿਂ ਭਦਨ੍ਤੇ, ਸੀਹੋਵ ਸੇਲਸ੍ਸ ਗੁਹਂ ਉਪੇਤਿ.

੭੭.

‘‘ਨ ਪੀਲ਼ਿਤਾ ਅਤ੍ਤਦੁਖੇਨ ਧੀਰਾ, ਸੁਖਪ੍ਫਲਂ ਕਮ੍ਮ ਪਰਿਚ੍ਚਜਨ੍ਤਿ;

ਸਮ੍ਮੋਹਿਤਾ ਵਾਪਿ ਸੁਖੇਨ ਮਤ੍ਤਾ, ਨ ਪਾਪਕਮ੍ਮਞ੍ਚ ਸਮਾਚਰਨ੍ਤਿ.

੭੮.

‘‘ਤੁਵਞ੍ਹਿ ਮਾਤਾ ਚ ਪਿਤਾ ਚ ਮਯ੍ਹਂ, ਭਤ੍ਤਾ ਪਤੀ ਪੋਸਕੋ ਦੇਵਤਾ ਚ;

ਦਾਸੋ ਅਹਂ ਤੁਯ੍ਹ ਸਪੁਤ੍ਤਦਾਰੋ, ਯਥਾਸੁਖਂ ਸਾਮਿ ਕਰੋਹਿ ਕਾਮਂ.

੭੯.

‘‘ਯੋ ‘ਇਸ੍ਸਰੋਮ੍ਹੀ’ਤਿ ਕਰੋਤਿ ਪਾਪਂ, ਕਤ੍ਵਾ ਚ ਸੋ ਨੁਤ੍ਤਸਤੇ ਪਰੇਸਂ;

ਨ ਤੇਨ ਸੋ ਜੀਵਤਿ ਦੀਘਮਾਯੁ, ਦੇਵਾਪਿ ਪਾਪੇਨ ਸਮੇਕ੍ਖਰੇ ਨਂ.

੮੦.

‘‘ਅਞ੍ਞਾਤਕਂ ਸਾਮਿਕੇਹੀ ਪਦਿਨ੍ਨਂ, ਧਮ੍ਮੇ ਠਿਤਾ ਯੇ ਪਟਿਚ੍ਛਨ੍ਤਿ ਦਾਨਂ;

ਪਟਿਚ੍ਛਕਾ ਦਾਯਕਾ ਚਾਪਿ ਤਤ੍ਥ, ਸੁਖਪ੍ਫਲਞ੍ਞੇਵ ਕਰੋਨ੍ਤਿ ਕਮ੍ਮਂ.

੮੧.

‘‘ਅਞ੍ਞੋ ਨੁ ਤੇ ਕੋਚਿ ਨਰੋ ਪਥਬ੍ਯਾ, ਸਦ੍ਧੇਯ੍ਯ ਲੋਕਸ੍ਮਿ ਨ ਮੇ ਪਿਯਾਤਿ;

ਭੁਸੋ ਚ ਤ੍ਯਸ੍ਸ ਮਨਸੋ ਵਿਘਾਤੋ, ਦਤ੍ਵਾ ਪਿਯਂ ਉਮ੍ਮਦਨ੍ਤਿਂ ਅਦਟ੍ਠਾ.

੮੨.

‘‘ਅਦ੍ਧਾ ਪਿਯਾ ਮਯ੍ਹ ਜਨਿਨ੍ਦ ਏਸਾ, ਨ ਸਾ ਮਮਂ ਅਪ੍ਪਿਯਾ ਭੂਮਿਪਾਲ;

ਯਂ ਤੇ ਮਯਾ ਉਮ੍ਮਦਨ੍ਤੀ ਪਦਿਨ੍ਨਾ, ਭੁਸੇਹਿ ਰਾਜਾ ਵਨਥਂ ਸਜਾਹਿ.

੮੩.

‘‘ਯੋ ਅਤ੍ਤਦੁਕ੍ਖੇਨ ਪਰਸ੍ਸ ਦੁਕ੍ਖਂ, ਸੁਖੇਨ ਵਾ ਅਤ੍ਤਸੁਖਂ ਦਹਾਤਿ;

ਯਥੇਵਿਦਂ ਮਯ੍ਹ ਤਥਾ ਪਰੇਸਂ, ਯੋ ਏਵਂ ਜਾਨਾਤਿ ਸ ਵੇਦਿ ਧਮ੍ਮਂ.

੮੪.

‘‘ਅਞ੍ਞੋ ਨੁ ਤੇ ਕੋਚਿ ਨਰੋ ਪਥਬ੍ਯਾ, ਸਦ੍ਧੇਯ੍ਯ ਲੋਕਸ੍ਮਿ ਨ ਮੇ ਪਿਯਾਤਿ;

ਭੁਸੋ ਚ ਤ੍ਯਸ੍ਸ ਮਨਸੋ ਵਿਘਾਤੋ, ਦਤ੍ਵਾ ਪਿਯਂ ਉਮ੍ਮਦਨ੍ਤਿਂ ਅਦਟ੍ਠਾ.

੮੫.

‘‘ਜਨਿਨ੍ਦ ਜਾਨਾਸਿ ਪਿਯਾ ਮਮੇਸਾ, ਨ ਸਾ ਮਮਂ ਅਪ੍ਪਿਯਾ ਭੂਮਿਪਾਲ;

ਪਿਯੇਨ ਤੇ ਦਮ੍ਮਿ ਪਿਯਂ ਜਨਿਨ੍ਦ, ਪਿਯਦਾਯਿਨੋ ਦੇਵ ਪਿਯਂ ਲਭਨ੍ਤਿ.

੮੬.

‘‘ਸੋ ਨੂਨਾਹਂ ਵਧਿਸ੍ਸਾਮਿ, ਅਤ੍ਤਾਨਂ ਕਾਮਹੇਤੁਕਂ;

ਨ ਹਿ ਧਮ੍ਮਂ ਅਧਮ੍ਮੇਨ, ਅਹਂ ਵਧਿਤੁਮੁਸ੍ਸਹੇ.

੮੭.

‘‘ਸਚੇ ਤੁਵਂ ਮਯ੍ਹ ਸਤਿਂ ਜਨਿਨ੍ਦ, ਨ ਕਾਮਯਾਸਿ ਨਰਵੀਰ ਸੇਟ੍ਠ;

ਚਜਾਮਿ ਨਂ ਸਬ੍ਬਜਨਸ੍ਸ ਸਿਬ੍ਯਾ, ਮਯਾ ਪਮੁਤ੍ਤਂ ਤਤੋ ਅਵ੍ਹਯੇਸਿ ਨਂ.

੮੮.

‘‘ਅਦੂਸਿਯਂ ਚੇ ਅਭਿਪਾਰਕ ਤ੍ਵਂ, ਚਜਾਸਿ ਕਤ੍ਤੇ ਅਹਿਤਾਯ ਤ੍ਯਸ੍ਸ;

ਮਹਾ ਚ ਤੇ ਉਪਵਾਦੋਪਿ ਅਸ੍ਸ, ਨ ਚਾਪਿ ਤ੍ਯਸ੍ਸ ਨਗਰਮ੍ਹਿ ਪਕ੍ਖੋ.

੮੯.

‘‘ਅਹਂ ਸਹਿਸ੍ਸਂ ਉਪਵਾਦਮੇਤਂ, ਨਿਨ੍ਦਂ ਪਸਂਸਂ ਗਰਹਞ੍ਚ ਸਬ੍ਬਂ;

ਮਮੇਤਮਾਗਚ੍ਛਤੁ ਭੂਮਿਪਾਲ, ਯਥਾਸੁਖਂ ਸਿਵਿ ਕਰੋਹਿ ਕਾਮਂ.

੯੦.

‘‘ਯੋ ਨੇਵ ਨਿਨ੍ਦਂ ਨ ਪਨਪ੍ਪਸਂਸਂ, ਆਦਿਯਤਿ ਗਰਹਂ ਨੋਪਿ ਪੂਜਂ;

ਸਿਰੀ ਚ ਲਕ੍ਖੀ ਚ ਅਪੇਤਿ ਤਮ੍ਹਾ, ਆਪੋ ਸੁਵੁਟ੍ਠੀਵ ਯਥਾ ਥਲਮ੍ਹਾ.

੯੧.

‘‘ਯਂ ਕਿਞ੍ਚਿ ਦੁਕ੍ਖਞ੍ਚ ਸੁਖਞ੍ਚ ਏਤ੍ਤੋ, ਧਮ੍ਮਾਤਿਸਾਰਞ੍ਚ ਮਨੋਵਿਘਾਤਂ;

ਉਰਸਾ ਅਹਂ ਪਚ੍ਚੁਤ੍ਤਰਿਸ੍ਸਾਮਿ ਸਬ੍ਬਂ, ਪਥਵੀ ਯਥਾ ਥਾਵਰਾਨਂ ਤਸਾਨਂ.

੯੨.

‘‘ਧਮ੍ਮਾਤਿਸਾਰਞ੍ਚ ਮਨੋਵਿਘਾਤਂ, ਦੁਕ੍ਖਞ੍ਚ ਨਿਚ੍ਛਾਮਿ ਅਹਂ ਪਰੇਸਂ;

ਏਕੋਵਿਮਂ ਹਾਰਯਿਸ੍ਸਾਮਿ ਭਾਰਂ, ਧਮ੍ਮੇ ਠਿਤੋ ਕਿਞ੍ਚਿ ਅਹਾਪਯਨ੍ਤੋ.

੯੩.

‘‘ਸਗ੍ਗੂਪਗਂ ਪੁਞ੍ਞਕਮ੍ਮਂ ਜਨਿਨ੍ਦ, ਮਾ ਮੇ ਤੁਵਂ ਅਨ੍ਤਰਾਯਂ ਅਕਾਸਿ;

ਦਦਾਮਿ ਤੇ ਉਮ੍ਮਦਨ੍ਤਿਂ ਪਸਨ੍ਨੋ, ਰਾਜਾਵ ਯਞ੍ਞੇ ਧਨਂ ਬ੍ਰਾਹ੍ਮਣਾਨਂ.

੯੪.

‘‘ਅਦ੍ਧਾ ਤੁਵਂ ਕਤ੍ਤੇ ਹਿਤੇਸਿ ਮਯ੍ਹਂ, ਸਖਾ ਮਮਂ ਉਮ੍ਮਦਨ੍ਤੀ ਤੁਵਞ੍ਚ;

ਨਿਨ੍ਦੇਯ੍ਯੁ ਦੇਵਾ ਪਿਤਰੋ ਚ ਸਬ੍ਬੇ, ਪਾਪਞ੍ਚ ਪਸ੍ਸਂ ਅਭਿਸਮ੍ਪਰਾਯਂ.

੯੫.

‘‘ਨ ਹੇਤਧਮ੍ਮਂ ਸਿਵਿਰਾਜ ਵਜ੍ਜੁਂ, ਸਨੇਗਮਾ ਜਾਨਪਦਾ ਚ ਸਬ੍ਬੇ;

ਯਂ ਤੇ ਮਯਾ ਉਮ੍ਮਦਨ੍ਤੀ ਪਦਿਨ੍ਨਾ, ਭੁਸੇਹਿ ਰਾਜਾ ਵਨਥਂ ਸਜਾਹਿ.

੯੬.

‘‘ਅਦ੍ਧਾ ਤੁਵਂ ਕਤ੍ਤੇ ਹਿਤੇਸਿ ਮਯ੍ਹਂ, ਸਖਾ ਮਮਂ ਉਮ੍ਮਦਨ੍ਤੀ ਤੁਵਞ੍ਚ;

ਸਤਞ੍ਚ ਧਮ੍ਮਾਨਿ ਸੁਕਿਤ੍ਤਿਤਾਨਿ, ਸਮੁਦ੍ਦਵੇਲਾਵ ਦੁਰਚ੍ਚਯਾਨਿ.

੯੭.

‘‘ਆਹੁਨੇਯ੍ਯੋ ਮੇਸਿ ਹਿਤਾਨੁਕਮ੍ਪੀ, ਧਾਤਾ ਵਿਧਾਤਾ ਚਸਿ ਕਾਮਪਾਲੋ;

ਤਯੀ ਹੁਤਾ ਰਾਜ ਮਹਪ੍ਫਲਾ ਹਿ, ਕਾਮੇਨ ਮੇ ਉਮ੍ਮਦਨ੍ਤਿਂ ਪਟਿਚ੍ਛ.

੯੮.

‘‘ਅਦ੍ਧਾ ਹਿ ਸਬ੍ਬਂ ਅਭਿਪਾਰਕ ਤ੍ਵਂ, ਧਮ੍ਮਂ ਅਚਾਰੀ ਮਮ ਕਤ੍ਤੁਪੁਤ੍ਤ;

ਅਞ੍ਞੋ ਨੁ ਤੇ ਕੋ ਇਧ ਸੋਤ੍ਥਿਕਤ੍ਤਾ, ਦ੍ਵਿਪਦੋ ਨਰੋ ਅਰੁਣੇ ਜੀਵਲੋਕੇ.

੯੯.

‘‘ਤੁਵਂ ਨੁ ਸੇਟ੍ਠੋ ਤ੍ਵਮਨੁਤ੍ਤਰੋਸਿ, ਤ੍ਵਂ ਧਮ੍ਮਗੁਤ੍ਤੋ ਧਮ੍ਮਵਿਦੂ ਸੁਮੇਧੋ;

ਸੋ ਧਮ੍ਮਗੁਤ੍ਤੋ ਚਿਰਮੇਵ ਜੀਵ, ਧਮ੍ਮਞ੍ਚ ਮੇ ਦੇਸਯ ਧਮ੍ਮਪਾਲ.

੧੦੦.

‘‘ਤਦਿਙ੍ਘ ਅਭਿਪਾਰਕ, ਸੁਣੋਹਿ ਵਚਨਂ ਮਮ;

ਧਮ੍ਮਂ ਤੇ ਦੇਸਯਿਸ੍ਸਾਮਿ, ਸਤਂ ਆਸੇਵਿਤਂ ਅਹਂ.

੧੦੧.

‘‘ਸਾਧੁ ਧਮ੍ਮਰੁਚੀ ਰਾਜਾ, ਸਾਧੁ ਪਞ੍ਞਾਣਵਾ ਨਰੋ;

ਸਾਧੁ ਮਿਤ੍ਤਾਨਮਦ੍ਦੁਬ੍ਭੋ, ਪਾਪਸ੍ਸਾਕਰਣਂ ਸੁਖਂ.

੧੦੨.

‘‘ਅਕ੍ਕੋਧਨਸ੍ਸ ਵਿਜਿਤੇ, ਠਿਤਧਮ੍ਮਸ੍ਸ ਰਾਜਿਨੋ;

ਸੁਖਂ ਮਨੁਸ੍ਸਾ ਆਸੇਥ, ਸੀਤਚ੍ਛਾਯਾਯ ਸਙ੍ਘਰੇ.

੧੦੩.

‘‘ਨ ਚਾਹਮੇਤਂ ਅਭਿਰੋਚਯਾਮਿ, ਕਮ੍ਮਂ ਅਸਮੇਕ੍ਖਕਤਂ ਅਸਾਧੁ;

ਯੇ ਵਾਪਿ ਞਤ੍ਵਾਨ ਸਯਂ ਕਰੋਨ੍ਤਿ, ਉਪਮਾ ਇਮਾ ਮਯ੍ਹਂ ਤੁਵਂ ਸੁਣੋਹਿ.

੧੦੪.

‘‘ਗਵਂ ਚੇ ਤਰਮਾਨਾਨਂ, ਜਿਮ੍ਹਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਤਾ ਜਿਮ੍ਹਂ ਗਚ੍ਛਨ੍ਤਿ, ਨੇਤ੍ਤੇ ਜਿਮ੍ਹਂ ਗਤੇ ਸਤਿ.

੧੦੫.

‘‘ਏਵਮੇਵ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਚੇ ਅਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਦੁਖਂ ਸੇਤਿ, ਰਾਜਾ ਚੇ ਹੋਤਿ ਅਧਮ੍ਮਿਕੋ.

੧੦੬.

‘‘ਗਵਂ ਚੇ ਤਰਮਾਨਾਨਂ, ਉਜੁਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਗਾਵੀ ਉਜੁਂ ਯਨ੍ਤਿ, ਨੇਤ੍ਤੇ ਉਜੁਂ ਗਤੇ ਸਤਿ.

੧੦੭.

‘‘ਏਵਮੇਵ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਸਚੇ ਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਸੁਖਂ ਸੇਤਿ, ਰਾਜਾ ਚੇ ਹੋਤਿ ਧਮ੍ਮਿਕੋ.

੧੦੮.

‘‘ਨ ਚਾਪਾਹਂ ਅਧਮ੍ਮੇਨ, ਅਮਰਤ੍ਤਮਭਿਪਤ੍ਥਯੇ;

ਇਮਂ ਵਾ ਪਥਵਿਂ ਸਬ੍ਬਂ, ਵਿਜੇਤੁਂ ਅਭਿਪਾਰਕ.

੧੦੯.

‘‘ਯਞ੍ਹਿ ਕਿਞ੍ਚਿ ਮਨੁਸ੍ਸੇਸੁ, ਰਤਨਂ ਇਧ ਵਿਜ੍ਜਤਿ;

ਗਾਵੋ ਦਾਸੋ ਹਿਰਞ੍ਞਞ੍ਚ, ਵਤ੍ਥਿਯਂ ਹਰਿਚਨ੍ਦਨਂ.

੧੧੦.

‘‘ਅਸ੍ਸਿਤ੍ਥਿਯੋ ਰਤਨਂ ਮਣਿਕਞ੍ਚ, ਯਞ੍ਚਾਪਿ ਮੇ ਚਨ੍ਦਿਮਸੂਰਿਯਾ ਅਭਿਪਾਲਯਨ੍ਤਿ;

ਨ ਤਸ੍ਸ ਹੇਤੁ ਵਿਸਮਂ ਚਰੇਯ੍ਯਂ, ਮਜ੍ਝੇ ਸਿਵੀਨਂ ਉਸਭੋਮ੍ਹਿ ਜਾਤੋ.

੧੧੧.

‘‘ਨੇਤਾ ਹਿਤਾ ਉਗ੍ਗਤੋ ਰਟ੍ਠਪਾਲੋ, ਧਮ੍ਮਂ ਸਿਵੀਨਂ ਅਪਚਾਯਮਾਨੋ;

ਸੋ ਧਮ੍ਮਮੇਵਾਨੁਵਿਚਿਨ੍ਤਯਨ੍ਤੋ, ਤਸ੍ਮਾ ਸਕੇ ਚਿਤ੍ਤਵਸੇ ਨ ਵਤ੍ਤੋ.

੧੧੨.

‘‘ਅਦ੍ਧਾ ਤੁਵਂ ਮਹਾਰਾਜ, ਨਿਚ੍ਚਂ ਅਬ੍ਯਸਨਂ ਸਿਵਂ;

ਕਰਿਸ੍ਸਸਿ ਚਿਰਂ ਰਜ੍ਜਂ, ਪਞ੍ਞਾ ਹਿ ਤਵ ਤਾਦਿਸੀ.

੧੧੩.

‘‘ਏਤਂ ਤੇ ਅਨੁਮੋਦਾਮ, ਯਂ ਧਮ੍ਮਂ ਨਪ੍ਪਮਜ੍ਜਸਿ;

ਧਮ੍ਮਂ ਪਮਜ੍ਜ ਖਤ੍ਤਿਯੋ, ਰਟ੍ਠਾ ਚਵਤਿ ਇਸ੍ਸਰੋ.

੧੧੪.

‘‘ਧਮ੍ਮਂ ਚਰ ਮਹਾਰਾਜ, ਮਾਤਾਪਿਤੂਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੧੫.

‘‘ਧਮ੍ਮਂ ਚਰ ਮਹਾਰਾਜ, ਪੁਤ੍ਤਦਾਰੇਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੧੬.

‘‘ਧਮ੍ਮਂ ਚਰ ਮਹਾਰਾਜ, ਮਿਤ੍ਤਾਮਚ੍ਚੇਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੧੭.

‘‘ਧਮ੍ਮਂ ਚਰ ਮਹਾਰਾਜ, ਵਾਹਨੇਸੁ ਬਲੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੧੮.

‘‘ਧਮ੍ਮਂ ਚਰ ਮਹਾਰਾਜ, ਗਾਮੇਸੁ ਨਿਗਮੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੧੯.

‘‘ਧਮ੍ਮਂ ਚਰ ਮਹਾਰਾਜ, ਰਟ੍ਠੇਸੁ ਜਨਪਦੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੨੦.

‘‘ਧਮ੍ਮਂ ਚਰ ਮਹਾਰਾਜ, ਸਮਣਬ੍ਰਾਹ੍ਮਣੇਸੁ ਚ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੨੧.

‘‘ਧਮ੍ਮਂ ਚਰ ਮਹਾਰਾਜ, ਮਿਗਪਕ੍ਖੀਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੨੨.

‘‘ਧਮ੍ਮਂ ਚਰ ਮਹਾਰਾਜ, ਧਮ੍ਮੋ ਚਿਣ੍ਣੋ ਸੁਖਾਵਹੋ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੨੩.

‘‘ਧਮ੍ਮਂ ਚਰ ਮਹਾਰਾਜ, ਸਇਨ੍ਦਾ ਦੇਵਾ ਸਬ੍ਰਹ੍ਮਕਾ;

ਸੁਚਿਣ੍ਣੇਨ ਦਿਵਂ ਪਤ੍ਤਾ, ਮਾ ਧਮ੍ਮਂ ਰਾਜ ਪਾਮਦੋ’’ਤਿ.

ਤਤ੍ਥ ਸਬ੍ਬਾਪੀਤਿ, ਜਨਿਨ੍ਦ, ਅਹਮੇਤਂ ਏਕਕੋਵ ਪਟਿਚ੍ਛਾਦੇਤ੍ਵਾ ਆਨੇਸ੍ਸਾਮਿ, ਤਸ੍ਮਾ ਠਪੇਤ੍ਵਾ ਮਮਞ੍ਚ ਤੁਵਞ੍ਚ ਅਞ੍ਞਾ ਸਬ੍ਬਾਪਿ ਪਜਾ ਇਮਸ੍ਸ ਕਤਸ੍ਸ ਆਕਾਰਮਤ੍ਤਮ੍ਪਿ ਨ ਜਞ੍ਞਾ ਨ ਜਾਨਿਸ੍ਸਨ੍ਤਿ. ਭੁਸੇਹੀਤਿ ਤਾਯ ਸਦ੍ਧਿਂ ਅਭਿਰਮਨ੍ਤੋ ਅਤ੍ਤਨੋ ਤਣ੍ਹਾਵਨਥਂ ਭੁਸਂ ਕਰੋਹਿ ਵਡ੍ਢੇਹਿ ਮਨੋਰਥਂ ਪੂਰੇਹਿ. ਸਜਾਹੀਤਿ ਮਨੋਰਥਂ ਪਨ ਪੂਰੇਤ੍ਵਾ ਸਚੇ ਤੇ ਨ ਰੁਚ੍ਚਤਿ, ਅਥ ਨਂ ਸਜਾਹਿ ਮਯ੍ਹਮੇਵ ਪਟਿਦੇਹਿ. ਕਮ੍ਮਕਰਨ੍ਤਿ, ਸਮ੍ਮ ਅਭਿਪਾਰਕ, ਯੋ ਮਨੁਸ੍ਸੋ ਪਾਪਕਂ ਕਮ੍ਮਂ ਕਰੋਨ੍ਤੋ, ਸੋ ਪਚ੍ਛਾ ਮਾ ਇਧ ਅਞ੍ਞੇ ਇਦਂ ਪਾਪਕਮ੍ਮਂ ਮਞ੍ਞਿਂਸੁ ਮਾ ਜਾਨਨ੍ਤੂਤਿ ਮਞ੍ਞਤਿ ਚਿਨ੍ਤੇਤਿ, ਦੁਚਿਨ੍ਤਿਤਮੇਤਂ ਤਸ੍ਸ. ਕਿਂਕਾਰਣਾ? ਪਸ੍ਸਨ੍ਤਿ ਭੂਤਾਨਿ ਕਰੋਨ੍ਤਮੇਤਨ੍ਤਿ ਯੇ ਚ ਬੁਦ੍ਧਾ ਪਚ੍ਚੇਕਬੁਦ੍ਧਾ ਬੁਦ੍ਧਪੁਤ੍ਤਾ ਇਦ੍ਧਿਯਾ ਯੁਤ੍ਤਾ, ਤੇ ਚ ਨਂ ਪਸ੍ਸਨ੍ਤਿਯੇਵ. ਨ ਮੇ ਪਿਯਾਤਿ, ਸਮ੍ਮ ਅਭਿਪਾਰਕ, ਅਞ੍ਞੋ ਨੁ ਤੇ ਕੋਚਿ ‘‘ਇਧ ਲੋਕਸ੍ਮਿਂ ਸਕਲਾਯਪਿ ਪਥਵਿਯਾ ਨ ਮੇ ਉਮ੍ਮਾਦਨ੍ਤੀ ਪਿਯਾ’’ਤਿ ਏਵਂ ਸਦ੍ਦਹੇਯ੍ਯ.

ਸੀਹੋਵ ਸੇਲਸ੍ਸ ਗੁਹਨ੍ਤਿ, ਮਹਾਰਾਜ, ਸਚੇ ਤ੍ਵਂ ਤਂ ਇਧ ਨ ਆਨੇਸਿ, ਅਥ ਯਥਾ ਸੀਹੋ ਕਿਲੇਸਪਰਿਲ਼ਾਹੇ ਉਪ੍ਪਨ੍ਨੇ ਸੀਹਪੋਤਿਕਾਯ ਵਸਨਟ੍ਠਾਨਂ ਮਣਿਗੁਹਂ ਉਪੇਤਿ, ਏਵਂ ਤਸ੍ਸਾ ਵਸਨਟ੍ਠਾਨਂ ਗਚ੍ਛ, ਤਤ੍ਥ ਅਤ੍ਤਨੋ ਪਤ੍ਥਨਂ ਪੂਰੇਹੀਤਿ. ਸੁਖਪ੍ਫਲਨ੍ਤਿ, ਸਮ੍ਮ ਅਭਿਪਾਰਕ, ਪਣ੍ਡਿਤਾ ਅਤ੍ਤਨੋ ਦੁਕ੍ਖੇਨ ਫੁਟ੍ਠਾ ਸਮਾਨਾ ਨ ਸੁਖਵਿਪਾਕਦਾਯਕਕਮ੍ਮਂ ਪਰਿਚ੍ਚਜਨ੍ਤਿ, ਸਮ੍ਮੋਹਿਤਾ ਵਾਪਿ ਹੁਤ੍ਵਾ ਮੋਹੇਨ ਮੂਲ਼੍ਹਾ ਸੁਖੇਨ ਮਤ੍ਤਾ ਪਾਪਕਮ੍ਮਂ ਨਾਮ ਨ ਸਮਾਚਰਨ੍ਤਿ. ਯਥਾਸੁਖਂ, ਸਾਮਿ, ਕਰੋਹਿ ਕਾਮਨ੍ਤਿ, ਸਾਮਿ ਸਿਵਿਰਾਜ, ਅਤ੍ਤਨੋ ਦਾਸਿਂ ਪਰਿਚਾਰੇਨ੍ਤਸ੍ਸ ਗਰਹਾ ਨਾਮ ਨਤ੍ਥਿ, ਤ੍ਵਂ ਯਥਾਸੁਖਂ ਯਥਾਜ੍ਝਾਸਯਂ ਕਾਮਂ ਕਰੋਹਿ, ਅਤ੍ਤਨੋ ਇਚ੍ਛਂ ਪੂਰੇਹੀਤਿ. ਨ ਤੇਨ ਸੋ ਜੀਵਤੀਤਿ, ਸਮ੍ਮ ਅਭਿਪਾਰਕ, ਯੋ ‘‘ਇਸ੍ਸਰੋਮ੍ਹੀ’’ਤਿ ਪਾਪਂ ਕਰੋਤਿ, ਕਤ੍ਵਾ ਚ ਕਿਂ ਮਂ ਦੇਵਮਨੁਸ੍ਸਾ ਵਕ੍ਖਨ੍ਤੀਤਿ ਨ ਉਤ੍ਤਸਤਿ ਨ ਓਤ੍ਤਪ੍ਪਤਿ, ਸੋ ਤੇਨ ਕਮ੍ਮੇਨ ਨ ਚ ਦੀਘਕਾਲਂ ਜੀਵਤਿ, ਖਿਪ੍ਪਮੇਵ ਮਰਤਿ, ਦੇਵਤਾਪਿ ਪਨ ‘‘ਕਿਂ ਇਮਸ੍ਸ ਪਾਪਰਞ੍ਞੋ ਰਜ੍ਜੇਨ, ਵਰਮਸ੍ਸ ਵਾਲ਼ੁਕਘਟਂ ਗਲੇ ਬਨ੍ਧਿਤ੍ਵਾ ਮਰਣ’’ਨ੍ਤਿ ਲਾਮਕੇਨ ਚਕ੍ਖੁਨਾ ਓਲੋਕੇਨ੍ਤਿ.

ਅਞ੍ਞਾਤਕਨ੍ਤਿ, ਮਹਾਰਾਜ, ਅਞ੍ਞੇਸਂ ਸਨ੍ਤਕਂ ਤੇਹਿ ਸਾਮਿਕੇਹਿ ਪਦਿਨ੍ਨਂ ਦਾਨਂ ਯੇ ਅਤ੍ਤਨੋ ਧਮ੍ਮੇ ਠਿਤਾ ਪਟਿਚ੍ਛਨ੍ਤਿ, ਤੇ ਤਤ੍ਥ ਪਟਿਚ੍ਛਕਾ ਚ ਦਾਯਕਾ ਚ ਸਬ੍ਬੇਪਿ ਸੁਖਪ੍ਫਲਮੇਵ ਕਮ੍ਮਂ ਕਰੋਨ੍ਤਿ. ਪਟਿਗ੍ਗਾਹਕੇ ਹਿ ਪਟਿਗ੍ਗਣ੍ਹਨ੍ਤੇ ਤਂ ਦਾਨਂ ਦਾਯਕਸ੍ਸ ਮਹਨ੍ਤਂ ਵਿਪਾਕਂ ਦੇਤੀਤਿ. ਯੋ ਅਤ੍ਤਦੁਕ੍ਖੇਨਾਤਿ, ਸਮ੍ਮ ਅਭਿਪਾਰਕ, ਯੋ ਅਤ੍ਤਨੋ ਦੁਕ੍ਖੇਨ ਪੀਲ਼ਿਤੋ ਤਂ ਪਰਸ੍ਸ ਦਹਤਿ, ਅਤ੍ਤਨੋ ਸਰੀਰਤੋ ਅਪਨੇਤ੍ਵਾ ਪਰਸ੍ਸ ਸਰੀਰੇ ਖਿਪਤਿ, ਪਰਸ੍ਸ ਵਾ ਸੁਖੇਨ ਅਤ੍ਤਨੋ ਸੁਖਂ ਦਹਤਿ, ਪਰਸ੍ਸ ਸੁਖਂ ਗਹੇਤ੍ਵਾ ਅਤ੍ਤਨਿ ਪਕ੍ਖਿਪਤਿ, ‘‘ਅਤ੍ਤਨੋ ਦੁਕ੍ਖਂ ਹਰਿਸ੍ਸਾਮੀ’’ਤਿ ਪਰਂ ਦੁਕ੍ਖਿਤਂ ਕਰੋਤਿ, ‘‘ਅਤ੍ਤਾਨਂ ਸੁਖੇਸ੍ਸਾਮੀ’’ਤਿ ਪਰਂ ਦੁਕ੍ਖਿਤਂ ਕਰੋਤਿ, ‘‘ਅਤ੍ਤਾਨਂ ਸੁਖੇਸ੍ਸਾਮੀ’’ਤਿ ਪਰਸ੍ਸ ਸੁਖਂ ਨਾਸੇਤਿ, ਨ ਸੋ ਧਮ੍ਮਂ ਜਾਨਾਤਿ. ਯੋ ਪਨ ਏਵਂ ਜਾਨਾਤਿ ‘‘ਯਥੇਵਿਦਂ ਮਯ੍ਹਂ ਸੁਖਦੁਕ੍ਖਂ, ਤਥਾ ਪਰੇਸ’’ਨ੍ਤਿ, ਸ ਵੇਦਿ ਧਮ੍ਮਂ ਜਾਨਾਤਿ ਨਾਮਾਤਿ ਅਯਮੇਤਿਸ੍ਸਾ ਗਾਥਾਯ ਅਤ੍ਥੋ.

ਪਿਯੇਨ ਤੇ ਦਮ੍ਮੀਤਿ ਪਿਯੇਨ ਕਾਰਣਭੂਤੇਨ ਪਿਯਂ ਫਲਂ ਪਤ੍ਥੇਨ੍ਤੋ ਦਮ੍ਮੀਤਿ ਅਤ੍ਥੋ. ਪਿਯਂ ਲਭਨ੍ਤੀਤਿ ਸਂਸਾਰੇ ਸਂਸਰਨ੍ਤਾ ਪਿਯਮੇਵ ਲਭਨ੍ਤਿ. ਕਾਮਹੇਤੁਕਨ੍ਤਿ, ਸਮ੍ਮ ਅਭਿਪਾਰਕ, ਕਾਮਹੇਤੁਕਂ ਅਯੁਤ੍ਤਂ ਕਤ੍ਵਾ ‘‘ਅਤ੍ਤਾਨਂ ਵਧਿਸ੍ਸਾਮੀ’’ਤਿ ਮੇ ਪਰਿਵਿਤਕ੍ਕੋ ਉਪ੍ਪਜ੍ਜਤਿ. ਮਯ੍ਹ ਸਤਿਨ੍ਤਿ ਮਮ ਸਨ੍ਤਕਂ. ‘‘ਮਯ੍ਹ ਸਤੀ’’ਤਿਪਿ ਪਾਠੋ, ਮਮ ਸਨ੍ਤਕਾਤਿ ਏਵਂ ਮਞ੍ਞਮਾਨੋ ਸਚੇ ਤ੍ਵਂ ਤਂ ਨ ਕਾਮੇਸੀਤਿ ਅਤ੍ਥੋ. ਸਬ੍ਬਜਨਸ੍ਸਾਤਿ ਸਬ੍ਬਾ ਸੇਨਿਯੋ ਸਨ੍ਨਿਪਾਤਾਪੇਤ੍ਵਾ ਤਸ੍ਸ ਸਬ੍ਬਜਨਸ੍ਸ ਅਯਂ ਮਯ੍ਹਂ ਅਹਿਤਾਤਿ ਪਰਿਚ੍ਚਜਿਸ੍ਸਾਮਿ. ਤਤੋ ਅਵ੍ਹਯੇਸੀਤਿ ਤਤੋ ਤਂ ਅਪਰਿਗ੍ਗਹਿਤਤ੍ਤਾ ਆਨੇਯ੍ਯਾਸਿ. ਅਦੂਸਿਯਨ੍ਤਿ ਅਨਪਰਾਧਂ. ਕਤ੍ਤੇਤਿ ਤਮੇਵ ਅਪਰੇਨ ਨਾਮੇਨ ਆਲਪਤਿ. ਸੋ ਹਿ ਰਞ੍ਞੋ ਹਿਤਂ ਕਰੋਤਿ, ਤਸ੍ਮਾ ‘‘ਕਤ੍ਤਾ’’ਤਿ ਵੁਚ੍ਚਤਿ. ਨ ਚਾਪਿ ਤ੍ਯਸ੍ਸਾਤਿ ਏਵਂ ਅਕਿਚ੍ਚਕਾਰੀਤਿ ਨਗਰੇ ਤਵ ਕੋਚਿ ਪਕ੍ਖੋਪਿ ਨ ਭਵੇਯ੍ਯ.

ਨਿਨ੍ਦਨ੍ਤਿ ਨ ਕੇਵਲਂ ਉਪਵਾਦਮੇਵ, ਸਚੇਪਿ ਮਂ ਕੋਚਿ ਸਮ੍ਮੁਖਾ ਨਿਨ੍ਦਿਸ੍ਸਤਿ ਵਾ ਪਸਂਸਿਸ੍ਸਤਿ ਵਾ, ਦੋਸਂ ਵਾ ਪਨ ਆਰੋਪੇਨ੍ਤੋ ਗਰਹਿਸ੍ਸਤਿ, ਤਮ੍ਪਾਹਂ ਨਿਨ੍ਦਂ ਪਸਂਸਂ ਗਰਹਞ੍ਚ ਸਬ੍ਬਂ ਸਹਿਸ੍ਸਾਮਿ, ਸਬ੍ਬਮੇਤਂ ਮਮ ਆਗਚ੍ਛਤੂਤਿ ਵਦਤਿ. ਤਮ੍ਹਾਤਿ ਯੋ ਏਤੇ ਨਿਨ੍ਦਾਦਯੋ ਨ ਗਣ੍ਹਾਤਿ, ਤਮ੍ਹਾ ਪੁਰਿਸਾ ਇਸ੍ਸਰਿਯਸਙ੍ਖਾਤਾ ਸਿਰੀ ਚ ਪਞ੍ਞਾਸਙ੍ਖਾਤਾ ਲਕ੍ਖੀ ਚ ਥਲਟ੍ਠਾਨਤੋ ਸੁਵੁਟ੍ਠਿਸਙ੍ਖਾਤੋ ਆਪੋ ਵਿਯ ਅਪੇਤਿ ਨ ਪਤਿਟ੍ਠਾਤੀਤਿ. ਏਤ੍ਤੋਤਿ ਇਤੋ ਮਮ ਤਸ੍ਸਾ ਪਰਿਚ੍ਚਤ੍ਤਕਾਰਣਾ. ਧਮ੍ਮਾਤਿਸਾਰਞ੍ਚਾਤਿ ਧਮ੍ਮਂ ਅਤਿਕ੍ਕਮਿਤ੍ਵਾ ਪਵਤ੍ਤਂ ਅਕੁਸਲਂ ਵਾ ਯਂ ਕਿਞ੍ਚਿ ਹੋਤਿ. ਪਚ੍ਚੁਤ੍ਤਰਿਸ੍ਸਾਮੀਤਿ ਸਮ੍ਪਟਿਚ੍ਛਿਸ੍ਸਾਮਿ ਧਾਰਯਿਸ੍ਸਾਮਿ. ਥਾਵਰਾਨਂ ਤਸਾਨਨ੍ਤਿ ਯਥਾ ਮਹਾਪਥਵੀ ਖੀਣਾਸਵਾਨਞ੍ਚ ਪੁਥੁਜ੍ਜਨਾਨਞ੍ਚ ਕਿਞ੍ਚਿ ਸਮ੍ਪਟਿਚ੍ਛਤਿ ਸਬ੍ਬਂ ਅਧਿਵਾਸੇਤਿ, ਤਥੇਵਾਹਮ੍ਪਿ ਸਬ੍ਬਮੇਤਂ ਸਮ੍ਪਟਿਚ੍ਛਿਸ੍ਸਾਮਿ ਅਧਿਵਾਸੇਸ੍ਸਾਮੀਤਿ ਦੀਪੇਤਿ. ਏਕੋਵਿਮਨ੍ਤਿ ਅਹਂ ਏਕੋਵ ਇਮਮ੍ਪਿ ਅਤ੍ਤਨੋ ਦੁਕ੍ਖਭਾਰਂ ਹਾਰਯਿਸ੍ਸਾਮਿ ਧਾਰਯਿਸ੍ਸਾਮਿ ਵਹਿਸ੍ਸਾਮਿ. ਧਮ੍ਮੇ ਠਿਤੋਤਿ ਵਿਨਿਚ੍ਛਯਧਮ੍ਮੇ ਪਵੇਣਿਧਮ੍ਮੇ ਤਿਵਿਧਸੁਚਰਿਤਧਮ੍ਮੇ ਚ ਠਿਤੋ ਹੁਤ੍ਵਾ.

ਸਗ੍ਗੂਪਗਨ੍ਤਿ, ਦੇਵ, ਪੁਞ੍ਞਕਮ੍ਮਂ ਨਾਮੇਤਂ ਸਗ੍ਗੂਪਗਂ ਹੋਤਿ. ਯਞ੍ਞੇ ਧਨਨ੍ਤਿ ਯਞ੍ਞਧਨਂ, ਅਯਮੇਵ ਵਾ ਪਾਠੋ. ਸਖਾਤਿ ਉਮ੍ਮਾਦਨ੍ਤੀਪਿ ਮਮ ਸਹਾਯਿਕਾ, ਤ੍ਵਮ੍ਪਿ ਸਹਾਯਕੋ. ਪਿਤਰੋਤਿ ਬ੍ਰਹ੍ਮਾਨੋ. ਸਬ੍ਬੇਤਿ ਨ ਕੇਵਲਂ ਦੇਵਬ੍ਰਹ੍ਮਾਨੋਵ, ਸਬ੍ਬੇ ਰਟ੍ਠਵਾਸਿਨੋਪਿ ਮਂ ਪਸ੍ਸਥ, ‘‘ਭੋ, ਸਹਾਯਕਸ੍ਸ ਭਰਿਯਾ ਸਹਾਯਿਕਾ ਇਮਿਨਾ ਗੇਹੇ ਕਤਾ’’ਤਿ ਨਿਨ੍ਦੇਯ੍ਯੁਂ. ਨ ਹੇਤਧਮ੍ਮਨ੍ਤਿ ਨ ਹਿ ਏਤਂ ਅਧਮ੍ਮਿਕਂ. ਯਂ ਤੇ ਮਯਾਤਿ ਯਸ੍ਮਾ ਮਯਾ ਸਾ ਤੁਯ੍ਹਂ ਦਿਨ੍ਨਾ, ਤਸ੍ਮਾ ਏਤਂ ਅਧਮ੍ਮੋਤਿ ਨ ਵਦਿਸ੍ਸਨ੍ਤਿ. ਸਤਨ੍ਤਿ ਸਨ੍ਤਾਨਂ ਬੁਦ੍ਧਾਦੀਨਂ ਖਨ੍ਤਿਮੇਤ੍ਤਾਭਾਵਨਾਸੀਲਾਚਾਰਸਙ੍ਖਾਤਾਨਿ ਧਮ੍ਮਾਨਿ ਸੁਵਣ੍ਣਿਤਾਨਿ ਸਮੁਦ੍ਦਵੇਲਾਵ ਦੁਰਚ੍ਚਯਾਨਿ, ਤਸ੍ਮਾ ਯਥਾ ਸਮੁਦ੍ਦੋ ਵੇਲਂ ਨਾਤਿਕ੍ਕਮਤਿ, ਏਵਮਹਮ੍ਪਿ ਸੀਲਵੇਲਂ ਨਾਤਿਕ੍ਕਮਿਸ੍ਸਾਮੀਤਿ ਵਦਤਿ.

ਆਹੁਨੇਯ੍ਯੋ ਮੇਸੀਤਿ, ਮਹਾਰਾਜ, ਤ੍ਵਂ ਮਮ ਆਹੁਨਪਾਹੁਨਸਕ੍ਕਾਰਸ੍ਸਾਨੁਚ੍ਛਵਿਕੋ. ਧਾਤਾ ਵਿਧਾਤਾ ਚਸਿ ਕਾਮਪਾਲੋਤਿ ਤ੍ਵਂ ਮਮ, ਦੇਵ, ਧਾਰਣਤੋ ਧਾਤਾ ਇਸ੍ਸਰਿਯਸੁਖਸ੍ਸ ਵਿਦਹਨਤੋ ਵਿਧਾਤਾ ਇਚ੍ਛਿਤਪਤ੍ਥਿਤਾਨਂ ਕਾਮਾਨਂ ਪਾਲਨਤੋ ਕਾਮਪਾਲੋ. ਤਯੀ ਹੁਤਾਤਿ ਤੁਯ੍ਹਂ ਦਿਨ੍ਨਾ. ਕਾਮੇਨ ਮੇਤਿ ਮਮ ਕਾਮੇਨ ਮਮ ਪਤ੍ਥਨਾਯ ਉਮ੍ਮਾਦਨ੍ਤਿਂ ਪਟਿਚ੍ਛਾਤਿ ਏਵਂ ਅਭਿਪਾਰਕੋ ਰਞ੍ਞੋ ਦੇਤਿ. ਰਾਜਾ ‘‘ਨ ਮਯ੍ਹਂ ਅਤ੍ਥੋ’’ਤਿ ਪਟਿਕ੍ਖਿਪਤਿ. ਭੂਮਿਯਂ ਪਤਿਤਂ ਸਾਕੁਣਿਕਪਚ੍ਛਿਂ ਪਿਟ੍ਠਿਪਾਦੇਨ ਪਹਰਿਤ੍ਵਾ ਅਟਵਿਯਂ ਖਿਪਨ੍ਤਾ ਵਿਯ ਉਭੋਪਿ ਨਂ ਜਹਨ੍ਤੇਵ. ਇਦਾਨਿ ਰਾਜਾ ਪੁਨ ਅਕਥਨਤ੍ਥਾਯ ਤਂ ਸਨ੍ਤਜ੍ਜੇਨ੍ਤੋ ‘‘ਅਦ੍ਧਾ ਹੀ’’ਤਿ ਗਾਥਮਾਹ. ਤਤ੍ਥ ਕਤ੍ਤੁਪੁਤ੍ਤਾਤਿ ਪਿਤਾਪਿਸ੍ਸ ਕਤ੍ਤਾਵ, ਤੇਨ ਨਂ ਏਵਂ ਆਲਪਤਿ. ਇਦਂ ਵੁਤ੍ਤਂ ਹੋਤਿ – ਅਦ੍ਧਾ ਤ੍ਵਂ ਇਤੋ ਪੁਬ੍ਬੇ ਮਯ੍ਹਂ ਸਬ੍ਬਧਮ੍ਮਂ ਅਚਰਿ, ਹਿਤਮੇਵ ਵੁਡ੍ਢਿਮੇਵ ਅਕਾਸਿ, ਇਦਾਨਿ ਪਨ ਪਟਿਪਕ੍ਖੋ ਹੁਤ੍ਵਾ ਬਹੁਂ ਕਥੇਸਿ, ‘‘ਮਾ ਏਵਂ ਵਿਪ੍ਪਲਪਸਿ, ਅਞ੍ਞੋ ਨੁ ਤੇ ਦ੍ਵਿਪਦੋ ਨਰੋ, ਕੋ ਇਧ ਜੀਵਲੋਕੇ ਅਰੁਣੇਯੇਵ ਸੋਤ੍ਥਿਕਤ੍ਤਾ, ਸਚੇ ਹਿ ਅਹਂ ਵਿਯ ਅਞ੍ਞੋ ਰਾਜਾ ਤਵ ਭਰਿਯਾਯ ਪਟਿਬਦ੍ਧਚਿਤ੍ਤੋ ਅਭਵਿਸ੍ਸ, ਅਨ੍ਤੋਅਰੁਣੇਯੇਵ ਤਵ ਸੀਸਂ ਛਿਨ੍ਦਾਪੇਤ੍ਵਾ ਤਂ ਅਤ੍ਤਨੋ ਘਰੇ ਕਰੇਯ੍ਯ, ਅਹਂ ਪਨ ਅਕੁਸਲਭਯੇਨੇਵ ਨ ਕਰੋਮਿ, ਤੁਣ੍ਹੀ ਹੋਹਿ, ਨ ਮੇ ਏਤਾਯ ਅਤ੍ਥੋ’’ਤਿ ਤਂ ਸਨ੍ਤਜ੍ਜੇਸਿ.

ਸੋ ਤਂ ਸੁਤ੍ਵਾ ਪੁਨ ਕਿਞ੍ਚਿ ਵਤ੍ਤੁਂ ਅਸਕ੍ਕੋਨ੍ਤੋ ਰਞ੍ਞੋ ਥੁਤਿਵਸੇਨ ‘‘ਤੁਵਂ ਨੂ’’ਤਿ ਗਾਥਮਾਹ. ਤਸ੍ਸਤ੍ਥੋ – ਮਹਾਰਾਜ, ਤ੍ਵਞ੍ਞੇਵ ਸਕਲਜਮ੍ਬੁਦੀਪੇ ਸਬ੍ਬੇਸਂ ਨਰਿਨ੍ਦਾਨਂ ਸੇਟ੍ਠੋ, ਤ੍ਵਂ ਅਨੁਤ੍ਤਰੋ, ਤ੍ਵਂ ਵਿਨਿਚ੍ਛਯਧਮ੍ਮਪਵੇਣਿਧਮ੍ਮਸੁਚਰਿਤਧਮ੍ਮਾਨਂ ਗੋਪਾਯਨੇਨ ਧਮ੍ਮਗੁਤ੍ਤੋ, ਤੇਸਂ ਵਿਦਿਤਤ੍ਤਾ ਧਮ੍ਮਵਿਦੂ ਤ੍ਵਂ ਸੁਮੇਧੋ, ਸੋ ਤ੍ਵਂ ਯਂ ਧਮ੍ਮਂ ਗੋਪੇਸਿ, ਤੇਨੇਵ ਗੁਤ੍ਤੋ ਚੀਰਂ ਜੀਵ, ਧਮ੍ਮਞ੍ਚ ਮੇ ਦੇਸੇਹਿ ਧਮ੍ਮਪਾਲਕ, ਧਮ੍ਮਗੋਪਕ, ਰਾਜਵਰਾਤਿ.

ਅਥ ਰਾਜਾ ਧਮ੍ਮਂ ਦੇਸੇਨ੍ਤੋ ‘‘ਤਦਿਙ੍ਘਾ’’ਤਿਆਦਿਮਾਹ. ਤਤ੍ਥ ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ, ਯਸ੍ਮਾ ਮਂ ਤ੍ਵਂ ਚੋਦੇਸਿ, ਤਸ੍ਮਾਤਿ ਅਤ੍ਥੋ. ਸਤਨ੍ਤਿ ਬੁਦ੍ਧਾਦੀਹਿ ਸਪ੍ਪੁਰਿਸੇਹਿ ਆਸੇਵਿਤਂ. ਸਾਧੂਤਿ ਸੁਨ੍ਦਰੋ ਪਸਤ੍ਥੋ. ਵਿਨਿਚ੍ਛਯਪਵੇਣਿਸੁਚਰਿਤਧਮ੍ਮੇ ਰੋਚੇਤੀਤਿ ਧਮ੍ਮਰੁਚਿ. ਤਾਦਿਸੋ ਹਿ ਜੀਵਿਤਂ ਜਹਨ੍ਤੋਪਿ ਅਕਿਚ੍ਚਂ ਨ ਕਰੋਤਿ, ਤਸ੍ਮਾ ਸਾਧੁ. ਪਞ੍ਞਾਣਵਾਤਿ ਞਾਣਸਮ੍ਪਨ੍ਨੋ. ਮਿਤ੍ਤਾਨਮਦ੍ਦੁਬ੍ਭੋਤਿ ਮਿਤ੍ਤਸ੍ਸ ਅਦੁਸ੍ਸਨਭਾਵੋ. ਠਿਤਧਮ੍ਮਸ੍ਸਾਤਿ ਪਤਿਟ੍ਠਿਤਤਿਵਿਧਧਮ੍ਮਸ੍ਸ. ਆਸੇਥਾਤਿ ਆਸੇਯ੍ਯੁਂ ਨਿਸੀਦੇਯ੍ਯੁਂ. ਦੇਸਨਾਸੀਸਮੇਵ ਚੇਤਂ, ਚਤ੍ਤਾਰੋਪਿ ਇਰਿਯਾਪਥੇ ਸੁਖਂ ਕਪ੍ਪੇਯ੍ਯੁਨ੍ਤਿ ਅਯਂ ਪਨੇਤ੍ਥ ਅਤ੍ਥੋ. ਸੀਤਚ੍ਛਾਯਾਯਾਤਿ ਪੁਤ੍ਤਦਾਰਞਾਤਿਮਿਤ੍ਤਾਨਂ ਸੀਤਲਾਯ ਛਾਯਾਯ. ਸਙ੍ਘਰੇਤਿ ਸਕਘਰੇ, ਅਤ੍ਤਨੋ ਗੇਹੇਤਿ ਅਤ੍ਥੋ. ਅਧਮ੍ਮਬਲਿਦਣ੍ਡਾਦੀਹਿ ਅਨੁਪਦ੍ਦੁਤਾ ਸੁਖਂ ਵਸੇਯ੍ਯੁਨ੍ਤਿ ਦਸ੍ਸੇਤਿ. ਨ ਚਾਹਮੇਤਨ੍ਤਿ, ਸਮ੍ਮ ਅਭਿਪਾਰਕ, ਯਮੇਤਂ ਅਸਮੇਕ੍ਖਿਤ੍ਵਾ ਕਤਂ ਅਸਾਧੁਕਮ੍ਮਂ, ਏਤਂ ਅਹਂ ਨ ਰੋਚਯਾਮਿ. ਯੇ ਵਾਪਿ ਞਤ੍ਵਾਨਾਤਿ ਯੇ ਵਾ ਪਨ ਰਾਜਾਨੋ ਞਤ੍ਵਾ ਤੁਲੇਤ੍ਵਾ ਤੀਰੇਤ੍ਵਾ ਸਯਂ ਕਰੋਨ੍ਤਿ, ਤੇਸਾਹਂ ਕਮ੍ਮਂ ਰੋਚੇਮੀਤਿ ਅਧਿਪ੍ਪਾਯੋ. ਉਪਮਾ ਇਮਾਤਿ ਇਮਸ੍ਮਿਂ ਪਨਤ੍ਥੇ ਤ੍ਵਂ ਮਯ੍ਹਂ ਇਮਾ ਦ੍ਵੇ ਉਪਮਾ ਸੁਣੋਹਿ.

ਜਿਮ੍ਹਨ੍ਤਿ ਵਙ੍ਕਂ. ਨੇਤ੍ਤੇਤਿ ਯੋ ਗਾਵਿਯੋ ਨੇਤਿ, ਤਸ੍ਮਿਂ ਜੇਟ੍ਠਕਉਸਭੇ. ਪਗੇਵਾਤਿ ਤਸ੍ਮਿਂ ਅਧਮ੍ਮਂ ਚਰਨ੍ਤੇ ਇਤਰਾ ਪਜਾ ਪਗੇਵ ਚਰਤਿ, ਅਤਿਵਿਯ ਕਰੋਤੀਤਿ ਅਤ੍ਥੋ. ਧਮ੍ਮਿਕੋਤਿ ਚਤ੍ਤਾਰਿ ਅਗਤਿਗਮਨਾਨਿ ਪਹਾਯ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ. ਅਮਰਤ੍ਤਨ੍ਤਿ ਦੇਵਤ੍ਤਂ. ਰਤਨਨ੍ਤਿ ਸਵਿਞ੍ਞਾਣਕਾਵਿਞ੍ਞਾਣਕਰਤਨਂ. ਵਤ੍ਥਿਯਨ੍ਤਿ ਕਾਸਿਕਵਤ੍ਥਮੇਵ. ਅਸ੍ਸਿਤ੍ਥਿਯੋਤਿ ਵਾਤਸਮਗਤਿਅਸ੍ਸੇਪਿ ਉਤ੍ਤਮਰੂਪਧਰਾ ਇਤ੍ਥਿਯੋਪਿ. ਰਤਨਂ ਮਣਿਕਞ੍ਚਾਤਿ ਸਤ੍ਤਵਿਧਰਤਨਞ੍ਚ ਮਹਗ੍ਘਭਣ੍ਡਕਞ੍ਚ. ਅਭਿਪਾਲਯਨ੍ਤੀਤਿ ਆਲੋਕਂ ਕਰੋਨ੍ਤਾ ਰਕ੍ਖਨ੍ਤਿ. ਨ ਤਸ੍ਸਾਤਿ ਤਸ੍ਸ ਚਕ੍ਕਵਤ੍ਤਿਰਜ੍ਜਸ੍ਸਪਿ ਹੇਤੁ ਨ ਵਿਸਮਂ ਚਰੇਯ੍ਯਂ. ਉਸਭੋਮ੍ਹੀਤਿ ਯਸ੍ਮਾ ਅਹਂ ਸਿਵੀਨਂ ਮਜ੍ਝੇ ਜੇਟ੍ਠਕਰਾਜਾ ਹੁਤ੍ਵਾ ਜਾਤੋ, ਤਸ੍ਮਾ ਚਕ੍ਕਵਤ੍ਤਿਰਜ੍ਜਕਾਰਣਮ੍ਪਿ ਨ ਵਿਸਮਂ ਚਰਾਮੀਤਿ ਅਤ੍ਥੋ. ਨੇਤਾਤਿ ਮਹਾਜਨਂ ਕੁਸਲੇ ਪਤਿਟ੍ਠਾਪੇਤ੍ਵਾ ਦੇਵਨਗਰਂ ਨੇਤਾ, ਹਿਤਕਰਣੇਨ ਤਸ੍ਸ ਹਿਤਾ, ‘‘ਸਿਵਿਰਾਜਾ ਕਿਰ ਧਮ੍ਮਚਾਰੀ’’ਤਿ ਸਕਲਜਮ੍ਬੁਦੀਪੇ ਞਾਤਤ੍ਤਾ ਉਗ੍ਗਤੋ, ਸਮੇਨ ਰਟ੍ਠਪਾਲਨਤੋ ਰਟ੍ਠਪਾਲੋ. ਅਪਚਾਯਮਾਨੋਤਿ ਸਿਵੀਨਂ ਪੋਰਾਣਕਰਾਜੂਨਂ ਪਵੇਣਿਧਮ੍ਮਂ ਅਪਚਾਯਮਾਨੋ. ਸੋਤਿ ਸੋ ਅਹਂ ਤਮੇਵ ਧਮ੍ਮਂ ਅਨੁਵਿਚਿਨ੍ਤਯਨ੍ਤੋ ਤਸ੍ਮਾ ਤੇਨ ਕਾਰਣੇਨ ਅਤ੍ਤਨੋ ਚਿਤ੍ਤਸ੍ਸ ਵਸੇ ਨ ਵਤ੍ਤਾਮਿ.

ਏਵਂ ਮਹਾਸਤ੍ਤਸ੍ਸ ਧਮ੍ਮਕਥਂ ਸੁਤ੍ਵਾ ਅਭਿਪਾਰਕੋ ਥੁਤਿਂ ਕਰੋਨ੍ਤੋ ‘‘ਅਦ੍ਧਾ’’ਤਿਆਦਿਮਾਹ. ਨਪ੍ਪਮਜ੍ਜਸੀਤਿ ਅਤ੍ਤਨਾ ਕਥਿਤਧਮ੍ਮਂ ਨਪ੍ਪਮਜ੍ਜਸਿ ਤਤ੍ਥੇਵ ਵਤ੍ਤੇਸਿ. ਧਮ੍ਮਂ ਪਮਜ੍ਜਾਤਿ ਧਮ੍ਮਂ ਪਮੁਸ੍ਸਿਤ੍ਵਾ ਅਗਤਿਵਸੇਨ ਗਨ੍ਤ੍ਵਾ. ਏਵਂ ਸੋ ਤਸ੍ਸ ਥੁਤਿਂ ਕਤ੍ਵਾ ‘‘ਧਮ੍ਮਂ ਚਰਾ’’ਤਿ ਧਮ੍ਮਚਰਿਯਾਯ ਨਿਯ੍ਯੋਜੇਨ੍ਤੋ ਉਤ੍ਤਰਿਪਿ ਦਸ ਓਵਾਦਗਾਥਾ ਅਭਾਸਿ. ਤਾਸਮਤ੍ਥੋ ਹੇਟ੍ਠਾ ਤੇਸਕੁਣਜਾਤਕੇ (ਜਾ. ੨.੧੭.੧ ਆਦਯੋ) ਵਣ੍ਣਿਤੋਵ.

ਏਵਂ ਅਭਿਪਾਰਕਸੇਨਾਪਤਿਨਾ ਰਞ੍ਞੋ ਧਮ੍ਮੇ ਦੇਸਿਤੇ ਰਾਜਾ ਉਮ੍ਮਾਦਨ੍ਤਿਯਾ ਪਟਿਬਦ੍ਧਚਿਤ੍ਤਂ ਵਿਨੋਦੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਸੋ ਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਤਦਾ ਸੁਨਨ੍ਦਸਾਰਥਿ ਆਨਨ੍ਦੋ ਅਹੋਸਿ, ਅਭਿਪਾਰਕੋ ਸਾਰਿਪੁਤ੍ਤੋ, ਉਮ੍ਮਾਦਨ੍ਤੀ ਉਪ੍ਪਲਵਣ੍ਣਾ, ਸੇਸਪਰਿਸਾ ਬੁਦ੍ਧਪਰਿਸਾ, ਸਿਵਿਰਾਜਾ ਅਹਮੇਵ ਅਹੋਸਿਨ੍ਤਿ.

ਉਮ੍ਮਾਦਨ੍ਤੀਜਾਤਕਵਣ੍ਣਨਾ ਦੁਤਿਯਾ.

[੫੨੮] ੩. ਮਹਾਬੋਧਿਜਾਤਕਵਣ੍ਣਨਾ

ਕਿਂ ਨੁ ਦਣ੍ਡਂ ਕਿਮਜਿਨਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪਞ੍ਞਾਪਾਰਮਿਂ ਆਰਬ੍ਭ ਕਥੇਸਿ. ਵਤ੍ਥੁ ਮਹਾਉਮਙ੍ਗਜਾਤਕੇ (ਜਾ. ੨.੨੨.੫੯੦ ਆਦਯੋ) ਆਵਿ ਭਵਿਸ੍ਸਤਿ. ਤਦਾ ਪਨ ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਤਥਾਗਤੋ ਪਞ੍ਞਵਾ ਪਰਪ੍ਪਵਾਦਪ੍ਪਮਦ੍ਦਨੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਸਿਰਟ੍ਠੇ ਅਸੀਤਿਕੋਟਿਵਿਭਵਸ੍ਸ ਉਦਿਚ੍ਚਬ੍ਰਾਹ੍ਮਣਮਹਾਸਾਲਸ੍ਸ ਕੁਲੇ ਨਿਬ੍ਬਤ੍ਤਿ, ‘‘ਬੋਧਿਕੁਮਾਰੋ’’ਤਿਸ੍ਸ ਨਾਮਂ ਕਰਿਂਸੁ. ਸੋ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਉਗ੍ਗਹਿਤਸਿਪ੍ਪੋ ਪਚ੍ਚਾਗਨ੍ਤ੍ਵਾ ਅਗਾਰਮਜ੍ਝੇ ਵਸਨ੍ਤੋ ਅਪਰਭਾਗੇ ਕਾਮੇ ਪਹਾਯ ਹਿਮਵਨ੍ਤਪਦੇਸਂ ਪਵਿਸਿਤ੍ਵਾ ਪਰਿਬ੍ਬਾਜਕਪਬ੍ਬਜ੍ਜਂ ਪਬ੍ਬਜਿਤ੍ਵਾ ਤਤ੍ਥੇਵ ਵਨਮੂਲਫਲਾਹਾਰੋ ਚਿਰਂ ਵਸਿਤ੍ਵਾ ਵਸ੍ਸਾਰਤ੍ਤਸਮਯੇ ਹਿਮਵਨ੍ਤਾ ਓਰੁਯ੍ਹ ਚਾਰਿਕਂ ਚਰਨ੍ਤੋ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਰਾਜੁਯ੍ਯਾਨੇ ਵਸਿਤ੍ਵਾ ਪੁਨਦਿਵਸੇ ਪਰਿਬ੍ਬਾਜਕਸਾਰੁਪ੍ਪੇਨ ਨਗਰੇ ਭਿਕ੍ਖਾਯ ਚਰਨ੍ਤੋ ਰਾਜਦ੍ਵਾਰਂ ਪਾਪੁਣਿ ਤਮੇਨਂ ਸੀਹਪਞ੍ਜਰੇ ਠਿਤੋ ਰਾਜਾ ਦਿਸ੍ਵਾ ਤਸ੍ਸ ਉਪਸਮੇ ਪਸੀਦਿਤ੍ਵਾ ਤਂ ਅਤ੍ਤਨੋ ਭਵਨਂ ਪਵੇਸੇਤ੍ਵਾ ਰਾਜਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਕਤਪਟਿਸਨ੍ਥਾਰੋ ਥੋਕਂ ਧਮ੍ਮਕਥਂ ਸੁਤ੍ਵਾ ਨਾਨਗ੍ਗਰਸਭੋਜਨਂ ਦਾਪੇਸਿ. ਮਹਾਸਤ੍ਤੋ ਭਤ੍ਤਂ ਗਹੇਤ੍ਵਾ ਚਿਨ੍ਤੇਸਿ – ‘‘ਇਦਂ ਰਾਜਕੁਲਂ ਨਾਮ ਬਹੁਦੋਸਂ ਬਹੁਪਚ੍ਚਾਮਿਤ੍ਤਂ ਹੋਤਿ, ਕੋ ਨੁ ਖੋ ਮਮ ਉਪ੍ਪਨ੍ਨਂ ਭਯਂ ਨਿਤ੍ਥਰਿਸ੍ਸਤੀ’’ਤਿ. ਸੋ ਅਵਿਦੂਰੇ ਠਿਤਂ ਰਾਜਵਲ੍ਲਭਂ ਏਕਂ ਪਿਙ੍ਗਲਸੁਨਖਂ ਦਿਸ੍ਵਾ ਮਹਨ੍ਤਂ ਭਤ੍ਤਪਿਣ੍ਡਂ ਗਹੇਤ੍ਵਾ ਤਸ੍ਸ ਦਾਤੁਕਾਮਤਾਕਾਰਂ ਦਸ੍ਸੇਸਿ. ਰਾਜਾ ਞਤ੍ਵਾ ਸੁਨਖਸ੍ਸ ਭਾਜਨਂ ਆਹਰਾਪੇਤ੍ਵਾ ਭਤ੍ਤਂ ਗਾਹਾਪੇਤ੍ਵਾ ਦਾਪੇਸਿ. ਮਹਾਸਤ੍ਤੋਪਿ ਤਸ੍ਸ ਦਤ੍ਵਾ ਭਤ੍ਤਕਿਚ੍ਚਂ ਨਿਟ੍ਠਪੇਸਿ. ਰਾਜਾਪਿਸ੍ਸ ਪਟਿਞ੍ਞਂ ਗਹੇਤ੍ਵਾ ਅਨ੍ਤੋਨਗਰੇ ਰਾਜੁਯ੍ਯਾਨੇ ਪਣ੍ਣਸਾਲਂ ਕਾਰੇਤ੍ਵਾ ਪਬ੍ਬਜਿਤਪਰਿਕ੍ਖਾਰੇ ਦਤ੍ਵਾ ਤਂ ਤਤ੍ਥ ਵਾਸਾਪੇਸਿ, ਦੇਵਸਿਕਞ੍ਚਸ੍ਸ ਦ੍ਵੇ ਤਯੋ ਵਾਰੇ ਉਪਟ੍ਠਾਨਂ ਅਗਮਾਸਿ. ਭੋਜਨਕਾਲੇ ਪਨ ਮਹਾਸਤ੍ਤੋ ਨਿਚ੍ਚਂ ਰਾਜਪਲ੍ਲਙ੍ਕੇਯੇਵ ਨਿਸੀਦਿਤ੍ਵਾ ਰਾਜਭੋਜਨਮੇਵ ਭੁਞ੍ਜਤਿ. ਏਵਂ ਦ੍ਵਾਦਸ ਸਂਵਚ੍ਛਰਾਨਿ ਅਤੀਤਾਨਿ.

ਤਸ੍ਸ ਪਨ ਰਞ੍ਞੋ ਪਞ੍ਚ ਅਮਚ੍ਚਾ ਅਤ੍ਥਞ੍ਚ ਧਮ੍ਮਞ੍ਚ ਅਨੁਸਾਸਨ੍ਤਿ. ਤੇਸੁ ਏਕੋ ਅਹੇਤੁਕਵਾਦੀ, ਏਕੋ ਇਸ੍ਸਰਕਤਵਾਦੀ, ਏਕੋ ਪੁਬ੍ਬੇਕਤਵਾਦੀ, ਏਕੋ ਉਚ੍ਛੇਦਵਾਦੀ, ਏਕੋ ਖਤ੍ਤਵਿਜ੍ਜਵਾਦੀ. ਤੇਸੁ ਅਹੇਤੁਕਵਾਦੀ ‘‘ਇਮੇ ਸਤ੍ਤਾ ਸਂਸਾਰਸੁਦ੍ਧਿਕਾ’’ਤਿ ਮਹਾਜਨਂ ਉਗ੍ਗਣ੍ਹਾਪੇਸਿ. ਇਸ੍ਸਰਕਤਵਾਦੀ ‘‘ਅਯਂ ਲੋਕੋ ਇਸ੍ਸਰਨਿਮ੍ਮਿਤੋ’’ਤਿ ਮਹਾਜਨਂ ਉਗ੍ਗਣ੍ਹਾਪੇਸਿ. ਪੁਬ੍ਬੇਕਤਵਾਦੀ ‘‘ਇਮੇਸਂ ਸਤ੍ਤਾਨਂ ਸੁਖਂ ਵਾ ਦੁਕ੍ਖਂ ਵਾ ਉਪ੍ਪਜ੍ਜਮਾਨਂ ਪੁਬ੍ਬੇਕਤੇਨੇਵ ਉਪ੍ਪਜ੍ਜਤੀ’’ਤਿ ਮਹਾਜਨਂ ਉਗ੍ਗਣ੍ਹਾਪੇਸਿ. ਉਚ੍ਛੇਦਵਾਦੀ ‘‘ਇਤੋ ਪਰਲੋਕਂ ਗਤੋ ਨਾਮ ਨਤ੍ਥਿ, ਅਯਂ ਲੋਕੋ ਉਚ੍ਛਿਜ੍ਜਤੀ’’ਤਿ ਮਹਾਜਨਂ ਉਗ੍ਗਣ੍ਹਾਪੇਸਿ. ਖਤ੍ਤਵਿਜ੍ਜਵਾਦੀ ‘‘ਮਾਤਾਪਿਤਰੋਪਿ ਮਾਰੇਤ੍ਵਾ ਅਤ੍ਤਨੋਵ ਅਤ੍ਥੋ ਕਾਤਬ੍ਬੋ’’ਤਿ ਮਹਾਜਨਂ ਉਗ੍ਗਣ੍ਹਾਪੇਸਿ. ਤੇ ਰਞ੍ਞੋ ਵਿਨਿਚ੍ਛਯੇ ਨਿਯੁਤ੍ਤਾ ਲਞ੍ਜਖਾਦਕਾ ਹੁਤ੍ਵਾ ਅਸ੍ਸਾਮਿਕਂ ਸਾਮਿਕਂ, ਸਾਮਿਕਂ ਅਸ੍ਸਾਮਿਕਂ ਕਰੋਨ੍ਤਿ.

ਅਥੇਕਦਿਵਸਂ ਏਕੋ ਪੁਰਿਸੋ ਕੂਟਟ੍ਟਪਰਾਜਿਤੋ ਮਹਾਸਤ੍ਤਂ ਭਿਕ੍ਖਾਯ ਚਰਨ੍ਤਂ ਰਾਜਗੇਹਂ ਪਵਿਸਨ੍ਤਂ ਦਿਸ੍ਵਾ ਵਨ੍ਦਿਤ੍ਵਾ, ‘‘ਭਨ੍ਤੇ, ਤੁਮ੍ਹੇ ਰਾਜਗੇਹੇ ਭੁਞ੍ਜਮਾਨਾ ਵਿਨਿਚ੍ਛਯਾਮਚ੍ਚੇ ਲਞ੍ਜਂ ਗਹੇਤ੍ਵਾ ਲੋਕਂ ਵਿਨਾਸੇਨ੍ਤੇ ਕਸ੍ਮਾ ਅਜ੍ਝੁਪੇਕ੍ਖਥ, ਇਦਾਨਿ ਪਞ੍ਚਹਿ ਅਮਚ੍ਚੇਹਿ ਕੂਟਟ੍ਟਕਾਰਕਸ੍ਸ ਹਤ੍ਥਤੋ ਲਞ੍ਜਂ ਗਹੇਤ੍ਵਾ ਸਾਮਿਕੋਵ ਸਮਾਨੋ ਅਸ੍ਸਾਮਿਕੋ ਕਤੋ’’ਤਿ ਪਰਿਦੇਵਿ. ਸੋ ਤਸ੍ਮਿਂ ਕਾਰੁਞ੍ਞਵਸੇਨ ਵਿਨਿਚ੍ਛਯਂ ਗਨ੍ਤ੍ਵਾ ਧਮ੍ਮੇਨ ਵਿਨਿਚ੍ਛਿਨਿਤ੍ਵਾ ਸਾਮਿਕਞ੍ਞੇਵ ਸਾਮਿਕਂ ਅਕਾਸਿ. ਮਹਾਜਨੋ ਏਕਪ੍ਪਹਾਰੇਨੇਵ ਮਹਾਸਦ੍ਦੇਨ ਸਾਧੁਕਾਰਂ ਅਦਾਸਿ. ਰਾਜਾ ਤਂ ਸਦ੍ਦਂ ਸੁਤ੍ਵਾ ‘‘ਕਿਂਸਦ੍ਦੋ ਨਾਮਾਯ’’ਨ੍ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ਕਤਭਤ੍ਤਕਿਚ੍ਚਂ ਮਹਾਸਤ੍ਤਂ ਉਪਨਿਸੀਦਿਤ੍ਵਾ ਪੁਚ੍ਛਿ – ‘‘ਭਨ੍ਤੇ, ਅਜ੍ਜ ਕਿਰ ਵੋ ਅਟ੍ਟੋ ਵਿਨਿਚ੍ਛਿਤੋ’’ਤਿ. ‘‘ਆਮ, ਮਹਾਰਾਜਾ’’ਤਿ. ‘‘ਭਨ੍ਤੇ, ਤੁਮ੍ਹੇਸੁ ਵਿਨਿਚ੍ਛਿਨਨ੍ਤੇਸੁ ਮਹਾਜਨਸ੍ਸ ਵੁਡ੍ਢਿ ਭਵਿਸ੍ਸਤਿ, ਇਤੋ ਪਟ੍ਠਾਯ ਤੁਮ੍ਹੇਵ ਵਿਨਿਚ੍ਛਿਨਥਾ’’ਤਿ. ‘‘ਮਹਾਰਾਜ, ਮਯਂ ਪਬ੍ਬਜਿਤਾ ਨਾਮ, ਨੇਤਂ ਕਮ੍ਮਂ ਅਮ੍ਹਾਕਂ ਕਮ੍ਮ’’ਨ੍ਤਿ. ‘‘ਭਨ੍ਤੇ, ਮਹਾਜਨੇ ਕਾਰੁਞ੍ਞੇਨ ਕਾਤੁਂ ਵਟ੍ਟਤਿ, ਤੁਮ੍ਹੇ ਸਕਲਦਿਵਸਂ ਮਾ ਵਿਨਿਚ੍ਛਿਨਥ, ਉਯ੍ਯਾਨਤੋ ਪਨ ਇਧਾਗਚ੍ਛਨ੍ਤਾ ਵਿਨਿਚ੍ਛਯਟ੍ਠਾਨਂ ਗਨ੍ਤ੍ਵਾ ਪਾਤੋਵ ਚਤ੍ਤਾਰੋ ਅਟ੍ਟੇ ਵਿਨਿਚ੍ਛਿਨਥ, ਭੁਤ੍ਵਾ ਉਯ੍ਯਾਨਂ ਗਚ੍ਛਨ੍ਤਾ ਚਤ੍ਤਾਰੋ, ਏਵਂ ਮਹਾਜਨਸ੍ਸ ਵੁਡ੍ਢਿ ਭਵਿਸ੍ਸਤੀ’’ਤਿ. ਸੋ ਤੇਨ ਪੁਨਪ੍ਪੁਨਂ ਯਾਚਿਯਮਾਨੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਤੋ ਪਟ੍ਠਾਯ ਤਥਾ ਅਕਾਸਿ.

ਕੂਟਟ੍ਟਕਾਰਕਾ ਓਕਾਸਂ ਨ ਲਭਿਂਸੁ. ਤੇਪਿ ਅਮਚ੍ਚਾ ਲਞ੍ਜਂ ਅਲਭਨ੍ਤਾ ਦੁਗ੍ਗਤਾ ਹੁਤ੍ਵਾ ਚਿਨ੍ਤਯਿਂਸੁ – ‘‘ਬੋਧਿਪਰਿਬ੍ਬਾਜਕਸ੍ਸ ਵਿਨਿਚ੍ਛਿਨਨਕਾਲਤੋ ਪਟ੍ਠਾਯ ਮਯਂ ਕਿਞ੍ਚਿ ਨ ਲਭਾਮ, ਹਨ੍ਦ ਨਂ ‘ਰਾਜਵੇਰਿਕੋ’ਤਿ ਵਤ੍ਵਾ ਰਞ੍ਞੋ ਅਨ੍ਤਰੇ ਪਰਿਭਿਨ੍ਦਿਤ੍ਵਾ ਮਾਰਾਪੇਸ੍ਸਾਮਾ’’ਤਿ. ਤੇ ਰਾਜਾਨਂ ਉਪਸਙ੍ਕਮਿਤ੍ਵਾ, ‘‘ਮਹਾਰਾਜ, ਬੋਧਿਪਰਿਬ੍ਬਾਜਕੋ ਤੁਮ੍ਹਾਕਂ ਅਨਤ੍ਥਕਾਮੋ’’ਤਿ ਵਤ੍ਵਾ ਅਸਦ੍ਦਹਨ੍ਤੇਨ ਰਞ੍ਞਾ ‘‘ਸੀਲਵਾ ਏਸ ਞਾਣਸਮ੍ਪਨ੍ਨੋ, ਨ ਏਵਂ ਕਰਿਸ੍ਸਤੀ’’ਤਿ ਵੁਤ੍ਤੇ, ‘‘ਮਹਾਰਾਜ, ਤੇਨ ਸਕਲਨਗਰਵਾਸਿਨੋ ਅਤ੍ਤਨੋ ਹਤ੍ਥੇ ਕਤ੍ਵਾ ਕੇਵਲਂ ਅਮ੍ਹੇਯੇਵ ਪਞ੍ਚ ਜਨੇ ਕਾਤੁਂ ਨ ਸਕ੍ਕਾ, ਸਚੇ ਅਮ੍ਹਾਕਂ ਵਚਨਂ ਨ ਸਦ੍ਦਹਥ, ਤਸ੍ਸ ਇਧਾਗਮਨਕਾਲੇ ਪਰਿਸਂ ਓਲੋਕੇਥਾ’’ਤਿ ਆਹਂਸੁ. ਰਾਜਾ ‘‘ਸਾਧੂ’’ਤਿ ਸੀਹਪਞ੍ਜਰੇ ਠਿਤੋ ਤਂ ਆਗਚ੍ਛਨ੍ਤਂ ਓਲੋਕੇਨ੍ਤੋ ਪਰਿਵਾਰਂ ਦਿਸ੍ਵਾ ਅਤ੍ਤਨੋ ਅਞ੍ਞਾਣੇਨ ਅਟ੍ਟਕਾਰਕਮਨੁਸ੍ਸੇ ‘‘ਤਸ੍ਸ ਪਰਿਵਾਰਾ’’ਤਿ ਮਞ੍ਞਮਾਨੋ ਭਿਜ੍ਜਿਤ੍ਵਾ ਤੇ ਅਮਚ੍ਚੇ ਪਕ੍ਕੋਸਾਪੇਤ੍ਵਾ ‘‘ਕਿਨ੍ਤਿ ਕਰੋਮਾ’’ਤਿ ਪੁਚ੍ਛਿ. ‘‘ਗਣ੍ਹਾਪੇਥ ਨਂ, ਦੇਵਾ’’ਤਿ. ‘‘ਓਲ਼ਾਰਿਕਂ ਅਪਰਾਧਂ ਅਪਸ੍ਸਨ੍ਤਾ ਕਥਂ ਗਣ੍ਹਾਮਾ’’ਤਿ. ‘‘ਤੇਨ ਹਿ, ਮਹਾਰਾਜ, ਪਕਤਿਪਰਿਹਾਰਮਸ੍ਸ ਹਾਪੇਥ, ਤਂ ਪਰਿਹਾਯਨ੍ਤਂ ਦਿਸ੍ਵਾ ਪਣ੍ਡਿਤੋ ਪਰਿਬ੍ਬਾਜਕੋ ਕਸ੍ਸਚਿ ਅਨਾਰੋਚੇਤ੍ਵਾ ਸਯਮੇਵ ਪਲਾਯਿਸ੍ਸਤੀ’’ਤਿ.

ਰਾਜਾ ‘‘ਸਾਧੂ’’ਤਿ ਵਤ੍ਵਾ ਅਨੁਪੁਬ੍ਬੇਨ ਤਸ੍ਸ ਪਰਿਹਾਰਂ ਪਰਿਹਾਪੇਸਿ. ਪਠਮਦਿਵਸਂ ਤਾਵ ਨਂ ਤੁਚ੍ਛਪਲ੍ਲਙ੍ਕੇਯੇਵ ਨਿਸੀਦਾਪੇਸੁਂ. ਸੋ ਤੁਚ੍ਛਪਲ੍ਲਙ੍ਕਂ ਦਿਸ੍ਵਾਵ ਰਞ੍ਞੋ ਪਰਿਭਿਨ੍ਨਭਾਵਂ ਞਤ੍ਵਾ ਸਯਮੇਵ ਉਯ੍ਯਾਨਂ ਗਨ੍ਤ੍ਵਾ ਤਂ ਦਿਵਸਮੇਵ ਪਕ੍ਕਮਿਤੁਕਾਮੋ ਹੁਤ੍ਵਾਪਿ ‘‘ਏਕਨ੍ਤੇਨ ਞਤ੍ਵਾ ਪਕ੍ਕਮਿਸ੍ਸਾਮੀ’’ਤਿ ਨ ਪਕ੍ਕਾਮਿ. ਅਥਸ੍ਸ ਪੁਨਦਿਵਸੇ ਤੁਚ੍ਛਪਲ੍ਲਙ੍ਕੇ ਨਿਸਿਨ੍ਨਸ੍ਸ ਰਞ੍ਞੋਪਕਤਿਭਤ੍ਤਞ੍ਚ ਅਞ੍ਞਞ੍ਚ ਗਹੇਤ੍ਵਾ ਮਿਸ੍ਸਕਭਤ੍ਤਂ ਅਦਂਸੁ. ਤਤਿਯਦਿਵਸੇ ਮਹਾਤਲਂ ਪਵਿਸਿਤੁਂ ਅਦਤ੍ਵਾ ਸੋਪਾਨਸੀਸੇਯੇਵ ਠਪੇਤ੍ਵਾ ਮਿਸ੍ਸਕਭਤ੍ਤਂ ਅਦਂਸੁ. ਸੋ ਤਮ੍ਪਿ ਆਦਾਯ ਉਯ੍ਯਾਨਂ ਗਨ੍ਤ੍ਵਾ ਭਤ੍ਤਕਿਚ੍ਚਂ ਅਕਾਸਿ. ਚਤੁਤ੍ਥਦਿਵਸੇ ਹੇਟ੍ਠਾਪਾਸਾਦੇ ਠਪੇਤ੍ਵਾ ਕਣਾਜਕਭਤ੍ਤਂ ਅਦਂਸੁ. ਸੋ ਤਮ੍ਪਿ ਗਹੇਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਭਤ੍ਤਕਿਚ੍ਚਂ ਅਕਾਸਿ. ਰਾਜਾ ਅਮਚ੍ਚੇ ਪੁਚ੍ਛਿ – ‘‘ਬੋਧਿਪਰਿਬ੍ਬਾਜਕੋ ਸਕ੍ਕਾਰੇ ਪਰਿਹਾਪਿਤੇਪਿ ਨ ਪਕ੍ਕਮਤਿ, ਕਿਨ੍ਤਿ ਨਂ ਕਰੋਮਾ’’ਤਿ? ‘‘ਦੇਵ, ਨ ਸੋ ਭਤ੍ਤਤ੍ਥਾਯ ਚਰਤਿ, ਛਤ੍ਤਤ੍ਥਾਯ ਪਨ ਚਰਤਿ. ਸਚੇ ਭਤ੍ਤਤ੍ਥਾਯ ਚਰੇਯ੍ਯ, ਪਠਮਦਿਵਸਂਯੇਵ ਪਲਾਯੇਯ੍ਯਾ’’ਤਿ. ‘‘ਇਦਾਨਿ ਕਿਂ ਕਰੋਮਾ’’ਤਿ? ‘‘ਸ੍ਵੇ ਘਾਤਾਪੇਥ ਨਂ, ਮਹਾਰਾਜਾ’’ਤਿ. ਸੋ ‘‘ਸਾਧੂ’’ਤਿ ਤੇਸਞ੍ਞੇਵ ਹਤ੍ਥੇ ਖਗ੍ਗੇ ਠਪੇਤ੍ਵਾ ‘‘ਸ੍ਵੇ ਅਨ੍ਤਰਦ੍ਵਾਰੇ ਠਤ੍ਵਾ ਪਵਿਸਨ੍ਤਸ੍ਸੇਵਸ੍ਸ ਸੀਸਂ ਛਿਨ੍ਦਿਤ੍ਵਾ ਖਣ੍ਡਾਖਣ੍ਡਿਕਂ ਕਤ੍ਵਾ ਕਞ੍ਚਿ ਅਜਾਨਾਪੇਤ੍ਵਾ ਵਚ੍ਚਕੁਟਿਯਂ ਪਕ੍ਖਿਪਿਤ੍ਵਾ ਨ੍ਹਤ੍ਵਾ ਆਗਚ੍ਛੇਯ੍ਯਾਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਸ੍ਵੇ ਆਗਨ੍ਤ੍ਵਾ ਏਵਂ ਕਰਿਸ੍ਸਾਮਾ’’ਤਿ ਅਞ੍ਞਮਞ੍ਞਂ ਵਿਚਾਰੇਤ੍ਵਾ ਏਵਂ ਅਤ੍ਤਨੋ ਨਿਵੇਸਨਂ ਅਗਮਂਸੁ.

ਰਾਜਾਪਿ ਸਾਯਂ ਭੁਤ੍ਤਭੋਜਨੋ ਸਿਰਿਸਯਨੇ ਨਿਪਜ੍ਜਿਤ੍ਵਾ ਮਹਾਸਤ੍ਤਸ੍ਸ ਗੁਣੇ ਅਨੁਸ੍ਸਰਿ. ਅਥਸ੍ਸ ਤਾਵਦੇਵ ਸੋਕੋ ਉਪ੍ਪਜ੍ਜਿ, ਸਰੀਰਤੋ ਸੇਦਾ ਮੁਚ੍ਚਿਂਸੁ, ਸਯਨੇ ਅਸ੍ਸਾਸਂ ਅਲਭਨ੍ਤੋ ਅਪਰਾਪਰਂ ਪਰਿਵਤ੍ਤਿ. ਅਥਸ੍ਸ ਅਗ੍ਗਮਹੇਸੀ ਉਪਨਿਪਜ੍ਜਿ, ਸੋ ਤਾਯ ਸਦ੍ਧਿਂ ਸਲ੍ਲਾਪਮਤ੍ਤਮ੍ਪਿ ਨ ਕਰਿ. ਅਥ ਨਂ ਸਾ ‘‘ਕਿਂ ਨੁ ਖੋ, ਮਹਾਰਾਜ, ਸਲ੍ਲਾਪਮਤ੍ਤਮ੍ਪਿ ਨ ਕਰੋਥ, ਅਪਿ ਨੁ ਖੋ ਮੇ ਕੋਚਿ ਅਪਰਾਧੋ ਅਤ੍ਥੀ’’ਤਿ ਪੁਚ੍ਛਿ. ‘‘ਨਤ੍ਥਿ ਦੇਵਿ, ਅਪਿਚ ਖੋ ਬੋਧਿਪਰਿਬ੍ਬਾਜਕੋ ਕਿਰ ਅਮ੍ਹਾਕਂ ਪਚ੍ਚਤ੍ਥਿਕੋ ਜਾਤੋਤਿ ਤਸ੍ਸ ਸ੍ਵੇ ਘਾਤਨਤ੍ਥਾਯ ਪਞ੍ਚ ਅਮਚ੍ਚੇ ਆਣਾਪੇਸਿਂ, ਤੇ ਪਨ ਨਂ ਮਾਰੇਤ੍ਵਾ ਖਣ੍ਡਾਖਣ੍ਡਿਕਂ ਕਤ੍ਵਾ ਵਚ੍ਚਕੂਪੇ ਪਕ੍ਖਿਪਿਸ੍ਸਨ੍ਤਿ, ਸੋ ਪਨ ਅਮ੍ਹਾਕਂ ਦ੍ਵਾਦਸ ਸਂਵਚ੍ਛਰਾਨਿ ਬਹੁਂ ਧਮ੍ਮਂ ਦੇਸੇਸਿ, ਏਕਾਪਰਾਧੋਪਿਸ੍ਸ ਮਯਾ ਪਚ੍ਚਕ੍ਖਤੋ ਨ ਦਿਟ੍ਠਪੁਬ੍ਬੋ, ਪਰਪਤ੍ਤਿਯੇਨ ਹੁਤ੍ਵਾ ਤਸ੍ਸ ਮਯਾ ਵਧੋ ਆਣਤ੍ਤੋ, ਤੇਨ ਕਾਰਣੇਨ ਸੋਚਾਮੀ’’ਤਿ. ਅਥ ਨਂ ਸਾ ‘‘ਸਚੇ ਤੇ ਦੇਵ ਸੋ ਪਚ੍ਚਤ੍ਥਿਕੋ ਜਾਤੋ, ਤਂ ਘਾਤੇਨ੍ਤੋ ਕਿਂ ਸੋਚਸਿ, ਪਚ੍ਚਤ੍ਥਿਕਂ ਨਾਮ ਪੁਤ੍ਤਮ੍ਪਿ ਘਾਤੇਤ੍ਵਾ ਅਤ੍ਤਨੋ ਸੋਤ੍ਥਿਭਾਵੋ ਕਾਤਬ੍ਬੋਵ, ਮਾ ਸੋਚਿਤ੍ਥਾ’’ਤਿ ਅਸ੍ਸਾਸੇਸਿ. ਸੋ ਤਸ੍ਸਾ ਵਚਨੇਨ ਪਟਿਲਦ੍ਧਸ੍ਸਾਸੋ ਨਿਦ੍ਦਂ ਓਕ੍ਕਮਿ.

ਤਸ੍ਮਿਂ ਖਣੇ ਕੋਲੇਯ੍ਯਕੋ ਪਿਙ੍ਗਲਸੁਨਖੋ ਤਂ ਕਥਂ ਸੁਤ੍ਵਾ ‘‘ਸ੍ਵੇ ਮਯਾ ਅਤ੍ਤਨੋ ਬਲੇਨਸ੍ਸ ਜੀਵਿਤਂ ਦਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਨਦਿਵਸੇ ਪਾਤੋਵ ਪਾਸਾਦਾ ਓਰੁਯ੍ਹ ਮਹਾਦ੍ਵਾਰਂ ਆਗਨ੍ਤ੍ਵਾ ਉਮ੍ਮਾਰੇ ਸੀਸਂ ਕਤ੍ਵਾ ਮਹਾਸਤ੍ਤਸ੍ਸ ਆਗਮਨਮਗ੍ਗਂ ਓਲੋਕੇਨ੍ਤੋਵ ਨਿਪਜ੍ਜਿ. ਤੇਪਿ ਅਮਚ੍ਚਾ ਪਾਤੋਵ ਖਗ੍ਗਹਤ੍ਥਾ ਆਗਨ੍ਤ੍ਵਾ ਦ੍ਵਾਰਨ੍ਤਰੇ ਅਟ੍ਠਂਸੁ. ਬੋਧਿਸਤ੍ਤੋਪਿ ਵੇਲਂ ਸਲ੍ਲਕ੍ਖੇਤ੍ਵਾ ਉਯ੍ਯਾਨਾ ਨਿਕ੍ਖਮ੍ਮ ਰਾਜਦ੍ਵਾਰਂ ਆਗਞ੍ਛਿ. ਅਥ ਨਂ ਸੁਨਖੋ ਦਿਸ੍ਵਾ ਮੁਖਂ ਵਿਵਰਿਤ੍ਵਾ ਚਤਸ੍ਸੋ ਦਾਠਾ ਦਸ੍ਸੇਤ੍ਵਾ ‘‘ਕਿਂ ਤ੍ਵਂ, ਭਨ੍ਤੇ, ਜਮ੍ਬੁਦੀਪਤਲੇ ਅਞ੍ਞਤ੍ਥ ਭਿਕ੍ਖਂ ਨ ਲਭਸਿ, ਅਮ੍ਹਾਕਂ ਰਾਜਾ ਤਵ ਮਾਰਣਤ੍ਥਾਯ ਪਞ੍ਚ ਅਮਚ੍ਚੇ ਖਗ੍ਗਹਤ੍ਥੇ ਦ੍ਵਾਰਨ੍ਤਰੇ ਠਪੇਸਿ, ਮਾ ਤ੍ਵਂ ਨਲਾਟੇਨ ਮਚ੍ਚੁਂ ਗਹੇਤ੍ਵਾ ਆਗਮਿ, ਸੀਘਂ ਪਕ੍ਕਮਾ’’ਤਿ ਮਹਾਸਦ੍ਦੇਨ ਵਿਰਵਿ. ਸੋ ਸਬ੍ਬਰੁਤਞ੍ਞੁਤਾਯ ਤਮਤ੍ਥਂ ਞਤ੍ਵਾ ਤਤੋਵ ਨਿਵਤ੍ਤਿਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਪਕ੍ਕਮਨਤ੍ਥਾਯ ਪਰਿਕ੍ਖਾਰੇ ਆਦਿਯਿ. ਰਾਜਾ ਸੀਹਪਞ੍ਜਰੇ ਠਿਤੋ ਤਂ ਆਗਚ੍ਛਨ੍ਤਂ ਗਚ੍ਛਨ੍ਤਞ੍ਚ ਦਿਸ੍ਵਾ ‘‘ਸਚੇ ਅਯਂ ਮਮ ਪਚ੍ਚਤ੍ਥਿਕੋ ਭਵੇਯ੍ਯ, ਉਯ੍ਯਾਨਂ ਗਨ੍ਤ੍ਵਾ ਬਲਂ ਸਨ੍ਨਿਪਾਤਾਪੇਤ੍ਵਾ ਕਮ੍ਮਸਜ੍ਜੋ ਭਵਿਸ੍ਸਤਿ. ਨੋ ਚੇ, ਅਤ੍ਤਨੋ ਪਰਿਕ੍ਖਾਰੇ ਗਹੇਤ੍ਵਾ ਗਮਨਸਜ੍ਜੋ ਭਵਿਸ੍ਸਤਿ, ਜਾਨਿਸ੍ਸਾਮਿ ਤਾਵਸ੍ਸ ਕਿਰਿਯ’’ਨ੍ਤਿ ਉਯ੍ਯਾਨਂ ਗਨ੍ਤ੍ਵਾ ਮਹਾਸਤ੍ਤਂ ਅਤ੍ਤਨੋ ਪਰਿਕ੍ਖਾਰੇ ਆਦਾਯ ‘‘ਗਮਿਸ੍ਸਾਮੀ’’ਤਿ ਪਣ੍ਣਸਾਲਤੋ ਨਿਕ੍ਖਨ੍ਤਂ ਚਙ੍ਕਮਨਕੋਟਿਯਂ ਦਿਸ੍ਵਾਵ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ਪਠਮਂ ਗਾਥਮਾਹ –

੧੨੪.

‘‘ਕਿਂ ਨੁ ਦਣ੍ਡਂ ਕਿਮਜਿਨਂ, ਕਿਂ ਛਤ੍ਤਂ ਕਿਮੁਪਾਹਨਂ;

ਕਿਮਙ੍ਕੁਸਞ੍ਚ ਪਤ੍ਤਞ੍ਚ, ਸਙ੍ਘਾਟਿਞ੍ਚਾਪਿ ਬ੍ਰਾਹ੍ਮਣ;

ਤਰਮਾਨਰੂਪੋਹਾਸਿ, ਕਿਂ ਨੁ ਪਤ੍ਥਯਸੇ ਦਿਸ’’ਨ੍ਤਿ.

ਤਸ੍ਸਤ੍ਥੋ – ਭਨ੍ਤੇ, ਪੁਬ੍ਬੇ ਤ੍ਵਂ ਅਮ੍ਹਾਕਂ ਘਰਂ ਆਗਚ੍ਛਨ੍ਤੋ ਦਣ੍ਡਾਦੀਨਿ ਨ ਗਣ੍ਹਾਸਿ, ਅਜ੍ਜ ਪਨ ਕੇਨ ਕਾਰਣੇਨ ਦਣ੍ਡਞ੍ਚ ਅਜਿਨਞ੍ਚ ਛਤ੍ਤੂਪਾਹਨਞ੍ਚ ਮਤ੍ਤਿਕਪਸਿਬ੍ਬਕੋਲਮ੍ਬਨਅਙ੍ਕੁਸਞ੍ਚ ਮਤ੍ਤਿਕਪਤ੍ਤਞ੍ਚ ਸਙ੍ਘਾਟਿਞ੍ਚਾਤਿ ਸਬ੍ਬੇਪਿਮੇ ਪਰਿਕ੍ਖਾਰੇ ਤਰਮਾਨਰੂਪੋ ਗਣ੍ਹਾਸਿ, ਕਤਰਂ ਨੁ ਦਿਸਂ ਪਤ੍ਥੇਸਿ, ਕਤ੍ਥ ਗਨ੍ਤੁਕਾਮੋਸੀਤਿ ਪੁਚ੍ਛਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਅਯਂ ਅਤ੍ਤਨਾ ਕਤਕਮ੍ਮਂ ਨ ਜਾਨਾਤੀਤਿ ਮਞ੍ਞਤਿ, ਜਾਨਾਪੇਸ੍ਸਾਮਿ ਨ’’ਨ੍ਤਿ ਦ੍ਵੇ ਗਾਥਾ ਅਭਾਸਿ –

੧੨੫.

‘‘ਦ੍ਵਾਦਸੇਤਾਨਿ ਵਸ੍ਸਾਨਿ, ਵੁਸਿਤਾਨਿ ਤਵਨ੍ਤਿਕੇ;

ਨਾਭਿਜਾਨਾਮਿ ਸੋਣੇਨ, ਪਿਙ੍ਗਲੇਨਾਭਿਕੂਜਿਤਂ.

੧੨੬.

‘‘ਸ੍ਵਾਯਂ ਦਿਤ੍ਤੋਵ ਨਦਤਿ, ਸੁਕ੍ਕਦਾਠਂ ਵਿਦਂਸਯਂ;

ਤਵ ਸੁਤ੍ਵਾ ਸਭਰਿਯਸ੍ਸ, ਵੀਤਸਦ੍ਧਸ੍ਸ ਮਂ ਪਤੀ’’ਤਿ.

ਤਤ੍ਥ ਅਭਿਕੂਜਿਤਨ੍ਤਿ ਏਤੇਨ ਤਵ ਸੁਨਖੇਨ ਏਵਂ ਮਹਾਵਿਰਵੇਨ ਵਿਰਵਿਤਂ ਨ ਜਾਨਾਮਿ. ਦਿਤ੍ਤੋ ਵਾਤਿ ਦਪ੍ਪਿਤੋ ਵਿਯ. ਸਭਰਿਯਸ੍ਸਾਤਿ ਤਵ ਸਭਰਿਯਸ੍ਸ ਮਮ ਮਾਰਣਤ੍ਥਾਯ ਪਞ੍ਚਨ੍ਨਂ ਅਮਚ੍ਚਾਨਂ ਆਣਤ੍ਤਭਾਵਂ ਕਥੇਨ੍ਤਸ੍ਸ ਸੁਤ੍ਵਾ ‘‘ਕਿਂ ਤ੍ਵਂ ਅਞ੍ਞਤ੍ਥ ਭਿਕ੍ਖਂ ਨ ਲਭਸਿ, ਰਞ੍ਞਾ ਤੇ ਵਧੋ ਆਣਤ੍ਤੋ, ਇਧ ਮਾਗਚ੍ਛੀ’’ਤਿ ਦਿਤ੍ਤੋਵ ਨਦਤਿ. ਵੀਤਸਦ੍ਧਸ੍ਸ ਮਂ ਪਤੀਤਿ ਮਮਨ੍ਤਰੇ ਵਿਗਤਸਦ੍ਧਸ੍ਸ ਤਵ ਵਚਨਂ ਸੁਤ੍ਵਾ ਏਵ ਨਦਤੀਤਿ ਆਹ.

ਤਤੋ ਰਾਜਾ ਅਤ੍ਤਨੋ ਦੋਸਂ ਸਮ੍ਪਟਿਚ੍ਛਿਤ੍ਵਾ ਤਂ ਖਮਾਪੇਨ੍ਤੋ ਚਤੁਤ੍ਥਂ ਗਾਥਮਾਹ –

੧੨੭.

‘‘ਅਹੁ ਏਸ ਕਤੋ ਦੋਸੋ, ਯਥਾ ਭਾਸਸਿ ਬ੍ਰਾਹ੍ਮਣ;

ਏਸ ਭਿਯ੍ਯੋ ਪਸੀਦਾਮਿ, ਵਸ ਬ੍ਰਾਹ੍ਮਣ ਮਾਗਮਾ’’ਤਿ.

ਤਤ੍ਥ ਭਿਯ੍ਯੋਤਿ ਸਚ੍ਚਂ ਮਯਾ ਏਵਂ ਆਣਤ੍ਤਂ, ਅਯਂ ਮੇ ਦੋਸੋ, ਏਸ ਪਨਾਹਂ ਇਦਾਨਿ ਅਧਿਕਤਰਂ ਤਯਿ ਪਸੀਦਾਮਿ, ਇਧੇਵ ਵਸ, ਮਾ ਅਞ੍ਞਤ੍ਥ ਗਮੀਤਿ.

ਤਂ ਸੁਤ੍ਵਾ ਮਹਾਸਤ੍ਤੋ, ‘‘ਮਹਾਰਾਜ, ਪਣ੍ਡਿਤਾ ਨਾਮ ਤਾਦਿਸੇਨ ਪਰਪਤ੍ਤਿਯੇਨ ਅਪਚ੍ਚਕ੍ਖਕਾਰਿਨਾ ਸਦ੍ਧਿਂ ਨ ਵਸਨ੍ਤੀ’’ਤਿ ਵਤ੍ਵਾ ਤਸ੍ਸ ਅਨਾਚਾਰਂ ਪਕਾਸੇਨ੍ਤੋ ਆਹ –

੧੨੮.

‘‘ਸਬ੍ਬਸੇਤੋ ਪੁਰੇ ਆਸਿ, ਤਤੋਪਿ ਸਬਲੋ ਅਹੁ;

ਸਬ੍ਬਲੋਹਿਤਕੋ ਦਾਨਿ, ਕਾਲੋ ਪਕ੍ਕਮਿਤੁਂ ਮਮ.

੧੨੯.

‘‘ਅਬ੍ਭਨ੍ਤਰਂ ਪੁਰੇ ਆਸਿ, ਤਤੋ ਮਜ੍ਝੇ ਤਤੋ ਬਹਿ;

ਪੁਰਾ ਨਿਦ੍ਧਮਨਾ ਹੋਤਿ, ਸਯਮੇਵ ਵਜਾਮਹਂ.

੧੩੦.

‘‘ਵੀਤਸਦ੍ਧਂ ਨ ਸੇਵੇਯ੍ਯ, ਉਪਦਾਨਂਵਨੋਦਕਂ;

ਸਚੇਪਿ ਨਂ ਅਨੁਖਣੇ, ਵਾਰਿ ਕਦ੍ਦਮਗਨ੍ਧਿਕਂ.

੧੩੧.

‘‘ਪਸਨ੍ਨਮੇਵ ਸੇਵੇਯ੍ਯ, ਅਪ੍ਪਸਨ੍ਨਂ ਵਿਵਜ੍ਜਯੇ;

ਪਸਨ੍ਨਂ ਪਯਿਰੁਪਾਸੇਯ੍ਯ, ਰਹਦਂਵੁਦਕਤ੍ਥਿਕੋ.

੧੩੨.

‘‘ਭਜੇ ਭਜਨ੍ਤਂ ਪੁਰਿਸਂ, ਅਭਜਨ੍ਤਂ ਨ ਭਜ੍ਜਯੇ;

ਅਸਪ੍ਪੁਰਿਸਧਮ੍ਮੋ ਸੋ, ਯੋ ਭਜਨ੍ਤਂ ਨ ਭਜ੍ਜਤਿ.

੧੩੩.

‘‘ਯੋ ਭਜਨ੍ਤਂ ਨ ਭਜਤਿ, ਸੇਵਮਾਨਂ ਨ ਸੇਵਤਿ;

ਸ ਵੇ ਮਨੁਸ੍ਸਪਾਪਿਟ੍ਠੋ, ਮਿਗੋ ਸਾਖਸ੍ਸਿਤੋ ਯਥਾ.

੧੩੪.

‘‘ਅਚ੍ਚਾਭਿਕ੍ਖਣਸਂਸਗ੍ਗਾ, ਅਸਮੋਸਰਣੇਨ ਚ;

ਏਤੇਨ ਮਿਤ੍ਤਾ ਜੀਰਨ੍ਤਿ, ਅਕਾਲੇ ਯਾਚਨਾਯ ਚ.

੧੩੫.

‘‘ਤਸ੍ਮਾ ਨਾਭਿਕ੍ਖਣਂ ਗਚ੍ਛੇ, ਨ ਚ ਗਚ੍ਛੇ ਚਿਰਾਚਿਰਂ;

ਕਾਲੇਨ ਯਾਚਂ ਯਾਚੇਯ੍ਯ, ਏਵਂ ਮਿਤ੍ਤਾ ਨ ਜੀਯਰੇ.

੧੩੬.

‘‘ਅਤਿਚਿਰਂ ਨਿਵਾਸੇਨ, ਪਿਯੋ ਭਵਤਿ ਅਪ੍ਪਿਯੋ;

ਆਮਨ੍ਤ ਖੋ ਤਂ ਗਚ੍ਛਾਮ, ਪੁਰਾ ਤੇ ਹੋਮ ਅਪ੍ਪਿਯਾ’’ਤਿ.

ਤਤ੍ਥ ਸਬ੍ਬਸੇਤੋਤਿ, ਮਹਾਰਾਜ, ਪਠਮਮੇਵ ਤਵ ਨਿਵੇਸਨੇ ਮਮ ਓਦਨੋ ਸਬ੍ਬਸੇਤੋ ਅਹੋਸਿ, ਯਂ ਤ੍ਵਂ ਭੁਞ੍ਜਸਿ, ਤਮੇਵ ਦਾਪੇਸੀਤਿ ਅਤ੍ਥੋ. ਤਤੋਤਿ ਤਤੋ ਪਚ੍ਛਾ ਪਰਿਭੇਦਕਾਨਂ ਵਚਨਂ ਗਹੇਤ੍ਵਾ ਤਵ ਮਯਿ ਵਿਰਤ੍ਤਕਾਲੇ ਸਬਲੋ ਮਿਸ੍ਸਕੋਦਨੋ ਜਾਤੋ. ਦਾਨੀਤਿ ਇਦਾਨਿ ਸਬ੍ਬਲੋਹਿਤਕੋ ਜਾਤੋ. ਕਾਲੋਤਿ ਅਗੁਣਞ੍ਞੁਸ੍ਸ ਤਵ ਸਨ੍ਤਿਕਾ ਇਦਾਨਿ ਮਮ ਪਕ੍ਕਮਿਤੁਂ ਕਾਲੋ. ਅਬ੍ਭਨ੍ਤਰਨ੍ਤਿ ਪਠਮਂ ਮਮ ਅਬ੍ਭਨ੍ਤਰਂ ਆਸਨਂ ਆਸਿ, ਅਲਙ੍ਕਤਮਹਾਤਲਮ੍ਹਿ ਉਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲਙ੍ਕੇਯੇਵ ਮਂ ਨਿਸੀਦਾਪੇਸੁਂ. ਮਜ੍ਝੇਤਿ ਸੋਪਾਨਮਤ੍ਥਕੇ. ਪੁਰਾ ਨਿਦ੍ਧਮਨਾ ਹੋਤੀਤਿ ਯਾਵ ਗੀਵਾਯਂ ਗਹੇਤ੍ਵਾ ਨਿਕ੍ਕਡ੍ਢਨਾ ਨ ਹੋਤਿ.

ਅਨੁਖਣੇਤਿ ਸਚੇਪਿ ਅਨੁਦਕਂ ਉਦਪਾਨਂ ਪਤ੍ਤੋ ਪੁਰਿਸੋ ਉਦਕਂ ਅਪਸ੍ਸਨ੍ਤੋ ਕਲਲਂ ਵਿਯੂਹਿਤ੍ਵਾ ਅਨੁਖਣੇਯ੍ਯ, ਤਥਾਪਿ ਤਂ ਵਾਰਿ ਕਦ੍ਦਮਗਨ੍ਧਿਕਂ ਭਵੇਯ੍ਯ, ਅਮਨੁਞ੍ਞਤਾਯ ਨ ਪਿਵੇਯ੍ਯ, ਤਥੇਵ ਵੀਤਸਦ੍ਧਂ ਪਯਿਰੁਪਾਸਨ੍ਤੇਨ ਲਦ੍ਧਪਚ੍ਚਯਾਪਿ ਪਰਿਤ੍ਤਾ ਚੇਵ ਲੂਖਾ ਚ, ਅਮਨੁਞ੍ਞਾ ਅਪਰਿਭੋਗਾਰਹਾਤਿ ਅਤ੍ਥੋ. ਪਸਨ੍ਨਨ੍ਤਿ ਪਤਿਟ੍ਠਿਤਸਦ੍ਧਂ. ਰਹਦਨ੍ਤਿ ਗਮ੍ਭੀਰਂ ਮਹਾਰਹਦਂ. ਭਜਨ੍ਤਨ੍ਤਿ ਅਤ੍ਤਾਨਂ ਭਜਨ੍ਤਮੇਵ ਭਜੇਯ੍ਯ. ਅਭਜਨ੍ਤਨ੍ਤਿ ਪਚ੍ਚਤ੍ਥਿਕਂ. ਨ ਭਜ੍ਜਯੇਤਿ ਨ ਭਜੇਯ੍ਯ. ਨ ਭਜ੍ਜਤੀਤਿ ਯੋ ਪੁਰਿਸੋ ਅਤ੍ਤਾਨਂ ਭਜਨ੍ਤਂ ਹਿਤਚਿਤ੍ਤਂ ਪੁਗ੍ਗਲਂ ਨ ਭਜਤਿ, ਸੋ ਅਸਪ੍ਪੁਰਿਸਧਮ੍ਮੋ ਨਾਮਾਤਿ. ਮਨੁਸ੍ਸਪਾਪਿਟ੍ਠੋਤਿ ਮਨੁਸ੍ਸਲਾਮਕੋ ਪਤਿਕੁਟ੍ਠੋ ਸਬ੍ਬਪਚ੍ਛਿਮਕੋ. ਸਾਖਸ੍ਸਿਤੋਤਿ ਮਕ੍ਕਟੋ.

ਅਚ੍ਚਾਭਿਕ੍ਖਣਸਂਸਗ੍ਗਾਤਿ ਅਤਿਵਿਯ ਅਭਿਣ੍ਹਸਂਸਗ੍ਗੇਨ. ਅਕਾਲੇਤਿ ਅਯੁਤ੍ਤਪ੍ਪਤ੍ਤਕਾਲੇ ਪਰਸ੍ਸ ਪਿਯਭਣ੍ਡਂ ਯਾਚਨਾਯ ਮਿਤ੍ਤਾ ਜੀਰਨ੍ਤਿ ਨਾਮ, ਤ੍ਵਮ੍ਪਿ ਅਤਿਚਿਰਂ ਨਿਵਾਸੇਨ ਮਯਿ ਮਿਤ੍ਤਿਂ ਭਿਨ੍ਦਿ. ਤਸ੍ਮਾਤਿ ਯਸ੍ਮਾ ਅਚ੍ਚਾਭਿਕ੍ਖਣਸਂਸਗ੍ਗੇਨ ਅਸਮੋਸਰਣੇਨ ਚ ਮਿਤ੍ਤਾ ਜੀਰਨ੍ਤਿ, ਤਸ੍ਮਾ. ਚਿਰਾਚਿਰਨ੍ਤਿ ਚਿਰਕਾਲਂ ਵੀਤਿਨਾਮੇਤ੍ਵਾ ਚਿਰਂ ਨ ਗਚ੍ਛੇ ਨ ਉਪਸਙ੍ਕਮੇਯ੍ਯ. ਯਾਚਨ੍ਤਿ ਯਾਚਿਤਬ੍ਬਂ ਭਣ੍ਡਕਂ ਯੁਤ੍ਤਕਾਲੇ ਯਾਚੇਯ੍ਯ. ਨ ਜੀਯਰੇਤਿ ਏਵਂ ਮਿਤ੍ਤਾ ਨ ਜੀਰਨ੍ਤਿ. ਪੁਰਾ ਤੇ ਹੋਮ ਅਪ੍ਪਿਯਾਤਿ ਯਾਵ ਤਵ ਅਪ੍ਪਿਯਾ ਨ ਹੋਮ, ਤਾਵ ਆਮਨ੍ਤੇਤ੍ਵਾਵ ਤਂ ਗਚ੍ਛਾਮਾਤਿ.

ਰਾਜਾ ਆਹ –

੧੩੭.

‘‘ਏਵਂ ਚੇ ਯਾਚਮਾਨਾਨਂ, ਅਞ੍ਜਲਿਂ ਨਾਵਬੁਜ੍ਝਸਿ;

ਪਰਿਚਾਰਕਾਨਂ ਸਤਂ, ਵਚਨਂ ਨ ਕਰੋਸਿ ਨੋ;

ਏਵਂ ਤਂ ਅਭਿਯਾਚਾਮ, ਪੁਨ ਕਯਿਰਾਸਿ ਪਰਿਯਾਯ’’ਨ੍ਤਿ.

ਤਤ੍ਥ ਨਾਵਬੁਜ੍ਝਸੀਤਿ ਸਚੇ, ਭਨ੍ਤੇ, ਏਵਂ ਯਾਚਨ੍ਤੇਨ ਮਯਾ ਕਤਂ ਅਞ੍ਜਲਿਂ ਨ ਜਾਨਾਸਿ, ਨ ਪਟਿਗ੍ਗਣ੍ਹਸੀਤਿ ਅਤ੍ਥੋ. ਪਰਿਯਾਯਨ੍ਤਿ ਪੁਨ ਇਧਾਗਮਨਾਯ ਏਕਵਾਰਂ ਕਰੇਯ੍ਯਾਸੀਤਿ ਯਾਚਤਿ.

ਬੋਧਿਸਤ੍ਤੋ ਆਹ –

੧੩੮.

‘‘ਏਵਂ ਚੇ ਨੋ ਵਿਹਰਤਂ, ਅਨ੍ਤਰਾਯੋ ਨ ਹੇਸ੍ਸਤਿ;

ਤੁਯ੍ਹਂ ਵਾਪਿ ਮਹਾਰਾਜ, ਮਯ੍ਹਂ ਵਾ ਰਟ੍ਠਵਦ੍ਧਨ;

ਅਪ੍ਪੇਵ ਨਾਮ ਪਸ੍ਸੇਮ, ਅਹੋਰਤ੍ਤਾਨਮਚ੍ਚਯੇ’’ਤਿ.

ਤਤ੍ਥ ਏਵਂ ਚੇ ਨੋਤਿ ਸਚੇ, ਮਹਾਰਾਜ, ਏਵਂ ਨਾਨਾ ਹੁਤ੍ਵਾ ਵਿਹਰਨ੍ਤਾਨਂ ਅਮ੍ਹਾਕਂ ਅਨ੍ਤਰਾਯੋ ਨ ਹੇਸ੍ਸਤਿ, ਤੁਯ੍ਹਂ ਵਾ ਮਯ੍ਹਂ ਵਾ ਜੀਵਿਤਂ ਪਵਤ੍ਤਿਸ੍ਸਤੀਤਿ ਦੀਪੇਤਿ. ਪਸ੍ਸੇਮਾਤਿ ਅਪਿ ਨਾਮ ਪਸ੍ਸੇਯ੍ਯਾਮ.

ਏਵਂ ਵਤ੍ਵਾ ਮਹਾਸਤ੍ਤੋ ਰਞ੍ਞੋ ਧਮ੍ਮਂ ਦੇਸੇਤ੍ਵਾ ‘‘ਅਪ੍ਪਮਤ੍ਤੋ ਹੋਹਿ, ਮਹਾਰਾਜਾ’’ਤਿ ਵਤ੍ਵਾ ਉਯ੍ਯਾਨਾ ਨਿਕ੍ਖਮਿਤ੍ਵਾ ਏਕਸ੍ਮਿਂ ਸਭਾਗਟ੍ਠਾਨੇ ਭਿਕ੍ਖਾਯ ਚਰਿਤ੍ਵਾ ਬਾਰਾਣਸਿਤੋ ਨਿਕ੍ਖਮ੍ਮ ਅਨੁਪੁਬ੍ਬੇਨ ਹਿਮਵਨ੍ਤੋਕਾਸਮੇਵ ਗਨ੍ਤ੍ਵਾ ਕਿਞ੍ਚਿ ਕਾਲਂ ਵਸਿਤ੍ਵਾ ਪੁਨ ਓਤਰਿਤ੍ਵਾ ਏਕਂ ਪਚ੍ਚਨ੍ਤਗਾਮਂ ਨਿਸ੍ਸਾਯ ਅਰਞ੍ਞੇ ਵਸਿ. ਤਸ੍ਸ ਪਨ ਗਤਕਾਲਤੋ ਪਟ੍ਠਾਯ ਤੇ ਅਮਚ੍ਚਾ ਪੁਨ ਵਿਨਿਚ੍ਛਯੇ ਨਿਸੀਦਿਤ੍ਵਾ ਵਿਲੋਪਂ ਕਰੋਨ੍ਤਾ ਚਿਨ੍ਤਯਿਂਸੁ – ‘‘ਸਚੇ ਮਹਾਬੋਧਿਪਰਿਬ੍ਬਾਜਕੋ ਪੁਨਾਗਮਿਸ੍ਸਤਿ, ਜੀਵਿਤਂ ਨੋ ਨਤ੍ਥਿ, ਕਿਂ ਨੁ ਖ੍ਵਸ੍ਸ ਅਨਾਗਮਨਕਾਰਣਂ ਕਰੇਯ੍ਯਾਮਾ’’ਤਿ. ਅਥ ਨੇਸਂ ਏਤਦਹੋਸਿ – ‘‘ਇਮੇ ਸਤ੍ਤਾ ਪਟਿਬਦ੍ਧਟ੍ਠਾਨਂ ਨਾਮ ਜਹਿਤੁਂ ਨ ਸਕ੍ਕੋਨ੍ਤਿ, ਕਿਂ ਨੁ ਖ੍ਵਸ੍ਸ ਇਧ ਪਟਿਬਦ੍ਧਟ੍ਠਾਨ’’ਨ੍ਤਿ. ਤਤੋ ‘‘ਰਞ੍ਞੋ ਅਗ੍ਗਮਹੇਸੀ’’ਤਿ ਞਤ੍ਵਾ ‘‘ਠਾਨਂ ਖੋ ਪਨੇਤਂ ਵਿਜ੍ਜਤਿ, ਯਂ ਸੋ ਇਮਂ ਨਿਸ੍ਸਾਯ ਆਗਚ੍ਛੇਯ੍ਯ, ਪਟਿਕਚ੍ਚੇਵ ਨਂ ਮਾਰਾਪੇਸ੍ਸਾਮਾ’’ਤਿ ਤੇ ਰਾਜਾਨਂ ਏਤਦਵੋਚੁਂ – ‘‘ਦੇਵ, ਇਮਸ੍ਮਿਂ ਦਿਵਸੇ ਨਗਰੇ ਏਕਾ ਕਥਾ ਸੂਯਤੀ’’ਤਿ. ‘‘ਕਿਂ ਕਥਾ ਨਾਮਾ’’ਤਿ? ‘‘ਮਹਾਬੋਧਿਪਰਿਬ੍ਬਾਜਕੋ ਚ ਕਿਰ ਦੇਵੀ ਚ ਅਞ੍ਞਮਞ੍ਞਂ ਸਾਸਨਪਟਿਸਾਸਨਂ ਪੇਸੇਨ੍ਤੀ’’ਤਿ. ‘‘ਕਿਨ੍ਤਿ ਕਤ੍ਵਾ’’ਤਿ? ਤੇਨ ਕਿਰ ਦੇਵਿਯਾ ਪੇਸਿਤਂ ‘‘ਸਕ੍ਕਾ ਨੁ ਖੋ ਅਤ੍ਤਨੋ ਬਲੇਨ ਰਾਜਾਨਂ ਮਾਰਾਪੇਤ੍ਵਾ ਮਮ ਸੇਤਚ੍ਛਤ੍ਤਂ ਦਾਤੁ’’ਨ੍ਤਿ. ਤਾਯਪਿਸ੍ਸ ਪੇਸਿਤਂ ‘‘ਰਞ੍ਞੋ ਮਾਰਣਂ ਨਾਮ ਮਮ ਭਾਰੋ, ਮਹਾਬੋਧਿਪਰਿਬ੍ਬਾਜਕੋ ਖਿਪ੍ਪਂ ਆਗਚ੍ਛਤੂ’’ਤਿ ਰਾਜਾ ਤੇਸਂ ਪੁਨਪ੍ਪੁਨਂ ਕਥੇਨ੍ਤਾਨਂ ਸਦ੍ਦਹਿਤ੍ਵਾ ‘‘ਇਦਾਨਿ ਕਿਂ ਕਤ੍ਤਬ੍ਬ’’ਨ੍ਤਿ ਪੁਚ੍ਛਿਤ੍ਵਾ ‘‘ਦੇਵਿਂ ਮਾਰੇਤੁਂ ਵਟ੍ਟਤੀ’’ਤਿ ਵੁਤ੍ਤੇ ਅਨੁਪਪਰਿਕ੍ਖਿਤ੍ਵਾਵ ‘‘ਤੇਨ ਹਿ ਨਂ ਤੁਮ੍ਹੇਵ ਮਾਰੇਤ੍ਵਾ ਖਣ੍ਡਾਖਣ੍ਡਿਕਂ ਛਿਨ੍ਦਿਤ੍ਵਾ ਵਚ੍ਚਕੂਪੇ ਖਿਪਥਾ’’ਤਿ ਆਹ. ਤੇ ਤਥਾ ਕਰਿਂਸੁ. ਤਸ੍ਸਾ ਮਾਰਿਤਭਾਵੋ ਸਕਲਨਗਰੇ ਪਾਕਟੋ ਅਹੋਸਿ.

ਅਥਸ੍ਸਾ ਚਤ੍ਤਾਰੋ ਪੁਤ੍ਤਾ ‘‘ਇਮਿਨਾ ਨੋ ਨਿਰਪਰਾਧਾ ਮਾਤਾ ਮਾਰਿਤਾ’’ਤਿ ਰਞ੍ਞੋ ਪਚ੍ਚਤ੍ਥਿਕਾ ਅਹੇਸੁਂ. ਰਾਜਾ ਮਹਾਭਯਪ੍ਪਤ੍ਤੋ ਅਹੋਸਿ. ਮਹਾਸਤ੍ਤੋ ਪਰਮ੍ਪਰਾਯ ਤਂ ਪਵਤ੍ਤਿਂ ਸੁਤ੍ਵਾ ਚਿਨ੍ਤੇਸਿ – ‘‘ਠਪੇਤ੍ਵਾ ਮਂ ਅਞ੍ਞੋ ਤੇ ਕੁਮਾਰੇ ਸਞ੍ਞਾਪੇਤ੍ਵਾ ਪਿਤਰਂ ਖਮਾਪੇਤੁਂ ਸਮਤ੍ਥੋ ਨਾਮ ਨਤ੍ਥਿ, ਰਞ੍ਞੋ ਚ ਜੀਵਿਤਂ ਦਸ੍ਸਾਮਿ, ਕੁਮਾਰੇ ਚ ਪਾਪਤੋ ਮੋਚੇਸ੍ਸਾਮੀ’’ਤਿ. ਸੋ ਪੁਨਦਿਵਸੇ ਪਚ੍ਚਨ੍ਤਗਾਮਂ ਪਵਿਸਿਤ੍ਵਾ ਮਨੁਸ੍ਸੇਹਿ ਦਿਨ੍ਨਂ ਮਕ੍ਕਟਮਂਸਂ ਖਾਦਿਤ੍ਵਾ ਤਸ੍ਸ ਚਮ੍ਮਂ ਯਾਚਿਤ੍ਵਾ ਗਹੇਤ੍ਵਾ ਅਸ੍ਸਮਪਦੇ ਸੁਕ੍ਖਾਪੇਤ੍ਵਾ ਨਿਗ੍ਗਨ੍ਧਂ ਕਤ੍ਵਾ ਨਿਵਾਸੇਸਿਪਿ ਪਾਰੁਪੇਸਿਪਿ ਅਂਸੇਪਿ ਠਪੇਸਿ. ਕਿਂਕਾਰਣਾ? ‘‘ਬਹੂਪਕਾਰੋ ਮੇ’’ਤਿ ਵਚਨਤ੍ਥਾਯ. ਸੋ ਤਂ ਚਮ੍ਮਂ ਆਦਾਯ ਅਨੁਪੁਬ੍ਬੇਨ ਬਾਰਾਣਸਿਂ ਗਨ੍ਤ੍ਵਾ ਕੁਮਾਰੇ ਉਪਸਙ੍ਕਮਿਤ੍ਵਾ ‘‘ਪਿਤੁਘਾਤਕਕਮ੍ਮਂ ਨਾਮ ਦਾਰੁਣਂ, ਤਂ ਵੋ ਨ ਕਾਤਬ੍ਬਂ, ਅਜਰਾਮਰੋ ਸਤ੍ਤੋ ਨਾਮ ਨਤ੍ਥਿ, ਅਹਂ ਤੁਮ੍ਹੇ ਅਞ੍ਞਮਞ੍ਞਂ ਸਮਗ੍ਗੇ ਕਰਿਸ੍ਸਾਮਿਚ੍ਚੇਵ ਆਗਤੋ, ਤੁਮ੍ਹੇ ਮਯਾ ਪਹਿਤੇ ਸਾਸਨੇ ਆਗਚ੍ਛੇਯ੍ਯਾਥਾ’’ਤਿ ਕੁਮਾਰੇ ਓਵਦਿਤ੍ਵਾ ਅਨ੍ਤੋਨਗਰੇ ਉਯ੍ਯਾਨਂ ਪਵਿਸਿਤ੍ਵਾ ਮਕ੍ਕਟਚਮ੍ਮਂ ਅਤ੍ਥਰਿਤ੍ਵਾ ਸਿਲਾਪਟ੍ਟੇ ਨਿਸੀਦਿ.

ਅਥ ਨਂ ਉਯ੍ਯਾਨਪਾਲਕੋ ਦਿਸ੍ਵਾ ਵੇਗੇਨ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਸੁਤ੍ਵਾਵ ਸਞ੍ਜਾਤਸੋਮਨਸ੍ਸੋ ਹੁਤ੍ਵਾ ਤੇ ਅਮਚ੍ਚੇ ਆਦਾਯ ਤਤ੍ਥ ਗਨ੍ਤ੍ਵਾ ਮਹਾਸਤ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ ਪਟਿਸਨ੍ਥਾਰਂ ਕਾਤੁਂ ਆਰਭਿ. ਮਹਾਸਤ੍ਤੋ ਤੇਨ ਸਦ੍ਧਿਂ ਅਸਮ੍ਮੋਦਿਤ੍ਵਾ ਮਕ੍ਕਟਚਮ੍ਮਮੇਵ ਪਰਿਮਜ੍ਜਿ. ਅਥ ਨਂ ਏਵਮਾਹ – ‘‘ਭਨ੍ਤੇ, ਤੁਮ੍ਹੇ ਮਂ ਅਕਥੇਤ੍ਵਾ ਮਕ੍ਕਟਚਮ੍ਮਮੇਵ ਪਰਿਮਜ੍ਜਥ, ਕਿਂ ਵੋ ਇਦਂ ਮਯਾ ਬਹੂਪਕਾਰਤਰ’’ਨ੍ਤਿ? ‘‘ਆਮ ਮਹਾਰਾਜ, ਬਹੂਪਕਾਰੋ ਮੇ ਏਸ ਵਾਨਰੋ, ਅਹਮਸ੍ਸ ਪਿਟ੍ਠੇ ਨਿਸੀਦਿਤ੍ਵਾ ਵਿਚਰਿਂ, ਅਯਂ ਮੇ ਪਾਨੀਯਘਟਂ ਆਹਰਿ, ਵਸਨਟ੍ਠਾਨਂ ਸਮ੍ਮਜ੍ਜਿ, ਆਭਿਸਮਾਚਾਰਿਕਵਤ੍ਤਪਟਿਵਤ੍ਤਂ ਮਮ ਅਕਾਸਿ, ਅਹਂ ਪਨ ਅਤ੍ਤਨੋ ਦੁਬ੍ਬਲਚਿਤ੍ਤਤਾਯ ਅਸ੍ਸ ਮਂਸਂ ਖਾਦਿਤ੍ਵਾ ਚਮ੍ਮਂ ਸੁਕ੍ਖਾਪੇਤ੍ਵਾ ਅਤ੍ਥਰਿਤ੍ਵਾ ਨਿਸੀਦਾਮਿ ਚੇਵ ਨਿਪਜ੍ਜਾਮਿ ਚ, ਏਵਂ ਬਹੂਪਕਾਰੋ ਏਸ ਮਯ੍ਹ’’ਨ੍ਤਿ. ਇਤਿ ਸੋ ਤੇਸਂ ਵਾਦੇ ਭਿਨ੍ਦਨਤ੍ਥਾਯ ਵਾਨਰਚਮ੍ਮੇ ਵਾਨਰਵੋਹਾਰਂ ਆਰੋਪੇਤ੍ਵਾ ਤਂ ਤਂ ਪਰਿਯਾਯਂ ਸਨ੍ਧਾਯ ਇਮਂ ਕਥਂ ਕਥੇਸਿ. ਸੋ ਹਿ ਤਸ੍ਸ ਨਿਵੁਤ੍ਥਪੁਬ੍ਬਤ੍ਤਾ ‘‘ਪਿਟ੍ਠੇ ਨਿਸੀਦਿਤ੍ਵਾ ਵਿਚਰਿ’’ਨ੍ਤਿ ਆਹ; ਤਂ ਅਂਸੇ ਕਤ੍ਵਾ ਪਾਨੀਯਘਟਸ੍ਸ ਆਹਟਪੁਬ੍ਬਤ੍ਤਾ ‘‘ਪਾਨੀਯਘਟਂ ਆਹਰੀ’’ਤਿ ਆਹ; ਤੇਨ ਚਮ੍ਮੇਨ ਭੂਮਿਯਂ ਸਮ੍ਮਟ੍ਠਪੁਬ੍ਬਤ੍ਤਾ ‘‘ਵਸਨਟ੍ਠਾਨਂ ਸਮ੍ਮਜ੍ਜੀ’’ਤਿ ਆਹ; ਨਿਪਨ੍ਨਕਾਲੇ ਤੇਨ ਚਮ੍ਮੇਨ ਪਿਟ੍ਠਿਯਾ, ਅਕ੍ਕਨ੍ਤਕਾਲੇ ਪਾਦਾਨਂ ਫੁਟ੍ਠਪੁਬ੍ਬਤ੍ਤਾ ‘‘ਵਤ੍ਤਪਟਿਵਤ੍ਤਂ ਮੇ ਅਕਾਸੀ’’ਤਿ ਆਹ. ਛਾਤਕਾਲੇ ਪਨ ਤਸ੍ਸ ਮਂਸਂ ਲਭਿਤ੍ਵਾ ਖਾਦਿਤਤ੍ਤਾ ‘‘ਅਹਂ ਪਨ ਅਤ੍ਤਨੋ ਦੁਬ੍ਬਲਚਿਤ੍ਤਤਾਯ ਤਸ੍ਸ ਮਂਸਂ ਖਾਦਿ’’ਨ੍ਤਿ ਆਹ.

ਤਂ ਸੁਤ੍ਵਾ ਤੇ ਅਮਚ੍ਚਾ ‘‘ਪਾਣਾਤਿਪਾਤੋ ਤੇਨ ਕਤੋ’’ਤਿ ਸਞ੍ਞਾਯ ‘‘ਪਸ੍ਸਥ, ਭੋ, ਪਬ੍ਬਜਿਤਸ੍ਸ ਕਮ੍ਮਂ, ਮਕ੍ਕਟਂ ਕਿਰ ਮਾਰੇਤ੍ਵਾ ਮਂਸਂ ਖਾਦਿਤ੍ਵਾ ਚਮ੍ਮਂ ਗਹੇਤ੍ਵਾ ਵਿਚਰਤੀ’’ਤਿ ਪਾਣਿਂ ਪਹਰਿਤ੍ਵਾ ਪਰਿਹਾਸਮਕਂਸੁ. ਮਹਾਸਤ੍ਤੋ ਤੇ ਤਥਾ ਕਰੋਨ੍ਤੇ ਦਿਸ੍ਵਾ ‘‘ਇਮੇ ਅਤ੍ਤਨੋ ਵਾਦਭੇਦਨਤ੍ਥਾਯ ਮਮ ਚਮ੍ਮਂ ਆਦਾਯ ਆਗਤਭਾਵਂ ਨ ਜਾਨਨ੍ਤਿ, ਜਾਨਾਪੇਸ੍ਸਾਮਿ ਨੇ’’ਤਿ ਅਹੇਤੁਕਵਾਦਿਂ ਤਾਵ ਆਮਨ੍ਤੇਤ੍ਵਾ ਪੁਚ੍ਛਿ – ‘‘ਆਵੁਸੋ, ਤ੍ਵਂ ਕਸ੍ਮਾ ਮਂ ਪਰਿਹਸਸੀ’’ਤਿ? ‘‘ਮਿਤ੍ਤਦੁਬ੍ਭਿਕਮ੍ਮਸ੍ਸ ਚੇਵ ਪਾਣਾਤਿਪਾਤਸ੍ਸ ਚ ਕਤਤ੍ਤਾ’’ਤਿ. ਤਤੋ ਮਹਾਸਤ੍ਤੋ ‘‘ਯੋ ਪਨ ਗਤਿਯਾ ਚੇਵ ਦਿਟ੍ਠਿਯਾ ਚ ਤੇ ਸਦ੍ਦਹਿਤ੍ਵਾ ਏਵਂ ਕਰੇਯ੍ਯ, ਤੇਨ ਕਿਂ ਦੁਕ੍ਕਟ’’ਨ੍ਤਿ ਤਸ੍ਸ ਵਾਦਂ ਭਿਨ੍ਦਨ੍ਤੋ ਆਹ –

੧੩੯.

‘‘ਉਦੀਰਣਾ ਚੇ ਸਂਗਤ੍ਯਾ, ਭਾਵਾਯਮਨੁਵਤ੍ਤਤਿ;

ਅਕਾਮਾ ਅਕਰਣੀਯਂ ਵਾ, ਕਰਣੀਯਂ ਵਾਪਿ ਕੁਬ੍ਬਤਿ;

ਅਕਾਮਕਰਣੀਯਮ੍ਹਿ, ਕ੍ਵਿਧ ਪਾਪੇਨ ਲਿਪ੍ਪਤਿ.

੧੪੦.

‘‘ਸੋ ਚੇ ਅਤ੍ਥੋ ਚ ਧਮ੍ਮੋ ਚ, ਕਲ੍ਯਾਣੋ ਨ ਚ ਪਾਪਕੋ;

ਭੋਤੋ ਚੇ ਵਚਨਂ ਸਚ੍ਚਂ, ਸੁਹਤੋ ਵਾਨਰੋ ਮਯਾ.

੧੪੧.

‘‘ਅਤ੍ਤਨੋ ਚੇ ਹਿ ਵਾਦਸ੍ਸ, ਅਪਰਾਧਂ ਵਿਜਾਨਿਯਾ;

ਨ ਮਂ ਤ੍ਵਂ ਗਰਹੇਯ੍ਯਾਸਿ, ਭੋਤੋ ਵਾਦੋ ਹਿ ਤਾਦਿਸੋ’’ਤਿ.

ਤਤ੍ਥ ਉਦੀਰਣਾਤਿ ਕਥਾ. ਸਂਗਤ੍ਯਾਤਿ ਸਂਗਤਿਯਾ ਛਨ੍ਨਂ ਅਭਿਜਾਤੀਨਂ ਤਂ ਤਂ ਅਭਿਜਾਤਿਂ ਉਪਗਮਨੇਨ. ਭਾਵਾਯਮਨੁਵਤ੍ਤਤੀਤਿ ਭਾਵੇਨ ਅਨੁਵਤ੍ਤਤਿ, ਕਰਣਤ੍ਥੇ ਸਮ੍ਪਦਾਨਂ. ਅਕਾਮਾਤਿ ਅਕਾਮੇਨ ਅਨਿਚ੍ਛਾਯ. ਅਕਰਣੀਯਂ ਵਾ ਕਰਣੀਯਂ ਵਾਪੀਤਿ ਅਕਤ੍ਤਬ੍ਬਂ ਪਾਪਂ ਵਾ ਕਤ੍ਤਬ੍ਬਂ ਕੁਸਲਂ ਵਾ. ਕੁਬ੍ਬਤੀਤਿ ਕਰੋਤਿ. ਕ੍ਵਿਧਾਤਿ ਕੋ ਇਧ. ਇਦਂ ਵੁਤ੍ਤਂ ਹੋਤਿ – ਤ੍ਵਂ ਅਹੇਤੁਕਵਾਦੀ ‘‘ਨਤ੍ਥਿ ਹੇਤੁ ਨਤ੍ਥਿ ਪਚ੍ਚਯੋ ਸਤ੍ਤਾਨਂ ਸਂਕਿਲੇਸਾਯਾ’’ਤਿਆਦਿਦਿਟ੍ਠਿਕੋ, ਅਯਂ ਲੋਕੋ ਸਂਗਤਿਯਾ ਚੇਵ ਸਭਾਵੇਨ ਚ ਅਨੁਵਤ੍ਤਤਿ ਪਰਿਣਮਤਿ, ਤਤ੍ਥ ਤਤ੍ਥ ਸੁਖਦੁਕ੍ਖਂ ਪਟਿਸਂਵੇਦੇਤਿ. ਅਕਾਮਕੋਵ ਪਾਪਂ ਵਾ ਪੁਞ੍ਞਂ ਵਾ ਕਰੋਤੀਤਿ ਵਦਸਿ, ਅਯਂ ਤਵ ਉਦੀਰਣਾ ਸਚੇ ਤਥਾ, ਏਵਂ ਸਨ੍ਤੇ ਅਕਾਮਕਰਣੀਯਸ੍ਮਿਂ ਅਤ੍ਤਨੋ ਧਮ੍ਮਤਾਯ ਪਵਤ੍ਤਮਾਨੇ ਪਾਪੇ ਕੋ ਇਧ ਸਤ੍ਤੋ ਪਾਪੇਨ ਲਿਪ੍ਪਤਿ, ਸਚੇ ਹਿ ਅਤ੍ਤਨਾ ਅਕਤੇਨ ਪਾਪੇਨ ਲਿਪ੍ਪਤਿ, ਨ ਕੋਚਿ ਨ ਲਿਪ੍ਪੇਯ੍ਯਾਤਿ.

ਸੋ ਚੇਤਿ ਸੋ ਅਹੇਤੁਕਵਾਦਸਙ੍ਖਾਤੋ ਤਵ ਭਾਸਿਤਤ੍ਥੋ ਚ ਅਤ੍ਥਜੋਤਕੋ ਧਮ੍ਮੋ ਚ ਕਲ੍ਯਾਣੋ ਨ ਚ ਪਾਪਕੋ. ‘‘ਅਹੇਤੂ ਅਪ੍ਪਚ੍ਚਯਾ ਸਤ੍ਤਾ ਸਂਕਿਲਿਸ੍ਸਨ੍ਤਿ, ਸੁਖਦੁਕ੍ਖਂ ਪਟਿਸਂਵੇਦਿਯਨ੍ਤੀ’’ਤਿ ਇਦਂ ਭੋਤੋ ਵਚਨਂ ਸਚ੍ਚਂ ਚੇ, ਸੁਹਤੋ ਵਾਨਰੋ ਮਯਾ, ਕੋ ਏਤ੍ਥ ਮਮ ਦੋਸੋਤਿ ਅਤ੍ਥੋ. ਵਿਜਾਨਿਯਾਤਿ, ਸਮ੍ਮ, ਸਚੇ ਹਿ ਤ੍ਵਂ ਅਤ੍ਤਨੋ ਵਾਦਸ੍ਸ ਅਪਰਾਧਂ ਜਾਨੇਯ੍ਯਾਸਿ, ਨ ਮਂ ਗਰਹੇਯ੍ਯਾਸਿ. ਕਿਂਕਾਰਣਾ? ਭੋਤੋ ਵਾਦੋ ਹਿ ਤਾਦਿਸੋ, ਤਸ੍ਮਾ ਅਯਂ ਮਮ ਵਾਦਂ ਕਰੋਤੀਤਿ ਮਂ ਪਸਂਸੇਯ੍ਯਾਸਿ, ਅਤ੍ਤਨੋ ਪਨ ਵਾਦਂ ਅਜਾਨਨ੍ਤੋ ਮਂ ਗਰਹਸੀਤਿ.

ਏਵਂ ਮਹਾਸਤ੍ਤੋ ਤਂ ਨਿਗ੍ਗਣ੍ਹਿਤ੍ਵਾ ਅਪ੍ਪਟਿਭਾਣਂ ਅਕਾਸਿ. ਸੋਪਿ ਰਾਜਪਰਿਸਤਿ ਮਙ੍ਕੁਭੂਤੋ ਪਤ੍ਤਕ੍ਖਨ੍ਧੋ ਨਿਸੀਦਿ. ਮਹਾਸਤ੍ਤੋਪਿ ਤਸ੍ਸ ਵਾਦਂ ਭਿਨ੍ਦਿਤ੍ਵਾ ਇਸ੍ਸਰਕਤਵਾਦਿਂ ਆਮਨ੍ਤੇਤ੍ਵਾ ‘‘ਤ੍ਵਂ, ਆਵੁਸੋ, ਮਂ ਕਸ੍ਮਾ ਪਰਿਹਸਸਿ, ਯਦਿ ਇਸ੍ਸਰਨਿਮ੍ਮਿਤਵਾਦਂ ਸਾਰਤੋ ਪਚ੍ਚੇਸੀ’’ਤਿ ਵਤ੍ਵਾ ਆਹ –

੧੪੨.

‘‘ਇਸ੍ਸਰੋ ਸਬ੍ਬਲੋਕਸ੍ਸ, ਸਚੇ ਕਪ੍ਪੇਤਿ ਜੀਵਿਤਂ;

ਇਦ੍ਧਿਂ ਬ੍ਯਸਨਭਾਵਞ੍ਚ, ਕਮ੍ਮਂ ਕਲ੍ਯਾਣਪਾਪਕਂ;

ਨਿਦ੍ਦੇਸਕਾਰੀ ਪੁਰਿਸੋ, ਇਸ੍ਸਰੋ ਤੇਨ ਲਿਪ੍ਪਤਿ.

੧੪੩.

‘‘ਸੋ ਚੇ ਅਤ੍ਥੋ ਚ ਧਮ੍ਮੋ ਚ, ਕਲ੍ਯਾਣੋ ਨ ਚ ਪਾਪਕੋ;

ਭੋਤੋ ਚੇ ਵਚਨਂ ਸਚ੍ਚਂ, ਸੁਹਤੋ ਵਾਨਰੋ ਮਯਾ.

੧੪੪.

‘‘ਅਤ੍ਤਨੋ ਚੇ ਹਿ ਵਾਦਸ੍ਸ, ਅਪਰਾਧਂ ਵਿਜਾਨਿਯਾ;

ਨ ਮਂ ਤ੍ਵਂ ਗਰਹੇਯ੍ਯਾਸਿ, ਭੋਤੋ ਵਾਦੋ ਹਿ ਤਾਦਿਸੋ’’ਤਿ.

ਤਤ੍ਥ ਕਪ੍ਪੇਤਿ ਜੀਵਿਤਨ੍ਤਿ ਸਚੇ ਬ੍ਰਹ੍ਮਾ ਵਾ ਅਞ੍ਞੋ ਵਾ ਕੋਚਿ ਇਸ੍ਸਰੋ ‘‘ਤ੍ਵਂ ਕਸਿਯਾ ਜੀਵ, ਤ੍ਵਂ ਗੋਰਕ੍ਖੇਨਾ’’ਤਿ ਏਵਂ ਸਬ੍ਬਲੋਕਸ੍ਸ ਜੀਵਿਤਂ ਸਂਵਿਦਹਤਿ ਵਿਚਾਰੇਤਿ. ਇਦ੍ਧਿਂ ਬ੍ਯਸਨਭਾਵਞ੍ਚਾਤਿ ਇਸ੍ਸਰਿਯਾਦਿਭੇਦਾ ਇਦ੍ਧਿਯੋ ਚ ਞਾਤਿਵਿਨਾਸਾਦਿਕਂ ਬ੍ਯਸਨਭਾਵਞ੍ਚ ਸੇਸਞ੍ਚ ਕਲ੍ਯਾਣਪਾਪਕਂ ਕਮ੍ਮਂ ਸਬ੍ਬਂ ਯਦਿ ਇਸ੍ਸਰੋਵ ਕਪ੍ਪੇਤਿ ਕਰੋਤਿ. ਨਿਦ੍ਦੇਸਕਾਰੀਤਿ ਯਦਿ ਤਸ੍ਸ ਨਿਦ੍ਦੇਸਂ ਆਣਤ੍ਤਿਮੇਵ ਸੇਸੋ ਯੋ ਕੋਚਿ ਪੁਰਿਸੋ ਕਰੋਤਿ, ਏਵਂ ਸਨ੍ਤੇ ਯੋ ਕੋਚਿ ਪੁਰਿਸੋ ਪਾਪਂ ਕਰੋਤਿ, ਤਸ੍ਸ ਇਸ੍ਸਰੇਨ ਕਤਤ੍ਤਾ ਇਸ੍ਸਰੋਵ ਤੇਨ ਪਾਪੇਨ ਲਿਪ੍ਪਤਿ. ਸੇਸਂ ਪੁਰਿਮਨਯੇਨੇਵ ਵੇਦਿਤਬ੍ਬਂ. ਯਥਾ ਚ ਇਧ, ਏਵਂ ਸਬ੍ਬਤ੍ਥ.

ਇਤਿ ਸੋ ਅਮ੍ਬਤੋਵ ਮੁਗ੍ਗਰਂ ਗਹੇਤ੍ਵਾ ਅਮ੍ਬਂ ਪਾਤੇਨ੍ਤੋ ਵਿਯ ਇਸ੍ਸਰਕਰਣੇਨੇਵ ਇਸ੍ਸਰਕਤਵਾਦਂ ਭਿਨ੍ਦਿਤ੍ਵਾ ਪੁਬ੍ਬੇਕਤਵਾਦਿਂ ਆਮਨ੍ਤੇਤ੍ਵਾ ‘‘ਤ੍ਵਂ, ਆਵੁਸੋ, ਮਂ ਕਿਂ ਪਰਿਹਸਸਿ, ਯਦਿ ਪੁਬ੍ਬੇਕਤਵਾਦਂ ਸਚ੍ਚਂ ਮਞ੍ਞਸੀ’’ਤਿ ਵਤ੍ਵਾ ਆਹ –

੧੪੫.

‘‘ਸਚੇ ਪੁਬ੍ਬੇਕਤਹੇਤੁ, ਸੁਖਦੁਕ੍ਖਂ ਨਿਗਚ੍ਛਤਿ;

ਪੋਰਾਣਕਂ ਕਤਂ ਪਾਪਂ, ਤਮੇਸੋ ਮੁਚ੍ਚਤੇ ਇਣਂ;

ਪੋਰਾਣਕ ਇਣਮੋਕ੍ਖੋ, ਕ੍ਵਿਧ ਪਾਪੇਨ ਲਿਪ੍ਪਤਿ.

੧੪੬.

‘‘ਸੋ ਚੇ ਅਤ੍ਥੋ ਚ ਧਮ੍ਮੋ ਚ, ਕਲ੍ਯਾਣੋ ਨ ਚ ਪਾਪਕੋ;

ਭੋਤੋ ਚੇ ਵਚਨਂ ਸਚ੍ਚਂ, ਸੁਹਤੋ ਵਾਨਰੋ ਮਯਾ.

੧੪੭.

‘‘ਅਤ੍ਤਨੋ ਚੇ ਹਿ ਵਾਦਸ੍ਸ, ਅਪਰਾਧਂ ਵਿਜਾਨਿਯਾ;

ਨ ਮਂ ਤ੍ਵਂ ਗਰਹੇਯ੍ਯਾਸਿ, ਭੋਤੋ ਵਾਦੋ ਹਿ ਤਾਦਿਸੋ’’ਤਿ.

ਤਤ੍ਥ ਪੁਬ੍ਬੇਕਤਹੇਤੂਤਿ ਪੁਬ੍ਬਕਤਹੇਤੁ ਪੁਰਿਮਭਵੇ ਕਤਕਮ੍ਮਕਾਰਣੇਨੇਵ. ਤਮੇਸੋ ਮੁਚ੍ਚਤੇ ਇਣਨ੍ਤਿ ਯੋ ਵਧਬਨ੍ਧਾਦੀਹਿ ਦੁਕ੍ਖਂ ਪਾਪੁਣਾਤਿ, ਯਦਿ ਸੋ ਯਂ ਤੇਨ ਪੋਰਾਣਕਂ ਕਤਂ ਪਾਪਂ, ਤਂ ਇਦਾਨਿ ਇਣਂ ਮੁਚ੍ਚਤਿ, ਏਵਂ ਸਨ੍ਤੇ ਮਮਪਿ ਏਸ ਪੋਰਾਣਕਇਣਤੋ ਮੋਕ੍ਖੋ, ਅਨੇਨ ਹਿ ਮਕ੍ਕਟੇਨ ਪੁਬ੍ਬੇ ਪਰਿਬ੍ਬਾਜਕੇਨ ਹੁਤ੍ਵਾ ਅਹਂ ਮਕ੍ਕਟੋ ਸਮਾਨੋ ਮਾਰੇਤ੍ਵਾ ਖਾਦਿਤੋ ਭਵਿਸ੍ਸਾਮਿ, ਸ੍ਵਾਯਂ ਇਧ ਮਕ੍ਕਟਤ੍ਤਂ ਪਤ੍ਤੋ ਮਯਾ ਪਰਿਬ੍ਬਾਜਕਤ੍ਤਂ ਪਤ੍ਤੇਨ ਮਾਰੇਤ੍ਵਾ ਖਾਦਿਤੋ ਭਵਿਸ੍ਸਤਿ, ਕੋ ਇਧ ਪਾਪੇਨ ਲਿਪ੍ਪਤੀਤਿ.

ਇਤਿ ਸੋ ਤਸ੍ਸਪਿ ਵਾਦਂ ਭਿਨ੍ਦਿਤ੍ਵਾ ਉਚ੍ਛੇਦਵਾਦਿਂ ਅਭਿਮੁਖਂ ਕਤ੍ਵਾ ‘‘ਤ੍ਵਂ, ਆਵੁਸੋ, ‘ਇਤ੍ਥਿ ਦਿਨ੍ਨ’ਨ੍ਤਿਆਦੀਨਿ ਵਤ੍ਵਾ ‘ਇਧੇਵ ਸਤ੍ਤਾ ਉਚ੍ਛਿਜ੍ਜਨ੍ਤਿ, ਪਰਲੋਕਂ ਗਤਾ ਨਾਮ ਨਤ੍ਥੀ’ਤਿ ਮਞ੍ਞਮਾਨੋ ਕਸ੍ਮਾ ਮਂ ਪਰਿਹਸਸੀ’’ਤਿ ਸਨ੍ਤਜ੍ਜੇਤ੍ਵਾ ਆਹ –

੧੪੮.

‘‘ਚਤੁਨ੍ਨਂਯੇਵੁਪਾਦਾਯ, ਰੂਪਂ ਸਮ੍ਭੋਤਿ ਪਾਣਿਨਂ;

ਯਤੋ ਚ ਰੂਪਂ ਸਮ੍ਭੋਤਿ, ਤਤ੍ਥੇਵਾਨੁਪਗਚ੍ਛਤਿ;

ਇਧੇਵ ਜੀਵਤਿ ਜੀਵੋ, ਪੇਚ੍ਚ ਪੇਚ੍ਚ ਵਿਨਸ੍ਸਤਿ.

੧੪੯.

‘‘ਉਚ੍ਛਿਜ੍ਜਤਿ ਅਯਂ ਲੋਕੋ, ਯੇ ਬਾਲਾ ਯੇ ਚ ਪਣ੍ਡਿਤਾ;

ਉਚ੍ਛਿਜ੍ਜਮਾਨੇ ਲੋਕਮ੍ਹਿ, ਕ੍ਵਿਧ ਪਾਪੇਨ ਲਿਪ੍ਪਤਿ.

੧੫੦.

‘‘ਸੋ ਚੇ ਅਤ੍ਥੋ ਚ ਧਮ੍ਮੋ ਚ, ਕਲ੍ਯਾਣੋ ਨ ਚ ਪਾਪਕੋ;

ਭੋਤੋ ਚੇ ਵਚਨਂ ਸਚ੍ਚਂ, ਸੁਹਤੋ ਵਾਨਰੋ ਮਯਾ.

੧੫੧.

‘‘ਅਤ੍ਤਨੋ ਚੇ ਹਿ ਵਾਦਸ੍ਸ, ਅਪਰਾਧਂ ਵਿਜਾਨਿਯਾ;

ਨ ਮਂ ਤ੍ਵਂ ਗਰਹੇਯ੍ਯਾਸਿ, ਭੋਤੋ ਵਾਦੋ ਹਿ ਤਾਦਿਸੋ’’ਤਿ.

ਤਤ੍ਥ ਚਤੁਨ੍ਨਨ੍ਤਿ ਪਥਵੀਆਦੀਨਂ ਭੂਤਾਨਂ. ਰੂਪਨ੍ਤਿ ਰੂਪਕ੍ਖਨ੍ਧੋ. ਤਤ੍ਥੇਵਾਤਿ ਯਤੋ ਤਂ ਰੂਪਂ ਸਮ੍ਭੋਤਿ, ਨਿਰੁਜ੍ਝਨਕਾਲੇਪਿ ਤਤ੍ਥੇਵ ਅਨੁਪਗਚ੍ਛਤਿ. ਇਮਿਨਾ ਤਸ੍ਸ ‘‘ਚਾਤੁਮਹਾਭੂਤਿਕੋ ਅਯਂ ਪੁਰਿਸੋ ਯਦਾ ਕਾਲਂ ਕਰੋਤਿ, ਤਦਾ ਪਥਵੀ ਪਥਵੀਕਾਯਂ ਅਨੁਪੇਤਿ ਅਨੁਪਗਚ੍ਛਤਿ, ਆਪੋ… ਤੇਜੋ… ਵਾਯੋ ਵਾਯੋਕਾਯਂ ਅਨੁਪੇਤਿ ਅਨੁਪਗਚ੍ਛਤਿ, ਆਕਾਸਂ ਇਨ੍ਦ੍ਰਿਯਾਨਿ ਸਙ੍ਕਮਨ੍ਤਿ, ਆਸਨ੍ਧਿਪਞ੍ਚਮਾ ਪੁਰਿਸਾ ਮਤਂ ਆਦਾਯ ਗਚ੍ਛਨ੍ਤਿ, ਯਾਵ ਆਲ਼ਾਹਨਾ ਪਦਾਨਿ ਪਞ੍ਞਾਯਨ੍ਤਿ, ਕਾਪੋਤਕਾਨਿ ਅਟ੍ਠੀਨਿ ਭਵਨ੍ਤਿ, ਭਸ੍ਮਨ੍ਤਾ ਆਹੁਤਿਯੋ, ਦਤ੍ਤੁਪਞ੍ਞਤ੍ਤਂ ਯਦਿਦਂ ਦਾਨਂ, ਤੇਸਂ ਤੁਚ੍ਛਾ ਮੁਸਾ ਵਿਲਾਪੋ, ਯੇ ਕੇਚਿ ਅਤ੍ਥਿਕਵਾਦਂ ਵਦਨ੍ਤਿ, ਬਾਲੇ ਚ ਪਣ੍ਡਿਤੇ ਚ ਕਾਯਸ੍ਸ ਭੇਦਾ ਉਚ੍ਛਿਜ੍ਜਨ੍ਤਿ ਵਿਨਸ੍ਸਨ੍ਤਿ, ਨ ਹੋਨ੍ਤਿ ਪਰਂ ਮਰਣਾ’’ਤਿ ਇਮਂ ਦਿਟ੍ਠਿਂ ਪਤਿਟ੍ਠਾਪੇਸਿ. ਇਧੇਵਾਤਿ ਇਮਸ੍ਮਿਂਯੇਵ ਲੋਕੇ ਜੀਵੋ ਜੀਵਤਿ. ਪੇਚ੍ਚ ਪੇਚ੍ਚ ਵਿਨਸ੍ਸਤੀਤਿ ਪਰਲੋਕੇ ਨਿਬ੍ਬਤ੍ਤੋ ਸਤ੍ਤੋ ਗਤਿਵਸੇਨ ਇਧ ਅਨਾਗਨ੍ਤ੍ਵਾ ਤਤ੍ਥੇਵ ਪਰਲੋਕੇ ਵਿਨਸ੍ਸਤਿ ਉਚ੍ਛਿਜ੍ਜਤਿ. ਏਵਂ ਉਚ੍ਛਿਜ੍ਜਮਾਨੇ ਲੋਕਸ੍ਮਿਂ ਕੋ ਇਧ ਪਾਪੇਨ ਲਿਪ੍ਪਤੀਤਿ.

ਇਤਿ ਸੋ ਤਸ੍ਸਪਿ ਵਾਦਂ ਭਿਨ੍ਦਿਤ੍ਵਾ ਖਤ੍ਤਵਿਜ੍ਜਵਾਦਿਂ ਆਮਨ੍ਤੇਤ੍ਵਾ ‘‘ਤ੍ਵਂ, ਆਵੁਸੋ, ‘ਮਾਤਾਪਿਤਰੋਪਿ ਮਾਰੇਤ੍ਵਾ ਅਤ੍ਤਨੋ ਅਤ੍ਥੋ ਕਾਤਬ੍ਬੋ’ਤਿ ਇਮਂ ਲਦ੍ਧਿਂ ਉਕ੍ਖਿਪਿਤ੍ਵਾ ਵਿਚਰਨ੍ਤੋ ਕਸ੍ਮਾ ਮਂ ਪਰਿਹਸਸੀ’’ਤਿ ਵਤ੍ਵਾ ਆਹ –

੧੫੨.

‘‘ਆਹੁ ਖਤ੍ਤਵਿਦਾ ਲੋਕੇ, ਬਾਲਾ ਪਣ੍ਡਿਤਮਾਨਿਨੋ;

ਮਾਤਰਂ ਪਿਤਰਂ ਹਞ੍ਞੇ, ਅਥੋ ਜੇਟ੍ਠਮ੍ਪਿ ਭਾਤਰਂ;

ਹਨੇਯ੍ਯ ਪੁਤ੍ਤਦਾਰੇ ਚ, ਅਤ੍ਥੋ ਚੇ ਤਾਦਿਸੋ ਸਿਯਾ’’ਤਿ.

ਤਤ੍ਥ ਖਤ੍ਤਵਿਦਾਤਿ ਖਤ੍ਤਵਿਜ੍ਜਾ, ਅਯਮੇਵ ਵਾ ਪਾਠੋ. ਖਤ੍ਤਵਿਜ੍ਜਾਚਰਿਯਾਨਂ ਏਤਂ ਨਾਮਂ. ਬਾਲਾ ਪਣ੍ਡਿਤਮਾਨਿਨੋਤਿ ਬਾਲਾ ਸਮਾਨਾਪਿ ‘‘ਪਣ੍ਡਿਤਾ ਮਯਂ ਅਤ੍ਤਨੋ ਪਣ੍ਡਿਤਭਾਵਂ ਪਕਾਸੇਮਾ’’ਤਿ ਮਞ੍ਞਮਾਨਾ ਪਣ੍ਡਿਤਮਾਨਿਨੋ ਹੁਤ੍ਵਾ ਏਵਮਾਹੁ. ਅਤ੍ਥੋ ਚੇਤਿ ਸਚੇ ਅਤ੍ਤਨੋ ਯਥਾਰੂਪੋ ਕੋਚਿ ਅਤ੍ਥੋ ਸਿਯਾ, ਨ ਕਿਞ੍ਚਿ ਪਰਿਵਜ੍ਜੇਯ੍ਯ, ਸਬ੍ਬਂ ਹਨੇਯ੍ਯੇਵਾਤਿ ਵਦਨ੍ਤਿ, ਤ੍ਵਮ੍ਪਿ ਨੇਸਂ ਅਞ੍ਞਤਰੋਤਿ.

ਏਵਂ ਤਸ੍ਸ ਲਦ੍ਧਿਂ ਪਤਿਟ੍ਠਪੇਤ੍ਵਾ ਅਤ੍ਤਨੋ ਲਦ੍ਧਿਂ ਪਕਾਸੇਨ੍ਤੋ ਆਹ –

੧੫੩.

‘‘ਯਸ੍ਸ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;

ਨ ਤਸ੍ਸ ਸਾਖਂ ਭਞ੍ਜੇਯ੍ਯ, ਮਿਤ੍ਤਦੁਬ੍ਭੋ ਹਿ ਪਾਪਕੋ.

੧੫੪.

‘‘ਅਥ ਅਤ੍ਥੇ ਸਮੁਪ੍ਪਨ੍ਨੇ, ਸਮੂਲਮਪਿ ਅਬ੍ਬਹੇ;

ਅਤ੍ਥੋ ਮੇ ਸਮ੍ਬਲੇਨਾਪਿ, ਸੁਹਤੋ ਵਾਨਰੋ ਮਯਾ.

੧੫੫.

‘‘ਸੋ ਚੇ ਅਤ੍ਥੋ ਚ ਧਮ੍ਮੋ ਚ, ਕਲ੍ਯਾਣੋ ਨ ਚ ਪਾਪਕੋ;

ਭੋਤੋ ਚੇ ਵਚਨਂ ਸਚ੍ਚਂ, ਸੁਹਤੋ ਵਾਨਰੋ ਮਯਾ.

੧੫੬.

‘‘ਅਤ੍ਤਨੋ ਚੇ ਹਿ ਵਾਦਸ੍ਸ, ਅਪਰਾਧਂ ਵਿਜਾਨਿਯਾ;

ਨ ਮਂ ਤ੍ਵਂ ਗਰਹੇਯ੍ਯਾਸਿ, ਭੋਤੋ ਵਾਦੋ ਹਿ ਤਾਦਿਸੋ’’ਤਿ.

ਤਤ੍ਥ ਅਮ੍ਭੋ ਖਤ੍ਤਵਿਦ ਅਮ੍ਹਾਕਂ ਪਨ ਆਚਰਿਯਾ ਏਵਂ ਵਣ੍ਣਯਨ੍ਤਿ. ਅਤ੍ਤਨਾ ਪਰਿਭੁਤ੍ਤਚ੍ਛਾਯਸ੍ਸ ਰੁਕ੍ਖਸ੍ਸਪਿ ਸਾਖਂ ਵਾ ਪਣ੍ਣਂ ਵਾ ਨ ਭਞ੍ਜੇਯ੍ਯ. ਕਿਂਕਾਰਣਾ? ਮਿਤ੍ਤਦੁਬ੍ਭੋ ਹਿ ਪਾਪਕੋ. ਤ੍ਵਂ ਪਨ ਏਵਂ ਵਦੇਸਿ – ‘‘ਅਥ ਅਤ੍ਥੇ ਸਮੁਪ੍ਪਨ੍ਨੇ ਸਮੂਲਮਪਿ ਅਬ੍ਬਹੇ’’ਤਿ, ਮਮ ਚ ਪਾਥੇਯ੍ਯੇਨ ਅਤ੍ਥੋ ਅਹੋਸਿ, ਤਸ੍ਮਾ ਸਚੇਪੇਸ ਮਯਾ ਹਤੋ, ਤਥਾਪਿ ਅਤ੍ਥੋ ਮੇ ਸਮ੍ਬਲੇਨਾਪਿ, ਸੁਹਤੋ ਵਾਨਰੋ ਮਯਾ.

ਏਵਂ ਸੋ ਤਸ੍ਸਪਿ ਵਾਦਂ ਭਿਨ੍ਦਿਤ੍ਵਾ ਪਞ੍ਚਸੁ ਤੇਸੁ ਅਪਟਿਭਾਨੇਸੁ ਨਿਸਿਨ੍ਨੇਸੁ ਰਾਜਾਨਂ ਆਮਨ੍ਤੇਤ੍ਵਾ, ‘‘ਮਹਾਰਾਜ, ਤ੍ਵਂ ਇਮੇ ਪਞ੍ਚ ਰਟ੍ਠਵਿਲੋਪਕੇ ਮਹਾਚੋਰੇ ਗਹੇਤ੍ਵਾ ਵਿਚਰਸਿ, ਅਹੋ ਬਾਲੋ, ਏਵਰੂਪਾਨਞ੍ਹਿ ਸਂਸਗ੍ਗੇਨ ਪੁਰਿਸੋ ਦਿਟ੍ਠਧਮ੍ਮਿਕਮ੍ਪਿ ਸਮ੍ਪਰਾਯਿਕਮ੍ਪਿ ਮਹਾਦੁਕ੍ਖਂ ਪਾਪੁਣੇਯ੍ਯਾ’’ਤਿ ਵਤ੍ਵਾ ਰਞ੍ਞੋ ਧਮ੍ਮਂ ਦੇਸੇਨ੍ਤੋ ਆਹ –

੧੫੭.

‘‘ਅਹੇਤੁਵਾਦੋ ਪੁਰਿਸੋ, ਯੋ ਚ ਇਸ੍ਸਰਕੁਤ੍ਤਿਕੋ;

ਪੁਬ੍ਬੇਕਤੀ ਚ ਉਚ੍ਛੇਦੀ, ਯੋ ਚ ਖਤ੍ਤਵਿਦੋ ਨਰੋ.

੧੫੮.

‘‘ਏਤੇ ਅਸਪ੍ਪੁਰਿਸਾ ਲੋਕੇ, ਬਾਲਾ ਪਣ੍ਡਿਤਮਾਨਿਨੋ;

ਕਰੇਯ੍ਯ ਤਾਦਿਸੋ ਪਾਪਂ, ਅਥੋ ਅਞ੍ਞਮ੍ਪਿ ਕਾਰਯੇ;

ਅਸਪ੍ਪੁਰਿਸਸਂਸਗ੍ਗੋ, ਦੁਕ੍ਖਨ੍ਤੋ ਕਟੁਕੁਦ੍ਰਯੋ’’ਤਿ.

ਤਤ੍ਥ ਤਾਦਿਸੋਤਿ, ਮਹਾਰਾਜ, ਯਾਦਿਸਾ ਏਤੇ ਪਞ੍ਚ ਦਿਟ੍ਠਿਗਤਿਕਾ, ਤਾਦਿਸੋ ਪੁਰਿਸੋ ਸਯਮ੍ਪਿ ਪਾਪਂ ਕਰੇਯ੍ਯ. ਯ੍ਵਾਸ੍ਸ ਵਚਨਂ ਸੁਣਾਤਿ, ਤਂ ਅਞ੍ਞਮ੍ਪਿ ਕਾਰਯੇ. ਦੁਕ੍ਖਨ੍ਤੋਤਿ ਏਵਰੂਪੇਹਿ ਅਸਪ੍ਪੁਰਿਸੇਹਿ ਸਦ੍ਧਿਂ ਸਂਸਗ੍ਗੋ ਇਧਲੋਕੇਪਿ ਪਰਲੋਕੇਪਿ ਦੁਕ੍ਖਨ੍ਤੋ ਕਟੁਕੁਦ੍ਰਯੋਵ ਹੋਤਿ. ਇਮਸ੍ਸ ਪਨਤ੍ਥਸ੍ਸ ਪਕਾਸਨਤ੍ਥਂ ‘‘ਯਾਨਿ ਕਾਨਿਚਿ, ਭਿਕ੍ਖਵੇ, ਭਯਾਨਿ ਉਪ੍ਪਜ੍ਜਨ੍ਤਿ, ਸਬ੍ਬਾਨਿ ਤਾਨਿ ਬਾਲਤੋ’’ਤਿ ਸੁਤ੍ਤਂ (ਅ. ਨਿ. ੩.੧) ਆਹਰਿਤਬ੍ਬਂ. ਗੋਧਜਾਤਕ- (ਜਾ. ੧.੧.੧੩੮) ਸਞ੍ਜੀਵਜਾਤਕ- (ਜਾ. ੧.੧.੧੫੦) ਅਕਿਤ੍ਤਿਜਾਤਕਾਦੀਹਿ (ਜਾ. ੧.੧੩.੮੩ ਆਦਯੋ) ਚਾਯਮਤ੍ਥੋ ਦੀਪੇਤਬ੍ਬੋ.

ਇਦਾਨੀ ਓਪਮ੍ਮਦਸ੍ਸਨਵਸੇਨ ਧਮ੍ਮਦੇਸਨਂ ਵਡ੍ਢੇਨ੍ਤੋ ਆਹ –

੧੫੯.

‘‘ਉਰਬ੍ਭਰੂਪੇਨ ਵਕਸ੍ਸੁ ਪੁਬ੍ਬੇ, ਅਸਂਕਿਤੋ ਅਜਯੂਥਂ ਉਪੇਤਿ;

ਹਨ੍ਤ੍ਵਾ ਉਰਣਿਂ ਅਜਿਕਂ ਅਜਞ੍ਚ, ਉਤ੍ਰਾਸਯਿਤ੍ਵਾ ਯੇਨਕਾਮਂ ਪਲੇਤਿ.

੧੬੦.

‘‘ਤਥਾਵਿਧੇਕੇ ਸਮਣਬ੍ਰਾਹ੍ਮਣਾਸੇ, ਛਦਨਂ ਕਤ੍ਵਾ ਵਞ੍ਚਯਨ੍ਤਿ ਮਨੁਸ੍ਸੇ;

ਅਨਾਸਕਾ ਥਣ੍ਡਿਲਸੇਯ੍ਯਕਾ ਚ, ਰਜੋਜਲ੍ਲਂ ਉਕ੍ਕੁਟਿਕਪ੍ਪਧਾਨਂ;

ਪਰਿਯਾਯਭਤ੍ਤਞ੍ਚ ਅਪਾਨਕਤ੍ਤਾ, ਪਾਪਾਚਾਰਾ ਅਰਹਨ੍ਤੋ ਵਦਾਨਾ.

੧੬੧.

‘‘ਏਤੇ ਅਸਪ੍ਪੁਰਿਸਾ ਲੋਕੇ, ਬਾਲਾ ਪਣ੍ਡਿਤਮਾਨਿਨੋ;

ਕਰੇਯ੍ਯ ਤਾਦਿਸੋ ਪਾਪਂ, ਅਥੋ ਅਞ੍ਞਮ੍ਪਿ ਕਾਰਯੇ;

ਅਸਪ੍ਪੁਰਿਸਸਂਸਗ੍ਗੋ, ਦੁਕ੍ਖਨ੍ਤੋ ਕਟੁਕੁਦ੍ਰਯੋ.

੧੬੨.

‘‘ਯਮਾਹੁ ਨਤ੍ਥਿ ਵੀਰਿਯਨ੍ਤਿ, ਅਹੇਤੁਞ੍ਚ ਪਵਦਨ੍ਤਿ ਯੇ;

ਪਰਕਾਰਂ ਅਤ੍ਤਕਾਰਞ੍ਚ, ਯੇ ਤੁਚ੍ਛਂ ਸਮਵਣ੍ਣਯੁਂ.

੧੬੩.

‘‘ਏਤੇ ਅਸਪ੍ਪੁਰਿਸਾ ਲੋਕੇ, ਬਾਲਾ ਪਣ੍ਡਿਤਮਾਨਿਨੋ;

ਕਰੇਯ੍ਯ ਤਾਦਿਸੋ ਪਾਪਂ, ਅਥੋ ਅਞ੍ਞਮ੍ਪਿ ਕਾਰਯੇ;

ਅਸਪ੍ਪੁਰਿਸਸਂਸਗ੍ਗੋ, ਦੁਕ੍ਖਨ੍ਤੋ ਕਟੁਕੁਦ੍ਰਯੋ.

੧੬੪.

‘‘ਸਚੇ ਹਿ ਵੀਰਿਯਂ ਨਾਸ੍ਸ, ਕਮ੍ਮਂ ਕਲ੍ਯਾਣਪਾਪਕਂ;

ਨ ਭਰੇ ਵਡ੍ਢਕਿਂ ਰਾਜਾ, ਨਪਿ ਯਨ੍ਤਾਨਿ ਕਾਰਯੇ.

੧੬੫.

‘‘ਯਸ੍ਮਾ ਚ ਵੀਰਿਯਂ ਅਤ੍ਥਿ, ਕਮ੍ਮਂ ਕਲ੍ਯਾਣਪਾਪਕਂ;

ਤਸ੍ਮਾ ਯਨ੍ਤਾਨਿ ਕਾਰੇਤਿ, ਰਾਜਾ ਭਰਤਿ ਵਡ੍ਢਕਿਂ.

੧੬੬.

‘‘ਯਦਿ ਵਸ੍ਸਸਤਂ ਦੇਵੋ, ਨ ਵਸ੍ਸੇ ਨ ਹਿਮਂ ਪਤੇ;

ਉਚ੍ਛਿਜ੍ਜੇਯ੍ਯ ਅਯਂ ਲੋਕੋ, ਵਿਨਸ੍ਸੇਯ੍ਯ ਅਯਂ ਪਜਾ.

੧੬੭.

‘‘ਯਸ੍ਮਾ ਚ ਵਸ੍ਸਤੀ ਦੇਵੋ, ਹਿਮਞ੍ਚਾਨੁਫੁਸਾਯਤਿ;

ਤਸ੍ਮਾ ਸਸ੍ਸਾਨਿ ਪਚ੍ਚਨ੍ਤਿ, ਰਟ੍ਠਞ੍ਚ ਪਾਲਿਤੇ ਚਿਰਂ.

੧੬੮.

‘‘ਗਵਂ ਚੇ ਤਰਮਾਨਾਨਂ, ਜਿਮ੍ਹਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਤਾ ਜਿਮ੍ਹਂ ਗਚ੍ਛਨ੍ਤਿ, ਨੇਤ੍ਤੇ ਜਿਮ੍ਹਂ ਗਤੇ ਸਤਿ.

੧੬੯.

‘‘ਏਵਮੇਵ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਚੇ ਅਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਦੁਖਂ ਸੇਤਿ, ਰਾਜਾ ਚੇ ਹੋਤਿ ਅਧਮ੍ਮਿਕੋ.

੧੭੦.

‘‘ਗਵਂ ਚੇ ਤਰਮਾਨਾਨਂ, ਉਜੁਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਗਾਵੀ ਉਜੁਂ ਯਨ੍ਤਿ, ਨੇਤ੍ਤੇ ਉਜੁਂ ਗਤੇ ਸਤਿ.

੧੭੧.

‘‘ਏਵਮੇਵ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਸਚੇ ਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਸੁਖਂ ਸੇਤਿ, ਰਾਜਾ ਚੇ ਹੋਤਿ ਧਮ੍ਮਿਕੋ.

੧੭੨.

‘‘ਮਹਾਰੁਕ੍ਖਸ੍ਸ ਫਲਿਨੋ, ਆਮਂ ਛਿਨ੍ਦਤਿ ਯੋ ਫਲਂ;

ਰਸਞ੍ਚਸ੍ਸ ਨ ਜਾਨਾਤਿ, ਬੀਜਞ੍ਚਸ੍ਸ ਵਿਨਸ੍ਸਤਿ.

੧੭੩.

‘‘ਮਹਾਰੁਕ੍ਖੂਪਮਂ ਰਟ੍ਠਂ, ਅਧਮ੍ਮੇਨ ਪਸਾਸਤਿ;

ਰਸਞ੍ਚਸ੍ਸ ਨ ਜਾਨਾਤਿ, ਰਟ੍ਠਞ੍ਚਸ੍ਸ ਵਿਨਸ੍ਸਤਿ.

੧੭੪.

‘‘ਮਹਾਰੁਕ੍ਖਸ੍ਸ ਫਲਿਨੋ, ਪਕ੍ਕਂ ਛਿਨ੍ਦਤਿ ਯੋ ਫਲਂ;

ਰਸਞ੍ਚਸ੍ਸ ਵਿਜਾਨਾਤਿ, ਬੀਜਞ੍ਚਸ੍ਸ ਨ ਨਸ੍ਸਤਿ.

੧੭੫.

‘‘ਮਹਾਰੁਕ੍ਖੂਪਮਂ ਰਟ੍ਠਂ, ਧਮ੍ਮੇਨ ਯੋ ਪਸਾਸਤਿ;

ਰਸਞ੍ਚਸ੍ਸ ਵਿਜਾਨਾਤਿ, ਰਟ੍ਠਞ੍ਜਸ੍ਸ ਨ ਨਸ੍ਸਤਿ.

੧੭੬.

‘‘ਯੋ ਚ ਰਾਜਾ ਜਨਪਦਂ, ਅਧਮ੍ਮੇਨ ਪਸਾਸਤਿ;

ਸਬ੍ਬੋਸਧੀਹਿ ਸੋ ਰਾਜਾ, ਵਿਰੁਦ੍ਧੋ ਹੋਤਿ ਖਤ੍ਤਿਯੋ.

੧੭੭.

‘‘ਤਥੇਵ ਨੇਗਮੇ ਹਿਂਸਂ, ਯੇ ਯੁਤ੍ਤਾ ਕਯਵਿਕ੍ਕਯੇ;

ਓਜਦਾਨਬਲੀਕਾਰੇ, ਸ ਕੋਸੇਨ ਵਿਰੁਜ੍ਝਤਿ.

੧੭੮.

‘‘ਪਹਾਰਵਰਖੇਤ੍ਤਞ੍ਞੂ, ਸਙ੍ਗਾਮੇ ਕਤਨਿਸ੍ਸਮੇ;

ਉਸ੍ਸਿਤੇ ਹਿਂਸਯਂ ਰਾਜਾ, ਸ ਬਲੇਨ ਵਿਰੁਜ੍ਝਤਿ.

੧੭੯.

‘‘ਤਥੇਵ ਇਸਯੋ ਹਿਂਸਂ, ਸਞ੍ਞਤੇ ਬ੍ਰਹ੍ਮਚਾਰਿਨੋ;

ਅਧਮ੍ਮਚਾਰੀ ਖਤ੍ਤਿਯੋ, ਸੋ ਸਗ੍ਗੇਨ ਵਿਰੁਜ੍ਝਤਿ.

੧੮੦.

‘‘ਯੋ ਚ ਰਾਜਾ ਅਧਮ੍ਮਟ੍ਠੋ, ਭਰਿਯਂ ਹਨ੍ਤਿ ਅਦੂਸਿਕਂ;

ਲੁਦ੍ਧਂ ਪਸਵਤੇ ਠਾਨਂ, ਪੁਤ੍ਤੇਹਿ ਚ ਵਿਰੁਜ੍ਝਤਿ.

੧੮੧.

‘‘ਧਮ੍ਮਂ ਚਰੇ ਜਾਨਪਦੇ, ਨੇਗਮੇਸੁ ਬਲੇਸੁ ਚ;

ਇਸਯੋ ਚ ਨ ਹਿਂਸੇਯ੍ਯ, ਪੁਤ੍ਤਦਾਰੇ ਸਮਂ ਚਰੇ.

੧੮੨.

‘‘ਸ ਤਾਦਿਸੋ ਭੂਮਿਪਤਿ, ਰਟ੍ਠਪਾਲੋ ਅਕੋਧਨੋ;

ਸਪਤ੍ਤੇ ਸਮ੍ਪਕਮ੍ਪੇਤਿ, ਇਨ੍ਦੋਵ ਅਸੁਰਾਧਿਪੋ’’ਤਿ.

ਤਤ੍ਥ ਵਕਸ੍ਸੂਤਿ ਵਕੋ ਅਸ੍ਸੁ, ਅਸ੍ਸੂਤਿ ਨਿਪਾਤਮਤ੍ਤਂ. ਇਦਂ ਵੁਤ੍ਤਂ ਹੋਤਿ – ਮਹਾਰਾਜ, ਪੁਬ੍ਬੇ ਏਕੋ ਉਰਬ੍ਭਰੂਪੋ ਵਕੋ ਅਹੋਸਿ, ਤਸ੍ਸ ਨਙ੍ਗੁਟ੍ਠਮਤ੍ਤਮੇਵ ਦੀਘਂ, ਤਂ ਪਨ ਸੋ ਅਨ੍ਤਰਸਤ੍ਤਿਮ੍ਹਿ ਪਕ੍ਖਿਪਿਤ੍ਵਾ ਉਰਬ੍ਭਰੂਪੇਨ ਅਸਂਕਿਤੋ ਅਜਯੂਥਂ ਉਪੇਤਿ. ਤਤ੍ਥ ਉਰਣਿਕਞ੍ਚ ਅਜਿਕਞ੍ਚ ਅਜਞ੍ਚ ਹਨ੍ਤ੍ਵਾ ਯੇਨਕਾਮਂ ਪਲੇਤਿ. ਤਥਾਵਿਧੇਕੇਤਿ ਤਥਾਵਿਧਾ ਏਕੇ ਸਮਣਬ੍ਰਾਹ੍ਮਣਾ ਪਬ੍ਬਜ੍ਜਾਲਿਙ੍ਗੇਨ ਛਦਨਂ ਕਤ੍ਵਾ ਅਤ੍ਤਾਨਂ ਛਾਦੇਤ੍ਵਾ ਮਧੁਰਵਚਨਾਦੀਹਿ ਹਿਤਕਾਮਾ ਵਿਯ ਹੁਤ੍ਵਾ ਲੋਕਂ ਵਞ੍ਚੇਨ੍ਤਿ. ‘‘ਅਨਾਸਕਾ’’ਤਿਆਦਿ ਤੇਸਂ ਛਦਨਸ੍ਸ ਦਸ੍ਸਨਤ੍ਥਂ ਵੁਤ੍ਤਂ. ਏਕਚ੍ਚੇ ਹਿ ‘‘ਮਯਂ ਅਨਾਸਕਾ ਨ ਕਿਞ੍ਚਿ ਆਹਾਰੇਮਾ’’ਤਿ ਮਨੁਸ੍ਸੇ ਵਞ੍ਚੇਨ੍ਤਿ, ਅਪਰੇ ‘‘ਮਯਂ ਥਣ੍ਡਿਲਸੇਯ੍ਯਕਾ’’ਤਿ. ਅਞ੍ਞੇਸਂ ਪਨ ਰਜੋਜਲ੍ਲਂ ਛਦਨਂ, ਅਞ੍ਞੇਸਂ ਉਕ੍ਕੁਟਿਕਪ੍ਪਧਾਨਂ, ਤੇ ਗਚ੍ਛਨ੍ਤਾਪਿ ਉਪ੍ਪਤਿਤ੍ਵਾ ਉਕ੍ਕੁਟਿਕਾਵ ਗਚ੍ਛਨ੍ਤਿ. ਅਞ੍ਞੇਸਂ ਸਤ੍ਤਾਹਦਸਾਹਾਦਿਵਾਰਭੋਜਨਸਙ੍ਖਾਤਂ ਪਰਿਯਾਯਭਤ੍ਤਛਦਨਂ, ਅਪਰੇ ਅਪਾਨਕਤ੍ਤਾ ਹੋਨ੍ਤਿ, ‘‘ਮਯਂ ਪਾਨੀਯਂ ਨ ਪਿਵਾਮਾ’’ਤਿ ਵਦਨ੍ਤਿ. ਅਰਹਨ੍ਤੋ ਵਦਾਨਾਤਿ ਪਾਪਾਚਾਰਾ ਹੁਤ੍ਵਾਪਿ ‘‘ਮਯਂ ਅਰਹਨ੍ਤੋ’’ਤਿ ਵਦਨ੍ਤਾ ਵਿਚਰਨ੍ਤਿ. ਏਤੇਤਿ, ਮਹਾਰਾਜ, ਇਮੇ ਵਾ ਪਞ੍ਚ ਜਨਾ ਹੋਨ੍ਤੁ ਅਞ੍ਞੇ ਵਾ, ਯਾਵਨ੍ਤੋ ਦਿਟ੍ਠਿਗਤਿਕਾ ਨਾਮ, ਸਬ੍ਬੇਪਿ ਏਤੇ ਅਸਪ੍ਪੁਰਿਸਾ. ਯਮਾਹੂਤਿ ਯੇ ਆਹੁ, ਯੇ ਵਦਨ੍ਤਿ.

ਸਚੇ ਹਿ ਵੀਰਿਯਂ ਨਾਸ੍ਸਾਤਿ, ਮਹਾਰਾਜ, ਸਚੇ ਞਾਣਸਮ੍ਪਯੁਤ੍ਤਂ ਕਾਯਿਕਚੇਤਸਿਕਵੀਰਿਯਂ ਨ ਭਵੇਯ੍ਯ. ਕਮ੍ਮਨ੍ਤਿ ਕਲ੍ਯਾਣਪਾਪਕਂ ਕਮ੍ਮਮ੍ਪਿ ਯਦਿ ਨ ਭਵੇਯ੍ਯ. ਨ ਭਰੇਤਿ ਏਵਂ ਸਨ੍ਤੇ ਵਡ੍ਢਕਿਂ ਵਾ ਅਞ੍ਞੇ ਵਾ ਕਾਰਕੇ ਰਾਜਾ ਨ ਪੋਸੇਯ੍ਯ, ਨਪਿ ਯਨ੍ਤਾਨੀਤਿ ਨਪਿ ਤੇਹਿ ਸਤ੍ਤਭੂਮਿਕਪਾਸਾਦਾਦੀਨਿ ਯਨ੍ਤਾਨਿ ਕਾਰੇਯ੍ਯ. ਕਿਂਕਾਰਣਾ? ਵੀਰਿਯਸ੍ਸ ਚੇਵ ਕਮ੍ਮਸ੍ਸ ਚ ਅਭਾਵਾ. ਉਚ੍ਛਿਜ੍ਜੇਯ੍ਯਾਤਿ, ਮਹਾਰਾਜ, ਯਦਿ ਏਤ੍ਤਕਂ ਕਾਲਂ ਨੇਵ ਦੇਵੋ ਵਸ੍ਸੇਯ੍ਯ, ਨ ਹਿਮਂ ਪਤੇਯ੍ਯ, ਅਥ ਕਪ੍ਪੁਟ੍ਠਾਨਕਾਲੋ ਵਿਯ ਅਯਂ ਲੋਕੋ ਉਚ੍ਛਿਜ੍ਜੇਯ੍ਯ. ਉਚ੍ਛੇਦਵਾਦਿਨਾ ਕਥਿਤਨਿਯਾਮੇਨ ਪਨ ਉਚ੍ਛੇਦੋ ਨਾਮ ਨਤ੍ਥਿ. ਪਾਲਿਤੇਤਿ ਪਾਲਯਤਿ.

‘‘ਗਵਂ ਚੇ’’ਤਿ ਚਤਸ੍ਸੋ ਗਾਥਾ ਰਞ੍ਞੋ ਧਮ੍ਮਦੇਸਨਾਯਮੇਵ ਵੁਤ੍ਤਾ, ਤਥਾ ‘‘ਮਹਾਰੁਕ੍ਖਸ੍ਸਾ’’ਤਿਆਦਿਕਾ. ਤਤ੍ਥ ਮਹਾਰੁਕ੍ਖਸ੍ਸਾਤਿ ਮਧੁਰਅਮ੍ਬਰੁਕ੍ਖਸ੍ਸ. ਅਧਮ੍ਮੇਨਾਤਿ ਅਗਤਿਗਮਨੇਨ. ਰਸਞ੍ਚਸ੍ਸ ਨ ਜਾਨਾਤੀਤਿ ਅਧਮ੍ਮਿਕੋ ਰਾਜਾ ਰਟ੍ਠਸ੍ਸ ਰਸਂ ਓਜਂ ਨ ਜਾਨਾਤਿ, ਆਯਸਮ੍ਪਤ੍ਤਿਂ ਨ ਲਭਤਿ. ਵਿਨਸ੍ਸਤੀਤਿ ਸੁਞ੍ਞਂ ਹੋਤਿ, ਮਨੁਸ੍ਸਾ ਗਾਮਨਿਗਮੇ ਛਡ੍ਡੇਤ੍ਵਾ ਪਚ੍ਚਨ੍ਤਂ ਪਬ੍ਬਤਵਿਸਮਂ ਭਜਨ੍ਤਿ, ਸਬ੍ਬਾਨਿ ਆਯਮੁਖਾਨਿ ਪਚ੍ਛਿਜ੍ਜਨ੍ਤਿ. ਸਬ੍ਬੋਸਧੀਹੀਤਿ ਸਬ੍ਬੇਹਿ ਮੂਲਤਚਪਤ੍ਤਪੁਪ੍ਫਫਲਾਦੀਹਿ ਚੇਵ ਸਪ੍ਪਿਨਵਨੀਤਾਦੀਹਿ ਚ ਓਸਧੇਹਿ ਵਿਰੁਜ੍ਝਤਿ, ਤਾਨਿ ਨ ਸਮ੍ਪਜ੍ਜਨ੍ਤਿ. ਅਧਮ੍ਮਿਕਰਞ੍ਞੋ ਹਿ ਪਥਵੀ ਨਿਰੋਜਾ ਹੋਤਿ, ਤਸ੍ਸਾ ਨਿਰੋਜਤਾਯ ਓਸਧਾਨਂ ਓਜਾ ਨ ਹੋਤਿ, ਤਾਨਿ ਰੋਗਞ੍ਚ ਵੂਪਸਮੇਤੁਂ ਨ ਸਕ੍ਕੋਨ੍ਤਿ. ਇਤਿ ਸੋ ਤੇਹਿ ਵਿਰੁਦ੍ਧੋ ਨਾਮ ਹੋਤਿ.

ਨੇਗਮੇਤਿ ਨਿਗਮਵਾਸਿਕੁਟੁਮ੍ਬਿਕੇ. ਹਿਂਸਨ੍ਤਿ ਹਿਂਸਨ੍ਤੋ ਪੀਲ਼ੇਨ੍ਤੋ. ਯੇ ਯੁਤ੍ਤਾਤਿ ਯੇ ਕਯਵਿਕ੍ਕਯੇ ਯੁਤ੍ਤਾ ਆਯਾਨਂ ਮੁਖਾ ਥਲਜਲਪਥਵਾਣਿਜਾ, ਤੇ ਚ ਹਿਂਸਨ੍ਤੋ. ਓਜਦਾਨਬਲੀਕਾਰੇਤਿ ਤਤੋ ਤਤੋ ਭਣ੍ਡਾਹਰਣਸੁਙ੍ਕਦਾਨਵਸੇਨ ਓਜਦਾਨਞ੍ਚੇਵ ਛਭਾਗਦਸਭਾਗਾਦਿਭੇਦਂ ਬਲਿਞ੍ਚ ਕਰੋਨ੍ਤੇ. ਸ ਕੋਸੇਨਾਤਿ ਸੋ ਏਤੇ ਹਿਂਸਨ੍ਤੋ ਅਧਮ੍ਮਿਕਰਾਜਾ ਧਨਧਞ੍ਞੇਹਿ ਪਰਿਹਾਯਨ੍ਤੋ ਕੋਸੇਨ ਵਿਰੁਜ੍ਝਤਿ ਨਾਮ. ਪਹਾਰਵਰਖੇਤ੍ਤਞ੍ਞੂਤਿ ‘‘ਇਮਸ੍ਮਿਂ ਠਾਨੇ ਵਿਜ੍ਝਿਤੁਂ ਵਟ੍ਟਤੀ’’ਤਿ ਏਵਂ ਪਹਾਰਵਰਾਨਂ ਖੇਤ੍ਤਂ ਜਾਨਨ੍ਤੇ ਧਨੁਗ੍ਗਹੇ. ਸਙ੍ਗਾਮੇ ਕਤਨਿਸ੍ਸਮੇਤਿ ਯੁਦ੍ਧੇ ਸੁਕਤਕਮ੍ਮੇ ਮਹਾਯੋਧੇ. ਉਸ੍ਸਿਤੇਤਿ ਉਗ੍ਗਤੇ ਪਞ੍ਞਾਤੇ ਮਹਾਮਤ੍ਤੇ. ਹਿ ਸਯਨ੍ਤਿ ਏਵਰੂਪੇ ਸਯਂ ਵਾ ਹਿਂਸਨ੍ਤੋ ਪਰੇਹਿ ਵਾ ਹਿਂਸਾਪੇਨ੍ਤੋ. ਬਲੇਨਾਤਿ ਬਲਕਾਯੇਨ. ਤਥਾਵਿਧਞ੍ਹਿ ਰਾਜਾਨਂ ‘‘ਅਯਂ ਬਹੁਕਾਰੇ ਅਤ੍ਤਨੋ ਰਜ੍ਜਦਾਯਕੇਪਿ ਹਿਂਸਤਿ, ਕਿਮਙ੍ਗਂ ਪਨ ਅਮ੍ਹੇ’’ਤਿ ਅਵਸੇਸਾਪਿ ਯੋਧਾ ਵਿਜਹਨ੍ਤਿਯੇਵ. ਇਤਿ ਸੋ ਬਲੇਨ ਵਿਰੁਦ੍ਧੋ ਨਾਮ ਹੋਤਿ.

ਤਥੇਵ ਇਸਯੋ ਹਿਂਸਨ੍ਤਿ ਯਥਾ ਚ ਨੇਗਮਾਦਯੋ, ਤਥੇਵ ਏਸਿਤਗੁਣੇ ਪਬ੍ਬਜਿਤੇ ਅਕ੍ਕੋਸਨਪਹਰਣਾਦੀਹਿ ਹਿਂਸਨ੍ਤੋ ਅਧਮ੍ਮਚਾਰੀ ਰਾਜਾ ਕਾਯਸ੍ਸ ਭੇਦਾ ਅਪਾਯਮੇਵ ਉਪੇਤਿ, ਸਗ੍ਗੇ ਨਿਬ੍ਬਤ੍ਤਿਤੁਂ ਨ ਸਕ੍ਕੋਤੀਤਿ ਸਗ੍ਗੇਨ ਵਿਰੁਦ੍ਧੋ ਨਾਮ ਹੋਤਿ. ਭਰਿਯਂ ਹਨ੍ਤਿ ਅਦੂਸਿਕਨ੍ਤਿ ਅਤ੍ਤਨੋ ਬਾਹੁਚ੍ਛਾਯਾਯ ਵਡ੍ਢਿਤਂ ਪੁਤ੍ਤਧੀਤਾਹਿ ਸਂਵਡ੍ਢਂ ਸੀਲਵਤਿਂ ਭਰਿਯਂ ਮਿਤ੍ਤਪਤਿਰੂਪਕਾਨਂ ਚੋਰਾਨਂ ਵਚਨਂ ਗਹੇਤ੍ਵਾ ਮਾਰੇਤਿ. ਲੁਦ੍ਧਂ ਪਸਵਤੇ ਠਾਨਨ੍ਤਿ ਸੋ ਅਤ੍ਤਨੋ ਨਿਰਯੂਪਪਤ੍ਤਿਂ ਪਸਵਤਿ ਨਿਪ੍ਫਾਦੇਤਿ. ਪੁਤ੍ਤੇਹਿ ਚਾਤਿ ਇਮਸ੍ਮਿਞ੍ਞੇਵ ਅਤ੍ਤਭਾਵੇ ਅਤ੍ਤਨੋ ਪੁਤ੍ਤੇਹਿ ਸਦ੍ਧਿਂ ਵਿਰੁਜ੍ਝਤੀਤਿ.

ਏਵਮਸ੍ਸ ਸੋ ਤੇਸਂ ਪਞ੍ਚਨ੍ਨਂ ਜਨਾਨਂ ਕਥਂ ਗਹੇਤ੍ਵਾ ਦੇਵਿਯਾ ਮਾਰਿਤਭਾਵਞ੍ਚ ਪੁਤ੍ਤਾਨਂ ਵਿਰੁਦ੍ਧਭਾਵਞ੍ਚ ਸਨ੍ਧਿਮੁਖੇ ਚੋਰਂ ਚੂਲ਼ਾਯਂ ਗਣ੍ਹਨ੍ਤੋ ਵਿਯ ਕਥੇਸਿ. ਮਹਾਸਤ੍ਤੋ ਹਿ ਤੇਸਂ ਅਮਚ੍ਚਾਨਂ ਨਿਗ੍ਗਣ੍ਹਨਞ੍ਚ ਧਮ੍ਮਦੇਸਨਞ੍ਚ ਦੇਵਿਯਾ ਤੇਹਿ ਮਾਰਿਤਭਾਵਸ੍ਸ ਆਵਿਕਰਣਤ੍ਥਞ੍ਚ ਤਤ੍ਥ ਅਨੁਪੁਬ੍ਬੇਨ ਕਥਂ ਆਹਰਿਤ੍ਵਾ ਓਕਾਸਂ ਕਤ੍ਵਾ ਏਤਮਤ੍ਥਂ ਕਥੇਸਿ. ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਅਤ੍ਤਨੋ ਅਪਰਾਧਂ ਜਾਨਿ. ਅਥ ਨਂ ਮਹਾਸਤ੍ਤੋ ‘‘ਇਤੋ ਪਟ੍ਠਾਯ, ਮਹਾਰਾਜ, ਏਵਰੂਪਾਨਂ ਪਾਪਾਨਂ ਕਥਂ ਗਹੇਤ੍ਵਾ ਮਾ ਪੁਨ ਏਵਮਕਾਸੀ’’ਤਿ ਵਤ੍ਵਾ ਓਵਦਨ੍ਤੋ ‘‘ਧਮ੍ਮਂ ਚਰੇ’’ਤਿਆਦਿਮਾਹ.

ਤਤ੍ਥ ਧਮ੍ਮਂ ਚਰੇਤਿ, ਮਹਾਰਾਜ, ਰਾਜਾ ਨਾਮ ਜਨਪਦਂ ਅਧਮ੍ਮਿਕੇਨ ਬਲਿਨਾ ਅਪੀਲ਼ੇਨ੍ਤੋ ਜਨਪਦੇ ਧਮ੍ਮਂ ਚਰੇਯ੍ਯ, ਸਾਮਿਕੇ ਅਸਾਮਿਕੇ ਅਕਰੋਨ੍ਤੋ ਨੇਗਮੇਸੁ ਧਮ੍ਮਂ ਚਰੇਯ੍ਯ, ਅਟ੍ਠਾਨੇ ਅਕਿਲਮੇਨ੍ਤੋ ਬਲੇਸੁ ਧਮ੍ਮਂ ਚਰੇਯ੍ਯ. ਵਧਬਨ੍ਧਅਕ੍ਕੋਸਪਰਿਭਾਸੇ ਪਰਿਹਰਨ੍ਤੋ ਪਚ੍ਚਯੇ ਚ ਨੇਸਂ ਦਦਨ੍ਤੋ ਇਸਯੋ ਨ ਵਿਹਿਂਸੇਯ੍ਯ, ਧੀਤਰੋ ਯੁਤ੍ਤਟ੍ਠਾਨੇ ਪਤਿਟ੍ਠਾਪੇਨ੍ਤੋ ਪੁਤ੍ਤੇ ਚ ਸਿਪ੍ਪਾਨਿ ਸਿਕ੍ਖਾਪੇਤ੍ਵਾ ਸਮ੍ਮਾ ਪਰਿਹਰਨ੍ਤੋ ਭਰਿਯਂ ਇਸ੍ਸਰਿਯਵੋਸ੍ਸਗ੍ਗਅਲਙ੍ਕਾਰਦਾਨਸਮ੍ਮਾਨਨਾਦੀਹਿ ਅਨੁਗ੍ਗਣ੍ਹਨ੍ਤੋ ਪੁਤ੍ਤਦਾਰੇ ਸਮਂ ਚਰੇਯ੍ਯ. ਸ ਤਾਦਿਸੋਤਿ ਸੋ ਤਾਦਿਸੋ ਰਾਜਾ ਪਵੇਣਿਂ ਅਭਿਨ੍ਦਿਤ੍ਵਾ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਨ੍ਤੋ ਰਾਜਾਣਾਯ ਰਾਜਤੇਜੇਨ ਸਪਤ੍ਤੇ ਸਮ੍ਪਕਮ੍ਪੇਤਿ ਤਾਸੇਤਿ ਚਾਲੇਤਿ. ‘‘ਇਨ੍ਦੋਵਾ’’ਤਿ ਇਦਂ ਉਪਮਤ੍ਥਂ ਵੁਤ੍ਤਂ. ਯਥਾ ਅਸੁਰੇ ਜੇਤ੍ਵਾ ਅਭਿਭਵਿਤ੍ਵਾ ਠਿਤਕਾਲਤੋ ਪਟ੍ਠਾਯ ਅਸੁਰਾਧਿਪੋਤਿ ਸਙ੍ਖ੍ਯਂ ਗਤੋ ਇਨ੍ਦੋ ਅਤ੍ਤਨੋ ਸਪਤ੍ਤਭੂਤੇ ਅਸੁਰੇ ਕਮ੍ਪੇਸਿ, ਤਥਾ ਕਮ੍ਪੇਤੀਤਿ.

ਏਵਂ ਮਹਾਸਤ੍ਤੋ ਰਞ੍ਞੋ ਧਮ੍ਮਂ ਦੇਸੇਤ੍ਵਾ ਚਤ੍ਤਾਰੋਪਿ ਕੁਮਾਰੇ ਪਕ੍ਕੋਸਾਪੇਤ੍ਵਾ ਓਵਦਿਤ੍ਵਾ ਰਞ੍ਞੋ ਕਤਕਮ੍ਮਂ ਪਕਾਸੇਤ੍ਵਾ ਰਾਜਾਨਂ ਖਮਾਪੇਤ੍ਵਾ ‘‘ਮਹਾਰਾਜ, ਇਤੋ ਪਟ੍ਠਾਯ ਅਤੁਲੇਤ੍ਵਾ ਪਰਿਭੇਦਕਾਨਂ ਕਥਂ ਗਹੇਤ੍ਵਾ ਮਾ ਏਵਰੂਪਂ ਸਾਹਸਿਕਕਮ੍ਮਂ ਅਕਾਸਿ, ਤੁਮ੍ਹੇਪਿ ਕੁਮਾਰਾ ਮਾ ਰਞ੍ਞੋ ਦੁਬ੍ਭਿਤ੍ਥਾ’’ਤਿ ਸਬ੍ਬੇਸਂ ਓਵਾਦਂ ਅਦਾਸਿ. ਅਥ ਨਂ ਰਾਜਾ ਆਹ – ‘‘ਅਹਂ, ਭਨ੍ਤੇ, ਤੁਮ੍ਹੇਸੁ ਚ ਦੇਵਿਯਾ ਚ ਅਪਰਜ੍ਝਨ੍ਤੋ ਇਮੇ ਨਿਸ੍ਸਾਯ ਏਤੇਸਂ ਕਥਂ ਗਹੇਤ੍ਵਾ ਏਤਂ ਪਾਪਕਮ੍ਮਂ ਕਰਿਂ, ਇਮੇ ਪਞ੍ਚਪਿ ਮਾਰੇਮੀ’’ਤਿ. ਨ ਲਬ੍ਭਾ, ਮਹਾਰਾਜ, ਏਵਂ ਕਾਤੁਨ੍ਤਿ. ਤੇਨ ਹਿ ਤੇਸਂ ਹਤ੍ਥਪਾਦੇ ਛੇਦਾਪੇਮੀਤਿ. ਇਦਮ੍ਪਿ ਨ ਲਬ੍ਭਾ ਕਾਤੁਨ੍ਤਿ. ਰਾਜਾ ‘‘ਸਾਧੁ, ਭਨ੍ਤੇ’’ਤਿ ਸਮ੍ਪਟਿਚ੍ਛਿਤ੍ਵਾ ਤੇ ਸਬ੍ਬਸਂਹਰਣੇ ਕਤ੍ਵਾ ਪਞ੍ਚਚੂਲ਼ਾਕਰਣਗਦ੍ਦੂਲਬਨ੍ਧਨਗੋਮਯਾਸਿਞ੍ਚਨੇਹਿ ਅਵਮਾਨੇਤ੍ਵਾ ਰਟ੍ਠਾ ਪਬ੍ਬਾਜੇਸਿ. ਬੋਧਿਸਤ੍ਤੋ ਤਤ੍ਥ ਕਤਿਪਾਹਂ ਵਸਿਤ੍ਵਾ ‘‘ਅਪ੍ਪਮਤ੍ਤੋ ਹੋਹੀ’’ਤਿ ਰਾਜਾਨਂ ਓਵਦਿਤ੍ਵਾ ਹਿਮਵਨ੍ਤਂਯੇਵ ਗਨ੍ਤ੍ਵਾ ਝਾਨਾਭਿਞ੍ਞਾ ਨਿਬ੍ਬਤ੍ਤੇਤ੍ਵਾ ਯਾਵਜੀਵਂ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਤਥਾਗਤੋ ਪਞ੍ਞਵਾਯੇਵ ਪਰਪ੍ਪਵਾਦਪ੍ਪਮਦ੍ਦਨੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਪਞ੍ਚ ਦਿਟ੍ਠਿਗਤਿਕਾ ਪੂਰਣਕਸ੍ਸਪਮਕ੍ਖਲਿਗੋਸਾਲਪਕੁਧਕਚ੍ਚਾਨਅਜਿਤਕੇਸਕਮ੍ਬਲਨਿਗਣ੍ਠਨਾਟਪੁਤ੍ਤਾ ਅਹੇਸੁਂ, ਪਿਙ੍ਗਲਸੁਨਖੋ ਆਨਨ੍ਦੋ, ਮਹਾਬੋਧਿਪਰਿਬ੍ਬਾਜਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਹਾਬੋਧਿਜਾਤਕਵਣ੍ਣਨਾ ਤਤਿਯਾ.

ਜਾਤਕੁਦ੍ਦਾਨਂ –

ਸਨਿਲ਼ੀਨਿਕਮਵ੍ਹਯਨੋ ਪਠਮੋ, ਦੁਤਿਯੋ ਪਨ ਸਉਮ੍ਮਦਨ੍ਤਿਵਰੋ;

ਤਤਿਯੋ ਪਨ ਬੋਧਿਸਿਰੀਵ੍ਹਯਨੋ, ਕਥਿਤਾ ਪਨ ਤੀਣਿ ਜਿਨੇਨ ਸੁਭਾਤਿ.

ਪਣ੍ਣਾਸਨਿਪਾਤਵਣ੍ਣਨਾ ਨਿਟ੍ਠਿਤਾ.

੧੯. ਸਟ੍ਠਿਨਿਪਾਤੋ

[੫੨੯] ੧. ਸੋਣਕਜਾਤਕਵਣ੍ਣਨਾ

ਕਸ੍ਸ ਸੁਤ੍ਵਾ ਸਤਂ ਦਮ੍ਮੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਨੇਕ੍ਖਮ੍ਮਪਾਰਮਿਂ ਆਰਬ੍ਭ ਕਥੇਸਿ. ਤਦਾ ਹਿ ਭਗਵਾ ਧਮ੍ਮਸਭਾਯਂ ਨੇਕ੍ਖਮ੍ਮਪਾਰਮਿਂ ਵਣ੍ਣਯਨ੍ਤਾਨਂ ਭਿਕ੍ਖੂਨਂ ਮਜ੍ਝੇ ਨਿਸੀਦਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਤਥਾਗਤੋ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਰਾਜਗਹੇ ਮਗਧਰਾਜਾ ਨਾਮ ਰਜ੍ਜਂ ਕਾਰੇਸਿ. ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿ, ਨਾਮਗ੍ਗਹਣਦਿਵਸੇ ਚਸ੍ਸ ‘‘ਅਰਿਨ੍ਦਮਕੁਮਾਰੋ’’ਤਿ ਨਾਮਂ ਕਰਿਂਸੁ. ਤਸ੍ਸ ਜਾਤਦਿਵਸੇਯੇਵ ਪੁਰੋਹਿਤਸ੍ਸਪਿ ਪੁਤ੍ਤੋ ਜਾਯਿ, ‘‘ਸੋਣਕਕੁਮਾਰੋ’’ਤਿਸ੍ਸ ਨਾਮਂ ਕਰਿਂਸੁ. ਤੇ ਉਭੋਪਿ ਏਕਤੋਵ ਵਡ੍ਢਿਤ੍ਵਾ ਵਯਪ੍ਪਤ੍ਤਾ ਉਤ੍ਤਮਰੂਪਧਰਾ ਰੂਪੇਨ ਨਿਬ੍ਬਿਸੇਸਾ ਹੁਤ੍ਵਾ ਤਕ੍ਕਸਿਲਂ ਗਨ੍ਤ੍ਵਾ ਉਗ੍ਗਹਿਤਸਿਪ੍ਪਾ ਤਤੋ ਨਿਕ੍ਖਮਿਤ੍ਵਾ ‘‘ਸਬ੍ਬਸਮਯਸਿਪ੍ਪਞ੍ਚ ਦੇਸਚਾਰਿਤ੍ਤਞ੍ਚ ਜਾਨਿਸ੍ਸਾਮਾ’’ਤਿ ਅਨੁਪੁਬ੍ਬੇਨ ਚਾਰਿਕਂ ਚਰਨ੍ਤਾ ਬਾਰਾਣਸਿਂ ਪਤ੍ਵਾ ਰਾਜੁਯ੍ਯਾਨੇ ਵਸਿਤ੍ਵਾ ਪੁਨਦਿਵਸੇ ਨਗਰਂ ਪਵਿਸਿਂਸੁ. ਤਂ ਦਿਵਸਞ੍ਚ ਏਕਚ੍ਚੇ ਮਨੁਸ੍ਸਾ ‘‘ਬ੍ਰਾਹ੍ਮਣਵਾਚਨਕਂ ਕਰਿਸ੍ਸਾਮਾ’’ਤਿ ਪਾਯਾਸਂ ਪਟਿਯਾਦੇਤ੍ਵਾ ਆਸਨਾਨਿ ਪਞ੍ਞਾਪੇਤ੍ਵਾ ਆਗਚ੍ਛਨ੍ਤੇ ਤੇ ਕੁਮਾਰੇ ਦਿਸ੍ਵਾ ਘਰਂ ਪਵੇਸੇਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਾਪੇਸੁਂ. ਤਤ੍ਥ ਬੋਧਿਸਤ੍ਤਸ੍ਸ ਪਞ੍ਞਤ੍ਤਾਸਨੇ ਸੁਦ੍ਧਵਤ੍ਥਂ ਅਤ੍ਥਤਂ ਅਹੋਸਿ, ਸੋਣਕਸ੍ਸ ਰਤ੍ਤਕਮ੍ਬਲਂ. ਸੋ ਤਂ ਨਿਮਿਤ੍ਤਂ ਦਿਸ੍ਵਾਵ ‘‘ਅਜ੍ਜ ਮੇ ਪਿਯਸਹਾਯੋ ਅਰਿਨ੍ਦਮਕੁਮਾਰੋ ਬਾਰਾਣਸਿਰਾਜਾ ਭਵਿਸ੍ਸਤਿ, ਮਯ੍ਹਂ ਪਨ ਸੇਨਾਪਤਿਟ੍ਠਾਨਂ ਦਸ੍ਸਤੀ’’ਤਿ ਅਞ੍ਞਾਸਿ. ਤੇ ਉਭੋਪਿ ਕਤਭਤ੍ਤਕਿਚ੍ਚਾ ਉਯ੍ਯਾਨਮੇਵ ਅਗਮਂਸੁ.

ਤਦਾ ਬਾਰਾਣਸਿਰਞ੍ਞੋ ਕਾਲਕਤਸ੍ਸ ਸਤ੍ਤਮੋ ਦਿਵਸੋ ਹੋਤਿ, ਅਪੁਤ੍ਤਕਂ ਰਾਜਕੁਲਂ. ਅਮਚ੍ਚਾਦਯੋ ਪਾਤੋਵ ਸਸੀਸਂ ਨ੍ਹਾਤਾ ਸਨ੍ਨਿਪਤਿਤ੍ਵਾ ‘‘ਰਜ੍ਜਾਰਹਸ੍ਸ ਸਨ੍ਤਿਕਂ ਗਮਿਸ੍ਸਤੀ’’ਤਿ ਫੁਸ੍ਸਰਥਂ ਯੋਜੇਤ੍ਵਾ ਵਿਸ੍ਸਜ੍ਜੇਸੁਂ. ਸੋ ਨਗਰਾ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਰਾਜੁਯ੍ਯਾਨਂ ਗਨ੍ਤ੍ਵਾ ਉਯ੍ਯਾਨਦ੍ਵਾਰੇ ਨਿਵਤ੍ਤਿਤ੍ਵਾ ਆਰੋਹਣਸਜ੍ਜੋ ਹੁਤ੍ਵਾ ਅਟ੍ਠਾਸਿ. ਬੋਧਿਸਤ੍ਤੋ ਮਙ੍ਗਲਸਿਲਾਪਟ੍ਟੇਸਸੀਸਂ ਪਾਰੁਪਿਤ੍ਵਾ ਨਿਪਜ੍ਜਿ, ਸੋਣਕਕੁਮਾਰੋ ਤਸ੍ਸ ਸਨ੍ਤਿਕੇ ਨਿਸੀਦਿ. ਸੋ ਤੂਰਿਯਸਦ੍ਦਂ ਸੁਤ੍ਵਾ ‘‘ਅਰਿਨ੍ਦਮਸ੍ਸ ਫੁਸ੍ਸਰਥੋ ਆਗਚ੍ਛਤਿ, ਅਜ੍ਜੇਸ ਰਾਜਾ ਹੁਤ੍ਵਾ ਮਮ ਸੇਨਾਪਤਿਟ੍ਠਾਨਂ ਦਸ੍ਸਤਿ, ਨ ਖੋ ਪਨ ਮਯ੍ਹਂ ਇਸ੍ਸਰਿਯੇਨਤ੍ਥੋ, ਏਤਸ੍ਮਿਂ ਗਤੇ ਨਿਕ੍ਖਮਿਤ੍ਵਾ ਪਬ੍ਬਜਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਕਮਨ੍ਤੇ ਪਟਿਚ੍ਛਨ੍ਨੇ ਅਟ੍ਠਾਸਿ. ਪੁਰੋਹਿਤੋ ਉਯ੍ਯਾਨਂ ਪਵਿਸਿਤ੍ਵਾ ਮਹਾਸਤ੍ਤਂ ਨਿਪਨ੍ਨਕਂ ਦਿਸ੍ਵਾ ਤੂਰਿਯਾਨਿ ਪਗ੍ਗਣ੍ਹਾਪੇਸਿ. ਮਹਾਸਤ੍ਤੋ ਪਬੁਜ੍ਝਿਤ੍ਵਾ ਪਰਿਵਤ੍ਤਿਤ੍ਵਾ ਥੋਕਂ ਨਿਪਜ੍ਜਿਤ੍ਵਾ ਉਟ੍ਠਾਯ ਸਿਲਾਪਟ੍ਟੇ ਪਲ੍ਲਙ੍ਕੇਨ ਨਿਸੀਦਿ. ਅਥ ਨਂ ਪੁਰੋਹਿਤੋ ਅਞ੍ਜਲਿਂ ਪਗ੍ਗਣ੍ਹਿਤ੍ਵਾ ਆਹ – ‘‘ਰਜ੍ਜਂ ਤੇ, ਦੇਵ, ਪਾਪੁਣਾਤੀ’’ਤਿ. ‘‘ਕਿਂ ਅਪੁਤ੍ਤਕਂ ਰਾਜਕੁਲ’’ਨ੍ਤਿ? ‘‘ਏਵਂ, ਦੇਵਾ’’ਤਿ. ‘‘ਤੇਨ ਹਿ ਸਾਧੂ’’ਤਿ. ਅਥ ਨਂ ਤੇ ਤਤ੍ਥੇਵ ਅਭਿਸਿਞ੍ਚਿਤ੍ਵਾ ਰਥਂ ਆਰੋਪੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਗਰਂ ਪਵੇਸੇਸੁਂ. ਸੋ ਨਗਰਂ ਪਦਕ੍ਖਿਣਂ ਕਤ੍ਵਾ ਪਾਸਾਦਂ ਅਭਿਰੂਹਿ. ਸੋ ਯਸਮਹਨ੍ਤਤਾਯ ਸੋਣਕਕੁਮਾਰਂ ਨ ਸਰਿ.

ਸੋਪਿ ਤਸ੍ਮਿਂ ਨਗਰਂ ਪਵਿਟ੍ਠੇ ਪਚ੍ਛਾ ਆਗਨ੍ਤ੍ਵਾ ਸਿਲਾਪਟ੍ਟੇ ਨਿਸੀਦਿ. ਅਥਸ੍ਸ ਪੁਰਤੋ ਬਨ੍ਧਨਾ ਪਵੁਤ੍ਤਂ ਸਾਲਰੁਕ੍ਖਤੋ ਪਣ੍ਡੁਪਲਾਸਂ ਪਤਿ. ਸੋ ਤਂ ਦਿਸ੍ਵਾਵ ‘‘ਯਥੇਵੇਤਂ, ਤਥਾ ਮਮਪਿ ਸਰੀਰਂ ਜਰਂ ਪਤ੍ਵਾ ਪਤਿਸ੍ਸਤੀ’’ਤਿ ਅਨਿਚ੍ਚਾਦਿਵਸੇਨ ਵਿਪਸ੍ਸਨਂ ਪਟ੍ਠਪੇਤ੍ਵਾ ਪਚ੍ਚੇਕਬੋਧਿਂ ਪਾਪੁਣਿ. ਤਂਖਣਞ੍ਞੇਵਸ੍ਸ ਗਿਹਿਲਿਙ੍ਗਂ ਅਨ੍ਤਰਧਾਯਿ, ਪਬ੍ਬਜਿਤਲਿਙ੍ਗਂ ਪਾਤੁਰਹੋਸਿ. ਸੋ ‘‘ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ ਉਦਾਨਂ ਉਦਾਨੇਨ੍ਤੋ ਨਨ੍ਦਮੂਲਕਪਬ੍ਭਾਰਂ ਅਗਮਾਸਿ. ਮਹਾਸਤ੍ਤੋਪਿ ਚਤ੍ਤਾਲੀਸਮਤ੍ਤਾਨਂ ਸਂਵਚ੍ਛਰਾਨਂ ਅਚ੍ਚਯੇਨ ਸਰਿਤ੍ਵਾ ‘‘ਕਹਂ ਨੁ ਖੋ ਮੇ ਸਹਾਯੋ ਸੋਣਕੋ’’ਤਿ ਸੋਣਕਂ ਪੁਨਪ੍ਪੁਨਂ ਸਰਨ੍ਤੋਪਿ ‘‘ਮਯਾ ਸੁਤੋ ਵਾ ਦਿਟ੍ਠੋ ਵਾ’’ਤਿ ਵਤ੍ਤਾਰਂ ਅਲਭਿਤ੍ਵਾ ਅਲਙ੍ਕਤਮਹਾਤਲੇ ਰਾਜਪਲ੍ਲਙ੍ਕੇ ਨਿਸਿਨ੍ਨੋ ਗਨ੍ਧਬ੍ਬਨਾਟਕਨਚ੍ਚਗੀਤਾਦੀਹਿ ਪਰਿਵੁਤੋ ਸਮ੍ਪਤ੍ਤਿਮਨੁਭਵਨ੍ਤੋ ‘‘ਯੋ ਮੇ ਕਸ੍ਸਚਿ ਸਨ੍ਤਿਕੇ ਸੁਤ੍ਵਾ ‘ਅਸੁਕਟ੍ਠਾਨੇ ਨਾਮ ਸੋਣਕੋ ਵਸਤੀ’ਤਿ ਆਚਿਕ੍ਖਿਸ੍ਸਤਿ, ਤਸ੍ਸ ਸਤਂ ਦਸ੍ਸਾਮਿ, ਯੋ ਮੇ ਸਾਮਂ ਦਿਸ੍ਵਾ ਆਰੋਚੇਸ੍ਸਤਿ, ਤਸ੍ਸ ਸਹਸ੍ਸ’’ਨ੍ਤਿ ਏਕਂ ਉਦਾਨਂ ਅਭਿਸਙ੍ਖਰਿਤ੍ਵਾ ਗੀਤਵਸੇਨ ਉਦਾਨੇਨ੍ਤੋ ਪਠਮਂ ਗਾਥਮਾਹ –

‘‘ਕਸ੍ਸ ਸੁਤ੍ਵਾ ਸਤਂ ਦਮ੍ਮਿ, ਸਹਸ੍ਸਂ ਦਿਟ੍ਠ ਸੋਣਕਂ;

ਕੋ ਮੇ ਸੋਣਕਮਕ੍ਖਾਤਿ, ਸਹਾਯਂ ਪਂਸੁਕੀਲ਼ਿਤ’’ਨ੍ਤਿ.

ਅਥਸ੍ਸ ਮੁਖਤੋ ਲੁਞ੍ਚਨ੍ਤੀ ਵਿਯ ਗਹੇਤ੍ਵਾ ਏਕਾ ਨਾਟਕੀਤ੍ਥੀ ਤਂ ਗਾਯਿ. ਅਥਞ੍ਞਾ ਅਥਞ੍ਞਾਤਿ ‘‘ਅਮ੍ਹਾਕਂ ਰਞ੍ਞੋ ਪਿਯਗੀਤ’’ਨ੍ਤਿ ਸਬ੍ਬਾ ਓਰੋਧਾ ਗਾਯਿਂਸੁ. ਅਨੁਕ੍ਕਮੇਨ ਨਗਰਵਾਸਿਨੋਪਿ ਜਾਨਪਦਾਪਿ ਤਮੇਵ ਗੀਤਂ ਗਾਯਿਂਸੁ. ਰਾਜਾਪਿ ਪੁਨਪ੍ਪੁਨਂ ਤਮੇਵ ਗੀਤਂ ਗਾਯਤਿ. ਪਣ੍ਣਾਸਮਤ੍ਤਾਨਂ ਸਂਵਚ੍ਛਰਾਨਂ ਅਚ੍ਚਯੇਨ ਪਨਸ੍ਸ ਬਹੂ ਪੁਤ੍ਤਧੀਤਰੋ ਅਹੇਸੁਂ, ਜੇਟ੍ਠਪੁਤ੍ਤੋ ਦੀਘਾਵੁਕੁਮਾਰੋ ਨਾਮ ਅਹੋਸਿ. ਤਦਾ ਸੋਣਕਪਚ੍ਚੇਕਬੁਦ੍ਧੋ ‘‘ਅਰਿਨ੍ਦਮਰਾਜਾ ਮਂ ਦਟ੍ਠੁਕਾਮੋ, ਅਹਂ ਤਤ੍ਥ ਗਨ੍ਤ੍ਵਾ ਕਾਮੇਸੁ ਆਦੀਨਵਂ ਨੇਕ੍ਖਮ੍ਮੇ ਚਾਨਿਸਂਸਂ ਕਥੇਤ੍ਵਾ ਪਬ੍ਬਜ੍ਜਨਾਕਾਰਂ ਕਰੋਮੀ’’ਤਿ ਚਿਨ੍ਤੇਤ੍ਵਾ ਇਦ੍ਧਿਯਾ ਆਕਾਸੇਨਾਗਨ੍ਤ੍ਵਾ ਉਯ੍ਯਾਨੇ ਨਿਸੀਦਿ. ਤਦਾ ਏਕੋ ਸਤ੍ਤਵਸ੍ਸਿਕੋ ਪਞ੍ਚਚੂਲ਼ਕਕੁਮਾਰਕੋ ਮਾਤਰਾ ਪਹਿਤੋ ਗਨ੍ਤ੍ਵਾ ਉਯ੍ਯਾਨਵਨੇ ਦਾਰੂਨਿ ਉਦ੍ਧਰਨ੍ਤੋ ਪੁਨਪ੍ਪੁਨਂ ਤਮੇਵ ਗੀਤਂ ਗਾਯਿ. ਅਥ ਨਂ ਸੋ ਪਕ੍ਕੋਸਿਤ੍ਵਾ ‘‘ਕੁਮਾਰਕ, ਤ੍ਵਂ ਅਞ੍ਞਂ ਅਗਾਯਿਤ੍ਵਾ ਏਕਮੇਵ ਗੀਤਂ ਗਾਯਸਿ, ਕਿਂ ਅਞ੍ਞਂ ਨ ਜਾਨਾਸੀ’’ਤਿ ਪੁਚ੍ਛਿ. ‘‘ਜਾਨਾਮਿ, ਭਨ੍ਤੇ, ਅਮ੍ਹਾਕਂ ਪਨ ਰਞ੍ਞੋ ਇਦਮੇਵ ਪਿਯਂ, ਤੇਨ ਨਂ ਪੁਨ੍ਨਪ੍ਪੁਨਂ ਗਾਯਾਮੀ’’ਤਿ. ‘‘ਏਤਸ੍ਸ ਪਨ ਤੇ ਗੀਤਸ੍ਸ ਪਟਿਗੀਤਂ ਗਾਯਨ੍ਤੋ ਕੋਚਿ ਦਿਟ੍ਠਪੁਬ੍ਬੋ’’ਤਿ. ‘‘ਨ ਦਿਟ੍ਠਪੁਬ੍ਬੋ, ਭਨ੍ਤੇ’’ਤਿ. ‘‘ਅਹਂ ਤਂ ਸਿਕ੍ਖਾਪੇਸ੍ਸਾਮਿ, ਸਕ੍ਖਿਸ੍ਸਸਿ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਪਟਿਗੀਤਂ ਗਾਯਿਤੁ’’ਨ੍ਤਿ. ‘‘ਆਮ, ਭਨ੍ਤੇ’’ਤਿ. ਅਥਸ੍ਸ ਸੋ ਪਟਿਗੀਤਂ ਆਚਿਕ੍ਖਨ੍ਤੋ ‘‘ਮਯ੍ਹਂ ਸੁਤ੍ਵਾ’’ਤਿਆਦਿਮਾਹ. ਉਗ੍ਗਣ੍ਹਾਪੇਤ੍ਵਾ ਚ ਪਨ ਤਂ ਉਯ੍ਯੋਜੇਸਿ – ‘‘ਗਚ੍ਛ, ਕੁਮਾਰਕ, ਇਮਂ ਪਟਿਗੀਤਂ ਰਞ੍ਞਾ ਸਦ੍ਧਿਂ ਗਾਯਾਹਿ, ਰਾਜਾ ਤੇ ਮਹਨ੍ਤਂ ਇਸ੍ਸਰਿਯਂ ਦਸ੍ਸਤਿ, ਕਿਂ ਤੇ ਦਾਰੂਹਿ, ਵੇਗੇਨ ਯਾਹੀ’’ਤਿ.

ਸੋ ‘‘ਸਾਧੂ’’ਤਿ ਤਂ ਪਟਿਗੀਤਂ ਉਗ੍ਗਣ੍ਹਿਤ੍ਵਾ ਵਨ੍ਦਿਤ੍ਵਾ, ‘‘ਭਨ੍ਤੇ, ਯਾਵਾਹਂ ਰਾਜਾਨਂ ਆਨੇਮਿ, ਤਾਵ ਇਧੇਵ ਹੋਥਾ’’ਤਿ ਵਤ੍ਵਾ ਵੇਗੇਨ ਮਾਤੁ ਸਨ੍ਤਿਕਂ ਗਨ੍ਤ੍ਵਾ, ‘‘ਅਮ੍ਮ, ਖਿਪ੍ਪਂ ਮਂ ਨ੍ਹਾਪੇਤ੍ਵਾ ਅਲਙ੍ਕਰੋਥ, ਅਜ੍ਜ ਤਂ ਦਲਿਦ੍ਦਭਾਵਤੋ ਮੋਚੇਸ੍ਸਾਮੀ’’ਤਿ ਵਤ੍ਵਾ ਨ੍ਹਾਤਮਣ੍ਡਿਤੋ ਰਾਜਦ੍ਵਾਰਂ ਗਨ੍ਤ੍ਵਾ ‘‘ਅਯ੍ਯ ਦੋਵਾਰਿਕ, ‘ਏਕੋ ਦਾਰਕੋ ਤੁਮ੍ਹੇਹਿ ਸਦ੍ਧਿਂ ਪਟਿਗੀਤਂ ਗਾਯਿਸ੍ਸਾਮੀਤਿ ਆਗਨ੍ਤ੍ਵਾ ਦ੍ਵਾਰੇ ਠਿਤੋ’ਤਿ ਰਞ੍ਞੋ ਅਰੋਚੇਹੀ’’ਤਿ ਆਹ. ਸੋ ਵੇਗੇਨ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ‘‘ਆਗਚ੍ਛਤੂ’’ਤਿ ਪਕ੍ਕੋਸਾਪੇਤ੍ਵਾ, ‘‘ਤਾਤ, ਤ੍ਵਂ ਮਯਾ ਸਦ੍ਧਿਂ ਪਟਿਗੀਤਂ ਗਾਯਿਸ੍ਸਸੀ’’ਤਿ ਆਹ. ‘‘ਆਮ, ਦੇਵਾ’’ਤਿ. ‘‘ਤੇਨ ਹਿ ਗਾਯਸ੍ਸੂ’’ਤਿ. ‘‘ਦੇਵ, ਇਮਸ੍ਮਿਂ ਠਾਨੇ ਨ ਗਾਯਾਮਿ, ਨਗਰੇ ਪਨ ਭੇਰਿਂ ਚਰਾਪੇਤ੍ਵਾ ਮਹਾਜਨਂ ਸਨ੍ਨਿਪਾਤਾਪੇਥ, ਮਹਾਜਨਮਜ੍ਝੇ ਗਾਯਿਸ੍ਸਾਮੀ’’ਤਿ. ਰਾਜਾ ਤਥਾ ਕਾਰੇਤ੍ਵਾ ਅਲਙ੍ਕਤਮਣ੍ਡਪੇ ਪਲ੍ਲਙ੍ਕਮਜ੍ਝੇ ਨਿਸੀਦਿਤ੍ਵਾ ਤਸ੍ਸਾਨੁਰੂਪਂ ਆਸਨਂ ਦਾਪੇਤ੍ਵਾ ‘‘ਇਦਾਨਿ ਤਵ ਗੀਤਂ ਗਾਯਸ੍ਸੂ’’ਤਿ ਆਹ. ‘‘ਦੇਵ, ਤੁਮ੍ਹੇ ਤਾਵ ਗਾਯਥ, ਅਥਾਹਂ ਪਟਿਗੀਤਂ ਗਾਯਿਸ੍ਸਾਮੀ’’ਤਿ. ਤਤੋ ਰਾਜਾ ਪਠਮਂ ਗਾਯਨ੍ਤੋ ਗਾਥਮਾਹ –

੧.

‘‘ਕਸ੍ਸ ਸੁਤ੍ਵਾ ਸਤਂ ਦਮ੍ਮਿ, ਸਹਸ੍ਸਂ ਦਿਟ੍ਠ ਸੋਣਕਂ;

ਸੋ ਮੇ ਸੋਣਕਮਕ੍ਖਾਤਿ, ਸਹਾਯਂ ਪਂਸੁਕੀਲ਼ਿਤ’’ਨ੍ਤਿ.

ਤਤ੍ਥ ਸੁਤ੍ਵਾਤਿ ‘‘ਅਸੁਕਟ੍ਠਾਨੇ ਨਾਮ ਤੇ ਪਿਯਸਹਾਯੋ ਸੋਣਕੋ ਵਸਤੀ’’ਤਿ ਤਸ੍ਸ ਵਸਨਟ੍ਠਾਨਂ ਸੁਤ੍ਵਾ ਆਰੋਚੇਨ੍ਤਸ੍ਸ ਕਸ੍ਸ ਸਤਂ ਦਮ੍ਮਿ. ਦਿਟ੍ਠਾਤਿ ‘‘ਅਸੁਕਟ੍ਠਾਨੇ ਨਾਮ ਮਯਾ ਦਿਟ੍ਠੋ’’ਤਿ ਦਿਸ੍ਵਾ ਆਰੋਚੇਨ੍ਤਸ੍ਸ ਕਸ੍ਸ ਸਹਸ੍ਸਂ ਦਮ੍ਮੀਤਿ.

ਏਵਂ ਰਞ੍ਞਾ ਪਠਮਂ ਉਦਾਨਗਾਥਾਯ ਗੀਤਾਯ ਪਞ੍ਚਚੂਲ਼ਕਦਾਰਕੇਨ ਪਟਿਗੀਤਭਾਵਂ ਪਕਾਸੇਨ੍ਤੋ ਸਤ੍ਥਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਦੀਯਡ੍ਢਗਾਥਾ ਅਭਾਸਿ –

੨.

‘‘ਅਥਬ੍ਰਵੀ ਮਾਣਵਕੋ, ਦਹਰੋ ਪਞ੍ਚਚੂਲ਼ਕੋ;

ਮਯ੍ਹਂ ਸੁਤ੍ਵਾ ਸਤਂ ਦੇਹਿ, ਸਹਸ੍ਸਂ ਦਿਟ੍ਠ ਸੋਣਕਂ;

ਅਹਂ ਤੇ ਸੋਣਕਕ੍ਖਿਸ੍ਸਂ, ਸਹਾਯਂ ਪਂਸੁਕੀਲ਼ਿਤ’’ਨ੍ਤਿ.

ਤੇਨ ਵੁਤ੍ਤਗਾਥਾਯ ਪਨ ਅਯਮਤ੍ਥੋ – ਮਹਾਰਾਜ, ਯਂ ਤ੍ਵਂ ‘‘ਸੁਤ੍ਵਾ ਆਰੋਚੇਨ੍ਤਸ੍ਸ ਸਤਂ ਦਮ੍ਮੀ’’ਤਿ ਵਦਸਿ, ਤਮ੍ਪਿ ਮਮੇਵ ਦੇਹਿ, ਯਂ ‘‘ਦਿਸ੍ਵਾ ਆਰੋਚੇਨ੍ਤਸ੍ਸ ਸਹਸ੍ਸਂ ਦਮ੍ਮੀ’’ਤਿ ਵਦਸਿ, ਤਮ੍ਪਿ ਮਯ੍ਹਮੇਵ ਦੇਹਿ, ਅਹਂ ਤੇ ਪਿਯਸਹਾਯਂ ਇਦਾਨੇਵ ਪਚ੍ਚਕ੍ਖਤੋਵ ‘‘ਅਯਂ ਸੋਣਕੋ’’ਤਿ ਆਚਿਕ੍ਖਿਸ੍ਸਨ੍ਤਿ.

ਇਤੋ ਪਰਂ ਸੁਵਿਞ੍ਞੇਯ੍ਯਾ ਸਮ੍ਬੁਦ੍ਧਗਾਥਾ ਪਾਲ਼ਿਨਯੇਨੇਵ ਵੇਦਿਤਬ੍ਬਾ –

੩.

‘‘ਕਤਮਸ੍ਮਿਂ ਸੋ ਜਨਪਦੇ, ਰਟ੍ਠੇਸੁ ਨਿਗਮੇਸੁ ਚ;

ਕਤ੍ਥ ਸੋਣਕਮਦ੍ਦਕ੍ਖਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.

੪.

‘‘ਤਵੇਵ ਦੇਵ ਵਿਜਿਤੇ, ਤਵੇਵੁਯ੍ਯਾਨਭੂਮਿਯਂ;

ਉਜੁਵਂਸਾ ਮਹਾਸਾਲਾ, ਨੀਲੋਭਾਸਾ ਮਨੋਰਮਾ.

੫.

‘‘ਤਿਟ੍ਠਨ੍ਤਿ ਮੇਘਸਮਾਨਾ, ਰਮ੍ਮਾ ਅਞ੍ਞੋਞ੍ਞਨਿਸ੍ਸਿਤਾ;

ਤੇਸਂ ਮੂਲਮ੍ਹਿ ਸੋਣਕੋ, ਝਾਯਤੀ ਅਨੁਪਾਦਨੋ;

ਉਪਾਦਾਨੇਸੁ ਲੋਕੇਸੁ, ਡਯ੍ਹਮਾਨੇਸੁ ਨਿਬ੍ਬੁਤੋ.

੬.

‘‘ਤਤੋ ਚ ਰਾਜਾ ਪਾਯਾਸਿ, ਸੇਨਾਯ ਚਤੁਰਙ੍ਗਿਯਾ;

ਕਾਰਾਪੇਤ੍ਵਾ ਸਮਂ ਮਗ੍ਗਂ, ਅਗਮਾ ਯੇਨ ਸੋਣਕੋ.

੭.

‘‘ਉਯ੍ਯਾਨਭੂਮਿਂ ਗਨ੍ਤ੍ਵਾਨ, ਵਿਚਰਨ੍ਤੋ ਬ੍ਰਹਾਵਨੇ;

ਆਸੀਨਂ ਸੋਣਕਂ ਦਕ੍ਖਿ, ਡਯ੍ਹਮਾਨੇਸੁ ਨਿਬ੍ਬੁਤ’’ਨ੍ਤਿ.

ਤਤ੍ਥ ਉਜੁਵਂਸਾਤਿ ਉਜੁਕ੍ਖਨ੍ਧਾ. ਮਹਾਸਾਲਾਤਿ ਮਹਾਰੁਕ੍ਖਾ. ਮੇਘਸਮਾਨਾਤਿ ਨੀਲਮੇਘਸਦਿਸਾ. ਰਮ੍ਮਾਤਿ ਰਮਣੀਯਾ. ਅਞ੍ਞੋਞ੍ਞਨਿਸ੍ਸਿਤਾਤਿ ਸਾਖਾਹਿ ਸਾਖਂ, ਮੂਲੇਨ ਮੂਲਂ ਸਂਸਿਬ੍ਬਿਤ੍ਵਾ ਠਿਤਾ. ਤੇਸਨ੍ਤਿ ਤੇਸਂ ਏਵਰੂਪਾਨਂ ਤਵ ਉਯ੍ਯਾਨਵਨੇ ਸਾਲਾਨਂ ਹੇਟ੍ਠਾ. ਝਾਯਤੀਤਿ ਲਕ੍ਖਣੂਪਨਿਜ੍ਝਾਨਆਰਮ੍ਮਣੂਪਨਿਜ੍ਝਾਨਸਙ੍ਖਾਤੇਹਿ ਝਾਨੇਹਿ ਝਾਯਤਿ. ਅਨੁਪਾਦਨੋਤਿ ਕਾਮੁਪਾਦਾਨਾਦਿਵਿਰਹਿਤੋ. ਡਯ੍ਹਮਾਨੇਸੂਤਿ ਏਕਾਦਸਹਿ ਅਗ੍ਗੀਹਿ ਡਯ੍ਹਮਾਨੇਸੁ ਸਤ੍ਤੇਸੁ. ਨਿਬ੍ਬੁਤੋਤਿ ਤੇ ਅਗ੍ਗੀ ਨਿਬ੍ਬਾਪੇਤ੍ਵਾ ਸੀਤਲੇਨ ਹਦਯੇਨ ਝਾਯਮਾਨੋ ਤਵ ਉਯ੍ਯਾਨੇ ਮਙ੍ਗਲਸਾਲਰੁਕ੍ਖਮੂਲੇ ਸਿਲਾਪਟ੍ਟੇ ਨਿਸਿਨ੍ਨੋ ਏਸ ਤੇ ਸਹਾਯੋ ਕਞ੍ਚਨਪਟਿਮਾ ਵਿਯ ਸੋਭਮਾਨੋ ਪਟਿਮਾਨੇਤੀਤਿ. ਤਤੋ ਚਾਤਿ, ਭਿਕ੍ਖਵੇ, ਤਤੋ ਸੋ ਅਰਿਨ੍ਦਮੋ ਰਾਜਾ ਤਸ੍ਸ ਵਚਨਂ ਸੁਤ੍ਵਾਵ ‘‘ਸੋਣਕਪਚ੍ਚੇਕਬੁਦ੍ਧਂ ਪਸ੍ਸਿਸ੍ਸਾਮੀ’’ਤਿ ਚਤੁਰਙ੍ਗਿਨਿਯਾ ਸੇਨਾਯ ਪਾਯਾਸਿ ਨਿਕ੍ਖਮਿ. ਵਿਚਰਨ੍ਤੋਤਿ ਉਜੁਕਮੇਵ ਅਗਨ੍ਤ੍ਵਾ ਤਸ੍ਮਿਂ ਮਹਨ੍ਤੇ ਵਨਸਣ੍ਡੇ ਵਿਚਰਨ੍ਤੋ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਆਸੀਨਂ ਅਦ੍ਦਕ੍ਖਿ.

ਸੋ ਤਂ ਅਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ ਅਤ੍ਤਨੋ ਕਿਲੇਸਾਭਿਰਤਤ੍ਤਾ ਤਂ ‘‘ਕਪਣੋ’’ਤਿ ਮਞ੍ਞਮਾਨੋ ਇਮਂ ਗਾਥਮਾਹ –

੮.

‘‘ਕਪਣੋ ਵਤਯਂ ਭਿਕ੍ਖੁ, ਮੁਣ੍ਡੋ ਸਙ੍ਘਾਟਿਪਾਰੁਤੋ;

ਅਮਾਤਿਕੋ ਅਪਿਤਿਕੋ, ਰੁਕ੍ਖਮੂਲਸ੍ਮਿ ਝਾਯਤੀ’’ਤਿ.

ਤਤ੍ਥ ਝਾਯਤੀਤਿ ਨਿਮ੍ਮਾਤਿਕੋ ਨਿਪ੍ਪਿਤਿਕੋ ਕਾਰੁਞ੍ਞਪ੍ਪਤ੍ਤੋ ਝਾਯਤਿ.

੯.

‘‘ਇਮਂ ਵਾਕ੍ਯਂ ਨਿਸਾਮੇਤ੍ਵਾ, ਸੋਣਕੋ ਏਤਦਬ੍ਰਵਿ;

ਨ ਰਾਜ ਕਪਣੋ ਹੋਤਿ, ਧਮ੍ਮਂ ਕਾਯੇਨ ਫਸ੍ਸਯਂ.

੧੦.

‘‘ਯੋ ਚ ਧਮ੍ਮਂ ਨਿਰਂਕਤ੍ਵਾ, ਅਧਮ੍ਮਮਨੁਵਤ੍ਤਤਿ;

ਸ ਰਾਜ ਕਪਣੋ ਹੋਤਿ, ਪਾਪੋ ਪਾਪਪਰਾਯਣੋ’’ਤਿ.

ਤਤ੍ਥ ਇਮਨ੍ਤਿ ਤਸ੍ਸ ਕਿਲੇਸਾਭਿਰਤਸ੍ਸ ਪਬ੍ਬਜ੍ਜਂ ਅਰੋਚੇਨ੍ਤਸ੍ਸ ਇਮਂ ਪਬ੍ਬਜ੍ਜਾਗਰਹਵਚਨਂ ਸੁਤ੍ਵਾ. ਏਤਦਬ੍ਰਵੀਤਿ ਪਬ੍ਬਜ੍ਜਾਯ ਗੁਣਂ ਪਕਾਸੇਨ੍ਤੋ ਏਤਂ ਅਬ੍ਰਵਿ. ਫਸ੍ਸਯਨ੍ਤਿ ਫਸ੍ਸਯਨ੍ਤੋ ਯੇਨ ਅਰਿਯਮਗ੍ਗਧਮ੍ਮੋ ਨਾਮਕਾਯੇਨ ਫਸ੍ਸਿਤੋ, ਸੋ ਕਪਣੋ ਨਾਮ ਨ ਹੋਤੀਤਿ ਦਸ੍ਸੇਨ੍ਤੋ ਏਵਮਾਹ. ਨਿਰਂਕਤ੍ਵਾਤਿ ਅਤ੍ਤਭਾਵਤੋ ਨੀਹਰਿਤ੍ਵਾ. ਪਾਪੋ ਪਾਪਪਰਾਯਣੋਤਿ ਸਯਂ ਪਾਪਾਨਂ ਕਰਣੇਨ ਪਾਪੋ, ਅਞ੍ਞੇਸਮ੍ਪਿ ਕਰੋਨ੍ਤਾਨਂ ਪਤਿਟ੍ਠਾਭਾਵੇਨ ਪਾਪਪਰਾਯਣੋਤਿ.

ਏਵਂ ਸੋ ਬੋਧਿਸਤ੍ਤਂ ਗਰਹਿ. ਸੋ ਅਤ੍ਤਨੋ ਗਰਹਿਤਭਾਵਂ ਅਜਾਨਨ੍ਤੋ ਵਿਯ ਹੁਤ੍ਵਾ ਨਾਮਗੋਤ੍ਤਂ ਕਥੇਤ੍ਵਾ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਰੋਨ੍ਤੋ ਗਾਥਮਾਹ –

੧੧.

‘‘ਅਰਿਨ੍ਦਮੋਤਿ ਮੇ ਨਾਮਂ, ਕਾਸਿਰਾਜਾਤਿ ਮਂ ਵਿਦੂ;

ਕਚ੍ਚਿ ਭੋਤੋ ਸੁਖਸ੍ਸੇਯ੍ਯਾ, ਇਧ ਪਤ੍ਤਸ੍ਸ ਸੋਣਕਾ’’ਤਿ.

ਤਤ੍ਥ ਕਚ੍ਚੀਤਿ ਅਮ੍ਹਾਕਂ ਤਾਵ ਨ ਕਿਞ੍ਚਿ ਅਫਾਸੁਕਂ, ਭੋਤੋ ਪਨ ਕਚ੍ਚਿ ਇਧ ਪਤ੍ਤਸ੍ਸ ਇਮਸ੍ਮਿਂ ਉਯ੍ਯਾਨੇ ਵਸਤੋ ਸੁਖਵਿਹਾਰੋਤਿ ਪੁਚ੍ਛਤਿ.

ਅਥ ਨਂ ਪਚ੍ਚੇਕਬੁਦ੍ਧੋ, ‘‘ਮਹਾਰਾਜ, ਨ ਕੇਵਲਂ ਇਧ, ਅਞ੍ਞਤ੍ਰਾਪਿ ਵਸਨ੍ਤਸ੍ਸ ਮੇ ਅਸੁਖਂ ਨਾਮ ਨਤ੍ਥੀ’’ਤਿ ਵਤ੍ਵਾ ਤਸ੍ਸ ਸਮਣਭਦ੍ਰਗਾਥਾਯੋ ਨਾਮ ਆਰਭਿ –

੧੨.

‘‘ਸਦਾਪਿ ਭਦ੍ਰਮਧਨਸ੍ਸ, ਅਨਾਗਾਰਸ੍ਸ ਭਿਕ੍ਖੁਨੋ;

ਨ ਤੇਸਂ ਕੋਟ੍ਠੇ ਓਪੇਨ੍ਤਿ, ਨ ਕੁਮ੍ਭਿਂ ਨ ਕਲ਼ੋਪਿਯਂ;

ਪਰਨਿਟ੍ਠਿਤਮੇਸਾਨਾ, ਤੇਨ ਯਾਪੇਨ੍ਤਿ ਸੁਬ੍ਬਤਾ.

੧੩.

‘‘ਦੁਤਿਯਮ੍ਪਿ ਭਦ੍ਰਮਧਨਸ੍ਸ, ਅਨਾਗਾਰਸ੍ਸ ਭਿਕ੍ਖੁਨੋ;

ਅਨਵਜ੍ਜਪਿਣ੍ਡੋ ਭੋਤ੍ਤਬ੍ਬੋ, ਨ ਚ ਕੋਚੂਪਰੋਧਤਿ.

੧੪.

‘‘ਤਤਿਯਮ੍ਪਿ ਭਦ੍ਰਮਧਨਸ੍ਸ, ਅਨਾਗਾਰਸ੍ਸ ਭਿਕ੍ਖੁਨੋ;

ਨਿਬ੍ਬੁਤੋ ਪਿਣ੍ਡੋ ਭੋਤ੍ਤਬ੍ਬੋ, ਨ ਚ ਕੋਚੂਪਰੋਧਤਿ.

੧੫.

‘‘ਚਤੁਤ੍ਥਮ੍ਪਿ ਭਦ੍ਰਮਧਨਸ੍ਸ, ਅਨਾਗਾਰਸ੍ਸ ਭਿਕ੍ਖੁਨੋ;

ਮੁਤ੍ਤਸ੍ਸ ਰਟ੍ਠੇ ਚਰਤੋ, ਸਙ੍ਗੋ ਯਸ੍ਸ ਨ ਵਿਜ੍ਜਤਿ.

੧੬.

‘‘ਪਞ੍ਚਮਮ੍ਪਿ ਭਦ੍ਰਮਧਨਸ੍ਸ, ਅਨਾਗਾਰਸ੍ਸ ਭਿਕ੍ਖੁਨੋ;

ਨਗਰਮ੍ਹਿ ਡਯ੍ਹਮਾਨਮ੍ਹਿ, ਨਾਸ੍ਸ ਕਿਞ੍ਚਿ ਅਡਯ੍ਹਥ.

੧੭.

‘‘ਛਟ੍ਠਮ੍ਪਿ ਭਦ੍ਰਮਧਨਸ੍ਸ, ਅਨਾਗਾਰਸ੍ਸ ਭਿਕ੍ਖੁਨੋ;

ਰਟ੍ਠੇ ਵਿਲੁਮ੍ਪਮਾਨਮ੍ਹਿ, ਨਾਸ੍ਸ ਕਿਞ੍ਚਿ ਅਹੀਰਥ.

੧੮.

‘‘ਸਤ੍ਤਮਮ੍ਪਿ ਭਦ੍ਰਮਧਨਸ੍ਸ, ਅਨਾਗਾਰਸ੍ਸ ਭਿਕ੍ਖੁਨੋ;

ਚੋਰੇਹਿ ਰਕ੍ਖਿਤਂ ਮਗ੍ਗਂ, ਯੇ ਚਞ੍ਞੇ ਪਰਿਪਨ੍ਥਿਕਾ;

ਪਤ੍ਤਚੀਵਰਮਾਦਾਯ, ਸੋਤ੍ਥਿਂ ਗਚ੍ਛਤਿ ਸੁਬ੍ਬਤੋ.

੧੯.

‘‘ਅਟ੍ਠਮਮ੍ਪਿ ਭਦ੍ਰਮਧਨਸ੍ਸ, ਅਨਾਗਾਰਸ੍ਸ ਭਿਕ੍ਖੁਨੋ;

ਯਂ ਯਂ ਦਿਸਂ ਪਕ੍ਕਮਤਿ, ਅਨਪੇਕ੍ਖੋਵ ਗਚ੍ਛਤੀ’’ਤਿ.

ਤਤ੍ਥ ਅਨਾਗਾਰਸ੍ਸਾਤਿ, ਮਹਾਰਾਜ, ਘਰਾਵਾਸਂ ਪਹਾਯ ਅਨਾਗਾਰਿਯਭਾਵਂ ਪਤ੍ਤਸ੍ਸ ਅਧਨਸ੍ਸ ਅਕਿਞ੍ਚਨਸ੍ਸ ਭਿਕ੍ਖੁਨੋ ਸਬ੍ਬਕਾਲਂ ਭਦ੍ਰਮੇਵ. ਨ ਤੇਸਨ੍ਤਿ, ਮਹਾਰਾਜ, ਤੇਸਂ ਅਧਨਾਨਂ ਭਿਕ੍ਖੂਨਂ ਨ ਕੋਟ੍ਠਾਗਾਰੇ ਧਨਧਞ੍ਞਾਨਿ ਓਪੇਨ੍ਤਿ, ਨ ਕੁਮ੍ਭਿਯਂ, ਨ ਪਚ੍ਛਿਯਂ, ਤੇ ਪਨ ਸੁਬ੍ਬਤਾ ਪਰਨਿਟ੍ਠਿਤਂ ਪਰੇਸਂ ਘਰੇ ਪਕ੍ਕਂ ਆਹਾਰਂ ਸਙ੍ਘਾਟਿਂ ਪਾਰੁਪਿਤ੍ਵਾ ਕਪਾਲਮਾਦਾਯ ਘਰਪਟਿਪਾਟਿਯਾ ਏਸਾਨਾ ਪਰਿਯੇਸਨ੍ਤਾ ਤੇਨ ਤਤੋ ਲਦ੍ਧੇਨ ਪਿਣ੍ਡੇਨ ਤਂ ਆਹਾਰਂ ਨਵਨ੍ਨਂ ਪਾਟਿਕੁਲ੍ਯਾਨਂ ਵਸੇਨ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਿਤ੍ਵਾ ਜੀਵਿਤਵੁਤ੍ਤਿਂ ਯਾਪੇਨ੍ਤਿ.

ਅਨਵਜ੍ਜਪਿਣ੍ਡੋ ਭੋਤ੍ਤਬ੍ਬੋਤਿ ਵੇਜ੍ਜਕਮ੍ਮਾਦਿਕਾਯ ਅਨੇਸਨਾਯ ਵਾ ਕੁਹਨਾ ਲਪਨਾ ਨੇਮਿਤ੍ਤਿਕਤਾ ਨਿਪ੍ਪੇਸਿਕਤਾ ਲਾਭੇਨ ਲਾਭਂ ਨਿਜਿਗੀਸਨਤਾਤਿ ਏਵਰੂਪੇਨ ਮਿਚ੍ਛਾਜੀਵੇਨ ਵਾ ਉਪ੍ਪਾਦਿਤਾ ਚਤ੍ਤਾਰੋ ਪਚ੍ਚਯਾ, ਧਮ੍ਮੇਨ ਉਪ੍ਪਾਦਿਤਾਪਿ ਅਪਚ੍ਚਵੇਕ੍ਖਿਤ੍ਵਾ ਪਰਿਭੁਤ੍ਤਾ ਸਾਵਜ੍ਜਪਿਣ੍ਡੋ ਨਾਮ. ਅਨੇਸਨਂ ਪਨ ਪਹਾਯ ਮਿਚ੍ਛਾਜੀਵਂ ਵਜ੍ਜੇਤ੍ਵਾ ਧਮ੍ਮੇਨ ਸਮੇਨ ਉਪ੍ਪਾਦਿਤਾ ‘‘ਪਟਿਸਙ੍ਖਾ ਯੋਨਿਸੋ ਚੀਵਰਂ ਪਟਿਸੇਵਾਮੀ’’ਤਿ ਵੁਤ੍ਤਨਯੇਨੇਵ ਪਚ੍ਚਵੇਕ੍ਖਿਤ੍ਵਾ ਪਰਿਭੁਤ੍ਤਾ ਅਨਵਜ੍ਜਪਿਣ੍ਡੋ ਨਾਮ. ਯੇਨ ਏਵਰੂਪੋ ਅਨਵਜ੍ਜਪਿਣ੍ਡੋ ਭੋਤ੍ਤਬ੍ਬੋ ਪਰਿਭੁਞ੍ਜਿਤਬ੍ਬੋ, ਯਞ੍ਚ ਏਵਰੂਪਂ ਅਨਵਜ੍ਜਂ ਪਿਣ੍ਡਂ ਭੁਞ੍ਜਮਾਨਾਨਂ ਪਚ੍ਚਯੇ ਨਿਸ੍ਸਾਯ ਕੋਚਿ ਅਪ੍ਪਮਤ੍ਤਕੋਪਿ ਕਿਲੇਸੋ ਨ ਉਪਰੋਧਤਿ ਨ ਪੀਲ਼ੇਤਿ, ਤਸ੍ਸ ਦੁਤਿਯਮ੍ਪਿ ਭਦ੍ਰਂ ਅਧਨਸ੍ਸ ਅਨਾਗਾਰਸ੍ਸ ਭਿਕ੍ਖੁਨੋ.

ਨਿਬ੍ਬੁਤੋਤਿ ਪੁਥੁਜ੍ਜਨਭਿਕ੍ਖੁਨੋ ਧਮ੍ਮੇਨ ਉਪ੍ਪਨ੍ਨਪਿਣ੍ਡੋਪਿ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਿਯਮਾਨੋ ਨਿਬ੍ਬੁਤਪਿਣ੍ਡੋ ਨਾਮ, ਏਕਨ੍ਤਤੋ ਪਨ ਖੀਣਾਸਵਸ੍ਸ ਪਿਣ੍ਡੋਵ ਨਿਬ੍ਬੁਤਪਿਣ੍ਡੋ ਨਾਮ. ਕਿਂਕਾਰਣਾ? ਸੋ ਹਿ ਥੇਯ੍ਯਪਰਿਭੋਗੋ, ਇਣਪਰਿਭੋਗੋ, ਦਾਯਜ੍ਜਪਰਿਭੋਗੋ, ਸਾਮਿਪਰਿਭੋਗੋਤਿ ਇਮੇਸੁ ਚਤੂਸੁ ਪਰਿਭੋਗੇਸੁ ਸਾਮਿਪਰਿਭੋਗਵਸੇਨ ਤਂ ਭੁਞ੍ਜਤਿ, ਤਣ੍ਹਾਦਾਸਬ੍ਯਂ ਅਤੀਤੋ ਸਾਮੀ ਹੁਤ੍ਵਾ ਪਰਿਭੁਞ੍ਜਤਿ, ਨ ਤਂ ਤਪ੍ਪਚ੍ਚਯਾ ਕੋਚਿ ਅਪ੍ਪਮਤ੍ਤਕੋਪਿ ਕਿਲੇਸੋ ਉਪਰੋਧਤਿ.

ਮੁਤ੍ਤਸ੍ਸ ਰਟ੍ਠੇ ਚਰਤੋਤਿ ਉਪਟ੍ਠਾਕਕੁਲਾਦੀਸੁ ਅਲਗ੍ਗਮਾਨਸਸ੍ਸ ਛਿਨ੍ਨਵਲਾਹਕਸ੍ਸ ਵਿਯ ਰਾਹੁਮੁਖਾ ਪਮੁਤ੍ਤਸ੍ਸ ਵਿਮਲਚਨ੍ਦਮਣ੍ਡਲਸ੍ਸ ਵਿਯ ਚ ਯਸ੍ਸ ਗਾਮਨਿਗਮਾਦੀਸੁ ਚਰਨ੍ਤਸ੍ਸ ਰਾਗਸਙ੍ਗਾਦੀਸੁ ਏਕੋਪਿ ਸਙ੍ਗੋ ਨਤ੍ਥਿ. ਏਕਚ੍ਚੋ ਹਿ ਕੁਲੇਹਿ ਸਂਸਟ੍ਠੋ ਵਿਹਰਤਿ ਸਹਸੋਕੀ ਸਹਨਨ੍ਦੀ, ਏਕਚ੍ਚੋ ਮਾਤਾਪਿਤੂਸੁਪਿ ਅਲਗ੍ਗਮਾਨਸੋ ਵਿਚਰਤਿ ਕੋਰੁਨਗਰਗਾਮਵਾਸੀ ਦਹਰੋ ਵਿਯ, ਏਵਰੂਪਸ੍ਸ ਪੁਥੁਜ੍ਜਨਸ੍ਸਪਿ ਭਦ੍ਰਮੇਵ.

ਨਾਸ੍ਸ ਕਿਞ੍ਚੀਤਿ ਯੋ ਹਿ ਬਹੁਪਰਿਕ੍ਖਾਰੋ ਹੋਤਿ, ਸੋ ‘‘ਮਾ ਮੇ ਚੋਰਾ ਪਰਿਕ੍ਖਾਰੇ ਹਰਿਂਸੂ’’ਤਿ ਅਤਿਰੇਕਾਨਿ ਚ ਚੀਵਰਾਦੀਨਿ ਅਨ੍ਤੋਨਗਰੇ ਉਪਟ੍ਠਾਕਕੁਲੇ ਨਿਕ੍ਖਿਪਤਿ, ਅਥ ਨਗਰਮ੍ਹਿ ਡਯ੍ਹਮਾਨੇ ‘‘ਅਸੁਕਕੁਲੇ ਨਾਮ ਅਗ੍ਗਿ ਉਟ੍ਠਿਤੋ’’ਤਿ ਸੁਤ੍ਵਾ ਸੋਚਤਿ ਕਿਲਮਤਿ, ਏਵਰੂਪਸ੍ਸ ਭਦ੍ਰਂ ਨਾਮ ਨਤ੍ਥਿ. ਯੋ ਪਨ, ਮਹਾਰਾਜ, ਸਕੁਣਵਤ੍ਤਂ ਪੂਰੇਤਿ, ਕਾਯਪਟਿਬਦ੍ਧਪਰਿਕ੍ਖਾਰੋਵ ਹੋਤਿ, ਤਸ੍ਸ ਤਾਦਿਸਸ੍ਸ ਨ ਕਿਞ੍ਚਿ ਅਡਯ੍ਹਥ, ਤੇਨਸ੍ਸ ਪਞ੍ਚਮਮ੍ਪਿ ਭਦ੍ਰਮੇਵ.

ਵਿਲੁਮ੍ਪਮਾਨਮ੍ਹੀਤਿ ਵਿਲੁਪ੍ਪਮਾਨਮ੍ਹਿ, ਅਯਮੇਵ ਵਾ ਪਾਠੋ. ਅਹੀਰਥਾਤਿ ਯਥਾ ਪਬ੍ਬਤਗਹਨਾਦੀਹਿ ਨਿਕ੍ਖਮਿਤ੍ਵਾ ਰਟ੍ਠਂ ਵਿਲੁਮ੍ਪਮਾਨੇਸੁ ਚੋਰੇਸੁ ਬਹੁਪਰਿਕ੍ਖਾਰਸ੍ਸ ਅਨ੍ਤੋਗਾਮੇ ਠਪਿਤਂ ਵਿਲੁਮ੍ਪਤਿ ਹਰਤਿ, ਤਥਾ ਯਸ੍ਸ ਅਧਨਸ੍ਸ ਕਾਯਪਟਿਬਦ੍ਧਪਰਿਕ੍ਖਾਰਸ੍ਸ ਨ ਕਿਞ੍ਚਿ ਅਹੀਰਥ ਤਸ੍ਸ ਛਟ੍ਠਮ੍ਪਿ ਭਦ੍ਰਮੇਵ.

ਯੇ ਚਞ੍ਞੇ ਪਰਿਪਨ੍ਥਿਕਾਤਿ ਯੇ ਚ ਅਞ੍ਞੇਪਿ ਤੇਸੁ ਤੇਸੁ ਠਾਨੇਸੁ ਸੁਙ੍ਕਗਹਣਤ੍ਥਾਯ ਠਪਿਤਾ ਪਰਿਪਨ੍ਥਿਕਾ, ਤੇਹਿ ਚ ਰਕ੍ਖਿਤਂ. ਪਤ੍ਤਚੀਵਰਨ੍ਤਿ ਚੋਰਾਨਂ ਅਨੁਪਕਾਰਂ ਸੁਙ੍ਕਿਕਾਨਂ ਅਸੁਙ੍ਕਾਰਹਂ ਮਤ੍ਤਿਕਾਪਤ੍ਤਞ੍ਚੇਵ ਕਤਦਲ਼੍ਹੀਕਮ੍ਮਪਰਿਭਣ੍ਡਂ ਪਂਸੁਕੂਲਚੀਵਰਞ੍ਚ ਅਪ੍ਪਗ੍ਘਾਨਿ ਕਾਯਬਨ੍ਧਨਪਰਿਸ੍ਸਾਵਨਸੂਚਿਵਾਸਿਪਤ੍ਤਤ੍ਥਵਿਕਾਨਿ ਚਾਤਿ ਸਬ੍ਬੇਪਿ ਅਟ੍ਠ ਪਰਿਕ੍ਖਾਰੇ ਕਾਯਪਟਿਬਦ੍ਧੇ ਕਤ੍ਵਾ ਮਗ੍ਗਪ੍ਪਟਿਪਨ੍ਨੋ ਕੇਨਚਿ ਅਵਿਹੇਠਿਯਮਾਨੋ ਸੋਤ੍ਥਿਂ ਗਚ੍ਛਤਿ. ਸੁਬ੍ਬਤੋਤਿ ਲੋਭਨੀਯਾਨਿ ਹਿ ਚੀਵਰਾਦੀਨਿ ਦਿਸ੍ਵਾ ਚੋਰਾ ਹਰਨ੍ਤਿ, ਸੁਙ੍ਕਿਕਾਪਿ ‘‘ਕਿਂ ਨੁ ਖੋ ਏਤਸ੍ਸ ਹਤ੍ਥੇ’’ਤਿ ਪਤ੍ਤਤ੍ਥਵਿਕਾਦੀਨਿ ਸੋਧੇਨ੍ਤਿ, ਸੁਬ੍ਬਤੋ ਪਨ ਸਲ੍ਲਹੁਕਵੁਤ੍ਤਿ ਤੇਸਂ ਪਸ੍ਸਨ੍ਤਾਨਞ੍ਞੇਵ ਸੋਤ੍ਥਿਂ ਗਚ੍ਛਤਿ, ਤੇਨਸ੍ਸ ਸਤ੍ਤਮਮ੍ਪਿ ਭਦ੍ਰਮੇਵ.

ਅਨਪੇਕ੍ਖੋਵ ਗਚ੍ਛਤੀਤਿ ਕਾਯਪਟਿਬਦ੍ਧਤੋ ਅਤਿਰੇਕਸ੍ਸ ਵਿਹਾਰੇ ਪਟਿਸਾਮਿਤਸ੍ਸ ਕਸ੍ਸਚਿ ਪਰਿਕ੍ਖਾਰਸ੍ਸ ਅਭਾਵਾ ਵਸਨਟ੍ਠਾਨਂ ਨਿਵਤ੍ਤਿਤ੍ਵਾਪਿ ਨ ਓਲੋਕੇਤਿ. ਯਂ ਯਂ ਦਿਸਂ ਗਨ੍ਤੁਕਾਮੋ ਹੋਤਿ, ਤਂ ਤਂ ਗਚ੍ਛਨ੍ਤੋ ਅਨਪੇਕ੍ਖੋਵ ਗਚ੍ਛਤਿ ਅਨੁਰਾਧਪੁਰਾ ਨਿਕ੍ਖਮਿਤ੍ਵਾ ਥੂਪਾਰਾਮੇ ਪਬ੍ਬਜਿਤਾਨਂ ਦ੍ਵਿਨ੍ਨਂ ਕੁਲਪੁਤ੍ਤਾਨਂ ਵੁਡ੍ਢਤਰੋ ਵਿਯ.

ਇਤਿ ਸੋਣਕਪਚ੍ਚੇਕਬੁਦ੍ਧੋ ਅਟ੍ਠ ਸਮਣਭਦ੍ਰਕਾਨਿ ਕਥੇਸਿ. ਤਤੋ ਉਤ੍ਤਰਿਂ ਪਨ ਸਤਮ੍ਪਿ ਸਹਸ੍ਸਮ੍ਪਿ ਅਪਰਿਮਾਣਾਨਿ ਸਮਣਭਦ੍ਰਕਾਨਿ ਏਸ ਕਥੇਤੁਂ ਸਮਤ੍ਥੋਯੇਵ. ਰਾਜਾ ਪਨ ਕਾਮਾਭਿਰਤਤ੍ਤਾ ਤਸ੍ਸ ਕਥਂ ਪਚ੍ਛਿਨ੍ਦਿਤ੍ਵਾ ‘‘ਮਯ੍ਹਂ ਸਮਣਭਦ੍ਰਕੇਹਿ ਅਤ੍ਥੋ ਨਤ੍ਥੀ’’ਤਿ ਅਤ੍ਤਨੋ ਕਾਮਾਧਿਮੁਤ੍ਤਤਂ ਪਕਾਸੇਨ੍ਤੋ ਆਹ –

੨੦.

‘‘ਬਹੂਨਿ ਸਮਣਭਦ੍ਰਾਨਿ, ਯੇ ਤ੍ਵਂ ਭਿਕ੍ਖੁ ਪਸਂਸਸਿ;

ਅਹਞ੍ਚ ਗਿਦ੍ਧੋ ਕਾਮੇਸੁ, ਕਥਂ ਕਾਹਾਮਿ ਸੋਣਕ.

੨੧.

‘‘ਪਿਯਾ ਮੇ ਮਾਨੁਸਾ ਕਾਮਾ, ਅਥੋ ਦਿਬ੍ਯਾਪਿ ਮੇ ਪਿਯਾ;

ਅਥ ਕੇਨ ਨੁ ਵਣ੍ਣੇਨ, ਉਭੋ ਲੋਕੇ ਲਭਾਮਸੇ’’ਤਿ.

ਤਤ੍ਥ ਵਣ੍ਣੇਨਾਤਿ ਕਾਰਣੇਨ.

ਅਥ ਨਂ ਪਚ੍ਚੇਕਬੁਦ੍ਧੋ ਆਹ –

੨੨.

‘‘ਕਾਮੇ ਗਿਦ੍ਧਾ ਕਾਮਰਤਾ, ਕਾਮੇਸੁ ਅਧਿਮੁਚ੍ਚਿਤਾ;

ਨਰਾ ਪਾਪਾਨਿ ਕਤ੍ਵਾਨ, ਉਪਪਜ੍ਜਨ੍ਤਿ ਦੁਗ੍ਗਤਿਂ.

੨੩.

‘‘ਯੇ ਚ ਕਾਮੇ ਪਹਨ੍ਤ੍ਵਾਨ, ਨਿਕ੍ਖਨ੍ਤਾ ਅਕੁਤੋਭਯਾ;

ਏਕੋਦਿਭਾਵਾਧਿਗਤਾ, ਨ ਤੇ ਗਚ੍ਛਨ੍ਤਿ ਦੁਗ੍ਗਤਿਂ.

੨੪.

‘‘ਉਪਮਂ ਤੇ ਕਰਿਸ੍ਸਾਮਿ, ਤਂ ਸੁਣੋਹਿ ਅਰਿਨ੍ਦਮ;

ਉਪਮਾਯ ਮਿਧੇਕਚ੍ਚੇ, ਅਤ੍ਥਂ ਜਾਨਨ੍ਤਿ ਪਣ੍ਡਿਤਾ.

੨੫.

‘‘ਗਙ੍ਗਾਯ ਕੁਣਪਂ ਦਿਸ੍ਵਾ, ਵੁਯ੍ਹਮਾਨਂ ਮਹਣ੍ਣਵੇ;

ਵਾਯਸੋ ਸਮਚਿਨ੍ਤੇਸਿ, ਅਪ੍ਪਪਞ੍ਞੋ ਅਚੇਤਸੋ.

੨੬.

‘‘ਯਾਨਞ੍ਚ ਵਤਿਦਂ ਲਦ੍ਧਂ, ਭਕ੍ਖੋ ਚਾਯਂ ਅਨਪ੍ਪਕੋ;

ਤਤ੍ਥ ਰਤ੍ਤਿਂ ਤਤ੍ਥ ਦਿਵਾ, ਤਤ੍ਥੇਵ ਨਿਰਤੋ ਮਨੋ.

੨੭.

‘‘ਖਾਦਂ ਨਾਗਸ੍ਸ ਮਂਸਾਨਿ, ਪਿਵਂ ਭਾਗੀਰਥੋਦਕਂ;

ਸਮ੍ਪਸ੍ਸਂ ਵਨਚੇਤ੍ਯਾਨਿ, ਨ ਪਲੇਤ੍ਥ ਵਿਹਙ੍ਗਮੋ.

੨੮.

‘‘ਤਞ੍ਚ ਓਤਰਣੀ ਗਙ੍ਗਾ, ਪਮਤ੍ਤਂ ਕੁਣਪੇ ਰਤਂ;

ਸਮੁਦ੍ਦਂ ਅਜ੍ਝਗਾਹਾਸਿ, ਅਗਤੀ ਯਤ੍ਥ ਪਕ੍ਖਿਨਂ.

੨੯.

‘‘ਸੋ ਚ ਭਕ੍ਖਪਰਿਕ੍ਖੀਣੋ, ਉਦਪਤ੍ਵਾ ਵਿਹਙ੍ਗਮੋ;

ਨ ਪਚ੍ਛਤੋ ਨ ਪੁਰਤੋ, ਨੁਤ੍ਤਰਂ ਨੋਪਿ ਦਕ੍ਖਿਣਂ.

੩੦.

‘‘ਦੀਪਂ ਸੋ ਨਜ੍ਝਗਾਗਞ੍ਛਿ, ਅਗਤੀ ਯਤ੍ਥ ਪਕ੍ਖਿਨਂ;

ਸੋ ਚ ਤਤ੍ਥੇਵ ਪਾਪਤ੍ਥ, ਯਥਾ ਦੁਬ੍ਬਲਕੋ ਤਥਾ.

੩੧.

‘‘ਤਞ੍ਚ ਸਾਮੁਦ੍ਦਿਕਾ ਮਚ੍ਛਾ, ਕੁਮ੍ਭੀਲਾ ਮਕਰਾ ਸੁਸੂ;

ਪਸਯ੍ਹਕਾਰਾ ਖਾਦਿਂਸੁ, ਫਨ੍ਦਮਾਨਂ ਵਿਪਕ੍ਖਕਂ.

੩੨.

‘‘ਏਵਮੇਵ ਤੁਵਂ ਰਾਜ, ਯੇ ਚਞ੍ਞੇ ਕਾਮਭੋਗਿਨੋ;

ਗਿਦ੍ਧਾ ਚੇ ਨ ਵਮਿਸ੍ਸਨ੍ਤਿ, ਕਾਕਪਞ੍ਞਾਵ ਤੇ ਵਿਦੂ.

੩੩.

‘‘ਏਸਾ ਤੇ ਉਪਮਾ ਰਾਜ, ਅਤ੍ਥਸਨ੍ਦਸ੍ਸਨੀ ਕਤਾ;

ਤ੍ਵਞ੍ਚ ਪਞ੍ਞਾਯਸੇ ਤੇਨ, ਯਦਿ ਕਾਹਸਿ ਵਾ ਨ ਵਾ’’ਤਿ.

ਤਤ੍ਥ ਪਾਪਾਨੀਤਿ, ਮਹਾਰਾਜ, ਤ੍ਵਂ ਕਾਮਗਿਦ੍ਧੋ, ਨਰਾ ਚ ਕਾਮੇ ਨਿਸ੍ਸਾਯ ਕਾਯਦੁਚ੍ਚਰਿਤਾਦੀਨਿ ਪਾਪਾਨਿ ਕਤ੍ਵਾ ਯਤ੍ਥ ਸੁਪਿਨਨ੍ਤੇਪਿ ਦਿਬ੍ਬਾ ਚ ਮਾਨੁਸਿਕਾ ਚ ਕਾਮਾ ਨ ਲਬ੍ਭਨ੍ਤਿ, ਤਂ ਦੁਗ੍ਗਤਿਂ ਉਪਪਜ੍ਜਨ੍ਤੀਤਿ ਅਤ੍ਥੋ. ਪਹਨ੍ਤ੍ਵਾਨਾਤਿ ਖੇਲ਼ਪਿਣ੍ਡਂ ਵਿਯ ਪਹਾਯ. ਅਕੁਤੋਭਯਾਤਿ ਰਾਗਾਦੀਸੁ ਕੁਤੋਚਿ ਅਨਾਗਤਭਯਾ. ਏਕੋਦਿਭਾਵਾਧਿਗਤਾਤਿ ਏਕੋਦਿਭਾਵਂ ਏਕਵਿਹਾਰਿਕਤਂ ਅਧਿਗਤਾ. ਨ ਤੇਤਿ ਤੇ ਏਵਰੂਪਾ ਪਬ੍ਬਜਿਤਾ ਦੁਗ੍ਗਤਿਂ ਨ ਗਚ੍ਛਨ੍ਤਿ.

ਉਪਮਂ ਤੇਤਿ, ਮਹਾਰਾਜ, ਦਿਬ੍ਬਮਾਨੁਸਕੇ ਕਾਮੇ ਪਤ੍ਥੇਨ੍ਤਸ੍ਸ ਹਤ੍ਥਿਕੁਣਪੇ ਪਟਿਬਦ੍ਧਕਾਕਸਦਿਸਸ੍ਸ ਤਵ ਏਕਂ ਉਪਮਂ ਕਰਿਸ੍ਸਾਮਿ, ਤਂ ਸੁਣੋਹੀਤਿ ਅਤ੍ਥੋ. ਕੁਣਪਨ੍ਤਿ ਹਤ੍ਥਿਕਲ਼ੇਵਰਂ. ਮਹਣ੍ਣਵੇਤਿ ਗਮ੍ਭੀਰਪੁਥੁਲੇ ਉਦਕੇ. ਏਕੋ ਕਿਰ ਮਹਾਵਾਰਣੋ ਗਙ੍ਗਾਤੀਰੇ ਚਰਨ੍ਤੋ ਗਙ੍ਗਾਯਂ ਪਤਿਤ੍ਵਾ ਉਤ੍ਤਰਿਤੁਂ ਅਸਕ੍ਕੇਨ੍ਤੋ ਤਤ੍ਥੇਵ ਮਤੋ ਗਙ੍ਗਾਯ ਵੁਯ੍ਹਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਵਾਯਸੋਤਿ ਆਕਾਸੇਨ ਗਚ੍ਛਨ੍ਤੋ ਏਕੋ ਕਾਕੋ. ਯਾਨਞ੍ਚ ਵਤਿਦਨ੍ਤਿ ਸੋ ਏਵਂ ਚਿਨ੍ਤੇਤ੍ਵਾ ਤਤ੍ਥ ਨਿਲੀਯਿਤ੍ਵਾ ‘‘ਇਦਂ ਮਯਾ ਹਤ੍ਥਿਯਾਨਂ ਲਦ੍ਧਂ, ਏਤ੍ਥ ਨਿਲੀਨੋ ਸੁਖਂ ਚਰਿਸ੍ਸਾਮਿ, ਅਯਮੇਵ ਚ ਮੇ ਅਨਪ੍ਪਕੋ ਭਕ੍ਖੋ ਭਵਿਸ੍ਸਤਿ, ਇਦਾਨਿ ਮਯਾ ਅਞ੍ਞਤ੍ਥ ਗਨ੍ਤੁਂ ਨ ਵਟ੍ਟਤੀ’’ਤਿ ਸਨ੍ਨਿਟ੍ਠਾਨਮਕਾਸਿ. ਤਤ੍ਥ ਰਤ੍ਤਿਨ੍ਤਿ ਤਤ੍ਥ ਰਤ੍ਤਿਞ੍ਚ ਦਿਵਾ ਚ ਤਤ੍ਥੇਵ ਮਨੋ ਅਭਿਰਤੋ ਅਹੋਸਿ. ਨ ਪਲੇਤ੍ਥਾਤਿ ਨ ਉਪ੍ਪਤਿਤ੍ਵਾ ਪਕ੍ਕਾਮਿ.

