📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਖੁਦ੍ਦਕਨਿਕਾਯੇ

ਜਾਤਕ-ਅਟ੍ਠਕਥਾ

(ਸਤ੍ਤਮੋ ਭਾਗੋ)

੨੨. ਮਹਾਨਿਪਾਤੋ

[੫੪੩] ੬. ਭੂਰਿਦਤ੍ਤਜਾਤਕਵਣ੍ਣਨਾ

ਨਗਰਕਣ੍ਡਂ

ਯਂ ¶ ¶ ¶ ਕਿਞ੍ਚਿ ਰਤਨਂ ਅਤ੍ਥੀਤਿ ਇਦਂ ਸਤ੍ਥਾ ਸਾਵਤ੍ਥਿਂ ਉਪਨਿਸ੍ਸਾਯ ਜੇਤਵਨੇ ਵਿਹਰਨ੍ਤੋ ਉਪੋਸਥਿਕੇ ਉਪਾਸਕੇ ਆਰਬ੍ਭ ਕਥੇਸਿ. ਤੇ ਕਿਰ ਉਪੋਸਥਦਿਵਸੇ ਪਾਤੋਵ ਉਪੋਸਥਂ ਅਧਿਟ੍ਠਾਯ ਦਾਨਂ ਦਤ੍ਵਾ ਪਚ੍ਛਾਭਤ੍ਤਂ ਗਨ੍ਧਮਾਲਾਦਿਹਤ੍ਥਾ ਜੇਤਵਨਂ ਗਨ੍ਤ੍ਵਾ ਧਮ੍ਮਸ੍ਸਵਨਵੇਲਾਯ ਏਕਮਨ੍ਤਂ ਨਿਸੀਦਿਂਸੁ. ਸਤ੍ਥਾ ਧਮ੍ਮਸਭਂ ਆਗਨ੍ਤ੍ਵਾ ਅਲਙ੍ਕਤਬੁਦ੍ਧਾਸਨੇ ਨਿਸੀਦਿਤ੍ਵਾ ਭਿਕ੍ਖੁਸਙ੍ਘਂ ਓਲੋਕੇਤ੍ਵਾ ਭਿਕ੍ਖੁਆਦੀਸੁ ¶ ਪਨ ਯੇ ¶ ਆਰਬ੍ਭ ਧਮ੍ਮਕਥਾ ਸਮੁਟ੍ਠਾਤਿ, ਤੇਹਿ ਸਦ੍ਧਿਂ ਤਥਾਗਤਾ ਸਲ੍ਲਪਨ੍ਤਿ, ਤਸ੍ਮਾ ਅਜ੍ਜ ਉਪਾਸਕੇ ਆਰਬ੍ਭ ਪੁਬ੍ਬਚਰਿਯਪ੍ਪਟਿਸਂਯੁਤ੍ਤਾ ਧਮ੍ਮਕਥਾ ਸਮੁਟ੍ਠਹਿਸ੍ਸਤੀਤਿ ਞਤ੍ਵਾ ਉਪਾਸਕੇਹਿ ਸਦ੍ਧਿਂ ਸਲ੍ਲਪਨ੍ਤੋ ‘‘ਉਪੋਸਥਿਕਤ੍ਥ, ਉਪਾਸਕਾ’’ਤਿ ਉਪਾਸਕੇ ਪੁਚ੍ਛਿਤ੍ਵਾ ‘‘ਆਮ, ਭਨ੍ਤੇ’’ਤਿ ਵੁਤ੍ਤੇ ‘‘ਸਾਧੁ, ਉਪਾਸਕਾ, ਕਲ੍ਯਾਣਂ ਵੋ ਕਤਂ, ਅਪਿਚ ਅਨਚ੍ਛਰਿਯਂ ਖੋ ਪਨੇਤਂ, ਯਂ ਤੁਮ੍ਹੇ ਮਾਦਿਸਂ ਬੁਦ੍ਧਂ ਓਵਾਦਦਾਯਕਂ ਆਚਰਿਯਂ ਲਭਨ੍ਤਾ ਉਪੋਸਥਂ ਕਰੇਯ੍ਯਾਥ. ਪੋਰਾਣਪਣ੍ਡਿਤਾ ਪਨ ਅਨਾਚਰਿਯਕਾਪਿ ਮਹਨ੍ਤਂ ਯਸਂ ਪਹਾਯ ਉਪੋਸਥਂ ਕਰਿਂਸੁਯੇਵਾ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ¶ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਨਾਮ ਰਾਜਾ ਰਜ੍ਜਂ ਕਾਰੇਨ੍ਤੋ ਪੁਤ੍ਤਸ੍ਸ ਉਪਰਜ੍ਜਂ ਦਤ੍ਵਾ ਤਸ੍ਸ ਮਹਨ੍ਤਂ ਯਸਂ ਦਿਸ੍ਵਾ ‘‘ਰਜ੍ਜਮ੍ਪਿ ਮੇ ਗਣ੍ਹੇਯ੍ਯਾ’’ਤਿ ਉਪ੍ਪਨ੍ਨਾਸਙ੍ਕੋ ‘‘ਤਾਤ, ਤ੍ਵਂ ਇਤੋ ਨਿਕ੍ਖਮਿਤ੍ਵਾ ਯਤ੍ਥ ਤੇ ਰੁਚ੍ਚਤਿ, ਤਤ੍ਥ ਵਸਿਤ੍ਵਾ ਮਮ ਅਚ੍ਚਯੇਨ ਕੁਲਸਨ੍ਤਕਂ ਰਜ੍ਜਂ ਗਣ੍ਹਾਹੀ’’ਤਿ ਆਹ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪਿਤਰਂ ਵਨ੍ਦਿਤ੍ਵਾ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਯਮੁਨਂ ਗਨ੍ਤ੍ਵਾ ਯਮੁਨਾਯ ਚ ਸਮੁਦ੍ਦਸ੍ਸ ਚ ਪਬ੍ਬਤਸ੍ਸ ਚ ਅਨ੍ਤਰੇ ਪਣ੍ਣਸਾਲਂ ਮਾਪੇਤ੍ਵਾ ਵਨਮੂਲਫਲਾਹਾਰੋ ਪਟਿਵਸਤਿ. ਤਦਾ ਸਮੁਦ੍ਦਸ੍ਸ ਹੇਟ੍ਠਿਮੇ ਨਾਗਭਵਨੇ ਏਕਾ ਮਤਪਤਿਕਾ ਨਾਗਮਾਣਵਿਕਾ ਅਞ੍ਞਾਸਂ ਸਪਤਿਕਾਨਂ ਯਸਂ ਓਲੋਕੇਤ੍ਵਾ ਕਿਲੇਸਂ ਨਿਸ੍ਸਾਯ ਨਾਗਭਵਨਾ ਨਿਕ੍ਖਮਿਤ੍ਵਾ ਸਮੁਦ੍ਦਤੀਰੇ ਵਿਚਰਨ੍ਤੀ ਰਾਜਪੁਤ੍ਤਸ੍ਸ ਪਦਵਲਞ੍ਜਂ ਦਿਸ੍ਵਾ ਪਦਾਨੁਸਾਰੇਨ ਗਨ੍ਤ੍ਵਾ ਤਂ ਪਣ੍ਣਸਾਲਂ ਅਦ੍ਦਸ. ਤਦਾ ਰਾਜਪੁਤ੍ਤੋ ਫਲਾਫਲਤ੍ਥਾਯ ਗਤੋ ਹੋਤਿ. ਸਾ ਪਣ੍ਣਸਾਲਂ ਪਵਿਸਿਤ੍ਵਾ ਕਟ੍ਠਤ੍ਥਰਣਞ੍ਚੇਵ ਸੇਸਪਰਿਕ੍ਖਾਰੇ ਚ ਦਿਸ੍ਵਾ ਚਿਨ੍ਤੇਸਿ ‘‘ਇਦਂ ਏਕਸ੍ਸ ਪਬ੍ਬਜਿਤਸ੍ਸ ਵਸਨਟ੍ਠਾਨਂ, ਵੀਮਂਸਿਸ੍ਸਾਮਿ ਨਂ ‘ਸਦ੍ਧਾਯ ਪਬ੍ਬਜਿਤੋ ਨੁ ਖੋ ਨੋ’ਤਿ, ਸਚੇ ਹਿ ਸਦ੍ਧਾਯ ਪਬ੍ਬਜਿਤੋ ਭਵਿਸ੍ਸਤਿ ਨੇਕ੍ਖਮ੍ਮਾਧਿਮੁਤ੍ਤੋ, ਨ ਮੇ ਅਲਙ੍ਕਤਸਯਨਂ ਸਾਦਿਯਿਸ੍ਸਤਿ. ਸਚੇ ਕਾਮਾਭਿਰਤੋ ਭਵਿਸ੍ਸਤਿ, ਨ ਸਦ੍ਧਾਪਬ੍ਬਜਿਤੋ, ਮਮ ਸਯਨਸ੍ਮਿਂਯੇਵ ਨਿਪਜ੍ਜਿਸ੍ਸਤਿ. ਅਥ ਨਂ ਗਹੇਤ੍ਵਾ ਅਤ੍ਤਨੋ ਸਾਮਿਕਂ ਕਤ੍ਵਾ ਇਧੇਵ ਵਸਿਸ੍ਸਾਮੀ’’ਤਿ. ਸਾ ਨਾਗਭਵਨਂ ਗਨ੍ਤ੍ਵਾ ਦਿਬ੍ਬਪੁਪ੍ਫਾਨਿ ਚੇਵ ਦਿਬ੍ਬਗਨ੍ਧੇ ਚ ਆਹਰਿਤ੍ਵਾ ਦਿਬ੍ਬਪੁਪ੍ਫਸਯਨਂ ਸਜ੍ਜੇਤ੍ਵਾ ਪਣ੍ਣਸਾਲਾਯਂ ਪੁਪ੍ਫੂਪਹਾਰਂ ਕਤ੍ਵਾ ਗਨ੍ਧਚੁਣ੍ਣਂ ਵਿਕਿਰਿਤ੍ਵਾ ਪਣ੍ਣਸਾਲਂ ਅਲਙ੍ਕਰਿਤ੍ਵਾ ਨਾਗਭਵਨਮੇਵ ਗਤਾ.

ਰਾਜਪੁਤ੍ਤੋ ਸਾਯਨ੍ਹਸਮਯਂ ਆਗਨ੍ਤ੍ਵਾ ਪਣ੍ਣਸਾਲਂ ਪਵਿਟ੍ਠੋ ਤਂ ਪਵਤ੍ਤਿਂ ਦਿਸ੍ਵਾ ‘‘ਕੇਨ ਨੁ ਖੋ ਇਮਂ ਸਯਨਂ ਸਜ੍ਜਿਤ’’ਨ੍ਤਿ ¶ ਫਲਾਫਲਂ ਪਰਿਭੁਞ੍ਜਿਤ੍ਵਾ ‘‘ਅਹੋ ਸੁਗਨ੍ਧਾਨਿ ਪੁਪ੍ਫਾਨਿ, ਮਨਾਪਂ ਵਤ ਕਤ੍ਵਾ ਸਯਨਂ ਪਞ੍ਞਤ੍ਤ’’ਨ੍ਤਿ ਨ ਸਦ੍ਧਾਪਬ੍ਬਜਿਤਭਾਵੇਨ ਸੋਮਨਸ੍ਸਜਾਤੋ ਪੁਪ੍ਫਸਯਨੇ ਪਰਿਵਤ੍ਤਿਤ੍ਵਾ ਨਿਪਨ੍ਨੋ ਨਿਦ੍ਦਂ ਓਕ੍ਕਮਿਤ੍ਵਾ ਪੁਨਦਿਵਸੇ ਸੂਰਿਯੁਗ੍ਗਮਨੇ ਉਟ੍ਠਾਯ ਪਣ੍ਣਸਾਲਂ ਅਸਮ੍ਮਜ੍ਜਿਤ੍ਵਾ ਫਲਾਫਲਤ੍ਥਾਯ ਅਗਮਾਸਿ. ਨਾਗਮਾਣਵਿਕਾ ਤਸ੍ਮਿਂ ਖਣੇ ਆਗਨ੍ਤ੍ਵਾ ਮਿਲਾਤਾਨਿ ਪੁਪ੍ਫਾਨਿ ਦਿਸ੍ਵਾ ‘‘ਕਾਮਾਧਿਮੁਤ੍ਤੋ ਏਸ, ਨ ਸਦ੍ਧਾਪਬ੍ਬਜਿਤੋ, ਸਕ੍ਕਾ ਨਂ ਗਣ੍ਹਿਤੁ’’ਨ੍ਤਿ ਞਤ੍ਵਾ ਪੁਰਾਣਪੁਪ੍ਫਾਨਿ ਨੀਹਰਿਤ੍ਵਾ ¶ ਅਞ੍ਞਾਨਿ ਪੁਪ੍ਫਾਨਿ ਆਹਰਿਤ੍ਵਾ ਤਥੇਵ ਨਵਪੁਪ੍ਫਸਯਨਂ ਸਜ੍ਜੇਤ੍ਵਾ ਪਣ੍ਣਸਾਲਂ ਅਲਙ੍ਕਰਿਤ੍ਵਾ ਚਙ੍ਕਮੇ ਪੁਪ੍ਫਾਨਿ ਵਿਕਿਰਿਤ੍ਵਾ ਨਾਗਭਵਨਮੇਵ ਗਤਾ. ਸੋ ਤਂ ਦਿਵਸਮ੍ਪਿ ਪੁਪ੍ਫਸਯਨੇ ¶ ਸਯਿਤ੍ਵਾ ਪੁਨਦਿਵਸੇ ਚਿਨ੍ਤੇਸਿ ‘‘ਕੋ ਨੁ ਖੋ ਇਮਂ ਪਣ੍ਣਸਾਲਂ ਅਲਙ੍ਕਰੋਤੀ’’ਤਿ? ਸੋ ਫਲਾਫਲਤ੍ਥਾਯ ਅਗਨ੍ਤ੍ਵਾ ਪਣ੍ਣਸਾਲਤੋ ਅਵਿਦੂਰੇ ਪਟਿਚ੍ਛਨ੍ਨੋ ਅਟ੍ਠਾਸਿ. ਇਤਰਾਪਿ ਬਹੂ ਗਨ੍ਧੇ ਚੇਵ ਪੁਪ੍ਫਾਨਿ ਚ ਆਦਾਯ ਅਸ੍ਸਮਪਦਂ ਅਗਮਾਸਿ. ਰਾਜਪੁਤ੍ਤੋ ਉਤ੍ਤਮਰੂਪਧਰਂ ਨਾਗਮਾਣਵਿਕਂ ਦਿਸ੍ਵਾਵ ਪਟਿਬਦ੍ਧਚਿਤ੍ਤੋ ਅਤ੍ਤਾਨਂ ਅਦਸ੍ਸੇਤ੍ਵਾ ਤਸ੍ਸਾ ਪਣ੍ਣਸਾਲਂ ਪਵਿਸਿਤ੍ਵਾ ਸਯਨਂ ਸਜ੍ਜਨਕਾਲੇ ਪਵਿਸਿਤ੍ਵਾ ‘‘ਕਾਸਿ ਤ੍ਵ’’ਨ੍ਤਿ ਪੁਚ੍ਛਿ. ‘‘ਅਹਂ ਨਾਗਮਾਣਵਿਕਾ, ਸਾਮੀ’’ਤਿ. ‘‘ਸਸਾਮਿਕਾ ਅਸ੍ਸਾਮਿਕਾਸੀ’’ਤਿ. ‘‘ਸਾਮਿ, ਅਹਂ ਪੁਬ੍ਬੇ ਸਸਾਮਿਕਾ, ਇਦਾਨਿ ਪਨ ਅਸ੍ਸਾਮਿਕਾ ਵਿਧਵਾ’’. ‘‘ਤ੍ਵਂ ਪਨ ਕਤ੍ਥ ਵਾਸਿਕੋਸੀ’’ਤਿ? ‘‘ਅਹਂ ਬਾਰਾਣਸਿਰਞ੍ਞੋ ਪੁਤ੍ਤੋ ਬ੍ਰਹ੍ਮਦਤ੍ਤਕੁਮਾਰੋ ਨਾਮ’’. ‘‘ਤ੍ਵਂ ਨਾਗਭਵਨਂ ਪਹਾਯ ਕਸ੍ਮਾ ਇਧ ਵਿਚਰਸੀ’’ਤਿ? ‘‘ਸਾਮਿ, ਅਹਂ ਤਤ੍ਥ ਸਸਾਮਿਕਾਨਂ ਨਾਗਮਾਣਵਿਕਾਨਂ ਯਸਂ ਓਲੋਕੇਤ੍ਵਾ ਕਿਲੇਸਂ ਨਿਸ੍ਸਾਯ ਉਕ੍ਕਣ੍ਠਿਤ੍ਵਾ ਤਤੋ ਨਿਕ੍ਖਮਿਤ੍ਵਾ ਸਾਮਿਕਂ ਪਰਿਯੇਸਨ੍ਤੀ ਵਿਚਰਾਮੀ’’ਤਿ. ‘‘ਤੇਨ ਹਿ ਭਦ੍ਦੇ, ਸਾਧੁ, ਅਹਮ੍ਪਿ ਨ ਸਦ੍ਧਾਯ ਪਬ੍ਬਜਿਤੋ, ਪਿਤਰਾ ਪਨ ਮੇ ਨੀਹਰਿਤਤ੍ਤਾ ਇਧ ਵਸਾਮਿ, ਤ੍ਵਂ ਮਾ ਚਿਨ੍ਤਯਿ, ਅਹਂ ਤੇ ਸਾਮਿਕੋ ਭਵਿਸ੍ਸਾਮਿ, ਉਭੋਪਿ ਇਧ ਸਮਗ੍ਗਵਾਸਂ ਵਸਿਸ੍ਸਾਮਾ’’ਤਿ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਤਤੋ ਪਟ੍ਠਾਯ ਤੇ ਉਭੋਪਿ ਤਤ੍ਥੇਵ ਸਮਗ੍ਗਵਾਸਂ ਵਸਿਂਸੁ. ਸਾ ਅਤ੍ਤਨੋ ਆਨੁਭਾਵੇਨ ਮਹਾਰਹਂ ਗੇਹਂ ਮਾਪੇਤ੍ਵਾ ਮਹਾਰਹਂ ਪਲ੍ਲਙ੍ਕਂ ਆਹਰਿਤ੍ਵਾ ਸਯਨਂ ਪਞ੍ਞਪੇਸਿ. ਤਤੋ ਪਟ੍ਠਾਯ ਮੂਲਫਲਾਫਲਂ ਨ ਖਾਦਿ, ਦਿਬ੍ਬਅਨ੍ਨਪਾਨਮੇਵ ਭੁਞ੍ਜਿਤ੍ਵਾ ਜੀਵਿਕਂ ਕਪ੍ਪੇਸਿ.

ਅਪਰਭਾਗੇ ਨਾਗਮਾਣਵਿਕਾ ਗਬ੍ਭਂ ਪਟਿਲਭਿਤ੍ਵਾ ਪੁਤ੍ਤਂ ਵਿਜਾਯਿ, ਸਾਗਰਤੀਰੇ ਜਾਤਤ੍ਤਾ ਤਸ੍ਸ ‘‘ਸਾਗਰਬ੍ਰਹ੍ਮਦਤ੍ਤੋ’’ਤਿ ਨਾਮਂ ¶ ਕਰਿਂਸੁ. ਤਸ੍ਸ ਪਦਸਾ ਗਮਨਕਾਲੇ ਨਾਗਮਾਣਵਿਕਾ ਧੀਤਰਂ ਵਿਜਾਯਿ, ਤਸ੍ਸਾ ਸਮੁਦ੍ਦਤੀਰੇ ਜਾਤਤ੍ਤਾ ‘‘ਸਮੁਦ੍ਦਜਾ’’ਤਿ ਨਾਮਂ ਕਰਿਂਸੁ. ਅਥੇਕੋ ਬਾਰਾਣਸਿਵਾਸਿਕੋ ਵਨਚਰਕੋ ਤਂ ਠਾਨਂ ਪਤ੍ਵਾ ਕਤਪਟਿਸਨ੍ਥਾਰੋ ਰਾਜਪੁਤ੍ਤਂ ਸਞ੍ਜਾਨਿਤ੍ਵਾ ਕਤਿਪਾਹਂ ਤਤ੍ਥ ਵਸਿਤ੍ਵਾ ‘‘ਦੇਵ, ਅਹਂ ਤੁਮ੍ਹਾਕਂ ਇਧ ਵਸਨਭਾਵਂ ਰਾਜਕੁਲਸ੍ਸ ਆਰੋਚੇਸ੍ਸਾਮੀ’’ਤਿ ਤਂ ਵਨ੍ਦਿਤ੍ਵਾ ਨਿਕ੍ਖਮਿਤ੍ਵਾ ਨਗਰਂ ਅਗਮਾਸਿ. ਤਦਾ ਰਾਜਾ ਕਾਲਮਕਾਸਿ. ਅਮਚ੍ਚਾ ਤਸ੍ਸ ਸਰੀਰਕਿਚ੍ਚਂ ਕਤ੍ਵਾ ਸਤ੍ਤਮੇ ਦਿਵਸੇ ਸਨ੍ਨਿਪਤਿਤ੍ਵਾ ‘‘ਅਰਾਜਕਂ ਰਜ੍ਜਂ ਨਾਮ ਨ ਸਣ੍ਠਾਤਿ, ਰਾਜਪੁਤ੍ਤਸ੍ਸ ਵਸਨਟ੍ਠਾਨਂ ਵਾ ਅਤ੍ਥਿਭਾਵਂ ਵਾ ਨ ਜਾਨਾਮ, ਫੁਸ੍ਸਰਥਂ ਵਿਸ੍ਸਜ੍ਜੇਤ੍ਵਾ ਰਾਜਾਨਂ ਗਣ੍ਹਿਸ੍ਸਾਮਾ’’ਤਿ ਮਨ੍ਤਯਿਂਸੁ. ਤਸ੍ਮਿਂ ਖਣੇ ਵਨਚਰਕੋ ਨਗਰਂ ਪਤ੍ਵਾ ਤਂ ਕਥਂ ਸੁਤ੍ਵਾ ਅਮਚ੍ਚਾਨਂ ਸਨ੍ਤਿਕਂ ਗਨ੍ਤ੍ਵਾ ‘‘ਅਹਂ ਰਾਜਪੁਤ੍ਤਸ੍ਸ ਸਨ੍ਤਿਕੇ ਤਯੋ ਚਤ੍ਤਾਰੋ ¶ ਦਿਵਸੇ ਵਸਿਤ੍ਵਾ ਆਗਤੋਮ੍ਹੀ’’ਤਿ ਤਂ ਪਵਤ੍ਤਿਂ ਆਚਿਕ੍ਖਿ. ਅਮਚ੍ਚਾ ਤਸ੍ਸ ਸਕ੍ਕਾਰਂ ਕਤ੍ਵਾ ਤੇਨ ਮਗ੍ਗਨਾਯਕੇਨ ਸਦ੍ਧਿਂ ਤਤ੍ਥ ਗਨ੍ਤ੍ਵਾ ਕਤਪਟਿਸਨ੍ਥਾਰਾ ਰਞ੍ਞੋ ਕਾਲਕਤਭਾਵਂ ਆਰੋਚੇਤ੍ਵਾ ‘‘ਦੇਵ, ਰਜ੍ਜਂ ਪਟਿਪਜ੍ਜਾਹੀ’’ਤਿ ਆਹਂਸੁ.

ਸੋ ¶ ‘‘ਨਾਗਮਾਣਵਿਕਾਯ ਚਿਤ੍ਤਂ ਜਾਨਿਸ੍ਸਾਮੀ’’ਤਿ ਤਂ ਉਪਸਙ੍ਕਮਿਤ੍ਵਾ ‘‘ਭਦ੍ਦੇ, ਪਿਤਾ ਮੇ ਕਾਲਕਤੋ, ਅਮਚ੍ਚਾ ਮਯ੍ਹਂ ਛਤ੍ਤਂ ਉਸ੍ਸਾਪੇਤੁਂ ਆਗਤਾ, ਗਚ੍ਛਾਮ, ਭਦ੍ਦੇ, ਉਭੋਪਿ ਦ੍ਵਾਦਸਯੋਜਨਿਕਾਯ ਬਾਰਾਣਸਿਯਾ ਰਜ੍ਜਂ ਕਾਰੇਸ੍ਸਾਮ, ਤ੍ਵਂ ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਜੇਟ੍ਠਿਕਾ ਭਵਿਸ੍ਸਸੀ’’ਤਿ ਆਹ. ‘‘ਸਾਮਿ, ਨ ਸਕ੍ਕਾ ਮਯਾ ਗਨ੍ਤੁ’’ਨ੍ਤਿ. ‘‘ਕਿਂਕਾਰਣਾ’’ਤਿ? ‘‘ਮਯਂ ਘੋਰਵਿਸਾ ਖਿਪ੍ਪਕੋਪਾ ਅਪ੍ਪਮਤ੍ਤਕੇਨਪਿ ਕੁਜ੍ਝਾਮ, ਸਪਤ੍ਤਿਰੋਸੋ ਚ ਨਾਮ ਭਾਰਿਯੋ. ਸਚਾਹਂ ਕਿਞ੍ਚਿ ਦਿਸ੍ਵਾ ਵਾ ਸੁਤ੍ਵਾ ਵਾ ਕੁਦ੍ਧਾ ਓਲੋਕੇਸ੍ਸਾਮਿ, ਭਸ੍ਮਾਮੁਟ੍ਠਿ ਵਿਯ ਵਿਪ੍ਪਕਿਰਿਸ੍ਸਤਿ. ਇਮਿਨਾ ਕਾਰਣੇਨ ਨ ਸਕ੍ਕਾ ਮਯਾ ਗਨ੍ਤੁ’’ਨ੍ਤਿ. ਰਾਜਪੁਤ੍ਤੋ ਪੁਨਦਿਵਸੇਪਿ ਯਾਚਤੇਵ. ਅਥ ਨਂ ਸਾ ਏਵਮਾਹ – ‘‘ਅਹਂ ਤਾਵ ਕੇਨਚਿ ਪਰਿਯਾਯੇਨ ਨ ਗਮਿਸ੍ਸਾਮਿ, ਇਮੇ ਪਨ ਮੇ ਪੁਤ੍ਤਾ ਨਾਗਕੁਮਾਰਾ ਤਵ ਸਮ੍ਭਵੇਨ ਜਾਤਤ੍ਤਾ ਮਨੁਸ੍ਸਜਾਤਿਕਾ. ਸਚੇ ਤੇ ਮਯਿ ਸਿਨੇਹੋ ਅਤ੍ਥਿ, ਇਮੇਸੁ ਅਪ੍ਪਮਤ੍ਤੋ ਭਵ. ਇਮੇ ਖੋ ਪਨ ਉਦਕਬੀਜਕਾ ਸੁਖੁਮਾਲਾ ਮਗ੍ਗਂ ਗਚ੍ਛਨ੍ਤਾ ਵਾਤਾਤਪੇਨ ਕਿਲਮਿਤ੍ਵਾ ਮਰੇਯ੍ਯੁਂ, ਤਸ੍ਮਾ ਏਕਂ ਨਾਵਂ ਖਣਾਪੇਤ੍ਵਾ ਉਦਕਸ੍ਸ ਪੂਰਾਪੇਤ੍ਵਾ ਤਾਯ ਦ੍ਵੇ ਪੁਤ੍ਤਕੇ ਉਦਕਕੀਲ਼ਂ ਕੀਲ਼ਾਪੇਤ੍ਵਾ ਨਗਰੇਪਿ ਅਨ੍ਤੋਵਤ੍ਥੁਸ੍ਮਿਂਯੇਵ ¶ ਪੋਕ੍ਖਰਣਿਂਕਾਰੇਯ੍ਯਾਸਿ, ਏਵਂ ਤੇ ਨ ਕਿਲਮਿਸ੍ਸਨ੍ਤੀ’’ਤਿ.

ਸਾ ਏਵਞ੍ਚ ਪਨ ਵਤ੍ਵਾ ਰਾਜਪੁਤ੍ਤਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਪੁਤ੍ਤਕੇ ਆਲਿਙ੍ਗਿਤ੍ਵਾ ਥਨਨ੍ਤਰੇ ਨਿਪਜ੍ਜਾਪੇਤ੍ਵਾ ਸੀਸੇ ਚੁਮ੍ਬਿਤ੍ਵਾ ਰਾਜਪੁਤ੍ਤਸ੍ਸ ਨਿਯ੍ਯਾਦੇਤ੍ਵਾ ਰੋਦਿਤ੍ਵਾ ਕਨ੍ਦਿਤ੍ਵਾ ਤਤ੍ਥੇਵ ਅਨ੍ਤਰਧਾਯਿਤ੍ਵਾ ਨਾਗਭਵਨਂ ਅਗਮਾਸਿ. ਰਾਜਪੁਤ੍ਤੋਪਿ ਦੋਮਨਸ੍ਸਪ੍ਪਤ੍ਤੋ ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ ਨਿਵੇਸਨਾ ਨਿਕ੍ਖਮਿਤ੍ਵਾ ਅਕ੍ਖੀਨਿ ਪੁਞ੍ਛਿਤ੍ਵਾ ਅਮਚ੍ਚੇ ਉਪਸਙ੍ਕਮਿ. ਤੇ ਤਂ ਤਤ੍ਥੇਵ ਅਭਿਸਿਞ੍ਚਿਤ੍ਵਾ ‘‘ਦੇਵ, ਅਮ੍ਹਾਕਂ ਨਗਰਂ ਗਚ੍ਛਾਮਾ’’ਤਿ ਵਦਿਂਸੁ. ਤੇਨ ਹਿ ਸੀਘਂ ਨਾਵਂ ਖਣਿਤ੍ਵਾ ਸਕਟਂ ਆਰੋਪੇਤ੍ਵਾ ਉਦਕਸ੍ਸ ਪੂਰੇਤ੍ਵਾ ਉਦਕਪਿਟ੍ਠੇ ਵਣ੍ਣਗਨ੍ਧਸਮ੍ਪਨ੍ਨਾਨਿ ਨਾਨਾਪੁਪ੍ਫਾਨਿ ਵਿਕਿਰਥ, ਮਮ ਪੁਤ੍ਤਾ ਉਦਕਬੀਜਕਾ, ਤੇ ਤਤ੍ਥ ਕੀਲ਼ਨ੍ਤਾ ਸੁਖਂ ਗਮਿਸ੍ਸਨ੍ਤੀ’’ਤਿ. ਅਮਚ੍ਚਾ ਤਥਾ ਕਰਿਂਸੁ. ਰਾਜਾ ਬਾਰਾਣਸਿਂ ਪਤ੍ਵਾ ਅਲਙ੍ਕਤਨਗਰਂ ਪਵਿਸਿਤ੍ਵਾ ਸੋਲ਼ਸਸਹਸ੍ਸਾਹਿ ਨਾਟਕਿਤ੍ਥੀਹਿ ਅਮਚ੍ਚਾਦੀਹਿ ¶ ਚ ਪਰਿਵੁਤੋ ਮਹਾਤਲੇ ਨਿਸੀਦਿਤ੍ਵਾ ਸਤ੍ਤਾਹਂ ਮਹਾਪਾਨਂ ਪਿਵਿਤ੍ਵਾ ਪੁਤ੍ਤਾਨਂ ਅਤ੍ਥਾਯ ਪੋਕ੍ਖਰਣਿਂ ਕਾਰੇਸਿ. ਤੇ ਨਿਬਦ੍ਧਂ ਤਤ੍ਥ ਕੀਲ਼ਿਂਸੁ.

ਅਥੇਕਦਿਵਸਂ ਪੋਕ੍ਖਰਣਿਯਂ ਉਦਕੇ ਪਵੇਸਿਯਮਾਨੇ ਏਕੋ ਕਚ੍ਛਪੋ ਪਵਿਸਿਤ੍ਵਾ ਨਿਕ੍ਖਮਨਟ੍ਠਾਨਂ ਅਪਸ੍ਸਨ੍ਤੋ ਪੋਕ੍ਖਰਣਿਤਲੇ ਨਿਪਜ੍ਜਿਤ੍ਵਾ ਦਾਰਕਾਨਂ ਕੀਲ਼ਨਕਾਲੇ ਉਦਕਤੋ ਉਟ੍ਠਾਯ ਸੀਸਂ ਨੀਹਰਿਤ੍ਵਾ ਤੇ ਓਲੋਕੇਤ੍ਵਾ ਪੁਨ ਉਦਕੇ ਨਿਮੁਜ੍ਜਿ. ਤੇ ਤਂ ਦਿਸ੍ਵਾ ਭੀਤਾ ਪਿਤੁ ਸਨ੍ਤਿਕਂ ਗਨ੍ਤ੍ਵਾ ‘‘ਤਾਤ, ਪੋਕ੍ਖਰਣਿਯਂ ਏਕੋ ਯਕ੍ਖੋ ਅਮ੍ਹੇ ਤਾਸੇਤੀ’’ਤਿ ਆਹਂਸੁ. ਰਾਜਾ ‘‘ਗਚ੍ਛਥ ਨਂ ਗਣ੍ਹਥਾ’’ਤਿ ਪੁਰਿਸੇ ਆਣਾਪੇਸਿ. ਤੇ ਜਾਲਂ ਖਿਪਿਤ੍ਵਾ ਕਚ੍ਛਪਂ ਆਦਾਯ ਰਞ੍ਞੋ ਦਸ੍ਸੇਸੁਂ. ਕੁਮਾਰਾ ਤਂ ਦਿਸ੍ਵਾ ‘‘ਏਸ, ਤਾਤ, ਪਿਸਾਚੋ’’ਤਿ ਵਿਰਵਿਂਸੁ. ਰਾਜਾ ਪੁਤ੍ਤਸਿਨੇਹੇਨ ਕਚ੍ਛਪਸ੍ਸ ਕੁਜ੍ਝਿਤ੍ਵਾ ‘‘ਗਚ੍ਛਥਸ੍ਸ ¶ ਕਮ੍ਮਕਾਰਣਂ ਕਰੋਥਾ’’ਤਿ ਆਣਾਪੇਸਿ. ਤਤ੍ਰ ਏਕਚ੍ਚੇ ‘‘ਅਯਂ ਰਾਜਵੇਰਿਕੋ, ਏਤਂ ਉਦੁਕ੍ਖਲੇ ਮੁਸਲੇਹਿ ਚੁਣ੍ਣਵਿਚੁਣ੍ਣਂ ਕਾਤੁਂ ਵਟ੍ਟਤੀ’’ਤਿ ਆਹਂਸੁ, ਏਕਚ੍ਚੇ ‘‘ਤੀਹਿ ਪਾਕੇਹਿ ਪਚਿਤ੍ਵਾ ਖਾਦਿਤੁਂ’’, ਏਕਚ੍ਚੇ ‘‘ਅਙ੍ਗਾਰੇਸੁ ਉਤ੍ਤਾਪੇਤੁਂ,’’ ਏਕਚ੍ਚੇ ‘‘ਅਨ੍ਤੋਕਟਾਹੇਯੇਵ ਨਂ ਪਚਿਤੁਂ ਵਟ੍ਟਤੀ’’ਤਿ ਆਹਂਸੁ. ਏਕੋ ਪਨ ਉਦਕਭੀਰੁਕੋ ਅਮਚ੍ਚੋ ‘‘ਇਮਂ ਯਮੁਨਾਯ ਆਵਟ੍ਟੇ ਖਿਪਿਤੁਂ ਵਟ੍ਟਤਿ, ਸੋ ਤਤ੍ਥ ਮਹਾਵਿਨਾਸਂ ਪਾਪੁਣਿਸ੍ਸਤਿ. ਏਵਰੂਪਾ ਹਿਸ੍ਸ ਕਮ੍ਮਕਾਰਣਾ ਨਤ੍ਥੀ’’ਤਿ ਆਹ. ਕਚ੍ਛਪੋ ਤਸ੍ਸ ਕਥਂ ¶ ਸੁਤ੍ਵਾ ਸੀਸਂ ਨੀਹਰਿਤ੍ਵਾ ਏਵਮਾਹ – ‘‘ਅਮ੍ਭੋ, ਕਿਂ ਤੇ ਮਯਾ ਅਪਰਾਧੋ ਕਤੋ, ਕੇਨ ਮਂ ਏਵਰੂਪਂ ਕਮ੍ਮਕਾਰਣਂ ਵਿਚਾਰੇਸਿ. ਮਯਾ ਹਿ ਸਕ੍ਕਾ ਇਤਰਾ ਕਮ੍ਮਕਾਰਣਾ ਸਹਿਤੁਂ, ਅਯਂ ਪਨ ਅਤਿਕਕ੍ਖਲ਼ੋ, ਮਾ ਏਵਂ ਅਵਚਾ’’ਤਿ. ਤਂ ਸੁਤ੍ਵਾ ਰਾਜਾ ‘‘ਇਮਂ ਏਤਦੇਵ ਕਾਰੇਤੁਂ ਵਟ੍ਟਤੀ’’ਤਿ ਯਮੁਨਾਯ ਆਵਟ੍ਟੇ ਖਿਪਾਪੇਸਿ. ਪੁਰਿਸੋ ਤਥਾ ਅਕਾਸਿ. ਸੋ ਏਕਂ ਨਾਗਭਵਨਗਾਮਿਂ ਉਦਕਵਾਹਂ ਪਤ੍ਵਾ ਨਾਗਭਵਨਂ ਅਗਮਾਸਿ.

ਅਥ ਨਂ ਤਸ੍ਮਿਂ ਉਦਕਵਾਹੇ ਕੀਲ਼ਨ੍ਤਾ ਧਤਰਟ੍ਠਨਾਗਰਞ੍ਞੋ ਪੁਤ੍ਤਾ ਨਾਗਮਾਣਵਕਾ ਦਿਸ੍ਵਾ ‘‘ਗਣ੍ਹਥ ਨਂ ਦਾਸ’’ਨ੍ਤਿ ਆਹਂਸੁ. ਸੋ ਚਿਨ੍ਤੇਸਿ ‘‘ਅਹਂ ਬਾਰਾਣਸਿਰਞ੍ਞੋ ਹਤ੍ਥਾ ਮੁਚ੍ਚਿਤ੍ਵਾ ਏਵਰੂਪਾਨਂ ਫਰੁਸਾਨਂ ਨਾਗਾਨਂ ਹਤ੍ਥਂ ਪਤ੍ਤੋ, ਕੇਨ ਨੁ ਖੋ ਉਪਾਯੇਨ ਮੁਚ੍ਚੇਯ੍ਯ’’ਨ੍ਤਿ. ਸੋ ‘‘ਅਤ੍ਥੇਸੋ ਉਪਾਯੋ’’ਤਿ ਮੁਸਾਵਾਦਂ ਕਤ੍ਵਾ ‘‘ਤੁਮ੍ਹੇ ਧਤਰਟ੍ਠਸ੍ਸ ਨਾਗਰਞ੍ਞੋ ਸਨ੍ਤਕਾ ਹੁਤ੍ਵਾ ਕਸ੍ਮਾ ਏਵਂ ਵਦੇਥ, ਅਹਂ ਚਿਤ੍ਤਚੂਲ਼ੋ ਨਾਮ ਕਚ੍ਛਪੋ ਬਾਰਾਣਸਿਰਞ੍ਞੋ ਦੂਤੋ, ਧਤਰਟ੍ਠਸ੍ਸ ਸਨ੍ਤਿਕਂ ਆਗਤੋ, ਅਮ੍ਹਾਕਂ ਰਾਜਾ ਧਤਰਟ੍ਠਸ੍ਸ ਧੀਤਰਂ ਦਾਤੁਕਾਮੋ ਮਂ ਪਹਿਣਿ, ਤਸ੍ਸ ਮਂ ਦਸ੍ਸੇਥਾ’’ਤਿ ਆਹ. ਤੇ ਸੋਮਨਸ੍ਸਜਾਤਾ ਤਂ ¶ ਆਦਾਯ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸੁਂ. ਰਾਜਾ ‘‘ਆਨੇਥ ਨ’’ਨ੍ਤਿ ਤਂ ਪਕ੍ਕੋਸਾਪੇਤ੍ਵਾ ਦਿਸ੍ਵਾਵ ਅਨਤ੍ਤਮਨੋ ਹੁਤ੍ਵਾ ‘‘ਏਵਂ ਲਾਮਕਸਰੀਰੋ ਦੂਤਕਮ੍ਮਂ ਕਾਤੁਂ ਨ ਸਕ੍ਕੋਤੀ’’ਤਿ ਆਹ. ਤਂ ਸੁਤ੍ਵਾ ਕਚ੍ਛਪੋ ‘‘ਕਿਂ ਪਨ, ਮਹਾਰਾਜ, ਦੂਤੇਹਿ ਨਾਮ ਤਾਲਪ੍ਪਮਾਣੇਹਿ ਭਵਿਤਬ੍ਬਂ, ਸਰੀਰਞ੍ਹਿ ਖੁਦ੍ਦਕਂ ਵਾ ਮਹਨ੍ਤਂ ਵਾ ਅਪ੍ਪਮਾਣਂ, ਗਤਗਤਟ੍ਠਾਨੇ ਕਮ੍ਮਨਿਪ੍ਫਾਦਨਮੇਵ ਪਮਾਣਂ. ਮਹਾਰਾਜ, ਅਮ੍ਹਾਕਂ ਰਞ੍ਞੋ ਬਹੂ ਦੂਤਾ. ਥਲੇ ਕਮ੍ਮਂ ਮਨੁਸ੍ਸਾ ਕਰੋਨ੍ਤਿ, ਆਕਾਸੇ ਪਕ੍ਖਿਨੋ, ਉਦਕੇ ਅਹਮੇਵ. ਅਹਞ੍ਹਿ ਚਿਤ੍ਤਚੂਲ਼ੋ ਨਾਮ ਕਚ੍ਛਪੋ ਠਾਨਨ੍ਤਰਪ੍ਪਤ੍ਤੋ ਰਾਜਵਲ੍ਲਭੋ, ਮਾ ਮਂ ਪਰਿਭਾਸਥਾ’’ਤਿ ਅਤ੍ਤਨੋ ਗੁਣਂ ਵਣ੍ਣੇਸਿ. ਅਥ ਨਂ ਧਤਰਟ੍ਠੋ ਪੁਚ੍ਛਿ ‘‘ਕੇਨ ਪਨਤ੍ਥੇਨ ਰਞ੍ਞਾ ਪੇਸਿਤੋਸੀ’’ਤਿ. ਮਹਾਰਾਜ, ਰਾਜਾ ਮਂ ਏਵਮਾਹ ‘‘ਮਯਾ ਸਕਲਜਮ੍ਬੁਦੀਪੇ ਰਾਜੂਹਿ ਸਦ੍ਧਿਂ ਮਿਤ੍ਤਧਮ੍ਮੋ ਕਤੋ, ਇਦਾਨਿ ਧਤਰਟ੍ਠੇਨ ਨਾਗਰਞ੍ਞਾ ਸਦ੍ਧਿਂ ਮਿਤ੍ਤਧਮ੍ਮਂ ਕਾਤੁਂ ਮਮ ਧੀਤਰਂ ਸਮੁਦ੍ਦਜਂ ਦਮ੍ਮੀ’’ਤਿ ਵਤ੍ਵਾ ਮਂ ਪਹਿਣਿ. ‘‘ਤੁਮ੍ਹੇ ਪਪਞ੍ਚਂ ਅਕਤ੍ਵਾ ਮਯਾ ਸਦ੍ਧਿਂਯੇਵ ਪੁਰਿਸਂ ਪੇਸੇਤ੍ਵਾ ਦਿਵਸਂ ਵਵਤ੍ਥਪੇਤ੍ਵਾ ਦਾਰਿਕਂ ਗਣ੍ਹਥਾ’’ਤਿ. ਸੋ ਤੁਸ੍ਸਿਤ੍ਵਾ ਤਸ੍ਸ ਸਕ੍ਕਾਰਂ ਕਤ੍ਵਾ ¶ ਤੇਨ ਸਦ੍ਧਿਂ ਚਤ੍ਤਾਰੋ ਨਾਗਮਾਣਵਕੇ ਪੇਸੇਸਿ ‘‘ਗਚ੍ਛਥ, ਰਞ੍ਞੋ ਵਚਨਂ ਸੁਤ੍ਵਾ ਦਿਵਸਂ ਵਵਤ੍ਥਪੇਤ੍ਵਾ ਏਥਾ’’ਤਿ. ਤੇ ‘‘ਸਾਧੂ’’ਤਿ ਵਤ੍ਵਾ ਕਚ੍ਛਪਂ ਗਹੇਤ੍ਵਾ ਨਾਗਭਵਨਾ ਨਿਕ੍ਖਮਿਂਸੁ.

ਕਚ੍ਛਪੋ ¶ ਯਮੁਨਾਯ ਬਾਰਾਣਸਿਯਾ ਚ ਅਨ੍ਤਰੇ ਏਕਂ ਪਦੁਮਸਰਂ ਦਿਸ੍ਵਾ ਏਕੇਨੁਪਾਯੇਨ ਪਲਾਯਿਤੁਕਾਮੋ ਏਵਮਾਹ – ‘‘ਭੋ ਨਾਗਮਾਣਵਕਾ, ਅਮ੍ਹਾਕਂ ਰਾਜਾ ਪੁਤ੍ਤਦਾਰਾ ਚਸ੍ਸ ਮਂ ਉਦਕੇ ਗੋਚਰਤ੍ਤਾ ਰਾਜਨਿਵੇਸਨਂ ਆਗਤਂ ਦਿਸ੍ਵਾਵ ਪਦੁਮਾਨਿ ਨੋ ਦੇਹਿ, ਭਿਸਮੂਲਾਨਿ ਦੇਹੀਤਿ ਯਾਚਨ੍ਤਿ. ਅਹਂ ਤੇਸਂ ਅਤ੍ਥਾਯ ਤਾਨਿ ਗਣ੍ਹਿਸ੍ਸਾਮਿ, ਏਤ੍ਥ ਮਂ ਵਿਸ੍ਸਜ੍ਜੇਤ੍ਵਾ ਮਂ ਅਪਸ੍ਸਨ੍ਤਾਪਿ ਪੁਰੇਤਰਂ ਰਞ੍ਞੋ ਸਨ੍ਤਿਕਂ ਗਚ੍ਛਥ, ਅਹਂ ਵੋ ਤਤ੍ਥੇਵ ਪਸ੍ਸਿਸ੍ਸਾਮੀ’’ਤਿ. ਤੇ ਤਸ੍ਸ ਸਦ੍ਦਹਿਤ੍ਵਾ ਤਂ ਵਿਸ੍ਸਜ੍ਜੇਸੁਂ. ਸੋ ਤਤ੍ਥ ਏਕਮਨ੍ਤੇ ਨਿਲੀਯਿ. ਇਤਰੇਪਿ ਨਂ ਅਦਿਸ੍ਵਾ ‘‘ਰਞ੍ਞੋ ਸਨ੍ਤਿਕਂ ਗਤੋ ਭਵਿਸ੍ਸਤੀ’’ਤਿ ਮਾਣਵਕਵਣ੍ਣੇਨ ਰਾਜਾਨਂ ਉਪਸਙ੍ਕਮਿਂਸੁ. ਰਾਜਾ ਪਟਿਸਨ੍ਥਾਰਂ ਕਤ੍ਵਾ ‘‘ਕੁਤੋ ਆਗਤਤ੍ਥਾ’’ਤਿ ਪੁਚ੍ਛਿ. ‘‘ਧਤਰਟ੍ਠਸ੍ਸ ਸਨ੍ਤਿਕਾ, ਮਹਾਰਾਜਾ’’ਤਿ. ‘‘ਕਿਂਕਾਰਣਾ ਇਧਾਗਤਾ’’ਤਿ? ‘‘ਮਹਾਰਾਜ, ਮਯਂ ਤਸ੍ਸ ਦੂਤਾ, ਧਤਰਟ੍ਠੋ ਵੋ ਆਰੋਗ੍ਯਂ ਪੁਚ੍ਛਤਿ. ਸਚੇ ਯਂ ਵੋ ਇਚ੍ਛਥ, ਤਂ ਨੋ ਵਦੇਥ. ਤੁਮ੍ਹਾਕਂ ਕਿਰ ਧੀਤਰਂ ਸਮੁਦ੍ਦਜਂ ¶ ਅਮ੍ਹਾਕਂ ਰਞ੍ਞੋ ਪਾਦਪਰਿਚਾਰਿਕਂ ਕਤ੍ਵਾ ਦੇਥਾ’’ਤਿ ਇਮਮਤ੍ਥਂ ਪਕਾਸੇਨ੍ਤਾ ਪਠਮਂ ਗਾਥਮਾਹਂਸੁ –

੭੮੪.

‘‘ਯਂ ਕਿਞ੍ਚਿ ਰਤਨਂ ਅਤ੍ਥਿ, ਧਤਰਟ੍ਠਨਿਵੇਸਨੇ;

ਸਬ੍ਬਾਨਿ ਤੇ ਉਪਯਨ੍ਤੁ, ਧੀਤਰਂ ਦੇਹਿ ਰਾਜਿਨੋ’’ਤਿ.

ਤਤ੍ਥ ਸਬ੍ਬਾਨਿ ਤੇ ਉਪਯਨ੍ਤੂਤਿ ਤਸ੍ਸ ਨਿਵੇਸਨੇ ਸਬ੍ਬਾਨਿ ਰਤਨਾਨਿ ਤਵ ਨਿਵੇਸਨਂ ਉਪਗਚ੍ਛਨ੍ਤੁ.

ਤਂ ਸੁਤ੍ਵਾ ਰਾਜਾ ਦੁਤਿਯਂ ਗਾਥਮਾਹ –

੭੮੫.

‘‘ਨ ਨੋ ਵਿਵਾਹੋ ਨਾਗੇਹਿ, ਕਤਪੁਬ੍ਬੋ ਕੁਦਾਚਨਂ;

ਤਂ ਵਿਵਾਹਂ ਅਸਂਯੁਤ੍ਤਂ, ਕਥਂ ਅਮ੍ਹੇ ਕਰੋਮਸੇ’’ਤਿ.

ਤਤ੍ਥ ਅਸਂਯੁਤ੍ਤਨ੍ਤਿ ਅਯੁਤ੍ਤਂ ਤਿਰਚ੍ਛਾਨੇਹਿ ਸਦ੍ਧਿਂ ਸਂਸਗ੍ਗਂ ਅਨਨੁਚ੍ਛਵਿਕਂ. ਅਮ੍ਹੇਤਿ ਅਮ੍ਹੇ ਮਨੁਸ੍ਸਜਾਤਿਕਾ ਸਮਾਨਾ ਕਥਂ ਤਿਰਚ੍ਛਾਨਗਤਸਮ੍ਬਨ੍ਧਂ ਕਰੋਮਾਤਿ.

ਤਂ ਸੁਤ੍ਵਾ ਨਾਗਮਾਣਵਕਾ ‘‘ਸਚੇ ਤੇ ਧਤਰਟ੍ਠੇਨ ਸਦ੍ਧਿਂ ਸਮ੍ਬਨ੍ਧੋ ਅਨਨੁਚ੍ਛਵਿਕੋ, ਅਥ ਕਸ੍ਮਾ ਅਤ੍ਤਨੋ ਉਪਟ੍ਠਾਕਂ ਚਿਤ੍ਤਚੂਲ਼ਂ ਨਾਮ ਕਚ੍ਛਪਂ ‘ਸਮੁਦ੍ਦਜਂ ਨਾਮ ਤੇ ਧੀਤਰਂ ਦਮ੍ਮੀ’ਤਿ ਅਮ੍ਹਾਕਂ ¶ ਰਞ੍ਞੋ ਪੇਸੇਸਿ? ਏਵਂ ਪੇਸੇਤ੍ਵਾ ਇਦਾਨਿ ਤੇ ਅਮ੍ਹਾਕਂ ਰਾਜਾਨਂ ਪਰਿਭਵਂ ਕਰੋਨ੍ਤਸ੍ਸ ਕਤ੍ਤਬ੍ਬਯੁਤ੍ਤਕਂ ¶ ਮਯਂ ਜਾਨਿਸ੍ਸਾਮ. ਮਯਞ੍ਹਿ ਨਾਗਮਾਣਵਕਾ’’ਤਿ ਵਤ੍ਵਾ ਰਾਜਾਨਂ ਤਜ੍ਜੇਨ੍ਤਾ ਦ੍ਵੇ ਗਾਥਾ ਅਭਾਸਿਂਸੁ –

੭੮੬.

‘‘ਜੀਵਿਤਂ ਨੂਨ ਤੇ ਚਤ੍ਤਂ, ਰਟ੍ਠਂ ਵਾ ਮਨੁਜਾਧਿਪ;

ਨ ਹਿ ਨਾਗੇ ਕੁਪਿਤਮ੍ਹਿ, ਚਿਰਂ ਜੀਵਨ੍ਤਿ ਤਾਦਿਸਾ.

੭੮੭.

‘‘ਯੋ ਤ੍ਵਂ ਦੇਵ ਮਨੁਸ੍ਸੋਸਿ, ਇਦ੍ਧਿਮਨ੍ਤਂ ਅਨਿਦ੍ਧਿਮਾ;

ਵਰੁਣਸ੍ਸ ਨਿਯਂ ਪੁਤ੍ਤਂ, ਯਾਮੁਨਂ ਅਤਿਮਞ੍ਞਸੀ’’ਤਿ.

ਤਤ੍ਥ ਰਟ੍ਠਂ ਵਾਤਿ ਏਕਂਸੇਨ ਤਯਾ ਜੀਵਿਤਂ ਵਾ ਰਟ੍ਠਂ ਵਾ ਚਤ੍ਤਂ. ਤਾਦਿਸਾਤਿ ਤੁਮ੍ਹਾਦਿਸਾ ਏਵਂ ਮਹਾਨੁਭਾਵੇ ਨਾਗੇ ਕੁਪਿਤੇ ਚਿਰਂ ਜੀਵਿਤੁਂ ਨ ਸਕ੍ਕੋਨ੍ਤਿ, ਅਨ੍ਤਰਾਵ ਅਨ੍ਤਰਧਾਯਨ੍ਤਿ. ਯੋ ਤ੍ਵਂ, ਦੇਵ, ਮਨੁਸ੍ਸੋਸੀਤਿ ਦੇਵ, ਯੋ ਤ੍ਵਂ ਮਨੁਸ੍ਸੋ ¶ ਸਮਾਨੋ. ਵਰੁਣਸ੍ਸਾਤਿ ਵਰੁਣਨਾਗਰਾਜਸ੍ਸ. ਨਿਯਂ ਪੁਤ੍ਤਨ੍ਤਿ ਅਜ੍ਝਤ੍ਤਿਕਪੁਤ੍ਤਂ. ਯਾਮੁਨਨ੍ਤਿ ਯਮੁਨਾਯ ਹੇਟ੍ਠਾ ਜਾਤਂ.

ਤਤੋ ਰਾਜਾ ਦ੍ਵੇ ਗਾਥਾ ਅਭਾਸਿ –

੭੮੮.

‘‘ਨਾਤਿਮਞ੍ਞਾਮਿ ਰਾਜਾਨਂ, ਧਤਰਟ੍ਠਂ ਯਸਸ੍ਸਿਨਂ;

ਧਤਰਟ੍ਠੋ ਹਿ ਨਾਗਾਨਂ, ਬਹੂਨਮਪਿ ਇਸ੍ਸਰੋ.

੭੮੯.

‘‘ਅਹਿ ਮਹਾਨੁਭਾਵੋਪਿ, ਨ ਮੇ ਧੀਤਰਮਾਰਹੋ;

ਖਤ੍ਤਿਯੋ ਚ ਵਿਦੇਹਾਨਂ, ਅਭਿਜਾਤਾ ਸਮੁਦ੍ਦਜਾ’’ਤਿ.

ਤਤ੍ਥ ਬਹੂਨਮਪੀਤਿ ਪਞ੍ਚਯੋਜਨਸਤਿਕਸ੍ਸ ਨਾਗਭਵਨਸ੍ਸ ਇਸ੍ਸਰਭਾਵਂ ਸਨ੍ਧਾਯੇਵਮਾਹ. ਨ ਮੇ ਧੀਤਰਮਾਰਹੋਤਿ ਏਵਂ ਮਹਾਨੁਭਾਵੋਪਿ ਪਨ ਸੋ ਅਹਿਜਾਤਿਕਤ੍ਤਾ ਮਮ ਧੀਤਰਂ ਅਰਹੋ ਨ ਹੋਤਿ. ‘‘ਖਤ੍ਤਿਯੋ ਚ ਵਿਦੇਹਾਨ’’ਨ੍ਤਿ ਇਦਂ ਮਾਤਿਪਕ੍ਖੇ ਞਾਤਕੇ ਦਸ੍ਸੇਨ੍ਤੋ ਆਹ. ਸਮੁਦ੍ਦਜਾਤਿ ਸੋ ਚ ਵਿਦੇਹਰਾਜਪੁਤ੍ਤੋ ਮਮ ਧੀਤਾ ਸਮੁਦ੍ਦਜਾ ਚਾਤਿ ਉਭੋਪਿ ਅਭਿਜਾਤਾ. ਤੇ ਅਞ੍ਞਮਞ੍ਞਂ ਸਂਵਾਸਂ ਅਰਹਨ੍ਤਿ. ਨ ਹੇਸਾ ਮਣ੍ਡੂਕਭਕ੍ਖਸ੍ਸ ਸਪ੍ਪਸ੍ਸ ਅਨੁਚ੍ਛਵਿਕਾਤਿ ਆਹ.

ਨਾਗਮਾਣਵਕਾ ਤਂ ਤਤ੍ਥੇਵ ਨਾਸਾਵਾਤੇਨ ਮਾਰੇਤੁਕਾਮਾ ਹੁਤ੍ਵਾਪਿ ‘‘ਅਮ੍ਹਾਕਂ ਦਿਵਸਂ ਵਵਤ੍ਥਾਪਨਤ੍ਥਾਯ ਪੇਸਿਤਾ, ਇਮਂ ਮਾਰੇਤ੍ਵਾ ਗਨ੍ਤੁਂ ਨ ਯੁਤ੍ਤਂ, ਗਨ੍ਤ੍ਵਾ ਰਞ੍ਞੋ ਆਚਿਕ੍ਖਿਤ੍ਵਾ ਜਾਨਿਸ੍ਸਾਮਾ’’ਤਿ ¶ ਤਤ੍ਥੇਵ ਅਨ੍ਤਰਹਿਤਾ ‘‘ਕਿਂ, ਤਾਤਾ, ਲਦ੍ਧਾ ਵੋ ਰਾਜਧੀਤਾ’’ਤਿ ਰਞ੍ਞਾ ਪੁਚ੍ਛਿਤਾ ਕੁਜ੍ਝਿਤ੍ਵਾ ‘‘ਕਿਂ, ਦੇਵ, ਅਮ੍ਹੇ ਅਕਾਰਣਾ ਯਤ੍ਥ ਵਾ ਤਤ੍ਥ ਵਾ ਪੇਸੇਸਿ. ਸਚੇਪਿ ਮਾਰੇਤੁਕਾਮੋ, ਇਧੇਵ ਨੋ ਮਾਰੇਹਿ. ਸੋ ਤੁਮ੍ਹੇ ¶ ਅਕ੍ਕੋਸਤਿ ਪਰਿਭਾਸਤਿ, ਅਤ੍ਤਨੋ ਧੀਤਰਂ ਜਾਤਿਮਾਨੇਨ ਉਕ੍ਖਿਪਤੀ’’ਤਿ ਤੇਨ ਵੁਤ੍ਤਞ੍ਚ ਅਵੁਤ੍ਤਞ੍ਚ ਵਤ੍ਵਾ ਰਞ੍ਞੋ ਕੋਧਂ ਉਪ੍ਪਾਦਯਿਂਸੁ. ਸੋ ਅਤ੍ਤਨੋ ਪਰਿਸਂ ਸਨ੍ਨਿਪਾਤੇਤੁਂ ਆਣਾਪੇਨ੍ਤੋ ਆਹ –

੭੯੦.

‘‘ਕਮ੍ਬਲਸ੍ਸਤਰਾ ਉਟ੍ਠੇਨ੍ਤੁ, ਸਬ੍ਬੇ ਨਾਗੇ ਨਿਵੇਦਯ;

ਬਾਰਾਣਸਿਂ ਪਵਜ੍ਜਨ੍ਤੁ, ਮਾ ਚ ਕਞ੍ਚਿ ਵਿਹੇਠਯੁ’’ਨ੍ਤਿ.

ਤਤ੍ਥ ਕਮ੍ਬਲਸ੍ਸਤਰਾ ਉਟ੍ਠੇਨ੍ਤੂਤਿ ਕਮ੍ਬਲਸ੍ਸਤਰਾ ਨਾਮ ਤਸ੍ਸ ਮਾਤੁਪਕ੍ਖਿਕਾ ਸਿਨੇਰੁਪਾਦੇ ਵਸਨਨਾਗਾ, ਤੇ ਚ ਉਟ੍ਠਹਨ੍ਤੁ. ਅਞ੍ਞੇ ਚ ਚਤੂਸੁ ਦਿਸਾਸੁ ¶ ਅਨੁਦਿਸਾਸੁ ਯਤ੍ਤਕਾ ਵਾ ਮਯ੍ਹਂ ਵਚਨਕਰਾ, ਤੇ ਸਬ੍ਬੇ ਨਾਗੇ ਨਿਵੇਦਯ, ਗਨ੍ਤ੍ਵਾ ਜਾਨਾਪੇਥ, ਖਿਪ੍ਪਂ ਕਿਰ ਸਨ੍ਨਿਪਾਤੇਥਾਤਿ ਆਣਾਪੇਨ੍ਤੋ ਏਵਮਾਹ. ਤਤੋ ਸਬ੍ਬੇਹੇਵ ਸੀਘਂ ਸਨ੍ਨਿਪਤਿਤੇਹਿ ‘‘ਕਿਂ ਕਰੋਮ, ਦੇਵਾ’’ਤਿ ਵੁਤ੍ਤੇ ‘‘ਸਬ੍ਬੇਪਿ ਤੇ ਨਾਗਾ ਬਾਰਾਣਸਿਂ ਪਵਜ੍ਜਨ੍ਤੂ’’ਤਿ ਆਹ. ‘‘ਤਤ੍ਥ ਗਨ੍ਤ੍ਵਾ ਕਿਂ ਕਾਤਬ੍ਬਂ, ਦੇਵ, ਤਂ ਨਾਸਾਵਾਤਪ੍ਪਹਾਰੇਨ ਭਸ੍ਮਂ ਕਰੋਮਾ’’ਤਿ ਚ ਵੁਤ੍ਤੇ ਰਾਜਧੀਤਰਿ ਪਟਿਬਦ੍ਧਚਿਤ੍ਤਤਾਯ ਤਸ੍ਸਾ ਵਿਨਾਸਂ ਅਨਿਚ੍ਛਨ੍ਤੋ ‘‘ਮਾ ਚ ਕਞ੍ਚਿ ਵਿਹੇਠਯੁ’’ਨ੍ਤਿ ਆਹ, ਤੁਮ੍ਹੇਸੁ ਕੋਚਿ ਕਞ੍ਚਿ ਮਾ ਵਿਹੇਠਯਾਤਿ ਅਤ੍ਥੋ. ਅਯਮੇਵ ਵਾ ਪਾਠੋ.

ਅਥ ਨਂ ਨਾਗਾ ‘‘ਸਚੇ ਕੋਚਿ ਮਨੁਸ੍ਸੋ ਨ ਵਿਹੇਠੇਤਬ੍ਬੋ, ਤਤ੍ਥ ਗਨ੍ਤ੍ਵਾ ਕਿਂ ਕਰਿਸ੍ਸਾਮਾ’’ਤਿ ਆਹਂਸੁ. ਅਥ ਨੇ ‘‘ਇਦਞ੍ਚਿਦਞ੍ਚ ਕਰੋਥ, ਅਹਮ੍ਪਿ ਇਦਂ ਨਾਮ ਕਰਿਸ੍ਸਾਮੀ’’ਤਿ ਆਚਿਕ੍ਖਨ੍ਤੋ ਗਾਥਾਦ੍ਵਯਮਾਹ –

੭੯੧.

‘‘ਨਿਵੇਸਨੇਸੁ ਸੋਬ੍ਭੇਸੁ, ਰਥਿਯਾ ਚਚ੍ਚਰੇਸੁ ਚ;

ਰੁਕ੍ਖਗ੍ਗੇਸੁ ਚ ਲਮ੍ਬਨ੍ਤੁ, ਵਿਤਤਾ ਤੋਰਣੇਸੁ ਚ.

੭੯੨.

‘‘ਅਹਮ੍ਪਿ ਸਬ੍ਬਸੇਤੇਨ, ਮਹਤਾ ਸੁਮਹਂ ਪੁਰਂ;

ਪਰਿਕ੍ਖਿਪਿਸ੍ਸਂ ਭੋਗੇਹਿ, ਕਾਸੀਨਂ ਜਨਯਂ ਭਯ’’ਨ੍ਤਿ.

ਤਤ੍ਥ ਸੋਬ੍ਭੇਸੂਤਿ ਪੋਕ੍ਖਰਣੀਸੁ. ਰਥਿਯਾਤਿ ਰਥਿਕਾਯ. ਵਿਤਤਾਤਿ ਵਿਤਤਸਰੀਰਾ ਮਹਾਸਰੀਰਾ ਹੁਤ੍ਵਾ ਏਤੇਸੁ ਚੇਵ ਨਿਵੇਸਨਾਦੀਸੁ ਦ੍ਵਾਰਤੋਰਣੇਸੁ ਚ ਓਲਮ੍ਬਨ੍ਤੁ, ਏਤ੍ਤਕਂ ਨਾਗਾ ਕਰੋਨ੍ਤੁ, ਕਰੋਨ੍ਤਾ ਚ ¶ ਨਿਵੇਸਨੇ ਤਾਵ ਮਞ੍ਚਪੀਠਾਨਂ ਹੇਟ੍ਠਾ ਚ ਉਪਰਿ ਚ ਅਨ੍ਤੋਗਬ੍ਭਬਹਿਗਬ੍ਭਾਦੀਸੁ ਚ ਪੋਕ੍ਖਰਣਿਯਂ ਉਦਕਪਿਟ੍ਠੇ ਰਥਿਕਾਦੀਨਂ ਪਸ੍ਸੇਸੁ ਚੇਵ ਥਲੇਸੁ ਚ ਮਹਨ੍ਤਾਨਿ ਸਰੀਰਾਨਿ ਮਾਪੇਤ੍ਵਾ ਮਹਨ੍ਤੇ ਫਣੇ ਕਤ੍ਵਾ ਕਮ੍ਮਾਰਗਗ੍ਗਰੀ ਵਿਯ ਧਮਮਾਨਾ ‘‘ਸੁਸੂ’’ਤਿ ਸਦ੍ਦਂ ਕਰੋਨ੍ਤਾ ਓਲਮ੍ਬਥ ਚ ਨਿਪਜ੍ਜਥ ਚ. ਅਤ੍ਤਾਨਂ ਪਨ ਤਰੁਣਦਾਰਕਾਨਂ ਜਰਾਜਿਣ੍ਣਾਨਂ ਗਬ੍ਭਿਨਿਤ੍ਥੀਨਂ ਸਮੁਦ੍ਦਜਾਯ ਚਾਤਿ ਇਮੇਸਂ ਚਤੁਨ੍ਨਂ ਮਾ ਦਸ੍ਸਯਿਤ੍ਥ. ਅਹਮ੍ਪਿ ਸਬ੍ਬਸੇਤੇਨ ਮਹਨ੍ਤੇਨ ਸਰੀਰੇਨ ਗਨ੍ਤ੍ਵਾ ਸੁਮਹਨ੍ਤਂ ਕਾਸਿਪੁਰਂ ਸਤ੍ਤਕ੍ਖਤ੍ਤੁਂ ਭੋਗੇਹਿ ਪਰਿਕ੍ਖਿਪਿਸ੍ਸਂ, ਮਹਨ੍ਤੇਨ ਫਣੇਨ ਨਂ ਛਾਦੇਤ੍ਵਾ ਏਕਨ੍ਧਕਾਰਂ ਕਤ੍ਵਾ ਕਾਸੀਨਂ ਭਯਂ ਜਨਯਨ੍ਤੋ ‘‘ਸੁਸੂ’’ਤਿ ਸਦ੍ਦਂ ਮੁਞ੍ਚਿਸ੍ਸਾਮੀਤਿ.

ਅਥ ਸਬ੍ਬੇ ਨਾਗਾ ਤਥਾ ਅਕਂਸੁ. ਤਮਤ੍ਥਂ ¶ ਪਕਾਸੇਨ੍ਤੋ ਸਤ੍ਥਾ ਆਹ –

੭੯੩.

‘‘ਤਸ੍ਸ ¶ ਤਂ ਵਚਨਂ ਸੁਤ੍ਵਾ, ਉਰਗਾਨੇਕਵਣ੍ਣਿਨੋ;

ਬਾਰਾਣਸਿਂ ਪਵਜ੍ਜਿਂਸੁ, ਨ ਚ ਕਞ੍ਚਿ ਵਿਹੇਠਯੁਂ.

੭੯੪.

‘‘ਨਿਵੇਸਨੇਸੁ ਸੋਬ੍ਭੇਸੁ, ਰਥਿਯਾ ਚਚ੍ਚਰੇਸੁ ਚ;

ਰੁਕ੍ਖਗ੍ਗੇਸੁ ਚ ਲਮ੍ਬਿਂਸੁ, ਵਿਤਤਾ ਤੋਰਣੇਸੁ ਚ.

੭੯੫.

‘‘ਤੇਸੁ ਦਿਸ੍ਵਾਨ ਲਮ੍ਬਨ੍ਤੇ, ਪੁਥੂ ਕਨ੍ਦਿਂਸੁ ਨਾਰਿਯੋ;

ਨਾਗੇ ਸੋਣ੍ਡਿਕਤੇ ਦਿਸ੍ਵਾ, ਪਸ੍ਸਸਨ੍ਤੇ ਮੁਹੁਂ ਮੁਹੁਂ.

੭੯੬.

‘‘ਬਾਰਾਣਸੀ ਪਬ੍ਯਥਿਤਾ, ਆਤੁਰਾ ਸਮਪਜ੍ਜਥ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ਧੀਤਰਂ ਦੇਹਿ ਰਾਜਿਨੋ’’ਤਿ.

ਤਤ੍ਥ ਅਨੇਕਵਣ੍ਣਿਨੋਤਿ ਨੀਲਾਦਿਵਸੇਨ ਅਨੇਕਵਣ੍ਣਾ. ਏਵਰੂਪਾਨਿ ਹਿ ਤੇ ਰੂਪਾਨਿ ਮਾਪਯਿਂਸੁ. ਪਵਜ੍ਜਿਂਸੂਤਿ ਅਡ੍ਢਰਤ੍ਤਸਮਯੇ ਪਵਿਸਿਂਸੁ. ਲਮ੍ਬਿਂਸੂਤਿ ਧਤਰਟ੍ਠੇਨ ਵੁਤ੍ਤਨਿਯਾਮੇਨੇਵ ਤੇ ਸਬ੍ਬੇਸੁ ਠਾਨੇਸੁ ਮਨੁਸ੍ਸਾਨਂ ਸਞ੍ਚਾਰਂ ਪਚ੍ਛਿਨ੍ਦਿਤ੍ਵਾ ਓਲਮ੍ਬਿਂਸੁ. ਦੂਤਾ ਹੁਤ੍ਵਾ ਆਗਤਾ ਪਨ ਚਤ੍ਤਾਰੋ ਨਾਗਮਾਣਵਕਾ ਰਞੋ ਸਯਨਸ੍ਸ ਚਤ੍ਤਾਰੋ ਪਾਦੇ ਪਰਿਕ੍ਖਿਪਿਤ੍ਵਾ ਉਪਰਿਸੀਸੇ ਮਹਨ੍ਤੇ ਫਣੇ ਕਤ੍ਵਾ ਤੁਣ੍ਡੇਹਿ ਸੀਸਂ ਪਹਰਨ੍ਤਾ ਵਿਯ ਦਾਠਾ ਵਿਵਰਿਤ੍ਵਾ ਪਸ੍ਸਸਨ੍ਤਾ ਅਟ੍ਠਂਸੁ. ਧਤਰਟ੍ਠੋਪਿ ਅਤ੍ਤਨਾ ਵੁਤ੍ਤਨਿਯਾਮੇਨ ਨਗਰਂ ਪਟਿਚ੍ਛਾਦੇਸਿ. ਪਬੁਜ੍ਝਮਾਨਾ ਪੁਰਿਸਾ ਯਤੋ ਯਤੋ ਹਤ੍ਥਂ ਵਾ ਪਾਦਂ ਵਾ ਪਸਾਰੇਨ੍ਤਿ, ਤਤ੍ਥ ਤਤ੍ਥ ਸਪ੍ਪੇ ਛੁਪਿਤ੍ਵਾ ‘‘ਸਪ੍ਪੋ, ਸਪ੍ਪੋ’’ਤਿ ਵਿਰਵਨ੍ਤਿ. ਪੁਥੂ ਕਨ੍ਦਿਂਸੂਤਿ ਯੇਸੁ ਗੇਹੇਸੁ ਦੀਪਾ ਜਲਨ੍ਤਿ, ਤੇਸੁ ਇਤ੍ਥਿਯੋ ਪਬੁਦ੍ਧਾ ਦ੍ਵਾਰਤੋਰਣਗੋਪਾਨਸਿਯੋ ਓਲੋਕੇਤ੍ਵਾ ਓਲਮ੍ਬਨ੍ਤੇ ਨਾਗੇ ¶ ਦਿਸ੍ਵਾ ਬਹੂ ਏਕਪ੍ਪਹਾਰੇਨੇਵ ਕਨ੍ਦਿਂਸੁ. ਏਵਂ ਸਕਲਨਗਰਂ ਏਕਕੋਲਾਹਲਂ ਅਹੋਸਿ. ਸੋਣ੍ਡਿਕਤੇਤਿ ਕਤਫਣੇ.

ਪਕ੍ਕਨ੍ਦੁਨ੍ਤਿ ਵਿਭਾਤਾਯ ਰਤ੍ਤਿਯਾ ਨਾਗਾਨਂ ਅਸ੍ਸਾਸਵਾਤੇਨ ਸਕਲਨਗਰੇ ਰਾਜਨਿਵੇਸਨੇ ਚ ਉਪ੍ਪਾਤਿਯਮਾਨੇ ਵਿਯ ਭੀਤਾ ਮਨੁਸ੍ਸਾ ‘‘ਨਾਗਰਾਜਾਨੋ ਕਿਸ੍ਸ ਨੋ ਵਿਹੇਠਥਾ’’ਤਿ ਵਤ੍ਵਾ ਤੁਮ੍ਹਾਕਂ ਰਾਜਾ ‘‘ਧੀਤਰਂ ਦਸ੍ਸਾਮੀ’’ਤਿ ਧਤਰਟ੍ਠਸ੍ਸ ਦੂਤਂ ਪੇਸੇਤ੍ਵਾ ਪੁਨ ਤਸ੍ਸ ਦੂਤੇਹਿ ਆਗਨ੍ਤ੍ਵਾ ‘‘ਦੇਹੀ’’ਤਿ ਵੁਤ੍ਤੋ ਅਮ੍ਹਾਕਂ ਰਾਜਾਨਂ ਅਕ੍ਕੋਸਤਿ ਪਰਿਭਾਸਤਿ. ‘‘ਸਚੇ ਅਮ੍ਹਾਕਂ ਰਞ੍ਞੋ ਧੀਤਰਂ ਨ ਦਸ੍ਸਤਿ, ਸਕਲਨਗਰਸ੍ਸ ਜੀਵਿਤਂ ਨਤ੍ਥੀ’’ਤਿ ਵੁਤ੍ਤੇ ‘‘ਤੇਨ ਹਿ ਨੋ ¶ , ਸਾਮਿ, ਓਕਾਸਂ ਦੇਥ, ਮਯਂ ਗਨ੍ਤ੍ਵਾ ਰਾਜਾਨਂ ਯਾਚਿਸ੍ਸਾਮਾ’’ਤਿ ਯਾਚਨ੍ਤਾ ਓਕਾਸਂ ਲਭਿਤ੍ਵਾ ਰਾਜਦ੍ਵਾਰਂ ਗਨ੍ਤ੍ਵਾ ਮਹਨ੍ਤੇਨ ਰਵੇਨ ਪਕ੍ਕਨ੍ਤਿਂਸੁ. ਭਰਿਯਾਯੋਪਿਸ੍ਸ ਅਤ੍ਤਨੋ ਅਤ੍ਤਨੋ ਗਬ੍ਭੇਸੁ ਨਿਪਨ੍ਨਕਾਵ ‘‘ਦੇਵ, ਧੀਤਰਂ ਧਤਰਟ੍ਠਰਞ੍ਞੋ ਦੇਹੀ’’ਤਿ ਏਕਪ੍ਪਹਾਰੇਨ ਕਨ੍ਦਿਂਸੁ. ਤੇਪਿ ਚਤ੍ਤਾਰੋ ਨਾਗਮਾਣਵਕਾ ‘‘ਦੇਹੀ’’ਤਿ ਤੁਣ੍ਹੇਹਿ ਸੀਸਂ ਪਹਰਨ੍ਤਾ ਵਿਯ ਦਾਠਾ ਵਿਵਰਿਤ੍ਵਾ ਪਸ੍ਸਸਨ੍ਤਾ ਅਟ੍ਠਂਸੁ.

ਸੋ ਨਿਪਨ੍ਨਕੋਵ ਨਗਰਵਾਸੀਨਞ੍ਚ ਅਤ੍ਤਨੋ ਚ ਭਰਿਯਾਨਂ ਪਰਿਦੇਵਿਤਸਦ੍ਦਂ ਸੁਤ੍ਵਾ ਚਤੂਹਿ ਚ ਨਾਗਮਾਣਵਕੇਹਿ ਤਜ੍ਜਿਤਤ੍ਤਾ ਮਰਣਭਯਭੀਤੋ ‘‘ਮਮ ਧੀਤਰਂ ਸਮੁਦ੍ਦਜਂ ਧਤਰਟ੍ਠਸ੍ਸ ਦਮ੍ਮੀ’’ਤਿ ਤਿਕ੍ਖਤ੍ਤੁਂ ਅਵਚ. ਤਂ ਸੁਤ੍ਵਾ ਸਬ੍ਬੇਪਿ ਨਾਗਰਾਜਾਨੋ ਤਿਗਾਵੁਤਮਤ੍ਤਂ ਪਟਿਕ੍ਕਮਿਤ੍ਵਾ ਦੇਵਨਗਰਂ ਵਿਯ ਏਕਂ ਨਗਰਂ ਮਾਪੇਤ੍ਵਾ ਤਤ੍ਥ ਠਿਤਾ ‘‘ਧੀਤਰਂ ਕਿਰ ਨੋ ਪੇਸੇਤੂ’’ਤਿ ਪਣ੍ਣਾਕਾਰਂ ਪਹਿਣਿਂਸੁ. ਰਾਜਾ ਤੇਹਿ ¶ ਆਭਤਂ ਪਣ੍ਣਾਕਾਰਂ ਗਹੇਤ੍ਵਾ ‘‘ਤੁਮ੍ਹੇ ਗਚ੍ਛਥ, ਅਹਂ ਧੀਤਰਂ ਅਮਚ੍ਚਾਨਂ ਹਤ੍ਥੇ ਪਹਿਣਿਸ੍ਸਾਮੀ’’ਤਿ ਤੇ ਉਯ੍ਯੋਜੇਤ੍ਵਾ ਧੀਤਰਂ ਪਕ੍ਕੋਸਾਪੇਤ੍ਵਾ ਉਪਰਿਪਾਸਾਦਂ ਆਰੋਪੇਤ੍ਵਾ ਸੀਹਪਞ੍ਜਰਂ ਵਿਵਰਿਤ੍ਵਾ ‘‘ਅਮ੍ਮ, ਪਸ੍ਸੇਤਂ ਅਲਙ੍ਕਤਨਗਰਂ, ਤ੍ਵਂ ਏਤ੍ਥ ਏਤਸ੍ਸ ਰਞ੍ਞੋ ਅਗ੍ਗਮਹੇਸੀ ਭਵਿਸ੍ਸਸਿ, ਨ ਦੂਰੇ ਇਤੋ ਤਂ ਨਗਰਂ, ਉਕ੍ਕਣ੍ਠਿਤਕਾਲੇਯੇਵ ਇਧ ਆਗਨ੍ਤੁਂ ਸਕ੍ਕਾ, ਏਤ੍ਥ ਗਨ੍ਤਬ੍ਬ’’ਨ੍ਤਿ ਸਞ੍ਞਾਪੇਤ੍ਵਾ ਸੀਸਂ ਨ੍ਹਾਪੇਤ੍ਵਾ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਪਟਿਚ੍ਛਨ੍ਨਯੋਗ੍ਗੇ ਨਿਸੀਦਾਪੇਤ੍ਵਾ ਅਮਚ੍ਚਾਨਂ ਹਤ੍ਥੇ ਦਤ੍ਵਾ ਪਾਹੇਸਿ. ਨਾਗਰਾਜਾਨੋ ਪਚ੍ਚੁਗ੍ਗਮਨਂ ਕਤ੍ਵਾ ਮਹਾਸਕ੍ਕਾਰਂ ਕਰਿਂਸੁ. ਅਮਚ੍ਚਾ ਨਗਰਂ ਪਵਿਸਿਤ੍ਵਾ ਤਂ ਤਸ੍ਸ ਦਤ੍ਵਾ ਬਹੁਂ ਧਨਂ ਆਦਾਯ ਨਿਵਤ੍ਤਿਂਸੁ. ਤੇ ਰਾਜਧੀਤਰਂ ਪਾਸਾਦਂ ਆਰੋਪੇਤ੍ਵਾ ਅਲਙ੍ਕਤਦਿਬ੍ਬਸਯਨੇ ਨਿਪਜ੍ਜਾਪੇਸੁਂ. ਤਙ੍ਖਣਞ੍ਞੇਵ ਨਂ ਨਾਗਮਾਣਵਿਕਾ ਖੁਜ੍ਜਾਦਿਵੇਸਂ ਗਹੇਤ੍ਵਾ ਮਨੁਸ੍ਸਪਰਿਚਾਰਿਕਾ ਵਿਯ ਪਰਿਵਾਰਯਿਂਸੁ. ਸਾ ਦਿਬ੍ਬਸਯਨੇ ਨਿਪਨ੍ਨਮਤ੍ਤਾਵ ਦਿਬ੍ਬਫਸ੍ਸਂ ਫੁਸਿਤ੍ਵਾ ਨਿਦ੍ਦਂ ਓਕ੍ਕਮਿ.

ਧਤਰਟ੍ਠੋ ਤਂ ਗਹੇਤ੍ਵਾ ਸਦ੍ਧਿਂ ਨਾਗਪਰਿਸਾਯ ਤਤ੍ਥ ਅਨ੍ਤਰਹਿਤੋ ਨਾਗਭਵਨੇਯੇਵ ਪਾਤੁਰਹੋਸਿ. ਰਾਜਧੀਤਾ ਪਬੁਜ੍ਝਿਤ੍ਵਾ ਅਲਙ੍ਕਤਦਿਬ੍ਬਸਯਨਂ ਅਞ੍ਞੇ ਚ ਸੁਵਣ੍ਣਪਾਸਾਦਮਣਿਪਾਸਾਦਾਦਯੋ ਉਯ੍ਯਾਨਪੋਕ੍ਖਰਣਿਯੋ ¶ ਅਲਙ੍ਕਤਦੇਵਨਗਰਂ ਵਿਯ ਨਾਗਭਵਨਂ ਦਿਸ੍ਵਾ ਖੁਜ੍ਜਾਦਿਪਰਿਚਾਰਿਕਾਯੋ ਪੁਚ੍ਛਿ ‘‘ਇਦਂ ਨਗਰਂ ਅਤਿਵਿਯ ਅਲਙ੍ਕਤਂ, ਨ ਅਮ੍ਹਾਕਂ ਨਗਰਂ ਵਿਯ, ਕਸ੍ਸੇਤ’’ਨ੍ਤਿ. ‘‘ਸਾਮਿਕਸ੍ਸ ¶ ਤੇ ਸਨ੍ਤਕਂ, ਦੇਵਿ, ਨ ਅਪ੍ਪਪੁਞ੍ਞਾ ਏਵਰੂਪਂ ਸਮ੍ਪਤ੍ਤਿਂ ਲਭਨ੍ਤਿ, ਮਹਾਪੁਞ੍ਞਤਾਯ ਤੇ ਅਯਂ ਲਦ੍ਧਾ’’ਤਿ. ਧਤਰਟ੍ਠੋਪਿ ਪਞ੍ਚਯੋਜਨਸਤਿਕੇ ਨਾਗਭਵਨੇ ਭੇਰਿਂ ਚਰਾਪੇਸਿ ‘‘ਯੋ ਸਮੁਦ੍ਦਜਾਯ ਸਪ੍ਪਵਣ੍ਣਂ ਦਸ੍ਸੇਤਿ, ਤਸ੍ਸ ਰਾਜਦਣ੍ਡੋ ਭਵਿਸ੍ਸਤੀ’’ਤਿ. ਤਸ੍ਮਾ ਏਕੋਪਿ ਤਸ੍ਸਾ ਸਪ੍ਪਵਣ੍ਣਂ ਦਸ੍ਸੇਤੁਂ ਸਮਤ੍ਥੋ ਨਾਮ ਨਾਹੋਸਿ. ਸਾ ਮਨੁਸ੍ਸਲੋਕਸਞ੍ਞਾਯ ਏਵ ਤਤ੍ਥ ਤੇਨ ਸਦ੍ਧਿਂ ਸਮ੍ਮੋਦਮਾਨਾ ਪਿਯਸਂਵਾਸਂ ਵਸਿ.

ਨਗਰਕਣ੍ਡਂ ਨਿਟ੍ਠਿਤਂ.

ਉਪੋਸਥਕਣ੍ਡਂ

ਸਾ ਅਪਰਭਾਗੇ ਧਤਰਟ੍ਠਂ ਪਟਿਚ੍ਚ ਗਬ੍ਭਂ ਪਟਿਲਭਿਤ੍ਵਾ ਪੁਤ੍ਤਂ ਵਿਜਾਯਿ, ਤਸ੍ਸ ਪਿਯਦਸ੍ਸਨਤ੍ਤਾ ‘‘ਸੁਦਸ੍ਸਨੋ’’ਤਿ ਨਾਮਂ ਕਰਿਂਸੁ. ਪੁਨਾਪਰਂ ਪੁਤ੍ਤਂ ਵਿਜਾਯਿ, ਤਸ੍ਸ ‘‘ਦਤ੍ਤੋ’’ਤਿ ਨਾਮਂ ਅਕਂਸੁ. ਸੋ ¶ ਪਨ ਬੋਧਿਸਤ੍ਤੋ. ਪੁਨੇਕਂ ਪੁਤ੍ਤਂ ਵਿਜਾਯਿ, ਤਸ੍ਸ ‘‘ਸੁਭੋਗੋ’’ਤਿ ਨਾਮਂ ਕਰਿਂਸੁ. ਅਪਰਮ੍ਪਿ ਪੁਤ੍ਤਂ ਵਿਜਾਯਿ, ਤਸ੍ਸ ‘‘ਅਰਿਟ੍ਠੋ’’ਤਿ ਨਾਮਂ ਕਰਿਂਸੁ. ਇਤਿ ਸਾ ਚਤ੍ਤਾਰੋ ਪੁਤ੍ਤੇ ਵਿਜਾਯਿਤ੍ਵਾਪਿ ਨਾਗਭਵਨਭਾਵਂ ਨ ਜਾਨਾਤਿ. ਅਥੇਕਦਿਵਸਂ ਤਰੁਣਨਾਗਾ ਅਰਿਟ੍ਠਸ੍ਸ ਆਚਿਕ੍ਖਿਂਸੁ ‘‘ਤਵ ਮਾਤਾ ਮਨੁਸ੍ਸਿਤ੍ਥੀ, ਨ ਨਾਗਿਨੀ’’ਤਿ. ਅਰਿਟ੍ਠੋ ‘‘ਵੀਮਂਸਿਸ੍ਸਾਮਿ ਨ’’ਨ੍ਤਿ ਏਕਦਿਵਸਂ ਥਨਂ ਪਿਵਨ੍ਤੋਵ ਸਪ੍ਪਸਰੀਰਂ ਮਾਪੇਤ੍ਵਾ ਨਙ੍ਗੁਟ੍ਠਖਣ੍ਡੇਨ ਮਾਤੁ ਪਿਟ੍ਠਿਪਾਦੇ ਘਟ੍ਟੇਸਿ. ਸਾ ਤਸ੍ਸ ਸਪ੍ਪਸਰੀਰਂ ਦਿਸ੍ਵਾ ਭੀਤਤਸਿਤਾ ਮਹਾਰਵਂ ਰਵਿਤ੍ਵਾ ਤਂ ਭੂਮਿਯਂ ਖਿਪਨ੍ਤੀ ਨਖੇਨ ਤਸ੍ਸ ਅਕ੍ਖਿਂ ਭਿਨ੍ਦਿ. ਤਤੋ ਲੋਹਿਤਂ ਪਗ੍ਘਰਿ. ਰਾਜਾ ਤਸ੍ਸਾ ਸਦ੍ਦਂ ਸੁਤ੍ਵਾ ‘‘ਕਿਸ੍ਸੇਸਾ ਵਿਰਵਤੀ’’ਤਿ ਪੁਚ੍ਛਿਤ੍ਵਾ ਅਰਿਟ੍ਠੇਨ ਕਤਕਿਰਿਯਂ ਸੁਤ੍ਵਾ ‘‘ਗਣ੍ਹਥ, ਨਂ ਦਾਸਂ ਗਹੇਤ੍ਵਾ ਜੀਵਿਤਕ੍ਖਯਂ ਪਾਪੇਥਾ’’ਤਿ ਤਜ੍ਜੇਨ੍ਤੋ ਆਗਚ੍ਛਿ. ਰਾਜਧੀਤਾ ਤਸ੍ਸ ਕੁਦ੍ਧਭਾਵਂ ਞਤ੍ਵਾ ਪੁਤ੍ਤਸਿਨੇਹੇਨ ‘‘ਦੇਵ, ਪੁਤ੍ਤਸ੍ਸ ਮੇ ਅਕ੍ਖਿ ਭਿਨ੍ਨਂ, ਖਮਥੇਤਸ੍ਸਾਪਰਾਧ’’ਨ੍ਤਿ ਆਹ. ਰਾਜਾ ਏਤਾਯ ਏਵਂ ਵਦਨ੍ਤਿਯਾ ‘‘ਕਿਂ ਸਕ੍ਕਾ ਕਾਤੁ’’ਨ੍ਤਿ ਖਮਿ. ਤਂ ਦਿਵਸਂ ਸਾ ‘‘ਇਦਂ ਨਾਗਭਵਨ’’ਨ੍ਤਿ ਅਞ੍ਞਾਸਿ. ਤਤੋ ਚ ਪਟ੍ਠਾਯ ਅਰਿਟ੍ਠੋ ਕਾਣਾਰਿਟ੍ਠੋ ਨਾਮ ਜਾਤੋ. ਚਤ੍ਤਾਰੋਪਿ ਪੁਤ੍ਤਾ ਵਿਞ੍ਞੁਤਂ ਪਾਪੁਣਿਂਸੁ.

ਅਥ ਨੇਸਂ ਪਿਤਾ ਯੋਜਨਸਤਿਕਂ ਯੋਜਨਸਤਿਕਂ ਕਤ੍ਵਾ ਰਜ੍ਜਮਦਾਸਿ, ਮਹਨ੍ਤੋ ਯਸੋ ਅਹੋਸਿ. ਸੋਲ਼ਸ ਸੋਲ਼ਸ ਨਾਗਕਞ੍ਞਾਸਹਸ੍ਸਾਨਿ ਪਰਿਵਾਰਯਿਂਸੁ. ਪਿਤੁ ਏਕਯੋਜਨਸਤਿਕਮੇਵ ਰਜ੍ਜਂ ਅਹੋਸਿ. ਤਯੋ ਪੁਤ੍ਤਾ ਮਾਸੇ ¶ ਮਾਸੇ ਮਾਤਾਪਿਤਰੋ ਪਸ੍ਸਿਤੁਂ ਆਗਚ੍ਛਨ੍ਤਿ, ਬੋਧਿਸਤ੍ਤੋ ਪਨ ਅਨ੍ਵਦ੍ਧਮਾਸਂ ਆਗਚ੍ਛਤਿ. ਨਾਗਭਵਨੇ ਸਮੁਟ੍ਠਿਤਂ ਪਞ੍ਹਂ ਬੋਧਿਸਤ੍ਤੋਵ ਕਥੇਤਿ. ਪਿਤਰਾ ਸਦ੍ਧਿਂ ਵਿਰੂਪਕ੍ਖਮਹਾਰਾਜਸ੍ਸਪਿ ¶ ਉਪਟ੍ਠਾਨਂ ਗਚ੍ਛਤਿ, ਤਸ੍ਸ ਸਨ੍ਤਿਕੇ ਸਮੁਟ੍ਠਿਤਂ ਪਞ੍ਹਮ੍ਪਿ ਸੋਵ ਕਥੇਤਿ. ਅਥੇਕਦਿਵਸਂ ਵਿਰੂਪਕ੍ਖੇ ਨਾਗਪਰਿਸਾਯ ਸਦ੍ਧਿਂ ਤਿਦਸਪੁਰਂ ਗਨ੍ਤ੍ਵਾ ਸਕ੍ਕਂ ਪਰਿਵਾਰੇਤ੍ਵਾ ਨਿਸਿਨ੍ਨੇ ਦੇਵਾਨਂ ਅਨ੍ਤਰੇ ਪਞ੍ਹੋ ਸਮੁਟ੍ਠਾਸਿ. ਤਂ ਕੋਚਿ ਕਥੇਤੁਂ ਨਾਸਕ੍ਖਿ, ਪਲ੍ਲਙ੍ਕਵਰਗਤੋ ਪਨ ਹੁਤ੍ਵਾ ਮਹਾਸਤ੍ਤੋਵ ਕਥੇਸਿ. ਅਥ ਨਂ ਦੇਵਰਾਜਾ ਦਿਬ੍ਬਗਨ੍ਧਪੁਪ੍ਫੇਹਿ ਪੂਜੇਤ੍ਵਾ ‘‘ਦਤ੍ਤ, ਤ੍ਵਂ ਪਥਵਿਸਮਾਯ ਵਿਪੁਲਾਯ ਪਞ੍ਞਾਯ ਸਮਨ੍ਨਾਗਤੋ, ਇਤੋ ਪਟ੍ਠਾਯ ਭੂਰਿਦਤ੍ਤੋ ਨਾਮ ਹੋਹੀ’’ਤਿ ‘‘ਭੂਰਿਦਤ੍ਤੋ’’ ਤਿਸ੍ਸ ਨਾਮਂ ਅਕਾਸਿ. ਸੋ ¶ ਤਤੋ ਪਟ੍ਠਾਯ ਸਕ੍ਕਸ੍ਸ ਉਪਟ੍ਠਾਨਂ ਗਚ੍ਛਨ੍ਤੋ ਅਲਙ੍ਕਤਵੇਜਯਨ੍ਤਪਾਸਾਦਂ ਦੇਵਚ੍ਛਰਾਹਿ ਆਕਿਣ੍ਣਂ ਅਤਿਮਨੋਹਰਂ ਸਕ੍ਕਸ੍ਸ ਸਮ੍ਪਤ੍ਤਿਂ ਦਿਸ੍ਵਾ ਦੇਵਲੋਕੇ ਪਿਯਂ ਕਤ੍ਵਾ ‘‘ਕਿਂ ਮੇ ਇਮਿਨਾ ਮਣ੍ਡੂਕਭਕ੍ਖੇਨ ਅਤ੍ਤਭਾਵੇਨ, ਨਾਗਭਵਨਂ ਗਨ੍ਤ੍ਵਾ ਉਪੋਸਥਵਾਸਂ ਵਸਿਤ੍ਵਾ ਇਮਸ੍ਮਿਂ ਦੇਵਲੋਕੇ ਉਪ੍ਪਤ੍ਤਿਕਾਰਣਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਾਗਭਵਨਂ ਗਨ੍ਤ੍ਵਾ ਮਾਤਾਪਿਤਰੋ ਆਪੁਚ੍ਛਿ ‘‘ਅਮ੍ਮਤਾਤਾ, ਅਹਂ ਉਪੋਸਥਕਮ੍ਮਂ ਕਰਿਸ੍ਸਾਮੀ’’ਤਿ. ‘‘ਸਾਧੁ, ਤਾਤ, ਕਰੋਹਿ, ਕਰੋਨ੍ਤੋ ਪਨ ਬਹਿ ਅਗਨ੍ਤ੍ਵਾ ਇਮਸ੍ਮਿਞ੍ਞੇਵ ਨਾਗਭਵਨੇ ਏਕਸ੍ਮਿਂ ਸੁਞ੍ਞਵਿਮਾਨੇ ਕਰੋਹਿ, ਬਹਿਗਤਾਨਂ ਪਨ ਨਾਗਾਨਂ ਮਹਨ੍ਤਂ ਭਯ’’ਨ੍ਤਿ.

ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਤ੍ਥੇਵ ਸੁਞ੍ਞਵਿਮਾਨੇ ਰਾਜੁਯ੍ਯਾਨੇ ਉਪੋਸਥਵਾਸਂ ਵਸਤਿ. ਅਥ ਨਂ ਨਾਨਾਤੂਰਿਯਹਤ੍ਥਾ ਨਾਗਕਞ੍ਞਾ ਪਰਿਵਾਰੇਨ੍ਤਿ. ਸੋ ‘‘ਨ ਮਯ੍ਹਂ ਇਧ ਵਸਨ੍ਤਸ੍ਸ ਉਪੋਸਥਕਮ੍ਮਂ ਮਤ੍ਥਕਂ ਪਾਪੁਣਿਸ੍ਸਤਿ, ਮਨੁਸ੍ਸਪਥਂ ਗਨ੍ਤ੍ਵਾ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਿਵਾਰਣਭਯੇਨ ਮਾਤਾਪਿਤੂਨਂ ਅਨਾਰੋਚੇਤ੍ਵਾ ਅਤ੍ਤਨੋ ਭਰਿਯਾਯੋ ਆਮਨ੍ਤੇਤ੍ਵਾ ‘‘ਭਦ੍ਦੇ, ਅਹਂ ਮਨੁਸ੍ਸਲੋਕਂ ਗਨ੍ਤ੍ਵਾ ਯਮੁਨਾਤੀਰੇ ਨਿਗ੍ਰੋਧਰੁਕ੍ਖੋ ਅਤ੍ਥਿ, ਤਸ੍ਸਾਵਿਦੂਰੇ ਵਮ੍ਮਿਕਮਤ੍ਥਕੇ ਭੋਗੇ ਆਭੁਜਿਤ੍ਵਾ ਚਤੁਰਙ੍ਗਸਮਨ੍ਨਾਗਤਂ ਉਪੋਸਥਂ ਅਧਿਟ੍ਠਾਯ ਨਿਪਜ੍ਜਿਤ੍ਵਾ ਉਪੋਸਥਕਮ੍ਮਂ ਕਰਿਸ੍ਸਾਮਿ. ਮਯਾ ਸਬ੍ਬਰਤ੍ਤਿਂ ਨਿਪਜ੍ਜਿਤ੍ਵਾ ਉਪੋਸਥਕਮ੍ਮੇ ਕਤੇ ਅਰੁਣੁਗ੍ਗਮਨਵੇਲਾਯਮੇਵ ਤੁਮ੍ਹੇ ਦਸ ਦਸ ਇਤ੍ਥਿਯੋ ਆਦਾਯ ਵਾਰੇਨ ਵਾਰੇਨ ਤੂਰਿਯਹਤ੍ਥਾ ਮਮ ਸਨ੍ਤਿਕਂ ਆਗਨ੍ਤ੍ਵਾ ਮਂ ਗਨ੍ਧੇਹਿ ਚ ਪੁਪ੍ਫੇਹਿ ਚ ਪੂਜੇਤ੍ਵਾ ਗਾਯਿਤ੍ਵਾ ਨਚ੍ਚਿਤ੍ਵਾ ਮਂ ਆਦਾਯ ਨਾਗਭਵਨਮੇਵ ਆਗਚ੍ਛਥਾ’’ਤਿ ਵਤ੍ਵਾ ਤਤ੍ਥ ਗਨ੍ਤ੍ਵਾ ਵਮ੍ਮਿਕਮਤ੍ਥਕੇ ਭੋਗੇ ਆਭੁਜਿਤ੍ਵਾ ‘‘ਯੋ ਮਮ ਚਮ੍ਮਂ ਵਾ ਨ੍ਹਾਰੁਂ ਵਾ ਅਟ੍ਠਿਂ ਵਾ ਰੁਹਿਰਂ ਵਾ ਇਚ੍ਛਤਿ, ਸੋ ਆਹਰਤੂ’’ਤਿ ਚਤੁਰਙ੍ਗਸਮਨ੍ਨਾਗਤਂ ਉਪੋਸਥਂ ਅਧਿਟ੍ਠਾਯ ਨਙ੍ਗਲਸੀਸਪ੍ਪਮਾਣਂ ¶ ਸਰੀਰਂ ਮਾਪੇਤ੍ਵਾ ਨਿਪਨ੍ਨੋ ਉਪੋਸਥਕਮ੍ਮਮਕਾਸਿ. ਅਰੁਣੇ ਉਟ੍ਠਹਨ੍ਤੇਯੇਵ ਤਂ ਨਾਗਮਾਣਵਿਕਾ ਆਗਨ੍ਤ੍ਵਾ ਯਥਾਨੁਸਿਟ੍ਠਂ ਪਟਿਪਜ੍ਜਿਤ੍ਵਾ ਨਾਗਭਵਨਂ ਆਨੇਨ੍ਤਿ. ਤਸ੍ਸ ਇਮਿਨਾ ਨਿਯਾਮੇਨ ਉਪੋਸਥਂ ਕਰੋਨ੍ਤਸ੍ਸ ¶ ਦੀਘੋ ਅਦ੍ਧਾ ਵੀਤਿਵਤ੍ਤੋ.