ਓਤਰਣੀਤਿ ਸਮੁਦ੍ਦਾਭਿਮੁਖੀ ਓਤਰਮਾਨਾ. ‘‘ਓਹਾਰਿਣੀ’’ਤਿਪਿ ਪਾਠੋ, ਸਾ ਸਮੁਦ੍ਦਾਭਿਮੁਖੀ ਅਵਹਾਰਿਣੀਤਿ ਅਤ੍ਥੋ. ਅਗਤੀ ਯਤ੍ਥਾਤਿ ਸਮੁਦ੍ਦਮਜ੍ਝਂ ਸਨ੍ਧਾਯਾਹ. ਭਕ੍ਖਪਰਿਕ੍ਖੀਣੋਤਿ ਪਰਿਕ੍ਖੀਣਭਕ੍ਖੋ. ਉਦਪਤ੍ਵਾਤਿ ਖੀਣੇ ਚਮ੍ਮੇ ਚ ਮਂਸੇ ਚ ਅਟ੍ਠਿਸਙ੍ਘਾਤੋ ਊਮਿਵੇਗੇਨ ਭਿਨ੍ਨੋ ਉਦਕੇ ਨਿਮੁਜ੍ਜਿ. ਅਥ ਸੋ ਕਾਕੋ ਉਦਕੇ ਪਤਿਟ੍ਠਾਤੁਂ ਅਸਕ੍ਕੋਨ੍ਤੋ ਉਪ੍ਪਤਿ, ਏਵਂ ਉਪ੍ਪਤਿਤ੍ਵਾਤਿ ਅਤ੍ਥੋ. ਅਗਤੀ ਯਤ੍ਥ ਪਕ੍ਖਿਨਨ੍ਤਿ ਯਸ੍ਮਿਂ ਸਮੁਦ੍ਦਮਜ੍ਝੇ ਪਕ੍ਖੀਨਂ ਅਗਤਿ, ਤਤ੍ਥ ਸੋ ਏਵਂ ਉਪ੍ਪਤਿਤੋ ਪਚ੍ਛਿਮਂ ਦਿਸਂ ਗਨ੍ਤ੍ਵਾ ਤਤ੍ਥ ਪਤਿਟ੍ਠਂ ਅਲਭਿਤ੍ਵਾ ਪੁਰਤ੍ਥਿਮਂ, ਤਤੋ ਉਤ੍ਤਰਂ, ਤਤੋ ਦਕ੍ਖਿਣਨ੍ਤਿ ਚਤਸ੍ਸੋਪਿ ਦਿਸਾ ਗਨ੍ਤ੍ਵਾ ਅਤ੍ਤਨੋ ਪਤਿਟ੍ਠਾਨਂ ਨ ਅਜ੍ਝਗਾ ਨਾਗਞ੍ਛੀਤਿ ਅਤ੍ਥੋ. ਅਥ ਵਾ ਵਾਯਸੋ ਏਵਂ ਉਪ੍ਪਤਿਤ੍ਵਾ ਪਚ੍ਛਿਮਾਦੀਸੁ ਏਕੇਕਂ ਦਿਸਂ ਆਗਞ੍ਛਿ, ਦੀਪਂ ਪਨ ਨਜ੍ਝਾਗਮਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਪਾਪਤ੍ਥਾਤਿ ਪਪਤਿਤੋ. ਯਥਾ ਦੁਬ੍ਬਲਕੋਤਿ ਯਥਾ ਦੁਬ੍ਬਲਕੋ ਪਤੇਯ੍ਯ, ਤਥੇਵ ਪਤਿਤੋ. ਸੁਸੂਤਿ ਸੁਸੁਨਾਮਕਾ ਚਣ੍ਡਮਚ੍ਛਾ. ਪਸਯ੍ਹਕਾਰਾਤਿ ਅਨਿਚ੍ਛਮਾਨਕਂਯੇਵ ਬਲਕ੍ਕਾਰੇਨ. ਵਿਪਕ੍ਖਕਨ੍ਤਿ ਵਿਦ੍ਧਸ੍ਤਪਕ੍ਖਕਂ.

ਗਿਦ੍ਧਾ ਚੇ ਨ ਵਮਿਸ੍ਸਨ੍ਤੀਤਿ ਯਦਿ ਗਿਦ੍ਧਾ ਹੁਤ੍ਵਾ ਕਾਮੇ ਨ ਵਮਿਸ੍ਸਨ੍ਤਿ, ਨ ਛਡ੍ਡੇਸ੍ਸਨ੍ਤਿ. ਕਾਕਪਞ੍ਞਾਵ ਤੇਤਿ ਕਾਕਸ੍ਸ ਸਮਾਨਪਞ੍ਞਾ ਇਤਿ ਤੇ ਬੁਦ੍ਧਾਦਯੋ ਪਣ੍ਡਿਤਾ ਵਿਦੂ ਵਿਦਨ੍ਤਿ, ਜਾਨਨ੍ਤੀਤਿ ਅਤ੍ਥੋ. ਅਤ੍ਥਸਨ੍ਦਸ੍ਸਨੀਤਿ ਅਤ੍ਥਪ੍ਪਕਾਸਿਕਾ. ਤ੍ਵਞ੍ਚ ਪਞ੍ਞਾਯਸੇਤਿ ਤ੍ਵਞ੍ਚ ਪਞ੍ਞਾਯਿਸ੍ਸਸਿ. ਇਦਂ ਵੁਤ੍ਤਂ ਹੋਤਿ – ਮਹਾਰਾਜ, ਮਯਾ ਹਿਤਕਾਮੇਨ ਤਵ ਓਵਾਦੋ ਦਿਨ੍ਨੋ, ਤਂ ਪਨ ਤ੍ਵਂ ਯਦਿ ਕਾਹਸਿ, ਦੇਵਲੋਕੇ ਨਿਬ੍ਬਤ੍ਤਿਸ੍ਸਸਿ, ਯਦਿ ਨ ਕਾਹਸਿ, ਕਾਮਪਙ੍ਕੇ ਨਿਮੁਗ੍ਗੋ ਜੀਵਿਤਪਰਿਯੋਸਾਨੇ ਨਿਰਯੇ ਨਿਬ੍ਬਤ੍ਤਿਸ੍ਸਸੀਤਿ ਏਵਂ ਤ੍ਵਮੇਵ ਤੇਨ ਕਾਰਣੇਨ ਵਾ ਅਕਾਰਣੇਨ ਵਾ ਸਗ੍ਗੇ ਵਾ ਨਿਰਯੇ ਵਾ ਪਞ੍ਞਾਯਿਸ੍ਸਸਿ. ਅਹਂ ਪਨ ਸਬ੍ਬਭਵੇਹਿ ਮੁਤ੍ਤੋ ਅਪ੍ਪਟਿਸਨ੍ਧਿਕੋਤਿ.

ਇਮਂ ਪਨ ਓਵਾਦਂ ਦੇਨ੍ਤੇਨ ਪਚ੍ਚੇਕਬੁਦ੍ਧੇਨ ਨਦੀ ਦਸ੍ਸਿਤਾ, ਤਾਯ ਵੁਯ੍ਹਮਾਨਂ ਹਤ੍ਥਿਕੁਣਪਂ ਦਸ੍ਸਿਤਂ, ਕੁਣਪਖਾਦਕੋ ਕਾਕੋ ਦਸ੍ਸਿਤੋ, ਤਸ੍ਸ ਕੁਣਪਂ ਖਾਦਿਤ੍ਵਾ ਪਾਨੀਯਪਿਵਨਕਾਲੋ ਦਸ੍ਸਿਤੋ, ਰਮਣੀਯਵਨਸਣ੍ਡਦਸ੍ਸਨਕਾਲੋ ਦਸ੍ਸਿਤੋ, ਕੁਣਪਸ੍ਸ ਨਦਿਯਾ ਵੁਯ੍ਹਮਾਨਸ੍ਸ ਸਮੁਦ੍ਦਪਵੇਸੋ ਦਸ੍ਸਿਤੋ, ਸਮੁਦ੍ਦਮਜ੍ਝੇ ਕਾਕਸ੍ਸ ਹਤ੍ਥਿਕੁਣਪੇ ਪਤਿਟ੍ਠਂ ਅਲਭਿਤ੍ਵਾ ਵਿਨਾਸਂ ਪਤ੍ਤਕਾਲੋ ਦਸ੍ਸਿਤੋ. ਤਤ੍ਥ ਨਦੀ ਵਿਯ ਅਨਮਤਗ੍ਗੋ ਸਂਸਾਰੋ ਦਟ੍ਠਬ੍ਬੋ, ਨਦਿਯਾ ਵੁਯ੍ਹਮਾਨਂ ਹਤ੍ਥਿਕੁਣਪਂ ਵਿਯ ਸਂਸਾਰੇ ਪਞ੍ਚ ਕਾਮਗੁਣਾ, ਕਾਕੋ ਵਿਯ ਬਾਲਪੁਥੁਜ੍ਜਨੋ, ਕਾਕਸ੍ਸ ਕੁਣਪਂ ਖਾਦਿਤ੍ਵਾ ਪਾਨੀਯਪਿਵਨਕਾਲੋ ਵਿਯ ਪੁਥੁਜ੍ਜਨਸ੍ਸ ਕਾਮਗੁਣੇ ਪਰਿਭੁਞ੍ਜਿਤ੍ਵਾ ਸੋਮਨਸ੍ਸਿਕਕਾਲੋ, ਕਾਕਸ੍ਸ ਕੁਣਪੇ ਲਗ੍ਗਸ੍ਸੇਵ ਰਮਣੀਯਵਨਸਣ੍ਡਦਸ੍ਸਨਂ ਵਿਯ ਪੁਥੁਜ੍ਜਨਸ੍ਸ ਕਾਮਗੁਣੇਸੁ ਲਗ੍ਗਸ੍ਸੇਵ ਸਵਨਵਸੇਨ ਅਟ੍ਠਤਿਂਸਾਰਮ੍ਮਣਦਸ੍ਸਨਂ, ਕੁਣਪੇ ਸਮੁਦ੍ਦਂ ਪਵਿਟ੍ਠੇ ਕਾਕਸ੍ਸ ਪਤਿਟ੍ਠਂ ਲਭਿਤੁਂ ਅਸਕ੍ਕੋਨ੍ਤਸ੍ਸ ਵਿਨਾਸਂ ਪਤ੍ਤਕਾਲੋ ਵਿਯ ਬਾਲਪੁਥੁਜ੍ਜਨਸ੍ਸ ਕਾਮਗੁਣਗਿਦ੍ਧਸ੍ਸ ਪਾਪਪਰਾਯਣਸ੍ਸ ਕੁਸਲਧਮ੍ਮੇ ਪਤਿਟ੍ਠਂ ਲਭਿਤੁਂ ਅਸਕ੍ਕੋਨ੍ਤਸ੍ਸ ਮਹਾਨਿਰਯੇ ਮਹਾਵਿਨਾਸਪਤ੍ਤਿ ਦਟ੍ਠਬ੍ਬਾਤਿ.

ਏਵਮਸ੍ਸ ਸੋ ਇਮਾਯ ਉਪਮਾਯ ਓਵਾਦਂ ਦਤ੍ਵਾ ਇਦਾਨਿ ਤਮੇਵ ਓਵਾਦਂ ਥਿਰਂ ਕਤ੍ਵਾ ਪਤਿਟ੍ਠਪੇਤੁਂ ਗਾਥਮਾਹ –

੩੪.

‘‘ਏਕਵਾਚਮ੍ਪਿ ਦ੍ਵਿਵਾਚਂ, ਭਣੇਯ੍ਯ ਅਨੁਕਮ੍ਪਕੋ;

ਤਤੁਤ੍ਤਰਿਂ ਨ ਭਾਸੇਯ੍ਯ, ਦਾਸੋਵਯ੍ਯਸ੍ਸ ਸਨ੍ਤਿਕੇ’’ਤਿ.

ਤਤ੍ਥ ਨ ਭਾਸੇਯ੍ਯਾਤਿ ਵਚਨਂ ਅਗ੍ਗਣ੍ਹਨ੍ਤਸ੍ਸ ਹਿ ਤਤੋ ਉਤ੍ਤਰਿਂ ਭਾਸਮਾਨੋ ਸਾਮਿਕਸ੍ਸ ਸਨ੍ਤਿਕੇ ਦਾਸੋ ਵਿਯ ਹੋਤਿ. ਦਾਸੋ ਹਿ ਸਾਮਿਕੇ ਕਥਂ ਗਣ੍ਹਨ੍ਤੇਪਿ ਅਗ੍ਗਣ੍ਹਨ੍ਤੇਪਿ ਕਥੇਤਿਯੇਵ. ਤੇਨ ਵੁਤ੍ਤਂ ‘‘ਤਤੁਤ੍ਤਰਿਂ ਨ ਭਾਸੇਯ੍ਯਾ’’ਤਿ.

੩੫.

‘‘ਇਦਂ ਵਤ੍ਵਾਨ ਪਕ੍ਕਾਮਿ, ਸੋਣਕੋ ਅਮਿਤਬੁਦ੍ਧਿਮਾ;

ਵੇਹਾਸੇ ਅਨ੍ਤਲਿਕ੍ਖਸ੍ਮਿਂ, ਅਨੁਸਾਸਿਤ੍ਵਾਨ ਖਤ੍ਤਿਯ’’ਨ੍ਤਿ. –

ਅਯਂ ਅਭਿਸਮ੍ਬੁਦ੍ਧਗਾਥਾ.

ਤਤ੍ਥ ਇਦਂ ਵਤ੍ਵਾਨਾਤਿ, ਭਿਕ੍ਖਵੇ, ਸੋ ਪਚ੍ਚੇਕਬੁਦ੍ਧੋ ਅਮਿਤਾਯ ਲੋਕੁਤ੍ਤਰਬੁਦ੍ਧਿਯਾ ਅਮਿਤਬੁਦ੍ਧਿਮਾ ਇਦਂ ਵਤ੍ਵਾ ਇਦ੍ਧਿਯਾ ਉਪ੍ਪਤਿਤ੍ਵਾ ‘‘ਸਚੇ ਪਬ੍ਬਜਿਸ੍ਸਸਿ, ਤਵੇਵ, ਨੋ ਚੇ ਪਬ੍ਬਜਿਸ੍ਸਸਿ, ਤਵੇਵ, ਦਿਨ੍ਨੋ ਤੇ ਮਯਾ ਓਵਾਦੋ, ਅਪ੍ਪਮਤ੍ਤੋ ਹੋਹੀ’’ਤਿ ਏਵਂ ਅਨੁਸਾਸਿਤ੍ਵਾਨ ਖਤ੍ਤਿਯਂ ਪਕ੍ਕਾਮਿ.

ਬੋਧਿਸਤ੍ਤੋਪਿ ਤਂ ਆਕਾਸੇਨ ਗਚ੍ਛਨ੍ਤਂ ਯਾਵ ਦਸ੍ਸਨਪਥਾ ਓਲੋਕੇਨ੍ਤੋ ਠਤ੍ਵਾ ਤਸ੍ਮਿਂ ਚਕ੍ਖੁਪਥੇ ਅਤਿਕ੍ਕਨ੍ਤੇ ਸਂਵੇਗਂ ਪਟਿਲਭਿਤ੍ਵਾ ਚਿਨ੍ਤੇਸਿ – ‘‘ਅਯਂ ਬ੍ਰਾਹ੍ਮਣੋ ਹੀਨਜਚ੍ਚੋ ਸਮਾਨੋ ਅਸਮ੍ਭਿਨ੍ਨੇ ਖਤ੍ਤਿਯਵਂਸੇ ਜਾਤਸ੍ਸ ਮਮ ਮਤ੍ਥਕੇ ਅਤ੍ਤਨੋ ਪਾਦਰਜਂ ਓਕਿਰਨ੍ਤੋ ਆਕਾਸਂ ਉਪ੍ਪਤਿਤ੍ਵਾ ਗਤੋ, ਮਯਾਪਿ ਅਜ੍ਜੇਵ ਨਿਕ੍ਖਮਿਤ੍ਵਾ ਪਬ੍ਬਜਿਤੁਂ ਵਟ੍ਟਤੀ’’ਤਿ. ਸੋ ਰਜ੍ਜਂ ਨਿਯ੍ਯਾਦੇਤ੍ਵਾ ਪਬ੍ਬਜਿਤੁਕਾਮੋ ਗਾਥਾਦ੍ਵਯਮਾਹ –

੩੬.

‘‘ਕੋ ਨੁਮੇ ਰਾਜਕਤ੍ਤਾਰੋ, ਸੁਦ੍ਦਾ ਵੇਯ੍ਯਤ੍ਤਮਾਗਤਾ;

ਰਜ੍ਜਂ ਨਿਯ੍ਯਾਦਯਿਸ੍ਸਾਮਿ, ਨਾਹਂ ਰਜ੍ਜੇਨ ਮਤ੍ਥਿਕੋ.

੩੭.

‘‘ਅਜ੍ਜੇਵ ਪਬ੍ਬਜਿਸ੍ਸਾਮਿ, ਕੋ ਜਞ੍ਞਾ ਮਰਣਂ ਸੁਵੇ;

ਮਾਹਂ ਕਾਕੋਵ ਦੁਮ੍ਮੇਧੋ, ਕਾਮਾਨਂ ਵਸਮਨ੍ਵਗ’’ਨ੍ਤਿ.

ਤਤ੍ਥ ਕੋ ਨੁਮੇਤਿ ਕੁਹਿਂ ਨੁ ਇਮੇ. ਰਾਜਕਤ੍ਤਾਰੋਤਿ ਯੇ ਰਾਜਾਰਹਂ ਅਭਿਸਿਞ੍ਚਿਤ੍ਵਾ ਰਾਜਾਨਂ ਕਰੋਨ੍ਤਿ. ਸੁਦ੍ਦਾ ਵੇਯ੍ਯਤ੍ਤਮਾਗਤਾਤਿ ਸੁਦ੍ਦਾ ਚ ਯੇ ਚ ਅਞ੍ਞੇ ਬ੍ਯਤ੍ਤਭਾਵਂ ਆਗਤਾ ਮੁਖਮਙ੍ਗਲਿਕਾ. ਰਜ੍ਜੇਨ ਮਤ੍ਥਿਕੋਤਿ ਰਜ੍ਜੇਨ ਅਤ੍ਥਿਕੋ. ਕੋ ਜਞ੍ਞਾ ਮਰਣਂ ਸੁਵੇਤਿ ਮਰਣਂ ਅਜ੍ਜ ਵਾ ਸੁਵੇ ਵਾਤਿ ਇਦਂ ਕੋ ਜਾਨਿਤੁਂ ਸਮਤ੍ਥੋ.

ਏਵਂ ਰਜ੍ਜਂ ਨਿਯ੍ਯਾਦੇਨ੍ਤਸ੍ਸ ਸੁਤ੍ਵਾ ਅਮਚ੍ਚਾ ਆਹਂਸੁ –

੩੮.

‘‘ਅਤ੍ਥਿ ਤੇ ਦਹਰੋ ਪੁਤ੍ਤੋ, ਦੀਘਾਵੁ ਰਟ੍ਠਵਡ੍ਢਨੋ;

ਤਂ ਰਜ੍ਜੇ ਅਭਿਸਿਞ੍ਚਸ੍ਸੁ, ਸੋ ਨੋ ਰਾਜਾ ਭਵਿਸ੍ਸਤੀ’’ਤਿ.

ਤਤੋ ਪਰਂ ਰਞ੍ਞਾ ਵੁਤ੍ਤਗਾਥਮਾਦਿਂ ਕਤ੍ਵਾ ਉਦਾਨਸਮ੍ਬਨ੍ਧਗਾਥਾ ਪਾਲ਼ਿਨਯੇਨੇਵ ਵੇਦਿਤਬ੍ਬਾ –

੩੯.

‘‘ਖਿਪ੍ਪਂ ਕੁਮਾਰਮਾਨੇਥ, ਦੀਘਾਵੁਂ ਰਟ੍ਠਵਡ੍ਢਨਂ;

ਤਂ ਰਜ੍ਜੇ ਅਭਿਸਿਞ੍ਚਿਸ੍ਸਂ, ਸੋ ਵੋ ਰਾਜਾ ਭਵਿਸ੍ਸਤਿ.

੪੦.

‘‘ਤਤੋ ਕੁਮਾਰਮਾਨੇਸੁਂ, ਦੀਘਾਵੁਂ ਰਟ੍ਠਵਡ੍ਢਨਂ;

ਤਂ ਦਿਸ੍ਵਾ ਆਲਪੀ ਰਾਜਾ, ਏਕਪੁਤ੍ਤਂ ਮਨੋਰਮਂ.

੪੧.

‘‘ਸਟ੍ਠਿ ਗਾਮਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;

ਤੇ ਪੁਤ੍ਤ ਪਟਿਪਜ੍ਜਸੁ, ਰਜ੍ਜਂ ਨਿਯ੍ਯਾਦਯਾਮਿ ਤੇ.

੪੨.

‘‘ਅਜ੍ਜੇਵ ਪਬ੍ਬਜਿਸ੍ਸਾਮਿ, ਕੋ ਜਞ੍ਞਾ ਮਰਣਂ ਸੁਵੇ;

ਮਾਹਂ ਕਾਕੋ ਵ ਦੁਮ੍ਮੇਧੋ, ਕਾਮਾਨਂ ਵਸਮਨ੍ਵਗਂ.

੪੩.

‘‘ਸਟ੍ਠਿ ਨਾਗਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਸੁਵਣ੍ਣਕਚ੍ਛਾ ਮਾਤਙ੍ਗਾ, ਹੇਮਕਪ੍ਪਨਵਾਸਸਾ.

੪੪.

‘‘ਆਰੂਲ਼੍ਹਾ ਗਾਮਣੀਯੇਭਿ, ਤੋਮਰਙ੍ਕੁਸਪਾਣਿਭਿ;

ਤੇ ਪੁਤ੍ਤ ਪਟਿਪਜ੍ਜਸ੍ਸੁ, ਰਜ੍ਜਂ ਨਿਯ੍ਯਾਦਯਾਮਿ ਤੇ.

੪੫.

‘‘ਅਜ੍ਜੇਵ ਪਬ੍ਬਜਿਸ੍ਸਾਮਿ, ਕੋ ਜਞ੍ਞਾ ਮਰਣਂ ਸੁਵੇ;

ਮਾਹਂ ਕਾਕੋਵ ਦੁਮ੍ਮੇਧੋ, ਕਾਮਾਨਂ ਵਸਮਨ੍ਵਗਂ.

੪੬.

‘‘ਸਟ੍ਠਿ ਅਸ੍ਸਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਆਜਾਨੀਯਾਵ ਜਾਤਿਯਾ, ਸਿਨ੍ਧਵਾ ਸੀਘਵਾਹਿਨੋ.

੪੭.

‘‘ਆਰੂਲ਼੍ਹਾ ਗਾਮਣੀਯੇਭਿ, ਇਲ੍ਲਿਯਾਚਾਪਧਾਰਿਭਿ;

ਤੇ ਪੁਤ੍ਤ ਪਟਿਪਜ੍ਜਸ੍ਸੁ, ਰਜ੍ਜਂ ਨਿਯ੍ਯਾਦਯਾਮਿ ਤੇ.

੪੮.

‘‘ਅਜ੍ਜੇਵ ਪਬ੍ਬਜਿਸ੍ਸਾਮਿ, ਕੋ ਜਞ੍ਞਾ ਮਰਣਂ ਸੁਵੇ;

ਮਾਹਂ ਕਾਕੋਵ ਦੁਮ੍ਮੇਧੋ, ਕਾਮਾਨਂ ਵਸਮਨ੍ਵਗਂ.

੪੯.

‘‘ਸਟ੍ਠਿ ਰਥਸਹਸ੍ਸਾਨਿ, ਸਨ੍ਨਦ੍ਧਾ ਉਸ੍ਸਿਤਦ੍ਧਜਾ;

ਦੀਪਾ ਅਥੋਪਿ ਵੇਯ੍ਯਗ੍ਘਾ, ਸਬ੍ਬਾਲਙ੍ਕਾਰਭੂਸਿਤਾ.

੫੦.

‘‘ਆਰੂਲ਼੍ਹਾ ਗਾਮਣੀਯੇਭਿ, ਚਾਪਹਤ੍ਥੇਹਿ ਵਮ੍ਮਿਭਿ;

ਤੇ ਪੁਤ੍ਤ ਪਟਿਪਜ੍ਜਸ੍ਸੁ, ਰਜ੍ਜਂ ਨਿਯ੍ਯਾਦਯਾਮਿ ਤੇ.

੫੧.

‘‘ਅਜ੍ਜੇਵ ਪਬ੍ਬਜਿਸ੍ਸਾਮਿ, ਕੋ ਜਞ੍ਞਾ ਮਰਣਂ ਸੁਵੇ;

ਮਾਹਂ ਕਾਕੋਵ ਦੁਮ੍ਮੇਧੋ, ਕਾਮਾਨਂ ਵਸਮਨ੍ਵਗਂ.

੫੨.

‘‘ਸਟ੍ਠਿ ਧੇਨੁਸਹਸ੍ਸਾਨਿ, ਰੋਹਞ੍ਞਾ ਪੁਙ੍ਗਵੂਸਭਾ;

ਤਾ ਪੁਤ੍ਤ ਪਟਿਪਜ੍ਜਸ੍ਸੁ, ਰਜ੍ਜਂ ਨਿਯ੍ਯਾਦਯਾਮਿ ਤੇ.

੫੩.

‘‘ਅਜ੍ਜੇਵ ਪਬ੍ਬਜਿਸ੍ਸਾਮਿ, ਕੋ ਜਞ੍ਞਾ ਮਰਣਂ ਸੁਵੇ;

ਮਾਹਂ ਕਾਕੋਵ ਦੁਮ੍ਮੇਧੋ, ਕਾਮਾਨਂ ਵਸਮਨ੍ਵਗਂ.

੫੪.

‘‘ਸੋਲ਼ਸਿਤ੍ਥਿਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਵਿਚਿਤ੍ਰਵਤ੍ਥਾਭਰਣਾ, ਆਮੁਤ੍ਤਮਣਿਕੁਣ੍ਡਲਾ;

ਤਾ ਪੁਤ੍ਤ ਪਟਿਪਜ੍ਜਸ੍ਸੁ, ਰਜ੍ਜਂ ਨਿਯ੍ਯਾਦਯਾਮਿ ਤੇ.

੫੫.

‘‘ਅਜ੍ਜੇਵ ਪਬ੍ਬਜਿਸ੍ਸਾਮਿ, ਕੋ ਜਞ੍ਞਾ ਮਰਣਂ ਸੁਵੇ;

ਮਾਹਂ ਕਾਕੋਵ ਦੁਮ੍ਮੇਧੋ, ਕਾਮਾਨਂ ਵਸਮਨ੍ਵਗਂ.

੫੬.

‘‘ਦਹਰਸ੍ਸੇਵ ਮੇ ਤਾਤ, ਮਾਤਾ ਮਤਾਤਿ ਮੇ ਸੁਤਂ;

ਤਯਾ ਵਿਨਾ ਅਹਂ ਤਾਤ, ਜੀਵਿਤੁਮ੍ਪਿ ਨ ਉਸ੍ਸਹੇ.

੫੭.

‘‘ਯਥਾ ਆਰਞ੍ਞਕਂ ਨਾਗਂ, ਪੋਤੋ ਅਨ੍ਵੇਤਿ ਪਚ੍ਛਤੋ;

ਜੇਸ੍ਸਨ੍ਤਂ ਗਿਰਿਦੁਗ੍ਗੇਸੁ, ਸਮੇਸੁ ਵਿਸਮੇਸੁ ਚ.

੫੮.

‘‘ਏਵਂ ਤਂ ਅਨੁਗਚ੍ਛਾਮਿ, ਪਤ੍ਤਮਾਦਾਯ ਪਚ੍ਛਤੋ;

ਸੁਭਰੋ ਤੇ ਭਵਿਸ੍ਸਾਮਿ, ਨ ਤੇ ਹੇਸ੍ਸਾਮਿ ਦੁਬ੍ਭਰੋ.

੫੯.

‘‘ਯਥਾ ਸਾਮੁਦ੍ਦਿਕਂ ਨਾਵਂ, ਵਾਣਿਜਾਨਂ ਧਨੇਸਿਨਂ;

ਵੋਹਾਰੋ ਤਤ੍ਥ ਗਣ੍ਹੇਯ੍ਯ, ਵਾਣਿਜਾ ਬ੍ਯਸਨੀ ਸਿਯਾ.

੬੦.

‘‘ਏਵਮੇਵਾਯਂ ਪੁਤ੍ਤਕਲਿ, ਅਨ੍ਤਰਾਯਕਰੋ ਮਮ;

ਇਮਂ ਕੁਮਾਰਂ ਪਾਪੇਥ, ਪਾਸਾਦਂ ਰਤਿਵਡ੍ਢਨਂ.

੬੧.

‘‘ਤਤ੍ਥ ਕਮ੍ਬੁਸਹਤ੍ਥਾਯੋ, ਯਥਾ ਸਕ੍ਕਂਵ ਅਚ੍ਛਰਾ;

ਤਾ ਨਂ ਤਤ੍ਥ ਰਮੇਸ੍ਸਨ੍ਤਿ, ਤਾਹਿ ਚੇਸੋ ਰਮਿਸ੍ਸਤਿ.

੬੨.

‘‘ਤਤੋ ਕੁਮਾਰਂ ਪਾਪੇਸੁਂ, ਪਾਸਾਦਂ ਰਤਿਵਡ੍ਢਨਂ;

ਤਂ ਦਿਸ੍ਵਾ ਅਵਚੁਂ ਕਞ੍ਞਾ, ਦੀਘਾਵੁਂ ਰਟ੍ਠਵਡ੍ਢਨਂ.

੬੩.

‘‘ਦੇਵਤਾਨੁਸਿ ਗਨ੍ਧਬ੍ਬੋ, ਅਦੁ ਸਕ੍ਕੋ ਪੁਰਿਨ੍ਦਦੋ;

ਕੋ ਵਾ ਤ੍ਵਂ ਕਸ੍ਸ ਵਾ ਪੁਤ੍ਤੋ, ਕਥਂ ਜਾਨੇਮੁ ਤਂ ਮਯਂ.

੬੪.

‘‘ਨਮ੍ਹਿ ਦੇਵੋ ਨ ਗਨ੍ਧਬ੍ਬੋ, ਨਾਪਿ ਸਕ੍ਕੋ ਪੁਰਿਨ੍ਦਦੋ;

ਕਾਸਿਰਞ੍ਞੋ ਅਹਂ ਪੁਤ੍ਤੋ, ਦੀਘਾਵੁ ਰਟ੍ਠਵਡ੍ਢਨੋ;

ਮਮਂ ਭਰਥ ਭਦ੍ਦਂ ਵੋ, ਅਹਂ ਭਤ੍ਤਾ ਭਵਾਮਿ ਵੋ.

੬੫.

‘‘ਤਂ ਤਤ੍ਥ ਅਵਚੁਂ ਕਞ੍ਞਾ, ਦੀਘਾਵੁਂ ਰਟ੍ਠਵਡ੍ਢਨਂ;

ਕੁਹਿਂ ਰਾਜਾ ਅਨੁਪ੍ਪਤ੍ਤੋ, ਇਤੋ ਰਾਜਾ ਕੁਹਿਂ ਗਤੋ.

੬੬.

‘‘ਪਙ੍ਕਂ ਰਾਜਾ ਅਤਿਕ੍ਕਨ੍ਤੋ, ਥਲੇ ਰਾਜਾ ਪਤਿਟ੍ਠਿਤੋ;

ਅਕਣ੍ਡਕਂ ਅਗਹਨਂ, ਪਟਿਪਨ੍ਨੋ ਮਹਾਪਥਂ.

੬੭.

‘‘ਅਹਞ੍ਚ ਪਟਿਪਨ੍ਨੋਸ੍ਮਿ, ਮਗ੍ਗਂ ਦੁਗ੍ਗਤਿਗਾਮਿਨਂ;

ਸਕਣ੍ਟਕਂ ਸਗਹਨਂ, ਯੇਨ ਗਚ੍ਛਨ੍ਤਿ ਦੁਗ੍ਗਤਿਂ.

੬੮.

‘‘ਤਸ੍ਸ ਤੇ ਸ੍ਵਾਗਤਂ ਰਾਜ, ਸੀਹਸ੍ਸੇਵ ਗਿਰਿਬ੍ਬਜਂ;

ਅਨੁਸਾਸ ਮਹਾਰਾਜ, ਤ੍ਵਂ ਨੋ ਸਬ੍ਬਾਸਮਿਸ੍ਸਰੋ’’ਤਿ.

ਤਤ੍ਥ ਖਿਪ੍ਪਨ੍ਤਿ ਤੇਨ ਹਿ ਨਂ ਸੀਘਂ ਆਨੇਥ. ਆਲਪੀਤਿ ‘‘ਸਟ੍ਠਿ ਗਾਮਸਹਸ੍ਸਾਨੀ’’ਤਿਆਦੀਨਿ ਵਦਨ੍ਤੋ ਆਲਪਿ. ਸਬ੍ਬਾਲਙ੍ਕਾਰਭੂਸਿਤਾਤਿ ਤੇ ਨਾਗਾ ਸਬ੍ਬੇਹਿ ਸੀਸੂਪਗਾਦੀਹਿ ਅਲਙ੍ਕਾਰੇਹਿ ਭੂਸਿਤਾ. ਹੇਮਕਪ੍ਪਨਵਾਸਸਾਤਿ ਸੁਵਣ੍ਣਖਚਿਤੇਨ ਕਪ੍ਪਨੇਨ ਪਟਿਚ੍ਛਨ੍ਨਸਰੀਰਾ. ਗਾਮਣੀਯੇਭੀਤਿ ਹਤ੍ਥਾਚਰਿਯੇਹਿ. ਆਜਾਨੀਯਾਵਾਤਿ ਕਾਰਣਾਕਾਰਣਵਿਜਾਨਨਕਾ ਵ. ਜਾਤਿਯਾਤਿ ਸਿਨ੍ਧਵਜਾਤਿਯਾ ਸਿਨ੍ਧੁਰਟ੍ਠੇ ਸਿਨ੍ਧੁਨਦੀਤੀਰੇ ਜਾਤਾ. ਗਾਮਣੀਯੇਭੀਤਿ ਅਸ੍ਸਾਚਰਿਯੇਹਿ. ਇਲ੍ਲਿਯਾ ਚਾਪਧਾਰਿਭੀਤਿ ਇਲ੍ਲਿਯਾਵੁਧਞ੍ਚ ਚਾਪਾਵੁਧਞ੍ਚ ਧਾਰੇਨ੍ਤੇਹਿ. ਦੀਪਾ ਅਥੋਪਿ ਵੇਯ੍ਯਗ੍ਘਾਤਿ ਦੀਪਿਚਮ੍ਮਬ੍ਯਗ੍ਘਚਮ੍ਮਪਰਿਵਾਰਾ. ਗਾਮਣੀਯੇਭੀਤਿ ਰਥਿਕੇਹਿ. ਵਮ੍ਮਿਭੀਤਿ ਸਨ੍ਨਦ੍ਧਵਮ੍ਮੇਹਿ. ਰੋਹਞ੍ਞਾਤਿ ਰਤ੍ਤਵਣ੍ਣਾ. ਪੁਙ੍ਗਵੂਸਭਾਤਿ ਉਸਭਸਙ੍ਖਾਤੇਨ ਜੇਟ੍ਠਕਪੁਙ੍ਗਵੇਨ ਸਮਨ੍ਨਾਗਤਾ.

ਦਹਰਸ੍ਸੇਵ ਮੇ, ਤਾਤਾਤਿ ਅਥ ਨਂ ਕੁਮਾਰੋ, ਤਾਤ, ਮਮ ਦਹਰਸ੍ਸੇਵ ਸਤੋ ਮਾਤਾ ਮਤਾ ਇਤਿ ਮਯਾ ਸੁਤਂ, ਸੋਹਂ ਤਯਾ ਵਿਨਾ ਜੀਵਿਤੁਂ ਨ ਸਕ੍ਖਿਸ੍ਸਾਮੀਤਿ ਆਹ. ਪੋਤੋਤਿ ਤਰੁਣਪੋਤਕੋ. ਜੇਸ੍ਸਨ੍ਤਨ੍ਤਿ ਵਿਚਰਨ੍ਤਂ. ਸਾਮੁਦ੍ਦਿਕਨ੍ਤਿ ਸਮੁਦ੍ਦੇ ਵਿਚਰਨ੍ਤਂ. ਧਨੇਸਿਨਨ੍ਤਿ ਧਨਂ ਪਰਿਯੇਸਨ੍ਤਾਨਂ. ਵੋਹਾਰੋਤਿ ਵਿਚਿਤ੍ਰਵੋਹਾਰੋ ਹੇਟ੍ਠਾਕਡ੍ਢਨਕੋ ਵਾਲ਼ਮਚ੍ਛੋ ਵਾ ਉਦਕਰਕ੍ਖਸੋ ਵਾ ਆਵਟ੍ਟੋ ਵਾ. ਤਤ੍ਥਾਤਿ ਤਸ੍ਮਿਂ ਸਮੁਦ੍ਦੇ. ਵਾਣਿਜਾ ਬ੍ਯਸਨੀ ਸਿਯਾਤਿ ਅਥ ਤੇ ਵਾਣਿਜਾ ਬ੍ਯਸਨਪ੍ਪਤ੍ਤਾ ਭਵੇਯ੍ਯੁਂ. ‘‘ਸਿਯ੍ਯੁਨ੍ਤਿ’’ਪਿ ਪਾਠੋ. ਪੁਤ੍ਤਕਲੀਤਿ ਪੁਤ੍ਤਲਾਮਕੋ ਪੁਤ੍ਤਕਾਲ਼ਕਣ੍ਣੀ. ਕੁਮਾਰੋ ਪੁਨ ਕਿਞ੍ਚਿ ਵਤ੍ਤੁਂ ਨ ਵਿਸਹਿ. ਅਥ ਰਾਜਾ ਅਮਚ੍ਚੇ ਆਣਾਪੇਨ੍ਤੋ ‘‘ਇਮ’’ਨ੍ਤਿਆਦਿਮਾਹ. ਤਤ੍ਥ ਕਮ੍ਬੁਸਹਤ੍ਥਾਯੋਤਿ ਕਮ੍ਬੁਸਂ ਵੁਚ੍ਚਤਿ ਸੁਵਣ੍ਣਂ, ਸੁਵਣ੍ਣਾਭਰਣਭੂਸਿਤਹਤ੍ਥਾਯੋਤਿ ਅਤ੍ਥੋ. ਯਥਾਤਿ ਯਥਾ ਇਚ੍ਛਨ੍ਤਿ, ਤਥਾ ਕਰੋਨ੍ਤਿ.

ਏਵਂ ਵਤ੍ਵਾ ਮਹਾਸਤ੍ਤੋ ਤਤ੍ਥੇਵ ਤਂ ਅਭਿਸਿਞ੍ਚਾਪੇਤ੍ਵਾ ਨਗਰਂ ਪਾਹੇਸਿ. ਸਯਂ ਪਨ ਏਕਕੋਵ ਉਯ੍ਯਾਨਾ ਨਿਕ੍ਖਮਿਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਰਮਣੀਯੇ ਭੂਮਿਭਾਗੇ ਪਣ੍ਣਸਾਲਂ ਮਾਪੇਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਨਮੂਲਫਲਾਹਾਰੋ ਯਾਪੇਸਿ. ਮਹਾਜਨੋਪਿ ਕੁਮਾਰਂ ਬਾਰਾਣਸਿਂ ਪਵੇਸੇਸਿ. ਸੋ ਨਗਰਂ ਪਦਕ੍ਖਿਣਂ ਕਤ੍ਵਾ ਪਾਸਾਦਂ ਅਭਿਰੁਹਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ‘‘ਤਤੋ’’ਤਿਆਦਿਮਾਹ. ਤਂ ਦਿਸ੍ਵਾ ਅਵਚੁਂ ਕਞ੍ਞਾਤਿ ਤਂ ਮਹਨ੍ਤੇਨ ਪਰਿਵਾਰੇਨ ਸਿਰਿਸੋਭਗ੍ਗੇਨ ਆਗਤਂ ਦਿਸ੍ਵਾ ‘‘ਅਸੁਕੋ ਨਾਮੇਸੋ’’ਤਿ ਅਜਾਨਨ੍ਤਿਯੋਵ ਤਾ ਨਾਟਕਿਤ੍ਥਿਯੋ ਗਨ੍ਤ੍ਵਾ ਅਵੋਚੁਂ. ਮਮਂ ਭਰਥਾਤਿ ਮਮਂ ਇਚ੍ਛਥ. ਪਙ੍ਕਨ੍ਤਿ ਰਾਗਾਦਿਕਿਲੇਸਪਙ੍ਕਂ. ਥਲੇਤਿ ਪਬ੍ਬਜ੍ਜਾਯ. ਅਕਣ੍ਟਕਨ੍ਤਿ ਰਾਗਕਣ੍ਟਕਾਦਿਵਿਰਹਿਤਂ. ਤੇਹੇਵ ਗਹਨੇਹਿ ਅਗਹਨਂ. ਮਹਾਪਥਨ੍ਤਿ ਸਗ੍ਗਮੋਕ੍ਖਗਾਮਿਨਂ ਮਹਾਮਗ੍ਗਂ ਪਟਿਪਨ੍ਨੋ. ਯੇਨਾਤਿ ਯੇਨ ਮਿਚ੍ਛਾਮਗ੍ਗੇਨ ਦੁਗ੍ਗਤਿਂ ਗਚ੍ਛਨ੍ਤਿ, ਤਂ ਅਹਂ ਪਟਿਪਨ੍ਨੋਤਿ ਵਦਤਿ. ਤਤੋ ਤਾ ਚਿਨ੍ਤੇਸੁਂ – ‘‘ਰਾਜਾ ਤਾਵ ਅਮ੍ਹੇ ਪਹਾਯ ਪਬ੍ਬਜਿਤੋ, ਅਯਮ੍ਪਿ ਕਾਮੇਸੁ ਵਿਰਤ੍ਤਚਿਤ੍ਤਰੂਪੋ, ਸਚੇ ਨਂ ਨਾਭਿਰਮੇਸ੍ਸਾਮ, ਨਿਕ੍ਖਮਿਤ੍ਵਾ ਪਬ੍ਬਜੇਯ੍ਯ, ਅਭਿਰਮਨਾਕਾਰਮਸ੍ਸ ਕਰਿਸ੍ਸਾਮਾ’’ਤਿ. ਅਥ ਨਂ ਅਭਿਨਨ੍ਦਨ੍ਤਿਯੋ ਓਸਾਨਗਾਥਮਾਹਂਸੁ. ਤਤ੍ਥ ਗਿਰਿਬ੍ਬਜਨ੍ਤਿ ਸੀਹਪੋਤਕਾਨਂ ਵਸਨਟ੍ਠਾਨਂ ਕਞ੍ਚਨਗੁਹਂ ਕੇਸਰਸੀਹਸ੍ਸ ਆਗਤਂ ਵਿਯ ਤਸ੍ਸ ਤਵ ਆਗਤਂ ਸੁਆਗਤਂ. ਤ੍ਵਂ ਨੋਤਿ ਤ੍ਵਂ ਸਬ੍ਬਾਸਮ੍ਪਿ ਅਮ੍ਹਾਕਂ ਇਸ੍ਸਰੋ, ਸਾਮੀਤਿ.

ਏਵਞ੍ਚ ਪਨ ਵਤ੍ਵਾ ਸਬ੍ਬਾ ਤੂਰਿਯਾਨਿ ਪਗ੍ਗਣ੍ਹਿਂਸੁ, ਨਾਨਪ੍ਪਕਾਰਾਨਿ ਨਚ੍ਚਗੀਤਾਨਿ ਪਵਤ੍ਤਿਂਸੁ. ਯਸੋ ਮਹਾ ਅਹੋਸਿ, ਸੋ ਯਸਮਦਮਤ੍ਤੋ ਪਿਤਰਂ ਨ ਸਰਿ, ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਯਥਾਕਮ੍ਮਂ ਗਤੋ. ਬੋਧਿਸਤ੍ਤੋਪਿ ਝਾਨਾਭਿਞ੍ਞਾ ਨਿਬ੍ਬਤ੍ਤੇਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਤਥਾਗਤੋ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪਚ੍ਚੇਕਬੁਦ੍ਧੋ ਪਰਿਨਿਬ੍ਬਾਯਿ, ਪੁਤ੍ਤੋ ਰਾਹੁਲਕੁਮਾਰੋ ਅਹੋਸਿ, ਸੇਸਪਰਿਸਾ ਬੁਦ੍ਧਪਰਿਸਾ, ਅਰਿਨ੍ਦਮਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੋਣਕਜਾਤਕਵਣ੍ਣਨਾ ਪਠਮਾ.

[੫੩੦] ੨. ਸਂਕਿਚ੍ਚਜਾਤਕਵਣ੍ਣਨਾ

ਦਿਸ੍ਵਾ ਨਿਸਿਨ੍ਨਂ ਰਾਜਾਨਨ੍ਤਿ ਇਦਂ ਸਤ੍ਥਾ ਜੀਵਕਮ੍ਬਵਨੇ ਵਿਹਰਨ੍ਤੋ ਅਜਾਤਸਤ੍ਤੁਸ੍ਸ ਪਿਤੁਘਾਤਕਮ੍ਮਂ ਆਰਬ੍ਭ ਕਥੇਸਿ. ਸੋ ਹਿ ਦੇਵਦਤ੍ਤਂ ਨਿਸ੍ਸਾਯ ਤਸ੍ਸ ਵਚਨੇਨ ਪਿਤਰਂ ਘਾਤਾਪੇਤ੍ਵਾ ਦੇਵਦਤ੍ਤਸ੍ਸ ਸਙ੍ਘਭੇਦਾਵਸਾਨੇ ਭਿਨ੍ਨਪਰਿਸਸ੍ਸ ਰੋਗੇ ਉਪ੍ਪਨ੍ਨੇ ‘‘ਤਥਾਗਤਂ ਖਮਾਪੇਸ੍ਸਾਮੀ’’ਤਿ ਮਞ੍ਚਸਿਵਿਕਾਯ ਸਾਵਤ੍ਥਿਂ ਗਚ੍ਛਨ੍ਤਸ੍ਸ ਜੇਤਵਨਦ੍ਵਾਰੇ ਪਥਵਿਂ ਪਵਿਟ੍ਠਭਾਵਂ ਸੁਤ੍ਵਾ ‘‘ਦੇਵਦਤ੍ਤੋ ਸਮ੍ਮਾਸਮ੍ਬੁਦ੍ਧਸ੍ਸ ਪਟਿਪਕ੍ਖੋ ਹੁਤ੍ਵਾ ਪਥਵਿਂ ਪਵਿਸਿਤ੍ਵਾ ਅਵੀਚਿਪਰਾਯਣੋ ਜਾਤੋ, ਮਯਾਪਿ ਤਂ ਨਿਸ੍ਸਾਯ ਪਿਤਾ ਧਮ੍ਮਿਕੋ ਧਮ੍ਮਰਾਜਾ ਘਾਤਿਤੋ, ਅਹਮ੍ਪਿ ਨੁ ਖੋ ਪਥਵਿਂ ਪਵਿਸਿਸ੍ਸਾਮੀ’’ਤਿ ਭੀਤੋ ਰਜ੍ਜਸਿਰਿਯਾ ਚਿਤ੍ਤਸ੍ਸਾਦਂ ਨ ਲਭਿ, ‘‘ਥੋਕਂ ਨਿਦ੍ਦਾਯਿਸ੍ਸਾਮੀ’’ਤਿ ਨਿਦ੍ਦਂ ਉਪਗਤਮਤ੍ਤੋਵ ਨਵਯੋਜਨਬਹਲਾਯਂ ਅਯਮਹਾਪਥਵਿਯਂ ਪਾਤੇਤ੍ਵਾ ਅਯਸੂਲੇਹਿ ਕੋਟ੍ਟਿਯਮਾਨੋ ਵਿਯ ਸੁਨਖੇਹਿ ਲੁਞ੍ਜਿਤ੍ਵਾ ਖਜ੍ਜਮਾਨੋ ਵਿਯ ਭੇਰਵਰਵੇਨ ਵਿਰਵਨ੍ਤੋ ਉਟ੍ਠਾਤਿ.

ਅਥੇਕਦਿਵਸਂ ਕੋਮੁਦਿਯਾ ਚਾਤੁਮਾਸਿਨਿਯਾ ਅਮਚ੍ਚਗਣਪਰਿਵੁਤੋ ਅਤ੍ਤਨੋ ਯਸਂ ਓਲੋਕੇਤ੍ਵਾ ‘‘ਮਮ ਪਿਤੁ ਯਸੋ ਇਤੋ ਮਹਨ੍ਤਤਰੋ, ਤਥਾਰੂਪਂ ਨਾਮ ਅਹਂ ਧਮ੍ਮਰਾਜਾਨਂ ਦੇਵਦਤ੍ਤਂ ਨਿਸ੍ਸਾਯ ਘਾਤੇਸਿ’’ਨ੍ਤਿ ਚਿਨ੍ਤੇਸਿ. ਤਸ੍ਸੇਵਂ ਚਿਨ੍ਤੇਨ੍ਤਸ੍ਸੇਵ ਕਾਯੇ ਡਾਹੋ ਉਪ੍ਪਜ੍ਜਿ, ਸਕਲਸਰੀਰਂ ਸੇਦਤਿਨ੍ਤਂ ਅਹੋਸਿ. ਤਤੋ ‘‘ਕੋ ਨੁ ਖੋ ਮੇ ਇਮਂ ਭਯਂ ਵਿਨੋਦੇਤੁਂ ਸਕ੍ਖਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ‘‘ਠਪੇਤ੍ਵਾ ਦਸਬਲਂ ਅਞ੍ਞੋ ਨਤ੍ਥੀ’’ਤਿ ਞਤ੍ਵਾ ‘‘ਅਹਂ ਤਥਾਗਤਸ੍ਸ ਮਹਾਪਰਾਧੋ, ਕੋ ਨੁ ਖੋ ਮਂ ਨੇਤ੍ਵਾ ਦਸ੍ਸੇਸ੍ਸਤੀ’’ਤਿ ਚਿਨ੍ਤੇਨ੍ਤੋ ‘‘ਨ ਅਞ੍ਞੋ ਕੋਚਿ ਅਞ੍ਞਤ੍ਰ ਜੀਵਕਾ’’ਤਿ ਸਲ੍ਲਕ੍ਖੇਤ੍ਵਾ ਤਸ੍ਸ ਗਹੇਤ੍ਵਾ ਗਮਨੂਪਾਯਂ ਕਰੋਨ੍ਤੋ ‘‘ਰਮਣੀਯਾ ਵਤ, ਭੋ, ਦੋਸਿਨਾ ਰਤ੍ਤੀ’’ਤਿ ਉਦਾਨਂ ਉਦਾਨੇਤ੍ਵਾ ‘‘ਕਂ ਨੁ ਖ੍ਵਜ੍ਜ ਸਮਣਂ ਵਾ ਬ੍ਰਾਹ੍ਮਣਂ ਵਾ ਪਯਿਰੁਪਾਸੇਯ੍ਯਾਮੀ’’ਤਿ ਵਤ੍ਵਾ ਪੂਰਣਸਾਵਕਾਦੀਹਿ ਪੂਰਣਾਦੀਨਂ ਗੁਣੇ ਕਥਿਤੇ ਤੇਸਂ ਵਚਨਂ ਅਨਾਦਿਯਿਤ੍ਵਾ ਜੀਵਕਂ ਪਟਿਪੁਚ੍ਛਿਤ੍ਵਾ ਤੇਨ ਤਥਾਗਤਸ੍ਸ ਗੁਣਂ ਕਥੇਤ੍ਵਾ ‘‘ਤਂ ਦੇਵੋ ਭਗਵਨ੍ਤਂ ਪਯਿਰੁਪਾਸਤੂ’’ਤਿ ਵੁਤ੍ਤੋ ਹਤ੍ਥਿਯਾਨਾਨਿ ਕਪ੍ਪਾਪੇਤ੍ਵਾ ਜੀਵਕਮ੍ਬਵਨਂ ਗਨ੍ਤ੍ਵਾ ਤਥਾਗਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਤਥਾਗਤੇਨ ਕਤਪਟਿਸਨ੍ਥਾਰੋ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਚ੍ਛਿਤ੍ਵਾ ਤਥਾਗਤਸ੍ਸ ਮਧੁਰਂ ਸਾਮਞ੍ਞਫਲਧਮ੍ਮਦੇਸਨਂ (ਦੀ. ਨਿ. ੧.੧੫੦ ਆਦਯੋ) ਸੁਤ੍ਵਾ ਸੁਤ੍ਤਪਰਿਯੋਸਾਨੇ ਉਪਾਸਕਤ੍ਤਂ ਪਟਿਵੇਦਿਤ੍ਵਾ ਤਥਾਗਤਂ ਖਮਾਪੇਤ੍ਵਾ ਪਕ੍ਕਾਮਿ. ਸੋ ਤਤੋ ਪਟ੍ਠਾਯ ਦਾਨਂ ਦੇਨ੍ਤੋ ਸੀਲਂ ਰਕ੍ਖਨ੍ਤੋ ਤਥਾਗਤੇਨ ਸਦ੍ਧਿਂ ਸਂਸਗ੍ਗਂ ਕਤ੍ਵਾ ਮਧੁਰਧਮ੍ਮਕਥਂ ਸੁਣਨ੍ਤੋ ਕਲ੍ਯਾਣਮਿਤ੍ਤਸਂਸਗ੍ਗੇਨ ਪਹੀਨਭਯੋ ਵਿਗਤਲੋਮਹਂਸੋ ਹੁਤ੍ਵਾ ਚਿਤ੍ਤਸ੍ਸਾਦਂ ਪਟਿਲਭਿਤ੍ਵਾ ਸੁਖੇਨ ਚਤ੍ਤਾਰੋ ਇਰਿਯਾਪਥੇ ਕਪ੍ਪੇਸਿ.

ਅਥੇਕਦਿਵਸਂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਆਵੁਸੋ, ਅਜਾਤਸਤ੍ਤੁ ਪਿਤੁਘਾਤਕਮ੍ਮਂ ਕਤ੍ਵਾ ਭਯਪ੍ਪਤ੍ਤੋ ਅਹੋਸਿ, ਰਜ੍ਜਸਿਰਿਂ ਨਿਸ੍ਸਾਯ ਚਿਤ੍ਤਸ੍ਸਾਦਂ ਅਲਭਨ੍ਤੋ ਸਬ੍ਬਇਰਿਯਾਪਥੇਸੁ ਦੁਕ੍ਖਂ ਅਨੁਭੋਤਿ, ਸੋ ਦਾਨਿ ਤਥਾਗਤਂ ਆਗਮ੍ਮ ਕਲ੍ਯਾਣਮਿਤ੍ਤਸਂਸਗ੍ਗੇਨ ਵਿਗਤਭਯੋ ਇਸ੍ਸਰਿਯਸੁਖਂ ਅਨੁਭੋਤੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਸ ਪਿਤੁਘਾਤਕਮ੍ਮਂ ਕਤ੍ਵਾ ਮਂ ਨਿਸ੍ਸਾਯ ਸੁਖਂ ਸਯੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਰਜ੍ਜਂ ਕਾਰੇਨ੍ਤੋ ਬ੍ਰਹ੍ਮਦਤ੍ਤਕੁਮਾਰਂ ਨਾਮ ਪੁਤ੍ਤਂ ਪਟਿਲਭਿ. ਤਦਾ ਬੋਧਿਸਤ੍ਤੋ ਪੁਰੋਹਿਤਸ੍ਸ ਗੇਹੇ ਪਟਿਸਨ੍ਧਿਂ ਗਣ੍ਹਿ, ਜਾਤਸ੍ਸੇਵਸ੍ਸ ‘‘ਸਂਕਿਚ੍ਚਕੁਮਾਰੋ’’ਤਿ ਨਾਮਂ ਕਰਿਂਸੁ. ਤੇ ਉਭੋਪਿ ਰਾਜਨਿਵੇਸਨੇ ਏਕਤੋਵ ਵਡ੍ਢਿਂਸੁ. ਅਞ੍ਞਮਞ੍ਞਂ ਸਹਾਯਕਾ ਹੁਤ੍ਵਾ ਵਯਪ੍ਪਤ੍ਤਾ ਤਕ੍ਕਸਿਲਂ ਗਨ੍ਤ੍ਵਾ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਪਚ੍ਚਾਗਮਿਂਸੁ. ਅਥ ਰਾਜਾ ਪੁਤ੍ਤਸ੍ਸ ਉਪਰਜ੍ਜਂ ਅਦਾਸਿ. ਬੋਧਿਸਤ੍ਤੋਪਿ ਉਪਰਾਜਸ੍ਸੇਵ ਸਨ੍ਤਿਕੇ ਅਹੋਸਿ. ਅਥੇਕਦਿਵਸਂ ਉਪਰਾਜਾ ਪਿਤੁ ਉਯ੍ਯਾਨਕੀਲ਼ਂ ਗਚ੍ਛਨ੍ਤਸ੍ਸ ਮਹਨ੍ਤਂ ਯਸਂ ਦਿਸ੍ਵਾ ਤਸ੍ਮਿਂ ਲੋਭਂ ਉਪ੍ਪਾਦੇਤ੍ਵਾ ‘‘ਮਯ੍ਹਂ ਪਿਤਾ ਮਮ ਭਾਤਿਕਸਦਿਸੋ, ਸਚੇ ਏਤਸ੍ਸ ਮਰਣਂ ਓਲੋਕੇਸ੍ਸਾਮਿ, ਮਹਲ੍ਲਕਕਾਲੇ ਰਜ੍ਜਂ ਲਭਿਸ੍ਸਾਮਿ, ਤਦਾ ਲਦ੍ਧੇਨਪਿ ਰਜ੍ਜੇਨ ਕੋ ਅਤ੍ਥੋ, ਪਿਤਰਂ ਮਾਰੇਤ੍ਵਾ ਰਜ੍ਜਂ ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਬੋਧਿਸਤ੍ਤਸ੍ਸ ਤਮਤ੍ਥਂ ਆਰੋਚੇਸਿ. ਬੋਧਿਸਤ੍ਤੋ, ‘‘ਸਮ੍ਮ, ਪਿਤੁਘਾਤਕਮ੍ਮਂ ਨਾਮ ਭਾਰਿਯਂ, ਨਿਰਯਮਗ੍ਗੋ, ਨ ਸਕ੍ਕਾ ਏਤਂ ਕਾਤੁਂ, ਮਾ ਕਰੀ’’ਤਿ ਪਟਿਬਾਹਿ. ਸੋ ਪੁਨਪ੍ਪੁਨਮ੍ਪਿ ਕਥੇਤ੍ਵਾ ਯਾਵਤਤਿਯਂ ਤੇਨ ਪਟਿਬਾਹਿਤੋ ਪਾਦਮੂਲਿਕੇਹਿ ਸਦ੍ਧਿਂ ਮਨ੍ਤੇਸਿ. ਤੇਪਿ ਸਮ੍ਪਟਿਚ੍ਛਿਤ੍ਵਾ ਰਞ੍ਞੋ ਮਾਰਣੂਪਾਯਂ ਵੀਮਂਸਿਂਸੁ. ਬੋਧਿਸਤ੍ਤੋ ਤਂ ਪਵਤ੍ਤਿਂ ਞਤ੍ਵਾ ‘‘ਨਾਹਂ ਏਤੇਹਿ ਸਦ੍ਧਿਂ ਏਕਤੋ ਭਵਿਸ੍ਸਾਮੀ’’ਤਿ ਮਾਤਾਪਿਤਰੋ ਅਨਾਪੁਚ੍ਛਿਤ੍ਵਾਵ ਅਗ੍ਗਦ੍ਵਾਰੇਨ ਨਿਕ੍ਖਮਿਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਾ ਨਿਬ੍ਬਤ੍ਤੇਤ੍ਵਾ ਵਨਮੂਲਫਲਾਹਾਰੋ ਵਿਹਾਸਿ.

ਰਾਜਕੁਮਾਰੋਪਿ ਤਸ੍ਮਿਂ ਗਤੇ ਪਿਤਰਂ ਮਾਰਾਪੇਤ੍ਵਾ ਮਹਨ੍ਤਂ ਯਸਂ ਅਨੁਭਵਿ. ‘‘ਸਂਕਿਚ੍ਚਕੁਮਾਰੋ ਕਿਰ ਇਸਿਪਬ੍ਬਜ੍ਜਂ ਪਬ੍ਬਜਿਤੋ’’ਤਿ ਸੁਤ੍ਵਾ ਬਹੂ ਕੁਲਪੁਤ੍ਤਾ ਨਿਕ੍ਖਮਿਤ੍ਵਾ ਤਸ੍ਸ ਸਨ੍ਤਿਕੇ ਪਬ੍ਬਜਿਂਸੁ. ਸੋ ਮਹਤਾ ਇਸਿਗਣੇਨ ਪਰਿਵੁਤੋ ਤਤ੍ਥ ਵਸਿ. ਸਬ੍ਬੇਪਿ ਸਮਾਪਤ੍ਤਿਲਾਭਿਨੋਯੇਵ. ਰਾਜਾਪਿ ਪਿਤਰਂ ਮਾਰੇਤ੍ਵਾ ਅਪ੍ਪਮਤ੍ਤਕਂਯੇਵ ਕਾਲਂ ਰਜ੍ਜਸੁਖਂ ਅਨੁਭਵਿਤ੍ਵਾ ਤਤੋ ਪਟ੍ਠਾਯ ਭੀਤੋ ਚਿਤ੍ਤਸ੍ਸਾਦਂ ਅਲਭਨ੍ਤੋ ਨਿਰਯੇ ਕਮ੍ਮਕਰਣਪ੍ਪਤ੍ਤੋ ਵਿਯ ਅਹੋਸਿ. ਸੋ ਬੋਧਿਸਤ੍ਤਂ ਅਨੁਸ੍ਸਰਿਤ੍ਵਾ ‘‘ਸਹਾਯੋ ਮੇ ‘ਪਿਤੁਘਾਤਕਮ੍ਮਂ ਭਾਰਿਯਂ, ਮਾ ਕਰੀ’ਤਿ ਪਟਿਸੇਧੇਤ੍ਵਾ ਮਂ ਅਤ੍ਤਨੋ ਕਥਂ ਗਾਹਾਪੇਤੁਂ ਅਸਕ੍ਕੋਨ੍ਤੋ ਅਤ੍ਤਾਨਂ ਨਿਦ੍ਦੋਸਂ ਕਤ੍ਵਾ ਪਲਾਯਿ. ਸਚੇ ਸੋ ਇਧ ਅਭਵਿਸ੍ਸ, ਨ ਮੇ ਪਿਤੁਘਾਤਕਮ੍ਮਂ ਕਾਤੁਂ ਅਦਸ੍ਸ, ਇਦਮ੍ਪਿ ਮੇ ਭਯਂ ਹਰੇਯ੍ਯ, ਕਹਂ ਨੁ ਖੋ ਸੋ ਏਤਰਹਿ ਵਿਹਰਤਿ. ਸਚੇ ਤਸ੍ਸ ਵਸਨਟ੍ਠਾਨਂ ਜਾਨੇਯ੍ਯਂ, ਪਕ੍ਕੋਸਾਪੇਯ੍ਯਂ, ਕੋ ਨੁ ਖੋ ਮੇ ਤਸ੍ਸ ਵਸਨਟ੍ਠਾਨਂ ਆਰੋਚੇਯ੍ਯਾ’’ਤਿ ਚਿਨ੍ਤੇਸਿ. ਸੋ ਤਤੋ ਪਟ੍ਠਾਯ ਅਨ੍ਤੇਪੁਰੇ ਚ ਰਾਜਸਭਾਯਞ੍ਚ ਬੋਧਿਸਤ੍ਤਸ੍ਸੇਵ ਵਣ੍ਣਂ ਭਾਸਤਿ.

ਏਵਂ ਅਦ੍ਧਾਨੇ ਗਤੇ ਬੋਧਿਸਤ੍ਤੋ ‘‘ਰਾਜਾ ਮਂ ਸਰਤਿ, ਮਯਾ ਤਤ੍ਥ ਗਨ੍ਤ੍ਵਾ ਤਸ੍ਸ ਧਮ੍ਮਂ ਦੇਸੇਤ੍ਵਾ ਤਂ ਨਿਬ੍ਭਯਂ ਕਤ੍ਵਾ ਆਗਨ੍ਤੁਂ ਵਟ੍ਟਤੀ’’ਤਿ ਪਣ੍ਣਾਸ ਵਸ੍ਸਾਨਿ ਹਿਮਵਨ੍ਤੇ ਵਸਿਤ੍ਵਾ ਪਞ੍ਚਸਤਤਾਪਸਪਰਿਵੁਤੋ ਆਕਾਸੇਨਾਗਨ੍ਤ੍ਵਾ ਦਾਯਪਸ੍ਸੇ ਨਾਮ ਉਯ੍ਯਾਨੇ ਓਤਰਿਤ੍ਵਾ ਇਸਿਗਣਪਰਿਵੁਤੋ ਸਿਲਾਪਟ੍ਟੇ ਨਿਸੀਦਿ. ਉਯ੍ਯਾਨਪਾਲੋ ਤਂ ਦਿਸ੍ਵਾ ‘‘ਭਨ੍ਤੇ, ਗਣਸਤ੍ਥਾ ਕੋਨਾਮੋ’’ਤਿ ਪੁਚ੍ਛਿਤ੍ਵਾ ‘‘ਸਂਕਿਚ੍ਚਪਣ੍ਡਿਤੋ ਨਾਮਾ’’ਤਿ ਚ ਸੁਤ੍ਵਾ ਸਯਮ੍ਪਿ ਸਞ੍ਜਾਨਿਤ੍ਵਾ ‘‘ਭਨ੍ਤੇ, ਯਾਵਾਹਂ ਰਾਜਾਨਂ ਆਨੇਮਿ, ਤਾਵ ਇਧੇਵ ਹੋਥ, ਅਮ੍ਹਾਕਂ ਰਾਜਾ ਤੁਮ੍ਹੇ ਦਟ੍ਠੁਕਾਮੋ’’ਤਿ ਵਤ੍ਵਾ ਵੇਗੇਨ ਰਾਜਕੁਲਂ ਗਨ੍ਤ੍ਵਾ ਤਸ੍ਸ ਆਗਤਭਾਵਂ ਰਞ੍ਞੋ ਆਰੋਚੇਸਿ. ਰਾਜਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਕਤ੍ਤਬ੍ਬਯੁਤ੍ਤਕਂ ਉਪਹਾਰਂ ਕਤ੍ਵਾ ਪਞ੍ਹਂ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੬੯.

‘‘ਦਿਸ੍ਵਾ ਨਿਸਿਨ੍ਨਂ ਰਾਜਾਨਂ, ਬ੍ਰਹ੍ਮਦਤ੍ਤਂ ਰਥੇਸਭਂ;

ਅਥਸ੍ਸ ਪਟਿਵੇਦੇਸਿ, ਯਸ੍ਸਾਸਿ ਅਨੁਕਮ੍ਪਕੋ.

੭੦.

‘‘ਸਂਕਿਚ੍ਚਾਯਂ ਅਨੁਪ੍ਪਤ੍ਤੋ, ਇਸੀਨਂ ਸਾਧੁਸਮ੍ਮਤੋ;

ਤਰਮਾਨਰੂਪੋ ਨਿਯ੍ਯਾਹਿ, ਖਿਪ੍ਪਂ ਪਸ੍ਸ ਮਹੇਸਿਨਂ.

੭੧.

‘‘ਤਤੋ ਚ ਰਾਜਾ ਤਰਮਾਨੋ, ਯੁਤ੍ਤਮਾਰੁਯ੍ਹ ਸਨ੍ਦਨਂ;

ਮਿਤ੍ਤਾਮਚ੍ਚਪਰਿਬ੍ਯੂਲ਼੍ਹੋ, ਅਗਮਾਸਿ ਰਥੇਸਭੋ.

੭੨.

‘‘ਨਿਕ੍ਖਿਪ੍ਪ ਪਞ੍ਚ ਕਕੁਧਾਨਿ, ਕਾਸੀਨਂ ਰਟ੍ਠਵਡ੍ਢਨੋ;

ਵਾਲਬੀਜਨਿਮੁਣ੍ਹੀਸਂ, ਖਗ੍ਗਂ ਛਤ੍ਤਞ੍ਚੁਪਾਹਨਂ.

੭੩.

‘‘ਓਰੁਯ੍ਹ ਰਾਜਾ ਯਾਨਮ੍ਹਾ, ਠਪਯਿਤ੍ਵਾ ਪਟਿਚ੍ਛਦਂ;

ਆਸੀਨਂ ਦਾਯਪਸ੍ਸਸ੍ਮਿਂ, ਸਂਕਿਚ੍ਚਮੁਪਸਙ੍ਕਮਿ.

੭੪.

‘‘ਉਪਸਙ੍ਕਮਿਤ੍ਵਾ ਸੋ ਰਾਜਾ, ਸਮ੍ਮੋਦਿ ਇਸਿਨਾ ਸਹ;

ਤਂ ਕਥਂ ਵੀਤਿਸਾਰੇਤ੍ਵਾ, ਏਕਮਨ੍ਤਂ ਉਪਾਵਿਸਿ.

੭੫.

‘‘ਏਕਮਨ੍ਤਂ ਨਿਸਿਨ੍ਨੋਵ, ਅਥ ਕਾਲਂ ਅਮਞ੍ਞਥ;

ਤਤੋ ਪਾਪਾਨਿ ਕਮ੍ਮਾਨਿ, ਪੁਚ੍ਛਿਤੁਂ ਪਟਿਪਜ੍ਜਥ.

੭੬.

‘‘ਇਸਿਂ ਪੁਚ੍ਛਾਮ ਸਂਕਿਚ੍ਚਂ, ਇਸੀਨਂ ਸਾਧੁਸਮ੍ਮਤਂ;

ਆਸੀਨਂ ਦਾਯਪਸ੍ਸਸ੍ਮਿਂ, ਇਸਿਸਙ੍ਘਪੁਰਕ੍ਖਤਂ.

੭੭.

‘‘ਕਂ ਗਤਿਂ ਪੇਚ੍ਚ ਗਚ੍ਛਨ੍ਤਿ, ਨਰਾ ਧਮ੍ਮਾਤਿਚਾਰਿਨੋ;

ਅਤਿਚਿਣ੍ਣੋ ਮਯਾ ਧਮ੍ਮੋ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

ਤਤ੍ਥ ਦਿਸ੍ਵਾਤਿ, ਭਿਕ੍ਖਵੇ, ਸੋ ਉਯ੍ਯਾਨਪਾਲੋ ਰਾਜਾਨਂ ਰਾਜਸਭਾਯਂ ਨਿਸਿਨ੍ਨਂ ਦਿਸ੍ਵਾ ਅਥਸ੍ਸ ਪਟਿਵੇਦੇਸਿ, ‘‘ਯਸ੍ਸਾਸੀ’’ਤਿ ਵਦਨ੍ਤੋ ਆਰੋਚੇਸੀਤਿ ਅਤ੍ਥੋ. ਯਸ੍ਸਾਸੀਤਿ, ਮਹਾਰਾਜ, ਯਸ੍ਸ ਤ੍ਵਂ ਅਨੁਕਮ੍ਪਕੋ ਮੁਦੁਚਿਤ੍ਤੋ ਅਹੋਸਿ, ਯਸ੍ਸ ਅਭਿਣ੍ਹਂ ਵਣ੍ਣਂ ਪਯਿਰੁਦਾਹਾਸਿ, ਸੋ ਅਯਂ ਸਂਕਿਚ੍ਚੋ ਇਸੀਨਂ ਅਨ੍ਤਰੇ ਸਾਧੁ ਲਦ੍ਧਕੋਤਿ ਸਮ੍ਮਤੋ ਅਨੁਪ੍ਪਤ੍ਤੋ ਤਵ ਉਯ੍ਯਾਨੇ ਸਿਲਾਪਟ੍ਟੇ ਇਸਿਗਣਪਰਿਵੁਤੋ ਕਞ੍ਚਨਪਟਿਮਾ ਵਿਯ ਨਿਸਿਨ੍ਨੋ. ਤਰਮਾਨਰੂਪੋਤਿ, ਮਹਾਰਾਜ, ਪਬ੍ਬਜਿਤਾ ਨਾਮ ਕੁਲੇ ਵਾ ਗਣੇ ਵਾ ਅਲਗ੍ਗਾ ਤੁਮ੍ਹਾਕਂ ਗਚ੍ਛਨ੍ਤਾਨਞ੍ਞੇਵ ਪਕ੍ਕਮੇਯ੍ਯੁਂ, ਤਸ੍ਮਾ ਤਰਮਾਨਰੂਪੋ ਖਿਪ੍ਪਂ ਨਿਯ੍ਯਾਹਿ, ਮਹਨ੍ਤਾਨਂ ਸੀਲਾਦਿਗੁਣਾਨਂ ਏਸਿਤਤ੍ਤਾ ਪਸ੍ਸ ਮਹੇਸਿਨਂ.

ਤਤੋਤਿ, ਭਿਕ੍ਖਵੇ, ਸੋ ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਤਤੋ ਤਸ੍ਸ ਵਚਨਤੋ ਅਨਨ੍ਤਰਮੇਵ. ਨਿਕ੍ਖਿਪ੍ਪਾਤਿ ਨਿਕ੍ਖਿਪਿਤ੍ਵਾ ਤਸ੍ਸ ਕਿਰ ਉਯ੍ਯਾਨਦ੍ਵਾਰਂ ਪਤ੍ਵਾਵ ਏਤਦਹੋਸਿ – ‘‘ਪਬ੍ਬਜਿਤਾ ਨਾਮ ਗਰੁਟ੍ਠਾਨਿਯਾ, ਸਂਕਿਚ੍ਚਤਾਪਸਸ੍ਸ ਸਨ੍ਤਿਕਂ ਉਦ੍ਧਤਵੇਸੇਨ ਗਨ੍ਤੁਂ ਅਯੁਤ੍ਤ’’ਨ੍ਤਿ. ਸੋ ਮਣਿਚਿਤ੍ਤਸੁਵਣ੍ਣਦਣ੍ਡਂ ਵਾਲਬੀਜਨਿਂ, ਕਞ੍ਚਨਮਯਂ ਉਣ੍ਹੀਸਪਟ੍ਟਂ, ਸੁਪਰਿਕ੍ਖਿਤ੍ਤਂ ਮਙ੍ਗਲਖਗ੍ਗਂ, ਸੇਤਚ੍ਛਤ੍ਤਂ, ਸੋਵਣ੍ਣਪਾਦੁਕਾਤਿ ਇਮਾਨਿ ਪਞ੍ਚ ਰਾਜਕਕੁਧਭਣ੍ਡਾਨਿ ਅਪਨੇਸਿ. ਤੇਨ ਵੁਤ੍ਤਂ ‘‘ਨਿਕ੍ਖਿਪ੍ਪਾ’’ਤਿ. ਪਟਿਚ੍ਛਦਨ੍ਤਿ ਤਮੇਵ ਰਾਜਕਕੁਧਭਣ੍ਡਂ ਠਪਯਿਤ੍ਵਾ ਭਣ੍ਡਾਗਾਰਿਕਸ੍ਸ ਹਤ੍ਥੇ ਦਤ੍ਵਾ. ਦਾਯਪਸ੍ਸਸ੍ਮਿਨ੍ਤਿ ਏਵਂਨਾਮਕੇ ਉਯ੍ਯਾਨੇ. ਅਥ ਕਾਲਂ ਅਮਞ੍ਞਥਾਤਿ ਅਥ ਸੋ ਇਦਾਨਿ ਮੇ ਪਞ੍ਹਂ ਪੁਚ੍ਛਿਤੁਂ ਕਾਲੋਤਿ ਜਾਨਿ. ਪਾਲ਼ਿਯਂ ਪਨ ‘‘ਯਥਾਕਾਲ’’ਨ੍ਤਿ ਆਗਤਂ, ਤਸ੍ਸ ਕਾਲਾਨੁਰੂਪੇਨ ਪਞ੍ਹਪੁਚ੍ਛਨਂ ਅਮਞ੍ਞਥਾਤਿ ਅਤ੍ਥੋ. ਪਟਿਪਜ੍ਜਥਾਤਿ ਪਟਿਪਜ੍ਜਿ. ਪੇਚ੍ਚਾਤਿ ਪਟਿਗਨ੍ਤ੍ਵਾ, ਪਰਲੋਕਸ੍ਸ ਵਾ ਨਾਮੇਤਂ, ਤਸ੍ਮਾ ਪਰਲੋਕੇਤਿ ਅਤ੍ਥੋ. ਮਯਾਤਿ, ਭਨ੍ਤੇ, ਮਯਾ ਸੁਚਰਿਤਧਮ੍ਮੋ ਅਤਿਚਿਣ੍ਣੋ ਪਿਤੁਘਾਤਕਮ੍ਮਂ ਕਤਂ, ਤਂ ਮੇ ਅਕ੍ਖਾਹਿ, ਕਂ ਗਤਿਂ ਪਿਤੁਘਾਤਕਾ ਗਚ੍ਛਨ੍ਤਿ, ਕਤਰਸ੍ਮਿਂ ਨਿਰਯੇ ਪਚ੍ਚਨ੍ਤੀਤਿ ਪੁਚ੍ਛਤਿ.

ਤਂ ਸੁਤ੍ਵਾ ਬੋਧਿਸਤ੍ਤੋ ‘‘ਤੇਨ ਹਿ, ਮਹਾਰਾਜ, ਸੁਣੋਹੀ’’ਤਿ ਵਤ੍ਵਾ ਓਵਾਦਂ ਤਾਵ ਅਦਾਸਿ. ਸਤ੍ਥਾ ਤਮਤ੍ਥਂ ਪਕਾਸੇਨ੍ਤੋ ਆਹ –

੭੮.

‘‘ਇਸੀ ਅਵਚ ਸਂਕਿਚ੍ਚੋ, ਕਾਸੀਨਂ ਰਟ੍ਠਵਡ੍ਢਨਂ;

ਆਸੀਨਂ ਦਾਯਪਸ੍ਸਸ੍ਮਿਂ, ਮਹਾਰਾਜ ਸੁਣੋਹਿ ਮੇ.

੭੯.

‘‘ਉਪ੍ਪਥੇਨ ਵਜਨ੍ਤਸ੍ਸ, ਯੋ ਮਗ੍ਗਮਨੁਸਾਸਤਿ;

ਤਸ੍ਸ ਚੇ ਵਚਨਂ ਕਯਿਰਾ, ਨਾਸ੍ਸ ਮਗ੍ਗੇਯ੍ਯ ਕਣ੍ਟਕੋ.

੮੦.

‘‘ਅਧਮ੍ਮਂ ਪਟਿਪਨ੍ਨਸ੍ਸ, ਯੋ ਧਮ੍ਮਮਨੁਸਾਸਤਿ;

ਤਸ੍ਸ ਚੇ ਵਚਨਂ ਕਯਿਰਾ, ਨ ਸੋ ਗਚ੍ਛੇਯ੍ਯ ਦੁਗ੍ਗਤਿ’’ਨ੍ਤਿ.

ਤਤ੍ਥ ਉਪ੍ਪਥੇਨਾਤਿ ਚੋਰੇਹਿ ਪਰਿਯੁਟ੍ਠਿਤਮਗ੍ਗੇਨ. ਮਗ੍ਗਮਨੁਸਾਸਤੀਤਿ ਖੇਮਮਗ੍ਗਂ ਅਕ੍ਖਾਤਿ. ਨਾਸ੍ਸ ਮਗ੍ਗੇਯ੍ਯ ਕਣ੍ਟਕੋਤਿ ਤਸ੍ਸ ਓਵਾਦਕਰਸ੍ਸ ਪੁਰਿਸਸ੍ਸ ਮੁਖਂ ਚੋਰਕਣ੍ਟਕੋ ਨ ਪਸ੍ਸੇਯ੍ਯ. ਯੋ ਧਮ੍ਮਨ੍ਤਿ ਯੋ ਸੁਚਰਿਤਧਮ੍ਮਂ. ਨ ਸੋਤਿ ਸੋ ਪੁਰਿਸੋ ਨਿਰਯਾਦਿਭੇਦਂ ਦੁਗ੍ਗਤਿਂ ਨ ਗਚ੍ਛੇਯ੍ਯ. ਉਪ੍ਪਥਸਦਿਸੋ ਹਿ, ਮਹਾਰਾਜ, ਅਧਮ੍ਮੋ, ਖੇਮਮਗ੍ਗਸਦਿਸੋ ਸੁਚਰਿਤਧਮ੍ਮੋ, ਤ੍ਵਂ ਪਨ ਪੁਬ੍ਬੇ ‘‘ਪਿਤਰਂ ਘਾਤੇਤ੍ਵਾ ਰਾਜਾ ਹੋਮੀ’’ਤਿ ਮਯ੍ਹਂ ਕਥੇਤ੍ਵਾ ਮਯਾ ਪਟਿਬਾਹਿਤੋ ਮਮ ਵਚਨਂ ਅਕਤ੍ਵਾ ਪਿਤਰਂ ਘਾਤੇਤ੍ਵਾ ਇਦਾਨਿ ਸੋਚਸਿ, ਪਣ੍ਡਿਤਾਨਂ ਓਵਾਦਂ ਅਕਰੋਨ੍ਤੋ ਨਾਮ ਚੋਰਮਗ੍ਗਪਟਿਪਨ੍ਨੋ ਵਿਯ ਮਹਾਬ੍ਯਸਨਂ ਪਾਪੁਣਾਤੀਤਿ.

ਏਵਮਸ੍ਸ ਓਵਾਦਂ ਦਤ੍ਵਾ ਉਪਰਿ ਧਮ੍ਮਂ ਦੇਸੇਨ੍ਤੋ ਆਹ –

੮੧.

‘‘ਧਮ੍ਮੋ ਪਥੋ ਮਹਾਰਾਜ, ਅਧਮ੍ਮੋ ਪਨ ਉਪ੍ਪਥੋ;

ਅਧਮ੍ਮੋ ਨਿਰਯਂ ਨੇਤਿ, ਧਮ੍ਮੋ ਪਾਪੇਤਿ ਸੁਗ੍ਗਤਿਂ.

੮੨.

‘‘ਅਧਮ੍ਮਚਾਰਿਨੋ ਰਾਜ, ਨਰਾ ਵਿਸਮਜੀਵਿਨੋ;

ਯਂ ਗਤਿਂ ਪੇਚ੍ਚ ਗਚ੍ਛਨ੍ਤਿ, ਨਿਰਯੇ ਤੇ ਸੁਣੋਹਿ ਮੇ.

੮੩.

‘‘ਸਞ੍ਜੀਵੋ ਕਾਲ਼ਸੁਤ੍ਤੋ ਚ, ਸਙ੍ਘਾਤੋ ਦ੍ਵੇ ਚ ਰੋਰੁਵਾ;

ਅਥਾਪਰੋ ਮਹਾਵੀਚਿ, ਤਾਪਨੋ ਚ ਪਤਾਪਨੋ.

੮੪.

‘‘ਇਚ੍ਚੇਤੇ ਅਟ੍ਠ ਨਿਰਯਾ, ਅਕ੍ਖਾਤਾ ਦੁਰਤਿਕ੍ਕਮਾ;

ਆਕਿਣ੍ਣਾ ਲੁਦ੍ਦਕਮ੍ਮੇਹਿ, ਪਚ੍ਚੇਕਾ ਸੋਲ਼ਸੁਸ੍ਸਦਾ.

੮੫.

‘‘ਕਦਰਿਯਤਾਪਨਾ ਘੋਰਾ, ਅਚ੍ਚਿਮਨ੍ਤੋ ਮਹਬ੍ਭਯਾ;

ਲੋਮਹਂਸਨਰੂਪਾ ਚ, ਭੇਸ੍ਮਾ ਪਟਿਭਯਾ ਦੁਖਾ.

੮੬.

‘‘ਚਤੁਕ੍ਕਣ੍ਣਾ ਚਤੁਦ੍ਵਾਰਾ, ਵਿਭਤ੍ਤਾ ਭਾਗਸੋ ਮਿਤਾ;

ਅਯੋਪਾਕਾਰਪਰਿਯਨ੍ਤਾ, ਅਯਸਾ ਪਟਿਕੁਜ੍ਜਿਤਾ.

੮੭.

‘‘ਤੇਸਂ ਅਯੋਮਯਾ ਭੂਮਿ, ਜਲਿਤਾ ਤੇਜਸਾ ਯੁਤਾ;

ਸਮਨ੍ਤਾ ਯੋਜਨਸਤਂ, ਫੁਟਾ ਤਿਟ੍ਠਨ੍ਤਿ ਸਬ੍ਬਦਾ.

੮੮.

‘‘ਏਤੇ ਪਤਨ੍ਤਿ ਨਿਰਯੇ, ਉਦ੍ਧਂਪਾਦਾ ਅਵਂਸਿਰਾ;

ਇਸੀਨਂ ਅਤਿਵਤ੍ਤਾਰੋ, ਸਞ੍ਞਤਾਨਂ ਤਪਸ੍ਸਿਨਂ.

੮੯.

‘‘ਤੇ ਭੂਨਹੁਨੋ ਪਚ੍ਚਨ੍ਤਿ, ਮਚ੍ਛਾ ਬਿਲਕਤਾ ਯਥਾ;

ਸਂਵਚ੍ਛਰੇ ਅਸਙ੍ਖੇਯ੍ਯੇ, ਨਰਾ ਕਿਬ੍ਬਿਸਕਾਰਿਨੋ.

੯੦.

‘‘ਡਯ੍ਹਮਾਨੇਨ ਗਤ੍ਤੇਨ, ਨਿਚ੍ਚਂ ਸਨ੍ਤਰਬਾਹਿਰਂ;

ਨਿਰਯਾ ਨਾਧਿਗਚ੍ਛਨ੍ਤਿ, ਦ੍ਵਾਰਂ ਨਿਕ੍ਖਮਨੇਸਿਨੋ.

੯੧.

‘‘ਪੁਰਤ੍ਥਿਮੇਨ ਧਾਵਨ੍ਤਿ, ਤਤੋ ਧਾਵਨ੍ਤਿ ਪਚ੍ਛਤੋ;

ਉਤ੍ਤਰੇਨਪਿ ਧਾਵਨ੍ਤਿ, ਤਤੋ ਧਾਵਨ੍ਤਿ ਦਕ੍ਖਿਣਂ;

ਯਂ ਯਞ੍ਹਿ ਦ੍ਵਾਰਂ ਗਚ੍ਛਨ੍ਤਿ, ਤਂ ਤਦੇਵ ਪਿਧੀਯਰੇ.

੯੨.

‘‘ਬਹੂਨਿ ਵਸ੍ਸਸਹਸ੍ਸਾਨਿ, ਜਨਾ ਨਿਰਯਗਾਮਿਨੋ;

ਬਾਹਾ ਪਗ੍ਗਯ੍ਹ ਕਨ੍ਦਨ੍ਤਿ, ਪਤ੍ਵਾ ਦੁਕ੍ਖਂ ਅਨਪ੍ਪਕਂ.

੯੩.

‘‘ਆਸੀਵਿਸਂਵ ਕੁਪਿਤਂ, ਤੇਜਸ੍ਸਿਂ ਦੁਰਤਿਕ੍ਕਮਂ;

ਨ ਸਾਧੁਰੂਪੇ ਆਸੀਦੇ, ਸਞ੍ਞਤਾਨਂ ਤਪਸ੍ਸਿਨਂ.

੯੪.

‘‘ਅਤਿਕਾਯੋ ਮਹਿਸ੍ਸਾਸੋ, ਅਜ੍ਜੁਨੋ ਕੇਕਕਾਧਿਪੋ;

ਸਹਸ੍ਸਬਾਹੁ ਉਚ੍ਛਿਨ੍ਨੋ, ਇਸਿਮਾਸਜ੍ਜ ਗੋਤਮਂ.

੯੫.

‘‘ਅਰਜਂ ਰਜਸਾ ਵਚ੍ਛਂ, ਕਿਸਂ ਅਵਕਿਰਿਯ ਦਣ੍ਡਕੀ;

ਤਾਲੋਵ ਮੂਲਤੋ ਛਿਨ੍ਨੋ, ਸ ਰਾਜਾ ਵਿਭਵਙ੍ਗਤੋ.

੯੬.

‘‘ਉਪਹਚ੍ਚ ਮਨਂ ਮਜ੍ਝੋ, ਮਾਤਙ੍ਗਸ੍ਮਿਂ ਯਸਸ੍ਸਿਨੇ;

ਸਪਾਰਿਸਜ੍ਜੋ ਉਚ੍ਛਿਨ੍ਨੋ, ਮਜ੍ਝਾਰਞ੍ਞਂ ਤਦਾ ਅਹੁ.

੯੭.

‘‘ਕਣ੍ਹਦੀਪਾਯਨਾਸਜ੍ਜ, ਇਸਿਂ ਅਨ੍ਧਕਵੇਣ੍ਡਯੋ;

ਅਞ੍ਞੋਞ੍ਞਂ ਮੁਸਲਾ ਹਨ੍ਤ੍ਵਾ, ਸਮ੍ਪਤ੍ਤਾ ਯਮਸਾਧਨਂ.

੯੮.

‘‘ਅਥਾਯਂ ਇਸਿਨਾ ਸਤ੍ਤੋ, ਅਨ੍ਤਲਿਕ੍ਖਚਰੋ ਪੁਰੇ;

ਪਾਵੇਕ੍ਖਿ ਪਥਵਿਂ ਚੇਚ੍ਚੋ, ਹੀਨਤ੍ਤੋ ਪਤ੍ਤਪਰਿਯਾਯਂ.

੯੯.

‘‘ਤਸ੍ਮਾ ਹਿ ਛਨ੍ਦਾਗਮਨਂ, ਨਪ੍ਪਸਂਸਨ੍ਤਿ ਪਣ੍ਡਿਤਾ;

ਅਦੁਟ੍ਠਚਿਤ੍ਤੋ ਭਾਸੇਯ੍ਯ, ਗਿਰਂ ਸਚ੍ਚੂਪਸਂਹਿਤਂ.

੧੦੦.

‘‘ਮਨਸਾ ਚੇ ਪਦੁਟ੍ਠੇਨ, ਯੋ ਨਰੋ ਪੇਕ੍ਖਤੇ ਮੁਨਿਂ;

ਵਿਜ੍ਜਾਚਰਣਸਮ੍ਪਨ੍ਨਂ, ਗਨ੍ਤਾ ਸੋ ਨਿਰਯਂ ਅਧੋ.

੧੦੧.

‘‘ਯੇ ਵੁਡ੍ਢੇ ਪਰਿਭਾਸਨ੍ਤਿ, ਫਰੁਸੂਪਕ੍ਕਮਾ ਜਨਾ;

ਅਨਪਚ੍ਚਾ ਅਦਾਯਾਦਾ, ਤਾਲਵਤ੍ਥੁ ਭਵਨ੍ਤਿ ਤੇ.

੧੦੨.

‘‘ਯੋ ਚ ਪਬ੍ਬਜਿਤਂ ਹਨ੍ਤਿ, ਕਤਕਿਚ੍ਚਂ ਮਹੇਸਿਨਂ;

ਸ ਕਾਲ਼ਸੁਤ੍ਤੇ ਨਿਰਯੇ, ਚਿਰਰਤ੍ਤਾਯ ਪਚ੍ਚਤਿ.

੧੦੩.

‘‘ਯੋ ਚ ਰਾਜਾ ਅਧਮ੍ਮਟ੍ਠੋ, ਰਟ੍ਠਵਿਦ੍ਧਂਸਨੋ ਮਗੋ;

ਤਾਪਯਿਤ੍ਵਾ ਜਨਪਦਂ, ਤਾਪਨੇ ਪੇਚ੍ਚ ਪਚ੍ਚਤਿ.

੧੦੪.

‘‘ਸੋ ਚ ਵਸ੍ਸਸਹਸ੍ਸਾਨਿ, ਸਤਂ ਦਿਬ੍ਬਾਨਿ ਪਚ੍ਚਤਿ;

ਅਚ੍ਚਿਸਙ੍ਘਪਰੇਤੋ ਸੋ, ਦੁਕ੍ਖਂ ਵੇਦੇਤਿ ਵੇਦਨਂ.

੧੦੫.

‘‘ਤਸ੍ਸ ਅਗ੍ਗਿਸਿਖਾ ਕਾਯਾ, ਨਿਚ੍ਛਰਨ੍ਤਿ ਪਭਸ੍ਸਰਾ;

ਤੇਜੋਭਕ੍ਖਸ੍ਸ ਗਤ੍ਤਾਨਿ, ਲੋਮੇਹਿ ਚ ਨਖੇਹਿ ਚ.

੧੦੬.

‘‘ਡਯ੍ਹਮਾਨੇਨ ਗਤ੍ਤੇਨ, ਨਿਚ੍ਚਂ ਸਨ੍ਤਰਬਾਹਿਰਂ;

ਦੁਕ੍ਖਾਭਿਤੁਨ੍ਨੋ ਨਦਤਿ, ਨਾਗੋ ਤੁਤ੍ਤਟ੍ਟਿਤੋ ਯਥਾ.

੧੦੭.

‘‘ਯੋ ਲੋਭਾ ਪਿਤਰਂ ਹਨ੍ਤਿ, ਦੋਸਾ ਵਾ ਪੁਰਿਸਾਧਮੋ;

ਸ ਕਾਲ਼ਸੁਤ੍ਤੇ ਨਿਰਯੇ, ਚਿਰਰਤ੍ਤਾਯ ਪਚ੍ਚਤਿ.

੧੦੮.

‘‘ਸ ਤਾਦਿਸੋ ਪਚ੍ਚਤਿ ਲੋਹਕੁਮ੍ਭਿਯਂ, ਪਕ੍ਕਞ੍ਚ ਸਤ੍ਤੀਹਿ ਹਨਨ੍ਤਿ ਨਿਤ੍ਤਚਂ;

ਅਨ੍ਧਂ ਕਰਿਤ੍ਵਾ ਮੁਤ੍ਤਕਰੀਸਭਕ੍ਖਂ, ਖਾਰੇ ਨਿਮੁਜ੍ਜਨ੍ਤਿ ਤਥਾਵਿਧਂ ਨਰਂ.

੧੦੯.

‘‘ਤਤ੍ਤਂ ਪਕ੍ਕੁਥਿਤਮਯੋਗੁਲ਼ਞ੍ਚ, ਦੀਘੇ ਚ ਫਾਲੇ ਚਿਰਰਤ੍ਤਤਾਪਿਤੇ;

ਵਿਕ੍ਖਮ੍ਭਮਾਦਾਯ ਵਿਬਨ੍ਧਰਜ੍ਜੁਭਿ, ਵਿਵਟੇ ਮੁਖੇ ਸਮ੍ਪਵਿਸਨ੍ਤਿ ਰਕ੍ਖਸਾ.

੧੧੦.

‘‘ਸਾਮਾ ਚ ਸੋਣਾ ਸਬਲਾ ਚ ਗਿਜ੍ਝਾ, ਕਾਕੋਲਸਙ੍ਘਾ ਚ ਦਿਜਾ ਅਯੋਮੁਖਾ;

ਸਙ੍ਗਮ੍ਮ ਖਾਦਨ੍ਤਿ ਵਿਪ੍ਫਨ੍ਦਮਾਨਂ, ਜਿਵ੍ਹਂ ਵਿਭਜ੍ਜ ਵਿਘਾਸਂ ਸਲੋਹਿਤਂ.

੧੧੧.

‘‘ਤਂ ਦਡ੍ਢਤਾਲਂ ਪਰਿਭਿਨ੍ਨਗਤ੍ਤਂ, ਨਿਪ੍ਪੋਥਯਨ੍ਤਾ ਅਨੁਵਿਚਰਨ੍ਤਿ ਰਕ੍ਖਸਾ;

ਰਤੀ ਹਿ ਤੇਸਂ ਦੁਖਿਨੋ ਪਨੀਤਰੇ, ਏਤਾਦਿਸਸ੍ਮਿਂ ਨਿਰਯੇ ਵਸਨ੍ਤਿ;

ਯੇ ਕੇਚਿ ਲੋਕੇ ਇਧ ਪੇਤ੍ਤਿਘਾਤਿਨੋ.

੧੧੨.

‘‘ਪੁਤ੍ਤੋ ਚ ਮਾਤਰਂ ਹਨ੍ਤ੍ਵਾ, ਇਤੋ ਗਨ੍ਤ੍ਵਾ ਯਮਕ੍ਖਯਂ;

ਭੁਸਮਾਪਜ੍ਜਤੇ ਦੁਕ੍ਖਂ, ਅਤ੍ਤਕਮ੍ਮਫਲੂਪਗੋ.

੧੧੩.

‘‘ਅਮਨੁਸ੍ਸਾ ਅਤਿਬਲਾ, ਹਨ੍ਤਾਰਂ ਜਨਯਨ੍ਤਿਯਾ;

ਅਯੋਮਯੇਹਿ ਵਾਲੇਹਿ, ਪੀਲ਼ਯਨ੍ਤਿ ਪੁਨਪ੍ਪੁਨਂ.

੧੧੪.

‘‘ਤਮਸ੍ਸਵਂ ਸਕਾ ਗਤ੍ਤਾ, ਰੁਧਿਰਂ ਅਤ੍ਤਸਮ੍ਭਵਂ;

ਤਮ੍ਬਲੋਹਵਿਲੀਨਂਵ, ਤਤ੍ਤਂ ਪਾਯੇਨ੍ਤਿ ਮਤ੍ਤਿਘਂ.

੧੧੫.

‘‘ਜਿਗੁਚ੍ਛਂ ਕੁਣਪਂ ਪੂਤਿਂ, ਦੁਗ੍ਗਨ੍ਧਂ ਗੂਥਕਦ੍ਦਮਂ;

ਪੁਬ੍ਬਲੋਹਿਤਸਙ੍ਕਾਸਂ, ਰਹਦਮੋਗਯ੍ਹ ਤਿਟ੍ਠਤਿ.

੧੧੬.

‘‘ਤਮੇਨਂ ਕਿਮਯੋ ਤਤ੍ਥ, ਅਤਿਕਾਯਾ ਅਯੋਮੁਖਾ;

ਛਵਿਂ ਭੇਤ੍ਵਾਨ ਖਾਦਨ੍ਤਿ, ਸਂਗਿਦ੍ਧਾ ਮਂਸਲੋਹਿਤੇ.

੧੧੭.

‘‘ਸੋ ਚ ਤਂ ਨਿਰਯਂ ਪਤ੍ਤੋ, ਨਿਮੁਗ੍ਗੋ ਸਤਪੋਰਿਸਂ;

ਪੂਤਿਕਂ ਕੁਣਪਂ ਵਾਤਿ, ਸਮਨ੍ਤਾ ਸਤਯੋਜਨਂ.

੧੧੮.

‘‘ਚਕ੍ਖੁਮਾਪਿ ਹਿ ਚਕ੍ਖੂਹਿ, ਤੇਨ ਗਨ੍ਧੇਨ ਜੀਯਤਿ;

ਏਤਾਦਿਸਂ ਬ੍ਰਹ੍ਮਦਤ੍ਤ, ਮਾਤੁਘੋ ਲਭਤੇ ਦੁਖਂ.

੧੧੯.

‘‘ਖੁਰਧਾਰਮਨੁਕ੍ਕਮ੍ਮ, ਤਿਕ੍ਖਂ ਦੁਰਭਿਸਮ੍ਭਵਂ;

ਪਤਨ੍ਤਿ ਗਬ੍ਭਪਾਤਿਯੋ, ਦੁਗ੍ਗਂ ਵੇਤਰਣਿਂ ਨਦਿਂ.

੧੨੦.

‘‘ਅਯੋਮਯਾ ਸਿਮ੍ਬਲਿਯੋ, ਸੋਲ਼ਸਙ੍ਗੁਲਕਣ੍ਟਕਾ;

ਉਭਤੋ ਅਭਿਲਮ੍ਬਨ੍ਤਿ, ਦੁਗ੍ਗਂ ਵੇਤਰਣਿਂ ਨਦਿਂ.

੧੨੧.

‘‘ਤੇ ਅਚ੍ਚਿਮਨ੍ਤੋ ਤਿਟ੍ਠਨ੍ਤਿ, ਅਗ੍ਗਿਕ੍ਖਨ੍ਧਾਵ ਆਰਕਾ;

ਆਦਿਤ੍ਤਾ ਜਾਤਵੇਦੇਨ, ਉਦ੍ਧਂ ਯੋਜਨਮੁਗ੍ਗਤਾ.

੧੨੨.

‘‘ਏਤੇ ਵਜਨ੍ਤਿ ਨਿਰਯੇ, ਤਤ੍ਤੇ ਤਿਖਿਣਕਣ੍ਟਕੇ;

ਨਾਰਿਯੋ ਚ ਅਤਿਚਾਰਾ, ਨਰਾ ਚ ਪਰਦਾਰਗੂ.

੧੨੩.

‘‘ਤੇ ਪਤਨ੍ਤਿ ਅਧੋਕ੍ਖਨ੍ਧਾ, ਵਿਵਤ੍ਤਾ ਵਿਹਤਾ ਪੁਥੂ;

ਸਯਨ੍ਤਿ ਵਿਨਿਵਿਦ੍ਧਙ੍ਗਾ, ਦੀਘਂ ਜਗ੍ਗਨ੍ਤਿ ਸਬ੍ਬਦਾ.

੧੨੪.

‘‘ਤਤੋ ਰਤ੍ਯਾ ਵਿਵਸਾਨੇ, ਮਹਤਿਂ ਪਬ੍ਬਤੂਪਮਂ;

ਲੋਹਕੁਮ੍ਭਿਂ ਪਵਜ੍ਜਨ੍ਤਿ, ਤਤ੍ਤਂ ਅਗ੍ਗਿਸਮੂਦਕਂ.

੧੨੫.

‘‘ਏਵਂ ਦਿਵਾ ਚ ਰਤ੍ਤੋ ਚ, ਦੁਸ੍ਸੀਲਾ ਮੋਹਪਾਰੁਤਾ;

ਅਨੁਭੋਨ੍ਤਿ ਸਕਂ ਕਮ੍ਮਂ, ਪੁਬ੍ਬੇ ਦੁਕ੍ਕਟਮਤ੍ਤਨੋ.

੧੨੬.

‘‘ਯਾ ਚ ਭਰਿਯਾ ਧਨਕ੍ਕੀਤਾ, ਸਾਮਿਕਂ ਅਤਿਮਞ੍ਞਤਿ;

ਸਸ੍ਸੁਂ ਵਾ ਸਸੁਰਂ ਵਾਪਿ, ਜੇਟ੍ਠਂ ਵਾਪਿ ਨਨਨ੍ਦਰਂ.

੧੨੭.

‘‘ਤਸ੍ਸਾ ਵਙ੍ਕੇਨ ਜਿਵ੍ਹਗ੍ਗਂ, ਨਿਬ੍ਬਹਨ੍ਤਿ ਸਬਨ੍ਧਨਂ;

ਸ ਬ੍ਯਾਮਮਤ੍ਤਂ ਕਿਮਿਨਂ, ਜਿਵ੍ਹਂ ਪਸ੍ਸਤਿ ਅਤ੍ਤਨਿ;

ਵਿਞ੍ਞਾਪੇਤੁਂ ਨ ਸਕ੍ਕੋਤਿ, ਤਾਪਨੇ ਪੇਚ੍ਚ ਪਚ੍ਚਤਿ.

੧੨੮.

‘‘ਓਰਬ੍ਭਿਕਾ ਸੂਕਰਿਕਾ, ਮਚ੍ਛਿਕਾ ਮਿਗਬਨ੍ਧਕਾ;

ਚੋਰਾ ਗੋਘਾਤਕਾ ਲੁਦ੍ਦਾ, ਅਵਣ੍ਣੇ ਵਣ੍ਣਕਾਰਕਾ.

੧੨੯.

‘‘ਸਤ੍ਤੀਹਿ ਲੋਹਕੂਟੇਹਿ, ਨੇਤ੍ਤਿਂਸੇਹਿ ਉਸੂਹਿ ਚ;

ਹਞ੍ਞਮਾਨਾ ਖਾਰਨਦਿਂ, ਪਪਤਨ੍ਤਿ ਅਵਂਸਿਰਾ.

੧੩੦.

‘‘ਸਾਯਂ ਪਾਤੋ ਕੂਟਕਾਰੀ, ਅਯੋਕੂਟੇਹਿ ਹਞ੍ਞਤਿ;

ਤਤੋ ਵਨ੍ਤਂ ਦੁਰਤ੍ਤਾਨਂ, ਪਰੇਸਂ ਭੁਞ੍ਜਰੇ ਸਦਾ.

੧੩੧.

‘‘ਧਙ੍ਕਾ ਭੇਰਣ੍ਡਕਾ ਗਿਜ੍ਝਾ, ਕਾਕੋਲਾ ਚ ਅਯੋਮੁਖਾ;

ਵਿਪ੍ਫਨ੍ਦਮਾਨਂ ਖਾਦਨ੍ਤਿ, ਨਰਂ ਕਿਬ੍ਬਿਸਕਾਰਕਂ.

੧੩੨.

‘‘ਯੇ ਮਿਗੇਨ ਮਿਗਂ ਹਨ੍ਤਿ, ਪਕ੍ਖਿਂ ਵਾ ਪਨ ਪਕ੍ਖਿਨਾ;

ਅਸਨ੍ਤੋ ਰਜਸਾ ਛਨ੍ਨਾ, ਗਨ੍ਤਾ ਤੇ ਨਿਰਯੁਸ੍ਸਦ’’ਨ੍ਤਿ.

ਤਤ੍ਥ ਧਮ੍ਮੋ ਪਥੋਤਿ ਦਸਕੁਸਲਕਮ੍ਮਪਥਧਮ੍ਮੋ ਖੇਮੋ ਅਪ੍ਪਟਿਭਯੋ ਸੁਗਤਿਮਗ੍ਗੋ. ਵਿਸਮਜੀਵਿਨੋਤਿ ਅਧਮ੍ਮੇਨ ਕਪ੍ਪਿਤਜੀਵਿਕਾ. ਨਿਰਯੇ ਤੇਤਿ ਤੇ ਏਤੇਸਂ ਨਿਬ੍ਬਤ੍ਤਨਿਰਯੇ ਕਥੇਮਿ. ਸੁਣੋਹਿ ਮੇਤਿ ਮਹਾਸਤ੍ਤੋ ਰਞ੍ਞਾ ਪਿਤੁਘਾਤਕਾਨਂ ਨਿਬ੍ਬਤ੍ਤਨਿਰਯਂ ਪੁਚ੍ਛਿਤੋਪਿ ਪਥਮਂ ਤਂ ਅਦਸ੍ਸੇਤ੍ਵਾ ਅਟ੍ਠ ਮਹਾਨਿਰਯੇ ਸੋਲ਼ਸ ਚ ਉਸ੍ਸਦਨਿਰਯੇ ਦਸ੍ਸੇਤੁਂ ਏਵਮਾਹ. ਕਿਂਕਾਰਣਾ? ਪਠਮਞ੍ਹਿ ਤਸ੍ਮਿਂ ਦਸ੍ਸਿਯਮਾਨੇ ਰਾਜਾ ਫਲਿਤੇਨ ਹਦਯੇਨ ਤਤ੍ਥੇਵ ਮਰੇਯ੍ਯ, ਇਮੇਸੁ ਪਨ ਨਿਰਯੇਸੁ ਪਚ੍ਚਮਾਨਸਤ੍ਤੇ ਦਿਸ੍ਵਾ ਦਿਟ੍ਠਾਨੁਗਤਿਕੋ ਹੁਤ੍ਵਾ ‘‘ਅਹਂ ਵਿਯ ਅਞ੍ਞੇਪਿ ਬਹੂ ਪਾਪਕਮ੍ਮਿਨੋ ਅਤ੍ਥਿ, ਅਹਂ ਏਤੇਸਂ ਅਨ੍ਤਰੇ ਪਚ੍ਚਿਸ੍ਸਾਮੀ’’ਤਿ ਸਞ੍ਜਾਤੁਪਤ੍ਥਮ੍ਭੋ ਅਰੋਗੋ ਭਵਿਸ੍ਸਤੀਤਿ ਤੇ ਪਨ ਨਿਰਯੇ ਦਸ੍ਸੇਨ੍ਤੋ ਮਹਾਸਤ੍ਤੋ ਪਠਮਂ ਇਦ੍ਧਿਬਲੇਨ ਪਥਵਿਂ ਦ੍ਵਿਧਾ ਕਤ੍ਵਾ ਪਚ੍ਛਾ ਦਸ੍ਸੇਸਿ.

ਤੇਸਂ ਵਚਨਤ੍ਥੋ – ਨਿਰਯਪਾਲੇਹਿ ਪਜ੍ਜਲਿਤਾਨਿ ਨਾਨਾਵੁਧਾਨਿ ਗਹੇਤ੍ਵਾ ਖਣ੍ਡਾਖਣ੍ਡਿਕਂ ਛਿਨ੍ਨਾ ਹੀਰਂ ਹੀਰਂ ਕਤਾ ਨੇਰਯਿਕਸਤ੍ਤਾ ਪੁਨਪ੍ਪੁਨਂ ਸਞ੍ਜੀਵਨ੍ਤਿ ਏਤ੍ਥਾਤਿ ਸਞ੍ਜੀਵੋ. ਨਿਰਯਪਾਲਾ ਪੁਨਪ੍ਪੁਨਂ ਨਦਨ੍ਤਾ ਵਗ੍ਗਨ੍ਤਾ ਪਜ੍ਜਲਿਤਾਨਿ ਨਾਨਾਵੁਧਾਨਿ ਗਹੇਤ੍ਵਾ ਜਲਿਤਾਯ ਲੋਹਪਥਵਿਯਂ ਨੇਰਯਿਕੇ ਸਤ੍ਤੇ ਅਪਰਾਪਰਂ ਅਨੁਬਨ੍ਧਿਤ੍ਵਾ ਪਹਰਿਤ੍ਵਾ ਜਲਿਤਪਥਵਿਯਂ ਪਤਿਤੇ ਜਲਿਤਕਾਲ਼ਸੁਤ੍ਤਂ ਪਾਤੇਤ੍ਵਾ ਜਲਿਤਫਰਸੁਂ ਗਹੇਤ੍ਵਾ ਸਯਂ ਉਨ੍ਨਦਨ੍ਤਾ ਮਹਨ੍ਤੇਨ ਅਟ੍ਟਸ੍ਸਰੇਨ ਵਿਰਵਨ੍ਤੇ ਅਟ੍ਠਂਸੇ ਸੋਲ਼ਸਂਸੇ ਕਰੋਨ੍ਤਾ ਏਤ੍ਥ ਤਚ੍ਛਨ੍ਤੀਤਿ ਕਾਲ਼ਸੁਤ੍ਤੋ. ਮਹਨ੍ਤਾ ਜਲਿਤਅਯਪਬ੍ਬਤਾ ਘਾਤੇਨ੍ਤਿ ਏਤ੍ਥਾਤਿ ਸਙ੍ਘਾਤੋ. ਤਤ੍ਥ ਕਿਰ ਸਤ੍ਤੇ ਨਵਯੋਜਨਾਯ ਜਲਿਤਾਯ ਅਯਪਥਵਿਯਾ ਯਾਵ ਕਟਿਤੋ ਪਵੇਸੇਤ੍ਵਾ ਨਿਚ੍ਚਲੇ ਕਰੋਨ੍ਤਿ. ਅਥ ਪੁਰਤ੍ਥਿਮਤੋ ਜਲਿਤੋ ਅਯਪਬ੍ਬਤੋ ਸਮੁਟ੍ਠਾਯ ਅਸਨਿ ਵਿਯ ਵਿਰਵਨ੍ਤੋ ਆਗਨ੍ਤ੍ਵਾ ਤੇ ਸਤ੍ਤੇ ਸਣ੍ਹਕਰਣਿਯਂ ਤਿਲੇ ਪਿਸਨ੍ਤੋ ਵਿਯ ਗਨ੍ਤ੍ਵਾ ਪਚ੍ਛਿਮਦਿਸਾਯ ਤਿਟ੍ਠਤਿ, ਪਚ੍ਛਿਮਦਿਸਤੋ ਸਮੁਟ੍ਠਿਤੋਪਿ ਤਥੇਵ ਗਨ੍ਤ੍ਵਾ ਪੁਰਤ੍ਥਿਮਦਿਸਾਯ ਤਿਟ੍ਠਤਿ. ਦ੍ਵੇ ਪਨ ਏਕਤੋ ਸਮਾਗਨ੍ਤ੍ਵਾ ਉਚ੍ਛੁਯਨ੍ਤੇ ਉਚ੍ਛੁਖਣ੍ਡਾਨਿ ਵਿਯ ਪੀਲ਼ੇਨ੍ਤਿ. ਏਵਂ ਤਤ੍ਥ ਬਹੂਨਿ ਵਸ੍ਸਸਤਸਹਸ੍ਸਾਨਿ ਦੁਕ੍ਖਂ ਅਨੁਭੋਨ੍ਤਿ.

ਦ੍ਵੇ ਚ ਰੋਰੁਵਾਤਿ ਜਾਲਰੋਰੁਵੋ, ਧੂਮਰੋਰੁਵੋ ਚਾਤਿ ਦ੍ਵੇ. ਤਤ੍ਥ ਜਾਲਰੋਰੁਵੋ ਕਪ੍ਪੇਨ ਸਣ੍ਠਿਤਾਹਿ ਰਤ੍ਤਲੋਹਜਾਲਾਹਿ ਪੁਣ੍ਣੋ, ਧੂਮਰੋਰੁਵੋ ਖਾਰਧੂਮੇਨ ਪੁਣ੍ਣੋ. ਤੇਸੁ ਜਾਲਰੋਰੁਵੇ ਪਚ੍ਚਨ੍ਤਾਨਂ ਨਵਹਿ ਵਣ੍ਣਮੁਖੇਹਿ ਜਾਲਾ ਪਵਿਸਿਤ੍ਵਾ ਸਰੀਰਂ ਦਹਨ੍ਤਿ, ਧੂਮਰੋਰੁਵੇ ਪਚ੍ਚਨ੍ਤਾਨਂ ਨਵਹਿ ਵਣਮੁਖੇਹਿ ਖਾਰਧੂਮੋ ਪਵਿਸਿਤ੍ਵਾ ਪਿਟ੍ਠਂ ਵਿਯ ਸਰੀਰਂ ਸੇਦੇਤਿ. ਉਭਯਤ੍ਥਪਿ ਪਚ੍ਚਨ੍ਤਾ ਸਤ੍ਤਾ ਮਹਾਵਿਰਵਂ ਵਿਰਵਨ੍ਤੀਤਿ ਦ੍ਵੇਪਿ ‘‘ਰੋਰੁਵਾ’’ਤਿ ਵੁਤ੍ਤਾ. ਜਾਲਾਨਂ ਵਾ ਪਚ੍ਚਨਸਤ੍ਤਾਨਂ ਵਾ ਤੇਸਂ ਦੁਕ੍ਖਸ੍ਸ ਵਾ ਵੀਚਿ ਅਨ੍ਤਰਂ ਨਤ੍ਥਿ ਏਤ੍ਥਾਤਿ ਅਵੀਚਿ, ਮਹਨ੍ਤੋ ਅਵੀਚਿ ਮਹਾਵੀਚਿ. ਤਤ੍ਥ ਹਿ ਪੁਰਤ੍ਥਿਮਾਦੀਹਿ ਭਿਤ੍ਤੀਹਿ ਜਾਲਾ ਉਟ੍ਠਹਿਤ੍ਵਾ ਪਚ੍ਛਿਮਾਦੀਸੁ ਪਟਿਹਞ੍ਞਤਿ, ਤਾ ਚ ਭਿਤ੍ਤਿਯੋ ਵਿਨਿਵਿਜ੍ਝਿਤ੍ਵਾ ਪੁਰਤੋ ਯੋਜਨਸਤਂ ਗਣ੍ਹਾਤਿ. ਹੇਟ੍ਠਾ ਉਟ੍ਠਿਤਾ ਜਾਲਾ ਉਪਰਿ ਪਟਿਹਞ੍ਞਤਿ, ਉਪਰਿ ਉਟ੍ਠਿਤਾ ਹੇਟ੍ਠਾ ਪਟਿਹਞ੍ਞਤਿ. ਏਵਂ ਤਾਵੇਤ੍ਥ ਜਾਲਾਨਂ ਵੀਚਿ ਨਾਮ ਨਤ੍ਥਿ. ਤਸ੍ਸ ਪਨ ਅਨ੍ਤੋ ਯੋਜਨਸਤਂ ਠਾਨਂ ਖੀਰਵਲ੍ਲਿਪਿਟ੍ਠਸ੍ਸ ਪੂਰਿਤਨਾਲ਼ਿ ਵਿਯ ਸਤ੍ਤੇਹਿ ਨਿਰਨ੍ਤਰਂ ਪੂਰਿਤਂ ਚਤੂਹਿ ਇਰਿਯਾਪਥੇਹਿ ਪਚ੍ਚਨ੍ਤਾਨਂ ਸਤ੍ਤਾਨਂ ਪਮਾਣਂ ਨਤ੍ਥਿ, ਨ ਚ ਅਞ੍ਞਮਞ੍ਞਂ ਬ੍ਯਾਬਾਧੇਨ੍ਤਿ, ਸਕਟ੍ਠਾਨੇਯੇਵ ਪਚ੍ਚਨ੍ਤਿ. ਏਵਮੇਤ੍ਥ ਸਤ੍ਤਾਨਂ ਵੀਚਿ ਨਾਮ ਨਤ੍ਥਿ. ਯਥਾ ਪਨ ਜਿਵ੍ਹਗ੍ਗੇ ਛ ਮਧੁਬਿਨ੍ਦੂਨਿ ਸਤ੍ਤਮਸ੍ਸ ਤਮ੍ਬਲੋਹਬਿਨ੍ਦੁਨੋ ਅਨੁਦਹਨਬਲਵਤਾਯ ਅਬ੍ਬੋਹਾਰਿਕਾਨਿ ਹੋਨ੍ਤਿ, ਤਥਾ ਤਤ੍ਥ ਅਨੁਦਹਨਬਲਵਤਾਯ ਸੇਸਾ ਛ ਅਕੁਸਲਵਿਪਾਕੁਪੇਕ੍ਖਾ ਅਬ੍ਬੋਹਾਰਿਕਾ ਹੋਨ੍ਤਿ, ਦੁਕ੍ਖਮੇਵ ਨਿਰਨ੍ਤਰਂ ਪਞ੍ਞਾਯਤਿ. ਏਵਮੇਤ੍ਥ ਦੁਕ੍ਖਸ੍ਸ ਵੀਚਿ ਨਾਮ ਨਤ੍ਥਿ. ਸ੍ਵਾਯਂ ਸਹ ਭਿਤ੍ਤੀਹਿ ਵਿਕ੍ਖਮ੍ਭਤੋ ਅਟ੍ਠਾਰਸਾਧਿਕਤਿਯੋਜਨਸਤੋ, ਆਵਟ੍ਟਤੋ ਪਨ ਚਤੁਪਣ੍ਣਾਸਾਧਿਕਨਵਯੋਜਨਸਤੋ, ਸਹ ਉਸ੍ਸਦੇਹਿ ਦਸ ਯੋਜਨਸਹਸ੍ਸਾਨਿ. ਏਵਮਸ੍ਸ ਮਹਨ੍ਤਤਾ ਵੇਦਿਤਬ੍ਬਾ.

ਨਿਚ੍ਚਲੇ ਸਤ੍ਤੇ ਤਪਤੀਤਿ ਤਾਪਨੋ. ਅਤਿਵਿਯ ਤਾਪੇਤੀਤਿ ਪਤਾਪਨੋ. ਤਤ੍ਥ ਤਾਪਨਸ੍ਮਿਂ ਤਾਵ ਸਤ੍ਤੇ ਤਾਲਕ੍ਖਨ੍ਧਪ੍ਪਮਾਣੇ ਜਲਿਤਅਯਸੂਲੇ ਨਿਸੀਦਾਪੇਨ੍ਤਿ. ਤਤੋ ਹੇਟ੍ਠਾ ਪਥਵੀ ਜਲਤਿ, ਸੂਲਾਨਿ ਜਲਨ੍ਤਿ, ਸਤ੍ਤਾ ਜਲਨ੍ਤਿ. ਏਵਂ ਸੋ ਨਿਰਯੋ ਨਿਚ੍ਚਲੇ ਸਤ੍ਤੇ ਤਪਤਿ. ਇਤਰਸ੍ਮਿਂ ਪਨ ਨਿਬ੍ਬਤ੍ਤਸਤ੍ਤੇ ਜਲਨ੍ਤੇਹਿ ਆਵੁਧੇਹਿ ਪਹਰਿਤ੍ਵਾ ਜਲਿਤਂ ਅਯਪਬ੍ਬਤਂ ਆਰੋਪੇਨ੍ਤਿ. ਤੇਸਂ ਪਬ੍ਬਤਮਤ੍ਥਕੇ ਠਿਤਕਾਲੇ ਕਮ੍ਮਪਚ੍ਚਯੋ ਵਾਤੋ ਪਹਰਤਿ. ਤੇ ਤਤ੍ਥ ਸਣ੍ਠਾਤੁਂ ਅਸਕ੍ਕੋਨ੍ਤਾ ਉਦ੍ਧਂਪਾਦਾ ਅਧੋਸਿਰਾ ਪਤਨ੍ਤਿ. ਅਥ ਹੇਟ੍ਠਾ ਅਯਪਥਵਿਤੋ ਜਲਿਤਾਨਿ ਅਯਸੂਲਾਨਿ ਉਟ੍ਠਹਨ੍ਤਿ. ਤੇ ਤਾਨਿ ਮਤ੍ਥਕੇਨੇਵ ਪਹਰਿਤ੍ਵਾ ਤੇਸੁ ਵਿਨਿਵਿਦ੍ਧਸਰੀਰਾ ਜਲਨ੍ਤਾ ਪਚ੍ਚਨ੍ਤਿ. ਏਵਮੇਸ ਅਤਿਵਿਯ ਤਾਪੇਤੀਤਿ.

ਬੋਧਿਸਤ੍ਤੋ ਪਨ ਏਤੇ ਨਿਰਯੇ ਦਸ੍ਸੇਨ੍ਤੋ ਪਠਮਂ ਸਞ੍ਜੀਵਂ ਦਸ੍ਸੇਤ੍ਵਾ ਤਤ੍ਥ ਪਚ੍ਚਨ੍ਤੇ ਨੇਰਯਿਕਸਤ੍ਤੇ ਦਿਸ੍ਵਾ ਮਹਾਜਨਸ੍ਸ ਮਹਾਭਯੇ ਉਪ੍ਪਨ੍ਨੇ ਤਂ ਅਨ੍ਤਰਧਾਪੇਤ੍ਵਾ ਪੁਨ ਪਥਵਿਂ ਦ੍ਵਿਧਾ ਕਤ੍ਵਾ ਕਾਲ਼ਸੁਤ੍ਤਂ ਦਸ੍ਸੇਸਿ, ਤਤ੍ਥਪਿ ਪਚ੍ਚਮਾਨੇ ਸਤ੍ਤੇ ਦਿਸ੍ਵਾ ਮਹਾਜਨਸ੍ਸ ਮਹਾਭਯੇ ਉਪ੍ਪਨ੍ਨੇ ਤਮ੍ਪਿ ਅਨ੍ਤਰਧਾਪੇਸੀਤਿ ਏਵਂ ਪਟਿਪਾਟਿਯਾ ਦਸ੍ਸੇਸਿ. ਤਤੋ ਰਾਜਾਨਂ ਆਮਨ੍ਤੇਤ੍ਵਾ, ‘‘ਮਹਾਰਾਜ, ਤਯਾ ਇਮੇਸੁ ਅਟ੍ਠਸੁ ਮਹਾਨਿਰਯੇਸੁ ਪਚ੍ਚਮਾਨੇ ਸਤ੍ਤੇ ਦਿਸ੍ਵਾ ਅਪ੍ਪਮਾਦਂ ਕਾਤੁਂ ਵਟ੍ਟਤੀ’’ਤਿ ਵਤ੍ਵਾ ਪੁਨ ਤੇਸਞ੍ਞੇਵ ਮਹਾਨਿਰਯਾਨਂ ਕਿਚ੍ਚਂ ਕਥੇਤੁਂ ‘‘ਇਚ੍ਚੇਤੇ’’ਤਿਆਦਿਮਾਹ. ਤਤ੍ਥ ਅਕ੍ਖਾਤਾਤਿ ਮਯਾ ਚ ਤੁਯ੍ਹਂ ਕਥਿਤਾ, ਪੋਰਾਣਕੇਹਿ ਚ ਕਥਿਤਾਯੇਵ. ਆਕਿਣ੍ਣਾਤਿ ਪਰਿਪੁਣ੍ਣਾ. ਪਚ੍ਚੇਕਾ ਸੋਲ਼ਸੁਸ੍ਸਦਾਤਿ ਏਤੇਸਂ ਨਿਰਯਾਨਂ ਏਕੇਕਸ੍ਸ ਚਤੂਸੁ ਦ੍ਵਾਰੇਸੁ ਏਕੇਕਸ੍ਮਿਂ ਚਤ੍ਤਾਰੋ ਚਤ੍ਤਾਰੋ ਕਤ੍ਵਾ ਸੋਲ਼ਸ ਸੋਲ਼ਸ ਉਸ੍ਸਦਨਿਰਯਾਤਿ ਸਬ੍ਬੇਪਿ ਸਤਂ ਅਟ੍ਠਵੀਸਤਿ ਚ ਉਸ੍ਸਦਨਿਰਯਾ ਅਟ੍ਠ ਚ ਮਹਾਨਿਰਯਾਤਿ ਛਤ੍ਤਿਂਸਨਿਰਯਸਤਂ. ਕਦਰਿਯਤਾਪਨਾਤਿ ਸਬ੍ਬੇਤੇ ਕਦਰਿਯਾਨਂ ਤਾਪਨਾ. ਬਲਵਦੁਕ੍ਖਤਾਯ ਘੋਰਾ. ਕਮ੍ਮਨਿਬ੍ਬਤ੍ਤਾਨਂ ਅਚ੍ਚੀਨਂ ਅਤ੍ਥਿਤਾਯ ਅਚ੍ਚਿਮਨ੍ਤੋ. ਭਯਸ੍ਸ ਮਹਨ੍ਤਤਾਯ ਮਹਬ੍ਭਯਾ. ਦਿਟ੍ਠਮਤ੍ਤਾ ਵਾ ਸੁਤਮਤ੍ਤਾ ਵਾ ਲੋਮਾਨਿ ਹਂਸਨ੍ਤੀਤਿ ਲੋਮਹਂਸਨਰੂਪਾ ਚ. ਭੀਸਨਤਾਯ ਭੇਸ੍ਮਾ. ਭਯਜਨਨਤਾਯ ਪਟਿਭਯਾ. ਸੁਖਾਭਾਵੇਨ ਦੁਖਾ. ਚਤੁਕ੍ਕਣ੍ਣਾਤਿ ਸਬ੍ਬੇਪਿ ਚਤੁਰਸ੍ਸਮਞ੍ਜੂਸਸਦਿਸਾ. ਵਿਭਤ੍ਤਾਤਿ ਚਤੁਦ੍ਵਾਰਵਸੇਨ ਵਿਭਤ੍ਤਾ. ਭਾਗਸੋ ਮਿਤਾਤਿ ਦ੍ਵਾਰਵੀਥੀਨਂ ਵਸੇਨ ਕੋਟ੍ਠਾਸੇ ਠਪੇਤ੍ਵਾ ਮਿਤਾ. ਅਯਸਾ ਪਟਿਕੁਜ੍ਜਿਤਾਤਿ ਸਬ੍ਬੇਪਿ ਨਵਯੋਜਨਿਕੇਨ ਅਯਕਪਾਲੇਨ ਪਟਿਚ੍ਛਨ੍ਨਾ. ਫੁਟਾ ਤਿਟ੍ਠਨ੍ਤੀਤਿ ਸਬ੍ਬੇਪਿ ਏਤ੍ਤਕਂ ਠਾਨਂ ਅਨੁਫਰਿਤ੍ਵਾ ਤਿਟ੍ਠਨ੍ਤਿ.

ਉਦ੍ਧਂਪਾਦਾ ਅਵਂਸਿਰਾਤਿ ਏਵਂ ਤੇਸੁ ਤੇਸੁ ਨਿਰਯੇਸੁ ਸਮ੍ਪਰਿਵਤ੍ਤਿਤ੍ਵਾ ਪੁਨਪ੍ਪੁਨਂ ਪਤਮਾਨੇ ਸਨ੍ਧਾਯਾਹ. ਅਤਿਵਤ੍ਤਾਰੋਤਿ ਫਰੁਸਵਾਚਾਹਿ ਅਤਿਕ੍ਕਮਿਤ੍ਵਾ ਵਤ੍ਤਾਰੋ. ਮਹਾਨਿਰਯੇਸੁ ਕਿਰ ਯੇਭੁਯ੍ਯੇਨ ਧਮ੍ਮਿਕਸਮਣਬ੍ਰਾਹ੍ਮਣੇਸੁ ਕਤਾਪਰਾਧਾਵ ਪਚ੍ਚਨ੍ਤਿ, ਤਸ੍ਮਾ ਏਵਮਾਹ. ਤੇ ਭੂਨਹੁਨੋਤਿ ਤੇ ਇਸੀਨਂ ਅਤਿਵਤ੍ਤਾਰੋ ਅਤ੍ਤਨੋ ਵੁਡ੍ਢਿਯਾ ਹਤਤ੍ਤਾ ਭੂਨਹੁਨੋ ਕੋਟ੍ਠਾਸਕਤਾ ਮਚ੍ਛਾ ਵਿਯ ਪਚ੍ਚਨ੍ਤਿ. ਅਸਙ੍ਖੇਯ੍ਯੇਤਿ ਗਣੇਤੁਂ ਅਸਕ੍ਕੁਣੇਯ੍ਯੇ. ਕਿਬ੍ਬਿਸਕਾਰਿਨੋਤਿ ਦਾਰੁਣਕਮ੍ਮਕਾਰਿਨੋ. ਨਿਕ੍ਖਮਨੇਸਿਨੋਤਿ ਨਿਰਯਾ ਨਿਕ੍ਖਮਨਂ ਏਸਨ੍ਤਾਪਿ ਗਵੇਸਨ੍ਤਾਪਿ ਨਿਕ੍ਖਮਨਦ੍ਵਾਰਂ ਨਾਧਿਗਚ੍ਛਨ੍ਤਿ. ਪੁਰਤ੍ਥਿਮੇਨਾਤਿ ਯਦਾ ਤਂ ਦ੍ਵਾਰਂ ਅਪਾਰੁਤਂ ਹੋਤਿ, ਅਥ ਤਦਭਿਮੁਖਾ ਧਾਵਨ੍ਤਿ, ਤੇਸਂ ਤਤ੍ਥ ਛਵਿਆਦੀਨਿ ਝਾਯਨ੍ਤਿ. ਦ੍ਵਾਰਸਮੀਪਂ ਪਤ੍ਤਾਨਞ੍ਚ ਤੇਸਂ ਤਂ ਪਿਧੀਯਤਿ, ਪਚ੍ਛਿਮਦ੍ਵਾਰਂ ਅਪਾਰੁਤਂ ਵਿਯ ਖਾਯਤਿ. ਏਸ ਨਯੋ ਸਬ੍ਬਤ੍ਥ. ਨ ਸਾਧੁਰੂਪੇਤਿ ਵੁਤ੍ਤਪ੍ਪਕਾਰਂ ਸਪ੍ਪਂ ਵਿਯ ਸਾਧੁਰੂਪੇ ਇਸਯੋ ਨ ਆਸੀਦੇ, ਨ ਫਰੁਸਵਚਨੇਨ ਕਾਯਕਮ੍ਮੇਨ ਵਾ ਘਟ੍ਟੇਨ੍ਤੋ ਉਪਗਚ੍ਛੇਯ੍ਯ. ਕਿਂਕਾਰਣਾ? ਸਞ੍ਞਤਾਨਂ ਤਪਸ੍ਸੀਨਂ ਆਸਾਦਿਤਤ੍ਤਾ ਅਟ੍ਠਸੁ ਮਹਾਨਿਰਯੇਸੁ ਮਹਾਦੁਕ੍ਖਸ੍ਸ ਅਨੁਭਵਿਤਬ੍ਬਤ੍ਤਾ.

ਇਦਾਨਿ ਯੇ ਰਾਜਾਨੋ ਤਥਾਰੂਪੇ ਆਸਾਦੇਤ੍ਵਾ ਤਂ ਦੁਕ੍ਖਂ ਪਤ੍ਤਾ, ਤੇ ਦਸ੍ਸੇਤੁਂ ‘‘ਅਤਿਕਾਯੋ’’ਤਿਆਦਿਮਾਹ. ਤਤ੍ਥ ਅਤਿਕਾਯੋਤਿ ਬਲਸਮ੍ਪਨ੍ਨੋ ਮਹਾਕਾਯੋ. ਮਹਿਸ੍ਸਾਸੋਤਿ ਮਹਾਧਨੁਗ੍ਗਹੋ. ਕੇਕਕਾਧਿਪੋਤਿ ਕੇਕਕਰਟ੍ਠਾਧਿਪਤਿ. ਸਹਸ੍ਸਬਾਹੂਤਿ ਪਞ੍ਚਹਿ ਧਨੁਗ੍ਗਹਸਤੇਹਿ ਬਾਹੁਸਹਸ੍ਸੇਨ ਆਰੋਪੇਤਬ੍ਬਂ ਧਨੁਂ ਆਰੋਪਨਸਮਤ੍ਥਤਾਯ ਸਹਸ੍ਸਬਾਹੁ. ਵਿਭਵਙ੍ਗਤੋਤਿ ਵਿਨਾਸਂ ਪਤ੍ਤੋ. ਵਤ੍ਥੂਨਿ ਪਨ ਸਰਭਙ੍ਗਜਾਤਕੇ (ਜਾ. ੨.੧੭.੫੦ ਆਦਯੋ) ਵਿਤ੍ਥਾਰਿਤਾਨਿ. ਉਪਹਚ੍ਚ ਮਨਨ੍ਤਿ ਅਤ੍ਤਨੋ ਚਿਤ੍ਤਂ ਪਦੂਸੇਤ੍ਵਾ. ਮਾਤਙ੍ਗਸ੍ਮਿਨ੍ਤਿ ਮਾਤਙ੍ਗਪਣ੍ਡਿਤੇ. ਵਤ੍ਥੁ ਮਾਤਙ੍ਗਜਾਤਕੇ (ਜਾ. ੧.੧੫.੧ ਆਦਯੋ) ਵਣ੍ਣਿਤਂ. ਕਣ੍ਹਦੀਪਾਯਨਾਸਜ੍ਜਾਤਿ ਕਣ੍ਹਦੀਪਾਯਨਂ ਆਸਜ੍ਜ. ਯਮਸਾਧਨਨ੍ਤਿ ਨਿਰਯਪਾਲਕਰਞ੍ਞੋ ਆਣਾਪਵਤ੍ਤਟ੍ਠਾਨਂ. ਵਤ੍ਥੁ ਘਟਪਣ੍ਡਿਤਜਾਤਕੇ (ਜਾ. ੧.੧੦.੧੬੫ ਆਦਯੋ) ਵਿਤ੍ਥਾਰਿਤਂ. ਇਸਿਨਾਤਿ ਕਪਿਲਤਾਪਸੇਨ. ਪਾਵੇਕ੍ਖੀਤਿ ਪਵਿਟ੍ਠੋ. ਚੇਚ੍ਚੋਤਿ ਚੇਤਿਯਰਾਜਾ. ਹੀਨਤ੍ਤੋਤਿ ਪਰਿਹੀਨਤ੍ਤਭਾਵੋ ਅਨ੍ਤਰਹਿਤਇਦ੍ਧਿ. ਪਤ੍ਤਪਰਿਯਾਯਨ੍ਤਿ ਪਰਿਯਾਯਂ ਮਰਣਕਾਲਂ ਪਤ੍ਵਾ. ਵਤ੍ਥੁ ਚੇਤਿਯਜਾਤਕੇ (ਜਾ. ੧.੮.੪੫ ਆਦਯੋ) ਕਥਿਤਂ.

ਤਸ੍ਮਾ ਹੀਤਿ ਯਸ੍ਮਾ ਚਿਤ੍ਤਵਸਿਕੋ ਹੁਤ੍ਵਾ ਇਸੀਸੁ ਅਪਰਜ੍ਝਿਤ੍ਵਾ ਅਟ੍ਠਸੁ ਮਹਾਨਿਰਯੇਸੁ ਪਚ੍ਚਤਿ, ਤਸ੍ਮਾ ਹਿ. ਛਨ੍ਦਾਗਮਨਨ੍ਤਿ ਛਨ੍ਦਾਦਿਚਤੁਬ੍ਬਿਧਮ੍ਪਿ ਅਗਤਿਗਮਨਂ. ਪਦੁਟ੍ਠੇਨਾਤਿ ਕੁਦ੍ਧੇਨ. ਗਨ੍ਤਾ ਸੋ ਨਿਰਯਂ ਅਧੋਤਿ ਸੋ ਤੇਨ ਅਧੋਗਮਨਿਯੇਨ ਕਮ੍ਮੇਨ ਅਧੋਨਿਰਯਮੇਵ ਗਚ੍ਛਤਿ. ਪਾਲ਼ਿਯਂ ਪਨ ‘‘ਨਿਰਯੁਸ੍ਸਦ’’ਨ੍ਤਿ ਲਿਖਿਤਂ, ਤਸ੍ਸ ਉਸ੍ਸਦਨਿਰਯਂ ਗਚ੍ਛਤੀਤਿ ਅਤ੍ਥੋ. ਵੁਡ੍ਢੇਤਿ ਵਯੋਵੁਡ੍ਢੇ ਚ ਗੁਣਵੁਡ੍ਢੇ ਚ. ਅਨਪਚ੍ਚਾਤਿ ਭਵਨ੍ਤਰੇਪਿ ਅਪਚ੍ਚਂ ਵਾ ਦਾਯਾਦਂ ਵਾ ਨ ਲਭਨ੍ਤੀਤਿ ਅਤ੍ਥੋ. ਤਾਲਵਤ੍ਥੂਤਿ ਦਿਟ੍ਠਧਮ੍ਮੇਪਿ ਛਿਨ੍ਨਮੂਲਤਾਲੋ ਵਿਯ ਮਹਾਵਿਨਾਸਂ ਪਤ੍ਵਾ ਨਿਰਯੇ ਨਿਬ੍ਬਤ੍ਤਨ੍ਤਿ. ਯੋ ਚ ਪਬ੍ਬਜਿਤਂ ਹਨ੍ਤੀਤਿ ਯੋ ਬਾਲਜਨੋ ਸਮਣਂ ਹਨਤਿ. ਚਿਰਰਤ੍ਤਾਯਾਤਿ ਚਿਰਂ ਕਾਲਂ.

ਏਵਂ ਮਹਾਸਤ੍ਤੋ ਇਸਿਵਿਹੇਠਕਾਨਂ ਪਚ੍ਚਨਨਿਰਯੇ ਦਸ੍ਸੇਤ੍ਵਾ ਉਪਰਿ ਅਧਮ੍ਮਿਕਰਾਜੂਨਂ ਪਚ੍ਚਨਨਿਰਯੇ ਦਸ੍ਸੇਨ੍ਤੋ ‘‘ਯੋ ਚਾ’’ਤਿਆਦਿਮਾਹ. ਤਤ੍ਥ ਰਟ੍ਠਵਿਦ੍ਧਂਸਨੋਤਿ ਛਨ੍ਦਾਦਿਵਸੇਨ ਗਨ੍ਤ੍ਵਾ ਰਟ੍ਠਸ੍ਸ ਵਿਦ੍ਧਂਸਨੋ. ਅਚ੍ਚਿਸਙ੍ਘਪਰੇਤੋਤਿ ਅਚ੍ਚਿਸਮੂਹਪਰਿਕ੍ਖਿਤ੍ਤੋ. ਤੇਜੋਭਕ੍ਖਸ੍ਸਾਤਿ ਅਗ੍ਗਿਮੇਵ ਖਾਦਨ੍ਤਸ੍ਸ. ਗਤ੍ਤਾਨੀਤਿ ਤਿਗਾਵੁਤੇ ਸਰੀਰੇ ਸਬ੍ਬਙ੍ਗਪਚ੍ਚਙ੍ਗਾਨਿ. ਲੋਮੇਹਿ ਚ ਨਖੇਹਿ ਚਾਤਿ ਏਤੇਹਿ ਸਦ੍ਧਿਂ ਸਬ੍ਬਾਨਿ ਏਕਜਾਲਾਨਿ ਹੋਨ੍ਤਿ. ਤੁਤ੍ਤਟ੍ਟੀਤੋਤਿ ਆਨੇਞ੍ਜਕਾਰਣਂ ਕਾਰਿਯਮਾਨੋ ਤੁਤ੍ਤੇਹਿ ਵਿਦ੍ਧੋ ਨਾਗੋ ਯਥਾ ਨਦਤਿ.

ਏਵਂ ਮਹਾਸਤ੍ਤੋ ਅਧਮ੍ਮਿਕਰਾਜੂਨਂ ਪਚ੍ਚਨਨਿਰਯੇ ਦਸ੍ਸੇਤ੍ਵਾ ਇਦਾਨਿ ਪਿਤੁਘਾਤਕਾਦੀਨਂ ਪਚ੍ਚਨਨਿਰਯੇ ਦਸ੍ਸੇਤੁਂ ‘‘ਯੋ ਲੋਭਾ’’ਤਿਆਦਿਮਾਹ. ਤਤ੍ਥ ਲੋਭਾਤਿ ਯਸਧਨਲੋਭੇਨ. ਦੋਸਾ ਵਾਤਿ ਦੁਟ੍ਠਚਿਤ੍ਤਤਾਯ ਵਾ. ਨਿਤ੍ਤਚਨ੍ਤਿ ਲੋਹਕੁਮ੍ਭਿਯਂ ਬਹੂਨਿ ਵਸਸਹਸ੍ਸਾਨਿ ਪਕ੍ਕਂ ਨੀਹਰਿਤ੍ਵਾ ਤਿਗਾਵੁਤਮਸ੍ਸ ਸਰੀਰਂ ਨਿਤ੍ਤਚਂ ਕਤ੍ਵਾ ਜਲਿਤਾਯ ਲੋਹਪਥਵਿਯਂ ਪਾਤੇਤ੍ਵਾ ਤਿਣ੍ਹੇਹਿ ਅਯਸੂਲੇਹਿ ਕੋਟ੍ਟੇਤ੍ਵਾ ਚੁਣਵਿਚੁਣ੍ਣਂ ਕਰੋਨ੍ਤਿ. ਅਨ੍ਧਂ ਕਰਿਤ੍ਵਾਤਿ, ਮਹਾਰਾਜ, ਤਂ ਪਿਤੁਘਾਤਕਂ ਨਿਰਯਪਾਲਾ ਜਲਿਤਲੋਹਪਥਵਿਯਂ ਉਤ੍ਤਾਨਂ ਪਾਤੇਤ੍ਵਾ ਜਲਿਤੇਹਿ ਅਯਸੂਲੇਹਿ ਅਕ੍ਖੀਨਿ ਭਿਨ੍ਦਿਤ੍ਵਾ ਅਨ੍ਧਂ ਕਰਿਤ੍ਵਾ ਮੁਖੇ ਉਣ੍ਹਂ ਮੁਤ੍ਤਕਰੀਸਂ ਪਕ੍ਖਿਪਿਤ੍ਵਾ ਪਲਾਲਪੀਠਂ ਵਿਯ ਨਂ ਪਰਿਵਤ੍ਤੇਤ੍ਵਾ ਕਪ੍ਪੇਨ ਸਣ੍ਠਿਤੇ ਖਾਰੇ ਲੋਹਉਦਕੇ ਨਿਮੁਜ੍ਜਾਪੇਨ੍ਤਿ. ਤਤ੍ਤਂ ਪਕ੍ਕੁਥਿਤਮਯੋਗੁਲ਼ਞ੍ਚਾਤਿ ਪੁਨ ਪਕ੍ਕੁਥਿਤਂ ਗੂਥਕਲਲਞ੍ਚੇਵ ਜਲਿਤਅਯੋਗੁਲ਼ਞ੍ਚ ਖਾਦਾਪੇਨ੍ਤਿ. ਸੋ ਪਨ ਤਂ ਆਹਰਿਯਮਾਨਂ ਦਿਸ੍ਵਾ ਮੁਖਂ ਪਿਧੇਤਿ. ਅਥਸ੍ਸ ਦੀਘੇ ਚਿਰਤਾਪਿਤੇ ਜਲਮਾਨੇ ਫਾਲੇ ਆਦਾਯ ਮੁਖਂ ਵਿਕ੍ਖਮ੍ਭੇਤ੍ਵਾ ਵਿਵਰਿਤ੍ਵਾ ਰਜ੍ਜੁਬਦ੍ਧਂ ਅਯਬਲਿਸਂ ਖਿਪਿਤ੍ਵਾ ਜਿਵ੍ਹਂ ਨੀਹਰਿਤ੍ਵਾ ਤਸ੍ਮਿਂ ਵਿਵਟੇ ਮੁਖੇ ਤਂ ਅਯੋਗੁਲ਼ਂ ਸਮ੍ਪਵਿਸਨ੍ਤਿ ਪਕ੍ਖਿਪਨ੍ਤਿ. ਰਕ੍ਖਸਾਤਿ ਨਿਰਯਪਾਲਾ.

ਸਾਮਾ ਚਾਤਿ, ਮਹਾਰਾਜ, ਤਸ੍ਸ ਪਿਤੁਘਾਤਕਸ੍ਸ ਜਿਵ੍ਹਂ ਬਲਿਸੇਨ ਨਿਕ੍ਕਡ੍ਢਿਤ੍ਵਾ ਅਯਸਙ੍ਕੂਹਿ ਪਥਵਿਯਂ ਨੀਹਤਂ ਜਿਵ੍ਹਂ ਸਾਮਾ ਸੋਣਾ ਸਬਲਵਣ੍ਣਾ ਸੁਨਖਾ ਚ ਲੋਹਤੁਣ੍ਡਾ ਗਿਜ੍ਝਾ ਚ ਕਾਕੋਲਸਙ੍ਘਾ ਚ ਅਞ੍ਞੇ ਚ ਨਾਨਪ੍ਪਕਾਰਾ ਸਕੁਣਾ ਸਮਾਗਨ੍ਤ੍ਵਾ ਆਵੁਧੇਹਿ ਛਿਨ੍ਦਨ੍ਤਾ ਵਿਯ ਵਿਭਜ੍ਜ ਕਾਕਪਦਾਕਾਰੇਨ ਕੋਟ੍ਠਾਸੇ ਕਤ੍ਵਾ ਵਿਪ੍ਫਨ੍ਦਮਾਨਂ ਸਲੋਹਿਤਂ ਵਿਘਾਸਂ ਖਾਦਨ੍ਤਾ ਵਿਯ ਸਤ੍ਤੇ ਭਕ੍ਖਯਨ੍ਤੀਤਿ ਅਤ੍ਥੋ. ਤਂ ਦਡ੍ਢਤਾਲਨ੍ਤਿ ਤਂ ਪਿਤੁਘਾਤਕਂ ਝਾਯਮਾਨਤਾਲਂ ਵਿਯ ਜਲਿਤਸਰੀਰਂ. ਪਰਿਭਿਨ੍ਨਗਤ੍ਤਨ੍ਤਿ ਤਤ੍ਥ ਤਤ੍ਥ ਪਰਿਭਿਨ੍ਨਗਤ੍ਤਂ. ਨਿਪ੍ਪੋਥਯਨ੍ਤਾਤਿ ਜਲਿਤੇਹਿ ਅਯਮੁਗ੍ਗਰੇਹਿ ਪਹਰਨ੍ਤਾ. ਰਤੀ ਹਿ ਤੇਸਨ੍ਤਿ ਤੇਸਂ ਨਿਰਯਪਾਲਾਨਂ ਸਾ ਰਤਿ ਕੀਲ਼ਾ ਹੋਤਿ. ਦੁਖਿਨੋ ਪਨੀਤਰੇਤਿ ਇਤਰੇ ਪਨ ਨੇਰਯਿਕਸਤ੍ਤਾ ਦੁਕ੍ਖਿਤਾ ਹੋਨ੍ਤਿ. ਪੇਤ੍ਤਿਘਾਤਿਨੋਤਿ ਪਿਤੁਘਾਤਕਾ. ਇਤਿ ਇਮਂ ਪਿਤੁਘਾਤਕਾਨਂ ਪਚ੍ਚਨਨਿਰਯਂ ਦਿਸ੍ਵਾ ਰਾਜਾ ਭੀਤਤਸਿਤੋ ਅਹੋਸਿ.

ਅਥ ਨਂ ਮਹਾਸਤ੍ਤੋ ਸਮਸ੍ਸਾਸੇਤ੍ਵਾ ਮਾਤੁਘਾਤਕਾਨਂ ਪਚ੍ਚਨਨਿਰਯਂ ਦਸ੍ਸੇਸਿ. ਯਮਕ੍ਖਯਨ੍ਤਿ ਯਮਨਿਵੇਸਨਂ, ਨਿਰਯਨ੍ਤਿ ਅਤ੍ਥੋ. ਅਤ੍ਤਕਮ੍ਮਫਲੂਪਗੋਤਿ ਅਤ੍ਤਨੋ ਕਮ੍ਮਫਲੇਨ ਉਪਗਤੋ. ਅਮਨੁਸ੍ਸਾਤਿ ਨਿਰਯਪਾਲਾ. ਹਨ੍ਤਾਰਂ ਜਨਯਨ੍ਤਿਯਾਤਿ ਮਾਤੁਘਾਤਕਂ. ਵਾਲੇਹੀਤਿ ਅਯਮਕਚਿਵਾਲੇਹਿ ਵੇਠੇਤ੍ਵਾ ਅਯਯਨ੍ਤੇਨ ਪੀਲ਼ਯਨ੍ਤਿ. ਤਨ੍ਤਿ ਤਂ ਮਾਤੁਘਾਤਕਂ. ਪਾਯੇਨ੍ਤੀਤਿ ਤਸ੍ਸ ਪੀਲ਼ਿਯਮਾਨਸ੍ਸ ਰੁਹਿਰਂ ਗਲ਼ਿਤ੍ਵਾ ਅਯਕਪਲ੍ਲਂ ਪੂਰੇਤਿ. ਅਥ ਨਂ ਯਨ੍ਤਤੋ ਨੀਹਰਨ੍ਤਿ, ਤਾਵਦੇਵਸ੍ਸ ਸਰੀਰਂ ਪਾਕਤਿਕਂ ਹੋਤਿ. ਤਂ ਪਥਵਿਯਂ ਉਤ੍ਤਾਨਂ ਨਿਪਜ੍ਜਾਪੇਤ੍ਵਾ ਵਿਲੀਨਂ ਤਮ੍ਬਲੋਹਂ ਵਿਯ ਪਕ੍ਕੁਥਿਤਂ ਲੋਹਿਤਂ ਪਾਯੇਨ੍ਤਿ. ਓਗਯ੍ਹ ਤਿਟ੍ਠਤੀਤਿ ਤਂ ਬਹੂਨਿ ਵਸ੍ਸਸਹਸ੍ਸਾਨਿ ਅਯਯਨ੍ਤੇਹਿ ਪੀਲ਼ੇਤ੍ਵਾ ਜੇਗੁਚ੍ਛੇ ਦੁਗ੍ਗਨ੍ਧੇ ਪਟਿਕੂਲੇ ਮਹਨ੍ਤੇ ਗੂਥਕਲਲਆਵਾਟੇ ਖਿਪਨ੍ਤਿ, ਸੋ ਤਂ ਰਹਦਂ ਓਗਯ੍ਹ ਓਗਾਹਿਤ੍ਵਾ ਤਿਟ੍ਠਤਿ. ਅਤਿਕਾਯਾਤਿ ਏਕਦੋਣਿਕਨਾਵਪ੍ਪਮਾਣਸਰੀਰਾ. ਅਯੋਮੁਖਾਤਿ ਅਯਸੂਚਿਮੁਖਾ. ਛਵਿਂ ਭੇਤ੍ਵਾਨਾਤਿ ਛਵਿਮਾਦਿਂ ਕਤ੍ਵਾ ਯਾਵ ਅਟ੍ਠਿਮ੍ਪਿ ਭੇਤ੍ਵਾ ਅਟ੍ਠਿਮਿਞ੍ਜਮ੍ਪਿ ਖਾਦਨ੍ਤਿ. ਸਂਗਿਦ੍ਧਾਤਿ ਗਧਿਤਾ ਮੁਚ੍ਛਿਤਾ. ਨ ਕੇਵਲਞ੍ਚ ਖਾਦਨ੍ਤੇਵ, ਅਧੋਮਗ੍ਗਾਦੀਹਿ ਪਨ ਪਵਿਸਿਤ੍ਵਾ ਮੁਖਾਦੀਹਿ ਨਿਕ੍ਖਮਨ੍ਤਿ, ਵਾਮਪਸ੍ਸਾਦੀਹਿ ਪਵਿਸਿਤ੍ਵਾ ਦਕ੍ਖਿਣਪਸ੍ਸਾਦੀਹਿ ਨਿਕ੍ਖਮਨ੍ਤਿ, ਸਕਲਮ੍ਪਿ ਸਰੀਰਂ ਛਿਦ੍ਦਾਵਛਿਦ੍ਦਂ ਕਰੋਨ੍ਤਿ, ਸੋ ਤਤ੍ਥ ਅਤਿਦੁਕ੍ਖਪਰੇਤੋ ਵਿਰਵਨ੍ਤੋ ਪਚ੍ਚਤਿ. ਸੋ ਚਾਤਿ ਸੋ ਮਾਤੁਘਾਤਕੋ ਚ ਤਂ ਸਤਪੋਰਿਸਂ ਨਿਰਯਂ ਪਤ੍ਤੋ ਸਸੀਸਕੋ ਨਿਮੁਗ੍ਗੋਵ ਹੋਤਿ, ਤਞ੍ਚ ਕੁਣਪਂ ਸਮਨ੍ਤਾ ਯੋਜਨਸਤਂ ਪੂਤਿਕਂ ਹੁਤ੍ਵਾ ਵਾਯਤਿ. ਮਾਤੁਘੋਤਿ ਮਾਤੁਘਾਤਕੋ.

ਏਵਂ ਮਹਾਸਤ੍ਤੋ ਮਾਤੁਘਾਤਕਾਨਂ ਪਚ੍ਚਨਨਿਰਯਂ ਦਸ੍ਸੇਤ੍ਵਾ ਪੁਨ ਗਬ੍ਭਪਾਤਕਾਨਂ ਪਚ੍ਚਨਨਿਰਯਂ ਦਸ੍ਸੇਨ੍ਤੋ ਗਾਥਮਾਹ. ਖੁਰਧਾਰਮਨੁਕ੍ਕਮ੍ਮਾਤਿ ਖੁਰਧਾਰਨਿਰਯਂ ਅਤਿਕ੍ਕਮਿਤ੍ਵਾ. ਤਤ੍ਥ ਕਿਰ ਨਿਰਯਪਾਲਾ ਮਹਨ੍ਤਮਹਨ੍ਤੇ ਖੁਰੇ ਉਪਰਿ ਧਾਰੇ ਕਤ੍ਵਾ ਸਨ੍ਥਰਨ੍ਤਿ, ਤਤੋ ਯਾਹਿ ਗਬ੍ਭਪਾਤਨਖਰਭੇਸਜ੍ਜਾਨਿ ਪਿਵਿਤ੍ਵਾ ਗਬ੍ਭਾ ਪਾਤਿਤਾ, ਤਾ ਗਬ੍ਭਪਾਤਿਨਿਯੋ ਇਤ੍ਥਿਯੋ ਜਲਿਤੇਹਿ ਆਵੁਧੇਹਿ ਪੋਥੇਨ੍ਤਾ ਅਨੁਬਨ੍ਧਨ੍ਤਿ, ਤਾ ਤਿਖਿਣਖੁਰਧਾਰਾਸੁ ਖਣ੍ਡਾਖਣ੍ਡਿਕਾ ਹੁਤ੍ਵਾ ਪੁਨਪ੍ਪੁਨਂ ਉਟ੍ਠਾਯ ਤਂ ਦੁਰਭਿਸਮ੍ਭਵਂ ਖੁਰਧਾਰਨਿਰਯਂ ਅਕ੍ਕਮਨ੍ਤਿਯੋ ਅਤਿਕ੍ਕਮਿਤ੍ਵਾ ਨਿਰਯਪਾਲੇਹਿ ਅਨੁਬਦ੍ਧਾ ਦੁਗ੍ਗਂ ਦੁਰਤਿਕ੍ਕਮਂ ਵਿਸਮਂ ਵੇਤਰਣਿਂ ਨਦਿਂ ਪਤਨ੍ਤਿ. ਤਤ੍ਥ ਕਮ੍ਮਕਾਰਣਂ ਨਿਮਿਜਾਤਕੇ (ਜਾ. ੨.੨੨.੪੨੧ ਆਦਯੋ) ਆਵਿ ਭਵਿਸ੍ਸਤਿ.

ਏਵਂ ਗਬ੍ਭਪਾਤਿਨੀਨਂ ਨਿਰਯਂ ਦਸ੍ਸੇਤ੍ਵਾ ਮਹਾਸਤ੍ਤੋ ਯਤ੍ਥ ਪਰਦਾਰਿਕਾ ਚ ਅਤਿਚਾਰਿਨਿਯੋ ਚ ਪਤਨ੍ਤਾ ਪਚ੍ਚਨ੍ਤਿ, ਤਂ ਕਣ੍ਟਕਸਿਮ੍ਬਲਿਨਿਰਯਂ ਦਸ੍ਸੇਨ੍ਤੋ ‘‘ਅਯੋਮਯਾ’’ਤਿਆਦਿਮਾਹ. ਤਤ੍ਥ ਉਭਤੋ ਅਭਿਲਮ੍ਬਨ੍ਤੀਤਿ ਵੇਤਰਣਿਯਾ ਉਭੋਸੁ ਤੀਰੇਸੁ ਤਾਸਂ ਸਿਮ੍ਬਲੀਨਂ ਸਾਖਾ ਓਲਮ੍ਬਨ੍ਤਿ. ਤੇ ਅਚ੍ਚਿਮਨ੍ਤੋਤਿ ਤੇ ਪਜ੍ਜਲਿਤਸਰੀਰਾ ਸਤ੍ਤਾ ਅਚ੍ਚਿਮਨ੍ਤੋ ਹੁਤ੍ਵਾ ਤਿਟ੍ਠਨ੍ਤਿ. ਯੋਜਨਨ੍ਤਿ ਤਿਗਾਵੁਤਂ ਤੇਸਂ ਸਰੀਰਂ, ਤਤੋ ਉਟ੍ਠਿਤਜਾਲਾਯ ਪਨ ਸਦ੍ਧਿਂ ਯੋਜਨਉਬ੍ਬੇਧਾ ਹੋਨ੍ਤਿ. ਏਤੇ ਵਜਨ੍ਤੀਤਿ ਤੇ ਪਰਦਾਰਿਕਾ ਸਤ੍ਤਾ ਨਾਨਾਵਿਧੇਹਿ ਆਵੁਧੇਹਿ ਕੋਟ੍ਟਿਯਮਾਨਾ ਏਤੇ ਸਿਮ੍ਬਲਿਨਿਰਯੇ ਅਭਿਰੁਹਨ੍ਤਿ. ਤੇ ਪਤਨ੍ਤੀਤਿ ਤੇ ਬਹੂਨਿ ਵਸ੍ਸਸਹਸ੍ਸਾਨਿ ਰੁਕ੍ਖਵਿਟਪੇਸੁ ਲਗ੍ਗਾ ਝਾਯਿਤ੍ਵਾ ਪੁਨ ਨਿਰਯਪਾਲੇਹਿ ਆਵੁਧੇਹਿ ਵਿਹਤਾ ਵਿਵਤ੍ਤਾ ਹੁਤ੍ਵਾ ਪਰਿਵਤ੍ਤਿਤ੍ਵਾ ਅਧੋਸੀਸਕਾ ਪਤਨ੍ਤਿ. ਪੁਥੂਤਿ ਬਹੂ. ਵਿਨਿਵਿਦ੍ਧਙ੍ਗਾਤਿ ਤੇਸਂ ਤਤੋ ਪਤਨਕਾਲੇ ਹੇਟ੍ਠਾ ਅਯਪਥਵਿਤੋ ਸੂਲਾਨਿ ਉਟ੍ਠਹਿਤ੍ਵਾ ਤੇਸਂ ਮਤ੍ਥਕਂ ਪਟਿਚ੍ਛਨ੍ਤਿ, ਤਾਨਿ ਤੇਸਂ ਅਧੋਮਗ੍ਗੇਨ ਨਿਕ੍ਖਮਨ੍ਤਿ, ਤੇ ਏਵਂ ਸੂਲੇਸੁ ਵਿਦ੍ਧਸਰੀਰਾ ਚਿਰਰਤ੍ਤਾ ਸਯਨ੍ਤਿ. ਦੀਘਨ੍ਤਿ ਸੁਪਿਨੇਪਿ ਨਿਦ੍ਦਂ ਅਲਭਨ੍ਤਾ ਦੀਘਰਤ੍ਤਂ ਜਗ੍ਗਨ੍ਤੀਤਿ ਅਤ੍ਥੋ. ਰਤ੍ਯਾ ਵਿਵਸਾਨੇਤਿ ਰਤ੍ਤੀਨਂ ਅਚ੍ਚਯੇਨ, ਚਿਰਕਾਲਾਤਿਕ੍ਕਮੇਨਾਤਿ ਅਤ੍ਥੋ. ਪਵਜ੍ਜਨ੍ਤੀਤਿ ਸਟ੍ਠਿਯੋਜਨਿਕਂ ਜਲਿਤਂ ਲੋਹਕੁਮ੍ਭਿਂ ਕਪ੍ਪੇਨ ਸਣ੍ਠਿਤਂ ਜਲਿਤਤਮ੍ਬਲੋਹਰਸਪੁਣ੍ਣਂ ਲੋਹਕੁਮ੍ਭਿਂ ਨਿਰਯਪਾਲੇਹਿ ਖਿਤ੍ਤਾ ਪਚ੍ਚਨ੍ਤਿ. ਦੁਸ੍ਸੀਲਾਤਿ ਪਰਦਾਰਿਕਾ.

ਏਵਂ ਮਹਾਸਤ੍ਤੋ ਪਰਦਾਰਿਕਅਤਿਚਾਰਿਕਾਨਂ ਪਚ੍ਚਨਸਿਮ੍ਬਲਿਨਿਰਯਂ ਦਸ੍ਸੇਤ੍ਵਾ ਇਤੋ ਪਰਂ ਸਾਮਿਕਵਤ੍ਤਸਸ੍ਸੁਸਸੁਰਵਤ੍ਤਾਦੀਨਿ ਅਪੂਰੇਨ੍ਤੀਨਂ ਪਚ੍ਚਨਟ੍ਠਾਨਂ ਪਕਾਸੇਨ੍ਤੋ ‘‘ਯਾ ਚਾ’’ਤਿਆਦਿਮਾਹ. ਤਤ੍ਥ ਅਤਿਮਞ੍ਞਤੀਤਿ ਭਿਸਜਾਤਕੇ (ਜਾ. ੧.੧੪.੭੮ ਆਦਯੋ) ਵੁਤ੍ਤਂ ਸਾਮਿਕਵਤ੍ਤਂ ਅਕਰੋਨ੍ਤੀ ਅਤਿਕ੍ਕਮਿਤ੍ਵਾ ਮਞ੍ਞਤਿ. ਜੇਟ੍ਠਂ ਵਾਤਿ ਸਾਮਿਕਸ੍ਸ ਜੇਟ੍ਠਭਾਤਰਂ. ਨਨਨ੍ਦਰਨ੍ਤਿ ਸਾਮਿਕਸ੍ਸ ਭਗਿਨਿਂ. ਏਤੇਸਮ੍ਪਿ ਹਿ ਅਞ੍ਞਤਰਸ੍ਸ ਹਤ੍ਥਪਾਦਪਿਟ੍ਠਿਪਰਿਕਮ੍ਮਨ੍ਹਾਪਨਭੋਜਨਾਦਿਭੇਦਂ ਵਤ੍ਤਂ ਅਪੂਰੇਨ੍ਤੀ ਤੇਸੁ ਹਿਰੋਤ੍ਤਪ੍ਪਂ ਅਨੁਪਟ੍ਠਪੇਨ੍ਤੀ ਤੇ ਅਤਿਮਞ੍ਞਤਿ ਨਾਮ, ਸਾਪਿ ਨਿਰਯੇ ਨਿਬ੍ਬਤ੍ਤਿ. ਵਙ੍ਕੇਨਾਤਿ ਤਸ੍ਸਾ ਸਾਮਿਕਵਤ੍ਤਾਦੀਨਂ ਅਪਰਿਪੂਰਿਕਾਯ ਸਾਮਿਕਾਦਯੋ ਅਕ੍ਕੋਸਿਤ੍ਵਾ ਪਰਿਭਾਸਿਤ੍ਵਾ ਨਿਰਯੇ ਨਿਬ੍ਬਤ੍ਤਾਯ ਲੋਹਪਥਵਿਯਂ ਨਿਪਜ੍ਜਾਪੇਤ੍ਵਾ ਅਯਸਙ੍ਕੁਨਾ ਮੁਖਂ ਵਿਵਰਿਤ੍ਵਾ ਬਲਿਸੇਨ ਜਿਵ੍ਹਗ੍ਗਂ ਨਿਬ੍ਬਹਨ੍ਤਿ, ਰਜ੍ਜੁਬਨ੍ਧਨੇਨ ਸਬਨ੍ਧਨਂ ਕਡ੍ਢਨ੍ਤਿ. ਕਿਮਿਨਨ੍ਤਿ ਕਿਮਿਭਰਿਤਂ. ਇਦਂ ਵੁਤ੍ਤਂ ਹੋਤਿ – ਮਹਾਰਾਜ, ਸੋ ਨੇਰਯਿਕਸਤ੍ਤੋ ਏਵਂ ਨਿਕ੍ਕਡ੍ਢਿਤਂ ਅਤ੍ਤਨੋ ਬ੍ਯਾਮੇਨ ਬ੍ਯਾਮਮਤ੍ਤਂ ਜਿਵ੍ਹਂ ਆਵੁਧੇਹਿ ਕੋਟ੍ਟਿਤਕੋਟ੍ਟਿਤਟ੍ਠਾਨੇ ਸਞ੍ਜਾਤੇਹਿ ਮਹਾਦੋਣਿਪ੍ਪਮਾਣੇਹਿ ਕਿਮੀਹਿ ਭਰਿਤਂ ਪਸ੍ਸਤਿ. ਵਿਞ੍ਞਾਪੇਤੁਂ ਨ ਸਕ੍ਕੋਤੀਤਿ ਨਿਰਯਪਾਲੇ ਯਾਚਿਤੁਕਾਮੋਪਿ ਕਿਞ੍ਚਿ ਵਤ੍ਤੁਂ ਨ ਸਕ੍ਕੋਤਿ. ਤਾਪਨੇਤਿ ਏਵਂ ਸਾ ਤਤ੍ਥ ਬਹੂਨਿ ਵਸ੍ਸਸਹਸ੍ਸਾਨਿ ਪਚ੍ਚਿਤ੍ਵਾ ਪੁਨ ਤਾਪਨਮਹਾਨਿਰਯੇ ਪਚ੍ਚਤਿ.

ਏਵਂ ਮਹਾਸਤ੍ਤੋ ਸਾਮਿਕਵਤ੍ਤਸਸ੍ਸੁਸਸੁਰਵਤ੍ਤਾਦੀਨਿ ਅਪੂਰੇਨ੍ਤੀਨਂ ਪਚ੍ਚਨਨਿਰਯਂ ਦਸ੍ਸੇਤ੍ਵਾ ਇਦਾਨਿ ਸੂਕਰਿਕਾਦੀਨਂ ਪਚ੍ਚਨਨਿਰਯੇ ਦਸ੍ਸੇਨ੍ਤੋ ‘‘ਓਰਬ੍ਭਿਕਾ’’ਤਿਆਦਿਮਾਹ. ਤਤ੍ਥ ਅਵਣ੍ਣੇ ਵਣ੍ਣਕਾਰਕਾਤਿ ਪੇਸੁਞ੍ਞਕਾਰਕਾ. ਖਾਰਨਦਿਨ੍ਤਿ ਏਤੇ ਓਰਬ੍ਭਿਕਾਦਯੋ ਏਤੇਹਿ ਸਤ੍ਤਿਆਦੀਹਿ ਹਞ੍ਞਮਾਨਾ ਵੇਤਰਣਿਂ ਨਦਿਂ ਪਤਨ੍ਤੀਤਿ ਅਤ੍ਥੋ. ਸੇਸਾਨਿ ਓਰਬ੍ਭਿਕਾਦੀਨਂ ਪਚ੍ਚਨਟ੍ਠਾਨਾਨਿ ਨਿਮਿਜਾਤਕੇ ਆਵਿ ਭਵਿਸ੍ਸਨ੍ਤਿ. ਕੁਟਕਾਰੀਤਿ ਕੂਟਵਿਨਿਚ੍ਛਯਸ੍ਸ ਚੇਵ ਤੁਲਾਕੂਟਾਦੀਨਞ੍ਚ ਕਾਰਕੇ ਸਨ੍ਧਾਯੇਤਂ ਵੁਤ੍ਤਂ. ਤਤ੍ਥ ਕੂਟਵਿਨਿਚ੍ਛਯਕੂਟਟ੍ਟਕਾਰਕਕੂਟਅਗ੍ਘਾਪਨਿਕਾਨਂ ਪਚ੍ਚਨਨਿਰਯਾ ਨਿਮਿਜਾਤਕੇ ਆਵਿ ਭਵਿਸ੍ਸਨ੍ਤਿ. ਵਨ੍ਤਨ੍ਤਿ ਵਮਿਤਕਂ. ਦੁਰਤ੍ਤਾਨਨ੍ਤਿ ਦੁਗ੍ਗਤਤ੍ਤਭਾਵਾਨਂ. ਇਦਂ ਵੁਤ੍ਤਂ ਹੋਤਿ – ਮਹਾਰਾਜ, ਤੇ ਦੁਰਤ੍ਤਭਾਵਾ ਸਤ੍ਤਾ ਅਯਕੂਟੇਹਿ ਮਤ੍ਥਕੇ ਭਿਜ੍ਜਮਾਨੇ ਵਮਨ੍ਤਿ, ਤਤੋ ਤਂ ਵਨ੍ਤਂ ਜਲਿਤਅਯਕਪਲ੍ਲੇਹਿ ਤੇਸੁ ਏਕਚ੍ਚਾਨਂ ਮੁਖੇ ਖਿਪਨ੍ਤਿ, ਇਤਿ ਤੇ ਪਰੇਸਂ ਵਨ੍ਤਂ ਭੁਞ੍ਜਨ੍ਤਿ ਨਾਮ. ਭੇਰਣ੍ਡਕਾਤਿ ਸਿਙ੍ਗਾਲਾ. ਵਿਪ੍ਫਨ੍ਦਮਾਨਨ੍ਤਿ ਅਧੋਮੁਖਂ ਨਿਪਜ੍ਜਾਪਿਤਂ ਨਿਕ੍ਕਡ੍ਢਿਤਜਿਵ੍ਹਂ ਇਤੋ ਚਿਤੋ ਚ ਵਿਪ੍ਫਨ੍ਦਮਾਨਂ. ਮਿਗੇਨਾਤਿ ਓਕਚਾਰਕਮਿਗੇਨ. ਪਕ੍ਖਿਨਾਤਿ ਤਥਾਰੂਪੇਨੇਵ. ਗਨ੍ਤਾ ਤੇਤਿ ਗਨ੍ਤਾਰੋ ਤੇ. ਨਿਰਯੁਸ੍ਸਦਨ੍ਤਿ ਉਸ੍ਸਦਨਿਰਯਂ. ਪਾਲ਼ਿਯਂ ਪਨ ‘‘ਨਿਰਯਂ ਅਧੋ’’ਤਿ ਲਿਖਿਤਂ. ਅਯਂ ਪਨ ਨਿਰਯੋ ਨਿਮਿਜਾਤਕੇ ਆਵਿ ਭਵਿਸ੍ਸਤੀਤਿ.

ਇਤਿ ਮਹਾਸਤ੍ਤੋ ਏਤ੍ਤਕੇ ਨਿਰਯੇ ਦਸ੍ਸੇਤ੍ਵਾ ਇਦਾਨਿ ਦੇਵਲੋਕਵਿਵਰਣਂ ਕਤ੍ਵਾ ਰਞ੍ਞੋ ਦੇਵਲੋਕੇ ਦਸ੍ਸੇਨ੍ਤੋ ਆਹ –

੧੩੩.

‘‘ਸਨ੍ਤੋ ਚ ਉਦ੍ਧਂ ਗਚ੍ਛਨ੍ਤਿ, ਸੁਚਿਣ੍ਣੇਨਿਧ ਕਮ੍ਮੁਨਾ;

ਸੁਚਿਣ੍ਣਸ੍ਸ ਫਲਂ ਪਸ੍ਸ, ਸਇਨ੍ਦਾ ਦੇਵਾ ਸਬ੍ਰਹ੍ਮਕਾ.

੧੩੪.

‘‘ਤਂ ਤਂ ਬ੍ਰੂਮਿ ਮਹਾਰਾਜ, ਧਮ੍ਮਂ ਰਟ੍ਠਪਤੀ ਚਰ;

ਤਥਾ ਰਾਜ ਚਰਾਹਿ ਧਮ੍ਮਂ, ਯਥਾ ਤਂ ਸੁਚਿਣ੍ਣਂ ਨਾਨੁਤਪ੍ਪੇਯ੍ਯ ਪਚ੍ਛਾ’’ਤਿ.

ਤਤ੍ਥ ਸਨ੍ਤੋਤਿ ਕਾਯਾਦੀਹਿ ਉਪਸਨ੍ਤਾ. ਉਦ੍ਧਨ੍ਤਿ ਦੇਵਲੋਕਂ. ਸਇਨ੍ਦਾਤਿ ਤਤ੍ਥ ਤਤ੍ਥ ਇਨ੍ਦੇਹਿ ਸਦ੍ਧਿਂ. ਮਹਾਸਤ੍ਤੋ ਹਿਸ੍ਸ ਚਾਤੁਮਹਾਰਾਜਾਦਿਕੇ ਦੇਵੇ ਦਸ੍ਸੇਨ੍ਤੋ, ‘‘ਮਹਾਰਾਜ, ਚਾਤੁਮਹਾਰਾਜਿਕੇ ਦੇਵੇ ਪਸ੍ਸ, ਚਤ੍ਤਾਰੋ ਮਹਾਰਾਜਾਨੋ ਪਸ੍ਸ, ਤਾਵਤਿਂਸੇ ਪਸ੍ਸ, ਸਕ੍ਕਂ ਪਸ੍ਸਾ’’ਤਿ ਏਵਂ ਸਬ੍ਬੇਪਿ ਸਇਨ੍ਦਕੇ ਸਬ੍ਰਹ੍ਮਕੇ ਚ ਦੇਵੇ ਦਸ੍ਸੇਨ੍ਤੋ ‘‘ਇਦਮ੍ਪਿ ਸੁਚਿਣ੍ਣਸ੍ਸ ਫਲਂ ਇਦਮ੍ਪਿ ਫਲ’’ਨ੍ਤਿ ਦਸ੍ਸੇਸਿ. ਤਂ ਤਂ ਬ੍ਰੂਮੀਤਿ ਤਸ੍ਮਾ ਤਂ ਭਣਾਮਿ. ਧਮ੍ਮਨ੍ਤਿ ਇਤੋ ਪਟ੍ਠਾਯ ਪਾਣਾਤਿਪਾਤਾਦੀਨਿ ਪਞ੍ਚ ਵੇਰਾਨਿ ਪਹਾਯ ਦਾਨਾਦੀਨਿ ਪੁਞ੍ਞਾਨਿ ਕਰੋਹੀਤਿ. ਯਥਾ ਤਂ ਸੁਚਿਣ੍ਣਂ ਨਾਨੁਤਪ੍ਪੇਯ੍ਯਾਤਿ ਯਥਾ ਤਂ ਦਾਨਾਦਿਪੁਞ੍ਞਕਮ੍ਮਂ ਸੁਚਿਣ੍ਣਂ ਪਿਤੁਘਾਤਕਮ੍ਮਪਚ੍ਚਯਂ ਵਿਪ੍ਪਟਿਸਾਰਂ ਪਟਿਚ੍ਛਾਦੇਤੁਂ ਸਮਤ੍ਥਤਾਯ ਤਂ ਨਾਨੁਤਪ੍ਪੇਯ੍ਯ, ਤਥਾ ਤਂ ਸੁਚਿਣ੍ਣਂ ਚਰ, ਬਹੁਂ ਪੁਞ੍ਞਂ ਕਰੋਹੀਤਿ ਅਤ੍ਥੋ.

ਸੋ ਮਹਾਸਤ੍ਤਸ੍ਸ ਧਮ੍ਮਕਥਂ ਸੁਤ੍ਵਾ ਤਤੋ ਪਟ੍ਠਾਯ ਅਸ੍ਸਾਸਂ ਪਟਿਲਭਿ. ਬੋਧਿਸਤ੍ਤੋ ਪਨ ਕਿਞ੍ਚਿ ਕਾਲਂ ਤਤ੍ਥ ਵਸਿਤ੍ਵਾ ਅਤ੍ਤਨੋ ਵਸਨਟ੍ਠਾਨਞ੍ਞੇਵ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਸ ਮਯਾ ਅਸ੍ਸਾਸਿਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਰਾਜਾ ਅਜਾਤਸਤ੍ਤੁ ਅਹੋਸਿ, ਇਸਿਗਣੋ ਬੁਦ੍ਧਪਰਿਸਾ, ਸਂਕਿਚ੍ਚਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਂਕਿਚ੍ਚਜਾਤਕਵਣ੍ਣਨਾ ਦੁਤਿਯਾ.

ਜਾਤਕੁਦ੍ਦਾਨਂ –

ਅਥ ਸਟ੍ਠਿਨਿਪਾਤਮ੍ਹਿ, ਸੁਣਾਥ ਮਮ ਭਾਸਿਤਂ;

ਜਾਤਕਸਵ੍ਹਯਨੋ ਪਵਰੋ, ਸੋਣਕਅਰਿਨ੍ਦਮਸਵ੍ਹਯਨੋ;

ਤਥਾ ਵੁਤ੍ਤਰਥੇਸਭਕਿਚ੍ਚਵਰੋਤਿ.

ਸਟ੍ਠਿਨਿਪਾਤਵਣ੍ਣਨਾ ਨਿਟ੍ਠਿਤਾ.

੨੦. ਸਤ੍ਤਤਿਨਿਪਾਤੋ

[੫੩੧] ੧. ਕੁਸਜਾਤਕਵਣ੍ਣਨਾ

ਇਦਂ ਤੇ ਰਟ੍ਠਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਏਕੋ ਕਿਰ ਸਾਵਤ੍ਥਿਵਾਸੀ ਕੁਲਪੁਤ੍ਤੋ ਸਾਸਨੇ ਉਰਂ ਦਤ੍ਵਾ ਪਬ੍ਬਜਿਤੋ ਏਕਦਿਵਸਂ ਸਾਵਤ੍ਥਿਯਂ ਪਿਣ੍ਡਾਯ ਚਰਨ੍ਤੋ ਏਕਂ ਅਲਙ੍ਕਤਇਤ੍ਥਿਂ ਦਿਸ੍ਵਾ ਸੁਭਨਿਮਿਤ੍ਤਗ੍ਗਾਹਵਸੇਨ ਓਲੋਕੇਤ੍ਵਾ ਕਿਲੇਸਾਭਿਭੂਤੋ ਅਨਭਿਰਤੋ ਵਿਹਾਸਿ ਦੀਘਕੇਸਨਖੋ ਕਿਲਿਟ੍ਠਚੀਵਰੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨੀਸਨ੍ਥਤਗਤ੍ਤੋ. ਯਥਾ ਹਿ ਦੇਵਲੋਕਾ ਚਵਨਧਮ੍ਮਾਨਂ ਦੇਵਪੁਤ੍ਤਾਨਂ ਪਞ੍ਚ ਪੁਬ੍ਬਨਿਮਿਤ੍ਤਾਨਿ ਪਞ੍ਞਾਯਨ੍ਤਿ, ਮਾਲਾ ਮਿਲਾਯਨ੍ਤਿ, ਵਤ੍ਥਾਨਿ ਕਿਲਿਸ੍ਸਨ੍ਤਿ, ਸਰੀਰੇ ਦੁਬ੍ਬਣ੍ਣਿਯਂ ਓਕ੍ਕਮਤਿ, ਉਭੋਹਿ ਕਚ੍ਛੇਹਿ ਸੇਦਾ ਮੁਚ੍ਚਨ੍ਤਿ, ਦੇਵੋ ਦੇਵਾਸਨੇ ਨਾਭਿਰਮਤਿ, ਏਵਮੇਵ ਸਾਸਨਾ ਚਵਨਧਮ੍ਮਾਨਂ ਉਕ੍ਕਣ੍ਠਿਤਭਿਕ੍ਖੂਨਂ ਪਞ੍ਚ ਪੁਬ੍ਬਨਿਮਿਤ੍ਤਾਨਿ ਪਞ੍ਞਾਯਨ੍ਤਿ, ਸਦ੍ਧਾਪੁਪ੍ਫਾਨਿ ਮਿਲਾਯਨ੍ਤਿ, ਸੀਲਵਤ੍ਥਾਨਿ ਕਿਲਿਸ੍ਸਨ੍ਤਿ, ਸਰੀਰੇ ਮਙ੍ਕੁਤਾਯ ਚੇਵ ਅਯਸਵਸੇਨ ਚ ਦੁਬ੍ਬਣ੍ਣਿਯਂ ਓਕ੍ਕਮਤਿ, ਕਿਲੇਸਸੇਦਾ ਮੁਚ੍ਚਨ੍ਤਿ, ਅਰਞ੍ਞਰੁਕ੍ਖਮੂਲਸੁਞ੍ਞਾਗਾਰੇਸੁ ਨਾਭਿਰਮਨ੍ਤਿ. ਤਸ੍ਸਪਿ ਤਾਨਿ ਪਞ੍ਞਾਯਿਂਸੁ. ਅਥ ਨਂ ਭਿਕ੍ਖੂ ਸਤ੍ਥੁ ਸਨ੍ਤਿਕਂ ਨੇਤ੍ਵਾ ‘‘ਅਯਂ, ਭਨ੍ਤੇ, ਉਕ੍ਕਣ੍ਠਿਤੋ’’ਤਿ ਦਸ੍ਸੇਸੁਂ. ਸਤ੍ਥਾ ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਉਕ੍ਕਣ੍ਠਿਤੋਸੀ’’ਤਿ ਤਂ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਮਾ, ਭਿਕ੍ਖੁ, ਕਿਲੇਸਵਸਿਕੋ ਹੋਹਿ, ਮਾਤੁਗਾਮੋ ਨਾਮੇਸ ਪਾਪੋ, ਤਸ੍ਮਿਂ ਪਟਿਬਦ੍ਧਚਿਤ੍ਤਤਂ ਵਿਨੋਦੇਹਿ, ਸਾਸਨੇ ਅਭਿਰਮ, ਮਾਤੁਗਾਮੇ ਪਟਿਬਦ੍ਧਚਿਤ੍ਤਤਾਯ ਹਿ ਤੇਜਵਨ੍ਤੋਪਿ ਪੋਰਾਣਕਪਣ੍ਡਿਤਾ ਨਿਤ੍ਤੇਜਾ ਹੁਤ੍ਵਾ ਅਨਯਬ੍ਯਸਨਂ ਪਾਪੁਣਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਮਲ੍ਲਰਟ੍ਠੇ ਕੁਸਾਵਤੀਰਾਜਧਾਨਿਯਂ ਓਕ੍ਕਾਕੋ ਨਾਮ ਰਾਜਾ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਸਿ. ਤਸ੍ਸ ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਜੇਟ੍ਠਿਕਾ ਸੀਲਵਤੀ ਨਾਮ ਅਗ੍ਗਮਹੇਸੀ ਅਹੋਸਿ, ਸਾ ਨੇਵ ਪੁਤ੍ਤਂ, ਨ ਧੀਤਰਂ ਲਭਿ. ਅਥਸ੍ਸ ਨਾਗਰਾ ਚੇਵ ਰਟ੍ਠਵਾਸਿਨੋ ਚ ਰਾਜਨਿਵੇਸਨਦ੍ਵਾਰੇ ਸਨ੍ਨਿਪਤਿਤ੍ਵਾ ‘‘ਰਟ੍ਠਂ ਨਸ੍ਸਿਸ੍ਸਤਿ, ਰਟ੍ਠਂ ਨਸ੍ਸਿਸ੍ਸਤੀ’’ਤਿ ਉਪਕ੍ਕੋਸਿਂਸੁ. ਰਾਜਾ ਸੀਹਪਞ੍ਜਰਂ ਉਗ੍ਘਾਟੇਤ੍ਵਾ ‘‘ਮਯਿ ਰਜ੍ਜਂ ਕਾਰੇਨ੍ਤੇ ਅਧਮ੍ਮਕਾਰੋ ਨਾਮ ਨਤ੍ਥਿ, ਕਸ੍ਮਾ ਉਪਕ੍ਕੋਸਥਾ’’ਤਿ ਪੁਚ੍ਛਿ. ‘‘ਸਚ੍ਚਂ, ਦੇਵ, ਅਧਮ੍ਮਕਾਰੋ ਨਾਮ ਨਤ੍ਥਿ, ਅਪਿਚ ਵਂਸਾਨੁਰਕ੍ਖਕੋ ਪਨ ਵੋ ਪੁਤ੍ਤੋ ਨਤ੍ਥਿ, ਅਞ੍ਞੋ ਰਜ੍ਜਂ ਗਹੇਤ੍ਵਾ ਰਟ੍ਠਂ ਨਾਸੇਸ੍ਸਤਿ, ਤਸ੍ਮਾ ਧਮ੍ਮੇਨ ਰਜ੍ਜਂ ਕਾਰੇਤੁਂ ਸਮਤ੍ਥਂ ਪੁਤ੍ਤਂ ਪਤ੍ਥੇਥਾ’’ਤਿ. ‘‘ਪੁਤ੍ਤਂ ਪਤ੍ਥੇਨ੍ਤੋ ਕਿਂ ਕਰੋਮੀ’’ਤਿ? ‘‘ਪਠਮਂ ਤਾਵ ਏਕਂ ਸਤ੍ਤਾਹਂ ਚੁਲ੍ਲਨਾਟਕਂ ਧਮ੍ਮਨਾਟਕਂ ਕਤ੍ਵਾ ਵਿਸ੍ਸਜ੍ਜੇਥ, ਸਚੇ ਸਾ ਪੁਤ੍ਤਂ ਲਭਿਸ੍ਸਤਿ, ਸਾਧੁ, ਨੋ ਚੇ, ਅਥ ਮਜ੍ਝਿਮਨਾਟਕਂ ਵਿਸ੍ਸਜ੍ਜੇਥ, ਤਤੋ ਜੇਟ੍ਠਨਾਟਕਂ, ਅਵਸ੍ਸਂ ਏਤ੍ਤਕਾਸੁ ਇਤ੍ਥੀਸੁ ਏਕਾ ਪੁਞ੍ਞਵਤੀ ਪੁਤ੍ਤਂ ਲਭਿਸ੍ਸਤੀ’’ਤਿ. ਰਾਜਾ ਤੇਸਂ ਵਚਨੇਨ ਤਥਾ ਕਤ੍ਵਾ ਸਤ੍ਤ ਦਿਵਸੇ ਯਥਾਸੁਖਂ ਅਭਿਰਮਿਤ੍ਵਾ ਆਗਤਾਗਤਂ ਪੁਚ੍ਛਿ – ‘‘ਕਚ੍ਚਿ ਵੋ ਪੁਤ੍ਤੋ ਲਦ੍ਧੋ’’ਤਿ? ਸਬ੍ਬਾ ‘‘ਨ ਲਭਾਮ, ਦੇਵਾ’’ਤਿ ਆਹਂਸੁ. ਰਾਜਾ ‘‘ਨ ਮੇ ਪੁਤ੍ਤੋ ਉਪ੍ਪਜ੍ਜਿਸ੍ਸਤੀ’’ਤਿ ਅਨਤ੍ਤਮਨੋ ਅਹੋਸਿ. ਨਾਗਰਾ ਪੁਨ ਤਥੇਵ ਉਪਕ੍ਕੋਸਿਂਸੁ. ਰਾਜਾ ‘‘ਕਿਂ ਉਪਕ੍ਕੋਸਥ, ਮਯਾ ਤੁਮ੍ਹਾਕਂ ਵਚਨੇਨ ਨਾਟਕਾਨਿ ਵਿਸ੍ਸਟ੍ਠਾਨਿ, ਏਕਾਪਿ ਪੁਤ੍ਤਂ ਨ ਲਭਤਿ, ਇਦਾਨਿ ਕਿਂ ਕਰੋਮਾ’’ਤਿ ਆਹ. ‘‘ਦੇਵ, ਏਤਾ ਦੁਸ੍ਸੀਲਾ ਭਵਿਸ੍ਸਨ੍ਤਿ ਨਿਪ੍ਪੁਞ੍ਞਾ, ਨਤ੍ਥਿ ਏਤਾਸਂ ਪੁਤ੍ਤਲਾਭਾਯ ਪੁਞ੍ਞਂ, ਤੁਮ੍ਹੇ ਏਤਾਸੁ ਪੁਤ੍ਤਂ ਅਲਭਨ੍ਤੀਸੁਪਿ ਮਾ ਅਪ੍ਪੋਸ੍ਸੁਕ੍ਕਤਂ ਆਪਜ੍ਜਥ, ਅਗ੍ਗਮਹੇਸੀ ਵੋ ਸੀਲਵਤੀ ਦੇਵੀ ਸੀਲਸਮ੍ਪਨ੍ਨਾ, ਤਂ ਵਿਸ੍ਸਜ੍ਜੇਥ, ਤਸ੍ਸਾ ਪੁਤ੍ਤੋ ਉਪ੍ਪਜ੍ਜਿਸ੍ਸਤੀ’’ਤਿ.

ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਇਤੋ ਕਿਰ ਸਤ੍ਤਮੇ ਦਿਵਸੇ ਰਾਜਾ ਸੀਲਵਤਿਂ ਦੇਵਿਂ ਧਮ੍ਮਨਾਟਕਂ ਕਤ੍ਵਾ ਵਿਸ੍ਸਜ੍ਜੇਸ੍ਸਤਿ, ਪੁਰਿਸਾ ਸਨ੍ਨਿਪਤਨ੍ਤੂ’’ਤਿ ਭੇਰਿਂ ਚਰਾਪੇਤ੍ਵਾ ਸਤ੍ਤਮੇ ਦਿਵਸੇ ਦੇਵਿਂ ਅਲਙ੍ਕਾਰਾਪੇਤ੍ਵਾ ਰਾਜਨਿਵੇਸਨਾ ਓਤਾਰੇਤ੍ਵਾ ਵਿਸ੍ਸਜ੍ਜੇਸਿ. ਤਸ੍ਸਾ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ‘‘ਕਿਂ ਨੁ ਖੋ’’ਤਿ ਆਵਜ੍ਜੇਨ੍ਤੋ ਦੇਵਿਯਾ ਪੁਤ੍ਤਪਤ੍ਥਨਭਾਵਂ ਞਤ੍ਵਾ ‘‘ਏਤਿਸ੍ਸਾ ਮਯਾ ਪੁਤ੍ਤਂ ਦਾਤੁਂ ਵਟ੍ਟਤਿ, ਅਤ੍ਥਿ ਨੁ ਖੋ ਦੇਵਲੋਕੇ ਏਤਿਸ੍ਸਾ ਅਨੁਚ੍ਛਵਿਕੋ ਪੁਤ੍ਤੋ’’ਤਿ ਉਪਧਾਰੇਨ੍ਤੋ ਬੋਧਿਸਤ੍ਤਂ ਅਦ੍ਦਸ. ਸੋ ਕਿਰ ਤਦਾ ਤਾਵਤਿਂਸਭਵਨੇ ਆਯੁਂ ਖੇਪੇਤ੍ਵਾ ਉਪਰਿਦੇਵਲੋਕੇ ਨਿਬ੍ਬਤ੍ਤਿਤੁਕਾਮੋ ਅਹੋਸਿ. ਸਕ੍ਕੋ ਤਸ੍ਸ ਵਿਮਾਨਦ੍ਵਾਰਂ ਗਨ੍ਤ੍ਵਾ ਤਂ ਪਕ੍ਕੋਸਿਤ੍ਵਾ, ‘‘ਮਾਰਿਸ, ਤਯਾ ਮਨੁਸ੍ਸਲੋਕਂ ਗਨ੍ਤ੍ਵਾ ਓਕ੍ਕਾਕਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿਤੁਂ ਵਟ੍ਟਤੀ’’ਤਿ ਸਮ੍ਪਟਿਚ੍ਛਾਪੇਤ੍ਵਾ ਅਪਰਮ੍ਪਿ ਦੇਵਪੁਤ੍ਤਂ ‘‘ਤ੍ਵਮ੍ਪਿ ਏਤਿਸ੍ਸਾ ਏਵ ਪੁਤ੍ਤੋ ਭਵਿਸ੍ਸਸੀ’’ਤਿ ਵਤ੍ਵਾ ‘‘ਮਾ ਖੋ ਪਨਸ੍ਸਾ ਕੋਚਿ ਸੀਲਂ ਭਿਨ੍ਦਤੂ’’ਤਿ ਮਹਲ੍ਲਕਬ੍ਰਾਹ੍ਮਣਵੇਸੇਨ ਰਞ੍ਞੋ ਨਿਵੇਸਨਦ੍ਵਾਰਂ ਅਗਮਾਸਿ.

ਮਹਾਜਨੋਪਿ ਨ੍ਹਾਤੋ ਅਲਙ੍ਕਤੋ ‘‘ਅਹਂ ਦੇਵਿਂ ਗਣ੍ਹਿਸ੍ਸਾਮਿ, ਅਹਂ ਦੇਵਿਂ ਗਣ੍ਹਿਸ੍ਸਾਮੀ’’ਤਿ ਰਾਜਦ੍ਵਾਰੇ ਸਨ੍ਨਿਪਤਿਤ੍ਵਾ ਸਕ੍ਕਞ੍ਚ ਦਿਸ੍ਵਾ ‘‘ਤ੍ਵਂ ਕਸ੍ਮਾ ਆਗਤੋਸੀ’’ਤਿ ਪਰਿਹਾਸਮਕਾਸਿ. ਸਕ੍ਕੋ ‘‘ਕਿਂ ਮਂ ਤੁਮ੍ਹੇ ਗਰਹਥ, ਸਚੇਪਿ ਮੇ ਸਰੀਰਂ ਜਿਣ੍ਣਂ, ਰਾਗੋ ਪਨ ਨ ਜੀਰਤਿ, ਸਚੇ ਸੀਲਵਤਿਂ ਲਭਿਸ੍ਸਾਮਿ, ਆਦਾਯ ਨਂ ਗਮਿਸ੍ਸਾਮੀਤਿ ਆਗਤੋਮ੍ਹੀ’’ਤਿ ਵਤ੍ਵਾ ਅਤ੍ਤਨੋ ਆਨੁਭਾਵੇਨ ਸਬ੍ਬੇਸਂ ਪੁਰਤੋਵ ਅਟ੍ਠਾਸਿ. ਅਞ੍ਞੋ ਕੋਚਿ ਤਸ੍ਸ ਤੇਜੇਨ ਪੁਰਤੋ ਭਵਿਤੁਂ ਨਾਸਕ੍ਖਿ. ਸੋ ਤਂ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਨਿਵੇਸਨਾ ਨਿਕ੍ਖਮਨ੍ਤਿਞ੍ਞੇਵ ਹਤ੍ਥੇ ਗਹੇਤ੍ਵਾ ਪਕ੍ਕਾਮਿ. ਅਥ ਨਂ ਤਤ੍ਥ ਤਤ੍ਥ ਠਿਤਾ ਗਰਹਿਂਸੁ ‘‘ਪਸ੍ਸਥ, ਭੋ, ਮਹਲ੍ਲਕਬ੍ਰਾਹ੍ਮਣੋ ਏਵਂ ਉਤ੍ਤਮਰੂਪਧਰਂ ਦੇਵਿਂ ਆਦਾਯ ਗਚ੍ਛਤਿ, ਅਤ੍ਤਨੋ ਯੁਤ੍ਤਂ ਨ ਜਾਨਾਤੀ’’ਤਿ. ਦੇਵੀਪਿ ‘‘ਮਹਲ੍ਲਕੋ ਮਂ ਗਹੇਤ੍ਵਾ ਗਚ੍ਛਤੀ’’ਤਿ ਨ ਅਟ੍ਟੀਯਤਿ ਨ ਹਰਾਯਤਿ. ਰਾਜਾਪਿ ਵਾਤਪਾਨੇ ਠਤ੍ਵਾ ‘‘ਕੋ ਨੁ ਖੋ ਦੇਵਿਂ ਗਹੇਤ੍ਵਾ ਗਚ੍ਛਤੀ’’ਤਿ ਓਲੋਕੇਨ੍ਤੋ ਤਂ ਦਿਸ੍ਵਾ ਅਨਤ੍ਤਮਨੋ ਅਹੋਸਿ.

ਸਕ੍ਕੋ ਤਂ ਆਦਾਯ ਨਗਰਦ੍ਵਾਰਤੋ ਨਿਕ੍ਖਮਿਤ੍ਵਾ ਦ੍ਵਾਰਸਮੀਪੇ ਏਕਂ ਘਰਂ ਮਾਪੇਸਿ ਵਿਵਟਦ੍ਵਾਰਂ ਪਞ੍ਞਤ੍ਤਕਟ੍ਠਤ੍ਥਰਿਕਂ. ਅਥ ਨਂ ਸਾ ‘‘ਇਦਂ ਤੇ ਨਿਵੇਸਨ’’ਨ੍ਤਿ ਪੁਚ੍ਛਿ. ਸੋ ‘‘ਆਮ, ਭਦ੍ਦੇ, ਪੁਬ੍ਬੇ ਪਨਾਹਂ ਏਕੋ, ਇਦਾਨਿਮ੍ਹਾ ਮਯਂ ਦ੍ਵੇ ਜਨਾ, ਅਹਂ ਭਿਕ੍ਖਾਯ ਚਰਿਤ੍ਵਾ ਤਣ੍ਡੁਲਾਦੀਨਿ ਆਹਰਿਸ੍ਸਾਮਿ, ਤ੍ਵਂ ਇਮਿਸ੍ਸਾ ਕਟ੍ਠਤ੍ਥਰਿਕਾਯ ਨਿਪਜ੍ਜਾਹੀ’’ਤਿ ਵਤ੍ਵਾ ਤਂ ਮੁਦੁਨਾ ਹਤ੍ਥੇਨ ਪਰਾਮਸਨ੍ਤੋ ਦਿਬ੍ਬਸਮ੍ਫਸ੍ਸਂ ਫਰਾਪੇਤ੍ਵਾ ਤਤ੍ਥ ਨਿਪਜ੍ਜਾਪੇਸਿ. ਸਾ ਦਿਬ੍ਬਸਮ੍ਫਸ੍ਸਫਰਣੇਨ ਸਞ੍ਞਂ ਵਿਸ੍ਸਜ੍ਜੇਸਿ. ਅਥ ਨਂ ਅਤ੍ਤਨੋ ਆਨੁਭਾਵੇਨ ਤਾਵਤਿਂਸਭਵਨਂ ਨੇਤ੍ਵਾ ਅਲਙ੍ਕਤਵਿਮਾਨੇ ਦਿਬ੍ਬਸਯਨੇ ਨਿਪਜ੍ਜਾਪੇਸਿ. ਸਾ ਸਤ੍ਤਮੇ ਦਿਵਸੇ ਪਬੁਜ੍ਝਿਤ੍ਵਾ ਤਂ ਸਮ੍ਪਤ੍ਤਿਂ ਦਿਸ੍ਵਾ ‘‘ਨ ਸੋ ਬ੍ਰਾਹ੍ਮਣੋ ਮਨੁਸ੍ਸੋ, ਸਕ੍ਕੋ ਭਵਿਸ੍ਸਤੀ’’ਤਿ ਅਞ੍ਞਾਸਿ. ਸਕ੍ਕੋਪਿ ਤਸ੍ਮਿਂ ਸਮਯੇ ਪਾਰਿਚ੍ਛਤ੍ਤਕਮੂਲੇ ਦਿਬ੍ਬਨਾਟਕਪਰਿਵੁਤੋ ਨਿਸਿਨ੍ਨੋ ਅਹੋਸਿ. ਸਾ ਸਯਨਾ ਉਟ੍ਠਾਯ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥ ਨਂ ਸਕ੍ਕੋ ‘‘ਵਰਂ ਤੇ, ਦੇਵਿ, ਦਦਾਮਿ, ਗਣ੍ਹਾਹੀ’’ਤਿ ਆਹ. ‘‘ਤੇਨ ਹਿ, ਦੇਵ, ਏਕਂ ਪੁਤ੍ਤਂ ਮੇ ਦੇਹੀ’’ਤਿ. ‘‘ਦੇਵਿ, ਤਿਟ੍ਠਤੁ ਏਕੋ ਪੁਤ੍ਤੋ, ਅਹਂ ਤੇ ਦ੍ਵੇ ਪੁਤ੍ਤੇ ਦਸ੍ਸਾਮਿ. ਤੇਸੁ ਪਨ ਏਕੋ ਪਞ੍ਞਵਾ ਭਵਿਸ੍ਸਤਿ ਵਿਰੂਪਵਾ, ਏਕੋ ਰੂਪਵਾ ਨ ਪਞ੍ਞਵਾ. ਤੇਸੁ ਕਤਰਂ ਪਠਮਂ ਇਚ੍ਛਸੀ’’ਤਿ? ‘‘ਪਞ੍ਞਵਨ੍ਤਂ, ਦੇਵਾ’’ਤਿ. ਸੋ ‘‘ਸਾਧੂ’’ਤਿ ਵਤ੍ਵਾ ਤਸ੍ਸਾ ਕੁਸਤਿਣਂ ਦਿਬ੍ਬਵਤ੍ਥਂ ਦਿਬ੍ਬਚਨ੍ਦਨਂ ਪਾਰਿਚ੍ਛਤ੍ਤਕਪੁਪ੍ਫਂ ਕੋਕਨੁਦਞ੍ਚ ਨਾਮ ਵੀਣਂ ਦਤ੍ਵਾ ਤਂ ਆਦਾਯ ਰਞ੍ਞੋ ਸਯਨਘਰਂ ਪਵਿਸਿਤ੍ਵਾ ਰਞ੍ਞਾ ਸਦ੍ਧਿਂ ਏਕਸਯਨੇ ਨਿਪਜ੍ਜਾਪੇਤ੍ਵਾ ਅਙ੍ਗੁਟ੍ਠਕੇਨ ਤਸ੍ਸਾ ਨਾਭਿਂ ਪਰਾਮਸਿ. ਤਸ੍ਮਿਂ ਖਣੇ ਬੋਧਿਸਤ੍ਤੋ ਤਸ੍ਸਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਸਕ੍ਕੋਪਿ ਸਕਟ੍ਠਾਨਮੇਵ ਗਤੋ. ਪਣ੍ਡਿਤਾ ਦੇਵੀ ਗਬ੍ਭਸ੍ਸ ਪਤਿਟ੍ਠਿਤਭਾਵਂ ਜਾਨਿ.

ਅਥ ਨਂ ਪਬੁਦ੍ਧੋ ਰਾਜਾ ਦਿਸ੍ਵਾ, ‘‘ਦੇਵਿ, ਕੇਨ ਨੀਤਾਸੀ’’ਤਿ ਪੁਚ੍ਛਿ. ‘‘ਸਕ੍ਕੇਨ, ਦੇਵਾ’’ਤਿ. ‘‘ਅਹਂ ਪਚ੍ਚਕ੍ਖਤੋ ਏਕਂ ਮਹਲ੍ਲਕਬ੍ਰਾਹ੍ਮਣਂ ਤਂ ਆਦਾਯ ਗਚ੍ਛਨ੍ਤਂ ਅਦ੍ਦਸਂ, ਕਸ੍ਮਾ ਮਂ ਵਞ੍ਚੇਸੀ’’ਤਿ? ‘‘ਸਦ੍ਦਹਥ, ਦੇਵ, ਸਕ੍ਕੋ ਮਂ ਗਹੇਤ੍ਵਾ ਦੇਵਲੋਕਂ ਨੇਸੀ’’ਤਿ. ‘‘ਨ ਸਦ੍ਦਹਾਮਿ, ਦੇਵੀ’’ਤਿ. ਅਥਸ੍ਸ ਸਾ ਸਕ੍ਕਦਤ੍ਤਿਯਂ ਕੁਸਤਿਣਂ ਦਸ੍ਸੇਤ੍ਵਾ ‘‘ਸਦ੍ਦਹਥਾ’’ਤਿ ਆਹ. ਰਾਜਾ ‘‘ਕੁਸਤਿਣਂ ਨਾਮ ਯਤੋ ਕੁਤੋਚਿ ਲਬ੍ਭਤੀ’’ਤਿ ਨ ਸਦ੍ਦਹਿ. ਅਥਸ੍ਸ ਸਾ ਦਿਬ੍ਬਵਤ੍ਥਾਦੀਨਿ ਦਸ੍ਸੇਸਿ. ਰਾਜਾ ਤਾਨਿ ਦਿਸ੍ਵਾ ਸਦ੍ਦਹਿਤ੍ਵਾ, ‘‘ਭਦ੍ਦੇ, ਸਕ੍ਕੋ ਤਾਵ ਤਂ ਨੇਤੁ, ਪੁਤ੍ਤੋ ਪਨ ਤੇ ਲਦ੍ਧੋ’’ਤਿ ਪੁਚ੍ਛਿ. ‘‘ਲਦ੍ਧੋ ਮਹਾਰਾਜ, ਗਬ੍ਭੋ ਮੇ ਪਤਿਟ੍ਠਿਤੋ’’ਤਿ. ਸੋ ਤੁਟ੍ਠੋ ਤਸ੍ਸਾ ਗਬ੍ਭਪਰਿਹਾਰਂ ਅਦਾਸਿ. ਸਾ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿ, ਤਸ੍ਸ ਅਞ੍ਞਂ ਨਾਮਂ ਅਕਤ੍ਵਾ ਕੁਸਤਿਣਨਾਮਮੇਵ ਅਕਂਸੁ. ਕੁਸਕੁਮਾਰਸ੍ਸ ਪਦਸਾ ਗਮਨਕਾਲੇ ਇਤਰੋ ਦੇਵਪੁਤ੍ਤੋ ਤਸ੍ਸਾ ਕੁਚ੍ਛਿਯਂ ਪਟਿਸਨ੍ਧਿਂ ਗਣ੍ਹਿ. ਸਾ ਦਸਮਾਸੇ ਪਰਿਪੁਣ੍ਣੇ ਪੁਤ੍ਤਂ ਵਿਜਾਯਿ, ਤਸ੍ਸ ‘‘ਜਯਮ੍ਪਤੀ’’ਤਿ ਨਾਮਂ ਕਰਿਂਸੁ. ਤੇ ਮਹਨ੍ਤੇਨ ਯਸੇਨ ਵਡ੍ਢਿਂਸੁ. ਬੋਧਿਸਤ੍ਤੋ ਪਞ੍ਞਵਾ ਆਚਰਿਯਸ੍ਸ ਸਨ੍ਤਿਕੇ ਕਿਞ੍ਚਿ ਸਿਪ੍ਪਂ ਅਨੁਗ੍ਗਹੇਤ੍ਵਾ ਅਤ੍ਤਨੋਵ ਪਞ੍ਞਾਯ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਾਪੁਣਿ.

ਅਥਸ੍ਸ ਸੋਲ਼ਸਵਸ੍ਸਕਾਲੇ ਰਾਜਾ ਰਜ੍ਜਂ ਦਾਤੁਕਾਮੋ ਦੇਵਿਂ ਆਮਨ੍ਤੇਤ੍ਵਾ ‘‘ਭਦ੍ਦੇ, ਪੁਤ੍ਤਸ੍ਸ ਤੇ ਰਜ੍ਜਂ ਦਤ੍ਵਾ ਨਾਟਕਾਨਿ ਉਪਟ੍ਠਪੇਸ੍ਸਾਮ, ਮਯਂ ਜੀਵਨ੍ਤਾਯੇਵ ਨਂ ਰਜ੍ਜੇ ਪਤਿਟ੍ਠਿਤਂ ਪਸ੍ਸਿਸ੍ਸਾਮ, ਸਕਲਜਮ੍ਬੁਦੀਪੇ ਖੋ ਪਨ ਯਸ੍ਸ ਰਞ੍ਞੋ ਧੀਤਰਂ ਇਚ੍ਛਤਿ, ਤਮਸ੍ਸ ਆਨੇਤ੍ਵਾ ਅਗ੍ਗਮਹੇਸਿਂ ਕਰਿਸ੍ਸਾਮ, ਚਿਤ੍ਤਮਸ੍ਸ ਜਾਨਾਹਿ, ਕਤਰਂ ਰਾਜਧੀਤਰਂ ਰੋਚੇਸੀ’’ਤਿ ਆਹ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਕੁਮਾਰਸ੍ਸ ਇਮਂ ਪਵਤ੍ਤਿਂ ਆਰੋਚੇਤ੍ਵਾ ਚਿਤ੍ਤਂ ਜਾਨਾਹੀ’’ਤਿ ਏਕਂ ਪਰਿਚਾਰਿਕਂ ਪੇਸੇਸਿ. ਸਾ ਗਨ੍ਤ੍ਵਾ ਤਸ੍ਸ ਤਂ ਪਵਤ੍ਤਿਂ ਆਰੋਚੇਸਿ. ਤਂ ਸੁਤ੍ਵਾ ਮਹਾਸਤ੍ਤੋ ਚਿਨ੍ਤੇਸਿ – ‘‘ਅਹਂ ਨ ਰੂਪਵਾ, ਰੂਪਸਮ੍ਪਨ੍ਨਾ ਰਾਜਧੀਤਾ ਆਨੀਤਾਪਿ ਮਂ ਦਿਸ੍ਵਾ ‘ਕਿਂ ਮੇ ਇਮਿਨਾ ਵਿਰੂਪੇਨਾ’ਤਿ ਪਲਾਯਿਸ੍ਸਤਿ ਇਤਿ ਨੋ ਲਜ੍ਜਿਤਬ੍ਬਕਂ ਭਵਿਸ੍ਸਤਿ, ਕਿਂ ਮੇ ਘਰਾਵਾਸੇਨ, ਧਰਮਾਨੇ ਮਾਤਾਪਿਤਰੋ ਉਪਟ੍ਠਹਿਤ੍ਵਾ ਤੇਸਂ ਅਚ੍ਚਯੇਨ ਨਿਕ੍ਖਮਿਤ੍ਵਾ ਪਬ੍ਬਜਿਸ੍ਸਾਮੀ’’ਤਿ. ਸੋ ‘‘ਮਯ੍ਹਂ ਨੇਵ ਰਜ੍ਜੇਨਤ੍ਥੋ, ਨ ਨਾਟਕੇਹਿ, ਅਹਂ ਮਾਤਾਪਿਤੂਨਂ ਅਚ੍ਚਯੇਨ ਪਬ੍ਬਜਿਸ੍ਸਾਮੀ’’ਤਿ ਆਹ. ਸਾ ਗਨ੍ਤ੍ਵਾ ਤਸ੍ਸ ਕਥਂ ਦੇਵਿਯਾ ਆਰੋਚੇਸਿ, ਦੇਵੀਪਿ ਰਞ੍ਞੋ ਆਰੋਚੇਸਿ. ਰਾਜਾ ਅਨਤ੍ਤਮਨੋ ਹੁਤ੍ਵਾ ਪੁਨ ਕਤਿਪਾਹਚ੍ਚਯੇਨ ਸਾਸਨਂ ਪੇਸੇਸਿ. ਸੋਪਿ ਪਟਿਬਾਹਤਿਯੇਵ. ਏਵਂ ਯਾਵਤਤਿਯਂ ਪਟਿਬਾਹਿਤ੍ਵਾ ਚਤੁਤ੍ਥਵਾਰੇ ਚਿਨ੍ਤੇਸਿ – ‘‘ਮਾਤਾਪਿਤੂਹਿ ਸਦ੍ਧਿਂ ਏਕਨ੍ਤੇਨ ਪਟਿਪਕ੍ਖਭਾਵੋ ਨਾਮ ਨ ਯੁਤ੍ਤੋ, ਏਕਂ ਉਪਾਯਂ ਕਰਿਸ੍ਸਾਮੀ’’ਤਿ.

ਸੋ ਕਮ੍ਮਾਰਜੇਟ੍ਠਕਂ ਪਕ੍ਕੋਸਾਪੇਤ੍ਵਾ ਬਹੁਂ ਸੁਵਣ੍ਣਂ ਦਤ੍ਵਾ ‘‘ਏਕਂ ਇਤ੍ਥਿਰੂਪਕਂ ਕਰੋਹੀ’’ਤਿ ਉਯ੍ਯੋਜੇਤ੍ਵਾ ਤਸ੍ਮਿਂ ਪਕ੍ਕਨ੍ਤੇ ਅਞ੍ਞਂ ਸੁਵਣ੍ਣਂ ਗਹੇਤ੍ਵਾ ਸਯਮ੍ਪਿ ਇਤ੍ਥਿਰੂਪਕਂ ਅਕਾਸਿ. ਬੋਧਿਸਤ੍ਤਾਨਞ੍ਹਿ ਅਧਿਪ੍ਪਾਯੋ ਨਾਮ ਸਮਿਜ੍ਝਤਿ. ਤਂ ਸੁਵਣ੍ਣਰੂਪਕਂ ਜਿਵ੍ਹਾਯ ਅਵਣ੍ਣਨੀਯਸੋਭਂ ਅਹੋਸਿ. ਅਥ ਨਂ ਮਹਾਸਤ੍ਤੋ ਖੋਮਂ ਨਿਵਾਸਾਪੇਤ੍ਵਾ ਸਿਰਿਗਬ੍ਭੇ ਠਪਾਪੇਸਿ. ਸੋ ਕਮ੍ਮਾਰਜੇਟ੍ਠਕੇਨ ਆਭਤਰੂਪਕਂ ਦਿਸ੍ਵਾ ਤਂ ਗਰਹਿਤ੍ਵਾ ‘‘ਗਚ੍ਛ ਅਮ੍ਹਾਕਂ ਸਿਰਿਗਬ੍ਭੇ ਠਪਿਤਰੂਪਕਂ ਆਹਰਾ’’ਤਿ ਆਹ. ਸੋ ਸਿਰਿਗਬ੍ਭਂ ਪਵਿਟ੍ਠੋ ਤਂ ਦਿਸ੍ਵਾ ‘‘ਕੁਮਾਰੇਨ ਸਦ੍ਧਿਂ ਅਭਿਰਮਿਤੁਂ ਏਕਾ ਦੇਵਚ੍ਛਰਾ, ਆਗਤਾ ਭਵਿਸ੍ਸਤੀ’’ਤਿ ਹਤ੍ਥਂ ਪਸਾਰੇਤੁਂ ਅਵਿਸਹਨ੍ਤੋ ਨਿਕ੍ਖਮਿਤ੍ਵਾ ‘‘ਦੇਵ, ਸਿਰਿਗਬ੍ਭੇ ਅਯ੍ਯਾ ਏਕਿਕਾਵ ਠਿਤਾ, ਉਪਗਨ੍ਤੁਂ ਨ ਸਕ੍ਕੋਮੀ’’ਤਿ ਆਹ. ‘‘ਤਾਤ, ਗਚ੍ਛ, ਸੁਵਣ੍ਣਰੂਪਕਂ ਏਤਂ, ਆਹਰਾ’’ਤਿ ਪੁਨ ਪੇਸਿਤੋ ਆਹਰਿ. ਕੁਮਾਰੋ ਕਮ੍ਮਾਰੇਨ ਕਤਂ ਰੂਪਕਂ ਸੁਵਣ੍ਣਗਬ੍ਭੇ ਨਿਕ੍ਖਿਪਾਪੇਤ੍ਵਾ ਅਤ੍ਤਨਾ ਕਤਂ ਅਲਙ੍ਕਾਰਾਪੇਤ੍ਵਾ ਰਥੇ ਠਪਾਪੇਤ੍ਵਾ ‘‘ਏਵਰੂਪਂ ਲਭਨ੍ਤੋ ਗਣ੍ਹਾਮੀ’’ਤਿ ਮਾਤੁ ਸਨ੍ਤਿਕਂ ਪਹਿਣਿ.

ਸਾ ਅਮਚ੍ਚੇ ਪਕ੍ਕੋਸਾਪੇਤ੍ਵਾ, ‘‘ਤਾਤਾ, ਮਯ੍ਹਂ ਪੁਤ੍ਤੋ ਮਹਾਪੁਞ੍ਞੋ ਸਕ੍ਕਦਤ੍ਤਿਯੋ ਅਨੁਚ੍ਛਵਿਕਂ ਕੁਮਾਰਿਕਂ ਲਭਿਸ੍ਸਤਿ, ਤੁਮ੍ਹੇ ਏਵਰੂਪਂ ਲਭਨ੍ਤਾ ਗਣ੍ਹਿਸ੍ਸਥ, ਇਮਂ ਰੂਪਕਂ ਪਟਿਚ੍ਛਨ੍ਨਯਾਨੇ ਠਪੇਤ੍ਵਾ ਸਕਲਜਮ੍ਬੁਦੀਪਂ ਚਰਨ੍ਤਾ ਯਸ੍ਸ ਰਞ੍ਞੋ ਏਵਰੂਪਂ ਧੀਤਰਂ ਪਸ੍ਸਥ, ਤਸ੍ਸੇਤਂ ਦਤ੍ਵਾ ‘ਓਕ੍ਕਾਕਰਾਜਾ ਤੁਮ੍ਹੇਹਿ ਸਦ੍ਧਿਂ ਆਵਾਹਂ ਕਰਿਸ੍ਸਤੀ’ਤਿ ਦਿਵਸਂ ਵਵਤ੍ਥਪੇਤ੍ਵਾ ਆਗਚ੍ਛਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਤਂ ਆਦਾਯ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿਤ੍ਵਾ ਵਿਚਰਨ੍ਤਾ ਯਂ ਰਾਜਧਾਨਿਂ ਪਾਪੁਣਨ੍ਤਿ, ਤਤ੍ਥ ਸਾਯਨ੍ਹਸਮਯੇ ਮਹਾਜਨਸ੍ਸ ਸਮੋਸਰਣਟ੍ਠਾਨੇ ਤਂ ਰੂਪਕਂ ਵਤ੍ਥਪੁਪ੍ਫਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਸੁਵਣ੍ਣਸਿਵਿਕਂ ਆਰੋਪੇਤ੍ਵਾ ਤਿਤ੍ਥਮਗ੍ਗੇ ਠਪੇਤ੍ਵਾ ਅਮਚ੍ਚਾ ਸਯਂ ਪਟਿਕ੍ਕਮਿਤ੍ਵਾ ਆਗਤਾਗਤਾਨਂ ਕਥਾਸਵਨਤ੍ਥਂ ਏਕਮਨ੍ਤੇ ਤਿਟ੍ਠਨ੍ਤਿ. ਮਹਾਜਨੋ ਤਂ ਓਲੋਕੇਤ੍ਵਾ ‘‘ਸੁਵਣ੍ਣਰੂਪਕ’’ਨ੍ਤਿ ਸਞ੍ਞਂ ਅਕਤ੍ਵਾ ‘‘ਅਯਂ ਮਨੁਸ੍ਸਿਤ੍ਥੀ ਸਮਾਨਾਪਿ ਦੇਵਚ੍ਛਰਪਟਿਭਾਗਾ ਅਤਿਵਿਯ ਸੋਭਤਿ, ਕਿਂ ਨੁ ਖੋ ਏਤ੍ਥ ਠਿਤਾ, ਕੁਤੋ ਵਾ ਆਗਤਾ, ਅਮ੍ਹਾਕਂ ਨਗਰੇ ਏਵਰੂਪਾ ਨਤ੍ਥੀ’’ਤਿ ਵਣ੍ਣੇਨ੍ਤੋ ਪਕ੍ਕਮਤਿ. ਤਂ ਸੁਤ੍ਵਾ ਅਮਚ੍ਚਾ ‘‘ਸਚੇ ਇਧ ਏਵਰੂਪਾ ਦਾਰਿਕਾ ਭਵੇਯ੍ਯ, ‘ਅਸੁਕਾ ਰਾਜਧੀਤਾ ਵਿਯ ਅਸੁਕਾ ਅਮਚ੍ਚਧੀਤਾ ਵਿਯਾ’ਤਿ ਵਦੇਯ੍ਯੁਂ, ਅਦ੍ਧਾ ਇਧ ਏਵਰੂਪਾ ਨਤ੍ਥੀ’’ਤਿ ਤਂ ਆਦਾਯ ਅਞ੍ਞਂ ਨਗਰਂ ਗਚ੍ਛਨ੍ਤਿ.

ਤੇ ਏਵਂ ਵਿਚਰਨ੍ਤਾ ਅਨੁਪੁਬ੍ਬੇਨ ਮਦ੍ਦਰਟ੍ਠੇ ਸਾਗਲਨਗਰਂ ਸਮ੍ਪਾਪੁਣਿਂਸੁ. ਤਤ੍ਥ ਮਦ੍ਦਰਞ੍ਞੋ ਅਟ੍ਠ ਧੀਤਰੋ ਉਤ੍ਤਮਰੂਪਧਰਾ ਦੇਵਚ੍ਛਰਪਟਿਭਾਗਾ, ਤਾਸਂ ਸਬ੍ਬਜੇਟ੍ਠਿਕਾ ਪਭਾਵਤੀ ਨਾਮ. ਤਸ੍ਸਾ ਸਰੀਰਤੋ ਬਾਲਸੂਰਿਯਸ੍ਸ ਪਭਾ ਵਿਯ ਪਭਾ ਨਿਚ੍ਛਰਨ੍ਤਿ, ਅਨ੍ਧਕਾਰੇਪਿ ਚਤੁਹਤ੍ਥੇ ਅਨ੍ਤੋਗਬ੍ਭੇ ਪਦੀਪਕਿਚ੍ਚਂ ਨਤ੍ਥਿ, ਸਬ੍ਬੋ ਗਬ੍ਭੋ ਏਕੋਭਾਸੋਵ ਹੋਤਿ. ਧਾਤੀ ਪਨਸ੍ਸਾ ਖੁਜ੍ਜਾ, ਸਾ ਪਭਾਵਤਿਂ ਭੋਜੇਤ੍ਵਾ ਤਸ੍ਸਾ ਸੀਸਨ੍ਹਾਪਨਤ੍ਥਂ ਅਟ੍ਠਹਿ ਵਣ੍ਣਦਾਸੀਹਿ ਅਟ੍ਠ ਘਟੇ ਗਾਹਾਪੇਤ੍ਵਾ ਸਾਯਨ੍ਹਸਮਯੇ ਉਦਕਤ੍ਥਾਯ ਗਚ੍ਛਨ੍ਤੀ ਤਿਤ੍ਥਮਗ੍ਗੇ ਠਿਤਂ ਤਂ ਰੂਪਕਂ ਦਿਸ੍ਵਾ ‘‘ਪਭਾਵਤੀ’’ਤਿ ਸਞ੍ਞਾਯ ‘‘ਅਯਂ ਦੁਬ੍ਬਿਨੀਤਾ ‘ਸੀਸਂ ਨ੍ਹਾਯਿਸ੍ਸਾਮੀ’ਤਿ ਅਮ੍ਹੇ ਉਦਕਤ੍ਥਾਯ ਪੇਸੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਤਿਤ੍ਥਮਗ੍ਗੇ ਠਿਤਾ’’ਤਿ ਕੁਜ੍ਝਿਤ੍ਵਾ ‘‘ਅਰੇ ਕੁਲਲਜ੍ਜਾਪਨਿਕੇ ਅਮ੍ਹੇਹਿ ਪੁਰਿਮਤਰਂ ਆਗਨ੍ਤ੍ਵਾ ਕਸ੍ਮਾ ਇਧ ਠਿਤਾਸਿ, ਸਚੇ ਰਾਜਾ ਜਾਨਿਸ੍ਸਤਿ, ਨਾਸੇਸ੍ਸਤਿ ਨੋ’’ਤਿ ਵਤ੍ਵਾ ਹਤ੍ਥੇਨ ਗਣ੍ਡਪਸ੍ਸੇ ਪਹਰਿ, ਹਤ੍ਥਤਲਂ ਭਿਜ੍ਜਮਾਨਂ ਵਿਯ ਜਾਤਂ. ਤਤੋ ‘‘ਸੁਵਣ੍ਣਰੂਪਕ’’ਨ੍ਤਿ ਞਤ੍ਵਾ ਹਸਮਾਨਾ ਤਾਸਂ ਵਣ੍ਣਦਾਸੀਨਂ ਸਨ੍ਤਿਕਂ ਗਚ੍ਛਨ੍ਤੀ ‘‘ਪਸ੍ਸਥੇਤਂ ਮੇ ਕਮ੍ਮਂ, ਮਮ ਧੀਤਾਤਿਸਞ੍ਞਾਯ ਪਹਾਰਂ ਅਦਾਸਿਂ, ਅਯਂ ਮਮ ਧੀਤੁ ਸਨ੍ਤਿਕੇ ਕਿਮਗ੍ਘਤਿ, ਕੇਵਲਂ ਮੇ ਹਤ੍ਥੋ ਦੁਕ੍ਖਾਪਿਤੋ’’ਤਿ ਆਹ.

ਅਥ ਨਂ ਰਾਜਦੂਤਾ ਗਹੇਤ੍ਵਾ ‘‘ਤ੍ਵਂ ‘ਮਮ ਧੀਤਾ ਇਤੋ ਅਭਿਰੂਪਤਰਾ’ਤਿ ਵਦਨ੍ਤੀ ਕਂ ਨਾਮ ਕਥੇਸੀ’’ਤਿ ਆਹਂਸੁ. ‘‘ਮਦ੍ਦਰਞ੍ਞੋ ਧੀਤਰਂ ਪਭਾਵਤਿਂ, ਇਦਂ ਰੂਪਕਂ ਤਸ੍ਸਾ ਸੋਲ਼ਸਿਮ੍ਪਿ ਕਲਂ ਨ ਅਗ੍ਘਤੀ’’ਤਿ. ਤੇ ਤੁਟ੍ਠਮਾਨਸਾ ਰਾਜਦ੍ਵਾਰਂ ਗਨ੍ਤ੍ਵਾ ‘‘ਓਕ੍ਕਾਕਰਞ੍ਞੋ ਦੂਤਾ ਦ੍ਵਾਰੇ ਠਿਤਾ’’ਤਿ ਪਟਿਹਾਰੇਸੁਂ. ਰਾਜਾ ਆਸਨਾ ਵੁਟ੍ਠਾਯ ਠਿਤਕੋਵ ‘‘ਪਕ੍ਕੋਸਥਾ’’ਤਿ ਆਹ. ਤੇ ਪਵਿਸਿਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ‘‘ਮਹਾਰਾਜ, ਅਮ੍ਹਾਕਂ ਰਾਜਾ ਤੁਮ੍ਹਾਕਂ ਆਰੋਗ੍ਯਂ ਪੁਚ੍ਛਤੀ’’ਤਿ ਵਤ੍ਵਾ ਕਤਸਕ੍ਕਾਰਸਮ੍ਮਾਨਾ ‘‘ਕਿਮਤ੍ਥਂ ਆਗਤਤ੍ਥਾ’’ਤਿ ਪੁਟ੍ਠਾ ‘‘ਅਮ੍ਹਾਕਂ ਰਞ੍ਞੋ ਸੀਹਸ੍ਸਰੋ ਪੁਤ੍ਤੋ ਕੁਸਕੁਮਾਰੋ ਨਾਮ, ਰਾਜਾ ਤਸ੍ਸ ਰਜ੍ਜਂ ਦਾਤੁਕਾਮੋ ਅਮ੍ਹੇ ਤੁਮ੍ਹਾਕਂ ਸਨ੍ਤਿਕਂ ਪਹਿਣਿ, ਤੁਮ੍ਹਾਕਂ ਕਿਰ ਧੀਤਾ ਪਭਾਵਤੀ, ਤਂ ਤਸ੍ਸ ਦੇਥ, ਇਮਞ੍ਚ ਸੁਵਣ੍ਣਰੂਪਕਂ ਦੇਯ੍ਯਧਮ੍ਮਂ ਗਣ੍ਹਥਾ’’ਤਿ ਤਂ ਰੂਪਕਂ ਤਸ੍ਸ ਅਦਂਸੁ. ਸੋਪਿ ‘‘ਏਵਰੂਪੇਨ ਮਹਾਰਾਜੇਨ ਸਦ੍ਧਿਂ ਵਿਵਾਹਮਙ੍ਗਲਂ ਭਵਿਸ੍ਸਤੀ’’ਤਿ ਤੁਟ੍ਠਚਿਤ੍ਤੋ ਸਮ੍ਪਟਿਚ੍ਛਿ. ਅਥ ਨਂ ਦੂਤਾ ਆਹਂਸੁ – ‘‘ਮਹਾਰਾਜ, ਅਮ੍ਹੇਹਿ ਨ ਸਕ੍ਕਾ ਪਪਞ੍ਚਂ ਕਾਤੁਂ, ਕੁਮਾਰਿਕਾਯ ਲਦ੍ਧਭਾਵਂ ਰਞ੍ਞੋ ਆਰੋਚੇਸ੍ਸਾਮ, ਅਥ ਨਂ ਸੋ ਆਗਨ੍ਤ੍ਵਾ ਆਦਾਯ ਗਮਿਸ੍ਸਤੀ’’ਤਿ. ਸੋ ‘‘ਸਾਧੂ’’ਤਿ ਵਤ੍ਵਾ ਤੇਸਂ ਸਕ੍ਕਾਰਂ ਕਤ੍ਵਾ ਵਿਸ੍ਸਜ੍ਜੇਸਿ. ਤੇ ਗਨ੍ਤ੍ਵਾ ਰਞ੍ਞੋ ਚ ਦੇਵਿਯਾ ਚ ਆਰੋਚੇਸੁਂ. ਰਾਜਾ ਮਹਨ੍ਤੇਨ ਪਰਿਵਾਰੇਨ ਕੁਸਾਵਤਿਤੋ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਸਾਗਲਨਗਰਂ ਪਾਪੁਣਿ. ਮਦ੍ਦਰਾਜਾ ਪਚ੍ਚੁਗ੍ਗਨ੍ਤ੍ਵਾ ਤਂ ਨਗਰਂ ਪਵੇਸੇਤ੍ਵਾ ਮਹਨ੍ਤਂ ਸਕ੍ਕਾਰਮਕਾਸਿ.

ਸੀਲਵਤੀ ਦੇਵੀ ਪਣ੍ਡਿਤਤ੍ਤਾ ‘‘ਕੋ ਜਾਨਾਤਿ, ਕਿਂ ਭਵਿਸ੍ਸਤੀ’’ਤਿ ਏਕਾਹਦ੍ਵੀਹਚ੍ਚਯੇਨ ਮਦ੍ਦਰਾਜਾਨਂ ਆਹ – ‘‘ਮਹਾਰਾਜ, ਸੁਣਿਸਂ ਦਟ੍ਠੁਕਾਮਾਮ੍ਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਂ ਪਕ੍ਕੋਸਾਪੇਸਿ. ਪਭਾਵਤੀ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਧਾਤਿਗਣਪਰਿਵੁਤਾ ਆਗਨ੍ਤ੍ਵਾ ਸਸ੍ਸੁਂ ਵਨ੍ਦਿ. ਸਾ ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਕੁਮਾਰਿਕਾ ਅਭਿਰੂਪਾ, ਮਯ੍ਹਂ ਪੁਤ੍ਤੋ ਵਿਰੂਪੋ. ਸਚੇ ਏਸਾ ਤਂ ਪਸ੍ਸਿਸ੍ਸਤਿ, ਏਕਾਹਮ੍ਪਿ ਅਵਸਿਤ੍ਵਾ ਪਲਾਯਿਸ੍ਸਤਿ, ਉਪਾਯਂ ਕਰਿਸ੍ਸਾਮੀ’’ਤਿ. ਸਾ ਮਦ੍ਦਰਾਜਾਨਂ ਆਮਨ੍ਤੇਤ੍ਵਾ, ‘‘ਮਹਾਰਾਜ, ਸੁਣਿਸਾ ਮੇ ਪੁਤ੍ਤਸ੍ਸ ਅਨੁਚ੍ਛਵਿਕਾ, ਅਪਿਚ ਖੋ ਪਨ ਅਮ੍ਹਾਕਂ ਕੁਲਪਵੇਣਿਯਾ ਆਗਤਂ ਚਾਰਿਤ੍ਤਂ ਅਤ੍ਥਿ, ਸਚੇ ਅਯਂ ਤਸ੍ਮਿਂ ਚਾਰਿਤ੍ਤੇ ਵਤ੍ਤਿਸ੍ਸਤਿ, ਨੇਸ੍ਸਾਮਿ ਨ’’ਨ੍ਤਿ ਆਹ. ‘‘ਕਿਂ ਪਨ ਵੋ ਚਾਰਿਤ੍ਤ’’ਨ੍ਤਿ. ‘‘ਅਮ੍ਹਾਕਂ ਵਂਸੇ ਯਾਵ ਏਕਸ੍ਸ ਗਬ੍ਭਸ੍ਸ ਪਤਿਟ੍ਠਾਨਂ ਹੋਤਿ, ਤਾਵ ਦਿਵਾ ਸਾਮਿਕਂ ਪਸ੍ਸਿਤੁਂ ਨ ਲਭਤਿ. ਸਚੇ ਏਸਾ ਤਥਾ ਕਰਿਸ੍ਸਤਿ, ਨੇਸ੍ਸਾਮਿ ਨ’’ਨ੍ਤਿ. ਰਾਜਾ ‘‘ਕਿਂ, ਅਮ੍ਮ, ਸਕ੍ਖਿਸ੍ਸਸਿ ਏਵਂ ਵਤ੍ਤਿਤੁ’’ਨ੍ਤਿ ਧੀਤਰਂ ਪੁਚ੍ਛਿ. ਸਾ ‘‘ਆਮ ਤਾਤਾ’’ਤਿ ਆਹ. ਤਤੋ ਓਕ੍ਕਾਕਰਾਜਾ ਮਦ੍ਦਰਞ੍ਞੋ ਬਹੁਂ ਧਨਂ ਦਤ੍ਵਾ ਤਂ ਆਦਾਯ ਪਕ੍ਕਾਮਿ. ਮਦ੍ਦਰਾਜਾਪਿ ਮਹਨ੍ਤੇਨ ਪਰਿਵਾਰੇਨ ਧੀਤਰਂ ਉਯ੍ਯੋਜੇਸਿ.

ਓਕ੍ਕਾਕੋ ਕੁਸਾਵਤਿਂ ਗਨ੍ਤ੍ਵਾ ਨਗਰਂ ਅਲਙ੍ਕਾਰਾਪੇਤ੍ਵਾ ਸਬ੍ਬਬਨ੍ਧਨਾਨਿ ਮੋਚੇਤ੍ਵਾ ਪੁਤ੍ਤਸ੍ਸ ਅਭਿਸੇਕਂ ਕਤ੍ਵਾ ਰਜ੍ਜਂ ਦਤ੍ਵਾ ਪਭਾਵਤਿਂ ਅਗ੍ਗਮਹੇਸਿਂ ਕਾਰੇਤ੍ਵਾ ਨਗਰੇ ‘‘ਕੁਸਰਾਜਸ੍ਸ ਆਣਾ’’ਤਿ ਭੇਰਿਂ ਚਰਾਪੇਸਿ. ਸਕਲਜਮ੍ਬੁਦੀਪਤਲੇ ਰਾਜਾਨੋ ਯੇਸਂ ਧੀਤਰੋ ਅਤ੍ਥਿ, ਤੇ ਕੁਸਰਞ੍ਞੋ ਧੀਤਰੋ ਪਹਿਣਿਂਸੁ. ਯੇਸਂ ਪੁਤ੍ਤਾ ਅਤ੍ਥਿ, ਤੇ ਤੇਨ ਸਦ੍ਧਿਂ ਮਿਤ੍ਤਭਾਵਂ ਆਕਙ੍ਖਨ੍ਤਾ ਪੁਤ੍ਤੇ ਉਪਟ੍ਠਾਕੇ ਕਤ੍ਵਾ ਪਹਿਣਿਂਸੁ. ਬੋਧਿਸਤ੍ਤਸ੍ਸ ਨਾਟਕਪਰਿਵਾਰੋ ਮਹਾ ਅਹੋਸਿ, ਮਹਨ੍ਤੇਨ ਯਸੇਨ ਰਜ੍ਜਂ ਕਾਰੇਸਿ. ਸੋ ਪਭਾਵਤਿਂ ਦਿਵਾ ਪਸ੍ਸਿਤੁਂ ਨ ਲਭਤਿ, ਸਾਪਿ ਤਂ ਦਿਵਾ ਪਸ੍ਸਿਤੁਂ ਨ ਲਭਤਿ, ਉਭਿਨ੍ਨਂ ਰਤ੍ਤਿਦਸ੍ਸਨਮੇਵ ਹੋਤਿ. ਤਤ੍ਥ ਪਭਾਵਤਿਯਾ ਸਰੀਰਪ੍ਪਭਾਪਿ ਅਬ੍ਬੋਹਾਰਿਕਾ ਅਹੋਸਿ. ਬੋਧਿਸਤ੍ਤੋ ਸਿਰਿਗਬ੍ਭਤੋ ਰਤ੍ਤਿਂਯੇਵ ਨਿਕ੍ਖਮਤਿ.

ਸੋ ਕਤਿਪਾਹਚ੍ਚਯੇਨ ਪਭਾਵਤਿਂ ਦਿਵਾ ਦਟ੍ਠੁਕਾਮੋ ਮਾਤੁਯਾ ਆਰੋਚੇਸਿ. ਸਾ ‘‘ਮਾ ਤੇ ਤਾਤ, ਰੁਚ੍ਚਿ, ਯਾਵ ਏਕਂ ਪੁਤ੍ਤਂ ਲਭਸਿ, ਤਾਵ ਆਗਮੇਹੀ’’ਤਿ, ਪਟਿਕ੍ਖਿਪਿ. ਸੋ ਪੁਨਪ੍ਪੁਨਂ ਯਾਚਿਯੇਵ. ਅਥ ਨਂ ਸਾ ਆਹ – ‘‘ਤੇਨ ਹਿ ਹਤ੍ਥਿਸਾਲਂ ਗਨ੍ਤ੍ਵਾ ਹਤ੍ਥਿਮੇਣ੍ਡਵੇਸੇਨ ਤਿਟ੍ਠ, ਅਹਂ ਤਂ ਤਤ੍ਥ ਆਨੇਸ੍ਸਾਮਿ, ਅਥ ਨਂ ਅਕ੍ਖੀਨਿ ਪੂਰੇਤ੍ਵਾ ਓਲੋਕੇਯ੍ਯਾਸਿ, ਮਾ ਚ ਅਤ੍ਤਾਨਂ ਜਾਨਾਪੇਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਹਤ੍ਥਿਸਾਲਂ ਅਗਮਾਸਿ. ਅਥਸ੍ਸ ਮਾਤਾ ਹਤ੍ਥਿਸਾਲਂ ਅਲਙ੍ਕਾਰਾਪੇਤ੍ਵਾ ਪਭਾਵਤਿਂ ‘‘ਏਹਿ ਸਾਮਿਕਸ੍ਸ ਹਤ੍ਥਿਨੋ ਪਸ੍ਸਾਮਾ’’ਤਿ ਤਤ੍ਥ ਨੇਤ੍ਵਾ ‘‘ਅਯਂ ਹਤ੍ਥੀ ਅਸੁਕੋ ਨਾਮ, ਅਯਂ ਹਤ੍ਥੀ ਅਸੁਕੋ ਨਾਮਾ’’ਤਿ ਤਸ੍ਸਾ ਦਸ੍ਸੇਸਿ. ਤਤ੍ਥ ਤਂ ਰਾਜਾ ਮਾਤੁ ਪਚ੍ਛਤੋ ਗਚ੍ਛਨ੍ਤਿਂ ਦਿਸ੍ਵਾ ਹਤ੍ਥਿਗੋਪਕਵੇਸੇਨ ਹਤ੍ਥਿਛਕਣਪਿਣ੍ਡੇਨ ਪਿਟ੍ਠਿਯਂ ਪਹਰਿ. ਸਾ ਕੁਦ੍ਧਾ ‘‘ਰਞ੍ਞੋ ਕਥੇਤ੍ਵਾ ਤੇ ਹਤ੍ਥਂ ਛਿਨ੍ਦਾਪੇਸ੍ਸਾਮੀ’’ਤਿ ਵਤ੍ਵਾ ਦੇਵਿਂ ਉਜ੍ਝਾਪੇਸਿ. ਰਾਜਮਾਤਾ ‘‘ਮਾ ਅਮ੍ਮ ਕੁਜ੍ਝੀ’’ਤਿ ਸੁਣਿਸਂ ਸਞ੍ਞਾਪੇਤ੍ਵਾ ਪਿਟ੍ਠਿਂ ਪਰਿਮਜ੍ਜਿ. ਪੁਨਪਿ ਰਾਜਾ ਤਂ ਦਟ੍ਠੁਕਾਮੋ ਹੁਤ੍ਵਾ ਅਸ੍ਸਸਾਲਾਯ ਅਸ੍ਸਗੋਪਕਵੇਸੇਨ ਤਂ ਦਿਸ੍ਵਾ ਤਥੇਵ ਅਸ੍ਸਛਕਣਪਿਣ੍ਡੇਨ ਪਹਰਿ. ਤਦਾਪਿ ਤਂ ਕੁਦ੍ਧਂ ਸਸ੍ਸੁ ਸਞ੍ਞਾਪੇਸਿ.

ਪੁਨੇਕਦਿਵਸੇ ਪਭਾਵਤੀ ਮਹਾਸਤ੍ਤਂ ਪਸ੍ਸਿਤੁਕਾਮਾ ਹੁਤ੍ਵਾ ਸਸ੍ਸੁਯਾ ਆਰੋਚੇਤ੍ਵਾ ‘‘ਅਲਂ ਮਾ ਤੇ ਰੁਚ੍ਚੀ’’ਤਿ ਪਟਿਕ੍ਖਿਤ੍ਤਾਪਿ ਪੁਨਪ੍ਪੁਨਂ ਯਾਚਿ. ਅਥ ਨਂ ਸਾ ਆਹ – ‘‘ਤੇਨ ਹਿ ਸ੍ਵੇ ਮਮ ਪੁਤ੍ਤੋ ਨਗਰਂ ਪਦਕ੍ਖਿਣਂ ਕਰਿਸ੍ਸਤਿ, ਤ੍ਵਂ ਸੀਹਪਞ੍ਜਰਂ ਵਿਵਰਿਤ੍ਵਾ ਤਂ ਪਸ੍ਸੇਯ੍ਯਾਸੀ’’ਤਿ. ਏਵਞ੍ਚ ਪਨ ਵਤ੍ਵਾ ਪੁਨਦਿਵਸੇ ਨਗਰਂ ਅਲਙ੍ਕਾਰਾਪੇਤ੍ਵਾ ਜਯਮ੍ਪਤਿਕੁਮਾਰਂ ਰਾਜਵੇਸਂ ਗਾਹਾਪੇਤ੍ਵਾ ਹਤ੍ਥਿਪਿਟ੍ਠੇ ਨਿਸੀਦਾਪੇਤ੍ਵਾ ਬੋਧਿਸਤ੍ਤਂ ਪਚ੍ਛਿਮਾਸਨੇ ਨਿਸੀਦਾਪੇਤ੍ਵਾ ਨਗਰਂ ਪਦਕ੍ਖਿਣਂ ਕਾਰਾਪੇਸਿ. ਸਾ ਪਭਾਵਤਿਂ ਆਦਾਯ ਸੀਹਪਞ੍ਜਰੇ ਠਤ੍ਵਾ ‘‘ਪਸ੍ਸ ਤਵ ਸਾਮਿਕਸ੍ਸ ਸਿਰਿਸੋਭਗ੍ਗ’’ਨ੍ਤਿ ਆਹ. ਸਾ ‘‘ਅਨੁਚ੍ਛਵਿਕੋ ਮੇ ਸਾਮਿਕੋ ਲਦ੍ਧੋ’’ਤਿ ਅਤ੍ਤਮਨਾ ਅਹੋਸਿ. ਤਂ ਦਿਵਸਂ ਪਨ ਮਹਾਸਤ੍ਤੋ ਹਤ੍ਥਿਮੇਣ੍ਡਵੇਸੇਨ ਜਯਮ੍ਪਤਿਸ੍ਸ ਪਚ੍ਛਿਮਾਸਨੇ ਨਿਸੀਦਿਤ੍ਵਾ ਯਥਾਧਿਪ੍ਪਾਯੇਨ ਪਭਾਵਤਿਂ ਓਲੋਕੇਨ੍ਤੋ ਹਤ੍ਥਵਿਕਾਰਾਦਿਵਸੇਨ ਚਿਤ੍ਤਰੁਚਿਯਾ ਕੇਲ਼ਿਂ ਦਸ੍ਸੇਸਿ. ਹਤ੍ਥਿਮ੍ਹਿ ਅਤਿਕ੍ਕਨ੍ਤੇ ਰਾਜਮਾਤਾ ਪਭਾਵਤਿਂ ਪੁਚ੍ਛਿ – ‘‘ਦਿਟ੍ਠੋ ਤੇ, ਅਮ੍ਮ, ਸਾਮਿਕੋ’’ਤਿ. ‘‘ਆਮ ਅਯ੍ਯੇ, ਪਚ੍ਛਿਮਾਸਨੇ ਪਨਸ੍ਸ ਨਿਸਿਨ੍ਨੋ ਹਤ੍ਥਿਮੇਣ੍ਡੋ ਅਤਿਵਿਯ ਦੁਬ੍ਬਿਨੀਤੋ, ਮਯ੍ਹਂ ਹਤ੍ਥਵਿਕਾਰਾਦੀਨਿ ਦਸ੍ਸੇਸਿ, ਕਸ੍ਮਾ ਏਵਰੂਪਂ ਅਲਕ੍ਖਿਕਂ ਰਞ੍ਞੋ ਪਚ੍ਛਿਮਾਸਨੇ ਨਿਸੀਦਾਪੇਸੁਂ, ਨੀਹਰਾਪੇਹਿ ਨ’’ਨ੍ਤਿ? ‘‘ਅਮ੍ਮ, ਰਞ੍ਞੋ ਪਚ੍ਛਿਮਾਸਨੇ ਰਕ੍ਖਾ ਨਾਮ ਇਚ੍ਛਿਤਬ੍ਬਾ’’ਤਿ.

ਸਾ ਚਿਨ੍ਤੇਸਿ – ‘‘ਅਯਂ ਹਤ੍ਥਿਮੇਣ੍ਡੋ ਅਤਿਵਿਯ ਨਿਬ੍ਭਯੋ, ਰਾਜਾਨਂ ‘ਰਾਜਾ’ਤਿਪਿ ਨ ਮਞ੍ਞਤਿ, ਕਿਂ ਨੁ ਖੋ ਏਸੋਵ ਕੁਸਰਾਜਾ, ਅਦ੍ਧਾ ਹਿ ਏਸੋ ਅਤਿਵਿਯ ਵਿਰੂਪੋ ਏਵ ਭਵਿਸ੍ਸਤਿ, ਤੇਨੇਵ ਮਂ ਨ ਦਸ੍ਸੇਨ੍ਤੀ’’ਤਿ. ਸਾ ਖੁਜ੍ਜਂ ਕਣ੍ਣਮੂਲੇ ਆਹ – ‘‘ਅਮ੍ਮ, ਗਚ੍ਛ ਤਾਵ ਜਾਨਾਹਿ, ਕਿਂ ਪੁਰਿਮਾਸਨੇ ਨਿਸਿਨ੍ਨਕੋ ਰਾਜਾ, ਉਦਾਹੁ ਪਚ੍ਛਿਮਾਸਨੇ’’ਤਿ? ‘‘ਕਥਂ ਪਨਾਹਂ ਜਾਨਿਸ੍ਸਾਮੀ’’ਤਿ. ‘‘ਸਚੇ ਹਿ ਸੋ ਰਾਜਾ ਭਵਿਸ੍ਸਤਿ, ਪਠਮਤਰਂ ਹਤ੍ਥਿਪਿਟ੍ਠਿਤੋ ਓਤਰਿਸ੍ਸਤਿ, ਇਮਾਯ ਸਞ੍ਞਾਯ ਜਾਨਾਹੀ’’ਤਿ. ਸਾ ਗਨ੍ਤ੍ਵਾ ਏਕਮਨ੍ਤੇ ਠਿਤਾ ਪਠਮਂ ਮਹਾਸਤ੍ਤਂ ਓਤਰਨ੍ਤਂ ਅਦ੍ਦਸ, ਪਚ੍ਛਾ ਜਯਮ੍ਪਤਿਕੁਮਾਰਂ. ਮਹਾਸਤ੍ਤੋਪਿ ਇਤੋ ਚਿਤੋ ਚ ਓਲੋਕੇਨ੍ਤੋ ਖੁਜ੍ਜਂ ਦਿਸ੍ਵਾ ‘‘ਇਮਿਨਾ ਨਾਮ ਕਾਰਣੇਨ ਏਸਾ ਆਗਤਾ ਭਵਿਸ੍ਸਤੀ’’ਤਿ ਞਤ੍ਵਾ ਤਂ ਪਕ੍ਕੋਸਾਪੇਤ੍ਵਾ ‘‘ਇਮਂ ਅਨ੍ਤਰਂ ਪਭਾਵਤਿਯਾ ਮਾ ਕਥੇਹੀ’’ਤਿ ਦਲ਼੍ਹਂ ਵਤ੍ਵਾ ਉਯ੍ਯੋਜੇਸਿ. ਸਾ ਗਨ੍ਤ੍ਵਾ ‘‘ਪੁਰਿਮਾਸਨੇ ਨਿਸਿਨ੍ਨੋ ਪਠਮਂ ਓਤਰੀ’’ਤਿ ਆਹ. ਪਭਾਵਤੀ ਤਸ੍ਸਾ ਵਚਨਂ ਸਦ੍ਦਹਿ.

ਮਹਾਸਤ੍ਤੋਪਿ ਪੁਨ ਦਟ੍ਠੁਕਾਮੋ ਹੁਤ੍ਵਾ ਮਾਤਰਂ ਯਾਚਿ. ਸਾ ਪਟਿਕ੍ਖਿਪਿਤੁਂ ਅਸਕ੍ਕੋਨ੍ਤੀ ‘‘ਤੇਨ ਹਿ ਅਞ੍ਞਾਤਕਵੇਸੇਨ ਉਯ੍ਯਾਨਂ ਗਚ੍ਛਾਹੀ’’ਤਿ ਆਹ. ਸੋ ਉਯ੍ਯਾਨਂ ਗਨ੍ਤ੍ਵਾ ਪੋਕ੍ਖਰਣਿਯਂ ਗਲਪ੍ਪਮਾਣਂ ਉਦਕਂ ਪਵਿਸਿਤ੍ਵਾ ਪਦੁਮਿਨਿਪਤ੍ਤੇਨ ਸੀਸਂ ਛਾਦੇਤ੍ਵਾ ਪੁਪ੍ਫਿਤਪਦੁਮੇਨ ਮੁਖਂ ਆਵਰਿਤ੍ਵਾ ਅਟ੍ਠਾਸਿ. ਮਾਤਾਪਿਸ੍ਸ ਪਭਾਵਤਿਂ ਉਯ੍ਯਾਨਂ ਨੇਤ੍ਵਾ ਸਾਯਨ੍ਹਸਮਯੇ ‘‘ਇਮੇ ਰੁਕ੍ਖੇ ਪਸ੍ਸ, ਸਕੁਣੇ ਪਸ੍ਸ, ਮਿਗੇ ਪਸ੍ਸਾ’’ਤਿ ਪਲੋਭਯਮਾਨਾ ਪੋਕ੍ਖਰਣੀਤੀਰਂ ਪਾਯਾਸਿ. ਸਾ ਪਞ੍ਚਵਿਧਪਦੁਮਸਞ੍ਛਨ੍ਨਂ ਪੋਕ੍ਖਰਣਿਂ ਦਿਸ੍ਵਾ ਨ੍ਹਾਯਿਤੁਕਾਮਾ ਪਰਿਚਾਰਿਕਾਹਿ ਸਦ੍ਧਿਂ ਪੋਕ੍ਖਰਣਿਂ ਓਤਰਿਤ੍ਵਾ ਕੀਲ਼ਨ੍ਤੀ ਤਂ ਪਦੁਮਂ ਦਿਸ੍ਵਾ ਵਿਚਿਨਿਤੁਕਾਮਾ ਹਤ੍ਥਂ ਪਸਾਰੇਸਿ. ਅਥ ਨਂ ਰਾਜਾ ਪਦੁਮਿਨਿਪਤ੍ਤਂ ਅਪਨੇਤ੍ਵਾ ‘‘ਅਹਂ ਕੁਸਰਾਜਾ’’ਤਿ ਵਤ੍ਵਾ ਹਤ੍ਥੇ ਗਣ੍ਹਿ. ਸਾ ਤਸ੍ਸ ਮੁਖਂ ਦਿਸ੍ਵਾ ‘‘ਯਕ੍ਖੋ ਮਂ ਗਣ੍ਹੀ’’ਤਿ ਵਿਰਵਿਤ੍ਵਾ ਤਤ੍ਥੇਵ ਵਿਸਞ੍ਞਿਤਂ ਪਤ੍ਤਾ. ਅਥਸ੍ਸਾ ਰਾਜਾ ਹਤ੍ਥਂ ਮੁਞ੍ਚਿ. ਸਾ ਸਞ੍ਞਂ ਪਟਿਲਭਿਤ੍ਵਾ ‘‘ਕੁਸਰਾਜਾ ਕਿਰ ਮਂ ਹਤ੍ਥੇ ਗਣ੍ਹਿ, ਇਮਿਨਾਵਾਹਂ ਹਤ੍ਥਿਸਾਲਾਯ ਹਤ੍ਥਿਛਕਣਪਿਣ੍ਡੇਨ, ਅਸ੍ਸਸਾਲਾਯ ਅਸ੍ਸਛਕਣਪਿਣ੍ਡੇਨ ਪਹਟਾ, ਅਯਮੇਵ ਮਂ ਹਤ੍ਥਿਸ੍ਸ ਪਚ੍ਛਿਮਾਸਨੇ ਨਿਸੀਦਿਤ੍ਵਾ ਉਪ੍ਪਣ੍ਡੇਸਿ, ਕਿਂ ਮੇ ਏਵਰੂਪੇਨ ਦੁਮ੍ਮੁਖੇਨ ਪਤਿਨਾ, ਇਮਂ ਜਹਿਤ੍ਵਾ ਅਹਂ ਜੀਵਨ੍ਤੀ ਅਞ੍ਞਂ ਪਤਿਂ ਲਭਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਤ੍ਤਨਾ ਸਦ੍ਧਿਂ ਆਗਤੇ ਅਮਚ੍ਚੇ ਪਕ੍ਕੋਸਾਪੇਤ੍ਵਾ ‘‘ਮਮ ਯਾਨਵਾਹਨਂ ਸਜ੍ਜਂ ਕਰੋਥ, ਅਜ੍ਜੇਵ ਗਮਿਸ੍ਸਾਮੀ’’ਤਿ ਆਹਂ. ਤੇ ਰਞ੍ਞੋ ਆਰੋਚੇਸੁਂ. ਰਾਜਾ ਚਿਨ੍ਤੇਸਿ – ‘‘ਸਚੇ ਗਨ੍ਤੁਂ ਨ ਲਭਿਸ੍ਸਤਿ, ਹਦਯਮਸ੍ਸਾ ਫਲਿਸ੍ਸਤਿ, ਗਚ੍ਛਤੁ ਪੁਨ ਤਂ ਅਤ੍ਤਨੋ ਬਲੇਨ ਆਨੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਥਸ੍ਸਾ ਗਮਨਂ ਅਨੁਜਾਨਿ. ਸਾ ਪਿਤੁਨਗਰਮੇਵ ਅਗਮਾਸਿ.

ਮਹਾਸਤ੍ਤੋਪਿ ਉਯ੍ਯਾਨਤੋ ਨਗਰਂ ਪਵਿਸਿਤ੍ਵਾ ਅਲਙ੍ਕਤਪਾਸਾਦਂ ਅਭਿਰੁਹਿ. ਬੋਧਿਸਤ੍ਤਞ੍ਹਿ ਸਾ ਪੁਬ੍ਬਪਤ੍ਥਨਾਵਸੇਨ ਨ ਇਚ੍ਛਿ, ਸੋਪਿ ਪੁਬ੍ਬਕਮ੍ਮਵਸੇਨੇਵ ਵਿਰੂਪੋ ਅਹੋਸਿ. ਅਤੀਤੇ ਕਿਰ ਬਾਰਾਣਸਿਯਂ ਦ੍ਵਾਰਗਾਮੇ ਉਪਰਿਮਵੀਥਿਯਾ ਚ ਹੇਟ੍ਠਿਮਵੀਥਿਯਾ ਚ ਦ੍ਵੇ ਕੁਲਾਨਿ ਵਸਿਂਸੁ. ਏਕਸ੍ਸ ਕੁਲਸ੍ਸ ਦ੍ਵੇ ਪੁਤ੍ਤਾ ਅਹੇਸੁਂ. ਏਕਸ੍ਸ ਏਕਾਵ ਧੀਤਾ ਅਹੋਸਿ. ਦ੍ਵੀਸੁ ਪੁਤ੍ਤੇਸੁ ਬੋਧਿਸਤ੍ਤੋ ਕਨਿਟ੍ਠੋ. ਤਂ ਕੁਮਾਰਿਕਂ ਜੇਟ੍ਠਕਸ੍ਸ ਅਦਂਸੁ. ਕਨਿਟ੍ਠੋ ਅਦਾਰਭਰਣੋ ਭਾਤੁ ਸਨ੍ਤਿਕੇਯੇਵ ਵਸਿ. ਅਥੇਕਦਿਵਸਂ ਤਸ੍ਮਿਂ ਘਰੇ ਅਤਿਰਸਕਪੂਵੇ ਪਚਿਂਸੁ. ਬੋਧਿਸਤ੍ਤੋ ਅਰਞ੍ਞਂ ਗਤੋ ਹੋਤਿ. ਤਸ੍ਸ ਪੂਵਂ ਠਪੇਤ੍ਵਾ ਅਵਸੇਸੇ ਭਾਜੇਤ੍ਵਾ ਖਾਦਿਂਸੁ. ਤਸ੍ਮਿਂ ਖਣੇ ਪਚ੍ਚੇਕਬੁਦ੍ਧੋ ਭਿਕ੍ਖਾਯ ਘਰਦ੍ਵਾਰਂ ਅਗਮਾਸਿ. ਬੋਧਿਸਤ੍ਤਸ੍ਸ ਭਾਤੁਜਾਯਾ ‘‘ਚੂਲ਼ਪਤਿਨੋ ਅਞ੍ਞਂ ਪੂਵਂ ਪਚਿਸ੍ਸਾਮੀ’’ਤਿ ਤਂ ਗਹੇਤ੍ਵਾ ਪਚ੍ਚੇਕਬੁਦ੍ਧਸ੍ਸ ਅਦਾਸਿ. ਸੋਪਿ ਤਂ ਖਣਞ੍ਞੇਵ ਅਰਞ੍ਞਤੋ ਆਗਚ੍ਛਿ. ਅਥ ਨਂ ਸਾ ਆਹ – ‘‘ਸਾਮਿ, ਚਿਤ੍ਤਂ ਪਸਾਦੇਹਿ, ਤਵ ਕੋਟ੍ਠਾਸੋ ਪਚ੍ਚੇਕਬੁਦ੍ਧਸ੍ਸ ਦਿਨ੍ਨੋ’’ਤਿ. ਸੋ ‘‘ਤਵ ਕੋਟ੍ਠਾਸਂ ਖਾਦਿਤ੍ਵਾ ਮਮ ਕੋਟ੍ਠਾਸਂ ਦੇਸਿ, ਅਹਂ ਕਿਂ ਖਾਦਿਸ੍ਸਾਮੀ’’ਤਿ ਕੁਦ੍ਧੋ ਪਚ੍ਚੇਕਬੁਦ੍ਧਂ ਅਨੁਗਨ੍ਤ੍ਵਾ ਪਤ੍ਤਤੋ ਪੂਵਂ ਗਣ੍ਹਿ. ਸਾ ਮਾਤੁ ਘਰਂ ਗਨ੍ਤ੍ਵਾ ਨਵਵਿਲੀਨਂ ਚਮ੍ਪਕਪੁਪ੍ਫਵਣ੍ਣਂ ਸਪ੍ਪਿਂ ਆਹਰਿਤ੍ਵਾ ਪਚ੍ਚੇਕਬੁਦ੍ਧਸ੍ਸ ਪਤ੍ਤਂ ਪੂਰੇਸਿ, ਤਂ ਓਭਾਸਂ ਮੁਞ੍ਚਿ. ਸਾ ਤਂ ਦਿਸ੍ਵਾ ਪਤ੍ਥਨਂ ਪਟ੍ਠਪੇਸਿ – ‘‘ਭਨ੍ਤੇ, ਇਮਿਨਾ ਦਾਨਬਲੇਨ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਮੇ ਸਰੀਰਂ ਓਭਾਸਜਾਤਂ ਹੋਤੁ, ਉਤ੍ਤਮਰੂਪਧਰਾ ਚ ਭਵੇਯ੍ਯਂ, ਇਮਿਨਾ ਚ ਮੇ ਅਸਪ੍ਪੁਰਿਸੇਨ ਸਦ੍ਧਿਂ ਏਕਟ੍ਠਾਨੇ ਵਾਸੋ ਮਾ ਅਹੋਸੀ’’ਤਿ. ਇਤਿ ਸਾ ਇਮਿਸ੍ਸਾ ਪੁਬ੍ਬਪਤ੍ਥਨਾਯ ਵਸੇਨ ਤਂ ਨ ਇਚ੍ਛਿ. ਬੋਧਿਸਤ੍ਤੋਪਿ ਤਂ ਪੂਵ ਤਸ੍ਮਿਂ ਸਪ੍ਪਿਪਤ੍ਤੇ ਓਸੀਦਾਪੇਤ੍ਵਾ ਪਤ੍ਥਨਂ ਪਟ੍ਠਪੇਸਿ – ‘‘ਭਨ੍ਤੇ, ਇਮਂ ਯੋਜਨਸਤੇ ਵਸਨ੍ਤਿਮ੍ਪਿ ਆਨੇਤ੍ਵਾ ਮਮ ਪਾਦਪਰਿਚਾਰਿਕਂ ਕਾਤੁਂ ਸਮਤ੍ਥੋ ਭਵੇਯ੍ਯ’’ਨ੍ਤਿ. ਤਤ੍ਥ ਯਂ ਸੋ ਕੁਦ੍ਧੋ ਗਨ੍ਤ੍ਵਾ ਪੂਵਂ ਗਣ੍ਹਿ, ਤਸ੍ਸ ਪੁਬ੍ਬਕਮ੍ਮਸ੍ਸ ਵਸੇਨ ਵਿਰੂਪੋ ਅਹੋਸਿ, ਪੁਬ੍ਬਪਤ੍ਥਨਾਯ ਸਾ ਚ ਤਂ ਨ ਇਚ੍ਛੀਤਿ.

ਸੋ ਪਭਾਵਤਿਯਾ ਗਤਾਯ ਸੋਕਪ੍ਪਤ੍ਤੋ ਅਹੋਸਿ, ਨਾਨਾਕਾਰੇਹਿ ਪਰਿਚਾਰਯਮਾਨਾਪਿ ਨਂ ਸੇਸਿਤ੍ਥਿਯੋ ਓਲੋਕਾਪੇਤੁਮ੍ਪਿ ਨਾਸਕ੍ਖਿਂਸੁ,, ਪਭਾਵਤਿਰਹਿਤਮਸ੍ਸ ਸਕਲਮ੍ਪਿ ਨਿਵੇਸਨਂ ਤੁਚ੍ਛਂ ਵਿਯ ਖਾਯਿ. ਸੋ ‘‘ਇਦਾਨਿ ਸਾਗਲਨਗਰਂ ਪਤ੍ਤਾ ਭਵਿਸ੍ਸਤੀ’’ਤਿ ਪਚ੍ਚੂਸਸਮਯੇ ਮਾਤੁ ਸਨ੍ਤਿਕਂ ਗਨ੍ਤ੍ਵਾ, ‘‘ਅਮ੍ਮ, ਅਹਂ ਪਭਾਵਤਿਂ ਆਨੇਸ੍ਸਾਮਿ, ਤੁਮ੍ਹੇ ਰਜ੍ਜਂ ਅਨੁਸਾਸਥਾ’’ਤਿ ਵਦਨ੍ਤੋ ਪਠਮਂ ਗਾਥਮਾਹ –

੧.

‘‘ਇਦਂ ਤੇ ਰਟ੍ਠਂ ਸਧਨਂ ਸਯੋਗ੍ਗਂ, ਸਕਾਯੁਰਂ ਸਬ੍ਬਕਾਮੂਪਪਨ੍ਨਂ;

ਇਦਂ ਤੇ ਰਜ੍ਜਂ ਅਨੁਸਾਸ ਅਮ੍ਮ, ਗਚ੍ਛਾਮਹਂ ਯਤ੍ਥ ਪਿਯਾ ਪਭਾਵਤੀ’’ਤਿ.

ਤਤ੍ਥ ਸਯੋਗ੍ਗਨ੍ਤਿ ਹਤ੍ਥਿਯੋਗ੍ਗਾਦਿਸਹਿਤਂ. ਸਕਾਯੁਰਨ੍ਤਿ ਸਪਞ੍ਚਰਾਜਕਕੁਧਭਣ੍ਡਂ. ਅਨੁਸਾਸ, ਅਮ੍ਮਾਤਿ ਸੋ ਕਿਰ ਪੁਰਿਸਸ੍ਸ ਰਜ੍ਜਂ ਦਤ੍ਵਾ ਪੁਨ ਗਣ੍ਹਨਂ ਨਾਮ ਨ ਯੁਤ੍ਤਨ੍ਤਿ ਪਿਤੁ ਵਾ ਭਾਤੁ ਵਾ ਅਨਿਯ੍ਯਾਦੇਤ੍ਵਾ ਮਾਤੁ ਨਿਯ੍ਯਾਦੇਨ੍ਤੋ ਏਵਮਾਹ.

ਸਾ ਤਸ੍ਸ ਕਥਂ ਸੁਤ੍ਵਾ ‘‘ਤੇਨ ਹਿ, ਤਾਤ, ਅਪ੍ਪਮਤ੍ਤੋ ਭਵੇਯ੍ਯਾਸਿ, ਮਾਤੁਗਾਮੋ ਨਾਮ ਅਪਰਿਸੁਦ੍ਧਹਦਯੋ’’ਤਿ ਵਤ੍ਵਾ ਨਾਨਗ੍ਗਰਸਭੋਜਨਸ੍ਸ ਸੁਵਣ੍ਣਕਰੋਟਿਂ ਪੂਰੇਤ੍ਵਾ ‘‘ਇਦਂ ਅਨ੍ਤਰਾਮਗ੍ਗੇ ਭੁਞ੍ਜੇਯ੍ਯਾਸੀ’’ਤਿ ਵਤ੍ਵਾ ਉਯ੍ਯੋਜੇਸਿ. ਸੋ ਤਂ ਆਦਾਯ ਮਾਤਰਂ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ‘‘ਜੀਵਨ੍ਤੋ ਪੁਨ ਤੁਮ੍ਹੇ ਪਸ੍ਸਿਸ੍ਸਾਮੀ’’ਤਿ ਵਤ੍ਵਾ ਸਿਰਿਗਬ੍ਭਂ ਪਵਿਸਿਤ੍ਵਾ ਪਞ੍ਚਾਵੁਧਂ ਸਨ੍ਨਯ੍ਹਿਤ੍ਵਾ ਭਤ੍ਤਕਰੋਟਿਯਾ ਸਦ੍ਧਿਂ ਕਹਾਪਣਸਹਸ੍ਸਂ ਪਸਿਬ੍ਬਕੇ ਕਤ੍ਵਾ ਕੋਕਨੁਦਞ੍ਚ ਵੀਣਂ ਆਦਾਯ ਨਗਰਾ ਨਿਕ੍ਖਮਿਤ੍ਵਾ ਮਗ੍ਗਂ ਪਟਿਪਜ੍ਜਿਤ੍ਵਾ ਮਹਬ੍ਬਲੋ ਮਹਾਥਾਮੋ ਯਾਵ ਮਜ੍ਝਨ੍ਹਿਕਾ ਪਣ੍ਣਾਸ ਯੋਜਨਾਨਿ ਗਨ੍ਤ੍ਵਾ ਭਤ੍ਤਂ ਭੁਞ੍ਜਿਤ੍ਵਾ ਸੇਸਦਿਵਸਭਾਗੇਨ ਪੁਨ ਪਣ੍ਣਾਸ ਯੋਜਨਾਨਿ ਗਨ੍ਤ੍ਵਾ ਏਕਾਹੇਨੇਵ ਯੋਜਨਸਤਿਕਂ ਮਗ੍ਗਂ ਖੇਪੇਤ੍ਵਾ ਸਾਯਨ੍ਹਸਮਯੇ ਨ੍ਹਤ੍ਵਾ ਸਾਗਲਨਗਰਂ ਪਾਵਿਸਿ. ਤਸ੍ਮਿਂ ਪਵਿਟ੍ਠਮਤ੍ਤੇਯੇਵ ਤਸ੍ਸ ਤੇਜੇਨ ਪਭਾਵਤੀ ਸਯਨਪਿਟ੍ਠੇ ਸਣ੍ਠਾਤੁਂ ਅਸਕ੍ਕੋਨ੍ਤੀ ਓਤਰਿਤ੍ਵਾ ਭੂਮਿਯਂ ਨਿਪਜ੍ਜਿ. ਬੋਧਿਸਤ੍ਤਂ ਕਿਲਨ੍ਤਿਨ੍ਦ੍ਰਿਯਂ ਵੀਥਿਯਾ ਗਚ੍ਛਨ੍ਤਂ ਅਞ੍ਞਤਰਾ ਇਤ੍ਥੀ ਦਿਸ੍ਵਾ ਪਕ੍ਕੋਸਾਪੇਤ੍ਵਾ ਨਿਸੀਦਾਪੇਤ੍ਵਾ ਪਾਦੇ ਧੋਵਾਪੇਤ੍ਵਾ ਸਯਨਂ ਦਾਪੇਸਿ. ਸੋ ਕਿਲਨ੍ਤਕਾਯੋ ਨਿਪਜ੍ਜਿਤ੍ਵਾ ਨਿਦ੍ਦਂ ਓਕ੍ਕਮਿ.

ਅਥ ਸਾ ਤਸ੍ਮਿਂ ਨਿਦ੍ਦਮੁਪਗਤੇ ਭਤ੍ਤਂ ਸਮ੍ਪਾਦੇਤ੍ਵਾ ਤਂ ਪਬੋਧੇਤ੍ਵਾ ਭਤ੍ਤਂ ਭੋਜੇਸਿ. ਸੋ ਤੁਟ੍ਠੋ ਤਸ੍ਸਾ ਸਦ੍ਧਿਂ ਭਤ੍ਤਕਰੋਟਿਯਾ ਕਹਾਪਣਸਹਸ੍ਸਂ ਅਦਾਸਿ. ਸੋ ਪਞ੍ਚਾਵੁਧਂ ਤਤ੍ਥੇਵ ਠਪੇਤ੍ਵਾ ‘‘ਗਨ੍ਤਬ੍ਬਟ੍ਠਾਨਂ ਮੇ ਅਤ੍ਥੀ’’ਤਿ ਵਤ੍ਵਾ ਵੀਣਂ ਆਦਾਯ ਹਤ੍ਥਿਸਾਲਂ ਗਨ੍ਤ੍ਵਾ ‘‘ਅਜ੍ਜ ਮੇ ਇਧ ਵਸਿਤੁਂ ਦੇਥ, ਗਨ੍ਧਬ੍ਬਂ ਵੋ ਕਰਿਸ੍ਸਾਮੀ’’ਤਿ ਵਤ੍ਵਾ ਹਤ੍ਥਿਗੋਪਕੇਹਿ ਅਨੁਞ੍ਞਾਤੋ ਏਕਮਨ੍ਤੇ ਨਿਪਜ੍ਜਿਤ੍ਵਾ ਥੋਕਂ ਨਿਦ੍ਦਾਯਿਤ੍ਵਾ ਪਟਿਪ੍ਪਸ੍ਸਦ੍ਧਦਰਥੋ ਉਟ੍ਠਾਯ ਵੀਣਂ ਮੁਞ੍ਚਿਤ੍ਵਾ ‘‘ਸਾਗਲਨਗਰਵਾਸਿਨੋ ਇਮਂ ਸਦ੍ਦਂ ਸੁਣਨ੍ਤੂ’’ਤਿ ਵੀਣਂ ਵਾਦੇਨ੍ਤੋ ਗਾਯਿ. ਪਭਾਵਤੀ ਭੂਮਿਯਂ ਨਿਪਨ੍ਨਾ ਤਂ ਸਦ੍ਦਂ ਸੁਤ੍ਵਾਵ ‘‘ਅਯਂ ਨ ਅਞ੍ਞਸ੍ਸ ਵੀਣਾਸਦ੍ਦੋ, ਨਿਸ੍ਸਂਸਯਂ ਕੁਸਰਾਜਾ ਮਮਤ੍ਥਾਯ ਆਗਤੋ’’ਤਿ ਅਞ੍ਞਾਸਿ. ਮਦ੍ਦਰਾਜਾਪਿ ਤਂ ਸਦ੍ਦਂ ਸੁਤ੍ਵਾ ‘‘ਅਤਿਵਿਯ ਮਧੁਰਂ ਵਾਦੇਤਿ, ਸ੍ਵੇ ਏਤਂ ਪਕ੍ਕੋਸਾਪੇਤ੍ਵਾ ਮਮ ਗਨ੍ਧਬ੍ਬਂ ਕਾਰੇਸ੍ਸਾਮੀ’’ਤਿ ਚਿਨ੍ਤੇਸਿ.