ਉਪੋਸਥਖਣ੍ਡਂ ਨਿਟ੍ਠਿਤਂ.

ਗਰੁਲ਼ਖਣ੍ਡਂ

ਤਦਾ ¶ ਏਕੋ ਬਾਰਾਣਸਿਦ੍ਵਾਰਗਾਮਵਾਸੀ ਬ੍ਰਾਹ੍ਮਣੋ ਸੋਮਦਤ੍ਤੇਨ ਨਾਮ ਪੁਤ੍ਤੇਨ ਸਦ੍ਧਿਂ ਅਰਞ੍ਞਂ ਗਨ੍ਤ੍ਵਾ ਸੂਲਯਨ੍ਤਪਾਸਵਾਗੁਰਾਦੀਹਿ ਓਡ੍ਡੇਤ੍ਵਾ ਮਿਗੇ ਵਧਿਤ੍ਵਾ ਮਂਸਂ ਕਾਜੇਨਾਹਰਿਤ੍ਵਾ ਵਿਕ੍ਕਿਣਨ੍ਤੋ ਜੀਵਿਕਂ ਕਪ੍ਪੇਸਿ. ਸੋ ਏਕਦਿਵਸਂ ਅਨ੍ਤਮਸੋ ਗੋਧਾਮਤ੍ਤਮ੍ਪਿ ਅਲਭਿਤ੍ਵਾ ‘‘ਤਾਤ ਸੋਮਦਤ੍ਤ, ਸਚੇ ਤੁਚ੍ਛਹਤ੍ਥਾ ਗਮਿਸ੍ਸਾਮ, ਮਾਤਾ ਤੇ ਕੁਜ੍ਝਿਸ੍ਸਤਿ, ਯਂ ਕਿਞ੍ਚਿ ਗਹੇਤ੍ਵਾ ਗਮਿਸ੍ਸਾਮਾ’’ਤਿ ਵਤ੍ਵਾ ਬੋਧਿਸਤ੍ਤਸ੍ਸ ਨਿਪਨ੍ਨਵਮ੍ਮਿਕਟ੍ਠਾਨਾਭਿਮੁਖੋ ਗਨ੍ਤ੍ਵਾ ਪਾਨੀਯਂ ਪਾਤੁਂ ਯਮੁਨਂ ਓਤਰਨ੍ਤਾਨਂ ਮਿਗਾਨਂ ਪਦਵਲਞ੍ਜਂ ਦਿਸ੍ਵਾ ‘‘ਤਾਤ, ਮਿਗਮਗ੍ਗੋ ਪਞ੍ਞਾਯਤਿ, ਤ੍ਵਂ ਪਟਿਕ੍ਕਮਿਤ੍ਵਾ ਤਿਟ੍ਠਾਹਿ, ਅਹਂ ਪਾਨੀਯਤ੍ਥਾਯ ਆਗਤਂ ਮਿਗਂ ਵਿਜ੍ਝਿਸ੍ਸਾਮੀ’’ਤਿ ਧਨੁਂ ਆਦਾਯ ਮਿਗਂ ਓਲੋਕੇਨ੍ਤੋ ਏਕਸ੍ਮਿਂ ਰੁਕ੍ਖਮੂਲੇ ਅਟ੍ਠਾਸਿ. ਅਥੇਕੋ ਮਿਗੋ ਸਾਯਨ੍ਹਸਮਯੇ ਪਾਨੀਯਂ ਪਾਤੁਂ ਆਗਤੋ. ਸੋ ਤਂ ਵਿਜ੍ਝਿ. ਮਿਗੋ ਤਤ੍ਥ ਅਪਤਿਤ੍ਵਾ ਸਰਵੇਗੇਨ ਤਜ੍ਜਿਤੋ ਲੋਹਿਤੇਨ ਪਗ੍ਘਰਨ੍ਤੇਨ ਪਲਾਯਿ. ਪਿਤਾਪੁਤ੍ਤਾ ਨਂ ਅਨੁਬਨ੍ਧਿਤ੍ਵਾ ਪਤਿਤਟ੍ਠਾਨੇ ਮਂਸਂ ਗਹੇਤ੍ਵਾ ਅਰਞ੍ਞਾ ਨਿਕ੍ਖਮਿਤ੍ਵਾ ਸੂਰਿਯਤ੍ਥਙ੍ਗਮਨਵੇਲਾਯ ਤਂ ਨਿਗ੍ਰੋਧਂ ਪਤ੍ਵਾ ‘‘ਇਦਾਨਿ ਅਕਾਲੋ, ਨ ਸਕ੍ਕਾ ਗਨ੍ਤੁਂ, ਇਧੇਵ ਵਸਿਸ੍ਸਾਮਾ’’ਤਿ ਮਂਸਂ ਏਕਮਨ੍ਤੇ ਠਪੇਤ੍ਵਾ ਰੁਕ੍ਖਂ ਆਰੁਯ੍ਹ ਵਿਟਪਨ੍ਤਰੇ ਨਿਪਜ੍ਜਿਂਸੁ. ਬ੍ਰਾਹ੍ਮਣੋ ਪਚ੍ਚੂਸਸਮਯੇ ਪਬੁਜ੍ਝਿਤ੍ਵਾ ਮਿਗਸਦ੍ਦਸਵਨਾਯ ਸੋਤਂ ਓਦਹਿ.

ਤਸ੍ਮਿਂ ਖਣੇ ਨਾਗਮਾਣਵਿਕਾਯੋ ਆਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪੁਪ੍ਫਾਸਨਂ ਪਞ੍ਞਾਪੇਸੁਂ. ਸੋ ਅਹਿਸਰੀਰਂ ਅਨ੍ਤਰਧਾਪੇਤ੍ਵਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਦਿਬ੍ਬਸਰੀਰਂ ਮਾਪੇਤ੍ਵਾ ਸਕ੍ਕਲੀਲਾਯ ਪੁਪ੍ਫਾਸਨੇ ਨਿਸੀਦਿ. ਨਾਗਮਾਣਵਿਕਾਪਿ ਨਂ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਦਿਬ੍ਬਤੂਰਿਯਾਨਿ ਵਾਦੇਤ੍ਵਾ ਨਚ੍ਚਗੀਤਂ ਪਟ੍ਠਪੇਸੁਂ. ਬ੍ਰਾਹ੍ਮਣੋ ਤਂ ਸਦ੍ਦਂ ਸੁਤ੍ਵਾ ‘‘ਕੋ ਨੁ ਖੋ ਏਸ, ਜਾਨਿਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ‘‘ਪੁਤ੍ਤ, ਪੁਤ੍ਤਾ’’ਤਿ ਵਤ੍ਵਾਪਿ ਪੁਤ੍ਤਂ ਪਬੋਧੇਤੁਂ ਅਸਕ੍ਕੋਨ੍ਤੋ ‘‘ਸਯਤੁ ਏਸ, ਕਿਲਨ੍ਤੋ ਭਵਿਸ੍ਸਤਿ, ਅਹਮੇਵ ਗਮਿਸ੍ਸਾਮੀ’’ਤਿ ਰੁਕ੍ਖਾ ਓਰੁਯ੍ਹ ਤਸ੍ਸ ਸਨ੍ਤਿਕਂ ਅਗਮਾਸਿ. ਨਾਗਮਾਣਵਿਕਾ ਤਂ ਦਿਸ੍ਵਾ ਸਦ੍ਧਿਂ ਤੂਰਿਯੇਹਿ ਭੂਮਿਯਂ ਨਿਮੁਜ੍ਜਿਤ੍ਵਾ ਅਤ੍ਤਨੋ ਨਾਗਭਵਨਮੇਵ ਗਤਾ. ਬੋਧਿਸਤ੍ਤੋ ਏਕਕੋਵ ¶ ¶ ਅਹੋਸਿ. ਬ੍ਰਾਹ੍ਮਣੋ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਨ੍ਤੋ ਗਾਥਾਦ੍ਵਯਮਾਹ –

੭੯੭.

‘‘ਪੁਪ੍ਫਾਭਿਹਾਰਸ੍ਸ ਵਨਸ੍ਸ ਮਜ੍ਝੇ, ਕੋ ਲੋਹਿਤਕ੍ਖੋ ਵਿਤਤਨ੍ਤਰਂਸੋ;

ਕਾ ਕਮ੍ਬੁਕਾਯੂਰਧਰਾ ਸੁਵਤ੍ਥਾ, ਤਿਟ੍ਠਨ੍ਤਿ ਨਾਰਿਯੋ ਦਸ ਵਨ੍ਦਮਾਨਾ.

੭੯੮.

‘‘ਕੋ ¶ ਤ੍ਵਂ ਬ੍ਰਹਾਬਾਹੁ ਵਨਸ੍ਸ ਮਜ੍ਝੇ, ਵਿਰੋਚਸਿ ਘਤਸਿਤ੍ਤੋਵ ਅਗ੍ਗਿ;

ਮਹੇਸਕ੍ਖੋ ਅਞ੍ਞਤਰੋਸਿ ਯਕ੍ਖੋ, ਉਦਾਹੁ ਨਾਗੋਸਿ ਮਹਾਨੁਭਾਵੋ’’ਤਿ.

ਤਤ੍ਥ ਪੁਪ੍ਫਾਭਿਹਾਰਸ੍ਸਾਤਿ ਬੋਧਿਸਤ੍ਤਸ੍ਸ ਪੂਜਨਤ੍ਥਾਯ ਆਭਤੇਨ ਦਿਬ੍ਬਪੁਪ੍ਫਾਭਿਹਾਰੇਨ ਸਮਨ੍ਨਾਗਤਸ੍ਸ. ਕੋਤਿ ਕੋ ਨਾਮ ਤ੍ਵਂ. ਲੋਹਿਤਕ੍ਖੋਤਿ ਰਤ੍ਤਕ੍ਖੋ. ਵਿਤਤਨ੍ਤਰਂਸੋਤਿ ਪੁਥੁਲਅਨ੍ਤਰਂਸੋ. ਕਮ੍ਬੁਕਾਯੂਰਧਰਾਤਿ ਸੁਵਣ੍ਣਾਲਙ੍ਕਾਰਧਰਾ. ਬ੍ਰਹਾਬਾਹੂਤਿ ਮਹਾਬਾਹੁ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਸਚੇਪਿ ‘ਸਕ੍ਕਾਦੀਸੁ ਅਞ੍ਞਤਰੋਹਮਸ੍ਮੀ’ਤਿ ਵਕ੍ਖਾਮਿ, ਸਦ੍ਦਹਿਸ੍ਸਤੇਵਾਯਂ ਬ੍ਰਾਹ੍ਮਣੋ, ਅਜ੍ਜ ਪਨ ਮਯਾ ਸਚ੍ਚਮੇਵ ਕਥੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਨਾਗਰਾਜਭਾਵਂ ਕਥੇਨ੍ਤੋ ਆਹ –

੭੯੯.

‘‘ਨਾਗੋਹਮਸ੍ਮਿ ਇਦ੍ਧਿਮਾ, ਤੇਜਸ੍ਸੀ ਦੁਰਤਿਕ੍ਕਮੋ;

ਡਂਸੇਯ੍ਯਂ ਤੇਜਸਾ ਕੁਦ੍ਧੋ, ਫੀਤਂ ਜਨਪਦਂ ਅਪਿ.

੮੦੦.

‘‘ਸਮੁਦ੍ਦਜਾ ਹਿ ਮੇ ਮਾਤਾ, ਧਤਰਟ੍ਠੋ ਚ ਮੇ ਪਿਤਾ;

ਸੁਦਸ੍ਸਨਕਨਿਟ੍ਠੋਸ੍ਮਿ, ਭੂਰਿਦਤ੍ਤੋਤਿ ਮਂ ਵਿਦੂ’’ਤਿ.

ਤਤ੍ਥ ਤੇਜਸ੍ਸੀਤਿ ਵਿਸਤੇਜੇਨ ਤੇਜਵਾ. ਦੁਰਤਿਕ੍ਕਮੋਤਿ ਅਞ੍ਞੇਨ ਅਤਿਕ੍ਕਮਿਤੁਂ ਅਸਕ੍ਕੁਣੇਯ੍ਯੋ. ਡਂਸੇਯ੍ਯਨ੍ਤਿ ਸਚਾਹਂ ਕੁਦ੍ਧੋ ਫੀਤਂ ਜਨਪਦਂ ਅਪਿ ਡਂਸੇਯ੍ਯਂ, ਪਥਵਿਯਂ ਮਮ ਦਾਠਾਯ ਪਤਿਤਮਤ੍ਤਾਯ ਸਦ੍ਧਿਂ ਪਥਵਿਯਾ ਮਮ ਤੇਜੇਨ ਸੋ ਸਬ੍ਬੋ ਜਨਪਦੋ ਭਸ੍ਮਾ ਭਵੇਯ੍ਯਾਤਿ ਵਦਤਿ. ਸੁਦਸ੍ਸਨਕਨਿਟ੍ਠੋਸ੍ਮੀਤਿ ਅਹਂ ਮਮ ਭਾਤੁ ਸੁਦਸ੍ਸਨਸ੍ਸ ਕਨਿਟ੍ਠੋ ਅਸ੍ਮਿ. ਵਿਦੂਤਿ ਏਵਂ ਮਮਂ ਪਞ੍ਚਯੋਜਨਸਤਿਕੇ ਨਾਗਭਵਨੇ ਜਾਨਨ੍ਤੀਤਿ.

ਇਦਞ੍ਚ ¶ ਪਨ ਵਤ੍ਵਾ ਮਹਾਸਤ੍ਤੋ ਚਿਨ੍ਤੇਸਿ ‘‘ਅਯਂ ਬ੍ਰਾਹ੍ਮਣੋ ਚਣ੍ਡੋ ਫਰੁਸੋ, ਅਹਿਤੁਣ੍ਡਿਕਸ੍ਸ ਆਰੋਚੇਤ੍ਵਾ ਉਪੋਸਥਕਮ੍ਮਸ੍ਸ ਮੇ ਅਨ੍ਤਰਾਯਮ੍ਪਿ ਕਰੇਯ੍ਯ, ਯਂ ਨੂਨਾਹਂ ਇਮਂ ਨਾਗਭਵਨਂ ਨੇਤ੍ਵਾ ਮਹਨ੍ਤਂ ਯਸਂ ਦਤ੍ਵਾ ਉਪੋਸਥਕਮ੍ਮਂ ਅਦ੍ਧਨਿਯਂ ਕਰੇਯ੍ਯ’’ਨ੍ਤਿ. ਅਥ ਨਂ ਆਹ ¶ ‘‘ਬ੍ਰਾਹ੍ਮਣ, ਮਹਨ੍ਤਂ ਤੇ ਯਸਂ ਦਸ੍ਸਾਮਿ, ਰਮਣੀਯਂ ਨਾਗਭਵਨਂ, ਏਹਿ ਤਤ੍ਥ ਗਚ੍ਛਾਮਾ’’ਤਿ. ‘‘ਸਾਮਿ, ਪੁਤ੍ਤੋ ਮੇ ਅਤ੍ਥਿ, ਤਸ੍ਮਿਂ ਗਚ੍ਛਨ੍ਤੇ ਆਗਮਿਸ੍ਸਾਮੀ’’ਤਿ. ਅਥ ਨਂ ਮਹਾਸਤ੍ਤੋ ‘‘ਗਚ੍ਛ, ਬ੍ਰਾਹ੍ਮਣ, ਆਨੇਹਿ ਨ’’ਨ੍ਤਿ ਵਤ੍ਵਾ ਅਤ੍ਤਨੋ ਆਵਾਸਂ ਆਚਿਕ੍ਖਨ੍ਤੋ ਆਹ –

੮੦੧.

‘‘ਯਂ ¶ ਗਮ੍ਭੀਰਂ ਸਦਾਵਟ੍ਟਂ, ਰਹਦਂ ਭੇਸ੍ਮਂ ਪੇਕ੍ਖਸਿ;

ਏਸ ਦਿਬ੍ਯੋ ਮਮਾਵਾਸੋ, ਅਨੇਕਸਤਪੋਰਿਸੋ.

੮੦੨.

‘‘ਮਯੂਰਕੋਞ੍ਚਾਭਿਰੁਦਂ, ਨੀਲੋਦਂ ਵਨਮਜ੍ਝਤੋ;

ਯਮੁਨਂ ਪਵਿਸ ਮਾ ਭੀਤੋ, ਖੇਮਂ ਵਤ੍ਤਵਤਂ ਸਿਵ’’ਨ੍ਤਿ.

ਤਤ੍ਥ ਸਦਾਵਟ੍ਟਨ੍ਤਿ ਸਦਾ ਪਵਤ੍ਤਂ ਆਵਟ੍ਟਂ. ਭੇਸ੍ਮਨ੍ਤਿ ਭਯਾਨਕਂ. ਪੇਕ੍ਖਸੀਤਿ ਯਂ ਏਵਰੂਪਂ ਰਹਦਂ ਪਸ੍ਸਸਿ. ਮਯੂਰਕੋਞ੍ਚਾਭਿਰੁਦਨ੍ਤਿ ਉਭੋਸੁ ਤੀਰੇਸੁ ਵਨਘਟਾਯਂ ਵਸਨ੍ਤੇਹਿ ਮਯੂਰੇਹਿ ਚ ਕੋਞ੍ਚੇਹਿ ਚ ਅਭਿਰੁਦਂ ਉਪਕੂਜਿਤਂ. ਨੀਲੋਦਨ੍ਤਿ ਨੀਲਸਲਿਲਂ. ਵਨਮਜ੍ਝਤੋਤਿ ਵਨਮਜ੍ਝੇਨ ਸਨ੍ਦਮਾਨਂ. ਪਵਿਸ ਮਾ ਭੀਤੋਤਿ ਏਵਰੂਪਂ ਯਮੁਨਂ ਅਭੀਤੋ ਹੁਤ੍ਵਾ ਪਵਿਸ. ਵਤ੍ਤਵਤਨ੍ਤਿ ਵਤ੍ਤਸਮ੍ਪਨ੍ਨਾਨਂ ਆਚਾਰਵਨ੍ਤਾਨਂ ਵਸਨਭੂਮਿਂ ਪਵਿਸ, ਗਚ੍ਛ, ਬ੍ਰਾਹ੍ਮਣ, ਪੁਤ੍ਤਂ ਆਨੇਹੀਤਿ.

ਬ੍ਰਾਹ੍ਮਣੋ ਗਨ੍ਤ੍ਵਾ ਪੁਤ੍ਤਸ੍ਸ ਤਮਤ੍ਥਂ ਆਰੋਚੇਤ੍ਵਾ ਪੁਤ੍ਤਂ ਆਨੇਸਿ. ਮਹਾਸਤ੍ਤੋ ਤੇ ਉਭੋਪਿ ਆਦਾਯ ਯਮੁਨਾਤੀਰਂ ਗਨ੍ਤ੍ਵਾ ਤੀਰੇ ਠਿਤੋ ਆਹ –

੮੦੩.

‘‘ਤਤ੍ਥ ਪਤ੍ਤੋ ਸਾਨੁਚਰੋ, ਸਹ ਪੁਤ੍ਤੇਨ ਬ੍ਰਾਹ੍ਮਣ;

ਪੂਜਿਤੋ ਮਯ੍ਹਂ ਕਾਮੇਹਿ, ਸੁਖਂ ਬ੍ਰਾਹ੍ਮਣ ਵਚ੍ਛਸੀ’’ਤਿ.

ਤਤ੍ਥ ਤਤ੍ਥ ਪਤ੍ਤੋਤਿ ਤ੍ਵਂ ਅਮ੍ਹਾਕਂ ਨਾਗਭਵਨਂ ਪਤ੍ਤੋ ਹੁਤ੍ਵਾ. ਮਯ੍ਹਨ੍ਤਿ ਮਮ ਸਨ੍ਤਕੇਹਿ ਕਾਮੇਹਿ ਪੂਜਿਤੋ. ਵਚ੍ਛਸੀਤਿ ਤਤ੍ਥ ਨਾਗਭਵਨੇ ਸੁਖਂ ਵਸਿਸ੍ਸਤਿ.

ਏਵਂ ਵਤ੍ਵਾ ਮਹਾਸਤ੍ਤੋ ਉਭੋਪਿ ਤੇ ਪਿਤਾਪੁਤ੍ਤੇ ਅਤ੍ਤਨੋ ਆਨੁਭਾਵੇਨ ਨਾਗਭਵਨਂ ਆਨੇਸਿ. ਤੇਸਂ ਤਤ੍ਥ ਦਿਬ੍ਬੋ ਅਤ੍ਤਭਾਵੋ ਪਾਤੁਭਵਿ. ਅਥ ¶ ਨੇਸਂ ਮਹਾਸਤ੍ਤੋ ਦਿਬ੍ਬਸਮ੍ਪਤ੍ਤਿਂ ਦਤ੍ਵਾ ਚਤ੍ਤਾਰਿ ਚਤ੍ਤਾਰਿ ਨਾਗਕਞ੍ਞਾਸਤਾਨਿ ਅਦਾਸਿ. ਤੇ ਮਹਾਸਮ੍ਪਤ੍ਤਿਂ ਅਨੁਭਵਿਂਸੁ. ਬੋਧਿਸਤ੍ਤੋਪਿ ਅਪ੍ਪਮਤ੍ਤੋ ਉਪੋਸਥਕਮ੍ਮਂ ਅਕਾਸਿ. ਅਨ੍ਵਡ੍ਢਮਾਸਂ ਮਾਤਾਪਿਤੂਨਂ ਉਪਟ੍ਠਾਨਂ ਗਨ੍ਤ੍ਵਾ ਧਮ੍ਮਕਥਂ ਕਥੇਤ੍ਵਾ ਤਤੋ ਚ ਬ੍ਰਾਹ੍ਮਣਸ੍ਸ ਸਨ੍ਤਿਕਂ ਗਨ੍ਤ੍ਵਾ ਆਰੋਗ੍ਯਂ ਪੁਚ੍ਛਿਤ੍ਵਾ ‘‘ਯੇਨ ਤੇ ਅਤ੍ਥੋ, ਤਂ ਵਦੇਯ੍ਯਾਸਿ, ਅਨੁਕ੍ਕਣ੍ਠਮਾਨੋ ਅਭਿਰਮਾ’’ਤਿ ਵਤ੍ਵਾ ਸੋਮਦਤ੍ਤੇਨਪਿ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਅਤ੍ਤਨੋ ਨਿਵੇਸਨਂ ਅਗਚ੍ਛਿ. ਬ੍ਰਾਹ੍ਮਣੋ ਏਕਸਂਵਚ੍ਛਰਂ ਨਾਗਭਵਨੇ ਵਸਿਤ੍ਵਾ ਮਨ੍ਦਪੁਞ੍ਞਤਾਯ ਉਕ੍ਕਣ੍ਠਿਤੋ ¶ ਮਨੁਸ੍ਸਲੋਕਂ ਗਨ੍ਤੁਕਾਮੋ ਅਹੋਸਿ. ਨਾਗਭਵਨਮਸ੍ਸ ਲੋਕਨ੍ਤਰਨਿਰਯੋ ਵਿਯ ਅਲਙ੍ਕਤਪਾਸਾਦੋ ਬਨ੍ਧਨਾਗਾਰਂ ਵਿਯ ਅਲਙ੍ਕਤਨਾਗਕਞ੍ਞਾ ਯਕ੍ਖਿਨਿਯੋ ਵਿਯ ਉਪਟ੍ਠਹਿਂਸੁ. ਸੋ ‘‘ਅਹਂ ਤਾਵ ਉਕ੍ਕਣ੍ਠਿਤੋ ¶ , ਸੋਮਦਤ੍ਤਸ੍ਸਪਿ ਚਿਤ੍ਤਂ ਜਾਨਿਸ੍ਸਾਮੀ’’ਤਿ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਆਹ ‘‘ਕਿਂ, ਤਾਤ, ਉਕ੍ਕਣ੍ਠਸੀ’’ਤਿ? ‘‘ਕਸ੍ਮਾ ਉਕ੍ਕਣ੍ਠਿਸ੍ਸਾਮਿ ਨ ਉਕ੍ਕਣ੍ਠਾਮਿ, ਤ੍ਵਂ ਪਨ ਉਕ੍ਕਣ੍ਠਸਿ, ਤਾਤਾ’’ਤਿ? ‘‘ਆਮ ਤਾਤਾ’’ਤਿ. ‘‘ਕਿਂਕਾਰਣਾ’’ਤਿ. ‘‘ਤਵ ਮਾਤੁ ਚੇਵ ਭਾਤੁਭਗਿਨੀਨਞ੍ਚ ਅਦਸ੍ਸਨੇਨ ਉਕ੍ਕਣ੍ਠਾਮਿ, ਏਹਿ, ਤਾਤ ਸੋਮਦਤ੍ਤ, ਗਚ੍ਛਾਮਾ’’ਤਿ. ਸੋ ‘‘ਨ ਗਚ੍ਛਾਮੀ’’ਤਿ ਵਤ੍ਵਾਪਿ ਪੁਨਪ੍ਪੁਨਂ ਪਿਤਰਾ ਯਾਚਿਯਮਾਨੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ.

ਬ੍ਰਾਹ੍ਮਣੋ ‘‘ਪੁਤ੍ਤਸ੍ਸ ਤਾਵ ਮੇ ਮਨੋ ਲਦ੍ਧੋ, ਸਚੇ ਪਨਾਹਂ ਭੂਰਿਦਤ੍ਤਸ੍ਸ ‘ਉਕ੍ਕਣ੍ਠਿਤੋਮ੍ਹੀ’ਤਿ ਵਕ੍ਖਾਮਿ, ਅਤਿਰੇਕਤਰਂ ਮੇ ਯਸਂ ਦਸ੍ਸਤਿ, ਏਵਂ ਮੇ ਗਮਨਂ ਨ ਭਵਿਸ੍ਸਤਿ. ਏਕੇਨ ਪਨ ਉਪਾਯੇਨ ਤਸ੍ਸ ਸਮ੍ਪਤ੍ਤਿਂ ਵਣ੍ਣੇਤ੍ਵਾ ‘ਤ੍ਵਂ ਏਵਰੂਪਂ ਸਮ੍ਪਤ੍ਤਿਂ ਪਹਾਯ ਕਿਂਕਾਰਣਾ ਮਨੁਸ੍ਸਲੋਕਂ ਗਨ੍ਤ੍ਵਾ ਉਪੋਸਥਕਮ੍ਮਂ ਕਰੋਸੀ’ਤਿ ਪੁਚ੍ਛਿਤ੍ਵਾ ‘ਸਗ੍ਗਤ੍ਥਾਯਾ’ਤਿ ਵੁਤ੍ਤੇ ‘ਤ੍ਵਂ ਤਾਵ ਏਵਰੂਪਂ ਸਮ੍ਪਤ੍ਤਿਂ ਪਹਾਯ ਸਗ੍ਗਤ੍ਥਾਯ ਉਪੋਸਥਕਮ੍ਮਂ ਕਰੋਸਿ, ਕਿਮਙ੍ਗਂ ਪਨ ਮਯਂਯੇਵ ਪਰਧਨੇਨ ਜੀਵਿਕਂ ਕਪ੍ਪੇਮ, ਅਹਮ੍ਪਿ ਮਨੁਸ੍ਸਲੋਕਂ ਗਨ੍ਤ੍ਵਾ ਞਾਤਕੇ ਦਿਸ੍ਵਾ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰਿਸ੍ਸਾਮੀ’ਤਿ ਨਂ ਸਞ੍ਞਾਪੇਸ੍ਸਾਮਿ. ਅਥ ਮੇ ਸੋ ਗਮਨਂ ਅਨੁਜਾਨਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਏਕਦਿਵਸਂ ਤੇਨਾਗਨ੍ਤ੍ਵਾ ‘‘ਕਿਂ, ਬ੍ਰਾਹ੍ਮਣ, ਉਕ੍ਕਣ੍ਠਸੀ’’ਤਿ ਪੁਚ੍ਛਿਤੋ ‘‘ਤੁਮ੍ਹਾਕਂ ਸਨ੍ਤਿਕਾ ਅਮ੍ਹਾਕਂ ਨ ਕਿਞ੍ਚਿ ਪਰਿਹਾਯਤੀ’’ਤਿ ਕਿਞ੍ਚਿ ਗਮਨਪਟਿਬਦ੍ਧਂ ਅਵਤ੍ਵਾਵ ਆਦਿਤੋ ਤਾਵ ਤਸ੍ਸ ਸਮ੍ਪਤ੍ਤਿਂ ਵਣ੍ਣੇਨ੍ਤੋ ਆਹ –

੮੦੪.

‘‘ਸਮਾ ਸਮਨ੍ਤਪਰਿਤੋ, ਪਹੂਤਤਗਰਾ ਮਹੀ;

ਇਨ੍ਦਗੋਪਕਸਞ੍ਛਨ੍ਨਾ, ਸੋਭਤਿ ਹਰਿਤੁਤ੍ਤਮਾ.

੮੦੫.

‘‘ਰਮ੍ਮਾਨਿ ¶ ਵਨਚੇਤ੍ਯਾਨਿ, ਰਮ੍ਮਾ ਹਂਸੂਪਕੂਜਿਤਾ;

ਓਪੁਪ੍ਫਪਦ੍ਧਾ ਤਿਟ੍ਠਨ੍ਤਿ, ਪੋਕ੍ਖਰਞ੍ਞੋ ਸੁਨਿਮ੍ਮਿਤਾ.

੮੦੬.

‘‘ਅਟ੍ਠਂਸਾ ਸੁਕਤਾ ਥਮ੍ਭਾ, ਸਬ੍ਬੇ ਵੇਲ਼ੁਰਿਯਾਮਯਾ;

ਸਹਸ੍ਸਥਮ੍ਭਾ ਪਾਸਾਦਾ, ਪੂਰਾ ਕਞ੍ਞਾਹਿ ਜੋਤਰੇ.

੮੦੭.

‘‘ਵਿਮਾਨਂ ¶ ਉਪਪਨ੍ਨੋਸਿ, ਦਿਬ੍ਯਂ ਪੁਞ੍ਞੇਹਿ ਅਤ੍ਤਨੋ;

ਅਸਮ੍ਬਾਧਂ ਸਿਵਂ ਰਮ੍ਮਂ, ਅਚ੍ਚਨ੍ਤਸੁਖਸਂਹਿਤਂ.

੮੦੮.

‘‘ਮਞ੍ਞੇ ਸਹਸ੍ਸਨੇਤ੍ਤਸ੍ਸ, ਵਿਮਾਨਂ ਨਾਭਿਕਙ੍ਖਸਿ;

ਇਦ੍ਧੀ ਹਿ ਤ੍ਯਾਯਂ ਵਿਪੁਲਾ, ਸਕ੍ਕਸ੍ਸੇਵ ਜੁਤੀਮਤੋ’’ਤਿ.

ਤਤ੍ਥ ¶ ਸਮਾ ਸਮਨ੍ਤਪਰਿਤੋਤਿ ਪਰਿਸਮਨ੍ਤਤੋ ਸਬ੍ਬਦਿਸਾਭਾਗੇਸੁ ਅਯਂ ਤਵ ਨਾਗਭਵਨੇ ਮਹੀ ਸੁਵਣ੍ਣਰਜਤਮਣਿ ਮੁਤ੍ਤਾਵਾਲੁਕਾਪਰਿਕਿਣ੍ਣਾ ਸਮਤਲਾ. ਪਹੂਤਤਗਰਾ ਮਹੀਤਿ ਬਹੁਕੇਹਿ ਤਗਰਗਚ੍ਛੇਹਿ ਸਮਨ੍ਨਾਗਤਾ. ਇਨ੍ਦਗੋਪਕਸਞ੍ਛਨ੍ਨਾਤਿ ਸੁਵਣ੍ਣਇਨ੍ਦਗੋਪਕੇਹਿ ਸਞ੍ਛਨ੍ਨਾ. ਸੋਭਤਿ ਹਰਿਤੁਤ੍ਤਮਾਤਿ ਹਰਿਤਵਣ੍ਣਦਬ੍ਬਤਿਣਸਞ੍ਛਨ੍ਨਾ ਸੋਭਤੀਤਿ ਅਤ੍ਥੋ. ਵਨਚੇਤ੍ਯਾਨੀਤਿ ਵਨਘਟਾ. ਓਪੁਪ੍ਫਪਦ੍ਧਾਤਿ ਪੁਪ੍ਫਿਤ੍ਵਾ ਪਤਿਤੇਹਿ ਪਦੁਮਪਤ੍ਤੇਹਿ ਸਞ੍ਛਨ੍ਨਾ ਉਦਕਪਿਟ੍ਠਾ. ਸੁਨਿਮ੍ਮਿਤਾਤਿ ਤਵ ਪੁਞ੍ਞਸਮ੍ਪਤ੍ਤਿਯਾ ਸੁਟ੍ਠੁ ਨਿਮ੍ਮਿਤਾ. ਅਟ੍ਠਂਸਾਤਿ ਤਵ ਵਸਨਪਾਸਾਦੇਸੁ ਅਟ੍ਠਂਸਾ ਸੁਕਤਾ ਵੇਲ਼ੁਰਿਯਮਯਾ ਥਮ੍ਭਾ. ਤੇਹਿ ਥਮ੍ਭੇਹਿ ਸਹਸ੍ਸਥਮ੍ਭਾ ਤਵ ਪਾਸਾਦਾ ਨਾਗਕਞ੍ਞਾਹਿ ਪੂਰਾ ਵਿਜ੍ਜੋਤਨ੍ਤਿ. ਉਪਪਨ੍ਨੋਸੀਤਿ ਏਵਰੂਪੇ ਵਿਮਾਨੇ ਨਿਬ੍ਬਤ੍ਤੋਸੀਤਿ ਅਤ੍ਥੋ. ਸਹਸ੍ਸਨੇਤ੍ਤਸ੍ਸ ਵਿਮਾਨਨ੍ਤਿ ਸਕ੍ਕਸ੍ਸ ਵੇਜਯਨ੍ਤਪਾਸਾਦਂ. ਇਦ੍ਧੀ ਹਿ ਤ੍ਯਾਯਂ ਵਿਪੁਲਾਤਿ ਯਸ੍ਮਾ ਤਵਾਯਂ ਵਿਪੁਲਾ ਇਦ੍ਧਿ, ਤਸ੍ਮਾ ਤ੍ਵਂ ਤੇਨ ਉਪੋਸਥਕਮ੍ਮੇਨ ਸਕ੍ਕਸ੍ਸ ਵਿਮਾਨਮ੍ਪਿ ਨ ਪਤ੍ਥੇਸਿ, ਅਞ੍ਞਂ ਤਤੋ ਉਤ੍ਤਰਿ ਮਹਨ੍ਤਂ ਠਾਨਂ ਪਤ੍ਥੇਸੀਤਿ ਮਞ੍ਞਾਮਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਮਾ ਹੇਵਂ, ਬ੍ਰਾਹ੍ਮਣ, ਅਵਚ, ਸਕ੍ਕਸ੍ਸ ਯਸਂ ਪਟਿਚ੍ਚ ਅਮ੍ਹਾਕਂ ਯਸੋ ਸਿਨੇਰੁਸਨ੍ਤਿਕੇ ਸਾਸਪੋ ਵਿਯ, ਮਯਂ ਤਸ੍ਸ ਪਰਿਚਾਰਕੇਪਿ ਨ ਅਗ੍ਘਾਮਾ’’ਤਿ ਵਤ੍ਵਾ ਗਾਥਮਾਹ –

੮੦੯.

‘‘ਮਨਸਾਪਿ ਨ ਪਤ੍ਤਬ੍ਬੋ, ਆਨੁਭਾਵੋ ਜੁਤੀਮਤੋ;

ਪਰਿਚਾਰਯਮਾਨਾਨਂ, ਸਇਨ੍ਦਾਨਂ ਵਸਵਤ੍ਤਿਨ’’ਨ੍ਤਿ.

ਤਸ੍ਸਤ੍ਥੋ ¶ – ਬ੍ਰਾਹ੍ਮਣ, ਸਕ੍ਕਸ੍ਸ ਯਸੋ ਨਾਮ ਏਕਂ ਦ੍ਵੇ ਤਯੋ ਚਤ੍ਤਾਰੋ ਵਾ ਦਿਵਸੇ ‘‘ਏਤ੍ਤਕੋ ਸਿਯਾ’’ਤਿ ਮਨਸਾ ਚਿਨ੍ਤੇਨ੍ਤੇਨਪਿ ਨ ਅਭਿਪਤ੍ਤਬ੍ਬੋ. ਯੇਪਿ ਨਂ ਚਤ੍ਤਾਰੋ ਮਹਾਰਾਜਾਨੋ ਪਰਿਚਾਰੇਨ੍ਤਿ, ਤੇਸਂ ਦੇਵਰਾਜਾਨਂ ਪਰਿਚਾਰਯਮਾਨਾਨਂ ਇਨ੍ਦਂ ਨਾਯਕਂ ਕਤ੍ਵਾ ਚਰਨ੍ਤਾਨਂ ਸਇਨ੍ਦਾਨਂ ਵਸਵਤ੍ਤੀਨਂ ਚਤੁਨ੍ਨਂ ਲੋਕਪਾਲਾਨਂ ਯਸਸ੍ਸਪਿ ਅਮ੍ਹਾਕਂ ਤਿਰਚ੍ਛਾਨਗਤਾਨਂ ਯਸੋ ਸੋਲ਼ਸਿਂ ਕਲਂ ਨਗ੍ਘਤੀਤਿ.

ਏਵਞ੍ਚ ਪਨ ਵਤ੍ਵਾ ‘‘ਇਦਂ ਤੇ ਮਞ੍ਞੇ ਸਹਸ੍ਸਨੇਤ੍ਤਸ੍ਸ ਵਿਮਾਨ’’ਨ੍ਤਿ ਵਚਨਂ ਸੁਤ੍ਵਾ ਅਹਂ ਤਂ ਅਨੁਸ੍ਸਰਿਂ. ‘‘ਅਹਞ੍ਹਿ ਵੇਜਯਨ੍ਤਂ ਪਤ੍ਥੇਨ੍ਤੋ ਉਪੋਸਥਕਮ੍ਮਂ ਕਰੋਮੀ’’ਤਿ ਤਸ੍ਸ ਅਤ੍ਤਨੋ ਪਤ੍ਥਨਂ ਆਚਿਕ੍ਖਨ੍ਤੋ ਆਹ –

੮੧੦.

‘‘ਤਂ ਵਿਮਾਨਂ ਅਭਿਜ੍ਝਾਯ, ਅਮਰਾਨਂ ਸੁਖੇਸਿਨਂ;

ਉਪੋਸਥਂ ਉਪਵਸਨ੍ਤੋ, ਸੇਮਿ ਵਮ੍ਮਿਕਮੁਦ੍ਧਨੀ’’ਤਿ.

ਤਤ੍ਥ ¶ ¶ ਅਭਿਜ੍ਝਾਯਾਤਿ ਪਤ੍ਥੇਤ੍ਵਾ. ਅਮਰਾਨਨ੍ਤਿ ਦੀਘਾਯੁਕਾਨਂ ਦੇਵਾਨਂ. ਸੁਖੇਸਿਨਨ੍ਤਿ ਏਸਿਤਸੁਖਾਨਂ ਸੁਖੇ ਪਤਿਟ੍ਠਿਤਾਨਂ.

ਕਂ ਸੁਤ੍ਵਾ ਬ੍ਰਾਹ੍ਮਣੋ ‘‘ਇਦਾਨਿ ਮੇ ਓਕਾਸੋ ਲਦ੍ਧੋ’’ਤਿ ਸੋਮਨਸ੍ਸਪ੍ਪਤ੍ਤੋ ਗਨ੍ਤੁਂ ਆਪੁਚ੍ਛਨ੍ਤੋ ਗਾਥਾਦ੍ਵਯਮਾਹ –

੮੧੧.

‘‘ਅਹਞ੍ਚ ਮਿਗਮੇਸਾਨੋ, ਸਪੁਤ੍ਤੋ ਪਾਵਿਸਿਂ ਵਨਂ;

ਤਂ ਮਂ ਮਤਂ ਵਾ ਜੀਵਂ ਵਾ, ਨਾਭਿਵੇਦੇਨ੍ਤਿ ਞਾਤਕਾ.

੮੧੨.

‘‘ਆਮਨ੍ਤਯੇ ਭੂਰਿਦਤ੍ਤਂ, ਕਾਸਿਪੁਤ੍ਤਂ ਯਸਸ੍ਸਿਨਂ;

ਤਯਾ ਨੋ ਸਮਨੁਞ੍ਞਾਤਾ, ਅਪਿ ਪਸ੍ਸੇਮੁ ਞਾਤਕੇ’’ਤਿ.

ਤਤ੍ਥ ਨਾਭਿਵੇਦੇਨ੍ਤੀਤਿ ਨ ਜਾਨਨ੍ਤਿ, ਕਥੇਨ੍ਤੋਪਿ ਨੇਸਂ ਨਤ੍ਥਿ. ਆਮਨ੍ਤਯੇਤਿ ਆਮਨ੍ਤਯਾਮਿ. ਕਾਸਿਪੁਤ੍ਤਨ੍ਤਿ ਕਾਸਿਰਾਜਧੀਤਾਯ ਪੁਤ੍ਤਂ.

ਤਤੋ ਬੋਧਿਸਤ੍ਤੋ ਆਹ –

੮੧੩.

‘‘ਏਸੋ ਹਿ ਵਤ ਮੇ ਛਨ੍ਦੋ, ਯਂ ਵਸੇਸਿ ਮਮਨ੍ਤਿਕੇ;

ਨ ਹਿ ਏਤਾਦਿਸਾ ਕਾਮਾ, ਸੁਲਭਾ ਹੋਨ੍ਤਿ ਮਾਨੁਸੇ.

੮੧੪.

‘‘ਸਚੇ ਤ੍ਵਂ ਨਿਚ੍ਛਸੇ ਵਤ੍ਥੁਂ, ਮਮ ਕਾਮੇਹਿ ਪੂਜਿਤੋ;

ਮਯਾ ਤ੍ਵਂ ਸਮਨੁਞ੍ਞਾਤੋ, ਸੋਤ੍ਥਿਂ ਪਸ੍ਸਾਹਿ ਞਾਤਕੇ’’ਤਿ.

ਮਹਾਸਤ੍ਤੋ ¶ ਗਾਥਾਦ੍ਵਯਂ ਵਤ੍ਵਾ ਚਿਨ੍ਤੇਸਿ – ‘‘ਅਯਂ ਮਣਿਂ ਨਿਸ੍ਸਾਯ ਸੁਖਂ ਜੀਵਨ੍ਤੋ ਕਸ੍ਸਚਿ ਨਾਚਿਕ੍ਖਿਸ੍ਸਤਿ, ਏਤਸ੍ਸ ਸਬ੍ਬਕਾਮਦਦਂ ਮਣਿਂ ਦਸ੍ਸਾਮੀ’’ਤਿ. ਅਥਸ੍ਸ ਤਂ ਦਦਨ੍ਤੋ ਆਹ –

੮੧੫.

‘‘ਧਾਰਯਿਮਂ ਮਣਿਂ ਦਿਬ੍ਯਂ, ਪਸੁਂ ਪੁਤ੍ਤੇ ਚ ਵਿਨ੍ਦਤਿ;

ਅਰੋਗੋ ਸੁਖਿਤੋ ਹੋਤਿ, ਗਚ੍ਛੇਵਾਦਾਯ ਬ੍ਰਾਹ੍ਮਣਾ’’ਤਿ.

ਤਤ੍ਥ ¶ ਪਸੁਂ ਪੁਤ੍ਤੇ ਚ ਵਿਨ੍ਦਤੀਤਿ ਇਮਂ ਮਣਿਂ ਧਾਰਯਮਾਨੋ ਇਮਸ੍ਸਾਨੁਭਾਵੇਨ ਪਸੁਞ੍ਚ ਪੁਤ੍ਤੇ ਚ ਅਞ੍ਞਞ੍ਚ ਯਂ ਇਚ੍ਛਤਿ, ਤਂ ਸਬ੍ਬਂ ਲਭਤਿ.

ਤਤੋ ਬ੍ਰਾਹ੍ਮਣੋ ਗਾਥਮਾਹ –

੮੧੬.

‘‘ਕੁਸਲਂ ਪਟਿਨਨ੍ਦਾਮਿ, ਭੂਰਿਦਤ੍ਤ ਵਚੋ ਤਵ;

ਪਬ੍ਬਜਿਸ੍ਸਾਮਿ ਜਿਣ੍ਣੋਸ੍ਮਿ, ਨ ਕਾਮੇ ਅਭਿਪਤ੍ਥਯੇ’’ਤਿ.

ਤਸ੍ਸਤ੍ਥੋ – ਭੂਰਿਦਤ੍ਤ, ਤਵ ਵਚਨਂ ਕੁਸਲਂ ਅਨਵਜ੍ਜਂ, ਤਂ ਪਟਿਨਨ੍ਦਾਮਿ ਨ ਪਟਿਕ੍ਖਿਪਾਮਿ. ਅਹਂ ਪਨ ਜਿਣ੍ਣੋ ਅਸ੍ਮਿ, ਤਸ੍ਮਾ ਪਬ੍ਬਜਿਸ੍ਸਾਮਿ, ਨ ਕਾਮੇ ਅਭਿਪਤ੍ਥਯਾਮਿ, ਕਿਂ ਮੇ ਮਣਿਨਾਤਿ.

ਬੋਧਿਸਤ੍ਤੋ ਆਹ –

੮੧੭.

‘‘ਬ੍ਰਹ੍ਮਚਰਿਯਸ੍ਸ ਚੇ ਭਙ੍ਗੋ, ਹੋਤਿ ਭੋਗੇਹਿ ਕਾਰਿਯਂ;

ਅਵਿਕਮ੍ਪਮਾਨੋ ਏਯ੍ਯਾਸਿ, ਬਹੁਂ ਦਸ੍ਸਾਮਿ ਤੇ ਧਨ’’ਨ੍ਤਿ.

ਤਤ੍ਥ ¶ ਚੇ ਭਙ੍ਗੋਤਿ ਬ੍ਰਹ੍ਮਚਰਿਯਵਾਸੋ ਨਾਮ ਦੁਕ੍ਕਰੋ, ਅਨਭਿਰਤਸ੍ਸ ਬ੍ਰਹ੍ਮਚਰਿਯਸ੍ਸ ਚੇ ਭਙ੍ਗੋ ਹੋਤਿ, ਤਦਾ ਗਿਹਿਭੂਤਸ੍ਸ ਭੋਗੇਹਿ ਕਾਰਿਯਂ ਹੋਤਿ, ਏਵਰੂਪੇ ਕਾਲੇ ਤ੍ਵਂ ਨਿਰਾਸਙ੍ਕੋ ਹੁਤ੍ਵਾ ਮਮ ਸਨ੍ਤਿਕਂ ਆਗਚ੍ਛੇਯ੍ਯਾਸਿ, ਬਹੁਂ ਤੇ ਧਨਂ ਦਸ੍ਸਾਮੀਤਿ.

ਬ੍ਰਾਹ੍ਮਣੋ ਆਹ –

੮੧੮.

‘‘ਕੁਸਲਂ ਪਟਿਨਨ੍ਦਾਮਿ, ਭੂਰਿਦਤ੍ਤ ਵਚੋ ਤਵ;

ਪੁਨਪਿ ਆਗਮਿਸ੍ਸਾਮਿ, ਸਚੇ ਅਤ੍ਥੋ ਭਵਿਸ੍ਸਤੀ’’ਤਿ.

ਤਤ੍ਥ ਪੁਨਪੀਤਿ ਪੁਨ ਅਪਿ, ਅਯਮੇਵ ਵਾ ਪਾਠੋ.

ਅਥਸ੍ਸ ¶ ਤਤ੍ਥ ਅਵਸਿਤੁਕਾਮਤਂ ਞਤ੍ਵਾ ਮਹਾਸਤ੍ਤੋ ਨਾਗਮਾਣਵਕੇ ਆਣਾਪੇਤ੍ਵਾ ਬ੍ਰਾਹ੍ਮਣਂ ਮਨੁਸ੍ਸਲੋਕਂ ਪਾਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੮੧੯.

‘‘ਇਦਂ ¶ ਵਤ੍ਵਾ ਭੂਰਿਦਤ੍ਤੋ, ਪੇਸੇਸਿ ਚਤੁਰੋ ਜਨੇ;

ਏਥ ਗਚ੍ਛਥ ਉਟ੍ਠੇਥ, ਖਿਪ੍ਪਂ ਪਾਪੇਥ ਬ੍ਰਾਹ੍ਮਣਂ.

੮੨੦.

‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਉਟ੍ਠਾਯ ਚਤੁਰੋ ਜਨਾ;

ਪੇਸਿਤਾ ਭੂਰਿਦਤ੍ਤੇਨ, ਖਿਪ੍ਪਂ ਪਾਪੇਸੁ ਬ੍ਰਾਹ੍ਮਣ’’ਨ੍ਤਿ.

ਤਤ੍ਥ ਪਾਪੇਸੂਤਿ ਯਮੁਨਾਤੋ ਉਤ੍ਤਾਰੇਤ੍ਵਾ ਬਾਰਾਣਸਿਮਗ੍ਗਂ ਪਾਪਯਿਂਸੁ, ਪਾਪਯਿਤ੍ਵਾ ਚ ਪਨ ‘‘ਤੁਮ੍ਹੇ ਗਚ੍ਛਥਾ’’ਤਿ ਵਤ੍ਵਾ ਨਾਗਭਵਨਮੇਵ ਪਚ੍ਚਾਗਮਿਂਸੁ.

ਬ੍ਰਾਹ੍ਮਣੋਪਿ ‘‘ਤਾਤ ਸੋਮਦਤ੍ਤ, ਇਮਸ੍ਮਿਂ ਠਾਨੇ ਮਿਗਂ ਵਿਜ੍ਝਿਮ੍ਹਾ, ਇਮਸ੍ਮਿਂ ਸੂਕਰ’’ਨ੍ਤਿ ਪੁਤ੍ਤਸ੍ਸ ਆਚਿਕ੍ਖਨ੍ਤੋ ਅਨ੍ਤਰਾਮਗ੍ਗੇ ਪੋਕ੍ਖਰਣਿਂ ਦਿਸ੍ਵਾ ‘‘ਤਾਤ ਸੋਮਦਤ੍ਤ, ਨ੍ਹਾਯਾਮਾ’’ਤਿ ਵਤ੍ਵਾ ‘‘ਸਾਧੁ, ਤਾਤਾ’’ਤਿ ਵੁਤ੍ਤੇ ਉਭੋਪਿ ਦਿਬ੍ਬਾਭਰਣਾਨਿ ਚੇਵ ਦਿਬ੍ਬਵਤ੍ਥਾਨਿ ਚ ਓਮੁਞ੍ਚਿਤ੍ਵਾ ਭਣ੍ਡਿਕਂ ਕਤ੍ਵਾ ਪੋਕ੍ਖਰਣੀਤੀਰੇ ਠਪੇਤ੍ਵਾ ਓਤਰਿਤ੍ਵਾ ਨ੍ਹਾਯਿਂਸੁ. ਤਸ੍ਮਿਂ ਖਣੇ ਤਾਨਿ ਅਨ੍ਤਰਧਾਯਿਤ੍ਵਾ ਨਾਗਭਵਨਮੇਵ ਅਗਮਂਸੁ. ਪਠਮਂ ਨਿਵਤ੍ਥਕਾਸਾਵਪਿਲੋਤਿਕਾਵ ਨੇਸਂ ਸਰੀਰੇ ਪਟਿਮੁਞ੍ਚਿਂਸੁ, ਧਨੁਸਰਸਤ੍ਤਿਯੋਪਿ ਪਾਕਤਿਕਾਵ ਅਹੇਸੁਂ. ਸੋਮਦਤ੍ਤੋ ‘‘ਨਾਸਿਤਾਮ੍ਹਾ ਤਯਾ, ਤਾਤਾ’’ਤਿ ਪਰਿਦੇਵਿ. ਅਥ ਨਂ ਪਿਤਾ ‘‘ਮਾ ਚਿਨ੍ਤਯਿ, ਮਿਗੇਸੁ ਸਨ੍ਤੇਸੁ ਅਰਞ੍ਞੇ ਮਿਗੇ ਵਧਿਤ੍ਵਾ ਜੀਵਿਕਂ ਕਪ੍ਪੇਸ੍ਸਾਮਾ’’ਤਿ ਅਸ੍ਸਾਸੇਸਿ. ਸੋਮਦਤ੍ਤਸ੍ਸ ਮਾਤਾ ਤੇਸਂ ਆਗਮਨਂ ਸੁਤ੍ਵਾ ਪਚ੍ਚੁਗ੍ਗਨ੍ਤ੍ਵਾ ਘਰਂ ਨੇਤ੍ਵਾ ਅਨ੍ਨਪਾਨੇਨ ਸਨ੍ਤਪ੍ਪੇਸਿ. ਬ੍ਰਾਹ੍ਮਣੋ ਭੁਞ੍ਜਿਤ੍ਵਾ ਨਿਦ੍ਦਂ ਓਕ੍ਕਮਿ. ਇਤਰਾ ਪੁਤ੍ਤਂ ਪੁਚ੍ਛਿ ‘‘ਤਾਤ ¶ , ਏਤ੍ਤਕਂ ਕਾਲਂ ਕੁਹਿਂ ਗਤਤ੍ਥਾ’’ਤਿ? ‘‘ਅਮ੍ਮ, ਭੂਰਿਦਤ੍ਤਨਾਗਰਾਜੇਨ ਅਮ੍ਹੇ ਨਾਗਭਵਨਂ ਨੀਤਾ, ਤਤੋ ਉਕ੍ਕਣ੍ਠਿਤ੍ਵਾ ਇਦਾਨਿ ਆਗਤਾ’’ਤਿ. ‘‘ਕਿਞ੍ਚਿ ਪਨ ਵੋ ਰਤਨਂ ਆਭਤ’’ਨ੍ਤਿ. ‘‘ਨਾਭਤਂ ਅਮ੍ਮਾ’’ਤਿ. ‘‘ਕਿਂ ਤੁਮ੍ਹਾਕਂ ਤੇਨ ਕਿਞ੍ਚਿ ਨ ਦਿਨ੍ਨ’’ਨ੍ਤਿ. ‘‘ਅਮ੍ਮ, ਭੂਰਿਦਤ੍ਤੇਨ ਮੇ ਪਿਤੁ ਸਬ੍ਬਕਾਮਦਦੋ ਮਣਿ ਦਿਨ੍ਨੋ ਅਹੋਸਿ, ਇਮਿਨਾ ਪਨ ਨ ਗਹਿਤੋ’’ਤਿ. ‘‘ਕਿਂਕਾਰਣਾ’’ਤਿ. ‘‘ਪਬ੍ਬਜਿਸ੍ਸਤਿ ਕਿਰਾ’’ਤਿ. ਸਾ ‘‘ਏਤ੍ਤਕਂ ਕਾਲਂ ਦਾਰਕੇ ਮਮ ਭਾਰਂ ਕਰੋਨ੍ਤੋ ਨਾਗਭਵਨੇ ਵਸਿਤ੍ਵਾ ਇਦਾਨਿ ਕਿਰ ਪਬ੍ਬਜਿਸ੍ਸਤੀ’’ਤਿ ਕੁਜ੍ਝਿਤ੍ਵਾ ਵੀਹਿਭਞ੍ਜਨਦਬ੍ਬਿਯਾ ਪਿਟ੍ਠਿਂ ਪੋਥੇਨ੍ਤੀ ‘‘ਅਰੇ, ਦੁਟ੍ਠਬ੍ਰਾਹ੍ਮਣ, ਪਬ੍ਬਜਿਸ੍ਸਾਮੀਤਿ ਕਿਰ ਮਣਿਰਤਨਂ ਨ ਗਣ੍ਹਸਿ, ਅਥ ਕਸ੍ਮਾ ਅਪਬ੍ਬਜਿਤ੍ਵਾ ਇਧਾਗਤੋਸਿ, ਨਿਕ੍ਖਮ ਮਮ ਘਰਾ ਸੀਘ’’ਨ੍ਤਿ ਸਨ੍ਤਜ੍ਜੇਸਿ. ਅਥ ਨਂ ‘‘ਭਦ੍ਦੇ, ਮਾ ਕੁਜ੍ਝਿ, ਅਰਞ੍ਞੇ ਮਿਗੇਸੁ ਸਨ੍ਤੇਸੁ ਅਹਂ ਤਂ ਪੋਸੇਸ੍ਸਾਮੀ’’ਤਿ ¶ ਵਤ੍ਵਾ ਪੁਤ੍ਤੇਨ ਸਦ੍ਧਿਂ ਅਰਞ੍ਞਂ ਗਨ੍ਤ੍ਵਾ ਪੁਰਿਮਨਿਯਾਮੇਨੇਵ ਜੀਵਿਕਂ ਕਪ੍ਪੇਸਿ.

ਤਦਾ ਦਕ੍ਖਿਣਮਹਾਸਮੁਦ੍ਦਸ੍ਸ ਦਿਸਾਭਾਗੇ ਸਿਮ੍ਬਲਿਵਾਸੀ ਏਕੋ ਗਰੁਲ਼ੋ ਪਕ੍ਖਵਾਤੇਹਿ ਸਮੁਦ੍ਦੇ ਉਦਕਂ ਵਿਯੂਹਿਤ੍ਵਾ ਏਕਂ ਨਾਗਰਾਜਾਨਂ ਸੀਸੇ ਗਣ੍ਹਿ. ਤਦਾਹਿ ਸੁਪਣ੍ਣਾ ਨਾਗਂ ਗਹੇਤੁਂ ਅਜਾਨਨਕਾਯੇਵ ¶ , ਪਚ੍ਛਾ ਪਣ੍ਡਰਜਾਤਕੇ ਜਾਨਿਂਸੁ. ਸੋ ਪਨ ਤਂ ਸੀਸੇ ਗਹੇਤ੍ਵਾਪਿ ਉਦਕੇ ਅਨੋਤ੍ਥਰਨ੍ਤੇਯੇਵ ਉਕ੍ਖਿਪਿਤ੍ਵਾ ਓਲਮ੍ਬਨ੍ਤਂ ਆਦਾਯ ਹਿਮਵਨ੍ਤਮਤ੍ਥਕੇਨ ਪਾਯਾਸਿ. ਤਦਾ ਚੇਕੋ ਕਾਸਿਰਟ੍ਠਵਾਸੀ ਬ੍ਰਾਹ੍ਮਣੋ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਪ੍ਪਦੇਸੇ ਪਣ੍ਣਸਾਲਂ ਮਾਪੇਤ੍ਵਾ ਪਟਿਵਸਤਿ. ਤਸ੍ਸ ਚਙ੍ਕਮਨਕੋਟਿਯਂ ਮਹਾਨਿਗ੍ਰੋਧਰੁਕ੍ਖੋ ਅਤ੍ਥਿ. ਸੋ ਤਸ੍ਸ ਮੂਲੇ ਦਿਵਾਵਿਹਾਰਂ ਕਰੋਤਿ. ਸੁਪਣ੍ਣੋ ਨਿਗ੍ਰੋਧਮਤ੍ਥਕੇਨ ਨਾਗਂ ਹਰਤਿ. ਨਾਗੋ ਓਲਮ੍ਬਨ੍ਤੋ ਮੋਕ੍ਖਤ੍ਥਾਯ ਨਙ੍ਗੁਟ੍ਠੇਨ ਨਿਗ੍ਰੋਧਵਿਟਪਂ ਵੇਠੇਸਿ. ਸੁਪਣ੍ਣੋ ਤਂ ਅਜਾਨਨ੍ਤੋਵ ਮਹਬ੍ਬਲਤਾਯ ਆਕਾਸੇ ਪਕ੍ਖਨ੍ਦਿਯੇਵ. ਨਿਗ੍ਰੋਧਰੁਕ੍ਖੋ ਸਮੂਲੋ ਉਪ੍ਪਾਟਿਤੋ. ਸੁਪਣ੍ਣੋ ਨਾਗਂ ਸਿਮ੍ਬਲਿਵਨਂ ਨੇਤ੍ਵਾ ਤੁਣ੍ਡੇਨ ਪਹਰਿਤ੍ਵਾ ਕੁਚ੍ਛਿਂ ਫਾਲੇਤ੍ਵਾ ਨਾਗਮੇਦਂ ¶ ਖਾਦਿਤ੍ਵਾ ਸਰੀਰਂ ਸਮੁਦ੍ਦਕੁਚ੍ਛਿਮ੍ਹਿ ਛਡ੍ਡੇਸਿ. ਨਿਗ੍ਰੋਧਰੁਕ੍ਖੋ ਪਤਨ੍ਤੋ ਮਹਾਸਦ੍ਦਮਕਾਸਿ. ਸੁਪਣ੍ਣੋ ‘‘ਕਿਸ੍ਸ ਏਸੋ ਸਦ੍ਦੋ’’ਤਿ ਅਧੋ ਓਲੋਕੇਨ੍ਤੋ ਨਿਗ੍ਰੋਧਰੁਕ੍ਖਂ ਦਿਸ੍ਵਾ ‘‘ਕੁਤੋ ਏਸ ਮਯਾ ਉਪ੍ਪਾਟਿਤੋ’’ਤਿ ਚਿਨ੍ਤੇਤ੍ਵਾ ‘‘ਤਾਪਸਸ੍ਸ ਚਙ੍ਕਮਨਕੋਟਿਯਾ ਨਿਗ੍ਰੋਧੋ ਏਸੋ’’ਤਿ ਤਥਤੋ ਞਤ੍ਵਾ ‘‘ਅਯਂ ਤਸ੍ਸ ਬਹੂਪਕਾਰੋ, ‘ਅਕੁਸਲਂ ਨੁ ਖੋ ਮੇ ਪਸੁਤਂ, ਉਦਾਹੁ ਨੋ’ਤਿ ਤਮੇਵ ਪੁਚ੍ਛਿਤ੍ਵਾ ਜਾਨਿਸ੍ਸਾਮੀ’’ਤਿ ਮਾਣਵਕਵੇਸੇਨ ਤਸ੍ਸ ਸਨ੍ਤਿਕਂ ਅਗਮਾਸਿ.

ਤਸ੍ਮਿਂ ਖਣੇ ਤਾਪਸੋ ਤਂ ਠਾਨਂ ਸਮਂ ਕਰੋਤਿ. ਸੁਪਣ੍ਣਰਾਜਾ ਤਾਪਸਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਅਜਾਨਨ੍ਤੋ ਵਿਯ ‘‘ਕਿਸ੍ਸ ਠਾਨਂ, ਭਨ੍ਤੇ, ਇਦ’’ਨ੍ਤਿ ਪੁਚ੍ਛਿ. ‘‘ਉਪਾਸਕ, ਏਕੋ ਸੁਪਣ੍ਣੋ ਭੋਜਨਤ੍ਥਾਯ ਨਾਗਂ ਹਰਨ੍ਤੋ ਨਾਗੇਨ ਮੋਕ੍ਖਤ੍ਥਾਯ ਨਿਗ੍ਰੋਧਵਿਟਪਂ ਨਙ੍ਗੁਟ੍ਠੇਨ ਵੇਠਿਤਾਯਪਿ ਅਤ੍ਤਨੋ ਮਹਬ੍ਬਲਤਾਯ ਪਕ੍ਖਨ੍ਤਿਤ੍ਵਾ ਗਤੋ, ਅਥ ਨਿਗ੍ਰੋਧਰੁਕ੍ਖੋ ਉਪ੍ਪਾਟਿਤੋ, ਇਦਂ ਤਸ੍ਸ ਉਪ੍ਪਾਟਿਤਟ੍ਠਾਨ’’ਨ੍ਤਿ. ‘‘ਕਿਂ ਪਨ, ਭਨ੍ਤੇ, ਤਸ੍ਸ ਸੁਪਣ੍ਣਸ੍ਸ ਅਕੁਸਲਂ ਹੋਤਿ, ਉਦਾਹੁ ਨੋ’’ਤਿ? ‘‘ਸਚੇ ਨ ਜਾਨਾਤਿ, ਅਚੇਤਨਕਮ੍ਮਂ ਨਾਮ ਅਕੁਸਲਂ ਨ ਹੋਤੀ’’ਤਿ. ‘‘ਕਿਂ ਨਾਗਸ੍ਸ ਪਨ ¶ , ਭਨ੍ਤੇ’’ਤਿ? ‘‘ਸੋ ਇਮਂ ਨਾਸੇਤੁਂ ਨ ਗਣ੍ਹਿ, ਮੋਕ੍ਖਤ੍ਥਾਯ ਗਣ੍ਹਿ, ਤਸ੍ਮਾ ਤਸ੍ਸਪਿ ਨ ਹੋਤਿਯੇਵਾ’’ਤਿ. ਸੁਪਣ੍ਣੋ ਤਾਪਸਸ੍ਸ ਤੁਸ੍ਸਿਤ੍ਵਾ ‘‘ਭਨ੍ਤੇ, ਅਹਂ ਸੋ ਸੁਪਣ੍ਣਰਾਜਾ, ਤੁਮ੍ਹਾਕਞ੍ਹਿ ਪਞ੍ਹਵੇਯ੍ਯਾਕਰਣੇਨ ਤੁਟ੍ਠੋ. ਤੁਮ੍ਹੇ ਅਰਞ੍ਞੇ ਵਸਥ, ਅਹਞ੍ਚੇਕਂ ਅਲਮ੍ਪਾਯਨਮਨ੍ਤਂ ਜਾਨਾਮਿ, ਅਨਗ੍ਘੋ ਮਨ੍ਤੋ. ਤਮਹਂ ਤੁਮ੍ਹਾਕਂ ਆਚਰਿਯਭਾਗਂ ਕਤ੍ਵਾ ਦਮ੍ਮਿ, ਪਟਿਗ੍ਗਣ੍ਹਥ ਨ’’ਨ੍ਤਿ ਆਹ. ‘‘ਅਲਂ ਮਯ੍ਹਂ ਮਨ੍ਤੇਨ, ਗਚ੍ਛਥ ਤੁਮ੍ਹੇ’’ਤਿ. ਸੋ ਤਂ ਪੁਨਪ੍ਪੁਨਂ ਯਾਚਿਤ੍ਵਾ ਸਮ੍ਪਟਿਚ੍ਛਾਪੇਤ੍ਵਾ ਮਨ੍ਤਂ ਦਤ੍ਵਾ ਓਸਧਾਨਿ ਆਚਿਕ੍ਖਿਤ੍ਵਾ ਪਕ੍ਕਾਮਿ.

ਗਰੁਲ਼ਕਣ੍ਡਂ ਨਿਟ੍ਠਿਤਂ.

ਕੀਲ਼ਨਕਣ੍ਡਂ

ਤਸ੍ਮਿਂ ¶ ਕਾਲੇ ਬਾਰਾਣਸਿਯਂ ਏਕੋ ਦਲਿਦ੍ਦਬ੍ਰਾਹ੍ਮਣੋ ਬਹੁਂ ਇਣਂ ਗਹੇਤ੍ਵਾ ਇਣਸਾਮਿਕੇਹਿ ਚੋਦਿਯਮਾਨੋ ‘‘ਕਿਂ ਮੇ ਇਧ ਵਾਸੇਨ, ਅਰਞ੍ਞਂ ਪਵਿਸਿਤ੍ਵਾ ਮਤਂ ਸੇਯ੍ਯੋ’’ਤਿ ਨਿਕ੍ਖਮਿਤ੍ਵਾ ਵਨਂ ਪਵਿਸਿਤ੍ਵਾ ਅਨੁਪੁਬ੍ਬੇਨ ਤਂ ਅਸ੍ਸਮਪਦਂ ਪਤ੍ਵਾ ਤਾਪਸਂ ਵਤ੍ਤਸਮ੍ਪਦਾਯ ਆਰਾਧੇਸਿ. ਤਾਪਸੋ ‘‘ਅਯਂ ਬ੍ਰਾਹ੍ਮਣੋ ਮਯ੍ਹਂ ਅਤਿਵਿਯ ਉਪਕਾਰਕੋ, ਸੁਪਣ੍ਣਰਾਜੇਨ ਦਿਨ੍ਨਂ ਦਿਬ੍ਬਮਨ੍ਤਮਸ੍ਸ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਬ੍ਰਾਹ੍ਮਣ, ਅਹਂ ਅਲਮ੍ਪਾਯਨਮਨ੍ਤਂ ਜਾਨਾਮਿ, ਤਂ ਤੇ ਦਮ੍ਮਿ, ਗਣ੍ਹਾਹਿ ਨ’’ਨ੍ਤਿ ਵਤ੍ਵਾ ‘‘ਅਲਂ, ਭਨ੍ਤੇ, ਨ ਮਯ੍ਹਂ ਮਨ੍ਤੇਨਤ੍ਥੋ’’ਤਿ ¶ ਵੁਤ੍ਤੇਪਿ ਪੁਨਪ੍ਪੁਨਂ ਵਤ੍ਵਾ ਨਿਪ੍ਪੀਲ਼ੇਤ੍ਵਾ ਸਮ੍ਪਟਿਚ੍ਛਾਪੇਤ੍ਵਾ ਅਦਾਸਿਯੇਵ. ਤਸ੍ਸ ਚ ਮਨ੍ਤਸ੍ਸ ਅਨੁਚ੍ਛਵਿਕਾਨਿ ਓਸਧਾਨਿ ਚੇਵ ਮਨ੍ਤੁਪਚਾਰਞ੍ਚ ਸਬ੍ਬਂ ਕਥੇਸਿ. ਬ੍ਰਾਹ੍ਮਣੋ ‘‘ਲਦ੍ਧੋ ਮੇ ਜੀਵਿਤੁਪਾਯੋ’’ਤਿ ਕਤਿਪਾਹਂ ਵਸਿਤ੍ਵਾ ‘‘ਵਾਤਾਬਾਧੋ ਮੇ, ਭਨ੍ਤੇ, ਬਾਧਤੀ’’ਤਿ ਅਪਦੇਸਂ ਕਤ੍ਵਾ ਤਾਪਸੇਨ ਵਿਸ੍ਸਜ੍ਜਿਤੋ ਤਂ ਵਨ੍ਦਿਤ੍ਵਾ ਖਮਾਪੇਤ੍ਵਾ ਅਰਞ੍ਞਾ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਯਮੁਨਾਯ ਤੀਰਂ ਪਤ੍ਵਾ ਤਂ ਮਨ੍ਤਂ ਸਜ੍ਝਾਯਨ੍ਤੋ ਮਹਾਮਗ੍ਗਂ ਗਚ੍ਛਤਿ.

ਤਸ੍ਮਿਂ ਕਾਲੇ ਸਹਸ੍ਸਮਤ੍ਤਾ ਭੂਰਿਦਤ੍ਤਸ੍ਸ ਪਰਿਚਾਰਿਕਾ ਨਾਗਮਾਣਵਿਕਾ ਤਂ ਸਬ੍ਬਕਾਮਦਦਂ ਮਣਿਰਤਨਂ ਆਦਾਯ ਨਾਗਭਵਨਾ ਨਿਕ੍ਖਮਿਤ੍ਵਾ ਯਮੁਨਾਤੀਰੇ ਵਾਲੁਕਰਾਸਿਮ੍ਹਿ ਠਪੇਤ੍ਵਾ ਤਸ੍ਸ ਓਭਾਸੇਨ ਸਬ੍ਬਰਤ੍ਤਿਂ ਉਦਕਕੀਲ਼ਂ ਕੀਲ਼ਿਤ੍ਵਾ ਅਰੁਣੁਗ੍ਗਮਨੇ ਸਬ੍ਬਾਲਙ੍ਕਾਰੇਨ ਅਲਙ੍ਕਰਿਤ੍ਵਾ ਮਣਿਰਤਨਂ ਪਰਿਵਾਰੇਤ੍ਵਾ ਸਿਰਿਂ ਪਵੇਸਯਮਾਨਾ ਨਿਸੀਦਿਂਸੁ. ਬ੍ਰਾਹ੍ਮਣੋਪਿ ਮਨ੍ਤਂ ਸਜ੍ਝਾਯਨ੍ਤੋ ਤਂ ਠਾਨਂ ਪਾਪੁਣਿ. ਤਾ ਮਨ੍ਤਸਦ੍ਦਂ ਸੁਤ੍ਵਾਵ ‘‘ਇਮਿਨਾ ਸੁਪਣ੍ਣੇਨ ਭਵਿਤਬ੍ਬ’’ਨ੍ਤਿ ਮਰਣਭਯਤਜ੍ਜਿਤਾ ਮਣਿਰਤਨਂ ਅਗ੍ਗਹੇਤ੍ਵਾ ਪਥਵਿਯਂ ਨਿਮੁਜ੍ਜਿਤ੍ਵਾ ਨਾਗਭਵਨਂ ਅਗਮਿਂਸੁ. ਬ੍ਰਾਹ੍ਮਣੋਪਿ ਮਣਿਰਤਨਂ ਦਿਸ੍ਵਾ ‘‘ਇਦਾਨੇਵ ਮੇ ਮਨ੍ਤੋ ਸਮਿਦ੍ਧੋ’’ਤਿ ਤੁਟ੍ਠਮਾਨਸੋ ¶ ਮਣਿਰਤਨਂ ਆਦਾਯ ਪਾਯਾਸਿ. ਤਸ੍ਮਿਂ ਖਣੇ ਨੇਸਾਦਬ੍ਰਾਹ੍ਮਣੋ ਸੋਮਦਤ੍ਤੇਨ ਸਦ੍ਧਿਂ ਮਿਗਵਧਾਯ ਅਰਞ੍ਞਂ ਪਵਿਸਨ੍ਤੋ ਤਸ੍ਸ ਹਤ੍ਥੇ ਤਂ ਮਣਿਰਤਨਂ ਦਿਸ੍ਵਾ ਪੁਤ੍ਤਂ ਆਹ ‘‘ਤਾਤ, ਨਨੁ ਏਸੋ ਅਮ੍ਹਾਕਂ ਭੂਰਿਦਤ੍ਤੇਨ ਦਿਨ੍ਨੋ ਮਣੀ’’ਤਿ? ‘‘ਆਮ, ਤਾਤ, ਏਸੋ ਮਣੀ’’ਤਿ. ‘‘ਤੇਨ ਹਿਸ੍ਸ ਅਗੁਣਂ ਕਥੇਤ੍ਵਾ ਇਮਂ ਬ੍ਰਾਹ੍ਮਣਂ ਵਞ੍ਚੇਤ੍ਵਾ ਗਣ੍ਹਾਮੇਤਂ ਮਣਿਰਤਨ’’ਨ੍ਤਿ. ‘‘ਤਾਤ, ਪੁਬ੍ਬੇ ਭੂਰਿਦਤ੍ਤੇਨ ਦੀਯਮਾਨਂ ਨ ਗਣ੍ਹਿ, ਇਦਾਨਿ ਪਨੇਸ ਬ੍ਰਾਹ੍ਮਣੋ ਤਞ੍ਞੇਵ ਵਞ੍ਚੇਸ੍ਸਤਿ, ਤੁਣ੍ਹੀ ਹੋਹੀ’’ਤਿ. ਬ੍ਰਾਹ੍ਮਣੋ ‘‘ਹੋਤੁ, ਤਾਤ, ਪਸ੍ਸਸਿ ਏਤਸ੍ਸ ਵਾ ਮਮ ਵਾ ਵਞ੍ਚਨਭਾਵ’’ਨ੍ਤਿ ਅਲਮ੍ਪਾਯਨੇਨ ਸਦ੍ਧਿਂ ਸਲ੍ਲਪਨ੍ਤੋ ਆਹ –

੮੨੧.

‘‘ਮਣਿਂ ਪਗ੍ਗਯ੍ਹ ਮਙ੍ਗਲ੍ਯਂ, ਸਾਧੁਵਿਤ੍ਤਂ ਮਨੋਰਮਂ;

ਸੇਲਂ ਬ੍ਯਞ੍ਜਨਸਮ੍ਪਨ੍ਨਂ, ਕੋ ਇਮਂ ਮਣਿਮਜ੍ਝਗਾ’’ਤਿ.

ਤਤ੍ਥ ¶ ਮਙ੍ਗਲ੍ਯਨ੍ਤਿ ਮਙ੍ਗਲਸਮ੍ਮਤਂ ਸਬ੍ਬਕਾਮਦਦਂ. ਕੋ ਇਮਨ੍ਤਿ ਕੁਹਿਂ ਇਮਂ ਮਣਿਂ ਅਧਿਗਤੋਸਿ.

ਤਤੋ ¶ ਅਲਮ੍ਪਾਯਨੋ ਗਾਥਮਾਹ –

੮੨੨.

‘‘ਲੋਹਿਤਕ੍ਖਸਹਸ੍ਸਾਹਿ, ਸਮਨ੍ਤਾ ਪਰਿਵਾਰਿਤਂ;

ਅਜ੍ਜ ਕਾਲਂ ਪਥਂ ਗਚ੍ਛਂ, ਅਜ੍ਝਗਾਹਂ ਮਣਿਂ ਇਮ’’ਨ੍ਤਿ.

ਤਸ੍ਸਤ੍ਥੋ – ਅਹਂ ਅਜ੍ਜ ਕਾਲਂ ਪਾਤੋਵ ਪਥਂ ਮਗ੍ਗਂ ਗਚ੍ਛਨ੍ਤੋ ਰਤ੍ਤਕ੍ਖਿਕਾਹਿ ਸਹਸ੍ਸਮਤ੍ਤਾਹਿ ਨਾਗਮਾਣਵਿਕਾਹਿ ਸਮਨ੍ਤਾ ਪਰਿਵਾਰਿਤਂ ਇਮਂ ਮਣਿਂ ਅਜ੍ਝਗਾ. ਮਂ ਦਿਸ੍ਵਾ ਹਿ ਸਬ੍ਬਾਵ ਏਤਾ ਭਯਤਜ੍ਜਿਤਾ ਇਮਂ ਛਡ੍ਡੇਤ੍ਵਾ ਪਲਾਤਾਤਿ.

ਨੇਸਾਦਬ੍ਰਾਹ੍ਮਣੋ ਤਂ ਵਞ੍ਚੇਤੁਕਾਮੋ ਮਣਿਰਤਨਸ੍ਸ ਅਗੁਣਂ ਪਕਾਸੇਨ੍ਤੋ ਅਤ੍ਤਨਾ ਗਣ੍ਹਿਤੁਕਾਮੋ ਤਿਸ੍ਸੋ ਗਾਥਾ ਅਭਾਸਿ –

੮੨੩.

‘‘ਸੂਪਚਿਣ੍ਣੋ ਅਯਂ ਸੇਲੋ, ਅਚ੍ਚਿਤੋ ਮਾਨਿਤੋ ਸਦਾ;

ਸੁਧਾਰਿਤੋ ਸੁਨਿਕ੍ਖਿਤ੍ਤੋ, ਸਬ੍ਬਤ੍ਥਮਭਿਸਾਧਯੇ.

੮੨੪.

‘‘ਉਪਚਾਰਵਿਪਨ੍ਨਸ੍ਸ, ਨਿਕ੍ਖੇਪੇ ਧਾਰਣਾਯ ਵਾ;

ਅਯਂ ਸੇਲੋ ਵਿਨਾਸਾਯ, ਪਰਿਚਿਣ੍ਣੋ ਅਯੋਨਿਸੋ.

੮੨੫.

‘‘ਨ ¶ ਇਮਂ ਅਕੁਸਲੋ ਦਿਬ੍ਯਂ, ਮਣਿਂ ਧਾਰੇਤੁਮਾਰਹੋ;

ਪਟਿਪਜ੍ਜ ਸਤਂ ਨਿਕ੍ਖਂ, ਦੇਹਿਮਂ ਰਤਨਂ ਮਮ’’ਨ੍ਤਿ.

ਤਤ੍ਥ ਸਬ੍ਬਤ੍ਥਨ੍ਤਿ ਯੋ ਇਮਂ ਸੇਲਂ ਸੁਟ੍ਠੁ ਉਪਚਰਿਤੁਂ ਅਚ੍ਚਿਤੁਂ ਅਤ੍ਤਨੋ ਜੀਵਿਤਂ ਵਿਯ ਮਮਾਯਿਤੁਂ ਸੁਟ੍ਠੁ ਧਾਰੇਤੁਂ ਸੁਟ੍ਠੁ ਨਿਕ੍ਖਿਪਿਤੁਂ ਜਾਨਾਤਿ, ਤਸ੍ਸੇਵ ਸੂਪਚਿਣ੍ਣੋ ਅਚ੍ਚਿਤੋ ਮਾਨਿਤੋ ਸੁਧਾਰਿਤੋ ਸੁਨਿਕ੍ਖਿਤ੍ਤੋ ਅਯਂ ਸੇਲੋ ਸਬ੍ਬਂ ਅਤ੍ਥਂ ਸਾਧੇਤੀਤਿ ਅਤ੍ਥੋ. ਉਪਚਾਰਵਿਪਨ੍ਨਸ੍ਸਾਤਿ ਯੋ ਪਨ ਉਪਚਾਰਵਿਪਨ੍ਨੋ ਹੋਤਿ, ਤਸ੍ਸੇਸੋ ਅਨੁਪਾਯੇਨ ਪਰਿਚਿਣ੍ਣੋ ਵਿਨਾਸਮੇਵ ਵਹਤੀਤਿ ਵਦਤਿ. ਧਾਰੇਤੁਮਾਰਹੋਤਿ ਧਾਰੇਤੁਂ ਅਰਹੋ. ਪਟਿਪਜ੍ਜ ਸਤਂ ਨਿਕ੍ਖਨ੍ਤਿ ਅਮ੍ਹਾਕਂ ਗੇਹੇ ਬਹੂ ਮਣੀ, ਮਯਮੇਤਂ ਗਹੇਤੁਂ ਜਾਨਾਮ. ਅਹਂ ਤੇ ਨਿਕ੍ਖਸਤਂ ਦਸ੍ਸਾਮਿ, ਤਂ ਪਟਿਪਜ੍ਜ, ਦੇਹਿ ਇਮਂ ਮਣਿਰਤਨਂ ਮਮਨ੍ਤਿ. ਤਸ੍ਸ ਹਿ ਗੇਹੇ ਏਕੋਪਿ ਸੁਵਣ੍ਣਨਿਕ੍ਖੋ ਨਤ੍ਥਿ. ਸੋ ਪਨ ਤਸ੍ਸ ਮਣਿਨੋ ਸਬ੍ਬਕਾਮਦਦਭਾਵਂ ਜਾਨਾਤਿ ¶ . ਤੇਨਸ੍ਸ ਏਤਦਹੋਸਿ ‘‘ਅਹਂ ਸਸੀਸਂ ਨ੍ਹਤ੍ਵਾ ਮਣਿਂ ਉਦਕੇਨ ਪਰਿਪ੍ਫੋਸਿਤ੍ਵਾ ‘ਨਿਕ੍ਖਸਤਂ ਮੇ ਦੇਹੀ’ਤਿ ਵਕ੍ਖਾਮਿ, ਅਥੇਸ ਮੇ ਦਸ੍ਸਤਿ, ਤਮਹਂ ਏਤਸ੍ਸ ਦਸ੍ਸਾਮੀ’’ਤਿ. ਤਸ੍ਮਾ ਸੂਰੋ ਹੁਤ੍ਵਾ ਏਵਮਾਹ.

ਤਤੋ ਅਲਮ੍ਪਾਯਨੋ ਗਾਥਮਾਹ –

੮੨੬.

‘‘ਨ ਚ ਮ੍ਯਾਯਂ ਮਣੀ ਕੇਯ੍ਯੋ, ਗੋਹਿ ਵਾ ਰਤਨੇਹਿ ਵਾ;

ਸੇਲੋ ਬ੍ਯਞ੍ਜਨਸਮ੍ਪਨ੍ਨੋ, ਨੇਵ ਕੇਯ੍ਯੋ ਮਣਿ ਮਮਾ’’ਤਿ.

ਤਤ੍ਥ ਨ ਚ ਮ੍ਯਾਯਨ੍ਤਿ ਅਯਂ ਮਣਿ ਮਮ ਸਨ੍ਤਕੋ ਕੇਨਚਿ ਵਿਕ੍ਕਿਣਿਤਬ੍ਬੋ ਨਾਮ ਨ ਹੋਤਿ. ਨੇਵ ਕੇਯ੍ਯੋਤਿ ਅਯਞ੍ਚ ਮਮ ਮਣਿ ਲਕ੍ਖਣਸਮ੍ਪਨ੍ਨੋ, ਤਸ੍ਮਾ ਨੇਵ ਕੇਯ੍ਯੋ ਕੇਨਚਿ ਵਤ੍ਥੁਨਾਪਿ ਵਿਕ੍ਕਿਣਿਤਬ੍ਬੋ ਨਾਮ ਨ ਹੋਤੀਤਿ.

ਨੇਸਾਦਬ੍ਰਾਹ੍ਮਣੋ ¶ ਆਹ –

੮੨੭.

‘‘ਨੋ ਚੇ ਤਯਾ ਮਣੀ ਕੇਯ੍ਯੋ, ਗੋਹਿ ਵਾ ਰਤਨੇਹਿ ਵਾ;

ਅਥ ਕੇਨ ਮਣੀ ਕੇਯ੍ਯੋ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

ਅਲਮ੍ਪਾਯਨੋ ਆਹ –

੮੨੮.

‘‘ਯੋ ਮੇ ਸਂਸੇ ਮਹਾਨਾਗਂ, ਤੇਜਸ੍ਸਿਂ ਦੁਰਤਿਕ੍ਕਮਂ;

ਤਸ੍ਸ ਦਜ੍ਜਂ ਇਮਂ ਸੇਲਂ, ਜਲਨ੍ਤਮਿਵ ਤੇਜਸਾ’’ਤਿ.

ਤਤ੍ਥ ਜਲਨ੍ਤਮਿਵ ਤੇਜਸਾਤਿ ਪਭਾਯ ਜਲਨ੍ਤਂ ਵਿਯ.

ਨੇਸਾਦਬ੍ਰਾਹ੍ਮਣੋ ¶ ਆਹ –

੮੨੯.

‘‘ਕੋ ਨੁ ਬ੍ਰਾਹ੍ਮਣਵਣ੍ਣੇਨ, ਸੁਪਣ੍ਣੋ ਪਤਤਂ ਵਰੋ;

ਨਾਗਂ ਜਿਗੀਸਮਨ੍ਵੇਸਿ, ਅਨ੍ਵੇਸਂ ਭਕ੍ਖਮਤ੍ਤਨੋ’’ਤਿ.

ਤਤ੍ਥ ¶ ਕੋ ਨੂਤਿ ਇਦਂ ਨੇਸਾਦਬ੍ਰਾਹ੍ਮਣੋ ‘‘ਅਤ੍ਤਨੋ ਭਕ੍ਖਂ ਅਨ੍ਵੇਸਨ੍ਤੇਨ ਗਰੁਲ਼ੇਨ ਭਵਿਤਬ੍ਬ’’ਨ੍ਤਿ ਚਿਨ੍ਤੇਤ੍ਵਾ ਏਵਮਾਹ.

ਅਲਮ੍ਪਾਯਨੋ ਏਵਮਾਹ –

੮੩੦.

‘‘ਨਾਹਂ ਦਿਜਾਧਿਪੋ ਹੋਮਿ, ਅਦਿਟ੍ਠੋ ਗਰੁਲ਼ੋ ਮਯਾ;

ਆਸੀਵਿਸੇਨ ਵਿਤ੍ਤੋਤਿ, ਵੇਜ੍ਜੋ ਬ੍ਰਾਹ੍ਮਣ ਮਂ ਵਿਦੂ’’ਤਿ.

ਤਤ੍ਥ ਮਂ ਵਿਦੂਤਿ ਮਂ ‘‘ਏਸ ਆਸੀਵਿਸੇਨ ਵਿਤ੍ਤਕੋ ਅਲਮ੍ਪਾਯਨੋ ਨਾਮ ਵੇਜ੍ਜੋ’’ਤਿ ਜਾਨਨ੍ਤਿ.

ਨੇਸਾਦਬ੍ਰਾਹ੍ਮਣੋ ਆਹ –

੮੩੧.

‘‘ਕਿਂ ਨੁ ਤੁਯ੍ਹਂ ਫਲਂ ਅਤ੍ਥਿ, ਕਿਂ ਸਿਪ੍ਪਂ ਵਿਜ੍ਜਤੇ ਤਵ;

ਕਿਸ੍ਮਿਂ ਵਾ ਤ੍ਵਂ ਪਰਤ੍ਥਦ੍ਧੋ, ਉਰਗਂ ਨਾਪਚਾਯਸੀ’’ਤਿ.

ਤਤ੍ਥ ਕਿਸ੍ਮਿਂ ਵਾ ਤ੍ਵਂ ਪਰਤ੍ਥਦ੍ਧੋਤਿ ਤ੍ਵਂ ਕਿਸ੍ਮਿਂ ਵਾ ਉਪਤ੍ਥਦ੍ਧੋ ਹੁਤ੍ਵਾ, ਕਿਂ ਨਿਸ੍ਸਯਂ ਕਤ੍ਵਾ ਉਰਗਂ ਆਸੀਵਿਸਂ ਨ ਅਪਚਾਯਸਿ ਜੇਟ੍ਠਕਂ ਅਕਤ੍ਵਾ ਅਵਜਾਨਾਸੀਤਿ ਪੁਚ੍ਛਤਿ.

ਸੋ ਅਤ੍ਤਨੋ ਬਲਂ ਦੀਪੇਨ੍ਤੋ ਆਹ –

੮੩੨.

‘‘ਆਰਞ੍ਞਿਕਸ੍ਸ ਇਸਿਨੋ, ਚਿਰਰਤ੍ਤਂ ਤਪਸ੍ਸਿਨੋ;

ਸੁਪਣ੍ਣੋ ਕੋਸਿਯਸ੍ਸਕ੍ਖਾ, ਵਿਸਵਿਜ੍ਜਂ ਅਨੁਤ੍ਤਰਂ.

੮੩੩.

‘‘ਤਂ ਭਾਵਿਤਤ੍ਤਞ੍ਞਤਰਂ, ਸਮ੍ਮਨ੍ਤਂ ਪਬ੍ਬਤਨ੍ਤਰੇ;

ਸਕ੍ਕਚ੍ਚਂ ਤਂ ਉਪਟ੍ਠਾਸਿਂ, ਰਤ੍ਤਿਨ੍ਦਿਵਮਤਨ੍ਦਿਤੋ.

੮੩੪.

‘‘ਸੋ ਤਦਾ ਪਰਿਚਿਣ੍ਣੋ ਮੇ, ਵਤ੍ਤਵਾ ਬ੍ਰਹ੍ਮਚਰਿਯਵਾ;

ਦਿਬ੍ਬਂ ਪਾਤੁਕਰੀ ਮਨ੍ਤਂ, ਕਾਮਸਾ ਭਗਵਾ ਮਮ.

੮੩੫.

‘‘ਤ੍ਯਾਹਂ ¶ ¶ ਮਨ੍ਤੇ ਪਰਤ੍ਥਦ੍ਧੋ, ਨਾਹਂ ਭਾਯਾਮਿ ਭੋਗਿਨਂ;

ਆਚਰਿਯੋ ਵਿਸਘਾਤਾਨਂ, ਅਲਮ੍ਪਾਨੋਤਿ ਮਂ ਵਿਦੂ’’ਤਿ.

ਤਤ੍ਥ ¶ ਕੋਸਿਯਸ੍ਸਕ੍ਖਾਤਿ ਕੋਸਿਯਗੋਤ੍ਤਸ੍ਸ ਇਸਿਨੋ ਸੁਪਣ੍ਣੋ ਆਚਿਕ੍ਖਿ. ਤੇਨ ਅਕ੍ਖਾਤਕਾਰਣਂ ਪਨ ਸਬ੍ਬਂ ਵਿਤ੍ਥਾਰੇਤ੍ਵਾ ਕਥੇਤਬ੍ਬਂ. ਭਾਵਿਤਤ੍ਤਞ੍ਞਤਰਨ੍ਤਿ ਭਾਵਿਤਤ੍ਤਾਨਂ ਇਸੀਨਂ ਅਞ੍ਞਤਰਂ. ਸਮ੍ਮਨ੍ਤਨ੍ਤਿ ਵਸਨ੍ਤਂ. ਕਾਮਸਾਤਿ ਅਤ੍ਤਨੋ ਇਚ੍ਛਾਯ. ਮਮਾਤਿ ਤਂ ਮਨ੍ਤਂ ਮਯ੍ਹਂ ਪਕਾਸੇਸਿ. ਤ੍ਯਾਹਂ ਮਨ੍ਤੇ, ਪਰਤ੍ਥਦ੍ਧੋਤਿ ਅਹਂ ਤੇ ਮਨ੍ਤੇ ਉਪਤ੍ਥਦ੍ਧੋ ਨਿਸ੍ਸਿਤੋ. ਭੋਗਿਨਨ੍ਤਿ ਨਾਗਾਨਂ. ਵਿਸਘਾਤਾਨਨ੍ਤਿ ਵਿਸਘਾਤਕਵੇਜ੍ਜਾਨਂ.

ਤਂ ਸੁਤ੍ਵਾ ਨੇਸਾਦਬ੍ਰਾਹ੍ਮਣੋ ਚਿਨ੍ਤੇਸਿ ‘‘ਅਯਂ ਅਲਮ੍ਪਾਯਨੋ ਯ੍ਵਾਸ੍ਸ ਨਾਗਂ ਦਸ੍ਸੇਤਿ, ਤਸ੍ਸ ਮਣਿਰਤਨਂ ਦਸ੍ਸਤਿ, ਭੂਰਿਦਤ੍ਤਮਸ੍ਸ ਦਸ੍ਸੇਤ੍ਵਾ ਮਣਿਂ ਗਣ੍ਹਿਸ੍ਸਾਮੀ’’ਤਿ. ਤਤੋ ਪੁਤ੍ਤੇਨ ਸਦ੍ਧਿਂ ਮਨ੍ਤੇਨ੍ਤੋ ਗਾਥਮਾਹ –

੮੩੬.

‘‘ਗਣ੍ਹਾਮਸੇ ਮਣਿਂ ਤਾਤ, ਸੋਮਦਤ੍ਤ ਵਿਜਾਨਹਿ;

ਮਾ ਦਣ੍ਡੇਨ ਸਿਰਿਂ ਪਤ੍ਤਂ, ਕਾਮਸਾ ਪਜਹਿਮ੍ਹਸੇ’’ਤਿ.

ਤਤ੍ਥ ਗਣ੍ਹਾਮਸੇਤਿ ਗਣ੍ਹਾਮ. ਕਾਮਸਾਤਿ ਅਤ੍ਤਨੋ ਰੁਚਿਯਾ ਦਣ੍ਡੇਨ ਪਹਰਿਤ੍ਵਾ ਮਾ ਜਹਾਮ.

ਸੋਮਦਤ੍ਤੋ ਆਹ –

੮੩੭.

‘‘ਸਕਂ ਨਿਵੇਸਨਂ ਪਤ੍ਤਂ, ਯੋ ਤਂ ਬ੍ਰਾਹ੍ਮਣ ਪੂਜਯਿ;

ਏਵਂ ਕਲ੍ਯਾਣਕਾਰਿਸ੍ਸ, ਕਿਂ ਮੋਹਾ ਦੁਬ੍ਭਿਮਿਚ੍ਛਸਿ.

੮੩੮.

‘‘ਸਚੇ ਤ੍ਵਂ ਧਨਕਾਮੋਸਿ, ਭੂਰਿਦਤ੍ਤੋ ਪਦਸ੍ਸਤਿ;

ਤਮੇਵ ਗਨ੍ਤ੍ਵਾ ਯਾਚਸ੍ਸੁ, ਬਹੁਂ ਦਸ੍ਸਤਿ ਤੇ ਧਨ’’ਨ੍ਤਿ.

ਤਤ੍ਥ ਪੂਜਯੀਤਿ ਦਿਬ੍ਬਕਾਮੇਹਿ ਪੂਜਯਿਤ੍ਥ. ਦੁਬ੍ਭਿਮਿਚ੍ਛਸੀਤਿ ਕਿਂ ਤਥਾਰੂਪਸ੍ਸ ਮਿਤ੍ਤਸ੍ਸ ਦੁਬ੍ਭਿਕਮ੍ਮਂ ਕਾਤੁਂ ਇਚ੍ਛਸਿ ਤਾਤਾਤਿ.

ਬ੍ਰਾਹ੍ਮਣੋ ਆਹ –

੮੩੯.

‘‘ਹਤ੍ਥਗਤਂ ¶ ਪਤ੍ਤਗਤਂ, ਨਿਕਿਣ੍ਣਂ ਖਾਦਿਤੁਂ ਵਰਂ;

ਮਾ ਨੋ ਸਨ੍ਦਿਟ੍ਠਿਕੋ ਅਤ੍ਥੋ, ਸੋਮਦਤ੍ਤ ਉਪਚ੍ਚਗਾ’’ਤਿ.

ਤਤ੍ਥ ਹਤ੍ਥਗਤਨ੍ਤਿ ਤਾਤ ਸੋਮਦਤ੍ਤ, ਤ੍ਵਂ ਤਰੁਣਕੋ ਲੋਕਪਵਤ੍ਤਿਂ ਨ ਜਾਨਾਸਿ. ਯਞ੍ਹਿ ਹਤ੍ਥਗਤਂ ਵਾ ਹੋਤਿ ਪਤ੍ਤਗਤਂ ਵਾ ਪੁਰਤੋ ਵਾ ਨਿਕਿਣ੍ਣਂ ਠਪਿਤਂ, ਤਦੇਵ ਮੇ ਖਾਦਿਤੁਂ ਵਰਂ, ਨ ਦੂਰੇ ਠਿਤਂ.

ਸੋਮਦਤ੍ਤੋ ¶ ¶ ਆਹ –

੮੪੦.

‘‘ਪਚ੍ਚਤਿ ਨਿਰਯੇ ਘੋਰੇ, ਮਹਿਸ੍ਸਮਪਿ ਵਿਵਰਤਿ;

ਮਿਤ੍ਤਦੁਬ੍ਭੀ ਹਿਤਚ੍ਚਾਗੀ, ਜੀਵਰੇਵਾਪਿ ਸੁਸ੍ਸਤਿ.

੮੪੧.

‘‘ਸਚੇ ਤ੍ਵਂ ਧਨਕਾਮੋਸਿ, ਭੂਰਿਦਤ੍ਤੋ ਪਦਸ੍ਸਤਿ;

ਮਞ੍ਞੇ ਅਤ੍ਤਕਤਂ ਵੇਰਂ, ਨ ਚਿਰਂ ਵੇਦਯਿਸ੍ਸਸੀ’’ਤਿ.

ਤਤ੍ਥ ਮਹਿਸ੍ਸਮਪਿ ਵਿਵਰਤੀਤਿ ਤਾਤ, ਮਿਤ੍ਤਦੁਬ੍ਭਿਨੋ ਜੀਵਨ੍ਤਸ੍ਸੇਵ ਪਥਵੀ ਭਿਜ੍ਜਿਤ੍ਵਾ ਵਿਵਰਂ ਦੇਤਿ. ਹਿਤਚ੍ਚਾਗੀਤਿ ਅਤ੍ਤਨੋ ਹਿਤਪਰਿਚ੍ਚਾਗੀ. ਜੀਵਰੇਵਾਪਿ ਸੁਸ੍ਸਤੀਤਿ ਜੀਵਮਾਨੋਵ ਸੁਸ੍ਸਤਿ, ਮਨੁਸ੍ਸਪੇਤੋ ਹੋਤਿ. ਅਤ੍ਤਕਤਂ ਵੇਰਨ੍ਤਿ ਅਤ੍ਤਨਾ ਕਤਂ ਪਾਪਂ. ਨ ਚਿਰਨ੍ਤਿ ਨ ਚਿਰਸ੍ਸੇਵ ਵੇਦਯਿਸ੍ਸਸੀਤਿ ਮਞ੍ਞਾਮਿ.

ਬ੍ਰਾਹ੍ਮਣੋ ਆਹ –

੮੪੨.

‘‘ਮਹਾਯਞ੍ਞਂ ਯਜਿਤ੍ਵਾਨ, ਏਵਂ ਸੁਜ੍ਝਨ੍ਤਿ ਬ੍ਰਾਹ੍ਮਣਾ;

ਮਹਾਯਞ੍ਞਂ ਯਜਿਸ੍ਸਾਮ, ਏਵਂ ਮੋਕ੍ਖਾਮ ਪਾਪਕਾ’’ਤਿ.

ਤਤ੍ਥ ਸੁਜ੍ਝਨ੍ਤੀਤਿ ਤਾਤ ਸੋਮਦਤ੍ਤ, ਤ੍ਵਂ ਦਹਰੋ ਨ ਕਿਞ੍ਚਿ ਜਾਨਾਸਿ, ਬ੍ਰਾਹ੍ਮਣਾ ਨਾਮ ਯਂ ਕਿਞ੍ਚਿ ਪਾਪਂ ਕਤ੍ਵਾ ਯਞ੍ਞੇਨ ਸੁਜ੍ਝਨ੍ਤੀਤਿ ਦਸ੍ਸੇਨ੍ਤੋ ਏਵਮਾਹ.

ਸੋਮਦਤ੍ਤੋ ਆਹ –

੮੪੩.

‘‘ਹਨ੍ਦ ¶ ਦਾਨਿ ਅਪਾਯਾਮਿ, ਨਾਹਂ ਅਜ੍ਜ ਤਯਾ ਸਹ;

ਪਦਮ੍ਪੇਕਂ ਨ ਗਚ੍ਛੇਯ੍ਯਂ, ਏਵਂ ਕਿਬ੍ਬਿਸਕਾਰਿਨਾ’’ਤਿ.

ਤਤ੍ਥ ਅਪਾਯਾਮੀਤਿ ਅਪਗਚ੍ਛਾਮਿ, ਪਲਾਯਾਮੀਤਿ ਅਤ੍ਥੋ.

ਏਵਞ੍ਚ ਪਨ ਵਤ੍ਵਾ ਪਣ੍ਡਿਤੋ ਮਾਣਵੋ ਪਿਤਰਂ ਅਤ੍ਤਨੋ ਵਚਨਂ ਗਾਹਾਪੇਤੁਂ ਅਸਕ੍ਕੋਨ੍ਤੋ ਮਹਨ੍ਤੇਨ ਸਦ੍ਦੇਨ ਦੇਵਤਾ ਉਜ੍ਝਾਪੇਤ੍ਵਾ ‘‘ਏਵਰੂਪੇਨ ਪਾਪਕਾਰਿਨਾ ਸਦ੍ਧਿਂ ਨ ਗਮਿਸ੍ਸਾਮੀ’’ਤਿ ਪਿਤੁ ਪਸ੍ਸਨ੍ਤਸ੍ਸੇਵ ਪਲਾਯਿਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕੇ ਉਪ੍ਪਜ੍ਜਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੮੪੪.

‘‘ਇਦਂ ¶ ਵਤ੍ਵਾਨ ਪਿਤਰਂ, ਸੋਮਦਤ੍ਤੋ ਬਹੁਸ੍ਸੁਤੋ;

ਉਜ੍ਝਾਪੇਤ੍ਵਾਨ ਭੂਤਾਨਿ, ਤਮ੍ਹਾ ਠਾਨਾ ਅਪਕ੍ਕਮੀ’’ਤਿ.

ਨੇਸਾਦਬ੍ਰਾਹ੍ਮਣੋ ‘‘ਸੋਮਦਤ੍ਤੋ ਠਪੇਤ੍ਵਾ ਅਤ੍ਤਨੋ ਗੇਹਂ ਕੁਹਿਂ ਗਮਿਸ੍ਸਤੀ’’ਤਿ ਚਿਨ੍ਤੇਨ੍ਤੋ ਅਲਮ੍ਪਾਯਨਂ ਥੋਕਂ ਅਨਤ੍ਤਮਨਂ ਦਿਸ੍ਵਾ ‘‘ਅਲਮ੍ਪਾਯਨ ¶ , ਮਾ ਚਿਨ੍ਤਯਿ, ਦਸ੍ਸੇਸ੍ਸਾਮਿ ਤੇ ਭੂਰਿਦਤ੍ਤ’’ਨ੍ਤਿ ਤਂ ਆਦਾਯ ਨਾਗਰਾਜਸ੍ਸ ਉਪੋਸਥਕਰਣਟ੍ਠਾਨਂ ਗਨ੍ਤ੍ਵਾ ਵਮ੍ਮਿਕਮਤ੍ਥਕੇ ਭੋਗੇ ਆਭੁਜਿਤ੍ਵਾ ਨਿਪਨ੍ਨਂ ਨਾਗਰਾਜਾਨਂ ਦਿਸ੍ਵਾ ਅਵਿਦੂਰੇ ਠਿਤੋ ਹਤ੍ਥਂ ਪਸਾਰੇਤ੍ਵਾ ਦ੍ਵੇ ਗਾਥਾ ਅਭਾਸਿ –

੮੪੫.

‘‘ਗਣ੍ਹਾਹੇਤਂ ਮਹਾਨਾਗਂ, ਆਹਰੇਤਂ ਮਣਿਂ ਮਮ;

ਇਨ੍ਦਗੋਪਕਵਣ੍ਣਾਭੋ, ਯਸ੍ਸ ਲੋਹਿਤਕੋ ਸਿਰੋ.

੮੪੬.

‘‘ਕਪ੍ਪਾਸਪਿਚੁਰਾਸੀਵ, ਏਸੋ ਕਾਯੋ ਪਦਿਸ੍ਸਤਿ;

ਵਮ੍ਮਿਕਗ੍ਗਗਤੋ ਸੇਤਿ, ਤਂ ਤ੍ਵਂ ਗਣ੍ਹਾਹਿ ਬ੍ਰਾਹ੍ਮਣਾ’’ਤਿ.

ਤਤ੍ਥ ਇਨ੍ਦਗੋਪਕਵਣ੍ਣਾਭੋਤਿ ਇਨ੍ਦਗੋਪਕਵਣ੍ਣੋ ਵਿਯ ਆਭਾਸਤਿ. ਕਪ੍ਪਾਸਪਿਚੁਰਾਸੀਵਾਤਿ ਸੁਵਿਹਿਤਸ੍ਸ ਕਪ੍ਪਾਸਪਿਚੁਨੋ ਰਾਸਿ ਵਿਯ.

ਅਥ ਮਹਾਸਤ੍ਤੋ ਅਕ੍ਖੀਨਿ ਉਮ੍ਮੀਲੇਤ੍ਵਾ ਨੇਸਾਦਬ੍ਰਾਹ੍ਮਣਂ ਦਿਸ੍ਵਾ ‘‘ਅਯਂ ਉਪੋਸਥਸ੍ਸ ਮੇ ਅਨ੍ਤਰਾਯਂ ਕਰੇਯ੍ਯਾਤਿ ਇਮਂ ਨਾਗਭਵਨਂ ਨੇਤ੍ਵਾ ਮਹਾਸਮ੍ਪਤ੍ਤਿਯਾ ਪਤਿਟ੍ਠਾਪੇਸਿਂ. ਮਯਾ ਦੀਯਮਾਨਂ ਮਣਿਂ ਗਣ੍ਹਿਤੁਂ ਨ ਇਚ੍ਛਿ. ਇਦਾਨਿ ਪਨ ਅਹਿਤੁਣ੍ਡਿਕਂ ਗਹੇਤ੍ਵਾ ਆਗਚ੍ਛਤਿ. ਸਚਾਹਂ ਇਮਸ੍ਸ ਮਿਤ੍ਤਦੁਬ੍ਭਿਨੋ ¶ ਕੁਜ੍ਝੇਯ੍ਯਂ, ਸੀਲਂ ਮੇ ਖਣ੍ਡਂ ਭਵਿਸ੍ਸਤਿ. ਮਯਾ ਖੋ ਪਨ ਪਠਮਞ੍ਞੇਵ ਚਤੁਰਙ੍ਗਸਮਨ੍ਨਾਗਤੋ ਉਪੋਸਥੋ ਅਧਿਟ੍ਠਿਤੋ, ਸੋ ਯਥਾਧਿਟ੍ਠਿਤੋਵ ਹੋਤੁ, ਅਲਮ੍ਪਾਯਨੋ ਮਂ ਛਿਨ੍ਦਤੁ ਵਾ ਪਚਤੁ ਵਾ, ਸੂਲੇਨ ਵਾ ਵਿਜ੍ਝਤੁ, ਨੇਵਸ੍ਸ ਕੁਜ੍ਝਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਸਚੇ ਖੋ ਪਨਾਹਂ ਇਮੇ ਓਲੋਕੇਸ੍ਸਾਮਿ, ਭਸ੍ਮਾ ਭਵੇਯ੍ਯੁਂ. ਮਂ ਪੋਥੇਨ੍ਤੇਪਿ ਨ ਕੁਜ੍ਝਿਸ੍ਸਾਮਿ ਨ ਓਲੋਕੇਸ੍ਸਾਮੀ’’ਤਿ ਅਕ੍ਖੀਨਿ ਨਿਮੀਲੇਤ੍ਵਾ ਅਧਿਟ੍ਠਾਨਪਾਰਮਿਂ ਪੁਰੇਚਾਰਿਕਂ ਕਤ੍ਵਾ ਭੋਗਨ੍ਤਰੇ ਸੀਸਂ ਪਕ੍ਖਿਪਿਤ੍ਵਾ ਨਿਚ੍ਚਲੋਵ ਹੁਤ੍ਵਾ ਨਿਪਜ੍ਜਿ. ਨੇਸਾਦਬ੍ਰਾਹ੍ਮਣੋਪਿ ‘‘ਭੋ ਅਲਮ੍ਪਾਯਨ, ਇਮਂ ਨਾਗਂ ਗਣ੍ਹਾਹਿ, ਦੇਹਿ ਮੇ ਮਣਿ’’ਨ੍ਤਿ ਆਹ. ਅਲਮ੍ਪਾਯਨੋ ਨਾਗਂ ਦਿਸ੍ਵਾ ਤੁਟ੍ਠੋ ਮਣਿਂ ਕਿਸ੍ਮਿਞ੍ਚਿ ਅਗਣੇਤ੍ਵਾ ‘‘ਗਣ੍ਹ, ਬ੍ਰਾਹ੍ਮਣਾ’’ਤਿ ਤਸ੍ਸ ਹਤ੍ਥੇ ਖਿਪਿ. ਸੋ ਤਸ੍ਸ ਹਤ੍ਥਤੋ ਗਲ਼ਿਤ੍ਵਾ ਪਥਵਿਯਂ ਪਤਿ. ਪਤਿਤਮਤ੍ਤੋਵ ਪਥਵਿਂ ਪਵਿਸਿਤ੍ਵਾ ਨਾਗਭਵਨਮੇਵ ਗਤੋ.

ਬ੍ਰਾਹ੍ਮਣੋ ¶ ਮਣਿਰਤਨਤੋ ਭੂਰਿਦਤ੍ਤੇਨ ਸਦ੍ਧਿਂ ਮਿਤ੍ਤਭਾਵਤੋ ਪੁਤ੍ਤਤੋਤਿ ਤੀਹਿ ਪਰਿਹਾਯਿ. ਸੋ ‘‘ਨਿਪ੍ਪਚ੍ਚਯੋ ਜਾਤੋਮ੍ਹਿ, ਪੁਤ੍ਤਸ੍ਸ ਮੇ ਵਚਨਂ ਨ ਕਤ’’ਨ੍ਤਿ ਪਰਿਦੇਵਨ੍ਤੋ ਗੇਹਂ ਅਗਮਾਸਿ. ਅਲਮ੍ਪਾਯਨੋਪਿ ¶ ਦਿਬ੍ਬੋਸਧੇਹਿ ਅਤ੍ਤਨੋ ਸਰੀਰਂ ਮਕ੍ਖੇਤ੍ਵਾ ਥੋਕਂ ਖਾਦਿਤ੍ਵਾ ਅਤ੍ਤਨੋ ਕਾਯਂ ਪਰਿਪ੍ਫੋਸੇਤ੍ਵਾ ਦਿਬ੍ਬਮਨ੍ਤਂ ਜਪ੍ਪਨ੍ਤੋ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ਨਙ੍ਗੁਟ੍ਠੇ ਗਹੇਤ੍ਵਾ ਆਕਡ੍ਢਿਤ੍ਵਾ ਸੀਸਂ ਦਲ਼੍ਹਂ ਗਣ੍ਹਨ੍ਤੋ ਮੁਖਮਸ੍ਸ ਵਿਵਰਿਤ੍ਵਾ ਓਸਧਂ ਖਾਦਿਤ੍ਵਾ ਮੁਖੇ ਖੇਲ਼ਂ ਓਪਿ. ਸੁਚਿਜਾਤਿਕੋ ਨਾਗਰਾਜਾ ਸੀਲਭੇਦਭਯੇਨ ਅਕੁਜ੍ਝਿਤ੍ਵਾ ਅਕ੍ਖੀਨਿਪਿ ਨ ਉਮ੍ਮੀਲੇਸਿ. ਅਥ ਨਂ ਓਸਧਮਨ੍ਤਂ ਕਤ੍ਵਾ ਨਙ੍ਗੁਟ੍ਠੇ ਗਹੇਤ੍ਵਾ ਹੇਟ੍ਠਾਸੀਸਂ ਕਤ੍ਵਾ ਸਞ੍ਚਾਲੇਤ੍ਵਾ ਗਹਿਤਭੋਜਨਂ ਛਡ੍ਡਾਪੇਤ੍ਵਾ ਭੂਮਿਯਂ ਦੀਘਤੋ ਨਿਪਜ੍ਜਾਪੇਤ੍ਵਾ ਮਸੂਰਕਂ ਮਦ੍ਦਨ੍ਤੋ ਵਿਯ ਪਾਦੇਹਿ ਮਦ੍ਦਿਤ੍ਵਾ ਅਟ੍ਠੀਨਿ ਚੁਣ੍ਣਿਯਮਾਨਾਨਿ ਵਿਯ ਅਹੇਸੁਂ. ਪੁਨ ਨਙ੍ਗੁਟ੍ਠੇ ਗਹੇਤ੍ਵਾ ਦੁਸ੍ਸਂ ਪੋਥੇਨ੍ਤੋ ਵਿਯ ਪੋਥੇਸਿ. ਮਹਾਸਤ੍ਤੋ ਏਵਰੂਪਂ ਦੁਕ੍ਖਂ ਅਨੁਭਵਨ੍ਤੋਪਿ ਨੇਵ ਕੁਜ੍ਝਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੮੪੭.

‘‘ਅਥੋਸਧੇਹਿ ਦਿਬ੍ਬੇਹਿ, ਜਪ੍ਪਂ ਮਨ੍ਤਪਦਾਨਿ ਚ;

ਏਵਂ ਤਂ ਅਸਕ੍ਖਿ ਸਤ੍ਥੁਂ, ਕਤ੍ਵਾ ਪਰਿਤ੍ਤਮਤ੍ਤਨੋ’’ਤਿ.

ਤਤ੍ਥ ਅਸਕ੍ਖੀਤਿ ਸਕ੍ਖਿ. ਸਤ੍ਥੁਨ੍ਤਿ ਗਣ੍ਹਿਤੁਂ.

ਇਤਿ ਸੋ ਮਹਾਸਤ੍ਤਂ ਦੁਬ੍ਬਲਂ ਕਤ੍ਵਾ ਵਲ੍ਲੀਹਿ ਪੇਲ਼ਂ ਸਜ੍ਜੇਤ੍ਵਾ ਮਹਾਸਤ੍ਤਂ ਤਤ੍ਥ ਪਕ੍ਖਿਪਿ, ਸਰੀਰਸ੍ਸ ਮਹਨ੍ਤਤਾਯ ਤਤ੍ਥ ਨ ਪਵਿਸਤਿ. ਅਥ ਨਂ ਪਣ੍ਹਿਯਾ ਕੋਟ੍ਟੇਨ੍ਤੋ ਪਵੇਸੇਤ੍ਵਾ ਪੇਲ਼ਂ ਆਦਾਯ ਏਕਂ ਗਾਮਂ ਗਨ੍ਤ੍ਵਾ ਗਾਮਮਜ੍ਝੇ ਓਤਾਰੇਤ੍ਵਾ ‘‘ਨਾਗਸ੍ਸ ਨਚ੍ਚਂ ਦਟ੍ਠੁਕਾਮਾ ਆਗਚ੍ਛਨ੍ਤੂ’’ਤਿ ਸਦ੍ਦਮਕਾਸਿ. ਸਕਲਗਾਮਵਾਸਿਨੋ ਸਨ੍ਨਿਪਤਿਂਸੁ. ਤਸ੍ਮਿਂ ਖਣੇ ਅਲਮ੍ਪਾਯਨੋ ‘‘ਨਿਕ੍ਖਮ ਮਹਾਨਾਗਾ’’ਤਿ ¶ ਆਹ. ਮਹਾਸਤ੍ਤੋ ਚਿਨ੍ਤੇਸਿ ‘‘ਅਜ੍ਜ ਮਯਾ ਪਰਿਸਂ ਤੋਸੇਨ੍ਤੇਨ ਕੀਲ਼ਿਤੁਂ ਵਟ੍ਟਤਿ. ਏਵਂ ਅਲਮ੍ਪਾਯਨੋ ਬਹੁਂ ਧਨਂ ਲਭਿਤ੍ਵਾ ਤੁਟ੍ਠੋ ਮਂ ਵਿਸ੍ਸਜ੍ਜੇਸ੍ਸਤਿ. ਯਂ ਯਂ ਏਸ ਮਂ ਕਾਰੇਤਿ, ਤਂ ਤਂ ਕਰਿਸ੍ਸਾਮੀ’’ਤਿ. ਅਥ ਨਂ ਸੋ ਪੇਲ਼ਤੋ ਨੀਹਰਿਤ੍ਵਾ ‘‘ਮਹਾ ਹੋਹੀ’’ਤਿ ਆਹ. ਸੋ ਮਹਾ ਅਹੋਸਿ, ‘‘ਖੁਦ੍ਦਕੋ, ਵਟ੍ਟੋ, ਵਮ੍ਮਿਤੋ, ਏਕਪ੍ਫਣੋ, ਦ੍ਵਿਫਣੋ, ਤਿਪ੍ਫਣੋ, ਚਤੁਪ੍ਫਣੋ, ਪਞ੍ਚ, ਛ, ਸਤ੍ਤ, ਅਟ੍ਠ, ਨਵ, ਦਸ ਵੀਸਤਿ, ਤਿਂਸਤਿ, ਚਤ੍ਤਾਲੀਸ, ਪਣ੍ਣਾਸਪ੍ਫਣੋ, ਸਤਪ੍ਫਣੋ, ਉਚ੍ਚੋ, ਨੀਚੋ, ਦਿਸ੍ਸਮਾਨਕਾਯੋ, ਅਦਿਸ੍ਸਮਾਨਕਾਯੋ, ਦਿਸ੍ਸਮਾਨਉਪਡ੍ਢਕਾਯੋ ¶ , ਨੀਲੋ, ਪੀਤੋ, ਲੋਹਿਤੋ, ਓਦਾਤੋ, ਮਞ੍ਜਟ੍ਠਿਕੋ ਹੋਹਿ, ਅਗ੍ਗਿਜਾਲਂ ਵਿਸ੍ਸਜ੍ਜੇਹਿ, ਉਦਕਂ, ਧੂਮਂ ਵਿਸ੍ਸਜ੍ਜੇਹੀ’’ਤਿ. ਮਹਾਸਤ੍ਤੋ ਇਮੇਸੁਪਿ ਆਕਾਰੇਸੁ ਵੁਤ੍ਤਵੁਤ੍ਤੇ ¶ ਅਤ੍ਤਭਾਵੇ ਨਿਮ੍ਮਿਨਿਤ੍ਵਾ ਨਚ੍ਚਂ ਦਸ੍ਸੇਸਿ. ਤਂ ਦਿਸ੍ਵਾ ਕੋਚਿ ਅਸ੍ਸੂਨਿ ਸਨ੍ਧਾਰੇਤੁਂ ਨਾਸਕ੍ਖਿ.

ਮਨੁਸ੍ਸਾ ਬਹੂਨਿ ਹਿਰਞ੍ਞਸੁਵਣ੍ਣਵਤ੍ਥਾਲਙ੍ਕਾਰਾਦੀਨਿ ਅਦਂਸੁ. ਇਤਿ ਤਸ੍ਮਿਂ ਗਾਮੇ ਸਹਸ੍ਸਮਤ੍ਤਂ ਲਭਿ. ਸੋ ਕਿਞ੍ਚਾਪਿ ਮਹਾਸਤ੍ਤਂ ਗਣ੍ਹਨ੍ਤੋ ‘‘ਸਹਸ੍ਸਂ ਲਭਿਤ੍ਵਾ ਤਂ ਵਿਸ੍ਸਜ੍ਜੇਸ੍ਸਾਮੀ’’ਤਿ ਆਹ, ਤਂ ਪਨ ਧਨਂ ਲਭਿਤ੍ਵਾ ‘‘ਗਾਮਕੇਪਿ ਤਾਵ ਮਯਾ ਏਤ੍ਤਕਂ ਧਨਂ ਲਦ੍ਧਂ, ਨਗਰੇ ਕਿਰ ਬਹੁਂ ਲਭਿਸ੍ਸਾਮੀ’’ਤਿ ਧਨਲੋਭੇਨ ਤਂ ਨ ਮੁਞ੍ਚਿ. ਸੋ ਤਸ੍ਮਿਂ ਗਾਮੇ ਕੁਟੁਮ੍ਬਂ ਸਣ੍ਠਪੇਤ੍ਵਾ ਰਤਨਮਯਂ ਪੇਲ਼ਂ ਕਾਰੇਤ੍ਵਾ ਤਤ੍ਥ ਮਹਾਸਤ੍ਤਂ ਪਕ੍ਖਿਪਿਤ੍ਵਾ ਸੁਖਯਾਨਕਂ ਆਰੁਯ੍ਹ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿਤ੍ਵਾ ਤਂ ਗਾਮਨਿਗਮਾਦੀਸੁ ਕੀਲ਼ਾਪੇਨ੍ਤੋ ਅਨੁਪੁਬ੍ਬੇਨ ਬਾਰਾਣਸਿਂ ਪਾਪੁਣਿ. ਨਾਗਰਾਜਸ੍ਸ ਪਨ ਮਧੁਲਾਜੇ ਦੇਤਿ, ਮਣ੍ਡੂਕੇ ਮਾਰੇਤ੍ਵਾ ਦੇਤਿ, ਸੋ ਗੋਚਰਂ ਨ ਗਣ੍ਹਾਤਿ ਅਵਿਸ੍ਸਜ੍ਜਨਭਯੇਨ. ਗੋਚਰਂ ਅਗ੍ਗਣ੍ਹਨ੍ਤਮ੍ਪਿ ਪੁਨ ਨਂ ਚਤ੍ਤਾਰੋ ਦ੍ਵਾਰਗਾਮੇ ਆਦਿਂ ਕਤ੍ਵਾ ਤਤ੍ਥ ਤਤ੍ਥ ਮਾਸਮਤ੍ਤਂ ਕੀਲ਼ਾਪੇਸਿ. ਪਨ੍ਨਰਸਉਪੋਸਥਦਿਵਸੇ ਪਨ ‘‘ਅਜ੍ਜ ਤੁਮ੍ਹਾਕਂ ਸਨ੍ਤਿਕੇ ਕੀਲ਼ਾਪੇਸ੍ਸਾਮੀ’’ਤਿ ਰਞ੍ਞੋ ਆਰੋਚਾਪੇਸਿ. ਰਾਜਾ ਨਗਰੇ ਭੇਰਿਂ ਚਰਾਪੇਤ੍ਵਾ ਮਹਾਜਨਂ ਸਨ੍ਨਿਪਾਤਾਪੇਸਿ. ਰਾਜਙ੍ਗਣੇ ਮਞ੍ਚਾਤਿਮਞ੍ਚਂ ਬਨ੍ਧਿਂਸੁ.

ਕੀਲ਼ਨਖਣ੍ਡਂ ਨਿਟ੍ਠਿਤਂ.

ਨਗਰਪਵੇਸਨਕਣ੍ਡਂ

ਅਲਮ੍ਪਾਯਨੇਨ ਪਨ ਬੋਧਿਸਤ੍ਤਸ੍ਸ ਗਹਿਤਦਿਵਸੇਯੇਵ ਮਹਾਸਤ੍ਤਸ੍ਸ ਮਾਤਾ ਸੁਪਿਨਨ੍ਤੇ ਅਦ੍ਦਸ ਕਾਲ਼ੇਨ ਰਤ੍ਤਕ੍ਖਿਨਾ ਪੁਰਿਸੇਨ ਅਸਿਨਾ ਦਕ੍ਖਿਣਬਾਹੁਂ ਛਿਨ੍ਦਿਤ੍ਵਾ ਲੋਹਿਤੇਨ ਪਗ੍ਘਰਨ੍ਤੇਨ ਨੀਯਮਾਨਂ. ਸਾ ਭੀਤਤਸਿਤਾ ਉਟ੍ਠਾਯ ਦਕ੍ਖਿਣਬਾਹੁਂ ਪਰਾਮਸਿਤ੍ਵਾ ਸੁਪਿਨਭਾਵਂ ਜਾਨਿ. ਅਥਸ੍ਸਾ ਏਤਦਹੋਸਿ ‘‘ਮਯਾ ਕਕ੍ਖਲ਼ੋ ਪਾਪਸੁਪਿਨੋ ਦਿਟ੍ਠੋ, ਚਤੁਨ੍ਨਂ ਵਾ ਮੇ ਪੁਤ੍ਤਾਨਂ ਧਤਰਟ੍ਠਸ੍ਸ ਰਞ੍ਞੋ ਵਾ ਮਮ ਵਾ ਪਰਿਪਨ੍ਥੇਨ ਭਵਿਤਬ੍ਬ’’ਨ੍ਤਿ. ਅਪਿਚ ਖੋ ਪਨ ਮਹਾਸਤ੍ਤਮੇਵ ਆਰਬ੍ਭ ਅਤਿਰੇਕਤਰਂ ਚਿਨ੍ਤੇਸਿ. ਕਿਂਕਾਰਣਾ ¶ ? ਸੇਸਾ ਅਤ੍ਤਨੋ ਨਾਗਭਵਨੇ ਵਸਨ੍ਤਿ, ਇਤਰੋ ਪਨ ਸੀਲਜ੍ਝਾਸਯਤ੍ਤਾ ਮਨੁਸ੍ਸਲੋਕਂ ਗਨ੍ਤ੍ਵਾ ਉਪੋਸਥਕਮ੍ਮਂ ਕਰੋਤਿ. ਤਸ੍ਮਾ ‘‘ਕਚ੍ਚਿ ਨੁ ਖੋ ਮੇ ਪੁਤ੍ਤਂ ਅਹਿਤੁਣ੍ਡਿਕੋ ਵਾ ਸੁਪਣ੍ਣੋ ਵਾ ਗਣ੍ਹੇਯ੍ਯਾ’’ਤਿ ਤਸ੍ਸੇਵ ਅਤਿਰੇਕਤਰਂ ਚਿਨ੍ਤੇਸਿ ¶ . ਤਤੋ ਅਡ੍ਢਮਾਸੇ ਅਤਿਕ੍ਕਨ੍ਤੇ ‘‘ਮਮ ਪੁਤ੍ਤੋ ਅਡ੍ਢਮਾਸਾਤਿਕ੍ਕਮੇਨ ਮਂ ਵਿਨਾ ਵਤ੍ਤਿਤੁਂ ਨ ਸਕ੍ਕੋਤਿ, ਅਦ੍ਧਾਸ੍ਸ ਕਿਞ੍ਚਿ ¶ ਭਯਂ ਉਪ੍ਪਨ੍ਨਂ ਭਵਿਸ੍ਸਤੀ’’ਤਿ ਦੋਮਨਸ੍ਸਪ੍ਪਤ੍ਤਾ ਅਹੋਸਿ. ਮਾਸਾਤਿਕ੍ਕਮੇਨ ਪਨਸ੍ਸਾ ਸੋਕੇਨ ਅਸ੍ਸੂਨਂ ਅਪਗ੍ਘਰਣਕਾਲੋ ਨਾਮ ਨਾਹੋਸਿ, ਹਦਯਂ ਸੁਸ੍ਸਿ, ਅਕ੍ਖੀਨਿ ਉਪਚ੍ਚਿਂਸੁ. ਸਾ ‘‘ਇਦਾਨਿ ਆਗਮਿਸ੍ਸਤਿ, ਇਦਾਨਿ ਆਗਮਿਸ੍ਸਤੀ’’ਤਿ ਤਸ੍ਸਾਗਮਨਮਗ੍ਗਮੇਵ ਓਲੋਕੇਨ੍ਤੀ ਨਿਸੀਦਿ. ਅਥਸ੍ਸਾ ਜੇਟ੍ਠਪੁਤ੍ਤੋ ਸੁਦਸ੍ਸਨੋ ਮਾਸਚ੍ਚਯੇਨ ਮਹਤਿਯਾ ਪਰਿਸਾਯ ਸਦ੍ਧਿਂ ਮਾਤਾਪਿਤੂਨਂ ਦਸ੍ਸਨਤ੍ਥਾਯ ਆਗਤੋ, ਪਰਿਸਂ ਬਹਿ ਠਪੇਤ੍ਵਾ ਪਾਸਾਦਂ ਆਰੁਯ੍ਹ ਮਾਤਰਂ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਸਾ ਭੂਰਿਦਤ੍ਤਂ ਅਨੁਸੋਚਨ੍ਤੀ ਤੇਨ ਸਦ੍ਧਿਂ ਨ ਕਿਞ੍ਚਿ ਸਲ੍ਲਪਿ. ਸੋ ਚਿਨ੍ਤੇਸਿ ‘‘ਮਯ੍ਹਂ ਮਾਤਾ ਮਯਿ ਪੁਬ੍ਬੇ ਆਗਤੇ ਤੁਸ੍ਸਤਿ, ਪਟਿਸਨ੍ਥਾਰਂ ਕਰੋਤਿ, ਅਜ੍ਜ ਪਨ ਦੋਮਨਸ੍ਸਪ੍ਪਤ੍ਤਾ, ਕਿਂ ਨੁ ਖੋ ਕਾਰਣ’’ਨ੍ਤਿ? ਅਥ ਨਂ ਪੁਚ੍ਛਨ੍ਤੋ ਆਹ –

੮੪੮.

‘‘ਮਮਂ ਦਿਸ੍ਵਾਨ ਆਯਨ੍ਤਂ, ਸਬ੍ਬਕਾਮਸਮਿਦ੍ਧਿਨਂ;

ਇਨ੍ਦ੍ਰਿਯਾਨਿ ਅਹਟ੍ਠਾਨਿ, ਸਾਵਂ ਜਾਤਂ ਮੁਖਂ ਤਵ.

੮੪੯.

‘‘ਪਦ੍ਧਂ ਯਥਾ ਹਤ੍ਥਗਤਂ, ਪਾਣਿਨਾ ਪਰਿਮਦ੍ਦਿਤਂ;

ਸਾਵਂ ਜਾਤਂ ਮੁਖਂ ਤੁਯ੍ਹਂ, ਮਮਂ ਦਿਸ੍ਵਾਨ ਏਦਿਸ’’ਨ੍ਤਿ.

ਤਤ੍ਥ ਅਹਟ੍ਠਾਨੀਤਿ ਨ ਵਿਪ੍ਪਸਨ੍ਨਾਨਿ. ਸਾਵਨ੍ਤਿ ਕਞ੍ਚਨਾਦਾਸਵਣ੍ਣਂ ਤੇ ਮੁਖਂ ਪੀਤਕਾਲ਼ਕਂ ਜਾਤਂ. ਹਤ੍ਥਗਤਨ੍ਤਿ ਹਤ੍ਥੇਨ ਛਿਨ੍ਦਿਤਂ. ਏਦਿਸਨ੍ਤਿ ਏਵਰੂਪਂ ਮਹਨ੍ਤੇਨ ਸਿਰਿਸੋਭਗ੍ਗੇਨ ਤੁਮ੍ਹਾਕਂ ਦਸ੍ਸਨਤ੍ਥਾਯ ਆਗਤਂ ਮਂ ਦਿਸ੍ਵਾ.

ਸਾ ਏਵਂ ਵੁਤ੍ਤੇਪਿ ਨੇਵ ਕਥੇਸਿ. ਸੁਦਸ੍ਸਨੋ ਚਿਨ੍ਤੇਸਿ ‘‘ਕਿਂ ਨੁ ਖੋ ਕੇਨਚਿ ਕੁਦ੍ਧਾ ਵਾ ਪਰਿਬਦ੍ਧਾ ਵਾ ਭਵੇਯ੍ਯਾ’’ਤਿ. ਅਥ ਨਂ ਪੁਚ੍ਛਨ੍ਤੋ ਇਤਰਂ ਗਾਥਮਾਹ –

੮੫੦.

‘‘ਕਚ੍ਚਿ ਨੁ ਤੇ ਨਾਭਿਸਸਿ, ਕਚ੍ਚਿ ਤੇ ਅਤ੍ਥਿ ਵੇਦਨਾ;

ਯੇਨ ਸਾਵਂ ਮੁਖਂ ਤੁਯ੍ਹਂ, ਮਮਂ ਦਿਸ੍ਵਾਨ ਆਗਤ’’ਨ੍ਤਿ.

ਤਤ੍ਥ ਕਚ੍ਚਿ ਨੁ ਤੇ ਨਾਭਿਸਸੀਤਿ ਕਚ੍ਚਿ ਨੁ ਤਂ ਕੋਚਿ ਨ ਅਭਿਸਸਿ ਅਕ੍ਕੋਸੇਨ ਵਾ ਪਰਿਭਾਸਾਯ ¶ ਵਾ ਵਿਹਿਂਸੀਤਿ ਪੁਚ੍ਛਤਿ. ਤੁਯ੍ਹਨ੍ਤਿ ਤਵ ਪੁਬ੍ਬੇ ਮਮਂ ਦਿਸ੍ਵਾ ਆਗਤਂ ਏਦਿਸਂ ਮੁਖਂ ਨ ਹੋਤਿ. ਯੇਨ ਪਨ ਕਾਰਣੇਨ ਅਜ੍ਜ ਤਵ ਮੁਖਂ ਸਾਵਂ ਜਾਤਂ, ਤਂ ਮੇ ਆਚਿਕ੍ਖਾਤਿ ਪੁਚ੍ਛਤਿ.

ਅਥਸ੍ਸ ¶ ਸਾ ਆਚਿਕ੍ਖਨ੍ਤੀ ਆਹ –

੮੫੧.

‘‘ਸੁਪਿਨਂ ਤਾਤ ਅਦ੍ਦਕ੍ਖਿਂ, ਇਤੋ ਮਾਸਂ ਅਧੋਗਤਂ;

‘ਦਕ੍ਖਿਣਂ ¶ ਵਿਯ ਮੇ ਬਾਹੁਂ, ਛੇਤ੍ਵਾ ਰੁਹਿਰਮਕ੍ਖਿਤਂ;

ਪੁਰਿਸੋ ਆਦਾਯ ਪਕ੍ਕਾਮਿ, ਮਮ ਰੋਦਨ੍ਤਿਯਾ ਸਤਿ’.

੮੫੨.

‘‘ਯਤੋਹਂ ਸੁਪਿਨਮਦ੍ਦਕ੍ਖਿਂ, ਸੁਦਸ੍ਸਨ ਵਿਜਾਨਹਿ;

ਤਤੋ ਦਿਵਾ ਵਾ ਰਤ੍ਤਿਂ ਵਾ, ਸੁਖਂ ਮੇ ਨੋਪਲਬ੍ਭਤੀ’’ਤਿ.

ਤਤ੍ਥ ਇਤੋ ਮਾਸਂ ਅਧੋਗਤਨ੍ਤਿ ਇਤੋ ਹੇਟ੍ਠਾ ਮਾਸਾਤਿਕ੍ਕਨ੍ਤਂ. ਅਜ੍ਜ ਮੇ ਦਿਟ੍ਠਸੁਪਿਨਸ੍ਸ ਮਾਸੋ ਹੋਤੀਤਿ ਦਸ੍ਸੇਤਿ. ਪੁਰਿਸੋਤਿ ਏਕੋ ਕਾਲ਼ੋ ਰਤ੍ਤਕ੍ਖਿ ਪੁਰਿਸੋ. ਰੋਦਨ੍ਤਿਯਾ ਸਤੀਤਿ ਰੋਦਮਾਨਾਯ ਸਤਿਯਾ. ਸੁਖਂ ਮੇ ਨੋਪਲਬ੍ਭਤੀਤਿ ਮਮ ਸੁਖਂ ਨਾਮ ਨ ਵਿਜ੍ਜਤਿ.

ਏਵਞ੍ਚ ਪਨ ਵਤ੍ਵਾ ‘‘ਤਾਤ, ਪਿਯਪੁਤ੍ਤਕੋ ਮੇ ਤਵ ਕਨਿਟ੍ਠੋ ਨ ਦਿਸ੍ਸਤਿ, ਭਯੇਨਸ੍ਸ ਉਪ੍ਪਨ੍ਨੇਨ ਭਵਿਤਬ੍ਬ’’ਨ੍ਤਿ ਪਰਿਦੇਵਨ੍ਤੀ ਆਹ –

੮੫੩.

‘‘ਯਂ ਪੁਬ੍ਬੇ ਪਰਿਵਾਰਿਂਸੁ, ਕਞ੍ਞਾ ਰੁਚਿਰਵਿਗ੍ਗਹਾ;

ਹੇਮਜਾਲਪ੍ਪਟਿਚ੍ਛਨ੍ਨਾ, ਭੂਰਿਦਤ੍ਤੋ ਨ ਦਿਸ੍ਸਤਿ.

੮੫੪.

‘‘ਯਂ ਪੁਬ੍ਬੇ ਪਰਿਵਾਰਿਂਸੁ, ਨੇਤ੍ਤਿਂਸਵਰਧਾਰਿਨੋ;

ਕਣਿਕਾਰਾਵ ਸਮ੍ਫੁਲ੍ਲਾ, ਭੂਰਿਦਤ੍ਤੋ ਨ ਦਿਸ੍ਸਤਿ.

੮੫੫.

‘‘ਹਨ੍ਦ ਦਾਨਿ ਗਮਿਸ੍ਸਾਮ, ਭੂਰਿਦਤ੍ਤਨਿਵੇਸਨਂ;

ਧਮ੍ਮਟ੍ਠਂ ਸੀਲਸਮ੍ਪਨ੍ਨਂ, ਪਸ੍ਸਾਮ ਤਵ ਭਾਤਰ’’ਨ੍ਤਿ.

ਤਤ੍ਥ ਸਮ੍ਫੁਲ੍ਲਾਤਿ ਸੁਵਣ੍ਣਵਤ੍ਥਾਲਙ੍ਕਾਰਧਾਰਿਤਾਯ ਸਮ੍ਫੁਲ੍ਲਾ ਕਣਿਕਾਰਾ ਵਿਯ. ਹਨ੍ਦਾਤਿ ਵਵਸ੍ਸਗ੍ਗਤ੍ਥੇ ਨਿਪਾਤੋ, ਏਹਿ, ਤਾਤ, ਭੂਰਿਦਤ੍ਤਸ੍ਸ ਨਿਵੇਸਨਂ ਗਚ੍ਛਾਮਾਤਿ ਵਦਤਿ.

ਏਵਞ੍ਚ ¶ ਪਨ ਵਤ੍ਵਾ ਤਸ੍ਸ ਚੇਵ ਅਤ੍ਤਨੋ ਚ ਪਰਿਸਾਯ ਸਦ੍ਧਿਂ ਤਤ੍ਥ ਅਗਮਾਸਿ. ਭੂਰਿਦਤ੍ਤਸ੍ਸ ਭਰਿਯਾਯੋ ਪਨ ਤਂ ਵਮ੍ਮਿਕਮਤ੍ਥਕੇ ਅਦਿਸ੍ਵਾ ‘‘ਮਾਤੁ ਨਿਵੇਸਨੇ ਵਸਿਸ੍ਸਤੀ’’ਤਿ ਅਬ੍ਯਾਵਟਾ ਅਹੇਸੁਂ. ਤਾ ‘‘ਸਸ੍ਸੁ ਕਿਰ ਨੋ ਪੁਤ੍ਤਂ ਅਪਸ੍ਸਨ੍ਤੀ ਆਗਚ੍ਛਤੀ’’ਤਿ ਸੁਤ੍ਵਾ ਪਚ੍ਚੁਗ੍ਗਮਨਂ ਕਤ੍ਵਾ ‘‘ਅਯ੍ਯੇ, ਪੁਤ੍ਤਸ੍ਸ ਤੇ ਅਦਿਸ੍ਸਮਾਨਸ੍ਸ ਅਜ੍ਜ ਮਾਸੋ ਅਤੀਤੋ’’ਤਿ ਮਹਾਪਰਿਦੇਵਂ ਪਰਿਦੇਵਮਾਨਾ ¶ ਤਸ੍ਸਾ ਪਾਦਮੂਲੇ ਪਤਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੮੫੬.

‘‘ਤਞ੍ਚ ਦਿਸ੍ਵਾਨ ਆਯਨ੍ਤਿਂ, ਭੂਰਿਦਤ੍ਤਸ੍ਸ ਮਾਤਰਂ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ਭੂਰਿਦਤ੍ਤਸ੍ਸ ਨਾਰਿਯੋ.

੮੫੭.

‘‘ਪੁਤ੍ਤਂ ਤੇਯ੍ਯੇ ਨ ਜਾਨਾਮ, ਇਤੋ ਮਾਸਂ ਅਧੋਗਤਂ;

ਮਤਂ ਵਾ ਯਦਿ ਵਾ ਜੀਵਂ, ਭੂਰਿਦਤ੍ਤਂ ਯਸਸ੍ਸਿਨ’’ਨ੍ਤਿ.

ਤਤ੍ਥ ¶ ‘‘ਪੁਤ੍ਤਂ ਤੇਯ੍ਯੇ’’ਤਿ ਅਯਂ ਤਾਸਂ ਪਰਿਦੇਵਨਕਥਾ.

ਭੂਰਿਦਤ੍ਤਸ੍ਸ ਮਾਤਾ ਸੁਣ੍ਹਾਹਿ ਸਦ੍ਧਿਂ ਅਨ੍ਤਰਵੀਥਿਯਂ ਪਰਿਦੇਵਿਤ੍ਵਾ ਤਾ ਆਦਾਯ ਤਸ੍ਸ ਪਾਸਾਦਂ ਆਰੁਯ੍ਹ ਪੁਤ੍ਤਸ੍ਸ ਸਯਨਞ੍ਚ ਆਸਨਞ੍ਚ ਓਲੋਕੇਤ੍ਵਾ ਪਰਿਦੇਵਮਾਨਾ ਆਹ –

੮੫੮.

‘‘ਸਕੁਣੀ ਹਤਪੁਤ੍ਤਾਵ, ਸੁਞ੍ਞਂ ਦਿਸ੍ਵਾ ਕੁਲਾਵਕਂ;

ਚਿਰਂ ਦੁਕ੍ਖੇਨ ਝਾਯਿਸ੍ਸਂ, ਭੂਰਿਦਤ੍ਤਂ ਅਪਸ੍ਸਤੀ.

੮੫੯.

‘‘ਕੁਰਰੀ ਹਤਛਾਪਾਵ, ਸੁਞ੍ਞਂ ਦਿਸ੍ਵਾ ਕੁਲਾਵਕਂ;

ਚਿਰਂ ਦੁਕ੍ਖੇਨ ਝਾਯਿਸ੍ਸਂ, ਭੂਰਿਦਤ੍ਤਂ ਅਪਸ੍ਸਤੀ.

੮੬੦.

‘‘ਸਾ ਨੂਨ ਚਕ੍ਕਵਾਕੀਵ, ਪਲ੍ਲਲਸ੍ਮਿਂ ਅਨੋਦਕੇ;

ਚਿਰਂ ਦੁਕ੍ਖੇਨ ਝਾਯਿਸ੍ਸਂ, ਭੂਰਿਦਤ੍ਤਂ ਅਪਸ੍ਸਤੀ.

੮੬੧.

‘‘ਕਮ੍ਮਾਰਾਨਂ ਯਥਾ ਉਕ੍ਕਾ, ਅਨ੍ਤੋ ਝਾਯਤਿ ਨੋ ਬਹਿ;

ਏਵਂ ਝਾਯਾਮਿ ਸੋਕੇਨ, ਭੂਰਿਦਤ੍ਤਂ ਅਪਸ੍ਸਤੀ’’ਤਿ.

ਤਤ੍ਥ ਅਪਸ੍ਸਤੀਤਿ ਅਪਸ੍ਸਨ੍ਤੀ. ਹਤਛਾਪਾਵਾਤਿ ਹਤਪੋਤਕਾਵ.

ਏਵਂ ¶ ਭੂਰਿਦਤ੍ਤਮਾਤਰਿ ਵਿਲਪਮਾਨਾਯ ਭੂਰਿਦਤ੍ਤਨਿਵੇਸਨਂ ਅਣ੍ਣਵਕੁਚ੍ਛਿ ਵਿਯ ਏਕਸਦ੍ਦਂ ਅਹੋਸਿ. ਏਕੋਪਿ ਸਕਭਾਵੇਨ ਸਣ੍ਠਾਤੁਂ ਨਾਸਕ੍ਖਿ. ਸਕਲਨਿਵੇਸਨਂ ਯੁਗਨ੍ਧਰਵਾਤਪ੍ਪਹਟਂ ਵਿਯ ਸਾਲਵਨਂ ਅਹੋਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੮੬੨.

‘‘ਸਾਲਾਵ ਸਮ੍ਪਮਥਿਤਾ, ਮਾਲੁਤੇਨ ਪਮਦ੍ਦਿਤਾ;

ਸੇਨ੍ਤਿ ਪੁਤ੍ਤਾ ਚ ਦਾਰਾ ਚ, ਭੂਰਿਦਤ੍ਤਨਿਵੇਸਨੇ’’ਤਿ.

ਅਰਿਟ੍ਠੋ ¶ ਚ ਸੁਭੋਗੋ ਚ ਉਭੋਪਿ ਭਾਤਰੋ ਮਾਤਾਪਿਤੂਨਂ ਉਪਟ੍ਠਾਨਂ ਗਚ੍ਛਨ੍ਤਾ ਤਂ ਸਦ੍ਦਂ ਸੁਤ੍ਵਾ ਭੂਰਿਦਤ੍ਤਨਿਵੇਸਨਂ ਪਵਿਸਿਤ੍ਵਾ ਮਾਤਰਂ ਅਸ੍ਸਾਸਯਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੮੬੩.

‘‘ਇਦਂ ਸੁਤ੍ਵਾਨ ਨਿਗ੍ਘੋਸਂ, ਭੂਰਿਦਤ੍ਤਨਿਵੇਸਨੇ;

ਅਰਿਟ੍ਠੋ ਚ ਸੁਭੋਗੋ ਚ, ਪਧਾਵਿਂਸੁ ਅਨਨ੍ਤਰਾ.

੮੬੪.

‘‘ਅਮ੍ਮ ਅਸ੍ਸਾਸ ਮਾ ਸੋਚਿ, ਏਵਂਧਮ੍ਮਾ ਹਿ ਪਾਣਿਨੋ;

ਚਵਨ੍ਤਿ ਉਪਪਜ੍ਜਨ੍ਤਿ, ਏਸਾਸ੍ਸ ਪਰਿਣਾਮਿਤਾ’’ਤਿ.

ਤਤ੍ਥ ਏਸਾਸ੍ਸ ਪਰਿਣਾਮਿਤਾਤਿ ਏਸਾ ਚੁਤੂਪਪਤ੍ਤਿ ਅਸ੍ਸ ਲੋਕਸ੍ਸ ਪਰਿਣਾਮਿਤਾ, ਏਵਞ੍ਹਿ ਸੋ ਲੋਕੋ ਪਰਿਣਾਮੇਤਿ. ਏਤੇਹਿ ਦ੍ਵੀਹਿ ਅਙ੍ਗੇਹਿ ਮੁਤ੍ਤੋ ਨਾਮ ਨਤ੍ਥੀਤਿ ਵਦਨ੍ਤਿ.

ਸਮੁਦ੍ਦਜਾ ¶ ਆਹ –

੮੬੫.

‘‘ਅਹਮ੍ਪਿ ਤਾਤ ਜਾਨਾਮਿ, ਏਵਂਧਮ੍ਮਾ ਹਿ ਪਾਣਿਨੋ;

ਸੋਕੇਨ ਚ ਪਰੇਤਸ੍ਮਿ, ਭੂਰਿਦਤ੍ਤਂ ਅਪਸ੍ਸਤੀ.

੮੬੬.

‘‘ਅਜ੍ਜ ਚੇ ਮੇ ਇਮਂ ਰਤ੍ਤਿਂ, ਸੁਦਸ੍ਸਨ ਵਿਜਾਨਹਿ;

ਭੂਰਿਦਤ੍ਤਂ ਅਪਸ੍ਸਨ੍ਤੀ, ਮਞ੍ਞੇ ਹਿਸ੍ਸਾਮਿ ਜੀਵਿਤ’’ਨ੍ਤਿ.

ਤਤ੍ਥ ਅਜ੍ਜ ਚੇ ਮੇਤਿ ਤਾਤ ਸੁਦਸ੍ਸਨ, ਸਚੇ ਅਜ੍ਜ ਇਮਂ ਰਤ੍ਤਿਂ ਭੂਰਿਦਤ੍ਤੋ ਮਮ ਦਸ੍ਸਨਂ ਨਾਗਮਿਸ੍ਸਤਿ, ਅਥਾਹਂ ਤਂ ਅਪਸ੍ਸਨ੍ਤੀ ਜੀਵਿਤਂ ਜਹਿਸ੍ਸਾਮੀਤਿ ਮਞ੍ਞਾਮਿ.

ਪੁਤ੍ਤਾ ¶ ਆਹਂਸੁ –

੮੬੭.

‘‘ਅਮ੍ਮ ਅਸ੍ਸਾਸ ਮਾ ਸੋਚਿ, ਆਨਯਿਸ੍ਸਾਮ ਭਾਤਰਂ;

ਦਿਸੋਦਿਸਂ ਗਮਿਸ੍ਸਾਮ, ਭਾਤੁਪਰਿਯੇਸਨਂ ਚਰਂ.

੮੬੮.

‘‘ਪਬ੍ਬਤੇ ਗਿਰਿਦੁਗ੍ਗੇਸੁ, ਗਾਮੇਸੁ ਨਿਗਮੇਸੁ ਚ;

ਓਰੇਨ ਸਤ੍ਤਰਤ੍ਤਸ੍ਸ, ਭਾਤਰਂ ਪਸ੍ਸ ਆਗਤ’’ਨ੍ਤਿ.

ਤਤ੍ਥ ਚਰਨ੍ਤਿ ਅਮ੍ਮ, ਮਯਂ ਤਯੋਪਿ ਜਨਾ ਭਾਤੁਪਰਿਯੇਸਨਂ ਚਰਨ੍ਤਾ ਦਿਸੋਦਿਸਂ ਗਮਿਸ੍ਸਾਮਾਤਿ ਨਂ ਅਸ੍ਸਾਸੇਸੁਂ.

ਤਤੋ ¶ ਸੁਦਸ੍ਸਨੋ ਚਿਨ੍ਤੇਸਿ ‘‘ਸਚੇ ਤਯੋਪਿ ਏਕਂ ਦਿਸਂ ਗਮਿਸ੍ਸਾਮ, ਪਪਞ੍ਚੋ ਭਵਿਸ੍ਸਤਿ, ਤੀਹਿ ਤੀਣਿ ਠਾਨਾਨਿ ਗਨ੍ਤੁਂ ਵਟ੍ਟਤਿ – ਏਕੇਨ ਦੇਵਲੋਕਂ, ਏਕੇਨ ਹਿਮਵਨ੍ਤਂ, ਏਕੇਨ ਮਨੁਸ੍ਸਲੋਕਂ. ਸਚੇ ਖੋ ਪਨ ਕਾਣਾਰਿਟ੍ਠੋ ਮਨੁਸ੍ਸਲੋਕਂ ਗਮਿਸ੍ਸਤਿ, ਯਤ੍ਥੇਵ ਭੂਰਿਦਤ੍ਤਂ ਪਸ੍ਸਤਿ. ਤਂ ਗਾਮਂ ਵਾ ਨਿਗਮਂ ਵਾ ਝਾਪੇਤ੍ਵਾ ਏਸ੍ਸਤਿ, ਏਸ ਕਕ੍ਖਲ਼ੋ ਫਰੁਸੋ, ਨ ਸਕ੍ਕਾ ਏਤਂ ਤਤ੍ਥ ਪੇਸੇਤੁ’’ਨ੍ਤਿ. ਚਿਨ੍ਤੇਤ੍ਵਾ ਚ ਪਨ ‘‘ਤਾਤ ਅਰਿਟ੍ਠ, ਤ੍ਵਂ ਦੇਵਲੋਕਂ ਗਚ੍ਛ, ਸਚੇ ਦੇਵਤਾਹਿ ਧਮ੍ਮਂ ਸੋਤੁਕਾਮਾਹਿ ਭੂਰਿਦਤ੍ਤੋ ਦੇਵਲੋਕਂ ਨੀਤੋ, ਤਤੋ ਨਂ ਆਨੇਹੀ’’ਤਿ ਅਰਿਟ੍ਠਂ ਦੇਵਲੋਕਂ ਪਹਿਣਿ. ਸੁਭੋਗਂ ਪਨ ‘‘ਤਾਤ, ਤ੍ਵਂ ਹਿਮਵਨ੍ਤਂ ਗਨ੍ਤ੍ਵਾ ਪਞ੍ਚਸੁ ਮਹਾਨਦੀਸੁ ਭੂਰਿਦਤ੍ਤਂ ਉਪਧਾਰੇਤ੍ਵਾ ਏਹੀ’’ਤਿ ਹਿਮਵਨ੍ਤਂ ਪਹਿਣਿ. ਸਯਂ ਪਨ ਮਨੁਸ੍ਸਲੋਕਂ ਗਨ੍ਤੁਕਾਮੋ ਚਿਨ੍ਤੇਸਿ – ‘‘ਸਚਾਹਂ ਮਾਣਵਕਵਣ੍ਣੇਨ ਗਮਿਸ੍ਸਾਮਿ, ਮਨੁਸ੍ਸਾ ਨੇਵ ਮੇ ਪਿਯਾਯਿਸ੍ਸਨ੍ਤਿ, ਮਯਾ ਤਾਪਸਵੇਸੇਨ ਗਨ੍ਤੁਂ ਵਟ੍ਟਤਿ, ਮਨੁਸ੍ਸਾਨਞ੍ਹਿ ਪਬ੍ਬਜਿਤਾ ਪਿਯਾ ਮਨਾਪਾ’’ਤਿ. ਸੋ ਤਾਪਸਵੇਸਂ ਗਹੇਤ੍ਵਾ ਮਾਤਰਂ ਵਨ੍ਦਿਤ੍ਵਾ ਨਿਕ੍ਖਮਿ.

ਬੋਧਿਸਤ੍ਤਸ੍ਸ ਪਨ ਅਜਮੁਖੀ ਨਾਮ ਵੇਮਾਤਿਕਭਗਿਨੀ ਅਤ੍ਥਿ. ਤਸ੍ਸਾ ਬੋਧਿਸਤ੍ਤੇ ਅਧਿਮਤ੍ਤੋ ਸਿਨੇਹੋ. ਸਾ ਸੁਦਸ੍ਸਨਂ ਗਚ੍ਛਨ੍ਤਂ ਦਿਸ੍ਵਾ ਆਹ – ‘‘ਭਾਤਿਕ ¶ , ਅਤਿਵਿਯ ਕਿਲਮਾਮਿ, ਅਹਮ੍ਪਿ ਤਯਾ ਸਦ੍ਧਿਂ ਗਮਿਸ੍ਸਾਮੀ’’ਤਿ. ‘‘ਅਮ੍ਮ, ਨ ਸਕ੍ਕਾ ਤਯਾ ਗਨ੍ਤੁਂ, ਅਹਂ ਪਬ੍ਬਜਿਤਵਸੇਨ ਗਚ੍ਛਾਮੀ’’ਤਿ. ‘‘ਅਹਂ ਪਨ ਖੁਦ੍ਦਕਮਣ੍ਡੂਕੀ ਹੁਤ੍ਵਾ ਤਵ ਜਟਨ੍ਤਰੇ ਨਿਪਜ੍ਜਿਤ੍ਵਾ ਗਮਿਸ੍ਸਾਮੀ’’ਤਿ. ‘‘ਤੇਨ ਹਿ ਏਹੀ’’ਤਿ. ਸਾ ਮਣ੍ਡੂਕਪੋਤਿਕਾ ਹੁਤ੍ਵਾ ਤਸ੍ਸ ਜਟਨ੍ਤਰੇ ਨਿਪਜ੍ਜਿ. ਸੁਦਸ੍ਸਨੋ ‘‘ਮੂਲਤੋ ਪਟ੍ਠਾਯ ਵਿਚਿਨਨ੍ਤੋ ਗਮਿਸ੍ਸਾਮੀ’’ਤਿ ਬੋਧਿਸਤ੍ਤਸ੍ਸ ਭਰਿਯਾਯੋ ਤਸ੍ਸ ਉਪੋਸਥਕਰਣਟ੍ਠਾਨਂ ਪੁਚ੍ਛਿਤ੍ਵਾ ਪਠਮਂ ਤਤ੍ਥ ਗਨ੍ਤ੍ਵਾ ਅਲਮ੍ਪਾਯਨੇਨ ਮਹਾਸਤ੍ਤਸ੍ਸ ਗਹਿਤਟ੍ਠਾਨੇ ਲੋਹਿਤਞ੍ਚ ਵਲ੍ਲੀਹਿ ਕਤਪੇਲ਼ਟ੍ਠਾਨਞ੍ਚ ਦਿਸ੍ਵਾ ‘‘ਭੂਰਿਦਤ੍ਤੋ ਅਹਿਤੁਣ੍ਡਿਕੇਨ ਗਹਿਤੋ’’ਤਿ ਞਤ੍ਵਾ ਸਮੁਪ੍ਪਨ੍ਨਸੋਕੋ ਅਸ੍ਸੁਪੁਣ੍ਣੇਹਿ ¶ ਨੇਤ੍ਤੇਹਿ ਅਲਮ੍ਪਾਯਨਸ੍ਸ ਗਤਮਗ੍ਗੇਨੇਵ ਪਠਮਂ ਕੀਲ਼ਾਪਿਤਗਾਮਂ ਗਨ੍ਤ੍ਵਾ ਮਨਸ੍ਸੇ ਪੁਚ੍ਛਿ ‘‘ਏਵਰੂਪੋ ਨਾਮ ਨਾਗੋ ਕੇਨਚੀਧ ਅਹਿਤੁਣ੍ਡਿਕੇਨ ਕੀਲ਼ਾਪਿਤੋ’’ਤਿ? ‘‘ਆਮ, ਅਲਮ੍ਪਾਯਨੇਨ ਇਤੋ ਮਾਸਮਤ੍ਥਕੇ ਕੀਲ਼ਾਪਿਤੋ’’ਤਿ. ‘‘ਕਿਞ੍ਚਿ ਧਨਂ ਤੇਨ ਲਦ੍ਧ’’ਨ੍ਤਿ? ‘‘ਆਮ, ਇਧੇਵ ਤੇਨ ਸਹਸ੍ਸਮਤ੍ਤਂ ਲਦ੍ਧ’’ਨ੍ਤਿ. ‘‘ਇਦਾਨਿ ਸੋ ਕੁਹਿਂ ਗਤੋ’’ਤਿ? ‘‘ਅਸੁਕਗਾਮਂ ਨਾਮਾ’’ਤਿ. ਸੋ ਤਤੋ ਪਟ੍ਠਾਯ ਪੁਚ੍ਛਨ੍ਤੋ ਅਨੁਪੁਬ੍ਬੇਨ ਰਾਜਦ੍ਵਾਰਂ ਅਗਮਾਸਿ.

ਤਸ੍ਮਿਂ ¶ ਖਣੇ ਅਲਮ੍ਪਾਯਨੋ ਸੁਨ੍ਹਾਤੋ ਸੁਵਿਲਿਤ੍ਤੋ ਮਟ੍ਠਸਾਟਕਂ ਨਿਵਾਸੇਤ੍ਵਾ ਰਤਨਪੇਲ਼ਂ ਗਾਹਾਪੇਤ੍ਵਾ ਰਾਜਦ੍ਵਾਰਮੇਵ ਗਤੋ. ਮਹਾਜਨੋ ਸਨ੍ਨਿਪਤਿ, ਰਞ੍ਞੋ ਆਸਨਂ ਪਞ੍ਞਤ੍ਤਂ. ਸੋ ਅਨ੍ਤੋਨਿਵੇਸਨੇ ਠਿਤੋਵ ‘‘ਅਹਂ ਆਗਚ੍ਛਾਮਿ, ਨਾਗਰਾਜਾਨਂ ਕੀਲ਼ਾਪੇਤੂ’’ਤਿ ਪੇਸੇਸਿ. ਅਲਮ੍ਪਾਯਨੋ ਚਿਤ੍ਤਤ੍ਥਰਣੇ ਰਤਨਪੇਲ਼ਂ ਠਪੇਤ੍ਵਾ ਵਿਵਰਿਤ੍ਵਾ ‘‘ਏਹਿ ਮਹਾਨਾਗਾ’’ਤਿ ਸਞ੍ਞਮਦਾਸਿ. ਤਸ੍ਮਿਂ ਸਮਯੇ ਸੁਦਸ੍ਸਨੋਪਿ ਪਰਿਸਨ੍ਤਰੇ ਠਾਤੋ. ਅਥ ਮਹਾਸਤ੍ਤੋ ਸੀਸਂ ਨੀਹਰਿਤ੍ਵਾ ਸਬ੍ਬਾਵਨ੍ਤਂ ਪਰਿਸਂ ਓਲੋਕੇਸਿ. ਨਾਗਾ ਹਿ ਦ੍ਵੀਹਿ ਕਾਰਣੇਹਿ ਪਰਿਸਂ ਓਲੋਕੇਨ੍ਤਿ ਸੁਪਣ੍ਣਪਰਿਪਨ੍ਥਂ ਵਾ ਞਾਤਕੇ ਵਾ ਦਸ੍ਸਨਤ੍ਥਾਯ. ਤੇ ਸੁਪਣ੍ਣਂ ਦਿਸ੍ਵਾ ਭੀਤਾ ਨ ਨਚ੍ਚਨ੍ਤਿ, ਞਾਤਕੇ ਵਾ ਦਿਸ੍ਵਾ ਲਜ੍ਜਮਾਨਾ ਨ ਨਚ੍ਚਨ੍ਤਿ. ਮਹਾਸਤ੍ਤੋ ਪਨ ਓਲੋਕੇਨ੍ਤੋ ਪਰਿਸਨ੍ਤਰੇ ਭਾਤਰਂ ਅਦ੍ਦਸ. ਸੋ ਅਕ੍ਖਿਪੂਰਾਨਿ ਅਸ੍ਸੂਨਿ ਗਹੇਤ੍ਵਾ ਪੇਲ਼ਤੋ ਨਿਕ੍ਖਮਿਤ੍ਵਾ ਭਾਤਰਾਭਿਮੁਖੋ ਪਾਯਾਸਿ. ਮਹਾਜਨੋ ਤਂ ਆਗਚ੍ਛਨ੍ਤਂ ਦਿਸ੍ਵਾ ਭੀਤੋ ਪਟਿਕ੍ਕਮਿ, ਏਕੋ ਸੁਦਸ੍ਸਨੋਵ ਅਟ੍ਠਾਸਿ. ਸੋ ਗਨ੍ਤ੍ਵਾ ਤਸ੍ਸ ਪਾਦਪਿਟ੍ਠਿਯਂ ਸੀਸਂ ਠਪੇਤ੍ਵਾ ਰੋਦਿ, ਸੁਦਸ੍ਸਨੋਪਿ ਪਰਿਦੇਵਿ. ਮਹਾਸਤ੍ਤੋ ਰੋਦਿਤ੍ਵਾ ਨਿਵਤ੍ਤਿਤ੍ਵਾ ਪੇਲ਼ਮੇਵ ਪਾਵਿਸਿ. ਅਲਮ੍ਪਾਯਨੋਪਿ ‘‘ਇਮਿਨਾ ਨਾਗੇਨ ਤਾਪਸੋ ਡਟ੍ਠੋ ਭਵਿਸ੍ਸਤਿ, ਅਸ੍ਸਾਸੇਸ੍ਸਾਮਿ ਨ’’ਨ੍ਤਿ ਉਪਸਙ੍ਕਮਿਤ੍ਵਾ ਆਹ –

੮੬੯.

‘‘ਹਤ੍ਥਾ ¶ ਪਮੁਤ੍ਤੋ ਉਰਗੋ, ਪਾਦੇ ਤੇ ਨਿਪਤੀ ਭੁਸਂ;

ਕਚ੍ਚਿ ਨੁ ਤਂ ਡਂਸੀ ਤਾਤ, ਮਾ ਭਾਯਿ ਸੁਖਿਤੋ ਭਵਾ’’ਤਿ.

ਤਤ੍ਥ ਮਾ ਭਾਯੀਤਿ ਤਾਤ ਤਾਪਸ, ਅਹਂ ਅਲਮ੍ਪਾਯਨੋ ਨਾਮ, ਮਾ ਭਾਯਿ, ਤਵ ਪਟਿਜਗ੍ਗਨਂ ਨਾਮ ਮਮ ਭਾਰੋਤਿ.

ਸੁਦਸ੍ਸਨੋ ਤੇਨ ਸਦ੍ਧਿਂ ਕਥੇਤੁਕਮ੍ਯਤਾਯ ਗਾਥਮਾਹ –

੮੭੦.

‘‘ਨੇਵ ਮਯ੍ਹਂ ਅਯਂ ਨਾਗੋ, ਅਲਂ ਦੁਕ੍ਖਾਯ ਕਾਯਚਿ;

ਯਾਵਤਤ੍ਥਿ ਅਹਿਗ੍ਗਾਹੋ, ਮਯਾ ਭਿਯ੍ਯੋ ਨ ਵਿਜ੍ਜਤੀ’’ਤਿ.

ਤਤ੍ਥ ¶ ਕਾਯਚੀਤਿ ਕਸ੍ਸਚਿ ਅਪ੍ਪਮਤ੍ਤਕਸ੍ਸਪਿ ਦੁਕ੍ਖਸ੍ਸ ਉਪ੍ਪਾਦਨੇ ਅਯਂ ਮਮ ਅਸਮਤ੍ਥੋ. ਮਯਾ ਹਿ ਸਦਿਸੋ ਅਹਿਤੁਣ੍ਡਿਕੋ ਨਾਮ ਨਤ੍ਥੀਤਿ.

ਅਲਮ੍ਪਾਯਨੋ ‘‘ਅਸੁਕੋ ਨਾਮੇਸੋ’’ਤਿ ਅਜਾਨਨ੍ਤੋ ਕੁਜ੍ਝਿਤ੍ਵਾ ਆਹ –

੮੭੧.

‘‘ਕੋ ¶ ਨੁ ਬ੍ਰਾਹ੍ਮਣਵਣ੍ਣੇਨ, ਦਿਤ੍ਤੋ ਪਰਿਸਮਾਗਤੋ;

ਅਵ੍ਹਾਯਨ੍ਤੁ ਸੁਯੁਦ੍ਧੇਨ, ਸੁਣਨ੍ਤੁ ਪਰਿਸਾ ਮਮਾ’’ਤਿ.

ਤਤ੍ਥ ਦਿਤ੍ਤੋਤਿ ਗਬ੍ਬਿਤੋ ਬਾਲੋ ਅਨ੍ਧਞਾਣੋ. ਅਵ੍ਹਾਯਨ੍ਤੂਤਿ ਅਵ੍ਹਾਯਨ੍ਤੋ, ਅਯਮੇਵ ਵਾ ਪਾਠੋ. ਇਦਂ ਵੁਤ੍ਤਂ ਹੋਤਿ – ਅਯਂ ਕੋ ਬਾਲੋ ਉਮ੍ਮਤ੍ਤਕੋ ਵਿਯ ਮਂ ਸੁਯੁਦ੍ਧੇਨ ਅਵ੍ਹਾਯਨ੍ਤੋ ਅਤ੍ਤਨਾ ਸਦ੍ਧਿਂ ਸਮਂ ਕਰੋਨ੍ਤੋ ਪਰਿਸਮਾਗਤੋ, ਪਰਿਸਾ ਮਮ ਵਚਨਂ ਸੁਣਨ੍ਤੁ, ਮਯ੍ਹਂ ਦੋਸੋ ਨਤ੍ਥਿ, ਮਾ ਖੋ ਮੇ ਕੁਜ੍ਝਿਤ੍ਥਾਤਿ.

ਅਥ ਨਂ ਸੁਦਸ੍ਸਨੋ ਗਾਥਾਯ ਅਜ੍ਝਭਾਸਿ –

੮੭੨.

‘‘ਤ੍ਵਂ ਮਂ ਨਾਗੇਨ ਆਲਮ੍ਪ, ਅਹਂ ਮਣ੍ਡੂਕਛਾਪਿਯਾ;

ਹੋਤੁ ਨੋ ਅਬ੍ਭੁਤਂ ਤਤ੍ਥ, ਆ ਸਹਸ੍ਸੇਹਿ ਪਞ੍ਚਹੀ’’ਤਿ.

ਤਤ੍ਥ ਨਾਗੇਨਾਤਿ ਤ੍ਵਂ ਨਾਗੇਨ ਮਯਾ ਸਦ੍ਧਿਂ ਯੁਜ੍ਝ, ਅਹਂ ਮਣ੍ਡੂਕਛਾਪਿਯਾ ਤਯਾ ਸਦ੍ਧਿਂ ਯੁਜ੍ਝਿਸ੍ਸਾਮਿ. ਆ ਸਹਸ੍ਸੇਹਿ ਪਞ੍ਚਹੀਤਿ ਤਸ੍ਮਿਂ ਨੋ ਯੁਦ੍ਧੇ ਯਾਵ ਪਞ੍ਚਹਿ ਸਹਸ੍ਸੇਹਿ ਅਬ੍ਭੁਤਂ ਹੋਤੂਤਿ.

ਅਲਮ੍ਪਾਯਨੋ ਆਹ –

੮੭੩.

‘‘ਅਹਞ੍ਹਿ ਵਸੁਮਾ ਅਡ੍ਢੋ, ਤ੍ਵਂ ਦਲਿਦ੍ਦੋਸਿ ਮਾਣਵ;

ਕੋ ਨੁ ਤੇ ਪਾਟਿਭੋਗਤ੍ਥਿ, ਉਪਜੂਤਞ੍ਚ ਕਿਂ ਸਿਯਾ.

੮੭੪.

‘‘ਉਪਜੂਤਞ੍ਚ ਮੇ ਅਸ੍ਸ, ਪਾਟਿਭੋਗੋ ਚ ਤਾਦਿਸੋ;

ਹੋਤੁ ਨੋ ਅਬ੍ਭੁਤਂ ਤਤ੍ਥ, ਆ ਸਹਸ੍ਸੇਹਿ ਪਞ੍ਚਹੀ’’ਤਿ.

ਤਤ੍ਥ ¶ ਕੋ ਨੁ ਤੇਤਿ ਤਵ ਪਬ੍ਬਜਿਤਸ੍ਸ ਕੋ ਨੁ ਪਾਟਿਭੋਗੋ ਅਤ੍ਥਿ. ਉਪਜੂਤਞ੍ਚਾਤਿ ਇਮਸ੍ਮਿਂ ਵਾ ਜੂਤੇ ਉਪਨਿਕ੍ਖੇਪਭੂਤਂ ਕਿਂ ਨਾਮ ਤਵ ਧਨਂ ਸਿਯਾ, ਦਸ੍ਸੇਹਿ ਮੇਤਿ ¶ ਵਦਤਿ. ਉਪਜੂਤਞ੍ਚ ਮੇਤਿ ਮਯ੍ਹਂ ਪਨ ਦਾਤਬ੍ਬਂ ਉਪਨਿਕ੍ਖੇਪਧਨਂ ਵਾ ਠਪੇਤਬ੍ਬਪਾਟਿਭੋਗੋ ਵਾ ਤਾਦਿਸੋ ਅਤ੍ਥਿ, ਤਸ੍ਮਾ ਨੋ ਤਤ੍ਥ ਯਾਵ ਪਞ੍ਚਹਿ ਸਹਸ੍ਸੇਹਿ ਅਬ੍ਭੁਤਂ ਹੋਤੂਤਿ.

ਸੁਦਸ੍ਸਨੋ ਤਸ੍ਸ ਕਥਂ ਸੁਤ੍ਵਾ ‘‘ਪਞ੍ਚਹਿ ਨੋ ਸਹਸ੍ਸੇਹਿ ਅਬ੍ਭੁਤਂ ਹੋਤੂ’’ਤਿ ਅਭੀਤੋ ਰਾਜਨਿਵੇਸਨਂ ਆਰੁਯ੍ਹ ਮਾਤੁਲਰਞ੍ਞੋ ਸਨ੍ਤਿਕੇ ਠਿਤੋ ਗਾਥਮਾਹ –

੮੭੫.

‘‘ਸੁਣੋਹਿ ¶ ਮੇ ਮਹਾਰਾਜ, ਵਚਨਂ ਭਦ੍ਦਮਤ੍ਥੁ ਤੇ;

ਪਞ੍ਚਨ੍ਨਂ ਮੇ ਸਹਸ੍ਸਾਨਂ, ਪਾਟਿਭੋਗੋ ਹਿ ਕਿਤ੍ਤਿਮਾ’’ਤਿ.

ਤਤ੍ਥ ਕਿਤ੍ਤਿਮਾਤਿ ਗੁਣਕਿਤ੍ਤਿਸਮ੍ਪਨ੍ਨ ਵਿਵਿਧਗੁਣਾਚਾਰਕਿਤ੍ਤਿਸਮ੍ਪਨ੍ਨ.

ਰਾਜਾ ‘‘ਅਯਂ ਤਾਪਸੋ ਮਂ ਅਤਿਬਹੁਂ ਧਨਂ ਯਾਚਤਿ, ਕਿਂ ਨੁ ਖੋ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੮੭੬.

‘‘ਪੇਤ੍ਤਿਕਂ ਵਾ ਇਣਂ ਹੋਤਿ, ਯਂ ਵਾ ਹੋਤਿ ਸਯਂਕਤਂ;

ਕਿਂ ਤ੍ਵਂ ਏਵਂ ਬਹੁਂ ਮਯ੍ਹਂ, ਧਨਂ ਯਾਚਸਿ ਬ੍ਰਾਹ੍ਮਣਾ’’ਤਿ.

ਤਤ੍ਥ ਪੇਤ੍ਤਿਕਂ ਵਾਤਿ ਪਿਤਰਾ ਵਾ ਗਹੇਤ੍ਵਾ ਖਾਦਿਤਂ, ਅਤ੍ਤਨਾ ਵਾ ਕਤਂ ਇਣਂ ਨਾਮ ਹੋਤਿ, ਕਿਂ ਮਮ ਪਿਤਰਾ ਤਵ ਹਤ੍ਥਤੋ ਗਹਿਤਂ ਅਤ੍ਥਿ, ਉਦਾਹੁ ਮਯਾ, ਕਿਂਕਾਰਣਾ ਮਂ ਏਵਂ ਬਹੁਂ ਧਨਂ ਯਾਚਸੀਤਿ?

ਏਵਂ ਵੁਤ੍ਤੇ ਸੁਦਸ੍ਸਨੋ ਦ੍ਵੇ ਗਾਥਾ ਅਭਾਸਿ –

੮੭੭.

‘‘ਅਲਮ੍ਪਾਯਨੋ ਹਿ ਨਾਗੇਨ, ਮਮਂ ਅਭਿਜਿਗੀਸਤਿ;

ਅਹਂ ਮਣ੍ਡੂਕਛਾਪਿਯਾ, ਡਂਸਯਿਸ੍ਸਾਮਿ ਬ੍ਰਾਹ੍ਮਣਂ.

੮੭੮.

‘‘ਤਂ ਤ੍ਵਂ ਦਟ੍ਠੁਂ ਮਹਾਰਾਜ, ਅਜ੍ਜ ਰਟ੍ਠਾਭਿਵਡ੍ਢਨ;

ਖਤ੍ਤਸਙ੍ਘਪਰਿਬ੍ਯੂਲ਼੍ਹੋ, ਨਿਯ੍ਯਾਹਿ ਅਹਿਦਸ੍ਸਨ’’ਨ੍ਤਿ.

ਤਤ੍ਥ ¶ ਅਭਿਜਿਗੀਸਤੀਤਿ ਯੁਦ੍ਧੇ ਜਿਨਿਤੁਂ ਇਚ੍ਛਤਿ. ਤਤ੍ਥ ਸਚੇ ਸੋ ਜੀਯਿਸ੍ਸਤਿ, ਮਯ੍ਹਂ ਪਞ੍ਚਸਹਸ੍ਸਾਨਿ ਦਸ੍ਸਤਿ. ਸਚਾਹਂ ਜੀਯਿਸ੍ਸਾਮਿ, ਅਹਮਸ੍ਸ ਦਸ੍ਸਾਮਿ, ਤਸ੍ਮਾ ਤਂ ਬਹੁਂ ਧਨਂ ਯਾਚਾਮਿ. ਤਨ੍ਤਿ ਤਸ੍ਮਾ ਤ੍ਵਂ ਮਹਾਰਾਜ, ਅਜ੍ਜ ਅਹਿਦਸ੍ਸਨਂ ਦਟ੍ਠੁਂ ਨਿਯ੍ਯਾਹੀਤਿ.

ਰਾਜਾ ‘‘ਤੇਨ ਹਿ ਗਚ੍ਛਾਮਾ’’ਤਿ ਤਾਪਸੇਨ ਸਦ੍ਧਿਂਯੇਵ ਨਿਕ੍ਖਮਿ. ਤਂ ਦਿਸ੍ਵਾ ਅਲਮ੍ਪਾਯਨੋ ‘‘ਅਯਂ ਤਾਪਸੋ ਗਨ੍ਤ੍ਵਾ ਰਾਜਾਨਂ ਗਹੇਤ੍ਵਾ ਆਗਤੋ, ਰਾਜਕੁਲੂਪਕੋ ਭਵਿਸ੍ਸਤੀ’’ਤਿ ਭੀਤੋ ਤਂ ਅਨੁਵਤ੍ਤਨ੍ਤੋ ਗਾਥਮਾਹ –

੮੭੯.

‘‘ਨੇਵ ਤਂ ਅਤਿਮਞ੍ਞਾਮਿ, ਸਿਪ੍ਪਵਾਦੇਨ ਮਾਣਵ;

ਅਤਿਮਤ੍ਤੋਸਿ ਸਿਪ੍ਪੇਨ, ਉਰਗਂ ਨਾਪਚਾਯਸੀ’’ਤਿ.

ਤਤ੍ਥ ¶ ¶ ਸਿਪ੍ਪਵਾਦੇਨਾਤਿ ਮਾਣਵ, ਅਹਂ ਅਤ੍ਤਨੋ ਸਿਪ੍ਪੇਨ ਤਂ ਨਾਤਿਮਞ੍ਞਾਮਿ, ਤ੍ਵਂ ਪਨ ਸਿਪ੍ਪੇਨ ਅਤਿਮਤ੍ਤੋ ਇਮਂ ਉਰਗਂ ਨ ਪੂਜੇਸਿ, ਨਾਗਸ੍ਸ ਅਪਚਿਤਿਂ ਨ ਕਰੋਸੀਤਿ.

ਤਤੋ ਸੁਦਸ੍ਸਨੋ ਦ੍ਵੇ ਗਾਥਾ ਅਭਾਸਿ –

੮੮੦.

‘‘ਅਹਮ੍ਪਿ ਨਾਤਿਮਞ੍ਞਾਮਿ, ਸਿਪ੍ਪਵਾਦੇਨ ਬ੍ਰਾਹ੍ਮਣ;

ਅਵਿਸੇਨ ਚ ਨਾਗੇਨ, ਭੁਸਂ ਵਞ੍ਚਯਸੇ ਜਨਂ.

੮੮੧.

‘‘ਏਵਞ੍ਚੇਤਂ ਜਨੋ ਜਞ੍ਞਾ, ਯਥਾ ਜਾਨਾਮਿ ਤਂ ਅਹਂ;

ਨ ਤ੍ਵਂ ਲਭਸਿ ਆਲਮ੍ਪ, ਭੁਸਮੁਟ੍ਠਿਂ ਕੁਤੋ ਧਨ’’ਨ੍ਤਿ.

ਅਥਸ੍ਸ ਅਲਮ੍ਪਾਯਨੋ ਕੁਜ੍ਝਿਤ੍ਵਾ ਆਹ –

੮੮੨.

‘‘ਖਰਾਜਿਨੋ ਜਟੀ ਦੁਮ੍ਮੀ, ਦਿਤ੍ਤੋ ਪਰਿਸਮਾਗਤੋ;

ਯੋ ਤ੍ਵਂ ਏਵਂ ਗਤਂ ਨਾਗਂ, ‘ਅਵਿਸੋ’ ਅਤਿਮਞ੍ਞਤਿ.

੮੮੩.

‘‘ਆਸਜ੍ਜ ਖੋ ਨਂ ਜਞ੍ਞਾਸਿ, ਪੁਣ੍ਣਂ ਉਗ੍ਗਸ੍ਸ ਤੇਜਸੋ;

ਮਞ੍ਞੇ ਤਂ ਭਸ੍ਮਰਾਸਿਂਵ, ਖਿਪ੍ਪਮੇਸ ਕਰਿਸ੍ਸਤੀ’’ਤਿ.

ਤਤ੍ਥ ¶ ਦੁਮ੍ਮੀਤਿ ਅਨਞ੍ਜਿਤਨਯਨੋ [ਰੁਮ੍ਮੀਤਿ ਅਨਞ੍ਜਿਤਾ ਮਣ੍ਡਿਤੋ (ਸੀ. ਪੀ.)]. ਅਵਿਸੋ ਅਤਿਮਞ੍ਞਸੀਤਿ ਨਿਬ੍ਬਿਸੋਤਿ ਅਵਜਾਨਾਸਿ. ਆਸਜ੍ਜਾਤਿ ਉਪਗਨ੍ਤ੍ਵਾ. ਜਞ੍ਞਾਸੀਤਿ ਜਾਨੇਯ੍ਯਾਸਿ.

ਅਥ ਤੇਨ ਸਦ੍ਧਿਂ ਕੇਲ਼ਿਂ ਕਰੋਨ੍ਤੋ ਸੁਦਸ੍ਸਨੋ ਗਾਥਮਾਹ –

੮੮੪.

‘‘ਸਿਯਾ ਵਿਸਂ ਸਿਲੁਤ੍ਤਸ੍ਸ, ਦੇਡ੍ਡੁਭਸ੍ਸ ਸਿਲਾਭੁਨੋ;

ਨੇਵ ਲੋਹਿਤਸੀਸਸ੍ਸ, ਵਿਸਂ ਨਾਗਸ੍ਸ ਵਿਜ੍ਜਤੀ’’ਤਿ.

ਤਤ੍ਥ ਸਿਲੁਤ੍ਤਸ੍ਸਾਤਿ ਘਰਸਪ੍ਪਸ੍ਸ. ਦੇਡ੍ਡੁਭਸ੍ਸਾਤਿ ਉਦਕਸਪ੍ਪਸ੍ਸ. ਸਿਲਾਭੁਨੋਤਿ ਨੀਲਵਣ੍ਣਸਪ੍ਪਸ੍ਸ. ਇਤਿ ਨਿਬ੍ਬਿਸੇ ਸਪ੍ਪੇ ਦਸ੍ਸੇਤ੍ਵਾ ਏਤੇਸਂ ਵਿਸਂ ਸਿਯਾ, ਨੇਵ ਲੋਹਿਤਸੀਸਸ੍ਸ ਸਪ੍ਪਸ੍ਸਾਤਿ ਆਹ.

ਅਥ ਨਂ ਅਲਮ੍ਪਾਯਨੋ ਦ੍ਵੀਹਿ ਗਾਥਾਹਿ ਅਜ੍ਝਭਾਸਿ –

੮੮੫.

‘‘ਸੁਤਮੇਤਂ ਅਰਹਤਂ, ਸਞ੍ਞਤਾਨਂ ਤਪਸ੍ਸਿਨਂ;

ਇਧ ਦਾਨਾਨਿ ਦਤ੍ਵਾਨ, ਸਗ੍ਗਂ ਗਚ੍ਛਨ੍ਤਿ ਦਾਯਕਾ;

ਜੀਵਨ੍ਤੋ ਦੇਹਿ ਦਾਨਾਨਿ, ਯਦਿ ਤੇ ਅਤ੍ਥਿ ਦਾਤਵੇ.

੮੮੬.

‘‘ਅਯਂ ¶ ਨਾਗੋ ਮਹਿਦ੍ਧਿਕੋ, ਤੇਜਸ੍ਸੀ ਦੁਰਤਿਕ੍ਕਮੋ;

ਤੇਨ ਤਂ ਡਂਸਯਿਸ੍ਸਾਮਿ, ਸੋ ਤਂ ਭਸ੍ਮਂ ਕਰਿਸ੍ਸਤੀ’’ਤਿ.

ਤਤ੍ਥ ਦਾਤਵੇਤਿ ਯਦਿ ਤੇ ਕਿਞ੍ਚਿ ਦਾਤਬ੍ਬਂ ਅਤ੍ਥਿ, ਤਂ ਦੇਹੀਤਿ.

੮੮੭.

‘‘ਮਯਾਪੇਤਂ ਸੁਤਂ ਸਮ੍ਮ, ਸਞ੍ਞਤਾਨਂ ਤਪਸ੍ਸਿਨਂ;

ਇਧ ਦਾਨਾਨਿ ਦਤ੍ਵਾਨ, ਸਗ੍ਗਂ ਗਚ੍ਛਨ੍ਤਿ ਦਾਯਕਾ;

ਤ੍ਵਮੇਵ ਦੇਹਿ ਜੀਵਨ੍ਤੋ, ਯਦਿ ਤੇ ਅਤ੍ਥਿ ਦਾਤਵੇ.

੮੮੮.

‘‘ਅਯਂ ¶ ਅਜਮੁਖੀ ਨਾਮ, ਪੁਣ੍ਣਾ ਉਗ੍ਗਸ੍ਸ ਤੇਜਸੋ;

ਤਾਯ ਤਂ ਡਂਸਯਿਸ੍ਸਾਮਿ, ਸਾ ਤਂ ਭਸ੍ਮਂ ਕਰਿਸ੍ਸਤਿ.

੮੮੯.

‘‘ਯਾ ¶ ਧੀਤਾ ਧਤਰਟ੍ਠਸ੍ਸ, ਵੇਮਾਤਾ ਭਗਿਨੀ ਮਮ;

ਸਾ ਤਂ ਡਂਸਤ੍ਵਜਮੁਖੀ, ਪੁਣ੍ਣਾ ਉਗ੍ਗਸ੍ਸ ਤੇਜਸੋ’’ਤਿ. –

ਇਮਾ ਗਾਥਾ ਸੁਦਸ੍ਸਨਸ੍ਸ ਵਚਨਂ. ਤਤ੍ਥ ਪੁਣ੍ਣਾ ਉਗ੍ਗਸ੍ਸ ਤੇਜਸੋਤਿ ਉਗ੍ਗੇਨ ਵਿਸੇਨ ਪੁਣ੍ਣਾ.

ਏਵਞ੍ਚ ਪਨ ਵਤ੍ਵਾ ‘‘ਅਮ੍ਮ ਅਜਮੁਖਿ, ਜਟਨ੍ਤਰਤੋ ਮੇ ਨਿਕ੍ਖਮਿਤ੍ਵਾ ਪਾਣਿਮ੍ਹਿ ਪਤਿਟ੍ਠਹਾ’’ਤਿ ਮਹਾਜਨਸ੍ਸ ਮਜ੍ਝੇਯੇਵ ਭਗਿਨਿਂ ਪਕ੍ਕੋਸਿਤ੍ਵਾ ਹਤ੍ਥਂ ਪਸਾਰੇਸਿ. ਸਾ ਤਸ੍ਸ ਸਦ੍ਦਂ ਸੁਤ੍ਵਾ ਜਟਨ੍ਤਰੇ ਨਿਸਿਨ੍ਨਾਵ ਤਿਕ੍ਖਤ੍ਤੁਂ ਮਣ੍ਡੂਕਵਸ੍ਸਿਤਂ ਵਸ੍ਸਿਤ੍ਵਾ ਨਿਕ੍ਖਮਿਤ੍ਵਾ ਅਂਸਕੂਟੇ ਨਿਸੀਦਿਤ੍ਵਾ ਉਪ੍ਪਤਿਤ੍ਵਾ ਤਸ੍ਸ ਹਤ੍ਥਤਲੇ ਤੀਣਿ ਵਿਸਬਿਨ੍ਦੂਨਿ ਪਾਤੇਤ੍ਵਾ ਪੁਨ ਤਸ੍ਸ ਜਟਨ੍ਤਰਮੇਵ ਪਾਵਿਸਿ. ਸੁਦਸ੍ਸਨੋ ਵਿਸਂ ਗਹੇਤ੍ਵਾ ਠਿਤੋਵ ‘‘ਨਸ੍ਸਿਸ੍ਸਤਾਯਂ ਜਨਪਦੋ, ਨਸ੍ਸਿਸ੍ਸਤਾਯਂ ਜਨਪਦੋ’’ਤਿ ਤਿਕ੍ਖਤ੍ਤੁਂ ਮਹਾਸਦ੍ਦਂ ਅਭਾਸਿ. ਤਸ੍ਸ ਸੋ ਸਦ੍ਦੋ ਦ੍ਵਾਦਸਯੋਜਨਿਕਂ ਬਾਰਾਣਸਿਂ ਛਾਦੇਤ੍ਵਾ ਅਟ੍ਠਾਸਿ. ਅਥ ਰਾਜਾ ਤਂ ਸਦ੍ਦਂ ਸੁਤ੍ਵਾ ‘‘ਕਿਮਤ੍ਥਂ ਜਨਪਦੋ ਨਸ੍ਸਿਸ੍ਸਤੀ’’ਤਿ ਪੁਚ੍ਛਿ. ‘‘ਮਹਾਰਾਜ, ਇਮਸ੍ਸ ਵਿਸਸ੍ਸ ਨਿਸਿਞ੍ਚਨਟ੍ਠਾਨਂ ਨ ਪਸ੍ਸਾਮੀ’’ਤਿ. ‘‘ਤਾਤ, ਮਹਨ੍ਤਾ ਅਯਂ ਪਥਵੀ, ਪਥਵਿਯਂ ਨਿਸਿਞ੍ਚਾ’’ਤਿ. ਅਥ ਨਂ ‘‘ਨ ਸਕ੍ਕਾ ਪਥਵਿਯਂ ਸਿਞ੍ਚਿਤੁਂ, ਮਹਾਰਾਜਾ’’ਤਿ ਪਟਿਕ੍ਖਿਪਨ੍ਤੋ ਗਾਥਮਾਹ –

੮੯੦.

‘‘ਛਮਾਯਂ ਚੇ ਨਿਸਿਞ੍ਚਿਸ੍ਸਂ, ਬ੍ਰਹ੍ਮਦਤ੍ਤ ਵਿਜਾਨਹਿ;

ਤਿਣਲਤਾਨਿ ਓਸਧ੍ਯੋ, ਉਸ੍ਸੁਸ੍ਸੇਯ੍ਯੁਂ ਅਸਂਸਯ’’ਨ੍ਤਿ.

ਤਤ੍ਥ ¶ ਤਿਣਲਤਾਨੀਤਿ ਪਥਵਿਨਿਸ੍ਸਿਤਾਨਿ ਤਿਣਾਨਿ ਚ ਲਤਾ ਚ ਸਬ੍ਬੋਸਧਿਯੋ ਚ ਉਸ੍ਸੁਸ੍ਸੇਯ੍ਯੁਂ, ਤਸ੍ਮਾ ਨ ਸਕ੍ਕਾ ਪਥਵਿਯਂ ਨਿਸਿਞ੍ਚਿਤੁਨ੍ਤਿ.

ਤੇਨ ਹਿ ਨਂ, ਤਾਤ, ਉਦ੍ਧਂ ਆਕਾਸਂ ਖਿਪਾਤਿ. ਤਤ੍ਰਾਪਿ ਨ ਸਕ੍ਕਾਤਿ ਦਸ੍ਸੇਨ੍ਤੋ ਗਾਥਮਾਹ –

੮੯੧.

‘‘ਉਦ੍ਧਂ ਚੇ ਪਾਤਯਿਸ੍ਸਾਮਿ, ਬ੍ਰਹ੍ਮਦਤ੍ਤ ਵਿਜਾਨਹਿ;

ਸਤ੍ਤਵਸ੍ਸਾਨਿਯਂ ਦੇਵੋ, ਨ ਵਸ੍ਸੇ ਨ ਹਿਮਂ ਪਤੇ’’ਤਿ.

ਤਤ੍ਥ ਨ ਹਿਮਂ ਪਤੇਤਿ ਸਤ੍ਤਵਸ੍ਸਾਨਿ ਹਿਮਬਿਨ੍ਦੁਮਤ੍ਤਮ੍ਪਿ ਨ ਪਤਿਸ੍ਸਤਿ.

ਤੇਨ ¶ ਹਿ ਨਂ ਤਾਤ ਉਦਕੇ ਸਿਞ੍ਚਾਤਿ. ਤਤ੍ਰਾਪਿ ਨ ਸਕ੍ਕਾਤਿ ਦਸ੍ਸੇਤੁਂ ਗਾਥਮਾਹ –

੮੯੨.

‘‘ਉਦਕੇ ¶ ਚੇ ਨਿਸਿਞ੍ਚਿਸ੍ਸਂ, ਬ੍ਰਹ੍ਮਦਤ੍ਤ ਵਿਜਾਨਹਿ;

ਯਾਵਨ੍ਤੋਦਕਜਾ ਪਾਣਾ, ਮਰੇਯ੍ਯੁਂ ਮਚ੍ਛਕਚ੍ਛਪਾ’’ਤਿ.

ਅਥ ਨਂ ਰਾਜਾ ਆਹ – ‘‘ਤਾਤ, ਮਯਂ ਨ ਕਿਞ੍ਚਿ ਜਾਨਾਮ, ਯਥਾ ਅਮ੍ਹਾਕਂ ਰਟ੍ਠਂ ਨ ਨਸ੍ਸਤਿ, ਤਂ ਉਪਾਯਂ ਤ੍ਵਮੇਵ ਜਾਨਾਹੀ’’ਤਿ. ‘‘ਤੇਨ ਹਿ, ਮਹਾਰਾਜ, ਇਮਸ੍ਮਿਂ ਠਾਨੇ ਪਟਿਪਾਟਿਯਾ ਤਯੋ ਆਵਾਟੇ ਖਣਾਪੇਥਾ’’ਤਿ. ਰਾਜਾ ਖਣਾਪੇਸਿ. ਸੁਦਸ੍ਸਨੋ ਪਠਮਂ ਆਵਾਟਂ ਨਾਨਾਭੇਸਜ੍ਜਾਨਂ ਪੂਰਾਪੇਸਿ, ਦੁਤਿਯਂ ਗੋਮਯਸ੍ਸ, ਤਤਿਯਂ ਦਿਬ੍ਬੋਸਧਾਨਞ੍ਞੇਵ. ਤਤੋ ਪਠਮੇ ਆਵਾਟੇ ਵਿਸਬਿਨ੍ਦੂਨਿ ਪਾਤੇਸਿ. ਤਙ੍ਖਣਞ੍ਞੇਵ ਧੂਮਾਯਿਤ੍ਵਾ ਜਾਲਾ ਉਟ੍ਠਹਿ. ਸਾ ਗਨ੍ਤ੍ਵਾ ਗੋਮਯੇ ਆਵਾਟਂ ਗਣ੍ਹਿ. ਤਤੋਪਿ ਜਾਲਾ ਉਟ੍ਠਾਯ ਇਤਰਂ ਦਿਬ੍ਬੋਸਧਸ੍ਸ ਪੁਣ੍ਣਂ ਗਹੇਤ੍ਵਾ ਓਸਧਾਨਿ ਝਾਪੇਤ੍ਵਾ ਨਿਬ੍ਬਾਯਿ. ਅਲਮ੍ਪਾਯਨੋ ਤਸ੍ਸ ਆਵਾਟਸ੍ਸ ਅਵਿਦੂਰੇ ਅਟ੍ਠਾਸਿ. ਅਥ ਨਂ ਵਿਸਉਸੁਮਾ ਪਹਰਿ, ਸਰੀਰਚ੍ਛਵਿ ਉਪ੍ਪਾਟੇਤ੍ਵਾ ਗਤਾ, ਸੇਤਕੁਟ੍ਠਿ ਅਹੋਸਿ. ਸੋ ਭਯਤਜ੍ਜਿਤੋ ‘‘ਨਾਗਰਾਜਾਨਂ ਵਿਸ੍ਸਜ੍ਜੇਮੀ’’ਤਿ ਤਿਕ੍ਖਤ੍ਤੁਂ ਵਾਚਂ ਨਿਚ੍ਛਾਰੇਸਿ. ਤਂ ਸੁਤ੍ਵਾ ਬੋਧਿਸਤ੍ਤੋ ਰਤਨਪੇਲ਼ਾਯ ਨਿਕ੍ਖਮਿਤ੍ਵਾ ਸਬ੍ਬਾਲਙ੍ਕਾਰਪ੍ਪਟਿਮਣ੍ਡਿਤਂ ਅਤ੍ਤਭਾਵਂ ਮਾਪੇਤ੍ਵਾ ਦੇਵਰਾਜਲੀਲਾਯ ਠਿਤੋ. ਸੁਦਸ੍ਸਨੋਪਿ ਅਜਮੁਖੀਪਿ ਤਥੇਵ ਅਟ੍ਠਂਸੁ. ਤਤੋ ਸੁਦਸ੍ਸਨੋ ਰਾਜਾਨਂ ਆਹ – ‘‘ਜਾਨਾਸਿ ਨੋ, ਮਹਾਰਾਜ, ਕਸ੍ਸੇਤੇ ਪੁਤ੍ਤਾ’’ਤਿ? ‘‘ਨ ਜਾਨਾਮੀ’’ਤਿ. ‘‘ਤੁਮ੍ਹੇ ਤਾਵ ਨ ਜਾਨਾਸਿ, ਕਾਸਿਰਞ੍ਞੋ ਪਨ ਧੀਤਾਯ ਸਮੁਦ੍ਦਜਾਯ ਧਤਰਟ੍ਠਸ੍ਸ ਦਿਨ੍ਨਭਾਵਂ ਜਾਨਾਸੀ’’ਤਿ? ‘‘ਆਮ, ਜਾਨਾਮਿ, ਮਯ੍ਹਂ ਸਾ ਕਨਿਟ੍ਠਭਗਿਨੀ’’ਤਿ. ‘‘ਮਯਂ ਤਸ੍ਸਾ ਪੁਤ੍ਤਾ, ਤ੍ਵਂ ਨੋ ਮਾਤੁਲੋ’’ਤਿ.