ਬੋਧਿਸਤ੍ਤੋ ‘‘ਨ ਸਕ੍ਕਾ ਇਧ ਵਸਮਾਨੇਨ ਪਭਾਵਤੀ ਦਟ੍ਠੁਂ, ਅਟ੍ਠਾਨਮੇਤ’’ਨ੍ਤਿ ਪਾਤੋਵ ਨਿਕ੍ਖਮਿਤ੍ਵਾ ਸਾਯਂ ਭੁਤ੍ਤਗੇਹੇਯੇਵ ਪਾਤਰਾਸਂ ਭੁਞ੍ਜਿਤ੍ਵਾ ਵੀਣਂ ਠਪੇਤ੍ਵਾ ਰਾਜਕੁਮ੍ਭਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸ ਅਨ੍ਤੇਵਾਸਿਕਭਾਵਂ ਉਪਗਨ੍ਤ੍ਵਾ ਏਕਦਿਵਸੇਨੇਵ ਘਰਂ ਮਤ੍ਤਿਕਾਯ ਪੂਰੇਤ੍ਵਾ ‘‘ਭਾਜਨਾਨਿ ਕਰੋਮਿ ਆਚਰਿਯਾ’’ਤਿ ਵਤ੍ਵਾ, ‘‘ਆਮ, ਕਾਰੋਹੀ’’ਤਿ ਵੁਤ੍ਤੇ ਏਕਂ ਮਤ੍ਤਿਕਾਪਿਣ੍ਡਂ ਚਕ੍ਕੇ ਠਪੇਤ੍ਵਾ ਚਕ੍ਕਂ ਆਵਿਞ੍ਛਿ, ਸਕਿਂ ਆਵਿਦ੍ਧਮੇਵ ਯਾਵ ਮਜ੍ਝਨ੍ਹਿਕਾਤਿਕ੍ਕਮਾ ਭਮਿਯੇਵ. ਸੋ ਨਾਨਾਵਣ੍ਣਾਨਿ ਖੁਦ੍ਦਕਮਹਨ੍ਤਾਨਿ ਭਾਜਨਾਨਿ ਕਤ੍ਵਾ ਪਭਾਵਤਿਯਾ ਅਤ੍ਥਾਯ ਭਾਜਨਂ ਕਰੋਨ੍ਤੋ ਨਾਨਾਰੂਪਾਨਿ ਸਮੁਟ੍ਠਾਪੇਸਿ. ਬੋਧਿਸਤ੍ਤਾਨਞ੍ਹਿ ਅਧਿਪ੍ਪਾਯੋ ਨਾਮ ਸਮਿਜ੍ਝਤਿ, ‘‘ਤਾਨਿ ਰੂਪਾਨਿ ਪਭਾਵਤੀਯੇਵ ਪਸ੍ਸਤੂ’’ਤਿ ਅਧਿਟ੍ਠਾਸਿ. ਸੋ ਸਬ੍ਬਭਾਜਨਾਨਿ ਸੁਕ੍ਖਾਪੇਤ੍ਵਾ ਪਚਿਤ੍ਵਾ ਗੇਹਂ ਪੂਰੇਸਿ. ਕੁਮ੍ਭਕਾਰੋ ਨਾਨਾਭਾਜਨਾਨਿ ਗਹੇਤ੍ਵਾ ਰਾਜਕੁਲਂ ਅਗਮਾਸਿ. ਰਾਜਾ ਦਿਸ੍ਵਾ ‘‘ਕੇਨਿਮਾਨਿ ਕਤਾਨੀ’’ਤਿ ਪੁਚ੍ਛਿ. ‘‘ਮਯਾ, ਦੇਵਾ’’ਤਿ. ‘‘ਅਹਂ ਤਯਾ ਕਤਾਨਿ ਜਾਨਾਮਿ, ਕਥੇਹਿ, ਕੇਨ ਕਤਾਨੀ’’ਤਿ? ‘‘ਅਨ੍ਤੇਵਾਸਿਕੇਨ ਮੇ ਦੇਵਾ’’ਤਿ. ‘‘ਨ ਤੇ ਸੋ ਅਨ੍ਤੇਵਾਸੀ, ਆਚਰਿਯੋ ਤੇ ਸੋ, ਤ੍ਵਂ ਤਸ੍ਸ ਸਨ੍ਤਿਕੇ ਸਿਪ੍ਪਂ ਸਿਕ੍ਖ, ਇਤੋ ਪਟ੍ਠਾਯ ਚ ਸੋ ਮਮ ਧੀਤਾਨਂ ਭਾਜਨਾਨਿ ਕਰੋਤੁ, ਇਮਞ੍ਚਸ੍ਸ ਸਹਸ੍ਸਂ ਦੇਹੀ’’ਤਿ ਸਹਸ੍ਸਂ ਦਾਪੇਤ੍ਵਾ ‘‘ਨਾਨਾਵਣ੍ਣਾਨਿ ਇਮਾਨਿ ਖੁਦ੍ਦਕਭਾਜਨਾਨਿ ਮਮ ਧੀਤਾਨਂ ਦੇਹੀ’’ਤਿ ਆਹ.

ਸੋ ਤਾਨਿ ਤਾਸਂ ਸਨ੍ਤਿਕਂ ਨੇਤ੍ਵਾ ‘‘ਇਮਾਨਿ ਵੋ ਕੀਲ਼ਨਤ੍ਥਾਯ ਖੁਦ੍ਦਕਭਾਜਨਾਨੀ’’ਤਿ ਆਹ. ਤਾ ਸਬ੍ਬਾ ਆਗਮਿਂਸੁ. ਕੁਮ੍ਭਕਾਰੋ ਮਹਾਸਤ੍ਤੇਨ ਪਭਾਵਤਿਯਾ ਅਤ੍ਥਾਯ ਕਤਭਾਜਨਮੇਵ ਤਸ੍ਸਾ ਅਦਾਸਿ. ਸਾ ਚ ਭਾਜਨਂ ਗਹੇਤ੍ਵਾ ਤਤ੍ਥ ਅਤ੍ਤਨੋ ਚ ਮਹਾਸਤ੍ਤਸ੍ਸ ਚ ਖੁਜ੍ਜਾਯ ਚ ਰੂਪਂ ਪਸ੍ਸਿਤ੍ਵਾ ‘‘ਇਦਂ ਨ ਅਞ੍ਞੇਨ ਕਤਂ, ਕੁਸਰਾਜੇਨੇਵ ਕਤ’’ਨ੍ਤਿ ਞਤ੍ਵਾ ਕੁਜ੍ਝਿਤ੍ਵਾ ਭੂਮਿਯਂ ਖਿਪਿਤ੍ਵਾ ‘‘ਇਮਿਨਾ ਮਯ੍ਹਂ ਅਤ੍ਥੋ ਨਤ੍ਥਿ, ਇਚ੍ਛਨ੍ਤਾਨਂ ਦੇਹੀ’’ਤਿ ਆਹ. ਅਥਸ੍ਸਾ ਭਗਿਨਿਯੋ ਕੁਦ੍ਧਭਾਵਂ ਞਤ੍ਵਾ ‘‘ਖੁਦ੍ਦਕਭਾਜਨਂ ਕੁਸਰਞ੍ਞਾ ਕਤਨ੍ਤਿ ਮਞ੍ਞਸਿ, ਇਦਂ ਤੇਨ ਨ ਕਤਂ, ਕੁਮ੍ਭਕਾਰੇਨੇਵ ਕਤਂ, ਗਣ੍ਹਾਹਿ ਨ’’ਨ੍ਤਿ ਅਵਹਸਿਂਸੁ. ਸਾ ਤੇਨ ਕਤਭਾਵਂ ਤਸ੍ਸ ਚ ਆਗਤਭਾਵਂ ਤਾਸਂ ਨ ਕਥੇਸਿ. ਕੁਮ੍ਭਕਾਰੋ ਸਹਸ੍ਸਂ ਬੋਧਿਸਤ੍ਤਸ੍ਸ ਦਤ੍ਵਾ ‘‘ਤਾਤ, ਰਾਜਾ ਤੇ ਤੁਟ੍ਠੋ, ਇਤੋ ਕਿਰ ਪਟ੍ਠਾਯ ਰਾਜਧੀਤਾਨਂ ਭਾਜਨਾਨਿ ਕਰੇਯ੍ਯਾਸਿ, ਅਹਂ ਤਾਸਂ ਹਰਿਸ੍ਸਾਮੀ’’ਤਿ ਆਹ.

ਸੋ ‘‘ਇਧਾਪਿ ਵਸਨ੍ਤੇਨ ਨ ਸਕ੍ਕਾ ਪਭਾਵਤੀ ਦਟ੍ਠੁ’’ਨ੍ਤਿ ਤਂ ਸਹਸ੍ਸਂ ਤਸ੍ਸੇਵ ਦਤ੍ਵਾ ਰਾਜੁਪਟ੍ਠਾਕਸ੍ਸ ਨਲ਼ਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸ ਅਨ੍ਤੇਵਾਸਿਕੋ ਹੁਤ੍ਵਾ ਪਭਾਵਤਿਯਾ ਅਤ੍ਥਾਯ ਤਾਲਵਣ੍ਟਂ ਕਤ੍ਵਾ ਤਤ੍ਥੇਵ ਸੇਤਚ੍ਛਤ੍ਤਞ੍ਚ ਆਪਾਨਭੂਮਿਞ੍ਚ ਵਤ੍ਥਂ ਗਹੇਤ੍ਵਾ ਠਿਤਂ ਪਭਾਵਤਿਞ੍ਚਾਤਿ ਨਾਨਾਰੂਪਾਨਿ ਦਸ੍ਸੇਸਿ. ਨਲ਼ਕਾਰੋ ਤਞ੍ਚ ਅਞ੍ਞਞ੍ਚ ਤੇਨ ਕਤਭਣ੍ਡਕਂ ਆਦਾਯ ਰਾਜਕੁਲਂ ਅਗਮਾਸਿ. ਰਾਜਾ ਦਿਸ੍ਵਾ ‘‘ਕੇਨਿਮਾਨਿ ਕਤਾਨੀ’’ਤਿ ਪੁਚ੍ਛਿਤ੍ਵਾ ਪੁਰਿਮਨਯੇਨੇਵ ਸਹਸ੍ਸਂ ਦਤ੍ਵਾ ‘‘ਇਮਾਨਿ ਨਲ਼ਕਾਰਭਣ੍ਡਾਨਿ ਮਮ ਧੀਤਾਨਂ ਦੇਹੀ’’ਤਿ ਆਹ. ਸੋਪਿ ਬੋਧਿਸਤ੍ਤੇਨ ਪਭਾਵਤਿਯਾ ਅਤ੍ਥਾਯ ਕਤਂ ਤਾਲਵਣ੍ਟਂ ਤਸ੍ਸਾਯੇਵ ਅਦਾਸਿ. ਤਤ੍ਰਪਿ ਰੂਪਾਨਿ ਅਞ੍ਞੋ ਜਨੋ ਨ ਪਸ੍ਸਤਿ, ਪਭਾਵਤੀ ਪਨ ਦਿਸ੍ਵਾ ਕੁਸਰਞ੍ਞਾ ਕਤਭਾਵਂ ਞਤ੍ਵਾ ‘‘ਗਣ੍ਹਿਤੁਕਾਮਾ ਗਣ੍ਹਨ੍ਤੂ’’ਤਿ ਕੁਦ੍ਧਾ ਭੂਮਿਯਂ ਖਿਪਿ. ਅਥ ਨਂ ਸੇਸਾ ਅਵਹਸਿਂਸੁ. ਨਲ਼ਕਾਰੋ ਸਹਸ੍ਸਂ ਆਹਰਿਤ੍ਵਾ ਬੋਧਿਸਤ੍ਤਸ੍ਸ ਦਤ੍ਵਾ ਤਂ ਪਵਤ੍ਤਿਂ ਆਰੋਚੇਸਿ.

ਸੋ ‘‘ਇਦਮ੍ਪਿ ਮਯ੍ਹਂ ਅਵਸਨਟ੍ਠਾਨ’’ਨ੍ਤਿ ਸਹਸ੍ਸਂ ਤਸ੍ਸੇਵ ਦਤ੍ਵਾ ਰਾਜਮਾਲਾਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਨ੍ਤੇਵਾਸਿਕਭਾਵਂ ਉਪਗਨ੍ਤ੍ਵਾ ਨਾਨਾਵਿਧਂ ਮਾਲਾਵਿਕਤਿਂ ਗਨ੍ਥਿਤ੍ਵਾ ਪਭਾਵਤਿਯਾ ਅਤ੍ਥਾਯ ਨਾਨਾਰੂਪਵਿਚਿਤ੍ਰਂ ਏਕਂ ਚੁਮ੍ਬਟਕਂ ਅਕਾਸਿ. ਮਾਲਾਕਾਰੋ ਤਂ ਸਬ੍ਬਂ ਆਦਾਯ ਰਾਜਕੁਲਂ ਅਗਮਾਸਿ. ਰਾਜਾ ਦਿਸ੍ਵਾ ‘‘ਕੇਨਿਮਾਨਿ ਗਨ੍ਥਿਤਾਨੀ’’ਤਿ ਪੁਚ੍ਛਿ. ‘‘ਮਯਾ, ਦੇਵਾ’’ਤਿ. ‘‘ਅਹਂ ਤਯਾ ਗਨ੍ਥਿਤਾਨਿ ਜਾਨਾਮਿ, ਕਥੇਹਿ, ਕੇਨ ਗਨ੍ਥਿਤਾਨੀ’’ਤਿ? ‘‘ਅਨ੍ਤੇਵਾਸਿਕੇਨ ਮੇ, ਦੇਵਾ’’ਤਿ. ‘‘ਨ ਸੋ ਅਨ੍ਤੇਵਾਸੀ, ਆਚਰਿਯੋ ਤੇ ਸੋ, ਤ੍ਵਂ ਤਸ੍ਸ ਸਨ੍ਤਿਕੇ ਸਿਪ੍ਪਂ ਸਿਕ੍ਖ, ਇਤੋ ਪਟ੍ਠਾਯ ਚ ਸੋ ਮਮ ਧੀਤਾਨਂ ਪੁਪ੍ਫਾਨਿ ਗਨ੍ਥਤੁ, ਇਮਞ੍ਚਸ੍ਸ ਸਹਸ੍ਸਂ ਦੇਹੀ’’ਤਿ ਸਹਸ੍ਸਂ ਦਤ੍ਵਾ ‘‘ਇਮਾਨਿ ਪੁਪ੍ਫਾਨਿ ਮਮ ਧੀਤਾਨਂ ਦੇਹੀ’’ਤਿ ਆਹ. ਸੋਪਿ ਬੋਧਿਸਤ੍ਤੇਨ ਪਭਾਵਤਿਯਾ ਅਤ੍ਥਾਯ ਕਤਂ ਚੁਮ੍ਬਟਕਂ ਤਸ੍ਸਾਯੇਵ ਅਦਾਸਿ. ਸਾ ਤਤ੍ਥ ਅਤ੍ਤਨੋ ਚ ਰਞ੍ਞੋ ਚ ਰੂਪੇਹਿ ਸਦ੍ਧਿਂ ਨਾਨਾਰੂਪਾਨਿ ਦਿਸ੍ਵਾ ਤੇਨ ਕਤਭਾਵਂ ਞਤ੍ਵਾ ਕੁਜ੍ਝਿਤ੍ਵਾ ਭੂਮਿਯਂ ਖਿਪਿ. ਸੇਸਾ ਭਗਿਨਿਯੋ ਤਂ ਤਥੇਵ ਅਵਹਸਿਂਸੁ. ਮਾਲਾਕਾਰੋਪਿ ਸਹਸ੍ਸਂ ਆਹਰਿਤ੍ਵਾ ਬੋਧਿਸਤ੍ਤਸ੍ਸ ਦਤ੍ਵਾ ਤਂ ਪਵਤ੍ਤਿਂ ਆਰੋਚੇਸਿ.

ਸੋ ‘‘ਇਦਮ੍ਪਿ ਮਯ੍ਹਂ ਅਵਸਨਟ੍ਠਾਨ’’ਨ੍ਤਿ ਸਹਸ੍ਸਂ ਤਸ੍ਸੇਵ ਦਤ੍ਵਾ ਰਞ੍ਞੋ ਸੂਦਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਨ੍ਤੇਵਾਸਿਕਭਾਵਂ ਉਪਗਚ੍ਛਿ. ਅਥੇਕਦਿਵਸਂ ਸੂਦੋ ਰਞ੍ਞੋ ਭੋਜਨਵਿਕਤਿਂ ਹਰਨ੍ਤੋ ਅਤ੍ਤਨੋ ਅਤ੍ਥਾਯ ਪਚਿਤੁਂ ਬੋਧਿਸਤ੍ਤਸ੍ਸ ਅਟ੍ਠਿਮਂਸਂ ਅਦਾਸਿ. ਸੋ ਤਂ ਤਥਾ ਸਮ੍ਪਾਦੇਸਿ, ਯਥਾਸ੍ਸ ਗਨ੍ਧੋ ਸਕਲਨਗਰਂ ਅਵਤ੍ਥਰਿ. ਰਾਜਾ ਤਂ ਘਾਯਿਤ੍ਵਾ ‘‘ਕਿਂ ਤੇ ਮਹਾਨਸੇ ਅਞ੍ਞਮ੍ਪਿ ਮਂਸਂ ਪਚਸੀ’’ਤਿ ਪੁਚ੍ਛਿ. ‘‘ਨਤ੍ਥਿ, ਦੇਵ, ਅਪਿਚ ਖੋ ਪਨ ਮੇ ਅਨ੍ਤੇਵਾਸਿਕਸ੍ਸ ਅਟ੍ਠਿਮਂਸਂ ਪਚਨਤ੍ਥਾਯ ਦਿਨ੍ਨਂ, ਤਸ੍ਸੇਵ ਸੋ ਗਨ੍ਧੋ ਭਵਿਸ੍ਸਤੀ’’ਤਿ. ਰਾਜਾ ਆਹਰਾਪੇਤ੍ਵਾ ਤਤੋ ਥੋਕਂ ਜਿਵ੍ਹਗ੍ਗੇ ਠਪੇਸਿ, ਤਾਵਦੇਵ ਸਤ੍ਤ ਰਸਹਰਣਿਸਹਸ੍ਸਾਨਿ ਖੋਭੇਨ੍ਤਂ ਫਰਿ. ਰਾਜਾ ਰਸਤਣ੍ਹਾਯ ਬਜ੍ਝਿਤ੍ਵਾ ਸਹਸ੍ਸਂ ਦਤ੍ਵਾ ‘‘ਇਤੋ ਪਟ੍ਠਾਯ ਤਵ ਅਨ੍ਤੇਵਾਸਿਨਾ ਮਮ ਚ ਧੀਤਾਨਞ੍ਚ ਮੇ ਭਤ੍ਤਂ ਪਚਾਪੇਤ੍ਵਾ ਤ੍ਵਂ ਮਯ੍ਹਂ ਆਹਰ, ਸੋ ਮੇ ਧੀਤਾਨਂ ਹਰਤੂ’’ਤਿ ਆਹ. ਸੂਦੋ ਗਨ੍ਤ੍ਵਾ ਤਸ੍ਸ ਆਰੋਚੇਸਿ. ਸੋ ਤਂ ਸੁਤ੍ਵਾ ‘‘ਇਦਾਨਿ ਮੇ ਮਨੋਰਥੋ ਮਤ੍ਥਕਂ ਪਤ੍ਤੋ, ਇਦਾਨਿ ਪਨਾਹਂ ਪਭਾਵਤਿਂ ਦਟ੍ਠੁਂ ਲਭਿਸ੍ਸਾਮੀ’’ਤਿ ਤੁਟ੍ਠੋ ਤਂ ਸਹਸ੍ਸਂ ਤਸ੍ਸੇਵ ਦਤ੍ਵਾ ਪੁਨਦਿਵਸੇ ਭਤ੍ਤਂ ਸਮ੍ਪਾਦੇਤ੍ਵਾ ਰਞ੍ਞੋ ਭਤ੍ਤਭਾਜਨਾਨਿ ਪੇਸੇਤ੍ਵਾ ਰਾਜਧੀਤਾਨਂ ਭਤ੍ਤਕਾਜਂ ਸਯਂ ਗਹੇਤ੍ਵਾ ਪਭਾਵਤਿਯਾ ਵਸਨਪਾਸਾਦਂ ਅਭਿਰੁਹਿ. ਸਾ ਤਂ ਭਤ੍ਤਕਾਜਂ ਆਦਾਯ ਪਾਸਾਦਂ ਅਭਿਰੁਹਨ੍ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਅਤ੍ਤਨੋ ਅਨਨੁਚ੍ਛਵਿਕਂ ਦਾਸਕਮ੍ਮਕਰੇਹਿ ਕਤ੍ਤਬ੍ਬਂ ਕਰੋਤਿ. ਸਚੇ ਪਨਾਹਂ ਕਤਿਪਾਹਂ ਤੁਣ੍ਹੀ ਭਵਿਸ੍ਸਾਮਿ, ‘ਇਦਾਨਿ ਮਂ ਏਸਾ ਰੋਚਤੀ’ਤਿ ਸਞ੍ਞੀ ਹੁਤ੍ਵਾ ਕਤ੍ਥਚਿ ਅਗਨ੍ਤ੍ਵਾ ਮਂ ਓਲੋਕੇਨ੍ਤੋ ਇਧੇਵ ਵਸਿਸ੍ਸਤਿ, ਇਦਾਨੇਵ ਤਂ ਅਕ੍ਕੋਸਿਤ੍ਵਾ ਪਰਿਭਾਸਿਤ੍ਵਾ ਮੁਹੁਤ੍ਤਮ੍ਪਿ ਇਧ ਵਸਿਤੁਂ ਅਦਤ੍ਵਾ ਪਲਾਪੇਸ੍ਸਾਮੀ’’ਤਿ. ਸਾ ਦ੍ਵਾਰਂ ਅਡ੍ਢਵਿਵਟਂ ਕਤ੍ਵਾ ਏਕਂ ਹਤ੍ਥਂ ਕਵਾਟੇ ਲਗ੍ਗੇਤ੍ਵਾ ਏਕੇਨ ਹਤ੍ਥੇਨ ਅਗ੍ਗਲ਼ਂ ਉਪ੍ਪੀਲ਼ੇਤ੍ਵਾ ਦੁਤਿਯਂ ਗਾਥਮਾਹ –

੨.

‘‘ਅਨੁਜ੍ਜੁਭੂਤੇਨ ਹਰਂ ਮਹਨ੍ਤਂ, ਦਿਵਾ ਚ ਰਤ੍ਤੋ ਚ ਨਿਸੀਥਕਾਲੇ;

ਪਟਿਗਚ੍ਛ ਤ੍ਵਂ ਖਿਪ੍ਪਂ ਕੁਸਾਵਤਿਂ ਕੁਸ, ਨਿਚ੍ਛਾਮਿ ਦੁਬ੍ਬਣ੍ਣਮਹਂ ਵਸਨ੍ਤ’’ਨ੍ਤਿ.

ਤਸ੍ਸਤ੍ਥੋ – ਮਹਾਰਾਜ, ਤ੍ਵਂ ਭਤ੍ਤਕਾਰਕੋ ਹੁਤ੍ਵਾ ਉਜੁਕੇਨ ਚਿਤ੍ਤੇਨ ਯੋਪਿ ਤੇ ਸੀਸਂ ਭਿਨ੍ਦੇਯ੍ਯ, ਤਸ੍ਸਪੇਤਂ ਕਮ੍ਮਂ ਨ ਕਰੋਸਿ, ਅਨੁਜੁਭੂਤੇਨ ਪਨ ਚਿਤ੍ਤੇਨ ਮਮਤ੍ਥਾਯ ਏਤਂ ਮਹਨ੍ਤਂ ਕਾਜਂ ਹਰਨ੍ਤੋ ਦਿਵਾ ਚ ਰਤ੍ਤੋ ਚ ਨਿਸੀਥਕਾਲੇ ਚ ਮਹਨ੍ਤਂ ਦੁਕ੍ਖਂ ਅਨੁਭਵਿਸ੍ਸਸਿ, ਕਿਂ ਤੇ ਤੇਨ ਅਨੁਭੂਤੇਨ ਦੁਕ੍ਖੇਨ, ਤ੍ਵਂ ਅਤ੍ਤਨੋ ਨਗਰਂ ਕੁਸਾਵਤਿਮੇਵ ਪਟਿਗਚ੍ਛ, ਅਞ੍ਞਂ ਅਤ੍ਤਨਾ ਸਦਿਸਿਂ ਅਤਿਰਸਕਪੂਵਸਣ੍ਠਾਨਮੁਖਿਂ ਯਕ੍ਖਿਨਿਂ ਅਗ੍ਗਮਹੇਸਿਂ ਕਤ੍ਵਾ ਰਜ੍ਜਂ ਕਾਰੇਹੀਤਿ. ਨਿਚ੍ਛਾਮਿ ਦੁਬ੍ਬਣ੍ਣਮਹਂ ਵਸਨ੍ਤਨ੍ਤਿ ਅਹਂ ਪਨ ਤਂ ਦੁਬ੍ਬਣ੍ਣਂ ਦੁਸ੍ਸਣ੍ਠਿਤਂ ਇਧ ਵਸਨ੍ਤਂ ਨ ਇਚ੍ਛਾਮੀਤਿ.

ਸੋ ‘‘ਪਭਾਵਤਿਯਾ ਮੇ ਸਨ੍ਤਿਕਾ ਕਥਾ ਲਦ੍ਧਾ’’ਤਿ ਤੁਟ੍ਠਚਿਤ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੩.

‘‘ਨਾਹਂ ਗਮਿਸ੍ਸਾਮਿ ਇਤੋ ਕੁਸਾਵਤਿਂ, ਪਭਾਵਤੀ ਵਣ੍ਣਪਲੋਭਿਤੋ ਤਵ;

ਰਮਾਮਿ ਮਦ੍ਦਸ੍ਸ ਨਿਕੇਤਰਮ੍ਮੇ, ਹਿਤ੍ਵਾਨ ਰਟ੍ਠਂ ਤਵ ਦਸ੍ਸਨੇ ਰਤੋ.

੪.

‘‘ਪਭਾਵਤੀ ਵਣ੍ਣਪਲੋਭਿਤੋ ਤਵ, ਸਮ੍ਮੂਲ਼੍ਹਰੂਪੋ ਵਿਚਰਾਮਿ ਮੇਦਿਨਿਂ;

ਦਿਸਂ ਨ ਜਾਨਾਮਿ ਕੁਤੋਮ੍ਹਿ ਆਗਤੋ, ਤਯਮ੍ਹਿ ਮਤ੍ਤੋ ਮਿਗਮਨ੍ਦਲੋਚਨੇ.

੫.

‘‘ਸੁਵਣ੍ਣਚੀਰਵਸਨੇ, ਜਾਤਰੂਪਸੁਮੇਖਲੇ;

ਸੁਸ੍ਸੋਣਿ ਤਵ ਕਾਮਾ ਹਿ, ਨਾਹਂ ਰਜ੍ਜੇਨ ਮਤ੍ਥਿਕੋ’’ਤਿ.

ਤਤ੍ਥ ਰਮਾਮੀਤਿ ਅਭਿਰਮਾਮਿ ਨ ਉਕ੍ਕਣ੍ਠਾਮਿ. ਸਮ੍ਮੂਲ਼੍ਹਰੂਪੋਤਿ ਕਿਲੇਸਸਮ੍ਮੂਲ਼੍ਹੋ ਹੁਤ੍ਵਾ. ਤਯਮ੍ਹਿ ਮਤ੍ਤੋਤਿ ਤਯਿ ਮਤ੍ਤੋਮ੍ਹਿ, ਤਯਾ ਵਾ ਮਤ੍ਤੋਮ੍ਹਿ. ਸੁਵਣ੍ਣਚੀਰਵਸਨੇਤਿ ਸੁਵਣ੍ਣਖਚਿਤਵਤ੍ਥਵਸਨੇ. ਨਾਹਂ ਰਜ੍ਜੇਨ ਮਤ੍ਥਿਕੋਤਿ ਨ ਅਹਂ ਰਜ੍ਜੇਨ ਅਤ੍ਥਿਕੋ.

ਏਵਂ ਵੁਤ੍ਤੇ ਸਾ ਚਿਨ੍ਤੇਸਿ – ‘‘ਅਹਂ ਏਤਂ ‘ਵਿਪ੍ਪਟਿਸਾਰੀ ਭਵਿਸ੍ਸਤੀ’ਤਿ ਪਰਿਭਾਸਾਮਿ, ਅਯਂ ਪਨ ਰਜ੍ਜਿਤ੍ਵਾਵ ਕਥੇਤਿ, ਸਚੇ ਖੋ ਪਨ ਮਂ ‘ਅਹਂ ਕੁਸਰਾਜਾ’ਤਿ ਵਤ੍ਵਾ ਹਤ੍ਥੇ ਗਣ੍ਹੇਯ੍ਯ, ਕੋ ਤਂ ਨਿਵਾਰੇਯ੍ਯ, ਕੋਚਿ ਨੋ ਇਮਂ ਕਥਂ ਸੁਣੇਯ੍ਯਾ’’ਤਿ ਦ੍ਵਾਰਂ ਥਕੇਤ੍ਵਾ ਸੂਚਿਂ ਦਤ੍ਵਾ ਅਨ੍ਤੋ ਅਟ੍ਠਾਸਿ. ਸੋਪਿ ਭਤ੍ਤਕਾਜਂ ਆਹਰਿਤ੍ਵਾ ਭਤ੍ਤਂ ਵਡ੍ਢੇਤ੍ਵਾ ਰਾਜਧੀਤਰੋ ਭੋਜੇਸਿ. ਪਭਾਵਤੀ ‘‘ਗਚ੍ਛ ਕੁਸਰਾਜੇਨ ਪਕ੍ਕਭਤ੍ਤਂ ਆਹਰਾ’’ਤਿ ਖੁਜ੍ਜਂ ਪੇਸੇਸਿ. ਸਾ ਆਹਰਿਤ੍ਵਾ ‘‘ਭੁਞ੍ਜਾਹੀ’’ਤਿ ਆਹ. ਨਾਹਂ ਤੇਨ ਪਕ੍ਕਭਤ੍ਤਂ ਭੁਞ੍ਜਾਮਿ, ਤ੍ਵਂ ਭੁਞ੍ਜਿਤ੍ਵਾ ਅਤ੍ਤਨੋ ਲਦ੍ਧਨਿਵਾਪਂ ਗਹੇਤ੍ਵਾ ਭਤ੍ਤਂ ਪਚਿਤ੍ਵਾ ਆਹਰ, ਕੁਸਰਞ੍ਞੋ ਆਗਤਭਾਵਞ੍ਚ ਮਾ ਕਸ੍ਸਚਿ ਆਰੋਚੇਸੀਤਿ. ਖੁਜ੍ਜਾ ਤਤੋ ਪਟ੍ਠਾਯ ਤਸ੍ਸਾ ਕੋਟ੍ਠਾਸਂ ਆਹਰਿਤ੍ਵਾ ਸਯਂ ਭੁਞ੍ਜਤਿ, ਅਤ੍ਤਨੋ ਕੋਟ੍ਠਾਸਂ ਤਸ੍ਸਾ ਉਪਨੇਤਿ. ਕੁਸਰਾਜਾਪਿ ਤਤੋ ਪਟ੍ਠਾਯ ਤਂ ਪਸ੍ਸਿਤੁਂ ਅਲਭਨ੍ਤੋ ਚਿਨ੍ਤੇਸਿ – ‘‘ਅਤ੍ਥਿ ਨੁ ਖੋ ਪਭਾਵਤਿਯਾ ਮਯਿ ਸਿਨੇਹੋ, ਉਦਾਹੁ ਨਤ੍ਥਿ, ਵੀਮਂਸਿਸ੍ਸਾਮਿ ਨ’’ਨ੍ਤਿ. ਸੋ ਪਨ ਰਾਜਧੀਤਰੋ ਭੋਜੇਤ੍ਵਾ ਭਤ੍ਤਕਾਜਂ ਆਦਾਯ ਨਿਕ੍ਖਨ੍ਤੋ ਤਸ੍ਸਾ ਗਬ੍ਭਦ੍ਵਾਰੇ ਪਾਸਾਦਤਲਂ ਪਾਦੇਨ ਪਹਰਿਤ੍ਵਾ ਭਾਜਨਾਨਿ ਘਟ੍ਟੇਤ੍ਵਾ ਨਿਤ੍ਥੁਨਿਤ੍ਵਾ ਵਿਸਞ੍ਞੀ ਹੁਤ੍ਵਾ ਵਿਯ ਅਵਕੁਜ੍ਜੋ ਪਤਿ. ਸਾ ਤਸ੍ਸ ਨਿਤ੍ਥੁਨਿਤਸਦ੍ਦੇਨ ਦ੍ਵਾਰਂ ਵਿਵਰਿਤ੍ਵਾ ਤਂ ਭਤ੍ਤਕਾਜੇਨ ਓਤ੍ਥਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਸਕਲਜਮ੍ਬੁਦੀਪੇ ਅਗ੍ਗਰਾਜਾ ਮਂ ਨਿਸ੍ਸਾਯ ਰਤ੍ਤਿਨ੍ਦਿਵਂ ਦੁਕ੍ਖਂ ਅਨੁਭੋਤਿ, ਸੁਖੁਮਾਲਤਾਯ ਭਤ੍ਤਕਾਜੇਨ ਅਵਤ੍ਥਤੋ ਪਤਤਿ, ਜੀਵਤਿ ਨੁ ਖੋ, ਨੋ ਵਾ’’ਤਿ. ਸਾ ਗਬ੍ਭਤੋ ਨਿਕ੍ਖਮਿਤ੍ਵਾ ਤਸ੍ਸ ਨਾਸਵਾਤਂ ਉਪਧਾਰੇਤੁਂ ਗੀਵਂ ਪਸਾਰੇਤ੍ਵਾ ਮੁਖਂ ਓਲੋਕੇਸਿ. ਸੋ ਮੁਖਪੂਰਂ ਖੇਲ਼ਂ ਗਹੇਤ੍ਵਾ ਤਸ੍ਸਾ ਸਰੀਰੇ ਪਾਤੇਸਿ. ਸਾ ਤਂ ਪਰਿਭਾਸਿਤ੍ਵਾ ਗਬ੍ਭਂ ਪਵਿਸਿਤ੍ਵਾ ਦ੍ਵਾਰਂ ਅਡ੍ਢਵਿਵਟਂ ਥਕੇਤ੍ਵਾ ਠਿਤਾ ਗਾਥਮਾਹ –

੬.

‘‘ਅਬ੍ਭੂਤਿ ਤਸ੍ਸ ਭੋ ਹੋਤਿ, ਯੋ ਅਨਿਚ੍ਛਨ੍ਤਮਿਚ੍ਛਤਿ;

ਅਕਾਮਂ ਰਾਜ ਕਾਮੇਸਿ, ਅਕਨ੍ਤਂ ਕਨ੍ਤੁਮਿਚ੍ਛਸੀ’’ਤਿ.

ਤਤ੍ਥ ਅਬ੍ਭੂਤੀਤਿ ਅਭੂਤਿ, ਅਵੁਡ੍ਢੀਤਿ ਅਤ੍ਥੋ.

ਸੋ ਪਨ ਪਟਿਬਦ੍ਧਚਿਤ੍ਤਤਾਯ ਅਕ੍ਕੋਸਿਯਮਾਨੋਪਿ ਪਰਿਭਾਸਿਯਮਾਨੋਪਿ ਵਿਪ੍ਪਟਿਸਾਰਂ ਅਨੁਪ੍ਪਾਦੇਤ੍ਵਾਵ ਅਨਨ੍ਤਰਂ ਗਾਥਮਾਹ –

੭.

‘‘ਅਕਾਮਂ ਵਾ ਸਕਾਮਂ ਵਾ, ਯੋ ਨਰੋ ਲਭਤੇ ਪਿਯਂ;

ਲਾਭਮੇਤ੍ਥ ਪਸਂਸਾਮ, ਅਲਾਭੋ ਤਤ੍ਥ ਪਾਪਕੋ’’ਤਿ.

ਸਾਪਿ ਤਸ੍ਮਿਂ ਏਵਂ ਕਥੇਨ੍ਤੇਪਿ ਅਨੋਸਕ੍ਕਿਤ੍ਵਾ ਥਦ੍ਧਤਰਵਚਨਂ ਵਤ੍ਵਾ ਪਲਾਪੇਤੁਕਾਮਾ ਇਤਰਂ ਗਾਥਮਾਹ –

੮.

‘‘ਪਾਸਾਣਸਾਰਂ ਖਣਸਿ, ਕਣਿਕਾਰਸ੍ਸ ਦਾਰੁਨਾ;

ਵਾਤਂ ਜਾਲੇਨ ਬਾਧੇਸਿ, ਯੋ ਅਨਿਚ੍ਛਨ੍ਤਮਿਚ੍ਛਸੀ’’ਤਿ.

ਤਤ੍ਥ ਕਣਿਕਾਰਸ੍ਸ ਦਾਰੁਨਾਤਿ ਕਣਿਕਾਰਕਟ੍ਠੇਨ. ਬਾਧੇਸੀਤਿ ਬਨ੍ਧਸੀਤਿ.

ਤਂ ਸੁਤ੍ਵਾ ਰਾਜਾ ਤਿਸ੍ਸੋ ਗਾਥਾਯੋ ਅਭਾਸਿ –

੯.

‘‘ਪਾਸਾਣੋ ਨੂਨ ਤੇ ਹਦਯੇ, ਓਹਿਤੋ ਮੁਦੁਲਕ੍ਖਣੇ;

ਯੋ ਤੇ ਸਾਤਂ ਨ ਵਿਨ੍ਦਾਮਿ, ਤਿਰੋਜਨਪਦਾਗਤੋ.

੧੦.

‘‘ਯਦਾ ਮਂ ਭਕੁਟਿਂ ਕਤ੍ਵਾ, ਰਾਜਪੁਤ੍ਤੀ ਉਦਿਕ੍ਖਤਿ;

ਆਲ਼ਾਰਿਕੋ ਤਦਾ ਹੋਮਿ, ਰਞ੍ਞੋ ਮਦ੍ਦਸ੍ਸਨ੍ਤੇਪੁਰੇ.

੧੧.

‘‘ਯਦਾ ਉਮ੍ਹਯਮਾਨਾ ਮਂ, ਰਾਜਪੁਤ੍ਤੀ ਉਦਿਕ੍ਖਤਿ;

ਨਾਲ਼ਾਰਿਕੋ ਤਦਾ ਹੋਮਿ, ਰਾਜਾ ਹੋਮਿ ਤਦਾ ਕੁਸੋ’’ਤਿ.

ਤਤ੍ਥ ਮੁਦੁਲਕ੍ਖਣੇਤਿ ਮੁਦੁਨਾ ਇਤ੍ਥਿਲਕ੍ਖਣੇਨ ਸਮਨ੍ਨਾਗਤੇ. ਯੋਤਿ ਯੋ ਅਹਂ ਤਿਰੋਰਟ੍ਠਾ ਆਗਤੋ ਤਵ ਸਨ੍ਤਿਕੇ ਵਸਨ੍ਤੋ ਪਟਿਸਨ੍ਥਾਰਮਤ੍ਤਮ੍ਪਿ ਸਾਤਂ ਨ ਲਭਾਮਿ, ਸੋ ਏਵਂ ਮਞ੍ਞਾਮਿ, ਮਯਿ ਸਿਨੇਹੁਪ੍ਪਤ੍ਤਿਨਿਵਾਰਣਾਯ ਨੂਨ ਤਵ ਹਦਯੇ ਪਾਸਾਣੋ ਠਪਿਤੋ. ਭਕੁਟਿਂ ਕਤ੍ਵਾਤਿ ਕੋਧਵਸੇਨ ਵਲਿਵਿਸਮਂ ਨਲਾਟਂ ਕਤ੍ਵਾ. ਆਲ਼ਾਰਿਕੋਤਿ ਭਤ੍ਤਕਾਰਕੋ. ਤਸ੍ਮਿਂ ਖਣੇ ਅਹਂ ਮਦ੍ਦਰਞ੍ਞੋ ਅਨ੍ਤੇਪੁਰੇ ਭਤ੍ਤਕਾਰਕਦਾਸੋ ਵਿਯ ਹੋਮੀਤਿ ਵਦਤਿ. ਉਮ੍ਹਯਮਾਨਾਤਿ ਪਹਟ੍ਠਾਕਾਰਂ ਦਸ੍ਸੇਤ੍ਵਾ ਹਸਮਾਨਾ. ਰਾਜਾ ਹੋਮੀਤਿ ਤਸ੍ਮਿਂ ਖਣੇ ਅਹਂ ਕੁਸਾਵਤੀਨਗਰੇ ਰਜ੍ਜਂ ਕਾਰੇਨ੍ਤੋ ਰਾਜਾ ਵਿਯ ਹੋਮਿ, ਕਸ੍ਮਾਸਿ ਏਵਂ ਫਰੁਸਾ, ਇਤੋ ਪਟ੍ਠਾਯ ਮਾ ਏਵਰੂਪਂ ਕਰਿ, ਭਦ੍ਦੇਤਿ.

ਸਾ ਤਸ੍ਸ ਵਚਨਂ ਸੁਤ੍ਵਾ ਚਿਨ੍ਤੇਸਿ – ‘‘ਅਯਂ ਅਤਿਵਿਯ ਅਲ੍ਲੀਯਿਤ੍ਵਾ ਕਥੇਤਿ, ਮੁਸਾਵਾਦਂ ਕਤ੍ਵਾ ਉਪਾਯੇਨ ਨਂ ਇਤੋ ਪਲਾਪੇਸ੍ਸਾਮੀ’’ਤਿ ਗਾਥਮਾਹ –

੧੨.

‘‘ਸਚੇ ਹਿ ਵਚਨਂ ਸਚ੍ਚਂ, ਨੇਮਿਤ੍ਤਾਨਂ ਭਵਿਸ੍ਸਤਿ;

ਨੇਵ ਮੇ ਤ੍ਵਂ ਪਤੀ ਅਸ੍ਸ, ਕਾਮਂ ਛਿਨ੍ਦਨ੍ਤੁ ਸਤ੍ਤਧਾ’’ਤਿ.

ਤਸ੍ਸਤ੍ਥੋ – ਮਹਾਰਾਜ, ਮਯਾ ‘‘ਅਯਂ ਕੁਸਰਾਜਾ ਮਯ੍ਹਂ ਪਤਿ ਭਵਿਸ੍ਸਤਿ, ਨ ਭਵਿਸ੍ਸਤੀ’’ਤਿ ਬਹੂ ਨਿਮਿਤ੍ਤਪਾਠਕਾ ਪੁਚ੍ਛਿਤਾ, ਤੇ ‘‘ਕਾਮਂ ਕਿਰ ਮਂ ਸਤ੍ਤਧਾ ਛਿਨ੍ਦਨ੍ਤੁ, ਨੇਵ ਮੇ ਤ੍ਵਂ ਪਤਿ ਭਵਿਸ੍ਸਸੀ’’ਤਿ ਵਦਿਂਸੂਤਿ.

ਤਂ ਸੁਤ੍ਵਾ ਰਾਜਾ ਤਂ ਪਟਿਬਾਹਨ੍ਤੋ ‘‘ਭਦ੍ਦੇ, ਮਯਾਪਿ ਅਤ੍ਤਨੋ ਰਟ੍ਠੇ ਨੇਮਿਤ੍ਤਕਾ ਪੁਚ੍ਛਿਤਾ, ਤੇ ‘ਅਞ੍ਞਤ੍ਰ ਸੀਹਸ੍ਸਰਕੁਸਰਾਜਤੋ ਤਵ ਪਤਿ ਨਾਮ ਅਞ੍ਞੋ ਨਤ੍ਥੀ’ਤਿ ਬ੍ਯਾਕਰਿਂਸੁ, ਅਹਮ੍ਪਿ ਅਤ੍ਤਨੋ ਞਾਣਬਲਨਿਮਿਤ੍ਤੇਨ ਏਵਮੇਵ ਕਥੇਸਿ’’ਨ੍ਤਿ ਵਤ੍ਵਾ ਅਨਨ੍ਤਰਂ ਗਾਥਮਾਹ –

੧੩.

‘‘ਸਚੇ ਹਿ ਵਚਨਂ ਸਚ੍ਚਂ, ਅਞ੍ਞੇਸਂ ਯਦਿ ਵਾ ਮਮ;

ਨੇਵ ਤੁਯ੍ਹਂ ਪਤੀ ਅਤ੍ਥਿ, ਅਞ੍ਞੋ ਸੀਹਸ੍ਸਰਾ ਕੁਸਾ’’ਤਿ.

ਤਸ੍ਸਤ੍ਥੋ – ਯਦਿ ਹਿ ਅਞ੍ਞੇਸਂ ਨੇਮਿਤ੍ਤਾਨਂ ਵਚਨਂ ਸਚ੍ਚਂ, ਯਦਿ ਵਾ ਮਮ ਵਚਨਂ ਸਚ੍ਚਂ, ਤਵ ਅਞ੍ਞੋ ਪਤਿ ਨਾਮ ਨਤ੍ਥੀਤਿ.

ਸਾ ਤਸ੍ਸ ਵਚਨਂ ਸੁਤ੍ਵਾ ‘‘ਨ ਸਕ੍ਕਾ ਇਮਂ ਲਜ੍ਜਾਪੇਤੁਂ ਵਾ ਪਲਾਪੇਤੁਂ ਵਾ, ਕਿਂ ਮੇ ਇਮਿਨਾ’’ਤਿ ਦ੍ਵਾਰਂ ਪਿਧਾਯ ਅਤ੍ਤਾਨਂ ਨ ਦਸ੍ਸੇਸਿ. ਸੋਪਿ ਕਾਜਂ ਗਹੇਤ੍ਵਾ ਓਤਰਿ, ਤਤੋ ਪਟ੍ਠਾਯ ਤਂ ਦਟ੍ਠੁਂ ਨ ਲਭਤਿ, ਭਤ੍ਤਕਾਰਕਕਮ੍ਮਂ ਕਰੋਨ੍ਤੋ ਅਤਿਵਿਯ ਕਿਲਮਤਿ, ਭੁਤ੍ਤਪਾਤਰਾਸੋ ਦਾਰੂਨਿ ਫਾਲੇਤਿ, ਭਾਜਨਾਨਿ ਧੋਵਤਿ, ਕਾਜੇਨ ਉਦਕਂ ਆਹਰਤਿ, ਸਯਨ੍ਤੋ ਅਮ੍ਬਣਪਿਟ੍ਠੇ ਸਯਤਿ, ਪਾਤੋ ਵੁਟ੍ਠਾਯ ਯਾਗੁਆਦੀਨਿ ਪਚਤਿ ਹਰਤਿ ਭੋਜੇਤਿ, ਨਨ੍ਦਿਰਾਗਂ ਨਿਸ੍ਸਾਯ ਅਤਿਦੁਕ੍ਖਂ ਅਨੁਭੋਤਿ. ਸੋ ਏਕਦਿਵਸਂ ਭਤ੍ਤਗੇਹਦ੍ਵਾਰੇਨ ਗਚ੍ਛਨ੍ਤਿਂ ਖੁਜ੍ਜਂ ਦਿਸ੍ਵਾ ਪਕ੍ਕੋਸਿ. ਸਾ ਪਭਾਵਤਿਯਾ ਭਯੇਨ ਤਸ੍ਸ ਸਨ੍ਤਿਕਂ ਗਨ੍ਤੁਂ ਅਵਿਸਹਨ੍ਤੀ ਤੁਰਿਤਤੁਰਿਤਾ ਵਿਯ ਗਚ੍ਛਤਿ. ਅਥ ਨਂ ਵੇਗੇਨ ਉਪਗਨ੍ਤ੍ਵਾ ‘‘ਖੁਜ੍ਜੇ’’ਤਿ ਆਹ.

ਸਾ ਨਿਵਤ੍ਤਿਤ੍ਵਾ ਠਿਤਾ ‘‘ਕੋ ਏਸੋ’’ਤਿ ਵਤ੍ਵਾ ‘‘ਤੁਮ੍ਹਾਕਂ ਸਦ੍ਦਂ ਨ ਸੁਣਾਮੀ’’ਤਿ ਆਹ. ਅਥ ਨਂ ‘‘ਖੁਜ੍ਜੇ ਤ੍ਵਮ੍ਪਿ ਸਾਮਿਨੀਪਿ ਤੇ ਉਭੋਪਿ ਅਤਿਵਿਯ ਥਦ੍ਧਾ, ਏਤ੍ਤਕਂ ਕਾਲਂ ਤੁਮ੍ਹਾਕਂ ਸਨ੍ਤਿਕੇ ਵਸਨ੍ਤੋ ਆਰੋਗ੍ਯਸਾਸਨਮਤ੍ਤਮ੍ਪਿ ਨ ਲਭਾਮਿ, ਦੇਯ੍ਯਧਮ੍ਮਂ ਪਨ ਕਿਂ ਦਸ੍ਸਥ, ਤਿਟ੍ਠਤੁ ਤਾਵੇਤਂ, ਅਪਿ ਮੇ ਪਭਾਵਤਿਂ ਮੁਦੁਕਂ ਕਤ੍ਵਾ ਦਸ੍ਸੇਤੁਂ ਸਕ੍ਖਿਸ੍ਸਸੀ’’ਤਿ ਆਹ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਅਥ ਨਂ ‘‘ਸਚੇ ਮੇ ਤਂ ਦਸ੍ਸੇਤੁਂ ਸਕ੍ਖਿਸ੍ਸਸਿ, ਖੁਜ੍ਜਭਾਵਂ ਤੇ ਉਜੁਕਂ ਕਤ੍ਵਾ ਗੀਵੇਯ੍ਯਕਂ ਦਸ੍ਸਾਮੀ’’ਤਿ ਪਲੋਭੇਨ੍ਤੋ ਪਞ੍ਚ ਗਾਥਾਯੋ ਅਭਾਸਿ –

੧੪.

‘‘ਨੇਕ੍ਖਂ ਗੀਵਂ ਤੇ ਕਾਰੇਸ੍ਸਂ, ਪਤ੍ਵਾ ਖੁਜ੍ਜੇ ਕੁਸਾਵਤਿਂ;

ਸਚੇ ਮਂ ਨਾਗਨਾਸੂਰੂ, ਓਲੋਕੇਯ੍ਯ ਪਭਾਵਤੀ.

੧੫.

‘‘ਨੇਕ੍ਖਂ ਗੀਵਂ ਤੇ ਕਾਰੇਸ੍ਸਂ, ਪਤ੍ਵਾ ਖੁਜ੍ਜੇ ਕੁਸਾਵਤਿਂ;

ਸਚੇ ਮਂ ਨਾਗਨਾਸੂਰੂ, ਆਲਪੇਯ੍ਯ ਪਭਾਵਤੀ.

੧੬.

‘‘ਨੇਕ੍ਖਂ ਗੀਵਂ ਤੇ ਕਾਰੇਸ੍ਸਂ, ਪਤ੍ਵਾ ਖੁਜ੍ਜੇ ਕੁਸਾਵਤਿਂ;

ਸਚੇ ਮਂ ਨਾਗਨਾਸੂਰੂ, ਉਮ੍ਹਾਯੇਯ੍ਯ ਪਭਾਵਤੀ.

੧੭.

‘‘ਨੇਕ੍ਖਂ ਗੀਵਂ ਤੇ ਕਾਰੇਸ੍ਸਂ, ਪਤ੍ਵਾ ਖੁਜ੍ਜੇ ਕੁਸਾਵਤਿਂ;

ਸਚੇ ਮਂ ਨਾਗਨਾਸੂਰੂ, ਪਮ੍ਹਾਯੇਯ੍ਯ ਪਭਾਵਤੀ.

੧੮.

‘‘ਨੇਕ੍ਖਂ ਗੀਵਂ ਤੇ ਕਾਰੇਸ੍ਸਂ, ਪਤ੍ਵਾ ਖੁਜ੍ਜੇ ਕੁਸਾਵਤਿਂ;

ਸਚੇ ਮਂ ਨਾਗਨਾਸੂਰੂ, ਪਾਣੀਹਿ ਉਪਸਮ੍ਫੁਸੇ’’ਤਿ.

ਤਤ੍ਥ ਨੇਕ੍ਖਂ ਗੀਵਂ ਤੇਤਿ ਤਵ ਗੀਵੇਯ੍ਯਂ ਸਬ੍ਬਸੁਵਣ੍ਣਮਯਮੇਵ ਕਾਰੇਸ੍ਸਾਮੀਤਿ ਅਤ੍ਥੋ. ‘‘ਨੇਕ੍ਖਂ ਗੀਵਂ ਤੇ ਕਰਿਸ੍ਸਾਮੀ’’ਤਿਪਿ ਪਾਠੋ, ਤਵ ਗੀਵਾਯ ਨੇਕ੍ਖਮਯਂ ਪਿਲ਼ਨ੍ਧਨਂ ਪਿਲ਼ਨ੍ਧੇਸ੍ਸਾਮੀਤਿ ਅਤ੍ਥੋ. ਓਲੋਕੇਯ੍ਯਾਤਿ ਸਚੇ ਤਵ ਵਚਨੇਨ ਮਂ ਪਭਾਵਤੀ ਓਲੋਕੇਯ੍ਯ, ਸਚੇ ਮਂ ਤਾਯ ਓਲੋਕਾਪੇਤੁਂ ਸਕ੍ਖਿਸ੍ਸਸੀਤਿ ਅਤ੍ਥੋ. ‘‘ਆਲਪੇਯ੍ਯਾ’’ਤਿਆਦੀਸੁਪਿ ਏਸੇਵ ਨਯੋ. ਏਤ੍ਥ ਪਨ ਉਮ੍ਹਾਯੇਯ੍ਯਾਤਿ ਮਨ੍ਦਹਸਿਤਵਸੇਨ ਪਰਿਹਾਸੇਯ੍ਯ. ਪਮ੍ਹਾਯੇਯ੍ਯਾਤਿ ਮਹਾਹਸਿਤਵਸੇਨ ਪਰਿਹਾਸੇਯ੍ਯ.

ਸਾ ਤਸ੍ਸ ਵਚਨਂ ਸੁਤ੍ਵਾ ‘‘ਗਚ੍ਛਥ ਤੁਮ੍ਹੇ, ਦੇਵ, ਕਤਿਪਾਹਚ੍ਚਯੇਨ ਨਂ ਤੁਮ੍ਹਾਕਂ ਵਸੇ ਕਰਿਸ੍ਸਾਮਿ, ਪਸ੍ਸਥ ਮੇ ਪਰਕ੍ਕਮ’’ਨ੍ਤਿ ਵਤ੍ਵਾ ਤਂ ਕਰਣੀਯਂ ਤੀਰੇਤ੍ਵਾ ਪਭਾਵਤਿਯਾ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸਾ ਵਸਨਗਬ੍ਭਂ ਸੋਧੇਨ੍ਤੀ ਵਿਯ ਪਹਰਣਯੋਗ੍ਗਂ ਲੇਡ੍ਡੁਖਣ੍ਡਮ੍ਪਿ ਅਸੇਸੇਤ੍ਵਾ ਅਨ੍ਤਮਸੋ ਪਾਦੁਕਾਪਿ ਨੀਹਰਿਤ੍ਵਾ ਸਕਲਗਬ੍ਭਂ ਸਮ੍ਮਜ੍ਜਿਤ੍ਵਾ ਗਬ੍ਭਦ੍ਵਾਰੇ ਉਮ੍ਮਾਰਂ ਅਨ੍ਤਰਂ ਕਤ੍ਵਾ ਉਚ੍ਚਾਸਨਂ ਪਞ੍ਞਪੇਤ੍ਵਾ ਪਭਾਵਤਿਯਾ ਏਕਂ ਨੀਚਪੀਠਕਂ ਅਤ੍ਥਰਿਤ੍ਵਾ ‘‘ਏਹਿ, ਅਮ੍ਮ, ਸੀਸੇ ਤੇ ਊਕਾ ਵਿਚਿਨਿਸ੍ਸਾਮੀ’’ਤਿ ਤਂ ਤਤ੍ਥ ਪੀਠਕੇ ਨਿਸੀਦਾਪੇਤ੍ਵਾ ਅਤ੍ਤਨੋ ਊਰੁਅਨ੍ਤਰੇ ਤਸ੍ਸਾ ਸੀਸਂ ਠਪੇਤ੍ਵਾ ਥੋਕਂ ਕਣ੍ਡੁਯਿਤ੍ਵਾ ‘‘ਅਹੋ ਇਮਿਸ੍ਸਾ ਸੀਸੇ ਬਹੂ ਊਕਾ’’ਤਿ ਸਕਸੀਸਤੋ ਊਕਾ ਗਹੇਤ੍ਵਾ ਤਸ੍ਸਾ ਹਤ੍ਥੇ ਠਪੇਤ੍ਵਾ ‘‘ਪਸ੍ਸ ਕਿਤ੍ਤਕਾ ਤੇ ਸੀਸੇ ਊਕਾ’’ਤਿ ਪਿਯਕਥਂ ਕਥੇਤ੍ਵਾ ਮਹਾਸਤ੍ਤਸ੍ਸ ਗੁਣਂ ਕਥੇਨ੍ਤੀ ਗਾਥਮਾਹ –

੧੯.

‘‘ਨ ਹਿ ਨੂਨਾਯਂ ਰਾਜਪੁਤ੍ਤੀ, ਕੁਸੇ ਸਾਤਮ੍ਪਿ ਵਿਨ੍ਦਤਿ;

ਆਲ਼ਾਰਿਕੇ ਭਤੇ ਪੋਸੇ, ਵੇਤਨੇਨ ਅਨਤ੍ਥਿਕੇ’’ਤਿ.

ਤਸ੍ਸਤ੍ਥੋ – ਏਕਂਸੇਨ ਅਯਂ ਰਾਜਪੁਤ੍ਤੀ ਪੁਬ੍ਬੇ ਕੁਸਾਵਤੀਨਗਰੇ ਕੁਸਨਰਿਨ੍ਦਸ੍ਸ ਸਨ੍ਤਿਕੇ ਮਾਲਾਗਨ੍ਧਵਿਲੇਪਨਵਤ੍ਥਾਲਙ੍ਕਾਰਵਸੇਨ ਅਪ੍ਪਮਤ੍ਤਕਮ੍ਪਿ ਸਾਤਂ ਨ ਵਿਨ੍ਦਤਿ ਨ ਲਭਤਿ, ਤਮ੍ਬੂਲਮਤ੍ਤਮ੍ਪਿ ਏਤੇਨ ਏਤਿਸ੍ਸਾ ਦਿਨ੍ਨਪੁਬ੍ਬਂ ਨ ਭਵਿਸ੍ਸਤਿ. ਕਿਂਕਾਰਣਾ? ਇਤ੍ਥਿਯੋ ਨਾਮ ਏਕਦਿਵਸਮ੍ਪਿ ਅਙ੍ਕਂ ਅਵਤ੍ਥਰਿਤ੍ਵਾ ਨਿਪਨ੍ਨਸਾਮਿਕਮ੍ਹਿ ਹਦਯਂ ਭਿਨ੍ਦਿਤੁਂ ਨ ਸਕ੍ਕੋਨ੍ਤਿ, ਅਯਂ ਪਨ ਆਲ਼ਾਰਿਕੇ ਭਤੇ ਪੋਸੇ ਆਲ਼ਾਰਿਕਤ੍ਤਞ੍ਚ ਭਤਕਤ੍ਤਞ੍ਚ ਉਪਗਤੇ ਏਤਸ੍ਮਿਂ ਪੁਰਿਸੇ ਮੂਲੇਨਪਿ ਅਨਤ੍ਥਿਕੇ ਕੇਵਲਂ ਤਂਯੇਵ ਨਿਸ੍ਸਾਯ ਰਜ੍ਜਂ ਪਹਾਯ ਆਗਨ੍ਤ੍ਵਾ ਏਵਂ ਦੁਕ੍ਖਂ ਅਨੁਭਵਨ੍ਤੇ ਪਟਿਸਨ੍ਥਾਰਮਤ੍ਤਮ੍ਪਿ ਨ ਕਰੋਤਿ, ਸਚੇਪਿ ਤੇ, ਅਮ੍ਮ, ਤਸ੍ਮਿਂ ਸਿਨੇਹੋ ਨਤ੍ਥਿ, ਸਕਲਜਮ੍ਬੁਦੀਪੇ ਅਗ੍ਗਰਾਜਾ ਮਂ ਨਿਸ੍ਸਾਯ ਕਿਲਮਤੀਤਿ ਤਸ੍ਸ ਕਿਞ੍ਚਿਦੇਵ ਦਾਤੁਂ ਅਰਹਸੀਤਿ.

ਸਾ ਤਂ ਸੁਤ੍ਵਾ ਖੁਜ੍ਜਾਯ ਕੁਜ੍ਝਿ. ਅਥ ਨਂ ਖੁਜ੍ਜਾ ਗੀਵਾਯਂ ਗਹੇਤ੍ਵਾ ਅਨ੍ਤੋਗਬ੍ਭੇ ਖਿਪਿਤ੍ਵਾ ਸਯਂ ਬਹਿ ਹੁਤ੍ਵਾ ਦ੍ਵਾਰਂ ਪਿਧਾਯ ਆਵਿਞ੍ਛਨਰਜ੍ਜੁਮ੍ਹਿ ਓਲਮ੍ਬਨ੍ਤੀ ਅਟ੍ਠਾਸਿ. ਪਭਾਵਤੀ ਤਂ ਗਹੇਤੁਂ ਅਸਕ੍ਕੋਨ੍ਤੀ ਦ੍ਵਾਰਮੂਲੇ ਠਤ੍ਵਾ ਅਕ੍ਕੋਸਨ੍ਤੀ ਇਤਰਂ ਗਾਥਮਾਹ –

੨੦.

‘‘ਨ ਹਿ ਨੂਨਾਯਂ ਸਾ ਖੁਜ੍ਜਾ, ਲਭਤਿ ਜਿਵ੍ਹਾਯ ਛੇਦਨਂ;

ਸੁਨਿਸਿਤੇਨ ਸਤ੍ਥੇਨ, ਏਵਂ ਦੁਬ੍ਭਾਸਿਤਂ ਭਣ’’ਨ੍ਤਿ.

ਤਤ੍ਥ ਸੁਨਿਸਿਤੇਨਾਤਿ ਸੁਟ੍ਠੁ ਨਿਸਿਤੇਨ ਤਿਖਿਣਸਤ੍ਥੇਨ. ਏਵਂ ਦੁਬ੍ਭਾਸਿਤਨ੍ਤਿ ਏਵਂ ਅਸੋਤਬ੍ਬਯੁਤ੍ਤਕਂ ਦੁਬ੍ਭਾਸਿਤਂ ਭਣਨ੍ਤੀ.

ਅਥ ਖੁਜ੍ਜਾ ਆਵਿਞ੍ਚਨਰਜ੍ਜੁਂ ਗਹੇਤ੍ਵਾ ਠਿਤਾਵ ‘‘ਨਿਪ੍ਪਞ੍ਞੇ ਦੁਬ੍ਬਿਨੀਤੇ ਤਵ ਰੂਪਂ ਕਿਂ ਕਰਿਸ੍ਸਤਿ, ਕਿਂ ਮਯਂ ਤਵ ਰੂਪਂ ਖਾਦਿਤ੍ਵਾ ਯਾਪੇਸ੍ਸਾਮਾ’’ਤਿ ਵਤ੍ਵਾ ਤੇਰਸਹਿ ਗਾਥਾਹਿ ਬੋਧਿਸਤ੍ਤਸ੍ਸ ਗੁਣਂ ਪਕਾਸੇਨ੍ਤੀ ਖੁਜ੍ਜਾਗਜ੍ਜਿਤਂ ਨਾਮ ਗਜ੍ਜਿ –

੨੧.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਹਾਯਸੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੨.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਹਦ੍ਧਨੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੩.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਹਬ੍ਬਲੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੪.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਹਾਰਟ੍ਠੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੫.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਹਾਰਾਜਾਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੬.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਸੀਹਸ੍ਸਰੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੭.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਵਗ੍ਗੁਸ੍ਸਰੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੮.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਬਿਨ੍ਦੁਸ੍ਸਰੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੯.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਞ੍ਜੁਸ੍ਸਰੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੩੦.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਧੁਸ੍ਸਰੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੩੧.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਸਤਸਿਪ੍ਪੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੩੨.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਖਤ੍ਤਿਯੋਤਿਪਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੩੩.

‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਕੁਸਰਾਜਾਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯ’’ਨ੍ਤਿ.

ਤਤ੍ਥ ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ, ਪਭਾਵਤੀਤਿ ਅਰੇ ਪਭਾਵਤਿ, ਮਾ ਤ੍ਵਂ ਏਤਂ ਕੁਸਨਰਿਨ੍ਦਂ ਅਤ੍ਤਨੋ ਰੂਪੇਨ ਆਰੋਹਪਰਿਣਾਹੇਨ ਪਮਿਨਿ, ਏਵਂ ਪਮਾਣਂ ਗਣ੍ਹਿ. ਮਹਾਯਸੋਤਿ ਮਹਾਨੁਭਾਵੋ ਸੋਤਿ ਏਵਂ ਹਦਯੇ ਕਤ੍ਵਾਨ ਰੁਚਿਰੇ ਪਿਯਦਸ੍ਸਨੇ ਕਰਸ੍ਸੁ ਤਸ੍ਸ ਪਿਯਂ. ਆਨੁਭਾਵੋਯੇਵ ਹਿਸ੍ਸ ਰੂਪਨ੍ਤਿ ਵਦਤਿ. ਏਸ ਨਯੋ ਸਬ੍ਬਤ੍ਥ. ਅਪਿ ਚ ਮਹਾਯਸੋਤਿ ਮਹਾਪਰਿਵਾਰੋ. ਮਹਦ੍ਧਨੋਤਿ ਮਹਾਭੋਗੋ. ਮਹਬ੍ਬਲੋਤਿ ਮਹਾਥਾਮੋ. ਮਹਾਰਟ੍ਠੋਤਿ ਵਿਪੁਲਰਟ੍ਠੋ. ਮਹਾਰਾਜਾਤਿ ਸਕਲਜਮ੍ਬੁਦੀਪੇ ਅਗ੍ਗਰਾਜਾ. ਸੀਹਸ੍ਸਰੋਤਿ ਸੀਹਸਦ੍ਦਸਮਾਨਸਦ੍ਦੋ. ਵਗ੍ਗੁਸ੍ਸਰੋਤਿ ਲੀਲਾਯੁਤ੍ਤਸ੍ਸਰੋ. ਬਿਨ੍ਦੁਸ੍ਸਰੋਤਿ ਸਮ੍ਪਿਣ੍ਡਿਤਘਨਸ੍ਸਰੋ. ਮਞ੍ਜੁਸ੍ਸਰੋਤਿ ਸੁਨ੍ਦਰਸ੍ਸਰੋ. ਮਧੁਸ੍ਸਰੋਤਿ ਮਧੁਰਯੁਤ੍ਤਸ੍ਸਰੋ. ਸਤਸਿਪ੍ਪੋਤਿ ਪਰੇਸਂ ਸਨ੍ਤਿਕੇ ਅਸਿਕ੍ਖਿਤ੍ਵਾ ਅਤ੍ਤਨੋ ਬਲੇਨੇਵ ਨਿਪ੍ਫਨ੍ਨਅਨੇਕਸਤਸਿਪ੍ਪੋ. ਖਤ੍ਤਿਯੋਤਿ ਓਕ੍ਕਾਕਪਵੇਣਿਯਂ ਜਾਤੋ ਅਸਮ੍ਭਿਨ੍ਨਖਤ੍ਤਿਯੋ. ਕੁਸਰਾਜਾਤਿ ਸਕ੍ਕਦਤ੍ਤਿਯਕੁਸਤਿਣਸਮਾਨਨਾਮੋ ਰਾਜਾ. ਏਵਰੂਪੋ ਹਿ ਅਞ੍ਞੋ ਰਾਜਾ ਨਾਮ ਨਤ੍ਥੀਤਿ ਜਾਨਿਤ੍ਵਾ ਏਤਸ੍ਸ ਪਿਯਂ ਕਰੋਹੀਤਿ ਖੁਜ੍ਜਾ ਏਤ੍ਤਕਾਹਿ ਗਾਥਾਹਿ ਤਸ੍ਸ ਗੁਣਂ ਕਥੇਸਿ.

ਪਭਾਵਤੀ ਤਸ੍ਸਾ ਵਚਨਂ ਸੁਤ੍ਵਾ ‘‘ਖੁਜ੍ਜੇ ਅਤਿਵਿਯ ਗਜ੍ਜਸਿ, ਹਤ੍ਥੇਨ ਪਾਪੁਣਨ੍ਤੀ ਸਸਾਮਿਕਭਾਵਂ ਤੇ ਜਾਨਾਪੇਸ੍ਸਾਮੀ’’ਤਿ ਖੁਜ੍ਜਂ ਤਜ੍ਜੇਸਿ. ਸਾਪਿ ਤਂ ‘‘ਅਹਂ ਤਂ ਰਕ੍ਖਮਾਨਾ ਪਿਤੁਨੋ ਤੇ ਕੁਸਰਾਜਸ੍ਸ ਆਗਤਭਾਵਂ ਨਾਰੋਚੇਸਿਂ, ਹੋਤੁ, ਅਜ੍ਜ ਰਞ੍ਞੋ ਆਰੋਚੇਸ੍ਸਾਮੀ’’ਤਿ ਮਹਨ੍ਤੇਨ ਸਦ੍ਦੇਨ ਭਾਯਾਪੇਸਿ. ਸਾਪਿ ‘‘ਕੋਚਿਦੇਵ ਸੁਣੇਯ੍ਯਾ’’ਤਿ ਖੁਜ੍ਜਂ ਸਞ੍ਞਾਪੇਸਿ. ਬੋਧਿਸਤ੍ਤੋਪਿ ਤਂ ਪਸ੍ਸਿਤੁਂ ਅਲਭਨ੍ਤੋ ਸਤ੍ਤ ਮਾਸੇ ਦੁਬ੍ਭੋਜਨੇਨ ਦੁਕ੍ਖਸੇਯ੍ਯਾਯ ਕਿਲਮਨ੍ਤੋ ਚਿਨ੍ਤੇਸਿ – ‘‘ਕੋ ਮੇ ਏਤਾਯ ਅਤ੍ਥੋ, ਸਤ੍ਤ ਮਾਸੇ ਵਸਨ੍ਤੋ ਏਤਂ ਪਸ੍ਸਿਤੁਮ੍ਪਿ ਨ ਲਭਾਮਿ, ਅਤਿਵਿਯ ਕਕ੍ਖਲ਼ਾ ਸਾਹਸਿਕਾ, ਗਨ੍ਤ੍ਵਾ ਮਾਤਾਪਿਤਰੋ ਪਸ੍ਸਿਸ੍ਸਾਮੀ’’ਤਿ. ਤਸ੍ਮਿਂ ਖਣੇ ਸਕ੍ਕੋ ਆਵਜ੍ਜੇਨ੍ਤੋ ਤਸ੍ਸ ਉਕ੍ਕਣ੍ਠਿਤਭਾਵਂ ਞਤ੍ਵਾ ‘‘ਰਾਜਾ ਸਤ੍ਤ ਮਾਸੇ ਪਭਾਵਤਿਂ ਦਟ੍ਠੁਮ੍ਪਿ ਨ ਲਭਿ, ਲਭਨਾਕਾਰਮਸ੍ਸ ਕਰਿਸ੍ਸਾਮੀ’’ਤਿ ਮਦ੍ਦਰਞ੍ਞੋ ਦੂਤੇ ਕਤ੍ਵਾ ਸਤ੍ਤਨ੍ਨਂ ਰਾਜੂਨਂ ਦੂਤਂ ਪਾਹੇਨ੍ਤੋ ‘‘ਪਭਾਵਤੀ, ਕੁਸਰਾਜਂ ਛਡ੍ਡੇਤ੍ਵਾ ਆਗਤਾ, ਆਗਚ੍ਛਨ੍ਤੁ ਪਭਾਵਤਿਂ ਗਣ੍ਹਨ੍ਤੂ’’ਤਿ ਏਕੇਕਸ੍ਸ ਵਿਸੁਂ ਵਿਸੁਂ ਸਾਸਨਂ ਪਹਿਣਿ. ਤੇ ਮਹਾਪਰਿਵਾਰੇਨ ਗਨ੍ਤ੍ਵਾ ਨਗਰਂ ਪਤ੍ਵਾ ਅਞ੍ਞਮਞ੍ਞਸ੍ਸ ਆਗਤਕਾਰਣਂ ਨ ਜਾਨਨ੍ਤਿ. ਤੇ ‘‘ਤ੍ਵਂ ਕਸ੍ਮਾ ਆਗਤੋ, ਤ੍ਵਂ ਕਸ੍ਮਾ ਆਗਤੋਸੀ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਞਤ੍ਵਾ ਕੁਜ੍ਝਿਤ੍ਵਾ ‘‘ਏਕਂ ਕਿਰ ਧੀਤਰਂ ਸਤ੍ਤਨ੍ਨਂ ਦਸ੍ਸਤਿ, ਪਸ੍ਸਥਸ੍ਸ ਅਨਾਚਾਰਂ, ਉਪ੍ਪਣ੍ਡੇਤਿ ਨੋ, ਗਣ੍ਹਥ ਨ’’ਨ੍ਤਿ ‘‘ਸਬ੍ਬੇਸਮ੍ਪਿ ਅਮ੍ਹਾਕਂ ਪਭਾਵਤਿਂ ਦੇਤੁ ਯੁਦ੍ਧਂ ਵਾ’’ਤਿ ਸਾਸਨਾਨਿ ਪਹਿਣਿਤ੍ਵਾ ਨਗਰਂ ਪਰਿਵਾਰਯਿਂਸੁ. ਮਦ੍ਦਰਾਜਾ ਸਾਸਨਂ ਸੁਤ੍ਵਾ ਭੀਤਤਸਿਤੋ ਅਮਚ੍ਚੇ ਆਮਨ੍ਤੇਤ੍ਵਾ ‘‘ਕਿਂ ਕਰੋਮਾ’’ਤਿ ਪੁਚ੍ਛਿ. ਅਥ ਨਂ ਅਮਚ੍ਚਾ ‘‘ਦੇਵ, ਸਤ੍ਤਪਿ ਰਾਜਾਨੋ ਪਭਾਵਤਿਂ ਨਿਸ੍ਸਾਯ ਆਗਤਾ, ‘ਸਚੇ ਨ ਦਸ੍ਸਤਿ, ਪਾਕਾਰਂ ਭਿਨ੍ਦਿਤ੍ਵਾ ਨਗਰਂ ਪਵਿਸਿਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਤਂ ਗਣ੍ਹਿਸ੍ਸਾਮਾ’ਤਿ ਵਦਨ੍ਤਿ, ਪਾਕਾਰੇ ਅਭਿਨ੍ਨੇਯੇਵ ਤੇਸਂ ਪਭਾਵਤਿਂ ਪੇਸੇਸ੍ਸਾਮਾ’’ਤਿ ਵਤ੍ਵਾ ਗਾਥਮਾਹਂਸੁ –

੩੪.

‘‘ਏਤੇ ਨਾਗਾ ਉਪਤ੍ਥਦ੍ਧਾ, ਸਬ੍ਬੇ ਤਿਟ੍ਠਨ੍ਤਿ ਵਮ੍ਮਿਤਾ;

ਪੁਰਾ ਮਦ੍ਦਨ੍ਤਿ ਪਾਕਾਰਂ, ਆਨੇਨ੍ਤੇਤਂ ਪਭਾਵਤਿ’’ਨ੍ਤਿ.

ਤਤ੍ਥ ਉਪਤ੍ਥਦ੍ਧਾਤਿ ਅਤਿਥਦ੍ਧਾ ਦਪ੍ਪਿਤਾ. ਆਨੇਨ੍ਤੇਤਂ ਪਭਾਵਤਿਨ੍ਤਿ ਆਨੇਨ੍ਤੁ ਏਤਂ ਪਭਾਵਤਿਨ੍ਤਿ ਸਾਸਨਾਨਿ ਪਹਿਣਿਂਸੁ. ਤਸ੍ਮਾ ਯਾਵ ਏਤੇ ਨਾਗਾ ਪਾਕਾਰਂ ਨ ਮਦ੍ਦਨ੍ਤਿ, ਤਾਵ ਨੇਸਂ ਪਭਾਵਤਿਂ ਪੇਸੇਹਿ, ਮਹਾਰਾਜਾਤਿ.

ਤਂ ਸੁਤ੍ਵਾ ਰਾਜਾ ‘‘ਸਚਾਹਂ ਏਕਸ੍ਸ ਪਭਾਵਤਿਂ ਪੇਸੇਸ੍ਸਾਮਿ, ਸੇਸਾ ਯੁਦ੍ਧਂ ਕਰਿਸ੍ਸਨ੍ਤਿ, ਨ ਸਕ੍ਕਾ ਏਕਸ੍ਸ ਦਾਤੁਂ, ਸਕਲਜਮ੍ਬੁਦੀਪੇ ਅਗ੍ਗਰਾਜਾਨਂ ‘ਵਿਰੂਪੋ’ਤਿ ਛਡ੍ਡੇਤ੍ਵਾ ਆਗਤਾ ਆਗਮਨਸ੍ਸ ਫਲਂ ਲਭਤੁ, ਵਧਿਤ੍ਵਾਨ ਨਂ ਸਤ੍ਤ ਖਣ੍ਡਾਨਿ ਕਤ੍ਵਾ ਸਤ੍ਤਨ੍ਨਂ ਖਤ੍ਤਿਯਾਨਂ ਪੇਸੇਸ੍ਸਾਮੀ’’ਤਿ ਵਦਨ੍ਤੋ ਅਨਨ੍ਤਰਂ ਗਾਥਮਾਹ –

੩੫.

‘‘ਸਤ੍ਤ ਬਿਲੇ ਕਰਿਤ੍ਵਾਨ, ਅਹਮੇਤਂ ਪਭਾਵਤਿਂ;

ਖਤ੍ਤਿਯਾਨਂ ਪਦਸ੍ਸਾਮਿ, ਯੇ ਮਂ ਹਨ੍ਤੁਂ ਇਧਾਗਤਾ’’ਤਿ.

ਤਸ੍ਸ ਸਾ ਕਥਾ ਸਕਲਨਿਵੇਸਨੇ ਪਾਕਟਾ ਅਹੋਸਿ. ਪਰਿਚਾਰਿਕਾ ਗਨ੍ਤ੍ਵਾ ‘‘ਰਾਜਾ ਕਿਰ ਤਂ ਸਤ੍ਤ ਖਣ੍ਡਾਨਿ ਕਤ੍ਵਾ ਸਤ੍ਤਨ੍ਨਂ ਰਾਜੂਨਂ ਪੇਸੇਸ੍ਸਤੀ’’ਤਿ ਪਭਾਵਤਿਯਾ ਆਰੋਚੇਸੁਂ. ਸਾ ਮਰਣਭਯਭੀਤਾ ਆਸਨਾ ਵੁਟ੍ਠਾਯ ਭਗਿਨੀਹਿ ਪਰਿਵੁਤਾ ਮਾਤੁ ਸਿਰਿਗਬ੍ਭਂ ਅਗਮਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੩੬.

‘‘ਅਵੁਟ੍ਠਹਿ ਰਾਜਪੁਤ੍ਤੀ, ਸਾਮਾ ਕੋਸੇਯ੍ਯਵਾਸਿਨੀ;

ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ, ਦਾਸੀਗਣਪੁਰਕ੍ਖਤਾ’’ਤਿ.

ਤਤ੍ਥ ਸਾਮਾਤਿ ਸੁਵਣ੍ਣਵਣ੍ਣਾ. ਕੋਸੇਯ੍ਯਵਾਸਿਨੀਤਿ ਸੁਵਣ੍ਣਖਚਿਤਕੋਸੇਯ੍ਯਨਿਵਸਨਾ.

ਸਾ ਮਾਤੁ ਸਨ੍ਤਿਕਂ ਗਨ੍ਤ੍ਵਾ ਮਾਤਰਂ ਵਨ੍ਦਿਤ੍ਵਾ ਪਰਿਦੇਵਮਾਨਾ ਆਹ –

੩੭.

‘‘ਤਂ ਨੂਨ ਕਕ੍ਕੂਪਨਿਸੇਵਿਤਂ ਮੁਖਂ, ਆਦਾਸਦਨ੍ਤਾਥਰੁਪਚ੍ਚਵੇਕ੍ਖਿਤਂ;

ਸੁਭਂ ਸੁਨੇਤ੍ਤਂ ਵਿਰਜਂ ਅਨਙ੍ਗਣਂ, ਛੁਦ੍ਧਂ ਵਨੇ ਠਸ੍ਸਤਿ ਖਤ੍ਤਿਯੇਹਿ.

੩੮.

‘‘ਤੇ ਨੂਨ ਮੇ ਅਸਿਤੇ ਵੇਲ੍ਲਿਤਗ੍ਗੇ, ਕੇਸੇ ਮੁਦੂ ਚਨ੍ਦਨਸਾਰਲਿਤ੍ਤੇ;

ਸਮਾਕੁਲੇ ਸੀਵਥਿਕਾਯ ਮਜ੍ਝੇ, ਪਾਦੇਹਿ ਗਿਜ੍ਝਾ ਪਰਿਕਡ੍ਢਿਸ੍ਸਨ੍ਤਿ.

੩੯.

‘‘ਤਾ ਨੂਨ ਮੇ ਤਮ੍ਬਨਖਾ ਸੁਲੋਮਾ, ਬਾਹਾ ਮੁਦੂ ਚਨ੍ਦਨਸਾਰਲਿਤ੍ਤਾ;

ਛਿਨ੍ਨਾ ਵਨੇ ਉਜ੍ਝਿਤਾ ਖਤ੍ਤਿਯੇਹਿ, ਗਯ੍ਹ ਧਙ੍ਕੋ ਗਚ੍ਛਤਿ ਯੇਨਕਾਮਂ.

੪੦.

‘‘ਤੇ ਨੂਨ ਤਾਲੂਪਨਿਭੇ ਅਲਮ੍ਬੇ, ਨਿਸੇਵਿਤੇ ਕਾਸਿਕਚਨ੍ਦਨੇਨ;

ਥਨੇਸੁ ਮੇ ਲਮ੍ਬਿਸ੍ਸਤਿ ਸਿਙ੍ਗਾਲੋ, ਮਾਤੂਵ ਪੁਤ੍ਤੋ ਤਰੁਣੋ ਤਨੂਜੋ.

੪੧.

‘‘ਤਂ ਨੂਨ ਸੋਣਿਂ ਪੁਥੁਲਂ ਸੁਕੋਟ੍ਟਿਤਂ, ਨਿਸੇਵਿਤਂ ਕਞ੍ਚਨਮੇਖਲਾਹਿ;

ਛਿਨ੍ਨਂ ਵਨੇ ਖਤ੍ਤਿਯੇਹੀ ਅਵਤ੍ਥਂ, ਸਿਙ੍ਗਾਲਸਙ੍ਘਾ ਪਰਿਕਡ੍ਢਿਸ੍ਸਨ੍ਤਿ.

੪੨.

‘‘ਸੋਣਾ ਧਙ੍ਕਾ ਸਿਙ੍ਗਾਲਾ ਚ, ਯੇ ਚਞ੍ਞੇ ਸਨ੍ਤਿ ਦਾਠਿਨੋ;

ਅਜਰਾ ਨੂਨ ਹੇਸ੍ਸਨ੍ਤਿ, ਭਕ੍ਖਯਿਤ੍ਵਾ ਪਭਾਵਤਿਂ.

੪੩.

‘‘ਸਚੇ ਮਂਸਾਨਿ ਹਰਿਂਸੁ, ਖਤ੍ਤਿਯਾ ਦੂਰਗਾਮਿਨੋ;

ਅਟ੍ਠੀਨਿ ਅਮ੍ਮ ਯਾਚਿਤ੍ਵਾ, ਅਨੁਪਥੇ ਦਹਾਥ ਨਂ.

੪੪.

‘‘ਖੇਤ੍ਤਾਨਿ ਅਮ੍ਮ ਕਾਰੇਤ੍ਵਾ, ਕਣਿਕਾਰੇਤ੍ਥ ਰੋਪਯ;

ਯਦਾ ਤੇ ਪੁਪ੍ਫਿਤਾ ਅਸ੍ਸੁ, ਹੇਮਨ੍ਤਾਨਂ ਹਿਮਚ੍ਚਯੇ;

ਸਰੇਯ੍ਯਾਥ ਮਮਂ ਅਮ੍ਮ, ਏਵਂਵਣ੍ਣਾ ਪਭਾਵਤੀ’’ਤਿ.

ਤਤ੍ਥ ਕਕ੍ਕੂਪਨਿਸੇਵਿਤਨ੍ਤਿਲ ਕਕ੍ਕੂਪਨਿਸੇਵਿਤਨ੍ਤਿ ਸਾਸਪਕਕ੍ਕਲੋਣਕਕ੍ਕਮਤ੍ਤਿਕਕਕ੍ਕਤਿਲਕਕ੍ਕਹਲਿਦ੍ਦਿਕਕ੍ਕਮੁਖਚੁਣ੍ਣਕੇਹਿ ਇਮੇਹਿ ਪਞ੍ਚਹਿ ਕਕ੍ਕੇਹਿ ਉਪਨਿਸੇਵਿਤਂ. ਆਦਾਸਦਨ੍ਤਾਥਰੁਪਚ੍ਚਵੇਕ੍ਖਿਤਨ੍ਤਿ ਦਨ੍ਤਮਯਥਰੁਮ੍ਹਿ ਆਦਾਸੇ ਪਚ੍ਚਵੇਕ੍ਖਿਤਂ ਤਤ੍ਥ ਓਲੋਕੇਤ੍ਵਾ ਮਣ੍ਡਿਤਂ. ਸੁਭਨ੍ਤਿ ਸੁਭਮੁਖਂ. ਵਿਰਜਨ੍ਤਿ ਵਿਗਤਰਜਂ ਨਿਮ੍ਮਲਂ. ਅਨਙ੍ਗਣਨ੍ਤਿ ਗਣ੍ਡਪਿਲ਼ਕਾਦਿਦੋਸਰਹਿਤਂ. ਛੁਦ੍ਧਨ੍ਤਿ ਅਮ੍ਮ ਏਵਰੂਪਂ ਮਮ ਮੁਖਂ ਅਦ੍ਧਾ ਇਦਾਨਿ ਖਤ੍ਤਿਯੇਹਿ ਛਡ੍ਡਿਤਂ ਵਨੇ ਅਰਞ੍ਞੇ ਠਸ੍ਸਤੀਤਿ ਪਰਿਦੇਵਤਿ. ਅਸਿਤੇਤਿ ਕਾਲ਼ਕੇ. ਵੇਲ੍ਲਿਤਗ੍ਗੇਤਿ ਉਨ੍ਨਤਗ੍ਗੇ. ਸੀਵਥਿਕਾਯਾਤਿ ਸੁਸਾਨਮ੍ਹਿ. ਪਰਿਕਡ੍ਢਿਸ੍ਸਨ੍ਤੀਤਿ ਏਵਰੂਪੇ ਮਮ ਕੇਸੇ ਮਨੁਸ੍ਸਮਂਸਖਾਦਕਾ ਗਿਜ੍ਝਾ ਪਾਦੇਹਿ ਪਹਰਿਤ੍ਵਾ ਨੂਨ ਪਰਿਕਡ੍ਢਿਸ੍ਸਨ੍ਤਿ. ਗਯ੍ਹ ਧਙ੍ਕੋ ਗਚ੍ਛਤਿ ਯੇਨਕਾਮਨ੍ਤਿ ਅਮ੍ਮ ਮਮ ਏਵਰੂਪਂ ਬਾਹਂ ਨੂਨ ਧਙ੍ਕੋ ਗਹੇਤ੍ਵਾ ਲੁਞ੍ਜਿਤ੍ਵਾ ਖਾਦਨ੍ਤੋ ਯੇਨਕਾਮਂ ਗਚ੍ਛਿਸ੍ਸਤਿ.

ਤਾਲੂਪਨਿਭੇਤਿ ਸੁਵਣ੍ਣਤਾਲਫਲਸਦਿਸੇ. ਕਾਸਿਕਚਨ੍ਦਨੇਨਾਤਿ ਸੁਖੁਮਚਨ੍ਦਨੇਨ ਨਿਸੇਵਿਤੇ. ਥਨੇਸੁ ਮੇਤਿ ਅਮ੍ਮ ਮਮ ਸੁਸਾਨੇ ਪਤਿਤਾਯ ਏਵਰੂਪੇ ਥਨੇ ਦਿਸ੍ਵਾ ਮੁਖੇਨ ਡਂਸਿਤ੍ਵਾ ਤੇਸੁ ਮੇ ਥਨੇਸੁ ਅਤ੍ਤਨੋ ਤਨੁਜੋ ਮਾਤੁ ਤਰੁਣਪੁਤ੍ਤੋ ਵਿਯ ਨੂਨ ਸਿਙ੍ਗਾਲੋ ਲਮ੍ਬਿਸ੍ਸਤਿ. ਸੋਣਿਨ੍ਤਿ ਕਟਿਂ. ਸੁਕੋਟ੍ਟਿਤਨ੍ਤਿ ਗੋਹਨੁਕੇਨ ਪਹਰਿਤ੍ਵਾ ਸੁਵਡ੍ਢਿਤਂ. ਅਵਤ੍ਥਨ੍ਤਿ ਛਡ੍ਡਿਤਂ. ਭਕ੍ਖਯਿਤ੍ਵਾਤਿ ਅਮ੍ਮ ਏਤੇ ਏਤ੍ਤਕਾ ਨੂਨ ਮਮ ਮਂਸਂ ਖਾਦਿਤ੍ਵਾ ਅਜਰਾ ਭਵਿਸ੍ਸਨ੍ਤਿ.

ਸਚੇ ਮਂਸਾਨਿ ਹਰਿਂਸੂਤਿ ਅਮ੍ਮ ਸਚੇ ਤੇ ਖਤ੍ਤਿਯਾ ਮਯਿਂ ਪਟਿਬਦ੍ਧਚਿਤ੍ਤਾ ਮਮ ਮਂਸਾਨਿ ਹਰੇਯ੍ਯੁਂ, ਅਥ ਤੁਮ੍ਹੇ ਅਟ੍ਠੀਨਿ ਯਾਚਿਤ੍ਵਾ ਅਨੁਪਥੇ ਦਹਾਥਨਂ, ਜਙ੍ਘਮਗ੍ਗਮਹਾਮਗ੍ਗਾਨਂ ਅਨ੍ਤਰੇ ਦਹੇਯ੍ਯਾਥਾਤਿ ਵਦਤਿ. ਖੇਤ੍ਤਾਨੀਤਿ ਅਮ੍ਮ ਮਮ ਝਾਪਿਤਟ੍ਠਾਨੇ ਮਾਲਾਦਿਵਤ੍ਥੂਨਿ ਕਾਰੇਤ੍ਵਾ ਏਤ੍ਥ ਏਤੇਸੁ ਖੇਤ੍ਤੇਸੁ ਕਣਿਕਾਰਰੁਕ੍ਖੇ ਰੋਪਯ. ਹਿਮਚ੍ਚਯੇਤਿ ਹਿਮਪਾਤਾਤਿਕ੍ਕਮੇ ਫਗ੍ਗੁਣਮਾਸੇ. ਸਰੇਯ੍ਯਾਥਾਤਿ ਤੇਸਂ ਪੁਪ੍ਫਾਨਂ ਸੁਵਣ੍ਣਚਙ੍ਕੋਟਕਂ ਪੂਰੇਤ੍ਵਾ ਊਰੂਸੁ ਠਪੇਤ੍ਵਾ ਮਮ ਧੀਤਾ ਪਭਾਵਤੀ ਏਵਂਵਣ੍ਣਾਤਿ ਸਰੇਯ੍ਯਾਥ.

ਇਤਿ ਸਾ ਮਰਣਭਯਤਜ੍ਜਿਤਾ ਮਾਤੁ ਸਨ੍ਤਿਕੇ ਵਿਲਪਿ. ਮਦ੍ਦਰਾਜਾਪਿ ‘‘ਫਰਸੁਞ੍ਚ ਗਣ੍ਡਿਕਞ੍ਚ ਗਹੇਤ੍ਵਾ ਚੋਰਘਾਤਕੋ ਇਧੇਵ ਆਗਚ੍ਛਤੂ’’ਤਿ ਆਣਾਪੇਸਿ. ਤਸ੍ਸ ਆਗਮਨਂ ਸਕਲਰਾਜਗੇਹੇ ਪਾਕਟਂ ਅਹੋਸਿ. ਅਥਸ੍ਸ ਆਗਤਭਾਵਂ ਸੁਤ੍ਵਾ ਪਭਾਵਤਿਯਾ ਮਾਤਾ ਉਟ੍ਠਾਯਾਸਨਾ ਸੋਕਸਮਪ੍ਪਿਤਾ ਰਞ੍ਞੋ ਸਨ੍ਤਿਕਂ ਅਗਮਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੪੫.

‘‘ਤਸ੍ਸਾ ਮਾਤਾ ਉਦਟ੍ਠਾਸਿ, ਖਤ੍ਤਿਯਾ ਦੇਵਵਣ੍ਣਿਨੀ;

ਦਿਸ੍ਵਾ ਅਸਿਞ੍ਚ ਸੂਨਞ੍ਚ, ਰਞ੍ਞੋ ਮਦ੍ਦਸ੍ਸਨ੍ਤੇਪੁਰੇ’’ਤਿ.

ਤਤ੍ਥ ਉਦਟ੍ਠਾਸੀਤਿ ਆਸਨਾ ਉਟ੍ਠਾਯ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਅਟ੍ਠਾਸਿ. ਦਿਸ੍ਵਾ ਅਸਿਞ੍ਚ ਸੂਨਞ੍ਚਾਤਿ ਅਨ੍ਤੇਪੁਰਮ੍ਹਿ ਅਲਙ੍ਕਤਮਹਾਤਲੇ ਰਞ੍ਞੋ ਪੁਰਤੋ ਨਿਕ੍ਖਿਤ੍ਤਂ ਫਰਸੁਞ੍ਚ ਗਣ੍ਡਿਕਞ੍ਚ ਦਿਸ੍ਵਾ ਵਿਲਪਨ੍ਤੀ ਗਾਥਮਾਹ –

੪੬.

‘‘ਇਮਿਨਾ ਨੂਨ ਅਸਿਨਾ, ਸੁਸਞ੍ਞਂ ਤਨੁਮਜ੍ਝਿਮਂ;

ਧੀਤਰਂ ਮਦ੍ਦ ਹਨ੍ਤ੍ਵਾਨ, ਖਤ੍ਤਿਯਾਨਂ ਪਦਸ੍ਸਸੀ’’ਤਿ.

ਤਤ੍ਥ ਅਸਿਨਾਤਿ ਫਰਸੁਂ ਸਨ੍ਧਾਯਾਹ. ਸੋ ਹਿ ਇਮਸ੍ਮਿਂ ਠਾਨੇ ਅਸਿ ਨਾਮ ਜਾਤੋ. ਸੁਸਞ੍ਞਂ ਤਨੁਮਜ੍ਝਿਮਨ੍ਤਿ ਸੁਟ੍ਠੁ ਸਞ੍ਞਾਤਂ ਤਨੁਮਜ੍ਝਿਮਂ.

ਅਥ ਨਂ ਰਾਜਾ ਸਞ੍ਞਾਪੇਨ੍ਤੋ ਆਹ – ‘‘ਦੇਵਿ, ਕਿਂ ਕਥੇਸਿ, ਤਵ ਧੀਤਾ ਸਕਲਜਮ੍ਬੁਦੀਪੇ ਅਗ੍ਗਰਾਜਾਨਂ ‘ਵਿਰੂਪੋ’ਤਿ ਛਡ੍ਡੇਤ੍ਵਾ ਗਤਮਗ੍ਗੇ ਪਦਵਲਞ੍ਜੇ ਅਵਿਨਟ੍ਠੇਯੇਵ ਮਚ੍ਚੁਂ ਨਲਾਟੇਨਾਦਾਯ ਆਗਤਾ, ਇਦਾਨਿ ਅਤ੍ਤਨੋ ਰੂਪਂ ਨਿਸ੍ਸਾਯ ਈਦਿਸਂ ਫਲਂ ਲਭਤੂ’’ਤਿ. ਸਾ ਤਸ੍ਸ ਵਚਨਂ ਸੁਤ੍ਵਾ ਧੀਤੁ ਸਨ੍ਤਿਕਂ ਗਨ੍ਤ੍ਵਾ ਵਿਲਪਨ੍ਤੀ ਆਹ –

੪੭.

‘‘ਨ ਮੇ ਅਕਾਸਿ ਵਚਨਂ, ਅਤ੍ਥਕਾਮਾਯ ਪੁਤ੍ਤਿਕੇ;

ਸਾਜ੍ਜ ਲੋਹਿਤਸਞ੍ਛਨ੍ਨਾ, ਗਚ੍ਛਸਿ ਯਮਸਾਧਨਂ.

੪੮.

‘‘ਏਵਮਾਪਜ੍ਜਤੀ ਪੋਸੋ, ਪਾਪਿਯਞ੍ਚ ਨਿਗਚ੍ਛਤਿ;

ਯੋ ਵੇ ਹਿਤਾਨਂ ਵਚਨਂ, ਨ ਕਰੋਤਿ ਅਤ੍ਥਦਸ੍ਸਿਨਂ.

੪੯.

‘‘ਸਚੇ ਚ ਅਜ੍ਜ ਧਾਰੇਸਿ, ਕੁਮਾਰਂ ਚਾਰੁਦਸ੍ਸਨਂ;

ਕੁਸੇਨ ਜਾਤਂ ਖਤ੍ਤਿਯਂ, ਸੁਵਣ੍ਣਮਣਿਮੇਖਲਂ;

ਪੂਜਿਤਂ ਞਾਤਿਸਙ੍ਘੇਹਿ, ਨ ਗਚ੍ਛਸਿ ਯਮਕ੍ਖਯਂ.

੫੦.

‘‘ਯਤ੍ਥਸ੍ਸੁ ਭੇਰੀ ਨਦਤਿ, ਕੁਞ੍ਜਰੋ ਚ ਨਿਕੂਜਤਿ;

ਖਤ੍ਤਿਯਾਨਂ ਕੁਲੇ ਭਦ੍ਦੇ, ਕਿਨ੍ਨੁ ਸੁਖਤਰਂ ਤਤੋ.

੫੧.

‘‘ਅਸ੍ਸੋ ਚ ਸਿਸਤਿ ਦ੍ਵਾਰੇ, ਕੁਮਾਰੋ ਉਪਰੋਦਤਿ;

ਖਤ੍ਤਿਯਾਨਂ ਕੁਲੇ ਭਦ੍ਦੇ, ਕਿਨ੍ਨੁ ਸੁਖਤਰਂ ਤਤੋ.

੫੨.

‘‘ਮਯੂਰਕੋਞ੍ਚਾਭਿਰੁਦੇ, ਕੋਕਿਲਾਭਿਨਿਕੂਜਿਤੇ;

ਖਤ੍ਤਿਯਾਨਂ ਕੁਲੇ ਭਦ੍ਦੇ, ਕਿਨ੍ਨੁ ਸੁਖਤਰਂ ਤਤੋ’’ਤਿ.

ਤਤ੍ਥ ਪੁਤ੍ਤਿਕੇਤਿ ਤਂ ਆਲਪਤਿ. ਇਦਂ ਵੁਤ੍ਤਂ ਹੋਤਿ – ਅਮ੍ਮ, ਇਧ ਕਿਂ ਕਰਿਸ੍ਸਸਿ, ਸਾਮਿਕਸ੍ਸ ਸਨ੍ਤਿਕਂ ਗਚ੍ਛ, ਮਾ ਰੂਪਮਦੇਨ ਮਜ੍ਜੀਤਿ ਏਵਂ ਯਾਚਨ੍ਤਿਯਾਪਿ ਮੇ ਵਚਨਂ ਨ ਅਕਾਸਿ, ਸਾ ਤ੍ਵਂ ਅਜ੍ਜ ਲੋਹਿਤਸਞ੍ਛਨ੍ਨਾ ਗਚ੍ਛਸਿ ਯਮਸਾਧਨਂ, ਮਚ੍ਚੁਰਾਜਸ੍ਸ ਭਵਨਂ ਗਮਿਸ੍ਸਸੀਤਿ. ਪਾਪਿਯਞ੍ਚਾਤਿ ਇਤੋ ਪਾਪਤਰਞ੍ਚ ਨਿਗਚ੍ਛਤਿ. ਸਚੇ ਚ ਅਜ੍ਜ ਧਾਰੇਸੀਤਿ, ਅਮ੍ਮ, ਸਚੇ ਤ੍ਵਂ ਚਿਤ੍ਤਸ੍ਸ ਵਸਂ ਅਗਨ੍ਤ੍ਵਾ ਕੁਸਨਰਿਨ੍ਦਂ ਪਟਿਚ੍ਚ ਲਦ੍ਧਂ ਅਤ੍ਤਨੋ ਰੂਪੇਨ ਸਦਿਸਂ ਚਾਰੁਦਸ੍ਸਨਂ ਕੁਮਾਰਂ ਅਜ੍ਜ ਧਾਰਯਿਸ੍ਸਸਿ. ਯਮਕ੍ਖਯਨ੍ਤਿ ਏਵਂ ਸਨ੍ਤੇ ਯਮਨਿਵੇਸਨਂ ਨ ਗਚ੍ਛੇਯ੍ਯਾਸਿ. ਤਤੋ ਯਮ੍ਹਿ ਖਤ੍ਤਿਯਕੁਲੇ ਅਯਂ ਵਿਭੂਤਿ, ਤਮ੍ਹਾ ਨਾਨਾਭੇਰਿਸਦ੍ਦੇਨ ਚੇਵ ਮਤ੍ਤਵਾਰਣਕੋਞ੍ਚਨਾਦੇਨ ਚ ਨਿਨ੍ਨਾਦਿਤਾ ਕੁਸਾਵਤੀਰਾਜਕੁਲਾ ਕਿਂ ਨੁ ਸੁਖਤਰਂ ਦਿਸ੍ਵਾ ਇਧਾਗਤਾਸੀਤਿ ਅਤ੍ਥੋ. ਸਿਸਤੀਤਿ ਹਸਤਿ. ਕੁਮਾਰੋਤਿ ਸੁਸਿਕ੍ਖਿਤੋ ਗਨ੍ਧਬ੍ਬਕੁਮਾਰੋ. ਉਪਰੋਦਤੀਤਿ ਨਾਨਾਤੂਰਿਯਾਨਿ ਗਹੇਤ੍ਵਾ ਉਪਹਾਰਂ ਕਰੋਤਿ. ਕੋਕਿਲਾਭਿਨਿਕੂਜਿਤੇਤਿ ਕੁਸਰਾਜਕੁਲੇ ਸਾਯਂ ਪਾਤੋ ਪਵਤ੍ਤਨਚ੍ਚਗੀਤਵਾਦਿਤੂਪਹਾਰਂ ਪਟਿਪ੍ਫਰਨ੍ਤੀ ਵਿਯ ਕੋਕਿਲੇਹਿ ਅਭਿਨਿਕੂਜਿਤੇ.

ਇਤਿ ਸਾਪਿ ਏਤ੍ਤਕਾਹਿ ਗਾਥਾਹਿ ਤਾਯ ਸਦ੍ਧਿਂ ਸਲ੍ਲਪਿਤ੍ਵਾ ‘‘ਸਚੇ ਅਜ੍ਜ ਕੁਸਨਰਿਨ੍ਦੋ ਇਧ ਅਸ੍ਸ, ਇਮੇ ਸਤ੍ਤ ਰਾਜਾਨੋ ਪਲਾਪੇਤ੍ਵਾ ਮਮ ਧੀਤਰਂ ਦੁਕ੍ਖਾ ਪਮੋਚੇਤ੍ਵਾ ਆਦਾਯ ਗਚ੍ਛੇਯ੍ਯਾ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੫੩.

‘‘ਕਹਂ ਨੁ ਖੋ ਸਤ੍ਤੁਮਦ੍ਦਨੋ, ਪਰਰਟ੍ਠਪ੍ਪਮਦ੍ਦਨੋ;

ਕੁਸੋ ਸੋਲ਼ਾਰਪਞ੍ਞਾਣੋ, ਯੋ ਨੋ ਦੁਕ੍ਖਾ ਪਮੋਚਯੇ’’ਤਿ.

ਤਤ੍ਥ ਸੋਲ਼ਾਰਪਞ੍ਞਾਣੋਤਿ ਉਲ਼ਾਰਪਞ੍ਞੋ.

ਤਤੋ ਪਭਾਵਤੀ ‘‘ਮਮ ਮਾਤੁ ਕੁਸਸ੍ਸ ਵਣ੍ਣਂ ਭਣਨ੍ਤਿਯਾ ਮੁਖਂ ਨਪ੍ਪਹੋਤਿ, ਆਚਿਕ੍ਖਿਸ੍ਸਾਮਿ ਤਾਵਸ੍ਸਾ ਤਸ੍ਸ ਇਧੇਵ ਆਲ਼ਾਰਿਕਕਮ੍ਮਂ ਕਤ੍ਵਾ ਵਸਨਭਾਵ’’ਨ੍ਤਿ ਚਿਨ੍ਤੇਤ੍ਵਾ ਗਾਥਮਾਹ –

੫੪.

‘‘ਇਧੇਵ ਸੋ ਸਤ੍ਤੁਮਦ੍ਦਨੋ, ਪਰਰਟ੍ਠਪ੍ਪਮਦ੍ਦਨੋ;

ਕੁਸੋ ਸੋਲ਼ਾਰਪਞ੍ਞਾਣੋ, ਯੋ ਤੇ ਸਬ੍ਬੇ ਵਧਿਸ੍ਸਤੀ’’ਤਿ.

ਅਥਸ੍ਸਾ ਮਾਤਾ ‘‘ਅਯਂ ਮਰਣਭਯਭੀਤਾ ਵਿਪ੍ਪਲਪਤੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੫੫.

‘‘ਉਮ੍ਮਤ੍ਤਿਕਾ ਨੁ ਭਣਸਿ, ਅਨ੍ਧਬਾਲਾ ਪਭਾਸਸਿ;

ਕੁਸੋ ਚੇ ਆਗਤੋ ਅਸ੍ਸ, ਕਿਂ ਨ ਜਾਨੇਮੁ ਤਂ ਮਯ’’ਨ੍ਤਿ.

ਤਤ੍ਥ ਅਨ੍ਧਬਾਲਾਤਿ ਸਮ੍ਮੂਲ਼੍ਹਾ ਅਞ੍ਞਾਣਾ ਹੁਤ੍ਵਾ. ਕਿਂ ਨ ਜਾਨੇਮੂਤਿ ਕੇਨ ਕਾਰਣੇਨ ਤਂ ਨ ਜਾਨੇਯ੍ਯਾਮ. ਸੋ ਹਿ ਅਨ੍ਤਰਾਮਗ੍ਗੇ ਠਿਤੋਵ ਅਮ੍ਹਾਕਂ ਸਾਸਨਂ ਪੇਸੇਯ੍ਯ, ਸਮੁਸ੍ਸਿਤਦ੍ਧਜਾ ਚਤੁਰਙ੍ਗਿਨੀਸੇਨਾ ਪਞ੍ਞਾਯੇਥ, ਤ੍ਵਂ ਪਨ ਮਰਣਭਯੇਨ ਕਥੇਸੀਤਿ.

ਸਾ ਏਵਂ ਵੁਤ੍ਤੇ ‘‘ਨ ਮੇ ਮਾਤਾ ਸਦ੍ਦਹਤਿ, ਤਸ੍ਸ ਇਧਾਗਨ੍ਤ੍ਵਾ ਸਤ੍ਤ ਮਾਸੇ ਵਸਨਭਾਵਂ ਨ ਜਾਨਾਤਿ, ਦਸ੍ਸੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਮਾਤਰਂ ਹਤ੍ਥੇ ਗਹੇਤ੍ਵਾ ਸੀਹਪਞ੍ਜਰਂ ਵਿਵਰਿਤ੍ਵਾ ਹਤ੍ਥਂ ਪਸਾਰੇਤ੍ਵਾ ਦਸ੍ਸੇਨ੍ਤੀ ਗਾਥਮਾਹ –

੫੬.

‘‘ਏਸੋ ਆਲ਼ਾਰਿਕੋ ਪੋਸੋ, ਕੁਮਾਰੀਪੁਰਮਨ੍ਤਰੇ;

ਦਲ਼੍ਹਂ ਕਤ੍ਵਾਨ ਸਂਵੇਲ੍ਲਿਂ, ਕੁਮ੍ਭਿਂ ਧੋਵਤਿ ਓਣਤੋ’’ਤਿ.

ਤਤ੍ਥ ਕੁਮਾਰੀਪੁਰਮਨ੍ਤਰੇਤਿ ਵਾਤਪਾਨੇ ਠਿਤਾ ਤਵ ਧੀਤਾਨਂ ਕੁਮਾਰੀਨਂ ਵਸਨਟ੍ਠਾਨਨ੍ਤਰੇ ਨਂ ਓਲੋਕੇਹਿ. ਸਂਵੇਲ੍ਲਿਨ੍ਤਿ ਕਚ੍ਛਂ ਬਨ੍ਧਿਤ੍ਵਾ ਕੁਮ੍ਭਿਂ ਧੋਵਤਿ.

ਸੋ ਕਿਰ ਤਦਾ ‘‘ਅਜ੍ਜ ਮੇ ਮਨੋਰਥੋ ਮਤ੍ਥਕਂ ਪਾਪੁਣਿਸ੍ਸਤਿ, ਅਦ੍ਧਾ ਮਰਣਭਯਤਜ੍ਜਿਤਾ, ਪਭਾਵਤੀ, ਮਮ ਆਗਤਭਾਵਂ ਕਥੇਸ੍ਸਤਿ, ਭਾਜਨਾਨਿ ਧੋਵਿਤ੍ਵਾ ਪਟਿਸਾਮੇਸ੍ਸਾਮੀ’’ਤਿ ਉਦਕਂ ਆਹਰਿਤ੍ਵਾ ਭਾਜਨਾਨਿ ਧੋਵਿਤੁਂ ਆਰਭਿ. ਅਥ ਨਂ ਮਾਤਾ ਪਰਿਭਾਸਨ੍ਤੀ ਗਾਥਮਾਹ –

੫੭.

‘‘ਵੇਣੀ ਤ੍ਵਮਸਿ ਚਣ੍ਡਾਲੀ, ਅਦੂਸਿ ਕੁਲਗਨ੍ਧਿਨੀ;

ਕਥਂ ਮਦ੍ਦਕੁਲੇ ਜਾਤਾ, ਦਾਸਂ ਕਯਿਰਾਸਿ ਕਾਮੁਕ’’ਨ੍ਤਿ.

ਤਤ੍ਥ ਵੇਣੀਤਿ ਤਚ੍ਛਿਕਾ. ਅਦੂਸਿ ਕੁਲਗਨ੍ਧਿਨੀਤਿ ਉਦਾਹੁ ਤ੍ਵਂ ਕੁਲਦੂਸਿਕਾ. ਕਾਮੁਕਨ੍ਤਿ ਕਥਂ ਨਾਮ ਤ੍ਵਂ ਏਵਰੂਪੇ ਕੁਲੇ ਜਾਤਾ ਅਤ੍ਤਨੋ ਸਾਮਿਕਂ ਦਾਸਂ ਕਰੇਯ੍ਯਾਸੀਤਿ.

ਤਤੋ ਪਭਾਵਤੀ ‘‘ਮਮ ਮਾਤਾ ਇਮਸ੍ਸ ਮਂ ਨਿਸ੍ਸਾਯ ਏਵਂ ਵਸਨਭਾਵਂ ਨ ਜਾਨਾਤਿ ਮਞ੍ਞੇ’’ਤਿ ਚਿਨ੍ਤੇਤ੍ਵਾ ਇਤਰਂ ਗਾਥਮਾਹ –

੫੮.

‘‘ਨਮ੍ਹਿ ਵੇਣੀ ਨ ਚਣ੍ਡਾਲੀ, ਨ ਚਮ੍ਹਿ ਕੁਲਗਨ੍ਧਿਨੀ;

ਓਕ੍ਕਾਕਪੁਤ੍ਤੋ ਭਦ੍ਦਨ੍ਤੇ, ਤ੍ਵਂ ਨੁ ਦਾਸੋਤਿ ਮਞ੍ਞਸੀ’’ਤਿ.

ਤਤ੍ਥ ਓਕ੍ਕਾਕਪੁਤ੍ਤੋਤਿ, ਅਮ੍ਮ, ਏਸ ਓਕ੍ਕਾਕਪੁਤ੍ਤੋ, ਤ੍ਵਂ ਪਨ ‘‘ਦਾਸੋ’’ਤਿ ਮਞ੍ਞਸਿ, ਕਸ੍ਮਾ ਨਂ ਅਹਂ ‘‘ਦਾਸੋ’’ਤਿ ਕਥੇਸ੍ਸਾਮੀਤਿ.

ਇਦਾਨਿਸ੍ਸ ਯਸਂ ਵਣ੍ਣੇਨ੍ਤੀ ਆਹ –

੫੯.

‘‘ਯੋ ਬ੍ਰਾਹ੍ਮਣਸਹਸ੍ਸਾਨਿ, ਸਦਾ ਭੋਜੇਤਿ ਵੀਸਤਿਂ;

ਓਕ੍ਕਾਕਪੁਤ੍ਤੋ ਭਦ੍ਦਨ੍ਤੇ, ਤ੍ਵਂ ਨੁ ਦਾਸੋਤਿ ਮਞ੍ਞਸਿ.

੬੦.

ਯਸ੍ਸ ਨਾਗਸਹਸ੍ਸਾਨਿ, ਸਦਾ ਯੋਜੇਨ੍ਤਿ ਵੀਸਤਿਂ;

ਓਕ੍ਕਾਕਪੁਤ੍ਤੋ ਭਦ੍ਦਨ੍ਤੇ, ਤ੍ਵਂ ਨੁ ਦਾਸੋਤਿ ਮਞ੍ਞਸਿ.

੬੧.

‘‘ਯਸ੍ਸ ਅਸ੍ਸਸਹਸ੍ਸਾਨਿ, ਸਦਾ ਯੋਜੇਨ੍ਤਿ ਵੀਸਤਿਂ;

ਓਕ੍ਕਾਕਪੁਤ੍ਤੋ ਭਦ੍ਦਨ੍ਤੇ, ਤ੍ਵਂ ਨੁ ਦਾਸੋਤਿ ਮਞ੍ਞਸਿ.

੬੨.

‘‘ਯਸ੍ਸ ਰਥਸਹਸ੍ਸਾਨਿ, ਸਦਾ ਯੋਜੇਨ੍ਤਿ ਵੀਸਤਿਂ;

ਓਕ੍ਕਾਕਪੁਤ੍ਤੋ ਭਦ੍ਦਨ੍ਤੇ, ਤ੍ਵਂ ਨੁ ਦਾਸੋਤਿ ਮਞ੍ਞਸਿ;

ਯਸ੍ਸ ਉਸਭਸਹਸ੍ਸਾਨਿ, ਸਦਾ ਯੋਜੇਨ੍ਤਿ ਵੀਸਤਿਂ;

ਓਕ੍ਕਾਕਪੁਤ੍ਤੋ ਭਦ੍ਦਨ੍ਤੇ, ਤ੍ਵਂ ਨੁ ਦਾਸੋਤਿ ਮਞ੍ਞਸਿ.

੬੩.

‘‘ਯਸ੍ਸ ਧੇਨੁਸਹਸ੍ਸਾਨਿ, ਸਦਾ ਦੁਹਨ੍ਤਿ ਵੀਸਤਿਂ;

ਓਕ੍ਕਾਕਪੁਤ੍ਤੋ ਭਦ੍ਦਨ੍ਤੇ, ਤ੍ਵਂ ਨੁ ਦਾਸੋਤਿ ਮਞ੍ਞਸੀ’’ਤਿ.

ਏਵਂ ਤਾਯ ਪਞ੍ਚਹਿ ਗਾਥਾਹਿ ਮਹਾਸਤ੍ਤਸ੍ਸ ਯਸੋ ਵਣ੍ਣਿਤੋ. ਅਥਸ੍ਸਾ ਮਾਤਾ ‘‘ਅਯਂ ਅਸਮ੍ਭਿਤਾ ਕਥਂ ਕਥੇਤਿ, ਅਦ੍ਧਾ ਏਵਮੇਤ’’ਨ੍ਤਿ ਸਦ੍ਦਹਿਤ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸਿ. ਸੋ ਵੇਗੇਨ ਪਭਾਵਤਿਯਾ ਸਨ੍ਤਿਕਂ ਗਨ੍ਤ੍ਵਾ ‘‘ਸਚ੍ਚਂ ਕਿਰ, ਅਮ੍ਮ, ਕੁਸਰਾਜਾ ਇਧਾਗਤੋ’’ਤਿ. ‘‘ਆਮ ਤਾਤ, ਅਜ੍ਜਸ੍ਸ ਸਤ੍ਤ ਮਾਸਾ ਅਤਿਕ੍ਕਨ੍ਤਾ ਤਵ ਧੀਤਾਨਂ ਆਲ਼ਾਰਿਕਤ੍ਤਂ ਕਰੋਨ੍ਤਸ੍ਸਾ’’ਤਿ. ਸੋ ਤਸ੍ਸਾ ਅਸਦ੍ਦਹਨ੍ਤੋ ਖੁਜ੍ਜਂ ਪੁਚ੍ਛਿਤ੍ਵਾ ਯਥਾਭੂਤਂ ਸੁਤ੍ਵਾ ਧੀਤਰਂ ਗਰਹਨ੍ਤੋ ਗਾਥਮਾਹ –

੬੪.

‘‘ਤਗ੍ਘ ਤੇ ਦੁਕ੍ਕਟਂ ਬਾਲੇ, ਯਂ ਖਤ੍ਤਿਯਂ ਮਹਬ੍ਬਲਂ;

ਨਾਗਂ ਮਣ੍ਡੂਕਵਣ੍ਣੇਨ, ਨ ਤਂ ਅਕ੍ਖਾਸਿਧਾਗਤ’’ਨ੍ਤਿ.

ਤਤ੍ਥ ਤਗ੍ਘਾਤਿ ਏਕਂਸੇਨੇਵ.

ਸੋ ਧੀਤਰਂ ਗਰਹਿਤ੍ਵਾ ਵੇਗੇਨ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਕਤਪਟਿਸਨ੍ਥਾਰੋ ਅਞ੍ਜਲਿਂ ਪਗ੍ਗਯ੍ਹ ਅਤ੍ਤਨੋ ਅਚ੍ਚਯਂ ਦਸ੍ਸੇਨ੍ਤੋ ਗਾਥਮਾਹ –

੬੫.

‘‘ਅਪਰਾਧਂ ਮਹਾਰਾਜ, ਤ੍ਵਂ ਨੋ ਖਮ ਰਥੇਸਭ;

ਯਂ ਤਂ ਅਞ੍ਞਾਤਵੇਸੇਨ, ਨਾਞ੍ਞਾਸਿਮ੍ਹਾ ਇਧਾਗਤ’’ਨ੍ਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਸਚਾਹਂ ਫਰੁਸਂ ਵਕ੍ਖਾਮਿ, ਇਧੇਵਸ੍ਸ ਹਦਯਂ ਫਲਿਸ੍ਸਤਿ, ਅਸ੍ਸਾਸੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਭਾਜਨਨ੍ਤਰੇ ਠਿਤੋਵ ਇਤਰਂ ਗਾਥਮਾਹ –

੬੬.

‘‘ਮਾਦਿਸਸ੍ਸ ਨ ਤਂ ਛਨ੍ਨਂ, ਯੋਹਂ ਆਲ਼ਾਰਿਕੋ ਭਵੇ;

ਤ੍ਵਞ੍ਞੇਵ ਮੇ ਪਸੀਦਸ੍ਸੁ, ਨਤ੍ਥਿ ਤੇ ਦੇਵ ਦੁਕ੍ਕਟ’’ਨ੍ਤਿ.

ਰਾਜਾ ਤਸ੍ਸ ਸਨ੍ਤਿਕਾ ਪਟਿਸਨ੍ਥਾਰਂ ਲਭਿਤ੍ਵਾ ਪਾਸਾਦਂ ਅਭਿਰੁਹਿਤ੍ਵਾ ਪਭਾਵਤਿਂ ਪਕ੍ਕੋਸਾਪੇਤ੍ਵਾ ਖਮਾਪਨਤ੍ਥਾਯ ਪੇਸੇਤੁਂ ਗਾਥਮਾਹ –

੬੭.

‘‘ਗਚ੍ਛ ਬਾਲੇ ਖਮਾਪੇਹਿ, ਕੁਸਰਾਜਂ ਮਹਬ੍ਬਲਂ;

ਖਮਾਪਿਤੋ ਕੁਸੋ ਰਾਜਾ, ਸੋ ਤੇ ਦਸ੍ਸਤਿ ਜੀਵਿਤ’’ਨ੍ਤਿ.

ਸਾ ਪਿਤੁ ਵਚਨਂ ਸੁਤ੍ਵਾ ਭਗਿਨੀਹਿ ਚੇਵ ਪਰਿਚਾਰਿਕਾਹਿ ਚ ਪਰਿਵੁਤਾ ਤਸ੍ਸ ਸਨ੍ਤਿਕਂ ਅਗਮਾਸਿ. ਸੋਪਿ ਕਮ੍ਮਕਾਰਵੇਸੇਨ ਠਿਤੋਵ ਤਸ੍ਸਾ ਅਤ੍ਤਨੋ ਸਨ੍ਤਿਕਂ ਆਗਮਨਂ ਞਤ੍ਵਾ ‘‘ਅਜ੍ਜ ਪਭਾਵਤਿਯਾ ਮਾਨਂ ਭਿਨ੍ਦਿਤ੍ਵਾ ਪਾਦਮੂਲੇ ਨਂ ਕਲਲੇ ਨਿਪਜ੍ਜਾਪੇਸ੍ਸਾਮੀ’’ਤਿ ਸਬ੍ਬਂ ਅਤ੍ਤਨਾ ਆਭਤਂ ਉਦਕਂ ਛਡ੍ਡੇਤ੍ਵਾ ਖਲਮਣ੍ਡਲਮਤ੍ਤਂ ਠਾਨਂ ਮਦ੍ਦਿਤ੍ਵਾ ਏਕਕਲਲਂ ਅਕਾਸਿ. ਸਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸ ਪਾਦੇਸੁ ਨਿਪਤਿਤ੍ਵਾ ਕਲਲਪਿਟ੍ਠੇ ਨਿਪਨ੍ਨਾ ਤਂ ਖਮਾਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੬੮.

‘‘ਪਿਤੁਸ੍ਸ ਵਚਨਂ ਸੁਤ੍ਵਾ, ਦੇਵਵਣ੍ਣੀ ਪਭਾਵਤੀ;

ਸਿਰਸਾ ਅਗ੍ਗਹੀ ਪਾਦੇ, ਕੁਸਰਾਜਂ ਮਹਬ੍ਬਲ’’ਨ੍ਤਿ.

ਤਤ੍ਥ ਸਿਰਸਾਤਿ ਸਿਰਸਾ ਨਿਪਤਿਤ੍ਵਾ ਕੁਸਰਾਜਾਨਂ ਪਾਦੇ ਅਗ੍ਗਹੇਸੀਤਿ.

ਗਹੇਤ੍ਵਾ ਚ ਪਨ ਨਂ ਖਮਾਪੇਨ੍ਤੀ ਤਿਸ੍ਸੋ ਗਾਥਾਯੋ ਅਭਾਸਿ –

੬੯.

‘‘ਯਾਮਾ ਰਤ੍ਯੋ ਅਤਿਕ੍ਕਨ੍ਤਾ, ਤਾਮਾ ਦੇਵ ਤਯਾ ਵਿਨਾ;

ਵਨ੍ਦੇ ਤੇ ਸਿਰਸਾ ਪਾਦੇ, ਮਾ ਮੇ ਕੁਜ੍ਝ ਰਥੇਸਭ.

੭੦.

‘‘ਸਬ੍ਬਂ ਤੇ ਪਟਿਜਾਨਾਮਿ, ਮਹਾਰਾਜ ਸੁਣੋਹਿ ਮੇ;

ਨ ਚਾਪਿ ਅਪ੍ਪਿਯਂ ਤੁਯ੍ਹਂ, ਕਰੇਯ੍ਯਾਮਿ ਅਹਂ ਪੁਨ.

੭੧.

‘‘ਏਵਂ ਚੇ ਯਾਚਮਾਨਾਯ, ਵਚਨਂ ਮੇ ਨ ਕਾਹਸਿ;

ਇਦਾਨਿ ਮਂ ਤਾਤੋ ਹਨ੍ਤ੍ਵਾ, ਖਤ੍ਤਿਯਾਨਂ ਪਦਸ੍ਸਤੀ’’ਤਿ.

ਤਤ੍ਥ ਰਤ੍ਯੋਤਿ ਰਤ੍ਤਿਯੋ. ਤਾਮਾਤਿ ਤਾ ਇਮਾ ਸਬ੍ਬਾਪਿ ਤਯਾ ਵਿਨਾ ਅਤਿਕ੍ਕਨ੍ਤਾ. ਸਬ੍ਬਂ ਤੇ ਪਟਿਜਾਨਾਮੀਤਿ, ਮਹਾਰਾਜ, ਏਤ੍ਤਕਂ ਕਾਲਂ ਮਯਾ ਤਵ ਅਪ੍ਪਿਯਮੇਵ ਕਤਂ, ਇਦਂ ਤੇ ਅਹਂ ਸਬ੍ਬਂ ਪਟਿਜਾਨਾਮਿ, ਅਪਰਮ੍ਪਿ ਸੁਣੋਹਿ ਮੇ, ਇਤੋ ਪਟ੍ਠਾਯਾਹਂ ਪੁਨ ਤੁਯ੍ਹਂ ਅਪ੍ਪਿਯਂ ਨ ਕਰਿਸ੍ਸਾਮਿ. ਏਵਂ ਚੇਤਿ ਸਚੇ ਏਵਂ ਯਾਚਮਾਨਾਯ ਮਮ ਤ੍ਵਂ ਵਚਨਂ ਨ ਕਰਿਸ੍ਸਸੀਤਿ.

ਤਂ ਸੁਤ੍ਵਾ ਰਾਜਾ ‘‘ਸਚਾਹਂ ‘ਇਮਂ ਤ੍ਵਞ੍ਚੇਵ ਜਾਨਿਸ੍ਸਸੀ’ਤਿ ਵਕ੍ਖਾਮਿ, ਹਦਯਮਸ੍ਸਾ ਫਲਿਸ੍ਸਤਿ, ਅਸ੍ਸਾਸੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਆਹ –

੭੨.

‘‘ਏਵਂ ਤੇ ਯਾਚਮਾਨਾਯ, ਕਿਂ ਨ ਕਾਹਾਮਿ ਤੇ ਵਚੋ;

ਵਿਕੁਦ੍ਧੋ ਤ੍ਯਸ੍ਮਿ ਕਲ੍ਯਾਣਿ, ਮਾ ਤ੍ਵਂ ਭਾਯਿ ਪਭਾਵਤਿ.

੭੩.

‘‘ਸਬ੍ਬਂ ਤੇ ਪਟਿਜਾਨਾਮਿ, ਰਾਜਪੁਤ੍ਤਿ ਸੁਣੋਹਿ ਮੇ;

ਨ ਚਾਪਿ ਅਪ੍ਪਿਯਂ ਤੁਯ੍ਹਂ, ਕਰੇਯ੍ਯਾਮਿ ਅਹਂ ਪੁਨ.

੭੪.

‘‘ਤਵ ਕਾਮਾ ਹਿ ਸੁਸ੍ਸੋਣਿ, ਪਹੁ ਦੁਕ੍ਖਂ ਤਿਤਿਕ੍ਖਿਸਂ;

ਬਹੁਂ ਮਦ੍ਦਕੁਲਂ ਹਨ੍ਤ੍ਵਾ, ਨਯਿਤੁਂ ਤਂ ਪਭਾਵਤੀ’’ਤਿ.

ਤਤ੍ਥ ਕਿਂ ਨ ਕਾਹਾਮੀਤਿ ਕਿਂਕਾਰਣਾ ਤਵ ਵਚਨਂ ਨ ਕਰਿਸ੍ਸਾਮਿ. ਵਿਕੁਦ੍ਧੋ ਤ੍ਯਸ੍ਮੀਤਿ ਵਿਕੁਦ੍ਧੋ ਨਿਕ੍ਕੋਪੋ ਤੇ ਅਸ੍ਮਿਂ. ਸਬ੍ਬਂ ਤੇਤਿ ਵਿਕੁਦ੍ਧਭਾਵਞ੍ਚ ਇਦਾਨਿ ਅਪ੍ਪਿਯਕਰਣਞ੍ਚ ਉਭਯਂ ਤੇ ਇਦਂ ਸਬ੍ਬਮੇਵ ਪਟਿਜਾਨਾਮਿ. ਤਵ ਕਾਮਾਤਿ ਤਵ ਕਾਮੇਨ ਤਂ ਇਚ੍ਛਮਾਨੋ. ਤਿਤਿਕ੍ਖਿਸਨ੍ਤਿ ਅਧਿਵਾਸੇਮਿ. ਬਹੁਂ ਮਦ੍ਦਕੁਲਂ ਹਨ੍ਤ੍ਵਾ ਨਯਿਤੁਂ ਤਨ੍ਤਿ ਬਹੁਮਦ੍ਦਰਾਜਕੁਲਂ ਹਨਿਤ੍ਵਾ ਬਲਕ੍ਕਾਰੇਨ ਤਂ ਨੇਤੁਂ ਸਮਤ੍ਥੋਤਿ.

ਅਥ ਸੋ ਸਕ੍ਕਸ੍ਸ ਦੇਵਰਞ੍ਞੋ ਪਰਿਚਾਰਿਕਂ ਵਿਯ ਤਂ ਅਤ੍ਤਨੋ ਪਰਿਚਾਰਿਕਂ ਦਿਸ੍ਵਾ ਖਤ੍ਤਿਯਮਾਨਂ ਉਪ੍ਪਾਦੇਤ੍ਵਾ ‘‘ਮਯਿ ਕਿਰ ਧਰਮਾਨੇਯੇਵ ਮਮ ਭਰਿਯਂ ਅਞ੍ਞੇ ਗਹੇਤ੍ਵਾ ਗਮਿਸ੍ਸਨ੍ਤੀ’’ਤਿ ਸੀਹੋ ਵਿਯ ਰਾਜਙ੍ਗਣੇ ਵਿਜਮ੍ਭਮਾਨੋ ‘‘ਸਕਲਨਗਰਵਾਸਿਨੋ ਮੇ ਆਗਤਭਾਵਂ ਜਾਨਨ੍ਤੂ’’ਤਿ ਵਗ੍ਗਨ੍ਤੋ ਨਦਨ੍ਤੋ ਸੇਲ਼ੇਨ੍ਤੋ ਅਪ੍ਫੋਟੇਨ੍ਤੋ ‘‘ਇਦਾਨਿ ਤੇ ਜੀਵਗ੍ਗਾਹਂ ਗਹੇਸ੍ਸਾਮਿ, ਰਥਾਦਯੋ ਮੇ ਯੋਜੇਨ੍ਤੂ’’ਤਿ ਅਨਨ੍ਤਰਂ ਗਾਥਮਾਹ –

੭੫.

‘‘ਯੋਜਯਨ੍ਤੁ ਰਥੇ ਅਸ੍ਸੇ, ਨਾਨਾਚਿਤ੍ਤੇ ਸਮਾਹਿਤੇ;

ਅਥ ਦਕ੍ਖਥ ਮੇ ਵੇਗਂ, ਵਿਧਮਨ੍ਤਸ੍ਸ ਸਤ੍ਤਵੋ’’ਤਿ.

ਤਤ੍ਥ ਨਾਨਾਚਿਤ੍ਤੇਤਿ ਨਾਨਾਲਙ੍ਕਾਰਵਿਚਿਤ੍ਤੇ. ਸਮਾਹਿਤੇਤਿ ਅਸ੍ਸੇ ਸਨ੍ਧਾਯ ਵੁਤ੍ਤਂ, ਸੁਸਿਕ੍ਖਿਤੇ ਨਿਬ੍ਬਿਸੇਵਨੇਤਿ ਅਤ੍ਥੋ. ਅਥ ਦਕ੍ਖਥ ਮੇ ਵੇਗਨ੍ਤਿ ਅਥ ਮੇ ਪਰਕ੍ਕਮਂ ਪਸ੍ਸਿਸ੍ਸਥਾਤਿ.

ਸਤ੍ਤੂਨਂ ਗਣ੍ਹਨਂ ਨਾਮ ਮਯ੍ਹਂ ਭਾਰੋ, ਗਚ੍ਛ ਤ੍ਵਂ ਨ੍ਹਤ੍ਵਾ ਅਲਙ੍ਕਰਿਤ੍ਵਾ ਪਾਸਾਦਂ ਆਰੁਹਾਤਿ ਤਂ ਉਯ੍ਯੋਜੇਸਿ. ਮਦ੍ਦਰਾਜਾਪਿਸ੍ਸ ਪਰਿਹਾਰਕਰਣਤ੍ਥਂ ਅਮਚ੍ਚੇ ਪਹਿਣਿ. ਤੇ ਤਸ੍ਸ ਮਹਾਨਸਦ੍ਵਾਰੇਯੇਵ ਸਾਣਿਂ ਪਰਿਕ੍ਖਿਪਿਤ੍ਵਾ ਕਪ੍ਪਕੇ ਉਪਟ੍ਠਪੇਸੁਂ. ਸੋ ਕਤਮਸ੍ਸੁਕਮ੍ਮੋ ਸੀਸਂਨ੍ਹਾਤੋ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਅਮਚ੍ਚਾਦੀਹਿ ਪਰਿਵੁਤੋ ‘‘ਪਾਸਾਦਂ ਅਭਿਰੁਹਿਸ੍ਸਾਮੀ’’ਤਿ ਦਿਸਾ ਵਿਲੋਕੇਤ੍ਵਾ ਅਪ੍ਫੋਟੇਸਿ. ਓਲੋਕਿਤਓਲੋਕਿਤਟ੍ਠਾਨਂ ਵਿਕਮ੍ਪਿ. ਸੋ ‘‘ਇਦਾਨਿ ਮੇ ਪਰਕ੍ਕਮਂ ਪਸ੍ਸਿਸ੍ਸਥਾ’’ਤਿ ਆਹ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਅਨਨ੍ਤਰਂ ਗਾਥਮਾਹ –

੭੬.

‘‘ਤਞ੍ਚ ਤਤ੍ਥ ਉਦਿਕ੍ਖਿਂਸੁ, ਰਞ੍ਞੋ ਮਦ੍ਦਸ੍ਸਨ੍ਤੇਪੁਰੇ;

ਵਿਜਮ੍ਭਮਾਨਂ ਸੀਹਂਵ, ਫੋਟੇਨ੍ਤਂ ਦਿਗੁਣਂ ਭੁਜ’’ਨ੍ਤਿ.

ਤਸ੍ਸਤ੍ਥੋ – ਤਞ੍ਚ ਤਤ੍ਥ ਵਿਜਮ੍ਭਨ੍ਤਂ ਅਪ੍ਫੋਟੇਨ੍ਤਂ ਰਞ੍ਞੋ ਅਨ੍ਤੇਪੁਰੇ ਵਾਤਪਾਨਾਨਿ ਵਿਵਰਿਤ੍ਵਾ ਇਤ੍ਥਿਯੋ ਉਦਿਕ੍ਖਿਂਸੂਤਿ.

ਅਥਸ੍ਸ ਮਦ੍ਦਰਾਜਾ ਕਤਆਨੇਞ੍ਜਕਾਰਣਂ ਅਲਙ੍ਕਤਵਰਵਾਰਣਂ ਪੇਸੇਸਿ. ਸੋ ਸਮੁਸ੍ਸਿਤਸੇਤਚ੍ਛਤ੍ਤਂ ਹਤ੍ਥਿਕ੍ਖਨ੍ਧਂ ਆਰੁਯ੍ਹ ‘‘ਪਭਾਵਤਿਂ ਆਨੇਥਾ’’ਤਿ ਤਮ੍ਪਿ ਪਚ੍ਛਤੋ ਨਿਸੀਦਾਪੇਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਪਰਿਵੁਤੋ ਪਾਚੀਨਦ੍ਵਾਰੇਨ ਨਿਕ੍ਖਮਿਤ੍ਵਾ ਪਰਸੇਨਂ ਓਲੋਕੇਤ੍ਵਾ ‘‘ਅਹਂ ਕੁਸਰਾਜਾ, ਜੀਵਿਤਤ੍ਥਿਕਾ ਉਰੇਨ ਨਿਪਜ੍ਜਨ੍ਤੂ’’ਤਿ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿਤ੍ਵਾ ਸਤ੍ਤੁਮਦ੍ਦਨਂ ਅਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੭੭.

‘‘ਹਤ੍ਥਿਕ੍ਖਨ੍ਧਞ੍ਚ ਆਰੁਯ੍ਹ, ਆਰੋਪੇਤ੍ਵਾ ਪਭਾਵਤਿਂ;

ਸਙ੍ਗਾਮਂ ਓਤਰਿਤ੍ਵਾਨ, ਸੀਹਨਾਦਂ ਨਦੀ ਕੁਸੋ.

੭੮.

‘‘ਤਸ੍ਸ ਤਂ ਨਦਤੋ ਸੁਤ੍ਵਾ, ਸੀਹਸ੍ਸੇਵਿਤਰੇ ਮਿਗਾ;

ਖਤ੍ਤਿਯਾ ਵਿਪਲਾਯਿਂਸੁ, ਕੁਸਸਦ੍ਦਭਯਟ੍ਟਿਤਾ.

੭੯.

‘‘ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਅਞ੍ਞਮਞ੍ਞਸ੍ਸ ਛਿਨ੍ਦਨ੍ਤਿ, ਕੁਸਸਦ੍ਦਭਯਟ੍ਟਿਤਾ.

੮੦.

‘‘ਤਸ੍ਮਿਂ ਸਙ੍ਗਾਮਸੀਸਸ੍ਮਿਂ, ਪਸ੍ਸਿਤ੍ਵਾ ਹਟ੍ਠਮਾਨਸੋ;

ਕੁਸਸ੍ਸ ਰਞ੍ਞੋ ਦੇਵਿਨ੍ਦੋ, ਅਦਾ ਵੇਰੋਚਨਂ ਮਣਿਂ.

੮੧.

‘‘ਸੋ ਤਂ ਵਿਜ੍ਝਿਤ੍ਵਾ ਸਙ੍ਗਾਮਂ, ਲਦ੍ਧਾ ਵੇਰੋਚਨਂ ਮਣਿਂ;

ਹਤ੍ਥਿਕ੍ਖਨ੍ਧਗਤੋ ਰਾਜਾ, ਪਾਵੇਕ੍ਖਿ ਨਗਰਂ ਪੁਰਂ.

੮੨.

‘‘ਜੀਵਗ੍ਗਾਹਂ ਗਹੇਤ੍ਵਾਨ, ਬਨ੍ਧਿਤ੍ਵਾ ਸਤ੍ਤ ਖਤ੍ਤਿਯੇ;

ਸਸੁਰਸ੍ਸੂਪਨਾਮੇਸਿ, ਇਮੇ ਤੇ ਦੇਵ ਸਤ੍ਤਵੋ.

੮੩.

‘‘ਸਬ੍ਬੇਵ ਤੇ ਵਸਂ ਗਤਾ, ਅਮਿਤ੍ਤਾ ਵਿਹਤਾ ਤਵ;

ਕਾਮਂ ਕਰੋਹਿ ਤੇ ਤਯਾ, ਮੁਞ੍ਚ ਵਾ ਤੇ ਹਨਸ੍ਸੁ ਵਾ’’ਤਿ.

ਤਤ੍ਥ ਵਿਪਲਾਯਿਂਸੂਤਿ ਸਤਿਂ ਪਚ੍ਚੁਪਟ੍ਠਾਪੇਤੁਂ ਅਸਕ੍ਕੋਨ੍ਤਾ ਵਿਪਲ੍ਲਤ੍ਥਚਿਤ੍ਤਾ ਭਿਜ੍ਜਿਂਸੁ. ਕੁਸਸਦ੍ਦਭਯਟ੍ਟਿਤਾਤਿ ਕੁਸਰਞ੍ਞੋ ਸਦ੍ਦਂ ਨਿਸ੍ਸਾਯ ਜਾਤੇਨ ਭਯੇਨ ਉਪਦ੍ਦੁਤਾ ਮੂਲ਼੍ਹਚਿਤ੍ਤਾ. ਅਞ੍ਞਮਞ੍ਞਸ੍ਸ ਛਿਨ੍ਦਨ੍ਤੀਤਿ ਅਞ੍ਞਮਞ੍ਞਂ ਛਿਨ੍ਦਨ੍ਤਿ ਮਦ੍ਦਨ੍ਤਿ. ‘‘ਭਿਨ੍ਦਿਂਸੂ’’ਤਿਪਿ ਪਾਠੋ. ਤਸ੍ਮਿਨ੍ਤਿ ਏਵਂ ਬੋਧਿਸਤ੍ਤਸ੍ਸ ਸਦ੍ਦਸਵਨੇਨੇਵ ਸਙ੍ਗਾਮੇ ਭਿਨ੍ਨੇ ਤਸ੍ਮਿਂ ਸਙ੍ਗਾਮਸੀਸੇ ਤਂ ਮਹਾਸਤ੍ਤਸ੍ਸ ਪਰਕ੍ਕਮਂ ਪਸ੍ਸਿਤ੍ਵਾ ਤੁਟ੍ਠਹਦਯੋ ਸਕ੍ਕੋ ਵੇਰੋਚਨਂ ਨਾਮ ਮਣਿਕ੍ਖਨ੍ਧਂ ਤਸ੍ਸ ਅਦਾਸਿ. ਨਗਰਂ ਪੁਰਨ੍ਤਿ ਨਗਰਸਙ੍ਖਾਤਂ ਪੁਰਂ. ਬਨ੍ਧਿਤ੍ਵਾਤਿ ਤੇਸਞ੍ਞੇਵ ਉਤ੍ਤਰਿ ਸਾਟਕੇਨ ਪਚ੍ਛਾਬਾਹਂ ਬਨ੍ਧਿਤ੍ਵਾ. ਕਾਮਂ ਕਰੋਹਿ ਤੇ ਤਯਾਤਿ ਤ੍ਵਂ ਅਤ੍ਤਨੋ ਕਾਮਂ ਇਚ੍ਛਂ ਰੁਚਿਂ ਕਰੋਹਿ, ਏਤੇ ਹਿ ਤਯਾ ਦਾਸਾ ਕਤਾਯੇਵਾਤਿ.

ਰਾਜਾ ਆਹ –

੮੪.

‘‘ਤੁਯ੍ਹੇਵ ਸਤ੍ਤਵੋ ਏਤੇ, ਨ ਹਿ ਤੇ ਮਯ੍ਹ ਸਤ੍ਤਵੋ;

ਤ੍ਵਞ੍ਞੇਵ ਨੋ ਮਹਾਰਾਜ, ਮੁਞ੍ਚ ਵਾ ਤੇ ਹਨਸ੍ਸੁ ਵਾ’’ਤਿ.

ਤਤ੍ਥ ਤ੍ਵਞ੍ਞੇਵ ਨੋਤਿ, ਮਹਾਰਾਜ, ਤ੍ਵਂਯੇਵ ਅਮ੍ਹਾਕਂ ਇਸ੍ਸਰੋਤਿ.

ਏਵਂ ਵੁਤ੍ਤੇ ਮਹਾਸਤ੍ਤੋ ‘‘ਕਿਂ ਇਮੇਹਿ ਮਾਰਿਤੇਹਿ, ਮਾ ਤੇਸਂ ਆਗਮਨਂ ਨਿਰਤ੍ਥਕਂ ਹੋਤੁ, ਪਭਾਵਤਿਯਾ ਕਨਿਟ੍ਠਾ ਸਤ੍ਤ ਮਦ੍ਦਰਾਜਧੀਤਰੋ ਅਤ੍ਥਿ, ਤਾ ਨੇਸਂ ਦਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੮੫.

‘‘ਇਮਾ ਤੇ ਧੀਤਰੋ ਸਤ੍ਤ, ਦੇਵਕਞ੍ਞੂਪਮਾ ਸੁਭਾ;

ਦਦਾਹਿ ਨੇਸਂ ਏਕੇਕਂ, ਹੋਨ੍ਤੁ ਜਾਮਾਤਰੋ ਤਵਾ’’ਤਿ.

ਅਥ ਨਂ ਰਾਜਾ ਆਹ –

੮੬.

‘‘ਅਮ੍ਹਾਕਞ੍ਚੇਵ ਤਾਸਞ੍ਚ, ਤ੍ਵਂ ਨੋ ਸਬ੍ਬੇਸਮਿਸ੍ਸਰੋ;

ਤ੍ਵਞ੍ਞੇਵ ਨੋ ਮਹਾਰਾਜ, ਦੇਹਿ ਨੇਸਂ ਯਦਿਚ੍ਛਸੀ’’ਤਿ.

ਤਤ੍ਥ ਤ੍ਵਂ ਨੋ ਸਬ੍ਬੇਸਨ੍ਤਿ, ਮਹਾਰਾਜ ਕੁਸਨਰਿਨ੍ਦ, ਕਿਂ ਵਦੇਸਿ, ਤ੍ਵਞ੍ਞੇਵ ਏਤੇਸਞ੍ਚ ਸਤ੍ਤਨ੍ਨਂ ਰਾਜੂਨਂ ਮਮਞ੍ਚ ਇਮਾਸਞ੍ਚ ਸਬ੍ਬੇਸਂ ਨੋ ਇਸ੍ਸਰੋ. ਯਦਿਚ੍ਛਸੀਤਿ ਯਦਿ ਇਚ੍ਛਸਿ, ਯਸ੍ਸ ਵਾ ਯਂ ਦਾਤੁਂ ਇਚ੍ਛਸਿ, ਤਸ੍ਸ ਤਂ ਦੇਹੀਤਿ.

ਏਵਂ ਵੁਤ੍ਤੇ ਸੋ ਤਾ ਸਬ੍ਬਾਪਿ ਅਲਙ੍ਕਾਰਾਪੇਤ੍ਵਾ ਏਕੇਕਸ੍ਸ ਰਞ੍ਞੋ ਏਕੇਕਂ ਅਦਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਪਞ੍ਚ ਗਾਥਾਯੋ ਅਭਾਸਿ –

੮੭.

‘‘ਏਕਮੇਕਸ੍ਸ ਏਕੇਕਂ, ਅਦਾ ਸੀਹਸ੍ਸਰੋ ਕੁਸੋ;

ਖਤ੍ਤਿਯਾਨਂ ਤਦਾ ਤੇਸਂ, ਰਞ੍ਞੋ ਮਦ੍ਦਸ੍ਸ ਧੀਤਰੋ.

੮੮.

‘‘ਪੀਣਿਤਾ ਤੇਨ ਲਾਭੇਨ, ਤੁਟ੍ਠਾ ਸੀਹਸ੍ਸਰੇ ਕੁਸੇ;

ਸਕਰਟ੍ਠਾਨਿ ਪਾਯਿਂਸੁ, ਖਤ੍ਤਿਯਾ ਸਤ੍ਤ ਤਾਵਦੇ.

੮੯.

‘‘ਪਭਾਵਤਿਞ੍ਚ ਆਦਾਯ, ਮਣਿਂ ਵੇਰੋਚਨਂ ਸੁਭਂ;

ਕੁਸਾਵਤਿਂ ਕੁਸੋ ਰਾਜਾ, ਅਗਮਾਸਿ ਮਹਬ੍ਬਲੋ.

੯੦.

‘‘ਤ੍ਯਸ੍ਸੁ ਏਕਰਥੇ ਯਨ੍ਤਾ, ਪਵਿਸਨ੍ਤਾ ਕੁਸਾਵਤਿਂ;

ਸਮਾਨਾ ਵਣ੍ਣਰੂਪੇਨ, ਨਾਞ੍ਞਮਞ੍ਞਾਤਿਰੋਚਿਸੁਂ.

੯੧.

‘‘ਮਾਤਾ ਪੁਤ੍ਤੇਨ ਸਂਗਚ੍ਛਿ, ਉਭਯੋ ਚ ਜਯਮ੍ਪਤੀ;

ਸਮਗ੍ਗਾ ਤੇ ਤਦਾ ਆਸੁਂ, ਫੀਤਂ ਧਰਣਿਮਾਵਸੁ’’ਨ੍ਤਿ.

ਤਤ੍ਥ ਪੀਣਿਤਾਤਿ ਸਨ੍ਤਪ੍ਪਿਤਾ. ਪਾਯਿਂਸੂਤਿ ਇਦਾਨਿ ਅਪ੍ਪਮਤ੍ਤਾ ਭਵੇਯ੍ਯਾਥਾਤਿ ਕੁਸਨਰਿਨ੍ਦੇਨ ਓਵਦਿਤਾ ਅਗਮਂਸੁ. ਅਗਮਾਸੀਤਿ ਕਤਿਪਾਹਂ ਵਸਿਤ੍ਵਾ ‘‘ਅਮ੍ਹਾਕਂ ਰਟ੍ਠਂ ਗਮਿਸ੍ਸਾਮਾ’’ਤਿ ਸਸੁਰਂ ਆਪੁਚ੍ਛਿਤ੍ਵਾ ਗਤੋ. ਏਕਰਥੇ ਯਨ੍ਤਾਤਿ ਦ੍ਵੇਪਿ ਏਕਰਥਂ ਅਭਿਰੁਯ੍ਹ ਗਚ੍ਛਨ੍ਤਾ. ਸਮਾਨਾ ਵਣ੍ਣਰੂਪੇਨਾਤਿ ਵਣ੍ਣੇਨ ਚ ਰੂਪੇਨ ਚ ਸਮਾਨਾ ਹੁਤ੍ਵਾ. ਨਾਞ੍ਞਮਞ੍ਞਾਤਿਰੋਚਿਸੁਨ੍ਤਿ ਏਕੋ ਏਕਂ ਨਾਤਿਕ੍ਕਮਿ. ਮਣਿਰਤਨਾਨੁਭਾਵੇਨ ਕਿਰ ਮਹਾਸਤ੍ਤੋ ਅਭਿਰੂਪੋ ਅਹੋਸਿ ਸੁਵਣ੍ਣਵਣ੍ਣੋ ਸੋਭਗ੍ਗਪ੍ਪਤ੍ਤੋ, ਸੋ ਕਿਰ ਪੁਬ੍ਬੇ ਪਚ੍ਚੇਕਬੁਦ੍ਧਸ੍ਸ ਪਿਣ੍ਡਪਾਤਨਿਸ੍ਸਨ੍ਦੇਨ ਬੁਦ੍ਧਪਟਿਮਾਕਰਣਨਿਸ੍ਸਨ੍ਦੇਨ ਚ ਏਵਂ ਤੇਜਵਨ੍ਤੋ ਅਹੋਸਿ. ਸਂਗਚ੍ਛੀਤਿ ਅਥਸ੍ਸ ਮਾਤਾ ਮਹਾਸਤ੍ਤਸ੍ਸ ਆਗਮਨਂ ਸੁਤ੍ਵਾ ਨਗਰੇ ਭੇਰਿਂ ਚਰਾਪੇਤ੍ਵਾ ਮਹਾਸਤ੍ਤਸ੍ਸ ਬਹੁਂ ਪਣ੍ਣਾਕਾਰਂ ਆਦਾਯ ਪਚ੍ਚੁਗ੍ਗਮਨਂ ਕਤ੍ਵਾ ਸਮਾਗਚ੍ਛਿ. ਸੋਪਿ ਮਾਤਰਾ ਸਦ੍ਧਿਂਯੇਵ ਨਗਰਂ ਪਦਕ੍ਖਿਣਂ ਕਤ੍ਵਾ ਸਤ੍ਤਾਹਂ ਛਣਕੀਲ਼ਂ ਕੀਲ਼ਿਤ੍ਵਾ ਅਲਙ੍ਕਤਪਾਸਾਦਤਲਂ ਅਭਿਰੁਹਿ. ਤੇਪਿ ਉਭੋ ਜਯਮ੍ਪਤਿਕਾ ਸਮਗ੍ਗਾ ਅਹੇਸੁਂ, ਤਤੋ ਪਟ੍ਠਾਯ ਯਾਵਜੀਵਂ ਸਮਗ੍ਗਾ ਸਮ੍ਮੋਦਮਾਨਾ ਫੀਤਂ ਧਰਣਿਂ ਅਜ੍ਝਾਵਸਿਂਸੂਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ, ਕਨਿਟ੍ਠੋ ਆਨਨ੍ਦੋ, ਖੁਜ੍ਜਾ ਖੁਜ੍ਜੁਤ੍ਤਰਾ, ਪਭਾਵਤੀ ਰਾਹੁਲਮਾਤਾ, ਪਰਿਸਾ ਬੁਦ੍ਧਪਰਿਸਾ, ਕੁਸਰਾਜਾ ਪਨ ਅਹਮੇਵ ਅਹੋਸਿਨ੍ਤਿ.

ਕੁਸਜਾਤਕਵਣ੍ਣਨਾ ਪਠਮਾ.

[੫੩੨] ੨. ਸੋਣਨਨ੍ਦਜਾਤਕਵਣ੍ਣਨਾ

ਦੇਵਤਾ ਨੁਸਿ ਗਨ੍ਧਬ੍ਬੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਾਤੁਪੋਸਕਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਸਾਮਜਾਤਕੇ (ਜਾ. ੨.੨੨.੨੯੬ ਆਦਯੋ) ਵਤ੍ਥੁਸਦਿਸਂ. ਤਦਾ ਪਨ ਸਤ੍ਥਾ ‘‘ਮਾ, ਭਿਕ੍ਖਵੇ, ਇਮਂ ਭਿਕ੍ਖੁਂ ਉਜ੍ਝਾਯਿਤ੍ਥ, ਪੋਰਾਣਕਪਣ੍ਡਿਤਾ ਸਕਲਜਮ੍ਬੁਦੀਪੇ ਰਜ੍ਜਂ ਲਭਮਾਨਾਪਿ ਤਂ ਅਗ੍ਗਹੇਤ੍ਵਾ ਮਾਤਾਪਿਤਰੋ ਪੋਸਿਂਸੁਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸੀ ਬ੍ਰਹ੍ਮਵਡ੍ਢਨਂ ਨਾਮ ਨਗਰਂ ਅਹੋਸਿ. ਤਤ੍ਥ ਮਨੋਜੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਤ੍ਥ ਅਞ੍ਞਤਰੋ ਅਸੀਤਿਕੋਟਿਵਿਭਵੋ ਬ੍ਰਾਹ੍ਮਣਮਹਾਸਾਲੋ ਅਪੁਤ੍ਤਕੋ ਅਹੋਸਿ. ਤਸ੍ਸ ਬ੍ਰਾਹ੍ਮਣੀ ਤੇਨੇਵ ‘‘ਭੋਤਿ ਪੁਤ੍ਤਂ ਪਤ੍ਥੇਹੀ’’ਤਿ ਵੁਤ੍ਤਾ ਪਤ੍ਥੇਸਿ. ਅਥ ਬੋਧਿਸਤ੍ਤੋ ਬ੍ਰਹ੍ਮਲੋਕਾ ਚਵਿਤ੍ਵਾ ਤਸ੍ਸਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ, ਜਾਤਸ੍ਸ ਚਸ੍ਸ ‘‘ਸੋਣਕੁਮਾਰੋ’’ਤਿ ਨਾਮਂ ਕਰਿਂਸੁ. ਤਸ੍ਸ ਪਦਸਾ ਗਮਨਕਾਲੇ ਅਞ੍ਞੋਪਿ ਸਤ੍ਤੋ ਬ੍ਰਹ੍ਮਲੋਕਾ ਚਵਿਤ੍ਵਾ ਤਸ੍ਸਾਯੇਵ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ, ਤਸ੍ਸ ਜਾਤਸ੍ਸ ‘‘ਨਨ੍ਦਕੁਮਾਰੋ’’ਤਿ ਨਾਮਂ ਕਰਿਂਸੁ. ਤੇਸਂ ਉਗ੍ਗਹਿਤਵੇਦਾਨਂ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਤਾਨਂ ਵਯਪ੍ਪਤ੍ਤਾਨਂ ਰੂਪਸਮ੍ਪਦਂ ਦਿਸ੍ਵਾ ਬ੍ਰਾਹ੍ਮਣੋ ਬ੍ਰਾਹ੍ਮਣਿਂ ਆਮਨ੍ਤੇਤ੍ਵਾ ‘‘ਭੋਤਿ ਪੁਤ੍ਤਂ ਸੋਣਕੁਮਾਰਂ ਘਰਬਨ੍ਧਨੇਨ ਬਨ੍ਧਿਸ੍ਸਾਮਾ’’ਤਿ ਆਹ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪੁਤ੍ਤਸ੍ਸ ਤਮਤ੍ਥਂ ਆਚਿਕ੍ਖਿ. ਸੋ ‘‘ਅਲਂ, ਅਮ੍ਮ, ਮਯ੍ਹਂ ਘਰਾਵਾਸੇਨ, ਅਹਂ ਯਾਵਜੀਵਂ ਤੁਮ੍ਹੇ ਪਟਿਜਗ੍ਗਿਤ੍ਵਾ ਤੁਮ੍ਹਾਕਂ ਅਚ੍ਚਯੇਨ ਹਿਮਵਨ੍ਤਂ ਪਵਿਸਿਤ੍ਵਾ ਪਬ੍ਬਜਿਸ੍ਸਾਮੀ’’ਤਿ ਆਹ. ਸਾ ਬ੍ਰਾਹ੍ਮਣਸ੍ਸ ਏਤਮਤ੍ਥਂ ਆਰੋਚੇਸਿ.

ਤੇ ਪੁਨਪ੍ਪੁਨਂ ਕਥੇਨ੍ਤਾਪਿ ਤਸ੍ਸ ਚਿਤ੍ਤਂ ਅਲਭਿਤ੍ਵਾ ਨਨ੍ਦਕੁਮਾਰਂ ਆਮਨ੍ਤੇਤ੍ਵਾ ‘‘ਤਾਤ, ਤੇਨ ਹਿ ਤ੍ਵਂ ਕੁਟੁਮ੍ਬਂ ਪਟਿਪਜ੍ਜਾਹੀ’’ਤਿ ਵਤ੍ਵਾ ‘‘ਨਾਹਂ ਭਾਤਰਾ ਛਡ੍ਡਿਤਖੇਲ਼ਂ ਸੀਸੇਨ ਉਕ੍ਖਿਪਾਮਿ, ਅਹਮ੍ਪਿ ਤੁਮ੍ਹਾਕਂ ਅਚ੍ਚਯੇਨ ਭਾਤਰਾਵ ਸਦ੍ਧਿਂ ਪਬ੍ਬਜਿਸ੍ਸਾਮੀ’’ਤਿ ਵੁਤ੍ਤੇ ਤੇਸਂ ਵਚਨਂ ਸੁਤ੍ਵਾ ‘‘ਇਮੇ ਦ੍ਵੇ ਏਵਂ ਤਰੁਣਾਵ ਕਾਮੇ ਪਜਹਨ੍ਤਿ, ਕਿਮਙ੍ਗਂ ਪਨ ਮਯਂ, ਸਬ੍ਬੇਯੇਵ ਪਬ੍ਬਜਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ, ‘‘ਤਾਤਾ, ਕਿਂ ਵੋ ਅਮ੍ਹਾਕਂ ਅਚ੍ਚਯੇਨ ਪਬ੍ਬਜ੍ਜਾਯ, ਇਦਾਨੇਵ ਸਬ੍ਬੇ ਮਯਂ ਪਬ੍ਬਜਿਸ੍ਸਾਮਾ’’ਤਿ ਰਞ੍ਞੋ ਆਰੋਚੇਤ੍ਵਾ ਸਬ੍ਬਂ ਧਨਂ ਦਾਨਮੁਖੇ ਵਿਸ੍ਸਜ੍ਜੇਤ੍ਵਾ ਦਾਸਜਨਂ ਭੁਜਿਸ੍ਸਂ ਕਤ੍ਵਾ ਞਾਤੀਨਂ ਦਾਤਬ੍ਬਯੁਤ੍ਤਕਂ ਦਤ੍ਵਾ ਚਤ੍ਤਾਰੋਪਿ ਜਨਾ ਬ੍ਰਹ੍ਮਵਡ੍ਢਨਨਗਰਾ ਨਿਕ੍ਖਮਿਤ੍ਵਾ ਹਿਮਵਨ੍ਤਪਦੇਸੇ ਪਞ੍ਚਪਦੁਮਸਞ੍ਛਨ੍ਨਂ ਸਰਂ ਨਿਸ੍ਸਾਯ ਰਮਣੀਯੇ ਵਨਸਣ੍ਡੇ ਅਸ੍ਸਮਂ ਮਾਪੇਤ੍ਵਾ ਪਬ੍ਬਜਿਤ੍ਵਾ ਤਤ੍ਥ ਵਸਿਂਸੁ. ਉਭੋਪਿ ਭਾਤਰੋ ਮਾਤਾਪਿਤਰੋ ਪਟਿਜਗ੍ਗਿਂਸੁ, ਤੇਸਂ ਪਾਤੋਵ ਦਨ੍ਤਕਟ੍ਠਞ੍ਚ ਮੁਖਧੋਵਨਞ੍ਚ ਦਤ੍ਵਾ ਪਣ੍ਣਸਾਲਞ੍ਚ ਪਰਿਵੇਣਞ੍ਚ ਸਮ੍ਮਜ੍ਜਿਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਪੇਤ੍ਵਾ ਅਰਞ੍ਞਤੋ ਮਧੁਰਫਲਾਫਲਾਨਿ ਆਹਰਿਤ੍ਵਾ ਮਾਤਾਪਿਤਰੋ ਖਾਦਾਪੇਨ੍ਤਿ, ਉਣ੍ਹੇਨ ਵਾ ਸੀਤੇਨ ਵਾ ਵਾਰਿਨਾ ਨ੍ਹਾਪੇਨ੍ਤਿ, ਜਟਾ ਸੋਧੇਨ੍ਤਿ, ਪਾਦਪਰਿਕਮ੍ਮਾਦੀਨਿ ਤੇਸਂ ਕਰੋਨ੍ਤਿ.

ਏਵਂ ਅਦ੍ਧਾਨੇ ਗਤੇ ਨਨ੍ਦਪਣ੍ਡਿਤੋ ‘‘ਮਯਾ ਆਭਤਫਲਾਫਲਾਨੇਵ ਪਠਮਂ ਮਾਤਾਪਿਤਰੋ ਖਾਦਾਪੇਸ੍ਸਾਮੀ’’ਤਿ ਪੁਰਤੋ ਗਨ੍ਤ੍ਵਾ ਹਿਯ੍ਯੋ ਚ ਪਰਹਿਯ੍ਯੋ ਚ ਗਹਿਤਟ੍ਠਾਨਤੋ ਯਾਨਿ ਵਾ ਤਾਨਿ ਵਾ ਪਾਤੋਵ ਆਹਰਿਤ੍ਵਾ ਮਾਤਾਪਿਤਰੋ ਖਾਦਾਪੇਸਿ. ਤੇ ਤਾਨਿ ਖਾਦਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਉਪੋਸਥਿਕਾ ਭਵਨ੍ਤਿ. ਸੋਣਪਣ੍ਡਿਤੋ ਪਨ ਦੂਰਂ ਗਨ੍ਤ੍ਵਾ ਮਧੁਰਮਧੁਰਾਨਿ ਸੁਪਕ੍ਕਸੁਪਕ੍ਕਾਨਿ ਆਹਰਿਤ੍ਵਾ ਉਪਨਾਮੇਸਿ. ਅਥ ਨਂ, ‘‘ਤਾਤ, ਕਨਿਟ੍ਠੇਨ ਤੇ ਆਭਤਾਨਿ ਮਯਂ ਪਾਤੋਵ ਖਾਦਿਤ੍ਵਾ ਉਪੋਸਥਿਕਾ ਜਾਤਾ, ਨ ਇਦਾਨਿ ਨੋ ਅਤ੍ਥੋ’’ਤਿ ਵਦਨ੍ਤਿ. ਇਤਿ ਤਸ੍ਸ ਫਲਾਫਲਾਨਿ ਪਰਿਭੋਗਂ ਨ ਲਭਨ੍ਤਿ ਵਿਨਸ੍ਸਨ੍ਤਿ, ਪੁਨਦਿਵਸੇਸੁਪਿ ਤਥੇਵਾਤਿ. ਏਵਂ ਸੋ ਪਞ੍ਚਾਭਿਞ੍ਞਤਾਯ ਦੂਰਂ ਗਨ੍ਤ੍ਵਾਪਿ ਆਹਰਤਿ, ਤੇ ਪਨ ਨ ਖਾਦਨ੍ਤਿ.

ਅਥ ਮਹਾਸਤ੍ਤੋ ਚਿਨ੍ਤੇਸਿ – ‘‘ਮਾਤਾਪਿਤਰੋ ਮੇ ਸੁਖੁਮਾਲਾ, ਨਨ੍ਦੋ ਚ ਯਾਨਿ ਵਾ ਤਾਨਿ ਵਾ ਅਪਕ੍ਕਦੁਪ੍ਪਕ੍ਕਾਨਿ ਫਲਾਫਲਾਨਿ ਆਹਰਿਤ੍ਵਾ ਖਾਦਾਪੇਤਿ, ਏਵਂ ਸਨ੍ਤੇ ਇਮੇ ਨ ਚੀਰਂ ਪਵਤ੍ਤਿਸ੍ਸਨ੍ਤਿ, ਵਾਰੇਸ੍ਸਾਮਿ ਨ’’ਨ੍ਤਿ. ਅਥ ਨਂ ਸੋ ਆਮਨ੍ਤੇਤ੍ਵਾ ‘‘ਨਨ੍ਦ, ਇਤੋ ਪਟ੍ਠਾਯ ਫਲਾਫਲਂ ਆਹਰਿਤ੍ਵਾ ਮਮਾਗਮਨਂ ਪਟਿਮਾਨੇਹਿ, ਉਭੋਪਿ ਏਕਤੋਵ ਖਾਦਾਪੇਸ੍ਸਾਮਾ’’ਤਿ ਆਹ. ਸੋ ਏਵਂ ਵੁਤ੍ਤੇਪਿ ਅਤ੍ਤਨੋ ਪੁਞ੍ਞਂ ਪਚ੍ਚਾਸੀਸਨ੍ਤੋ ਨ ਤਸ੍ਸ ਵਚਨਮਕਾਸਿ. ਮਹਾਸਤ੍ਤੋ ‘‘ਨਨ੍ਦੋ ਮਮ ਵਚਨਂ ਅਕਰੋਨ੍ਤੋ ਅਯੁਤ੍ਤਂ ਕਰੋਤਿ, ਪਲਾਪੇਸ੍ਸਾਮਿ ਨਂ, ਤਤੋ ਏਕਕੋਵ ਮਾਤਾਪਿਤਰੋ ਪਟਿਜਗ੍ਗਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਨਨ੍ਦ, ਤ੍ਵਂ ਅਨੋਵਾਦਕੋ ਪਣ੍ਡਿਤਾਨਂ ਵਚਨਂ ਨ ਕਰੋਸਿ, ਅਹਂ ਜੇਟ੍ਠੋ, ਮਾਤਾਪਿਤਰੋ ਮਮੇਵ ਭਾਰੋ, ਅਹਮੇਵ ਨੇਸਂ ਪਟਿਜਗ੍ਗਿਸ੍ਸਾਮਿ, ਤ੍ਵਂ ਇਧ ਵਸਿਤੁਂ ਨ ਲਚ੍ਛਸਿ, ਅਞ੍ਞਤ੍ਥ ਯਾਹੀ’’ਤਿ ਤਸ੍ਸ ਅਚ੍ਛਰਂ ਪਹਰਿ.

ਸੋ ਤੇਨ ਪਲਾਪਿਤੋ ਤਸ੍ਸ ਸਨ੍ਤਿਕੇ ਠਾਤੁਂ ਅਸਕ੍ਕੋਨ੍ਤੋ ਤਂ ਵਨ੍ਦਿਤ੍ਵਾ ਮਾਤਾਪਿਤਰੋ ਉਪਸਙ੍ਕਮਿਤ੍ਵਾ ਤਮਤ੍ਥਂ ਆਰੋਚੇਤ੍ਵਾ ਅਤ੍ਤਨੋ ਪਣ੍ਣਸਾਲਂ ਪਵਿਸਿਤ੍ਵਾ ਕਸਿਣਂ ਓਲੋਕੇਤ੍ਵਾ ਤਂ ਦਿਵਸਮੇਵ ਪਞ੍ਚ ਅਭਿਞ੍ਞਾਯੋ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਚਿਨ੍ਤੇਸਿ – ‘‘ਅਹਂ ਸੀਨੇਰੁਪਾਦਤੋ ਰਤਨਵਾਲੁਕਾ ਆਹਰਿਤ੍ਵਾ ਮਮ ਭਾਤੁ ਪਣ੍ਣਸਾਲਾਯ ਪਰਿਵੇਣੇ ਓਕਿਰਿਤ੍ਵਾ ਭਾਤਰਂ ਖਮਾਪੇਤੁਂ ਪਹੋਮਿ, ਏਵਮ੍ਪਿ ਨ ਸੋਭਿਸ੍ਸਤਿ, ਅਨੋਤਤ੍ਤਤੋ ਉਦਕਂ ਆਹਰਿਤ੍ਵਾ ਮਮ ਭਾਤੁ ਪਣ੍ਣਸਾਲਾਯ ਪਰਿਵੇਣੇ ਓਸਿਞ੍ਚਿਤ੍ਵਾ ਭਾਤਰਂ ਖਮਾਪੇਤੁਂ ਪਹੋਮਿ, ਏਵਮ੍ਪਿ ਨ ਸੋਭਿਸ੍ਸਤਿ, ਸਚੇ ਮੇ ਭਾਤਰਂ ਦੇਵਤਾਨਂ ਵਸੇਨ ਖਮਾਪੇਯ੍ਯਂ, ਚਤ੍ਤਾਰੋ ਚ ਮਹਾਰਾਜਾਨੋ ਸਕ੍ਕਞ੍ਚ ਆਨੇਤ੍ਵਾ ਭਾਤਰਂ ਖਮਾਪੇਤੁਂ ਪਹੋਮਿ, ਏਵਮ੍ਪਿ ਨ ਸੋਭਿਸ੍ਸਤਿ, ਸਕਲਜਮ੍ਬੁਦੀਪੇ ਮਨੋਜਂ ਅਗ੍ਗਰਾਜਾਨਂ ਆਦਿਂ ਕਤ੍ਵਾ ਰਾਜਾਨੋ ਆਨੇਤ੍ਵਾ ਖਮਾਪੇਸ੍ਸਾਮਿ, ਏਵਂ ਸਨ੍ਤੇ ਮਮ ਭਾਤੁ ਗੁਣੋ ਸਕਲਜਮ੍ਬੁਦੀਪੇ ਅਵਤ੍ਥਰਿਤ੍ਵਾ ਗਮਿਸ੍ਸਤਿ, ਚਨ੍ਦਿਮਸੂਰਿਯੋ ਵਿਯ ਪਞ੍ਞਾਯਿਸ੍ਸਤੀ’’ਤਿ. ਸੋ ਤਾਵਦੇਵ ਇਦ੍ਧਿਯਾ ਗਨ੍ਤ੍ਵਾ ਬ੍ਰਹ੍ਮਵਡ੍ਢਨਨਗਰੇ ਤਸ੍ਸ ਰਞ੍ਞੋ ਨਿਵੇਸਨਦ੍ਵਾਰੇ ਓਤਰਿਤ੍ਵਾ ਠਿਤੋ ‘‘ਏਕੋ ਕਿਰ ਵੋ ਤਾਪਸੋ ਦਟ੍ਠੁਕਾਮੋ’’ਤਿ ਰਞ੍ਞੋ ਆਰੋਚਾਪੇਸਿ. ਰਾਜਾ ‘‘ਕਿਂ ਪਬ੍ਬਜਿਤਸ੍ਸ ਮਯਾ ਦਿਟ੍ਠੇਨ, ਆਹਾਰਤ੍ਥਾਯ ਆਗਤੋ ਭਵਿਸ੍ਸਤੀ’’ਤਿ ਭਤ੍ਤਂ ਪਹਿਣਿ, ਸੋ ਭਤ੍ਤਂ ਨ ਇਚ੍ਛਿ. ਤਣ੍ਡੁਲਂ ਪਹਿਣਿ, ਤਣ੍ਡੁਲਂ ਨ ਇਚ੍ਛਿ. ਵਤ੍ਥਾਨਿ ਪਹਿਣਿ, ਵਤ੍ਥਾਨਿ ਨ ਇਚ੍ਛਿ. ਤਮ੍ਬੂਲਂ ਪਹਿਣਿ, ਤਮ੍ਬੂਲਂ ਨ ਇਚ੍ਛਿ. ਅਥਸ੍ਸ ਸਨ੍ਤਿਕੇ ਦੂਤਂ ਪੇਸੇਸਿ, ‘‘ਕਿਮਤ੍ਥਂ ਆਗਤੋਸੀ’’ਤਿ. ਸੋ ਦੂਤੇਨ ਪੁਟ੍ਠੋ ‘‘ਰਾਜਾਨਂ ਉਪਟ੍ਠਹਿਤੁਂ ਆਗਤੋਮ੍ਹੀ’’ਤਿ ਆਹ. ਰਾਜਾ ਤਂ ਸੁਤ੍ਵਾ ‘‘ਬਹੂ ਮਮ ਉਪਟ੍ਠਾਕਾ, ਅਤ੍ਤਨੋਵ ਤਾਪਸਧਮ੍ਮਂ ਕਰੋਤੂ’’ਤਿ ਪੇਸੇਸਿ. ਸੋ ਤਂ ਸੁਤ੍ਵਾ ‘‘ਅਹਂ ਤੁਮ੍ਹਾਕਂ ਅਤ੍ਤਨੋ ਬਲੇਨ ਸਕਲਜਮ੍ਬੁਦੀਪੇ ਰਜ੍ਜਂ ਗਹੇਤ੍ਵਾ ਦਸ੍ਸਾਮੀ’’ਤਿ ਆਹ.

ਤਂ ਸੁਤ੍ਵਾ ਰਾਜਾ ਚਿਨ੍ਤੇਸਿ – ‘‘ਪਬ੍ਬਜਿਤਾ ਨਾਮ ਪਣ੍ਡਿਤਾ, ਕਿਞ੍ਚਿ ਉਪਾਯਂ ਜਾਨਿਸ੍ਸਨ੍ਤੀ’’ਤਿ ਤਂ ਪਕ੍ਕੋਸਾਪੇਤ੍ਵਾ ਆਸਨੇ ਨਿਸੀਦਾਪੇਤ੍ਵਾ ਵਨ੍ਦਿਤ੍ਵਾ ‘‘ਭਨ੍ਤੇ, ਤੁਮ੍ਹੇ ਕਿਰ ਮਯ੍ਹਂ ਸਕਲਜਮ੍ਬੁਦੀਪਰਜ੍ਜਂ ਗਹੇਤ੍ਵਾ ਦਸ੍ਸਥਾ’’ਤਿ ਪੁਚ੍ਛਿ. ‘‘ਆਮ ਮਹਾਰਾਜਾ’’ਤਿ. ‘‘ਕਥਂ ਗਣ੍ਹਿਸ੍ਸਥਾ’’ਤਿ? ‘‘ਮਹਾਰਾਜ, ਅਨ੍ਤਮਸੋ ਖੁਦ੍ਦਕਮਕ੍ਖਿਕਾਯ ਪਿਵਨਮਤ੍ਤਮ੍ਪਿ ਲੋਹਿਤਂ ਕਸ੍ਸਚਿ ਅਨੁਪ੍ਪਾਦੇਤ੍ਵਾ ਤਵ ਧਨਚ੍ਛੇਦਂ ਅਕਤ੍ਵਾ ਅਤ੍ਤਨੋ ਇਦ੍ਧਿਯਾਵ ਗਹੇਤ੍ਵਾ ਦਸ੍ਸਾਮਿ, ਅਪਿਚ ਕੇਵਲਂ ਪਪਞ੍ਚਂ ਅਕਤ੍ਵਾ ਅਜ੍ਜੇਵ ਨਿਕ੍ਖਮਿਤੁਂ ਵਟ੍ਟਤੀ’’ਤਿ. ਸੋ ਤਸ੍ਸ ਵਚਨਂ ਸਦ੍ਦਹਿਤ੍ਵਾ ਸੇਨਙ੍ਗਪਰਿਵੁਤੋ ਨਗਰਾ ਨਿਕ੍ਖਮਿ. ਸਚੇ ਸੇਨਾਯ ਉਣ੍ਹਂ ਹੋਤਿ, ਨਨ੍ਦਪਣ੍ਡਿਤੋ ਅਤ੍ਤਨੋ ਇਦ੍ਧਿਯਾ ਛਾਯਂ ਕਤ੍ਵਾ ਸੀਤਂ ਕਰੋਤਿ, ਦੇਵੇ ਵਸ੍ਸਨ੍ਤੇ ਸੇਨਾਯ ਉਪਰਿ ਵਸ੍ਸਿਤੁਂ ਨ ਦੇਤਿ, ਸੀਤਂ ਵਾ ਉਣ੍ਹਂ ਵਾ ਵਾਰੇਤਿ, ਮਗ੍ਗੇ ਖਾਣੁਕਣ੍ਟਕਾਦਯੋ ਸਬ੍ਬਪਰਿਸ੍ਸਯੇ ਅਨ੍ਤਰਧਾਪੇਤਿ, ਮਗ੍ਗਂ ਕਸਿਣਮਣ੍ਡਲਂ ਵਿਯ ਸਮਂ ਕਤ੍ਵਾ ਸਯਂ ਆਕਾਸੇ ਚਮ੍ਮਖਣ੍ਡਂ ਪਤ੍ਥਰਿਤ੍ਵਾ ਪਲ੍ਲਙ੍ਕੇਨ ਨਿਸਿਨ੍ਨੋ ਸੇਨਾਯ ਪਰਿਵੁਤੋ ਗਚ੍ਛਤਿ.

ਏਵਂ ਸੇਨਂ ਆਦਾਯ ਪਠਮਂ ਕੋਸਲਰਟ੍ਠਂ ਗਨ੍ਤ੍ਵਾ ਨਗਰਸ੍ਸਾਵਿਦੂਰੇ ਖਨ੍ਧਾਵਾਰਂ ਨਿਵਾਸਾਪੇਤ੍ਵਾ ‘‘ਯੁਦ੍ਧਂ ਵਾ ਨੋ ਦੇਤੁ ਸੇਤਚ੍ਛਤ੍ਤਂ ਵਾ’’ਤਿ ਕੋਸਲਰਞ੍ਞੋ ਦੂਤਂ ਪਾਹੇਸਿ. ਸੋ ਕੁਜ੍ਝਿਤ੍ਵਾ ‘‘ਕਿਂ ਅਹਂ ਨ ਰਾਜਾ’’ਤਿ ‘‘ਯੁਦ੍ਧਂ ਦਮ੍ਮੀ’’ਤਿ ਸੇਨਾਯ ਪੁਰਕ੍ਖਤੋ ਨਿਕ੍ਖਮਿ. ਦ੍ਵੇ ਸੇਨਾ ਯੁਜ੍ਝਿਤੁਂ ਆਰਭਿਂਸੁ. ਨਨ੍ਦਪਣ੍ਡਿਤੋ ਦ੍ਵਿਨ੍ਨਮ੍ਪਿ ਅਨ੍ਤਰੇ ਅਤ੍ਤਨੋ ਨਿਸੀਦਨਂ ਅਜਿਨਚਮ੍ਮਂ ਮਹਨ੍ਤਂ ਕਤ੍ਵਾ ਪਸਾਰੇਤ੍ਵਾ ਦ੍ਵੀਹਿਪਿ ਸੇਨਾਹਿ ਖਿਤ੍ਤਸਰੇ ਚਮ੍ਮੇਨੇਵ ਸਮ੍ਪਟਿਚ੍ਛਿ. ਏਕਸੇਨਾਯਪਿ ਕੋਚਿ ਕਣ੍ਡੇਨ ਵਿਦ੍ਧੋ ਨਾਮ ਨਤ੍ਥਿ, ਹਤ੍ਥਗਤਾਨਂ ਪਨ ਕਣ੍ਡਾਨਂ ਖਯੇਨ ਦ੍ਵੇਪਿ ਸੇਨਾ ਨਿਰੁਸ੍ਸਾਹਾ ਅਟ੍ਠਂਸੁ. ਨਨ੍ਦਪਣ੍ਡਿਤੋ ਮਨੋਜਰਾਜਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਮਾ ਭਾਯਿ, ਮਹਾਰਾਜਾ’’ਤਿ ਅਸ੍ਸਾਸੇਤ੍ਵਾ ਕੋਸਲਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਮਹਾਰਾਜ, ਮਾ ਭਾਯਿ, ਨਤ੍ਥਿ ਤੇ ਪਰਿਪਨ੍ਥੋ, ਤਵ ਰਜ੍ਜਂ ਤਵੇਵ ਭਵਿਸ੍ਸਤਿ, ਕੇਵਲਂ ਮਨੋਜਰਞ੍ਞੋ ਵਸਵਤ੍ਤੀ ਹੋਹੀ’’ਤਿ ਆਹ. ਸੋ ਤਸ੍ਸ ਸਦ੍ਦਹਿਤ੍ਵਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਅਥ ਨਂ ਮਨੋਜਸ੍ਸ ਸਨ੍ਤਿਕਂ ਨੇਤ੍ਵਾ ‘‘ਮਹਾਰਾਜ, ਕੋਸਲਰਾਜਾ ਤੇ ਵਸੇ ਵਤ੍ਤਤਿ, ਇਮਸ੍ਸ ਰਜ੍ਜਂ ਇਮਸ੍ਸੇਵ ਹੋਤੂ’’ਤਿ ਆਹ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਂ ਅਤ੍ਤਨੋ ਵਸੇ ਵਤ੍ਤੇਤ੍ਵਾ ਦ੍ਵੇ ਸੇਨਾ ਆਦਾਯ ਅਙ੍ਗਰਟ੍ਠਂ ਗਨ੍ਤ੍ਵਾ ਅਙ੍ਗਂ ਗਹੇਤ੍ਵਾ ਤਤੋ ਮਗਧਰਟ੍ਠਨ੍ਤਿ ਏਤੇਨੁਪਾਯੇਨ ਸਕਲਜਮ੍ਬੁਦੀਪੇ ਰਾਜਾਨੋ ਅਤ੍ਤਨੋ ਵਸੇ ਵਤ੍ਤੇਤ੍ਵਾ ਤਤੋ ਤੇਹਿ ਪਰਿਵੁਤੋ ਬ੍ਰਹ੍ਮਵਡ੍ਢਨਨਗਰਮੇਵ ਗਤੋ. ਰਜ੍ਜਂ ਗਣ੍ਹਨ੍ਤੋ ਪਨੇਸ ਸਤ੍ਤਨ੍ਨਂ ਸਂਵਚ੍ਛਰਾਨਂ ਉਪਰਿ ਸਤ੍ਤਦਿਵਸਾਧਿਕੇਹਿ ਸਤ੍ਤਮਾਸੇਹਿ ਗਣ੍ਹਿ. ਸੋ ਏਕੇਕਰਾਜਧਾਨਿਤੋ ਨਾਨਪ੍ਪਕਾਰਂ ਖਜ੍ਜਭੋਜਨਂ ਆਹਰਾਪੇਤ੍ਵਾ ਏਕਸਤਰਾਜਾਨੋ ਗਹੇਤ੍ਵਾ ਤੇਹਿ ਸਦ੍ਧਿਂ ਸਤ੍ਤਾਹਂ ਮਹਾਪਾਨਂ ਪਿਵਿ.

ਨਨ੍ਦਪਣ੍ਡਿਤੋ ‘‘ਯਾਵ ਰਾਜਾ ਸਤ੍ਤਾਹਂ ਇਸ੍ਸਰਿਯਸੁਖਂ ਅਨੁਭੋਤਿ, ਤਾਵਸ੍ਸ ਅਤ੍ਤਾਨਂ ਨ ਦਸ੍ਸੇਸ੍ਸਾਮੀ’’ਤਿ ਉਤ੍ਤਰਕੁਰੁਮ੍ਹਿ ਪਿਣ੍ਡਾਯ ਚਰਿਤ੍ਵਾ ਹਿਮਵਨ੍ਤੇ ਕਞ੍ਚਨਗੁਹਾਦ੍ਵਾਰੇ ਸਤ੍ਤਾਹਂ ਵਸਿ. ਮਨੋਜੋਪਿ ਸਤ੍ਤਮੇ ਦਿਵਸੇ ਅਤ੍ਤਨੋ ਮਹਨ੍ਤਂ ਸਿਰਿਵਿਭਵਂ ਓਲੋਕੇਤ੍ਵਾ ‘‘ਅਯਂ ਯਸੋ ਨ ਮਯ੍ਹਂ ਮਾਤਾਪਿਤੂਹਿ, ਨ ਅਞ੍ਞੇਹਿ ਦਿਨ੍ਨੋ, ਨਨ੍ਦਤਾਪਸਂ ਨਿਸ੍ਸਾਯ ਉਪ੍ਪਨ੍ਨੋ, ਤਂ ਖੋ ਪਨ ਮੇ ਅਪਸ੍ਸਨ੍ਤਸ੍ਸ ਅਜ੍ਜ ਸਤ੍ਤਮੋ ਦਿਵਸੋ, ਕਹਂ ਨੁ ਖੋ ਮੇ ਯਸਦਾਯਕੋ’’ਤਿ ਨਨ੍ਦਪਣ੍ਡਿਤਂ ਸਰਿ. ਸੋ ਤਸ੍ਸ ਅਨੁਸ੍ਸਰਣਭਾਵਂ ਞਤ੍ਵਾ ਆਗਨ੍ਤ੍ਵਾ ਪੁਰਤੋ ਆਕਾਸੇ ਅਟ੍ਠਾਸਿ. ਰਾਜਾ ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਹਂ ਇਮਸ੍ਸ ਤਾਪਸਸ੍ਸ ਦੇਵਤਾਭਾਵਂ ਵਾ ਮਨੁਸ੍ਸਭਾਵਂ ਵਾ ਨ ਜਾਨਾਮਿ, ਸਚੇ ਏਸ ਮਨੁਸ੍ਸੋ ਭਵੇਯ੍ਯ, ਸਕਲਜਮ੍ਬੁਦੀਪਰਜ੍ਜਂ ਏਤਸ੍ਸੇਵ ਦਸ੍ਸਾਮਿ. ਅਥ ਦੇਵੋ, ਸਕ੍ਕਾਰਮਸ੍ਸ ਕਰਿਸ੍ਸਾਮੀ’’ਤਿ. ਸੋ ਤਂ ਵੀਮਂਸਨ੍ਤੋ ਪਠਮਂ ਗਾਥਮਾਹ –

੯੨.

‘‘ਦੇਵਤਾ ਨੁਤਿ ਗਨ੍ਧਬ੍ਬੋ, ਅਦੁ ਸਕ੍ਕੋ ਪੁਰਿਨ੍ਦਦੋ;

ਮਨੁਸ੍ਸਭੂਤੋ ਇਦ੍ਧਿਮਾ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ.

ਸੋ ਤਸ੍ਸ ਵਚਨਂ ਸੁਤ੍ਵਾ ਸਭਾਵਮੇਵ ਕਥੇਨ੍ਤੋ ਦੁਤਿਯਂ ਗਾਥਮਾਹ –

੯੩.

‘‘ਨਾਪਿ ਦੇਵੋ ਨ ਗਨ੍ਧਬ੍ਬੋ, ਨਾਪਿ ਸਕ੍ਕੋ ਪੁਰਿਨ੍ਦਦੋ;

ਮਨੁਸ੍ਸਭੂਤੋ ਇਦ੍ਧਿਮਾ, ਏਵਂ ਜਾਨਾਹਿ ਭਾਰਧਾ’’ਤਿ.

ਤਤ੍ਥ ਭਾਰਧਾਤਿ ਰਟ੍ਠਭਾਰਧਾਰਿਤਾਯ ਨਂ ਏਵਂ ਆਲਪਤਿ.

ਤਂ ਸੁਤ੍ਵਾ ਰਾਜਾ ‘‘ਮਨੁਸ੍ਸਭੂਤੋ ਕਿਰਾਯਂ ਮਯ੍ਹਂ ਏਵਂ ਬਹੁਪਕਾਰੋ, ਮਹਨ੍ਤੇਨ ਯਸੇਨ ਨਂ ਸਨ੍ਤਪ੍ਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਆਹ –

੯੪.

‘‘ਕਤਰੂਪਮਿਦਂ ਭੋਤੋ, ਵੇਯ੍ਯਾਵਚ੍ਚਂ ਅਨਪ੍ਪਕਂ;

ਦੇਵਮ੍ਹਿ ਵਸ੍ਸਮਾਨਮ੍ਹਿ, ਅਨੋਵਸ੍ਸਂ ਭਵਂ ਅਕਾ.

੯੫.

‘‘ਤਤੋ ਵਾਤਾਤਪੇ ਘੋਰੇ, ਸੀਤਚ੍ਛਾਯਂ ਭਵਂ ਅਕਾ;

ਤਤੋ ਅਮਿਤ੍ਤਮਜ੍ਝੇਸੁ, ਸਰਤਾਣਂ ਭਵਂ ਅਕਾ.

੯੬.

‘‘ਤਤੋ ਫੀਤਾਨਿ ਰਟ੍ਠਾਨਿ, ਵਸਿਨੋ ਤੇ ਭਵਂ ਅਕਾ;

ਤਤੋ ਏਕਸਤਂ ਖਤ੍ਯੇ, ਅਨੁਯਨ੍ਤੇ ਭਵਂ ਅਕਾ.

੯੭.

‘‘ਪਤੀਤਾਸ੍ਸੁ ਮਯਂ ਭੋਤੋ, ਵਦ ਤਂ ਭਞ੍ਜਮਿਚ੍ਛਸਿ;

ਹਤ੍ਥਿਯਾਨਂ ਅਸ੍ਸਰਥਂ, ਨਾਰਿਯੋ ਚ ਅਲਙ੍ਕਤਾ;

ਨਿਵੇਸਨਾਨਿ ਰਮ੍ਮਾਨਿ, ਮਯਂ ਭੋਤੋ ਦਦਾਮਸੇ.

੯੮.

‘‘ਅਥ ਵਙ੍ਗੇ ਵਾ ਮਗਧੇ, ਮਯਂ ਭੋਤੋ ਦਦਾਮਸੇ;

ਅਥ ਵਾ ਅਸ੍ਸਕਾਵਨ੍ਤੀ, ਸੁਮਨਾ ਦਮ੍ਮ ਤੇ ਮਯਂ.

੯੯.

‘‘ਉਪਡ੍ਢਂ ਵਾਪਿ ਰਜ੍ਜਸ੍ਸ, ਮਯਂ ਭੋਤੋ ਦਦਾਮਸੇ;

ਸਚੇ ਤੇ ਅਤ੍ਥੋ ਰਜ੍ਜੇਨ, ਅਨੁਸਾਸ ਯਦਿਚ੍ਛਸੀ’’ਤਿ.

ਤਤ੍ਥ ਕਤਰੂਪਮਿਦਨ੍ਤਿ ਕਤਸਭਾਵਂ. ਵੇਯ੍ਯਾਵਚ੍ਚਨ੍ਤਿ ਕਾਯਵੇਯ੍ਯਾਵਤਿਕਕਮ੍ਮਂ. ਅਨੋਵਸ੍ਸਨ੍ਤਿ ਅਵਸ੍ਸਂ, ਯਥਾ ਦੇਵੋ ਨ ਵਸ੍ਸਤਿ, ਤਥਾ ਕਤਨ੍ਤਿ ਅਤ੍ਥੋ. ਸੀਤਚ੍ਛਾਯਨ੍ਤਿ ਸੀਤਲਂ ਛਾਯਂ. ਵਸਿਨੋ ਤੇਤਿ ਤੇ ਰਟ੍ਠਵਾਸਿਨੋ ਅਮ੍ਹਾਕਂ ਵਸਵਤ੍ਤਿਨੋ. ਖਤ੍ਯੇਤਿ ਖਤ੍ਤਿਯੇ, ਅਟ੍ਠਕਥਾਯਂ ਪਨ ਅਯਮੇਵ ਪਾਠੋ. ਪਤੀਤਾਸ੍ਸੁ ਮਯਨ੍ਤਿ ਤੁਟ੍ਠਾ ਮਯਂ. ਵਦ ਤਂ ਭਞ੍ਜਮਿਚ੍ਛਸੀਤਿ ਭਞ੍ਜਨ੍ਤਿ ਰਤਨਸ੍ਸੇਤਂ ਨਾਮਂ, ਵਰਂ ਤੇ ਦਦਾਮਿ, ਯਂ ਰਤਨਂ ਇਚ੍ਛਸਿ, ਤਂ ਵਦੇਹੀਤਿ ਅਤ੍ਥੋ. ‘‘ਹਤ੍ਥਿਯਾਨ’’ਨ੍ਤਿਆਦੀਹਿ ਸਰੂਪਤੋ ਤਂ ਤਂ ਰਤਨਂ ਦਸ੍ਸੇਤਿ . ਅਸ੍ਸਕਾਵਨ੍ਤੀਅਸ੍ਸਕਰਟ੍ਠਂ ਵਾ ਅਵਨ੍ਤਿਰਟ੍ਠਂ ਵਾ. ਰਜ੍ਜੇਨਾਤਿ ਸਚੇਪਿ ਤੇ ਸਕਲਜਮ੍ਬੁਦੀਪਰਜ੍ਜੇਨ ਅਤ੍ਥੋ, ਤਮ੍ਪਿ ਤੇ ਦਤ੍ਵਾ ਅਹਂ ਫਲਕਾਵੁਧਹਤ੍ਥੋ ਤੁਮ੍ਹਾਕਂ ਰਥਸ੍ਸ ਪੁਰਤੋ ਗਮਿਸ੍ਸਾਮੀਤਿ ਦੀਪੇਤਿ. ਯਦਿਚ੍ਛਸੀਤਿ ਏਤੇਸੁ ਮਯਾ ਵੁਤ੍ਤਪ੍ਪਕਾਰੇਸੁ ਯਂ ਇਚ੍ਛਸਿ, ਤਂ ਅਨੁਸਾਸ ਆਣਾਪੇਹੀਤਿ.

ਤਂ ਸੁਤ੍ਵਾ ਨਨ੍ਦਪਣ੍ਡਿਤੋ ਅਤ੍ਤਨੋ ਅਧਿਪ੍ਪਾਯਂ ਆਵਿਕਰੋਨ੍ਤੋ ਆਹ –

੧੦੦.

‘‘ਨ ਮੇ ਅਤ੍ਥੋਪਿ ਰਜ੍ਜੇਨ, ਨਗਰੇਨ ਧਨੇਨ ਵਾ;

ਅਥੋਪਿ ਜਨਪਦੇਨ, ਅਤ੍ਥੋ ਮਯ੍ਹਂ ਨ ਵਿਜ੍ਜਤੀ’’ਤਿ.

‘‘ਸਚੇ ਤੇ ਮਯਿ ਸਿਨੇਹੋ ਅਤ੍ਥਿ, ਏਕਂ ਮੇ ਵਚਨਂ ਕਰੋਹੀ’’ਤਿ ਵਤ੍ਵਾ ਗਾਥਾਦ੍ਵਯਮਾਹ –

੧੦੧.

‘‘ਭੋਤੋਵ ਰਟ੍ਠੇ ਵਿਜਿਤੇ, ਅਰਞ੍ਞੇ ਅਤ੍ਥਿ ਅਸ੍ਸਮੋ;

ਪਿਤਾ ਮਯ੍ਹਂ ਜਨੇਤ੍ਤੀ ਚ, ਉਭੋ ਸਮ੍ਮਨ੍ਤਿ ਅਸ੍ਸਮੇ.

੧੦੨.

‘‘ਤੇਸਾਹਂ ਪੁਬ੍ਬਾਚਰਿਯੇਸੁ, ਪੁਞ੍ਞਂ ਨ ਲਭਾਮਿ ਕਾਤਵੇ;

ਭਵਨ੍ਤਂ ਅਜ੍ਝਾਵਰਂ ਕਤ੍ਵਾ, ਸੋਣਂ ਯਾਚੇਮੁ ਸਂਵਰ’’ਨ੍ਤਿ.

ਤਤ੍ਥ ਰਟ੍ਠੇਤਿ ਰਜ੍ਜੇ. ਵਿਜਿਤੇਤਿ ਆਣਾਪਵਤ੍ਤਿਟ੍ਠਾਨੇ. ਅਸ੍ਸਮੋਤਿ ਹਿਮਵਨ੍ਤਾਰਞ੍ਞੇ ਏਕੋ ਅਸ੍ਸਮੋ ਅਤ੍ਥਿ. ਸਮ੍ਮਨ੍ਤੀਤਿ ਤਸ੍ਮਿਂ ਅਸ੍ਸਮੇ ਵਸਨ੍ਤਿ. ਤੇਸਾਹਨ੍ਤਿ ਤੇਸੁ ਅਹਂ. ਕਾਤਵੇਤਿ ਵਤ੍ਤਪਟਿਵਤ੍ਤਫਲਾਫਲਾਹਰਣਸਙ੍ਖਾਤਂ ਪੁਞ੍ਞਂ ਕਾਤੁਂ ਨ ਲਭਾਮਿ, ਭਾਤਾ ਮੇ ਸੋਣਪਣ੍ਡਿਤੋ ਨਾਮ ਮਮੇਕਸ੍ਮਿਂ ਅਪਰਾਧੇ ਮਾ ਇਧ ਵਸੀਤਿ ਮਂ ਪਲਾਪੇਸਿ. ਅਜ੍ਝਾਵਰਨ੍ਤਿ ਅਧਿਆਵਰਂ ਤੇ ਮਯਂ ਭਵਨ੍ਤਂ ਸਪਰਿਵਾਰਂ ਕਤ੍ਵਾ ਸੋਣਪਣ੍ਡਿਤਂ ਸਂਵਰਂ ਯਾਚੇਮੁ, ਆਯਤਿਂ ਸਂਵਰਂ ਯਾਚਾਮਾਤਿ ਅਤ੍ਥੋ. ‘‘ਯਾਚੇਮਿਮਂ ਵਰ’’ਨ੍ਤਿਪਿ ਪਾਠੋ, ਮਯਂ ਤਯਾ ਸਦ੍ਧਿਂ ਸੋਣਂ ਯਾਚੇਯ੍ਯਾਮ ਖਮਾਪੇਯ੍ਯਾਮ, ਇਮਂ ਵਰਂ ਤਵ ਸਨ੍ਤਿਕਾ ਗਣ੍ਹਾਮੀਤਿ ਅਤ੍ਥੋ.

ਅਥ ਨਂ ਰਾਜਾ ਆਹ –

੧੦੩.

‘‘ਕਰੋਮਿ ਤੇ ਤਂ ਵਚਨਂ, ਯਂ ਮਂ ਭਣਸਿ ਬ੍ਰਾਹ੍ਮਣ;

ਏਤਞ੍ਚ ਖੋ ਨੋ ਅਕ੍ਖਾਹਿ, ਕੀਵਨ੍ਤੋ ਹੋਨ੍ਤੁ ਯਾਚਕਾ’’ਤਿ.

ਤਤ੍ਥ ਕਰੋਮੀਤਿ ਅਹਂ ਸਕਲਜਮ੍ਬੁਦੀਪਰਜ੍ਜਂ ਦਦਮਾਨੋ ਏਤ੍ਤਕਂ ਕਿਂ ਨ ਕਰਿਸ੍ਸਾਮਿ, ਕਰੋਮੀਤਿ ਵਦਤਿ. ਕੀਵਨ੍ਤੋਤਿ ਕਿਤ੍ਤਕਾ.

ਨਨ੍ਦਪਣ੍ਡਿਤੋ ਆਹ –

੧੦੪.

‘‘ਪਰੋਸਤਂ ਜਾਨਪਦਾ, ਮਹਾਸਾਲਾ ਚ ਬ੍ਰਾਹ੍ਮਣਾ;

ਇਮੇ ਚ ਖਤ੍ਤਿਯਾ ਸਬ੍ਬੇ, ਅਭਿਜਾਤਾ ਯਸਸ੍ਸਿਨੋ;

ਭਵਞ੍ਚ ਰਾਜਾ ਮਨੋਜੋ, ਅਲਂ ਹੇਸ੍ਸਨ੍ਤਿ ਯਾਚਕਾ’’ਤਿ.

ਤਤ੍ਥ ਜਾਨਪਦਾਤਿ ਗਹਪਤੀ. ਮਹਾਸਾਲਾ ਚ ਬ੍ਰਾਹ੍ਮਣਾਤਿ ਸਾਰਪ੍ਪਤ੍ਤਾ ਬ੍ਰਾਹ੍ਮਣਾ ਚ ਪਰੋਸਤਾਯੇਵ. ਅਲਂ ਹੇਸ੍ਸਨ੍ਤੀਤਿ ਪਰਿਯਤ੍ਤਾ ਭਵਿਸ੍ਸਨ੍ਤਿ. ਯਾਚਕਾਤਿ ਮਮਤ੍ਥਾਯ ਸੋਣਪਣ੍ਡਿਤਸ੍ਸ ਖਮਾਪਕਾ.

ਅਥ ਨਂ ਰਾਜਾ ਆਹ –

੧੦੫.

‘‘ਹਤ੍ਥੀ ਅਸ੍ਸੇ ਚ ਯੋਜੇਨ੍ਤੁ, ਰਥਂ ਸਨ੍ਨਯ੍ਹ ਸਾਰਥਿ;

ਆਬਨ੍ਧਨਾਨਿ ਗਣ੍ਹਾਥ, ਪਾਦਾਸੁਸ੍ਸਾਰਯਦ੍ਧਜੇ;

ਅਸ੍ਸਮਂ ਤਂ ਗਮਿਸ੍ਸਾਮਿ, ਯਤ੍ਥ ਸਮ੍ਮਤਿ ਕੋਸਿਯੋ’’ਤਿ.

ਤਤ੍ਥ ਯੋਜੇਨ੍ਤੂਤਿ ਹਤ੍ਥਾਰੋਹਾ ਹਤ੍ਥੀ, ਅਸ੍ਸਾਰੋਹਾ ਚ ਅਸ੍ਸੇ ਕਪ੍ਪੇਨ੍ਤੁ. ਰਥਂ ਸਨ੍ਨਯ੍ਹ ਸਾਰਥੀਤਿ ਸਮ੍ਮਸਾਰਥਿ ਤ੍ਵਮ੍ਪਿ ਰਥਂ ਸਨ੍ਨਯ੍ਹ. ਆਬਨ੍ਧਨਾਨੀਤਿ ਹਤ੍ਥਿਅਸ੍ਸਰਥੇਸੁ ਆਬਨ੍ਧਿਤਬ੍ਬਾਨਿ ਭਣ੍ਡਾਨਿ ਚ ਗਣ੍ਹਥ. ਪਾਦਾਸੁਸ੍ਸਾਰਯਦ੍ਧਜੇਤਿ ਰਥੇ ਠਪਿਤਧਜਪਾਦਾਸੁ ਧਜੇ ਉਸ੍ਸਾਰਯਨ੍ਤੁ ਉਸ੍ਸਾਪੇਨ੍ਤੁ. ਕੋਸਿਯੋਤਿ ਯਸ੍ਮਿਂ ਅਸ੍ਸਮੇ ਕੋਸਿਯਗੋਤ੍ਤੋ ਵਸਤੀਤਿ.

੧੦੬.

‘‘ਤਤੋ ਚ ਰਾਜਾ ਪਾਯਾਸਿ, ਸੇਨਾਯ ਚਤੁਰਙ੍ਗਿਨੀ;

ਅਗਮਾ ਅਸ੍ਸਮਂ ਰਮ੍ਮਂ, ਯਤ੍ਥ ਸਮ੍ਮਤਿ ਕੋਸਿਯੋ’’ਤਿ. – ਅਯਂ ਅਭਿਸਮ੍ਬੁਦ੍ਧਗਾਥਾ;

ਤਤ੍ਥ ਤਤੋ ਚਾਤਿ, ਭਿਕ੍ਖਵੇ, ਏਵਂ ਵਤ੍ਵਾ ਤਤੋ ਸੋ ਰਾਜਾ ਏਕਸਤਖਤ੍ਤਿਯੇ ਗਹੇਤ੍ਵਾ ਮਹਤਿਯਾ ਸੇਨਾਯ ਪਰਿਵੁਤੋ ਨਨ੍ਦਪਣ੍ਡਿਤਂ ਪੁਰਤੋ ਕਤ੍ਵਾ ਨਗਰਾ ਨਿਕ੍ਖਮਿ. ਚਤੁਰਙ੍ਗੀਨੀਤਿ ਚਤੁਰਙ੍ਗਿਨਿਯਾ ਸੇਨਾਯ ਅਗਮਾਸਿ, ਅਨ੍ਤਰਮਗ੍ਗੇ ਵਤ੍ਤਮਾਨੋਪਿ ਅਵਸ੍ਸਂ ਗਾਮਿਤਾਯ ਏਵਂ ਵੁਤ੍ਤੋ. ਚਤੁਵੀਸਤਿਅਕ੍ਖੋਭਣਿਸਙ੍ਖਾਤੇਨ ਬਲਕਾਯੇਨ ਸਦ੍ਧਿਂ ਮਗ੍ਗਂ ਪਟਿਪਨ੍ਨਸ੍ਸ ਤਸ੍ਸ ਨਨ੍ਦਪਣ੍ਡਿਤੋ ਇਦ੍ਧਾਨੁਭਾਵੇਨ ਅਟ੍ਠੁਸਭਵਿਤ੍ਥਤਂ ਮਗ੍ਗਂ ਸਮਂ ਮਾਪੇਤ੍ਵਾ ਆਕਾਸੇ ਚਮ੍ਮਖਣ੍ਡਂ ਪਤ੍ਥਰਿਤ੍ਵਾ ਤਤ੍ਥ ਪਲ੍ਲਙ੍ਕੇਨ ਨਿਸੀਦਿਤ੍ਵਾ ਸੇਨਾਯ ਪਰਿਵੁਤੋ ਅਲਙ੍ਕਤਹਤ੍ਥਿਕ੍ਖਨ੍ਧੇ ਨਿਸੀਦਿਤ੍ਵਾ ਗਚ੍ਛਨ੍ਤੇਨ ਰਞ੍ਞਾ ਸਦ੍ਧਿਂ ਧਮ੍ਮਯੁਤ੍ਤਕਥਂ ਕਥੇਨ੍ਤੋ ਸੀਤਉਣ੍ਹਾਦਿਪਰਿਸ੍ਸਯੇ ਵਾਰੇਨ੍ਤੋ ਅਗਮਾਸਿ.

ਅਥਸ੍ਸ ਅਸ੍ਸਮਂ ਪਾਪੁਣਨਦਿਵਸੇ ਸੋਣਪਣ੍ਡਿਤੋ ‘‘ਮਮ ਕਨਿਟ੍ਠਸ੍ਸ ਅਤਿਰੇਕਸਤ੍ਤਮਾਸਸਤ੍ਤਦਿਵਸਾਧਿਕਾਨਿ ਸਤ੍ਤ ਵਸ੍ਸਾਨਿ ਨਿਕ੍ਖਨ੍ਤਸ੍ਸਾ’’ਤਿ ਆਵਜ੍ਜੇਤ੍ਵਾ ‘‘ਕਹਂ ਨੁ ਖੋ ਸੋ ਏਤਰਹੀ’’ਤਿ ਦਿਬ੍ਬੇਨ ਚਕ੍ਖੁਨਾ ਓਲੋਕੇਨ੍ਤੋ ‘‘ਚਤੁਵੀਸਤਿਅਕ੍ਖੋਭਣਿਪਰਿਵਾਰੇਨ ਸਦ੍ਧਿਂ ਏਕਸਤਰਾਜਾਨੋ ਗਹੇਤ੍ਵਾ ਮਮਞ੍ਞੇਵ ਖਮਾਪੇਤੁਂ ਆਗਚ੍ਛਤੀ’’ਤਿ ਦਿਸ੍ਵਾ ਚਿਨ੍ਤੇਸਿ – ‘‘ਇਮੇਹਿ ਰਾਜੂਹਿ ਚੇਵ ਪਰਿਸਾਹਿ ਚ ਮਮ ਕਨਿਟ੍ਠਸ੍ਸ ਬਹੂਨਿ ਪਾਟਿਹਾਰਿਯਾਨਿ ਦਿਟ੍ਠਾਨਿ, ਮਮਾਨੁਭਾਵਂ ਅਜਾਨਿਤ੍ਵਾ ‘ਅਯਂ ਕੂਟਜਟਿਲੋ ਅਤ੍ਤਨੋ ਪਮਾਣਂ ਨ ਜਾਨਾਤਿ, ਅਮ੍ਹਾਕਂ ਅਯ੍ਯੇਨ ਸਦ੍ਧਿਂ ਪਯੋਜੇਸੀ’ਤਿ ਮਂ ਵਮ੍ਭੇਨ੍ਤਾ ਕਥੇਨ੍ਤਾ ਅਵੀਚਿਪਰਾਯਣਾ ਭਵੇਯ੍ਯੁਂ, ਇਦ੍ਧਿਪਾਟਿਹਾਰਿਯਂ ਨੇਸਂ ਦਸ੍ਸੇਸ੍ਸਾਮੀ’’ਤਿ. ਸੋ ਚਤੁਰਙ੍ਗੁਲਮਤ੍ਤੇਨ ਅਂਸਂ ਅਫੁਸਨ੍ਤਂ ਆਕਾਸੇ ਕਾਜਂ ਠਪੇਤ੍ਵਾ ਅਨੋਤਤ੍ਤਤੋ ਉਦਕਂ ਆਹਰਿਤੁਂ ਰਞ੍ਞੋ ਅਵਿਦੂਰੇ ਆਕਾਸੇਨ ਪਾਯਾਸਿ. ਨਨ੍ਦਪਣ੍ਡਿਤੋ ਤਂ ਆਗਚ੍ਛਨ੍ਤਂ ਦਿਸ੍ਵਾ ਅਤ੍ਤਾਨਂ ਦਸ੍ਸੇਤੁਂ ਅਵਿਸਹਨ੍ਤੋ ਨਿਸਿਨ੍ਨਟ੍ਠਾਨੇਯੇਵ ਅਨ੍ਤਰਧਾਯਿਤ੍ਵਾ ਪਲਾਯਿਤ੍ਵਾ ਹਿਮਵਨ੍ਤਂ ਪਾਵਿਸਿ. ਮਨੋਜਰਾਜਾ ਪਨ ਤਂ ਰਮਣੀਯੇਨ ਇਸਿਵੇਸੇਨ ਤਥਾ ਆਗਚ੍ਛਨ੍ਤਂ ਦਿਸ੍ਵਾ ਗਾਥਮਾਹ –

੧੦੭.

‘‘ਕਸ੍ਸ ਕਾਦਮ੍ਬਯੋ ਕਾਜੋ, ਵੇਹਾਸਂ ਚਤੁਰਙ੍ਗੁਲਂ;

ਅਂਸਂ ਅਸਮ੍ਫੁਸਂ ਏਤਿ, ਉਦਹਾਰਾਯ ਗਚ੍ਛਤੋ’’ਤਿ.

ਤਤ੍ਥ ਕਾਦਮ੍ਬਯੋਤਿ ਕਦਮ੍ਬਰੁਕ੍ਖਮਯੋ. ਅਂਸਂ ਅਸਮ੍ਫੁਸਂ ਏਤੀਤਿ ਅਂਸਂ ਅਸਮ੍ਫੁਸਨ੍ਤੋ ਸਯਮੇਵ ਆਗਚ੍ਛਤਿ. ਉਦਹਾਰਾਯਾਤਿ ਉਦਕਂ ਆਹਰਿਤੁਂ ਗਚ੍ਛਨ੍ਤਸ੍ਸ ਕਸ੍ਸ ਏਸ ਕਾਜੋ ਏਵਂ ਏਤਿ, ਕੋ ਨਾਮ ਤ੍ਵਂ, ਕੁਤੋ ਵਾ ਆਗਚ੍ਛਸੀਤਿ.

ਏਵਂ ਵੁਤ੍ਤੇ ਮਹਾਸਤ੍ਤੋ ਗਾਥਾਦ੍ਵਯਮਾਹ –

੧੦੮.

‘‘ਅਹਂ ਸੋਣੋ ਮਹਾਰਾਜ, ਤਾਪਸੋ ਸਹਿਤਬ੍ਬਤੋ;

ਭਰਾਮਿ ਮਾਤਾਪਿਤਰੋ, ਰਤ੍ਤਿਨ੍ਦਿਵਮਤਨ੍ਦਿਤੋ.

੧੦੯.

‘‘ਵਨੇ ਫਲਞ੍ਚ ਮੂਲਞ੍ਚ, ਆਹਰਿਤ੍ਵਾ ਦਿਸਮ੍ਪਤਿ;

ਪੋਸੇਮਿ ਮਾਤਾਪਿਤਰੋ, ਪੁਬ੍ਬੇ ਕਤਮਨੁਸ੍ਸਰ’’ਨ੍ਤਿ.

ਤਤ੍ਥ ਸਹਿਤਬ੍ਬਤੋਤਿ ਸਹਿਤਵਤੋ ਸੀਲਾਚਾਰਸਮ੍ਪਨ੍ਨੋ ਏਕੋ ਤਾਪਸੋ ਅਹਨ੍ਤਿ ਵਦਤਿ. ਭਰਾਮੀਤਿ ਪੋਸੇਮਿ. ਅਤਨ੍ਦਿਤੋਤਿ ਅਨਲਸੋ ਹੁਤ੍ਵਾ. ਪੁਬ੍ਬੇ ਕਤਮਨੁਸ੍ਸਰਨ੍ਤਿ ਤੇਹਿ ਪੁਬ੍ਬੇ ਕਤਂ ਮਯ੍ਹਂ ਗੁਣਂ ਅਨੁਸ੍ਸਰਨ੍ਤੋਤਿ.

ਤਂ ਸੁਤ੍ਵਾ ਰਾਜਾ ਤੇਨ ਸਦ੍ਧਿਂ ਵਿਸ੍ਸਾਸਂ ਕਤ੍ਤੁਕਾਮੋ ਅਨਨ੍ਤਰਂ ਗਾਥਮਾਹ –

੧੧੦.

‘‘ਇਚ੍ਛਾਮ ਅਸ੍ਸਮਂ ਗਨ੍ਤੁਂ, ਯਤ੍ਥ ਸਮ੍ਮਤਿ ਕੋਸਿਯੋ;

ਮਗ੍ਗਂ ਨੋ ਸੋਣ ਅਕ੍ਖਾਹਿ, ਯੇਨ ਗਚ੍ਛੇਮੁ ਅਸ੍ਸਮ’’ਨ੍ਤਿ.

ਤਤ੍ਥ ਅਸ੍ਸਮਨ੍ਤਿ ਤੁਮ੍ਹਾਕਂ ਅਸ੍ਸਮਪਦਂ.

ਅਥ ਮਹਾਸਤ੍ਤੋ ਅਤ੍ਤਨੋ ਆਨੁਭਾਵੇਨ ਅਸ੍ਸਮਪਦਗਾਮਿਮਗ੍ਗਂ ਮਾਪੇਤ੍ਵਾ ਗਾਥਮਾਹ –

੧੧੧.

‘‘ਅਯਂ ਏਕਪਦੀ ਰਾਜ, ਯੇਨੇਤਂ ਮੇਘਸਨ੍ਨਿਭਂ;

ਕੋਵਿਲ਼ਾਰੇਹਿ ਸਞ੍ਛਨ੍ਨਂ, ਏਤ੍ਥ ਸਮ੍ਮਤਿ ਕੋਸਿਯੋ’’ਤਿ.

ਤਸ੍ਸਤ੍ਥੋ – ਮਹਾਰਾਜ, ਅਯਂ ਏਕਪਦਿਕੋ ਜਙ੍ਘਮਗ੍ਗੋ, ਇਮਿਨਾ ਗਚ੍ਛਥ, ਯੇਨ ਦਿਸਾਭਾਗੇਨ ਏਤਂ ਮੇਘਵਣ੍ਣਂ ਸੁਪੁਪ੍ਫਿਤਕੋਵਿਲ਼ਾਰਸਞ੍ਛਨ੍ਨਂ ਵਨਂ ਦਿਸ੍ਸਤਿ, ਏਤ੍ਥ ਮਮ ਪਿਤਾ ਕੋਸਿਯਗੋਤ੍ਤੋ ਵਸਤਿ, ਏਤਸ੍ਸ ਸੋ ਅਸ੍ਸਮੋਤਿ.

੧੧੨.

‘‘ਇਦਂ ਵਤ੍ਵਾਨ ਪਕ੍ਕਾਮਿ, ਤਰਮਾਨੋ ਮਹਾਇਸਿ;

ਵੇਹਾਸੇ ਅਨ੍ਤਲਿਕ੍ਖਸ੍ਮਿਂ, ਅਨੁਸਾਸਿਤ੍ਵਾਨ ਖਤ੍ਤਿਯੇ.

੧੧੩.

‘‘ਅਸ੍ਸਮਂ ਪਰਿਮਜ੍ਜਿਤ੍ਵਾ, ਪਞ੍ਞਾਪੇਤ੍ਵਾਨ ਆਸਨਂ;

ਪਣ੍ਣਸਾਲਂ ਪਵਿਸਿਤ੍ਵਾ, ਪਿਤਰਂ ਪਤਿਬੋਧਯਿ.

੧੧੪.

‘‘ਇਮੇ ਆਯਨ੍ਤਿ ਰਾਜਾਨੋ, ਅਭਿਜਾਤਾ ਯਸਸ੍ਸਿਨੋ;

ਅਸ੍ਸਮਾ ਨਿਕ੍ਖਮਿਤ੍ਵਾਨ, ਨਿਸੀਦ ਤ੍ਵਂ ਮਹਾਇਸੇ.

੧੧੫.

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਤਰਮਾਨੋ ਮਹਾਇਸਿ;

ਅਸ੍ਸਮਾ ਨਿਕ੍ਖਮਿਤ੍ਵਾਨ, ਸਦ੍ਵਾਰਮ੍ਹਿ ਉਪਾਵਿਸੀ’’ਤਿ. – ਇਮਾ ਅਭਿਸਮ੍ਬੁਦ੍ਧਗਾਥਾ;

ਤਤ੍ਥ ਪਕ੍ਕਾਮੀਤਿ ਅਨੋਤਤ੍ਤਂ ਅਗਮਾਸਿ. ਅਸ੍ਸਮਂ ਪਰਿਮਜ੍ਜਿਤ੍ਵਾਤਿ, ਭਿਕ੍ਖਵੇ, ਸੋ ਇਸਿ ਵੇਗੇਨ ਅਨੋਤਤ੍ਤਂ ਗਨ੍ਤ੍ਵਾ ਪਾਨੀਯਂ ਆਦਾਯ ਤੇਸੁ ਰਾਜੂਸੁ ਅਸ੍ਸਮਂ ਅਸਮ੍ਪਤ੍ਤੇਸੁਯੇਵ ਆਗਨ੍ਤ੍ਵਾ ਪਾਨੀਯਘਟੇ ਪਾਨੀਯਮਾਲ਼ਕੇ ਠਪੇਤ੍ਵਾ ‘‘ਮਹਾਜਨੋ ਪਿਵਿਸ੍ਸਤੀ’’ਤਿ ਵਨਕੁਸੁਮੇਹਿ ਵਾਸੇਤ੍ਵਾ ਸਮ੍ਮਜ੍ਜਨਿਂ ਆਦਾਯ ਅਸ੍ਸਮਂ ਸਮ੍ਮਜ੍ਜਿਤ੍ਵਾ ਪਣ੍ਣਸਾਲਦ੍ਵਾਰੇ ਪਿਤੁ ਆਸਨਂ ਪਞ੍ਞਾਪੇਤ੍ਵਾ ਪਵਿਸਿਤ੍ਵਾ ਪਿਤਰਂ ਜਾਨਾਪੇਸੀਤਿ ਅਤ੍ਥੋ. ਉਪਾਵਿਸੀਤਿ ਉਚ੍ਚਾਸਨੇ ਨਿਸੀਦਿ.

ਬੋਧਿਸਤ੍ਤਸ੍ਸ ਮਾਤਾ ਪਨ ਤਸ੍ਸ ਪਚ੍ਛਤੋ ਨੀਚਟ੍ਠਾਨੇ ਏਕਮਨ੍ਤਂ ਨਿਸੀਦਿ. ਮਹਾਸਤ੍ਤੋ ਨੀਚਾਸਨੇ ਨਿਸੀਦਿ. ਨਨ੍ਦਪਣ੍ਡਿਤੋਪਿ ਬੋਧਿਸਤ੍ਤਸ੍ਸ ਅਨੋਤਤ੍ਤਤੋ ਪਾਨੀਯਂ ਆਦਾਯ ਅਸ੍ਸਮਂ ਆਗਤਕਾਲੇ ਰਞ੍ਞੋ ਸਨ੍ਤਿਕਂ ਆਗਨ੍ਤ੍ਵਾ ਅਸ੍ਸਮਸ੍ਸ ਅਵਿਦੂਰੇ ਖਨ੍ਧਾਵਾਰਂ ਨਿਵਾਸੇਸਿ. ਅਥ ਰਾਜਾ ਨ੍ਹਤ੍ਵਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਏਕਸਤਰਾਜਪਰਿਵੁਤੋ ਨਨ੍ਦਪਣ੍ਡਿਤਂ ਗਹੇਤ੍ਵਾ ਮਹਨ੍ਤੇਨ ਸਿਰਿਸੋਭਗ੍ਗੇਨ ਬੋਧਿਸਤ੍ਤਂ ਖਮਾਪੇਤੁਂ ਅਸ੍ਸਮਂ ਪਾਵਿਸਿ. ਅਥ ਨਂ ਤਥਾ ਆਗਚ੍ਛਨ੍ਤਂ ਬੋਧਿਸਤ੍ਤਸ੍ਸ ਪਿਤਾ ਦਿਸ੍ਵਾ ਬੋਧਿਸਤ੍ਤਂ ਪੁਚ੍ਛਿ, ਸੋਪਿਸ੍ਸ ਆਚਿਕ੍ਖਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੬.

‘‘ਤਞ੍ਚ ਦਿਸ੍ਵਾਨ ਆਯਨ੍ਤਂ, ਜਲਨ੍ਤਂਰਿਵ ਤੇਜਸਾ;

ਖਤ੍ਯਸਙ੍ਘਪਰਿਬ੍ਯੂਲ਼੍ਹਂ, ਕੋਸਿਯੋ ਏਤਦਬ੍ਰਵਿ.

੧੧੭.

‘‘ਕਸ੍ਸ ਭੇਰੀ ਮੁਦਿਙ੍ਗਾ ਚ, ਸਙ੍ਖਾ ਪਣਵਦਿਨ੍ਦਿਮਾ;

ਪੁਰਤੋ ਪਟਿਪਨ੍ਨਾਨਿ, ਹਾਸਯਨ੍ਤਾ ਰਥੇਸਭਂ.

੧੧੮.

‘‘ਕਸ੍ਸ ਕਞ੍ਚਨਪਟ੍ਟੇਨ, ਪੁਥੁਨਾ ਵਿਜ੍ਜੁਵਣ੍ਣਿਨਾ;

ਯੁਵਾ ਕਲਾਪਸਨ੍ਨਦ੍ਧੋ, ਕੋ ਏਤਿ ਸਿਰਿਯਾ ਜਲਂ.

੧੧੯.

‘‘ਉਕ੍ਕਾਮੁਖਪਹਟ੍ਠਂਵ, ਖਦਿਰਙ੍ਗਾਰਸਨ੍ਨਿਭਂ;

ਮੁਖਞ੍ਚ ਰੁਚਿਰਾ ਭਾਤਿ, ਕੋ ਏਤਿ ਸਿਰਿਯਾ ਜਲਂ.

੧੨੦.

‘‘ਕਸ੍ਸ ਪਗ੍ਗਹਿਤਂ ਛਤ੍ਤਂ, ਸਸਲਾਕਂ ਮਨੋਰਮਂ;

ਆਦਿਚ੍ਚਰਂਸਾਵਰਣਂ, ਕੋ ਏਤਿ ਸਿਰਿਯਾ ਜਲਂ.

੧੨੧.

‘‘ਕਸ੍ਸ ਅਙ੍ਗਂ ਪਰਿਗ੍ਗਯ੍ਹ, ਵਾਲਬੀਜਨਿਮੁਤ੍ਤਮਂ;

ਚਰਨ੍ਤਿ ਵਰਪੁਞ੍ਞਸ੍ਸ, ਹਤ੍ਥਿਕ੍ਖਨ੍ਧੇਨ ਆਯਤੋ.

੧੨੨.

‘‘ਕਸ੍ਸ ਸੇਤਾਨਿ ਛਤ੍ਤਾਨਿ, ਆਜਾਨੀਯਾ ਚ ਵਮ੍ਮਿਤਾ;

ਸਮਨ੍ਤਾ ਪਰਿਕੀਰੇਨ੍ਤਿ, ਕੋ ਏਤਿ ਸਿਰਿਯਾ ਜਲਂ.

੧੨੩.

‘‘ਕਸ੍ਸ ਏਕਸਤਂ ਖਤ੍ਯਾ, ਅਨੁਯਨ੍ਤਾ ਯਸਸ੍ਸਿਨੋ;

ਸਮਨ੍ਤਾਨੁਪਰਿਯਨ੍ਤਿ, ਕੋ ਏਤਿ ਸਿਰਿਯਾ ਜਲਂ.

੧੨੪.

‘‘ਹਤ੍ਥਿਅਸ੍ਸਰਥਪਤ੍ਤਿ, ਸੇਨਾ ਚ ਚਤੁਰਙ੍ਗਿਨੀ;

ਸਮਨ੍ਤਾਨੁਪਰਿਯਨ੍ਤਿ, ਕੋ ਏਤਿ ਸਿਰਿਯਾ ਜਲਂ.

੧੨੫.

‘‘ਕਸ੍ਸੇਸਾ ਮਹਤੀ ਸੇਨਾ, ਪਿਟ੍ਠਿਤੋ ਅਨੁਵਤ੍ਤਤਿ;

ਅਕ੍ਖੋਭਣੀ ਅਪਰਿਯਨ੍ਤਾ, ਸਾਗਰਸ੍ਸੇਵ ਊਮਿਯੋ.

੧੨੬.

‘‘ਰਾਜਾਭਿਰਾਜਾ ਮਨੋਜੋ, ਇਨ੍ਦੋਵ ਜਯਤਂ ਪਤਿ;

ਨਨ੍ਦਸ੍ਸਜ੍ਝਾਵਰਂ ਏਤਿ, ਅਸ੍ਸਮਂ ਬ੍ਰਹ੍ਮਚਾਰਿਨਂ.

੧੨੭.

‘‘ਤਸ੍ਸੇਸਾ ਮਹਤੀ ਸੇਨਾ, ਪਿਟ੍ਠਿਤੋ ਅਨੁਵਤ੍ਤਤਿ;

ਅਕ੍ਖੋਭਣੀ ਅਪਰਿਯਨ੍ਤਾ, ਸਾਗਰਸ੍ਸੇਵ ਊਮਿਯੋ’’ਤਿ.

ਤਤ੍ਥ ਜਲਨ੍ਤਂਰਿਵਾਤਿ ਜਲਨ੍ਤਂ ਵਿਯ. ਪਟਿਪਨ੍ਨਾਨੀਤਿ ਏਤਾਨਿ ਤੂਰਿਯਾਨਿ ਕਸ੍ਸ ਪੁਰਤੋ ਆਗਚ੍ਛਨ੍ਤੀਤਿ ਅਤ੍ਥੋ. ਹਾਸਯਨ੍ਤਾਤਿ ਤੋਸੇਨ੍ਤਾ. ਕਞ੍ਚਨਪਟ੍ਟੇਨਾਤਿ, ਤਾਤ, ਕਸ੍ਸ ਕਞ੍ਚਨਮਯੇਨ ਵਿਜ੍ਜੁਵਣ੍ਣੇਨ ਉਣ੍ਹੀਸਪਟ੍ਟੇਨ ਨਲਾਟਨ੍ਤੋ ਪਰਿਕ੍ਖਿਤ੍ਤੋਤਿ ਪੁਚ੍ਛਤਿ. ਯੁਵਾਤਿ ਤਰੁਣੋ. ਕਲਾਪਸਨ੍ਨਦ੍ਧੋਤਿ ਸਨ੍ਨਦ੍ਧਸਰਤੂਣੀਰੋ. ਉਕ੍ਕਾਮੁਖਪਹਟ੍ਠਂ ਵਾਤਿ ਕਮ੍ਮਾਰਾਨਂ ਉਦ੍ਧਨੇ ਪਹਟ੍ਠਂ ਸੁਵਣ੍ਣਂ ਵਿਯ. ਖਦਿਰਙ੍ਗਾਰਸਨ੍ਨਿਭਨ੍ਤਿ ਵੀਤਚ੍ਚਿਤਖਦਿਰਙ੍ਗਾਰਵਣ੍ਣਂ. ਆਦਿਚ੍ਚਰਂਸਾਵਰਣਨ੍ਤਿਆਦਿਚ੍ਚਰਂਸੀਨਂ ਆਵਰਣਂ. ਅਙ੍ਗਂ ਪਰਿਗ੍ਗਯ੍ਹਾਤਿ ਅਙ੍ਗਂ ਪਰਿਗ੍ਗਹੇਤ੍ਵਾ, ਸਰੀਰਂ ਪਰਿਕ੍ਖਿਪਿਤ੍ਵਾਤਿ ਅਤ੍ਥੋ. ਵਾਲਬੀਜਨਿਮੁਤ੍ਤਮਨ੍ਤਿ ਵਾਲਬੀਜਨਿਂ ਉਤ੍ਤਮਂ. ਚਰਨ੍ਤੀਤਿ ਸਞ੍ਚਰਨ੍ਤਿ. ਛਤ੍ਤਾਨੀਤਿ ਆਜਾਨੀਯਪਿਟ੍ਠੇ ਨਿਸਿਨ੍ਨਾਨਂ ਧਾਰਿਤਛਤ੍ਤਾਨਿ. ਪਰਿਕੀਰੇਨ੍ਤੀਤਿ ਤਸ੍ਸ ਸਮਨ੍ਤਾ ਸਬ੍ਬਦਿਸਾਭਾਗੇਸੁ ਪਰਿਕੀਰਯਨ੍ਤਿ. ਚਤੁਰਙ੍ਗਿਨੀਤਿ ਏਤੇਹਿ ਹਤ੍ਥਿਆਦੀਹਿ ਚਤੂਹਿ ਅਙ੍ਗੇਹਿ ਸਮਨ੍ਨਾਗਤਾ. ਅਕ੍ਖੋਭਣੀਤਿ ਖੋਭੇਤੁਂ ਨ ਸਕ੍ਕਾ. ਸਾਗਰਸ੍ਸੇਵਾਤਿ ਸਾਗਰਸ੍ਸ ਊਮਿਯੋ ਵਿਯ ਅਪਰਿਯਨ੍ਤਾ. ਰਾਜਾਭਿਰਾਜਾਤਿ ਏਕਸਤਰਾਜੂਨਂ ਪੂਜਿਤੋ, ਤੇਸਂ ਵਾ ਅਧਿਕੋ ਰਾਜਾਤਿ ਰਾਜਾਭਿਰਾਜਾ. ਜਯਤਂ ਪਤੀਤਿ ਜਯਪ੍ਪਤ੍ਤਾਨਂ ਤਾਵਤਿਂਸਾਨਂ ਜੇਟ੍ਠਕੋ. ਅਜ੍ਝਾਵਰਨ੍ਤਿ ਮਮਂ ਖਮਾਪਨਤ੍ਥਾਯ ਨਨ੍ਦਸ੍ਸ ਪਰਿਸਭਾਵਂ ਉਪਗਨ੍ਤ੍ਵਾ ਏਤਿ.

ਸਤ੍ਥਾ ਆਹ –

੧੨੮.

‘‘ਅਨੁਲਿਤ੍ਤਾ ਚਨ੍ਦਨੇਨ, ਕਾਸਿਕੁਤ੍ਤਮਧਾਰਿਨੋ;

ਸਬ੍ਬੇ ਪਞ੍ਜਲਿਕਾ ਹੁਤ੍ਵਾ, ਇਸੀਨਂ ਅਜ੍ਝੁਪਾਗਮੁ’’ਨ੍ਤਿ.

ਤਤ੍ਥ ਇਸੀਨਂ ਅਜ੍ਝੁਪਾਗਮੁਨ੍ਤਿ, ਭਿਕ੍ਖਵੇ, ਸਬ੍ਬੇਪਿ ਤੇ ਰਾਜਾਨੋ ਸੁਰਭਿਚਨ੍ਦਨੇਨ ਅਨੁਲਿਤ੍ਤਾ ਉਤ੍ਤਮਕਾਸਿਕਵਤ੍ਥਧਾਰਿਨੋ ਸਿਰਸਿ ਪਤਿਟ੍ਠਾਪਿਤਅਞ੍ਜਲੀ ਹੁਤ੍ਵਾ ਇਸੀਨਂ ਸਨ੍ਤਿਕਂ ਉਪਗਤਾ.

ਤਤੋ ਮਨੋਜੋ ਰਾਜਾ ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਪਟਿਸਨ੍ਥਾਰਂ ਕਰੋਨ੍ਤੋ ਗਾਥਾਦ੍ਵਯਮਾਹ –

੧੨੯.

‘‘ਕਚ੍ਚਿ ਨੁ ਭੋਤੋ ਕੁਸਲਂ, ਕਚ੍ਚਿ ਭੋਤੋ ਅਨਾਮਯਂ;

ਕਚ੍ਚਿ ਉਞ੍ਛੇਨ ਯਾਪੇਥ, ਕਚ੍ਚਿ ਮੂਲਫਲਾ ਬਹੂ.

੧੩੦.

‘‘ਕਚ੍ਚਿ ਡਂਸਾ ਮਕਸਾ ਚ, ਅਪ੍ਪਮੇਵ ਸਰੀਸਪਾ;

ਵਨੇ ਵਾਲ਼ਮਿਗਾਕਿਣ੍ਣੇ, ਕਚ੍ਚਿ ਹਿਂਸਾ ਨ ਵਿਜ੍ਜਤੀ’’ਤਿ.

ਤਤੋ ਪਰਂ ਉਭਿਨ੍ਨਂ ਤੇਸਂ ਵਚਨਪਟਿਵਚਨਵਸੇਨ ਕਥਿਤਗਾਥਾ ਹੋਨ੍ਤਿ –

੧੩੧.

‘‘ਕੁਸਲਞ੍ਚੇਵ ਨੋ ਰਾਜ, ਅਥੋ ਰਾਜ ਅਨਾਮਯਂ;

ਅਥੋ ਉਞ੍ਛੇਨ ਯਾਪੇਮ, ਅਥੋ ਮੂਲਫਲਾ ਬਹੂ.

੧੩੨.

‘‘ਅਥੋ ਡਂਸਾ ਮਕਸਾ ਚ, ਅਪ੍ਪਮੇਵ ਸਰੀਸਪਾ;

ਵਨੇ ਵਾਲ਼ਮਿਗਾਕਿਣ੍ਣੇ, ਹਿਂਸਾ ਮਯ੍ਹਂ ਨ ਵਿਜ੍ਜਤਿ.

੧੩੩.

‘‘ਬਹੂਨਿ ਵਸ੍ਸਪੂਗਾਨਿ, ਅਸ੍ਸਮੇ ਸਮ੍ਮਤਂ ਇਧ;

ਨਾਭਿਜਾਨਾਮਿ ਉਪ੍ਪਨ੍ਨਂ, ਆਬਾਧਂ ਅਮਨੋਰਮਂ.

੧੩੪.

‘‘ਸ੍ਵਾਗਤਂ ਤੇ ਮਹਾਰਾਜ, ਅਥੋ ਤੇ ਅਦੁਰਾਗਤਂ;

ਇਸ੍ਸਰੋਸਿ ਅਨੁਪ੍ਪਤ੍ਤੋ, ਯਂ ਇਧਤ੍ਥਿ ਪਵੇਦਯ.

੧੩੫.

‘‘ਤਿਨ੍ਦੁਕਾਨਿ ਪਿਯਾਲਾਨਿ, ਮਧੁਕੇ ਕਾਸੁਮਾਰਿਯੋ;

ਫਲਾਨਿ ਖੁਦ੍ਦਕਪ੍ਪਾਨਿ, ਭੁਞ੍ਜ ਰਾਜ ਵਰਂ ਵਰਂ.

੧੩੬.

‘‘ਇਦਮ੍ਪਿ ਪਾਨੀਯਂ ਸੀਤਂ, ਆਭਤਂ ਗਿਰਿਗਬ੍ਭਰਾ;

ਤਤੋ ਪਿਵ ਮਹਾਰਾਜ, ਸਚੇ ਤ੍ਵਂ ਅਭਿਕਙ੍ਖਸਿ.

੧੩੭.

‘‘ਪਟਿਗ੍ਗਹਿਤਂ ਯਂ ਦਿਨ੍ਨਂ, ਸਬ੍ਬਸ੍ਸ ਅਗ੍ਘਿਯਂ ਕਤਂ;

ਨਨ੍ਦਸ੍ਸਾਪਿ ਨਿਸਾਮੇਥ, ਵਚਨਂ ਸੋ ਪਵਕ੍ਖਤਿ.

੧੩੮.

‘‘ਅਜ੍ਝਾਵਰਮ੍ਹਾ ਨਨ੍ਦਸ੍ਸ, ਭੋਤੋ ਸਨ੍ਤਿਕਮਾਗਤਾ;

ਸੁਣਾਤੁ ਭਵਂ ਵਚਨਂ, ਨਨ੍ਦਸ੍ਸ ਪਰਿਸਾਯ ਚਾ’’ਤਿ.

ਇਮਾ ਯੇਭੁਯ੍ਯੇਨ ਪਾਕਟਸਮ੍ਬਨ੍ਧਾਯੇਵ, ਯਂ ਪਨੇਤ੍ਥ ਅਪਾਕਟਂ, ਤਦੇਵ ਵਕ੍ਖਾਮ. ਪਵੇਦਯਾਤਿ ਯਂ ਇਮਸ੍ਮਿਂ ਠਾਨੇ ਤਵ ਅਭਿਰੁਚਿਤਂ ਅਤ੍ਥਿ, ਤਂ ਨੋ ਕਥੇਹੀਤਿ ਵਦਤਿ. ਖੁਦ੍ਦਕਪ੍ਪਾਨੀਤਿ ਏਤਾਨਿ ਨਾਨਾਰੁਕ੍ਖਫਲਾਨਿ ਖੁਦ੍ਦਕਮਧੁਪਟਿਭਾਗਾਨਿ ਮਧੁਰਾਨਿ. ਵਰਂ ਵਰਨ੍ਤਿ ਇਤੋ ਉਤ੍ਤਮੁਤ੍ਤਮਂ ਗਹੇਤ੍ਵਾ ਭੁਞ੍ਜ. ਗਿਰਿਗਬ੍ਭਰਾਤਿ ਅਨੋਤਤ੍ਤਤੋ. ਸਬ੍ਬਸ੍ਸ ਅਗ੍ਘਿਯਨ੍ਤਿ ਯੇਨ ਮਯਂ ਆਪੁਚ੍ਛਿਤਾ, ਤਂ ਅਮ੍ਹੇਹਿ ਪਟਿਗ੍ਗਹਿਤਂ ਨਾਮ ਤੁਮ੍ਹੇਹਿ ਚ ਦਿਨ੍ਨਮੇਵ ਨਾਮ, ਏਤ੍ਤਾਵਤਾ ਇਮਸ੍ਸ ਜਨਸ੍ਸ ਸਬ੍ਬਸ੍ਸ ਅਗ੍ਘਿਯਂ ਤੁਮ੍ਹੇਹਿ ਕਤਂ. ਨਨ੍ਦਸ੍ਸਾਪੀਤਿ ਅਮ੍ਹਾਕਂ ਤਾਵ ਸਬ੍ਬਂ ਕਤਂ, ਇਦਾਨਿ ਪਨ ਨਨ੍ਦਪਣ੍ਡਿਤੋ ਕਿਞ੍ਚਿ ਵਤ੍ਤੁਕਾਮੋ, ਤਸ੍ਸਪਿ ਤਾਵ ਵਚਨਂ ਸੁਣਾਥ. ਅਜ੍ਝਾਵਰਮ੍ਹਾਤਿ ਮਯਞ੍ਹਿ ਨ ਅਞ੍ਞੇਨ ਕਮ੍ਮੇਨ ਆਗਤਾ, ਨਨ੍ਦਸ੍ਸ ਪਨ ਪਰਿਸਾ ਹੁਤ੍ਵਾ ਤੁਮ੍ਹਾਕਂ ਖਮਾਪਨਤ੍ਥਾਯ ਆਗਤਾਤਿ ਵਦਤਿ. ਭਵਨ੍ਤਿ ਭਵਂ ਸੋਣਪਣ੍ਡਿਤੋ ਸੁਣਾਤੁ.

ਏਵਂ ਵੁਤ੍ਤੇ ਨਨ੍ਦਪਣ੍ਡਿਤੋ ਉਟ੍ਠਾਯਾਸਨਾ ਮਾਤਾਪਿਤਰੋ ਚ ਭਾਤਰਞ੍ਚ ਵਨ੍ਦਿਤ੍ਵਾ ਸਕਪਰਿਸਾਯ ਸਦ੍ਧਿਂ ਸਲ੍ਲਪਨ੍ਤੋ ਆਹ –

੧੩੯.

‘‘ਪਰੋਸਤਂ ਜਾਨਪਦਾ, ਮਹਾਸਾਲਾ ਚ ਬ੍ਰਾਹ੍ਮਣਾ;

ਇਮੇ ਚ ਖਤ੍ਤਿਯਾ ਸਬ੍ਬੇ, ਅਭਿਜਾਤਾ ਯਸਸ੍ਸਿਨੋ;

ਭਵਞ੍ਚ ਰਾਜਾ ਮਨੋਜੋ, ਅਨੁਮਞ੍ਞਨ੍ਤੁ ਮੇ ਵਚੋ.

੧੪੦.

‘‘ਯੇ ਚ ਸਨ੍ਤਿ ਸਮੀਤਾਰੋ, ਯਕ੍ਖਾਨਿ ਇਧ ਮਸ੍ਸਮੇ;

ਅਰਞ੍ਞੇ ਭੂਤਭਬ੍ਯਾਨਿ, ਸੁਣਨ੍ਤੁ ਵਚਨਂ ਮਮ.

੧੪੧.

‘‘ਨਮੋ ਕਤ੍ਵਾਨ ਭੂਤਾਨਂ, ਇਸਿਂ ਵਕ੍ਖਾਮਿ ਸੁਬ੍ਬਤਂ;

ਸੋ ਤ੍ਯਾਹਂ ਦਕ੍ਖਿਣਾ ਬਾਹੁ, ਤਵ ਕੋਸਿਯ ਸਮ੍ਮਤੋ.

੧੪੨.

‘‘ਪਿਤਰਂ ਮੇ ਜਨੇਤ੍ਤਿਞ੍ਚ, ਭਤ੍ਤੁਕਾਮਸ੍ਸ ਮੇ ਸਤੋ;

ਵੀਰ ਪੁਞ੍ਞਮਿਦਂ ਠਾਨਂ, ਮਾ ਮਂ ਕੋਸਿਯ ਵਾਰਯ.

੧੪੩.

‘‘ਸਬ੍ਭਿ ਹੇਤਂ ਉਪਞ੍ਞਾਤਂ, ਮਮੇਤਂ ਉਪਨਿਸ੍ਸਜ;

ਉਟ੍ਠਾਨਪਾਰਿਚਰਿਯਾਯ, ਦੀਘਰਤ੍ਤਂ ਤਯਾ ਕਤਂ;

ਧਾਤਾਪਿਤੂਸੁ ਪੁਞ੍ਞਾਨਿ, ਮਮ ਲੋਕਦਦੋ ਭਵ.

੧੪੪.

‘‘ਤਥੇਵ ਸਨ੍ਤਿ ਮਨੁਜਾ, ਧਮ੍ਮੇ ਧਮ੍ਮਪਦਂ ਵਿਦੂ;

ਮਗ੍ਗੋ ਸਗ੍ਗਸ੍ਸ ਲੋਕਸ੍ਸ, ਯਥਾ ਜਾਨਾਸਿ ਤ੍ਵਂ ਇਸੇ.

੧੪੫.

‘‘ਉਟ੍ਠਾਨਪਾਰਿਚਰਿਯਾਯ, ਮਾਤਾਪਿਤੁਸੁਖਾਵਹਂ;

ਤਂ ਮਂ ਪੁਞ੍ਞਾ ਨਿਵਾਰੇਤਿ, ਅਰਿਯਮਗ੍ਗਾਵਰੋ ਨਰੋ’’ਤਿ.

ਤਤ੍ਥ ਅਨੁਮਞ੍ਞਨ੍ਤੂਤਿ ਅਨੁਬੁਜ੍ਝਨ੍ਤੁ, ਸਾਧੁਕਂ ਸੁਤ੍ਵਾ ਪਚ੍ਚਕ੍ਖਂ ਕਰੋਨ੍ਤੂਤਿ ਅਤ੍ਥੋ. ਸਮੀਤਾਰੋਤਿ ਸਮਾਗਤਾ. ਅਰਞ੍ਞੇ ਭੂਤਭਬ੍ਯਾਨੀਤਿ ਅਸ੍ਮਿਂ ਹਿਮਵਨ੍ਤਾਰਞ੍ਞੇ ਯਾਨਿ ਭੂਤਾਨਿ ਚੇਵ ਵੁਡ੍ਢਿਮਰਿਯਾਦਪ੍ਪਤ੍ਤਾਨਿ ਭਬ੍ਯਾਨਿ ਚ ਤਰੁਣਦੇਵਤਾਨਿ, ਤਾਨਿਪਿ ਸਬ੍ਬਾਨਿ ਮਮ ਵਚਨਂ ਸੁਣਨ੍ਤੂਤਿ ਅਤ੍ਥੋ. ‘‘ਨਮੋ ਕਤ੍ਵਾਨਾ’’ਤਿ ਇਦਂ ਸੋ ਪਰਿਸਾਯ ਸਞ੍ਞਂ ਦਤ੍ਵਾ ਤਸ੍ਮਿਂ ਵਨਸਣ੍ਡੇ ਨਿਬ੍ਬਤ੍ਤਦੇਵਤਾਨਂ ਨਮਕ੍ਕਾਰਂ ਕਤ੍ਵਾ ਆਹ. ਤਸ੍ਸਤ੍ਥੋ – ਅਜ੍ਜ ਬਹੂਹਿ ਦੇਵਤਾਹਿ ਮਮ ਭਾਤਿਕਸ੍ਸ ਧਮ੍ਮਕਥਾਸਵਨਤ੍ਥਂ ਆਗਤਾਹਿ ਭਵਿਤਬ੍ਬਂ, ਅਹਂ ਵੋ ਨਮਕ੍ਕਾਰੋ, ਤੁਮ੍ਹੇਪਿ ਮਯ੍ਹਂ ਸਹਾਯਾ ਹੋਥਾਤਿ. ਸੋ ਦੇਵਤਾਨਂ ਅਞ੍ਜਲਿਂ ਪਗ੍ਗਹੇਤ੍ਵਾ ਪਰਿਸਂ ਜਾਨਾਪੇਤ੍ਵਾ ‘‘ਇਸਿਂ ਵਕ੍ਖਾਮੀ’’ਤਿਆਦਿਮਾਹ. ਤਤ੍ਥ ਇਸਿਨ੍ਤਿ ਸੋਣਪਣ੍ਡਿਤਂ ਸਨ੍ਧਾਯ ਵਦਤਿ. ਸਮ੍ਮਤੋਤਿ ਭਾਤਰੋ ਨਾਮ ਅਙ੍ਗਸਮਾ ਹੋਨ੍ਤਿ, ਤਸ੍ਮਾ ਸੋ ਤੇ ਅਹਂ ਦਕ੍ਖਿਣਾ ਬਾਹੂਤਿ ਸਮ੍ਮਤੋ. ਤੇਨ ਮੇ ਖਮਿਤੁਂ ਅਰਹਥਾਤਿ ਦੀਪੇਤਿ.

ਵੀਰਾਤਿ ਵੀਰਿਯਵਨ੍ਤ ਮਹਾਪਰਕ੍ਕਮ. ਪੁਞ੍ਞਮਿਦਂ ਠਾਨਨ੍ਤਿ ਇਦਂ ਮਾਤਾਪਿਤੁਉਪਟ੍ਠਾਨਂ ਨਾਮ ਪੁਞ੍ਞਂ ਸਗ੍ਗਸਂਵਤ੍ਤਨਿਕਕਾਰਣਂ, ਤਂ ਕਰੋਨ੍ਤਂ ਮਂ ਮਾ ਵਾਰਯਾਤਿ ਵਦਤਿ. ਸਬ੍ਭਿ ਹੇਤਨ੍ਤਿ ਏਤਞ੍ਹਿ ਮਾਤਾਪਿਤੁਉਪਟ੍ਠਾਨਂ ਨਾਮ ਪਣ੍ਡਿਤੇਹਿ ਉਪਞ੍ਞਾਤਂ ਉਪਗਨ੍ਤ੍ਵਾ ਞਾਤਞ੍ਚੇਵ ਵਣ੍ਣਿਤਞ੍ਚ. ਮਮੇਤਂ ਉਪਨਿਸ੍ਸਜਾਤਿ ਇਦਂ ਤ੍ਵਂ ਮਯ੍ਹਂ ਨਿਸ੍ਸਜ ਵਿਸ੍ਸਜ੍ਜੇਹਿ ਦੇਹਿ. ਉਟ੍ਠਾਨਪਾਰਿਚਰਿਯਾਯਾਤਿ ਉਟ੍ਠਾਨੇਨ ਚ ਪਾਰਿਚਰਿਯਾਯ ਚ. ਕਤਨ੍ਤਿ ਦੀਘਰਤ੍ਤਂ ਤਯਾ ਕੁਸਲਂ ਕਤਂ. ਪੁਞ੍ਞਾਨੀਤਿ ਇਦਾਨਿ ਅਹਂ ਮਾਤਾਪਿਤੂਸੁ ਪੁਞ੍ਞਾਨਿ ਕਤ੍ਤੁਕਾਮੋ. ਮਮ ਲੋਕਦਦੋਤਿ ਤਸ੍ਸ ਮਮ ਤ੍ਵਂ ਸਗ੍ਗਲੋਕਦਦੋ ਹੋਤਿ, ਅਹਞ੍ਹਿ ਤੇਸਂ ਵਤ੍ਤਂ ਉਪਟ੍ਠਾਨਂ ਕਤ੍ਵਾ ਦੇਵਲੋਕੇ ਅਪਰਿਮਾਣਂ ਯਸਂ ਲਭਿਸ੍ਸਾਮਿ, ਤਸ੍ਸ ਮੇ ਤ੍ਵਂ ਦਾਯਕੋ ਹੋਹੀਤਿ ਵਦਤਿ.

ਤਥੇਵਾਤਿ ਯਥਾ ਤ੍ਵਂ ਜਾਨਾਸਿ, ਤਥੇਵ ਅਞ੍ਞੇਪਿ ਮਨੁਜਾ ਇਮਿਸ੍ਸਂ ਪਰਿਸਾਯਂ ਸਨ੍ਤਿ, ਤੇ ਨਾਨਪ੍ਪਕਾਰੇ ਧਮ੍ਮੇ ਇਦਂ ਜੇਟ੍ਠਾਪਚਾਯਿਕਭਾਵਸਙ੍ਖਾਤਂ ਧਮ੍ਮਕੋਟ੍ਠਾਸਂ ਵਦਨ੍ਤਿ. ਕਿਨ੍ਤਿ? ਮਗ੍ਗੋ ਸਗ੍ਗਸ੍ਸ ਲੋਕਸ੍ਸਾਤਿ. ਸੁਖਾਵਹਨ੍ਤਿ ਉਟ੍ਠਾਨੇਨ ਚ ਪਾਰਿਚਰਿਯਾਯ ਚ ਮਾਤਾਪਿਤੂਨਂ ਸੁਖਾਵਹਂ. ਤਂ ਮਨ੍ਤਿ ਤਂ ਮਂ ਏਵਂ ਸਮ੍ਮਾਪਟਿਪਨ੍ਨਮ੍ਪਿ ਭਾਤਾ ਸੋਣਪਣ੍ਡਿਤੋ ਤਮ੍ਹਾ ਪੁਞ੍ਞਾ ਅਭਿਵਾਰੇਤਿ. ਅਰਿਯਮਗ੍ਗਾਵਰੋਤਿ ਸੋ ਏਵਂ ਵਾਰੇਨ੍ਤੋ ਅਯਂ ਨਰੋ ਮਮ ਪਿਯਦਸ੍ਸਨਤਾਯ ਅਰਿਯਸਙ੍ਖਾਤਸ੍ਸ ਵੇਦਲੋਕਸ੍ਸ ਮਗ੍ਗਾਵਰਣੋ ਨਾਮ ਹੋਤੀਤਿ.

ਏਵਂ ਨਨ੍ਦਪਣ੍ਡਿਤੇਨ ਵੁਤ੍ਤੇ ਮਹਾਸਤ੍ਤੋ ‘‘ਇਮਸ੍ਸ ਤਾਵ ਤੁਮ੍ਹੇਹਿ ਵਚਨਂ ਸੁਤਂ, ਇਦਾਨਿ ਮਮਪਿ ਸੁਣਾਥਾ’’ਤਿ ਸਾਵੇਨ੍ਤੋ ਆਹ –

੧੪੬.

‘‘ਸੁਣਨ੍ਤੁ ਭੋਨ੍ਤੋ ਵਚਨਂ, ਭਾਤੁਰਜ੍ਝਾਵਰਾ ਮਮ;

ਕੁਲਵਂਸਂ ਮਹਾਰਾਜ, ਪੋਰਾਣਂ ਪਰਿਹਾਪਯਂ;

ਅਧਮ੍ਮਚਾਰੀ ਜੇਟ੍ਠੇਸੁ, ਨਿਰਯਂ ਸੋਪਪਜ੍ਜਤਿ.

੧੪੭.

‘‘ਯੇ ਚ ਧਮ੍ਮਸ੍ਸ ਕੁਸਲਾ, ਪੋਰਾਣਸ੍ਸ ਦਿਸਮ੍ਪਤਿ;

ਚਾਰਿਤ੍ਤੇਨ ਚ ਸਮ੍ਪਨ੍ਨਾ, ਨ ਤੇ ਗਚ੍ਛਨ੍ਤਿ ਦੁਗ੍ਗਤਿਂ.

੧੪੮.

‘‘ਮਾਤਾ ਪਿਤਾ ਚ ਭਾਤਾ ਚ, ਭਗਿਨੀ ਞਾਤਿ ਬਨ੍ਧਵਾ;

ਸਬ੍ਬੇ ਜੇਟ੍ਠਸ੍ਸ ਤੇ ਭਾਰਾ, ਏਵਂ ਜਾਨਾਹਿ ਭਾਰਧ.

੧੪੯.

‘‘ਆਦਿਯਿਤ੍ਵਾ ਗਰੁਂ ਭਾਰਂ, ਨਾਵਿਕੋ ਵਿਯ ਉਸ੍ਸਹੇ;

ਧਮ੍ਮਞ੍ਚ ਨਪ੍ਪਮਜ੍ਜਾਮਿ, ਜੇਟ੍ਠੋ ਚਸ੍ਮਿ ਰਥੇਸਭਾ’’ਤਿ.

ਤਤ੍ਥ ਭਾਤੁਰਜ੍ਝਾਵਰਾਤਿ ਮਮ ਭਾਤੁ ਪਰਿਸਾ ਹੁਤ੍ਵਾ ਆਗਤਾ ਭੋਨ੍ਤੋ ਸਬ੍ਬੇਪਿ ਰਾਜਾਨੋ ਮਮਪਿ ਤਾਵ ਵਚਨਂ ਸੁਣਨ੍ਤੁ. ਪਰਿਹਾਪਯਨ੍ਤਿ ਪਰਿਹਾਪੇਨ੍ਤੋ. ਧਮ੍ਮਸ੍ਸਾਤਿ ਜੇਟ੍ਠਾਪਚਾਯਨਧਮ੍ਮਸ੍ਸ ਪਵੇਣੀਧਮ੍ਮਸ੍ਸ. ਕੁਸਲਾਤਿ ਛੇਕਾ. ਚਾਰਿਤ੍ਤੇਨ ਚਾਤਿ ਆਚਾਰਸੀਲੇਨ ਸਮ੍ਪਨ੍ਨਾ. ਭਾਰਾਤਿ ਸਬ੍ਬੇ ਏਤੇ ਜੇਟ੍ਠੇਨ ਵਹਿਤਬ੍ਬਾ ਪਟਿਜਗ੍ਗਿਤਬ੍ਬਾਤਿ ਤਸ੍ਸ ਭਾਰਾ ਨਾਮ. ਨਾਵਿਕੋ ਵਿਯਾਤਿ ਯਥਾ ਨਾਵਾਯ ਗਰੁਂ ਭਾਰਂ ਆਦਿਯਿਤ੍ਵਾ ਸਮੁਦ੍ਦਮਜ੍ਝੇ ਨਾਵਂ ਸੋਤ੍ਥਿਨਾ ਨੇਤੁਂ ਨਾਵਿਕੋ ਉਸ੍ਸਹੇਤਿ ਵਾਯਮਤਿ, ਸਹ ਨਾਵਾਯ ਸਬ੍ਬਭਣ੍ਡਞ੍ਚ ਜਨੋ ਚ ਤਸ੍ਸੇਵ ਭਾਰੋ ਹੋਤਿ, ਤਥਾ ਮਮੇਵ ਸਬ੍ਬੇ ਞਾਤਕਾ ਭਾਰੋਤਿ, ਅਹਞ੍ਚ ਤੇ ਉਸ੍ਸਹਾਮਿ ਪਟਿਜਗ੍ਗਿਤੁਂ ਸਕ੍ਕੋਮਿ, ਤਞ੍ਚ ਜੇਟ੍ਠਾਪਚਾਯਨਧਮ੍ਮਂ ਨਪ੍ਪਮਜ੍ਜਾਮਿ, ਨ ਕੇਵਲਞ੍ਚ ਏਤੇਸਞ੍ਞੇਵ, ਸਕਲਸ੍ਸਪਿ ਲੋਕਸ੍ਸ ਜੇਟ੍ਠੋ ਚ ਅਸ੍ਮਿ, ਤਸ੍ਮਾ ਅਹਮੇਵ ਸਦ੍ਧਿਂ ਨਨ੍ਦੇਨ ਪਟਿਜਗ੍ਗਿਤੁਂ ਯੁਤ੍ਤੋਤਿ.

ਤਂ ਸੁਤ੍ਵਾ ਸਬ੍ਬੇਪਿ ਤੇ ਰਾਜਾਨੋ ਅਤ੍ਤਮਨਾ ਹੁਤ੍ਵਾ ‘‘ਜੇਟ੍ਠਭਾਤਿਕਸ੍ਸ ਕਿਰ ਅਵਸੇਸਾ ਭਾਰਾਤਿ ਅਜ੍ਜ ਅਮ੍ਹੇਹਿ ਞਾਤ’’ਨ੍ਤਿ ਨਨ੍ਦਪਣ੍ਡਿਤਂ ਪਹਾਯ ਮਹਾਸਤ੍ਤਂ ਸਨ੍ਨਿਸ੍ਸਿਤਾ ਹੁਤ੍ਵਾ ਤਸ੍ਸ ਥੁਤਿਂ ਕਰੋਨ੍ਤਾ ਦ੍ਵੇ ਗਾਥਾ ਅਭਾਸਿਂਸੁ –

੧੫੦.

‘‘ਅਧਿਗਮਾ ਤਮੇ ਞਾਣਂ, ਜਾਲਂਵ ਜਾਤਵੇਦਤੋ;

ਏਵਮੇਵ ਨੋ ਭਵਂ ਧਮ੍ਮਂ, ਕੋਸਿਯੋ ਪਵਿਦਂਸਯਿ.

੧੫੧.

‘‘ਯਥਾ ਉਦਯਮਾਦਿਚ੍ਚੋ, ਵਾਸੁਦੇਵੋ ਪਭਙ੍ਕਰੋ;

ਪਾਣੀਨਂ ਪਵਿਦਂਸੇਤਿ, ਰੂਪਂ ਕਲ੍ਯਾਣਪਾਪਕਂ;

ਏਵਮੇਵ ਨੋ ਭਵਂ ਧਮ੍ਮਂ, ਕੋਸਿਯੋ ਪਵਿਦਂਸਯੀ’’ਤਿ.

ਤਤ੍ਥ ਅਧਿਗਮਾਤਿ ਮਯਂ ਇਤੋ ਪੁਬ੍ਬੇ ਜੇਟ੍ਠਾਪਚਾਯਨਧਮ੍ਮਪਟਿਚ੍ਛਾਦਕੇ ਤਮੇ ਵਤ੍ਤਮਾਨਾ ਨ ਜਾਨਾਮ, ਅਜ੍ਜ ਜਾਤਵੇਦਤੋ ਜਾਲਂਵ ਞਾਣਂ ਅਧਿਗਤਾ. ਏਵਮੇਵ ਨੋਤਿ ਯਥਾ ਮਹਨ੍ਧਕਾਰੇ ਪਬ੍ਬਤਮਤ੍ਥਕੇ ਜਲਿਤੋ ਜਾਤਵੇਦੋ ਸਮਨ੍ਤਾ ਆਲੋਕਂ ਫਰਨ੍ਤੋ ਰੂਪਾਨਿ ਦਸ੍ਸੇਤਿ, ਤਥਾ ਨੋ ਭਵਂ ਕੋਸਿਯਗੋਤ੍ਤੋ ਧਮ੍ਮਂ ਪਵਿਦਂਸਯੀਤਿ ਅਤ੍ਥੋ. ਵਾਸੁਦੇਵੋਤਿ ਵਸੁਦੇਵੋ ਵਸੁਜੋਤਨੋ, ਧਨਪਕਾਸਨੋਤਿ ਅਤ੍ਥੋ.

ਇਤਿ ਮਹਾਸਤ੍ਤੋ ਏਤ੍ਤਕਂ ਕਾਲਂ ਨਨ੍ਦਪਣ੍ਡਿਤਸ੍ਸ ਪਾਟਿਹਾਰਿਯਾਨਿ ਦਿਸ੍ਵਾ ਤਸ੍ਮਿਂ ਪਸਨ੍ਨਚਿਤ੍ਤੇ ਤੇ ਰਾਜਾਨੋ ਞਾਣਬਲੇਨ ਤਸ੍ਮਿਂ ਪਸਾਦਂ ਭਿਨ੍ਦਿਤ੍ਵਾ ਅਤ੍ਤਨੋ ਕਥਂ ਗਾਹਾਪੇਤ੍ਵਾ ਸਬ੍ਬੇਵ ਅਤ੍ਤਨੋ ਮੁਖਂ ਉਲ੍ਲੋਕਿਤੇ ਅਕਾਸਿ. ਅਥ ਨਨ੍ਦਪਣ੍ਡਿਤੋ ‘‘ਭਾਤਾ ਮੇ ਪਣ੍ਡਿਤੋ ਬ੍ਯਤ੍ਤੋ ਧਮ੍ਮਕਥਿਕੋ ਸਬ੍ਬੇਪਿਮੇ ਰਾਜਾਨੋ ਭਿਨ੍ਦਿਤ੍ਵਾ ਅਤ੍ਤਨੋ ਪਕ੍ਖੇ ਕਰਿ, ਠਪੇਤ੍ਵਾ ਇਮਂ ਅਞ੍ਞੋ ਮਯ੍ਹਂ ਪਟਿਸਰਣਂ ਨਤ੍ਥਿ, ਇਮਮੇਵ ਯਾਚਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੫੨.

‘‘ਏਵਂ ਮੇ ਯਾਚਮਾਨਸ੍ਸ, ਅਞ੍ਜਲਿਂ ਨਾਵਬੁਜ੍ਝਥ;

ਤਵ ਬਦ੍ਧਚਰੋ ਹੇਸ੍ਸਂ, ਵੁਟ੍ਠਿਤੋ ਪਰਿਚਾਰਕੋ’’ਤਿ.

ਤਸ੍ਸਤ੍ਥਾ – ਸਚੇ ਤੁਮ੍ਹੇ ਮਮ ਏਵਂ ਯਾਚਮਾਨਸ੍ਸ ਖਮਾਪਨਤ੍ਥਾਯ ਪਗ੍ਗਹਿਤਂ ਅਞ੍ਜਲਿਂ ਨਾਵਬੁਜ੍ਝਥ ਨ ਪਟਿਗ੍ਗਣ੍ਹਥ, ਤੁਮ੍ਹੇਵ ਮਾਤਾਪਿਤਰੋ ਉਪਟ੍ਠਹਥ, ਅਹਂ ਪਨ ਤੁਮ੍ਹਾਕਂ ਬਦ੍ਧਚਰੋ ਵੇਯ੍ਯਾਵਚ੍ਚਕਰੋ ਹੇਸ੍ਸਂ, ਰਤ੍ਤਿਨ੍ਦਿਵਂ ਅਨਲਸਭਾਵੇਨ ਵੁਟ੍ਠਿਤੋ ਪਰਿਚਾਰਕੋ ਅਹਂ ਤੁਮ੍ਹੇ ਪਟਿਜਗ੍ਗਿਸ੍ਸਾਮੀਤਿ.

ਮਹਾਸਤ੍ਤਸ੍ਸ ਪਕਤਿਯਾਪਿ ਨਨ੍ਦਪਣ੍ਡਿਤੇ ਦੋਸੋ ਵਾ ਵੇਰਂ ਵਾ ਨਤ੍ਥਿ, ਅਤਿਥਦ੍ਧਂ ਵਚਨਂ ਕਥੇਨ੍ਤਸ੍ਸ ਪਨਸ੍ਸ ਮਾਨਹਾਪਨਤ੍ਥਂ ਨਿਗ੍ਗਹਵਸੇਨ ਤਥਾ ਕਤ੍ਵਾ ਇਦਾਨਿਸ੍ਸ ਵਚਨਂ ਸੁਤ੍ਵਾ ਤੁਟ੍ਠਚਿਤ੍ਤੋ ਤਸ੍ਮਿਂ ਪਸਾਦਂ ਉਪ੍ਪਾਦੇਤ੍ਵਾ ‘‘ਇਦਾਨਿ ਤੇ ਖਮਾਮਿ, ਮਾਤਾਪਿਤਰੋ ਚ ਪਟਿਜਗ੍ਗਿਤੁਂ ਲਭਿਸ੍ਸਸੀ’’ਤਿ ਤਸ੍ਸ ਗੁਣਂ ਪਕਾਸੇਨ੍ਤੋ ਆਹ –

੧੫੩.

‘‘ਅਦ੍ਧਾ ਨਨ੍ਦ ਵਿਜਾਨਾਸਿ, ਸਦ੍ਧਮ੍ਮਂ ਸਬ੍ਭਿ ਦੇਸਿਤਂ;

ਅਰਿਯੋ ਅਰਿਯਸਮਾਚਾਰੋ, ਬਾਲ਼੍ਹਂ ਤ੍ਵਂ ਮਮ ਰੁਚ੍ਚਸਿ.

੧੫੪.

‘‘ਭਵਨ੍ਤਂ ਵਦਾਮਿ ਭੋਤਿਞ੍ਚ, ਸੁਣਾਥ ਵਚਨਂ ਮਮ;

ਨਾਯਂ ਭਾਰੋ ਭਾਰਮਤੋ, ਅਹੁ ਮਯ੍ਹਂ ਕੁਦਾਚਨਂ.

੧੫੫.

‘‘ਤਂ ਮਂ ਉਪਟ੍ਠਿਤਂ ਸਨ੍ਤਂ, ਮਾਤਾਪਿਤੁ ਸੁਖਾਵਹਂ;

ਨਨ੍ਦੋ ਅਜ੍ਝਾਵਰਂ ਕਤ੍ਵਾ, ਉਪਟ੍ਠਾਨਾਯ ਯਾਚਤਿ.

੧੫੬.

‘‘ਯੋ ਵੇ ਇਚ੍ਛਤਿ ਕਾਮੇਨ, ਸਨ੍ਤਾਨਂ ਬ੍ਰਹ੍ਮਚਾਰਿਨਂ;

ਨਨ੍ਦਂ ਵੋ ਵਰਥ ਏਕੋ, ਕਂ ਨਨ੍ਦੋ ਉਪਤਿਟ੍ਠਤੂ’’ਤਿ.

ਤਤ੍ਥ ਅਰਿਯੋਤਿ ਸੁਨ੍ਦਰੋ. ਅਰਿਯਸਮਾਚਾਰੋਤਿ ਸੁਨ੍ਦਰਸਮਾਚਾਰੋਪਿ ਜਾਤੋ. ਬਾਲ਼੍ਹਨ੍ਤਿ ਇਦਾਨਿ ਤ੍ਵਂ ਮਮ ਅਤਿਵਿਯ ਰੁਚ੍ਚਸਿ. ਸੁਣਾਥਾਤਿ ਅਮ੍ਮ ਤਾਤਾ ਤੁਮ੍ਹੇ ਮਮ ਵਚਨਂ ਸੁਣਾਥ. ਨਾਯਂ ਭਾਰੋਤਿ ਅਯਂ ਤੁਮ੍ਹਾਕਂ ਪਟਿਜਗ੍ਗਨਭਾਰੋ ਨ ਕਦਾਚਿ ਮਮ ਭਾਰਮਤੋ ਅਹੁ. ਤਂ ਮਨ੍ਤਿ ਤਂ ਭਾਰੋਤਿ ਅਮਞ੍ਞਿਤ੍ਵਾਵ ਮਂ ਤੁਮ੍ਹੇ ਉਪਟ੍ਠਿਤਂ ਸਮਾਨਂ. ਉਪਟ੍ਠਾਨਾਯ ਯਾਚਤੀਤਿ ਤੁਮ੍ਹੇ ਉਪਟ੍ਠਾਤੁਂ ਮਂ ਯਾਚਤਿ. ਯੋ ਵੇ ਇਚ੍ਛਤੀਤਿ ਮਯ੍ਹਞ੍ਹਿ ਤ੍ਵਂ ਮੇ ਮਾਤਰਂ ਵਾ ਪਿਤਰਂ ਵਾ ਉਪਟ੍ਠਹਾਤਿ ਵਤ੍ਤੁਂ ਨ ਯੁਤ੍ਤਂ, ਤੁਮ੍ਹਾਕਂ ਪਨ ਸਨ੍ਤਾਨਂ ਬ੍ਰਹ੍ਮਚਾਰੀਨਂ ਯੋ ਏਕੋ ਇਚ੍ਛਤਿ, ਤਂ ਵਦਾਮਿ ਕਾਮੇਨ ਨਨ੍ਦਂ ਵੋ ਵਰਥ, ਤਂ ਮਮ ਕਨਿਟ੍ਠਂ ਨਨ੍ਦਂ ਰੋਚੇਥ, ਤੁਮ੍ਹੇਸੁ ਕਂ ਏਸ ਉਪਟ੍ਠਾਤੁ, ਉਭੋਪਿ ਹਿ ਮਯਂ ਤੁਮ੍ਹਾਕਂ ਪੁਤ੍ਤਾਯੇਵਾਤਿ.

ਅਥਸ੍ਸ ਮਾਤਾ ਆਸਨਾ ਵੁਟ੍ਠਾਯ, ‘‘ਤਾਤ ਸੋਣਪਣ੍ਡਿਤ, ਚਿਰਪ੍ਪਵੁਤ੍ਥੋ ਤੇ ਕਨਿਟ੍ਠੋ, ਏਵਂ ਚਿਰਾਗਤਮ੍ਪਿ ਤਂ ਯਾਚਿਤੁਂ ਨ ਵਿਸਹਾਮਿ, ਮਯਞ੍ਹਿ ਤਂ ਨਿਸ੍ਸਿਤਾ, ਇਦਾਨਿ ਪਨ ਤਯਾ ਅਨੁਞ੍ਞਾਤਾ ਅਹਂ ਏਤਂ ਬ੍ਰਹ੍ਮਚਾਰਿਨਂ ਬਾਹਾਹਿ ਉਪਗੂਹਿਤ੍ਵਾ ਸੀਸੇ ਉਪਸਿਙ੍ਘਾਯਿਤੁਂ ਲਭੇਯ੍ਯ’’ਨ੍ਤਿ ਇਮਮਤ੍ਥਂ ਪਕਾਸੇਨ੍ਤੀ ਗਾਥਮਾਹ –

੧੫੭.

‘‘ਤਯਾ ਤਾਤ ਅਨੁਞ੍ਞਾਤਾ, ਸੋਣ ਤਂ ਨਿਸ੍ਸਿਤਾ ਮਯਂ;

ਉਪਘਾਤੁਂ ਲਭੇ ਨਨ੍ਦਂ, ਮੁਦ੍ਧਨਿ ਬ੍ਰਹ੍ਮਚਾਰਿਨ’’ਨ੍ਤਿ.

ਅਥ ਮਹਾਸਤ੍ਤੋ ‘‘ਤੇਨ ਹਿ, ਅਮ੍ਮ, ਅਨੁਜਾਨਾਮਿ, ਤ੍ਵਂ ਗਚ੍ਛ, ਪੁਤ੍ਤਂ ਨਨ੍ਦਂ ਆਲਿਙ੍ਗਿਤ੍ਵਾ ਸੀਸੇ ਘਾਯਿਤ੍ਵਾ ਚੁਮ੍ਬਿਤ੍ਵਾ ਤਵ ਹਦਯੇ ਸੋਕਂ ਨਿਬ੍ਬਾਪੇਹੀ’’ਤਿ ਆਹ. ਸਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਨਨ੍ਦਪਣ੍ਡਿਤਂ ਪਰਿਸਮਜ੍ਝੇਯੇਵ ਆਲਿਙ੍ਗਿਤ੍ਵਾ ਸੀਸਂ ਘਾਯਿਤ੍ਵਾ ਚੁਮ੍ਬਿਤ੍ਵਾ ਹਦਯੇ ਸੋਕਂ ਨਿਬ੍ਬਾਪੇਤ੍ਵਾ ਮਹਾਸਤ੍ਤੇਨ ਸਦ੍ਧਿਂ ਸਲ੍ਲਪਨ੍ਤੀ ਆਹ –

੧੫੮.

‘‘ਅਸ੍ਸਤ੍ਥਸ੍ਸੇਵ ਤਰੁਣਂ, ਪਵਾਲ਼ਂ ਮਾਲੁਤੇਰਿਤਂ;

ਚਿਰਸ੍ਸਂ ਨਨ੍ਦਂ ਦਿਸ੍ਵਾਨ, ਹਦਯਂ ਮੇ ਪਵੇਧਤਿ.

੧੫੯.

‘‘ਯਦਾ ਸੁਤ੍ਤਾਪਿ ਸੁਪਿਨੇ, ਨਨ੍ਦਂ ਪਸ੍ਸਾਮਿ ਆਗਤਂ;

ਉਦਗ੍ਗਾ ਸੁਮਨਾ ਹੋਮਿ, ਨਨ੍ਦੋ ਨੋ ਆਗਤੋ ਅਯਂ.

੧੬੦.

‘‘ਯਦਾ ਚ ਪਟਿਬੁਜ੍ਝਿਤ੍ਵਾ, ਨਨ੍ਦਂ ਪਸ੍ਸਾਮਿ ਨਾਗਤਂ;

ਭਿਯ੍ਯੋ ਆਵਿਸਤੀ ਸੋਕੋ, ਦੋਮਨਸ੍ਸਞ੍ਚਨਪ੍ਪਕਂ.

੧੬੧.

‘‘ਸਾਹਂ ਅਜ੍ਜ ਚਿਰਸ੍ਸਮ੍ਪਿ, ਨਨ੍ਦਂ ਪਸ੍ਸਾਮਿ ਆਗਤਂ;

ਭਤ੍ਤੁਚ੍ਚ ਮਯ੍ਹਞ੍ਚ ਪਿਯੋ, ਨਨ੍ਦੋ ਨੋ ਪਾਵਿਸੀ ਘਰਂ.

੧੬੨.

‘‘ਪਿਤੁਪਿ ਨਨ੍ਦੋ ਸੁਪ੍ਪਿਯੋ, ਯਂ ਨਨ੍ਦੋ ਨਪ੍ਪਵਸੇ ਘਰਾ;

ਲਭਤੂ ਤਾਤ ਨਨ੍ਦੋ ਤਂ, ਮਂ ਨਨ੍ਦੋ ਉਪਤਿਟ੍ਠਤੂ’’ਤਿ.

ਤਤ੍ਥ ਮਾਲੁਤੇਰਿਤਨ੍ਤਿ ਯਥਾ ਵਾਤਾਹਤਂ ਅਸ੍ਸਤ੍ਥਸ੍ਸ ਪਲ੍ਲਵਂ ਕਮ੍ਪਤਿ, ਏਵਂ ਚਿਰਸ੍ਸਂ ਨਨ੍ਦਂ ਦਿਸ੍ਵਾ ਅਜ੍ਜ ਮਮ ਹਦਯਂ ਕਮ੍ਪਤੀਤਿ ਵਦਤਿ. ਸੁਤ੍ਤਾਤਿ, ਤਾਤ ਸੋਣ, ਯਦਾਹਂ ਸੁਤ੍ਤਾਪਿ ਸੁਪਿਨੇ ਨਨ੍ਦਂ ਆਗਤਂ ਪਸ੍ਸਾਮਿ, ਤਦਾਪਿ ਉਦਗ੍ਗਾ ਹੋਮਿ. ਭਤ੍ਤੁਚ੍ਚਾਤਿ ਸਾਮਿਕਸ੍ਸ ਚ ਮੇ ਮਯ੍ਹਞ੍ਚ ਪਿਯੋ. ਨਨ੍ਦੋ ਨੋ ਪਾਵਿਸੀ ਘਰਨ੍ਤਿ, ਤਾਤ, ਪੁਤ੍ਤੋ ਨੋ ਨਨ੍ਦੋ ਪਣ੍ਣਸਾਲਂ ਪਵਿਸਤੁ. ਯਨ੍ਤਿ ਯਸ੍ਮਾ ਪਿਤੁਪਿ ਸੁਟ੍ਠੁ ਪਿਯੋ, ਤਸ੍ਮਾ ਪੁਨ ਇਮਮ੍ਹਾ ਘਰਾ ਨ ਵਿਪ੍ਪਵਸੇਯ੍ਯ. ਨਨ੍ਦੋ ਤਨ੍ਤਿ, ਤਾਤ, ਨਨ੍ਦੋ ਯਂ ਇਚ੍ਛਤਿ, ਤਂ ਲਭਤੁ. ਮਂ ਨਨ੍ਦੋਤਿ, ਤਾਤ ਸੋਣ, ਤਵ ਪਿਤਰਂ ਤ੍ਵਂ ਉਪਟ੍ਠਹ, ਮਂ ਨਨ੍ਦੋ ਉਪਟ੍ਠਾਤੁ.