ਤਂ ¶ ਸੁਤ੍ਵਾ ਰਾਜਾ ਕਮ੍ਪਮਾਨੋ ਤੇ ਆਲਿਙ੍ਗਿਤ੍ਵਾ ਸੀਸੇ ਚੁਮ੍ਬਿਤ੍ਵਾ ਰੋਦਿਤ੍ਵਾ ਪਾਸਾਦਂ ਆਰੋਪੇਤ੍ਵਾ ਮਹਨ੍ਤਂ ਸਕ੍ਕਾਰਂ ਕਾਰੇਤ੍ਵਾ ਭੂਰਿਦਤ੍ਤੇਨ ਪਟਿਸਨ੍ਥਾਰਂ ਕਰੋਨ੍ਤੋ ਪੁਚ੍ਛਿ ‘‘ਤਾਤ, ਤਂ ਏਵਰੂਪਂ ਉਗ੍ਗਤੇਜਂ ਕਥਂ ਅਲਮ੍ਪਾਯਨੋ ਗਣ੍ਹੀ’’ਤਿ? ਸੋ ਸਬ੍ਬਂ ਵਿਤ੍ਥਾਰੇਨ ਕਥੇਤ੍ਵਾ ਰਾਜਾਨਂ ਓਵਦਨ੍ਤੋ ‘‘ਮਹਾਰਾਜ, ਰਞ੍ਞਾ ਨਾਮ ਇਮਿਨਾ ਨਿਯਾਮੇਨ ਰਜ੍ਜਂ ਕਾਰੇਤੁਂ ਵਟ੍ਟਤੀ’’ਤਿ ਮਾਤੁਲਸ੍ਸ ਧਮ੍ਮਂ ਦੇਸੇਸਿ. ਅਥ ਨਂ ਸੁਦਸ੍ਸਨੋ ਆਹ – ‘‘ਮਾਤੁਲ, ਮਮ ਮਾਤਾ ਭੂਰਿਦਤ੍ਤਂ ਅਪਸ੍ਸਨ੍ਤੀ ਕਿਲਮਤਿ, ਨ ਸਕ੍ਕਾ ਅਮ੍ਹੇਹਿ ਪਪਞ੍ਚਂ ਕਾਤੁ’’ਨ੍ਤਿ. ‘‘ਸਾਧੁ, ਤਾਤਾ, ਤੁਮ੍ਹੇ ਤਾਵ ਗਚ੍ਛਥ. ਅਹਂ ਪਨ ਮਮ ਭਗਿਨਿਂ ਦਟ੍ਠੁਕਾਮੋਮ੍ਹਿ, ਕਥਂ ਪਸ੍ਸਿਸ੍ਸਾਮੀ’’ਤਿ. ‘‘ਮਾਤੁਲ, ਕਹਂ ਪਨ ਨੋ ਅਯ੍ਯਕੋ ਕਾਸਿਰਾਜਾ’’ਤਿ? ‘‘ਤਾਤ, ਮਮ ਭਗਿਨਿਯਾ ਵਿਨਾ ¶ ਵਸਿਤੁਂ ਅਸਕ੍ਕੋਨ੍ਤੋ ਰਜ੍ਜਂ ਪਹਾਯ ਪਬ੍ਬਜਿਤ੍ਵਾ ਅਸੁਕੇ ਵਨਸਣ੍ਡੇ ਨਾਮ ਵਸਤੀ’’ਤਿ. ‘‘ਮਾਤੁਲ, ਮਮ ਮਾਤਾ ਤੁਮ੍ਹੇ ਚੇਵ ਅਯ੍ਯਕਞ੍ਚ ਦਟ੍ਠੁਕਾਮਾ, ਤੁਮ੍ਹੇ ਅਸੁਕਦਿਵਸੇ ਮਮ ਅਯ੍ਯਕਸ੍ਸ ਸਨ੍ਤਿਕਂ ਗਚ੍ਛਥ, ਮਯਂ ਮਾਤਰਂ ਆਦਾਯ ਅਯ੍ਯਕਸ੍ਸ ਅਸ੍ਸਮਪਦਂ ਆਗਚ੍ਛਿਸ੍ਸਾਮ. ਤਤ੍ਥ ਨਂ ਤੁਮ੍ਹੇਪਿ ਪਸ੍ਸਿਸ੍ਸਥਾ’’ਤਿ. ਇਤਿ ਤੇ ਮਾਤੁਲਸ੍ਸ ਦਿਵਸਂ ¶ ਵਵਤ੍ਥਪੇਤ੍ਵਾ ਰਾਜਨਿਵੇਸਨਾ ਓਤਰਿਂਸੁ. ਰਾਜਾ ਭਾਗਿਨੇਯ੍ਯੇ ਉਯ੍ਯੋਜੇਤ੍ਵਾ ਰੋਦਿਤ੍ਵਾ ਨਿਵਤ੍ਤਿ. ਤੇਪਿ ਪਥਵਿਯਂ ਨਿਮੁਜ੍ਜਿਤ੍ਵਾ ਨਾਗਭਵਨਂ ਗਤਾ.

ਨਗਰਪਵੇਸਨਖਣ੍ਡਂ ਨਿਟ੍ਠਿਤਂ.

ਮਹਾਸਤ੍ਤਸ੍ਸ ਪਰਿਯੇਸਨਖਣ੍ਡਂ

ਮਹਾਸਤ੍ਤੇ ਸਮ੍ਪਤ੍ਤੇ ਸਕਲਨਾਗਭਵਨਂ ਏਕਪਰਿਦੇਵਸਦ੍ਦਂ ਅਹੋਸਿ. ਸੋਪਿ ਮਾਸਂ ਪੇਲ਼ਾਯ ਵਸਿਤਤ੍ਤਾ ਕਿਲਨ੍ਤੋ ਗਿਲਾਨਸੇਯ੍ਯਂ ਸਯਿ. ਤਸ੍ਸ ਸਨ੍ਤਿਕਂ ਆਗਚ੍ਛਨ੍ਤਾਨਂ ਨਾਗਾਨਂ ਪਮਾਣਂ ਨਤ੍ਥਿ. ਸੋ ਤੇਹਿ ਸਦ੍ਧਿਂ ਕਥੇਨ੍ਤੋ ਕਿਲਮਤਿ. ਕਾਣਾਰਿਟ੍ਠੋ ਦੇਵਲੋਕਂ ਗਨ੍ਤ੍ਵਾ ਮਹਾਸਤ੍ਤਂ ਅਦਿਸ੍ਵਾ ਪਠਮਮੇਵਾਗਤੋ. ਅਥ ਨਂ ‘‘ਏਸ ਚਣ੍ਡੋ ਫਰੁਸੋ, ਸਕ੍ਖਿਸ੍ਸਤਿ ਨਾਗਪਰਿਸਂ ਵਾਰੇਤੁ’’ਨ੍ਤਿ ਮਹਾਸਤ੍ਤਸ੍ਸ ਨਿਸਿਨ੍ਨਟ੍ਠਾਨੇ ਦੋਵਾਰਿਕਂ ਕਰਿਂਸੁ. ਸੁਭੋਗੋਪਿ ਸਕਲਹਿਮਵਨ੍ਤਂ ਵਿਚਰਿਤ੍ਵਾ ਤਤੋ ਮਹਾਸਮੁਦ੍ਦਞ੍ਚ ਸੇਸਨਦਿਯੋ ਚ ਉਪਧਾਰੇਤ੍ਵਾ ਯਮੁਨਂ ਉਪਧਾਰੇਨ੍ਤੋ ਆਗਚ੍ਛਤਿ. ਨੇਸਾਦਬ੍ਰਾਹ੍ਮਣੋਪਿ ਅਲਮ੍ਪਾਯਨਂ ਕੁਟ੍ਠਿਂ ਦਿਸ੍ਵਾ ਚਿਨ੍ਤੇਸਿ ‘‘ਅਯਂ ਭੂਰਿਦਤ੍ਤਂ ਕਿਲਮੇਤ੍ਵਾ ਕੁਟ੍ਠਿ ਜਾਤੋ, ਅਹਂ ਪਨ ਤਂ ਮਯ੍ਹਂ ਤਾਵ ਬਹੂਪਕਾਰਂ ਮਣਿਲੋਭੇਨ ਅਲਮ੍ਪਾਯਨਸ੍ਸ ਦਸ੍ਸੇਸਿਂ, ਤਂ ਪਾਪਂ ਮਮ ਆਗਮਿਸ੍ਸਤਿ. ਯਾਵ ਤਂ ਨ ਆਗਚ੍ਛਤਿ, ਤਾਵਦੇਵ ਯਮੁਨਂ ਗਨ੍ਤ੍ਵਾ ਪਯਾਗਤਿਤ੍ਥੇ ਪਾਪਪਵਾਹਨਂ ਕਰਿਸ੍ਸਾਮੀ’’ਤਿ. ਸੋ ਤਤ੍ਥ ਗਨ੍ਤ੍ਵਾ ‘‘ਮਯਾ ਭੂਰਿਦਤ੍ਤੇ ਮਿਤ੍ਤਦੁਬ੍ਭਿਕਮ੍ਮਂ ਕਤਂ, ਤਂ ਪਾਪਂ ਪਵਾਹੇਸ੍ਸਾਮੀ’’ਤਿ ਵਤ੍ਵਾ ਉਦਕੋਰੋਹਨਕਮ੍ਮਂ ਕਰੋਤਿ. ਤਸ੍ਮਿਂ ਖਣੇ ਸੁਭੋਗੋ ¶ ਤਂ ਠਾਨਂ ਪਤ੍ਤੋ. ਤਸ੍ਸ ਤਂ ਵਚਨਂ ਸੁਤ੍ਵਾ ‘‘ਇਮਿਨਾ ਕਿਰ ਪਾਪਕੇਨ ਤਾਵ ਮਹਨ੍ਤਸ੍ਸ ਯਸਸ੍ਸ ਦਾਯਕੋ ਮਮ ਭਾਤਾ ਮਣਿਰਤਨਸ੍ਸ ਕਾਰਣਾ ਅਲਮ੍ਪਾਯਨਸ੍ਸ ਦਸ੍ਸਿਤੋ, ਨਾਸ੍ਸ ਜੀਵਿਤਂ ਦਸ੍ਸਾਮੀ’’ਤਿ ਨਙ੍ਗੁਟ੍ਠੇਨ ਤਸ੍ਸ ਪਾਦੇਸੁ ਵੇਠੇਤ੍ਵਾ ਆਕਡ੍ਢਿਤ੍ਵਾ ਉਦਕੇ ਓਸਿਦਾਪੇਤ੍ਵਾ ਨਿਰਸ੍ਸਾਸਕਾਲੇ ਥੋਕਂ ਸਿਥਿਲਂ ਅਕਾਸਿ. ਸੋ ਸੀਸਂ ਉਕ੍ਖਿਪਿ. ਅਥ ਨਂ ਪੁਨਾਕਡ੍ਢਿਤ੍ਵਾ ¶ ਓਸੀਦਾਪੇਸਿ. ਏਵਂ ਬਹੂ ਵਾਰੇ ਤੇਨ ਕਿਲਮਿਯਮਾਨੋ ਨੇਸਾਦਬ੍ਰਾਹ੍ਮਣੋ ਸੀਸਂ ਉਕ੍ਖਿਪਿਤ੍ਵਾ ਗਾਥਮਾਹ –

੮੯੩.

‘‘ਲੋਕ੍ਯਂ ਸਜਨ੍ਤਂ ਉਦਕਂ, ਪਯਾਗਸ੍ਮਿਂ ਪਤਿਟ੍ਠਿਤਂ;

ਕੋ ਮਂ ਅਜ੍ਝੋਹਰੀ ਭੂਤੋ, ਓਗਾਲ਼੍ਹਂ ਯਮੁਨਂ ਨਦਿ’’ਨ੍ਤਿ.

ਤਤ੍ਥ ਲੋਕ੍ਯਨ੍ਤਿ ਏਵਂ ਪਾਪਵਾਹਨਸਮਤ੍ਥਨ੍ਤਿ ਲੋਕਸਮ੍ਮਤਂ. ਸਜਨ੍ਤਨ੍ਤਿ ਏਵਰੂਪਂ ਉਦਕਂ ਅਭਿਸਿਞ੍ਚਨ੍ਤਂ. ਪਯਾਗਸ੍ਮਿਨ੍ਤਿ ਪਯਾਗਤਿਤ੍ਥੇ.

ਅਥ ¶ ਨਂ ਸੁਭੋਗੋ ਗਾਥਾਯ ਅਜ੍ਝਭਾਸਿ –

੮੯੪.

‘‘ਯਦੇਸ ਲੋਕਾਧਿਪਤੀ ਯਸਸ੍ਸੀ, ਬਾਰਾਣਸਿਂ ਪਕ੍ਰਿਯ ਸਮਨ੍ਤਤੋ;

ਤਸ੍ਸਾਹ ਪੁਤ੍ਤੋ ਉਰਗੂਸਭਸ੍ਸ, ਸੁਭੋਗੋਤਿ ਮਂ ਬ੍ਰਾਹ੍ਮਣ ਵੇਦਯਨ੍ਤੀ’’ਤਿ.

ਤਤ੍ਥ ਯਦੇਸਾਤਿ ਯੋ ਏਸੋ. ਪਕ੍ਰਿਯ ਸਮਨ੍ਤਤੋਤਿ ਪਚ੍ਚਤ੍ਥਿਕਾਨਂ ਦੁਪ੍ਪਹਰਣਸਮਤ੍ਥਤਾਯ ਪਰਿਸਮਨ੍ਤਤੋ ਪਕਿਰਿਯ ਸਬ੍ਬਂ ਪਰਿਕ੍ਖਿਪਿਤ੍ਵਾ ਉਪਰਿ ਫਣੇਨ ਛਾਦੇਸਿ.

ਅਥ ਨਂ ਬ੍ਰਾਹ੍ਮਣੋ ‘‘ਅਯਂ ਭੂਰਿਦਤ੍ਤਭਾਤਾ, ਨ ਮੇ ਜੀਵਿਤਂ ਦਸ੍ਸਤਿ, ਯਂਨੂਨਾਹਂ ਏਤਸ੍ਸ ਚੇਵ ਮਾਤਾਪਿਤੂਨਞ੍ਚਸ੍ਸ ਵਣ੍ਣਕਿਤ੍ਤਨੇਨ ਮੁਦੁਚਿਤ੍ਤਤਂ ਕਤ੍ਵਾ ਅਤ੍ਤਨੋ ਜੀਵਿਤਂ ਯਾਚੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਗਾਥਮਾਹ –

੮੯੫.

‘‘ਸਚੇ ਹਿ ਪੁਤ੍ਤੋ ਉਰਗੂਸਭਸ੍ਸ, ਕਾਸਿਸ੍ਸ ਰਞ੍ਞੋ ਅਮਰਾਧਿਪਸ੍ਸ;

ਮਹੇਸਕ੍ਖੋ ਅਞ੍ਞਤਰੋ ਪਿਤਾ ਤੇ, ਮਚ੍ਚੇਸੁ ਮਾਤਾ ਪਨ ਤੇ ਅਤੁਲ੍ਯਾ;

ਨ ਤਾਦਿਸੋ ਅਰਹਤਿ ਬ੍ਰਾਹ੍ਮਣਸ੍ਸ, ਦਾਸਮ੍ਪਿ ਓਹਾਰਿਤੁਂ ਮਹਾਨੁਭਾਵੋ’’ਤਿ.

ਤਤ੍ਥ ¶ ਕਾਸਿਸ੍ਸਾਤਿ ਅਪਰੇਨ ਨਾਮੇਨ ਏਵਂਨਾਮਕਸ੍ਸ. ‘‘ਕਾਸਿਕਰਞ੍ਞੋ’’ਤਿਪਿ ਪਠਨ੍ਤਿਯੇਵ. ਕਾਸਿਰਾਜਧੀਤਾਯ ਗਹਿਤਤ੍ਤਾ ਕਾਸਿਰਜ੍ਜਮ੍ਪਿ ਤਸ੍ਸੇਵ ਸਨ੍ਤਕਂ ਕਤ੍ਵਾ ਵਣ੍ਣੇਤਿ. ਅਮਰਾਧਿਪਸ੍ਸਾਤਿ ਦੀਘਾਯੁਕਤਾਯ ਅਮਰਸਙ੍ਖਾਤਾਨਂ ਨਾਗਾਨਂ ਅਧਿਪਸ੍ਸ. ਮਹੇਸਕ੍ਖੋਤਿ ਮਹਾਨੁਭਾਵੋ. ਅਞ੍ਞਤਰੋਤਿ ਮਹੇਸਕ੍ਖਾਨਂ ਅਞ੍ਞਤਰੋ. ਦਾਸਮ੍ਪੀਤਿ ¶ ਤਾਦਿਸੋ ਹਿ ਮਹਾਨੁਭਾਵੋ ਆਨੁਭਾਵਰਹਿਤਂ ਬ੍ਰਾਹ੍ਮਣਸ੍ਸ ਦਾਸਮ੍ਪਿ ਉਦਕੇ ਓਹਰਿਤੁਂ ਨਾਰਹਤਿ, ਪਗੇਵ ਮਹਾਨੁਭਾਵਂ ਬ੍ਰਾਹ੍ਮਣਨ੍ਤਿ.

ਅਥ ਨਂ ਸੁਭੋਗੋ ‘‘ਅਰੇ ਦੁਟ੍ਠਬ੍ਰਾਹ੍ਮਣ, ਤ੍ਵਂ ਮਂ ਵਞ੍ਚੇਤ੍ਵਾ ‘ਮੁਞ੍ਚਿਸ੍ਸਾਮੀ’ਤਿ ਮਞ੍ਞਸਿ, ਨ ਤੇ ਜੀਵਿਤਂ ਦਸ੍ਸਾਮੀ’’ਤਿ ਤੇਨ ਕਤਕਮ੍ਮਂ ਪਕਾਸੇਨ੍ਤੋ ਆਹ –

੮੯੬.

‘‘ਰੁਕ੍ਖਂ ਨਿਸ੍ਸਾਯ ਵਿਜ੍ਝਿਤ੍ਥੋ, ਏਣੇਯ੍ਯਂ ਪਾਤੁਮਾਗਤਂ;

ਸੋ ਵਿਦ੍ਧੋ ਦੂਰਮਚਰਿ, ਸਰਵੇਗੇਨ ਸੀਘਵਾ.

੮੯੭.

‘‘ਤਂ ਤ੍ਵਂ ਪਤਿਤਮਦ੍ਦਕ੍ਖਿ, ਅਰਞ੍ਞਸ੍ਮਿਂ ਬ੍ਰਹਾਵਨੇ;

ਸ ਮਂਸਕਾਜਮਾਦਾਯ, ਸਾਯਂ ਨਿਗ੍ਰੋਧੁਪਾਗਮਿ.

੮੯੮.

‘‘ਸੁਕਸਾਲ਼ਿਕਸਙ੍ਘੁਟ੍ਠਂ ¶ , ਪਿਙ੍ਗਲਂ ਸਨ੍ਥਤਾਯੁਤਂ;

ਕੋਕਿਲਾਭਿਰੁਦਂ ਰਮ੍ਮਂ, ਧੁਵਂ ਹਰਿਤਸਦ੍ਦਲਂ.

੮੯੯.

‘‘ਤਤ੍ਥ ਤੇ ਸੋ ਪਾਤੁਰਹੁ, ਇਦ੍ਧਿਯਾ ਯਸਸਾ ਜਲਂ;

ਮਹਾਨੁਭਾਵੋ ਭਾਤਾ ਮੇ, ਕਞ੍ਞਾਹਿ ਪਰਿਵਾਰਿਤੋ.

੯੦੦.

‘‘ਸੋ ਤੇਨ ਪਰਿਚਿਣ੍ਣੋ ਤ੍ਵਂ, ਸਬ੍ਬਕਾਮੇਹਿ ਤਪ੍ਪਿਤੋ;

ਅਦੁਟ੍ਠਸ੍ਸ ਤੁਵਂ ਦੁਬ੍ਭਿ, ਤਂ ਤੇ ਵੇਰਂ ਇਧਾਗਤਂ.

੯੦੧.

‘‘ਖਿਪ੍ਪਂ ਗੀਵਂ ਪਸਾਰੇਹਿ, ਨ ਤੇ ਦਸ੍ਸਾਮਿ ਜੀਵਿਤਂ;

ਭਾਤੁ ਪਰਿਸਰਂ ਵੇਰਂ, ਛੇਦਯਿਸ੍ਸਾਮਿ ਤੇ ਸਿਰ’’ਨ੍ਤਿ.

ਤਤ੍ਥ ਸਾਯਂ ਨਿਗ੍ਰੋਧੁਪਾਗਮੀਤਿ ਵਿਕਾਲੇ ਨਿਗ੍ਰੋਧਂ ਉਪਗਤੋ ਅਸਿ. ਪਿਙ੍ਗਲਨ੍ਤਿ ਪਕ੍ਕਾਨਂ ਵਣ੍ਣੇਨ ਪਿਙ੍ਗਲਂ. ਸਨ੍ਥਤਾਯੁਤਨ੍ਤਿ ਪਾਰੋਹਪਰਿਕਿਣ੍ਣਂ. ਕੋਕਿਲਾਭਿਰੁਦਨ੍ਤਿ ਕੋਕਿਲਾਹਿ ਅਭਿਰੁਦਂ. ਧੁਵਂ ਹਰਿਤਸਦ੍ਦਲਨ੍ਤਿ ਉਦਕਭੂਮਿਯਂ ਜਾਤਤ੍ਤਾ ਨਿਚ੍ਚਂ ਹਰਿਤਸਦ੍ਦਲਂ ਭੂਮਿਭਾਗਂ. ਪਾਤੁਰਹੂਤਿ ਤਸ੍ਮਿਂ ਤੇ ਨਿਗ੍ਰੋਧੇ ਠਿਤਸ੍ਸ ¶ ਸੋ ਮਮ ਭਾਤਾ ਪਾਕਟੋ ਅਹੋਸਿ. ਇਦ੍ਧਿਯਾਤਿ ਪੁਞ੍ਞਤੇਜੇਨ. ਸੋ ਤੇਨਾਤਿ ਸੋ ਤੁਵਂ ਤੇਨ ਅਤ੍ਤਨੋ ਨਾਗਭਵਨਂ ਨੇਤ੍ਵਾ ਪਰਿਚਿਣ੍ਣੋ. ਪਰਿਸਰਨ੍ਤਿ ਤਯਾ ਮਮ ਭਾਤੁ ਕਤਂ ਵੇਰਂ ਪਾਪਕਮ੍ਮਂ ਪਰਿਸਰਨ੍ਤੋ ਅਨੁਸ੍ਸਰਨ੍ਤੋ. ਛੇਦਯਿਸ੍ਸਾਮਿ ਤੇ ਸਿਰਨ੍ਤਿ ਤਵ ਸੀਸਂ ਛਿਨ੍ਦਿਸ੍ਸਾਮੀਤਿ.

ਅਥ ਬ੍ਰਾਹ੍ਮਣੋ ‘‘ਨ ਮੇਸ ਜੀਵਿਤਂ ਦਸ੍ਸਤਿ, ਯਂ ਕਿਞ੍ਚਿ ਪਨ ਵਤ੍ਵਾ ਮੋਕ੍ਖਤ੍ਥਾਯ ਵਾਯਮਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੯੦੨.

‘‘ਅਜ੍ਝਾਯਕੋ ਯਾਚਯੋਗੀ, ਆਹੁਤਗ੍ਗਿ ਚ ਬ੍ਰਾਹ੍ਮਣੋ;

ਏਤੇਹਿ ਤੀਹਿ ਠਾਨੇਹਿ, ਅਵਜ੍ਝੋ ਹੋਤਿ ਬ੍ਰਾਹ੍ਮਣੋ’’ਤਿ.

ਤਤ੍ਥ ਏਤੇਹੀਤਿ ਏਤੇਹਿ ਅਜ੍ਝਾਯਕਤਾਦੀਹਿ ਤੀਹਿ ਕਾਰਣੇਹਿ ਬ੍ਰਾਹ੍ਮਣੋ ਅਵਜ੍ਝੋ, ਨ ਲਬ੍ਭਾ ਬ੍ਰਾਹ੍ਮਣਂ ਵਧਿਤੁਂ, ਕਿਂ ਤ੍ਵਂ ਵਦੇਸਿ, ਯੋ ਹਿ ਬ੍ਰਾਹ੍ਮਣਂ ਵਧੇਤਿ, ਸੋ ਨਿਰਯੇ ਨਿਬ੍ਬਤ੍ਤਤੀਤਿ.

ਤਂ ¶ ਸੁਤ੍ਵਾ ਸੁਭੋਗੋ ਸਂਸਯਪਕ੍ਖਨ੍ਦੋ ਹੁਤ੍ਵਾ ‘‘ਇਮਂ ਨਾਗਭਵਨਂ ਨੇਤ੍ਵਾ ਭਾਤਰੋ ਪਟਿਪੁਚ੍ਛਿਤ੍ਵਾ ਜਾਨਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦ੍ਵੇ ਗਾਥਾ ਅਭਾਸਿ –

੯੦੩.

‘‘ਯਂ ¶ ਪੁਰਂ ਧਤਰਟ੍ਠਸ੍ਸ, ਓਗਾਲ਼੍ਹਂ ਯਮੁਨਂ ਨਦਿਂ;

ਜੋਤਤੇ ਸਬ੍ਬਸੋਵਣ੍ਣਂ, ਗਿਰਿਮਾਹਚ੍ਚ ਯਾਮੁਨਂ.

੯੦੪.

‘‘ਤਤ੍ਥ ਤੇ ਪੁਰਿਸਬ੍ਯਗ੍ਘਾ, ਸੋਦਰਿਯਾ ਮਮ ਭਾਤਰੋ;

ਯਥਾ ਤੇ ਤਤ੍ਥ ਵਕ੍ਖਨ੍ਤਿ, ਤਥਾ ਹੇਸ੍ਸਸਿ ਬ੍ਰਾਹ੍ਮਣਾ’’ਤਿ.

ਤਤ੍ਥ ਪੁਰਨ੍ਤਿ ਨਾਗਪੁਰਂ. ਓਗਾਲ਼੍ਹਨ੍ਤਿ ਅਨੁਪਵਿਟ੍ਠਂ. ਗਿਰਿਮਾਹਚ੍ਚ ਯਾਮੁਨਨ੍ਤਿ ਯਮੁਨਾਤੋ ਅਵਿਦੂਰੇ ਠਿਤਂ ਹਿਮਵਨ੍ਤਂ ਆਹਚ੍ਚ ਜੋਤਤਿ. ਤਤ੍ਥ ਤੇਤਿ ਤਸ੍ਮਿਂ ਨਗਰੇ ਤੇ ਮਮ ਭਾਤਰੋ ਵਸਨ੍ਤਿ, ਤਤ੍ਥ ਨੀਤੇ ਤਯਿ ਯਥਾ ਤੇ ਵਕ੍ਖਨ੍ਤਿ, ਤਥਾ ਭਵਿਸ੍ਸਸਿ. ਸਚੇ ਹਿ ਸਚ੍ਚਂ ਕਥੇਸਿ, ਜੀਵਿਤਂ ਤੇ ਅਤ੍ਥਿ. ਨੋ ਚੇ, ਤਤ੍ਥੇਵ ਸੀਸਂ ਛਿਨ੍ਦਿਸ੍ਸਾਮੀਤਿ.

ਇਤਿ ਨਂ ਵਤ੍ਵਾ ਸੁਭੋਗੋ ਗੀਵਾਯਂ ਗਹੇਤ੍ਵਾ ਖਿਪਨ੍ਤੋ ਅਕ੍ਕੋਸਨ੍ਤੋ ਪਰਿਭਾਸਨ੍ਤੋ ਮਹਾਸਤ੍ਤਸ੍ਸ ਪਾਸਾਦਦ੍ਵਾਰਂ ਅਗਮਾਸਿ.

ਮਹਾਸਤ੍ਤਸ੍ਸ ਪਰਿਯੇਸਨਯਕਣ੍ਡਂ ਨਿਟ੍ਠਿਤਂ.

ਮਿਚ੍ਛਾਕਥਾ

ਅਥ ¶ ਨਂ ਦੋਵਾਰਿਕੋ ਹੁਤ੍ਵਾ ਨਿਸਿਨ੍ਨੋ ਕਾਣਾਰਿਟ੍ਠੋ ਤਥਾ ਕਿਲਮੇਤ੍ਵਾ ਆਨੀਯਮਾਨਂ ਦਿਸ੍ਵਾ ਪਟਿਮਗ੍ਗਂ ਗਨ੍ਤ੍ਵਾ ‘‘ਸੁਭੋਗ, ਮਾ ਵਿਹੇਠਯਿ, ਬ੍ਰਾਹ੍ਮਣਾ ਨਾਮ ਮਹਾਬ੍ਰਹ੍ਮੁਨੋ ਪੁਤ੍ਤਾ. ਸਚੇ ਹਿ ਮਹਾਬ੍ਰਹ੍ਮਾ ਜਾਨਿਸ੍ਸਤਿ, ‘ਮਮ ਪੁਤ੍ਤਂ ਵਿਹੇਠੇਨ੍ਤੀ’ਤਿ ਕੁਜ੍ਝਿਤ੍ਵਾ ਅਮ੍ਹਾਕਂ ਸਕਲਂ ਨਾਗਭਵਨਂ ਵਿਨਾਸੇਸ੍ਸਤਿ. ਲੋਕਸ੍ਮਿਞ੍ਹਿ ਬ੍ਰਾਹ੍ਮਣਾ ਨਾਮ ਸੇਟ੍ਠਾ ਮਹਾਨੁਭਾਵਾ, ਤ੍ਵਂ ਤੇਸਂ ਆਨੁਭਾਵਂ ਨ ਜਾਨਾਸਿ, ਅਹਂ ਪਨ ਜਾਨਾਮੀ’’ਤਿ ਆਹ. ਕਾਣਾਰਿਟ੍ਠੋ ਕਿਰ ਅਤੀਤਾਨਨ੍ਤਰਭਵੇ ਯਞ੍ਞਕਾਰਬ੍ਰਾਹ੍ਮਣੋ ਅਹੋਸਿ, ਤਸ੍ਮਾ ਏਵਮਾਹ. ਵਤ੍ਵਾ ਚ ਪਨ ਅਨੁਭੂਤਪੁਬ੍ਬਵਸੇਨ ਯਜਨਸੀਲੋ ਹੁਤ੍ਵਾ ਸੁਭੋਗਞ੍ਚ ਨਾਗਪਰਿਸਞ੍ਚ ਆਮਨ੍ਤੇਤ੍ਵਾ ‘‘ਏਥ, ਭੋ, ਯਞ੍ਞਕਾਰਕਾਨਂ ਵੋ ਗੁਣੇ ਵਣ੍ਣੇਸ੍ਸਾਮੀ’’ਤਿ ਵਤ੍ਵਾ ਯਞ੍ਞਵਣ੍ਣਨਂ ਆਰਭਨ੍ਤੋ ਆਹ –

੯੦੫.

‘‘ਅਨਿਤ੍ਤਰਾ ਇਤ੍ਤਰਸਮ੍ਪਯੁਤ੍ਤਾ, ਯਞ੍ਞਾ ਚ ਵੇਦਾ ਚ ਸੁਭੋਗ ਲੋਕੇ;

ਤਦਗ੍ਗਰਯ੍ਹਞ੍ਹਿ ਵਿਨਿਨ੍ਦਮਾਨੋ, ਜਹਾਤਿ ਵਿਤ੍ਤਞ੍ਚ ਸਤਞ੍ਚ ਧਮ੍ਮ’’ਨ੍ਤਿ.

ਤਤ੍ਥ ¶ ¶ ਅਨਿਤ੍ਤਰਾਤਿ ਸੁਭੋਗ ਇਮਸ੍ਮਿਂ ਲੋਕੇ ਯਞ੍ਞਾ ਚ ਵੇਦਾ ਚ ਅਨਿਤ੍ਤਰਾ ਨ ਲਾਮਕਾ ਮਹਾਨੁਭਾਵਾ, ਤੇ ਇਤ੍ਤਰੇਹਿ ਬ੍ਰਾਹ੍ਮਣੇਹਿ ਸਮ੍ਪਯੁਤ੍ਤਾ, ਤਸ੍ਮਾ ਬ੍ਰਾਹ੍ਮਣਾਪਿ ਅਨਿਤ੍ਤਰਾਵ ਜਾਤਾ. ਤਦਗ੍ਗਰਯ੍ਹਨ੍ਤਿ ਤਸ੍ਮਾ ਅਗਾਰਯ੍ਹਂ ਬ੍ਰਾਹ੍ਮਣਂ ਵਿਨਿਨ੍ਦਮਾਨੋ ਧਨਞ੍ਚ ਪਣ੍ਡਿਤਾਨਂ ਧਮ੍ਮਞ੍ਚ ਜਹਾਤਿ. ਇਦਂ ਕਿਰ ਸੋ ‘‘ਇਮਿਨਾ ਭੂਰਿਦਤ੍ਤੇ ਮਿਤ੍ਤਦੁਬ੍ਭਿਕਮ੍ਮਂ ਕਤਨ੍ਤਿ ਵਤ੍ਤੁਂ ਨਾਗਪਰਿਸਾ ਮਾ ਲਭਨ੍ਤੂ’’ਤਿ ਅਵੋਚ.

ਅਥ ਨਂ ਕਾਣਾਰਿਟ੍ਠੋ ‘‘ਸੁਭੋਗ ਜਾਨਾਸਿ ਪਨ ਅਯਂ ਲੋਕੋ ਕੇਨ ਨਿਮ੍ਮਿਤੋ’’ਤਿ ਵਤ੍ਵਾ ‘‘ਨ ਜਾਨਾਮੀ’’ਤਿ ਵੁਤ੍ਤੇ ‘‘ਬ੍ਰਾਹ੍ਮਣਾਨਂ ਪਿਤਾਮਹੇਨ ਮਹਾਬ੍ਰਹ੍ਮੁਨਾ ਨਿਮ੍ਮਿਤੋ’’ਤਿ ਦਸ੍ਸੇਤੁਂ ਇਤਰਂ ਗਾਥਮਾਹ –

੯੦੬.

‘‘ਅਜ੍ਝੇਨਮਰਿਯਾ ਪਥਵਿਂ ਜਨਿਨ੍ਦਾ, ਵੇਸ੍ਸਾ ਕਸਿਂ ਪਾਰਿਚਰਿਯਞ੍ਚ ਸੁਦ੍ਦਾ;

ਉਪਾਗੁ ਪਚ੍ਚੇਕਂ ਯਥਾਪਦੇਸਂ, ਕਤਾਹੁ ਏਤੇ ਵਸਿਨਾਤਿ ਆਹੂ’’ਤਿ.

ਤਤ੍ਥ ਉਪਾਗੂਤਿ ਉਪਗਤਾ. ਬ੍ਰਹ੍ਮਾ ਕਿਰ ਬ੍ਰਾਹ੍ਮਣਾਦਯੋ ਚਤ੍ਤਾਰੋ ਵਣ੍ਣੇ ਨਿਮ੍ਮਿਨਿਤ੍ਵਾ ਅਰਿਯੇ ਤਾਵ ਬ੍ਰਾਹ੍ਮਣੇ ਆਹ – ‘‘ਤੁਮ੍ਹੇ ਅਜ੍ਝੇਨਮੇਵ ਉਪਗਚ੍ਛਥ ¶ , ਮਾ ਅਞ੍ਞਂ ਕਿਞ੍ਚਿ ਕਰਿਤ੍ਥਾ’’ਤਿ, ਜਨਿਨ੍ਦੇ ਆਹ ‘‘ਤੁਮ੍ਹੇ ਪਥਵਿਂਯੇਵ ਵਿਜਿਨਥ’’, ਵੇਸ੍ਸੇ ਆਹ – ‘‘ਤੁਮ੍ਹੇ ਕਸਿਂਯੇਵ ਉਪੇਥ’’, ਸੁਦ੍ਦੇ ਆਹ ‘‘ਤੁਮ੍ਹੇ ਤਿਣ੍ਣਂ ਵਣ੍ਣਾਨਂ ਪਾਰਿਚਰਿਯਂਯੇਵ ਉਪੇਥਾ’’ਤਿ. ਤਤੋ ਪਟ੍ਠਾਯ ਅਰਿਯਾ ਅਜ੍ਝੇਨਂ, ਜਨਿਨ੍ਦਾ ਪਥਵਿਂ, ਵੇਸ੍ਸਾ ਕਸਿਂ, ਸੁਦ੍ਦਾ ਪਾਰਿਚਰਿਯਂ ਉਪਾਗਤਾਤਿ ਵਦਨ੍ਤਿ. ਪਚ੍ਚੇਕਂ ਯਥਾਪਦੇਸਨ੍ਤਿ ਉਪਗਚ੍ਛਨ੍ਤਾ ਚ ਪਾਟਿਯੇਕ੍ਕਂ ਅਤ੍ਤਨੋ ਕੁਲਪਦੇਸਾਨੁਰੂਪੇਨ ਬ੍ਰਹ੍ਮੁਨਾ ਵੁਤ੍ਤਨਿਯਾਮੇਨੇਵ ਉਪਗਤਾ. ਕਤਾਹੁ ਏਤੇ ਵਸਿਨਾਤਿ ਆਹੂਤਿ ਏਵਂ ਕਿਰ ਏਤੇ ਵਸਿਨਾ ਮਹਾਬ੍ਰਹ੍ਮੁਨਾ ਕਤਾ ਅਹੇਸੁਨ੍ਤਿ ਕਥੇਨ੍ਤਿ.

ਏਵਂ ਮਹਾਗੁਣਾ ਏਤੇ ਬ੍ਰਾਹ੍ਮਣਾ ਨਾਮ. ਯੋ ਹਿ ਏਤੇਸੁ ਚਿਤ੍ਤਂ ਪਸਾਦੇਤ੍ਵਾ ਦਾਨਂ ਦੇਤਿ, ਤਸ੍ਸ ਅਞ੍ਞਤ੍ਥ ਪਟਿਸਨ੍ਧਿ ਨਤ੍ਥਿ, ਦੇਵਲੋਕਮੇਵ ਗਚ੍ਛਤੀਤਿ ਵਤ੍ਵਾ ਆਹ –

੯੦੭.

‘‘ਧਾਤਾ ਵਿਧਾਤਾ ਵਰੁਣੋ ਕੁਵੇਰੋ, ਸੋਮੋ ਯਮੋ ਚਨ੍ਦਿਮਾ ਵਾਯੁ ਸੂਰਿਯੋ;

ਏਤੇਪਿ ਯਞ੍ਞਂ ਪੁਥੁਸੋ ਯਜਿਤ੍ਵਾ, ਅਜ੍ਝਾਯਕਾਨਂ ਅਥੋ ਸਬ੍ਬਕਾਮੇ.

੯੦੮.

‘‘ਵਿਕਾਸਿਤਾ ਚਾਪਸਤਾਨਿ ਪਞ੍ਚ, ਯੋ ਅਜ੍ਜੁਨੋ ਬਲਵਾ ਭੀਮਸੇਨੋ;

ਸਹਸ੍ਸਬਾਹੁ ਅਸਮੋ ਪਥਬ੍ਯਾ, ਸੋਪਿ ਤਦਾ ਆਦਹਿ ਜਾਤਵੇਦ’’ਨ੍ਤਿ.

ਤਤ੍ਥ ¶ ¶ ਏਤੇਪੀਤਿ ਏਤੇ ਧਾਤਾਦਯੋ ਦੇਵਰਾਜਾਨੋ. ਪੁਥੁਸੋਤਿ ਅਨੇਕਪ੍ਪਕਾਰਂ ਯਞ੍ਞਂ ਯਜਿਤ੍ਵਾ. ਅਥੋ ਸਬ੍ਬਕਾਮੇਤਿ ਅਥ ਅਜ੍ਝਾਯਕਾਨਂ ਬ੍ਰਾਹ੍ਮਣਾਨਂ ਸਬ੍ਬਕਾਮੇ ਦਤ੍ਵਾ ਏਤਾਨਿ ਠਾਨਾਨਿ ਪਤ੍ਤਾਤਿ ਦਸ੍ਸੇਤਿ. ਵਿਕਾਸਿਤਾਤਿ ਆਕਡ੍ਢਿਤਾ. ਚਾਪਸਤਾਨਿ ਪਞ੍ਚਾਤਿ ਨ ਧਨੁਪਞ੍ਚਸਤਾਨਿ, ਪਞ੍ਚਚਾਪਸਤਪ੍ਪਮਾਣਂ ਪਨ ਮਹਾਧਨੁਂ ਸਯਮੇਵ ਆਕਡ੍ਢਤਿ. ਭੀਮਸੇਨੋਤਿ ਭਯਾਨਕਸੇਨੋ. ਸਹਸ੍ਸਬਾਹੂਤਿ ਨ ਤਸ੍ਸ ਬਾਹੂਨਂ ਸਹਸ੍ਸਂ, ਪਞ੍ਚਨ੍ਨਂ ਪਨ ਧਨੁਗ੍ਗਹਸਤਾਨਂ ਬਾਹੁਸਹਸ੍ਸੇਨ ਆਕਡ੍ਢਿਤਬ੍ਬਸ੍ਸ ਧਨੁਨੋ ਆਕਡ੍ਢਨੇਨੇਵਂ ਵੁਤ੍ਤਂ. ਆਦਹਿ ਜਾਤਵੇਦਨ੍ਤਿ ਸੋਪਿ ਰਾਜਾ ਤਸ੍ਮਿਂ ਕਾਲੇ ਬ੍ਰਾਹ੍ਮਣੇ ਸਬ੍ਬਕਾਮੇਹਿ ਸਨ੍ਤਪ੍ਪੇਤ੍ਵਾ ਅਗ੍ਗਿਂ ਆਦਹਿ ਪਤਿਟ੍ਠਾਪੇਤ੍ਵਾ ਪਰਿਚਰਿ, ਤੇਨੇਵ ਕਾਰਣੇਨ ¶ ਦੇਵਲੋਕੇ ਨਿਬ੍ਬਤ੍ਤੋ. ਤਸ੍ਮਾ ਬ੍ਰਾਹ੍ਮਣਾ ਨਾਮ ਇਮਸ੍ਮਿਂ ਲੋਕੇ ਜੇਟ੍ਠਕਾਤਿ ਆਹ.

ਸੋ ਉਤ੍ਤਰਿਪਿ ਬ੍ਰਾਹ੍ਮਣੇ ਵਣ੍ਣੇਨ੍ਤੋ ਗਾਥਮਾਹ –

੯੦੯.

‘‘ਯੋ ਬ੍ਰਾਹ੍ਮਣੇ ਭੋਜਯਿ ਦੀਘਰਤ੍ਤਂ, ਅਨ੍ਨੇਨ ਪਾਨੇਨ ਯਥਾਨੁਭਾਵਂ;

ਪਸਨ੍ਨਚਿਤ੍ਤੋ ਅਨੁਮੋਦਮਾਨੋ, ਸੁਭੋਗ ਦੇਵਞ੍ਞਤਰੋ ਅਹੋਸੀ’’ਤਿ.

ਤਤ੍ਥ ਯੋਤਿ ਯੋ ਸੋ ਪੋਰਾਣਕੋ ਬਾਰਾਣਸਿਰਾਜਾਤਿ ਦਸ੍ਸੇਤਿ. ਯਥਾਨੁਭਾਵਨ੍ਤਿ ਯਥਾਬਲਂ ਯਂ ਤਸ੍ਸ ਅਤ੍ਥਿ, ਤਂ ਸਬ੍ਬਂ ਪਰਿਚ੍ਚਜਿਤ੍ਵਾ ਭੋਜੇਸਿ. ਦੇਵਞ੍ਞਤਰੋਤਿ ਸੋ ਅਞ੍ਞਤਰੋ ਮਹੇਸਕ੍ਖਦੇਵਰਾਜਾ ਅਹੋਸਿ. ਏਵਂ ਬ੍ਰਾਹ੍ਮਣਾ ਨਾਮ ਅਗ੍ਗਦਕ੍ਖਿਣੇਯ੍ਯਾਤਿ ਦਸ੍ਸੇਤਿ.

ਅਥਸ੍ਸ ਅਪਰਮ੍ਪਿ ਕਾਰਣਂ ਆਹਰਿਤ੍ਵਾ ਦਸ੍ਸੇਨ੍ਤੋ ਗਾਥਮਾਹ –

੯੧੦.

‘‘ਮਹਾਸਨਂ ਦੇਵਮਨੋਮਵਣ੍ਣਂ, ਯੋ ਸਪ੍ਪਿਨਾ ਅਸਕ੍ਖਿ ਭੋਜੇਤੁਮਗ੍ਗਿਂ;

ਸ ਯਞ੍ਞਤਨ੍ਤਂ ਵਰਤੋ ਯਜਿਤ੍ਵਾ, ਦਿਬ੍ਬਂ ਗਤਿਂ ਮੁਚਲਿਨ੍ਦਜ੍ਝਗਚ੍ਛੀ’’ਤਿ.

ਤਤ੍ਥ ਮਹਾਸਨਨ੍ਤਿ ਮਹਾਭਕ੍ਖਂ. ਭੋਜੇਤੁਨ੍ਤਿ ਸਨ੍ਤਪ੍ਪੇਤੁਂ. ਯਞ੍ਞਤਨ੍ਤਨ੍ਤਿ ਯਞ੍ਞਵਿਧਾਨਂ. ਵਰਤੋਤਿ ਵਰਸ੍ਸ ਅਗ੍ਗਿਦੇਵਸ੍ਸ ਯਜਿਤ੍ਵਾ. ਮੁਚਲਿਨ੍ਦਜ੍ਝਗਚ੍ਛੀਤਿ ਮੁਚਲਿਨ੍ਦੋ ਅਧਿਗਤੋਤਿ.

ਏਕੋ ਕਿਰ ਪੁਬ੍ਬੇ ਬਾਰਾਣਸਿਯਂ ਮੁਚਲਿਨ੍ਦੋ ਨਾਮ ਰਾਜਾ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ਸਗ੍ਗਮਗ੍ਗਂ ਪੁਚ੍ਛਿ. ਅਥ ਨਂ ਤੇ ‘‘ਬ੍ਰਾਹ੍ਮਣਾਨਞ੍ਚ ਬ੍ਰਾਹ੍ਮਣਦੇਵਤਾਯ ਚ ਸਕ੍ਕਾਰਂ ਕਰੋਹੀ’’ਤਿ ਵਤ੍ਵਾ ‘‘ਕਾ ਬ੍ਰਾਹ੍ਮਣਦੇਵਤਾ’’ਤਿ ਵੁਤ੍ਤੇ ‘‘‘ਅਗ੍ਗਿਦੇਵੋਤਿ ਤਂ ਨਵਨੀਤਸਪ੍ਪਿਨਾ ਸਨ੍ਤਪ੍ਪੇਹੀ’’’ਤਿ ਆਹਂਸੁ. ਸੋ ਤਥਾ ਅਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਏਸ ਇਮਂ ਗਾਥਮਾਹ.

ਅਪਰਮ੍ਪਿ ¶ ¶ ਕਾਰਣਂ ਦਸ੍ਸੇਨ੍ਤੋ ਗਾਥਮਾਹ –

੯੧੧.

‘‘ਮਹਾਨੁਭਾਵੋ ਵਸ੍ਸਸਹਸ੍ਸਜੀਵੀ, ਯੋ ਪਬ੍ਬਜੀ ਦਸ੍ਸਨੇਯ੍ਯੋ ਉਲ਼ਾਰੋ;

ਹਿਤ੍ਵਾ ¶ ਅਪਰਿਯਨ੍ਤ ਰਟ੍ਠਂ ਸਸੇਨਂ, ਰਾਜਾ ਦੁਦੀਪੋਪਿ ਜਗਾਮ ਸਗ੍ਗ’’ਨ੍ਤਿ.

ਤਤ੍ਥ ਪਬ੍ਬਜੀਤਿ ਪਞ੍ਚਵਸ੍ਸਸਤਾਨਿ ਰਜ੍ਜਂ ਕਾਰੇਨ੍ਤੋ ਬ੍ਰਾਹ੍ਮਣਾਨਂ ਸਕ੍ਕਾਰਂ ਕਤ੍ਵਾ ਅਪਰਿਯਨ੍ਤਂ ਰਟ੍ਠਂ ਸਸੇਨਂ ਹਿਤ੍ਵਾ ਪਬ੍ਬਜਿ. ਦੁਦੀਪੋਪੀਤਿ ਸੋ ਦੁਦੀਪੋ ਨਾਮ ਰਾਜਾ ਬ੍ਰਾਹ੍ਮਣੇ ਪੂਜੇਤ੍ਵਾਵ ਸਗ੍ਗਂ ਗਤੋਤਿ ਵਦਤਿ. ‘‘ਦੁਜੀਪੋ’’ਤਿਪਿ ਪਾਠੋ.

ਅਪਰਾਨਿਪਿਸ੍ਸ ਉਦਾਹਰਣਾਨਿ ਦਸ੍ਸੇਨ੍ਤੋ ਆਹ –

੯੧੨.

‘‘ਯੋ ਸਾਗਰਨ੍ਤਂ ਸਾਗਰੋ ਵਿਜਿਤ੍ਵਾ, ਯੂਪਂ ਸੁਭਂ ਸੋਣ੍ਣਮਯਂ ਉਲ਼ਾਰਂ;

ਉਸ੍ਸੇਸਿ ਵੇਸ੍ਸਾਨਰਮਾਦਹਾਨੋ, ਸੁਭੋਗ ਦੇਵਞ੍ਞਤਰੋ ਅਹੋਸਿ.

੯੧੩.

‘‘ਯਸ੍ਸਾਨੁਭਾਵੇਨ ਸੁਭੋਗ ਗਙ੍ਗਾ, ਪਵਤ੍ਤਥ ਦਧਿਸਨ੍ਨਿਸਿਨ੍ਨਂ ਸਮੁਦ੍ਦਂ;

ਸ ਲੋਮਪਾਦੋ ਪਰਿਚਰਿਯ ਮਗ੍ਗਿਂ, ਅਙ੍ਗੋ ਸਹਸ੍ਸਕ੍ਖਪੁਰਜ੍ਝਗਚ੍ਛੀ’’ਤਿ.

ਤਤ੍ਥ ਸਾਗਰਨ੍ਤਨ੍ਤਿ ਸਾਗਰਪਰਿਯਨ੍ਤਂ ਪਥਵਿਂ. ਉਸ੍ਸੇਸੀਤਿ ਬ੍ਰਾਹ੍ਮਣੇ ਸਗ੍ਗਮਗ੍ਗਂ ਪੁਚ੍ਛਿਤ੍ਵਾ ‘‘ਸੋਵਣ੍ਣਯੂਪਂ ਉਸ੍ਸਾਪੇਹੀ’’ਤਿ ਵੁਤ੍ਤੋ ਪਸੁਘਾਤਨਤ੍ਥਾਯ ਉਸ੍ਸਾਪੇਸਿ. ਵੇਸ੍ਸਾਨਰਮਾਦਹਾਨੋਤਿ ਵੇਸ੍ਸਾਨਰਂ ਅਗ੍ਗਿਂ ਆਦਹਨ੍ਤੋ. ‘‘ਵੇਸਾਨਰਿ’’ਨ੍ਤਿਪਿ ਪਾਠੋ. ਦੇਵਞ੍ਞਤਰੋਤਿ ਸੁਭੋਗ, ਸੋ ਹਿ ਰਾਜਾ ਅਗ੍ਗਿਂ ਜੁਹਿਤ੍ਵਾ ਅਞ੍ਞਤਰੋ ਮਹੇਸਕ੍ਖਦੇਵੋ ਅਹੋਸੀਤਿ ਵਦਤਿ. ਯਸ੍ਸਾਨੁਭਾਵੇਨਾਤਿ ਭੋ ਸੁਭੋਗ, ਗਙ੍ਗਾ ਚ ਮਹਾਸਮੁਦ੍ਦੋ ਚ ਕੇਨ ਕਤੋਤਿ ਜਾਨਾਸੀਤਿ. ਨ ਜਾਨਾਮੀਤਿ. ਕਿਂ ਤ੍ਵਂ ਜਾਨਿਸ੍ਸਸਿ, ਬ੍ਰਾਹ੍ਮਣੇਯੇਵ ਪੋਥੇਤੁਂ ਜਾਨਾਸੀਤਿ. ਅਤੀਤਸ੍ਮਿਞ੍ਹਿ ਅਙ੍ਗੋ ਨਾਮ ਲੋਮਪਾਦੋ ਬਾਰਾਣਸਿਰਾਜਾ ਬ੍ਰਾਹ੍ਮਣੇ ਸਗ੍ਗਮਗ੍ਗਂ ਪੁਚ੍ਛਿਤ੍ਵਾ ਤੇਹਿ ‘‘ਭੋ, ਮਹਾਰਾਜ, ਹਿਮਵਨ੍ਤਂ ਪਵਿਸਿਤ੍ਵਾ ਬ੍ਰਾਹ੍ਮਣਾਨਂ ਸਕ੍ਕਾਰਂ ਕਤ੍ਵਾ ਅਗ੍ਗਿਂ ਪਰਿਚਰਾਹੀ’’ਤਿ ਵੁਤ੍ਤੇ ਅਪਰਿਮਾਣਾ ¶ ਗਾਵਿਯੋ ਚ ਮਹਿਂਸਿਯੋ ਚ ਆਦਾਯ ਹਿਮਵਨ੍ਤਂ ਪਵਿਸਿਤ੍ਵਾ ਤਥਾ ਅਕਾਸਿ. ‘‘ਬ੍ਰਾਹ੍ਮਣੇਹਿ ਭੁਤ੍ਤਾਤਿਰਿਤ੍ਤਂ ਖੀਰਦਧਿਂ ਕਿਂ ਕਾਤਬ੍ਬ’’ਨ੍ਤਿ ਚ ਵੁਤ੍ਤੇ ‘‘ਛਡ੍ਡੇਥਾ’’ਤਿ ਆਹ. ਤਤ੍ਥ ਥੋਕਸ੍ਸ ਖੀਰਸ੍ਸ ਛਡ੍ਡਿਤਟ੍ਠਾਨੇ ਕੁਨ੍ਨਦਿਯੋ ਅਹੇਸੁਂ, ਬਹੁਕਸ੍ਸ ਛਡ੍ਡਿਤਟ੍ਠਾਨੇ ਗਙ੍ਗਾ ਪਵਤ੍ਤਥ. ਤਂ ਪਨ ਖੀਰਂ ਯਤ੍ਥ ਦਧਿ ਹੁਤ੍ਵਾ ਸਨ੍ਨਿਸਿਨ੍ਨਂ ਠਿਤਂ, ਤਂ ਸਮੁਦ੍ਦਂ ਨਾਮ ਜਾਤਂ. ਇਤਿ ਸੋ ਏਵਰੂਪਂ ਸਕ੍ਕਾਰਂ ਕਤ੍ਵਾ ਬ੍ਰਾਹ੍ਮਣੇਹਿ ਵੁਤ੍ਤਵਿਧਾਨੇਨ ਅਗ੍ਗਿਂ ਪਰਿਚਰਿਯ ਸਹਸ੍ਸਕ੍ਖਸ੍ਸ ਪੁਰਂ ਅਜ੍ਝਗਚ੍ਛਿ.

ਇਤਿਸ੍ਸ ¶ ਇਦਂ ਅਤੀਤਂ ਆਹਰਿਤ੍ਵਾ ਇਮਂ ਗਾਥਮਾਹ –

੯੧੪.

‘‘ਮਹਿਦ੍ਧਿਕੋ ਦੇਵਵਰੋ ਯਸਸ੍ਸੀ, ਸੇਨਾਪਤਿ ਤਿਦਿਵੇ ਵਾਸਵਸ੍ਸ;

ਸੋ ¶ ਸੋਮਯਾਗੇਨ ਮਲਂ ਵਿਹਨ੍ਤ੍ਵਾ, ਸੁਭੋਗ ਦੇਵਞ੍ਞਤਰੋ ਅਹੋਸੀ’’ਤਿ.

ਤਤ੍ਥ ਸੋ ਸੋਮਯਾਗੇਨ ਮਲਂ ਵਿਹਨ੍ਤ੍ਵਾਤਿ ਭੋ ਸੁਭੋਗ, ਯੋ ਇਦਾਨਿ ਸਕ੍ਕਸ੍ਸ ਸੇਨਾਪਤਿ ਮਹਾਯਸੋ ਦੇਵਪੁਤ੍ਤੋ, ਸੋਪਿ ਪੁਬ੍ਬੇ ਏਕੋ ਬਾਰਾਣਸਿਰਾਜਾ ਬ੍ਰਾਹ੍ਮਣੇ ਸਗ੍ਗਮਗ੍ਗਂ ਪੁਚ੍ਛਿਤ੍ਵਾ ਤੇਹਿ ‘‘ਸੋਮਯਾਗੇਨ ਅਤ੍ਤਨੋ ਮਲਂ ਪਵਾਹੇਤ੍ਵਾ ਦੇਵਲੋਕਂ ਗਚ੍ਛਾਹੀ’’ਤਿ ਵੁਤ੍ਤੇ ਬ੍ਰਾਹ੍ਮਣਾਨਂ ਮਹਨ੍ਤਂ ਸਕ੍ਕਾਰਂ ਕਤ੍ਵਾ ਤੇਹਿ ਵੁਤ੍ਤਵਿਧਾਨੇਨ ਸੋਮਯਾਗਂ ਕਤ੍ਵਾ ਤੇਨ ਅਤ੍ਤਨੋ ਮਲਂ ਵਿਹਨ੍ਤ੍ਵਾ ਦੇਵਞ੍ਞਤਰੋ ਜਾਤੋਤਿ ਇਮਮਤ੍ਥਂ ਪਕਾਸੇਨ੍ਤੋ ਏਵਮਾਹ.

ਅਪਰਾਨਿਪਿਸ੍ਸ ਉਦਾਹਰਣਾਨਿ ਦਸ੍ਸੇਨ੍ਤੋ ਆਹ –

੯੧੫.

‘‘ਅਕਾਰਯਿ ਲੋਕਮਿਮਂ ਪਰਞ੍ਚ, ਭਾਗੀਰਥਿਂ ਹਿਮਵਨ੍ਤਞ੍ਚ ਗਿਜ੍ਝਂ;

ਯੋ ਇਦ੍ਧਿਮਾ ਦੇਵਵਰੋ ਯਸਸ੍ਸੀ, ਸੋਪਿ ਤਦਾ ਆਦਹਿ ਜਾਤਵੇਦਂ.

੯੧੬.

‘‘ਮਾਲਾਗਿਰੀ ਹਿਮਵਾ ਯੋ ਚ ਗਿਜ੍ਝੋ, ਸੁਦਸ੍ਸਨੋ ਨਿਸਭੋ ਕੁਵੇਰੁ;

ਏਤੇ ਚ ਅਞ੍ਞੇ ਚ ਨਗਾ ਮਹਨ੍ਤਾ, ਚਿਤ੍ਯਾ ਕਤਾ ਯਞ੍ਞਕਰੇਹਿ ਮਾਹੂ’’ਤਿ.

ਤਤ੍ਥ ¶ ਸੋਪਿ ਤਦਾ ਆਦਹਿ ਜਾਤਵੇਦਨ੍ਤਿ ਭਾਤਿਕ ਸੁਭੋਗ, ਯੇਨ ਮਹਾਬ੍ਰਹ੍ਮੁਨਾ ਅਯਞ੍ਚ ਲੋਕੋ ਪਰੋ ਚ ਲੋਕੋ ਭਾਗੀਰਥਿਗਙ੍ਗਾ ਚ ਹਿਮਵਨ੍ਤਪਬ੍ਬਤੋ ਚ ਗਿਜ੍ਝਪਬ੍ਬਤੋ ਚ ਕਤੋ, ਸੋਪਿ ਯਦਾ ਬ੍ਰਹ੍ਮੁਪਪਤ੍ਤਿਤੋ ਪੁਬ੍ਬੇ ਮਾਣਵਕੋ ਅਹੋਸਿ, ਤਦਾ ਅਗ੍ਗਿਮੇਵ ਆਦਹਿ, ਅਗ੍ਗਿਂ ਜੁਹਿਤ੍ਵਾ ਮਹਾਬ੍ਰਹ੍ਮਾ ਹੁਤ੍ਵਾ ਇਦਂ ਸਬ੍ਬਮਕਾਸਿ. ਏਵਂਮਹਿਦ੍ਧਿਕਾ ਬ੍ਰਾਹ੍ਮਣਾਤਿ ਦਸ੍ਸੇਤਿ.

ਚਿਤ੍ਯਾ ਕਤਾਤਿ ਪੁਬ੍ਬੇ ਕਿਰੇਕੋ ਬਾਰਾਣਸਿਰਾਜਾ ਬ੍ਰਾਹ੍ਮਣੇ ਸਗ੍ਗਮਗ੍ਗਂ ਪੁਚ੍ਛਿਤ੍ਵਾ ‘‘ਬ੍ਰਾਹ੍ਮਣਾਨਂ ਸਕ੍ਕਾਰਂ ਕਰੋਹੀ’’ਤਿ ਵੁਤ੍ਤੇ ਤੇਸਂ ਮਹਾਦਾਨਂ ਪਟ੍ਠਪੇਤ੍ਵਾ ‘‘ਮਯ੍ਹਂ ਦਾਨੇ ਕਿਂ ਨਤ੍ਥੀ’’ਤਿ ਪੁਚ੍ਛਿਤ੍ਵਾ ‘‘ਸਬ੍ਬਂ, ਦੇਵ, ਅਤ੍ਥਿ, ਬ੍ਰਾਹ੍ਮਣਾਨਂ ਪਨ ਆਸਨਾਨਿ ਨਪ੍ਪਹੋਨ੍ਤੀ’’ਤਿ ਵੁਤ੍ਤੇ ਇਟ੍ਠਕਾਹਿ ਚਿਨਾਪੇਤ੍ਵਾ ਆਸਨਾਨਿ ਕਾਰੇਸਿ. ਤਦਾ ਚਿਤ੍ਯਾ ਆਸਨਪੀਠਿਕਾ ਬ੍ਰਾਹ੍ਮਣਾਨਂ ਆਨੁਭਾਵੇਨ ਵਡ੍ਢਿਤ੍ਵਾ ਮਾਲਾਗਿਰਿਆਦਯੋ ਪਬ੍ਬਤਾ ਜਾਤਾ. ਏਵਮੇਤੇ ਯਞ੍ਞਕਾਰੇਹਿ ਬ੍ਰਾਹ੍ਮਣੇਹਿ ਕਤਾਤਿ ਕਥੇਨ੍ਤੀਤਿ.

ਅਥ ¶ ਨਂ ਪੁਨ ਆਹ ‘‘ਭਾਤਿਕ, ਜਾਨਾਸਿ ਪਨਾਯਂ ਸਮੁਦ੍ਦੋ ਕੇਨ ਕਾਰਣੇਨ ਅਪੇਯ੍ਯੋ ਲੋਣੋਦਕੋ ਜਾਤੋ’’ਤਿ? ‘‘ਨ ਜਾਨਾਮਿ, ਅਰਿਟ੍ਠਾ’’ਤਿ. ਅਥ ਨਂ ‘‘ਤ੍ਵਂ ਬ੍ਰਾਹ੍ਮਣੇਯੇਵ ਵਿਹਿਂਸਿਤੁਂ ਜਾਨਾਸਿ, ਸੁਣੋਹੀ’’ਤਿ ਵਤ੍ਵਾ ਗਾਥਮਾਹ –

੯੧੭.

‘‘ਅਜ੍ਝਾਯਕਂ ਮਨ੍ਤਗੁਣੂਪਪਨ੍ਨਂ, ਤਪਸ੍ਸਿਨਂ ‘ਯਾਚਯੋਗੋ’ਤਿਧਾਹੁ;

ਤੀਰੇ ¶ ਸਮੁਦ੍ਦਸ੍ਸੁਦਕਂ ਸਜਨ੍ਤਂ, ਤਂ ਸਾਗਰੋਜ੍ਝੋਹਰਿ ਤੇਨਾਪੇਯ੍ਯੋ’’ਤਿ.

ਤਤ੍ਥ ‘ਯਾਚਯੋਗੋਤਿਧਾਹੂਤਿ ਤਂ ਬ੍ਰਾਹ੍ਮਣਂ ਯਾਚਯੋਗੋਤਿ ਇਧ ਲੋਕੇ ਆਹੁ. ਉਦਕਂ ਸਜਨ੍ਤਤਿ ਸੋ ਕਿਰੇਕਦਿਵਸਂ ਪਾਪਪਵਾਹਨਕਮ੍ਮਂ ਕਰੋਨ੍ਤੋ ਤੀਰੇ ਠਤ੍ਵਾ ਸਮੁਦ੍ਦਤੋ ਉਦਕਂ ਗਹੇਤ੍ਵਾ ਅਤ੍ਤਨੋ ਉਪਰਿ ਸੀਸੇ ਸਜਨ੍ਤਂ ਅਬ੍ਭੁਕਿਰਤਿ. ਅਥ ਨਂ ਏਵਂ ਕਰੋਨ੍ਤਂ ਵਡ੍ਢਿਤ੍ਵਾ ਸਾਗਰੋ ਅਜ੍ਝੋਹਰਿ. ਤਂ ਕਾਰਣਂ ਮਹਾਬ੍ਰਹ੍ਮਾ ਞਤ੍ਵਾ ‘‘ਇਮਿਨਾ ਕਿਰ ਮੇ ਪੁਤ੍ਤੋ ਹਤੋ’’ਤਿ ਕੁਜ੍ਝਿਤ੍ਵਾ ‘‘ਸਮੁਦ੍ਦੋ ਅਪੇਯ੍ਯੋ ਲੋਣੋਦਕੋ ਭਵਤੂ’’ਤਿ ਵਤ੍ਵਾ ਅਭਿਸਪਿ, ਤੇਨ ਕਾਰਣੇਨ ਅਪੇਯ੍ਯੋ ਜਾਤੋ. ਏਵਰੂਪਾ ਏਤੇ ਬ੍ਰਾਹ੍ਮਣਾ ਨਾਮ ਮਹਾਨੁਭਾਵਾਤਿ.

ਪੁਨਪਿ ¶ ਆਹ –

੯੧੮.

‘‘ਆਯਾਗਵਤ੍ਥੂਨਿ ਪੁਥੂ ਪਥਬ੍ਯਾ, ਸਂਵਿਜ੍ਜਨ੍ਤਿ ਬ੍ਰਾਹ੍ਮਣਾ ਵਾਸਵਸ੍ਸ;

ਪੁਰਿਮਂ ਦਿਸਂ ਪਚ੍ਛਿਮਂ ਦਕ੍ਖਿਣੁਤ੍ਤਰਂ, ਸਂਵਿਜ੍ਜਮਾਨਾ ਜਨਯਨ੍ਤਿ ਵੇਦ’’ਨ੍ਤਿ.

ਤਤ੍ਥ ਵਾਸਵਸ੍ਸਾਤਿ ਪੁਬ੍ਬੇ ਬ੍ਰਾਹ੍ਮਣਾਨਂ ਦਾਨਂ ਦਤ੍ਵਾ ਵਾਸਵਤ੍ਤਂ ਪਤ੍ਤਸ੍ਸ ਵਾਸਵਸ੍ਸ. ਆਯਾਗਵਤ੍ਥੂਨੀਤਿ ਪੁਞ੍ਞਕ੍ਖੇਤ੍ਤਭੂਤਾ ਅਗ੍ਗਦਕ੍ਖਿਣੇਯ੍ਯਾ ਪਥਬ੍ਯਾ ਪੁਥੂ ਬ੍ਰਾਹ੍ਮਣਾ ਸਂਵਿਜ੍ਜਨ੍ਤਿ. ਪੁਰਿਮਂ ਦਿਸਨ੍ਤਿ ਤੇ ਇਦਾਨਿਪਿ ਚਤੂਸੁ ਦਿਸਾਸੁ ਸਂਵਿਜ੍ਜਮਾਨਾ ਤਸ੍ਸ ਵਾਸਵਸ੍ਸ ਮਹਨ੍ਤਂ ਵੇਦਂ ਜਨਯਨ੍ਤਿ, ਪੀਤਿਸੋਮਨਸ੍ਸਂ ਆਵਹਨ੍ਤਿ.

ਏਵਂ ਅਰਿਟ੍ਠੋ ਚੁਦ੍ਦਸਹਿ ਗਾਥਾਹਿ ਬ੍ਰਾਹ੍ਮਣੇ ਚ ਯਞ੍ਞੇ ਚ ਵੇਦੇ ਚ ਵਣ੍ਣੇਸਿ.

ਮਿਚ੍ਛਾਕਥਾ ਨਿਟ੍ਠਿਤਾ.

ਤਸ੍ਸ ਤਂ ਕਥਂ ਸੁਤ੍ਵਾ ਮਹਾਸਤ੍ਤਸ੍ਸ ਗਿਲਾਨੁਪਟ੍ਠਾਨਂ ਆਗਤਾ ਬਹੂ ਨਾਗਾ ‘‘ਅਯਂ ਭੂਤਮੇਵ ਕਥੇਤੀ’’ਤਿ ਮਿਚ੍ਛਾਗਾਹਂ ਗਣ੍ਹਨਾਕਾਰਪ੍ਪਤ੍ਤਾ ਜਾਤਾ. ਮਹਾਸਤ੍ਤੋ ਗਿਲਾਨਸੇਯ੍ਯਾਯ ਨਿਪਨ੍ਨੋਵ ਤਂ ਸਬ੍ਬਂ ਅਸ੍ਸੋਸਿ ¶ . ਨਾਗਾਪਿਸ੍ਸ ਆਰੋਚੇਸੁਂ. ਤਤੋ ਮਹਾਸਤ੍ਤੋ ਚਿਨ੍ਤੇਸਿ ‘‘ਅਰਿਟ੍ਠੋ ਮਿਚ੍ਛਾਮਗ੍ਗਂ ਵਣ੍ਣੇਤਿ, ਵਾਦਮਸ੍ਸ ਭਿਨ੍ਦਿਤ੍ਵਾ ਪਰਿਸਂ ਸਮ੍ਮਾਦਿਟ੍ਠਿਕਂ ਕਰਿਸ੍ਸਾਮੀ’’ਤਿ. ਸੋ ਉਟ੍ਠਾਯ ਨ੍ਹਤ੍ਵਾ ਸਬ੍ਬਾਲਙ੍ਕਾਰਪ੍ਪਟਿਮਣ੍ਡਿਤੋ ਧਮ੍ਮਾਸਨੇ ਨਿਸੀਦਿਤ੍ਵਾ ਸਬ੍ਬਂ ਨਾਗਪਰਿਸਂ ਸਨ੍ਨਿਪਾਤਾਪੇਤ੍ਵਾ ਅਰਿਟ੍ਠਂ ਪਕ੍ਕੋਸਾਪੇਤ੍ਵਾ ‘‘ਅਰਿਟ੍ਠ, ਤ੍ਵਂ ਅਭੂਤਂ ਵਤ੍ਵਾ ਵੇਦੇ ਚ ਯਞ੍ਞੇ ਚ ਬ੍ਰਾਹ੍ਮਣੇ ਚ ਵਣ੍ਣੇਸਿ, ਬ੍ਰਾਹ੍ਮਣਾਨਞ੍ਹਿ ਵੇਦਵਿਧਾਨੇਨ ਯਞ੍ਞਯਜਨਂ ਨਾਮ ਅਨਰਿਯਸਮ੍ਮਤਂ ਨ ਸਗ੍ਗਾਵਹਂ, ਤਵ ਵਾਦੇ ਅਭੂਤਂ ਪਸ੍ਸਾਹੀ’’ਤਿ ਵਤ੍ਵਾ ਯਞ੍ਞਭੇਦਵਾਦਂ ਨਾਮ ਆਰਭਨ੍ਤੋ ਆਹ –

੯੧੯.

‘‘ਕਲੀ ¶ ਹਿ ਧੀਰਾਨ ਕਟਂ ਮਗਾਨਂ, ਭਵਨ੍ਤਿ ਵੇਦਜ੍ਝਗਤਾਨਰਿਟ੍ਠ;

ਮਰੀਚਿਧਮ੍ਮਂ ਅਸਮੇਕ੍ਖਿਤਤ੍ਤਾ, ਮਾਯਾਗੁਣਾ ਨਾਤਿਵਹਨ੍ਤਿ ਪਞ੍ਞਂ.

੯੨੦.

‘‘ਵੇਦਾ ¶ ਨ ਤਾਣਾਯ ਭਵਨ੍ਤਿ ਦਸ੍ਸ, ਮਿਤ੍ਤਦ੍ਦੁਨੋ ਭੂਨਹੁਨੋ ਨਰਸ੍ਸ;

ਨ ਤਾਯਤੇ ਪਰਿਚਿਣ੍ਣੋ ਚ ਅਗ੍ਗਿ, ਦੋਸਨ੍ਤਰਂ ਮਚ੍ਚਮਨਰਿਯਕਮ੍ਮਂ.

੯੨੧.

‘‘ਸਬ੍ਬਞ੍ਚ ਮਚ੍ਚਾ ਸਧਨਂ ਸਭੋਗਂ, ਆਦੀਪਿਤਂ ਦਾਰੁ ਤਿਣੇਨ ਮਿਸ੍ਸਂ;

ਦਹਂ ਨ ਤਪ੍ਪੇ ਅਸਮਤ੍ਥਤੇਜੋ, ਕੋ ਤਂ ਸੁਭਿਕ੍ਖਂ ਦ੍ਵਿਰਸਞ੍ਞੁ ਕਯਿਰਾ.

੯੨੨.

‘‘ਯਥਾਪਿ ਖੀਰਂ ਵਿਪਰਿਣਾਮਧਮ੍ਮਂ, ਦਧਿ ਭਵਿਤ੍ਵਾ ਨਵਨੀਤਮ੍ਪਿ ਹੋਤਿ;

ਏਵਮ੍ਪਿ ਅਗ੍ਗਿ ਵਿਪਰਿਣਾਮਧਮ੍ਮੋ, ਤੇਜੋ ਸਮੋਰੋਹਤੀ ਯੋਗਯੁਤ੍ਤੋ.

੯੨੩.

‘‘ਨ ਦਿਸ੍ਸਤੀ ਅਗ੍ਗਿ ਮਨੁਪ੍ਪਵਿਟ੍ਠੋ, ਸੁਕ੍ਖੇਸੁ ਕਟ੍ਠੇਸੁ ਨਵੇਸੁ ਚਾਪਿ;

ਨਾਮਤ੍ਥਮਾਨੋ ਅਰਣੀਨਰੇਨ, ਨਾਕਮ੍ਮੁਨਾ ਜਾਯਤਿ ਜਾਤਵੇਦੋ.

੯੨੪.

‘‘ਸਚੇ ਹਿ ਅਗ੍ਗਿ ਅਨ੍ਤਰਤੋ ਵਸੇਯ੍ਯ, ਸੁਕ੍ਖੇਸੁ ਕਟ੍ਠੇਸੁ ਨਵੇਸੁ ਚਾਪਿ;

ਸਬ੍ਬਾਨਿ ਸੁਸ੍ਸੇਯ੍ਯੁ ਵਨਾਨਿ ਲੋਕੇ, ਸੁਕ੍ਖਾਨਿ ਕਟ੍ਠਾਨਿ ਚ ਪਜ੍ਜਲੇਯ੍ਯੁਂ.

੯੨੫.

‘‘ਕਰੋਤਿ ਚੇ ਦਾਰੁਤਿਣੇਨ ਪੁਞ੍ਞਂ, ਭੋਜਂ ਨਰੋ ਧੂਮਸਿਖਿਂ ਪਤਾਪਵਂ;

ਅਙ੍ਗਾਰਿਕਾ ਲੋਣਕਰਾ ਚ ਸੂਦਾ, ਸਰੀਰਦਾਹਾਪਿ ਕਰੇਯ੍ਯੁ ਪੁਞ੍ਞਂ.

੯੨੬.

‘‘ਅਥ ¶ ਚੇ ਹਿ ਏਤੇ ਨ ਕਰੋਨ੍ਤਿ ਪੁਞ੍ਞਂ, ਅਜ੍ਝੇਨਮਗ੍ਗਿਂ ਇਧ ਤਪ੍ਪਯਿਤ੍ਵਾ;

ਨ ਕੋਚਿ ਲੋਕਸ੍ਮਿਂ ਕਰੋਤਿ ਪੁਞ੍ਞਂ, ਭੋਜਂ ਨਰੋ ਧੂਮਸਿਖਿਂ ਪਤਾਪਵਂ.

੯੨੭.

‘‘ਕਥਞ੍ਹਿ ¶ ¶ ਲੋਕਾਪਚਿਤੋ ਸਮਾਨੋ, ਅਮਨੁਞ੍ਞਗਨ੍ਧਂ ਬਹੂਨਂ ਅਕਨ੍ਤਂ;

ਯਦੇਵ ਮਚ੍ਚਾ ਪਰਿਵਜ੍ਜਯਨ੍ਤਿ, ਤਦਪ੍ਪਸਤ੍ਥਂ ਦ੍ਵਿਰਸਞ੍ਞੁ ਭੁਞ੍ਜੇ.

੯੨੮.

‘‘ਸਿਖਿਮ੍ਪਿ ਦੇਵੇਸੁ ਵਦਨ੍ਤਿ ਹੇਕੇ, ਆਪਂ ਮਿਲਕ੍ਖੂ ਪਨ ਦੇਵਮਾਹੁ;

ਸਬ੍ਬੇਵ ਏਤੇ ਵਿਤਥਂ ਭਣਨ੍ਤਿ, ਅਗ੍ਗੀ ਨ ਦੇਵਞ੍ਞਤਰੋ ਨ ਚਾਪੋ.

੯੨੯.

‘‘ਅਨਿਨ੍ਦ੍ਰਿਯਬਦ੍ਧਮਸਞ੍ਞਕਾਯਂ, ਵੇਸ੍ਸਾਨਰਂ ਕਮ੍ਮਕਰਂ ਪਜਾਨਂ;

ਪਰਿਚਰਿਯ ਮਗ੍ਗਿਂ ਸੁਗਤਿਂ ਕਥਂ ਵਜੇ, ਪਾਪਾਨਿ ਕਮ੍ਮਾਨਿ ਪਕੁਬ੍ਬਮਾਨੋ.

੯੩੦.

‘‘ਸਬ੍ਬਾਭਿਭੂ ਤਾਹੁਧ ਜੀਵਿਕਤ੍ਥਾ, ਅਗ੍ਗਿਸ੍ਸ ਬ੍ਰਹ੍ਮਾ ਪਰਿਚਾਰਿਕੋਤਿ;

ਸਬ੍ਬਾਨੁਭਾਵੀ ਚ ਵਸੀ ਕਿਮਤ੍ਥਂ, ਅਨਿਮ੍ਮਿਤੋ ਨਿਮ੍ਮਿਤਂ ਵਨ੍ਦਿਤਸ੍ਸ.

੯੩੧.

‘‘ਹਸ੍ਸਂ ਅਨਿਜ੍ਝਾਨਕ੍ਖਮਂ ਅਤਚ੍ਛਂ, ਸਕ੍ਕਾਰਹੇਤੁ ਪਕਿਰਿਂਸੁ ਪੁਬ੍ਬੇ;

ਤੇ ਲਾਭਸਕ੍ਕਾਰੇ ਅਪਾਤੁਭੋਨ੍ਤੇ, ਸਨ੍ਧਾਪਿਤਾ ਜਨ੍ਤੁਭਿ ਸਨ੍ਤਿਧਮ੍ਮਂ.

੯੩੨.

‘‘ਅਜ੍ਝੇਨਮਰਿਯਾ ਪਥਵਿਂ ਜਨਿਨ੍ਦਾ, ਵੇਸ੍ਸਾ ਕਸਿਂ ਪਾਰਿਚਰਿਯਞ੍ਚ ਸੁਦ੍ਦਾ;

ਉਪਾਗੁ ਪਚ੍ਚੇਕਂ ਯਥਾਪਦੇਸਂ, ਕਤਾਹੁ ਏਤੇ ਵਸਿਨਾਤਿ ਆਹੁ.

੯੩੩.

‘‘ਏਤਞ੍ਚ ¶ ਸਚ੍ਚਂ ਵਚਨਂ ਭਵੇਯ੍ਯ, ਯਥਾ ਇਦਂ ਭਾਸਿਤਂ ਬ੍ਰਾਹ੍ਮਣੇਹਿ;

ਨਾਖਤ੍ਤਿਯੋ ਜਾਤੁ ਲਭੇਥ ਰਜ੍ਜਂ, ਨਾਬ੍ਰਾਹ੍ਮਣੋ ਮਨ੍ਤਪਦਾਨਿ ਸਿਕ੍ਖੇ;

ਨਾਞ੍ਞਤ੍ਰ ਵੇਸ੍ਸੇਹਿ ਕਸਿਂ ਕਰੇਯ੍ਯ, ਸੁਦ੍ਦੋ ਨ ਮੁਚ੍ਚੇ ਪਰਪੇਸਨਾਯ.

੯੩੪.

‘‘ਯਸ੍ਮਾ ¶ ਚ ਏਤਂ ਵਚਨਂ ਅਭੂਤਂ, ਮੁਸਾਵਿਮੇ ਓਦਰਿਯਾ ਭਣਨ੍ਤਿ;

ਤਦਪ੍ਪਪਞ੍ਞਾ ਅਭਿਸਦ੍ਦਹਨ੍ਤਿ, ਪਸ੍ਸਨ੍ਤਿ ਤਂ ਪਣ੍ਡਿਤਾ ਅਤ੍ਤਨਾਵ.

੯੩੫.

‘‘ਖਤ੍ਯਾ ਹਿ ਵੇਸ੍ਸਾਨਂ ਬਲਿਂ ਹਰਨ੍ਤਿ, ਆਦਾਯ ਸਤ੍ਥਾਨਿ ਚਰਨ੍ਤਿ ਬ੍ਰਾਹ੍ਮਣਾ;

ਤਂ ਤਾਦਿਸਂ ਸਙ੍ਖੁਭਿਤਂ ਪਭਿਨ੍ਨਂ, ਕਸ੍ਮਾ ਬ੍ਰਹ੍ਮਾ ਨੁਜ੍ਜੁ ਕਰੋਤਿ ਲੋਕਂ.

੯੩੬.

‘‘ਸਚੇ ਹਿ ਸੋ ਇਸ੍ਸਰੋ ਸਬ੍ਬਲੋਕੇ, ਬ੍ਰਹ੍ਮਾ ਬਹੂਭੂਤਪਤੀ ਪਜਾਨਂ;

ਕਿਂ ਸਬ੍ਬਲੋਕਂ ਵਿਦਹੀ ਅਲਕ੍ਖਿਂ, ਕਿਂ ਸਬ੍ਬਲੋਕਂ ਨ ਸੁਖਿਂ ਅਕਾਸਿ.

੯੩੭.

‘‘ਸਚੇ ¶ ਹਿ ਸੋ ਇਸ੍ਸਰੋ ਸਬ੍ਬਲੋਕੇ, ਬ੍ਰਹ੍ਮਾ ਬਹੂਭੂਤਪਤੀ ਪਜਾਨਂ;

ਮਾਯਾ ਮੁਸਾਵਜ੍ਜਮਦੇਨ ਚਾਪਿ, ਲੋਕਂ ਅਧਮ੍ਮੇਨ ਕਿਮਤ੍ਥਮਕਾਰਿ.

੯੩੮.

‘‘ਸਚੇ ਹਿ ਸੋ ਇਸ੍ਸਰੋ ਸਬ੍ਬਲੋਕੇ, ਬ੍ਰਹ੍ਮਾ ਬਹੂਭੂਤਪਤੀ ਪਜਾਨਂ;

ਅਧਮ੍ਮਿਕੋ ਭੂਤਪਤੀ ਅਰਿਟ੍ਠ, ਧਮ੍ਮੇ ਸਤਿ ਯੋ ਵਿਦਹੀ ਅਧਮ੍ਮਂ.

੯੩੯.

‘‘ਕੀਟਾ ਪਟਙ੍ਗਾ ਉਰਗਾ ਚ ਭੇਕਾ, ਗਨ੍ਤ੍ਵਾ ਕਿਮੀ ਸੁਜ੍ਝਤਿ ਮਕ੍ਖਿਕਾ ਚ;

ਏਤੇਪਿ ਧਮ੍ਮਾ ਅਨਰਿਯਰੂਪਾ, ਕਮ੍ਬੋਜਕਾਨਂ ਵਿਤਥਾ ਬਹੂਨ’’ਨ੍ਤਿ.

ਤਤ੍ਥ ¶ ਵੇਦਜ੍ਝਗਤਾਨਰਿਟ੍ਠਾਤਿ ਅਰਿਟ੍ਠ, ਇਮਾਨਿ ਵੇਦਾਧਿਗਮਨਾਨਿ ਨਾਮ ਧੀਰਾਨਂ ਪਰਾਜਯਸਙ੍ਖਾਤੋ ਕਲਿਗ੍ਗਾਹੋ, ਮਗਾਨਂ ਬਾਲਾਨਂ ਜਯਸਙ੍ਖਾਤੋ ਕਟਗ੍ਗਾਹੋ. ਮਰੀਚਿਧਮ੍ਮਨ੍ਤਿ ਇਦਞ੍ਹਿ ਵੇਦਤ੍ਤਯਂ ਮਰੀਚਿਧਮ੍ਮਂ. ਤਯਿਦਂ ਅਸਮੇਕ੍ਖਿਤਤ੍ਤਾ ਯੁਤ੍ਤਾਯੁਤ੍ਤਂ ¶ ਅਜਾਨਨ੍ਤਾ ਬਾਲਾ ਉਦਕਸਞ੍ਞਾਯ ਮਗਾ ਮਰੀਚਿਂ ਵਿਯ ਭੂਤਸਞ੍ਞਾਯ ਅਨਵਜ੍ਜਸਞ੍ਞਾਯ ਅਤ੍ਤਨੋ ਵਿਨਾਸਂ ਉਪਗਚ੍ਛਨ੍ਤਿ. ਪਞ੍ਞਨ੍ਤਿ ਏਵਰੂਪਾ ਪਨ ਮਾਯਾਕੋਟ੍ਠਾਸਾ ਪਞ੍ਞਂ ਞਾਣਸਮ੍ਪਨ੍ਨਂ ਪੁਰਿਸਂ ਨਾਤਿਵਹਨ੍ਤਿ ਨ ਵਞ੍ਚੇਨ੍ਤਿ. ਭਵਨ੍ਤਿ ਦਸ੍ਸਾਤਿ ਦ-ਕਾਰੋ ਬ੍ਯਞ੍ਜਨਸਨ੍ਧਿਮਤ੍ਤਂ, ਅਸ੍ਸ ਭੂਨਹੁਨੋ ਵੁਡ੍ਢਿਘਾਤਕਸ੍ਸ ਮਿਤ੍ਤਦੁਬ੍ਭਿਨੋ ਨਰਸ੍ਸ ਵੇਦਾ ਨ ਤਾਣਤ੍ਥਾਯ ਭਵਨ੍ਤਿ, ਪਤਿਟ੍ਠਾ ਹੋਤੁਂ ਨ ਸਕ੍ਕੋਨ੍ਤੀਤਿ ਅਤ੍ਥੋ. ਪਰਿਚਿਣ੍ਣੋ ਚ ਅਗ੍ਗੀਤਿ ਅਗ੍ਗਿ ਚ ਪਰਿਚਿਣ੍ਣੋ ਤਿਵਿਧੇਨ ਦੁਚ੍ਚਰਿਤਦੋਸੇਨ ਸਦੋਸਚਿਤ੍ਤਂ ਪਾਪਕਮ੍ਮਂ ਪੁਰਿਸਂ ਨ ਤਾਯਤਿ ਨ ਰਕ੍ਖਤਿ.

ਸਬ੍ਬਞ੍ਚ ਮਚ੍ਚਾਤਿ ਸਚੇਪਿ ਹਿ ਮਚ੍ਚਾ ਯਤ੍ਤਕਂ ਲੋਕੇ ਦਾਰੁ ਅਤ੍ਥਿ, ਤਂ ਸਬ੍ਬਂ ਸਧਨਂ ਸਭੋਗਂ ਅਤ੍ਤਨੋ ਧਨੇਨ ਚ ਭੋਗੇਹਿ ਚ ਸਦ੍ਧਿਂ ਤਿਣੇਨ ਮਿਸ੍ਸਂ ਕਤ੍ਵਾ ਆਦੀਪੇਯ੍ਯੁਂ. ਏਵਂ ਸਬ੍ਬਮ੍ਪਿ ਤਂ ਤੇਹਿ ਆਦੀਪਿਤਂ ਦਹਨ੍ਤੋ ਅਯਂ ਅਸਮਤ੍ਥਤੇਜੋ ਅਸਦਿਸਤੇਜੋ ਤਵ ਅਗ੍ਗਿ ਨ ਤਪ੍ਪੇਯ੍ਯ. ਏਵਂ ਅਤਪ੍ਪਨੀਯਂ, ਭਾਤਿਕ, ਦ੍ਵਿਰਸਞ੍ਞੁ ਦ੍ਵੀਹਿ ਜਿਵ੍ਹਾਹਿ ਰਸਜਾਨਨਸਮਤ੍ਥੋ ਕੋ ਤਂ ਸਪ੍ਪਿਆਦੀਹਿ ਸੁਭਿਕ੍ਖਂ ਸੁਹੀਤਂ ਕਯਿਰਾ, ਕੋ ਸਕ੍ਕੁਣੇਯ੍ਯ ਕਾਤੁਂ. ਏਵਂ ਅਤਿਤ੍ਤਂ ਪਨੇਤਂ ਮਹਗ੍ਘਸਂ ਸਨ੍ਤਪ੍ਪੇਤ੍ਵਾ ਕੋ ਨਾਮ ਦੇਵਲੋਕਂ ਗਮਿਸ੍ਸਤਿ, ਪਸ੍ਸ ਯਾਵਞ੍ਚੇਤਂ ਦੁਕ੍ਕਥਿਤਨ੍ਤਿ. ਯੋਗਯੁਤ੍ਤੋਤਿ ਅਰਣਿਮਥਨਯੋਗੇਨ ਯੁਤ੍ਤੋ ਹੁਤ੍ਵਾ ਤਂ ਪਚ੍ਚਯਂ ਲਭਿਤ੍ਵਾਵ ਅਗ੍ਗਿ ਸਮੋਰੋਹਤਿ ਨਿਬ੍ਬਤ੍ਤਤਿ. ਏਵਂ ਪਰਵਾਯਾਮੇਨ ਉਪ੍ਪਜ੍ਜਮਾਨਂ ਅਚੇਤਨਂ ਤਂ ਤ੍ਵਂ ‘‘ਦੇਵੋ’’ਤਿ ਵਦੇਸਿ. ਇਦਮ੍ਪਿ ਅਭੂਤਮੇਵ ਕਥੇਸੀਤਿ.

ਅਗ੍ਗਿ ਮਨੁਪ੍ਪਵਿਟ੍ਠੋਤਿ ਅਗ੍ਗਿ ਅਨੁਪਵਿਟ੍ਠੋ. ਨਾਮਤ੍ਥਮਾਨੋਤਿ ਨਾਪਿ ਅਰਣਿਹਤ੍ਥੇਨ ਨਰੇਨ ਅਮਤ੍ਥਿਯਮਾਨੋ ਨਿਬ੍ਬਤ੍ਤਤਿ. ਨਾਕਮ੍ਮੁਨਾ ਜਾਯਤਿ ਜਾਤਵੇਦੋਤਿ ਏਕਸ੍ਸ ਕਿਰਿਯਂ ਵਿਨਾ ਅਤ੍ਤਨੋ ਧਮ੍ਮਤਾਯ ਏਵ ਨ ਜਾਯਤਿ. ਸੁਸ੍ਸੇਯ੍ਯੁਨ੍ਤਿ ਅਨ੍ਤੋ ਅਗ੍ਗਿਨਾ ਸੋਸਿਯਮਾਨਾਨਿ ਵਨਾਨਿ ਸੁਕ੍ਖੇਯ੍ਯੁਂ, ਅਲ੍ਲਾਨੇਵ ¶ ਨ ਸਿਯੁਂ. ਭੋਜਨ੍ਤਿ ਭੋਜੇਨ੍ਤੋ. ਧੂਮਸਿਖਿਂ ਪਤਾਪਵਨ੍ਤਿ ਧੂਮਸਿਖਾਯ ਯੁਤ੍ਤਂ ਪਤਾਪਵਨ੍ਤਂ. ਅਙ੍ਗਾਰਿਕਾਤਿ ਅਙ੍ਗਾਰਕਮ੍ਮਕਰਾ. ਲੋਣਕਰਾਤਿ ਲੋਣੋਦਕਂ ਪਚਿਤ੍ਵਾ ਲੋਣਕਾਰਕਾ. ਸੂਦਾਤਿ ਭਤ੍ਤਕਾਰਕਾ. ਸਰੀਰਦਾਹਾਤਿ ਮਤਸਰੀਰਜ੍ਝਾਪਕਾ. ਪੁਞ੍ਞਨ੍ਤਿ ਏਤੇਪਿ ਸਬ੍ਬੇ ਪੁਞ੍ਞਮੇਵ ਕਰੇਯ੍ਯੁਂ.

ਅਜ੍ਝੇਨਮਗ੍ਗਿਨ੍ਤਿ ਅਜ੍ਝੇਨਅਗ੍ਗਿਂ. ਨ ਕੋਚੀਤਿ ਮਨ੍ਤਜ੍ਝਾਯਕਾ ਬ੍ਰਾਹ੍ਮਣਾਪਿ ਹੋਨ੍ਤੁ, ਕੋਚਿ ਨਰੋ ਧੂਮਸਿਖਿਂ ਪਤਾਪਵਨ੍ਤਂ ਅਗ੍ਗਿਂ ਭੋਜੇਨ੍ਤੋ ਤਪ੍ਪਯਿਤ੍ਵਾਪਿ ਪੁਞ੍ਞਂ ¶ ਨ ਕਰੋਤਿ ਨਾਮ. ਲੋਕਾਪਚਿਤੋ ਸਮਾਨੋਤਿ ਤਵ ਦੇਵੋਲੋਕਸ੍ਸ ਅਪਚਿਤੋ ਪੂਜਿਤੋ ਸਮਾਨੋ. ਯਦੇਵਾਤਿ ਯਂ ਅਹਿਕੁਣਪਾਦਿਂ ਪਟਿਕੁਲਂ ਜੇਗੁਚ੍ਛਂ ਮਚ੍ਚਾ ਦੂਰਤੋ ਪਰਿਵਜ੍ਜੇਨ੍ਤਿ. ਤਦਪ੍ਪਸਤ੍ਥਨ੍ਤਿ ਤਂ ਅਪ੍ਪਸਤ੍ਥਂ, ਸਮ੍ਮ, ਦ੍ਵਿਰਸਞ੍ਞੁ ਕਥਂ ਕੇਨ ਕਾਰਣੇਨ ਪਰਿਭੁਞ੍ਜੇਯ੍ਯ. ਦੇਵੇਸੂਤਿ ਏਕੇ ਮਨੁਸ੍ਸਾ ਸਿਖਿਮ੍ਪਿ ਦੇਵੇਸੁ ਅਞ੍ਞਤਰਂ ਦੇਵਂ ਵਦਨ੍ਤਿ. ਮਿਲਕ੍ਖੂ ਪਨਾਤਿ ਅਞ੍ਞਾਣਾ ਪਨ ਮਿਲਕ੍ਖੂ ਉਦਕਂ ‘‘ਦੇਵੋ’’ਤਿ ਵਦਨ੍ਤਿ. ਅਸਞ੍ਞਕਾਯਨ੍ਤਿ ¶ ਅਨਿਨ੍ਦ੍ਰਿਯਬਦ੍ਧਂ ਅਚਿਤ੍ਤਕਾਯਞ੍ਚ ਸਮਾਨਂ ਏਤਂ ਅਚੇਤਨਂ ਪਜਾਨਂ ਪਚਨਾਦਿਕਮ੍ਮਕਰਂ ਵੇਸ੍ਸਾਨਰਂ ਅਗ੍ਗਿਂ ਪਰਿਚਰਿਤ੍ਵਾ ਪਾਪਾਨਿ ਕਮ੍ਮਾਨਿ ਕਰੋਨ੍ਤੋ ਲੋਕੋ ਕਥਂ ਸੁਗਤਿਂ ਗਮਿਸ੍ਸਤਿ. ਇਦਂ ਤੇ ਅਤਿਵਿਯ ਦੁਕ੍ਕਥਿਤਂ.

ਸਬ੍ਬਾਭਿ ਭੂਤਾਹੁਧ ਜੀਵਿਕਤ੍ਥਾਤਿ ਇਮੇ ਬ੍ਰਾਹ੍ਮਣਾ ਅਤ੍ਤਨੋ ਜੀਵਿਕਤ੍ਥਂ ਮਹਾਬ੍ਰਹ੍ਮਾ ਸਬ੍ਬਾਭਿਭੂਤਿ ਆਹਂਸੁ, ਸਬ੍ਬੋ ਲੋਕੋ ਤੇਨੇਵ ਨਿਮ੍ਮਿਤੋਤਿ ਵਦਨ੍ਤਿ. ਪੁਨ ਅਗ੍ਗਿਸ੍ਸ ਬ੍ਰਹ੍ਮਾ ਪਰਿਚਾਰਕੋਤਿਪਿ ਵਦਨ੍ਤਿ. ਸੋਪਿ ਕਿਰ ਅਗ੍ਗਿਂ ਜੁਹਤੇਵ. ਸਬ੍ਬਾਨੁਭਾਵੀ ਚ ਵਸੀਤਿ ਸੋ ਪਨ ਯਦਿ ਸਬ੍ਬਾਨੁਭਾਵੀ ਚ ਵਸੀ ਚ, ਅਥ ਕਿਮਤ੍ਥਂ ਸਯਂ ਅਨਿਮ੍ਮਿਤੋ ਹੁਤ੍ਵਾ ਅਤ੍ਤਨਾਵ ਨਿਮ੍ਮਿਤਂ ਵਨ੍ਦਿਤਾ ਭਵੇਯ੍ਯ. ਇਦਮ੍ਪਿ ਤੇ ਦੁਕ੍ਕਥਿਤਮੇਵ. ਹਸ੍ਸਨ੍ਤਿ ਅਰਿਟ੍ਠ ਬ੍ਰਾਹ੍ਮਣਾਨਂ ਵਚਨਂ ਨਾਮ ਹਸਿਤਬ੍ਬਯੁਤ੍ਤਕਂ ਪਣ੍ਡਿਤਾਨਂ ਨ ਨਿਜ੍ਝਾਨਕ੍ਖਮਂ. ਪਕਿਰਿਂਸੂਤਿ ਇਮੇ ਬ੍ਰਾਹ੍ਮਣਾ ਏਵਰੂਪਂ ਮੁਸਾਵਾਦਂ ਅਤ੍ਤਨੋ ਸਕ੍ਕਾਰਹੇਤੁ ਪੁਬ੍ਬੇ ਪਤ੍ਥਰਿਂਸੁ. ਸਨ੍ਧਾਪਿਤਾ ਜਨ੍ਤੁਭਿ ਸਨ੍ਤਿਧਮ੍ਮਨ੍ਤਿ ਤੇ ਏਤ੍ਤਕੇਨ ਲਾਭਸਕ੍ਕਾਰੇ ਅਪਾਤੁਭੂਤੇ ਜਨ੍ਤੂਹਿ ਸਦ੍ਧਿਂ ਯੋਜੇਤ੍ਵਾ ਪਾਣਵਧਪਟਿਸਂਯੁਤ੍ਤਂ ਅਤ੍ਤਨੋ ਲਦ੍ਧਿਧਮ੍ਮਸਙ੍ਖਾਤਂ ਸਨ੍ਤਿਧਮ੍ਮਂ ਸਨ੍ਧਾਪਿਤਾ, ਯਞ੍ਞਸੁਤ੍ਤਂ ਨਾਮ ਗਨ੍ਥਯਿਂਸੂਤਿ ਅਤ੍ਥੋ.

ਏਤਞ੍ਚ ਸਚ੍ਚਨ੍ਤਿ ਯਦੇਤਂ ਤਯਾ ‘‘ਅਜ੍ਝੇਨਮਰਿਯਾ’’ਤਿਆਦਿ ਵੁਤ੍ਤਂ, ਏਤਞ੍ਚ ਸਚ੍ਚਂ ਭਵੇਯ੍ਯ. ਨਾਖਤ੍ਤਿਯੋਤਿ ਏਵਂ ਸਨ੍ਤੇ ਅਖਤ੍ਤਿਯੋ ਰਜ੍ਜਂ ਨਾਮ ਨ ਲਭੇਯ੍ਯ, ਅਬ੍ਰਾਹ੍ਮਣੋਪਿ ਮਨ੍ਤਪਦਾਨਿ ਨ ਸਿਕ੍ਖੇਯ੍ਯ. ਮੁਸਾਵਿਮੇਤਿ ਮੁਸਾਵ ਇਮੇ. ਓਦਰਿਯਾਤਿ ਉਦਰਨਿਸ੍ਸਿਤਜੀਵਿਕਾ, ਉਦਰਪੂਰਣਹੇਤੁ ਵਾ. ਤਦਪ੍ਪਪਞ੍ਞਾਤਿ ਤਂ ਤੇਸਂ ਵਚਨਂ ਅਪ੍ਪਪਞ੍ਞਾ. ਅਤ੍ਤਨਾਵਾਤਿ ਪਣ੍ਡਿਤਾ ਪਨ ਤੇਸਂ ਵਚਨਂ ‘‘ਸਦੋਸ’’ਨ੍ਤਿ ਅਤ੍ਤਨਾਵ ਪਸ੍ਸਨ੍ਤਿ. ਤਾਦਿਸਨ੍ਤਿ ਤਥਾਰੂਪਂ. ਸਙ੍ਖੁਭਿਤਨ੍ਤਿ ਸਙ੍ਖੁਭਿਤ੍ਵਾ ਬ੍ਰਹ੍ਮੁਨਾ ਠਪਿਤਮਰਿਯਾਦਂ ਭਿਨ੍ਦਿਤ੍ਵਾ ਠਿਤਂ ਸਙ੍ਖੁਭਿਤਂ ਵਿਭਿਨ੍ਦਂ ਲੋਕਂ ਸੋ ਤਵਬ੍ਰਹ੍ਮਾ ਕਸ੍ਮਾ ਉਜੁਂ ਨ ਕਰੋਤਿ ¶ . ਅਲਕ੍ਖਿਨ੍ਤਿ ਕਿਂਕਾਰਣਾ ਸਬ੍ਬਲੋਕੇ ਦੁਕ੍ਖਂ ਵਿਦਹਿ. ਸੁਖਿਨ੍ਤਿ ਕਿਂ ਨੁ ਏਕਨ੍ਤਸੁਖਿਮੇਵ ਸਬ੍ਬਲੋਕਂ ਨ ¶ ਅਕਾਸਿ, ਲੋਕਵਿਨਾਸਕੋ ਚੋਰੋ ਮਞ੍ਞੇ ਤਵ ਬ੍ਰਹ੍ਮਾਤਿ. ਮਾਯਾਤਿ ਮਾਯਾਯ. ਅਧਮ੍ਮੇਨ ਕਿਮਤ੍ਥਮਕਾਰੀਤਿ ਇਮਿਨਾ ਮਾਯਾਦਿਨਾ ਅਧਮ੍ਮੇਨ ਕਿਂਕਾਰਣਾ ਲੋਕਂ ਅਨਤ੍ਥਕਿਰਿਯਾਯਂ ਸਂਯੋਜੇਸੀਤਿ ਅਤ੍ਥੋ. ਅਰਿਟ੍ਠਾਤਿ ਅਰਿਟ੍ਠ, ਤਵ ਭੂਤਪਤਿ ਅਧਮ੍ਮਿਕੋ, ਯੋ ਦਸਵਿਧੇ ਕੁਸਲਧਮ੍ਮੇ ਸਤਿ ਧਮ੍ਮਮੇਵ ਅਵਿਦਹਿਤ੍ਵਾ ਅਧਮ੍ਮਂ ਵਿਦਹਿ. ਕੀਟਾਤਿਆਦਿ ਉਪਯੋਗਤ੍ਥੇ ਪਚ੍ਚਤ੍ਤਂ. ਏਤੇ ਕੀਟਾਦਯੋ ਪਾਣੇ ਹਨ੍ਤ੍ਵਾ ਮਚ੍ਚੋ ਸੁਜ੍ਝਤੀਤਿ ਏਤੇਪਿ ਕਮ੍ਬੋਜਰਟ੍ਠਵਾਸੀਨਂ ਬਹੂਨਂ ਅਨਰਿਯਾਨਂ ਧਮ੍ਮਾ, ਤੇ ਪਨ ਵਿਤਥਾ, ਅਧਮ੍ਮਾਵ ਧਮ੍ਮਾਤਿ ਵੁਤ੍ਤਾ. ਤੇਹਿਪਿ ਤਵ ਬ੍ਰਹ੍ਮੁਨਾਵ ਨਿਮ੍ਮਿਤੇਹਿ ਭਵਿਤਬ੍ਬਨ੍ਤਿ.

ਇਦਾਨਿ ਤੇਸਂ ਵਿਤਥਭਾਵਂ ਦਸ੍ਸੇਨ੍ਤੋ ਆਹ –

੯੪੦.

‘‘ਸਚੇ ਹਿ ਸੋ ਸੁਜ੍ਝਤਿ ਯੋ ਹਨਾਤਿ, ਹਤੋਪਿ ਸੋ ਸਗ੍ਗਮੁਪੇਤਿ ਠਾਨਂ;

ਭੋਵਾਦਿ ¶ ਭੋਵਾਦਿਨ ਮਾਰਯੇਯ੍ਯੁਂ, ਯੇ ਚਾਪਿ ਤੇਸਂ ਅਭਿਸਦ੍ਦਹੇਯ੍ਯੁਂ.

੯੪੧.

‘‘ਨੇਵ ਮਿਗਾ ਨ ਪਸੂ ਨੋਪਿ ਗਾਵੋ, ਆਯਾਚਨ੍ਤਿ ਅਤ੍ਤਵਧਾਯ ਕੇਚਿ;

ਵਿਪ੍ਫਨ੍ਦਮਾਨੇ ਇਧ ਜੀਵਿਕਤ੍ਥਾ, ਯਞ੍ਞੇਸੁ ਪਾਣੇ ਪਸੁਮਾਰਭਨ੍ਤਿ.

੯੪੨.

‘‘ਯੂਪੁਸ੍ਸਨੇ ਪਸੁਬਨ੍ਧੇ ਚ ਬਾਲਾ, ਚਿਤ੍ਤੇਹਿ ਵਣ੍ਣੇਹਿ ਮੁਖਂ ਨਯਨ੍ਤਿ;

ਅਯਂ ਤੇ ਯੂਪੋ ਕਾਮਦੁਹੋ ਪਰਤ੍ਥ, ਭਵਿਸ੍ਸਤਿ ਸਸ੍ਸਤੋ ਸਮ੍ਪਰਾਯੇ.

੯੪੩.

‘‘ਸਚੇ ਚ ਯੂਪੇ ਮਣਿਸਙ੍ਖਮੁਤ੍ਤਂ, ਧਞ੍ਞਂ ਧਨਂ ਰਜਤਂ ਜਾਤਰੂਪਂ;

ਸੁਕ੍ਖੇਸੁ ਕਟ੍ਠੇਸੁ ਨਵੇਸੁ ਚਾਪਿ, ਸਚੇ ਦੁਹੇ ਤਿਦਿਵੇ ਸਬ੍ਬਕਾਮੇ;

ਤੇਵਿਜ੍ਜਸਙ੍ਘਾਵ ਪੁਥੂ ਯਜੇਯ੍ਯੁਂ, ਅਬ੍ਰਾਹ੍ਮਣਂ ਕਞ੍ਚਿ ਨ ਯਾਜਯੇਯ੍ਯੁਂ.

੯੪੪.

‘‘ਕੁਤੋ ¶ ਚ ਯੂਪੇ ਮਣਿਸਙ੍ਖਮੁਤ੍ਤਂ, ਧਞ੍ਞਂ ਧਨਂ ਰਜਤਂ ਜਾਤਰੂਪਂ;

ਸੁਕ੍ਖੇਸੁ ਕਟ੍ਠੇਸੁ ਨਵੇਸੁ ਚਾਪਿ, ਕੁਤੋ ਦੁਹੇ ਤਿਦਿਵੇ ਸਬ੍ਬਕਾਮੇ.

੯੪੫.

‘‘ਸਠਾ ਚ ਲੁਦ੍ਦਾ ਚ ਪਲੁਦ੍ਧਬਾਲਾ, ਚਿਤ੍ਤੇਹਿ ਵਣ੍ਣੇਹਿ ਮੁਖਂ ਨਯਨ੍ਤਿ;

ਆਦਾਯ ਅਗ੍ਗਿਂ ਮਮ ਦੇਹਿ ਵਿਤ੍ਤਂ, ਤਤੋ ਸੁਖੀ ਹੋਹਿਸਿ ਸਬ੍ਬਕਾਮੇ.

੯੪੬.

‘‘ਤਮਗ੍ਗਿਹੁਤ੍ਤਂ ¶ ਸਰਣਂ ਪਵਿਸ੍ਸ, ਚਿਤ੍ਤੇਹਿ ਵਣ੍ਣੇਹਿ ਮੁਖਂ ਨਯਨ੍ਤਿ;

ਓਰੋਪਯਿਤ੍ਵਾ ਕੇਸਮਸ੍ਸੁਂ ਨਖਞ੍ਚ, ਵੇਦੇਹਿ ਵਿਤ੍ਤਂ ਅਤਿਗਾਲ਼੍ਹਯਨ੍ਤਿ.

੯੪੭.

‘‘ਕਾਕਾ ਉਲੂਕਂਵ ਰਹੋ ਲਭਿਤ੍ਵਾ, ਏਕਂ ਸਮਾਨਂ ਬਹੁਕਾ ਸਮੇਚ੍ਚ;

ਅਨ੍ਨਾਨਿ ¶ ਭੁਤ੍ਵਾ ਕੁਹਕਾ ਕੁਹਿਤ੍ਵਾ, ਮੁਣ੍ਡਂ ਕਰਿਤ੍ਵਾ ਯਞ੍ਞਪਥੋਸ੍ਸਜਨ੍ਤਿ.

੯੪੮.

‘‘ਏਵਞ੍ਹਿ ਸੋ ਵਞ੍ਚਿਤੋ ਬ੍ਰਾਹ੍ਮਣੇਹਿ, ਏਕੋ ਸਮਾਨੋ ਬਹੁਕਾ ਸਮੇਚ੍ਚ;

ਤੇ ਯੋਗਯੋਗੇਨ ਵਿਲੁਮ੍ਪਮਾਨਾ, ਦਿਟ੍ਠਂ ਅਦਿਟ੍ਠੇਨ ਧਨਂ ਹਰਨ੍ਤਿ.

੯੪੯.

‘‘ਅਕਾਸਿਯਾ ਰਾਜੂਹਿਵਾਨੁਸਿਟ੍ਠਾ, ਤਦਸ੍ਸ ਆਦਾਯ ਧਨਂ ਹਰਨ੍ਤਿ;

ਤੇ ਤਾਦਿਸਾ ਚੋਰਸਮਾ ਅਸਨ੍ਤਾ, ਵਜ੍ਝਾ ਨ ਹਞ੍ਞਨ੍ਤਿ ਅਰਿਟ੍ਠ ਲੋਕੇ.

੯੫੦.

‘‘ਇਨ੍ਦਸ੍ਸ ਬਾਹਾਰਸਿ ਦਕ੍ਖਿਣਾਤਿ, ਯਞ੍ਞੇਸੁ ਛਿਨ੍ਦਨ੍ਤਿ ਪਲਾਸਯਟ੍ਠਿਂ;

ਤਂ ਚੇਪਿ ਸਚ੍ਚਂ ਮਘਵਾ ਛਿਨ੍ਨਬਾਹੁ, ਕੇਨਸ੍ਸ ਇਨ੍ਦੋ ਅਸੁਰੇ ਜਿਨਾਤਿ.

੯੫੧.

‘‘ਤਞ੍ਚੇਵ ¶ ਤੁਚ੍ਛਂ ਮਘਵਾ ਸਮਙ੍ਗੀ, ਹਨ੍ਤਾ ਅਵਜ੍ਝੋ ਪਰਮੋ ਸ ਦੇਵੋ;

ਮਨ੍ਤਾ ਇਮੇ ਬ੍ਰਾਹ੍ਮਣਾ ਤੁਚ੍ਛਰੂਪਾ, ਸਨ੍ਦਿਟ੍ਠਿਕਾ ਵਞ੍ਚਨਾ ਏਸ ਲੋਕੇ.

੯੫੨.

‘‘ਮਾਲਾਗਿਰਿ ਹਿਮਵਾ ਯੋ ਚ ਗਿਜ੍ਝੋ, ਸੁਦਸ੍ਸਨੋ ਨਿਸਭੋ ਕੁਵੇਰੁ;

ਏਤੇ ਚ ਅਞ੍ਞੇ ਚ ਨਗਾ ਮਹਨ੍ਤਾ, ਚਿਤ੍ਯਾ ਕਤਾ ਯਞ੍ਞਕਰੇਹਿ ਮਾਹੁ.

੯੫੩.

‘‘ਯਥਾਪਕਾਰਾਨਿ ਹਿ ਇਟ੍ਠਕਾਨਿ, ਚਿਤ੍ਯਾ ਕਤਾ ਯਞ੍ਞਕਰੇਹਿ ਮਾਹੁ;

ਨ ਪਬ੍ਬਤਾ ਹੋਨ੍ਤਿ ਤਥਾਪਕਾਰਾ, ਅਞ੍ਞਾ ਦਿਸਾ ਅਚਲਾ ਤਿਟ੍ਠਸੇਲਾ.

੯੫੪.

‘‘ਨ ਇਟ੍ਠਕਾ ਹੋਨ੍ਤਿ ਸਿਲਾ ਚਿਰੇਨ, ਨ ਤਤ੍ਥ ਸਞ੍ਜਾਯਤਿ ਅਯੋ ਨ ਲੋਹਂ;

ਯਞ੍ਞਞ੍ਚ ¶ ਏਤਂ ਪਰਿਵਣ੍ਣਯਨ੍ਤਾ, ਚਿਤ੍ਯਾ ਕਤਾ ਯਞ੍ਞਕਰੇਹਿ ਮਾਹੁ.

੯੫੫.

‘‘ਅਜ੍ਝਾਯਕਂ ਮਨ੍ਤਗੁਣੂਪਪਨ੍ਨਂ, ਤਪਸ੍ਸਿਨਂ ‘ਯਾਚਯੋਗੋ’ਤਿਧਾਹੁ;

ਤੀਰੇ ਸਮੁਦ੍ਦਸ੍ਸੁਦਕਂ ਸਜਨ੍ਤਂ, ਤਂ ਸਾਗਰਜ੍ਝੋਹਰਿ ਤੇਨਾਪੇਯ੍ਯੋ.

੯੫੬.

‘‘ਪਰੋਸਹਸ੍ਸਮ੍ਪਿ ¶ ਸਮਨ੍ਤਵੇਦੇ, ਮਨ੍ਤੂਪਪਨ੍ਨੇ ਨਦਿਯੋ ਵਹਨ੍ਤਿ;

ਨ ਤੇਨ ਬ੍ਯਾਪਨ੍ਨਰਸੂਦਕਾ ਨ, ਕਸ੍ਮਾ ਸਮੁਦ੍ਦੋ ਅਤੁਲੋ ਅਪੇਯ੍ਯੋ.

੯੫੭.

‘‘ਯੇ ਕੇਚਿ ਕੂਪਾ ਇਧ ਜੀਵਲੋਕੇ, ਲੋਣੂਦਕਾ ਕੂਪਖਣੇਹਿ ਖਾਤਾ;

ਨ ਬ੍ਰਾਹ੍ਮਣਜ੍ਝੋਹਰਣੇਨ ਤੇਸੁ, ਆਪੋ ਅਪੇਯ੍ਯੋ ਦ੍ਵਿਰਸਞ੍ਞੁ ਮਾਹੁ.

੯੫੮.

‘‘ਪੁਰੇ ¶ ਪੁਰਤ੍ਥਾ ਕਾ ਕਸ੍ਸ ਭਰਿਯਾ, ਮਨੋ ਮਨੁਸ੍ਸਂ ਅਜਨੇਸਿ ਪੁਬ੍ਬੇ;

ਤੇਨਾਪਿ ਧਮ੍ਮੇਨ ਨ ਕੋਚਿ ਹੀਨੋ, ਏਵਮ੍ਪਿ ਵੋਸ੍ਸਗ੍ਗਵਿਭਙ੍ਗਮਾਹੁ.

੯੫੯.

‘‘ਚਣ੍ਡਾਲਪੁਤ੍ਤੋਪਿ ਅਧਿਚ੍ਚ ਵੇਦੇ, ਭਾਸੇਯ੍ਯ ਮਨ੍ਤੇ ਕੁਸਲੋ ਮਤੀਮਾ;

ਨ ਤਸ੍ਸ ਮੁਦ੍ਧਾਪਿ ਫਲੇਯ੍ਯ ਸਤ੍ਤਧਾ, ਮਨ੍ਤਾ ਇਮੇ ਅਤ੍ਤਵਧਾਯ ਕਤਾ.

੯੬੦.

‘‘ਵਾਚਾਕਤਾ ਗਿਦ੍ਧਿਕਤਾ ਗਹੀਤਾ, ਦੁਮ੍ਮੋਚਯਾ ਕਬ੍ਯਪਥਾਨੁਪਨ੍ਨਾ;

ਬਾਲਾਨ ਚਿਤ੍ਤਂ ਵਿਸਮੇ ਨਿਵਿਟ੍ਠਂ, ਤਦਪ੍ਪਪਞ੍ਞਾ ਅਭਿਸਦ੍ਦਹਨ੍ਤਿ.

੯੬੧.

‘‘ਸੀਹਸ੍ਸ ਬ੍ਯਗ੍ਘਸ੍ਸ ਚ ਦੀਪਿਨੋ ਚ, ਨ ਵਿਜ੍ਜਤੀ ਪੋਰਿਸਿਯਂ ਬਲੇਨ;

ਮਨੁਸ੍ਸਭਾਵੋ ਚ ਗਵਂਵ ਪੇਕ੍ਖੋ, ਜਾਤੀ ਹਿ ਤੇਸਂ ਅਸਮਾ ਸਮਾਨਾ.

੯੬੨.

‘‘ਸਚੇ ¶ ਚ ਰਾਜਾ ਪਥਵਿਂ ਵਿਜਿਤ੍ਵਾ, ਸਜੀਵਵਾ ਅਸ੍ਸਵਪਾਰਿਸਜ੍ਜੋ;

ਸਯਮੇਵ ਸੋ ਸਤ੍ਤੁਸਙ੍ਘਂ ਵਿਜੇਯ੍ਯ, ਤਸ੍ਸਪ੍ਪਜਾ ਨਿਚ੍ਚਸੁਖੀ ਭਵੇਯ੍ਯ.

੯੬੩.

‘‘ਖਤ੍ਤਿਯਮਨ੍ਤਾ ਚ ਤਯੋ ਚ ਵੇਦਾ, ਅਤ੍ਥੇਨ ਏਤੇ ਸਮਕਾ ਭਵਨ੍ਤਿ;

ਤੇਸਞ੍ਚ ਅਤ੍ਥਂ ਅਵਿਨਿਚ੍ਛਿਨਿਤ੍ਵਾ, ਨ ਬੁਜ੍ਝਤੀ ਓਘਪਥਂਵ ਛਨ੍ਨਂ.

੯੬੪.

‘‘ਖਤ੍ਤਿਯਮਨ੍ਤਾ ਚ ਤਯੋ ਚ ਵੇਦਾ, ਅਤ੍ਥੇਨ ਏਤੇ ਸਮਕਾ ਭਵਨ੍ਤਿ;

ਲਾਭੋ ਅਲਾਭੋ ਅਯਸੋ ਯਸੋ ਚ, ਸਬ੍ਬੇਵ ਤੇਸਂ ਚਤੁਨ੍ਨਞ੍ਚ ਧਮ੍ਮਾ.

੯੬੫.

‘‘ਯਥਾਪਿ ¶ ਇਬ੍ਭਾ ਧਨਧਞ੍ਞਹੇਤੁ, ਕਮ੍ਮਾਨਿ ਕਰੋਨ੍ਤਿ ਪੁਥੂ ਪਥਬ੍ਯਾ;

ਤੇਵਿਜ੍ਜਸਙ੍ਘਾ ਚ ਤਥੇਵ ਅਜ੍ਜ, ਕਮ੍ਮਾਨਿ ਕਰੋਨ੍ਤਿ ਪੁਥੂ ਪਥਬ੍ਯਾ.

੯੬੬.

‘‘ਇਬ੍ਭੇਹਿ ¶ ਯੇ ਤੇ ਸਮਕਾ ਭਵਨ੍ਤਿ, ਨਿਚ੍ਚੁਸ੍ਸੁਕਾ ਕਾਮਗੁਣੇਸੁ ਯੁਤ੍ਤਾ;

ਕਮ੍ਮਾਨਿ ਕਰੋਨ੍ਤਿ ਪੁਥੂ ਪਥਬ੍ਯਾ, ਤਦਪ੍ਪਪਞ੍ਞਾ ਦ੍ਵਿਰਸਞ੍ਞੁਰਾ ਤੇ’’ਤਿ.

ਤਤ੍ਥ ਭੋਵਾਦੀਤਿ ਬ੍ਰਾਹ੍ਮਣਾ. ਭੋਵਾਦਿਨ ਮਾਰਯੇਯ੍ਯੁਨ੍ਤਿ ਬ੍ਰਾਹ੍ਮਣਮੇਵ ਮਾਰੇਯ੍ਯੁਂ. ਯੇ ਚਾਪੀਤਿ ਯੇਪਿ ਬ੍ਰਾਹ੍ਮਣਾਨਂ ਤਂ ਵਚਨਂ ਸਦ੍ਦਹੇਯ੍ਯੁਂ, ਤੇ ਅਤ੍ਤਨੋ ਉਪਟ੍ਠਾਕੇਯੇਵ ਚ ਬ੍ਰਾਹ੍ਮਣੇ ਚ ਮਾਰੇਯ੍ਯੁਂ. ਬ੍ਰਾਹ੍ਮਣਾ ਪਨ ਬ੍ਰਾਹ੍ਮਣੇ ਚ ਉਪਟ੍ਠਾਕੇ ਚ ਅਮਾਰੇਤ੍ਵਾ ਨਾਨਪ੍ਪਕਾਰੇ ਤਿਰਚ੍ਛਾਨੇਯੇਵ ਮਾਰੇਨ੍ਤਿ. ਇਤਿ ਤੇਸਂ ਵਚਨਂ ਮਿਚ੍ਛਾ. ਕੇਚੀਤਿ ਯਞ੍ਞੇਸੁ ਨੋ ਮਾਰੇਥ, ਮਯਂ ਸਗ੍ਗਂ ਗਮਿਸ੍ਸਾਮਾਤਿ ਆਯਾਚਨ੍ਤਾ ਕੇਚਿ ਨਤ੍ਥਿ. ਪਾਣੇ ਪਸੁਮਾਰਭਨ੍ਤੀਤਿ ਮਿਗਾਦਯੋ ਪਾਣੇ ਚ ਪਸੂ ਚ ਵਿਪ੍ਫਨ੍ਦਮਾਨੇ ਜੀਵਿਕਤ੍ਥਾਯ ਮਾਰੇਨ੍ਤਿ. ਮੁਖਂ ਨਯਨ੍ਤੀਤਿ ਏਤੇਸੁ ਯੂਪੁਸ੍ਸਨੇਸੁ ਪਸੁਬਨ੍ਧੇਸੁ ਇਮਸ੍ਮਿਂ ਤੇ ਯੂਪੇ ਸਬ੍ਬਂ ਮਣਿਸਙ੍ਖਮੁਤ੍ਤਂ ਧਞ੍ਞਂ ਧਨਂ ਰਜਤਂ ਜਾਤਰੂਪਂ ਸਨ੍ਨਿਹਿਤਂ, ਅਯਂ ਤੇ ਯੂਪੋ ਪਰਤ੍ਥ ਪਰਲੋਕੇ ਕਾਮਦੁਹੋ ਭਵਿਸ੍ਸਤਿ, ਸਸ੍ਸਤਭਾਵਂ ਆਵਹਿਸ੍ਸਤੀਤਿ ਚਿਤ੍ਰੇਹਿ ਕਾਰਣੇਹਿ ਮੁਖਂ ਪਸਾਦੇਨ੍ਤਿ, ਤਂ ਤਂ ਵਤ੍ਵਾ ਮਿਚ੍ਛਾਗਾਹਂ ¶ ਗਾਹੇਨ੍ਤੀਤਿ ਅਤ੍ਥੋ.

ਸਚੇ ਚਾਤਿ ਸਚੇ ਚ ਯੂਪੇ ਵਾ ਸੇਸਕਟ੍ਠੇਸੁ ਵਾ ਏਤਂ ਮਣਿਆਦਿਕਂ ਭਵੇਯ੍ਯ, ਤਿਦਿਵੇ ਵਾ ਸਬ੍ਬਕਾਮਦੁਹੋ ਅਸ੍ਸ, ਤੇਵਿਜ੍ਜਸਙ੍ਘਾਵ ਪੁਥੂ ਹੁਤ੍ਵਾ ਯਞ੍ਞਂ ਯਜੇਯ੍ਯੁਂ ਬਹੁਧਨਤਾਯ ਚੇਵ ਸਗ੍ਗਕਾਮਤਾਯ ਚ, ਅਞ੍ਞਂ ਅਬ੍ਰਾਹ੍ਮਣਂ ਨ ਯਾਜੇਯ੍ਯੁਂ. ਯਸ੍ਮਾ ਪਨ ਅਤ੍ਤਨੋ ਧਨਂ ਪਚ੍ਚਾਸੀਸਨ੍ਤਾ ਅਞ੍ਞਮ੍ਪਿ ਯਜਾਪੇਨ੍ਤਿ, ਤਸ੍ਮਾ ਅਭੂਤਵਾਦਿਨੋਤਿ ਵੇਦਿਤਬ੍ਬਾ. ਕੁਤੋ ਚਾਤਿ ਏਤਸ੍ਮਿਞ੍ਚ ਯੂਪੇ ਵਾ ਸੇਸਕਟ੍ਠੇਸੁ ਵਾ ਕੁਤੋ ਏਤਂ ਮਣਿਆਦਿਕਂ ਅਵਿਜ੍ਜਮਾਨਮੇਵ, ਕੁਤੋ ਤਿਦਿਵੇ ਸਬ੍ਬਕਾਮੇ ਦੁਹਿਸ੍ਸਤਿ. ਸਬ੍ਬਥਾਪਿ ਅਭੂਤਮੇਵ ਤੇਸਂ ਵਚਨਂ.

ਸਠਾ ¶ ਚ ਲੁਦ੍ਦਾ ਚ ਪਲੁਦ੍ਧਬਾਲਾਤਿ ਅਰਿਟ੍ਠ, ਇਮੇ ਬ੍ਰਾਹ੍ਮਣਾ ਨਾਮ ਕੇਰਾਟਿਕਾ ਚੇਵ ਨਿਕ੍ਕਰੁਣਾ ਚ, ਤੇ ਬਾਲਾ ਲੋਕਂ ਪਲੋਭੇਤ੍ਵਾ ਉਪਲੋਭੇਤ੍ਵਾ ਚਿਤ੍ਰੇਹਿ ਕਾਰਣੇਹਿ ਮੁਖਂ ਪਸਾਦੇਨ੍ਤਿ. ਸਬ੍ਬਕਾਮੇਤਿ ਅਗ੍ਗਿਂ ਆਦਾਯ ਤ੍ਵਞ੍ਚ ਜੂਹ, ਅਮ੍ਹਾਕਞ੍ਚ ਵਿਤ੍ਤਂ ਦੇਹਿ, ਤਤੋ ਸਬ੍ਬਕਾਮੇ ਲਭਿਤ੍ਵਾ ਸੁਖੀ ਹੋਹਿਸਿ.

ਤਮਗ੍ਗਿਹੁਤ੍ਤਂ ਸਰਣਂ ਪਵਿਸ੍ਸਾਤਿ ਤਂ ਰਾਜਾਨਂ ਵਾ ਰਾਜਮਹਾਮਤ੍ਤਂ ਵਾ ਆਦਾਯ ਅਗ੍ਗਿਜੁਹਨਟ੍ਠਾਨਂ ਗੇਹਂ ਪਵਿਸਿਤ੍ਵਾ. ਓਰੋਪਯਿਤ੍ਵਾਤਿ ਚਿਤ੍ਰਾਨਿ ਕਾਰਣਾਨਿ ਵਦਨ੍ਤਾ ਕੇਸਮਸ੍ਸੁਂ ਨਖੇ ਚ ਓਰੋਪਯਿਤ੍ਵਾ. ਅਤਿਗਾਲ਼੍ਹਯਨ੍ਤੀਤਿ ਵੁਤ੍ਤਤਾਯ ਤਯੋ ਵੇਦੇ ਨਿਸ੍ਸਾਯ ‘‘ਇਦਂ ਦਾਤਬ੍ਬਂ, ਇਦਂ ਕਤ੍ਤਬ੍ਬ’’ਨ੍ਤਿ ਵਦਨ੍ਤਾ ਵੇਦੇਹਿ ਤਸ੍ਸ ਸਨ੍ਤਕਂ ਵਿਤ੍ਤਂ ਅਤਿਗਾਲ਼੍ਹਯਨ੍ਤਿ ਵਿਨਾਸੇਨ੍ਤਿ ਵਿਦ੍ਧਂਸੇਨ੍ਤਿ.

ਅਨ੍ਨਾਨਿ ¶ ਭੁਤ੍ਵਾ ਕੁਹਕਾ ਕੁਹਿਤ੍ਵਾਤਿ ਤੇ ਕੁਹਕਾ ਨਾਨਪ੍ਪਕਾਰਂ ਕੁਹਕਕਮ੍ਮਂ ਕਤ੍ਵਾ ਸਮੇਚ੍ਚ ਸਮਾਗਨ੍ਤ੍ਵਾ ਯਞ੍ਞਂ ਵਣ੍ਣੇਤ੍ਵਾ ਵਞ੍ਚੇਤ੍ਵਾ ਤਸ੍ਸ ਸਨ੍ਤਕਂ ਨਾਨਗ੍ਗਰਸਭੋਜਨਂ ਭੁਞ੍ਜਿਤ੍ਵਾ ਅਥ ਨਂ ਮੁਣ੍ਡਕਂ ਕਤ੍ਵਾ ਯਞ੍ਞਪਥੇ ਓਸ੍ਸਜਨ੍ਤਿ, ਤਂ ਗਹੇਤ੍ਵਾ ਬਹਿਯਞ੍ਞਾਵਾਟਂ ਗਚ੍ਛਨ੍ਤੀਤਿ ਅਤ੍ਥੋ.

ਯੋਗਯੋਗੇਨਾਤਿ ਤੇ ਬ੍ਰਾਹ੍ਮਣਾ ਤਂ ਏਕਂ ਬਹੁਕਾ ਸਮੇਚ੍ਚ ਤੇਨ ਤੇਨ ਯੋਗੇਨ ਤਾਯ ਤਾਯ ਯੁਤ੍ਤਿਯਾ ਵਿਲੁਮ੍ਪਮਾਨਾ ਦਿਟ੍ਠਂ ਪਚ੍ਚਕ੍ਖਂ ਤਸ੍ਸ ਧਨਂ ਅਦਿਟ੍ਠੇਨ ਦੇਵਲੋਕੇਨ ਅਦਿਟ੍ਠਂ ਦੇਵਲੋਕਂ ਵਣ੍ਣੇਤ੍ਵਾ ਆਹਰਣਟ੍ਠਾਨਂ ਕਤ੍ਵਾ ਹਰਨ੍ਤਿ. ਅਕਾਸਿਯਾ ਰਾਜੂਹਿਵਾਨੁਸਿਟ੍ਠਾਤਿ ‘‘ਇਦਞ੍ਚਿਦਞ੍ਚ ਬਲਿਂ ਗਣ੍ਹਥਾ’’ਤਿ ਰਾਜੂਹਿ ਅਨੁਸਿਟ੍ਠਾ ਅਕਾਸਿਯਸਙ੍ਖਾਤਾ ਰਾਜਪੁਰਿਸਾ ਵਿਯ. ਤਦਸ੍ਸਾਤਿ ਤਂ ਅਸ੍ਸ ਧਨਂ ਆਦਾਯ ਹਰਨ੍ਤਿ. ਚੋਰਸਮਾਤਿ ਅਭੂਤਬਲਿਗ੍ਗਾਹਕਾ ਸਨ੍ਧਿਚ੍ਛੇਦਕਚੋਰਸਦਿਸਾ ਅਸਪ੍ਪੁਰਿਸਾ. ਵਜ੍ਝਾਤਿ ਵਧਾਰਹਾ ਏਵਰੂਪਾ ਪਾਪਧਮ੍ਮਾ ਉਦਾਨਿ ਲੋਕੇ ਨ ਹਞ੍ਞਨ੍ਤਿ.

ਬਾਹਾਰਸੀਤਿ ਬਾਹਾ ਅਸਿ. ਇਦਂ ਵੁਤ੍ਤਂ ਹੋਤਿ – ਇਦਮ੍ਪਿ ਅਰਿਟ੍ਠ, ਬ੍ਰਾਹ੍ਮਣਾਨਂ ਮੁਸਾਵਾਦਂ ਪਸ੍ਸ. ਤੇ ਕਿਰ ਯਞ੍ਞੇਸੁ ਮਹਤਿਂ ਪਲਾਸਯਟ੍ਠਿਂ ‘‘ਇਨ੍ਦਸ੍ਸ ਬਾਹਾ ਅਸਿ ਦਕ੍ਖਿਣਾ’’ਤਿ ਵਤ੍ਵਾ ਛਿਨ੍ਦਨ੍ਤਿ. ਤਞ੍ਚੇ ਏਤੇਸਂ ਵਚਨਂ ਸਚ੍ਚਂ, ਅਥ ਛਿਨ੍ਨਬਾਹੁ ਸਮਾਨੋ ਕੇਨਸ੍ਸ ਬਾਹੁਬਲੇਨ ਇਨ੍ਦੋ ਅਸੁਰੇ ਜਿਨਾਤੀਤਿ. ਸਮਙ੍ਗੀਤਿ ਬਾਹੁਸਮਙ੍ਗੀ ਅਚ੍ਛਿਨ੍ਨਬਾਹੁ ਅਰੋਗੋਯੇਵ. ਹਨ੍ਤਾਤਿ ਅਸੁਰਾਨਂ ਹਨ੍ਤਾ. ਪਰਮੋਤਿ ਉਤ੍ਤਮੋ ਪੁਞ੍ਞਿਦ੍ਧਿਯਾ ਸਮਨ੍ਨਾਗਤੋ ਅਞ੍ਞੇਸਂ ਅਵਜ੍ਝੋ. ਬ੍ਰਾਹ੍ਮਣਾਤਿ ਬ੍ਰਾਹ੍ਮਣਾਨਂ. ਤੁਚ੍ਛਰੂਪਾਤਿ ਤੁਚ੍ਛਸਭਾਵਾ ਨਿਪ੍ਫਲਾ ¶ . ਵਞ੍ਚਨਾਤਿ ਯੇ ਚ ਤੇ ਬ੍ਰਾਹ੍ਮਣਾਨਂ ਮਨ੍ਤਾ ਨਾਮ, ਏਸਾ ਲੋਕੇ ਸਨ੍ਦਿਟ੍ਠਿਕਾ ਵਞ੍ਚਨਾ.

ਯਥਾਪਕਾਰਾਨੀਤਿ ਯਾਦਿਸਾਨਿ ਇਟ੍ਠਕਾਨਿ ਗਹੇਤ੍ਵਾ ਯਞ੍ਞਕਰੇਹਿ ਚਿਤ੍ਯਾ ਕਤਾਤਿ ਵਦਨ੍ਤਿ. ਤਿਟ੍ਠਸੇਲਾਤਿ ਪਬ੍ਬਤਾ ਹਿ ਅਚਲਾ ਤਿਟ੍ਠਾ ਨ ਉਪਚਿਤਾ ਏਕਗ੍ਘਨਾ ਸਿਲਾਮਯਾ ਚ. ਇਟ੍ਠਕਾਨਿ ਚਲਾਨਿ ਨ ਏਕਗ੍ਘਨਾਨਿ ਨ ਸਿਲਾਮਯਾਨਿ. ਪਰਿਵਣ੍ਣਯਨ੍ਤਾਤਿ ਏਤਂ ¶ ਯਞ੍ਞਂ ਵਣ੍ਣੇਨ੍ਤਾ ਬ੍ਰਾਹ੍ਮਣਾ.

ਸਮਨ੍ਤਵੇਦੇਤਿ ਪਰਿਪੁਣ੍ਣਵੇਦੇ ਬ੍ਰਾਹ੍ਮਣੇ. ਵਹਨ੍ਤੀਤਿ ਸੋਤੇਸੁਪਿ ਆਵਟ੍ਟੇਸੁਪਿ ਪਤਿਤੇ ਵਹਨ੍ਤਿ, ਨਿਮੁਜ੍ਜਾਪੇਤ੍ਵਾ ਜੀਵਿਤਕ੍ਖਯਂ ਪਾਪੇਨ੍ਤਿ. ਨ ਤੇਨ ਬ੍ਯਾਪਨ੍ਨਰਸੂਦਕਾ ਨਾਤਿ ਏਤ੍ਥ ਏਕੋ ਨ-ਕਾਰੋ ਪੁਚ੍ਛਨਤ੍ਥੋ ਹੋਤਿ. ਨਨੁ ਤੇਨ ਬ੍ਯਾਪਨ੍ਨਰਸੂਦਕਾ ਨਦਿਯੋਤਿ ਤਂ ਪੁਚ੍ਛਨ੍ਤੋ ਏਵਮਾਹ. ਕਸ੍ਮਾਤਿ ਕੇਨ ਕਾਰਣੇਨ ਤਾਵ ਮਹਾਸਮੁਦ੍ਦੋਵ ਅਪੇਯ੍ਯੋ ਕਤੋ, ਕਿਂ ਮਹਾਬ੍ਰਹ੍ਮਾ ਯਮੁਨਾਦੀਸੁ ਨਦੀਸੁ ਉਦਕਂ ਅਪੇਯ੍ਯਂ ਕਾਤੁਂ ਨ ਸਕ੍ਕੋਤਿ, ਸਮੁਦ੍ਦੇਯੇਵ ਸਕ੍ਕੋਤੀਤਿ. ਦ੍ਵਿਰਸਞ੍ਞੁ ਮਾਹੂਤਿ ਦ੍ਵਿਰਸਞ੍ਞੂ ਅਹੁ, ਜਾਤੋਤਿ ਅਤ੍ਥੋ.

ਪੁਰੇ ¶ ਪੁਰਤ੍ਥਾਤਿ ਇਤੋ ਪੁਰੇ ਪੁਬ੍ਬੇ ਪੁਰਤ੍ਥਾ ਪਠਮਕਪ੍ਪਿਕਕਾਲੇ. ਕਾ ਕਸ੍ਸ ਭਰਿਯਾਤਿ ਕਾ ਕਸ੍ਸ ਭਰਿਯਾ ਨਾਮ. ਤਦਾ ਹਿ ਇਤ੍ਥਿਲਿਙ੍ਗਮੇਵ ਨਤ੍ਥਿ, ਪਚ੍ਛਾ ਮੇਥੁਨਧਮ੍ਮਵਸੇਨ ਮਾਤਾਪਿਤਰੋ ਨਾਮ ਜਾਤਾ. ਮਨੋ ਮਨੁਸ੍ਸਨ੍ਤਿ ਤਦਾ ਹਿ ਮਨੋਯੇਵ ਮਨੁਸ੍ਸਂ ਜਨੇਸਿ, ਮਨੋਮਯਾਵ ਸਤ੍ਤਾ ਨਿਬ੍ਬਤ੍ਤਿਂਸੂਤਿ ਅਤ੍ਥੋ. ਤੇਨਾਪਿ ਧਮ੍ਮੇਨਾਤਿ ਤੇਨਾਪਿ ਕਾਰਣੇਨ ਤੇਨ ਸਭਾਵੇਨ ਨ ਕੋਚਿ ਜਾਤਿਯਾ ਹੀਨੋ. ਨ ਹਿ ਤਦਾ ਖਤ੍ਤਿਯਾਦਿਭੇਦੋ ਅਤ੍ਥਿ, ਤਸ੍ਮਾ ਯਂ ਬ੍ਰਾਹ੍ਮਣਾ ਵਦਨ੍ਤਿ ‘‘ਬ੍ਰਾਹ੍ਮਣਾਵ ਜਾਤਿਯਾ ਸੇਟ੍ਠਾ, ਇਤਰੇ ਹੀਨਾ’’ਤਿ, ਤਂ ਮਿਚ੍ਛਾ. ਏਵਮ੍ਪੀਤਿ ਏਵਂ ਵਤ੍ਤਮਾਨੇ ਲੋਕੇ ਪੋਰਾਣਕਵਤ੍ਤਂ ਜਹਿਤ੍ਵਾ ਪਚ੍ਛਾ ਅਤ੍ਤਨਾ ਸਮ੍ਮਨ੍ਨਿਤ੍ਵਾ ਕਤਾਨਂ ਵਸੇਨ ਖਤ੍ਤਿਯਾਦਯੋ ਚਤ੍ਤਾਰੋ ਕੋਟ੍ਠਾਸਾ ਜਾਤਾ, ਏਵਮ੍ਪਿ ਵੋਸ੍ਸਗ੍ਗਵਿਭਙ੍ਗਮਾਹੁ, ਅਤ੍ਤਨਾ ਕਤੇਹਿ ਕਮ੍ਮਵੋਸ੍ਸਗ੍ਗੇਹਿ ਤੇਸਂ ਸਤ੍ਤਾਨਂ ਏਕਚ੍ਚੇ ਖਤ੍ਤਿਯਾ ਜਾਤਾ, ਏਕਚ੍ਚੇ ਬ੍ਰਾਹ੍ਮਣਾਦਯੋਤਿ ਇਮਂ ਵਿਭਾਗਂ ਕਥੇਨ੍ਤਿ, ਤਸ੍ਮਾ ‘‘ਬ੍ਰਾਹ੍ਮਣਾਵ ਸੇਟ੍ਠਾ’’ਤਿ ਵਚਨਂ ਮਿਚ੍ਛਾ.

ਸਤ੍ਤਧਾਤਿ ਯਦਿ ਮਹਾਬ੍ਰਹ੍ਮੁਨਾ ਬ੍ਰਾਹ੍ਮਣਾਨਞ੍ਞੇਵ ਤਯੋ ਵੇਦਾ ਦਿਨ੍ਨਾ, ਨ ਅਞ੍ਞੇਸਂ, ਚਣ੍ਡਾਲਸ੍ਸ ਮਨ੍ਤੇ ਭਾਸਨ੍ਤਸ੍ਸ ਮੁਦ੍ਧਾ ਸਤ੍ਤਧਾ ਫਲੇਯ੍ਯ, ਨ ¶ ਚ ਫਲਤਿ, ਤਸ੍ਮਾ ਇਮੇਹਿ ਬ੍ਰਾਹ੍ਮਣੇਹਿ ਅਤ੍ਤਵਧਾਯ ਮਨ੍ਤਾ ਕਤਾ, ਅਤ੍ਤਨੋਯੇਵ ਨੇਸਂ ਮੁਸਾਵਾਦਿਤਂ ਪਕਾਸੇਨ੍ਤਾ ਗੁਣਵਧਂ ਕਰੋਨ੍ਤਿ. ਵਾਚਾਕਤਾਤਿ ਏਤੇ ਮਨ੍ਤਾ ਨਾਮ ਮੁਸਾਵਾਦੇਨ ਚਿਨ੍ਤੇਤ੍ਵਾ ਕਤਾ. ਗਿਦ੍ਧਿਕਤਾ ਗਹੀਤਾਤਿ ਲਾਭਗਿਦ੍ਧਿਕਤਾਯ ਬ੍ਰਾਹ੍ਮਣੇਹਿ ਗਹਿਤਾ. ਦੁਮ੍ਮੋਚਯਾਤਿ ਮਚ੍ਛੇਨ ਗਿਲਿਤਬਲਿਸੋ ਵਿਯ ਦੁਮ੍ਮੋਚਯਾ. ਕਬ੍ਯਪਥਾਨੁਪਨ੍ਨਾਤਿ ਕਬ੍ਯਾਕਾਰਕਬ੍ਰਾਹ੍ਮਣਾਨਂ ਵਚਨਪਥਂ ਅਨੁਪਨ੍ਨਾ ਅਨੁਗਤਾ. ਤੇ ਹਿ ਯਥਾ ਇਚ੍ਛਨ੍ਤਿ, ਤਥਾ ਮੁਸਾ ਵਤ੍ਵਾ ਬਨ੍ਧਨ੍ਤਿ. ਬਾਲਾਨਨ੍ਤਿ ਤੇਸਞ੍ਹਿ ਬਾਲਾਨਂ ਚਿਤ੍ਤਂ ਵਿਸਮੇ ਨਿਵਿਟ੍ਠਂ, ਤਂ ਅਞ੍ਞੇ ਅਪ੍ਪਪਞ੍ਞਾਵ ਅਭਿਸਦ੍ਦਹਨ੍ਤਿ.

ਪੋਰਿਸਿਯਂਬਲੇਨਾਤਿ ਪੋਰਿਸਿਯਸਙ੍ਖਾਤੇਨ ਬਲੇਨ. ਇਦਂ ਵੁਤ੍ਤਂ ਹੋਤਿ – ਯਂ ਏਤੇਸਂ ਸੀਹਾਦੀਨਂ ਪੁਰਿਸਥਾਮਸਙ੍ਖਾਤਂ ਪੋਰਿਸਿਯਬਲਂ, ਤੇਨ ਬਲੇਨ ਸਮਨ੍ਨਾਗਤੋ ਬ੍ਰਾਹ੍ਮਣੋ ਨਾਮ ਨਤ੍ਥਿ, ਸਬ੍ਬੇ ਇਮੇਹਿ ਤਿਰਚ੍ਛਾਨੇਹਿਪਿ ਹੀਨਾਯੇਵਾਤਿ. ਮਨੁਸ੍ਸਭਾਵੋ ਚ ਗਵਂਵ ਪੇਕ੍ਖੋਤਿ ਅਪਿਚ ਯੋ ਏਤੇਸਂ ਮਨੁਸ੍ਸਭਾਵੋ, ਸੋ ਗੁਨ੍ਨਂ ਵਿਯ ਪੇਕ੍ਖਿਤਬ੍ਬੋ. ਕਿਂਕਾਰਣਾ? ਜਾਤਿ ਹਿ ਤੇਸਂ ਅਸਮਾ ਸਮਾਨਾ. ਤੇਸਞ੍ਹਿ ਬ੍ਰਾਹ੍ਮਣਾਨਂ ਦੁਪ੍ਪਞ੍ਞਤਾਯ ਗੋਹਿ ਸਦ੍ਧਿਂ ਸਮਾਨਜਾਤਿਯੇਵ ਅਸਮਾ. ਅਞ੍ਞਮੇਵ ਹਿ ਗੁਨ੍ਨਂ ਸਣ੍ਠਾਨਂ, ਅਞ੍ਞਂ ਤੇਸਨ੍ਤਿ. ਏਤੇਨ ਬ੍ਰਾਹ੍ਮਣੇ ਤਿਰਚ੍ਛਾਨੇਸੁ ਸੀਹਾਦੀਹਿ ਸਮੇਪਿ ਅਕਤ੍ਵਾ ਗੋਰੂਪਸਮੇਵ ਕਰੋਤਿ.

ਸਚੇ ਚ ਰਾਜਾਤਿ ਅਰਿਟ੍ਠ, ਯਦਿ ਮਹਾਬ੍ਰਹ੍ਮੁਨਾ ਦਿਨ੍ਨਭਾਵੇਨ ਖਤ੍ਤਿਯੋਵ ਪਥਵਿਂ ਵਿਜਿਤ੍ਵਾ. ਸਜੀਵਵਾਤਿ ਸਹਜੀਵੀਹਿ ਅਮਚ੍ਚੇਹਿ ਸਮਨ੍ਨਾਗਤੋ. ਅਸ੍ਸਵਪਾਰਿਸਜ੍ਜੋਤਿ ਅਤ੍ਤਨੋ ਓਵਾਦਕਰਪਰਿਸਾਵਚਰੋਵ ਸਿਯਾ, ਅਥਸ੍ਸ ਪਰਿਸਾਯ ਯੁਜ੍ਝਿਤ੍ਵਾ ¶ ਰਜ੍ਜਂ ਕਾਤਬ੍ਬਂ ਨਾਮ ਨ ਭਵੇਯ੍ਯ ¶ . ਸਯਮੇਵ ਸੋ ਏਕਕੋਵ ਸਤ੍ਤੁਸਙ੍ਘਂ ਵਿਜੇਯ੍ਯ, ਏਵਂ ਸਤਿ ਯੁਦ੍ਧੇ ਦੁਕ੍ਖਾਭਾਵੇਨ ਤਸ੍ਸ ਪਜਾ ਨਿਚ੍ਚਸੁਖੀ ਭਵੇਯ੍ਯ, ਏਤਞ੍ਚ ਨਤ੍ਥਿ. ਤਸ੍ਮਾ ਤੇਸਂ ਵਚਨਂ ਮਿਚ੍ਛਾ.

ਖਤ੍ਤਿਯਮਨ੍ਤਾਤਿ ਰਾਜਸਤ੍ਥਞ੍ਚ ਤਯੋ ਚ ਵੇਦਾ ਅਤ੍ਤਨੋ ਆਣਾਯ ਰੁਚਿਯਾ ‘‘ਇਦਮੇਵ ਕਤ੍ਤਬ੍ਬ’’ਨ੍ਤਿ ਪਵਤ੍ਤਤ੍ਤਾ ਅਤ੍ਥੇਨ ਏਤੇ ਸਮਕਾ ਭਵਨ੍ਤਿ. ਅਵਿਨਿਚ੍ਛਿਨਿਤ੍ਵਾਤਿ ਤੇਸਂ ਖਤ੍ਤਿਯਮਨ੍ਤਾਨਂ ਖਤ੍ਤਿਯੋਪਿ ਵੇਦਾਨਂ ਬ੍ਰਾਹ੍ਮਣੋਪਿ ਅਤ੍ਥਂ ਅਵਿਨਿਚ੍ਛਿਨਿਤ੍ਵਾ ਆਣਾਵਸੇਨੇਵ ਉਗ੍ਗਣ੍ਹਨ੍ਤੋ ਤਂ ਅਤ੍ਥਂ ਉਦਕੋਘੇਨ ਛਨ੍ਨਮਗ੍ਗਂ ਵਿਯ ਨ ਬੁਜ੍ਝਤਿ.

ਅਤ੍ਥੇਨ ¶ ਏਤੇਤਿ ਵਞ੍ਚਨਤ੍ਥੇਨ ਏਤੇ ਸਮਕਾ ਭਵਨ੍ਤਿ. ਕਿਂਕਾਰਣਾ? ਬ੍ਰਾਹ੍ਮਣਾਵ ਸੇਟ੍ਠਾ, ਅਞ੍ਞੇ ਵਣ੍ਣਾ ਹੀਨਾਤਿ ਵਦਨ੍ਤਿ. ਯੇ ਚ ਤੇ ਲਾਭਾਦਯੋ ਲੋਕਧਮ੍ਮਾ, ਸਬ੍ਬੇਵ ਤੇਸਂ ਚਤੁਨ੍ਨਮ੍ਪਿ ਵਣ੍ਣਾਨਂ ਧਮ੍ਮਾ. ਏਕਸਤ੍ਤੋਪਿ ਏਤੇਹਿ ਮੁਤ੍ਤਕੋ ਨਾਮ ਨਤ੍ਥਿ. ਇਤਿ ਬ੍ਰਾਹ੍ਮਣਾ ਲੋਕਧਮ੍ਮੇਹਿ ਅਪਰਿਮੁਤ੍ਤਾਵ ਸਮਾਨਾ ‘‘ਸੇਟ੍ਠਾ ਮਯ’’ਨ੍ਤਿ ਮੁਸਾ ਕਥੇਨ੍ਤਿ.

ਇਬ੍ਭਾਤਿ ਗਹਪਤਿਕਾ. ਤੇਵਿਜ੍ਜਸਙ੍ਘਾ ਚਾਤਿ ਬ੍ਰਾਹ੍ਮਣਾਪਿ ਤਥੇਵ ਪੁਥੂਨਿ ਕਸਿਗੋਰਕ੍ਖਾਦੀਨਿ ਕਮ੍ਮਾਨਿ ਕਰੋਨ੍ਤਿ. ਨਿਚ੍ਚੁਸ੍ਸੁਕਾਤਿ ਨਿਚ੍ਚਂ ਉਸ੍ਸੁਕ੍ਕਜਾਤਾ ਛਨ੍ਦਜਾਤਾ. ਤਦਪ੍ਪਪਞ੍ਞਾ ਦ੍ਵਿਰਸਞ੍ਞੁਰਾ ਤੇਤਿ ਤਸ੍ਮਾ ਭਾਤਿਕ, ਦ੍ਵਿਰਸਞ੍ਞੁ ਨਿਪ੍ਪਞ੍ਞਾ ਬ੍ਰਾਹ੍ਮਣਾ, ਆਰਾ ਤੇ ਧਮ੍ਮਤੋ. ਪੋਰਾਣਕਾ ਹਿ ਬ੍ਰਾਹ੍ਮਣਧਮ੍ਮਾ ਏਤਰਹਿ ਸੁਨਖੇਸੁ ਸਨ੍ਦਿਸ੍ਸਨ੍ਤੀਤਿ.

ਏਵਂ ਮਹਾਸਤ੍ਤੋ ਤਸ੍ਸ ਵਾਦਂ ਭਿਨ੍ਦਿਤ੍ਵਾ ਅਤ੍ਤਨੋ ਵਾਦਂ ਪਤਿਟ੍ਠਾਪੇਸਿ. ਤਸ੍ਸ ਧਮ੍ਮਕਥਂ ਸੁਤ੍ਵਾ ਸਬ੍ਬਾ ਨਾਗਪਰਿਸਾ ਸੋਮਨਸ੍ਸਜਾਤਾ ਅਹੇਸੁਂ. ਮਹਾਸਤ੍ਤੋ ਨੇਸਾਦਬ੍ਰਾਹ੍ਮਣਂ ਨਾਗਭਵਨਾ ਨੀਹਰਾਪੇਸਿ, ਪਰਿਭਾਸਮਤ੍ਤਮ੍ਪਿਸ੍ਸ ਨਾਕਾਸਿ. ਸਾਗਰਬ੍ਰਹ੍ਮਦਤ੍ਤੋਪਿ ਠਪਿਤਦਿਵਸਂ ਅਨਤਿਕ੍ਕਮਿਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਸਹ ਪਿਤੁ ਵਸਨਟ੍ਠਾਨਂ ਅਗਮਾਸਿ. ਮਹਾਸਤ੍ਤੋਪਿ ‘‘ਮਾਤੁਲਞ੍ਚ ਅਯ੍ਯਕਞ੍ਚ ਪਸ੍ਸਿਸ੍ਸਾਮੀ’’ਤਿ ਭੇਰਿਂ ਚਰਾਪੇਤ੍ਵਾ ਮਹਨ੍ਤੇਨ ਸਿਰਿਸੋਭਗ੍ਗੇਨ ਯਮੁਨਾਤੋ ਉਤ੍ਤਰਿਤ੍ਵਾ ਤਮੇਵ ਅਸ੍ਸਮਪਦਂ ਆਰਬ੍ਭ ਪਾਯਾਸਿ. ਅਵਸੇਸਾ ਭਾਤਰੋ ਚਸ੍ਸ ਮਾਤਾਪਿਤਰੋ ਚ ਪਚ੍ਛਤੋ ਪਾਯਿਂਸੁ. ਤਸ੍ਮਿਂ ਖਣੇ ਸਾਗਰਬ੍ਰਹ੍ਮਦਤ੍ਤੋ ਮਹਾਸਤ੍ਤਂ ਮਹਤਿਯਾ ਪਰਿਸਾਯ ਆਗਚ੍ਛਨ੍ਤਂ ਅਸਞ੍ਜਾਨਿਤ੍ਵਾ ਪਿਤਰਂ ਪੁਚ੍ਛਨ੍ਤੋ ਆਹ –

੯੬੭.

‘‘ਕਸ੍ਸ ਭੇਰੀ ਮੁਦਿਙ੍ਗਾ ਚ, ਸਙ੍ਖਾ ਪਣਵਦਿਨ੍ਦਿਮਾ;

ਪੁਰਤੋ ਪਟਿਪਨ੍ਨਾਨਿ, ਹਾਸਯਨ੍ਤਾ ਰਥੇਸਭਂ.

੯੬੮.

‘‘ਕਸ੍ਸ ¶ ਕਞ੍ਚਨਪਟ੍ਟੇਨ, ਪੁਥੁਨਾ ਵਿਜ੍ਜੁਵਣ੍ਣਿਨਾ;

ਯੁਵਾ ਕਲਾਪਸਨ੍ਨਦ੍ਧੋ, ਕੋ ਏਤਿ ਸਿਰਿਯਾ ਜਲਂ.

੯੬੯.

‘‘ਉਕ੍ਕਾਮੁਖਪਹਟ੍ਠਂਵ, ਖਦਿਰਙ੍ਗਾਰਸਨ੍ਨਿਭਂ;

ਮੁਖਞ੍ਚ ਰੁਚਿਰਾ ਭਾਤਿ, ਕੋ ਏਤਿ ਸਿਰਿਯਾ ਜਲਂ.

੯੭੦.

‘‘ਕਸ੍ਸ ¶ ਜਮ੍ਬੋਨਦਂ ਛਤ੍ਤਂ, ਸਸਲਾਕਂ ਮਨੋਰਮਂ;

ਆਦਿਚ੍ਚਰਂਸਾਵਰਣਂ, ਕੋ ਏਤਿ ਸਿਰਿਯਾ ਜਲਂ.

੯੭੧.

‘‘ਕਸ੍ਸ ¶ ਅਙ੍ਗਂ ਪਰਿਗ੍ਗਯ੍ਹ, ਵਾਲਬੀਜਨਿਮੁਤ੍ਤਮਂ;

ਉਭਤੋ ਵਰਪੁਞ੍ਞਸ੍ਸ, ਮੁਦ੍ਧਨਿ ਉਪਰੂਪਰਿ.

੯੭੨.

‘‘ਕਸ੍ਸ ਪੇਖੁਣਹਤ੍ਥਾਨਿ, ਚਿਤ੍ਰਾਨਿ ਚ ਮੁਦੂਨਿ ਚ;

ਕਞ੍ਚਨਮਣਿਦਣ੍ਡਾਨਿ, ਚਰਨ੍ਤਿ ਦੁਭਤੋ ਮੁਖਂ.

੯੭੩.

‘‘ਖਦਿਰਙ੍ਗਾਰਵਣ੍ਣਾਭਾ, ਉਕ੍ਕਾਮੁਖਪਹਂਸਿਤਾ;

ਕਸ੍ਸੇਤੇ ਕੁਣ੍ਡਲਾ ਵਗ੍ਗੂ, ਸੋਭਨ੍ਤਿ ਦੁਭਤੋ ਮੁਖਂ.

੯੭੪.

‘‘ਕਸ੍ਸ ਵਾਤੇਨ ਛੁਪਿਤਾ, ਨਿਦ੍ਧਨ੍ਤਾ ਮੁਦੁਕਾਲ਼ਕਾ;

ਸੋਭਯਨ੍ਤਿ ਨਲਾਟਨ੍ਤਂ, ਨਭਾ ਵਿਜ੍ਜੁਰਿਵੁਗ੍ਗਤਾ.

੯੭੫.

‘‘ਕਸ੍ਸ ਏਤਾਨਿ ਅਕ੍ਖੀਨਿ, ਆਯਤਾਨਿ ਪੁਥੂਨਿ ਚ;

ਕੋ ਸੋਭਤਿ ਵਿਸਾਲਕ੍ਖੋ, ਕਸ੍ਸੇਤਂ ਉਣ੍ਣਜਂ ਮੁਖਂ.

੯੭੬.

‘‘ਕਸ੍ਸੇਤੇ ਲਪਨਜਾਤਾ, ਸੁਦ੍ਧਾ ਸਙ੍ਖਵਰੂਪਮਾ;

ਭਾਸਮਾਨਸ੍ਸ ਸੋਭਨ੍ਤਿ, ਦਨ੍ਤਾ ਕੁਪ੍ਪਿਲਸਾਦਿਸਾ.

੯੭੭.

‘‘ਕਸ੍ਸ ਲਾਖਾਰਸਸਮਾ, ਹਤ੍ਥਪਾਦਾ ਸੁਖੇਧਿਤਾ;

ਕੋ ਸੋ ਬਿਮ੍ਬੋਟ੍ਠਸਮ੍ਪਨ੍ਨੋ, ਦਿਵਾ ਸੂਰਿਯੋਵ ਭਾਸਤਿ.

੯੭੮.

‘‘ਹਿਮਚ੍ਚਯੇ ¶ ਹਿਮਵਤਿ, ਮਹਾਸਾਲੋਵ ਪੁਪ੍ਫਿਤੋ;

ਕੋ ਸੋ ਓਦਾਤਪਾਵਾਰੋ, ਜਯਂ ਇਨ੍ਦੋਵ ਸੋਭਤਿ.

੯੭੯.

‘‘ਸੁਵਣ੍ਣਪੀਲ਼ਕਾਕਿਣ੍ਣਂ, ਮਣਿਦਣ੍ਡਵਿਚਿਤ੍ਤਕਂ;

ਕੋ ਸੋ ਪਰਿਸਮੋਗਯ੍ਹ, ਈਸਂ ਖਗ੍ਗਂ ਪਮੁਞ੍ਚਤਿ.

੯੮੦.

‘‘ਸੁਵਣ੍ਣਵਿਕਤਾ ਚਿਤ੍ਤਾ, ਸੁਕਤਾ ਚਿਤ੍ਤਸਿਬ੍ਬਨਾ;

ਕੋ ਸੋ ਓਮੁਞ੍ਚਤੇ ਪਾਦਾ, ਨਮੋ ਕਤ੍ਵਾ ਮਹੇਸਿਨੋ’’ਤਿ.

ਤਤ੍ਥ ਪਟਿਪਨ੍ਨਾਨੀਤਿ ਕਸ੍ਸੇਤਾਨਿ ਤੂਰਿਯਾਨਿ ਪੁਰਤੋ ਪਟਿਪਨ੍ਨਾਨਿ. ਹਾਸਯਨ੍ਤਾਤਿ ਏਤਂ ਰਾਜਾਨਂ ਹਾਸਯਨ੍ਤਾ. ਕਸ੍ਸ ਕਞ੍ਚਨਪਟ੍ਟੇਨਾਤਿ ਕਸ੍ਸ ਨਲਾਟਨ੍ਤੇ ਬਨ੍ਧੇਨ ਉਣ੍ਹੀਸਪਟ੍ਟੇਨ ਵਿਜ੍ਜੁਯਾ ਮੇਘਮੁਖਂ ਵਿਯ ਮੁਖਂ ਪਜ੍ਜੋਤਤੀਤਿ ਪੁਚ੍ਛਤਿ. ਯੁਵਾ ਕਲਾਪਸਨ੍ਨਦ੍ਧੋਤਿ ਤਰੁਣੋ ਸਨ੍ਨਦ੍ਧਕਲਾਪੋ. ਉਕ੍ਕਾਮੁਖਪਹਟ੍ਠਂਵਾਤਿ ਕਮ੍ਮਾਰੁਦ੍ਧਨੇ ਪਹਟ੍ਠਸੁਵਣ੍ਣਂ ਵਿਯ. ਖਦਿਰਙ੍ਗਾਰਸਨ੍ਨਿਭਨ੍ਤਿ ਆਦਿਤ੍ਤਖਦਿਰਙ੍ਗਾਰਸਨ੍ਨਿਭਂ. ਜਮ੍ਬੋਨਦਨ੍ਤਿ ਰਤ੍ਤਸੁਵਣ੍ਣਮਯਂ. ਅਙ੍ਗਂ ਪਰਿਗ੍ਗਯ੍ਹਾਤਿ ਚਾਮਰਿਗਾਹਕੇਨ ¶ ਅਙ੍ਗੇਨ ਪਰਿਗ੍ਗਹਿਤਾ ਹੁਤ੍ਵਾ. ਵਾਲਬੀਜਨਿਮੁਤ੍ਤਮਨ੍ਤਿ ਉਤ੍ਤਮਂ ਵਾਲਬੀਜਨਿਂ. ਪੇਖੁਣਹਤ੍ਥਾਨੀਤਿ ਮੋਰਪਿਞ੍ਛਹਤ੍ਥਕਾਨਿ. ਚਿਤ੍ਰਾਨੀਤਿ ਸਤ੍ਤਰਤਨਚਿਤ੍ਰਾਨਿ. ਕਞ੍ਚਨਮਣਿਦਣ੍ਡਾਨੀਤਿ ਤਪਨੀਯਸੁਵਣ੍ਣੇਨ ਚ ਮਣੀਹਿ ¶ ਚ ਖਣਿਤਦਣ੍ਡਾਨਿ. ਦੁਭਤੋ ਮੁਖਨ੍ਤਿ ਮੁਖਸ੍ਸ ਉਭਯਪਸ੍ਸੇਸੁ ਚਰਨ੍ਤਿ.

ਵਾਤੇਨ ਛੁਪਿਤਾਤਿ ਵਾਤਪਹਟਾ. ਨਿਦ੍ਧਨ੍ਤਾਤਿ ਸਿਨਿਦ੍ਧਅਨ੍ਤਾ. ਨਲਾਟਨ੍ਤਨ੍ਤਿ ਕਸ੍ਸੇਤੇ ਏਵਰੂਪਾ ਕੇਸਾ ਨਲਾਟਨ੍ਤਂ ਉਪਸੋਭੇਨ੍ਤਿ. ਨਭਾ ਵਿਜ੍ਜੁਰਿਵੁਗ੍ਗਤਾਤਿ ਨਭਤੋ ਉਗ੍ਗਤਾ ਵਿਜ੍ਜੁ ਵਿਯ. ਉਣ੍ਣਜਨ੍ਤਿ ਕਞ੍ਚਨਾਦਾਸੋ ਵਿਯ ਪਰਿਪੁਣ੍ਣਂ. ਲਪਨਜਾਤਾਤਿ ਮੁਖਜਾਤਾ. ਕੁਪ੍ਪਿਲਸਾਦਿਸਾਤਿ ਮਨ੍ਦਾਲਕਮਕੁਲਸਦਿਸਾ. ਸੁਖੇਧਿਤਾਤਿ ਸੁਖਪਰਿਹਟਾ. ਜਯਂ ਇਨ੍ਦੋਵਾਤਿ ਜਯਂ ਪਤ੍ਤੋ ਇਨ੍ਦੋ ਵਿਯ. ਸੁਵਣ੍ਣਪੀਲ਼ਕਾਕਿਣ੍ਣਨ੍ਤਿ ਸੁਵਣ੍ਣਪੀਲ਼ਕਾਹਿ ਆਕਿਣ੍ਣਂ. ਮਣਿਦਣ੍ਡਵਿਚਿਤ੍ਤਕਨ੍ਤਿ ਮਣੀਹਿ ਥਰੁਮ੍ਹਿ ਵਿਚਿਤ੍ਤਕਂ. ਸੁਵਣ੍ਣਵਿਕਤਾਤਿ ਸੁਵਣ੍ਣਖਚਿਤਾ. ਚਿਤ੍ਤਾਤਿ ਸਤ੍ਤਰਤਨਵਿਚਿਤ੍ਤਾ. ਸੁਕਤਾਤਿ ਸੁਟ੍ਠੁ ਨਿਟ੍ਠਿਤਾ. ਚਿਤ੍ਤਸਿਬ੍ਬਨਾਤਿ ਚਿਤ੍ਰਸਿਬ੍ਬਿਨਿਯੋ. ਕੋ ਸੋ ਓਮੁਞ੍ਚਤੇ ਪਾਦਾਤਿ ਕੋ ਏਸ ਪਾਦਤੋ ਏਵਰੂਪਾ ਪਾਦੁਕਾ ਓਮੁਞ੍ਚਤੀਤਿ.

ਏਵਂ ਪੁਤ੍ਤੇਨ ਸਾਗਰਬ੍ਰਹ੍ਮਦਤ੍ਤੇਨ ਪੁਟ੍ਠੋ ਇਦ੍ਧਿਮਾ ਅਭਿਞ੍ਞਾਲਾਭੀ ਤਾਪਸੋ ‘‘ਤਾਤ, ਏਤੇ ਧਤਰਟ੍ਠਰਞ੍ਞੋ ਪੁਤ੍ਤਾ ਤਵ ਭਾਗਿਨੇਯ੍ਯਨਾਗਾ’’ਤਿ ਆਚਿਕ੍ਖਨ੍ਤੋ ਗਾਥਮਾਹ –

੯੮੧.

‘‘ਧਤਰਟ੍ਠਾ ¶ ਹਿ ਤੇ ਨਾਗਾ, ਇਦ੍ਧਿਮਨ੍ਤੋ ਯਸਸ੍ਸਿਨੋ;

ਸਮੁਦ੍ਦਜਾਯ ਉਪ੍ਪਨ੍ਨਾ, ਨਾਗਾ ਏਤੇ ਮਹਿਦ੍ਧਿਕਾ’’ਤਿ.

ਏਵਂ ਤੇਸਂ ਕਥੇਨ੍ਤਾਨਞ੍ਞੇਵ ਨਾਗਪਰਿਸਾ ਪਤ੍ਵਾ ਤਾਪਸਸ੍ਸ ਪਾਦੇ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਸਮੁਦ੍ਦਜਾਪਿ ਪਿਤਰਂ ਵਨ੍ਦਿਤ੍ਵਾ ਰੋਦਿਤ੍ਵਾ ਨਾਗਪਰਿਸਾਯ ਸਦ੍ਧਿਂ ਨਾਗਭਵਨਮੇਵ ਗਤਾ. ਸਾਗਰਬ੍ਰਹ੍ਮਦਤ੍ਤੋਪਿ ਤਤ੍ਥੇਵ ਕਤਿਪਾਹਂ ਵਸਿਤ੍ਵਾ ਬਾਰਾਣਸਿਮੇਵ ਗਤੋ. ਸਮੁਦ੍ਦਜਾ ਨਾਗਭਵਨੇਯੇਵ ਕਾਲਮਕਾਸਿ. ਬੋਧਿਸਤ੍ਤੋ ਯਾਵਜੀਵਂ ਸੀਲਂ ਰਕ੍ਖਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਆਯੁਪਰਿਯੋਸਾਨੇ ਸਦ੍ਧਿਂ ਪਰਿਸਾਯ ਸਗ੍ਗਪੁਰਂ ਪੂਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਉਪਾਸਕਾ ਪੋਰਾਣਕਪਣ੍ਡਿਤਾ ਅਨੁਪ੍ਪਨ੍ਨੇਪਿ ਬੁਦ੍ਧੇ ਏਵਰੂਪਂ ਨਾਮ ਸਮ੍ਪਤ੍ਤਿਂ ਪਹਾਯ ਉਪੋਸਥਕਮ੍ਮਂ ਕਰਿਂਸੁਯੇਵਾ’’ਤਿ ¶ ਵਤ੍ਵਾ ਜਾਤਕਂ ਸਮੋਧਾਨੇਸਿ. ਦੇਸਨਾਪਰਿਯੋਸਾਨੇ ਉਪਾਸਕਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ. ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ, ਨੇਸਾਦਬ੍ਰਾਹ੍ਮਣੋ ਦੇਵਦਤ੍ਤੋ, ਸੋਮਦਤ੍ਤੋ ਆਨਨ੍ਦੋ, ਅਜਮੁਖੀ ਉਪ੍ਪਲਵਣ੍ਣਾ, ਸੁਦਸ੍ਸਨੋ ਸਾਰਿਪੁਤ੍ਤੋ, ਸੁਭੋਗੋ ਮੋਗ੍ਗਲ੍ਲਾਨੋ, ਕਾਣਾਰਿਟ੍ਠੋ ਸੁਨਕ੍ਖਤ੍ਤੋ, ਭੂਰਿਦਤ੍ਤੋ ਪਨ ਅਹਮੇਵ ਸਮ੍ਮਾਸਮ੍ਬੁਦ੍ਧੋ ਅਹੋਸਿਨ੍ਤਿ.

ਭੂਰਿਦਤ੍ਤਜਾਤਕਵਣ੍ਣਨਾ ਛਟ੍ਠਾਨਿਟ੍ਠਿਤਾ.

[੫੪੪] ੭. ਚਨ੍ਦਕੁਮਾਰਜਾਤਕਵਣ੍ਣਨਾ

ਰਾਜਾਸਿ ¶ ¶ ਲੁਦ੍ਦਕਮ੍ਮੋਤਿ ਇਦਂ ਸਤ੍ਥਾ ਗਿਜ੍ਝਕੂਟੇ ਵਿਹਰਨ੍ਤੋ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਤਸ੍ਸ ਵਤ੍ਥੁ ਸਙ੍ਘਭੇਦਕਕ੍ਖਨ੍ਧਕੇ ਆਗਤਮੇਵ. ਤਂ ਤਸ੍ਸ ਪਬ੍ਬਜਿਤਕਾਲਤੋ ਪਟ੍ਠਾਯ ਯਾਵ ਬਿਮ੍ਬਿਸਾਰਰਞ੍ਞੋ ਮਰਣਾ ਤਤ੍ਥਾਗਤਨਯੇਨੇਵ ਵੇਦਿਤਬ੍ਬਂ. ਤਂ ਪਨ ਮਾਰਾਪੇਤ੍ਵਾ ਦੇਵਦਤ੍ਤੋ ਅਜਾਤਸਤ੍ਤੁਂ ਉਪਸਙ੍ਕਮਿਤ੍ਵਾ ‘‘ਮਹਾਰਾਜ, ਤਵ ਮਨੋਰਥੋ ਮਤ੍ਥਕਂ ਪਤ੍ਤੋ, ਮਮ ਮਨੋਰਥੋ ਤਾਵ ਨ ਪਾਪੁਣਾਤੀ’’ਤਿ ਆਹ. ‘‘ਕੋ ਪਨ ਤੇ, ਭਨ੍ਤੇ, ਮਨੋਰਥੋ’’ਤਿ? ‘‘ਨਨੁ ਦਸਬਲਂ ਮਾਰੇਤ੍ਵਾ ਬੁਦ੍ਧੋ ਭਵਿਸ੍ਸਾਮੀ’’ਤਿ. ‘‘ਅਮ੍ਹੇਹੇਤ੍ਥ ਕਿਂ ਕਾਤਬ੍ਬ’’ਨ੍ਤਿ? ‘‘ਮਹਾਰਾਜ, ਧਨੁਗ੍ਗਹੇ ਸਨ੍ਨਿਪਾਤਾਪੇਤੁਂ ਵਟ੍ਟਤੀ’’ਤਿ. ‘‘ਸਾਧੁ, ਭਨ੍ਤੇ’’ਤਿ ਰਾਜਾ ਅਕ੍ਖਣਵੇਧੀਨਂ ਧਨੁਗ੍ਗਹਾਨਂ ਪਞ੍ਚਸਤਾਨਿ ਸਨ੍ਨਿਪਾਤਾਪੇਤ੍ਵਾ ਤਤੋ ਏਕਤਿਂਸ ਜਨੇ ਉਚ੍ਚਿਨਿਤ੍ਵਾ ਥੇਰਸ੍ਸ ਸਨ੍ਤਿਕਂ ਪਾਹੇਸਿ. ਸੋ ਤੇਸਂ ਜੇਟ੍ਠਕਂ ਆਮਨ੍ਤੇਤ੍ਵਾ ‘‘ਆਵੁਸੋ ਸਮਣੋ ਗੋਤਮੋ ਗਿਜ੍ਝਕੂਟੇ ਵਿਹਰਤਿ, ਅਸੁਕਸ੍ਮਿਂ ਨਾਮ ਦਿਵਾਟ੍ਠਾਨੇ ਚਙ੍ਕਮਤਿ. ਤ੍ਵਂ ਤਤ੍ਥ ਗਨ੍ਤ੍ਵਾ ਤਂ ਵਿਸਪੀਤੇਨ ਸਲ੍ਲੇਨ ਵਿਜ੍ਝਿਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਅਸੁਕੇਨ ਨਾਮ ਮਗ੍ਗੇਨ ਏਹੀ’’ਤਿ ਵਤ੍ਵਾ ਪੇਸੇਤ੍ਵਾ ਤਸ੍ਮਿਂ ਮਗ੍ਗੇ ਦ੍ਵੇ ਧਨੁਗ੍ਗਹੇ ਠਪੇਸਿ ‘‘ਤੁਮ੍ਹਾਕਂ ਠਿਤਮਗ੍ਗੇਨ ਏਕੋ ਪੁਰਿਸੋ ਆਗਮਿਸ੍ਸਤਿ, ਤਂ ਤੁਮ੍ਹੇ ਜੀਵਿਤਾ ਵੋਰੋਪੇਤ੍ਵਾ ਅਸੁਕੇਨ ਨਾਮ ਮਗ੍ਗੇਨ ਏਥਾ’’ਤਿ, ਤਸ੍ਮਿਂ ਮਗ੍ਗੇ ਚਤ੍ਤਾਰੋ ਪੁਰਿਸੇ ਠਪੇਸਿ ‘‘ਤੁਮ੍ਹਾਕਂ ਠਿਤਮਗ੍ਗੇਨ ਦ੍ਵੇ ਪੁਰਿਸਾ ਆਗਮਿਸ੍ਸਨ੍ਤਿ, ਤੁਮ੍ਹੇ ਤੇ ਜੀਵਿਤਾ ਵੋਰੋਪੇਤ੍ਵਾ ਅਸੁਕੇਨ ਨਾਮ ਮਗ੍ਗੇਨ ਏਥਾ’’ਤਿ, ਤਸ੍ਮਿਂ ਮਗ੍ਗੇ ਅਟ੍ਠ ਜਨੇ ਠਪੇਸਿ ‘‘ਤੁਮ੍ਹਾਕਂ ਠਿਤਮਗ੍ਗੇਨ ਚਤ੍ਤਾਰੋ ਪੁਰਿਸੋ ਆਗਮਿਸ੍ਸਨ੍ਤਿ, ਤੁਮ੍ਹੇ ਤੇ ਜੀਵਿਤਾ ਵੋਰੋਪੇਤ੍ਵਾ ਅਸੁਕੇਨ ਨਾਮ ਮਗ੍ਗੇਨ ਏਥਾ’’ਤਿ, ਤਸ੍ਮਿਂ ਮਗ੍ਗੇ ਸੋਲ਼ਸ ਪੁਰਿਸੇ ਠਪੇਸਿ ‘‘ਤੁਮ੍ਹਾਕਂ ਠਿਤਮਗ੍ਗੇਨ ਅਟ੍ਠ ਪੁਰਿਸਾ ਆਗਮਿਸ੍ਸਨ੍ਤਿ, ਤੁਮ੍ਹੇ ਤੇ ਜੀਵਿਤਾ ਵੋਰੋਪੇਤ੍ਵਾ ਅਸੁਕੇਨ ਨਾਮ ਮਗ੍ਗੇਨ ਏਥਾ’’ਤਿ.

ਕਸ੍ਮਾ ਪਨੇਸ ਏਵਮਕਾਸੀਤਿ? ਅਤ੍ਤਨੋ ਕਮ੍ਮਸ੍ਸ ਪਟਿਚ੍ਛਾਦਨਤ੍ਥਂ. ਅਥ ਸੋ ਜੇਟ੍ਠਕਧਨੁਗ੍ਗਹੋ ਵਾਮਤੋ ਖਗ੍ਗਂ ਲਗ੍ਗੇਤ੍ਵਾ ਪਿਟ੍ਠਿਯਾ ਤੁਣੀਰਂ ਬਨ੍ਧਿਤ੍ਵਾ ਮੇਣ੍ਡਸਿਙ੍ਗਮਹਾਧਨੁਂ ਗਹੇਤ੍ਵਾ ਤਥਾਗਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਵਿਜ੍ਝਿਸ੍ਸਾਮਿ ਨ’’ਨ੍ਤਿ ਸਞ੍ਞਾਯ ਧਨੁਂ ਆਰੋਪੇਤ੍ਵਾ ਸਰਂ ਸਨ੍ਨਯ੍ਹਿਤ੍ਵਾ ¶ ਆਕਡ੍ਢਿਤ੍ਵਾ ਵਿਸ੍ਸਜ੍ਜੇਤੁਂ ਨਾਸਕ੍ਖਿ. ਸੋ ਸਰਂ ਓਰੋਪੇਤੁਮ੍ਪਿ ਅਸਕ੍ਕੋਨ੍ਤੋ ਫਾਸੁਕਾ ਭਿਜ੍ਜਨ੍ਤਿਯੋ ਵਿਯ ਮੁਖਤੋ ਖੇਲ਼ੇਨ ਪਗ੍ਘਰਨ੍ਤੇਨ ਕਿਲਨ੍ਤਰੂਪੋ ਅਹੋਸਿ, ਸਕਲਸਰੀਰਂ ਥਦ੍ਧਂ ਜਾਤਂ, ਯਨ੍ਤੇਨ ਪੀਲ਼ਿਤਾਕਾਰਪ੍ਪਤ੍ਤਂ ਵਿਯ ਅਹੋਸਿ. ਸੋ ਮਰਣਭਯਤਜ੍ਜਿਤੋ ਅਟ੍ਠਾਸਿ. ਅਥ ਨਂ ਸਤ੍ਥਾ ਦਿਸ੍ਵਾ ¶ ਮਧੁਰਸ੍ਸਰਂ ਨਿਚ੍ਛਾਰੇਤ੍ਵਾ ਏਤਦਵੋਚ ‘‘ਮਾ ਭਾਯਿ ਭੋ, ਪੁਰਿਸ, ਇਤੋ ਏਹੀ’’ਤਿ. ਸੋ ਤਸ੍ਮਿਂ ਖਣੇ ਆਵੁਧਾਨਿ ਛਡ੍ਡੇਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ‘‘ਅਚ੍ਚਯੋ ਮਂ, ਭਨ੍ਤੇ, ਅਚ੍ਚਗਮਾ ਯਥਾਬਾਲਂ ਯਥਾਮੂਲ਼੍ਹਂ ਯਥਾਅਕੁਸਲਂ, ਸ੍ਵਾਹਂ ਤੁਮ੍ਹਾਕਂ ਗੁਣੇ ਅਜਾਨਨ੍ਤੋ ਅਨ੍ਧਬਾਲਸ੍ਸ ਦੇਵਦਤ੍ਤਸ੍ਸ ਵਚਨੇਨ ਤੁਮ੍ਹੇ ਜੀਵਿਤਾ ਵੋਰੋਪੇਤੁਂ ਆਗਤੋਮ੍ਹਿ, ਖਮਥ ਮੇ, ਭਨ੍ਤੇ’’ਤਿ ਖਮਾਪੇਤ੍ਵਾ ਏਕਮਨ੍ਤੇ ਨਿਸੀਦਿ. ਅਥ ਨਂ ਸਤ੍ਥਾ ਧਮ੍ਮਂ ਦੇਸੇਨ੍ਤੋ ਸਚ੍ਚਾਨਿ ਪਕਾਸੇਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ‘‘ਆਵੁਸੋ, ਦੇਵਦਤ੍ਤੇਨ ਆਚਿਕ੍ਖਿਤਮਗ੍ਗਂ ਅਪ੍ਪਟਿਪਜ੍ਜਿਤ੍ਵਾ ਅਞ੍ਞੇਨ ਮਗ੍ਗੇਨ ਯਾਹੀ’’ਤਿ ਉਯ੍ਯੋਜੇਸਿ. ਉਯ੍ਯੋਜੇਤ੍ਵਾ ਚ ਪਨ ਚਙ੍ਕਮਾ ਓਰੁਯ੍ਹ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ.

ਅਥ ਤਸ੍ਮਿਂ ਧਨੁਗ੍ਗਹੇ ਅਨਾਗਚ੍ਛਨ੍ਤੇ ਇਤਰੇ ਦ੍ਵੇ ਜਨਾ ‘‘ਕਿਂ ਨੁ ਖੋ ਸੋ ਚਿਰਾਯਤੀ’’ਤਿ ਪਟਿਮਗ੍ਗੇਨ ਗਚ੍ਛਨ੍ਤਾ ਦਸਬਲਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਸਤ੍ਥਾ ਤੇਸਮ੍ਪਿ ਧਮ੍ਮਂ ਦੇਸੇਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ‘‘ਆਵੁਸੋ, ਦੇਵਦਤ੍ਤੇਨ ਕਥਿਤਮਗ੍ਗਂ ਅਪ੍ਪਟਿਪਜ੍ਜਿਤ੍ਵਾ ਇਮਿਨਾ ਮਗ੍ਗੇਨ ਗਚ੍ਛਥਾ’’ਤਿ ਉਯ੍ਯੋਜੇਸਿ. ਇਮਿਨਾ ਉਪਾਯੇਨ ਇਤਰੇਸੁਪਿ ਆਗਨ੍ਤ੍ਵਾ ਨਿਸਿਨ੍ਨੇਸੁ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ਅਞ੍ਞੇਨ ਮਗ੍ਗੇਨ ਉਯ੍ਯੋਜੇਸਿ. ਅਥ ਸੋ ਪਠਮਮਾਗਤੋ ਜੇਟ੍ਠਕਧਨੁਗ੍ਗਹੋ ਦੇਵਦਤ੍ਤਂ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਦੇਵਦਤ੍ਤ ਅਹਂ ਸਮ੍ਮਾਸਮ੍ਬੁਦ੍ਧਂ ਜੀਵਿਤਾ ਵੋਰੋਪੇਤੁਂ ਨਾਸਕ੍ਖਿਂ, ਮਹਿਦ੍ਧਿਕੋ ਸੋ ਭਗਵਾ ਮਹਾਨੁਭਾਵੋ’’ਤਿ ਆਰੋਚੇਸਿ. ਤੇ ਸਬ੍ਬੇਪਿ ‘‘ਸਮ੍ਮਾਸਮ੍ਬੁਦ੍ਧਂ ਨਿਸ੍ਸਾਯ ਅਮ੍ਹੇਹਿ ਜੀਵਿਤਂ ਲਦ੍ਧ’’ਨ੍ਤਿ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਅਯਂ ਪਵਤ੍ਤਿ ਭਿਕ੍ਖੁਸਙ੍ਘੇ ਪਾਕਟਾ ਅਹੋਸਿ. ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ ਦੇਵਦਤ੍ਤੋ ਕਿਰ ਏਕਸ੍ਮਿਂ ਤਥਾਗਤੇ ਵੇਰਚਿਤ੍ਤੇਨ ਬਹੂ ਜਨੇ ਜੀਵਿਤਾ ਵੋਰੋਪੇਤੁਂ ਵਾਯਾਮਮਕਾਸਿ, ਤੇ ਸਬ੍ਬੇਪਿ ਸਤ੍ਥਾਰਂ ਨਿਸ੍ਸਾਯ ਜੀਵਿਤਂ ਲਭਿਂਸੂ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ¶ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਮਂ ਏਕਕਂ ਨਿਸ੍ਸਾਯ ਮਯਿ ਵੇਰਚਿਤ੍ਤੇਨ ਬਹੂ ਜਨੇ ਜੀਵਿਤਾ ਵੋਰੋਪੇਤੁਂ ਵਾਯਾਮਂ ਅਕਾਸਿਯੇਵਾ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਅਯਂ ਬਾਰਾਣਸੀ ਪੁਪ੍ਫਵਤੀ ਨਾਮ ਅਹੋਸਿ. ਤਤ੍ਥ ਵਸਵਤ੍ਤਿਰਞ੍ਞੋ ਪੁਤ੍ਤੋ ਏਕਰਾਜਾ ਨਾਮ ਰਜ੍ਜਂ ਕਾਰੇਸਿ, ਤਸ੍ਸ ਪੁਤ੍ਤੋ ਚਨ੍ਦਕੁਮਾਰੋ ਨਾਮ ਓਪਰਜ੍ਜਂ ਕਾਰੇਸਿ. ਖਣ੍ਡਹਾਲੋ ਨਾਮ ਬ੍ਰਾਹ੍ਮਣੋ ਪੁਰੋਹਿਤੋ ਅਹੋਸਿ. ਸੋ ਰਞ੍ਞੋ ਅਤ੍ਥਞ੍ਚ ਧਮ੍ਮਞ੍ਚ ਅਨੁਸਾਸਿ. ਤਂ ਕਿਰ ਰਾਜਾ ‘‘ਪਣ੍ਡਿਤੋ’’ਤਿ ਵਿਨਿਚ੍ਛਯੇ ਨਿਸੀਦਾਪੇਸਿ. ਸੋ ਲਞ੍ਜਵਿਤ੍ਤਕੋ ਹੁਤ੍ਵਾ ਲਞ੍ਜਂ ਗਹੇਤ੍ਵਾ ਅਸਾਮਿਕੇ ਸਾਮਿਕੇ ਕਰੋਤਿ, ਸਾਮਿਕੇ ਚ ਅਸਾਮਿਕੇ. ਅਥੇਕਦਿਵਸਂ ਏਕੋ ਅਡ੍ਡਪਰਾਜਿਤੋ ਪੁਰਿਸੋ ਵਿਨਿਚ੍ਛਯਟ੍ਠਾਨਾ ਉਪਕ੍ਕੋਸੇਨ੍ਤੋ ਨਿਕ੍ਖਮਿਤ੍ਵਾ ਰਾਜੁਪਟ੍ਠਾਨਂ ਆਗਚ੍ਛਨ੍ਤਂ ਚਨ੍ਦਕੁਮਾਰਂ ਦਿਸ੍ਵਾ ਧਾਵਿਤ੍ਵਾ ਤਸ੍ਸ ਪਾਦੇਸੁ ਨਿਪਤਿਤ੍ਵਾ ਰੋਦਿ. ਸੋ ‘‘ਕਿਂ, ਭੋ ਪੁਰਿਸ, ਰੋਦਸੀ’’ਤਿ ਆਹ. ‘‘ਸਾਮਿ, ਖਣ੍ਡਹਾਲੋ ¶ ਵਿਨਿਚ੍ਛਯੇ ਵਿਲੋਪਂ ਖਾਦਤਿ, ਅਹਂ ਤੇਨ ਲਞ੍ਜਂ ਗਹੇਤ੍ਵਾ ਪਰਾਜਯਂ ਪਾਪਿਤੋ’’ਤਿ. ਚਨ੍ਦਕੁਮਾਰੋ ‘‘ਮਾ ਭਾਯੀ’’ਤਿ ਤਂ ਅਸ੍ਸਾਸੇਤ੍ਵਾ ਵਿਨਿਚ੍ਛਯਂ ਨੇਤ੍ਵਾ ਸਾਮਿਕਮੇਵ ਸਾਮਿਕਂ, ਅਸਾਮਿਕਮੇਵ ਅਸਾਮਿਕਂ ਅਕਾਸਿ. ਮਹਾਜਨੋ ਮਹਾਸਦ੍ਦੇਨ ਸਾਧੁਕਾਰਮਦਾਸਿ. ਰਾਜਾ ਤਂ ਸੁਤ੍ਵਾ ‘‘ਕਿਂਸਦ੍ਦੋ ਏਸੋ’’ਤਿ ਪੁਚ੍ਛਿ. ‘‘ਚਨ੍ਦਕੁਮਾਰੇਨ ਕਿਰ ਅਡ੍ਡੋ ਸੁਵਿਨਿਚ੍ਛਿਤੋ, ਤਤ੍ਥੇਸੋ ਸਾਧੁਕਾਰਸਦ੍ਦੋ’’ਤਿ. ਤਂ ਸੁਤ੍ਵਾ ਰਾਜਾ ਤੁਸ੍ਸਿ. ਕੁਮਾਰੋ ਆਗਨ੍ਤ੍ਵਾ ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਥ ਨਂ ਰਾਜਾ ‘‘ਤਾਤ, ਏਕੋ ਕਿਰ ਤੇ ਅਡ੍ਡੋ ਵਿਨਿਚ੍ਛਿਤੋ’’ਤਿ ਆਹ. ‘‘ਆਮ, ਦੇਵਾ’’ਤਿ. ‘‘ਤੇਨ ਹਿ, ਤਾਤ, ਇਤੋ ਪਟ੍ਠਾਯ ਤ੍ਵਮੇਵ ਵਿਨਿਚ੍ਛਯਂ ਪਟ੍ਠਪੇਹੀ’’ਤਿ ਵਿਨਿਚ੍ਛਯਂ ਕੁਮਾਰਸ੍ਸ ਅਦਾਸਿ.

ਤਤੋ ਪਟ੍ਠਾਯ ਖਣ੍ਡਹਾਲਸ੍ਸ ਆਯੋ ਪਚ੍ਛਿਜ੍ਜਿ. ਸੋ ਤਤੋ ਪਟ੍ਠਾਯ ਕੁਮਾਰੇ ਆਘਾਤਂ ਬਨ੍ਧਿਤ੍ਵਾ ਓਕਾਸਂ ਗਵੇਸਨ੍ਤੋ ਅਨ੍ਤਰਾਪੇਕ੍ਖੋ ਵਿਚਰਿ. ਸੋ ਪਨ ਰਾਜਾ ਮਨ੍ਦਪਞ੍ਞੋ. ਸੋ ਏਕਦਿਵਸਂ ਰਤ੍ਤਿਭਾਗੇ ਸੁਪਿਤ੍ਵਾ ਪਚ੍ਚੂਸਸਮਯੇ ਸੁਪਿਨਨ੍ਤੇ ਅਲਙ੍ਕਤਦ੍ਵਾਰਕੋਟ੍ਠਕਂ, ਸਤ੍ਤਰਤਨਮਯਪਾਕਾਰਂ, ਸਟ੍ਠਿਯੋਜਨਿਕਸੁਵਣ੍ਣਮਯਵਾਲੁਕਮਹਾਵੀਥਿਂ, ਯੋਜਨਸਹਸ੍ਸੁਬ੍ਬੇਧਵੇਜਯਨ੍ਤਪਾਸਾਦਪਟਿਮਣ੍ਡਿਤਂ ਨਨ੍ਦਨਵਨਾਦਿਵਨਰਾਮਣੇਯ੍ਯਕਨਨ੍ਦਾਪੋਕ੍ਖਰਣਿਆਦਿਪੋਕ੍ਖਰਣਿਰਾਮਣੇਯ੍ਯਕਸਮਨ੍ਨਾਗਤਂ ਆਕਿਣ੍ਣਦੇਵਗਣਂ ਤਾਵਤਿਂਸਭਵਨਂ ਦਿਸ੍ਵਾ ¶ ਪਬੁਜ੍ਝਿਤ੍ਵਾ ਤਤ੍ਥ ਗਨ੍ਤੁਕਾਮੋ ਚਿਨ੍ਤੇਸਿ – ‘‘ਸ੍ਵੇ ਆਚਰਿਯਖਣ੍ਡਹਾਲਸ੍ਸਾਗਮਨਵੇਲਾਯ ਦੇਵਲੋਕਗਾਮਿਮਗ੍ਗਂ ਪੁਚ੍ਛਿਤ੍ਵਾ ਤੇਨ ਦੇਸਿਤਮਗ੍ਗੇਨ ਦੇਵਲੋਕਂ ਗਮਿਸ੍ਸਾਮੀ’’ਤਿ ਖਣ੍ਡਹਾਲੋਪਿ ਪਾਤੋਵ ਨ੍ਹਤ੍ਵਾ ਭੁਞ੍ਜਿਤ੍ਵਾ ਰਾਜੁਪਟ੍ਠਾਨਂ ਆਗਨ੍ਤ੍ਵਾ ਰਾਜਨਿਵੇਸਨਂ ਪਵਿਸਿਤ੍ਵਾ ਰਞ੍ਞੋ ਸੁਖਸੇਯ੍ਯਂ ਪੁਚ੍ਛਿ. ਅਥਸ੍ਸ ਰਾਜਾ ਆਸਨਂ ਦਾਪੇਤ੍ਵਾ ਪਞ੍ਹਂ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੯੮੨.

‘‘ਰਾਜਾਸਿ ਲੁਦ੍ਦਕਮ੍ਮੋ, ਏਕਰਾਜਾ ਪੁਪ੍ਫਵਤੀਯਾ;

ਸੋ ਪੁਚ੍ਛਿ ਬ੍ਰਹ੍ਮਬਨ੍ਧੁਂ, ਖਣ੍ਡਹਾਲਂ ਪੁਰੋਹਿਤਂ ਮੂਲ਼੍ਹਂ.

੯੮੩.

‘‘ਸਗ੍ਗਾਨ ਮਗ੍ਗਮਾਚਿਕ੍ਖ, ਤ੍ਵਂਸਿ ਬ੍ਰਾਹ੍ਮਣ ਧਮ੍ਮਵਿਨਯਕੁਸਲੋ;

ਯਥਾ ਇਤੋ ਵਜਨ੍ਤਿ ਸੁਗਤਿਂ, ਨਰਾ ਪੁਞ੍ਞਾਨਿ ਕਤ੍ਵਾਨਾ’’ਤਿ.

ਤਤ੍ਥ ਰਾਜਾਸੀਤਿ ਰਾਜਾ ਆਸਿ. ਲੁਦ੍ਦਕਮ੍ਮੋਤਿ ਕਕ੍ਖਲ਼ਫਰੁਸਕਮ੍ਮੋ. ਸਗ੍ਗਾਨ ਮਗ੍ਗਨ੍ਤਿ ਸਗ੍ਗਾਨਂ ਗਮਨਮਗ੍ਗਂ. ਧਮ੍ਮਵਿਨਯਕੁਸਲੋਤਿ ਸੁਚਰਿਤਧਮ੍ਮੇ ਚ ਆਚਾਰਵਿਨਯੇ ਚ ਕੁਸਲੋ. ਯਥਾਤਿ ਯਥਾ ਨਰਾ ਪੁਞ੍ਞਾਨਿ ਕਤ੍ਵਾ ਇਤੋ ਸੁਗਤਿਂ ਗਚ੍ਛਨ੍ਤਿ, ਤਂ ਮੇ ਸੁਗਤਿਮਗ੍ਗਂ ਆਚਿਕ੍ਖਾਹੀਤਿ ਪੁਚ੍ਛਿ.

ਇਮਂ ¶ ਪਨ ਪਞ੍ਹਂ ਸਬ੍ਬਞ੍ਞੁਬੁਦ੍ਧਂ ਵਾ ਤਸ੍ਸ ਸਾਵਕੇ ਵਾ ਤੇਸਂ ਅਲਾਭੇਨ ਬੋਧਿਸਤ੍ਤਂ ਵਾ ਪੁਚ੍ਛਿਤੁਂ ਵਟ੍ਟਤਿ. ਰਾਜਾ ਪਨ ਯਥਾ ਨਾਮ ਸਤ੍ਤਾਹਂ ਮਗ੍ਗਮੂਲ਼੍ਹੋ ਪੁਰਿਸੋ ਅਞ੍ਞਂ ਮਾਸਮਤ੍ਤਂ ਮਗ੍ਗਮੂਲ਼੍ਹਂ ਮਗ੍ਗਂ ਪੁਚ੍ਛੇਯ੍ਯ, ਏਵਂ ਖਣ੍ਡਹਾਲਂ ਪੁਚ੍ਛਿ. ਸੋ ਚਿਨ੍ਤੇਸਿ ‘‘ਅਯਂ ਮੇ ਪਚ੍ਚਾਮਿਤ੍ਤਸ੍ਸ ਪਿਟ੍ਠਿਦਸ੍ਸਨਕਾਲੋ, ਇਦਾਨਿ ਚਨ੍ਦਕੁਮਾਰਂ ਜੀਵਿਤਕ੍ਖਯਂ ਪਾਪੇਤ੍ਵਾ ਮਮ ਮਨੋਰਥਂ ਪੂਰੇਸ੍ਸਾਮੀ’’ਤਿ. ਅਥ ਰਾਜਾਨਂ ਆਮਨ੍ਤੇਤ੍ਵਾ ਤਤਿਯਂ ਗਾਥਮਾਹ –

੯੮੪.

‘‘ਅਤਿਦਾਨਂ ਦਦਿਤ੍ਵਾਨ, ਅਵਜ੍ਝੇ ਦੇਵ ਘਾਤੇਤ੍ਵਾ;

ਏਵਂ ਵਜਨ੍ਤਿ ਸੁਗਤਿਂ, ਨਰਾ ਪੁਞ੍ਞਾਨਿ ਕਤ੍ਵਾਨਾ’’ਤਿ.

ਤਸ੍ਸਤ੍ਥੋ – ਮਹਾਰਾਜ ਸਗ੍ਗਂ ਗਚ੍ਛਨ੍ਤਾ ਨਾਮ ਅਤਿਦਾਨਂ ਦਦਨ੍ਤਿ, ਅਵਜ੍ਝੇ ਘਾਤੇਨ੍ਤਿ. ਸਚੇਪਿ ਸਗ੍ਗਂ ਗਨ੍ਤੁਕਾਮੋਸਿ, ਤ੍ਵਮ੍ਪਿ ਤਥੇਵ ਕਰੋਹੀਤਿ.

ਅਥ ਨਂ ਰਾਜਾ ਪਞ੍ਹਸ੍ਸ ਅਤ੍ਥਂ ਪੁਚ੍ਛਿ –

੯੮੫.

‘‘ਕਿਂ ਪਨ ਤਂ ਅਤਿਦਾਨਂ, ਕੇ ਚ ਅਵਜ੍ਝਾ ਇਮਸ੍ਮਿ ਲੋਕਸ੍ਮਿਂ;

ਏਤਞ੍ਚ ਖੋ ਨੋ ਅਕ੍ਖਾਹਿ, ਯਜਿਸ੍ਸਾਮਿ ਦਦਾਮਿ ਦਾਨਾਨੀ’’ਤਿ.

ਸੋਪਿਸ੍ਸ ¶ ਬ੍ਯਾਕਾਸਿ –

੯੮੬.