ਮਹਾਸਤ੍ਤੋ ‘‘ਏਵਂ ਹੋਤੂ’’ਤਿ ਮਾਤੁ ਵਚਨਂ ਸਮ੍ਪਟਿਚ੍ਛਿਤ੍ਵਾ ‘‘ਨਨ੍ਦ, ਤਯਾ ਜੇਟ੍ਠਕਕੋਟ੍ਠਾਸੋ ਲਦ੍ਧੋ, ਮਾਤਾ ਨਾਮ ਅਤਿਗੁਣਕਾਰਿਕਾ, ਅਪ੍ਪਮਤ੍ਤੋ ਹੁਤ੍ਵਾ ਪਟਿਜਗ੍ਗੇਯ੍ਯਾਸੀ’’ਤਿ ਓਵਦਿਤ੍ਵਾ ਮਾਤੁ ਗੁਣਂ ਪਕਾਸੇਨ੍ਤੋ ਦ੍ਵੇ ਗਾਥਾ ਅਭਾਸਿ –

੧੬੩.

‘‘ਅਨੁਕਮ੍ਪਿਕਾ ਪਤਿਟ੍ਠਾ ਚ, ਪੁਬ੍ਬੇ ਰਸਦਦੀ ਚ ਨੋ;

ਮਗ੍ਗੋ ਸਗ੍ਗਸ੍ਸ ਲੋਕਸ੍ਸ, ਮਾਤਾ ਤਂ ਵਰਤੇ ਇਸੇ.

੧੬੪.

‘‘ਪੁਬ੍ਬੇ ਰਸਦਦੀ ਗੋਤ੍ਤੀ, ਮਾਤਾ ਪੁਞ੍ਞੂਪਸਂਹਿਤਾ;

ਮਗ੍ਗੋ ਸਗ੍ਗਸ੍ਸ ਲੋਕਸ੍ਸ, ਮਾਤਾ ਤਂ ਵਰਤੇ ਇਸੇ’’ਤਿ.

ਤਤ੍ਥ ਅਨੁਕਮ੍ਪਿਕਾਤਿ ਮੁਦੁਹਦਯਾ. ਪੁਬ੍ਬੇ ਰਸਦਦੀਤਿ ਪਠਮਮੇਵ ਅਤ੍ਤਨੋ ਖੀਰਸਙ੍ਖਾਤਸ੍ਸ ਰਸਸ੍ਸ ਦਾਯਿਕਾ. ਮਾਤਾ ਤਨ੍ਤਿ ਮਮ ਮਾਤਾ ਮਂ ਨ ਇਚ੍ਛਤਿ, ਤਂ ਵਰਤਿ ਇਚ੍ਛਤਿ. ਗੋਤ੍ਤੀਤਿ ਗੋਪਾਯਿਕਾ. ਪੁਞ੍ਞੂਪਸਂਹਿਤਾਤਿ ਪੁਞ੍ਞੂਪਨਿਸ੍ਸਿਤਾ ਪੁਞ੍ਞਦਾਯਿਕਾ.

ਏਵਂ ਮਹਾਸਤ੍ਤੋ ਦ੍ਵੀਹਿ ਗਾਥਾਹਿ ਮਾਤੁ ਗੁਣਂ ਕਥੇਤ੍ਵਾ ਪੁਨਾਗਨ੍ਤ੍ਵਾ ਤਸ੍ਸਾ ਆਸਨੇ ਨਿਸਿਨ੍ਨਕਾਲੇ ‘‘ਨਨ੍ਦ, ਤ੍ਵਂ ਦੁਕ੍ਕਰਕਾਰਿਕਂ ਮਾਤਰਂ ਲਭਸਿ, ਉਭੋਪਿ ਮਯਂ ਮਾਤਰਾ ਦੁਕ੍ਖੇਨ ਸਂਵਡ੍ਢਿਤਾ, ਤਂ ਇਦਾਨਿ ਤ੍ਵਂ ਅਪ੍ਪਮਤ੍ਤੋ ਪਟਿਜਗ੍ਗਾਹਿ, ਅਮਧੁਰਾਨਿ ਫਲਾਫਲਾਨਿ ਮਾ ਖਾਦਾਪੇਹੀ’’ਤਿ ਵਤ੍ਵਾ ਪਰਿਸਮਜ੍ਝੇਯੇਵ ਮਾਤੁ ਦੁਕ੍ਕਰਕਾਰਿਕਤਂ ਪਕਾਸੇਨ੍ਤੋ ਆਹ –

੧੬੫.

‘‘ਆਕਙ੍ਖਮਾਨਾ ਪੁਤ੍ਤਫਲਂ, ਦੇਵਤਾਯ ਨਮਸ੍ਸਤਿ;

ਨਕ੍ਖਤ੍ਤਾਨਿ ਚ ਪੁਚ੍ਛਤਿ, ਉਤੁਸਂਵਚ੍ਛਰਾਨਿ ਚ.

੧੬੬.

‘‘ਤਸ੍ਸਾ ਉਤੁਮ੍ਹਿ ਨ੍ਹਾਤਾਯ, ਹੋਤਿ ਗਬ੍ਭਸ੍ਸ ਵੋਕ੍ਕਮੋ;

ਤੇਨ ਦੋਹਲ਼ਿਨੀ ਹੋਤਿ, ਸੁਹਦਾ ਤੇਨ ਵੁਚ੍ਚਤਿ.

੧੬੭.

‘‘ਸਂਵਚ੍ਛਰਂ ਵਾ ਊਨਂ ਵਾ, ਪਰਿਹਰਿਤ੍ਵਾ ਵਿਜਾਯਤਿ;

ਤੇਨ ਸਾ ਜਨਯਨ੍ਤੀਤਿ, ਜਨੇਤ੍ਤਿ ਤੇਨ ਵੁਚ੍ਚਤਿ.

੧੬੮.

‘‘ਥਨਖੀਰੇਨ ਗੀਤੇਨ, ਅਙ੍ਗਪਾਵੁਰਣੇਨ ਚ;

ਰੋਦਨ੍ਤਂ ਪੁਤ੍ਤਂ ਤੋਸੇਤਿ, ਤੋਸੇਨ੍ਤੀ ਤੇਨ ਵੁਚ੍ਚਤਿ.

੧੬੯.

‘‘ਤਤੋ ਵਾਤਾਤਪੇ ਘੋਰੇ, ਮਮਂ ਕਤ੍ਵਾ ਉਦਿਕ੍ਖਤਿ;

ਦਾਰਕਂ ਅਪ੍ਪਜਾਨਨ੍ਤਂ, ਪੋਸੇਨ੍ਤੀ ਤੇਨ ਵੁਚ੍ਚਤਿ.

੧੭੦.

‘‘ਯਞ੍ਚ ਮਾਤੁਧਨਂ ਹੋਤਿ, ਯਞ੍ਚ ਹੋਤਿ ਪਿਤੁਦ੍ਧਨਂ;

ਉਭਯਮ੍ਪੇਤਸ੍ਸ ਗੋਪੇਤਿ, ਅਪਿ ਪੁਤ੍ਤਸ੍ਸ ਨੋ ਸਿਯਾ.

੧੭੧.

‘‘ਏਵਂ ਪੁਤ੍ਤ ਅਦੁਂ ਪੁਤ੍ਤ, ਇਤਿ ਮਾਤਾ ਵਿਹਞ੍ਞਤਿ;

ਪਮਤ੍ਤਂ ਪਰਦਾਰੇਸੁ, ਨਿਸੀਥੇ ਪਤ੍ਤਯੋਬ੍ਬਨੇ;

ਸਾਯਂ ਪੁਤ੍ਤਂ ਅਨਾਯਨ੍ਤਂ, ਇਤਿ ਮਾਤਾ ਵਿਹਞ੍ਞਤਿ.

੧੭੨.

‘‘ਏਵਂ ਕਿਚ੍ਛਾ ਭਤੋ ਪੋਸੋ, ਮਾਤੁ ਅਪਰਿਚਾਰਕੋ;

ਮਾਤਰਿ ਮਿਚ੍ਛਾ ਚਰਿਤ੍ਵਾਨ, ਨਿਰਯਂ ਸੋਪਪਜ੍ਜਤਿ.

੧੭੩.

‘‘ਏਵਂ ਕਿਚ੍ਛਾ ਭਤੋ ਪੋਸੋ, ਪਿਤੁ ਅਪਰਿਚਾਰਕੋ;

ਪਿਤਰਿ ਮਿਚ੍ਛਾ ਚਰਿਤ੍ਵਾਨ, ਨਿਰਯਂ ਸੋਪਪਜ੍ਜਤਿ.

੧੭੪.

‘‘ਧਨਾਪਿ ਧਨਕਾਮਾਨਂ, ਨਸ੍ਸਤਿ ਇਤਿ ਮੇ ਸੁਤਂ;

ਮਾਤਰਂ ਅਪਰਿਚਰਿਤ੍ਵਾਨ, ਕਿਚ੍ਛਂ ਵਾ ਸੋ ਨਿਗਚ੍ਛਤਿ.

੧੭੫.

‘‘ਧਨਾਪਿ ਧਨਕਾਮਾਨਂ, ਨਸ੍ਸਤਿ ਇਤਿ ਮੇ ਸੁਤਂ;

ਪਿਤਰਂ ਅਪਰਿਚਰਿਤ੍ਵਾਨ, ਕਿਚ੍ਛਂ ਵਾ ਸੋ ਨਿਗਚ੍ਛਤਿ.

੧੭੬.

‘‘ਆਨਨ੍ਦੋ ਚ ਪਮੋਦੋ ਚ, ਸਦਾ ਹਸਿਤਕੀਲ਼ਿਤਂ;

ਮਾਤਰਂ ਪਰਿਚਰਿਤ੍ਵਾਨ, ਲਬ੍ਭਮੇਤਂ ਵਿਜਾਨਤੋ.

੧੭੭.

‘‘ਆਨਨ੍ਦੋ ਚ ਪਮੋਦੋ ਚ, ਸਦਾ ਹਸਿਤਕੀਲ਼ਿਤਂ;

ਪਿਤਰਂ ਪਰਿਚਰਿਤ੍ਵਾਨ, ਲਬ੍ਭਮੇਤਂ ਵਿਜਾਨਤੋ.

੧੭੮.

‘‘ਦਾਨਞ੍ਚ ਪਿਯਵਾਚਾ ਚ, ਅਤ੍ਥਚਰਿਯਾ ਚ ਯਾ ਇਧ;

ਸਮਾਨਤ੍ਤਤਾ ਚ ਧਮ੍ਮੇਸੁ, ਤਤ੍ਥ ਤਤ੍ਥ ਯਥਾਰਹਂ;

ਏਤੇ ਖੋ ਸਙ੍ਗਹਾ ਲੋਕੇ, ਰਥਸ੍ਸਾਣੀਵ ਯਾਯਤੋ.

੧੭੯.

‘‘ਏਤੇ ਚ ਸਙ੍ਗਹਾ ਨਾਸ੍ਸੁ, ਨ ਮਾਤਾ ਪੁਤ੍ਤਕਾਰਣਾ;

ਲਭੇਥ ਮਾਨਂ ਪੂਜਂ ਵਾ, ਪਿਤਾ ਵਾ ਪੁਤ੍ਤਕਾਰਣਾ.

੧੮੦.

‘‘ਯਸ੍ਮਾ ਚ ਸਙ੍ਗਹਾ ਏਤੇ, ਸਮ੍ਮਪੇਕ੍ਖਨ੍ਤਿ ਪਣ੍ਡਿਤਾ;

ਤਸ੍ਮਾ ਮਹਤ੍ਤਂ ਪਪ੍ਪੋਨ੍ਤਿ, ਪਾਸਂਸਾ ਚ ਭਵਨ੍ਤਿ ਤੇ.

੧੮੧.

‘‘ਬ੍ਰਹ੍ਮਾਤਿ ਮਾਤਾਪਿਤਰੋ, ਪੁਬ੍ਬਾਚਰਿਯਾਤਿ ਵੁਚ੍ਚਰੇ;

ਆਹੁਨੇਯ੍ਯਾ ਚ ਪੁਤ੍ਤਾਨਂ, ਪਜਾਯ ਅਨੁਕਮ੍ਪਕਾ.

੧੮੨.

‘‘ਤਸ੍ਮਾ ਹਿ ਨੇ ਨਮਸ੍ਸੇਯ੍ਯ, ਸਕ੍ਕਰੇਯ੍ਯ ਚ ਪਣ੍ਡਿਤੋ;

ਅਨ੍ਨੇਨ ਅਥੋ ਪਾਨੇਨ, ਵਤ੍ਥੇਨ ਸਯਨੇਨ ਚ;

ਉਚ੍ਛਾਦਨੇਨ ਨ੍ਹਾਪਨੇਨ, ਪਾਦਾਨਂ ਧੋਵਨੇਨ ਚ.

੧੮੩.

‘‘ਤਾਯ ਨਂ ਪਾਰਿਚਰਿਯਾਯ, ਮਾਤਾਪਿਤੂਸੁ ਪਣ੍ਡਿਤਾ;

ਇਧੇਵ ਨਂ ਪਸਂਸਨ੍ਤਿ, ਪੇਚ੍ਚ ਸਗ੍ਗੇ ਪਮੋਦਤੀ’’ਤਿ.

ਤਤ੍ਥ ਪੁਤ੍ਤਫਲਨ੍ਤਿ ਪੁਤ੍ਤਸਙ੍ਖਾਤਂ ਫਲਂ. ਦੇਵਤਾਯ ਨਮਸ੍ਸਤੀਤਿ ‘‘ਪੁਤ੍ਤੋ ਮੇ ਉਪ੍ਪਜ੍ਜਤੂ’’ਤਿ ਦੇਵਤਾਯ ਨਮਕ੍ਕਾਰਂ ਕਰੋਤਿ ਆਯਾਚਤਿ. ਪੁਚ੍ਛਤੀਤਿ ‘‘ਕਤਰੇਨ ਨਕ੍ਖਤ੍ਤੇਨ ਜਾਤੋ ਪੁਤ੍ਤੋ ਦੀਘਾਯੁਕੋ ਹੋਤਿ, ਕਤਰੇਨ ਅਪ੍ਪਾਯੁਕੋ’’ਤਿ ਏਵਂ ਨਕ੍ਖਤ੍ਤਾਨਿ ਚ ਪੁਚ੍ਛਤਿ. ਉਤੁਸਂਵਚ੍ਛਰਾਨਿ ਚਾਤਿ ‘‘ਛਨ੍ਨਂ ਉਤੂਨਂ ਕਤਰਸ੍ਮਿਂ ਉਤੁਮ੍ਹਿ ਜਾਤੋ ਦੀਘਾਯੁਕੋ ਹੋਤਿ, ਕਤਰਸ੍ਮਿਂ ਉਤੁਮ੍ਹਿ ਅਪ੍ਪਾਯੁਕੋ, ਕਤਿਵਸ੍ਸਾਯ ਵਾ ਮਾਤੁਯਾ ਜਾਤੋ ਪੁਤ੍ਤੋ ਦੀਘਾਯੁਕੋ ਹੋਤਿ, ਕਤਿਵਸ੍ਸਾਯ ਅਪ੍ਪਾਯੁਕੋ’’ਤਿ ਏਵਂ ਉਤੁਸਂਵਚ੍ਛਰਾਨਿ ਚ ਪੁਚ੍ਛਤਿ. ਉਤੁਮ੍ਹਿ ਨ੍ਹਾਤਾਯਾਤਿ ਪੁਪ੍ਫੇ ਉਪ੍ਪਨ੍ਨੇ ਉਤੁਮ੍ਹਿ ਨ੍ਹਾਤਾਯ. ਵੋਕ੍ਕਮੋਤਿ ਤਿਣ੍ਣਂ ਸਨ੍ਨਿਪਾਤਾ ਗਬ੍ਭਾਵਕ੍ਕਨ੍ਤਿ ਹੋਤਿ, ਕੁਚ੍ਛਿਯਂ ਗਬ੍ਭੋ ਪਤਿਟ੍ਠਾਤਿ. ਤੇਨਾਤਿ ਤੇਨ ਗਬ੍ਭੇਨ ਸਾ ਦੋਹਲ਼ਿਨੀ ਹੋਤਿ. ਤੇਨਾਤਿ ਤਦਾ ਤਸ੍ਸਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਪਜਾਯ ਸਿਨੇਹੋ ਉਪ੍ਪਜ੍ਜਤਿ, ਤੇਨ ਕਾਰਣੇਨ ‘‘ਸੁਹਦਾ’’ਤਿ ਵੁਚ੍ਚਤਿ. ਤੇਨਾਤਿ ਤੇਨ ਕਾਰਣੇਨ ਸਾ ‘‘ਜਨਯਨ੍ਤੀ’’ਤਿ ਚ ‘‘ਜਨੇਤ੍ਤੀ’’ਤਿ ਚ ਵੁਚ੍ਚਤਿ.

ਅਙ੍ਗਪਾਵੁਰਣੇਨ ਚਾਤਿ ਥਨਨ੍ਤਰੇ ਨਿਪਜ੍ਜਾਪੇਤ੍ਵਾ ਸਰੀਰਸਮ੍ਫਸ੍ਸਂ ਫਰਾਪੇਨ੍ਤੀ ਅਙ੍ਗਸਙ੍ਖਾਤੇਨੇਵ ਪਾਵੁਰਣੇਨ. ਤੋਸੇਨ੍ਤੀਤਿ ਸਞ੍ਞਾਪੇਨ੍ਤੀ ਹਾਸੇਨ੍ਤੀ. ਮਮਂ ਕਤ੍ਵਾ ਉਦਿਕ੍ਖਤੀਤਿ ‘‘ਪੁਤ੍ਤਸ੍ਸ ਮੇ ਉਪਰਿ ਵਾਤੋ ਪਹਰਤਿ, ਆਤਪੋ ਫਰਤੀ’’ਤਿ ਏਵਂ ਮਮਂਕਾਰਂ ਕਤ੍ਵਾ ਸਿਨਿਦ੍ਧੇਨ ਹਦਯੇਨ ਉਦਿਕ੍ਖਤਿ. ਉਭਯਮ੍ਪੇਤਸ੍ਸਾਤਿ ਉਭਯਮ੍ਪਿ ਏਤਂ ਧਨਂ ਏਤਸ੍ਸ ਪੁਤ੍ਤਸ੍ਸ ਅਤ੍ਥਾਯ ਅਞ੍ਞੇਸਂ ਅਦਸ੍ਸੇਤ੍ਵਾ ਸਾਰਗਬ੍ਭਾਦੀਸੁ ਮਾਤਾ ਗੋਪੇਤਿ. ਏਵਂ ਪੁਤ੍ਤ, ਅਦੁਂ ਪੁਤ੍ਤਾਤਿ ‘‘ਅਨ੍ਧਬਾਲ ਪੁਤ੍ਤ, ਏਵਂ ਰਾਜਕੁਲਾਦੀਸੁ ਅਪ੍ਪਮਤ੍ਤੋ ਹੋਹਿ, ਅਦੁਞ੍ਚ ਕਮ੍ਮਂ ਮਾ ਕਰੋਹੀ’’ਤਿ ਸਿਕ੍ਖਾਪੇਨ੍ਤੀ ਇਤਿ ਮਾਤਾ ਵਿਹਞ੍ਞਤਿ ਕਿਲਮਤਿ. ਪਤ੍ਤਯੋਬ੍ਬਨੇਤਿ ਪੁਤ੍ਤੇ ਪਤ੍ਤਯੋਬ੍ਬਨੇ ਤਂ ਪੁਤ੍ਤਂ ਨਿਸੀਥੇ ਪਰਦਾਰੇਸੁ ਪਮਤ੍ਤਂ ਸਾਯਂ ਅਨਾਗਚ੍ਛਨ੍ਤਂ ਞਤ੍ਵਾ ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ ਮਗ੍ਗਂ ਓਲੋਕੇਨ੍ਤੀ ਵਿਹਞ੍ਞਤਿ ਕਿਲਮਤਿ.

ਕਿਚ੍ਛਾ ਭਤੋਤਿ ਕਿਚ੍ਛੇਨ ਭਤੋ ਪਟਿਜਗ੍ਗਿਤੋ. ਮਿਚ੍ਛਾ ਚਰਿਤ੍ਵਾਨਾਤਿ ਮਾਤਰਂ ਅਪਟਿਜਗ੍ਗਿਤ੍ਵਾ. ਧਨਾਪੀਤਿ ਧਨਮ੍ਪਿ, ਅਯਮੇਵ ਵਾ ਪਾਠੋ. ਇਦਂ ਵੁਤ੍ਤਂ ਹੋਤਿ – ਧਨਕਾਮਾਨਂ ਉਪ੍ਪਨ੍ਨਂ ਧਨਮ੍ਪਿ ਮਾਤਰਂ ਅਪਟਿਜਗ੍ਗਨ੍ਤਾਨਂ ਨਸ੍ਸਤੀਤਿ ਮੇ ਸੁਤਨ੍ਤਿ. ਕਿਚ੍ਛਂ ਵਾ ਸੋਤਿ ਇਤਿ ਧਨਂ ਵਾ ਤਸ੍ਸ ਨਸ੍ਸਤਿ, ਦੁਕ੍ਖਂ ਵਾਸੋ ਪੁਰਿਸੋ ਨਿਗਚ੍ਛਤਿ. ਲਬ੍ਭਮੇਤਨ੍ਤਿ ਏਤਂ ਇਧਲੋਕੇ ਚ ਪਰਲੋਕੇ ਚ ਆਨਨ੍ਦਾਦਿਸੁਖਂ ਮਾਤਰਂ ਪਰਿਚਰਿਤ੍ਵਾ ਵਿਜਾਨਤੋ ਪਣ੍ਡਿਤਸ੍ਸ ਲਬ੍ਭਂ, ਸਕ੍ਕਾ ਲਦ੍ਧੁਂ ਤਾਦਿਸੇਨਾਤਿ ਅਤ੍ਥੋ.

ਦਾਨਞ੍ਚਾਤਿ ਮਾਤਾਪਿਤੂਨਂ ਦਾਨਂ ਦਾਤਬ੍ਬਂ, ਪਿਯਵਚਨਂ ਭਣਿਤਬ੍ਬਂ, ਉਪ੍ਪਨ੍ਨਕਿਚ੍ਚਸਾਧਨਵਸੇਨ ਅਤ੍ਥੋ ਚਰਿਤਬ੍ਬੋ. ਧਮ੍ਮੇਸੂਤਿ ਜੇਟ੍ਠਾਪਚਾਯਨਧਮ੍ਮੇਸੁ ਤਤ੍ਥ ਤਤ੍ਥ ਪਰਿਸਮਜ੍ਝੇ ਵਾ ਰਹੋਗਤਾਨਂ ਵਾ ਅਭਿਵਾਦਨਾਦਿਵਸੇਨ ਸਮਾਨਤ੍ਤਤਾ ਕਾਤਬ੍ਬਾ, ਨ ਰਹੋ ਅਭਿਵਾਦਨਾਦੀਨਿ ਕਤ੍ਵਾ ਪਰਿਸਤਿ ਨ ਕਾਤਬ੍ਬਾਨਿ, ਸਬ੍ਬਤ੍ਥ ਸਮਾਨੇਨੇਵ ਭਵਿਤਬ੍ਬਂ. ਏਤੇ ਚ ਸਙ੍ਗਹਾ ਨਾਸ੍ਸੂਤਿ ਸਚੇ ਏਤੇ ਚਤ੍ਤਾਰੋ ਸਙ੍ਗਹਾ ਨ ਭਵੇਯ੍ਯੁਂ. ਸਮ੍ਮਪੇਕ੍ਖਨ੍ਤੀਤਿ ਸਮ੍ਮਾ ਨਯੇਨ ਕਾਰਣੇਨ ਪੇਕ੍ਖਨ੍ਤਿ. ਮਹਤ੍ਤਨ੍ਤਿ ਸੇਟ੍ਠਤ੍ਤਂ. ਬ੍ਰਹ੍ਮਾਤਿ ਪੁਤ੍ਤਾਨਂ ਬ੍ਰਹ੍ਮਸਮਾ ਉਤ੍ਤਮਾ ਸੇਟ੍ਠਾ. ਪੁਬ੍ਬਾਚਰਿਯਾਤਿ ਪਠਮਾਚਰਿਯਾ. ਆਹੁਨੇਯ੍ਯਾਤਿ ਆਹੁਨਪਟਿਗ੍ਗਾਹਕਾ ਯਸ੍ਸ ਕਸ੍ਸਚਿ ਸਕ੍ਕਾਰਸ੍ਸ ਅਨੁਚ੍ਛਵਿਕਾ. ਅਨ੍ਨੇਨ ਅਥੋਤਿ ਅਨ੍ਨੇਨ ਚੇਵ ਅਤ੍ਥੋ ਪਾਨੇਨ ਚ. ਪੇਚ੍ਚਾਤਿ ਕਾਲਕਿਰਿਯਾਯ ਪਰਿਯੋਸਾਨੇ ਇਤੋ ਗਨ੍ਤ੍ਵਾ ਸਗ੍ਗੇ ਪਮੋਦਤੀਤਿ.

ਏਵਂ ਮਹਸਤ੍ਤੋ ਸਿਨੇਰੁਂ ਪਵਟ੍ਟੇਨ੍ਤੋ ਵਿਯ ਧਮ੍ਮਦੇਸਨਂ ਨਿਟ੍ਠਾਪੇਸਿ. ਤਂ ਸੁਤ੍ਵਾ ਸਬ੍ਬੇਪਿ ਤੇ ਰਾਜਾਨੋ ਬਲਕਾਯਾ ਚ ਪਸੀਦਿਂਸੁ. ਅਥ ਨੇ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ‘‘ਦਾਨਾਦੀਸੁ ਅਪ੍ਪਮਤ੍ਤਾ ਹੋਥਾ’’ਤਿ ਓਵਦਿਤ੍ਵਾ ਉਯ੍ਯੋਜੇਸਿ. ਸਬ੍ਬੇਪਿ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਆਯੁਪਰਿਯੋਸਾਨੇ ਦੇਵਨਗਰਂ ਪੂਰਯਿਂਸੁ. ਸੋਣਪਣ੍ਡਿਤਨਨ੍ਦਪਣ੍ਡਿਤਾਪਿ ਯਾਵਤਾਯੁਕਂ ਮਾਤਾਪਿਤਰੋ ਪਰਿਚਰਿਤ੍ਵਾ ਬ੍ਰਹ੍ਮਲੋਕਪਰਾਯਣਾ ਅਹੇਸੁਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਮਾਤੁਪੋਸਕਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਮਾਤਾਪਿਤਰੋ ਮਾਹਾਰਾਜਕੁਲਾਨਿ ਅਹੇਸੁਂ, ਨਨ੍ਦਪਣ੍ਡਿਤੋ ਆਨਨ੍ਦੋ, ਮਨੋਜਰਾਜਾ ਸਾਰਿਪੁਤ੍ਤੋ, ਏਕਸਤਰਾਜਾਨੋ ਅਸੀਤਿਮਹਾਥੇਰਾ ਚੇਵ ਅਞ੍ਞਤਰਥੇਰਾ ਚ, ਚਤੁਵੀਸਤਿ ਅਕ੍ਖੋਭਣਿਯੋ ਬੁਦ੍ਧਪਰਿਸਾ, ਸੋਣਪਣ੍ਡਿਤੋ ਪਨ ਅਹਮੇਵ ਅਹੋਸਿਨ੍ਤਿ.

ਸੋਣਨਨ੍ਦਜਾਤਕਵਣ੍ਣਨਾ ਦੁਤਿਯਾ.

ਜਾਤਕੁਦ੍ਦਾਨਂ –

ਅਥ ਸਤ੍ਤਤਿਮਮ੍ਹਿ ਨਿਪਾਤਵਰੇ, ਸਭਾਵਨ੍ਤੁ ਕੁਸਾਵਤਿਰਾਜਵਰੋ;

ਅਥ ਸੋਣਸੁਨਨ੍ਦਵਰੋ ਚ ਪੁਨ, ਅਭਿਵਾਸਿਤਸਤ੍ਤਤਿਮਮ੍ਹਿ ਸੁਤੇਤਿ.

ਸਤ੍ਤਤਿਨਿਪਾਤਵਣ੍ਣਨਾ ਨਿਟ੍ਠਿਤਾ.

੨੧. ਅਸੀਤਿਨਿਪਾਤੋ

[੫੩੩] ੧. ਚੂਲ਼ਹਂਸਜਾਤਕਵਣ੍ਣਨਾ

ਸੁਮੁਖਾਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਆਯਸ੍ਮਤੋ ਆਨਨ੍ਦਸ੍ਸ ਜੀਵਿਤਪਰਿਚ੍ਚਾਗਂ ਆਰਬ੍ਭ ਕਥੇਸਿ. ਦੇਵਦਤ੍ਤੇਨ ਹਿ ਤਥਾਗਤਂ ਜੀਵਿਤਾ ਵੋਰੋਪੇਤੁਂ ਪਯੋਜਿਤੇਸੁ ਧਨੁਗ੍ਗਹੇਸੁ ਸਬ੍ਬਪਠਮਂ ਪੇਸਿਤੇਨ ਆਗਨ੍ਤ੍ਵਾ ‘‘ਨਾਹਂ, ਭਨ੍ਤੇ, ਸਕ੍ਕੋਮਿ ਤਂ ਭਗਵਨ੍ਤਂ ਜੀਵਿਤਾ ਵੋਰੋਪੇਤੁਂ, ਮਹਿਦ੍ਧਿਕੋ ਸੋ ਭਗਵਾ ਮਹਾਨੁਭਾਵੋ’’ਤਿ ਵੁਤ੍ਤੇ ਦੇਵਦਤ੍ਤੋ ‘‘ਅਲਂ, ਆਵੁਸੋ, ਮਾ ਤ੍ਵਂ ਸਮਣਂ ਗੋਤਮਂ ਜੀਵਿਤਾ ਵੋਰੋਪੇਹਿ, ਅਹਮੇਵ ਸਮਣਂ ਗੋਤਮਂ ਜੀਵਿਤਾ ਵੋਰੋਪੇਸ੍ਸਾਮੀ’’ਤਿ ਵਤ੍ਵਾ ਤਥਾਗਤੇ ਗਿਜ੍ਝਕੂਟਪਬ੍ਬਤਸ੍ਸ ਪਚ੍ਛਿਮਛਾਯਾਯ ਚਙ੍ਕਮਨ੍ਤੇ ਸਯਂ ਗਿਜ੍ਝਕੂਟਂ ਪਬ੍ਬਤਂ ਅਭਿਰੁਹਿਤ੍ਵਾ ਯਨ੍ਤਵੇਗੇਨ ਮਹਤਿਂ ਸਿਲਂ ਪਵਿਜ੍ਝਿ, ‘‘ਇਮਾਯ ਸਿਲਾਯ ਸਮਣਂ ਗੋਤਮਂ ਜੀਵਿਤਾ ਵੋਰੋਪੇਸ੍ਸਾਮੀ’’ਤਿ. ਤਦਾ ਦ੍ਵੇ ਪਬ੍ਬਤਕੂਟਾ ਸਮਾਗਨ੍ਤ੍ਵਾ ਤਂ ਸਿਲਂ ਸਮ੍ਪਟਿਚ੍ਛਿਂਸੁ. ਤਤੋ ਪਪਟਿਕਾ ਉਪ੍ਪਤਿਤ੍ਵਾ ਭਗਵਤੋ ਪਾਦਂ ਪਹਰਿਤ੍ਵਾ ਰੁਹਿਰਂ ਉਪ੍ਪਾਦੇਸਿ, ਬਲਵਵੇਦਨਾ ਪਵਤ੍ਤਿਂਸੁ. ਜੀਵਕੋ ਤਥਾਗਤਸ੍ਸ ਪਾਦਂ ਸਤ੍ਥਕੇਨ ਫਾਲੇਤ੍ਵਾ ਦੁਟ੍ਠਲੋਹਿਤਂ ਵਮੇਤ੍ਵਾ ਪੂਤਿਮਂਸਂ ਅਪਨੇਤ੍ਵਾ ਧੋਵਿਤ੍ਵਾ ਭੇਸਜ੍ਜਂ ਆਲਿਮ੍ਪਿਤ੍ਵਾ ਨਿਰੋਗਮਕਾਸਿ. ਸਤ੍ਥਾ ਪੁਰਿਮਸਦਿਸਮੇਵ ਭਿਕ੍ਖੁਸਙ੍ਘਪਰਿਵੁਤੋ ਮਹਤਿਯਾ ਬੁਦ੍ਧਲੀਲਾਯ ਵਿਚਰਿ.

ਅਥ ਨਂ ਦਿਸ੍ਵਾ ਦੇਵਦਤ੍ਤੋ ਚਿਨ੍ਤੇਸਿ – ‘‘ਸਮਣਸ੍ਸ ਗੋਤਮਸ੍ਸ ਰੂਪਸੋਭਗ੍ਗਪ੍ਪਤ੍ਤਂ ਸਰੀਰਂ ਦਿਸ੍ਵਾ ਕੋਚਿ ਮਨੁਸ੍ਸਭੂਤੋ ਉਪਸਙ੍ਕਮਿਤੁਂ ਨ ਸਕ੍ਕੋਤਿ, ਰਞ੍ਞੋ ਖੋ ਪਨ ਨਾਲ਼ਾਗਿਰਿ ਨਾਮ ਹਤ੍ਥੀ ਚਣ੍ਡੋ ਫਰੁਸੋ ਮਨੁਸ੍ਸਘਾਤਕੋ ਬੁਦ੍ਧਧਮ੍ਮਸਙ੍ਘਗੁਣੇ ਨ ਜਾਨਾਤਿ, ਸੋ ਤਂ ਜੀਵਿਤਕ੍ਖਯਂ ਪਾਪੇਸ੍ਸਤੀ’’ਤਿ. ਸੋ ਗਨ੍ਤ੍ਵਾ ਰਞ੍ਞੋ ਤਮਤ੍ਥਂ ਆਰੋਚੇਸਿ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਹਤ੍ਥਾਚਰਿਯਂ ਪਕ੍ਕੋਸਾਪੇਤ੍ਵਾ ‘‘ਸਮ੍ਮ, ਸ੍ਵੇ ਨਾਲ਼ਾਗਿਰਿਂ ਮਤ੍ਤਂ ਕਤ੍ਵਾ ਪਾਤੋਵ ਸਮਣੇਨ ਗੋਤਮੇਨ ਪਟਿਪਨ੍ਨਵੀਥਿਯਂ ਵਿਸ੍ਸਜ੍ਜੇਹੀ’’ਤਿ ਆਹ. ਦੇਵਦਤ੍ਤੋਪਿ ਨਂ ‘‘ਅਞ੍ਞੇਸੁ ਦਿਵਸੇਸੁ ਹਤ੍ਥੀ ਕਿਤ੍ਤਕਂ ਸੁਰਂ ਪਿਵਤੀ’’ਤਿ ਪੁਚ੍ਛਿਤ੍ਵਾ ‘‘ਅਟ੍ਠ ਘਟੇ, ਭਨ੍ਤੇ’’ਤਿ ਵੁਤ੍ਤੇ ‘‘ਤੇਨ ਹਿ ਸ੍ਵੇ ਤ੍ਵਂ ਤਂ ਸੋਲ਼ਸ ਘਟੇ ਪਾਯੇਤ੍ਵਾ ਸਮਣੇਨ ਗੋਤਮੇਨ ਪਟਿਪਨ੍ਨਵੀਥਿਯਂ ਅਭਿਮੁਖਂ ਕਰੇਯ੍ਯਾਸੀ’’ਤਿ ਆਹ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਰਾਜਾ ਨਗਰੇ ਭੇਰਿਂ ਚਰਾਪੇਸਿ – ‘‘ਸ੍ਵੇ ਨਾਲ਼ਾਗਿਰਿਂ ਮਤ੍ਤਂ ਕਤ੍ਵਾ ਨਗਰੇ ਵਿਸ੍ਸਜ੍ਜੇਸ੍ਸਤਿ, ਨਾਗਰਾ ਪਾਤੋਵ ਸਬ੍ਬਕਿਚ੍ਚਾਨਿ ਕਤ੍ਵਾ ਅਨ੍ਤਰਵੀਥਿਂ ਮਾ ਪਟਿਪਜ੍ਜਿਂਸੂ’’ਤਿ. ਦੇਵਦਤ੍ਤੋਪਿ ਰਾਜਨਿਵੇਸਨਾ ਓਰੁਯ੍ਹ ਹਤ੍ਥਿਸਾਲਂ ਗਨ੍ਤ੍ਵਾ ਹਤ੍ਥਿਗੋਪਕੇ ਆਮਨ੍ਤੇਤ੍ਵਾ ‘‘ਮਯਂ ਭਣੇ ਉਚ੍ਚਟ੍ਠਾਨਿਯਂ ਨੀਚਟ੍ਠਾਨੇ, ਨੀਚਟ੍ਠਾਨਿਯਂ ਵਾ ਉਚ੍ਚਟ੍ਠਾਨੇ ਕਾਤੁਂ ਸਮਤ੍ਥਾ, ਸਚੇ ਵੋ ਯਸੇਨ ਅਤ੍ਥੋ, ਸ੍ਵੇ ਪਾਤੋਵ ਨਾਲ਼ਾਗਿਰਿਂ ਤਿਖਿਣਸੁਰਾਯ ਸੋਲ਼ਸ ਘਟੇ ਪਾਯੇਤ੍ਵਾ ਸਮਣਸ੍ਸ ਗੋਤਮਸ੍ਸ ਆਗਮਨਵੇਲਾਯ ਤੁਤ੍ਤਤੋਮਰੇਹਿ ਵਿਜ੍ਝਿਤ੍ਵਾ ਕੁਜ੍ਝਾਪੇਤ੍ਵਾ ਹਤ੍ਥਿਸਾਲਂ ਭਿਨ੍ਦਾਪੇਤ੍ਵਾ ਸਮਣੇਨ ਗੋਤਮੇਨ ਪਟਿਪਨ੍ਨਵੀਥਿਯਂ ਅਭਿਮੁਖਂ ਕਤ੍ਵਾ ਸਮਣਂ ਗੋਤਮਂ ਜੀਵਿਤਕ੍ਖਯਂ ਪਾਪੇਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਂਸੁ.

ਸਾ ਪਵਤ੍ਤਿ ਸਕਲਨਗਰੇ ਵਿਤ੍ਥਾਰਿਕਾ ਅਹੋਸਿ. ਬੁਦ੍ਧਧਮ੍ਮਸਙ੍ਘਮਾਮਕਾ ਉਪਾਸਕਾ ਤਂ ਸੁਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਦੇਵਦਤ੍ਤੋ ਰਞ੍ਞਾ ਸਦ੍ਧਿਂ ਏਕਤੋ ਹੁਤ੍ਵਾ ਸ੍ਵੇ ਤੁਮ੍ਹੇਹਿ ਪਟਿਪਨ੍ਨਵੀਥਿਯਂ ਨਾਲ਼ਾਗਿਰਿਂ ਵਿਸ੍ਸਜ੍ਜਾਪੇਸ੍ਸਤਿ, ਸ੍ਵੇ ਪਿਣ੍ਡਾਯ ਅਪਵਿਸਿਤ੍ਵਾ ਇਧੇਵ ਹੋਥ, ਮਯਂ ਵਿਹਾਰੇਯੇਵ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਭਿਕ੍ਖਂ ਦਸ੍ਸਾਮਾ’’ਤਿ ਵਦਿਂਸੁ. ਸਤ੍ਥਾਪਿ ‘‘ਸ੍ਵੇ ਪਿਣ੍ਡਾਯ ਨ ਪਵਿਸਿਸ੍ਸਾਮੀ’’ਤਿ ਅਵਤ੍ਵਾਵ ‘‘ਅਹਂ ਸ੍ਵੇ ਨਾਲ਼ਾਗਿਰਿਂ ਦਮੇਤ੍ਵਾ ਪਾਟਿਹਾਰਿਯਂ ਕਤ੍ਵਾ ਤਿਤ੍ਥਿਯੇ ਮਦ੍ਦਿਤ੍ਵਾ ਰਾਜਗਹੇ ਪਿਣ੍ਡਾਯ ਅਚਰਿਤ੍ਵਾਵ ਭਿਕ੍ਖੁਸਙ੍ਘਪਰਿਵੁਤੋ ਨਗਰਾ ਨਿਕ੍ਖਮਿਤ੍ਵਾ ਵੇਲ਼ੁਵਨਮੇਵ ਆਗਮਿਸ੍ਸਾਮਿ, ਰਾਜਗਹਵਾਸਿਨੋਪਿ ਬਹੂਨਿ ਭਤ੍ਤਭਾਜਨਾਨਿ ਗਹੇਤ੍ਵਾ ਵੇਲ਼ੁਵਨਮੇਵ ਆਗਮਿਸ੍ਸਨ੍ਤਿ, ਸ੍ਵੇ ਵਿਹਾਰੇਯੇਵ ਭਤ੍ਤਗ੍ਗਂ ਭਵਿਸ੍ਸਤੀ’’ਤਿ ਇਮਿਨਾ ਕਾਰਣੇਨ ਤੇਸਂ ਅਧਿਵਾਸੇਸਿ. ਤੇ ਤਥਾਗਤਸ੍ਸ ਅਧਿਵਾਸਨਂ ਵਿਦਿਤ੍ਵਾ ਭਤ੍ਤਭਾਜਨਾਨਿ ਆਹਰਿਤ੍ਵਾ ‘‘ਵਿਹਾਰੇਯੇਵ ਦਾਨਂ ਦਸ੍ਸਾਮਾ’’ਤਿ ਪਕ੍ਕਮਿਂਸੁ.

ਸਤ੍ਥਾਪਿ ਪਠਮਯਾਮੇ ਧਮ੍ਮਂ ਦੇਸੇਤ੍ਵਾ ਮਜ੍ਝਿਮਯਾਮੇ ਦੇਵਤਾਨਂ ਪਞ੍ਹਂ ਵਿਸ੍ਸਜ੍ਜੇਤ੍ਵਾ ਪਚ੍ਛਿਮਯਾਮਸ੍ਸ ਪਠਮਕੋਟ੍ਠਾਸੇ ਸੀਹਸੇਯ੍ਯਂ ਕਪ੍ਪੇਤ੍ਵਾ ਦੁਤਿਯਕੋਟ੍ਠਾਸੇ ਫਲਸਮਾਪਤ੍ਤਿਯਾ ਵੀਤਿਨਾਮੇਤ੍ਵਾ ਤਤਿਯਕੋਟ੍ਠਾਸੇ ਮਹਾਕਰੁਣਾਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਬੋਧਨੇਯ੍ਯਬਨ੍ਧਵੇ ਓਲੋਕੇਨ੍ਤੋ ਨਾਲ਼ਾਗਿਰਿਦਮਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯਂ ਦਿਸ੍ਵਾ ਵਿਭਾਤਾਯ ਰਤ੍ਤਿਯਾ ਕਤਸਰੀਰਪਟਿਜਗ੍ਗਨੋ ਹੁਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਤ੍ਵਾ, ‘‘ਆਨਨ੍ਦ, ਅਜ੍ਜ ਰਾਜਗਹਪਰਿਵਤ੍ਤਕੇਸੁ ਅਟ੍ਠਾਰਸਸੁ ਮਹਾਵਿਹਾਰੇਸੁ ਸਬ੍ਬੇਸਮ੍ਪਿ ਭਿਕ੍ਖੂਨਂ ਮਯਾਸਦ੍ਧਿਂ ਰਾਜਗਹਂ ਪਵਿਸਿਤੁਂ ਆਰੋਚੇਹੀ’’ਤਿ ਆਹ. ਥੇਰੋ ਤਥਾ ਅਕਾਸਿ. ਸਬ੍ਬੇਪਿ ਭਿਕ੍ਖੂ ਵੇਲ਼ੁਵਨੇ ਸਨ੍ਨਿਪਤਿਂਸੁ. ਸਤ੍ਥਾ ਮਹਾਭਿਕ੍ਖੁਸਙ੍ਘਪਰਿਵੁਤੋ ਰਾਜਗਹਂ ਪਾਵਿਸਿ. ਅਥ ਹਤ੍ਥਿਮੇਣ੍ਡਾ ਯਥਾਨੁਸਿਟ੍ਠਂ ਪਟਿਪਜ੍ਜਿਂਸੁ, ਮਹਨ੍ਤੋ ਸਮਾਗਮੋ ਅਹੋਸਿ. ਸਦ੍ਧਾਸਮ੍ਪਨ੍ਨਾ ਮਨੁਸ੍ਸਾ ‘‘ਅਜ੍ਜ ਕਿਰ ਬੁਦ੍ਧਨਾਗਸ੍ਸ ਤਿਰਚ੍ਛਾਨਨਾਗੇਨ ਸਙ੍ਗਾਮੋ ਭਵਿਸ੍ਸਤਿ, ਅਨੂਪਮਾਯ ਬੁਦ੍ਧਲੀਲਾਯ ਨਾਲ਼ਾਗਿਰਿਦਮਨਂ ਪਸ੍ਸਿਸ੍ਸਾਮਾ’’ਤਿ ਪਾਸਾਦਹਮ੍ਮਿਯਗੇਹਚ੍ਛਦਨਾਦੀਨਿ ਅਭਿਰੁਹਿਤ੍ਵਾ ਅਟ੍ਠਂਸੁ. ਅਸਦ੍ਧਾ ਪਨ ਮਿਚ੍ਛਾਦਿਟ੍ਠਿਕਾ ‘‘ਅਯਂ ਨਾਲ਼ਾਗਿਰਿ ਚਣ੍ਡੋ ਫਰੁਸੋ ਮਨੁਸ੍ਸਘਾਤਕੋ ਬੁਦ੍ਧਾਦੀਨਂ ਗੁਣਂ ਨ ਜਾਨਾਤਿ, ਸੋ ਅਜ੍ਜ ਸਮਣਸ੍ਸ ਗੋਤਮਸ੍ਸ ਸੁਵਣ੍ਣਵਣ੍ਣਂ ਸਰੀਰਂ ਵਿਦ੍ਧਂਸੇਤ੍ਵਾ ਜੀਵਿਤਕ੍ਖਯਂ ਪਾਪੇਸ੍ਸਤਿ, ਅਜ੍ਜ ਪਚ੍ਚਾਮਿਤ੍ਤਸ੍ਸ ਪਿਟ੍ਠਿਂ ਪਸ੍ਸਿਸ੍ਸਾਮਾ’’ਤਿ ਪਾਸਾਦਾਦੀਸੁ ਅਟ੍ਠਂਸੁ.

ਹਤ੍ਥੀਪਿ ਭਗਵਨ੍ਤਂ ਆਗਚ੍ਛਨ੍ਤਂ ਦਿਸ੍ਵਾ ਮਨੁਸ੍ਸੇ ਤਾਸੇਨ੍ਤੋ ਗੇਹਾਨਿ ਵਿਦ੍ਧਂਸੇਨ੍ਤੋ ਸਕਟਾਨਿ ਸਂਚੁਣ੍ਣੇਨ੍ਤੋ ਸੋਣ੍ਡਂ ਉਸ੍ਸਾਪੇਤ੍ਵਾ ਪਹਟ੍ਠਕਣ੍ਣਵਾਲੋ ਪਬ੍ਬਤੋ ਵਿਯ ਅਜ੍ਝੋਤ੍ਥਰਨ੍ਤੋ ਯੇਨ ਭਗਵਾ ਤੇਨਾਭਿਧਾਵਿ. ਤਂ ਆਗਚ੍ਛਨ੍ਤਂ ਦਿਸ੍ਵਾ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘‘ਅਯਂ, ਭਨ੍ਤੇ, ਨਾਲ਼ਾਗਿਰਿ ਚਣ੍ਡੋ ਫਰੁਸੋ ਮਨੁਸ੍ਸਘਾਤਕੋ ਇਮਂ ਰਚ੍ਛਂ ਪਟਿਪਨ੍ਨੋ, ਨ ਖੋ ਪਨਾਯਂ ਬੁਦ੍ਧਾਦਿਗੁਣਂ ਜਾਨਾਤਿ, ਪਟਿਕ੍ਕਮਤੁ, ਭਨ੍ਤੇ, ਭਗਵਾ, ਪਟਿਕ੍ਕਮਤੁ ਸੁਗਤੋ’’ਤਿ. ਮਾ, ਭਿਕ੍ਖਵੇ, ਭਾਯਿਤ੍ਥ, ਪਟਿਬਲੋ ਅਹਂ ਨਾਲ਼ਾਗਿਰਿਂ ਦਮੇਤੁਨ੍ਤਿ. ਅਥਾਯਸ੍ਮਾ ਸਾਰਿਪੁਤ੍ਤੋ ਸਤ੍ਥਾਰਂ ਯਾਚਿ – ‘‘ਭਨ੍ਤੇ, ਪਿਤੁ ਉਪ੍ਪਨ੍ਨਕਿਚ੍ਚਂ ਨਾਮ ਜੇਟ੍ਠਪੁਤ੍ਤਸ੍ਸ ਭਾਰੋ, ਅਹਮੇਵ ਤਂ ਦਮੇਮੀ’’ਤਿ. ਅਥ ਨਂ ਸਤ੍ਥਾ, ‘‘ਸਾਰਿਪੁਤ੍ਤ, ਬੁਦ੍ਧਬਲਂ ਨਾਮ ਅਞ੍ਞਂ, ਸਾਵਕਬਲਂ ਅਞ੍ਞਂ, ਤਿਟ੍ਠ ਤ੍ਵ’’ਨ੍ਤਿ ਪਟਿਬਾਹਿ. ਏਵਂ ਯੇਭੁਯ੍ਯੇਨ ਅਸੀਤਿ ਮਹਾਥੇਰਾ ਯਾਚਿਂਸੁ. ਸਤ੍ਥਾ ਸਬ੍ਬੇਪਿ ਪਟਿਬਾਹਿ. ਅਥ ਆਯਸ੍ਮਾ ਆਨਨ੍ਦੋ ਸਤ੍ਥਰਿ ਬਲਵਸਿਨੇਹੇਨ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ‘‘ਅਯਂ ਹਤ੍ਥੀ ਪਠਮਂ ਮਂ ਮਾਰੇਤੂ’’ਤਿ ਤਥਾਗਤਸ੍ਸਤ੍ਥਾਯ ਜੀਵਿਤਂ ਪਰਿਚ੍ਚਜਿਤ੍ਵਾ ਗਨ੍ਤ੍ਵਾ ਸਤ੍ਥੁ ਪੁਰਤੋ ਅਟ੍ਠਾਸਿ. ਅਥ ਨਂ ਸਤ੍ਥਾ ‘‘ਅਪੇਹਿ, ਆਨਨ੍ਦ, ਮਾ ਮੇ ਪੁਰਤੋ ਅਟ੍ਠਾਸੀ’’ਤਿ ਆਹ. ‘‘ਭਨ੍ਤੇ, ਅਯਂ ਹਤ੍ਥੀ ਚਣ੍ਡੋ ਫਰੁਸੋ ਮਨੁਸ੍ਸਘਾਤਕੋ ਕਪ੍ਪੁਟ੍ਠਾਨਗ੍ਗਿਸਦਿਸੋ ਪਠਮਂ ਮਂ ਮਾਰੇਤ੍ਵਾ ਪਚ੍ਛਾ ਤੁਮ੍ਹਾਕਂ ਸਨ੍ਤਿਕਂ ਆਗਚ੍ਛਤੂ’’ਤਿ ਥੇਰੋ ਅਵਚ. ਯਾਵਤਤਿਯਂ ਵੁਚ੍ਚਮਾਨੋਪਿ ਤਥੇਵ ਅਟ੍ਠਾਸਿ ਨ ਪਟਿਕ੍ਕਮਿ. ਅਥ ਨਂ ਭਗਵਾ ਇਦ੍ਧਿਬਲੇਨ ਪਟਿਕ੍ਕਮਾਪੇਤ੍ਵਾ ਭਿਕ੍ਖੂਨਂ ਅਨ੍ਤਰੇ ਠਪੇਸਿ.

ਤਸ੍ਮਿਂ ਖਣੇ ਏਕਾ ਇਤ੍ਥੀ ਨਾਲ਼ਾਗਿਰਿਂ ਦਿਸ੍ਵਾ ਮਰਣਭਯਭੀਤਾ ਪਲਾਯਮਾਨਾ ਅਙ੍ਕੇਨ ਗਹਿਤਂ ਦਾਰਕਂ ਹਤ੍ਥਿਨੋ ਚ ਤਥਾਗਤਸ੍ਸ ਚ ਅਨ੍ਤਰੇ ਛਡ੍ਡੇਤ੍ਵਾ ਪਲਾਯਿ. ਹਤ੍ਥੀ ਤਂ ਅਨੁਬਨ੍ਧਿਤ੍ਵਾ ਨਿਵਤ੍ਤਿਤ੍ਵਾ ਦਾਰਕਸ੍ਸ ਸਨ੍ਤਿਕਂ ਅਗਮਾਸਿ. ਤਦਾ ਦਾਰਕੋ ਮਹਾਰਵਂ ਰਵਿ. ਸਤ੍ਥਾ ਨਾਲ਼ਾਗਿਰਿਂ ਓਦਿਸ੍ਸਕਮੇਤ੍ਤਾਯ ਫਰਿਤ੍ਵਾ ਸੁਮਧੁਰਂ ਬ੍ਰਹ੍ਮਸ੍ਸਰਂ ਨਿਚ੍ਛਾਰੇਤ੍ਵਾ ‘‘ਅਮ੍ਭੋ ਨਾਲ਼ਾਗਿਰਿ ਤਂ ਸੋਲ਼ਸ ਸੁਰਾਘਟੇ ਪਾਯੇਤ੍ਵਾ ਮਤ੍ਤਂ ਕਰੋਨ੍ਤਾ ਨ ‘ਅਞ੍ਞਂ ਗਣ੍ਹਿਸ੍ਸਤੀ’ਤਿ ਕਰਿਂਸੁ, ‘ਮਂ ਗਣ੍ਹਿਸ੍ਸਤੀ’ਤਿ ਪਨ ਕਰਿਂਸੁ, ਮਾ ਅਕਾਰਣੇਨ ਜਙ੍ਘਾਯੋ ਕਿਲਮੇਨ੍ਤੋ ਵਿਚਰਿ, ਇਤੋ ਏਹੀ’’ਤਿ ਪਕ੍ਕੋਸਿ. ਸੋ ਸਤ੍ਥੁ ਵਚਨਂ ਸੁਤ੍ਵਾ ਅਕ੍ਖੀਨਿ ਉਮ੍ਮੀਲੇਤ੍ਵਾ ਭਗਵਤੋ ਰੂਪਸਿਰਿਂ ਓਲੋਕੇਤ੍ਵਾ ਪਟਿਲਦ੍ਧਸਂਵੇਗੋ ਬੁਦ੍ਧਤੇਜੇਨ ਪਚ੍ਛਿਨ੍ਨਸੁਰਾਮਦੋ ਸੋਣ੍ਡਂ ਓਲਮ੍ਬੇਨ੍ਤੋ ਕਣ੍ਣੇ ਚਾਲੇਨ੍ਤੋ ਆਗਨ੍ਤ੍ਵਾ ਤਥਾਗਤਸ੍ਸ ਪਾਦੇਸੁ ਪਤਿ. ਅਥ ਨਂ ਸਤ੍ਥਾ, ‘‘ਨਾਲ਼ਾਗਿਰਿ, ਤ੍ਵਂ ਤਿਰਚ੍ਛਾਨਹਤ੍ਥੀ, ਅਹਂ ਬੁਦ੍ਧਵਾਰਣੋ, ਇਤੋ ਪਟ੍ਠਾਯ ਮਾ ਚਣ੍ਡੋ ਫਰੁਸੋ ਮਨੁਸ੍ਸਘਾਤਕੋ ਭਵ, ਸਬ੍ਬਸਤ੍ਤੇਸੁ ਮੇਤ੍ਤਚਿਤ੍ਤਂ ਪਟਿਲਭਾ’’ਤਿ ਵਤ੍ਵਾ ਦਕ੍ਖਿਣਹਤ੍ਥਂ ਪਸਾਰੇਤ੍ਵਾ ਕੁਮ੍ਭੇ ਪਰਾਮਸਿਤ੍ਵਾ –

‘‘ਮਾ ਕੁਞ੍ਜਰ ਨਾਗਮਾਸਦੋ, ਦੁਕ੍ਖੋ ਹਿ ਕੁਞ੍ਜਰ ਨਾਗਮਾਸਦੋ;

ਨ ਹਿ ਨਾਗਹਤਸ੍ਸ ਕੁਞ੍ਜਰ, ਸੁਗਤਿ ਹੋਤਿ ਇਤੋ ਪਰਂ ਯਤੋ.

‘‘ਮਾ ਚ ਮਦੋ ਮਾ ਚ ਪਮਾਦੋ, ਨ ਹਿ ਪਮਤ੍ਤਾ ਸੁਗਤਿਂ ਵਜਨ੍ਤਿ ਤੇ;

ਤ੍ਵਞ੍ਞੇਵ ਤਥਾ ਕਰਿਸ੍ਸਸਿ, ਯੇਨ ਤ੍ਵਂ ਸੁਗਤਿਂ ਗਮਿਸ੍ਸਸੀ’’ਤਿ. (ਚੂਲ਼ਵ. ੩੪੨) –

ਧਮ੍ਮਂ ਦੇਸੇਸਿ.

ਤਸ੍ਸ ਸਕਲਸਰੀਰਂ ਪੀਤਿਯਾ ਨਿਰਨ੍ਤਰਂ ਫੁਟਂ ਅਹੋਸਿ. ਸਚੇ ਕਿਰ ਤਿਰਚ੍ਛਾਨਗਤੋ ਨਾਭਵਿਸ੍ਸਾ, ਸੋਤਾਪਤ੍ਤਿਫਲਂ ਅਧਿਗਮਿਸ੍ਸਾ. ਮਨੁਸ੍ਸਾ ਤਂ ਪਾਟਿਹਾਰਿਯਂ ਦਿਸ੍ਵਾ ਉਨ੍ਨਦਿਂਸੁ ਅਪ੍ਫੋਟਿਂਸੁ, ਸਞ੍ਜਾਤਸੋਮਨਸ੍ਸਾ ਨਾਨਾਭਰਣਾਨਿ ਖਿਪਿਂਸੁ, ਤਾਨਿ ਹਤ੍ਥਿਸ੍ਸ ਸਰੀਰਂ ਪਟਿਚ੍ਛਾਦਯਿਂਸੁ. ਤਤੋ ਪਟ੍ਠਾਯ ਨਾਲ਼ਾਗਿਰਿ ਧਨਪਾਲਕੋ ਨਾਮ ਜਾਤੋ. ਤਸ੍ਮਿਂ ਖੋ ਪਨ ਧਨਪਾਲਕਸਮਾਗਮੇ ਚਤੁਰਾਸੀਤਿ ਪਾਣਸਹਸ੍ਸਾਨਿ ਅਮਤਂ ਪਿਵਿਂਸੁ. ਸਤ੍ਥਾ ਧਨਪਾਲਕਂ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਸਿ. ਸੋ ਸੋਣ੍ਡਾਯ ਭਗਵਤੋ ਪਾਦੇ ਪਂਸੂਨਿ ਗਹੇਤ੍ਵਾ ਉਪਰਿ ਮੁਦ੍ਧਨਿ ਆਕਿਰਿਤ੍ਵਾ ਪਟਿਕੁਟਿਤੋਵ ਪਟਿਕ੍ਕਮਿਤ੍ਵਾ ਦਸ੍ਸਨੂਪਚਾਰੇ ਠਿਤੋ ਦਸਬਲਂ ਵਨ੍ਦਿਤ੍ਵਾ ਨਿਵਤ੍ਤਿਤ੍ਵਾ ਹਤ੍ਥਿਸਾਲਂ ਪਾਵਿਸਿ. ਤਤੋ ਪਟ੍ਠਾਯ ਦਨ੍ਤਸੁਦਨ੍ਤੋ ਹੁਤ੍ਵਾ ਨ ਕਞ੍ਚਿ ਵਿਹੇਠੇਤਿ. ਸਤ੍ਥਾ ਨਿਪ੍ਫਨ੍ਨਮਨੋਰਥੋ ‘‘ਯੇਹਿ ਯਂ ਧਨਂ ਖਿਤ੍ਤਂ, ਤੇਸਞ੍ਞੇਵ ਤਂ ਹੋਤੂ’’ਤਿ ਅਧਿਟ੍ਠਾਯ ‘‘ਅਜ੍ਜ ਮਯਾ ਮਹਨ੍ਤਂ ਪਾਟਿਹਾਰਿਯਂ ਕਤਂ, ਇਮਸ੍ਮਿਂ ਨਗਰੇ ਪਿਣ੍ਡਾਯ ਚਰਣਂ ਅਪ੍ਪਟਿਰੂਪ’’ਨ੍ਤਿ ਤਿਤ੍ਥਿਯੇ ਮਦ੍ਦਿਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਜਯਪ੍ਪਤ੍ਤੋ ਵਿਯ ਖਤ੍ਤਿਯੋ ਨਗਰਾ ਨਿਕ੍ਖਮਿਤ੍ਵਾ ਵੇਲ਼ੁਵਨਮੇਵ ਗਤੋ. ਨਗਰਵਾਸਿਨੋ ਬਹੁਂ ਅਨ੍ਨਪਾਨਖਾਦਨੀਯਂ ਆਦਾਯ ਵਿਹਾਰਂ ਗਨ੍ਤ੍ਵਾ ਮਹਾਦਾਨਂ ਪਵਤ੍ਤਯਿਂਸੁ.

ਤਂ ਦਿਵਸਂ ਸਾਯਨ੍ਹਸਮਯੇ ਧਮ੍ਮਸਭਂ ਪੂਰੇਤ੍ਵਾ ਸਨ੍ਨਿਸਿਨ੍ਨਾ ਭਿਕ੍ਖੂ ਕਥਂ ਸਮੁਟ੍ਠਾਪੇਸੁਂ – ‘‘ਆਵੁਸੋ, ਆਯਸ੍ਮਤਾ ਆਨਨ੍ਦੇਨ ਤਥਾਗਤਸ੍ਸਤ੍ਥਾਯ ਅਤ੍ਤਨੋ ਜੀਵਿਤਂ ਪਰਿਚ੍ਚਜਨ੍ਤੇਨ ਦੁਕ੍ਕਰਂ ਕਤਂ, ਨਾਲ਼ਾਗਿਰਿਂ ਦਿਸ੍ਵਾ ਸਤ੍ਥਾਰਾ ਤਿਕ੍ਖਤ੍ਤੁਂ ਪਟਿਬਾਹਿਯਮਾਨੋਪਿ ਨਾਪਗਤੋ, ਅਹੋ ਦੁਕ੍ਕਰਕਾਰਕੋ, ਆਵੁਸੋ, ਆਯਸ੍ਮਾ ਆਨਨ੍ਦੋ’’ਤਿ. ਸਤ੍ਥਾ ‘‘ਆਨਨ੍ਦਸ੍ਸ ਗੁਣਕਥਾ ਪਵਤ੍ਤਤਿ, ਗਨ੍ਤਬ੍ਬਂ ਮਯਾ ਏਤ੍ਥਾ’’ਤਿ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਆਨਨ੍ਦੋ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤੋਪਿ ਮਮਤ੍ਥਾਯ ਜੀਵਿਤਂ ਪਰਿਚ੍ਚਜਿਯੇਵਾ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਮਹਿਂਸਕਰਟ੍ਠੇ ਸਾਗਲਨਗਰੇ ਸਾਗਲੋ ਨਾਮ ਰਾਜਾ ਧਮ੍ਮੇਨ ਰਜ੍ਜਂ ਕਾਰੇਸਿ. ਤਦਾ ਨਗਰਤੋ ਅਵਿਦੂਰੇ ਏਕਸ੍ਮਿਂ ਨੇਸਾਦਗਾਮਕੇ ਅਞ੍ਞਤਰੋ ਨੇਸਾਦੋ ਪਾਸੇਹਿ ਸਕੁਣੇ ਬਨ੍ਧਿਤ੍ਵਾ ਨਗਰੇ ਵਿਕ੍ਕਿਣਨ੍ਤੋ ਜੀਵਿਕਂ ਕਪ੍ਪੇਸਿ. ਨਗਰਤੋ ਚ ਅਵਿਦੂਰੇ ਆਵਟ੍ਟਤੋ ਦ੍ਵਾਦਸਯੋਜਨੋ ਮਾਨੁਸਿਯੋ ਨਾਮ ਪਦੁਮਸਰੋ ਅਹੋਸਿ ਪਞ੍ਚਵਣ੍ਣਪਦੁਮਸਞ੍ਛਨ੍ਨੋ. ਤਤ੍ਥ ਨਾਨਪ੍ਪਕਾਰੋ ਸਕੁਣਸਙ੍ਘੋ ਓਤਰਿ. ਸੋ ਨੇਸਾਦੋ ਤਤ੍ਥ ਅਨਿਯਾਮੇਨ ਪਾਸੇ ਓਡ੍ਡੇਸਿ. ਤਸ੍ਮਿਂ ਕਾਲੇ ਧਤਰਟ੍ਠੋ ਹਂਸਰਾਜਾ ਛਨ੍ਨਵੁਤਿਹਂਸਸਹਸ੍ਸਪਰਿਵਾਰੋ ਚਿਤ੍ਤਕੂਟਪਬ੍ਬਤੇ ਸੁਵਣ੍ਣਗੁਹਾਯਂ ਵਸਤਿ, ਸੁਮੁਖੋ ਨਾਮਸ੍ਸ ਸੇਨਾਪਤਿ ਅਹੋਸਿ. ਅਥੇਕਦਿਵਸਂ ਤਤੋ ਹਂਸਯੂਥਾ ਕਤਿਪਯਾ ਸੁਵਣ੍ਣਹਂਸਾ ਮਾਨੁਸਿਯਂ ਸਰਂ ਗਨ੍ਤ੍ਵਾ ਪਹੂਤਗੋਚਰੇ ਤਸ੍ਮਿਂ ਯਥਾਸੁਖਂ ਵਿਚਰਿਤ੍ਵਾ ਸੁਹਿਤਾ ਚਿਤ੍ਤਕੂਟਂ ਆਗਨ੍ਤ੍ਵਾ ਧਤਰਟ੍ਠਸ੍ਸ ਆਰੋਚੇਸੁਂ – ‘‘ਮਹਾਰਾਜ, ਮਨੁਸ੍ਸਪਥੇ ਮਾਨੁਸਿਯੋ ਨਾਮ ਪਦੁਮਸਰੋ ਸਮ੍ਪਨ੍ਨਗੋਚਰੋ, ਤਤ੍ਥ ਗੋਚਰਂ ਗਣ੍ਹਿਤੁਂ ਗਚ੍ਛਾਮਾ’’ਤਿ. ਸੋ ‘‘ਮਨੁਸ੍ਸਪਥੋ ਨਾਮ ਸਾਸਙ੍ਕੋ ਸਪ੍ਪਟਿਭਯੋ, ਮਾ ਵੋ ਰੁਚ੍ਚਿਤ੍ਥਾ’’ਤਿ ਪਟਿਕ੍ਖਿਪਿਤ੍ਵਾਪਿ ਤੇਹਿ ਪੁਨਪ੍ਪੁਨਂ ਵੁਚ੍ਚਮਾਨੋ ‘‘ਸਚੇ ਤੁਮ੍ਹਾਕਂ ਰੁਚ੍ਚਤਿ, ਗਚ੍ਛਾਮਾ’’ਤਿ ਸਪਰਿਵਾਰੋ ਤਂ ਸਰਂ ਅਗਮਾਸਿ. ਸੋ ਆਕਾਸਾ ਓਤਰਨ੍ਤੋ ਪਾਦਂ ਪਾਸੇ ਪਵੇਸੇਨ੍ਤੋਯੇਵ ਓਤਰਿ. ਅਥਸ੍ਸ ਪਾਸੋ ਪਾਦਂ ਅਯਪਟ੍ਟਕੇਨ ਕਡ੍ਢਨ੍ਤੋ ਵਿਯ ਆਬਨ੍ਧਿਤ੍ਵਾ ਗਣ੍ਹਿ. ਅਥਸ੍ਸ ‘‘ਛਿਨ੍ਦਿਸ੍ਸਾਮਿ ਨ’’ਨ੍ਤਿ ਆਕਡ੍ਢਨ੍ਤਸ੍ਸ ਪਠਮਵਾਰੇ ਚਮ੍ਮਂ ਛਿਜ੍ਜਿ, ਦੁਤਿਯਵਾਰੇ ਮਂਸਂ ਛਿਜ੍ਜਿ, ਤਤਿਯਵਾਰੇ ਨ੍ਹਾਰੁ ਛਿਜ੍ਜਿ, ਪਾਸੋ ਅਟ੍ਠਿਂ ਆਹਚ੍ਚ ਅਟ੍ਠਾਸਿ, ਲੋਹਿਤਂ ਪਗ੍ਘਰਿ, ਬਲਵਵੇਦਨਾ ਪਵਤ੍ਤਿਂਸੁ.

ਸੋ ਚਿਨ੍ਤੇਸਿ – ‘‘ਸਚਾਹਂ ਬਦ੍ਧਰਵਂ ਰਵਿਸ੍ਸਾਮਿ, ਞਾਤਕਾ ਮੇ ਉਤ੍ਰਸ੍ਤਾ ਹੁਤ੍ਵਾ ਗੋਚਰਂ ਅਗ੍ਗਣ੍ਹਿਤ੍ਵਾ ਛਾਤਜ੍ਝਤ੍ਤਾਵ ਪਲਾਯਨ੍ਤਾ ਦੁਬ੍ਬਲਤਾਯ ਮਹਾਸਮੁਦ੍ਦੇ ਪਤਿਸ੍ਸਨ੍ਤੀ’’ਤਿ. ਸੋ ਵੇਦਨਂ ਅਧਿਵਾਸੇਤ੍ਵਾ ਞਾਤੀਨਂ ਯਾਵਦਤ੍ਥਂ ਚਰਿਤ੍ਵਾ ਹਂਸਾਨਂ ਕੀਲ਼ਨਕਾਲੇ ਮਹਨ੍ਤੇਨ ਸਦ੍ਦੇਨ ਬਦ੍ਧਰਵਂ ਰਵਿ. ਤਂ ਸੁਤ੍ਵਾ ਤੇ ਹਂਸਾ ਮਰਣਭਯਤਜ੍ਜਿਤਾ ਵਗ੍ਗਵਗ੍ਗਾ ਹੁਤ੍ਵਾ ਚਿਤ੍ਤਕੂਟਾਭਿਮੁਖਾ ਪਕ੍ਕਮਿਂਸੁ. ਤੇਸੁ ਪਕ੍ਕਨ੍ਤੇਸੁ ਸੁਮੁਖੋ ਹਂਸਸੇਨਾਪਤਿ ‘‘ਕਚ੍ਚਿ ਨੁ ਖੋ ਇਦਂ ਭਯਂ ਮਹਾਰਾਜਸ੍ਸ ਉਪ੍ਪਨ੍ਨਂ, ਜਾਨਿਸ੍ਸਾਮਿ ਨ’’ਨ੍ਤਿ ਵੇਗੇਨ ਪਕ੍ਖਨ੍ਦਿਤ੍ਵਾ ਪੁਰਤੋ ਗਚ੍ਛਨ੍ਤਸ੍ਸ ਹਂਸਗਣਸ੍ਸ ਅਨ੍ਤਰੇ ਮਹਾਸਤ੍ਤਂ ਅਦਿਸ੍ਵਾ ਮਜ੍ਝਿਮਹਂਸਗਣਂ ਵਿਚਿਨਿ, ਤਤ੍ਥਪਿ ਅਦਿਸ੍ਵਾ ਪਚ੍ਛਿਮਹਂਸਗਣਂ ਵਿਚਿਨਿ, ਤਤ੍ਥਪਿ ਅਦਿਸ੍ਵਾ ‘‘ਨਿਸ੍ਸਂਸਯਂ ਤਸ੍ਸੇਵੇਦਂ ਭਯਂ ਉਪ੍ਪਨ੍ਨ’’ਨ੍ਤਿ ਨਿਵਤ੍ਤਿਤ੍ਵਾ ਆਗਚ੍ਛਨ੍ਤੋ ਮਹਾਸਤ੍ਤਂ ਪਾਸੇ ਬਦ੍ਧਂ ਲੋਹਿਤਮਕ੍ਖਿਤਂ ਦੁਕ੍ਖਾਤੁਰਂ ਪਙ੍ਕਪਿਟ੍ਠੇ ਨਿਪਨ੍ਨਂ ਦਿਸ੍ਵਾ ‘‘ਮਾ ਭਾਯਿ, ਮਹਾਰਾਜ, ਅਹਂ ਮਮ ਜੀਵਿਤਂ ਪਰਿਚ੍ਚਜਿਤ੍ਵਾ ਤੁਮ੍ਹੇ ਪਾਸਤੋ ਮੋਚੇਸ੍ਸਾਮੀ’’ਤਿ ਵਦਨ੍ਤੋ ਓਤਰਿਤ੍ਵਾ ਮਹਾਸਤ੍ਤਂ ਅਸ੍ਸਾਸੇਨ੍ਤੋਵ ਪਙ੍ਕਪਿਟ੍ਠੇ ਨਿਸੀਦਿ. ਅਥ ਨਂ ਵੀਮਂਸਨ੍ਤੋ ਮਹਾਸਤ੍ਤੋ ਪਠਮਂ ਗਾਥਮਾਹ –

੧.

‘‘ਸੁਮੁਖ ਅਨੁਪਚਿਨਨ੍ਤਾ, ਪਕ੍ਕਮਨ੍ਤਿ ਵਿਹਙ੍ਗਮਾ;

ਗਚ੍ਛ ਤੁਵਮ੍ਪਿ ਮਾ ਕਙ੍ਖਿ, ਨਤ੍ਥਿ ਬਦ੍ਧੇ ਸਹਾਯਤਾ’’ਤਿ.

ਤਤ੍ਥ ਅਨੁਪਚਿਨਨ੍ਤਾਤਿ ਸਿਨੇਹੇਨ ਆਲਯਵਸੇਨ ਅਨੋਲੋਕੇਨ੍ਤਾ. ਪਕ੍ਕਮਨ੍ਤੀਤਿ ਏਤੇ ਛਨ੍ਨਵੁਤਿ ਹਂਸਸਹਸ੍ਸਾ ਞਾਤਿਵਿਹਙ੍ਗਮਾ ਮਂ ਛਡ੍ਡੇਤ੍ਵਾ ਗਚ੍ਛਨ੍ਤਿ, ਤ੍ਵਮ੍ਪਿ ਗਚ੍ਛ, ਮਾ ਇਧ ਵਾਸਂ ਆਕਙ੍ਖਿ, ਏਵਞ੍ਹਿ ਪਾਸੇਨ ਬਦ੍ਧੇ ਮਯਿ ਸਹਾਯਤਾ ਨਾਮ ਨਤ੍ਥਿ, ਨ ਹਿ ਤੇ ਅਹਂ ਇਦਾਨਿ ਕਿਞ੍ਚਿ ਸਹਾਯਕਿਚ੍ਚਂ ਕਾਤੁਂ ਸਕ੍ਖਿਸ੍ਸਾਮਿ, ਕਿਂ ਤੇ ਮਯਾ ਨਿਰੂਪਕਾਰੇਨ, ਪਪਞ੍ਚਂ ਅਕਤ੍ਵਾ ਗਚ੍ਛੇਵਾਤਿ ਵਦਤਿ.

ਇਤੋ ਪਰਂ –

੨.

‘‘ਗਚ੍ਛੇ ਵਾਹਂ ਨ ਵਾ ਗਚ੍ਛੇ, ਨ ਤੇਨ ਅਮਰੋ ਸਿਯਂ;

ਸੁਖਿਤਂ ਤਂ ਉਪਾਸਿਤ੍ਵਾ, ਦੁਕ੍ਖਿਤਂ ਤਂ ਕਥਂ ਜਹੇ.

੩.

‘‘ਮਰਣਂ ਵਾ ਤਯਾ ਸਦ੍ਧਿਂ, ਜੀਵਿਤਂ ਵਾ ਤਯਾ ਵਿਨਾ;

ਤਦੇਵ ਮਰਣਂ ਸੇਯ੍ਯੋ, ਯਞ੍ਚੇ ਜੀਵੇ ਤਯਾ ਵਿਨਾ.

੪.

‘‘ਨੇਸ ਧਮ੍ਮੋ ਮਹਾਰਾਜ, ਯਂ ਤਂ ਏਵਂ ਗਤਂ ਜਹੇ;

ਯਾ ਗਤਿ ਤੁਯ੍ਹਂ ਸਾ ਮਯ੍ਹਂ, ਰੁਚ੍ਚਤੇ ਵਿਹਗਾਧਿਪ.

੫.

‘‘ਕਾ ਨੁ ਪਾਸੇਨ ਬਦ੍ਧਸ੍ਸ, ਗਤਿ ਅਞ੍ਞਾ ਮਹਾਨਸਾ;

ਸਾ ਕਥਂ ਚੇਤਯਾਨਸ੍ਸ, ਮੁਤ੍ਤਸ੍ਸ ਤਵ ਰੁਚ੍ਚਤਿ.

੬.

‘‘ਕਂ ਵਾ ਤ੍ਵਂ ਪਸ੍ਸਸੇ ਅਤ੍ਥਂ, ਮਮ ਤੁਯ੍ਹਞ੍ਚ ਪਕ੍ਖਿਮ;

ਞਾਤੀਨਂ ਵਾਵਸਿਟ੍ਠਾਨਂ, ਉਭਿਨ੍ਨਂ ਜੀਵਿਤਕ੍ਖਯੇ.

੭.

‘‘ਯਂ ਨ ਕਞ੍ਚਨਦੇਪਿਞ੍ਛ, ਅਨ੍ਧੇਨ ਤਮਸਾ ਗਤਂ;

ਤਾਦਿਸੇ ਸਞ੍ਚਜਂ ਪਾਣਂ, ਕਮਤ੍ਥਮਭਿਜੋਤਯੇ.

੮.

‘‘ਕਥਂ ਨੁ ਪਤਤਂ ਸੇਟ੍ਠ, ਧਮ੍ਮੇ ਅਤ੍ਥਂ ਨ ਬੁਜ੍ਝਸਿ;

ਧਮ੍ਮੋ ਅਪਚਿਤੋ ਸਨ੍ਤੋ, ਅਤ੍ਥਂ ਦਸ੍ਸੇਤਿ ਪਾਣਿਨਂ.

੯.

‘‘ਸੋਹਂ ਧਮ੍ਮਂ ਅਪੇਕ੍ਖਾਨੋ, ਧਮ੍ਮਾ ਚਤ੍ਥਂ ਸਮੁਟ੍ਠਿਤਂ;

ਭਤ੍ਤਿਞ੍ਚ ਤਯਿ ਸਮ੍ਪਸ੍ਸਂ, ਨਾਵਕਙ੍ਖਾਮਿ ਜੀਵਿਤਂ.

੧੦. ‘‘ਅਦ੍ਧਾ ਏਸੋ ਸਤਂ ਧਮ੍ਮੋ, ਯੋ ਮਿਤ੍ਤੋ ਮਿਤ੍ਤਮਾਪਦੇ.

ਨ ਚਜੇ ਜੀਵਿਤਸ੍ਸਾਪਿ, ਹੇਤੁਧਮ੍ਮਮਨੁਸ੍ਸਰਂ.

੧੧.

‘‘ਸ੍ਵਾਯਂ ਧਮ੍ਮੋ ਚ ਤੇ ਚਿਣ੍ਣੋ, ਭਤ੍ਤਿ ਚ ਵਿਦਿਤਾ ਮਯਿ;

ਕਾਮਂ ਕਰਸ੍ਸੁ ਮਯ੍ਹੇਤਂ, ਗਚ੍ਛੇਵਾਨੁਮਤੋ ਮਯਾ.

੧੨.

‘‘ਅਪਿ ਤ੍ਵੇਵਂ ਗਤੇ ਕਾਲੇ, ਯਂ ਖਣ੍ਡਂ ਞਾਤਿਨਂ ਮਯਾ;

ਤਯਾ ਤਂ ਬੁਦ੍ਧਿਸਮ੍ਪਨ੍ਨਂ, ਅਸ੍ਸ ਪਰਮਸਂਵੁਤਂ.

੧੩.

‘‘ਇਚ੍ਚੇਵਂ ਮਨ੍ਤਯਨ੍ਤਾਨਂ, ਅਰਿਯਾਨਂ ਅਰਿਯਵੁਤ੍ਤਿਨਂ;

ਪਚ੍ਚਦਿਸ੍ਸਥ ਨੇਸਾਦੋ, ਆਤੁਰਾਨਮਿਵਨ੍ਤਕੋ.

੧੪.

‘‘ਤੇ ਸਤ੍ਤੁਮਭਿਸਞ੍ਚਿਕ੍ਖ, ਦੀਘਰਤ੍ਤਂ ਹਿਤਾ ਦਿਜਾ;

ਤੁਣ੍ਹੀਮਾਸਿਤ੍ਥ ਉਭਯੋ, ਨ ਸਞ੍ਚਲੇਸੁਮਾਸਨਾ.

੧੫.

‘‘ਧਤਰਟ੍ਠੇ ਚ ਦਿਸ੍ਵਾਨ, ਸਮੁਡ੍ਡੇਨ੍ਤੇ ਤਤੋ ਤਤੋ;

ਅਭਿਕ੍ਖਮਥ ਵੇਗੇਨ, ਦਿਜਸਤ੍ਤੁ ਦਿਜਾਧਿਪੇ.

੧੬.

‘‘ਸੋ ਚ ਵੇਗੇਨਭਿਕ੍ਕਮ੍ਮ, ਆਸਜ੍ਜ ਪਰਮੇ ਦਿਜੇ;

ਪਚ੍ਚਕਮਿਤ੍ਥ ਨੇਸਾਦੋ, ਬਦ੍ਧਾ ਇਤਿ ਵਿਚਿਨ੍ਤਯਂ.

੧੭.

‘‘ਏਕਂਵ ਬਦ੍ਧਮਾਸੀਨਂ, ਅਬਦ੍ਧਞ੍ਚ ਪੁਨਾਪਰਂ;

ਆਸਜ੍ਜ ਬਦ੍ਧਮਾਸੀਨਂ, ਪੇਕ੍ਖਮਾਨਮਦੀਨਵਂ.

੧੮.

‘‘ਤਤੋ ਸੋ ਵਿਮਤੋਯੇਵ, ਪਣ੍ਡਰੇ ਅਜ੍ਝਭਾਸਥ;

ਪਵਡ੍ਢਕਾਯੇ ਆਸੀਨੇ, ਦਿਜਸਙ੍ਘਗਣਾਧਿਪੇ.

੧੯.

‘‘ਯਂ ਨੁ ਪਾਸੇਨ ਮਹਤਾ, ਬਦ੍ਧੋ ਨ ਕੁਰੁਤੇ ਦਿਸਂ;

ਅਥ ਕਸ੍ਮਾ ਅਬਦ੍ਧੋ ਤ੍ਵਂ, ਬਲੀ ਪਕ੍ਖਿ ਨ ਗਚ੍ਛਸਿ.

੨੦.

‘‘ਕਿਂ ਨੁ ਤ੍ਯਾਯਂ ਦਿਜੋ ਹੋਤਿ, ਮੁਤ੍ਤੋ ਬਦ੍ਧਂ ਉਪਾਸਸਿ;

ਓਹਾਯ ਸਕੁਣਾ ਯਨ੍ਤਿ, ਕਿਂ ਏਕੋ ਅਵਹੀਯਸਿ.

੨੧.

‘‘ਰਾਜਾ ਮੇ ਸੋ ਦਿਜਾਮਿਤ੍ਤ, ਸਖਾ ਪਾਣਸਮੋ ਚ ਮੇ;

ਨੇਵ ਨਂ ਵਿਜਹਿਸ੍ਸਾਮਿ, ਯਾਵ ਕਾਲਸ੍ਸ ਪਰਿਯਾਯਂ.

੨੨.

‘‘ਕਥਂ ਪਨਾਯਂ ਵਿਹਙ੍ਗੋ, ਨਾਦ੍ਦਸ ਪਾਸਮੋਡ੍ਡਿਤਂ;

ਪਦਞ੍ਹੇਤਂ ਮਹਨ੍ਤਾਨਂ, ਬੋਦ੍ਧੁਮਰਹਨ੍ਤਿ ਆਪਦਂ.

੨੩.

‘‘ਯਦਾ ਪਰਾਭਵੋ ਹੋਤਿ, ਪੋਸੋ ਜੀਵਿਤਸਙ੍ਖਯੇ;

ਅਥ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਤਿ.

੨੪.

‘‘ਅਪਿ ਤ੍ਵੇਵ ਮਹਾਪਞ੍ਞ, ਪਾਸਾ ਬਹੁਵਿਧਾ ਤਤਾ;

ਗੁਯ੍ਹਮਾਸਜ੍ਜ ਬਜ੍ਝਨ੍ਤਿ, ਅਥੇਵਂ ਜੀਵਿਤਕ੍ਖਯੇ’’ਤਿ. –

ਇਮਾਸਂ ਗਾਥਾਨਂ ਸਮ੍ਬਨ੍ਧੋ ਪਾਲ਼ਿਨਯੇਨੇਵ ਵੇਦਿਤਬ੍ਬੋ.

ਤਤ੍ਥ ਗਚ੍ਛੇ ਵਾਤਿ, ਮਹਾਰਾਜ, ਅਹਂ ਇਤੋ ਗਚ੍ਛੇਯ੍ਯਂ ਵਾ ਨ ਵਾ, ਨਾਹਂ ਤੇਨ ਗਮਨੇਨ ਵਾ ਅਗਮਨੇਨ ਵਾ ਅਮਰੋ ਸਿਯਂ, ਅਹਞ੍ਹਿ ਇਤੋ ਗਤੋਪਿ ਅਗਤੋਪਿ ਮਰਣਤੋ ਅਮੁਤ੍ਤੋਵ, ਇਤੋ ਪੁਬ੍ਬੇ ਪਨ ਸੁਖਿਤਂ ਤਂ ਉਪਾਸਿਤ੍ਵਾ ਇਦਾਨਿ ਦੁਕ੍ਖਿਤਂ ਤਂ ਕਥਂ ਜਹੇਯ੍ਯਨ੍ਤਿ ਵਦਤਿ. ਮਰਣਂ ਵਾਤਿ ਮਮ ਅਗਚ੍ਛਨ੍ਤਸ੍ਸ ਵਾ ਤਯਾ ਸਦ੍ਧਿਂ ਮਰਣਂ ਭਵੇਯ੍ਯ, ਗਚ੍ਛਨ੍ਤਸ੍ਸ ਵਾ ਤਯਾ ਵਿਨਾ ਜੀਵਿਤਂ. ਤੇਸੁ ਦ੍ਵੀਸੁ ਯਂ ਤਯਾ ਸਦ੍ਧਿਂ ਮਰਣਂ, ਤਦੇਵ ਮੇ ਵਰਂ, ਯਂ ਤਯਾ ਵਿਨਾ ਜੀਵੇਯ੍ਯਂ, ਨ ਮੇ ਤਂ ਵਰਨ੍ਤਿ ਅਤ੍ਥੋ. ਰੁਚ੍ਚਤੇਤਿ ਯਾ ਤਵ ਗਤਿ ਨਿਪ੍ਫਤ੍ਤਿ, ਸਾਵ ਮਯ੍ਹਂ ਰੁਚ੍ਚਤਿ. ਸਾ ਕਥਨ੍ਤਿ ਸਮ੍ਮ ਸੁਮੁਖ ਮਮ ਤਾਵ ਦਲ਼੍ਹੇਨ ਵਾਲਪਾਸੇਨ ਬਦ੍ਧਸ੍ਸ ਪਰਹਤ੍ਥਂ ਗਤਸ੍ਸ ਸਾ ਗਤਿ ਰੁਚ੍ਚਤੁ, ਤਵ ਪਨ ਚੇਤਯਾਨਸ੍ਸ ਸਚੇਤਨਸ੍ਸ ਪਞ੍ਞਵਤੋ ਮੁਤ੍ਤਸ੍ਸ ਕਥਂ ਰੁਚ੍ਚਤਿ.

ਪਕ੍ਖਿਮਾਤਿ ਪਕ੍ਖਸਮ੍ਪਨ੍ਨ. ਉਭਿਨ੍ਨਨ੍ਤਿ ਅਮ੍ਹਾਕਂ ਦ੍ਵਿਨ੍ਨਂ ਜੀਵਿਤਕ੍ਖਯੇ ਸਤਿ ਤ੍ਵਂ ਮਮ ਵਾ ਤਵ ਵਾ ਅਵਸਿਟ੍ਠਞਾਤੀਨਂ ਵਾ ਕਂ ਅਤ੍ਥਂ ਪਸ੍ਸਸਿ. ਯਂ ਨਾਤਿ ਏਤ੍ਥ ਨ-ਕਾਰੋ ਉਪਮਾਨੇ. ਕਞ੍ਚਨਦੇਪਿਞ੍ਛਾਤਿ ਕਞ੍ਚਨਦ੍ਵੇਪਿਞ੍ਛ, ਅਯਮੇਵ ਵਾ ਪਾਠੋ, ਕਞ੍ਚਨਸਦਿਸਉਭਯਪਕ੍ਖਾਤਿ ਅਤ੍ਥੋ. ਤਮਸਾਤਿ ਤਮਸਿ. ਗਤਨ੍ਤਿ ਕਤਂ, ਅਯਮੇਵ ਵਾ ਪਾਠੋ. ਪੁਰਿਮਸ੍ਸ ਨ-ਕਾਰਸ੍ਸ ਇਮਿਨਾ ਸਮ੍ਬਨ੍ਧੋ, ‘‘ਨ ਕਤ’’ਨ੍ਤਿ ਕਤਂ ਵਿਯਾਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਤਯਿ ਪਾਣਂ ਚਜਨ੍ਤੇਪਿ ਅਚਜਨ੍ਤੇਪਿ ਮਮ ਜੀਵਿਤਸ੍ਸ ਅਭਾਵਾ ਯਂ ਤਵ ਪਾਣਸਞ੍ਚਜਨਂ, ਤਂ ਅਨ੍ਧੇਨ ਤਮਸਿ ਕਤਂ ਵਿਯ ਕਿਞ੍ਚਿਦੇਵ ਰੂਪਕਮ੍ਮਂ ਅਪਚ੍ਚਕ੍ਖਗੁਣਂ, ਤਾਦਿਸੇ ਤਵ ਅਪਚ੍ਚਕ੍ਖਗੁਣੇ ਪਾਣਸਞ੍ਚਜਨੇ ਤ੍ਵਂ ਪਾਣਂ ਸਞ੍ਚਜਨ੍ਤੋ ਕਮਤ੍ਥਂ ਜੋਤੇਯ੍ਯਾਸੀਤਿ.

ਧਮ੍ਮੋ ਅਪਚਿਤੋ ਸਨ੍ਤੋਤਿ ਧਮ੍ਮੋ ਪੂਜਿਤੋ ਮਾਨਿਤੋ ਸਮਾਨੋ. ਅਤ੍ਥਂ ਦਸ੍ਸੇਤੀਤਿ ਵੁਦ੍ਧਿਂ ਦਸ੍ਸੇਤਿ. ਅਪੇਕ੍ਖਾਨੋਤਿ ਅਪੇਕ੍ਖਨ੍ਤੋ. ਧਮ੍ਮਾ ਚਤ੍ਥਨ੍ਤਿ ਧਮ੍ਮਤੋ ਚ ਅਤ੍ਥਂ ਸਮੁਟ੍ਠਿਤਂ ਪਸ੍ਸਨ੍ਤੋ. ਭਤ੍ਤਿਨ੍ਤਿ ਸਿਨੇਹਂ. ਸਤਂ ਧਮ੍ਮੋਤਿ ਪਣ੍ਡਿਤਾਨਂ ਸਭਾਵੋ. ਯੋ ਮਿਤ੍ਤੋਤਿ ਯੋ ਮਿਤ੍ਤੋ ਆਪਦਾਸੁ ਮਿਤ੍ਤਂ ਨ ਚਜੇ, ਤਸ੍ਸ ਅਚਜਨ੍ਤਸ੍ਸ ਮਿਤ੍ਤਸ੍ਸ ਏਸ ਸਭਾਵੋ ਨਾਮ ਅਦ੍ਧਾ ਸਤਂ ਧਮ੍ਮੋ. ਵਿਦਿਤਾਤਿ ਪਾਕਟਾ ਜਾਤਾ. ਕਾਮਂ ਕਰਸ੍ਸੂਤਿ ਏਤਂ ਮਮ ਕਾਮਂ ਮਯਾ ਇਚ੍ਛਿਤਂ ਮਮ ਵਚਨਂ ਕਰਸ੍ਸੁ. ਅਪਿ ਤ੍ਵੇਵਂ ਗਤੇ ਕਾਲੇਤਿ ਅਪਿ ਤੁ ਏਵਂ ਗਤੇ ਕਾਲੇ ਮਯਿ ਇਮਸ੍ਮਿਂ ਠਾਨੇ ਪਾਸੇਨ ਬਦ੍ਧੇ. ਪਰਮਸਂਵੁਤਨ੍ਤਿ ਪਰਮਪਰਿਪੁਣ੍ਣਂ.

ਇਚ੍ਚੇਵਂ ਮਨ੍ਤਯਨ੍ਤਾਨਨ੍ਤਿ ‘‘ਗਚ੍ਛ, ਨ ਗਚ੍ਛਾਮੀ’’ਤਿ ਏਵਂ ਕਥੇਨ੍ਤਾਨਂ ਅਰਿਯਾਨਨ੍ਤਿ ਆਚਾਰਅਰਿਯਾਨਂ. ਪਚ੍ਚਦਿਸ੍ਸਥਾਤਿ ਕਾਸਾਯਾਨਿ ਨਿਵਾਸੇਤ੍ਵਾ ਰਤ੍ਤਮਾਲਂ ਪਿਲ਼ਨ੍ਧਿਤ੍ਵਾ ਮੁਗ੍ਗਰਂ ਆਦਾਯ ਆਗਚ੍ਛਨ੍ਤੋ ਅਦਿਸ੍ਸਥ. ਆਤੁਰਾਨਨ੍ਤਿ ਗਿਲਾਨਾਨਂ ਮਚ੍ਚੁ ਵਿਯ. ਅਭਿਸਞ੍ਚਿਕ੍ਖਾਤਿ, ਭਿਕ੍ਖਵੇ, ਤੇ ਉਭੋਪਿ ਸਤ੍ਤੁਂ ਆਯਨ੍ਤਂ ਪਸ੍ਸਿਤ੍ਵਾ. ਹਿਤਾਤਿ ਦੀਘਰਤ੍ਤਂ ਅਞ੍ਞਮਞ੍ਞਸ੍ਸ ਹਿਤਾ ਮੁਦੁਚਿਤ੍ਤਾ. ਨ ਸਞ੍ਚਲੇਸੁਮਾਸਨਾਤਿ ਆਸਨਤੋ ਨ ਚਲਿਂਸੁ, ਯਥਾਨਿਸਿਨ੍ਨਾਵ ਅਹੇਸੁਂ. ਸੁਮੁਖੋ ਪਨ ‘‘ਅਯਂ ਨੇਸਾਦੋ ਆਗਨ੍ਤ੍ਵਾ ਪਹਰਨ੍ਤੋ ਮਂ ਪਠਮਂ ਪਹਰਤੂ’’ਤਿ ਚਿਨ੍ਤੇਤ੍ਵਾ ਮਹਾਸਤ੍ਤਂ ਪਚ੍ਛਤੋ ਕਤ੍ਵਾ ਨਿਸੀਦਿ.

ਧਤਰਟ੍ਠੇਤਿ ਹਂਸੇ. ਸਮੁਡ੍ਡੇਨ੍ਤੇਤਿ ਮਰਣਭਯੇਨ ਇਤੋ ਚਿਤੋ ਚ ਉਪ੍ਪਤਨ੍ਤੇ ਦਿਸ੍ਵਾ. ਆਸਜ੍ਜਾਤਿ ਇਤਰੇ ਦ੍ਵੇ ਜਨੇ ਉਪਗਨ੍ਤ੍ਵਾ. ਪਚ੍ਚਕਮਿਤ੍ਥਾਤਿ ‘‘ਬਦ੍ਧਾ, ਨ ਬਦ੍ਧਾ’’ਤਿ ਚਿਨ੍ਤੇਨ੍ਤੋ ਉਪਧਾਰੇਨ੍ਤੋ ਅਕਮਿਤ੍ਥ, ਵੇਗਂ ਹਾਪੇਤ੍ਵਾ ਸਣਿਕਂ ਅਗਮਾਸਿ. ਆਸਜ੍ਜ ਬਦ੍ਧਮਾਸੀਨਨ੍ਤਿ ਬਦ੍ਧਂ ਮਹਾਸਤ੍ਤਂ ਉਪਗਨ੍ਤ੍ਵਾ ਨਿਸਿਨ੍ਨਂ ਸੁਮੁਖਂ. ਅਦੀਨਵਨ੍ਤਿਆਦੀਨਵਮੇਵ ਹੁਤ੍ਵਾ ਮਹਾਸਤ੍ਤਂ ਓਲੋਕੇਨ੍ਤਂ ਦਿਸ੍ਵਾ. ਵਿਮਤੋਤਿ ਕਿਂ ਨੁ ਖੋ ਅਬਦ੍ਧੋ ਬਦ੍ਧਸ੍ਸ ਸਨ੍ਤਿਕੇ ਨਿਸਿਨ੍ਨੋ, ਕਾਰਣਂ ਪੁਚ੍ਛਿਸ੍ਸਾਮੀਤਿ ਵਿਮਤਿਜਾਤੋ ਹੁਤ੍ਵਾਤਿ ਅਤ੍ਥੋ. ਪਣ੍ਡਰੇਤਿ ਹਂਸੇ, ਅਥ ਵਾ ਪਰਿਸੁਦ੍ਧੇ ਨਿਮ੍ਮਲੇ, ਸਮ੍ਪਹਟ੍ਠਕਞ੍ਚਨਵਣ੍ਣੇਤਿ ਅਤ੍ਥੋ. ਪਵਡ੍ਢਕਾਯੇਤਿ ਵਡ੍ਢਿਤਕਾਯੇ ਮਹਾਸਰੀਰੇ. ਯਂ ਨੂਤਿ ਯਂ ਤਾਵ ਏਸੋ ਮਹਾਪਾਸੇਨ ਬਦ੍ਧੋ. ਨ ਕੁਰੁਤੇ ਦਿਸਨ੍ਤਿ ਪਲਾਯਨਤ੍ਥਾਯ ਏਕਂ ਦਿਸਂ ਨ ਭਜਤਿ, ਤਂ ਯੁਤ੍ਤਨ੍ਤਿ ਅਧਿਪ੍ਪਾਯੋ. ਬਲੀਤਿ ਬਲਸਮ੍ਪਨ੍ਨੋ ਹੁਤ੍ਵਾਪਿ. ਪਕ੍ਖੀਤਿ ਤਂ ਆਲਪਤਿ. ਓਹਾਯਾਤਿ ਛਡ੍ਡੇਤ੍ਵਾ. ਯਨ੍ਤੀਤਿ ਸੇਸਸਕੁਣਾ ਗਚ੍ਛਨ੍ਤਿ. ਅਵਹੀਯਸੀਤਿ ਓਹੀਯਸਿ.

ਦਿਜਾਮਿਤ੍ਤਾਤਿ ਦਿਜਾਨਂ ਅਮਿਤ੍ਤ. ਯਾਵ ਕਾਲਸ੍ਸ ਪਰਿਯਾਯਨ੍ਤਿ ਯਾਵ ਮਰਣਸ੍ਸ ਵਾਰੋ ਆਗਚ੍ਛਤਿ. ਕਥਂ ਪਨਾਯਨ੍ਤਿ ਤ੍ਵਂ ਰਾਜਾ ਮੇ ਸੋਤਿ ਵਦਸਿ, ਰਾਜਾਨੋ ਚ ਨਾਮ ਪਣ੍ਡਿਤਾ ਹੋਨ੍ਤਿ, ਇਤਿਪਿ ਪਣ੍ਡਿਤੋ ਸਮਾਨੋ ਕੇਨ ਕਾਰਣੇਨ ਓਡ੍ਡਿਤਂ ਪਾਸਂ ਨ ਅਦ੍ਦਸ. ਪਦਂ ਹੇਤਨ੍ਤਿ ਯਸਮਹਤ੍ਤਂ ਵਾ ਞਾਣਮਹਤ੍ਤਂ ਵਾ ਪਤ੍ਤਾਨਂ ਅਤ੍ਤਨੋ ਆਪਦਬੁਜ੍ਝਨਂ ਨਾਮ ਪਦਂ ਕਾਰਣਂ, ਤਸ੍ਮਾ ਤੇ ਆਪਦਂ ਬੋਦ੍ਧੁਮਰਹਨ੍ਤਿ. ਪਰਾਭਵੋਤਿ ਅਵਡ੍ਢਿ. ਆਸਜ੍ਜਾਪੀਤਿ ਉਪਗਨ੍ਤ੍ਵਾਪਿ ਨ ਬੁਜ੍ਝਤਿ. ਤਤਾਤਿ ਵਿਤਤਾ ਓਡ੍ਡਿਤਾ. ਗੁਯ੍ਹਮਾਸਜ੍ਜਾਤਿ ਤੇਸੁ ਪਾਸੇਸੁ ਯੋ ਗੁਲ਼੍ਹੋ ਪਟਿਚ੍ਛਨ੍ਨੋ ਪਾਸੋ, ਤਂ ਆਸਜ੍ਜ ਬਜ੍ਝਨ੍ਤਿ. ਅਥੇਵਨ੍ਤਿ ਅਥ ਏਵਂ ਜੀਵਿਤਕ੍ਖਯੇ ਬਜ੍ਝਨ੍ਤੇਵਾਤਿ ਅਤ੍ਥੋ.

ਇਤਿ ਨਂ ਸੋ ਕਥਾਸਲ੍ਲਾਪੇਨ ਮੁਦੁਹਦਯਂ ਕਤ੍ਵਾ ਮਹਾਸਤ੍ਤਸ੍ਸ ਜੀਵਿਤਂ ਯਾਚਨ੍ਤੋ ਗਾਥਮਾਹ –

੨੫.

‘‘ਅਪਿ ਨਾਯਂ ਤਯਾ ਸਦ੍ਧਿਂ, ਸਂਵਾਸਸ੍ਸ ਸੁਖੁਦ੍ਰਯੋ;

ਅਪਿ ਨੋ ਅਨੁਮਞ੍ਞਾਸਿ, ਅਪਿ ਨੋ ਜੀਵਿਤਂ ਦਦੇ’’ਤਿ.

ਤਤ੍ਥ ਅਪਿ ਨਾਯਨ੍ਤਿ ਅਪਿ ਨੁ ਅਯਂ. ਸੁਖੁਦ੍ਰਯੋਤਿ ਸੁਖਫਲੋ. ਅਪਿ ਨੋ ਅਨੁਮਞ੍ਞਾਸੀਤਿ ਚਿਤ੍ਤਕੂਟਂ ਗਨ੍ਤ੍ਵਾ ਞਾਤਕੇ ਪਸ੍ਸਿਤੁਂ ਤ੍ਵਂ ਅਪਿ ਨੋ ਅਨੁਜਾਨੇਯ੍ਯਾਸਿ. ਅਪਿ ਨੋ ਜੀਵਿਤਂ ਦਦੇਤਿ ਅਪਿ ਨੋ ਇਮਾਯ ਕਥਾਯ ਉਪ੍ਪਨ੍ਨਵਿਸ੍ਸਾਸੋ ਨ ਮਾਰੇਯ੍ਯਾਸੀਤਿ.

ਸੋ ਤਸ੍ਸ ਮਧੁਰਕਥਾਯ ਬਜ੍ਝਿਤ੍ਵਾ ਗਾਥਮਾਹ –

੨੬.

‘‘ਨ ਚੇਵ ਮੇ ਤ੍ਵਂ ਬਦ੍ਧੋਸਿ, ਨਪਿ ਇਚ੍ਛਾਮਿ ਤੇ ਵਧਂ;

ਕਾਮਂ ਖਿਪ੍ਪਮਿਤੋ ਗਨ੍ਤ੍ਵਾ, ਜੀਵ ਤ੍ਵਂ ਅਨਿਘੋ ਚਿਰ’’ਨ੍ਤਿ.

ਤਤੋ ਸੁਮੁਖੋ ਚਤਸ੍ਸੋ ਗਾਥਾ ਅਭਾਸਿ –

੨੭.

‘‘ਨੇਵਾਹਮੇਤਮਿਚ੍ਛਾਮਿ, ਅਞ੍ਞਤ੍ਰੇਤਸ੍ਸ ਜੀਵਿਤਾ;

ਸਚੇ ਏਕੇਨ ਤੁਟ੍ਠੋਸਿ, ਮੁਞ੍ਚੇਤਂ ਮਞ੍ਚ ਭਕ੍ਖਯ.

੨੮.

‘‘ਆਰੋਹਪਰਿਣਾਹੇਨ, ਤੁਲ੍ਯਾਸ੍ਮਾ ਵਯਸਾ ਉਭੋ;

ਨ ਤੇ ਲਾਭੇਨ ਜੀਵਤ੍ਥਿ, ਏਤੇਨ ਨਿਮਿਨਾ ਤੁਵਂ.

੨੯.

‘‘ਤਦਿਙ੍ਘ ਸਮਪੇਕ੍ਖਸ੍ਸੁ, ਹੋਤੁ ਗਿਦ੍ਧਿ ਤਵਮ੍ਹਸੁ;

ਮਂ ਪੁਬ੍ਬੇ ਬਨ੍ਧ ਪਾਸੇਨ, ਪਚ੍ਛਾ ਮੁਞ੍ਚ ਦਿਜਾਧਿਪਂ.

੩੦.

‘‘ਤਾਵਦੇਵ ਚ ਤੇ ਲਾਭੋ, ਕਤਾਸ੍ਸ ਯਾਚਨਾਯ ਚ;

ਮਿਤ੍ਤਿ ਚ ਧਤਰਟ੍ਠੇਹਿ, ਯਾਵਜੀਵਾਯ ਤੇ ਸਿਯਾ’’ਤਿ.

ਤਤ੍ਥ ਏਤਨ੍ਤਿ ਯਂ ਅਞ੍ਞਤ੍ਰ ਏਤਸ੍ਸ ਜੀਵਿਤਾ ਮਮ ਜੀਵਿਤਂ, ਏਤਂ ਅਹਂ ਨੇਵ ਇਚ੍ਛਾਮਿ. ਤੁਲ੍ਯਾਸ੍ਮਾਤਿ ਸਮਾਨਾ ਹੋਮ. ਨਿਮਿਨਾ ਤੁਵਨ੍ਤਿ ਪਰਿਵਤ੍ਤੇਹਿ ਤ੍ਵਂ. ਤਵਮ੍ਹਸੂਤਿ ਤਵ ਅਮ੍ਹੇਸੁ ਗਿਦ੍ਧਿ ਹੋਤੁ, ਕਿਂ ਤੇ ਏਤੇਨ, ਮਯਿ ਲੋਭਂ ਉਪ੍ਪਾਦੇਹੀਤਿ ਵਦਤਿ. ਤਾਵਦੇਵਾਤਿ ਤਤ੍ਤਕੋਯੇਵ. ਯਾਚਨਾਯ ਚਾਤਿ ਯਾ ਮਮ ਯਾਚਨਾ, ਸਾਵ ਕਤਾ ਅਸ੍ਸਾਤਿ ਅਤ੍ਥੋ.

ਇਤਿ ਸੋ ਤਾਯ ਧਮ੍ਮਦੇਸਨਾਯ ਤੇਲੇ ਪਕ੍ਖਿਤ੍ਤਕਪ੍ਪਾਸਪਿਚੁ ਵਿਯ ਮੁਦੁਗਤਹਦਯੋ ਮਹਾਸਤ੍ਤਂ ਤਸ੍ਸ ਦਾਯਂ ਕਤ੍ਵਾ ਦਦਨ੍ਤੋ ਆਹ –

੩੧.

‘‘ਪਸ੍ਸਨ੍ਤੁ ਨੋ ਮਹਾਸਙ੍ਘਾ, ਤਯਾ ਮੁਤ੍ਤਂ ਇਤੋ ਗਤਂ;

ਮਿਤ੍ਤਾਮਚ੍ਚਾ ਚ ਭਚ੍ਚਾ ਚ, ਪੁਤ੍ਤਦਾਰਾ ਚ ਬਨ੍ਧਵਾ.

੩੨.

‘‘ਨ ਚ ਤੇ ਤਾਦਿਸਾ ਮਿਤ੍ਤਾ, ਬਹੂਨਂ ਇਧ ਵਿਜ੍ਜਤਿ;

ਯਥਾ ਤ੍ਵਂ ਧਤਰਟ੍ਠਸ੍ਸ, ਪਾਣਸਾਧਾਰਣੋ ਸਖਾ.

੩੩.

‘‘ਸੋ ਤੇ ਸਹਾਯਂ ਮੁਞ੍ਚਾਮਿ, ਹੋਤੁ ਰਾਜਾ ਤਵਾਨੁਗੋ;

ਕਾਮਂ ਖਿਪ੍ਪਮਿਤੋ ਗਨ੍ਤ੍ਵਾ, ਞਾਤਿਮਜ੍ਝੇ ਵਿਰੋਚਥਾ’’ਤਿ.

ਤਤ੍ਥ ਨੋਤਿ ਨਿਪਾਤਮਤ੍ਤਂ. ਤਯਾ ਮੁਤ੍ਤਨ੍ਤਿ ਇਮਞ੍ਹਿ ਤ੍ਵਞ੍ਞੇਵ ਮੁਞ੍ਚਸਿ ਨਾਮ, ਤਸ੍ਮਾ ਇਮਂ ਤਯਾ ਮੁਤ੍ਤਂ ਇਤੋ ਚਿਤ੍ਤਕੂਟਪਬ੍ਬਤਂ ਗਤਂ ਮਹਨ੍ਤਾ ਞਾਤਿਸਙ੍ਘਾ ਏਤੇ ਚ ਮਿਤ੍ਤਾਦਯੋ ਪਸ੍ਸਨ੍ਤੁ. ਏਤ੍ਥ ਚ ਬਨ੍ਧਵਾਤਿ ਏਕਲੋਹਿਤਸਮ੍ਬਨ੍ਧਾ. ਵਿਜ੍ਜਤੀਤਿ ਵਿਜ੍ਜਨ੍ਤਿ. ਪਾਣਸਾਧਾਰਣੋਤਿ ਸਾਧਾਰਣਪਾਣੋ ਅਵਿਭਤ੍ਤਜੀਵਿਕੋ, ਯਥਾ ਤ੍ਵਂ ਏਤਸ੍ਸ ਸਖਾ, ਏਤਾਦਿਸਾ ਅਞ੍ਞੇਸਂ ਬਹੂਨਂ ਮਿਤ੍ਤਾ ਨਾਮ ਨ ਵਿਜ੍ਜਨ੍ਤਿ. ਤਵਾਨੁਗੋਤਿ ਏਤਂ ਦੁਕ੍ਖਿਤਂ ਆਦਾਯ ਪੁਰਤੋ ਗਚ੍ਛਨ੍ਤਸ੍ਸ ਤਵ ਅਯਂ ਅਨੁਗੋ ਹੋਤੂਤਿ.

ਏਵਂ ਵਤ੍ਵਾ ਪਨ ਨੇਸਾਦਪੁਤ੍ਤੋ ਮੇਤ੍ਤਚਿਤ੍ਤੇਨ ਮਹਾਸਤ੍ਤਂ ਉਪਸਙ੍ਕਮਿਤ੍ਵਾ ਬਨ੍ਧਨਂ ਛਿਨ੍ਦਿਤ੍ਵਾ ਆਲਿਙ੍ਗਿਤ੍ਵਾ ਸਰਤੋ ਨਿਕ੍ਖਾਮੇਤ੍ਵਾ ਸਰਤੀਰੇ ਤਰੁਣਦਬ੍ਬਤਿਣਪਿਟ੍ਠੇ ਨਿਸੀਦਾਪੇਤ੍ਵਾ ਪਾਦੇ ਬਨ੍ਧਨਪਾਸਂ ਮੁਦੁਚਿਤ੍ਤੇਨ ਸਣਿਕਂ ਮੋਚੇਤ੍ਵਾ ਦੂਰੇ ਖਿਪਿਤ੍ਵਾ ਮਹਾਸਤ੍ਤੇ ਬਲਵਸਿਨੇਹਂ ਪਚ੍ਚੁਪਟ੍ਠਾਪੇਤ੍ਵਾ ਮੇਤ੍ਤਚਿਤ੍ਤੇਨ ਉਦਕਂ ਆਦਾਯ ਲੋਹਿਤਂ ਧੋਵਿਤ੍ਵਾ ਪੁਨਪ੍ਪੁਨਂ ਪਰਿਮਜ੍ਜਿ. ਤਸ੍ਸ ਮੇਤ੍ਤਚਿਤ੍ਤਾਨੁਭਾਵੇਨ ਬੋਧਿਸਤ੍ਤਸ੍ਸ ਪਾਦੇ ਸਿਰਾ ਸਿਰਾਹਿ, ਮਂਸਂ ਮਂਸੇਨ, ਚਮ੍ਮਂ ਚਮ੍ਮੇਨ ਘਟਿਤਂ, ਤਾਵਦੇਵ ਪਾਦੋ ਸਂਰੁਲ਼੍ਹੋ ਸਞ੍ਜਾਤਛਵਿਸਞ੍ਜਾਤਲੋਮੋ ਅਹੋਸਿ ਅਬਦ੍ਧਪਾਦੇਨ ਨਿਬ੍ਬਿਸੇਸੋ. ਬੋਧਿਸਤ੍ਤੋ ਸੁਖਿਤੋ ਪਕਤਿਭਾਵੇਨੇਵ ਨਿਸੀਦਿ. ਅਥ ਸੁਮੁਖੋ ਅਤ੍ਤਾਨਂ ਨਿਸ੍ਸਾਯ ਮਹਾਸਤ੍ਤਸ੍ਸ ਸੁਖਿਤਭਾਵਂ ਦਿਸ੍ਵਾ ਸਞ੍ਜਾਤਸੋਮਨਸ੍ਸੋ ਨੇਸਾਦਸ੍ਸ ਥੁਤਿਮਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੩੪.

‘‘ਸੋ ਪਤੀਤੋ ਪਮੁਤ੍ਤੇਨ, ਭਤ੍ਤੁਨਾ ਭਤ੍ਤੁਗਾਰਵੋ;

ਅਜ੍ਝਭਾਸਥ ਵਕ੍ਕਙ੍ਗੋ, ਵਾਚਂ ਕਣ੍ਣਸੁਖਂ ਭਣਂ.

੩੫.

‘‘ਏਵਂ ਲੁਦ੍ਦਕ ਨਨ੍ਦਸ੍ਸੁ, ਸਹ ਸਬ੍ਬੇਹਿ ਞਾਤਿਭਿ;

ਯਥਾਹਮਜ੍ਜ ਨਨ੍ਦਾਮਿ, ਮੁਤ੍ਤਂ ਦਿਸ੍ਵਾ ਦਿਜਾਧਿਪ’’ਨ੍ਤਿ.

ਤਤ੍ਥ ਵਕ੍ਕਙ੍ਗੋਤਿ ਵਙ੍ਕਗੀਵੋ.

ਏਵਂ ਲੁਦ੍ਦਸ੍ਸ ਥੁਤਿਂ ਕਤ੍ਵਾ ਸੁਮੁਖੋ ਬੋਧਿਸਤ੍ਤਂ ਆਹ – ‘‘ਮਹਾਰਾਜ, ਇਮਿਨਾ ਅਮ੍ਹਾਕਂ ਮਹਾਉਪਕਾਰੋ ਕਤੋ, ਅਯਞ੍ਹਿ ਅਮ੍ਹਾਕਂ ਵਚਨਂ ਅਕਤ੍ਵਾ ਕੀਲ਼ਾਹਂਸੇ ਨੋ ਕਤ੍ਵਾ ਇਸ੍ਸਰਾਨਂ ਦੇਨ੍ਤੋ ਬਹੁਂ ਧਨਂ ਲਭੇਯ੍ਯ, ਮਾਰੇਤ੍ਵਾ ਮਂਸਂ ਵਿਕ੍ਕਿਣਨ੍ਤੋ ਮੂਲਮ੍ਪਿ ਲਭੇਥ, ਅਤ੍ਤਨੋ ਪਨ ਜੀਵਿਤਂ ਅਨੋਲੋਕੇਤ੍ਵਾ ਅਮ੍ਹਾਕਂ ਵਚਨਂ ਅਕਰਿ, ਇਮਂ ਰਞ੍ਞੋ ਸਨ੍ਤਿਕਂ ਨੇਤ੍ਵਾ ਸੁਖਜੀਵਿਤਂ ਕਰੋਮਾ’’ਤਿ. ਮਹਾਸਤ੍ਤੋ ਸਮ੍ਪਟਿਚ੍ਛਿ. ਸੁਮੁਖੋ ਅਤ੍ਤਨੋ ਭਾਸਾਯ ਮਹਾਸਤ੍ਤੇਨ ਸਦ੍ਧਿਂ ਕਥੇਤ੍ਵਾ ਪੁਨ ਮਨੁਸ੍ਸਭਾਸਾਯ ਲੁਦ੍ਦਪੁਤ੍ਤਂ ਆਮਨ੍ਤੇਤ੍ਵਾ ‘‘ਸਮ੍ਮ, ਤ੍ਵਂ ਕਿਮਤ੍ਥਂ ਪਾਸੇ ਓਡ੍ਡੇਸੀ’’ਤਿ ਪੁਚ੍ਛਿਤ੍ਵਾ ‘‘ਧਨਤ੍ਥ’’ਨ੍ਤਿ ਵੁਤ੍ਤੇ ‘‘ਏਵਂ ਸਨ੍ਤੇ ਅਮ੍ਹੇ ਆਦਾਯ ਨਗਰਂ ਪਵਿਸਿਤ੍ਵਾ ਰਞ੍ਞੋ ਦਸ੍ਸੇਹਿ, ਬਹੁਂ ਤੇ ਧਨਂ ਦਾਪੇਸ੍ਸਾਮੀ’’ਤਿ ਵਤ੍ਵਾ ਆਹ –

੩੬.

‘‘ਏਹਿ ਤਂ ਅਨੁਸਿਕ੍ਖਾਮਿ, ਯਥਾ ਤ੍ਵਮਪਿ ਲਚ੍ਛਸੇ;

ਲਾਭਂ ਤਵਾਯਂ ਧਤਰਟ੍ਠੋ, ਪਾਪਂ ਕਿਞ੍ਚਿ ਨ ਦਕ੍ਖਤਿ.

੩੭.

‘‘ਖਿਪ੍ਪਮਨ੍ਤੇਪੁਰਂ ਨੇਤ੍ਵਾ, ਰਞ੍ਞੋ ਦਸ੍ਸੇਹਿ ਨੋ ਉਭੋ;

ਅਬਦ੍ਧੇ ਪਕਤਿਭੂਤੇ, ਕਾਜੇ ਉਭਯਤੋ ਠਿਤੇ.

੩੮.

‘‘ਧਤਰਟ੍ਠਾ ਮਹਾਰਾਜ, ਹਂਸਾਧਿਪਤਿਨੋ ਇਮੇ;

ਅਯਞ੍ਹਿ ਰਾਜਾ ਹਂਸਾਨਂ, ਅਯਂ ਸੇਨਾਪਤੀਤਰੋ.

੩੯. ‘‘ਅਸਂਸਯਂ ਇਮਂ ਦਿਸ੍ਵਾ, ਹਂਸਰਾਜਂ ਨਰਾਧਿਪੋ.

ਪਤੀਤੋ ਸੁਮਨੋ ਵਿਤ੍ਤੋ, ਬਹੁਂ ਦਸ੍ਸਤਿ ਤੇ ਧਨ’’ਨ੍ਤਿ.

ਤਤ੍ਥ ਅਨੁਸਿਕ੍ਖਾਮੀਤਿ ਅਨੁਸਾਸਾਮਿ. ਪਾਪਨ੍ਤਿ ਲਾਮਕਂ. ਰਞ੍ਞੋ ਦਸ੍ਸੇਹਿ ਨੋ ਉਭੋਤਿ ਅਮ੍ਹੇ ਉਭੋਪਿ ਰਞ੍ਞੋ ਦਸ੍ਸੇਹਿ. ਅਯਂ ਬੋਧਿਸਤ੍ਤਸ੍ਸ ਪਞ੍ਞਾਪਭਾਵਦਸ੍ਸਨਤ੍ਥਂ, ਅਤ੍ਤਨੋ ਮਿਤ੍ਤਧਮ੍ਮਸ੍ਸ ਆਵਿਭਾਵਨਤ੍ਥਂ, ਲੁਦ੍ਦਸ੍ਸ ਧਨਲਾਭਤ੍ਥਂ, ਰਞ੍ਞੋ ਸੀਲੇਸੁ ਪਤਿਟ੍ਠਾਪਨਤ੍ਥਞ੍ਚਾਤਿ ਚਤੂਹਿ ਕਾਰਣੇਹਿ ਏਵਮਾਹ. ਧਤਰਟ੍ਠਾਤਿ ਨੇਤ੍ਵਾ ਚ ਪਨ ਰਞ੍ਞੋ ਏਵਂ ਆਚਿਕ੍ਖੇਯ੍ਯਾਸਿ, ‘‘ਮਹਾਰਾਜ, ਇਮੇ ਧਤਰਟ੍ਠਕੁਲੇ ਜਾਤਾ ਦ੍ਵੇ ਹਂਸਾਧਿਪਤਿਨੋ, ਏਤੇਸੁ ਅਯਂ ਰਾਜਾ, ਇਤਰੋ ਸੇਨਾਪਤੀ’’ਤਿ. ਇਤਿ ਨਂ ਸਿਕ੍ਖਾਪੇਸਿ. ‘‘ਪਤੀਤੋ’’ਤਿਆਦੀਨਿ ਤੀਣਿਪਿ ਤੁਟ੍ਠਾਕਾਰਵੇਵਚਨਾਨੇਵ.

ਏਵਂ ਵੁਤ੍ਤੇ ਲੁਦ੍ਦੋ, ‘‘ਸਾਮਿ, ਮਾ ਵੋ ਰਾਜਦਸ੍ਸਨਂ ਰੁਚ੍ਚਿ, ਰਾਜਾਨੋ ਨਾਮ ਚਲਚਿਤ੍ਤਾ, ਕੀਲ਼ਾਹਂਸੇ ਵਾ ਵੋ ਕਰੇਯ੍ਯੁਂ ਮਾਰਾਪੇਯ੍ਯੁਂ ਵਾ’’ਤਿ ਵਤ੍ਵਾ, ‘‘ਸਮ੍ਮ, ਮਾ ਭਾਯਿ, ਅਹਂ ਤਾਦਿਸਂ ਕਕ੍ਖਲ਼ਂ ਲੁਦ੍ਦਂ ਲੋਹਿਤਪਾਣਿਂ ਧਮ੍ਮਕਥਾਯ ਮੁਦੁਕਂ ਕਤ੍ਵਾ ਮਮ ਪਾਦੇਸੁ ਪਾਤੇਸਿਂ, ਰਾਜਾਨੋ ਨਾਮ ਪੁਞ੍ਞਵਨ੍ਤੋ ਪਞ੍ਞਵਨ੍ਤੋ ਚ ਸੁਭਾਸਿਤਦੁਬ੍ਭਾਸਿਤਞ੍ਞੂ ਚ, ਖਿਪ੍ਪਂ ਅਮ੍ਹੇ ਰਞ੍ਞੋ ਦਸ੍ਸੇਹੀ’’ਤਿ ਵੁਤ੍ਤੇ ‘‘ਤੇਨ ਹਿ ਮਾ ਮਯ੍ਹਂ ਕੁਜ੍ਝਿਤ੍ਥ, ਅਹਂ ਅਵਸ੍ਸਂ ਤੁਮ੍ਹਾਕਂ ਰੁਚਿਯਾ ਨੇਮੀ’’ਤਿ ਵਤ੍ਵਾ ਉਭੋਪਿ ਕਾਜਂ ਆਰੋਪੇਤ੍ਵਾ ਰਾਜਕੁਲਂ ਗਨ੍ਤ੍ਵਾ ਰਞ੍ਞੋ ਦਸ੍ਸੇਤ੍ਵਾ ਰਞ੍ਞਾ ਪੁਟ੍ਠੋ ਯਥਾਭੂਤਂ ਆਰੋਚੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੪੦.

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਕਮ੍ਮੁਨਾ ਉਪਪਾਦਯਿ;

ਖਿਪ੍ਪਮਨ੍ਤੇਪੁਰਂ ਗਨ੍ਤ੍ਵਾ, ਰਞ੍ਞੋ ਹਂਸੇ ਅਦਸ੍ਸਯਿ;

ਅਬਦ੍ਧੇ ਪਕਤਿਭੂਤੇ, ਕਾਜੇ ਉਭਯਤੋ ਠਿਤੇ.

੪੧.

‘‘ਧਤਰਟ੍ਠਾ ਮਹਾਰਾਜ, ਹਂਸਾਧਿਪਤਿਨੋ ਇਮੇ;

ਅਯਞ੍ਹਿ ਰਾਜਾ ਹਂਸਾਨਂ, ਅਯਂ ਸੇਨਾਪਤੀਤਰੋ;

੪੨.

‘‘ਕਥਂ ਪਨਿਮੇ ਵਿਹਙ੍ਗਾ, ਤਵ ਹਤ੍ਥਤ੍ਤਮਾਗਤਾ;

ਕਥਂ ਲੁਦ੍ਦੋ ਮਹਨ੍ਤਾਨਂ, ਇਸ੍ਸਰੇ ਇਧ ਅਜ੍ਝਗਾ.

੪੩.

‘‘ਵਿਹਿਤਾ ਸਨ੍ਤਿਮੇ ਪਾਸਾ, ਪਲ੍ਲਲੇਸੁ ਜਨਾਧਿਪ;

ਯਂ ਯਦਾਯਤਨਂ ਮਞ੍ਞੇ, ਦਿਜਾਨਂ ਪਾਣਰੋਧਨਂ.

੪੪.

‘‘ਤਾਦਿਸਂ ਪਾਸਮਾਸਜ੍ਜ, ਹਂਸਰਾਜਾ ਅਬਜ੍ਝਥ;

ਤਂ ਅਬਦ੍ਧੋ ਉਪਾਸਿਨੋ, ਮਮਾਯਂ ਅਜ੍ਝਭਾਸਥ.

੪੫.

‘‘ਸੁਦੁਕ੍ਕਰਂ ਅਨਰਿਯੇਭਿ, ਦਹਤੇ ਭਾਵਮੁਤ੍ਤਮਂ;

ਭਤ੍ਤੁਰਤ੍ਥੇ ਪਰਕ੍ਕਨ੍ਤੋ, ਧਮ੍ਮਯੁਤ੍ਤੋ ਵਿਹਙ੍ਗਮੋ.

੪੬.

‘‘ਅਤ੍ਤਨਾਯਂ ਚਜਿਤ੍ਵਾਨ, ਜੀਵਿਤਂ ਜੀਵਿਤਾਰਹੋ;

ਅਨੁਤ੍ਥੁਨਨ੍ਤੋ ਆਸੀਨੋ, ਭਤ੍ਤੁ ਯਾਚਿਤ੍ਥ ਜੀਵਿਤਂ.

੪੭.

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਪਸਾਦਮਹਮਜ੍ਝਗਾ;

ਤਤੋ ਨਂ ਪਾਮੁਚਿਂ ਪਾਸਾ, ਅਨੁਞ੍ਞਾਸਿਂ ਸੁਖੇਨ ਚ.

੪੮.

‘‘ਸੋ ਪਤੀਤੋ ਪਮੁਤ੍ਤੇਨ, ਭਤ੍ਤੁਨਾ ਭਤ੍ਤੁਗਾਰਵੋ;

ਅਜ੍ਝਭਾਸਥ ਵਕ੍ਕਙ੍ਗੋ, ਵਾਚਂ ਕਣ੍ਣਸੁਖਂ ਭਣਂ.

੪੯.

‘‘ਏਵਂ ਲੁਦ੍ਦਕ ਨਨ੍ਦਸ੍ਸੁ, ਸਹ ਸਬ੍ਬੇਹਿ ਞਾਤਿਭਿ;

ਯਥਾਹਮਜ੍ਜ ਨਨ੍ਦਾਮਿ, ਮੁਤ੍ਤਂ ਦਿਸ੍ਵਾ ਦਿਜਾਧਿਪਂ.

੫੦.

‘‘ਏਹਿ ਤਂ ਅਨੁਸਿਕ੍ਖਾਮਿ, ਯਥਾ ਤ੍ਵਮਪਿ ਲਚ੍ਛਸੇ;

ਲਾਭਂ ਤਵਾਯਂ ਧਤਰਟ੍ਠੋ, ਪਾਪਂ ਕਿਞ੍ਚਿ ਨ ਦਕ੍ਖਤਿ.

੫੧.

‘‘ਖਿਪ੍ਪਮਨ੍ਤੇਪੁਰਂ ਨੇਤ੍ਵਾ, ਰਞ੍ਞੋ ਦਸ੍ਸੇਹਿ ਨੋ ਉਭੋ;

ਅਬਦ੍ਧੇ ਪਕਤਿਭੂਤੇ, ਕਾਜੇ ਉਭਯਤੋ ਠਿਤੇ.

੫੨.

‘‘ਧਤਰਟ੍ਠਾ ਮਹਾਰਾਜ, ਹਂਸਾਧਿਪਤਿਨੋ ਇਮੇ;

ਅਯਞ੍ਹਿ ਰਾਜਾ ਹਂਸਾਨਂ, ਅਯਂ ਸੇਨਾਪਤੀਤਰੋ.

੫੩.

‘‘ਅਸਂਸਯਂ ਇਮਂ ਦਿਸ੍ਵਾ, ਹਂਸਰਾਜਂ ਨਰਾਧਿਪੋ;

ਪਤੀਤੋ ਸੁਮਨੋ ਵਿਤ੍ਤੋ, ਬਹੁਂ ਦਸ੍ਸਤਿ ਤੇ ਧਨਂ.

੫੪.

‘‘ਏਵਮੇਤਸ੍ਸ ਵਚਨਾ, ਆਨੀਤਾਮੇ ਉਭੋ ਮਯਾ;

ਏਤ੍ਥੇਵ ਹਿ ਇਮੇ ਆਸੁਂ, ਉਭੋ ਅਨੁਮਤਾ ਮਯਾ.

੫੫.

‘‘ਸੋਯਂ ਏਵਂ ਗਤੋ ਪਕ੍ਖੀ, ਦਿਜੋ ਪਰਮਧਮ੍ਮਿਕੋ;

ਮਾਦਿਸਸ੍ਸ ਹਿ ਲੁਦ੍ਦਸ੍ਸ, ਜਨਯੇਯ੍ਯਾਥ ਮਦ੍ਦਵਂ.

੫੬.

‘‘ਉਪਾਯਨਞ੍ਚ ਤੇ ਦੇਵ, ਨਾਞ੍ਞਂ ਪਸ੍ਸਾਮਿ ਏਦਿਸਂ;

ਸਬ੍ਬਸਾਕੁਣਿਕਾਗਾਮੇ, ਤਂ ਪਸ੍ਸ ਮਨੁਜਾਧਿਪਾ’’ਤਿ.

ਤਤ੍ਥ ਕਮ੍ਮੁਨਾ ਉਪਪਾਦਯੀਤਿ ਯਂ ਸੋ ਅਵਚ, ਤਂ ਕਰੋਨ੍ਤੋ ਕਾਯਕਮ੍ਮੇਨ ਸਮ੍ਪਾਦੇਸਿ. ਗਨ੍ਤ੍ਵਾਤਿ ਹਂਸਰਾਜੇਨ ਨਿਸਿਨ੍ਨਕਾਜਕੋਟਿਂ ਉਚ੍ਚਤਰਂ, ਸੇਨਾਪਤਿਨਾ ਨਿਸਿਨ੍ਨਕਾਜਕੋਟਿਂ ਥੋਕਂ ਨੀਚਂ ਕਤ੍ਵਾ ਉਭੋਪਿ ਤੇ ਉਕ੍ਖਿਪਿਤ੍ਵਾ ‘‘ਹਂਸਰਾਜਾ ਚ ਸੇਨਾਪਤਿ ਚ ਰਾਜਾਨਂ ਪਸ੍ਸਿਤੁਂ ਗਚ੍ਛਨ੍ਤਿ, ਉਸ੍ਸਰਥ ਉਸ੍ਸਰਥਾ’’ਤਿ ਜਨਂ ਉਸ੍ਸਾਰੇਨ੍ਤੋ ‘‘ਏਵਰੂਪਾ ਨਾਮ ਸੋਭਗ੍ਗਪ੍ਪਤ੍ਤਾ ਸੁਵਣ੍ਣਵਣ੍ਣਾ ਹਂਸਰਾਜਾਨੋ ਨ ਦਿਟ੍ਠਪੁਬ੍ਬਾ’’ਤਿ ਮੁਦੁਹਦਯੇਸੁ ਮਨੁਸ੍ਸੇਸੁ ਪਸਂਸਨ੍ਤੇਸੁ ਖਿਪ੍ਪਮਨ੍ਤੇਪੁਰਂ ਗਨ੍ਤ੍ਵਾ. ਅਦਸ੍ਸਯੀਤਿ ‘‘ਹਂਸਰਾਜਾਨੋ ਤੁਮ੍ਹੇ ਦਟ੍ਠੁਂ ਆਗਤਾ’’ਤਿ ਰਞ੍ਞੋ ਆਰੋਚਾਪੇਤ੍ਵਾ ਤੇਨ ਤੁਟ੍ਠਚਿਤ੍ਤੇਨ ‘‘ਆਗਚ੍ਛਨ੍ਤੂ’’ਤਿ ਪਕ੍ਕੋਸਾਪਿਤੋ ਅਭਿਹਰਿਤ੍ਵਾ ਦਸ੍ਸੇਸਿ. ਹਤ੍ਥਤ੍ਤਨ੍ਤਿ ਹਤ੍ਥੇਸੁ ਆਗਤਂ, ਪਤ੍ਤਨ੍ਤਿ ਵੁਤ੍ਤਂ ਹੋਤਿ. ਮਹਨ੍ਤਾਨਨ੍ਤਿ ਯਸਮਹਨ੍ਤਪ੍ਪਤ੍ਤਾਨਂ ਸੁਵਣ੍ਣਵਣ੍ਣਾਨਂ ਧਤਰਟ੍ਠਹਂਸਾਨਂ ਇਸ੍ਸਰੇ ਸਾਮਿਨੋ ਕਥਂ ਤ੍ਵਂ ਲੁਦ੍ਦੋ ਹੁਤ੍ਵਾ ਅਧਿਗਤੋਤਿ ਪੁਚ੍ਛਤਿ. ‘‘ਇਸ੍ਸਰਮਿਧਮਜ੍ਝਗਾ’’ਤਿਪਿ ਪਾਠੋ, ਏਤੇਸਂ ਇਸ੍ਸਰਿਯਂ ਤ੍ਵਂ ਕਥਂ ਅਜ੍ਝਗਾਤਿ ਅਤ੍ਥੋ.

ਵਿਹਿਤਾਤਿ ਯੋਜਿਤਾ. ਯਂ ਯਦਾਯਤਨਂ ਮਞ੍ਞੇਤਿ, ਮਹਾਰਾਜ, ਯਂ ਯਂ ਸਮੋਸਰਣਟ੍ਠਾਨਂ ਦਿਜਾਨਂ ਪਾਣਰੋਧਨਂ ਜੀਵਿਤਕ੍ਖਯਕਰਂ ਮਞ੍ਞਾਮਿ, ਤਤ੍ਥ ਤਤ੍ਥ ਮਯਾ ਪਲ੍ਲਲੇਸੁ ਪਾਸਾ ਵਿਹਿਤਾ. ਤਾਦਿਸਨ੍ਤਿ ਮਾਨੁਸਿਯਸਰੇ ਤਥਾਵਿਧਂ ਪਾਣਰੋਧਨਂ ਮਯਾ ਵਿਹਿਤਂ ਪਾਸਂ. ਤਨ੍ਤਿ ਤਂ ਏਤਂ ਤਤ੍ਥ ਬਦ੍ਧਂ. ਉਪਾਸਿਨੋਤਿ ਅਤ੍ਤਨੋ ਜੀਵਿਤਂ ਅਗਣੇਤ੍ਵਾ ਉਪਗਨ੍ਤ੍ਵਾ ਨਿਸਿਨ੍ਨੋ. ਮਮਾਯਨ੍ਤਿ ਮਂ ਅਯਂ ਸੇਨਾਪਤਿ ਅਜ੍ਝਭਾਸਥ, ਮਯਾ ਸਦ੍ਧਿਂ ਕਥੇਸਿ. ਸੁਦੁਕ੍ਕਰਨ੍ਤਿ ਤਸ੍ਮਿਂ ਖਣੇ ਏਸ ਅਮ੍ਹਾਦਿਸੇਹਿ ਅਨਰਿਯੇਹਿ ਸੁਦੁਕ੍ਕਰਂ ਅਕਾਸਿ. ਕਿਂ ਤਨ੍ਤਿ? ਦਹਤੇ ਭਾਵਮੁਤ੍ਤਮਂ, ਅਤ੍ਤਨੋ ਉਤ੍ਤਮਂ ਅਜ੍ਝਾਸਯਂ ਦਹਤਿ ਵਿਦਹਤਿ ਪਕਾਸੇਤਿ. ਅਤ੍ਤਨਾਯਨ੍ਤਿ ਅਤ੍ਤਨੋ ਅਯਂ. ਅਨੁਤ੍ਥੁਨਨ੍ਤੋਤਿ ਭਤ੍ਤੁਗੁਣੇ ਵਣ੍ਣੇਨ੍ਤੋ ਤਸ੍ਸ ਜੀਵਿਤਂ ਮੁਞ੍ਚਾਤਿ ਮਂ ਯਾਚਿ.

ਤਸ੍ਸਾਤਿ ਤਸ੍ਸ ਤਥਾ ਯਾਚਨ੍ਤਸ੍ਸ. ਸੁਖੇਨ ਚਾਤਿ ਯਥਾਸੁਖੇਨ ਚਿਤ੍ਤਕੂਟਂ ਗਨ੍ਤ੍ਵਾ ਞਾਤਿਸਙ੍ਘਂ ਪਸ੍ਸਥਾਤਿ ਚ ਅਨੁਜਾਨਿਂ. ਏਤ੍ਥੇਵ ਹੀਤਿ ਮਯਾ ਪਨ ਇਮੇ ਦ੍ਵੇ ਏਤ੍ਥ ਮਾਨੁਸਿਯਸਰੇਯੇਵ ਚਿਤ੍ਤਕੂਟਗਮਨਾਯ ਅਨੁਮਤਾ ਅਹੇਸੁਂ. ਏਵਂ ਗਤੋਤਿ ਏਵਂ ਸਤ੍ਤੁ ਹਤ੍ਥਗਤੋ. ਜਨਯੇਯ੍ਯਾਥ ਮਦ੍ਦਵਨ੍ਤਿ ਅਤ੍ਤਨਿ ਮੇਤ੍ਤਚਿਤ੍ਤਂ ਜਨੇਸਿ. ਉਪਾਯਨਨ੍ਤਿ ਪਣ੍ਣਾਕਾਰਂ. ਸਬ੍ਬਸਾਕੁਣਿਕਾਗਾਮੇਤਿ ਸਬ੍ਬਸ੍ਮਿਮ੍ਪਿ ਸਾਕੁਣਿਕਗਾਮੇ ਨਾਹਂ ਅਞ੍ਞਂ ਤਵ ਏਵਰੂਪਂ ਕੇਨਚਿ ਸਾਕੁਣਿਕੇਨ ਆਭਤਪੁਬ੍ਬਂ ਉਪਾਯਨਂ ਪਸ੍ਸਾਮਿ. ਤਂ ਪਸ੍ਸਾਤਿ ਤਂ ਮਯਾ ਆਭਤਂ ਉਪਾਯਨਂ ਪਸ੍ਸ ਮਨੁਜਾਧਿਪਾਤਿ.

ਏਵਂ ਸੋ ਠਿਤਕੋਵ ਸੁਮੁਖਸ੍ਸ ਗੁਣਂ ਕਥੇਸਿ. ਤਤੋ ਰਾਜਾ ਹਂਸਰਞ੍ਞੋ ਮਹਾਰਹਂ ਆਸਨਂ, ਸੁਮੁਖਸ੍ਸ ਚ ਸੁਵਣ੍ਣਭਦ੍ਦਪੀਠਕਂ ਦਾਪੇਤ੍ਵਾ ਤੇਸਂ ਤਤ੍ਥ ਨਿਸਿਨ੍ਨਾਨਂ ਸੁਵਣ੍ਣਭਾਜਨੇਹਿ ਲਾਜਮਧੁਫਾਣਿਤਾਦੀਨਿ ਦਾਪੇਤ੍ਵਾ ਨਿਟ੍ਠਿਤੇ ਪਾਨਭੋਜਨਕਿਚ੍ਚੇ ਅਞ੍ਜਲਿਂ ਪਗ੍ਗਯ੍ਹ ਮਹਾਸਤ੍ਤਂ ਧਮ੍ਮਕਥਂ ਯਾਚਿਤ੍ਵਾ ਸੁਵਣ੍ਣਪੀਠਕੇ ਨਿਸੀਦਿ. ਸੋ ਤੇਨ ਯਾਚਿਤੋ ਪਟਿਸਨ੍ਥਾਰਂ ਤਾਵ ਅਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੫੭.

‘‘ਦਿਸ੍ਵਾ ਨਿਸਿਨ੍ਨਂ ਰਾਜਾਨਂ, ਪੀਠੇ ਸੋਵਣ੍ਣਯੇ ਸੁਭੇ;

ਅਜ੍ਝਭਾਸਥ ਵਕ੍ਕਙ੍ਗੋ, ਵਾਚਂ ਕਣ੍ਣਸੁਖਂ ਭਣਂ.

੫੮.

‘‘ਕਚ੍ਚਿ ਨੁ ਭੋਤੋ ਕੁਸਲਂ, ਕਚ੍ਚਿ ਭੋਤੋ ਅਨਾਮਯਂ;

ਕਚ੍ਚਿ ਰਟ੍ਠਮਿਦਂ ਫੀਤਂ, ਧਮ੍ਮੇਨ ਮਨੁਸਾਸਸਿ.

੫੯.

‘‘ਕੁਸਲਞ੍ਚੇਵ ਮੇ ਹਂਸ, ਅਥੋ ਹਂਸ ਅਨਾਮਯਂ;

ਅਥੋ ਰਟ੍ਠਮਿਦਂ ਫੀਤਂ, ਧਮ੍ਮੇਨ ਮਨੁਸਾਸਹਂ.

੬੦.

‘‘ਕਚ੍ਚਿ ਭੋਤੋ ਅਮਚ੍ਚੇਸੁ, ਦੋਸੋ ਕੋਚਿ ਨ ਵਿਜ੍ਜਤਿ;

ਕਚ੍ਚਿ ਚ ਤੇ ਤਵਤ੍ਥੇਸੁ, ਨਾਵਕਙ੍ਖਨ੍ਤਿ ਜੀਵਿਤਂ.

੬੧.

‘‘ਅਥੋਪਿ ਮੇ ਅਮਚ੍ਚੇਸੁ, ਦੋਸੋ ਕੋਚਿ ਨ ਵਿਜ੍ਜਤਿ;

ਅਥੋਪਿ ਤੇ ਮਮਤ੍ਥੇਸੁ, ਨਾਵਕਙ੍ਖਨ੍ਤਿ ਜੀਵਿਤਂ.

੬੨.

‘‘ਕਚ੍ਚਿ ਤੇ ਸਾਦਿਸੀ ਭਰਿਯਾ, ਅਸ੍ਸਵਾ ਪਿਯਭਾਣਿਨੀ;

ਪੁਤ੍ਤਰੂਪਯਸੂਪੇਤਾ, ਤਵ ਛਨ੍ਦਵਸਾਨੁਗਾ.

੬੩.

‘‘ਅਥੋ ਮੇ ਸਾਦਿਸੀ ਭਰਿਯਾ, ਅਸ੍ਸਵਾ ਪਿਯਭਾਣਿਨੀ;

ਪੁਤ੍ਤਰੂਪਯਸੂਪੇਤਾ, ਮਮ ਛਨ੍ਦਵਸਾਨੁਗਾ’’ਤਿ.

ਤਤ੍ਥ ਰਾਜਾਨਨ੍ਤਿ ਸਾਗਲਰਾਜਾਨਂ. ਵਕ੍ਕਙ੍ਗੋਤਿ ਹਂਸਰਾਜਾ. ਧਮ੍ਮੇਨ ਮਨੁਸਾਸਸੀਤਿ ਧਮ੍ਮੇਨ ਅਨੁਸਾਸਸਿ. ਦੋਸੋਤਿ ਅਪਰਾਧੋ. ਤਵਤ੍ਥੇਸੂਤਿ ਉਪ੍ਪਨ੍ਨੇਸੁ ਤਵ ਯੁਦ੍ਧਾਦੀਸੁ ਅਤ੍ਥੇਸੁ. ਨਾਵਕਙ੍ਖਨ੍ਤੀਤਿ ਉਰਂ ਦਤ੍ਵਾ ਪਰਿਚ੍ਚਜਨ੍ਤਾ ਕਿਚ੍ਚਿ ਅਤ੍ਤਨੋ ਜੀਵਿਤਂ ਨ ਪਤ੍ਥੇਨ੍ਤਿ, ਜੀਵਿਤਞ੍ਚ ਚਜਿਤ੍ਵਾ ਤਵੇਵਤ੍ਥਂ ਕਰੋਨ੍ਤਿ. ਸਾਦਿਸੀਤਿ ਸਮਾਨਜਾਤਿਕਾ. ਅਸ੍ਸਵਾਤਿ ਵਚਨਸਮ੍ਪਟਿਚ੍ਛਿਕਾ. ਪੁਤ੍ਤਰੂਪਯਸੂਪੇਤਾਤਿ ਪੁਤ੍ਤੇਹਿ ਚ ਰੂਪੇਨ ਚ ਯਸੇਨ ਚ ਉਪੇਤਾ. ਤਵ ਛਨ੍ਦਵਸਾਨੁਗਾਤਿ ਕਚ੍ਚਿ ਤਵ ਅਜ੍ਝਾਸਯਂ ਤਵ ਵਸਂ ਅਨੁਵਤ੍ਤਤਿ, ਨ ਅਤ੍ਤਨੋ ਚਿਤ੍ਤਵਸੇਨ ਵਤ੍ਤਤੀਤਿ ਪੁਚ੍ਛਤਿ.

ਏਵਂ ਬੋਧਿਸਤ੍ਤੇਨ ਪਟਿਸਨ੍ਥਾਰੇ ਕਤੇ ਪੁਨ ਰਾਜਾ ਤੇਨ ਸਦ੍ਧਿਂ ਕਥੇਨ੍ਤੋ ਆਹ –

੬੪.

‘‘ਭਵਨ੍ਤਂ ਕਚ੍ਚਿ ਨੁ ਮਹਾ-ਸਤ੍ਤੁਹਤ੍ਥਤ੍ਤਤਂ ਗਤੋ;

ਦੁਕ੍ਖਮਾਪਜ੍ਜਿ ਵਿਪੁਲਂ, ਤਸ੍ਮਿਂ ਪਠਮਮਾਪਦੇ.

੬੫.

‘‘ਕਚ੍ਚਿ ਯਨ੍ਤਾਪਤਿਤ੍ਵਾਨ, ਦਣ੍ਡੇਨ ਸਮਪੋਥਯਿ;

ਏਵਮੇਤੇਸਂ ਜਮ੍ਮਾਨਂ, ਪਾਤਿਕਂ ਭਵਤਿ ਤਾਵਦੇ.

੬੬.

‘‘ਖੇਮਮਾਸਿ ਮਹਾਰਾਜ, ਏਵਮਾਪਦਿਯਾ ਸਤਿ;

ਨ ਚਾਯਂ ਕਿਞ੍ਚਿ ਰਸ੍ਮਾਸੁ, ਸਤ੍ਤੂਵ ਸਮਪਜ੍ਜਥ.

੬੭.

‘‘ਪਚ੍ਚਗਮਿਤ੍ਥ ਨੇਸਾਦੋ, ਪੁਬ੍ਬੇਵ ਅਜ੍ਝਭਾਸਥ;

ਤਦਾਯਂ ਸੁਮੁਖੋਯੇਵ, ਪਣ੍ਡਿਤੋ ਪਚ੍ਚਭਾਸਥ.

੬੮.

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਪਸਾਦਮਯਮਜ੍ਝਗਾ;

ਤਤੋ ਮਂ ਪਾਮੁਚੀ ਪਾਸਾ, ਅਨੁਞ੍ਞਾਸਿ ਸੁਖੇਨ ਚ.

੬੯.

‘‘ਇਦਞ੍ਚ ਸੁਮੁਖੇਨੇਵ, ਏਤਦਤ੍ਥਾਯ ਚਿਨ੍ਤਿਤਂ;

ਭੋਤੋ ਸਕਾਸੇਗਮਨਂ, ਏਤਸ੍ਸ ਧਨਮਿਚ੍ਛਤਾ.

੭੦.

‘‘ਸ੍ਵਾਗਤਞ੍ਚੇਵਿਦਂ ਭਵਤਂ, ਪਤੀਤੋ ਚਸ੍ਮਿ ਦਸ੍ਸਨਾ;

ਏਸੋ ਚਾਪਿ ਬਹੁਂ ਵਿਤ੍ਤਂ, ਲਭਤਂ ਯਾਵਦਿਚ੍ਛਤੀ’’ਤਿ.

ਤਤ੍ਥ ਮਹਾਸਤ੍ਤੁਹਤ੍ਥਤ੍ਤਤਂ ਗਤੋਤਿ ਮਹਨ੍ਤਸ੍ਸ ਸਤ੍ਤੁਨੋ ਹਤ੍ਥਤ੍ਤਂ ਗਤੋ. ਆਪਤਿਤ੍ਵਾਨਾਤਿ ਉਪਧਾਵਿਤ੍ਵਾ. ਪਾਤਿਕਨ੍ਤਿ ਪਾਕਤਿਕਂ, ਅਯਮੇਵ ਵਾ ਪਾਠੋ. ਇਦਂ ਵੁਤ੍ਤਂ ਹੋਤਿ – ਏਤੇਸਞ੍ਹਿ ਜਮ੍ਮਾਨਂ ਤਾਵਦੇਵ ਏਵਂ ਪਾਕਤਿਕਂ ਹੋਤਿ, ਸਕੁਣੇ ਦਣ੍ਡੇਨ ਪੋਥੇਤ੍ਵਾ ਜੀਵਿਤਕ੍ਖਯਂ ਪਾਪੇਨ੍ਤੋ ਧਨਵੇਤਨਂ ਲਭਤੀਤਿ. ਕਿਞ੍ਚਿ ਰਸ੍ਮਾਸੂਤਿ ਕਿਞ੍ਚਿ ਅਮ੍ਹੇਸੁ. ਸਤ੍ਤੂਵਾਤਿ ਸਤ੍ਤੁ ਵਿਯ. ਪਚ੍ਚਗਮਿਤ੍ਥਾਤਿ, ਮਹਾਰਾਜ, ਏਸ ਅਮ੍ਹੇ ਦਿਸ੍ਵਾ ਬਦ੍ਧਾਤਿ ਸਞ੍ਞਾਯ ਥੋਕਂ ਓਸਕ੍ਕਿਤ੍ਥ. ਪੁਬ੍ਬੇਵਾਤਿ ਅਯਮੇਵ ਪਠਮਂ ਅਜ੍ਝਭਾਸਿ. ਤਦਾਤਿ ਤਸ੍ਮਿਂ ਕਾਲੇ. ਏਤਦਤ੍ਥਾਯਾਤਿ ਏਤਸ੍ਸ ਨੇਸਾਦਪੁਤ੍ਤਸ੍ਸ ਅਤ੍ਥਾਯ ਚਿਨ੍ਤਿਤਂ. ਧਨਮਿਚ੍ਛਤਾਤਿ ਏਤਸ੍ਸ ਧਨਂ ਇਚ੍ਛਨ੍ਤੇਨ ਤਵ ਸਨ੍ਤਿਕਂ ਅਮ੍ਹਾਕਂ ਆਗਮਨਂ ਚਿਨ੍ਤਿਤਂ. ਸ੍ਵਾਗਤਞ੍ਚੇਵਿਦਨ੍ਤਿ ਮਾ ਭੋਨ੍ਤੋ ਚਿਨ੍ਤਯਨ੍ਤੁ, ਭਵਤਂ ਇਦਂ ਇਧਾਗਮਨਂ ਸ੍ਵਾਗਤਮੇਵ. ਲਭਤਨ੍ਤਿ ਲਭਤੁ.

ਏਵਞ੍ਚ ਪਨ ਵਤ੍ਵਾ ਰਾਜਾ ਅਞ੍ਞਤਰਂ ਅਮਚ੍ਚਂ ਓਲੋਕੇਤ੍ਵਾ ‘‘ਕਿਂ ਕਰੋਮਿ ਦੇਵਾ’’ਤਿ ਵੁਤ੍ਤੇ ‘‘ਇਮਂ ਨੇਸਾਦਂ ਕਪ੍ਪਿਤਕੇਸਮਸ੍ਸੁਂ ਨ੍ਹਾਤਾਨੁਲਿਤ੍ਤਂ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਕਾਰੇਤ੍ਵਾ ਆਨੇਹੀ’’ਤਿ ਵਤ੍ਵਾ ਤੇਨ ਤਥਾ ਕਤ੍ਵਾ ਆਨੀਤਸ੍ਸ ਤਸ੍ਸ ਸਂਵਚ੍ਛਰੇ ਸਂਵਚ੍ਛਰੇ ਸਤਸਹਸ੍ਸੁਟ੍ਠਾਨਕਂ ਗਾਮਂ, ਦ੍ਵੇ ਵੀਥਿਯੋ ਗਹੇਤ੍ਵਾ ਠਿਤਂ ਮਹਨ੍ਤਂ ਗੇਹਂ, ਰਥਵਰਞ੍ਚ, ਅਞ੍ਞਞ੍ਚ ਬਹੁਂ ਹਿਰਞ੍ਞਸੁਵਣ੍ਣਂ ਅਦਾਸਿ. ਤਮਤ੍ਥਂ ਆਵਿਕਰੋਨ੍ਤੋ ਸਤ੍ਥਾ ਆਹ –

੭੧.

‘‘ਸਨ੍ਤਪ੍ਪਯਿਤ੍ਵਾ ਨੇਸਾਦਂ, ਭੋਗੇਹਿ ਮਨੁਜਾਧਿਪੋ;

ਅਜ੍ਝਭਾਸਥ ਵਕ੍ਕਙ੍ਗਂ, ਵਾਚਂ ਕਣ੍ਣਸੁਖਂ ਭਣ’’ਨ੍ਤਿ.

ਅਥ ਮਹਾਸਤ੍ਤੋ ਰਞ੍ਞੋ ਧਮ੍ਮਂ ਦੇਸੇਸਿ. ਸੋ ਤਸ੍ਸ ਧਮ੍ਮਕਥਂ ਸੁਤ੍ਵਾ ਤੁਟ੍ਠਹਦਯੋ ‘‘ਧਮ੍ਮਕਥਿਕਸ੍ਸ ਸਕ੍ਕਾਰਂ ਕਰਿਸ੍ਸਾਮੀ’’ਤਿ ਸੇਤਚ੍ਛਤ੍ਤਂ ਦਤ੍ਵਾ ਰਜ੍ਜਂ ਪਟਿਚ੍ਛਾਪੇਨ੍ਤੋ ਆਹ –

੭੨.

‘‘ਯਂ ਖਲੁ ਧਮ੍ਮਮਾਧੀਨਂ, ਵਸੋ ਵਤ੍ਤਤਿ ਕਿਞ੍ਚਨਂ;

ਸਬ੍ਬਤ੍ਥਿਸ੍ਸਰਿਯਂ ਭਵਤਂ, ਪਸਾਸਥ ਯਦਿਚ੍ਛਥ.

੭੩.

‘‘ਦਾਨਤ੍ਥਂ ਉਪਭੋਤ੍ਤੁਂ ਵਾ, ਯਂ ਚਞ੍ਞਂ ਉਪਕਪ੍ਪਤਿ;

ਏਤਂ ਦਦਾਮਿ ਵੋ ਵਿਤ੍ਤਂ, ਇਸ੍ਸਰਿਯਂ ਵਿਸ੍ਸਜਾਮਿ ਵੋ’’ਤਿ.

ਤਤ੍ਥ ਵਸੋ ਵਤ੍ਤਤੀਤਿ ਯਤ੍ਥ ਮਮ ਵਸੋ ਵਤ੍ਤਤਿ. ਕਿਞ੍ਚਨਨ੍ਤਿ ਤਂ ਅਪ੍ਪਮਤ੍ਤਕਮ੍ਪਿ. ਸਬ੍ਬਤ੍ਥਿਸ੍ਸਰਿਯਨ੍ਤਿ ਸਬ੍ਬਂ ਭਵਤਂਯੇਵ ਇਸ੍ਸਰਿਯਂ ਅਤ੍ਥੁ. ਯਂ ਚਞ੍ਞਂ ਉਪਕਪ੍ਪਤੀਤਿ ਪੁਞ੍ਞਕਾਮਤਾਯ ਦਾਨਤ੍ਥਂ ਵਾ ਛਤ੍ਤਂ ਉਸ੍ਸਾਪੇਤ੍ਵਾ ਰਜ੍ਜਮੇਵ ਉਪਭੋਤ੍ਤੁਂ ਵਾ ਯਂ ਵਾ ਅਞ੍ਞਂ ਤੁਮ੍ਹਾਕਂ ਰੁਚ੍ਚਤਿ, ਤਂ ਕਰੋਥ, ਏਤਂ ਦਦਾਮਿ ਵੋ ਵਿਤ੍ਤਂ, ਸਦ੍ਧਿਂਯੇਵ ਸੇਤਚ੍ਛਤ੍ਤੇਨ ਮਮ ਸਨ੍ਤਕਂ ਇਸ੍ਸਰਿਯਂ ਵਿਸ੍ਸਜ੍ਜਾਮਿ ਵੋਤਿ.

ਅਥ ਮਹਾਸਤ੍ਤੋ ਰਞ੍ਞਾ ਦਿਨ੍ਨਂ ਸੇਤਚ੍ਛਤ੍ਤਂ ਪੁਨ ਤਸ੍ਸੇਵ ਅਦਾਸਿ. ਰਾਜਾਪਿ ਚਿਨ੍ਤੇਸਿ – ‘‘ਹਂਸਰਞ੍ਞੋ ਤਾਵ ਮੇ ਧਮ੍ਮਕਥਾ ਸੁਤਾ, ਲੁਦ੍ਦਪੁਤ੍ਤੇਨ ਪਨ ‘ਅਯਂ ਸੁਮੁਖੋ ਮੁਧੁਰਕਥੋ’ਤਿ ਅਤਿਵਿਯ ਵਣ੍ਣਿਤੋ, ਇਮਸ੍ਸਪਿ ਧਮ੍ਮਕਥਂ ਸੋਸ੍ਸਾਮੀ’’ਤਿ. ਸੋ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਅਨਨ੍ਤਰਂ ਗਾਥਮਾਹ –

੭੪.

‘‘ਯਥਾ ਚ ਮ੍ਯਾਯਂ ਸੁਮੁਖੋ, ਅਜ੍ਝਭਾਸੇਯ੍ਯ ਪਣ੍ਡਿਤੋ;

ਕਾਮਸਾ ਬੁਦ੍ਧਿਸਮ੍ਪਨ੍ਨੋ, ਤਂ ਮ੍ਯਾਸ੍ਸ ਪਰਮਪ੍ਪਿਯ’’ਨ੍ਤਿ.

ਤਤ੍ਥ ਯਥਾਤਿ ਯਦਿ. ਇਦਂ ਵੁਤ੍ਤਂ ਹੋਤਿ – ਯਦਿ ਚ ਮੇ ਅਯਂ ਸੁਮੁਖੋ ਪਣ੍ਡਿਤੋ ਬੁਦ੍ਧਿਸਮ੍ਪਨ੍ਨੋ ਕਾਮਸਾ ਅਤ੍ਤਨੋ ਰੁਚਿਯਾ ਅਜ੍ਝਭਾਸੇਯ੍ਯ, ਤਂ ਮੇ ਪਰਮਪ੍ਪਿਯਂ ਅਸ੍ਸਾਤਿ.

ਤਤੋ ਸੁਮੁਖੋ ਆਹ –

੭੫.

‘‘ਅਹਂ ਖਲੁ ਮਹਾਰਾਜ, ਨਾਗਰਾਜਾਰਿਵਨ੍ਤਰਂ;

ਪਟਿਵਤ੍ਤੁਂ ਨ ਸਕ੍ਕੋਮਿ, ਨ ਮੇ ਸੋ ਵਿਨਯੋ ਸਿਯਾ.

੭੬.

‘‘ਅਮ੍ਹਾਕਞ੍ਚੇਵ ਸੋ ਸੇਟ੍ਠੋ, ਤ੍ਵਞ੍ਚ ਉਤ੍ਤਮਸਤ੍ਤਵੋ;

ਭੂਮਿਪਾਲੋ ਮਨੁਸ੍ਸਿਨ੍ਦੋ, ਪੂਜਾ ਬਹੂਹਿ ਹੇਤੁਭਿ.

੭੭.

‘‘ਤੇਸਂ ਉਭਿਨ੍ਨਂ ਭਣਤਂ, ਵਤ੍ਤਮਾਨੇ ਵਿਨਿਚ੍ਛਯੇ;

ਨਨ੍ਤਰਂ ਪਤਿਵਤ੍ਤਬ੍ਬਂ, ਪੇਸ੍ਸੇਨ ਮਨੁਜਾਧਿਪਾ’’ਤਿ.

ਤਤ੍ਥ ਨਾਗਰਾਜਾਰਿਵਨ੍ਤਰਨ੍ਤਿ ਪੇਲ਼ਾਯ ਅਬ੍ਭਨ੍ਤਰਂ ਪਵਿਟ੍ਠੋ ਨਾਗਰਾਜਾ ਵਿਯ. ਪਟਿਵਤ੍ਤੁਨ੍ਤਿ ਤੁਮ੍ਹਾਕਂ ਦ੍ਵਿਨ੍ਨਂ ਅਨ੍ਤਰੇ ਵਤ੍ਤੁਂ ਨ ਸਕ੍ਕੋਮਿ. ਨ ਮੇ ਸੋਤਿ ਸਚੇ ਵਦੇਯ੍ਯਂ, ਨ ਮੇ ਸੋ ਵਿਨਯੋ ਭਵੇਯ੍ਯ. ਅਮ੍ਹਾਕਞ੍ਚੇਵਾਤਿ ਛਨ੍ਨਵੁਤਿਯਾ ਹਂਸਸਹਸ੍ਸਾਨਂ. ਉਤ੍ਤਮਸਤ੍ਤਵੋਤਿ ਉਤ੍ਤਮਸਤ੍ਤੋ. ਪੂਜਾਤਿ ਉਭੋ ਤੁਮ੍ਹੇ ਮਯ੍ਹਂ ਬਹੂਹਿ ਕਾਰਣੇਹਿ ਪੂਜਾਰਹਾ ਚੇਵ ਪਸਂਸਾਰਹਾ ਚ. ਪੇਸ੍ਸੇਨਾਤਿ ਵੇਯ੍ਯਾਵਚ੍ਚਕਰੇਨ ਸੇਵਕੇਨ.

ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਤੁਟ੍ਠਹਦਯੋ ‘‘ਨੇਸਾਦਪੁਤ੍ਤੋ ਤਂ ਵਣ੍ਣੇਤਿ, ਨ ਅਞ੍ਞੇਨ ਤੁਮ੍ਹਾਦਿਸੇਨ ਮਧੁਰਧਮ੍ਮਕਥਿਕੇਨ ਨਾਮ ਭਵਿਤਬ੍ਬ’’ਨ੍ਤਿ ਵਤ੍ਵਾ ਆਹ –

੭੮.

‘‘ਧਮ੍ਮੇਨ ਕਿਰ ਨੇਸਾਦੋ, ਪਣ੍ਡਿਤੋ ਅਣ੍ਡਜੋ ਇਤਿ;

ਨਹੇਵ ਅਕਤਤ੍ਤਸ੍ਸ, ਨਯੋ ਏਤਾਦਿਸੋ ਸਿਯਾ.

੭੯.

‘‘ਏਵਂ ਅਗ੍ਗਪਕਤਿਮਾ, ਏਵਂ ਉਤ੍ਤਮਸਤ੍ਤਵੋ;

ਯਾਵਤਤ੍ਥਿ ਮਯਾ ਦਿਟ੍ਠਾ, ਨਾਞ੍ਞਂ ਪਸ੍ਸਾਮਿ ਏਦਿਸਂ.

੮੦.

‘‘ਤੁਟ੍ਠੋਸ੍ਮਿ ਵੋ ਪਕਤਿਯਾ, ਵਾਕ੍ਯੇਨ ਮਧੁਰੇਨ ਚ;

ਏਸੋ ਚਾਪਿ ਮਮਚ੍ਛਨ੍ਦੋ, ਚਿਰਂ ਪਸ੍ਸੇਯ੍ਯ ਵੋ ਉਭੋ’’ਤਿ.

ਤਤ੍ਥ ਧਮ੍ਮੇਨਾਤਿ ਸਭਾਵੇਨ ਕਾਰਣੇਨ. ਅਕਤਤ੍ਤਸ੍ਸਾਤਿ ਅਸਮ੍ਪਾਦਿਤਅਤ੍ਤਭਾਵਸ੍ਸ ਮਿਤ੍ਤਦੁਬ੍ਭਿਸ੍ਸ. ਨਯੋਤਿ ਪਞ੍ਞਾ. ਅਗ੍ਗਪਕਤਿਮਾਤਿ ਅਗ੍ਗਸਭਾਵੋ. ਉਤ੍ਤਮਸਤ੍ਤਵੋਤਿ ਉਤ੍ਤਮਸਤ੍ਤੋ. ਯਾਵਤਤ੍ਥੀਤਿ ਯਾਵਤਾ ਮਯਾ ਦਿਟ੍ਠਾ ਨਾਮ ਅਤ੍ਥਿ. ਨਾਞ੍ਞਨ੍ਤਿ ਤਸ੍ਮਿਂ ਮਯਾ ਦਿਟ੍ਠਟ੍ਠਾਨੇ ਅਞ੍ਞਂ ਏਵਰੂਪਂ ਨ ਪਸ੍ਸਾਮਿ. ਤੁਟ੍ਠੋਸ੍ਮਿ ਵੋ ਪਕਤਿਯਾਤਿ ਸਮ੍ਮ ਹਂਸਰਾਜ ਅਹਂ ਪਕਤਿਯਾ ਪਠਮਮੇਵ ਤੁਮ੍ਹਾਕਂ ਦਸ੍ਸਨੇਨ ਤੁਟ੍ਠੋ. ਵਾਕ੍ਯੇਨਾਤਿ ਇਦਾਨਿ ਪਨ ਵੋ ਮਧੁਰਵਚਨੇਨ ਤੁਟ੍ਠੋਸ੍ਮਿ. ਚਿਰਂ ਪਸ੍ਸੇਯ੍ਯ ਵੋਤਿ ਇਧੇਵ ਵਸਾਪੇਤ੍ਵਾ ਮੁਹੁਤ੍ਤਮ੍ਪਿ ਅਵਿਪ੍ਪਵਾਸਨ੍ਤੋ ਚਿਰਂ ਤੁਮ੍ਹੇ ਪਸ੍ਸੇਯ੍ਯਨ੍ਤਿ ਏਸ ਮੇ ਛਨ੍ਦੋਤਿ ਵਦਤਿ.

ਤਤੋ ਮਹਾਸਤ੍ਤੋ ਰਾਜਾਨਂ ਪਸਂਸਨ੍ਤੋ ਆਹ –

੮੧.

‘‘ਯਂ ਕਿਚ੍ਚਂ ਪਰਮੇ ਮਿਤ੍ਤੇ, ਕਤਮਸ੍ਮਾਸੁ ਤਂ ਤਯਾ;

ਪਤ੍ਤਾ ਨਿਸ੍ਸਂਸਯਂ ਤ੍ਯਾਮ੍ਹਾ, ਭਤ੍ਤਿਰਸ੍ਮਾਸੁ ਯਾ ਤਵ.

੮੨.

‘‘ਅਦੁਞ੍ਚ ਨੂਨ ਸੁਮਹਾ, ਞਾਤਿਸਙ੍ਘਸ੍ਸ ਮਨ੍ਤਰਂ;

ਅਦਸ੍ਸਨੇਨ ਅਸ੍ਮਾਕਂ, ਦੁਕ੍ਖਂ ਬਹੂਸੁ ਪਕ੍ਖਿਸੁ.

੮੩.

‘‘ਤੇਸਂ ਸੋਕਵਿਘਾਤਾਯ, ਤਯਾ ਅਨੁਮਤਾ ਮਯਂ;

ਤਂ ਪਦਕ੍ਖਿਣਤੋ ਕਤ੍ਵਾ, ਞਾਤਿਂ ਪਸ੍ਸੇਮੁਰਿਨ੍ਦਮ.

੮੪.

‘‘ਅਦ੍ਧਾਹਂ ਵਿਪੁਲਂ ਪੀਤਿਂ, ਭਵਤਂ ਵਿਨ੍ਦਾਮਿ ਦਸ੍ਸਨਾ;

ਏਸੋ ਚਾਪਿ ਮਹਾ ਅਤ੍ਥੋ, ਞਾਤਿਵਿਸ੍ਸਾਸਨਾ ਸਿਯਾ’’ਤਿ.

ਤਤ੍ਥ ਕਤਮਸ੍ਮਾਸੂਤਿ ਕਤਂ ਅਮ੍ਹੇਸੁ. ਪਤ੍ਤਾ ਨਿਸ੍ਸਂਸਯਂ ਤ੍ਯਾਮ੍ਹਾਤਿ ਮਯਂ ਨਿਸ੍ਸਂਸਯੇਨ ਤਯਾ ਪਤ੍ਤਾਯੇਵ. ਭਤ੍ਤਿਰਸ੍ਮਾਸੁ ਯਾ ਤਵਾਤਿ ਯਾ ਤਵ ਅਮ੍ਹੇਸੁ ਭਤ੍ਤਿ, ਤਾਯ ਭਤ੍ਤਿਯਾ ਮਯਂ ਤਯਾ ਅਸਂਸਯੇਨ ਪਤ੍ਤਾਯੇਵ, ਨ ਚ ਵਿਪ੍ਪਯੁਤ੍ਤਾ, ਵਿਪ੍ਪਵੁਟ੍ਠਾਪਿ ਸਹਵਾਸਿਨੋਯੇਵ ਨਾਮ ਮਯਨ੍ਤਿ ਦੀਪੇਤਿ. ਅਦੁਞ੍ਚ ਨੂਨ ਸੁਮਹਾਤਿ ਏਤਞ੍ਚ ਏਕਂਸੇਨੇਵ ਸੁਮਹਨ੍ਤਂ. ਞਾਤਿਸਙ੍ਘਸ੍ਸ ਮਨ੍ਤਰਨ੍ਤਿ ਅਮ੍ਹੇਹਿ ਦ੍ਵੀਹਿ ਜਨੇਹਿ ਵਿਰਹਿਤਸ੍ਸ ਮਮ ਞਾਤਿਸਙ੍ਘਸ੍ਸ ਅਨ੍ਤਰਂ ਛਿਦ੍ਦਂ. ਅਸ੍ਮਾਕਨ੍ਤਿ ਅਮ੍ਹਾਕਂ ਦ੍ਵਿਨ੍ਨਂ ਅਦਸ੍ਸਨੇਨ ਬਹੂਸੁ ਪਕ੍ਖੀਸੁ ਦੁਕ੍ਖਂ ਉਪ੍ਪਨ੍ਨਂ. ਪਸ੍ਸੇਮੁਰਿਨ੍ਦਮਾਤਿ ਪਸ੍ਸੇਯ੍ਯਾਮ ਅਰਿਨ੍ਦਮ. ਭਵਤਨ੍ਤਿ ਭੋਤੋ ਦਸ੍ਸਨੇਨ. ਏਸੋ ਚਾਪਿ ਮਹਾ ਅਤ੍ਥੋਤਿ ਯਾ ਏਸਾ ਞਾਤਿਸਙ੍ਘਸਙ੍ਖਾਤਾ ਞਾਤਿਵਿਸ੍ਸਾਸਨਾ ਸਿਯਾ, ਏਸੋ ਚਾਪਿ ਮਹਨ੍ਤੋ ਅਤ੍ਥੋਪਿ.

ਏਵਂ ਵੁਤ੍ਤੇ ਰਾਜਾ ਤੇਸਂ ਗਮਨਂ ਅਨੁਜਾਨਿ. ਮਹਾਸਤ੍ਤੋਪਿ ਰਞ੍ਞੋ ਪਞ੍ਚਵਿਧੇ ਦੁਸ੍ਸੀਲ੍ਯੇ ਆਦੀਨਵਂ, ਸੀਲੇ ਚ ਆਨਿਸਂਸਂ ਕਥੇਤ੍ਵਾ ‘‘ਇਮਂ ਸੀਲਂ ਰਕ੍ਖ, ਧਮ੍ਮੇਨ ਰਜ੍ਜਂ ਕਾਰੇਹਿ, ਚਤੂਹਿ ਸਙ੍ਗਹਵਤ੍ਥੂਹਿ ਜਨਂ ਸਙ੍ਗਣ੍ਹਾਹੀ’’ਤਿ ਓਵਦਿਤ੍ਵਾ ਚਿਤ੍ਤਕੂਟਂ ਅਗਮਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੮੫.

‘‘ਇਦਂ ਵਤ੍ਵਾ ਧਤਰਟ੍ਠੋ, ਹਂਸਰਾਜਾ ਨਰਾਧਿਪਂ;

ਉਤ੍ਤਮਂ ਜਵਮਨ੍ਵਾਯ, ਞਾਤਿਸਙ੍ਘਂ ਉਪਾਗਮੁਂ.

੮੬.

‘‘ਤੇ ਅਰੋਗੇ ਅਨੁਪ੍ਪਤ੍ਤੇ, ਦਿਸ੍ਵਾਨ ਪਰਮੇ ਦਿਜੇ;

ਕੇਕਾਤਿ ਮਕਰੁਂ ਹਂਸਾ, ਪੁਥੁਸਦ੍ਦੋ ਅਜਾਯਥ.

੮੭.

‘‘ਤੇ ਪਤੀਤਾ ਪਮੁਤ੍ਤੇਨ, ਭਤ੍ਤੁਨਾ ਭਤ੍ਤੁਗਾਰਵਾ;

ਸਮਨ੍ਤਾ ਪਰਿਕਿਰਿਂਸੁ, ਅਣ੍ਡਜਾ ਲਦ੍ਧਪਚ੍ਚਯਾ’’ਤਿ.

ਤਤ੍ਥ ਉਪਾਗਮੁਨ੍ਤਿ ਅਰੁਣੁਗ੍ਗਮਨਵੇਲਾਯਮੇਵ ਲਾਜਮਧੁਫਾਣਿਤਾਦੀਨਿ ਪਰਿਭੁਞ੍ਜਿਤ੍ਵਾ ਰਞ੍ਞਾ ਚ ਦੇਵਿਯਾ ਚ ਦ੍ਵੀਹਿ ਸੁਵਣ੍ਣਤਾਲਵਣ੍ਟੇਹਿ ਉਕ੍ਖਿਪਿਤ੍ਵਾ ਗਨ੍ਧਮਾਲਾਦੀਹਿ ਕਤਸਕ੍ਕਾਰਾ ਤਾਲਵਣ੍ਟੇਹਿ ਓਤਰਿਤ੍ਵਾ ਰਾਜਾਨਂ ਪਦਕ੍ਖਿਣਂ ਕਤ੍ਵਾ ਵੇਹਾਸਂ ਉਪ੍ਪਤਿਤ੍ਵਾ ਰਞ੍ਞਾ ਅਞ੍ਜਲਿਂ ਪਗ੍ਗਯ੍ਹ ‘‘ਗਚ੍ਛਥ ਸਾਮਿਨੋ’’ਤਿ ਵੁਤ੍ਤੇ ਸੀਹਪਞ੍ਜਰੇਨ ਨਿਕ੍ਖਨ੍ਤਾ ਉਤ੍ਤਮੇਨ ਜਵੇਨ ਗਨ੍ਤ੍ਵਾ ਞਾਤਿਗਣਂ ਉਪਾਗਮਿਂਸੁ. ਪਰਮੇਤਿ ਉਤ੍ਤਮੇ. ਕੇਕਾਤਿ ਅਤ੍ਤਨੋ ਸਭਾਵੇਨ ‘‘ਕੇਕਾ’’ਤਿ ਸਦ੍ਦਮਕਂਸੁ. ਭਤ੍ਤੁਗਾਰਵਾਤਿ ਭਤ੍ਤਰਿ ਸਗਾਰਵਾ. ਪਰਿਕਿਰਿਂਸੂਤਿ ਭਤ੍ਤੁਨੋ ਮੁਤ੍ਤਭਾਵੇਨ ਤੁਟ੍ਠਾ ਤਂ ਭਤ੍ਤਾਰਂ ਸਮਨ੍ਤਾ ਪਰਿਵਾਰਯਿਂਸੁ. ਲਦ੍ਧਪਚ੍ਚਯਾਤਿ ਲਦ੍ਧਪਤਿਟ੍ਠਾ.

ਏਵਂ ਪਰਿਵਾਰੇਤ੍ਵਾ ਪਨ ਤੇ ਹਂਸਾ ‘‘ਕਥਂ ਮੁਤ੍ਤੋਸਿ, ਮਹਾਰਾਜਾ’’ਤਿ ਪੁਚ੍ਛਿਂਸੁ. ਮਹਾਸਤ੍ਤੋ ਸੁਮੁਖਂ ਨਿਸ੍ਸਾਯ ਮੁਤ੍ਤਭਾਵਂ, ਸਾਗਲਰਾਜਲੁਦ੍ਦਪੁਤ੍ਤੇਹਿ ਕਤਕਮ੍ਮਞ੍ਚ ਕਥੇਸਿ. ਤਂ ਸੁਤ੍ਵਾ ਤੁਟ੍ਠੋ ਹਂਸਗਣੋ ‘‘ਸੁਮੁਖਸੇਨਾਪਤਿ ਚ ਰਾਜਾ ਚ ਲੁਦ੍ਦਪੁਤ੍ਤੋ ਚ ਸੁਖਿਤਾ ਨਿਦ੍ਦੁਕ੍ਖਾ ਚਿਰਂ ਜੀਵਨ੍ਤੂ’’ਤਿ ਥੁਤਿਮਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਓਸਾਨਗਾਥਮਾਹ –

੮੮.

‘‘ਏਵਂ ਮਿਤ੍ਤਵਤਂ ਅਤ੍ਥਾ, ਸਬ੍ਬੇ ਹੋਨ੍ਤਿ ਪਦਕ੍ਖਿਣਾ;

ਹਂਸਾ ਯਥਾ ਧਤਰਟ੍ਠਾ, ਞਾਤਿਸਙ੍ਘਂ ਉਪਾਗਮੁ’’ਨ੍ਤਿ.

ਤਤ੍ਥ ਮਿਤ੍ਤਵਤਨ੍ਤਿ ਕਲ੍ਯਾਣਮਿਤ੍ਤਸਮ੍ਪਨ੍ਨਾਨਂ. ਪਦਕ੍ਖਿਣਾਤਿ ਸੁਖਨਿਪ੍ਫਤ੍ਤਿਨੋ ਵੁਡ੍ਢਿਯੁਤ੍ਤਾ. ਧਤਰਟ੍ਠਾਤਿ ਹਂਸਰਾਜਾ ਸੁਮੁਖੋ ਰਞ੍ਞਾ ਚੇਵ ਲੁਦ੍ਦਪੁਤ੍ਤੇਨ ਚਾਤਿ ਦ੍ਵੀਹਿ ਏਵਂ ਉਭੋਪਿ ਤੇ ਧਤਰਟ੍ਠਾ ਕਲ੍ਯਾਣਮਿਤ੍ਤਸਮ੍ਪਨ੍ਨਾ ਯਥਾ ਞਾਤਿਸਙ੍ਘਂ ਉਪਾਗਮੁਂ, ਞਾਤਿਸਙ੍ਘਉਪਗਮਨਸਙ੍ਖਾਤੋ ਨੇਸਂ ਅਤ੍ਥੋ ਪਦਕ੍ਖਿਣੋ ਜਾਤੋ, ਏਵਂ ਅਞ੍ਞੇਸਮ੍ਪਿ ਮਿਤ੍ਤਵਤਂ ਅਤ੍ਥਾ ਪਦਕ੍ਖਿਣਾ ਹੋਨ੍ਤੀਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ ਭਿਕ੍ਖਵੇ ਇਦਾਨੇਵ, ਪੁਬ੍ਬੇਪਾਨਨ੍ਦੋ ਮਮਤ੍ਥਾਯ ਜੀਵਿਤਂ ਪਰਿਚ੍ਚਜੀ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਨੇਸਾਦੋ ਛਨ੍ਨੋ ਅਹੋਸਿ, ਰਾਜਾ ਸਾਰਿਪੁਤ੍ਤੋ, ਸੁਮੁਖੋ ਆਨਨ੍ਦੋ, ਛਨ੍ਨਵੁਤਿ ਹਂਸਸਹਸ੍ਸਾ ਬੁਦ੍ਧਪਰਿਸਾ, ਹਂਸਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚੂਲ਼ਹਂਸਜਾਤਕਵਣ੍ਣਨਾ ਪਠਮਾ.

[੫੩੪] ੨. ਮਹਾਹਂਸਜਾਤਕਵਣ੍ਣਨਾ

ਏਤੇ ਹਂਸਾ ਪਕ੍ਕਮਨ੍ਤੀਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਆਨਨ੍ਦਥੇਰਸ੍ਸ ਜੀਵਿਤਪਰਿਚ੍ਚਾਗਮੇਵ ਆਰਬ੍ਭ ਕਥੇਸਿ. ਵਤ੍ਥੁ ਹੇਟ੍ਠਾ ਵੁਤ੍ਤਸਦਿਸਮੇਵ, ਇਧ ਪਨ ਸਤ੍ਥਾ ਅਤੀਤਂ ਆਹਰਨ੍ਤੋ ਇਦਮਾਹਰਿ.

ਅਤੀਤੇ ਬਾਰਾਣਸਿਯਂ ਸਂਯਮਸ੍ਸ ਨਾਮ ਬਾਰਾਣਸਿਰਞ੍ਞੋ ਖੇਮਾ ਨਾਮ ਅਗ੍ਗਮਹੇਸੀ ਅਹੋਸਿ. ਤਦਾ ਬੋਧਿਸਤ੍ਤੋ ਨਵੁਤਿਹਂਸਸਹਸ੍ਸਪਰਿਵੁਤੋ ਚਿਤ੍ਤਕੂਟੇ ਵਿਹਾਸਿ. ਅਥੇਕਦਿਵਸਂ ਖੇਮਾ ਦੇਵੀ ਪਚ੍ਚੂਸਸਮਯੇ ਸੁਪਿਨਂ ਅਦ੍ਦਸ. ਸੁਵਣ੍ਣਵਣ੍ਣਾ ਹਂਸਾ ਆਗਨ੍ਤ੍ਵਾ ਰਾਜਪਲ੍ਲਙ੍ਕੇ ਨਿਸੀਦਿਤ੍ਵਾ ਮਧੁਰਸ੍ਸਰੇਨ ਧਮ੍ਮਕਥਂ ਕਥੇਸੁਂ. ਦੇਵਿਯਾ ਸਾਧੁਕਾਰਂ ਦਤ੍ਵਾ ਧਮ੍ਮਂ ਸੁਣਨ੍ਤਿਯਾ ਧਮ੍ਮਸ੍ਸਵਨੇਨ ਅਤਿਤ੍ਤਾਯ ਏਵ ਰਤ੍ਤਿ ਵਿਭਾਯਿ. ਹਂਸਾ ਧਮ੍ਮਂ ਕਥੇਤ੍ਵਾ ਸੀਹਪਞ੍ਜਰੇਨ ਨਿਕ੍ਖਮਿਤ੍ਵਾ ਅਗਮਂਸੁ. ਸਾ ਵੇਗੇਨੁਟ੍ਠਾਯ ‘‘ਪਲਾਯਮਾਨੇ ਹਂਸੇ ਗਣ੍ਹਥ ਗਣ੍ਹਥਾ’’ਤਿ ਵਤ੍ਵਾ ਹਤ੍ਥਂ ਪਸਾਰੇਨ੍ਤੀਯੇਵ ਪਬੁਜ੍ਝਿ. ਤਸ੍ਸਾ ਕਥਂ ਸੁਤ੍ਵਾ ਪਰਿਚਾਰਿਕਾਯੋ ‘‘ਕੁਹਿਂ ਹਂਸਾ’’ਤਿ ਥੋਕਂ ਅਵਹਸਿਂਸੁ. ਸਾ ਤਸ੍ਮਿਂ ਖਣੇ ਸੁਪਿਨਭਾਵਂ ਞਤ੍ਵਾ ਚਿਨ੍ਤੇਸਿ – ‘‘ਅਹਂ ਅਭੂਤਂ ਨ ਪਸ੍ਸਾਮਿ, ਅਦ੍ਧਾ ਇਮਸ੍ਮਿਂ ਲੋਕੇ ਸੁਵਣ੍ਣਵਣ੍ਣਾ ਹਂਸਾ ਭਵਿਸ੍ਸਨ੍ਤਿ, ਸਚੇ ਖੋ ਪਨ ‘ਸੁਵਣ੍ਣਹਂਸਾਨਂ ਧਮ੍ਮਂ ਸੋਤੁਕਾਮਾਮ੍ਹੀ’ਤਿ ਰਾਜਾਨਂ ਵਕ੍ਖਾਮਿ, ‘ਅਮ੍ਹੇਹਿ ਸੁਵਣ੍ਣਹਂਸਾ ਨਾਮ ਨ ਦਿਟ੍ਠਪੁਬ੍ਬਾ, ਹਂਸਾਨਞ੍ਚ ਕਥਾ ਨਾਮ ਅਭੂਤਾਯੇਵਾ’ਤਿ ਵਤ੍ਵਾ ਨਿਰੁਸ੍ਸੁਕ੍ਕੋ ਭਵਿਸ੍ਸਤਿ, ‘ਦੋਹਲ਼ੋ’ਤਿ ਵੁਤ੍ਤੇ ਪਨ ਯੇਨ ਕੇਨਚਿ ਉਪਾਯੇਨ ਪਰਿਯੇਸਿਸ੍ਸਤਿ, ਏਵਂ ਮੇ ਮਨੋਰਥੋ ਸਮਿਜ੍ਝਿਸ੍ਸਤੀ’’ਤਿ. ਸਾ ਗਿਲਾਨਾਲਯਂ ਦਸ੍ਸੇਤ੍ਵਾ ਪਰਿਚਾਰਿਕਾਨਂ ਸਞ੍ਞਂ ਦਤ੍ਵਾ ਨਿਪਜ੍ਜਿ.

ਰਾਜਾ ਰਾਜਾਸਨੇ ਨਿਸਿਨ੍ਨੋ ਤਸ੍ਸਾ ਦਸ੍ਸਨਵੇਲਾਯ ਤਂ ਅਦਿਸ੍ਵਾ ‘‘ਕਹਂ, ਖੇਮਾ ਦੇਵੀ’’ਤਿ ਪੁਚ੍ਛਿਤ੍ਵਾ ‘‘ਗਿਲਾਨਾ’’ਤਿ ਸੁਤ੍ਵਾ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ਸਯਨੇਕਦੇਸੇ ਨਿਸੀਦਿਤ੍ਵਾ ਪਿਟ੍ਠਿਂ ਪਰਿਮਜ੍ਜਨ੍ਤੋ ‘‘ਕਿਂ ਤੇ ਅਫਾਸੁਕ’’ਨ੍ਤਿ ਪੁਚ੍ਛਿ. ‘‘ਦੇਵ ਅਞ੍ਞਂ ਅਫਾਸੁਕਂ ਨਤ੍ਥਿ, ਦੋਹਲ਼ੋ ਪਨ ਮੇ ਉਪ੍ਪਨ੍ਨੋ’’ਤਿ. ਤੇਨ ਹਿ ‘‘ਭਣ, ਦੇਵਿ, ਯਂ ਇਚ੍ਛਸਿ, ਤਂ ਸੀਘਂ ਤੇ ਉਪਨਾਮੇਸ੍ਸਾਮੀ’’ਤਿ. ‘‘ਮਹਾਰਾਜ, ਅਹਮੇਕਸ੍ਸ ਸੁਵਣ੍ਣਹਂਸਸ੍ਸ ਸਮੁਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲਙ੍ਕੇ ਨਿਸਿਨ੍ਨਸ੍ਸ ਗਨ੍ਧਮਾਲਾਦੀਹਿ ਪੂਜਂ ਕਤ੍ਵਾ ਸਾਧੁਕਾਰਂ ਦਦਮਾਨਾ ਧਮ੍ਮਕਥਂ ਸੋਤੁਮਿਚ੍ਛਾਮਿ, ਸਚੇ ਲਭਾਮਿ, ਇਚ੍ਚੇਤਂ ਕੁਸਲਂ, ਨੋ ਚੇ, ਜੀਵਿਤਂ ਮੇ ਨਤ੍ਥੀ’’ਤਿ. ਅਥ ਨਂ ਰਾਜਾ ‘‘ਸਚੇ ਮਨੁਸ੍ਸਲੋਕੇ ਅਤ੍ਥਿ, ਲਭਿਸ੍ਸਸਿ, ਮਾ ਚਿਨ੍ਤਯੀ’’ਤਿ ਅਸ੍ਸਾਸੇਤ੍ਵਾ ਸਿਰਿਗਬ੍ਭਤੋ ਨਿਕ੍ਖਮ੍ਮ ਅਮਚ੍ਚੇਹਿ ਸਦ੍ਧਿਂ ਮਨ੍ਤੇਸਿ – ‘‘ਅਮ੍ਭੋ, ਖੇਮਾ ਦੇਵੀ, ‘ਸੁਵਣ੍ਣਹਂਸਸ੍ਸ ਧਮ੍ਮਕਥਂ ਸੋਤੁਂ ਲਭਨ੍ਤੀ ਜੀਵਿਸ੍ਸਾਮਿ, ਅਲਭਨ੍ਤਿਯਾ ਮੇ ਜੀਵਿਤਂ ਨਤ੍ਥੀ’ਤਿ ਵਦਤਿ, ਅਤ੍ਥਿ ਨੁ ਖੋ ਸੁਵਣ੍ਣਵਣ੍ਣਾ ਹਂਸਾ’’ਤਿ. ‘‘ਦੇਵ ਅਮ੍ਹੇਹਿ ਨੇਵ ਦਿਟ੍ਠਪੁਬ੍ਬਾ ਨ ਸੁਤਪੁਬ੍ਬਾ’’ਤਿ. ‘‘ਕੇ ਪਨ ਜਾਨੇਯ੍ਯੁ’’ਨ੍ਤਿ? ‘‘ਬ੍ਰਾਹ੍ਮਣਾ, ਦੇਵਾ’’ਤਿ. ਰਾਜਾ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ਸਕ੍ਕਾਰਂ ਕਤ੍ਵਾ ਪੁਚ੍ਛਿ – ‘‘ਹੋਨ੍ਤਿ ਨੁ ਖੋ ਆਚਰਿਯਾ ਸੁਵਣ੍ਣਵਣ੍ਣਾ ਹਂਸਾ’’ਤਿ? ‘‘ਆਮ, ਮਹਾਰਾਜ ਅਮ੍ਹਾਕਂ ਮਨ੍ਤੇਸੁਮਚ੍ਛਾ, ਕਕ੍ਕਟਕਾ, ਕਚ੍ਛਪਾ, ਮਿਗਾ, ਮੋਰਾ, ਹਂਸਾਤਿ ਛ ਏਤੇ ਤਿਰਚ੍ਛਾਨਗਤਾ ਸੁਵਣ੍ਣਵਣ੍ਣਾ ਹੋਨ੍ਤੀਤਿ ਆਗਤਾ, ਤਤ੍ਥ ਧਤਰਟ੍ਠਕੁਲਹਂਸਾ ਨਾਮ ਪਣ੍ਡਿਤਾ ਞਾਣਸਮ੍ਪਨ੍ਨਾ, ਇਤਿ ਮਨੁਸ੍ਸੇਹਿ ਸਦ੍ਧਿਂ ਸਤ੍ਤ ਸੁਵਣ੍ਣਵਣ੍ਣਾ ਹੋਨ੍ਤੀ’’ਤਿ.

ਤਂ ਸੁਤ੍ਵਾ ਰਾਜਾ ਅਤ੍ਤਮਨੋ ਹੁਤ੍ਵਾ ‘‘ਕਹਂ ਨੁ ਖੋ ਆਚਰਿਯਾ ਧਤਰਟ੍ਠਹਂਸਾ ਵਸਨ੍ਤੀ’’ਤਿ ਪੁਚ੍ਛਿਤ੍ਵਾ ‘‘ਨ ਜਾਨਾਮ, ਮਹਾਰਾਜਾ’’ਤਿ ਵੁਤ੍ਤੇ ‘‘ਅਥ ਕੇ ਪਨ ਜਾਨਿਸ੍ਸਨ੍ਤੀ’’ਤਿ ਵਤ੍ਵਾ ‘‘ਲੁਦ੍ਦਪੁਤ੍ਤਾ’’ਤਿ ਵੁਤ੍ਤੇ ਸਬ੍ਬੇ ਅਤ੍ਤਨੋ ਵਿਜਿਤੇ ਲੁਦ੍ਦਕੇ ਸਨ੍ਨਿਪਾਤਾਪੇਤ੍ਵਾ ਪੁਚ੍ਛਿ – ‘‘ਤਾਤਾ, ਸੁਵਣ੍ਣਵਣ੍ਣਾ ਧਤਰਟ੍ਠਕੁਲਹਂਸਾ ਨਾਮ ਕਹਂ ਵਸਨ੍ਤੀ’’ਤਿ? ਅਥੇਕੋ ਲੁਦ੍ਦੋ ‘‘ਹਿਮਵਨ੍ਤੇ ਕਿਰ, ਦੇਵ, ਚਿਤ੍ਤਕੂਟਪਬ੍ਬਤੇਤਿ ਨੋ ਕੁਲਪਰਮ੍ਪਰਾਯ ਕਥੇਨ੍ਤੀ’’ਤਿ ਆਹ. ‘‘ਜਾਨਾਸਿ ਪਨ ਨੇਸਂ ਗਹਣੂਪਾਯ’’ਨ੍ਤਿ? ‘‘ਨ ਜਾਨਾਮਿ, ਦੇਵਾ’’ਤਿ. ‘‘ਕੇ ਪਨ ਜਾਨਿਸ੍ਸਨ੍ਤੀ’’ਤਿ? ਬ੍ਰਾਹ੍ਮਣਾਤਿ. ਸੋ ਬ੍ਰਾਹ੍ਮਣਪਣ੍ਡਿਤੇ ਪਕ੍ਕੋਸਾਪੇਤ੍ਵਾ ਚਿਤ੍ਤਕੂਟਪਬ੍ਬਤੇ ਸੁਵਣ੍ਣਵਣ੍ਣਾਨਂ ਹਂਸਾਨਂ ਅਤ੍ਥਿਭਾਵਂ ਆਰੋਚੇਤ੍ਵਾ ‘‘ਜਾਨਾਥ ਨੁ ਖੋ ਤੇਸਂ ਗਹਣੂਪਾਯ’’ਨ੍ਤਿ ਪੁਚ੍ਛਿ. ‘‘ਮਹਾਰਾਜ, ਕਿਂ ਤੇਹਿ ਗਨ੍ਤ੍ਵਾ ਗਹਿਤੇਹਿ, ਉਪਾਯੇਨ ਤੇ ਨਗਰਸਮੀਪਂ ਆਨੇਤ੍ਵਾ ਗਹੇਸ੍ਸਾਮਾ’’ਤਿ. ‘‘ਕੋ ਪਨ ਉਪਾਯੋ’’ਤਿ? ‘‘ਮਹਾਰਾਜ, ਨਗਰਤੋ ਅਵਿਦੂਰੇ ਉਤ੍ਤਰੇਨ ਤਿਗਾਵੁਤਮਤ੍ਤੇ ਤਿਗਾਵੁਤਪ੍ਪਮਾਣਂ ਖੇਮਂ ਨਾਮ ਸਰਂ ਕਾਰਾਪੇਤ੍ਵਾ ਉਦਕਸ੍ਸ ਪੂਰੇਤ੍ਵਾ ਨਾਨਾਧਞ੍ਞਾਨਿ ਰੋਪੇਤ੍ਵਾ ਪਞ੍ਚਵਣ੍ਣਪਦੁਮਸਞ੍ਛਨ੍ਨਂ ਕਾਰਾਪੇਤ੍ਵਾ ਏਕਂ ਪਣ੍ਡਿਤਂ ਨੇਸਾਦਂ ਪਟਿਚ੍ਛਾਪੇਤ੍ਵਾ ਮਨੁਸ੍ਸਾਨਂ ਉਪਗਨ੍ਤੁਂ ਅਦਤ੍ਵਾ ਚਤੂਸੁ ਕਣ੍ਣੇਸੁ ਠਿਤੇਹਿ ਅਭਯਂ ਘੋਸਾਪੇਥ, ਤਂ ਸੁਤ੍ਵਾ ਨਾਨਾਸਕੁਣਾ ਦਸ ਦਿਸਾ ਓਤਰਿਸ੍ਸਨ੍ਤਿ, ਤੇਪਿ ਹਂਸਾ ਪਰਮ੍ਪਰਾਯ ਤਸ੍ਸ ਸਰਸ੍ਸ ਖੇਮਭਾਵਂ ਸੁਤ੍ਵਾ ਆਗਚ੍ਛਿਸ੍ਸਨ੍ਤਿ, ਅਥ ਨੇ ਵਾਲਪਾਸੇਹਿ ਬਨ੍ਧਾਪੇਤ੍ਵਾ ਗਣ੍ਹਾਪੇਯ੍ਯਾਥਾ’’ਤਿ.

ਤਂ ਸੁਤ੍ਵਾ ਰਾਜਾ ਤੇਹਿ ਵੁਤ੍ਤਪਦੇਸੇ ਵੁਤ੍ਤਪ੍ਪਕਾਰਂ ਸਰਂ ਕਾਰਾਪੇਤ੍ਵਾ ਛੇਕਂ ਨੇਸਾਦਂ ਪਕ੍ਕੋਸਾਪੇਤ੍ਵਾ ਤਸ੍ਸ ਸਹਸ੍ਸਂ ਦਾਪੇਤ੍ਵਾ ‘‘ਤ੍ਵਂ ਇਤੋ ਪਟ੍ਠਾਯ ਅਤ੍ਤਨੋ ਕਮ੍ਮਂ ਮਾ ਕਰਿ, ਪੁਤ੍ਤਦਾਰਂ ਤੇ ਅਹਂ ਪੋਸੇਸ੍ਸਾਮਿ, ਤ੍ਵਂ ਅਪ੍ਪਮਤ੍ਤੋ ਖੇਮਂ ਸਰਂ ਰਕ੍ਖਨ੍ਤੋ ਮਨੁਸ੍ਸੇ ਪਟਿਕ੍ਕਮਾਪੇਤ੍ਵਾ ਚਤੂਸੁ ਕਣ੍ਣੇਸੁ ਅਭਯਂ ਘੋਸਾਪੇਤ੍ਵਾ ਆਗਤਾਗਤੇ ਸਕੁਣੇ ਮਮ ਆਚਿਕ੍ਖੇਯ੍ਯਾਸਿ, ਸੁਵਣ੍ਣਹਂਸੇਸੁ ਆਗਤੇਸੁ ਮਹਨ੍ਤਂ ਸਕ੍ਕਾਰਂ ਲਭਿਸ੍ਸਸੀ’’ਤਿ ਤਮਸ੍ਸਾਸੇਤ੍ਵਾ ਖੇਮਂ ਸਰਂ ਪਟਿਚ੍ਛਾਪੇਸਿ. ਸੋ ਤਤੋ ਪਟ੍ਠਾਯ ਰਞ੍ਞਾ ਵੁਤ੍ਤਨਯੇਨੇਵ ਤਤ੍ਥ ਪਟਿਪਜ੍ਜਿ, ‘‘ਖੇਮਂ ਸਰਂ ਰਕ੍ਖਤੀ’’ਤਿ ਚਸ੍ਸ ‘‘ਖੇਮਨੇਸਾਦੋ’’ਤ੍ਵੇਵ ਨਾਮਂ ਉਦਪਾਦਿ. ਤਤੋ ਪਟ੍ਠਾਯ ਚ ਨਾਨਪ੍ਪਕਾਰਾ ਸਕੁਣਾ ਓਤਰਿਂਸੁ, ‘‘ਖੇਮਂ ਨਿਬ੍ਭਯਂ ਸਰ’’ਨ੍ਤਿ ਪਰਮ੍ਪਰਾਘੋਸੇਨ ਨਾਨਾਹਂਸਾ ਆਗਮਿਂਸੁ. ਪਠਮਂ ਤਾਵ ਤਿਣਹਂਸਾ ਆਗਮਿਂਸੁ, ਤੇਸਂ ਘੋਸੇਨ ਪਣ੍ਡੁਹਂਸਾ, ਤੇਸਂ ਘੋਸੇਨ ਮਨੋਸਿਲਾਵਣ੍ਣਾ ਹਂਸਾ, ਤੇਸਂ ਘੋਸੇਨ ਸੇਤਹਂਸਾ, ਤੇਸਂ ਘੋਸੇਨ ਪਾਕਹਂਸਾ ਆਗਮਿਂਸੁ. ਤੇਸੁ ਆਗਤੇਸੁ ਖੇਮਕੋ ਰਞ੍ਞੋ ਆਰੋਚੇਸਿ – ‘‘ਦੇਵ, ਪਞ੍ਚਵਣ੍ਣਾ ਹਂਸਾ ਆਗਨ੍ਤ੍ਵਾ ਸਰੇ ਗੋਚਰਂ ਗਣ੍ਹਨ੍ਤਿ, ਪਾਕਹਂਸਾਨਂ ਆਗਤਤ੍ਤਾ ਇਦਾਨਿ ਕਤਿਪਾਹੇਨੇਵ ਸੁਵਣ੍ਣਹਂਸਾ ਆਗਮਿਸ੍ਸਨ੍ਤਿ, ਮਾ ਚਿਨ੍ਤਯਿਤ੍ਥ, ਦੇਵਾ’’ਤਿ.

ਤਂ ਸੁਤ੍ਵਾ ਰਾਜਾ ‘‘ਅਞ੍ਞੇਨ ਤਤ੍ਥ ਨ ਗਨ੍ਤਬ੍ਬਂ, ਯੋ ਗਚ੍ਛਿਸ੍ਸਤਿ, ਹਤ੍ਥਪਾਦਛੇਦਨਞ੍ਚ ਘਰਵਿਲੋਪਞ੍ਚ ਪਾਪੁਣਿਸ੍ਸਤੀ’’ਤਿ ਨਗਰ ਭੇਰਿਂ ਚਰਾਪੇਸਿ. ਤਤੋ ਪਟ੍ਠਾਯ ਤਤ੍ਥ ਕੋਚਿ ਨ ਗਚ੍ਛਤਿ. ਚਿਤ੍ਤਕੂਟਸ੍ਸ ਪਨਾਵਿਦੂਰੇ ਕਞ੍ਚਨਗੁਹਾਯਂਪਾਕਹਂਸਾ ਵਸਨ੍ਤਿ, ਤੇਪਿ ਮਹਬ੍ਬਲਾ. ਧਤਰਟ੍ਠਕੁਲੇਨ ਸਦ੍ਧਿਂ ਤੇਸਂ ਸਰੀਰਵਣ੍ਣੋਵ ਵਿਸੇਸੋ. ਪਾਕਹਂਸਰਞ੍ਞੋ ਪਨ ਧੀਤਾ ਸੁਵਣ੍ਣਵਣ੍ਣਾ ਅਹੋਸਿ. ਸੋ ਤਂ ਧਤਰਟ੍ਠਮਹਿਸ੍ਸਰਸ੍ਸ ਅਨੁਰੂਪਾਤਿ ਤਸ੍ਸ ਪਾਦਪਰਿਚਾਰਿਕਂ ਕਤ੍ਵਾ ਪੇਸੇਸਿ. ਸਾ ਤਸ੍ਸ ਪਿਯਾ ਅਹੋਸਿ ਮਨਾਪਾ, ਤੇਨੇਵ ਚ ਕਾਰਣੇਨ ਤਾਨਿ ਦ੍ਵੇ ਹਂਸਕੁਲਾਨਿ ਅਞ੍ਞਮਞ੍ਞਂ ਵਿਸ੍ਸਾਸਿਕਾਨਿ ਜਾਤਾਨਿ.

ਅਥੇਕਦਿਵਸਂ ਬੋਧਿਸਤ੍ਤਸ੍ਸ ਪਰਿਵਾਰਹਂਸਾ ਪਾਕਹਂਸੇ ਪੁਚ੍ਛਿਂਸੁ – ‘‘ਤੁਮ੍ਹੇ ਇਮੇਸੁ ਦਿਵਸੇਸੁ ਕਹਂ ਗੋਚਰਂ ਗਣ੍ਹਥਾ’’ਤਿ? ‘‘ਮਯਂ ਬਾਰਾਣਸਿਤੋ ਅਵਿਦੂਰੇ ਖੇਮਸਰੇ ਗੋਚਰਂ ਗਣ੍ਹਾਮ, ਤੁਮ੍ਹੇ ਪਨ ਕੁਹਿਂ ਆਹਿਣ੍ਡਥਾ’’ਤਿ. ‘‘ਅਸੁਕਂ ਨਾਮਾ’’ਤਿ ਵੁਤ੍ਤੇ ‘‘ਕਸ੍ਮਾ ਖੇਮਸਰਂ ਨ ਗਚ੍ਛਥ, ਸੋ ਹਿ ਸਰੋ ਰਮਣੀਯੋ ਨਾਨਾਸਕੁਣਸਮਾਕਿਣ੍ਣੋ ਪਞ੍ਚਵਣ੍ਣਪਦੁਮਸਞ੍ਛਨ੍ਨੋ ਨਾਨਾਧਞ੍ਞਫਲਸਮ੍ਪਨ੍ਨੋ ਨਾਨਪ੍ਪਕਾਰਭਮਰਗਣਨਿਕੂਜਿਤੋ ਚਤੂਸੁ ਕਣ੍ਣੇਸੁ ਨਿਚ੍ਚਂ ਪਵਤ੍ਤਅਭਯਘੋਸਨੋ, ਕੋਚਿ ਨਂ ਉਪਸਙ੍ਕਮਿਤੁਂ ਸਮਤ੍ਥੋ ਨਾਮ ਨਤ੍ਥਿ, ਪਗੇਵ ਅਞ੍ਞਂ ਉਪਦ੍ਦਵਂ ਕਾਤੁਂ, ਏਵਰੂਪੋ ਸੋ ਸਰੋ’’ਤਿ ਖੇਮਸਰਂ ਵਣ੍ਣਯਿਂਸੁ. ਤੇ ਤੇਸਂ ਵਚਨਂ ਸੁਤ੍ਵਾ ‘‘ਬਾਰਾਣਸਿਯਾ ਸਮੀਪੇ ਕਿਰ ਏਵਰੂਪੋ ਖੇਮੋ ਨਾਮ ਸਰੋ ਅਤ੍ਥਿ, ਪਾਕਹਂਸਾ ਤਤ੍ਥ ਗਨ੍ਤ੍ਵਾ ਗੋਚਰਂ ਗਣ੍ਹਨ੍ਤਿ, ਤੁਮ੍ਹੇਪਿ ਧਤਰਟ੍ਠਮਹਿਸ੍ਸਰਸ੍ਸ ਆਰੋਚੇਥ, ਸਚੇ ਅਨੁਜਾਨਾਤਿ, ਮਯਮ੍ਪਿ ਤਤ੍ਥ ਗਨ੍ਤ੍ਵਾ ਗੋਚਰਂ ਗਣ੍ਹੇਯ੍ਯਾਮਾ’’ਤਿ ਸੁਮੁਖਸ੍ਸ ਕਥੇਸੁਂ. ਸੁਮੁਖੋ ਰਞ੍ਞੋ ਆਰੋਚੇਸਿ. ਸੋ ਚਿਨ੍ਤੇਸਿ – ‘‘ਮਨੁਸ੍ਸਾ ਨਾਮ ਬਹੁਮਾਯਾ ਖਰਮਨ੍ਤਾ ਉਪਾਯਕੁਸਲਾ, ਭਵਿਤਬ੍ਬਮੇਤ੍ਥ ਕਾਰਣੇਨ, ਏਤ੍ਤਕਂ ਕਾਲਂ ਏਸੋ ਸਰੋ ਨਤ੍ਥਿ, ਇਦਾਨਿ ਅਮ੍ਹਾਕਂ ਗਹਣਤ੍ਥਾਯ ਕਤੋ ਭਵਿਸ੍ਸਤੀ’’ਤਿ. ਸੋ ਸੁਮੁਖਂ ਆਹ – ‘‘ਮਾ ਵੋ ਤਤ੍ਥ ਗਮਨਂ ਰੁਚ੍ਚਥ, ਨ ਸੋ ਸਰੋ ਤੇਹਿ ਸੁਧਮ੍ਮਤਾਯ ਕਤੋ, ਅਮ੍ਹਾਕਂ ਗਹਣਤ੍ਥਾਯੇਵ ਕਤੋ, ਮਨੁਸ੍ਸਾ ਨਾਮ ਬਹੁਮਾਯਾ ਖਰਮਨ੍ਤਾ ਉਪਾਯਕੁਸਲਾ, ਤੁਮ੍ਹੇ ਸਕੇਯੇਵ ਗੋਚਰੇ ਚਰਥਾ’’ਤਿ.

ਸੁਵਣ੍ਣਹਂਸਾ ‘‘ਖੇਮਂ ਸਰਂ ਗਨ੍ਤੁਕਾਮਮ੍ਹਾ’’ਤਿ ਦੁਤਿਯਮ੍ਪਿ ਤਤਿਯਮ੍ਪਿ ਸੁਮੁਖਸ੍ਸ ਆਰੋਚੇਸੁਂ. ਸੋ ਤੇਸਂ ਤਤ੍ਥ ਗਨ੍ਤੁਕਾਮਤਂ ਮਹਾਸਤ੍ਤਸ੍ਸ ਆਰੋਚੇਸਿ. ਅਥ ਮਹਾਸਤ੍ਤੋ ‘‘ਮਮ ਞਾਤਕਾ ਮਂ ਨਿਸ੍ਸਾਯ ਮਾ ਕਿਲਮਨ੍ਤੁ, ਤੇਨ ਹਿ ਗਚ੍ਛਾਮਾ’’ਤਿ ਨਵੁਤਿਹਂਸਸਹਸ੍ਸਪਰਿਵੁਤੋ ਤਤ੍ਥ ਗਨ੍ਤ੍ਵਾ ਗੋਚਰਂ ਗਹੇਤ੍ਵਾ ਹਂਸਕੀਲ਼ਂ ਕੀਲ਼ਿਤ੍ਵਾ ਚਿਤ੍ਤਕੂਟਮੇਵ ਪਚ੍ਚਾਗਮਿ. ਖੇਮਕੋ ਤੇਸਂ ਗੋਚਰਂ ਚਰਿਤ੍ਵਾ ਗਤਕਾਲੇ ਗਨ੍ਤ੍ਵਾ ਤੇਸਂ ਆਗਤਭਾਵਂ ਰਞ੍ਞੋ ਆਰੋਚੇਸਿ. ਰਾਜਾ ਤੁਟ੍ਠਚਿਤ੍ਤੋ ਹੁਤ੍ਵਾ, ‘‘ਸਮ੍ਮ ਖੇਮਕ, ਏਕਂ ਵਾ ਦ੍ਵੇ ਵਾ ਹਂਸੇ ਗਣ੍ਹਿਤੁਂ ਵਾਯਮ, ਮਹਨ੍ਤਂ ਤੇ ਯਸਂ ਦਸ੍ਸਾਮੀ’’ਤਿ ਵਤ੍ਵਾ ਪਰਿਬ੍ਬਯਂ ਦਤ੍ਵਾ ਤਂ ਉਯ੍ਯੋਜੇਸਿ. ਸੋ ਤਤ੍ਥ ਗਨ੍ਤ੍ਵਾ ਚਾਟਿਪਞ੍ਜਰੇ ਨਿਸੀਦਿਤ੍ਵਾ ਹਂਸਾਨਂ ਚਰਣਟ੍ਠਾਨਂ ਵੀਮਂਸਿ. ਬੋਧਿਸਤ੍ਤਾ ਨਾਮ ਨਿਲ੍ਲੋਲੁਪ੍ਪਚਾਰਿਨੋ ਹੋਨ੍ਤਿ, ਤਸ੍ਮਾ ਮਹਾਸਤ੍ਤੋ ਓਤਿਣ੍ਣਟ੍ਠਾਨਤੋ ਪਟ੍ਠਾਯ ਸਪਦਾਨਂ ਸਾਲਿਂ ਖਾਦਨ੍ਤੋ ਅਗਮਾਸਿ. ਸੇਸਾ ਇਤੋ ਚਿਤੋ ਚ ਖਾਦਨ੍ਤਾ ਵਿਚਰਿਂਸੁ.

ਅਥ ਲੁਦ੍ਦਪੁਤ੍ਤੋ ‘‘ਅਯਂ ਹਂਸੋ ਨਿਲ੍ਲੋਲੁਪ੍ਪਚਾਰੀ, ਇਮਂ ਬਨ੍ਧਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਨਦਿਵਸੇ ਹਂਸੇਸੁ ਸਰਂ ਅਨੋਤਿਣ੍ਣੇਸੁਯੇਵ ਚਾਟਿਪਞ੍ਜਰੇ ਨਿਸਿਨ੍ਨੋ ਤਂ ਠਾਨਂ ਗਨ੍ਤ੍ਵਾ ਅਵਿਦੂਰੇ ਪਞ੍ਜਰੇ ਅਤ੍ਤਾਨਂ ਪਟਿਚ੍ਛਾਦੇਤ੍ਵਾ ਛਿਦ੍ਦੇਨ ਓਲੋਕੇਨ੍ਤੋ ਅਚ੍ਛਿ. ਤਸ੍ਮਿਂ ਖਣੇ ਮਹਾਸਤ੍ਤੋ ਨਵੁਤਿਹਂਸਸਹਸ੍ਸਪੁਰਕ੍ਖਤੋ ਹਿਯ੍ਯੋ ਓਤਿਣ੍ਣਟ੍ਠਾਨੇਯੇਵ ਓਤਰਿਤ੍ਵਾ ਓਧਿਯਂ ਨਿਸੀਦਿਤ੍ਵਾ ਸਾਲਿਂ ਖਾਦਨ੍ਤੋ ਪਾਯਾਸਿ. ਨੇਸਾਦੋ ਪਞ੍ਜਰਛਿਦ੍ਦੇਨ ਓਲੋਕੇਨ੍ਤੋ ਤਸ੍ਸ ਰੂਪਸੋਭਗ੍ਗਪ੍ਪਤ੍ਤਂ ਅਤ੍ਤਭਾਵਂ ਦਿਸ੍ਵਾ ‘‘ਅਯਂ ਹਂਸੋ ਸਕਟਨਾਭਿਪ੍ਪਮਾਣਸਰੀਰੋ ਸੁਵਣ੍ਣਵਣ੍ਣੋ, ਤੀਹਿ ਰਤ੍ਤਰਾਜੀਹਿ ਗੀਵਾਯਂ ਪਰਿਕ੍ਖਿਤ੍ਤੋ, ਤਿਸ੍ਸੋ ਰਾਜਿਯੋ ਗਲੇਨ ਓਤਰਿਤ੍ਵਾ ਉਰਨ੍ਤਰੇਨ ਗਤਾ, ਤਿਸ੍ਸੋ ਪਚ੍ਛਾਭਾਗੇਨ ਨਿਬ੍ਬਿਜ੍ਝਿਤ੍ਵਾ ਗਤਾ, ਰਤ੍ਤਕਮ੍ਬਲਸੁਤ੍ਤਸਿਕ੍ਕਾਯ ਠਪਿਤਕਞ੍ਚਨਕ੍ਖਨ੍ਧੋ ਵਿਯ ਅਤਿਰੋਚਤਿ, ਇਮਿਨਾ ਏਤੇਸਂ ਰਞ੍ਞਾ ਭਵਿਤਬ੍ਬਂ, ਇਮਮੇਵ ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਸਿ. ਹਂਸਰਾਜਾਪਿ ਬਹੁਂ ਗੋਚਰਂ ਚਰਿਤ੍ਵਾ ਜਲਕੀਲ਼ਂ ਕੀਲ਼ਿਤ੍ਵਾ ਹਂਸਗਣਪਰਿਵੁਤੋ ਚਿਤ੍ਤਕੂਟਮੇਵ ਅਗਮਾਸਿ. ਇਮਿਨਾ ਨਿਯਾਮੇਨੇਵ ਪਞ੍ਚ ਦਿਵਸੇ ਗੋਚਰਂ ਗਣ੍ਹਿ. ਛਟ੍ਠੇ ਦਿਵਸੇ ਖੇਮਕੋ ਕਾਲ਼ਅਸ੍ਸਵਾਲਮਯਂ ਦਲ਼੍ਹਂ ਮਹਾਰਜ੍ਜੁਂ ਵਟ੍ਟਿਤ੍ਵਾ ਯਟ੍ਠਿਯਾ ਪਾਸਂ ਕਤ੍ਵਾ ‘‘ਸ੍ਵੇ ਹਂਸਰਾਜਾ ਇਮਸ੍ਮਿਂ ਓਕਾਸੇ ਓਤਰਿਸ੍ਸਤੀ’’ਤਿ ਤਥਤੋ ਞਤ੍ਵਾ ਅਨ੍ਤੋਉਦਕੇ ਯਟ੍ਠਿਪਾਸਂ ਓਡ੍ਡਿ.

ਪੁਨਦਿਵਸੇ ਹਂਸਰਾਜਾ ਓਤਰਨ੍ਤੋ ਪਾਦਂ ਪਾਸੇ ਪਵੇਸਨ੍ਤੋਯੇਵ ਓਤਰਿ. ਅਥਸ੍ਸ ਪਾਸੋ ਪਾਦਂ ਅਯਪਟ੍ਟਕੇਨ ਕਡ੍ਢਨ੍ਤੋ ਵਿਯ ਆਬਨ੍ਧਿਤ੍ਵਾ ਗਣ੍ਹਿ. ਸੋ ‘‘ਛਿਨ੍ਦਿਸ੍ਸਾਮਿ ਨ’’ਨ੍ਤਿ ਵੇਗਂ ਜਨੇਤ੍ਵਾ ਕਡ੍ਢਿਤ੍ਵਾ ਪਾਤੇਸਿ. ਪਠਮਵਾਰੇ ਸੁਵਣ੍ਣਵਣ੍ਣਂ ਚਮ੍ਮਂ ਛਿਜ੍ਜਿ, ਦੁਤਿਯਵਾਰੇ ਕਮ੍ਬਲਵਣ੍ਣਂ ਮਂਸਂ ਛਿਜ੍ਜਿ, ਤਤਿਯਵਾਰੇ ਨ੍ਹਾਰੁ ਛਿਜ੍ਜਿ, ਚਤੁਤ੍ਥਵਾਰੇ ਪਨ ‘‘ਪਾਦਾ ਛਿਜ੍ਜੇਯ੍ਯੁਂ, ਰਞ੍ਞੋ ਪਨ ਹੀਨਙ੍ਗਤਾ ਨਾਮ ਅਨਨੁਚ੍ਛਵਿਕਾ’’ਤਿ ਨ ਵਾਯਾਮਂ ਅਕਾਸਿ, ਬਲਵਵੇਦਨਾ ਚ ਪਵਤ੍ਤਿਂਸੁ. ਸੋ ਚਿਨ੍ਤੇਸਿ – ‘‘ਸਚਾਹਂ ਬਦ੍ਧਰਵਂ ਰਵਿਸ੍ਸਾਮਿ, ਞਾਤਕਾ ਮੇ ਞਤ੍ਰਸ੍ਤਾ ਹੁਤ੍ਵਾ ਗੋਚਰਂ ਅਗ੍ਗਹੇਤ੍ਵਾ ਛਾਤਜ੍ਝਤ੍ਤਾਵ ਪਲਾਯਨ੍ਤਾ ਦੁਬ੍ਬਲਤ੍ਤਾ ਸਮੁਦ੍ਦੇ ਪਤਿਸ੍ਸਨ੍ਤੀ’’ਤਿ. ਸੋ ਵੇਦਨਂ ਅਧਿਵਾਸੇਤ੍ਵਾ ਪਾਸਵਸੇ ਵਤ੍ਤੇਤ੍ਵਾ ਸਾਲਿਂ ਖਾਦਨ੍ਤੋ ਵਿਯ ਹੁਤ੍ਵਾ ਤੇਸਂ ਯਾਵਦਤ੍ਥਂ ਚਰਿਤ੍ਵਾ ਹਂਸਕੀਲ਼ਂ ਕੀਲ਼ਨਕਾਲੇ ਮਹਨ੍ਤੇਨ ਸਦ੍ਦੇਨ ਬਦ੍ਧਰਵਂ ਰਵਿ. ਤਂ ਸੁਤ੍ਵਾ ਹਂਸਾ ਮਰਣਭਯਤਜ੍ਜਿਤਾ ਵਗ੍ਗਵਗ੍ਗਾ ਚਿਤ੍ਤਕੂਟਾਭਿਮੁਖਾ ਪੁਰਿਮਨਯੇਨੇਵ ਪਕ੍ਕਮਿਂਸੁ.

ਸੁਮੁਖੋਪਿ ਹੇਟ੍ਠਾ ਵੁਤ੍ਤਨਯੇਨੇਵ ਚਿਨ੍ਤੇਤ੍ਵਾ ਵਿਚਿਨਿਤ੍ਵਾ ਤੀਸੁਪਿ ਕੋਟ੍ਠਾਸੇਸੁ ਮਹਾਸਤ੍ਤਂ ਅਦਿਸ੍ਵਾ ‘‘ਅਦ੍ਧਾ ਤਸ੍ਸੇਵੇਦਂ ਭਯਂ ਉਪ੍ਪਨ੍ਨ’’ਨ੍ਤਿ ਨਿਵਤ੍ਤਿਤ੍ਵਾ ਆਗਤੋ ਮਹਾਸਤ੍ਤਂ ਪਾਸੇਨ ਬਦ੍ਧਂ ਲੋਹਿਤਮਕ੍ਖਿਤਂ ਦੁਕ੍ਖਾਤੁਰਂ ਪਙ੍ਕਪਿਟ੍ਠੇ ਨਿਪਨ੍ਨਂ ਦਿਸ੍ਵਾ ‘‘ਮਾ ਭਾਯਿ, ਮਹਾਰਾਜ, ਅਹਂ ਮਮ ਜੀਵਿਤਂ ਪਰਿਚ੍ਚਜਿਤ੍ਵਾ ਤੁਮ੍ਹੇ ਮੋਚੇਸ੍ਸਾਮੀ’’ਤਿ ਵਦਨ੍ਤੋ ਓਤਰਿਤ੍ਵਾ ਮਹਾਸਤ੍ਤਂ ਅਸ੍ਸਾਸੇਨ੍ਤੋ ਪਙ੍ਕਪਿਟ੍ਠੇ ਨਿਸੀਦਿ. ਮਹਾਸਤ੍ਤੋ ‘‘ਨਵੁਤਿਹਂਸਸਹਸ੍ਸੇਸੁ ਮਂ ਛਡ੍ਡੇਤ੍ਵਾ ਪਲਾਯਨ੍ਤੇਸੁ ਅਯਂ ਸੁਮੁਖੋ ਏਕਕੋਵ ਆਗਤੋ, ਕਿਂ ਨੁ ਖੋ ਲੁਦ੍ਦਪੁਤ੍ਤਸ੍ਸ ਆਗਤਕਾਲੇ ਮਂ ਛਡ੍ਡੇਤ੍ਵਾ ਪਲਾਯਿਸ੍ਸਤਿ, ਉਦਾਹੁ ਨੋ’’ਤਿ ਵੀਮਂਸਨਵਸੇਨ ਲੋਹਿਤਮਕ੍ਖਿਤੋ ਪਾਸਯਟ੍ਠਿਯਂ ਓਲਮ੍ਬਨ੍ਤੋਯੇਵ ਤਿਸ੍ਸੋ ਗਾਥਾ ਅਭਾਸਿ –

੮੯.

‘‘ਏਤੇ ਹਂਸਾ ਪਕ੍ਕਮਨ੍ਤਿ, ਵਕ੍ਕਙ੍ਗਾ ਭਯਮੇਰਿਤਾ;

ਹਰਿਤ੍ਤਚ ਹੇਮਵਣ੍ਣ, ਕਾਮਂ ਸੁਮੁਖ ਪਕ੍ਕਮ.

੯੦.

‘‘ਓਹਾਯ ਮਂ ਞਾਤਿਗਣਾ, ਏਕਂ ਪਾਸਵਸਂ ਗਤਂ;

ਅਨਪੇਕ੍ਖਮਾਨਾ ਗਚ੍ਛਨ੍ਤਿ, ਕਿਂ ਏਕੋ ਅਵਹੀਯਸਿ.

੯੧.

‘‘ਪਤੇਵ ਪਤਤਂ ਸੇਟ੍ਠ, ਨਤ੍ਥਿ ਬਦ੍ਧੇ ਸਹਾਯਤਾ;

ਮਾ ਅਨੀਘਾਯ ਹਾਪੇਸਿ, ਕਾਮਂ ਸੁਮੁਖ ਪਕ੍ਕਮਾ’’ਤਿ.

ਤਤ੍ਥ ਭਯਮੇਰਿਤਾਤਿ ਭਯੇਨ ਏਰਿਤਾ ਭਯਟ੍ਟਿਤਾ ਭਯਚਲਿਤਾ. ਤਤਿਯਪਦੇ ‘‘ਹਰੀ’’ਤਿਪਿ ‘‘ਹੇਮ’’ਨ੍ਤਿਪਿ ਸੁਵਣ੍ਣਸ੍ਸੇਵ ਨਾਮਂ. ਸੋ ਚ ਹਰਿਤ੍ਤਚਤਾਯ ਹੇਮਵਣ੍ਣੋ, ਤੇਨ ਤਂ ਏਵਂ ਆਲਪਤਿ. ਸੁਮੁਖਾਤਿ ਸੁਨ੍ਦਰਮੁਖ. ਅਨਪੇਕ੍ਖਮਾਨਾਤਿ ਤਵ ਞਾਤਕਾ ਮਂ ਅਨੋਲੋਕੇਨ੍ਤਾ ਨਿਰਾਲਯਾ ਹੁਤ੍ਵਾ. ਪਤੇਵਾਤਿ ਉਪ੍ਪਤਾਹਿਯੇਵ. ਮਾ ਅਨੀਘਾਯਾਤਿ ਇਤੋ ਗਨ੍ਤ੍ਵਾ ਪਤ੍ਤਬ੍ਬਾਯ ਨਿਦੁਕ੍ਖਭਾਵਾਯ ਵੀਰਿਯਂ ਮਾ ਹਾਪੇਸਿ.

ਤਂ ਸੁਤ੍ਵਾ ਸੁਮੁਖੋ ‘‘ਅਯਂ ਹਂਸਰਾਜਾ ਮਮ ਪਿਯਮਿਤ੍ਤਭਾਵਂ ਨ ਜਾਨਾਤਿ, ਅਨੁਪ੍ਪਿਯਭਾਣੀ ਮਿਤ੍ਤੋਤਿ ਮਂ ਸਲ੍ਲਕ੍ਖੇਤਿ, ਸਿਨੇਹਭਾਵਮਸ੍ਸ ਦਸ੍ਸੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਚਤਸ੍ਸੋ ਗਾਥਾ ਅਭਾਸਿ –

੯੨.

‘‘ਨਾਹਂ ਦੁਕ੍ਖਪਰੇਤੋਪਿ, ਧਤਰਟ੍ਠ ਤੁਵਂ ਜਹੇ;

ਜੀਵਿਤਂ ਮਰਣਂ ਵਾ ਮੇ, ਤਯਾ ਸਦ੍ਧਿਂ ਭਵਿਸ੍ਸਤਿ.

੯੩.

‘‘ਨਾਹਂ ਦੁਕ੍ਖਪਰੇਤੋਪਿ, ਧਤਰਟ੍ਠ ਤੁਵਂ ਜਹੇ;

ਨ ਮਂ ਅਨਰਿਯਸਂਯੁਤ੍ਤੇ, ਕਮ੍ਮੇ ਯੋਜੇਤੁਮਰਹਸਿ.

੯੪.

‘‘ਸਕੁਮਾਰੋ ਸਖਾਤ੍ਯਸ੍ਮਿ, ਸਚਿਤ੍ਤੇ ਚਸ੍ਮਿ ਤੇ ਠਿਤੋ;

ਞਾਤੋ ਸੇਨਾਪਤੀ ਤ੍ਯਾਹਂ, ਹਂਸਾਨਂ ਪਵਰੁਤ੍ਤਮ.

੯੫.

‘‘ਕਥਂ ਅਹਂ ਵਿਕਤ੍ਤਿਸ੍ਸਂ, ਞਾਤਿਮਜ੍ਝੇ ਇਤੋ ਗਤੋ;

ਤਂ ਹਿਤ੍ਵਾ ਪਤਤਂ ਸੇਟ੍ਠ, ਕਿਂ ਤੇ ਵਕ੍ਖਾਮਿਤੋ ਗਤੋ;

ਇਧ ਪਾਣਂ ਚਜਿਸ੍ਸਾਮਿ, ਨਾਨਰਿਯਂ ਕਤ੍ਤੁਮੁਸ੍ਸਹੇ’’ਤਿ.

ਤਤ੍ਥ ਨਾਹਨ੍ਤਿ ਅਹਂ, ਮਹਾਰਾਜ, ਕਾਯਿਕਚੇਤਸਿਕੇਨ ਦੁਕ੍ਖੇਨ ਫੁਟ੍ਠੋਪਿ ਤਂ ਨ ਜਹਾਮਿ. ਅਨਰਿਯਸਂਯੁਤ੍ਤੇਤਿ ਮਿਤ੍ਤਦੁਬ੍ਭੀਹਿ ਅਹਿਰਿਕੇਹਿ ਕਤ੍ਤਬ੍ਬਤਾਯ ਅਨਰਿਯਭਾਵੇਨ ਸਂਯੁਤ੍ਤੇ. ਕਮ੍ਮੇਤਿ ਤਂ ਜਹਿਤ੍ਵਾ ਪਕ੍ਕਮਨਕਮ੍ਮੇ. ਸਕੁਮਾਰੋਤਿ ਸਮਾਨਕੁਮਾਰੋ, ਏਕਦਿਵਸੇਨੇਵ ਪਟਿਸਨ੍ਧਿਂ ਗਹੇਤ੍ਵਾ ਏਕਦਿਵਸੇ ਅਣ੍ਡਕੋਸਂ ਪਦਾਲੇਤ੍ਵਾ ਏਕਤੋ ਵਡ੍ਢਿਤਕੁਮਾਰੋਤਿ ਅਤ੍ਥੋ. ਸਖਾਤ੍ਯਸ੍ਮੀਤਿ ਅਹਂ ਤੇ ਦਕ੍ਖਿਣਕ੍ਖਿਸਮੋ ਪਿਯਸਹਾਯੋ. ਸਚਿਤ੍ਤੇਤਿ ਤਵ ਸਕੇ ਚਿਤ੍ਤੇ ਅਹਂ ਠਿਤੋ ਤਵ ਵਸੇ ਵਤ੍ਤਾਮਿ, ਤਯਿ ਜੀਵਨ੍ਤੇ ਜੀਵਾਮਿ, ਨ ਜੀਵਨ੍ਤੇ ਨ ਜੀਵਾਮੀਤਿ ਅਤ੍ਥੋ. ‘‘ਸਂਚਿਤ੍ਤੇ’’ਤਿਪਿ ਪਾਠੋ, ਤਵ ਚਿਤ੍ਤੇ ਅਹਂ ਸਣ੍ਠਿਤੋ ਸੁਟ੍ਠੁ ਠਿਤੋਤਿ ਅਤ੍ਥੋ. ਞਾਤੋਤਿ ਸਬ੍ਬਹਂਸਾਨਂ ਅਨ੍ਤਰੇ ਪਞ੍ਞਾਤੋ. ਵਿਕਤ੍ਤਿਸ੍ਸਨ੍ਤਿ ‘‘ਕੁਹਿਂ ਹਂਸਰਾਜਾ’’ਤਿ ਪੁਚ੍ਛਿਤੋ ਅਹਂ ਕਿਨ੍ਤਿ ਕਥੇਸ੍ਸਾਮਿ. ਕਿਂ ਤੇ ਵਕ੍ਖਾਮੀਤਿ ਤੇ ਤਵ ਪਵਤ੍ਤਿਂ ਪੁਚ੍ਛਨ੍ਤੇ ਹਂਸਗਣੇ ਕਿਂ ਵਕ੍ਖਾਮਿ.

ਏਵਂ ਸੁਮੁਖੇਨ ਚਤੂਹਿ ਗਾਥਾਹਿ ਸੀਹਨਾਦੇ ਨਦਿਤੇ ਤਸ੍ਸ ਗੁਣਂ ਪਕਾਸੇਨ੍ਤੋ ਮਹਾਸਤ੍ਤੋ ਆਹ –

੯੬.

‘‘ਏਸੋ ਹਿ ਧਮ੍ਮੋ ਸੁਮੁਖ, ਯਂ ਤ੍ਵਂ ਅਰਿਯਪਥੇ ਠਿਤੋ;

ਯੋ ਭਤ੍ਤਾਰਂ ਸਖਾਰਂ ਮਂ, ਨ ਪਰਿਚ੍ਚਤ੍ਤੁਮੁਸ੍ਸਹੇ.

੯੭.

‘‘ਤਞ੍ਹਿ ਮੇ ਪੇਕ੍ਖਮਾਨਸ੍ਸ, ਭਯਂ ਨ ਤ੍ਵੇਵ ਜਾਯਤਿ;

ਅਧਿਗਚ੍ਛਸਿ ਤ੍ਵਂ ਮਯ੍ਹਂ, ਏਵਂਭੂਤਸ੍ਸ ਜੀਵਿਤ’’ਨ੍ਤਿ.

ਤਤ੍ਥ ਏਸੋ ਧਮ੍ਮੋਤਿ ਏਸ ਪੋਰਾਣਕਪਣ੍ਡਿਤਾਨਂ ਸਭਾਵੋ. ਭਤ੍ਤਾਰਂ ਸਖਾਰਂ ਮਨ੍ਤਿ ਸਾਮਿਕਞ੍ਚ ਸਹਾਯਞ੍ਚ ਮਂ. ਭਯਨ੍ਤਿ ਚਿਤ੍ਤੁਤ੍ਰਾਸੋ ਮਯ੍ਹਂ ਨ ਜਾਯਤਿ, ਚਿਤ੍ਤਕੂਟਪਬ੍ਬਤੇ ਹਂਸਗਣਮਜ੍ਝੇ ਠਿਤੋ ਵਿਯ ਹੋਮਿ. ਮਯ੍ਹਨ੍ਤਿ ਮਮ ਜੀਵਿਤਂ ਤ੍ਵਂ ਲਭਾਪੇਸ੍ਸਸਿ.

ਏਵਂ ਤੇਸਂ ਕਥੇਨ੍ਤਾਨਞ੍ਞੇਵ ਲੁਦ੍ਦਪੁਤ੍ਤੋ ਸਰਪਰਿਯਨ੍ਤੇ ਠਿਤੋ ਹਂਸੇ ਤੀਹਿ ਖਨ੍ਧੇਹਿ ਪਲਾਯਨ੍ਤੇ ਦਿਸ੍ਵਾ ‘‘ਕਿਂ ਨੁ ਖੋ’’ਤਿ ਪਾਸਟ੍ਠਾਨਂ ਓਲੋਕੇਨ੍ਤੋ ਬੋਧਿਸਤ੍ਤਂ ਪਾਸਯਟ੍ਠਿਯਂ ਓਲਮ੍ਬਨ੍ਤਂ ਦਿਸ੍ਵਾ ਸਞ੍ਜਾਤਸੋਮਨਸ੍ਸੋ ਕਚ੍ਛਂ ਦਲ਼੍ਹਂ ਬਨ੍ਧਿਤ੍ਵਾ ਮੁਗ੍ਗਰਂ ਗਹੇਤ੍ਵਾ ਕਪ੍ਪੁਟ੍ਠਾਨਗ੍ਗਿ ਵਿਯ ਅਵਤ੍ਥਰਮਾਨੋ ਪਣ੍ਹਿਯਾ ਅਕ੍ਕਨ੍ਤਕਲਲੇ ਉਪਰਿਸੀਸੇਨ ਗਨ੍ਤ੍ਵਾ ਪੁਰਤੋ ਪਤਨ੍ਤੇ ਵੇਗੇਨ ਉਪਸਙ੍ਕਮਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੯੮.

‘‘ਇਚ੍ਚੇਵਂ ਮਨ੍ਤਯਨ੍ਤਾਨਂ, ਅਰਿਯਾਨਂ ਅਰਿਯਵੁਤ੍ਤਿਨਂ;

ਦਣ੍ਡਮਾਦਾਯ ਨੇਸਾਦੋ, ਆਪਤੀ ਤੁਰਿਤੋ ਭੁਸਂ.

੯੯.

‘‘ਤਮਾਪਤਨ੍ਤਂ ਦਿਸ੍ਵਾਨ, ਸੁਮੁਖੋ ਅਤਿਬ੍ਰੂਹਯਿ;

ਅਟ੍ਠਾਸਿ ਪੁਰਤੋ ਰਞ੍ਞੋ, ਹਂਸੋ ਵਿਸ੍ਸਾਸਯਂ ਬ੍ਯਥਂ.

੧੦੦.

‘‘ਮਾ ਭਾਯਿ ਪਤਤਂ ਸੇਟ੍ਠ, ਨ ਹਿ ਭਾਯਨ੍ਤਿ ਤਾਦਿਸਾ;

ਅਹਂ ਯੋਗਂ ਪਯੁਞ੍ਜਿਸ੍ਸਂ, ਯੁਤ੍ਤਂ ਧਮ੍ਮੂਪਸਞ੍ਹਿਤਂ;

ਤੇਨ ਪਰਿਯਾਪਦਾਨੇਨ, ਖਿਪ੍ਪਂ ਪਾਸਾ ਪਮੋਕ੍ਖਸੀ’’ਤਿ.

ਤਤ੍ਥ ਅਰਿਯਵੁਤ੍ਤਿਨਨ੍ਤਿ ਅਰਿਯਾਚਾਰੇ ਵਤ੍ਤਮਾਨਾਨਂ. ਭੁਸਨ੍ਤਿ ਦਲ਼੍ਹਂ ਬਲਵਂ. ਅਤਿਬ੍ਰੂਹਯੀਤਿ ਅਨਨ੍ਤਰਗਾਥਾਯ ਆਗਤਂ ‘‘ਮਾ ਭਾਯੀ’’ਤਿ ਵਚਨਂ ਵਦਨ੍ਤੋ ਅਤਿਬ੍ਰੂਹੇਸਿ ਮਹਾਸਦ੍ਦਂ ਨਿਚ੍ਛਾਰੇਸਿ. ਅਟ੍ਠਾਸੀਤਿ ਸਚੇ ਨੇਸਾਦੋ ਰਾਜਾਨਂ ਪਹਰਿਸ੍ਸਤਿ, ਅਹਂ ਪਹਾਰਂ ਸਮ੍ਪਟਿਚ੍ਛਿਸ੍ਸਾਮੀਤਿ ਜੀਵਿਤਂ ਪਰਿਚ੍ਚਜਿਤ੍ਵਾ ਪੁਰਤੋ ਅਟ੍ਠਾਸਿ. ਵਿਸ੍ਸਾਸਯਨ੍ਤਿ ਵਿਸ੍ਸਾਸੇਨ੍ਤੋ ਅਸ੍ਸਾਸੇਨ੍ਤੋ. ਬ੍ਯਥਨ੍ਤਿ ਬ੍ਯਥਿਤਂ ਭੀਤਂ ਰਾਜਾਨਂ ‘‘ਮਾ ਭਾਯੀ’’ਤਿ ਇਮਿਨਾ ਵਚਨੇਨ ਵਿਸ੍ਸਾਸੇਨ੍ਤੋ. ਤਾਦਿਸਾਤਿ ਤੁਮ੍ਹਾਦਿਸਾ ਞਾਣਵੀਰਿਯਸਮ੍ਪਨ੍ਨਾ. ਯੋਗਨ੍ਤਿ ਞਾਣਵੀਰਿਯਯੋਗਂ. ਯੁਤ੍ਤਨ੍ਤਿ ਅਨੁਚ੍ਛਵਿਕਂ. ਧਮ੍ਮੂਪਸਞ੍ਹਿਤਨ੍ਤਿ ਕਾਰਣਨਿਸ੍ਸਿਤਂ. ਤੇਨ ਪਰਿਯਾਪਦਾਨੇਨਾਤਿ ਤੇਨ ਮਯਾ ਪਯੁਤ੍ਤੇਨ ਯੋਗੇਨ ਪਰਿਸੁਦ੍ਧੇਨ. ਪਮੋਕ੍ਖਸੀਤਿ ਮੁਚ੍ਚਿਸ੍ਸਸਿ.

ਏਵਂ ਸੁਮੁਖੋ ਮਹਾਸਤ੍ਤਂ ਅਸ੍ਸਾਸੇਤ੍ਵਾ ਲੁਦ੍ਦਪੁਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਮਧੁਰਂ ਮਾਨੁਸਿਂ ਵਾਚਂ ਨਿਚ੍ਛਾਰੇਨ੍ਤੋ, ‘‘ਸਮ੍ਮ, ਤ੍ਵਂ ਕੋਨਾਮੋਸੀ’’ਤਿ ਪੁਚ੍ਛਿਤ੍ਵਾ ‘‘ਸੁਵਣ੍ਣਵਣ੍ਣਹਂਸਰਾਜ, ਅਹਂ ਖੇਮਕੋ ਨਾਮਾ’’ਤਿ ਵੁਤ੍ਤੇ, ‘‘ਸਮ੍ਮ ਖੇਮਕ, ‘ਤਯਾ ਓਡ੍ਡਿਤਵਾਲਪਾਸੇ ਯੋ ਵਾ ਸੋ ਵਾ ਹਂਸੋ ਬਦ੍ਧੋ’ਤਿ ਸਞ੍ਞਂ ਮਾ ਕਰਿ, ਨਵੁਤਿਯਾ ਹਂਸਸਹਸ੍ਸਾਨਂ ਪਵਰੋ ਧਤਰਟ੍ਠਹਂਸਰਾਜਾ ਤੇ ਪਾਸੇ ਬਦ੍ਧੋ, ਞਾਣਸੀਲਾਚਾਰਸਮ੍ਪਨ੍ਨੋ ਸਙ੍ਗਾਹਕਪਕ੍ਖੇ ਠਿਤੋ, ਨ ਤਂ ਮਾਰੇਤੁਂ ਯੁਤ੍ਤੋ, ਅਹਂ ਤਵ ਇਮਿਨਾ ਕਤ੍ਤਬ੍ਬਕਿਚ੍ਚਂ ਕਰਿਸ੍ਸਾਮਿ, ਅਯਮ੍ਪਿ ਸੁਵਣ੍ਣਵਣ੍ਣੋ, ਅਹਮ੍ਪਿ ਤਥੇਵ, ਅਹਂ ਏਤਸ੍ਸਤ੍ਥਾਯ ਅਤ੍ਤਨੋ ਜੀਵਿਤਂ ਪਰਿਚ੍ਚਜਿਸ੍ਸਾਮਿ, ਸਚੇ ਤ੍ਵਂ ਏਤਸ੍ਸ ਪਤ੍ਤਾਨਿ ਗਣ੍ਹਿਤੁਕਾਮੋਸਿ, ਮਮ ਪਤ੍ਤਾਨਿ ਗਣ੍ਹ, ਅਥੋਪਿ ਚਮ੍ਮਮਂਸਨ੍ਹਾਰੁਅਟ੍ਠੀਨਮਞ੍ਞਤਰਂ ਗਣ੍ਹਿਤੁਕਾਮੋਸਿ, ਮਮੇਵ ਸਰੀਰਤੋ ਗਣ੍ਹ, ਅਥ ਨਂ ਕੀਲ਼ਾਹਂਸਂ ਕਾਤੁਕਾਮੋਸਿ, ਮਞ੍ਞੇਵ ਕਰ, ਜੀਵਨ੍ਤਮੇਵ ਵਿਕ੍ਕਿਣਿਤ੍ਵਾ ਸਚੇ ਧਨਂ ਉਪ੍ਪਾਦੇਤੁਕਾਮੋਸਿ, ਮਂ ਜੀਵਨ੍ਤਮੇਵ ਵਿਕ੍ਕਿਣਿਤ੍ਵਾ ਧਨਂ ਉਪ੍ਪਾਦੇਹਿ, ਮਾ ਏਤਂ ਞਾਣਾਦਿਗੁਣਸਂਯੁਤ੍ਤਂ ਹਂਸਰਾਜਾਨਂ ਅਵਧਿ, ਸਚੇ ਹਿ ਨਂ ਵਧਿਸ੍ਸਸਿ, ਨਿਰਯਾਦੀਹਿ ਨ ਮੁਚ੍ਚਿਸ੍ਸਸੀ’’ਤਿ ਤਂ ਨਿਰਯਾਦਿਭਯੇਨ ਸਨ੍ਤਜ੍ਜੇਤ੍ਵਾ ਅਤ੍ਤਨੋ ਮਧੁਰਕਥਂ ਗਣ੍ਹਾਪੇਤ੍ਵਾ ਪੁਨ ਬੋਧਿਸਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਅਸ੍ਸਾਸੇਨ੍ਤੋ ਅਟ੍ਠਾਸਿ. ਨੇਸਾਦੋ ਤਸ੍ਸ ਕਥਂ ਸੁਤ੍ਵਾ ‘‘ਅਯਂ ਤਿਰਚ੍ਛਾਨਗਤੋ ਸਮਾਨੋ ਮਨੁਸ੍ਸੇਹਿਪਿ ਕਾਤੁਂ ਅਸਕ੍ਕੁਣੇਯ੍ਯਂ ਏਵਰੂਪਂ ਮਿਤ੍ਤਧਮ੍ਮਂ ਕਰੋਤਿ, ਮਨੁਸ੍ਸਾਪਿ ਏਵਂ ਮਿਤ੍ਤਧਮ੍ਮੇ ਠਾਤੁਂ ਨ ਸਕ੍ਕੋਨ੍ਤਿ, ਅਹੋ ਏਸ ਞਾਣਸਮ੍ਪਨ੍ਨੋ ਮਧੁਰਕਥੋ ਧਮ੍ਮਿਕੋ’’ਤਿ ਸਕਲਸਰੀਰਂ ਪੀਤਿਸੋਮਨਸ੍ਸਪਰਿਪੁਣ੍ਣਂ ਕਤ੍ਵਾ ਪਹਟ੍ਠਲੋਮੋ ਦਣ੍ਡਂ ਛਡ੍ਡੇਤ੍ਵਾ ਸਿਰਸਿ ਅਞ੍ਜਲਿਂ ਪਤਿਟ੍ਠਪੇਤ੍ਵਾ ਸੂਰਿਯਂ ਨਮਸ੍ਸਨ੍ਤੋ ਵਿਯ ਸੁਮੁਖਸ੍ਸ ਗੁਣਂ ਕਿਤ੍ਤੇਨ੍ਤੋ ਅਟ੍ਠਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੦੧.

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਸੁਮੁਖਸ੍ਸ ਸੁਭਾਸਿਤਂ;

ਪਹਟ੍ਠਲੋਮੋ ਨੇਸਾਦੋ, ਅਞ੍ਜਲਿਸ੍ਸ ਪਣਾਮਯਿ.

੧੦੨.

‘‘ਨ ਮੇ ਸੁਤਂ ਵਾ ਦਿਟ੍ਠਂ ਵਾ, ਭਾਸਨ੍ਤੋ ਮਾਨੁਸਿਂ ਦਿਜੋ;

ਅਰਿਯਂ ਬ੍ਰੁਵਾਨੋ ਵਕ੍ਕਙ੍ਗੋ, ਚਜਨ੍ਤੋ ਮਾਨੁਸਿਂ ਗਿਰਂ.

੧੦੩.

‘‘ਕਿਂ ਨੁ ਤਾਯਂ ਦਿਜੋ ਹੋਤਿ, ਮੁਤ੍ਤੋ ਬਦ੍ਧਂ ਉਪਾਸਸਿ;

ਓਹਾਯ ਸਕੁਣਾ ਯਨ੍ਤਿ, ਕਿਂ ਏਕੋ ਅਵਹੀਯਸੀ’’ਤਿ.

ਤਤ੍ਥ ਅਞ੍ਜਲਿਸ੍ਸ ਪਣਾਮਯੀਤਿ ਅਞ੍ਜਲਿਂ ਅਸ੍ਸ ਉਪਨਾਮਯਿ, ‘‘ਨ ਮੇ’’ਤਿ ਗਾਥਾਯਸ੍ਸ ਥੁਤਿਂ ਕਰੋਤਿ. ਤਤ੍ਥ ਮਾਨੁਸਿਨ੍ਤਿ ਮਨੁਸ੍ਸਵਾਚਂ. ਅਰਿਯਨ੍ਤਿ ਸੁਨ੍ਦਰਂ ਨਿਦ੍ਦੋਸਂ. ਚਜਨ੍ਤੋਤਿ ਵਿਸ੍ਸਜ੍ਜੇਨ੍ਤੋ. ਇਦਂ ਵੁਤ੍ਤਂ ਹੋਤਿ – ਸਮ੍ਮ, ਤ੍ਵਂ ਦਿਜੋ ਸਮਾਨੋ ਅਜ੍ਜ ਮਯਾ ਸਦ੍ਧਿਂ ਮਾਨੁਸਿਂ ਵਾਚਂ ਭਾਸਨ੍ਤੋ ਨਿਦ੍ਦੋਸਂ ਬ੍ਰੁਵਾਨੋ ਮਾਨੁਸਿਂ ਗਿਰਂ ਚਜਨ੍ਤੋ ਪਚ੍ਚਕ੍ਖਤੋ ਦਿਟ੍ਠੋ, ਇਤੋ ਪੁਬ੍ਬੇ ਪਨ ਇਦਂ ਅਚ੍ਛਰਿਯਂ ਮਯਾ ਨੇਵ ਸੁਤਂ ਨ ਦਿਟ੍ਠਨ੍ਤਿ. ਕਿਂ ਨੁ ਤਾਯਨ੍ਤਿ ਯਂ ਏਤਂ ਤ੍ਵਂ ਉਪਾਸਸਿ, ਕਿਂ ਨੁ ਤੇ ਅਯਂ ਹੋਤਿ.

ਏਵਂ ਤੁਟ੍ਠਚਿਤ੍ਤੇਨ ਨੇਸਾਦੇਨ ਪੁਟ੍ਠੋ ਸੁਮੁਖੋ ‘‘ਅਯਂ ਮੁਦੁਕੋ ਜਾਤੋ, ਇਦਾਨਿਸ੍ਸ ਭਿਯ੍ਯੋਸੋਮਤ੍ਤਾਯ ਮੁਦੁਭਾਵਤ੍ਥਂ ਮਮ ਗੁਣਂ ਦਸ੍ਸੇਸਾਮੀ’’ਤਿ ਚਿਨ੍ਤੇਤ੍ਵਾ ਆਹ –

੧੦੪.

‘‘ਰਾਜਾ ਮੇ ਸੋ ਦਿਜਾਮਿਤ੍ਤ, ਸੇਨਾਪਚ੍ਚਸ੍ਸ ਕਾਰਯਿਂ;

ਤਮਾਪਦੇ ਪਰਿਚ੍ਚਤੁਂ, ਨੁਸ੍ਸਹੇ ਵਿਹਗਾਧਿਪਂ.

੧੦੫.

‘‘ਮਹਾਗਣਾਯ ਭਤ੍ਤਾ ਮੇ, ਮਾ ਏਕੋ ਬ੍ਯਸਨਂ ਅਗਾ;

ਤਥਾ ਤਂ ਸਮ੍ਮ ਨੇਸਾਦ, ਭਤ੍ਤਾਯਂ ਅਭਿਤੋ ਰਮੇ’’ਤਿ.

ਤਤ੍ਥ ਨੁਸ੍ਸਹੇਤਿ ਨ ਸਮਤ੍ਥੋਮ੍ਹਿ. ਮਹਾਗਣਾਯਾਤਿ ਮਹਤੋ ਹਂਸਗਣਸ੍ਸ. ਮਾ ਏਕੋਤਿ ਮਾਦਿਸੇ ਸੇਵਕੇ ਵਿਜ੍ਜਮਾਨੇ ਮਾ ਏਕਕੋ ਬ੍ਯਸਨਂ ਅਗਾ. ਤਥਾ ਤਨ੍ਤਿ ਯਥਾ ਅਹਂ ਵਦਾਮਿ, ਤਥੇਵ ਤਂ. ਸਮ੍ਮਾਤਿ ਵਯਸ੍ਸ. ਭਤ੍ਤਾਯਂ ਅਭਿਤੋ ਰਮੇਤਿ ਭਤ੍ਤਾ ਅਯਂ ਮਮ, ਅਹਮਸ੍ਸ ਅਭਿਤੋ ਰਮੇ ਸਨ੍ਤਿਕੇ ਰਮਾਮਿ ਨ ਉਕ੍ਕਣ੍ਠਾਮੀਤਿ.

ਨੇਸਾਦੋ ਤਂ ਤਸ੍ਸ ਧਮ੍ਮਨਿਸ੍ਸਿਤਂ ਮਧੁਰਕਥਂ ਸੁਤ੍ਵਾ ਸੋਮਨਸ੍ਸਪ੍ਪਤ੍ਤੋ ਪਹਟ੍ਠਲੋਮੋ ‘‘ਸਚਾਹਂ ਏਤਂ ਸੀਲਾਦਿਗੁਣਸਂਯੁਤ੍ਤਂ ਹਂਸਰਾਜਾਨਂ ਵਧਿਸ੍ਸਾਮਿ, ਚਤੂਹਿ ਅਪਾਯੇਹਿ ਨ ਮੁਚ੍ਚਿਸ੍ਸਾਮਿ, ਰਾਜਾ ਮਂ ਯਦਿਚ੍ਛਤਿ, ਤਂ ਕਰੋਤੁ, ਅਹਮੇਤਂ ਸੁਮੁਖਸ੍ਸ ਦਾਯਂ ਕਤ੍ਵਾ ਵਿਸ੍ਸਜ੍ਜੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੦੬.

‘‘ਅਰਿਯਵਤ੍ਤਸਿ ਵਕ੍ਕਙ੍ਗ, ਯੋ ਪਿਣ੍ਡਮਪਚਾਯਸਿ;

ਚਜਾਮਿ ਤੇ ਤਂ ਭਤ੍ਤਾਰਂ, ਗਚ੍ਛਥੂਭੋ ਯਥਾਸੁਖ’’ਨ੍ਤਿ.

ਤਤ੍ਥ ਅਰਿਯਵਤ੍ਤਸੀਤਿ ਮਿਤ੍ਤਧਮ੍ਮਰਕ੍ਖਣਸਙ੍ਖਾਤੇਨ ਆਚਾਰਅਰਿਯਾਨਂ ਵਤ੍ਤੇਨ ਸਮਨ੍ਨਾਗਤੋਸਿ. ਪਿਣ੍ਡਮਪਚਾਯਸੀਤਿ ਭਤ੍ਤੁ ਸਨ੍ਤਿਕਾ ਲਦ੍ਧਂ ਪਿਣ੍ਡਂ ਸੇਨਾਪਤਿਟ੍ਠਾਨਂ ਪੂਜੇਸਿ. ਗਚ੍ਛਥੂਭੋਤਿ ਦ੍ਵੇਪਿ ਜਨਾ ਅਸ੍ਸੁਮੁਖੇ ਞਾਤਿਸਙ੍ਘੇ ਹਾਸਯਮਾਨਾ ਯਥਾਸੁਖਂ ਗਚ੍ਛਥਾਤਿ.

ਏਵਂ ਵਤ੍ਵਾ ਨੇਸਾਦੋ ਮੁਦੁਚਿਤ੍ਤੇਨ ਮਹਾਸਤ੍ਤਂ ਉਪਸਙ੍ਕਮਿਤ੍ਵਾ ਯਟ੍ਠਿਂ ਓਨਾਮੇਤ੍ਵਾ ਪਙ੍ਕਪਿਟ੍ਠੇ ਨਿਸੀਦਾਪੇਤ੍ਵਾ ਪਾਸਯਟ੍ਠਿਯਾ ਮੋਚੇਤ੍ਵਾ ਤਂ ਉਕ੍ਖਿਪਿਤ੍ਵਾ ਸਰਤੋ ਨੀਹਰਿਤ੍ਵਾ ਤਰੁਣਦਬ੍ਬਤਿਣਪਿਟ੍ਠੇ ਨਿਸੀਦਾਪੇਤ੍ਵਾ ਪਾਦੇ ਬਦ੍ਧਪਾਸਂ ਸਣਿਕਂ ਮੋਚੇਤ੍ਵਾ ਮਹਾਸਤ੍ਤੇ ਬਲਵਸਿਨੇਹਂ ਪਚ੍ਚੁਪਟ੍ਠਾਪੇਤ੍ਵਾ ਮੇਤ੍ਤਚਿਤ੍ਤੇਨ ਉਦਕਂ ਆਦਾਯ ਲੋਹਿਤਂ ਧੋਵਿਤ੍ਵਾ ਪੁਨਪ੍ਪੁਨਂ ਪਰਿਮਜ੍ਜਿ, ਅਥਸ੍ਸ ਮੇਤ੍ਤਾਨੁਭਾਵੇਨ ਸਿਰਾਯ ਸਿਰਾ, ਮਂਸੇਨ ਮਂਸਂ, ਚਮ੍ਮੇਨ ਚਮ੍ਮਂ ਘਟਿਤਂ, ਪਾਦੋ ਪਾਕਤਿਕੋ ਅਹੋਸਿ, ਇਤਰੇਨ ਨਿਬ੍ਬਿਸੇਸੋ. ਬੋਧਿਸਤ੍ਤੋ ਸੁਖਪ੍ਪਤ੍ਤੋ ਹੁਤ੍ਵਾ ਪਕਤਿਭਾਵੇਨ ਨਿਸੀਦਿ. ਸੁਮੁਖੋ ਅਤ੍ਤਾਨਂ ਨਿਸ੍ਸਾਯ ਰਞ੍ਞੋ ਸੁਖਿਤਭਾਵਂ ਦਿਸ੍ਵਾ ਸਞ੍ਜਾਤਸੋਮਨਸ੍ਸੋ ਚਿਨ੍ਤੇਸਿ – ‘‘ਇਮਿਨਾ ਅਮ੍ਹਾਕਂ ਮਹਾਉਪਕਾਰੋ ਕਤੋ, ਅਮ੍ਹੇਹਿ ਏਤਸ੍ਸ ਕਤੋ ਉਪਕਾਰੋ ਨਾਮ ਨਤ੍ਥਿ, ਸਚੇ ਏਸ ਰਾਜਰਾਜਮਹਾਮਤ੍ਤਾਨਂ ਅਤ੍ਥਾਯ ਅਮ੍ਹੇ ਗਣ੍ਹਿ, ਤੇਸਂ ਸਨ੍ਤਿਕਂ ਨੇਤ੍ਵਾ ਬਹੁਂ ਧਨਂ ਲਭਿਸ੍ਸਤਿ, ਸਚੇ ਅਤ੍ਤਨੋ ਅਤ੍ਥਾਯ ਗਣ੍ਹਿ, ਅਮ੍ਹੇ ਵਿਕ੍ਕਿਣਿਤ੍ਵਾ ਧਨਂ ਲਭਿਸ੍ਸਤੇਵ, ਪੁਚ੍ਛਿਸ੍ਸਾਮਿ ਤਾਵ ਨ’’ਨ੍ਤਿ. ਅਥ ਨਂ ਉਪਕਾਰਂ ਕਾਤੁਕਾਮਤਾਯ ਪੁਚ੍ਛਨ੍ਤੋ ਆਹ –

੧੦੭.

‘‘ਸਚੇ ਅਤ੍ਤਪ੍ਪਯੋਗੇਨ, ਓਹਿਤੋ ਹਂਸਪਕ੍ਖਿਨਂ;

ਪਟਿਗ੍ਗਣ੍ਹਾਮ ਤੇ ਸਮ੍ਮ, ਏਤਂ ਅਭਯਦਕ੍ਖਿਣਂ.

੧੦੮.

‘‘ਨੋ ਚੇ ਅਤ੍ਤਪ੍ਪਯੋਗੇਨ, ਓਹਿਤੋ ਹਂਸਪਕ੍ਖਿਨਂ;

ਅਨਿਸ੍ਸਰੋ ਮੁਞ੍ਚਮਮ੍ਹੇ, ਥੇਯ੍ਯਂ ਕਯਿਰਾਸਿ ਲੁਦ੍ਦਕਾ’’ਤਿ.

ਤਤ੍ਥ ਸਚੇਤਿ, ਸਮ੍ਮ ਨੇਸਾਦ, ਸਚੇ ਤਯਾ ਅਤ੍ਤਨੋ ਪਯੋਗੇਨ ਅਤ੍ਤਨੋ ਅਤ੍ਥਾਯ ਹਂਸਾਨਞ੍ਚੇਵ ਸੇਸਪਕ੍ਖੀਨਞ੍ਚ ਪਾਸੋ ਓਹਿਤੋ. ਅਨਿਸ੍ਸਰੋਤਿ ਅਨਿਸ੍ਸਰੋ ਹੁਤ੍ਵਾ ਅਮ੍ਹੇ ਮੁਞ੍ਚਨ੍ਤੋ ਯੇਨਾਸਿ ਆਣਤ੍ਤੋ, ਤਸ੍ਸਸਨ੍ਤਕਂ ਗਣ੍ਹਨ੍ਤੋ ਥੇਯ੍ਯਂ ਕਯਿਰਾਸਿ.

ਤਂ ਸੁਤ੍ਵਾ ਨੇਸਾਦੋ ‘‘ਨਾਹਂ ਤੁਮ੍ਹੇ ਅਤ੍ਤਨੋ ਅਤ੍ਥਾਯ ਗਣ੍ਹਿਂ, ਬਾਰਾਣਸਿਰਞ੍ਞਾ ਪਨ ਸਂਯਮੇਨ ਗਣ੍ਹਾਪਿਤੋਮ੍ਹੀ’’ਤਿ ਵਤ੍ਵਾ ਦੇਵਿਯਾ ਦਿਟ੍ਠਸੁਪਿਨਕਾਲਤੋ ਪਟ੍ਠਾਯ ਯਾਵ ਰਞ੍ਞਾ ਤੇਸਂ ਆਗਤਭਾਵਂ ਸੁਤ੍ਵਾ, ‘‘ਸਮ੍ਮ ਖੇਮਕ, ਏਕਂ ਵਾ ਦ੍ਵੇ ਵਾ ਹਂਸੇ ਗਣ੍ਹਿਤੁਂ ਵਾਯਮ, ਮਹਨ੍ਤਂ ਤੇ ਯਸਂ ਦਸ੍ਸਾਮੀ’’ਤਿ ਵਤ੍ਵਾ ਪਰਿਬ੍ਬਯਂ ਦਤ੍ਵਾ ਉਯ੍ਯੋਜਿਤਭਾਵੋ, ਤਾਵ ਸਬ੍ਬਂ ਪਵਤ੍ਤਿਂ ਆਰੋਚੇਸਿ. ਤਂ ਸੁਤ੍ਵਾ ਸੁਮੁਖੋ ‘‘ਇਮਿਨਾ ਨੇਸਾਦੇਨ ਅਤ੍ਤਨੋ ਜੀਵਿਤਂ ਅਗਣੇਤ੍ਵਾ ਅਮ੍ਹੇ ਵਿਸ੍ਸਜ੍ਜੇਨ੍ਤੇਨ ਦੁਕ੍ਕਰਂ ਕਤਂ, ਸਚੇ ਮਯਂ ਇਤੋ ਚਿਤ੍ਤਕੂਟਂ ਗਮਿਸ੍ਸਾਮ, ਨੇਵ ਧਤਰਟ੍ਠਰਞ੍ਞੋ ਪਞ੍ਞਾਨੁਭਾਵੋ, ਨ ਮਯ੍ਹਂ ਮਿਤ੍ਤਧਮ੍ਮੋ ਪਾਕਟੋ ਭਵਿਸ੍ਸਤਿ, ਨ ਲੁਦ੍ਦਪੁਤ੍ਤੋ ਮਹਨ੍ਤਂ ਯਸਂ ਲਚ੍ਛਤਿ, ਨ ਰਾਜਾ ਪਞ੍ਚਸੁ ਸੀਲੇਸੁ ਪਤਿਟ੍ਠਹਿਸ੍ਸਤਿ, ਨ ਦੇਵਿਯਾ ਮਨੋਰਥੋ ਮਤ੍ਥਕਂ ਪਾਪੁਣਿਸ੍ਸਤੀ’’ਤਿ ਚਿਨ੍ਤੇਤ੍ਵਾ, ‘‘ਸਮ੍ਮ, ਏਵਂ ਸਨ੍ਤੇ ਅਮ੍ਹੇ ਵਿਸ੍ਸਜ੍ਜੇਤੁਂ ਨ ਲਭਸਿ, ਰਞ੍ਞੋ ਨੋ ਦਸ੍ਸੇਹਿ, ਸੋ ਅਮ੍ਹੇ ਯਥਾਰੁਚਿਂ ਕਰਿਸ੍ਸਤੀ’’ਤਿ ਇਮਮਤ੍ਥਂ ਪਕਾਸੇਨ੍ਤੋ ਗਾਥਮਾਹ –

੧੦੯.

‘‘ਯਸ੍ਸ ਤ੍ਵਂ ਭਤਕੋ ਰਞ੍ਞੋ, ਕਾਮਂ ਤਸ੍ਸੇਵ ਪਾਪਯ;

ਤਤ੍ਥ ਸਂਯਮਨੋ ਰਾਜਾ, ਯਥਾਭਿਞ੍ਞਂ ਕਰਿਸ੍ਸਤੀ’’ਤਿ.

ਤਤ੍ਥ ਤਸ੍ਸੇਵਾਤਿ ਤਸ੍ਸੇਵ ਸਨ੍ਤਿਕਂ ਨੇਹਿ. ਤਤ੍ਥਾਤਿ ਤਸ੍ਮਿਂ ਰਾਜਨਿਵੇਸਨੇ. ਯਥਾਭਿਞ੍ਞਨ੍ਤਿ ਯਥਾਧਿਪ੍ਪਾਯਂ ਯਥਾਰੁਚਿਂ.

ਤਂ ਸੁਤ੍ਵਾ ਨੇਸਾਦੋ ‘‘ਮਾ ਵੋ ਭਦ੍ਦਨ੍ਤੇ ਰਾਜਦਸ੍ਸਨਂ ਰੁਚ੍ਚਿਤ੍ਥ, ਰਾਜਾਨੋ ਨਾਮ ਸਪ੍ਪਟਿਭਯਾ, ਕੀਲ਼ਾਹਂਸੇ ਵਾ ਵੋ ਕਰੇਯ੍ਯੁਂ ਮਾਰੇਯ੍ਯੁਂ ਵਾ’’ਤਿ ਆਹ. ਅਥ ਨਂ ਸੁਮੁਖੋ, ‘‘ਸਮ੍ਮ ਲੁਦ੍ਦਕ ਮਾ ਅਮ੍ਹਾਕਂ ਚਿਨ੍ਤਯਿ, ਅਹਂ ਤਾਦਿਸਸ੍ਸ ਕਕ੍ਖਲ਼ਸ੍ਸ ਧਮ੍ਮਕਥਾਯ ਮਦ੍ਦਵਂ ਜਨੇਸਿਂ, ਰਞ੍ਞੋ ਕਿਂ ਨ ਜਨੇਸ੍ਸਾਮਿ, ਰਾਜਾਨੋ ਹਿ ਪਣ੍ਡਿਤਾ ਸੁਭਾਸਿਤਦੁਬ੍ਭਾਸਿਤਞ੍ਞੁ, ਖਿਪ੍ਪਂ ਨੋ ਰਞ੍ਞੋ ਸਨ੍ਤਿਕਂ ਨੇਹਿ, ਨਯਨ੍ਤੋ ਚ ਮਾ ਬਨ੍ਧਨੇਨ ਨਯਿ, ਪੁਪ੍ਫਪਞ੍ਜਰੇ ਪਨ ਨਿਸੀਦਾਪੇਤ੍ਵਾ ਨੇਹਿ, ਪੁਪ੍ਫਪਞ੍ਜਰਂ ਕਰੋਨ੍ਤੋ ਧਤਰਟ੍ਠਸ੍ਸ ਮਹਨ੍ਤਂ ਸੇਤਪਦੁਮਸਞ੍ਛਨ੍ਨਂ, ਮਮ ਖੁਦ੍ਦਕਂ ਰਤ੍ਤਪਦੁਮਸਞ੍ਛਨ੍ਨਂ ਕਤ੍ਵਾ ਧਤਰਟ੍ਠਂ ਪੁਰਤੋ, ਮਮਂ ਪਚ੍ਛਤੋ ਨੀਚਤਰਂ ਕਤ੍ਵਾ ਆਦਾਯ ਖਿਪ੍ਪਂ ਨੇਤ੍ਵਾ ਰਞ੍ਞੋ ਦਸ੍ਸੇਹੀ’’ਤਿ ਆਹ. ਸੋ ਤਸ੍ਸ ਵਚਨਂ ਸੁਤ੍ਵਾ ‘‘ਸੁਮੁਖੋ ਰਾਜਾਨਂ ਦਿਸ੍ਵਾ ਮਮ ਮਹਨ੍ਤਂ ਯਸਂ ਦਾਤੁਕਾਮੋ ਭਵਿਸ੍ਸਤੀ’’ਤਿ ਸਞ੍ਜਾਤਸੋਮਨਸ੍ਸੋ ਮੁਦੂਹਿ ਲਤਾਹਿ ਪਞ੍ਜਰੇ ਕਤ੍ਵਾ ਪਦੁਮੇਹਿ ਛਾਦੇਤ੍ਵਾ ਵੁਤ੍ਤਨਯੇਨੇਵ ਤੇ ਗਹੇਤ੍ਵਾ ਅਗਮਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੦.

‘‘ਇਚ੍ਚੇਵਂ ਵੁਤ੍ਤੋ ਨੇਸਾਦੋ, ਹੇਮਵਣ੍ਣੇ ਹਰਿਤ੍ਤਚੇ;

ਉਭੋ ਹਤ੍ਥੇਹਿ ਸਙ੍ਗਯ੍ਹ, ਪਞ੍ਜਰੇ ਅਜ੍ਝਵੋਦਹਿ.

੧੧੧.

‘‘ਤੇ ਪਞ੍ਜਰਗਤੇ ਪਕ੍ਖੀ, ਉਭੋ ਭਸ੍ਸਰਵਣ੍ਣਿਨੇ;

ਸੁਮੁਖਂ ਧਤਰਟ੍ਠਞ੍ਚ, ਲੁਦ੍ਦੋ ਆਦਾਯ ਪਕ੍ਕਮੀ’’ਤਿ.

ਤਤ੍ਥ ਅਜ੍ਝਵੋਦਹੀਤਿ ਓਦਹਿ ਠਪੇਸਿ. ਭਸ੍ਸਰਵਣ੍ਣਿਨੇਤਿ ਪਭਾਸਮ੍ਪਨ੍ਨਵਣ੍ਣੇ.

ਏਵਂ ਲੁਦ੍ਦਸ੍ਸ ਤੇ ਆਦਾਯ ਪਕ੍ਕਮਨਕਾਲੇ ਧਤਰਟ੍ਠੋ ਪਾਕਹਂਸਰਾਜਧੀਤਰਂ ਅਤ੍ਤਨੋ ਭਰਿਯਂ ਸਰਿਤ੍ਵਾ ਸੁਮੁਖਂ ਆਮਨ੍ਤੇਤ੍ਵਾ ਕਿਲੇਸਵਸੇਨ ਵਿਲਪਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੨.

‘‘ਹਰੀਯਮਾਨੋ ਧਤਰਟ੍ਠੋ, ਸੁਮੁਖਂ ਏਤਦਬ੍ਰਵਿ;

ਬਾਲ਼੍ਹਂ ਭਾਯਾਮਿ ਸੁਮੁਖ, ਸਾਮਾਯ ਲਕ੍ਖਣੂਰੁਯਾ;

ਅਸ੍ਮਾਕਂ ਵਧਮਞ੍ਞਾਯ, ਅਥਤ੍ਤਾਨਂ ਵਧਿਸ੍ਸਤਿ.

੧੧੩.

‘‘ਪਾਕਹਂਸਾ ਚ ਸੁਮੁਖ, ਸੁਹੇਮਾ ਹੇਮਸੁਤ੍ਤਚਾ;

ਕੋਞ੍ਚੀ ਸਮੁਦ੍ਦਤੀਰੇਵ, ਕਪਣਾ ਨੂਨ ਰੁਚ੍ਛਤੀ’’ਤਿ.

ਤਤ੍ਥ ਭਾਯਾਮੀਤਿ ਮਰਣਤੋ ਭਾਯਾਮਿ. ਸਾਮਾਯਾਤਿ ਸੁਵਣ੍ਣਵਣ੍ਣਾਯ. ਲਕ੍ਖਣੂਰੁਯਾਤਿ ਲਕ੍ਖਣਸਮ੍ਪਨ੍ਨਊਰੁਯਾ. ਵਚਮਞ੍ਞਾਯਾਤਿ ਵਧਂ ਜਾਨਿਤ੍ਵਾ ‘‘ਮਮ ਪਿਯਸਾਮਿਕੋ ਮਾਰਿਤੋ’’ਤਿ ਸਞ੍ਞੀ ਹੁਤ੍ਵਾ. ਵਧਿਸ੍ਸਤੀਤਿ ਕਿਂ ਮੇ ਪਿਯਸਾਮਿਕੇ ਮਤੇ ਜੀਵਿਤੇਨਾਤਿ ਮਰਿਸ੍ਸਤਿ. ਪਾਕਹਂਸਾਤਿ ਪਾਕਹਂਸਰਾਜਧੀਤਾ. ਸੁਹੇਮਾਤਿ ਏਵਂਨਾਮਿਕਾ. ਹੇਮਸੁਤ੍ਤਚਾਤਿ ਹੇਮਸਦਿਸਸੁਨ੍ਦਰਤਚਾ. ਰੁਚ੍ਛਤੀਤਿ ਯਥਾ ਲੋਣਿਸਙ੍ਖਾਤਂ ਸਮੁਦ੍ਦਂ ਓਤਰਿਤ੍ਵਾ ਮਤੇ ਪਤਿਮ੍ਹਿ ਕੋਞ੍ਚੀ ਸਕੁਣਿਕਾ ਕਪਣਾ ਰੋਦਤਿ, ਏਵਂ ਨੂਨ ਸਾ ਰੋਦਿਸ੍ਸਤੀਤਿ.

ਤਂ ਸੁਤ੍ਵਾ ਸੁਮੁਖੋ ‘‘ਅਯਂ ਹਂਸਰਾਜਾ ਅਞ੍ਞੇ ਓਵਦਿਤੁਂ ਯੁਤ੍ਤੋ ਮਾਤੁਗਾਮਂ ਨਿਸ੍ਸਾਯ ਕਿਲੇਸਵਸੇਨ ਵਿਲਪਤਿ, ਉਦਕਸ੍ਸ ਆਦਿਤ੍ਤਕਾਲੋ ਵਿਯ ਵਤਿਯਾ ਉਟ੍ਠਾਯ ਕੇਦਾਰਖਾਦਨਕਾਲੋ ਵਿਯ ਚ ਜਾਤੋ, ਯਂਨੂਨਾਹਂ ਅਤ੍ਤਨੋ ਬਲੇਨ ਮਾਤੁਗਾਮਸ੍ਸ ਦੋਸਂ ਪਕਾਸੇਤ੍ਵਾ ਏਤਂ ਸਞ੍ਞਾਪੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੧੪.

‘‘ਏਵਂ ਮਹਨ੍ਤੋ ਲੋਕਸ੍ਸ, ਅਪ੍ਪਮੇਯ੍ਯੋ ਮਹਾਗਣੀ;

ਏਕਿਤ੍ਥਿਮਨੁਸੋਚੇਯ੍ਯ, ਨਯਿਦਂ ਪਞ੍ਞਵਤਾਮਿਵ.

੧੧੫.

‘‘ਵਾਤੋਵ ਗਨ੍ਧਮਾਦੇਤਿ, ਉਭਯਂ ਛੇਕਪਾਪਕਂ;

ਬਾਲੋ ਆਮਕਪਕ੍ਕਂਵ, ਲੋਲੋ ਅਨ੍ਧੋਵ ਆਮਿਸਂ.

੧੧੬.

‘‘ਅਵਿਨਿਚ੍ਛਯਞ੍ਞੁ ਅਤ੍ਥੇਸੁ, ਮਨ੍ਦੋਵ ਪਟਿਭਾਸਿ ਮਂ;

ਕਿਚ੍ਚਾਕਿਚ੍ਚਂ ਨ ਜਾਨਾਸਿ, ਸਮ੍ਪਤ੍ਤੋ ਕਾਲਪਰਿਯਾਯਂ.

੧੧੭.

‘‘ਅਡ੍ਢੁਮ੍ਮਤ੍ਤੋ ਉਦੀਰੇਸਿ, ਯੋ ਸੇਯ੍ਯਾ ਮਞ੍ਞਸਿਤ੍ਥਿਯੋ;

ਬਹੁਸਾਧਾਰਣਾ ਹੇਤਾ, ਸੋਣ੍ਡਾਨਂਵ ਸੁਰਾਘਰਂ.

੧੧੮.

‘‘ਮਾਯਾ ਚੇਤਾ ਮਰੀਚੀ ਚ, ਸੋਕਾ ਰੋਗਾ ਚੁਪਦ੍ਦਵਾ;

ਖਰਾ ਚ ਬਨ੍ਧਨਾ ਚੇਤਾ, ਮਚ੍ਚੁਪਾਸਾ ਗੁਹਾਸਯਾ;

ਤਾਸੁ ਯੋ ਵਿਸ੍ਸਸੇ ਪੋਸੋ, ਸੋ ਨਰੇਸੁ ਨਰਾਧਮੋ’’ਤਿ.

ਤਤ੍ਥ ਮਹਨ੍ਤੋਤਿ ਮਹਨ੍ਤੋ ਸਮਾਨੋ. ਲੋਕਸ੍ਸਾਤਿ ਹਂਸਲੋਕਸ੍ਸ. ਅਪ੍ਪਮੇਯ੍ਯੋਤਿ ਗੁਣੇਹਿ ਪਮੇਤੁਂ ਅਸਕ੍ਕੁਣੇਯ੍ਯੋ. ਮਹਾਗਣੀਤਿ ਮਹਨ੍ਤੇਨ ਗਣੇਨ ਸਮਨ੍ਨਾਗਤੋ ਗਣਸਤ੍ਥਾ. ਏਕਿਤ੍ਥਿਨ੍ਤਿ ਯਂ ਏਵਰੂਪੋ ਭਵਂ ਏਕਂ ਇਤ੍ਥਿਂ ਅਨੁਸੋਚੇਯ੍ਯ, ਇਦਂ ਅਨੁਸੋਚਨਂ ਨ ਪਞ੍ਞਵਤਂ ਇਵ, ਤੇਨਾਹਂ ਅਜ੍ਜ ਤਂ ਬਾਲੋਤਿ ਮਞ੍ਞਾਮੀਤਿ ਅਧਿਪ੍ਪਾਯੇਨੇਵਮਾਹ.

ਆਦੇਤੀਤਿ ਗਣ੍ਹਾਤਿ. ਛੇਕਪਾਪਕਨ੍ਤਿ ਸੁਨ੍ਦਰਾਸੁਨ੍ਦਰਂ. ਆਮਕਪਕ੍ਕਤਿ ਆਮਕਞ੍ਚ ਪਕ੍ਕਞ੍ਚ. ਲੋਲੋਤਿ ਰਸਲੋਲੋ. ਇਦਂ ਵੁਤ੍ਤਂ ਹੋਤਿ – ਮਹਾਰਾਜ, ਯਥਾ ਨਾਮ ਵਾਤੋ ਪਦੁਮਸਰਾਦੀਨਿ ਪਹਰਿਤ੍ਵਾ ਸੁਗਨ੍ਧਮ੍ਪਿ ਸਙ੍ਕਾਰਟ੍ਠਾਨਾਦੀਨਿ ਪਹਰਿਤ੍ਵਾ ਦੁਗ੍ਗਨ੍ਧਮ੍ਪੀਤਿ ਉਭਯਂ ਛੇਕਪਾਪਕਂ ਗਨ੍ਧਂ ਆਦਿਯਤਿ, ਯਥਾ ਚ ਬਾਲੋ ਕੁਮਾਰਕੋ ਅਮ੍ਬਜਮ੍ਬੂਨਂ ਹੇਟ੍ਠਾ ਨਿਸਿਨ੍ਨੋ ਹਤ੍ਥਂ ਪਸਾਰੇਤ੍ਵਾ ਪਤਿਤਪਤਿਤਂ ਆਮਕਮ੍ਪਿ ਪਕ੍ਕਮ੍ਪਿ ਫਲਂ ਗਹੇਤ੍ਵਾ ਖਾਦਤਿ, ਯਥਾ ਚ ਰਸਲੋਲੋ ਅਨ੍ਧੋ ਭਤ੍ਤੇ ਉਪਨੀਤੇ ਯਂਕਿਞ੍ਚਿ ਸਮਕ੍ਖਿਕਮ੍ਪਿ ਨਿਮ੍ਮਕ੍ਖਿਕਮ੍ਪਿ ਆਮਿਸਂ ਆਦਿਯਤਿ, ਏਵਂ ਇਤ੍ਥਿਯੋ ਨਾਮ ਕਿਲੇਸਵਸੇਨ ਅਡ੍ਢਮ੍ਪਿ ਦੁਗ੍ਗਤਮ੍ਪਿ ਕੁਲੀਨਮ੍ਪਿ ਅਕੁਲੀਨਮ੍ਪਿ ਅਭਿਰੂਪਮ੍ਪਿ ਵਿਰੂਪਮ੍ਪਿ ਗਣ੍ਹਨ੍ਤਿ ਭਜਨ੍ਤਿ, ਤਾਦਿਸਾਨਂ ਪਾਪਧਮ੍ਮਾਨਂ ਇਤ੍ਥੀਨਂ ਕਿਂਕਾਰਣਾ ਵਿਪ੍ਪਲਪਸਿ, ਮਹਾਰਾਜਾਤਿ.

ਅਤ੍ਥੇਸੂਤਿ ਕਾਰਣਾਕਾਰਣੇਸੁ. ਮਨ੍ਦੋਤਿ ਅਨ੍ਧਬਾਲੋ. ਪਟਿਭਾਸਿ ਮਨ੍ਤਿ ਮਮ ਉਪਟ੍ਠਾਸਿ. ਕਾਲਪਰਿਯਾਯਨ੍ਤਿ ਏਵਰੂਪਂ ਮਰਣਕਾਲਂ ਪਤ੍ਤੋ ‘‘ਇਮਸ੍ਮਿਂ ਕਾਲੇ ਇਦਂ ਕਤ੍ਤਬ੍ਬਂ, ਇਦਂ ਨਕਤ੍ਤਬ੍ਬਂ, ਇਦਂ ਵਤ੍ਤਬ੍ਬਂ, ਇਦਂ ਨ ਵਤ੍ਤਬ੍ਬ’’ਨ੍ਤਿ ਨ ਜਾਨਾਸਿ ਦੇਵਾਤਿ. ਅਡ੍ਢੁਮ੍ਮਤ੍ਤੋਤਿ ਅਡ੍ਢੁਮ੍ਮਤ੍ਤਕੋ ਮਞ੍ਞੇ ਹੁਤ੍ਵਾ. ਉਦੀਰੇਸੀਤਿ ਯਥਾ ਸੁਰਂ ਪਿਵਿਤ੍ਵਾ ਨਾਤਿਮਤ੍ਤੋ ਪੁਰਿਸੋ ਯਂ ਵਾ ਤਂ ਵਾ ਪਲਪਤਿ, ਏਵਂ ਪਲਪਸੀਤਿ ਅਤ੍ਥੋ. ਸੇਯ੍ਯਾਤਿ ਵਰਾ ਉਤ੍ਤਮਾ.

‘‘ਮਾਯਾ ਚਾ’’ਤਿਆਦੀਸੁ, ਦੇਵ, ਇਤ੍ਥਿਯੋ ਨਾਮੇਤਾ ਵਞ੍ਚਨਟ੍ਠੇਨ ਮਾਯਾ, ਅਗਯ੍ਹੁਪਗਟ੍ਠੇਨ ਮਰੀਚੀ, ਸੋਕਾਦੀਨਂ ਪਚ੍ਚਯਤ੍ਤਾ ਸੋਕਾ, ਰੋਗਾ, ਅਨੇਕਪ੍ਪਕਾਰਾ ਉਪਦ੍ਦਵਾ, ਕੋਧਾਦੀਹਿ ਥਦ੍ਧਭਾਵੇਨੇਵ ਖਰਾ. ਤਾ ਹਿ ਨਿਸ੍ਸਾਯ ਅਨ੍ਦੁਬਨ੍ਧਨਾਦੀਹਿ ਬਨ੍ਧਨਤੋ ਬਨ੍ਧਨਾ ਚੇਤਾ, ਇਤ੍ਥਿਯੋ ਨਾਮ ਸਰੀਰਗੁਹਾਸਯਵਸੇਨੇਵ ਮਚ੍ਚੁ ਨਾਮ ਏਤਾ, ਦੇਵਾਤਿ. ‘‘ਕਾਮਹੇਤੁ, ਕਾਮਨਿਦਾਨਂ, ਕਾਮਾਧਿਕਰਣਂ, ਕਾਮਾਨਮੇਵ ਹੇਤੁ ਰਾਜਾਨੋ ਚੋਰਂ ਗਹੇਤ੍ਵਾ’’ਤਿ (ਮ. ਨਿ. ੧.੧੬੮-੧੬੯) ਸੁਤ੍ਤੇਨਪੇਸ ਅਤ੍ਥੋ ਦੀਪੇਤਬ੍ਬੋ.

ਤਤੋ ਧਤਰਟ੍ਠੋ ਮਾਤੁਗਾਮੇ ਪਟਿਬਦ੍ਧਚਿਤ੍ਤਤਾਯ ‘‘ਤ੍ਵਂ ਮਾਤੁਗਾਮਸ੍ਸ ਗੁਣਂ ਨ ਜਾਨਾਸਿ, ਪਣ੍ਡਿਤਾ ਏਵ ਏਤਂ ਜਾਨਨ੍ਤਿ, ਨ ਹੇਤਾ ਗਰਹਿਤਬ੍ਬਾ’’ਤਿ ਦੀਪੇਨ੍ਤੋ ਆਹ –

੧੧੯.

‘‘ਯਂ ਵੁਦ੍ਧੇਹਿ ਉਪਞ੍ਞਾਤਂ, ਕੋ ਤਂ ਨਿਨ੍ਦਿਤੁਮਰਹਤਿ;

ਮਹਾਭੂਤਿਤ੍ਥਿਯੋ ਨਾਮ, ਲੋਕਸ੍ਮਿਂ ਉਦਪਜ੍ਜਿਸੁਂ.

੧੨੦.

‘‘ਖਿਡ੍ਡਾ ਪਣਿਹਿਤਾ ਤ੍ਯਾਸੁ, ਰਤਿ ਤ੍ਯਾਸੁ ਪਤਿਟ੍ਠਿਤਾ;

ਬੀਜਾਨਿ ਤ੍ਯਾਸੁ ਰੂਹਨ੍ਤਿ, ਯਦਿਦਂ ਸਤ੍ਤਾ ਪਜਾਯਰੇ;

ਤਾਸੁ ਕੋ ਨਿਬ੍ਬਿਦੇ ਪੋਸੋ, ਪਾਣਮਾਸਜ੍ਜ ਪਾਣਿਭਿ.

੧੨੧.

‘‘ਤ੍ਵਮੇਵ ਨਞ੍ਞੋ ਸੁਮੁਖ, ਥੀਨਂ ਅਤ੍ਥੇਸੁ ਯੁਞ੍ਜਸਿ;

ਤਸ੍ਸ ਤ੍ਯਜ੍ਜ ਭਯੇ ਜਾਤੇ, ਭੀਤੇ ਨ ਜਾਯਤੇ ਮਤਿ.

੧੨੨.

‘‘ਸਬ੍ਬੋ ਹਿ ਸਂਸਯਂ ਪਤ੍ਤੋ, ਭਯਂ ਭੀਰੂ ਤਿਤਿਕ੍ਖਤਿ;

ਪਣ੍ਡਿਤਾ ਚ ਮਹਨ੍ਤਾਨੋ, ਅਤ੍ਥੇ ਯੁਞ੍ਜਨ੍ਤਿ ਦੁਯ੍ਯੁਜੇ.

੧੨੩.

‘‘ਏਤਦਤ੍ਥਾਯ ਰਾਜਾਨੋ, ਸੂਰਮਿਚ੍ਛਨ੍ਤਿ ਮਨ੍ਤਿਨਂ;

ਪਟਿਬਾਹਤਿ ਯਂ ਸੂਰੋ, ਆਪਦਂ ਅਤ੍ਤਪਰਿਯਾਯਂ.

੧੨੪.

‘‘ਮਾ ਨੋ ਅਜ੍ਜ ਵਿਕਨ੍ਤਿਂਸੁ, ਰਞ੍ਞੋ ਸੂਦਾ ਮਹਾਨਸੇ;

ਤਥਾ ਹਿ ਵਣ੍ਣੋ ਪਤ੍ਤਾਨਂ, ਫਲਂ ਵੇਲ਼ੁਂਵ ਤਂ ਵਧਿ.

੧੨੫.

‘‘ਮੁਤ੍ਤੋਪਿ ਨ ਇਚ੍ਛਿ ਉਡ੍ਡੇਤੁਂ, ਸਯਂ ਬਨ੍ਧਂ ਉਪਾਗਮਿ;

ਸੋਪਜ੍ਜ ਸਂਸਯਂ ਪਤ੍ਤੋ, ਅਤ੍ਥਂ ਗਣ੍ਹਾਹਿ ਮਾ ਮੁਖ’’ਨ੍ਤਿ.

ਤਤ੍ਥ ਯਨ੍ਤਿ ਯਂ ਮਾਤੁਗਾਮਸਙ੍ਖਾਤਂ ਵਤ੍ਥੁ ਪਞ੍ਞਾਵੁਦ੍ਧੇਹਿ ਞਾਤਂ, ਤੇਸਮੇਵ ਪਾਕਟਂ, ਨ ਬਾਲਾਨਂ. ਮਹਾਭੂਤਾਤਿ ਮਹਾਗੁਣਾ ਮਹਾਨਿਸਂਸਾ. ਉਦਪਜ੍ਜਿਸੁਨ੍ਤਿ ਪਠਮਕਪ੍ਪਿਕਕਾਲੇ ਇਤ੍ਥਿਲਿਙ੍ਗਸ੍ਸੇਵ ਪਠਮਂ ਪਾਤੁਭੂਤਤ੍ਤਾ ਪਠਮਂ ਨਿਬ੍ਬਤ੍ਤਾਤਿ ਅਤ੍ਥੋ. ਤ੍ਯਾਸੂਤਿ ਸੁਮੁਖ ਤਾਸੁ ਇਤ੍ਥੀਸੁ ਕਾਯਵਚੀਖਿਡ੍ਡਾ ਚ ਪਣਿਹਿਤਾ ਓਹਿਤਾ ਠਪਿਤਾ, ਕਾਮਗੁਣਰਤਿ ਚ ਪਤਿਟ੍ਠਿਤਾ. ਬੀਜਾਨੀਤਿ ਬੁਦ੍ਧਪਚ੍ਚੇਕਬੁਦ੍ਧਅਰਿਯਸਾਵਕਚਕ੍ਕਵਤ੍ਤਿਆਦਿਬੀਜਾਨਿ ਤਾਸੁ ਰੁਹਨ੍ਤਿ. ਯਦਿਦਨ੍ਤਿ ਯੇ ਏਤੇ ਸਬ੍ਬੇਪਿ ਸਤ੍ਤਾ. ਪਜਾਯਰੇਤਿ ਸਬ੍ਬੇ ਤਾਸਞ੍ਞੇਵ ਕੁਚ੍ਛਿਮ੍ਹਿ ਸਂਵਦ੍ਧਾਤਿ ਦੀਪੇਤਿ. ਨਿਬ੍ਬਿਦੇਤਿ ਨਿਬ੍ਬਿਨ੍ਦੇਯ੍ਯ. ਪਾਣਮਾਸਜ੍ਜ ਪਾਣਿਭੀਤਿ ਅਤ੍ਤਨੋ ਪਾਣੇਹਿਪਿ ਤਾਸਂ ਪਾਣਂ ਆਸਾਦੇਤ੍ਵਾ ਅਤ੍ਤਨੋ ਜੀਵਿਤਂ ਚਜਨ੍ਤੋਪਿ ਤਾ ਲਭਿਤ੍ਵਾ ਕੋ ਨਿਬ੍ਬਿਨ੍ਦੇਯ੍ਯਾਤਿ ਅਤ੍ਥੋ.

ਨਞ੍ਞੋਤਿ ਨ ਅਞ੍ਞੋ, ਸੁਮੁਖ, ਮਯਾ ਚਿਤ੍ਤਕੂਟਤਲੇ ਹਂਸਗਣਮਜ੍ਝੇ ਨਿਸਿਨ੍ਨੇਨ ਤਂ ਅਦਿਸ੍ਵਾ ‘‘ਕਹਂ ਨੁ ਸੁਮੁਖੋ’’ਤਿ ਵੁਤ੍ਤੇ ‘‘ਏਸ ਮਾਤੁਗਾਮਂ ਗਹੇਤ੍ਵਾ ਕਞ੍ਚਨਗੁਹਾਯਂ ਉਤ੍ਤਮਰਤਿਂ ਅਨੁਭੋਤੀ’’ਤਿ ਵਦਨ੍ਤਿ, ਏਵਂ ਤ੍ਵਮੇਵ ਥੀਨਂ ਅਤ੍ਥੇਸੁ ਯੁਞ੍ਜਸਿ ਯੁਤ੍ਤਪਯੁਤ੍ਤੋ ਹੋਸਿ, ਨ ਅਞ੍ਞੋਤਿ ਅਤ੍ਥੋ. ਤਸ੍ਸ ਤ੍ਯਜ੍ਜਾਤਿ ਤਸ੍ਸ ਤੇ ਅਜ੍ਜ ਮਰਣਭਯੇ ਜਾਤੇ ਇਮਿਨਾ ਭੀਤੇਨ ਮਰਣਭਯੇਨ ਭੀਤੋ ਮਞ੍ਞੇ, ਅਯਂ ਮਾਤੁਗਾਮਸ੍ਸ ਦੋਸਦਸ੍ਸਨੇ ਨਿਪੁਣਾ ਮਤਿ ਜਾਯਤੇਤਿ ਅਧਿਪ੍ਪਾਯੇਨੇਵਮਾਹ.

ਸਬ੍ਬੋ ਹੀਤਿ ਯੋ ਹਿ ਕੋਚਿ. ਸਂਸਯਂ ਪਤ੍ਤੋਤਿ ਜੀਵਿਤਸਂਸਯਪ੍ਪਤ੍ਤੋ. ਭੀਰੂਤਿ ਭੀਰੂ ਹੁਤ੍ਵਾਪਿ ਭਯਂ ਅਧਿਵਾਸੇਤਿ. ਮਹਨ੍ਤਾਨੋਤਿ ਯੇ ਪਨ ਪਣ੍ਡਿਤਾ ਚ ਹੋਨ੍ਤਿ ਮਹਨ੍ਤੇ ਚ ਠਾਨੇ ਠਿਤਾ ਮਹਨ੍ਤਾਨੋ, ਤੇ ਦੁਯ੍ਯੁਜੇ ਅਤ੍ਥੇ ਯੁਞ੍ਜਨ੍ਤਿ ਘਟੇਨ੍ਤਿ ਵਾਯਮਨ੍ਤਿ, ਤਸ੍ਮਾ ‘‘ਮਾ ਭਾਯਿ, ਧੀਰੋ ਹੋਹੀ’’ਤਿ ਤਂ ਉਸ੍ਸਾਹੇਨ੍ਤੋ ਏਵਮਾਹ. ਆਪਦਨ੍ਤਿ ਸਾਮਿਨੋ ਆਗਤਂ ਆਪਦਂ ਏਸ ਸੂਰੋ ਪਟਿਬਾਹਤਿ, ਏਤਦਤ੍ਥਾਯ ਸੂਰਂ ਮਨ੍ਤਿਨਂ ਇਚ੍ਛਨ੍ਤਿ. ਅਤ੍ਤਪਰਿਯਾਯਨ੍ਤਿ ਅਤ੍ਤਨੋ ਪਰਿਤ੍ਤਾਣਮ੍ਪਿ ਚ ਕਾਤੁਂ ਸਕ੍ਕੋਤੀਤਿ ਅਧਿਪ੍ਪਾਯੋ.

ਵਿਕਨ੍ਤਿਂਸੂਤਿ ਛਿਨ੍ਦਿਂਸੁ. ਇਦਂ ਵੁਤ੍ਤਂ ਹੋਤਿ – ਸਮ੍ਮ ਸੁਮੁਖ, ਤ੍ਵਂ ਮਯਾ ਅਤ੍ਤਨੋ ਅਨਨ੍ਤਰੇ ਠਾਨੇ ਠਪਿਤੋ, ਤਸ੍ਮਾ ਯਥਾ ਅਜ੍ਜ ਰਞ੍ਞੋ ਸੂਦਾ ਅਮ੍ਹੇ ਮਂਸਤ੍ਥਾਯ ਨ ਵਿਕਨ੍ਤਿਂਸੁ, ਤਥਾ ਕਰੋਹਿ, ਤਾਦਿਸੋ ਹਿ ਅਮ੍ਹਾਕਂ ਪਤ੍ਤਵਣ੍ਣੋ. ਤਂ ਵਧੀਤਿ ਸ੍ਵਾਯਂ ਵਣ੍ਣੋ ਯਥਾ ਨਾਮ ਵੇਲ਼ੁਂ ਨਿਸ੍ਸਾਯ ਜਾਤਂ ਫਲਂ ਵੇਲ਼ੁਮੇਵ ਵਧਤਿ, ਤਥਾ ਮਾ ਤਂ ਵਧਿ, ਤਞ੍ਚ ਮਞ੍ਚ ਮਾ ਵਧੀਤਿ ਅਧਿਪ੍ਪਾਯੇਨੇਵਮਾਹ.

ਮੁਤ੍ਤੋਪੀਤਿ ਯਥਾਸੁਖਂ ਚਿਤ੍ਤਕੂਟਪਬ੍ਬਤਂ ਗਚ੍ਛਾਤਿ ਏਵਂ ਲੁਦ੍ਦਪੁਤ੍ਤੇਨ ਮਯਾ ਸਦ੍ਧਿਂ ਮੁਤ੍ਤੋ ਵਿਸ੍ਸਜ੍ਜਿਤੋ ਸਮਾਨੋਪਿ ਉਡ੍ਡਿਤੁਂ ਨ ਇਚ੍ਛਿ. ਸਯਨ੍ਤਿ ਰਾਜਾਨਂ ਦਟ੍ਠੁਕਾਮੋ ਹੁਤ੍ਵਾ ਸਯਮੇਵ ਬਨ੍ਧਂ ਉਪਗਤੋਤਿ ਏਵਮਿਦਂ ਅਮ੍ਹਾਕਂ ਭਯਂ ਤਂ ਨਿਸ੍ਸਾਯ ਆਗਤਂ. ਸੋਪਜ੍ਜਾਤਿ ਸੋਪਿ ਅਜ੍ਜ ਜੀਵਿਤਸਂਸਯਂ ਪਤ੍ਤੋ. ਅਤ੍ਥਂ ਗਣ੍ਹਾਹਿ ਮਾ ਮੁਖਨ੍ਤਿ ਇਦਾਨਿ ਅਮ੍ਹਾਕਂ ਮੁਞ੍ਚਨਕਾਰਣਂ ਗਣ੍ਹ, ਯਥਾ ਮੁਚ੍ਚਾਮ, ਤਥਾ ਵਾਯਮ, ‘‘ਵਾਤੋਵ ਗਨ੍ਧਮਾਦੇਤੀ’’ਤਿਆਦੀਨਿ ਵਦਨ੍ਤੋ ਇਤ੍ਥਿਗਰਹਤ੍ਥਾਯ ਮੁਖਂ ਮਾ ਪਸਾਰਯਿ.

ਏਵਂ ਮਹਾਸਤ੍ਤੋ ਮਾਤੁਗਾਮਂ ਵਣ੍ਣੇਤ੍ਵਾ ਸੁਮੁਖਂ ਅਪ੍ਪਟਿਭਾਣਂ ਕਤ੍ਵਾ ਤਸ੍ਸ ਅਨਤ੍ਤਮਨਭਾਵਂ ਵਿਦਿਤ੍ਵਾ ਇਦਾਨਿ ਨਂ ਪਗ੍ਗਣ੍ਹਨ੍ਤੋ ਗਾਥਮਾਹ –

੧੨੬.

‘‘ਸੋ ਤਂ ਯੋਗਂ ਪਯੁਞ੍ਜਸ੍ਸੁ, ਯੁਤ੍ਤਂ ਧਮ੍ਮੂਪਸਂਹਿਤਂ;

ਤਵ ਪਰਿਯਾਪਦਾਨੇਨ, ਮਮ ਪਾਣੇਸਨਂ ਚਰਾ’’ਤਿ.

ਤਤ੍ਥ ਸੋਤਿ, ਸਮ੍ਮ ਸੁਮੁਖ, ਸੋ ਤ੍ਵਂ. ਤਂ ਯੋਗਨ੍ਤਿ ਯਂ ਪੁਬ੍ਬੇ ‘‘ਅਹਂ ਯੋਗਂ ਪਯੁਞ੍ਜਿਸ੍ਸਂ, ਯੁਤ੍ਤਂ ਧਮ੍ਮੂਪਸਂਹਿਤ’’ਨ੍ਤਿ ਅਵਚਾਸਿ, ਤਂ ਇਦਾਨਿ ਪਯੁਞ੍ਜਸ੍ਸੁ. ਤਵ ਪਰਿਯਾਪਦਾਨੇਨਾਤਿ ਤਵ ਤੇਨ ਯੋਗੇਨ ਪਰਿਸੁਦ੍ਧੇਨ. ‘‘ਪਰਿਯੋਦਾਤੇਨਾ’’ਤਿਪਿ ਪਾਠੋ, ਪਰਿਤ੍ਤਾਣੇਨਾਤਿ ਅਤ੍ਥੋ, ਤਯਾ ਕਤਤ੍ਤਾ ਤਵ ਸਨ੍ਤਕੇਨ ਪਰਿਤ੍ਤਾਣੇਨ ਮਮ ਜੀਵਿਤਪਰਿਯੇਸਨਂ ਚਰਾਤਿ ਅਧਿਪ੍ਪਾਯੋ.

ਅਥ ਸੁਮੁਖੋ ‘‘ਅਯਂ ਅਤਿਵਿਯ ਮਰਣਭਯਭੀਤੋ ਮਮ ਞਾਣਬਲਂ ਨ ਜਾਨਾਤਿ, ਰਾਜਾਨਂ ਦਿਸ੍ਵਾ ਥੋਕਂ ਕਥਂ ਲਭਿਤ੍ਵਾ ਜਾਨਿਸ੍ਸਾਮਿ, ਅਸ੍ਸਾਸੇਸ੍ਸਾਮਿ ਤਾਵ ਨ’’ਨ੍ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੨੭.

‘‘ਮਾ ਭਾਯਿ ਪਤਤਂ ਸੇਟ੍ਠ, ਨ ਹਿ ਭਾਯਨ੍ਤਿ ਤਾਦਿਸਾ;

ਅਹਂ ਯੋਗਂ ਪਯੁਞ੍ਜਿਸ੍ਸਂ, ਯੁਤ੍ਤਂ ਧਮ੍ਮੂਪਸਂਹਿਤਂ;

ਮਮ ਪਰਿਯਾਪਦਾਨੇਨ, ਖਿਪ੍ਪਂ ਪਾਸਾ ਪਮੋਕ੍ਖਸੀ’’ਤਿ.

ਤਤ੍ਥ ਪਾਸਾਤਿ ਦੁਕ੍ਖਪਾਸਤੋ.

ਇਤਿ ਤੇਸਂ ਸਕੁਣਭਾਸਾਯ ਕਥੇਨ੍ਤਾਨਂ ਲੁਦ੍ਦਪੁਤ੍ਤੋ ਨ ਕਿਞ੍ਚਿ ਅਞ੍ਞਾਸਿ, ਕੇਵਲਂ ਪਨ ਤੇ ਕਾਜੇਨਾਦਾਯ ਬਾਰਾਣਸਿਂ ਪਾਵਿਸਿ. ਅਚ੍ਛਰਿਯਬ੍ਭੁਤਜਾਤੇਨ ਅਞ੍ਜਲਿਨਾ ਮਹਾਜਨੇਨ ਅਨੁਗ੍ਗਚ੍ਛਮਾਨੋ ਸੋ ਰਾਜਦ੍ਵਾਰਂ ਪਤ੍ਵਾ ਅਤ੍ਤਨੋ ਆਗਤਭਾਵਂ ਰਞ੍ਞੋ ਆਰੋਚਾਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੨੮.

‘‘ਸੋ ਲੁਦ੍ਦੋ ਹਂਸਕਾਜੇਨ, ਰਾਜਦ੍ਵਾਰਂ ਉਪਾਗਮਿ;

ਪਟਿਵੇਦੇਥ ਮਂ ਰਞ੍ਞੋ, ਧਤਰਟ੍ਠਾਯਮਾਗਤੋ’’ਤਿ.

ਤਤ੍ਥ ਪਟਿਵੇਦੇਥ ਮਨ੍ਤਿ ਖੇਮਕੋ ਆਗਤੋਤਿ ਏਵਂ ਮਂ ਰਞ੍ਞੋ ਨਿਵੇਦੇਥ. ਧਤਰਟ੍ਠਾਯਨ੍ਤਿ ਅਯਂ ਧਤਰਟ੍ਠੋ ਆਗਤੋਤਿ ਪਟਿਵੇਦੇਥ.

ਦੋਵਾਰਿਕੋ ਗਨ੍ਤ੍ਵਾ ਪਟਿਵੇਦੇਸਿ. ਰਾਜਾ ਸਞ੍ਜਾਤਸੋਮਨਸ੍ਸੋ ‘‘ਖਿਪ੍ਪਂ ਆਗਚ੍ਛਤੂ’’ਤਿ ਵਤ੍ਵਾ ਅਮਚ੍ਚਗਣਪਰਿਵੁਤੋ ਸਮੁਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲਙ੍ਕੇ ਨਿਸਿਨ੍ਨੋ ਖੇਮਕਂ ਹਂਸਕਾਜਂ ਆਦਾਯ ਮਹਾਤਲਂ ਅਭਿਰੁਲ਼੍ਹਂ ਦਿਸ੍ਵਾ ਸੁਵਣ੍ਣਵਣ੍ਣੇ ਹਂਸੇ ਓਲੋਕੇਤ੍ਵਾ ‘‘ਸਮ੍ਪੁਣ੍ਣੋ ਮੇ ਮਨੋਰਥੋ’’ਤਿ ਤਸ੍ਸ ਕਤ੍ਤਬ੍ਬਕਿਚ੍ਚਂ ਅਮਚ੍ਚੇ ਆਣਾਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੨੯.

‘‘ਤੇ ਦਿਸ੍ਵਾ ਪੁਞ੍ਞਸਙ੍ਕਾਸੇ, ਉਭੋ ਲਕ੍ਖਣਸਮ੍ਮਤੇ;

ਖਲੁ ਸਂਯਮਨੋ ਰਾਜਾ, ਅਮਚ੍ਚੇ ਅਜ੍ਝਭਾਸਥ.

੧੩੦.

‘‘ਦੇਥ ਲੁਦ੍ਦਸ੍ਸ ਵਤ੍ਥਾਨਿ, ਅਨ੍ਨਂ ਪਾਨਞ੍ਚ ਭੋਜਨਂ;

ਕਾਮਂਕਰੋ ਹਿਰਞ੍ਞਸ੍ਸ, ਯਾਵਨ੍ਤੋ ਏਸ ਇਚ੍ਛਤੀ’’ਤਿ.

ਤਤ੍ਥ ਪੁਞ੍ਞਸਙ੍ਕਾਸੇਤਿ ਅਤ੍ਤਨੋ ਪੁਞ੍ਞਸਦਿਸੇ. ਲਕ੍ਖਣਸਮ੍ਮਤੇਤਿ ਸੇਟ੍ਠਸਮ੍ਮਤੇ ਅਭਿਞ੍ਞਾਤੇ. ਖਲੂਤਿ ਨਿਪਾਤੋ, ਤਸ੍ਸ ‘‘ਤੇ ਖਲੁ ਦਿਸ੍ਵਾ’’ਤਿ ਪੁਰਿਮਪਦੇਨ ਸਮ੍ਬਨ੍ਧੋ. ‘‘ਦੇਥਾ’’ਤਿਆਦੀਨਿ ਰਾਜਾ ਪਸਨ੍ਨਾਕਾਰਂ ਕਰੋਨ੍ਤੋ ਆਹ. ਤਤ੍ਥ ਕਾਮਂਕਰੋ ਹਿਰਞ੍ਞਸ੍ਸਾਤਿ ਹਿਰਞ੍ਞਂ ਅਸ੍ਸ ਕਾਮਕਿਰਿਯਾ ਅਤ੍ਥੁ. ਯਾਵਨ੍ਤੋਤਿ ਯਤ੍ਤਕਂ ਏਸ ਇਚ੍ਛਤਿ, ਤਤ੍ਤਕਂ ਹਿਰਞ੍ਞਮਸ੍ਸ ਦੇਥਾਤਿ ਅਤ੍ਥੋ.

ਏਵਂ ਪਸਨ੍ਨਾਕਾਰਂ ਕਾਰੇਤ੍ਵਾ ਪੀਤਿਸੋਮਨਸ੍ਸਾਸਮੁਸ੍ਸਹਿਤੋ ‘‘ਗਚ੍ਛਥ ਨਂ ਅਲਙ੍ਕਰਿਤ੍ਵਾ ਆਨੇਥਾ’’ਤਿ ਆਹ. ਅਥ ਨਂ ਅਮਚ੍ਚਾ ਰਾਜਨਿਵੇਸਨਾ ਓਤਾਰੇਤ੍ਵਾ ਕਪ੍ਪਿਤਕੇਸਮਸ੍ਸੁਂ ਨ੍ਹਾਤਾਨੁਲਿਤ੍ਤਂ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਕਤ੍ਵਾ ਰਞ੍ਞੋ ਦਸ੍ਸੇਸੁਂ. ਅਥਸ੍ਸ ਰਾਜਾ ਸਂਵਚ੍ਛਰੇ ਸਤਸਹਸ੍ਸੁਟ੍ਠਾਨਕੇ ਦ੍ਵਾਦਸ ਗਾਮੇ ਆਜਞ੍ਞਯੁਤ੍ਤਂ ਰਥਂ ਅਲਙ੍ਕਤਮਹਾਗੇਹਞ੍ਚਾਤਿ ਮਹਨ੍ਤਂ ਯਸਂ ਦਾਪੇਸਿ. ਸੋ ਮਹਨ੍ਤਂ ਯਸਂ ਲਭਿਤ੍ਵਾ ਅਤ੍ਤਨੋ ਕਮ੍ਮਂ ਪਕਾਸੇਤੁਂ ‘‘ਨ ਤੇ, ਦੇਵ, ਮਯਾ ਯੋ ਵਾ ਸੋ ਵਾ ਹਂਸੋ ਆਨੀਤੋ, ਅਯਂ ਪਨ ਨਵੁਤਿਯਾ ਹਂਸਸਹਸ੍ਸਾਨਂ ਰਾਜਾ ਧਤਰਟ੍ਠੋ ਨਾਮ, ਅਯਂ ਸੇਨਾਪਤਿ ਸੁਮੁਖੋ ਨਾਮਾ’’ਤਿ ਆਹ. ਅਥ ਨਂ ਰਾਜਾ ‘‘ਕਥਂ ਤੇ, ਸਮ੍ਮ, ਏਤੇ ਗਹਿਤਾ’’ਤਿ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੧.

‘‘ਦਿਸ੍ਵਾ ਲੁਦ੍ਦਂ ਪਸਨ੍ਨਤ੍ਤਂ, ਕਾਸਿਰਾਜਾ ਤਦਬ੍ਰਵਿ;

ਯਦ੍ਯਾਯਂ ਸਮ੍ਮ ਖੇਮਕ, ਪੁਣ੍ਣਾ ਹਂਸੇਹਿ ਤਿਟ੍ਠਤਿ.

੧੩੨.

‘‘ਕਥਂ ਰੁਚਿਮਜ੍ਝਗਤਂ, ਪਾਸਹਤ੍ਥੋ ਉਪਾਗਮਿ;

ਓਕਿਣ੍ਣਂ ਞਾਤਿਸਙ੍ਘੇਹਿ, ਨਿਮ੍ਮਜ੍ਝਿਮਂ ਕਥਂ ਗਹੀ’’ਤਿ.

ਤਤ੍ਥ ਪਸਨ੍ਨਤ੍ਤਨ੍ਤਿ ਪਸਨ੍ਨਭਾਵਂ ਸੋਮਨਸ੍ਸਪ੍ਪਤ੍ਤਂ. ਯਦ੍ਯਾਯਨ੍ਤਿ, ਸਮ੍ਮ ਖੇਮਕ, ਯਦਿ ਅਯਂ ਅਮ੍ਹਾਕਂ ਪੋਕ੍ਖਰਣੀ ਨਵੁਤਿਹਂਸਸਹਸ੍ਸੇਹਿ ਪੁਣ੍ਣਾ ਤਿਟ੍ਠਤਿ. ਕਥਂ ਰੁਚਿਮਜ੍ਝਗਤਨ੍ਤਿ ਏਵਂ ਸਨ੍ਤੇ ਤ੍ਵਂ ਤੇਸਂ ਰੁਚੀਨਂ ਪਿਯਦਸ੍ਸਨਾਨਂ ਹਂਸਾਨਂ ਮਜ੍ਝਗਤਂ ਏਤਂ ਞਾਤਿਸਙ੍ਘੇਹਿ ਓਕਿਣ੍ਣਂ. ਨਿਮ੍ਮਜ੍ਝਿਮਨ੍ਤਿ ਨੇਵ ਮਜ੍ਝਿਮਂ ਨੇਵ ਕਨਿਟ੍ਠਂ ਉਤ੍ਤਮਂ ਹਂਸਰਾਜਾਨਂ ਕਥਂ ਪਾਸਹਤ੍ਥੋ ਉਪਾਗਮਿ ਕਥਂ ਗਣ੍ਹੀਤਿ.

ਸੋ ਤਸ੍ਸ ਕਥੇਨ੍ਤੋ ਆਹ –

੧੩੩.

‘‘ਅਜ੍ਜ ਮੇ ਸਤ੍ਤਮਾ ਰਤ੍ਤਿ, ਅਦਨਾਨਿ ਉਪਾਸਤੋ;

ਪਦਮੇਤਸ੍ਸ ਅਨ੍ਵੇਸਂ, ਅਪ੍ਪਮਤ੍ਤੋ ਘਟਸ੍ਸਿਤੋ.

੧੩੪.

‘‘ਅਥਸ੍ਸ ਪਦਮਦ੍ਦਕ੍ਖਿਂ, ਚਰਤੋ ਅਦਨੇਸਨਂ;

ਤਤ੍ਥਾਹਂ ਓਦਹਿਂ ਪਾਸਂ, ਏਵਂ ਤਂ ਦਿਜਮਗ੍ਗਹਿ’’ਨ੍ਤਿ.

ਤਤ੍ਥ ਅਦਨਾਨੀਤਿ ਆਦਾਨਾਨਿ, ਗੋਚਰਗ੍ਗਹਣਟ੍ਠਾਨਾਨੀਤਿ ਅਤ੍ਥੋ, ਅਯਮੇਵ ਵਾ ਪਾਠੋ. ਉਪਾਸਤੋਤਿ ਉਪਗਚ੍ਛਨ੍ਤਸ੍ਸ. ਪਦਨ੍ਤਿ ਗੋਚਰਭੂਮਿਯਂ ਅਕ੍ਕਨ੍ਤਪਦਂ. ਘਟਸ੍ਸਿਤੋਤਿ ਚਾਟਿਪਞ੍ਜਰੇ ਨਿਸ੍ਸਿਤੋ ਹੁਤ੍ਵਾ. ਅਥਸ੍ਸਾਤਿ ਅਥ ਛਟ੍ਠੇ ਦਿਵਸੇ ਏਤਸ੍ਸ ਅਦਨੇਸਨਂ ਚਰਨ੍ਤਸ੍ਸ ਪਦਂ ਅਦ੍ਦਕ੍ਖਿਂ. ਏਵਂ ਤਨ੍ਤਿ ਏਵਂ ਤਂ ਦਿਜਂ ਅਗ੍ਗਹਿਨ੍ਤਿ ਸਬ੍ਬਂ ਗਹਿਤੋਪਾਯਂ ਆਚਿਕ੍ਖਿ.

ਤਂ ਸੁਤ੍ਵਾ ਰਾਜਾ ‘‘ਅਯਂ ਦ੍ਵਾਰੇ ਠਤ੍ਵਾ ਪਟਿਵੇਦੇਨ੍ਤੋਪਿ ਧਤਰਟ੍ਠਸ੍ਸੇਵਾਗਮਨਂ ਪਟਿਵੇਦੇਸਿ, ਇਦਾਨਿਪਿ ਏਤਂ ਏਕਮੇਵ ਗਣ੍ਹਿਨ੍ਤਿ ਵਦਤਿ, ਕਿਂ ਨੁ ਖੋ ਏਤ੍ਥ ਕਾਰਣ’’ਨ੍ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੩੫.

‘‘ਲੁਦ੍ਦ ਦ੍ਵੇ ਇਮੇ ਸਕੁਣਾ, ਅਥ ਏਕੋਤਿ ਭਾਸਸਿ;

ਚਿਤ੍ਤਂ ਨੁ ਤੇ ਵਿਪਰਿਯਤ੍ਤਂ, ਅਦੁ ਕਿਂ ਨੁ ਜਿਗੀਸਸੀ’’ਤਿ.

ਤਤ੍ਥ ਵਿਪਰਿਯਤ੍ਤਨ੍ਤਿ ਵਿਪਲ੍ਲਤ੍ਥਂ. ਅਦੁ ਕਿਂ ਨੁ ਜਿਗੀਸਸੀਤਿ ਉਦਾਹੁ ਕਿਂ ਨੁ ਚਿਨ੍ਤੇਸਿ, ਕਿਂ ਇਤਰਂ ਗਹੇਤ੍ਵਾ ਅਞ੍ਞਸ੍ਸ ਦਾਤੁਕਾਮੋ ਹੁਤ੍ਵਾ ਚਿਨ੍ਤੇਸੀਤਿ ਪੁਚ੍ਛਤਿ.

ਤਤੋ ਲੁਦ੍ਦੋ ‘‘ਨ ਮੇ, ਦੇਵ, ਚਿਤ੍ਤਂ ਵਿਪਲ੍ਲਤ੍ਥਂ, ਨਾਪਿ ਅਹਂ ਇਤਰਂ ਅਞ੍ਞਸ੍ਸ ਦਾਤੁਕਾਮੋ, ਅਪਿਚ ਖੋ ਪਨ ਮਯਾ ਓਹਿਤੇ ਪਾਸੇ ਏਕੋਵ ਬਦ੍ਧੋ’’ਤਿ ਆਵਿ ਕਰੋਨ੍ਤੋ ਆਹ –

੧੩੬.

‘‘ਯਸ੍ਸ ਲੋਹਿਤਕਾ ਤਾਲਾ, ਤਪਨੀਯਨਿਭਾ ਸੁਭਾ;

ਉਰਂ ਸਂਹਚ੍ਚ ਤਿਟ੍ਠਨ੍ਤਿ, ਸੋ ਮੇ ਬਨ੍ਧਂ ਉਪਾਗਮਿ.

੧੩੭.

‘‘ਅਥਾਯਂ ਭਸ੍ਸਰੋ ਪਕ੍ਖੀ, ਅਬਦ੍ਧੋ ਬਦ੍ਧਮਾਤੁਰਂ;

ਅਰਿਯਂ ਬ੍ਰੁਵਾਨੋ ਅਟ੍ਠਾਸਿ, ਚਜਨ੍ਤੋ ਮਾਨੁਸਿਂ ਗਿਰ’’ਨ੍ਤਿ.

ਤਤ੍ਥ ਲੋਹਿਤਕਾਤਿ ਰਤ੍ਤਵਣ੍ਣਾ. ਲਾਤਾਤਿ ਰਾਜਿਯੋ. ਉਰਂ ਸਂਹਚ੍ਚਾਤਿ ਉਰਂ ਆਹਚ੍ਚ. ਇਦਂ ਵੁਤ੍ਤਂ ਹੋਤਿ – ਮਹਾਰਾਜ, ਯਸ੍ਸੇਤਾ ਰਤ੍ਤਸੁਵਣ੍ਣਸਪ੍ਪਟਿਭਾਗਾ ਤਿਸ੍ਸੋ ਲੋਹਿਤਕਾ ਰਾਜਿਯੋ ਗੀਵਂ ਪਰਿਕ੍ਖਿਪਿਤ੍ਵਾ ਉਰਂ ਆਹਚ੍ਚ ਤਿਟ੍ਠਨ੍ਤਿ, ਸੋ ਏਕੋਵ ਮਮ ਪਾਸੇ ਬਨ੍ਧਂ ਉਪਾਗਤੋਤਿ. ਭਸ੍ਸਰੋਤਿ ਪਰਿਸੁਦ੍ਧੋ ਪਭਾਸਮ੍ਪਨ੍ਨੋ. ਆਤੁਰਨ੍ਤਿ ਗਿਲਾਨਂ ਦੁਕ੍ਖਿਤਂ ਅਟ੍ਠਾਸੀਤਿ.

ਅਥ ਧਤਰਟ੍ਠਸ੍ਸ ਬਦ੍ਧਭਾਵਂ ਞਤ੍ਵਾ ਨਿਵਤ੍ਤਿਤ੍ਵਾ ਏਤਂ ਸਮਸ੍ਸਾਸੇਤ੍ਵਾ ਮਮਾਗਮਨਕਾਲੇ ਚ ਪਚ੍ਚੁਗ੍ਗਮਨਂ ਕਤ੍ਵਾ ਆਕਾਸੇਯੇਵ ਮਯਾ ਸਦ੍ਧਿਂ ਮਧੁਰਪਟਿਸਨ੍ਥਾਰਂ ਕਤ੍ਵਾ ਮਨੁਸ੍ਸਭਾਸਾਯ ਧਤਰਟ੍ਠਸ੍ਸ ਗੁਣਂ ਕਥੇਨ੍ਤੋ ਅਟ੍ਠਾਸਿ, ਮਮ ਹਦਯਂ ਮੁਦੁਕਂ ਕਤ੍ਵਾ ਪੁਨ ਏਤਸ੍ਸੇਵ ਪੁਰਤੋ ਅਟ੍ਠਾਸਿ. ਅਥਾਹਂ, ਦੇਵ, ਸੁਮੁਖਸ੍ਸ ਸੁਭਾਸਿਤਂ ਸੁਤ੍ਵਾ ਪਸਨ੍ਨਚਿਤ੍ਤੋ ਧਤਰਟ੍ਠਂ ਵਿਸ੍ਸਜ੍ਜੇਸਿਂ, ਇਤਿ ਧਤਰਟ੍ਠਸ੍ਸ ਪਾਸਤੋ ਮੋਕ੍ਖੋ, ਇਮੇ ਹਂਸੇ ਆਦਾਯ ਮਮ ਇਧਾਗਮਨਞ੍ਚ ਸੁਮੁਖੇਨੇਵ ਕਤਨ੍ਤਿ. ਏਵਂ ਸੋ ਸੁਮੁਖਸ੍ਸ ਗੁਣਕਥਂ ਕਥੇਸਿ. ਤਂ ਸੁਤ੍ਵਾ ਰਾਜਾ ਸੁਮੁਖਸ੍ਸ ਧਮ੍ਮਕਥਂ ਸੋਤੁਕਾਮੋ ਅਹੋਸਿ. ਲੁਦ੍ਦਪੁਤ੍ਤਸ੍ਸ ਸਕ੍ਕਾਰਂ ਕਰੋਨ੍ਤਸ੍ਸੇਵ ਸੂਰਿਯੋ ਅਤ੍ਥਙ੍ਗਤੋ, ਦੀਪਾ ਪਜ੍ਜਲਿਤਾ, ਬਹੂ ਖਤ੍ਤਿਯਾਦਯੋ ਸਨ੍ਨਿਪਤਿਤਾ, ਖੇਮਾ ਦੇਵੀਪਿ ਵਿਵਿਧਨਾਟਕਪਰਿਵਾਰਾ ਰਞ੍ਞੋ ਦਕ੍ਖਿਣਪਸ੍ਸੇ ਨਿਸੀਦਿ. ਤਸ੍ਮਿਂ ਖਣੇ ਰਾਜਾ ਸੁਮੁਖਂ ਕਥਾਪੇਤੁਕਾਮੋ ਗਾਥਮਾਹ –

੧੩੮.

‘‘ਅਥ ਕਿਂ ਦਾਨਿ ਸੁਮੁਖ, ਹਨੁਂ ਸਂਹਚ੍ਚ ਤਿਟ੍ਠਸਿ;

ਅਦੁ ਮੇ ਪਰਿਸਂ ਪਤ੍ਤੋ, ਭਯਾ ਭੀਤੋ ਨ ਭਾਸਸੀ’’ਤਿ.

ਤਤ੍ਥ ਹਨੁਂ ਸਂਹਚ੍ਚਾਤਿ ਮਧੁਰਕਥੋ ਕਿਰ ਤ੍ਵਂ, ਅਥ ਕਸ੍ਮਾ ਇਦਾਨਿ ਮੁਖਂ ਪਿਧਾਯ ਤਿਟ੍ਠਸਿ. ਅਦੂਤਿ ਕਚ੍ਚਿ. ਭਯਾ ਭੀਤੋਤਿ ਪਰਿਸਸਾਰਜ੍ਜਭਯੇਨ ਭੀਤੋ ਹੁਤ੍ਵਾ.

ਤਂ ਸੁਤ੍ਵਾ ਸੁਮੁਖੋ ਅਭੀਤਭਾਵਂ ਦਸ੍ਸੇਨ੍ਤੋ ਗਾਥਮਾਹ –

੧੩੯.

‘‘ਨਾਹਂ ਕਾਸਿਪਤਿ ਭੀਤੋ, ਓਗਯ੍ਹ ਪਰਿਸਂ ਤਵ;

ਨਾਹਂ ਭਯਾ ਨ ਭਾਸਿਸ੍ਸਂ, ਵਾਕ੍ਯਂ ਅਤ੍ਥਸ੍ਮਿਂ ਤਾਦਿਸੇ’’ਤਿ.

ਤਤ੍ਥ ਤਾਦਿਸੇਤਿ ਅਪਿਚ ਖੋ ਪਨ ਤਥਾਰੂਪੇ ਅਤ੍ਥੇ ਉਪ੍ਪਨ੍ਨੇ ਵਾਕ੍ਯਂ ਭਾਸਿਸ੍ਸਾਮੀਤਿ ਵਚਨੋਕਾਸਂ ਓਲੋਕੇਨ੍ਤੋ ਨਿਸਿਨ੍ਨੋਮ੍ਹੀਤਿ ਅਤ੍ਥੋ.

ਤਂ ਸੁਤ੍ਵਾ ਰਾਜਾ ਤਸ੍ਸ ਕਥਂ ਵਡ੍ਢੇਤੁਕਾਮਤਾਯ ਪਰਿਹਾਸਂ ਕਰੋਨ੍ਤੋ ਆਹ –

੧੪੦.

‘‘ਨ ਤੇ ਅਭਿਸਰਂ ਪਸ੍ਸੇ, ਨ ਰਥੇ ਨਪਿ ਪਤ੍ਤਿਕੇ;

ਨਾਸ੍ਸ ਚਮ੍ਮਂਵ ਕੀਟਂ ਵਾ, ਵਮ੍ਮਿਤੇ ਚ ਧਨੁਗ੍ਗਹੇ.

੧੪੧.

‘‘ਨ ਹਿਰਞ੍ਞਂ ਸੁਵਣ੍ਣਂ ਵਾ, ਨਗਰਂ ਵਾ ਸੁਮਾਪਿਤਂ;

ਓਕਿਣ੍ਣਪਰਿਖਂ ਦੁਗ੍ਗਂ, ਦਲ਼੍ਹਮਟ੍ਟਾਲਕੋਟ੍ਠਕਂ;

ਯਤ੍ਥ ਪਵਿਟ੍ਠੋ ਸੁਮੁਖ, ਭਾਯਿਤਬ੍ਬਂ ਨ ਭਾਯਸੀ’’ਤਿ.

ਤਤ੍ਥ ਅਭਿਸਰਨ੍ਤਿ ਰਕ੍ਖਣਤ੍ਥਾਯ ਪਰਿਵਾਰੇਤ੍ਵਾ ਠਿਤਂ ਆਵੁਧਹਤ੍ਥਂ ਪਰਿਸਂ ਤੇ ਨ ਪਸ੍ਸਾਮਿ. ਨਾਸ੍ਸਾਤਿ ਏਤ੍ਥ ਅਸ੍ਸਾਤਿ ਨਿਪਾਤਮਤ੍ਤਂ. ਚਮ੍ਮਨ੍ਤਿ ਸਰਪਰਿਤ੍ਤਾਣਚਮ੍ਮਂ. ਕੀਟਨ੍ਤਿ ਕੀਟਂ ਚਾਟਿਕਪਾਲਾਦਿ ਵੁਚ੍ਚਤਿ. ਚਾਟਿਕਪਾਲਹਤ੍ਥਾਪਿ ਤੇ ਸਨ੍ਤਿਕੇ ਨਤ੍ਥੀਤਿ ਦੀਪੇਤਿ. ਵਮ੍ਮਿਤੇਤਿ ਚਮ੍ਮਸਨ੍ਨਦ੍ਧੇ. ਨ ਹਿਰਞ੍ਞਨ੍ਤਿ ਯਂ ਨਿਸ੍ਸਾਯ ਨ ਭਾਯਸਿ, ਤਂ ਹਿਰਞ੍ਞਮ੍ਪਿ ਤੇ ਨ ਪਸ੍ਸਾਮਿ.

ਏਵਂ ਰਞ੍ਞਾ ‘‘ਕਿਂ ਤੇ ਅਭਾਯਨਕਾਰਣ’’ਨ੍ਤਿ ਵੁਤ੍ਤੇ ਤਂ ਕਥੇਨ੍ਤੋ ਆਹ –

੧੪੨.

‘‘ਨ ਮੇ ਅਭਿਸਰੇਨਤ੍ਥੋ, ਨਗਰੇਨ ਧਨੇਨ ਵਾ;

ਅਪਥੇਨ ਪਥਂ ਯਾਮ, ਅਨ੍ਤਲਿਕ੍ਖੇਚਰਾ ਮਯਂ.

੧੪੩.

‘‘ਸੁਤਾ ਚ ਪਣ੍ਡਿਤਾ ਤ੍ਯਮ੍ਹਾ, ਨਿਪੁਣਾ ਚਤ੍ਥਚਿਨ੍ਤਕਾ;

ਭਾਸੇਮਤ੍ਥਵਤਿਂ ਵਾਚਂ, ਸਚ੍ਚੇ ਚਸ੍ਸ ਪਤਿਟ੍ਠਿਤੋ.

੧੪੪.

‘‘ਕਿਞ੍ਚ ਤੁਯ੍ਹਂ ਅਸਚ੍ਚਸ੍ਸ, ਅਨਰਿਯਸ੍ਸ ਕਰਿਸ੍ਸਤਿ;

ਮੁਸਾਵਾਦਿਸ੍ਸ ਲੁਦ੍ਦਸ੍ਸ, ਭਣਿਤਮ੍ਪਿ ਸੁਭਾਸਿਤ’’ਨ੍ਤਿ.

ਤਤ੍ਥ ਅਭਿਸਰੇਨਾਤਿ ਆਰਕ੍ਖਪਰਿਵਾਰੇਨ. ਅਤ੍ਥੋਤਿ ਏਤੇਨ ਮਮ ਕਿਚ੍ਚਂ ਨਤ੍ਥਿ. ਕਸ੍ਮਾ? ਯਸ੍ਮਾ ਅਪਥੇਨ ਤੁਮ੍ਹਾਦਿਸਾਨਂ ਅਮਗ੍ਗੇਨ ਪਥਂ ਮਾਪੇਤ੍ਵਾ ਯਾਮ, ਆਕਾਸਚਾਰਿਨੋ ਮਯਨ੍ਤਿ. ਪਣ੍ਡਿਤਾ ਤ੍ਯਮ੍ਹਾਤਿ ਪਣ੍ਡਿਤਾਤਿ ਤਯਾ ਸੁਤਾਮ੍ਹਾ, ਤੇਨੇਵ ਕਾਰਣੇਨ ਅਮ੍ਹਾਕਂ ਸਨ੍ਤਿਕਾ ਧਮ੍ਮਂ ਸੋਤੁਕਾਮੋ ਕਿਰ ਨੋ ਗਾਹਾਪੇਸਿ. ਸਚ੍ਚੇ ਚਸ੍ਸਾਤਿ ਸਚੇ ਪਨ ਤ੍ਵਂ ਸਚ੍ਚੇ ਪਤਿਟ੍ਠਿਤੋ ਅਸ੍ਸ, ਅਤ੍ਥਵਤਿਂ ਕਾਰਣਨਿਸ੍ਸਿਤਂ ਵਾਚਂ ਭਾਸੇਯ੍ਯਾਮ. ਅਸਚ੍ਚਸ੍ਸਾਤਿ ਵਚੀਸਚ੍ਚਰਹਿਤਸ੍ਸ ਤਵ ਸੁਭਾਸਿਤਂ ਮੁਣ੍ਡਸ੍ਸ ਦਨ੍ਤਸੂਚਿ ਵਿਯ ਕਿਂ ਕਰਿਸ੍ਸਤਿ.

ਤਂ ਸੁਤ੍ਵਾ ਰਾਜਾ ‘‘ਕਸ੍ਮਾ ਮਂ ਮੁਸਾਵਾਦੀ ਅਨਰਿਯੋਤਿ ਵਦਸਿ, ਕਿਂ ਮਯਾ ਕਤ’’ਨ੍ਤਿ ਆਹ. ਅਥ ਨਂ ਸੁਮੁਖੋ ‘‘ਤੇਨ ਹਿ, ਮਹਾਰਾਜ, ਸੁਣਾਹੀ’’ਤਿ ਵਤ੍ਵਾ ਆਹ –

੧੪੫.

‘‘ਤਂ ਬ੍ਰਾਹ੍ਮਣਾਨਂ ਵਚਨਾ, ਇਮਂ ਖੇਮਮਕਾਰਯਿ;

ਅਭਯਞ੍ਚ ਤਯਾ ਘੁਟ੍ਠਂ, ਇਮਾਯੋ ਦਸਧਾ ਦਿਸਾ.

੧੪੬.

‘‘ਓਗਯ੍ਹ ਤੇ ਪੋਕ੍ਖਰਣਿਂ, ਵਿਪ੍ਪਸਨ੍ਨੋਦਕਂ ਸੁਚਿਂ;

ਪਹੂਤਂ ਚਾਦਨਂ ਤਤ੍ਥ, ਅਹਿਂਸਾ ਚੇਤ੍ਥ ਪਕ੍ਖਿਨਂ.

੧੪੭.

‘‘ਇਦਂ ਸੁਤ੍ਵਾਨ ਨਿਗ੍ਘੋਸਂ, ਆਗਤਮ੍ਹ ਤਵਨ੍ਤਿਕੇ;

ਤੇ ਤੇ ਬਦ੍ਧਸ੍ਮ ਪਾਸੇਨ, ਏਤਂ ਤੇ ਭਾਸਿਤਂ ਮੁਸਾ.

੧੪੮.

‘‘ਮੁਸਾਵਾਦਂ ਪੁਰਕ੍ਖਤ੍ਵਾ, ਇਚ੍ਛਾਲੋਭਞ੍ਚ ਪਾਪਕਂ;

ਉਭੋਸਨ੍ਧਿਮਤਿਕ੍ਕਮ੍ਮ, ਅਸਾਤਂ ਉਪਪਜ੍ਜਤੀ’’ਤਿ.

ਤਤ੍ਥ ਤਨ੍ਤਿ ਤ੍ਵਂ. ਖੇਮਨ੍ਤਿ ਏਵਂਨਾਮਿਕਂ ਪੋਕ੍ਖਰਣਿਂ. ਘੁਟ੍ਠਨ੍ਤਿ ਚਤੂਸੁ ਕਣ੍ਣੇਸੁ ਠਤ੍ਵਾ ਘੋਸਾਪਿਤਂ. ਦਸਧਾਤਿ ਇਮਾਸੁ ਦਸਧਾ ਠਿਤਾਸੁ ਦਿਸਾਸੁ ਤਯਾ ਅਭਯਂ ਘੁਟ੍ਠਂ. ਓਗਯ੍ਹਾਤਿ ਓਗਾਹੇਤ੍ਵਾ ਆਗਤਾਨਂ ਸਨ੍ਤਿਕਾ. ਪਹੂਤਂ ਚਾਦਨਨ੍ਤਿ ਪਹੂਤਞ੍ਚ ਪਦੁਮਪੁਪ੍ਫਸਾਲਿਆਦਿਕਂ ਅਦਨਂ. ਇਦਂ ਸੁਤ੍ਵਾਨਾਤਿ ਤੇਸਂ ਤਂ ਪੋਕ੍ਖਰਣਿਂ ਓਗਾਹੇਤ੍ਵਾ ਆਗਤਾਨਂ ਸਨ੍ਤਿਕਾ ਇਦਂ ਅਭਯਂ ਸੁਤ੍ਵਾ ਤਵਨ੍ਤਿਕੇ ਤਵ ਸਮੀਪੇ ਤਯਾ ਕਾਰਿਤਪੋਕ੍ਖਰਣਿਂ ਆਗਤਾਮ੍ਹਾਤਿ ਅਤ੍ਥੋ. ਤੇ ਤੇਤਿ ਤੇ ਮਯਂ ਤਵ ਪਾਸੇਨ ਬਦ੍ਧਾ. ਪੁਰਕ੍ਖਤ੍ਵਾਤਿ ਪੁਰਤੋ ਕਤ੍ਵਾ. ਇਚ੍ਛਾਲੋਭਨ੍ਤਿ ਇਚ੍ਛਾਸਙ੍ਖਾਤਂ ਪਾਪਕਂ ਲੋਭਂ. ਉਭੋਸਨ੍ਧਿਨ੍ਤਿ ਉਭਯਂ ਦੇਵਲੋਕੇ ਚ ਮਨੁਸ੍ਸਲੋਕੇ ਚ ਪਟਿਸਨ੍ਧਿਂ ਇਮੇ ਪਾਪਧਮ੍ਮੇ ਪੁਰਤੋ ਕਤ੍ਵਾ ਚਰਨ੍ਤੋ ਪੁਗ੍ਗਲੋ ਸੁਗਤਿਪਟਿਸਨ੍ਧਿਂ ਅਤਿਕ੍ਕਮਿਤ੍ਵਾ ਅਸਾਤਂ ਨਿਰਯਂ ਉਪਪਜ੍ਜਤੀਤਿ.

ਏਵਂ ਪਰਿਸਮਜ੍ਝੇਯੇਵ ਰਾਜਾਨਂ ਲਜ੍ਜਾਪੇਸਿ. ਅਥ ਨਂ ਰਾਜਾ ‘‘ਨਾਹਂ, ਸੁਮੁਖ, ਤੁਮ੍ਹੇ ਮਾਰੇਤ੍ਵਾ ਮਂਸਂ ਖਾਦਿਤੁਕਾਮੋ ਗਣ੍ਹਾਪੇਸਿਂ, ਪਣ੍ਡਿਤਭਾਵਂ ਪਨ ਵੋ ਸੁਤ੍ਵਾ ਸੁਭਾਸਿਤਂ ਸੋਤੁਕਾਮੋ ਗਣ੍ਹਾਪੇਸਿ’’ਨ੍ਤਿ ਪਕਾਸੇਨ੍ਤੋ ਆਹ –

੧੪੯.

‘‘ਨਾਪਰਜ੍ਝਾਮ ਸੁਮੁਖ, ਨਪਿ ਲੋਭਾਵ ਮਗ੍ਗਹਿਂ;

ਸੁਤਾ ਚ ਪਣ੍ਡਿਤਾਤ੍ਯਤ੍ਥ, ਨਿਪੁਣਾ ਅਤ੍ਥਚਿਨ੍ਤਕਾ.

੧੫੦.

‘‘ਅਪ੍ਪੇਵਤ੍ਥਵਤਿਂ ਵਾਚਂ, ਬ੍ਯਾਹਰੇਯ੍ਯੁਂ ਇਧਾਗਤਾ;

ਤਥਾ ਤਂ ਸਮ੍ਮ ਨੇਸਾਦੋ, ਵੁਤ੍ਤੋ ਸੁਮੁਖ ਮਗ੍ਗਹੀ’’ਤਿ.

ਤਤ੍ਥ ਨਾਪਰਜ੍ਝਾਮਾਤਿ ਮਾਰੇਨ੍ਤੋ ਅਪਰਜ੍ਝਤਿ ਨਾਮ, ਮਯਂ ਨ ਮਾਰੇਮ. ਲੋਭਾਵ ਮਗ੍ਗਹਿਨ੍ਤਿ ਮਂਸਂ ਖਾਦਿਤੁਕਾਮੋ ਹੁਤ੍ਵਾ ਲੋਭਾਵ ਤੁਮ੍ਹੇ ਨਾਹਂ ਅਗ੍ਗਹਿਂ. ਪਣ੍ਡਿਤਾਤ੍ਯਤ੍ਥਾਤਿ ਪਣ੍ਡਿਤਾਤਿ ਸੁਤਾ ਅਤ੍ਥ. ਅਤ੍ਥਚਿਨ੍ਤਕਾਤਿ ਪਟਿਚ੍ਛਨ੍ਨਾਨਂ ਅਤ੍ਥਾਨਂ ਚਿਨ੍ਤਕਾ. ਅਤ੍ਥਵਤਿਨ੍ਤਿ ਕਾਰਣਨਿਸ੍ਸਿਤਂ. ਤਥਾਤਿ ਤੇਨ ਕਾਰਣੇਨ. ਵੁਤ੍ਤੋਤਿ ਮਯਾ ਵੁਤ੍ਤੋ ਹੁਤ੍ਵਾ. ਸੁਮੁਖ, ਮਗ੍ਗਹੀਤਿ, ਸੁਮੁਖਾਤਿ ਆਲਪਤਿ, ਮ-ਕਾਰੋ ਪਦਸਨ੍ਧਿਕਰੋ. ਅਗ੍ਗਹੀਤਿ ਧਮ੍ਮਂ ਦੇਸੇਤੁਂ ਤੁਮ੍ਹੇ ਗਣ੍ਹਿ.

ਤਂ ਸੁਤ੍ਵਾ ਸੁਮੁਖੋ ‘‘ਸੁਭਾਸਿਤਂ ਸੋਤੁਕਾਮੇਨ ਅਯੁਤ੍ਤਂ ਤੇ ਕਤਂ, ਮਹਾਰਾਜਾ’’ਤਿ ਵਤ੍ਵਾ ਆਹ –

੧੫੧.

‘‘ਨੇਵ ਭੀਤਾ ਕਾਸਿਪਤਿ, ਉਪਨੀਤਸ੍ਮਿਂ ਜੀਵਿਤੇ;

ਭਾਸੇਮਤ੍ਥਵਤਿਂ ਵਾਚਂ, ਸਮ੍ਪਤ੍ਤਾ ਕਾਲਪਰਿਯਾਯਂ.

੧੫੨.

‘‘ਯੋ ਮਿਗੇਨ ਮਿਗਂ ਹਨ੍ਤਿ, ਪਕ੍ਖਿਂ ਵਾ ਪਨ ਪਕ੍ਖਿਨਾ;

ਸੁਤੇਨ ਵਾ ਸੁਤਂ ਕਿਣ੍ਯਾ, ਕਿਂ ਅਨਰਿਯਤਰਂ ਤਤੋ.

੧੫੩.

‘‘ਯੋ ਚਾਰਿਯਰੁਦਂ ਭਾਸੇ, ਅਨਰਿਯਧਮ੍ਮਵਸ੍ਸਿਤੋ;

ਉਭੋ ਸੋ ਧਂਸਤੇ ਲੋਕਾ, ਇਧ ਚੇਵ ਪਰਤ੍ਥ ਚ.

੧੫੪.

‘‘ਨ ਮਜ੍ਜੇਥ ਯਸਂ ਪਤ੍ਤੋ, ਨ ਬ੍ਯਾਧੇ ਪਤ੍ਤਸਂਸਯਂ;

ਵਾਯਮੇਥੇਵ ਕਿਚ੍ਚੇਸੁ, ਸਂਵਰੇ ਵਿਵਰਾਨਿ ਚ.

੧੫੫.

‘‘ਯੇ ਵੁਦ੍ਧਾ ਅਬ੍ਭਤਿਕ੍ਕਨ੍ਤਾ, ਸਮ੍ਪਤ੍ਤਾ ਕਾਲਪਰਿਯਾਯਂ;

ਇਧ ਧਮ੍ਮਂ ਚਰਿਤ੍ਵਾਨ, ਏਵਂਤੇ ਤਿਦਿਵਂ ਗਤਾ.

੧੫੬.

‘‘ਇਦਂ ਸੁਤ੍ਵਾ ਕਾਸਿਪਤਿ, ਧਮ੍ਮਮਤ੍ਤਨਿ ਪਾਲਯ;

ਧਤਰਟ੍ਠਞ੍ਚ ਮੁਞ੍ਚਾਹਿ, ਹਂਸਾਨਂ ਪਵਰੁਤ੍ਤਮ’’ਨ੍ਤਿ.

ਤਤ੍ਥ ਉਪਨੀਤਸ੍ਮਿਨ੍ਤਿ ਮਰਣਸਨ੍ਤਿਕਂ ਉਪਨੀਤੇ. ਕਾਲਪਰਿਯਾਯਨ੍ਤਿ ਮਰਣਕਾਲਵਾਰਂ ਸਮ੍ਪਤ੍ਤਾ ਸਮਾਨਾ ਨ ਭਾਸਿਸ੍ਸਾਮ. ਨ ਹਿ ਧਮ੍ਮਕਥਿਕਂ ਬਨ੍ਧਿਤ੍ਵਾ ਮਰਣਭਯੇਨ ਤਜ੍ਜੇਤ੍ਵਾ ਧਮ੍ਮਂ ਸੁਣਨ੍ਤਿ, ਅਯੁਤ੍ਤਂ ਤੇ ਕਤਨ੍ਤਿ. ਮਿਗੇਨਾਤਿ ਸੁਟ੍ਠੁ ਸਿਕ੍ਖਾਪਿਤੇਨ ਦੀਪਕਮਿਗੇਨ. ਹਨ੍ਤੀਤਿ ਹਨਤਿ. ਪਕ੍ਖਿਨਾਤਿ ਦੀਪਕਪਕ੍ਖਿਨਾ. ਸੁਤੇਨਾਤਿ ਖੇਮਂ ਨਿਬ੍ਭਯਨ੍ਤਿ ਵਿਸ੍ਸੁਤੇਨ ਦੀਪਕਮਿਗਪਕ੍ਖਿਸਦਿਸੇਨ ਪਦੁਮਸਰੇਨ. ਸੁਤਨ੍ਤਿ ‘‘ਪਣ੍ਡਿਤੋ ਚਿਤ੍ਰਕਥੀ’’ਤਿ ਏਵਂ ਸੁਤਂ ਧਮ੍ਮਕਥਿਕਂ. ਕਿਣ੍ਯਾਤਿ ‘‘ਧਮ੍ਮਂ ਸੋਸ੍ਸਾਮੀ’’ਤਿ ਪਾਸਬਨ੍ਧਨੇਨ ਯੋ ਕਿਣੇਯ੍ਯ ਹਿਂਸੇਯ੍ਯ ਬਾਧੇਯ੍ਯ. ਤਤੋਤਿ ਤੇਸਂ ਕਿਰਿਯਤੋ ਉਤ੍ਤਰਿ ਅਞ੍ਞਂ ਅਨਰਿਯਤਰਂ ਨਾਮ ਕਿਮਤ੍ਥਿ.

ਅਰਿਯਰੁਦਨ੍ਤਿ ਮੁਖੇਨ ਅਰਿਯਵਚਨਂ ਸੁਨ੍ਦਰਵਚਨਂ ਭਾਸਤਿ. ਅਨਰਿਯਧਮ੍ਮਵਸ੍ਸਿਤੋਤਿ ਕਮ੍ਮੇਨ ਅਨਰਿਯਧਮ੍ਮਂ ਅਵਸ੍ਸਿਤੋ. ਉਭੋਤਿ ਦੇਵਲੋਕਾ ਚ ਮਨੁਸ੍ਸਲੋਕਾ ਚਾਤਿ ਉਭਯਮ੍ਹਾ. ਇਧ ਚੇਵਾਤਿ ਇਧ ਉਪ੍ਪਨ੍ਨੋਪਿ ਪਰਤ੍ਥ ਉਪ੍ਪਨ੍ਨੋਪਿ ਏਵਰੂਪੋ ਦ੍ਵੀਹਿ ਸੁਗਤਿਲੋਕੇਹਿ ਧਂਸਿਤ੍ਵਾ ਨਿਰਯਮੇਵ ਉਪਪਜ੍ਜਤਿ. ਪਤ੍ਤਸਂਸਯਨ੍ਤਿ ਜੀਵਿਤਸਂਸਯਮਾਪਨ੍ਨਮ੍ਪਿ ਦੁਕ੍ਖਂ ਪਤ੍ਵਾ ਨ ਕਿਲਮੇਯ੍ਯ. ਸਂਵਰੇ ਵਿਵਰਾਨਿ ਚਾਤਿ ਅਤ੍ਤਨੋ ਛਿਦ੍ਦਾਨਿ ਦ੍ਵਾਰਾਨਿ ਸਂਵਰੇਯ੍ਯ ਪਿਦਹੇਯ੍ਯ. ਵੁਦ੍ਧਾਤਿ ਗੁਣਵੁਦ੍ਧਾ ਪਣ੍ਡਿਤਾ. ਅਬ੍ਭਤਿਕ੍ਕਨ੍ਤਾਤਿ ਇਮਂ ਮਨੁਸ੍ਸਲੋਕਂ ਅਤਿਕ੍ਕਨ੍ਤਾ. ਕਾਲਪਰਿਯਾਯਨ੍ਤਿ ਮਰਣਕਾਲਪਰਿਯਾਯਂ ਪਤ੍ਤਾ ਹੁਤ੍ਵਾ. ਏਵਂਤੇਤਿ ਏਵਂ ਏਤੇ. ਇਦਨ੍ਤਿ ਇਦਂ ਮਯਾ ਵੁਤ੍ਤਂ ਅਤ੍ਥਨਿਸ੍ਸਿਤਂ ਵਚਨਂ. ਧਮ੍ਮਨ੍ਤਿ ਪਵੇਣਿਯਧਮ੍ਮਮ੍ਪਿ ਸੁਚਰਿਤਧਮ੍ਮਮ੍ਪਿ.

ਤਂ ਸੁਤ੍ਵਾ ਰਾਜਾ ਆਹ –

੧੫੭.

‘‘ਆਹਰਨ੍ਤੁਦਕਂ ਪਜ੍ਜਂ, ਆਸਨਞ੍ਚ ਮਹਾਰਹਂ;

ਪਞ੍ਜਰਤੋ ਪਮੋਕ੍ਖਾਮਿ, ਧਤਰਟ੍ਠਂ ਯਸਸ੍ਸਿਨਂ.

੧੫੮.

‘‘ਤਞ੍ਚ ਸੇਨਾਪਤਿਂ ਧੀਰਂ, ਨਿਪੁਣਂ ਅਤ੍ਥਚਿਨ੍ਤਕਂ;

ਯੋ ਸੁਖੇ ਸੁਖਿਤੋ ਰਞ੍ਞੋ, ਦੁਕ੍ਖਿਤੇ ਹੋਤਿ ਦੁਕ੍ਖਿਤੋ.

੧੫੯.

‘‘ਏਦਿਸੋ ਖੋ ਅਰਹਤਿ, ਪਿਣ੍ਡਮਸ੍ਨਾਤੁ ਭਤ੍ਤੁਨੋ;

ਯਥਾਯਂ ਸੁਮੁਖੋ ਰਞ੍ਞੋ, ਪਾਣਸਾਧਾਰਣੋ ਸਖਾ’’ਤਿ.

ਤਤ੍ਥ ਉਦਕਨ੍ਤਿ ਪਾਦਧੋਵਨਂ. ਪਜ੍ਜਨ੍ਤਿ ਪਾਦਬ੍ਭਞ੍ਜਨਂ. ਸੁਖੇਤਿ ਸੁਖਮ੍ਹਿ ਸਤਿ.

ਰਞ੍ਞੋ ਵਚਨਂ ਸੁਤ੍ਵਾ ਤੇਸਂ ਆਸਨਾਨਿ ਆਹਰਿਤ੍ਵਾ ਤਤ੍ਥ ਨਿਸਿਨ੍ਨਾਨਂ ਗਨ੍ਧੋਦਕੇਨ ਪਾਦੇ ਧੋਵਿਤ੍ਵਾ ਸਤਪਾਕੇਨ ਤੇਲੇਨ ਅਬ੍ਭਞ੍ਜਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੬੦.

‘‘ਪੀਠਞ੍ਚ ਸਬ੍ਬਸੋਵਣ੍ਣਂ, ਅਟ੍ਠਪਾਦਂ ਮਨੋਰਮਂ;

ਮਟ੍ਠਂ ਕਾਸਿਕਮਤ੍ਥਨ੍ਨਂ, ਧਤਰਟ੍ਠੋ ਉਪਾਵਿਸਿ.

੧੬੧.

‘‘ਕੋਚ੍ਛਞ੍ਚ ਸਬ੍ਬਸੋਵਣ੍ਣਂ, ਵੇਯ੍ਯਗ੍ਘਪਰਿਸਿਬ੍ਬਿਤਂ;

ਸੁਮੁਖੋ ਅਜ੍ਝੁਪਾਵੇਕ੍ਖਿ, ਧਤਰਟ੍ਠਸ੍ਸਨਨ੍ਤਰਾ.

੧੬੨.

‘‘ਤੇਸਂ ਕਞ੍ਚਨਪਤ੍ਤਹਿ, ਪੁਥੂ ਆਦਾਯ ਕਾਸਿਯੋ;

ਹਂਸਾਨਂ ਅਭਿਹਾਰੇਸੁ, ਅਗ੍ਗਰਞ੍ਞੋ ਪਵਾਸਿਤ’’ਨ੍ਤਿ.

ਤਤ੍ਥ ਮਟ੍ਠਨ੍ਤਿ ਕਰਣਪਰਿਨਿਟ੍ਠਿਤਂ. ਕਾਸਿਕਮਤ੍ਥਨ੍ਨਨ੍ਤਿ ਕਾਸਿਕਵਤ੍ਥੇਨ ਅਤ੍ਥਤਂ. ਕੋਚ੍ਛਨ੍ਤਿ ਮਜ੍ਝੇ ਸਂਖਿਤ੍ਤਂ. ਵੇਯ੍ਯਗ੍ਘਪਰਿਸਿਬ੍ਬਿਤਨ੍ਤਿ ਬ੍ਯਗ੍ਘਚਮ੍ਮਪਰਿਸਿਬ੍ਬਿਤਂ ਮਙ੍ਗਲਦਿਵਸੇ ਅਗ੍ਗਮਹੇਸਿਯਾ ਨਿਸਿਨ੍ਨਪੀਠਂ. ਕਞ੍ਚਨਪਤ੍ਤੇਹੀਤਿ ਸੁਵਣ੍ਣਭਾਜਨੇਹਿ. ਪੁਥੂਤਿ ਬਹੂ ਜਨਾ. ਕਾਸਿਯੋਤਿ ਕਾਸਿਰਟ੍ਠਵਾਸਿਨੋ. ਅਭਿਹਾਰੇਸੁਨ੍ਤਿ ਉਪਨਾਮੇਸੁਂ. ਅਗ੍ਗਰਞ੍ਞੋ ਪਵਾਸਿਤਨ੍ਤਿ ਅਟ੍ਠਸਤਪਲਸੁਵਣ੍ਣਪਾਤਿਪਰਿਕ੍ਖਿਤ੍ਤਂ ਹਂਸਰਞ੍ਞੋ ਪਣ੍ਣਾਕਾਰਤ੍ਥਾਯ ਕਾਸਿਰਞ੍ਞਾ ਪੇਸਿਤਂ ਨਾਨਗ੍ਗਰਸਭੋਜਨਂ.

ਏਵਂ ਉਪਨੀਤੇ ਪਨ ਤਸ੍ਮਿਂ ਕਾਸਿਰਾਜਾ ਤੇਸਂ ਸਮ੍ਪਗ੍ਗਹਤ੍ਥਂ ਸਯਂ ਸੁਵਣ੍ਣਪਾਤਿਂ ਗਹੇਤ੍ਵਾ ਉਪਨਾਮੇਸਿ. ਤੇ ਤਤੋ ਮਧੁਲਾਜੇ ਖਾਦਿਤ੍ਵਾ ਮਧੁਰੋਦਕਞ੍ਚ ਪਿਵਿਂਸੁ. ਅਥ ਮਹਾਸਤ੍ਤੋ ਰਞ੍ਞੋ ਅਭਿਹਾਰਞ੍ਚ ਪਸਾਦਞ੍ਚ ਦਿਸ੍ਵਾ ਪਟਿਸਨ੍ਥਾਰਮਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੬੩.

‘‘ਦਿਸ੍ਵਾ ਅਭਿਹਟਂ ਅਗ੍ਗਂ, ਕਾਸਿਰਾਜੇਨ ਪੇਸਿਤਂ;

ਕੁਸਲੋ ਖਤ੍ਤਧਮ੍ਮਾਨਂ, ਤਤੋ ਪੁਚ੍ਛਿ ਅਨਨ੍ਤਰਾ.

੧੬੪.

‘‘ਕਚ੍ਚਿਨ੍ਨੁ ਭੋਤੋ ਕੁਸਲਂ, ਕਚ੍ਚਿ ਭੋਤੋ ਅਨਾਮਯਂ;

ਕਚ੍ਚਿ ਰਟ੍ਠਮਿਦਂ ਫੀਤਂ, ਧਮ੍ਮੇਨ ਮਨੁਸਾਸਸਿ.

੧੬੫.

‘‘ਕੁਸਲਞ੍ਚੇਵ ਮੇ ਹਂਸ, ਅਥੋ ਹਂਸ ਅਨਾਮਯਂ;

ਅਥੋ ਰਟ੍ਠਮਿਦਂ ਫੀਤਂ, ਧਮ੍ਮੇਨ ਮਨੁਸਾਸਹਂ.

੧੬੬.

‘‘ਕਚ੍ਚਿ ਭੋਤੋ ਅਮਚ੍ਚੇਸੁ, ਦੋਸੋ ਕੋਚਿ ਨ ਵਿਜ੍ਜਤਿ;

ਕਚ੍ਚਿ ਚ ਤੇ ਤਵਤ੍ਥੇਸੁ, ਨਾਵਕਙ੍ਖਨ੍ਤਿ ਜੀਵਿਤਂ.

੧੬੭.

‘‘ਅਥੋਪਿ ਮੇ ਅਮਚ੍ਚੇਸੁ, ਦੋਸੋ ਕੋਚਿ ਨ ਵਿਜ੍ਜਤਿ;

ਅਥੋਪਿ ਤੇ ਮਮਤ੍ਥੇਸੁ, ਨਾਵਕਙ੍ਖਨ੍ਤਿ ਜੀਵਿਤਂ.

੧੬੮.

‘‘ਕਚ੍ਚਿ ਤੇ ਸਾਦਿਸੀ ਭਰਿਯਾ, ਅਸ੍ਸਵਾ ਪਿਯਭਾਣਿਨੀ;

ਪੁਤ੍ਤਰੂਪਯਸੂਪੇਤਾ, ਤਵ ਛਨ੍ਦਵਸਾਨੁਗਾ.

੧੬੯.

‘‘ਅਥੋ ਮੇ ਸਾਦਿਸੀ ਭਰਿਯਾ, ਅਸ੍ਸਵਾ ਪਿਯਭਾਣਿਨੀ;

ਪੁਤ੍ਤਰੂਪਯਸੂਪੇਤਾ, ਮਮ ਛਨ੍ਦਵਸਾਨੁਗਾ.

੧੭੦.

‘‘ਕਚ੍ਚਿ ਰਟ੍ਠਂ ਅਨੁਪ੍ਪੀਲ਼ਂ, ਅਕੁਤੋਚਿਉਪਦ੍ਦਵਂ;

ਅਸਾਹਸੇਨ ਧਮ੍ਮੇਨ, ਸਮੇਨ ਮਨੁਸਾਸਸਿ.

੧੭੧.

‘‘ਅਥੋ ਰਟ੍ਠਂ ਅਨੁਪ੍ਪੀਲ਼ਂ, ਅਕੁਤੋਚਿਉਪਦ੍ਦਵਂ;

ਅਸਾਹਸੇਨ ਧਮ੍ਮੇਨ, ਸਮੇਨ ਮਨੁਸਾਸਹਂ.

੧੭੨.

‘‘ਕਚ੍ਚਿ ਸਨ੍ਤੋ ਅਪਚਿਤਾ, ਅਸਨ੍ਤੋ ਪਰਿਵਜ੍ਜਿਤਾ;

ਨੋ ਚੇ ਧਮ੍ਮਂ ਨਿਰਂਕਤ੍ਵਾ, ਅਧਮ੍ਮਮਨੁਵਤ੍ਤਸਿ.

੧੭੩.

‘‘ਸਨ੍ਤੋ ਚ ਮੇ ਅਪਚਿਤਾ, ਅਸਨ੍ਤੋ ਪਰਿਵਜ੍ਜਿਤਾ;

ਧਮ੍ਮਮੇਵਾਨੁਵਤ੍ਤਾਮਿ, ਅਧਮ੍ਮੋ ਮੇ ਨਿਰਂਕਤੋ.

੧੭੪.

‘‘ਕਚ੍ਚਿ ਨਾਨਾਗਤਂ ਦੀਘਂ, ਸਮਵੇਕ੍ਖਸਿ ਖਤ੍ਤਿਯ;

ਕਚ੍ਚਿਮਤ੍ਤੋ ਮਦਨੀਯੇ, ਪਰਲੋਕਂ ਨ ਸਨ੍ਤਸਿ.

੧੭੫.

‘‘ਨਾਹਂ ਅਨਾਗਤਂ ਦੀਘਂ, ਸਮਵੇਕ੍ਖਾਮਿ ਪਕ੍ਖਿਮ;

ਠਿਤੋ ਦਸਸੁ ਧਮ੍ਮੇਸੁ, ਪਰਲੋਕਂ ਨ ਸਨ੍ਤਸੇ.

੧੭੬.

‘‘ਦਾਨਂ ਸੀਲਂ ਪਰਿਚ੍ਚਾਗਂ, ਅਜ੍ਜਵਂ ਮਦ੍ਦਵਂ ਤਪਂ;

ਅਕ੍ਕੋਧਂ ਅਵਿਹਿਂਸਞ੍ਚ, ਖਨ੍ਤਿਞ੍ਚ ਅਵਿਰੋਧਨਂ.

੧੭੭.

‘‘ਇਚ੍ਚੇਤੇ ਕੁਸਲੇ ਧਮ੍ਮੇ, ਠਿਤੇ ਪਸ੍ਸਾਮਿ ਅਤ੍ਤਨਿ;

ਤਤੋ ਮੇ ਜਾਯਤੇ ਪੀਤਿ, ਸਾਮਨਸ੍ਸਞ੍ਚਨਪ੍ਪਕਂ.

੧੭੮.

‘‘ਸੁਮੁਖੋ ਚ ਅਚਿਨ੍ਤੇਤ੍ਵਾ, ਵਿਸਜ੍ਜਿ ਫਰੁਸਂ ਗਿਰਂ;

ਭਾਵਦੋਸਮਨਞ੍ਞਾਯ, ਅਸ੍ਮਾਕਾਯਂ ਵਿਹਙ੍ਗਮੋ.

੧੭੯.

‘‘ਸੋ ਕੁਦ੍ਧੋ ਫਰੁਸਂ ਵਾਚਂ, ਨਿਚ੍ਛਾਰੇਸਿ ਅਯੋਨਿਸੋ;

ਯਾਨਸ੍ਮੇਸੁ ਨ ਵਿਜ੍ਜਨ੍ਤਿ, ਨਯਿਦਂ ਪਞ੍ਞਵਤਾਮਿਵਾ’’ਤਿ.

ਤਤ੍ਥ ਦਿਸ੍ਵਾਤਿ ਤਂ ਬਹੁਂ ਅਗ੍ਗਪਾਨਭੋਜਨਂ ਦਿਸ੍ਵਾ. ਪੇਸਿਤਨ੍ਤਿ ਆਹਰਾਪੇਤ੍ਵਾ ਉਪਨੀਤਂ. ਖਤ੍ਤਧਮ੍ਮਾਨਨ੍ਤਿ ਪਠਮਕਾਰਣੇਸੁ ਪਟਿਸਨ੍ਥਾਰਧਮ੍ਮਾਨਂ. ਤਤੋ ਪੁਚ੍ਛਿ ਅਨਨ੍ਤਰਾਤਿ ਤਸ੍ਮਿਂ ਕਾਲੇ ‘‘ਕਚ੍ਚਿ ਨੁ, ਭੋਤੋ’’ਤਿ ਅਨੁਪਟਿਪਾਟਿਯਾ ਪੁਚ੍ਛਿ. ਤਾ ਪਨੇਤਾ ਛ ਗਾਥਾ ਹੇਟ੍ਠਾ ਵੁਤ੍ਤਤ੍ਥਾਯੇਵ. ਅਨੁਪ੍ਪੀਲ਼ਨ੍ਤਿ ਕਚ੍ਚਿ ਰਟ੍ਠਵਾਸਿਨੋ ਯਨ੍ਤੇ ਉਚ੍ਛੁਂ ਵਿਯ ਨ ਪੀਲ਼ੇਸੀਤਿ ਪੁਚ੍ਛਤਿ. ਅਕੁਤੋਚਿਉਪਦ੍ਦਵਨ੍ਤਿ ਕੁਤੋਚਿ ਅਨੁਪਦ੍ਦਵਂ. ਧਮ੍ਮੇਨ ਸਮੇਨ ਮਨੁਸਾਸਸੀਤਿ ਕਚ੍ਚਿ ਤਵ ਰਟ੍ਠਂ ਧਮ੍ਮੇਨ ਸਮੇਨ ਅਨੁਸਾਸਸਿ. ਸਨ੍ਤੋਤਿ ਸੀਲਾਦਿਗੁਣਸਂਯੁਤ੍ਤਾ ਸਪ੍ਪੁਰਿਸਾ. ਨਿਰਂਕਤ੍ਵਾਤਿ ਛਡ੍ਡੇਤ੍ਵਾ. ਨਾਨਾਗਤਂ ਦੀਘਨ੍ਤਿ ਅਨਾਗਤਂ ਅਤ੍ਤਨੋ ਜੀਵਿਤਪਵਤ੍ਤਿਂ ‘‘ਕਚ੍ਚਿ ਦੀਘ’’ਨ੍ਤਿ ਨ ਸਮਵੇਕ੍ਖਸਿ, ਆਯੁਸਙ੍ਖਾਰਾਨਂ ਪਰਿਤ੍ਤਭਾਵਂ ਜਾਨਾਸੀਤਿ ਪੁਚ੍ਛਤਿ. ਮਦਨੀਯੇਤਿ ਮਦਾਰਹੇ ਰੂਪਾਦਿਆਰਮ੍ਮਣੇ. ਨ ਸਨ੍ਤਸੀਤਿ ਨ ਭਾਯਸਿ. ਇਦਂ ਵੁਤ੍ਤਂ ਹੋਤਿ – ਕਚ੍ਚਿ ਰੂਪਾਦੀਸੁ ਕਾਮਗੁਣੇਸੁ ਅਮਤ੍ਤੋ ਅਪ੍ਪਮਤ੍ਤੋ ਹੁਤ੍ਵਾ ਦਾਨਾਦੀਨਂ ਕੁਸਲਾਨਂ ਕਤਤ੍ਤਾ ਪਰਲੋਕਂ ਨ ਭਾਯਸੀਤਿ.

ਦਸਸੂਤਿ ਦਸਸੁ ਰਾਜਧਮ੍ਮੇਸੁ. ਦਾਨਾਦੀਸੁ ਦਸਵਤ੍ਥੁਕਾ ਚੇਤਨਾ ਦਾਨਂ, ਪਞ੍ਚਸੀਲਦਸਸੀਲਾਨਿ ਸੀਲਂ, ਦੇਯ੍ਯਧਮ੍ਮਚਾਗੋ ਪਰਿਚ੍ਚਾਗੋ, ਉਜੁਭਾਵੋ ਅਜ੍ਜਵਂ, ਮੁਦੁਭਾਵੋ ਮਦ੍ਦਵਂ, ਉਪੋਸਥਕਮ੍ਮਂ ਤਪੋ, ਮੇਤ੍ਤਾਪੁਬ੍ਬਭਾਗੋ ਅਕ੍ਕੋਧੋ, ਕਰੁਣਾਪੁਬ੍ਬਭਾਗੋ ਅਵਿਹਿਂਸਾ, ਅਧਿਵਾਸਨਾ ਖਨ੍ਤਿ, ਅਵਿਰੋਧੋ ਅਵਿਰੋਧਨਂ. ਅਚਿਨ੍ਤੇਤ੍ਵਾਤਿ ਮਮ ਇਮਂ ਗੁਣਸਮ੍ਪਤ੍ਤਿਂ ਅਚਿਨ੍ਤੇਤ੍ਵਾ. ਭਾਵਦੋਸਨ੍ਤਿ ਚਿਤ੍ਤਦੋਸਂ. ਅਨਞ੍ਞਾਯਾਤਿ ਅਜਾਨਿਤ੍ਵਾ. ਅਸ੍ਮਾਕਞ੍ਹਿ ਚਿਤ੍ਤਦੋਸੋ ਨਾਮ ਨਤ੍ਥਿ, ਯਮੇਸ ਜਾਨੇਯ੍ਯ, ਤਂ ਅਜਾਨਿਤ੍ਵਾਵ ਫਰੁਸਂ ਕਕ੍ਖਲ਼ਂ ਗਿਰਂ ਵਿਸ੍ਸਜ੍ਜੇਸਿ. ਅਯੋਨਿਸੋਤਿ ਅਨੁਪਾਯੇਨ. ਯਾਨਸ੍ਮੇਸੂਤਿ ਯਾਨਿ ਵਜ੍ਜਾਨਿ ਅਮ੍ਹੇਸੁ ਨ ਵਿਜ੍ਜਨ੍ਤਿ, ਤਾਨਿ ਵਦਤਿ. ਨਯਿਦਨ੍ਤਿ ਤਸ੍ਮਾਸ੍ਸ ਇਦਂ ਵਚਨਂ ਪਞ੍ਞਵਤਂ ਇਵ ਨ ਹੋਤਿ, ਤੇਨੇਸ ਮਮ ਨ ਪਣ੍ਡਿਤੋ ਵਿਯ ਉਪਟ੍ਠਾਤਿ.

ਤਂ ਸੁਤ੍ਵਾ ਸੁਮੁਖੋ ‘‘ਮਯਾ ਗੁਣਸਮ੍ਪਨ੍ਨੋਵ ਰਾਜਾ ਅਪਸਾਦਿਤੋ, ਸੋ ਮੇ ਕੁਦ੍ਧੋ, ਖਮਾਪੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਆਹ –

੧੮੦.

‘‘ਅਤ੍ਥਿ ਮੇ ਤਂ ਅਤਿਸਾਰਂ, ਵੇਗੇਨ ਮਨੁਜਾਧਿਪ;

ਧਤਰਟ੍ਠੇ ਚ ਬਦ੍ਧਸ੍ਮਿਂ, ਦੁਕ੍ਖਂ ਮੇ ਵਿਪੁਲਂ ਅਹੁ.

੧੮੧.

‘‘ਤ੍ਵਂ ਨੋ ਪਿਤਾਵ ਪੁਤ੍ਤਾਨਂ, ਭੂਤਾਨਂ ਧਰਣੀਰਿਵ;

ਅਸ੍ਮਾਕਂ ਅਧਿਪਨ੍ਨਾਨਂ, ਖਮਸ੍ਸੁ ਰਾਜਕੁਞ੍ਜਰਾ’’ਤਿ.

ਤਤ੍ਥ ਅਤਿਸਾਰਨ੍ਤਿ ਪਕ੍ਖਲਿਤਂ. ਵੇਗੇਨਾਤਿ ਅਹਂ ਏਤਂ ਕਥਂ ਕਥੇਨ੍ਤੋ ਵੇਗੇਨ ਸਹਸਾ ਕਥੇਸਿਂ. ਦੁਕ੍ਖਨ੍ਤਿ ਚੇਤਸਿਕਂ ਦੁਕ੍ਖਂ ਮਮ ਵਿਪੁਲਂ ਅਹੋਸਿ, ਤਸ੍ਮਾ ਕੋਧਵਸੇਨ ਯਂ ਮਯਾ ਵੁਤ੍ਤਂ, ਤਂ ਮੇ ਖਮਥ, ਮਹਾਰਾਜਾਤਿ. ਪੁਤ੍ਤਾਨਨ੍ਤਿ ਤ੍ਵਂ ਅਮ੍ਹਾਕਂ ਪੁਤ੍ਤਾਨਂ ਪਿਤਾ ਵਿਯ. ਧਰਣੀਰਿਵਾਤਿ ਪਾਣਭੂਤਾਨਂ ਪਤਿਟ੍ਠਾ ਪਥਵੀ ਵਿਯ ਤ੍ਵਂ ਅਮ੍ਹਾਕਂ ਅਵਸ੍ਸਯੋ. ਅਧਿਪਨ੍ਨਾਨਨ੍ਤਿ ਦੋਸੇਨ ਅਪਰਾਧੇਨ ਅਜ੍ਝੋਤ੍ਥਟਾਨਂ ਖਮਸ੍ਸੂਤਿ ਇਦਂ ਸੋ ਆਸਨਾ ਓਰੁਯ੍ਹ ਪਕ੍ਖੇਹਿ ਅਞ੍ਜਲਿਂ ਕਤ੍ਵਾ ਆਹ.

ਅਥ ਨਂ ਰਾਜਾ ਆਲਿਙ੍ਗਿਤ੍ਵਾ ਆਦਾਯ ਸੁਵਣ੍ਣਪੀਠੇ ਨਿਸੀਦਾਪੇਤ੍ਵਾ ਅਚ੍ਚਯਦੇਸਨਂ ਪਟਿਗ੍ਗਣ੍ਹਨ੍ਤੋ ਆਹ –

੧੮੨.

‘‘ਏਤਂ ਤੇ ਅਨੁਮੋਦਾਮ, ਯਂ ਭਾਵਂ ਨ ਨਿਗੂਹਸਿ;

ਖਿਲਂ ਪਭਿਨ੍ਦਸਿ ਪਕ੍ਖਿ, ਉਜੁਕੋਸਿ ਵਿਹਙ੍ਗਮਾ’’ਤਿ.

ਤਤ੍ਥ ਅਨੁਮੋਦਾਮਾਤਿ ਏਤਂ ਤੇ ਦੋਸਂ ਖਮਾਮ. ਯਨ੍ਤਿ ਯਸ੍ਮਾ ਤ੍ਵਂ ਅਤ੍ਤਨੋ ਚਿਤ੍ਤਪਟਿਚ੍ਛਨ੍ਨਭਾਵਂ ਨ ਨਿਗੂਹਸਿ. ਖਿਲਨ੍ਤਿ ਚਿਤ੍ਤਖਿਲਂ ਚਿਤ੍ਤਖਾਣੁਕਂ.

ਇਦਞ੍ਚ ਪਨ ਵਤ੍ਵਾ ਰਾਜਾ ਮਹਾਸਤ੍ਤਸ੍ਸ ਧਮ੍ਮਕਥਾਯ ਸੁਮੁਖਸ੍ਸ ਚ ਉਜੁਭਾਵੇ ਪਸੀਦਿਤ੍ਵਾ ‘‘ਪਸਨ੍ਨੇਨ ਨਾਮ ਪਸਨ੍ਨਾਕਾਰੋ ਕਾਤਬ੍ਬੋ’’ਤਿ ਉਭਿਨ੍ਨਮ੍ਪਿ ਤੇਸਂ ਅਤ੍ਤਨੋ ਰਜ੍ਜਸਿਰਿਂ ਨਿਯ੍ਯਾਦੇਨ੍ਤੋ ਆਹ –

੧੮੩.

‘‘ਯਂ ਕਿਞ੍ਚਿ ਰਤਨਂ ਅਤ੍ਥਿ, ਕਾਸਿਰਾਜਨਿਵੇਸਨੇ;

ਰਜਤਂ ਜਾਤਰੂਪਞ੍ਚ, ਮੁਤ੍ਤਾ ਵੇਲ਼ੁਰਿਯਾ ਬਹੂ.

੧੮੪.

‘‘ਮਣਯੋ ਸਙ੍ਖਮੁਤ੍ਤਾ ਚ, ਵਤ੍ਥਕਂ ਹਰਿਚਨ੍ਦਨਂ;

ਅਜਿਨਂ ਦਨ੍ਤਭਣ੍ਡਞ੍ਚ, ਲੋਹਂ ਕਾਲ਼ਾਯਸਂ ਬਹੁਂ;

ਏਤਂ ਦਦਾਮਿ ਵੋ ਵਿਤ੍ਤਂ, ਇਸ੍ਸਰਂ ਵਿਸ੍ਸਜਾਮਿ ਵੋ’’ਤਿ.

ਤਤ੍ਥ ਮੁਤ੍ਤਾਤਿ ਵਿਦ੍ਧਾਵਿਦ੍ਧਮੁਤ੍ਤਾ. ਮਣਯੋਤਿ ਮਣਿਭਣ੍ਡਕਾਨਿ. ਸਙ੍ਖਮੁਤ੍ਤਾ ਚਾਤਿ ਦਕ੍ਖਿਣਾਵਟ੍ਟਸਙ੍ਖਰਤਨਞ੍ਚ ਆਮਲਕਵਟ੍ਟਮੁਤ੍ਤਰਤਨਞ੍ਚ. ਵਤ੍ਥਕਨ੍ਤਿ ਸੁਖੁਮਕਾਸਿਕਵਤ੍ਥਾਨਿ. ਅਜਿਨਨ੍ਤਿ ਅਜਿਨਮਿਗਚਮ੍ਮਂ. ਲੋਹਂ ਕਾਲ਼ਾਯਸਨ੍ਤਿ ਤਮ੍ਬਲੋਹਞ੍ਚ ਕਾਲ਼ਲੋਹਞ੍ਚ. ਇਸ੍ਸਰਨ੍ਤਿ ਕਞ੍ਚਨਮਾਲੇਨ ਸੇਤਚ੍ਛਤ੍ਤੇਨ ਸਦ੍ਧਿਂ ਦ੍ਵਾਦਸਯੋਜਨਿਕੇ ਬਾਰਾਣਸਿਨਗਰੇ ਰਜ੍ਜਂ.

ਏਵਞ੍ਚ ਪਨ ਵਤ੍ਵਾ ਉਭੋਪਿ ਤੇ ਸੇਤਚ੍ਛਤ੍ਤੇਨ ਪੂਜੇਤ੍ਵਾ ਰਜ੍ਜਂ ਪਟਿਚ੍ਛਾਪੇਸਿ. ਅਥ ਮਹਾਸਤ੍ਤੋ ਰਞ੍ਞਾ ਸਦ੍ਧਿਂ ਸਲ੍ਲਪਨ੍ਤੋ ਆਹ –

੧੮੫.

‘‘ਅਦ੍ਧਾ ਅਪਚਿਤਾ ਤ੍ਯਮ੍ਹਾ, ਸਕ੍ਕਤਾ ਚ ਰਥੇਸਭ;

ਧਮ੍ਮੇਸੁ ਵਤ੍ਤਮਾਨਾਨਂ, ਤ੍ਵਂ ਨੋ ਆਚਰਿਯੋ ਭਵ.

੧੮੬.

‘‘ਆਚਰਿਯ ਮਨੁਞ੍ਞਾਤਾ, ਤਯਾ ਅਨੁਮਤਾ ਮਯਂ;

ਤਂ ਪਦਕ੍ਖਿਣਤੋ ਕਤ੍ਵਾ, ਞਾਤਿਂ ਪਸ੍ਸੇਮੁਰਿਨ੍ਦਮਾ’’ਤਿ.

ਤਤ੍ਥ ਧਮ੍ਮੇਸੂਤਿ ਕੁਸਲਕਮ੍ਮਪਥਧਮ੍ਮੇਸੁ. ਆਚਰਿਯੋਤਿ ਤ੍ਵਂ ਅਮ੍ਹੇਹਿ ਬ੍ਯਤ੍ਤਤਰੋ, ਤਸ੍ਮਾ ਨੋ ਆਚਰਿਯੋ ਹੋਤਿ, ਅਪਿਚ ਦਸਨ੍ਨਂ ਰਾਜਧਮ੍ਮਾਨਂ ਕਥਿਤਤ੍ਤਾ ਸੁਮੁਖਸ੍ਸ ਦੋਸਂ ਦਸ੍ਸੇਤ੍ਵਾ ਅਚ੍ਚਯਪਟਿਗ੍ਗਹਣਸ੍ਸ ਕਤਤ੍ਤਾਪਿ ਤ੍ਵਂ ਅਮ੍ਹਾਕਂ ਆਚਰਿਯੋਵ, ਤਸ੍ਮਾ ਇਦਾਨਿਪਿ ਨੋ ਆਚਾਰਸਿਕ੍ਖਾਪਨੇਨ ਆਚਰਿਯੋ ਭਵਾਤਿ ਆਹ. ਪਸ੍ਸੇਮੁਰਿਨ੍ਦਮਾਤਿ ਪਸ੍ਸੇਮੁ ਅਰਿਨ੍ਦਮ.

ਸੋ ਤੇਸਂ ਗਮਨਂ ਅਨੁਜਾਨਿ, ਬੋਧਿਸਤ੍ਤਸ੍ਸਪਿ ਧਮ੍ਮਂ ਕਥੇਨ੍ਤਸ੍ਸੇਵ ਅਰੁਣਂ ਉਟ੍ਠਹਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੮੭.

‘‘ਸਬ੍ਬਰਤ੍ਤਿਂ ਚਿਨ੍ਤਯਿਤ੍ਵਾ, ਮਨ੍ਤਯਿਤ੍ਵਾ ਯਥਾਕਥਂ;

ਕਾਸਿਰਾਜਾ ਅਨੁਞ੍ਞਾਸਿ, ਹਂਸਾਨਂ ਪਵਰੁਤ੍ਤਮ’’ਨ੍ਤਿ.

ਤਤ੍ਥ ਯਥਾਕਥਨ੍ਤਿ ਯਂਕਿਞ੍ਚਿ ਅਤ੍ਥਂ ਤੇਹਿ ਸਦ੍ਧਿਂ ਚਿਨ੍ਤੇਤਬ੍ਬਂ ਮਨ੍ਤੇਤਬ੍ਬਞ੍ਚ, ਸਬ੍ਬਂ ਤਂ ਚਿਨ੍ਤੇਤ੍ਵਾ ਚ ਮਨ੍ਤੇਤ੍ਵਾ ਚਾਤਿ ਅਤ੍ਥੋ. ਅਨੁਞ੍ਞਾਸੀਤਿ ਗਚ੍ਛਥਾਤਿ ਅਨੁਞ੍ਞਾਸਿ.

ਏਵਂ ਤੇਨ ਅਨੁਞ੍ਞਾਤੋ ਬੋਧਿਸਤ੍ਤੋ ਰਾਜਾਨਂ ‘‘ਅਪ੍ਪਮਤ੍ਤੋ ਧਮ੍ਮੇਨ ਰਜ੍ਜਂ ਕਾਰੇਹੀ’’ਤਿ ਓਵਦਿਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਸਿ. ਰਾਜਾ ਤੇਸਂ ਕਞ੍ਚਨਭਾਜਨੇਹਿ ਮਧੁਲਾਜਞ੍ਚ ਮਧੁਰੋਦਕਞ੍ਚ ਉਪਨਾਮੇਤ੍ਵਾ ਨਿਟ੍ਠਿਤਾਹਾਰਕਿਚ੍ਚੇ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਬੋਧਿਸਤ੍ਤਂ ਸੁਵਣ੍ਣਚਙ੍ਕੋਟਕੇਨ ਸਯਂ ਉਕ੍ਖਿਪਿ, ਖੇਮਾ ਦੇਵੀ ਸੁਮੁਖਂ ਉਕ੍ਖਿਪਿ. ਅਥ ਨੇ ਸੀਹਪਞ੍ਜਰਂ ਉਗ੍ਘਾਟੇਤ੍ਵਾ ਸੂਰਿਯੁਗ੍ਗਮਨਵੇਲਾਯ ‘‘ਗਚ੍ਛਥ ਸਾਮਿਨੋ’’ਤਿ ਵਿਸ੍ਸਜ੍ਜੇਸੁਂ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੮੮.

‘‘ਤਤੋ ਰਤ੍ਯਾ ਵਿਵਸਾਨੇ, ਸੂਰਿਯੁਗ੍ਗਮਨਂ ਪਤਿ;

ਪੇਕ੍ਖਤੋ ਕਾਸਿਰਾਜਸ੍ਸ, ਭਵਨਾ ਤੇ ਵਿਗਾਹਿਸੁ’’ਨ੍ਤਿ.

ਤਤ੍ਥ ਵਿਗਾਹਿਸੁਨ੍ਤਿ ਆਕਾਸਂ ਪਕ੍ਖਨ੍ਦਿਂਸੁ.

ਤੇਸੁ ਮਹਾਸਤ੍ਤੋ ਸੁਵਣ੍ਣਚਙ੍ਕੋਟਕਤੋ ਉਪ੍ਪਤਿਤ੍ਵਾ ਆਕਾਸੇ ਠਤ੍ਵਾ ‘‘ਮਾ ਚਿਨ੍ਦਯਿ, ਮਹਾਰਾਜ, ਅਪ੍ਪਮਤ੍ਤੋ ਅਮ੍ਹਾਕਂ ਓਵਾਦੇ ਵਤ੍ਤੇਯ੍ਯਾਸੀ’’ਤਿ ਰਾਜਾਨਂ ਸਮਸ੍ਸਾਸੇਤ੍ਵਾ ਸੁਮੁਖਂ ਆਦਾਯ ਚਿਤ੍ਤਕੂਟਮੇਵ ਗਤੋ. ਤਾਨਿਪਿ ਖੋ ਨਵੁਤਿ ਹਂਸਸਹਸ੍ਸਾਨਿ ਕਞ੍ਚਨਗੁਹਤੋ ਨਿਕ੍ਖਮਿਤ੍ਵਾ ਪਬ੍ਬਤਤਲੇ ਨਿਸਿਨ੍ਨਾਨਿ ਤੇ ਆਗਚ੍ਛਨ੍ਤੇ ਦਿਸ੍ਵਾ ਪਚ੍ਚੁਗ੍ਗਨ੍ਤ੍ਵਾ ਪਰਿਵਾਰੇਸੁਂ. ਤੇ ਞਾਤਿਗਣਪਰਿਵੁਤਾ ਚਿਤ੍ਤਕੂਟਤਲਂ ਪਵਿਸਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੮੯.

‘‘ਤੇ ਅਰੋਗੇ ਅਨੁਪ੍ਪਤ੍ਤੇ, ਦਿਸ੍ਵਾਨ ਪਰਮੇ ਦਿਜੇ;

ਕੇਕਾਤਿ ਮਕਰੁਂ ਹਂਸਾ, ਪੁਥੁਸਦ੍ਦੋ ਅਜਾਯਥ.

੧੯੦.

‘‘ਤੇ ਪਤੀਤਾ ਪਮੁਤ੍ਤੇਨ, ਭਤ੍ਤੁਨਾ ਭਤ੍ਤੁਗਾਰਵਾ;

ਸਮਨ੍ਤਾ ਪਰਿਕਿਰਿਂਸੁ, ਅਣ੍ਡਜਾ ਲਦ੍ਧਪਚ੍ਚਯਾ’’ਤਿ.

ਏਵਂ ਪਰਿਵਾਰੇਤ੍ਵਾ ਚ ਪਨ ਤੇ ਹਂਸਾ ‘‘ਕਥਂ ਮੁਤ੍ਤੋਸਿ, ਮਹਾਰਾਜਾ’’ਤਿ ਪੁਚ੍ਛਿਂਸੁ. ਮਹਾਸਤ੍ਤੋ ਸੁਮੁਖਂ ਨਿਸ੍ਸਾਯ ਮੁਤ੍ਤਭਾਵਂ ਸਂਯਮਰਾਜਲੁਦ੍ਦਪੁਤ੍ਤੇਹਿ ਕਤਕਮ੍ਮਞ੍ਚ ਕਥੇਸਿ. ਤਂ ਸੁਤ੍ਵਾ ਤੁਟ੍ਠਾ ਹਂਸਗਣਾ ‘‘ਸੁਮੁਖੋ ਸੇਨਾਪਤਿ ਚ ਰਾਜਾ ਚ ਲੁਦ੍ਦਪੁਤ੍ਤੋ ਚ ਸੁਖਿਤਾ ਨਿਦ੍ਦੁਕ੍ਖਾ ਚਿਰਂ ਜੀਵਨ੍ਤੂ’’ਤਿ ਆਹਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੯੧.

‘‘ਏਵਂ ਮਿਤ੍ਤਵਤਂ ਅਤ੍ਥਾ, ਸਬ੍ਬੇ ਹੋਨ੍ਤਿ ਪਦਕ੍ਖਿਣਾ;

ਹਂਸਾ ਯਥਾ ਧਤਰਟ੍ਠਾ, ਞਾਤਿਸਙ੍ਘਮੁਪਾਗਮੁ’’ਨ੍ਤਿ.

ਤਂ ਚੂਲ਼ਹਂਸਜਾਤਕੇ ਵੁਤ੍ਤਤ੍ਥਮੇਵ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਆਨਨ੍ਦੋ ਮਮਤ੍ਥਾਯ ਅਤ੍ਤਨੋ ਜੀਵਿਤਂ ਪਰਿਚ੍ਚਜੀ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਲੁਦ੍ਦਪੁਤ੍ਤੋ ਛਨ੍ਨੋ ਅਹੋਸਿ, ਖੇਮਾ ਦੇਵੀ, ਖੇਮਾ ਭਿਕ੍ਖੁਨੀ, ਰਾਜਾ ਸਾਰਿਪੁਤ੍ਤੋ, ਸੁਮੁਖੋ ਆਨਨ੍ਦੋ, ਸੇਸਪਰਿਸਾ ਬੁਦ੍ਧਪਰਿਸਾ, ਧਤਰਟ੍ਠਹਂਸਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਹਾਹਂਸਜਾਤਕਵਣ੍ਣਨਾ ਦੁਤਿਯਾ.

[੫੩੫] ੩. ਸੁਧਾਭੋਜਨਜਾਤਕਵਣ੍ਣਨਾ

ਨੇਵ ਕਿਣਾਮਿ ਨਪਿ ਵਿਕ੍ਕਿਣਾਮੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਦਾਨਜ੍ਝਾਸਯਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਕਿਰ ਸਾਵਤ੍ਥਿਯਂ ਏਕੋ ਕੁਲਪੁਤ੍ਤੋ ਹੁਤ੍ਵਾ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ਪਸਨ੍ਨਚਿਤ੍ਤੋ ਪਬ੍ਬਜਿਤ੍ਵਾ ਸੀਲੇਸੁ ਪਰਿਪੂਰਕਾਰੀ ਧੁਤਙ੍ਗਗੁਣਸਮਨ੍ਨਾਗਤੋ ਸਬ੍ਰਹ੍ਮਚਾਰੀਸੁ ਪਵਤ੍ਤਮੇਤ੍ਤਚਿਤ੍ਤੋ ਦਿਵਸਸ੍ਸ ਤਿਕ੍ਖਤ੍ਤੁਂ ਬੁਦ੍ਧਧਮ੍ਮਸਙ੍ਘੁਪਟ੍ਠਾਨੇ ਅਪ੍ਪਮਤ੍ਤੋ ਆਚਾਰਸਮ੍ਪਨ੍ਨੋ ਦਾਨਜ੍ਝਾਸਯੋ ਅਹੋਸਿ. ਸਾਰਣੀਯਧਮ੍ਮਪੂਰਕੋ ਅਤ੍ਤਨਾ ਲਦ੍ਧਂ ਪਟਿਗ੍ਗਾਹਕੇਸੁ ਵਿਜ੍ਜਮਾਨੇਸੁ ਛਿਨ੍ਨਭਤ੍ਤੋ ਹੁਤ੍ਵਾਪਿ ਦੇਤਿਯੇਵ, ਤਸ੍ਮਾ ਤਸ੍ਸ ਦਾਨਜ੍ਝਾਸਯਦਾਨਾਭਿਰਤਭਾਵੋ ਭਿਕ੍ਖੁਸਙ੍ਘੇ ਪਾਕਟੋ ਅਹੋਸਿ. ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ, ‘‘ਆਵੁਸੋ, ਅਸੁਕੋ ਨਾਮ ਭਿਕ੍ਖੁ ਦਾਨਜ੍ਝਾਸਯੋ ਦਾਨਾਭਿਰਤੋ ਅਤ੍ਤਨਾ ਲਦ੍ਧਂ ਪਸਤਮਤ੍ਤਪਾਨੀਯਮ੍ਪਿ ਲੋਭਂ ਛਿਨ੍ਦਿਤ੍ਵਾ ਸਬ੍ਰਹ੍ਮਚਾਰੀਨਂ ਦੇਤਿ, ਬੋਧਿਸਤ੍ਤਸ੍ਸੇਵਸ੍ਸ ਅਜ੍ਝਾਸਯੋ’’ਤਿ. ਸਤ੍ਥਾ ਤਂ ਕਥਂ ਦਿਬ੍ਬਾਯ ਸੋਤਧਾਤੁਯਾ ਸੁਤ੍ਵਾ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਯਂ, ਭਿਕ੍ਖਵੇ, ਭਿਕ੍ਖੁ ਪੁਬ੍ਬੇ ਅਦਾਨਸੀਲੋ ਮਚ੍ਛਰੀ ਤਿਣਗ੍ਗੇਨ ਤੇਲਬਿਨ੍ਦੁਮ੍ਪਿ ਅਦਾਤਾ ਅਹੋਸਿ, ਅਥ ਨਂ ਅਹਂ ਦਮੇਤ੍ਵਾ ਨਿਬ੍ਬਿਸੇਵਨਂ ਕਤ੍ਵਾ ਦਾਨਫਲਂ ਵਣ੍ਣੇਤ੍ਵਾ ਦਾਨੇ ਪਤਿਟ੍ਠਾਪੇਸਿਂ, ਸੋ ‘ਪਸਤਮਤ੍ਤਂ ਉਦਕਮ੍ਪਿ ਲਭਿਤ੍ਵਾ ਅਦਤ੍ਵਾ ਨ ਪਿਵਿਸ੍ਸਾਮੀ’ਤਿ ਮਮ ਸਨ੍ਤਿਕੇ ਵਰਂ ਅਗ੍ਗਹੇਸਿ, ਤਸ੍ਸ ਫਲੇਨ ਦਾਨਜ੍ਝਾਸਯੋ ਦਾਨਾਭਿਰਤੋ ਜਾਤੋ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਏਕੋ ਗਹਪਤਿ ਅਡ੍ਢੋ ਅਹੋਸਿ ਅਸੀਤਿਕੋਟਿਵਿਭਵੋ. ਅਥਸ੍ਸ ਰਾਜਾ ਸੇਟ੍ਠਿਟ੍ਠਾਨਂ ਅਦਾਸਿ. ਸੋ ਰਾਜਪੂਜਿਤੋ ਨਾਗਰਜਾਨਪਦਪੂਜਿਤੋ ਹੁਤ੍ਵਾ ਏਕਦਿਵਸਂ ਅਤ੍ਤਨੋ ਸਮ੍ਪਤ੍ਤਿਂ ਓਲੋਕੇਤ੍ਵਾ ਚਿਨ੍ਤੇਸਿ – ‘‘ਅਯਂ ਯਸੋ ਮਯਾ ਅਤੀਤਭਵੇ ਨੇਵ ਨਿਦ੍ਦਾਯਨ੍ਤੇਨ, ਨ ਕਾਯਦੁਚ੍ਚਰਿਤਾਦੀਨਿ ਕਰੋਨ੍ਤੇਨ ਲਦ੍ਧੋ, ਸੁਚਰਿਤਾਨਿ ਪਨ ਪੂਰੇਤ੍ਵਾ ਲਦ੍ਧੋ, ਅਨਾਗਤੇਪਿ ਮਯਾ ਮਮ ਪਤਿਟ੍ਠਂ ਕਾਤੁਂ ਵਟ੍ਟਤੀ’’ਤਿ. ਸੋ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ‘‘ਦੇਵ, ਮਮ ਘਰੇ ਅਸੀਤਿਕੋਟਿਧਨਂ ਅਤ੍ਥਿ, ਤਂ ਗਣ੍ਹਾਹੀ’’ਤਿ ਵਤ੍ਵਾ ‘‘ਨ ਮਯ੍ਹਂ ਤਵ ਧਨੇਨਤ੍ਥੋ, ਬਹੁਂ ਮੇ ਧਨਂ, ਇਤੋਪਿ ਯਦਿਚ੍ਛਸਿ, ਤਂ ਗਣ੍ਹਾਹੀ’’ਤਿ ਵੁਤ੍ਤੇ ‘‘ਕਿਂ ਨੁ, ਦੇਵ, ਮਮ ਧਨਂ ਦਾਤੁਂ ਲਭਾਮੀ’’ਤਿ ਆਹ. ਅਥ ਰਞ੍ਞਾ ‘‘ਯਥਾਰੁਚਿ ਕਰੋਹੀ’’ਤਿ ਵੁਤ੍ਤੇ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਨਿਵੇਸਨਦ੍ਵਾਰੇ ਚਾਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛਸਤਸਹਸ੍ਸਪਰਿਚ੍ਚਾਗਂ ਕਰੋਨ੍ਤੋ ਮਹਾਦਾਨਂ ਪਵਤ੍ਤੇਸਿ. ਸੋ ਯਾਵਜੀਵਂ ਦਾਨਂ ਦਤ੍ਵਾ ‘‘ਇਮਂ ਮਮ ਦਾਨਵਂਸਂ ਮਾ ਉਪਚ੍ਛਿਨ੍ਦਥਾ’’ਤਿ ਪੁਤ੍ਤੇ ਅਨੁਸਾਸਿਤ੍ਵਾ ਜੀਵਿਤਪਰਿਯੋਸਾਨੇ ਸਕ੍ਕੋ ਹੁਤ੍ਵਾ ਨਿਬ੍ਬਤ੍ਤਿ. ਪੁਤ੍ਤੋਪਿਸ੍ਸ ਤਥੇਵ ਦਾਨਂ ਦਤ੍ਵਾ ਚਨ੍ਦੋ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਪੁਤ੍ਤੋ ਸੂਰਿਯੋ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਪੁਤ੍ਤੋ ਮਾਤਲਿ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਪੁਤ੍ਤੋ ਪਞ੍ਚਸਿਖੋ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਪਨ ਪੁਤ੍ਤੋ ਛਟ੍ਠੋ ਸੇਟ੍ਠਿਟ੍ਠਾਨਂ ਲਦ੍ਧਾ ਮਚ੍ਛਰਿਯਕੋਸਿਯੋ ਨਾਮ ਅਹੋਸਿ ਅਸੀਤਿਕੋਟਿਵਿਭਵੋਯੇਵ. ਸੋ ‘‘ਮਮ ਪਿਤੁਪਿਤਾਮਹਾ ਬਾਲਾ ਅਹੇਸੁਂ, ਦੁਕ੍ਖੇਨ ਸਮ੍ਭਤਂ ਧਨਂ ਛਡ੍ਡੇਸੁਂ, ਅਹਂ ਪਨ ਧਨਂ ਰਕ੍ਖਿਸ੍ਸਾਮਿ, ਕਸ੍ਸਚਿ ਕਿਞ੍ਚਿ ਨ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦਾਨਸਾਲਾ ਵਿਦ੍ਧਂਸੇਤ੍ਵਾ ਅਗ੍ਗਿਨਾ ਝਾਪੇਤ੍ਵਾ ਥਦ੍ਧਮਚ੍ਛਰੀ ਅਹੋਸਿ.

ਅਥਸ੍ਸ ਗੇਹਦ੍ਵਾਰੇ ਯਾਚਕਾ ਸਨ੍ਨਿਪਤਿਤ੍ਵਾ ਬਾਹਾ ਪਗ੍ਗਯ੍ਹ, ‘‘ਮਹਾਸੇਟ੍ਠਿ, ਮਾ ਅਤ੍ਤਨੋ ਪਿਤੁਪਿਤਾਮਹਾਨਂ ਦਾਨਵਂਸਂ ਨਾਸਯਿ, ਦਾਨਂ ਦੇਹੀ’’ਤਿ ਮਹਾਸਦ੍ਦੇਨ ਪਰਿਦੇਵਿਂਸੁ. ਤਂ ਸੁਤ੍ਵਾ ਮਹਾਜਨੋ ‘‘ਮਚ੍ਛਰਿਯਕੋਸਿਯੇਨ ਅਤ੍ਤਨੋ ਦਾਨਵਂਸੋ ਉਪਚ੍ਛਿਨ੍ਨੋ’’ਤਿ ਤਂ ਗਰਹਿ. ਸੋ ਲਜ੍ਜਿਤੋ ਨਿਵੇਸਨਦ੍ਵਾਰੇ ਯਾਚਕਾਨਂ ਆਗਤਾਗਤਟ੍ਠਾਨਂ ਨਿਵਾਰੇਤੁਂ ਆਰਕ੍ਖਂ ਠਪੇਸਿ. ਤੇ ਨਿਪ੍ਪਚ੍ਚਯਾ ਹੁਤ੍ਵਾ ਪੁਨ ਤਸ੍ਸ ਗੇਹਦ੍ਵਾਰਂ ਨ ਓਲੋਕੇਸੁਂ. ਸੋ ਤਤੋ ਪਟ੍ਠਾਯ ਧਨਮੇਵ ਸਂਹਰਤਿ, ਨੇਵ ਅਤ੍ਤਨਾ ਪਰਿਭੁਞ੍ਜਤਿ, ਨ ਪੁਤ੍ਤਦਾਰਾਦੀਨਂ ਦੇਤਿ, ਕਞ੍ਜਿਕਬਿਲਙ੍ਗਦੁਤਿਯਂ ਸਕੁਣ੍ਡਕਭਤ੍ਤਂ ਭੁਞ੍ਜਤਿ, ਮੂਲਫਲਮਤ੍ਤਤਨ੍ਤਾਨਿ ਥੂਲਵਤ੍ਥਾਨਿ ਨਿਵਾਸੇਤਿ, ਪਣ੍ਣਛਤ੍ਤਂ ਮਤ੍ਥਕੇ ਧਾਰੇਤ੍ਵਾ ਜਰਗ੍ਗੋਣਯੁਤ੍ਤੇਨ ਜਜ੍ਜਰਰਥਕੇਨ ਯਾਤਿ. ਇਤਿ ਤਸ੍ਸ ਅਸਪ੍ਪੁਰਿਸਸ੍ਸ ਤਤ੍ਤਕਂ ਧਨਂ ਸੁਨਖੇਨ ਲਦ੍ਧਂ ਨਾਲ਼ਿਕੇਰਂ ਵਿਯ ਅਹੋਸਿ.

ਸੋ ਏਕਦਿਵਸਂ ਰਾਜੂਪਟ੍ਠਾਨਂ ਗਚ੍ਛਨ੍ਤੋ ‘‘ਅਨੁਸੇਟ੍ਠਿਂ ਆਦਾਯ ਗਮਿਸ੍ਸਾਮੀ’’ਤਿ ਤਸ੍ਸ ਗੇਹਂ ਅਗਮਾਸਿ. ਤਸ੍ਮਿਂ ਖਣੇ ਅਨੁਸੇਟ੍ਠਿ ਪੁਤ੍ਤਧੀਤਾਦੀਹਿ ਪਰਿਵੁਤੋ ਨਵਸਪ੍ਪਿਪਕ੍ਕਮਧੁਸਕ੍ਖਰਚੁਣ੍ਣੇਹਿ ਸਙ੍ਖਤਂ ਪਾਯਾਸਂ ਭੁਞ੍ਜਮਾਨੋ ਨਿਸਿਨ੍ਨੋ ਹੋਤਿ. ਸੋ ਮਚ੍ਛਰਿਯਕੋਸਿਯਂ ਦਿਸ੍ਵਾ ਆਸਨਾ ਵੁਟ੍ਠਾਯ ‘‘ਏਹਿ, ਮਹਾਸੇਟ੍ਠਿ, ਇਮਸ੍ਮਿਂ ਪਲ੍ਲਙ੍ਕੇ ਨਿਸੀਦ, ਪਾਯਾਸਂ ਭੁਞ੍ਜਿਸ੍ਸਾਮਾ’’ਤਿ ਆਹ. ਤਸ੍ਸ ਪਾਯਾਸਂ ਦਿਸ੍ਵਾਵ ਮੁਖੇ ਖੇਲ਼ਾ ਉਪ੍ਪਜ੍ਜਿ, ਭੁਞ੍ਜਿਤੁਕਾਮੋ ਅਹੋਸਿ, ਏਵਂ ਪਨ ਚਿਨ੍ਤੇਸਿ – ‘‘ਸਚਾਹਂ ਭੁਞ੍ਜਿਸ੍ਸਾਮਿ, ਅਨੁਸੇਟ੍ਠਿਨੋ ਮਮ ਗੇਹਂ ਆਗਤਕਾਲੇ ਪਟਿਸਕ੍ਕਾਰੋ ਕਾਤਬ੍ਬੋ ਭਵਿਸ੍ਸਤਿ, ਏਵਂ ਮੇ ਧਨਂ ਨਸ੍ਸਿਸ੍ਸਤਿ, ਨ ਭੁਞ੍ਜਿਸ੍ਸਾਮੀ’’ਤਿ. ਅਥ ਪੁਨਪ੍ਪੁਨਂ ਯਾਚਿਯਮਾਨੋਪਿ ‘‘ਇਦਾਨਿ ਮੇ ਭੁਤ੍ਤਂ, ਸੁਹਿਤੋਸ੍ਮੀ’’ਤਿ ਨ ਇਚ੍ਛਿ. ਅਨੁਸੇਟ੍ਠਿਮ੍ਹਿ ਭੁਞ੍ਜਨ੍ਤੇ ਪਨ ਓਲੋਕੇਨ੍ਤੋ ਮੁਖੇ ਸਞ੍ਜਾਯਮਾਨੇਨ ਖੇਲ਼ੇਨ ਨਿਸੀਦਿਤ੍ਵਾ ਤਸ੍ਸ ਭਤ੍ਤਕਿਚ੍ਚਾਵਸਾਨੇ ਤੇਨ ਸਦ੍ਧਿਂ ਰਾਜਨਿਵੇਸਨਂ ਗਨ੍ਤ੍ਵਾ ਰਾਜਾਨਂ ਪਸ੍ਸਿਤ੍ਵਾ ਰਾਜਨਿਵੇਸਨਤੋ ਓਤਰਿਤ੍ਵਾ ਅਤ੍ਤਨੋ ਗੇਹਂ ਅਨੁਪ੍ਪਤ੍ਤੋ ਪਾਯਾਸਤਣ੍ਹਾਯ ਪੀਲ਼ਿਯਮਾਨੋ ਚਿਨ੍ਤੇਸਿ – ‘‘ਸਚਾਹਂ ‘ਪਾਯਾਸਂ ਭੁਞ੍ਜਿਤੁਕਾਮੋਮ੍ਹੀ’ਤਿ ਵਕ੍ਖਾਮਿ, ਮਹਾਜਨੋ ਭੁਞ੍ਜਿਤੁਕਾਮੋ ਭਵਿਸ੍ਸਤਿ, ਬਹੂ ਤਣ੍ਡੁਲਾਦਯੋ ਨਸ੍ਸਿਸ੍ਸਨ੍ਤਿ, ਨ ਕਸ੍ਸਚਿ ਕਥੇਸ੍ਸਾਮੀ’’ਤਿ. ਸੋ ਰਤ੍ਤਿਨ੍ਦਿਵਂ ਪਾਯਾਸਮੇਵ ਚਿਨ੍ਤੇਨ੍ਤੋ ਵੀਤਿਨਾਮੇਤ੍ਵਾਪਿ ਧਨਨਾਸਨਭਯੇਨ ਕਸ੍ਸਚਿ ਅਕਥੇਤ੍ਵਾਵ ਪਿਪਾਸਂ ਅਧਿਵਾਸੇਸਿ, ਅਨੁਕ੍ਕਮੇਨ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਅਹੋਸਿ. ਏਵਂ ਸਨ੍ਤੇਪਿ ਧਨਨਾਸਨਭਯੇਨ ਅਕਥੇਨ੍ਤੋ ਅਪਰਭਾਗੇ ਦੁਬ੍ਬਲੋ ਹੁਤ੍ਵਾ ਸਯਨਂ ਉਪਗੂਹਿਤ੍ਵਾ ਨਿਪਜ੍ਜਿ.

ਅਥ ਨਂ ਭਰਿਯਾ ਉਪਗਨ੍ਤ੍ਵਾ ਹਤ੍ਥੇਨ ਪਿਟ੍ਠਿਂ ਪਰਿਮਜ੍ਜਮਾਨਾ ‘‘ਕਿਂ ਤੇ, ਸਾਮਿ, ਅਫਾਸੁਕ’’ਨ੍ਤਿ ਪੁਚ੍ਛਿ. ‘‘ਤਵੇਵ ਸਰੀਰੇ ਅਫਾਸੁਕਂ ਕਰੋਹਿ, ਮਮ ਅਫਾਸੁਕਂ ਨਤ੍ਥੀ’’ਤਿ. ‘‘ਸਾਮਿ, ਉਪ੍ਪਣ੍ਡੁਪ੍ਪਣ੍ਡੁਕਜਾਤੋਸਿ, ਕਿਂ ਨੁ ਤੇ ਕਾਚਿ ਚਿਨ੍ਤਾ ਅਤ੍ਥਿ, ਉਦਾਹੁ ਰਾਜਾ ਤੇ ਕੁਪਿਤੋ, ਅਦੁ ਪੁਤ੍ਤੇਹਿ ਅਵਮਾਨੋ ਕਤੋ, ਅਥ ਵਾ ਪਨ ਕਾਚਿ ਤਣ੍ਹਾ ਉਪ੍ਪਨ੍ਨਾ’’ਤਿ? ‘‘ਆਮ, ਤਣ੍ਹਾ ਮੇ ਉਪ੍ਪਨ੍ਨਾ’’ਤਿ. ‘‘ਕਥੇਹਿ, ਸਾਮੀ’’ਤਿ? ‘‘ਕਥੇਸ੍ਸਾਮਿ, ਸਕ੍ਖਿਸ੍ਸਸਿ ਨਂ ਰਕ੍ਖਿਤੁ’’ਨ੍ਤਿ. ‘‘ਰਕ੍ਖਿਤਬ੍ਬਯੁਤ੍ਤਕਾ ਚੇ, ਰਕ੍ਖਿਸ੍ਸਾਮੀ’’ਤਿ. ਏਵਮ੍ਪਿ ਧਨਨਾਸਨਭਯੇਨ ਕਥੇਤੁਂ ਨ ਉਸ੍ਸਹਿ. ਤਾਯ ਪੁਨਪ੍ਪੁਨਂ ਪੀਲ਼ਿਯਮਾਨੋ ਕਥੇਸਿ – ‘‘ਭਦ੍ਦੇ, ਅਹਂ ਏਕਦਿਵਸਂ ਅਨੁਸੇਟ੍ਠਿਂ ਨਵਸਪ੍ਪਿਮਧੁਸਕ੍ਖਰਚੁਣ੍ਣੇਹਿ ਸਙ੍ਖਤਂ ਪਾਯਾਸਂ ਭੁਞ੍ਜਨ੍ਤਂ ਦਿਸ੍ਵਾ ਤਤੋ ਪਟ੍ਠਾਯ ਤਾਦਿਸਂ ਪਾਯਾਸਂ ਭੁਞ੍ਜਿਤੁਕਾਮੋ ਜਾਤੋ’’ਤਿ. ‘‘ਅਸਪ੍ਪੁਰਿਸ, ਕਿਂ ਤ੍ਵਂ ਦੁਗ੍ਗਤੋ, ਸਕਲਮਾਰਾਣਸਿਵਾਸੀਨਂ ਪਹੋਨਕਂ ਪਾਯਾਸਂ ਪਚਿਸ੍ਸਾਮੀ’’ਤਿ. ਅਥਸ੍ਸ ਸੀਸੇ ਦਣ੍ਡੇਨ ਪਹਰਣਕਾਲੋ ਵਿਯ ਅਹੋਸਿ. ਸੋ ਤਸ੍ਸਾ ਕੁਜ੍ਝਿਤ੍ਵਾ ‘‘ਜਾਨਾਮਹਂ ਤਵ ਮਹਦ੍ਧਨਭਾਵਂ, ਸਚੇ ਤੇ ਕੁਲਘਰਾ ਆਭਤਂ ਅਤ੍ਥਿ, ਪਾਯਾਸਂ ਪਚਿਤ੍ਵਾ ਨਾਗਰਾਨਂ ਦੇਹੀ’’ਤਿ ਆਹ. ‘‘ਤੇਨ ਹਿ ਏਕਵੀਥਿਵਾਸੀਨਂ ਪਹੋਨਕਂ ਕਤ੍ਵਾ ਪਚਾਮੀ’’ਤਿ. ‘‘ਕਿਂ ਤੇ ਏਤੇਹਿ, ਅਤ੍ਤਨੋ ਪਨ ਸਨ੍ਤਕਂ ਖਾਦਨ੍ਤੂ’’ਤਿ? ‘‘ਤੇਨ ਹਿ ਇਤੋ ਚਿਤੋ ਚ ਸਤ੍ਤਸਤ੍ਤਘਰਵਾਸੀਨਂ ਪਹੋਨਕਂ ਕਤ੍ਵਾ ਪਚਾਮੀ’’ਤਿ. ‘‘ਕਿਂ ਤੇ ਏਤੇਹੀ’’ਤਿ. ‘‘ਤੇਨ ਹਿ ਇਮਸ੍ਮਿਂ ਗੇਹੇ ਪਰਿਜਨਸ੍ਸਾ’’ਤਿ. ‘‘ਕਿਂ ਤੇ ਏਤੇਨਾ’’ਤਿ? ‘‘ਤੇਨ ਹਿ ਬਨ੍ਧੁਜਨਸ੍ਸੇਵ ਪਹੋਨਕਂ ਕਤ੍ਵਾ ਪਚਾਮੀ’’ਤਿ. ‘‘ਕਿਂ ਤੇ ਏਤੇਨਾ’’ਤਿ? ‘‘ਤੇਨ ਹਿ ਤੁਯ੍ਹਞ੍ਚ ਮਯ੍ਹਞ੍ਚ ਪਚਾਮਿ ਸਾਮੀ’’ਤਿ. ‘‘ਕਾਸਿ ਤ੍ਵਂ, ਨ ਤੁਯ੍ਹਂ ਵਟ੍ਟਤੀ’’ਤਿ? ‘‘ਤੇਨ ਹਿ ਏਕਸ੍ਸੇਵ ਤੇ ਪਹੋਨਕਂ ਕਤ੍ਵਾ ਪਚਾਮੀ’’ਤਿ. ‘‘ਮਯ੍ਹਞ੍ਚ ਤ੍ਵਂ ਮਾ ਪਚਿ, ਗੇਹੇ ਪਨ ਪਚਨ੍ਤੇ ਬਹੂ ਪਚ੍ਚਾਸੀਸਨ੍ਤਿ, ਮਯ੍ਹਂ ਪਨ ਪਤ੍ਥਂ ਤਣ੍ਡੁਲਾਨਂ ਚਤੁਭਾਗਂ ਖੀਰਸ੍ਸ ਅਚ੍ਛਰਂ ਸਕ੍ਖਰਾਯ ਕਰਣ੍ਡਕਂ ਸਪ੍ਪਿਸ੍ਸ ਕਰਣ੍ਡਕਂ ਮਧੁਸ੍ਸ ਏਕਞ੍ਚ ਪਚਨਭਾਜਨਂ ਦੇਹਿ, ਅਹਂ ਅਰਞ੍ਞਂ ਪਵਿਸਿਤ੍ਵਾ ਤਤ੍ਥ ਪਚਿਤ੍ਵਾ ਭੁਞ੍ਜਾਮੀ’’ਤਿ. ਸਾ ਤਥਾ ਅਕਾਸਿ. ਸੋ ਤਂ ਸਬ੍ਬਂ ਚੇਟਕੇਨ ਗਾਹਾਪੇਤ੍ਵਾ ‘‘ਗਚ੍ਛ ਅਸੁਕਟ੍ਠਾਨੇ ਤਿਟ੍ਠਾਹੀ’’ਤਿ ਤਂ ਪੁਰਤੋ ਪੇਸੇਤ੍ਵਾ ਏਕਕੋਵ ਓਗੁਣ੍ਠਿਕਂ ਕਤ੍ਵਾ ਅਞ੍ਞਾਤਕਵੇਸੇਨ ਤਤ੍ਥ ਗਨ੍ਤ੍ਵਾ ਨਦੀਤੀਰੇ ਏਕਸ੍ਮਿਂ ਗਚ੍ਛਮੂਲੇ ਉਦ੍ਧਨਂ ਕਾਰੇਤ੍ਵਾ ਦਾਰੁਦਕਂ ਆਹਰਾਪੇਤ੍ਵਾ ‘‘ਤ੍ਵਂ ਗਨ੍ਤ੍ਵਾ ਏਕਸ੍ਮਿਂ ਮਗ੍ਗੇ ਠਤ੍ਵਾ ਕਞ੍ਚਿਦੇਵ ਦਿਸ੍ਵਾ ਮਮ ਸਞ੍ਞਂ ਦਦੇਯ੍ਯਾਸਿ, ਮਯਾ ਪਕ੍ਕੋਸਿਤਕਾਲੇਵ ਆਗਚ੍ਛੇਯ੍ਯਾਸੀ’’ਤਿ ਤਂ ਪੇਸੇਤ੍ਵਾ ਅਗ੍ਗਿਂ ਕਤ੍ਵਾ ਪਾਯਾਸਂ ਪਚਿ.

ਤਸ੍ਮਿਂ ਖਣੇ ਸਕ੍ਕੋ ਦੇਵਰਾਜਾ ਦਸਸਹਸ੍ਸਯੋਜਨਂ ਅਲਙ੍ਕਤਦੇਵਨਗਰਂ, ਸਟ੍ਠਿਯੋਜਨਂ ਸੁਵਣ੍ਣਵੀਥਿਂ, ਯੋਜਨਸਹਸ੍ਸੁਬ੍ਬੇਧਂ ਵੇਜਯਨ੍ਤਂ, ਪਞ੍ਚਯੋਜਨਸਤਿਕਂ ਸੁਧਮ੍ਮਸਭਂ, ਸਟ੍ਠਿਯੋਜਨਂ ਪਣ੍ਡੁਕਮ੍ਬਲਸਿਲਾਸਨਂ, ਪਞ੍ਚਯੋਜਨਾਵਟ੍ਟਂ ਕਞ੍ਚਨਮਾਲਸੇਤਚ੍ਛਤ੍ਤਂ, ਅਡ੍ਢਤੇਯ੍ਯਕੋਟਿਸਙ੍ਖਾ ਦੇਵਚ੍ਛਰਾ, ਅਲਙ੍ਕਤਪਟਿਯਤ੍ਤਂ ਅਤ੍ਤਭਾਵਨ੍ਤਿ ਇਮਂ ਅਤ੍ਤਨੋ ਸਿਰਿਂ ਓਲੋਕੇਤ੍ਵਾ ‘‘ਕਿਂ ਨੁ ਖੋ ਕਤ੍ਵਾ ਮਯਾ ਅਯਂ ਯਸੋ ਲਦ੍ਧੋ’’ਤਿ ਚਿਨ੍ਤੇਤ੍ਵਾ ਬਾਰਾਣਸਿਯਂ ਸੇਟ੍ਠਿਭੂਤੇਨ ਪਵਤ੍ਤਿਤਂ ਦਾਨਂ ਅਦ੍ਦਸ. ਤਤੋ ‘‘ਮਮ ਪੁਤ੍ਤਾਦਯੋ ਕੁਹਿਂ ਨਿਬ੍ਬਤ੍ਤਾ’’ਤਿ ਓਲੋਕੇਨ੍ਤੋ ‘‘ਪੁਤ੍ਤੋ ਮੇ ਚਨ੍ਦੋ ਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਪੁਤ੍ਤੋ ਸੂਰਿਯੋ, ਤਸ੍ਸ ਪੁਤ੍ਤੋ, ਮਾਤਲਿ, ਤਸ੍ਸ ਪੁਤ੍ਤੋ, ਪਞ੍ਚਸਿਖੋ’’ਤਿ ਸਬ੍ਬੇਸਂ ਨਿਬ੍ਬਤ੍ਤਿਂ ਦਿਸ੍ਵਾ ‘‘ਪਞ੍ਚਸਿਖਸ੍ਸ ਪੁਤ੍ਤੋ ਕੀਦਿਸੋ’’ਤਿ ਓਲੋਕੇਨ੍ਤੋ ਅਤ੍ਤਨੋ ਵਂਸਸ੍ਸ ਉਪਚ੍ਛਿਨ੍ਨਭਾਵਂ ਪਸ੍ਸਿ. ਅਥਸ੍ਸ ਏਤਦਹੋਸਿ – ‘‘ਅਯਂ ਅਸਪ੍ਪੁਰਿਸੋ ਮਚ੍ਛਰੀ ਹੁਤ੍ਵਾ ਨੇਵ ਅਤ੍ਤਨਾ ਪਰਿਭੁਞ੍ਜਤਿ, ਨ ਪਰੇਸਂ ਦੇਤਿ, ਮਮ ਵਂਸੋ ਤੇਨ ਉਪਚ੍ਛਿਨ੍ਨੋ, ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤਿਸ੍ਸਤਿ, ਓਵਾਦਮਸ੍ਸ ਦਤ੍ਵਾ ਮਮ ਵਂਸਂ ਪਤਿਟ੍ਠਾਪੇਤ੍ਵਾ ਏਤਸ੍ਸ ਇਮਸ੍ਮਿਂ ਦੇਵਨਗਰੇ ਨਿਬ੍ਬਤ੍ਤਨਾਕਾਰਂ ਕਰਿਸ੍ਸਾਮੀ’’ਤਿ. ਸੋ ਚਨ੍ਦਾਦਯੋ ਪਕ੍ਕੋਸਾਪੇਤ੍ਵਾ ‘‘ਏਥ ਮਨੁਸ੍ਸਪਥਂ ਗਮਿਸ੍ਸਾਮ, ਮਚ੍ਛਰਿਯਕੋਸਿਯੇਨ ਅਮ੍ਹਾਕਂ ਵਂਸੋ ਉਪਚ੍ਛਿਨ੍ਨੋ, ਦਾਨਸਾਲਾ ਝਾਪਿਤਾ, ਨੇਵ ਅਤ੍ਤਨਾ ਪਰਿਭੁਞ੍ਜਤਿ, ਨ ਪਰੇਸਂ ਦੇਤਿ, ਇਦਾਨਿ ਪਨ ਪਾਯਾਸਂ ਭੁਞ੍ਜਿਤੁਕਾਮੋ ਹੁਤ੍ਵਾ ‘ਘਰੇ ਪਚ੍ਚਨ੍ਤੇ ਅਞ੍ਞਸ੍ਸਪਿ ਪਾਯਾਸੋ ਦਾਤਬ੍ਬੋ ਭਵਿਸ੍ਸਤੀ’ਤਿ ਅਰਞ੍ਞਂ ਪਵਿਸਿਤ੍ਵਾ ਏਕਕੋਵ ਪਚਤਿ, ਏਤਂ ਦਮੇਤ੍ਵਾ ਦਾਨਫਲਂ ਜਾਨਾਪੇਤ੍ਵਾ ਆਗਮਿਸ੍ਸਾਮ, ਅਪਿਚ ਖੋ ਪਨ ਅਮ੍ਹੇਹਿ ਸਬ੍ਬੇਹਿ ਏਕਤੋ ਯਾਚਿਯਮਾਨੋ ਤਤ੍ਥੇਵ ਮਰੇਯ੍ਯ. ਮਮ ਪਠਮਂ ਗਨ੍ਤ੍ਵਾ ਪਾਯਾਸਂ ਯਾਚਿਤ੍ਵਾ ਨਿਸਿਨ੍ਨਕਾਲੇ ਤੁਮ੍ਹੇ ਬ੍ਰਾਹ੍ਮਣਵਣ੍ਣੇਨ ਪਟਿਪਾਟਿਯਾ ਆਗਨ੍ਤ੍ਵਾ ਯਾਚੇਯ੍ਯਾਥਾ’’ਤਿ ਵਤ੍ਵਾ ਸਯਂ ਤਾਵ ਬ੍ਰਾਹ੍ਮਣਵਣ੍ਣੇਨ ਤਂ ਉਪਸਙ੍ਕਮਿਤ੍ਵਾ ‘‘ਭੋ, ਕਤਰੋ ਬਾਰਾਣਸਿਗਮਨਮਗ੍ਗੋ’’ਤਿ ਪੁਚ੍ਛਿ. ਅਥ ਨਂ ਮਚ੍ਛਰਿਯਕੋਸਿਯੋ ‘‘ਕਿਂ ਉਮ੍ਮਤ੍ਤਕੋਸਿ, ਬਾਰਾਣਸਿਮਗ੍ਗਮ੍ਪਿ ਨ ਜਾਨਾਸਿ, ਕਿਂ ਇਤੋ ਏਸਿ, ਏਤ੍ਤੋ ਯਾਹੀ’’ਤਿ ਆਹ.

ਸਕ੍ਕੋ ਤਸ੍ਸ ਵਚਨਂ ਸੁਤ੍ਵਾ ਅਸੁਣਨ੍ਤੋ ਵਿਯ ‘‘ਕਿਂ ਕਥੇਸੀ’’ਤਿ ਤਂ ਉਪਗਚ੍ਛਤੇਵ. ਸੋਪਿ, ‘‘ਅਰੇ, ਬਧਿਰ ਬ੍ਰਾਹ੍ਮਣ, ਕਿਂ ਇਤੋ ਏਸਿ, ਪੁਰਤੋ ਯਾਹੀ’’ਤਿ ਵਿਰਵਿ. ਅਥ ਨਂ ਸਕ੍ਕੋ, ‘‘ਭੋ, ਕਸ੍ਮਾ ਵਿਰਵਸਿ, ਧੂਮੋ ਪਞ੍ਞਾਯਤਿ, ਅਗ੍ਗਿ ਪਞ੍ਞਾਯਤਿ, ਪਾਯਾਸੋ ਪਚ੍ਚਤਿ, ਬ੍ਰਾਹ੍ਮਣਾਨਂ ਨਿਮਨ੍ਤਨਟ੍ਠਾਨੇਨ ਭਵਿਤਬ੍ਬਂ, ਅਹਮ੍ਪਿ ਬ੍ਰਾਹ੍ਮਣਾਨਂ ਭੋਜਨਕਾਲੇ ਥੋਕਂ ਲਭਿਸ੍ਸਾਮਿ, ਕਿਂ ਮਂ ਨਿਚ੍ਛੁਭਸੀ’’ਤਿ ਵਤ੍ਵਾ ‘‘ਨਤ੍ਥੇਤ੍ਥ ਬ੍ਰਾਹ੍ਮਣਾਨਂ ਨਿਮਨ੍ਤਨਂ, ਪੁਰਤੋ ਯਾਹੀ’’ਤਿ ਵੁਤ੍ਤੇ ‘‘ਤੇਨ ਹਿ ਕਸ੍ਮਾ ਕੁਜ੍ਝਸਿ, ਤਵ ਭੋਜਨਕਾਲੇ ਥੋਕਂ ਲਭਿਸ੍ਸਾਮੀ’’ਤਿ ਆਹ. ਅਥ ਨਂ ਸੋ ‘‘ਅਹਂ ਤੇ ਏਕਸਿਤ੍ਥਮ੍ਪਿ ਨ ਦਸ੍ਸਾਮਿ, ਥੋਕਂ ਇਦਂ ਮਮ ਯਾਪਨਮਤ੍ਤਮੇਵ, ਮਯਾਪਿ ਚੇਤਂ ਯਾਚਿਤ੍ਵਾਵ ਲਦ੍ਧਂ, ਤ੍ਵਂ ਅਞ੍ਞਤੋ ਆਹਾਰਂ ਪਰਿਯੇਸਾਹੀ’’ਤਿ ਵਤ੍ਵਾ ਭਰਿਯਂ ਯਾਚਿਤ੍ਵਾ ਲਦ੍ਧਭਾਵਂ ਸਨ੍ਧਾਯੇਵ ਵਤ੍ਵਾ ਗਾਥਮਾਹ –

੧੯੨.

‘‘ਨੇਵ ਕਿਣਾਮਿ ਨਪਿ ਵਿਕ੍ਕਿਣਾਮਿ, ਨ ਚਾਪਿ ਮੇ ਸਨ੍ਨਿਚਯੋ ਚ ਅਤ੍ਥਿ;

ਸੁਕਿਚ੍ਛਰੂਪਂ ਵਤਿਦਂ ਪਰਿਤ੍ਤਂ, ਪਤ੍ਥੋਦਨੋ ਨਾਲਮਯਂ ਦੁਵਿਨ੍ਨ’’ਨ੍ਤਿ.

ਤਂ ਸੁਤ੍ਵਾ ਸਕ੍ਕੋ ‘‘ਅਹਮ੍ਪਿ ਤੇ ਮਧੁਰਸਦ੍ਦੇਨ ਏਕਂ ਸਿਲੋਕਂ ਕਥੇਸ੍ਸਾਮਿ, ਤਂ ਸੁਣਾਹੀ’’ਤਿ ਵਤ੍ਵਾ ‘‘ਨ ਮੇ ਤਵ ਸਿਲੋਕੇਨ ਅਤ੍ਥੋ’’ਤਿ ਤਸ੍ਸ ਵਾਰੇਨ੍ਤਸ੍ਸੇਵ ਗਾਥਾਦ੍ਵਯਮਾਹ –

੧੯੩.

‘‘ਅਪ੍ਪਮ੍ਹਾ ਅਪ੍ਪਕਂ ਦਜ੍ਜਾ, ਅਨੁਮਜ੍ਝਤੋ ਮਜ੍ਝਕਂ;

ਬਹੁਮ੍ਹਾ ਬਹੁਕਂ ਦਜ੍ਜਾ, ਅਦਾਨਂ ਨੂਪਪਜ੍ਜਤਿ.

੧੯੪.

‘‘ਤਂ ਤਂ ਵਦਾਮਿ ਕੋਸਿਯ, ਦੇਹਿ ਦਾਨਾਨਿ ਭੁਞ੍ਜ ਚ;

ਅਰਿਯਮਗ੍ਗਂ ਸਮਾਰੁਹ, ਨੇਕਾਸੀ ਲਭਤੇ ਸੁਖ’’ਨ੍ਤਿ.

ਤਤ੍ਥ ਅਨੁਮਜ੍ਝਤੋ ਮਜ੍ਝਕਨ੍ਤਿ ਅਪ੍ਪਮਤ੍ਤਕਮ੍ਪਿ ਮਜ੍ਝੇ ਛੇਤ੍ਵਾ ਦ੍ਵੇ ਕੋਟ੍ਠਾਸੇ ਕਰਿਤ੍ਵਾ ਏਕਂ ਕੋਟ੍ਠਾਸਂ ਦਤ੍ਵਾ ਤਤੋ ਅਵਸੇਸਤੋ ਅਨੁਮਜ੍ਝਤੋਪਿ ਪੁਨ ਮਜ੍ਝੇ ਛੇਤ੍ਵਾ ਏਕੋ ਕੋਟ੍ਠਾਸੋ ਦਾਤਬ੍ਬੋਯੇਵ. ਅਦਾਨਂ ਨੂਪਪਜ੍ਜਤੀਤਿ ਅਪ੍ਪਂ ਵਾ ਬਹੁਂ ਵਾ ਦਿਨ੍ਨਂ ਹੋਤੁ, ਅਦਾਨਂ ਨਾਮ ਨ ਹੋਤਿ, ਤਮ੍ਪਿ ਦਾਨਮੇਵ ਮਹਪ੍ਫਲਮੇਵ.

ਸੋ ਤਸ੍ਸ ਵਚਨਂ ਸੁਤ੍ਵਾ ‘‘ਮਨਾਪਂ ਤੇ, ਬ੍ਰਾਹ੍ਮਣ, ਕਥਿਤਂ, ਪਾਯਾਸੇ ਪਕ੍ਕੇ ਥੋਕਂ ਲਭਿਸ੍ਸਸਿ, ਨਿਸੀਦਾਹੀ’’ਤਿ ਆਹ. ਸਕ੍ਕੋ ਏਕਮਨ੍ਤੇ ਨਿਸੀਦਿ. ਤਸ੍ਮਿਂ ਨਿਸਿਨ੍ਨੇ ਚਨ੍ਦੋ ਤੇਨੇਵ ਨਿਯਾਮੇਨ ਉਪਸਙ੍ਕਮਿਤ੍ਵਾ ਤਥੇਵ ਕਥਂ ਪਵਤ੍ਤੇਤ੍ਵਾ ਤਸ੍ਸ ਵਾਰੇਨ੍ਤਸ੍ਸੇਵ ਗਾਥਾਦ੍ਵਯਮਾਹ –

੧੯੫.

‘‘ਮੋਘਞ੍ਚਸ੍ਸ ਹੁਤਂ ਹੋਤਿ, ਮੋਘਞ੍ਚਾਪਿ ਸਮੀਹਿਤਂ;

ਅਤਿਥਿਸ੍ਮਿਂ ਯੋ ਨਿਸਿਨ੍ਨਸ੍ਮਿਂ, ਏਕੋ ਭੁਞ੍ਜਤਿ ਭੋਜਨਂ.

੧੯੬.

ਤਂ ਤਂ ਵਦਾਮਿ ਕੋਸਿਯ, ਦੇਹਿ ਦਾਨਾਨਿ ਭੁਞ੍ਜ ਚ;

ਅਰਿਯਮਗ੍ਗਂ ਸਮਾਰੁਹ, ਨੇਕਾਸੀ ਲਭਤੇ ਸੁਖ’’ਨ੍ਤਿ.

ਤਤ੍ਥ ਸਮੀਹਿਤਨ੍ਤਿ ਧਨੁਪ੍ਪਾਦਨਵੀਰਿਯਂ.

ਸੋ ਤਸ੍ਸ ਵਚਨਂ ਸੁਤ੍ਵਾ ਕਿਚ੍ਛੇਨ ਕਸਿਰੇਨ ‘‘ਤੇਨ ਹਿ ਨਿਸੀਦ, ਥੋਕਂ ਲਭਿਸ੍ਸਸੀ’’ਤਿ ਆਹ. ਸੋ ਗਨ੍ਤ੍ਵਾ ਸਕ੍ਕਸ੍ਸ ਸਨ੍ਤਿਕੇ ਨਿਸੀਦਿ. ਤਤੋ ਸੂਰਿਯੋ ਤੇਨੇਵ ਨਯੇਨ ਉਪਸਙ੍ਕਮਿਤ੍ਵਾ ਤਥੇਵ ਕਥਂ ਪਵਤ੍ਤੇਤ੍ਵਾ ਤਸ੍ਸ ਵਾਰੇਨ੍ਤਸ੍ਸੇਵ ਗਾਥਾਦ੍ਵਯਮਾਹ –

੧੯੭.

‘‘ਸਚ੍ਚਞ੍ਚਸ੍ਸ ਹੁਤਂ ਹੋਤਿ, ਸਚ੍ਚਞ੍ਚਾਪਿ ਸਮੀਹਿਤਂ;

ਅਤਿਥਿਸ੍ਮਿਂ ਯੋ ਨਿਸਿਨ੍ਨਸ੍ਮਿਂ, ਨੇਕੋ ਭੁਞ੍ਜਤਿ ਭੋਜਨਂ.

੧੯੮.

‘‘ਤਂ ਤਂ ਵਦਾਮਿ ਕੋਸਿਯ, ਦੇਹਿ ਦਾਨਾਨਿ ਭੁਞ੍ਜ ਚ;

ਅਰਿਯਮਗ੍ਗਂ ਸਮਾਰੁਹ, ਨੇਕਾਸੀ ਲਭਤੇ ਸੁਖ’’ਨ੍ਤਿ.

ਤਸ੍ਸਪਿ ਵਚਨਂ ਸੁਤ੍ਵਾ ਕਿਚ੍ਛੇਨ ਕਸਿਰੇਨ ‘‘ਤੇਨ ਹਿ ਨਿਸੀਦ, ਥੋਕਂ ਲਭਿਸ੍ਸਸੀ’’ਤਿ ਆਹ. ਸੋ ਗਨ੍ਤ੍ਵਾ ਚਨ੍ਦਸ੍ਸ ਸਨ੍ਤਿਕੇ ਨਿਸੀਦਿ. ਅਥ ਨਂ ਮਾਤਲਿ ਤੇਨੇਵ ਨਯੇਨ ਉਪਸਙ੍ਕਮਿਤ੍ਵਾ ਤਥੇਵ ਕਥਂ ਪਵਤ੍ਤੇਤ੍ਵਾ ਤਸ੍ਸ ਵਾਰੇਨ੍ਤਸ੍ਸੇਵ ਇਮਾ ਗਾਥਾ ਅਭਾਸਿ –

੧੯੯.

‘‘ਸਰਞ੍ਚ ਜੁਹਤਿ ਪੋਸੋ, ਬਹੁਕਾਯ ਗਯਾਯ ਚ;

ਦੋਣੇ ਤਿਮ੍ਬਰੁਤਿਤ੍ਥਸ੍ਮਿਂ, ਸੀਘਸੋਤੇ ਮਹਾਵਹੇ.

੨੦੦.

‘‘ਅਤ੍ਰ ਚਸ੍ਸ ਹੁਤਂ ਹੋਤਿ, ਅਤ੍ਰ ਚਸ੍ਸ ਸਮੀਹਿਤਂ;

ਅਤਿਥਿਸ੍ਮਿਂ ਯੋ ਨਿਸਿਨ੍ਨਸ੍ਮਿਂ, ਨੇਕੋ ਭੁਞ੍ਜਤਿ ਭੋਜਨਂ.

੨੦੧.

‘‘ਤਂ ਤਂ ਵਦਾਮਿ ਕੋਸਿਯ, ਦੇਹਿ ਦਾਨਾਨਿ ਭੁਞ੍ਜ ਚ;

ਅਰਿਯਮਗ੍ਗਂ ਸਮਾਰੁਹ, ਨੇਕਾਸੀ ਲਭਤੇ ਸੁਖ’’ਨ੍ਤਿ.

ਤਾਸਂ ਅਤ੍ਥੋ – ਯੋ ਪੁਰਿਸੋ ‘‘ਨਾਗਯਕ੍ਖਾਦੀਨਂ ਬਲਿਕਮ੍ਮਂ ਕਰੋਮੀ’’ਤਿ ਸਮੁਦ੍ਦਸੋਣ੍ਡਿਪੋਕ੍ਖਰਣੀਆਦੀਸੁ ਯਂ ਕਿਞ੍ਚਿ ਸਰਞ੍ਚ ਉਪਗਨ੍ਤ੍ਵਾ ਜੁਹਤਿ, ਤਤ੍ਥ ਬਲਿਕਮ੍ਮਂ ਕਰੋਤਿ, ਤਥਾ ਬਹੁਕਾਯ ਨਦਿਯਾ ਗਯਾਯ ਪੋਕ੍ਖਰਣਿਯਾ ਦੋਣਨਾਮਕੇ ਚ ਤਿਮ੍ਬਰੁਨਾਮਕੇ ਚ ਤਿਤ੍ਥੇ ਸੀਘਸੋਤੇ ਮਹਨ੍ਤੇ ਵਾਰਿਵਹੇ. ਅਤ੍ਰ ਚਸ੍ਸਾਤਿ ਯਦਿ ਅਤ੍ਰਾਪਿ ਏਤੇਸੁ ਸਰਾਦੀਸੁ ਅਸ੍ਸ ਪੁਰਿਸਸ੍ਸ ਹੁਤਞ੍ਚੇਵ ਸਮੀਹਿਤਞ੍ਚ ਹੋਤਿ, ਸਫਲਂ ਸੁਖੁਦ੍ਰਯਂ ਸਮ੍ਪਜ੍ਜਤਿ. ਅਤਿਥਿਸ੍ਮਿਂ ਯੋ ਨਿਸਿਨ੍ਨਸ੍ਮਿਂ ਨੇਕੋ ਭੁਞ੍ਜਤਿ ਭੋਜਨਂ, ਏਤ੍ਥ ਵਤ੍ਤਬ੍ਬਮੇਵ ਨਤ੍ਥਿ, ਤੇਨ ਤਂ ਵਦਾਮਿ – ਕੋਸਿਯ, ਦਾਨਾਨਿ ਚ ਦੇਹਿ, ਸਯਞ੍ਚ ਭੁਞ੍ਜ, ਅਰਿਯਾਨਂ ਦਾਨਾਭਿਰਤਾਨਂ ਬੁਦ੍ਧਾਦੀਨਂ ਮਗ੍ਗਂ ਅਭਿਰੁਹ. ਨ ਹਿ ਏਕਾਸੀ ਏਕੋਵ ਭੁਞ੍ਜਮਾਨੋ ਸੁਖਂ ਨਾਮ ਲਭਤੀਤਿ.

ਸੋ ਤਸ੍ਸਪਿ ਵਚਨਂ ਸੁਤ੍ਵਾ ਪਬ੍ਬਤਕੂਟੇਨ ਓਤ੍ਥਟੋ ਵਿਯ ਕਿਚ੍ਛੇਨ ਕਸਿਰੇਨ ‘‘ਤੇਨ ਹਿ ਨਿਸੀਦ, ਥੋਕਂ ਲਭਿਸ੍ਸਸੀ’’ਤਿ ਆਹ. ਮਾਤਲਿ ਗਨ੍ਤ੍ਵਾ ਸੂਰਿਯਸ੍ਸ ਸਨ੍ਤਿਕੇ ਨਿਸੀਦਿ. ਤਤੋ ਪਞ੍ਚਸਿਖੋ ਤੇਨੇਵ ਨਯੇਨ ਉਪਸਙ੍ਕਮਿਤ੍ਵਾ ਤਥੇਵ ਕਥਂ ਪਵਤ੍ਤੇਤ੍ਵਾ ਤਸ੍ਸ ਵਾਰੇਨ੍ਤਸ੍ਸੇਵ ਗਾਥਾਦ੍ਵਯਮਾਹ –

੨੦੨.

‘‘ਬਲ਼ਿਸਞ੍ਹਿ ਸੋ ਨਿਗਿਲਤਿ, ਦੀਘਸੁਤ੍ਤਂ ਸਬਨ੍ਧਨਂ;

ਅਤਿਥਿਸ੍ਮਿਂ ਯੋ ਨਿਸਿਨ੍ਨਸ੍ਮਿਂ, ਏਕੋ ਭੁਞ੍ਜਤਿ ਭੋਜਨਂ.

੨੦੩.

‘‘ਤਂ ਤਂ ਵਦਾਮਿ ਕੋਸਿਯ, ਦੇਹਿ ਦਾਨਾਨਿ ਭੁਞ੍ਜ ਚ;

ਅਰਿਯਮਗ੍ਗਂ ਸਮਾਰੁਹ, ਨੇਕਾਸੀ ਲਭਤੇ ਸੁਖ’’ਨ੍ਤਿ.

ਮਚ੍ਛਰਿਯਕੋਸਿਯੋ ਤਂ ਸੁਤ੍ਵਾ ਦੁਕ੍ਖਵੇਦਨੋ ਨਿਤ੍ਥੁਨਨ੍ਤੋ ‘‘ਤੇਨ ਹਿ ਨਿਸੀਦ, ਥੋਕਂ ਲਭਿਸ੍ਸਸੀ’’ਤਿ ਆਹ. ਪਞ੍ਚਸਿਖੋ ਗਨ੍ਤ੍ਵਾ ਮਾਤਲਿਸ੍ਸ ਸਨ੍ਤਿਕੇ ਨਿਸੀਦਿ. ਇਤਿ ਤੇਸੁ ਪਞ੍ਚਸੁ ਬ੍ਰਾਹ੍ਮਣੇਸੁ ਨਿਸਿਨ੍ਨਮਤ੍ਤੇਸ੍ਵੇਵ ਪਾਯਾਸੋ ਪਚ੍ਚਿ. ਅਥ ਨਂ ਕੋਸਿਯੋ ਉਦ੍ਧਨਾ ਓਤਾਰੇਤ੍ਵਾ ‘‘ਤੁਮ੍ਹਾਕਂ ਪਤ੍ਤਾਨਿ ਆਹਰਥਾ’’ਤਿ ਆਹ. ਤੇ ਅਨੁਟ੍ਠਾਯ ਯਥਾਨਿਸਿਨ੍ਨਾਵ ਹਤ੍ਥੇ ਪਸਾਰੇਤ੍ਵਾ ਹਿਮਵਨ੍ਤਤੋ ਮਾਲੁਵਪਤ੍ਤਾਨਿ ਆਹਰਿਂਸੁ. ਕੋਸਿਯੋ ਤਾਨਿ ਦਿਸ੍ਵਾ ‘‘ਤੁਮ੍ਹਾਕਂ ਏਤੇਸੁ ਪਤ੍ਤੇਸੁ ਦਾਤਬ੍ਬਪਾਯਾਸੋ ਨਤ੍ਥਿ, ਖਦਿਰਾਦੀਨਂ ਪਤ੍ਤਾਨਿ ਆਹਰਥਾ’’ਤਿ ਆਹ. ਤੇ ਤਾਨਿਪਿ ਆਹਰਿਂਸੁ. ਏਕੇਕਂ ਪਤ੍ਤਂ ਯੋਧਫਲਕਪ੍ਪਮਾਣਂ ਅਹੋਸਿ. ਸੋ ਸਬ੍ਬੇਸਂ ਦਬ੍ਬਿਯਾ ਪਾਯਾਸਂ ਅਦਾਸਿ, ਸਬ੍ਬਨ੍ਤਿਮਸ੍ਸ ਦਾਨਕਾਲੇਪਿ ਉਕ੍ਖਲਿਯਾ ਊਨਂ ਨ ਪਞ੍ਞਾਯਿ, ਪਞ੍ਚਨ੍ਨਮ੍ਪਿ ਦਤ੍ਵਾ ਸਯਂ ਉਕ੍ਖਲਿਂ ਗਹੇਤ੍ਵਾ ਨਿਸੀਦਿ. ਤਸ੍ਮਿਂ ਖਣੇ ਪਞ੍ਚਸਿਖੋ ਉਟ੍ਠਾਯ ਅਤ੍ਤਭਾਵਂ ਵਿਜਹਿਤ੍ਵਾ ਸੁਨਖੋ ਹੁਤ੍ਵਾ ਤੇਸਂ ਪੁਰਤੋ ਪਸ੍ਸਾਵਂ ਕਰੋਨ੍ਤੋ ਅਗਮਾਸਿ. ਬ੍ਰਾਹ੍ਮਣਾ ਅਤ੍ਤਨੋ ਪਾਯਾਸਂ ਪਤ੍ਤੇਨ ਪਿਦਹਿਂਸੁ. ਕੋਸਿਯਸ੍ਸ ਹਤ੍ਥਪਿਟ੍ਠੇ ਪਸ੍ਸਾਵਬਿਨ੍ਦੁ ਪਤਿ. ਬ੍ਰਾਹ੍ਮਣਾ ਕੁਣ੍ਡਿਕਾਹਿ ਉਦਕਂ ਗਹੇਤ੍ਵਾ ਪਾਯਾਸਂ ਅਬ੍ਭੁਕਿਰਿਤ੍ਵਾ ਭੁਞ੍ਜਮਾਨਾ ਵਿਯ ਅਹੇਸੁਂ. ਕੋਸਿਯੋ ‘‘ਮਯ੍ਹਮ੍ਪਿ ਉਦਕਂ ਦੇਥ, ਹਤ੍ਥਂ ਧੋਵਿਤ੍ਵਾ ਭੁਞ੍ਜਿਸ੍ਸਾਮੀ’’ਤਿ ਆਹ. ‘‘ਤਵ ਉਦਕਂ ਆਹਰਿਤ੍ਵਾ ਹਤ੍ਥਂ ਧੋਵਾ’’ਤਿ. ‘‘ਮਯਾ ਤੁਮ੍ਹਾਕਂ ਪਾਯਾਸੋ ਦਿਨ੍ਨੋ, ਮਯ੍ਹਂ ਥੋਕਂ ਉਦਕਂ ਦੇਥਾ’’ਤਿ. ‘‘ਮਯਂ ਪਿਣ੍ਡਪਟਿਪਿਣ੍ਡਕਮ੍ਮਂ ਨਾਮ ਨ ਕਰੋਮਾ’’ਤਿ. ‘‘ਤੇਨ ਹਿ ਇਮਂ ਉਕ੍ਖਲਿਂ ਓਲੋਕੇਥ, ਹਤ੍ਥਂ ਧੋਵਿਤ੍ਵਾ ਆਗਮਿਸ੍ਸਾਮੀ’’ਤਿ ਨਦਿਂ ਓਤਰਿ. ਤਸ੍ਮਿਂ ਖਣੇ ਸੁਨਖੋ ਉਕ੍ਖਲਿਂ ਪਸ੍ਸਾਵਸ੍ਸ ਪੂਰੇਸਿ. ਸੋ ਤਂ ਪਸ੍ਸਾਵਂ ਕਰੋਨ੍ਤਂ ਦਿਸ੍ਵਾ ਮਹਨ੍ਤਂ ਦਣ੍ਡਮਾਦਾਯ ਤਂ ਤਜ੍ਜੇਨ੍ਤੋ ਆਗਚ੍ਛਿ. ਸੋ ਅਸ੍ਸਾਜਾਨੀਯਮਤ੍ਤੋ ਹੁਤ੍ਵਾ ਤਂ ਅਨੁਬਨ੍ਧਨ੍ਤੋ ਨਾਨਾਵਣ੍ਣੋ ਅਹੋਸਿ, ਕਾਲ਼ੋਪਿ ਹੋਤਿ ਸੇਤੋਪਿ ਸੁਵਣ੍ਣਵਣ੍ਣੋਪਿ ਕਬਰੋਪਿ ਉਚ੍ਚੋਪਿ ਨੀਚੋਪਿ, ਏਵਂ ਨਾਨਾਵਣ੍ਣੋ ਹੁਤ੍ਵਾ ਮਚ੍ਛਰਿਯਕੋਸਿਯਂ ਅਨੁਬਨ੍ਧਿ. ਸੋ ਮਰਣਭਯਭੀਤੋ ਬ੍ਰਾਹ੍ਮਣੇ ਉਪਸਙ੍ਕਮਿ. ਤੇਪਿ ਉਪ੍ਪਤਿਤ੍ਵਾ ਆਕਾਸੇ ਠਿਤਾ. ਸੋ ਤੇਸਂ ਤਂ ਇਦ੍ਧਿਂ ਦਿਸ੍ਵਾ ਗਾਥਮਾਹ –

੨੦੪.

‘‘ਉਲ਼ਾਰਵਣ੍ਣਾ ਵਤ ਬ੍ਰਾਹ੍ਮਣਾ ਇਮੇ, ਅਯਞ੍ਚ ਵੋ ਸੁਨਖੋ ਕਿਸ੍ਸ ਹੇਤੁ;

ਉਚ੍ਚਾਵਚਂ ਵਣ੍ਣਨਿਭਂ ਵਿਕੁਬ੍ਬਤਿ, ਅਕ੍ਖਾਥ ਨੋ ਬ੍ਰਾਹ੍ਮਣਾ ਕੇ ਨੁ ਤੁਮ੍ਹੇ’’ਤਿ.

ਤਂ ਸੁਤ੍ਵਾ ਸਕ੍ਕੋ ਦੇਵਰਾਜਾ –

੨੦੫.

‘‘ਚਨ੍ਦੋ ਚ ਸੂਰਿਯੋ ਚ ਉਭੋ ਇਧਾਗਤਾ, ਅਯਂ ਪਨ ਮਾਤਲਿ ਦੇਵਸਾਰਥਿ;

ਸਕ੍ਕੋਹਮਸ੍ਮਿ ਤਿਦਸਾਨਮਿਨ੍ਦੋ; ਏਸੋ ਚ ਖੋ ਪਞ੍ਚਸਿਖੋਤਿ ਵੁਚ੍ਚਤੀ’’ਤਿ.

ਗਾਥਂ ਵਤ੍ਵਾ ਤਸ੍ਸ ਯਸਂ ਵਣ੍ਣੇਨ੍ਤੋ ਗਾਥਮਾਹ –

੨੦੬.

‘‘ਪਾਣਿਸ੍ਸਰਾ ਮੁਦਿਙ੍ਗਾ ਚ, ਮੁਰਜਾਲਮ੍ਬਰਾਨਿ ਚ;

ਸੁਤ੍ਤਮੇਨਂ ਪਬੋਧੇਨ੍ਤਿ, ਪਟਿਬੁਦ੍ਧੋ ਚ ਨਨ੍ਦਤੀ’’ਤਿ.

ਸੋ ਤਸ੍ਸ ਵਚਨਂ ਸੁਤ੍ਵਾ ‘‘ਸਕ੍ਕ, ਏਵਰੂਪਂ ਦਿਬ੍ਬਸਮ੍ਪਤ੍ਤਿਂ ਕਿਨ੍ਤਿ ਕਤ੍ਵਾ ਲਭਸੀ’’ਤਿ ਪੁਚ੍ਛਿ. ਸਕ੍ਕੋ ‘‘ਅਦਾਨਸੀਲਾ ਤਾਵ ਪਾਪਧਮ੍ਮਾ ਮਚ੍ਛਰਿਨੋ ਦੇਵਲੋਕਂ ਨ ਗਚ੍ਛਨ੍ਤਿ, ਨਿਰਯੇ ਨਿਬ੍ਬਤ੍ਤਨ੍ਤੀ’’ਤਿ ਦਸ੍ਸੇਨ੍ਤੋ –

੨੦੭.

‘‘ਯੇ ਕੇਚਿਮੇ ਮਚ੍ਛਰਿਨੋ ਕਦਰਿਯਾ, ਪਰਿਭਾਸਕਾ ਸਮਣਬ੍ਰਾਹ੍ਮਣਾਨਂ;

ਇਧੇਵ ਨਿਕ੍ਖਿਪ੍ਪ ਸਰੀਰਦੇਹਂ, ਕਾਯਸ੍ਸ ਭੇਦਾ ਨਿਰਯਂ ਵਜਨ੍ਤੀ’’ਤਿ. –

ਇਮਂ ਗਾਥਂ ਵਤ੍ਵਾ ਧਮ੍ਮੇ ਠਿਤਾਨਂ ਦੇਵਲੋਕਪਟਿਲਾਭਂ ਦਸ੍ਸੇਤੁਂ ਗਾਥਮਾਹ –

੨੦੮.

‘‘ਯੇ ਕੇਚਿਮੇ ਸੁਗ੍ਗਤਿਮਾਸਮਾਨਾ, ਧਮ੍ਮੇ ਠਿਤਾ ਸਂਯਮੇ ਸਂਵਿਭਾਗੇ;

ਇਧੇਵ ਨਿਕ੍ਖਿਪ੍ਪ ਸਰੀਰਦੇਹਂ, ਕਾਯਸ੍ਸ ਭੇਦਾ ਸੁਗਤਿਂ ਵਜਨ੍ਤੀ’’ਤਿ.

ਤਤ੍ਥ ਆਸਮਾਨਾਤਿ ਆਸੀਸਨ੍ਤਾ. ਯੇ ਕੇਚਿ ਸੁਗਤਿਂ ਆਸੀਸਨ੍ਤਿ, ਸਬ੍ਬੇ ਤੇ ਸਂਯਮਸਙ੍ਖਾਤੇ ਦਸਸੀਲਧਮ੍ਮੇ ਸਂਵਿਭਾਗਸਙ੍ਖਾਤੇ ਦਾਨਧਮ੍ਮੇ ਚ ਠਿਤਾ ਹੁਤ੍ਵਾ ਇਧ ਸਰੀਰਸਙ੍ਖਾਤਂ ਦੇਹਂ ਨਿਕ੍ਖਿਪਿਤ੍ਵਾ ਤਸ੍ਸ ਕਾਯਸ੍ਸ ਭੇਦਾ ਸੁਗਤਿਂ ਵਜਨ੍ਤੀਤਿ ਅਤ੍ਥੋ.

ਏਵਂ ਵਤ੍ਵਾ ਚ ਪਨ, ‘‘ਕੋਸਿਯ, ਨ ਮਯਂ ਤਵ ਸਨ੍ਤਿਕੇ ਪਾਯਾਸਤ੍ਥਾਯ ਆਗਤਾ, ਕਾਰੁਞ੍ਞੇਨ ਪਨ ਤਂ ਅਨੁਕਮ੍ਪਮਾਨਾ ਆਗਤਾਮ੍ਹਾ’’ਤਿ ਤਸ੍ਸ ਪਕਾਸੇਤੁਂ ਆਹ –

੨੦੯.

‘‘ਤ੍ਵਂ ਨੋਸਿ ਞਾਤਿ ਪੁਰਿਮਾਸੁ ਜਾਤਿਸੁ, ਸੋ ਮਚ੍ਛਰੀ ਰੋਸਕੋ ਪਾਪਧਮ੍ਮੋ;

ਤਵੇਵ ਅਤ੍ਥਾਯ ਇਧਾਗਤਮ੍ਹਾ, ਮਾ ਪਾਪਧਮ੍ਮੋ ਨਿਰਯਂ ਗਮਿਤ੍ਥਾ’’ਤਿ.

ਤਤ੍ਥ ਸੋਤਿ ਸੋ ਤ੍ਵਂ. ਮਾ ਪਾਪਧਮ੍ਮੋਤਿ ਅਯਂ ਅਮ੍ਹਾਕਂ ਞਾਤਿ ਪਾਪਧਮ੍ਮੋ ਮਾ ਨਿਰਯਂ ਅਗਮਾਤਿ ਏਤਦਤ੍ਥਂ ਆਗਤਮ੍ਹਾਤਿ ਅਤ੍ਥੋ.

ਤਂ ਸੁਤ੍ਵਾ ਕੋਸਿਯੋ ‘‘ਅਤ੍ਥਕਾਮਾ ਕਿਰ ਮੇ, ਏਤੇ ਮਂ ਨਿਰਯਾ ਉਦ੍ਧਰਿਤ੍ਵਾ ਸਗ੍ਗੇ ਪਤਿਟ੍ਠਾਪੇਤੁਕਾਮਾ’’ਤਿ ਤੁਟ੍ਠਚਿਤ੍ਤੋ ਆਹ –

੨੧੦.

‘‘ਅਦ੍ਧਾ ਮਂ ਵੋ ਹਿਤਕਾਮਾ, ਯਂ ਮਂ ਸਮਨੁਸਾਸਥ;

ਸੋਹਂ ਤਥਾ ਕਰਿਸ੍ਸਾਮਿ, ਸਬ੍ਬਂ ਵੁਤ੍ਤਂ ਹਿਤੇਸਿਭਿ.

੨੧੧.

‘‘ਏਸਾਹਮਜ੍ਜੇਵ ਉਪਰਮਾਮਿ, ਨ ਚਾਹਂ ਕਿਞ੍ਚਿ ਕਰੇਯ੍ਯ ਪਾਪਂ;

ਨ ਚਾਪਿ ਮੇ ਕਿਞ੍ਚਿ ਅਦੇਯ੍ਯਮਤ੍ਥਿ, ਨ ਚਾਪਿਦਤ੍ਵਾ ਉਦਕਂ ਪਿਵਾਮਿ.

੨੧੨.

‘‘ਏਵਞ੍ਚ ਮੇ ਦਦਤੋ ਸਬ੍ਬਕਾਲਂ, ਭੋਗਾ ਇਮੇ ਵਾਸਵ ਖੀਯਿਸ੍ਸਨ੍ਤਿ;

ਤਤੋ ਅਹਂ ਪਬ੍ਬਜਿਸ੍ਸਾਮਿ ਸਕ੍ਕ, ਹਿਤ੍ਵਾਨ ਕਾਮਾਨਿ ਯਥੋਧਿਕਾਨੀ’’ਤਿ.

ਤਤ੍ਥ ਮਨ੍ਤਿ ਮਮ. ਵੋਤਿ ਤੁਮ੍ਹੇ. ਯਂ ਮਨ੍ਤਿ ਯੇਨ ਮਂ ਸਮਨੁਸਾਸਥ, ਤੇਨ ਮੇ ਤੁਮ੍ਹੇ ਹਿਤਕਾਮਾ. ਤਥਾਤਿ ਯਥਾ ਵਦਥ, ਤਥੇਵ ਕਰਿਸ੍ਸਾਮਿ. ਉਪਰਮਾਮੀਤਿ ਮਚ੍ਛਰਿਭਾਵਤੋ ਉਪਰਮਾਮਿ. ਅਦੇਯ੍ਯਮਤ੍ਥੀਤਿ ਇਤੋ ਪਟ੍ਠਾਯ ਚ ਮਮ ਆਲੋਪਤੋ ਉਪਡ੍ਢਮ੍ਪਿ ਅਦੇਯ੍ਯਂ ਨਾਮ ਨਤ੍ਥਿ, ਨ ਚਾਪਿਦਤ੍ਵਾਤਿ ਉਦਕਪਸਤਮ੍ਪਿ ਚਾਹਂ ਲਭਿਤ੍ਵਾ ਅਦਤ੍ਵਾ ਨ ਪਿਵਿਸ੍ਸਾਮਿ. ਖੀਯਿਸ੍ਸਨ੍ਤੀਤਿ ਵਿਕ੍ਖੀਯਿਸ੍ਸਨ੍ਤਿ. ਯਥੋਧਿਕਾਨੀਤਿ ਵਤ੍ਥੁਕਾਮਕਿਲੇਸਕਾਮਵਸੇਨ ਯਥਾਠਿਤਕੋਟ੍ਠਾਸਾਨਿਯੇਵ.

ਸਕ੍ਕੋ ਮਚ੍ਛਰਿਯਕੋਸਿਯਂ ਦਮੇਤ੍ਵਾ ਨਿਬ੍ਬਿਸੇਵਨਂ ਕਤ੍ਵਾ ਦਾਨਫਲਂ ਜਾਨਾਪੇਤ੍ਵਾ ਧਮ੍ਮਦੇਸਨਾਯ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਸਦ੍ਧਿਂ ਤੇਹਿ ਦੇਵਨਗਰਮੇਵ ਗਤੋ. ਮਚ੍ਛਰਿਯਕੋਸਿਯੋਪਿ ਨਗਰਂ ਪਵਿਸਿਤ੍ਵਾ ਰਾਜਾਨਂ ਅਨੁਜਾਨਾਪੇਤ੍ਵਾ ‘‘ਗਹਿਤਗਹਿਤਭਾਜਨਾਨਿ ਪੂਰੇਤ੍ਵਾ ਗਣ੍ਹਨ੍ਤੂ’’ਤਿ ਯਾਚਕਾਨਂ ਧਨਂ ਦਤ੍ਵਾ ਤਸ੍ਮਿਂ ਖੀਣੇ ਨਿਕ੍ਖਮ੍ਮ ਹਿਮਵਨ੍ਤਤੋ ਦਕ੍ਖਿਣਪਸ੍ਸੇ ਗਙ੍ਗਾਯ ਚੇਵ ਏਕਸ੍ਸ ਚ ਜਾਤਸ੍ਸਰਸ੍ਸ ਅਨ੍ਤਰੇ ਪਣ੍ਣਸਾਲਂ ਕਤ੍ਵਾ ਪਬ੍ਬਜਿਤ੍ਵਾ ਵਨਮੂਲਫਲਾਹਾਰੋ ਤਤ੍ਥ ਚਿਰਂ ਵਿਹਾਸਿ, ਜਰਂ ਪਾਪੁਣਿ. ਤਦਾ ਸਕ੍ਕਸ੍ਸ ਆਸਾ ਸਦ੍ਧਾ ਸਿਰੀ ਹਿਰੀਤਿ ਚਤਸ੍ਸੋ ਧੀਤਰੋ ਹੋਨ੍ਤਿ. ਤਾ ਬਹੁਂ ਦਿਬ੍ਬਗਨ੍ਧਮਾਲਂ ਆਦਾਯ ਉਦਕਕੀਲ਼ਨਤ੍ਥਾਯ ਅਨੋਤਤ੍ਤਦਹਂ ਗਨ੍ਤ੍ਵਾ ਤਤ੍ਥ ਕੀਲ਼ਿਤ੍ਵਾ ਮਨੋਸਿਲਾਤਲੇ ਨਿਸੀਦਿਂਸੁ. ਤਸ੍ਮਿਂ ਖਣੇ ਨਾਰਦੋ ਨਾਮ ਬ੍ਰਾਹ੍ਮਣਤਾਪਸੋ ਤਾਵਤਿਂਸਭਵਨਂ ਦਿਵਾਵਿਹਾਰਤ੍ਥਾਯ ਗਨ੍ਤ੍ਵਾ ਨਨ੍ਦਨਵਨਚਿਤ੍ਤਲਤਾਵਨੇਸੁ ਦਿਵਾਵਿਹਾਰਂ ਕਤ੍ਵਾ ਪਾਰਿਚ੍ਛਤ੍ਤਕਪੁਪ੍ਫਂ ਛਤ੍ਤਂ ਵਿਯ ਛਾਯਤ੍ਥਾਯ ਧਾਰਯਮਾਨੋ ਮਨੋਸਿਲਾਤਲਮਤ੍ਥਕੇਨ ਅਤ੍ਤਨੋ ਵਸਨਟ੍ਠਾਨਂ ਕਞ੍ਚਨਗੁਹਂ ਗਚ੍ਛਤਿ. ਅਥ ਤਾ ਤਸ੍ਸ ਹਤ੍ਥੇ ਤਂ ਪੁਪ੍ਫਂ ਦਿਸ੍ਵਾ ਯਾਚਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੨੧੩.

‘‘ਨਗੁਤ੍ਤਮੇ ਗਿਰਿਵਰੇ ਗਨ੍ਧਮਾਦਨੇ, ਮੋਦਨ੍ਤਿ ਤਾ ਦੇਵਵਰਾਭਿਪਾਲਿਤਾ;

ਅਥਾਗਮਾ ਇਸਿਵਰੋ ਸਬ੍ਬਲੋਕਗੂ, ਸੁਪੁਪ੍ਫਿਤਂ ਦੁਮਵਰਸਾਖਮਾਦਿਯ.

੨੧੪.

‘‘ਸੁਚਿਂ ਸੁਗਨ੍ਧਂ ਤਿਦਸੇਹਿ ਸਕ੍ਕਤਂ, ਪੁਪ੍ਫੁਤ੍ਤਮਂ ਅਮਰਵਰੇਹਿ ਸੇਵਿਤਂ;

ਅਲਦ੍ਧ ਮਚ੍ਚੇਹਿਵ ਦਾਨਵੇਹਿ ਵਾ, ਅਞ੍ਞਤ੍ਰ ਦੇਵੇਹਿ ਤਦਾਰਹਂ ਹਿਦਂ.

੨੧੫.

‘‘ਤਤੋ ਚਤਸ੍ਸੋ ਕਨਕਤ੍ਤਚੂਪਮਾ, ਉਟ੍ਠਾਯ ਨਾਰਿਯੋ ਪਮਦਾਧਿਪਾ ਮੁਨਿਂ;

ਆਸਾ ਚ ਸਦ੍ਧਾ ਚ ਸਿਰੀ ਤਤੋ ਹਿਰੀ, ਇਚ੍ਚਬ੍ਰਵੁਂ ਨਾਰਦਦੇਵ ਬ੍ਰਾਹ੍ਮਣਂ.

੨੧੬.

‘‘ਸਚੇ ਅਨੁਦ੍ਦਿਟ੍ਠਂ ਤਯਾ ਮਹਾਮੁਨਿ, ਪੁਪ੍ਫਂ ਇਮਂ ਪਾਰਿਛਤ੍ਤਸ੍ਸ ਬ੍ਰਮ੍ਹੇ;

ਦਦਾਹਿ ਨੋ ਸਬ੍ਬਾ ਗਤਿ ਤੇ ਇਜ੍ਝਤੁ, ਤੁਵਮ੍ਪਿ ਨੋ ਹੋਹਿ ਯਥੇਵ ਵਾਸਵੋ.

੨੧੭.

‘‘ਤਂ ਯਾਚਮਾਨਾਭਿਸਮੇਕ੍ਖ ਨਾਰਦੋ, ਇਚ੍ਚਬ੍ਰਵੀ ਸਂਕਲਹਂ ਉਦੀਰਯਿ;

ਨ ਮਯ੍ਹਮਤ੍ਥਤ੍ਥਿ ਇਮੇਹਿ ਕੋਚਿ ਨਂ, ਯਾਯੇਵ ਵੋ ਸੇਯ੍ਯਸਿ ਸਾ ਪਿਲ਼ਨ੍ਧਥਾ’’ਤਿ.

ਤਤ੍ਥ ਗਿਰਿਵਰੇਤਿ ਪੁਰਿਮਸ੍ਸ ਵੇਵਚਨਂ. ਦੇਵਵਰਾਭਿਪਾਲਿਤਾਤਿ ਸਕ੍ਕੇਨ ਰਕ੍ਖਿਤਾ. ਸਬ੍ਬਲੋਕਗੂਤਿ ਦੇਵਲੋਕੇ ਚ ਮਨੁਸ੍ਸਲੋਕੇ ਚ ਸਬ੍ਬਤ੍ਥ ਗਮਨਸਮਤ੍ਥੋ. ਦੁਮਵਰਸਾਖਮਾਦਿਯਾਤਿ ਸਾਖਾਯ ਜਾਤਤ੍ਤਾ ਦੁਮਵਰਸਾਖਨ੍ਤਿ ਲਦ੍ਧਨਾਮਂ ਪੁਪ੍ਫਂ ਗਹੇਤ੍ਵਾ. ਸਕ੍ਕਤਨ੍ਤਿ ਕਤਸਕ੍ਕਾਰਂ. ਅਮਰਵਰੇਹੀਤਿ ਸਕ੍ਕਂ ਸਨ੍ਧਾਯ ਵੁਤ੍ਤਂ. ਅਞ੍ਞਤ੍ਰ ਦੇਵੇਹੀਤਿ ਠਪੇਤ੍ਵਾ ਦੇਵੇ ਚ ਇਦ੍ਧਿਮਨ੍ਤੇ ਚ ਅਞ੍ਞੇਹਿ ਮਨੁਸ੍ਸੇਹਿ ਵਾ ਯਕ੍ਖਾਦੀਹਿ ਵਾ ਅਲਦ੍ਧਂ. ਤਦਾਰਹਂ ਹਿਦਨ੍ਤਿ ਤੇਸਂਯੇਵ ਹਿ ਤਂ ਅਰਹਂ ਅਨੁਚ੍ਛਵਿਕਂ. ਕਨਕਤ੍ਤਚੂਪਮਾਤਿ ਕਨਕੂਪਮਾ ਤਚਾ. ਉਟ੍ਠਾਯਾਤਿ ਅਯ੍ਯੋ ਮਾਲਾਗਨ੍ਧਵਿਲੇਪਨਾਦਿਪਟਿਵਿਰਤੋ ਪੁਪ੍ਫਂ ਨ ਪਿਲ਼ਨ੍ਧਿਸ੍ਸਤਿ, ਏਕਸ੍ਮਿਂ ਪਦੇਸੇ ਛਡ੍ਡੇਸ੍ਸਤਿ, ਏਥ ਤਂ ਯਾਚਿਤ੍ਵਾ ਪੁਪ੍ਫਂ ਪਿਲ਼ਨ੍ਧਿਸ੍ਸਾਮਾਤਿ ਹਤ੍ਥੇ ਪਸਾਰੇਤ੍ਵਾ ਯਾਚਮਾਨਾ ਏਕਪ੍ਪਹਾਰੇਨੇਵ ਉਟ੍ਠਹਿਤ੍ਵਾ. ਪਮਦਾਧਿਪਾਤਿ ਪਮਦਾਨਂ ਉਤ੍ਤਮਾ. ਮੁਨਿਨ੍ਤਿ ਇਸਿਂ.

ਅਨੁਦ੍ਦਿਟ੍ਠਨ੍ਤਿ ‘‘ਅਸੁਕਸ੍ਸ ਨਾਮ ਦਸ੍ਸਾਮੀ’’ਤਿ ਨ ਉਦ੍ਦਿਟ੍ਠਂ. ਸਬ੍ਬਾ ਗਤਿ ਤੇ ਇਜ੍ਝਤੂਤਿ ਸਬ੍ਬਾ ਤੇ ਚਿਤ੍ਤਗਤਿ ਇਜ੍ਝਤੁ, ਪਤ੍ਥਿਤਪਤ੍ਥਿਤਸ੍ਸ ਲਾਭੀ ਹੋਹੀਤਿ ਤਸ੍ਸ ਥੁਲਿਮਙ੍ਗਲਂ ਵਦਨ੍ਤਿ. ਯਥੇਵ ਵਾਸਵੋਤਿ ਯਥਾ ਅਮ੍ਹਾਕਂ ਪਿਤਾ ਵਾਸਵੋ ਇਚ੍ਛਿਤਿਚ੍ਛਿਤਂ ਦੇਤਿ, ਤਥੇਵ ਨੋ ਤ੍ਵਮ੍ਪਿ ਹੋਹੀਤਿ. ਤਨ੍ਤਿ ਤਂ ਪੁਪ੍ਫਂ. ਅਭਿਸਮੇਕ੍ਖਾਤਿ ਦਿਸ੍ਵਾ. ਸਂਕਲਹਨ੍ਤਿ ਨਾਨਾਗਾਹਂ ਕਲਹਵਡ੍ਢਨਂ ਕਥਂ ਉਦੀਰਯਿ. ਇਮੇਹੀਤਿ ਇਮੇਹਿ ਪੁਪ੍ਫੇਹਿ ਨਾਮ ਮਯ੍ਹਂ ਅਤ੍ਥੋ ਨਤ੍ਥਿ, ਪਟਿਵਿਰਤੋ ਅਹਂ ਮਾਲਾਧਾਰਣਤੋਤਿ ਦੀਪੇਤਿ. ਯਾਯੇਵ ਵੋ ਸੇਯ੍ਯਸੀਤਿ ਯਾ ਤੁਮ੍ਹਾਕਂ ਅਨ੍ਤਰੇ ਜੇਟ੍ਠਿਕਾ. ਸਾ ਪਿਲ਼ਨ੍ਧਥਾਤਿ ਸਾ ਏਤਂ ਪਿਲ਼ਨ੍ਧਤੂਤਿ ਅਤ੍ਥੋ.

ਤਾ ਚਤਸ੍ਸੋਪਿ ਤਸ੍ਸ ਵਚਨਂ ਸੁਤ੍ਵਾ ਗਾਥਮਾਹਂਸੁ –

੨੧੮.

‘‘ਤ੍ਵਂ ਨੋਤ੍ਤਮੇਵਾਭਿਸਮੇਕ੍ਖ ਨਾਰਦ, ਯਸ੍ਸਿਚ੍ਛਸਿ ਤਸ੍ਸਾ ਅਨੁਪ੍ਪਵੇਚ੍ਛਸੁ;

ਯਸ੍ਸਾ ਹਿ ਨੋ ਨਾਰਦ ਤ੍ਵਂ ਪਦਸ੍ਸਸਿ, ਸਾਯੇਵ ਨੋ ਹੇਹਿਤਿ ਸੇਟ੍ਠਸਮ੍ਮਤਾ’’ਤਿ.

ਤਤ੍ਥ ਤ੍ਵਂ ਨੋਤ੍ਤਮੇਵਾਤਿ ਉਤ੍ਤਮਮਹਾਮੁਨਿ ਤ੍ਵਮੇਵ ਨੋ ਉਪਧਾਰੇਹਿ. ਤਾਸਂ ਵਚਨਂ ਸੁਤ੍ਵਾ ਨਾਰਦੋ ਤਾ ਆਲਪਨ੍ਤੋ ਗਾਥਮਾਹ –

੨੧੯.

‘‘ਅਕਲ੍ਲਮੇਤਂ ਵਚਨਂ ਸੁਗਤ੍ਤੇ, ਕੋ ਬ੍ਰਾਹ੍ਮਣੋ ਸਂਕਲਹਂ ਉਦੀਰਯੇ;

ਗਨ੍ਤ੍ਵਾਨ ਭੂਤਾਧਿਪਮੇਵ ਪੁਚ੍ਛਥ, ਸਚੇ ਨ ਜਾਨਾਥ ਇਧੁਤ੍ਤਮਾਧਮੇ’’ਨ੍ਤਿ.

ਤਸ੍ਸਤ੍ਥੋ – ਭਦ੍ਦੇ ਸੁਗਤ੍ਤੇ, ਇਦਂ ਤੁਮ੍ਹੇਹਿ ਵੁਤ੍ਤਂ ਵਚਨਂ ਮਮ ਅਯੁਤ੍ਤਂ, ਏਵਞ੍ਹਿ ਸਤਿ ਮਯਾ ਤੁਮ੍ਹੇਸੁ ਏਕਂ ਸੇਟ੍ਠਂ, ਸੇਸਾ ਹੀਨਾ ਕਰੋਨ੍ਤੇਨ ਕਲਹੋ ਵਡ੍ਢਿਤੋ ਭਵਿਸ੍ਸਤਿ, ਕੋ ਬਾਹਿਤਪਾਪੋ ਬ੍ਰਾਹ੍ਮਣੋ ਕਲਹਂ ਉਦੀਰਯੇ ਵਡ੍ਢੇਯ੍ਯ. ਏਵਰੂਪਸ੍ਸ ਹਿ ਕਲਹਵਡ੍ਢਨਂ ਨਾਮ ਅਯੁਤ੍ਤਂ, ਤਸ੍ਮਾ ਇਤੋ ਗਤ੍ਵਾ ਅਤ੍ਤਨੋ ਪਿਤਰਂ ਭੂਤਾਧਿਪਂ ਸਕ੍ਕਮੇਵ ਪੁਚ੍ਛਥ, ਸਚੇ ਅਤ੍ਤਨੋ ਉਤ੍ਤਮਂ ਅਧਮਞ੍ਚ ਨ ਜਾਨਾਥਾਤਿ.

ਤਤੋ ਸਤ੍ਥਾ ਗਾਥਮਾਹ –

੨੨੦.

‘‘ਤਾ ਨਾਰਦੇਨ ਪਰਮਪ੍ਪਕੋਪਿਤਾ, ਉਦੀਰਿਤਾ ਵਣ੍ਣਮਦੇਨ ਮਤ੍ਤਾ;

ਸਕਾਸੇ ਗਨ੍ਤ੍ਵਾਨ ਸਹਸ੍ਸਚਕ੍ਖੁਨੋ, ਪੁਚ੍ਛਿਂਸੁ ਭੂਤਾਧਿਪਂ ਕਾ ਨੁ ਸੇਯ੍ਯਸੀ’’ਤਿ.

ਤਤ੍ਥ ਪਰਮਪ੍ਪਕੋਪਿਤਾਤਿ ਪੁਪ੍ਫਂ ਅਦਦਨ੍ਤੇਨ ਅਤਿਵਿਯ ਕੋਪਿਤਾ ਤਸ੍ਸ ਕੁਪਿਤਾ ਹੁਤ੍ਵਾ. ਉਦੀਰਿਤਾਤਿ ‘‘ਭੂਤਾਧਿਪਮੇਵ ਪੁਚ੍ਛਥਾ’’ਤਿ ਵੁਤ੍ਤਾ. ਸਹਸ੍ਸਚਕ੍ਖੁਨੋਤਿ ਸਕ੍ਕਸ੍ਸ ਸਨ੍ਤਿਕਂ ਗਨ੍ਤ੍ਵਾ. ਕਾ ਨੂਤਿ ਅਮ੍ਹਾਕਂ ਅਨ੍ਤਰੇ ਕਤਮਾ ਉਤ੍ਤਮਾਤਿ ਪੁਚ੍ਛਿਂਸੁ.

ਏਵਂ ਪੁਚ੍ਛਿਤ੍ਵਾ ਠਿਤਾ –

੨੨੧.

‘‘ਤਾ ਦਿਸ੍ਵਾ ਆਯਤ੍ਤਮਨਾ ਪੁਰਿਨ੍ਦਦੋ, ਇਚ੍ਚਬ੍ਰਵੀ ਦੇਵਵਰੋ ਕਤਞ੍ਜਲੀ;

ਸਬ੍ਬਾਵ ਵੋ ਹੋਥ ਸੁਗਤ੍ਤੇ ਸਾਦਿਸੀ, ਕੋਨੇਵ ਭਦ੍ਦੇ ਕਲਹਂ ਉਦੀਰਯੀ’’ਤਿ.

ਤਤ੍ਥ ਤਾ ਦਿਸ੍ਵਾਤਿ, ਭਿਕ੍ਖਵੇ, ਚਤਸ੍ਸੋਪਿ ਅਤ੍ਤਨੋ ਸਨ੍ਤਿਕਂ ਆਗਤਾ ਦਿਸ੍ਵਾ. ਆਯਤ੍ਤਮਨਾਤਿ ਉਸ੍ਸੁਕ੍ਕਮਨਾ ਬ੍ਯਾਵਟਚਿਤ੍ਤਾ. ਕਤਞ੍ਜਲੀਤਿ ਨਮਸ੍ਸਮਾਨਾਹਿ ਦੇਵਤਾਹਿ ਪਗ੍ਗਹਿਤਞ੍ਜਲੀ. ਸਾਦਿਸੀਤਿ ਸਬ੍ਬਾਵ ਤੁਮ੍ਹੇ ਸਾਦਿਸਿਯੋ. ਕੋ ਨੇਵਾਤਿ ਕੋ ਨੁ ਏਵਂ. ਕਲਹਂ ਉਦੀਰਯੀਤਿ ਇਦਂ ਨਾਨਾਗਾਹਂ ਵਿਗ੍ਗਹਂ ਕਥੇਸਿ ਵਡ੍ਢੇਸਿ.

ਅਥਸ੍ਸ ਤਾ ਕਥਯਮਾਨਾ ਗਾਥਮਾਹਂਸੁ –

੨੨੨.

‘‘ਯੋ ਸਬ੍ਬਲੋਕਚ੍ਚਰਿਤੋ ਮਹਾਮੁਨਿ, ਧਮ੍ਮੇ ਠਿਤੋ ਨਾਰਦੋ ਸਚ੍ਚਨਿਕ੍ਕਮੋ;

ਸੋ ਨੋਬ੍ਰਵਿ ਗਿਰਿਵਰੇ ਗਨ੍ਧਮਾਦਨੇ, ਗਨ੍ਤ੍ਵਾਨ ਭੂਤਾਧਿਪਮੇਵ ਪੁਚ੍ਛਥ;

ਸਚੇ ਨ ਜਾਨਾਥ ਇਧੁਤ੍ਤਮਾਧਮ’’ਨ੍ਤਿ.

ਤਤ੍ਥ ਸਚ੍ਚਨਿਕ੍ਕਮੋਤਿ ਤਥਪਰਕ੍ਕਮੋ.

ਤਂ ਸੁਤ੍ਵਾ ਸਕ੍ਕੋ ‘‘ਇਮਾ ਚਤਸ੍ਸੋਪਿ ਮਯ੍ਹਂ ਧੀਤਰੋਵ, ਸਚਾਹਂ ‘ਏਤਾਸੁ ਏਕਾ ਗੁਣਸਮ੍ਪਨ੍ਨਾ ਉਤ੍ਤਮਾ’ਤਿ ਵਕ੍ਖਾਮਿ, ਸੇਸਾ ਕੁਜ੍ਝਿਸ੍ਸਨ੍ਤਿ, ਨ ਸਕ੍ਕਾ ਅਯਂ ਅਡ੍ਡੋ ਵਿਨਿਚ੍ਛਿਨਿਤੁਂ, ਇਮਾ ਹਿਮਵਨ੍ਤੇ ਕੋਸਿਯਤਾਪਸਸ੍ਸ ਸਨ੍ਤਿਕਂ ਪੇਸੇਸਾਮਿ, ਸੋ ਏਤਾਸਂ ਅਡ੍ਡਂ ਵਿਨਿਚ੍ਛਿਨਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ‘‘ਅਹਂ ਤੁਮ੍ਹਾਕਂ ਅਡ੍ਡਂ ਨ ਵਿਨਿਚ੍ਛਿਨਿਸ੍ਸਾਮਿ, ਹਿਮਵਨ੍ਤੇ ਕੋਸਿਯੋ ਨਾਮ ਤਾਪਸੋ ਅਤ੍ਥਿ, ਤਸ੍ਸਾਹਂ ਅਤ੍ਤਨੋ ਸੁਧਾਭੋਜਨਂ ਪੇਸੇਸ੍ਸਾਮਿ, ਸੋ ਪਰਸ੍ਸ ਅਦਤ੍ਵਾ ਨ ਭੁਞ੍ਜਤਿ, ਦਦਨ੍ਤੋ ਚ ਵਿਚਿਨਿਤ੍ਵਾ ਗੁਣਵਨ੍ਤਾਨਂ ਦੇਤਿ, ਯਾ ਤੁਮ੍ਹੇਸੁ ਤਸ੍ਸ ਹਤ੍ਥਤੋ ਭਤ੍ਤਂ ਲਭਿਸ੍ਸਤਿ, ਸਾ ਉਤ੍ਤਮਾ ਭਵਿਸ੍ਸਤੀ’’ਤਿ ਆਚਿਕ੍ਖਨ੍ਤੋ ਗਾਥਮਾਹ –

੨੨੩.

‘‘ਅਸੁ ਬ੍ਰਹਾਰਞ੍ਞਚਰੋ ਮਹਾਮੁਨਿ, ਨਾਦਤ੍ਵਾ ਭਤ੍ਤਂ ਵਰਗਤ੍ਤੇ ਭੁਞ੍ਜਤਿ;

ਵਿਚੇਯ੍ਯ ਦਾਨਾਨਿ ਦਦਾਤਿ ਕੋਸਿਯੋ,

ਯਸ੍ਸਾ ਹਿ ਸੋ ਦਸ੍ਸਤਿ ਸਾਵ ਸੇਯ੍ਯਸੀ’’ਤਿ.

ਤਤ੍ਥ ਬ੍ਰਹਾਰਞ੍ਞਧਰੋਤਿ ਮਹਾਅਰਞ੍ਞਵਾਸੀ.

ਇਤਿ ਸੋ ਤਾਪਸਸ੍ਸ ਸਨ੍ਤਿਕਂ ਪੇਸੇਤ੍ਵਾ ਮਾਤਲਿਂ ਪਕ੍ਕੋਸਾਪੇਤ੍ਵਾ ਤਸ੍ਸ ਸਨ੍ਤਿਕਂ ਪੇਸੇਨ੍ਤੋ ਅਨਨ੍ਤਰਂ ਗਾਥਮਾਹ –

੨੨੪.

‘‘ਅਸੂ ਹਿ ਯੋ ਸਮ੍ਮਤਿ ਦਕ੍ਖਿਣਂ ਦਿਸਂ, ਗਙ੍ਗਾਯ ਤੀਰੇ ਹਿਮਵਨ੍ਤਪਸ੍ਸਨਿ;

ਸ ਕੋਸਿਯੋ ਦੁਲ੍ਲਭਪਾਨਭੋਜਨੋ, ਤਸ੍ਸ ਸੁਧਂ ਪਾਪਯ ਦੇਵਸਾਰਥੀ’’ਤਿ.

ਤਤ੍ਥ ਸਮ੍ਮਤੀਤਿ ਵਸਤਿ. ਦਕ੍ਖਿਣਨ੍ਤਿ ਹਿਮਵਨ੍ਤਸ੍ਸ ਦਕ੍ਖਿਣਾਯ ਦਿਸਾਯ. ਪਸ੍ਸਨੀਤਿ ਪਸ੍ਸੇ.

ਤਤੋ ਸਤ੍ਥਾ ਆਹ –

੨੨੫.

‘‘ਸ ਮਾਤਲੀ ਦੇਵਵਰੇਨ ਪੇਸਿਤੋ, ਸਹਸ੍ਸਯੁਤ੍ਤਂ ਅਭਿਰੁਯ੍ਹ ਸਨ੍ਦਨਂ;

ਸੁਖਿਪ੍ਪਮੇਵ ਉਪਗਮ੍ਮ ਅਸ੍ਸਮਂ, ਅਦਿਸ੍ਸਮਾਨੋ ਮੁਨਿਨੋ ਸੁਧਂ ਅਦਾ’’ਤਿ.

ਤਤ੍ਥ ਅਦਿਸ੍ਸਮਾਨੋਤਿ, ਭਿਕ੍ਖਵੇ, ਸੋ ਮਾਤਲਿ ਦੇਵਰਾਜਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਤਂ ਅਸ੍ਸਮਂ ਗਨ੍ਤ੍ਵਾ ਅਦਿਸ੍ਸਮਾਨਕਾਯੋ ਹੁਤ੍ਵਾ ਤਸ੍ਸ ਸੁਧਂ ਅਦਾਸਿ, ਦਦਮਾਨੋ ਚ ਰਤ੍ਤਿਂ ਪਧਾਨਮਨੁਯੁਞ੍ਜਿਤ੍ਵਾ ਪਚ੍ਚੂਸਸਮਯੇ ਅਗ੍ਗਿਂ ਪਰਿਚਰਿਤ੍ਵਾ ਵਿਭਾਤਾਯ ਰਤ੍ਤਿਯਾ ਉਦੇਨ੍ਤਂ ਸੂਰਿਯਂ ਨਮਸ੍ਸਮਾਨਸ੍ਸ ਠਿਤਸ੍ਸ ਤਸ੍ਸ ਹਤ੍ਥੇ ਸੁਧਾਭੋਜਨਪਾਤਿਂ ਠਪੇਸਿ.

ਕੋਸਿਯੋ ਤਂ ਗਹੇਤ੍ਵਾ ਠਿਤਕੋਵ ਗਾਥਾਦ੍ਵਯਮਾਹ –

੨੨੬.

‘‘ਉਦਗ੍ਗਿਹੁਤ੍ਤਂ ਉਪਤਿਟ੍ਠਤੋ ਹਿ ਮੇ, ਪਭਙ੍ਕਰਂ ਲੋਕਤਮੋਨੁਦੁਤ੍ਤਮਂ;

ਸਬ੍ਬਾਨਿ ਭੂਤਾਨਿ ਅਧਿਚ੍ਚ ਵਾਸਵੋ;

ਕੋ ਨੇਵ ਮੇ ਪਾਣਿਸੁ ਕਿਂ ਸੁਧੋਦਹਿ.

੨੨੭.

‘‘ਸਙ੍ਖੂਪਮਂ ਸੇਤਮਤੁਲ੍ਯਦਸ੍ਸਨਂ, ਸੁਚਿਂ ਸੁਗਨ੍ਧਂ ਪਿਯਰੂਪਮਬ੍ਭੁਤਂ;

ਅਦਿਟ੍ਠਪੁਬ੍ਬਂ ਮਮ ਜਾਤੁ ਚਕ੍ਖੁਭਿ, ਕਾ ਦੇਵਤਾ ਪਾਣਿਸੁ ਕਿਂ ਸੁਧੋਦਹੀ’’ਤਿ.

ਤਤ੍ਥ ਉਦਗ੍ਗਿਹੁਤ੍ਤਨ੍ਤਿ ਉਦਕਅਗ੍ਗਿਹੁਤ੍ਤਂ ਪਰਿਚਰਿਤ੍ਵਾ ਅਗ੍ਗਿਸਾਲਤੋ ਨਿਕ੍ਖਮ੍ਮ ਪਣ੍ਣਸਾਲਦ੍ਵਾਰੇ ਠਤ੍ਵਾ ਪਭਙ੍ਕਰਂ ਲੋਕਤਮੋਨੁਦਂ ਉਤ੍ਤਮਂ ਆਦਿਚ੍ਚਂ ਉਪਤਿਟ੍ਠਤੋ ਮਮ ਸਬ੍ਬਾਨਿ ਭੂਤਾਨਿ ਅਧਿਚ੍ਚ ਅਤਿਕ੍ਕਮਿਤ੍ਵਾ ਵਤ੍ਤਮਾਨੋ ਵਾਸਵੋ ਨੁ ਖੋ ਏਵਂ ਮਮ ਪਾਣੀਸੁ ਕਿਂ ਸੁਧਂ ਕਿਂ ਨਾਮੇਤਂ ਓਦਹਿ. ‘‘ਸਙ੍ਖੂਪਮ’’ਨ੍ਤਿਆਦੀਹਿ ਠਿਤਕੋਵ ਸੁਧਂ ਵਣ੍ਣੇਤਿ.

ਤਤੋ ਮਾਤਲਿ ਆਹ –

੨੨੮.

‘‘ਅਹਂ ਮਹਿਨ੍ਦੇਨ ਮਹੇਸਿ ਪੇਸਿਤੋ, ਸੁਧਾਭਿਹਾਸਿਂ ਤੁਰਿਤੋ ਮਹਾਮੁਨਿ;

ਜਾਨਾਸਿ ਮਂ ਮਾਤਲਿ ਦੇਵਸਾਰਥਿ, ਭੁਞ੍ਜਸ੍ਸੁ ਭਤ੍ਤੁਤ੍ਤਮ ਮਾਭਿਵਾਰਯਿ.

੨੨੯.

‘‘ਭੁਤ੍ਤਾ ਚ ਸਾ ਦ੍ਵਾਦਸ ਹਨ੍ਤਿ ਪਾਪਕੇ, ਖੁਦਂ ਪਿਪਾਸਂ ਅਰਤਿਂ ਦਰਕ੍ਲਮਂ;

ਕੋਧੂਪਨਾਹਞ੍ਚ ਵਿਵਾਦਪੇਸੁਣਂ, ਸੀਤੁਣ੍ਹ ਤਨ੍ਦਿਞ੍ਚ ਰਸੁਤ੍ਤਮਂ ਇਦ’’ਨ੍ਤਿ.

ਤਤ੍ਥ ਸੁਧਾਭਿਹਾਸਿਨ੍ਤਿ ਇਮਂ ਸੁਧਾਭੋਜਨਂ ਤੁਯ੍ਹਂ ਅਭਿਹਰਿਂ. ਜਾਨਾਸੀਤਿ ਜਾਨਾਹਿ ਮਂ ਤ੍ਵਂ, ਅਹਂ ਮਾਤਲਿ ਨਾਮ ਦੇਵਸਾਰਥੀਤਿ ਅਤ੍ਥੋ. ਮਾਭਿਵਾਰਯੀਤਿ ਨ ਭੁਞ੍ਜਾਮੀਤਿ ਅਪ੍ਪਟਿਕ੍ਖਿਪਿਤ੍ਵਾ ਭੁਞ੍ਜ ਮਾ ਪਪਞ੍ਚ ਕਰਿ. ਪਾਪਕੇਤਿ ਅਯਞ੍ਹਿ ਸੁਧਾ ਭੁਤ੍ਤਾ ਦ੍ਵਾਦਸ ਪਾਪਧਮ੍ਮੇ ਹਨਤਿ. ਖੁਦਨ੍ਤਿ ਪਠਮਂ ਤਾਵ ਛਾਤਭਾਵਂ ਹਨਤਿ, ਦੁਤਿਯਂ ਪਾਨੀਯਪਿਪਾਸਂ, ਤਤਿਯਂ ਉਕ੍ਕਣ੍ਠਿਤਂ, ਚਤੁਤ੍ਥਂ ਕਾਯਦਰਥਂ, ਪਞ੍ਚਮਂ ਕਿਲਨ੍ਤਭਾਵਂ, ਛਟ੍ਠਂ ਕੋਧਂ, ਸਤ੍ਤਮਂ ਉਪਨਾਹਂ, ਅਟ੍ਠਮਂ ਵਿਵਾਦਂ, ਨਵਮਂ ਪੇਸੁਣਂ, ਦਸਮਂ ਸੀਤਂ, ਏਕਾਦਸਮਂ ਉਣ੍ਹਂ, ਦ੍ਵਾਦਸਮਂ ਤਨ੍ਦਿਂ ਆਲਸਿਯਭਾਵਂ, ਇਦਂ ਰਸੁਤ੍ਤਮਂ ਉਤ੍ਤਮਰਸਂ ਸੁਧਾਭੋਜਨਂ ਇਮੇ ਦ੍ਵਾਦਸ ਪਾਪਧਮ੍ਮੇ ਹਨਤਿ.

ਤਂ ਸੁਤ੍ਵਾ ਕੋਸਿਯੋ ਅਤ੍ਤਨੋ ਵਤਸਮਾਦਾਨਂ ਆਵਿਕਰੋਨ੍ਤੋ –

੨੩੦.

‘‘ਨ ਕਪ੍ਪਤੀ ਮਾਤਲਿ ਮਯ੍ਹ ਭੁਞ੍ਜਿਤੁਂ, ਪੁਬ੍ਬੇ ਅਦਤ੍ਵਾ ਇਤਿ ਮੇ ਵਤੁਤ੍ਤਮਂ;

ਨ ਚਾਪਿ ਏਕਾਸ੍ਨਮਰਿਯਪੂਜਿਤਂ, ਅਸਂਵਿਭਾਗੀ ਚ ਸੁਖਂ ਨ ਵਿਨ੍ਦਤੀ’’ਤਿ. –

ਗਾਥਂ ਵਤ੍ਵਾ, ‘‘ਭਨ੍ਤੇ, ਤੁਮ੍ਹੇਹਿ ਪਰਸ੍ਸ ਅਦਤ੍ਵਾ ਭੋਜਨੇ ਕਂ ਦੋਸਂ ਦਿਸ੍ਵਾ ਇਦਂ ਵਤਂ ਸਮਾਦਿਨ੍ਨ’’ਨ੍ਤਿ ਮਾਤਲਿਨਾ ਪੁਟ੍ਠੋ ਆਹ –

੨੩੧.

‘‘ਥੀਘਾਤਕਾ ਯੇ ਚਿਮੇ ਪਾਰਦਾਰਿਕਾ, ਮਿਤ੍ਤਦ੍ਦੁਨੋ ਯੇ ਚ ਸਪਨ੍ਤਿ ਸੁਬ੍ਬਤੇ;

ਸਬ੍ਬੇ ਚ ਤੇ ਮਚ੍ਛਰਿਪਞ੍ਚਮਾਧਮਾ, ਤਸ੍ਮਾ ਅਦਤ੍ਵਾ ਉਦਕਮ੍ਪਿ ਨਾਸ੍ਨਿਯੇ.

੨੩੨.

‘‘ਸੋਹਿਤ੍ਥਿਯਾ ਵਾ ਪੁਰਿਸਸ੍ਸ ਵਾ ਪਨ, ਦਸ੍ਸਾਮਿ ਦਾਨਂ ਵਿਦੁਸਮ੍ਪਵਣ੍ਣਿਤਂ;

ਸਦ੍ਧਾ ਵਦਞ੍ਞੂ ਇਧ ਵੀਤਮਚ੍ਛਰਾ, ਭਵਨ੍ਤਿ ਹੇਤੇ ਸੁਚਿਸਚ੍ਚਸਮ੍ਮਤਾ’’ਤਿ.

ਤਤ੍ਥ ਪੁਬ੍ਬੇਤਿ ਪਠਮਂ ਅਦਤ੍ਵਾ, ਅਥ ਵਾ ਇਤਿ ਮੇ ਪੁਬ੍ਬੇ ਵਤੁਤ੍ਤਮਂ ਇਦਂ ਪੁਬ੍ਬੇਵ ਮਯਾ ਵਤਂ ਸਮਾਦਿਨ੍ਨਨ੍ਤਿ ਦਸ੍ਸੇਤਿ. ਨ ਚਾਪਿ ਏਕਾਸ੍ਨਮਰਿਯਪੂਜਿਤਨ੍ਤਿ ਏਕਕਸ੍ਸ ਅਸਨਂ ਨ ਅਰਿਯੇਹਿ ਬੁਦ੍ਧਾਦੀਹਿ ਪੂਜਿਤਂ. ਸੁਖਨ੍ਤਿ ਦਿਬ੍ਬਮਾਨੁਸਿਕਂ ਸੁਖਂ ਨ ਲਭਤਿ. ਥੀਘਾਤਕਾਤਿ ਇਤ੍ਥਿਘਾਤਕਾ. ਯੇ ਚਿਮੇਤਿ ਯੇ ਚ ਇਮੇ. ਸਪਨ੍ਤੀਤਿ ਅਕ੍ਕੋਸਨ੍ਤਿ. ਸੁਬ੍ਬਤੇਤਿ ਧਮ੍ਮਿਕਸਮਣਬ੍ਰਾਹ੍ਮਣੇ. ਮਚ੍ਛਰਿਪਞ੍ਚਮਾਤਿ ਮਚ੍ਛਰੀ ਪਞ੍ਚਮੋ ਏਤੇਸਨ੍ਤਿ ਮਚ੍ਛਰਿਪਞ੍ਚਮਾ. ਅਧਮਾਤਿ ਇਮੇ ਪਞ੍ਚ ਅਧਮਾ ਨਾਮ. ਤਸ੍ਮਾਤਿ ਯਸ੍ਮਾ ਅਹਂ ਪਞ੍ਚਮਅਧਮਭਾਵਭਯੇਨ ਅਦਤ੍ਵਾ ਉਦਕਮ੍ਪਿ ਨਾਸ੍ਨਿਯੇ ਨ ਪਰਿਭੁਞ੍ਜਿਸ੍ਸਾਮੀਤਿ ਇਮਂ ਵਤਂ ਸਮਾਦਿਯਿਂ. ਸੋਹਿਤ੍ਥਿਯਾ ਵਾਤਿ ਸੋ ਅਹਂ ਇਤ੍ਥਿਯਾ ਵਾ. ਵਿਦੁਸਮ੍ਪਵਣ੍ਣਿਤਨ੍ਤਿ ਵਿਦੂਹਿ ਪਣ੍ਡਿਤੇਹਿ ਬੁਦ੍ਧਾਦੀਹਿ ਵਣ੍ਣਿਤਂ. ਸੁਚਿਸਚ੍ਚਸਮ੍ਮਤਾਤਿ ਏਤੇ ਓਕਪ੍ਪਨਿਯਸਦ੍ਧਾਯ ਸਮਨ੍ਨਾਗਤਾ ਵਦਞ੍ਞੂ ਵੀਤਮਚ੍ਛਰਾ ਪੁਰਿਸਾ ਸੁਚੀ ਚੇਵ ਉਤ੍ਤਮਸਮ੍ਮਤਾ ਚ ਹੋਨ੍ਤੀਤਿ ਅਤ੍ਥੋ.

ਤਂ ਸੁਤ੍ਵਾ ਮਾਤਲਿ ਦਿਸ੍ਸਮਾਨਕਾਯੇਨ ਅਟ੍ਠਾਸਿ. ਤਸ੍ਮਿਂ ਖਣੇ ਤਾ ਚਤਸ੍ਸੋ ਦੇਵਕਞ੍ਞਾਯੋ ਚਤੁਦ੍ਦਿਸਂ ਅਟ੍ਠਂਸੁ, ਸਿਰੀ ਪਾਚੀਨਦਿਸਾਯ ਅਟ੍ਠਾਸਿ, ਆਸਾ ਦਕ੍ਖਿਣਦਿਸਾਯ, ਸਦ੍ਧਾ ਪਚ੍ਛਿਮਦਿਸਾਯ, ਹਿਰੀ ਉਤ੍ਤਰਦਿਸਾਯ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੨੩੩.

‘‘ਅਤੋ ਮਤਾ ਦੇਵਵਰੇਨ ਪੇਸਿਤਾ, ਕਞ੍ਞਾ ਚਤਸ੍ਸੋ ਕਨਕਤ੍ਤਚੂਪਮਾ;

ਆਸਾ ਚ ਸਦ੍ਧਾ ਚ ਸਿਰੀ ਤਤੋ ਹਿਰੀ, ਤਂ ਅਸ੍ਸਮਂ ਆਗਮੁ ਯਤ੍ਥ ਕੋਸਿਯੋ.

੨੩੪.

‘‘ਤਾ ਦਿਸ੍ਵਾ ਸਬ੍ਬੋ ਪਰਮਪ੍ਪਮੋਦਿਤੋ, ਸੁਭੇਨ ਵਣ੍ਣੇਨ ਸਿਖਾਰਿਵਗ੍ਗਿਨੋ;

ਕਞ੍ਞਾ ਚਤਸ੍ਸੋ ਚਤੁਰੋ ਚਤੁਦ੍ਦਿਸਾ, ਇਚ੍ਚਬ੍ਰਵੀ ਮਾਤਲਿਨੋ ਚ ਸਮ੍ਮੁਖਾ.

੨੩੫.

‘‘ਪੁਰਿਮਂ ਦਿਸਂ ਕਾ ਤ੍ਵਂ ਪਭਾਸਿ ਦੇਵਤੇ, ਅਲਙ੍ਕਤਾ ਤਾਰਵਰਾਵ ਓਸਧੀ;

ਪੁਚ੍ਛਾਮਿ ਤਂ ਕਞ੍ਚਨਵੇਲ੍ਲਿਵਿਗ੍ਗਹੇ, ਆਚਿਕ੍ਖ ਮੇ ਤ੍ਵਂ ਕਤਮਾਸਿ ਦੇਵਤਾ.

੨੩੬.

‘‘ਸਿਰਾਹ ਦੇਵੀ ਮਨੁਜੇਹਿ ਪੂਜਿਤਾ, ਅਪਾਪਸਤ੍ਤੂਪਨਿਸੇਵਿਨੀ ਸਦਾ;

ਸੁਧਾਵਿਵਾਦੇਨ ਤਵਨ੍ਤਿਮਾਗਤਾ, ਤਂ ਮਂ ਸੁਧਾਯ ਵਰਪਞ੍ਞ ਭਾਜਯ.

੨੩੭.

‘‘ਯਸ੍ਸਾਹਮਿਚ੍ਛਾਮਿ ਸੁਧਂ ਮਹਾਮੁਨਿ, ਸੋ ਸਬ੍ਬਕਾਮੇਹਿ ਨਰੋ ਪਮੋਦਤਿ;

ਸਿਰੀਤਿ ਮਂ ਜਾਨਹਿ ਜੂਹਤੁਤ੍ਤਮ, ਤਂ ਮਂ ਸੁਧਾਯ ਵਰਪਞ੍ਞ ਭਾਜਯਾ’’ਤਿ.

ਤਤ੍ਥ ਅਤੋਤਿ ਤਤੋ. ਮਤਾਤਿ ਅਨੁਮਤਾ, ਅਥ ਦੇਵਵਰੇਨ ਅਨੁਮਤਾ ਚੇਵ ਪੇਸਿਤਾ ਚਾਤਿ ਅਤ੍ਥੋ. ਸਬ੍ਬੋ ਪਰਮਪ੍ਪਮੋਦਿਤੋਤਿ ਅਨਵਸੇਸੋ ਹੁਤ੍ਵਾ ਅਤਿਪਮੋਦਿਤੋ. ‘‘ਸਾਮ’’ਨ੍ਤਿਪਿ ਪਾਠੋ, ਤਾ ਦੇਵਤਾ ਸਾਮਂ ਦਿਸ੍ਵਾਤਿ ਅਤ੍ਥੋ. ਚਤੁਰੋਤਿ ਚਤੁਰਾ. ਅਯਮੇਵ ਵਾ ਪਾਠੋ, ਚਾਤੁਰਿਯੇਨ ਸਮਨ੍ਨਾਗਤਾਤਿ ਅਤ੍ਥੋ. ਤਾਰਵਰਾਤਿ ਤਾਰਕਾਨਂ ਵਰਾ. ਕਞ੍ਚਨਵੇਲ੍ਲਿਵਿਗ੍ਗਹੇਤਿ ਕਞ੍ਚਨਰੂਪਸਦਿਸਸਰੀਰੇ. ਸਿਰਾਹਾਤਿ ਸਿਰੀ ਅਹਂ. ਤਵਨ੍ਤਿਮਾਗਤਾਤਿ ਤਵ ਸਨ੍ਤਿਕਂ ਆਗਤਾ. ਭਾਜਯਾਤਿ ਯਥਾ ਮਂ ਸੁਧਾ ਭਜਤਿ, ਤਥਾ ਕਰੋਹਿ, ਸੁਧਂ ਮੇ ਦੇਹੀਤਿ ਅਤ੍ਥੋ. ਜਾਨਹੀਤਿ ਜਾਨ. ਜੂਹਤੁਤ੍ਤਮਾਤਿ ਅਗ੍ਗਿਂ ਜੁਹਨ੍ਤਾਨਂ ਉਤ੍ਤਮ.

ਤਂ ਸੁਤ੍ਵਾ ਕੋਸਿਯੋ ਆਹ –

੨੩੮.

‘‘ਸਿਪ੍ਪੇਨ ਵਿਜ੍ਜਾਚਰਣੇਨ ਬੁਦ੍ਧਿਯਾ, ਨਰਾ ਉਪੇਤਾ ਪਗੁਣਾ ਸਕਮ੍ਮੁਨਾ;

ਤਯਾ ਵਿਹੀਨਾ ਨ ਲਭਨ੍ਤਿ ਕਿਞ੍ਚਨਂ, ਤਯਿਦਂ ਨ ਸਾਧੁ ਯਦਿਦਂ ਤਯਾ ਕਤਂ.

੨੩੯.

‘‘ਪਸ੍ਸਾਮਿ ਪੋਸਂ ਅਲਸਂ ਮਹਗ੍ਘਸਂ, ਸੁਦੁਕ੍ਕੁਲੀਨਮ੍ਪਿ ਅਰੂਪਿਮਂ ਨਰਂ;

ਤਯਾਨੁਗੁਤ੍ਤੋ ਸਿਰਿ ਜਾਤਿਮਾਮਪਿ, ਪੇਸੇਤਿ ਦਾਸਂ ਵਿਯ ਭੋਗਵਾ ਸੁਖੀ.

੨੪੦.

‘‘ਤਂ ਤਂ ਅਸਚ੍ਚਂ ਅਵਿਭਜ੍ਜਸੇਵਿਨਿਂ, ਜਾਨਾਮਿ ਮੂਲ਼੍ਹਂ ਵਿਦੁਰਾਨੁਪਾਤਿਨਿਂ;

ਨ ਤਾਦਿਸੀ ਅਰਹਤਿ ਆਸਨੂਦਕਂ, ਕੁਤੋ ਸੁਧਾ ਗਚ੍ਛ ਨ ਮਯ੍ਹ ਰੁਚ੍ਚਸੀ’’ਤਿ.

ਤਤ੍ਥ ਸਿਪ੍ਪੇਨਾਤਿ ਹਤ੍ਥਿਅਸ੍ਸਰਥਧਨੁਸਿਪ੍ਪਾਦਿਨਾ. ਵਿਜ੍ਜਾਚਰਣੇਨਾਤਿ ਵੇਦਤ੍ਤਯਸਙ੍ਖਾਤਾਯ ਵਿਜ੍ਜਾਯ ਚੇਵ ਸੀਲੇਨ ਚ. ਪਗੁਣਾ ਸਕਮ੍ਮੁਨਾਤਿ ਅਤ੍ਤਨੋ ਪੁਰਿਸਕਾਰੇਨ ਪਧਾਨਗੁਣਸਮਨ੍ਨਾਗਤਾ. ਕਿਞ੍ਚਨਨ੍ਤਿ ਕਿਞ੍ਚਿ ਅਪ੍ਪਮਤ੍ਤਕਮ੍ਪਿ ਯਸਂ ਵਾ ਸੁਖਂ ਵਾ ਨ ਲਭਨ੍ਤਿ. ਯਦਿਦਨ੍ਤਿ ਯਂ ਏਤਂ ਇਸ੍ਸਰਿਯਤ੍ਥਾਯ ਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਚਰਨ੍ਤਾਨਂ ਤਯਾ ਵੇਕਲ੍ਲਂ ਕਤਂ, ਤਂ ਤੇ ਨ ਸਾਧੁ. ਅਰੂਪਿਮਨ੍ਤਿ ਵਿਰੂਪਂ. ਤਯਾਨੁਗੁਤ੍ਤੋਤਿ ਤਯਾ ਅਨੁਰਕ੍ਖਿਤੋ. ਜਾਤਿਮਾਮਪੀਤਿ ਜਾਤਿਸਮ੍ਪਨ੍ਨਮ੍ਪਿ ਸਿਪ੍ਪਵਿਜ੍ਜਾਚਰਣਬੁਦ੍ਧਿਕਮ੍ਮੇਹਿ ਸਮ੍ਪਨ੍ਨਮ੍ਪਿ. ਪੇਸੇਤੀਤਿ ਪੇਸਨਕਾਰਕਂ ਕਰੋਤਿ. ਤਂ ਤਨ੍ਤਿ ਤਸ੍ਮਾ ਤਂ. ਅਸਚ੍ਚਨ੍ਤਿ ਸਭਾਵਸਙ੍ਖਾਤੇ ਸਚ੍ਚੇ ਅਵਤ੍ਤਨਤਾਯ ਅਸਚ੍ਚਂ ਉਤ੍ਤਮਭਾਵਰਹਿਤਂ. ਅਵਿਭਜ੍ਜਸੇਵਿਨਿਨ੍ਤਿ ਅਵਿਭਜਿਤ੍ਵਾ ਯੁਤ੍ਤਾਯੁਤ੍ਤਂ ਅਜਾਨਿਤ੍ਵਾ ਸਿਪ੍ਪਾਦਿਸਮ੍ਪਨ੍ਨੇਪਿ ਇਤਰੇਪਿ ਸੇਵਮਾਨਂ. ਵਿਦੁਰਾਨੁਪਾਤਿਨਿਨ੍ਤਿ ਪਣ੍ਡਿਤਾਨੁਪਾਤਿਨਿਂ ਪਣ੍ਡਿਤੇ ਪਾਤੇਤ੍ਵਾ ਪੋਥੇਤ੍ਵਾ ਵਿਹੇਠੇਤ੍ਵਾ ਚਰਮਾਨਂ. ਕੁਤੋ ਸੁਧਾਤਿ ਤਾਦਿਸਾਯ ਨਿਗ੍ਗੁਣਾਯ ਕੁਤੋ ਸੁਧਾਭੋਜਨਂ, ਨ ਮੇ ਰੁਚ੍ਚਸਿ, ਗਚ੍ਛ ਮਾ ਇਧ ਤਿਟ੍ਠਾਤਿ.

ਸਾ ਤੇਨ ਪਟਿਕ੍ਖਿਤ੍ਤਾ ਤਤ੍ਥੇਵਨ੍ਤਰਧਾਯਿ. ਤਤੋ ਸੋ ਆਸਾਯ ਸਦ੍ਧਿਂ ਸਲ੍ਲਪਨ੍ਤੋ ਆਹ –

੨੪੧.

‘‘ਕਾ ਸੁਕ੍ਕਦਾਠਾ ਪਟਿਮੁਕ੍ਕਕੁਣ੍ਡਲਾ, ਚਿਤ੍ਤਙ੍ਗਦਾ ਕਮ੍ਬੁਵਿਮਟ੍ਠਧਾਰਿਨੀ;

ਓਸਿਤ੍ਤਵਣ੍ਣਂ ਪਰਿਦਯ੍ਹ ਸੋਭਸਿ, ਕੁਸਗ੍ਗਿਰਤ੍ਤਂ ਅਪਿਲ਼ਯ੍ਹ ਮਞ੍ਜਰਿਂ.

੨੪੨.

‘‘ਮਿਗੀਵ ਭਨ੍ਤਾ ਸਰਚਾਪਧਾਰਿਨਾ, ਵਿਰਾਧਿਤਾ ਮਨ੍ਦਮਿਵ ਉਦਿਕ੍ਖਸਿ;

ਕੋ ਤੇ ਦੁਤੀਯੋ ਇਦ ਮਨ੍ਦਲੋਚਨੇ, ਨ ਭਾਯਸਿ ਏਕਿਕਾ ਕਾਨਨੇ ਵਨੇ’’ਤਿ.

ਤਤ੍ਥ ਚਿਤ੍ਤਙ੍ਗਦਾਤਿ ਚਿਤ੍ਰੇਹਿ ਅਙ੍ਗਦੇਹਿ ਸਮਨ੍ਨਾਗਤਾ. ਕਮ੍ਬੁਵਿਮਟ੍ਠਧਾਰਿਨੀਤਿ ਕਰਣਪਰਿਨਿਟ੍ਠਿਤੇਨ ਵਿਮਟ੍ਠਸੁਵਣ੍ਣਾਲਙ੍ਕਾਰਧਾਰਿਨੀ. ਓਸਿਤ੍ਤਵਣ੍ਣਨ੍ਤਿ ਅਵਸਿਤ੍ਤਉਦਕਧਾਰਵਣ੍ਣਂ ਦਿਬ੍ਬਦੁਕੂਲਂ. ਪਰਿਦਯ੍ਹਾਤਿ ਨਿਵਾਸੇਤ੍ਵਾ ਚੇਵ ਪਾਰੁਪਿਤ੍ਵਾ ਚ. ਕੁਸਗ੍ਗਿਰਤ੍ਤਨ੍ਤਿ ਕੁਸਤਿਣਗ੍ਗਿਸਿਖਾਵਣ੍ਣਂ. ਅਪਿਲ਼ਯ੍ਹ ਮਞ੍ਜਰਿਨ੍ਤਿ ਸਪਲ੍ਲਵਂ ਅਸੋਕਕਣ੍ਣਿਕਂ ਕਣ੍ਣੇ ਪਿਲ਼ਨ੍ਧਿਤ੍ਵਾਤਿ ਵੁਤ੍ਤਂ ਹੋਤਿ. ਸਰਚਾਪਧਾਰਿਨਾਤਿ ਲੁਦ੍ਦੇਨ. ਵਿਰਾਧਿਤਾਤਿ ਵਿਰਦ੍ਧਪਹਾਰਾ. ਮਨ੍ਦਮਿਵਾਤਿ ਯਥਾ ਸਾ ਮਿਗੀ ਭੀਤਾ ਵਨਨ੍ਤਰੇ ਠਤ੍ਵਾ ਤਂ ਮਨ੍ਦਂ ਮਨ੍ਦਂ ਓਲੋਕੇਤਿ, ਏਵਂ ਓਲੋਕੇਸਿ.

ਤਤੋ ਆਸਾ ਆਹ –

੨੪੩.

‘‘ਨ ਮੇ ਦੁਤੀਯੋ ਇਧ ਮਤ੍ਥਿ ਕੋਸਿਯ, ਮਸਕ੍ਕਸਾਰਪ੍ਪਭਵਮ੍ਹਿ ਦੇਵਤਾ;

ਆਸਾ ਸੁਧਾਸਾਯ ਤਵਨ੍ਤਿਮਾਗਤਾ, ਤਂ ਮਂ ਸੁਧਾਯ ਵਰਪਞ੍ਞ ਭਾਜਯਾ’’ਤਿ.

ਤਤ੍ਥ ਮਸਕ੍ਕਸਾਰਪ੍ਪਭਵਾਤਿ ਤਾਵਤਿਂਸਭਵਨੇ ਸਮ੍ਭਵਾ.

ਤਂ ਸੁਤ੍ਵਾ ਕੋਸਿਯੋ ‘‘ਤ੍ਵਂ ਕਿਰ ਯੋ ਤੇ ਰੁਚ੍ਚਤਿ, ਤਸ੍ਸ ਆਸਾਫਲਨਿਪ੍ਫਾਦਨੇਨ ਆਸਂ ਦੇਸਿ, ਯੋ ਤੇ ਨ ਰੁਚ੍ਚਤਿ, ਤਸ੍ਸ ਨ ਦੇਸਿ, ਨਤ੍ਥਿ ਤਯਾ ਸਮਾ ਪਤ੍ਥਿਤਤ੍ਥਵਿਨਾਸਿਕਾ’’ਤਿ ਦੀਪੇਨ੍ਤੋ ਆਹ –

੨੪੪.

‘‘ਆਸਾਯ ਯਨ੍ਤਿ ਵਾਣਿਜਾ ਧਨੇਸਿਨੋ, ਨਾਵਂ ਸਮਾਰੁਯ੍ਹ ਪਰੇਨ੍ਤਿ ਅਣ੍ਣਵੇ;

ਤੇ ਤਤ੍ਥ ਸੀਦਨ੍ਤਿ ਅਥੋਪਿ ਏਕਦਾ, ਜੀਨਾਧਨਾ ਏਨ੍ਤਿ ਵਿਨਟ੍ਠਪਾਭਤਾ.

੨੪੫.

‘‘ਆਸਾਯ ਖੇਤ੍ਤਾਨਿ ਕਸਨ੍ਤਿ ਕਸ੍ਸਕਾ, ਵਪਨ੍ਤਿ ਬੀਜਾਨਿ ਕਰੋਨ੍ਤੁਪਾਯਸੋ;

ਈਤੀਨਿਪਾਤੇਨ ਅਵੁਟ੍ਠਿਤਾਯ ਵਾ, ਨ ਕਿਞ੍ਚਿ ਵਿਨ੍ਦਨ੍ਤਿ ਤਤੋ ਫਲਾਗਮਂ.

੨੪੬.

‘‘ਅਥਤ੍ਤਕਾਰਾਨਿ ਕਰੋਨ੍ਤਿ ਭਤ੍ਤੁਸੁ, ਆਸਂ ਪੁਰਕ੍ਖਤ੍ਵਾ ਨਰਾ ਸੁਖੇਸਿਨੋ;

ਤੇ ਭਤ੍ਤੁਰਤ੍ਥਾ ਅਤਿਗਾਲ਼੍ਹਿਤਾ ਪੁਨ, ਦਿਸਾ ਪਨਸ੍ਸਨ੍ਤਿ ਅਲਦ੍ਧ ਕਿਞ੍ਚਨਂ.

੨੪੭.

‘‘ਹਿਤ੍ਵਾਨ ਧਞ੍ਞਞ੍ਚ ਧਨਞ੍ਚ ਞਾਤਕੇ, ਆਸਾਯ ਸਗ੍ਗਾਧਿਮਨਾ ਸੁਖੇਸਿਨੋ;

ਤਪਨ੍ਤਿ ਲੂਖਮ੍ਪਿ ਤਪਂ ਚਿਰਨ੍ਤਰਂ, ਕੁਮਗ੍ਗਮਾਰੁਯ੍ਹ ਪਰੇਨ੍ਤਿ ਦੁਗ੍ਗਤਿਂ.

੨੪੮.

‘‘ਆਸਾ ਵਿਸਂਵਾਦਿਕਸਮ੍ਮਤਾ ਇਮੇ, ਆਸੇ ਸੁਧਾਸਂ ਵਿਨਯਸ੍ਸੁ ਅਤ੍ਤਨਿ;

ਨ ਤਾਦਿਸੀ ਅਰਹਤਿ ਆਸਨੂਦਕਂ, ਕੁਤੋ ਸੁਧਾ ਗਚ੍ਛ ਨ ਮਯ੍ਹ ਰੁਚ੍ਚਸੀ’’ਤਿ.

ਤਤ੍ਥ ਪਰੇਨ੍ਤੀਤਿ ਪਕ੍ਖਨ੍ਦਨ੍ਤਿ. ਜੀਨਾਧਨਾਤਿ ਜੀਨਧਨਾ. ਇਤਿ ਤਵ ਵਸੇਨ ਏਕੇ ਸਮ੍ਪਜ੍ਜਨ੍ਤਿ ਏਕੇ ਵਿਪਜ੍ਜਨ੍ਤਿ, ਨਤ੍ਥਿ ਤਯਾ ਸਦਿਸਾ ਪਾਪਧਮ੍ਮਾਤਿ ਵਦਤਿ. ਕਰੋਨ੍ਤੁਪਾਯਸੋਤਿ ਤਂ ਤਂ ਕਿਚ੍ਚਂ ਉਪਾਯੇਨ ਕਰੋਨ੍ਤਿ. ਈਤੀਨਿਪਾਤੇਨਾਤਿ ਵਿਸਮਵਾਤਮੂਸਿਕਸਲਭਸੁਕਪਾਣਕਸੇਤਟ੍ਠਿਕਰੋਗਾਦੀਨਂ ਸਸ੍ਸੁਪਦ੍ਦਵਾਨਂ ਅਞ੍ਞਤਰਨਿਪਾਤੇਨ ਵਾ. ਤਤੋਤਿ ਤਤੋ ਸਸ੍ਸਤੋ ਤੇ ਕਿਞ੍ਚਿ ਫਲਂ ਨ ਵਿਨ੍ਦਨ੍ਤਿ, ਤੇਸਮ੍ਪਿ ਆਸਚ੍ਛੇਦਨਕਮ੍ਮਂ ਤ੍ਵਮੇਵ ਕਰੋਸੀਤਿ ਵਦਤਿ. ਅਥਤ੍ਤਕਾਰਾਨੀਤਿ ਯੁਦ੍ਧਭੂਮੀਸੁ ਪੁਰਿਸਕਾਰੇ. ਆਸਂ ਪੁਰਕ੍ਖਤ੍ਵਾਤਿ ਇਸ੍ਸਰਿਯਾਸਂ ਪੁਰਤੋ ਕਤ੍ਵਾ. ਭਤ੍ਤੁਰਤ੍ਥਾਤਿ ਸਾਮਿਨੋ ਅਤ੍ਥਾਯ. ਅਤਿਗਾਲ਼ਿਤਾਤਿ ਪਚ੍ਚਤ੍ਥਿਕੇਹਿ ਅਤਿਪੀਲ਼ਿਤਾ ਵਿਲੁਤ੍ਤਸਾਪਤੇਯ੍ਯਾ ਦ੍ਧਸ੍ਤਸੇਨਵਾਹਨਾ ਹੁਤ੍ਵਾ. ਪਨਸ੍ਸਨ੍ਤੀਤਿ ਪਲਾਯਨ੍ਤਿ. ਅਲਦ੍ਧ ਕਿਞ੍ਚਨਨ੍ਤਿ ਕਿਞ੍ਚਿ ਇਸ੍ਸਰਿਯਂ ਅਲਭਿਤ੍ਵਾ. ਇਤਿ ਏਤੇਸਮ੍ਪਿ ਇਸ੍ਸਰਿਯਾਲਾਭਂ ਤ੍ਵਮੇਵ ਕਰੋਸੀਤਿ ਵਦਤਿ. ਸਗ੍ਗਾਧਿਮਨਾਤਿ ਸਗ੍ਗਂ ਅਧਿਗਨ੍ਤੁਮਨਾ. ਲੂਖਨ੍ਤਿ ਨਿਰੋਜਂ ਪਞ੍ਚਤਪਾਦਿਕਂ ਕਾਯਕਿਲਮਥਂ. ਚਿਰਨ੍ਤਰਨ੍ਤਿ ਚਿਰਕਾਲਂ. ਆਸਾ ਵਿਸਂਵਾਦਿਕਸਮ੍ਮਤਾ ਇਮੇਤਿ ਏਵਂ ਇਮੇ ਸਤ੍ਤਾ ਸਗ੍ਗਾਸਾਯ ਦੁਗ੍ਗਤਿਂ ਗਚ੍ਛਨ੍ਤਿ, ਤਸ੍ਮਾ ਤ੍ਵਂ ਆਸਾ ਨਾਮ ਵਿਸਂਵਾਦਿਕਸਮ੍ਮਤਾ ਵਿਸਂਵਾਦਿਕਾਤਿ ਸਙ੍ਖਂ ਗਤਾ. ਆਸੇਤਿ ਤਂ ਆਲਪਤਿ.

ਸਾਪਿ ਤੇਨ ਪਟਿਕ੍ਖਿਤ੍ਤਾ ਅਨ੍ਤਰਧਾਯਿ. ਤਤੋ ਸਦ੍ਧਾਯ ਸਦ੍ਧਿਂ ਸਲ੍ਲਪਨ੍ਤੋ ਗਾਥਮਾਹ –

੨੪੯.

‘‘ਦਦ੍ਦਲ੍ਲਮਾਨਾ ਯਸਸਾ ਯਸਸ੍ਸਿਨੀ, ਜਿਘਞ੍ਞਨਾਮਵ੍ਹਯਨਂ ਦਿਸਂ ਪਤਿ;

ਪੁਚ੍ਛਾਮਿ ਤਂ ਕਞ੍ਚਨਵੇਲ੍ਲਿਵਿਗ੍ਗਹੇ, ਆਚਿਕ੍ਖ ਮੇ ਤ੍ਵਂ ਕਤਮਾਸਿ ਦੇਵਤੇ’’ਤਿ.

ਤਤ੍ਥ ਦਦ੍ਦਲ੍ਲਮਾਨਾਤਿ ਜਲਮਾਨਾ. ਜਿਘਞ੍ਞਨਾਮਵ੍ਹਯਨਨ੍ਤਿ ਅਪਰਾਤਿ ਚ ਪਚ੍ਛਿਮਾਤਿ ਚ ਏਵਂ ਜਿਘਞ੍ਞੇਨ ਲਾਮਕੇਨ ਨਾਮੇਨ ਵੁਚ੍ਚਮਾਨਂ ਦਿਸਂ ਪਤਿ ਦਦ੍ਦਲ੍ਲਮਾਨਾ ਤਿਟ੍ਠਸਿ.

ਤਤੋ ਸਾ ਗਾਥਮਾਹ –

੨੫੦.

‘‘ਸਦ੍ਧਾਹ ਦੇਵੀ ਮਨੁਜੇਹਿ ਪੂਜਿਤਾ, ਅਪਾਪਸਤ੍ਤੂਪਨਿਸੇਵਿਨੀ ਸਦਾ;

ਸੁਧਾਵਿਵਾਦੇਨ ਤਵਨ੍ਤਿ ਮਾਗਤਾ, ਤਂ ਮਂ ਸੁਧਾਯ ਵਰਪਞ੍ਞ ਭਾਜਯਾ’’ਤਿ.

ਤਤ੍ਥ ਸਦ੍ਧਾਤਿ ਯਸ੍ਸ ਕਸ੍ਸਚਿ ਵਚਨਪਤ੍ਤਿਯਾਯਨਾ ਸਾਵਜ੍ਜਾਪਿ ਹੋਤਿ ਅਨਵਜ੍ਜਾਪਿ. ਪੂਜਿਤਾਤਿ ਅਨਵਜ੍ਜਕੋਟ੍ਠਾਸਵਸੇਨ ਪੂਜਿਤਾ. ਅਪਾਪਸਤ੍ਤੂਪਨਿਸੇਵਿਨੀਤਿ ਅਨਵਜ੍ਜਸਦ੍ਧਾਯ ਚ ਏਕਨ੍ਤਪਤ੍ਤਿਯਾਯਨੁਸਭਾਵਾਰ ਪਰੇਸੁਪਿ ਪਤ੍ਤਿਯਾਯਨਵਿਦਹਨਸਮਤ੍ਥਾਯ ਦੇਵਤਾਯੇਤਂ ਨਾਮਂ.

ਅਥਂ ਨਂ ਕੋਸਿਯੋ ‘‘ਇਮੇ ਸਤ੍ਤਾ ਯਸ੍ਸ ਕਸ੍ਸਚਿ ਵਚਨਂ ਸਦ੍ਦਹਿਤ੍ਵਾ ਤਂ ਤਂ ਕਰੋਨ੍ਤਾ ਕਤ੍ਤਬ੍ਬਤੋ ਅਕਤ੍ਤਬ੍ਬਮੇਵ ਬਹੁਤਰਂ ਕਰੋਨ੍ਤਿ, ਤਂ ਸਬ੍ਬਂ ਤਯਾ ਕਾਰਿਤਂ ਨਾਮ ਹੋਤੀ’’ਤਿ ਵਤ੍ਵਾ ਏਵਮਾਹ –

੨੫੧.

‘‘ਦਾਨਂ ਦਮਂ ਚਾਗਮਥੋਪਿ ਸਂਯਮਂ, ਆਦਾਯ ਸਦ੍ਧਾਯ ਕਰੋਨ੍ਤਿ ਹੇਕਦਾ;

ਥੇਯ੍ਯਂ ਮੁਸਾ ਕੂਟਮਥੋਪਿ ਪੇਸੁਣਂ, ਕਰੋਨ੍ਤਿ ਹੇਕੇ ਪੁਨ ਵਿਚ੍ਚੁਤਾ ਤਯਾ.

੨੫੨.

‘‘ਭਰਿਯਾਸੁ ਪੋਸੋ ਸਦਿਸੀਸੁ ਪੇਕ੍ਖਵਾ, ਸੀਲੂਪਪਨ੍ਨਾਸੁ ਪਤਿਬ੍ਬਤਾਸੁਪਿ;

ਵਿਨੇਤ੍ਵਾਨ ਛਨ੍ਦਂ ਕੁਲਿਤ੍ਥਿਰਾਸੁਪਿ, ਕਰੋਤਿ ਸਦ੍ਧਂ ਪੁਨ ਕੁਮ੍ਭਦਾਸਿਯਾ.

੨੫੩.

‘‘ਤ੍ਵਮੇਵ ਸਦ੍ਧੇ ਪਰਦਾਰਸੇਵਿਨੀ, ਪਾਪਂ ਕਰੋਸਿ ਕੁਸਲਮ੍ਪਿ ਰਿਞ੍ਚਸਿ;

ਨ ਤਾਦਿਸੀ ਅਰਹਤਿ ਆਸਨੂਦਕਂ, ਕੁਤੋ ਸੁਧਾ ਗਚ੍ਛ ਨ ਮਯ੍ਹ ਰੁਚ੍ਚਸੀ’’ਤਿ.

ਤਤ੍ਥ ਦਾਨਨ੍ਤਿ ਦਸਵਤ੍ਥੁਕਂ ਪੁਞ੍ਞਚੇਤਨਂ. ਦਮਨ੍ਤਿ ਇਨ੍ਦ੍ਰਿਯਦਮਨਂ. ਚਾਗਨ੍ਤਿ ਦੇਯ੍ਯਧਮ੍ਮਪਰਿਚ੍ਚਾਗਂ. ਸਂਯਮਨ੍ਤਿ ਸੀਲਂ. ਆਦਾਯ ਸਦ੍ਧਾਯਾਤਿ ‘‘ਏਤਾਨਿ ਦਾਨਾਦੀਨਿ ਮਹਾਨਿਸਂਸਾਨਿ ਕਤ੍ਤਬ੍ਬਾਨੀ’’ਤਿ ਵਦਤਂ ਵਚਨਂ ਸਦ੍ਧਾਯ ਆਦਿਯਿਤ੍ਵਾਪਿ ਕਰੋਨ੍ਤਿ ਏਕਦਾ. ਕੂਟਨ੍ਤਿ ਤੁਲਾਕੂਟਾਦਿਕਂ ਵਾ ਗਾਮਕੂਟਾਦਿਕਂ ਕਮ੍ਮਂ ਵਾ. ਕਰੋਨ੍ਤਿ ਹੇਕੇਤਿ ਏਕੇ ਮਨੁਸ੍ਸਾ ਏਵਰੂਪੇਸੁ ਨਾਮ ਕਾਲੇਸੁ ਇਮੇਸਞ੍ਚ ਅਤ੍ਥਾਯ ਥੇਯ੍ਯਾਦੀਨਿ ਕਤ੍ਤਬ੍ਬਾਨੀਤਿ ਕੇਸਞ੍ਚਿ ਵਚਨਂ ਸਦ੍ਦਹਿਤ੍ਵਾ ਏਤਾਨਿਪਿ ਕਰੋਨ੍ਤਿ. ਪੁਨ ਵਿਚ੍ਚੁਤਾ ਤਯਾਤਿ ਪੁਨ ਤਯਾ ਵਿਸੁਤ੍ਤਾ ਸਾਵਜ੍ਜਦੁਕ੍ਖਵਿਪਾਕਾਨੇਤਾਨਿ ਨ ਕਤ੍ਤਬ੍ਬਾਨੀਤਿ ਵਦਤਂ ਵਚਨਂ ਅਪਤ੍ਤਿਯਾਯਿਤ੍ਵਾਪਿ ਕਰੋਨ੍ਤਿ. ਇਤਿ ਤਵ ਵਸੇਨ ਸਾਵਜ੍ਜਮ੍ਪਿ ਅਨਵਜ੍ਜਮ੍ਪਿ ਕਰੇਯ੍ਯਾਸਿ ਵਦਤਿ.

ਸਦਿਸੀਸੂਤਿ ਜਾਤਿਗੋਤ੍ਤਸੀਲਾਦੀਹਿ ਸਦਿਸੀਸੁ. ਪੇਕ੍ਖਵਾਤਿ ਪੇਕ੍ਖਾ ਵੁਚ੍ਚਤਿ ਤਣ੍ਹਾ, ਸਤਣ੍ਹੋਤਿ ਅਤ੍ਥੋ. ਛਨ੍ਦਨ੍ਤਿ ਛਨ੍ਦਰਾਗਂ. ਕਰੋਤਿ ਸਦ੍ਧਨ੍ਤਿ ਕੁਮ੍ਭਦਾਸਿਯਾਪਿ ਵਚਨੇ ਸਦ੍ਧਂ ਕਰੋਤਿ, ਤਸ੍ਸਾ ‘‘ਅਹਂ ਤੁਮ੍ਹਾਕਂ ਇਦਂ ਨਾਮ ਉਪਕਾਰਂ ਕਰਿਸ੍ਸਾਮੀ’’ਤਿ ਵਦਨ੍ਤਿਯਾ ਪਤ੍ਤਿਯਾਯਿਤ੍ਵਾ ਕੁਲਿਤ੍ਥਿਯੋਪਿ ਛਡ੍ਡੇਤ੍ਵਾ ਤਮੇਵ ਪਟਿਸੇਵਤਿ, ਅਸੁਕਾ ਨਾਮ ਤੁਮ੍ਹੇਸੁ ਪਟਿਬਦ੍ਧਚਿਤ੍ਤਾਤਿ ਕੁਮ੍ਭਦਾਸਿਯਾਪਿ ਵਚਨੇ ਸਦ੍ਧਂ ਕਤ੍ਵਾਵ ਪਰਦਾਰਂ ਸੇਵਤਿ. ਤ੍ਵਮੇਵ ਸਦ੍ਧੇ ਪਰਦਾਰਸੇਵਿਨੀਤਿ ਯਸ੍ਮਾ ਤਂ ਤਂ ਪਤ੍ਤਿਯਾਯਿਤ੍ਵਾ ਤਵ ਵਸੇਨ ਪਰਦਾਰਂ ਸੇਵਨ੍ਤਿ ਪਾਪਂ ਕਰੋਨ੍ਤਿ ਕੁਸਲਂ ਜਹਨ੍ਤਿ, ਤਸ੍ਮਾ ਤ੍ਵਮੇਵ ਪਰਦਾਰਸੇਵਿਨੀ ਤ੍ਵਂ ਪਾਪਾਨਿ ਕਰੋਸਿ, ਕੁਸਲਮ੍ਪਿ ਰਿਞ੍ਚਸਿ, ਨਤ੍ਥਿ ਤਯਾ ਸਮਾ ਲੋਕਵਿਨਾਸਿਕਾ ਪਾਪਧਮ੍ਮਾ, ਗਚ੍ਛ ਨ ਮੇ ਰੁਚ੍ਚਸੀਤਿ.

ਸਾ ਤਤ੍ਥੇਵ ਅਨ੍ਤਰਧਾਯਿ. ਕੋਸਿਯੋਪਿ ਉਤ੍ਤਰਤੋ ਠਿਤਾਯ ਹਿਰਿਯਾ ਸਦ੍ਧਿਂ ਸਲ੍ਲਪਨ੍ਤੋ ਗਾਥਾਦ੍ਵਯਮਾਹ –

੨੫੪.

‘‘ਜਿਘਞ੍ਞਰਤ੍ਤਿਂ ਅਰੁਣਸ੍ਮਿਮੂਹਤੇ, ਯਾ ਦਿਸ੍ਸਤਿ ਉਤ੍ਤਮਰੂਪਵਣ੍ਣਿਨੀ;

ਤਥੂਪਮਾ ਮਂ ਪਟਿਭਾਸਿ ਦੇਵਤੇ, ਆਚਿਕ੍ਖ ਮੇ ਤ੍ਵਂ ਕਤਮਾਸਿ ਅਚ੍ਛਰਾ.

੨੫੫.

‘‘ਕਾਲ਼ਾ ਨਿਦਾਘੇਰਿਵ ਅਗ੍ਗਿਜਾਰਿਵ, ਅਨਿਲੇਰਿਤਾ ਲੋਹਿਤਪਤ੍ਤਮਾਲਿਨੀ;

ਕਾ ਤਿਟ੍ਠਸਿ ਮਨ੍ਦਮਿਗਾਵਲੋਕਯਂ, ਭਾਸੇਸਮਾਨਾਵ ਗਿਰਂ ਨ ਮੁਞ੍ਚਸੀ’’ਤਿ.

ਤਤ੍ਥ ਜਿਘਞ੍ਞਰਤ੍ਤਿਨ੍ਤਿ ਪਚ੍ਛਿਮਰਤ੍ਤਿਂ, ਰਤ੍ਤਿਪਰਿਯੋਸਾਨੇਤਿ ਅਤ੍ਥੋ. ਊਹਤੇਤਿ ਅਰੁਣੇ ਉਗ੍ਗਤੇ. ਯਾਤਿ ਯਾ ਪੁਰਤ੍ਥਿਮਾ ਦਿਸਾ ਰਤ੍ਤਸੁਵਣ੍ਣਤਾਯ ਉਪ੍ਪਮਰੂਪਧਰਾ ਹੁਤ੍ਵਾ ਦਿਸ੍ਸਤਿ. ਕਾਲ਼ਾ ਨਿਦਾਘੇਰਿਵਾਤਿ ਨਿਦਾਘਸਮਯੇ ਕਾਲ਼ਵਲ੍ਲਿ ਵਿਯ. ਅਗ੍ਗਿਜਾਰਿਵਾਤਿ ਅਗ੍ਗਿਜਾਲਾ ਇਵ, ਸਾਪਿ ਨਿਜ੍ਝਾਮਖੇਤ੍ਤੇਸੁ ਤਰੁਣਉਟ੍ਠਿਤਕਾਲ਼ਵਲ੍ਲਿ ਵਿਯਾਤਿ ਅਤ੍ਥੋ. ਲੋਹਿਤਪਤ੍ਤਮਾਲਿਨੀਤਿ ਲੋਹਿਤਵਣ੍ਣੇਹਿ ਪਤ੍ਤੇਹਿ ਪਰਿਵੁਤਾ. ਕਾ ਤਿਟ੍ਠਸੀਤਿ ਯਥਾ ਸਾ ਤਰੁਣਕਾਲ਼ਵਲ੍ਲਿ ਵਾਤੇਰਿਤਾ ਵਿਲਾਸਮਾਨਾ ਸੋਭਮਾਨਾ ਤਿਟ੍ਠਤਿ, ਏਵਂ ਕਾ ਨਾਮ ਤ੍ਵਂ ਤਿਟ੍ਠਸਿ. ਭਾਸੇਸਮਾਨਾਵਾਤਿ ਮਯਾ ਸਦ੍ਧਿਂ ਭਾਸਿਤੁਕਾਮਾ ਵਿਯ ਹੋਸਿ, ਨ ਚ ਗਿਰਂ ਮੁਞ੍ਚਸਿ.

ਤਤੋ ਸਾ ਗਾਥਮਾਹ –

੨੫੬.

‘‘ਹਿਰਾਹ ਦੇਵੀ ਮਨੁਜੇਹਿ ਪੂਜਿਤਾ, ਅਪਾਪਸਤ੍ਤੂਪਨਿਸੇਵਿਨੀ ਸਦਾ;

ਸੁਧਾਵਿਵਾਦੇਨ ਤਵਨ੍ਤਿਮਾਗਤਾ, ਸਾਹਂ ਨ ਸਕ੍ਕੋਮਿ ਸੁਧਮ੍ਪਿ ਯਾਚਿਤੁਂ;

ਕੋਪੀਨਰੂਪਾ ਵਿਯ ਯਾਚਨਿਤ੍ਥਿਯਾ’’ਤਿ.

ਤਤ੍ਥ ਹਿਰਾਹਨ੍ਤਿ ਹਿਰੀ ਅਹਂ. ਸੁਧਮ੍ਪੀਤਿ ਸਾ ਅਹਂ ਸੁਧਾਭੋਜਨਂ ਤਂ ਯਾਚਿਤੁਮ੍ਪਿ ਨ ਸਕ੍ਕੋਮਿ. ਕਿਂਕਾਰਣਾ? ਕੋਪੀਨਰੂਪਾ ਵਿਯ ਯਾਚਨਿਤ੍ਥਿਯਾ, ਯਸ੍ਮਾ ਇਤ੍ਥਿਯਾ ਯਾਚਨਾ ਨਾਮ ਕੋਪੀਨਰੂਪਾ ਵਿਯ ਰਹਸ੍ਸਙ੍ਗਵਿਵਰਣਸਦਿਸਾ ਹੋਤਿ, ਨਿਲ੍ਲਜ੍ਜਾ ਵਿਯ ਹੋਤੀਤਿ ਅਤ੍ਥੋ.

ਤਂ ਸੁਤ੍ਵਾ ਤਾਪਸੋ ਦ੍ਵੇ ਗਾਥਾ ਅਭਾਸਿ –

੨੫੭.

‘‘ਧਮ੍ਮੇਨ ਞਾਯੇਨ ਸੁਗਤ੍ਤੇ ਲਚ੍ਛਸਿ, ਏਸੋ ਹਿ ਧਮ੍ਮੋ ਨ ਹਿ ਯਾਚਨਾ ਸੁਧਾ.

ਤਂ ਤਂ ਅਯਾਚਨ੍ਤਿਮਹਂ ਨਿਮਨ੍ਤਯੇ, ਸੁਧਾਯ ਯਞ੍ਚਿਚ੍ਛਸਿ ਤਮ੍ਪਿ ਦਮ੍ਮਿ ਤੇ.

੨੫੮.

‘‘ਸਾ ਤ੍ਵਂ ਮਯਾ ਅਜ੍ਜ ਸਕਮ੍ਹਿ ਅਸ੍ਸਮੇ, ਨਿਮਨ੍ਤਿਤਾ ਕਞ੍ਚਨਵੇਲ੍ਲਿਵਿਗ੍ਗਹੇ;

ਤੁਵਞ੍ਹਿ ਮੇ ਸਬ੍ਬਰਸੇਹਿ ਪੂਜਿਯਾ, ਤਂ ਪੂਜਯਿਤ੍ਵਾਨ ਸੁਧਮ੍ਪਿ ਅਸ੍ਨਿਯੇ’’ਤਿ.

ਤਤ੍ਥ ਧਮ੍ਮੇਨਾਤਿ ਸਭਾਵੇਨ. ਞਾਯੇਨਾਤਿ ਕਾਰਣੇਨ. ਨ ਹਿ ਯਾਚਨਾ ਸੁਧਾਤਿ ਨ ਹਿ ਯਾਚਨਾਯ ਸੁਧਾ ਲਬ੍ਭਤਿ, ਤੇਨੇਵ ਕਾਰਣੇਨ ਇਤਰਾ ਤਿਸ੍ਸੋ ਨਲਭਿਂਸੁ. ਤਂ ਤਨ੍ਤਿ ਤਸ੍ਮਾ ਤਂ. ਯਞ੍ਚਿਚ੍ਛਸੀਤਿ ਨ ਕੇਵਲਂ ਨਿਮਨ੍ਤੇਮਿਯੇਵ, ਯਞ੍ਚ ਸੁਧਂ ਇਚ੍ਛਸਿ, ਤਮ੍ਪਿ ਦਮ੍ਮਿ ਤੇ. ਕਞ੍ਚਨਵੇਲ੍ਲਿਵਿਗ੍ਗਹੇਤਿ ਕਞ੍ਚਨਰਾਸਿਸਸ੍ਸਿਰਿਕਸਰੀਰੇ. ਪੂਜਿਯਾਤਿ ਨ ਕੇਵਲਂ ਸੁਧਾਯ, ਅਞ੍ਞੇਹਿਪਿ ਸਬ੍ਬਰਸੇਹਿ ਤ੍ਵਂ ਮਯਾ ਪੂਜੇਤਬ੍ਬਯੁਤ੍ਤਕਾਵ. ਅਸ੍ਨਿਯੇਤਿ ਤਂ ਪੂਜੇਤ੍ਵਾ ਸਚੇ ਸੁਧਾਯ ਅਵਸੇਸਂ ਭਵਿਸ੍ਸਤਿ, ਅਹਮ੍ਪਿ ਭੁਞ੍ਜਿਸ੍ਸਾਮਿ.

ਤਤੋ ਅਪਰਾ ਅਭਿਸਮ੍ਬੁਦ੍ਧਗਾਥਾ –

੨੫੯.

‘‘ਸਾ ਕੋਸਿਯੇਨਾਨੁਮਤਾ ਜੁਤੀਮਤਾ, ਅਦ੍ਧਾ ਹਿਰਿ ਰਮ੍ਮਂ ਪਾਵਿਸਿ ਯਸ੍ਸਮਂ;

ਉਦਕਵਨ੍ਤਂ ਫਲਮਰਿਯਪੂਜਿਤਂ, ਅਪਾਪਸਤ੍ਤੂਪਨਿਸੇਵਿਤਂ ਸਦਾ.

੨੬੦.

‘‘ਰੁਕ੍ਖਗ੍ਗਹਾਨਾ ਬਹੁਕੇਤ੍ਥ ਪੁਪ੍ਫਿਤਾ, ਅਮ੍ਬਾ ਪਿਯਾਲਾ ਪਨਸਾ ਚ ਕਿਂਸੁਕਾ;

ਸੋਭਞ੍ਜਨਾ ਲੋਦ੍ਦਮਥੋਪਿ ਪਦ੍ਧਕਾ, ਕੇਕਾ ਚ ਭਙ੍ਗਾ ਤਿਲਕਾ ਸੁਪੁਪ੍ਫਿਤਾ.

੨੬੧.

‘‘ਸਾਲਾ ਕਰੇਰੀ ਬਹੁਕੇਤ੍ਥ ਜਮ੍ਬੁਯੋ, ਅਸ੍ਸਤ੍ਥਨਿਗ੍ਰੋਧਮਧੁਕਵੇਤਸਾ;

ਉਦ੍ਦਾਲਕਾ ਪਾਟਲਿ ਸਿਨ੍ਦੁਵਾਰਕਾ, ਮਨੁਞ੍ਞਗਨ੍ਧਾ ਮੁਚਲਿਨ੍ਦਕੇਤਕਾ.

੨੬੨.

‘‘ਹਰੇਣੁਕਾ ਵੇਲ਼ੁਕਾ ਕੇਣੁ ਤਿਨ੍ਦੁਕਾ, ਸਾਮਾਕਨੀਵਾਰਮਥੋਪਿ ਚੀਨਕਾ;

ਮੋਚਾ ਕਦਲੀ ਬਹੁਕੇਤ੍ਥ ਸਾਲਿਯੋ, ਪਵੀਹਯੋ ਆਭੂਜਿਨੋ ਚ ਤਣ੍ਡੁਲਾ.

੨੬੩.

‘‘ਤਸ੍ਸੇਵੁਤ੍ਤਰਪਸ੍ਸੇਨ, ਜਾਤਾ ਪੋਕ੍ਖਰਣੀ ਸਿਵਾ;

ਅਕਕ੍ਕਸਾ ਅਪਬ੍ਭਾਰਾ, ਸਾਧੁ ਅਪ੍ਪਟਿਗਨ੍ਧਿਕਾ.

੨੬੪.

‘‘ਤਤ੍ਥ ਮਚ੍ਛਾ ਸਨ੍ਨਿਰਤਾ, ਖੇਮਿਨੋ ਬਹੁਭੋਜਨਾ;

ਸਿਙ੍ਗੂ ਸਵਙ੍ਕਾ ਸਂਕੁਲਾ, ਸਤਵਙ੍ਕਾ ਚ ਰੋਹਿਤਾ;

ਆਲ਼ਿਗਗ੍ਗਰਕਾਕਿਣ੍ਣਾ, ਪਾਠੀਨਾ ਕਾਕਮਚ੍ਛਕਾ.

੨੬੫.

‘‘ਤਤ੍ਥ ਪਕ੍ਖੀ ਸਨ੍ਨਿਰਤਾ, ਖੇਮਿਨੋ ਬਹੁਭੋਜਨਾ;

ਹਂਸਾ ਕੋਞ੍ਚਾ ਮਯੂਰਾ ਚ, ਚਕ੍ਕਵਾਕਾ ਚ ਕੁਕ੍ਕੁਹਾ;

ਕੁਣਾਲਕਾ ਬਹੂ ਚਿਤ੍ਰਾ, ਸਿਖਣ੍ਡੀ ਜੀਵਜੀਵਕਾ.

੨੬੬.

‘‘ਤਤ੍ਥ ਪਾਨਾਯ ਮਾਯਨ੍ਤਿ, ਨਾਨਾ ਮਿਗਗਣਾ ਬਹੂ;

ਸੀਹਾ ਬ੍ਯਗ੍ਘਾ ਵਰਾਹਾ ਚ, ਅਚ੍ਛਕੋਕਤਰਚ੍ਛਯੋ.