‘‘ਪੁਤ੍ਤੇਹਿ ਦੇਵ ਯਜਿਤਬ੍ਬਂ, ਮਹੇਸੀਹਿ ਨੇਗਮੇਹਿ ਚ;

ਉਸਭੇਹਿ ਆਜਾਨਿਯੇਹਿ ਚਤੂਹਿ, ਸਬ੍ਬਚਤੁਕ੍ਕੇਨ ਦੇਵ ਯਜਿਤਬ੍ਬ’’ਨ੍ਤਿ.

ਰਞ੍ਞੋ ਪਞ੍ਹਂ ਬ੍ਯਾਕਰੋਨ੍ਤੋ ਚ ਦੇਵਲੋਕਮਗ੍ਗਂ ਪੁਟ੍ਠੋ ਨਿਰਯਮਗ੍ਗਂ ਬ੍ਯਾਕਾਸਿ.

ਤਤ੍ਥ ਪੁਤ੍ਤੇਹੀਤਿ ਅਤ੍ਤਨਾ ਜਾਤੇਹਿ ਪਿਯਪੁਤ੍ਤੇਹਿ ਚੇਵ ਪਿਯਧੀਤਾਹਿ ਚ. ਮਹੇਸੀਹੀਤਿ ਪਿਯਭਰਿਯਾਹਿ. ਨੇਗਮੇਹੀਤਿ ਸੇਟ੍ਠੀਹਿ. ਉਸਭੇਹੀਤਿ ਸਬ੍ਬਸੇਤੇਹਿ ਉਸਭਰਾਜੂਹਿ. ਆਜਾਨਿਯੇਹੀਤਿ ਮਙ੍ਗਲਅਸ੍ਸੇਹਿ. ਚਤੂਹੀਤਿ ਏਤੇਹਿ ਸਬ੍ਬੇਹੇਵ ਅਞ੍ਞੇਹਿ ਚ ਹਤ੍ਥਿਆਦੀਹਿ ਚਤੂਹਿ ਚਤੂਹੀਤਿ ਏਵਂ ਸਬ੍ਬਚਤੁਕ੍ਕੇਨ, ਦੇਵ, ਯਜਿਤਬ੍ਬਂ. ਏਤੇਸਞ੍ਹਿ ਖਗ੍ਗੇਨ ਸੀਸਂ ਛਿਨ੍ਦਿਤ੍ਵਾ ਸੁਵਣ੍ਣਪਾਤਿਯਾ ਗਲਲੋਹਿਤਂ ਗਹੇਤ੍ਵਾ ਆਵਾਟੇ ਪਕ੍ਖਿਪਿਤ੍ਵਾ ਯਞ੍ਞਸ੍ਸ ਯਜਨਕਰਾਜਾਨੋ ਸਰੀਰੇਨ ਸਹ ਦੇਵਲੋਕਂ ਗਚ੍ਛਨ੍ਤਿ. ਮਹਾਰਾਜ, ਸਮਣਬ੍ਰਾਹ੍ਮਣਕਪਣਦ੍ਧਿਕਵਨਿਬ੍ਬਕਯਾਚਕਾਨਂ ਘਾਸਚ੍ਛਾਦਨਾਦਿਸਮ੍ਪਦਾਨਂ ਦਾਨਮੇਵ ¶ ਪਵਤ੍ਤਤਿ. ਇਮੇ ਪਨ ਪੁਤ੍ਤਧੀਤਾਦਯੋ ਮਾਰੇਤ੍ਵਾ ਤੇਸਂ ਗਲਲੋਹਿਤੇਨ ਯਞ੍ਞਸ੍ਸ ਯਜਨਂ ਅਤਿਦਾਨਂ ਨਾਮਾਤਿ ਰਾਜਾਨਂ ਸਞ੍ਞਾਪੇਸਿ.

ਇਤਿ ਸੋ ‘‘ਸਚੇ ਚਨ੍ਦਕੁਮਾਰਂ ਏਕਞ੍ਞੇਵ ਗਣ੍ਹਿਸ੍ਸਾਮਿ, ਵੇਰਚਿਤ੍ਤੇਨ ਕਰਣਂ ਮਞ੍ਞਿਸ੍ਸਨ੍ਤੀ’’ਤਿ ਤਂ ਮਹਾਜਨਸ੍ਸ ਅਨ੍ਤਰੇ ਪਕ੍ਖਿਪਿ. ਇਦਂ ਪਨ ਤੇਸਂ ਕਥੇਨ੍ਤਾਨਂ ਕਥਂ ਸੁਤ੍ਵਾ ਸਬ੍ਬੇ ਅਨ੍ਤੇਪੁਰਜਨਾ ਭੀਤਤਸਿਤਾ ਸਂਵਿਗ੍ਗਮਾਨਹਦਯਾ ਏਕਪ੍ਪਹਾਰੇਨੇਵ ਮਹਾਰਵਂ ਰਵਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੯੮੭.

‘‘ਤਂ ਸੁਤ੍ਵਾ ਅਨ੍ਤੇਪੁਰੇ, ਕੁਮਾਰਾ ਮਹੇਸਿਯੋ ਚ ਹਞ੍ਞਨ੍ਤੁ;

ਏਕੋ ਅਹੋਸਿ ਨਿਗ੍ਘੋਸੋ, ਭਿਕ੍ਖਾ ਅਚ੍ਚੁਗ੍ਗਤੋ ਸਦ੍ਦੋ’’ਤਿ.

ਤਤ੍ਥ ਤਨ੍ਤਿ ‘‘ਕੁਮਾਰਾ ਚ ਮਹੇਸਿਯੋ ਚ ਹਞ੍ਞਨ੍ਤੂ’’ਤਿ ਤਂ ਸਦ੍ਦਂ ਸੁਤ੍ਵਾ ਏਕੋਤਿ ਸਕਲਰਾਜਨਿਵੇਸਨੇ ਏਕੋਵ ਨਿਗ੍ਘੋਸੋ ਅਹੋਸਿ. ਭਿਸ੍ਮਾਤਿ ਭਯਾਨਕੋ. ਅਚ੍ਚੁਗ੍ਗਤੋਤਿ ਅਤਿਉਗ੍ਗਤੋ ਅਹੋਸਿ, ਸਕਲਰਾਜਕੁਲਂ ਯੁਗਨ੍ਤਵਾਤਪ੍ਪਹਟਂ ਵਿਯ ਸਾਲਵਨਂ ਅਹੋਸਿ.

ਬ੍ਰਾਹ੍ਮਣੋ ਰਾਜਾਨਂ ਆਹ – ‘‘ਕਿਂ ਪਨ, ਮਹਾਰਾਜ, ਯਞ੍ਞਂ ਯਜਿਤੁਂ ਸਕ੍ਕੋਸਿ, ਨ ਸਕ੍ਕੋਸੀ’’ਤਿ? ‘‘ਕਿਂ ਕਥੇਸਿ, ਆਚਰਿਯ, ਯਞ੍ਞਂ ਯਜਿਤ੍ਵਾ ਦੇਵਲੋਕਂ ¶ ਗਮਿਸ੍ਸਾਮੀ’’ਤਿ. ‘‘ਮਹਾਰਾਜ, ਭੀਰੁਕਾ ਦੁਬ੍ਬਲਜ੍ਝਾਸਯਾ ਯਞ੍ਞਂ ਯਜਿਤੁਂ ਸਮਤ੍ਥਾ ਨਾਮ ਨ ਹੋਨ੍ਤਿ, ਤੁਮ੍ਹੇ ਇਧ ਸਬ੍ਬੇ ਸਨ੍ਨਿਪਾਤੇਥ, ਅਹਂ ਯਞ੍ਞਾਵਾਟੇ ਕਮ੍ਮਂ ਕਰਿਸ੍ਸਾਮੀ’’ਤਿ ਅਤ੍ਤਨੋ ਪਹੋਨਕਂ ਬਲਕਾਯਂ ਗਹੇਤ੍ਵਾ ਨਗਰਾ ਨਿਕ੍ਖਮ੍ਮ ਯਞ੍ਞਾਵਾਟਂ ਸਮਤਲਂ ਕਾਰੇਤ੍ਵਾ ਵਤਿਯਾ ਪਰਿਕ੍ਖਿਪਿ. ਕਸ੍ਮਾ? ਧਮ੍ਮਿਕੋ ਹਿ ਸਮਣੋ ਵਾ ਬ੍ਰਾਹ੍ਮਣੋ ਵਾ ਆਗਨ੍ਤ੍ਵਾ ਨਿਵਾਰੇਯ੍ਯਾਤਿ ਯਞ੍ਞਾਵਾਟੇ ਵਤਿਯਾ ਪਰਿਕ੍ਖੇਪਨਂ ਨਾਮ ਚਾਰਿਤ੍ਤਨ੍ਤਿ ਕਤ੍ਵਾ ਪੋਰਾਣਕਬ੍ਰਾਹ੍ਮਣੇਹਿ ਠਪਿਤਂ. ਰਾਜਾਪਿ ਪੁਰਿਸੇ ਪਕ੍ਕੋਸਾਪੇਤ੍ਵਾ ‘‘ਤਾਤਾ, ਅਹਂ ਅਤ੍ਤਨੋ ਪੁਤ੍ਤਧੀਤਰੋ ਚ ਭਰਿਯਾਯੋ ਚ ਮਾਰੇਤ੍ਵਾ ਯਞ੍ਞਂ ਯਜਿਤ੍ਵਾ ਦੇਵਲੋਕਂ ਗਮਿਸ੍ਸਾਮਿ, ਗਚ੍ਛਥ ਨੇਸਂ ਆਚਿਕ੍ਖਿਤ੍ਵਾ ਸਬ੍ਬੇ ਇਧਾਨੇਥਾ’’ਤਿ ਪੁਤ੍ਤਾਨਂ ਤਾਵ ਆਨਯਨਤ੍ਥਾਯ ਆਹ –

੯੮੮.

‘‘ਗਚ੍ਛਥ ਵਦੇਥ ਕੁਮਾਰੇ, ਚਨ੍ਦਂ ਸੂਰਿਯਞ੍ਚ ਭਦ੍ਦਸੇਨਞ੍ਚ;

ਸੂਰਞ੍ਚ ਵਾਮਗੋਤ੍ਤਞ੍ਚ, ਪਚੁਰਾ ਕਿਰ ਹੋਥ ਯਞ੍ਞਤ੍ਥਾਯਾ’’ਤਿ.

ਤਤ੍ਥ ਗਚ੍ਛਥ ਵਦੇਥ ਕੁਮਾਰੇਤਿ ਚਨ੍ਦਕੁਮਾਰੋ ਚ ਸੂਰਿਯਕੁਮਾਰੋ ਚਾਤਿ ਦ੍ਵੇ ਗੋਤਮਿਦੇਵਿਯਾ ਅਗ੍ਗਮਹੇਸਿਯਾ ¶ ਪੁਤ੍ਤਾ, ਭਦ੍ਦਸੇਨੋ ਚ ਸੂਰੋ ਚ ਵਾਮਗੋਤ੍ਤੋ ਚ ਤੇਸਂ ਵੇਮਾਤਿਕਭਾਤਰੋ. ਪਚੁਰਾ ਕਿਰ ਹੋਥਾਤਿ ਏਕਸ੍ਮਿਂ ਠਾਨੇ ਰਾਸੀ ਹੋਥਾਤਿ ਆਚਿਕ੍ਖਥਾਤਿ ਅਤ੍ਥੋ.

ਤੇ ਪਠਮਂ ਚਨ੍ਦਕੁਮਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਆਹਂਸੁ ‘‘ਕੁਮਾਰ, ਤੁਮ੍ਹੇ ਕਿਰ ਮਾਰੇਤ੍ਵਾ ਤੁਮ੍ਹਾਕਂ ਪਿਤਾ ਦੇਵਲੋਕਂ ਗਨ੍ਤੁਕਾਮੋ, ਤੁਮ੍ਹਾਕਂ ਗਣ੍ਹਨਤ੍ਥਾਯ ਅਮ੍ਹੇ ਪੇਸੇਸੀ’’ਤਿ. ‘‘ਕਸ੍ਸ ਵਚਨੇਨ ਮਂ ਗਣ੍ਹਾਪੇਸੀ’’ਤਿ? ‘‘ਖਣ੍ਡਹਾਲਸ੍ਸ, ਦੇਵਾ’’ਤਿ. ‘‘ਕਿਂ ਸੋ ਮਞ੍ਞੇਵ ਗਣ੍ਹਾਪੇਤਿ, ਉਦਾਹੁ ਅਞ੍ਞੇਪੀ’’ਤਿ. ‘‘ਰਾਜਪੁਤ੍ਤ, ਅਞ੍ਞੇਪਿ ਗਣ੍ਹਾਪੇਤਿ, ਸਬ੍ਬਚਤੁਕ੍ਕਂ ਕਿਰ ਯਞ੍ਞਂ ਯਜਿਤੁਕਾਮੋ’’ਤਿ. ਸੋ ਚਿਨ੍ਤੇਸਿ ‘‘ਤਸ੍ਸ ਅਞ੍ਞੇਹਿ ਸਦ੍ਧਿਂ ਵੇਰਂ ਨਤ੍ਥਿ, ‘ਵਿਨਿਚ੍ਛਯੇ ਵਿਲੋਪਂ ਕਾਤੁਂ ਨ ਲਭਾਮੀ’ਤਿ ਪਨ ਮਯਿ ਏਕਸ੍ਮਿਂ ਵੇਰਚਿਤ੍ਤੇਨ ਬਹੂ ਮਾਰਾਪੇਤਿ, ਪਿਤਰਂ ਦਟ੍ਠੁਂ ਲਭਨ੍ਤਸ੍ਸ ਸਬ੍ਬੇਸਂ ਤੇਸਂ ਮੋਚਾਪਨਂ ਨਾਮ ਮਮ ਭਾਰੋ’’ਤਿ. ਅਥ ਨੇ ਰਾਜਪੁਰਿਸੇ ਆਹ ‘‘ਤੇਨ ਹਿ ਮੇ ਪਿਤੁ ਵਚਨਂ ਕਰੋਥਾ’’ਤਿ. ਤੇ ਤਂ ਨੇਤ੍ਵਾ ਰਾਜਙ੍ਗਣੇ ਏਕਮਨ੍ਤੇ ਠਪੇਤ੍ਵਾ ਇਤਰੇਪਿ ਤਯੋ ਆਮਨ੍ਤੇਤ੍ਵਾ ਤਸ੍ਸੇਵ ਸਨ੍ਤਿਕੇ ਕਤ੍ਵਾ ਰਞ੍ਞੋ ਆਰੋਚਯਿਂਸੁ ‘‘ਆਨੀਤਾ ਤੇ, ਦੇਵ, ਪੁਤ੍ਤਾ’’ਤਿ. ਸੋ ਤੇਸਂ ਵਚਨਂ ਸੁਤ੍ਵਾ ‘‘ਤਾਤਾ, ਇਦਾਨਿ ਮੇ ਧੀਤਰੋ ਆਨੇਤ੍ਵਾ ¶ ਤੇਸਞ੍ਞੇਵ ਭਾਤਿਕਾਨਂ ਸਨ੍ਤਿਕੇ ਕਰੋਥਾ’’ਤਿ ਚਤਸ੍ਸੋ ਧੀਤਰੋ ਆਹਰਾਪੇਤੁਂ ਇਤਰਂ ਗਾਥਮਾਹ –

੯੮੯.

‘‘ਕੁਮਾਰਿਯੋਪਿ ਵਦੇਥ, ਉਪਸੇਨਂ ਕੋਕਿਲਞ੍ਚ ਮੁਦਿਤਞ੍ਚ;

ਨਨ੍ਦਞ੍ਚਾਪਿ ਕੁਮਾਰਿਂ, ਪਚੁਰਾ ਕਿਰ ਹੋਥ ਯਞ੍ਞਤ੍ਥਾਯਾ’’ਤਿ.

ਤੇ ‘‘ਏਵਂ ਕਰਿਸ੍ਸਾਮਾ’’ਤਿ ਤਾਸਂ ਸਨ੍ਤਿਕਂ ਗਨ੍ਤ੍ਵਾ ਤਾ ਰੋਦਮਾਨਾ ਪਰਿਦੇਵਮਾਨਾ ਆਨੇਤ੍ਵਾ ਭਾਤਿਕਾਨਞ੍ਞੇਵ ਸਨ੍ਤਿਕੇ ਕਰਿਂਸੁ. ਤਤੋ ਰਾਜਾ ਅਤ੍ਤਨੋ ਭਰਿਯਾਨਂ ਗਹਣਤ੍ਥਾਯ ਇਤਰਂ ਗਾਥਮਾਹ –

੯੯੦.

‘‘ਵਿਜਯਮ੍ਪਿ ਮਯ੍ਹਂ ਮਹੇਸਿਂ, ਏਰਾਵਤਿਂ ਕੇਸਿਨਿਂਸੁਨਨ੍ਦਞ੍ਚ;

ਲਕ੍ਖਣਵਰੂਪਪਨ੍ਨਾ, ਪਚੁਰਾ ਕਿਰ ਹੋਥ ਯਞ੍ਞਤ੍ਥਾਯਾ’’ਤਿ.

ਤਤ੍ਥ ਲਕ੍ਖਣਵਰੂਪਪਨ੍ਨਾਤਿ ਉਤ੍ਤਮੇਹਿ ਚਤੁਸਟ੍ਠਿਯਾ ਇਤ੍ਥਿਲਕ੍ਖਣੇਹਿ ਉਪਪਨ੍ਨਾ ਏਤਾਪਿ ਵਦੇਥਾਤਿ ਅਤ੍ਥੋ.

ਤੇ ਤਾਪਿ ਪਰਿਦੇਵਮਾਨਾ ਆਨੇਤ੍ਵਾ ਕੁਮਾਰਾਨਂ ਸਨ੍ਤਿਕੇ ਕਰਿਂਸੁ. ਅਥ ਰਾਜਾ ਚਤ੍ਤਾਰੋ ਸੇਟ੍ਠਿਨੋ ਗਹਣਤ੍ਥਾਯ ਆਣਾਪੇਨ੍ਤੋ ਇਤਰਂ ਗਾਥਮਾਹ –

੯੯੧.

‘‘ਗਹਪਤਯੋ ¶ ਚ ਵਦੇਥ, ਪੁਣ੍ਣਮੁਖਂ ਭਦ੍ਦਿਯਂ ਸਿਙ੍ਗਾਲਞ੍ਚ;

ਵਡ੍ਢਞ੍ਚਾਪਿ ਗਹਪਤਿਂ, ਪਚੁਰਾ ਕਿਰ ਹੋਥ ਯਞ੍ਞਤ੍ਥਾਯਾ’’ਤਿ.

ਰਾਜਪੁਰਿਸਾ ਗਨ੍ਤ੍ਵਾ ਤੇਪਿ ਆਨਯਿਂਸੁ. ਰਞ੍ਞੋ ਪੁਤ੍ਤਦਾਰੇ ਗਯ੍ਹਮਾਨੇ ਸਕਲਨਗਰਂ ਨ ਕਿਞ੍ਚਿ ਅਵੋਚ. ਸੇਟ੍ਠਿਕੁਲਾਨਿ ਪਨ ਮਹਾਸਮ੍ਬਨ੍ਧਾਨਿ, ਤਸ੍ਮਾ ਤੇਸਂ ਗਹਿਤਕਾਲੇ ਸਕਲਨਗਰਂ ਸਙ੍ਖੁਭਿਤ੍ਵਾ ‘‘ਰਞ੍ਞੋ ਸੇਟ੍ਠਿਨੋ ਮਾਰੇਤ੍ਵਾ ਯਞ੍ਞਂ ਯਜਿਤੁਂ ਨ ਦਸ੍ਸਾਮਾ’’ਤਿ ਸੇਟ੍ਠਿਨੋ ਪਰਿਵਾਰੇਤ੍ਵਾਵ ਤੇਸਂ ਞਾਤਿਵਗ੍ਗੇਨ ਸਦ੍ਧਿਂ ਰਾਜਕੁਲਂ ਅਗਮਿ. ਅਥ ਤੇ ਸੇਟ੍ਠਿਨੋ ਞਾਤਿਗਣਪਰਿਵੁਤਾ ਰਾਜਾਨਂ ਵਨ੍ਦਿਤ੍ਵਾ ਅਤ੍ਤਨੋ ਜੀਵਿਤਂ ਯਾਚਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੯੯੨.

‘‘ਤੇ ਤਤ੍ਥ ਗਹਪਤਯੋ, ਅਵੋਚਿਸੁਂ ਸਮਾਗਤਾ ਪੁਤ੍ਤਦਾਰਪਰਿਕਿਣ੍ਣਾ;

ਸਬ੍ਬੇਵ ਸਿਖਿਨੋ ਦੇਵ ਕਰੋਹਿ, ਅਥ ਵਾ ਨੋ ਦਾਸੇ ਸਾਵੇਹੀ’’ਤਿ.

ਤਤ੍ਥ ¶ ਸਬ੍ਬੇਵ ਸਿਖਿਨੋਤਿ ਸਬ੍ਬੇ ਅਮ੍ਹੇ ਮਤ੍ਥਕੇ ਚੂਲ਼ਂ ਬਨ੍ਧਿਤ੍ਵਾ ਅਤ੍ਤਨੋ ਚੇਟਕੇ ਕਰੋਹਿ, ਮਯਂ ਤੇ ਚੇਟਕਕਿਚ੍ਚਂ ਕਰਿਸ੍ਸਾਮ. ਅਥ ਵਾ ਨੋ ਦਾਸੇ ਸਾਵੇਹੀਤਿ ਅਥ ਵਾ ਨੋ ਅਸਦ੍ਦਹਨ੍ਤੋ ਸਬ੍ਬਸੇਨਿਯੋ ਸਨ੍ਨਿਪਾਤੇਤ੍ਵਾ ਰਾਸਿਮਜ੍ਝੇ ਅਮ੍ਹੇ ਦਾਸੇ ਸਾਵੇਹਿ, ਮਯਂ ਤੇ ਦਾਸਤ੍ਤਂ ਪਟਿਸ੍ਸੁਣਿਸ੍ਸਾਮਾਤਿ.

ਤੇ ਏਵਂ ਯਾਚਨ੍ਤਾਪਿ ਜੀਵਿਤਂ ਲਦ੍ਧੁਂ ਨਾਸਕ੍ਖਿਂਸੁ. ਰਾਜਪੁਰਿਸਾ ਸੇਸੇ ਪਟਿਕ੍ਕਮਾਪੇਤ੍ਵਾ ਤੇ ਗਹੇਤ੍ਵਾ ਕੁਮਾਰਾਨਞ੍ਞੇਵ ਸਨ੍ਤਿਕੇ ਨਿਸੀਦਾਪੇਸੁਂ. ਤਤੋ ਪਨ ਰਾਜਾ ਹਤ੍ਥਿਆਦੀਨਂ ਗਹਣਤ੍ਥਾਯ ਆਣਾਪੇਨ੍ਤੋ ਆਹ –

੯੯੩.

‘‘ਅਭਯਙ੍ਕਰਮ੍ਪਿ ਮੇ ਹਤ੍ਥਿਂ, ਨਾਲ਼ਾਗਿਰਿਂ ਅਚ੍ਚੁਗ੍ਗਤਂ ਵਰੁਣਦਨ੍ਤਂ;

ਆਨੇਥ ਖੋ ਨੇ ਖਿਪ੍ਪਂ, ਯਞ੍ਞਤ੍ਥਾਯ ਭਵਿਸ੍ਸਨ੍ਤਿ.

੯੯੪.

‘‘ਅਸ੍ਸਰਤਨਮ੍ਪਿ ਕੇਸਿਂ, ਸੁਰਾਮੁਖਂ ਪੁਣ੍ਣਕਂ ਵਿਨਤਕਞ੍ਚ;

ਆਨੇਥ ਖੋ ਨੇ ਖਿਪ੍ਪਂ, ਯਞ੍ਞਤ੍ਥਾਯ ਭਵਿਸ੍ਸਨ੍ਤਿ.

੯੯੫.

‘‘ਉਸਭਮ੍ਪਿ ਯੂਥਪਤਿਂ ਅਨੋਜਂ, ਨਿਸਭਂ ਗਵਮ੍ਪਤਿਂ ਤੇਪਿ ਮਯ੍ਹਂ ਆਨੇਥ;

ਸਮੂਹ ਕਰੋਨ੍ਤੁ ਸਬ੍ਬਂ, ਯਜਿਸ੍ਸਾਮਿ ਦਦਾਮਿ ਦਾਨਾਨਿ.

੯੯੬.

‘‘ਸਬ੍ਬਂ ¶ ਪਟਿਯਾਦੇਥ, ਯਞ੍ਞਂ ਪਨ ਉਗ੍ਗਤਮ੍ਹਿ ਸੂਰਿਯਮ੍ਹਿ;

ਆਣਾਪੇਥ ਚ ਕੁਮਾਰੇ, ਅਭਿਰਮਨ੍ਤੁ ਇਮਂ ਰਤ੍ਤਿਂ.

੯੯੭.

‘‘ਸਬ੍ਬਂ ਉਪਟ੍ਠਪੇਥ, ਯਞ੍ਞਂ ਪਨ ਉਗ੍ਗਤਮ੍ਹਿ ਸੂਰਿਯਮ੍ਹਿ;

ਵਦੇਥ ਦਾਨਿ ਕੁਮਾਰੇ, ਅਜ੍ਜ ਖੋ ਪਚ੍ਛਿਮਾ ਰਤ੍ਤੀ’’ਤਿ.

ਤਤ੍ਥ ਸਮੂਹ ਕਰੋਨ੍ਤੁ ਸਬ੍ਬਨ੍ਤਿ ਨ ਕੇਵਲਂ ਏਤ੍ਤਕਮੇਵ, ਅਵਸੇਸਮ੍ਪਿ ਚਤੁਪ੍ਪਦਗਣਞ੍ਚੇਵ ਪਕ੍ਖਿਗਣਞ੍ਚ ਸਬ੍ਬਂ ਚਤੁਕ੍ਕਂ ਕਤ੍ਵਾ ਰਾਸਿਂ ਕਰੋਨ੍ਤੁ, ਸਬ੍ਬਚਤੁਕ੍ਕਂ ਯਞ੍ਞਂ ਯਜਿਸ੍ਸਾਮਿ, ਯਾਚਕਬ੍ਰਾਹ੍ਮਣਾਨਞ੍ਚ ਦਾਨਂ ਦਸ੍ਸਾਮੀਤਿ. ਸਬ੍ਬਂ ਪਟਿਯਾਦੇਥਾਤਿ ਏਵਂ ਮਯਾ ਵੁਤ੍ਤਂ ਅਨਵਸੇਸਂ ਉਪਟ੍ਠਪੇਥ. ਉਗ੍ਗਤਮ੍ਹੀਤਿ ਅਹਂ ਪਨ ਯਞ੍ਞਂ ਉਗ੍ਗਤੇ ਸੂਰਿਯੇ ਸ੍ਵੇ ਪਾਤੋਵ ਯਜਿਸ੍ਸਾਮਿ. ਸਬ੍ਬਂ ਉਪਟ੍ਠਪੇਥਾਤਿ ਸੇਸਮ੍ਪਿ ਸਬ੍ਬਂ ਯਞ੍ਞਉਪਕਰਣਂ ਉਪਟ੍ਠਪੇਥਾਤਿ.

ਰਞ੍ਞੋ ¶ ਪਨ ਮਾਤਾਪਿਤਰੋ ਧਰਨ੍ਤਿਯੇਵ. ਅਥਸ੍ਸ ਅਮਚ੍ਚਾ ਗਨ੍ਤ੍ਵਾ ਮਾਤੁਯਾ ਆਰੋਚੇਸੁਂ ‘‘ਅਯ੍ਯੇ, ਪੁਤ੍ਤੋ ਵੋ ਪੁਤ੍ਤਦਾਰਂ ਮਾਰੇਤ੍ਵਾ ਯਞ੍ਞਂ ਯਜਿਤੁਕਾਮੋ’’ਤਿ. ਸਾ ‘‘ਕਿਂ ਕਥੇਥ, ਤਾਤਾ’’ਤਿ ਹਤ੍ਥੇਨ ਹਦਯਂ ਪਹਰਿਤ੍ਵਾ ਰੋਦਮਾਨਾ ਆਗਨ੍ਤ੍ਵਾ ‘‘ਸਚ੍ਚਂ ਕਿਰ ਏਵਰੂਪੋ ਤੇ ਯਞ੍ਞੋ ਭਵਿਸ੍ਸਤੀ’’ਤਿ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੯੯੮.

‘‘ਤਂਤਂ ਮਾਤਾ ਅਵਚ, ਰੋਦਨ੍ਤੀ ਆਗਨ੍ਤ੍ਵਾ ਵਿਮਾਨਤੋ;

ਯਞ੍ਞੋ ਕਿਰ ਤੇ ਪੁਤ੍ਤ, ਭਵਿਸ੍ਸਤਿ ਚਤੂਹਿ ਪੁਤ੍ਤੇਹੀ’’ਤਿ.

ਤਤ੍ਥ ਤਂਤਨ੍ਤਿ ਤਂ ਏਤਂ ਰਾਜਾਨਂ. ਵਿਮਾਨਤੋਤਿ ਅਤ੍ਤਨੋ ਵਸਨਟ੍ਠਾਨਤੋ.

ਰਾਜਾ ਆਹ –

੯੯੯.

‘‘ਸਬ੍ਬੇਪਿ ਮਯ੍ਹਂ ਪੁਤ੍ਤਾ ਚਤ੍ਤਾ, ਚਨ੍ਦਸ੍ਮਿਂ ਹਞ੍ਞਮਾਨਸ੍ਮਿਂ;

ਪੁਤ੍ਤੇਹਿ ਯਞ੍ਞਂ ਯਜਿਤ੍ਵਾਨ, ਸੁਗਤਿਂ ਸਗ੍ਗਂ ਗਮਿਸ੍ਸਾਮੀ’’ਤਿ.

ਤਤ੍ਥ ਚਤ੍ਤਾਤਿ ਚਨ੍ਦਕੁਮਾਰੇ ਹਞ੍ਞਮਾਨੇਯੇਵ ਸਬ੍ਬੇਪਿ ਯਞ੍ਞਤ੍ਥਾਯ ਮਯਾ ਪਰਿਚ੍ਚਤ੍ਤਾ.

ਅਥ ਨਂ ਮਾਤਾ ਆਹ –

੧੦੦੦.

‘‘ਮਾ ¶ ਤਂ ਪੁਤ੍ਤ ਸਦ੍ਦਹੇਸਿ, ਸੁਗਤਿ ਕਿਰ ਹੋਤਿ ਪੁਤ੍ਤਯਞ੍ਞੇਨ;

ਨਿਰਯਾਨੇਸੋ ਮਗ੍ਗੋ, ਨੇਸੋ ਮਗ੍ਗੋ ਹਿ ਸਗ੍ਗਾਨਂ.

੧੦੦੧.

‘‘ਦਾਨਾਨਿ ਦੇਹਿ ਕੋਣ੍ਡਞ੍ਞ, ਅਹਿਂਸਾ ਸਬ੍ਬਭੂਤਭਬ੍ਯਾਨਂ;

ਏਸ ਮਗ੍ਗੋ ਸੁਗਤਿਯਾ, ਨ ਚ ਮਗ੍ਗੋ ਪੁਤ੍ਤਯਞ੍ਞੇਨਾ’’ਤਿ.

ਤਤ੍ਥ ਨਿਰਯਾਨੇਸੋਤਿ ਨਿਰਸ੍ਸਾਦਤ੍ਥੇਨ ਨਿਰਯਾਨਂ ਚਤੁਨ੍ਨਂ ਅਪਾਯਾਨਂ ਏਸ ਮਗ੍ਗੋ. ਕੋਣ੍ਡਞ੍ਞਾਤਿ ਰਾਜਾਨਂ ਗੋਤ੍ਤੇਨਾਲਪਤਿ. ਭੂਤਭਬ੍ਯਾਨਨ੍ਤਿ ਭੂਤਾਨਞ੍ਚ ਭਵਿਤਬ੍ਬਸਤ੍ਤਾਨਞ੍ਚ. ਪੁਤ੍ਤਯਞ੍ਞੇਨਾਤਿ ਏਵਰੂਪੇਨ ਪੁਤ੍ਤਧੀਤਰੋ ਮਾਰੇਤ੍ਵਾ ਯਜਕਯਞ੍ਞੇਨ ਸਗ੍ਗਮਗ੍ਗੋ ਨਾਮ ਨਤ੍ਥੀਤਿ.

ਰਾਜਾ ਆਹ –

੧੦੦੨.

‘‘ਆਚਰਿਯਾਨਂ ਵਚਨਾ, ਘਾਤੇਸ੍ਸਂ ਚਨ੍ਦਞ੍ਚ ਸੂਰਿਯਞ੍ਚ;

ਪੁਤ੍ਤੇਹਿ ਯਞ੍ਞਂ ਯਜਿਤ੍ਵਾਨ ਦੁਚ੍ਚਜੇਹਿ, ਸੁਗਤਿਂ ਸਗ੍ਗਂ ਗਮਿਸ੍ਸਾਮੀ’’ਤਿ.

ਤਤ੍ਥ ¶ ਆਚਰਿਯਾਨਂ ਵਚਨਨ੍ਤਿ ਅਮ੍ਮ, ਨੇਸਾ ਮਮ ਅਤ੍ਤਨੋ ਮਤਿ, ਆਚਾਰਸਿਕ੍ਖਾਪਨਕਸ੍ਸ ਪਨ ਮੇ ਖਣ੍ਡਹਾਲਾਚਰਿਯਸ੍ਸ ਏਤਂ ਵਚਨਂ, ਏਸਾ ਅਨੁਸਿਟ੍ਠਿ. ਤਸ੍ਮਾ ਅਹਂ ਏਤੇ ਘਾਤੇਸ੍ਸਂ, ਦੁਚ੍ਚਜੇਹਿ ਪੁਤ੍ਤੇਹਿ ਯਞ੍ਞਂ ਯਜਿਤ੍ਵਾ ਸਗ੍ਗਂ ਗਮਿਸ੍ਸਾਮੀਤਿ.

ਅਥਸ੍ਸ ਮਾਤਾ ਅਤ੍ਤਨੋ ਵਚਨਂ ਗਾਹਾਪੇਤੁਂ ਅਸਕ੍ਕੋਨ੍ਤੀ ਅਪਗਤਾ. ਪਿਤਾ ਤਂ ਪਵਤ੍ਤਿਂ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੦੦੩.

‘‘ਤਂਤਂ ਪਿਤਾਪਿ ਅਵਚ, ਵਸਵਤ੍ਤੀ ਓਰਸਂ ਸਕਂ ਪੁਤ੍ਤਂ;

ਯਞ੍ਞੋ ਕਿਰ ਤੇ ਪੁਤ੍ਤ, ਭਵਿਸ੍ਸਤਿ ਚਤੂਹਿ ਪੁਤ੍ਤੇਹੀ’’ਤਿ.

ਤਤ੍ਥ ਵਸਵਤ੍ਤੀਤਿ ਤਸ੍ਸ ਨਾਮਂ.

ਰਾਜਾ ਆਹ –

੧੦੦੪.

‘‘ਸਬ੍ਬੇਪਿ ¶ ਮਯ੍ਹਂ ਪੁਤ੍ਤਾ ਚਤ੍ਤਾ, ਚਨ੍ਦਸ੍ਮਿਂ ਹਞ੍ਞਮਾਨਸ੍ਮਿਂ;

ਪੁਤ੍ਤੇਹਿ ਯਞ੍ਞਂ ਯਜਿਤ੍ਵਾਨ, ਸੁਗਤਿਂ ਸਗ੍ਗਂ ਗਮਿਸ੍ਸਾਮੀ’’ਤਿ.

ਅਥ ਨਂ ਪਿਤਾ ਆਹ –

੧੦੦੫.

‘‘ਮਾ ਤਂ ਪੁਤ੍ਤ ਸਦ੍ਦਹੇਸਿ, ਸੁਗਤਿ ਕਿਰ ਹੋਤਿ ਪੁਤ੍ਤਯਞ੍ਞੇਨ;

ਨਿਰਯਾਨੇਸੋ ਮਗ੍ਗੋ, ਨੇਸੋ ਮਗ੍ਗੋ ਹਿ ਸਗ੍ਗਾਨਂ.

੧੦੦੬.

‘‘ਦਾਨਾਨਿ ਦੇਹਿ ਕੋਣ੍ਡਞ੍ਞ, ਅਹਿਂਸਾ ਸਬ੍ਬਭੂਤਭਬ੍ਯਾਨਂ;

ਏਸ ਮਗ੍ਗੋ ਸੁਗਤਿਯਾ, ਨ ਚ ਮਗ੍ਗੋ ਪੁਤ੍ਤਯਞ੍ਞੇਨਾ’’ਤਿ.

ਰਾਜਾ ਆਹ –

੧੦੦੭.

‘‘ਆਚਰਿਯਾਨਂ ਵਚਨਾ, ਘਾਤੇਸ੍ਸਂ ਚਨ੍ਦਞ੍ਚ ਸੂਰਿਯਞ੍ਚ;

ਪੁਤ੍ਤੇਹਿ ਯਞ੍ਞਂ ਯਜਿਤ੍ਵਾਨ ਦੁਚ੍ਚਜੇਹਿ, ਸੁਗਤਿਂ ਸਗ੍ਗਂ ਗਮਿਸ੍ਸਾਮੀ’’ਤਿ.

ਅਥ ਨਂ ਪਿਤਾ ਆਹ –

੧੦੦੮.

‘‘ਦਾਨਾਨਿ ਦੇਹਿ ਕੋਣ੍ਡਞ੍ਞ, ਅਹਿਂਸਾ ਸਬ੍ਬਭੂਤਭਬ੍ਯਾਨਂ;

ਪੁਤ੍ਤਪਰਿਵੁਤੋ ਤੁਵਂ, ਰਟ੍ਠਂ ਜਨਪਦਞ੍ਚ ਪਾਲੇਹੀ’’ਤਿ.

ਤਤ੍ਥ ਪੁਤ੍ਤਪਰਿਵੁਤੋਤਿ ਪੁਤ੍ਤੇਹਿ ਪਰਿਵੁਤੋ. ਰਟ੍ਠਂ ਜਨਪਦਞ੍ਚਾਤਿ ਸਕਲਕਾਸਿਰਟ੍ਠਞ੍ਚ ਤਸ੍ਸੇਵ ਤਂ ਤਂ ਕੋਟ੍ਠਾਸਭੂਤਂ ਜਨਪਦਞ੍ਚ.

ਸੋਪਿ ¶ ਤਂ ਅਤ੍ਤਨੋ ਵਚਨਂ ਗਾਹਾਪੇਤੁਂ ਨਾਸਕ੍ਖਿ. ਤਤੋ ਚਨ੍ਦਕੁਮਾਰੋ ਚਿਨ੍ਤੇਸਿ ‘‘ਇਮਸ੍ਸ ਏਤ੍ਤਕਸ੍ਸ ਜਨਸ੍ਸ ਦੁਕ੍ਖਂ ਮਂ ਏਕਂ ਨਿਸ੍ਸਾਯ ਉਪ੍ਪਨ੍ਨਂ, ਮਮ ਪਿਤਰਂ ਯਾਚਿਤ੍ਵਾ ਏਤ੍ਤਕਂ ਜਨਂ ਮਰਣਦੁਕ੍ਖਤੋ ਮੋਚੇਸ੍ਸਾਮੀ’’ਤਿ. ਸੋ ਪਿਤਰਾ ਸਦ੍ਧਿਂ ਸਲ੍ਲਪਨ੍ਤੋ ਆਹ –

੧੦੦੯.

‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਹਤ੍ਥੀ ਅਸ੍ਸੇ ਚ ਪਾਲੇਮ.

੧੦੧੦.

‘‘ਮਾ ¶ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਹਤ੍ਥਿਛਕਣਾਨਿ ਉਜ੍ਝੇਮ.

੧੦੧੧.

‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਅਸ੍ਸਛਕਣਾਨਿ ਉਜ੍ਝੇਮ.

੧੦੧੨.

‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਯਸ੍ਸ ਹੋਨ੍ਤਿ ਤਵ ਕਾਮਾ, ਅਪਿ ਰਟ੍ਠਾ ਪਬ੍ਬਾਜਿਤਾ;

ਭਿਕ੍ਖਾਚਰਿਯਂ ਚਰਿਸ੍ਸਾਮਾ’’ਤਿ.

ਤਤ੍ਥ ਅਪਿ ਨਿਗਲ਼ਬਨ੍ਧਕਾਪੀਤਿ ਅਪਿ ਨਾਮ ਮਯਂ ਮਹਾਨਿਗਲ਼ੇਹਿ ਬਨ੍ਧਕਾਪਿ ਹੁਤ੍ਵਾ. ਯਸ੍ਸ ਹੋਨ੍ਤਿ ਤਵ ਕਾਮਾਤਿ ਸਚੇਪਿ ਖਣ੍ਡਹਾਲਸ੍ਸ ਦਾਤੁਕਾਮੋਸਿ, ਤਸ੍ਸ ਨੋ ਦਾਸੇ ਕਤ੍ਵਾ ਦੇਹਿ, ਕਰਿਸ੍ਸਾਮਸ੍ਸ ਦਾਸਕਮ੍ਮਨ੍ਤਿ ਵਦਤਿ. ਅਪਿ ਰਟ੍ਠਾਤਿ ਸਚੇ ਅਮ੍ਹਾਕਂ ਕੋਚਿ ਦੋਸੋ ਅਤ੍ਥਿ, ਰਟ੍ਠਾ ਨੋ ਪਬ੍ਬਾਜੇਹਿ. ਅਪਿ ਨਾਮ ਰਟ੍ਠਾ ਪਬ੍ਬਾਜਿਤਾਪਿ ਕਪਣਾ ਵਿਯ ਕਪਾਲਂ ਗਹੇਤ੍ਵਾ ਭਿਕ੍ਖਾਚਰਿਯਂ ਚਰਿਸ੍ਸਾਮ, ਮਾ ਨੋ ਅਵਧਿ, ਦੇਹਿ ਨੋ ਜੀਵਿਤਨ੍ਤਿ ਵਿਲਪਿ.

ਤਸ੍ਸ ਤਂ ਨਾਨਪ੍ਪਕਾਰਂ ਵਿਲਾਪਂ ਸੁਤ੍ਵਾ ਰਾਜਾ ਹਦਯਫਲਿਤਪ੍ਪਤ੍ਤੋ ਵਿਯ ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ ਰੋਦਮਾਨੋ ‘‘ਨ ਮੇ ਕੋਚਿ ਪੁਤ੍ਤੇ ਮਾਰੇਤੁਂ ਲਚ੍ਛਤਿ, ਨ ਮਮਤ੍ਥੋ ਦੇਵਲੋਕੇਨਾ’’ਤਿ ਸਬ੍ਬੇ ਤੇ ਮੋਚੇਤੁਂ ਆਹ –

੧੦੧੩.

‘‘ਦੁਕ੍ਖਂ ਖੋ ਮੇ ਜਨਯਥ, ਵਿਲਪਨ੍ਤਾ ਜੀਵਿਤਸ੍ਸ ਕਾਮਾ ਹਿ;

ਮੁਞ੍ਚੇਥ ਦਾਨਿ ਕੁਮਾਰੇ, ਅਲਮ੍ਪਿ ਮੇ ਹੋਤੁ ਪੁਤ੍ਤਯਞ੍ਞੇਨਾ’’ਤਿ.

ਤਂ ਰਞ੍ਞੋ ਕਥਂ ਸੁਤ੍ਵਾ ਰਾਜਪੁਤ੍ਤੇ ਆਦਿਂ ਕਤ੍ਵਾ ਸਬ੍ਬਂ ਤਂ ਪਕ੍ਖਿਪਰਿਯੋਸਾਨਂ ਪਾਣਗਣਂ ਵਿਸ੍ਸਜ੍ਜੇਸੁਂ. ਖਣ੍ਡਹਾਲੋਪਿ ਯਞ੍ਞਾਵਾਟੇ ਕਮ੍ਮਂ ਸਂਵਿਦਹਤਿ. ਅਥ ਨਂ ਏਕੋ ਪੁਰਿਸੋ ‘‘ਅਰੇ ਦੁਟ੍ਠ, ਖਣ੍ਡਹਾਲ, ਰਞ੍ਞਾ ਪੁਤ੍ਤਾ ¶ ਵਿਸ੍ਸਜ੍ਜਿਤਾ, ਤ੍ਵਂ ਅਤ੍ਤਨੋ ਪੁਤ੍ਤੇ ਮਾਰੇਤ੍ਵਾ ਤੇਸਂ ਗਲਲੋਹਿਤੇਨ ਯਞ੍ਞਂ ਯਜਸ੍ਸੂ’’ਤਿ ਆਹ. ਸੋ ‘‘ਕਿਂ ਨਾਮ ਰਞ੍ਞਾ ਕਤ’’ਨ੍ਤਿ ਕਪ੍ਪੁਟ੍ਠਾਨਗ੍ਗਿ ਵਿਯ ਅਵਤ੍ਥਰਨ੍ਤੋ ਉਟ੍ਠਾਯ ਤੁਰਿਤੋ ਧਾਵਿਤ੍ਵਾ ਆਹ –

੧੦੧੪.

‘‘ਪੁਬ੍ਬੇਵ ¶ ਖੋਸਿ ਮੇ ਵੁਤ੍ਤੋ, ਦੁਕ੍ਕਰਂ ਦੁਰਭਿਸਮ੍ਭਵਞ੍ਚੇਤਂ;

ਅਥ ਨੋ ਉਪਕ੍ਖਟਸ੍ਸ ਯਞ੍ਞਸ੍ਸ, ਕਸ੍ਮਾ ਕਰੋਸਿ ਵਿਕ੍ਖੇਪਂ.

੧੦੧੫.

‘‘ਸਬ੍ਬੇ ਵਜਨ੍ਤਿ ਸੁਗਤਿਂ, ਯੇ ਯਜਨ੍ਤਿ ਯੇਪਿ ਯਾਜੇਨ੍ਤਿ;

ਯੇ ਚਾਪਿ ਅਨੁਮੋਦਨ੍ਤਿ, ਯਜਨ੍ਤਾਨਂ ਏਦਿਸਂ ਮਹਾਯਞ੍ਞ’’ਨ੍ਤਿ.

ਤਤ੍ਥ ਪੁਬ੍ਬੇਵਾਤਿ ਮਯਾ ਤ੍ਵਂ ਪੁਬ੍ਬੇਵ ਵੁਤ੍ਤੋ ‘‘ਨ ਤੁਮ੍ਹਾਦਿਸੇਨ ਭੀਰੁਕਜਾਤਿਕੇਨ ਸਕ੍ਕਾ ਯਞ੍ਞਂ ਯਜਿਤੁਂ, ਯਞ੍ਞਯਜਨਂ ਨਾਮੇਤਂ ਦੁਕ੍ਕਰਂ ਦੁਰਭਿਸਮ੍ਭਵ’’ਨ੍ਤਿ, ਅਥ ਨੋ ਇਦਾਨਿ ਉਪਕ੍ਖਟਸ੍ਸ ਪਟਿਯਤ੍ਤਸ੍ਸ ਯਞ੍ਞਸ੍ਸ ਵਿਕ੍ਖੇਪਂ ਕਰੋਸਿ. ‘‘ਵਿਕ੍ਖਮ੍ਭ’’ਨ੍ਤਿਪਿ ਪਾਠੋ, ਪਟਿਸੇਧਨ੍ਤਿ ਅਤ੍ਥੋ. ਮਹਾਰਾਜ, ਕਸ੍ਮਾ ਏਵਂ ਕਰੋਸਿ. ਯਤ੍ਤਕਾ ਹਿ ਯਞ੍ਞਂ ਯਜਨ੍ਤਿ ਵਾ ਯਾਜੇਨ੍ਤਿ ਵਾ ਅਨੁਮੋਦਨ੍ਤਿ ਵਾ, ਸਬ੍ਬੇ ਸੁਗਤਿਮੇਵ ਵਜਨ੍ਤੀਤਿ ਦਸ੍ਸੇਤਿ.

ਸੋ ਅਨ੍ਧਬਾਲੋ ਰਾਜਾ ਤਸ੍ਸ ਕੋਧਵਸਿਕਸ੍ਸ ਕਥਂ ਗਹੇਤ੍ਵਾ ਧਮ੍ਮਸਞ੍ਞੀ ਹੁਤ੍ਵਾ ਪੁਨ ਪੁਤ੍ਤੇ ਗਣ੍ਹਾਪੇਸਿ. ਤਤੋ ਚਨ੍ਦਕੁਮਾਰੋ ਪਿਤਰਂ ਅਨੁਬੋਧਯਮਾਨੋ ਆਹ –

੧੦੧੬.

‘‘ਅਥ ਕਿਸ੍ਸ ਜਨੋ ਪੁਬ੍ਬੇ, ਸੋਤ੍ਥਾਨਂ ਬ੍ਰਾਹ੍ਮਣੇ ਅਵਾਚੇਸਿ;

ਅਥ ਨੋ ਅਕਾਰਣਸ੍ਮਾ, ਯਞ੍ਞਤ੍ਥਾਯ ਦੇਵ ਘਾਤੇਸਿ.

੧੦੧੭.

‘‘ਪੁਬ੍ਬੇਵ ਨੋ ਦਹਰਕਾਲੇ, ਨ ਹਨੇਸਿ ਨ ਘਾਤੇਸਿ;

ਦਹਰਮ੍ਹਾ ਯੋਬ੍ਬਨਂ ਪਤ੍ਤਾ, ਅਦੂਸਕਾ ਤਾਤ ਹਞ੍ਞਾਮ.

੧੦੧੮.

‘‘ਹਤ੍ਥਿਗਤੇ ਅਸ੍ਸਗਤੇ, ਸਨ੍ਨਦ੍ਧੇ ਪਸ੍ਸ ਨੋ ਮਹਾਰਾਜ;

ਯੁਦ੍ਧੇ ਵਾ ਯੁਜ੍ਝਮਾਨੇ ਵਾ, ਨ ਹਿ ਮਾਦਿਸਾ ਸੂਰਾ ਹੋਨ੍ਤਿ ਯਞ੍ਞਤ੍ਥਾਯ.

੧੦੧੯.

‘‘ਪਚ੍ਚਨ੍ਤੇ ਵਾਪਿ ਕੁਪਿਤੇ, ਅਟਵੀਸੁ ਵਾ ਮਾਦਿਸੇ ਨਿਯੋਜੇਨ੍ਤਿ;

ਅਥ ਨੋ ਅਕਾਰਣਸ੍ਮਾ, ਅਭੂਮਿਯਂ ਤਾਤ ਹਞ੍ਞਾਮ.

੧੦੨੦.

‘‘ਯਾਪਿ ¶ ਹਿ ਤਾ ਸਕੁਣਿਯੋ, ਵਸਨ੍ਤਿ ਤਿਣਘਰਾਨਿ ਕਤ੍ਵਾਨ;

ਤਾਸਮ੍ਪਿ ਪਿਯਾ ਪੁਤ੍ਤਾ, ਅਥ ਨੋ ਤ੍ਵਂ ਦੇਵ ਘਾਤੇਸਿ.

੧੦੨੧.

‘‘ਮਾ ¶ ਤਸ੍ਸ ਸਦ੍ਦਹੇਸਿ, ਨ ਮਂ ਖਣ੍ਡਹਾਲੋ ਘਾਤੇਯ੍ਯ;

ਮਮਞ੍ਹਿ ਸੋ ਘਾਤੇਤ੍ਵਾਨ, ਅਨਨ੍ਤਰਾ ਤਮ੍ਪਿ ਦੇਵ ਘਾਤੇਯ੍ਯ.

੧੦੨੨.

‘‘ਗਾਮਵਰਂ ਨਿਗਮਵਰਂ ਦਦਨ੍ਤਿ, ਭੋਗਮ੍ਪਿਸ੍ਸ ਮਹਾਰਾਜ;

ਅਥਗ੍ਗਪਿਣ੍ਡਿਕਾਪਿ, ਕੁਲੇ ਕੁਲੇ ਹੇਤੇ ਭੁਞ੍ਜਨ੍ਤਿ.

੧੦੨੩.

‘‘ਤੇਸਮ੍ਪਿ ਤਾਦਿਸਾਨਂ, ਇਚ੍ਛਨ੍ਤਿ ਦੁਬ੍ਭਿਤੁਂ ਮਹਾਰਾਜ;

ਯੇਭੁਯ੍ਯੇਨ ਏਤੇ, ਅਕਤਞ੍ਞੁਨੋ ਬ੍ਰਾਹ੍ਮਣਾ ਦੇਵ.

੧੦੨੪.

‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਹਤ੍ਥੀ ਅਸ੍ਸੇ ਚ ਪਾਲੇਮ.

੧੦੨੫.

‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਹਤ੍ਥਿਛਕਣਾਨਿ ਉਜ੍ਝੇਮ.

੧੦੨੬.

‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਅਸ੍ਸਛਕਣਾਨਿ ਉਜ੍ਝੇਮ.

੧੦੨੭.

‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਯਸ੍ਸ ਹੋਨ੍ਤਿ ਤਵ ਕਾਮਾ, ਅਪਿ ਰਟ੍ਠਾ ਪਬ੍ਬਾਜਿਤਾ;

ਭਿਕ੍ਖਾਚਰਿਯਂ ਚਰਿਸ੍ਸਾਮਾ’’ਤਿ.

ਤਤ੍ਥ ਪੁਬ੍ਬੇਤਿ ਤਾਤ, ਯਦਿ ਅਹਂ ਮਾਰੇਤਬ੍ਬੋ, ਅਥ ਕਸ੍ਮਾ ਅਮ੍ਹਾਕਂ ਞਾਤਿਜਨੋ ਪੁਬ੍ਬੇ ਮਮ ਜਾਤਕਾਲੇ ਬ੍ਰਾਹ੍ਮਣੇ ਸੋਤ੍ਥਾਨਂ ਅਵਾਚੇਸਿ. ਤਦਾ ਕਿਰ ਖਣ੍ਡਹਾਲੋਵ ਮਮ ਲਕ੍ਖਣਾਨਿ ਉਪਧਾਰੇਤ੍ਵਾ ‘‘ਇਮਸ੍ਸ ਕੁਮਾਰਸ੍ਸ ਨ ਕੋਚਿ ਅਨ੍ਤਰਾਯੋ ਭਵਿਸ੍ਸਤਿ, ਤੁਮ੍ਹਾਕਂ ਅਚ੍ਚਯੇਨ ਰਜ੍ਜਂ ਕਾਰੇਸ੍ਸਤੀ’’ਤਿ ਆਹ. ਇਚ੍ਚਸ੍ਸ ਪੁਰਿਮੇਨ ਪਚ੍ਛਿਮਂ ਨ ਸਮੇਤਿ, ਮੁਸਾਵਾਦੀ ਏਸ. ਅਥ ਨੋ ਏਤਸ੍ਸ ਵਚਨਂ ਗਹੇਤ੍ਵਾ ਅਕਾਰਣਸ੍ਮਾ ਨਿਕ੍ਕਾਰਣਾਯੇਵ ਯਞ੍ਞਤ੍ਥਾਯ, ਦੇਵ, ਘਾਤੇਸਿ. ਮਾ ਅਮ੍ਹੇ ਘਾਤੇਸਿ. ਅਯਞ੍ਹਿ ਮਯਿ ਏਕਸ੍ਮਿਂ ਵੇਰੇਨ ਮਹਾਜਨਂ ਮਾਰੇਤੁਕਾਮੋ, ਸਾਧੁਕਂ ਸਲ੍ਲਕ੍ਖੇਹਿ ਨਰਿਨ੍ਦਾਤਿ. ਪੁਬ੍ਬੇਵ ਨੋਤਿ ਮਹਾਰਾਜ, ਸਚੇਪਿ ਅਮ੍ਹੇ ਮਾਰੇਤੁਕਾਮੋ, ਪੁਬ੍ਬੇਵ ਨੋ ਕਸ੍ਮਾ ਸਯਂ ¶ ਵਾ ਨ ਹਨੇਸਿ, ਅਞ੍ਞੇਹਿ ਵਾ ਨ ¶ ਘਾਤਾਪੇਸਿ. ਇਦਾਨਿ ਪਨ ਮਯਂ ਦਹਰਮ੍ਹਾ ਤਰੁਣਾ, ਪਠਮਵਯੇ ਠਿਤਾ ਪੁਤ੍ਤਧੀਤਾਹਿ ਵਡ੍ਢਾਮ, ਏਵਂਭੂਤਾ ਤਵ ਅਦੂਸਕਾਵ ਕਿਂਕਾਰਣਾ ਹਞ੍ਞਾਮਾਤਿ?

ਪਸ੍ਸ ਨੋਤਿ ਅਮ੍ਹੇਵ ਚਤ੍ਤਾਰੋ ਭਾਤਿਕੇ ਪਸ੍ਸ. ਯੁਜ੍ਝਮਾਨੇਤਿ ਪਚ੍ਚਤ੍ਥਿਕਾਨਂ ਨਗਰਂ ਪਰਿਵਾਰੇਤ੍ਵਾ ਠਿਤਕਾਲੇ ਅਮ੍ਹਾਦਿਸੇ ਪੁਤ੍ਤੇ ਤੇਹਿ ਸਦ੍ਧਿਂ ਯੁਜ੍ਝਮਾਨੇ ਪਸ੍ਸ. ਅਪੁਤ੍ਤਕਾ ਹਿ ਰਾਜਾਨੋ ਅਨਾਥਾ ਨਾਮ ਹੋਨ੍ਤਿ. ਮਾਦਿਸਾਤਿ ਅਮ੍ਹਾਦਿਸਾ ਸੂਰਾ ਬਲਵਨ੍ਤੋ ਨ ਯਞ੍ਞਤ੍ਥਾਯ ਮਾਰੇਤਬ੍ਬਾ ਹੋਨ੍ਤਿ. ਨਿਯੋਜੇਨ੍ਤੀਤਿ ਤੇਸਂ ਪਚ੍ਚਾਮਿਤ੍ਤਾਨਂ ਗਣ੍ਹਨਤ੍ਥਾਯ ਪਯੋਜੇਨ੍ਤਿ. ਅਥ ਨੋਤਿ ਅਥ ਅਮ੍ਹੇ ਅਕਾਰਣਸ੍ਮਾ ਅਕਾਰਣੇਨ ਅਭੂਮਿਯਂ ਅਨੋਕਾਸੇਯੇਵ ਕਸ੍ਮਾ, ਤਾਤ, ਹਞ੍ਞਾਮਾਤਿ ਅਤ੍ਥੋ. ਮਾ ਤਸ੍ਸ ਸਦ੍ਦਹੇਸੀਤਿ ਮਹਾਰਾਜ, ਨ ਮਂ ਖਣ੍ਡਹਾਲੋ ਘਾਤਯੇ, ਮਾ ਤਸ੍ਸ ਸਦ੍ਦਹੇਯ੍ਯਾਸਿ. ਭੋਗਮ੍ਪਿਸ੍ਸਾਤਿ ਭੋਗਮ੍ਪਿ ਅਸ੍ਸ ਬ੍ਰਾਹ੍ਮਣਸ੍ਸ ਰਾਜਾਨੋ ਦੇਨ੍ਤਿ. ਅਥਗ੍ਗਪਿਣ੍ਡਿਕਾਪੀਤਿ ਅਥ ਤੇ ਅਗ੍ਗੋਦਕਂ ਅਗ੍ਗਪਿਣ੍ਡਂ ਲਭਨ੍ਤਾ ਅਗ੍ਗਪਿਣ੍ਡਿਕਾਪਿ ਹੋਨ੍ਤਿ. ਤੇਸਮ੍ਪੀਤਿ ਯੇਸਂ ਕੁਲੇ ਭੁਞ੍ਜਨ੍ਤਿ, ਤੇਸਮ੍ਪਿ ਏਵਰੂਪਾਨਂ ਪਿਣ੍ਡਦਾਯਕਾਨਂ ਦੁਬ੍ਭਿਤੁਂ ਇਚ੍ਛਨ੍ਤਿ.

ਰਾਜਾ ਕੁਮਾਰਸ੍ਸ ਵਿਲਾਪਂ ਸੁਤ੍ਵਾ –

੧੦੨੮.

‘‘ਦੁਕ੍ਖਂ ਖੋ ਮੇ ਜਨਯਥ, ਵਿਲਪਨ੍ਤਾ ਜੀਵਿਤਸ੍ਸ ਕਾਮਾ ਹਿ;

ਮੁਞ੍ਚੇਥ ਦਾਨਿ ਕੁਮਾਰੇ, ਅਲਮ੍ਪਿ ਮੇ ਹੋਤੁ ਪੁਤ੍ਤਯਞ੍ਞੇਨਾ’’ਤਿ. –

ਇਮਂ ਗਾਥਂ ਵਤ੍ਵਾ ਪੁਨਪਿ ਮੋਚੇਸਿ. ਖਣ੍ਡਹਾਲੋ ਆਗਨ੍ਤ੍ਵਾ ਪੁਨਪਿ –

੧੦੨੯.

‘‘ਪੁਬ੍ਬੇਵ ਖੋਸਿ ਮੇ ਵੁਤ੍ਤੋ, ਦੁਕ੍ਕਰਂ ਦੁਰਭਿਸਮ੍ਭਵਞ੍ਚੇਤਂ;

ਅਥ ਨੋ ਉਪਕ੍ਖਟਸ੍ਸ ਯਞ੍ਞਸ੍ਸ, ਕਸ੍ਮਾ ਕਰੋਸਿ ਵਿਕ੍ਖੇਪਂ.

੧੦੩੦.

‘‘ਸਬ੍ਬੇ ਵਜਨ੍ਤਿ ਸੁਗਤਿਂ, ਯੇ ਯਜਨ੍ਤਿ ਯੇਪਿ ਯਾਜੇਨ੍ਤਿ;

ਯੇ ਚਾਪਿ ਅਨੁਮੋਦਨ੍ਤਿ, ਯਜਨ੍ਤਾਨਂ ਏਦਿਸਂ ਮਹਾਯਞ੍ਞ’’ਨ੍ਤਿ. –

ਏਵਂ ਵਤ੍ਵਾ ਪੁਨ ਗਣ੍ਹਾਪੇਸਿ. ਅਥਸ੍ਸ ਅਨੁਨਯਨਤ੍ਥਂ ਕੁਮਾਰੋ ਆਹ –

੧੦੩੧.

‘‘ਯਦਿ ਕਿਰ ਯਜਿਤ੍ਵਾ ਪੁਤ੍ਤੇਹਿ, ਦੇਵਲੋਕਂ ਇਤੋ ਚੁਤਾ ਯਨ੍ਤਿ;

ਬ੍ਰਾਹ੍ਮਣੋ ਤਾਵ ਯਜਤੁ, ਪਚ੍ਛਾਪਿ ਯਜਸਿ ਤੁਵਂ ਰਾਜ.

੧੦੩੨.

‘‘ਯਦਿ ¶ ¶ ਕਿਰ ਯਜਿਤ੍ਵਾ ਪੁਤ੍ਤੇਹਿ, ਦੇਵਲੋਕਂ ਇਤੋ ਚੁਤਾ ਯਨ੍ਤਿ;

ਏਸ੍ਵੇਵ ਖਣ੍ਡਹਾਲੋ, ਯਜਤਂ ਸਕੇਹਿ ਪੁਤ੍ਤੇਹਿ.

੧੦੩੩.

‘‘ਏਵਂ ਜਾਨਨ੍ਤੋ ਖਣ੍ਡਹਾਲੋ, ਕਿਂ ਪੁਤ੍ਤਕੇ ਨ ਘਾਤੇਸਿ;

ਸਬ੍ਬਞ੍ਚ ਞਾਤਿਜਨਂ, ਅਤ੍ਤਾਨਞ੍ਚ ਨ ਘਾਤੇਸਿ.

੧੦੩੪.

‘‘ਸਬ੍ਬੇ ਵਜਨ੍ਤਿ ਨਿਰਯਂ, ਯੇ ਯਜਨ੍ਤਿ ਯੇਪਿ ਯਾਜੇਨ੍ਤਿ;

ਯੇ ਚਾਪਿ ਅਨੁਮੋਦਨ੍ਤਿ, ਯਜਨ੍ਤਾਨਂ ਏਦਿਸਂ ਮਹਾਯਞ੍ਞਂ.

੧੦੩੫.

‘‘ਸਚੇ ਹਿ ਸੋ ਸੁਜ੍ਝਤਿ ਯੋ ਹਨਾਤਿ, ਹਤੋਪਿ ਸੋ ਸਗ੍ਗਮੁਪੇਤਿ ਠਾਨਂ;

ਭੋਵਾਦਿ ਭੋਵਾਦਿਨ ਮਾਰਯੇਯ੍ਯੁਂ, ਯੇ ਚਾਪਿ ਤੇਸਂ ਅਭਿਸਦ੍ਦਹੇਯ੍ਯੁ’’ਨ੍ਤਿ.

ਤਤ੍ਥ ਬ੍ਰਾਹ੍ਮਣੋ ਤਾਵਾਤਿ ਪਠਮਂ ਤਾਵ ਖਣ੍ਡਹਾਲੋ ਯਜਤੁ ਸਕੇਹਿ ਪੁਤ੍ਤੇਹਿ, ਅਥ ਤਸ੍ਮਿਂ ਏਵਂ ਯਜਿਤ੍ਵਾ ਦੇਵਲੋਕਂ ਗਤੇ ਪਚ੍ਛਾ ਤ੍ਵਂ ਯਜਿਸ੍ਸਸਿ. ਦੇਵ, ਸਾਦੁਰਸਭੋਜਨਮ੍ਪਿ ਹਿ ਤ੍ਵਂ ਅਞ੍ਞੇਹਿ ਵੀਮਂਸਾਪੇਤ੍ਵਾ ਭੁਞ੍ਜਸਿ, ਪੁਤ੍ਤਦਾਰਮਾਰਣਂਯੇਵ ਕਸ੍ਮਾ ਅਵੀਮਂਸਿਤ੍ਵਾ ਕਰੋਸੀਤਿ ਦੀਪੇਨ੍ਤੋ ਏਵਮਾਹ. ਏਵਂ ਜਾਨਨ੍ਤੋਤਿ ‘‘ਪੁਤ੍ਤਧੀਤਰੋ ਮਾਰੇਤ੍ਵਾ ਦੇਵਲੋਕਂ ਗਚ੍ਛਤੀ’’ਤਿ ਏਵਂ ਜਾਨਨ੍ਤੋ ਕਿਂਕਾਰਣਾ ਅਤ੍ਤਨੋ ਪੁਤ੍ਤੇ ਚ ਞਾਤੀ ਚ ਅਤ੍ਤਾਨਞ੍ਚ ਨ ਘਾਤੇਸਿ. ਸਚੇ ਹਿ ਪਰਂ ਮਾਰੇਤ੍ਵਾ ਦੇਵਲੋਕਂ ਗਚ੍ਛਨ੍ਤਿ, ਅਤ੍ਤਾਨਂ ਮਾਰੇਤ੍ਵਾ ਬ੍ਰਹ੍ਮਲੋਕਂ ਗਨ੍ਤਬ੍ਬੋ ਭਵਿਸ੍ਸਤਿ. ਏਵਂ ਯਞ੍ਞਗੁਣਂ ਜਾਨਨ੍ਤੇਨ ਪਰਂ ਅਮਾਰੇਤ੍ਵਾ ਅਤ੍ਤਾਵ ਮਾਰੇਤਬ੍ਬੋ ਸਿਯਾ. ਅਯਂ ਪਨ ਤਥਾ ਅਕਤ੍ਵਾ ਮਂ ਮਾਰਾਪੇਤਿ. ਇਮਿਨਾਪਿ ਕਾਰਣੇਨ ਜਾਨਾਹਿ, ਮਹਾਰਾਜ ‘‘ਯਥਾ ਏਸ ਵਿਨਿਚ੍ਛਯੇ ਵਿਲੋਪਂ ਕਾਤੁਂ ਅਲਭਨ੍ਤੋ ਏਵਂ ਕਰੋਤੀ’’ਤਿ. ਏਦਿਸਨ੍ਤਿ ਏਵਰੂਪਂ ਪੁਤ੍ਤਘਾਤਯਞ੍ਞਂ.

ਕੁਮਾਰੋ ਏਤ੍ਤਕਂ ਕਥੇਨ੍ਤੋਪਿ ਪਿਤਰਂ ਅਤ੍ਤਨੋ ਵਚਨਂ ਗਾਹਾਪੇਤੁਂ ਅਸਕ੍ਕੋਨ੍ਤੋ ਰਾਜਾਨਂ ਪਰਿਵਾਰੇਤ੍ਵਾ ਠਿਤਂ ਪਰਿਸਂ ਆਰਬ੍ਭ ਆਹ –

੧੦੩੬.

‘‘ਕਥਞ੍ਚ ਕਿਰ ਪੁਤ੍ਤਕਾਮਾਯੋ, ਗਹਪਤਯੋ ਘਰਣਿਯੋ ਚ;

ਨਗਰਮ੍ਹਿ ਨ ਉਪਰਵਨ੍ਤਿ ਰਾਜਾਨਂ, ਮਾ ਘਾਤਯਿ ਓਰਸਂ ਪੁਤ੍ਤਂ.

੧੦੩੭.

‘‘ਕਥਞ੍ਚ ¶ ਕਿਰ ਪੁਤ੍ਤਕਾਮਾਯੋ, ਗਹਪਤਯੋ ਘਰਣਿਯੋ ਚ;

ਨਗਰਮ੍ਹਿ ਨ ਉਪਰਵਨ੍ਤਿ ਰਾਜਾਨਂ, ਮਾ ਘਾਤਯਿ ਅਤ੍ਰਜਂ ਪੁਤ੍ਤਂ.

੧੦੩੮.

‘‘ਰਞ੍ਞੋ ¶ ਚਮ੍ਹਿ ਅਤ੍ਥਕਾਮੋ, ਹਿਤੋ ਚ ਸਬ੍ਬਜਨਪਦਸ੍ਸ;

ਨ ਕੋਚਿ ਅਸ੍ਸ ਪਟਿਘਂ, ਮਯਾ ਜਾਨਪਦੋ ਨ ਪਵੇਦੇਤੀ’’ਤਿ.

ਤਤ੍ਥ ਪੁਤ੍ਤਕਾਮਾਯੋਤਿ ਘਰਣਿਯੋ ਸਨ੍ਧਾਯ ਵੁਤ੍ਤਂ. ਗਹਪਤਯੋ ਪਨ ਪੁਤ੍ਤਕਾਮਾ ਨਾਮ ਹੋਨ੍ਤਿ. ਨ ਉਪਰਵਨ੍ਤੀਤਿ ਨ ਉਪਕ੍ਕੋਸਨ੍ਤਿ ਨ ਵਦਨ੍ਤਿ. ਅਤ੍ਰਜਨ੍ਤਿ ਅਤ੍ਤਤੋ ਜਾਤਂ. ਏਵਂ ਵੁਤ੍ਤੇਪਿ ਕੋਚਿ ਰਞ੍ਞਾ ਸਦ੍ਧਿਂ ਕਥੇਤੁਂ ਸਮਤ੍ਥੋ ਨਾਮ ਨਾਹੋਸਿ. ਨ ਕੋਚਿ ਅਸ੍ਸ ਪਟਿਘਂ ਮਯਾਤਿ ਇਮਿਨਾ ਨੋ ਲਞ੍ਜੋ ਵਾ ਗਹਿਤੋ, ਇਸ੍ਸਰਿਯਮਦੇਨ ਵਾ ਇਦਂ ਨਾਮ ਦੁਕ੍ਖਂ ਕਤਨ੍ਤਿ ਕੋਚਿ ਏਕੋਪਿ ਮਯਾ ਸਦ੍ਧਿਂ ਪਟਿਘਂ ਕਤ੍ਤਾ ਨਾਮ ਨਾਹੋਸਿ. ਜਾਨਪਦੋ ਨ ਪਵੇਦੇਤੀਤਿ ਏਵਂ ਰਞ੍ਞੋ ਚ ਜਨਪਦਸ੍ਸ ਚ ਅਤ੍ਥਕਾਮਸ੍ਸ ਮਮ ਪਿਤਰਂ ਅਯਂ ਜਾਨਪਦੋ ‘‘ਗੁਣਸਮ੍ਪਨ੍ਨੋ ਤੇ ਪੁਤ੍ਤੋ’’ਤਿ ਨ ਪਵੇਦੇਤਿ, ਨ ਜਾਨਾਪੇਤੀਤਿ ਅਤ੍ਥੋ.

ਏਵਂ ਵੁਤ੍ਤੇਪਿ ਕੋਚਿ ਕਿਞ੍ਚਿ ਨ ਕਥੇਸਿ. ਤਤੋ ਚਨ੍ਦਕੁਮਾਰੋ ਅਤ੍ਤਨੋ ਭਰਿਯਾਯੋ ਤਂ ਯਾਚਨਤ੍ਥਾਯ ਉਯ੍ਯੋਜੇਨ੍ਤੋ ਆਹ –

੧੦੩੯.

‘‘ਗਚ੍ਛਥ ਵੋ ਘਰਣਿਯੋ, ਤਾਤਞ੍ਚ ਵਦੇਥ ਖਣ੍ਡਹਾਲਞ੍ਚ;

ਮਾ ਘਾਤੇਥ ਕੁਮਾਰੇ, ਅਦੂਸਕੇ ਸੀਹਸਙ੍ਕਾਸੇ.

੧੦੪੦.

‘‘ਗਚ੍ਛਥ ਵੋ ਘਰਣਿਯੋ, ਤਾਤਞ੍ਚ ਵਦੇਥ ਖਣ੍ਡਹਾਲਞ੍ਚ;

ਮਾ ਘਾਤੇਥ ਕੁਮਾਰੇ, ਅਪੇਕ੍ਖਿਤੇ ਸਬ੍ਬਲੋਕਸ੍ਸਾ’’ਤਿ.

ਤਾ ਗਨ੍ਤ੍ਵਾ ਯਾਚਿਂਸੁ. ਤਾਪਿ ਰਾਜਾ ਨ ਓਲੋਕੇਸਿ. ਤਤੋ ਕੁਮਾਰੋ ਅਨਾਥੋ ਹੁਤ੍ਵਾ ਵਿਲਪਨ੍ਤੋ –

੧੦੪੧.

‘‘ਯਂਨੂਨਾਹਂ ਜਾਯੇਯ੍ਯਂ, ਰਥਕਾਰਕੁਲੇਸੁ ਵਾ,

ਪੁਕ੍ਕੁਸਕੁਲੇਸੁ ਵਾ ਵੇਸ੍ਸੇਸੁ ਵਾ ਜਾਯੇਯ੍ਯਂ,

ਨ ਹਜ੍ਜ ਮਂ ਰਾਜ ਯਞ੍ਞੇ ਘਾਤੇਯ੍ਯਾ’’ਤਿ. –

ਵਤ੍ਵਾ ਪੁਨ ਤਾ ਭਰਿਯਾਯੋ ਉਯ੍ਯੋਜੇਨ੍ਤੋ ਆਹ –

੧੦੪੨.

‘‘ਸਬ੍ਬਾ ਸੀਮਨ੍ਤਿਨਿਯੋ ਗਚ੍ਛਥ, ਅਯ੍ਯਸ੍ਸ ਖਣ੍ਡਹਾਲਸ੍ਸ;

ਪਾਦੇਸੁ ਨਿਪਤਥ, ਅਪਰਾਧਾਹਂ ਨ ਪਸ੍ਸਾਮਿ.

੧੦੪੩.

‘‘ਸਬ੍ਬਾ ¶ ¶ ਸੀਮਨ੍ਤਿਨਿਯੋ ਗਚ੍ਛਥ, ਅਯ੍ਯਸ੍ਸ ਖਣ੍ਡਹਾਲਸ੍ਸ;

ਪਾਦੇਸੁ ਨਿਪਤਥ, ਕਿਨ੍ਤੇ ਭਨ੍ਤੇ ਮਯਂ ਅਦੂਸੇਮਾ’’ਤਿ.

ਤਤ੍ਥ ਅਪਰਾਧਾਹਂ ਨ ਪਸ੍ਸਾਮੀਤਿ ਅਹਂ ਆਚਰਿਯਖਣ੍ਡਹਾਲੇ ਅਤ੍ਤਨੋ ਅਪਰਾਧਂ ਨ ਪਸ੍ਸਾਮਿ. ਕਿਨ੍ਤੇ ਭਨ੍ਤੇਤਿ ਅਯ੍ਯ ਖਣ੍ਡਹਾਲ, ਮਯਂ ਤੁਯ੍ਹਂ ਕਿਂ ਦੂਸਯਿਮ੍ਹਾ, ਅਥ ਚਨ੍ਦਕੁਮਾਰਸ੍ਸ ਦੋਸੋ ਅਤ੍ਥਿ, ਤਂ ਖਮਥਾਤਿ ਵਦੇਥਾਤਿ.

ਅਥ ਚਨ੍ਦਕੁਮਾਰਸ੍ਸ ਕਨਿਟ੍ਠਭਗਿਨੀ ਸੇਲਕੁਮਾਰੀ ਨਾਮ ਸੋਕਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੀ ਪਿਤੁ ਪਾਦਮੂਲੇ ਪਤਿਤ੍ਵਾ ਪਰਿਦੇਵਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੦੪੪.

‘‘ਕਪਣਾ ਵਿਲਪਤਿ ਸੇਲਾ, ਦਿਸ੍ਵਾਨ ਭਾਤਰੇ ਉਪਨੀਤਤ੍ਤੇ;

ਯਞ੍ਞੋ ਕਿਰ ਮੇ ਉਕ੍ਖਿਪਿਤੋ, ਤਾਤੇਨ ਸਗ੍ਗਕਾਮੇਨਾ’’ਤਿ.

ਤਤ੍ਥ ਉਪਨੀਤਤ੍ਤੇਤਿ ਉਪਨੀਤਸਭਾਵੇ. ਉਕ੍ਖਿਪਿਤੋਤਿ ਉਕ੍ਖਿਤ੍ਤੋ. ਸਗ੍ਗਕਾਮੇਨੋਤਿ ਮਮ ਭਾਤਰੋ ਮਾਰੇਤ੍ਵਾ ਸਗ੍ਗਂ ਇਚ੍ਛਨ੍ਤੇਨ. ਤਾਤ, ਇਮੇ ਮਾਰੇਤ੍ਵਾ ਕਿਂ ਸਗ੍ਗੇਨ ਕਰਿਸ੍ਸਸੀਤਿ ਵਿਲਪਤਿ.

ਰਾਜਾ ਤਸ੍ਸਾਪਿ ਕਥਂ ਨ ਗਣ੍ਹਿ. ਤਤੋ ਚਨ੍ਦਕੁਮਾਰਸ੍ਸ ਪੁਤ੍ਤੋ ਵਸੁਲੋ ਨਾਮ ਪਿਤਰਂ ਦੁਕ੍ਖਿਤਂ ਦਿਸ੍ਵਾ ‘‘ਅਹਂ ਅਯ੍ਯਕਂ ਯਾਚਿਤ੍ਵਾ ਮਮ ਪਿਤੁ ਜੀਵਿਤਂ ਦਾਪੇਸ੍ਸਾਮੀ’’ਤਿ ਰਞ੍ਞੋ ਪਾਦਮੂਲੇ ਪਰਿਦੇਵਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੦੪੫.

‘‘ਆਵਤ੍ਤਿ ਪਰਿਵਤ੍ਤਿ ਚ, ਵਸੁਲੋ ਸਮ੍ਮੁਖਾ ਰਞ੍ਞੋ;

ਮਾ ਨੋ ਪਿਤਰਂ ਅਵਧਿ, ਦਹਰਮ੍ਹਾਯੋਬ੍ਬਨਂ ਪਤ੍ਤਾ’’ਤਿ.

ਤਤ੍ਥ ਦਹਰਮ੍ਹਾਯੋਬ੍ਬਨਂ ਪਤ੍ਤਾਤਿ ਦੇਵ, ਮਯਂ ਤਰੁਣਦਾਰਕਾ, ਨ ਤਾਵ ਯੋਬ੍ਬਨਪ੍ਪਤ੍ਤਾ, ਅਮ੍ਹੇਸੁਪਿ ਤਾਵ ਅਨੁਕਮ੍ਪਾਯ ਅਮ੍ਹਾਕਂ ਪਿਤਰਂ ਮਾ ਅਵਧੀਤਿ.

ਰਾਜਾ ਤਸ੍ਸ ਪਰਿਦੇਵਿਤਂ ਸੁਤ੍ਵਾ ਭਿਜ੍ਜਮਾਨਹਦਯੋ ਵਿਯ ਹੁਤ੍ਵਾ ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ ਕੁਮਾਰਂ ਆਲਿਙ੍ਗਿਤ੍ਵਾ ‘‘ਤਾਤ, ਅਸ੍ਸਾਸਂ ਪਟਿਲਭ, ਵਿਸ੍ਸਜ੍ਜੇਮਿ ਤੇ ਪਿਤਰ’’ਨ੍ਤਿ ਵਤ੍ਵਾ ਗਾਥਮਾਹ –

੧੦੪੬.

‘‘ਏਸੋ ¶ ਤੇ ਵਸੁਲ ਪਿਤਾ, ਸਮੇਹਿ ਪਿਤਰਾ ਸਹ;

ਦੁਕ੍ਖਂ ਖੋ ਮੇ ਜਨਯਸਿ, ਵਿਲਪਨ੍ਤੋ ਅਨ੍ਤੇਪੁਰਸ੍ਮਿਂ;

ਮੁਞ੍ਚੇਥ ਦਾਨਿ ਕੁਮਾਰੇ, ਅਲਮ੍ਪਿ ਮੇ ਹੋਤੁ ਪੁਤ੍ਤਯਞ੍ਞੇਨਾ’’ਤਿ.

ਤਤ੍ਥ ਅਨ੍ਤੇਪੁਰਸ੍ਮਿਨ੍ਤਿ ਰਾਜਨਿਵੇਸਨਸ੍ਸ ਅਨ੍ਤਰੇ.

ਪੁਨ ¶ ਖਣ੍ਡਹਾਲੋ ਆਗਨ੍ਤ੍ਵਾ ਆਹ –

੧੦੪੭.

‘‘ਪੁਬ੍ਬੇਵ ਖੋਸਿ ਮੇ ਵੁਤ੍ਤੋ, ਦੁਕ੍ਕਰਂ ਦੁਰਭਿਸਮ੍ਭਵਞ੍ਚੇਤਂ;

ਅਥ ਨੋ ਉਪਕ੍ਖਟਸ੍ਸ ਯਞ੍ਞਸ੍ਸ, ਕਸ੍ਮਾ ਕਰੋਸਿ ਵਿਕ੍ਖੇਪਂ.

੧੦੪੮.

‘‘ਸਬ੍ਬੇ ਵਜਨ੍ਤਿ ਸੁਗਤਿਂ, ਯੇ ਯਜਨ੍ਤਿ ਯੇਪਿ ਯਾਜੇਨ੍ਤਿ;

ਯੇ ਚਾਪਿ ਅਨੁਮੋਦਨ੍ਤਿ, ਯਜਨ੍ਤਾਨਂ ਏਦਿਸਂ ਮਹਾਯਞ੍ਞ’’ਨ੍ਤਿ.

ਰਾਜਾ ਪਨ ਅਨ੍ਧਬਾਲੋ ਪੁਨ ਤਸ੍ਸ ਵਚਨੇਨ ਪੁਤ੍ਤੇ ਗਣ੍ਹਾਪੇਸਿ. ਤਤੋ ਖਣ੍ਡਹਾਲੋ ਚਿਨ੍ਤੇਸਿ – ‘‘ਅਯਂ ਰਾਜਾ ਮੁਦੁਚਿਤ੍ਤੋ ਕਾਲੇਨ ਗਣ੍ਹਾਪੇਤਿ, ਕਾਲੇਨ ਵਿਸ੍ਸਜ੍ਜੇਤਿ, ਪੁਨਪਿ ਦਾਰਕਾਨਂ ਵਚਨੇਨ ਪੁਤ੍ਤੇ ਵਿਸ੍ਸਜ੍ਜੇਯ੍ਯ, ਯਞ੍ਞਾਵਾਟਞ੍ਞੇਵ ਨਂ ਨੇਮੀ’’ਤਿ. ਅਥਸ੍ਸ ਤਤ੍ਥ ਗਮਨਤ੍ਥਾਯ ਗਾਥਮਾਹ –

੧੦੪੯.

‘‘ਸਬ੍ਬਰਤਨਸ੍ਸ ਯਞ੍ਞੋ ਉਪਕ੍ਖਟੋ, ਏਕਰਾਜ ਤਵ ਪਟਿਯਤ੍ਤੋ;

ਅਭਿਨਿਕ੍ਖਮਸ੍ਸੁ ਦੇਵ, ਸਗ੍ਗਂ ਗਤੋ ਤ੍ਵਂ ਪਮੋਦਿਸ੍ਸਸੀ’’ਤਿ.

ਤਸ੍ਸਤ੍ਥੋ – ਮਹਾਰਾਜ, ਤਵ ਯਞ੍ਞੋ ਸਬ੍ਬਰਤਨੇਹਿ ਉਪਕ੍ਖਟੋ ਪਟਿਯਤ੍ਤੋ, ਇਦਾਨਿ ਤੇ ਅਭਿਨਿਕ੍ਖਮਨਕਾਲੋ, ਤਸ੍ਮਾ ਅਭਿਨਿਕ੍ਖਮ, ਯਞ੍ਞਂ ਯਜਿਤ੍ਵਾ ਸਗ੍ਗਂ ਗਤੋ ਪਮੋਦਿਸ੍ਸਸੀਤਿ.

ਤਤੋ ਬੋਧਿਸਤ੍ਤਂ ਆਦਾਯ ਯਞ੍ਞਾਵਾਟਗਮਨਕਾਲੇ ਤਸ੍ਸ ਓਰੋਧਾ ਏਕਤੋਵ ਨਿਕ੍ਖਮਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੦੫੦.

‘‘ਦਹਰਾ ਸਤ੍ਤਸਤਾ ਏਤਾ, ਚਨ੍ਦਕੁਮਾਰਸ੍ਸ ਭਰਿਯਾਯੋ;

ਕੇਸੇ ਪਕਿਰਿਤ੍ਵਾਨ, ਰੋਦਨ੍ਤਿਯੋ ਮਗ੍ਗਮਨੁਯਾਯਿਂਸੁ.

੧੦੫੧.

‘‘ਅਪਰਾ ¶ ਪਨ ਸੋਕੇਨ, ਨਿਕ੍ਖਨ੍ਤਾ ਨਨ੍ਦਨੇ ਵਿਯ ਦੇਵਾ;

ਕੇਸੇ ਪਕਿਰਿਤ੍ਵਾਨ, ਰੋਦਨ੍ਤਿਯੋ ਮਗ੍ਗਮਨੁਯਾਯਿਸੁ’’ਨ੍ਤਿ.

ਤਤ੍ਥ ਨਨ੍ਦਨੇ ਵਿਯ ਦੇਵਾਤਿ ਨਨ੍ਦਨਵਨੇ ਚਵਨਦੇਵਪੁਤ੍ਤਂ ਪਰਿਵਾਰੇਤ੍ਵਾ ਨਿਕ੍ਖਨ੍ਤਦੇਵਤਾ ਵਿਯ ਗਤਾ.

ਇਤੋ ¶ ਪਰਂ ਤਾਸਂ ਵਿਲਾਪਗਾਥਾ ਹੋਨ੍ਤਿ –

੧੦੫੨.

‘‘ਕਾਸਿਕਸੁਚਿਵਤ੍ਥਧਰਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨੀਯਨ੍ਤਿ ਚਨ੍ਦਸੂਰਿਯਾ, ਯਞ੍ਞਤ੍ਥਾਯ ਏਕਰਾਜਸ੍ਸ.

੧੦੫੩.

‘‘ਕਾਸਿਕਸੁਚਿਵਤ੍ਥਧਰਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨੀਯਨ੍ਤਿ ਚਨ੍ਦਸੂਰਿਯਾ, ਮਾਤੁ ਕਤ੍ਵਾ ਹਦਯਸੋਕਂ.

੧੦੫੪.

‘‘ਕਾਸਿਕਸੁਚਿਵਤ੍ਥਧਰਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨੀਯਨ੍ਤਿ ਚਨ੍ਦਸੂਰਿਯਾ, ਜਨਸ੍ਸ ਕਤ੍ਵਾ ਹਦਯਸੋਕਂ.

੧੦੫੫.

‘‘ਮਂਸਰਸਭੋਜਨਾ ਨ੍ਹਾਪਕਸੁਨ੍ਹਾਪਿਤਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨੀਯਨ੍ਤਿ ਚਨ੍ਦਸੂਰਿਯਾ, ਯਞ੍ਞਤ੍ਥਾਯ ਏਕਰਾਜਸ੍ਸ.

੧੦੫੬.

‘‘ਮਂਸਰਸਭੋਜਨਾ ਨ੍ਹਾਪਕਸੁਨ੍ਹਾਪਿਤਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨੀਯਨ੍ਤਿ ਚਨ੍ਦਸੂਰਿਯਾ, ਮਾਤੁ ਕਤ੍ਵਾ ਹਦਯਸੋਕਂ.

੧੦੫੭.

‘‘ਮਂਸਰਸਭੋਜਨਾ ਨ੍ਹਾਪਕਸੁਨ੍ਹਾਪਿਤਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨੀਯਨ੍ਤਿ ਚਨ੍ਦਸੂਰਿਯਾ, ਜਨਸ੍ਸ ਕਤ੍ਵਾ ਹਦਯਸੋਕਂ.

੧੦੫੮.

‘‘ਯਸ੍ਸੁ ਪੁਬ੍ਬੇ ਹਤ੍ਥਿਵਰਧੁਰਗਤੇ, ਹਤ੍ਥੀਹਿ ਅਨੁਵਜਨ੍ਤਿ;

ਤ੍ਯਜ੍ਜ ਚਨ੍ਦਸੂਰਿਯਾ, ਉਭੋਵ ਪਤ੍ਤਿਕਾ ਯਨ੍ਤਿ.

੧੦੫੯.

‘‘ਯਸ੍ਸੁ ¶ ਪੁਬ੍ਬੇ ਅਸ੍ਸਵਰਧੁਰਗਤੇ, ਅਸ੍ਸੇਹਿ ਅਨੁਵਜਨ੍ਤਿ;

ਤ੍ਯਜ੍ਜ ਚਨ੍ਦਸੂਰਿਯਾ, ਉਭੋਵ ਪਤ੍ਤਿਕਾ ਯਨ੍ਤਿ.

੧੦੬੦.

‘‘ਯਸ੍ਸੁ ਪੁਬ੍ਬੇ ਰਥਵਰਧੁਰਗਤੇ, ਰਥੇਹਿ ਅਨੁਵਜਨ੍ਤਿ;

ਤ੍ਯਜ੍ਜ ਚਨ੍ਦਸੂਰਿਯਾ, ਉਭੋਵ ਪਤ੍ਤਿਕਾ ਯਨ੍ਤਿ.

੧੦੬੧.

‘‘ਯੇਹਿਸ੍ਸੁ ਪੁਬ੍ਬੇ ਨਿਯ੍ਯਂਸੁ, ਤਪਨੀਯਕਪ੍ਪਨੇਹਿ ਤੁਰਙ੍ਗੇਹਿ;

ਤ੍ਯਜ੍ਜ ਚਨ੍ਦਸੂਰਿਯਾ, ਉਭੋਵ ਪਤ੍ਤਿਕਾ ਯਨ੍ਤੀ’’ਤਿ.

ਤਤ੍ਥ ਕਾਸਿਕਸੁਚਿਵਤ੍ਥਧਰਾਤਿ ਕਾਸਿਕਾਨਿ ਸੁਚਿਵਤ੍ਥਾਨਿ ਧਾਰਯਮਾਨਾ. ਚਨ੍ਦਸੂਰਿਯਾਤਿ ਚਨ੍ਦਕੁਮਾਰੋ ਚ ਸੂਰਿਯਕੁਮਾਰੋ ਚ. ਨ੍ਹਾਪਕਸੁਨ੍ਹਾਪਿਤਾਤਿ ਚਨ੍ਦਨਚੁਣ੍ਣੇਨ ¶ ਉਬ੍ਬਟ੍ਟੇਤ੍ਵਾ ਨ੍ਹਾਪਕੇਹਿ ਕਤਪਰਿਕਮ੍ਮਤਾਯ ਸੁਨ੍ਹਾਪਿਤਾ. ਯਸ੍ਸੂਤਿ ਯੇ ਅਸ੍ਸੁ. ਅਸ੍ਸੂਤਿ ਨਿਪਾਤਮਤ੍ਤਂ, ਯੇ ਕੁਮਾਰੇਤਿ ਅਤ੍ਥੋ. ਪੁਬ੍ਬੇਤਿ ਇਤੋ ਪੁਬ੍ਬੇ. ਹਤ੍ਥਿਵਰਧੁਰਗਤੇਤਿ ਹਤ੍ਥਿਵਰਾਨਂ ਧੁਰਗਤੇ, ਅਲਙ੍ਕਤਹਤ੍ਥਿਕ੍ਖਨ੍ਧਵਰਗਤੇਤਿ ਅਤ੍ਥੋ. ਅਸ੍ਸਵਰਧੁਰਗਤੇਤਿ ਅਸ੍ਸਵਰਪਿਟ੍ਠਿਗਤੇ. ਰਥਵਰਧੁਰਗਤੇਤਿ ਰਥਵਰਮਜ੍ਝਗਤੇ. ਨਿਯ੍ਯਂਸੂਤਿ ਨਿਕ੍ਖਮਿਂਸੁ.

ਏਵਂ ਤਾਸੁ ਪਰਿਦੇਵਨ੍ਤੀਸੁਯੇਵ ਬੋਧਿਸਤ੍ਤਂ ਨਗਰਾ ਨੀਹਰਿਂਸੁ. ਸਕਲਨਗਰਂ ਸਙ੍ਖੁਭਿਤ੍ਵਾ ਨਿਕ੍ਖਮਿਤੁਂ ਆਰਭਿ. ਮਹਾਜਨੇ ਨਿਕ੍ਖਨ੍ਤੇ ਦ੍ਵਾਰਾਨਿ ਨਪ੍ਪਹੋਨ੍ਤਿ. ਬ੍ਰਾਹ੍ਮਣੋ ਅਤਿਬਹੁਂ ਜਨਂ ਦਿਸ੍ਵਾ ‘‘ਕੋ ਜਾਨਾਤਿ, ਕਿਂ ਭਵਿਸ੍ਸਤੀ’’ਤਿ ਨਗਰਦ੍ਵਾਰਾਨਿ ਥਕਾਪੇਸਿ. ਮਹਾਜਨੋ ਨਿਕ੍ਖਮਿਤੁਂ ਅਲਭਨ੍ਤੋ ਨਗਰਦ੍ਵਾਰਸ੍ਸ ਆਸਨ੍ਨਟ੍ਠਾਨੇ ਉਯ੍ਯਾਨਂ ਅਤ੍ਥਿ, ਤਸ੍ਸ ਸਨ੍ਤਿਕੇ ਮਹਾਵਿਰਵਂ ਰਵਿ. ਤੇਨ ਰਵੇਨ ਸਕੁਣਸਙ੍ਘੋ ਸਙ੍ਖੁਭਿਤੋ ਆਕਾਸਂ ਪਕ੍ਖਨ੍ਦਿ. ਮਹਾਜਨੋ ਤਂ ਤਂ ਸਕੁਣਿਂ ਆਮਨ੍ਤੇਤ੍ਵਾ ਵਿਲਪਨ੍ਤੋ ਆਹ –

੧੦੬੨.

‘‘ਯਦਿ ਸਕੁਣਿ ਮਂਸਮਿਚ੍ਛਸਿ, ਡਯਸ੍ਸੁ ਪੁਬ੍ਬੇਨ ਪੁਪ੍ਫਵਤਿਯਾ;

ਯਜਤੇਤ੍ਥ ਏਕਰਾਜਾ, ਸਮ੍ਮੂਲ਼੍ਹੋ ਚਤੂਹਿ ਪੁਤ੍ਤੇਹਿ.

੧੦੬੩.

‘‘ਯਦਿ ਸਕੁਣਿ ਮਂਸਮਿਚ੍ਛਸਿ, ਡਯਸ੍ਸੁ ਪੁਬ੍ਬੇਨ ਪੁਪ੍ਫਵਤਿਯਾ;

ਯਜਤੇਤ੍ਥ ਏਕਰਾਜਾ, ਸਮ੍ਮੂਲ਼੍ਹੋ ਚਤੂਹਿ ਕਞ੍ਞਾਹਿ.

੧੦੬੪.

‘‘ਯਦਿ ਸਕੁਣਿ ਮਂਸਮਿਚ੍ਛਸਿ, ਡਯਸ੍ਸੁ ਪੁਬ੍ਬੇਨ ਪੁਪ੍ਫਵਤਿਯਾ;

ਯਜਤੇਤ੍ਥ ਏਕਰਾਜਾ, ਸਮ੍ਮੂਲ਼੍ਹੋ ਚਤੂਹਿ ਮਹੇਸੀਤਿ.

੧੦੬੫.

‘‘ਯਦਿ ¶ ਸਕੁਣਿ ਮਂਸਮਿਚ੍ਛਸਿ, ਡਯਸ੍ਸੁ ਪੁਬ੍ਬੇਨ ਪੁਪ੍ਫਵਤਿਯਾ;

ਯਜਤੇਤ੍ਥ ਏਕਰਾਜਾ, ਸਮ੍ਮੂਲ਼੍ਹੋ ਚਤੂਹਿ ਗਹਪਤੀਹਿ.

੧੦੬੬.

‘‘ਯਦਿ ਸਕੁਣਿ ਮਂਸਮਿਚ੍ਛਸਿ, ਡਯਸ੍ਸੁ ਪੁਬ੍ਬੇਨ ਪੁਪ੍ਫਵਤਿਯਾ;

ਯਜਤੇਤ੍ਥ ਏਕਰਾਜਾ, ਸਮ੍ਮੂਲ਼੍ਹੋ ਚਤੂਹਿ ਹਤ੍ਥੀਹਿ.

੧੦੬੭.

‘‘ਯਦਿ ਸਕੁਣਿ ਮਂਸਮਿਚ੍ਛਸਿ, ਡਯਸ੍ਸੁ ਪੁਬ੍ਬੇਨ ਪੁਪ੍ਫਵਤਿਯਾ;

ਯਜਤੇਤ੍ਥ ਏਕਰਾਜਾ, ਸਮ੍ਮੂਲ਼੍ਹੋ ਚਤੂਹਿ ਅਸ੍ਸੇਹਿ.

੧੦੬੮.

‘‘ਯਦਿ ਸਕੁਣਿ ਮਂਸਮਿਚ੍ਛਸਿ, ਡਯਸ੍ਸੁ ਪੁਬ੍ਬੇਨ ਪੁਪ੍ਫਵਤਿਯਾ;

ਯਜਤੇਤ੍ਥ ਏਕਰਾਜਾ, ਸਮ੍ਮੂਲ਼੍ਹੋ ਚਤੂਹਿ ਉਸਭੇਹਿ.

੧੦੬੯.

‘‘ਯਦਿ ¶ ਸਕੁਣਿ ਮਂਸਮਿਚ੍ਛਸਿ, ਡਯਸ੍ਸੁ ਪੁਬ੍ਬੇਨ ਪੁਪ੍ਫਵਤਿਯਾ;

ਯਜਤੇਤ੍ਥ ਏਕਰਾਜਾ, ਸਮ੍ਮੂਲ਼੍ਹੋ ਸਬ੍ਬਚਤੁਕ੍ਕੇਨਾ’’ਤਿ.

ਤਤ੍ਥ ਮਂਸਮਿਚ੍ਛਸੀਤਿ ਅਮ੍ਭੋ ਸਕੁਣਿ, ਸਚੇ ਮਂਸਂ ਇਚ੍ਛਸਿ, ਪੁਪ੍ਫਵਤਿਯਾ ਪੁਬ੍ਬੇਨ ਪੁਰਤ੍ਥਿਮਦਿਸਾਯਂ ਯਞ੍ਞਾਵਾਟੋ ਅਤ੍ਥਿ, ਤਤ੍ਥ ਗਚ੍ਛ. ਯਜਤੇਤ੍ਥਾਤਿ ਏਤ੍ਥ ਖਣ੍ਡਹਾਲਸ੍ਸ ਵਚਨਂ ਗਹੇਤ੍ਵਾ ਸਮ੍ਮੂਲ਼੍ਹੋ ਏਕਰਾਜਾ ਚਤੂਹਿ ਪੁਤ੍ਤੇਹਿ ਯਞ੍ਞਂ ਯਜਤਿ. ਸੇਸਗਾਥਾਸੁਪਿ ਏਸੇਵ ਨਯੋ.