੨੬੭.

‘‘ਪਲਾਸਾਦਾ ਗਵਜਾ ਚ, ਮਹਿਂਸਾ ਰੋਹਿਤਾ ਰੁਰੂ;

ਏਣੇਯ੍ਯਾ ਚ ਵਰਾਹਾ ਚ, ਗਣਿਨੋ ਨੀਕਸੂਕਰਾ;

ਕਦਲਿਮਿਗਾ ਬਹੁਕੇਤ੍ਥ, ਬਿਲ਼ਾਰਾ ਸਸਕਣ੍ਣਿਕਾ.

੨੬੮.

‘‘ਛਮਾਗਿਰੀ ਪੁਪ੍ਫਵਿਚਿਤ੍ਰਸਨ੍ਥਤਾ, ਦਿਜਾਭਿਘੁਟ੍ਠਾ ਦਿਜਸਙ੍ਘਸੇਵਿਤਾ’’ਤਿ.

ਤਤ੍ਥ ਜੁਤੀਮਤਾਤਿ ਆਨੁਭਾਵਸਮ੍ਪਨ੍ਨੇਨ. ਪਾਵਿਸਿ ਯਸ੍ਸਮਨ੍ਤਿ ਪਾਵਿਸਿ ਅਸ੍ਸਮਂ, ਯ-ਕਾਰੋ ਬ੍ਯਞ੍ਜਨਸਨ੍ਧਿਕਰੋ. ਉਦਕਵਨ੍ਤਨ੍ਤਿ ਤੇਸੁ ਤੇਸੁ ਠਾਨੇਸੁ ਉਦਕਸਮ੍ਪਨ੍ਨਂ. ਫਲਨ੍ਤਿ ਅਨੇਕਫਲਸਮ੍ਪਨ੍ਨਂ. ਅਰਿਯਪੂਜਿਤਨ੍ਤਿ ਨੀਵਰਣਦੋਸਰਹਿਤੇਹਿ ਝਾਨਲਾਭੀਹਿ ਅਰਿਯੇਹਿ ਪੂਜਿਤਂ ਪਸਤ੍ਥਂ. ਰੁਕ੍ਖਗ੍ਗਹਾਨਾਤਿ ਪੁਪ੍ਫੂਪਗਫਲੂਪਗਰੁਕ੍ਖਗਹਨਾ. ਸੋਭਞ੍ਜਨਾਤਿ ਸਿਗ੍ਗੁਰੁਕ੍ਖਾ. ਲੋਦ੍ਦਮਥੋਪਿ ਪਦ੍ਧਕਾਤਿ ਲੋਦ੍ਦਰੁਕ੍ਖਾ ਚ ਪਦੁਮਰੁਕ੍ਖਾ ਚ. ਕੇਕਾ ਚ ਭਙ੍ਗਾਤਿ ਏਵਂਨਾਮਕਾ ਰੁਕ੍ਖਾ ਏਵ. ਕਰੇਰੀਤਿ ਕਰੇਰਿਰੁਕ੍ਖਾ. ਉਦ੍ਦਾਲਕਾਤਿ ਵਾਤਘਾਤਕਾ. ਮੁਚਲਿਨ੍ਦਕੇਤਕਾਤਿ ਮੁਚਲਿਨ੍ਦਾ ਚ ਪਞ੍ਚਵਿਧਕੇਤਕਾ ਚ. ਹਰੇਣੁਕਾਤਿ ਅਪਰਣ੍ਣਜਾਤਿ. ਵੇਲ਼ੁਕਾਤਿ ਵਂਸਭੇਦਕਾ. ਕੇਣੂਤਿ ਅਰਞ੍ਞਮਾਸਾ. ਤਿਨ੍ਦੁਕਾਤਿ ਤਿਮ੍ਬਰੁਰੁਕ੍ਖਾ. ਚੀਨਕਾਤਿ ਖੁਦ੍ਦਕਰਾਜਮਾਸਾ. ਮੋਚਾਤਿ ਅਟ੍ਠਿਕਕਦਲਿਯੋ. ਸਾਲਿਯੋਤਿ ਨਾਨਪ੍ਪਕਾਰਾ ਜਾਤਸ੍ਸਰਂ ਉਪਨਿਸ੍ਸਾਯ ਜਾਤਾ ਸਾਲਿਯੋ. ਪਵੀਹਯੋਤਿ ਨਾਨਪ੍ਪਕਾਰਾ ਵੀਹਯੋ. ਆਭੂਜਿਨੋਤਿ ਭੁਜਪਤ੍ਤਾ. ਤਣ੍ਡੁਲਾਤਿ ਨਿਕ੍ਕੁਣ੍ਡਕਥੁਸਾਨਿ ਸਯਂਜਾਤਤਣ੍ਡੁਲਸੀਸਾਨਿ.

ਤਸ੍ਸੇਵਾਤਿ, ਭਿਕ੍ਖਵੇ, ਤਸ੍ਸੇਵ ਅਸ੍ਸਮਸ੍ਸ ਉਤ੍ਤਰਦਿਸਾਭਾਗੇ. ਪੋਕ੍ਖਰਣੀਤਿ ਪਞ੍ਚਵਿਧਪਦੁਮਸਞ੍ਛਨ੍ਨਾ ਜਾਤਸ੍ਸਰਪੋਕ੍ਖਰਣੀ. ਅਕਕ੍ਕਸਾਤਿ ਮਚ੍ਛਸਿਪ੍ਪਿਕਸੇਵਾਲਾਦਿਕਕ੍ਕਸਰਹਿਤਾ. ਅਪਬ੍ਭਾਰਾਤਿ ਅਚ੍ਛਿਨ੍ਨਤਟਾ ਸਮਤਿਤ੍ਥਾ. ਅਪ੍ਪਟਿਗਨ੍ਧਿਕਾਤਿ ਅਪਟਿਕ੍ਕੂਲਗਨ੍ਧੇਨ ਉਦਕੇਨ ਸਮਨ੍ਨਾਗਤਾ. ਤਤ੍ਥਾਤਿ ਤਸ੍ਸਾ ਪੋਕ੍ਖਰਣਿਯਾ. ਖੇਮਿਨੋਤਿ ਅਭਯਾ. ‘‘ਸਿਙ੍ਗੂ’’ਤਿਆਦੀਨਿ ਤੇਸਂ ਮਚ੍ਛਾਨਂ ਨਾਮਾਨਿ. ਕੁਣਾਲਕਾਤਿ ਕੋਕਿਲਾ. ਚਿਤ੍ਰਾਤਿ ਚਿਤ੍ਰਪਤ੍ਤਾ. ਸਿਖਣ੍ਡੀਤਿ ਉਟ੍ਠਿਤਸਿਖਾ ਮੋਰਾ, ਅਞ੍ਞੇਪਿ ਵਾ ਮਤ੍ਥਕੇ ਜਾਤਸਿਖਾ ਪਕ੍ਖਿਨੋ. ਪਾਨਾਯ ਮਾਯਨ੍ਤੀਤਿ ਪਾਨਾਯ ਆਯਨ੍ਤਿ. ਪਲਾਸਾਦਾਤਿ ਖਗ੍ਗਾ. ਗਵਜਾਤਿ ਗਵਯਾ. ਗਣਿਨੋਤਿ ਗੋਕਣ੍ਣਾ. ਕਣ੍ਣਿਕਾਤਿ ਕਣ੍ਣਿਕਮਿਗਾ. ਛਮਾਗਿਰੀਤਿ ਭੂਮਿਸਮਪਤ੍ਥਟਾ ਪਿਟ੍ਠਿਪਾਸਾਣਾ. ਪੁਪ੍ਫਵਿਚਿਤ੍ਰਸਨ੍ਥਤਾਤਿ ਵਿਚਿਤ੍ਰਪੁਪ੍ਫਸਨ੍ਥਤਾ. ਦਿਜਾਭਿਘੁਟ੍ਠਾਤਿ ਮਧੁਰਸ੍ਸਰੇਹਿ ਦਿਜੇਹਿ ਅਭਿਘੁਟ੍ਠਾ. ਏਵਰੂਪਾ ਤਤ੍ਥ ਭੂਮਿਪਬ੍ਬਤਾਤਿ ਏਵਂ ਭਗਵਾ ਕੋਸਿਯਸ੍ਸ ਅਸ੍ਸਮਂ ਵਣ੍ਣੇਤਿ.

ਇਦਾਨਿ ਹਿਰਿਦੇਵਿਯਾ ਤਤ੍ਥ ਪਵਿਸਨਾਦੀਨਿ ਦਸ੍ਸੇਤੁਂ ਆਹ –

੨੬੯.

‘‘ਸਾ ਸੁਤ੍ਤਚਾ ਨੀਲਦੁਮਾਭਿਲਮ੍ਬਿਤਾ, ਵਿਜ੍ਜੂ ਮਹਾਮੇਘਰਿਵਾਨੁਪਜ੍ਜਥ;

ਤਸ੍ਸਾ ਸੁਸਮ੍ਬਨ੍ਧਸਿਰਂ ਕੁਸਾਮਯਂ, ਸੁਚਿਂ ਸੁਗਨ੍ਧਂ ਅਜਿਨੂਪਸੇਵਿਤਂ;

ਅਤ੍ਰਿਚ੍ਚ ਕੋਚ੍ਛਂ ਹਿਰਿਮੇਤਦਬ੍ਰਵਿ, ਨਿਸੀਦ ਕਲ੍ਯਾਣਿ ਸੁਖਯਿਦਮਾਸਨਂ.

੨੭੦.

‘‘ਤਸ੍ਸਾ ਤਦਾ ਕੋਚ੍ਛਗਤਾਯ ਕੋਸਿਯੋ, ਯਦਿਚ੍ਛਮਾਨਾਯ ਜਟਾਜਿਨਨ੍ਧਰੋ;

ਨਵੇਹਿ ਪਤ੍ਤੇਹਿ ਸਯਂ ਸਹੂਦਕਂ, ਸੁਧਾਭਿਹਾਸੀ ਤੁਰਿਤੋ ਮਹਾਮੁਨਿ.

੨੭੧.

‘‘ਸਾ ਤਂ ਪਟਿਗ੍ਗਯ੍ਹ ਉਭੋਹਿ ਪਾਣਿਭਿ, ਇਚ੍ਚਬ੍ਰਵਿ ਅਤ੍ਤਮਨਾ ਜਟਾਧਰਂ;

ਹਨ੍ਦਾਹਂ ਏਤਰਹਿ ਪੂਜਿਤਾ ਤਯਾ, ਗਚ੍ਛੇਯ੍ਯਂ ਬ੍ਰਹ੍ਮੇ ਤਿਦਿਵਂ ਜਿਤਾਵਿਨੀ.

੨੭੨.

‘‘ਸਾ ਕੋਸਿਯੇਨਾਨੁਮਤਾ ਜੁਤੀਮਤਾ, ਉਦੀਰਿਤਾ ਵਣ੍ਣਮਦੇਨ ਮਤ੍ਤਾ;

ਸਕਾਸੇ ਗਨ੍ਤ੍ਵਾਨ ਸਹਸ੍ਸਚਕ੍ਖੁਨੋ, ਅਯਂ ਸੁਧਾ ਵਾਸਵ ਦੇਹਿ ਮੇ ਜਯਂ.

੨੭੩.

‘‘ਤਮੇਨ ਸਕ੍ਕੋਪਿ ਤਦਾ ਅਪੂਜਯਿ, ਸਹਿਨ੍ਦਦੇਵਾ ਸੁਰਕਞ੍ਞਮੁਤ੍ਤਮਂ;

ਸਾ ਪਞ੍ਜਲੀ ਦੇਵਮਨੁਸ੍ਸਪੂਜਿਤਾ, ਨਵਮ੍ਹਿ ਕੋਚ੍ਛਮ੍ਹਿ ਯਦਾ ਉਪਾਵਿਸੀ’’ਤਿ.

ਤਤ੍ਥ ਸੁਤ੍ਤਚਾਤਿ ਸੁਚ੍ਛਵੀ. ਨੀਲਦੁਮਾਭਿਲਮ੍ਬਿਤਾਤਿ ਨੀਲੇਸੁ ਦੁਮੇਸੁ ਅਭਿਲਮ੍ਬਿਤਾ ਹੁਤ੍ਵਾ, ਤਂ ਤਂ ਨੀਲਦੁਮਸਾਖਂ ਪਰਾਮਸਨ੍ਤੀਤਿ ਅਤ੍ਥੋ. ਮਹਾਮੇਘਰਿਵਾਤਿ ਤੇਨ ਨਿਮਨ੍ਤਿਤਾ ਮਹਾਮੇਘਵਿਜ੍ਜੁ ਵਿਯ ਤਸ੍ਸ ਤਂ ਅਸ੍ਸਮਂ ਪਾਵਿਸਿ. ਤਸ੍ਸਾਤਿ ਤਸ੍ਸਾ ਹਿਰਿਯਾ. ਸੁਸਮ੍ਬਨ੍ਧਸਿਰਨ੍ਤਿ ਸੁਟ੍ਠੁ ਸਮ੍ਬਨ੍ਧਸੀਸਂ. ਕੁਸਾਮਯਨ੍ਤਿ ਉਸੀਰਾਦਿਮਿਸ੍ਸਕਕੁਸਤਿਣਮਯਂ. ਸੁਗਨ੍ਧਨ੍ਤਿ ਉਸੀਰੇਨ ਚੇਵ ਅਞ੍ਞੇਨ ਸੁਗਨ੍ਧਤਿਣੇਨ ਚ ਮਿਸ੍ਸਕਤ੍ਤਾ ਸੁਗਨ੍ਧਂ. ਅਜਿਨੂਪਸੇਵਿਤਨ੍ਤਿ ਉਪਰਿਅਤ੍ਥਤੇਨ ਅਜਿਨਚਮ੍ਮੇਨ ਉਪਸੇਵਿਤਂ. ਅਤ੍ਰਿਚ੍ਚ ਕੋਚ੍ਛਨ੍ਤਿ ਏਵਰੂਪਂ ਕੋਚ੍ਛਾਸਨਂ ਪਣ੍ਣਸਾਲਦ੍ਵਾਰੇ ਅਤ੍ਥਰਿਤ੍ਵਾ. ਸੁਖਯਿਦਮਾਸਨਨ੍ਤਿ ਸੁਖਂ ਨਿਸੀਦ ਇਦਮਾਸਨਂ.

ਯਨ੍ਤਿ ਯਾਵਦਤ੍ਥਂ. ਇਚ੍ਛਮਾਨਾਯਾਤਿ ਸੁਧਂ ਇਚ੍ਛਨ੍ਤਿਯਾ. ਨਵੇਹਿ ਪਤ੍ਤੇਹੀਤਿ ਤਙ੍ਖਣਞ੍ਞੇਵ ਪੋਕ੍ਖਰਣਿਤੋ ਆਭਤੇਹਿ ਅਲ੍ਲਪਦੁਮਿਨਿਪਤ੍ਤੇਹਿ. ਸਯਨ੍ਤਿ ਸਹਤ੍ਥੇਨ. ਸਹੂਦਕਨ੍ਤਿ ਦਕ੍ਖਿਣੋਦਕਸਹਿਤਂ. ਸੁਧਾਭਿਹਾਸੀਤਿ ਸੁਧਂ ਅਭਿਹਰਿ. ਤੁਰਿਤੋਤਿ ਸੋਮਨਸ੍ਸਵੇਗੇਨ ਤੁਰਿਤੋ. ਹਨ੍ਦਾਤਿ ਵਵਸ੍ਸਗ੍ਗਤ੍ਥੇ ਨਿਪਾਤੋ. ਜਿਤਾਵਿਨੀਤਿ ਵਿਜਯਪ੍ਪਤ੍ਤਾ ਹੁਤ੍ਵਾ.

ਅਨੁਮਤਾਤਿ ਇਦਾਨਿ ਯਥਾਰੁਚਿਂ ਗਚ੍ਛਾਤਿ ਅਨੁਞ੍ਞਾਤਾ. ਉਦੀਰਿਤਾਤਿ ਤਿਦਸਪੁਰਂ ਗਨ੍ਤ੍ਵਾ ਸਕ੍ਕਸ੍ਸ ਸਨ੍ਤਿਕੇ ਅਯਂ ਸੁਧਾਤਿ ਉਦੀਰਯਿ. ਸੁਰਕਞ੍ਞਨ੍ਤਿ ਦੇਵਧੀਤਰਂ. ਉਤ੍ਤਮਨ੍ਤਿ ਪਵਰਂ. ਸਾ ਪਞ੍ਜਲੀ ਦੇਵਮਨੁਸ੍ਸਪੂਜਿਤਾਤਿ ਪਞ੍ਜਲੀ ਦੇਵੇਹਿ ਚ ਮਨੁਸ੍ਸੇਹਿ ਚ ਪੂਜਿਤਾ. ਯਦਾਤਿ ਯਦਾ ਨਿਸੀਦਨਤ੍ਥਾਯ ਸਕ੍ਕੇਨ ਦਾਪਿਤੇ ਨਵੇ ਕਞ੍ਚਨਪੀਠਸਙ੍ਖਾਤੇ ਕੋਚ੍ਛੇ ਸਾ ਉਪਾਵਿਸਿ, ਤਦਾ ਨਂ ਤਤ੍ਥ ਨਿਸਿਨ੍ਨਂ ਸਕ੍ਕੋ ਚ ਸੇਸਦੇਵਤਾ ਚ ਪਾਰਿਚ੍ਛਤ੍ਤਕਪੁਪ੍ਫਾਦੀਹਿ ਪੂਜਯਿਂਸੁ.

ਏਵਂ ਸਕ੍ਕੋ ਤਂ ਪੂਜੇਤ੍ਵਾ ਚਿਨ੍ਤੇਸਿ – ‘‘ਕੇਨ ਨੁ ਖੋ ਕਾਰਣੇਨ ਕੋਸਿਯੋ ਸੇਸਾਨਂ ਅਦਤ੍ਵਾ ਇਮਿਸ੍ਸਾਵ ਸੁਧਂ ਅਦਾਸੀ’’ਤਿ. ਸੋ ਤਸ੍ਸ ਕਾਰਣਸ੍ਸ ਜਾਨਨਤ੍ਥਾਯ ਪੁਨ ਮਾਤਲਿਂ ਪੇਸੇਸਿ. ਤਮਤ੍ਥਂ ਆਵਿ ਕਰੋਨ੍ਤੋ ਸਤ੍ਥਾ ਆਹ –

੨੭੪.

‘‘ਤਮੇਵ ਸਂਸੀ ਪੁਨਦੇਵ ਮਾਤਲਿਂ, ਸਹਸ੍ਸਨੇਤ੍ਤੋ ਤਿਦਸਾਨਮਿਨ੍ਦੋ;

ਗਨ੍ਤ੍ਵਾਨ ਵਾਕ੍ਯਂ ਮਮ ਬ੍ਰੂਹਿ ਕੋਸਿਯਂ, ਆਸਾਯ ਸਦ੍ਧਾ ਸਿਰਿਯਾ ਚ ਕੋਸਿਯ;

ਹਿਰੀ ਸੁਧਂ ਕੇਨ ਮਲਤ੍ਥ ਹੇਤੁਨਾ’’ਤਿ.

ਤਤ੍ਥ ਸਂਸੀਤਿ ਅਭਾਸਿ. ਵਾਕ੍ਯਂ ਮਮਾਤਿ ਮਮ ਵਾਕ੍ਯਂ ਕੋਸਿਯਂ ਬ੍ਰੂਹਿ. ਆਸਾਯ ਸਦ੍ਧਾ ਸਿਰਿਯਾ ਚਾਤਿ ਆਸਾਤੋ ਚ ਸਦ੍ਧਾਤੋ ਚ ਸਿਰਿਤੋ ਚ ਹਿਰੀਯੇਵ ਕੇਨ ਹੇਤੁਨਾ ਸੁਧਮਲਤ੍ਥਾਤਿ.

ਸੋ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਵੇਜਯਨ੍ਤਰਥਮਾਰੁਯ੍ਹ ਅਗਮਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੨੭੫.

‘‘ਤਂ ਸੁਪ੍ਲਵਤ੍ਥਂ ਉਦਤਾਰਯੀ ਰਥਂ, ਦਦ੍ਦਲ੍ਲਮਾਨਂ ਉਪਕਾਰਿਯਸਾਦਿਸਂ;

ਜਮ੍ਬੋਨਦੀਸਂ ਤਪਨੇਯ੍ਯਸਨ੍ਨਿਭਂ, ਅਲਙ੍ਕਤਂ ਕਞ੍ਚਨਚਿਤ੍ਤਸਨ੍ਨਿਭਂ.

੨੭੬.

‘‘ਸੁਵਣ੍ਣਚਨ੍ਦੇਤ੍ਥ ਬਹੂ ਨਿਪਾਤਿਤਾ, ਹਤ੍ਥੀ ਗਵਾਸ੍ਸਾ ਕਿਕਿਬ੍ਯਗ੍ਘਦੀਪਿਯੋ;

ਏਣੇਯ੍ਯਕਾ ਲਙ੍ਘਮਯੇਤ੍ਥ ਪਕ੍ਖਿਨੋ, ਮਿਗੇਤ੍ਥ ਵੇਲ਼ੁਰਿਯਮਯਾ ਯੁਧਾ ਯੁਤਾ.

੨੭੭.

‘‘ਤਤ੍ਥਸ੍ਸਰਾਜਹਰਯੋ ਅਯੋਜਯੁਂ, ਦਸਸਤਾਨਿ ਸੁਸੁਨਾਗਸਾਦਿਸੇ;

ਅਲਙ੍ਕਤੇ ਕਞ੍ਚਨਜਾਲੁਰਚ੍ਛਦੇ, ਆਵੇਲ਼ਿਨੇ ਸਦ੍ਦਗਮੇ ਅਸਙ੍ਗਿਤੇ.

੨੭੮.

‘‘ਤਂ ਯਾਨਸੇਟ੍ਠਂ ਅਭਿਰੁਯ੍ਹ ਮਾਤਲਿ, ਦਿਸਾ ਇਮਾਯੋ ਅਭਿਨਾਦਯਿਤ੍ਥ;

ਨਭਞ੍ਚ ਸੇਲਞ੍ਚ ਵਨਪ੍ਪਤਿਨਿਞ੍ਚ, ਸਸਾਗਰਂ ਪਬ੍ਯਥਯਿਤ੍ਥ ਮੇਦਿਨਿਂ.

੨੭੯.

‘‘ਸ ਖਿਪ੍ਪਮੇਵ ਉਪਗਮ੍ਮ ਅਸ੍ਸਮਂ, ਪਾਵਾਰਮੇਕਂਸਕਤੋ ਕਤਞ੍ਜਲੀ;

ਬਹੁਸ੍ਸੁਤਂ ਵੁਦ੍ਧਂ ਵਿਨੀਤਵਨ੍ਤਂ, ਇਚ੍ਚਬ੍ਰਵਿ ਮਾਤਲਿ ਦੇਵਬ੍ਰਾਹ੍ਮਣਂ.

੨੮੦.

‘‘ਇਨ੍ਦਸ੍ਸ ਵਾਕ੍ਯਂ ਨਿਸਾਮੇਹਿ ਕੋਸਿਯ, ਦੂਤੋ ਅਹਂ ਪੁਚ੍ਛਤਿ ਤਂ ਪੁਰਿਨ੍ਦਦੋ;

ਆਸਾਯ ਸਦ੍ਧਾ ਸਿਰਿਯਾ ਚ ਕੋਸਿਯ, ਹਿਰੀ ਸੁਧਂ ਕੇਨ ਮਲਤ੍ਥ ਹੇਤੁਨਾ’’ਤਿ.

ਤਤ੍ਥ ਤਂ ਸੁਪ੍ਲਵਤ੍ਥਨ੍ਤਿ ਤਂ ਵੇਜਯਨ੍ਤਰਥਂ ਸੁਖੇਨ ਪ੍ਲਵਨਤ੍ਥਂ. ਉਦਤਾਰਯੀਤਿ ਉਤ੍ਤਾਰੇਸਿ ਉਕ੍ਖਿਪਿਤ੍ਵਾ ਗਮਨਸਜ੍ਜਮਕਾਸਿ. ਉਪਕਾਰਿਯਸਾਦਿਸਨ੍ਤਿ ਉਪਕਰਣਭਣ੍ਡੇਹਿ ਸਦਿਸਂ, ਯਥਾ ਤਸ੍ਸ ਅਗ੍ਗਿਸਿਖਾਯ ਸਮਾਨਵਣ੍ਣਾਨਿ ਉਪਕਰਣਾਨਿ ਜਲਨ੍ਤਿ, ਤਥੇਵ ਜਲਿਤਨ੍ਤਿ ਅਤ੍ਥੋ. ਜਮ੍ਬੋਨਦੀਸਨ੍ਤਿ ਜਮ੍ਬੁਨਦਸਙ੍ਖਾਤਂ ਰਤ੍ਤਸੁਵਣ੍ਣਮਯਂ ਈਸਂ. ਕਞ੍ਚਨਚਿਤ੍ਤਸਨ੍ਨਿਭਨ੍ਤਿ, ਕਞ੍ਚਨਮਯੇਨ ਸਤ੍ਤਰਤਨਵਿਚਿਤ੍ਤੇਨ ਅਟ੍ਠਮਙ੍ਗਲੇਨ ਸਮਨ੍ਨਾਗਤਂ. ਸੁਵਣ੍ਣਚਨ੍ਦੇਤ੍ਥਾਤਿ ਸੁਵਣ੍ਣਮਯਾ ਚਨ੍ਦਕਾ ਏਤ੍ਥ ਰਥੇ. ਹਤ੍ਥੀਤਿ ਸੁਵਣ੍ਣਰਜਤਮਣਿਮਯਾ ਹਤ੍ਥੀ. ਗਵਾਦੀਸੁਪਿ ਏਸੇਵ ਨਯੋ. ਲਙ੍ਘਮਯੇਤ੍ਥ ਪਕ੍ਖਿਨੋਤਿ ਏਤ੍ਥ ਰਥੇ ਲਙ੍ਘਮਯਾ ਨਾਨਾਰਤਨਮਯਾ ਪਕ੍ਖਿਗਣਾਪਿ ਪਟਿਪਾਟਿਯਾ ਠਿਤਾ. ਯੁਧਾ ਯੁਤਾਤਿ ਅਤ੍ਤਨੋ ਅਤ੍ਤਨੋ ਯੁਧੇਨ ਸਦ੍ਧਿਂ ਯੁਤ੍ਤਾ ਹੁਤ੍ਵਾ ਦਸ੍ਸਿਤਾ.

ਅਸ੍ਸਰਾਜਹਰਯੋਤਿ ਹਰਿਵਣ੍ਣਮਨੋਮਯਅਸ੍ਸਰਾਜਾਨੋ. ਸੁਸੁਨਾਗਸਾਦਿਸੇਤਿ ਬਲਸਮ੍ਪਤ੍ਤਿਯਾ ਤਰੁਣਨਾਗਸਦਿਸੇ. ਕਞ੍ਚਨਜਾਲੁਰਚ੍ਛਦੇਤਿ ਕਞ੍ਚਨਜਾਲਮਯੇਨ ਉਰਚ੍ਛਦਾਲਙ੍ਕਾਰੇਨ ਸਮਨ੍ਨਾਗਤੇ. ਆਵੇਲ਼ਿਨੇਤਿ ਆਵੇਲ਼ਸਙ੍ਖਾਤੇਹਿ ਕਣ੍ਣਾਲਙ੍ਕਾਰੇਹਿ ਯੁਤ੍ਤੇ. ਸਦ੍ਦਗਮੇਤਿ ਪਤੋਦਪ੍ਪਹਾਰਂ ਵਿਨਾ ਸਦ੍ਦਮਤ੍ਤੇਨੇਵ ਗਮਨਸੀਲੇ. ਅਸਙ੍ਗੀਤੇਤਿ ਨਿਸ੍ਸਙ੍ਗੇ ਸੀਘਜਵੇ ਏਵਰੂਪੇ ਅਸ੍ਸਰਾਜੇ ਤਤ੍ਥ ਯੋਜੇਸੁਨ੍ਤਿ ਅਤ੍ਥੋ.

ਅਭਿਨਾਦਯਿਤ੍ਥਾਤਿ ਯਾਨਸਦ੍ਦੇਨ ਏਕਨਿਨ੍ਨਾਦਂ ਅਕਾਸਿ. ਵਨਪ੍ਪਤਿਨਿਞ੍ਚਾਤਿ ਵਨਪ੍ਪਤਿਨੀ ਚ ਵਨਸਣ੍ਡੇ ਚਾਤਿ ਅਤ੍ਥੋ. ਪਬ੍ਯਥਯਿਤ੍ਥਾਤਿ ਕਮ੍ਪਯਿਤ੍ਥ. ਤਤ੍ਥ ਆਕਾਸਟ੍ਠਕਵਿਮਾਨਕਮ੍ਪਨੇਨ ਨਭਕਮ੍ਪਨਂ ਵੇਦਿਤਬ੍ਬਂ. ਪਾਵਾਰਮੇਕਂਸਕਤੋਤਿ ਏਕਂਸਕਤਪਾਵਾਰਦਿਬ੍ਬਵਤ੍ਥੋ. ਵੁਦ੍ਧਨ੍ਤਿ ਗੁਣਵੁਦ੍ਧਂ. ਵਿਨੀਤਵਨ੍ਤਨ੍ਤਿ ਵਿਨੀਤੇਨ ਆਚਾਰਵਤ੍ਤੇਨ ਸਮਨ੍ਨਾਗਤਂ. ਇਚ੍ਚਬ੍ਰਵੀਤਿ ਰਥਂ ਆਕਾਸੇ ਠਪੇਤ੍ਵਾ ਓਤਰਿਤ੍ਵਾ ਏਵਂ ਅਬ੍ਰਵਿ. ਦੇਵਬ੍ਰਾਹ੍ਮਣਨ੍ਤਿ ਦੇਵਸਮਂ ਬ੍ਰਾਹ੍ਮਣਂ.

ਸੋ ਤਸ੍ਸ ਵਚਨਂ ਸੁਤ੍ਵਾ ਗਾਥਮਾਹ –

੨੮੧.

‘‘ਅਨ੍ਧਾ ਸਿਰੀ ਮਂ ਪਟਿਭਾਤਿ ਮਾਤਲਿ, ਸਦ੍ਧਾ ਅਨਿਚ੍ਚਾ ਪਨ ਦੇਵਸਾਰਥਿ.

ਆਸਾ ਵਿਸਂਵਾਦਿਕਸਮ੍ਮਤਾ ਹਿ ਮੇ, ਹਿਰੀ ਚ ਅਰਿਯਮ੍ਹਿ ਗੁਣੇ ਪਤਿਟ੍ਠਿਤਾ’’ਤਿ.

ਤਤ੍ਥ ਅਨ੍ਧਾਤਿ ਸਿਪ੍ਪਾਦਿਸਮ੍ਪਨ੍ਨੇਪਿ ਅਸਮ੍ਪਨ੍ਨੇਪਿ ਭਜਨਤੋ ‘‘ਅਨ੍ਧਾ’’ਤਿ ਮਂ ਪਟਿਭਾਤਿ. ਅਨਿਚ੍ਚਾਤਿ ਸਦ੍ਧਾ ਪਨ ਤਂ ਤਂ ਵਤ੍ਥੁਂ ਪਹਾਯ ਅਞ੍ਞਸ੍ਮਿਂ ਅਞ੍ਞਸ੍ਮਿਂ ਉਪ੍ਪਜ੍ਜਨਤੋ ਹੁਤ੍ਵਾ ਅਭਾਵਾਕਾਰੇਨ ‘‘ਅਨਿਚ੍ਚਾ’’ਤਿ ਮਂ ਪਟਿਭਾਤਿ. ਵਿਸਂਵਾਦਿਕਸਮ੍ਮਤਾਤਿ ਆਸਾ ਪਨ ਯਸ੍ਮਾ ਧਨਤ੍ਥਿਕਾ ਨਾਵਾਯ ਸਮੁਦ੍ਦਂ ਪਕ੍ਖਨ੍ਦਿਤ੍ਵਾ ਵਿਨਟ੍ਠਪਾਭਤਾ ਏਨ੍ਤਿ, ਤਸ੍ਮਾ ‘‘ਵਿਸਂਵਾਦਿਕਾ’’ਤਿ ਮਂ ਪਟਿਭਾਤਿ. ਅਰਿਯਮ੍ਹਿ ਗੁਣੇਤਿ ਹਿਰੀ ਪਨ ਹਿਰੋਤ੍ਤਪ੍ਪਸਭਾਵਸਙ੍ਖਾਤੇ ਪਰਿਸੁਦ੍ਧੇ ਅਰਿਯਗੁਣੇ ਪਤਿਟ੍ਠਿਤਾਤਿ.

ਇਦਾਨਿ ਤਸ੍ਸਾ ਗੁਣਂ ਵਣ੍ਣੇਨ੍ਤੋ ਆਹ –

੨੮੨.

‘‘ਕੁਮਾਰਿਯੋ ਯਾਚਿਮਾ ਗੋਤ੍ਤਰਕ੍ਖਿਤਾ, ਜਿਣ੍ਣਾ ਚ ਯਾ ਯਾ ਚ ਸਭਤ੍ਤੁਇਤ੍ਥਿਯੋ;

ਤਾ ਛਨ੍ਦਰਾਗਂ ਪੁਰਿਸੇਸੁ ਉਗ੍ਗਤਂ, ਹਿਰਿਯਾ ਨਿਵਾਰੇਨ੍ਤਿ ਸਚਿਤ੍ਤਮਤ੍ਤਨੋ.

੨੮੩.

‘‘ਸਙ੍ਗਾਮਸੀਸੇ ਸਰਸਤ੍ਤਿਸਂਯੁਤੇ, ਪਰਾਜਿਤਾਨਂ ਪਤਤਂ ਪਲਾਯਿਨਂ;

ਹਿਰਿਯਾ ਨਿਵਤ੍ਤਨ੍ਤਿ ਜਹਿਤ੍ਵ ਜੀਵਿਤਂ, ਤੇ ਸਮ੍ਪਟਿਚ੍ਛਨ੍ਤਿ ਪੁਨਾ ਹਿਰੀਮਨਾ.

੨੮੪.

‘‘ਵੇਲਾ ਯਥਾ ਸਾਗਰਵੇਗਵਾਰਿਨੀ, ਹਿਰਾਯ ਹਿ ਪਾਪਜਨਂ ਨਿਵਾਰਿਨੀ;

ਤਂ ਸਬ੍ਬਲੋਕੇ ਹਿਰਿਮਰਿਯਪੂਜਿਤਂ, ਇਨ੍ਦਸ੍ਸ ਤਂ ਵੇਦਯ ਦੇਵਸਾਰਥੀ’’ਤਿ.

ਤਤ੍ਥ ਜਿਣ੍ਣਾਤਿ ਵਿਧਵਾ. ਸਭਤ੍ਤੂਤਿ ਸਸਾਮਿਕਾ ਤਰੁਣਿਤ੍ਥਿਯੋ. ਅਤ੍ਤਨੋਤਿ ਤਾ ਸਬ੍ਬਾਪਿ ਪਰਪੁਰਿਸੇਸੁ ਅਤ੍ਤਨੋ ਛਨ੍ਦਰਾਗਂ ਉਗ੍ਗਤਂ ਵਿਦਿਤ੍ਵਾ ‘‘ਅਯੁਤ੍ਤਮੇਤਂ ਅਮ੍ਹਾਕ’’ਨ੍ਤਿ ਹਿਰਿਯਾ ਸਚਿਤ੍ਤਂ ਨਿਵਾਰੇਨ੍ਤਿ, ਪਾਪਕਮ੍ਮਂ ਨ ਕਰੋਨ੍ਤਿ. ਪਤਤਂ ਪਲਾਯਿਨਨ੍ਤਿ ਪਤਨ੍ਤਾਨਞ੍ਚ ਪਲਾਯਨ੍ਤਾਨਞ੍ਚ ਅਨ੍ਤਰੇ. ਜਹਿਤ੍ਵ ਜੀਵਿਤਨ੍ਤਿ ਯੇ ਹਿਰਿਮਨ੍ਤੋ ਹੋਨ੍ਤਿ, ਤੇ ਅਤ੍ਤਨੋ ਜੀਵਿਤਂ ਚਜਿਤ੍ਵਾ ਹਿਰਿਯਾ ਨਿਵਤ੍ਤਨ੍ਤਿ, ਏਵਂ ਨਿਵਤ੍ਤਾ ਚ ਪਨ ਤੇ ਹਿਰੀਮਨਾ ਪੁਨ ਅਤ੍ਤਨੋ ਸਾਮਿਕਂ ਸਮ੍ਪਟਿਚ੍ਛਨ੍ਤਿ, ਅਮਿਤ੍ਤਹਤ੍ਥਤੋ ਮੋਚੇਤ੍ਵਾ ਗਣ੍ਹਨ੍ਤਿ. ਪਾਪਜਨਂ ਨਿਵਾਰਿਨੀਤਿ ਪਾਪਤੋ ਜਨਂ ਨਿਵਾਰਿਨੀ, ਅਯਮੇਵ ਵਾ ਪਾਠੋ. ਤਨ੍ਤਿ ਤਂ ਹਿਰਿਂ. ਅਰਿਯਪੂਜਿਤਨ੍ਤਿ ਅਰਿਯੇਹਿ ਬੁਦ੍ਧਾਦੀਹਿ ਪੂਜਿਤਂ. ਇਨ੍ਦਸ੍ਸ ਤਂ ਵੇਦਯਾਤਿ ਯਸ੍ਮਾ ਏਵਂ ਮਹਾਗੁਣਾ ਅਰਿਯਪੂਜਿਤਾਵੇਸਾ, ਤਸ੍ਮਾ ਤਂ ਏਵਂ ਉਤ੍ਤਮਾ ਨਾਮੇਸਾਤਿ ਇਨ੍ਦਸ੍ਸ ਕਥੇਹੀਤਿ.

ਤਂ ਸੁਤ੍ਵਾ ਮਾਤਲਿ ਗਾਥਮਾਹ –

੨੮੫.

‘‘ਕੋ ਤੇ ਇਮਂ ਕੋਸਿਯ ਦਿਟ੍ਠਿਮੋਦਹਿ, ਬ੍ਰਹ੍ਮਾ ਮਹਿਨ੍ਦੋ ਅਥ ਵਾ ਪਜਾਪਤਿ;

ਹਿਰਾਯ ਦੇਵੇਸੁ ਹਿ ਸੇਟ੍ਠਸਮ੍ਮਤਾ, ਧੀਤਾ ਮਹਿਨ੍ਦਸ੍ਸ ਮਹੇਸਿ ਜਾਯਥਾ’’ਤਿ.

ਤਤ੍ਥ ਦਿਟ੍ਠਿਨ੍ਤਿ ‘‘ਹਿਰੀ ਨਾਮ ਮਹਾਗੁਣਾ ਅਰਿਯਪੂਜਿਤਾ’’ਤਿ ਲਦ੍ਧਿਂ. ਓਦਹੀਤਿ ਹਦਯੇ ਪਵੇਸੇਸਿ. ਸੇਟ੍ਠਸਮ੍ਮਤਾਤਿ ਤਵ ਸਨ੍ਤਿਕੇ ਸੁਧਾਯ ਲਦ੍ਧਕਾਲਤੋ ਪਟ੍ਠਾਯ ਇਨ੍ਦਸ੍ਸ ਸਨ੍ਤਿਕੇ ਕਞ੍ਚਨਾਸਨਂ ਲਭਿਤ੍ਵਾ ਸਬ੍ਬਦੇਵਤਾਹਿ ਪੂਜਿਯਮਾਨਾ ਉਤ੍ਤਮਸਮ੍ਮਤਾ ਜਾਯਥ.

ਏਵਂ ਤਸ੍ਮਿਂ ਕਥੇਨ੍ਤੇਯੇਵ ਕੋਸਿਯਸ੍ਸ ਤਙ੍ਖਣਞ੍ਞੇਵ ਚਵਨਧਮ੍ਮੋ ਜਾਤੋ. ਅਥ ਨਂ, ਮਾਤਲਿ, ‘‘ਕੋਸਿਯ ਆਯੁਸਙ੍ਖਾਰੋ ਤੇ ਓਸ੍ਸਟ੍ਠੋ, ਚਵਨਧਮ੍ਮੋਪਿ ਤੇ ਸਮ੍ਪਤ੍ਤੋ, ਕਿਂ ਤੇ ਮਨੁਸ੍ਸਲੋਕੇਨ, ਦੇਵਲੋਕਂ ਗਚ੍ਛਾਮਾ’’ਤਿ ਤਤ੍ਥ ਨੇਤੁਕਾਮੋ ਹੁਤ੍ਵਾ ਗਾਥਮਾਹ –

੨੮੬.

‘‘ਹਨ੍ਦੇਹਿ ਦਾਨਿ ਤਿਦਿਵਂ ਅਪਕ੍ਕਮ, ਰਥਂ ਸਮਾਰੁਯ੍ਹ ਮਮਾਯਿਤਂ ਇਮਂ;

ਇਨ੍ਦੋ ਚ ਤਂ ਇਨ੍ਦਸਗੋਤ੍ਤ ਕਙ੍ਖਤਿ, ਅਜ੍ਜੇਵ ਤ੍ਵਂ ਇਨ੍ਦਸਹਬ੍ਯਤਂ ਵਜਾ’’ਤਿ.

ਤਤ੍ਥ ਮਮਾਯਿਤਨ੍ਤਿ ਪਿਯਂ ਮਨਾਪਂ. ਇਨ੍ਦਸਗੋਤ੍ਤਾਤਿ ਪੁਰਿਮਭਵੇ ਇਨ੍ਦੇਨ ਸਮਾਨਗੋਤ੍ਤ. ਕਙ੍ਖਤੀਤਿ ਤਵਾਗਮਨਂ ਇਚ੍ਛਨ੍ਤੋ ਕਙ੍ਖਤਿ.

ਇਤਿ ਤਸ੍ਮਿਂ ਕੋਸਿਯੇਨ ਸਦ੍ਧਿਂ ਕਥੇਨ੍ਤੇਯੇਵ ਕੋਸਿਯੋ ਚਵਿਤ੍ਵਾ ਓਪਪਾਤਿਕੋ ਦੇਵਪੁਤ੍ਤੋ ਹੁਤ੍ਵਾ ਆਰੁਯ੍ਹ ਦਿਬ੍ਬਰਥੇ ਅਟ੍ਠਾਸਿ. ਅਥ ਨਂ, ਮਾਤਲਿ, ਸਕ੍ਕਸ੍ਸ ਸਨ੍ਤਿਕਂ ਨੇਸਿ. ਸਕ੍ਕੋ ਤਂ ਦਿਸ੍ਵਾਵ ਤੁਟ੍ਠਮਾਨਸੋ ਅਤ੍ਤਨੋ ਧੀਤਰਂ ਹਿਰਿਦੇਵਿਂ ਤਸ੍ਸ ਅਗ੍ਗਮਹੇਸਿਂ ਕਤ੍ਵਾ ਅਦਾਸਿ, ਅਪਰਿਮਾਣਮਸ੍ਸ ਇਸ੍ਸਰਿਯਂ ਅਹੋਸਿ. ਤਮਤ੍ਥਂ ਵਿਦਿਤ੍ਵਾ ‘‘ਅਨੋਮਸਤ੍ਤਾਨਂ ਕਮ੍ਮਂ ਨਾਮ ਏਵਂ ਵਿਸੁਜ੍ਝਤੀ’’ਤਿ ਸਤ੍ਥਾ ਓਸਾਨਗਾਥਮਾਹ –

੨੮੭.

‘‘ਏਵਂ ਵਿਸੁਜ੍ਝਨ੍ਤਿ ਅਪਾਪਕਮ੍ਮਿਨੋ, ਅਥੋ ਸੁਚਿਣ੍ਣਸ੍ਸ ਫਲਂ ਨ ਨਸ੍ਸਤਿ;

ਯੇ ਕੇਚਿ ਮਦ੍ਦਕ੍ਖੁ ਸੁਧਾਯ ਭੋਜਨਂ, ਸਬ੍ਬੇਵ ਤੇ ਇਨ੍ਦਸਹਬ੍ਯਤਂ ਗਤਾ’’ਤਿ.

ਤਤ੍ਥ ਅਪਾਪਕਮ੍ਮਿਨੋਤਿ ਅਪਾਪਕਮ੍ਮਾ ਸਤ੍ਤਾ ਏਵਂ ਵਿਸੁਜ੍ਝਨ੍ਤਿ ਯੇ ਕੇਚਿ ਮਦ੍ਦਕ੍ਖੂਤਿ ਯੇ ਕੇਚਿ ਸਤ੍ਤਾ ਤਸ੍ਮਿਂ ਹਿਮਵਨ੍ਤਪਦੇਸੇ ਤਦਾ ਕੋਸਿਯੇਨ ਹਿਰਿਯਾ ਦੀਯਮਾਨਂ ਸੁਧਾਭੋਜਨਂ ਅਦ੍ਦਸਂਸੁ. ਸਬ੍ਬੇਵ ਤੇਤਿ ਤੇ ਸਬ੍ਬੇਪਿ ਤਂ ਦਾਨਂ ਅਨੁਮੋਦਿਤ੍ਵਾ ਚਿਤ੍ਤਂ ਪਸਾਦੇਤ੍ਵਾ ਇਨ੍ਦਸਹਬ੍ਯਤਂ ਗਤਾਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਤਂ ਅਦਾਨਾਭਿਰਤਂ ਥਦ੍ਧਮਚ੍ਛਰਿਯਂ ਸਮਾਨਂ ਅਹਂ ਦਮੇਸਿਂਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਹਿਰੀ ਦੇਵਤਾ ਉਪ੍ਪਲਵਣ੍ਣਾ ਅਹੋਸਿ, ਕੋਸਿਯੋ ਦਾਨਪਤਿ ਭਿਕ੍ਖੁ, ਪਞ੍ਚਸਿਖੋ ਅਨੁਰੁਦ੍ਧੋ, ਮਾਤਲਿ ਆਨਨ੍ਦੋ, ਸੂਰਿਯੋ ਕਸ੍ਸਪੋ, ਚਨ੍ਦੋ ਮੋਗ੍ਗਲ੍ਲਾਨੋ, ਨਾਰਦੋ ਸਾਰਿਪੁਤ੍ਤੋ, ਸਕ੍ਕੋ ਅਹਮੇਵ ਅਹੋਸਿ’’ਨ੍ਤਿ.

ਸੁਧਾਭੋਜਨਜਾਤਕਵਣ੍ਣਨਾ ਤਤਿਯਾ.

[੫੩੬] ੪. ਕੁਣਾਲਜਾਤਕਵਣ੍ਣਨਾ

ਏਵਮਕ੍ਖਾਯਤੀਤਿ ਇਦਂ ਸਤ੍ਥਾ ਕੁਣਾਲਦਹੇ ਵਿਹਰਨ੍ਤੋ ਅਨਭਿਰਤਿਪੀਲ਼ਿਤੇ ਪਞ੍ਚਸਤੇ ਭਿਕ੍ਖੂ ਆਰਬ੍ਭ ਕਥੇਸਿ. ਤਤ੍ਰਾਯਂ ਅਨੁਪੁਬ੍ਬਿਕਥਾ – ਸਾਕਿਯਕੋਲਿਯਾ ਕਿਰ ਕਪਿਲਵਤ੍ਥੁਨਗਰਸ੍ਸ ਚ ਕੋਲਿਯਨਗਰਸ੍ਸ ਚ ਅਨ੍ਤਰੇ ਰੋਹਿਣਿਂ ਨਾਮ ਨਦਿਂ ਏਕੇਨੇਵਾਵਰਣੇਨ ਬਨ੍ਧਾਪੇਤ੍ਵਾ ਸਸ੍ਸਾਨਿ ਕਾਰੇਨ੍ਤਿ. ਅਥ ਜੇਟ੍ਠਮੂਲਮਾਸੇ ਸਸ੍ਸੇਸੁ ਮਿਲਾਯਨ੍ਤੇਸੁ ਉਭਯਨਗਰਵਾਸੀਨਮ੍ਪਿ ਕਮ੍ਮਕਾਰਾ ਸਨ੍ਨਿਪਤਿਂਸੁ. ਤਤ੍ਥ ਕੋਲਿਯਨਗਰਵਾਸਿਨੋ ਵਦਿਂਸੁ – ‘‘ਇਦਂ ਉਦਕਂ ਉਭਯਤੋ ਨੀਹਰਿਯਮਾਨਂ ਨੇਵ ਤੁਮ੍ਹਾਕਂ, ਨ ਅਮ੍ਹਾਕਂ ਪਹੋਸ੍ਸਤਿ, ਅਮ੍ਹਾਕਂ ਪਨ ਸਸ੍ਸਂ ਏਕਉਦਕੇਨੇਵ ਨਿਪ੍ਫਜ੍ਜਿਸ੍ਸਤਿ, ਇਦਂ ਉਦਕਂ ਅਮ੍ਹਾਕਂ ਦੇਥਾ’’ਤਿ. ਕਪਿਲਵਤ੍ਥੁਵਾਸਿਨੋ ਵਦਿਂਸੁ – ‘‘ਤੁਮ੍ਹੇਸੁ ਕੋਟ੍ਠੇ ਪੂਰੇਤ੍ਵਾ ਠਿਤੇਸੁ ਮਯਂ ਰਤ੍ਤਸੁਵਣ੍ਣਨੀਲਮਣਿਕਾਲ਼ਕਹਾਪਣੇ ਗਹੇਤ੍ਵਾ ਨ ਸਕ੍ਖਿਸ੍ਸਾਮ ਪਚ੍ਛਿਪਸਿਬ੍ਬਕਾਦਿਹਤ੍ਥਾ ਤੁਮ੍ਹਾਕਂ ਘਰਦ੍ਵਾਰੇ ਵਿਚਰਿਤੁਂ, ਅਮ੍ਹਾਕਮ੍ਪਿ ਸਸ੍ਸਂ ਏਕੇਨੇਵ ਉਦਕੇਨ ਨਿਪ੍ਫਜ੍ਜਿਸ੍ਸਤਿ, ਇਦਂ ਉਦਕਂ ਅਮ੍ਹਾਕਂ ਦੇਥਾ’’ਤਿ. ‘‘ਨ ਮਯਂ ਦਸ੍ਸਾਮਾ’’ਤਿ? ‘‘ਮਯਮ੍ਪਿ ਨ ਦਸ੍ਸਾਮਾ’’ਤਿ. ਏਵਂ ਕਲਹਂ ਵਡ੍ਢੇਤ੍ਵਾ ਏਕੋ ਉਟ੍ਠਾਯ ਏਕਸ੍ਸ ਪਹਾਰਂ ਅਦਾਸਿ, ਸੋਪਿ ਅਞ੍ਞਸ੍ਸਾਤਿ ਏਵਂ ਅਞ੍ਞਮਞ੍ਞਂ ਪਹਰਿਤ੍ਵਾ ਰਾਜਕੁਲਾਨਂ ਜਾਤਿਂ ਘਟ੍ਟੇਤ੍ਵਾ ਕਲਹਂ ਪਵਤ੍ਤੇਸੁਂ.

ਕੋਲਿਯਕਮ੍ਮਕਾਰਾ ਵਦਨ੍ਤਿ – ‘‘ਤੁਮ੍ਹੇ ਕਪਿਲਵਤ੍ਥੁਵਾਸਿਕੇ ਸਾਕਿਯਦਾਰਕੇ ਗਹੇਤ੍ਵਾ ਗਜ੍ਜਥ, ਯੇ ਸੋਣਸਿਙ੍ਗਾਲਾਦਯੋ ਵਿਯ ਅਤ੍ਤਨੋ ਭਗਿਨੀਹਿ ਸਦ੍ਧਿਂ ਵਸਿਂਸੁ, ਏਤੇਸਂ ਹਤ੍ਥਿਅਸ੍ਸਾਦਯੋ ਵਾ ਫਲਕਾਵੁਧਾਨਿ ਵਾ ਅਮ੍ਹਾਕਂ ਕਿਂ ਕਰਿਸ੍ਸਨ੍ਤੀ’’ਤਿ? ਸਾਕਿਯਕਮ੍ਮਕਾਰਾ ਵਦਨ੍ਤਿ – ‘‘ਤੁਮ੍ਹੇ ਦਾਨਿ ਕੁਟ੍ਠਿਨੋ ਦਾਰਕੇ ਗਹੇਤ੍ਵਾ ਗਜ੍ਜਥ, ਯੇ ਅਨਾਥਾ ਨਿਗ੍ਗਤਿਕਾ ਤਿਰਚ੍ਛਾਨਾ ਵਿਯ ਕੋਲਰੁਕ੍ਖੇ ਵਸਿਂਸੁ, ਏਤੇਸਂ ਹਤ੍ਥਿਅਸ੍ਸਾਦਯੋ ਵਾ ਫਲਕਾਵੁਧਾਨਿ ਵਾ ਅਮ੍ਹਾਕਂ ਕਿਂ ਕਰਿਸ੍ਸਨ੍ਤੀ’’ਤਿ? ਤੇ ਗਨ੍ਤ੍ਵਾ ਤਸ੍ਮਿਂ ਕਮ੍ਮੇ ਨਿਯੁਤ੍ਤਅਮਚ੍ਚਾਨਂ ਕਥੇਸੁਂ, ਅਮਚ੍ਚਾ ਰਾਜਕੁਲਾਨਂ ਕਥੇਸੁਂ. ਤਤੋ ਸਾਕਿਯਾ ‘‘ਭਗਿਨੀਹਿ ਸਦ੍ਧਿਂ ਸਂਵਾਸਿਕਾਨਂ ਥਾਮਞ੍ਚ ਬਲਞ੍ਚ ਦਸ੍ਸੇਸ੍ਸਾਮਾ’’ਤਿ ਯੁਦ੍ਧਸਜ੍ਜਾ ਨਿਕ੍ਖਮਿਂਸੁ. ਕੋਲਿਯਾਪਿ ‘‘ਕੋਲਰੁਕ੍ਖਵਾਸੀਨਂ ਥਾਮਞ੍ਚ ਬਲਞ੍ਚ ਦਸ੍ਸੇਸ੍ਸਾਮਾ’’ਤਿ ਯੁਦ੍ਧਸਜ੍ਜਾ ਨਿਕ੍ਖਮਿਂਸੁ. ਅਪਰੇ ਪਨਾਚਰਿਯਾ ‘‘ਸਾਕਿਯਕੋਲਿਯਾਨਂ ਦਾਸੀਸੁ ਉਦਕਤ੍ਥਾਯ ਨਦਿਂ ਗਨ੍ਤ੍ਵਾ ਚੁਮ੍ਬਟਾਨਿ ਭੂਮਿਯਂ ਨਿਕ੍ਖਿਪਿਤ੍ਵਾ ਸੁਖਕਥਾਯ ਸਨ੍ਨਿਸਿਨ੍ਨਾਸੁ ਏਕਿਸ੍ਸਾ ਚੁਮ੍ਬਟਂ ਏਕਾ ਸਕਸਞ੍ਞਾਯ ਗਣ੍ਹਿ, ਤਂ ਨਿਸ੍ਸਾਯ ‘ਮਮ ਚੁਮ੍ਬਟਂ, ਤਵ ਚੁਮ੍ਬਟ’ਨ੍ਤਿ ਕਲਹੇ ਪਵਤ੍ਤੇ ਕਮੇਨ ਉਭਯਨਗਰਵਾਸਿਨੋ ਦਾਸਕਮ੍ਮਕਾਰਾ ਚੇਵ ਸੇਵਕਗਾਮਭੋਜਕਾਮਚ੍ਚਉਪਰਾਜਾਨੋ ਚਾਤਿ ਸਬ੍ਬੇ ਯੁਦ੍ਧਸਜ੍ਜਾ ਨਿਕ੍ਖਮਿਂਸੂ’’ਤਿ ਵਦਨ੍ਤਿ. ਇਮਮ੍ਹਾ ਪਨ ਨਯਾ ਪੁਰਿਮਨਯੋਵ ਬਹੂਸੁ ਅਟ੍ਠਕਥਾਸੁ ਆਗਤੋ, ਯੁਤ੍ਤਰੂਪੋ ਚਾਤਿ ਸ੍ਵੇਵ ਗਹੇਤਬ੍ਬੋ.

ਤੇ ਪਨ ਸਾਯਨ੍ਹਸਮਯੇ ਯੁਦ੍ਧਸਜ੍ਜਾ ਨਿਕ੍ਖਮਿਸ੍ਸਨ੍ਤੀਤਿ ਤਸ੍ਮਿਂ ਸਮਯੇ ਭਗਵਾ ਸਾਵਤ੍ਥਿਯਂ ਵਿਹਰਨ੍ਤੋ ਪਚ੍ਚੂਸਸਮਯੇ ਲੋਕਂ ਵੋਲੋਕੇਨ੍ਤੋ ਇਮੇ ਏਵਂ ਯੁਦ੍ਧਸਜ੍ਜੇ ਨਿਕ੍ਖਨ੍ਤੇ ਅਦ੍ਦਸ, ਦਿਸ੍ਵਾ ਚ ‘‘ਮਯਿ ਗਤੇ ਏਸ ਕਲਹੋ ਵੂਪਸਮਿਸ੍ਸਤਿ ਨੁ ਖੋ, ਨੋ’’ਤਿ ਉਪਧਾਰੇਨ੍ਤੋ ‘‘ਅਹਮੇਤ੍ਥ ਗਨ੍ਤ੍ਵਾ ਕਲਹਵੂਪਸਮਤ੍ਥਂ ਤੀਣਿ ਜਾਤਕਾਨਿ ਕਥੇਸ੍ਸਾਮਿ, ਤਤੋ ਕਲਹੋ ਵੂਪਸਮਿਸ੍ਸਤਿ, ਅਥ ਸਾਮਗ੍ਗਿਦੀਪਨਤ੍ਥਾਯ ਦ੍ਵੇ ਜਾਤਕਾਨਿ ਕਥੇਤ੍ਵਾ ਅਤ੍ਤਦਣ੍ਡਸੁਤ੍ਤਂ (ਸੁ. ਨਿ. ੯੪੧ ਆਦਯੋ) ਦੇਸੇਸ੍ਸਾਮਿ, ਦੇਸਨਂ ਸੁਤ੍ਵਾ ਉਭਯਨਗਰਵਾਸਿਨੋ ਅਡ੍ਢਤੇਯ੍ਯਾਨਿ ਅਡ੍ਢਤੇਯ੍ਯਾਨਿ ਕੁਮਾਰਸਤਾਨਿ ਦਸ੍ਸਨ੍ਤਿ, ਅਹਂ ਤੇ ਪਬ੍ਬਾਜੇਸ੍ਸਾਮਿ, ਮਹਨ੍ਤੋ ਸਮਾਗਮੋ ਭਵਿਸ੍ਸਤੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਸਾਯਨ੍ਹਸਮਯੇ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਕਸ੍ਸਚਿ ਅਨਾਰੋਚੇਤ੍ਵਾ ਸਯਮੇਵ ਪਤ੍ਤਚੀਵਰਮਾਦਾਯ ਦ੍ਵਿਨ੍ਨਂ ਸੇਨਾਨਂ ਅਨ੍ਤਰੇ ਆਕਾਸੇ ਪਲ੍ਲਙ੍ਕਂ ਆਭੁਜਿਤ੍ਵਾ ਤੇਸਂ ਸਂਵੇਗਜਨਨਤ੍ਥਂ ਦਿਵਾ ਅਨ੍ਧਕਾਰਂ ਕਾਤੁਂ ਕੇਸਰਂਸਿਯੋ ਵਿਸ੍ਸਜ੍ਜੇਨ੍ਤੋ ਨਿਸੀਦਿ. ਅਥ ਨੇਸਂ ਸਂਵਿਗ੍ਗਮਾਨਸਾਨਂ ਅਤ੍ਤਾਨਂ ਦਸ੍ਸੇਨ੍ਤੋ ਛਬ੍ਬਣ੍ਣਾ ਬੁਦ੍ਧਰਂਸਿਯੋ ਵਿਸ੍ਸਜ੍ਜੇਸਿ. ਕਪਿਲਵਤ੍ਥੁਵਾਸਿਨੋਪਿ ਭਗਵਨ੍ਤਂ ਦਿਸ੍ਵਾ ‘‘ਅਮ੍ਹਾਕਂ ਞਾਤਿਸੇਟ੍ਠੋ ਸਤ੍ਥਾ ਆਗਤੋ, ਦਿਟ੍ਠੋ ਨੁ ਖੋ ਤੇਨ ਅਮ੍ਹਾਕਂ ਕਲਹਕਰਣਭਾਵੋ’’ਤਿ ਚਿਨ੍ਤੇਤ੍ਵਾ ‘‘ਨ ਖੋ ਪਨ ਸਕ੍ਕਾ ਸਤ੍ਥਰਿ ਆਗਤੇ ਅਮ੍ਹੇਹਿ ਪਰਸ੍ਸ ਸਰੀਰੇ ਸਤ੍ਥਂ ਪਾਤੇਤੁਂ, ਕੋਲਿਯਨਗਰਵਾਸਿਨੋ ਅਮ੍ਹੇ ਹਨਨ੍ਤੁ ਵਾ ਬਜ੍ਝਨ੍ਤੁ ਵਾ’’ਤਿ ਆਵੁਧਾਨਿ ਛਡ੍ਡੇਸੁਂ. ਕੋਲਿਯਨਗਰਵਾਸਿਨੋਪਿ ਤਥੇਵ ਅਕਂਸੁ.

ਅਥ ਭਗਵਾ ਓਤਰਿਤ੍ਵਾ ਰਮਣੀਯੇ ਪਦੇਸੇ ਵਾਲੁਕਪੁਲਿਨੇ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸੀਦਿ ਅਨੋਪਮਾਯ ਬੁਦ੍ਧਸਿਰਿਯਾ ਵਿਰੋਚਮਾਨੋ. ਤੇਪਿ ਰਾਜਾਨੋ ਭਗਵਨ੍ਤਂ ਵਨ੍ਦਿਤ੍ਵਾ ਨਿਸੀਦਿਂਸੁ. ਅਥ ਨੇ ਸਤ੍ਥਾ ਜਾਨਨ੍ਤੋਵ ‘‘ਕਸ੍ਮਾ ਆਗਤਤ੍ਥ, ਮਹਾਰਾਜਾ’’ਤਿ ਪੁਚ੍ਛਿ. ‘‘ਨੇਵ, ਭਨ੍ਤੇ, ਨਦਿਦਸ੍ਸਨਤ੍ਥਾਯ, ਨ ਕੀਲ਼ਨਤ੍ਥਾਯ, ਅਪਿਚ ਖੋ ਪਨ ਇਮਸ੍ਮਿਂ ਠਾਨੇ ਸਙ੍ਗਾਮਂ ਪਚ੍ਚੁਪਟ੍ਠਾਪੇਤ੍ਵਾ ਆਗਤਮ੍ਹਾ’’ਤਿ. ‘‘ਕਿਂ ਨਿਸ੍ਸਾਯ ਵੋ ਕਲਹੋ, ਮਹਾਰਾਜਾ’’ਤਿ? ‘‘ਉਦਕਂ ਨਿਸ੍ਸਾਯ ਭਨ੍ਤੇ’’ਤਿ. ‘‘ਉਦਕਂ ਕਿਂ ਅਗ੍ਘਤਿ ਮਹਾਰਾਜਾ’’ਤਿ? ‘‘ਅਪ੍ਪਗ੍ਘਂ, ਭਨ੍ਤੇ’’ਤਿ. ‘‘ਪਥਵੀ ਨਾਮ ਕਿਂ ਅਗ੍ਘਤਿ, ਮਹਾਰਾਜਾ’’ਤਿ? ‘‘ਅਨਗ੍ਘਾ, ਭਨ੍ਤੇ’’ਤਿ. ‘‘ਖਤ੍ਤਿਯਾ ਕਿਂ ਅਗ੍ਘਨ੍ਤਿ, ਮਹਾਰਾਜਾ’’ਤਿ? ‘‘ਖਤ੍ਤਿਯਾ ਨਾਮ ਅਨਗ੍ਘਾ, ਭਨ੍ਤੇ’’ਤਿ. ‘‘ਅਪ੍ਪਗ੍ਘਂ ਉਦਕਂ ਨਿਸ੍ਸਾਯ ਕਸ੍ਮਾ ਅਨਗ੍ਘੇ ਖਤ੍ਤਿਯੇ ਨਾਸੇਥ, ਮਹਾਰਾਜ, ਕਲਹਸ੍ਮਿਞ੍ਹਿ ਅਸ੍ਸਾਦੋ ਨਾਮ ਨਤ੍ਥਿ, ਕਲਹਵਸੇਨ ਹਿ ਮਹਾਰਾਜਾ ਏਕਾਯ ਰੁਕ੍ਖਦੇਵਤਾਯ ਕਾਲ਼ਸੀਹੇਨ ਸਦ੍ਧਿਂ ਬਦ੍ਧਾਘਾਤੋ ਸਕਲਮ੍ਪਿ ਇਮਂ ਕਪ੍ਪਂ ਅਨੁਪ੍ਪਤ੍ਤੋਯੇਵਾ’’ਤਿ ਵਤ੍ਵਾ ਫਨ੍ਦਨਜਾਤਕਂ (ਜਾ. ੧.੧੩.੧੪ ਆਦਯੋ) ਕਥੇਸਿ. ਤਤੋ ‘‘ਪਰਪਤ੍ਤਿਯੇਨ ਨਾਮ ਮਹਾਰਾਜਾ ਨ ਭਵਿਤਬ੍ਬਂ, ਪਰਪਤ੍ਤਿਯਾ ਹਿ ਹੁਤ੍ਵਾ ਏਕਸ੍ਸ ਸਸਸ੍ਸ ਕਥਾਯ ਤਿਯੋਜਨਸਹਸ੍ਸਵਿਤ੍ਥਤੇ ਹਿਮਵਨ੍ਤੇ ਚਤੁਪ੍ਪਦਗਣਾ ਮਹਾਸਮੁਦ੍ਦਂ ਪਕ੍ਖਨ੍ਦਿਨੋ ਅਹੇਸੁਂ, ਤਸ੍ਮਾ ਪਰਪਤ੍ਤਿਯੇਨ ਨ ਭਵਿਤਬ੍ਬ’’ਨ੍ਤਿ ਵਤ੍ਵਾ ਦਦ੍ਦਰਜਾਤਕਂ (ਜਾ. ੧.੨੪੩-੪੪; ੧.੪.੧੩-੧੬; ੧.੯.੧੦੫ ਆਦਯੋ) ਕਥੇਸਿ. ਤਤੋ ‘‘ਕਦਾਚਿ ਮਹਾਰਾਜਾ ਦੁਬ੍ਬਲੋਪਿ ਮਹਬ੍ਬਲਸ੍ਸ ਰਨ੍ਧਂ ਪਸ੍ਸਤਿ, ਕਦਾਚਿ ਮਹਬ੍ਬਲੋਪਿ ਦੁਬ੍ਬਲਸ੍ਸ ਰਨ੍ਧਂ ਪਸ੍ਸਤਿ, ਲਟੁਕਿਕਾਪਿ ਹਿ ਸਕੁਣਿਕਾ ਹਤ੍ਥਿਨਾਗਂ ਘਾਤੇਸੀ’’ਤਿ ਵਤ੍ਵਾ ਲਟੁਕਿਕਜਾਤਕਂ (ਜਾ. ੧.੫.੩੯ ਆਦਯੋ) ਕਥੇਸਿ. ਏਵਂ ਕਲਹਵੂਪਸਮਨਤ੍ਥਾਯ ਤੀਣਿ ਜਾਤਕਾਨਿ ਕਥੇਤ੍ਵਾ ਸਾਮਗ੍ਗਿਪਰਿਦੀਪਨਤ੍ਥਾਯ ਦ੍ਵੇ ਜਾਤਕਾਨਿ ਕਥੇਸਿ. ‘‘ਸਮਗ੍ਗਾਨਞ੍ਹਿ ਮਹਾਰਾਜਾ ਕੋਚਿ ਓਤਾਰਂ ਨਾਮ ਪਸ੍ਸਿਤੁਂ ਨ ਸਕ੍ਕੋਤੀ’’ਤਿ ਵਤ੍ਵਾ ਰੁਕ੍ਖਧਮ੍ਮਜਾਤਕਂ (ਜਾ. ੧.੧.੭੪) ਕਥੇਸਿ. ਤਤੋ ‘‘ਸਮਗ੍ਗਾਨਂ ਮਹਾਰਾਜਾ ਕੋਚਿ ਵਿਵਰਂ ਪਸ੍ਸਿਤੁਂ ਨਾਸਕ੍ਖਿ, ਯਦਾ ਪਨ ਅਞ੍ਞਮਞ੍ਞਂ ਵਿਵਾਦਮਕਂਸੁ, ਅਥ ਨੇ ਏਕੋ ਨੇਸਾਦਪੁਤ੍ਤੋ ਜੀਵਿਤਕ੍ਖਯਂ ਪਾਪੇਤ੍ਵਾ ਆਦਾਯ ਗਤੋ, ਵਿਵਾਦੇ ਅਸ੍ਸਾਦੋ ਨਾਮ ਨਤ੍ਥੀ’’ਤਿ ਵਤ੍ਵਾ ਵਟ੍ਟਕਜਾਤਕਂ (ਜਾ. ੧.੧.੩੫, ੧੧੮; ੧.੬.੧੨੮-੧੩੩) ਕਥੇਸਿ. ਏਵਂ ਇਮਾਨਿ ਪਞ੍ਚ ਜਾਤਕਾਨਿ ਕਥੇਤ੍ਵਾ ਅਵਸਾਨੇ ਅਤ੍ਤਦਣ੍ਡਸੁਤ੍ਤਂ (ਸੁ. ਨਿ. ੯੪੧ ਆਦਯੋ) ਕਥੇਸਿ.

ਅਥ ਰਾਜਾਨੋ ਪਸਨ੍ਨਾ ‘‘ਸਚੇ ਸਤ੍ਥਾ ਨਾਗਮਿਸ੍ਸ, ਮਯਂ ਅਞ੍ਞਮਞ੍ਞਂ ਵਧਿਤ੍ਵਾ ਲੋਹਿਤਨਦਿਂ ਪਵਤ੍ਤਯਿਸ੍ਸਾਮ, ਸਤ੍ਥਾਰਂ ਨਿਸ੍ਸਾਯ ਨੋ ਜੀਵਿਤਂ ਲਦ੍ਧਂ. ਸਚੇ ਪਨ ਸਤ੍ਥਾ ਅਗਾਰਂ ਅਜ੍ਝਾਵਸਿਸ੍ਸ, ਦ੍ਵਿਸਹਸ੍ਸਦੀਪਪਰਿਵਾਰਂ ਚਤੁਮਹਾਦੀਪਰਜ੍ਜਂ ਹਤ੍ਥਗਤਂ ਅਭਵਿਸ੍ਸ, ਅਤਿਰੇਕਸਹਸ੍ਸਂ ਖੋ ਪਨਸ੍ਸ ਪੁਤ੍ਤਾ ਅਭਵਿਸ੍ਸਂਸੁ, ਤਤੋ ਖਤ੍ਤਿਯਪਰਿਵਾਰੋਵ ਅਵਿਚਰਿਸ੍ਸ, ਤਂ ਖੋ ਪਨੇਸ ਸਮ੍ਪਤ੍ਤਿਂ ਪਹਾਯ ਨਿਕ੍ਖਮਿਤ੍ਵਾ ਸਮ੍ਬੋਧਿਂ ਪਤ੍ਤੋ, ਇਦਾਨਿਪਿ ਖਤ੍ਤਿਯਪਰਿਵਾਰੋਵ ਵਿਚਰਤੂ’’ਤਿ ਉਭਯਨਗਰਵਾਸਿਨੋ ਅਡ੍ਢਤੇਯ੍ਯਾਨਿ ਅਡ੍ਢਤੇਯ੍ਯਾਨਿ ਕੁਮਾਰਸਤਾਨਿ ਅਦਂਸੁ. ਭਗਵਾ ਤੇ ਪਬ੍ਬਾਜੇਤ੍ਵਾ ਮਹਾਵਨਂ ਅਗਮਾਸਿ. ਪੁਨਦਿਵਸਤੋ ਪਟ੍ਠਾਯ ਤੇਹਿ ਪਰਿਵੁਤੋ ਏਕਦਾ ਕਪਿਲਵਤ੍ਥੁਨਗਰੇ ਏਕਦਾ ਕੋਲਿਯਨਗਰੇਤਿ ਦ੍ਵੀਸੁ ਨਗਰੇਸੁ ਪਿਣ੍ਡਾਯ ਚਰਤਿ. ਉਭਯਨਗਰਵਾਸਿਨੋ ਮਹਾਸਕ੍ਕਾਰਂ ਕਰਿਂਸੁ. ਤੇਸਂ ਗਰੁਗਾਰਵੇਨ ਨ ਅਤ੍ਤਨੋ ਰੁਚਿਯਾ ਪਬ੍ਬਜਿਤਾਨਂ ਅਨਭਿਰਤਿ ਉਪ੍ਪਜ੍ਜਿ. ਪੁਰਾਣਦੁਤਿਯਿਕਾਯੋਪਿ ਨੇਸਂ ਅਨਭਿਰਤਿਜਨਨਤ੍ਥਾਯ ਤਂ ਤਂ ਵਤ੍ਵਾ ਸਾਸਨਂ ਪੇਸੇਸੁਂ. ਤੇ ਅਤਿਰੇਕਤਰਂ ਉਕ੍ਕਣ੍ਠਿਂਸੁ. ਭਗਵਾ ਆਵਜ੍ਜੇਨ੍ਤੋ ਤੇਸਂ ਅਨਭਿਰਤਭਾਵਂ ਞਤ੍ਵਾ ‘‘ਇਮੇ ਭਿਕ੍ਖੂ ਮਾਦਿਸੇਨ ਬੁਦ੍ਧੇਨ ਸਦ੍ਧਿਂ ਏਕਤੋ ਵਸਨ੍ਤਾ ਉਕ੍ਕਣ੍ਠਨ੍ਤਿ, ਕਥਂ ਰੂਪਾ ਨੁ ਖੋ ਤੇਸਂ ਧਮ੍ਮਕਥਾ ਸਪ੍ਪਾਯਾ’’ਤਿ ਉਪਧਾਰੇਨ੍ਤੋ ਕੁਣਾਲਧਮ੍ਮਦੇਸਨਂ ਪਸ੍ਸਿ. ਅਥਸ੍ਸ ਏਤਦਹੋਸਿ – ‘‘ਅਹਂ ਇਮੇ ਭਿਕ੍ਖੂ ਹਿਮਵਨ੍ਤਂ ਨੇਤ੍ਵਾ ਕੁਣਾਲਕਥਾਯ ਨੇਸਂ ਮਾਤੁਗਾਮਦੋਸਂ ਪਕਾਸੇਤ੍ਵਾ ਅਨਭਿਰਤਿਂ ਹਰਿਤ੍ਵਾ ਸੋਤਾਪਤ੍ਤਿਮਗ੍ਗਂ ਦਸ੍ਸਾਮੀ’’ਤਿ.

ਸੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਕਪਿਲਵਤ੍ਥੁਂ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਭਤ੍ਤਕਿਚ੍ਚਵੇਲਾਯਮੇਵ ਤੇ ਪਞ੍ਚਸਤੇ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਦਿਟ੍ਠਪੁਬ੍ਬੋ ਵੋ, ਭਿਕ੍ਖਵੇ, ਰਮਣੀਯੋ ਹਿਮਵਨ੍ਤਪਦੇਸੋ’’ਤਿ ਪੁਚ੍ਛਿ. ‘‘ਨੋਹੇਤਂ, ਭਨ੍ਤੇ’’ਤਿ. ‘‘ਗਚ੍ਛਿਸ੍ਸਥ ਪਨ ਹਿਮਵਨ੍ਤਚਾਰਿਕ’’ਨ੍ਤਿ? ‘‘ਭਨ੍ਤੇ, ਅਨਿਦ੍ਧਿਮਨ੍ਤੋ ਮਯਂ ਕਥਂ ਗਮਿਸ੍ਸਾਮਾ’’ਤਿ. ‘‘ਸਚੇ ਪਨ ਵੋ ਕੋਚਿ ਗਹੇਤ੍ਵਾ ਗਚ੍ਛੇਯ੍ਯ, ਗਚ੍ਛੇਯ੍ਯਾਥਾ’’ਤਿ? ‘‘ਆਮ, ਭਨ੍ਤੇ’’ਤਿ. ਸਤ੍ਥਾ ਸਬ੍ਬੇਪਿ ਤੇ ਅਤ੍ਤਨੋ ਇਦ੍ਧਿਯਾ ਗਹੇਤ੍ਵਾ ਆਕਾਸੇ ਉਪ੍ਪਤਿਤ੍ਵਾ ਹਿਮਵਨ੍ਤਂ ਗਨ੍ਤ੍ਵਾ ਗਗਨਤਲੇ ਠਿਤੋਵ ਰਮਣੀਯੇ ਹਿਮਵਨ੍ਤਪਦੇਸੇ ਕਞ੍ਚਨਪਬ੍ਬਤਂ ਰਜਤਪਬ੍ਬਤਂ ਮਣਿਪਬ੍ਬਤਂ ਹਿਙ੍ਗੁਲਿਕਪਬ੍ਬਤਂ ਅਞ੍ਜਨਪਬ੍ਬਤਂ ਸਾਨੁਪਬ੍ਬਤਂ ਫਲਿਕਪਬ੍ਬਤਨ੍ਤਿ ਨਾਨਾਵਿਧੇ ਪਬ੍ਬਤੇ, ਪਞ੍ਚ ਮਹਾਨਦਿਯੋ, ਕਣ੍ਣਮੁਣ੍ਡਕਂ ਰਥਕਾਰਂ ਸੀਹਪਪਾਤਂ ਛਦ੍ਦਨ੍ਤਂ ਤਿਯਗ੍ਗਲ਼ਂ ਅਨੋਤਤ੍ਤਂ ਕੁਣਾਲਦਹਨ੍ਤਿ ਸਤ੍ਤ ਦਹੇ ਦਸ੍ਸੇਸਿ. ਹਿਮਵਨ੍ਤੋ ਚ ਨਾਮ ਮਹਾ ਪਞ੍ਚਯੋਜਨਸਤੁਬ੍ਬੇਧੋ ਤਿਯੋਜਨਸਹਸ੍ਸਵਿਤ੍ਥਤੋ, ਤਸ੍ਸ ਇਮਂ ਰਮਣੀਯਂ ਏਕਦੇਸਂ ਅਤ੍ਤਨੋ ਆਨੁਭਾਵੇਨ ਦਸ੍ਸੇਸਿ. ਤਤ੍ਥ ਕਤਨਿਵਾਸਾਨਿ ਸੀਹਬ੍ਯਗ੍ਘਹਤ੍ਥਿਕੁਲਾਦੀਨਿ ਚਤੁਪ੍ਪਦਾਨਿਪਿ ਏਕਦੇਸਤੋ ਦਸ੍ਸੇਸਿ. ਤਤ੍ਥ ਆਰਾਮਰਾਮਣੇਯ੍ਯਕਾਦੀਨਿ ਪੁਪ੍ਫੂਪਗਫਲੂਪਗੇ ਰੁਕ੍ਖੇ ਨਾਨਾਵਿਧੇ ਸਕੁਣਸਙ੍ਘੇ ਜਲਜਥਲਜਪੁਪ੍ਫਾਨਿ ਹਿਮਵਨ੍ਤਸ੍ਸ ਪੁਰਤ੍ਥਿਮਪਸ੍ਸੇ ਸੁਵਣ੍ਣਤਲਂ, ਪੁਚ੍ਛਿਮਪਸ੍ਸੇ ਹਿਙ੍ਗੁਲਤਲਂ ਦਸ੍ਸੇਸਿ. ਇਮੇਸਂ ਰਾਮਣੇਯ੍ਯਕਾਨਂ ਦਿਟ੍ਠਕਾਲਤੋ ਪਟ੍ਠਾਯ ਤੇਸਂ ਭਿਕ੍ਖੂਨਂ ਪੁਰਾਣਦੁਤਿਯਿਕਾਸੁ ਛਨ੍ਦਰਾਗੋ ਪਹੀਨੋ.

ਅਥ ਸਤ੍ਥਾ ਤੇ ਭਿਕ੍ਖੂ ਗਹੇਤ੍ਵਾ ਆਕਾਸਤੋ ਓਤਰਿਤ੍ਵਾ ਹਿਮਵਨ੍ਤਪਚ੍ਛਿਮਪਸ੍ਸੇ ਸਟ੍ਠਿਯੋਜਨਿਕੇ ਮਨੋਸਿਲਾਤਲੇ ਸਤ੍ਤਯੋਜਨਿਕਸ੍ਸ ਕਪ੍ਪਟ੍ਠਿਕਸਾਲਰੁਕ੍ਖਸ੍ਸ ਹੇਟ੍ਠਾ ਤਿਯੋਜਨਿਕਾਯ ਮਨੋਸਿਲਾਤਲਾਯ ਤੇਹਿ ਭਿਕ੍ਖੂਹਿ ਪਰਿਵੁਤੋ ਛਬ੍ਬਣ੍ਣਰਸ੍ਮਿਯੋ ਵਿਸ੍ਸਜ੍ਜੇਨ੍ਤੋ ਅਣ੍ਣਵਕੁਚ੍ਛਿਂ ਖੋਭੇਤ੍ਵਾ ਜਲਮਾਨੋ ਸੂਰਿਯੋ ਵਿਯ ਨਿਸੀਦਿਤ੍ਵਾ ਮਧੁਰਸ੍ਸਰਂ ਨਿਚ੍ਛਾਰੇਨ੍ਤੋ ਤੇ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੇ, ਇਮਸ੍ਮਿਂ ਹਿਮਵਨ੍ਤੇ ਤੁਮ੍ਹੇਹਿ ਅਦਿਟ੍ਠਪੁਬ੍ਬਂ ਪੁਚ੍ਛਥਾ’’ਤਿ. ਤਸ੍ਮਿਂ ਖਣੇ ਦ੍ਵੇ ਚਿਤ੍ਰਕੋਕਿਲਾ ਉਭੋਸੁ ਕੋਟੀਸੁ ਦਣ੍ਡਕਂ ਮੁਖੇਨ ਡਂਸਿਤ੍ਵਾ ਮਜ੍ਝੇ ਅਤ੍ਤਨੋ ਸਾਮਿਕਂ ਨਿਸੀਦਾਪੇਤ੍ਵਾ ਅਟ੍ਠ ਚਿਤ੍ਰਕੋਕਿਲਾ ਪੁਰਤੋ, ਅਟ੍ਠ ਪਚ੍ਛਤੋ, ਅਟ੍ਠ ਵਾਮਤੋ, ਅਟ੍ਠ ਦਕ੍ਖਿਣਤੋ, ਅਟ੍ਠ ਹੇਟ੍ਠਾ, ਅਟ੍ਠ ਉਪਰਿ ਛਾਯਂ ਕਤ੍ਵਾ ਏਵਂ ਚਿਤ੍ਰਕੋਕਿਲਂ ਪਰਿਵਾਰੇਤ੍ਵਾ ਆਕਾਸੇਨਾਗਚ੍ਛਨ੍ਤਿ. ਅਥ ਤੇ ਭਿਕ੍ਖੂ ਤਂ ਸਕੁਣਸਙ੍ਘਂ ਦਿਸ੍ਵਾ ਸਤ੍ਥਾਰਂ ਪੁਚ੍ਛਿਂਸੁ – ‘‘ਕੇ ਨਾਮੇਤੇ, ਭਨ੍ਤੇ ਸਕੁਣਾ’’ਤਿ? ‘‘ਭਿਕ੍ਖਵੇ, ਏਸ ਮਮ ਪੋਰਾਣਕੋ ਵਂਸੋ, ਮਯਾ ਠਪਿਤਾ ਪਵੇਣੀ, ਮਂ ਤਾਵ ਪੁਬ੍ਬੇ ਏਵਂ ਪਰਿਚਰਿਂਸੁ, ਤਦਾ ਪਨੇਸ ਸਕੁਣਗਣੋ ਮਹਾ ਅਹੋਸਿ, ਅਡ੍ਢੁਡ੍ਢਾਨਿ ਦਿਜਕਞ੍ਞਾਸਹਸ੍ਸਾਨਿ ਮਂ ਪਰਿਚਰਿਂਸੁ. ਅਨੁਪੁਬ੍ਬੇਨ ਪਰਿਹਾਯਿਤ੍ਵਾ ਇਦਾਨਿ ਏਤ੍ਤਕੋ ਜਾਤੋ’’ਤਿ. ‘‘ਕਥਂ ਏਵਰੂਪੇ ਪਨ, ਭਨ੍ਤੇ, ਵਨਸਣ੍ਡੇ ਏਤਾ ਦਿਜਕਞ੍ਞਾਯੋ ਤੁਮ੍ਹੇ ਪਰਿਚਰਿਂਸੂ’’ਤਿ? ਅਥ ਨੇਸਂ ਸਤ੍ਥਾ ‘‘ਤੇਨ ਹਿ, ਭਿਕ੍ਖਵੇ, ਸੁਣਾਥਾ’’ਤਿ ਸਤਿਂ ਉਪਟ੍ਠਾਪੇਤ੍ਵਾ ਅਤੀਤਂ ਆਹਰਿਤ੍ਵਾ ਦਸ੍ਸੇਨ੍ਤੋ ਆਹ –

‘‘ਏਵਮਕ੍ਖਾਯਤਿ ਏਵਮਨੁਸੂਯਤਿ, ਸਬ੍ਬੋਸਧਧਰਣਿਧਰੇ ਨੇਕਪੁਪ੍ਫਮਾਲ੍ਯਵਿਤਤੇ ਗਜਗਵਜਮਹਿਂਸਰੁਰੁਚਮਰਪਸਦਖਗ੍ਗਗੋਕਣ੍ਣਸੀਹਬ੍ਯਗ੍ਘਦੀਪਿਅਚ੍ਛਕੋਕਤਰਚ੍ਛਉਦ੍ਦਾਰਕਦਲਿ- ਮਿਗਬਿਲ਼ਾਰਸਸਕਣ੍ਣਿਕਾਨੁਚਰਿਤੇ ਆਕਿਣ੍ਣਨੇਲਮਣ੍ਡਲਮਹਾਵਰਾਹਨਾਗਕੁਲਕਰੇਣੁਸਙ੍ਘਾਧਿਵੁਟ੍ਠੇ ਇਸ੍ਸਮਿਗਸਾਖਮਿਗਸਰਭਮਿਗਏਣੀਮਿਗਵਾਤਮਿਗਪਸਦਮਿਗਪੁਰਿਸਾਲੁਕਿਮ੍ਪੁਰਿਸਯਕ੍ਖਰਕ੍ਖ- ਸਨਿਸੇਵਿਤੇ ਅਮਜ੍ਜਵਮਞ੍ਜਰੀਧਰਪਹਟ੍ਠਪੁਪ੍ਫਫੁਸਿਤਗ੍ਗਾਨੇਕਪਾਦਪਗਣਵਿਤਕੇ ਕੁਰਰਚਕੋਰਵਾਰਣਮਯੂਰਪਰਭਤਜੀਵਞ੍ਜੀਵਕਚੇਲਾਵਕਭਿਙ੍ਕਾਰਕਰਵੀਕਮਤ੍ਤਵਿਹਙ੍ਗਗਣਸਤਤਸਮ੍ਪਘੁਟ੍ਠੇ ਅਞ੍ਜਨਮਨੋਸਿਲਾਹਰਿਤਾਲਹਿਙ੍ਗੁਲਕਹੇਮਰਜਤਕਨਕਾਨੇਕਧਾਤੁ- ਸਤਵਿਨਦ੍ਧਪਟਿਮਣ੍ਡਿਤਪਦੇਸੇ ਏਵਰੂਪੇ ਖਲੁ, ਭੋ, ਰਮ੍ਮੇ ਵਨਸਣ੍ਡੇ ਕੁਣਾਲੋ ਨਾਮ ਸਕੁਣੋ ਪਟਿਵਸਤਿ ਅਤਿਵਿਯ ਚਿਤ੍ਤੋ ਅਤਿਵਿਯ ਚਿਤ੍ਤਪਤ੍ਤਚ੍ਛਦਨੋ’’.

‘‘ਤਸ੍ਸੇਵ ਖਲੁ, ਭੋ, ਕੁਣਾਲਸ੍ਸ ਸਕੁਣਸ੍ਸ ਅਡ੍ਢੁਡ੍ਢਾਨਿ ਇਤ੍ਥਿਸਹਸ੍ਸਾਨਿ ਪਰਿਚਾਰਿਕਾ ਦਿਜਕਞ੍ਞਾਯੋ, ਅਥ ਖਲੁ, ਭੋ, ਦ੍ਵੇ ਦਿਜਕਞ੍ਞਾਯੋ ਕਟ੍ਠਂ ਮੁਖੇਨ ਡਂਸਿਤ੍ਵਾ ਤਂ ਕੁਣਾਲਂ ਸਕੁਣਂ ਮਜ੍ਝੇ ਨਿਸੀਦਾਪੇਤ੍ਵਾ ਉਡ੍ਡੇਨ੍ਤਿਮਾ ਨਂ ਕੁਣਾਲਂ ਸਕੁਣਂ ਅਦ੍ਧਾਨਪਰਿਯਾਯਪਥੇ ਕਿਲਮਥੋ ਉਬ੍ਬਾਹੇਤ੍ਥਾ’’ਤਿ.

‘‘ਪਞ੍ਚਸਤਾ ਦਿਜਕਞ੍ਞਾਯੋ ਹੇਟ੍ਠਤੋ ਹੇਟ੍ਠਤੋ ਉਡ੍ਡੇਨ੍ਤਿ ‘ਸਚਾਯਂ ਕੁਣਾਲੋ ਸਕੁਣੋ ਆਸਨਾ ਪਰਿਪਤਿਸ੍ਸਤਿ, ਮਯਂ ਤਂ ਪਕ੍ਖੇਹਿ ਪਟਿਗ੍ਗਹੇਸ੍ਸਾਮਾ’ਤਿ.

‘‘ਪਞ੍ਚਸਤਾ ਦਿਜਕਞ੍ਞਾਯੋ ਉਪਰੂਪਰਿ ਉਡ੍ਡੇਨ੍ਤਿ ‘ਮਾ ਨਂ ਕੁਣਾਲਂ ਸਕੁਣਂ ਆਤਪੋ ਪਰਿਤਾਪੇਸੀ’ਤਿ.

‘‘ਪਞ੍ਚਸਤਾ ਦਿਜਕਞ੍ਞਾਯੋ ਉਭਤੋਪਸ੍ਸੇਨ ਉਡ੍ਡੇਨ੍ਤਿ ‘ਮਾ ਨਂ ਕੁਣਾਲਂ ਸਕੁਣਂ ਸੀਤਂ ਵਾ ਉਣ੍ਹਂ ਵਾ ਤਿਣਂ ਵਾ ਰਜੋ ਵਾ ਵਾਤੋ ਵਾ ਉਸ੍ਸਾਵੋ ਵਾ ਉਪਪ੍ਫੁਸੀ’ਤਿ.

‘‘ਪਞ੍ਚਸਤਾ ਦਿਜਕਞ੍ਞਾਯੋ ਪੁਰਤੋ ਪੁਰਤੋ ਉਡ੍ਡੇਨ੍ਤਿ ‘ਮਾ ਨਂ ਕੁਣਾਲਂ ਸਕੁਣਂ ਗੋਪਾਲਕਾ ਵਾ ਪਸੁਪਾਲਕਾ ਵਾ ਤਿਣਹਾਰਕਾ ਵਾ ਕਟ੍ਠਹਾਰਕਾ ਵਾ ਵਨਕਮ੍ਮਿਕਾ ਵਾ ਕਟ੍ਠੇਨ ਵਾ ਕਠਲੇਨ ਵਾ ਪਾਣਿਨਾ ਵਾ ਲੇਡ੍ਡੁਨਾ ਵਾ ਦਣ੍ਡੇਨ ਵਾ ਸਤ੍ਥੇਨ ਵਾ ਸਕ੍ਖਰਾਹਿ ਵਾ ਪਹਾਰਂ ਅਦਂਸੁ, ਮਾਯਂ ਕੁਣਾਲੋ ਸਕੁਣੋ ਗਚ੍ਛੇਹਿ ਵਾ ਲਤਾਹਿ ਵਾ ਰੁਕ੍ਖੇਹਿ ਵਾ ਸਾਖਾਹਿ ਵਾ ਥਮ੍ਭੇਹਿ ਵਾ ਪਾਸਾਣੇਹਿ ਵਾ ਬਲਵਨ੍ਤੇਹਿ ਵਾ ਪਕ੍ਖੀਹਿ ਸਙ੍ਗਮੇਸੀ’ਤਿ.

‘‘ਪਞ੍ਚਸਤਾ ਦਿਜਕਞ੍ਞਾਯੋ ਪਚ੍ਛਤੋ ਪਚ੍ਛਤੋ ਉਡ੍ਡੇਨ੍ਤਿ ਸਣ੍ਹਾਹਿ ਸਖਿਲਾਹਿ ਮਞ੍ਜੂਹਿ ਮਧੁਰਾਹਿ ਵਾਚਾਹਿ ਸਮੁਦਾਚਰਨ੍ਤਿਯੋ ‘ਮਾਯਂ ਕੁਣਾਲੋ ਸਕੁਣੋ ਆਸਨੇ ਪਰਿਯੁਕ੍ਕਣ੍ਠੀ’ਤਿ.

‘‘ਪਞ੍ਚਸਤਾ ਦਿਜਕਞ੍ਞਾਯੋ ਦਿਸੋਦਿਸਂ ਉਡ੍ਡੇਨ੍ਤਿ ਅਨੇਕਰੁਕ੍ਖਵਿਵਿਧਵਿਕਤਿਫਲਮਾਹਰਨ੍ਤਿਯੋ ‘ਮਾਯਂ ਕੁਣਾਲੋ ਸਕੁਣੋ ਖੁਦਾਯ ਪਰਿਕਿਲਮਿਤ੍ਥਾ’ਤਿ.

‘‘ਅਥ ਖਲੁ, ਭੋ, ਤਾ ਦਿਜਕਞ੍ਞਾਯੋ ਤਂ ਕੁਣਾਲਂ ਸਕੁਣਂ ਆਰਾਮੇਨੇਵ ਆਰਾਮਂ, ਉਯ੍ਯਾਨੇਨੇਵ ਉਯ੍ਯਾਨਂ, ਨਦੀਤਿਤ੍ਥੇਨੇਵ ਨਦੀਤਿਤ੍ਥਂ, ਪਬ੍ਬਤਸਿਖਰੇਨੇਵ ਪਬ੍ਬਤਸਿਖਰਂ, ਅਮ੍ਬਵਨੇਨੇਵ ਅਮ੍ਬਵਨਂ, ਜਮ੍ਬੁਵਨੇਨੇਵ ਜਮ੍ਬੁਵਨਂ, ਲਬੁਜਵਨੇਨੇਵ ਲਬੁਜਵਨਂ, ਨਾਲ਼ਿਕੇਰਸਞ੍ਚਾਰਿਯੇਨੇਵ ਨਾਲ਼ਿਕੇਰਸਞ੍ਚਾਰਿਯਂ ਖਿਪ੍ਪਮੇਵ ਅਭਿਸਮ੍ਭੋਨ੍ਤਿ ਰਤਿਤ੍ਥਾਯ.

‘‘ਅਥ ਖਲੁ, ਭੋ, ਕੁਣਾਲੋ ਸਕੁਣੋ ਤਾਹਿ ਦਿਜਕਞ੍ਞਾਹਿ ਦਿਵਸਂ ਪਰਿਬ੍ਯੂਲ਼੍ਹੋ ਏਵਂ ਅਪਸਾਦੇਤਿ ‘ਨਸ੍ਸਥ ਤੁਮ੍ਹੇ ਵਸਲਿਯੋ, ਵਿਨਸ੍ਸਥ ਤੁਮ੍ਹੇ ਵਸਿਲਿਯੋ ਚੋਰਿਯੋ ਧੁਤ੍ਤਿਯੋ ਅਸਤਿਯੋ ਲਹੁਚਿਤ੍ਤਾਯੋ ਕਤਸ੍ਸ ਅਪ੍ਪਟਿਕਾਰਿਕਾਯੋ ਅਨਿਲੋ ਵਿਯ ਯੇਨਕਾਮਂਗਮਾਯੋ’’’ ਤਿ.

ਤਤ੍ਰਾਯਂ ਅਤ੍ਥਵਣ੍ਣਨਾ – ਭਿਕ੍ਖਵੇ, ਸੋ ਵਨਸਣ੍ਡੋ ਏਵਂ ਅਕ੍ਖਾਯਤਿ ਏਵਞ੍ਚ ਅਨੁਸੂਯਤਿ. ਕਿਨ੍ਤਿ? ਸਬ੍ਬੋਸਧਧਰਣਿਧਰੇਤਿ ਵਿਤ੍ਥਾਰੋ. ਤਤ੍ਥ ਸਬ੍ਬੋਸਧਧਰਣਿਧਰੇਤਿ ਮੂਲਤਚਪਤ੍ਤਪੁਪ੍ਫਾਦਿਸਬ੍ਬੋਸਧਧਰਾਯ ਧਰਣਿਯਾ ਸਮਨ੍ਨਾਗਤੇਤਿ ਅਤ੍ਥੋ, ਸਬ੍ਬੋਸਧਯੁਤ੍ਤੋ ਵਾ ਧਰਣਿਧਰੋ. ਸੋ ਹਿ ਪਦੇਸੋ ਸਬ੍ਬੋਸਧਧਰਣਿਧਰੋਤਿ ਏਵਮਕ੍ਖਾਯਤਿ ਏਵਞ੍ਚ ਅਨੁਸੂਯਤਿ, ਤਸ੍ਮਿਂ ਵਨਸਣ੍ਡੇਤਿ ਵੁਤ੍ਤਂ ਹੋਤਿ. ਸੇਸਪਦਯੋਜਨਾਯਪਿ ਏਸੇਵ ਨਯੋ. ਨੇਕਪੁਪ੍ਫਮਾਲ੍ਯਵਿਤਤੇਤਿ ਅਨੇਕੇਹਿ ਫਲਤ੍ਥਾਯ ਉਪ੍ਪਨ੍ਨਪੁਪ੍ਫੇਹਿ ਚੇਵ ਪਿਲ਼ਨ੍ਧਨਮਾਲ੍ਯੇਹਿ ਚ ਵਿਤਤੇ. ਰੁਰੂਤਿ ਸੁਵਣ੍ਣਵਣ੍ਣਾ ਮਿਗਾ. ਉਦ੍ਦਾਰਾਤਿ ਉਦ੍ਦਾ. ਬਿਲ਼ਾਰਾਤਿ ਮਹਾਬਿਲ਼ਾਰਾ. ਨੇਲਮਣ੍ਡਲਂ ਵੁਚ੍ਚਤਿ ਤਰੁਣਭਿਙ੍ਕਚ੍ਛਾਪਮਣ੍ਡਲਂ. ਮਹਾਵਰਾਹਾਤਿ ਮਹਾਹਤ੍ਥਿਨੋ, ਆਕਿਣ੍ਣਨੇਲਮਣ੍ਡਲਮਹਾਵਰਾਹੇਨ ਗੋਚਰਿਯਾਦਿਭੇਦੇਨ ਦਸਵਿਧੇਨ ਨਾਗਕੁਲੇਨ ਚੇਵ ਕਰੇਣੁਸਙ੍ਘੇਨ ਚ ਅਧਿਵੁਟ੍ਠੇਤਿ ਅਤ੍ਥੋ. ਇਸ੍ਸਮਿਗਾਤਿ ਕਾਲ਼ਸੀਹਾ. ਵਾਤਮਿਗਾਤਿ ਮਹਾਵਾਤਮਿਗਾ. ਪਸਦਮਿਗਾਤਿ ਚਿਤ੍ਰਮਿਗਾ. ਪੁਰਿਸਾਲੂਤਿ ਵਲ਼ਵਾਮੁਖਯਕ੍ਖਿਨਿਯੋ. ਕਿਮ੍ਪੁਰਿਸਾਤਿ ਦੇਵਕਿਨ੍ਨਰਚਨ੍ਦਕਿਨ੍ਨਰਦੁਮਕਿਨ੍ਨਰਦਣ੍ਡਮਾਣਵਕਕੋਨ੍ਤਿ- ਸਕੁਣਕਣ੍ਣਪਾਵੁਰਣਾਦਿਭੇਦਾ ਕਿਨ੍ਨਰਾ. ਅਮਜ੍ਜਵਮਞ੍ਜਰੀਧਰਪਹਟ੍ਠਪੁਪ੍ਫਫੁਸਿਤਗ੍ਗਾਨੇਕਪਾਦਪਗਣਵਿਤਤੇਤਿ ਮਕੁਲਧਰੇਹਿ ਚੇਵ ਮਞ੍ਜਰੀਧਰੇਹਿ ਚ ਸੁਪੁਪ੍ਫਿਤੇਹਿ ਚ ਅਗ੍ਗਮਤ੍ਤਪੁਪ੍ਫਿਤੇਹਿ ਚ ਅਨੇਕੇਹਿ ਪਾਦਪਗਣੇਹਿ ਵਿਤਤੇ. ਵਾਰਣਾ ਨਾਮ ਹਤ੍ਥਿਲਿਙ੍ਗਸਕੁਣਾ. ਚੇਲਾਵਕਾਤਿਪਿ ਏਤੇ ਸਕੁਣਾਯੇਵ. ਹੇਮਞ੍ਚ ਕਨਕਞ੍ਚਾਤਿ ਦ੍ਵੇ ਸੁਵਣ੍ਣਜਾਤਿਯੋ. ਏਤੇਹਿ ਅਞ੍ਜਨਾਦੀਹਿ ਅਨੇਕਧਾਤੁਸਤੇਹਿ ਅਨੇਕੇਹਿ ਵਣ੍ਣਧਾਤੁਰਾਸੀਹਿ ਵਿਨਦ੍ਧਪਟਿਮਣ੍ਡਿਤਪਦੇਸੇ. ਭੋਤਿ ਧਮ੍ਮਾਲਪਨਮਤ੍ਤਮੇਤਂ. ਚਿਤ੍ਤੋਤਿ ਮੁਖਤੁਣ੍ਡਕੇਪਿ ਹੇਟ੍ਠਾਉਦਰਭਾਗੇਪਿ ਚਿਤ੍ਰੋਵ.

ਅਡ੍ਢੁਡ੍ਢਾਨੀਤਿ ਅਡ੍ਢਚਤੁਤ੍ਥਾਨਿ, ਤੀਣਿ ਸਹਸ੍ਸਾਨਿ ਪਞ੍ਚੇਵ ਸਤਾਨੀਤਿ ਅਤ੍ਥੋ. ਅਦ੍ਧਾਨਪਰਿਯਾਯਪਥੇਤਿ ਅਦ੍ਧਾਨਸਙ੍ਖਾਤੇ ਗਮਨਮਗ੍ਗੇ. ਉਬ੍ਬਾਹੇਤ੍ਥਾਤਿ ਬਾਧਯਿਤ੍ਥ. ਉਪਪ੍ਫੁਸੀਤਿ ਉਪਗਨ੍ਤ੍ਵਾ ਫੁਸਿ. ਪਹਾਰਂ ਅਦਂਸੂਤਿ ਏਤ੍ਥ ‘‘ਮਾ ਨ’’ਨ੍ਤਿ ਪਦਸ੍ਸ ਸਾਮਿਵਸੇਨ ਅਤ੍ਥੋ ਵੇਦਿਤਬ੍ਬੋ. ਸਙ੍ਗਮੇਸੀਤਿ ਸਮਾਗਚ੍ਛਿ. ਸਣ੍ਹਾਹੀਤਿ ਮਟ੍ਠਾਹਿ. ਸਖਿਲਾਹੀਤਿ ਪਿਯਾਹਿ. ਮਞ੍ਜੂਹੀਤਿ ਸਖਿਲਾਹਿ. ਮਧੁਰਾਹੀਤਿ ਮਧੁਰਸ੍ਸਰਾਹਿ. ਸਮੁਦਾਚਰਨ੍ਤਿਯੋਤਿ ਗਨ੍ਧਬ੍ਬਕਰਣਵਸੇਨ ਪਰਿਚਰਨ੍ਤਿਯੋ. ਅਨੇਕਰੁਕ੍ਖਵਿਵਿਧਵਿਕਤਿਫਲਨ੍ਤਿ ਅਨੇਕੇਹਿ ਰੁਕ੍ਖੇਹਿ ਵਿਵਿਧਵਿਕਤਿਫਲਂ. ਆਰਾਮੇਨੇਵ ਆਰਾਮਨ੍ਤਿ ਪੁਪ੍ਫਾਰਾਮਾਦੀਸੁ ਅਞ੍ਞਤਰੇਨ ਆਰਾਮੇਨੇਵ ਅਞ੍ਞਤਰਂ ਆਰਾਮਂ ਨੇਨ੍ਤੀਤਿ ਅਤ੍ਥੋ. ਉਯ੍ਯਾਨਾਦੀਸੁਪਿ ਏਸੇਵ ਨਯੋ. ਨਾਲ਼ਿਕੇਰਸਞ੍ਚਾਰਿਯੇਨੇਵਾਤਿ ਨਾਲ਼ਿਕੇਰਵਨੇਨੇਵ ਅਞ੍ਞਂ ਨਾਲ਼ਿਕੇਰਵਨਂ. ਅਤਿਸਮ੍ਭੋਨ੍ਤੀਤਿ ਏਵਂ ਨੇਤ੍ਵਾ ਤਤ੍ਥ ਨਂ ਖਿਪ੍ਪਞ੍ਞੇਵ ਰਤਿਤ੍ਥਾਯ ਪਾਪੁਣਨ੍ਤਿ.

ਦਿਵਸਂ ਪਰਿਬ੍ਯੂਲ਼੍ਹੋਤਿ ਸਕਲਦਿਵਸਂ ਪਰਿਬ੍ਯੂਲ਼੍ਹੋ. ਅਪਸਾਦੇਤੀਤਿ ਤਾ ਕਿਰ ਤਂ ਏਵਂ ਦਿਵਸਂ ਪਰਿਚਰਿਤ੍ਵਾ ਨਿਵਾਸਰੁਕ੍ਖੇ ਓਤਾਰੇਤ੍ਵਾ ਪਰਿਵਾਰੇਤ੍ਵਾ ਰੁਕ੍ਖਸਾਖਾਸੁ ਨਿਸੀਦਿਤ੍ਵਾ ‘‘ਅਪ੍ਪੇਵ ਨਾਮ ਮਧੁਰਵਚਨਂ ਲਭੇਯ੍ਯਾਮਾ’’ਤਿ ਪਤ੍ਥਯਨ੍ਤਿਯੋ ਇਮਿਨਾ ਉਯ੍ਯੋਜਿਤਕਾਲੇ ਅਤ੍ਤਨੋ ਵਸਨਟ੍ਠਾਨਂ ਗਮਿਸ੍ਸਾਮਾਤਿ ਵਸਨ੍ਤਿ. ਕੁਣਾਲਰਾਜਾ ਪਨ ਤਾ ਉਯ੍ਯੋਜੇਨ੍ਤੋ ‘‘ਨਸ੍ਸਥਾ’’ਤਿਆਦਿਵਚਨੇਹਿ ਅਪਸਾਦੇਤਿ. ਤਤ੍ਥ ਨਸ੍ਸਥਾਤਿ ਗਚ੍ਛਥ. ਵਿਨਸ੍ਸਥਾਤਿ ਸਬ੍ਬਤੋਭਾਗੇਨ ਨਸ੍ਸਥ. ਗੇਹੇ ਧਨਧਞ੍ਞਾਦੀਨਂ ਨਾਸਨੇਨ ਚੋਰਿਯੋ, ਬਹੁਮਾਯਤਾਯ ਧੁਤ੍ਤਿਯੋ, ਨਟ੍ਠਸ੍ਸਤਿਤਾਯ ਅਸਤਿਯੋ, ਅਨਵਟ੍ਠਿਤਚਿਤ੍ਤਤਾਯ ਲਹੁਚਿਤ੍ਤਾਯੋ, ਕਤਵਿਨਾਸਨੇਨ ਮਿਤ੍ਤਦੁਬ੍ਭਿਤਾਯ ਕਤਸ੍ਸ ਅਪ੍ਪਟਿਕਾਰਿਕਾਯੋਤਿ.

ਏਵਞ੍ਚ ਪਨ ਵਤ੍ਵਾ ‘‘ਇਤਿ ਖੋ, ਭਿਕ੍ਖਵੇ, ਅਹਂ ਤਿਰਚ੍ਛਾਨਗਤੋਪਿ ਇਤ੍ਥੀਨਂ ਅਕਤਞ੍ਞੁਤਂ ਬਹੁਮਾਯਤਂ ਅਨਾਚਾਰਤਂ ਦੁਸ੍ਸੀਲਤਞ੍ਚ ਜਾਨਾਮਿ, ਤਦਾਪਾਹਂ ਤਾਸਂ ਵਸੇ ਅਵਤ੍ਤਿਤ੍ਵਾ ਤਾ ਏਵ ਅਤ੍ਤਨੋ ਵਸੇ ਵਤ੍ਤੇਮੀ’’ਤਿ ਇਮਾਯ ਕਥਾਯ ਤੇਸਂ ਭਿਕ੍ਖੂਨਂ ਅਨਭਿਰਤਿਂ ਹਰਿਤ੍ਵਾ ਸਤ੍ਥਾ ਤੁਣ੍ਹੀ ਅਹੋਸਿ. ਤਸ੍ਮਿਂ ਖਣੇ ਦ੍ਵੇ ਕਾਲ਼ਕੋਕਿਲਾ ਸਾਮਿਕਂ ਦਣ੍ਡਕੇਨ ਉਕ੍ਖਿਪਿਤ੍ਵਾ ਹੇਟ੍ਠਾਭਾਗਾਦੀਸੁ ਚਤਸ੍ਸੋ ਚਤਸ੍ਸੋ ਹੁਤ੍ਵਾ ਤਂ ਪਦੇਸਂ ਆਗਮਿਂਸੁ. ਤੇ ਭਿਕ੍ਖੂ ਤਾਪਿ ਦਿਸ੍ਵਾ ਸਤ੍ਥਾਰਂ ਪੁਚ੍ਛਿਂਸੁ. ਸਤ੍ਥਾ ‘‘ਪੁਬ੍ਬੇ, ਭਿਕ੍ਖਵੇ, ਮਮ ਸਹਾਯੋ ਪੁਣ੍ਣਮੁਖੋ ਨਾਮ ਫੁਸ੍ਸਕੋਕਿਲੋ ਅਹੋਸਿ, ਤਸ੍ਸਾਯਂ ਵਂਸੋ’’ਤਿ ਵਤ੍ਵਾ ਪੁਰਿਮਨਯੇਨੇਵ ਤੇਹਿ ਭਿਕ੍ਖੂਹਿ ਪੁਚ੍ਛਿਤੋ ਆਹ –

‘‘ਤਸ੍ਸੇਵ ਖਲੁ, ਭੋ, ਹਿਮਵਤੋ ਪਬ੍ਬਤਰਾਜਸ੍ਸ ਪੁਰਤ੍ਥਿਮਦਿਸਾਭਾਗੇ ਸੁਸੁਖੁਮਸੁਨਿਪੁਣਗਿਰਿਪ੍ਪਭਵਹਰਿਤੁਪਯਨ੍ਤਿਯੋ’’ਤਿ.

ਤਤ੍ਥ ਸੁਟ੍ਠੁ ਸੁਖੁਮਸਣ੍ਹਸਲਿਲਤਾਯ ਸੁਸੁਖੁਮਸੁਨਿਪੁਣਾ, ਗਿਰਿ ਏਤਾਸਂ ਪਭਵੋਤਿ ਗਿਰਿਪ੍ਪਭਵਾ, ਹਿਮਵਨ੍ਤਤੋ ਸਨ੍ਦਮਾਨਹਰਿਤਤਿਣਮਿਸ੍ਸਓਘਤਾਯ ਹਰਿਤਾ, ਕੁਣਾਲਦਹਂ ਉਪਗਮਨੇਨ ਉਪਯਨ੍ਤਿਯੋਤਿ ਸੁਸੁਖੁਮਸੁਨਿਪੁਣਗਿਰਿਪ੍ਪਭਵਹਰਿਤੁਪਯਨ੍ਤਿਯੋ, ਏਵਰੂਪਾ ਨਦਿਯੋ ਯਸ੍ਮਿਂ ਸਨ੍ਦਨ੍ਤੀਤਿ ਅਤ੍ਥੋ.

ਇਦਾਨਿ ਯਂ ਕੁਣਾਲਦਹਂ ਤਾ ਉਪਯਨ੍ਤਿ, ਤਤ੍ਥ ਪੁਪ੍ਫਾਨਿ ਵਣ੍ਣੇਨ੍ਤੋ ਆਹ –

‘‘ਉਪ੍ਪਲਪਦੁਮਕੁਮੁਦਨਲਿਨਸਤਪਤ੍ਤਸੋਗਨ੍ਧਿਕਮਨ੍ਦਾਲਕਸਮ੍ਪਤਿਵਿਰੁਲ਼੍ਹਸੁਚਿਗਨ੍ਧਮਨੁਞ੍ਞਮਾਵਕਪ੍ਪਦੇਸੇ’’ਤਿ.

ਤਤ੍ਥ ਉਪ੍ਪਲਨ੍ਤਿ ਨੀਲੁਪ੍ਪਲਂ. ਨਲਿਨਨ੍ਤਿ ਸੇਤਪਦੁਮਂ. ਸਤਪਤ੍ਤਨ੍ਤਿ ਪਰਿਪੁਣ੍ਣਸਤਪਤ੍ਤਪਦੁਮਂ. ਸਮ੍ਪਤੀਤਿ ਏਤੇਹਿ ਸਮ੍ਪਤਿਵਿਰੁਲ਼੍ਹੇਹਿ ਅਭਿਨਵਜਾਤੇਹਿ ਸੁਚਿਗਨ੍ਧੇਨ ਚੇਵ ਮਨੁਞ੍ਞੇਨ ਚ ਹਦਯਬਨ੍ਧਨਸਮਤ੍ਥਤਾਯ ਮਾਵਕੇਨ ਚ ਪਦੇਸੇਨ ਸਮਨ੍ਨਾਗਤੇਤਿ ਅਤ੍ਥੋ.

ਇਦਾਨਿ ਤਸ੍ਮਿਂ ਦਹੇ ਰੁਕ੍ਖਾਦਯੋ ਵਣ੍ਣੇਨ੍ਤੋ ਆਹ –

‘‘ਕੁਰਵਕਮੁਚਲਿਨ੍ਦਕੇਤਕਵੇਦਿਸਵਞ੍ਜੁਲਪੁਨ੍ਨਾਗਬਕੁਲਤਿਲਕਪਿਯਕਹਸਨਸਾਲਸਲ਼ਲ- ਚਮ੍ਪਕਅਸੋਕਨਾਗਰੁਕ੍ਖਤਿਰੀਟਿਭੁਜਪਤ੍ਤਲੋਦ੍ਦਚਨ੍ਦਨੋਘਵਨੇ ਕਾਲ਼ਾਗਰੁਪਦ੍ਮਕਪਿਯਙ੍ਗੁਦੇਵਦਾਰੁਕਚੋਚਗਹਨੇ ਕਕੁਧਕੁਟਜਅਙ੍ਕੋਲਕਚ੍ਚਿਕਾਰਕਣਿਕਾਰਕਣ੍ਣਿਕਾਰ- ਕਨਵੇਰਕੋਰਣ੍ਡਕਕੋਵਿਲ਼ਾਰਕਿਂਸੁਕਯੋਧਿਕਵਨਮਲ੍ਲਿਕਮਨਙ੍ਗਣਮਨਵਜ੍ਜਭਣ੍ਡਿਸੁਰੁਚਿਰ- ਭਗਿਨਿਮਾਲਾਮਲ੍ਯਧਰੇ ਜਾਤਿਸੁਮਨਮਧੁਗਨ੍ਧਿਕਧਨੁਤਕ੍ਕਾਰਿਤਾਲੀਸਤਗਰਮੁਸੀਰਕੋਟ੍ਠਕਚ੍ਛਵਿਤਤੇ ਅਤਿਮੁਤ੍ਤਕਸਂਕੁਸੁਮਿਤਲਤਾਵਿਤਤਪਟਿਮਣ੍ਡਿਤਪ੍ਪਦੇਸੇ ਹਂਸਪਿਲਵਕਾਦਮ੍ਬਕਾਰਣ੍ਡਵਾਭਿਨਦਿਤੇ ਵਿਜ੍ਜਾਧਰਸਿਦ੍ਧਸਮਣਤਾਪਸਗਣਾਧਿਵੁਟ੍ਠੇ ਵਰਦੇਵਯਕ੍ਖਰਕ੍ਖਸਦਾਨਵਗਨ੍ਧਬ੍ਬਕਿਨ੍ਨਰਮਹੋਰਗਾਨੁਚਿਣ੍ਣਪ੍ਪਦੇਸੇ – ਏਵਰੂਪੇ ਖਲੁ, ਭੋ, ਰਮ੍ਮੇ ਵਨਸਣ੍ਡੇ ਪੁਣ੍ਣਮੁਖੋ ਨਾਮ ਫੁਸ੍ਸਕੋਕਿਲੋ ਪਤਿਵਸਤਿ ਅਤਿਵਿਯ ਮਧੁਰਗਿਰੋ ਵਿਲਾਸਿਤਨਯਨੋ ਮਤ੍ਤਕ੍ਖੋ.

‘‘ਤਸ੍ਸੇਵ ਖਲੁ, ਭੋ, ਪੁਣ੍ਣਮੁਖਸ੍ਸ ਫੁਸ੍ਸਕੋਕਿਲਸ੍ਸ ਅਡ੍ਢੁਡ੍ਢਾਨਿ ਇਤ੍ਥਿਸਤਾਨਿ ਪਰਿਚਾਰਿਕਾ ਦਿਜਕਞ੍ਞਾਯੋ. ਅਥ ਖਲੁ, ਭੋ, ਦ੍ਵੇ ਦਿਜਕਞ੍ਞਾਯੋ ਕਟ੍ਠਂ ਮੁਖੇਨ ਡਂਸਿਤ੍ਵਾ ਤਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਮਜ੍ਝੇ ਨਿਸੀਦਾਪੇਤ੍ਵਾ ਉਡ੍ਡੇਨ੍ਤਿ ‘ਮਾ ਨਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਅਦ੍ਧਾਨਪਰਿਯਾਯਪਥੇ ਕਿਲਮਥੋ ਉਬ੍ਬਾਹੇਤ੍ਥਾ’ਤਿ.

‘‘ਪਞ੍ਞਾਸ ਦਿਜਕਞ੍ਞਾਯੋ ਹੇਟ੍ਠਤੋ ਹੇਟ੍ਠਤੋ ਉਡ੍ਡੇਨ੍ਤਿ ‘ਸਚਾਯਂ ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਸਕੁਣੋ ਆਸਨਾ ਪਰਿਪਤਿਸ੍ਸਤਿ, ਮਯਂ ਤਂ ਪਕ੍ਖੇਹਿ ਪਟਿਗ੍ਗਹੇਸ੍ਸਾਮਾ’ਤਿ.

‘‘ਪਞ੍ਞਾਸ ਦਿਜਕਞ੍ਞਾਯੋ ਉਪਰੂਪਰਿ ਉਡ੍ਡੇਨ੍ਤਿ ‘ਮਾ ਨਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਆਤਪੋ ਪਰਿਤਾਪੇਸੀ’ਤਿ.

‘‘ਪਞ੍ਞਾਸ ਪਞ੍ਞਾਸ ਦਿਜਕਞ੍ਞਾਯੋ ਉਭਤੋਪਸ੍ਸੇਨ ਉਡ੍ਡੇਨ੍ਤਿ ‘ਮਾਨਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਸੀਤਂ ਵਾ ਉਣ੍ਹਂ ਵਾ ਤਿਣਂ ਵਾ ਰਜੋ ਵਾ ਵਾਤੋ ਵਾ ਉਸ੍ਸਾਵੋ ਵਾ ਉਪਪ੍ਫੁਸੀ’ਤਿ.

‘‘ਪਞ੍ਞਾਸ ਦਿਜਕਞ੍ਞਾਯੋ ਪੁਰਤੋ ਪੁਰਤੋ ਉਡ੍ਡੇਨ੍ਤਿ ‘ਮਾ ਨਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਗੋਪਾਲਕਾ ਵਾ ਪਸੁਪਾਲਕਾ ਵਾ ਤਿਣਹਾਰਕਾ ਵਾ ਕਟ੍ਠਹਾਰਕਾ ਵਾ ਵਨਕਮ੍ਮਿਕਾ ਵਾ ਕਟ੍ਠੇਨ ਵਾ ਕਠਲਾਯ ਵਾ ਪਾਣਿਨਾ ਵਾ ਲੇਡ੍ਡੁਨਾ ਵਾ ਦਣ੍ਡੇਨ ਵਾ ਸਤ੍ਥੇਨ ਵਾ ਸਕ੍ਖਰਾਹਿ ਵਾ ਪਹਾਰਮਦਂਸੁ, ਮਾਯਂ ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਗਚ੍ਛੇਹਿ ਵਾ ਲਤਾਹਿ ਵਾ ਰੁਕ੍ਖੇਹਿ ਵਾ ਸਾਖਾਹਿ ਵਾ ਥਮ੍ਭੇਹਿ ਵਾ ਪਾਸਾਣੇਹਿ ਵਾ ਬਲਵਨ੍ਤੇਹਿ ਵਾ ਪਕ੍ਖੀਹਿ ਸਙ੍ਗਮੇਸੀ’ਤਿ.

‘‘ਪਞ੍ਞਾਸ ਦਿਜਕਞ੍ਞਾਯੋ ਪਚ੍ਛਤੋ ਪਚ੍ਛਤੋ ਉਡ੍ਡੇਨ੍ਤਿ ਸਣ੍ਹਾਹਿ ਸਖਿਲਾਹਿ ਮਞ੍ਜੂਹਿ ਮਧੁਰਾਹਿ ਵਾਚਾਹਿ ਸਮੁਦਾਚਰਨ੍ਤਿਯੋ ‘ਮਾਯਂ ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਆਸਨੇ ਪਰਿਯੁਕ੍ਕਣ੍ਠੀ’ਤਿ.

‘‘ਪਞ੍ਞਾਸ ਦਿਜਕਞ੍ਞਾਯੋ ਦਿਸੋਦਿਸਂ ਉਡ੍ਡੇਨ੍ਤਿ ਅਨੇਕਰੁਕ੍ਖਵਿਵਿਧਵਿਕਤਿਫਲਮਾਹਰਨ੍ਤਿਯੋ ‘ਮਾਯਂ ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਖੁਦਾਯ ਪਰਿਕਿਲਮਿਤ੍ਥਾ’ਤਿ.

‘‘ਅਥ ਖਲੁ, ਭੋ, ਤਾ ਦਿਜਕਞ੍ਞਾਯੋ ਤਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਆਰਾਮੇਨੇਵ ਆਰਾਮਂ, ਉਯ੍ਯਾਨੇਨੇਵ ਉਯ੍ਯਾਨਂ, ਨਦੀਤਿਤ੍ਥੇਨੇਵ ਨਦੀਤਿਤ੍ਥਂ, ਪਬ੍ਬਤਸਿਖਰੇਨੇਵ ਪਬ੍ਬਤਸਿਖਰਂ, ਅਮ੍ਬਵਨੇਨੇਵ ਅਮ੍ਬਵਨਂ, ਜਮ੍ਬੁਵਨੇਨੇਵ ਜਮ੍ਬੁਵਨਂ, ਲਬੁਜਵਨੇਨੇਵ ਲਬੁਜਵਨਂ, ਨਾਲ਼ਿਕੇਰਸਞ੍ਚਾਰਿਯੇਨੇਵ ਨਾਲ਼ਿਕੇਰਸਞ੍ਚਾਰਿਯਂ ਖਿਪ੍ਪਮੇਵ ਅਭਿਸਮ੍ਭੋਨ੍ਤਿ ਰਤਿਤ੍ਥਾਯ.

‘‘ਅਥ ਖਲੁ, ਭੋ, ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਤਾਹਿ ਦਿਜਕਞ੍ਞਾਹਿ ਦਿਵਸਂ ਪਰਿਬ੍ਯੂਲ਼੍ਹੋ ਏਵਂ ਪਸਂਸਤਿ ‘ਸਾਧੁ ਸਾਧੁ, ਭਗਿਨਿਯੋ, ਏਤਂ ਖੋ ਭਗਿਨਿਯੋ ਤੁਮ੍ਹਾਕਂ ਪਤਿਰੂਪਂ ਕੁਲਧੀਤਾਨਂ, ਯਂ ਤੁਮ੍ਹੇ ਭਤ੍ਤਾਰਂ ਪਰਿਚਰੇਯ੍ਯਾਥਾ’ਤਿ.

‘‘ਅਥ ਖਲੁ, ਭੋ, ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਯੇਨ ਕੁਣਾਲੋ ਸਕੁਣੋ ਤੇਨੁਪਸਙ੍ਕਮਿ. ਅਦ੍ਦਸਂਸੁ ਖੋ ਕੁਣਾਲਸ੍ਸ ਸਕੁਣਸ੍ਸ ਪਰਿਚਾਰਿਕਾ ਦਿਜਕਞ੍ਞਾਯੋ ਤਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਯੇਨ ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਤਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਏਤਦਵੋਚੁਂ – ‘ਅਯਂ, ਸਮ੍ਮ ਪੁਣ੍ਣਮੁਖ, ਕੁਣਾਲੋ ਸਕੁਣੋ ਅਤਿਵਿਯ ਫਰੁਸੋ ਅਤਿਵਿਯ ਫਰੁਸਵਾਚੋ, ਅਪ੍ਪੇਵ ਨਾਮ ਤਵਮ੍ਪਿ ਆਗਮ੍ਮ ਪਿਯਵਾਚਂ ਲਭੇਯ੍ਯਾਮਾ’ਤਿ. ‘ਅਪ੍ਪੇਵ ਨਾਮ ਭਗਿਨਿਯੋ’ਤਿ ਵਤ੍ਵਾ ਯੇਨ ਕੁਣਾਲੋ ਸਕੁਣੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਕੁਣਾਲੇਨ ਸਕੁਣੇਨ ਸਦ੍ਧਿਂ ਪਟਿਸਮ੍ਮੋਦਿਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਤਂ ਕੁਣਾਲਂ ਸਕੁਣਂ ਏਤਦਵੋਚ – ‘ਕਿਸ੍ਸ ਤ੍ਵਂ, ਸਮ੍ਮ ਕੁਣਾਲ, ਇਤ੍ਥੀਨਂ ਸੁਜਾਤਾਨਂ ਕੁਲਧੀਤਾਨਂ ਸਮ੍ਮਾਪਟਿਪਨ੍ਨਾਨਂ ਮਿਚ੍ਛਾਪਟਿਪਨ੍ਨੋਸਿ, ਅਮਨਾਪਭਾਣੀਨਮ੍ਪਿ ਕਿਰ, ਸਮ੍ਮ ਕੁਣਾਲ, ਇਤ੍ਥੀਨਂ ਮਨਾਪਭਾਣਿਨਾ ਭਵਿਤਬ੍ਬਂ, ਕਿਮਙ੍ਗਂ ਪਨ ਮਨਾਪਭਾਣੀਨ’ਨ੍ਤਿ.

‘‘ਏਵਂ ਵੁਤ੍ਤੇ ਕੁਣਾਲੋ ਸਕੁਣੋ ਤਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਏਵਂ ਅਪਸਾਦੇਸਿ – ‘ਨਸ੍ਸ ਤ੍ਵਂ, ਸਮ੍ਮ ਜਮ੍ਮ ਵਸਲ, ਵਿਨਸ੍ਸ ਤ੍ਵਂ, ਸਮ੍ਮ ਜਮ੍ਮ ਵਸਲ, ਕੋ ਨੁ ਤਯਾ ਵਿਯਤ੍ਤੋ ਜਾਯਾਜਿਨੇਨਾ’ਤਿ. ਏਵਂ ਅਪਸਾਦਿਤੋ ਚ ਪਨ ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਤਤੋਯੇਵ ਪਟਿਨਿਵਤ੍ਤਿ.

‘‘ਅਥ ਖਲੁ, ਭੋ, ਪੁਣ੍ਣਮੁਖਸ੍ਸ ਫੁਸ੍ਸਕੋਕਿਲਸ੍ਸ ਅਪਰੇਨ ਸਮਯੇਨ ਨਚਿਰਸ੍ਸੇਵ ਖਰੋ ਆਬਾਧੋ ਉਪ੍ਪਜ੍ਜਿ, ਲੋਹਿਤਪਕ੍ਖਨ੍ਦਿਕਾ ਬਾਲ਼੍ਹਾ ਵੇਦਨਾ ਵਤ੍ਤਨ੍ਤਿ ਮਾਰਣਨ੍ਤਿਕਾ. ਅਥ ਖਲੁ, ਭੋ, ਪੁਣ੍ਣਮੁਖਸ੍ਸ ਫੁਸ੍ਸਕੋਕਿਲਸ੍ਸ ਪਰਿਚਾਰਿਕਾਨਂ ਦਿਜਕਞ੍ਞਾਨਂ ਏਤਦਹੋਸਿ – ‘ਆਬਾਧਿਕੋ ਖੋ ਅਯਂ ਪੁਣ੍ਣਮੁਖੋ ਫੁਸ੍ਸਕੋਕਿਲੋ, ਅਪ੍ਪੇਵ ਨਾਮ ਇਮਮ੍ਹਾ ਆਬਾਧਾ ਵੁਟ੍ਠਹੇਯ੍ਯਾ’ਤਿ ਏਕਂ ਅਦੁਤਿਯਂ ਓਹਾਯ ਯੇਨ ਕੁਣਾਲੋ ਸਕੁਣੋ ਤੇਨੁਪਸਙ੍ਕਮਿਂਸੁ. ਅਦ੍ਦਸਾ ਖੋ ਕੁਣਾਲੋ ਸਕੁਣੋ ਤਾ ਦਿਜਕਞ੍ਞਾਯੋ ਦੂਰਤੋਵ ਆਗਚ੍ਛਨ੍ਤਿਯੋ, ਦਿਸ੍ਵਾਨ ਤਾ ਦਿਜਕਞ੍ਞਾਯੋ ਏਤਦਵੋਚ – ‘ਕਹਂ ਪਨ ਤੁਮ੍ਹਂ ਵਸਲਿਯੋ ਭਤ੍ਤਾ’ਤਿ. ‘ਆਬਾਧਿਕੋ ਖੋ, ਸਮ੍ਮ ਕੁਣਾਲ, ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਅਪ੍ਪੇਵ ਨਾਮ ਤਮ੍ਹਾ ਆਬਾਧਾ ਵੁਟ੍ਠਹੇਯ੍ਯਾ’ਤਿ. ਏਵਂ ਵੁਤ੍ਤੇ ਕੁਣਾਲੋ ਸਕੁਣੋ ਤਾ ਦਿਜਕਞ੍ਞਾਯੋ ਏਵਂ ਅਪਸਾਦੇਸਿ – ‘ਨਸ੍ਸਥ ਤੁਮ੍ਹੇ ਵਸਲਿਯੋ, ਵਿਨਸ੍ਸਥ ਤੁਮ੍ਹੇ ਵਸਲਿਯੋ ਚੋਰਿਯੋ ਧੁਤ੍ਤਿਯੋ ਅਸਤਿਯੋ ਲਹੁਚਿਤ੍ਤਾਯੋ ਕਤਸ੍ਸ ਅਪ੍ਪਟਿਕਾਰਿਕਾਯੋ ਅਨਿਲੋ ਵਿਯ ਯੇਨਕਾਮਂਗਮਾਯੋ’ਤਿ ਵਤ੍ਵਾ ਯੇਨ ਪੁਣ੍ਣਮੁਖੋ ਫੁਸ੍ਸਕੋਕਿਲੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਏਤਦਵੋਚ – ‘ਹਂ, ਸਮ੍ਮ, ਪੁਣ੍ਣਮੁਖਾ’ਤਿ. ‘ਹਂ, ਸਮ੍ਮ, ਕੁਣਾਲਾ’ਤਿ.

‘‘ਅਥ ਖਲੁ, ਭੋ, ਕੁਣਾਲੋ ਸਕੁਣੋ ਤਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਪਕ੍ਖੇਹਿ ਚ ਮੁਖਤੁਣ੍ਡਕੇਨ ਚ ਪਰਿਗ੍ਗਹੇਤ੍ਵਾ ਵੁਟ੍ਠਾਪੇਤ੍ਵਾ ਨਾਨਾਭੇਸਜ੍ਜਾਨਿ ਪਾਯਾਪੇਸਿ. ਅਥ ਖਲੁ, ਭੋ, ਪੁਣ੍ਣਮੁਖਸ੍ਸ ਫੁਸ੍ਸਕੋਕਿਲਸ੍ਸ ਸੋ ਆਬਾਧੋ ਪਟਿਪ੍ਪਸ੍ਸਮ੍ਭੀ’’ਤਿ.

ਤਤ੍ਥ ਪਿਯਕਾਤਿ ਸੇਤਪੁਪ੍ਫਾ. ਹਸਨਾਤਿ ਹ-ਕਾਰੋ ਸਨ੍ਧਿਕਰੋ, ਅਸਨਾਯੇਵ. ਤਿਰੀਟੀਤਿ ਏਕਾ ਰੁਕ੍ਖਜਾਤਿ. ਚਨ੍ਦਨਾਤਿ ਰਤ੍ਤਸੁਰਭਿਚਨ੍ਦਨਾ. ਓਘਵਨੇਤਿ ਏਤੇਸਂ ਓਘੇਨ ਘਟਾਯ ਸਮਨ੍ਨਾਗਤਵਨੇ. ਦੇਵਦਾਰੁਕਚੋਚਗਹਨੇਤਿ ਦੇਵਦਾਰੁਰੁਕ੍ਖੇਹਿ ਚੇਵ ਕਦਲੀਹਿ ਚ ਗਹਨੇ. ਕਚ੍ਚਿਕਾਰਾਤਿ ਏਕਾ ਰੁਕ੍ਖਜਾਤਿ. ਕਣਿਕਾਰਾਤਿ ਮਹਾਪੁਪ੍ਫਾ. ਕਣ੍ਣਿਕਾਰਾਤਿ ਖੁਦ੍ਦਕਪੁਪ੍ਫਾ. ਕਿਂਸੁਕਾਤਿ ਵਾਤਘਾਤਕਾ. ਯੋਧਿਕਾਤਿ ਯੂਥਿਕਾ. ਵਨਮਲ੍ਲਿਕਮਨਙ੍ਗਣਮਨਵਜ੍ਜਭਣ੍ਡਿਸੁਰੁਚਿਰਭਗਿਨਿਮਾਲਾਮਲ੍ਯਧਰੇਤਿ ਮਲ੍ਲਿਕਾਨਞ੍ਚ ਅਨਙ੍ਗਣਾਨਂ ਅਨਵਜ੍ਜਾਨਞ੍ਚ ਭਣ੍ਡੀਨਂ ਸੁਰੁਚਿਰਾਨਞ੍ਚ ਭਗਿਨੀਨਂ ਪੁਪ੍ਫੇਹਿ ਮਾਲ੍ਯਧਾਰਯਮਾਨੇ. ਧਨੁਤਕ੍ਕਾਰੀਤਿ ਧਨੁਪਾਟਲਿ. ਤਾਲੀਸਾਤਿ ਤਾਲੀਸਪਤ੍ਤਰੁਕ੍ਖਾ. ਕਚ੍ਛਵਿਤਤੇਤਿ ਏਤੇਹਿ ਜਾਤਿਸੁਮਨਾਦੀਹਿ ਵਿਤਤੇ ਨਦਿਕਚ੍ਛਪਬ੍ਬਤਕਚ੍ਛੇ. ਸਂਕੁਸੁਮਿਤਲਤਾਤਿ ਤੇਸੁ ਤੇਸੁ ਠਾਨੇਸੁ ਸੁਟ੍ਠੁ ਕੁਸੁਮਿਤਅਤਿਮੁਤ੍ਤਕੇਹਿ ਚੇਵ ਨਾਨਾਵਿਧਲਤਾਹਿ ਚ ਵਿਤਤਪਟਿਮਣ੍ਡਿਤਪਦੇਸੇ. ਗਣਾਧਿਵੁਟ੍ਠੇਤਿ ਏਤੇਸਂ ਵਿਜ੍ਜਾਧਰਾਦੀਨਂ ਗਣੇਹਿ ਅਧਿਵੁਟ੍ਠੇ. ਪੁਣ੍ਣਮੁਖੋਤਿ ਮੁਖਪਰਿਪੁਣ੍ਣਤਾਯ ਪੁਣ੍ਣਮੁਖੋ. ਪਰੇਹਿ ਫੁਟ੍ਠਤਾਯ ਫੁਸ੍ਸਕੋਕਿਲੋ. ਵਿਲਾਸਿਤਨਯਨੋਤਿ ਵਿਲਾਸਿਤਨੇਤ੍ਤੋ. ਮਤ੍ਤਕ੍ਖੋਤਿ ਯਥਾ ਮਤ੍ਤਾਨਂ ਅਕ੍ਖੀਨਿ ਰਤ੍ਤਾਨਿ ਹੋਨ੍ਤਿ, ਏਵਂ ਰਤ੍ਤਕ੍ਖੋ, ਪਮਾਣਯੁਤ੍ਤਨੇਤ੍ਤੋ ਵਾ.

ਭਗਿਨਿਯੋਤਿ ਅਰਿਯਵੋਹਾਰੇਨ ਆਲਪਨਂ. ਪਰਿਚਰੇਯ੍ਯਾਥਾਤਿ ਸਕਲਦਿਵਸਂ ਗਹੇਤ੍ਵਾ ਵਿਚਰੇਯ੍ਯਾਥ. ਇਤਿ ਸੋ ਪਿਯਕਥਂ ਕਥੇਤ੍ਵਾ ਉਯ੍ਯੋਜੇਤਿ. ਕਦਾਚਿ ਪਨ ਕੁਣਾਲੋ ਸਪਰਿਵਾਰੋ ਪੁਣ੍ਣਮੁਖਂ ਦਸ੍ਸਨਾਯ ਗਚ੍ਛਤਿ, ਕਦਾਚਿ ਪੁਣ੍ਣਮੁਖੋ ਕੁਣਾਲਸ੍ਸ ਸਨ੍ਤਿਕਂ ਆਗਚ੍ਛਤਿ. ਤੇਨਾਹ ‘‘ਅਥ ਖਲੁ, ਭੋ’’ਤਿ. ਸਮ੍ਮਾਤਿ ਵਯਸ੍ਸ. ਆਗਮ੍ਮਾਤਿ ਪਟਿਚ੍ਚ ਉਪਨਿਸ੍ਸਾਯ. ਲਭੇਯ੍ਯਾਮਾਤਿ ਕੁਣਾਲਸ੍ਸ ਸਨ੍ਤਿਕਾ ਪਿਯਵਚਨਂ ਲਭੇਯ੍ਯਾਮ. ਅਪ੍ਪੇਵ ਨਾਮਾਤਿ ਅਪਿ ਨਾਮ ਲਭੇਯ੍ਯਾਥ, ਵਕ੍ਖਾਮਿ ਨਨ੍ਤਿ. ਸੁਜਾਤਾਨਨ੍ਤਿ ਸਮਜਾਤਿਕਾਨਂ.

ਨਸ੍ਸਾਤਿ ਪਲਾਯ. ਜਮ੍ਮਾਤਿ ਲਾਮਕ. ਵਿਯਤ੍ਤੋਤਿ ਕੋ ਨੁ ਤਯਾ ਸਦਿਸੋ ਅਞ੍ਞੋ ਬ੍ਯਤ੍ਤੋ ਨਾਮ ਅਤ੍ਥਿ. ਜਾਯਾਜਿਨੇਨਾਤਿ ਜਾਯਾਜਿਤੇਨ, ਅਯਮੇਵ ਵਾ ਪਾਠੋ. ਏਵਂ ਇਤ੍ਥਿਪਰਾਜਿਤੇਨ ਤਯਾ ਸਦਿਸੋ ਕੋ ਨਾਮ ਬ੍ਯਤ੍ਤੋ ਅਤ੍ਥੀਤਿ ਤਂ ਪੁਨ ਏਵਰੂਪਸ੍ਸ ਵਚਨਸ੍ਸ ਅਭਣਨਤ੍ਥਾਯ ਅਪਸਾਦੇਤਿ. ਤਤੋਯੇਵਾਤਿ ‘‘ਕੁਦ੍ਧੋ ਮੇ ਕੁਣਾਲੋ’’ਤਿ ਚਿਨ੍ਤੇਤ੍ਵਾ ਤਤੋਯੇਵ ਪਟਿਨਿਵਤ੍ਤਿ, ਸੋ ਨਿਵਤ੍ਤਿਤ੍ਵਾ ਸਪਰਿਵਾਰੋ ਅਤ੍ਤਨੋ ਨਿਵਾਸਟ੍ਠਾਨਮੇਵ ਅਗਮਾਸਿ.

ਅਪ੍ਪੇਵ ਨਾਮਾਤਿ ਸਂਸਯਪਰਿਵਿਤਕ੍ਕੋ, ਇਮਮ੍ਹਾ ਆਬਾਧਾ ਵੁਟ੍ਠਹੇਯ੍ਯ ਵਾ ਨੋ ਵਾਤਿ ਏਵਂ ਚਿਨ੍ਤੇਤ੍ਵਾ ਤਂ ਓਹਾਯ ਪਕ੍ਕਮਿਂਸੁ. ਤੁਮ੍ਹਨ੍ਤਿ ਤੁਮ੍ਹਾਕਂ. ਅਪ੍ਪੇਵ ਨਾਮਾਤਿ ਤਮ੍ਹਾ ਆਬਾਧਾ ਵੁਟ੍ਠਹੇਯ੍ਯ ਵਾ ਨੋ ਵਾ, ਅਮ੍ਹਾਕਂ ਆਗਤਕਾਲੇ ਮਤੋ ਭਵਿਸ੍ਸਤਿ. ਮਯਞ੍ਹਿ ਇਦਾਨੇਵ ਸੋ ਮਰਿਸ੍ਸਤੀਤਿ ਞਤ੍ਵਾ ਤੁਮ੍ਹਾਕਂ ਪਾਦਪਰਿਚਾਰਿਕਾ ਭਵਿਤੁਂ ਆਗਤਾ. ਤੇਨੁਪਸਙ੍ਕਮੀਤਿ ਇਮਾ ਇਤ੍ਥਿਯੋ ਸਾਮਿਕਸ੍ਸ ਮਤਕਾਲੇ ਆਗਤਾ ਪਟਿਕ੍ਕੂਲਾ ਭਵਿਸ੍ਸਾਮਾਤਿ ਤਂ ਪਹਾਯ ਆਗਤਾ, ਅਹਂ ਗਨ੍ਤ੍ਵਾ ਮਮ ਸਹਾਯਕਂ ਪੁਪ੍ਫਫਲਾਦੀਨਿ ਨਾਨਾਭੇਸਜ੍ਜਾਨਿ ਸਂਹਰਿਤ੍ਵਾ ਅਰੋਗਂ ਕਰਿਸ੍ਸਾਮੀਤਿ ਚਿਨ੍ਤੇਤ੍ਵਾ ਨਾਗਬਲੋ ਮਹਾਸਤ੍ਤੋ ਆਕਾਸੇ ਉਪ੍ਪਤਿਤ੍ਵਾ ਯੇਨ ਸੋ ਤੇਨੁਪਸਙ੍ਕਮਿ. ਹਨ੍ਤਿ ਨਿਪਾਤੋ, ‘‘ਜੀਵਸਿ, ਸਮ੍ਮਾ’’ਤਿ ਪੁਚ੍ਛਨ੍ਤੋ ਏਵਮਾਹ. ਇਤਰੋਪਿਸ੍ਸ ‘‘ਜੀਵਾਮੀ’’ਤਿ ਵਦਨ੍ਤੋ ‘‘ਹਂ ਸਮ੍ਮਾ’’ਤਿ ਆਹ. ਪਾਯਾਪੇਸੀਤਿ ਪਾਯੇਸਿ. ਪਟਿਪ੍ਪਸ੍ਸਮ੍ਭੀਤਿ ਵੂਪਸਮੀਤਿ.

ਤਾਪਿ ਦਿਜਕਞ੍ਞਾਯੋ ਅਸ੍ਮਿਂ ਅਰੋਗੇ ਜਾਤੇ ਆਗਤਾ. ਕੁਣਾਲੋਪਿ ਪੁਣ੍ਣਮੁਖਂ ਕਤਿਪਾਹਂ ਫਲਾਫਲਾਨਿ ਖਾਦਾਪੇਤ੍ਵਾ ਤਸ੍ਸ ਬਲਪ੍ਪਤ੍ਤਕਾਲੇ, ‘‘ਸਮ੍ਮ, ਇਦਾਨਿ ਤ੍ਵਂ ਅਰੋਗੋ, ਅਤ੍ਤਨੋ ਪਰਿਚਾਰਿਕਾਹਿ ਸਦ੍ਧਿਂ ਵਸ, ਅਹਮ੍ਪਿ ਅਤ੍ਤਨੋ ਵਸਨਟ੍ਠਾਨਂ ਗਮਿਸ੍ਸਾਮੀ’’ਤਿ ਆਹ. ਅਥ ਨਂ ਸੋ ‘‘ਇਮਾ, ਸਮ੍ਮ, ਮਂ ਬਾਲ਼੍ਹਗਿਲਾਨਂ ਪਹਾਯ ਪਲਾਯਨ੍ਤਿ, ਨ ਮੇ ਏਤਾਹਿ ਧੁਤ੍ਤੀਹਿ ਅਤ੍ਥੋ’’ਤਿ ਆਹ. ਤਂ ਸੁਤ੍ਵਾ ਮਹਾਸਤ੍ਤੋ ‘‘ਤੇਨ ਹਿ ਤੇ, ਸਮ੍ਮ, ਇਤ੍ਥੀਨਂ ਪਾਪਭਾਵਂ ਆਚਿਕ੍ਖਿਸ੍ਸਾਮੀ’’ਤਿ ਪੁਣ੍ਣਮੁਖਂ ਗਹੇਤ੍ਵਾ ਹਿਮਵਨ੍ਤਪਸ੍ਸੇ ਮਨੋਸਿਲਾਤਲਂ ਨੇਤ੍ਵਾ ਸਤ੍ਤਯੋਜਨਿਕਸਾਲਰੁਕ੍ਖਮੂਲੇ ਮਨੋਸਿਲਾਸਨੇ ਨਿਸੀਦਿ. ਏਕਸ੍ਮਿਂ ਪਸ੍ਸੇ ਪੁਣ੍ਣਮੁਖੋ ਸਪਰਿਵਾਰੋ ਨਿਸੀਦਿ. ਸਕਲਹਿਮਵਨ੍ਤੇ ਦੇਵਘੋਸਨਾ ਚਰਿ – ‘‘ਅਜ੍ਜ ਕੁਣਾਲੋ ਸਕੁਣਰਾਜਾ ਹਿਮਵਨ੍ਤੇ ਮਨੋਸਿਲਾਸਨੇ ਨਿਸੀਦਿਤ੍ਵਾ ਬੁਦ੍ਧਲੀਲਾਯ ਧਮ੍ਮਂ ਦੇਸੇਸ੍ਸਤਿ, ਤਂ ਸੁਣਾਥਾ’’ਤਿ. ਪਰਮ੍ਪਰਘੋਸੇਨ ਛ ਕਾਮਾਵਚਰਦੇਵਾ ਸੁਤ੍ਵਾ ਯੇਭੁਯ੍ਯੇਨ ਤਤ੍ਥ ਸਨ੍ਨਿਪਤਿਂਸੁ. ਬਹੁਨਾਗਸੁਪਣ੍ਣਕਿਨ੍ਨਰਵਿਜ੍ਜਾਧਰਾਦੀਨਮ੍ਪਿ ਦੇਵਤਾ ਤਮਤ੍ਥਂ ਉਗ੍ਘੋਸੇਸੁਂ. ਤਦਾ ਆਨਨ੍ਦੋ ਨਾਮ ਗਿਜ੍ਝਰਾਜਾ ਦਸਸਹਸ੍ਸਗਿਜ੍ਝਪਰਿਵਾਰੋ ਗਿਜ੍ਝਪਬ੍ਬਤੇ ਪਟਿਵਸਤਿ. ਸੋਪਿ ਤਂ ਕੋਲਾਹਲਂ ਸੁਤ੍ਵਾ ‘‘ਧਮ੍ਮਂ ਸੁਣਿਸ੍ਸਾਮੀ’’ਤਿ ਸਪਰਿਵਾਰੋ ਆਗਨ੍ਤ੍ਵਾ ਏਕਮਨ੍ਤਂ ਨਿਸੀਦਿ. ਨਾਰਦੋਪਿ ਪਞ੍ਚਾਭਿਞ੍ਞੋ ਤਾਪਸੋ ਦਸਸਹਸ੍ਸਤਾਪਸਪਰਿਵੁਤੋ ਹਿਮਵਨ੍ਤਪਦੇਸੇ ਵਿਹਰਨ੍ਤੋ ਤਂ ਦੇਵਘੋਸਨਂ ਸੁਤ੍ਵਾ ‘‘ਸਹਾਯੋ ਕਿਰ ਮੇ ਕੁਣਾਲੋ ਇਤ੍ਥੀਨਂ ਅਗੁਣਂ ਕਥੇਸ੍ਸਤਿ, ਮਹਾਸਮਾਗਮੋ ਭਵਿਸ੍ਸਤਿ, ਮਯਾਪਿ ਤਂ ਦੇਸਨਂ ਸੋਤੁਂ ਵਟ੍ਟਤੀ’’ਤਿ ਤਾਪਸਦਸਸਹਸ੍ਸੇਨ ਸਦ੍ਧਿਂ ਇਦ੍ਧਿਯਾ ਤਤ੍ਥ ਗਨ੍ਤ੍ਵਾ ਏਕਮਨ੍ਤਂ ਨਿਸੀਦਿ. ਬੁਦ੍ਧਾਨਂ ਦੇਸਨਾਸਨ੍ਨਿਪਾਤਸਦਿਸੋ ਮਹਾਸਮਾਗਮੋ ਅਹੋਸਿ. ਅਥ ਮਹਾਸਤ੍ਤੋ ਜਾਤਿਸ੍ਸਰਞਾਣੇਨ ਇਤ੍ਥਿਦੋਸਪਟਿਸਂਯੁਤ੍ਤਂ ਅਤੀਤਭਵੇ ਦਿਟ੍ਠਕਾਰਣਂ ਪੁਣ੍ਣਮੁਖਂ ਕਾਯਸਕ੍ਖਿਂ ਕਤ੍ਵਾ ਕਥੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

‘‘ਅਥ ਖਲੁ, ਭੋ, ਕੁਣਾਲੋ ਸਕੁਣੋ ਤਂ ਪੁਣ੍ਣਮੁਖਂ ਫੁਸ੍ਸਕੋਕਿਲਂ ਗਿਲਾਨਵੁਟ੍ਠਿਤਂ ਅਚਿਰਵੁਟ੍ਠਿਤਂ ਗੇਲਞ੍ਞਾ ਏਤਦਵੋਚ –

‘‘‘ਦਿਟ੍ਠਾ ਮਯਾ, ਸਮ੍ਮ ਪੁਣ੍ਣਮੁਖ, ਕਣ੍ਹਾ ਦ੍ਵੇਪਿਤਿਕਾ ਪਞ੍ਚਪਤਿਕਾਯ ਛਟ੍ਠੇ ਪੁਰਿਸੇ ਚਿਤ੍ਤਂ ਪਟਿਬਨ੍ਧਨ੍ਤਿਯਾ, ਯਦਿਦਂ ਕਬਨ੍ਧੇ ਪੀਠਸਪ੍ਪਿਮ੍ਹੀ’’’ਤਿ. ਭਵਤਿ ਚ ਪਨੁਤ੍ਤਰੇਤ੍ਥ ਵਾਕ੍ਯਂ –

੨੯੦.

‘‘ਅਥਜ੍ਜੁਨੋ ਨਕੁਲੋ ਭੀਮਸੇਨੋ, ਯੁਧਿਟ੍ਠਿਲੋ ਸਹਦੇਵੋ ਚ ਰਾਜਾ;

ਏਤੇ ਪਤੀ ਪਞ੍ਚ ਮਤਿਚ੍ਚ ਨਾਰੀ, ਅਕਾਸਿ ਖੁਜ੍ਜਵਾਮਨਕੇਨ ਪਾਪ’ਨ੍ਤਿ.

‘‘ਦਿਟ੍ਠਾ ਮਯਾ, ਸਮ੍ਮ ਪੁਣ੍ਣਮੁਖ, ਸਚ੍ਚਤਪਾਪੀ ਨਾਮ ਸਮਣੀ ਸੁਸਾਨਮਜ੍ਝੇ ਵਸਨ੍ਤੀ ਚਤੁਤ੍ਥਭਤ੍ਤਂ ਪਰਿਣਾਮਯਮਾਨਾ ਸੁਰਾਧੁਤ੍ਤਕੇਨ ਪਾਪਮਕਾਸਿ.

‘‘ਦਿਟ੍ਠਾ ਮਯਾ, ਸਮ੍ਮ ਪੁਣ੍ਣਮੁਖ, ਕਾਕਵਤੀ ਨਾਮ ਦੇਵੀ ਸਮੁਦ੍ਦਮਜ੍ਝੇ ਵਸਨ੍ਤੀ ਭਰਿਯਾ ਵੇਨਤੇਯ੍ਯਸ੍ਸ ਨਟਕੁਵੇਰੇਨ ਪਾਪਮਕਾਸਿ.

‘‘ਦਿਟ੍ਠਾ ਮਯਾ, ਸਮ੍ਮ ਪੁਣ੍ਣਮੁਖ, ਕੁਰੁਙ੍ਗਦੇਵੀ ਨਾਮ ਲੋਮਸੁਦ੍ਦਰੀ ਏਲ਼ਿਕਕੁਮਾਰਂ ਕਾਮਯਮਾਨਾ ਛਲ਼ਙ੍ਗਕੁਮਾਰਧਨਨ੍ਤੇਵਾਸਿਨਾ ਪਾਪਮਕਾਸਿ.

‘‘ਏਵਞ੍ਹੇਤਂ ਮਯਾ ਞਾਤਂ, ਬ੍ਰਹ੍ਮਦਤ੍ਤਸ੍ਸ ਮਾਤਰਂ;

ਓਹਾਯ ਕੋਸਲਰਾਜਂ, ਪਞ੍ਚਾਲਚਣ੍ਡੇਨ ਪਾਪਮਕਾਸਿ.

੨੯੧.

‘‘ਏਤਾ ਚ ਅਞ੍ਞਾ ਚ ਅਕਂਸੁ ਪਾਪਂ, ਤਸ੍ਮਾਹਮਿਤ੍ਥੀਨਂ ਨ ਵਿਸ੍ਸਸੇ ਨਪ੍ਪਸਂਸੇ;

ਮਹੀ ਯਥਾ ਜਗਤਿ ਸਮਾਨਰਤ੍ਤਾ, ਵਸੁਨ੍ਧਰਾ ਇਤਰੀਤਰਾਪਤਿਟ੍ਠਾ;

ਸਬ੍ਬਸਹਾ ਅਫਨ੍ਦਨਾ ਅਕੁਪ੍ਪਾ, ਤਥਿਤ੍ਥਿਯੋ ਤਾਯੋ ਨ ਵਿਸ੍ਸਸੇ ਨਰੋ.

੨੯੨.

‘‘ਸੀਹੋ ਯਥਾ ਲੋਹਿਤਮਂਸਭੋਜਨੋ, ਵਾਲ਼ਮਿਗੋ ਪਞ੍ਚਾਵੁਧੋ ਸੁਰੁਦ੍ਧੋ;

ਪਸਯ੍ਹਖਾਦੀ ਪਰਹਿਂਸਨੇ ਰਤੋ, ਤਥਿਤ੍ਥਿਯੋ ਤਾਯੋ ਨ ਵਿਸ੍ਸਸੇ ਨਰੋ.

‘‘ਨ ਖਲੁ, ਸਮ੍ਮ ਪੁਣ੍ਣਮੁਖ, ਵੇਸਿਯੋ ਨਾਰਿਯੋ ਗਮਨਿਯੋ, ਨ ਹੇਤਾ ਬਨ੍ਧਕਿਯੋ ਨਾਮ, ਵਧਿਕਾਯੋ ਨਾਮ ਏਤਾਯੋ, ਯਦਿਦਂ ਵੇਸਿਯੋ ਨਾਰਿਯੋ ਗਮਨਿਯੋ’’ਤਿ.

‘‘ਚੋਰੋ ਵਿਯ ਵੇਣਿਕਤਾ ਮਦਿਰਾਵ ਦਿਦ੍ਧਾ ਵਾਣਿਜੋ ਵਿਯ ਵਾਚਾਸਨ੍ਥੁਤਿਯੋ ਇਸ੍ਸਸਿਙ੍ਗਮਿਵ ਵਿਪਰਿਵਤ੍ਤਾਯੋ ਉਰਗਮਿਵ ਦੁਜਿਵ੍ਹਾਯੋ. ਸੋਬ੍ਭਮਿਵ ਪਟਿਚ੍ਛਨ੍ਨਾ ਪਾਤਾਲਮਿਵ ਦੁਪ੍ਪੂਰਾ ਰਕ੍ਖਸੀ ਵਿਯ ਦੁਤ੍ਤੋਸਾ ਯਮੋਵੇਕਨ੍ਤਹਾਰਿਯੋ. ਸਿਖੀਰਿਵ ਸਬ੍ਬਭਕ੍ਖਾ ਨਦੀਰਿਵ ਸਬ੍ਬਵਾਹੀ ਅਨਿਲੋ ਵਿਯ ਯੇਨਕਾਮਂਚਰਾ ਨੇਰੁ ਵਿਯ ਅਵਿਸੇਸਕਰਾ ਵਿਸਰੁਕ੍ਖੋ ਵਿਯ ਨਿਚ੍ਚਫਲਿਤਾਯੋਤਿ. ਭਵਤਿ ਚ ਪਨੁਤ੍ਤਰੇਤ੍ਥ ਵਾਕ੍ਯਂ –

੨੯੩.

‘‘‘ਯਥਾ ਚੋਰੋ ਯਥਾ ਦਿਦ੍ਧੋ, ਵਾਣਿਜੋਵ ਵਿਕਤ੍ਥਨੀ;

ਇਸ੍ਸਸਿਙ੍ਗਮਿਵ ਪਰਿਵਤ੍ਤਾ, ਦੁਜਿਵ੍ਹਾ ਉਰਗੋ ਵਿਯ.

੨੯੪.

‘‘‘ਸੋਬ੍ਭਮਿਵ ਪਟਿਚ੍ਛਨ੍ਨਾ, ਪਾਤਾਲਮਿਵ ਦੁਪ੍ਪੁਰਾ;

ਰਕ੍ਖਸੀ ਵਿਯ ਦੁਤ੍ਤੋਸਾ, ਯਮੋਵੇਕਨ੍ਤਹਾਰਿਯੋ.

੨੯੫.

‘‘ਯਥਾ ਸਿਖੀ ਨਦੀ ਵਾਤੋ, ਨੇਰੁਨਾਵ ਸਮਾਗਤਾ;

ਵਿਸਰੁਕ੍ਖੋ ਵਿਯ ਨਿਚ੍ਚਫਲਾ, ਨਾਸਯਨ੍ਤਿ ਘਰੇ ਭੋਗਂ;

ਰਤਨਨ੍ਤਕਰਿਤ੍ਥਿਯੋ’’’ਤਿ.

ਤਤ੍ਥ ਗਿਲਾਨਵੁਟ੍ਠਿਤਨ੍ਤਿ ਪਠਮਂ ਗਿਲਾਨਂ ਪਚ੍ਛਾ ਵੁਟ੍ਠਿਤਂ. ਦਿਟ੍ਠਾ ਮਯਾਤਿ ਅਤੀਤੇ ਕਿਰ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਸਮ੍ਪਨ੍ਨਬਲਵਾਹਨਤਾਯ ਕੋਸਲਰਜ੍ਜਂ ਗਹੇਤ੍ਵਾ ਕੋਸਲਰਾਜਾਨਂ ਮਾਰੇਤ੍ਵਾ ਤਸ੍ਸ ਅਗ੍ਗਮਹੇਸਿਂ ਸਗਬ੍ਭਂ ਗਹੇਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਤਂ ਅਤ੍ਤਨੋ ਅਗ੍ਗਮਹੇਸਿਂ ਅਕਾਸਿ. ਸਾ ਅਪਰਭਾਗੇ ਧੀਤਰਂ ਵਿਜਾਯਿ. ਰਞ੍ਞੋ ਪਨ ਪਕਤਿਯਾ ਧੀਤਾ ਵਾ ਪੁਤ੍ਤੋ ਵਾ ਨਤ੍ਥਿ, ਸੋ ਤੁਸ੍ਸਿਤ੍ਵਾ, ‘‘ਭਦ੍ਦੇ, ਵਰਂ ਗਣ੍ਹਾਹੀ’’ਤਿ ਆਹ. ਸਾ ਗਹਿਤਕਂ ਕਤ੍ਵਾ ਠਪੇਸਿ. ਤਸ੍ਸਾ ਪਨ ਕੁਮਾਰਿਕਾਯ ‘‘ਕਣ੍ਹਾ’’ਤਿ ਨਾਮਂ ਕਰਿਂਸੁ. ਅਥਸ੍ਸਾ ਵਯਪ੍ਪਤ੍ਤਾਯ ਮਾਤਾ ਤਂ ਆਹ – ‘‘ਅਮ੍ਮ, ਪਿਤਰਾ ਤਵ ਵਰੋ ਦਿਨ੍ਨੋ, ਤਮਹਂ ਗਹੇਤ੍ਵਾ ਠਪੇਸਿਂ, ਤਵ ਰੁਚ੍ਚਨਕਂ ਵਰਂ ਗਣ੍ਹਾ’’ਤਿ. ਸਾ ‘‘ਅਮ੍ਮ, ਮਯ੍ਹਂ ਅਞ੍ਞਂ ਅਵਿਜ੍ਜਮਾਨਂ ਨਤ੍ਥਿ, ਪਤਿਗ੍ਗਹਣਤ੍ਥਾਯ ਮੇ ਸਯਂ ਵਰਂ ਕਾਰੇਹੀ’’ਤਿ ਕਿਲੇਸਬਹੁਲਤਾਯ ਹਿਰੋਤ੍ਤਪ੍ਪਂ ਭਿਨ੍ਦਿਤ੍ਵਾ ਮਾਤਰਂ ਆਹ. ਸਾ ਰਞ੍ਞੋ ਆਰੋਚੇਸਿ. ਰਾਜਾ ‘‘ਯਥਾਰੁਚਿਤਂ ਪਤਿਂ ਗਣ੍ਹਤੂ’’ਤਿ ਵਤ੍ਵਾ ਸਯਂ ਵਰਂ ਘੋਸਾਪੇਸਿ. ਰਾਜਙ੍ਗਣੇ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਬਹੂ ਪੁਰਿਸਾ ਸਨ੍ਨਿਪਤਿਂਸੁ. ਕਣ੍ਹਾ ਪੁਪ੍ਫਸਮੁਗ੍ਗਂ ਆਦਾਯ ਉਤ੍ਤਰਸੀਹਪਞ੍ਜਰੇ ਠਿਤਾ ਓਲੋਕੇਨ੍ਤੀ ਏਕਮ੍ਪਿ ਨ ਰੋਚੇਸਿ.

ਤਦਾ ਪਣ੍ਡੁਰਾਜਗੋਤ੍ਤਤੋ ਅਜ੍ਜੁਨੋ ਨਕੁਲੋ ਭੀਮਸੇਨੋ ਯੁਧਿਟ੍ਠਿਲੋ ਸਹਦੇਵੋਤਿ ਇਮੇ ਪਞ੍ਚ ਪਣ੍ਡੁਰਾਜਪੁਤ੍ਤਾ ਤਕ੍ਕਸਿਲਾਯਂ ਦਿਸਾਪਾਮੋਕ੍ਖਸ੍ਸ ਆਚਰਿਯਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਹੇਤ੍ਵਾ ‘‘ਦੇਸਚਾਰਿਤ੍ਤਂ ਜਾਨਿਸ੍ਸਾਮਾ’’ਤਿ ਵਿਚਰਨ੍ਤਾ ਬਾਰਾਣਸਿਂ ਪਤ੍ਵਾ ਅਨ੍ਤੋਨਗਰੇ ਕੋਲਾਹਲਂ ਸੁਤ੍ਵਾ ਪੁਚ੍ਛਿਤ੍ਵਾ ਤਮਤ੍ਥਂ ਞਤ੍ਵਾ ‘‘ਮਯਮ੍ਪਿ ਗਮਿਸ੍ਸਾਮਾ’’ਤਿ ਕਞ੍ਚਨਰੂਪਸਮਾਨਰੂਪਾ ਤਤ੍ਥ ਗਨ੍ਤ੍ਵਾ ਪਟਿਪਾਟਿਯਾ ਅਟ੍ਠਂਸੁ. ਕਣ੍ਹਾ ਤੇ ਦਿਸ੍ਵਾ ਪਞ੍ਚਸੁਪਿ ਤੇਸੁ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ਪਞ੍ਚਨ੍ਨਮ੍ਪਿ ਸੀਸੇਸੁ ਮਾਲਾਚੁਮ੍ਬਟਕਾਨਿ ਖਿਪਿਤ੍ਵਾ, ‘‘ਅਮ੍ਮ, ਇਮੇ ਪਞ੍ਚ ਜਨੇ ਵਰੇਮੀ’’ਤਿ ਆਹ. ਸਾਪਿ ਰਞ੍ਞੋ ਆਰੋਚੇਸਿ. ਰਾਜਾ ਵਰਸ੍ਸ ਦਿਨ੍ਨਤ੍ਤਾ ‘‘ਨ ਲਭਿਸ੍ਸਤੀ’’ਤਿ ਅਵਤ੍ਵਾ ਅਨਤ੍ਤਮਨੋਵ ‘‘ਕਿਂਜਾਤਿਕਾ ਕਸ੍ਸ ਪੁਤ੍ਤਾ’’ਤਿ ਪੁਚ੍ਛਿਤ੍ਵਾ ਪਣ੍ਡੁਰਾਜਪੁਤ੍ਤਭਾਵਂ ਞਤ੍ਵਾ ਤੇਸਂ ਸਕ੍ਕਾਰਂ ਕਤ੍ਵਾ ਤਂ ਪਾਦਪਰਿਚਾਰਿਕਂ ਅਦਾਸਿ.

ਸਾ ਸਤ੍ਤਭੂਮਿਕਪਾਸਾਦੇ ਤੇ ਕਿਲੇਸਵਸੇਨ ਸਙ੍ਗਣ੍ਹਿ. ਏਕੋ ਪਨਸ੍ਸਾ ਪਰਿਚਾਰਕੋ ਖੁਜ੍ਜੋ ਪੀਠਸਪ੍ਪੀ ਅਤ੍ਥਿ. ਸਾ ਪਞ੍ਚ ਰਾਜਪੁਤ੍ਤੇ ਕਿਲੇਸਵਸੇਨ ਸਙ੍ਗਣ੍ਹਿਤ੍ਵਾ ਤੇਸਂ ਬਹਿ ਨਿਕ੍ਖਨ੍ਤਕਾਲੇ ਓਕਾਸਂ ਲਭਿਤ੍ਵਾ ਕਿਲੇਸੇਨ ਅਨੁਡਯ੍ਹਮਾਨਾ ਖੁਜ੍ਜੇਨ ਸਦ੍ਧਿਂ ਪਾਪਂ ਕਰੋਤਿ, ਤੇਨ ਚ ਸਦ੍ਧਿਂ ਕਥੇਨ੍ਤੀ – ‘‘ਮਯ੍ਹਂ ਤਯਾ ਸਦਿਸੋ ਪਿਯੋ ਨਤ੍ਥਿ, ਰਾਜਪੁਤ੍ਤੇ ਮਾਰਾਪੇਤ੍ਵਾ ਤੇਸਂ ਗਲਲੋਹਿਤੇਨ ਤਵ ਪਾਦੇ ਮਕ੍ਖਾਪੇਸ੍ਸਾਮੀ’’ਤਿ ਵਦਤਿ. ਇਤਰੇਸੁਪਿ ਜੇਟ੍ਠਭਾਤਿਕੇਨ ਮਿਸ੍ਸੀਭੂਤਕਾਲੇ – ‘‘ਇਮੇਹਿ ਚਤੂਹਿ ਤ੍ਵਮੇਵ ਮਯ੍ਹਂ ਪਿਯਤਰੋ, ਮਯਾ ਜੀਵਿਤਮ੍ਪਿ ਤਵਤ੍ਥਾਯ ਪਰਿਚ੍ਚਤ੍ਤਂ, ਮਮ ਪਿਤੁ ਅਚ੍ਚਯੇਨ ਤੁਯ੍ਹਞ੍ਞੇਵ ਰਜ੍ਜਂ ਦਾਪੇਸ੍ਸਾਮੀ’’ਤਿ ਵਦਤਿ. ਇਤਰੇਹਿ ਸਦ੍ਧਿਂ ਮਿਸ੍ਸੀਭੂਤਕਾਲੇਪਿ ਏਸੇਵ ਨਯੋ. ਤੇ ‘‘ਅਯਂ ਅਮ੍ਹੇ ਪਿਯਾਯਤਿ, ਇਸ੍ਸਰਿਯਞ੍ਚ ਨੋ ਏਤਂ ਨਿਸ੍ਸਾਯ ਜਾਤ’’ਨ੍ਤਿ ਤਸ੍ਸਾ ਅਤਿਵਿਯ ਤੁਸ੍ਸਨ੍ਤਿ.

ਸਾ ਏਕਦਿਵਸਂ ਆਬਾਧਿਕਾ ਅਹੋਸਿ. ਅਥ ਨਂ ਤੇ ਪਰਿਵਾਰੇਤ੍ਵਾ ਏਕੋ ਸੀਸਂ ਸਮ੍ਬਾਹਨ੍ਤੋ ਨਿਸੀਦਿ, ਸੇਸਾ ਏਕੇਕਂ ਹਤ੍ਥਞ੍ਚ ਪਾਦਞ੍ਚ. ਖੁਜ੍ਜੋ ਪਨ ਪਾਦਮੂਲੇ ਨਿਸੀਦਿ. ਸਾ ਸੀਸਂ ਸਮ੍ਬਾਹਮਾਨਸ੍ਸ ਜੇਟ੍ਠਭਾਤਿਕਸ੍ਸ ਅਜ੍ਜੁਨਕੁਮਾਰਸ੍ਸ – ‘‘ਮਯ੍ਹਂ ਤਯਾ ਪਿਯਤਰੋ ਨਤ੍ਥਿ, ਜੀਵਮਾਨਾ ਤੁਯ੍ਹਂ ਜੀਵਿਸ੍ਸਾਮਿ, ਪਿਤੁ ਅਚ੍ਚਯੇਨ ਤੁਯ੍ਹਂ ਰਜ੍ਜਂ ਦਾਪੇਸ੍ਸਾਮੀ’’ਤਿ ਸੀਸੇਨ ਸਞ੍ਞਂ ਦਦਮਾਨਾ ਤਂ ਸਙ੍ਗਣ੍ਹਿ, ਇਤਰੇਸਮ੍ਪਿ ਹਤ੍ਥਪਾਦੇਹਿ ਤਥੇਵ ਸਞ੍ਞਂ ਅਦਾਸਿ. ਖੁਜ੍ਜਸ੍ਸ ਪਨ – ‘‘ਤ੍ਵਞ੍ਞੇਵ ਮਮ ਪਿਯੋ, ਤਵਤ੍ਥਾਯ ਅਹਂ ਜੀਵਿਸ੍ਸਾਮੀ’’ਤਿ ਜਿਵ੍ਹਾਯ ਸਞ੍ਞਂ ਅਦਾਸਿ. ਤੇ ਸਬ੍ਬੇਪਿ ਪੁਬ੍ਬੇ ਕਥਿਤਭਾਵੇਨ ਤਾਯ ਸਞ੍ਞਾਯ ਤਮਤ੍ਥਂ ਜਾਨਿਂਸੁ. ਤੇਸੁ ਸੇਸਾ ਅਤ੍ਤਨੋ ਦਿਨ੍ਨਸਞ੍ਞਾਯੇਵ ਜਾਨਿਂਸੁ. ਅਜ੍ਜੁਨਕੁਮਾਰੋ ਪਨ ਤਸ੍ਸਾ ਹਤ੍ਥਪਾਦਜਿਵ੍ਹਾਵਿਕਾਰੇ ਦਿਸ੍ਵਾ – ‘‘ਯਥਾ ਮਯ੍ਹਂ, ਏਵਂ ਸੇਸਾਨਮ੍ਪਿ ਇਮਾਯ ਸਞ੍ਞਾ ਦਿਨ੍ਨਾ ਭਵਿਸ੍ਸਤਿ, ਖੁਜ੍ਜੇਨ ਚਾਪਿ ਸਦ੍ਧਿਂ ਏਤਿਸ੍ਸਾਯ ਸਨ੍ਥਵੇਨ ਭਵਿਤਬ੍ਬ’’ਨ੍ਤਿ ਚਿਨ੍ਤੇਤ੍ਵਾ ਭਾਤਰੋ ਗਹੇਤ੍ਵਾ ਬਹਿ ਨਿਕ੍ਖਮਿਤ੍ਵਾ ਪੁਚ੍ਛਿ – ‘‘ਦਿਟ੍ਠਾ ਵੋ ਪਞ੍ਚਪਤਿਕਾ ਮਮ ਸੀਸਵਿਕਾਰਂ ਦਸ੍ਸੇਨ੍ਤੀ’’ਤਿ? ‘‘ਆਮ, ਦਿਟ੍ਠਾ’’ਤਿ. ‘‘ਕਿਂਕਾਰਣਂ ਜਾਨਾਥਾ’’ਤਿ? ‘‘ਨ ਜਾਨਾਮਾ’’ਤਿ. ‘‘ਇਦਂ ਨਾਮੇਤ੍ਥ ਕਾਰਣਂ, ਤੁਮ੍ਹਾਕਂ ਪਨ ਹਤ੍ਥਪਾਦੇਹਿ ਦਿਨ੍ਨਸਞ੍ਞਾਯ ਕਾਰਣਂ ਜਾਨਾਥਾ’’ਤਿ? ‘‘ਆਮ, ਜਾਨਾਮਾ’’ਤਿ. ‘‘ਅਮ੍ਹਾਕਮ੍ਪਿ ਤੇਨੇਵ ਕਾਰਣੇਨ ਅਦਾਸਿ, ਖੁਜ੍ਜਸ੍ਸ ਜਿਵ੍ਹਾਵਿਕਾਰੇਨ ਸਞ੍ਞਾਦਾਨਸ੍ਸ ਕਾਰਣਂ ਜਾਨਾਥਾ’’ਤਿ? ‘‘ਨ ਜਾਨਾਮਾ’’ਤਿ. ਅਥ ਨੇਸਂ ਆਚਿਕ੍ਖਿਤ੍ਵਾ ‘‘ਇਮਿਨਾਪਿ ਸਦ੍ਧਿਂ ਏਤਾਯ ਪਾਪਕਮ੍ਮਂ ਕਤ’’ਨ੍ਤਿ ਵਤ੍ਵਾ ਤੇਸੁ ਅਸਦ੍ਦਹਨ੍ਤੇਸੁ ਖੁਜ੍ਜਂ ਪਕ੍ਕੋਸਿਤ੍ਵਾ ਪੁਚ੍ਛਿ. ਸੋ ਸਬ੍ਬਂ ਪਵਤ੍ਤਿਂ ਕਥੇਸਿ.

ਤੇ ਤਸ੍ਸ ਵਚਨਂ ਸੁਤ੍ਵਾ ਤਸ੍ਸਾ ਵਿਗਤਚ੍ਛਨ੍ਦਰਾਗਾ ਹੁਤ੍ਵਾ – ‘‘ਅਹੋ ਮਾਤੁਗਾਮੋ ਨਾਮ ਪਾਪੋ ਦੁਸ੍ਸੀਲੋ, ਮਾਦਿਸੇ ਨਾਮ ਜਾਤਿਸਮ੍ਪਨ੍ਨੇ ਸੋਭਗ੍ਗਪ੍ਪਤ੍ਤੇ ਪਹਾਯ ਏਵਰੂਪੇਨ ਜੇਗੁਚ੍ਛਪਟਿਕੂਲੇਨ ਖੁਜ੍ਜੇਨ ਸਦ੍ਧਿਂ ਪਾਪਕਮ੍ਮਂ ਕਰੋਤਿ, ਕੋ ਨਾਮ ਪਣ੍ਡਿਤਜਾਤਿਕੋ ਏਵਂ ਨਿਲ੍ਲਜ੍ਜਾਹਿ ਪਾਪਧਮ੍ਮਾਹਿ ਇਤ੍ਥੀਹਿ ਸਦ੍ਧਿਂ ਰਮਿਸ੍ਸਤੀ’’ਤਿ ਅਨੇਕਪਰਿਯਾਯੇਨ ਮਾਤੁਗਾਮਂ ਗਰਹਿਤ੍ਵਾ ‘‘ਅਲਂ ਨੋ ਘਰਾਵਾਸੇਨਾ’’ਤਿ ਪਞ੍ਚ ਜਨਾ ਹਿਮਵਨ੍ਤਂ ਪਵਿਸਿਤ੍ਵਾ ਪਬ੍ਬਜਿਤ੍ਵਾ ਕਸਿਣਪਰਿਕਮ੍ਮਂ ਕਤ੍ਵਾ ਆਯੁਪਰਿਯੋਸਾਨੇ ਯਥਾਕਮ੍ਮਂ ਗਤਾ. ਕੁਣਾਲੋ ਪਨ ਸਕੁਣਰਾਜਾ ਤਦਾ ਅਜ੍ਜੁਨਕੁਮਾਰੋ ਅਹੋਸਿ. ਤਸ੍ਮਾ ਅਤ੍ਤਨਾ ਦਿਟ੍ਠਕਾਰਣਂ ਦਸ੍ਸੇਨ੍ਤੋ ‘‘ਦਿਟ੍ਠਾ ਮਯਾ’’ਤਿਆਦਿਮਾਹ.

ਤਤ੍ਥ ਦ੍ਵੇਪਿਤਿਕਾਤਿ ਕੋਸਲਰਞ੍ਞੋ ਚ ਕਾਸਿਰਞ੍ਞੋ ਚ ਵਸੇਨੇਤਂ ਵੁਤ੍ਤਂ. ਪਞ੍ਚਪਤਿਕਾਯਾਤਿ ਪਞ੍ਚਪਤਿਕਾ, ਯ-ਕਾਰੋ ਨਿਪਾਤਮਤ੍ਤੋ. ਪਟਿਬਨ੍ਧਨ੍ਤਿਯਾਤਿ ਪਟਿਬਨ੍ਧਮਾਨਾ. ਕਬਨ੍ਧੇਤਿ ਤਸ੍ਸ ਕਿਰ ਗੀਵਾ ਓਨਮਿਤ੍ਵਾ ਉਰਂ ਅਲ੍ਲੀਨਾ, ਤਸ੍ਮਾ ਛਿਨ੍ਨਸੀਸੋ ਵਿਯ ਖਾਯਤਿ. ਪਞ੍ਚ ਮਤਿਚ੍ਚਾਤਿ ਏਤੇ ਪਞ੍ਚ ਅਤਿਕ੍ਕਮਿਤ੍ਵਾ. ਖੁਜ੍ਜਵਾਮਨਕੇਨਾਤਿ ਖੁਜ੍ਜੇਨ ਵਾਮਨਕੇਨ.

ਇਦਂ ਵਤ੍ਵਾ ਅਪਰਾਨਿਪਿ ਦਿਟ੍ਠਪੁਬ੍ਬਾਨਿ ਦਸ੍ਸੇਨ੍ਤੋ ਪੁਨ ‘‘ਦਿਟ੍ਠਾ’’ਤਿਆਦਿਮਾਹ. ਤਤ੍ਥ ਦੁਤਿਯਵਤ੍ਥੁਸ੍ਮਿਂ ਤਾਵ ਅਯਂ ਵਿਭਾਵਨਾ – ਅਤੀਤੇ ਕਿਰ ਬਾਰਾਣਸਿਂ ਨਿਸ੍ਸਾਯ ਸਚ੍ਚਤਪਾਪੀ ਨਾਮ ਸੇਤਸਮਣੀ ਸੁਸਾਨੇ ਪਣ੍ਣਸਾਲਂ ਕਾਰੇਤ੍ਵਾ ਤਤ੍ਥ ਵਸਮਾਨਾ ਚਤ੍ਤਾਰਿ ਭਤ੍ਤਾਨਿ ਅਤਿਕ੍ਕਮਿਤ੍ਵਾ ਭੁਞ੍ਜਤਿ, ਸਕਲਨਗਰੇ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਪਾਕਟਾ ਅਹੋਸਿ. ਬਾਰਾਣਸਿਵਾਸਿਨੋ ਖਿਪਿਤ੍ਵਾਪਿ ਖਲਿਤ੍ਵਾਪਿ ‘‘ਨਮੋ ਸਚ੍ਚਤਪਾਪਿਯਾ’’ਤਿ ਵਦਨ੍ਤਿ. ਅਥੇਕਸ੍ਮਿਂ ਛਣਕਾਲੇ ਪਠਮਦਿਵਸੇ ਤਾਵ ਸੁਵਣ੍ਣਕਾਰਾ ਗਣਬਨ੍ਧੇਨ ਏਕਸ੍ਮਿਂ ਪਦੇਸੇ ਮਣ੍ਡਪਂ ਕਤ੍ਵਾ ਮਚ੍ਛਮਂਸਸੁਰਾਗਨ੍ਧਮਾਲਾਦੀਨਿ ਆਹਰਿਤ੍ਵਾ ਸੁਰਾਪਾਨਂ ਆਰਭਿਂਸੁ. ਅਥੇਕੋ ਸੁਵਣ੍ਣਕਾਰੋ ਸੁਰਾਪਿਟ੍ਠਕਂ ਛਡ੍ਡੇਨ੍ਤੋ – ‘‘ਨਮੋ ਸਚ੍ਚਤਪਾਪਿਯਾ’’ਤਿ ਵਤ੍ਵਾ ਏਕੇਨ ਪਣ੍ਡਿਤੇਨ – ‘‘ਅਮ੍ਭੋ ਅਨ੍ਧਬਾਲ, ਚਲਚਿਤ੍ਤਾਯ ਇਤ੍ਥਿਯਾ ਨਮੋ ਕਰੋਸਿ, ਅਹੋ ਬਾਲੋ’’ਤਿ ਵੁਤ੍ਤੇ – ‘‘ਸਮ੍ਮ, ਮਾ ਏਵਂ ਅਵਚ, ਮਾ ਨਿਰਯਸਂਵਤ੍ਤਨਿਕਂ ਕਮ੍ਮਂ ਕਰੀ’’ਤਿ ਆਹ. ਅਥ ਨਂ ਸੋ ‘‘ਦੁਬ੍ਬੁਦ੍ਧਿ ਤੁਣ੍ਹੀ ਹੋਹਿ, ਸਹਸ੍ਸੇਨ ਅਬ੍ਭੁਤਂ ਕਰੋਹਿ, ਅਹਂ ਤੇ ਸਚ੍ਚਤਪਾਪਿਂ ਇਤੋ ਸਤ੍ਤਮੇ ਦਿਵਸੇ ਅਲਙ੍ਕਤਪਟਿਯਤ੍ਤਂ ਇਮਸ੍ਮਿਂਯੇਵ ਠਾਨੇ ਨਿਸਿਨ੍ਨੋ ਸੁਰਾਪਿਟ੍ਠਕਂ ਗਾਹਾਪੇਤ੍ਵਾ ਸੁਰਂ ਪਿਵਿਸ੍ਸਾਮਿ, ਮਾਤੁਗਾਮੋ ਧੁਵਸੀਲੋ ਨਾਮ ਨਤ੍ਥੀ’’ਤਿ ਆਹ. ਸੋ ‘‘ਨ ਸਕ੍ਖਿਸ੍ਸਸੀ’’ਤਿ ਵਤ੍ਵਾ ਤੇਨ ਸਦ੍ਧਿਂ ਸਹਸ੍ਸੇਨ ਅਬ੍ਭੁਤਮਕਾਸਿ. ਸੋ ਤਂ ਅਞ੍ਞੇਸਂ ਸੁਵਣ੍ਣਕਾਰਾਨਂ ਆਰੋਚੇਤ੍ਵਾ ਪੁਨਦਿਵਸੇ ਪਾਤੋਵ ਤਾਪਸਵੇਸੇਨ ਸੁਸਾਨਂ ਪਵਿਸਿਤ੍ਵਾ ਤਸ੍ਸਾ ਵਸਨਟ੍ਠਾਨਸ੍ਸ ਅਵਿਦੂਰੇ ਸੂਰਿਯਂ ਨਮਸ੍ਸਨ੍ਤੋ ਅਟ੍ਠਾਸਿ.

ਸਾ ਭਿਕ੍ਖਾਯ ਗਚ੍ਛਮਾਨਾ ਨਂ ਦਿਸ੍ਵਾ – ‘‘ਮਹਿਦ੍ਧਿਕੋ ਤਾਪਸੋ ਭਵਿਸ੍ਸਤਿ, ਅਹਂ ਤਾਵ ਸੁਸਾਨਪਸ੍ਸੇ ਵਸਾਮਿ, ਅਯਂ ਮਜ੍ਝੇ ਸੁਸਾਨਸ੍ਸ ਵਸਤਿ, ਭਵਿਤਬ੍ਬਮਸ੍ਸਬ੍ਭਨ੍ਤਰੇ ਸਨ੍ਤਧਮ੍ਮੇਨ, ਵਨ੍ਦਿਸ੍ਸਾਮਿ ਨ’’ਨ੍ਤਿ ਉਪਸਙ੍ਕਮਿਤ੍ਵਾ ਵਨ੍ਦਿ. ਸੋ ਨੇਵ ਓਲੋਕੇਸਿ ਨ ਆਲਪਿ. ਦੁਤਿਯਦਿਵਸੇਪਿ ਤਥੇਵ ਅਕਾਸਿ. ਤਤਿਯਦਿਵਸੇ ਪਨ ਵਨ੍ਦਿਤਕਾਲੇ ਅਧੋਮੁਖੋਵ ‘‘ਗਚ੍ਛਾਹੀ’’ਤਿ ਆਹ. ਚਤੁਤ੍ਥਦਿਵਸੇ ‘‘ਕਚ੍ਚਿ ਭਿਕ੍ਖਾਯ ਨ ਕਿਲਮਸੀ’’ਤਿ ਪਟਿਸਨ੍ਥਾਰਮਕਾਸਿ. ਸਾ ‘‘ਪਟਿਸਨ੍ਥਾਰੋ ਮੇ ਲਦ੍ਧੋ’’ਤਿ ਤੁਟ੍ਠਾ ਪਕ੍ਕਾਮਿ. ਪਞ੍ਚਮਦਿਵਸੇ ਬਹੁਤਰਂ ਪਟਿਸਨ੍ਥਾਰਂ ਲਭਿਤ੍ਵਾ ਥੋਕਂ ਨਿਸੀਦਿਤ੍ਵਾ ਗਤਾ. ਛਟ੍ਠੇ ਦਿਵਸੇ ਪਨ ਤਂ ਆਗਨ੍ਤ੍ਵਾ ਵਨ੍ਦਿਤ੍ਵਾ ਨਿਸਿਨ੍ਨਂ – ‘‘ਭਗਿਨਿ, ਕਿਂ ਨੁ ਖੋ ਅਜ੍ਜ ਬਾਰਾਣਸਿਯਂ ਮਹਾਗੀਤਵਾਦਿਤਸਦ੍ਦੋ’’ਤਿ ਵਤ੍ਵਾ – ‘‘ਅਯ੍ਯ, ਤੁਮ੍ਹੇ ਨ ਜਾਨਾਥ, ਨਗਰੇ ਛਣੋ ਘੁਟ੍ਠੋ, ਤਤ੍ਥ ਕੀਲ਼ਨ੍ਤਾਨਂ ਏਸ ਸਦ੍ਦੋ’’ਤਿ ਵੁਤ੍ਤੇ – ‘‘ਏਤ੍ਥ ਨਾਮੇਸੋ ਸਦ੍ਦੋ’’ਤਿ ਅਜਾਨਨ੍ਤੋ ਵਿਯ ਹੁਤ੍ਵਾ – ‘‘ਭਗਿਨਿ, ਕਤਿ ਭਤ੍ਤਾਨਿ ਅਤਿਕ੍ਕਮੇਸੀ’’ਤਿ ਪੁਚ੍ਛਿ. ‘‘ਚਤ੍ਤਾਰਿ, ਅਯ੍ਯ, ਤੁਮ੍ਹੇ ਪਨ ਕਤਿ ਅਤਿਕ੍ਕਮੇਥਾ’’ਤਿ? ‘‘ਸਤ੍ਤ ਭਗਿਨੀ’’ਤਿ. ਇਦਂ ਸੋ ਮੁਸਾ ਅਭਾਸਿ. ਦੇਵਸਿਕਂ ਹੇਸ ਰਤ੍ਤਿਂ ਭੁਞ੍ਜਤਿ. ਸੋ ਤਂ ‘‘ਕਤਿ ਤੇ ਭਗਿਨਿ ਵਸ੍ਸਾਨਿ ਪਬ੍ਬਜਿਤਾਯਾ’’ਤਿ ਪੁਚ੍ਛਿਤ੍ਵਾ ਤਾਯ ‘‘ਦ੍ਵਾਦਸ ਵਸ੍ਸਾਨੀ’’ਤਿ ਵਤ੍ਵਾ ‘‘ਤੁਮ੍ਹਾਕਂ ਕਤਿ ਵਸ੍ਸਾਨੀ’’ਤਿ ਵੁਤ੍ਤੋ ‘‘ਇਦਂ ਮੇ ਛਟ੍ਠਂ ਵਸ੍ਸ’’ਨ੍ਤਿ ਆਹ. ਅਥ ਨਂ ‘‘ਅਤ੍ਥਿ ਪਨ ਤੇ ਭਗਿਨਿ ਸਨ੍ਤਧਮ੍ਮਾਧਿਗਮੋ’’ਤਿ ਪੁਚ੍ਛਿਤ੍ਵਾ ‘‘ਨਤ੍ਥਿ, ਅਯ੍ਯ, ਤੁਮ੍ਹਾਕਂ ਪਨ ਅਤ੍ਥੀ’’ਤਿ ਵੁਤ੍ਤੇ ‘‘ਮਯ੍ਹਮ੍ਪਿ ਨਤ੍ਥੀ’’ਤਿ ਵਤ੍ਵਾ – ‘‘ਭਗਿਨਿ, ਮਯਂ ਨੇਵ ਕਾਮਸੁਖਂ ਲਭਾਮ, ਨ ਨੇਕ੍ਖਮ੍ਮਸੁਖਂ, ਕਿਂ ਅਮ੍ਹਾਕਂਯੇਵ ਉਣ੍ਹੋ ਨਿਰਯੋ, ਮਹਾਜਨਸ੍ਸ ਕਿਰਿਯਂ ਕਰੋਮ, ਅਹਂ ਗਿਹੀ ਭਵਿਸ੍ਸਾਮਿ, ਅਤ੍ਥਿ ਮੇ ਮਾਤੁ ਸਨ੍ਤਕਂ ਧਨਂ, ਨ ਸਕ੍ਕੋਮਿ ਦੁਕ੍ਖਂ ਅਨੁਭਵਿਤੁ’’ਨ੍ਤਿ ਆਹ. ਸਾ ਤਸ੍ਸ ਵਚਨਂ ਸੁਤ੍ਵਾ ਅਤ੍ਤਨੋ ਚਲਚਿਤ੍ਤਤਾਯ ਤਸ੍ਮਿਂ ਪਟਿਬਦ੍ਧਚਿਤ੍ਤਾ ਹੁਤ੍ਵਾ – ‘‘ਅਯ੍ਯ, ਅਹਮ੍ਪਿ ਉਕ੍ਕਣ੍ਠਿਤਾ, ਸਚੇ ਪਨ ਮਂ ਨ ਛਡ੍ਡੇਸ੍ਸਥ, ਅਹਮ੍ਪਿ ਗਿਹਿਨੀ ਭਵਿਸ੍ਸਾਮੀ’’ਤਿ ਆਹ. ਅਥ ਨਂ ਸੋ ‘‘ਏਹਿ ਤਂ ਨ ਛਡ੍ਡੇਸ੍ਸਾਮਿ, ਭਰਿਯਾ ਮੇ ਭਵਿਸ੍ਸਸੀ’’ਤਿ ਤਂ ਨਗਰਂ ਪਵੇਸੇਤ੍ਵਾ ਸਂਵਸਿਤ੍ਵਾ ਸੁਰਾਪਾਨਮਣ੍ਡਪਂ ਗਨ੍ਤ੍ਵਾ ਤਾਯ ਸੁਰਾਪਿਟ੍ਠਕਂ ਗਾਹਾਪੇਤ੍ਵਾ ਸੁਰਂ ਪਿਵਿ. ਇਤਰੋ ਸਹਸ੍ਸਂ ਜਿਤੋ. ਸਾ ਤਂ ਪਟਿਚ੍ਚ ਪੁਤ੍ਤਧੀਤਾਹਿ ਵਡ੍ਢਿ. ਤਦਾ ਕੁਣਾਲੋ ਸੁਰਾਧੁਤ੍ਤਕੋ ਅਹੋਸਿ. ਤਸ੍ਮਾ ਅਤ੍ਤਨਾ ਦਿਟ੍ਠਂ ਪਕਾਸੇਨ੍ਤੋ ‘‘ਦਿਟ੍ਠਾ ਮਯਾ’’ਤਿਆਦਿਮਾਹ.

ਤਤਿਯਵਤ੍ਥੁਸ੍ਮਿਂ ਅਤੀਤਕਥਾ ਚਤੁਕ੍ਕਨਿਪਾਤੇ ਕਾਕਵਤੀਜਾਤਕਵਣ੍ਣਨਾਯਂ (ਜਾ. ਅਟ੍ਠ. ੩.੪.ਕਾਕਵਤੀਜਾਤਕਵਣ੍ਣਨਾ) ਵਿਤ੍ਥਾਰਿਤਾ. ਤਦਾ ਪਨ ਕੁਣਾਲੋ ਗਰੁਲ਼ੋ ਅਹੋਸਿ. ਤਸ੍ਮਾ ਅਤ੍ਤਨਾ ਦਿਟ੍ਠਂ ਪਕਾਸੇਨ੍ਤੋ ‘‘ਦਿਟ੍ਠਾ ਮਯਾ’’ਤਿਆਦਿਮਾਹ.

ਚਤੁਤ੍ਥਵਤ੍ਥੁਸ੍ਮਿਂ ਅਤੀਤੇ ਬ੍ਰਹ੍ਮਦਤ੍ਤੋ ਕੋਸਲਰਾਜਾਨਂ ਵਧਿਤ੍ਵਾ ਰਜ੍ਜਂ ਗਹੇਤ੍ਵਾ ਤਸ੍ਸ ਅਗ੍ਗਮਹੇਸਿਂ ਗਬ੍ਭਿਨਿਂ ਆਦਾਯ ਬਾਰਾਣਸਿਂ ਪਚ੍ਚਾਗਨ੍ਤ੍ਵਾ ਤਸ੍ਸਾ ਗਬ੍ਭਿਨਿਭਾਵਂ ਜਾਨਨ੍ਤੋਪਿ ਤਂ ਅਗ੍ਗਮਹੇਸਿਂ ਅਕਾਸਿ. ਸਾ ਪਰਿਪਕ੍ਕਗਬ੍ਭਾ ਸੁਵਣ੍ਣਰੂਪਕਸਦਿਸਂ ਪੁਤ੍ਤਂ ਵਿਜਾਯਿਤ੍ਵਾ – ‘‘ਵੁਦ੍ਧਿਪ੍ਪਤ੍ਤਮ੍ਪਿ ਨਂ ਬਾਰਾਣਸਿਰਾਜਾ ‘ਏਸ ਮੇ ਪਚ੍ਚਾਮਿਤ੍ਤਸ੍ਸ ਪੁਤ੍ਤੋ, ਕਿਂ ਇਮਿਨਾ’ਤਿ ਮਾਰਾਪੇਸ੍ਸਤਿ, ਮਾ ਮੇ ਪੁਤ੍ਤੋ ਪਰਹਤ੍ਥੇ ਮਰਤੂ’’ਤਿ ਚਿਨ੍ਤੇਤ੍ਵਾ ਧਾਤਿਂ ਆਹ – ‘‘ਅਮ੍ਮ, ਇਮਂ ਦਾਰਕਂ ਪਿਲੋਤਿਕਂ ਅਤ੍ਥਰਿਤ੍ਵਾ ਆਮਕਸੁਸਾਨੇ ਨਿਪਜ੍ਜਾਪੇਤ੍ਵਾ ਏਹੀ’’ਤਿ. ਧਾਤੀ ਤਥਾ ਕਤ੍ਵਾ ਨ੍ਹਤ੍ਵਾ ਪਚ੍ਚਾਗਮਿ. ਕੋਸਲਰਾਜਾਪਿ ਮਰਿਤ੍ਵਾ ਪੁਤ੍ਤਸ੍ਸ ਆਰਕ੍ਖਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾਨੁਭਾਵੇਨ ਏਕਸ੍ਸ ਏਲ਼ਕਪਾਲਕਸ੍ਸ ਤਸ੍ਮਿਂ ਪਦੇਸੇ ਏਲ਼ਕੇ ਚਾਰੇਨ੍ਤਸ੍ਸ ਏਕਾ ਏਲ਼ਿਕਾ ਤਂ ਕੁਮਾਰਂ ਦਿਸ੍ਵਾ ਸਿਨੇਹਂ ਉਪ੍ਪਾਦੇਤ੍ਵਾ ਖੀਰਂ ਪਾਯੇਤ੍ਵਾ ਥੋਕਂ ਚਰਿਤ੍ਵਾ ਪੁਨ ਗਨ੍ਤ੍ਵਾ ਦ੍ਵੇ ਤਯੋ ਚਤ੍ਤਾਰੋ ਵਾਰੇ ਪਾਯੇਸਿ. ਏਲ਼ਕਪਾਲਕੋ ਤਸ੍ਸਾ ਕਿਰਿਯਂ ਦਿਸ੍ਵਾ ਤਂ ਠਾਨਂ ਗਨ੍ਤ੍ਵਾ ਤਂ ਦਾਰਕਂ ਦਿਸ੍ਵਾ ਪੁਤ੍ਤਸਿਨੇਹਂ ਪਚ੍ਚੁਪਟ੍ਠਪੇਤ੍ਵਾ ਨੇਤ੍ਵਾ ਅਤ੍ਤਨੋ ਭਰਿਯਾਯ ਅਦਾਸਿ. ਸਾ ਪਨ ਅਪੁਤ੍ਤਿਕਾ, ਤੇਨਸ੍ਸਾ ਥਞ੍ਞਂ ਨਤ੍ਥਿ, ਅਥ ਨਂ ਏਲ਼ਿਕਖੀਰਮੇਵ ਪਾਯੇਸਿ. ਤਤੋ ਪਟ੍ਠਾਯ ਪਨ ਦੇਵਸਿਕਂ ਦ੍ਵੇ ਤਿਸ੍ਸੋ ਏਲ਼ਿਕਾ ਮਰਨ੍ਤਿ. ਏਲ਼ਕਪਾਲੋ – ‘‘ਇਮਸ੍ਮਿਂ ਪਟਿਜਗ੍ਗਿਯਮਾਨੇ ਸਬ੍ਬਾ ਏਲ਼ਿਕਾ ਮਰਿਸ੍ਸਨ੍ਤਿ, ਕਿਂ ਨੋ ਇਮਿਨਾ’’ਤਿ ਤਂ ਏਕਸ੍ਮਿਂ ਮਤ੍ਤਿਕਾਭਾਜਨੇ ਨਿਪਜ੍ਜਾਪੇਤ੍ਵਾ ਅਪਰੇਨ ਪਿਦਹਿਤ੍ਵਾ ਮਾਸਚੁਣ੍ਣੇਨ ਮੁਖਂ ਨਿਬ੍ਬਿਵਰਂ ਵਿਲਿਮ੍ਪਿਤ੍ਵਾ ਨਦਿਯਂ ਵਿਸ੍ਸਜ੍ਜੇਸਿ. ਤਮੇਨਂ ਵੁਯ੍ਹਮਾਨਂ ਹੇਟ੍ਠਾਤਿਤ੍ਥੇ ਰਾਜਨਿਵੇਸਨੇ ਜਿਣ੍ਣਪਟਿਸਙ੍ਖਾਰਕੋ ਏਕੋ ਚਣ੍ਡਾਲੋ ਸਪਜਾਪਤਿਕੋ ਮਕਚਿਂ ਧੋਵਨ੍ਤੋ ਦਿਸ੍ਵਾਵ ਵੇਗੇਨ ਗਨ੍ਤ੍ਵਾ ਆਹਰਿਤ੍ਵਾ ਤੀਰੇ ਠਪੇਤ੍ਵਾ ‘‘ਕਿਮੇਤ੍ਥਾ’’ਤਿ ਵਿਵਰਿਤ੍ਵਾ ਓਲੋਕੇਨ੍ਤੋ ਦਾਰਕਂ ਪਸ੍ਸਿ. ਭਰਿਯਾਪਿਸ੍ਸ ਅਪੁਤ੍ਤਿਕਾ, ਤਸ੍ਸਾ ਤਸ੍ਮਿਂ ਪੁਤ੍ਤਸਿਨੇਹੋ ਨਿਬ੍ਬਤ੍ਤਿ, ਅਥ ਨਂ ਗੇਹਂ ਨੇਤ੍ਵਾ ਪਟਿਜਗ੍ਗਿ. ਤਂ ਸਤ੍ਤਟ੍ਠਵਸ੍ਸਕਾਲਤੋ ਪਟ੍ਠਾਯ ਮਾਤਾਪਿਤਰੋ ਰਾਜਕੁਲਂ ਗਚ੍ਛਨ੍ਤਾ ਆਦਾਯ ਗਚ੍ਛਨ੍ਤਿ. ਸੋਲ਼ਸਵਸ੍ਸਕਾਲਤੋ ਪਨ ਪਟ੍ਠਾਯ ਸ੍ਵੇਵ ਬਹੁਲਂ ਗਨ੍ਤ੍ਵਾ ਜਿਣ੍ਣਪਟਿਸਙ੍ਖਰਣਂ ਕਰੋਤਿ.

ਰਞ੍ਞੋ ਚ ਅਗ੍ਗਮਹੇਸਿਯਾ ਕੁਰੁਙ੍ਗਦੇਵੀ ਨਾਮ ਧੀਤਾ ਅਹੋਸਿ ਉਤ੍ਤਮਰੂਪਧਰਾ. ਸਾ ਤਸ੍ਸ ਦਿਟ੍ਠਕਾਲਤੋ ਪਟ੍ਠਾਯ ਤਸ੍ਮਿਂ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ਅਞ੍ਞਤ੍ਥ ਅਨਭਿਰਤਾ ਤਸ੍ਸ ਕਮ੍ਮਕਰਣਟ੍ਠਾਨਮੇਵ ਆਗਚ੍ਛਤਿ. ਤੇਸਂ ਅਭਿਣ੍ਹਦਸ੍ਸਨੇਨ ਅਞ੍ਞਮਞ੍ਞਂ ਪਟਿਬਦ੍ਧਚਿਤ੍ਤਾਨਂ ਅਨ੍ਤੋਰਾਜਕੁਲੇਯੇਵ ਪਟਿਚ੍ਛਨ੍ਨੋਕਾਸੇ ਅਜ੍ਝਾਚਾਰੋ ਪਵਤ੍ਤਿ. ਗਚ੍ਛਨ੍ਤੇ ਕਾਲੇ ਪਰਿਚਾਰਿਕਾਯੋ ਞਤ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ਕੁਜ੍ਝਿਤ੍ਵਾ ਅਮਚ੍ਚੇ ਸਨ੍ਨਿਪਾਤੇਤ੍ਵਾ – ‘‘ਇਮਿਨਾ ਚਣ੍ਡਾਲਪੁਤ੍ਤੇਨ ਇਦਂ ਨਾਮ ਕਤਂ, ਇਮਸ੍ਸ ਕਤ੍ਤਬ੍ਬਂ ਜਾਨਾਥਾ’’ਤਿ ਆਹ. ਅਮਚ੍ਚਾ ‘‘ਮਹਾਪਰਾਧੋ ਏਸ, ਨਾਨਾਵਿਧਕਮ੍ਮਕਾਰਣਾ ਕਾਰੇਤ੍ਵਾ ਪਚ੍ਛਾ ਮਾਰੇਤੁਂ ਵਟ੍ਟਤੀ’’ਤਿ ਵਦਿਂਸੁ. ਤਸ੍ਮਿਂ ਖਣੇ ਕੁਮਾਰਸ੍ਸ ਪਿਤਾ ਆਰਕ੍ਖਦੇਵਤਾ ਤਸ੍ਸੇਵ ਕੁਮਾਰਸ੍ਸ ਮਾਤੁ ਸਰੀਰੇ ਅਧਿਮੁਚ੍ਚਿ. ਸਾ ਦੇਵਤਾਨੁਭਾਵੇਨ ਰਾਜਾਨਂ ਉਪਸਙ੍ਕਮਿਤ੍ਵਾ ਆਹ – ‘‘ਮਹਾਰਾਜ, ਨਾਯਂ ਕੁਮਾਰੋ ਚਣ੍ਡਾਲੋ, ਏਸ ਕੁਮਾਰੋ ਮਮ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋ ਕੋਸਲਰਞ੍ਞੋ ਪੁਤ੍ਤੋ, ਅਹਂ ‘ਪੁਤ੍ਤੋ ਮੇ ਮਤੋ’ਤਿ ਤੁਮ੍ਹਾਕਂ ਮੁਸਾ ਅਵਚਂ, ਅਹਮੇਤਂ ‘ਤੁਮ੍ਹਾਕਂ ਪਚ੍ਚਾਮਿਤ੍ਤਸ੍ਸ ਪੁਤ੍ਤੋ’ਤਿ ਧਾਤਿਯਾ ਦਤ੍ਵਾ ਆਮਕਸੁਸਾਨੇ ਛਡ੍ਡਾਪੇਸਿਂ, ਅਥ ਨਂ ਏਕੋ ਏਲ਼ਕਪਾਲਕੋ ਪਟਿਜਗ੍ਗਿ, ਸੋ ਅਤ੍ਤਨੋ ਏਲ਼ਿਕਾਸੁ ਮਰਨ੍ਤੀਸੁ ਨਦਿਯਾ ਪਵਾਹੇਸਿ, ਅਥ ਨਂ ਵੁਯ੍ਹਮਾਨਂ ਤੁਮ੍ਹਾਕਂ ਗੇਹੇ ਜਿਣ੍ਣਪਟਿਸਙ੍ਖਾਰਕੋ ਚਣ੍ਡਾਲੋ ਦਿਸ੍ਵਾ ਪੋਸੇਸਿ, ਸਚੇ ਨ ਸਦ੍ਦਹਥ, ਤੇ ਸਬ੍ਬੇ ਪਕ੍ਕੋਸਾਪੇਤ੍ਵਾ ਪੁਚ੍ਛਥਾ’’ਤਿ.

ਰਾਜਾ ਧਾਤਿਂ ਆਦਿਂ ਕਤ੍ਵਾ ਸਬ੍ਬੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿਤ੍ਵਾ ਤਥੇਵ ਤਂ ਪਵਤ੍ਤਿਂ ਸੁਤ੍ਵਾ ‘‘ਜਾਤਿਸਮ੍ਪਨ੍ਨੋਯਂ ਕੁਮਾਰੋ’’ਤਿ ਤੁਟ੍ਠੋ ਤਂ ਨ੍ਹਾਪੇਤ੍ਵਾ ਅਲਙ੍ਕਾਰਾਪੇਤ੍ਵਾ ਤਸ੍ਸੇਵ ਧੀਤਰਂ ਅਦਾਸਿ. ਤਸ੍ਸ ਪਨ ਏਲ਼ਿਕਾਨਂ ਮਾਰਿਤਤ੍ਤਾ ‘‘ਏਲ਼ਿਕਕੁਮਾਰੋ’’ਤਿ ਨਾਮਂ ਅਕਂਸੁ. ਅਥਸ੍ਸ ਰਾਜਾ ਸਸੇਨਵਾਹਨਂ ਦਤ੍ਵਾ – ‘‘ਗਚ੍ਛ ਅਤ੍ਤਨੋ ਪਿਤੁ ਸਨ੍ਤਕਂ ਰਜ੍ਜਂ ਗਣ੍ਹਾ’’ਤਿ ਤਂ ਉਯ੍ਯੋਜੇਸਿ. ਸੋਪਿ ਕੁਰੁਙ੍ਗਦੇਵਿਂ ਆਦਾਯ ਗਨ੍ਤ੍ਵਾ ਰਜ੍ਜੇ ਪਤਿਟ੍ਠਾਸਿ. ਅਥਸ੍ਸ ਬਾਰਾਣਸਿਰਾਜਾ ‘‘ਅਨੁਗ੍ਗਹਿਤਸਿਪ੍ਪੋ ਅਯ’’ਨ੍ਤਿ ਸਿਪ੍ਪਸਿਕ੍ਖਾਪਨਤ੍ਥਂ ਛਲ਼ਙ੍ਗਕੁਮਾਰਂ ਨਾਮ ਆਚਰਿਯਂ ਪੇਸੇਸਿ. ਸੋ ਤਸ੍ਸ ‘‘ਆਚਰਿਯੋ ਮੇ’’ਤਿ ਸੇਨਾਪਤਿਟ੍ਠਾਨਂ ਅਦਾਸਿ. ਅਪਰਭਾਗੇ ਕੁਰੁਙ੍ਗਦੇਵੀ ਤੇਨ ਸਦ੍ਧਿਂ ਅਨਾਚਾਰਮਕਾਸਿ. ਸੇਨਾਪਤਿਨੋਪਿ ਪਰਿਚਾਰਕੋ ਧਨਨ੍ਤੇਵਾਸੀ ਨਾਮ ਅਤ੍ਥਿ. ਸੋ ਤਸ੍ਸ ਹਤ੍ਥੇ ਕੁਰੁਙ੍ਗਦੇਵਿਯਾ ਵਤ੍ਥਾਲਙ੍ਕਾਰਾਦੀਨਿ ਪੇਸੇਸਿ. ਸਾ ਤੇਨਪਿ ਸਦ੍ਧਿਂ ਪਾਪਮਕਾਸਿ. ਕੁਣਾਲੋ ਤਂ ਕਾਰਣਂ ਆਹਰਿਤ੍ਵਾ ਦਸ੍ਸੇਨ੍ਤੋ ‘‘ਦਿਟ੍ਠਾ ਮਯਾ’’ਤਿਆਦਿਮਾਹ.

ਤਤ੍ਥ ਲੋਮਸੁਦ੍ਦਰੀਤਿ ਲੋਮਰਾਜਿਯਾ ਮਣ੍ਡਿਤਉਦਰਾ. ਛਲ਼ਙ੍ਗਕੁਮਾਰਧਨਨ੍ਤੇਵਾਸਿਨਾਤਿ ਏਲ਼ਿਕਕੁਮਾਰਕਂ ਪਤ੍ਥਯਮਾਨਾਪਿ ਛਲ਼ਙ੍ਗਕੁਮਾਰਸੇਨਾਪਤਿਨਾ ਚ ਤਸ੍ਸੇਵ ਪਰਿਚਾਰਕੇਨ ਧਨਨ੍ਤੇਵਾਸਿਨਾ ਚ ਸਦ੍ਧਿਂ ਪਾਪਮਕਾਸਿ. ਏਵਂ ਅਨਾਚਾਰਾ ਇਤ੍ਥਿਯੋ ਦੁਸ੍ਸੀਲਾ ਪਾਪਧਮ੍ਮਾ, ਤੇਨਾਹਂ ਤਾ ਨਪ੍ਪਸਂਸਾਮੀਤਿ ਇਦਂ ਮਹਾਸਤ੍ਤੋ ਅਤੀਤਂ ਆਹਰਿਤ੍ਵਾ ਦਸ੍ਸੇਸਿ. ਸੋ ਹਿ ਤਦਾ ਛਲ਼ਙ੍ਗਕੁਮਾਰੋ ਅਹੋਸਿ, ਤਸ੍ਮਾ ਅਤ੍ਤਨਾ ਦਿਟ੍ਠਕਾਰਣਂ ਆਹਰਿ.

ਪਞ੍ਚਮਵਤ੍ਥੁਸ੍ਮਿਮ੍ਪਿ ਅਤੀਤੇ ਕੋਸਲਰਾਜਾ ਬਾਰਾਣਸਿਰਜ੍ਜਂ ਗਹੇਤ੍ਵਾ ਬਾਰਾਣਸਿਰਞ੍ਞੋ ਅਗ੍ਗਮਹੇਸਿਂ ਗਬ੍ਭਿਨਿਮ੍ਪਿ ਅਗ੍ਗਮਹੇਸਿਂ ਕਤ੍ਵਾ ਸਕਨਗਰਮੇਵ ਗਤੋ. ਸਾ ਅਪਰਭਾਗੇ ਪੁਤ੍ਤਂ ਵਿਜਾਯਿ. ਰਾਜਾ ਅਪੁਤ੍ਤਕਤ੍ਤਾ ਤਂ ਪੁਤ੍ਤਸਿਨੇਹੇਨ ਪੋਸੇਤ੍ਵਾ ਸਬ੍ਬਸਿਪ੍ਪਾਨਿ ਸਿਕ੍ਖਾਪੇਤ੍ਵਾ ਵਯਪ੍ਪਤ੍ਤਂ ‘‘ਅਤ੍ਤਨੋ ਪਿਤੁ ਸਨ੍ਤਕਂ ਰਜ੍ਜਂ ਗਣ੍ਹਾ’’ਤਿ ਪੇਸੇਸਿ. ਸੋ ਤਤ੍ਥ ਗਨ੍ਤ੍ਵਾ ਰਜ੍ਜਂ ਕਾਰੇਸਿ. ਅਥਸ੍ਸ ਮਾਤਾ ‘‘ਪੁਤ੍ਤਂ ਪਸ੍ਸਿਤੁਕਾਮਾਮ੍ਹੀ’’ਤਿ ਕੋਸਲਰਾਜਾਨਂ ਆਪੁਚ੍ਛਿਤ੍ਵਾ ਮਹਾਪਰਿਵਾਰਾ ਬਾਰਾਣਸਿਂ ਗਚ੍ਛਨ੍ਤੀ ਦ੍ਵਿਨ੍ਨਂ ਰਟ੍ਠਾਨਂ ਅਨ੍ਤਰੇ ਏਕਸ੍ਮਿਂ ਨਿਗਮੇ ਨਿਵਾਸਂ ਗਣ੍ਹਿ. ਤਤ੍ਥੇਵੇਕੋ ਪਞ੍ਚਾਲਚਣ੍ਡੋ ਨਾਮ ਬ੍ਰਾਹ੍ਮਣਕੁਮਾਰੋ ਅਤ੍ਥਿ ਅਭਿਰੂਪੋ. ਸੋ ਤਸ੍ਸਾ ਪਣ੍ਣਾਕਾਰਂ ਉਪਨਾਮੇਸਿ. ਸਾ ਤਂ ਦਿਸ੍ਵਾ ਪਟਿਬਦ੍ਧਚਿਤ੍ਤਾ ਤੇਨ ਸਦ੍ਧਿਂ ਪਾਪਕਮ੍ਮਂ ਕਤ੍ਵਾ ਕਤਿਪਾਹਂ ਤਤ੍ਥੇਵ ਵੀਤਿਨਾਮੇਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਪੁਤ੍ਤਂ ਦਿਸ੍ਵਾ ਖਿਪ੍ਪਂ ਨਿਵਤ੍ਤਿਤ੍ਵਾ ਪੁਨ ਤਸ੍ਮਿਂਯੇਵ ਨਿਗਮੇ ਨਿਵਾਸਂ ਗਹੇਤ੍ਵਾ ਕਤਿਪਾਹਂ ਤੇਨ ਸਦ੍ਧਿਂ ਅਨਾਚਾਰਂ ਚਰਿਤ੍ਵਾ ਕੋਸਲਨਗਰਂ ਗਤਾ. ਸਾ ਤਤੋ ਪਟ੍ਠਾਯ ਨਚਿਰਸ੍ਸੇਵ ਤਂ ਤਂ ਕਾਰਣਂ ਵਤ੍ਵਾ ‘‘ਪੁਤ੍ਤਸ੍ਸ ਸਨ੍ਤਿਕਂ ਗਚ੍ਛਾਮੀ’’ਤਿ ਰਾਜਾਨਂ ਆਪੁਚ੍ਛਿਤ੍ਵਾ ਗਚ੍ਛਨ੍ਤੀ ਚ ਆਗਚ੍ਛਨ੍ਤੀ ਚ ਤਸ੍ਮਿਂ ਨਿਗਮੇ ਅਡ੍ਢਮਾਸਮਤ੍ਤਂ ਤੇਨ ਸਦ੍ਧਿਂ ਅਨਾਚਾਰਂ ਚਰਿ. ਸਮ੍ਮ ਪੁਣ੍ਣਮੁਖ, ਇਤ੍ਥਿਯੋ ਨਾਮੇਤਾ ਦੁਸ੍ਸੀਲਾ ਮੁਸਾਵਾਦਿਨਿਯੋਤਿ ਇਦਮ੍ਪਿ ਅਤੀਤਂ ਦਸ੍ਸੇਨ੍ਤੋ ਮਹਾਸਤ੍ਤੋ ‘‘ਏਵਞ੍ਹੇਤ’’ਨ੍ਤਿਆਦਿਮਾਹ.

ਤਤ੍ਥ ਬ੍ਰਹ੍ਮਦਤ੍ਤਸ੍ਸ ਮਾਤਰਨ੍ਤਿ ਬਾਰਾਣਸਿਰਜ੍ਜਂ ਕਾਰੇਨ੍ਤਸ੍ਸ ਬ੍ਰਹ੍ਮਦਤ੍ਤਕੁਮਾਰਸ੍ਸ ਮਾਤਰਂ. ਤਦਾ ਕਿਰ ਕੁਣਾਲੋ ਪਞ੍ਚਾਲਚਣ੍ਡੋ ਅਹੋਸਿ, ਤਸ੍ਮਾ ਤਂ ਅਤ੍ਤਨਾ ਞਾਤਕਾਰਣਂ ਦਸ੍ਸੇਨ੍ਤੋ ਏਵਮਾਹ.

ਏਤਾ ਚਾਤਿ, ਸਮ੍ਮ ਪੁਣ੍ਣਮੁਖ, ਏਤਾਵ ਪਞ੍ਚ ਇਤ੍ਥਿਯੋ ਪਾਪਮਕਂਸੁ, ਨ ਅਞ੍ਞਾਤਿ ਸਞ੍ਞਂ ਮਾ ਕਰਿ, ਅਥ ਖੋ ਏਤਾ ਚ ਅਞ੍ਞਾ ਚ ਬਹੂ ਪਾਪਕਮ੍ਮਕਾਰਿਕਾਤਿ. ਇਮਸ੍ਮਿਂ ਠਾਨੇ ਠਤ੍ਵਾ ਲੋਕੇ ਅਤਿਚਾਰਿਨੀਨਂ ਵਤ੍ਥੂਨਿ ਕਥੇਤਬ੍ਬਾਨਿ. ਜਗਤੀਤਿ ਯਥਾ ਜਗਤਿਸਙ੍ਖਾਤਾ ਮਹੀ ਸਮਾਨਰਤ੍ਤਾ ਪਟਿਘਾਭਾਵੇਨ ਸਬ੍ਬੇਸੁ ਸਮਾਨਰਤ੍ਤਾ ਹੁਤ੍ਵਾ ਸਾ ਵਸੁਨ੍ਧਰਾ ਇਤਰੀਤਰਾਪਤਿਟ੍ਠਾ ਉਤ੍ਤਮਾਨਞ੍ਚ ਅਧਮਾਨਞ੍ਚ ਪਤਿਟ੍ਠਾ ਹੋਤਿ, ਤਥਾ ਇਤ੍ਥਿਯੋਪਿ ਕਿਲੇਸਵਸੇਨ ਸਬ੍ਬੇਸਮ੍ਪਿ ਉਤ੍ਤਮਾਧਮਾਨਂ ਪਤਿਟ੍ਠਾ ਹੋਨ੍ਤਿ. ਇਤ੍ਥਿਯੋ ਹਿ ਓਕਾਸਂ ਲਭਮਾਨਾ ਕੇਨਚਿ ਸਦ੍ਧਿਂ ਪਾਪਕਂ ਕਰੋਨ੍ਤਿ ਨਾਮ. ਸਬ੍ਬਸਹਾਤਿ ਯਥਾ ਚ ਸਾ ਸਬ੍ਬਮੇਵ ਸਹਤਿ ਨ ਫਨ੍ਦਤਿ ਨ ਕੁਪ੍ਪਤਿ ਨ ਚਲਤਿ, ਤਥਾ ਇਤ੍ਥਿਯੋ ਸਬ੍ਬੇਪਿ ਪੁਰਿਸੇ ਲੋਕਸ੍ਸਾਦਵਸੇਨ ਸਹਨ੍ਤਿ. ਸਚੇ ਤਾਸਂ ਕੋਚਿ ਪੁਰਿਸੋ ਚਿਤ੍ਤੇ ਪਤਿਟ੍ਠਿਤੋ ਹੋਤਿ, ਤਸ੍ਸ ਰਕ੍ਖਣਤ੍ਥਂ ਨ ਫਨ੍ਦਨ੍ਤਿ ਨ ਚਲਨ੍ਤਿ ਨ ਕੋਲਾਹਲਂ ਕਰੋਨ੍ਤਿ. ਯਥਾ ਚ ਸਾ ਨ ਕੁਪ੍ਪਤਿ ਨ ਚਲਤਿ, ਏਵਂ ਇਤ੍ਥਿਯੋਪਿ ਮੇਥੁਨਧਮ੍ਮੇਨ ਨ ਕੁਪ੍ਪਨ੍ਤਿ ਨ ਚਲਨ੍ਤਿ, ਨ ਸਕ੍ਕਾ ਤੇਨ ਪੂਰੇਤੁਂ.

ਵਾਲ਼ਮਿਗੋਤਿ ਦੁਟ੍ਠਮਿਗੋ. ਪਞ੍ਚਾਵੁਧੋਤਿ ਮੁਖਸ੍ਸ ਚੇਵ ਚਤੁਨ੍ਨਞ੍ਚ ਚਰਣਾਨਂ ਵਸੇਨੇਤਂ ਵੁਤ੍ਤਂ. ਸੁਰੁਦ੍ਧੋਤਿ ਸੁਲੁਦ੍ਧੋ ਸੁਫਰੁਸੋ. ਤਥਿਤ੍ਥਿਯੋਤਿ ਯਥਾ ਹਿ ਸੀਹਸ੍ਸ ਮੁਖਞ੍ਚੇਵ ਚਤ੍ਤਾਰੋ ਚ ਹਤ੍ਥਪਾਦਾਤਿ ਪਞ੍ਚਾਵੁਧਾਨਿ, ਤਥਾ ਇਤ੍ਥੀਨਮ੍ਪਿ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਾਨਿ ਪਞ੍ਚਾਵੁਧਾਨਿ. ਯਥਾ ਸੋ ਅਤ੍ਤਨੋ ਭਕ੍ਖਂ ਗਣ੍ਹਨ੍ਤੋ ਤੇਹਿਪਿ ਪਞ੍ਚਹਿ ਗਣ੍ਹਾਤਿ, ਤਥਾ ਤਾਪਿ ਕਿਲੇਸਭਕ੍ਖਂ ਗਣ੍ਹਮਾਨਾ ਰੂਪਾਦੀਹਿ ਆਵੁਧੇਹਿ ਪਹਰਿਤ੍ਵਾ ਗਣ੍ਹਨ੍ਤਿ. ਯਥਾ ਸੋ ਕਕ੍ਖਲ਼ੋ ਪਸਯ੍ਹ ਖਾਦਤਿ, ਏਵਂ ਏਤਾਪਿ ਕਕ੍ਖਲ਼ਾ ਪਸਯ੍ਹ ਖਾਦਿਕਾ. ਤਥਾ ਹੇਤਾ ਥਿਰਸੀਲੇਪਿ ਪੁਰਿਸੇ ਅਤ੍ਤਨੋ ਬਲੇਨ ਪਸਯ੍ਹਕਾਰਂ ਕਤ੍ਵਾ ਸੀਲਵਿਨਾਸਂ ਪਾਪੇਨ੍ਤਿ. ਯਥਾ ਸੋ ਪਰਹਿਂਸਨੇ ਰਤੋ, ਏਵਮੇਤਾਪਿ ਕਿਲੇਸਵਸੇਨ ਪਰਹਿਂਸਨੇ ਰਤਾ. ਤਾਯੋਤਿ ਤਾ ਏਵਂ ਅਗੁਣਸਮ੍ਮਨ੍ਨਾਗਤਾ ਨ ਵਿਸ੍ਸਸੇ ਨਰੋ.

ਗਮਨਿਯੋਤਿ ਗਣਿਕਾਯੋ. ਇਦਂ ਵੁਤ੍ਤਂ ਹੋਤਿ – ਸਮ੍ਮ ਪੁਣ੍ਣਮੁਖ, ਯਾਨੇਤਾਨਿ ਇਤ੍ਥੀਨਂ ‘‘ਵੇਸਿਯੋ’’ਤਿਆਦੀਨਿ ਨਾਮਾਨਿ, ਨ ਏਤਾਨਿ ਤਾਸਂ ਸਭਾਵਨਾਮਾਨਿ. ਨ ਹੇਤਾ ਵੇਸਿਯੋ ਨਾਮ ਗਮਨਿਯੋ ਨਾਮ ਬਨ੍ਧਕਿਯੋ ਨਾਮ, ਸਭਾਵਨਾਮਤੋ ਪਨ ਵਧਿਕਾਯੋ ਨਾਮ ਏਤਾਯੋ, ਯਾ ਏਤਾ ਵੇਸਿਯੋ ਨਾਰਿਯੋ ਗਮਨਿਯੋਤਿ ਵੁਚ੍ਚਨ੍ਤਿ. ਵਧਿਕਾਯੋਤਿ ਸਾਮਿਕਘਾਤਿਕਾਯੋ. ਸ੍ਵਾਯਮਤ੍ਥੋ ਮਹਾਹਂਸਜਾਤਕੇਨ ਦੀਪੇਤਬ੍ਬੋ. ਵੁਤ੍ਤਞ੍ਹੇਤਂ –

‘‘ਮਾਯਾ ਚੇਤਾ ਮਰੀਚੀ ਚ, ਸੋਕਾ ਰੋਗਾ ਚੁਪਦ੍ਦਵਾ;

ਖਰਾ ਚ ਬਨ੍ਧਨਾ ਚੇਤਾ, ਮਚ੍ਚੁਪਾਸਾ ਗੁਹਾਸਯਾ;

ਤਾਸੁ ਯੋ ਵਿਸ੍ਸਸੇ ਪੋਸੋ, ਸੋ ਨਰੇਸੁ ਨਰਾਧਮੋ’’ਤਿ. (ਜਾ. ੨.੨੧.੧੧੮);

ਵੇਣਿਕਤਾਤਿ ਕਤਵੇਣਿਯੋ. ਯਥਾ ਹਿ ਮੋਲ਼ਿਂ ਬਨ੍ਧਿਤ੍ਵਾ ਅਟਵਿਯਂ ਠਿਤਚੋਰੋ ਧਨਂ ਵਿਲੁਮ੍ਪਤਿ, ਏਵਮੇਤਾਪਿ ਕਿਲੇਸਵਸਂ ਨੇਤ੍ਵਾ ਧਨਂ ਵਿਲੁਮ੍ਪਨ੍ਤਿ. ਮਦਿਰਾਵ ਦਿਦ੍ਧਾਤਿ ਵਿਸਮਿਸ੍ਸਕਾ ਸੁਰਾ ਵਿਯ. ਯਥਾ ਸਾ ਵਿਕਾਰਂ ਦਸ੍ਸੇਤਿ, ਏਵਮੇਤਾਪਿ ਅਞ੍ਞੇਸੁ ਪੁਰਿਸੇਸੁ ਸਾਰਤ੍ਤਾ ਕਿਚ੍ਚਾਕਿਚ੍ਚਂ ਅਜਾਨਨ੍ਤਿਯੋ ਅਞ੍ਞਸ੍ਮਿਂ ਕਤ੍ਤਬ੍ਬੇ ਅਞ੍ਞਮੇਵ ਕਰੋਨ੍ਤਿਯੋ ਵਿਕਾਰਂ ਦਸ੍ਸੇਨ੍ਤਿ. ਵਾਚਾਸਨ੍ਥੁਤਿਯੋਤਿ ਯਥਾ ਵਾਣਿਜੋ ਅਤ੍ਤਨੋ ਭਣ੍ਡਸ੍ਸ ਵਣ੍ਣਮੇਵ ਭਣਤਿ, ਏਵਮੇਤਾਪਿ ਅਤ੍ਤਨੋ ਅਗੁਣਂ ਪਟਿਚ੍ਛਾਦੇਤ੍ਵਾ ਗੁਣਮੇਵ ਪਕਾਸੇਨ੍ਤਿ. ਵਿਪਰਿਵਤ੍ਤਾਯੋਤਿ ਯਥਾ ਇਸ੍ਸਮਿਗਸ੍ਸ ਸਿਙ੍ਗਂ ਪਰਿਵਤ੍ਤਿਤ੍ਵਾ ਠਿਤਂ, ਏਵਂ ਲਹੁਚਿਤ੍ਤਤਾਯ ਵਿਪਰਿਵਤ੍ਤਾਯੋਵ ਹੋਨ੍ਤਿ. ਉਰਗਮਿਵਾਤਿ ਉਰਗੋ ਵਿਯ ਮੁਸਾਵਾਦਿਤਾਯ ਦੁਜਿਵ੍ਹਾ ਨਾਮ. ਸੋਬ੍ਭਮਿਵਾਤਿ ਯਥਾ ਪਦਰਪਟਿਚ੍ਛਨ੍ਨੋ ਗੂਥਕੂਪੋ, ਏਵਂ ਵਤ੍ਥਾਲਙ੍ਕਾਰਪਟਿਚ੍ਛਨ੍ਨਾ ਹੁਤ੍ਵਾ ਵਿਚਰਨ੍ਤਿ. ਯਥਾ ਚ ਕਚਵਰੇਹਿ ਪਟਿਚ੍ਛਨ੍ਨੋ ਆਵਾਟੋ ਅਕ੍ਕਨ੍ਤੋ ਪਾਦਦੁਕ੍ਖਂ ਜਨੇਤਿ, ਏਵਮੇਤਾਪਿ ਵਿਸ੍ਸਾਸੇਨ ਉਪਸੇਵਿਯਮਾਨਾ. ਪਾਤਾਲਮਿਵਾਤਿ ਯਥਾ ਮਹਾਸਮੁਦ੍ਦੇ ਪਾਤਾਲਂ ਦੁਪ੍ਪੂਰਂ, ਏਵਮੇਤਾਪਿ ਮੇਥੁਨੇਨ ਵਿਜਾਯਨੇਨ ਅਲਙ੍ਕਾਰੇਨਾਤਿ ਤੀਹਿ ਦੁਪ੍ਪੂਰਾ. ਤੇਨੇਵਾਹ – ‘‘ਤਿਣ੍ਣਂ, ਭਿਕ੍ਖਵੇ, ਧਮ੍ਮਾਨਂ ਅਤਿਤ੍ਤੋ ਮਾਤੁਗਾਮੋ’’ਤਿਆਦਿ.

ਰਕ੍ਖਸੀ ਵਿਯਾਤਿ ਯਥਾ ਰਕ੍ਖਸੀ ਨਾਮ ਮਂਸਗਿਦ੍ਧਤਾਯ ਧਨੇਨ ਨ ਸਕ੍ਕਾ ਤੋਸੇਤੁਂ, ਬਹੁਮ੍ਪਿ ਧਨਂ ਪਟਿਕ੍ਖਿਪਿਤ੍ਵਾ ਮਂਸਮੇਵ ਪਤ੍ਥੇਤਿ, ਏਵਮੇਤਾਪਿ ਮੇਥੁਨਗਿਦ੍ਧਤਾਯ ਬਹੁਨਾਪਿ ਧਨੇਨ ਨ ਤੁਸ੍ਸਨ੍ਤਿ, ਧਨਂ ਅਗਣੇਤ੍ਵਾ ਮੇਥੁਨਮੇਵ ਪਤ੍ਥੇਨ੍ਤਿ. ਯਮੋਵਾਤਿ ਯਥਾ ਯਮੋ ਏਕਨ੍ਤਹਰੋ ਨ ਕਿਞ੍ਚਿ ਪਰਿਹਰਤਿ, ਏਵਮੇਤਾਪਿ ਜਾਤਿਸਮ੍ਪਨ੍ਨਾਦੀਸੁ ਨ ਕਞ੍ਚਿ ਪਰਿਹਰਨ੍ਤਿ, ਸਬ੍ਬਂ ਕਿਲੇਸਵਸੇਨ ਸੀਲਾਦਿਵਿਨਾਸਂ ਪਾਪੇਤ੍ਵਾ ਦੁਤਿਯਚਿਤ੍ਤਵਾਰੇ ਨਿਰਯਂ ਉਪਨੇਨ੍ਤਿ. ਸਿਖੀਰਿਵਾਤਿ ਯਥਾ ਸਿਖੀ ਸੁਚਿਮ੍ਪਿ ਅਸੁਚਿਮ੍ਪਿ ਸਬ੍ਬਂ ਭਕ੍ਖਯਤਿ, ਤਥੇਤਾਪਿ ਹੀਨੁਤ੍ਤਮੇ ਸਬ੍ਬੇ ਸੇਵਨ੍ਤਿ. ਨਦੀਉਪਮਾਯਮ੍ਪਿ ਏਸੇਵ ਨਯੋ. ਯੇਨਕਾ ਮਂਚਰਾਤਿ ਭੁਮ੍ਮਤ੍ਥੇ ਕਰਣਵਚਨਂ, ਯਤ੍ਥ ਏਤਾਸਂ ਕਾਮੋ ਹੋਤਿ, ਤਤ੍ਥੇਵ ਧਾਵਨ੍ਤਿ. ਨੇਰੂਤਿ ਹਿਮਵਤਿ ਏਕੋ ਸੁਵਣ੍ਣਪਬ੍ਬਤੋ, ਤਂ ਉਪਗਤਾ ਕਾਕਾਪਿ ਸੁਵਣ੍ਣਵਣ੍ਣਾਵ ਹੋਨ੍ਤਿ. ਯਥਾ ਸੋ, ਏਵਂ ਏਤਾਪਿ ਨਿਬ੍ਬਿਸੇਸਕਰਾ ਅਤ੍ਤਾਨਂ ਉਪਗਤਂ ਏਕਸਦਿਸਂ ਕਤ੍ਵਾ ਪਸ੍ਸਨ੍ਤਿ.

ਵਿਸਰੁਕ੍ਖੋਤਿ ਅਮ੍ਬਸਦਿਸੋ ਕਿਂਪਕ੍ਕਰੁਕ੍ਖੋ. ਸੋ ਨਿਚ੍ਚਮੇਵ ਫਲਤਿ, ਵਣ੍ਣਾਦਿਸਮ੍ਪਨ੍ਨੋ ਚ ਹੋਤਿ, ਤੇਨ ਨਂ ਨਿਰਾਸਙ੍ਕਾ ਪਰਿਭੁਞ੍ਜਿਤ੍ਵਾ ਮਰਨ੍ਤਿ, ਏਵਮੇਵ ਤਾਪਿ ਰੂਪਾਦਿਵਸੇਨ ਨਿਚ੍ਚਫਲਿਤਾ ਰਮਣੀਯਾ ਵਿਯ ਖਾਯਨ੍ਤਿ. ਸੇਵਿਯਮਾਨਾ ਪਨ ਪਮਾਦਂ ਉਪ੍ਪਾਦੇਤ੍ਵਾ ਅਪਾਯੇਸੁ ਪਾਤੇਨ੍ਤਿ. ਤੇਨ ਵੁਤ੍ਤਂ –

‘‘ਆਯਤਿਂ ਦੋਸਂ ਨਞ੍ਞਾਯ, ਯੋ ਕਾਮੇ ਪਟਿਸੇਵਤਿ;

ਵਿਪਾਕਨ੍ਤੇ ਹਨਨ੍ਤਿ ਨਂ, ਕਿਂਪਕ੍ਕਮਿਵ ਭਕ੍ਖਿਤ’’ਨ੍ਤਿ. (ਜਾ. ੧.੧.੮੫);

ਯਥਾ ਵਾ ਵਿਸਰੁਕ੍ਖੋ ਨਿਚ੍ਚਫਲਿਤੋ ਸਦਾ ਅਨਤ੍ਥਾਵਹੋ ਹੋਤਿ, ਏਵਮੇਤਾਪਿ ਸੀਲਾਦਿਵਿਨਾਸਨਵਸੇਨ. ਯਥਾ ਵਿਸਰੁਕ੍ਖਸ੍ਸ ਮੂਲਮ੍ਪਿ ਤਚੋਪਿ ਪਤ੍ਤਮ੍ਪਿ ਪੁਪ੍ਫਮ੍ਪਿ ਫਲਮ੍ਪਿ ਵਿਸਮੇਵਾਤਿ ਨਿਚ੍ਚਫਲੋ, ਤਥੇਵ ਤਾਸਂ ਰੂਪਮ੍ਪਿ…ਪੇ… ਫੋਟ੍ਠਬ੍ਬਮ੍ਪਿ ਵਿਸਮੇਵਾਤਿ ਵਿਸਰੁਕ੍ਖੋ ਵਿਯ ਨਿਚ੍ਚਫਲਿਤਾਯੋਤਿ.

‘‘ਪਨੁਤ੍ਤਰੇਤ੍ਥਾ’’ਤਿ ਗਾਥਾਬਨ੍ਧੇਨ ਤਮਤ੍ਥਂ ਪਾਕਟਂ ਕਾਤੁਂ ਏਵਮਾਹ. ਤਤ੍ਥ ਰਤਨਨ੍ਤਕਰਿਤ੍ਥਿਯੋਤਿ ਸਾਮਿਕੇਹਿ ਦੁਕ੍ਖਸਮ੍ਭਤਾਨਂ ਰਤਨਾਨਂ ਅਨ੍ਤਰਾਯਕਰਾ ਇਤ੍ਥਿਯੋ ਏਤਾਨਿ ਪਰੇਸਂ ਦਤ੍ਵਾ ਅਨਾਚਾਰਂ ਚਰਨ੍ਤਿ.

ਇਤੋ ਪਰਂ ਨਾਨਪ੍ਪਕਾਰੇਨ ਅਤ੍ਤਨੋ ਧਮ੍ਮਕਥਾਵਿਲਾਸਂ ਦਸ੍ਸੇਨ੍ਤੋ ਆਹ –

‘‘ਚਤ੍ਤਾਰਿਮਾਨਿ, ਸਮ੍ਮ ਪੁਣ੍ਣਮੁਖ, ਯਾਨਿ ਵਤ੍ਥੂਨਿ ਕਿਚ੍ਚੇ ਜਾਤੇ ਅਨਤ੍ਥਚਰਾਨਿ ਭਵਨ੍ਤਿ, ਤਾਨਿ ਪਰਕੁਲੇ ਨ ਵਾਸੇਤਬ੍ਬਾਨਿ, ਗੋਣਂ ਧੇਨੁਂ ਯਾਨਂ ਭਰਿਯਾ. ਚਤ੍ਤਾਰਿ ਏਤਾਨਿ ਪਣ੍ਡਿਤੋ ਧਨਾਨਿ ਘਰਾ ਨ ਵਿਪ੍ਪਵਾਸਯੇ. ਭਵਤਿ ਚ ਪਨੁਤ੍ਤਰੇਤ੍ਥ ਵਾਕ੍ਯਂ –

੨੯੬.

‘ਗੋਣਂ ਧੇਨੁਞ੍ਚ ਯਾਨਞ੍ਚ, ਭਰਿਯਂ ਞਾਤਿਕੁਲੇ ਨ ਵਾਸਯੇ;

ਭਞ੍ਜਨ੍ਤਿ ਰਥਂ ਅਯਾਨਕਾ, ਅਤਿਵਾਹੇਨ ਹਨਨ੍ਤਿ ਪੁਙ੍ਗਵਂ;

ਦੋਹੇਨ ਹਨਨ੍ਤਿ ਵਚ੍ਛਕਂ, ਭਰਿਯਾ ਞਾਤਿਕੁਲੇ ਪਦੁਸ੍ਸਤੀ’’’ਤਿ.

‘‘ਛ ਇਮਾਨਿ, ਸਮ੍ਮ ਪੁਣ੍ਣਮੁਖ, ਯਾਨਿ ਵਤ੍ਥੂਨਿ ਕਿਚ੍ਚੇ ਜਾਤੇ ਅਨਤ੍ਥਚਰਾਨਿ ਭਵਨ੍ਤਿ –

੨੯੭.

‘ਅਗੁਣਂ ਧਨੁ ਞਾਤਿਕੁਲੇ ਚ ਭਰਿਯਾ, ਪਾਰਂ ਨਾਵਾ ਅਕ੍ਖਭਗ੍ਗਞ੍ਚ ਯਾਨਂ;

ਦੂਰੇ ਮਿਤ੍ਤੋ ਪਾਪਸਹਾਯਕੋ ਚ, ਕਿਚ੍ਚੇ ਜਾਤੇ ਅਨਤ੍ਥਚਰਾਨਿ ਭਵਨ੍ਤੀ’’’ਤਿ.

‘‘ਅਟ੍ਠਹਿ ਖਲੁ, ਸਮ੍ਮ ਪੁਣ੍ਣਮੁਖ ਠਾਨੇਹਿ ਇਤ੍ਥੀ ਸਾਮਿਕਂ ਅਵਜਾਨਾਤਿ – ਦਲਿਦ੍ਦਤਾ, ਆਤੁਰਤਾ, ਜਿਣ੍ਣਤਾ, ਸੁਰਾਸੋਣ੍ਡਤਾ, ਮੁਦ੍ਧਤਾ, ਪਮਤ੍ਤਤਾ, ਸਬ੍ਬਕਿਚ੍ਚੇਸੁ ਅਨੁਵਤ੍ਤਨਤਾ, ਸਬ੍ਬਧਨਅਨੁਪ੍ਪਦਾਨੇਨ. ਇਮੇਹਿ ਖਲੁ, ਸਮ੍ਮ ਪੁਣ੍ਣਮੁਖ, ਅਟ੍ਠਹਿ ਠਾਨੇਹਿ ਇਤ੍ਥੀ ਸਾਮਿਕਂ ਅਵਜਾਨਾਤਿ. ਭਵਤਿ ਚ ਪਨੁਤ੍ਤਰੇਤ੍ਥ ਵਾਕ੍ਯਂ –

੨੯੮.

‘‘‘ਦਲਿਦ੍ਦਂ ਆਤੁਰਞ੍ਚਾਪਿ, ਜਿਣ੍ਣਕਂ ਸੁਰਸੋਣ੍ਡਕਂ;

ਪਮਤ੍ਤਂ ਮੁਦ੍ਧਪਤ੍ਤਞ੍ਚ, ਸਬ੍ਬਕਿਚ੍ਚੇਸੁ ਹਾਪਨਂ;

ਸਬ੍ਬਕਾਮਪ੍ਪਦਾਨੇਨ, ਅਵਜਾਨਾਤਿ ਸਾਮਿਕ’’’ਨ੍ਤਿ.

‘‘ਨਵਹਿ ਖਲੁ, ਸਮ੍ਮ ਪੁਣ੍ਣਮੁਖ ਠਾਨੇਹਿ ਇਤ੍ਥੀ ਪਦੋਸਮਾਹਰਤਿ – ਆਰਾਮਗਮਨਸੀਲਾ ਚ ਹੋਤਿ, ਉਯ੍ਯਾਨਗਮਨਸੀਲਾ ਚ ਹੋਤਿ, ਨਦੀਤਿਤ੍ਥਗਮਨਸੀਲਾ ਚ ਹੋਤਿ, ਞਾਤਿਕੁਲਗਮਨਸੀਲਾ ਚ ਹੋਤਿ, ਪਰਕੁਲਗਮਨਸੀਲਾ ਚ ਹੋਤਿ, ਆਦਾਸਦੁਸ੍ਸਮਣ੍ਡਨਾਨੁਯੋਗਮਨੁਯੁਤ੍ਤਸੀਲਾ ਚ ਹੋਤਿ, ਮਜ੍ਜਪਾਯਿਨੀ ਚ ਹੋਤਿ, ਨਿਲ੍ਲੋਕਨਸੀਲਾ ਚ ਹੋਤਿ, ਸਦ੍ਵਾਰਟ੍ਠਾਯਿਨੀ ਚ ਹੋਤਿ. ਇਮੇਹਿ ਖਲੁ, ਸਮ੍ਮ ਪੁਣ੍ਣਮੁਖ, ਨਵਹਿ ਠਾਨੇਹਿ ਇਤ੍ਥੀ ਪਦੋਸਮਾਹਰਤਿ. ਭਵਤਿ ਚ ਪਨੁਤ੍ਤਰੇਤ੍ਥ ਵਾਕ੍ਯਂ –

੨੯੯.

‘ਆਰਾਮਸੀਲਾ ਚ ਉਯ੍ਯਾਨਂ, ਨਦੀ ਞਾਤਿ ਪਰਕੁਲਂ;

ਆਦਾਸਦੁਸ੍ਸਮਣ੍ਡਨਮਨੁਯੁਤ੍ਤਾ, ਯਾ ਚਿਤ੍ਥੀ ਮਜ੍ਜਪਾਯਿਨੀ.

੩੦੦.

‘‘‘ਯਾ ਚ ਨਿਲ੍ਲੋਕਨਸੀਲਾ, ਯਾ ਚ ਸਦ੍ਵਾਰਠਾਯਿਨੀ;

ਨਵਹੇਤੇਹਿ ਠਾਨੇਹਿ, ਪਦੋਸਮਾਹਰਨ੍ਤਿ ਇਤ੍ਥਿਯੋ’’’ਤਿ.

‘‘ਚਤ੍ਤਾਲੀਸਾਯ ਖਲੁ, ਸਮ੍ਮ ਪੁਣ੍ਣਮੁਖ, ਠਾਨੇਹਿ ਇਤ੍ਥੀ ਪੁਰਿਸਂ ਅਚ੍ਚਾਚਰਤਿ – ਵਿਜਮ੍ਭਤਿ, ਵਿਨਮਤਿ, ਵਿਲਸਤਿ, ਵਿਲਜ੍ਜਤਿ, ਨਖੇਨ ਨਖਂ ਘਟ੍ਟੇਤਿ, ਪਾਦੇਨ ਪਾਦਂ ਅਕ੍ਕਮਤਿ, ਕਟ੍ਠੇਨ ਪਥਵਿਂ ਵਿਲਿਖਤਿ, ਦਾਰਕਂ ਉਲ੍ਲਙ੍ਘਤਿ ਉਲ੍ਲਙ੍ਘਾਪੇਤਿ, ਕੀਲ਼ਤਿ ਕੀਲ਼ਾਪੇਤਿ, ਚੁਮ੍ਬਤਿ ਚੁਮ੍ਬਾਪੇਤਿ, ਭੁਞ੍ਜਤਿ ਭੁਞ੍ਜਾਪੇਤਿ, ਦਦਾਤਿ, ਯਾਚਤਿ, ਕਤਮਨੁਕਰੋਤਿ, ਉਚ੍ਚਂ ਭਾਸਤਿ, ਨੀਚਂ ਭਾਸਤਿ, ਅਵਿਚ੍ਚਂ ਭਾਸਤਿ, ਵਿਵਿਚ੍ਚਂ ਭਾਸਤਿ, ਨਚ੍ਚੇਨ ਗੀਤੇਨ ਵਾਦਿਤੇਨ ਰੋਦਨੇਨ ਵਿਲਸਿਤੇਨ ਵਿਭੂਸਿਤੇਨ ਜਗ੍ਘਤਿ, ਪੇਕ੍ਖਤਿ, ਕਟਿਂ ਚਾਲੇਤਿ, ਗੁਯ੍ਹਭਣ੍ਡਕਂ ਸਞ੍ਚਾਲੇਤਿ, ਊਰੁਂ ਵਿਵਰਤਿ, ਊਰੁਂ ਪਿਦਹਤਿ, ਥਨਂ ਦਸ੍ਸੇਤਿ, ਕਚ੍ਛਂ ਦਸ੍ਸੇਤਿ, ਨਾਭਿਂ ਦਸ੍ਸੇਤਿ, ਅਕ੍ਖਿਂ ਨਿਖਨਤਿ, ਭਮੁਕਂ ਉਕ੍ਖਿਪਤਿ, ਓਟ੍ਠਂ ਉਪਲਿਖਤਿ, ਜਿਵ੍ਹਂ ਨਿਲ੍ਲਾਲੇਤਿ, ਦੁਸ੍ਸਂ ਮੁਞ੍ਚਤਿ, ਦੁਸ੍ਸਂ ਪਟਿਬਨ੍ਧਤਿ, ਸਿਰਸਂ ਮੁਞ੍ਚਤਿ, ਸਿਰਸਂ ਬਨ੍ਧਤਿ. ਇਮੇਹਿ ਖਲੁ, ਸਮ੍ਮ ਪੁਣ੍ਣਮੁਖ, ਚਤ੍ਤਾਲੀਸਾਯ ਠਾਨੇਹਿ ਇਤ੍ਥੀ ਪੁਰਿਸਂ ਅਚ੍ਚਾਚਰਤਿ.

‘‘ਪਞ੍ਚਵੀਸਾਯ ਖਲੁ, ਸਮ੍ਮ ਪੁਣ੍ਣਮੁਖ, ਠਾਨੇਹਿ ਇਤ੍ਥੀ ਪਦੁਟ੍ਠਾ ਵੇਦਿਤਬ੍ਬਾ ਭਵਤਿ – ਸਾਮਿਕਸ੍ਸ ਪਵਾਸਂ ਵਣ੍ਣੇਤਿ, ਪਵੁਟ੍ਠਂ ਨ ਸਰਤਿ, ਆਗਤਂ ਨਾਭਿਨਨ੍ਦਤਿ, ਅਵਣ੍ਣਂ ਤਸ੍ਸ ਭਣਤਿ, ਵਣ੍ਣਂ ਤਸ੍ਸ ਨ ਭਣਤਿ, ਅਨਤ੍ਥਂ ਤਸ੍ਸ ਚਰਤਿ, ਅਤ੍ਥਂ ਤਸ੍ਸ ਨ ਚਰਤਿ, ਅਕਿਚ੍ਚਂ ਤਸ੍ਸ ਕਰੋਤਿ, ਕਿਚ੍ਚਂ ਤਸ੍ਸ ਨ ਕਰੋਤਿ, ਪਰਿਦਹਿਤ੍ਵਾ ਸਯਤਿ, ਪਰਮ੍ਮੁਖੀ ਨਿਪਜ੍ਜਤਿ, ਪਰਿਵਤ੍ਤਕਜਾਤਾ ਖੋ ਪਨ ਹੋਤਿ ਕੁਙ੍ਕੁਮਿਯਜਾਤਾ, ਦੀਘਂ ਅਸ੍ਸਸਤਿ, ਦੁਕ੍ਖਂ ਵੇਦਯਤਿ, ਉਚ੍ਚਾਰਪਸ੍ਸਾਵਂ ਅਭਿਣ੍ਹਂ ਗਚ੍ਛਤਿ, ਵਿਲੋਮਮਾਚਰਤਿ, ਪਰਪੁਰਿਸਸਦ੍ਦਂ ਸੁਤ੍ਵਾ ਕਣ੍ਣਸੋਤਂ ਵਿਵਰਮੋਦਹਤਿ, ਨਿਹਤਭੋਗਾ ਖੋ ਪਨ ਹੋਤਿ, ਪਟਿਵਿਸ੍ਸਕੇਹਿ ਸਨ੍ਥਵਂ ਕਰੋਤਿ, ਨਿਕ੍ਖਨ੍ਤਪਾਦਾ ਖੋ ਪਨ ਹੋਤਿ ਵਿਸਿਖਾਨੁਚਾਰਿਨੀ, ਅਤਿਚਾਰਿਨੀ ਖੋ ਪਨ ਹੋਤਿ ਨਿਚ੍ਚਂ ਸਾਮਿਕੇ ਅਗਾਰਵਾ ਪਦੁਟ੍ਠਮਨਸਙ੍ਕਪ੍ਪਾ, ਅਭਿਣ੍ਹਂ ਦ੍ਵਾਰੇ ਤਿਟ੍ਠਤਿ, ਕਚ੍ਛਾਨਿ ਅਙ੍ਗਾਨਿ ਥਨਾਨਿ ਦਸ੍ਸੇਤਿ, ਦਿਸੋਦਿਸਂ ਗਨ੍ਤ੍ਵਾ ਪੇਕ੍ਖਤਿ. ਇਮੇਹਿ ਖਲੁ ਸਮ੍ਮ ਪੁਣ੍ਣਮੁਖ, ਪਞ੍ਚਵੀਸਾਯ ਠਾਨੇਹਿ ਇਤ੍ਥੀ ਪਦੁਟ੍ਠਾ ਵੇਦਿਤਬ੍ਬਾ ਭਵਤਿ. ਭਵਤਿ ਚ ਪਨੁਤ੍ਤਰੇਤ੍ਥ ਵਾਕ੍ਯਂ –

੩੦੧.

‘ਪਵਾਸਂ ਤਸ੍ਸ ਵਣ੍ਣੇਤਿ, ਗਤਂ ਤਸ੍ਸ ਨ ਸੋਚਤਿ;

ਦਿਸ੍ਵਾਨ ਪਤਿਮਾਗਤਂ ਨਾਭਿਨਨ੍ਦਤਿ, ਭਤ੍ਤਾਰਵਣ੍ਣਂ ਨ ਕਦਾਚਿ ਭਾਸਤਿ;

ਏਤੇ ਪਦੁਟ੍ਠਾਯ ਭਵਨ੍ਤਿ ਲਕ੍ਖਣਾ.

੩੦੨.

‘ਅਨਤ੍ਥਂ ਤਸ੍ਸ ਚਰਤਿ ਅਸਞ੍ਞਤਾ, ਅਤ੍ਥਞ੍ਚ ਹਾਪੇਤਿ ਅਕਿਚ੍ਚਕਾਰਿਨੀ;

ਪਰਿਦਹਿਤ੍ਵਾ ਸਯਤਿ ਪਰਮ੍ਮੁਖੀ, ਏਤੇ ਪਦੁਟ੍ਠਾਯ ਭਵਨ੍ਤਿ ਲਕ੍ਖਣਾ.

੩੦੩.

‘ਪਰਿਵਤ੍ਤਜਾਤਾ ਚ ਭਵਤਿ ਕੁਙ੍ਕੁਮੀ, ਦੀਘਞ੍ਚ ਅਸ੍ਸਸਤਿ ਦੁਕ੍ਖਵੇਦਿਨੀ;

ਉਚ੍ਚਾਰਪਸ੍ਸਾਵਮਭਿਣ੍ਹਂ ਗਚ੍ਛਤਿ, ਏਤੇ ਪਦੁਟ੍ਠਾਯ ਭਵਨ੍ਤਿ ਲਕ੍ਖਣਾ.

੩੦੪.

‘ਵਿਲੋਮਮਾਚਰਤਿ ਅਕਿਚ੍ਚਕਾਰਿਨੀ, ਸਦ੍ਦਂ ਨਿਸਾਮੇਤਿ ਪਰਸ੍ਸ ਭਾਸਤੋ;

ਨਿਹਤਭੋਗਾ ਚ ਕਰੋਤਿ ਸਨ੍ਥਵਂ, ਏਤੇ ਪਦੁਟ੍ਠਾਯ ਭਵਨ੍ਤਿ ਲਕ੍ਖਣਾ.

੩੦੫.

‘ਕਿਚ੍ਛੇਨ ਲਦ੍ਧਂ ਕਸਿਰਾਭਤਂ ਧਨਂ, ਵਿਤ੍ਤਂ ਵਿਨਾਸੇਤਿ ਦੁਕ੍ਖੇਨ ਸਮ੍ਭਤਂ;

ਪਟਿਵਿਸ੍ਸਕੇਹਿ ਚ ਕਰੋਤਿ ਸਨ੍ਥਵਂ, ਏਤੇ ਪਦੁਟ੍ਠਾਯ ਭਵਨ੍ਤਿ ਲਕ੍ਖਣਾ.

੩੦੬.

‘ਨਿਕ੍ਖਨ੍ਤਪਾਦਾ ਵਿਸਿਖਾਨੁਚਾਰਿਨੀ, ਨਿਚ੍ਚਞ੍ਚ ਸਾਮਿਮ੍ਹਿ ਪਦੁਟ੍ਠਮਾਨਸਾ;

ਅਤਿਚਾਰਿਨੀ ਹੋਤਿ ਅਪੇਤਗਾਰਵਾ, ਏਤੇ ਪਦੁਟ੍ਠਾਯ ਭਵਨ੍ਤਿ ਲਕ੍ਖਣਾ.

੩੦੭.

‘ਅਭਿਕ੍ਖਣਂ ਤਿਟ੍ਠਤਿ ਦ੍ਵਾਰਮੂਲੇ, ਥਨਾਨਿ ਕਚ੍ਛਾਨਿ ਚ ਦਸ੍ਸਯਨ੍ਤੀ;

ਦਿਸੋਦਿਸਂ ਪੇਕ੍ਖਤਿ ਭਨ੍ਤਚਿਤ੍ਤਾ, ਏਤੇ ਪਦੁਟ੍ਠਾਯ ਭਵਨ੍ਤਿ ਲਕ੍ਖਣਾ.

੩੦੮.

‘ਸਬ੍ਬਾ ਨਦੀ ਵਙ੍ਕਗਤੀ, ਸਬ੍ਬੇ ਕਟ੍ਠਮਯਾ ਵਨਾ;

ਸਬ੍ਬਿਤ੍ਥਿਯੋ ਕਰੇ ਪਾਪਂ, ਲਭਮਾਨੇ ਨਿਵਾਤਕੇ.

੩੦੯.

‘ਸਚੇ ਲਭੇਥ ਖਣਂ ਵਾ ਰਹੋ ਵਾ, ਨਿਵਾਤਕਂ ਵਾਪਿ ਲਭੇਥ ਤਾਦਿਸਂ;

ਸਬ੍ਬਾਵ ਇਤ੍ਥੀ ਕਯਿਰੁਂ ਨੁ ਪਾਪਂ, ਅਞ੍ਞਂ ਅਲਤ੍ਥ ਪੀਠਸਪ੍ਪਿਨਾਪਿ ਸਦ੍ਧਿਂ.

੩੧੦.

‘ਨਰਾਨਮਾਰਾਮਕਰਾਸੁ ਨਾਰਿਸੁ, ਅਨੇਕਚਿਤ੍ਤਾਸੁ ਅਨਿਗ੍ਗਹਾਸੁ ਚ;

ਸਬ੍ਬਤ੍ਥ ਨਾਪੀਤਿਕਰਾਪਿ ਚੇ ਸਿਯਾ, ਨ ਵਿਸ੍ਸਸੇ ਤਿਤ੍ਥਸਮਾ ਹਿ ਨਾਰਿਯੋ’’’ਤਿ.

ਤਤ੍ਥ ਗੋਣਂ ਧੇਨੁਨ੍ਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ. ਞਾਤਿਕੁਲੇ ਪਦੁਸ੍ਸਤੀਤਿ ਤਤ੍ਥ ਸਾ ਨਿਬ੍ਭਯਾ ਹੁਤ੍ਵਾ ਤਰੁਣਕਾਲਤੋ ਪਟ੍ਠਾਯ ਵਿਸ੍ਸਾਸਕੇਹਿ ਦਾਸਾਦੀਹਿਪਿ ਸਦ੍ਧਿਂ ਅਨਾਚਾਰਂ ਚਰਤਿ, ਞਾਤਕਾ ਞਤ੍ਵਾਪਿ ਨਿਗ੍ਗਹਂ ਨ ਕਰੋਨ੍ਤਿ, ਅਤ੍ਤਨੋ ਅਕਿਤ੍ਤਿਂ ਪਰਿਹਰਮਾਨਾ ਅਜਾਨਨ੍ਤਾ ਵਿਯ ਹੋਨ੍ਤਿ. ਅਨਤ੍ਥਚਰਾਨੀਤਿ ਅਚਰਿਤਬ੍ਬਾਨਿ ਅਤ੍ਥਾਨਿ, ਅਕਿਚ੍ਚਕਾਰਾਨੀਤਿ ਅਤ੍ਥੋ. ਅਗੁਣਨ੍ਤਿ ਜਿਯਾਰਹਿਤਂ. ਪਾਪਸਹਾਯਕੋਤਿ ਦੁਮ੍ਮਿਤ੍ਤੋ.

ਦਲਿਦ੍ਦਤਾਤਿ ਦਲਿਦ੍ਦਤਾਯ. ਸੇਸਪਦੇਸੁਪਿ ਏਸੇਵ ਨਯੋ. ਤਤ੍ਥ ਦਲਿਦ੍ਦੋ ਅਲਙ੍ਕਾਰਾਦੀਨਂ ਅਭਾਵਤੋ ਕਿਲੇਸੇਨ ਸਙ੍ਗਣ੍ਹਿਤੁਂ ਨ ਸਕ੍ਕੋਤੀਤਿ ਤਂ ਅਵਜਾਨਾਤਿ. ਗਿਲਾਨੋ ਵਤ੍ਥੁਕਾਮਕਿਲੇਸਕਾਮੇਹਿ ਸਙ੍ਗਣ੍ਹਿਤੁਂ ਨ ਸਕ੍ਕੋਤਿ. ਜਰਾਜਿਣ੍ਣੋ ਕਾਯਿਕਵਾਚਸਿਕਖਿਡ੍ਡਾਰਤਿਸਮਤ੍ਥੋ ਨ ਹੋਤਿ. ਸੁਰਾਸੋਣ੍ਡੋ ਤਸ੍ਸਾ ਹਤ੍ਥਪਿਲ਼ਨ੍ਧਨਾਦੀਨਿਪਿ ਸੁਰਾਘਰਞ੍ਞੇਵ ਪਵੇਸੇਤਿ. ਮੁਦ੍ਧੋ ਅਨ੍ਧਬਾਲੋ ਰਤਿਕੁਸਲੋ ਨ ਹੋਤਿ. ਪਮਤ੍ਤੋ ਦਾਸਿਸੋਣ੍ਡੋ ਹੁਤ੍ਵਾ ਘਰਦਾਸੀਹਿ ਸਦ੍ਧਿਂ ਸਂਵਸਤਿ, ਭਰਿਯਂ ਪਨ ਅਕ੍ਕੋਸਤਿ ਪਰਿਭਾਸਤਿ, ਤੇਨ ਨਂ ਅਵਜਾਨਾਤਿ. ਸਬ੍ਬਕਿਚ੍ਚੇਸੁ ਅਨੁਵਤ੍ਤਨ੍ਤਂ ‘‘ਅਯਂ ਨਿਤ੍ਤੇਜੋ, ਮਮੇਵ ਅਨੁਵਤ੍ਤਤੀ’’ਤਿ ਤਂ ਅਕ੍ਕੋਸਤਿ ਪਰਿਭਾਸਤਿ. ਯੋ ਪਨ ਸਬ੍ਬਂ ਧਨਂ ਅਨੁਪ੍ਪਦੇਤਿ ਕੁਟੁਮ੍ਬਂ ਪਟਿਚ੍ਛਾਪੇਤਿ, ਤਸ੍ਸ ਭਰਿਯਾ ਸਬ੍ਬਂ ਧਨਸਾਰਂ ਹਤ੍ਥੇ ਕਤ੍ਵਾ ਤਂ ਦਾਸਂ ਵਿਯ ਅਵਜਾਨਾਤਿ, ਇਚ੍ਛਮਾਨਾ ‘‘ਕੋ ਤਯਾ ਅਤ੍ਥੋ’’ਤਿ ਘਰਤੋਪਿ ਨਂ ਨਿਕ੍ਕਡ੍ਢਤਿ. ਮੁਦ੍ਧਪਤ੍ਤਨ੍ਤਿ ਮੁਦ੍ਧਭਾਵਪ੍ਪਤ੍ਤਂ.

ਪਦੋਸਮਾਹਰਤੀਤਿ ਸਾਮਿਕੇ ਪਦੋਸਂ ਆਹਰਤਿ ਦੁਸ੍ਸਤਿ, ਪਾਪਕਮ੍ਮਂ ਕਰੋਤੀਤਿ ਅਤ੍ਥੋ. ਆਰਾਮਗਮਨਸੀਲਾਤਿ ਸਾਮਿਕਂ ਆਪੁਚ੍ਛਾ ਵਾ ਅਨਾਪੁਚ੍ਛਾ ਵਾ ਅਭਿਣ੍ਹਂ ਪੁਪ੍ਫਾਰਾਮਾਦੀਸੁ ਅਞ੍ਞਤਰਂ ਗਨ੍ਤ੍ਵਾ ਤਤ੍ਥ ਅਨਾਚਾਰਂ ਚਰਿਤ੍ਵਾ ‘‘ਅਜ੍ਜ ਮਯਾ ਆਰਾਮੇ ਰੁਕ੍ਖਦੇਵਤਾਯ ਬਲਿਕਮ੍ਮਂ ਕਤ’’ਨ੍ਤਿਆਦੀਨਿ ਵਤ੍ਵਾ ਬਾਲਸਾਮਿਕਂ ਸਞ੍ਞਾਪੇਤਿ. ਪਣ੍ਡਿਤੋ ਪਨ ‘‘ਅਦ੍ਧਾ ਏਸਾ ਤਤ੍ਥ ਅਨਾਚਾਰਂ ਚਰਤੀ’’ਤਿ ਪੁਨ ਤਸ੍ਸਾ ਗਨ੍ਤੁਂ ਨ ਦੇਤਿ. ਏਵਂ ਸਬ੍ਬਪਦੇਸੁਪਿ ਅਤ੍ਥੋ ਵੇਦਿਤਬ੍ਬੋ. ਪਰਕੁਲਨ੍ਤਿ ਸਨ੍ਦਿਟ੍ਠਸਮ੍ਭਤ੍ਤਾਦੀਨਂ ਗੇਹਂ. ਤਂ ਸਾ ‘‘ਅਸੁਕਕੁਲੇ ਮੇ ਵਡ੍ਢਿ ਪਯੋਜਿਤਾ ਅਤ੍ਥਿ, ਤਾਵਕਾਲਿਕਂ ਦਿਨ੍ਨਕਂ ਅਤ੍ਥਿ, ਤਂ ਸਾਧੇਮੀ’’ਤਿਆਦੀਨਿ ਵਤ੍ਵਾ ਗਚ੍ਛਤਿ. ਨਿਲ੍ਲੋਕਨਸੀਲਾਤਿ ਵਾਤਪਾਨਨ੍ਤਰਾਦੀਹਿ ਓਲੋਕਨਸੀਲਾ. ਸਦ੍ਵਾਰਟ੍ਠਾਯਿਨੀਤਿ ਅਤ੍ਤਨੋ ਅਙ੍ਗਪਚ੍ਚਙ੍ਗਾਨਿ ਦਸ੍ਸੇਨ੍ਤੀ ਸਦ੍ਵਾਰੇ ਤਿਟ੍ਠਤਿ.

ਅਚ੍ਚਾਚਰਤੀਤਿ ਅਤਿਕ੍ਕਮ੍ਮ ਚਰਤਿ, ਸਾਮਿਕਸ੍ਸ ਸਨ੍ਤਿਕੇ ਠਿਤਾਵ ਅਞ੍ਞਸ੍ਸ ਨਿਮਿਤ੍ਤਂ ਦਸ੍ਸੇਤੀਤਿ ਅਤ੍ਥੋ. ਵਿਜਮ੍ਭਤੀਤਿ ‘‘ਅਹਂ ਤਂ ਦਿਸ੍ਵਾ ਵਿਜਮ੍ਭਿਸ੍ਸਾਮਿ, ਤਾਯ ਸਞ੍ਞਾਯ ਓਕਾਸਸ੍ਸ ਅਤ੍ਥਿਭਾਵਂ ਵਾ ਨਤ੍ਥਿਭਾਵਂ ਵਾ ਜਾਨੇਯ੍ਯਾਸੀ’’ਤਿ ਪਠਮਮੇਵ ਕਤਸਙ੍ਕੇਤਾ ਵਾ ਹੁਤ੍ਵਾ ਅਕਤਸਙ੍ਕੇਤਾ ਵਾਪਿ ‘‘ਏਵਂ ਏਸ ਮਯਿ ਬਜ੍ਝਿਸ੍ਸਤੀ’’ਤਿ ਸਾਮਿਕਸ੍ਸ ਪਸ੍ਸੇ ਠਿਤਾਵ ਵਿਜਮ੍ਭਤਿ ਵਿਜਮ੍ਭਨਂ ਦਸ੍ਸੇਤਿ. ਵਿਨਮਤੀਤਿ ਕਿਞ੍ਚਿਦੇਵ ਭੂਮਿਯਂ ਪਾਤੇਤ੍ਵਾ ਤਂ ਉਕ੍ਖਿਪਨ੍ਤੀ ਵਿਯ ਓਨਮਿਤ੍ਵਾ ਪਿਟ੍ਠਿਂ ਦਸ੍ਸੇਤਿ. ਵਿਲਸਤੀਤਿ ਗਮਨਾਦੀਹਿ ਵਾ ਇਰਿਯਾਪਥੇਹਿ ਅਲਙ੍ਕਾਰੇਨ ਵਾ ਵਿਲਾਸਂ ਦਸ੍ਸੇਤਿ. ਵਿਲਜ੍ਜਤੀਤਿ ਲਜ੍ਜਨ੍ਤੀ ਵਿਯ ਵਤ੍ਥੇਨ ਸਰੀਰਂ ਛਾਦੇਤਿ, ਕਵਾਟਂ ਵਾ ਭਿਤ੍ਤਿਂ ਵਾ ਅਲ੍ਲੀਯਤਿ. ਨਖੇਨਾਤਿ ਪਾਦਨਖੇਨ ਪਾਦਨਖਂ, ਹਤ੍ਥਨਖੇਨ ਹਤ੍ਥਨਖਂ ਘਟ੍ਟੇਤਿ. ਕਟ੍ਠੇਨਾਤਿ ਦਣ੍ਡਕੇਨ. ਦਾਰਕਨ੍ਤਿ ਅਤ੍ਤਨੋ ਵਾ ਪੁਤ੍ਤਂ ਅਞ੍ਞਸ੍ਸ ਵਾ ਪੁਤ੍ਤਂ ਗਹੇਤ੍ਵਾ ਉਕ੍ਖਿਪਤਿ ਵਾ ਉਕ੍ਖਿਪਾਪੇਤਿ ਵਾ. ਕੀਲ਼ਤੀਤਿ ਸਯਂ ਵਾ ਕੀਲ਼ਤਿ, ਦਾਰਕਂ ਵਾ ਕੀਲ਼ਾਪੇਤਿ. ਚੁਮ੍ਬਨਾਦੀਸੁਪਿ ਏਸੇਵ ਨਯੋ. ਦਦਾਤੀਤਿ ਤਸ੍ਸ ਕਿਞ੍ਚਿਦੇਵ ਫਲਂ ਵਾ ਪੁਪ੍ਫਂ ਵਾ ਦੇਤਿ. ਯਾਚਤੀਤਿ ਤਮੇਵ ਪਟਿਯਾਚਤਿ. ਅਨੁਕਰੋਤੀਤਿ ਦਾਰਕੇਨ ਕਤਂ ਕਤਂ ਅਨੁਕਰੋਤਿ. ਉਚ੍ਚਨ੍ਤਿ ਮਹਾਸਦ੍ਦਵਸੇਨ ਵਾ ਥੋਮਨਵਸੇਨ ਵਾ ਉਚ੍ਚਂ. ਨੀਚਨ੍ਤਿ ਮਨ੍ਦਸਦ੍ਦਵਸੇਨ ਵਾ ਅਮਨਾਪਵਚਨੇਨ ਵਾ ਪਰਿਭਵਵਚਨੇਨ ਵਾ ਨੀਚਂ. ਅਵਿਚ੍ਚਨ੍ਤਿ ਬਹੁਜਨਮਜ੍ਝੇ ਅਪ੍ਪਟਿਚ੍ਛਨ੍ਨਂ. ਵਿਵਿਚ੍ਚਨ੍ਤਿ ਰਹੋ ਪਟਿਚ੍ਛਨ੍ਨਂ. ਨਚ੍ਚੇਨਾਤਿ ਏਤੇਹਿ ਨਚ੍ਚਾਦੀਹਿ ਨਿਮਿਤ੍ਤਂ ਕਰੋਤਿ. ਤਤ੍ਥ ਰੋਦਿਤੇਨ ਨਿਮਿਤ੍ਤਕਰਣੇਨ ਰਤ੍ਤਿਂ ਦੇਵੇ ਵਸ੍ਸਨ੍ਤੇ ਵਾਤਪਾਨੇਨ ਹਤ੍ਥਿਂ ਆਰੋਪੇਤ੍ਵਾ ਸੇਟ੍ਠਿਪੁਤ੍ਤੇਨ ਨੀਤਾਯ ਪੁਰੋਹਿਤਬ੍ਰਾਹ੍ਮਣਿਯਾ ਵਤ੍ਥੁ ਕਥੇਤਬ੍ਬਂ. ਜਗ੍ਘਤੀਤਿ ਮਹਾਹਸਿਤਂ ਹਸਤਿ, ਏਵਮ੍ਪਿ ਨਿਮਿਤ੍ਤਂ ਕਰੋਤਿ. ਕਚ੍ਛਨ੍ਤਿ ਉਪਕਚ੍ਛਕਂ. ਉਪਲਿਖਤੀਤਿ ਦਨ੍ਤੇਹਿ ਉਪਲਿਖਤਿ. ਸਿਰਸਨ੍ਤਿ ਕੇਸਵਟ੍ਟਿਂ. ਏਵਂ ਕੇਸਾਨਂ ਮੋਚਨਬਨ੍ਧਨੇਹਿਪਿ ਪਰਪੁਰਿਸਾਨਂ ਨਿਮਿਤ੍ਤਂ ਕਰੋਤਿ, ਨਿਯਾਮੇਤ੍ਵਾ ਵਾ ਅਨਿਯਾਮੇਤ੍ਵਾ ਵਾ ਕੋਚਿਦੇਵ ਸਾਰਜ੍ਜਿਸ੍ਸਤੀਤਿਪਿ ਕਰੋਤਿਯੇਵ.

ਪਦੁਟ੍ਠਾ ਵੇਦਿਤਬ੍ਬਾ ਭਵਤੀਤਿ ਅਯਂ ਮਯਿ ਪਦੁਟ੍ਠਾ ਕੁਦ੍ਧਾ, ਕੁਜ੍ਝਿਤ੍ਵਾ ਚ ਪਨ ਮਿਚ੍ਛਾਚਾਰਂ ਚਰਤੀਤਿ ਪਣ੍ਡਿਤੇਨ ਵੇਦਿਤਬ੍ਬਾ ਭਵਤਿ. ਪਵਾਸਨ੍ਤਿ ‘‘ਅਸੁਕਗਾਮੇ ਪਯੁਤ੍ਤਂ ਧਨਂ ਨਸ੍ਸਤਿ, ਗਚ੍ਛ ਤਂ ਸਾਧੇਹਿ, ਵੋਹਾਰਂ ਕਰੋਹੀ’’ਤਿਆਦੀਨਿ ਵਤ੍ਵਾ ਤਸ੍ਮਿਂ ਗਤੇ ਅਨਾਚਾਰਂ ਚਰਿਤੁਕਾਮਾ ਪਵਾਸਂ ਵਣ੍ਣੇਤਿ. ਅਨਤ੍ਥਨ੍ਤਿ ਅਵਡ੍ਢਿਂ. ਅਕਿਚ੍ਚਨ੍ਤਿ ਅਕਤ੍ਤਬ੍ਬਯੁਤ੍ਤਕਂ. ਪਰਿਦਹਿਤ੍ਵਾਤਿ ਗਾਲ਼੍ਹਂ ਨਿਵਾਸੇਤ੍ਵਾ. ਪਰਿਵਤ੍ਤਕਜਾਤਾਤਿ ਇਤੋ ਚਿਤੋ ਚ ਪਰਿਵਤ੍ਤਮਾਨਾ. ਕੁਙ੍ਕੁਮਿਯਜਾਤਾਤਿ ਕੋਲਾਹਲਜਾਤਾ ਪਾਦਮੂਲੇ ਨਿਪਨ੍ਨਾ ਪਰਿਚਾਰਿਕਾ ਉਟ੍ਠਾਪੇਤਿ, ਦੀਪਂ ਜਾਲਾਪੇਤਿ, ਨਾਨਪ੍ਪਕਾਰਂ ਕੋਲਾਹਲਂ ਕਰੋਤਿ, ਤਸ੍ਸ ਕਿਲੇਸਰਤਿਂ ਨਾਸੇਤਿ. ਦੁਕ੍ਖਂ ਵੇਦਯਤੀਤਿ ਸੀਸਂ ਮੇ ਰੁਜ੍ਜਤੀਤਿਆਦੀਨਿ ਵਦਤਿ. ਵਿਲੋਮਮਾਚਰਤੀਤਿ ਆਹਾਰਂ ਸੀਤਲਂ ਇਚ੍ਛਨ੍ਤਸ੍ਸ ਉਣ੍ਹਂ ਦੇਤੀਤਿਆਦੀਨਂ ਵਸੇਨ ਪਚ੍ਚਨੀਕਵੁਤ੍ਤਿ ਹੋਤਿ. ਨਿਹਤਭੋਗਾਤਿ ਸਾਮਿਕੇਨ ਦੁਕ੍ਖਸਮ੍ਭਤਾਨਂ ਭੋਗਾਨਂ ਸੁਰਾਲੋਲਤਾਦੀਹਿ ਵਿਨਾਸਿਕਾ. ਸਨ੍ਥਵਨ੍ਤਿ ਕਿਲੇਸਵਸੇਨ ਸਨ੍ਥਵਂ ਕਰੋਤਿ. ਨਿਕ੍ਖਨ੍ਤਪਾਦਾਤਿ ਜਾਰਸ੍ਸ ਉਪਧਾਰਣਤ੍ਥਾਯ ਨਿਕ੍ਖਨ੍ਤਪਾਦਾ. ਸਾਮਿਕੇਤਿ ਪਤਿਮ੍ਹਿ ਅਗਾਰਵੇਨ ਚ ਪਦੁਟ੍ਠਮਾਨਸਾਯ ਚ ਅਤਿਚਾਰਿਨੀ ਹੋਤਿ.

ਸਬ੍ਬਿਤ੍ਥਿਯੋਤਿ ਠਪੇਤ੍ਵਾ ਵਿਪਸ੍ਸਨਾਯ ਤਨੁਕਤਕਿਲੇਸਾ ਸੇਸਾ ਸਬ੍ਬਾ ਇਤ੍ਥਿਯੋ ਪਾਪਂ ਕਰੇਯ੍ਯੁਂ. ਲਭਮਾਨੇਤਿ ਲਬ੍ਭਮਾਨੇ, ਸਂਵਿਜ੍ਜਮਾਨੇਤਿ ਅਤ੍ਥੋ. ਨਿਵਾਤਕੇਤਿ ਰਹੋਮਨ੍ਤਨਕੇ ਪਰਿਭੇਦਕੇ. ਖਣਂ ਵਾ ਰਹੋ ਵਾਤਿ ਪਾਪਕਰਣਤ੍ਥਾਯ ਓਕਾਸਂ ਵਾ ਪਟਿਚ੍ਛਨ੍ਨਟ੍ਠਾਨਂ ਵਾ. ਕਯਿਰੁਂ ਨੂਤਿ ਏਤ੍ਥ ਨੂ-ਤਿ ਨਿਪਾਤਮਤ੍ਤਂ. ਅਲਤ੍ਥਾਤਿ ਅਲਦ੍ਧਾ. ਅਯਮੇਵ ਵਾ ਪਾਠੋ, ਅਞ੍ਞਂ ਸਮ੍ਪਨ੍ਨਪੁਰਿਸਂ ਅਲਭਿਤ੍ਵਾ ਪੀਠਸਪ੍ਪਿਨਾਪਿ ਤਤੋ ਪਟਿਕ੍ਕੂਲਤਰੇਨਾਪਿ ਪਾਪਂ ਕਰੇਯ੍ਯੁਂ. ਆਰਾਮਕਰਾਸੂਤਿ ਅਭਿਰਤਿਕਾਰਿਕਾਸੁ. ਅਨਿਗ੍ਗਹਾਸੂਤਿ ਨਿਗ੍ਗਹੇਨ ਵਿਨੇਤੁਂ ਅਸਕ੍ਕੁਣੇਯ੍ਯਾਸੁ. ਤਿਤ੍ਥਸਮਾਤਿ ਯਥਾ ਤਿਤ੍ਥਂ ਉਤ੍ਤਮਾਧਮੇਸੁ ਨ ਕਞ੍ਚਿ ਨ੍ਹਾਯਨ੍ਤਂ ਵਾਰੇਤਿ, ਤਥਾ ਏਤਾਪਿ ਰਹੋ ਵਾ ਖਣੇ ਵਾ ਨਿਵਾਤਕੇ ਵਾ ਸਤਿ ਨ ਕਞ੍ਚਿ ਪਟਿਕ੍ਖਿਪਨ੍ਤਿ.

ਤਥਾ ਹਿ ਅਤੀਤੇ ਬਾਰਾਣਸਿਯਂ ਕਣ੍ਡਰੀ ਨਾਮ ਰਾਜਾ ਅਹੋਸਿ ਉਤ੍ਤਮਰੂਪਧਰੋ. ਤਸ੍ਸ ਦੇਵਸਿਕਂ ਅਮਚ੍ਚਾ ਗਨ੍ਧਕਰਣ੍ਡਕਸਹਸ੍ਸਂ ਆਹਰਨ੍ਤਿ. ਤੇਨਸ੍ਸ ਨਿਵੇਸਨੇ ਪਰਿਭਣ੍ਡਂ ਕਤ੍ਵਾ ਗਨ੍ਧਕਰਣ੍ਡਕੇ ਫਾਲੇਤ੍ਵਾ ਗਨ੍ਧਦਾਰੂਨਿ ਕਤ੍ਵਾ ਆਹਾਰਂ ਪਚਨ੍ਤਿ. ਭਰਿਯਾਪਿਸ੍ਸ ਅਭਿਰੂਪਾ ਅਹੋਸਿ ਨਾਮੇਨ ਕਿਨ੍ਨਰਾ ਨਾਮ. ਪੁਰੋਹਿਤੋਪਿਸ੍ਸ ਸਮਵਯੋ ਪਞ੍ਚਾਲਚਣ੍ਡੋ ਨਾਮ ਬੁਦ੍ਧਿਸਮ੍ਪਨ੍ਨੋ ਅਹੋਸਿ. ਰਞ੍ਞੋ ਪਨ ਪਾਸਾਦਂ ਨਿਸ੍ਸਾਯ ਅਨ੍ਤੋਪਾਕਾਰੇ ਜਮ੍ਬੁਰੁਕ੍ਖੋ ਨਿਬ੍ਬਤ੍ਤਿ, ਤਸ੍ਸ ਸਾਖਾ ਪਾਕਾਰਮਤ੍ਥਕੇ ਓਲਮ੍ਬਤਿ. ਤਸ੍ਸ ਛਾਯਾਯ ਜੇਗੁਚ੍ਛੋ ਦੁਸ੍ਸਣ੍ਠਾਨੋ ਪੀਠਸਪ੍ਪੀ ਵਸਤਿ. ਅਥੇਕਦਿਵਸਂ ਕਿਨ੍ਨਰਾ ਦੇਵੀ ਵਾਤਪਾਨੇਨ ਓਲੋਕੇਨ੍ਤੀ ਤਂ ਦਿਤ੍ਵਾ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ਰਤ੍ਤਿਂ ਰਾਜਾਨਂ ਰਤਿਯਾ ਸਙ੍ਗਣ੍ਹਿਤ੍ਵਾ ਤਸ੍ਮਿਂ ਨਿਦ੍ਦਂ ਓਕ੍ਕਨ੍ਤੇ ਸਣਿਕਂ ਉਟ੍ਠਾਯਾਸਨਾ ਨਾਨਗ੍ਗਰਸਭੋਜਨਂ ਸੁਵਣ੍ਣਸਰਕੇ ਪਕ੍ਖਿਪਿਤ੍ਵਾ ਉਚ੍ਛਙ੍ਗੇ ਕਤ੍ਵਾ ਸਾਟਕਰਜ੍ਜੁਯਾ ਵਾਤਪਾਨੇਨ ਓਤਰਿਤ੍ਵਾ ਜਮ੍ਬੁਂ ਆਰੁਯ੍ਹ ਸਾਖਾਯ ਓਰੁਯ੍ਹ ਪੀਠਸਪ੍ਪਿਂ ਭੋਜੇਤ੍ਵਾ ਪਾਪਂ ਕਤ੍ਵਾ ਆਗਤਮਗ੍ਗੇਨੇਵ ਪਾਸਾਦਂ ਆਰੁਯ੍ਹ ਗਨ੍ਧੇਹਿ ਸਰੀਰਂ ਉਬ੍ਬਟ੍ਟੇਤ੍ਵਾ ਰਞ੍ਞਾ ਸਦ੍ਧਿਂ ਨਿਪਜ੍ਜਿ. ਏਤੇਨੁਪਾਯੇਨ ਨਿਬਦ੍ਧਂ ਤੇਨ ਸਦ੍ਧਿਂ ਪਾਪਂ ਕਰੋਤਿ. ਰਾਜਾ ਪਨ ਨ ਜਾਨਾਤਿ.

ਸੋ ਏਕਦਿਵਸਂ ਨਗਰਂ ਪਦਕ੍ਖਿਣਂ ਕਤ੍ਵਾ ਨਿਵੇਸਨਂ ਪਵੇਸਨ੍ਤੋ ਜਮ੍ਬੁਛਾਯਾਯ ਸਯਿਤਂ ਪਰਮਕਾਰੁਞ੍ਞਪ੍ਪਤ੍ਤਂ ਪੀਠਸਪ੍ਪਿਂ ਦਿਸ੍ਵਾ ਪੁਰੋਹਿਤਂ ਆਹ – ‘‘ਪਸ੍ਸੇਤਂ ਮਨੁਸ੍ਸਪੇਤ’’ਨ੍ਤਿ. ‘‘ਆਮ, ਪਸ੍ਸਾਮਿ ਦੇਵਾ’’ਤਿ. ‘‘ਅਪਿ ਨੁ ਖੋ, ਸਮ੍ਮ, ਏਵਰੂਪਂ ਪਟਿਕ੍ਕੂਲਂ ਕਾਚਿ ਇਤ੍ਥੀ ਛਨ੍ਦਰਾਗਵਸੇਨ ਉਪਗਚ੍ਛੇਯ੍ਯਾ’’ਤਿ. ਤਂ ਕਥਂ ਸੁਤ੍ਵਾ ਪੀਠਸਪ੍ਪੀ ਮਾਨਂ ਜਨੇਤ੍ਵਾ ‘‘ਅਯਂ ਰਾਜਾ ਕਿਂ ਕਥੇਤਿ, ਅਤ੍ਤਨੋ ਦੇਵਿਯਾ ਮਮ ਸਨ੍ਤਿਕਂ ਆਗਮਨਂ ਨ ਜਾਨਾਤਿ ਮਞ੍ਞੇ’’ਤਿ ਜਮ੍ਬੁਰੁਕ੍ਖਸ੍ਸ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਸੁਣ ਸਾਮਿ, ਜਮ੍ਬੁਰੁਕ੍ਖੇ ਨਿਬ੍ਬਤ੍ਤਦੇਵਤੇ, ਠਪੇਤ੍ਵਾ ਤਂ ਅਞ੍ਞੋ ਏਤਂ ਕਾਰਣਂ ਨ ਜਾਨਾਤੀ’’ਤਿ ਆਹ. ਪੁਰੋਹਿਤੋ ਤਸ੍ਸ ਕਿਰਿਯਂ ਦਿਸ੍ਵਾ ਚਿਨ੍ਤੇਸਿ – ‘‘ਅਦ੍ਧਾ ਰਞ੍ਞੋ ਅਗ੍ਗਮਹੇਸੀ ਜਮ੍ਬੁਰੁਕ੍ਖੇਨ ਗਨ੍ਤ੍ਵਾ ਇਮਿਨਾ ਸਦ੍ਧਿਂ ਪਾਪਂ ਕਰੋਤੀ’’ਤਿ. ਸੋ ਰਾਜਾਨਂ ਪੁਚ੍ਛਿ – ‘‘ਮਹਾਰਾਜ, ਦੇਵਿਯਾ ਤੇ ਰਤ੍ਤਿਭਾਗੇ ਸਰੀਰਸਮ੍ਫਸ੍ਸੋ ਕੀਦਿਸੋ ਹੋਤੀ’’ਤਿ? ‘‘ਸਮ੍ਮ, ਅਞ੍ਞਂ ਨ ਪਸ੍ਸਾਮਿ, ਮਜ੍ਝਿਮਯਾਮੇ ਪਨਸ੍ਸਾ ਸਰੀਰਂ ਸੀਤਲਂ ਹੋਤੀ’’ਤਿ. ‘‘ਤੇਨ ਹਿ, ਦੇਵ, ਤਿਟ੍ਠਤੁ ਅਞ੍ਞਾ ਇਤ੍ਥੀ, ਅਗ੍ਗਮਹੇਸੀ ਤੇ ਕਿਨ੍ਨਰਾਦੇਵੀ ਇਮਿਨਾ ਸਦ੍ਧਿਂ ਪਾਪਂ ਕਰੋਤੀ’’ਤਿ. ‘‘ਸਮ੍ਮ, ਕਿਂ ਵਦੇਸਿ, ਏਵਰੂਪਾ ਪਰਮਵਿਲਾਸਸਮ੍ਪਨ੍ਨਾ ਕਿਂ ਇਮਿਨਾ ਪਰਮਜੇਗੁਚ੍ਛੇਨ ਸਦ੍ਧਿਂ ਅਭਿਰਮਿਸ੍ਸਤੀ’’ਤਿ? ‘‘ਤੇਨ ਹਿ ਨਂ, ਦੇਵ, ਪਰਿਗ੍ਗਣ੍ਹਾਹੀ’’ਤਿ.

ਸੋ ‘‘ਸਾਧੂ’’ਤਿ ਰਤ੍ਤਿਂ ਭੁਤ੍ਤਸਾਯਮਾਸੋ ਤਾਯ ਸਦ੍ਧਿਂ ਨਿਪ੍ਪਜ੍ਜਿਤ੍ਵਾ ‘‘ਪਰਿਗ੍ਗਣ੍ਹਿਸ੍ਸਾਮਿ ਨ’’ਨ੍ਤਿ ਪਕਤਿਯਾ ਨਿਦ੍ਦੁਪਗਮਨਵੇਲਾਯ ਨਿਦ੍ਦੁਪਗਤੋ ਵਿਯ ਅਹੋਸਿ. ਸਾਪਿ ਉਟ੍ਠਾਯ ਤਥੇਵ ਅਕਾਸਿ. ਰਾਜਾ ਤਸ੍ਸਾ ਅਨੁਪਦਞ੍ਞੇਵ ਗਨ੍ਤ੍ਵਾ ਜਮ੍ਬੁਛਾਯਂ ਨਿਸ੍ਸਾਯ ਅਟ੍ਠਾਸਿ. ਪੀਠਸਪ੍ਪੀ ਦੇਵਿਯਾ ਕੁਜ੍ਝਿਤ੍ਵਾ ‘‘ਤ੍ਵਂ ਅਜ੍ਜ ਅਤਿਚਿਰਾਯਿਤ੍ਵਾ ਆਗਤਾ’’ਤਿ ਹਤ੍ਥੇਨ ਕਣ੍ਣਸਙ੍ਖਲਿਕਂ ਪਹਰਿ. ਅਥ ਨਂ ‘‘ਮਾ ਮਂ ਕੁਜ੍ਝਿ, ਸਾਮਿ, ਰਞ੍ਞੋ ਨਿਦ੍ਦੁਪਗਮਨਂ ਓਲੋਕੇਸਿ’’ਨ੍ਤਿ ਵਤ੍ਵਾ ਤਸ੍ਸ ਗੇਹੇ ਪਾਦਪਰਿਚਾਰਿਕਾ ਵਿਯ ਅਹੋਸਿ. ਤੇਨ ਪਨਸ੍ਸਾ ਪਹਾਰੇਨ ਸੀਹਮੁਖਕੁਣ੍ਡਲਂ ਕਣ੍ਣਤੋ ਗਲ਼ਿਤ੍ਵਾ ਰਞ੍ਞੋ ਪਾਦਮੂਲੇ ਪਤਿ. ਰਾਜਾ ‘‘ਵਟ੍ਟਿਸ੍ਸਤਿ ਏਤ੍ਤਕ’’ਨ੍ਤਿ ਤਂ ਗਹੇਤ੍ਵਾ ਗਤੋ. ਸਾਪਿ ਤੇਨ ਸਦ੍ਧਿਂ ਅਤਿਚਰਿਤ੍ਵਾ ਪੁਰਿਮਨਿਯਾਮੇਨੇਵ ਗਨ੍ਤ੍ਵਾ ਰਞ੍ਞਾ ਸਦ੍ਧਿਂ ਨਿਪਜ੍ਜਿਤੁਂ ਆਰਭਿ. ਰਾਜਾ ਪਟਿਕ੍ਖਿਪਿਤ੍ਵਾ ਪੁਨਦਿਵਸੇ ‘‘ਕਿਨ੍ਨਰਾਦੇਵੀ ਮਯਾ ਦਿਨ੍ਨਂ ਸਬ੍ਬਾਲਙ੍ਕਾਰਂ ਅਲਙ੍ਕਰਿਤ੍ਵਾ ਏਤੂ’’ਤਿ ਆਣਾਪੇਸਿ. ਸਾ ‘‘ਸੀਹਮੁਖਕੁਣ੍ਡਲਂ ਮੇ ਸੁਵਣ੍ਣਕਾਰਸ੍ਸ ਸਨ੍ਤਿਕੇ’’ਤਿ ਵਤ੍ਵਾ ਨਾਗਮਿ, ਪੁਨ ਪੇਸਿਤੇ ਚ ਪਨ ਏਕਕੁਣ੍ਡਲਾਵ ਆਗਮਾਸਿ. ਰਾਜਾ ਪੁਚ੍ਛਿ – ‘‘ਕਹਂ ਤੇ ਕੁਣ੍ਡਲ’’ਨ੍ਤਿ? ‘‘ਸੁਵਣ੍ਣਕਾਰਸ੍ਸ ਸਨ੍ਤਿਕੇ’’ਤਿ. ਸੁਵਣ੍ਣਕਾਰਂ ਪਕ੍ਕੋਸਾਪੇਤ੍ਵਾ ‘‘ਕਿਂਕਾਰਣਾ ਇਮਿਸ੍ਸਾ ਕੁਣ੍ਡਲਂ ਨ ਦੇਸੀ’’ਤਿ ਆਹ. ‘‘ਨਾਹਂ ਗਣ੍ਹਾਮਿ ਦੇਵਾ’’ਤਿ. ਰਾਜਾ ਤਸ੍ਸਾ ਕੁਜ੍ਝਿਤ੍ਵਾ ‘‘ਪਾਪੇ ਚਣ੍ਡਾਲਿ ਮਾਦਿਸੇਨ ਤੇ ਸੁਵਣ੍ਣਕਾਰੇਨ ਭਵਿਤਬ੍ਬ’’ਨ੍ਤਿ ਵਤ੍ਵਾ ਤਂ ਕੁਣ੍ਡਲਂ ਤਸ੍ਸਾ ਪੁਰਥੋ ਖਿਪਿਤ੍ਵਾ ਪੁਰੋਹਿਤਂ ਆਹ – ‘‘ਸਮ੍ਮ, ਸਚ੍ਚਂ ਤਯਾ ਵੁਤ੍ਤਂ, ਗਚ੍ਛ ਸੀਸਮਸ੍ਸਾ ਛੇਦਾਪੇਹੀ’’ਤਿ. ਸੋ ਤਂ ਰਾਜਗੇਹੇਯੇਵ ਏਕਸ੍ਮਿਂ ਪਦੇਸੇ ਠਪੇਤ੍ਵਾ ਰਾਜਾਨਂ ਉਪਸਙ੍ਕਮਿਤ੍ਵਾ – ‘‘ਦੇਵ, ਮਾ ਕਿਨ੍ਨਰਾਦੇਵਿਯਾ ਕੁਜ੍ਝਿਤ੍ਥ, ਸਬ੍ਬਾ ਇਤ੍ਥਿਯੋ ਏਵਰੂਪਾਯੇਵ. ਸਚੇਪਿ ਇਤ੍ਥੀਨਂ ਦੁਸ੍ਸੀਲਭਾਵਂ ਞਾਤੁਕਾਮੋਸਿ, ਦਸ੍ਸੇਸ੍ਸਾਮਿ ਤੇ ਏਤਾਸਂ ਪਾਪਕਞ੍ਚੇਵ ਬਹੁਮਾਯਾਭਾਵਞ੍ਚ, ਏਹਿ ਅਞ੍ਞਾਤਕਵੇਸੇਨ ਜਨਪਦਂ ਚਰਾਮਾ’’ਤਿ ਆਹ.

ਰਾਜਾ ‘‘ਸਾਧੂ’’ਤਿ ਮਾਤਰਂ ਰਜ੍ਜਂ ਪਟਿਚ੍ਛਾਪੇਤ੍ਵਾ ਤੇਨ ਸਦ੍ਧਿਂ ਚਾਰਿਕਂ ਪਕ੍ਕਾਮਿ. ਤੇਸਂ ਯੋਜਨਂ ਮਗ੍ਗਂ ਗਨ੍ਤ੍ਵਾ ਮਹਾਮਗ੍ਗੇ ਨਿਸਿਨ੍ਨਾਨਂਯੇਵ ਏਕੋ ਕੁਟੁਮ੍ਬਿਕੋ ਪੁਤ੍ਤਸ੍ਸਤ੍ਥਾਯ ਮਙ੍ਗਲਂ ਕਤ੍ਵਾ ਏਕਂ ਕੁਮਾਰਿਕਂ ਪਟਿਚ੍ਛਨ੍ਨਯਾਨੇ ਨਿਸੀਦਾਪੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਗਚ੍ਛਤਿ. ਤਂ ਦਿਸ੍ਵਾ ਪੁਰੋਹਿਤੋ ਰਾਜਾਨਂ ਆਹ – ‘‘ਸਚੇ ਇਚ੍ਛਸਿ, ਇਮਂ ਕੁਮਾਰਿਕਂ ਤਯਾ ਸਦ੍ਧਿਂ ਪਾਪਂ ਕਾਰੇਤੁਂ ਸਕ੍ਕਾ ਦੇਵਾ’’ਤਿ. ‘‘ਕਿਂ ਕਥੇਸਿ, ਮਹਾਪਰਿਵਾਰਾ ਏਸਾ, ਨ ਸਕ੍ਕਾ ਸਮ੍ਮਾ’’ਤਿ? ਪੁਰੋਹਿਤੋ ‘‘ਤੇਨ ਹਿ ਪਸ੍ਸ, ਦੇਵਾ’’ਤਿ ਪੁਰਤੋ ਗਨ੍ਤ੍ਵਾ ਮਗ੍ਗਤੋ ਅਵਿਦੂਰੇ ਸਾਣਿਯਾ ਪਰਿਕ੍ਖਿਪਿਤ੍ਵਾ ਰਾਜਾਨਂ ਅਨ੍ਤੋਸਾਣਿਯਂ ਕਤ੍ਵਾ ਸਯਂ ਮਗ੍ਗਪਸ੍ਸੇ ਰੋਦਨ੍ਤੋ ਨਿਸੀਦਿ. ਅਥ ਨਂ ਸੋ ਕੁਟੁਮ੍ਬਿਕੋ ਦਿਸ੍ਵਾ ‘‘ਤਾਤ, ਕਸ੍ਮਾ ਰੋਦਸੀ’’ਤਿ ਪੁਚ੍ਛਿ. ‘‘ਭਰਿਯਾ ਮੇ ਗਰੁਭਾਰਾ, ਤਂ ਕੁਲਘਰਂ ਨੇਤੁਂ ਮਗ੍ਗਪਟਿਪਨ੍ਨੋਸ੍ਮਿ, ਤਸ੍ਸਾ ਅਨ੍ਤਰਾਮਗ੍ਗੇਯੇਵ ਗਬ੍ਭੋ ਚਲਿ, ਏਸਾ ਅਨ੍ਤੋਸਾਣਿਯਂ ਕਿਲਮਤਿ, ਕਾਚਿਸ੍ਸਾ ਇਤ੍ਥੀ ਸਨ੍ਤਿਕੇ ਨਤ੍ਥਿ, ਮਯਾਪਿ ਤਤ੍ਥ ਗਨ੍ਤੁਂ ਨ ਸਕ੍ਕਾ, ਨ ਜਾਨਾਮਿ ‘ਕਿਂ ਭਵਿਸ੍ਸਤੀ’ਤਿ, ਏਕਂ ਇਤ੍ਥਿਂ ਲਦ੍ਧੁਂ ਵਟ੍ਟਤੀ’’ਤਿ? ‘‘ਮਾ ਰੋਦਿ, ਬਹੂ ਮੇ ਇਤ੍ਥਿਯੋ, ਏਕਾ ਗਮਿਸ੍ਸਤੀ’’ਤਿ. ‘‘ਤੇਨ ਹਿ ਅਯਮੇਵ ਕੁਮਾਰਿਕਾ ਗਚ੍ਛਤੁ, ਏਤਿਸ੍ਸਾਪਿ ਮਙ੍ਗਲਂ ਭਵਿਸ੍ਸਤੀ’’ਤਿ. ਸੋ ਚਿਨ੍ਤੇਸਿ – ‘‘ਸਚ੍ਚਂ ਵਦਤਿ, ਸੁਣਿਸਾਯਪਿ ਮੇ ਮਙ੍ਗਲਮੇਵ, ਇਮਿਨਾ ਹਿ ਨਿਮਿਤ੍ਤੇਨ ਸਾ ਪੁਤ੍ਤਧੀਤਾਹਿ ਵਡ੍ਢਿਸ੍ਸਤੀ’’ਤਿ ਤਮੇਵ ਪੇਸੇਸਿ. ਸਾ ਤਤ੍ਥ ਪਵਿਸਿਤ੍ਵਾ ਰਾਜਾਨਂ ਦਿਸ੍ਵਾਵ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ਪਾਪਮਕਾਸਿ. ਰਾਜਾਪਿਸ੍ਸਾ ਅਙ੍ਗੁਲਿਮੁਦ੍ਦਿਕਂ ਅਦਾਸਿ. ਅਥ ਨਂ ਕਤਕਿਚ੍ਚਂ ਨਿਕ੍ਖਮਿਤ੍ਵਾ ਆਗਤਂ ਪੁਚ੍ਛਿਂਸੁ – ‘‘ਕਿਂ ਵਿਜਾਤਾ’’ਤਿ? ‘‘ਸੁਵਣ੍ਣਵਣ੍ਣਂ ਪੁਤ੍ਤ’’ਨ੍ਤਿ. ਕੁਟੁਮ੍ਬਿਕੋ ਤਂ ਆਦਾਯ ਪਾਯਾਸਿ. ਪੁਰੋਹਿਤੋਪਿ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ‘‘ਦਿਟ੍ਠਾ ਤੇ, ਦੇਵ, ਕੁਮਾਰਿਕਾਪਿ ਏਵਂ ਪਾਪਾ, ਕਿਮਙ੍ਗਂ ਪਨ ਅਞ੍ਞਾ, ਅਪਿ ਪਨ ਤੇ ਕਿਞ੍ਚਿ ਦਿਨ੍ਨ’’ਨ੍ਤਿ ਪੁਚ੍ਛਿ. ‘‘ਆਮ, ਅਙ੍ਗੁਲਿਮੁਦ੍ਦਿਕਾ ਦਿਨ੍ਨਾ’’ਤਿ. ‘‘ਨਾਸ੍ਸਾ ਤਂ ਦਸ੍ਸਾਮੀ’’ਤਿ ਵੇਗੇਨ ਗਨ੍ਤ੍ਵਾ ਯਾਨਕਂ ਗਣ੍ਹਿਤ੍ਵਾ ‘‘ਕਿਮੇਤ’’ਨ੍ਤਿ ਵੁਤ੍ਤੇ ‘‘ਅਯਂ ਮੇ ਬ੍ਰਾਹ੍ਮਣਿਯਾ ਉਸ੍ਸੀਸਕੇ ਠਪਿਤਂ ਮੁਦ੍ਦਿਕਂ ਗਹੇਤ੍ਵਾ ਆਗਤਾ, ਦੇਹਿ, ਅਮ੍ਮ, ਮੁਦ੍ਦਿਕ’’ਨ੍ਤਿ ਆਹ. ਸਾ ਤਂ ਦਦਮਾਨਾ ਬ੍ਰਾਹ੍ਮਣਂ ਹਤ੍ਥੇ ਨਖੇਨ ਵਿਜ੍ਝਿਤ੍ਵਾ ‘‘ਗਣ੍ਹ ਚੋਰਾ’’ਤਿ ਅਦਾਸਿ.

ਏਵਂ ਬ੍ਰਾਹ੍ਮਣੋ ਨਾਨਾਵਿਧੇਹਿ ਉਪਾਯੇਹਿ ਅਞ੍ਞਾਪਿ ਬਹੂ ਅਤਿਚਾਰਿਨਿਯੋ ਰਞ੍ਞੋ ਦਸ੍ਸੇਤ੍ਵਾ ‘‘ਇਧ ਤਾਵ ਏਤ੍ਤਕਂ ਹੋਤੁ, ਅਞ੍ਞਤ੍ਥ ਗਮਿਸ੍ਸਾਮ, ਦੇਵਾ’’ਤਿ ਆਹ. ਰਾਜਾ ‘‘ਸਕਲਜਮ੍ਬੁਦੀਪੇ ਚਰਿਤੇਪਿ ਸਬ੍ਬਾ ਇਤ੍ਥਿਯੋ ਏਵਰੂਪਾਵ ਭਵਿਸ੍ਸਨ੍ਤਿ, ਕਿਂ ਨੋ ਏਤਾਹਿ, ਨਿਵਤ੍ਤਾਮਾ’’ਤਿ ਬਾਰਾਣਸਿਮੇਵ ਪਚ੍ਚਾਗਨ੍ਤ੍ਵਾ – ‘‘ਮਹਾਰਾਜ, ਇਤ੍ਥਿਯੋ ਨਾਮ ਏਵਂ ਪਾਪਧਮ੍ਮਾ, ਪਕਤਿ ਏਸਾ ਏਤਾਸਂ, ਖਮਥ, ਦੇਵ, ਕਿਨ੍ਨਰਾਦੇਵਿਯਾ’’ਤਿ ਪੁਰੋਹਿਤੇਨ ਯਾਚਿਤੋ ਖਮਿਤ੍ਵਾ ਰਾਜਨਿਵੇਸਨਤੋ ਨਂ ਨਿਕ੍ਕਡ੍ਢਾਪੇਸਿ, ਠਾਨਤੋ ਪਨ ਤਂ ਅਪਨੇਤ੍ਵਾ ਅਞ੍ਞਂ ਅਗ੍ਗਮਹੇਸਿਂ ਅਕਾਸਿ. ਤਞ੍ਚ ਪੀਠਸਪ੍ਪਿਂ ਨਿਕ੍ਕਡ੍ਢਾਪੇਤ੍ਵਾ ਜਮ੍ਬੁਸਾਖਂ ਛੇਦਾਪੇਸਿ. ਤਦਾ ਕੁਣਾਲੋ ਪਞ੍ਚਾਲਚਣ੍ਡੋ ਅਹੋਸਿ. ਇਤਿ ਅਤ੍ਤਨਾ ਦਿਟ੍ਠਕਾਰਣਮੇਵ ਆਹਰਿਤ੍ਵਾ ਦਸ੍ਸੇਨ੍ਤੋ ਗਾਥਮਾਹ –

੩੧੧.

‘‘ਯਂ ਵੇ ਦਿਸ੍ਵਾ ਕਣ੍ਡਰੀਕਿਨ੍ਨਰਾਨਂ, ਸਬ੍ਬਿਤ੍ਥਿਯੋ ਨ ਰਮਨ੍ਤਿ ਅਗਾਰੇ;

ਤਂ ਤਾਦਿਸਂ ਮਚ੍ਚਂ ਚਜਿਤ੍ਵਾ ਭਰਿਯਾ, ਅਞ੍ਞਂ ਦਿਸ੍ਵਾ ਪੁਰਿਸਂ ਪੀਠਸਪ੍ਪਿ’’ਨ੍ਤਿ.

ਤਸ੍ਸਤ੍ਥੋ – ਯਂ ਵੇ ਕਣ੍ਡਰਿਸ੍ਸ ਰਞ੍ਞੋ ਕਿਨ੍ਨਰਾਯ ਦੇਵਿਯਾ ਚਾਤਿ ਇਮੇਸਂ ਕਣ੍ਡਰਿਕਿਨ੍ਨਰਾਨਂ ਵਿਰਾਗਕਾਰਣਂ ਅਹੋਸਿ, ਤਂ ਦਿਸ੍ਵਾ ਜਾਨਿਤਬ੍ਬਂ – ਸਬ੍ਬਿਤ੍ਥਿਯੋ ਅਤ੍ਤਨੋ ਸਾਮਿਕਾਨਂ ਨ ਰਮਨ੍ਤਿ ਅਗਾਰੇ. ਤਥਾ ਹਿ ਅਞ੍ਞਂ ਪੀਠਸਪ੍ਪਿਂ ਪੁਰਿਸਂ ਦਿਸ੍ਵਾ ਤਂ ਰਾਜਾਨਂ ਤਾਦਿਸਂ ਰਤਿਕੁਸਲਂ ਮਚ੍ਚਂ ਚਜਿਤ੍ਵਾ ਭਰਿਯਾ ਤੇਨ ਮਨੁਸ੍ਸਪੇਤੇਨ ਸਦ੍ਧਿਂ ਪਾਪਮਕਾਸੀਤਿ.

ਅਪਰੋਪਿ ਅਤੀਤੇ ਬਾਰਾਣਸਿਯਂ ਬਕੋ ਨਾਮ ਰਾਜਾ ਧਮ੍ਮੇਨ ਰਜ੍ਜਂ ਕਾਰੇਸਿ. ਤਦਾ ਬਾਰਾਣਸਿਯਾ ਪਾਚੀਨਦ੍ਵਾਰਵਾਸਿਨੋ ਏਕਸ੍ਸ ਦਲਿਦ੍ਦਸ੍ਸ ਪਞ੍ਚਪਾਪੀ ਨਾਮ ਧੀਤਾ ਅਹੋਸਿ. ਸਾ ਕਿਰ ਪੁਬ੍ਬੇਪਿ ਏਕਾ ਦਲਿਦ੍ਦਧੀਤਾ ਮਤ੍ਤਿਕਂ ਮਦ੍ਦਿਤ੍ਵਾ ਗੇਹੇ ਭਿਤ੍ਤਿਂ ਵਿਲਿਮ੍ਪਤਿ. ਅਥੇਕੋ ਪਚ੍ਚੇਕਬੁਦ੍ਧੋ ਅਤ੍ਤਨੋ ਪਬ੍ਭਾਰਪਰਿਭਣ੍ਡਕਰਣਤ੍ਥਂ ‘‘ਕਹਂ ਮਤ੍ਤਿਕਂ ਲਭਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਬਾਰਾਣਸਿਯਂ ਲਦ੍ਧੁਂ ਸਕ੍ਕਾ’’ਤਿ ਚੀਵਰਂ ਪਾਰੁਪਿਤ੍ਵਾ ਪਤ੍ਤਹਤ੍ਥੋ ਨਗਰਂ ਪਵਿਸਿਤ੍ਵਾ ਤਸ੍ਸਾ ਅਵਿਦੂਰੇ ਅਟ੍ਠਾਸਿ. ਸਾ ਕੁਜ੍ਝਿਤ੍ਵਾ ਉਲ੍ਲੋਕੇਨ੍ਤੀ ਪਦੁਟ੍ਠੇਨ ਮਨਸਾ ‘‘ਮਤ੍ਤਿਕਮ੍ਪਿ ਭਿਕ੍ਖਤੀ’’ਤਿ ਅਵੋਚ. ਪਚ੍ਚੇਕਬੁਦ੍ਧੋ ਨਿਚ੍ਚਲੋਵ ਅਹੋਸਿ. ਅਥ ਸਾ ਪਚ੍ਚੇਕਬੁਦ੍ਧਂ ਨਿਚ੍ਚਲਿਤਂ ਦਿਸ੍ਵਾ ਪੁਨ ਚਿਤ੍ਤਂ ਪਸਾਦੇਤ੍ਵਾ, ‘‘ਸਮਣ, ਮਤ੍ਤਿਕਮ੍ਪਿ ਨ ਲਭਸੀ’’ਤਿ ਵਤ੍ਵਾ ਮਹਨ੍ਤਂ ਮਤ੍ਤਿਕਾਪਿਣ੍ਡਂ ਆਹਰਿਤ੍ਵਾ ਪਤ੍ਤੇ ਠਪੇਸਿ. ਸੋ ਤਾਯ ਮਤ੍ਤਿਕਾਯ ਪਬ੍ਭਾਰੇ ਪਰਿਭਣ੍ਡਮਕਾਸਿ. ਸਾ ਨਚਿਰਸ੍ਸੇਵ ਤਤੋ ਚਵਿਤ੍ਵਾ ਤਸ੍ਮਿਂਯੇਵ ਨਗਰੇ ਬਹਿਦ੍ਵਾਰਗਾਮੇ ਦੁਗ੍ਗਤਿਤ੍ਥਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਸਾ ਦਸਮਾਸਚ੍ਚਯੇਨ ਮਾਤੁ ਕੁਚ੍ਛਿਤੋ ਨਿਕ੍ਖਮਿ. ਤਸ੍ਸਾ ਮਤ੍ਤਿਕਾਪਿਣ੍ਡਫਲੇਨ ਸਰੀਰਂ ਫਸ੍ਸਸਮ੍ਪਨ੍ਨਂ ਅਹੋਸਿ, ਕੁਜ੍ਝਿਤ੍ਵਾ ਉਲ੍ਲੋਕਿਤਤ੍ਤਾ ਪਨ ਹਤ੍ਥਪਾਦਮੁਖਅਕ੍ਖਿਨਾਸਾਨਿ ਪਾਪਾਨਿ ਵਿਰੂਪਾਨਿ ਅਹੇਸੁਂ. ਤੇਨ ਤਂ ‘‘ਪਞ੍ਚਪਾਪੀ’’ਤ੍ਵੇਵ ਸਞ੍ਜਾਨਿਂਸੁ.

ਅਥੇਕਦਿਵਸਂ ਬਾਰਾਣਸਿਰਾਜਾ ਰਤ੍ਤਿਂ ਅਞ੍ਞਾਤਕਵੇਸੇਨ ਨਗਰਂ ਪਰਿਗ੍ਗਣ੍ਹਨ੍ਤੋ ਤਂ ਪਦੇਸਂ ਗਤੋ. ਸਾਪਿ ਗਾਮਦਾਰਿਕਾਹਿ ਸਦ੍ਧਿਂ ਕੀਲ਼ਨ੍ਤੀ ਅਜਾਨਿਤ੍ਵਾਵ ਰਾਜਾਨਂ ਹਤ੍ਥੇ ਗਣ੍ਹਿ. ਸੋ ਤਸ੍ਸਾ ਹਤ੍ਥਸਮ੍ਫਸ੍ਸੇਨ ਸਕਭਾਵੇਨ ਸਣ੍ਠਾਤੁਂ ਨਾਸਕ੍ਖਿ, ਦਿਬ੍ਬਸਮ੍ਫਸ੍ਸੇਨ ਫੁਟ੍ਠੋ ਵਿਯ ਅਹੋਸਿ. ਸੋ ਫਸ੍ਸਰਾਗਰਤ੍ਤੋ ਤਥਾਵਿਰੂਪਮ੍ਪਿ ਤਂ ਹਤ੍ਥੇ ਗਹੇਤ੍ਵਾ ‘‘ਕਸ੍ਸ ਧੀਤਾਸੀ’’ਤਿ ਪੁਚ੍ਛਿਤ੍ਵਾ ‘‘ਦ੍ਵਾਰਵਾਸਿਨੋ’’ਤਿ ਵੁਤ੍ਤੇ ਅਸ੍ਸਾਮਿਕਭਾਵਂ ਪੁਚ੍ਛਿਤ੍ਵਾ ‘‘ਅਹਂ ਤੇ ਸਾਮਿਕੋ ਭਵਿਸ੍ਸਾਮਿ, ਗਚ੍ਛ ਮਾਤਾਪਿਤਰੋ ਅਨੁਜਾਨਾਪੇਹੀ’’ਤਿ ਆਹ. ਸਾ ਮਾਤਾਪਿਤਰੋ ਉਪਗਨ੍ਤ੍ਵਾ ‘‘ਏਕੋ, ਅਮ੍ਮ, ਪੁਰਿਸੋ ਮਂ ਇਚ੍ਛਤੀ’’ਤਿ ਵਤ੍ਵਾ ‘‘ਸੋਪਿ ਦੁਗ੍ਗਤੋ ਭਵਿਸ੍ਸਤਿ, ਸਚੇ ਤਾਦਿਸਮ੍ਪਿ ਇਚ੍ਛਤਿ, ਸਾਧੂ’’ਤਿ ਵੁਤ੍ਤੇ ਗਨ੍ਤ੍ਵਾ ਮਾਤਾਪਿਤੂਹਿ ਅਨੁਞ੍ਞਾਤਭਾਵਂ ਆਰੋਚੇਸਿ. ਸੋ ਤਸ੍ਮਿਂਯੇਵ ਗੇਹੇ ਤਾਯ ਸਦ੍ਧਿਂ ਵਸਿਤ੍ਵਾ ਪਾਤੋਵ ਰਾਜਨਿਵੇਸਨਂ ਪਾਵਿਸਿ. ਤਤੋ ਪਟ੍ਠਾਯੇਵ ਅਞ੍ਞਾਤਕਵੇਸੇਨ ਨਿਬਦ੍ਧਂ ਤਤ੍ਥ ਗਚ੍ਛਤਿ, ਅਞ੍ਞਂ ਇਤ੍ਥਿਂ ਓਲੋਕੇਤੁਮ੍ਪਿ ਨ ਇਚ੍ਛਤਿ.

ਅਥੇਕਦਿਵਸਂ ਤਸ੍ਸਾ ਪਿਤੁ ਲੋਹਿਤਪਕ੍ਖਨ੍ਦਿਕਾ ਉਪ੍ਪਜ੍ਜਿ. ਅਸਮ੍ਭਿਨ੍ਨਖੀਰਸਪ੍ਪਿਮਧੁਸਕ੍ਖਰਯੁਤ੍ਤਪਾਯਾਸੋਵ ਏਤਸ੍ਸ ਭੇਸਜ੍ਜਂ, ਤਂ ਤੇ ਦਲਿਦ੍ਦਤਾਯ ਉਪ੍ਪਾਦੇਤੁਂ ਨ ਸਕ੍ਕੋਨ੍ਤਿ. ਤਤੋ ਪਞ੍ਚਪਾਪਿਮਾਤਾ ਧੀਤਰਂ ਆਹ – ‘‘ਕਿਂ, ਅਮ੍ਮ, ਤਵ ਸਾਮਿਕੋ ਪਾਯਾਸਂ ਉਪ੍ਪਾਦੇਤੁਂ ਸਕ੍ਖਿਸ੍ਸਤੀ’’ਤਿ? ‘‘ਅਮ੍ਮ, ਮਮ ਸਾਮਿਕੇਨ ਅਮ੍ਹੇਹਿਪਿ ਦੁਗ੍ਗਤਤਰੇਨ ਭਵਿਤਬ੍ਬਂ, ਏਵਂ ਸਨ੍ਤੇਪਿ ਪੁਚ੍ਛਿਸ੍ਸਾਮਿ ਨਂ, ਮਾ ਚਿਨ੍ਤਯੀ’’ਤਿ ਵਤ੍ਵਾ ਤਸ੍ਸਾਗਮਨਵੇਲਾਯਂ ਦੁਮ੍ਮਨਾ ਹੁਤ੍ਵਾ ਨਿਸੀਦਿ. ਅਥ ਨਂ ਰਾਜਾ ਆਗਨ੍ਤ੍ਵਾ ‘‘ਕਿਂ ਦੁਮ੍ਮਨਾਸੀ’’ਤਿ ਪੁਚ੍ਛਿ. ਸਾ ਤਮਤ੍ਥਂ ਆਰੋਚੇਸਿ. ਤਂ ਸੁਤ੍ਵਾ ਰਾਜਾ ‘‘ਭਦ੍ਦੇ ਇਦਂ ਅਤਿਰਸਭੇਸਜ੍ਜਂ, ਕੁਤੋ ਲਭਿਸ੍ਸਾਮੀ’’ਤਿ ਵਤ੍ਵਾ ਚਿਨ੍ਤੇਸਿ – ‘‘ਨ ਸਕ੍ਕਾ ਮਯਾ ਨਿਚ੍ਚਕਾਲਂ ਏਵਂ ਚਰਿਤੁਂ, ਅਨ੍ਤਰਾਮਗ੍ਗੇ ਪਰਿਸ੍ਸਯੋਪਿ ਦਟ੍ਠਬ੍ਬੋ, ਸਚੇ ਖੋ ਪਨ ਏਤਂ ਅਨ੍ਤੇਪੁਰਂ ਨੇਸ੍ਸਾਮਿ, ਏਤਿਸ੍ਸਾ ਫਸ੍ਸਸਮ੍ਪਦਂ ਅਜਾਨਨ੍ਤਾ ‘ਅਮ੍ਹਾਕਂ ਰਾਜਾ ਯਕ੍ਖਿਨਿਂ ਗਹੇਤ੍ਵਾ ਆਗਤੋ’ਤਿ ਕੇਲ਼ਿਂ ਕਰਿਸ੍ਸਨ੍ਤਿ, ਸਕਲਨਗਰਵਾਸਿਨੋ ਏਤਿਸ੍ਸਾ ਸਮ੍ਫਸ੍ਸਂ ਜਾਨਾਪੇਤ੍ਵਾ ਗਰਹਂ ਮੋਚੇਸ੍ਸਾਮੀ’’ਤਿ. ਅਥ ਨਂ ਰਾਜਾ – ‘‘ਭਦ੍ਦੇ, ਮਾ ਚਿਨ੍ਤਯਿ, ਆਹਰਿਸ੍ਸਾਮਿ ਤੇ ਪਿਤੁ ਪਾਯਾਸ’’ਨ੍ਤਿ ਵਤ੍ਵਾ ਤਾਯ ਸਦ੍ਧਿਂ ਅਭਿਰਮਿਤ੍ਵਾ ਰਾਜਨਿਵੇਸਨਂ ਗਨ੍ਤ੍ਵਾ ਪੁਨਦਿਵਸੇ ਤਾਦਿਸਂ ਪਾਯਾਸਂ ਪਚਾਪੇਤ੍ਵਾ ਪਣ੍ਣਾਨਿ ਆਹਰਾਪੇਤ੍ਵਾ ਦ੍ਵੇ ਪੁਟੇ ਕਤ੍ਵਾ ਏਕਸ੍ਮਿਂ ਪਾਯਾਸਂ ਪਕ੍ਖਿਪਿਤ੍ਵਾ ਏਕਸ੍ਮਿਂ ਚੂਲ਼ਾਮਣਿਂ ਠਪੇਤ੍ਵਾ ਬਨ੍ਧਿਤ੍ਵਾ ਰਤ੍ਤਿਭਾਗੇ ਗਨ੍ਤ੍ਵਾ, ‘‘ਭਦ੍ਦੇ, ਮਯਂ ਦਲਿਦ੍ਦਾ, ਕਿਚ੍ਛੇਨ ਸਮ੍ਪਾਦਿਤਂ, ਤਵ ਪਿਤਰਂ ‘ਅਜ੍ਜ ਇਮਮ੍ਹਾ ਪੁਟਾ ਪਾਯਾਸਂ ਭੁਞ੍ਜ, ਸ੍ਵੇ ਇਮਮ੍ਹਾ’ਤਿ ਵਦੇਯ੍ਯਾਸੀ’’ਤਿ ਆਹ. ਸਾ ਤਥਾ ਅਕਾਸਿ. ਅਥਸ੍ਸਾ ਪਿਤਾ ਓਜਸਮ੍ਪਨ੍ਨਤ੍ਤਾ ਪਾਯਾਸਸ੍ਸ ਥੋਕਮੇਵ ਭੁਞ੍ਜਿਤ੍ਵਾ ਸੁਹਿਤੋ ਜਾਤੋ. ਸੇਸਂ ਮਾਤੁ ਦਤ੍ਵਾ ਸਯਮ੍ਪਿ ਭੁਞ੍ਜਿ. ਤਯੋਪਿ ਸੁਹਿਤਾ ਅਹੇਸੁਂ. ਚੂਲ਼ਾਮਣਿਪੁਟਂ ਪਨ ਪੁਨਦਿਵਸਤ੍ਥਾਯ ਠਪੇਸੁਂ.

ਰਾਜਾ ਨਿਵੇਸਨਂ ਗਨ੍ਤ੍ਵਾ ਮੁਖਂ ਧੋਵਿਤ੍ਵਾਵ ‘‘ਚੂਲ਼ਾਮਣਿਂ ਮੇ ਆਹਰਥਾ’’ਤਿ ਵਤ੍ਵਾ ‘‘ਨ ਪਸ੍ਸਾਮ, ਦੇਵਾ’’ਤਿ ਵੁਤ੍ਤੇ ‘‘ਸਕਲਨਗਰਂ ਵਿਚਿਨਥਾ’’ਤਿ ਆਹ. ਤੇ ਵਿਚਿਨਿਤ੍ਵਾਪਿ ਨ ਪਸ੍ਸਿਂਸੁ. ਤੇਨ ਹਿ ਬਹਿਨਗਰੇ ਦਲਿਦ੍ਦਗੇਹੇਸੁ ਭਤ੍ਤਪਣ੍ਣਪੁਟੇ ਉਪਾਦਾਯ ਵਿਚਿਨਥਾਤਿ. ਵਿਚਿਨਨ੍ਤਾ ਤਸ੍ਮਿਂ ਘਟੇ ਚੂਲ਼ਾਮਣਿਂ ਦਿਸ੍ਵਾ ਤਸ੍ਸਾ ਮਾਤਾਪਿਤਰੋ ‘‘ਚੋਰਾ’’ਤਿ ਬਨ੍ਧਿਤ੍ਵਾ ਨਯਿਂਸੁ. ਅਥਸ੍ਸਾ ਪਿਤਾ, ‘‘ਸਾਮਿ, ਨ ਮਯਂ ਚੋਰਾ, ਅਞ੍ਞੇਨਾਯਂ ਮਣਿ ਆਭਤੋ’’ਤਿ ਵਤ੍ਵਾ ‘‘ਕੇਨਾ’’ਤਿ ਵੁਤ੍ਤੇ ‘‘ਜਾਮਾਤਰਾ ਮੇ’’ਤਿ ਆਚਿਕ੍ਖਿਤ੍ਵਾ ‘‘ਕਹਂ ਸੋ’’ਤਿ ਪੁਚ੍ਛਿਤੋ ‘‘ਧੀਤਾ ਮੇ ਜਾਨਾਤੀ’’ਤਿ ਆਹ. ਤਤੋ ਧੀਤਾਯ ਸਦ੍ਧਿਂ ਕਥੇਸਿ – ‘‘ਅਮ੍ਮ, ਸਾਮਿਕਂ ਤੇ ਜਾਨਾਸੀ’’ਤਿ? ‘‘ਨ ਜਾਨਾਮੀ’’ਤਿ. ‘‘ਏਵਂ ਸਨ੍ਤੇ ਅਮ੍ਹਾਕਂ ਜੀਵਿਤਂ ਨਤ੍ਥੀ’’ਤਿ. ‘‘ਤਾਤ, ਸੋ ਅਨ੍ਧਕਾਰੇ ਆਗਨ੍ਤ੍ਵਾ ਅਨ੍ਧਕਾਰੇ ਏਵ ਯਾਤਿ, ਤੇਨਸ੍ਸ ਰੂਪਂ ਨ ਜਾਨਾਮਿ, ਹਤ੍ਥਸਮ੍ਫਸ੍ਸੇਨ ਪਨ ਨਂ ਜਾਨਿਤੁਂ ਸਕ੍ਕੋਮੀ’’ਤਿ. ਸੋ ਰਾਜਪੁਰਿਸਾਨਂ ਆਰੋਚੇਸਿ. ਤੇਪਿ ਰਞ੍ਞੋ ਆਰੋਚੇਸੁਂ. ਰਾਜਾ ਅਜਾਨਨ੍ਤੋ ਵਿਯ ਹੁਤ੍ਵਾ ‘‘ਤੇਨ ਹਿ ਤਂ ਇਤ੍ਥਿਂ ਰਾਜਙ੍ਗਣੇ ਅਨ੍ਤੋਸਾਣਿਯਂ ਠਪੇਤ੍ਵਾ ਸਾਣਿਯਾ ਹਤ੍ਥਪ੍ਪਮਾਣਂ ਛਿਦ੍ਦਂ ਕਤ੍ਵਾ ਨਗਰਵਾਸਿਨੋ ਸਨ੍ਨਿਪਾਤੇਤ੍ਵਾ ਹਤ੍ਥਸਮ੍ਫਸ੍ਸੇਨ ਚੋਰਂ ਗਣ੍ਹਥਾ’’ਤਿ ਆਹ. ਰਾਜਪੁਰਿਸਾ ਤਥਾ ਕਾਤੁਂ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ਰੂਪਂ ਦਿਸ੍ਵਾਵ ਵਿਪ੍ਪਟਿਸਾਰਿਨੋ ਹੁਤ੍ਵਾ – ‘‘ਧੀ, ਧੀ ਪਿਸਾਚੀ’’ਤਿ ਜਿਗੁਚ੍ਛਿਤ੍ਵਾ ਫੁਸਿਤੁਂ ਨ ਉਸ੍ਸਹਿਂਸੁ, ਆਨੇਤ੍ਵਾ ਪਨ ਨਂ ਰਾਜਙ੍ਗਣੇ ਅਨ੍ਤੋਸਾਣਿਯਂ ਠਪੇਤ੍ਵਾ ਸਕਲਨਗਰਵਾਸਿਨੋ ਸਨ੍ਨਿਪਾਤੇਸੁਂ. ਸਾ ਆਗਤਾਗਤਸ੍ਸ ਛਿਦ੍ਦੇਨ ਪਸਾਰਿਤਹਤ੍ਥਂ ਗਹੇਤ੍ਵਾਵ ‘‘ਨੋ ਏਸੋ’’ਤਿ ਵਦਤਿ. ਪੁਰਿਸਾ ਤਸ੍ਸਾ ਦਿਬ੍ਬਫਸ੍ਸਸਦਿਸੇ ਫਸ੍ਸੇ ਬਜ੍ਝਿਤ੍ਵਾ ਅਪਗਨ੍ਤੁਂ ਨ ਸਕ੍ਖਿਂਸੁ, ‘‘ਸਚਾਯਂ ਦਣ੍ਡਾਰਹਾ, ਦਣ੍ਡਂ ਦਤ੍ਵਾਪਿ ਦਾਸਕਮ੍ਮਕਾਰਭਾਵਂ ਉਪਗਨ੍ਤ੍ਵਾਪਿ ਏਤਂ ਘਰੇ ਕਰਿਸ੍ਸਾਮਾ’’ਤਿ ਚਿਨ੍ਤਯਿਂਸੁ. ਅਥ ਨੇ ਰਾਜਪੁਰਿਸਾ ਦਣ੍ਡੇਹਿ ਕੋਟ੍ਟੇਤ੍ਵਾ ਪਲਾਪੇਸੁਂ. ਉਪਰਾਜਾਨਂ ਆਦਿਂ ਕਤ੍ਵਾ ਸਬ੍ਬੇ ਉਮ੍ਮਤ੍ਤਕਾ ਵਿਯ ਅਹੇਸੁਂ.

ਅਥ ਰਾਜਾ – ‘‘ਕਚ੍ਚਿ ਅਹਂ ਭਵੇਯ੍ਯ’’ਨ੍ਤਿ ਹਤ੍ਥਂ ਪਸਾਰੇਸਿ. ਤਂ ਹਤ੍ਥੇ ਗਹੇਤ੍ਵਾਵ ‘‘ਚੋਰੋ ਮੇ ਗਹਿਤੋ’’ਤਿ ਮਹਾਸਦ੍ਦਂ ਕਰਿ. ਰਾਜਾ ਤੇਪਿ ਪੁਚ੍ਛਿ – ‘‘ਤੁਮ੍ਹੇ ਏਤਾਯ ਹਤ੍ਥੇ ਗਹਿਤਾ ਕਿਂ ਚਿਨ੍ਤਯਿਤ੍ਥਾ’’ਤਿ. ਤੇ ਯਥਾਭੂਤਂ ਆਰੋਚੇਸੁਂ. ਅਥ ਨੇ ਰਾਜਾ ਆਹ – ‘‘ਅਹਂ ਏਤਂ ਅਤ੍ਤਨੋ ਗੇਹਂ ਆਨੇਤੁਂ ਏਵਂ ਕਾਰੇਸਿਂ ‘ਏਤਿਸ੍ਸਾ ਫਸ੍ਸਂ ਅਜਾਨਨ੍ਤਾ ਮਂ ਪਰਿਭਵੇਯ੍ਯੁ’ਨ੍ਤਿ ਚਿਨ੍ਤੇਤ੍ਵਾ, ਤਸ੍ਮਾ ਮਯਾ ਸਬ੍ਬੇ ਤੁਮ੍ਹੇ ਜਾਨਾਪਿਤਾ, ਵਦਥ, ਭੋ ਦਾਨਿ, ਸਾ ਕਸ੍ਸ ਗੇਹੇ ਭਵਿਤੁਂ ਯੁਤ੍ਤਾ’’ਤਿ? ‘‘ਤੁਮ੍ਹਾਕਂ, ਦੇਵਾ’’ਤਿ. ਅਥ ਨਂ ਅਭਿਸਿਞ੍ਚਿਤ੍ਵਾ ਅਗ੍ਗਮਹੇਸਿਂ ਅਕਾਸਿ. ਮਾਤਾਪਿਤੂਨਮ੍ਪਿਸ੍ਸਾ ਇਸ੍ਸਰਿਯਂ ਦਾਪੇਸਿ. ਤਤੋ ਪਟ੍ਠਾਯ ਚ ਪਨ ਤਾਯ ਸਮ੍ਮਤ੍ਤੋ ਨੇਵ ਵਿਨਿਚ੍ਛਯਂ ਪਟ੍ਠਪੇਸਿ, ਨ ਅਞ੍ਞਂ ਇਤ੍ਥਿਂ ਓਲੋਕੇਸਿ. ਤਾ ਤਸ੍ਸਾ ਅਨ੍ਤਰਂ ਪਰਿਯੇਸਿਂਸੁ. ਸਾ ਏਕਦਿਵਸਂ ਦ੍ਵਿਨ੍ਨਂ ਰਾਜੂਨਂ ਅਗ੍ਗਮਹੇਸਿਭਾਵਸ੍ਸ ਸੁਪਿਨੇ ਨਿਮਿਤ੍ਤਂ ਦਿਸ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਸੁਪਿਨਪਾਠਕੇ ਪਕ੍ਕੋਸਾਪੇਤ੍ਵਾ ‘‘ਏਵਰੂਪੇ ਸੁਪਿਨੇ ਦਿਟ੍ਠੇ ਕਿਂ ਹੋਤੀ’’ਤਿ ਪੁਚ੍ਛਿ. ਤੇ ਇਤਰਾਸਂ ਇਤ੍ਥੀਨਂ ਸਨ੍ਤਿਕਾ ਲਞ੍ਜਂ ਗਹੇਤ੍ਵਾ – ‘‘ਮਹਾਰਾਜ, ਦੇਵਿਯਾ ਸਬ੍ਬਸੇਤਸ੍ਸ ਹਤ੍ਥਿਨੋ ਖਨ੍ਧੇ ਨਿਸਿਨ੍ਨਭਾਵੋ ਤੁਮ੍ਹਾਕਂ ਮਰਣਸ੍ਸ ਪੁਬ੍ਬਨਿਮਿਤ੍ਤਂ, ਹਤ੍ਥਿਖਨ੍ਧਗਤਾਯ ਪਨ ਚਨ੍ਦਪਰਾਮਸਨਂ ਤੁਮ੍ਹਾਕਂ ਪਚ੍ਚਾਮਿਤ੍ਤਰਾਜਾਨਯਨਸ੍ਸ ਪੁਬ੍ਬਨਿਮਿਤ੍ਤ’’ਨ੍ਤਿ ਵਤ੍ਵਾ ‘‘ਇਦਾਨਿ ਕਿਂ ਕਾਤਬ੍ਬ’’ਨ੍ਤਿ ਵੁਤ੍ਤੇ ‘‘ਦੇਵ ਇਮਂ ਮਾਰੇਤੁਂ ਨ ਸਕ੍ਕਾ, ਨਾਵਾਯ ਪਨ ਨਂ ਠਪੇਤ੍ਵਾ ਨਦਿਯਂ ਵਿਸ੍ਸਜ੍ਜੇਤੁਂ ਵਟ੍ਟਤੀ’’ਤਿ ਵਦਿਂਸੁ. ਰਾਜਾ ਆਹਾਰਵਤ੍ਥਾਲਙ੍ਕਾਰੇਹਿ ਸਦ੍ਧਿਂ ਰਤ੍ਤਿਭਾਗੇ ਨਂ ਨਾਵਾਯ ਠਪੇਤ੍ਵਾ ਨਦਿਯਂ ਵਿਸ੍ਸਜ੍ਜੇਸਿ.

ਸਾ ਨਦਿਯਾ ਵੁਯ੍ਹਮਾਨਾ ਹੇਟ੍ਠਾਨਦਿਯਾ ਨਾਵਾਯ ਉਦਕਂ ਕੀਲ਼ਨ੍ਤਸ੍ਸ ਬਾਵਰਿਕਰਞ੍ਞੋ ਅਭਿਮੁਖਟ੍ਠਾਨਂ ਪਤ੍ਤਾ. ਤਸ੍ਸ ਸੇਨਾਪਤਿ ਨਾਵਂ ਦਿਸ੍ਵਾ ‘‘ਅਯਂ ਨਾਵਾ ਮਯ੍ਹ’’ਨ੍ਤਿ ਆਹ. ਰਾਜਾ ‘‘ਨਾਵਾਯ ਭਣ੍ਡਂ ਮਯ੍ਹ’’ਨ੍ਤਿ ਵਤ੍ਵਾ ਆਗਤਾਯ ਨਾਵਾਯ ਤਂ ਦਿਸ੍ਵਾ ‘‘ਕਾ ਨਾਮ ਤ੍ਵਂ ਪਿਸਾਚੀਸਦਿਸਾ’’ਤਿ ਪੁਚ੍ਛਿ. ਸਾ ਸਿਤਂ ਕਤ੍ਵਾ ਬਕਸ੍ਸ ਰਞ੍ਞੋ ਅਗ੍ਗਮਹੇਸਿਭਾਵਂ ਕਥੇਤ੍ਵਾ ਸਬ੍ਬਂ ਤਂ ਪਵਤ੍ਤਿਂ ਤਸ੍ਸ ਕਥੇਸਿ. ਸਾ ਪਨ ਪਞ੍ਚਪਾਪੀਤਿ ਸਕਲਜਮ੍ਬੁਦੀਪੇ ਪਾਕਟਾ. ਅਥ ਨਂ ਰਾਜਾ ਹਤ੍ਥੇ ਗਹੇਤ੍ਵਾ ਉਕ੍ਖਿਪਿ, ਸਹ ਗਹਣੇਨੇਵ ਫਸ੍ਸਰਾਗਰਤ੍ਤੋ ਅਞ੍ਞਾਸੁ ਇਤ੍ਥੀਸੁ ਇਤ੍ਥਿਸਞ੍ਞਂ ਅਕਤ੍ਵਾ ਤਂ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਸਾ ਤਸ੍ਸ ਪਾਣਸਮਾ ਅਹੋਸਿ. ਬਕੋ ਤਂ ਪਵਤ੍ਤਿਂ ਸੁਤ੍ਵਾ ‘‘ਨਾਹਂ ਤਸ੍ਸ ਅਗ੍ਗਮਹੇਸਿਂ ਕਾਤੁਂ ਦਸ੍ਸਾਮੀ’’ਤਿ ਸੇਨਂ ਸਙ੍ਕਡ੍ਢਿਤ੍ਵਾ ਤਸ੍ਸ ਪਟਿਤਿਤ੍ਥੇ ਨਿਵੇਸਨਂ ਕਤ੍ਵਾ ਪਣ੍ਣਂ ਪੇਸੇਸਿ – ‘‘ਭਰਿਯਂ ਵਾ ਮੇ ਦੇਤੁ ਯੁਦ੍ਧਂ ਵਾ’’ਤਿ. ਸੋ ‘‘ਯੁਦ੍ਧਂ ਦਸ੍ਸਾਮਿ, ਨ ਭਰਿਯ’’ਨ੍ਤਿ ਵਤ੍ਵਾ ਯੁਦ੍ਧਸਜ੍ਜੋ ਅਹੋਸਿ. ਉਭਿਨ੍ਨਂ ਅਮਚ੍ਚਾ ‘‘ਮਾਤੁਗਾਮਂ ਨਿਸ੍ਸਾਯ ਮਰਣਕਿਚ੍ਚਂ ਨਤ੍ਥਿ, ਪੁਰਿਮਸਾਮਿਕਤ੍ਤਾ ਏਸਾ ਬਕਸ੍ਸ ਪਾਪੁਣਾਤਿ, ਨਾਵਾਯ ਲਦ੍ਧਤ੍ਤਾ ਬਾਵਰਿਕਸ੍ਸ, ਤਸ੍ਮਾ ਏਕੇਕਸ੍ਸ ਗੇਹੇ ਸਤ੍ਤ ਸਤ੍ਤ ਦਿਵਸਾਨਿ ਹੋਤੂ’’ਤਿ ਮਨ੍ਤੇਤ੍ਵਾ ਦ੍ਵੇਪਿ ਰਾਜਾਨੋ ਸਞ੍ਞਾਪੇਸੁਂ. ਤੇ ਉਭੋਪਿ ਅਤ੍ਤਮਨਾ ਹੁਤ੍ਵਾ ਤਿਤ੍ਥਪਟਿਤਿਤ੍ਥੇ ਨਗਰਾਨਿ ਮਾਪੇਤ੍ਵਾ ਵਸਿਂਸੁ. ਸਾ ਦ੍ਵਿਨ੍ਨਮ੍ਪਿ ਤੇਸਂ ਅਗ੍ਗਮਹੇਸਿਤ੍ਤਂ ਕਾਰੇਸਿ. ਦ੍ਵੇਪਿ ਤਸ੍ਸਾ ਸਮ੍ਮਤ੍ਤਾ ਅਹੇਸੁਂ. ਸਾ ਪਨ ਏਕਸ੍ਸ ਘਰੇ ਸਤ੍ਤਾਹਂ ਵਸਿਤ੍ਵਾ ਨਾਵਾਯ ਇਤਰਸ੍ਸ ਘਰਂ ਗਚ੍ਛਨ੍ਤੀ ਨਾਵਂ ਪਾਜੇਤ੍ਵਾ ਨੇਨ੍ਤੇਨ ਏਕੇਨ ਮਹਲ੍ਲਕਖੁਜ੍ਜਕੇਵਟ੍ਟੇਨ ਸਦ੍ਧਿਂ ਨਦੀਮਜ੍ਝੇ ਪਾਪਂ ਕਰੋਤਿ. ਤਦਾ ਕੁਣਾਲੋ ਸਕੁਣਰਾਜਾ ਬਕੋ ਅਹੋਸਿ, ਤਸ੍ਮਾ ਇਦਂ ਅਤ੍ਤਨਾ ਦਿਟ੍ਠਕਾਰਣਂ ਆਹਰਿਤ੍ਵਾ ਦਸ੍ਸੇਨ੍ਤੋ ਗਾਥਮਾਹ –

੩੧੨.

‘‘ਬਕਸ੍ਸ ਚ ਬਾਵਰਿਕਸ੍ਸ ਚ ਰਞ੍ਞੋ, ਅਚ੍ਚਨ੍ਤਕਾਮਾਨੁਗਤਸ੍ਸ ਭਰਿਯਾ;

ਅਵਾਚਰੀ ਪਟ੍ਠਵਸਾਨੁਗਸ੍ਸ, ਕਂ ਵਾਪਿ ਇਤ੍ਥੀ ਨਾਤਿਚਰੇ ਤਦਞ੍ਞ’’ਨ੍ਤਿ.

ਤਤ੍ਥ ਅਚ੍ਚਨ੍ਤਕਾਮਾਨੁਗਤਸ੍ਸਾਤਿ ਅਚ੍ਚਨ੍ਤਂ ਕਾਮਂ ਅਨੁਗਤਸ੍ਸ. ਅਵਾਚਰੀਤਿ ਅਨਾਚਾਰਂ ਚਰਿ. ਪਟ੍ਠਵਸਾਨੁਗਸ੍ਸਾਤਿ ਪਟ੍ਠਸ੍ਸ ਅਤ੍ਤਨੋ ਵਸਾਨੁਗਤਸ੍ਸ, ਅਤ੍ਤਨੋ ਪੇਸਨਕਾਰਸ੍ਸ ਸਨ੍ਤਿਕੇਤਿ ਅਤ੍ਥੋ. ਕਰਣਤ੍ਥੇ ਵਾ ਸਾਮਿਵਚਨਂ, ਤੇਨ ਸਦ੍ਧਿਂ ਪਾਪਮਕਾਸੀਤਿ ਵੁਤ੍ਤਂ ਹੋਤਿ. ਤਦਞ੍ਞਨ੍ਤਿ ਕਤਰਂ ਤਂ ਅਞ੍ਞਂ ਪੁਰਿਸਂ ਨਾਤਿਚਰੇਯ੍ਯਾਤਿ ਅਤ੍ਥੋ.

ਅਪਰਾਪਿ ਅਤੀਤੇ ਬ੍ਰਹ੍ਮਦਤ੍ਤਸ੍ਸ ਭਰਿਯਾ ਪਿਙ੍ਗਿਯਾਨੀ ਨਾਮ ਅਗ੍ਗਮਹੇਸੀ ਸੀਹਪਞ੍ਜਰਂ ਵਿਵਰਿਤ੍ਵਾ ਓਲੋਕੇਨ੍ਤੀ ਮਙ੍ਗਲਅਸ੍ਸਗੋਪਕਂ ਦਿਸ੍ਵਾ ਰਞ੍ਞੋ ਨਿਦ੍ਦੁਪਗਮਨਕਾਲੇ ਵਾਤਪਾਨੇਨ ਓਰੁਯ੍ਹ ਤੇਨ ਸਦ੍ਧਿਂ ਅਤਿਚਰਿਤ੍ਵਾ ਪੁਨ ਪਾਸਾਦਂ ਆਰੁਯ੍ਹ ਗਨ੍ਧੇਹਿ ਸਰੀਰਂ ਉਬ੍ਬਟ੍ਟੇਤ੍ਵਾ ਰਞ੍ਞਾ ਸਦ੍ਧਿਂ ਨਿਪਜ੍ਜਿ. ਅਥੇਕਦਿਵਸਂ ਰਾਜਾ ‘‘ਕਿਂ ਨੁ ਖੋ ਦੇਵਿਯਾ ਅਡ੍ਢਰਤ੍ਤਸਮਯੇ ਨਿਚ੍ਚਂ ਸਰੀਰਂ ਸੀਤਂ ਹੋਤਿ, ਪਰਿਗ੍ਗਣ੍ਹਿਸ੍ਸਾਮਿ ਨ’’ਨ੍ਤਿ ਏਕਦਿਵਸਂ ਨਿਦ੍ਦੁਪਗਤੋ ਵਿਯ ਹੁਤ੍ਵਾ ਤਂ ਉਟ੍ਠਾਯ ਗਚ੍ਛਨ੍ਤਿਂ ਅਨੁਗਨ੍ਤ੍ਵਾ ਅਸ੍ਸਬਨ੍ਧੇਨ ਸਦ੍ਧਿਂ ਅਤਿਚਰਨ੍ਤਿਂ ਦਿਸ੍ਵਾ ਨਿਵਤ੍ਤਿਤ੍ਵਾ ਸਯਨਂ ਅਭਿਰੁਹਿ. ਸਾਪਿ ਅਤਿਚਰਿਤ੍ਵਾ ਆਗਨ੍ਤ੍ਵਾ ਚੂਲ਼ਸਯਨਕੇ ਨਿਪਜ੍ਜਿ. ਪੁਨਦਿਵਸੇ ਰਾਜਾ ਅਮਚ੍ਚਗਣਮਜ੍ਝੇਯੇਵ ਤਂ ਪਕ੍ਕੋਸਾਪੇਤ੍ਵਾ ਤਂ ਕਿਚ੍ਚਂ ਆਵਿਕਤ੍ਵਾ ‘‘ਸਬ੍ਬਾਵ ਇਤ੍ਥਿਯੋ ਪਾਪਧਮ੍ਮਾ’’ਤਿ ਤਸ੍ਸਾ ਵਧਬਨ੍ਧਛੇਜ੍ਜਭੇਜ੍ਜਾਰਹਂ ਦੋਸਂ ਖਮਿਤ੍ਵਾ ਠਾਨਾ ਚਾਵੇਤ੍ਵਾ ਅਞ੍ਞਂ ਅਗ੍ਗਮਹੇਸਿਂ ਅਕਾਸਿ. ਤਦਾ ਕੁਣਾਲੋ ਰਾਜਾ ਬ੍ਰਹ੍ਮਦਤ੍ਤੋ ਅਹੋਸਿ, ਤੇਨ ਤਂ ਅਤ੍ਤਨਾ ਦਿਟ੍ਠਂ ਆਹਰਿਤ੍ਵਾ ਦਸ੍ਸੇਨ੍ਤੋ ਗਾਥਮਾਹ –

੩੧੩.

‘‘ਪਿਙ੍ਗਿਯਾਨੀ ਸਬ੍ਬਲੋਕਿਸ੍ਸਰਸ੍ਸ, ਰਞ੍ਞੋ ਪਿਯਾ ਬ੍ਰਹ੍ਮਦਤ੍ਤਸ੍ਸ ਭਰਿਯਾ;

ਅਵਾਚਰੀ ਪਟ੍ਠਵਸਾਨੁਗਸ੍ਸ, ਤਂ ਵਾਪਿ ਸਾ ਨਾਜ੍ਝਗਾ ਕਾਮਕਾਮਿਨੀ’’ਤਿ.

ਤਤ੍ਥ ਤਂ ਵਾਤਿ ਸਾ ਏਵਂ ਅਤਿਚਰਨ੍ਤੀ ਤਂ ਵਾ ਅਸ੍ਸਬਨ੍ਧਂ ਤਂ ਵਾ ਅਗ੍ਗਮਹੇਸਿਟ੍ਠਾਨਨ੍ਤਿ ਉਭਯਮ੍ਪਿ ਨਾਜ੍ਝਗਾ, ਉਭਤੋ ਭਟ੍ਠਾ ਅਹੋਸਿ. ਕਾਮਕਾਮਿਨੀਤਿ ਕਾਮੇ ਪਤ੍ਥਯਮਾਨਾ.

ਏਵਂ ਪਾਪਧਮ੍ਮਾ ਇਤ੍ਥਿਯੋਤਿ ਅਤੀਤਵਤ੍ਥੂਹਿ ਇਤ੍ਥੀਨਂ ਦੋਸਂ ਕਥੇਤ੍ਵਾ ਅਪਰੇਨਪਿ ਪਰਿਯਾਯੇਨ ਤਾਸਂ ਦੋਸਮੇਵ ਕਥੇਨ੍ਤੋ ਆਹ –

੩੧੪.

‘‘ਲੁਦ੍ਧਾਨਂ ਲਹੁਚਿਤ੍ਤਾਨਂ, ਅਕਤਞ੍ਞੂਨ ਦੁਬ੍ਭਿਨਂ;

ਨਾਦੇਵਸਤ੍ਤੋ ਪੁਰਿਸੋ, ਥੀਨਂ ਸਦ੍ਧਾਤੁਮਰਹਤਿ.

੩੧੫.

‘‘ਨ ਤਾ ਪਜਾਨਨ੍ਤਿ ਕਤਂ ਨ ਕਿਚ੍ਚਂ, ਨ ਮਾਤਰਂ ਪਿਤਰਂ ਭਾਤਰਂ ਵਾ;

ਅਨਰਿਯਾ ਸਮਤਿਕ੍ਕਨ੍ਤਧਮ੍ਮਾ, ਸਸ੍ਸੇਵ ਚਿਤ੍ਤਸ੍ਸ ਵਸਂ ਵਜਨ੍ਤਿ.

੩੧੬.

‘‘ਚਿਰਾਨੁਵੁਟ੍ਠਮ੍ਪਿ ਪਿਯਂ ਮਨਾਪਂ, ਅਨੁਕਮ੍ਪਕਂ ਪਾਣਸਮਮ੍ਪਿ ਭਤ੍ਤੁਂ;

ਆਵਾਸੁ ਕਿਚ੍ਚੇਸੁ ਚ ਨਂ ਜਹਨ੍ਤਿ, ਤਸ੍ਮਾਹਮਿਤ੍ਥੀਨਂ ਨ ਵਿਸ੍ਸਸਾਮਿ.

੩੧੭.

‘‘ਥੀਨਞ੍ਹਿ ਚਿਤ੍ਤਂ ਯਥਾ ਵਾਨਰਸ੍ਸ, ਕਨ੍ਨਪ੍ਪਕਨ੍ਨਂ ਯਥਾ ਰੁਕ੍ਖਛਾਯਾ;

ਚਲਾਚਲਂ ਹਦਯਮਿਤ੍ਥਿਯਾਨਂ, ਚਕ੍ਕਸ੍ਸ ਨੇਮਿ ਵਿਯ ਪਰਿਵਤ੍ਤਤਿ.

੩੧੮.

‘‘ਯਦਾ ਤਾ ਪਸ੍ਸਨ੍ਤਿ ਸਮੇਕ੍ਖਮਾਨਾ, ਆਦੇਯ੍ਯਰੂਪਂ ਪੁਰਿਸਸ੍ਸ ਵਿਤ੍ਤਂ;

ਸਣ੍ਹਾਹਿ ਵਾਚਾਹਿ ਨਯਨ੍ਤਿ ਮੇਨਂ, ਕਮ੍ਬੋਜਕਾ ਜਲਜੇਨੇਵ ਅਸ੍ਸਂ.

੩੧੯.

‘‘ਯਦਾ ਨ ਪਸ੍ਸਨ੍ਤਿ ਸਮੇਕ੍ਖਮਾਨਾ, ਆਦੇਯ੍ਯਰੂਪਂ ਪੁਰਿਸਸ੍ਸ ਵਿਤ੍ਤਂ;

ਸਮਨ੍ਤਤੋ ਨਂ ਪਰਿਵਜ੍ਜਯਨ੍ਤਿ, ਤਿਣ੍ਣੋ ਨਦੀਪਾਰਗਤੋਵ ਕੁਲ੍ਲਂ.

੩੨੦.

‘‘ਸਿਲੇਸੂਪਮਾ ਸਿਖਿਰਿਵ ਸਬ੍ਬਭਕ੍ਖਾ, ਤਿਕ੍ਖਮਾਯਾ ਨਦੀਰਿਵ ਸੀਘਸੋਤਾ;

ਸੇਵਨ੍ਤਿ ਹੇਤਾ ਪਿਯਮਪ੍ਪਿਯਞ੍ਚ, ਨਾਵਾ ਯਥਾ ਓਰਕੁਲਂ ਪਰਞ੍ਚ.

੩੨੧.

‘‘ਨ ਤਾ ਏਕਸ੍ਸ ਨ ਦ੍ਵਿਨ੍ਨਂ, ਆਪਣੋਵ ਪਸਾਰਿਤੋ;

ਯੋ ਤਾ ਮਯ੍ਹਨ੍ਤਿ ਮਞ੍ਞੇਯ੍ਯ, ਵਾਤਂ ਜਾਲੇਨ ਬਾਧਯੇ.

੩੨੨.

‘‘ਯਥਾ ਨਦੀ ਚ ਪਨ੍ਥੋ ਚ, ਪਾਨਾਗਾਰਂ ਸਭਾ ਪਪਾ;

ਏਵਂ ਲੋਕਿਤ੍ਥਿਯੋ ਨਾਮ, ਵੇਲਾ ਤਾਸਂ ਨ ਵਿਜ੍ਜਤਿ.

੩੨੩.

‘‘ਘਤਾਸਨਸਮਾ ਏਤਾ, ਕਣ੍ਹਸਪ੍ਪਸਿਰੂਪਮਾ;

ਗਾਵੋ ਬਹਿ ਤਿਣਸ੍ਸੇਵ, ਓਮਸਨ੍ਤਿ ਵਰਂ ਵਰਂ.

੩੨੪.

‘‘ਘਤਾਸਨਂ ਕੁਞ੍ਜਰਂ ਕਣ੍ਹਸਪ੍ਪਂ, ਮੁਦ੍ਧਾਭਿਸਿਤ੍ਤਂ ਪਮਦਾ ਚ ਸਬ੍ਬਾ;

ਏਤੇ ਨਰੋ ਨਿਚ੍ਚਯਤੋ ਭਜੇਥ, ਤੇਸਂ ਹਵੇ ਦੁਬ੍ਬਿਦੁ ਸਬ੍ਬਭਾਵੋ.

੩੨੫.

‘‘ਨਚ੍ਚਨ੍ਤਵਣ੍ਣਾ ਨ ਬਹੂਨ ਕਨ੍ਤਾ, ਨ ਦਕ੍ਖਿਣਾ ਪਮਦਾ ਸੇਵਿਤਬ੍ਬਾ;

ਨ ਪਰਸ੍ਸ ਭਰਿਯਾ ਨ ਧਨਸ੍ਸ ਹੇਤੁ, ਏਤਿਤ੍ਥਿਯੋ ਪਞ੍ਚ ਨ ਸੇਵਿਤਬ੍ਬਾ’’ਤਿ.

ਤਤ੍ਥ ਲੁਦ੍ਧਾਨਨ੍ਤਿ ਲੁਬ੍ਭਾਨਂ. ਕਣਵੇਰਜਾਤਕੇ (ਜਾ. ੧.੪.੬੯-੭੨) ਵਿਯ ਬਦ੍ਧਚੋਰੇਪਿ ਸਾਰਜ੍ਜਨਂ ਸਨ੍ਧਾਯੇਤਂ ਵੁਤ੍ਤਂ. ਲਹੁਚਿਤ੍ਤਾਨਨ੍ਤਿ ਮੁਹੁਤ੍ਤਮੇਵ ਪਰਿਵਤ੍ਤਨਚਿਤ੍ਤਾਨਂ. ਚੂਲ਼ਧਨੁਗ੍ਗਹਜਾਤਕੇਨ (ਜਾ. ੧.੫.੧੨੮ ਆਦਯੋ) ਏਤਂ ਦੀਪੇਤਬ੍ਬਂ. ਅਕਤਞ੍ਞੁਤਾ ਪਨ ਏਤਾਸਂ ਏਕਕਨਿਪਾਤੇ ਤਕ੍ਕਾਰਿਯਜਾਤਕੇਨ (ਜਾ. ੧.੧੩.੧੦੪ ਆਦਯੋ) ਦੀਪੇਤਬ੍ਬਾ. ਨਾਦੇਵਸਤ੍ਤੋਤਿ ਨ ਅਦੇਵਸਤ੍ਤੋ ਦੇਵੇਨ ਅਨਾਸਤ੍ਤੋ ਅਯਕ੍ਖਗਹਿਤਕੋ ਅਭੂਤਵਿਟ੍ਠੋ ਪੁਰਿਸੋ ਥੀਨਂ ਸੀਲਵਨ੍ਤਤਂ ਸਦ੍ਧਾਤੁਂ ਨਾਰਹਤਿ, ਭੂਤਵਿਟ੍ਠੋ ਪਨ ਸਦ੍ਦਹੇਯ੍ਯ. ਕਤਨ੍ਤਿ ਅਤ੍ਤਨੋ ਕਤਂ ਉਪਕਾਰਂ. ਕਿਚ੍ਚਨ੍ਤਿ ਅਤ੍ਤਨਾ ਕਤ੍ਤਬ੍ਬਂ ਕਿਚ੍ਚਂ. ਨ ਮਾਤਰਨ੍ਤਿ ਸਬ੍ਬੇਪਿ ਞਾਤਕੇ ਛਡ੍ਡੇਤ੍ਵਾ ਯਸ੍ਮਿਂ ਪਟਿਬਦ੍ਧਚਿਤ੍ਤਾ ਹੋਨ੍ਤਿ, ਤਞ੍ਞੇਵ ਅਨੁਬਨ੍ਧਨਤੋ ਏਤੇ ਮਾਤਾਦਯੋ ਨ ਜਾਨਨ੍ਤਿ ਨਾਮ ਮਹਾਪਨ੍ਥਕਮਾਤਾ ਵਿਯ. ਅਨਰਿਯਾਤਿ ਨਿਲ੍ਲਜ੍ਜਾ. ਸਸ੍ਸੇਵਾਤਿ ਸਕਸ੍ਸ. ਆਵਾਸੂਤਿ ਆਪਦਾਸੁ. ਕਿਚ੍ਚੇਸੂਤਿ ਤੇਸੁ ਤੇਸੁ ਕਰਣੀਯੇਸੁ.

ਕਨ੍ਨਪ੍ਪਕਨ੍ਨਨ੍ਤਿ ਓਤਿਣ੍ਣੋਤਿਣ੍ਣਂ. ਯਥਾ ਹਿ ਵਿਸਮੇ ਪਦੇਸੇ ਰੁਕ੍ਖਛਾਯਾ ਨਿਨ੍ਨਮ੍ਪਿਓਰੋਹਤਿ, ਥਲਮ੍ਪਿ ਅਭਿਰੁਹਤਿ, ਤਥਾ ਏਤਾਸਮ੍ਪਿ ਚਿਤ੍ਤਂ ਨ ਕਞ੍ਚਿ ਉਤ੍ਤਮਾਧਮਂ ਵਜ੍ਜੇਤਿ. ਚਲਾਚਲਨ੍ਤਿ ਏਕਸ੍ਮਿਂਯੇਵ ਅਪਤਿਟ੍ਠਿਤਂ. ਨੇਮਿ ਵਿਯਾਤਿ ਸਕਟਸ੍ਸ ਗਚ੍ਛਤੋ ਚਕ੍ਕਨੇਮਿ ਵਿਯ. ਆਦੇਯ੍ਯਰੂਪਨ੍ਤਿ ਗਹੇਤਬ੍ਬਜਾਤਿਕਂ. ਵਿਤ੍ਤਨ੍ਤਿ ਧਨਂ. ਨਯਨ੍ਤੀਤਿ ਅਤ੍ਤਨੋ ਵਸਂ ਨੇਨ੍ਤਿ. ਜਲਜੇਨਾਤਿ ਜਲਜਾਤਸੇਵਾਲੇਨ. ਕਮ੍ਬੋਜਰਟ੍ਠਵਾਸਿਨੋ ਕਿਰ ਯਦਾ ਅਟਵਿਤੋ ਅਸ੍ਸੇ ਗਣ੍ਹਿਤੁਕਾਮਾ ਹੋਨ੍ਤਿ, ਤਦਾ ਏਕਸ੍ਮਿਂ ਠਾਨੇ ਵਤਿਂ ਪਰਿਕ੍ਖਿਪਿਤ੍ਵਾ ਦ੍ਵਾਰਂ ਯੋਜੇਤ੍ਵਾ ਅਸ੍ਸਾਨਂ ਉਦਕਪਾਨਤਿਤ੍ਥੇ ਸੇਵਾਲਂ ਮਧੁਨਾ ਮਕ੍ਖੇਤ੍ਵਾ ਸੇਵਾਲਸਮ੍ਬਨ੍ਧਾਨਿ ਤੀਰੇ ਤਿਣਾਨਿ ਆਦਿਂ ਕਤ੍ਵਾ ਯਾਵ ਪਰਿਕ੍ਖੇਪਦ੍ਵਾਰਾ ਮਕ੍ਖੇਨ੍ਤਿ, ਅਸ੍ਸਾ ਪਾਨੀਯਂ ਪਿਵਿਤ੍ਵਾ ਰਸਗਿਦ੍ਧੇਨ ਮਧੁਨਾ ਮਕ੍ਖਿਤਾਨਿ ਤਾਨਿ ਤਿਣਾਨਿ ਖਾਦਨ੍ਤਾ ਅਨੁਕ੍ਕਮੇਨ ਤਂ ਠਾਨਂ ਪਵਿਸਨ੍ਤਿ. ਇਤਿ ਯਥਾ ਤੇ ਜਲਜੇਨ ਪਲੋਭੇਤ੍ਵਾ ਅਸ੍ਸੇ ਵਸਂ ਨੇਨ੍ਤਿ, ਤਥਾ ਏਤਾਪਿ ਧਨਂ ਦਿਸ੍ਵਾ ਤਸ੍ਸ ਗਹਣਤ੍ਥਾਯ ਸਣ੍ਹਾਹਿ ਵਾਚਾਹਿਪਿ ਪੁਰਿਸਂ ਵਸਂ ਨੇਨ੍ਤੀਤਿ ਅਤ੍ਥੋ. ਕੁਲ੍ਲਨ੍ਤਿ ਤਰਣਤ੍ਥਾਯ ਗਹਿਤਂ ਯਂ ਕਿਞ੍ਚਿ.

ਸਿਲੇਸੂਪਮਾਤਿ ਪੁਰਿਸਾਨਂ ਚਿਤ੍ਤਬਨ੍ਧਨੇਨ ਸਿਲੇਸਸਦਿਸਾ. ਤਿਕ੍ਖਮਾਯਾਤਿ ਤਿਖਿਣਮਾਯਾ ਸੀਘਮਾਯਾ. ਨਦੀਰਿਵਾਤਿ ਯਥਾ ਪਬ੍ਬਤੇਯ੍ਯਾ ਨਦੀ ਸੀਘਸੋਤਾ, ਏਵਂ ਸੀਘਮਾਯਾਤਿ ਅਤ੍ਥੋ. ਆਪਣੋਵਾਤਿ ਯਥਾ ਚ ਪਸਾਰਿਤਾਪਣੋ ਯੇਸਂ ਮੂਲਂ ਅਤ੍ਥਿ, ਤੇਸਞ੍ਞੇਵ ਉਪਕਾਰੋ, ਤਥੇਵ ਤਾਪਿ. ਯੋ ਤਾਤਿ ਯੋ ਪੁਰਿਸੋ ਤਾ ਇਤ੍ਥਿਯੋ. ਬਾਧਯੇਤਿ ਸੋ ਵਾਤਂ ਜਾਲੇਨ ਬਾਧੇਯ੍ਯ. ਵੇਲਾ ਤਾਸਂ ਨ ਵਿਜ੍ਜਤੀਤਿ ਯਥਾ ਏਤੇਸਂ ਨਦੀਆਦੀਨਂ ‘‘ਅਸੁਕਵੇਲਾਯਮੇਵ ਏਤ੍ਥ ਗਨ੍ਤਬ੍ਬ’’ਨ੍ਤਿ ਵੇਲਾ ਨਤ੍ਥਿ, ਰਤ੍ਤਿਮ੍ਪਿ ਦਿਵਾਪਿ ਇਚ੍ਛਿਤਿਚ੍ਛਿਤਕ੍ਖਣੇ ਉਪਗਨ੍ਤਬ੍ਬਾਨੇਵ, ਅਸੁਕੇਨੇਵਾਤਿਪਿ ਮਰਿਯਾਦਾ ਨਤ੍ਥਿ, ਅਤ੍ਥਿਕੇਨ ਉਪਗਨ੍ਤਬ੍ਬਾਨੇਵ, ਤਥਾ ਤਾਸਮ੍ਪੀਤਿ ਅਤ੍ਥੋ.

ਘਤਾਸਨਸਮਾ ਏਤਾਤਿ ਯਥਾ ਅਗ੍ਗਿ ਇਨ੍ਧਨੇਨ ਨ ਤਪ੍ਪਤਿ, ਏਵਮੇਤਾਪਿ ਕਿਲੇਸਰਤਿਯਾ. ਕਣ੍ਹਸਪ੍ਪਸਿਰੂਪਮਾਤਿ ਕੋਧਨਤਾਯ ਉਪਨਾਹਿਤਾਯ ਘੋਰਵਿਸਤਾਯ ਦੁਜਿਵ੍ਹਤਾਯ ਮਿਤ੍ਤਦੁਬ੍ਭਿਤਾਯਾਤਿ ਪਞ੍ਚਹਿ ਕਾਰਣੇਹਿ ਕਣ੍ਹਸਪ੍ਪਸਿਰਸਦਿਸਾ. ਤਤ੍ਥ ਬਹੁਲਰਾਗਤਾਯ ਘੋਰਵਿਸਤਾ, ਪਿਸੁਣਤਾਯ ਦੁਜਿਵ੍ਹਤਾ, ਅਤਿਚਾਰਿਤਾਯ ਮਿਤ੍ਤਦੁਬ੍ਭਿਤਾ ਵੇਦਿਤਬ੍ਬਾ. ਗਾਵੋ ਬਹਿ ਤਿਣਸ੍ਸੇਵਾਤਿ ਯਥਾ ਗਾਵੋ ਖਾਦਿਤਟ੍ਠਾਨਂ ਛਡ੍ਡੇਤ੍ਵਾ ਬਹਿ ਮਨਾਪਮਨਾਪਸ੍ਸ ਤਿਣਸ੍ਸ ਵਰਂ ਵਰਂ ਓਮਸਨ੍ਤਿ ਖਾਦਨ੍ਤਿ, ਏਵਮੇਤਾਪਿ ਨਿਦ੍ਧਨਂ ਛਡ੍ਡੇਤ੍ਵਾ ਅਞ੍ਞਂ ਸਧਨਮੇਵ ਭਜਨ੍ਤੀਤਿ ਅਤ੍ਥੋ. ਮੁਦ੍ਧਾਭਿਸਿਤ੍ਤਨ੍ਤਿ ਰਾਜਾਨਂ. ਪਮਦਾ ਚ ਸਬ੍ਬਾਤਿ ਸਬ੍ਬਾ ਚ ਇਤ੍ਥਿਯੋ. ਏਤੇਤਿ ਏਤੇ ਪਞ੍ਚ ਜਨੇ. ਨਿਚ੍ਚਯਤੋਤਿ ਨਿਚ੍ਚਸਞ੍ਞਤੋ, ਉਪਟ੍ਠਿਤਸ੍ਸਤਿ ਅਪ੍ਪਮਤ੍ਤੋਵ ਹੁਤ੍ਵਾਤਿ ਅਤ੍ਥੋ. ਦੁਬ੍ਬਿਦੂਤਿ ਦੁਜ੍ਜਾਨੋ. ਸਬ੍ਬਭਾਵੋਤਿ ਅਜ੍ਝਾਸਯੋ. ਚਿਰਪਰਿਚਿਣ੍ਣੋਪਿ ਹਿ ਅਗ੍ਗਿ ਦਹਤਿ, ਚਿਰਵਿਸ੍ਸਾਸਿਕੋਪਿ ਕੁਞ੍ਜਰੋ ਘਾਤੇਤਿ, ਚਿਰਪਰਿਚਿਤੋਪਿ ਸਪ੍ਪੋ ਡਂਸਤਿ, ਚਿਰਵਿਸ੍ਸਾਸਿਕੋਪਿ ਰਾਜਾ ਅਨਤ੍ਥਕਰੋ ਹੋਤਿ, ਏਵਂ ਚਿਰਾਚਿਣ੍ਣਾਪਿ ਇਤ੍ਥਿਯੋ ਵਿਕਾਰਂ ਦਸ੍ਸੇਨ੍ਤੀਤਿ.

ਨਚ੍ਚਨ੍ਤਵਣ੍ਣਾਤਿ ਅਭਿਰੂਪਵਤੀ. ਨ ਬਹੂਨ ਕਨ੍ਤਾਤਿ ਅਡ੍ਢਕਾਸਿਗਣਿਕਾ ਵਿਯ ਬਹੂਨਂ ਪਿਯਾ ਮਨਾਪਾ. ਨ ਦਕ੍ਖਿਣਾਤਿ ਨਚ੍ਚਗੀਤਕੁਸਲਾ. ਤਥਾਰੂਪਾ ਹਿ ਬਹੁਪਤ੍ਥਿਤਾ ਬਹੁਮਿਤ੍ਤਾ ਹੋਨ੍ਤਿ, ਤਸ੍ਮਾ ਨ ਸੇਵਿਤਬ੍ਬਾ. ਨ ਧਨਸ੍ਸ ਹੇਤੂਤਿ ਯਾ ਧਨਹੇਤੁਯੇਵ ਭਜਤਿ, ਸਾ ਅਪਰਿਗ੍ਗਹਾਪਿ ਨ ਸੇਵਿਤਬ੍ਬਾ. ਸਾ ਹਿ ਧਨਂ ਅਲਭਮਾਨਾ ਕੁਜ੍ਝਤੀਤਿ.

ਏਵਂ ਵੁਤ੍ਤੇ ਮਹਾਜਨੋ ਮਹਾਸਤ੍ਤਸ੍ਸ ‘‘ਅਹੋ ਸੁਕਥਿਤ’’ਨ੍ਤਿ ਸਾਧੁਕਾਰਮਦਾਸਿ. ਸੋਪਿ ਏਤ੍ਤਕੇਹਿ ਕਾਰਣੇਹਿ ਇਤ੍ਥੀਨਂ ਅਗੁਣਂ ਕਥੇਤ੍ਵਾ ਤੁਣ੍ਹੀ ਅਹੋਸਿ. ਤਂ ਸੁਤ੍ਵਾ ਆਨਨ੍ਦੋ ਗਿਜ੍ਝਰਾਜਾ, ‘‘ਸਮ੍ਮ ਕੁਣਾਲ, ਅਹਮ੍ਪਿ ਅਤ੍ਤਨੋ ਞਾਣਬਲੇਨ ਇਤ੍ਥੀਨਂ ਅਗੁਣਂ ਕਥੇਸ੍ਸਾਮੀ’’ਤਿ ਵਤ੍ਵਾ ਅਗੁਣਕਥਂ ਆਰਭਿ. ਤਂ ਦਸ੍ਸੇਨ੍ਤੋ ਸਤ੍ਥਾ ਆਹ –

‘‘ਅਥ ਖਲੁ, ਭੋ, ਆਨਨ੍ਦੋ ਗਿਜ੍ਝਰਾਜਾ ਕੁਣਾਲਸ੍ਸ ਆਦਿਮਜ੍ਝਕਥਾਪਰਿਯੋਸਾਨਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਾ ਗਾਥਾ ਅਭਾਸਿ –

੩੨੬.

‘‘ਪੁਣ੍ਣਮ੍ਪਿ ਚੇਮਂ ਪਥਵਿਂ ਧਨੇਨ, ਦਜ੍ਜਿਤ੍ਥਿਯਾ ਪੁਰਿਸੋ ਸਮ੍ਮਤਾਯ;

ਲਦ੍ਧਾ ਖਣਂ ਅਤਿਮਞ੍ਞੇਯ੍ਯ ਤਮ੍ਪਿ, ਤਾਸਂ ਵਸਂ ਅਸਤੀਨਂ ਨ ਗਚ੍ਛੇ.

੩੨੭.

‘‘ਉਟ੍ਠਾਹਕਂ ਚੇਪਿ ਅਲੀਨਵੁਤ੍ਤਿਂ, ਕੋਮਾਰਭਤ੍ਤਾਰਂ ਪਿਯਂ ਮਨਾਪਂ;

ਆਵਾਸੁ ਕਿਚ੍ਚੇਸੁ ਚ ਨਂ ਜਹਨ੍ਤਿ, ਤਸ੍ਮਾਹਮਿਤ੍ਥੀਨਂ ਨ ਵਿਸ੍ਸਸਾਮਿ.

੩੨੮.

‘‘ਨ ਵਿਸ੍ਸਸੇ ‘ਇਚ੍ਛਤਿ ਮ’ਨ੍ਤਿ ਪੋਸੋ, ਨ ਵਿਸ੍ਸਸੇ ‘ਰੋਦਤਿ ਮੇ ਸਕਾਸੇ’;

ਸੇਵਨ੍ਤਿ ਹੇਤਾ ਪਿਯਮਪ੍ਪਿਯਞ੍ਚ, ਨਾਵਾ ਯਥਾ ਓਰਕੂਲਂ ਪਰਞ੍ਚ.

੩੨੯.

‘‘ਨ ਵਿਸ੍ਸਸੇ ਸਾਖਪੁਰਾਣਸਨ੍ਥਤਂ, ਨ ਵਿਸ੍ਸਸੇ ਮਿਤ੍ਤਪੁਰਾਣਚੋਰਂ;

ਨ ਵਿਸ੍ਸਸੇ ਰਾਜਾਨਂ ‘ਸਖਾ ਮਮ’ਨ੍ਤਿ, ਨ ਵਿਸ੍ਸਸੇ ਇਤ੍ਥਿ ਦਸਨ੍ਨ ਮਾਤਰਂ.

੩੩੦.

‘‘ਨ ਵਿਸ੍ਸਸੇ ਰਾਮਕਰਾਸੁ ਨਾਰਿਸੁ, ਅਚ੍ਚਨ੍ਤਸੀਲਾਸੁ ਅਸਞ੍ਞਤਾਸੁ;

ਅਚ੍ਚਨ੍ਤਪੇਮਾਨੁਗਤਸ੍ਸ ਭਰਿਯਾ, ਨ ਵਿਸ੍ਸਸੇ ਤਿਤ੍ਥਸਮਾ ਹਿ ਨਾਰਿਯੋ.

੩੩੧.

‘‘ਹਨੇਯ੍ਯੁਂ ਛਿਨ੍ਦੇਯ੍ਯੁਂ ਛੇਦਾਪੇਯ੍ਯੁਮ੍ਪਿ, ਕਣ੍ਠੇਪਿ ਛੇਤ੍ਵਾ ਰੁਧਿਰਂ ਪਿਵੇਯ੍ਯੁਂ;

ਮਾ ਦੀਨਕਾਮਾਸੁ ਅਸਞ੍ਞਤਾਸੁ, ਭਾਵਂ ਕਰੇ ਗਙ੍ਗਤਿਤ੍ਥੂਪਮਾਸੁ.

੩੩੨.

‘‘ਮੁਸਾ ਤਾਸਂ ਯਥਾ ਸਚ੍ਚਂ, ਸਚ੍ਚਂ ਤਾਸਂ ਯਥਾ ਮੁਸਾ;

ਗਾਵੋ ਬਹਿ ਤਿਣਸ੍ਸੇਵ, ਓਮਸਨ੍ਤਿ ਵਰਂ ਵਰਂ.

੩੩੩.

‘‘ਗਤੇਨੇਤਾ ਪਲੋਭੇਨ੍ਤਿ, ਪੇਕ੍ਖਿਤੇਨ ਮ੍ਹਿਤੇਨ ਚ;

ਅਥੋਪਿ ਦੁਨ੍ਨਿਵਤ੍ਥੇਨ, ਮਞ੍ਜੁਨਾ ਭਣਿਤੇਨ ਚ.

੩੩੪.

‘‘ਚੋਰਿਯੋ ਕਥਿਨਾ ਹੇਤਾ, ਵਾਲ਼ਾ ਚ ਲਪਸਕ੍ਖਰਾ;

ਨ ਤਾ ਕਿਞ੍ਚਿ ਨ ਜਾਨਨ੍ਤਿ, ਯਂ ਮਨੁਸ੍ਸੇਸੁ ਵਞ੍ਚਨਂ.

੩੩੫.

‘‘ਅਸਾ ਲੋਕਿਤ੍ਥਿਯੋ ਨਾਮ, ਵੇਲਾ ਤਾਸਂ ਨ ਵਿਜ੍ਜਤਿ;

ਸਾਰਤ੍ਤਾ ਚ ਪਗਬ੍ਭਾ ਚ, ਸਿਖੀ ਸਬ੍ਬਘਸੋ ਯਥਾ.

੩੩੬.

‘‘ਨਤ੍ਥਿਤ੍ਥੀਨਂ ਪਿਯੋ ਨਾਮ, ਅਪ੍ਪਿਯੋਪਿ ਨ ਵਿਜ੍ਜਤਿ;

ਸੇਵਨ੍ਤਿ ਹੇਤਾ ਪਿਯਮਪ੍ਪਿਯਞ੍ਚ, ਨਾਵਾ ਯਥਾ ਓਰਕੂਲਂ ਪਰਞ੍ਚ.

੩੩੭.

‘‘ਨਤ੍ਥਿਤ੍ਥੀਨਂ ਪਿਯੋ ਨਾਮ, ਅਪ੍ਪਿਯੋਪਿ ਨ ਵਿਜ੍ਜਤਿ;

ਧਨਤ੍ਤਾ ਪਟਿਵਲ੍ਲਨ੍ਤਿ, ਲਤਾਵ ਦੁਮਨਿਸ੍ਸਿਤਾ.

੩੩੮.

‘‘ਹਤ੍ਥਿਬਨ੍ਧਂ ਅਸ੍ਸਬਨ੍ਧਂ, ਗੋਪੁਰਿਸਞ੍ਚ ਮਣ੍ਡਲਂ;

ਛਵਡਾਹਕਂ ਪੁਪ੍ਫਛਡ੍ਡਕਂ, ਸਧਨਮਨੁਪਤਨ੍ਤਿ ਨਾਰਿਯੋ.

੩੩੯.

‘‘ਕੁਲਪੁਤ੍ਤਮ੍ਪਿ ਜਹਨ੍ਤਿ ਅਕਿਞ੍ਚਨਂ, ਛਵਕਸਮਸਦਿਸਮ੍ਪਿ;

ਅਨੁਗਚ੍ਛਨ੍ਤਿ ਅਨੁਪਤਨ੍ਤਿ, ਧਨਹੇਤੁ ਹਿ ਨਾਰਿਯੋ’’ਤਿ.

ਤਤ੍ਥ ਆਦਿਮਜ੍ਝਕਥਾਪਰਿਯੋਸਾਨਨ੍ਤਿ ਕਥਾਯ ਆਦਿਮਜ੍ਝਪਰਿਯੋਸਾਨਂ. ਲਦ੍ਧਾ ਖਣਨ੍ਤਿ ਓਕਾਸਂ ਲਭਿਤ੍ਵਾ. ਇਚ੍ਛਤਿ ਮਨ੍ਤਿ ਮਂ ਏਸਾ ਇਚ੍ਛਤੀਤਿ ਪੁਰਿਸੋ ਇਤ੍ਥਿਂ ਨ ਵਿਸ੍ਸਸੇਯ੍ਯ. ਸਾਖਪੁਰਾਣਸਨ੍ਥਤਨ੍ਤਿ ਹਿਯ੍ਯੋ ਵਾ ਪਰੇ ਵਾ ਸਨ੍ਥਤਂ ਪੁਰਾਣਸਾਖਾਸਨ੍ਥਤਂ ਨ ਵਿਸ੍ਸਸੇ, ਅਪਪ੍ਫੋਟੇਤ੍ਵਾ ਅਪਚ੍ਚਵੇਕ੍ਖਿਤ੍ਵਾ ਨ ਪਰਿਭੁਞ੍ਜੇਯ੍ਯ. ਤਤ੍ਰ ਹਿ ਦੀਘਜਾਤਿਕੋ ਵਾ ਪਵਿਸਿਤ੍ਵਾ ਤਿਟ੍ਠੇਯ੍ਯੇ, ਪਚ੍ਚਾਮਿਤ੍ਤੋ ਵਾ ਸਤ੍ਥਂ ਨਿਕ੍ਖਿਪੇਯ੍ਯ. ਮਿਤ੍ਤਪੁਰਾਣਚੋਰਨ੍ਤਿ ਪਨ੍ਥਦੂਹਨਟ੍ਠਾਨੇ ਠਿਤਂ ਚੋਰਂ ‘‘ਪੁਰਾਣਮਿਤ੍ਤੋ ਮੇ’’ਤਿ ਨ ਵਿਸ੍ਸਸੇਯ੍ਯ. ਚੋਰਾ ਹਿ ਯੇ ਸਞ੍ਜਾਨਨ੍ਤਿ ਤੇਯੇਵ ਮਾਰੇਨ੍ਤਿ. ਸਖਾ ਮਮਨ੍ਤਿ ਸੋ ਹਿ ਖਿਪ੍ਪਮੇਵ ਕੁਜ੍ਝਤਿ, ਤਸ੍ਮਾ ਰਾਜਾਨਂ ‘‘ਸਖਾ ਮੇ’’ਤਿ ਨ ਵਿਸ੍ਸਸੇ. ਦਸਨ੍ਨਮਾਤਰਨ੍ਤਿ ‘‘ਅਯਂ ਮਹਲ੍ਲਿਕਾ ਇਦਾਨਿ ਮਂ ਨ ਅਤਿਚਰਿਸ੍ਸਤਿ, ਅਤ੍ਤਾਨਂ ਰਕ੍ਖਿਸ੍ਸਤੀ’’ਤਿ ਨ ਵਿਸ੍ਸਸੇਤਬ੍ਬਾ. ਰਾਮਕਰਾਸੂਤਿ ਬਾਲਾਨਂ ਰਤਿਕਰਾਸੁ. ਅਚ੍ਚਨ੍ਤਸੀਲਾਸੂਤਿ ਅਤਿਕ੍ਕਨ੍ਤਸੀਲਾਸੁ. ਅਚ੍ਚਨ੍ਤਪੇਮਾਨੁਗਤਸ੍ਸਾਤਿ ਸਚੇਪਿ ਅਚ੍ਚਨ੍ਤਂ ਅਨੁਗਤਪੇਮਾ ਅਸ੍ਸ, ਤਥਾਪਿ ਤਂ ਨ ਵਿਸ੍ਸਸੇ. ਕਿਂਕਾਰਣਾ? ਤਿਤ੍ਥਸਮਾ ਹਿ ਨਾਰਿਯੋਤਿ ਸਮ੍ਬਨ੍ਧੋ, ਤਿਤ੍ਥਂ ਵਿਯ ਸਬ੍ਬਸਾਧਾਰਣਾਤਿ ਅਤ੍ਥੋ.

ਹਨੇਯ੍ਯੁਨ੍ਤਿ ਕੁਦ੍ਧਾ ਵਾ ਅਞ੍ਞਪੁਰਿਸਸਾਰਤ੍ਤਾ ਵਾ ਹੁਤ੍ਵਾ ਸਬ੍ਬਮੇਤਂ ਹਨਨਾਦਿਂ ਕਰੇਯ੍ਯੁਂ. ਮਾ ਦੀਨਕਾਮਾਸੂਤਿ ਹੀਨਜ੍ਝਾਸਯਾਸੁ ਸਂਕਿਲਿਟ੍ਠਆਸਯਾਸੁ. ਭਾਵਨ੍ਤਿ ਏਵਰੂਪਾਸੁ ਸਿਨੇਹਂ ਮਾ ਕਰੇ. ਗਙ੍ਗਤਿਤ੍ਥੂਪਮਾਸੂਤਿ ਸਬ੍ਬਸਾਧਾਰਣਟ੍ਠੇਨ ਗਙ੍ਗਾਤਿਤ੍ਥਸਦਿਸਾਸੁ. ਮੁਸਾਤਿ ਮੁਸਾਵਾਦੋ ਤਾਸਂ ਸਚ੍ਚਸਦਿਸੋਵ. ਗਤੇਨਾਤਿਆਦੀਸੁ ਪੇਕ੍ਖਿਤੇਨ ਪਲੋਭਨੇ ਉਮ੍ਮਾਦਨ੍ਤੀਜਾਤਕਂ, (ਜਾ. ੨.੧੮.੫੭ ਆਦਯੋ) ਦੁਨ੍ਨਿਵਤ੍ਥੇਨ ਨਿਲ਼ਿਨਿਕਾਜਾਤਕਂ, (ਜਾ. ੨.੧੮.੧ ਆਦਯੋ) ਮਞ੍ਜੁਨਾ ਭਣਿਤੇਨ ‘‘ਤੁਵਟਂ ਖੋ, ਅਯ੍ਯਪੁਤ੍ਤ, ਆਗਚ੍ਛੇਯ੍ਯਾਸੀ’’ਤਿ ਨਨ੍ਦਤ੍ਥੇਰਸ੍ਸ ਵਤ੍ਥੁ (ਉਦਾ. ੨੨) ਕਥੇਤਬ੍ਬਂ. ਚੋਰਿਯੋਤਿ ਸਮ੍ਭਤਸ੍ਸ ਧਨਸ੍ਸ ਵਿਨਾਸਨੇਨ ਚੋਰਿਯੋ. ਕਥਿਨਾਤਿ ਥਦ੍ਧਹਦਯਾ. ਵਾਲ਼ਾਤਿ ਦੁਟ੍ਠਾ ਅਪ੍ਪਕੇਨੇਵ ਕੁਜ੍ਝਨਸੀਲਾ. ਲਪਸਕ੍ਖਰਾਤਿ ਨਿਰਤ੍ਥਕਲਪਨੇਨ ਸਕ੍ਖਰਾ ਵਿਯ ਮਧੁਰਾ. ਅਸਾਤਿ ਅਸਤਿਯੋ ਲਾਮਕਾ. ਸਾਰਤ੍ਤਾਤਿ ਸਬ੍ਬਦਾ ਸਾਰਤ੍ਤਾ. ਪਗਬ੍ਭਾਤਿ ਕਾਯਪਾਗਬ੍ਭਿਯਾਦੀਹਿ ਪਗਬ੍ਭਾ. ਯਥਾਤਿ ਯਥਾ ਸਿਖੀ ਸਬ੍ਬਘਸੋ, ਏਵਮੇਤਾਪਿ ਸਬ੍ਬਘਸਾ. ਪਟਿਵਲ੍ਲਨ੍ਤੀਤਿ ਪਰਿਸ੍ਸਜਨ੍ਤਿ ਉਪਗੂਹਨ੍ਤਿ ਵੇਠੇਨ੍ਤਿ. ਲਤਾਵਾਤਿ ਯਥਾ ਲਤਾ ਰੁਕ੍ਖਨਿਸ੍ਸਿਤਾ ਰੁਕ੍ਖਂ ਵੇਠੇਨ੍ਤਿ, ਏਵਮੇਤਾ ਪੁਰਿਸਂ ਪਰਿਸ੍ਸਜਨ੍ਤਿ ਨਾਮ.

ਹਤ੍ਥਿਬਨ੍ਧਨ੍ਤਿਆਦੀਸੁ ਗੋਪੁਰਿਸੋ ਵੁਚ੍ਚਤਿ ਗੋਪਾਲਕੋ. ਛਵਡਾਹਕਨ੍ਤਿ ਛਵਾਨਂ ਡਾਹਕਂ, ਸੁਸਾਨਪਾਲਨ੍ਤਿ ਵੁਤ੍ਤਂ ਹੋਤਿ. ਪੁਪ੍ਫਛਡ੍ਡਕਨ੍ਤਿ ਵਚ੍ਚਟ੍ਠਾਨਸੋਧਕਂ. ਸਧਨਨ੍ਤਿ ਏਤੇਸੁਪਿ ਸਧਨਂ ਅਨੁਗਚ੍ਛਨ੍ਤਿਯੇਵ. ਅਕਿਞ੍ਚਨਨ੍ਤਿ ਅਧਨਂ. ਛਵਕਸਮਸਦਿਸਨ੍ਤਿ ਸੁਨਖਮਂਸਖਾਦਚਣ੍ਡਾਲੇਨ ਸਮਂ ਸਦਿਸਂ, ਤੇਨ ਨਿਬ੍ਬਿਸੇਸਮ੍ਪਿ ਪੁਰਿਸਂ ਗਚ੍ਛਨ੍ਤਿ ਭਜਨ੍ਤਿ. ਕਸ੍ਮਾ? ਯਸ੍ਮਾ ਅਨੁਪਤਨ੍ਤਿ ਧਨਹੇਤੁ ਨਾਰਿਯੋਤਿ.

ਏਵਂ ਅਤ੍ਤਨੋ ਞਾਣੇ ਠਤ੍ਵਾ ਆਨਨ੍ਦੋ ਗਿਜ੍ਝਰਾਜਾ ਇਤ੍ਥੀਨਂ ਅਗੁਣਂ ਕਥੇਤ੍ਵਾ ਤੁਣ੍ਹੀ ਅਹੋਸਿ. ਤਸ੍ਸ ਵਚਨਂ ਸੁਤ੍ਵਾ ਨਾਰਦੋਪਿ ਅਤ੍ਤਨੋ ਞਾਣੇ ਠਤ੍ਵਾ ਤਾਸਂ ਅਗੁਣਂ ਕਥੇਸਿ. ਤਂ ਦਸ੍ਸੇਨ੍ਤੋ ਸਤ੍ਥਾ ਆਹ –

‘‘ਅਥ ਖਲੁ, ਭੋ, ਨਾਰਦੋ ਦੇਵਬ੍ਰਾਹ੍ਮਣੋ ਆਨਨ੍ਦਸ੍ਸ ਗਿਜ੍ਝਰਾਜਸ੍ਸ ਆਦਿਮਜ੍ਝਕਥਾਪਰਿਯੋਸਾਨਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਾ ਗਾਥਾ ਅਭਾਸਿ –

੩੪੦.

‘‘‘ਚਤ੍ਤਾਰੋਮੇ ਨ ਪੂਰੇਨ੍ਤਿ, ਤੇ ਮੇ ਸੁਣਾਥ ਭਾਸਤੋ;

ਸਮੁਦ੍ਦੋ ਬ੍ਰਾਹ੍ਮਣੋ ਰਾਜਾ, ਇਤ੍ਥੀ ਚਾਪਿ ਦਿਜਮ੍ਪਤਿ.

੩੪੧.

‘‘ਸਰਿਤਾ ਸਾਗਰਂ ਯਨ੍ਤਿ, ਯਾ ਕਾਚਿ ਪਥਵਿਸ੍ਸਿਤਾ;

ਤਾ ਸਮੁਦ੍ਦਂ ਨ ਪੂਰੇਨ੍ਤਿ, ਊਨਤ੍ਤਾ ਹਿ ਨ ਪੂਰਤਿ.

੩੪੨.

‘‘ਬ੍ਰਾਹ੍ਮਣੋ ਚ ਅਧੀਯਾਨ, ਵੇਦਮਕ੍ਖਾਨਪਞ੍ਚਮਂ;

ਭਿਯ੍ਯੋਪਿ ਸੁਤਮਿਚ੍ਛੇਯ੍ਯ, ਊਨਤ੍ਤਾ ਹਿ ਨ ਪੂਰਤਿ.

੩੪੩.

‘‘ਰਾਜਾ ਚ ਪਥਵਿਂ ਸਬ੍ਬਂ, ਸਸਮੁਦ੍ਦਂ ਸਪਬ੍ਬਤਂ;

ਅਜ੍ਝਾਵਸਂ ਵਿਜਿਨਿਤ੍ਵਾ, ਅਨਨ੍ਤਰਤਨੋਚਿਤਂ;

ਪਾਰਂ ਸਮੁਦ੍ਦਂ ਪਤ੍ਥੇਤਿ ਊਨਤ੍ਤਾ ਹਿ ਨ ਪੂਰਤਿ.

੩੪੪.

‘‘ਏਕਮੇਕਾਯ ਇਤ੍ਥਿਯਾ, ਅਟ੍ਠਟ੍ਠ ਪਤਿਨੋ ਸਿਯਾ;

ਸੂਰਾ ਚ ਬਲਵਨ੍ਤੋ ਚ, ਸਬ੍ਬਕਾਮਰਸਾਹਰਾ;

ਕਰੇਯ੍ਯ ਨਵਮੇ ਛਨ੍ਦਂ, ਊਨਤ੍ਤਾ ਹਿ ਨ ਪੂਰਤਿ.

੩੪੫.

‘‘ਸਬ੍ਬਿਤ੍ਥਿਯੋ ਸਿਖੀਰਿਵ ਸਬ੍ਬਭਕ੍ਖਾ, ਸਬ੍ਬਿਤ੍ਥਿਯੋ ਨਦੀਰਿਵ ਸਬ੍ਬਵਾਹੀ;

ਸਬ੍ਬਿਤ੍ਥਿਯੋ ਕਣ੍ਟਕਾਨਂਵ ਸਾਖਾ, ਸਬ੍ਬਿਤ੍ਥਿਯੋ ਧਨਹੇਤੁ ਵਜਨ੍ਤਿ.

੩੪੬.

‘‘ਵਾਤਞ੍ਚ ਜਾਲੇਨ ਨਰੋ ਪਰਾਮਸੇ, ਓਸਿਞ੍ਚਯੇ ਸਾਗਰਮੇਕਪਾਣਿਨਾ;

ਸਕੇਨ ਹਤ੍ਥੇਨ ਕਰੇਯ੍ਯ ਘੋਸਂ, ਯੋ ਸਬ੍ਬਭਾਵਂ ਪਮਦਾਸੁ ਓਸ੍ਸਜੇ.

੩੪੭.

‘‘ਚੋਰੀਨਂ ਬਹੁਬੁਦ੍ਧੀਨਂ, ਯਾਸੁ ਸਚ੍ਚਂ ਸੁਦੁਲ੍ਲਭਂ;

ਥੀਨਂ ਭਾਵੋ ਦੁਰਾਜਾਨੋ, ਮਚ੍ਛਸ੍ਸੇਵੋਦਕੇ ਗਤਂ.

੩੪੮.

‘‘ਅਨਲਾ ਮੁਦੁਸਮ੍ਭਾਸਾ, ਦੁਪ੍ਪੂਰਾ ਤਾ ਨਦੀਸਮਾ;

ਸੀਦਨ੍ਤਿ ਨਂ ਵਿਦਿਤ੍ਵਾਨ, ਆਰਕਾ ਪਰਿਵਜ੍ਜਯੇ.

੩੪੯.

‘‘ਆਵਟ੍ਟਨੀ ਮਹਾਮਾਯਾ, ਬ੍ਰਹ੍ਮਚਰਿਯਵਿਕੋਪਨਾ;

ਸੀਦਨ੍ਤਿ ਨਂ ਵਿਦਿਤ੍ਵਾਨ, ਆਰਕਾ ਪਰਿਵਜ੍ਜਯੇ.

੩੫੦.

‘‘ਯਂ ਏਤਾ ਉਪਸੇਵਨ੍ਤਿ, ਛਨ੍ਦਸਾ ਵਾ ਧਨੇਨ ਵਾ;

ਜਾਤਵੇਦੋਵ ਸਂਠਾਨਂ, ਖਿਪ੍ਪਂ ਅਨੁਦਹਨ੍ਤਿ ਨ’’’ਨ੍ਤਿ.

ਤਤ੍ਥ ਦਿਜਮ੍ਪਤੀਤਿ ਦਿਜਜੇਟ੍ਠਕਂ ਕੁਣਾਲਂ ਆਲਪਤਿ. ‘‘ਸਰਿਤਾ’’ਤਿਆਦਿ ਠਪਿਤਮਾਤਿਕਾਯ ਭਾਜਨਤ੍ਥਂ ਵੁਤ੍ਤਂ. ਊਨਤ੍ਤਾਤਿ ਉਦਕਪਤਿਟ੍ਠਾਨਸ੍ਸ ਮਹਨ੍ਤਤਾਯ ਊਨਾ ਏਵ. ਅਧੀਯਾਨਾਤਿ ਸਜ੍ਝਾਯਿਤ੍ਵਾ. ਵੇਦਮਕ੍ਖਾਨਪਞ੍ਚਮਨ੍ਤਿ ਇਤਿਹਾਸਪਞ੍ਚਮਂ ਵੇਦਚਤੁਕ੍ਕਂ. ਊਨਤ੍ਤਾਤਿ ਸੋ ਹਿ ਅਜ੍ਝਾਸਯਮਹਨ੍ਤਤਾਯ ਸਿਕ੍ਖਿਤਬ੍ਬਸ੍ਸ ਨ ਪੂਰਤਿ. ਅਨਨ੍ਤਰਤਨੋਚਿਤਨ੍ਤਿ ਨਾਨਾਰਤਨੇਹਿ ਓਚਿਤਂ ਪਰਿਪੁਣ੍ਣਂ. ਊਨਤ੍ਤਾਤਿ ਸੋ ਹਿ ਤਣ੍ਹਾਮਹਨ੍ਤਤਾਯ ਨ ਪੂਰਤਿ. ਸਿਯਾਤਿ ਸਿਯੁਂ, ਅਯਮੇਵ ਵਾ ਪਾਠੋ. ਸਬ੍ਬਕਾਮਰਸਾਹਰਾਤਿ ਸਬ੍ਬੇਸਂ ਕਾਮਰਸਾਨਂ ਆਹਰਕਾ. ‘‘ਨਵਮੇ’’ਤਿ ਅਟ੍ਠਹਿ ਅਤਿਤ੍ਤਭਾਵਦਸ੍ਸਨਤ੍ਥਂ ਵੁਤ੍ਤਂ. ਸਾ ਪਨ ਦਸਮੇਪਿ ਵੀਸਤਿਮੇਪਿ ਤਤੋ ਉਤ੍ਤਰਿਤਰੇਪਿ ਛਨ੍ਦਂ ਕਰੋਤੇਵ. ਊਨਤ੍ਤਾਤਿ ਸਾ ਹਿ ਕਾਮਤਣ੍ਹਾਯ ਮਹਨ੍ਤਤਾਯ ਨ ਪੂਰਤਿ. ਕਣ੍ਡਕਾਨਂਵ ਸਾਖਾਤਿ ਸਮ੍ਬਾਧਮਗ੍ਗੇ ਕਣ੍ਟਕਸਾਖਸਦਿਸਾ. ਯਥਾ ਹਿ ਸਾਖਾ ਲਗ੍ਗਿਤ੍ਵਾ ਆਕਡ੍ਢਤਿ, ਏਵਂ ਏਤਾਪਿ ਰੂਪਾਦੀਹਿ ਕਡ੍ਢਨ੍ਤਿ. ਯਥਾ ਸਾਖਾ ਹਤ੍ਥਾਦੀਸੁ ਵਿਜ੍ਝਿਤ੍ਵਾ ਦੁਕ੍ਖਂ ਉਪ੍ਪਾਦੇਤਿ, ਏਵਂ ਏਤਾਪਿ ਫੁਟ੍ਠਮਤ੍ਤਾ ਸਰੀਰਸਮ੍ਫਸ੍ਸੇਨ ਵਿਜ੍ਝਿਤ੍ਵਾ ਮਹਾਵਿਨਾਸਂ ਪਾਪੇਨ੍ਤਿ. ਵਜਨ੍ਤੀਤਿ ਪਰਪੁਰਿਸਂ ਵਜਨ੍ਤਿ.

ਪਰਾਮਸੇਤਿ ਗਣ੍ਹੇਯ੍ਯ. ਓਸਿਞ੍ਚਯੇਤਿ ਨ੍ਹਾਯਿਤੁਂ ਓਤਿਣ੍ਣੋ ਏਕੇਨ ਪਾਣਿਨਾ ਸਕਲਸਮੁਦ੍ਦਉਦਕਂ ਓਸਿਞ੍ਚੇਯ੍ਯ ਗਹੇਤ੍ਵਾ ਛਡ੍ਡੇਯ੍ਯ. ਸਕੇਨਾਤਿ ਏਕੇਨ ਅਤ੍ਤਨੋ ਹਤ੍ਥੇਨ ਤਮੇਵ ਹਤ੍ਥਂ ਹਰਿਤ੍ਵਾ ਘੋਸਂ ਉਪ੍ਪਾਦੇਯ੍ਯ. ਸਬ੍ਬਭਾਵਨ੍ਤਿ ‘‘ਤ੍ਵਮੇਵ ਇਟ੍ਠੋ ਕਨ੍ਤੋ ਪਿਯੋ ਮਨਾਪੋ’’ਤਿ ਵੁਚ੍ਚਮਾਨੋ ਯੋ ਪੁਰਿਸੋ ‘‘ਏਵਮੇਤ’’ਨ੍ਤਿ ਸਦ੍ਦਹਨ੍ਤੋ ਸਬ੍ਬਂ ਅਤ੍ਤਨੋ ਅਜ੍ਝਾਸਯਂ ਪਮਦਾਸੁ ਓਸ੍ਸਜੇਯ੍ਯ, ਸੋ ਜਾਲਾਦੀਹਿ ਵਾਤਗ੍ਗਹਣਾਦੀਨਿ ਕਰੇਯ੍ਯਾਤਿ ਅਤ੍ਥੋ. ਗਤਨ੍ਤਿ ਗਮਨਂ. ਅਨਲਾਤਿ ਤੀਹਿ ਧਮ੍ਮੇਹਿ ਅਲਨ੍ਤਿ ਵਚਨਵਿਰਹਿਤਾ. ਦੁਪ੍ਪੁਰਾ ਤਾਤਿ ਯਥਾ ਮਹਾਨਦੀ ਉਦਕੇਨ, ਏਵਂ ਕਿਲੇਸਰਤਿਯਾ ਤਾ ਦੁਪ੍ਪੂਰਾ. ਸੀਦਨ੍ਤਿ ਨਂ ਵਿਦਿਤ੍ਵਾਨਾਤਿ ਏਤ੍ਥ ਨਨ੍ਤਿ ਨਿਪਾਤਮਤ੍ਤਂ, ਇਤ੍ਥਿਯੋ ਅਲ੍ਲੀਨਾ ਚਤੂਸੁ ਅਪਾਯੇਸੁ ਸੀਦਨ੍ਤੀਤਿ ਵਿਦਿਤ੍ਵਾ. ਆਵਟ੍ਟਨੀਤਿ ਯਥਾ ਆਵਟ੍ਟਨੀ ਮਹਾਜਨਸ੍ਸ ਹਦਯਂ ਮੋਹੇਤ੍ਵਾ ਅਤ੍ਤਨੋ ਵਸੇ ਵਤ੍ਤੇਤਿ, ਏਵਮੇਤਾਪੀਤਿ ਅਤ੍ਥੋ. ਵਿਕੋਪਨਾਤਿ ਨਾਸਨਤ੍ਥੇਨ ਚ ਗਰਹਤ੍ਥੇਨ ਚ ਬ੍ਰਹ੍ਮਚਰਿਯਸ੍ਸ ਕੋਪਿਕਾ. ਛਨ੍ਦਸਾ ਵਾਤਿ ਪਿਯਸਂਵਾਸੇਨ ਵਾ. ਧਨੇਨ ਵਾਤਿ ਧਨਹੇਤੁ ਵਾ. ਸਂਠਾਨਨ੍ਤਿ ਯਥਾ ਜਾਤਵੇਦੋ ਅਤ੍ਤਨੋ ਠਾਨਂ ਯਂ ਯਂ ਪਦੇਸਂ ਅਲ੍ਲੀਯਤਿ, ਤਂ ਤਂ ਦਹਤਿ, ਤਥਾ ਏਤਾਪਿ ਯਂ ਯਂ ਪੁਰਿਸਂ ਕਿਲੇਸਵਸੇਨ ਅਲ੍ਲੀਯਨ੍ਤਿ, ਤਂ ਤਂ ਅਨੁਦਹਨ੍ਤਿ ਮਹਾਵਿਨਾਸਂ ਪਾਪੇਨ੍ਤਿ.

ਏਵਂ ਨਾਰਦੇਨ ਇਤ੍ਥੀਨਂ ਅਗੁਣੇ ਪਕਾਸਿਤੇ ਪੁਨ ਮਹਾਸਤ੍ਤੋ ਵਿਸੇਸੇਤ੍ਵਾ ਤਾਸਂ ਅਗੁਣਂ ਪਕਾਸੇਤਿ. ਤਂ ਦਸ੍ਸੇਤੁਂ ਸਤ੍ਥਾ ਆਹ –

‘‘ਅਥ ਖਲੁ, ਭੋ, ਕੁਣਾਲੋ ਸਕੁਣੋ ਨਾਰਦਸ੍ਸ ਦੇਵਬ੍ਰਾਹ੍ਮਣਸ੍ਸ ਆਦਿਮਜ੍ਝਕਥਾਪਰਿਯੋਸਾਨਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਾ ਗਾਥਾਯੋ ਅਜ੍ਝਭਾਸਿ –

੩੫੧.

‘‘‘ਸਲ੍ਲਪੇ ਨਿਸਿਤਖਗ੍ਗਪਾਣਿਨਾ, ਪਣ੍ਡਿਤੋ ਅਪਿ ਪਿਸਾਚਦੋਸਿਨਾ;

ਉਗ੍ਗਤੇਜਮੁਰਗਮ੍ਪਿ ਆਸਿਦੇ, ਏਕੋ ਏਕਾਯ ਪਮਦਾਯ ਨਾਲਪੇ.

੩੫੨.

‘‘ਲੋਕਚਿਤ੍ਤਮਥਨਾ ਹਿ ਨਾਰਿਯੋ, ਨਚ੍ਚਗੀਤਭਣਿਤਮ੍ਹਿਤਾਵੁਧਾ;

ਬਾਧਯਨ੍ਤਿ ਅਨੁਪਟ੍ਠਿਤਸ੍ਸਤਿਂ, ਦੀਪੇ ਰਕ੍ਖਸਿਗਣੋਵ ਵਾਣਿਜੇ.

੩੫੩.

‘‘ਨਤ੍ਥਿ ਤਾਸਂ ਵਿਨਯੋ ਨ ਸਂਵਰੋ, ਮਜ੍ਜਮਂਸਨਿਰਤਾ ਅਸਞ੍ਞਤਾ;

ਤਾ ਗਿਲਨ੍ਤਿ ਪੁਰਿਸਸ੍ਸ ਪਾਭਤਂ, ਸਾਗਰੇਵ ਮਕਰਂ ਤਿਮਿਙ੍ਗਲੋ.

੩੫੪.

‘‘ਪਞ੍ਚਕਾਮਗੁਣਸਾਤਗੋਚਰਾ, ਉਦ੍ਧਤਾ ਅਨਿਯਤਾ ਅਸਞ੍ਞਤਾ;

ਓਸਰਨ੍ਤਿ ਪਮਦਾ ਪਮਾਦਿਨਂ, ਲੋਣਤੋਯਵਤਿਯਂਵ ਆਪਕਾ.

੩੫੫.

‘‘ਯਂ ਨਰਂ ਉਪਲਪੇਨ੍ਤਿ ਨਾਰਿਯੋ, ਛਨ੍ਦਸਾ ਵਾ ਰਤਿਯਾ ਧਨੇਨ ਵਾ;

ਜਾਤਵੇਦਸਦਿਸਮ੍ਪਿ ਤਾਦਿਸਂ, ਰਾਗਦੋਸਵਧਿਯੋ ਦਹਨ੍ਤਿ ਨਂ.

੩੫੬.

‘‘ਅਡ੍ਢਂ ਞਤ੍ਵਾ ਪੁਰਿਸਂ ਮਹਦ੍ਧਨਂ, ਓਸਰਨ੍ਤਿ ਸਧਨਂ ਸਹਤ੍ਤਨਾ;

ਰਤ੍ਤਚਿਤ੍ਤਮਤਿਵੇਠਯਨ੍ਤਿ ਨਂ, ਸਾਲ ਮਾਲੁਵਲਤਾਵ ਕਾਨਨੇ.

੩੫੭.

‘‘ਤਾ ਉਪੇਨ੍ਤਿ ਵਿਵਿਧੇਨ ਛਨ੍ਦਸਾ, ਚਿਤ੍ਰਬਿਮ੍ਬਮੁਖਿਯੋ ਅਲਙ੍ਕਤਾ;

ਉਹਸਨ੍ਤਿ ਪਹਸਨ੍ਤਿ ਨਾਰਿਯੋ, ਸਮ੍ਬਰੋਵ ਸਤਮਾਯਕੋਵਿਦਾ.

੩੫੮.

‘‘ਜਾਤਰੂਪਮਣਿਮੁਤ੍ਤਭੂਸਿਤਾ, ਸਕ੍ਕਤਾ ਪਤਿਕੁਲੇਸੁ ਨਾਰਿਯੋ;

ਰਕ੍ਖਿਤਾ ਅਤਿਚਰਨ੍ਤਿ ਸਾਮਿਕਂ, ਦਾਨਵਂਵ ਹਦਯਨ੍ਤਰਸ੍ਸਿਤਾ.

੩੫੯.

‘‘ਤੇਜਵਾਪਿ ਹਿ ਨਰੋ ਵਿਚਕ੍ਖਣੋ, ਸਕ੍ਕਤੋ ਬਹੁਜਨਸ੍ਸ ਪੂਜਿਤੋ;

ਨਾਰਿਨਂ ਵਸਗਤੋ ਨ ਭਾਸਤਿ, ਰਾਹੁਨਾ ਉਪਹਤੋਵ ਚਨ੍ਦਿਮਾ.

੩੬੦.

‘‘ਯਂ ਕਰੇਯ੍ਯ ਕੁਪਿਤੋ ਦਿਸੋ ਦਿਸਂ, ਦੁਟ੍ਠਚਿਤ੍ਤੋ ਵਸਮਾਗਤਂ ਅਰਿਂ;

ਤੇਨ ਭਿਯ੍ਯੋ ਬ੍ਯਸਨਂ ਨਿਗਚ੍ਛਤਿ, ਨਾਰਿਨਂ ਵਸਗਤੋ ਅਪੇਕ੍ਖਵਾ.

੩੬੧.

‘‘ਕੇਸਲੂਨਨਖਛਿਨ੍ਨਤਜ੍ਜਿਤਾ, ਪਾਦਪਾਣਿਕਸਦਣ੍ਡਤਾਲ਼ਿਤਾ;

ਹੀਨਮੇਵੁਪਗਤਾ ਹਿ ਨਾਰਿਯੋ, ਤਾ ਰਮਨ੍ਤਿ ਕੁਣਪੇਵ ਮਕ੍ਖਿਕਾ.

੩੬੨.

‘‘ਤਾ ਕੁਲੇਸੁ ਵਿਸਿਖਨ੍ਤਰੇਸੁ ਵਾ, ਰਾਜਧਾਨਿਨਿਗਮੇਸੁ ਵਾ ਪੁਨ;

ਓਡ੍ਡਿਤਂ ਨਮੁਚਿਪਾਸਵਾਕਰਂ, ਚਕ੍ਖੁਮਾ ਪਰਿਵਜ੍ਜੇ ਸੁਖਤ੍ਥਿਕੋ.

੩੬੩.

‘‘ਓਸ੍ਸਜਿਤ੍ਵ ਕੁਸਲਂ ਤਪੋਗੁਣਂ, ਯੋ ਅਨਰਿਯਚਰਿਤਾਨਿ ਮਾਚਰਿ;

ਦੇਵਤਾਹਿ ਨਿਰਯਂ ਨਿਮਿਸ੍ਸਤਿ, ਛੇਦਗਾਮਿਮਣਿਯਂਵ ਵਾਣਿਜੋ.

੩੬੪.

‘‘ਸੋ ਇਧ ਗਰਹਿਤੋ ਪਰਤ੍ਥ ਚ, ਦੁਮ੍ਮਤੀ ਉਪਹਤੋ ਸਕਮ੍ਮੁਨਾ;

ਗਚ੍ਛਤੀ ਅਨਿਯਤੋ ਗਲ਼ਾਗਲ਼ਂ, ਦੁਟ੍ਠਗਦ੍ਰਭਰਥੋਵ ਉਪ੍ਪਥੇ.

੩੬੫.

‘‘ਸੋ ਉਪੇਤਿ ਨਿਰਯਂ ਪਤਾਪਨਂ, ਸਤ੍ਤਿਸਿਮ੍ਬਲਿਵਨਞ੍ਚ ਆਯਸਂ;

ਆਵਸਿਤ੍ਵਾ ਤਿਰਚ੍ਛਾਨਯੋਨਿਯਂ, ਪੇਤਰਾਜਵਿਸਯਂ ਨ ਮੁਞ੍ਚਤਿ.

੩੬੬.

‘‘ਦਿਬ੍ਯਖਿਡ੍ਡਰਤਿਯੋ ਚ ਨਨ੍ਦਨੇ, ਚਕ੍ਕਵਤ੍ਤਿਚਰਿਤਞ੍ਚ ਮਾਨੁਸੇ;

ਨਾਸਯਨ੍ਤਿ ਪਮਦਾ ਪਮਾਦਿਨਂ, ਦੁਗ੍ਗਤਿਞ੍ਚ ਪਟਿਪਾਦਯਨ੍ਤਿ ਨਂ.

੩੬੭.

‘‘ਦਿਬ੍ਯਖਿਡ੍ਡਰਤਿਯੋ ਨ ਦੁਲ੍ਲਭਾ, ਚਕ੍ਕਵਤ੍ਤਿਚਰਿਤਞ੍ਚ ਮਾਨੁਸੇ;

ਸੋਣ੍ਣਬ੍ਯਮ੍ਹਨਿਲਯਾ ਚ ਅਚ੍ਛਰਾ, ਯੇ ਚਰਨ੍ਤਿ ਪਮਦਾਹਨਤ੍ਥਿਕਾ.

੩੬੮.

‘‘ਕਾਮਧਾਤੁਸਮਤਿਕ੍ਕਮਾ ਗਤਿ, ਰੂਪਧਾਤੁਯਾ ਭਾਵੋ ਨ ਦੁਲ੍ਲਭੋ;

ਵੀਤਰਾਗਵਿਸਯੂਪਪਤ੍ਤਿ ਯਾ, ਯੇ ਚਰਨ੍ਤਿ ਪਮਦਾਹਨਤ੍ਥਿਕਾ.

੩੬੯.

‘‘ਸਬ੍ਬਦੁਕ੍ਖਸਮਤ੍ਤਿਕ੍ਕਮਂ ਸਿਵਂ, ਅਚ੍ਚਨ੍ਤਮਚਲਿਤਂ ਅਸਙ੍ਖਤਂ;

ਨਿਬ੍ਬੁਤੇਹਿ ਸੁਚਿਹੀ ਨ ਦੁਲ੍ਲਭਂ, ਯੇ ਚਰਨ੍ਤਿ ਪਮਦਾਹਨਤ੍ਥਿਕਾ’’’ਤਿ.

ਤਤ੍ਥ ਸਲ੍ਲਪੇਤਿ ‘‘ਸਚੇ ਮਯਾ ਸਦ੍ਧਿਂ ਸਲ੍ਲਪੇਸ੍ਸਸਿ, ਸੀਸਂ ਤੇ ਪਾਤੇਸ੍ਸਾਮੀ’’ਤਿ ਵਤ੍ਵਾ ਖਗ੍ਗਂ ਆਦਾਯ ਠਿਤੇਨਾਪਿ, ‘‘ਸਲ੍ਲਪਿਤਮਤ੍ਤੇਯੇਵ ਤਂ ਖਾਦਿਤ੍ਵਾ ਜੀਵਿਤਵਿਨਾਸਂ ਪਾਪੇਸ੍ਸਾਮੀ’’ਤਿ ਦੋਸਿਨਾ ਹੁਤ੍ਵਾ ਠਿਤੇਨਾਪਿ ਪਿਸਾਚੇਨ ਸਦ੍ਧਿਂ ਸਲ੍ਲਪੇ. ‘‘ਉਪਗਤਂ ਡਂਸਿਤ੍ਵਾ ਨਾਸੇਸ੍ਸਾਮੀ’’ਤਿ ਠਿਤਂ ਉਗ੍ਗਤੇਜਂ ਉਰਗਮ੍ਪਿ ਆਸਿਦੇ. ਏਕੋ ਪਨ ਹੁਤ੍ਵਾ ਰਹੋ ਏਕਾਯ ਪਮਦਾਯ ਨ ਹਿ ਆਲਪੇ. ਲੋਕਚਿਤ੍ਤਮਥਨਾਤਿ ਲੋਕਸ੍ਸ ਚਿਤ੍ਤਘਾਤਿਕਾ. ਦੀਪੇ ਰਕ੍ਖਸਿਗਣੋਤਿ ਯਥਾ ਦੀਪੇ ਰਕ੍ਖਸਿਗਣੋ ਮਨੁਸ੍ਸਵੇਸੇਨ ਵਾਣਿਜੇ ਉਪਲਾਪੇਤ੍ਵਾ ਅਤ੍ਤਨੋ ਵਸੇ ਗਤੇ ਕਤ੍ਵਾ ਖਾਦਤਿ, ਏਵਂ ਇਮਾਪਿ ਪਞ੍ਚਹਿ ਕਾਮਗੁਣੇਹਿ ਅਤ੍ਤਨੋ ਵਸੇ ਕਤ੍ਵਾ ਸਤ੍ਤੇ ਮਹਾਵਿਨਾਸਂ ਪਾਪੇਨ੍ਤੀਤਿ ਅਤ੍ਥੋ. ਵਿਨਯੋਤਿ ਆਚਾਰੋ. ਸਂਵਰੋਤਿ ਮਰਿਯਾਦੋ. ਪੁਰਿਸਸ੍ਸ ਪਾਭਤਨ੍ਤਿ ਦੁਕ੍ਖਸਮ੍ਭਤਂ ਧਨਂ ਗਿਲਨ੍ਤਿ ਨਾਸੇਨ੍ਤਿ.

ਅਨਿਯਤਾਤਿ ਅਨਿਯਤਚਿਤ੍ਤਾ. ਲੋਣਤੋਯਵਤਿਯਨ੍ਤਿ ਲੋਣਤੋਯਵਨ੍ਤਂ ਸਮੁਦ੍ਦਨ੍ਤਿ ਅਤ੍ਥੋ. ਆਪਕਾਤਿ ਆਪਗਾ, ਅਯਮੇਵ ਵਾ ਪਾਠੋ. ਯਥਾ ਸਮੁਦ੍ਦਂ ਨਦਿਯੋ ਓਸਰਨ੍ਤਿ, ਏਵਂ ਪਮਾਦਿਨਂ ਪਮਦਾਤਿ ਅਤ੍ਥੋ. ਛਨ੍ਦਸਾਤਿ ਪੇਮੇਨ. ਰਤਿਯਾਤਿ ਪਞ੍ਚਕਾਮਗੁਣਰਤਿਯਾ. ਧਨੇਨ ਵਾਤਿ ਧਨਹੇਤੁ ਵਾ. ਜਾਤਵੇਦਸਦਿਸਨ੍ਤਿ ਗੁਣਸਮ੍ਪਤ੍ਤਿਯਾ ਅਗ੍ਗਿਮਿਵ ਜਲਿਤਮ੍ਪਿ. ਰਾਗਦੋਸਵਧਿਯੋਤਿ ਕਾਮਰਾਗਦੋਸੇਹਿ ਵਧਿਕਾ. ਰਾਗਦੋਸਗਤਿਯੋਤਿਪਿ ਪਾਠੋ. ਓਸਰਨ੍ਤੀਤਿ ਧਨਗਹਣਤ੍ਥਾਯ ਮਧੁਰਵਚਨੇਨ ਤਂ ਬਨ੍ਧਨ੍ਤਿਯੋ ਉਪਗਚ੍ਛਨ੍ਤਿ. ਸਧਨਨ੍ਤਿ ਸਧਨਾ. ਅਯਮੇਵ ਵਾ ਪਾਠੋ, ਵਤ੍ਥਾਲਙ੍ਕਾਰਤ੍ਥਾਯ ਕਿਞ੍ਚਿ ਅਤ੍ਤਨੋ ਧਨਂ ਦਤ੍ਵਾਪਿ ਓਸਰਨ੍ਤੀਤਿ ਅਤ੍ਥੋ. ਸਹਤ੍ਤਨਾਤਿ ਅਤ੍ਤਭਾਵੇਨ ਸਦ੍ਧਿਂ ਅਤ੍ਤਭਾਵਮ੍ਪਿ ਤਸ੍ਸੇਵ ਪਰਿਚ੍ਚਜਨ੍ਤਿਯੋ ਵਿਯ ਹੋਨ੍ਤਿ. ਅਤਿਵੇਠਯਨ੍ਤੀਤਿ ਧਨਗਹਣਤ੍ਥਾਯ ਅਤਿਵਿਯ ਵੇਠੇਨ੍ਤਿ ਪੀਲ਼ੇਨ੍ਤਿ.

ਵਿਵਿਧੇਨ ਛਨ੍ਦਸਾਤਿ ਨਾਨਾਵਿਧੇਨ ਆਕਾਰੇਨ. ਚਿਤ੍ਰਬਿਮ੍ਬਮੁਖਿਯੋਤਿ ਅਲਙ੍ਕਾਰਵਸੇਨ ਚਿਤ੍ਰਸਰੀਰਾ ਚਿਤ੍ਰਮੁਖਿਯੋ ਹੁਤ੍ਵਾ. ਉਹਸਨ੍ਤੀਤਿ ਮਹਾਹਸਿਤਂ ਹਸਨ੍ਤਿ. ਪਹਸਨ੍ਤੀਤਿ ਮਨ੍ਦਹਸਿਤਂ ਹਸਨ੍ਤਿ. ਸਮ੍ਬਰੋਵਾਤਿ ਮਾਯਾਕਾਰਪੁਰਿਸੋ ਵਿਯ ਅਸੁਰਿਨ੍ਦੋ ਵਿਯ ਚ. ਦਾਨਵਂਵ ਹਦਯਨ੍ਤਰਸ੍ਸਿਤਾਤਿ ਯਥਾ ‘‘ਕੁਤੋ ਨੁ ਆਗਚ੍ਛਥ, ਭੋ, ਤਯੋ ਜਨਾ’’ਤਿ ਕਰਣ੍ਡਕਜਾਤਕੇ (ਜਾ. ੧.੯.੮੭ ਆਦਯੋ) ਹਦਯਨ੍ਤਰਨਿਸ੍ਸਿਤਾ ਅਨ੍ਤੋਉਦਰਗਤਾਪਿ ਦਾਨਵਂ ਅਤਿਚਰਿ, ਏਵਂ ਅਤਿਚਰਨ੍ਤਿ. ਅਰਕ੍ਖਿਤਾ ਹੇਤਾਤਿ ਦੀਪੇਤਿ. ਨ ਭਾਸਤੀਤਿ ਨ ਵਿਰੋਚਤਿ ਹਰਿਤਚਲੋਮਸਕਸ੍ਸਪਕੁਸਰਾਜਾਨੋ ਵਿਯ. ਤੇਨਾਤਿ ਤਮ੍ਹਾ ਅਮਿਤ੍ਤੇਨ ਕਤਾ ਬ੍ਯਸਨਾ ਅਤਿਰੇਕਤਰਂ ਬ੍ਯਸਨਨ੍ਤਿ ਅਤ੍ਥੋ. ਅਪੇਕ੍ਖਵਾਤਿ ਸਤਣ੍ਹੋ.

ਕੇਸਲੂਨਨਖਛਿਨ੍ਨਤਜ੍ਜਿਤਾਤਿ ਆਕਡ੍ਢਿਤ੍ਵਾ ਲੂਨਕੇਸਾ ਨਖੇਹਿ ਛਿਨ੍ਨਗਤ੍ਤਾ ਤਜ੍ਜਿਤਾ ਪਾਦਾਦੀਹਿ ਚ ਤਾਲ਼ਿਤਾਵ ਹੁਤ੍ਵਾ. ਯੋ ਕਿਲੇਸਵਸੇਨ ਏਤੇਪਿ ਵਿਪ੍ਪਕਾਰੇ ਕਰੋਤਿ, ਤਾਦਿਸਂ ਹੀਨਮੇਵ ਉਪਗਤਾ ਨਾਰਿਯੋ ਰਮਨ੍ਤਿ, ਨ ਏਤੇ ਵਿਪ੍ਪਕਾਰੇ ਪਰਿਹਰਨ੍ਤਿ, ਮਧੁਰਸਮਾਚਾਰੇ ਕਿਂਕਾਰਣਾ ਤਾ ਨ ਰਮਨ੍ਤਿ. ਕੁਣਪੇਵ ਮਕ੍ਖਿਕਾਤਿ ਯਸ੍ਮਾ ਜੇਗੁਚ੍ਛਹਤ੍ਥਿਕੁਣਪਾਦਿਮ੍ਹਿ ਮਕ੍ਖਿਕਾ ਵਿਯ ਤਾ ਹੀਨੇਯੇਵ ਰਮਨ੍ਤੀਤਿ ਅਤ੍ਥੋ. ਓਡ੍ਡਿਤਨ੍ਤਿ ਨ ਏਤਾ ਇਤ੍ਥਿਯੋ ਨਾਮ, ਅਥ ਖੋ ਇਮੇਸੁ ਠਾਨੇਸੁ ਨਮੁਚਿਨੋ ਕਿਲੇਸਮਾਰਸ੍ਸ ਮਿਗਪਕ੍ਖਿਗਹਣਤ੍ਥਂ ਲੁਦ੍ਦਕੇਹਿ ਓਡ੍ਡਿਤਂ ਪਾਸਞ੍ਚ ਵਾਕਰਞ੍ਚਾਤਿ ਮਞ੍ਞਮਾਨੋ ਪਞ੍ਞਾਚਕ੍ਖੁਮਾ ਪੁਰਿਸੋ ਦਿਬ੍ਬਮਾਨੁਸਿਕੇਨ ਸੁਖੇਨ ਅਤ੍ਥਿਕੋ ਪਰਿਵਜ੍ਜੇਯ੍ਯ.

ਓਸ੍ਸਜਿਤ੍ਵਾਤਿ ਦੇਵਮਨੁਸ੍ਸੇਸੁ ਮਹਾਸਮ੍ਪਤ੍ਤਿਦਾਯਕਂ ਤਪੋਗੁਣਂ ਛਡ੍ਡੇਤ੍ਵਾ. ਯੋਤਿ ਯੋ ਪੁਰਿਸੋ ਅਨਰਿਯੇਸੁ ਅਪਰਿਸੁਦ੍ਧੇਸੁ ਕਾਮਗੁਣੇਸੁ ਕਾਮਰਤਿਚਰਿਤਾਨਿ ਆਚਰਤਿ. ਦੇਵਤਾਹਿ ਨਿਰਯਂ ਨਿਮਿਸ੍ਸਤੀਤਿ ਸੋ ਦੇਵਲੋਕੇਨ ਪਰਿਵਤ੍ਤਿਤ੍ਵਾ ਨਿਰਯਂ ਗਣ੍ਹਿਸ੍ਸਤਿ. ਛੇਦਗਾਮਿਮਣਿਯਂਵ ਵਾਣਿਜੋਤਿ ਯਥਾ ਬਾਲਵਾਣਿਜੋ ਸਤਸਹਸ੍ਸਗ੍ਘਭਣ੍ਡਂ ਦਤ੍ਵਾ ਛੇਦਗਾਮਿਮਣਿਕਂ ਗਣ੍ਹਾਤਿ, ਤਥਾਰੂਪੋ ਅਯਂ ਹੋਤੀਤਿ ਅਤ੍ਥੋ. ਸੋਤਿ ਸੋ ਇਤ੍ਥੀਨਂ ਵਸਂ ਗਤੋ. ਅਨਿਯਤੋਤਿ ਏਤ੍ਤਕਂ ਨਾਮ ਕਾਲਂ ਅਪਾਯੇਸੁ ਪਚ੍ਚਿਸ੍ਸਤੀਤਿ ਅਨਿਯਤੋ. ਗਲ਼ਾਗਲ਼ਨ੍ਤਿ ਦੇਵਲੋਕਾ ਵਾ ਮਨੁਸ੍ਸਲੋਕਾ ਵਾ ਗਲ਼ਿਤ੍ਵਾ ਅਪਾਯਮੇਵ ਗਚ੍ਛਤੀਤਿ ਅਤ੍ਥੋ. ਯਥਾ ਕਿਂ? ਦੁਟ੍ਠਗਦ੍ਰਭਰਥੋਵ ਉਪ੍ਪਥੇਤਿ, ਯਥਾ ਕੂਟਗਦ੍ਰਭਯੁਤ੍ਤਰਥੋ ਮਗ੍ਗਾ ਓਕ੍ਕਮਿਤ੍ਵਾ ਉਪ੍ਪਥੇਯੇਵ ਗਚ੍ਛਤਿ, ਤਥਾ. ਸਤ੍ਤਿਸਿਮ੍ਬਲਿਵਨਨ੍ਤਿ ਸਤ੍ਤਿਸਦਿਸੇਹਿ ਕਣ੍ਟਕੇਹਿ ਯੁਤ੍ਤਂ ਆਯਸਂ ਸਿਮ੍ਬਲਿਵਨਂ. ਪੇਤਰਾਜਵਿਸਯਨ੍ਤਿ ਪੇਤਵਿਸਯਞ੍ਚ ਕਾਲਕਞ੍ਚਿਕਅਸੁਰਵਿਸਯਞ੍ਚ.

ਪਮਾਦਿਨਨ੍ਤਿ ਪਮਤ੍ਤਾਨਂ. ਤੇ ਹਿ ਪਮਦਾਸੁ ਪਮਤ੍ਤਾ ਤਾਸਂ ਸਮ੍ਪਤ੍ਤੀਨਂ ਮੂਲਭੂਤਂ ਕੁਸਲਂ ਨ ਕਰੋਨ੍ਤਿ, ਇਤਿ ਤੇਸਂ ਪਮਦਾ ਸਬ੍ਬਾ ਤਾ ਨਾਸੇਨ੍ਤਿ ਨਾਮ. ਪਟਿਪਾਦਯਨ੍ਤੀਤਿ ਤਥਾਵਿਧਂ ਪੁਰਿਸਂ ਤਾ ਪਮਾਦਵਸੇਨੇਵ ਅਕੁਸਲਂ ਕਾਰੇਤ੍ਵਾ ਦੁਗ੍ਗਤਿਂ ਪਟਿਪਾਦੇਨ੍ਤਿ ਨਾਮ. ਸੋਣ੍ਣਬ੍ਯਮ੍ਹਨਿਲਯਾਤਿ ਸੁਵਣ੍ਣਮਯਵਿਮਾਨਵਾਸਿਨਿਯੋ. ਪਮਦਾਹਨਤ੍ਥਿਕਾਤਿ ਯੇ ਪੁਰਿਸਾ ਪਮਦਾਹਿ ਅਨਤ੍ਥਿਕਾ ਹੁਤ੍ਵਾ ਬ੍ਰਹ੍ਮਚਰਿਯਂ ਚਰਨ੍ਤਿ. ਕਾਮਧਾਤੁਸਮਤਿਕ੍ਕਮਾਤਿ ਕਾਮਧਾਤੁਸਮਤਿਕ੍ਕਮਾ ਯਾ ਗਤਿ. ਰੂਪਧਾਤੁਯਾ ਭਾਵੋਤਿ ਯੋ ਕਾਮਧਾਤੁਸਮਤਿਕ੍ਕਮਗਤਿਸਙ੍ਖਾਤੋ ਰੂਪਧਾਤੁਯਾ ਭਾਵੋ, ਸੋ ਤੇਸਂ ਨ ਦੁਲ੍ਲਭੋ. ਵੀਤਰਾਗਵਿਸਯੂਪਪਤ੍ਤਿ ਯਾਤਿ ਯਾ ਵੀਤਰਾਗਵਿਸਯੇ ਸੁਦ੍ਧਾਵਾਸਲੋਕੇ ਉਪਪਤ੍ਤਿ, ਸਾਪਿ ਤੇਸਂ ਨ ਦੁਲ੍ਲਭਾਤਿ ਅਤ੍ਥੋ. ਅਚ੍ਚਨ੍ਤਨ੍ਤਿ ਅਨ੍ਤਾਤੀਤਂ ਅਵਿਨਾਸਧਮ੍ਮਂ. ਅਚਲਿਤਨ੍ਤਿ ਕਿਲੇਸੇਹਿ ਅਕਮ੍ਪਿਤਂ. ਨਿਬ੍ਬੁਤੇਹੀਤਿ ਨਿਬ੍ਬੁਤਕਿਲੇਸੇਹਿ. ਸੁਚਿਹੀਤਿ ਸੁਚੀਹਿ ਪਰਿਸੁਦ੍ਧੇਹਿ ਏਵਰੂਪਂ ਨਿਬ੍ਬਾਨਂ ਨ ਦੁਲ੍ਲਭਨ੍ਤਿ.

ਏਵਂ ਮਹਾਸਤ੍ਤੋ ਅਮਤਮਹਾਨਿਬ੍ਬਾਨਂ ਪਾਪੇਤ੍ਵਾ ਦੇਸਨਂ ਨਿਟ੍ਠਾਪੇਸਿ. ਹਿਮਵਨ੍ਤੇ ਕਿਨ੍ਨਰਮਹੋਰਗਾਦਯੋ ਆਕਾਸੇ ਠਿਤਾ ਦੇਵਤਾ ਚ ‘‘ਅਹੋ ਬੁਦ੍ਧਲੀਲਾਯ ਕਥਿਤਾ’’ਤਿ ਸਾਧੁਕਾਰਂ ਅਦਂਸੁ. ਆਨਨ੍ਦੋ ਗਿਜ੍ਝਰਾਜਾ ਨਾਰਦੋ ਦੇਵਬ੍ਰਾਹ੍ਮਣੋ ਪੁਣ੍ਣਮੁਖੋ ਚ ਫੁਸ੍ਸਕੋਕਿਲੋ ਅਤ੍ਤਨੋ ਅਤ੍ਤਨੋ ਪਰਿਸਂ ਆਦਾਯ ਯਥਾਠਾਨਮੇਵ ਗਮਿਂਸੁ. ਮਹਾਸਤ੍ਤੋਪਿ ਸਕਟ੍ਠਾਨਮੇਵ ਗਤੋ. ਇਤਰੇ ਪਨ ਅਨ੍ਤਰਨ੍ਤਰਾ ਗਨ੍ਤ੍ਵਾ ਮਹਾਸਤ੍ਤਸ੍ਸ ਸਨ੍ਤਿਕੇ ਓਵਾਦਂ ਗਹੇਤ੍ਵਾ ਤਸ੍ਮਿਂ ਓਵਾਦੇ ਠਤ੍ਵਾ ਸਗ੍ਗਪਰਾਯਣਾ ਅਹੇਸੁਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਨ੍ਤੋ ਓਸਾਨਗਾਥਾ ਅਭਾਸਿ –

੩੭੦.

‘‘ਕੁਣਾਲੋਹਂ ਤਦਾ ਆਸਿਂ, ਉਦਾਯੀ ਫੁਸ੍ਸਕੋਕਿਲੋ;

ਆਨਨ੍ਦੋ ਗਿਜ੍ਝਰਾਜਾਸਿ, ਸਾਰਿਪੁਤ੍ਤੋ ਚ ਨਾਰਦੋ;

ਪਰਿਸਾ ਬੁਦ੍ਧਪਰਿਸਾ, ਏਵਂ ਧਾਰੇਥ ਜਾਤਕ’’ਨ੍ਤਿ.

ਤੇ ਪਨ ਭਿਕ੍ਖੂ ਗਮਨਕਾਲੇ ਸਤ੍ਥਾਨੁਭਾਵੇਨ ਗਨ੍ਤ੍ਵਾ ਆਗਮਨਕਾਲੇ ਅਤ੍ਤਨੋ ਅਤ੍ਤਨੋਵ ਆਨੁਭਾਵੇਨ ਆਗਤਾ. ਤੇਸਂ ਸਤ੍ਥਾ ਮਹਾਵਨੇਯੇਵ ਕਮ੍ਮਟ੍ਠਾਨਂ ਕਥੇਸਿ. ਸਬ੍ਬੇਪਿ ਤੇ ਤਂ ਦਿਵਸਮੇਵ ਅਰਹਤ੍ਤਂ ਪਾਪੁਣਿਂਸੁ. ਮਹਾਦੇਵਤਾਸਮਾਗਮੋ ਅਹੋਸਿ. ਅਥਸ੍ਸ ਭਗਵਾ ਮਹਾਸਮਯਸੁਤ੍ਤਂ (ਦੀ. ਨਿ. ੨.੩੩੧ ਆਦਯੋ) ਕਥੇਸਿ.

ਕੁਣਾਲਜਾਤਕਵਣ੍ਣਨਾ ਚਤੁਤ੍ਥਾ.

[੫੩੭] ੫. ਮਹਾਸੁਤਸੋਮਜਾਤਕਵਣ੍ਣਨਾ

ਕਸ੍ਮਾ ਤੁਵਂ ਰਸਕ ਏਦਿਸਾਨੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਙ੍ਗੁਲਿਮਾਲਤ੍ਥੇਰਦਮਨਂ ਆਰਬ੍ਭ ਕਥੇਸਿ. ਤਸ੍ਸ ਉਪ੍ਪਤ੍ਤਿ ਚ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਅਙ੍ਗੁਲਿਮਾਲਸੁਤ੍ਤਵਣ੍ਣਨਾਯਂ (ਮ. ਨਿ. ਅਟ੍ਠ. ੨.੩੪ ਆਦਯੋ) ਵੁਤ੍ਤਨਯੇਨ ਵਿਤ੍ਥਾਰਤੋ ਵੇਦਿਤਬ੍ਬਾ. ਸੋ ਪਨ ਸਚ੍ਚਕਿਰਿਯਾਯ ਮੂਲ਼੍ਹਗਬ੍ਭਾਯ ਇਤ੍ਥਿਯਾ ਸੋਤ੍ਥਿਭਾਵਂ ਕਤ੍ਵਾ ਤਤੋ ਪਟ੍ਠਾਯ ਸੁਲਭਪਿਣ੍ਡੋ ਹੁਤ੍ਵਾ ਵਿਵੇਕਮਨੁਬ੍ਰੂਹਨ੍ਤੋ ਅਪਰਭਾਗੇ ਅਰਹਤ੍ਤਂ ਪਤ੍ਵਾ ਅਭਿਞ੍ਞਾਤੋਵ ਅਸੀਤਿਯਾ ਮਹਾਥੇਰਾਨਂ ਅਬ੍ਭਨ੍ਤਰੋ ਅਹੋਸਿ. ਤਸ੍ਮਿਂ ਕਾਲੇ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਆਵੁਸੋ, ਅਹੋ ਵਤ ਭਗਵਤਾ ਤਥਾਰੂਪਂ ਲੁਦ੍ਦਂ ਲੋਹਿਤਪਾਣਿਂ ਮਹਾਚੋਰਂ ਅਙ੍ਗੁਲਿਮਾਲਂ ਅਦਣ੍ਡੇਨ ਅਸਤ੍ਥੇਨ ਦਮੇਤ੍ਵਾ ਨਿਬ੍ਬਿਸੇਵਨਂ ਕਰੋਨ੍ਤੇਨ ਦੁਕ੍ਕਰਂ ਕਤਂ, ਅਹੋ ਬੁਦ੍ਧਾ ਨਾਮ ਦੁਕ੍ਕਰਕਾਰਿਨੋ’’ਤਿ. ਸਤ੍ਥਾ ਗਨ੍ਧਕੁਟਿਯਂ ਠਿਤੋਵ ਦਿਬ੍ਬਸੋਤੇਨ ਤਂ ਕਥਂ ਸੁਤ੍ਵਾ ‘‘ਅਜ੍ਜ ਮਮ ਗਮਨਂ ਬਹੁਪਕਾਰਂ ਭਵਿਸ੍ਸਤਿ, ਮਹਾਧਮ੍ਮਦੇਸਨਾ ਪਵਤ੍ਤਿਸ੍ਸਤੀ’’ਤਿ ਞਤ੍ਵਾ ਅਨੋਪਮਾਯ ਬੁਦ੍ਧਲੀਲਾਯ ਧਮ੍ਮਸਭਂ ਗਨ੍ਤ੍ਵਾ ਵਰਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਇਦਾਨੇਵ ਪਰਮਾਭਿਸਮ੍ਬੋਧਿਂ ਪਤ੍ਤੇਨ ਮਯਾ ਏਤਸ੍ਸ ਦਮਨਂ, ਸ੍ਵਾਹਂ ਪੁਬ੍ਬਚਰਿਯਂ ਚਰਨ੍ਤੋ ਪਦੇਸਞਾਣੇ ਠਿਤੋਪਿ ਏਤਂ ਦਮੇਸਿ’’ਨ੍ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਕੁਰੁਰਟ੍ਠੇ ਇਨ੍ਦਪਤ੍ਥਨਗਰੇ ਕੋਰਬ੍ਯੋ ਨਾਮ ਰਾਜਾ ਧਮ੍ਮੇਨ ਰਜ੍ਜਂ ਕਾਰੇਸਿ. ਤਦਾ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਦਸਮਾਸੇ ਅਤਿਕ੍ਕਨ੍ਤੇ ਸੁਵਣ੍ਣਵਣ੍ਣਂ ਪੁਤ੍ਤਂ ਵਿਜਾਯਿ, ਸੁਤਵਿਤ੍ਤਤਾਯ ਪਨ ਨਂ ‘‘ਸੁਤਸੋਮੋ’’ਤਿ ਸਞ੍ਜਾਨਿਂਸੁ. ਤਮੇਨਂ ਰਾਜਾ ਵਯਪ੍ਪਤ੍ਤਂ ਨਿਕ੍ਖਸਹਸ੍ਸਂ ਦਤ੍ਵਾ ਦਿਸਾਪਾਮੋਕ੍ਖਸ੍ਸ ਆਚਰਿਯਸ੍ਸ ਸਨ੍ਤਿਕੇ ਸਿਪ੍ਪੁਗ੍ਗਹਣਤ੍ਥਾਯ ਤਕ੍ਕਸਿਲਂ ਪੇਸੇਸਿ. ਸੋ ਆਚਰਿਯਭਾਗਂ ਆਦਾਯ ਨਗਰਾ ਨਿਕ੍ਖਮਿਤ੍ਵਾ ਮਗ੍ਗਂ ਪਟਿਪਜ੍ਜਿ. ਤਦਾ ਬਾਰਾਣਸਿਯਂ ਕਾਸਿਰਞ੍ਞੋ ਪੁਤ੍ਤੋ ਬ੍ਰਹ੍ਮਦਤ੍ਤਕੁਮਾਰੋਪਿ ਤਥੇਵ ਵਤ੍ਵਾ ਪਿਤਰਾ ਪੇਸਿਤੋ ਨਗਰਾ ਨਿਕ੍ਖਮਿਤ੍ਵਾ ਤਮੇਵ ਮਗ੍ਗਂ ਪਟਿਪਜ੍ਜਿ. ਅਥ ਸੁਤਸੋਮੋ ਮਗ੍ਗਂ ਗਨ੍ਤ੍ਵਾ ਨਗਰਦ੍ਵਾਰੇ ਸਾਲਾਯ ਫਲਕੇ ਵਿਸ੍ਸਮਤ੍ਥਾਯ ਨਿਸੀਦਿ. ਬ੍ਰਹ੍ਮਦਤ੍ਤਕੁਮਾਰੋਪਿ ਗਨ੍ਤ੍ਵਾ ਤੇਨ ਸਦ੍ਧਿਂ ਏਕਫਲਕੇ ਨਿਸੀਦਿ. ਅਥ ਨਂ ਸੁਤਸੋਮੋ ਪਟਿਸਨ੍ਥਾਰਂ ਕਰੋਨ੍ਤੋ ‘‘ਸਮ੍ਮ, ਮਗ੍ਗਕਿਲਨ੍ਤੋਸਿ, ਕੁਤੋ ਆਗਚ੍ਛਸੀ’’ਤਿ ਪੁਚ੍ਛਿਤ੍ਵਾ ‘‘ਬਾਰਾਣਸਿਤੋ’’ਤਿ ਵੁਤ੍ਤੇ ‘‘ਕਸ੍ਸ ਪੁਤ੍ਤੋਸੀ’’ਤਿ ਵਤ੍ਵਾ ‘‘ਕਾਸਿਰਞ੍ਞੋ ਪੁਤ੍ਤੋਮ੍ਹੀ’’ਤਿ ਵੁਤ੍ਤੇ ‘‘ਕੋ ਨਾਮੋਸੀ’’ਤਿ ਵਤ੍ਵਾ ‘‘ਅਹਂ ਬ੍ਰਹ੍ਮਦਤ੍ਤਕੁਮਾਰੋ ਨਾਮਾ’’ਤਿ ਵੁਤ੍ਤੇ ‘‘ਕੇਨ ਕਾਰਣੇਨ ਇਧਾਗਤੋਸੀ’’ਤਿ ਪੁਚ੍ਛਿ. ਸੋ ‘‘ਸਿਪ੍ਪੁਗ੍ਗਹਣਤ੍ਥਾਯਾ’’ਤਿ ਵਤ੍ਵਾ ‘‘ਤ੍ਵਮ੍ਪਿ ਮਗ੍ਗਕਿਲਨ੍ਤੋਸਿ, ਕੁਤੋ ਆਗਚ੍ਛਸੀ’’ਤਿ ਤੇਨੇਵ ਨਯੇਨ ਇਤਰਂ ਪੁਚ੍ਛਿ. ਸੋਪਿ ਤਸ੍ਸ ਸਬ੍ਬਂ ਆਚਿਕ੍ਖਿ. ਤੇ ਉਭੋਪਿ ‘‘ਮਯਂ ਖਤ੍ਤਿਯਾ, ਏਕਾਚਰਿਯਸ੍ਸੇਵ ਸਨ੍ਤਿਕੇ ਸਿਪ੍ਪੁਗ੍ਗਹਣਤ੍ਥਾਯ ਗਚ੍ਛਾਮਾ’’ਤਿ ਅਞ੍ਞਮਞ੍ਞਂ ਮਿਤ੍ਤਭਾਵਂ ਕਤ੍ਵਾ ਨਗਰਂ ਪਵਿਸਿਤ੍ਵਾ ਆਚਰਿਯਕੁਲਂ ਗਨ੍ਤ੍ਵਾ ਆਚਰਿਯਂ ਵਨ੍ਦਿਤ੍ਵਾ ਅਤ੍ਤਨੋ ਜਾਤਿਆਦਿਂ ਕਥੇਤ੍ਵਾ ਸਿਪ੍ਪੁਗ੍ਗਹਣਤ੍ਥਾਯ ਆਗਤਭਾਵਂ ਕਥੇਸੁਂ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਤੇ ਆਚਰਿਯਭਾਗਂ ਦਤ੍ਵਾ ਸਿਪ੍ਪਂ ਪਟ੍ਠਪੇਸੁਂ.

ਨ ਕੇਵਲਞ੍ਚ ਤੇ ਦ੍ਵੇਵ, ਅਞ੍ਞੇਪਿ ਤਦਾ ਜਮ੍ਬੁਦੀਪੇ ਏਕਸਤਮਤ੍ਤਾ ਰਾਜਪੁਤ੍ਤਾ ਤਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਨ੍ਤਿ. ਸੁਤਸੋਮੋ ਤੇਸਂ ਜੇਟ੍ਠਨ੍ਤੇਵਾਸਿਕੋ ਹੁਤ੍ਵਾ ਸਿਪ੍ਪਂ ਉਪਦਿਸਨ੍ਤੋ ਨਚਿਰਸ੍ਸੇਵ ਨਿਪ੍ਫਤ੍ਤਿਂ ਪਾਪੁਣਿ. ਸੋ ਅਞ੍ਞਸ੍ਸ ਸਨ੍ਤਿਕਂ ਅਗਨ੍ਤ੍ਵਾ ‘‘ਸਹਾਯੋ ਮੇ’’ਤਿ ਬ੍ਰਹ੍ਮਦਤ੍ਤਸ੍ਸ ਕੁਮਾਰਸ੍ਸੇਵ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸ ਪਿਟ੍ਠਿਆਚਰਿਯੋ ਹੁਤ੍ਵਾ ਸਿਪ੍ਪਂ ਸਿਕ੍ਖਾਪੇਸਿ. ਇਤਰੇਸਮ੍ਪਿ ਅਨੁਕ੍ਕਮੇਨ ਸਿਪ੍ਪਂ ਨਿਟ੍ਠਿਤਂ. ਤੇ ਅਨੁਯੋਗਂ ਦਤ੍ਵਾ ਆਚਰਿਯਂ ਵਨ੍ਦਿਤ੍ਵਾ ਸੁਤਸੋਮਂ ਪਰਿਵਾਰੇਤ੍ਵਾ ਨਿਕ੍ਖਮਿਂਸੁ. ਅਥ ਨੇ ਸੁਤਸੋਮੋ ਮਗ੍ਗਨ੍ਤਰੇ ਠਤ੍ਵਾ ਉਯ੍ਯੋਜੇਨ੍ਤੋ ‘‘ਤੁਮ੍ਹੇ ਅਤ੍ਤਨੋ ਅਤ੍ਤਨੋ ਪਿਤੂਨਂ ਸਿਪ੍ਪਂ ਦਸ੍ਸੇਤ੍ਵਾ ਰਜ੍ਜੇਸੁ ਪਤਿਟ੍ਠਹਿਸ੍ਸਥ, ਪਤਿਟ੍ਠਿਤਾ ਚ ਪਨ ਮਮੋਵਾਦਂ ਕਰੇਯ੍ਯਾਥਾ’’ਤਿ ਆਹ. ‘‘ਕਿਂ, ਆਚਰਿਯਾ’’ਤਿ? ‘‘ਪਕ੍ਖਦਿਵਸੇਸੁ ਉਪੋਸਥਿਕਾ ਹੁਤ੍ਵਾ ਮਾ ਘਾਤਂ ਕਰੇਯ੍ਯਾਥਾ’’ਤਿ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਂਸੁ. ਬੋਧਿਸਤ੍ਤੋਪਿ ਅਙ੍ਗਵਿਜ੍ਜਾਪਾਠਕਤ੍ਤਾ ‘‘ਅਨਾਗਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤਕੁਮਾਰਂ ਨਿਸ੍ਸਾਯ ਮਹਾਭਯਂ ਉਪ੍ਪਜ੍ਜਿਸ੍ਸਤੀ’’ਤਿ ਞਤ੍ਵਾ ਤੇ ਏਵਂ ਓਵਦਿਤ੍ਵਾ ਉਯ੍ਯੋਜੇਸਿ. ਤੇ ਸਬ੍ਬੇਪਿ ਅਤ੍ਤਨੋ ਅਤ੍ਤਨੋ ਜਨਪਦਂ ਗਨ੍ਤ੍ਵਾ ਪਿਤੂਨਂ ਸਿਪ੍ਪਂ ਦਸ੍ਸੇਤ੍ਵਾ ਰਜ੍ਜੇਸੁ ਪਤਿਟ੍ਠਾਯ ਪਤਿਟ੍ਠਿਤਭਾਵਞ੍ਚੇਵ ਓਵਾਦੇ ਵਤ੍ਤਨਭਾਵਞ੍ਚ ਜਾਨਾਪੇਤੁਂ ਪਣ੍ਣਾਕਾਰੇਨ ਸਦ੍ਧਿਂ ਪਣ੍ਣਾਨਿ ਪਹਿਣਿਂਸੁ. ਮਹਾਸਤ੍ਤੋ ਤਂ ਪਵਤ੍ਤਿਂ ਸੁਤ੍ਵਾ ‘‘ਅਪ੍ਪਮਤ੍ਤਾਵ ਹੋਥਾ’’ਤਿ ਪਣ੍ਣਾਨਿ ਪਟਿਪੇਸੇਸਿ.

ਤੇਸੁ ਬਾਰਾਣਸਿਰਾਜਾ ਵਿਨਾ ਮਂਸੇਨ ਭਤ੍ਤਂ ਨ ਭੁਞ੍ਜਤਿ. ਉਪੋਸਥਦਿਵਸਤ੍ਥਾਯਪਿਸ੍ਸ ਮਂਸਂ ਗਹੇਤ੍ਵਾ ਠਪੇਸਿ. ਅਥੇਕਦਿਵਸਂ ਏਵਂ ਠਪਿਤਮਂਸਂ ਭਤ੍ਤਕਾਰਕਸ੍ਸ ਪਮਾਦੇਨ ਰਾਜਗੇਹੇ ਕੋਲੇਯ੍ਯਕਸੁਨਖਾ ਖਾਦਿਂਸੁ. ਭਤ੍ਤਕਾਰਕੋ ਤਂ ਮਂਸਂ ਅਦਿਤ੍ਵਾ ਕਹਾਪਣਮੁਟ੍ਠਿਂ ਆਦਾਯ ਚਰਨ੍ਤੋਪਿ ਮਂਸਂ ਉਪ੍ਪਾਦੇਤੁਂ ਅਸਕ੍ਕੋਨ੍ਤੋ ‘‘ਸਚੇ ਅਮਂਸਕਭਤ੍ਤਂ ਉਪਨਾਮੇਸ੍ਸਾਮਿ, ਜੀਵਿਤਂ ਮੇ ਨਤ੍ਥਿ, ਕਿਂ ਨੁ ਖੋ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਅਤ੍ਥੇਸੋ ਉਪਾਯੋ’’ਤਿ ਵਿਕਾਲੇ ਆਮਕਸੁਸਾਨਂ ਗਨ੍ਤ੍ਵਾ ਮੁਹੁਤ੍ਤਮਤਸ੍ਸ ਪੁਰਿਸਸ੍ਸ ਊਰੁਮਂਸਂ ਆਹਰਿਤ੍ਵਾ ਸੁਪਕ੍ਕਂ ਪਚਿਤ੍ਵਾ ਭਤ੍ਤਂ ਉਪਨਾਮੇਸਿ. ਰਞ੍ਞੋ ਮਂਸਖਣ੍ਡਂ ਜਿਵ੍ਹਗ੍ਗੇ ਠਪਿਤਮਤ੍ਤਮੇਵ ਸਤ੍ਤ ਰਸਹਰਣਿਸਹਸ੍ਸਾਨਿ ਫਰਿ, ਸਕਲਸਰੀਰਂ ਖੋਭੇਤ੍ਵਾ ਅਟ੍ਠਾਸਿ. ਕਿਂਕਾਰਣਾ? ਪੁਬ੍ਬੇ ਚਸ੍ਸ ਸੇਵਨਤਾਯ. ਸੋ ਕਿਰ ਅਤੀਤਾਨਨ੍ਤਰੇ ਅਤ੍ਤਭਾਵੇ ਯਕ੍ਖੋ ਹੁਤ੍ਵਾ ਬਹੁਂ ਮਨੁਸ੍ਸਮਂਸਂ ਖਾਦਿਤਪੁਬ੍ਬੋ, ਤੇਨਸ੍ਸ ਤਂ ਪਿਯਂ ਅਹੋਸਿ. ਸੋ ‘‘ਸਚਾਹਂ ਤੁਣ੍ਹੀਯੇਵ ਭੁਞ੍ਜਿਸ੍ਸਾਮਿ, ਨ ਮੇ ਅਯਂ ਇਮਂ ਮਂਸਂ ਕਥੇਸ੍ਸਤੀ’’ਤਿ ਚਿਨ੍ਤੇਤ੍ਵਾ ਸਹ ਖੇਲ਼ੇਨ ਭੂਮਿਯਂ ਪਾਤੇਸਿ. ‘‘ਨਿਦ੍ਦੋਸਂ, ਦੇਵ, ਖਾਦਾਹੀ’’ਤਿ ਵੁਤ੍ਤੇ ਮਨੁਸ੍ਸੇ ਪਟਿਕ੍ਕਮਾਪੇਤ੍ਵਾ ‘‘ਅਹਮੇਤਸ੍ਸ ਨਿਦ੍ਦੋਸਭਾਵਂ ਜਾਨਾਮਿ, ਕਿਂ ਨਾਮੇਤਂ ਮਂਸ’’ਨ੍ਤਿ ਪੁਚ੍ਛਿ. ‘‘ਪੁਰਿਮਦਿਵਸੇਸੁ ਪਰਿਭੋਗਮਂਸਮੇਵ, ਦੇਵਾ’’ਤਿ. ‘‘ਨਨੁ ਅਞ੍ਞਸ੍ਮਿਂ ਕਾਲੇ ਅਯਂ ਰਸੋ ਨਤ੍ਥੀ’’ਤਿ? ‘‘ਅਜ੍ਜ ਸੁਪਕ੍ਕਂ, ਦੇਵਾ’’ਤਿ. ‘‘ਨਨੁ ਪੁਬ੍ਬੇਪਿ ਏਵਮੇਵ ਪਚਸੀ’’ਤਿ. ਅਥ ਨਂ ਤੁਣ੍ਹੀਭੂਤਂ ਞਤ੍ਵਾ ‘‘ਸਭਾਵਂ ਕਥੇਹਿ, ਨੋ ਚੇ ਕਥੇਸਿ, ਜੀਵਿਤਂ ਤੇ ਨਤ੍ਥੀ’’ਤਿ ਆਹ. ਸੋ ਅਭਯਂ ਯਾਚਿਤ੍ਵਾ ਯਥਾਭੂਤਂ ਕਥੇਸਿ. ਰਾਜਾ ‘‘ਮਾ ਸਦ੍ਦਮਕਾਸਿ, ਪਕਤਿਯਾ ਪਚਨਕਮਂਸਂ ਤ੍ਵਂ ਖਾਦਿਤ੍ਵਾ ਮਯ੍ਹਂ ਮਨੁਸ੍ਸਮਂਸਮੇਵ ਪਚਾਹੀ’’ਤਿ ਆਹ. ‘‘ਨਨੁ ਦੁਕ੍ਕਰਂ, ਦੇਵਾ’’ਤਿ? ‘‘ਮਾ ਭਾਯਿ, ਨ ਦੁਕ੍ਕਰ’’ਨ੍ਤਿ. ‘‘ਨਿਬਦ੍ਧਂ ਕੁਤੋ ਲਭਿਸ੍ਸਾਮਿ, ਦੇਵਾ’’ਤਿ? ‘‘ਨਨੁ ਬਨ੍ਧਨਾਗਾਰੇ ਬਹੂ ਮਨੁਸ੍ਸਾ’’ਤਿ. ਸੋ ਤਤੋ ਪਟ੍ਠਾਯ ਤਥਾ ਅਕਾਸਿ.

ਅਪਰਭਾਗੇ ਬਨ੍ਧਨਾਗਾਰੇ ਮਨੁਸ੍ਸੇਸੁ ਖੀਣੇਸੁ ‘‘ਇਦਾਨਿ ਕਿਂ ਕਰਿਸ੍ਸਾਮਿ, ਦੇਵਾ’’ਤਿ ਆਹ. ‘‘ਅਨ੍ਤਰਾਮਗ੍ਗੇ ਸਹਸ੍ਸਭਣ੍ਡਿਕਂ ਖਿਪਿਤ੍ਵਾ ਯੋ ਤਂ ਗਣ੍ਹਾਤਿ, ਤਂ ‘ਚੋਰੋ’ਤਿ ਗਹੇਤ੍ਵਾ ਮਾਰੇਹੀ’’ਤਿ ਆਹ. ਸੋ ਤਥਾ ਅਕਾਸਿ. ਅਪਰਭਾਗੇ ਰਾਜਭਯੇਨ ਸਹਸ੍ਸਭਣ੍ਡਿਕਂ ਓਲੋਕੇਨ੍ਤਮ੍ਪਿ ਅਦਿਸ੍ਵਾ ‘‘ਇਦਾਨਿ ਕਿਂ ਕਰਿਸ੍ਸਾਮੀ’’ਤਿ ਆਹ. ‘‘ਯਦਾ ਭੇਰਿਵੇਲਾਯ ਨਗਰਂ ਆਕੁਲਂ ਹੋਤਿ, ਤਦਾ ਤ੍ਵਂ ਪਨ ਏਕਸ੍ਮਿਂ ਘਰਸਨ੍ਧਿਮ੍ਹਿ ਵਾ ਵੀਥਿਯਂ ਵਾ ਚਤੁਕ੍ਕੇ ਵਾ ਠਤ੍ਵਾ ਮਨੁਸ੍ਸੇ ਮਾਰੇਤ੍ਵਾ ਮਂਸਂ ਗਣ੍ਹਾਹੀ’’ਤਿ. ਸੋ ਤਤੋ ਪਟ੍ਠਾਯ ਤਥਾ ਕਤ੍ਵਾ ਥੂਲਮਂਸਂ ਆਦਾਯ ਗਚ੍ਛਤਿ. ਤੇਸੁ ਤੇਸੁ ਠਾਨੇਸੁ ਕਲ਼ੇਵਰਾਨਿ ਦਿਸ੍ਸਨ੍ਤਿ. ਮਮ ਮਾਤਾ ਨ ਪਞ੍ਞਾਯਤਿ, ਮਮ ਪਿਤਾ ਨ ਪਞ੍ਞਾਯਤਿ, ਮਮ ਭਾਤਾ ਭਗਿਨੀ ਚ ਨ ਪਞ੍ਞਾਯਤਿ, ਮਨੁਸ੍ਸਾਨਂ ਪਰਿਦੇਵਨਸਦ੍ਦੋ ਸੂਯਤਿ. ਨਾਗਰਾ ਭੀਤਤਸਿਤਾ ‘‘ਇਮੇ ਮਨੁਸ੍ਸੇ ਸੀਹੋ ਨੁ ਖੋ ਖਾਦਤਿ, ਬ੍ਯਗ੍ਘੋ ਨੁ ਖੋ ਖਾਦਤਿ, ਯਕ੍ਖੋ ਨੁ ਖੋ ਖਾਦਤੀ’’ਤਿ ਓਲੋਕੇਨ੍ਤਾ ਪਹਾਰਮੁਖਂ ਦਿਸ੍ਵਾ ‘‘ਏਕੋ ਮਨੁਸ੍ਸਖਾਦਕੋ ਚੋਰੋ ਇਮੇ ਖਾਦਤੀ’’ਤਿ ਮਞ੍ਞਨ੍ਤਿ. ਮਹਾਜਨਾ ਰਾਜਙ੍ਗਣੇ ਸਨ੍ਨਿਪਤਿਤ੍ਵਾ ਉਪਕ੍ਕੋਸਿਂਸੁ. ਰਾਜਾ ‘‘ਕਿਂ, ਤਾਤਾ’’ਤਿ ਪੁਚ੍ਛਿ. ‘‘ਦੇਵ ਇਮਸ੍ਮਿਂ ਨਗਰੇ ਮਨੁਸ੍ਸਖਾਦਕੋ ਚੋਰੋ ਅਤ੍ਥਿ, ਤਂ ਗਣ੍ਹਾਪੇਥਾ’’ਤਿ ਆਹਂਸੁ. ‘‘ਅਹਂ ਕਥਂ ਤਂ ਜਾਨਿਸ੍ਸਾਮਿ, ਕਿਂ ਅਹਂ ਨਗਰਂ ਰਕ੍ਖਨ੍ਤੋਪਿ ਚਰਾਮੀ’’ਤਿ.

ਮਹਾਜਨਾ ‘‘ਰਾਜਾ ਨਗਰੇਨ ਅਨਤ੍ਥਿਕੋ, ਕਾਲ਼ਹਤ੍ਥਿਸੇਨਾਪਤਿਸ੍ਸ ਆਚਿਕ੍ਖਿਸ੍ਸਾਮਾ’’ਤਿ ਗਨ੍ਤ੍ਵਾ ਤਸ੍ਸ ਤਂ ਕਥੇਤ੍ਵਾ ‘‘ਚੋਰਂ ਪਰਿਯੇਸਿਤੁਂ ਵਟ੍ਟਤੀ’’ਤਿ ਵਦਿਂਸੁ. ਸੋ ‘‘ਸਾਧੁ ਸਤ੍ਤਾਹਂ ਆਗਮੇਥ, ਪਰਿਯੇਸਿਤ੍ਵਾ ਚੋਰਂ ਦਸ੍ਸਾਮੀ’’ਤਿ ਮਹਾਜਨੇ ਉਯ੍ਯੋਜੇਤ੍ਵਾ ਪੁਰਿਸੇ ਆਣਾਪੇਸਿ, ‘‘ਤਾਤਾ, ਨਗਰੇ ਕਿਰ ਮਨੁਸ੍ਸਖਾਦਕੋ ਚੋਰੋ ਅਤ੍ਥਿ, ਤੁਮ੍ਹੇ ਤੇਸੁ ਤੇਸੁ ਠਾਨੇਸੁ ਨਿਲੀਯਿਤ੍ਵਾ ਤਂ ਗਣ੍ਹਥਾ’’ਤਿ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਤੋ ਪਟ੍ਠਾਯ ਨਗਰਂ ਪਰਿਗ੍ਗਣ੍ਹਨ੍ਤਿ. ਭਤ੍ਤਕਾਰਕੋਪਿ ਏਕਸ੍ਮਿਂ ਘਰਸਨ੍ਧਿਮ੍ਹਿ ਸਮ੍ਪਟਿਚ੍ਛਨ੍ਨੋ ਹੁਤ੍ਵਾ ਏਕਂ ਇਤ੍ਥਿਂ ਮਾਰੇਤ੍ਵਾ ਘਨਘਨਮਂਸਂ ਆਦਾਯ ਪਚ੍ਛਿਯਂ ਪੂਰੇਤੁਂ ਆਰਭਿ. ਅਥ ਨਂ ਤੇ ਪੁਰਿਸਾ ਗਹੇਤ੍ਵਾ ਪੋਥੇਤ੍ਵਾ ਪਚ੍ਛਾਬਾਹਂ ਬਨ੍ਧਿਤ੍ਵਾ ‘‘ਗਹਿਤੋ ਮਨੁਸ੍ਸਖਾਦਕੋ ਚੋਰੋ’’ਤਿ ਮਹਾਸਦ੍ਦਂ ਕਰਿਂਸੁ. ਮਹਾਜਨੋ ਤਂ ਪਰਿਵਾਰੇਸਿ. ਅਥ ਨਂ ਸੁਟ੍ਠੁ ਬਨ੍ਧਿਤ੍ਵਾ ਮਂਸਪਚ੍ਛਿਂ ਗੀਵਾਯ ਬਨ੍ਧਿਤ੍ਵਾ ਆਦਾਯ ਸੇਨਾਪਤਿਸ੍ਸ ਦਸ੍ਸੇਸੁਂ. ਸੇਨਾਪਤਿ ਤਂ ਦਿਸ੍ਵਾ ‘‘ਕਿਂ ਨੁ ਖੋ ਏਸ ਇਮਂ ਮਂਸਂ ਖਾਦਤਿ, ਉਦਾਹੁ ਅਞ੍ਞੇਨ ਮਂਸੇਨ ਮਿਸ੍ਸੇਤ੍ਵਾ ਵਿਕ੍ਕਿਣਾਤਿ, ਉਦਾਹੁ ਅਞ੍ਞਸ੍ਸ ਵਚਨੇਨ ਮਾਰੇਤੀ’’ਤਿ ਚਿਨ੍ਤੇਤ੍ਵਾ ਤਮਤ੍ਥਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੩੭੧.

‘‘ਕਸ੍ਮਾ ਤੁਵਂ ਰਸਕ ਏਦਿਸਾਨਿ, ਕਰੋਸਿ ਕਮ੍ਮਾਨਿ ਸੁਦਾਰੁਣਾਨਿ;

ਹਨਾਸਿ ਇਤ੍ਥੀ ਪੁਰਿਸੇ ਚ ਮੂਲ਼੍ਹੋ, ਮਂਸਸ੍ਸ ਹੇਤੁ ਅਦੁ ਧਨਸ੍ਸ ਕਾਰਣਾ’’ਤਿ.

ਤਤ੍ਥ ਰਸਕਾਤਿ ਭਤ੍ਤਕਾਰਣਂ ਆਲਪਤਿ.

ਇਤੋ ਪਰਂ ਉਤ੍ਤਾਨਸਮ੍ਬਨ੍ਧਾਨਿ ਵਚਨਪਟਿਵਚਨਾਨਿ ਪਾਲ਼ਿਵਸੇਨੇਵ ਵੇਦਿਤਬ੍ਬਾਨਿ –

੩੭੨.

‘‘ਨ ਅਤ੍ਤਹੇਤੂ ਨ ਧਨਸ੍ਸ ਕਾਰਣਾ, ਨ ਪੁਤ੍ਤਦਾਰਸ੍ਸ ਸਹਾਯਞਾਤਿਨਂ;

ਭਤ੍ਤਾ ਚ ਮੇ ਭਗਵਾ ਭੂਮਿਪਾਲੋ, ਸੋ ਖਾਦਤਿ ਮਂਸਂ ਭਦਨ੍ਤੇਦਿਸਂ.

੩੭੩.

‘‘ਸਚੇ ਤੁਵਂ ਭਤ੍ਤੁਰਤ੍ਥੇ ਪਯੁਤ੍ਤੋ, ਕਰੋਸਿ ਕਮ੍ਮਾਨਿ ਸੁਦਾਰੁਣਾਨਿ;

ਪਾਤੋਵ ਅਨ੍ਤੇਪੁਰਂ ਪਾਪੁਣਿਤ੍ਵਾ, ਲਪੇਯ੍ਯਾਸਿ ਮੇ ਰਾਜਿਨੋ ਸਮ੍ਮੁਖੇ ਤਂ.

੩੭੪.

‘‘ਤਥਾ ਕਰਿਸ੍ਸਾਮਿ ਅਹਂ ਭਦਨ੍ਤੇ, ਯਥਾ ਤੁਵਂ ਭਾਸਸਿ ਕਾਲ਼ਹਤ੍ਥਿ;

ਪਾਤੋਵ ਅਨ੍ਤੇਪੁਰਂ ਪਾਪੁਣਿਤ੍ਵਾ, ਵਕ੍ਖਾਮਿ ਤੇ ਰਾਜਿਨੋ ਸਮ੍ਮੁਖੇ ਤ’’ਨ੍ਤਿ.

ਤਤ੍ਥ ਭਗਵਾਤਿ ਗਾਰਵਾਧਿਵਚਨਂ. ਸਚੇ ਤੁਵਨ੍ਤਿ ‘‘ਸਚ੍ਚਂ ਨੁ ਖੋ ਭਣਤਿ, ਉਦਾਹੁ ਮਰਣਭਯੇਨ ਮੁਸਾ ਭਣਤੀ’’ਤਿ ਵੀਮਂਸਨ੍ਤੋ ਏਵਮਾਹ. ਤਤ੍ਥ ਸੁਦਾਰੁਣਾਨੀਤਿ ਮਨੁਸ੍ਸਘਾਤਕਮ੍ਮਾਨਿ. ਸਮ੍ਮੁਖੇ ਤਨ੍ਤਿ ਸਮ੍ਮੁਖੇ ਠਤ੍ਵਾ ਏਵਂ ਵਦੇਯ੍ਯਾਸੀਤਿ. ਸੋ ਸਮ੍ਪਟਿਚ੍ਛਨ੍ਤੋ ਗਾਥਮਾਹ.

ਅਥ ਨਂ ਸੇਨਾਪਤਿ ਗਾਲ਼੍ਹਬਨ੍ਧਨਮੇਵ ਸਯਾਪੇਤ੍ਵਾ ਵਿਭਾਤਾਯ ਰਤ੍ਤਿਯਾ ਅਮਚ੍ਚੇਹਿ ਚ ਨਾਗਰੇਹਿ ਚ ਸਦ੍ਧਿਂ ਮਨ੍ਤੇਤ੍ਵਾ ਸਬ੍ਬੇਸੁ ਏਕਚ੍ਛਨ੍ਦੇਸੁ ਜਾਤੇਸੁ ਸਬ੍ਬਟ੍ਠਾਨੇਸੁ ਆਰਕ੍ਖਂ ਠਪੇਤ੍ਵਾ ਨਗਰਂ ਹਤ੍ਥਗਤਂ ਕਤ੍ਵਾ ਰਸਕਸ੍ਸ ਗੀਵਾਯਂ ਮਂਸਪਚ੍ਛਿਂ ਬਨ੍ਧਿਤ੍ਵਾ ਆਦਾਯ ਰਾਜਨਿਵੇਸਨਂ ਪਾਯਾਸਿ. ਸਕਲਨਗਰਂ ਵਿਰਵਿ. ਰਾਜਾ ਹਿਯ੍ਯੋ ਭੁਤ੍ਤਪਾਤਰਾਸੋ ਸਾਯਮਾਸਮ੍ਪਿ ਅਲਭਿਤ੍ਵਾ ‘‘ਰਸਕੋ ਇਦਾਨਿ ਆਗਚ੍ਛਿਸ੍ਸਤਿ, ਇਦਾਨਿ ਆਗਚ੍ਛਸ੍ਸਤੀ’’ਤਿ ਨਿਸਿਨ੍ਨੋਵ ਤਂ ਰਤ੍ਤਿਂ ਵੀਤਿਨਾਮੇਤ੍ਵਾ ‘‘ਅਜ੍ਜਪਿ ਰਸਕੋ ਨਾਗਚ੍ਛਤਿ, ਨਾਗਰਾਨਞ੍ਚ ਮਹਾਸਦ੍ਦੋ ਸੂਯਤਿ, ਕਿਂ ਨੂ ਖੋ ਏਤ’’ਨ੍ਤਿ ਵਾਤਪਾਨੇਨ ਓਲੋਕੇਨ੍ਤੋ ਤਂ ਤਥਾ ਆਨੀਯਮਾਨਂ ਦਿਸ੍ਵਾ ‘‘ਪਾਕਟਂ ਇਦਂ ਕਾਰਣਂ ਜਾਤ’’ਨ੍ਤਿ ਚਿਨ੍ਤੇਤ੍ਵਾ ਸਤਿਂ ਉਪਟ੍ਠਪੇਤ੍ਵਾ ਪਲ੍ਲਙ੍ਕੇਯੇਵ ਨਿਸੀਦਿ. ਕਾਲ਼ਹਤ੍ਥਿਪਿ ਨਂ ਉਪਸਙ੍ਕਮਿਤ੍ਵਾ ਅਨੁਯੁਞ੍ਜਿ, ਸੋਪਿਸ੍ਸ ਕਥੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੩੭੫.

‘‘ਤਤੋ ਰਤ੍ਯਾ ਵਿਵਸਾਨੇ, ਸੂਰਿਯੁਗ੍ਗਮਨਂ ਪਤਿ;

ਕਾਲ਼ੋ ਰਸਕਮਾਦਾਯ, ਰਾਜਾਨਂ ਉਪਸਙ੍ਕਮਿ;

ਉਪਸਙ੍ਕਮ੍ਮ ਰਾਜਾਨਂ, ਇਦਂ ਵਚਨਮਬ੍ਰਵਿ.

੩੭੬.

‘‘ਸਚ੍ਚਂ ਕਿਰ ਮਹਾਰਾਜ, ਰਸਕੋ ਪੇਸਿਤੋ ਤਯਾ.

ਹਨਤਿ ਇਤ੍ਥਿਪੁਰਿਸੇ, ਤੁਵਂ ਮਂਸਾਨਿ ਖਾਦਸਿ.

੩੭੭.

‘‘ਏਵਮੇਵ ਤਥਾ ਕਾਲ਼, ਰਸਕੋ ਪੇਸਿਤੋ ਮਯਾ;

ਮਮ ਅਤ੍ਥਂ ਕਰੋਨ੍ਤਸ੍ਸ, ਕਿਮੇਤਂ ਪਰਿਭਾਸਸੀ’’ਤਿ.

ਤਤ੍ਥ ਕਾਲ਼ਾਤਿ ਕਾਲ਼ਹਤ੍ਥਿ. ਏਵਮੇਵਾਤਿ ਤੇਨ ਸੇਨਾਪਤਿਨਾ ਤੇਜਵਨ੍ਤੇਨ ਅਨੁਯੁਤ੍ਤੋ ਰਾਜਾ ਮੁਸਾ ਵਤ੍ਤੁਂ ਅਸਕ੍ਕੋਨ੍ਤੋ ਏਵਮਾਹ. ਤਤ੍ਥ ਤਥਾਤਿ ਇਦਂ ਪੁਰਿਮਸ੍ਸ ਵੇਵਚਨਂ. ਮਮ ਅਤ੍ਥਨ੍ਤਿ ਮਮ ਵੁਡ੍ਢਿਂ. ਕਰੋਨ੍ਤਸ੍ਸਾਤਿ ਕਰੋਨ੍ਤਂ. ਕਿਮੇਤਨ੍ਤਿ ਕਸ੍ਮਾ ਏਤਂ. ਪਰਿਭਾਸਸੀਤਿ ਅਹੋ ਦੁਕ੍ਕਰਂ ਕਰੋਸਿ, ਕਾਲ਼ਹਤ੍ਥਿ ਤ੍ਵਂ ਨਾਮ ਅਞ੍ਞਂ ਚੋਰਂ ਅਗ੍ਗਹੇਤ੍ਵਾ ਮਮ ਪੇਸਨਕਾਰਕਂ ਗਣ੍ਹਾਸੀਤਿ ਤਸ੍ਸ ਭਯਂ ਜਨੇਨ੍ਤੋ ਕਥੇਸਿ.

ਤਂ ਸੁਤ੍ਵਾ ਸੇਨਾਪਤਿ ‘‘ਅਯਂ ਸਕੇਨੇਵ ਮੁਖੇਨ ਪਟਿਜਾਨਾਤਿ, ਅਹੋ ਸਾਹਸਿਕੋ, ਏਤ੍ਤਕਂ ਨਾਮ ਕਾਲਂ ਇਮੇ ਮਨੁਸ੍ਸਾ ਏਤੇਨ ਖਾਦਿਤਾ, ਵਾਰੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਆਹ – ‘‘ਮਹਾਰਾਜ, ਮਾ ਏਵਂ ਕਰਿ, ਮਾ ਮਨੁਸ੍ਸਮਂਸਂ ਖਾਦਸੀ’’ਤਿ. ‘‘ਕਾਲ਼ਹਤ੍ਥਿ ਕਿਂ ਕਥੇਸਿ, ਨਾਹਂ ਵਿਰਮਿਤੁਂ ਸਕ੍ਕੋਮੀ’’ਤਿ. ‘‘ਮਹਾਰਾਜ, ਸਚੇ ਨ ਵਿਰਮਿਸ੍ਸਸਿ, ਅਤ੍ਤਾਨਞ੍ਚ ਰਟ੍ਠਞ੍ਚ ਨਾਸੇਸ੍ਸਸੀ’’ਤਿ. ‘‘ਏਵਂ ਨਸ੍ਸਨ੍ਤੇਪਿ ਅਹਂ ਨੇਵ ਤਤੋ ਵਿਰਮਿਤੁਂ ਸਕ੍ਕੋਮੀ’’ਤਿ. ਤਤੋ ਸੇਨਾਪਤਿ ਤਸ੍ਸ ਸਞ੍ਞਾਪਨਤ੍ਥਾਯ ਵਤ੍ਥੁਂ ਆਹਰਿਤ੍ਵਾ ਦਸ੍ਸੇਤਿ – ਅਤੀਤਸ੍ਮਿਞ੍ਹਿ ਕਾਲੇ ਮਹਾਸਮੁਦ੍ਦੇ ਛ ਮਹਾਮਚ੍ਛਾ ਅਹੇਸੁਂ. ਤੇਸੁ ਆਨਨ੍ਦੋ ਤਿਮਿਨਨ੍ਦੋ ਅਜ੍ਝਾਰੋਹੋਤਿ ਇਮੇ ਤਯੋ ਮਚ੍ਛਾ ਪਞ੍ਚਯੋਜਨਸਤਿਕਾ, ਤਿਮਿਙ੍ਗਲੋ ਤਿਮਿਰਪਿਙ੍ਗਲੋ ਮਹਾਤਿਮਿਰਪਿਙ੍ਗਲੋਤਿ ਇਮੇ ਤਯੋ ਮਚ੍ਛਾ ਸਹਸ੍ਸਯੋਜਨਿਕਾ ਹੋਨ੍ਤਿ. ਤੇ ਸਬ੍ਬੇਪਿ ਪਾਸਾਣਸੇਵਾਲਭਕ੍ਖਾ ਅਹੇਸੁਂ. ਤੇਸੁ ਆਨਨ੍ਦੋ ਮਹਾਸਮੁਦ੍ਦਸ੍ਸ ਏਕਪਸ੍ਸੇ ਵਸਤਿ. ਤਂ ਬਹੂ ਮਚ੍ਛਾ ਦਸ੍ਸਨਾਯ ਉਪਸਙ੍ਕਮਨ੍ਤਿ, ਏਕਦਿਵਸਂ ‘‘ਸਬ੍ਬੇਸਂ ਦ੍ਵਿਪਦਚਤੁਪ੍ਪਦਾਨਂ ਸਤ੍ਤਾਨਂ ਰਾਜਾ ਪਞ੍ਞਾਯਤਿ, ਅਮ੍ਹਾਕਂ ਰਾਜਾ ਨਤ੍ਥਿ, ਮਯਮ੍ਪੇਤਂ ਰਾਜਾਨਂ ਕਰਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਸਬ੍ਬੇ ਏਕਚ੍ਛਨ੍ਦਾ ਹੁਤ੍ਵਾ ਆਨਨ੍ਦਂ ਰਾਜਾਨਂ ਕਰਿਂਸੁ. ਤੇ ਮਚ੍ਛਾ ਤਤੋ ਪਟ੍ਠਾਯ ਤਸ੍ਸ ਸਾਯਂ ਪਾਤੋਵ ਉਪਟ੍ਠਾਨਂ ਗਚ੍ਛਨ੍ਤਿ.

ਅਥੇਕਦਿਵਸਂ ਆਨਨ੍ਦੋ ਏਕਸ੍ਮਿਂ ਪਬ੍ਬਤੇ ਪਾਸਾਣਸੇਵਾਲਂ ਖਾਦਨ੍ਤੋ ਅਜਾਨਿਤ੍ਵਾ ‘‘ਸੇਵਾਲੋ’’ਤਿ ਸਞ੍ਞਾਯ ਏਕਂ ਮਚ੍ਛਂ ਖਾਦਿ. ਤਸ੍ਸ ਤਂ ਮਂਸਂ ਖਾਦਨ੍ਤਸ੍ਸ ਸਕਲਸਰੀਰਂ ਸਙ੍ਖੋਭੇਸਿ. ਸੋ ‘‘ਕਿਂ ਨੁ ਖੋ ਇਦਂ ਅਤਿਵਿਯ ਮਧੁਰ’’ਨ੍ਤਿ ਨੀਹਰਿਤ੍ਵਾ ਓਲੋਕੇਨ੍ਤੋ ਮਚ੍ਛਮਂਸਖਣ੍ਡਂ ਦਿਸ੍ਵਾ ‘‘ਏਤ੍ਤਕਂ ਕਾਲਂ ਅਜਾਨਿਤ੍ਵਾ ਨ ਖਾਦਾਮੀ’’ਤਿ ਚਿਨ੍ਤੇਤ੍ਵਾ ‘‘ਸਾਯਂ ਪਾਤੋਪਿ ਮਚ੍ਛਾਨਂ ਆਗਨ੍ਤ੍ਵਾ ਗਮਨਕਾਲੇ ਏਕਂ ਦ੍ਵੇ ਮਚ੍ਛੇ ਖਾਦਿਸ੍ਸਾਮਿ, ਪਾਕਟਂ ਕਤ੍ਵਾ ਖਾਦਿਯਮਾਨੇ ਏਕੋਪਿ ਮਂ ਨ ਉਪਸਙ੍ਕਮਿਸ੍ਸਤਿ, ਸਬ੍ਬੇ ਪਲਾਯਿਸ੍ਸਨ੍ਤਿ, ਪਟਿਚ੍ਛਨ੍ਨੋ ਹੁਤ੍ਵਾ ਪਚ੍ਛਾ ਓਸਕ੍ਕਿਤੋਸਕ੍ਕਿਤਂ ਪਹਰਿਤ੍ਵਾ ਖਾਦਿਸ੍ਸਾਮੀ’’ਤਿ ਤਥਾ ਕਤ੍ਵਾ ਖਾਦਿ. ਮਚ੍ਛਾ ਪਰਿਕ੍ਖਯਂ ਗਚ੍ਛਨ੍ਤਾ ਚਿਨ੍ਤਯਿਂਸੁ. ‘‘ਕੁਤੋ ਨੁ ਖੋ ਞਾਤੀਨਂ ਭਯਂ ਉਪ੍ਪਜ੍ਜਿਸ੍ਸਤੀ’’ਤਿ. ਅਥੇਕੋ ਪਣ੍ਡਿਤੋ ਮਚ੍ਛੋ ‘‘ਮਯ੍ਹਂ ਆਨਨ੍ਦਸ੍ਸ ਕਿਰਿਯਾ ਨ ਰੁਚ੍ਚਤਿ, ਪਰਿਗ੍ਗਣ੍ਹਿਸ੍ਸਾਮਿ ਨ’’ਨ੍ਤਿ ਮਚ੍ਛੇਸੁ ਉਪਟ੍ਠਾਨਂ ਗਤੇਸੁ ਆਨਨ੍ਦਸ੍ਸ ਕਣ੍ਣਪਤ੍ਤੇ ਪਟਿਚ੍ਛਨ੍ਨੋ ਅਟ੍ਠਾਸਿ. ਆਨਨ੍ਦੋ ਮਚ੍ਛੇ ਉਯ੍ਯੋਜੇਤ੍ਵਾ ਸਬ੍ਬਪਚ੍ਛਤੋ ਗਚ੍ਛਨ੍ਤਂ ਮਚ੍ਛਂ ਖਾਦਿ. ਸੋ ਪਣ੍ਡਿਤਮਚ੍ਛੋ ਤਸ੍ਸ ਕਿਰਿਯਂ ਦਿਸ੍ਵਾ ਇਤਰੇਸਂ ਆਰੋਚੇਸਿ. ਤੇ ਸਬ੍ਬੇਪਿ ਭੀਤਤਸਿਤਾ ਪਲਾਯਿਂਸੁ.

ਆਨਨ੍ਦੋ ਤਤੋ ਪਟ੍ਠਾਯ ਮਚ੍ਛਮਂਸਗਿਦ੍ਧੇਨ ਅਞ੍ਞਂ ਗੋਚਰਂ ਨ ਗਣ੍ਹਿ. ਸੋ ਜਿਘਚ੍ਛਾਯ ਪੀਲ਼ਿਤੋ ਕਿਲਨ੍ਤੋ ‘‘ਕਹਂ ਨੁ ਖੋ ਇਮੇ ਗਤਾ’’ਤਿ ਤੇ ਮਚ੍ਛੇ ਪਰਿਯੇਸਨ੍ਤੋ ਏਕਂ ਪਬ੍ਬਤਂ ਦਿਸ੍ਵਾ ‘‘ਮਮ ਭਯੇਨ ਇਮਂ ਪਬ੍ਬਤਂ ਨਿਸ੍ਸਾਯ ਵਸਨ੍ਤਿ ਮਞ੍ਞੇ, ਪਬ੍ਬਤਂ ਪਰਿਕ੍ਖਿਪਿਤ੍ਵਾ ਉਪਧਾਰੇਸ੍ਸਾਮੀ’’ਤਿ ਨਙ੍ਗੁਟ੍ਠੇਨ ਚ ਸੀਸੇਨ ਚ ਉਭੋ ਪਸ੍ਸੇ ਪਰਿਕ੍ਖਿਪਿਤ੍ਵਾ ਗਣ੍ਹਿ. ਤਤੋ ‘‘ਸਚੇ ਇਧ ਵਸਨ੍ਤਿ, ਪਲਾਯਿਸ੍ਸਨ੍ਤੀ’’ਤਿ ਪਬ੍ਬਤਂ ਪਰਿਕ੍ਖਿਪਨ੍ਤਂ ਅਤ੍ਤਨੋ ਨਙ੍ਗੁਟ੍ਠਂ ਦਿਸ੍ਵਾ ‘‘ਅਯਂ ਮਚ੍ਛੋ ਮਂ ਵਞ੍ਚੇਤ੍ਵਾ ਪਬ੍ਬਤਂ ਨਿਸ੍ਸਾਯ ਵਸਤੀ’’ਤਿ ਕੁਦ੍ਧੋ ਪਣ੍ਣਾਸਯੋਜਨਮਤ੍ਤਂ ਸਕਨਙ੍ਗੁਟ੍ਠਖਣ੍ਡਂ ਅਞ੍ਞਮਚ੍ਛਸਞ੍ਞਾਯ ਦਲ਼੍ਹਂ ਗਹੇਤ੍ਵਾ ਮੁਰੁਮੁਰਾਯਨ੍ਤੋ ਖਾਦਿ, ਦੁਕ੍ਖਵੇਦਨਾ ਉਪ੍ਪਜ੍ਜਿ. ਲੋਹਿਤਗਨ੍ਧੇਨ ਮਚ੍ਛਾ ਸਨ੍ਨਿਪਤਿਤ੍ਵਾ ਲੁਞ੍ਜਿਤ੍ਵਾ ਖਾਦਨ੍ਤਾ ਯਾਵ ਸੀਸਾ ਆਗਮਂਸੁ. ਮਹਾਸਰੀਰਤਾਯ ਪਰਿਵਤ੍ਤੇਤੁਂ ਅਸਕ੍ਕੋਨ੍ਤੋ ਤਤ੍ਥੇਵ ਜੀਵਿਤਕ੍ਖਯਂ ਪਾਪੁਣਿ, ਪਬ੍ਬਤਰਾਸਿ ਵਿਯ ਅਟ੍ਠਿਰਾਸਿ ਅਹੋਸਿ. ਆਕਾਸਚਾਰਿਨੋ ਤਾਪਸਪਰਿਬ੍ਬਾਜਕਾ ਮਨੁਸ੍ਸਾਨਂ ਕਥਯਿਂਸੁ. ਸਕਲਜਮ੍ਬੁਦੀਪੇ ਮਨੁਸ੍ਸਾ ਜਾਨਿਂਸੁ. ਤਂ ਵਤ੍ਥੁਂ ਆਹਰਿਤ੍ਵਾ ਦਸ੍ਸੇਨ੍ਤੋ ਕਾਲ਼ਹਤ੍ਥਿ ਆਹ –

੩੭੮.

‘‘ਆਨਨ੍ਦੋ ਸਬ੍ਬਮਚ੍ਛਾਨਂ, ਖਾਦਿਤ੍ਵਾ ਰਸਗਿਦ੍ਧਿਮਾ;

ਪਰਿਕ੍ਖੀਣਾਯ ਪਰਿਸਾਯ, ਅਤ੍ਤਾਨਂ ਖਾਦਿਯਾ ਮਤੋ.

੩੭੯.

‘‘ਏਵਂ ਪਮਤ੍ਤੋ ਰਸਗਾਰਵੇ ਰਤ੍ਤੋ, ਬਾਲੋ ਯਦੀ ਆਯਤਿ ਨਾਵਬੁਜ੍ਝਤਿ;

ਵਿਧਮ੍ਮ ਪੁਤ੍ਤੇ ਚਜਿ ਞਾਤਕੇ ਚ, ਪਰਿਵਤ੍ਤਿਯ ਅਤ੍ਤਾਨਞ੍ਞੇਵ ਖਾਦਤਿ.

੩੮੦.

‘‘ਇਦਂ ਤੇ ਸੁਤ੍ਵਾਨ ਵਿਗੇਤੁ ਛਨ੍ਦੋ, ਮਾ ਭਕ੍ਖਯੀ ਰਾਜ ਮਨੁਸ੍ਸਮਂਸਂ;

ਮਾ ਤ੍ਵਂ ਇਮਂ ਕੇਵਲਂ ਵਾਰਿਜੋਵ, ਦ੍ਵਿਪਦਾਧਿਪ ਸੁਞ੍ਞਮਕਾਸਿ ਰਟ੍ਠ’’ਨ੍ਤਿ.

ਤਤ੍ਥ ਆਨਨ੍ਦੋਤਿ, ਮਹਾਰਾਜ, ਅਤੀਤਸ੍ਮਿਂ ਕਾਲੇ ਮਹਾਸਮੁਦ੍ਦੇ ਪਞ੍ਚਸਤਯੋਜਨਿਕੋ ਆਨਨ੍ਦੋ ਨਾਮ ਮਹਾਮਚ੍ਛੋ ਸਬ੍ਬੇਸਂ ਮਚ੍ਛਾਨਂ ਰਾਜਾ ਮਹਾਸਮੁਦ੍ਦਸ੍ਸ ਏਕਪਸ੍ਸੇ ਠਿਤੋ. ਖਾਦਿਤ੍ਵਾਤਿ ਸਕਜਾਤਿਕਾਨਂ ਮਚ੍ਛਾਨਂ ਰਸਗਿਦ੍ਧਿਮਾ ਮਚ੍ਛੇ ਖਾਦਿਤ੍ਵਾ. ਪਰਿਕ੍ਖੀਣਾਯਾਤਿ ਮਚ੍ਛਪਰਿਸਾਯ ਖਯਪ੍ਪਤ੍ਤਾਯ. ਅਤ੍ਤਾਨਨ੍ਤਿ ਅਞ੍ਞਂ ਗੋਚਰਂ ਅਗ੍ਗਹੇਤ੍ਵਾ ਪਬ੍ਬਤਂ ਪਰਿਕ੍ਖਿਪਨ੍ਤੋ ਪਣ੍ਣਾਸਯੋਜਨਮਤ੍ਤਂ ਅਤ੍ਤਨੋ ਨਙ੍ਗੁਟ੍ਠਖਣ੍ਡਂ ਅਞ੍ਞਮਚ੍ਛਸਞ੍ਞਾਯ ਖਾਦਿਤ੍ਵਾ ਮਤੋ ਮਰਣਪ੍ਪਤ੍ਤੋ ਹੁਤ੍ਵਾ ਇਦਾਨਿ ਮਹਾਸਮੁਦ੍ਦੇ ਪਬ੍ਬਤਮਤ੍ਤੋ ਅਟ੍ਠਿਰਾਸਿ ਅਹੋਸਿ. ਏਵਂ ਪਮਤ੍ਤੋਤਿ ਯਥਾ ਮਹਾਮਚ੍ਛੋ ਆਨਨ੍ਦੋ, ਏਵਮ੍ਪਿ ਤਥਾ ਤ੍ਵਂ ਤਣ੍ਹਾਰਸਗਿਦ੍ਧਿਕੋ ਹੁਤ੍ਵਾ ਪਮਤ੍ਤੋ ਪਮਾਦਭਾਵਪ੍ਪਤ੍ਤੋ.

ਰਸਗਾਰਵੇ ਰਤ੍ਤੋਤਿ ਮਨੁਸ੍ਸਮਂਸਸ੍ਸ ਰਸਗਾਰਵੇ ਰਤ੍ਤੋ ਅਤਿਰਤ੍ਤਚਿਤ੍ਤੋ ਹੋਤਿ. ਬਾਲੋਤਿ ਯਦਿ ਬਾਲੋ ਦੁਪ੍ਪਞ੍ਞੋ ਆਯਤਿਂ ਅਨਾਗਤੇ ਕਾਲੇ ਉਪ੍ਪਜ੍ਜਨਕਦੁਕ੍ਖਂ ਨਾਵਬੁਜ੍ਝਤਿ ਨ ਜਾਨਾਤਿ. ਵਿਧਮ੍ਮਾਤਿ ਵਿਧਮੇਤ੍ਵਾ ਵਿਨਾਸੇਤ੍ਵਾ. ਪੁਤ੍ਤੇਤਿ ਪੁਤ੍ਤਧੀਤਰੋ ਚ. ਞਾਤਕੇ ਚਾਤਿ ਸੇਸਞਾਤਕੇ ਚ ਸਹਾਯੇ ਚ, ਵਿਧਮ੍ਮ ਪੁਤ੍ਤੇ ਚ ਚਜਿਤ੍ਵਾ ਞਾਤਕੇ ਚਾਤਿ ਅਤ੍ਥੋ. ਪਰਿਵਤ੍ਤਿਯਾਤਿ ਅਞ੍ਞਂ ਆਹਾਰਂ ਅਲਭਿਤ੍ਵਾ ਜਿਘਚ੍ਛਾਯ ਪੀਲ਼ਿਤੋ ਸਕਲਨਗਰਂ ਪਰਿਵਤ੍ਤਿਯ ਵਿਚਰਿਤ੍ਵਾ ਮਨੁਸ੍ਸਮਂਸਂ ਅਲਭਿਤ੍ਵਾ ਅਤ੍ਤਾਨਂ ਖਾਦਨ੍ਤੋ ਆਨਨ੍ਦੋ ਮਚ੍ਛੋ ਵਿਯ ਅਤ੍ਤਾਨਞ੍ਞੇਵ ਖਾਦਤਿ.

ਇਦਂ ਤੇ ਸੁਤ੍ਵਾਨਾਤਿ, ਮਹਾਰਾਜ, ਤੇ ਤੁਯ੍ਹਂ ਮਯਾ ਆਨੀਤਂ ਇਦਂ ਉਦਾਹਰਣਂ ਸੁਤ੍ਵਾ ਛਨ੍ਦੋ ਮਨੁਸ੍ਸਮਂਸਖਾਦਨਚ੍ਛਨ੍ਦੋ ਵਿਗੇਤੁ ਵਿਗਚ੍ਛਤੁ ਵਿਰਮਤੁ. ਮਾ ਭਕ੍ਖਯੀਤਿ ਰਾਜ ਮਨੁਸ੍ਸਮਂਸਂ ਮਾ ਭਕ੍ਖਯਿ ਮਾ ਖਾਦਿ. ਮਾ ਤ੍ਵਂ ਇਮਂ ਕੇਵਲਨ੍ਤਿ ਮਹਾਸਮੁਦ੍ਦਂ ਸੁਞ੍ਞਂ ਕਰੋਨ੍ਤੋ ਵਾਰਿਜੋ ਆਨਨ੍ਦੋ ਮਚ੍ਛੋ ਇਵ, ਭੋ ਦ੍ਵਿਪਦਾਧਿਪ, ਦ੍ਵਿਪਦਾਨਂ ਮਨੁਸ੍ਸਾਨਂ, ਇਸ੍ਸਰ ਮਹਾਰਾਜ, ਤ੍ਵਂ ਕੇਵਲਂ ਸਚ੍ਚਤੋ ਇਮਂ ਤਵ ਕਾਸਿਰਟ੍ਠਂ ਨਗਰਂ ਸੁਞ੍ਞਂ ਮਾ ਅਕਾਸੀਤਿ ਅਤ੍ਥੋ.

ਤਂ ਸੁਤ੍ਵਾ ਰਾਜਾ, ‘‘ਭੋ ਕਾਲ਼ਹਤ੍ਥਿ, ਨ ਤ੍ਵਮੇਵ ਉਪਮਂ ਜਾਨਾਸਿ, ਅਹਮ੍ਪਿ ਜਾਨਾਮੀ’’ਤਿ ਮਨੁਸ੍ਸਮਂਸਗਿਦ੍ਧਤਾਯ ਪੋਰਾਣਕਵਤ੍ਥੁਂ ਆਹਰਿਤ੍ਵਾ ਦਸ੍ਸੇਨ੍ਤੋ ਆਹ –

੩੮੧.

‘‘ਸੁਜਾਤੋ ਨਾਮ ਨਾਮੇਨ, ਓਰਸੋ ਤਸ੍ਸ ਅਤ੍ਰਜੋ;

ਜਮ੍ਬੁਪੇਸਿਮਲਦ੍ਧਾਨ, ਮਤੋ ਸੋ ਤਸ੍ਸ ਸਙ੍ਖਯੇ.

੩੮੨.

‘‘ਏਵਮੇਵ ਅਹਂ ਕਾਲ਼, ਭੁਤ੍ਵਾ ਭਕ੍ਖਂ ਰਸੁਤ੍ਤਮਂ;

ਅਲਦ੍ਧਾ ਮਾਨੁਸਂ ਮਂਸਂ, ਮਞ੍ਞੇ ਹਿਸ੍ਸਾਮਿ ਜੀਵਿਤ’’ਨ੍ਤਿ.

ਤਤ੍ਥ ਸੁਜਾਤੋ ਨਾਮਾਤਿ ਕਾਲ਼ਹਤ੍ਥਿ ਕੁਟੁਮ੍ਬਿਕੋ ਨਾਮੇਨ ਸੁਜਾਤੋ ਨਾਮ, ਤਸ੍ਸ ਅਤ੍ਰਜੋ ਪੁਤ੍ਤੋ ਓਰਸੋ ਜਮ੍ਬੁਪੇਸਿਂ ਅਲਦ੍ਧਾਨ ਅਲਭਿਤ੍ਵਾਨ. ਮਤੋਤਿ ਯਥਾ ਤਸ੍ਸਾ ਜਮ੍ਬੁਪੇਸਿਯਾ ਸਙ੍ਖਯੇ ਸੋ ਕੁਟੁਮ੍ਬਿਕਪੁਤ੍ਤੋ ਮਤੋ, ਏਵਮੇਵ ਅਹਂ ਰਸੁਤ੍ਤਮਂ ਅਞ੍ਞਰਸਾਨਂ ਉਤ੍ਤਮਂ ਮਨੁਸ੍ਸਾਨਂ ਮਂਸਂ ਭੁਤ੍ਵਾ ਭੁਞ੍ਜਿਤ੍ਵਾ ਅਲਦ੍ਧਾ ਮਨੁਸ੍ਸਮਂਸਂ ਜੀਵਿਤਂ ਹਿਸ੍ਸਾਮੀਤਿ ਮਞ੍ਞੇ ਮਞ੍ਞਾਮਿ.

ਅਤੀਤੇ ਕਿਰ ਬਾਰਾਣਸਿਯਂ ਸੁਜਾਤੋ ਨਾਮ ਕੁਟੁਮ੍ਬਿਕੋ ਲੋਣਮ੍ਬਿਲਸੇਵਨਤ੍ਥਾਯ ਹਿਮਵਨ੍ਤਤੋ ਆਗਤਾਨਿ ਪਞ੍ਚ ਇਸਿਸਤਾਨਿ ਅਤ੍ਤਨੋ ਉਯ੍ਯਾਨੇ ਵਸਾਪੇਤ੍ਵਾ ਉਪਟ੍ਠਾਸਿ. ਘਰੇ ਚਸ੍ਸ ਨਿਬਦ੍ਧਂ ਪਞ੍ਚਸਤਮਤ੍ਤਾ ਭਿਕ੍ਖਾ ਅਹੋਸਿ. ਤੇ ਪਨ ਤਾਪਸਾ ਕਦਾਚਿ ਜਨਪਦੇਪਿ ਭਿਕ੍ਖਾਯ ਚਰਨ੍ਤਿ, ਕਦਾਚਿ ਮਹਾਜਮ੍ਬੁਪੇਸਿਂ ਆਹਰਿਤ੍ਵਾ ਖਾਦਨ੍ਤਿ. ਤੇਸਂ ਜਮ੍ਬੁਪੇਸਿਂ ਆਹਰਿਤ੍ਵਾ ਖਾਦਨਕਾਲੇ ਸੁਜਾਤੋ ਚਿਨ੍ਤੇਸਿ – ‘‘ਅਜ੍ਜ ਭਦ੍ਦਨ੍ਤਾਨਂ ਤਯੋ ਚਤ੍ਤਾਰੋ ਦਿਵਸਾ ਅਨਾਗਚ੍ਛਨ੍ਤਾਨਂ, ਕਹਂ ਨੁ ਖੋ ਗਤਾ’’ਤਿ. ਸੋ ਅਤ੍ਤਨੋ ਪੁਤ੍ਤਕਂ ਅਙ੍ਗੁਲਿਯਂ ਗਾਹਾਪੇਤ੍ਵਾ ਤੇਸਂ ਭਤ੍ਤਕਿਚ੍ਚਕਾਲੇ ਤਤ੍ਥ ਅਗਮਾਸਿ. ਤਸ੍ਮਿਂ ਸਮਯੇ ਮਹਲ੍ਲਕਾਨਂ ਮੁਖਵਿਕ੍ਖਾਲਨਕਾਲੇ ਉਦਕਂ ਦਤ੍ਵਾ ਸਬ੍ਬਨਵਕੋ ਜਮ੍ਬੁਪੇਸਿਂ ਖਾਦਤਿ. ਸੁਜਾਤੋ ਤਾਪਸੇ ਵਨ੍ਦਿਤ੍ਵਾ ਨਿਸਿਨ੍ਨੋ – ‘‘ਕਿਂ, ਭਨ੍ਤੇ, ਖਾਦਥਾ’’ਤਿ ਪੁਚ੍ਛਿ. ‘‘ਮਹਾਜਮ੍ਬੁਪੇਸਿਂ, ਆਵੁਸੋ’’ਤਿ. ਤਂ ਸੁਤ੍ਵਾ ਕੁਮਾਰੋ ਪਿਪਾਸਂ ਉਪ੍ਪਾਦੇਸਿ. ਅਥਸ੍ਸ ਗਣਜੇਟ੍ਠਕੋ ਤਾਪਸੋ ਥੋਕਂ ਦਾਪੇਸਿ. ਸੋ ਤਂ ਖਾਦਿਤ੍ਵਾ ਮਧੁਰਰਸੇ ਬਜ੍ਝਿਤ੍ਵਾ – ‘‘ਜਮ੍ਬੁਪੇਸਿਂ ਮੇ ਦੇਥਾ’’ਤਿ ਪੁਨਪ੍ਪੁਨਂ ਯਾਚਿ. ਕੁਟੁਮ੍ਬਿਕੋ ਧਮ੍ਮਂ ਸੁਣਨ੍ਤੋ, ‘‘ਪੁਤ੍ਤਕ, ਮਾ ਵਿਰਵਿ, ਗੇਹਂ ਗਨ੍ਤ੍ਵਾ ਖਾਦਿਸ੍ਸਸੀ’’ਤਿ ਤਂ ਵਞ੍ਚੇਤ੍ਵਾ ‘‘ਇਮਂ ਨਿਸ੍ਸਾਯ ਭਦਨ੍ਤਾ ਉਕ੍ਕਣ੍ਠੇਯ੍ਯੁ’’ਨ੍ਤਿ ਤਂ ਸਮਸ੍ਸਾਸੇਨ੍ਤੋ ਇਸਿਗਣਂ ਅਨਾਪੁਚ੍ਛਿਤ੍ਵਾ ਗੇਹਂ ਗਤੋ. ਗਤਕਾਲਤੋ ਪਟ੍ਠਾਯ ਚਸ੍ਸ ਪੁਤ੍ਤੋ ‘‘ਜਮ੍ਬੁਪੇਸਿਂ ਮੇ ਦੇਥਾ’’ਤਿ ਪਰਿਦੇਵਿ. ਸੁਜਾਤੋ ‘‘ਇਸਯੋਪਿ ਆਚਿਕ੍ਖਿਸ੍ਸਾਮੀ’’ਤਿ ਉਯ੍ਯਾਨਂ ਗਤੋ. ਤੇ ਇਸਯੋਪਿ ‘‘ਇਧ ਚਿਰਂ ਵਸਿਮ੍ਹਾ’’ਤਿ ਹਿਮਵਨ੍ਤਮੇਵ ਗਤਾ. ਆਰਾਮੇ ਇਸਯੋ ਅਪਸ੍ਸਨ੍ਤੋ ਤਸ੍ਸ ਜਮ੍ਬੁਅਮ੍ਬਪਨਸਮੋਚਾਦੀਨਂ ਪੇਸਿਯੋ ਮਧੁਸਕ੍ਖਰਚੁਣ੍ਣਸਂਯੁਤ੍ਤਾ ਅਦਾਸਿ. ਤਾ ਤਸ੍ਸ ਜਿਵ੍ਹਗ੍ਗੇ ਠਪਿਤਮਤ੍ਤਾ ਹਲਾਹਲਵਿਸਸਦਿਸਾ ਹੋਨ੍ਤਿ. ਸੋ ਸਤ੍ਤਾਹਂ ਨਿਰਾਹਾਰੋ ਹੁਤ੍ਵਾ ਜੀਵਿਤਕ੍ਖਯਂ ਪਾਪੁਣਿ. ਰਾਜਾ ਇਦਂ ਕਾਰਣਂ ਆਹਰਿਤ੍ਵਾ ਦਸ੍ਸੇਨ੍ਤੋ ਏਵਮਾਹ.

ਤਤੋ ਕਾਲ਼ਹਤ੍ਥਿ ‘‘ਅਯਂ ਰਾਜਾ ਅਤਿਵਿਯ ਰਸਗਿਦ੍ਧੋ, ਅਪਰਾਨਿਪਿਸ੍ਸ ਉਦਾਹਰਣਾਨਿ ਆਹਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ‘‘ਮਹਾਰਾਜ, ਵਿਰਮਾਹੀ’’ਤਿ ਆਹ. ‘‘ਅਹਂ ਵਿਰਮਿਤੁਂ ਨ ਸਕ੍ਕੋਮੀ’’ਤਿ. ਦੇਵ, ਸਚੇ ਨ ਵਿਰਮਿਸ੍ਸਸਿ, ਤੁਵਂ ਞਾਤਿਮਣ੍ਡਲਤੋ ਚੇਵ ਰਜ੍ਜਸਿਰਿਤੋ ਚ ਪਰਿਹਾਯਿਸ੍ਸਸਿ. ਅਤੀਤਸ੍ਮਿਞ੍ਹਿ, ਮਹਾਰਾਜ, ਇਧੇਵ ਬਾਰਾਣਸਿਯਂ ਪਞ੍ਚਸੀਲਰਕ੍ਖਕਂ ਸੋਤ੍ਥਿਯਕੁਲਂ ਅਹੋਸਿ. ਤਸ੍ਸ ਕੁਲਸ੍ਸ ਏਕਪੁਤ੍ਤਕੋ ਅਹੋਸਿ. ਸੋ ਮਾਤਾਪਿਤੂਨਂ ਪਿਯੋ ਮਨਾਪੋ ਅਹੋਸਿ ਪਣ੍ਡਿਤੋ ਬ੍ਯਤ੍ਤੋ ਤਿਣ੍ਣਂ ਵੇਦਾਨਂ ਪਾਰਗੂ. ਸੋ ਸਮਵਯੇਹਿ ਤਰੁਣੇਹਿ ਸਦ੍ਧਿਂ ਗਣਬਨ੍ਧਨੇਨ ਵਿਚਰਿ. ਸੇਸਾ ਗਣਬਨ੍ਧਾ ਮਚ੍ਛਮਂਸਾਦੀਨਿ ਖਾਦਨ੍ਤਾ ਸੁਰਂ ਪਿਵਨ੍ਤਿ. ਮਾਣਵੋ ਮਂਸਾਦੀਨਿ ਨ ਖਾਦਤਿ, ਸੁਰਂ ਨ ਪਿਵਤਿ. ਤੇ ਮਨ੍ਤਯਿਂਸੁ – ‘‘ਅਯਂ ਸੁਰਾਯ ਅਪਿਵਨਤੋ ਅਮ੍ਹਾਕਂ ਮੂਲਂ ਨ ਦੇਤਿ, ਉਪਾਯੇਨ ਨਂ ਸੁਰਂ ਪਾਯੇਸ੍ਸਾਮਾ’’ਤਿ. ਤੇ ਸਨ੍ਨਿਪਤਿਤ੍ਵਾ, ‘‘ਸਮ੍ਮ, ਛਣਕੀਲ਼ਂ ਕੀਲ਼ਿਸ੍ਸਾਮਾ’’ਤਿ ਆਹਂਸੁ. ‘‘ਸਮ੍ਮ, ਤੁਮ੍ਹੇ ਸੁਰਂ ਪਿਵਥ, ਅਹਂ ਸੁਰਂ ਨ ਪਿਵਾਮਿ, ਤੁਮ੍ਹੇਵ ਗਚ੍ਛਥਾ’’ਤਿ. ‘‘ਸਮ੍ਮ, ਤਵ ਪਿਵਨਤ੍ਥਾਯ ਖੀਰਂ ਗਣ੍ਹਾਪੇਸ੍ਸਾਮਾ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਧੁਤ੍ਤਾ ਉਯ੍ਯਾਨਂ ਗਨ੍ਤ੍ਵਾ ਪਦੁਮਿਨਿਪਤ੍ਤੇਸੁ ਤਿਖਿਣਸੁਰਂ ਬਨ੍ਧਾਪੇਤ੍ਵਾ ਠਪਯਿਂਸੁ. ਅਥ ਨੇਸਂ ਪਾਨਕਾਲੇ ਮਾਣਵਸ੍ਸ ਖੀਰਂ ਉਪਨਯਿਂਸੁ. ਅਥ ਏਕੋ ਧੁਤ੍ਤੋ ‘‘ਪੋਕ੍ਖਰਮਧੁਂ, ਭੋ, ਆਹਰਾ’’ਤਿ ਆਹਰਾਪੇਤ੍ਵਾ ਪਦੁਮਿਨਿਪਤ੍ਤਪੁਟਂ ਹੇਟ੍ਠਾ ਛਿਦ੍ਦਂ ਕਤ੍ਵਾ ਅਙ੍ਗੁਲੀਹਿ ਮੁਖੇ ਠਪੇਤ੍ਵਾ ਆਕਡ੍ਢਿ. ਏਵਂ ਇਤਰੇਪਿ ਆਹਰਾਪੇਤ੍ਵਾ ਪਿਵਿਂਸੁ. ਮਾਣਵੋ ‘‘ਕਿਂ ਨਾਮੇਤ’’ਨ੍ਤਿ ਪੁਚ੍ਛਿ. ‘‘ਪੋਕ੍ਖਰਮਧੁਨਾਮਾ’’ਤਿ. ‘‘ਅਹਮ੍ਪਿ ਥੋਕਂ ਲਭਿਸ੍ਸਾਮਿ, ਦੇਥ ਭੋਨ੍ਤੋ’’ਤਿ. ਤਸ੍ਸਪਿ ਦਾਪਯਿਂਸੁ. ਸੋ ਪੋਕ੍ਖਰਮਧੁਸਞ੍ਞਾਯ ਸੁਰਂ ਪਿਵਿ. ਅਥਸ੍ਸ ਅਙ੍ਗਾਰਪਕ੍ਕਮਂਸਂ ਅਦਂਸੁ, ਤਮ੍ਪਿ ਖਾਦਿ.

ਏਵਮਸ੍ਸ ਪੁਨਪ੍ਪੁਨਂ ਪਿਵਨ੍ਤਸ੍ਸ ਮਤ੍ਤਕਾਲੇ ‘‘ਨ ਏਤਂ ਪੋਕ੍ਖਰਮਧੁ, ਸੁਰਾ ਏਸਾ’’ਤਿ ਵਦਿਂਸੁ. ਸੋ ‘‘ਏਤ੍ਤਕਂ ਕਾਲਂ ਏਵਂ ਮਧੁਰਰਸਂ ਨ ਜਾਨਿਂ, ਆਹਰਥ, ਭੋ, ਸੁਰ’’ਨ੍ਤਿ ਆਹ. ਤੇ ਆਹਰਿਤ੍ਵਾ ਪੁਨਪਿ ਅਦਂਸੁ. ਪਿਪਾਸਾ ਮਹਤੀ ਅਹੋਸਿ. ਅਥਸ੍ਸ ਪੁਨਪਿ ਯਾਚਨ੍ਤਸ੍ਸ ‘‘ਖੀਣਾ’’ਤਿ ਵਦਿਂਸੁ. ਸੋ ‘‘ਹਨ੍ਦ ਤਂ, ਭੋ, ਆਹਰਾਪੇਥਾ’’ਤਿ ਅਙ੍ਗੁਲਿਮੁਦ੍ਦਿਕਂ ਅਦਾਸਿ, ਸੋ ਸਕਲਦਿਵਸਂ ਤੇਹਿ ਸਦ੍ਧਿਂ ਪਿਵਿਤ੍ਵਾ ਮਤ੍ਤੋ ਰਤ੍ਤਕ੍ਖੋ ਕਮ੍ਪਨ੍ਤੋ ਵਿਲਪਨ੍ਤੋ ਗੇਹਂ ਗਨ੍ਤ੍ਵਾ ਨਿਪਜ੍ਜਿ. ਅਥਸ੍ਸ ਪਿਤਾ ਸੁਰਾਯ ਪਿਵਿਤਭਾਵਂ ਞਤ੍ਵਾ ਵਿਗਤੇ ਮਤ੍ਤੇ, ‘‘ਤਾਤ, ਅਯੁਤ੍ਤਂ ਤੇ ਕਤਂ ਸੋਤ੍ਤਿਯਕੁਲੇ ਜਾਤੇਨ ਸੁਰਂ ਪਿਵਨ੍ਤੇਨ, ਮਾ ਪੁਨ ਏਵਂ ਅਕਾਸੀ’’ਤਿ ਆਹ. ‘‘ਤਾਤ, ਕੋ ਮਯ੍ਹਂ ਦੋਸੋ’’ਤਿ. ‘‘ਸੁਰਾਯ ਪਿਵਿਤਭਾਵੋ’’ਤਿ. ‘‘ਤਾਤ, ਕਿਂ ਕਥੇਸਿ, ਮਯਾ ਏਵਰੂਪਂ ਮਧੁਰਰਸਂ ਏਤ੍ਤਕਂ ਕਾਲਂ ਅਲਦ੍ਧਪੁਬ੍ਬ’’ਨ੍ਤਿ. ਬ੍ਰਾਹ੍ਮਣੋ ਪੁਨਪ੍ਪੁਨਂ ਯਾਚਿ. ਸੋਪਿ ‘‘ਨ ਸਕ੍ਕੋਮਿ ਵਿਰਮਿਤੁ’’ਨ੍ਤਿ ਆਹ. ਅਥ ਬ੍ਰਾਹ੍ਮਣੋ ‘‘ਏਵਂ ਸਨ੍ਤੇ ਅਮ੍ਹਾਕਂ ਕੁਲਵਂਸੋ ਚ ਉਚ੍ਛਿਜ੍ਜਿਸ੍ਸਤਿ, ਧਨਞ੍ਚ ਵਿਨਸ੍ਸਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੩੮੩.

‘‘ਮਾਣਵ ਅਭਿਰੂਪੋਸਿ, ਕੁਲੇ ਜਾਤੋਸਿ ਸੋਤ੍ਥਿਯੇ;

ਨ ਤ੍ਵਂ ਅਰਹਸਿ ਤਾਤ, ਅਭਕ੍ਖਂ ਭਕ੍ਖਯੇਤਵੇ’’ਤਿ.

ਤਤ੍ਥ, ਮਾਣਵਾਤਿ, ਮਾਣਵ, ਤ੍ਵਂ ਅਭਿਰੂਪੋ ਅਸਿ, ਸੋਤ੍ਥਿਯੇ ਕੁਲੇ ਜਾਤੋਪਿ ਅਸਿ. ਅਭਕ੍ਖਂ ਭਕ੍ਖਯੇਤਵੇਤਿ, ਤਾਤ, ਤ੍ਵਂ ਅਭਕ੍ਖਿਤਬ੍ਬਯੁਤ੍ਤਕਂ ਭਕ੍ਖਯਿਤੁਂ ਨ ਅਰਹਸਿ.

ਏਵਞ੍ਚ ਪਨ ਵਤ੍ਵਾ, ‘‘ਤਾਤ, ਵਿਰਮ, ਸਚੇ ਨ ਵਿਰਮਸਿ, ਅਹਂ ਤਂ ਇਤੋ ਗੇਹਾ ਨਿਕ੍ਖਾਮੇਸ੍ਸਾਮਿ, ਤਵ ਰਟ੍ਠਾ ਪਬ੍ਬਾਜਨੀਯਕਮ੍ਮਂ ਕਰਿਸ੍ਸਾਮੀ’’ਤਿ ਆਹ. ਮਾਣਵੋ ‘‘ਏਵਂ ਸਨ੍ਤੇਪਿ ਅਹਂ ਸੁਰਂ ਜਹਿਤੁਂ ਨ ਸਕ੍ਕੋਮੀ’’ਤਿ ਵਤ੍ਵਾ ਗਾਥਾਦ੍ਵਯਮਾਹ –

੩੮੪.

‘‘ਰਸਾਨਂ ਅਞ੍ਞਤਰਂ ਏਤਂ, ਕਸ੍ਮਾ ਮਂ ਤ੍ਵਂ ਨਿਵਾਰਯੇ;

ਸੋਹਂ ਤਤ੍ਥ ਗਮਿਸ੍ਸਾਮਿ, ਯਤ੍ਥ ਲਚ੍ਛਾਮਿ ਏਦਿਸਂ.

੩੮੫.

‘‘ਸੋਵਾਹਂ ਨਿਪ੍ਪਤਿਸ੍ਸਾਮਿ, ਨਤੇ ਵਚ੍ਛਾਮਿ ਸਨ੍ਤਿਕੇ;

ਯਸ੍ਸ ਮੇ ਦਸ੍ਸਨੇਨ ਤ੍ਵਂ, ਨਾਭਿਨਨ੍ਦਸਿ ਬ੍ਰਾਹ੍ਮਣਾ’’ਤਿ.

ਤਤ੍ਥ ਰਸਾਨਨ੍ਤਿ ਲੋਣਮ੍ਬਿਲਤਿਤ੍ਤਕਕਟੁਕਖਾਰਿਕਮਧੁਰਕਸਾਵਸਙ੍ਖਾਤਾਨਂ ਸਤ੍ਤਨ੍ਨਂ ਰਸਾਨਂ ਅਞ੍ਞਤਰਂ ਉਤ੍ਤਮਰਸਮੇਤਂ ਮਜ੍ਜਂ ਨਾਮ. ਸੋਵਾਹਨ੍ਤਿ ਸੋ ਅਹਂ ਏਵ. ਨਿਪ੍ਪਤਿਸ੍ਸਾਮੀਤਿ ਨਿਕ੍ਖਮਿਸ੍ਸਾਮਿ.

ਏਵਞ੍ਚ ਪਨ ਵਤ੍ਵਾ ‘‘ਨਾਹਂ ਸੁਰਾਪਾਨਾ ਵਿਰਮਿਸ੍ਸਾਮਿ, ਯਂ ਤੇ ਰੁਚ੍ਚਤਿ, ਤਂ ਕਰੋਹੀ’’ਤਿ ਆਹ. ਅਥ ਬ੍ਰਾਹ੍ਮਣੋ ‘‘ਤਯਿ ਅਮ੍ਹੇ ਪਰਿਚ੍ਚਜਨ੍ਤੇ ਮਯਮ੍ਪਿ ਤਂ ਪਰਿਚ੍ਚਜਿਸ੍ਸਾਮਾ’’ਤਿ ਵਤ੍ਵਾ ਗਾਥਮਾਹ –

੩੮੬.

‘‘ਅਦ੍ਧਾ ਅਞ੍ਞੇਪਿ ਦਾਯਾਦੇ, ਪੁਤ੍ਤੇ ਲਚ੍ਛਾਮ ਮਾਣਵ;

ਤ੍ਵਞ੍ਚ ਜਮ੍ਮ ਵਿਨਸ੍ਸਸੁ, ਯਤ੍ਥ ਪਤ੍ਤਂ ਨ ਤਂ ਸੁਣੇ’’ਤਿ.

ਤਤ੍ਥ ਯਤ੍ਥ ਪਤ੍ਤਨ੍ਤਿ ਯਤ੍ਥ ਗਤਂ ਤਂ ‘‘ਅਸੁਕਟ੍ਠਾਨੇ ਨਾਮ ਵਸਤੀ’’ਤਿ ਨ ਸੁਣੋਮ, ਤਤ੍ਥ ਗਚ੍ਛਾਹੀਤਿ ਅਤ੍ਥੋ.

ਅਥ ਨਂ ਵਿਨਿਚ੍ਛਯਂ ਨੇਤ੍ਵਾ ਅਪੁਤ੍ਤਭਾਵਂ ਕਤ੍ਵਾ ਨੀਹਰਾਪੇਸਿ. ਸੋ ਅਪਰਭਾਗੇ ਨਿਪ੍ਪਚ੍ਚਯੋ ਕਪਣੋ ਜਿਣ੍ਣਪਿਲੋਤਿਕਂ ਨਿਵਾਸੇਤ੍ਵਾ ਕਪਾਲਹਤ੍ਥੋ ਪਿਣ੍ਡਾਯ ਚਰਨ੍ਤੋ ਅਞ੍ਞਤਰਂ ਕੁਟ੍ਟਂ ਨਿਸ੍ਸਾਯ ਕਾਲਮਕਾਸਿ. ਇਦਂ ਕਾਰਣਂ ਆਹਰਿਤ੍ਵਾ ਕਾਲ਼ਹਤ੍ਥਿ ਰਞ੍ਞੋ ਦਸ੍ਸੇਤ੍ਵਾ, ‘‘ਮਹਾਰਾਜ, ਸਚੇ ਤ੍ਵਂ ਅਮ੍ਹਾਕਂ ਵਚਨਂ ਨ ਕਰਿਸ੍ਸਸਿ, ਪਬ੍ਬਾਜਨੀਯਕਮ੍ਮਂ ਤੇ ਕਰਿਸ੍ਸਨ੍ਤੀ’’ਤਿ ਵਤ੍ਵਾ ਗਾਥਮਾਹ –

੩੮੭.

‘‘ਏਵਮੇਵ ਤੁਵਂ ਰਾਜ, ਦ੍ਵਿਪਦਿਨ੍ਦ ਸੁਣੋਹਿ ਮੇ;

ਪਬ੍ਬਾਜੇਸ੍ਸਨ੍ਤਿ ਤਂ ਰਟ੍ਠਾ, ਸੋਣ੍ਡਂ ਮਾਣਵਕਂ ਯਥਾ’’ਤਿ.

ਤਤ੍ਥ ਦ੍ਵਿਪਦਿਨ੍ਦਾਤਿ ਦ੍ਵਿਪਦਾਨਂ ਇਨ੍ਦ, ਭੋ ਮਹਾਰਾਜ, ਮੇ ਮਮ ਵਚਨਂ ਸੁਣੋਹਿ ਤੁਵਂ, ਏਵਮੇਵ ਸੋਣ੍ਡਂ ਮਾਣਵਕਂ ਯਥਾ ਤਂ ਭਵਨ੍ਤਂ ਰਟ੍ਠਤੋ ਪਬ੍ਬਾਜੇਸ੍ਸਨ੍ਤਿ.

ਏਵਂ ਕਾਲ਼ਹਤ੍ਥਿਨਾ ਉਪਮਾਯ ਆਹਟਾਯਪਿ ਰਾਜਾ ਤਤੋ ਵਿਰਮਿਤੁਂ ਅਸਕ੍ਕੋਨ੍ਤੋ ਅਪਰਮ੍ਪਿ ਉਦਾਹਰਣਂ ਦਸ੍ਸੇਤੁਂ ਆਹ –

੩੮੮.

‘‘ਸੁਜਾਤੋ ਨਾਮ ਨਾਮੇਨ, ਭਾਵਿਤਤ੍ਤਾਨ ਸਾਵਕੋ;

ਅਚ੍ਛਰਂ ਕਾਮਯਨ੍ਤੋਵ, ਨ ਸੋ ਭੁਞ੍ਜਿ ਨ ਸੋ ਪਿਵਿ.

੩੮੯.

‘‘ਕੁਸਗ੍ਗੇਨੁਦਕਮਾਦਾਯ, ਸਮੁਦ੍ਦੇ ਉਦਕਂ ਮਿਨੇ;

ਏਵਂ ਮਾਨੁਸਕਾ ਕਾਮਾ, ਦਿਬ੍ਬਕਾਮਾਨ ਸਨ੍ਤਿਕੇ.

੩੯੦.

‘‘ਏਵਮੇਵ ਅਹਂ ਕਾਲ਼, ਭੁਤ੍ਵਾ ਭਕ੍ਖਂ ਰਸੁਤ੍ਤਮਂ;

ਅਲਦ੍ਧਾ ਮਾਨੁਸਂ ਮਂਸਂ, ਮਞ੍ਞੇ ਹਿਸ੍ਸਾਮਿ ਜੀਵਿਤ’’ਨ੍ਤਿ.

ਵਤ੍ਥੁ ਹੇਟ੍ਠਾ ਵੁਤ੍ਤਸਦਿਸਮੇਵ.

ਤਤ੍ਥ ਭਾਵਿਤਤ੍ਤਾਨਾਤਿ ਭਾਵਿਤਚਿਤ੍ਤਾਨਂ ਤੇਸਂ ਪਞ੍ਚਨ੍ਨਂ ਇਸਿਸਤਾਨਂ. ਅਚ੍ਛਰਂ ਕਾਮਯਨ੍ਤੋਵਾਤਿ ਸੋ ਕਿਰ ਤੇਸਂ ਇਸੀਨਂ ਮਹਾਜਮ੍ਬੁਪੇਸਿਯਾ ਖਾਦਨਕਾਲੇ ਅਨਾਗਮਨਂ ਵਿਦਿਤ੍ਵਾ ‘‘ਕਿਂ ਨੁ ਖੋ ਕਾਰਣਾ ਨ ਆਗਚ੍ਛਨ੍ਤਿ, ਸਚੇ ਕਤ੍ਥਚਿ ਗਤਾ, ਜਾਨਿਸ੍ਸਾਮਿ, ਨੋ ਚੇ, ਅਥ ਨੇਸਂ ਸਨ੍ਤਿਕੇ ਧਮ੍ਮਂ ਸੁਣਿਸ੍ਸਾਮੀ’’ਤਿ ਉਯ੍ਯਾਨਂ ਗਨ੍ਤ੍ਵਾ ਇਸਿਗਣੇ ਵਨ੍ਦਿਤ੍ਵਾ ਗਣਜੇਟ੍ਠਕਸ੍ਸ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਨਿਸਿਨ੍ਨੋਵ ਸੂਰਿਯੇ ਅਤ੍ਥਙ੍ਗਤੇ ਉਯ੍ਯੋਜਿਯਮਾਨੋਪਿ ‘‘ਅਜ੍ਜ ਇਧੇਵ ਵਸਿਸ੍ਸਾਮੀ’’ਤਿ ਵਤ੍ਵਾ ਇਸਿਗਣਂ ਵਨ੍ਦਿਤ੍ਵਾ ਪਣ੍ਣਸਾਲਂ ਪਵਿਸਿਤ੍ਵਾ ਨਿਪਜ੍ਜਿ. ਰਤ੍ਤਿਭਾਗੇ ਸਕ੍ਕੋ ਦੇਵਰਾਜਾ ਦੇਵਚ੍ਛਰਾਸਙ੍ਘਪਰਿਵੁਤੋ ਸਦ੍ਧਿਂ ਅਤ੍ਤਨੋ ਪਰਿਚਾਰਿਕਾਹਿ ਇਸਿਗਣਂ ਵਨ੍ਦਿਤੁਂ ਆਗਤੋ, ਸਕਲਾਰਾਮੋ ਏਕੋਭਾਸੋ ਅਹੋਸਿ. ਸੁਜਾਤੋ ‘‘ਕਿਂ ਨੁ ਖੋ ਏਤ’’ਨ੍ਤਿ ਉਟ੍ਠਾਯ ਪਣ੍ਣਸਾਲਛਿਦ੍ਦੇਨ ਓਲੋਕੇਨ੍ਤੋ ਸਕ੍ਕਂ ਇਸਿਗਣਂ ਵਨ੍ਦਿਤੁਂ ਆਗਤਂ ਦੇਵਚ੍ਛਰਾਪਰਿਵੁਤਂ ਦਿਸ੍ਵਾ ਅਚ੍ਛਰਾਨਂ ਸਹ ਦਸ੍ਸਨੇਨ ਰਾਗਰਤ੍ਤੋ ਅਹੋਸਿ. ਸਕ੍ਕੋ ਨਿਸੀਦਿਤ੍ਵਾ ਧਮ੍ਮਕਥਂ ਸੁਤ੍ਵਾ ਸਕਟ੍ਠਾਨਮੇਵ ਗਤੋ. ਕੁਟੁਮ੍ਬਿਕੋਪਿ ਪੁਨਦਿਵਸੇ ਇਸਿਗਣਂ ਵਨ੍ਦਿਤ੍ਵਾ ਪੁਚ੍ਛਿ – ‘‘ਭਨ੍ਤੇ, ਕੋ ਨਾਮੇਸ ਰਤ੍ਤਿਭਾਗੇ ਤੁਮ੍ਹਾਕਂ ਵਨ੍ਦਨਤ੍ਥਾਯ ਆਗਤੋ’’ਤਿ? ‘‘ਸਕ੍ਕੋ, ਆਵੁਸੋ’’ਤਿ. ‘‘ਤਂ ਪਰਿਵਾਰੇਤ੍ਵਾ ਨਿਸਿਨ੍ਨਾ ਕਾ ਨਾਮੇਤਾ’’ਤਿ? ‘‘ਦੇਵਚ੍ਛਰਾ ਨਾਮੇਤਾ’’ਤਿ. ਸੋ ਇਸਿਗਣਂ ਵਨ੍ਦਿਤ੍ਵਾ ਗੇਹਂ ਗਨ੍ਤ੍ਵਾ ਗਤਕਾਲਤੋ ਪਟ੍ਠਾਯ ‘‘ਅਚ੍ਛਰਂ ਮੇ ਦੇਥ, ਅਚ੍ਛਰਂ ਮੇ ਦੇਥਾ’’ਤਿ ਵਿਲਪਿ. ਞਾਤਕਾ ਪਰਿਵਾਰੇਤ੍ਵਾ ‘‘ਭੂਤਾਵਿਟ੍ਠੋ ਨੁ ਖੋ’’ਤਿ ਅਚ੍ਛਰਂ ਪਹਰਿਂਸੁ. ਸੋ ‘‘ਨਾਹਂ ਏਤਂ ਅਚ੍ਛਰਂ ਕਥੇਮਿ, ਦੇਵਚ੍ਛਰਂ ਕਥੇਮੀ’’ਤਿ ਵਤ੍ਵਾ ‘‘ਅਯਂ ਅਚ੍ਛਰਾ’’ਤਿ ਅਲਙ੍ਕਰਿਤ੍ਵਾ ਆਨੀਤਂ ਭਰਿਯਮ੍ਪਿ ਗਣਿਕਮ੍ਪਿ ਓਲੋਕੇਨ੍ਤੋ ‘‘ਨਾਯਂ ਅਚ੍ਛਰਾ, ਯਕ੍ਖਿਨੀ ਏਸਾ, ਦੇਵਚ੍ਛਰਂ ਮੇ ਦੇਥਾ’’ਤਿ ਵਿਲਪਨ੍ਤੋ ਨਿਰਾਹਾਰੋ ਹੁਤ੍ਵਾ ਤਤ੍ਥੇਵ ਜੀਵਿਤਕ੍ਖਯਂ ਪਾਪੁਣਿ. ਤੇਨ ਵੁਤ੍ਤਂ –

‘‘ਅਚ੍ਛਰਂ ਕਾਮਯਨ੍ਤੋਵ, ਨ ਸੋ ਭੁਞ੍ਜਿ ਨ ਸੋ ਪਿਵੀ’’ਤਿ.

ਕੁਸਗ੍ਗੇਨੁਦਕਮਾਦਾਯ, ਸਮੁਦ੍ਦੇ ਉਦਕਂ ਮਿਨੇਤਿ, ਸਮ੍ਮ ਕਾਲ਼ਹਤ੍ਥਿ, ਯੋ ਕੁਸਗ੍ਗੇਨੇਵ ਉਦਕਂ ਗਹੇਤ੍ਵਾ ‘‘ਏਤ੍ਤਕਂ ਸਿਯਾ ਮਹਾਸਮੁਦ੍ਦੇ ਉਦਕ’’ਨ੍ਤਿ ਤੇਨ ਸਦ੍ਧਿਂ ਉਪਮਾਯ ਮਿਨੇਯ੍ਯ, ਸੋ ਕੇਵਲਂ ਮਿਨੇਯ੍ਯੇਵ, ਕੁਸਗ੍ਗੇ ਪਨ ਉਦਕਂ ਅਤਿਪਰਿਤ੍ਤਕਮੇਵ. ਯਥਾ ਤਂ, ਏਵਂ ਮਾਨੁਸਕਾ ਕਾਮਾ ਦਿਬ੍ਬਕਾਮਾਨਂ ਸਨ੍ਤਿਕੇ, ਤਸ੍ਮਾ ਸੋ ਸੁਜਾਤੋ ਅਞ੍ਞਂ ਇਤ੍ਥਿਂ ਨ ਓਲੋਕੇਸਿ, ਅਚ੍ਛਰਮੇਵ ਪਤ੍ਥੇਨ੍ਤੋ ਮਤੋ. ਏਵਮੇਵਾਤਿ ਯਥਾ ਸੋ ਦਿਬ੍ਬਕਾਮਂ ਅਲਭਨ੍ਤੋ ਜੀਵਿਤਂ ਜਹਿ, ਏਵਂ ਅਹਮ੍ਪਿ ਉਤ੍ਤਮਰਸਂ ਮਨੁਸ੍ਸਮਂਸਂ ਅਲਭਨ੍ਤੋ ਜੀਵਿਤਂ ਜਹਿਸ੍ਸਾਮੀਤਿ ਵਦਤਿ.

ਤਂ ਸੁਤ੍ਵਾ ਕਾਲ਼ਹਤ੍ਥਿ ‘‘ਅਯਂ ਰਾਜਾ ਅਤਿਵਿਯ ਰਸਗਿਦ੍ਧੋ, ਸਞ੍ਞਾਪੇਸ੍ਸਾਮਿ ਨ’’ਨ੍ਤਿ ਸਕਜਾਤਿਕਾਨਂ ਮਂਸਂ ਖਾਦਿਤ੍ਵਾ ਆਕਾਸਚਰਾ ਸੁਵਣ੍ਣਹਂਸਾਪਿ ਤਾਵ ਵਿਨਟ੍ਠਾਤਿ ਦਸ੍ਸੇਤੁਂ ਗਾਥਾਦ੍ਵਯਮਾਹ –

੩੯੧.

‘‘ਯਥਾਪਿ ਤੇ ਧਤਰਟ੍ਠਾ, ਹਂਸਾ ਵੇਹਾਯਸਙ੍ਗਮਾ;

ਅਭੁਤ੍ਤਪਰਿਭੋਗੇਨ, ਸਬ੍ਬੇ ਅਬ੍ਭਤ੍ਥਤਂ ਗਤਾ.

੩੯੨.

‘‘ਏਵਮੇਵ ਤੁਵਂ ਰਾਜ, ਦ੍ਵਿਪਦਿਨ੍ਦ ਸੁਣੋਹਿ ਮੇ;

ਅਭਕ੍ਖਂ ਰਾਜ ਭਕ੍ਖੇਸਿ, ਤਸ੍ਮਾ ਪਬ੍ਬਾਜਯਨ੍ਤਿ ਤ’’ਨ੍ਤਿ.

ਤਤ੍ਥ ਅਭੁਤ੍ਤਪਰਿਭੋਗੇਨਾਤਿ ਅਤ੍ਤਨੋ ਸਮਾਨਜਾਤਿਕਾਨਂ ਪਰਿਭੋਗੇਨ. ਅਬ੍ਭਤ੍ਥਤਂ ਗਤਾਤਿ ਸਬ੍ਬੇ ਮਰਣਮੇਵ ਪਤ੍ਤਾ. ਅਤੀਤੇ ਕਿਰ ਚਿਤ੍ਤਕੂਟੇ ਸੁਵਣ੍ਣਗੁਹਾਯਂ ਨਵੁਤਿ ਹਂਸਸਹਸ੍ਸਾਨਿ ਵਸਨ੍ਤਿ. ਤੇ ਵਸ੍ਸਿਕੇ ਚਤ੍ਤਾਰੋ ਮਾਸੇ ਨ ਨਿਕ੍ਖਮਨ੍ਤਿ, ਸਚੇ ਨਿਕ੍ਖਮੇਯ੍ਯੁਂ, ਉਦਕਪੁਣ੍ਣੇਹਿ ਪਤ੍ਤੇਹਿ ਉਪ੍ਪਤਿਤੁਂ ਅਸਕ੍ਕੋਨ੍ਤਾ ਮਹਾਸਮੁਦ੍ਦੇਯੇਵ ਪਤੇਯ੍ਯੁਂ, ਤਸ੍ਮਾ ਨ ਚ ਨਿਕ੍ਖਮਨ੍ਤਿ. ਉਪਕਟ੍ਠੇ ਪਨ ਵਸ੍ਸਕਾਲੇ ਜਾਤਸ੍ਸਰਤੋ ਸਯਂਜਾਤਸਾਲਿਯੋ ਆਹਰਿਤ੍ਵਾ ਗੁਹਂ ਪੂਰੇਤ੍ਵਾ ਸਾਲਿਂ ਖਾਦਨ੍ਤਾ ਵਸਨ੍ਤਿ. ਤੇਸਂ ਪਨ ਗੁਹਂ ਪਵਿਟ੍ਠਕਾਲੇ ਗੁਹਦ੍ਵਾਰੇ ਏਕੋ ਰਥਚਕ੍ਕਪ੍ਪਮਾਣੋ ਉਣ੍ਣਨਾਭਿ ਨਾਮ ਮਕ੍ਕਟਕੋ ਏਕੇਕਸ੍ਮਿਂ ਮਾਸੇ ਏਕੇਕਂ ਜਾਲਂ ਵਿਨਨ੍ਧਤਿ. ਤਸ੍ਸ ਏਕੇਕਂ ਸੁਤ੍ਤਂ ਗੋਰਜ੍ਜੁਪ੍ਪਮਾਣਂ ਹੋਤਿ. ਹਂਸਾ ‘‘ਤਂ ਜਾਲਂ ਭਿਨ੍ਦਿਸ੍ਸਤੀ’’ਤਿ ਏਕਸ੍ਸ ਤਰੁਣਹਂਸਸ੍ਸ ਦ੍ਵੇ ਕੋਟ੍ਠਾਸੇ ਦੇਨ੍ਤਿ. ਸੋ ਵਿਗਤੇ ਦੇਵੇ ਪੁਰਤੋ ਗਨ੍ਤ੍ਵਾ ਤਂ ਜਾਲਂ ਭਿਨ੍ਦਤਿ. ਤੇਨ ਮਗ੍ਗੇਨ ਸੇਸਾ ਗਚ੍ਛਨ੍ਤਿ. ਅਥੇਕਸ੍ਮਿਂ ਕਾਲੇ ਪਞ੍ਚ ਮਾਸੇ ਵਸ੍ਸੋ ਵੁਟ੍ਠੋ ਅਹੋਸਿ. ਹਂਸਾ ਖੀਣਗੋਚਰਾ ‘‘ਕਿਂ ਨੁ ਖੋ ਕਤ੍ਤਬ੍ਬ’’ਨ੍ਤਿ ਮਨ੍ਤੇਤ੍ਵਾ ‘‘ਮਯਂ ਜੀਵਨ੍ਤਾ ਅਣ੍ਡਾਨਿ ਲਭਿਸ੍ਸਾਮਾ’’ਤਿ ਪਠਮਂ ਅਣ੍ਡਾਨਿ ਖਾਦਿਂਸੁ, ਤਤੋ ਪੋਤਕੇ, ਤਤੋ ਜਿਣ੍ਣਹਂਸੇ. ਪਞ੍ਚਮਾਸਚ੍ਚਯੇਨ ਵਸ੍ਸਂ ਅਪਗਤਂ. ਮਕ੍ਕਟਕੋ ਪਞ੍ਚ ਜਾਲਾਨਿ ਵਿਨਨ੍ਧਿ. ਹਂਸਾ ਸਕਜਾਤਿਕਾਨਂ ਮਂਸਂ ਖਾਦਿਤ੍ਵਾ ਅਪ੍ਪਥਾਮਾ ਜਾਤਾ. ਦ੍ਵਿਗੁਣਕੋਟ੍ਠਾਸਲਾਭੀ ਹਂਸਤਰੁਣੋ ਜਾਲੇ ਪਹਰਿਤ੍ਵਾ ਚਤ੍ਤਾਰਿ ਭਿਨ੍ਦਿ, ਪਞ੍ਚਮਂ ਛਿਨ੍ਦਿਤੁਂ ਨਾਸਕ੍ਖਿ, ਤਤ੍ਥੇਵ ਲਗ੍ਗਿ. ਅਥਸ੍ਸ ਸੀਸਂ ਵਿਜ੍ਝਿਤ੍ਵਾ ਮਕ੍ਕਟਕੋ ਲੋਹਿਤਂ ਪਿਵਿ. ਅਞ੍ਞੋਪਿ ਆਗਨ੍ਤ੍ਵਾ ਜਾਲਂ ਪਹਰਿ, ਸੋਪਿ ਤਤ੍ਥੇਵ ਲਗ੍ਗੀਤਿ ਏਵਂ ਸਬ੍ਬੇਸਂ ਮਕ੍ਕਟਕੋ ਲੋਹਿਤਂ ਪਿਵਿ. ਤਦਾ ਧਤਰਟ੍ਠਕੁਲਂ ਉਚ੍ਛਿਨ੍ਨਨ੍ਤਿ ਵਦਨ੍ਤਿ. ਤੇਨ ਵੁਤ੍ਤਂ ‘‘ਸਬ੍ਬੇ ਅਬ੍ਭਤ੍ਥਤਂਗਤਾ’’ਤਿ.

ਏਵਮੇਵ ਤੁਵਨ੍ਤਿ ਯਥਾ ਏਤੇ ਹਂਸਾ ਅਭਕ੍ਖਂ ਸਕਜਾਤਿਕਮਂਸਂ ਖਾਦਿਂਸੁ, ਤਥਾ ਤ੍ਵਮ੍ਪਿ ਖਾਦਸਿ, ਸਕਲਨਗਰਂ ਭਯਪ੍ਪਤ੍ਤਂ, ਵਿਰਮ, ਮਹਾਰਾਜਾਤਿ. ਤਸ੍ਮਾ ਪਬ੍ਬਾਜਯਨ੍ਤਿ ਤਨ੍ਤਿ ਯਸ੍ਮਾ ਅਭਕ੍ਖਂ ਸਕਜਾਤਿਕਮਂਸਂ ਭਕ੍ਖੇਸਿ, ਤਸ੍ਮਾ ਇਮੇ ਨਗਰਵਾਸਿਨੋ ਤਂ ਰਟ੍ਠਾ ਪਬ੍ਬਾਜਯਨ੍ਤਿ.

ਰਾਜਾ ਅਞ੍ਞਮ੍ਪਿ ਉਪਮਂ ਵਤ੍ਤੁਕਾਮੋ ਅਹੋਸਿ. ਨਾਗਰਾ ਪਨ ਉਟ੍ਠਾਯ, ‘‘ਸਾਮਿ ਸੇਨਾਪਤਿ, ਕਿਂ ਕਰੋਸਿ, ਕਿਂ ਮਨੁਸ੍ਸਮਂਸਖਾਦਕਂ ਚੋਰਂ ਗਹੇਤ੍ਵਾ ਵਿਚਰਸਿ, ਸਚੇ ਨ ਵਿਰਮਿਸ੍ਸਤਿ, ਰਟ੍ਠਤੋ ਨਂ ਪਬ੍ਬਾਜੇਹੀ’’ਤਿ ਵਤ੍ਵਾ ਨਾਸ੍ਸ ਕਥੇਤੁਂ ਅਦਂਸੁ. ਰਾਜਾ ਬਹੂਨਂ ਕਥਂ ਸੁਤ੍ਵਾ ਭੀਤੋ ਪੁਨ ਵਤ੍ਤੁਂ ਨਾਸਕ੍ਖਿ. ਪੁਨਪਿ ਨਂ ਸੇਨਾਪਤਿ ‘‘ਕਿਂ ਮਹਾਰਾਜ ਵਿਰਮਿਤੁਂ ਸਕ੍ਖਿਸ੍ਸਸਿ, ਉਦਾਹੁ ਨ ਸਕ੍ਖਿਸ੍ਸਸੀ’’ਤਿ ਵਤ੍ਵਾ ‘‘ਨ ਸਕ੍ਕੋਮੀ’’ਤਿ ਵੁਤ੍ਤੇ ਸਬ੍ਬਂ ਓਰੋਧਗਣਞ੍ਚ ਪੁਤ੍ਤਧੀਤਰੋ ਚ ਸਬ੍ਬਾਲਙ੍ਕਾਰਪਟਿਮਣ੍ਡਿਤੇ ਪਸ੍ਸੇ ਠਪੇਤ੍ਵਾ, ‘‘ਮਹਾਰਾਜ, ਇਮੇ ਞਾਤਿਮਣ੍ਡਲੇ ਚੇਵ ਅਮਚ੍ਚਗਣਞ੍ਚ ਰਜ੍ਜਸਿਰਿਞ੍ਚ ਓਲੋਕੇਹਿ, ਮਾ ਵਿਨਸ੍ਸਿ, ਵਿਰਮ ਮਨੁਸ੍ਸਮਂਸਤੋ’’ਤਿ ਆਹ. ਰਾਜਾ ‘‘ਨ ਮਯ੍ਹਂ ਏਤੇ ਮਨੁਸ੍ਸਮਂਸਤੋ ਪਿਯਤਰਾ’’ਤਿ ਵਤ੍ਵਾ ‘‘ਤੇਨ ਹਿ, ਮਹਾਰਾਜ, ਇਮਮ੍ਹਾ ਨਗਰਾ ਚ ਰਟ੍ਠਾ ਚ ਨਿਕ੍ਖਮਥਾ’’ਤਿ ਵੁਤ੍ਤੇ, ‘‘ਕਾਲ਼ਹਤ੍ਥਿ, ਨ ਮੇ ਰਜ੍ਜੇਨਤ੍ਥੋ, ਨਗਰਾ ਨਿਕ੍ਖਮਾਮਿ, ਏਕਂ ਪਨ ਮੇ ਖਗ੍ਗਞ੍ਚ ਰਸਕਞ੍ਚ ਭਾਜਨਞ੍ਚ ਦੇਹੀ’’ਤਿ ਆਹ. ਅਥਸ੍ਸ ਖਗ੍ਗਞ੍ਚ ਮਂਸਪਚਨਭਾਜਨਞ੍ਚ ਪਚ੍ਛਿਞ੍ਚ ਉਕ੍ਖਿਪਾਪੇਤ੍ਵਾ ਰਸਕਞ੍ਚ ਦਤ੍ਵਾ ਰਟ੍ਠਾ ਪਬ੍ਬਾਜਨੀਯਕਮ੍ਮਂ ਕਰਿਂਸੁ.