ਏਵਂ ਮਹਾਜਨੋ ਤਸ੍ਮਿਂ ਠਾਨੇ ਪਰਿਦੇਵਿਤ੍ਵਾ ਬੋਧਿਸਤ੍ਤਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਪਾਸਾਦਂ ਪਦਕ੍ਖਿਣਂ ਕਰੋਨ੍ਤੋ ਅਨ੍ਤੇਪੁਰੇ ਕੂਟਾਗਾਰਉਯ੍ਯਾਨਾਦੀਨਿ ਪਸ੍ਸਨ੍ਤੋ ਗਾਥਾਹਿ ਪਰਿਦੇਵਿ –

੧੦੭੦.

‘‘ਅਯਮਸ੍ਸ ਪਾਸਾਦੋ, ਇਦਂ ਅਨ੍ਤੇਪੁਰਂ ਸੁਰਮਣੀਯਂ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ.

੧੦੭੧.

‘‘ਇਦਮਸ੍ਸ ਕੂਟਾਗਾਰਂ, ਸੋਵਣ੍ਣਂ ਪੁਪ੍ਫਮਲ੍ਯਵਿਕਿਣ੍ਣਂ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ.

੧੦੭੨.

‘‘ਇਦਮਸ੍ਸ ਉਯ੍ਯਾਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ.

੧੦੭੩.

‘‘ਇਦਮਸ੍ਸ ¶ ਅਸੋਕਵਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ.

੧੦੭੪.

‘‘ਇਦਮਸ੍ਸ ਕਣਿਕਾਰਵਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ.

੧੦੭੫.

‘‘ਇਦਮਸ੍ਸ ਪਾਟਲਿਵਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ.

੧੦੭੬.

‘‘ਇਦਮਸ੍ਸ ਅਮ੍ਬਵਨਂ, ਸੁਪੁਪ੍ਫਿਤਂ ਸਬ੍ਬਕਾਲਿਕਂ ਰਮ੍ਮਂ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ.

੧੦੭੭.

‘‘ਅਯਮਸ੍ਸ ਪੋਕ੍ਖਰਣੀ, ਸਞ੍ਛਨ੍ਨਾ ਪਦੁਮਪੁਣ੍ਡਰੀਕੇਹਿ;

ਨਾਵਾ ਚ ਸੋਵਣ੍ਣਵਿਕਤਾ, ਪੁਪ੍ਫਵਲ੍ਲਿਯਾ ਚਿਤ੍ਤਾ ਸੁਰਮਣੀਯਾ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ’’ਤਿ.

ਤਤ੍ਥ ¶ ਤੇਦਾਨੀਤਿ ਇਦਾਨਿ ਤੇ ਚਨ੍ਦਕੁਮਾਰਪ੍ਪਮੁਖਾ ਅਮ੍ਹਾਕਂ ਅਯ੍ਯਪੁਤ੍ਤਾ ਏਵਰੂਪਂ ਪਾਸਾਦਂ ਛਡ੍ਡੇਤ੍ਵਾ ਵਧਾਯ ਨੀਯਨ੍ਤਿ. ਸੋਵਣ੍ਣਵਿਕਤਾਤਿ ਸੁਵਣ੍ਣਖਚਿਤਾ.

ਏਤ੍ਤਕੇਸੁ ਠਾਨੇਸੁ ਵਿਲਪਨ੍ਤਾ ਪੁਨ ਹਤ੍ਥਿਸਾਲਾਦੀਨਿ ਉਪਸਙ੍ਕਮਿਤ੍ਵਾ ਆਹਂਸੁ –

੧੦੭੮.

‘‘ਇਦਮਸ੍ਸ ਹਤ੍ਥਿਰਤਨਂ, ਏਰਾਵਣੋ ਗਜੋ ਬਲੀ ਦਨ੍ਤੀ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ.

੧੦੭੯.

‘‘ਇਦਮਸ੍ਸ ਅਸ੍ਸਰਤਨਂ, ਏਕਖੁਰੋ ਅਸ੍ਸੋ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ.

੧੦੮੦.

‘‘ਅਯਮਸ੍ਸ ਅਸ੍ਸਰਥੋ, ਸਾਲ਼ਿਯਨਿਗ੍ਘੋਸੋ ਸੁਭੋ ਰਤਨਵਿਚਿਤ੍ਤੋ;

ਯਤ੍ਥਸ੍ਸੁ ਅਯ੍ਯਪੁਤ੍ਤਾ, ਸੋਭਿਂਸੁ ਨਨ੍ਦਨੇ ਵਿਯ ਦੇਵਾ;

ਤੇਦਾਨਿ ਅਯ੍ਯਪੁਤ੍ਤਾ, ਚਤ੍ਤਾਰੋ ਵਧਾਯ ਨਿਨ੍ਨੀਤਾ.

੧੦੮੧.

‘‘ਕਥਂ ¶ ਨਾਮ ਸਾਮਸਮਸੁਨ੍ਦਰੇਹਿ, ਚਨ੍ਦਨਮੁਦੁਕਗਤ੍ਤੇਹਿ;

ਰਾਜਾ ਯਜਿਸ੍ਸਤੇ ਯਞ੍ਞਂ, ਸਮ੍ਮੂਲ਼੍ਹੋ ਚਤੂਹਿ ਪੁਤ੍ਤੇਹਿ.

੧੦੮੨.

‘‘ਕਥਂ ਨਾਮ ਸਾਮਸਮਸੁਨ੍ਦਰਾਹਿ, ਚਨ੍ਦਨਮੁਦੁਕਗਤ੍ਤਾਹਿ;

ਰਾਜਾ ਯਜਿਸ੍ਸਤੇ ਯਞ੍ਞਂ, ਸਮ੍ਮੂਲ਼੍ਹੋ ਚਤੂਹਿ ਕਞ੍ਞਾਹਿ.

੧੦੮੩.

‘‘ਕਥਂ ਨਾਮ ਸਾਮਸਮਸੁਨ੍ਦਰਾਹਿ, ਚਨ੍ਦਨਮੁਦੁਕਗਤ੍ਤਾਹਿ;

ਰਾਜਾ ਯਜਿਸ੍ਸਤੇ ਯਞ੍ਞਂ, ਸਮ੍ਮੂਲ਼੍ਹੋ ਚਤੂਹਿ ਮਹੇਸੀਹਿ.

੧੦੮੪.

‘‘ਕਥਂ ਨਾਮ ਸਾਮਸਮਸੁਨ੍ਦਰੇਹਿ, ਚਨ੍ਦਨਮੁਦੁਕਗਤ੍ਤੇਹਿ;

ਰਾਜਾ ਯਜਿਸ੍ਸਤੇ ਯਞ੍ਞਂ, ਸਮ੍ਮੂਲ਼੍ਹੋ ਚਤੂਹਿ ਗਹਪਤੀਹਿ.

੧੦੮੫.

‘‘ਯਥਾ ਹੋਨ੍ਤਿ ਗਾਮਨਿਗਮਾ, ਸੁਞ੍ਞਾ ਅਮਨੁਸ੍ਸਕਾ ਬ੍ਰਹਾਰਞ੍ਞਾ;

ਤਥਾ ਹੇਸ੍ਸਤਿ ਪੁਪ੍ਫਵਤਿਯਾ, ਯਿਟ੍ਠੇਸੁ ਚਨ੍ਦਸੂਰਿਯੇਸੂ’’ਤਿ.

ਤਤ੍ਥ ਏਰਾਵਣੋਤਿ ਤਸ੍ਸ ਹਤ੍ਥਿਨੋ ਨਾਮਂ. ਏਕਖੁਰੋਤਿ ਅਭਿਨ੍ਨਖੁਰੋ. ਸਾਲ਼ਿਯਨਿਗ੍ਘੋਸੋਤਿ ਗਮਨਕਾਲੇ ਸਾਲ਼ਿਕਾਨਂ ਵਿਯ ਮਧੁਰੇਨ ਨਿਗ੍ਘੋਸੇਨ ¶ ਸਮਨ੍ਨਾਗਤੋ. ਕਥਂ ਨਾਮਾਤਿ ਕੇਨ ਨਾਮ ਕਾਰਣੇਨ. ਸਾਮਸਮਸੁਨ੍ਦਰੇਹੀਤਿ ਸੁਵਣ੍ਣਸਾਮੇਹਿ ਚ ਅਞ੍ਞਮਞ੍ਞਂ ਜਾਤਿਯਾ ਸਮੇਹਿ ਚ ਨਿਦ੍ਦੋਸਤਾਯ ਸੁਨ੍ਦਰੇਹਿ. ਚਨ੍ਦਨਮੁਦੁਕਗਤ੍ਤੇਹੀਤਿ ਲੋਹਿਤਚਨ੍ਦਨਲਿਤ੍ਤਗਤ੍ਤੇਹਿ. ਬ੍ਰਹਾਰਞ੍ਞਾਤਿ ਯਥਾ ਤੇ ਗਾਮਨਿਗਮਾ ਸੁਞ੍ਞਾ ਨਿਮ੍ਮਨੁਸ੍ਸਾ ਬ੍ਰਹਾਰਞ੍ਞਾ ਹੋਨ੍ਤਿ, ਤਥਾ ਪੁਪ੍ਫਵਤਿਯਾਪਿ ਯਞ੍ਞੇ ਯਿਟ੍ਠੇਸੁ ਰਾਜਪੁਤ੍ਤੇਸੁ ਸੁਞ੍ਞਾ ਅਰਞ੍ਞਸਦਿਸਾ ਭਵਿਸ੍ਸਤੀਤਿ.

ਅਥ ਮਹਾਜਨੋ ਬਹਿ ਨਿਕ੍ਖਮਿਤੁਂ ਅਲਭਨ੍ਤੋ ਅਨ੍ਤੋਨਗਰੇਯੇਵ ਵਿਚਰਨ੍ਤੋ ਪਰਿਦੇਵਿ. ਬੋਧਿਸਤ੍ਤੋਪਿ ਯਞ੍ਞਾਵਾਟਂ ਨੀਤੋ. ਅਥਸ੍ਸ ਮਾਤਾ ਗੋਤਮੀ ਨਾਮ ਦੇਵੀ ‘‘ਪੁਤ੍ਤਾਨਂ ਮੇ ਜੀਵਿਤਂ ਦੇਹਿ, ਦੇਵਾ’’ਤਿ ਰਞ੍ਞੋ ਪਾਦਮੂਲੇ ਪਰਿਵਤ੍ਤਿਤ੍ਵਾ ਪਰਿਦੇਵਮਾਨਾ ਆਹ –

੧੦੮੬.

‘‘ਉਮ੍ਮਤ੍ਤਿਕਾ ਭਵਿਸ੍ਸਾਮਿ, ਭੂਨਹਤਾ ਪਂਸੁਨਾ ਚ ਪਰਿਕਿਣ੍ਣਾ;

ਸਚੇ ਚਨ੍ਦਵਰਂ ਹਨ੍ਤਿ, ਪਾਣਾ ਮੇ ਦੇਵ ਰੁਜ੍ਝਨ੍ਤਿ.

੧੦੮੭.

‘‘ਉਮ੍ਮਤ੍ਤਿਕਾ ¶ ਭਵਿਸ੍ਸਾਮਿ, ਭੂਨਹਤਾ ਪਂਸੁਨਾ ਚ ਪਰਿਕਿਣ੍ਣਾ;

ਸਚੇ ਸੂਰਿਯਵਰਂ ਹਨ੍ਤਿ, ਪਾਣਾ ਮੇ ਦੇਵ ਰੁਜ੍ਝਨ੍ਤੀ’’ਤਿ.

ਤਤ੍ਥ ਭੂਨਹਤਾਤਿ ਹਤਵੁਡ੍ਢਿ. ਪਂਸੁਨਾ ਚ ਪਰਿਕਿਣ੍ਣਾਤਿ ਪਂਸੁਪਰਿਕਿਣ੍ਣਸਰੀਰਾ ਉਮ੍ਮਤ੍ਤਿਕਾ ਹੁਤ੍ਵਾ ਵਿਚਰਿਸ੍ਸਾਮਿ.

ਸਾ ਏਵਂ ਪਰਿਦੇਵਨ੍ਤੀਪਿ ਰਞ੍ਞੋ ਸਨ੍ਤਿਕਾ ਕਿਞ੍ਚਿ ਕਥਂ ਅਲਭਿਤ੍ਵਾ ‘‘ਮਮ ਪੁਤ੍ਤੋ ਤੁਮ੍ਹਾਕਂ ਕੁਜ੍ਝਿਤ੍ਵਾ ਗਤੋ ਭਵਿਸ੍ਸਤਿ, ਕਿਸ੍ਸ ਨਂ ਤੁਮ੍ਹੇ ਨ ਨਿਵਤ੍ਤੇਥਾ’’ਤਿ ਕੁਮਾਰਸ੍ਸ ਚਤਸ੍ਸੋ ਭਰਿਯਾਯੋ ਆਲਿਙ੍ਗਿਤ੍ਵਾ ਪਰਿਦੇਵਨ੍ਤੀ ਆਹ –

੧੦੮੮.

‘‘ਕਿਨ੍ਨੁਮਾ ਨ ਰਮਾਪੇਯ੍ਯੁਂ, ਅਞ੍ਞਮਞ੍ਞਂ ਪਿਯਂਵਦਾ;

ਘਟ੍ਟਿਕਾ ਉਪਰਿਕ੍ਖੀ ਚ, ਪੋਕ੍ਖਰਣੀ ਚ ਭਾਰਿਕਾ;

ਚਨ੍ਦਸੂਰਿਯੇਸੁ ਨਚ੍ਚਨ੍ਤਿਯੋ, ਸਮਾ ਤਾਸਂ ਨ ਵਿਜ੍ਜਤੀ’’ਤਿ.

ਤਤ੍ਥ ਕਿਨ੍ਨੁਮਾ ਨ ਰਮਾਪੇਯ੍ਯੁਨ੍ਤਿ ਕੇਨ ਕਾਰਣੇਨ ਇਮਾ ਘਟ੍ਟਿਕਾਤਿਆਦਿਕਾ ਚਤਸ੍ਸੋ ਅਞ੍ਞਮਞ੍ਞਂ ਪਿਯਂਵਦਾ ਚਨ੍ਦਸੂਰਿਯਕੁਮਾਰਾਨਂ ਸਨ੍ਤਿਕੇ ¶ ਨਚ੍ਚਨ੍ਤਿਯੋ ਮਮ ਪੁਤ੍ਤੇ ਨ ਰਮਾਪਯਿਂਸੁ, ਉਕ੍ਕਣ੍ਠਾਪਯਿਂਸੁ. ਸਕਲਜਮ੍ਬੁਦੀਪਸ੍ਮਿਞ੍ਹਿ ਨਚ੍ਚੇ ਵਾ ਗੀਤੇ ਵਾ ਸਮਾ ਅਞ੍ਞਾ ਕਾਚਿ ਤਾਸਂ ਨ ਵਿਜ੍ਜਤੀਤਿ ਅਤ੍ਥੋ.

ਇਤਿ ਸਾ ਸੁਣ੍ਹਾਹਿ ਸਦ੍ਧਿਂ ਪਰਿਦੇਵਿਤ੍ਵਾ ਅਞ੍ਞਂ ਗਹੇਤਬ੍ਬਗ੍ਗਹਣਂ ਅਪਸ੍ਸਨ੍ਤੀ ਖਣ੍ਡਹਾਲਂ ਅਕ੍ਕੋਸਮਾਨਾ ਅਟ੍ਠ ਗਾਥਾ ਅਭਾਸਿ –

੧੦੮੯.

‘‘ਇਮਂ ਮਯ੍ਹਂ ਹਦਯਸੋਕਂ, ਪਟਿਮੁਞ੍ਚਤੁ ਖਣ੍ਡਹਾਲ ਤਵ ਮਾਤਾ;

ਯੋ ਮਯ੍ਹਂ ਹਦਯਸੋਕੋ, ਚਨ੍ਦਮ੍ਹਿ ਵਧਾਯ ਨਿਨ੍ਨੀਤੇ.

੧੦੯੦.

‘‘ਇਮਂ ਮਯ੍ਹਂ ਹਦਯਸੋਕਂ, ਪਟਿਮੁਞ੍ਚਤੁ ਖਣ੍ਡਹਾਲ ਤਵ ਮਾਤਾ;

ਯੋ ਮਯ੍ਹਂ ਹਦਯਸੋਕੋ, ਸੂਰਿਯਮ੍ਹਿ ਵਧਾਯ ਨਿਨ੍ਨੀਤੇ.

੧੦੯੧.

‘‘ਇਮਂ ਮਯ੍ਹਂ ਹਦਯਸੋਕਂ, ਪਟਿਮੁਞ੍ਚਤੁ ਖਣ੍ਡਹਾਲ ਤਵ ਜਾਯਾ;

ਯੋ ਮਯ੍ਹਂ ਹਦਯਸੋਕੋ, ਚਨ੍ਦਮ੍ਹਿ ਵਧਾਯ ਨਿਨ੍ਨੀਤੇ.

੧੦੯੨.

‘‘ਇਮਂ ¶ ਮਯ੍ਹਂ ਹਦਯਸੋਕਂ, ਪਟਿਮੁਞ੍ਚਤੁ ਖਣ੍ਡਹਾਲ ਤਵ ਜਾਯਾ;

ਯੋ ਮਯ੍ਹਂ ਹਦਯਸੋਕੋ, ਸੂਰਿਯਮ੍ਹਿ ਵਧਾਯ ਨਿਨ੍ਨੀਤੇ.

੧੦੯੩.

‘‘ਮਾ ਚ ਪੁਤ੍ਤੇ ਮਾ ਚ ਪਤਿਂ, ਅਦ੍ਦਕ੍ਖਿ ਖਣ੍ਡਹਾਲ ਤਵ ਮਾਤਾ;

ਯੋ ਘਾਤੇਸਿ ਕੁਮਾਰੇ, ਅਦੂਸਕੇ ਸੀਹਸਙ੍ਕਾਸੇ.

੧੦੯੪.

‘‘ਮਾ ਚ ਪੁਤ੍ਤੇ ਮਾ ਚ ਪਤਿਂ, ਅਦ੍ਦਕ੍ਖਿ ਖਣ੍ਡਹਾਲ ਤਵ ਮਾਤਾ;

ਯੋ ਘਾਤੇਸਿ ਕੁਮਾਰੇ, ਅਪੇਕ੍ਖਿਤੇ ਸਬ੍ਬਲੋਕਸ੍ਸ.

੧੦੯੫.

‘‘ਮਾ ਚ ਪੁਤ੍ਤੇ ਮਾ ਚ ਪਤਿਂ, ਅਦ੍ਦਕ੍ਖਿ ਖਣ੍ਡਹਾਲ ਤਵ ਜਾਯਾ;

ਯੋ ਘਾਤੇਸਿ ਕੁਮਾਰੇ, ਅਦੂਸਕੇ ਸੀਹਸਙ੍ਕਾਸੇ.

੧੦੯੬.

‘‘ਮਾ ਚ ਪੁਤ੍ਤੇ ਮਾ ਚ ਪਤਿਂ, ਅਦ੍ਦਕ੍ਖਿ ਖਣ੍ਡਹਾਲ ਤਵ ਜਾਯਾ;

ਯੋ ਘਾਤੇਸਿ ਕੁਮਾਰੇ, ਅਪੇਕ੍ਖਿਤੇ ਸਬ੍ਬਲੋਕਸ੍ਸਾ’’ਤਿ.

ਤਤ੍ਥ ਇਮਂ ਮਯ੍ਹਨ੍ਤਿ ਮਯ੍ਹਂ ਇਮਂ ਹਦਯਸੋਕਂ ਦੁਕ੍ਖਂ. ਪਟਿਮੁਞ੍ਚਤੂਤਿ ਪਵਿਸਤੁ ਪਾਪੁਣਾਤੁ. ਯੋ ਘਾਤੇਸੀਤਿ ਯੋ ਤ੍ਵਂ ਘਾਤੇਸਿ. ਅਪੇਕ੍ਖਿਤੇਤਿ ਸਬ੍ਬਲੋਕੇਨ ਓਲੋਕਿਤੇ ਦਿਸ੍ਸਮਾਨੇ ਮਾਰੇਸੀਤਿ ਅਤ੍ਥੋ.

ਬੋਧਿਸਤ੍ਤੋ ¶ ਯਞ੍ਞਾਵਾਟੇਪਿ ਪਿਤਰਂ ਯਾਚਨ੍ਤੋ ਆਹ –

੧੦੯੭.

‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਹਤ੍ਥੀ ਅਸ੍ਸੇ ਚ ਪਾਲੇਮ.

੧੦੯੮.

‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਹਤ੍ਥਿਛਕਣਾਨਿ ਉਜ੍ਝੇਮ.

੧੦੯੯.

‘‘ਮਾ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਅਪਿ ਨਿਗਲ਼ਬਨ੍ਧਕਾਪਿ, ਅਸ੍ਸਛਕਣਾਨਿ ਉਜ੍ਝੇਮ.

੧੧੦੦.

‘‘ਮਾ ¶ ਨੋ ਦੇਵ ਅਵਧਿ, ਦਾਸੇ ਨੋ ਦੇਹਿ ਖਣ੍ਡਹਾਲਸ੍ਸ;

ਯਸ੍ਸ ਹੋਨ੍ਤਿ ਤਵ ਕਾਮਾ, ਅਪਿ ਰਟ੍ਠਾ ਪਬ੍ਬਾਜਿਤਾ;

ਭਿਕ੍ਖਾਚਰਿਯਂ ਚਰਿਸ੍ਸਾਮ.

੧੧੦੧.

‘‘ਦਿਬ੍ਬਂ ਦੇਵ ਉਪਯਾਚਨ੍ਤਿ, ਪੁਤ੍ਤਤ੍ਥਿਕਾਪਿ ਦਲਿਦ੍ਦਾ;

ਪਟਿਭਾਨਾਨਿਪਿ ਹਿਤ੍ਵਾ, ਪੁਤ੍ਤੇ ਨ ਲਭਨ੍ਤਿ ਏਕਚ੍ਚਾ.

੧੧੦੨.

‘‘ਆਸੀਸਿਕਾਨਿ ਕਰੋਨ੍ਤਿ, ਪੁਤ੍ਤਾ ਨੋ ਜਾਯਨ੍ਤੁ ਤਤੋ ਪਪੁਤ੍ਤਾ;

ਅਥ ਨੋ ਅਕਾਰਣਸ੍ਮਾ, ਯਞ੍ਞਤ੍ਥਾਯ ਦੇਵ ਘਾਤੇਸਿ.

੧੧੦੩.

‘‘ਉਪਯਾਚਿਤਕੇਨ ਪੁਤ੍ਤਂ ਲਭਨ੍ਤਿ, ਮਾ ਤਾਤ ਨੋ ਅਘਾਤੇਸਿ;

ਮਾ ਕਿਚ੍ਛਾਲਦ੍ਧਕੇਹਿ ਪੁਤ੍ਤੇਹਿ, ਯਜਿਤ੍ਥੋ ਇਮਂ ਯਞ੍ਞਂ.

੧੧੦੪.

‘‘ਉਪਯਾਚਿਤਕੇਨ ਪੁਤ੍ਤਂ ਲਭਨ੍ਤਿ, ਮਾ ਤਾਤ ਨੋ ਅਘਾਤੇਸਿ;

ਮਾ ਕਪਣਲਦ੍ਧਕੇਹਿ ਪੁਤ੍ਤੇਹਿ, ਅਮ੍ਮਾਯ ਨੋ ਵਿਪ੍ਪਵਾਸੇਹੀ’’ਤਿ.

ਤਤ੍ਥ ਦਿਬ੍ਬਨ੍ਤਿ ਦੇਵ, ਅਪੁਤ੍ਤਿਕਾ ਦਲਿਦ੍ਦਾਪਿ ਨਾਰਿਯੋ ਪੁਤ੍ਤਤ੍ਥਿਕਾ ਹੁਤ੍ਵਾ ਬਹੁਂ ਪਣ੍ਣਾਕਾਰਂ ਕਰਿਤ੍ਵਾ ਪੁਤ੍ਤਂ ਵਾ ਧੀਤਰਂ ਵਾ ਲਭਾਮਾਤਿ ਦਿਬ੍ਯਂ ਉਪਯਾਚਨ੍ਤਿ. ਪਟਿਭਾਨਾਨਿਪਿ ਹਿਤ੍ਵਾਤਿ ਦੋਹਲ਼ਾਨਿ ਛਡ੍ਡੇਤ੍ਵਾਪਿ, ਅਲਭਿਤ੍ਵਾਪੀਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਮਹਾਰਾਜ, ਨਾਰੀਨਞ੍ਹਿ ਉਪ੍ਪਨ੍ਨਂ ਦੋਹਲ਼ਂ ਅਲਭਿਤ੍ਵਾ ਗਬ੍ਭੋ ਸੁਸ੍ਸਿਤ੍ਵਾ ਨਸ੍ਸਤਿ. ਤਤ੍ਥ ਏਕਚ੍ਚਾ ਯਾਚਨ੍ਤਾਪਿ ਪੁਤ੍ਤੇ ਅਲਭਮਾਨਾ, ਕਾਚਿ ਲਦ੍ਧਮ੍ਪਿ ਦੋਹਲ਼ਂ ਪਹਾਯ ਅਪਰਿਭੁਞ੍ਜਿਤ੍ਵਾ ਨ ਲਭਨ੍ਤਿ, ਕਾਚਿ ਦੋਹਲ਼ਂ ਅਲਭਮਾਨਾ ਨ ਲਭਨ੍ਤਿ. ਮਯ੍ਹਂ ਪਨ ਮਾਤਾ ਉਪ੍ਪਨ੍ਨਂ ਦੋਹਲ਼ਂ ਲਭਿਤ੍ਵਾ ਪਰਿਭੁਞ੍ਜਿਤ੍ਵਾ ਉਪ੍ਪਨ੍ਨਂ ਗਬ੍ਭਂ ਅਨਾਸੇਤ੍ਵਾ ਪੁਤ੍ਤੇ ਪਟਿਲਭਿ. ਏਵਂ ਪਟਿਲਦ੍ਧੇ ਮਾ ਨੋ ਅਵਧੀਤਿ ਯਾਚਤਿ.

ਆਸੀਸਿਕਾਨੀਤਿ ¶ ਮਹਾਰਾਜ, ਇਮੇ ਸਤ੍ਤਾ ਆਸੀਸਂ ਕਰੋਨ੍ਤਿ. ਕਿਨ੍ਤਿ? ਪੁਤ੍ਤਾ ਨੋ ਜਾਯਨ੍ਤੂਤਿ. ਤਤੋ ਪਪੁਤ੍ਤਾਤਿ ਪੁਤ੍ਤਾਨਮ੍ਪਿ ਨੋ ਪੁਤ੍ਤਾ ਜਾਯਨ੍ਤੂਤਿ. ਅਥ ਨੋ ਅਕਾਰਣਸ੍ਮਾਤਿ ਅਥ ਤ੍ਵਂ ਅਮ੍ਹੇ ਅਕਾਰਣੇਨ ਯਞ੍ਞਤ੍ਥਾਯ ਘਾਤੇਸਿ. ਉਪਯਾਚਿਤਕੇਨਾਤਿ ਦੇਵਤਾਨਂ ਆਯਾਚਨੇਨ. ਕਪਣਲਦ੍ਧਕੇਹੀਤਿ ਕਪਣਾ ਵਿਯ ਹੁਤ੍ਵਾ ਲਦ੍ਧਕੇਹਿ. ਪੁਤ੍ਤੇਹੀਤਿ ਅਮ੍ਹੇਹਿ ਸਦ੍ਧਿਂ ਅਮ੍ਹਾਕਂ ਅਮ੍ਮਾਯ ਮਾ ਵਿਪ੍ਪਵਾਸੇਹਿ, ਮਾ ਨੋ ਮਾਤਰਾ ਸਦ੍ਧਿਂ ਵਿਪ੍ਪਵਾਸਂ ਕਰੀਤਿ ਵਦਤਿ.

ਸੋ ¶ ਏਵਂ ਵਦਨ੍ਤੋਪਿ ਪਿਤੁ ਸਨ੍ਤਿਕਾ ਕਿਞ੍ਚਿ ਕਥਂ ਅਲਭਿਤ੍ਵਾ ਮਾਤੁ ਪਾਦਮੂਲੇ ਨਿਪਤਿਤ੍ਵਾ ਪਰਿਦੇਵਮਾਨੋ ਆਹ –

੧੧੦੫.

‘‘ਬਹੁਦੁਕ੍ਖਾ ਪੋਸਿਯ ਚਨ੍ਦਂ, ਅਮ੍ਮ ਤੁਵਂ ਜੀਯਸੇ ਪੁਤ੍ਤਂ;

ਵਨ੍ਦਾਮਿ ਖੋ ਤੇ ਪਾਦੇ, ਲਭਤਂ ਤਾਤੋ ਪਰਲੋਕਂ.

੧੧੦੬.

‘‘ਹਨ੍ਦ ਚ ਮਂ ਉਪਗੂਹ, ਪਾਦੇ ਤੇ ਅਮ੍ਮ ਵਨ੍ਦਿਤੁਂ ਦੇਹਿ;

ਗਚ੍ਛਾਮਿ ਦਾਨਿ ਪਵਾਸਂ, ਯਞ੍ਞਤ੍ਥਾਯ ਏਕਰਾਜਸ੍ਸ.

੧੧੦੭.

‘‘ਹਨ੍ਦ ਚ ਮਂ ਉਪਗੂਹ, ਪਾਦੇ ਤੇ ਅਮ੍ਮ ਵਨ੍ਦਿਤੁਂ ਦੇਹਿ;

ਗਚ੍ਛਾਮਿ ਦਾਨਿ ਪਵਾਸਂ, ਮਾਤੁ ਕਤ੍ਵਾ ਹਦਯਸੋਕਂ.

੧੧੦੮.

‘‘ਹਨ੍ਦ ਚ ਮਂ ਉਪਗੂਹ, ਪਾਦੇ ਤੇ ਅਮ੍ਮ ਵਨ੍ਦਿਤੁਂ ਦੇਹਿ;

ਗਚ੍ਛਾਮਿ ਦਾਨਿ ਪਵਾਸਂ, ਜਨਸ੍ਸ ਕਤ੍ਵਾ ਹਦਯਸੋਕ’’ਨ੍ਤਿ.

ਤਤ੍ਥ ਬਹੁਦੁਕ੍ਖਾ ਪੋਸਿਯਾਤਿ ਬਹੂਹਿ ਦੁਕ੍ਖੇਹਿ ਪੋਸਿਯ. ਚਨ੍ਦਨ੍ਤਿ ਮਂ ਚਨ੍ਦਕੁਮਾਰਂ ਏਵਂ ਪੋਸੇਤ੍ਵਾ ਇਦਾਨਿ, ਅਮ੍ਮ, ਤ੍ਵਂ ਜੀਯਸੇ ਪੁਤ੍ਤਂ. ਲਭਤਂ ਤਾਤੋ ਪਰਲੋਕਨ੍ਤਿ ਪਿਤਾ ਮੇ ਭੋਗਸਮ੍ਪਨ੍ਨਂ ਪਰਲੋਕਂ ਲਭਤੁ. ਉਪਗੂਹਾਤਿ ਆਲਿਙ੍ਗ ਪਰਿਸ੍ਸਜ. ਪਵਾਸਨ੍ਤਿ ਪੁਨ ਅਨਾਗਮਨਾਯ ਅਚ੍ਚਨ੍ਤਂ ਵਿਪ੍ਪਵਾਸਂ ਗਚ੍ਛਾਮਿ.

ਅਥਸ੍ਸ ਮਾਤਾ ਪਰਿਦੇਵਨ੍ਤੀ ਚਤਸ੍ਸੋ ਗਾਥਾ ਅਭਾਸਿ –

੧੧੦੯.

‘‘ਹਨ੍ਦ ਚ ਪਦੁਮਪਤ੍ਤਾਨਂ, ਮੋਲ਼ਿਂ ਬਨ੍ਧਸ੍ਸੁ ਗੋਤਮਿਪੁਤ੍ਤ;

ਚਮ੍ਪਕਦਲਮਿਸ੍ਸਾਯੋ, ਏਸਾ ਤੇ ਪੋਰਾਣਿਕਾ ਪਕਤਿ.

੧੧੧੦.

‘‘ਹਨ੍ਦ ¶ ਚ ਵਿਲੇਪਨਂ ਤੇ, ਪਚ੍ਛਿਮਕਂ ਚਨ੍ਦਨਂ ਵਿਲਿਮ੍ਪਸ੍ਸੁ;

ਯੇਹਿ ਚ ਸੁਵਿਲਿਤ੍ਤੋ, ਸੋਭਸਿ ਰਾਜਪਰਿਸਾਯਂ.

੧੧੧੧.

‘‘ਹਨ੍ਦ ਚ ਮੁਦੁਕਾਨਿ ਵਤ੍ਥਾਨਿ, ਪਚ੍ਛਿਮਕਂ ਕਾਸਿਕਂ ਨਿਵਾਸੇਹਿ;

ਯੇਹਿ ਚ ਸੁਨਿਵਤ੍ਥੋ, ਸੋਭਸਿ ਰਾਜਪਰਿਸਾਯਂ.

੧੧੧੨.

‘‘ਮੁਤ੍ਤਾਮਣਿਕਨਕਵਿਭੂਸਿਤਾਨਿ ¶ , ਗਣ੍ਹਸ੍ਸੁ ਹਤ੍ਥਾਭਰਣਾਨਿ;

ਯੇਹਿ ਚ ਹਤ੍ਥਾਭਰਣੇਹਿ, ਸੋਭਸਿ ਰਾਜਪਰਿਸਾਯ’’ਨ੍ਤਿ.

ਤਤ੍ਥ ਪਦੁਮਪਤ੍ਤਾਨਨ੍ਤਿ ਪਦੁਮਪਤ੍ਤਵੇਠਨਂ ਨਾਮੇਕਂ ਪਸਾਧਨਂ, ਤਂ ਸਨ੍ਧਾਯੇਵਮਾਹ. ਤਵ ਵਿਪ੍ਪਕਿਣ੍ਣਂ ਮੋਲ਼ਿਂ ਉਕ੍ਖਿਪਿਤ੍ਵਾ ਪਦੁਮਪਤ੍ਤਵੇਠਨੇਨ ਯੋਜੇਤ੍ਵਾ ਬਨ੍ਧਾਤਿ ਅਤ੍ਥੋ. ਗੋਤਮਿਪੁਤ੍ਤਾਤਿ ਚਨ੍ਦਕੁਮਾਰਂ ਆਲਪਤਿ. ਚਮ੍ਪਕਦਲਮਿਸ੍ਸਾਯੋਤਿ ਅਬ੍ਭਨ੍ਤਰਿਮੇਹਿ ਚਮ੍ਪਕਦਲੇਹਿ ਮਿਸ੍ਸਿਤਾ ਵਣ੍ਣਗਨ੍ਧਸਮ੍ਪਨ੍ਨਾ ਨਾਨਾਪੁਪ੍ਫਮਾਲਾ ਪਿਲਨ੍ਧਸ੍ਸੁ. ਏਸਾ ਤੇਤਿ ਏਸਾ ਤਵ ਪੋਰਾਣਿਕਾ ਪਕਤਿ, ਤਮੇਵ ਗਣ੍ਹਸ੍ਸੁ ਪੁਤ੍ਤਾਤਿ ਪਰਿਦੇਵਤਿ. ਯੇਹਿ ਚਾਤਿ ਯੇਹਿ ਲੋਹਿਤਚਨ੍ਦਨਵਿਲੇਪਨੇਹਿ ਵਿਲਿਤ੍ਤੋ ਰਾਜਪਰਿਸਾਯ ਸੋਭਸਿ, ਤਾਨਿ ਵਿਲਿਮ੍ਪਸ੍ਸੂਤਿ ਅਤ੍ਥੋ. ਕਾਸਿਕਨ੍ਤਿ ਸਤਸਹਸ੍ਸਗ੍ਘਨਕਂ ਕਾਸਿਕਵਤ੍ਥਂ. ਗਣ੍ਹਸ੍ਸੂਤਿ ਪਿਲਨ੍ਧਸ੍ਸੁ.

ਇਦਾਨਿਸ੍ਸ ਚਨ੍ਦਾ ਨਾਮ ਅਗ੍ਗਮਹੇਸੀ ਤਸ੍ਸ ਪਾਦਮੂਲੇ ਨਿਪਤਿਤ੍ਵਾ ਪਰਿਦੇਵਮਾਨਾ ਆਹ –

੧੧੧੩.

‘‘ਨ ਹਿ ਨੂਨਾਯਂ ਰਟ੍ਠਪਾਲੋ, ਭੂਮਿਪਤਿ ਜਨਪਦਸ੍ਸ ਦਾਯਾਦੋ;

ਲੋਕਿਸ੍ਸਰੋ ਮਹਨ੍ਤੋ, ਪੁਤ੍ਤੇ ਸ੍ਨੇਹਂ ਜਨਯਤੀ’’ਤਿ.

ਤਂ ਸੁਤ੍ਵਾ ਰਾਜਾ ਗਾਥਮਾਹ –

੧੧੧੪.

‘‘ਮਯ੍ਹਮ੍ਪਿ ਪਿਯਾ ਪੁਤ੍ਤਾ, ਅਤ੍ਤਾ ਚ ਪਿਯੋ ਤੁਮ੍ਹੇ ਚ ਭਰਿਯਾਯੋ;

ਸਗ੍ਗਞ੍ਚ ਪਤ੍ਥਯਾਨੋ, ਤੇਨਾਹਂ ਘਾਤਯਿਸ੍ਸਾਮੀ’’ਤਿ.

ਤਸ੍ਸਤ੍ਥੋ – ਕਿਂਕਾਰਣਾ ਪੁਤ੍ਤਸਿਨੇਹਂ ਨ ਜਨੇਮਿ? ਨ ਕੇਵਲਂ ਗੋਤਮਿਯਾ ਏਵ, ਅਥ ਖੋ ਮਯ੍ਹਮ੍ਪਿ ਪਿਯਾ ਪੁਤ੍ਤਾ, ਤਥਾ ਅਤ੍ਤਾ ਚ ਤੁਮ੍ਹੇ ਚ ਸੁਣ੍ਹਾਯੋ ਭਰਿਯਾਯੋ ਚ ਪਿਯਾਯੇਵ. ਏਵਂ ਸਨ੍ਤੇਪਿ ਸਗ੍ਗਞ੍ਚ ਪਤ੍ਥਯਾਨੋ ਅਹਂ ਸਗ੍ਗਂ ਪਤ੍ਥੇਨ੍ਤੋ, ਤੇਨ ਕਾਰਣੇਨ ਏਤੇ ਘਾਤਯਿਸ੍ਸਾਮਿ, ਮਾ ਚਿਨ੍ਤਯਿਤ੍ਥ, ਸਬ੍ਬੇਪੇਤੇ ਮਯਾ ਸਦ੍ਧਿਂ ਦੇਵਲੋਕਂ ਏਕਤੋ ਗਮਿਸ੍ਸਨ੍ਤੀਤਿ.

ਚਨ੍ਦਾ ¶ ਆਹ –

੧੧੧੫.

‘‘ਮਂ ਪਠਮਂ ਘਾਤੇਹਿ, ਮਾ ਮੇ ਹਦਯਂ ਦੁਕ੍ਖਂ ਫਾਲੇਸਿ;

ਅਲਙ੍ਕਤੋ ਸੁਨ੍ਦਰਕੋ, ਪੁਤ੍ਤੋ ਦੇਵ ਤਵ ਸੁਖੁਮਾਲੋ.

੧੧੧੬.

‘‘ਹਨ੍ਦਯ੍ਯ ¶ ਮਂ ਹਨਸ੍ਸੁ, ਪਰਲੋਕੇ ਚਨ੍ਦਕੇਨ ਹੇਸ੍ਸਾਮਿ;

ਪੁਞ੍ਞਂ ਕਰਸ੍ਸੁ ਵਿਪੁਲਂ, ਵਿਚਰਾਮ ਉਭੋਪਿ ਪਰਲੋਕੇ’’ਤਿ.

ਤਤ੍ਥ ਪਠਮਨ੍ਤਿ ਦੇਵ, ਮਮ ਸਾਮਿਕਤੋ ਪਠਮਤਰਂ ਮਂ ਘਾਤੇਹਿ. ਦੁਕ੍ਖਨ੍ਤਿ ਚਨ੍ਦਸ੍ਸ ਮਰਣਦੁਕ੍ਖਂ ਮਮ ਹਦਯਂ ਮਾ ਫਾਲੇਸਿ. ਅਲਙ੍ਕਤੋਤਿ ਅਯਂ ਮਮ ਏਕੋਵ ਅਲਂ ਪਰਿਯਤ੍ਤੋਤਿ ਏਵਂ ਅਲਙ੍ਕਤੋ. ਏਵਰੂਪਂ ਨਾਮ ਪੁਤ੍ਤਂ ਮਾ ਘਾਤਯਿ, ਮਹਾਰਾਜਾਤਿ ਦੀਪੇਤਿ. ਹਨ੍ਦਯ੍ਯਾਤਿ ਹਨ੍ਦ, ਅਯ੍ਯ, ਰਾਜਾਨਂ ਆਲਪਨ੍ਤੀ ਏਵਮਾਹ. ਪਰਲੋਕੇ ਚਨ੍ਦਕੇਨਾਤਿ ਚਨ੍ਦੇਨ ਸਦ੍ਧਿਂ ਪਰਲੋਕੇ ਭਵਿਸ੍ਸਾਮਿ. ਵਿਚਰਾਮ ਉਭੋਪਿ ਪਰਲੋਕੇਤਿ ਤਯਾ ਏਕਤੋ ਘਾਤਿਤਾ ਉਭੋਪਿ ਪਰਲੋਕੇ ਸੁਖਂ ਅਨੁਭਵਨ੍ਤਾ ਵਿਚਰਾਮ, ਮਾ ਨੋ ਸਗ੍ਗਨ੍ਤਰਾਯਮਕਾਸੀਤਿ.

ਰਾਜਾ ਆਹ –

੧੧੧੭.

‘‘ਮਾ ਤ੍ਵਂ ਚਨ੍ਦੇ ਰੁਚ੍ਚਿ ਮਰਣਂ, ਬਹੁਕਾ ਤਵ ਦੇਵਰਾ ਵਿਸਾਲਕ੍ਖਿ;

ਤੇ ਤਂ ਰਮਯਿਸ੍ਸਨ੍ਤਿ, ਯਿਟ੍ਠਸ੍ਮਿਂ ਗੋਤਮਿਪੁਤ੍ਤੇ’’ਤਿ.

ਤਤ੍ਥ ਮਾ ਤ੍ਵਂ ਚਨ੍ਦੇ ਰੁਚ੍ਚੀਤਿ ਮਾ ਤ੍ਵਂ ਅਤ੍ਤਨੋ ਮਰਣਂ ਰੋਚੇਸਿ. ‘‘ਮਾ ਰੁਦ੍ਦੀ’’ਤਿਪਿ ਪਾਠੋ, ਮਾ ਰੋਦੀਤਿ ਅਤ੍ਥੋ. ਦੇਵਰਾਤਿ ਪਤਿਭਾਤੁਕਾ.

ਤਤੋ ਪਰਂ ਸਤ੍ਥਾ –

੧੧੧੮.

‘‘ਏਵਂ ਵੁਤ੍ਤੇ ਚਨ੍ਦਾ ਅਤ੍ਤਾਨਂ, ਹਨ੍ਤਿ ਹਤ੍ਥਤਲਕੇਹੀ’’ਤਿ. – ਉਪਡ੍ਢਗਾਥਮਾਹ;

ਤਤੋ ਪਰਂ ਤਸ੍ਸਾਯੇਵ ਵਿਲਾਪੋ ਹੋਤਿ –

‘‘ਅਲਮੇਤ੍ਥ ਜੀਵਿਤੇਨ, ਪਿਸ੍ਸਾਮਿ ਵਿਸਂ ਮਰਿਸ੍ਸਾਮਿ.

੧੧੧੯.

‘‘ਨ ਹਿ ਨੂਨਿਮਸ੍ਸ ਰਞ੍ਞੋ, ਮਿਤ੍ਤਾਮਚ੍ਚਾ ਚ ਵਿਜ੍ਜਰੇ ਸੁਹਦਾ;

ਯੇ ਨ ਵਦਨ੍ਤਿ ਰਾਜਾਨਂ, ‘ਮਾ ਘਾਤਯਿ ਓਰਸੇ ਪੁਤ੍ਤੇ’.

੧੧੨੦.

‘‘ਨ ¶ ¶ ਹਿ ਨੂਨਿਮਸ੍ਸ ਰਞ੍ਞੋ, ਞਾਤੀ ਮਿਤ੍ਤਾ ਚ ਵਿਜ੍ਜਰੇ ਸੁਹਦਾ;

ਯੇ ਨ ਵਦਨ੍ਤਿ ਰਾਜਾਨਂ, ‘ਮਾ ਘਾਤਯਿ ਅਤ੍ਰਜੇ ਪੁਤ੍ਤੇ’.

੧੧੨੧.

‘‘ਇਮੇ ਤੇਪਿ ਮਯ੍ਹਂ ਪੁਤ੍ਤਾ, ਗੁਣਿਨੋ ਕਾਯੂਰਧਾਰਿਨੋ ਰਾਜ;

ਤੇਹਿਪਿ ਯਜਸ੍ਸੁ ਯਞ੍ਞਂ, ਅਥ ਮੁਞ੍ਚਤੁ ਗੋਤਮਿਪੁਤ੍ਤੇ.

੧੧੨੨.

‘‘ਬਿਲਸਤਂ ਮਂ ਕਤ੍ਵਾਨ, ਯਜਸ੍ਸੁ ਸਤ੍ਤਧਾ ਮਹਾਰਾਜ;

ਮਾ ਜੇਟ੍ਠਪੁਤ੍ਤਮਵਧਿ, ਅਦੂਸਕਂ ਸੀਹਸਙ੍ਕਾਸਂ.

੧੧੨੩.

‘‘ਬਿਲਸਤਂ ਮਂ ਕਤ੍ਵਾਨ, ਯਜਸ੍ਸੁ ਸਤ੍ਤਧਾ ਮਹਾਰਾਜ;

ਮਾ ਜੇਟ੍ਠਪੁਤ੍ਤਮਵਧਿ, ਅਪੇਕ੍ਖਿਤਂ ਸਬ੍ਬਲੋਕਸ੍ਸਾ’’ਤਿ.

ਤਤ੍ਥ ਏਵਨ੍ਤਿ ਏਵਂ ਅਨ੍ਧਬਾਲੇਨ ਏਕਰਾਜੇਨ ਵੁਤ੍ਤੇ. ਹਨ੍ਤੀਤਿ ‘‘ਕਿਂ ਨਾਮੇਤਂ ਕਥੇਸੀ’’ਤਿ ਵਤ੍ਵਾ ਹਤ੍ਥਤਲੇਹਿ ਅਤ੍ਤਾਨਂ ਹਨ੍ਤਿ. ਪਿਸ੍ਸਾਮੀਤਿ ਪਿਵਿਸ੍ਸਾਮਿ. ਇਮੇ ਤੇਪੀਤਿ ਵਸੁਲਕੁਮਾਰਂ ਆਦਿਂ ਕਤ੍ਵਾ ਸੇਸਦਾਰਕੇ ਹਤ੍ਥੇ ਗਹੇਤ੍ਵਾ ਰਞ੍ਞੋ ਪਾਦਮੂਲੇ ਠਿਤਾ ਏਵਮਾਹ. ਗੁਣਿਨੋਤਿ ਮਾਲਾਗੁਣਆਭਰਣੇਹਿ ਸਮਨ੍ਨਾਗਤਾ. ਕਾਯੂਰਧਾਰਿਨੋਤਿ ਕਾਯੂਰਪਸਾਧਨਧਰਾ. ਬਿਲਸਤਨ੍ਤਿ ਮਹਾਰਾਜ, ਮਂ ਘਾਤੇਤ੍ਵਾ ਕੋਟ੍ਠਾਸਸਤਂ ਕਤ੍ਵਾ ਸਤ੍ਤਧਾ ਸਤ੍ਤਸੁ ਠਾਨੇਸੁ ਯਞ੍ਞਂ ਯਜਸ੍ਸੁ.

ਇਤਿ ਸਾ ਰਞ੍ਞੋ ਸਨ੍ਤਿਕੇ ਇਮਾਹਿ ਗਾਥਾਹਿ ਪਰਿਦੇਵਿਤ੍ਵਾ ਅਸ੍ਸਾਸਂ ਅਲਭਮਾਨਾ ਬੋਧਿਸਤ੍ਤਸ੍ਸੇਵ ਸਨ੍ਤਿਕਂ ਗਨ੍ਤ੍ਵਾ ਪਰਿਦੇਵਮਾਨਾ ਅਟ੍ਠਾਸਿ. ਅਥ ਨਂ ਸੋ ਆਹ – ‘‘ਚਨ੍ਦੇ, ਮਯਾ ਜੀਵਮਾਨੇਨ ਤੁਯ੍ਹਂ ਤਸ੍ਮਿਂ ਤਸ੍ਮਿਂ ਵਤ੍ਥੁਸ੍ਮਿਂ ਸੁਭਣਿਤੇ ਸੁਕਥਿਤੇ ਉਚ੍ਚਾਵਚਾਨਿ ਮਣਿਮੁਤ੍ਤਾਦੀਨਿ ਬਹੂਨਿ ਆਭਰਣਾਨਿ ਦਿਨ੍ਨਾਨਿ, ਅਜ੍ਜ ਪਨ ਤੇ ਇਦਂ ਪਚ੍ਛਿਮਦਾਨਂ, ਸਰੀਰਾਰੁਲ਼੍ਹਂ ਆਭਰਣਂ ਦਮ੍ਮਿ, ਗਣ੍ਹਾਹਿ ਨ’’ਨ੍ਤਿ. ਇਮਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੨੪.

‘‘ਬਹੁਕਾ ਤਵ ਦਿਨ੍ਨਾਭਰਣਾ, ਉਚ੍ਚਾਵਚਾ ਸੁਭਣਿਤਮ੍ਹਿ;

ਮੁਤ੍ਤਾਮਣਿਵੇਲ਼ੁਰਿਯਾ, ਏਤਂ ਤੇ ਪਚ੍ਛਿਮਕਂ ਦਾਨ’’ਨ੍ਤਿ.

ਚਨ੍ਦਾਦੇਵੀਪਿ ਤਂ ਸੁਤ੍ਵਾ ਤਤੋ ਪਰਾਹਿ ਨਵਹਿ ਗਾਥਾਹਿ ਵਿਲਪਿ –

੧੧੨੫.

‘‘ਯੇਸਂ ¶ ਪੁਬ੍ਬੇ ਖਨ੍ਧੇਸੁ, ਫੁਲ੍ਲਾ ਮਾਲਾਗੁਣਾ ਵਿਵਤ੍ਤਿਂਸੁ;

ਤੇਸਜ੍ਜਪਿ ਸੁਨਿਸਿਤੋ, ਨੇਤ੍ਤਿਂਸੋ ਵਿਵਤ੍ਤਿਸ੍ਸਤਿ ਖਨ੍ਧੇਸੁ.

੧੧੨੬.

‘‘ਯੇਸਂ ¶ ਪੁਬ੍ਬੇ ਖਨ੍ਧੇਸੁ, ਚਿਤ੍ਤਾ ਮਾਲਾਗੁਣਾ ਵਿਵਤ੍ਤਿਂਸੁ;

ਤੇਸਜ੍ਜਪਿ ਸੁਨਿਸਿਤੋ, ਨੇਤ੍ਤਿਂਸੋ ਵਿਵਤ੍ਤਿਸ੍ਸਤਿ ਖਨ੍ਧੇਸੁ.

੧੧੨੭.

‘‘ਅਚਿਰਂ ਵਤ ਨੇਤ੍ਤਿਂਸੋ, ਵਿਵਤ੍ਤਿਸ੍ਸਕਿ ਰਾਜਪੁਤ੍ਤਾਨਂ ਖਨ੍ਧੇਸੁ;

ਅਥ ਮਮ ਹਦਯਂ ਨ ਫਲਤਿ, ਤਾਵ ਦਲ਼੍ਹਬਨ੍ਧਞ੍ਚ ਮੇ ਆਸਿ.

੧੧੨੮.

‘‘ਕਾਸਿਕਸੁਚਿਵਤ੍ਥਧਰਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨਿਯ੍ਯਾਥ ਚਨ੍ਦਸੂਰਿਯਾ, ਯਞ੍ਞਤ੍ਥਾਯ ਏਕਰਾਜਸ੍ਸ.

੧੧੨੯.

‘‘ਕਾਸਿਕਸੁਚਿਵਤ੍ਥਧਰਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨਿਯ੍ਯਾਥ ਚਨ੍ਦਸੂਰਿਯਾ, ਮਾਤੁ ਕਤ੍ਵਾ ਹਦਯਸੋਕਂ.

੧੧੩੦.

‘‘ਕਾਸਿਕਸੁਚਿਵਤ੍ਥਧਰਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨਿਯ੍ਯਾਥ ਚਨ੍ਦਸੂਰਿਯਾ, ਜਨਸ੍ਸ ਕਤ੍ਵਾ ਹਦਯਸੋਕਂ.

੧੧੩੧.

‘‘ਮਂਸਰਸਭੋਜਨਾ ਨ੍ਹਾਪਕਸੁਨ੍ਹਾਪਿਤਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨਿਯ੍ਯਾਥ ਚਨ੍ਦਸੂਰਿਯਾ, ਯਞ੍ਞਤ੍ਥਾਯ ਏਕਰਾਜਸ੍ਸ.

੧੧੩੨.

‘‘ਮਂਸਰਸਭੋਜਨਾ ਨ੍ਹਾਪਕਸੁਨ੍ਹਾਪਿਤਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨਿਯ੍ਯਾਥ ਚਨ੍ਦਸੂਰਿਯਾ, ਮਾਤੁ ਕਤ੍ਵਾ ਹਦਯਸੋਕਂ.

੧੧੩੩.

‘‘ਮਂਸਰਸਭੋਜਨਾ ਨ੍ਹਾਪਕਸੁਨ੍ਹਾਪਿਤਾ, ਕੁਣ੍ਡਲਿਨੋ ਅਗਲੁਚਨ੍ਦਨਵਿਲਿਤ੍ਤਾ;

ਨਿਯ੍ਯਾਥ ਚਨ੍ਦਸੂਰਿਯਾ, ਜਨਸ੍ਸ ਕਤ੍ਵਾ ਹਦਯਸੋਕ’’ਨ੍ਤਿ.

ਤਤ੍ਥ ਮਾਲਾਗੁਣਾਤਿ ਪੁਪ੍ਫਦਾਮਾਨਿ. ਤੇਸਜ੍ਜਾਤਿ ਤੇਸਂ ਅਜ੍ਜ. ਨੇਤ੍ਤਿਂਸੋਤਿ ਅਸਿ. ਵਿਵਤ੍ਤਿਸ੍ਸਤੀਤਿ ਪਤਿਸ੍ਸਤਿ. ਅਚਿਰਂ ਵਤਾਤਿ ਅਚਿਰੇਨ ਵਤ. ਨ ਫਲਤੀਤਿ ਨ ਭਿਜ੍ਜਤਿ. ਤਾਵ ਦਲ਼੍ਹਬਨ੍ਧਞ੍ਚ ¶ ਮੇ ਆਸੀਤਿ ਅਤਿਵਿਯ ਥਿਰਬਨ੍ਧਨਂ ਮੇ ਹਦਯਂ ਭਵਿਸ੍ਸਤੀਤਿ ਅਤ੍ਥੋ. ਨਿਯ੍ਯਾਥਾਤਿ ਗਚ੍ਛਥ.

ਏਵਂ ਤਸ੍ਸਾ ਪਰਿਦੇਵਨ੍ਤਿਯਾਵ ਯਞ੍ਞਾਵਾਟੇ ਸਬ੍ਬਕਮ੍ਮਂ ਨਿਟ੍ਠਾਸਿ. ਰਾਜਪੁਤ੍ਤਂ ਨੇਤ੍ਵਾ ਗੀਵਂ ਓਨਾਮੇਤ੍ਵਾ ਨਿਸੀਦਾਪੇਸੁਂ. ਖਣ੍ਡਹਾਲੋ ਸੁਵਣ੍ਣਪਾਤਿਂ ਉਪਨਾਮੇਤ੍ਵਾ ਖਗ੍ਗਂ ਆਦਾਯ ‘‘ਤਸ੍ਸ ਗੀਵਂ ਛਿਨ੍ਦਿਸ੍ਸਾਮੀ’’ਤਿ ਅਟ੍ਠਾਸਿ. ਤਂ ਦਿਸ੍ਵਾ ਚਨ੍ਦਾਦੇਵੀ ‘‘ਅਞ੍ਞਂ ਮੇ ਪਟਿਸਰਣਂ ਨਤ੍ਥਿ, ਅਤ੍ਤਨੋ ਸਚ੍ਚਬਲੇਨ ਸਾਮਿਕਸ੍ਸ ¶ ਸੋਤ੍ਥਿਂ ਕਰਿਸ੍ਸਾਮੀ’’ਤਿ ਅਞ੍ਜਲਿਂ ਪਗ੍ਗਯ੍ਹ ਪਰਿਸਾਯ ਅਨ੍ਤਰੇ ਵਿਚਰਨ੍ਤੀ ਸਚ੍ਚਕਿਰਿਯਂ ਅਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੩੪.

‘‘ਸਬ੍ਬਸ੍ਮਿਂ ਉਪਕ੍ਖਟਸ੍ਮਿਂ, ਨਿਸੀਦਿਤੇ ਚਨ੍ਦਸ੍ਮਿਂ ਯਞ੍ਞਤ੍ਥਾਯ;

ਪਞ੍ਚਾਲਰਾਜਧੀਤਾ ਪਞ੍ਜਲਿਕਾ, ਸਬ੍ਬਪਰਿਸਾਯ ਸਮਨੁਪਰਿਯਾਯਿ.

੧੧੩੫.

‘‘ਯੇਨ ਸਚ੍ਚੇਨ ਖਣ੍ਡਹਾਲੋ, ਪਾਪਕਮ੍ਮਂ ਕਰੋਤਿ ਦੁਮ੍ਮੇਧੋ;

ਏਤੇਨ ਸਚ੍ਚਵਜ੍ਜੇਨ, ਸਮਙ੍ਗਿਨੀ ਸਾਮਿਕੇਨ ਹੋਮਿ.

੧੧੩੬.

‘‘ਯੇ ਇਧਤ੍ਥਿ ਅਮਨੁਸ੍ਸਾ, ਯਾਨਿ ਚ ਯਕ੍ਖਭੂਤਭਬ੍ਯਾਨਿ;

ਕਰੋਨ੍ਤੁ ਮੇ ਵੇਯ੍ਯਾਵਟਿਕਂ, ਸਮਙ੍ਗਿਨੀ ਸਾਮਿਕੇਨ ਹੋਮਿ.

੧੧੩੭.

‘‘ਯਾ ਦੇਵਤਾ ਇਧਾਗਤਾ, ਯਾਨਿ ਚ ਯਕ੍ਖਭੂਤਭਬ੍ਯਾਨਿ;

ਸਰਣੇਸਿਨਿਂ ਅਨਾਥਂ ਤਾਯਥ ਮਂ, ਯਾਚਾਮਹਂ ਪਤਿ ਮਾਹਂ ਅਜੇਯ੍ਯ’’ਨ੍ਤਿ.

ਤਤ੍ਥ ਉਪਕ੍ਖਟਸ੍ਮਿਨ੍ਤਿ ਸਬ੍ਬਸ੍ਮਿਂ ਯਞ੍ਞਸਮ੍ਭਾਰੇ ਸਜ੍ਜਿਤੇ ਪਟਿਯਤ੍ਤੇ. ਸਮਙ੍ਗਿਨੀਤਿ ਸਮ੍ਪਯੁਤ੍ਤਾ ਏਕਸਂਵਾਸਾ. ਯੇ ਇਧਤ੍ਥੀਤਿ ਯੇ ਇਧ ਅਤ੍ਥਿ. ਯਕ੍ਖਭੂਤਭਬ੍ਯਾਨੀਤਿ ਦੇਵਸਙ੍ਖਾਤਾ ਯਕ੍ਖਾ ਚ ਵਡ੍ਢਿਤ੍ਵਾ ਠਿਤਸਤ੍ਤਸਙ੍ਖਾਤਾ ਭੂਤਾ ਚ ਇਦਾਨਿ ਵਡ੍ਢਨਕਸਤ੍ਤਸਙ੍ਖਾਤਾਨਿ ਭਬ੍ਯਾਨਿ ਚ. ਵੇਯ੍ਯਾਵਟਿਕਨ੍ਤਿ ਮਯ੍ਹਂ ਵੇਯ੍ਯਾਵਚ੍ਚਂ ਕਰੋਨ੍ਤੁ. ਤਾਯਥ ਮਨ੍ਤਿ ਰਕ੍ਖਥ ਮਂ. ਯਾਚਾਮਹਨ੍ਤਿ ਅਹਂ ਵੋ ਯਾਚਾਮਿ. ਪਤਿ ਮਾਹਨ੍ਤਿ ਪਤਿਂ ਅਹਂ ਮਾ ਅਜੇਯ੍ਯਂ.

ਅਥ ਸਕ੍ਕੋ ਦੇਵਰਾਜਾ ਤਸ੍ਸਾ ਪਰਿਦੇਵਸਦ੍ਦਂ ਸੁਤ੍ਵਾ ਤਂ ਪਵਤ੍ਤਿਂ ਞਤ੍ਵਾ ਜਲਿਤਂ ਅਯਕੂਟਂ ਆਦਾਯ ਗਨ੍ਤ੍ਵਾ ਰਾਜਾਨਂ ਤਾਸੇਤ੍ਵਾ ਸਬ੍ਬੇ ਵਿਸ੍ਸਜ੍ਜਾਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੩੮.

‘‘ਤਂ ¶ ਸੁਤ੍ਵਾ ਅਮਨੁਸ੍ਸੋ, ਅਯੋਕੂਟਂ ਪਰਿਬ੍ਭਮੇਤ੍ਵਾਨ;

ਭਯਮਸ੍ਸ ਜਨਯਨ੍ਤੋ, ਰਾਜਾਨਂ ਇਦਮਵੋਚ.

੧੧੩੯.

‘‘ਬੁਜ੍ਝਸ੍ਸੁ ਖੋ ਰਾਜਕਲਿ, ਮਾ ਤਾਹਂ ਮਤ੍ਥਕਂ ਨਿਤਾਲ਼ੇਸਿਂ;

ਮਾ ਜੇਟ੍ਠਪੁਤ੍ਤਮਵਧਿ, ਅਦੂਸਕਂ ਸੀਹਸਙ੍ਕਾਸਂ.

੧੧੪੦.

‘‘ਕੋ ¶ ਤੇ ਦਿਟ੍ਠੋ ਰਾਜਕਲਿ, ਪੁਤ੍ਤਭਰਿਯਾਯੋ ਹਞ੍ਞਮਾਨਾਯੋ;

ਸੇਟ੍ਠਿ ਚ ਗਹਪਤਯੋ, ਅਦੂਸਕਾ ਸਗ੍ਗਕਾਮਾ ਹਿ.

੧੧੪੧.

‘‘ਤਂ ਸੁਤ੍ਵਾ ਖਣ੍ਡਹਾਲੋ, ਰਾਜਾ ਚ ਅਬ੍ਭੁਤਮਿਦਂ ਦਿਸ੍ਵਾਨ;

ਸਬ੍ਬੇਸਂ ਬਨ੍ਧਨਾਨਿ ਮੋਚੇਸੁਂ, ਯਥਾ ਤਂ ਅਨੁਪਘਾਤਂ.

੧੧੪੨.

‘‘ਸਬ੍ਬੇਸੁ ਵਿਪ੍ਪਮੁਤ੍ਤੇਸੁ, ਯੇ ਤਤ੍ਥ ਸਮਾਗਤਾ ਤਦਾ ਆਸੁਂ;

ਸਬ੍ਬੇ ਏਕੇਕਲੇਡ੍ਡੁਕਮਦਂਸੁ, ਏਸ ਵਧੋ ਖਣ੍ਡਹਾਲਸ੍ਸਾ’’ਤਿ.

ਤਤ੍ਥ ਅਮਨੁਸ੍ਸੋਤਿ ਸਕ੍ਕੋ ਦੇਵਰਾਜਾ. ਬੁਜ੍ਝਸ੍ਸੂਤਿ ਜਾਨਸ੍ਸੁ ਸਲ੍ਲਕ੍ਖੇਹਿ. ਰਾਜਕਲੀਤਿ ਰਾਜਕਾਲ਼ਕਣ੍ਣਿ ਰਾਜਲਾਮਕ. ਮਾ ਤਾਹਨ੍ਤਿ ਪਾਪਰਾਜ, ਬੁਜ੍ਝ, ਮਾ ਤੇ ਅਹਂ ਮਤ੍ਥਕਂ ਨਿਤਾਲ਼ੇਸਿਂ. ਕੋ ਤੇ ਦਿਟ੍ਠੋਤਿ ਕੁਹਿਂ ਤਯਾ ਦਿਟ੍ਠਪੁਬ੍ਬੋ. ਸਗ੍ਗਕਾਮਾ ਹੀਤਿ ਏਤ੍ਥ ਹੀਤਿ ਨਿਪਾਤਮਤ੍ਤਂ, ਸਗ੍ਗਕਾਮਾ ਸਗ੍ਗਂ ਪਤ੍ਥਯਮਾਨਾਤਿ ਅਤ੍ਥੋ. ਤਂ ਸੁਤ੍ਵਾਤਿ, ਭਿਕ੍ਖਵੇ, ਤਂ ਸਕ੍ਕਸ੍ਸ ਵਚਨਂ ਖਣ੍ਡਹਾਲੋ ਸੁਤ੍ਵਾ. ਅਬ੍ਭੁਤਮਿਦਨ੍ਤਿ ਰਾਜਾ ਚ ਇਦਂ ਸਕ੍ਕਸ੍ਸ ਦਸ੍ਸਨਂ ਪੁਬ੍ਬੇ ਅਭੂਤਂ ਦਿਸ੍ਵਾ. ਯਥਾ ਤਨ੍ਤਿ ਯਥਾ ਅਨੁਪਘਾਤਂ ਪਾਣਂ ਮੋਚੇਨ੍ਤਿ, ਏਵਮੇਵ ਮੋਚੇਸੁਂ. ਏਕੇਕਲੇਡ੍ਡੁਕਮਦਂਸੂਤਿ ਭਿਕ੍ਖਵੇ, ਯਤ੍ਤਕਾ ਤਸ੍ਮਿਂ ਯਞ੍ਞਾਵਾਟੇ ਸਮਾਗਤਾ, ਸਬ੍ਬੇ ਏਕਕੋਲਾਹਲਂ ਕਤ੍ਵਾ ਖਣ੍ਡਹਾਲਸ੍ਸ ਏਕੇਕਲੇਡ੍ਡੁਪਹਾਰਂ ਅਦਂਸੁ. ਏਸ ਵਧੋਤਿ ਏਸੋਵ ਖਣ੍ਡਹਾਲਸ੍ਸ ਵਧੋ ਅਹੋਸਿ, ਤਤ੍ਥੇਵ ਨਂ ਜੀਵਿਤਕ੍ਖਯਂ ਪਾਪੇਸੁਨ੍ਤਿ ਅਤ੍ਥੋ.

ਤਂ ਪਨ ਮਾਰੇਤ੍ਵਾ ਮਹਾਜਨੋ ਰਾਜਾਨਂ ਮਾਰੇਤੁਂ ਆਰਭਿ. ਬੋਧਿਸਤ੍ਤੋ ਪਿਤਰਂ ਪਰਿਸ੍ਸਜਿਤ੍ਵਾ ਮਾਰੇਤੁਂ ਨ ਅਦਾਸਿ. ਮਹਾਜਨੋ ‘‘ਜੀਵਿਤਂ ਏਤਸ੍ਸ ਪਾਪਰਞ੍ਞੋ ਦੇਮ, ਛਤ੍ਤਂ ਪਨਸ੍ਸ ਨਗਰੇ ਚ ਵਾਸਂ ਨ ਦਸ੍ਸਾਮ, ਚਣ੍ਡਾਲਂ ਕਤ੍ਵਾ ਬਹਿਨਗਰੇ ਵਸਾਪੇਸ੍ਸਾਮਾ’’ਤਿ ਵਤ੍ਵਾ ਰਾਜਵੇਸਂ ਹਾਰੇਤ੍ਵਾ ਕਾਸਾਵਂ ਨਿਵਾਸਾਪੇਤ੍ਵਾ ਹਲਿਦ੍ਦਿਪਿਲੋਤਿਕਾਯ ਸੀਸਂ ਵੇਠੇਤ੍ਵਾ ਚਣ੍ਡਾਲਂ ਕਤ੍ਵਾ ਚਣ੍ਡਾਲਵਸਨਟ੍ਠਾਨਂ ਤਂ ਪਹਿਣਿ. ਯੇ ਪਨੇਤਂ ਪਸੁਘਾਤਯਞ੍ਞਂ ਯਜਿਂਸੁ ਚੇਵ ਯਜਾਪੇਸੁਞ੍ਚ ਅਨੁਮੋਦਿਂਸੁ ਚ, ਸਬ੍ਬੇ ਨਿਰਯਪਰਾਯਣਾਵ ਅਹੇਸੁਂ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੪੩.

‘‘ਸਬ੍ਬੇ ¶ ¶ ਪਵਿਟ੍ਠਾ ਨਿਰਯਂ, ਯਥਾ ਤਂ ਪਾਪਕਂ ਕਰਿਤ੍ਵਾਨ;

ਨ ਹਿ ਪਾਪਕਮ੍ਮਂ ਕਤ੍ਵਾ, ਲਬ੍ਭਾ ਸੁਗਤਿਂ ਇਤੋ ਗਨ੍ਤੁ’’ਨ੍ਤਿ.

ਸੋਪਿ ਖੋ ਮਹਾਜਨੋ ਦ੍ਵੇ ਕਾਲ਼ਕਣ੍ਣਿਯੋ ਹਾਰੇਤ੍ਵਾ ਤਤ੍ਥੇਵ ਅਭਿਸੇਕਸਮ੍ਭਾਰੇ ਆਹਰਿਤ੍ਵਾ ਚਨ੍ਦਕੁਮਾਰਂ ਅਭਿਸਿਞ੍ਚਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੪੪.

‘‘ਸਬ੍ਬੇਸੁ ਵਿਪ੍ਪਮੁਤ੍ਤੇਸੁ, ਯੇ ਤਤ੍ਥ ਸਮਾਗਤਾ ਤਦਾ ਆਸੁਂ;

ਚਨ੍ਦਂ ਅਭਿਸਿਞ੍ਚਿਂਸੁ, ਸਮਾਗਤਾ ਰਾਜਪਰਿਸਾ ਚ.

੧੧੪੫.

‘‘ਸਬ੍ਬੇਸੁ ਵਿਪ੍ਪਮੁਤ੍ਤੇਸੁ, ਯੇ ਤਤ੍ਥ ਸਮਾਗਤਾ ਤਦਾ ਆਸੁਂ;

ਚਨ੍ਦਂ ਅਭਿਸਿਞ੍ਚਿਂਸੁ, ਸਮਾਗਤਾ ਰਾਜਕਞ੍ਞਾਯੋ ਚ.

੧੧੪੬.

‘‘ਸਬ੍ਬੇਸੁ ਵਿਪ੍ਪਮੁਤ੍ਤੇਸੁ, ਯੇ ਤਤ੍ਥ ਸਮਾਗਤਾ ਤਦਾ ਆਸੁਂ;

ਚਨ੍ਦਂ ਅਭਿਸਿਞ੍ਚਿਂਸੁ, ਸਮਾਗਤਾ ਦੇਵਪਰਿਸਾ ਚ.

੧੧੪੭.

‘‘ਸਬ੍ਬੇਸੁ ਵਿਪ੍ਪਮੁਤ੍ਤੇਸੁ, ਯੇ ਤਤ੍ਥ ਸਮਾਗਤਾ ਤਦਾ ਆਸੁਂ;

ਚਨ੍ਦਂ ਅਭਿਸਿਞ੍ਚਿਂਸੁ, ਸਮਾਗਤਾ ਦੇਵਕਞ੍ਞਾਯੋ ਚ.

੧੧੪੮.

‘‘ਸਬ੍ਬੇਸੁ ਵਿਪ੍ਪਮੁਤ੍ਤੇਸੁ, ਯੇ ਤਤ੍ਥ ਸਮਾਗਤਾ ਤਦਾ ਆਸੁਂ;

ਚੇਲੁਕ੍ਖੇਪਮਕਰੁਂ, ਸਮਾਗਤਾ ਰਾਜਪਰਿਸਾ ਚ.

੧੧੪੯.

‘‘ਸਬ੍ਬੇਸੁ ਵਿਪ੍ਪਮੁਤ੍ਤੇਸੁ, ਯੇ ਤਤ੍ਥ ਸਮਾਗਤਾ ਤਦਾ ਆਸੁਂ;

ਚੇਲੁਕ੍ਖੇਪਮਕਰੁਂ, ਸਮਾਗਤਾ ਰਾਜਕਞ੍ਞਾਯੋ ਚ.

੧੧੫੦.

‘‘ਸਬ੍ਬੇਸੁ ਵਿਪ੍ਪਮੁਤ੍ਤੇਸੁ, ਯੇ ਤਤ੍ਥ ਸਮਾਗਤਾ ਤਦਾ ਆਸੁਂ;

ਚੇਲੁਕ੍ਖੇਪਮਕਰੁਂ, ਸਮਾਗਤਾ ਦੇਵਪਰਿਸਾ ਚ.

੧੧੫੧.

‘‘ਸਬ੍ਬੇਸੁ ਵਿਪ੍ਪਮੁਤ੍ਤੇਸੁ, ਯੇ ਤਤ੍ਥ ਸਮਾਗਤਾ ਤਦਾ ਆਸੁਂ;

ਚੇਲੁਕ੍ਖੇਪਮਕਰੁਂ, ਸਮਾਗਤਾ ਦੇਵਕਞ੍ਞਾਯੋ ਚ.

੧੧੫੨.

‘‘ਸਬ੍ਬੇਸੁ ¶ ਵਿਪ੍ਪਮੁਤ੍ਤੇਸੁ, ਬਹੂ ਆਨਨ੍ਦਿਤਾ ਅਹੁਂ;

ਨਨ੍ਦਿਂ ਪਵੇਸਿ ਨਗਰਂ, ਬਨ੍ਧਨਾ ਮੋਕ੍ਖੋ ਅਘੋਸਿਤ੍ਥਾ’’ਤਿ.

ਤਤ੍ਥ ਰਾਜਪਰਿਸਾ ਚਾਤਿ ਰਾਜਪਰਿਸਾਪਿ ਤੀਹਿ ਸਙ੍ਖੇਹਿ ਅਭਿਸਿਞ੍ਚਿਂਸੁ. ਰਾਜਕਞ੍ਞਾਯੋ ਚਾਤਿ ਖਤ੍ਤਿਯਧੀਤਰੋਪਿ ਨਂ ਅਭਿਸਿਞ੍ਚਿਂਸੁ. ਦੇਵਪਰਿਸਾ ਚਾਤਿ ਸਕ੍ਕੋ ¶ ਦੇਵਰਾਜਾ ਵਿਜਯੁਤ੍ਤਰਸਙ੍ਖਂ ਗਹੇਤ੍ਵਾ ਦੇਵਪਰਿਸਾਯ ਸਦ੍ਧਿਂ ਅਭਿਸਿਞ੍ਚਿ. ਦੇਵਕਞ੍ਞਾਯੋ ਚਾਤਿ ਸੁਜਾਪਿ ਦੇਵਧੀਤਰਾਹਿ ਸਦ੍ਧਿਂ ਅਭਿਸਿਞ੍ਚਿ. ਚੇਲੁਕ੍ਖੇਪਮਕਰੁਨ੍ਤਿ ਨਾਨਾਵਣ੍ਣੇਹਿ ਵਤ੍ਥੇਹਿ ਧਜੇ ਉਸ੍ਸਾਪੇਤ੍ਵਾ ਉਤ੍ਤਰਿਸਾਟਕਾਨਿ ਆਕਾਸੇ ਖਿਪਨ੍ਤਾ ਚੇਲੁਕ੍ਖੇਪਂ ਕਰਿਂਸੁ. ਰਾਜਪਰਿਸਾ ਚ ਇਤਰੇ ਤਯੋ ਕੋਟ੍ਠਾਸਾ ਚਾਤਿ ਅਭਿਸੇਕਕਾਰਕਾ ਚਤ੍ਤਾਰੋਪਿ ਕੋਟ੍ਠਾਸਾ ਕਰਿਂਸੁਯੇਵ. ਆਨਨ੍ਦਿਤਾ ਅਹੁਨ੍ਤਿ ਆਮੋਦਿਤਾ ਅਹੇਸੁਂ. ਨਨ੍ਦਿਂ ਪਵੇਸਿ ਨਗਰਨ੍ਤਿ ਚਨ੍ਦਕੁਮਾਰਸ੍ਸ ਛਤ੍ਤਂ ਉਸ੍ਸਾਪੇਤ੍ਵਾ ਨਗਰਂ ਪਵਿਟ੍ਠਕਾਲੇ ਨਗਰੇ ਆਨਨ੍ਦਭੇਰਿ ਚਰਿ. ‘‘ਕਿਂ ਵਤ੍ਵਾ’’ਤਿ? ਯਥਾ ‘‘ਅਮ੍ਹਾਕਂ ਚਨ੍ਦਕੁਮਾਰੋ ਬਨ੍ਧਨਾ ਮੁਤ੍ਤੋ, ਏਵਮੇਵ ਸਬ੍ਬੇ ਬਨ੍ਧਨਾ ਮੁਚ੍ਚਨ੍ਤੂ’’ਤਿ. ਤੇਨ ਵੁਤ੍ਤਂ ‘‘ਬਨ੍ਧਨਾ ਮੋਕ੍ਖੋ ਅਘੋਸਿਤ੍ਥਾ’’ਤਿ.

ਬੋਧਿਸਤ੍ਤੋ ਪਿਤੁ ਵਤ੍ਤਂ ਪਟ੍ਠਪੇਸਿ. ਅਨ੍ਤੋਨਗਰਂ ਪਨ ਪਵਿਸਿਤੁਂ ਨ ਲਭਤਿ. ਪਰਿਬ੍ਬਯਸ੍ਸ ਖੀਣਕਾਲੇ ਬੋਧਿਸਤ੍ਤੋ ਉਯ੍ਯਾਨਕੀਲ਼ਾਦੀਨਂ ਅਤ੍ਥਾਯ ਗਚ੍ਛਨ੍ਤੋ ਤਂ ਉਪਸਙ੍ਕਮਿਤ੍ਵਾ ‘‘ਪਤਿਮ੍ਹੀ’’ਤਿ ਨ ਵਨ੍ਦਤਿ, ਅਞ੍ਜਲਿਂ ਪਨ ਕਤ੍ਵਾ ‘‘ਚਿਰਂ ਜੀਵ ਸਾਮੀ’’ਤਿ ਵਦਤਿ. ‘‘ਕੇਨਤ੍ਥੋ’’ਤਿ ਵੁਤ੍ਤੇ ਆਰੋਚੇਸਿ. ਅਥਸ੍ਸ ਪਰਿਬ੍ਬਯਂ ਦਾਪੇਸਿ. ਸੋ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਆਯੁਪਰਿਯੋਸਾਨੇ ਦੇਵਲੋਕਂ ਪੂਰਯਮਾਨੋ ਅਗਮਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਮਂ ਏਕਂ ਨਿਸ੍ਸਾਯ ਬਹੂ ਮਾਰੇਤੁਂ ਵਾਯਾਮਮਕਾਸੀ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ. ਤਦਾ ਖਣ੍ਡਹਾਲੋ ਦੇਵਦਤ੍ਤੋ ਅਹੋਸਿ, ਗੋਤਮੀਦੇਵੀ ਮਹਾਮਾਯਾ, ਚਨ੍ਦਾਦੇਵੀ ਰਾਹੁਲਮਾਤਾ, ਵਸੁਲੋ ਰਾਹੁਲੋ, ਸੇਲਾ ਉਪ੍ਪਲਵਣ੍ਣਾ, ਸੂਰੋ ਵਾਮਗੋਤ੍ਤੋ ਕਸ੍ਸਪੋ, ਭਦ੍ਦਸੇਨੋ ਮੋਗ੍ਗਲ੍ਲਾਨੋ, ਸੂਰਿਯਕੁਮਾਰੋ ਸਾਰਿਪੁਤ੍ਤੋ, ਚਨ੍ਦਰਾਜਾ ਪਨ ਅਹਮੇਵ ਸਮ੍ਮਾਸਮ੍ਬੁਦ੍ਧੋ ਅਹੋਸਿਨ੍ਤਿ.

ਚਨ੍ਦਕੁਮਾਰਜਾਤਕਵਣ੍ਣਨਾ ਸਤ੍ਤਮਾ.

[੫੪੫] ੮. ਮਹਾਨਾਰਦਕਸ੍ਸਪਜਾਤਕਵਣ੍ਣਨਾ

ਅਹੁ ¶ ¶ ਰਾਜਾ ਵਿਦੇਹਾਨਨ੍ਤਿ ਇਦਂ ਸਤ੍ਥਾ ਲਟ੍ਠਿਵਨੁਯ੍ਯਾਨੇ ਵਿਹਰਨ੍ਤੋ ਉਰੁਵੇਲਕਸ੍ਸਪਦਮਨਂ ਆਰਬ੍ਭ ਕਥੇਸਿ. ਯਦਾ ਹਿ ਸਤ੍ਥਾ ਪਵਤ੍ਤਿਤਵਰਧਮ੍ਮਚਕ੍ਕੋ ਉਰੁਵੇਲਕਸ੍ਸਪਾਦਯੋ ¶ ਜਟਿਲੇ ਦਮੇਤ੍ਵਾ ਮਗਧਰਾਜਸ੍ਸ ਪਟਿਸ੍ਸਵਂ ਲੋਚੇਤੁਂ ਪੁਰਾਣਜਟਿਲਸਹਸ੍ਸਪਰਿਵੁਤੋ ਲਟ੍ਠਿਵਨੁਯ੍ਯਾਨਂ ਅਗਮਾਸਿ. ਤਦਾ ਦ੍ਵਾਦਸਨਹੁਤਾਯ ਪਰਿਸਾਯ ਸਦ੍ਧਿਂ ਆਗਨ੍ਤ੍ਵਾ ਦਸਬਲਂ ਵਨ੍ਦਿਤ੍ਵਾ ਨਿਸਿਨ੍ਨਸ੍ਸ ਮਗਧਰਞ੍ਞੋ ਪਰਿਸਨ੍ਤਰੇ ਬ੍ਰਾਹ੍ਮਣਗਹਪਤਿਕਾਨਂ ਵਿਤਕ੍ਕੋ ਉਪ੍ਪਜ੍ਜਿ ‘‘ਕਿਂ ਨੁ ਖੋ ਉਰੁਵੇਲਕਸ੍ਸਪੋ ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਤਿ, ਉਦਾਹੁ ਮਹਾਸਮਣੋ ਉਰੁਵੇਲਕਸ੍ਸਪੇ’’ਤਿ. ਅਥ ਖੋ ਭਗਵਾ ਤੇਸਂ ਦ੍ਵਾਦਸਨਹੁਤਾਨਂ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ‘‘ਕਸ੍ਸਪਸ੍ਸ ਮਮ ਸਨ੍ਤਿਕੇ ਪਬ੍ਬਜਿਤਭਾਵਂ ਜਾਨਾਪੇਸ੍ਸਾਮੀ’’ਤਿ ਇਮਂ ਗਾਥਮਾਹ –

‘‘ਕਿਮੇਵ ਦਿਸ੍ਵਾ ਉਰੁਵੇਲਵਾਸਿ, ਪਹਾਸਿ ਅਗ੍ਗਿਂ ਕਿਸਕੋਵਦਾਨੋ;

ਪੁਚ੍ਛਾਮਿ ਤਂ ਕਸ੍ਸਪ ਏਤਮਤ੍ਥਂ, ਕਥਂ ਪਹੀਨਂ ਤਵ ਅਗ੍ਗਿਹੁਤ੍ਤ’’ਨ੍ਤਿ. (ਮਹਾਵ. ੫੫);

ਥੇਰੋਪਿ ਭਗਵਤੋ ਅਧਿਪ੍ਪਾਯਂ ਵਿਦਿਤ੍ਵਾ –

‘‘ਰੂਪੇ ਚ ਸਦ੍ਦੇ ਚ ਅਥੋ ਰਸੇ ਚ, ਕਾਮਿਤ੍ਥਿਯੋ ਚਾਭਿਵਦਨ੍ਤਿ ਯਞ੍ਞਾ;

ਏਤਂ ਮਲਨ੍ਤਿ ਉਪਧੀਸੁ ਞਤ੍ਵਾ, ਤਸ੍ਮਾ ਨ ਯਿਟ੍ਠੇ ਨ ਹੁਤੇ ਅਰਞ੍ਜਿ’’ਨ੍ਤਿ. (ਮਹਾਵ. ੫੫); –

ਇਮਂ ਗਾਥਂ ਵਤ੍ਵਾ ਅਤ੍ਤਨੋ ਸਾਵਕਭਾਵਂ ਪਕਾਸਨਤ੍ਥਂ ਤਥਾਗਤਸ੍ਸ ਪਾਦਪਿਟ੍ਠੇ ਸੀਸਂ ਠਪੇਤ੍ਵਾ ‘‘ਸਤ੍ਥਾ ਮੇ, ਭਨ੍ਤੇ, ਭਗਵਾ, ਸਾਵਕੋਹਮਸ੍ਮੀ’’ਤਿ ਵਤ੍ਵਾ ਏਕਤਾਲਂ ਦ੍ਵਿਤਾਲਂ ਤਿਤਾਲਨ੍ਤਿ ਯਾਵ ਸਤ੍ਤਤਾਲਪ੍ਪਮਾਣਂ ਸਤ੍ਤਕ੍ਖਤ੍ਤੁਂ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਓਰੁਯ੍ਹ ਤਥਾਗਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਤਂ ਪਾਟਿਹਾਰਿਯਂ ਦਿਸ੍ਵਾ ਮਹਾਜਨੋ ‘‘ਅਹੋ ਮਹਾਨੁਭਾਵੋ ਬੁਦ੍ਧੋ, ਏਵਂ ਥਾਮਗਤਦਿਟ੍ਠਿਕੋ ਨਾਮ ਅਤ੍ਤਾਨਂ ‘ਅਰਹਾ’ਤਿ ਮਞ੍ਞਮਾਨੋ ਉਰੁਵੇਲਕਸ੍ਸਪੋਪਿ ਦਿਟ੍ਠਿਜਾਲਂ ਭਿਨ੍ਦਿਤ੍ਵਾ ਤਥਾਗਤੇਨ ਦਮਿਤੋ’’ਤਿ ਸਤ੍ਥੁ ਗੁਣਕਥਞ੍ਞੇਵ ਕਥੇਸਿ. ਤਂ ਸੁਤ੍ਵਾ ਸਤ੍ਥਾ ‘‘ਅਨਚ੍ਛਰਿਯਂ ਇਦਾਨਿ ਸਬ੍ਬਞ੍ਞੁਤਪ੍ਪਤ੍ਤੇਨ ¶ ਮਯਾ ਇਮਸ੍ਸ ਦਮਨਂ, ਸ੍ਵਾਹਂ ਪੁਬ੍ਬੇ ਸਰਾਗਕਾਲੇਪਿ ਨਾਰਦੋ ਨਾਮ ਬ੍ਰਹ੍ਮਾ ¶ ਹੁਤ੍ਵਾ ਇਮਸ੍ਸ ਦਿਟ੍ਠਿਜਾਲਂ ਭਿਨ੍ਦਿਤ੍ਵਾ ਇਮਂ ਨਿਬ੍ਬਿਸੇਵਨਮਕਾਸਿ’’ਨ੍ਤਿ ਵਤ੍ਵਾ ਤਾਯ ਪਰਿਸਾਯ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਵਿਦੇਹਰਟ੍ਠੇ ਮਿਥਿਲਾਯਂ ਅਙ੍ਗਤਿ ਨਾਮ ਰਾਜਾ ਰਜ੍ਜਂ ਕਾਰੇਸਿ ਧਮ੍ਮਿਕੋ ਧਮ੍ਮਰਾਜਾ. ਤਸ੍ਸ ਰੁਚਾ ਨਾਮ ਧੀਤਾ ਅਹੋਸਿ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਕਪ੍ਪਸਤਸਹਸ੍ਸਂ ਪਤ੍ਥਿਤਪਤ੍ਥਨਾ ਮਹਾਪੁਞ੍ਞਾ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਾ. ਸੇਸਾ ਪਨਸ੍ਸ ਸੋਲ਼ਸਸਹਸ੍ਸਾ ਇਤ੍ਥਿਯੋ ਵਞ੍ਝਾ ਅਹੇਸੁਂ. ਤਸ੍ਸ ਸਾ ਧੀਤਾ ਪਿਯਾ ਅਹੋਸਿ ਮਨਾਪਾ. ਸੋ ਤਸ੍ਸਾ ਨਾਨਾਪੁਪ੍ਫਪੂਰੇ ਪਞ੍ਚਵੀਸਤਿਪੁਪ੍ਫਸਮੁਗ੍ਗੇ ਅਨਗ੍ਘਾਨਿ ਸੁਖੁਮਾਨਿ ਵਤ੍ਥਾਨਿ ਚ ‘‘ਇਮੇਹਿ ਅਤ੍ਤਾਨਂ ਅਲਙ੍ਕਰੋਤੂ’’ਤਿ ¶ ਦੇਵਸਿਕਂ ਪਹਿਣਿ. ਖਾਦਨੀਯਭੋਜਨੀਯਸ੍ਸ ਪਨ ਪਮਾਣਂ ਨਤ੍ਥਿ. ਅਨ੍ਵਡ੍ਢਮਾਸਂ ‘‘ਦਾਨਂ ਦੇਤੂ’’ਤਿ ਸਹਸ੍ਸਂ ਸਹਸ੍ਸਂ ਪੇਸੇਸਿ. ਤਸ੍ਸ ਖੋ ਪਨ ਵਿਜਯੋ ਚ ਸੁਨਾਮੋ ਚ ਅਲਾਤੋ ਚਾਤਿ ਤਯੋ ਅਮਚ੍ਚਾ ਅਹੇਸੁਂ. ਸੋ ਕੋਮੁਦਿਯਾ ਚਾਤੁਮਾਸਿਨਿਯਾ ਛਣੇ ਪਵਤ੍ਤਮਾਨੇ ਦੇਵਨਗਰਂ ਵਿਯ ਨਗਰੇ ਚ ਅਨ੍ਤੇਪੁਰੇ ਚ ਅਲਙ੍ਕਤੇ ਸੁਨ੍ਹਾਤੋ ਸੁਵਿਲਿਤ੍ਤੋ ਸਬ੍ਬਾਲਙ੍ਕਾਰਪ੍ਪਟਿਮਣ੍ਡਿਤੋ ਭੁਤ੍ਤਸਾਯਮਾਸੋ ਵਿਵਟਸੀਹਪਞ੍ਜਰੇ ਮਹਾਤਲੇ ਅਮਚ੍ਚਗਣਪਰਿਵੁਤੋ ਵਿਸੁਦ੍ਧਂ ਗਗਨਤਲਂ ਅਭਿਲਙ੍ਘਮਾਨਂ ਚਨ੍ਦਮਣ੍ਡਲਂ ਦਿਸ੍ਵਾ ‘‘ਰਮਣੀਯਾ ਵਤ ਭੋ ਦੋਸਿਨਾ ਰਤ੍ਤਿ, ਕਾਯ ਨੁ ਖੋ ਅਜ੍ਜ ਰਤਿਯਾ ਅਭਿਰਮੇਯ੍ਯਾਮਾ’’ਤਿ ਅਮਚ੍ਚੇ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੫੩.

‘‘ਅਹੁ ਰਾਜਾ ਵਿਦੇਹਾਨਂ, ਅਙ੍ਗਤਿ ਨਾਮ ਖਤ੍ਤਿਯੋ;

ਪਹੂਤਯੋਗ੍ਗੋ ਧਨਿਮਾ, ਅਨਨ੍ਤਬਲਪੋਰਿਸੋ.

੧੧੫੪.

‘‘ਸੋ ਚ ਪਨ੍ਨਰਸਿਂ ਰਤ੍ਤਿਂ, ਪੁਰਿਮਯਾਮੇ ਅਨਾਗਤੇ;

ਚਾਤੁਮਾਸਾ ਕੋਮੁਦਿਯਾ, ਅਮਚ੍ਚੇ ਸਨ੍ਨਿਪਾਤਯਿ.

੧੧੫੫.

‘‘ਪਣ੍ਡਿਤੇ ਸੁਤਸਮ੍ਪਨ੍ਨੇ, ਮ੍ਹਿਤਪੁਬ੍ਬੇ ਵਿਚਕ੍ਖਣੇ;

ਵਿਜਯਞ੍ਚ ਸੁਨਾਮਞ੍ਚ, ਸੇਨਾਪਤਿਂ ਅਲਾਤਕਂ.

੧੧੫੬.

‘‘ਤਮਨੁਪੁਚ੍ਛਿ ਵੇਦੇਹੋ, ਪਚ੍ਚੇਕਂ ਬ੍ਰੂਥ ਸਂ ਰੁਚਿਂ;

ਚਾਤੁਮਾਸਾ ਕੋਮੁਦਜ੍ਜ, ਜੁਣ੍ਹਂ ਬ੍ਯਪਹਤਂ ਤਮਂ;

ਕਾਯਜ੍ਜ ਰਤਿਯਾ ਰਤ੍ਤਿਂ, ਵਿਹਰੇਮੁ ਇਮਂ ਉਤੁ’’ਨ੍ਤਿ.

ਤਤ੍ਥ ¶ ¶ ਪਹੂਤਯੋਗ੍ਗੋਤਿ ਬਹੁਕੇਨ ਹਤ੍ਥਿਯੋਗ੍ਗਾਦਿਨਾ ਸਮਨ੍ਨਾਗਤੋ. ਅਨਨ੍ਤਬਲਪੋਰਿਸੋਤਿ ਅਨਨ੍ਤਬਲਕਾਯੋ. ਅਨਾਗਤੇਤਿ ਪਰਿਯੋਸਾਨਂ ਅਪ੍ਪਤ੍ਤੇ, ਅਨਤਿਕ੍ਕਨ੍ਤੇਤਿ ਅਤ੍ਥੋ. ਚਾਤੁਮਾਸਾਤਿ ਚਤੁਨ੍ਨਂ ਵਸ੍ਸਿਕਮਾਸਾਨਂ ਪਚ੍ਛਿਮਦਿਵਸਭੂਤਾਯ ਰਤ੍ਤਿਯਾ. ਕੋਮੁਦਿਯਾਤਿ ਫੁਲ੍ਲਕੁਮੁਦਾਯ. ਮ੍ਹਿਤਪੁਬ੍ਬੇਤਿ ਪਠਮਂ ਸਿਤਂ ਕਤ੍ਵਾ ਪਚ੍ਛਾ ਕਥਨਸੀਲੇ. ਤਮਨੁਪੁਚ੍ਛੀਤਿ ਤਂ ਤੇਸੁ ਅਮਚ੍ਚੇਸੁ ਏਕੇਕਂ ਅਮਚ੍ਚਂ ਅਨੁਪੁਚ੍ਛਿ. ਪਚ੍ਚੇਕਂ ਬ੍ਰੂਥ ਸਂ ਰੁਚਿਨ੍ਤਿ ਸਬ੍ਬੇਪਿ ਤੁਮ੍ਹੇ ਅਤ੍ਤਨੋ ਅਤ੍ਤਨੋ ਅਜ੍ਝਾਸਯਾਨੁਰੂਪਂ ਰੁਚਿਂ ਪਚ੍ਚੇਕਂ ਮਯ੍ਹਂ ਕਥੇਥ. ਕੋਮੁਦਜ੍ਜਾਤਿ ਕੋਮੁਦੀ ਅਜ੍ਜ. ਜੁਣ੍ਹਨ੍ਤਿ ਜੁਣ੍ਹਾਯ ਨਿਸ੍ਸਯਭੂਤਂ ਚਨ੍ਦਮਣ੍ਡਲਂ ਅਬ੍ਭੁਗ੍ਗਚ੍ਛਤਿ. ਬ੍ਯਪਹਤਂ ਤਮਨ੍ਤਿ ਤੇਨ ਸਬ੍ਬਂ ਅਨ੍ਧਕਾਰਂ ਵਿਹਤਂ. ਉਤੁਨ੍ਤਿ ਅਜ੍ਜ ਰਤ੍ਤਿਂ ਇਮਂ ਏਵਰੂਪਂ ਉਤੁਂ ਕਾਯਰਤਿਯਾ ਵਿਹਰੇਯ੍ਯਾਮਾਤਿ.

ਇਤਿ ਰਾਜਾ ਅਮਚ੍ਚੇ ਪੁਚ੍ਛਿ. ਤੇਨ ਤੇ ਪੁਚ੍ਛਿਤਾ ਅਤ੍ਤਨੋ ਅਤ੍ਤਨੋ ਅਜ੍ਝਾਸਯਾਨੁਰੂਪਂ ਕਥਂ ਕਥਯਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੫੭.

‘‘ਤਤੋ ਸੇਨਾਪਤਿ ਰਞ੍ਞੋ, ਅਲਾਤੋ ਏਤਦਬ੍ਰਵਿ;

‘ਹਟ੍ਠਂ ਯੋਗ੍ਗਂ ਬਲਂ ਸਬ੍ਬਂ, ਸੇਨਂ ਸਨ੍ਨਾਹਯਾਮਸੇ.

੧੧੫੮.

‘ਨਿਯ੍ਯਾਮ ¶ ਦੇਵ ਯੁਦ੍ਧਾਯ, ਅਨਨ੍ਤਬਲਪੋਰਿਸਾ;

ਯੇ ਤੇ ਵਸਂ ਨ ਆਯਨ੍ਤਿ, ਵਸਂ ਉਪਨਯਾਮਸੇ;

ਏਸਾ ਮਯ੍ਹਂ ਸਕਾ ਦਿਟ੍ਠਿ, ਅਜਿਤਂ ਓਜਿਨਾਮਸੇ’.

੧੧੫੯.

ਅਲਾਤਸ੍ਸ ਵਚੋ ਸੁਤ੍ਵਾ, ਸੁਨਾਮੋ ਏਤਦਬ੍ਰਵਿ;

‘ਸਬ੍ਬੇ ਤੁਯ੍ਹਂ ਮਹਾਰਾਜ, ਅਮਿਤ੍ਤਾ ਵਸਮਾਗਤਾ.

੧੧੬੦.

‘ਨਿਕ੍ਖਿਤ੍ਤਸਤ੍ਥਾ ਪਚ੍ਚਤ੍ਥਾ, ਨਿਵਾਤਮਨੁਵਤ੍ਤਰੇ;

ਉਤ੍ਤਮੋ ਉਸ੍ਸਵੋ ਅਜ੍ਜ, ਨ ਯੁਦ੍ਧਂ ਮਮ ਰੁਚ੍ਚਤਿ.

੧੧੬੧.

‘ਅਨ੍ਨਪਾਨਞ੍ਚ ਖਜ੍ਜਞ੍ਚ, ਖਿਪ੍ਪਂ ਅਭਿਹਰਨ੍ਤੁ ਤੇ;

ਰਮਸ੍ਸੁ ਦੇਵ ਕਾਮੇਹਿ, ਨਚ੍ਚਗੀਤੇ ਸੁਵਾਦਿਤੇ’.

੧੧੬੨.

ਸੁਨਾਮਸ੍ਸ ਵਚੋ ਸੁਤ੍ਵਾ, ਵਿਜਯੋ ਏਤਦਬ੍ਰਵਿ;

‘ਸਬ੍ਬੇ ਕਾਮਾ ਮਹਾਰਾਜ, ਨਿਚ੍ਚਂ ਤਵ ਮੁਪਟ੍ਠਿਤਾ.

੧੧੬੩.

‘ਨ ¶ ¶ ਹੇਤੇ ਦੁਲ੍ਲਭਾ ਦੇਵ, ਤਵ ਕਾਮੇਹਿ ਮੋਦਿਤੁਂ;

ਸਦਾਪਿ ਕਾਮਾ ਸੁਲਭਾ, ਨੇਤਂ ਚਿਤ੍ਤਮਤਂ ਮਮ.

੧੧੬੪.

‘ਸਮਣਂ ਬ੍ਰਾਹ੍ਮਣਂ ਵਾਪਿ, ਉਪਾਸੇਮੁ ਬਹੁਸ੍ਸੁਤਂ;

ਯੋ ਨਜ੍ਜ ਵਿਨਯੇ ਕਙ੍ਖਂ, ਅਤ੍ਥਧਮ੍ਮਵਿਦੂ ਇਸੇ’.