ਸੋ ਖਗ੍ਗਞ੍ਚ ਰਸਕਞ੍ਚ ਆਦਾਯ ਨਗਰਾ ਨਿਕ੍ਖਮਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਏਕਸ੍ਮਿਂ ਨਿਗ੍ਰੋਧਮੂਲੇ ਵਸਨਟ੍ਠਾਨਂ ਕਤ੍ਵਾ ਤਤ੍ਥ ਵਸਨ੍ਤੋ ਅਟਵਿਮਗ੍ਗੇ ਠਤ੍ਵਾ ਮਨੁਸ੍ਸੇ ਮਾਰੇਤ੍ਵਾ ਆਹਰਿਤ੍ਵਾ ਰਸਕਸ੍ਸ ਦੇਤਿ. ਸੋਪਿਸ੍ਸ ਮਂਸਂ ਪਚਿਤ੍ਵਾ ਉਪਨਾਮੇਤਿ. ਏਵਂ ਉਭੋਪਿ ਜੀਵਨ੍ਤਿ. ਮਨੁਸ੍ਸਗਹਣਕਾਲੇ ‘‘ਅਹਂ ਅਰੇ ਮਨੁਸ੍ਸਚੋਰੋ ਪੋਰਿਸਾਦੋ’’ਤਿ ਵਤ੍ਵਾ ਤਸ੍ਮਿਂ ਪਕ੍ਖਨ੍ਤੇ ਕੋਚਿ ਸਕਭਾਵੇਨ ਸਣ੍ਠਾਤੁਂ ਨ ਸਕ੍ਕੋਤਿ, ਸਬ੍ਬੇ ਭੂਮਿਯਂ ਪਤਨ੍ਤਿ. ਤੇਸੁ ਯਂ ਇਚ੍ਛਤਿ, ਤਂ ਉਦ੍ਧਂਪਾਦਂ ਅਧੋਸੀਸਂ ਕਤ੍ਵਾ ਆਹਰਿਤ੍ਵਾ ਰਸਕਸ੍ਸ ਦੇਤਿ. ਸੋ ਏਕਦਿਵਸਂ ਅਰਞ੍ਞੇ ਕਞ੍ਚਿ ਮਨੁਸ੍ਸਂ ਅਲਭਿਤ੍ਵਾ ਆਗਤੋ ਰਸਕੇਨ ‘‘ਕਿਂ ਦੇਵਾ’’ਤਿ ਵੁਤ੍ਤੇ ‘‘ਉਦ੍ਧਨੇ ਉਕ੍ਖਲਿਂ ਆਰੋਪੇਹੀ’’ਤਿ ਆਹ. ‘‘ਮਂਸਂ ਕਹਂ, ਦੇਵਾ’’ਤਿ? ‘‘ਲਭਿਸ੍ਸਾਮਹਂ ਮਂਸ’’ਨ੍ਤਿ. ਸੋ ‘‘ਨਤ੍ਥਿ ਮੇ ਦਾਨਿ ਜੀਵਿਤ’’ਨ੍ਤਿ ਕਮ੍ਪਮਾਨੋ ਉਦ੍ਧਨੇ ਅਗ੍ਗਿਂ ਕਤ੍ਵਾ ਉਕ੍ਖਲਿਂ ਆਰੋਪੇਸਿ. ਅਥ ਨਂ ਪੋਰਿਸਾਦੋ ਅਸਿਨਾ ਮਾਰੇਤ੍ਵਾ ਮਂਸਂ ਪਚਿਤ੍ਵਾ ਖਾਦਿ. ਤਤੋ ਪਟ੍ਠਾਯ ਏਕਕੋਵ ਜਾਤੋ ਸਯਮੇਵ ਪਚਿਤ੍ਵਾ ਖਾਦਤਿ. ‘‘ਪੋਰਿਸਾਦੋ ਮਗ੍ਗੇ ਮਗ੍ਗਪਟਿਪਨ੍ਨੇ ਹਨਤੀ’’ਤਿ ਸਕਲਜਮ੍ਬੁਦੀਪੇ ਪਾਕਟੋ ਅਹੋਸਿ.

ਤਦਾ ਏਕੋ ਸਮ੍ਪਨ੍ਨਵਿਭਵੋ ਬ੍ਰਾਹ੍ਮਣੋ ਪਞ੍ਚਹਿ ਸਕਟਸਤੇਹਿ ਵੋਹਾਰਂ ਕਰੋਨ੍ਤੋ ਪੁਬ੍ਬਨ੍ਤਤੋ ਅਪਰਨ੍ਤਂ ਸਞ੍ਚਰਤਿ. ਸੋ ਚਿਨ੍ਤੇਸਿ – ‘‘ਪੋਰਿਸਾਦੋ ਨਾਮ ਕਿਰ ਚੋਰੋ ਅਨ੍ਤਰਾਮਗ੍ਗੇ ਮਨੁਸ੍ਸੇ ਮਾਰੇਸਿ, ਧਨਂ ਦਤ੍ਵਾ ਤਂ ਅਟਵਿਂ ਅਤਿਕ੍ਕਮਿਸ੍ਸਾਮੀ’’ਤਿ. ਸੋ ਅਟਵਿਮੁਖਵਾਸੀਨਂ ਮਨੁਸ੍ਸਾਨਂ ‘‘ਤੁਮ੍ਹੇ ਮਂ ਅਟਵਿਤੋ ਅਤਿਕ੍ਕਾਮੇਥਾ’’ਤਿ ਸਹਸ੍ਸਂ ਦਤ੍ਵਾ ਤੇਹਿ ਸਦ੍ਧਿਂ ਮਗ੍ਗਂ ਪਟਿਪਜ੍ਜਿ. ਗਚ੍ਛਨ੍ਤੋ ਚ ਬ੍ਰਾਹ੍ਮਣੋ ਸਬ੍ਬਸਤ੍ਥਂ ਪੁਰਤੋ ਕਤ੍ਵਾ ਸਯਂ ਨ੍ਹਾਤਾਨੁਲਿਤ੍ਤੋ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਸੇਤਗੋਣਯੁਤ੍ਤੇ ਸੁਖਯਾਨਕੇ ਨਿਸਿਨ੍ਨੋ ਤੇਹਿ ਅਟਵਿਵਾਸਿਕਪੁਰਿਸੇਹਿ ਪਰਿਵੁਤੋ ਸਬ੍ਬਪਚ੍ਛਤੋ ਅਗਮਾਸਿ. ਤਸ੍ਮਿਂ ਖਣੇ ਪੋਰਿਸਾਦੋ ਰੁਕ੍ਖਂ ਆਰੁਯ੍ਹ ਪੁਰਿਸੇ ਉਪਧਾਰੇਨ੍ਤੋ ਸੇਸਮਨੁਸ੍ਸੇਸੁ ‘‘ਕਿਂ ਇਮੇਸੁ ਮਯਾ ਖਾਦਿਤਬ੍ਬਂ ਅਤ੍ਥੀ’’ਤਿ ਵਿਗਤਚ੍ਛਨ੍ਦੋ ਹੁਤ੍ਵਾ ਬ੍ਰਾਹ੍ਮਣਂ ਦਿਟ੍ਠਕਾਲਤੋ ਪਟ੍ਠਾਯ ਤਂ ਖਾਦਿਤੁਕਾਮਤਾਯ ਪਗ੍ਘਰਿਤਖੇਲ਼ੋ ਅਹੋਸਿ. ਸੋ ਤਸ੍ਮਿਂ ਅਤ੍ਤਨੋ ਸਨ੍ਤਿਕਂ ਆਗਤੇ ਰੁਕ੍ਖਤੋ ਓਰੁਯ੍ਹ ‘‘ਅਹਂ ਅਰੇ ਪੋਰਿਸਾਦੋ’’ਤਿ ਨਾਮਂ ਤਿਕ੍ਖਤ੍ਤੁਂ ਸਾਵੇਤ੍ਵਾ ਖਗ੍ਗਂ ਪਰਿਵਤ੍ਤੇਨ੍ਤੋ ਵਾਲੁਕਾਯ ਤੇਸਂ ਅਕ੍ਖੀਨਿ ਪੂਰੇਨ੍ਤੋ ਵਿਯ ਪਕ੍ਖਨ੍ਦਿ. ਏਕੋਪਿ ਠਾਤੁਂ ਸਮਤ੍ਥੋ ਨਾਮ ਨਤ੍ਥਿ, ਸਬ੍ਬੇ ਭੂਮਿਯਂ ਉਰੇਨ ਨਿਪਜ੍ਜਿਂਸੁ. ਸੋ ਸੁਖਯਾਨਕੇ ਨਿਸਿਨ੍ਨਂ ਬ੍ਰਾਹ੍ਮਣਂ ਪਾਦੇ ਗਹੇਤ੍ਵਾ ਪਿਟ੍ਠਿਯਂ ਅਧੋਸੀਸਕਂ ਓਲਮ੍ਬੇਤ੍ਵਾ ਸੀਸਂ ਗੋਪ੍ਫਕੇਹਿ ਪਹਰਨ੍ਤੋ ਉਕ੍ਖਿਪਿਤ੍ਵਾ ਪਾਯਾਸਿ.

ਤਦਾ ਤੇ ਪੁਰਿਸਾ ਉਟ੍ਠਾਯ, ‘‘ਭੋ, ਪੁਰਿਸਾ ਮਯਂ ਬ੍ਰਾਹ੍ਮਣਸ੍ਸ ਹਤ੍ਥਤੋ ਕਹਾਪਣਸਹਸ੍ਸਂ ਗਣ੍ਹਿਮ੍ਹਾ, ਕੋ ਨਾਮ ਅਮ੍ਹਾਕਂ ਪੁਰਿਸਕਾਰੋ, ਸਕ੍ਕੋਨ੍ਤਾ ਵਾ ਅਸਕ੍ਕੋਨ੍ਤਾ ਵਾ ਥੋਕਂ ਅਨੁਬਨ੍ਧਾਮਾ’’ਤਿ ਵਤ੍ਵਾ ਅਨੁਬਨ੍ਧਿਂਸੁ. ਪੋਰਿਸਾਦੋਪਿ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ਕਞ੍ਚਿ ਅਦਿਤ੍ਵਾ ਸਣਿਕਂ ਪਾਯਾਸਿ. ਤਸ੍ਮਿਂ ਖਣੇ ਥਾਮਸਮ੍ਪਨ੍ਨੋ ਏਕੋ ਸੂਰਪੁਰਿਸੋ ਵੇਗੇਨ ਤਂ ਪਾਪੁਣਿ. ਸੋ ਤਂ ਦਿਸ੍ਵਾ ਏਕਂ ਵਤਿਂ ਲਙ੍ਘਨ੍ਤੋ ਖਦਿਰਖਾਣੁਕਂ ਅਕ੍ਕਮਿ, ਖਾਣੁਕੋ ਪਿਟ੍ਠਿਪਾਦੇਨ ਨਿਕ੍ਖਮਿ. ਲੋਹਿਤੇਨ ਪਗ੍ਘਰਨ੍ਤੇਨ ਲਙ੍ਘਮਾਨੋ ਯਾਤਿ. ਅਥ ਨਂ ਸੋ ਦਿਸ੍ਵਾ, ‘‘ਭੋ, ਮਯਾ ਏਸ ਵਿਦ੍ਧੋ, ਕੇਵਲਂ ਤੁਮ੍ਹੇ ਪਚ੍ਛਤੋ ਏਥ, ਗਣ੍ਹਿਸ੍ਸਾਮਿ ਨ’’ਨ੍ਤਿ ਆਹ. ਤੇ ਦੁਬ੍ਬਲਭਾਵਂ ਞਤ੍ਵਾ ਤਂ ਅਨੁਬਨ੍ਧਿਂਸੁ. ਸੋ ਤੇਹਿ ਅਨੁਬਦ੍ਧਭਾਵਂ ਞਤ੍ਵਾ ਬ੍ਰਾਹ੍ਮਣਂ ਵਿਸ੍ਸਜ੍ਜੇਤ੍ਵਾ ਅਤ੍ਤਾਨਂ ਸੋਤ੍ਥਿਮਕਾਸਿ. ਅਥ ਅਟਵਿਵਾਸਿਕਪੁਰਿਸਾ ਬ੍ਰਾਹ੍ਮਣਸ੍ਸ ਲਦ੍ਧਕਾਲਤੋ ਪਟ੍ਠਾਯ ‘‘ਕਿਂ ਅਮ੍ਹਾਕਂ ਚੋਰੇਨਾ’’ਤਿ ਤਤੋ ਨਿਵਤ੍ਤਿਂਸੁ.

ਪੋਰਿਸਾਦੋਪਿ ਅਤ੍ਤਨੋ ਨਿਗ੍ਰੋਧਮੂਲਂ ਗਨ੍ਤ੍ਵਾ ਪਾਰੋਹਨ੍ਤਰਂ ਪਵਿਸਿਤ੍ਵਾ ਨਿਪਨ੍ਨੋ, ‘‘ਅਯ੍ਯੇ ਰੁਕ੍ਖਦੇਵਤੇ, ਸਚੇ ਮੇ ਸਤ੍ਤਾਹਬ੍ਭਨ੍ਤਰੇਯੇਵ ਵਣਂ ਫਾਸੁਕਂ ਕਾਤੁਂ ਸਕ੍ਖਿਸ੍ਸਸਿ, ਸਕਲਜਮ੍ਬੁਦੀਪੇ ਏਕਸਤਖਤ੍ਤਿਯਾਨਂ ਗਲਲੋਹਿਤੇਨ ਤਵ ਖਨ੍ਧਂ ਧੋਵਿਤ੍ਵਾ ਅਨ੍ਤੇਹਿ ਪਰਿਕ੍ਖਿਪਿਤ੍ਵਾ ਪਞ੍ਚਮਧੁਰਮਂਸੇਨ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ ਆਯਾਚਨਂ ਕਰਿ. ਤਸ੍ਸ ਅਨ੍ਨਪਾਨਮਂਸਂ ਅਲਭਨ੍ਤਸ੍ਸ ਸਰੀਰਂ ਸੁਸ੍ਸਿਤ੍ਵਾ ਅਨ੍ਤੋਸਤ੍ਤਾਹੇਯੇਵ ਵਣੋ ਫਾਸੁਕੋ ਅਹੋਸਿ. ਸੋ ਦੇਵਤਾਨੁਭਾਵੇਨ ਤਸ੍ਸ ਫਾਸੁਕਭਾਵਂ ਸਲ੍ਲਕ੍ਖੇਸਿ. ਸੋ ਕਤਿਪਾਹਂ ਮਨੁਸ੍ਸਮਂਸਂ ਖਾਦਿਤ੍ਵਾ ਬਲਂ ਗਹੇਤ੍ਵਾ ਚਿਨ੍ਤੇਸਿ – ‘‘ਬਹੁਪਕਾਰਾ ਮੇ ਦੇਵਤਾ, ਆਯਾਚਨਾ ਅਸ੍ਸਾ ਮੁਚ੍ਚਿਸ੍ਸਾਮੀ’’ਤਿ. ਸੋ ਖਗ੍ਗਂ ਆਦਾਯ ਰੁਕ੍ਖਮੂਲਤੋ ਨਿਕ੍ਖਮਿਤ੍ਵਾ ‘‘ਰਾਜਾਨੋ ਆਨੇਸ੍ਸਾਮੀ’’ਤਿ ਪਾਯਾਸਿ. ਅਥ ਨਂ ਪੁਰਿਮਭਵੇ ਯਕ੍ਖਕਾਲੇ ਏਕਤੋ ਮਨੁਸ੍ਸਮਂਸਖਾਦਕੋ ਸਹਾਯਕਯਕ੍ਖੋ ਅਨੁਵਿਚਰਨ੍ਤਂ ਦਿਸ੍ਵਾ ‘‘ਅਯਂ ਮਮ ਅਤੀਤਭਵੇ ਸਹਾਯੋ’’ਤਿ ਞਤ੍ਵਾ, ‘‘ਸਮ੍ਮ, ਮਂ ਸਞ੍ਜਾਨਾਸੀ’’ਤਿ ਪੁਚ੍ਛਿ. ‘‘ਨ ਸਞ੍ਜਾਨਾਮੀ’’ਤਿ. ਅਥਸ੍ਸ ਪੁਰਿਮਭਵੇ ਕਤਕਾਰਣਂ ਕਥੇਸਿ. ਸੋ ਤਂ ਸਞ੍ਜਾਨਿਤ੍ਵਾ ਪਟਿਸਨ੍ਥਾਰਮਕਾਸਿ. ‘‘ਕਹਂ ਨਿਬ੍ਬਤ੍ਤੋਸੀ’’ਤਿ ਪੁਟ੍ਠੋ ਨਿਬ੍ਬਤ੍ਤਟ੍ਠਾਨਞ੍ਚ ਰਟ੍ਠਾ ਪਬ੍ਬਾਜਿਤਕਾਰਣਞ੍ਚ ਇਦਾਨਿ ਵਸਨਟ੍ਠਾਨਞ੍ਚ ਖਾਣੁਨਾ ਵਿਦ੍ਧਕਾਰਣਞ੍ਚ ਦੇਵਤਾਯ ਆਯਾਚਨਾਮੋਚਨਤ੍ਥਂ ਗਮਨਕਾਰਣਞ੍ਚ ਸਬ੍ਬਂ ਆਰੋਚੇਤ੍ਵਾ ‘‘ਤਯਾਪਿ ਮਮੇਤਂ ਕਿਚ੍ਚਂ ਨਿਤ੍ਥਰਿਤਬ੍ਬਂ, ਉਭੋਪਿ ਗਚ੍ਛਾਮ, ਸਮ੍ਮਾ’’ਤਿ ਆਹ. ‘‘ਸਮ੍ਮ ਨ ਗਚ੍ਛੇਯ੍ਯਾਹਂ, ਏਕਂ ਪਨ ਮੇ ਕਮ੍ਮਂ ਅਤ੍ਥਿ, ਅਹਂ ਖੋ ਪਨ ਅਨਗ੍ਘਂ ਪਦਲਕ੍ਖਣਂ ਨਾਮ ਏਕਂ ਮਨ੍ਤਂ ਜਾਨਾਮਿ, ਸੋ ਬਲਞ੍ਚ ਜਵਞ੍ਚ ਸਦ੍ਦਞ੍ਚ ਕਰੋਤਿ, ਤਂ ਮਨ੍ਤਂ ਗਣ੍ਹਾਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਯਕ੍ਖੋਪਿਸ੍ਸ ਤਂ ਦਤ੍ਵਾ ਪਕ੍ਕਾਮਿ.

ਪੋਰਿਸਾਦੋ ਮਨ੍ਤਂ ਉਗ੍ਗਹੇਤ੍ਵਾ ਤਤੋ ਪਟ੍ਠਾਯ ਵਾਤਜਵੋ ਅਤਿਸੂਰੋ ਅਹੋਸਿ. ਸੋ ਸਤ੍ਤਾਹਬ੍ਭਨ੍ਤਰੇਯੇਵ ਏਕਸਤਰਾਜਾਨੋ ਉਯ੍ਯਾਨਾਦੀਨਿ ਗਚ੍ਛਨ੍ਤੇ ਦਿਸ੍ਵਾ ਵਾਤਵੇਗੇਨ ਪਕ੍ਖਨ੍ਦਿਤ੍ਵਾ ‘‘ਅਹਂ ਅਰੇ ਮਨੁਸ੍ਸਚੋਰੋ ਪੋਰਿਸਾਦੋ’’ਤਿ ਨਾਮਂ ਸਾਵੇਤ੍ਵਾ ਵਗ੍ਗਨ੍ਤੋ ਨਦਨ੍ਤੋ ਭਯਪ੍ਪਤ੍ਤੇ ਕਤ੍ਵਾ ਪਾਦੇ ਗਹੇਤ੍ਵਾ ਅਧੋਸੀਸਕੇ ਕਤ੍ਵਾ ਪਣ੍ਹਿਯਾ ਸੀਸਂ ਪਹਰਨ੍ਤੋ ਵਾਤਵੇਗੇਨ ਨੇਤ੍ਵਾ ਹਤ੍ਥਤਲੇਸੁ ਛਿਦ੍ਦਾਨਿ ਕਤ੍ਵਾ ਰਜ੍ਜੁਯਾ ਆਵੁਨਿਤ੍ਵਾ ਨਿਗ੍ਰੋਧਰੁਕ੍ਖੇ ਓਲਮ੍ਬੇਸਿ ਅਗ੍ਗਪਾਦਙ੍ਗੁਲੀਹਿ ਭੂਮਿਯਂ ਫੁਸਮਾਨਾਹਿ. ਤੇ ਸਬ੍ਬੇ ਰਾਜਾਨੋ ਵਾਤੇ ਪਹਰਨ੍ਤੇ ਮਿਲਾਤਕੁਰਣ੍ਡਕਦਾਮਾਨਿ ਵਿਯ ਪਰਿਵਤ੍ਤਨ੍ਤਾ ਓਲਮ੍ਬਿਂਸੁ. ‘‘ਸੁਤਸੋਮੋ ਪਨ ਮੇ ਪਿਟ੍ਠਿਆਚਰਿਯੋ ਹੋਤਿ, ਸਚੇ ਗਣ੍ਹਿਸ੍ਸਾਮਿ, ਸਕਲਜਮ੍ਬੁਦੀਪੋ ਤੁਚ੍ਛੋ ਭਵਿਸ੍ਸਤੀ’’ਤਿ ਤਂ ਨ ਨੇਸਿ. ਸੋ ‘‘ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ ਅਗ੍ਗਿਂ ਕਤ੍ਵਾ ਸੂਲੇ ਤਚ੍ਛਨ੍ਤੋ ਨਿਸੀਦਿ. ਰੁਕ੍ਖਦੇਵਤਾ ਤਂ ਕਿਰਿਯਂ ਦਿਸ੍ਵਾ ‘‘ਮਯ੍ਹਂ ਕਿਰੇਸ ਬਲਿਕਮ੍ਮਂ ਕਰੋਤਿ, ਵਣਮ੍ਪਿਸ੍ਸ ਮਯਾ ਕਿਞ੍ਚਿ ਫਾਸੁਕਂ ਕਤਂ ਨਤ੍ਥਿ, ਇਦਾਨਿ ਇਮੇਸਂ ਮਹਾਵਿਨਾਸਂ ਕਰਿਸ੍ਸਤਿ, ਕਿਂ ਨੁ ਖੋ ਕਤ੍ਤਬ੍ਬ’’ਨ੍ਤਿ ਚਿਨ੍ਤੇਤ੍ਵਾ ‘‘ਅਹਂ ਏਤਂ ਵਾਰੇਤੁਂ ਨ ਸਕ੍ਖਿਸ੍ਸਾਮੀ’’ਤਿ ਚਾਤੁਮਹਾਰਾਜਿਕਾਨਂ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਕਥੇਤ੍ਵਾ ‘‘ਨਿਵਾਰੇਥ ਨ’’ਨ੍ਤਿ ਆਹ. ਤੇਹਿਪਿ ‘‘ਨ ਮਯਂ ਪੋਰਿਸਾਦਸ੍ਸ ਕਮ੍ਮਂ ਨਿਵਾਰੇਤੁਂ ਸਕ੍ਖਿਸ੍ਸਾਮਾ’’ਤਿ ਵੁਤ੍ਤੇ ‘‘ਕੋ ਸਕ੍ਖਿਸ੍ਸਤੀ’’ਤਿ ਪੁਚ੍ਛਿਤ੍ਵਾ ‘‘ਸਕ੍ਕੋ, ਦੇਵਰਾਜਾ’’ਤਿ ਸੁਤ੍ਵਾ ਸਕ੍ਕਂ ਉਪਸਙ੍ਕਮਿਤ੍ਵਾ ਤਮਤ੍ਥਂ ਕਥੇਤ੍ਵਾ ‘‘ਨਿਵਾਰੇਥ ਨ’’ਨ੍ਤਿ ਆਹ. ਸੋਪਿ ‘‘ਨਾਹਂ ਸਕ੍ਕੋਮਿ ਨਿਵਾਰੇਤੁਂ, ਸਮਤ੍ਥਂ ਪਨ ਆਚਿਕ੍ਖਿਸ੍ਸਾਮੀ’’ਤਿ ਵਤ੍ਵਾ ‘‘ਕੋਨਾਮੋ’’ਤਿ ਵੁਤ੍ਤੇ ‘‘ਸਦੇਵਕੇ ਲੋਕੇ ਅਞ੍ਞੋ ਨਤ੍ਥਿ, ਕੁਰੁਰਟ੍ਠੇ ਪਨ ਇਨ੍ਦਪਤ੍ਥਨਗਰੇ ਕੋਰਬ੍ਯਰਾਜਪੁਤ੍ਤੋ ਸੁਤਸੋਮੋ ਨਾਮ ਤਂ ਨਿਬ੍ਬਿਸੇਵਨਂ ਕਤ੍ਵਾ ਦਮੇਸ੍ਸਤਿ, ਰਾਜੂਨਞ੍ਚ ਜੀਵਿਤਂ ਦਸ੍ਸਤਿ, ਤਞ੍ਚ ਮਨੁਸ੍ਸਮਂਸਾ ਓਰਮਾਪੇਸ੍ਸਤਿ, ਸਕਲਜਮ੍ਬੁਦੀਪੇ ਅਮਤਂ ਵਿਯ ਧਮ੍ਮਂ ਅਭਿਸਿਞ੍ਚਿਸ੍ਸਤਿ, ਸਚੇਪਿ ਰਾਜੂਨਂ ਜੀਵਿਤਂ ਦਾਤੁਕਾਮੋ, ‘ਸੁਤਸੋਮਂ ਆਨੇਤ੍ਵਾ ਬਲਿਕਮ੍ਮਂ ਕਾਤੁਂ ਵਟ੍ਟਤੀ’ਤਿ ਵਦੇਹੀ’’ਤਿ ਆਹ.

ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਖਿਪ੍ਪਂ ਆਗਨ੍ਤ੍ਵਾ ਪਬ੍ਬਜਿਤਵੇਸੇਨ ਤਸ੍ਸ ਅਵਿਦੂਰੇ ਪਾਯਾਸਿ. ਸੋ ਪਦਸਦ੍ਦੇਨ ‘‘ਰਾਜਾ ਨੁ ਖੋ ਕੋਚਿ ਪਲਾਤੋ ਭਵਿਸ੍ਸਤੀ’’ਤਿ ਓਲੋਕੇਨ੍ਤੋ ਤਂ ਦਿਸ੍ਵਾ ‘‘ਪਬ੍ਬਜਿਤਾ ਨਾਮ ਖਤ੍ਤਿਯਾਵ, ਇਮਂ ਗਹੇਤ੍ਵਾ ਏਕਸਤਂ ਪੂਰੇਤ੍ਵਾ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ ਉਟ੍ਠਾਯ ਅਸਿਹਤ੍ਥੋ ਅਨੁਬਨ੍ਧਿ, ਤਿਯੋਜਨਂ ਅਨੁਬਨ੍ਧਿਤ੍ਵਾਪਿ ਤਂ ਪਾਪੁਣਿਤੁਂ ਨਾਸਕ੍ਖਿ, ਗਤ੍ਤੇਹਿ ਸੇਦਾ ਮੁਚ੍ਚਿਂਸੁ. ਸੋ ਚਿਨ੍ਤੇਸਿ – ‘‘ਅਹਂ ਪੁਬ੍ਬੇ ਹਤ੍ਥਿਮ੍ਪਿ ਅਸ੍ਸਮ੍ਪਿ ਰਥਮ੍ਪਿ ਧਾਵਨ੍ਤਂ ਅਨੁਬਨ੍ਧਿਤ੍ਵਾ ਗਣ੍ਹਾਮਿ, ਅਜ੍ਜ ਇਮਂ ਪਬ੍ਬਜਿਤਂ ਸਕਾਯ ਗਤਿਯਾ ਗਚ੍ਛਨ੍ਤਂ ਸਬ੍ਬਥਾਮੇਨ ਧਾਵਨ੍ਤੋਪਿ ਗਣ੍ਹਿਤੁਂ ਨ ਸਕ੍ਕੋਮਿ, ਕਿਂ ਨੁ ਖੋ ਕਾਰਣ’’ਨ੍ਤਿ. ਤਤੋ ਸੋ ‘‘ਪਬ੍ਬਜਿਤਾ ਨਾਮ ਵਚਨਕਰਾ ਹੋਨ੍ਤਿ, ‘ਤਿਟ੍ਠਾ’ਤਿ ਨਂ ਵਤ੍ਵਾ ਠਿਤਂ ਗਹੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਤਿਟ੍ਠ, ਸਮਣਾ’’ਤਿ ਆਹ. ‘‘ਅਹਂ ਤਾਵ ਠਿਤੋ, ਤ੍ਵਂ ਪਨ ਧਾਵਿਤੁਂ ਵਾਯਾਮਮਕਾਸੀ’’ਤਿ. ਅਥ ਨਂ, ‘‘ਭੋ, ਪਬ੍ਬਜਿਤਾ ਨਾਮ ਜੀਵਿਤਹੇਤੁਪਿ ਅਲਿਕਂ ਨ ਭਣਨ੍ਤਿ, ਤ੍ਵਂ ਪਨ ਮੁਸਾਵਾਦਂ ਕਥੇਸੀ’’ਤਿ ਵਤ੍ਵਾ ਗਾਥਮਾਹ –

੩੯੩.

‘‘ਤਿਟ੍ਠਾਹੀਤਿ ਮਯਾ ਵੁਤ੍ਤੋ, ਸੋ ਤ੍ਵਂ ਗਚ੍ਛਸਿ ਪਮ੍ਮੁਖੋ;

ਅਟ੍ਠਿਤੋ ਤ੍ਵਂ ਠਿਤੋਮ੍ਹੀਤਿ, ਲਪਸਿ ਬ੍ਰਹ੍ਮਚਾਰਿਨਿ;

ਇਦਂ ਤੇ ਸਮਣਾਯੁਤ੍ਤਂ, ਅਸਿਞ੍ਚ ਮੇ ਮਞ੍ਞਸਿ ਕਙ੍ਕਪਤ੍ਤ’’ਨ੍ਤਿ.

ਤਸ੍ਸਤ੍ਥੋ – ਸਮਣ, ਤਿਟ੍ਠਾਹਿ ਇਤਿ ਵਚਨਂ ਮਯਾ ਵੁਤ੍ਤੋ ਸੋ ਤ੍ਵਂ ਪਮ੍ਮੁਖੋ ਪਰਮ੍ਮੁਖੋ ਹੁਤ੍ਵਾ ਗਚ੍ਛਸਿ, ਬ੍ਰਹ੍ਮਚਾਰਿਨਿ ਅਟ੍ਠਿਤੋ ਸਮਾਨੋ ਤ੍ਵਂ ਠਿਤੋ ਅਮ੍ਹਿ ਇਤਿ ਲਪਸਿ, ਅਸਿਞ੍ਚ ਮੇ ਕਙ੍ਕਪਤ੍ਤਂ ਮਞ੍ਞਸੀਤਿ.

ਤਤੋ ਦੇਵਤਾ ਗਾਥਾਦ੍ਵਯਮਾਹ –

੩੯੪.

‘‘ਠਿਤੋਹਮਸ੍ਮੀ ਸਧਮ੍ਮੇਸੁ ਰਾਜ, ਨ ਨਾਮਗੋਤ੍ਤਂ ਪਰਿਵਤ੍ਤਯਾਮਿ;

ਚੋਰਞ੍ਚ ਲੋਕੇ ਅਠਿਤਂ ਵਦਨ੍ਤਿ;

ਆਪਾਯਿਕਂ ਨੇਰਯਿਕਂ ਇਤੋ ਚੁਤਂ.

੩੯੫.

‘‘ਸਚੇ ਤ੍ਵਂ ਸਦ੍ਦਹਸਿ ਰਾਜ, ਸੁਤਂ ਗਣ੍ਹਾਹਿ ਖਤ੍ਤਿਯ;

ਤੇਨ ਯਞ੍ਞਂ ਯਜਿਤ੍ਵਾਨ, ਏਵਂ ਸਗ੍ਗਂ ਗਮਿਸ੍ਸਸੀ’’ਤਿ.

ਤਤ੍ਥ ਸਧਮ੍ਮੇਸੂਤਿ, ਮਹਾਰਾਜ, ਅਹਂ ਸਕੇਸੁ ਦਸਸੁ ਕੁਸਲਕਮ੍ਮਪਥਧਮ੍ਮੇਸੁ ਠਿਤੋ ਅਸ੍ਮਿ ਭਵਾਮਿ. ਨ ਨਾਮਗੋਤ੍ਤਨ੍ਤਿ ਤ੍ਵਂ ਪੁਬ੍ਬੇ ਦਹਰਕਾਲੇ ਬ੍ਰਹ੍ਮਦਤ੍ਤੋ ਹੁਤ੍ਵਾ ਪਿਤਰਿ ਕਾਲਕਤੇ ਬਾਰਾਣਸਿਂ ਰਜ੍ਜਂ ਲਭਿਤ੍ਵਾ ਬਾਰਾਣਸਿਰਾਜਾ ਜਾਤੋ, ਤਂ ਨਾਮਂ ਜਹਿਤ੍ਵਾ ਪੋਰਿਸਾਦੋ ਹੁਤ੍ਵਾ ਇਦਾਨਿ ਕਮ੍ਮਾਸਪਾਦੋ ਜਾਤੋ, ਖਤ੍ਤਿਯਕੁਲੇ ਜਾਤੋਪਿ ਅਭਕ੍ਖਂ ਮਨੁਸ੍ਸਮਂਸਂ ਯਸ੍ਮਾ ਭਕ੍ਖੇਸਿ, ਤਸ੍ਮਾ ਅਤ੍ਤਨੋ ਨਾਮਗੋਤ੍ਤਂ ਯਥਾ ਪਰਿਵਤ੍ਤੇਸਿ, ਤਥਾ ਅਹਂ ਅਤ੍ਤਨੋ ਨਾਮਗੋਤ੍ਤਂ ਨ ਪਰਿਵਤ੍ਤਯਾਮਿ. ਚੋਰਞ੍ਚਾਤਿ ਲੋਕੇ ਚੋਰਞ੍ਚ ਦਸਕੁਸਲਕਮ੍ਮਪਥੇਸੁ ਅਠਿਤਂ ਨਾਮ ਵਦਨ੍ਤਿ. ਇਤੋ ਚੁਤਨ੍ਤਿ ਇਤੋ ਚੁਤਂ ਹੁਤ੍ਵਾ ਅਪਾਯੇ ਨਿਰਯੇ ਪਤਿਟ੍ਠਿਤਂ. ਖਤ੍ਤਿਯ, ਭੂਮਿਪਾਲ ਮਹਾਰਾਜ, ਤ੍ਵਂ ਮਮ ਵਚਨਂ ਸਚੇ ਸਦ੍ਦਹਸਿ, ਸੁਤਸੋਮਂ ਗਣ੍ਹਾਹਿ, ਤੇਨ ਸੁਤਸੋਮੇਨ ਯਞ੍ਞਂ ਯਜਿਤ੍ਵਾਨ ਏਵਂ ਸਗ੍ਗਂ ਗਮਿਸ੍ਸਸਿ. ਭੋ, ਪੋਰਿਸਾਦ ਮੁਸਾਵਾਦਿ ਤਯਾ ਮਯ੍ਹਂ ‘‘ਸਕਲਜਮ੍ਬੁਦੀਪੇ ਰਾਜਾਨੋ ਆਨੇਤ੍ਵਾ ਬਹਿਕਮ੍ਮਂ ਕਰਿਸ੍ਸਾਮੀ’’ਤਿ ਪਟਿਸ੍ਸੁਤਂ, ਇਦਾਨਿ ਯੇ ਵਾ ਤੇ ਵਾ ਦੁਬ੍ਬਲਰਾਜਾਨੋ ਆਨੇਸਿ, ਜਮ੍ਬੁਦੀਪਤਲੇ ਜੇਟ੍ਠਕਂ ਸੁਤਸੋਮਰਾਜਾਨਂ ਸਚੇ ਤ੍ਵਂ ਨ ਆਨੇਸ੍ਸਸਿ, ਵਚਨਂ ਤੇ ਮੁਸਾ ਨਾਮ ਹੋਤਿ, ਤਸ੍ਮਾ ਸੁਤਸੋਮਂ ਗਣ੍ਹਾਹੀਤਿ.

ਏਵਞ੍ਚ ਪਨ ਵਤ੍ਵਾ ਦੇਵਤਾ ਪਬ੍ਬਜਿਤਵੇਸਂ ਅਨ੍ਤਰਧਾਪੇਤ੍ਵਾ ਸਕੇਨ ਵਣ੍ਣੇਨ ਆਕਾਸੇ ਤਰੁਣਸੂਰਿਯੋ ਵਿਯ ਜਲਮਾਨਾ ਅਟ੍ਠਾਸਿ. ਸੋ ਤਸ੍ਸਾ ਕਥਂ ਸੁਤ੍ਵਾ ਰੂਪਞ੍ਚ ਓਲੋਕੇਤ੍ਵਾ ‘‘ਕਾਸਿ ਤ੍ਵ’’ਨ੍ਤਿ ਆਹ. ਇਮਸ੍ਮਿਂ ‘‘ਰੁਕ੍ਖੇ ਨਿਬ੍ਬਤ੍ਤਦੇਵਤਾ’’ਤਿ. ਸੋ ‘‘ਦਿਟ੍ਠਾ ਮੇ ਅਤ੍ਤਨੋ, ਦੇਵਤਾ’’ਤਿ ਤੁਸ੍ਸਿਤ੍ਵਾ, ‘‘ਸਾਮਿ ਦੇਵਰਾਜ, ਮਾ ਸੁਤਸੋਮਸ੍ਸ ਕਾਰਣਾ ਚਿਨ੍ਤਯਿ, ਅਤ੍ਤਨੋ ਰੁਕ੍ਖਂ ਪਵਿਸਾ’’ਤਿ ਆਹ. ਦੇਵਤਾ ਤਸ੍ਸ ਪਸ੍ਸਨ੍ਤਸ੍ਸੇਵ ਰੁਕ੍ਖਂ ਪਾਵਿਸਿ. ਤਸ੍ਮਿਂ ਖਣੇ ਸੂਰਿਯੋ ਅਤ੍ਥਙ੍ਗਤੋ, ਚਨ੍ਦੋ ਉਗ੍ਗਤੋ. ਪੋਰਿਸਾਦੋ ਵੇਦਙ੍ਗਕੁਸਲੋ ਨਕ੍ਖਤ੍ਤਚਾਰਂ ਜਾਨਾਤਿ. ਸੋ ਨਭਂ ਓਲੋਕੇਤ੍ਵਾ ‘‘ਸ੍ਵੇ ਫੁਸ੍ਸਨਕ੍ਖਤ੍ਤਂ ਭਵਿਸ੍ਸਤਿ, ਸੁਤਸੋਮੋ ਨ੍ਹਾਯਿਤੁਂ ਉਯ੍ਯਾਨਂ ਗਮਿਸ੍ਸਤਿ, ਤਤ੍ਥ ਗਣ੍ਹਿਸ੍ਸਾਮਿ, ਆਰਕ੍ਖੋ ਪਨਸ੍ਸ ਮਹਾ ਭਵਿਸ੍ਸਤਿ, ਸਮਨ੍ਤਾ ਤਿਯੋਜਨਂ ਸਕਲਨਗਰਵਾਸਿਨੋ ਰਕ੍ਖਨ੍ਤਾ ਚਰਿਸ੍ਸਨ੍ਤਿ, ਅਸਂਵਿਹਿਤੇ ਆਰਕ੍ਖੇ ਪਠਮਯਾਮੇਯੇਵ ਮਿਗਾਜਿਨਂ ਉਯ੍ਯਾਨਂ ਗਨ੍ਤ੍ਵਾ ਮਙ੍ਗਲਪੋਕ੍ਖਰਣਿਂ ਓਤਰਿਤ੍ਵਾ ਠਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਤ੍ਥ ਗਨ੍ਤ੍ਵਾ ਪੋਕ੍ਖਰਣਿਂ ਓਰੁਯ੍ਹ ਪਦੁਮਪਤ੍ਤੇਨ ਸੀਸਂ ਪਟਿਚ੍ਛਾਦੇਤ੍ਵਾ ਅਟ੍ਠਾਸਿ. ਤਸ੍ਸ ਤੇਜੇਨ ਮਚ੍ਛਕਚ੍ਛਪਾਦਯੋ ਓਸਕ੍ਕਿਤ੍ਵਾ ਉਦਕਪਰਿਯਨ੍ਤੇ ਵਗ੍ਗਵਗ੍ਗਾ ਹੁਤ੍ਵਾ ਵਿਚਰਿਂਸੁ.

ਕੁਤੋ ਪਨ ਲਦ੍ਧੋਯਂ ਤੇਜੋਤਿ? ਪੁਬ੍ਬਯੋਗਵਸੇਨ. ਸੋ ਹਿ ਕਸਪਦਸਬਲਸ੍ਸ ਕਾਲੇ ਖੀਰਸਲਾਕਭਤ੍ਤਂ ਪਟ੍ਠਪੇਸਿ, ਤੇਨ ਮਹਾਥਾਮੋ ਅਹੋਸਿ. ਅਗ੍ਗਿਸਾਲਞ੍ਚ ਕਾਰੇਤ੍ਵਾ ਭਿਕ੍ਖੁਸਙ੍ਘਸ੍ਸ ਸੀਤਵਿਨੋਦਨਤ੍ਥਂ ਅਗ੍ਗਿਞ੍ਚ ਦਾਰੂਨਿ ਚ ਦਾਰੁਚ੍ਛੇਦਨਵਾਸਿਞ੍ਚ ਫਰਸੁਞ੍ਚ ਅਦਾਸਿ, ਤੇਨ ਤੇਜਵਾ ਅਹੋਸਿ.

ਏਵਂ ਤਸ੍ਮਿਂ ਅਨ੍ਤੋਉਯ੍ਯਾਨਂ ਗਤੇਯੇਵ ਬਲਵਪਚ੍ਚੂਸਸਮਯੇ ਸਮਨ੍ਤਾ ਤਿਯੋਜਨਂ ਆਰਕ੍ਖਂ ਗਣ੍ਹਿਂਸੁ. ਰਾਜਾਪਿ ਪਾਤੋਵ ਭੁਤ੍ਤਪਾਤਰਾਸੋ ਅਲਙ੍ਕਤਹਤ੍ਥਿਕ੍ਖਨ੍ਧਵਰਗਤੋ ਚਤੁਰਙ੍ਗਿਨਿਯਾ ਸੇਨਾਯ ਪਰਿਵੁਤੋ ਨਗਰਤੋ ਨਿਕ੍ਖਮਿ. ਤਦਾ ਤਕ੍ਕਸਿਲਤੋ ਨਨ੍ਦੋ ਨਾਮ ਬ੍ਰਾਹ੍ਮਣੋ ਚਤਸ੍ਸੋ ਸਤਾਰਹਾ ਗਾਥਾਯੋ ਆਦਾਯ ਵੀਸਤਿਯੋਨਜਸਤਂ ਮਗ੍ਗਂ ਅਤਿਕ੍ਕਮਿਤ੍ਵਾ ਤਂ ਨਗਰਂ ਪਤ੍ਵਾ ਦ੍ਵਾਰਗਾਮੇ ਵਸਿਤ੍ਵਾ ਸੂਰਿਯੇ ਉਗ੍ਗਤੇ ਨਗਰਂ ਪਵਿਸਨ੍ਤੋ ਰਾਜਾਨਂ ਪਾਚੀਨਦ੍ਵਾਰੇਨ ਨਿਕ੍ਖਨ੍ਤਂ ਦਿਸ੍ਵਾ ਹਤ੍ਥਂ ਪਸਾਰੇਤ੍ਵਾ ਜਯਾਪੇਸਿ. ਰਾਜਾ ਦਿਸਾਚਕ੍ਖੁਕੋ ਹੁਤ੍ਵਾ ਗਚ੍ਛਨ੍ਤੋ ਉਨ੍ਨਤਪ੍ਪਦੇਸੇ ਠਿਤਸ੍ਸ ਬ੍ਰਾਹ੍ਮਣਸ੍ਸ ਪਸਾਰਿਤਹਤ੍ਥਂ ਦਿਸ੍ਵਾ ਹਤ੍ਥਿਨਾ ਤਂ ਉਪਸਙ੍ਕਮਿਤ੍ਵਾ ਪੁਚ੍ਛਿ –

੩੯੬.

‘‘ਕਿਸ੍ਮਿਂ ਨੁ ਰਟ੍ਠੇ ਤਵ ਜਾਤਿਭੂਮਿ, ਅਥ ਕੇਨ ਅਤ੍ਥੇਨ ਇਧਾਨੁਪਤ੍ਤੋ;

ਅਕ੍ਖਾਹਿ ਮੇ ਬ੍ਰਾਹ੍ਮਣ ਏਤਮਤ੍ਥਂ, ਕਿਮਿਚ੍ਛਸੀ ਦੇਮਿ ਤਯਜ੍ਜ ਪਤ੍ਥਿਤ’’ਨ੍ਤਿ.

ਤਸ੍ਸਤ੍ਥੋ – ਭੋ ਬ੍ਰਾਹ੍ਮਣ, ਤਵ ਜਾਤਿਭੂਮਿ ਕਿਸ੍ਮਿਂ ਰਟ੍ਠੇ ਅਤ੍ਥਿ ਨੁ, ਕੇਨ ਅਤ੍ਥੇਨ ਪਯੋਜਨੇਨ ਹੇਤੁਭੂਤੇਨ ਇਦ ਇਮਸ੍ਮਿਂ ਨਗਰੇ ਅਨੁਪ੍ਪਤ੍ਤੋ, ਭੋ ਬ੍ਰਾਹ੍ਮਣ, ਮਯਾ ਪੁਚ੍ਛਿਤੋ ਸੋ ਤ੍ਵਂ ਏਤਮਤ੍ਥਂ ਏਤਂ ਪਯੋਜਨਂ ਮੇ ਮਯ੍ਹਂ ਅਕ੍ਖਾਹਿ ਕਥੇਹਿ, ਤਯਾ ਪਤ੍ਥਿਤਵਤ੍ਥੁਂ ਤੇ ਤੁਯ੍ਹਂ ਅਜ੍ਜ ਇਦਾਨਿ ਦਦਾਮਿ, ਕਿਂ ਵਤ੍ਥੁਂ ਇਚ੍ਛਸੀਤਿ.

ਅਥ ਨਂ ਸੋ ਗਾਥਮਾਹ –

੩੯੭.

‘‘ਗਾਥਾ ਚਤਸ੍ਸੋ ਧਰਣੀਮਹਿਸ੍ਸਰ, ਸੁਗਮ੍ਭੀਰਤ੍ਥਾ ਵਰਸਾਗਰੂਪਮਾ;

ਤਵੇਵ ਅਤ੍ਥਾਯ ਇਧਾਗਤੋਸ੍ਮਿ, ਸੁਣੋਹਿ ਗਾਥਾ ਪਰਮਤ੍ਥਸਂਹਿਤਾ’’ਤਿ.

ਤਤ੍ਥ ਧਰਣੀਮਹਿਸ੍ਸਰਾਤਿ ਭੂਮਿਪਾਲ ਚਤਸ੍ਸੋ ਗਾਥਾ ਕਿਂ ਭੂਤਾ?. ਸੁਗਮ੍ਭੀਰਤ੍ਥਾ ਵਰਸਾਗਰੂਪਮਾ, ਤਵੇਵ ਤਵ ਏਵ ਅਤ੍ਥਾਯ ਇਧ ਠਾਨਂ ਅਨੁਪ੍ਪਤ੍ਤੋ ਅਸ੍ਮਿ ਭਵਾਮਿ. ਸੁਣੋਹੀਤਿ ਕਸ੍ਸਪਦਸਬਲੇਨ ਦੇਸਿਤਾ ਪਰਮਤ੍ਥਸਂਹਿਤਾ ਇਮਾ ਸਤਾਰਹਾ ਗਾਥਾਯੋ ਸੁਣੋਹੀਤਿ ਅਤ੍ਥੋ.

ਇਤਿ ਵਤ੍ਵਾ, ‘‘ਮਹਾਰਾਜ, ਇਮਾ ਕਸ੍ਸਪਦਸਬਲੇਨ ਦੇਸਿਤਾ ਚਤਸ੍ਸੋ ਸਤਾਰਹਾ ਗਾਥਾਯੋ ‘‘ਤੁਮ੍ਹੇ ਸੁਤਵਿਤ੍ਤਕਾ’ਤਿ ਸੁਤ੍ਵਾ ਤੁਮ੍ਹਾਕਂ ਦੇਸੇਤੁਂ ਆਗਤੋਮ੍ਹੀ’’ਤਿ ਆਹ. ਰਾਜਾ ਤੁਟ੍ਠਮਾਨਸੋ ਹੁਤ੍ਵਾ, ‘‘ਆਚਰਿਯ, ਸੁਟ੍ਠੁ ਤੇ ਆਗਤਂ, ਮਯਾ ਪਨ ਨਿਵਤ੍ਤਿਤੁਂ ਨ ਸਕ੍ਕਾ, ਅਜ੍ਜ ਫੁਸ੍ਸਨਕ੍ਖਤ੍ਤਯੋਗੇਨ ਸੀਸਂ ਨ੍ਹਾਯਿਤੁਂ ਆਗਤੋਮ੍ਹਿ, ਅਹਂ ਪੁਨਦਿਵਸੇ ਆਗਨ੍ਤ੍ਵਾ ਸੋਸ੍ਸਾਮਿ, ਤ੍ਵਂ ਮਾ ਉਕ੍ਕਣ੍ਠੀ’’ਤਿ ਵਤ੍ਵਾ ‘‘ਗਚ੍ਛਥ ਬ੍ਰਾਹ੍ਮਣਸ੍ਸ ਅਸੁਕਗੇਹੇ ਸਯਨਂ ਪਞ੍ਞਾਪੇਤ੍ਵਾ ਘਾਸਚ੍ਛਾਦਨਂ ਸਂਵਿਦਹਥਾ’’ਤਿ ਅਮਚ੍ਚੇ ਆਣਾਪੇਤ੍ਵਾ ਉਯ੍ਯਾਨਂ ਪਾਵਿਸਿ. ਤਂ ਅਟ੍ਠਾਰਸਹਤ੍ਥੇਨ ਪਾਕਾਰੇਨ ਪਰਿਕ੍ਖਿਤ੍ਤਂ ਅਹੋਸਿ. ਤਂ ਅਞ੍ਞਮਞ੍ਞਂ ਸਙ੍ਘਟ੍ਟੇਨ੍ਤਾ ਸਮਨ੍ਤਾ ਹਤ੍ਥਿਨੋ ਪਰਿਕ੍ਖਿਪਿਂਸੁ, ਤਤੋ ਅਸ੍ਸਾ, ਤਤੋ ਰਥਾ, ਤਤੋ ਧਨੁਗ੍ਗਹਾ, ਤਤੋ ਪਤ੍ਤੀਤਿ, ਸਙ੍ਖੁਭਿਤਮਹਾਸਮੁਦ੍ਦੋ ਵਿਯ ਉਨ੍ਨਾਦੇਨ੍ਤੋ ਬਲਕਾਯੋ ਅਹੋਸਿ. ਅਥ ਰਾਜਾ ਓਲ਼ਾਰਿਕਾਨਿ ਆਭਰਣਾਨਿ ਓਮੁਞ੍ਚਿਤ੍ਵਾ ਮਸ੍ਸੁਕਮ੍ਮਂ ਕਾਰੇਤ੍ਵਾ ਉਬ੍ਬਟ੍ਟਿਤਸਰੀਰੋ ਪੋਕ੍ਖਰਣਿਯਾ ਅਨ੍ਤੋ ਰਾਜਵਿਭਵੇਨ ਨ੍ਹਤ੍ਵਾ ਪਚ੍ਚੁਤ੍ਤਰਿਤ੍ਵਾ ਉਦਕਗ੍ਗਹਣਸਾਟਕੇਨ ਨਿਵਾਸੇਤ੍ਵਾ ਅਟ੍ਠਾਸਿ. ਅਥਸ੍ਸ ਦੁਸ੍ਸਗਨ੍ਧਮਾਲਾਲਙ੍ਕਾਰੇ ਉਪਨਯਿਂਸੁ. ਪੋਰਿਸਾਦੋ ਚਿਨ੍ਤੇਸਿ – ‘‘ਰਾਜਾ ਅਲਙ੍ਕਤਕਾਲੇ ਭਾਰਿਕੋ ਭਵਿਸ੍ਸਤਿ, ਸਲ੍ਲਹੁਕਕਾਲੇਯੇਵ ਨਂ ਗਣ੍ਹਿਸ੍ਸਾਮੀ’’ਤਿ. ਸੋ ਨਦਨ੍ਤੋ ਵਗ੍ਗਨ੍ਤੋ ਉਦਕੇ ਮਚ੍ਛਂ ਆਲੁਲ਼ੇਨ੍ਤੋ ਵਿਜ੍ਜੁਲਤਾ ਵਿਯ ਮਤ੍ਥਕੇ ਖਗ੍ਗਂ ਪਰਿਬ੍ਭਮੇਨ੍ਤੋ ‘‘ਅਹਂ ਅਰੇ ਮਨੁਸ੍ਸਚੋਰੋ ਪੋਰਿਸਾਦੋ’’ਤਿ ਨਾਮਂ ਸਾਵੇਤ੍ਵਾ ਅਙ੍ਗੁਲਿਂ ਨਲਾਟੇ ਠਪੇਤ੍ਵਾ ਉਦਕਾ ਉਤ੍ਤਰਿ. ਤਸ੍ਸ ਸਦ੍ਦਂ ਸੁਤ੍ਵਾਵ ਹਤ੍ਥਾਰੋਹਾ ਹਤ੍ਥੀਹਿ, ਅਸ੍ਸਾਰੋਹਾ ਅਸ੍ਸੇਹਿ, ਰਥਾਰੋਹਾ ਰਥੇਹਿ ਭਸ੍ਸਿਂਸੁ. ਬਲਕਾਯੋ ਗਹਿਤਗਹਿਤਾਨਿ ਆਵੁਧਾਨਿ ਛਡ੍ਡੇਤ੍ਵਾ ਉਰੇਨ ਭੂਮਿਯਂ ਨਿਪਜ੍ਜਿ.

ਪੋਰਿਸਾਦੋ ਸੁਤਸੋਮਂ ਉਕ੍ਖਿਪਿਤ੍ਵਾ ਗਣ੍ਹਿ, ਸੇਸਰਾਜਾਨੋ ਪਾਦੇ ਗਹੇਤ੍ਵਾ ਅਧੋਸੀਸਕੇ ਕਤ੍ਵਾ ਪਣ੍ਹਿਯਾ ਸੀਸਂ ਪਹਰਨ੍ਤੋ ਗਚ੍ਛਤਿ. ਬੋਧਿਸਤ੍ਤਂ ਪਨ ਉਪਗਨ੍ਤ੍ਵਾ ਓਨਤੋ ਉਕ੍ਖਿਪਿਤ੍ਵਾ ਖਨ੍ਧੇ ਨਿਸੀਦਾਪੇਸਿ. ਸੋ ‘‘ਦ੍ਵਾਰੇਨ ਗਮਨਂ ਪਪਞ੍ਚੋ ਭਵਿਸ੍ਸਤੀ’’ਤਿ ਸਮ੍ਮੁਖਟ੍ਠਾਨੇਯੇਵ ਅਟ੍ਠਾਰਸਹਤ੍ਥਂ ਪਾਕਾਰਂ ਲਙ੍ਘਿਤ੍ਵਾ ਪੁਰਤੋ ਗਲਿਤਮਦਮਤ੍ਤਵਾਰਣਕੁਮ੍ਭੇ ਅਕ੍ਕਮਿਤ੍ਵਾ ਪਬ੍ਬਤਕੂਟਾਨਿ ਪਾਤੇਨ੍ਤੋ ਵਿਯ ਵਾਤਜਵਾਨਂ ਅਸ੍ਸਤਰਾਨਂ ਪਿਟ੍ਠੇ ਅਕ੍ਕਮਨ੍ਤੋ ਪਾਤੇਤ੍ਵਾ ਰਥਧੁਰਰਥਸੀਸੇਸੁ ਅਕ੍ਕਮਿਤ੍ਵਾ ਭਮਿਕਂ ਭਮਨ੍ਤੋ ਵਿਯ ਨੀਲਫਲਕਾਨਿ ਨਿਗ੍ਰੋਧਪਤ੍ਤਾਨਿ ਮਦ੍ਦਨ੍ਤੋ ਵਿਯ ਏਕਵੇਗੇਨੇਵ ਤਿਯੋਜਨਮਤ੍ਤਂ ਮਗ੍ਗਂ ਗਨ੍ਤ੍ਵਾ ‘‘ਅਤ੍ਥਿ ਨੁ ਖੋ ਕੋਚਿ ਸੁਤਸੋਮਸ੍ਸਤ੍ਥਾਯ ਪਚ੍ਛਤੋ ਆਗਚ੍ਛਨ੍ਤੋ’’ਤਿ ਓਲੋਕੇਤ੍ਵਾ ਕਞ੍ਚਿ ਅਦਿਤ੍ਵਾ ਸਣਿਕਂ ਗਚ੍ਛਨ੍ਤੋ ਸੁਤਸੋਮਸ੍ਸ ਕੇਸੇਹਿ ਉਦਕਬਿਨ੍ਦੂਨਿ ਅਤ੍ਤਨੋ ਉਰੇ ਪਤਿਤਾਨਿ ਦਿਸ੍ਵਾ ‘‘ਮਰਣਸ੍ਸ ਅਭਾਯਨ੍ਤੋ ਨਾਮ ਨਤ੍ਥਿ, ਸੁਤਸੋਮੋਪਿ ਮਰਣਭਯੇਨ ਰੋਦਤਿ ਮਞ੍ਞੇ’’ਤਿ ਚਿਨ੍ਤੇਤ੍ਵਾ ਆਹ –

੩੯੮.

‘‘ਨ ਵੇ ਰੁਦਨ੍ਤਿ ਮਤਿਮਨ੍ਤੋ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਦੀਪਞ੍ਹਿ ਏਤਂ ਪਰਮਂ ਨਰਾਨਂ, ਯਂ ਪਣ੍ਡਿਤਾ ਸੋਕਨੁਦਾ ਭਵਨ੍ਤਿ.

੩੯੯.

‘‘ਅਤ੍ਤਾਨਂ ਞਾਤੀ ਉਦਾਹੁ ਪੁਤ੍ਤਦਾਰਂ, ਧਞ੍ਞਂ ਧਨਂ ਰਜਤਂ ਜਾਤਰੂਪਂ;

ਕਿਮੇਵ ਤ੍ਵਂ ਸੁਤਸੋਮਾਨੁਤਪ੍ਪੇ, ਕੋਰਬ੍ਯਸੇਟ੍ਠ ਵਚਨਂ ਸੁਣੋਮ ਤੇਤ’’ਨ੍ਤਿ.

ਤਤ੍ਥ, ਭੋ ਸੁਤਸੋਮ ਮਹਾਰਾਜ, ਯੇ ਪਣ੍ਡਿਤਾ ਕਿਂ ਭੂਤਾ? ਮਤਿਮਨ੍ਤੋ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਜਾਨਨਪਞ੍ਞਾਯ ਸਮਨ੍ਨਾਗਤਾ, ਸਪ੍ਪਞ੍ਞਾ ਵਿਚਰਣਪਞ੍ਞਾਯ ਸਮਨ੍ਨਾਗਤਾ, ਬਹੁਸ੍ਸੁਤਾ ਬਹੁਸ੍ਸੁਤਧਰਾ ਬਹੁਟ੍ਠਾਨਚਿਨ੍ਤਿਨੋ ਬਹੁਕਾਰਣਚਿਨ੍ਤਨਸੀਲਾ, ਤੇ ਪਣ੍ਡਿਤਾ ਮਰਣਭਯੇ ਉਪ੍ਪਨ੍ਨੇ ਸਤਿ ਭੀਤਾ ਹੁਤ੍ਵਾ ਵੇ ਏਕਨ੍ਤੇਨ ਨ ਰੁਦਨ੍ਤਿ ਨ ਪਰਿਦੇਵਨ੍ਤਿ. ਦੀਪਂ ਹੀਤਿ, ਭੋ ਸੁਤਸੋਮ ਮਹਾਰਾਜ ਹਿ ਕਸ੍ਮਾ ਪਨ ਵਦਾਮਿ, ਮਹਾਸਮੁਦ੍ਦੇ ਭਿਨ੍ਨਨਾਵਾਨਂ ਵਾਣਿਜਕਾਨਂ ਜਨਾਨਂ ਪਤਿਟ੍ਠਾਭੂਤਂ ਮਹਾਦੀਪਂ ਇਵ, ਏਵਮ੍ਪਿ ਤਥਾ ਏਤਂ ਪਣ੍ਡਿਤਂ ਅਪ੍ਪਟਿਸਰਣਾਨਂ ਨਰਾਨਂ ਪਰਮਂ. ਯਂ ਯੇਨ ਕਾਰਣੇਨ ਯੇ ਪਣ੍ਡਿਤਾ ਸੋਕੀਨਂ ਜਨਾਨਂ ਸੋਕਨੁਦਾ ਭਵਨ੍ਤਿ, ਭੋ ਸੁਤਸੋਮ ਮਹਾਰਾਜ, ਤ੍ਵਂ ਮਰਣਭਯੇਨ ਪਰਿਦੇਵੀਤਿ ਮਞ੍ਞੇ ਮਞ੍ਞਾਮਿ. ਅਤ੍ਤਾਨਨ੍ਤਿ, ਭੋ ਸੁਤਸੋਮ ਮਹਾਰਾਜ, ਅਤ੍ਤਹੇਤੁ ਉਦਾਹੁ ਞਾਤਿਹੇਤੁ ਪੁਤ੍ਤਦਾਰਹੇਤੁ ਉਦਾਹੁ ਧਞ੍ਞਧਨਰਜਤਜਾਤਰੂਪਹੇਤੁ ਕਿਮੇਵ ਤ੍ਵਂ ਕਿਮੇਵ ਧਮ੍ਮਜਾਤਂ ਤ੍ਵਂ ਅਨੁਤਪ੍ਪੇ ਅਨੁਤਪ੍ਪੇਯ੍ਯਾਸਿ. ਕੋਰਬ੍ਯਸੇਟ੍ਠ ਕੁਰੁਰਟ੍ਠਵਾਸੀਨਂ ਸੇਟ੍ਠ ਉਤ੍ਤਮ, ਭੋ ਮਹਾਰਾਜ, ਏਤਂ ਤਵ ਵਚਨਂ ਸੁਣੋਮਾਤਿ.

ਸੁਤਸੋਮੋ ਆਹ –

੪੦੦.

‘‘ਨੇਵਾਹਮਤ੍ਤਾਨਮਨੁਤ੍ਥੁਨਾਮਿ, ਨ ਪੁਤ੍ਤਦਾਰਂ ਨ ਧਨਂ ਨ ਰਟ੍ਠਂ;

ਸਤਞ੍ਚ ਧਮ੍ਮੋ ਚਰਿਤੋ ਪੁਰਾਣੋ, ਤਂ ਸਙ੍ਗਰਂ ਬ੍ਰਾਹ੍ਮਣਸ੍ਸਾਨੁਤਪ੍ਪੇ.

੪੦੧.

‘‘ਕਤੋ ਮਯਾ ਸਙ੍ਗਰੋ ਬ੍ਰਾਹ੍ਮਣੇਨ, ਰਟ੍ਠੇ ਸਕੇ ਇਸ੍ਸਰਿਯੇ ਠਿਤੇਨ;

ਤਂ ਸਙ੍ਗਰਂ ਬ੍ਰਾਹ੍ਮਣਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸ’’ਨ੍ਤਿ.

ਤਤ੍ਥ ਨੇਵਾਹਮਤ੍ਤਾਨਮਨੁਤ੍ਥੁਨਾਮੀਤਿ ਅਹਂ ਤਾਵ ਅਤ੍ਤਤ੍ਥਾਯ ਨੇਵ ਰੋਦਾਮਿ ਨ ਸੋਚਾਮਿ, ਇਮੇਸਮ੍ਪਿ ਪੁਤ੍ਤਾਦੀਨਂ ਅਤ੍ਥਾਯ ਨ ਰੋਦਾਮਿ ਨ ਸੋਚਾਮਿ, ਅਪਿਚ ਖੋ ਪਨ ਸਤਂ ਪਣ੍ਡਿਤਾਨਂ ਚਰਿਤੋ ਪੁਰਾਣਧਮ੍ਮੋ ਅਤ੍ਥਿ, ਯਂ ਸਙ੍ਗਰਂ ਕਤ੍ਵਾ ਪਚ੍ਛਾ ਅਨੁਤਪ੍ਪਨਂ ਨਾਮ, ਤਂ ਸਙ੍ਗਰਂ ਬ੍ਰਾਹ੍ਮਣਸ੍ਸ ਅਹਂ ਅਨੁਸੋਚਾਮੀਤਿ ਅਤ੍ਥੋ. ਸਚ੍ਚਾਨੁਰਕ੍ਖੀਤਿ ਸਚ੍ਚਂ ਅਨੁਰਕ੍ਖਨ੍ਤੋ. ਸੋ ਹਿ ਬ੍ਰਾਹ੍ਮਣੋ ਤਕ੍ਕਸਿਲਤੋ ਕਸ੍ਸਪਦਸਬਲੇਨ ਦੇਸਿਤਾ ਚਤਸ੍ਸੋ ਸਤਾਰਹਾ ਗਾਥਾਯੋ ਆਦਾਯ ਆਗਤੋ, ਤਸ੍ਸਾਹਂ ਆਗਨ੍ਤੁਕਵਤ੍ਤਂ ਕਾਰੇਤ੍ਵਾ ‘‘ਨ੍ਹਤ੍ਵਾ ਆਗਤੋ ਸੁਣਿਸ੍ਸਾਮਿ, ਯਾਵ ਮਮਾਗਮਨਾ ਆਗਮੇਹੀ’’ਤਿ ਸਙ੍ਗਰਂ ਕਤ੍ਵਾ ਆਗਤੋ, ਤ੍ਵਂ ਤਾ ਗਾਥਾਯੋ ਸੋਤੁਂ ਅਦਤ੍ਵਾਵ ਮਂ ਗਣ੍ਹਿ. ਸਚੇ ਮਂ ਵਿਸ੍ਸਜ੍ਜੇਸਿ, ਤਂ ਧਮ੍ਮਂ ਸੁਤ੍ਵਾ ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸਾਮੀਤਿ ਵਦਤਿ.

ਅਥ ਨਂ ਪੋਰਿਸਾਦੋ ਆਹ –

੪੦੧.

‘‘ਨੇਵਾਹਮੇਤਂ ਅਭਿਸਦ੍ਦਹਾਮਿ, ਸੁਖੀ ਨਰੋ ਮਚ੍ਚੁਮੁਖਾ ਪਮੁਤ੍ਤੋ;

ਅਮਿਤ੍ਤਹਤ੍ਥਂ ਪੁਨਰਾਵਜੇਯ੍ਯ, ਕੋਰਬ੍ਯਸੇਟ੍ਠ ਨ ਹਿ ਮਂ ਉਪੇਸਿ.

੪੦੩.

‘‘ਮੁਤ੍ਤੋ ਤੁਵਂ ਪੋਰਿਸਾਦਸ੍ਸ ਹਤ੍ਥਾ, ਗਨ੍ਤ੍ਵਾ ਸਕਂ ਮਨ੍ਦਿਰਂ ਕਾਮਕਾਮੀ;

ਮਧੁਰਂ ਪਿਯਂ ਜੀਵਿਤਂ ਲਦ੍ਧ ਰਾਜ, ਕੁਤੋ ਤੁਵਂ ਏਹਿਸਿ ਮੇ ਸਕਾਸ’’ਨ੍ਤਿ.

ਤਤ੍ਥ ਸੁਖੀਤਿ ਸੁਖਪ੍ਪਤ੍ਤੋ ਹੁਤ੍ਵਾ. ਮਚ੍ਚੁਮੁਖਾ ਪਮੁਤ੍ਤੋਤਿ ਮਾਦਿਸਸ੍ਸ ਚੋਰਸ੍ਸ ਹਤ੍ਥਤੋ ਮੁਤ੍ਤਤਾਯ ਮਰਣਮੁਖਾ ਮੁਤ੍ਤੋ ਨਾਮ ਹੁਤ੍ਵਾ ਅਮਿਤ੍ਤਹਤ੍ਥਂ ਪੁਨਰਾਵਜੇਯ੍ਯ ਆਗਚ੍ਛੇਯ੍ਯ, ਅਹਂ ਏਤਂ ਵਚਨਂ ਨੇਵ ਅਭਿਸਦ੍ਦਹਾਮਿ, ਕੋਰਬ੍ਯਸੇਟ੍ਠ ਤ੍ਵਂ ਮਮ ਸਨ੍ਤਿਕਂ ਨ ਹਿ ਉਪੇਸਿ. ਮੁਤ੍ਤੋਤਿ ਸੁਤਸੋਮ ਤੁਵਂ ਪੋਰਿਸਾਦਸ੍ਸ ਹਤ੍ਥਤੋ ਮੁਤ੍ਤੋ. ਸਕਂ ਮਨ੍ਦਿਰਨ੍ਤਿ ਰਾਜਧਾਨਿਗੇਹਂ ਗਨ੍ਤ੍ਵਾ. ਕਾਮਕਾਮੀਤਿ ਕਾਮਂ ਕਾਮਯਮਾਨੋ. ਲਦ੍ਧਾਤਿ ਅਤਿਵਿਯ ਪਿਯਂ ਜੀਵਿਤਂ ਲਭਿਤ੍ਵਾ ਤੁਵਂ ਮੇ ਮਮ ਸਨ੍ਤਿਕੇ ਕੁਤੋ ਕੇਨ ਨਾਮ ਕਾਰਣੇਨ ਏਹਿਸਿ.

ਤਂ ਸੁਤ੍ਵਾ ਮਹਾਸਤ੍ਤੋ ਸੀਹੋ ਵਿਯ ਅਸਮ੍ਭਿਤੋ ਆਹ –

੪੦੪.

‘‘ਮਤਂ ਵਰੇਯ੍ਯ ਪਰਿਸੁਦ੍ਧਸੀਲੋ, ਨ ਜੀਵਿਤਂ ਗਰਹਿਤੋ ਪਾਪਧਮ੍ਮੋ;

ਨ ਹਿ ਤਂ ਨਰਂ ਤਾਯਤਿ ਦੁਗ੍ਗਤੀਹਿ, ਯਸ੍ਸਾਪਿ ਹੇਤੁ ਅਲਿਕਂ ਭਣੇਯ੍ਯ.

੪੦੫.

‘‘ਸਚੇਪਿ ਵਾਤੋ ਗਿਰਿਮਾਵਹੇਯ੍ਯ, ਚਨ੍ਦੋ ਚ ਸੂਰਿਯੋ ਚ ਛਮਾ ਪਤੇਯ੍ਯੁਂ;

ਸਬ੍ਬਾ ਚ ਨਜ੍ਜੋ ਪਟਿਸੋਤਂ ਵਜੇਯ੍ਯੁਂ, ਨ ਤ੍ਵੇਵਹਂ ਰਾਜ ਮੁਸਾ ਭਣੇਯ੍ਯਂ.

੪੦੬.

‘‘ਨਭਂ ਫਲੇਯ੍ਯ ਉਦਧੀਪਿ ਸੁਸ੍ਸੇ, ਸਂਵਤ੍ਤਯੇ ਭੂਤਧਰਾ ਵਸੁਨ੍ਧਰਾ;

ਸਿਲੁਚ੍ਚਯੋ ਮੇਰੁ ਸਮੂਲਮੁਪ੍ਪਤੇ, ਨ ਤ੍ਵੇਵਹਂ ਰਾਜ ਮੁਸਾ ਭਣੇਯ੍ਯ’’ਨ੍ਤਿ.

ਤਤ੍ਥ ਮਤਂ ਵਰੇਯ੍ਯਾਤਿ ਪੋਰਿਸਾਦ ਯੋ ਨਰੋ ਪਰਿਸੁਦ੍ਧਸੀਲੋ ਜੀਵਿਤਹੇਤੁ ਅਣੁਮਤ੍ਤਮ੍ਪਿ ਪਾਪਂ ਨ ਕਰੋਤਿ, ਸੀਲਸਮ੍ਪਨ੍ਨੋ ਹੁਤ੍ਵਾ ਵਰੇਯ੍ਯ ਤਂ ਮਰਣਂ ਇਚ੍ਛੇਯ੍ਯ, ਗਰਹਿਤੋ ਪਾਪਧਮ੍ਮੋ ਤਂ ਜੀਵਿਤਂ ਨ ਸੇਯ੍ਯੋ, ਦੁਸ੍ਸੀਲੋ ਪੁਗ੍ਗਲੋ ਯਸ੍ਸਾਪਿ ਹੇਤੁ ਅਤ੍ਤਾਦਿਨੋਪਿ ਹੇਤੁ ਅਲਿਕਂ ਵਚਨਂ ਭਣੇਯ੍ਯ, ਤਂ ਨਰਂ ਏਵਰੂਪਂ ਦੁਗ੍ਗਤੀਹਿ ਤਂ ਅਲਿਕਂ ਨ ਤਾਯਤੇ. ਸਚੇਪਿ ਵਾਤੋ ਗਿਰਿਮਾਵਹੇਯ੍ਯਾਤਿ, ਸਮ੍ਮ ਪੋਰਿਸਾਦ, ਤਯਾ ਸਦ੍ਧਿਂ ਏਕਾਚਰਿਯਕੁਲੇ ਸਿਕ੍ਖਿਤੋ ਏਵਰੂਪੋ ਸਹਾਯਕੋ ਹੁਤ੍ਵਾ ਅਹਂ ਜੀਵਿਤਹੇਤੁ ਮੁਸਾ ਨ ਕਥੇਮਿ, ਕਿਂ ਨ ਸਦ੍ਦਹਸਿ. ਸਚੇ ਪੁਰਤ੍ਥਿਮਾਦਿਭੇਦੋ ਵਾਤੋ ਉਟ੍ਠਾਯ ਮਹਨ੍ਤਂ ਗਿਰਿਂ ਤੂਲਪਿਚੁਂ ਵਿਯ ਆਕਾਸੇ ਆਵਹੇਯ੍ਯ, ਚਨ੍ਦੋ ਚ ਸੂਰਿਯੋ ਚ ਅਤ੍ਤਨੋ ਅਤ੍ਤਨੋ ਵਿਮਾਨੇਨ ਸਦ੍ਧਿਂ ਛਮਾ ਪਥਵਿਯਂ ਪਤੇਯ੍ਯੁਂ, ਸਬ੍ਬਾਪਿ ਨਜ੍ਜੋ ਪਤਿਸੋਤਂ ਵਜੇਯ੍ਯੁਂ, ਭੋ ਪੋਰਿਸਾਦ, ਏਵਰੂਪਂ ਵਚਨਂ ਸਚੇ ਭਣੇਯ੍ਯ, ਤਂ ਸਦ੍ਦਹਿਤਬ੍ਬਂ, ਅਹਂ ਮੁਸਾ ਭਣੇਯ੍ਯਂ ਇਤਿ ਵਚਨਂ ਤੁਯ੍ਹਂ ਜਨੇਹਿ ਵੁਤ੍ਤਂ, ਨ ਤ੍ਵੇਵ ਤਂ ਸਦ੍ਦਹਿਤਬ੍ਬਂ.

ਏਵਂ ਵੁਤ੍ਤੇਪਿ ਸੋ ਨ ਸਦ੍ਦਹਿਯੇਵ. ਅਥ ਬੋਧਿਸਤ੍ਤੋ ‘‘ਅਯਂ ਮਯ੍ਹਂ ਨ ਸਦ੍ਦਹਤਿ, ਸਪਥੇਨਪਿ ਨਂ ਸਦ੍ਦਹਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ‘‘ਸਮ੍ਮ ਪੋਰਿਸਾਦ, ਖਨ੍ਧਤੋ ਤਾਵ ਮਂ ਓਤਾਰੇਹਿ, ਸਪਥਂ ਕਤ੍ਵਾ ਤਂ ਸਦ੍ਦਹਾਪੇਸ੍ਸਾਮੀ’’ਤਿ ਵੁਤ੍ਤੇ ਤੇਨ ਓਤਾਰੇਤ੍ਵਾ ਭੂਮਿਯਂ ਠਪਿਤੋ ਸਪਥਂ ਕਰੋਨ੍ਤੋ ਆਹ –

੪੦੭.

‘‘ਅਸਿਞ੍ਚ ਸਤ੍ਤਿਞ੍ਚ ਪਰਾਮਸਾਮਿ, ਸਪਥਮ੍ਪਿ ਤੇ ਸਮ੍ਮ ਅਹਂ ਕਰੋਮਿ;

ਤਯਾ ਪਮੁਤ੍ਤੋ ਅਨਣੋ ਭਵਿਤ੍ਵਾ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸ’’ਨ੍ਤਿ.

ਤਸ੍ਸਤ੍ਥੋ – ਸਮ੍ਮ ਪੋਰਿਸਾਦ, ਸਚੇ ਇਚ੍ਛਸਿ, ਏਵਰੂਪੇਹਿ ਆਵੁਧੇਹਿ ਸਂਵਿਹਿਤਾਰਕ੍ਖੇ ਖਤ੍ਤਿਯਕੁਲੇ ਮੇ ਨਿਬ੍ਬਤ੍ਤਿ ਨਾਮ ਮਾ ਹੋਤੂਤਿ ਅਸਿਞ੍ਚ ਸਤ੍ਤਿਞ੍ਚ ਪਰਾਮਸਾਮਿ. ਸਚੇ ਅਞ੍ਞੇਹਿ ਰਾਜੂਹਿ ਅਕਤ੍ਤਬ੍ਬਂ ਅਞ੍ਞਂ ਵਾ ਯਂ ਇਚ੍ਛਸਿ, ਤਂ ਸਪਥਮ੍ਪਿ ਤੇ, ਸਮ੍ਮ, ਅਹਂ ਕਰੋਮਿ. ਯਥਾਹਂ ਤਯਾ ਪਮੁਤ੍ਤੋ ਗਨ੍ਤ੍ਵਾ ਬ੍ਰਾਹ੍ਮਣਸ੍ਸ ਅਨਣੋ ਹੁਤ੍ਵਾ ਸਚ੍ਚਮਨੁਰਕ੍ਖਨ੍ਤੋ ਪੁਨਰਾਗਮਿਸ੍ਸਾਮੀਤਿ.

ਤਤੋ ਪੋਰਿਸਾਦੋ ‘‘ਅਯਂ ਸੁਤਸੋਮੋ ਖਤ੍ਤਿਯੇਹਿ ਅਕਤ੍ਤਬ੍ਬਂ ਸਪਥਂ ਕਰੋਤਿ, ਕਿਂ ਮੇ ਇਮਿਨਾ, ਏਸ ਏਤੁ ਵਾ ਮਾ ਵਾ, ਅਹਮ੍ਪਿ ਖਤ੍ਤਿਯਰਾਜਾ, ਮਮੇਵ ਬਾਹੁਲੋਹਿਤਂ ਗਹੇਤ੍ਵਾ ਦੇਵਤਾਯ ਬਲਿਕਮ੍ਮਂ ਕਰਿਸ੍ਸਾਮਿ, ਅਯਂ ਅਤਿਵਿਯ ਕਿਲਮਤੀ’’ਤਿ ਚਿਨ੍ਤੇਤ੍ਵਾ –

੪੦੮.

‘‘ਯੋ ਤੇ ਕਤੋ ਸਙ੍ਗਰੋ ਬ੍ਰਾਹ੍ਮਣੇਨ, ਰਟ੍ਠੇ ਸਕੇ ਇਸ੍ਸਰਿਯੇ ਠਿਤੇਨ;

ਤਂ ਸਙ੍ਗਰਂ ਬ੍ਰਾਹ੍ਮਣਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਸ੍ਸੂ’’ਤਿ.

ਤਤ੍ਥ ਪੁਨਰਾਵਜਸ੍ਸੂਤਿ ਪੁਨ ਆਗਚ੍ਛੇਯ੍ਯਾਸਿ.

ਅਥ ਨਂ ਮਹਾਸਤ੍ਤੋ, ‘‘ਸਮ੍ਮ, ਮਾ ਚਿਨ੍ਤਯਿ, ਚਤਸ੍ਸੋ ਸਤਾਰਹਾ ਗਾਥਾ ਸੁਤ੍ਵਾ ਧਮ੍ਮਕਥਿਕਸ੍ਸ ਪੂਜਂ ਕਤ੍ਵਾ ਪਾਤੋਵਾਗਮਿਸ੍ਸਾਮੀ’’ਤਿ ਵਤ੍ਵਾ ਗਾਥਮਾਹ –

੪੦੯.

‘‘ਯੋ ਮੇ ਕਤੋ ਸਙ੍ਗਰੋ ਬ੍ਰਾਹ੍ਮਣੇਨ, ਰਟ੍ਠੇ ਸਕੇ ਇਸ੍ਸਰਿਯੇ ਠਿਤੇਨ;

ਤਂ ਸਙ੍ਗਰਂ ਬ੍ਰਾਹ੍ਮਣਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸ’’ਨ੍ਤਿ.

ਅਥ ਨਂ ਪੋਰਿਸਾਦੋ, ‘‘ਮਹਾਰਾਜ, ਤੁਮ੍ਹੇ ਖਤ੍ਤਿਯੇਹਿ ਅਕਤ੍ਤਬ੍ਬਂ ਸਪਥਂ ਕਰਿਤ੍ਥ, ਤਂ ਅਨੁਸ੍ਸਰੇਯ੍ਯਾਥਾ’’ਤਿ ਵਤ੍ਵਾ, ‘‘ਸਮ੍ਮ ਪੋਰਿਸਾਦ, ਤ੍ਵਂ ਮਂ ਦਹਰਕਾਲਤੋ ਪਟ੍ਠਾਯ ਜਾਨਾਸਿ, ਹਾਸੇਨਪਿ ਮੇ ਮੁਸਾ ਨ ਕਥਿਤਪੁਬ੍ਬਾ, ਸੋਹਂ ਇਦਾਨਿ ਰਜ੍ਜੇ ਪਤਿਟ੍ਠਿਤੋ ਧਮ੍ਮਾਧਮ੍ਮਂ ਜਾਨਨ੍ਤੋ ਕਿਂ ਮੁਸਾ ਕਥੇਸ੍ਸਾਮਿ, ਸਦ੍ਦਹਸਿ ਮਯ੍ਹਂ, ਅਹਂ ਤੇ ਸ੍ਵੇ ਬਲਿਕਮ੍ਮਂ ਪਾਪੁਣਿਸ੍ਸਾਮੀ’’ਤਿ ਸਦ੍ਦਹਾਪਿਤੋ ‘‘ਤੇਨ ਹਿ ਗਚ੍ਛ, ਮਹਾਰਾਜ, ਤੁਮ੍ਹੇਸੁ ਅਨਾਗਤੇਸੁ ਬਲਿਕਮ੍ਮਂ ਨ ਭਵਿਸ੍ਸਤਿ, ਦੇਵਤਾਪਿ ਤੁਮ੍ਹੇਹਿ ਵਿਨਾ ਨ ਸਮ੍ਪਟਿਚ੍ਛਤਿ, ਮਾ ਮੇ ਬਲਿਕਮ੍ਮਸ੍ਸ ਅਨ੍ਤਰਾਯਂ ਕਰਿਤ੍ਥਾ’’ਤਿ ਮਹਾਸਤ੍ਤਂ ਉਯ੍ਯੋਜੇਸਿ. ਸੋ ਰਾਹੁਮੁਖਾ ਮੁਤ੍ਤਚਨ੍ਦੋ ਵਿਯ ਨਾਗਬਲੋ ਥਾਮਸਮ੍ਪਨ੍ਨੋ ਖਿਪ੍ਪਮੇਵ ਨਗਰਂ ਸਮ੍ਪਾਪੁਣਿ. ਸੇਨਾਪਿਸ੍ਸ ‘‘ਸੁਤਸੋਮੋ ਰਾਜਾ ਪਣ੍ਡਿਤੋ ਮਧੁਰਧਮ੍ਮਕਥਿਕੋ ਏਕਂ ਦ੍ਵੇ ਕਥਾ ਕਥੇਤੁਂ ਲਭਨ੍ਤੋ ਪੋਰਿਸਾਦਂ ਦਮੇਤ੍ਵਾ ਸੀਹਮੁਖਾ ਮੁਤ੍ਤਮਤ੍ਤਵਾਰਣੋ ਵਿਯ ਆਗਮਿਸ੍ਸਤਿ, ‘ਇਮੇ ਰਾਜਾਨਂ ਪੋਰਿਸਾਦਸ੍ਸ ਦਤ੍ਵਾ ਆਗਤਾ’ਤਿ ਮਹਾਜਨੋ ਗਰਹਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਬਹਿਨਗਰੇਯੇਵ ਖਨ੍ਧਾਵਾਰਂ ਕਤ੍ਵਾ ਠਿਤਾ ਤਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਪਚ੍ਚੁਗ੍ਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਕਚ੍ਚਿ, ਮਹਾਰਾਜ, ਪੋਰਿਸਾਦੇਨ ਕਿਲਮਿਤੋ’’ਤਿ ਪਟਿਸਨ੍ਥਾਰਂ ਕਤ੍ਵਾ ‘‘ਪੋਰਿਸਾਦੇਨ ਮਯ੍ਹਂ ਮਾਤਾਪਿਤੂਹਿਪਿ ਦੁਕ੍ਕਰਂ ਕਤਂ, ਤਥਾਰੂਪੋ ਨਾਮ ਚਣ੍ਡੋ ਸਾਹਸਿਕੋ ਪੋਰਿਸਾਦੋ ਮਮ ਧਮ੍ਮਕਥਂ ਸੁਤ੍ਵਾ ਮਂ ਵਿਸ੍ਸਜ੍ਜੇਸੀ’’ਤਿ ਵੁਤ੍ਤੇ ਰਾਜਾਨਂ ਅਲਙ੍ਕਰਿਤ੍ਵਾ ਹਤ੍ਥਿਕ੍ਖਨ੍ਧਂ ਆਰੋਪੇਤ੍ਵਾ ਪਰਿਵਾਰੇਤ੍ਵਾ ਨਗਰਂ ਪਾਵਿਸਿ. ਤਂ ਦਿਸ੍ਵਾ ਸਬ੍ਬੇ ਨਾਗਰਾ ਤੁਸ੍ਸਿਂਸੁ.

ਸੋਪਿ ਧਮ੍ਮਗਰੁਤਾਯ ਧਮ੍ਮਸੋਣ੍ਡਤਾਯ ਮਾਤਾਪਿਤਰੋ ਅਦਿਸ੍ਵਾਵ ‘‘ਪਚ੍ਛਾਪਿ ਨੇ ਪਸ੍ਸਿਸ੍ਸਾਮੀ’’ਤਿ ਰਾਜਨਿਵੇਸਨਂ ਪਵਿਸਿਤ੍ਵਾ ਰਾਜਾਸਨੇ ਨਿਸੀਦਿਤ੍ਵਾ ਬ੍ਰਾਹ੍ਮਣਂ ਪਕ੍ਕੋਸਾਪੇਤ੍ਵਾ ਮਸ੍ਸੁਕਮ੍ਮਾਦੀਨਿਸ੍ਸ ਆਣਾਪੇਤ੍ਵਾ ਤਂ ਕਪ੍ਪਿਤਕੇਸਮਸ੍ਸੁਂ ਨ੍ਹਾਤਾਨੁਲਿਤ੍ਤਂ ਵਤ੍ਥਾਲਙ੍ਕਾਰਪਟਿਮਣ੍ਡਿਤਂ ਕਤ੍ਵਾ ਆਨੇਤ੍ਵਾ ਦਸ੍ਸਿਤਕਾਲੇ ਸਯਂ ਪਚ੍ਛਾ ਨ੍ਹਤ੍ਵਾ ਤਸ੍ਸ ਅਤ੍ਤਨੋ ਭੋਜਨਂ ਦਾਪੇਤ੍ਵਾ ਤਸ੍ਮਿਂ ਭੁਤ੍ਤੇ ਸਯਂ ਭੁਞ੍ਜਿਤ੍ਵਾ ਤਂ ਮਹਾਰਹੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਧਮ੍ਮਗਰੁਕਤਾਯ ਅਸ੍ਸ ਗਨ੍ਧਮਾਲਾਦੀਹਿ ਪੂਜਂ ਕਤ੍ਵਾ ਸਯਂ ਨੀਚੇ ਆਸਨੇ ਨਿਸੀਦਿਤ੍ਵਾ ‘‘ਤੁਮ੍ਹੇਹਿ ਮਯ੍ਹਂ ਆਭਤਾ ਸਤਾਰਹਾ ਗਾਥਾ ਸੁਣੋਮ ਆਚਰਿਯਾ’’ਤਿ ਯਾਚਿ. ਤਮਤ੍ਥਂ ਦੀਪੇਨ੍ਤੋ ਸਤ੍ਥਾ ਗਾਥਮਾਹ –

੪੧੦.

‘‘ਮੁਤ੍ਤੋ ਚ ਸੋ ਪੋਰਿਸਾਦਸ੍ਸ ਹਤ੍ਥਾ, ਗਨ੍ਤ੍ਵਾਨ ਤਂ ਬ੍ਰਾਹ੍ਮਣਂ ਏਤਦਵੋਚ;

ਸੁਣੋਮਿ ਗਾਥਾਯੋ ਸਤਾਰਹਾਯੋ, ਯਾ ਮੇ ਸੁਤਾ ਅਸ੍ਸੁ ਹਿਤਾਯ ਬ੍ਰਹ੍ਮੇ’’ਤਿ.

ਤਤ੍ਥ ਏਤਦਵੋਚਾਤਿ ਏਤਂ ਅਵੋਚ.

ਅਥ ਬ੍ਰਾਹ੍ਮਣੋ ਬੋਧਿਸਤ੍ਤੇਨ ਯਾਚਿਤਕਾਲੇ ਗਨ੍ਧੇਹਿ ਹਤ੍ਥੇ ਉਬ੍ਬਟ੍ਟੇਤ੍ਵਾ ਪਸਿਬ੍ਬਕਾ ਮਨੋਰਮਂ ਪੋਤ੍ਥਕਂ ਨੀਹਰਿਤ੍ਵਾ ਉਭੋਹਿ ਹਤ੍ਥੇਹਿ ਗਹੇਤ੍ਵਾ ‘‘ਤੇਨ ਹਿ, ਮਹਾਰਾਜ, ਕਸ੍ਸਪਦਸਬਲੇਨ ਦੇਸਿਤਾ ਰਾਗਮਦਾਦਿਨਿਮ੍ਮਦਨਾ ਅਮਤਮਹਾਨਿਬ੍ਬਾਨਸਮ੍ਪਾਪਿਕਾ ਚਤਸ੍ਸੋ ਸਤਾਰਹਾ ਗਾਥਾਯੋ ਸੁਣੋਹੀ’’ਤਿ ਵਤ੍ਵਾ ਪੋਤ੍ਥਕਂ ਓਲੋਕੇਨ੍ਤੋ ਆਹ –

੪੧੧.

‘‘ਸਕਿਦੇਵ ਸੁਤਸੋਮ, ਸਬ੍ਭਿ ਹੋਤਿ ਸਮਾਗਮੋ;

ਸਾ ਨਂ ਸਙ੍ਗਤਿ ਪਾਲੇਤਿ, ਨਾਸਬ੍ਭਿ ਬਹੁ ਸਙ੍ਗਮੋ.

੪੧੨.

‘‘ਸਬ੍ਭਿਰੇਵ ਸਮਾਸੇਥ, ਸਬ੍ਭਿ ਕੁਬ੍ਬੇਥ ਸਨ੍ਥਵਂ;

ਸਤਂ ਸਦ੍ਧਮ੍ਮਮਞ੍ਞਾਯ, ਸੇਯ੍ਯੋ ਹੋਤਿ ਨ ਪਾਪਿਯੋ.

੪੧੩.

‘‘ਜੀਰਨ੍ਤਿ ਵੇ ਰਾਜਰਥਾ ਸੁਚਿਤ੍ਤਾ, ਅਥੋ ਸਰੀਰਮ੍ਪਿ ਜਰਂ ਉਪੇਤਿ;

ਸਤਞ੍ਚ ਧਮ੍ਮੋ ਨ ਜਰਂ ਉਪੇਤਿ, ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤਿ.

੪੧੪.

‘‘ਨਭਞ੍ਚ ਦੂਰੇ ਪਥਵੀ ਚ ਦੂਰੇ, ਪਾਰਂ ਸਮੁਦ੍ਦਸ੍ਸ ਤਦਾਹੁ ਦੂਰੇ;

ਤਤੋ ਹਵੇ ਦੂਰਤਰਂ ਵਦਨ੍ਤਿ, ਸਤਞ੍ਚ ਧਮ੍ਮੋ ਅਸਤਞ੍ਚ ਰਾਜਾ’’ਤਿ.

ਤਤ੍ਥ ਸਕਿਦੇਵਾਤਿ ਏਕਵਾਰਮੇਵ. ਸਬ੍ਭੀਤਿ ਸਪ੍ਪੁਰਿਸੇਹਿ. ਸਾ ਨਨ੍ਤਿ ਸਾ ਸਬ੍ਭਿ ਸਪ੍ਪੁਰਿਸੇਹਿ ਸਙ੍ਗਤਿ ਸਮਾਗਮੋ ਏਕਵਾਰਂ ਪਵਤ੍ਤੋਪਿ ਤਂ ਪੁਗ੍ਗਲਂ ਪਾਲੇਤਿ ਰਕ੍ਖਤਿ. ਨਾਸਬ੍ਭੀਤਿ ਅਸਪ੍ਪੁਰਿਸੇਹਿ ਪਨ ਬਹੁ ਸੁਚਿਰਮ੍ਪਿ ਕਤੋ ਸਙ੍ਗਮੋ ਏਕਟ੍ਠਾਨੇ ਨਿਵਾਸੋ ਨ ਪਾਲੇਤਿ, ਨ ਥਾਵਰੋ ਹੋਤੀਤਿ ਅਤ੍ਥੋ. ਸਮਾਸੇਥਾਤਿ ਸਦ੍ਧਿਂ ਨਿਸੀਦੇਯ੍ਯ, ਸਬ੍ਬੇਪਿ ਇਰਿਯਾਪਥੇ ਪਣ੍ਡਿਤੇਹੇਵ ਸਦ੍ਧਿਂ ਪਵਤ੍ਤੇਯ੍ਯਾਤਿ ਅਤ੍ਥੋ. ਸਨ੍ਥਵਨ੍ਤਿ ਮਿਤ੍ਤਸਨ੍ਥਵਂ. ਸਤਂ ਸਦ੍ਧਮ੍ਮਨ੍ਤਿ ਪਣ੍ਡਿਤਾਨਂ ਬੁਦ੍ਧਾਦੀਨਂ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮਸਙ੍ਖਾਤਂ ਸਦ੍ਧਮ੍ਮਂ. ਸੇਯ੍ਯੋਤਿ ਏਤਂ ਧਮ੍ਮਂ ਞਤ੍ਵਾ ਵਡ੍ਢਿਯੇਵ ਹੋਤਿ, ਹਾਨਿ ਨਾਮ ਨਤ੍ਥੀਤਿ ਅਤ੍ਥੋ. ਰਾਜਰਥਾਤਿ ਰਾਜੂਨਂ ਆਰੋਹਨੀਯਰਥਾ. ਸੁਚਿਤ੍ਤਾਤਿ ਸੁਪਰਿਕਮ੍ਮਕਤਾ. ਸਬ੍ਭਿ ਪਵੇਦਯਨ੍ਤੀਤਿ ਬੁਦ੍ਧਾਦਯੋ ਸਨ੍ਤੋ ‘‘ਸਬ੍ਭੀ’’ਤਿ ਸਙ੍ਖਂ ਗਤਂ ਸੋਭਨਂ ਉਤ੍ਤਮਂ ਨਿਬ੍ਬਾਨਂ ਪਵੇਦੇਨ੍ਤਿ ਥੋਮੇਨ੍ਤਿ, ਸੋ ਨਿਬ੍ਬਾਨਸਙ੍ਖਾਤੋ ਸਤਂ ਧਮ੍ਮੋ ਜਰਂ ਨ ਉਪੇਤਿ ਨ ਜੀਰਤਿ. ਨਭਨ੍ਤਿ ਆਕਾਸੋ. ਦੂਰੇਤਿ ਪਥਵੀ ਹਿ ਸਪ੍ਪਤਿਟ੍ਠਾ ਸਗਹਣਾ, ਆਕਾਸੋ ਨਿਰਾਲਮ੍ਬੋ ਅਪ੍ਪਤਿਟ੍ਠੋ, ਇਤਿ ਉਭੋ ਏਤੇ ਏਕਾਬਦ੍ਧਾਪਿ ਵਿਸਂਯੋਗਟ੍ਠੇਨ ਅਨੁਪਲਿਤ੍ਤਟ੍ਠੇਨ ਚ ਦੂਰੇ ਨਾਮ ਹੋਨ੍ਤਿ. ਪਾਰਨ੍ਤਿ ਓਰਿਮਤੀਰਤੋ ਪਰਤੀਰਂ. ਤਦਾਹੂਤਿ ਤਂ ਆਹੁ.

ਇਤਿ ਬ੍ਰਾਹ੍ਮਣੋ ਚਤਸ੍ਸੋ ਸਤਾਰਹਾ ਗਾਥਾ ਕਸ੍ਸਪਦਸਬਲੇਨ ਦੇਸਿਤਨਿਯਾਮੇਨ ਦੇਸੇਤ੍ਵਾ ਤੁਣ੍ਹੀ ਅਹੋਸਿ. ਤਂ ਸੁਤ੍ਵਾ ਮਹਾਸਤ੍ਤੋ ‘‘ਸਪ੍ਫਲਂ ਵਤ ਮੇ ਆਗਮਨ’’ਨ੍ਤਿ ਤੁਟ੍ਠਚਿਤ੍ਤੋ ਹੁਤ੍ਵਾ ‘‘ਇਮਾ ਗਾਥਾ ਨੇਵ ਸਾਵਕਭਾਸਿਤਾ, ਨ ਇਸਿਭਾਸਿਤਾ, ਨ ਕੇਨਚਿ ਭਾਸਿਤਾ, ਸਬ੍ਬਞ੍ਞੁਨਾਵ ਭਾਸਿਤਾ, ਕਿਂ ਨੁ ਖੋ ਅਗ੍ਘਨ੍ਤੀ’’ਤਿ ਚਿਨ੍ਤੇਤ੍ਵਾ ‘‘ਇਮਾਸਂ ਸਕਲਮ੍ਪਿ ਚਕ੍ਕਵਾਲ਼ਂ ਯਾਵ ਬ੍ਰਹ੍ਮਲੋਕਾ ਸਤ੍ਤਰਤਨਪੁਣ੍ਣਂ ਕਤ੍ਵਾ ਦਦਮਾਨੋਪਿ ਨੇਵ ਅਨੁਚ੍ਛਵਿਕਂ ਕਾਤੁਂ ਸਕ੍ਕੋਤਿ, ਅਹਂ ਖੋ ਪਨਸ੍ਸ ਤਿਯੋਜਨਸਤੇ ਕੁਰੁਰਟ੍ਠੇ ਸਤ੍ਤਯੋਜਨਿਕੇ ਇਨ੍ਦਪਤ੍ਥਨਗਰੇ ਰਜ੍ਜਂ ਦਾਤੁਂ ਪਹੋਮਿ, ਅਤ੍ਥਿ ਨੁ ਖ੍ਵਸ੍ਸ ਰਜ੍ਜਂ ਕਾਰੇਤੁਂ ਭਾਗ੍ਯ’’ਨ੍ਤਿ ਅਙ੍ਗਵਿਜ੍ਜਾਨੁਭਾਵੇਨ ਓਲੋਕੇਨ੍ਤੋ ਨਾਦ੍ਦਸ. ਤਤੋ ਸੇਨਾਪਤਿਟ੍ਠਾਨਾਦੀਨਿ ਓਲੋਕੇਨ੍ਤੋ ਏਕਗਾਮਭੋਜਕਮਤ੍ਤਸ੍ਸਪਿ ਭਾਗ੍ਯਂ ਅਦਿਸ੍ਵਾ ਧਨਲਾਭਸ੍ਸ ਓਲੋਕੇਨ੍ਤੋ ਕੋਟਿਧਨਤੋ ਪਟ੍ਠਾਯ ਓਲੋਕੇਤ੍ਵਾ ਚਤੁਨ੍ਨਂਯੇਵ ਕਹਾਪਣਸਹਸ੍ਸਾਨਂ ਭਾਗ੍ਯਂ ਦਿਸ੍ਵਾ ‘‘ਏਤ੍ਤਕੇਨ ਨਂ ਪੂਜੇਸ੍ਸਾਮੀ’’ਤਿ ਚਤਸ੍ਸੋ ਸਹਸ੍ਸਤ੍ਥਵਿਕਾ ਦਾਪੇਤ੍ਵਾ, ‘‘ਆਚਰਿਯ, ਤੁਮ੍ਹੇ ਅਞ੍ਞੇਸਂ ਖਤ੍ਤਿਯਾਨਂ ਇਮਾ ਗਾਥਾ ਦੇਸੇਤ੍ਵਾ ਕਿਤ੍ਤਕਂ ਧਨਂ ਲਭਥਾ’’ਤਿ ਪੁਚ੍ਛਤਿ. ‘‘ਏਕੇਕਾਯ ਗਾਥਾਯ ਸਤਂ ਸਤਂ, ਮਹਾਰਾਜ, ਤੇਨੇਵ ਤਾ ਸਤਾਰਹਾ ਨਾਮ ਜਾਤਾ’’ਤਿ. ਅਥ ਨਂ ਮਹਾਸਤ੍ਤੋ, ‘‘ਆਚਰਿਯ, ਤ੍ਵਂ ਅਤ੍ਤਨਾ ਗਹੇਤ੍ਵਾ ਵਿਕ੍ਕੇਯ੍ਯਭਣ੍ਡਸ੍ਸ ਅਗ੍ਘਮ੍ਪਿ ਨ ਜਾਨਾਸਿ, ਇਤੋ ਪਟ੍ਠਾਯ ਏਕੇਕਾ ਗਾਥਾ ਸਹਸ੍ਸਾਰਹਾ ਨਾਮ ਹੋਨ੍ਤੂ’’ਤਿ ਵਤ੍ਵਾ ਗਾਥਮਾਹ –

੪੧੫.

‘‘ਸਹਸ੍ਸਿਯਾ ਇਮਾ ਗਾਥਾ, ਨਹਿਮਾ ਗਾਥਾ ਸਤਾਰਹਾ;

ਚਤ੍ਤਾਰਿ ਤ੍ਵਂ ਸਹਸ੍ਸਾਨਿ, ਖਿਪ੍ਪਂ ਗਣ੍ਹਾਹਿ ਬ੍ਰਾਹ੍ਮਣਾ’’ਤਿ.

ਤਸ੍ਸਤ੍ਥੋ – ਬ੍ਰਾਹ੍ਮਣ, ਇਮਾ ਗਾਥਾ ਸਹਸ੍ਸਿਯਾ ਸਹਸ੍ਸਾਰਹਾ, ਇਮਾ ਗਾਥਾ ਸਤਾਰਹਾ ਨ ਹਿ ਹੋਨ੍ਤੁ, ਬ੍ਰਾਹ੍ਮਣ, ਤ੍ਵਂ ਚਤ੍ਤਾਰਿ ਸਹਸ੍ਸਾਨਿ ਖਿਪ੍ਪਂ ਗਣ੍ਹਾਤਿ.

ਅਥਸ੍ਸ ਏਕਂ ਸੁਖਯਾਨਕਂ ਦਤ੍ਵਾ ‘‘ਬ੍ਰਾਹ੍ਮਣਂ ਸੋਤ੍ਥਿਨਾ ਗੇਹਂ ਸਮ੍ਪਾਪੇਥਾ’’ਤਿ ਪੁਰਿਸੇ ਆਣਾਪੇਤ੍ਵਾ ਤਂ ਉਯ੍ਯੋਜੇਸਿ. ਤਸ੍ਮਿਂ ਖਣੇ ‘‘ਸੁਤਸੋਮਰਞ੍ਞਾ ਸਤਾਰਹਾ ਗਾਥਾ ਸਹਸ੍ਸਾਰਹਾ ਕਤ੍ਵਾ ਪੂਜਿਤਾ ਸਾਧੁ ਸਾਧੂ’’ਤਿ ਮਹਾਸਾਧੁਕਾਰਸਦ੍ਦੋ ਅਹੋਸਿ. ਤਸ੍ਸ ਮਾਤਾਪਿਤਰੋ ਤਂ ਸਦ੍ਦਂ ਸੁਤ੍ਵਾ ‘‘ਕਿਂ ਸਦ੍ਦੋ ਨਾਮੇਸਾ’’ਤਿ ਪੁਚ੍ਛਿਤ੍ਵਾ ਯਥਾਭੂਤਂ ਸੁਤ੍ਵਾ ਅਤ੍ਤਨੋ ਧਨਲੋਭਤਾਯ ਮਹਾਸਤ੍ਤਸ੍ਸ ਕੁਜ੍ਝਿਂਸੁ. ਸੋਪਿ ਬ੍ਰਾਹ੍ਮਣਂ ਉਯ੍ਯੋਜੇਤ੍ਵਾ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਅਥਸ੍ਸ ਪਿਤਾ ‘‘ਕਥਂ, ਤਾਤ, ਏਵਰੂਪਸ੍ਸ ਸਾਹਸਿਕਸ੍ਸ ਚੋਰਸ੍ਸ ਹਤ੍ਥਤੋ ਮੁਤ੍ਤੋਸੀ’’ਤਿ ਪਟਿਸਨ੍ਥਾਰਮਤ੍ਤਮ੍ਪਿ ਅਕਤ੍ਵਾ ਅਤ੍ਤਨੋ ਧਨਲੋਭਤਾਯ ‘‘ਸਚ੍ਚਂ ਕਿਰ, ਤਾਤ, ਤਯਾ ਚਤਸ੍ਸੋ ਗਾਥਾ ਸੁਤ੍ਵਾ ਚਤ੍ਤਾਰਿ ਸਹਸ੍ਸਾਨਿ ਦਿਨ੍ਨਾਨੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚ’’ਨ੍ਤਿ ਵੁਤ੍ਤੇ ਗਾਥਮਾਹ –

੪੧੬.

‘‘ਆਸੀਤਿਯਾ ਨਾਵੁਤਿਯਾ ਚ ਗਾਥਾ, ਸਤਾਰਹਾ ਚਾਪਿ ਭਵੇਯ੍ਯ ਗਾਥਾ;

ਪਚ੍ਚਤ੍ਤਮੇਵ ਸੁਤਸੋਮ ਜਾਨਹਿ, ਸਹਸ੍ਸਿਯਾ ਨਾਮ ਕਾ ਅਤ੍ਥਿ ਗਾਥਾ’’ਤਿ.

ਤਸ੍ਸਤ੍ਥੋ – ਗਾਥਾ ਨਾਮ, ਤਾਤ, ਆਸੀਤਿਯਾ ਚ ਨਾਵੁਤਿਯਾ ਚ ਸਤਾਰਹਾ ਚਾਪਿ ਭਵੇਯ੍ਯ, ਪਚ੍ਚਤ੍ਤਮੇਵ ਅਤ੍ਤਨਾਵ ਜਾਨਾਹਿ, ਸਹਸ੍ਸਾਰਹਾ ਨਾਮ ਗਾਥਾ ਕਾ ਕਸ੍ਸ ਸਨ੍ਤਿਕੇ ਅਤ੍ਥੀਤਿ.

ਅਥ ਨਂ ਮਹਾਸਤ੍ਤੋ ‘‘ਨਾਹਂ, ਤਾਤ, ਧਨੇਨ ਵੁਦ੍ਧਿਂ ਇਚ੍ਛਾਮਿ, ਸੁਤੇਨ ਪਨ ਇਚ੍ਛਾਮੀ’’ਤਿ ਸਞ੍ਞਾਪੇਨ੍ਤੋ ਆਹ –

੪੧੭.

‘‘ਇਚ੍ਛਾਮਿ ਵੋਹਂ ਸੁਤਵੁਦ੍ਧਿਮਤ੍ਤਨੋ, ਸਨ੍ਤੋਤਿ ਮਂ ਸਪ੍ਪੁਰਿਸਾ ਭਜੇਯ੍ਯੁਂ;

ਅਹਂ ਸਵਨ੍ਤੀਹਿ ਮਹੋਦਧੀਵ, ਨ ਹਿ ਤਾਤ ਤਪ੍ਪਾਮਿ ਸੁਭਾਸਿਤੇਨ.

੪੧੮.

‘‘ਅਗ੍ਗਿ ਯਥਾ ਤਿਣਕਟ੍ਠਂ ਦਹਨ੍ਤੋ, ਨ ਕਪ੍ਪਤੀ ਸਾਗਰੋਵ ਨਦੀਭਿ;

ਏਵਮ੍ਪਿ ਤੇ ਪਣ੍ਡਿਤਾ ਰਾਜਸੇਟ੍ਠ, ਸੁਤ੍ਵਾ ਨ ਤਪ੍ਪਨ੍ਤਿ ਸੁਭਾਸਿਤੇਨ.

੪੧੯.

‘‘ਸਕਸ੍ਸ ਦਾਸਸ੍ਸ ਯਦਾ ਸੁਣੋਮਿ, ਗਾਥਂ ਅਹਂ ਅਤ੍ਥਵਤਿਂ ਜਨਿਨ੍ਦ;

ਤਮੇਵ ਸਕ੍ਕਚ੍ਚ ਨਿਸਾਮਯਾਮਿ, ਨ ਹਿ ਤਾਤ ਧਮ੍ਮੇਸੁ ਮਮਤ੍ਥਿ ਤਿਤ੍ਤੀ’’ਤਿ.

ਤਤ੍ਥ ਵੋਤਿ ਨਿਪਾਤਮਤ੍ਤਂ. ‘‘ਸਨ੍ਤੋ’’ਤਿ ਏਤੇ ਚ ਮਂ ਭਜੇਯ੍ਯੁਂ ਇਤਿ ਇਚ੍ਛਾਮਿ. ਸਵਨ੍ਤੀਹੀਤਿ ਨਦੀਹਿ. ਸਕਸ੍ਸਾਤਿ ਤਿਟ੍ਠਤੁ, ਨਨ੍ਦ, ਬ੍ਰਾਹ੍ਮਣੋ, ਯਦਾ ਅਹਂ ਅਤ੍ਤਨੋ ਦਾਸਸ੍ਸਪਿ ਸਨ੍ਤਿਕੇ ਸੁਣੋਮਿ, ਤਾਤ, ਧਮ੍ਮੇਸੁ ਮਮ ਤਿਤ੍ਤਿ ਨ ਹਿ ਅਤ੍ਥੀਤਿ.

ਏਵਞ੍ਚ ਪਨ ਵਤ੍ਵਾ ‘‘ਮਾ ਮਂ, ਤਾਤ, ਧਨਹੇਤੁ ਪਰਿਭਾਸਸਿ, ਅਹਂ ਧਮ੍ਮਂ ਸੁਤ੍ਵਾ ਆਗਮਿਸ੍ਸਾਮੀ’’ਤਿ ਸਪਥਂ ਕਤ੍ਵਾ ਆਗਤੋ, ਇਦਾਨਾਹਂ ਪੋਰਿਸਾਦਸ੍ਸ ਸਨ੍ਤਿਕਂ ਗਮਿਸ੍ਸਾਮਿ, ਇਦਂ ਤੇ ਰਜ੍ਜਂ ਗਣ੍ਹਥਾ’’ਤਿ ਰਜ੍ਜਂ ਨਿਯ੍ਯਾਦੇਨ੍ਤੋ ਗਾਥਮਾਹ –

੪੨੦.

‘‘ਇਦਂ ਤੇ ਰਟ੍ਠਂ ਸਧਨਂ ਸਯੋਗ੍ਗਂ, ਸਕਾਯੁਰਂ ਸਬ੍ਬਕਾਮੂਪਪਨ੍ਨਂ;

ਕਿਂ ਕਾਮਹੇਤੁ ਪਰਿਭਾਸਸਿ ਮਂ, ਗਚ੍ਛਾਮਹਂ ਪੋਰਿਸਾਦਸ੍ਸ ਞਤ੍ਤੇ’’ਤਿ.

ਤਤ੍ਥ ਞਤ੍ਤੇਤਿ ਸਨ੍ਤਿਕੇ.

ਤਸ੍ਮਿਂ ਸਮਯੇ ਪਿਤੁਰਞ੍ਞੋ ਹਦਯਂ ਉਣ੍ਹਂ ਅਹੋਸਿ. ਸੋ, ‘‘ਤਾਤ ਸੁਤਸੋਮ, ਕਿਂ ਨਾਮੇਤਂ ਕਥੇਸਿ, ਮਯਂ ਚਤੁਰਙ੍ਗਿਨਿਯਾ ਸੇਨਾਯ ਚੋਰਂ ਗਹੇਸ੍ਸਾਮਾ’’ਤਿ ਵਤ੍ਵਾ ਗਾਥਮਾਹ –

੪੨੧.

‘‘ਅਤ੍ਤਾਨੁਰਕ੍ਖਾਯ ਭਵਨ੍ਤਿ ਹੇਤੇ, ਹਤ੍ਥਾਰੋਹਾ ਰਥਿਕਾ ਪਤ੍ਤਿਕਾ ਚ;

ਅਸ੍ਸਾਰੋਹਾ ਯੇ ਚ ਧਨੁਗ੍ਗਹਾਸੇ, ਸੇਨਂ ਪਯੁਞ੍ਜਾਮ ਹਨਾਮ ਸਤ੍ਤੁ’’ਨ੍ਤਿ.

ਤਤ੍ਥ ਹਨਾਮਾਤਿ ਸਚੇ ਏਵਂ ਪਯੋਜਿਤਾ ਸੇਨਾ ਤਂ ਗਹੇਤੁਂ ਨ ਸਕ੍ਕੋਨ੍ਤਿ, ਅਥ ਨਂ ਸਕਲਰਟ੍ਠਵਾਸਿਨੋ ਗਹੇਤ੍ਵਾ ਗਨ੍ਤ੍ਵਾ ਹਨਾਮ ਸਤ੍ਤੁਂ, ਮਾਰੇਮ ਤਂ ਅਮ੍ਹਾਕਂ ਪਚ੍ਚਾਮਿਤ੍ਤਨ੍ਤਿ ਅਤ੍ਥੋ.

ਅਥ ਨਂ ਮਾਤਾਪਿਤਰੋ ਅਸ੍ਸੁਪੁਣ੍ਣਮੁਖਾ ਰੋਦਮਾਨਾ ਵਿਲਪਨ੍ਤਾ, ‘‘ਤਾਤ, ਮਾ ਗਚ੍ਛ, ਗਨ੍ਤੁਂ ਨ ਲਬ੍ਭਾ’’ਤਿ ਯਾਚਿਂਸੁ. ਸੋਲ਼ਸਸਹਸ੍ਸਾ ਨਾਟਕਿਤ੍ਥਿਯੋਪਿ ਸੇਸਪਰਿਜਨੋਪਿ ‘‘ਅਮ੍ਹੇ ਅਨਾਥੇ ਕਤ੍ਵਾ ਕੁਹਿਂ ਗਚ੍ਛਸਿ, ਦੇਵਾ’’ਤਿ ਪਰਿਦੇਵਿਂਸੁ. ਸਕਲਨਗਰੇ ਕੋਚਿ ਸਕਭਾਵੇਨ ਸਣ੍ਠਾਤੁਂ ਅਸਕ੍ਕੋਨ੍ਤੋ ‘‘ਸੁਤਸੋਮੋ ਪੋਰਿਸਾਦਸ੍ਸ ਕਿਰ ਪਟਿਞ੍ਞਂ ਦਤ੍ਵਾ ਆਗਤੋ, ਇਦਾਨਿ ਚਤਸ੍ਸੋ ਸਤਾਰਹਾ ਗਾਥਾ ਸੁਤ੍ਵਾ ਧਮ੍ਮਕਥਿਕਸ੍ਸ ਸਕ੍ਕਾਰਂ ਕਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਪੁਨਪਿ ਕਿਰ ਚੋਰਸ੍ਸ ਸਨ੍ਤਿਕਂ ਗਮਿਸ੍ਸਤੀ’’ਤਿ ਸਕਲਨਗਰਂ ਏਕਕੋਲਾਹਲਂ ਅਹੋਸਿ. ਸੋਪਿ ਮਾਤਾਪਿਤੂਨਂ ਵਚਨਂ ਸੁਤ੍ਵਾ ਗਾਥਮਾਹ –

੪੨੨.

‘‘ਸੁਦੁਕ੍ਕਰਂ ਪੋਰਿਸਾਦੋ ਅਕਾਸਿ, ਜੀਵਂ ਗਹੇਤ੍ਵਾਨ ਅਵਸ੍ਸਜੀ ਮਂ;

ਤਂ ਤਾਦਿਸਂ ਪੁਬ੍ਬਕਿਚ੍ਚਂ ਸਰਨ੍ਤੋ, ਦੁਬ੍ਭੇ ਅਹਂ ਤਸ੍ਸ ਕਥਂ ਜਨਿਨ੍ਦਾ’’ਤਿ.

ਤਤ੍ਥ ਜੀਵਂ ਗਹੇਤ੍ਵਾਨਾਤਿ ਜੀਵਗ੍ਗਾਹਂ ਗਹੇਤ੍ਵਾ. ਤਂ ਤਾਦਿਸਨ੍ਤਿ ਤਂ ਤੇਨ ਕਤਂ ਤਥਾਰੂਪਂ. ਪੁਬ੍ਬਕਿਚ੍ਚਨ੍ਤਿ ਪੁਰਿਮਂ ਉਪਕਾਰਂ. ਜਨਿਨ੍ਦਾਤਿ ਪਿਤਰਂ ਆਲਪਤਿ.

ਸੋ ਮਾਤਾਪਿਤਰੋ ਅਸ੍ਸਾਸੇਤ੍ਵਾ, ‘‘ਅਮ੍ਮ ਤਾਤਾ, ਤੁਮ੍ਹੇ ਮਯ੍ਹਂ ਮਾ ਚਿਨ੍ਤਯਿਤ੍ਥ, ਕਤਕਲ੍ਯਾਣੋ ਅਹਂ, ਮਮ ਛਕਾਮਸ੍ਸਗ੍ਗਿਸ੍ਸਰਿਯਂ ਨ ਦੁਲ੍ਲਭ’’ਨ੍ਤਿ ਮਾਤਾਪਿਤਰੋ ਵਨ੍ਦਿਤ੍ਵਾ ਆਪੁਚ੍ਛਿਤ੍ਵਾ ਸੇਸਜਨਂ ਅਨੁਸਾਸਿਤ੍ਵਾ ਪਕ੍ਕਾਮਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੪੨੩.

‘‘ਵਨ੍ਦਿਤ੍ਵਾ ਸੋ ਪਿਤਰਂ ਮਾਤਰਞ੍ਚ, ਅਨੁਸਾਸਿਤ੍ਵਾ ਨੇਗਮਞ੍ਚ ਬਲਞ੍ਚ;

ਸਚ੍ਚਵਾਦੀ ਸਚ੍ਚਾਨੁਰਕ੍ਖਮਾਨੋ, ਅਗਮਾਸਿ ਸੋ ਯਤ੍ਥ ਪੋਰਿਸਾਦੋ’’ਤਿ.

ਤਤ੍ਥ ਸਚ੍ਚਾਨੁਰਕ੍ਖਮਾਨੋਤਿ ਸਚ੍ਚਂ ਅਨੁਰਕ੍ਖਮਾਨੋ. ਅਗਮਾਸੀਤਿ ਤਂ ਰਤ੍ਤਿਂ ਨਿਵੇਸਨੇਯੇਵ ਵਸਿਤ੍ਵਾ ਪੁਨਦਿਵਸੇ ਅਰੁਣੁਗ੍ਗਮਨਵੇਲਾਯ ਮਾਤਾਪਿਤਰੋ ਵਨ੍ਦਿਤ੍ਵਾ ਆਪੁਚ੍ਛਿਤ੍ਵਾ ਸੇਸਜਨਂ ਅਨੁਸਾਸਿਤ੍ਵਾ ਅਸ੍ਸੁਮੁਖੇਨ ਨਾਨਪ੍ਪਕਾਰਂ ਪਰਿਦੇਵਨ੍ਤੇਨ ਇਤ੍ਥਾਗਾਰਾਦਿਨਾ ਮਹਾਜਨੇਨ ਅਨੁਗਤੋ ਨਗਰਾ ਨਿਕ੍ਖਮ੍ਮ ਤਂ ਜਨਂ ਨਿਵਤ੍ਤੇਤੁਂ ਅਸਕ੍ਕੋਨ੍ਤੋ ਮਹਾਮਗ੍ਗੇ ਦਣ੍ਡਕੇਨ ਤਿਰਿਯਂ ਲੇਖਂ ਕਡ੍ਢਿਤ੍ਵਾ ‘‘ਸਚੇ ਮਯਿ ਸਿਨੇਹੋ ਅਤ੍ਥਿ, ਇਮਂ ਮਾ ਅਤਿਕ੍ਕਮਿਂਸੂ’’ਤਿ ਆਹ. ਮਹਾਜਨੋ ਸੀਲਵਤੋ ਤੇਜਵਨ੍ਤਸ੍ਸ ਆਣਂ ਅਤਿਕ੍ਕਮਿਤੁਂ ਅਸਕ੍ਕੋਨ੍ਤੋ ਮਹਾਸਦ੍ਦੇਨ ਪਰਿਦੇਵਮਾਨੋ ਤਂ ਸੀਹਵਿਜਮ੍ਭਿਤੇਨ ਗਚ੍ਛਨ੍ਤਂ ਓਲੋਕੇਤ੍ਵਾ ਤਸ੍ਮਿਂ ਦਸ੍ਸਨੂਪਚਾਰਂ ਅਤਿਕ੍ਕਨ੍ਤੇ ਏਕਰਵਂ ਰਵਨ੍ਤੋ ਨਗਰਂ ਪਾਵਿਸਿ. ਸੋਪਿ ਆਗਤਮਗ੍ਗੇਨੇਵ ਤਸ੍ਸ ਸਨ੍ਤਿਕਂ ਗਤੋ. ਤੇਨ ਵੁਤ੍ਤਂ ‘‘ਅਗਮਾਸਿ ਸੋ ਯਤ੍ਥ ਪੋਰਿਸਾਦੋ’’ਤਿ.

ਤਤੋ ਪੋਰਿਸਾਦੋ ਚਿਨ੍ਤੇਸਿ – ‘‘ਸਚੇ ਮਮ ਸਹਾਯੋ ਸੁਤਸੋਮੋ ਆਗਨ੍ਤੁਕਾਮੋ, ਆਗਚ੍ਛਤੁ, ਅਨਾਗਨ੍ਤੁਕਾਮੋ, ਅਨਾਗਚ੍ਛਤੁ, ਰੁਕ੍ਖਦੇਵਤਾ ਯਂ ਮਯ੍ਹਂ ਇਚ੍ਛਤਿ, ਤਂ ਕਰੋਤੁ, ਇਮੇ ਰਾਜਾਨੋ ਮਾਰੇਤ੍ਵਾ ਪਞ੍ਚਮਧੁਰਮਂਸੇਨ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ ਚਿਤਕਂ ਕਤ੍ਵਾ ਅਗ੍ਗਿਂ ਜਾਲੇਤ੍ਵਾ ‘‘ਅਙ੍ਗਾਰਰਾਸਿ ਤਾਵ ਹੋਤੂ’’ਤਿ ਤਸ੍ਸ ਸੂਲੇ ਤਚ੍ਛਨ੍ਤਸ੍ਸ ਨਿਸਿਨ੍ਨਕਾਲੇ ਸੁਤਸੋਮੋ ਆਗਤੋ. ਅਥ ਨਂ ਪੋਰਿਸਾਦੋ ਦਿਸ੍ਵਾ ਤੁਟ੍ਠਚਿਤ੍ਤੋ, ‘‘ਸਮ੍ਮ, ਗਨ੍ਤ੍ਵਾ ਕਤ੍ਤਬ੍ਬਕਿਚ੍ਚਂ ਤੇ ਕਤ’’ਨ੍ਤਿ ਪੁਚ੍ਛਿ. ਮਹਾਸਤ੍ਤੋ, ‘‘ਆਮ ਮਹਾਰਾਜ, ਕਸ੍ਸਪਦਸਬਲੇਨ ਦੇਸਿਤਾ ਗਾਥਾ ਮੇ ਸੁਤਾ, ਧਮ੍ਮਕਥਿਕਸ੍ਸ ਚ ਸਕ੍ਕਾਰੋ ਕਤੋ, ਤਸ੍ਮਾ ਗਨ੍ਤ੍ਵਾ ਕਤ੍ਤਬ੍ਬਕਿਚ੍ਚਂ ਕਤਂ ਨਾਮ ਹੋਤੀ’’ਤਿ ਦਸ੍ਸੇਤੁਂ ਗਾਥਮਾਹ –

੪੨੪.

‘‘ਕਤੋ ਮਯਾ ਸਙ੍ਗਰੋ ਬ੍ਰਾਹ੍ਮਣੇਨ, ਰਟ੍ਠੇ ਸਕੇ ਇਸ੍ਸਰਿਯੇ ਠਿਤੇਨ;

ਤਂ ਸਙ੍ਗਰਂ ਬ੍ਰਾਹ੍ਮਣਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਗਤੋਸ੍ਮਿ;

ਯਜਸ੍ਸੁ ਯਞ੍ਞਂ ਖਾਦ ਮਂ ਪੋਰਿਸਾਦਾ’’ਤਿ.

ਤਤ੍ਥ ਯਜਸ੍ਸੂਤਿ ਮਂ ਮਾਰੇਤ੍ਵਾ ਦੇਵਤਾਯ ਵਾ ਯਞ੍ਞਂ ਯਜਸ੍ਸੁ, ਮਂਸਂ ਵਾ ਮੇ ਖਾਦਾਹੀਤਿ ਅਤ੍ਥੋ.

ਤਂ ਸੁਤ੍ਵਾ ਪੋਰਿਸਾਦੋ ‘‘ਅਯਂ ਰਾਜਾ ਨ ਭਾਯਤਿ, ਵਿਗਤਮਰਣਭਯੋ ਹੁਤ੍ਵਾ ਕਥੇਤਿ, ਕਿਸ੍ਸ ਨੁ ਖੋ ਏਸ ਆਨੁਭਾਵੋ’’ਤਿ ਚਿਨ੍ਤੇਤ੍ਵਾ ‘‘ਅਞ੍ਞਂ ਨਤ੍ਥਿ, ਅਯਂ ‘ਕਸ੍ਸਪਦਸਬਲੇਨ ਦੇਸਿਤਾ ਗਾਥਾ ਮੇ ਸੁਤਾ’ਤਿ ਵਦਤਿ, ਤਾਸਂ ਏਤੇਨ ਆਸੁਭਾਵੇਨ ਭਵਿਤਬ੍ਬਂ, ਅਹਮ੍ਪਿ ਤਂ ਕਥਾਪੇਤ੍ਵਾ ਤਾ ਗਾਥਾਯੋ ਸੋਸ੍ਸਾਮਿ, ਏਵਂ ਅਹਮ੍ਪਿ ਨਿਬ੍ਭਯੋ ਭਵਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਗਾਥਮਾਹ –

੪੨੫.

‘‘ਨ ਹਾਯਤੇ ਖਾਦਿਤਂ ਮਯ੍ਹਂ ਪਚ੍ਛਾ, ਚਿਤਕਾ ਅਯਂ ਤਾਵ ਸਧੂਮਿਕਾਵ;

ਨਿਦ੍ਧੂਮਕੇ ਪਚਿਤਂ ਸਾਧੁਪਕ੍ਕਂ, ਸੁਣੋਮਿ ਗਾਥਾਯੋ ਸਤਾਰਹਾਯੋ’’ਤਿ.

ਤਤ੍ਥ ਖਾਦਿਤਨ੍ਤਿ ਖਾਦਨਂ. ਤਂ ਖਾਦਨਂ ਮਯ੍ਹਂ ਪਚ੍ਛਾ ਵਾ ਪੁਰੇ ਵਾ ਨ ਪਰਿਹਾਯਤਿ, ਪਚ੍ਛਾਪਿ ਹਿ ਤ੍ਵਂ ਮਯਾ ਖਾਦਿਤਬ੍ਬੋਵ. ਨਿਦ੍ਧੂਮਕੇ ਪਚਿਤਨ੍ਤਿ ਨਿਦ੍ਧੂਮੇ ਨਿਜ੍ਝਾਲੇ ਅਗ੍ਗਿਮ੍ਹਿ ਪਕ੍ਕਮਂਸਂ ਸਾਧੁਪਕ੍ਕਂ ਨਾਮ ਹੋਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਅਯਂ ਪੋਰਿਸਾਦੋ ਪਾਪਧਮ੍ਮੋ, ਇਮਂ ਥੋਕਂ ਨਿਗ੍ਗਹੇਤ੍ਵਾ ਲਜ੍ਜਾਪੇਤ੍ਵਾ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਆਹ –

੪੨੬.

‘‘ਅਧਮ੍ਮਿਕੋ ਤ੍ਵਂ ਪੋਰਿਸਾਦਕਾਸਿ, ਰਟ੍ਠਾ ਚ ਭਟ੍ਠੋ ਉਦਰਸ੍ਸ ਹੇਤੁ;

ਧਮ੍ਮਞ੍ਚਿਮਾ ਅਭਿਵਦਨ੍ਤਿ ਗਾਥਾ, ਧਮ੍ਮੋ ਚ ਅਧਮ੍ਮੋ ਚ ਕੁਹਿਂ ਸਮੇਤਿ.

੪੨੭.

‘‘ਅਧਮ੍ਮਿਕਸ੍ਸ ਲੁਦ੍ਦਸ੍ਸ, ਨਿਚ੍ਚਂ ਲੋਹਿਤਪਾਣਿਨੋ;

ਨਤ੍ਥਿ ਸਚ੍ਚਂ ਕੁਤੋ ਧਮ੍ਮੋ, ਕਿਂ ਸੁਤੇਨ ਕਰਿਸ੍ਸਸੀ’’ਤਿ.

ਤਤ੍ਥ ਧਮ੍ਮਞ੍ਚਿਮਾਤਿ ਇਮਾ ਚ ਗਾਥਾ ਨਵਲੋਕੁਤ੍ਤਰਧਮ੍ਮਂ ਅਭਿਵਦਨ੍ਤਿ. ਕੁਹਿਂ ਸਮੇਤੀਤਿ ਕਤ੍ਥ ਸਮਾਗਚ੍ਛਤਿ. ਧਮ੍ਮੋ ਹਿ ਸੁਗਤਿਂ ਪਾਪੇਤਿ ਨਿਬ੍ਬਾਨਂ ਵਾ, ਅਧਮ੍ਮੋ ਦੁਗ੍ਗਤਿਂ. ਕੁਤੋ ਧਮ੍ਮੋਤਿ ਵਚੀਸਚ੍ਚਮਤ੍ਤਮ੍ਪਿ ਨਤ੍ਥਿ, ਕੁਤੋ ਧਮ੍ਮੋ. ਕਿਂ ਸੁਤੇਨਾਤਿ ਤ੍ਵਂ ਏਤੇਨ ਸੁਤੇਨ ਕਿਂ ਕਰਿਸ੍ਸਸਿ, ਮਤ੍ਤਿਕਾਭਾਜਨਂ ਵਿਯ ਹਿ ਸੀਹਵਸਾਯ ਅਭਾਜਨਂ ਤ੍ਵਂ ਧਮ੍ਮਸ੍ਸ.

ਸੋ ਏਵਂ ਕਥਿਤੇਪਿ ਨੇਵ ਕੁਜ੍ਝਿ. ਕਸ੍ਮਾ? ਮਹਾਸਤ੍ਤਸ੍ਸ ਮੇਤ੍ਤਾਭਾਵਨਾਯ ਮਹਤ੍ਤੇਨ. ਅਥ ਨਂ ‘‘ਕਿਂ ਪਨ ਸਮ੍ਮ ਸੁਤਸੋਮ ਅਹਮੇਵ ਅਧਮ੍ਮਿਕੋ’’ਤਿ ਵਤ੍ਵਾ ਗਾਥਮਾਹ –

੪੨੮.

‘‘ਯੋ ਮਂਸਹੇਤੁ ਮਿਗਵਂ ਚਰੇਯ੍ਯ, ਯੋ ਵਾ ਹਨੇ ਪੁਰਿਸਮਤ੍ਤਹੇਤੁ;

ਉਭੋਪਿ ਤੇ ਪੇਚ੍ਚ ਸਮਾ ਭਵਨ੍ਤਿ, ਕਸ੍ਮਾ ਨੋ ਅਧਮ੍ਮਿਕਂ ਬ੍ਰੂਸਿ ਮਂ ਤ੍ਵ’’ਨ੍ਤਿ.

ਤਤ੍ਥ ਕਸ੍ਮਾ ਨੋਤਿ ਯੇ ਜਮ੍ਬੁਦੀਪਤਲੇ ਰਾਜਾਨੋ ਅਲਙ੍ਕਤਪਟਿਯਤ੍ਤਾ ਮਹਾਬਲਪਰਿਵਾਰਾ ਰਥਵਰਗਤਾ ਮਿਗਵਂ ਚਰਨ੍ਤਾ ਤਿਖਿਣੇਹਿ ਸਰੇਹਿ ਮਿਗੇ ਵਿਜ੍ਝਿਤ੍ਵਾ ਮਾਰੇਨ੍ਤਿ, ਤੇ ਅਵਤ੍ਵਾ ਕਸ੍ਮਾ ਤ੍ਵਂ ਮਞ੍ਞੇਵ ਅਧਮ੍ਮਿਕਨ੍ਤਿ ਵਦਤਿ. ਯਦਿ ਤੇ ਨਿਦ੍ਦੋਸਾ, ਅਹਮ੍ਪਿ ਨਿਦ੍ਦੋਸੋ ਏਵਾਤਿ ਦੀਪੇਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ਤਸ੍ਸ ਲਦ੍ਧਿਂ ਭਿਨ੍ਦਨ੍ਤੋ ਗਾਥਮਾਹ –

੪੨੯.

‘‘ਪਞ੍ਚ ਪਞ੍ਚ ਨ ਖਾ ਭਕ੍ਖਾ, ਖਤ੍ਤਿਯੇਨ ਪਜਾਨਤਾ;

ਅਭਕ੍ਖਂ ਰਾਜ ਭਕ੍ਖੇਸਿ, ਤਸ੍ਮਾ ਅਧਮ੍ਮਿਕੋ ਤੁਵ’’ਨ੍ਤਿ.

ਤਸ੍ਸਤ੍ਥੋ – ਸਮ੍ਮ ਪੋਰਿਸਾਦ, ਖਤ੍ਤਿਯੇਨ ਨਾਮ ਖਤ੍ਤਿਯਧਮ੍ਮਂ ਜਾਨਨ੍ਤੇਨ ਪਞ੍ਚ ਪਞ੍ਚ ਹਤ੍ਥਿਆਦਯੋ ਦਸੇਵ ਸਤ੍ਤਾ ਮਂਸਵਸੇਨ ਨ ਖਾ ਭਕ੍ਖਾ ਨ ਖੋ ਖਾਦਿਤਬ੍ਬਯੁਤ੍ਤਕਾ. ‘‘ਨ ਖੋ’’ਤ੍ਵੇਵ ਵਾ ਪਾਠੋ. ਅਪਰੋ ਨਯੋ ਖਤ੍ਤਿਯੇਨ ਖਤ੍ਤਿਯਧਮ੍ਮਂ ਜਾਨਨ੍ਤੇਨ ਪਞ੍ਚਨਖੇਸੁ ਸਤ੍ਤੇਸੁ ਸਸਕੋ, ਸਲ੍ਲਕੋ, ਗੋਧਾ, ਕਪਿ ਕੁਮ੍ਮੋਤਿ ਇਮੇ ਪਞ੍ਚੇਵ ਸਤ੍ਤਾ ਭਕ੍ਖਿਤਬ੍ਬਯੁਤ੍ਤਕਾ, ਨ ਅਞ੍ਞੇ, ਤ੍ਵਂ ਪਨ ਅਭਕ੍ਖਂ ਮਨੁਸ੍ਸਮਂਸਂ ਭਕ੍ਖੇਸਿ, ਤੇਨ ਅਧਮ੍ਮਿਕੋਤਿ.

ਇਤਿ ਸੋ ਨਿਗ੍ਗਹਂ ਪਤ੍ਵਾ ਅਞ੍ਞਂ ਨਿਸ੍ਸਰਣਂ ਅਦਿਸ੍ਵਾ ਅਤ੍ਤਨੋ ਪਾਪਂ ਪਟਿਚ੍ਛਾਦੇਨ੍ਤੋ ਗਾਥਮਾਹ –

੪੩੦.

‘‘ਮੁਤ੍ਤੋ ਤੁਵਂ ਪੋਰਿਸਾਦਸ੍ਸ ਹਤ੍ਥਾ, ਗਨ੍ਤ੍ਵਾ ਸਕਂ ਮਨ੍ਦਿਰਂ ਕਾਮਕਾਮੀ;

ਅਮਿਤ੍ਤਹਤ੍ਥਂ ਪੁਨਰਾਗਤੋਸਿ, ਨ ਖਤ੍ਤਧਮ੍ਮੇ ਕੁਸਲੋਸਿ ਰਾਜਾ’’ਤਿ.

ਤਤ੍ਥ ਨ ਖਤ੍ਤਧਮ੍ਮੇਤਿ ਤ੍ਵਂ ਖਤ੍ਤਿਯਧਮ੍ਮਸਙ੍ਖਾਤੇ ਨੀਤਿਸਤ੍ਥੇ ਨ ਕੁਸਲੋਸਿ, ਅਤ੍ਤਨੋ ਅਤ੍ਥਾਨਤ੍ਥਂ ਨ ਜਾਨਾਸਿ, ਅਕਾਰਣੇਨੇਵ ਤੇ ਲੋਕੇ ਪਣ੍ਡਿਤੋਤਿ ਕਿਤ੍ਤਿ ਪਤ੍ਥਟਾ, ਅਹਂ ਪਨ ਤੇ ਪਣ੍ਡਿਤਭਾਵਂ ਨ ਪਸ੍ਸਾਮਿ ਨ ਜਾਨਾਮਿ, ਅਤਿਬਾਲੋਸੀਹਿ ਵਦਤਿ.

ਅਥ ਨਂ ਮਹਾਸਤ੍ਤੋ, ‘‘ਸਮ੍ਮ, ਖਤ੍ਤਿਯਧਮ੍ਮੇ ਕੁਸਲੇਨ ਨਾਮ ਮਾਦਿਸੇਨੇਵ ਭਵਿਤਬ੍ਬਂ. ਅਹਞ੍ਹਿ ਤਂ ਜਾਨਾਮਿ, ਨ ਪਨ ਤਦਤ੍ਥਾਯ ਪਟਿਪਜ੍ਜਾਮੀ’’ਤਿ ਵਤ੍ਵਾ ਗਾਥਮਾਹ –

੪੩੧.

‘‘ਯੇ ਖਤ੍ਤਧਮ੍ਮੇ ਕੁਸਲਾ ਭਵਨ੍ਤਿ, ਪਾਯੇਨ ਤੇ ਨੇਰਯਿਕਾ ਭਵਨ੍ਤਿ;

ਤਸ੍ਮਾ ਅਹਂ ਖਤ੍ਤਧਮ੍ਮਂ ਪਹਾਯ, ਸਚ੍ਚਾਨੁਰਕ੍ਖੀ ਪੁਨਰਾਗਤੋਸ੍ਮਿ;

ਯਜਸ੍ਸੁ ਯਞ੍ਞਂ ਖਾਦ ਮਂ ਪੋਰਿਸਾਦਾ’’ਤਿ.

ਤਤ੍ਥ ਕੁਸਲਾਤਿ ਤਦਤ੍ਥਾਯ ਪਟਿਪਜ੍ਜਨਕੁਸਲਾ. ਪਾਯੇਨਾਤਿ ਯੇਭੁਯ੍ਯੇਨ ਨੇਰਯਿਕਾ. ਯੇ ਪਨ ਤਤ੍ਥ ਨ ਨਿਬ੍ਬਤ੍ਤਨ੍ਤਿ, ਤੇ ਸੇਸਾਪਾਯੇਸੁ ਨਿਬ੍ਬਤ੍ਤਨ੍ਤਿ.

ਪੋਰਿਸਾਦੋ ਆਹ –

੪੩੨.

‘‘ਪਾਸਾਦਵਾਸਾ ਪਥਵੀਗਵਾਸ੍ਸਾ, ਕਾਮਿਤ੍ਥਿਯੋ ਕਾਸਿਕਚਨ੍ਦਨਞ੍ਚ;

ਸਬ੍ਬਂ ਤਹਿਂ ਲਭਸਿ ਸਾਮਿਤਾਯ, ਸਚ੍ਚੇਨ ਕਿਂ ਪਸ੍ਸਸਿ ਆਨਿਸਂਸ’’ਨ੍ਤਿ.

ਤਤ੍ਥ ਪਾਸਾਦਵਾਸਾਤਿ, ਸਮ੍ਮ ਸੁਤਸੋਮ, ਤਵ ਤਿਣ੍ਣਂ ਉਤੂਨਂ ਅਨੁਚ੍ਛਵਿਕਾ ਦਿਬ੍ਬਵਿਮਾਨਕਪ੍ਪਾ ਤਯੋ ਨਿਵਾਸਪਾਸਾਦਾ. ਪਥਵੀਗਵਾਸ੍ਸਾਤਿ ਪਥਵੀ ਚ ਗਾਵੋ ਚ ਅਸ੍ਸਾ ਚ ਬਹੂ. ਕਾਮਿਤ੍ਥਿਯੋਤਿ ਕਾਮਵਤ੍ਥੁਭੂਤਾ ਇਤ੍ਥਿਯੋ. ਕਾਸਿਕਚਨ੍ਦਨਞ੍ਚਾਤਿ ਕਾਸਿਕਵਤ੍ਥਞ੍ਚ ਲੋਹਿਤਚਨ੍ਦਨਞ੍ਚ. ਸਬ੍ਬਂ ਤਹਿਨ੍ਤਿ ਏਤਞ੍ਚ ਅਞ੍ਞਞ੍ਚ ਉਪਭੋਗਪਰਿਭੋਗਂ ਸਬ੍ਬਂ ਤ੍ਵਂ ਤਹਿਂ ਅਤ੍ਤਨੋ ਨਗਰੇ ਸਾਮਿਤਾਯ ਲਭਸਿ, ਸਾਮੀ ਹੁਤ੍ਵਾ ਯਥਾ ਇਚ੍ਛਸਿ, ਤਥਾ ਪਰਿਭੁਞ੍ਜਿਤੁਂ ਲਭਤਿ, ਸੋ ਤ੍ਵਂ ਸਬ੍ਬਮੇਤਂ ਪਹਾਯ ਸਚ੍ਚਾਨੁਰਕ੍ਖੀ ਇਧਾਗਚ੍ਛਨ੍ਤੋ ਸਚ੍ਚੇਨ ਕਿਂ ਆਨਿਸਂਸਂ ਪਸ੍ਸਸੀਤਿ.

ਬੋਧਿਸਤ੍ਤੋ ਆਹ –

੪੩੩.

‘‘ਯੇ ਕੇਚਿਮੇ ਅਤ੍ਥਿ ਰਸਾ ਪਥਬ੍ਯਾ, ਸਚ੍ਚਂ ਤੇਸਂ ਸਾਦੁਤਰਂ ਰਸਾਨਂ;

ਸਚ੍ਚੇ ਠਿਤਾ ਸਮਣਬ੍ਰਾਹ੍ਮਣਾ ਚ, ਤਰਨ੍ਤਿ ਜਾਤਿਮਰਣਸ੍ਸ ਪਾਰ’’ਨ੍ਤਿ.

ਤਤ੍ਥ ਸਾਦੁਤਰਨ੍ਤਿ ਯਸ੍ਮਾ ਸਬ੍ਬੇਪਿ ਰਸਾ ਸਤ੍ਤਾਨਂ ਸਚ੍ਚਕਾਲੇਯੇਵ ਪਣੀਤਾ ਮਧੁਰਾ ਹੋਨ੍ਤਿ, ਤਸ੍ਮਾ ਸਚ੍ਚਂ ਤੇਸਂ ਸਾਦੁਤਰਂ ਰਸਾਨਂ, ਯਸ੍ਮਾ ਵਾ ਵਿਰਤਿਸਚ੍ਚਵਚੀਸਚ੍ਚੇ ਠਿਤਾ ਜਾਤਿਮਰਣਸਙ੍ਖਾਤਸ੍ਸ ਤੇਭੂਮਕਵਟ੍ਟਸ੍ਸ ਪਾਰਂ ਅਮਤਮਹਾਨਿਬ੍ਬਾਨਂ ਤਰਨ੍ਤਿ ਪਾਪੁਣਨ੍ਤਿ, ਤਸ੍ਮਾਪਿ ਤਂ ਸਾਦੁਤਰਨ੍ਤਿ.

ਏਵਮਸ੍ਸ ਮਹਾਸਤ੍ਤੋ ਸਚ੍ਚੇ ਆਨਿਸਂਸਂ ਕਥੇਸਿ. ਤਤੋ ਪੋਰਿਸਾਦੋ ਵਿਕਸਿਤਪਦੁਮਪੁਣ੍ਣਚਨ੍ਦਸਸ੍ਸਿਰਿਕਮੇਵਸ੍ਸ ਮੁਖਂ ਓਲੋਕੇਤ੍ਵਾ ‘‘ਅਯਂ ਸੁਤਸੋਮੋ ਅਙ੍ਗਾਰਚਿਤਕਂ ਮਞ੍ਚ ਸੂਲਂ ਤਚ੍ਛਨ੍ਤਂ ਪਸ੍ਸਤਿ, ਚਿਤ੍ਤੁਤ੍ਰਾਸਮਤ੍ਤਮ੍ਪਿਸ੍ਸ ਨਤ੍ਥਿ, ਕਿਂ ਨੁ ਖੋ ਏਸ ਸਤਾਰਹਗਾਥਾਨਂ ਆਨੁਭਾਵੋ, ਉਦਾਹੁ ਸਚ੍ਚਸ੍ਸ, ਅਞ੍ਞਸ੍ਸੇਵ ਵਾ ਕਸ੍ਸਚੀ’’ਤਿ ਚਿਨ੍ਤੇਤ੍ਵਾ ‘‘ਪੁਚ੍ਛਿਸ੍ਸਾਮਿ ਤਾਵ ਨ’’ਨ੍ਤਿ ਪੁਚ੍ਛਨ੍ਤੋ ਗਾਥਮਾਹ –

੪੩੪.

‘‘ਮੁਤ੍ਤੋ ਤੁਵਂ ਪੋਰਿਸਾਦਸ੍ਸ ਹਤ੍ਥਾ, ਗਨ੍ਤ੍ਵਾ ਸਕਂ ਮਨ੍ਦਿਰਂ ਕਾਮਕਾਮੀ;

ਅਮਿਤ੍ਤਹਤ੍ਥਂ ਪੁਨਰਾਗਤੋਸਿ, ਨ ਹਿ ਨੂਨ ਤੇ ਮਰਣਭਯਂ ਜਨਿਨ੍ਦ;

ਅਲੀਨਚਿਤ੍ਤੋ ਅਸਿ ਸਚ੍ਚਵਾਦੀ’’ਤਿ.

ਮਹਾਸਤ੍ਤੋਪਿਸ੍ਸ ਆਚਿਕ੍ਖਨ੍ਤੋ ਆਹ –

੪੩੫.

‘‘ਕਤਾ ਮੇ ਕਲ੍ਯਾਣਾ ਅਨੇਕਰੂਪਾ, ਯਞ੍ਞਾ ਯਿਟ੍ਠਾ ਯੇ ਵਿਪੁਲਾ ਪਸਤ੍ਥਾ;

ਵਿਸੋਧਿਤੋ ਪਰਲੋਕਸ੍ਸ ਮਗ੍ਗੋ, ਧਮ੍ਮੇ ਠਿਤੋ ਕੋ ਮਰਣਸ੍ਸ ਭਾਯੇ.

੪੩੬.

‘‘ਕਤਾ ਮੇ ਕਲ੍ਯਾਣਾ ਅਨੇਕਰੂਪਾ, ਯਞ੍ਞਾ ਯਿਟ੍ਠਾ ਯੇ ਵਿਪੁਲਾ ਪਸਤ੍ਥਾ;

ਅਨਾਨੁਤਪ੍ਪਂ ਪਰਲੋਕਂ ਗਮਿਸ੍ਸਂ, ਯਜਸ੍ਸੁ ਯਞ੍ਞਂ ਅਦ ਮਂ ਪੋਰਿਸਾਦ.

੪੩੭.

‘‘ਪਿਤਾ ਚ ਮਾਤਾ ਚ ਉਪਟ੍ਠਿਤਾ ਮੇ, ਧਮ੍ਮੇਨ ਮੇ ਇਸ੍ਸਰਿਯਂ ਪਸਤ੍ਥਂ;

ਵਿਸੋਧਿਤੋ ਪਰਲੋਕਸ੍ਸ ਮਗ੍ਗੋ, ਧਮ੍ਮੇ ਠਿਤੋ ਕੋ ਮਰਣਸ੍ਸ ਭਾਯੇ.

੪੩੮.

‘‘ਪਿਤਾ ਚ ਮਾਤਾ ਚ ਉਪਟ੍ਠਿਤਾ ਮੇ, ਧਮ੍ਮੇਨ ਮੇ ਇਸ੍ਸਰਿਯਂ ਪਸਤ੍ਥਂ;

ਅਨਾਨੁਤਪ੍ਪਂ ਪਰਲੋਕਂ ਗਮਿਸ੍ਸਂ, ਯਜਸ੍ਸੁ ਯਞ੍ਞਂ ਅਦ ਮਂ ਪੋਰਿਸਾਦ.

੪੩੯.

‘‘ਞਾਤੀਸੁ ਮਿਤ੍ਤੇਸੁ ਕਤਾ ਮੇ ਕਾਰਾ, ਧਮ੍ਮੇਨ ਮੇ ਇਸ੍ਸਰਿਯਂ ਪਸਤ੍ਥਂ;

ਵਿਸੋਧਿਤੋ ਪਰਲੋਕਸ੍ਸ ਮਗ੍ਗੋ, ਧਮ੍ਮੇ ਠਿਤੋ ਕੋ ਮਰਣਸ੍ਸ ਭਾਯੇ.

੪੪੦.

‘‘ਞਾਤੀਸੁ ਮਿਤ੍ਤੇਸੁ ਕਤਾ ਮੇ ਕਾਰਾ, ਧਮ੍ਮੇਨ ਮੇ ਇਸ੍ਸਰਿਯਂ ਪਸਤ੍ਥਂ;

ਅਨਾਨੁਤਪ੍ਪਂ ਪਰਲੋਕਂ ਗਮਿਸ੍ਸਂ, ਯਜਸ੍ਸੁ ਯਞ੍ਞਂ ਅਦ ਮਂ ਪੋਰਿਸਾਦ.

੪੪੧.

‘‘ਦਿਨ੍ਨਂ ਮੇ ਦਾਨਂ ਬਹੁਧਾ ਬਹੂਨਂ, ਸਨ੍ਤਪ੍ਪਿਤਾ ਸਮਣਬ੍ਰਾਹ੍ਮਣਾ ਚ;

ਵਿਸੋਧਿਤੋ ਪਰਲੋਕਸ੍ਸ ਮਗ੍ਗੋ, ਧਮ੍ਮੇ ਠਿਤੋ ਕੋ ਮਰਣਸ੍ਸ ਭਾਯੇ.

੪੪੨.

‘‘ਦਿਨ੍ਨਂ ਮੇ ਦਾਨਂ ਬਹੁਧਾ ਬਹੂਨਂ, ਸਨ੍ਤਪ੍ਪਿਤਾ ਸਮਣਬ੍ਰਾਹ੍ਮਣਾ ਚ;

ਅਨਾਨੁਤਪ੍ਪਂ ਪਰਲੋਕਂ ਗਮਿਸ੍ਸਂ, ਯਜਸ੍ਸੁ ਯਞ੍ਞਂ ਅਦ ਮਂ ਪੋਰਿਸਾਦਾ’’ਤਿ.

ਤਤ੍ਥ ਕਲ੍ਯਾਣਾਤਿ ਕਲ੍ਯਾਣਕਮ੍ਮਾ. ਅਨੇਕਰੂਪਾਤਿ ਦਾਨਾਦਿਵਸੇਨ ਅਨੇਕਵਿਧਾ. ਯਞ੍ਞਾਤਿ ਦਸਵਿਧਦਾਨਵਤ੍ਥੁਪਰਿਚ੍ਚਾਗਵਸੇਨ ਅਤਿਵਿਪੁਲਾ ਪਣ੍ਡਿਤੇਹਿ ਪਸਤ੍ਥਾ ਯਞ੍ਞਾਪਿ ਯਿਟ੍ਠਾ ਪਵਤ੍ਤਿਤਾ. ਧਮ੍ਮੇ ਠਿਤੋਤਿ ਏਵਂ ਧਮ੍ਮੇ ਪਤਿਟ੍ਠਿਤੋ ਮਾਦਿਸੋ ਕੋ ਨਾਮ ਮਰਣਸ੍ਸ ਭਾਯੇਯ੍ਯ. ਅਨਾਨੁਤਪ੍ਪਨ੍ਤਿ ਅਨਾਨੁਤਪ੍ਪਮਾਨੋ. ਧਮ੍ਮੇਨ ਮੇ ਇਸ੍ਸਰਿਯਂ ਪਸਤ੍ਥਨ੍ਤਿ ਦਸਵਿਧਂ ਰਾਜਧਮ੍ਮਂ ਅਕੋਪੇਤ੍ਵਾ ਧਮ੍ਮੇਨੇਵ ਮਯਾ ਰਜ੍ਜਂ ਪਸਾਸਿਤਂ. ਕਾਰਾਤਿ ਞਾਤੀਸੁ ਞਾਤਿਕਿਚ੍ਚਾਨਿ, ਮਿਤ੍ਤੇਸੁ ਚ ਮਿਤ੍ਤਕਿਚ੍ਚਾਨਿ. ਦਾਨਨ੍ਤਿ ਸਵਤ੍ਥੁਕਚੇਤਨਾ. ਬਹੁਧਾਤਿ ਬਹੂਹਿ ਆਕਾਰੇਹਿ. ਬਹੂਨਨ੍ਤਿ ਨ ਪਞ੍ਚਨ੍ਨਂ, ਨ ਦਸਨ੍ਨਂ, ਸਤਸ੍ਸਪਿ ਸਹਸ੍ਸਸ੍ਸਪਿ ਸਤਸਹਸ੍ਸਸ੍ਸਪਿ ਦਿਨ੍ਨਮੇਵ. ਸਨ੍ਤਪ੍ਪਿਤਾਤਿ ਗਹਿਤਗਹਿਤਭਾਜਨਾਨਿ ਪੂਰੇਤ੍ਵਾ ਸੁਟ੍ਠੁ ਤਪ੍ਪਿਤਾ.

ਤਂ ਸੁਤ੍ਵਾ ਪੋਰਿਸਾਦੋ ‘‘ਅਯਂ ਸੁਤਸੋਮਮਹਾਰਾਜਾ ਸਪ੍ਪੁਰਿਸੋ ਞਾਣਸਮ੍ਪਨ੍ਨੋ ਮਧੁਰਧਮ੍ਮਕਥਿਕੋ, ਸਚਾਹਂ ਏਤਂ ਖਾਦੇਯ੍ਯਂ, ਮੁਦ੍ਧਾ ਮੇ ਸਤ੍ਤਧਾ ਫਲੇਯ੍ਯ, ਪਥਵੀ ਵਾ ਪਨ ਮੇ ਵਿਵਰਂ ਦਦੇਯ੍ਯਾ’’ਤਿ ਭੀਤਤਸਿਤੋ ਹੁਤ੍ਵਾ, ‘‘ਸਮ੍ਮ, ਨ ਤ੍ਵਂ ਮਯਾ ਖਾਦਿਤਬ੍ਬਰੂਪੋ’’ਤਿ ਵਤ੍ਵਾ ਗਾਥਮਾਹ –

੪੪੩.

‘‘ਵਿਸਂ ਪਜਾਨਂ ਪੁਰਿਸੋ ਅਦੇਯ੍ਯ, ਆਸੀਵਿਸਂ ਜਲਿਤਮੁਗ੍ਗਤੇਜਂ;

ਮੁਦ੍ਧਾਪਿ ਤਸ੍ਸ ਵਿਫਲੇਯ੍ਯ ਸਤ੍ਤਧਾ, ਯੋ ਤਾਦਿਸਂ ਸਚ੍ਚਵਾਦਿਂ ਅਦੇਯ੍ਯਾ’’ਤਿ.

ਤਤ੍ਥ ਵਿਸਨ੍ਤਿ ਤਤ੍ਥੇਵ ਮਾਰਣਸਮਤ੍ਥਂ ਹਲਾਹਲਵਿਸਂ. ਜਲਿਤਨ੍ਤਿ ਅਤ੍ਤਨੋ ਵਿਸਤੇਜੇਨ ਜਲਿਤਂ ਤੇਨੇਵ ਉਗ੍ਗਤੇਜਂ ਅਗ੍ਗਿਕ੍ਖਨ੍ਧਂ ਵਿਯ ਚਰਨ੍ਤਂ ਆਸੀਵਿਸਂ ਵਾ ਪਨ ਸੋ ਗੀਵਾਯ ਗਣ੍ਹੇਯ੍ਯ.

ਇਤਿ ਸੋ ਮਹਾਸਤ੍ਤਂ ‘‘ਹਲਾਹਲਵਿਸਸਦਿਸੋ ਤ੍ਵਂ, ਕੋ ਤਂ ਖਾਦਿਸ੍ਸਤੀ’’ਤਿ ਵਤ੍ਵਾ ਗਾਥਾ ਸੋਤੁਕਾਮੋ ਤਂ ਯਾਚਿਤ੍ਵਾ ਤੇਨ ਧਮ੍ਮਗਾਰਵਜਨਨਤ੍ਥਂ ‘‘ਏਵਰੂਪਾਨਂ ਅਨਵਜ੍ਜਗਾਥਾਨਂ ਤ੍ਵਂ ਅਭਾਜਨ’’ਨ੍ਤਿ ਪਟਿਕ੍ਖਿਤ੍ਤੋਪਿ ‘‘ਸਕਲਜਮ੍ਬੁਦੀਪੇ ਇਮਿਨਾ ਸਦਿਸੋ ਪਣ੍ਡਿਤੋ ਨਤ੍ਥਿ, ਅਯਂ ਮਮ ਹਤ੍ਥਾ ਮੁਚ੍ਚਿਤ੍ਵਾ ਗਨ੍ਤ੍ਵਾ ਤਾ ਗਾਥਾ ਸੁਤ੍ਵਾ ਧਮ੍ਮਕਥਿਕਸ੍ਸ ਸਕ੍ਕਾਰਂ ਕਤ੍ਵਾ ਨਲਾਟੇਨ ਮਚ੍ਚੁਂ ਆਦਾਯ ਪੁਨਾਗਤੋ, ਅਤਿਵਿਯ ਸਾਧੁਰੂਪਾ ਗਾਥਾ ਭਵਿਸ੍ਸਨ੍ਤੀ’’ਤਿ ਸੁਟ੍ਠੁਤਰਂ ਸਞ੍ਜਾਤਧਮ੍ਮਸ੍ਸਵਨਾਦਰੋ ਹੁਤ੍ਵਾ ਤਂ ਯਾਚਨ੍ਤੋ ਗਾਥਮਾਹ –

੪੪੪.

‘‘ਸੁਤ੍ਵਾ ਧਮ੍ਮਂ ਵਿਜਾਨਨ੍ਤਿ, ਨਰਾ ਕਲ੍ਯਾਣਪਾਪਕਂ;

ਅਪਿ ਗਾਥਾ ਸੁਣਿਤ੍ਵਾਨ, ਧਮ੍ਮੇ ਮੇ ਰਮਤੇ ਮਨੋ’’ਤਿ.

ਤਸ੍ਸਤ੍ਥੋ – ‘‘ਸਮ੍ਮ ਸੁਤਸੋਮ, ਨਰਾ ਨਾਮ ਧਮ੍ਮਂ ਸੁਤ੍ਵਾ ਕਲ੍ਯਾਣਮ੍ਪਿ ਪਾਪਕਮ੍ਪਿ ਜਾਨਨ੍ਤਿ, ਅਪ੍ਪੇਵ ਨਾਮ ਤਾ ਗਾਥਾ ਸੁਤ੍ਵਾ ਮਮਪਿ ਕੁਸਲਕਮ੍ਮਪਥਧਮ੍ਮੇ ਮਨੋ ਰਮੇਯ੍ਯਾ’’ਤਿ.

ਅਥ ਮਹਾਸਤ੍ਤੋ ‘‘ਸੋਤੁਕਾਮੋ ਦਾਨਿ ਪੋਰਿਸਾਦੋ, ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਤੇਨ ਹਿ, ਸਮ੍ਮ, ਸਾਧੁਕਂ ਸੁਣਾਹੀ’’ਤਿ ਤਂ ਓਹਿਤਸੋਤਂ ਕਤ੍ਵਾ ਨਨ੍ਦਬ੍ਰਾਹ੍ਮਣੇਨ ਕਥਿਤਨਿਯਾਮੇਨੇਵ ਗਾਥਾਨਂ ਥੁਤਿਂ ਕਤ੍ਵਾ ਛਸੁ ਕਾਮਾਵਚਰਦੇਵੇਸੁ ਏਕਕੋਲਾਹਲਂ ਕਤ੍ਵਾ ਦੇਵਤਾਸੁ ਸਾਧੁਕਾਰਂ ਦਦਮਾਨਾਸੁ ਪੋਰਿਸਾਦਸ੍ਸ ਧਮ੍ਮਂ ਕਥੇਸਿ –

੪੪੫.

‘‘ਸਕਿਦੇਵ ਮਹਾਰਾਜ, ਸਬ੍ਭਿ ਹੋਤਿ ਸਮਾਗਮੋ;

ਸਾ ਨਂ ਸਙ੍ਗਤਿ ਪਾਲੇਤਿ, ਨਾਸਬ੍ਭਿ ਬਹੁ ਸਙ੍ਗਮੋ.

੪੪੬.

‘‘ਸਬ੍ਭਿਰੇਵ ਸਮਾਸੇਥ, ਸਬ੍ਭਿ ਕੁਬ੍ਬੇਥ ਸਨ੍ਥਵਂ;

ਸਤਂ ਸਨ੍ਧਮ੍ਮਮਞ੍ਞਾਯ, ਸੇਯ੍ਯੋ ਹੋਤਿ ਨ ਪਾਪਿਯੋ.

੪੪੭.

‘‘ਜੀਰਨ੍ਤਿ ਵੇ ਰਾਜਰਥਾ ਸੁਚਿਤ੍ਤਾ, ਅਥੋ ਸਰੀਰਮ੍ਪਿ ਜਰਂ ਉਪੇਤਿ;

ਸਤਞ੍ਚ ਧਮ੍ਮੋ ਨ ਜਰਂ ਉਪੇਤਿ, ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤਿ.

੪੪੮.

‘‘ਨਭਞ੍ਚ ਦੂਰੇ ਪਥਵੀ ਚ ਦੂਰੇ, ਪਾਰਂ ਸਮੁਦ੍ਦਸ੍ਸ ਤਦਾਹੁ ਦੂਰੇ;

ਤਤੋ ਹਵੇ ਦੂਰਤਰਂ ਵਦਨ੍ਤਿ, ਸਤਞ੍ਚ ਧਮ੍ਮੋ ਅਸਤਞ੍ਚ ਰਾਜਾ’’ਤਿ.

ਤਸ੍ਸ ਤੇਨ ਸੁਕਥਿਤਤ੍ਤਾ ਚੇਵ ਅਤ੍ਤਨੋ ਪਣ੍ਡਿਤਭਾਵੇਨ ਚ ਤਾ ਗਾਥਾ ਸਬ੍ਬਞ੍ਞੁਬੁਦ੍ਧਕਥਿਤਾ ਵਿਯਾਤਿ ਚਿਨ੍ਤੇਨ੍ਤਸ੍ਸ ਸਕਲਸਰੀਰਂ ਪਞ੍ਚਵਣ੍ਣਾਯ ਪੀਤਿਯਾ ਪਰਿਪੂਰਿ, ਬੋਧਿਸਤ੍ਤੇ ਮੁਦੁਚਿਤ੍ਤਂ ਅਹੋਸਿ, ਸੇਤਚ੍ਛਤ੍ਤਦਾਯਕਂ ਪਿਤਰਂ ਵਿਯ ਨਂ ਅਮਞ੍ਞਿ. ਸੋ ‘‘ਅਹਂ ਸੁਤਸੋਮਸ੍ਸ ਦਾਤਬ੍ਬਂ ਕਿਞ੍ਚਿ ਹਿਰਞ੍ਞਸੁਵਣ੍ਣਂ ਨ ਪਸ੍ਸਾਮਿ, ਏਕੇਕਾਯ ਪਨਸ੍ਸ ਗਾਥਾਯ ਏਕੇਕਂ ਵਰਂ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੪੪੯.

‘‘ਗਾਥਾ ਇਮਾ ਅਤ੍ਥਵਤੀ ਸੁਬ੍ਯਞ੍ਜਨਾ, ਸੁਭਾਸਿਤਾ ਤੁਯ੍ਹ ਜਨਿਨ੍ਦ ਸੁਤ੍ਵਾ;

ਆਨਨ੍ਦਿ ਵਿਤ੍ਤੋ ਸੁਮਨੋ ਪਤੀਤੋ, ਚਤ੍ਤਾਰਿ ਤੇ ਸਮ੍ਮ ਵਰੇ ਦਦਾਮੀ’’ਤਿ.

ਤਤ੍ਥ ਆਨਨ੍ਦੀਤਿ ਆਨਨ੍ਦਜਾਤੋ. ਸੇਸਾਨਿ ਤਸ੍ਸੇਵ ਵੇਵਚਨਾਨਿ. ਚਤ੍ਤਾਰੋਪਿ ਹੇਤੇ ਤੁਟ੍ਠਾਕਾਰਾ ਏਵ.

ਅਥ ਨਂ ਮਹਾਸਤ੍ਤੋ ‘‘ਕਿਂ ਨਾਮ ਤ੍ਵਂ ਵਰਂ ਦਸ੍ਸਸੀ’’ਤਿ ਅਪਸਾਦੇਨ੍ਤੋ ਗਾਥਮਾਹ –

੪੫੦.

‘‘ਯੋ ਨਤ੍ਤਨੋ ਮਰਣਂ ਬੁਜ੍ਝਸਿ ਤੁਵਂ, ਹਿਤਾਹਿਤਂ ਵਿਨਿਪਾਤਞ੍ਚ ਸਗ੍ਗਂ;

ਗਿਦ੍ਧੋ ਰਸੇ ਦੁਚ੍ਚਰਿਤੇ ਨਿਵਿਟ੍ਠੋ, ਕਿਂ ਤ੍ਵਂ ਵਰਂ ਦਸ੍ਸਸਿ ਪਾਪਧਮ੍ਮ.

੪੫੧.

‘‘ਅਹਞ੍ਚ ਤਂ ‘ਦੇਹਿ ਵਰ’ਨ੍ਤਿ ਵਜ੍ਜਂ, ਤ੍ਵਂ ਚਾਪਿ ਦਤ੍ਵਾ ਨ ਅਵਾਕਰੇਯ੍ਯ;

ਸਨ੍ਦਿਟ੍ਠਿਕਂ ਕਲਹਮਿਮਂ ਵਿਵਾਦਂ, ਕੋ ਪਣ੍ਡਿਤੋ ਜਾਨਮੁਪਬ੍ਬਜੇਯ੍ਯਾ’’ਤਿ.

ਤਤ੍ਥ ਯੋਤਿ ਯੋ ਤ੍ਵਂ ‘‘ਮਰਣਧਮ੍ਮੋਹਮਸ੍ਮੀ’’ਤਿ ਅਤ੍ਤਨੋਪਿ ਮਰਣਂ ਨ ਬੁਜ੍ਝਸਿ ਨ ਜਾਨਾਸਿ, ਪਾਪਕਮ੍ਮਮੇਵ ਕਰੋਸਿ. ਹਿਤਾਹਿਤਨ੍ਤਿ ‘‘ਇਦਂ ਮੇ ਕਮ੍ਮਂ ਹਿਤਂ, ਇਦਂ ਅਹਿਤਂ, ਇਦਂ ਵਿਨਿਪਾਤਂ ਨੇਸ੍ਸਤਿ, ਇਦਂ ਸਗ੍ਗ’’ਨ੍ਤਿ ਨ ਜਾਨਾਸਿ. ਰਸੇਤਿ ਮਨੁਸ੍ਸਮਂਸਰਸੇ. ਵਜ੍ਜਨ੍ਤਿ ਵਦੇਯ੍ਯਂ. ਨ ਅਵਾਕਰੇਯ੍ਯਾਤਿ ਵਾਚਾਯ ਦਤ੍ਵਾ ‘‘ਦੇਹਿ ਮੇ ਵਰ’’ਨ੍ਤਿ ਵੁਚ੍ਚਮਾਨੋ ਨ ਅਵਾਕਰੇਯ੍ਯਾਸਿ ਨ ਦਦੇਯ੍ਯਾਸਿ. ਉਪਬ੍ਬਜੇਯ੍ਯਾਤਿ ਕੋ ਇਮਂ ਕਲਹਂ ਪਣ੍ਡਿਤੋ ਉਪਗਚ੍ਛੇਯ੍ਯ.

ਤਤੋ ਪੋਰਿਸਾਦੋ ‘‘ਨਾਯਂ ਮਯ੍ਹਂ ਸਦ੍ਦਹਤਿ, ਸਦ੍ਦਹਾਪੇਸ੍ਸਾਮਿ ਨ’’ਨ੍ਤਿ ਗਾਥਮਾਹ –

੪੫੨.

‘‘ਨ ਤਂ ਵਰਂ ਅਰਹਤਿ ਜਨ੍ਤੁ ਦਾਤੁਂ, ਯਂ ਵਾਪਿ ਦਤ੍ਵਾ ਨ ਅਵਾਕਰੇਯ੍ਯ;

ਵਰਸ੍ਸੁ ਸਮ੍ਮ ਅਵਿਕਮ੍ਪਮਾਨੋ, ਪਾਣਂ ਚਜਿਤ੍ਵਾਨਪਿ ਦਸ੍ਸਮੇਵਾ’’ਤਿ.

ਤਤ੍ਥ ਅਵਿਕਮ੍ਪਮਾਨੋਤਿ ਅਨੋਲੀਯਮਾਨੋ.

ਅਥ ਮਹਾਸਤ੍ਤੋ ‘‘ਅਯਂ ਅਤਿਵਿਯ ਸੂਰੋ ਹੁਤ੍ਵਾ ਕਥੇਤਿ, ਕਰਿਸ੍ਸਤਿ ਮੇ ਵਚਨਂ, ਵਰਂ ਗਣ੍ਹਿਸ੍ਸਾਮਿ, ਸਚੇ ਪਨ ‘‘ਮਨੁਸ੍ਸਮਂਸਂ ਨ ਖਾਦਿਤਬ੍ਬ’ਨ੍ਤਿ ਪਠਮਮੇਵ ਵਰਂ ਵਾਰਯਿਸ੍ਸਂ, ਅਤਿਵਿਯ ਕਿਲਮਿਸ੍ਸਤਿ, ਪਠਮਂ ਅਞ੍ਞੇ ਤਯੋ ਵਰੇ ਗਹੇਤ੍ਵਾ ਪਚ੍ਛਾ ਏਤਂ ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਆਹ –

੪੫੩.

‘‘ਅਰਿਯਸ੍ਸ ਅਰਿਯੇਨ ਸਮੇਤਿ ਸਖ੍ਯਂ, ਪਞ੍ਞਸ੍ਸ ਪਞ੍ਞਾਣਵਤਾ ਸਮੇਤਿ;

ਪਸ੍ਸੇਯ੍ਯ ਤਂ ਵਸ੍ਸਸਤਂ ਅਰੋਗਂ, ਏਤਂ ਵਰਾਨਂ ਪਠਮਂ ਵਰਾਮੀ’’ਤਿ.

ਤਤ੍ਥ ਅਰਿਯਸ੍ਸਾਤਿ ਆਚਾਰਅਰਿਯਸ੍ਸ. ਸਖ੍ਯਨ੍ਤਿ ਸਖਿਧਮ੍ਮੋ ਮਿਤ੍ਤਧਮ੍ਮੋ. ਪਞ੍ਞਾਣਵਤਾਤਿ ਞਾਣਸਮ੍ਪਨ੍ਨੇਨ. ਸਮੇਤੀਤਿ ਗਙ੍ਗੋਦਕਂ ਵਿਯ ਯਮੁਨੋਦਕੇਨ ਸਂਸਨ੍ਦਤਿ. ਧਾਤੁਸੋ ਹਿ ਸਤ੍ਤਾ ਸਂਸਨ੍ਦਨ੍ਤਿ. ਪਸ੍ਸੇਯ੍ਯ ਤਨ੍ਤਿ ਸੁਤਸੋਮੋ ਪੋਰਿਸਾਦਸ੍ਸ ਚਿਰਂ ਜੀਵਿਤਂ ਇਚ੍ਛਨ੍ਤੋ ਵਿਯ ਪਠਮਂ ਅਤ੍ਤਨੋ ਜੀਵਿਤਵਰਂ ਯਾਚਤਿ. ਪਣ੍ਡਿਤਸ੍ਸ ਹਿ ‘‘ਮਮ ਜੀਵਿਤਂ ਦੇਹੀ’’ਤਿ ਵਤ੍ਤੁਂ ਅਯੁਤ੍ਤਂ, ਅਪਿਚ ਸੋ ‘ਮਯ੍ਹਮੇਵ ਏਸ ਆਰੋਗ੍ਯਂ ਇਚ੍ਛਤੀ’ਤਿ ਚਿਨ੍ਤੇਤ੍ਵਾ ਤੁਸ੍ਸਿਸ੍ਸਤੀਤਿ ਏਵਮਾਹ.

ਸੋਪਿ ਤਂ ਸੁਤ੍ਵਾਵ ‘‘ਅਯਂ ਇਸ੍ਸਰਿਯਾ ਧਂਸੇਤ੍ਵਾ ਇਦਾਨਿ ਮਂਸਂ ਖਾਦਿਤੁਕਾਮਸ੍ਸ ਏਵਂ ਮਹਾਅਨਤ੍ਥਕਰਸ੍ਸ ਮਹਾਚੋਰਸ੍ਸ ਮਯ੍ਹਮੇਵ ਜੀਵਿਤਂ ਇਚ੍ਛਤਿ, ਅਹੋ ਮਮ ਹਿਤਕਾਮੋ’’ਤਿ ਤੁਟ੍ਠਮਾਨਸੋ ਵਞ੍ਚੇਤ੍ਵਾ ਵਰਸ੍ਸ ਗਹਿਤਭਾਵਂ ਅਜਾਨਿਤ੍ਵਾ ਤਂ ਵਰਂ ਦਦਮਾਨੋ ਗਾਥਮਾਹ –

੪੫੪.

‘‘ਅਰਿਯਸ੍ਸ ਅਰਿਯੇਨ ਸਮੇਤਿ ਸਖ੍ਯਂ, ਪਞ੍ਞਸ੍ਸ ਪਞ੍ਞਾਣਵਤਾ ਸਮੇਤਿ;

ਪਸ੍ਸਾਸਿ ਮਂ ਵਸ੍ਸਸਤਂ ਅਰੋਗਂ, ਏਤਂ ਵਰਾਨਂ ਪਠਮਂ ਦਦਾਮੀ’’ਤਿ.

ਤਤ੍ਥ ਵਰਾਨਨ੍ਤਿ ਚਤੁਨ੍ਨਂ ਵਰਾਨਂ ਪਠਮਂ.

ਤਤੋ ਬੋਧਿਸਤ੍ਤੋ ਆਹ –

੪੫੫.

‘‘ਯੇ ਖਤ੍ਤਿਯਾਸੇ ਇਧ ਭੂਮਿਪਾਲਾ, ਮੁਦ੍ਧਾਭਿਸਿਤ੍ਤਾ ਕਤਨਾਮਧੇਯ੍ਯਾ;

ਨ ਤਾਦਿਸੇ ਭੂਮਿਪਤੀ ਅਦੇਸਿ, ਏਤਂ ਵਰਾਨਂ ਦੁਤਿਯਂ ਵਰਾਮੀ’’ਤਿ.

ਤਤ੍ਥ ਕਤਨਾਮਧੇਯ੍ਯਾਤਿ ਮੁਦ੍ਧਨਿ ਅਭਿਸਿਤ੍ਤਤ੍ਤਾਵ ‘‘ਮੁਦ੍ਧਾਭਿਸਿਤ੍ਤਾ’’ਤਿ ਕਤਨਾਮਧੇਯ੍ਯਾ. ਨ ਤਾਦਿਸੇਤਿ ਤਾਦਿਸੇ ਖਤ੍ਤਿਯੇ ਨ ਅਦੇਸਿ ਮਾ ਖਾਦਿ.

ਇਤਿ ਸੋ ਦੁਤਿਯਂ ਵਰਂ ਗਣ੍ਹਨ੍ਤੋ ਪਰੋਸਤਾਨਂ ਖਤ੍ਤਿਯਾਨਂ ਜੀਵਿਤਵਰਂ ਗਣ੍ਹਿ. ਪੋਰਿਸਾਦੋਪਿਸ੍ਸ ਦਦਮਾਨੋ ਆਹ –

੪੫੬.

‘‘ਯੇ ਖਤ੍ਤਿਯਾਸੇ ਇਧ ਭੂਮਿਪਾਲਾ, ਮੁਦ੍ਧਾਭਿਸਿਤ੍ਤਾ ਕਤਨਾਮਧੇਯ੍ਯਾ;

ਨ ਤਾਦਿਸੇ ਭੂਮਿਪਤੀ ਅਦੇਮਿ, ਏਤਂ ਵਰਾਨਂ ਦੁਤਿਯਂ ਦਦਾਮੀ’’ਤਿ.

ਕਿਂ ਪਨ ਤੇ ਤੇਸਂ ਸਦ੍ਦਂ ਸੁਣਨ੍ਤਿ, ਨ ਸੁਣਨ੍ਤੀਤਿ? ਨ ਸਬ੍ਬਂ ਸੁਣਨ੍ਤਿ. ਪੋਰਿਸਾਦੇਨ ਹਿ ਰੁਕ੍ਖਸ੍ਸ ਧੂਮਜਾਲਉਪਦ੍ਦਵਭਯੇਨ ਪਟਿਕ੍ਕਮਿਤ੍ਵਾ ਅਗ੍ਗਿ ਕਤੋ, ਅਗ੍ਗਿਨੋ ਚ ਰੁਕ੍ਖਸ੍ਸ ਚ ਅਨ੍ਤਰੇ ਨਿਸੀਦਿਤ੍ਵਾ ਮਹਾਸਤ੍ਤੋ ਤੇਨ ਸਦ੍ਧਿਂ ਕਥੇਸਿ, ਤਸ੍ਮਾ ਸਬ੍ਬਂ ਅਸੁਤ੍ਵਾ ਉਪਡ੍ਢੁਪਡ੍ਢਂ ਸੁਣਿਂਸੁ. ਤੇ ‘‘ਇਦਾਨਿ ਸੁਤਸੋਮੋ ਪੋਰਿਸਾਦਂ ਦਮੇਸ੍ਸਤਿ, ਮਾ ਭਾਯਥਾ’’ਤਿ ਅਞ੍ਞਮਞ੍ਞਂ ਸਮਸ੍ਸਾਸੇਸੁਂ. ਤਸ੍ਮਿਂ ਖਣੇ ਮਹਾਸਤ੍ਤੋ ਇਮਂ ਗਾਥਮਾਹ –

੪੫੭.

‘‘ਪਰੋਸਤਂ ਖਤ੍ਤਿਯਾ ਤੇ ਗਹੀਤਾ, ਤਲਾਵੁਤਾ ਅਸ੍ਸੁਮੁਖਾ ਰੁਦਨ੍ਤਾ;

ਸਕੇ ਤੇ ਰਟ੍ਠੇ ਪਟਿਪਾਦਯਾਹਿ, ਏਤਂ ਵਰਾਨਂ ਤਤਿਯਂ ਵਰਾਮੀ’’ਤਿ.

ਤਤ੍ਥ ਪਰੋਸਤਨ੍ਤਿ ਅਤਿਰੇਕਸਤਂ. ਤੇ ਗਹੀਤਾਤਿ ਤਯਾ ਗਹਿਤਾ. ਤਲਾਵੁਤਾਤਿ ਹਤ੍ਥਤਲੇਸੁ ਆਵੁਤਾ.

ਇਤਿ ਮਹਾਸਤ੍ਤੋ ਤਤਿਯਂ ਵਰਂ ਗਣ੍ਹਨ੍ਤੋ ਤੇਸਂ ਖਤ੍ਤਿਯਾਨਂ ਸਕਰਟ੍ਠਨਿਯ੍ਯਾਤਨਵਰਂ ਗਣ੍ਹਿ. ਕਿਂਕਾਰਣਾ? ਸੋ ਅਖਾਦਨ੍ਤੋਪਿ ਵੇਰਭਯੇਨ ਸਬ੍ਬੇ ਤੇ ਦਾਸੇ ਕਤ੍ਵਾ ਅਰਞ੍ਞੇਯੇਵ ਵਾਸੇਯ੍ਯ, ਮਾਰੇਤ੍ਵਾ ਵਾ ਛਡ੍ਡੇਯ੍ਯ, ਪਚ੍ਚਨ੍ਤਂ ਨੇਤ੍ਵਾ ਵਾ ਵਿਕ੍ਕਿਣੇਯ੍ਯ, ਤਸ੍ਮਾ ਤੇਸਂ ਸਕਰਟ੍ਠਨਿਯ੍ਯਾਤਨਵਰਂ ਗਣ੍ਹਿ. ਇਤਰੋਪਿਸ੍ਸ ਦਦਮਾਨੋ ਇਮਂ ਗਾਥਮਾਹ –

੪੫੮.

‘‘ਪਰੋਸਤਂ ਖਤ੍ਤਿਯਾ ਮੇ ਗਹੀਤਾ, ਤਲਾਵੁਤਾ ਅਸ੍ਸੁਮੁਖਾ ਰੁਦਨ੍ਤਾ;

ਸਕੇ ਤੇ ਰਟ੍ਠੇ ਪਟਿਪਾਦਯਾਮਿ, ਏਤਂ ਵਰਾਨਂ ਤਤਿਯਂ ਦਦਾਮੀ’’ਤਿ.

ਚਤੁਤ੍ਥਂ ਪਨ ਵਰਂ ਗਣ੍ਹਨ੍ਤੋ ਬੋਧਿਸਤ੍ਤੋ ਇਮਂ ਗਾਥਮਾਹ –

੪੫੯.

‘‘ਛਿਦ੍ਦਂ ਤੇ ਰਟ੍ਠਂ ਬ੍ਯਥਿਤਾ ਭਯਾ ਹਿ, ਪੁਥੂ ਨਰਾ ਲੇਣਮਨੁਪ੍ਪਵਿਟ੍ਠਾ;

ਮਨੁਸ੍ਸਮਂਸਂ ਵਿਰਮੇਹਿ ਰਾਜ, ਏਤਂ ਵਰਾਨਂ ਚਤੁਤ੍ਥਂ ਵਰਾਮੀ’’ਤਿ.

ਤਤ੍ਥ ਛਿਦ੍ਦਨ੍ਤਿ ਨ ਘਨਵਾਸਂ ਤਤ੍ਥ ਤਤ੍ਥ ਗਾਮਾਦੀਨਂ ਉਟ੍ਠਿਤਤ੍ਤਾ ਸਵਿਵਰਂ. ਬ੍ਯਥਿਤਾ ਭਯਾਹੀਤਿ ‘‘ਪੋਰਿਸਾਦੋ ਇਦਾਨਿ ਆਗਮਿਸ੍ਸਤੀ’’ਤਿ ਤਵ ਭਯੇਨ ਕਮ੍ਪਿਤਾ. ਲੇਣਮਨੁਪ੍ਪਵਿਟ੍ਠਾਤਿ ਦਾਰਕੇ ਹਤ੍ਥੇਸੁ ਗਹੇਤ੍ਵਾ ਤਿਣਗਹਨਾਦਿਨਿਲੀਯਨਟ੍ਠਾਨਂ ਪਵਿਟ੍ਠਾ. ਮਨੁਸ੍ਸਮਂਸਨ੍ਤਿ ਦੁਗ੍ਗਨ੍ਧਂ ਜੇਗੁਚ੍ਛਂ ਪਟਿਕ੍ਕੂਲਂ ਮਨੁਸ੍ਸਮਂਸਂ ਪਜਹ. ਨਿਸ੍ਸਕ੍ਕਤ੍ਥੇ ਵਾ ਉਪਯੋਗਂ, ਮਨੁਸ੍ਸਮਂਸਤੋ ਵਿਰਮਾਹੀਤਿ ਅਤ੍ਥੋ.

ਏਵਂ ਵੁਤ੍ਤੇ ਪੋਰਿਸਾਦੋ ਪਾਣਿਂ ਪਹਰਿਤ੍ਵਾ ਹਸਨ੍ਤੋ ‘‘ਸਮ੍ਮ ਸੁਤਸੋਮ ਕਿਂ ਨਾਮੇਤਂ ਕਥੇਸਿ, ਕਥਾਹਂ ਤੁਮ੍ਹਾਕਂ ਏਤਂ ਵਰਂ ਦਸ੍ਸਾਮਿ, ਸਚੇ ਗਣ੍ਹਿਤੁਕਾਮੋ, ਅਞ੍ਞਂ ਗਣ੍ਹਾਹੀ’’ਤਿ ਵਤ੍ਵਾ ਗਾਥਮਾਹ –

੪੬੦.

‘‘ਅਦ੍ਧਾ ਹਿ ਸੋ ਭਕ੍ਖੋ ਮਮ ਮਨਾਪੋ, ਏਤਸ੍ਸ ਹੇਤੁਮ੍ਹਿ ਵਨਂ ਪਵਿਟ੍ਠੋ;

ਸੋਹਂ ਕਥਂ ਏਤ੍ਤੋ ਉਪਾਰਮੇਯ੍ਯਂ, ਅਞ੍ਞਂ ਵਰਾਨਂ ਚਤੁਤ੍ਥਂ ਵਰਸ੍ਸੂ’’ਤਿ.

ਤਤ੍ਥ ਵਨਨ੍ਤਿ ਰਜ੍ਜਂ ਪਹਾਯ ਇਮਂ ਵਨਂ ਪਵਿਟ੍ਠੋ.

ਅਥ ਨਂ ਮਹਾਸਤ੍ਤੋ ‘‘ਤ੍ਵਂ ‘ਮਨੁਸ੍ਸਮਂਸਸ੍ਸ ਪਿਯਤਰਤ੍ਤਾ ਤਤੋ ਵਿਰਮਿਤੁਂ ਨ ਸਕ੍ਕੋਮੀ’’ਤਿ ਵਦਸਿ. ਯੋ ਹਿ ਪਿਯਂ ਨਿਸ੍ਸਾਯ ਪਾਪਂ ਕਰੋਤਿ, ਅਯਂ ਬਾਲੋ’’ਤਿ ਵਤ੍ਵਾ ਗਾਥਮਾਹ –

੪੬੧.

‘‘ਨ ਵੇ ‘ਪਿਯਂ ਮੇ’ਤਿ ਜਨਿਨ੍ਦ ਤਾਦਿਸੋ, ਅਤ੍ਤਂ ਨਿਰਂਕਚ੍ਚ ਪਿਯਾਨਿ ਸੇਵਤਿ;

ਅਤ੍ਤਾਵ ਸੇਯ੍ਯੋ ਪਰਮਾ ਚ ਸੇਯ੍ਯੋ, ਲਬ੍ਭਾ ਪਿਯਾ ਓਚਿਤਤ੍ਥੇਨ ਪਚ੍ਛਾ’’ਤਿ.

ਤਤ੍ਥ ਤਾਦਿਸੋਤਿ ਜਨਿਨ੍ਦ ਤਾਦਿਸੋ ਯੁਵਾ ਅਭਿਰੂਪੋ ਮਹਾਯਸੋ ‘‘ਇਦਂ ਨਾਮ ਮੇ ਪਿਯ’’ਨ੍ਤਿ ਪਿਯਵਤ੍ਥੁਲੋਭੇਨ ਤਤ੍ਥ ਅਤ੍ਤਾਨਂ ਨਿਰਂਕਤ੍ਵਾ ਸਬ੍ਬਸੁਗਤੀਹਿ ਚੇਵ ਸੁਖਵਿਸੇਸੇਹਿ ਚ ਚਵਿਤ੍ਵਾ ਨਿਰਯੇ ਪਾਤੇਤ੍ਵਾ ਨ ਵੇ ਪਿਯਾਨਿ ਸੇਵਤਿ. ਪਰਮਾ ਚ ਸੇਯ੍ਯੋਤਿ ਪੁਰਿਸਸ੍ਸ ਹਿ ਪਰਮਾ ਪਿਯਵਤ੍ਥੁਮ੍ਹਾ ਅਤ੍ਤਾਵ ਵਰਤਰੋ. ਕਿਂਕਾਰਣਾ? ਲਬ੍ਭਾ ਪਿਯਾਤਿ, ਪਿਯਾ ਨਾਮ ਵਿਸਯਵਸੇਨ ਚੇਵ ਪੁਞ੍ਞੇਨ ਚ ਓਚਿਤਤ੍ਥੇਨ ਵਡ੍ਢਿਤਤ੍ਥੇਨ ਦਿਟ੍ਠਧਮ੍ਮੇ ਚੇਵ ਪਰਤ੍ਥ ਚ ਦੇਵਮਨੁਸ੍ਸਸਮ੍ਪਤ੍ਤਿਂ ਪਤ੍ਵਾ ਸਕ੍ਕਾ ਲਦ੍ਧੁਂ.

ਏਵਂ ਵੁਤ੍ਤੇ ਪੋਰਿਸਾਦੋ ਭਯਪ੍ਪਤ੍ਤੋ ਹੁਤ੍ਵਾ ‘‘ਅਹਂ ਸੁਤਸੋਮੇਨ ਗਹਿਤਂ ਵਰਂ ਵਿਸ੍ਸਜ੍ਜਾਪੇਤੁਮ੍ਪਿ ਮਨੁਸ੍ਸਮਂਸਤੋ ਵਿਰਮਿਤੁਮ੍ਪਿ ਨ ਸਕ੍ਕੋਮਿ, ਕਿਂ ਨੁ ਖੋ ਕਰਿਸ੍ਸਾਮੀ’’ਤਿ ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ ਗਾਥਮਾਹ –

੪੬੨.

‘‘ਪਿਯਂ ਮੇ ਮਾਨੁਸਂ ਮਂਸਂ, ਸੁਤਸੋਮ ਵਿਜਾਨਹਿ;

ਨਮ੍ਹਿ ਸਕ੍ਕਾ ਨਿਵਾਰੇਤੁਂ, ਅਞ੍ਞਂ ਵਰਂ ਸਮ੍ਮ ਵਰਸ੍ਸੂ’’ਤਿ.

ਤਤ੍ਥ ਵਿਜਾਨਹੀਤਿ ਤ੍ਵਮ੍ਪਿ ਜਾਨਾਹਿ.

ਤਤੋ ਬੋਧਿਸਤ੍ਤੋ ਆਹ –

੪੬੩.

‘‘ਯੋ ਵੇ ‘ਪਿਯਂ ਮੇ’ਤਿ ਪਿਯਾਨੁਰਕ੍ਖੀ, ਅਤ੍ਤਂ ਨਿਰਂਕਚ੍ਚ ਪਿਯਾਨਿ ਸੇਵਤਿ;

ਸੋਣ੍ਡੋਵ ਪਿਤ੍ਵਾ ਵਿਸਮਿਸ੍ਸਪਾਨਂ, ਤੇਨੇਵ ਸੋ ਹੋਤਿ ਦੁਕ੍ਖੀ ਪਰਤ੍ਥ.

੪੬੪.

‘‘ਯੋ ਚੀਧ ਸਙ੍ਖਾਯ ਪਿਯਾਨਿ ਹਿਤ੍ਵਾ, ਕਿਚ੍ਛੇਨਪਿ ਸੇਵਤਿ ਅਰਿਯਧਮ੍ਮੇ;

ਦੁਕ੍ਖਿਤੋਵ ਪਿਤ੍ਵਾਨ ਯਥੋਸਧਾਨਿ, ਤੇਨੇਵ ਸੋ ਹੋਤਿ ਸੁਖੀ ਪਰਤ੍ਥਾ’’ਤਿ.

ਤਤ੍ਥ ਯੋ ਵੇਤਿ, ਸਮ੍ਮ ਪੋਰਿਸਾਦ, ਯੋ ਪੁਰਿਸੋ ‘‘ਇਦਂ ਮੇ ਪਿਯ’’ਨ੍ਤਿ ਪਾਪਕਿਰਿਯਾਯ ਅਤ੍ਤਾਨਂ ਨਿਰਂਕਤ੍ਵਾ ਪਿਯਾਨਿ ਵਤ੍ਥੂਨਿ ਸੇਵਤਿ, ਸੋ ਸੁਰਾਪੇਮੇਨ ਵਿਸਮਿਸ੍ਸਂ ਸੁਰਂ ਪਿਤ੍ਵਾ ਸੋਣ੍ਡੋ ਵਿਯ ਤੇਨ ਪਾਪਕਮ੍ਮੇਨ ਪਰਤ੍ਥ ਨਿਰਯਾਦੀਸੁ ਦੁਕ੍ਖੀ ਹੋਤਿ. ਸਙ੍ਖਾਯਾਤਿ ਜਾਨਿਤ੍ਵਾ ਤੁਲੇਤ੍ਵਾ. ਪਿਯਾਨਿ ਹਿਤ੍ਵਾਤਿ ਅਧਮ੍ਮਪਟਿਸਂਯੁਤ੍ਤਾਨਿ ਪਿਯਾਨਿ ਛਡ੍ਡੇਤ੍ਵਾ.

ਏਵਂ ਵੁਤ੍ਤੇ ਪੋਰਿਸਾਦੋ ਕਲੂਨਂ ਪਰਿਦੇਵਨ੍ਤੋ ਗਾਥਮਾਹ –

੪੬੫.

‘‘ਓਹਾਯਹਂ ਪਿਤਰਂ ਮਾਤਰਞ੍ਚ, ਮਨਾਪਿਯੇ ਕਾਮਗੁਣੇ ਚ ਪਞ੍ਚ;

ਏਤਸ੍ਸ ਹੇਤੁਮ੍ਹਿ ਵਨਂ ਪਵਿਟ੍ਠੋ, ਤਂ ਤੇ ਵਰਂ ਕਿਨ੍ਤਿ ਮਹਂ ਦਦਾਮੀ’’ਤਿ.

ਤਤ੍ਥ ਏਤਸ੍ਸਾਤਿ ਮਨੁਸ੍ਸਮਂਸਸ੍ਸ. ਕਿਨ੍ਤਿ ਮਹਨ੍ਤਿ ਕਿਨ੍ਤਿ ਕਤ੍ਵਾ ਅਹਂ ਤਂ ਵਰਂ ਦੇਮਿ.

ਤਤੋ ਮਹਾਸਤ੍ਤੋ ਇਮਂ ਗਾਥਮਾਹ –

੪੬੬.

‘‘ਨ ਪਣ੍ਡਿਤਾ ਦਿਗੁਣਮਾਹੁ ਵਾਕ੍ਯਂ, ਸਚ੍ਚਪ੍ਪਟਿਞ੍ਞਾਵ ਭਵਨ੍ਤਿ ਸਨ੍ਤੋ;

‘ਵਰਸ੍ਸੁ ਸਮ੍ਮ’ ਇਤਿ ਮਂ ਅਵੋਚ, ਇਚ੍ਚਬ੍ਰਵੀ ਤ੍ਵਂ ਨ ਹਿ ਤੇ ਸਮੇਤੀ’’ਤਿ.

ਤਤ੍ਥ ਦਿਗੁਣਨ੍ਤਿ, ਸਮ੍ਮ ਪੋਰਿਸਾਦ, ਪਣ੍ਡਿਤਾ ਨਾਮ ਏਕਂ ਵਤ੍ਵਾ ਪੁਨ ਤਂ ਵਿਸਂਵਾਦੇਨ੍ਤਾ ਦੁਤਿਯਂ ਵਚਨਂ ਨ ਕਥੇਨ੍ਤਿ. ਇਤਿ ਮਂ ਅਵੋਚਾਤਿ, ‘‘ਸਮ੍ਮ ਸੁਤਸੋਮ ਵਰਸ੍ਸੁ ਵਰ’’ਨ੍ਤਿ ਏਵਂ ਮਂ ਅਭਾਸਸਿ. ਇਚ੍ਚਬ੍ਰਵੀਤਿ ਤਸ੍ਮਾ ਯਂ ਤ੍ਵਂ ਇਤਿ ਅਬ੍ਰਵਿ, ਤਂ ਤੇ ਇਦਾਨਿ ਨ ਸਮੇਤਿ.

ਸੋ ਪੁਨ ਰੋਦਨ੍ਤੋ ਏਵ ਗਾਥਮਾਹ –

੪੬੭.

‘‘ਅਪੁਞ੍ਞਲਾਭਂ ਅਯਸਂ ਅਕਿਤ੍ਤਿਂ, ਪਾਪਂ ਬਹੁਂ ਦੁਚ੍ਚਰਿਤਂ ਕਿਲੇਸਂ;

ਮਨੁਸ੍ਸਮਂਸਸ੍ਸ ਕਤੇ ਉਪਾਗਾ, ਤਂ ਤੇ ਵਰਂ ਕਿਨ੍ਤਿ ਮਹਂ ਦਦੇਯ੍ਯ’’ਨ੍ਤਿ.

ਤਤ੍ਥ ਪਾਪਨ੍ਤਿ ਕਮ੍ਮਪਥਂ ਅਪ੍ਪਤ੍ਤਂ. ਦੁਚ੍ਚਰਿਤਨ੍ਤਿ ਕਮ੍ਮਪਥਪ੍ਪਤ੍ਤਂ. ਕਿਲੇਸਨ੍ਤਿ ਦੁਕ੍ਖਂ. ਮਨੁਸ੍ਸਮਂਸਸ੍ਸ ਕਤੇਤਿ ਮਨੁਸ੍ਸਮਂਸਸ੍ਸ ਹੇਤੁ. ਉਪਾਗਾਤਿ ਉਪਗਤੋਮ੍ਹਿ. ਤਂ ਤੇਤਿ ਤਂ ਤੁਯ੍ਹਂ ਕਥਾਹਂ ਵਰਂ ਦੇਮਿ, ਮਾ ਮਂ ਵਾਰਯਿ, ਅਨੁਕਮ੍ਪਂ ਕਾਰੁਞ੍ਞਂ ਮਯਿ ਕਰੋਹਿ, ਅਞ੍ਞਂ ਵਰਂ ਗਣ੍ਹਾਹੀਤਿ ਆਹ.

ਅਥ ਮਹਾਸਤ੍ਤੋ ਆਹ –

੪੬੮.

‘‘ਨ ਤਂ ਵਰਂ ਅਰਹਤਿ ਜਨ੍ਤੁ ਦਾਤੁਂ, ਯਂ ਵਾਪਿ ਦਤ੍ਵਾ ਨ ਅਵਾਕਰੇਯ੍ਯ;

ਵਰਸ੍ਸੁ ਸਮ੍ਮ ਅਵਿਕਮ੍ਪਮਾਨੋ, ਪਾਣਂ ਚਜਿਤ੍ਵਾਨਪਿ ਦਸ੍ਸਮੇਵਾ’’ਤਿ.

ਏਵਂ ਤੇਨ ਪਠਮਂ ਵੁਤ੍ਤਗਾਥਂ ਆਹਰਿਤ੍ਵਾ ਦਸ੍ਸੇਤ੍ਵਾ ਵਰਦਾਨੇ ਉਸ੍ਸਾਹੇਨ੍ਤੋ ਗਾਥਾ ਆਹ –

੪੬੯.

‘‘ਪਾਣਂ ਚਜਨ੍ਤਿ ਸਨ੍ਤੋ ਨਾਪਿ ਧਮ੍ਮਂ, ਸਚ੍ਚਪ੍ਪਟਿਞ੍ਞਾਵ ਭਵਨ੍ਤਿ ਸਨ੍ਤੋ;

ਦਤ੍ਵਾ ਵਰਂ ਖਿਪ੍ਪਮਵਾਕਰੋਹਿ, ਏਤੇਨ ਸਮ੍ਪਜ੍ਜ ਸੁਰਾਜਸੇਟ੍ਠ.

੪੭੦.

‘‘ਚਜੇ ਧਨਂ ਅਙ੍ਗਵਰਸ੍ਸ ਹੇਤੁ, ਅਙ੍ਗਂ ਚਜੇ ਜੀਵਿਤਂ ਰਕ੍ਖਮਾਨੋ;

ਅਙ੍ਗਂ ਧਨਂ ਜੀਵਿਤਞ੍ਚਾਪਿ ਸਬ੍ਬਂ, ਚਜੇ ਨਰੋ ਧਮ੍ਮਮਨੁਸ੍ਸਰਨ੍ਤੋ’’ਤਿ.

ਤਤ੍ਥ ਪਾਣਨ੍ਤਿ ਜੀਵਿਤਂ. ਸਨ੍ਤੋ ਨਾਮ ਅਪਿ ਜੀਵਿਤਂ ਚਜਨ੍ਤਿ, ਨ ਧਮ੍ਮਂ. ਖਿਪ੍ਪਮਵਾਕਰੋਹੀਤਿ ਇਧ ਖਿਪ੍ਪਂ ਮਯ੍ਹਂ ਦੇਹੀਤਿ ਅਤ੍ਥੋ. ਏਤੇਨਾਤਿ ਏਤੇਨ ਧਮ੍ਮੇਨ ਚੇਵ ਸਚ੍ਚੇਨ ਚ ਸਮ੍ਪਜ੍ਜ ਸਮ੍ਪਨ੍ਨੋ ਉਪਪਨ੍ਨੋ ਹੋਹਿ. ਸੁਰਾਜਸੇਟ੍ਠਾਤਿ ਤਂ ਪਗ੍ਗਣ੍ਹਨ੍ਤੋ ਆਲਪਤਿ. ਚਜੇ ਧਨਨ੍ਤਿ, ਸਮ੍ਮ ਪੋਰਿਸਾਦ, ਪਣ੍ਡਿਤੋ ਪੁਰਿਸੋ ਹਤ੍ਥਪਾਦਾਦਿਮ੍ਹਿ ਅਙ੍ਗੇ ਛਿਜ੍ਜਮਾਨੇ ਤਸ੍ਸ ਰਕ੍ਖਣਤ੍ਥਾਯ ਬਹੁਮ੍ਪਿ ਧਨਂ ਚਜੇਯ੍ਯ. ਧਮ੍ਮਮਨੁਸ੍ਸਰਨ੍ਤੋਤਿ ਅਙ੍ਗਧਨਜੀਵਿਤਾਨਿ ਪਰਿਚ੍ਚਜਨ੍ਤੋਪਿ ‘‘ਸਤਂ ਧਮ੍ਮਂ ਨ ਵੀਤਿਕ੍ਕਮਿਸ੍ਸਾਮੀ’’ਤਿ ਏਵਂ ਧਮ੍ਮਂ ਅਨੁਸ੍ਸਰਨ੍ਤੋ.

ਏਵਂ ਮਹਾਸਤ੍ਤੋ ਇਮੇਹਿ ਕਾਰਣੇਹਿ ਤਂ ਸਚ੍ਚੇ ਪਤਿਟ੍ਠਾਪੇਤ੍ਵਾ ਇਦਾਨਿ ਅਤ੍ਤਨੋ ਗੁਰੁਭਾਵਂ ਦਸ੍ਸੇਤੁਂ ਗਾਥਮਾਹ –

੪੭੧.

‘‘ਯਸ੍ਮਾ ਹਿ ਧਮ੍ਮਂ ਪੁਰਿਸੋ ਵਿਜਞ੍ਞਾ, ਯੇ ਚਸ੍ਸ ਕਙ੍ਖਂ ਵਿਨਯਨ੍ਤਿ ਸਨ੍ਤੋ;

ਤਂ ਹਿਸ੍ਸ ਦੀਪਞ੍ਚ ਪਰਾਯਣਞ੍ਚ, ਨ ਤੇਨ ਮਿਤ੍ਤਿਂ ਜਿਰਯੇਥ ਪਞ੍ਞੋ’’ਤਿ.

ਤਤ੍ਥ ਯਸ੍ਮਾਤਿ ਯਮ੍ਹਾ ਪੁਰਿਸਾ. ਧਮ੍ਮਨ੍ਤਿ ਕੁਸਲਾਕੁਸਲਜੋਤਕਂ ਕਾਰਣਂ. ਵਿਜਞ੍ਞਾਤਿ ਵਿਜਾਨੇਯ੍ਯ. ਤਂ ਹਿਸ੍ਸਾਤਿ ਤਂ ਆਚਰਿਯਕੁਲਂ ਏਤਸ੍ਸ ਪੁਗ੍ਗਲਸ੍ਸ ਪਤਿਟ੍ਠਾਨਟ੍ਠੇਨ ਦੀਪਂ, ਉਪ੍ਪਨ੍ਨੇ ਭਯੇ ਗਨ੍ਤਬ੍ਬਟ੍ਠਾਨਟ੍ਠੇਨ ਪਰਾਯਣਞ੍ਚ. ਨ ਤੇਨ ਮਿਤ੍ਤਿਨ੍ਤਿ ਤੇਨ ਆਚਰਿਯਪੁਗ੍ਗਲੇਨ ਸਹ ਸੋ ਪਣ੍ਡਿਤੋ ਕੇਨਚਿਪਿ ਕਾਰਣੇਨ ਮਿਤ੍ਤਿਂ ਨ ਜੀਰਯੇਥ ਨ ਵਿਨਾਸੇਯ੍ਯ.

ਏਵਞ੍ਚ ਪਨ ਵਤ੍ਵਾ, ‘‘ਸਮ੍ਮ ਪੋਰਿਸਾਦ, ਗੁਣਵਨ੍ਤਸ੍ਸ ਆਚਰਿਯਸ੍ਸ ਵਚਨਂ ਨਾਮ ਭਿਨ੍ਦਿਤੁਂ ਨ ਵਟ੍ਟਤਿ, ਅਹਞ੍ਚ ਤਰੁਣਕਾਲੇਪਿ ਤਵ ਪਿਟ੍ਠਿਆਚਰਿਯੋ ਹੁਤ੍ਵਾ ਬਹੁਂ ਸਿਕ੍ਖਂ ਸਿਕ੍ਖਾਪੇਸਿਂ, ਇਦਾਨਿਪਿ ਬੁਦ੍ਧਲੀਲਾਯ ਸਤਾਰਹਾ ਗਾਥਾ ਤੇ ਕਥੇਸਿਂ, ਤੇਨ ਮੇ ਵਚਨਂ ਕਾਤੁਂ ਅਰਹਸੀ’’ਤਿ ਆਹ. ਤਂ ਸੁਤ੍ਵਾ ਪੋਰਿਸਾਦੋ ‘‘ਅਯਂ ਸੁਤਸੋਮੋ ਮਯ੍ਹਂ ਆਚਰਿਯੋ ਚੇਵ ਪਣ੍ਡਿਤੋ ਚ, ਵਰੋ ਚਸ੍ਸ ਮਯਾ ਦਿਨ੍ਨੋ, ਕਿਂ ਸਕ੍ਕਾ ਕਾਤੁਂ, ਏਕਸ੍ਮਿਂ ਅਤ੍ਤਭਾਵੇ ਮਰਣਂ ਨਾਮ ਧੁਵਂ, ਮਨੁਸ੍ਸਮਂਸਂ ਨ ਖਾਦਿਸ੍ਸਾਮਿ, ਦਸ੍ਸਾਮਿਸ੍ਸ ਵਰ’’ਨ੍ਤਿ ਅਸ੍ਸੁਧਾਰਾਹਿ ਪਵਤ੍ਤਮਾਨਾਹਿ ਉਟ੍ਠਾਯ ਸੁਤਸੋਮਨਰਿਨ੍ਦਸ੍ਸ ਪਾਦੇਸੁ ਪਤਿਤ੍ਵਾ ਵਰਂ ਦਦਮਾਨੋ ਇਮਂ ਗਾਥਮਾਹ –

੪੭੨.

‘‘ਅਦ੍ਧਾ ਹਿ ਸੋ ਭਕ੍ਖੋ ਮਮ ਮਨਾਪੋ, ਏਤਸ੍ਸ ਹੇਤੁਮ੍ਹਿ ਵਨਂ ਪਵਿਟ੍ਠੋ;

ਸਚੇ ਚ ਮਂ ਯਾਚਸਿ ਏਤਮਤ੍ਥਂ, ਏਤਮ੍ਪਿ ਤੇ ਸਮ੍ਮ ਵਰਂ ਦਦਾਮੀ’’ਤਿ.

ਅਥ ਨਂ ਮਹਾਸਤ੍ਤੋ ਏਵਮਾਹ – ‘‘ਸਮ੍ਮ, ਸੀਲੇ ਠਿਤਸ੍ਸ ਮਰਣਮ੍ਪਿ ਵਰਂ, ਗਣ੍ਹਾਮਿ, ਮਹਾਰਾਜ, ਤਯਾ ਦਿਨ੍ਨਂ ਵਰਂ, ਅਜ੍ਜ ਪਟ੍ਠਾਯ ਅਰਿਯਪਥੇ ਪਤਿਟ੍ਠਿਤੋਸਿ, ਏਵਂ ਸਨ੍ਤੇਪਿ ਤਂ ਯਾਚਾਮਿ, ਸਚੇ ਤੇ ਮਯਿ ਸਿਨੇਹੋ ਅਤ੍ਥਿ, ਪਞ੍ਚ ਸੀਲਾਨਿ ਗਣ੍ਹ, ਮਹਾਰਾਜਾ’’ਤਿ. ‘‘ਸਾਧੁ, ਸਮ੍ਮ, ਦੇਹਿ ਮੇ ਸੀਲਾਨੀ’’ਤਿ. ‘‘ਗਣ੍ਹ ਮਹਾਰਾਜਾ’’ਤਿ. ਸੋ ਮਹਾਸਤ੍ਤਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਮਹਾਸਤ੍ਤੋਪਿ ਨਂ ਪਞ੍ਚਸੀਲੇਸੁ ਪਤਿਟ੍ਠਾਪੇਸਿ. ਤਸ੍ਮਿਂ ਖਣੇ ਤਤ੍ਥ ਸਨ੍ਨਿਪਤਿਤਾ ਭੁਮ੍ਮਾ ਦੇਵਾ ਮਹਾਸਤ੍ਤੇ ਪੀਤਿਂ ਜਨੇਤ੍ਵਾ ‘‘ਅਵੀਚਿਤੋ ਯਾਵ ਭਵਗ੍ਗਾ ਅਞ੍ਞੋ ਪੋਰਿਸਾਦਂ ਮਨੁਸ੍ਸਮਂਸਤੋ ਨਿਵਾਰੇਤੁਂ ਸਮਤ੍ਥੋ ਨਾਮ ਨਤ੍ਥਿ, ਅਹੋ ਸੁਤਸੋਮੇਨ ਦੁਕ੍ਕਰਤਰਂ ਕਤ’’ਨ੍ਤਿ ਮਹਨ੍ਤੇਨ ਸਦ੍ਦੇਨ ਵਨਂ ਉਨ੍ਨਾਦੇਨ੍ਤਾ ਸਾਧੁਕਾਰਂ ਅਦਂਸੁ. ਤੇਸਂ ਸਦ੍ਦਂ ਸੁਤ੍ਵਾ ਚਾਤੁਮਹਾਰਾਜਿਕਾਤਿ ਏਵਂ ਯਾਵ ਬ੍ਰਹ੍ਮਲੋਕਾ ਏਕਕੋਲਾਹਲਂ ਅਹੋਸਿ. ਰੁਕ੍ਖੇ ਲਗ੍ਗਿਤਰਾਜਾਨੋਪਿ ਤਂ ਦੇਵਤਾਨਂ ਸਾਧੁਕਾਰਸਦ੍ਦਂ ਸੁਣਿਂਸੁ. ਰੁਕ੍ਖਦੇਵਤਾਪਿ ਸਕਵਿਮਾਨੇ ਠਿਤਾਵ ਸਾਧੁਕਾਰਮਦਾਸਿ. ਇਤਿ ਦੇਵਤਾਨਂ ਸਦ੍ਦੋਵ ਸੂਯਤਿ, ਰੂਪਂ ਨ ਦਿਸ੍ਸਤਿ. ਦੇਵਤਾਨਂ ਸਾਧੁਕਾਰਸਦ੍ਦਂ ਸੁਤ੍ਵਾ ਰਾਜਾਨੋ ਚਿਨ੍ਤਯਿਂਸੁ – ‘‘ਸੁਤਸੋਮਂ ਨਿਸ੍ਸਾਯ ਨੋ ਜੀਵਿਤਂ ਲਦ੍ਧਂ, ਦੁਕ੍ਕਰਂ ਕਤਂ ਸੁਤਸੋਮੇਨ ਪੋਰਿਸਾਦਂ ਦਮੇਨ੍ਤੇਨਾ’’ਤਿ ਬੋਧਿਸਤ੍ਤਸ੍ਸ ਥੁਤਿਂ ਕਰਿਂਸੁ. ਪੋਰਿਸਾਦੋ ਮਹਾਸਤ੍ਤਸ੍ਸ ਪਾਦੇ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥ ਨਂ ਬੋਧਿਸਤ੍ਤੋ – ‘‘ਸਮ੍ਮ, ਖਤ੍ਤਿਯੇ ਮੋਚੇਹੀ’’ਤਿ ਆਹ. ਸੋ ਚਿਨ੍ਤੇਸਿ ‘‘ਅਹਂ ਏਤੇਸਂ ਪਚ੍ਚਾਮਿਤ੍ਤੋ, ਏਤੇ ਮਯਾ ਮੋਚਿਤਾ ‘ਗਣ੍ਹਥ ਨੋ ਪਚ੍ਚਾਮਿਤ੍ਤ’ਨ੍ਤਿ ਮਂ ਹਿਂਸੇਯ੍ਯੁਂ, ਮਯਾ ਜੀਵਿਤਂ ਚਜਨ੍ਤੇਨਪਿ ਨ ਸਕ੍ਕਾ ਸੁਤਸੋਮਸ੍ਸ ਸਨ੍ਤਿਕਾ ਗਹਿਤਂ ਸੀਲਂ ਭਿਨ੍ਦਿਤੁਂ, ਇਮਿਨਾ ਸਦ੍ਧਿਯੇਵ ਗਨ੍ਤ੍ਵਾ ਮੋਚੇਸ੍ਸਾਮਿ, ਏਵਂ ਮੇ ਭਯਂ ਨ ਭਵਿਸ੍ਸਤੀ’’ਤਿ. ਅਥ ਬੋਧਿਸਤ੍ਤਂ ਵਨ੍ਦਿਤ੍ਵਾ, ‘‘ਸੁਤਸੋਮ, ਉਭੋਪਿ ਗਨ੍ਤ੍ਵਾ ਖਤ੍ਤਿਯੇ ਮੋਚੇਸ੍ਸਾਮਾ’’ਤਿ ਵਤ੍ਵਾ ਗਾਥਮਾਹ –

੪੭੩.

‘‘ਸਤ੍ਥਾ ਚ ਮੇ ਹੋਸਿ ਸਖਾ ਚ ਮੇਸਿ, ਵਚਨਮ੍ਪਿ ਤੇ ਸਮ੍ਮ ਅਹਂ ਅਕਾਸਿਂ;

ਤੁਵਮ੍ਪਿ ਮੇ ਸਮ੍ਮ ਕਰੋਹਿ ਵਾਕ੍ਯਂ, ਉਭੋਪਿ ਗਨ੍ਤ੍ਵਾਨ ਪਮੋਚਯਾਮਾ’’ਤਿ.

ਤਤ੍ਥ ਸਤ੍ਥਾਤਿ ਸਗ੍ਗਮਗ੍ਗਸ੍ਸ ਦੇਸਿਤਤ੍ਤਾ ਸਤ੍ਥਾ ਚ, ਤਰੁਣਕਾਲਤੋ ਪਟ੍ਠਾਯ ਸਖਾ ਚ.

ਅਥ ਨਂ ਬੋਧਿਸਤ੍ਤੋ ਆਹ –

੪੭੪.

‘‘ਸਤ੍ਥਾ ਚ ਤੇ ਹੋਮਿ ਸਖਾ ਚ ਤ੍ਯਮ੍ਹਿ, ਵਚਨਮ੍ਪਿ ਮੇ ਸਮ੍ਮ ਤੁਵਂ ਅਕਾਸਿ;

ਅਹਮ੍ਪਿ ਤੇ ਸਮ੍ਮ ਕਰੋਮਿ ਵਾਕ੍ਯਂ, ਉਭੋਪਿ ਗਨ੍ਤ੍ਵਾਨ ਪਮੋਚਯਾਮਾ’’ਤਿ.

ਏਵਂ ਵਤ੍ਵਾ ਤੇ ਉਪਸਙ੍ਕਮਿਤ੍ਵਾ ਆਹ –

੪੭੫.

‘‘ਕਮ੍ਮਾਸਪਾਦੇਨ ਵਿਹੇਠਿਤਤ੍ਥ, ਤਲਾਵੁਤਾ ਅਸ੍ਸੁਮੁਖਾ ਰੁਦਨ੍ਤਾ;

ਨ ਜਾਤੁ ਦੁਬ੍ਭੇਥ ਇਮਸ੍ਸ ਰਞ੍ਞੋ, ਸਚ੍ਚਪ੍ਪਟਿਞ੍ਞਂ ਮੇ ਪਟਿਸ੍ਸੁਣਾਥਾ’’ਤਿ.

ਤਤ੍ਥ ਕਮ੍ਮਾਸਪਾਦੇਨਾਤਿ ਇਦਂ ਮਹਾਸਤ੍ਤੋ ‘‘ਉਭੋਪਿ ਗਨ੍ਤ੍ਵਾਨ ਪਮੋਚਯਾਮਾ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਖਤ੍ਤਿਯਾ ਨਾਮ ਮਾਨਥਦ੍ਧਾ ਹੋਨ੍ਤਿ, ਮੁਤ੍ਤਮਤ੍ਤਾਵ ‘ਇਮਿਨਾ ਮਯਂ ਵਿਹੇਠਿਤਮ੍ਹਾ’ਤਿ ਪੋਰਿਸਾਦਂ ਪੋਥੇਯ੍ਯੁਮ੍ਪਿ ਹਨੇਯ੍ਯੁਮ੍ਪਿ, ਨ ਖੋ ਪਨੇਸ ਤੇਸੁ ਦੁਬ੍ਭਿਸ੍ਸਤਿ, ਅਹਂ ਏਕਕੋਵ ਗਨ੍ਤ੍ਵਾ ਪਟਿਞ੍ਞਂ ਤਾਵ ਨੇਸਂ ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਤ੍ਥ ਗਨ੍ਤ੍ਵਾ ਤੇ ਹਤ੍ਥਤਲੇ ਆਵੁਨਿਤ੍ਵਾ ਅਗ੍ਗਪਾਦਙ੍ਗੁਲੀਹਿ ਭੂਮਿਂ ਫੁਸਮਾਨਾਹਿ ਰੁਕ੍ਖਸਾਖਾਸੁ ਓਲਗ੍ਗਿਤੇ ਵਾਤਪ੍ਪਹਰਣਕਾਲੇ ਨਾਗਦਨ੍ਤੇਸੁ ਓਲਗ੍ਗਿਤਕੁਰਣ੍ਡਕਦਾਮਾਨਿ ਵਿਯ ਸਮ੍ਪਰਿਵਤ੍ਤਨ੍ਤੇ ਅਦ੍ਦਸ. ਤੇਪਿ ਤਂ ਦਿਸ੍ਵਾ ‘‘ਇਦਾਨਿਮ੍ਹਾ ਮਯਂ ਅਰੋਗਾ’’ਤਿ ਏਕਪ੍ਪਹਾਰੇਨੇਵ ਮਹਾਵਿਰਵਂ ਰਵਿਂਸੁ. ਅਥ ਨੇ ਮਹਾਸਤ੍ਤੋ ‘‘ਮਾ ਭਾਯਿਤ੍ਥਾ’’ਤਿ ਅਸ੍ਸਾਸੇਤ੍ਵਾ ‘‘ਮਯਾ ਪੋਰਿਸਾਦੋ ਦਮਿਤੋ, ਤੁਮ੍ਹਾਕਂ ਅਭਯਂ ਗਹਿਤਂ, ਤੁਮ੍ਹੇ ਪਨ ਮੇ ਵਚਨਂ ਕਰੋਥਾ’’ਤਿ ਵਤ੍ਵਾ ਏਵਮਾਹ. ਤਤ੍ਥ ਨ ਜਾਤੂਤਿ ਏਕਂਸੇਨੇਵ ਨ ਦੁਬ੍ਭੇਥ.

ਤੇ ਆਹਂਸੁ –

੪੭੬.

‘‘ਕਮ੍ਮਾਸਪਾਦੇਨ ਵਿਹੇਠਿਤਮ੍ਹਾ, ਤਲਾਵੁਤਾ ਅਸ੍ਸੁਮੁਖਾ ਰੁਦਨ੍ਤਾ;

ਨ ਜਾਤੁ ਦੁਬ੍ਭੇਮ ਇਮਸ੍ਸ ਰਞ੍ਞੋ, ਸਚ੍ਚਪ੍ਪਟਿਞ੍ਞਂ ਤੇ ਪਟਿਸ੍ਸੁਣਾਮਾ’’ਤਿ.

ਤਤ੍ਥ ਪਟਿਸ੍ਸੁਣਾਮਾਤਿ ‘‘ਏਵਂ ਪਟਿਞ੍ਞਂ ਅਧਿਵਾਸੇਮ ਸਮ੍ਪਟਿਚ੍ਛਾਮ, ਅਪਿਚ ਖੋ ਪਨ ਮਯਂ ਕਿਲਨ੍ਤਾ ਕਥੇਤੁਂ ਨ ਸਕ੍ਕੋਮ, ਤੁਮ੍ਹੇ ਸਬ੍ਬਸਤ੍ਤਾਨਂ ਸਰਣਂ, ਤੁਮ੍ਹੇਵ ਕਥੇਥ, ਮਯਂ ਵੋ ਵਚਨਂ ਸੁਤ੍ਵਾ ਪਟਿਞ੍ਞਂ ਦਸ੍ਸਾਮਾ’’ਤਿ.

ਅਥ ਨੇ ਬੋਧਿਸਤ੍ਤੋ ‘‘ਤੇਨ ਹਿ ਪਟਿਞ੍ਞਂ ਦੇਥਾ’’ਤਿ ਵਤ੍ਵਾ ਗਾਥਮਾਹ –

੪੭੭.

‘‘ਯਥਾ ਪਿਤਾ ਵਾ ਅਥ ਵਾਪਿ ਮਾਤਾ, ਅਨੁਕਮ੍ਪਕਾ ਅਤ੍ਥਕਾਮਾ ਪਜਾਨਂ,.

ਏਵਮੇਵ ਵੋ ਹੋਤੁ ਅਯਞ੍ਚ ਰਾਜਾ, ਤੁਮ੍ਹੇ ਚ ਵੋ ਹੋਥ ਯਥੇਵ ਪੁਤ੍ਤਾ’’ਤਿ.

ਅਥ ਨਂ ਤੇਪਿ ਸਮ੍ਪਟਿਚ੍ਛਮਾਨਾ ਇਮਂ ਗਾਥਮਾਹਂਸੁ –

੪੭੮.

‘‘ਯਥਾ ਪਿਤਾ ਵਾ ਅਥ ਵਾਪਿ ਮਾਤਾ, ਅਨੁਕਮ੍ਪਕਾ ਅਤ੍ਥਕਾਮਾ ਪਜਾਨਂ;

ਏਵਮੇਵ ਨੋ ਹੋਤੁ ਅਯਞ੍ਚ ਰਾਜਾ, ਮਯਮ੍ਪਿ ਹੇਸ੍ਸਾਮ ਯਥੇਵ ਪੁਤ੍ਤਾ’’ਤਿ.

ਤਤ੍ਥ ਤੁਮ੍ਹੇ ਚ ਵੋਤਿ ਵੋ-ਕਾਰੋ ਨਿਪਾਤਮਤ੍ਤਂ.

ਇਤਿ ਮਹਾਸਤ੍ਤੋ ਤੇਸਂ ਪਟਿਞ੍ਞਂ ਗਹੇਤ੍ਵਾ ਪੋਰਿਸਾਦਂ ਪਕ੍ਕੋਸਿਤ੍ਵਾ ‘‘ਏਹਿ, ਸਮ੍ਮ, ਖਤ੍ਤਿਯੇ ਮੋਚੇਹੀ’’ਤਿ ਆਹ. ਸੋ ਖਗ੍ਗਂ ਗਹੇਤ੍ਵਾ ਏਕਸ੍ਸ ਰਞ੍ਞੋ ਬਨ੍ਧਨਂ ਛਿਨ੍ਦਿ. ਰਾਜਾ ਸਤ੍ਤਾਹਂ ਨਿਰਾਹਾਰੋ ਵੇਦਨਪ੍ਪਤ੍ਤੋ ਸਹ ਬਨ੍ਧਨਛੇਦਾ ਮੁਚ੍ਛਿਤੋ ਭੂਮਿਯਂ ਪਤਿ. ਤਂ ਦਿਸ੍ਵਾ ਮਹਾਸਤ੍ਤੋ ਕਾਰੁਞ੍ਞਂ ਕਤ੍ਵਾ, ‘‘ਸਮ੍ਮ ਪੋਰਿਸਾਦ, ਮਾ ਏਵਂ ਛਿਨ੍ਦੀ’’ਤਿ ਏਕਂ ਰਾਜਾਨਂ ਉਭੋਹਿ ਹਤ੍ਥੇਹਿ ਦਲ਼੍ਹਂ ਗਹੇਤ੍ਵਾ ਉਰੇ ਕਤ੍ਵਾ ‘‘ਇਦਾਨਿ ਬਨ੍ਧਨਂ ਛਿਨ੍ਦਾਹੀ’’ਤਿ ਆਹ. ਪੋਰਿਸਾਦੋ ਖਗ੍ਗੇਨ ਛਿਨ੍ਦਿ. ਮਹਾਸਤ੍ਤੋ ਥਾਮਸਮ੍ਪਨ੍ਨਤਾਯ ਨਂ ਉਰੇ ਨਿਪਜ੍ਜਾਪੇਤ੍ਵਾ ਓਰਸਪੁਤ੍ਤਂ ਵਿਯ ਮੁਦੁਚਿਤ੍ਤੇਨ ਓਤਾਰੇਤ੍ਵਾ ਭੂਮਿਯਂ ਨਿਪਜ੍ਜਾਪੇਸਿ. ਏਵਂ ਸਬ੍ਬੇਪਿ ਤੇ ਭੂਮਿਯਂ ਨਿਪਜ੍ਜਾਪੇਤ੍ਵਾ ਵਣੇ ਧੋਵਿਤ੍ਵਾ ਦਾਰਕਾਨਂ ਕਣ੍ਣਤੋ ਸੁਤ੍ਤਕਂ ਵਿਯ ਸਣਿਕਂ ਰਜ੍ਜੁਯੋ ਨਿਕ੍ਕਡ੍ਢਿਤ੍ਵਾ ਪੁਬ੍ਬਲੋਹਿਤਂ ਧੋਵਿਤ੍ਵਾ ਵਣੇ ਨਿਦ੍ਦੋਸੇ ਕਤ੍ਵਾ, ‘‘ਸਮ੍ਮ ਪੋਰਿਸਾਦ, ਏਕਂ ਰੁਕ੍ਖਤਚਂ ਪਾਸਾਣੇ ਘਂਸਿਤ੍ਵਾ ਆਹਰਾ’’ਤਿ ਆਹਰਾਪੇਤ੍ਵਾ ਸਚ੍ਚਕਿਰਿਯਂ ਕਤ੍ਵਾ ਤੇਸਂ ਹਤ੍ਥਤਲਾਨਿ ਮਕ੍ਖੇਸਿ. ਤਙ੍ਖਣਞ੍ਞੇਵ ਵਣੋ ਫਾਸੁਕਂ ਅਹੋਸਿ. ਪੋਰਿਸਾਦੋ ਤਣ੍ਡੁਲਂ ਗਹੇਤ੍ਵਾ ਤਰਲਂ ਪਚਿ, ਉਭੋ ਜਨਾ ਪਰੋਸਤਂ ਖਤ੍ਤਿਯੇ ਪਾਯੇਸੁਂ. ਇਤਿ ਤੇ ਸਬ੍ਬੇਵ ਸਨ੍ਤਪ੍ਪਿਤਾ, ਸੂਰਿਯੋ ਅਤ੍ਥਙ੍ਗਤੋ. ਪੁਨਦਿਵਸੇ ਪਾਤੋ ਚ ਮਜ੍ਝਨ੍ਹਿਕੇ ਚ ਸਾਯਞ੍ਚ ਤਰਲਮੇਵ ਪਾਯੇਤ੍ਵਾ ਤਤਿਯਦਿਵਸੇ ਸਸਿਤ੍ਥਕਯਾਗੁਂ ਪਾਯੇਸੁਂ, ਤਾਵਤਾ ਤੇ ਅਰੋਗਾ ਅਹੇਸੁਂ.

ਅਥ ਨੇ ਮਹਾਸਤ੍ਤੋ ‘‘ਗਨ੍ਤੁਂ ਸਕ੍ਖਿਸ੍ਸਥਾ’’ਤਿ ਪੁਚ੍ਛਿਤ੍ਵਾ ‘‘ਗਚ੍ਛਾਮਾ’’ਤਿ ਵੁਤ੍ਤੇ ‘‘ਏਹਿ, ਸਮ੍ਮ ਪੋਰਿਸਾਦ, ਸਕਂ ਰਟ੍ਠਂ ਗਚ੍ਛਾਮਾ’’ਤਿ ਆਹ. ਸੋ ਰੋਦਮਾਨੋ ਤਸ੍ਸ ਪਾਦੇਸੁ ਪਤਿਤ੍ਵਾ ‘‘ਤ੍ਵਂ, ਸਮ੍ਮ, ਰਾਜਾਨੋ ਗਹੇਤ੍ਵਾ ਗਚ੍ਛ, ਅਹਂ ਇਧੇਵ ਵਨਮੂਲਫਲਾਨਿ ਖਾਦਨ੍ਤੋ ਵਸਿਸ੍ਸਾਮੀ’’ਤਿ ਆਹ. ‘‘ਸਮ੍ਮ, ਇਧ ਕਿਂ ਕਰਿਸ੍ਸਸਿ, ਰਮਣੀਯਂ ਤੇ ਰਟ੍ਠਂ, ਬਾਰਾਣਸਿਯਂ ਰਜ੍ਜਂ ਕਾਰੇਹੀ’’ਤਿ. ‘‘ਸਮ੍ਮ ਕਿਂ ਕਥੇਸਿ, ਨ ਸਕ੍ਕਾ ਮਯਾ ਤਤ੍ਥ ਗਨ੍ਤੁਂ, ਸਕਲਨਗਰਵਾਸਿਨੋ ਹਿ ਮੇ ਵੇਰਿਨੋ, ਤੇ ‘ਇਮਿਨਾ ਮਯ੍ਹਂ ਮਾਤਾ ਖਾਦਿਤਾ, ਮਯ੍ਹਂ ਪਿਤਾ, ਮਯ੍ਹਂ ਭਾਤਾ’ਤਿ ਮਂ ਪਰਿਭਾਸਿਸ੍ਸਨ੍ਤਿ, ‘ਗਣ੍ਹਥ ਇਮਂ ਚੋਰ’ਨ੍ਤਿ ਏਕੇਕਦਣ੍ਡੇਨ ਵਾ ਏਕੇਕਲੇਡ੍ਡੁਨਾ ਵਾ ਮਂ ਜੀਵਿਤਾ ਵੋਰੋਪੇਸ੍ਸਨ੍ਤਿ, ਅਹਞ੍ਚ ਤੁਮ੍ਹਾਕਂ ਸਨ੍ਤਿਕੇ ਸੀਲੇਸੁ ਪਤਿਟ੍ਠਿਤੋ, ਜੀਵਿਤਹੇਤੁਪਿ ਨ ਸਕ੍ਕਾ ਮਯਾ ਪਰਂ ਮਾਰੇਤੁਂ, ਤਸ੍ਮਾ ਨਾਹਂ ਗਚ੍ਛਾਮਿ, ਅਹਂ ਮਨੁਸ੍ਸਮਂਸਤੋ ਵਿਰਤਤ੍ਤਾ ਕਿਤ੍ਤਕਂ ਜੀਵਿਸ੍ਸਾਮਿ, ਇਦਾਨਿ ਮਮ ਤੁਮ੍ਹਾਕਂ ਦਸ੍ਸਨਂ ਨਤ੍ਥੀ’’ਤਿ ਰੋਦਿਤ੍ਵਾ ‘‘ਗਚ੍ਛਥ ਤੁਮ੍ਹੇ’’ਤਿ ਆਹ. ਅਥ ਮਹਾਸਤ੍ਤੋ ਤਸ੍ਸ ਪਿਟ੍ਠਿਂ ਪਰਿਮਜ੍ਜਿਤ੍ਵਾ, ‘‘ਸਮ੍ਮ ਪੋਰਿਸਾਦ, ਮਾ ਚਿਨ੍ਤਯਿ, ਸੁਤਸੋਮੋ ਨਾਮਾਹਂ, ਮਯਾ ਤਾਦਿਸੋ ਕਕ੍ਖਲ਼ੋ ਫਰੁਸੋ ਵਿਨੀਤੋ, ਬਾਰਾਣਸਿਵਾਸਿਕੇਸੁ ਕਿਂ ਵਤ੍ਤਬ੍ਬਂ ਅਤ੍ਥਿ, ਅਹਂ ਤਂ ਤਤ੍ਥ ਪਤਿਟ੍ਠਾਪੇਸ੍ਸਾਮਿ, ਅਸਕ੍ਕੋਨ੍ਤੋ ਅਤ੍ਤਨੋ ਰਜ੍ਜਂ ਦ੍ਵਿਧਾ ਭਿਨ੍ਦਿਤ੍ਵਾ ਦਸ੍ਸਾਮੀ’’ਤਿ ਵਤ੍ਵਾ ‘‘ਤੁਮ੍ਹਾਕਮ੍ਪਿ ਨਗਰੇ ਮਮ ਵੇਰਿਨੋ ਅਤ੍ਥਿਯੇਵਾ’’ਤਿ ਵੁਤ੍ਤੇ ‘‘ਇਮਿਨਾ ਮਮ ਵਚਨਂ ਕਰੋਨ੍ਤੇਨ ਦੁਕ੍ਕਰਂ ਕਤਂ, ਯੇਨ ਕੇਨਚਿ ਉਪਾਯੇਨ ਪੋਰਾਣਕਯਸੇ ਪਤਿਟ੍ਠਪੇਤਬ੍ਬੋ ਏਸ ਮਯਾ’’ਤਿ ਚਿਨ੍ਤੇਤ੍ਵਾ ਤਸ੍ਸ ਪਲੋਭਨਤ੍ਥਾਯ ਨਗਰਸਮ੍ਪਤ੍ਤਿਂ ਵਣ੍ਣੇਨ੍ਤੋ ਆਹ –

੪੭੯.

‘‘ਚਤੁਪ੍ਪਦਂ ਸਕੁਣਞ੍ਚਾਪਿ ਮਂਸਂ, ਸੂਦੇਹਿ ਰਨ੍ਧਂ ਸੁਕਤਂ ਸੁਨਿਟ੍ਠਿਤਂ;

ਸੁਧਂਵ ਇਨ੍ਦੋ ਪਰਿਭੁਞ੍ਜਿਯਾਨ, ਹਿਤ੍ਵਾ ਕਥੇਕੋ ਰਮਸੀ ਅਰਞ੍ਞੇ.

੪੮੦.

‘‘ਤਾ ਖਤ੍ਤਿਯਾ ਵੇਲ੍ਲਿਵਿਲਾਕਮਜ੍ਝਾ, ਅਲਙ੍ਕਤਾ ਸਮ੍ਪਰਿਵਾਰਯਿਤ੍ਵਾ;

ਇਨ੍ਦਂਵ ਦੇਵੇਸੁ ਪਮੋਦਯਿਂਸੁ, ਹਿਤ੍ਵਾ ਕਥੇਕੋ ਰਮਸੀ ਅਰਞ੍ਞੇ.

੪੮੧.

‘‘ਤਮ੍ਬੂਪਧਾਨੇ ਬਹੁਗੋਣਕਮ੍ਹਿ, ਸੁਭਮ੍ਹਿ ਸਬ੍ਬਸ੍ਸਯਨਮ੍ਹਿ ਸਙ੍ਗੇ;

ਸੇਯ੍ਯਸ੍ਸ ਮਜ੍ਝਮ੍ਹਿ ਸੁਖਂ ਸਯਿਤ੍ਵਾ

ਹਿਤ੍ਵਾ ਕਥੇਕੋ ਰਮਸੀ ਅਰਞ੍ਞੇ.

੪੮੨.

‘‘ਪਾਣਿਸ੍ਸਰਂ ਕੁਮ੍ਭਥੂਣਂ ਨਿਸੀਥੇ, ਅਥੋਪਿ ਵੇ ਨਿਪ੍ਪੁਰਿਸਮ੍ਪਿ ਤੂਰਿਯਂ;

ਬਹੁਂ ਸੁਗੀਤਞ੍ਚ ਸੁਵਾਦਿਤਞ੍ਚ, ਹਿਤ੍ਵਾ ਕਥੇਕੋ ਰਮਸੀ ਅਰਞ੍ਞੇ.

੪੮੩.

‘‘ਉਯ੍ਯਾਨਸਮ੍ਪਨ੍ਨਂ ਪਹੂਤਮਾਲ੍ਯਂ, ਮਿਗਾਜਿਨੂਪੇਤਂ ਪੁਰਂ ਸੁਰਮ੍ਮਂ;

ਹਯੇਹਿ ਨਾਗੇਹਿ ਰਥੇਹੁਪੇਤਂ, ਹਿਤ੍ਵਾ ਕਥੇਕੋ ਰਮਸੀ ਅਰਞ੍ਞੇ’’ਤਿ.

ਤਤ੍ਥ ਸੁਕਤਨ੍ਤਿ ਨਾਨਪ੍ਪਕਾਰੇਹਿ ਸੁਟ੍ਠੁ ਕਤਂ. ਸੁਨਿਟ੍ਠਿਤਨ੍ਤਿ ਨਾਨਾਸਮ੍ਭਾਰਯੋਜਨੇਨ ਸੁਟ੍ਠੁ ਨਿਟ੍ਠਿਤਂ. ਕਥੇਕੋਤਿ ਕਥਂ ਏਕੋ. ਰਮਸੀਤਿ ਮੂਲਫਲਾਦੀਨਿ ਖਾਦਨ੍ਤੋ ਕਥਂ ਰਮਿਸ੍ਸਸਿ, ‘‘ਏਹਿ, ਮਹਾਰਾਜ, ਗਮਿਸ੍ਸਾਮਾ’’ਤਿ. ਵੇਲ੍ਲਿਵਿਲਾਕਮਜ੍ਝਾਤਿ ਏਤ੍ਥ ਵੇਲ੍ਲੀਤਿ ਰਾਸਿ, ਵਿਲਾਕਮਜ੍ਝਾਤਿ ਵਿਲਗ੍ਗਮਜ੍ਝਾ. ਉਤ੍ਤਤ੍ਤਘਨਸੁਵਣ੍ਣਰਾਸਿਪਭਾ ਚੇਵ ਤਨੁਦੀਘਮਜ੍ਝਾ ਚਾਤਿ ਦਸ੍ਸੇਤਿ. ਦੇਵੇਸੂਤਿ ਦੇਵਲੋਕੇਸੁ ਅਚ੍ਛਰਾ ਇਨ੍ਦਂ ਵਿਯ ਰਮਣੀਯੇ ਬਾਰਾਣਸਿਨਗਰੇ ਪੁਬ੍ਬੇ ਤਂ ਪਮੋਦਯਿਂਸੁ, ਤਾ ਹਿਤ੍ਵਾ ਇਧ ਕਿਂ ਕਰਿਸ੍ਸਸਿ, ‘‘ਏਹਿ, ਸਮ੍ਮ, ਗਚ੍ਛਾਮਾ’’ਤਿ. ਤਮ੍ਬੂਪਧਾਨੇਤਿ ਰਤ੍ਤੂਪਧਾਨੇ. ਸਬ੍ਬਸ੍ਸਯਨਮ੍ਹੀਤਿ ਸਬ੍ਬਤ੍ਥਰਣਤ੍ਥਤੇ ਸਯਨੇ. ਸਙ੍ਗੇਤਿ ਅਨੇਕਭੂਮਿਕੇ ਦਸ੍ਸੇਤ੍ਵਾ ਅਦ੍ਧਰਤ੍ਤਅਙ੍ਗਯੁਤ੍ਤੇ ਤਤ੍ਥ ਤ੍ਵਂ ਪੁਬ੍ਬੇ ਸਯੀਤਿ ਅਤ੍ਥੋ. ਸੁਖਨ੍ਤਿ ਤਾਦਿਸਸ੍ਸ ਸਯਨਸ੍ਸ ਮਜ੍ਝਮ੍ਹਿ ਸੁਖਂ ਸਯਿਤ੍ਵਾਨ ਇਦਾਨਿ ਕਥਂ ਅਰਞ੍ਞੇ ਰਮਿਸ੍ਸਸਿ, ‘‘ਏਹਿ ਗਚ੍ਛਾਮ, ਸਮ੍ਮਾ’’ਤਿ. ਨਿਸੀਥੇਤਿ ਰਤ੍ਤਿਭਾਗੇ. ਹਿਤ੍ਵਾਤਿ ਏਵਰੂਪਂ ਸਮ੍ਪਤ੍ਤਿਂ ਛਡ੍ਡੇਤ੍ਵਾ. ਉਯ੍ਯਾਨਸਮ੍ਪਨ੍ਨਂ ਪਹੂਤਮਾਲ੍ਯਨ੍ਤਿ, ਮਹਾਰਾਜ, ਤਵ ਉਯ੍ਯਾਨਸਮ੍ਪਨ੍ਨਂ ਨਾਨਾਵਿਧਪੁਪ੍ਫਂ. ਮਿਗਾਜਿਨੂਪੇਤਂ ਪੁਰਂ ਸੁਰਮ੍ਮਨ੍ਤਿ ਤਂ ਉਯ੍ਯਾਨਂ ਮਿਗਾਜਿਨਂ ਨਾਮ ਨਾਮੇਨ, ਤੇਨ ਉਪੇਤਂ ਪੁਰਮ੍ਪਿ ਤੇ ਸੁਟ੍ਠੁ ਰਮ੍ਮਂ. ਹਿਤ੍ਵਾਤਿ ਏਵਰੂਪਂ ਮਨੋਰਮਂ ਨਗਰਂ ਛਡ੍ਡੇਤ੍ਵਾ.

ਇਤਿ ਮਹਾਸਤ੍ਤੋ ‘‘ਅਪ੍ਪੇਵ ਨਾਮੇਸ ਪੁਬ੍ਬੇ ਉਪਭੁਤ੍ਤਪਰਿਭੋਗਰਸਂ ਸਰਿਤ੍ਵਾ ਗਨ੍ਤੁਕਾਮੋ ਭਵੇਯ੍ਯਾ’’ਤਿ ਪਠਮਂ ਭੋਜਨੇਨ ਪਲੋਭੇਸਿ, ਦੁਤਿਯਂ ਕਿਲੇਸੇਨ, ਤਤਿਯਂ ਸਯਨੇਨ, ਚਤੁਤ੍ਥਂ ਨਚ੍ਚਗੀਤਵਾਦਿਤੇਨ, ਪਞ੍ਚਮਂ ਉਯ੍ਯਾਨੇਨ ਚੇਵ ਨਗਰੇਨ ਚਾਤਿ ਇਮੇਹਿ ਏਤ੍ਤਕੇਹਿ ਪਲੋਭੇਤ੍ਵਾ ‘‘ਏਹਿ, ਮਹਾਰਾਜ, ਅਹਂ ਤਂ ਆਦਾਯ ਗਨ੍ਤ੍ਵਾ ਬਾਰਾਣਸਿਯਂ ਪਤਿਟ੍ਠਾਪੇਤ੍ਵਾ ਪਚ੍ਛਾ ਸਕਰਟ੍ਠਂ ਗਮਿਸ੍ਸਾਮਿ, ਸਚੇ ਬਾਰਾਣਸਿਰਜ੍ਜਂ ਨ ਲਭਿਸ੍ਸਸਿ, ਉਪਡ੍ਢਰਜ੍ਜਂ ਤੇ ਦਸ੍ਸਾਮਿ, ਕਿਂ ਤੇ ਅਰਞ੍ਞਵਾਸੇਨ, ਮਮ ਵਚਨਂ ਕਰੋਹੀ’’ਤਿ ਆਹ. ਸੋ ਤਸ੍ਸ ਵਚਨਂ ਸੁਤ੍ਵਾ ਗਨ੍ਤੁਕਾਮੋ ਹੁਤ੍ਵਾ ‘‘ਸੁਤਸੋਮੋ ਮਯ੍ਹਂ ਅਤ੍ਥਕਾਮੋ ਅਨੁਕਮ੍ਪਕੋ, ਪਠਮਂ ਮਂ ਕਲ੍ਯਾਣੇ ਪਤਿਟ੍ਠਾਪੇਤ੍ਵਾ ‘ਇਦਾਨਿ ਪੋਰਾਣਕਯਸੇਵ ਪਤਿਟ੍ਠਾਪੇਸ੍ਸਾਮੀ’ਤਿ ਵਦਤਿ, ਸਕ੍ਖਿਸ੍ਸਤਿ ਚੇਸ ਪਤਿਟ੍ਠਾਪੇਤੁਂ, ਇਮਿਨਾ ਸਦ੍ਧਿਂਯੇਵ ਗਨ੍ਤੁਂ ਵਟ੍ਟਤਿ, ਕਿਂ ਮੇ ਅਰਞ੍ਞਵਾਸੇਨਾ’’ਤਿ ਚਿਨ੍ਤੇਤ੍ਵਾ ਤੁਟ੍ਠਚਿਤ੍ਤੋ ਤਸ੍ਸ ਗੁਣਂ ਨਿਸ੍ਸਾਯ ਵਣ੍ਣਂ ਕਥੇਤੁਕਾਮੋ ‘‘ਸਮ੍ਮ, ਸੁਤਸੋਮ, ਕਲ੍ਯਾਣਮਿਤ੍ਤਸਂਸਗ੍ਗਤੋ ਸਾਧੁਤਰਂ, ਪਾਪਮਿਤ੍ਤਸਂਸਗ੍ਗਤੋ ਵਾ ਪਾਪਤਰਂ ਨਾਮ ਨਤ੍ਥੀ’’ਤਿ ਵਤ੍ਵਾ ਆਹ –

੪੮੪.

‘‘ਕਾਲ਼ਪਕ੍ਖੇ ਯਥਾ ਚਨ੍ਦੋ, ਹਾਯਤੇਵ ਸੁਵੇ ਸੁਵੇ;

ਕਾਲ਼ਪਕ੍ਖੂਪਮੋ ਰਾਜ, ਅਸਤਂ ਹੋਤਿ ਸਮਾਗਮੋ.

੪੮੫.

‘‘ਯਥਾਹਂ ਰਸਕਮਾਗਮ੍ਮ, ਸੂਦਂ ਕਾਪੁਰਿਸਾਧਮਂ;

ਅਕਾਸਿਂ ਪਾਪਕਂ ਕਮ੍ਮਂ, ਯੇਨ ਗਚ੍ਛਾਮਿ ਦੁਗ੍ਗਤਿਂ.

੪੮੬.

‘‘ਸੁਕ੍ਕਪਕ੍ਖੇ ਯਥਾ ਚਨ੍ਦੋ, ਵਡ੍ਢਤੇਵ ਸੁਵੇ ਸੁਵੇ;

ਸੁਕ੍ਕਪਕ੍ਖੂਪਮੋ ਰਾਜ, ਸਤਂ ਹੋਤਿ ਸਮਾਗਮੋ.

੪੮੭.

‘‘ਯਥਾਹਂ ਤੁਵਮਾਗਮ੍ਮ, ਸੁਤਸੋਮ ਵਿਜਾਨਹਿ;

ਕਾਹਾਮਿ ਕੁਸਲਂ ਕਮ੍ਮਂ, ਯੇਨ ਗਚ੍ਛਾਮਿ ਸੁਗ੍ਗਤਿਂ.

੪੮੮.

‘‘ਥਲੇ ਯਥਾ ਵਾਰਿ ਜਨਿਨ੍ਦ ਵੁਟ੍ਠਂ, ਅਨਦ੍ਧਨੇਯ੍ਯਂ ਨ ਚਿਰਟ੍ਠਿਤੀਕਂ;

ਏਵਮ੍ਪਿ ਹੋਤਿ ਅਸਤਂ ਸਮਾਗਮੋ, ਅਨਦ੍ਧਨੇਯ੍ਯੋ ਉਦਕਂ ਥਲੇਵ.

੪੮੯.

‘‘ਸਰੇ ਯਥਾ ਵਾਰਿ ਜਨਿਨ੍ਦ ਵੁਟ੍ਠਂ, ਚਿਰਟ੍ਠਿਤੀਕਂ ਨਰਵੀਰਸੇਟ੍ਠ;

ਏਵਮ੍ਪਿ ਵੇ ਹੋਤਿ ਸਤਂ ਸਮਾਗਮੋ, ਚਿਰਟ੍ਠਿਤੀਕੋ ਉਦਕਂ ਸਰੇਵ.

੪੯੦.

‘‘ਅਬ੍ਯਾਯਿਕੋ ਹੋਤਿ ਸਤਂ ਸਮਾਗਮੋ, ਯਾਵਮ੍ਪਿ ਤਿਟ੍ਠੇਯ੍ਯ ਤਥੇਵ ਹੋਤਿ;

ਖਿਪ੍ਪਞ੍ਹਿ ਵੇਤਿ ਅਸਤਂ ਸਮਾਗਮੋ, ਤਸ੍ਮਾ ਸਤਂ ਧਮ੍ਮੋ ਅਸਬ੍ਭਿ ਆਰਕਾ’’ਤਿ.

ਤਤ੍ਥ ਸੁਵੇ ਸੁਵੇਤਿ ਦਿਵਸੇ ਦਿਵਸੇ. ਅਨਦ੍ਧਨੇਯ੍ਯਨ੍ਤਿ ਨ ਅਦ੍ਧਾਨਕ੍ਖਮਂ. ਸਰੇਤਿ ਸਮੁਦ੍ਦੇ. ਨਰਵੀਰਸੇਟ੍ਠਾਤਿ ਨਰੇਸੁ ਵੀਰਿਯੇਨ ਸੇਟ੍ਠ. ਉਦਕਂ ਸਰੇਵਾਤਿ ਸਮੁਦ੍ਦੇ ਵੁਟ੍ਠਉਦਕਂ ਵਿਯ. ਅਬ੍ਯਾਯਿਕੋਤਿ ਅਵਿਗਚ੍ਛਨਕੋ. ਯਾਵਮ੍ਪਿ ਤਿਟ੍ਠੇਯ੍ਯਾਤਿ ਯਤ੍ਤਕਂ ਕਾਲਂ ਜੀਵਿਤਂ ਤਿਟ੍ਠੇਯ੍ਯ, ਤਤ੍ਤਕਂ ਕਾਲਂ ਤਥੇਵ ਹੋਤਿ, ਨ ਜੀਰਤਿ ਸਪ੍ਪੁਰਿਸੇਹਿ ਮਿਤ੍ਤਭਾਵੋਤਿ.

ਇਤਿ ਪੋਰਿਸਾਦੋ ਸਤ੍ਤਹਿ ਗਾਥਾਹਿ ਮਹਾਸਤ੍ਤਸ੍ਸੇਵ ਵਣ੍ਣਂ ਕਥੇਸਿ. ਮਹਾਸਤ੍ਤੋਪਿ ਪੋਰਿਸਾਦਞ੍ਚ ਤੇ ਚ ਰਾਜਾਨੋ ਗਹੇਤ੍ਵਾ ਅਤ੍ਤਨੋ ਪਚ੍ਚਨ੍ਤਗਾਮਂ ਅਗਮਾਸਿ. ਪਚ੍ਚਨ੍ਤਗਾਮਵਾਸਿਨੋ ਮਹਾਸਤ੍ਤਂ ਦਿਸ੍ਵਾ ਨਗਰਂ ਗਨ੍ਤ੍ਵਾ ਅਮਚ੍ਚਾਨਂ ਆਚਿਕ੍ਖਿਂਸੁ. ਅਮਚ੍ਚਾ ਬਲਕਾਯਂ ਆਦਾਯ ਗਨ੍ਤ੍ਵਾ ਪਰਿਵਾਰਯਿਂਸੁ. ਮਹਾਸਤ੍ਤੋ ਤੇਨ ਪਰਿਵਾਰੇਨ ਬਾਰਾਣਸਿਰਜ੍ਜਂ ਅਗਮਾਸਿ. ਅਨ੍ਤਰਾਮਗ੍ਗੇ ਜਨਪਦਵਾਸਿਨੋ ਬੋਧਿਸਤ੍ਤਸ੍ਸ ਪਣ੍ਣਾਕਾਰਂ ਦਤ੍ਵਾ ਅਨੁਗਚ੍ਛਿਂਸੁ, ਮਹਨ੍ਤੋ ਪਰਿਵਾਰੋ ਅਹੋਸਿ, ਤੇਨ ਸਦ੍ਧਿਂ ਬਾਰਾਣਸਿਂ ਪਾਪੁਣਿ. ਤਦਾ ਪੋਰਿਸਾਦਸ੍ਸ ਪੁਤ੍ਤੋ ਰਾਜਾ ਹੋਤਿ, ਸੇਨਾਪਤਿ ਕਾਲ਼ਹਤ੍ਥਿਯੇਵ. ਨਾਗਰਾ ਰਞ੍ਞੋ ਆਰੋਚਯਿਂਸੁ – ‘‘ਮਹਾਰਾਜ, ਸੁਤਸੋਮੋ ਕਿਰ ਪੋਰਿਸਾਦਂ ਦਮੇਤ੍ਵਾ ਆਦਾਯ ਇਧਾਗਚ੍ਛਤਿ, ਨਗਰਮਸ੍ਸ ਪਵਿਸਿਤੁਂ ਨ ਦਸ੍ਸਾਮਾ’’ਤਿ ਸੀਘਂ ਨਗਰਦ੍ਵਾਰਾਨਿ ਪਿਦਹਿਤ੍ਵਾ ਆਵੁਧਹਤ੍ਥਾ ਅਟ੍ਠਂਸੁ. ਮਹਾਸਤ੍ਤੋ ਦ੍ਵਾਰਾਨਂ ਪਿਹਿਤਭਾਵਂ ਞਤ੍ਵਾ ਪੋਰਿਸਾਦਞ੍ਚ ਪਰੋਸਤਞ੍ਚ ਰਾਜਾਨੋ ਓਹਾਯ ਕਤਿਪਯੇਹਿ ਅਮਚ੍ਚੇਹਿ ਸਦ੍ਧਿਂ ਆਗਨ੍ਤ੍ਵਾ ‘‘ਅਹਂ ਸੁਤਸੋਮਰਾਜਾ, ਦ੍ਵਾਰਂ ਵਿਵਰਥਾ’’ਤਿ ਆਹ. ਪੁਰਿਸਾ ਗਨ੍ਤ੍ਵਾ ਰਞ੍ਞੋ ਆਰੋਚੇਸੁਂ. ਸੋ ‘‘ਖਿਪ੍ਪਂ ਵਿਵਰਥਾ’’ਤਿ ਵਿਵਰਾਪੇਸਿ. ਮਹਾਸਤ੍ਤੋ ਨਗਰਂ ਪਾਵਿਸਿ. ਰਾਜਾ ਚ ਕਾਲ਼ਹਤ੍ਥਿ ਚਸ੍ਸ ਪਚ੍ਚੁਗ੍ਗਮਨਂ ਕਤ੍ਵਾ ਆਦਾਯ ਪਾਸਾਦਂ ਆਰੋਪਯਿਂਸੁ.

ਸੋ ਰਾਜਪਲ੍ਲਙ੍ਕੇ ਨਿਸੀਦਿਤ੍ਵਾ ਪੋਰਿਸਾਦਸ੍ਸ ਅਗ੍ਗਮਹੇਸਿਂ ਸੇਸਾਮਚ੍ਚੇ ਚ ਪਕ੍ਕੋਸਾਪੇਤ੍ਵਾ ਕਾਲ਼ਹਤ੍ਥਿਂ ਆਹ – ‘‘ਕਾਲ਼ਹਤ੍ਥਿ, ਕਸ੍ਮਾ ਰਞ੍ਞੋ ਨਗਰਂ ਪਵਿਸਿਤੁਂ ਨ ਦੇਥਾ’’ਤਿ? ‘‘ਸੋ ਰਜ੍ਜਂ ਕਾਰੇਨ੍ਤੋ ਇਮਸ੍ਮਿਂ ਨਗਰੇ ਬਹੂ ਮਨੁਸ੍ਸੇ ਖਾਦਿ, ਖਤ੍ਤਿਯੇਹਿ ਅਕਤ੍ਤਬ੍ਬਂ ਕਰਿ, ਸਕਲਜਮ੍ਬੁਦੀਪਂ ਛਿਦ੍ਦਮਕਾਸਿ, ਏਵਰੂਪੋ ਪਾਪਧਮ੍ਮੋ, ਤੇਨ ਕਾਰਣੇਨਾ’’ਤਿ. ‘‘ਇਦਾਨਿ ‘ਸੋ ਏਵਰੂਪਂ ਕਰਿਸ੍ਸਤੀ’ਤਿ ਮਾ ਚਿਨ੍ਤਯਿਤ੍ਥ, ਅਹਂ ਤਂ ਦਮੇਤ੍ਵਾ ਸੀਲੇਸੁ ਪਤਿਟ੍ਠਾਪੇਸਿਂ, ਜੀਵਿਤਹੇਤੁਪਿ ਕਞ੍ਚਿ ਨ ਵਿਹੇਠੇਸ੍ਸਤਿ, ਨਤ੍ਥਿ ਵੋ ਤਤੋ ਭਯਂ, ਏਵਂ ਮਾ ਕਰਿਤ੍ਥ, ਪੁਤ੍ਤੇਹਿ ਨਾਮ ਮਾਤਾਪਿਤਰੋ ਪਟਿਜਗ੍ਗਿਤਬ੍ਬਾ, ਮਾਤਾਪਿਤੁਪੋਸਕਾ ਹਿ ਸਗ੍ਗਂ ਗਚ੍ਛਨ੍ਤਿ, ਇਤਰੇ ਨਿਰਯ’’ਨ੍ਤਿ ਏਵਂ ਸੋ ਨਿਚਾਸਨੇ ਨਿਸਿਨ੍ਨਸ੍ਸ ਪੁਤ੍ਤਰਾਜਸ੍ਸ ਓਵਾਦਂ ਦਤ੍ਵਾ, ‘‘ਕਾਲ਼ਹਤ੍ਥਿ, ਤ੍ਵਂ ਰਞ੍ਞੋ ਸਹਾਯੋ ਚੇਵ ਸੇਵਕੋ ਚ, ਰਞ੍ਞਾਪਿ ਮਹਨ੍ਤੇ ਇਸ੍ਸਰਿਯੇ ਪਤਿਟ੍ਠਾਪਿਤੋ, ਤਯਾਪਿ ਰਞ੍ਞੋ ਅਤ੍ਥਂ ਚਰਿਤੁਂ ਵਟ੍ਟਤੀ’’ਤਿ ਸੇਨਾਪਤਿਮ੍ਪਿ ਅਨੁਸਾਸਿਤ੍ਵਾ, ‘‘ਦੇਵਿ, ਤ੍ਵਮ੍ਪਿ ਕੁਲਗੇਹਾ ਆਗਨ੍ਤ੍ਵਾ ਤਸ੍ਸ ਸਨ੍ਤਿਕੇ ਅਗ੍ਗਮਹੇਸਿਟ੍ਠਾਨਂ ਪਤ੍ਵਾ ਪੁਤ੍ਤਧੀਤਾਹਿ ਵਡ੍ਢਿਪ੍ਪਤ੍ਤਾ, ਤਯਾਪਿ ਤਸ੍ਸ ਅਤ੍ਥਂ ਚਰਿਤੁਂ ਵਟ੍ਟਤੀ’’ਤਿ ਦੇਵਿਯਾਪਿ ਓਵਾਦਂ ਦਤ੍ਵਾ ਤਮੇਵਤ੍ਥਂ ਮਤ੍ਥਕਂ ਪਾਪੇਤੁਂ ਧਮ੍ਮਂ ਦੇਸੇਨ੍ਤੋ ਗਾਥਾ ਆਹ –

੪੯੧.

‘‘ਨ ਸੋ ਰਾਜਾ ਯੋ ਅਜੇਯ੍ਯਂ ਜਿਨਾਤਿ, ਨ ਸੋ ਸਖਾ ਯੋ ਸਖਾਰਂ ਜਿਨਾਤਿ;

ਨ ਸਾ ਭਰਿਯਾ ਯਾ ਪਤਿਨੋ ਨ ਵਿਭੇਤਿ, ਨ ਤੇ ਪੁਤ੍ਤਾ ਯੇ ਨ ਭਰਨ੍ਤਿ ਜਿਣ੍ਣਂ.

੪੯੨.

‘‘ਨ ਸਾ ਸਭਾ ਯਤ੍ਥ ਨ ਸਨ੍ਤਿ ਸਨ੍ਤੋ, ਨ ਤੇ ਸਨ੍ਤੋ ਯੇ ਨ ਭਣਨ੍ਤਿ ਧਮ੍ਮਂ;

ਰਾਗਞ੍ਚ ਦੋਸਞ੍ਚ ਪਹਾਯ ਮੋਹਂ, ਧਮ੍ਮਂ ਭਣਨ੍ਤਾਵ ਭਵਨ੍ਤਿ ਸਨ੍ਤੋ.

੪੯੩.

‘‘ਨਾਭਾਸਮਾਨਂ ਜਾਨਨ੍ਤਿ, ਮਿਸ੍ਸਂ ਬਾਲੇਹਿ ਪਣ੍ਡਿਤਂ;

ਭਾਸਮਾਨਞ੍ਚ ਜਾਨਨ੍ਤਿ, ਦੇਸੇਨ੍ਤਂ ਅਮਤਂ ਪਦਂ.

੪੯੪.

‘‘ਭਾਸਯੇ ਜੋਤਯੇ ਧਮ੍ਮਂ, ਪਗ੍ਗਣ੍ਹੇ ਇਸਿਨਂ ਧਜਂ;

ਸੁਭਾਸਿਤਦ੍ਧਜਾ ਇਸਯੋ, ਧਮ੍ਮੋ ਹਿ ਇਸਿਨਂ ਧਜੋ’’ਤਿ.

ਤਤ੍ਥ ਅਜੇਯ੍ਯਨ੍ਤਿ ਅਜੇਯ੍ਯਾ ਨਾਮ ਮਾਤਾਪਿਤਰੋ, ਤੇ ਜਿਨਨ੍ਤੋ ਰਾਜਾ ਨਾਮ ਨ ਹੋਤਿ. ਸਚੇ ਤ੍ਵਮ੍ਪਿ ਪਿਤੁ ਸਨ੍ਤਕਂ ਰਜ੍ਜਂ ਲਭਿਤ੍ਵਾ ਤਸ੍ਸ ਪਟਿਸਤ੍ਤੁ ਹੋਸਿ, ਅਕਿਚ੍ਚਕਾਰੀ ਨਾਮ ਭਵਿਸ੍ਸਸਿ. ਸਖਾਰਂ ਜਿਨਾਤੀਤਿ ਕੂਟਡ੍ਡੇਨ ਜਿਨਾਤਿ. ਸਚੇ ਤ੍ਵਂ, ਕਾਲ਼ਹਤ੍ਥਿ, ਰਞ੍ਞਾ ਸਦ੍ਧਿਂ ਮਿਤ੍ਤਧਮ੍ਮਂ ਨ ਪੂਰੇਸਿ, ਅਧਮ੍ਮਟ੍ਠੋ ਹੁਤ੍ਵਾ ਨਿਰਯੇ ਨਿਬ੍ਬਤ੍ਤਿਸ੍ਸਸਿ. ਨ ਵਿਭੇਤੀਤਿ ਨ ਭਾਯਤਿ. ਸਚੇ ਤ੍ਵਂ ਰਞ੍ਞੋ ਨ ਭਾਯਸਿ, ਭਰਿਯਾਧਮ੍ਮੇ ਠਿਤਾ ਨਾਮ ਨ ਹੋਸਿ, ਅਕਿਚ੍ਚਕਾਰੀ ਨਾਮ ਭਵਿਸ੍ਸਸਿ. ਜਿਣ੍ਣਨ੍ਤਿ ਮਹਲ੍ਲਕਂ. ਤਸ੍ਮਿਞ੍ਹਿ ਕਾਲੇ ਅਭਰਨ੍ਤਾ ਪੁਤ੍ਤਾ ਪੁਤ੍ਤਾ ਨਾਮ ਨ ਹੋਨ੍ਤਿ.

ਸਨ੍ਤੋਤਿ ਪਣ੍ਡਿਤਾ. ਯੇ ਨ ਭਣਨ੍ਤਿ ਧਮ੍ਮਨ੍ਤਿ ਯੇ ਪੁਚ੍ਛਿਤਾ ਸਚ੍ਚਸਭਾਵਂ ਨ ਵਦਨ੍ਤਿ, ਨ ਤੇ ਪਣ੍ਡਿਤਾ ਨਾਮ. ਧਮ੍ਮਂ ਭਣਨ੍ਤਾਵਾਤਿ ਏਤੇ ਰਾਗਾਦਯੋ ਪਹਾਯ ਪਰਸ੍ਸ ਹਿਤਾਨੁਕਮ੍ਪਕਾ ਹੁਤ੍ਵਾ ਸਭਾਵਂ ਭਣਨ੍ਤਾਵ ਪਣ੍ਡਿਤਾ ਨਾਮ ਹੋਨ੍ਤਿ. ਨਾਭਾਸਮਾਨਨ੍ਤਿ ਨ ਅਭਾਸਮਾਨਂ. ਅਮਤਂ ਪਦਨ੍ਤਿ ਅਮਤਮਹਾਨਿਬ੍ਬਾਨਂ ਦੇਸੇਨ੍ਤਂ ‘‘ਪਣ੍ਡਿਤੋ’’ਤਿ ਜਾਨਨ੍ਤਿ, ਤੇਨੇਵ ਪੋਰਿਸਾਦੋ ਮਂ ਞਤ੍ਵਾ ਪਸਨ੍ਨਚਿਤ੍ਤੋ ਚਤ੍ਤਾਰੋ ਵਰੇ ਦਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਿਤੋ. ਭਾਸਯੇਤਿ ਪਣ੍ਡਿਤੋ ਪੁਰਿਸੋ ਧਮ੍ਮਂ ਭਾਸੇਯ੍ਯ ਜੋਤੇਯ੍ਯ, ਬੁਦ੍ਧਾਦਯੋ ਇਸਯੋ ਯਸ੍ਮਾ ਧਮ੍ਮੋ ਏਤੇਸਂ ਧਜੋ, ਤਸ੍ਮਾ ਸੁਭਾਸਿਤਦ੍ਧਜਾ ਨਾਮ ਸੁਭਾਸਿਤਂ ਪਗ੍ਗਣ੍ਹਨ੍ਤਿ, ਬਾਲਾ ਪਨ ਸੁਭਾਸਿਤਂ ਪਗ੍ਗਣ੍ਹਨ੍ਤਾ ਨਾਮ ਨਤ੍ਥੀਤਿ.

ਇਮਸ੍ਸ ਧਮ੍ਮਕਥਂ ਸੁਤ੍ਵਾ ਰਾਜਾ ਚ ਸੇਨਾਪਤਿ ਚ ਦੇਵੀ ਚ ਤੁਟ੍ਠਾ ‘‘ਗਚ੍ਛਾਮ, ਮਹਾਰਾਜ, ਆਨੇਮਾ’’ਤਿ ਵਤ੍ਵਾ ਨਗਰੇ ਭੇਰਿਂ ਚਰਾਪੇਤ੍ਵਾ ਨਾਗਰੇ ਸਨ੍ਨਿਪਾਤੇਤ੍ਵਾ ‘‘ਤੁਮ੍ਹੇ ਮਾ ਭਾਯਿਤ੍ਥ, ਰਾਜਾ ਕਿਰ ਧਮ੍ਮੇ ਪਤਿਟ੍ਠਿਤੋ, ਏਥ ਨਂ ਆਨੇਮਾ’’ਤਿ ਮਹਾਜਨਂ ਆਦਾਯ ਮਹਾਸਤ੍ਤਂ ਪੁਰਤੋ ਕਤ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਕਪ੍ਪਕੇ ਉਪਟ੍ਠਾਪੇਤ੍ਵਾ ਕਪ੍ਪਿਤਕੇਸਮਸ੍ਸੁਂ ਨ੍ਹਾਤਾਨੁਲਿਤ੍ਤਪਸਾਧਿਤਂ ਰਾਜਾਨਂ ਰਤਨਰਾਸਿਮ੍ਹਿ ਠਪੇਤ੍ਵਾ ਅਭਿਸਿਞ੍ਚਿਤ੍ਵਾ ਨਗਰਂ ਪਵੇਸੇਸੁਂ. ਪੋਰਿਸਾਦੋ ਰਾਜਾ ਹੁਤ੍ਵਾ ਪਰੋਸਤਾਨਂ ਖਤ੍ਤਿਯਾਨਂ ਮਹਾਸਤ੍ਤਸ੍ਸ ਚ ਮਹਾਸਕ੍ਕਾਰਂ ਕਾਰੇਸਿ. ‘‘ਸੁਤਸੋਮਨਰਿਨ੍ਦੇਨ ਕਿਰ ਪੋਰਿਸਾਦਂ ਦਮੇਤ੍ਵਾ ਰਜ੍ਜੇ ਪਤਿਟ੍ਠਾਪਿਤੋ’’ਤਿ ਸਕਲਜਮ੍ਬੁਦੀਪੇ ਮਹਾਕੋਲਾਹਲਂ ਉਦਪਾਦਿ. ਇਨ੍ਦਪਤ੍ਥਨਗਰਵਾਸਿਨੋਪਿ ‘‘ਰਾਜਾ ਨੋ ਆਗਚ੍ਛਤੂ’’ਤਿ ਦੂਤਂ ਪਹਿਣਿਂਸੁ. ਸੋ ਤਤ੍ਥ ਮਾਸਮਤ੍ਤਂ ਵਸਿਤ੍ਵਾ, ‘‘ਸਮ੍ਮ, ਗਚ੍ਛਾਮਹਂ, ਤ੍ਵਂ ਅਪ੍ਪਮਤ੍ਤੋ ਹੋਹਿ, ਨਗਰਦ੍ਵਾਰੇਸੁ ਚ ਮਜ੍ਝੇ ਚਾਤਿ ਪਞ੍ਚ ਦਾਨਸਾਲਾਯੋ ਕਾਰੇਹਿ, ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਅਗਤਿਗਮਨਂ ਪਰਿਹਰਾ’’ਤਿ ਪੋਰਿਸਾਦਂ ਓਵਦਿ. ਪਰੋਸਤਾਹਿ ਰਾਜਧਾਨੀਹਿ ਬਲਕਾਯੋ ਯੇਭੁਯ੍ਯੇਨ ਸਨ੍ਨਿਪਤਿ. ਸੋ ਤੇਨ ਬਲਕਾਯੇਨ ਪਰਿਵੁਤੋ ਬਾਰਾਣਸਿਤੋ ਨਿਕ੍ਖਮਿ. ਪੋਰਿਸਾਦੋਪਿ ਨਿਕ੍ਖਮਿਤ੍ਵਾ ਉਪਡ੍ਢਪਥਾ ਨਿਵਤ੍ਤਿ. ਮਹਾਸਤ੍ਤੋ ਅਵਾਹਨਾਨਂ ਰਾਜੂਨਂ ਵਾਹਨਾਨਿ ਦਤ੍ਵਾ ਉਯ੍ਯੋਜੇਸਿ. ਤੇਪਿ ਰਾਜਾਨੋ ਤੇਨ ਸਦ੍ਧਿਂ ਸਮ੍ਮੋਦਿਤ੍ਵਾ ਮਹਾਸਤ੍ਤਂ ਵਨ੍ਦਨਾਦੀਨਿ ਕਤ੍ਵਾ ਅਤ੍ਤਨੋ ਅਤ੍ਤਨੋ ਜਨਪਦਂ ਅਗਮਿਂਸੁ.

ਮਹਾਸਤ੍ਤੋਪਿ ਨਗਰਂ ਪਤ੍ਵਾ ਇਨ੍ਦਪਤ੍ਥਨਗਰਵਾਸੀਹਿ ਦੇਵਨਗਰਂ ਵਿਯ ਅਲਙ੍ਕਤਨਗਰਂ ਪਵਿਸਿਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਮਧੁਰਪਟਿਸਨ੍ਥਾਰਂ ਕਤ੍ਵਾ ਮਹਾਤਲਂ ਅਭਿਰੁਹਿ. ਸੋ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਚਿਨ੍ਤੇਸਿ – ‘‘ਰੁਕ੍ਖਦੇਵਤਾ ਮਯ੍ਹਂ ਬਹੂਪਕਾਰਾ, ਬਲਿਕਮ੍ਮਲਾਭਮਸ੍ਸਾ ਕਰਿਸ੍ਸਾਮੀ’’ਤਿ. ਸੋ ਤਸ੍ਸ ਨਿਗ੍ਰੋਧਸ੍ਸ ਅਵਿਦੂਰੇ ਮਹਨ੍ਤਂ ਤਲ਼ਾਕਂ ਕਾਰੇਤ੍ਵਾ ਬਹੂਨਿ ਕੁਲਾਨਿ ਪੇਸੇਤ੍ਵਾ ਗਾਮਂ ਨਿਵੇਸੇਸਿ. ਗਾਮੋ ਮਹਾ ਅਹੋਸਿ ਅਸੀਤਿਮਤ੍ਤਆਪਣਸਹਸ੍ਸਪਟਿਮਣ੍ਡਿਤੋ. ਤਮ੍ਪਿ ਰੁਕ੍ਖਮੂਲਂ ਸਾਖਨ੍ਤਤੋ ਪਟ੍ਠਾਯ ਸਮਤਲਂ ਕਾਰੇਤ੍ਵਾ ਪਰਿਕ੍ਖਿਤ੍ਤਵੇਦਿਕਤੋਰਣਦ੍ਵਾਰਯੁਤ੍ਤਂ ਅਕਾਸਿ, ਦੇਵਤਾ ਅਭਿਪ੍ਪਸੀਦਿ. ਕਮ੍ਮਾਸਪਾਦਸ੍ਸ ਦਮਿਤਟ੍ਠਾਨੇ ਨਿਵੁਟ੍ਠਤ੍ਤਾ ਪਨ ਸੋ ਗਾਮੋ ਕਮ੍ਮਾਸਦਮ੍ਮਨਿਗਮੋ ਨਾਮ ਜਾਤੋ. ਤੇਪਿ ਸਬ੍ਬੇ ਰਾਜਾਨੋ ਮਹਾਸਤ੍ਤਸ੍ਸ ਓਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਆਯੁਪਰਿਯੋਸਾਨੇ ਸਗ੍ਗਂ ਪੂਰਯਿਂਸੁ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵਾਹਂ ਅਙ੍ਗੁਲਿਮਾਲਂ ਦਮੇਮਿ, ਪੁਬ੍ਬੇਪੇਸ ਮਯਾ ਦਮਿਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਪੋਰਿਸਾਦੋ ਰਾਜਾ ਅਙ੍ਗੁਲਿਮਾਲੋ ਅਹੋਸਿ, ਕਾਲ਼ਹਤ੍ਥਿ ਸਾਰਿਪੁਤ੍ਤੋ, ਨਨ੍ਦਬ੍ਰਾਹ੍ਮਣੋ ਆਨਨ੍ਦੋ, ਰੁਕ੍ਖਦੇਵਤਾ ਕਸ੍ਸਪੋ, ਸਕ੍ਕੋ ਅਨੁਰੁਦ੍ਧੋ, ਸੇਸਰਾਜਾਨੋ ਬੁਦ੍ਧਪਰਿਸਾ, ਮਾਤਾਪਿਤਰੋ ਮਹਾਰਾਜਕੁਲਾਨਿ, ਸੁਤਸੋਮਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਹਾਸੁਤਸੋਮਜਾਤਕਵਣ੍ਣਨਾ ਪਞ੍ਚਮਾ.

ਜਾਤਕੁਦ੍ਦਾਨਂ –

ਸੁਮੁਖੋ ਪਨ ਹਂਸਵਰੋ ਚ ਮਹਾ, ਸੁਧਭੋਜਨਿਕੋ ਚ ਪਰੋ ਪਵਰੋ;

ਸਕੁਣਾਲਦਿਜਾਧਿਪਤਿਵ੍ਹਯਨੋ, ਸੁਤਸੋਮਵਰੁਤ੍ਤਮਸਵ੍ਹਯਨੋਤਿ.

ਅਸੀਤਿਨਿਪਾਤਵਣ੍ਣਨਾ ਨਿਟ੍ਠਿਤਾ.

ਪਞ੍ਚਮੋ ਭਾਗੋ ਨਿਟ੍ਠਿਤੋ.