੧੧੬੫.

ਵਿਜਯਸ੍ਸ ਵਚੋ ਸੁਤ੍ਵਾ, ਰਾਜਾ ਅਙ੍ਗਤਿ ਮਬ੍ਰਵਿ;

‘ਯਥਾ ਵਿਜਯੋ ਭਣਤਿ, ਮਯ੍ਹਮ੍ਪੇਤਂਵ ਰੁਚ੍ਚਤਿ;

੧੧੬੬.

‘ਸਮਣਂ ਬ੍ਰਾਹ੍ਮਣਂ ਵਾਪਿ, ਉਪਾਸੇਮੁ ਬਹੁਸ੍ਸੁਤਂ;

ਯੋ ਨਜ੍ਜ ਵਿਨਯੇ ਕਙ੍ਖਂ, ਅਤ੍ਥਧਮ੍ਮਵਿਦੂ ਇਸੇ.

੧੧੬੭.

‘ਸਬ੍ਬੇਵ ਸਨ੍ਤਾ ਕਰੋਥ ਮਤਿਂ, ਕਂ ਉਪਾਸੇਮੁ ਪਣ੍ਡਿਤਂ;

ਯੋ ਨਜ੍ਜ ਵਿਨਯੇ ਕਙ੍ਖਂ, ਅਤ੍ਥਧਮ੍ਮਵਿਦੂ ਇਸੇ’.

੧੧੬੮.

ਵੇਦੇਹਸ੍ਸ ਵਚੋ ਸੁਤ੍ਵਾ, ਅਲਾਤੋ ਏਤਦਬ੍ਰਵਿ;

‘ਅਤ੍ਥਾਯਂ ਮਿਗਦਾਯਸ੍ਮਿਂ, ਅਚੇਲੋ ਧੀਰਸਮ੍ਮਤੋ.

੧੧੬੯.

‘ਗੁਣੋ ਕਸ੍ਸਪਗੋਤ੍ਤਾਯਂ, ਸੁਤੋ ਚਿਤ੍ਰਕਥੀ ਗਣੀ;

ਤਂ ਦੇਵ ਪਯਿਰੁਪਾਸੇਮੁ, ਸੋ ਨੋ ਕਙ੍ਖਂ ਵਿਨੇਸ੍ਸਤਿ’.

੧੧੭੦.

‘‘ਅਲਾਤਸ੍ਸ ਵਚੋ ਸੁਤ੍ਵਾ, ਰਾਜਾ ਚੋਦੇਸਿ ਸਾਰਥਿਂ;

ਮਿਗਦਾਯਂ ਗਮਿਸ੍ਸਾਮ, ਯੁਤ੍ਤਂ ਯਾਨਂ ਇਧਾ ਨਯਾ’’ਤਿ.

ਤਤ੍ਥ ਹਟ੍ਠਨ੍ਤਿ ਤੁਟ੍ਠਪਹਟ੍ਠਂ. ਓਜਿਨਾਮਸੇਤਿ ਯਂ ਨੋ ਅਜਿਤਂ, ਤਂ ਜਿਨਾਮ. ਏਸੋ ਮਮ ਅਜ੍ਝਾਸਯੋਤਿ. ਰਾਜਾ ਤਸ੍ਸ ਕਥਂ ਨੇਵ ਪਟਿਕ੍ਕੋਸਿ, ਨਾਭਿਨਨ੍ਦਿ. ਏਤਦਬ੍ਰਵੀਤਿ ਰਾਜਾਨਂ ਅਲਾਤਸ੍ਸ ਵਚਨਂ ਅਨਭਿਨਨ੍ਦਨ੍ਤਂ ਅਪ੍ਪਟਿਕ੍ਕੋਸਨ੍ਤਂ ਦਿਸ੍ਵਾ ‘‘ਨਾਯਂ ਯੁਦ੍ਧਜ੍ਝਾਸਯੋ, ਅਹਮਸ੍ਸ ਚਿਤ੍ਤਂ ਗਣ੍ਹਨ੍ਤੋ ਕਾਮਗੁਣਾਭਿਰਤਿਂ ਵਣ੍ਣਯਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਤਂ ‘‘ਸਬ੍ਬੇ ਤੁਯ੍ਹ’’ਨ੍ਤਿਆਦਿਵਚਨਂ ਅਬ੍ਰਵਿ.

ਵਿਜਯੋ ¶ ਏਤਦਬ੍ਰਵੀਤਿ ਰਾਜਾ ਸੁਨਾਮਸ੍ਸਪਿ ਵਚਨਂ ਨਾਭਿਨਨ੍ਦਿ, ਨ ਪਟਿਕ੍ਕੋਸਿ. ਤਤੋ ਵਿਜਯੋ ‘‘ਅਯਂ ਰਾਜਾ ਇਮੇਸਂ ਦ੍ਵਿਨ੍ਨਮ੍ਪਿ ਵਚਨਂ ਸੁਤ੍ਵਾ ਤੁਣ੍ਹੀਯੇਵ ਠਿਤੋ, ਪਣ੍ਡਿਤਾ ਨਾਮ ਧਮ੍ਮਸ੍ਸਵਨਸੋਣ੍ਡਾ ਹੋਨ੍ਤਿ, ਧਮ੍ਮਸ੍ਸਵਨਮਸ੍ਸ ਵਣ੍ਣਯਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਤਂ ‘‘ਸਬ੍ਬੇ ਕਾਮਾ’’ਤਿਆਦਿਵਚਨਂ ਅਬ੍ਰਵਿ. ਤਤ੍ਥ ਤਵ ¶ ਮੁਪਟ੍ਠਿਤਾਤਿ ਤਵ ਉਪਟ੍ਠਿਤਾ. ਮੋਦਿਤੁਨ੍ਤਿ ¶ ਤਵ ਕਾਮੇਹਿ ਮੋਦਿਤੁਂ ਅਭਿਰਮਿਤੁਂ ਇਚ੍ਛਾਯ ਸਤਿ ਨ ਹਿ ਏਤੇ ਕਾਮਾ ਦੁਲ੍ਲਭਾ. ਨੇਤਂ ਚਿਤ੍ਤਮਤਂ ਮਮਾਤਿ ਏਤਂ ਤਵ ਕਾਮੇਹਿ ਅਭਿਰਮਣਂ ਮਮ ਚਿਤ੍ਤਮਤਂ ਨ ਹੋਤਿ, ਨ ਮੇ ਏਤ੍ਥ ਚਿਤ੍ਤਂ ਪਕ੍ਖਨ੍ਦਤਿ. ਯੋ ਨਜ੍ਜਾਤਿ ਯੋ ਨੋ ਅਜ੍ਜ. ਅਤ੍ਥਧਮ੍ਮਵਿਦੂਤਿ ਪਾਲ਼ਿਅਤ੍ਥਞ੍ਚੇਵ ਪਾਲ਼ਿਧਮ੍ਮਞ੍ਚ ਜਾਨਨ੍ਤੋ. ਇਸੇਤਿ ਇਸਿ ਏਸਿਤਗੁਣੋ.

ਅਙ੍ਗਤਿ ਮਬ੍ਰਵੀਤਿ ਅਙ੍ਗਤਿ ਅਬ੍ਰਵਿ. ਮਯ੍ਹਮ੍ਪੇਤਂਵ ਰੁਚ੍ਚਤੀਤਿ ਮਯ੍ਹਮ੍ਪਿ ਏਤਞ੍ਞੇਵ ਰੁਚ੍ਚਤਿ. ਸਬ੍ਬੇਵ ਸਨ੍ਤਾਤਿ ਸਬ੍ਬੇਵ ਤੁਮ੍ਹੇ ਇਧ ਵਿਜ੍ਜਮਾਨਾ ਮਤਿਂ ਕਰੋਥ ਚਿਨ੍ਤੇਥ. ਅਲਾਤੋ ਏਤਦਬ੍ਰਵੀਤਿ ਰਞ੍ਞੋ ਕਥਂ ਸੁਤ੍ਵਾ ਅਲਾਤੋ ‘‘ਅਯਂ ਮਮ ਕੁਲੂਪਕੋ ਗੁਣੋ ਨਾਮ ਆਜੀਵਕੋ ਰਾਜੁਯ੍ਯਾਨੇ ਵਸਤਿ, ਤਂ ਪਸਂਸਿਤ੍ਵਾ ਰਾਜਕੁਲੂਪਕਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਤਂ ‘‘ਅਤ੍ਥਾਯ’’ਨ੍ਤਿਆਦਿਵਚਨਂ ਅਬ੍ਰਵਿ. ਤਤ੍ਥ ਧੀਰਸਮ੍ਮਤੋਤਿ ਪਣ੍ਡਿਤੋਤਿ ਸਮ੍ਮਤੋ. ਕਸ੍ਸਪਗੋਤ੍ਤਾਯਨ੍ਤਿ ਕਸ੍ਸਪਗੋਤ੍ਤੋ ਅਯਂ. ਸੁਤੋਤਿ ਬਹੁਸ੍ਸੁਤੋ. ਗਣੀਤਿ ਗਣਸਤ੍ਥਾ. ਚੋਦੇਸੀਤਿ ਆਣਾਪੇਸਿ.

ਰਞ੍ਞੋ ਤਂ ਕਥਂ ਸੁਤ੍ਵਾ ਸਾਰਥਿਨੋ ਤਥਾ ਕਰਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੭੧.

‘‘ਤਸ੍ਸ ਯਾਨਂ ਅਯੋਜੇਸੁਂ, ਦਨ੍ਤਂ ਰੂਪਿਯਪਕ੍ਖਰਂ;

ਸੁਕ੍ਕਮਟ੍ਠਪਰਿਵਾਰਂ, ਪਣ੍ਡਰਂ ਦੋਸਿਨਾ ਮੁਖਂ.

੧੧੭੨.

‘‘ਤਤ੍ਰਾਸੁਂ ਕੁਮੁਦਾਯੁਤ੍ਤਾ, ਚਤ੍ਤਾਰੋ ਸਿਨ੍ਧਵਾ ਹਯਾ;

ਅਨਿਲੂਪਮਸਮੁਪ੍ਪਾਤਾ, ਸੁਦਨ੍ਤਾ ਸੋਣ੍ਣਮਾਲਿਨੋ.

੧੧੭੩.

‘‘ਸੇਤਚ੍ਛਤ੍ਤਂ ਸੇਤਰਥੋ, ਸੇਤਸ੍ਸਾ ਸੇਤਬੀਜਨੀ;

ਵੇਦੇਹੋ ਸਹਮਚ੍ਚੇਹਿ, ਨਿਯ੍ਯਂ ਚਨ੍ਦੋਵ ਸੋਭਤਿ.

੧੧੭੪.

‘‘ਤਮਨੁਯਾਯਿਂਸੁ ਬਹਵੋ, ਇਨ੍ਦਿਖਗ੍ਗਧਰਾ ਬਲੀ;

ਅਸ੍ਸਪਿਟ੍ਠਿਗਤਾ ਵੀਰਾ, ਨਰਾ ਨਰਵਰਾਧਿਪਂ.

੧੧੭੫.

‘‘ਸੋ ¶ ਮੁਹੁਤ੍ਤਂਵ ਯਾਯਿਤ੍ਵਾ, ਯਾਨਾ ਓਰੁਯ੍ਹ ਖਤ੍ਤਿਯੋ;

ਵੇਦੇਹੋ ਸਹਮਚ੍ਚੇਹਿ, ਪਤ੍ਤੀ ਗੁਣਮੁਪਾਗਮਿ.

੧੧੭੬.

‘‘ਯੇਪਿ ਤਤ੍ਥ ਤਦਾ ਆਸੁਂ, ਬ੍ਰਾਹ੍ਮਣਿਬ੍ਭਾ ਸਮਾਗਤਾ;

ਨ ਤੇ ਅਪਨਯੀ ਰਾਜਾ, ਅਕਤਂ ਭੂਮਿਮਾਗਤੇ’’ਤਿ.

ਤਤ੍ਥ ¶ ਤਸ੍ਸ ਯਾਨਨ੍ਤਿ ਤਸ੍ਸ ਰਞ੍ਞੋ ਰਥਂ ਯੋਜਯਿਂਸੁ. ਦਨ੍ਤਨ੍ਤਿ ਦਨ੍ਤਮਯਂ. ਰੂਪਿਯਪਕ੍ਖਰਨ੍ਤਿ ਰਜਤਮਯਉਪਕ੍ਖਰਂ. ਸੁਕ੍ਕਮਟ੍ਠਪਰਿਵਾਰਨ੍ਤਿ ਪਰਿਸੁਦ੍ਧਾਫਰੁਸਪਰਿਵਾਰਂ. ਦੋਸਿਨਾ ਮੁਖਨ੍ਤਿ ਵਿਗਤਦੋਸਾਯ ਰਤ੍ਤਿਯਾ ਮੁਖਂ ਵਿਯ, ਚਨ੍ਦਸਦਿਸਨ੍ਤਿ ਅਤ੍ਥੋ. ਤਤ੍ਰਾਸੁਨ੍ਤਿ ਤਤ੍ਰ ਅਹੇਸੁਂ. ਕੁਮੁਦਾਤਿ ਕੁਮੁਦਵਣ੍ਣਾ. ਸਿਨ੍ਧਵਾਤਿ ਸਿਨ੍ਧਵਜਾਤਿਕਾ. ਅਨਿਲੂਪਮਸਮੁਪ੍ਪਾਤਾਤਿ ਵਾਤਸਦਿਸਵੇਗਾ. ਸੇਤਚ੍ਛਤ੍ਤਨ੍ਤਿ ਤਸ੍ਮਿਂ ਰਥੇ ਸਮੁਸ੍ਸਾਪਿਤਂ ਛਤ੍ਤਮ੍ਪਿ ਸੇਤਂ ਅਹੋਸਿ. ਸੇਤਰਥੋਤਿ ਸੋਪਿ ਰਥੋ ਸੇਤੋਯੇਵ. ਸੇਤਸ੍ਸਾਤਿ ਅਸ੍ਸਾਪਿ ਸੇਤਾ. ਸੇਤਬੀਜਨੀਤਿ ਬੀਜਨੀਪਿ ਸੇਤਾ. ਨਿਯ੍ਯਨ੍ਤਿ ਤੇਨ ਰਥੇਨ ਨਿਗ੍ਗਚ੍ਛਨ੍ਤੋ ਅਮਚ੍ਚਗਣਪਰਿਵੁਤੋ ਵੇਦੇਹਰਾਜਾ ਚਨ੍ਦੋ ਵਿਯ ਸੋਭਤਿ.

ਨਰਵਰਾਧਿਪਨ੍ਤਿ ਨਰਵਰਾਨਂ ਅਧਿਪਤਿਂ ਰਾਜਾਧਿਰਾਜਾਨਂ. ਸੋ ਮੁਹੁਤ੍ਤਂਵ ਯਾਯਿਤ੍ਵਾਤਿ ਸੋ ਰਾਜਾ ਮੁਹੁਤ੍ਤੇਨੇਵ ਉਯ੍ਯਾਨਂ ਗਨ੍ਤ੍ਵਾ. ਪਤ੍ਤੀ ਗੁਣਮੁਪਾਗਮੀਤਿ ਪਤ੍ਤਿਕੋਵ ਗੁਣਂ ਆਜੀਵਕਂ ਉਪਾਗਮਿ. ਯੇਪਿ ਤਤ੍ਥ ਤਦਾ ਆਸੁਨ੍ਤਿ ਯੇਪਿ ਤਸ੍ਮਿਂ ਉਯ੍ਯਾਨੇ ਤਦਾ ਪੁਰੇਤਰਂ ਗਨ੍ਤ੍ਵਾ ਤਂ ਆਜੀਵਕਂ ਪਯਿਰੁਪਾਸਮਾਨਾ ਨਿਸਿਨ੍ਨਾ ਅਹੇਸੁਂ. ਨ ਤੇ ਅਪਨਯੀਤਿ ਅਮ੍ਹਾਕਮੇਵ ਦੋਸੋ, ਯੇ ਮਯਂ ਪਚ੍ਛਾ ¶ ਅਗਮਿਮ੍ਹਾ, ਤੁਮ੍ਹੇ ਮਾ ਚਿਨ੍ਤਯਿਤ੍ਥਾਤਿ ਤੇ ਬ੍ਰਾਹ੍ਮਣੇ ਚ ਇਬ੍ਭੇ ਚ ਰਞ੍ਞੋਯੇਵ ਅਤ੍ਥਾਯ ਅਕਤਂ ਅਕਤੋਕਾਸਂ ਭੂਮਿਂ ਸਮਾਗਤੇ ਨ ਉਸ੍ਸਾਰਣਂ ਕਾਰੇਤ੍ਵਾ ਅਪਨਯੀਤਿ.

ਤਾਯ ਪਨ ਓਮਿਸ੍ਸਕਪਰਿਸਾਯ ਪਰਿਵੁਤੋਵ ਏਕਮਨ੍ਤਂ ਨਿਸੀਦਿਤ੍ਵਾ ਪਟਿਸਨ੍ਥਾਰਮਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੭੭.

‘‘ਤਤੋ ਸੋ ਮੁਦੁਕਾ ਭਿਸਿਯਾ, ਮੁਦੁਚਿਤ੍ਤਕਸਨ੍ਥਤੇ;

ਮੁਦੁਪਚ੍ਚਤ੍ਥਤੇ ਰਾਜਾ, ਏਕਮਨ੍ਤਂ ਉਪਾਵਿਸਿ.

੧੧੭੮.

‘‘ਨਿਸਜ੍ਜ ਰਾਜਾ ਸਮ੍ਮੋਦਿ, ਕਥਂ ਸਾਰਣਿਯਂ ਤਤੋ;

‘ਕਚ੍ਚਿ ਯਾਪਨਿਯਂ ਭਨ੍ਤੇ, ਵਾਤਾਨਮਵਿਯਗ੍ਗਤਾ.

੧੧੭੯.

‘ਕਚ੍ਚਿ ¶ ਅਕਸਿਰਾ ਵੁਤ੍ਤਿ, ਲਭਸਿ ਪਿਣ੍ਡਯਾਪਨਂ;

ਅਪ੍ਪਾਬਾਧੋ ਚਸਿ ਕਚ੍ਚਿ, ਚਕ੍ਖੁਂ ਨ ਪਰਿਹਾਯਤਿ’.

੧੧੮੦.

ਤਂ ਗੁਣੋ ਪਟਿਸਮ੍ਮੋਦਿ, ਵੇਦੇਹਂ ਵਿਨਯੇ ਰਤਂ;

‘ਯਾਪਨੀਯਂ ਮਹਾਰਾਜ, ਸਬ੍ਬਮੇਤਂ ਤਦੂਭਯਂ.

੧੧੮੧.

‘ਕਚ੍ਚਿ ¶ ਤੁਯ੍ਹਮ੍ਪਿ ਵੇਦੇਹ, ਪਚ੍ਚਨ੍ਤਾ ਨ ਬਲੀਯਰੇ;

ਕਚ੍ਚਿ ਅਰੋਗਂ ਯੋਗ੍ਗਂ ਤੇ, ਕਚ੍ਚਿ ਵਹਤਿ ਵਾਹਨਂ;

ਕਚ੍ਚਿ ਤੇ ਬ੍ਯਾਧਯੋ ਨਤ੍ਥਿ, ਸਰੀਰਸ੍ਸੁਪਤਾਪਿਯਾ’.

੧੧੮੨.

‘‘ਪਟਿਸਮ੍ਮੋਦਿਤੋ ਰਾਜਾ, ਤਤੋ ਪੁਚ੍ਛਿ ਅਨਨ੍ਤਰਾ;

ਅਤ੍ਥਂ ਧਮ੍ਮਞ੍ਚ ਞਾਯਞ੍ਚ, ਧਮ੍ਮਕਾਮੋ ਰਥੇਸਭੋ.

੧੧੮੩.

‘ਕਥਂ ਧਮ੍ਮਂ ਚਰੇ ਮਚ੍ਚੋ, ਮਾਤਾਪਿਤੂਸੁ ਕਸ੍ਸਪ;

ਕਥਂ ਚਰੇ ਆਚਰਿਯੇ, ਪੁਤ੍ਤਦਾਰੇ ਕਥਂ ਚਰੇ.

੧੧੮੪.

‘ਕਥਂ ਚਰੇਯ੍ਯ ਵੁਡ੍ਢੇਸੁ, ਕਥਂ ਸਮਣਬ੍ਰਾਹ੍ਮਣੇ;

ਕਥਞ੍ਚ ਬਲਕਾਯਸ੍ਮਿਂ, ਕਥਂ ਜਨਪਦੇ ਚਰੇ.

੧੧੮੫.

‘ਕਥਂ ਧਮ੍ਮਂ ਚਰਿਤ੍ਵਾਨ, ਮਚ੍ਚਾ ਗਚ੍ਛਨ੍ਤਿ ਸੁਗ੍ਗਤਿਂ;

ਕਥਞ੍ਚੇਕੇ ਅਧਮ੍ਮਟ੍ਠਾ, ਪਤਨ੍ਤਿ ਨਿਰਯਂ ਅਥੋ’’’ਤਿ.

ਤਤ੍ਥ ਮੁਦੁਕਾ ਭਿਸਿਯਾਤਿ ਮੁਦੁਕਾਯ ਸੁਖਸਮ੍ਫਸ੍ਸਾਯ ਭਿਸਿਯਾ. ਮੁਦੁਚਿਤ੍ਤਕਸਨ੍ਥਤੇਤਿ ਸੁਖਸਮ੍ਫਸ੍ਸੇ ਚਿਤ੍ਤਤ੍ਥਰਣੇ. ਮੁਦੁਪਚ੍ਚਤ੍ਥਤੇਤਿ ਮੁਦੁਨਾ ਪਚ੍ਚਤ੍ਥਰਣੇਨ ਪਚ੍ਚਤ੍ਥਤੇ. ਸਮ੍ਮੋਦੀਤਿ ਆਜੀਵਕੇਨ ਸਦ੍ਧਿਂ ਸਮ੍ਮੋਦਨੀਯਂ ਕਥਂ ਕਥੇਸਿ. ਤਤੋਤਿ ਤਤੋ ਨਿਸਜ੍ਜਨਤੋ ਅਨਨ੍ਤਰਮੇਵ ਸਾਰਣੀਯਂ ਕਥਂ ਕਥੇਸੀਤਿ ਅਤ੍ਥੋ. ਤਤ੍ਥ ਕਚ੍ਚਿ ਯਾਪਨਿਯਨ੍ਤਿ ਕਚ੍ਚਿ ਤੇ, ਭਨ੍ਤੇ, ਸਰੀਰਂ ਪਚ੍ਚਯੇਹਿ ਯਾਪੇਤੁਂ ਸਕ੍ਕਾ. ਵਾਤਾਨਮਵਿਯਗ੍ਗਤਾਤਿ ਕਚ੍ਚਿ ਤੇ ਸਰੀਰੇ ਧਾਤੁਯੋ ਸਮਪ੍ਪਵਤ੍ਤਾ, ਵਾਤਾਨਂ ਬ੍ਯਗ੍ਗਤਾ ਨਤ੍ਥਿ, ਤਤ੍ਥ ਤਤ੍ਥ ਵਗ੍ਗਵਗ੍ਗਾ ਹੁਤ੍ਵਾ ਵਾਤਾ ਨ ਬਾਧਯਨ੍ਤੀਤਿ ਅਤ੍ਥੋ.

ਅਕਸਿਰਾਤਿ ਨਿਦ੍ਦੁਕ੍ਖਾ. ਵੁਤ੍ਤੀਤਿ ਜੀਵਿਤਵੁਤ੍ਤਿ. ਅਪ੍ਪਾਬਾਧੋਤਿ ਇਰਿਯਾਪਥਭਞ੍ਜਕੇਨਾਬਾਧੇਨ ਵਿਰਹਿਤੋ ¶ . ਚਕ੍ਖੁਨ੍ਤਿ ਕਚ੍ਚਿ ਤੇ ਚਕ੍ਖੁਆਦੀਨਿ ¶ ਇਨ੍ਦ੍ਰਿਯਾਨਿ ਨ ਪਰਿਹਾਯਨ੍ਤੀਤਿ ਪੁਚ੍ਛਤਿ. ਪਟਿਸਮ੍ਮੋਦੀਤਿ ਸਮ੍ਮੋਦਨੀਯਕਥਾਯ ਪਟਿਕਥੇਸਿ. ਤਤ੍ਥ ਸਬ੍ਬਮੇਤਨ੍ਤਿ ਯਂ ਤਯਾ ਵੁਤ੍ਤਂ ਵਾਤਾਨਮਵਿਯਗ੍ਗਤਾਦਿ, ਤਂ ਸਬ੍ਬਂ ਤਥੇਵ. ਤਦੁਭਯਨ੍ਤਿ ਯਮ੍ਪਿ ਤਯਾ ‘‘ਅਪ੍ਪਾਬਾਧੋ ਚਸਿ ਕਚ੍ਚਿ, ਚਕ੍ਖੁਂ ਨ ਪਰਿਹਾਯਤੀ’’ਤਿ ਵੁਤ੍ਤਂ, ਤਮ੍ਪਿ ਉਭਯਂ ਤਥੇਵ.

ਨ ਬਲੀਯਰੇਤਿ ਨਾਭਿਭਵਨ੍ਤਿ ਨ ਕੁਪ੍ਪਨ੍ਤਿ. ਅਨਨ੍ਤਰਾਤਿ ਪਟਿਸਨ੍ਥਾਰਤੋ ਅਨਨ੍ਤਰਾ ਪਞ੍ਹਂ ਪੁਚ੍ਛਿ. ਤਤ੍ਥ ਅਤ੍ਥਂ ਧਮ੍ਮਞ੍ਚ ਞਾਯਞ੍ਚਾਤਿ ਪਾਲ਼ਿਅਤ੍ਥਞ੍ਚ ਪਾਲ਼ਿਞ੍ਚ ਕਾਰਣਯੁਤ੍ਤਿਞ੍ਚ ¶ . ਸੋ ਹਿ ‘‘ਕਥਂ ਧਮ੍ਮਂ ਚਰੇ’’ਤਿ ਪੁਚ੍ਛਨ੍ਤੋ ਮਾਤਾਪਿਤੁਆਦੀਸੁ ਪਟਿਪਤ੍ਤਿਦੀਪਕਂ ਪਾਲ਼ਿਞ੍ਚ ਪਾਲ਼ਿਅਤ੍ਥਞ੍ਚ ਕਾਰਣਯੁਤ੍ਤਿਞ੍ਚ ਮੇ ਕਥੇਥਾਤਿ ਇਮਂ ਅਤ੍ਥਞ੍ਚ ਧਮ੍ਮਞ੍ਚ ਞਾਯਞ੍ਚ ਪੁਚ੍ਛਤਿ. ਤਤ੍ਥ ਕਥਞ੍ਚੇਕੇ ਅਧਮ੍ਮਟ੍ਠਾਤਿ ਏਕਚ੍ਚੇ ਅਧਮ੍ਮੇ ਠਿਤਾ ਕਥਂ ਨਿਰਯਞ੍ਚੇਵ ਅਥੋ ਸੇਸਅਪਾਯੇ ਚ ਪਤਨ੍ਤੀਤਿ ਸਬ੍ਬਞ੍ਞੁਬੁਦ੍ਧਪਚ੍ਚੇਕਬੁਦ੍ਧਬੁਦ੍ਧਸਾਵਕਮਹਾਬੋਧਿਸਤ੍ਤੇਸੁ ਪੁਰਿਮਸ੍ਸ ਪੁਰਿਮਸ੍ਸ ਅਲਾਭੇਨ ਪਚ੍ਛਿਮਂ ਪਚ੍ਛਿਮਂ ਪੁਚ੍ਛਿਤਬ੍ਬਕਂ ਮਹੇਸਕ੍ਖਪਞ੍ਹਂ ਰਾਜਾ ਕਿਞ੍ਚਿ ਅਜਾਨਨ੍ਤਂ ਨਗ੍ਗਭੋਗ੍ਗਂ ਨਿਸ੍ਸਿਰਿਕਂ ਅਨ੍ਧਬਾਲਂ ਆਜੀਵਕਂ ਪੁਚ੍ਛਿ.

ਸੋਪਿ ਏਵਂ ਪੁਚ੍ਛਿਤੋ ਪੁਚ੍ਛਾਨੁਰੂਪਂ ਬ੍ਯਾਕਰਣਂ ਅਦਿਸ੍ਵਾ ਚਰਨ੍ਤਂ ਗੋਣਂ ਦਣ੍ਡੇਨ ਪਹਰਨ੍ਤੋ ਵਿਯ ਭਤ੍ਤਪਾਤਿਯਂ ਕਚਵਰਂ ਖਿਪਨ੍ਤੋ ਵਿਯ ਚ ‘‘ਸੁਣ, ਮਹਾਰਾਜਾ’’ਤਿ ਓਕਾਸਂ ਕਾਰੇਤ੍ਵਾ ਅਤ੍ਤਨੋ ਮਿਚ੍ਛਾਵਾਦਂ ਪਟ੍ਠਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੧੮੬.

‘‘ਵੇਦੇਹਸ੍ਸ ਵਚੋ ਸੁਤ੍ਵਾ, ਕਸ੍ਸਪੋ ਏਤਦਬ੍ਰਵਿ;

‘ਸੁਣੋਹਿ ਮੇ ਮਹਾਰਾਜ, ਸਚ੍ਚਂ ਅਵਿਤਥਂ ਪਦਂ.

੧੧੮੭.

‘ਨਤ੍ਥਿ ਧਮ੍ਮਚਰਿਤਸ੍ਸ, ਫਲਂ ਕਲ੍ਯਾਣਪਾਪਕਂ;

ਨਤ੍ਥਿ ਦੇਵ ਪਰੋ ਲੋਕੋ, ਕੋ ਤਤੋ ਹਿ ਇਧਾਗਤੋ.

੧੧੮੮.

‘ਨਤ੍ਥਿ ਦੇਵ ਪਿਤਰੋ ਵਾ, ਕੁਤੋ ਮਾਤਾ ਕੁਤੋ ਪਿਤਾ;

ਨਤ੍ਥਿ ਆਚਰਿਯੋ ਨਾਮ, ਅਦਨ੍ਤਂ ਕੋ ਦਮੇਸ੍ਸਤਿ.

੧੧੮੯.

‘ਸਮਤੁਲ੍ਯਾਨਿ ਭੂਤਾਨਿ, ਨਤ੍ਥਿ ਜੇਟ੍ਠਾਪਚਾਯਿਕਾ;

ਨਤ੍ਥਿ ਬਲਂ ਵੀਰਿਯਂ ਵਾ, ਕੁਤੋ ਉਟ੍ਠਾਨਪੋਰਿਸਂ;

ਨਿਯਤਾਨਿ ਹਿ ਭੂਤਾਨਿ, ਯਥਾ ਗੋਟਵਿਸੋ ਤਥਾ.

੧੧੯੦.

‘ਲਦ੍ਧੇਯ੍ਯਂ ¶ ਲਭਤੇ ਮਚ੍ਚੋ, ਤਤ੍ਥ ਦਾਨਫਲਂ ਕੁਤੋ;

ਨਤ੍ਥਿ ਦਾਨਫਲਂ ਦੇਵ, ਅਵਸੋ ਦੇਵਵੀਰਿਯੋ.

੧੧੯੧.

‘ਬਾਲੇਹਿ ਦਾਨਂ ਪਞ੍ਞਤ੍ਤਂ, ਪਣ੍ਡਿਤੇਹਿ ਪਟਿਚ੍ਛਿਤਂ;

ਅਵਸਾ ਦੇਨ੍ਤਿ ਧੀਰਾਨਂ, ਬਾਲਾ ਪਣ੍ਡਿਤਮਾਨਿਨੋ’’’ਤਿ.

ਤਤ੍ਥ ਇਧਾਗਤੋਤਿ ਤਤੋ ਪਰਲੋਕਤੋ ਇਧਾਗਤੋ ਨਾਮ ਨਤ੍ਥਿ. ਨਤ੍ਥਿ ਦੇਵ ਪਿਤਰੋ ਵਾਤਿ ਦੇਵ, ਅਯ੍ਯਕਪੇਯ੍ਯਕਾਦਯੋ ਵਾ ਨਤ੍ਥਿ, ਤੇਸੁ ¶ ਅਸਨ੍ਤੇਸੁ ਕੁਤੋ ਮਾਤਾ ਕੁਤੋ ਪਿਤਾ. ਯਥਾ ਗੋਟਵਿਸੋ ¶ ਤਥਾਤਿ ਗੋਟਵਿਸੋ ਵੁਚ੍ਚਤਿ ਪਚ੍ਛਾਬਨ੍ਧੋ, ਯਥਾ ਨਾਵਾਯ ਪਚ੍ਛਾਬਨ੍ਧੋ ਨਾਵਮੇਵ ਅਨੁਗਚ੍ਛਤਿ, ਤਥਾ ਇਮੇ ਸਤ੍ਤਾ ਨਿਯਤਮੇਵ ਅਨੁਗਚ੍ਛਨ੍ਤੀਤਿ ਵਦਤਿ. ਅਵਸੋ ਦੇਵਵੀਰਿਯੋਤਿ ਏਵਂ ਦਾਨਫਲੇ ਅਸਤਿ ਯੋ ਕੋਚਿ ਬਾਲੋ ਦਾਨਂ ਦੇਤਿ, ਸੋ ਅਵਸੋ ਅਵੀਰਿਯੋ ਨ ਅਤ੍ਤਨੋ ਵਸੇਨ ਬਲੇਨ ਦੇਤਿ, ਦਾਨਫਲਂ ਪਨ ਅਤ੍ਥੀਤਿ ਸਞ੍ਞਾਯ ਅਞ੍ਞੇਸਂ ਅਨ੍ਧਬਾਲਾਨਂ ਸਦ੍ਦਹਿਤ੍ਵਾ ਦੇਤੀਤਿ ਦੀਪੇਤਿ. ਬਾਲੇਹਿ ਦਾਨਂ ਪਞ੍ਞਤ੍ਤਨ੍ਤਿ ‘‘ਦਾਨਂ ਦਾਤਬ੍ਬ’’ਨ੍ਤਿ ਅਨ੍ਧਬਾਲੇਹਿ ਪਞ੍ਞਤ੍ਤਂ ਅਨੁਞ੍ਞਾਤਂ, ਤਂ ਦਾਨਂ ਬਾਲਾਯੇਵ ਦੇਨ੍ਤਿ, ਪਣ੍ਡਿਤਾ ਪਟਿਗ੍ਗਣ੍ਹਨ੍ਤਿ.

ਏਵਂ ਦਾਨਸ੍ਸ ਨਿਪ੍ਫਲਤਂ ਵਣ੍ਣੇਤ੍ਵਾ ਇਦਾਨਿ ਪਾਪਸ੍ਸ ਨਿਪ੍ਫਲਭਾਵਂ ਵਣ੍ਣੇਤੁਂ ਆਹ –

੧੧੯੨.

‘‘ਸਤ੍ਤਿਮੇ ਸਸ੍ਸਤਾ ਕਾਯਾ, ਅਚ੍ਛੇਜ੍ਜਾ ਅਵਿਕੋਪਿਨੋ;

ਤੇਜੋ ਪਥਵੀ ਆਪੋ ਚ, ਵਾਯੋ ਸੁਖਂ ਦੁਖਞ੍ਚਿਮੇ;

ਜੀਵੇ ਚ ਸਤ੍ਤਿਮੇ ਕਾਯਾ, ਯੇਸਂ ਛੇਤ੍ਤਾ ਨ ਵਿਜ੍ਜਤਿ.

੧੧੯੩.

‘‘ਨਤ੍ਥਿ ਹਨ੍ਤਾ ਵ ਛੇਤ੍ਤਾ ਵਾ, ਹਞ੍ਞੇ ਯੇਵਾਪਿ ਕੋਚਿ ਨਂ;

ਅਨ੍ਤਰੇਨੇਵ ਕਾਯਾਨਂ, ਸਤ੍ਥਾਨਿ ਵੀਤਿਵਤ੍ਤਰੇ.

੧੧੯੪.

‘‘ਯੋ ਚਾਪਿ ਸਿਰਮਾਦਾਯ, ਪਰੇਸਂ ਨਿਸਿਤਾਸਿਨਾ;

ਨ ਸੋ ਛਿਨ੍ਦਤਿ ਤੇ ਕਾਯੇ, ਤਤ੍ਥ ਪਾਪਫਲਂ ਕੁਤੋ.

੧੧੯੫.

‘‘ਚੁਲ੍ਲਾਸੀਤਿਮਹਾਕਪ੍ਪੇ, ਸਬ੍ਬੇ ਸੁਜ੍ਝਨ੍ਤਿ ਸਂਸਰਂ;

ਅਨਾਗਤੇ ਤਮ੍ਹਿ ਕਾਲੇ, ਸਞ੍ਞਤੋਪਿ ਨ ਸੁਜ੍ਝਤਿ.

੧੧੯੬.

‘‘ਚਰਿਤ੍ਵਾਪਿ ¶ ਬਹੁਂ ਭਦ੍ਰਂ, ਨੇਵ ਸੁਜ੍ਝਨ੍ਤਿਨਾਗਤੇ;

ਪਾਪਞ੍ਚੇਪਿ ਬਹੁਂ ਕਤ੍ਵਾ, ਤਂ ਖਣਂ ਨਾਤਿਵਤ੍ਤਰੇ.

੧੧੯੭.

‘‘ਅਨੁਪੁਬ੍ਬੇਨ ਨੋ ਸੁਦ੍ਧਿ, ਕਪ੍ਪਾਨਂ ਚੁਲ੍ਲਸੀਤਿਯਾ;

ਨਿਯਤਿਂ ਨਾਤਿਵਤ੍ਤਾਮ, ਵੇਲਨ੍ਤਮਿਵ ਸਾਗਰੋ’’ਤਿ.

ਤਤ੍ਥ ਕਾਯਾਤਿ ਸਮੂਹਾ. ਅਵਿਕੋਪਿਨੋਤਿ ਵਿਕੋਪੇਤੁਂ ਨ ਸਕ੍ਕਾ. ਜੀਵੇਤਿ ਜੀਵੋ. ‘‘ਜੀਵੋ’’ਤਿਪਿ ਪਾਠੋ, ਅਯਮੇਵ ਅਤ੍ਥੋ. ਸਤ੍ਤਿਮੇ ਕਾਯਾਤਿ ਇਮੇ ਸਤ੍ਤ ਕਾਯਾ. ਹਞ੍ਞੇ ਯੇਵਾਪਿ ਕੋਚਿ ਨਨ੍ਤਿ ਯੋ ਹਞ੍ਞੇਯ੍ਯ, ਸੋਪਿ ਨਤ੍ਥੇਵ. ਵੀਤਿਵਤ੍ਤਰੇਤਿ ਇਮੇਸਂ ਸਤ੍ਤਨ੍ਨਂ ਕਾਯਾਨਂ ਅਨ੍ਤਰੇਯੇਵ ਚਰਨ੍ਤਿ ¶ , ਛਿਨ੍ਦਿਤੁਂ ਨ ਸਕ੍ਕੋਨ੍ਤਿ. ਸਿਰਮਾਦਾਯਾਤਿ ਪਰੇਸਂ ਸੀਸਂ ਗਹੇਤ੍ਵਾ. ਨਿਸਿਤਾਸਿਨਾਤਿ ਨਿਸਿਤੇਨ ਅਸਿਨਾ ਛਿਨ੍ਦਤਿ, ਨ ਸੋ ਛਿਨ੍ਦਤੀਤਿ ਸੋਪਿ ਤੇ ਕਾਯੇ ਨ ਛਿਨ੍ਦਤਿ, ਪਥਵੀ ਪਥਵਿਮੇਵ ਉਪੇਤਿ, ਆਪਾਦਯੋ ਆਪਾਦਿਕੇ, ਸੁਖਦੁਕ੍ਖਜੀਵਾ ਆਕਾਸਂ ਪਕ੍ਖਨ੍ਦਨ੍ਤੀਤਿ ਦਸ੍ਸੇਤਿ.

ਸਂਸਰਨ੍ਤਿ ਮਹਾਰਾਜ, ਇਮੇ ਸਤ੍ਤਾ ਇਮਂ ਪਥਵਿਂ ਏਕਮਂਸਖਲਂ ਕਤ੍ਵਾਪਿ ਏਤ੍ਤਕੇ ਕਪ੍ਪੇ ਸਂਸਰਨ੍ਤਾ ਸੁਜ੍ਝਨ੍ਤਿ. ਅਞ੍ਞਤ੍ਰ ਹਿ ਸਂਸਾਰਾ ਸਤ੍ਤੇ ਸੋਧੇਤੁਂ ਸਮਤ੍ਥੋ ਨਾਮ ਨਤ੍ਥਿ, ਸਬ੍ਬੇ ਸਂਸਾਰੇਨੇਵ ਸੁਜ੍ਝਨ੍ਤਿ. ਅਨਾਗਤੇ ਤਮ੍ਹਿ ਕਾਲੇਤਿ ਯਥਾਵੁਤ੍ਤੇ ਪਨ ਏਤਸ੍ਮਿਂ ਕਾਲੇ ਅਨਾਗਤੇ ਅਪ੍ਪਤ੍ਤੇ ਅਨ੍ਤਰਾ ਸਞ੍ਞਤੋਪਿ ਪਰਿਸੁਦ੍ਧਸੀਲੋਪਿ ਨ ਸੁਜ੍ਝਤਿ. ਤਂ ¶ ਖਣਨ੍ਤਿ ਤਂ ਵੁਤ੍ਤਪ੍ਪਕਾਰਂ ਕਾਲਂ. ਅਨੁਪੁਬ੍ਬੇਨ ਨੋ ਸੁਦ੍ਧੀਤਿ ਅਮ੍ਹਾਕਂ ਵਾਦੇ ਅਨੁਪੁਬ੍ਬੇਨ ਸੁਦ੍ਧਿ, ਸਬ੍ਬੇਸਂ ਅਮ੍ਹਾਕਂ ਅਨੁਪੁਬ੍ਬੇਨ ਸੁਦ੍ਧਿ ਭਵਿਸ੍ਸਤੀਤਿ ਅਤ੍ਥੋ. ਇਤਿ ਸੋ ਉਚ੍ਛੇਦਵਾਦੋ ਅਤ੍ਤਨੋ ਥਾਮੇਨ ਸਕਵਾਦਂ ਨਿਪ੍ਪਦੇਸਤੋ ਕਥੇਸੀਤਿ.

੧੧੯੮.

‘‘ਕਸ੍ਸਪਸ੍ਸ ਵਚੋ ਸੁਤ੍ਵਾ, ਅਲਾਤੋ ਏਤਦਬ੍ਰਵਿ;

‘‘ਯਥਾ ਭਦਨ੍ਤੋ ਭਣਤਿ, ਮਯ੍ਹਮ੍ਪੇਤਂਵ ਰੁਚ੍ਚਤਿ.

੧੧੯੯.

‘ਅਹਮ੍ਪਿ ਪੁਰਿਮਂ ਜਾਤਿਂ, ਸਰੇ ਸਂਸਰਿਤਤ੍ਤਨੋ;

ਪਿਙ੍ਗਲੋ ਨਾਮਹਂ ਆਸਿਂ, ਲੁਦ੍ਦੋ ਗੋਘਾਤਕੋ ਪੁਰੇ.

੧੨੦੦.

‘ਬਾਰਾਣਸਿਯਂ ਫੀਤਾਯਂ, ਬਹੁਂ ਪਾਪਂ ਮਯਾ ਕਤਂ;

ਬਹੂ ਮਯਾ ਹਤਾ ਪਾਣਾ, ਮਹਿਂਸਾ ਸੂਕਰਾ ਅਜਾ.

੧੨੦੧.

‘ਤਤੋ ¶ ਚੁਤੋ ਇਧ ਜਾਤੋ, ਇਦ੍ਧੇ ਸੇਨਾਪਤੀਕੁਲੇ;

ਨਤ੍ਥਿ ਨੂਨ ਫਲਂ ਪਾਪਂ, ਯੋਹਂ ਨ ਨਿਰਯਂ ਗਤੋ’’’ਤਿ.

ਤਤ੍ਥ ਅਲਾਤੋ ਏਤਦਬ੍ਰਵੀਤਿ ਸੋ ਕਿਰ ਕਸ੍ਸਪਦਸਬਲਸ੍ਸ ਚੇਤਿਯੇ ਅਨੋਜਪੁਪ੍ਫਦਾਮੇਨ ਪੂਜਂ ਕਤ੍ਵਾ ਮਰਣਸਮਯੇ ਅਞ੍ਞੇਨ ਕਮ੍ਮੇਨ ਯਥਾਨੁਭਾਵਂ ਖਿਤ੍ਤੋ ਸਂਸਾਰੇ ਸਂਸਰਨ੍ਤੋ ਏਕਸ੍ਸ ਪਾਪਕਮ੍ਮਸ੍ਸ ਨਿਸ੍ਸਨ੍ਦੇਨ ਗੋਘਾਤਕਕੁਲੇ ਨਿਬ੍ਬਤ੍ਤਿਤ੍ਵਾ ਬਹੁਂ ਪਾਪਮਕਾਸਿ. ਅਥਸ੍ਸ ਮਰਣਕਾਲੇ ਭਸ੍ਮਪਟਿਚ੍ਛਨ੍ਨੋ ਵਿਯ ਅਗ੍ਗਿ ਏਤ੍ਤਕਂ ਕਾਲਂ ਠਿਤਂ ਤਂ ਪੁਞ੍ਞਕਮ੍ਮਂ ਓਕਾਸਮਕਾਸਿ. ਸੋ ਤਸ੍ਸਾਨੁਭਾਵੇਨ ਇਧ ਨਿਬ੍ਬਤ੍ਤਿਤ੍ਵਾ ਤਂ ਵਿਭੂਤਿਂ ਪਤ੍ਤੋ, ਜਾਤਿਂ ਸਰਨ੍ਤੋ ਪਨ ਅਤੀਤਾਨਨ੍ਤਰਤੋ ਪਰਂ ਪਰਿਸਰਿਤੁਂ ਅਸਕ੍ਕੋਨ੍ਤੋ ‘‘ਗੋਘਾਤਕਕਮ੍ਮਂ ਕਤ੍ਵਾ ਇਧ ਨਿਬ੍ਬਤ੍ਤੋਸ੍ਮੀ’’ਤਿ ਸਞ੍ਞਾਯ ਤਸ੍ਸ ¶ ਵਾਦਂ ਉਪਤ੍ਥਮ੍ਭੇਨ੍ਤੋ ਇਦਂ ‘‘ਯਥਾ ਭਦਨ੍ਤੋ ਭਣਤੀ’’ਤਿਆਦਿਵਚਨਂ ਅਬ੍ਰਵਿ. ਤਤ੍ਥ ਸਰੇ ਸਂਸਰਿਤਤ੍ਤਨੋਤਿ ਅਤ੍ਤਨੋ ਸਂਸਰਿਤਂ ਸਰਾਮਿ. ਸੇਨਾਪਤੀਕੁਲੇਤਿ ਸੇਨਾਪਤਿਕੁਲਮ੍ਹਿ.

੧੨੦੨.

‘‘ਅਥੇਤ੍ਥ ਬੀਜਕੋ ਨਾਮ, ਦਾਸੋ ਆਸਿ ਪਟਚ੍ਚਰੀ;

ਉਪੋਸਥਂ ਉਪਵਸਨ੍ਤੋ, ਗੁਣਸਨ੍ਤਿਕੁਪਾਗਮਿ.

੧੨੦੩.

‘‘ਕਸ੍ਸਪਸ੍ਸ ਵਚੋ ਸੁਤ੍ਵਾ, ਅਲਾਤਸ੍ਸ ਚ ਭਾਸਿਤਂ;

ਪਸ੍ਸਸਨ੍ਤੋ ਮੁਹੁਂ ਉਣ੍ਹਂ, ਰੁਦਂ ਅਸ੍ਸੂਨਿ ਵਤ੍ਤਯੀ’’ਤਿ.

ਤਤ੍ਥ ਅਥੇਤ੍ਥਾਤਿ ਅਥ ਏਤ੍ਥ ਏਤਿਸ੍ਸਂ ਮਿਥਿਲਾਯਂ. ਪਟਚ੍ਚਰੀਤਿ ਦਲਿਦ੍ਦੋ ਕਪਣੋ ਅਹੋਸਿ. ਗੁਣਸਨ੍ਤਿਕੁਪਾਗਮੀਤਿ ਗੁਣਸ੍ਸ ਸਨ੍ਤਿਕਂ ਕਿਞ੍ਚਿਦੇਵ ਕਾਰਣਂ ਸੋਸ੍ਸਾਮੀਤਿ ਉਪਗਤੋਤਿ ਵੇਦਿਤਬ੍ਬੋ.

੧੨੦੪.

‘‘ਤਮਨੁਪੁਚ੍ਛਿ ਵੇਦੇਹੋ, ‘ਕਿਮਤ੍ਥਂ ਸਮ੍ਮ ਰੋਦਸਿ;

ਕਿਂ ਤੇ ਸੁਤਂ ਵਾ ਦਿਟ੍ਠਂ ਵਾ, ਕਿਂ ਮਂ ਵੇਦੇਸਿ ਵੇਦਨ’’’ਨ੍ਤਿ.

ਤਤ੍ਥ ¶ ਕਿਂ ਮਂ ਵੇਦੇਸਿ ਵੇਦਨਨ੍ਤਿ ਕਿਂ ਨਾਮ ਤ੍ਵਂ ਕਾਯਿਕਂ ਵਾ ਚੇਤਸਿਕਂ ਵਾ ਵੇਦਨਂ ਪਤ੍ਤੋਯਂ, ਏਵਂ ਰੋਦਨ੍ਤੋ ਮਂ ਵੇਦੇਸਿ ਜਾਨਾਪੇਸਿ, ਉਤ੍ਤਾਨਮੇਵ ਨਂ ਕਤ੍ਵਾ ਮਯ੍ਹਂ ਆਚਿਕ੍ਖਾਹੀਤਿ.

੧੨੦੫.

‘‘ਵੇਦੇਹਸ੍ਸ ਵਚੋ ਸੁਤ੍ਵਾ, ਬੀਜਕੋ ਏਤਦਬ੍ਰਵਿ;

‘ਨਤ੍ਥਿ ਮੇ ਵੇਦਨਾ ਦੁਕ੍ਖਾ, ਮਹਾਰਾਜ ਸੁਣੋਹਿ ਮੇ.

੧੨੦੬.

‘ਅਹਮ੍ਪਿ ¶ ਪੁਰਿਮਂ ਜਾਤਿਂ, ਸਰਾਮਿ ਸੁਖਮਤ੍ਤਨੋ;

ਸਾਕੇਤਾਹਂ ਪੁਰੇ ਆਸਿਂ, ਭਾਵਸੇਟ੍ਠਿ ਗੁਣੇ ਰਤੋ.

੧੨੦੭.

‘ਸਮ੍ਮਤੋ ਬ੍ਰਾਹ੍ਮਣਿਬ੍ਭਾਨਂ, ਸਂਵਿਭਾਗਰਤੋ ਸੁਚਿ;

ਨ ਚਾਪਿ ਪਾਪਕਂ ਕਮ੍ਮਂ, ਸਰਾਮਿ ਕਤਮਤ੍ਤਨੋ.

੧੨੦੮.

‘ਤਤੋ ਚੁਤਾਹਂ ਵੇਦੇਹ, ਇਧ ਜਾਤੋ ਦੁਰਿਤ੍ਥਿਯਾ;

ਗਬ੍ਭਮ੍ਹਿ ਕੁਮ੍ਭਦਾਸਿਯਾ, ਯਤੋ ਜਾਤੋ ਸੁਦੁਗ੍ਗਤੋ.

੧੨੦੯.

‘ਏਵਮ੍ਪਿ ਦੁਗ੍ਗਤੋ ਸਨ੍ਤੋ, ਸਮਚਰਿਯਂ ਅਧਿਟ੍ਠਿਤੋ;

ਉਪਡ੍ਢਭਾਗਂ ਭਤ੍ਤਸ੍ਸ, ਦਦਾਮਿ ਯੋ ਮੇ ਇਚ੍ਛਤਿ.

੧੨੧੦.

‘ਚਾਤੁਦ੍ਦਸਿਂ ¶ ਪਞ੍ਚਦਸਿਂ, ਸਦਾ ਉਪਵਸਾਮਹਂ;

ਨ ਚਾਪਿ ਭੂਤੇ ਹਿਂਸਾਮਿ, ਥੇਯ੍ਯਂ ਚਾਪਿ ਵਿਵਜ੍ਜਯਿਂ.

੧੨੧੧.

‘ਸਬ੍ਬਮੇਵ ਹਿ ਨੂਨੇਤਂ, ਸੁਚਿਣ੍ਣਂ ਭਵਤਿ ਨਿਪ੍ਫਲਂ;

ਨਿਰਤ੍ਥਂ ਮਞ੍ਞਿਦਂ ਸੀਲਂ, ਅਲਾਤੋ ਭਾਸਤੀ ਯਥਾ.

੧੨੧੨.

‘ਕਲਿਮੇਵ ਨੂਨ ਗਣ੍ਹਾਮਿ, ਅਸਿਪ੍ਪੋ ਧੁਤ੍ਤਕੋ ਯਥਾ;

ਕਟਂ ਅਲਾਤੋ ਗਣ੍ਹਾਤਿ, ਕਿਤਵੋਸਿਕ੍ਖਿਤੋ ਯਥਾ.

੧੨੧੩.

‘ਦ੍ਵਾਰਂ ਨਪ੍ਪਟਿਪਸ੍ਸਾਮਿ, ਯੇਨ ਗਚ੍ਛਾਮਿ ਸੁਗ੍ਗਤਿਂ;

ਤਸ੍ਮਾ ਰਾਜ ਪਰੋਦਾਮਿ, ਸੁਤ੍ਵਾ ਕਸ੍ਸਪਭਾਸਿਤ’’’ਨ੍ਤਿ.

ਤਤ੍ਥ ਭਾਵਸੇਟ੍ਠੀਤਿ ਏਵਂਨਾਮਕੋ ਅਸੀਤਿਕੋਟਿਵਿਭਵੋ ਸੇਟ੍ਠਿ. ਗੁਣੇ ਰਤੋਤਿ ਗੁਣਮ੍ਹਿ ਰਤੋ. ਸਮ੍ਮਤੋਤਿ ਸਮ੍ਭਾਵਿਤੋ ਸਂਵਣ੍ਣਿਤੋ. ਸੁਚੀਤਿ ਸੁਚਿਕਮ੍ਮੋ. ਇਧ ਜਾਤੋ ਦੁਰਿਤ੍ਥਿਯਾਤਿ ਇਮਸ੍ਮਿਂ ਮਿਥਿਲਨਗਰੇ ਦਲਿਦ੍ਦਿਯਾ ਕਪਣਾਯ ਕੁਮ੍ਭਦਾਸਿਯਾ ਕੁਚ੍ਛਿਮ੍ਹਿ ਜਾਤੋਸ੍ਮੀਤਿ. ਸੋ ਕਿਰ ਪੁਬ੍ਬੇ ਕਸ੍ਸਪਬੁਦ੍ਧਕਾਲੇ ਅਰਞ੍ਞੇ ਨਟ੍ਠਂ ਬਲਿਬਦ੍ਦਂ ਗਵੇਸਮਾਨੋ ਏਕੇਨ ਮਗ੍ਗਮੂਲ਼੍ਹੇਨ ਭਿਕ੍ਖੁਨਾ ਮਗ੍ਗਂ ਪੁਟ੍ਠੋ ਤੁਣ੍ਹੀ ਹੁਤ੍ਵਾ ਪੁਨ ਤੇਨ ਪੁਚ੍ਛਿਤੋ ਕੁਜ੍ਝਿਤ੍ਵਾ ‘‘ਸਮਣ, ਦਾਸਾ ਨਾਮ ਮੁਖਰਾ ਹੋਨ੍ਤਿ, ਦਾਸੇਨ ਤਯਾ ਭਵਿਤਬ੍ਬਂ, ਅਤਿਮੁਖਰੋਸੀ’’ਤਿ ਆਹ. ਤਂ ਕਮ੍ਮਂ ਤਦਾ ਵਿਪਾਕਂ ਅਦਤ੍ਵਾ ਭਸ੍ਮਚ੍ਛਨ੍ਨੋ ਵਿਯ ਪਾਵਕੋ ¶ ਠਿਤਂ. ਮਰਣਸਮਯੇ ਅਞ੍ਞਂ ਕਮ੍ਮਂ ਉਪਟ੍ਠਾਸਿ. ਸੋ ਯਥਾਕਮ੍ਮਂ ਸਂਸਾਰੇ ਸਂਸਰਨ੍ਤੋ ਏਕਸ੍ਸ ਕੁਸਲਕਮ੍ਮਸ੍ਸ ਬਲੇਨ ਸਾਕੇਤੇ ਵੁਤ੍ਤਪ੍ਪਕਾਰੋ ਸੇਟ੍ਠਿ ਹੁਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਅਕਾਸਿ. ਤਂ ਪਨਸ੍ਸ ਕਮ੍ਮਂ ਪਥਵਿਯਂ ਨਿਹਿਤਨਿਧਿ ਵਿਯ ਠਿਤਂ ਓਕਾਸਂ ਲਭਿਤ੍ਵਾ ਵਿਪਾਕਂ ਦਸ੍ਸਤਿ. ਯਂ ਪਨ ਤੇਨ ਤਂ ਭਿਕ੍ਖੁਂ ਅਕ੍ਕੋਸਨ੍ਤੇਨ ਕਤਂ ਪਾਪਕਮ੍ਮਂ, ਤਮਸ੍ਸ ਤਸ੍ਮਿਂ ਅਤ੍ਤਭਾਵੇ ਵਿਪਾਕਂ ਅਦਾਸਿ. ਸੋ ਅਜਾਨਨ੍ਤੋ ‘‘ਇਤਰਸ੍ਸ ਕਲ੍ਯਾਣਕਮ੍ਮਸ੍ਸ ਬਲੇਨ ਕੁਮ੍ਭਦਾਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋਸ੍ਮੀ’’ਤਿ ਸਞ੍ਞਾਯ ਏਵਮਾਹ. ਯਤੋ ਜਾਤੋ ਸੁਦੁਗ੍ਗਤੋਤਿ ਸੋਹਂ ਜਾਤਕਾਲਤੋ ਪਟ੍ਠਾਯ ਅਤਿਦੁਗ੍ਗਤੋਤਿ ਦੀਪੇਤਿ.

ਸਮਚਰਿਯਮਧਿਟ੍ਠਿਤੋਤਿ ਸਮਚਰਿਯਾਯਮੇਵ ¶ ਪਤਿਟ੍ਠਿਤੋਮ੍ਹਿ. ਨੂਨੇਤਨ੍ਤਿ ਏਕਂਸੇਨ ਏਤਂ. ਮਞ੍ਞਿਦਂ ਸੀਲਨ੍ਤਿ ਦੇਵ, ਇਦਂ ਸੀਲਂ ਨਾਮ ਨਿਰਤ੍ਥਕਂ ਮਞ੍ਞੇ. ਅਲਾਤੋਤਿ ਯਥਾ ਅਯਂ ਅਲਾਤਸੇਨਾਪਤਿ ‘‘ਮਯਾ ਪੁਰਿਮਭਵੇ ਬਹੁਂ ਪਾਣਾਤਿਪਾਤਕਮ੍ਮਂ ਕਤ੍ਵਾ ਸੇਨਾਪਤਿਟ੍ਠਾਨਂ ਲਦ੍ਧ’’ਨ੍ਤਿ ਭਾਸਤਿ, ਤੇਨ ਕਾਰਣੇਨਾਹਂ ¶ ਨਿਰਤ੍ਥਕਂ ਸੀਲਨ੍ਤਿ ਮਞ੍ਞਾਮਿ. ਕਲਿਮੇਵਾਤਿ ਯਥਾ ਅਸਿਪ੍ਪੋ ਅਸਿਕ੍ਖਿਤੋ ਅਕ੍ਖਧੁਤ੍ਤੋ ਪਰਾਜਯਗ੍ਗਾਹਂ ਗਣ੍ਹਾਤਿ, ਤਥਾ ਨੂਨ ਗਣ੍ਹਾਮਿ, ਪੁਰਿਮਭਵੇ ਅਤ੍ਤਨੋ ਸਾਪਤੇਯ੍ਯਂ ਨਾਸੇਤ੍ਵਾ ਇਦਾਨਿ ਦੁਕ੍ਖਂ ਅਨੁਭਵਾਮਿ. ਕਸ੍ਸਪਭਾਸਿਤਨ੍ਤਿ ਕਸ੍ਸਪਗੋਤ੍ਤਸ੍ਸ ਅਚੇਲਕਸ੍ਸ ਭਾਸਿਤਂ ਸੁਤ੍ਵਾਤਿ ਵਦਤਿ.

੧੨੧੪.

‘‘ਬੀਜਕਸ੍ਸ ਵਚੋ ਸੁਤ੍ਵਾ, ਰਾਜਾ ਅਙ੍ਗਤਿ ਮਬ੍ਰਵਿ;

‘ਨਤ੍ਥਿ ਦ੍ਵਾਰਂ ਸੁਗਤਿਯਾ, ਨਿਯਤਿਂ ਕਙ੍ਖ ਬੀਜਕ.

੧੨੧੫.

‘ਸੁਖਂ ਵਾ ਯਦਿ ਵਾ ਦੁਕ੍ਖਂ, ਨਿਯਤਿਯਾ ਕਿਰ ਲਬ੍ਭਤਿ;

ਸਂਸਾਰਸੁਦ੍ਧਿ ਸਬ੍ਬੇਸਂ, ਮਾ ਤੁਰਿਤ੍ਥੋ ਅਨਾਗਤੇ.

੧੨੧੬.

‘ਅਹਮ੍ਪਿ ਪੁਬ੍ਬੇ ਕਲ੍ਯਾਣੋ, ਬ੍ਰਾਹ੍ਮਣਿਬ੍ਭੇਸੁ ਬ੍ਯਾਵਟੋ;

ਵੋਹਾਰਮਨੁਸਾਸਨ੍ਤੋ, ਰਤਿਹੀਨੋ ਤਦਨ੍ਤਰਾ’’’ਤਿ.

ਤਤ੍ਥ ਅਙ੍ਗਤਿ ਮਬ੍ਰਵੀਤਿ ਪਠਮਮੇਵ ਇਤਰੇਸਂ ਦ੍ਵਿਨ੍ਨਂ, ਪਚ੍ਛਾ ਬੀਜਕਸ੍ਸਾਤਿ ਤਿਣ੍ਣਂ ਵਚਨਂ ਸੁਤ੍ਵਾ ਦਲ਼੍ਹਂ ਮਿਚ੍ਛਾਦਿਟ੍ਠਿਂ ਗਹੇਤ੍ਵਾ ਏਤਂ ‘‘ਨਤ੍ਥਿ ਦ੍ਵਾਰ’’ਨ੍ਤਿਆਦਿਵਚਨਮਬ੍ਰਵਿ. ਨਿਯਤਿਂ ਕਙ੍ਖਾਤਿ ਸਮ੍ਮ ਬੀਜਕ, ਨਿਯਤਿਮੇਵ ਓਲੋਕੇਹਿ. ਚੁਲ੍ਲਾਸੀਤਿਮਹਾਕਪ੍ਪਪ੍ਪਮਾਣੋ ਕਾਲੋਯੇਵ ਹਿ ਸਤ੍ਤੇ ਸੋਧੇਤਿ, ਤ੍ਵਂ ਅਤਿਤੁਰਿਤੋਤਿ ਅਧਿਪ੍ਪਾਯੇਨੇਵਮਾਹ. ਅਨਾਗਤੇਤਿ ਤਸ੍ਮਿਂ ਕਾਲੇ ਅਸਮ੍ਪਤ੍ਤੇ ਅਨ੍ਤਰਾਵ ਦੇਵਲੋਕਂ ਗਚ੍ਛਾਮੀਤਿ ਮਾ ਤੁਰਿਤ੍ਥੋ. ਬ੍ਯਾਵਟੋਤਿ ਬ੍ਰਾਹ੍ਮਣੇਸੁ ਚ ਗਹਪਤਿਕੇਸੁ ਚ ਤੇਸਂਯੇਵ ਕਾਯਵੇਯ੍ਯਾਵਚ੍ਚਦਾਨਾਦਿਕਮ੍ਮਕਰਣੇਨ ਬ੍ਯਾਵਟੋ ਅਹੋਸਿਂ. ਵੋਹਾਰਨ੍ਤਿ ਵਿਨਿਚ੍ਛਯਟ੍ਠਾਨੇ ਨਿਸੀਦਿਤ੍ਵਾ ਰਾਜਕਿਚ੍ਚਂ ¶ ਵੋਹਾਰਂ ਅਨੁਸਾਸਨ੍ਤੋਵ. ਰਤਿਹੀਨੋ ਤਦਨ੍ਤਰਾਤਿ ਏਤ੍ਤਕਂ ਕਾਲਂ ਕਾਮਗੁਣਰਤਿਯਾ ਪਰਿਹੀਨੋਤਿ.

ਏਵਞ੍ਚ ਪਨ ਵਤ੍ਵਾ ‘‘ਭਨ੍ਤੇ ਕਸ੍ਸਪ, ਮਯਂ ਏਤ੍ਤਕਂ ਕਾਲਂ ਪਮਜ੍ਜਿਮ੍ਹਾ, ਇਦਾਨਿ ਪਨ ਅਮ੍ਹੇਹਿ ਆਚਰਿਯੋ ਲਦ੍ਧੋ, ਇਤੋ ਪਟ੍ਠਾਯ ਕਾਮਰਤਿਮੇਵ ਅਨੁਭਵਿਸ੍ਸਾਮ, ਤੁਮ੍ਹਾਕਂ ਸਨ੍ਤਿਕੇ ਇਤੋ ਉਤ੍ਤਰਿ ਧਮ੍ਮਸ੍ਸਵਨਮ੍ਪਿ ਨੋ ਪਪਞ੍ਚੋ ਭਵਿਸ੍ਸਤਿ, ਤਿਟ੍ਠਥ ਤੁਮ੍ਹੇ, ਮਯਂ ਗਮਿਸ੍ਸਾਮਾ’’ਤਿ ਆਪੁਚ੍ਛਨ੍ਤੋ ਆਹ –

੧੨੧੭.

‘‘ਪੁਨਪਿ ਭਨ੍ਤੇ ਦਕ੍ਖੇਮੁ, ਸਙ੍ਗਤਿ ਚੇ ਭਵਿਸ੍ਸਤੀ’’ਤਿ.

ਤਤ੍ਥ ਸਙ੍ਗਤਿ ਚੇਤਿ ਏਕਸ੍ਮਿਂ ਠਾਨੇ ਚੇ ਨੋ ਸਮਾਗਮੋ ਭਵਿਸ੍ਸਤਿ,ਨੋ ਚੇ, ਅਸਤਿ ਪੁਞ੍ਞਫਲੇ ਕਿਂ ਤਯਾ ਦਿਟ੍ਠੇਨਾਤਿ.

‘‘ਇਦਂ ¶ ਵਤ੍ਵਾਨ ਵੇਦੇਹੋ, ਪਚ੍ਚਗਾ ਸਨਿਵੇਸਨ’’ਨ੍ਤਿ;

ਤਤ੍ਥ ਸਨਿਵੇਸਨਨ੍ਤਿ ਭਿਕ੍ਖਵੇ, ਇਦਂ ਵਚਨਂ ਵੇਦੇਹਰਾਜਾ ਵਤ੍ਵਾ ਰਥਂ ਅਭਿਰੁਯ੍ਹ ਅਤ੍ਤਨੋ ਨਿਵੇਸਨਂ ਚਨ੍ਦਕਪਾਸਾਦਤਲਮੇਵ ਪਟਿਗਤੋ.

ਰਾਜਾ ¶ ਪਠਮਂ ਗੁਣਸਨ੍ਤਿਕਂ ਗਨ੍ਤ੍ਵਾ ਤਂ ਵਨ੍ਦਿਤ੍ਵਾ ਪਞ੍ਹਂ ਪੁਚ੍ਛਿ. ਆਗਚ੍ਛਨ੍ਤੋ ਪਨ ਅਵਨ੍ਦਿਤ੍ਵਾਵ ਆਗਤੋ. ਗੁਣੋ ਅਤ੍ਤਨੋ ਅਗੁਣਤਾਯ ਵਨ੍ਦਨਮ੍ਪਿ ਨਾਲਤ੍ਥ, ਪਿਣ੍ਡਾਦਿਕਂ ਸਕ੍ਕਾਰਂ ਕਿਮੇਵ ਲਚ੍ਛਤਿ. ਰਾਜਾਪਿ ਤਂ ਰਤ੍ਤਿਂ ਵੀਤਿਨਾਮੇਤ੍ਵਾ ਪੁਨਦਿਵਸੇ ਅਮਚ੍ਚੇ ਸਨ੍ਨਿਪਾਤੇਤ੍ਵਾ ‘‘ਕਾਮਗੁਣੇ ਮੇ ਉਪਟ੍ਠਾਪੇਥ, ਅਹਂ ਇਤੋ ਪਟ੍ਠਾਯ ਕਾਮਗੁਣਸੁਖਮੇਵ ਅਨੁਭਵਿਸ੍ਸਾਮਿ, ਨ ਮੇ ਅਞ੍ਞਾਨਿ ਕਿਚ੍ਚਾਨਿ ਆਰੋਚੇਤਬ੍ਬਾਨਿ, ਵਿਨਿਚ੍ਛਯਕਿਚ੍ਚਂ ਅਸੁਕੋ ਚ ਅਸੁਕੋ ਚ ਕਰੋਤੂ’’ਤਿ ਵਤ੍ਵਾ ਕਾਮਰਤਿਮਤ੍ਤੋ ਅਹੋਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੨੧੮.

‘‘ਤਤੋ ਰਤ੍ਯਾ ਵਿਵਸਾਨੇ, ਉਪਟ੍ਠਾਨਮ੍ਹਿ ਅਙ੍ਗਤਿ;

ਅਮਚ੍ਚੇ ਸਨ੍ਨਿਪਾਤੇਤ੍ਵਾ, ਇਦਂ ਵਚਨਮਬ੍ਰਵਿ.

੧੨੧੯.

‘ਚਨ੍ਦਕੇ ਮੇ ਵਿਮਾਨਸ੍ਮਿਂ, ਸਦਾ ਕਾਮੇ ਵਿਧੇਨ੍ਤੁ ਮੇ;

ਮਾ ਉਪਗਚ੍ਛੁਂ ਅਤ੍ਥੇਸੁ, ਗੁਯ੍ਹਪ੍ਪਕਾਸਿਯੇਸੁ ਚ.

੧੨੨੦.

‘ਵਿਜਯੋ ¶ ਚ ਸੁਨਾਮੋ ਚ, ਸੇਨਾਪਤਿ ਅਲਾਤਕੋ;

ਏਤੇ ਅਤ੍ਥੇ ਨਿਸੀਦਨ੍ਤੁ, ਵੋਹਾਰਕੁਸਲਾ ਤਯੋ’.

੧੨੨੧.

‘‘ਇਦਂ ਵਤ੍ਵਾਨ ਵੇਦੇਹੋ, ਕਾਮੇਵ ਬਹੁਮਞ੍ਞਥ;

ਨ ਚਾਪਿ ਬ੍ਰਾਹ੍ਮਣਿਬ੍ਭੇਸੁ, ਅਤ੍ਥੇ ਕਿਸ੍ਮਿਞ੍ਚਿ ਬ੍ਯਾਵਟੋ’’ਤਿ.

ਤਤ੍ਥ ਉਪਟ੍ਠਾਨਮ੍ਹੀਤਿ ਅਤ੍ਤਨੋ ਉਪਟ੍ਠਾਨਟ੍ਠਾਨੇ. ਚਨ੍ਦਕੇ ਮੇਤਿ ਮਮ ਸਨ੍ਤਕੇ ਚਨ੍ਦਕਪਾਸਾਦੇ. ਵਿਧੇਨ੍ਤੁ ਮੇਤਿ ਨਿਚ੍ਚਂ ਮਯ੍ਹਂ ਕਾਮੇ ਸਂਵਿਦਹਨ੍ਤੁ ਉਪਟ੍ਠਪੇਨ੍ਤੁ. ਗੁਯ੍ਹਪ੍ਪਕਾਸਿਯੇਸੂਤਿ ਗੁਯ੍ਹੇਸੁਪਿ ਪਕਾਸਿਯੇਸੁਪਿ ਅਤ੍ਥੇਸੁ ਉਪ੍ਪਨ੍ਨੇਸੁ ਮਂ ਕੇਚਿ ਮਾ ਉਪਗਚ੍ਛੁਂ. ਅਤ੍ਥੇਤਿ ਅਤ੍ਥਕਰਣੇ ਵਿਨਿਚ੍ਛਯਟ੍ਠਾਨੇ. ਨਿਸੀਦਨ੍ਤੂਤਿ ਮਯਾ ਕਤ੍ਤਬ੍ਬਕਿਚ੍ਚਸ੍ਸ ਕਰਣਤ੍ਥਂ ਸੇਸਅਮਚ੍ਚੇਹਿ ਸਦ੍ਧਿਂ ਨਿਸੀਦਨ੍ਤੂਤਿ.

੧੨੨੨.

‘‘ਤਤੋ ਦ੍ਵੇਸਤ੍ਤਰਤ੍ਤਸ੍ਸ, ਵੇਦੇਹਸ੍ਸਤ੍ਰਜਾ ਪਿਯਾ;

ਰਾਜਧੀਤਾ ਰੁਚਾ ਨਾਮ, ਧਾਤਿਮਾਤਰਮਬ੍ਰਵਿ.

੧੨੨੩.

‘‘ਅਲਙ੍ਕਰੋਥ ¶ ਮਂ ਖਿਪ੍ਪਂ, ਸਖਿਯੋ ਚਾਲਙ੍ਕਰੋਨ੍ਤੁ ਮੇ;

ਸੁਵੇ ਪਨ੍ਨਰਸੋ ਦਿਬ੍ਯੋ, ਗਚ੍ਛਂ ਇਸ੍ਸਰਸਨ੍ਤਿਕੇ.

੧੨੨੪.

‘‘ਤਸ੍ਸਾ ਮਾਲ੍ਯਂ ਅਭਿਹਰਿਂਸੁ, ਚਨ੍ਦਨਞ੍ਚ ਮਹਾਰਹਂ;

ਮਣਿਸਙ੍ਖਮੁਤ੍ਤਾਰਤਨਂ, ਨਾਨਾਰਤ੍ਤੇ ਚ ਅਮ੍ਬਰੇ.

੧੨੨੫.

‘‘ਤਞ੍ਚ ਸੋਣ੍ਣਮਯੇ ਪੀਠੇ, ਨਿਸਿਨ੍ਨਂ ਬਹੁਕਿਤ੍ਥਿਯੋ;

ਪਰਿਕਿਰਿਯ ਅਸੋਭਿਂਸੁ, ਰੁਚਂ ਰੁਚਿਰਵਣ੍ਣਿਨਿ’’ਨ੍ਤਿ.

ਤਤ੍ਥ ਤਤੋਤਿ ਤਤੋ ਰਞ੍ਞੋ ਕਾਮਪਙ੍ਕੇ ਲਗ੍ਗਿਤਦਿਵਸਤੋ ਪਟ੍ਠਾਯ. ਦ੍ਵੇਸਤ੍ਤਰਤ੍ਤਸ੍ਸਾਤਿ ਚੁਦ੍ਦਸਮੇ ਦਿਵਸੇ. ਧਾਤਿਮਾਤਰਮਬ੍ਰਵੀਤਿ ਪਿਤੁ ਸਨ੍ਤਿਕਂ ਗਨ੍ਤੁਕਾਮਾ ¶ ਹੁਤ੍ਵਾ ਧਾਤਿਮਾਤਰਮਾਹ. ਸਾ ਕਿਰ ਚਾਤੁਦ੍ਦਸੇ ਚਾਤੁਦ੍ਦਸੇ ਪਞ੍ਚਸਤਕੁਮਾਰਿਕਾਹਿ ਪਰਿਵੁਤਾ ਧਾਤਿਗਣਂ ਆਦਾਯ ਮਹਨ੍ਤੇਨ ਸਿਰਿਵਿਲਾਸੇਨ ਅਤ੍ਤਨੋ ਸਤ੍ਤਭੂਮਿਕਾ ਰਤਿਵਡ੍ਢਨਪਾਸਾਦਾ ਓਰੁਯ੍ਹ ਪਿਤੁ ਦਸ੍ਸਨਤ੍ਥਂ ਚਨ੍ਦਕਪਾਸਾਦਂ ਗਚ੍ਛਤਿ. ਅਥ ਨਂ ਪਿਤਾ ਦਿਸ੍ਵਾ ਤੁਟ੍ਠਮਾਨਸੋ ਹੁਤ੍ਵਾ ਮਹਾਸਕ੍ਕਾਰਂ ਕਾਰੇਤ੍ਵਾ ਉਯ੍ਯੋਜੇਨ੍ਤੋ ‘‘ਅਮ੍ਮ, ਦਾਨਂ ਦੇਹੀ’’ਤਿ ਸਹਸ੍ਸਂ ਦਤ੍ਵਾ ਉਯ੍ਯੋਜੇਤਿ. ਸਾ ਅਤ੍ਤਨੋ ਨਿਵੇਸਨਂ ਆਗਨ੍ਤ੍ਵਾ ਪੁਨਦਿਵਸੇ ਉਪੋਸਥਿਕਾ ਹੁਤ੍ਵਾ ਕਪਣਦ੍ਧਿਕਵਣਿਬ੍ਬਕਯਾਚਕਾਨਂ ਮਹਾਦਾਨਂ ਦੇਤਿ. ਰਞ੍ਞਾ ਕਿਰਸ੍ਸਾ ਏਕੋ ਜਨਪਦੋਪਿ ਦਿਨ੍ਨੋ. ਤਤੋ ਆਯੇਨ ¶ ਸਬ੍ਬਕਿਚ੍ਚਾਨਿ ਕਰੋਤਿ. ਤਦਾ ਪਨ ‘‘ਰਞ੍ਞਾ ਕਿਰ ਗੁਣਂ ਆਜੀਵਕਂ ਨਿਸ੍ਸਾਯ ਮਿਚ੍ਛਾਦਸ੍ਸਨਂ ਗਹਿਤ’’ਨ੍ਤਿ ਸਕਲਨਗਰੇ ਏਕਕੋਲਾਹਲਂ ਅਹੋਸਿ. ਤਂ ਪਵਤ੍ਤਿਂ ਰੁਚਾਯ ਧਾਤਿਯੋ ਸੁਤ੍ਵਾ ਰਾਜਧੀਤਾਯ ਆਰੋਚਯਿਂਸੁ ‘‘ਅਯ੍ਯੇ, ਪਿਤਰਾ ਕਿਰ ਤੇ ਆਜੀਵਕਸ੍ਸ ਕਥਂ ਸੁਤ੍ਵਾ ਮਿਚ੍ਛਾਦਸ੍ਸਨਂ ਗਹਿਤਂ, ਸੋ ਕਿਰ ਚਤੂਸੁ ਨਗਰਦ੍ਵਾਰੇਸੁ ਦਾਨਸਾਲਾਯੋ ਵਿਦ੍ਧਂਸਾਪੇਤ੍ਵਾ ਪਰਪਰਿਗ੍ਗਹਿਤਾ ਇਤ੍ਥਿਯੋ ਚ ਕੁਮਾਰਿਕਾਯੋ ਚ ਪਸਯ੍ਹਕਾਰੇਨ ਗਣ੍ਹਿਤੁਂ ਆਣਾਪੇਤਿ, ਰਜ੍ਜਂ ਨ ਵਿਚਾਰੇਤਿ, ਕਾਮਮਤ੍ਤੋਯੇਵ ਕਿਰ ਜਾਤੋ’’ਤਿ. ਸਾ ਤਂ ਕਥਂ ਸੁਤ੍ਵਾ ਅਨਤ੍ਤਮਨਾ ਹੁਤ੍ਵਾ ‘‘ਕਥਞ੍ਹਿ ਨਾਮ ਮੇ ਤਾਤੋ ਅਪਗਤਸੁਕ੍ਕਧਮ੍ਮਂ ਨਿਲ੍ਲਜ੍ਜਂ ਨਗ੍ਗਭੋਗ੍ਗਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਿਸ੍ਸਤਿ, ਨਨੁ ਧਮ੍ਮਿਕਸਮਣਬ੍ਰਾਹ੍ਮਣੇ ਕਮ੍ਮਵਾਦਿਨੋ ਉਪਸਙ੍ਕਮਿਤ੍ਵਾ ਪੁਚ੍ਛਿਤਬ੍ਬੋ ਸਿਯਾ, ਠਪੇਤ੍ਵਾ ਖੋ ਪਨ ਮਂ ਅਞ੍ਞੋ ਮਯ੍ਹਂ ਪਿਤਰਂ ਮਿਚ੍ਛਾਦਸ੍ਸਨਾ ਅਪਨੇਤ੍ਵਾ ਸਮ੍ਮਾਦਸ੍ਸਨੇ ਪਤਿਟ੍ਠਾਪੇਤੁਂ ਸਮਤ੍ਥੋ ਨਾਮ ਨਤ੍ਥਿ. ਅਹਞ੍ਹਿ ਅਤੀਤਾ ਸਤ੍ਤ, ਅਨਾਗਤਾ ਸਤ੍ਤਾਤਿ ਚੁਦ੍ਦਸ ਜਾਤਿਯੋ ਅਨੁਸ੍ਸਰਾਮਿ, ਤਸ੍ਮਾ ਪੁਬ੍ਬੇ ਮਯਾ ਕਤਂ ਪਾਪਕਮ੍ਮਂ ਕਥੇਤ੍ਵਾ ਪਾਪਕਮ੍ਮਸ੍ਸ ਫਲਂ ਦਸ੍ਸੇਨ੍ਤੀ ਮਮ ਪਿਤਰਂ ¶ ਮਿਚ੍ਛਾਦਸ੍ਸਨਾ ਮੋਚੇਸ੍ਸਾਮਿ. ਸਚੇ ਪਨ ਅਜ੍ਜੇਵ ਗਮਿਸ੍ਸਾਮਿ, ਅਥ ਮਂ ਪਿਤਾ ‘ਅਮ੍ਮ, ਤ੍ਵਂ ਪੁਬ੍ਬੇ ਅਡ੍ਢਮਾਸੇ ਆਗਚ੍ਛਸਿ, ਅਜ੍ਜ ਕਸ੍ਮਾ ਏਵਂ ਲਹੁ ਆਗਤਾਸੀ’ਤਿ ਵਕ੍ਖਤਿ. ਤਤ੍ਰ ਸਚੇ ਅਹਂ ‘ਤੁਮ੍ਹੇਹਿ ਕਿਰ ਮਿਚ੍ਛਾਦਸ੍ਸਨਂ ਗਹਿਤ’ਨ੍ਤਿ ਸੁਤ੍ਵਾ ‘ਆਗਤਮ੍ਹੀ’ਤਿ ਵਕ੍ਖਾਮਿ, ਨ ਮੇ ਵਚਨਂ ਗਰੁਂ ਕਤ੍ਵਾ ਗਣ੍ਹਿਸ੍ਸਤਿ, ਤਸ੍ਮਾ ਅਜ੍ਜ ਅਗਨ੍ਤ੍ਵਾ ਇਤੋ ਚੁਦ੍ਦਸਮੇ ਦਿਵਸੇ ਕਾਲ਼ਪਕ੍ਖੇਯੇਵ ਕਿਞ੍ਚਿ ਅਜਾਨਨ੍ਤੀ ਵਿਯ ਪੁਬ੍ਬੇ ਗਮਨਾਕਾਰੇਨ੍ਤੇਵ ਗਨ੍ਤ੍ਵਾ ਆਗਮਨਕਾਲੇ ਦਾਨਵਤ੍ਤਤ੍ਥਾਯ ਸਹਸ੍ਸਂ ਯਾਚਿਸ੍ਸਾਮਿ, ਤਦਾ ਮੇ ਪਿਤਾ ਦਿਟ੍ਠਿਯਾ ਗਹਿਤਭਾਵਂ ਕਥੇਸ੍ਸਤਿ. ਅਥ ਨਂ ਅਹਂ ਅਤ੍ਤਨੋ ਬਲੇਨ ਮਿਚ੍ਛਾਦਿਟ੍ਠਿਂ ਛਡ੍ਡਾਪੇਸ੍ਸਾਮੀ’’ਤਿ ਚਿਨ੍ਤੇਸਿ. ਤਸ੍ਮਾ ਚੁਦ੍ਦਸਮੇ ਦਿਵਸੇ ਪਿਤੁ ਸਨ੍ਤਿਕਂ ਗਨ੍ਤੁਕਾਮਾ ਹੁਤ੍ਵਾ ਏਵਮਾਹ.

ਤਤ੍ਥ ਸਖਿਯੋ ਚਾਤਿ ਸਹਾਯਿਕਾਯੋਪਿ ਮੇ ਪਞ੍ਚਸਤਾ ਕੁਮਾਰਿਕਾਯੋ ਏਕਾਯੇਕਂ ਅਸਦਿਸਂ ਕਤ੍ਵਾ ਨਾਨਾਲਙ੍ਕਾਰੇਹਿ ਨਾਨਾਵਣ੍ਣੇਹਿ ਪੁਪ੍ਫਗਨ੍ਧਵਿਲੇਪਨੇਹਿ ਅਲਙ੍ਕਰੋਨ੍ਤੂਤਿ. ਦਿਬ੍ਯੋਤਿ ਦਿਬ੍ਬਸਦਿਸੋ, ਦੇਵਤਾਸਨ੍ਨਿਪਾਤਪਟਿਮਣ੍ਡਿਤੋਤਿਪਿ ਦਿਬ੍ਬੋ. ਗਚ੍ਛਨ੍ਤਿ ਮਮ ਦਾਨਵਤ੍ਤਂ ਆਹਰਾਪੇਤੁਂ ਵਿਦੇਹਿਸ੍ਸਰਸ੍ਸ ਪਿਤੁ ਸਨ੍ਤਿਕਂ ਗਮਿਸ੍ਸਾਮੀਤਿ. ਅਭਿਹਰਿਂਸੂਤਿ ਸੋਲ਼ਸਹਿ ਗਨ੍ਧੋਦਕਘਟੇਹਿ ਨ੍ਹਾਪੇਤ੍ਵਾ ਮਣ੍ਡਨਤ੍ਥਾਯ ਅਭਿਹਰਿਂਸੁ. ਪਰਿਕਿਰਿਯਾਤਿ ਪਰਿਵਾਰੇਤ੍ਵਾ. ਅਸੋਭਿਂਸੂਤਿ ਸੁਜਂ ਪਰਿਵਾਰੇਤ੍ਵਾ ਠਿਤਾ ਦੇਵਕਞ੍ਞਾ ਵਿਯ ਤਂ ਦਿਵਸਂ ਅਤਿਵਿਯ ਅਸੋਭਿਂਸੂਤਿ.

੧੨੨੬.

‘‘ਸਾ ਚ ਸਖਿਮਜ੍ਝਗਤਾ, ਸਬ੍ਬਾਭਰਣਭੂਸਿਤਾ;

ਸਤੇਰਤਾ ਅਬ੍ਭਮਿਵ, ਚਨ੍ਦਕਂ ਪਾਵਿਸੀ ਰੁਚਾ.

੧੨੨੭.

‘‘ਉਪਸਙ੍ਕਮਿਤ੍ਵਾ ¶ ਵੇਦੇਹਂ, ਵਨ੍ਦਿਤ੍ਵਾ ਵਿਨਯੇ ਰਤਂ;

ਸੁਵਣ੍ਣਖਚਿਤੇ ਪੀਠੇ, ਏਕਮਨ੍ਤਂ ਉਪਾਵਿਸੀ’’ਤਿ.

ਤਤ੍ਥ ¶ ਉਪਾਵਿਸੀਤਿ ਪਿਤੁ ਵਸਨਟ੍ਠਾਨਂ ਚਨ੍ਦਕਪਾਸਾਦਂ ਪਾਵਿਸਿ. ਸੁਵਣ੍ਣਖਚਿਤੇਤਿ ਸਤ੍ਤਰਤਨਖਚਿਤੇ ਸੁਵਣ੍ਣਮਯੇ ਪੀਠੇ.

੧੨੨੮.

‘‘ਤਞ੍ਚ ਦਿਸ੍ਵਾਨ ਵੇਦੇਹੋ, ਅਚ੍ਛਰਾਨਂਵ ਸਙ੍ਗਮਂ;

ਰੁਚਂ ਸਖਿਮਜ੍ਝਗਤਂ, ਇਦਂ ਵਚਨਮਬ੍ਰਵਿ.

੧੨੨੯.

‘‘‘ਕਚ੍ਚਿ ਰਮਸਿ ਪਾਸਾਦੇ, ਅਨ੍ਤੋਪੋਕ੍ਖਰਣਿਂ ਪਤਿ;

ਕਚ੍ਚਿ ਬਹੁਵਿਧਂ ਖਜ੍ਜਂ, ਸਦਾ ਅਭਿਹਰਨ੍ਤਿ ਤੇ.

੧੨੩੦.

‘ਕਚ੍ਚਿ ¶ ਬਹੁਵਿਧਂ ਮਾਲ੍ਯਂ, ਓਚਿਨਿਤ੍ਵਾ ਕੁਮਾਰਿਯੋ;

ਘਰਕੇ ਕਰੋਥ ਪਚ੍ਚੇਕਂ, ਖਿਡ੍ਡਾਰਤਿਰਤਾ ਮੁਹੁਂ.

੧੨੩੧.

‘ਕੇਨ ਵਾ ਵਿਕਲਂ ਤੁਯ੍ਹਂ, ਕਿਂ ਖਿਪ੍ਪਂ ਆਹਰਨ੍ਤਿ ਤੇ;

ਮਨੋ ਕਰਸ੍ਸੁ ਕੁਡ੍ਡਮੁਖੀ, ਅਪਿ ਚਨ੍ਦਸਮਮ੍ਹਿਪੀ’’’ਤਿ.

ਤਤ੍ਥ ਸਙ੍ਗਮਨ੍ਤਿ ਅਚ੍ਛਰਾਨਂ ਸਙ੍ਗਮਂ ਵਿਯ ਸਮਾਗਮਂ ਦਿਸ੍ਵਾ. ਪਾਸਾਦੇਤਿ ਅਮ੍ਮ ਮਯਾ ਤੁਯ੍ਹਂ ਵੇਜਯਨ੍ਤਸਦਿਸੋ ਰਤਿਵਡ੍ਢਨਪਾਸਾਦੋ ਕਾਰਿਤੋ, ਕਚ੍ਚਿ ਤਤ੍ਥ ਰਮਸਿ. ਅਨ੍ਤੋਪੋਕ੍ਖਰਣਿਂ ਪਤੀਤਿ ਅਨ੍ਤੋਵਤ੍ਥੁਸ੍ਮਿਞ੍ਞੇਵ ਤੇ ਮਯਾ ਨਨ੍ਦਾਪੋਕ੍ਖਰਣੀਪਟਿਭਾਗਾਪੋਕ੍ਖਰਣੀ ਕਾਰਿਤਾ, ਕਚ੍ਚਿ ਤਂ ਪੋਕ੍ਖਰਣਿਂ ਪਟਿਚ੍ਚ ਉਦਕਕੀਲ਼ਂ ਕੀਲ਼ਨ੍ਤੀ ਰਮਸਿ. ਮਾਲ੍ਯਨ੍ਤਿ ਅਮ੍ਮ, ਅਹਂ ਤੁਯ੍ਹਂ ਦੇਵਸਿਕਂ ਪਞ੍ਚਵੀਸਤਿ ਪੁਪ੍ਫਸਮੁਗ੍ਗੇ ਪਹਿਣਾਮਿ, ਕਚ੍ਚਿ ਤੁਮ੍ਹੇ ਸਬ੍ਬਾਪਿ ਕੁਮਾਰਿਕਾਯੋ ਤਂ ਮਾਲ੍ਯਂ ਓਚਿਨਿਤ੍ਵਾ ਗਨ੍ਥਿਤ੍ਵਾ ਅਭਿਣ੍ਹਂ ਖਿਡ੍ਡਾਰਤਿਰਤਾ ਹੁਤ੍ਵਾ ਪਚ੍ਚੇਕਂ ਘਰਕੇ ਕਰੋਥ, ‘‘ਇਦਂ ਸੁਨ੍ਦਰਂ, ਇਦਂ ਸੁਨ੍ਦਰਤਰ’’ਨ੍ਤਿ ਪਾਟਿਯੇਕ੍ਕਂ ਸਾਰਮ੍ਭੇਨ ਵਾਯਪੁਪ੍ਫਘਰਕਾਨਿ ਪੁਪ੍ਫਗਬ੍ਭੇ ਚ ਪੁਪ੍ਫਾਸਨਪੁਪ੍ਫਸਯਨਾਨਿ ਚ ਕਚ੍ਚਿ ਕਰੋਥਾਤਿ ਪੁਚ੍ਛਤਿ.

ਵਿਕਲਨ੍ਤਿ ਵੇਕਲ੍ਲਂ. ਮਨੋ ਕਰਸ੍ਸੂਤਿ ਚਿਤ੍ਤਂ ਉਪ੍ਪਾਦੇਹਿ. ਕੁਡ੍ਡਮੁਖੀਤਿ ਸਾਸਪਕਕ੍ਕੇਹਿ ਪਸਾਦਿਤਮੁਖਤਾਯ ਤਂ ਏਵਮਾਹ. ਇਤ੍ਥਿਯੋ ਹਿ ਮੁਖਵਣ੍ਣਂ ਪਸਾਦੇਨ੍ਤਿਯੋ ਦੁਟ੍ਠਲੋਹਿਤਮੁਖਦੂਸਿਤਪੀਲ਼ਕਾਹਰਣਤ੍ਥਂ ਪਠਮਂ ਸਾਸਪਕਕ੍ਕੇਨ ਮੁਖਂ ਵਿਲਿਮ੍ਪਨ੍ਤਿ, ਤਤੋ ਲੋਹਿਤਸ੍ਸ ਸਮਕਰਣਤ੍ਥਂ ¶ ਮਤ੍ਤਿਕਾਕਕ੍ਕੇਨ, ਤਤੋ ਛਵਿਪਸਾਦਨਤ੍ਥਂ ਤਿਲਕਕ੍ਕੇਨ. ਚਨ੍ਦਸਮਮ੍ਹਿਪੀਤਿ ਚਨ੍ਦਤੋ ਦੁਲ੍ਲਭਤਰੋ ਨਾਮ ਨਤ੍ਥਿ, ਤਾਦਿਸੇਪਿ ਰੁਚਿਂ ਕਤ੍ਵਾ ਮਮਾਚਿਕ੍ਖ, ਸਮ੍ਪਾਦੇਸ੍ਸਾਮਿ ਤੇਤਿ.

੧੨੩੨.

‘‘ਵੇਦੇਹਸ੍ਸ ਵਚੋ ਸੁਤ੍ਵਾ, ਰੁਚਾ ਪਿਤਰ ਮਬ੍ਰਵਿ;

‘ਸਬ੍ਬਮੇਤਂ ਮਹਾਰਾਜ, ਲਬ੍ਭਤਿਸ੍ਸਰਸਨ੍ਤਿਕੇ.

੧੨੩੩.

‘ਸੁਵੇ ਪਨ੍ਨਰਸੋ ਦਿਬ੍ਯੋ, ਸਹਸ੍ਸਂ ਆਹਰਨ੍ਤੁ ਮੇ;

ਯਥਾਦਿਨ੍ਨਞ੍ਚ ਦਸ੍ਸਾਮਿ, ਦਾਨਂ ਸਬ੍ਬਵਣੀਸ੍ਵਹ’’’ਨ੍ਤਿ.

ਤਤ੍ਥ ਸਬ੍ਬਵਣੀਸ੍ਵਹਨ੍ਤਿ ਸਬ੍ਬਵਣਿਬ੍ਬਕੇਸੁ ਅਹਂ ਦਸ੍ਸਾਮਿ.

੧੨੩੪.

‘‘ਰੁਚਾਯ ਵਚਨਂ ਸੁਤ੍ਵਾ, ਰਾਜਾ ਅਙ੍ਗਤਿ ਮਬ੍ਰਵਿ;

‘ਬਹੁਂ ਵਿਨਾਸਿਤਂ ਵਿਤ੍ਤਂ, ਨਿਰਤ੍ਥਂ ਅਫਲਂ ਤਯਾ.

੧੨੩੫.

‘ਉਪੋਸਥੇ ¶ ਵਸਂ ਨਿਚ੍ਚਂ, ਅਨ੍ਨਪਾਨਂ ਨ ਭੁਞ੍ਜਸਿ;

ਨਿਯਤੇਤਂ ਅਭੁਤ੍ਤਬ੍ਬਂ, ਨਤ੍ਥਿ ਪੁਞ੍ਞਂ ਅਭੁਞ੍ਜਤੋ’’’ਤਿ.

ਤਤ੍ਥ ¶ ਅਙ੍ਗਤਿ ਮਬ੍ਰਵੀਤਿ ਭਿਕ੍ਖਵੇ, ਸੋ ਅਙ੍ਗਤਿਰਾਜਾ ਪੁਬ੍ਬੇ ਅਯਾਚਿਤੋਪਿ ‘‘ਅਮ੍ਮ, ਦਾਨਂ ਦੇਹੀ’’ਤਿ ਸਹਸ੍ਸਂ ਦਤ੍ਵਾ ਤਂ ਦਿਵਸਂ ਯਾਚਿਤੋਪਿ ਮਿਚ੍ਛਾਦਸ੍ਸਨਸ੍ਸ ਗਹਿਤਤ੍ਤਾ ਅਦਤ੍ਵਾ ਇਦਂ ‘‘ਬਹੁਂ ਵਿਨਾਸਿਤ’’ਨ੍ਤਿਆਦਿਵਚਨਂ ਅਬ੍ਰਵਿ. ਨਿਯਤੇਤਂ ਅਭੁਤ੍ਤਬ੍ਬਨ੍ਤਿ ਏਤਂ ਨਿਯਤਿਵਸੇਨ ਤਯਾ ਅਭੁਞ੍ਜਿਤਬ੍ਬਂ ਭਵਿਸ੍ਸਤਿ, ਭੁਞ੍ਜਨ੍ਤਾਨਮ੍ਪਿ ਅਭੁਞ੍ਜਨ੍ਤਾਨਮ੍ਪਿ ਪੁਞ੍ਞਂ ਨਤ੍ਥਿ. ਸਬ੍ਬੇ ਹਿ ਚੁਲ੍ਲਾਸੀਤਿਮਹਾਕਪ੍ਪੇ ਅਤਿਕ੍ਕਮਿਤ੍ਵਾਵ ਸੁਜ੍ਝਨ੍ਤਿ.

੧੨੩੬.

‘‘ਬੀਜਕੋਪਿ ਹਿ ਸੁਤ੍ਵਾਨ, ਤਦਾ ਕਸ੍ਸਪਭਾਸਿਤਂ;

‘ਪਸ੍ਸਸਨ੍ਤੋ ਮੁਹੁਂ ਉਣ੍ਹਂ, ਰੁਦਂ ਅਸ੍ਸੂਨਿ ਵਤ੍ਤਯਿ.

੧੨੩੭.

‘ਯਾਵ ਰੁਚੇ ਜੀਵਮਾਨਾ, ਮਾ ਭਤ੍ਤਮਪਨਾਮਯਿ;

ਨਤ੍ਥਿ ਭਦ੍ਦੇ ਪਰੋ ਲੋਕੋ, ਕਿਂ ਨਿਰਤ੍ਥਂ ਵਿਹਞ੍ਞਸੀ’’’ਤਿ.

ਤਤ੍ਥ ਬੀਜਕੋਪੀਤਿ ਬੀਜਕੋਪਿ ਪੁਬ੍ਬੇ ਕਲ੍ਯਾਣਕਮ੍ਮਂ ਕਤ੍ਵਾ ਤਸ੍ਸ ਨਿਸ੍ਸਨ੍ਦੇਨ ਦਾਸਿਕੁਚ੍ਛਿਯਂ ਨਿਬ੍ਬਤ੍ਤੋਤਿ ¶ ਬੀਜਕਵਤ੍ਥੁਮ੍ਪਿਸ੍ਸਾ ਉਦਾਹਰਣਤ੍ਥਂ ਆਹਰਿ. ਨਤ੍ਥਿ ਭਦ੍ਦੇਤਿ ਭਦ੍ਦੇ, ਗੁਣਾਚਰਿਯੋ ਏਵਮਾਹ ‘‘ਨਤ੍ਥਿ ਅਯਂ ਲੋਕੋ, ਨਤ੍ਥਿ ਪਰੋ ਲੋਕੋ, ਨਤ੍ਥਿ ਮਾਤਾ, ਨਤ੍ਥਿ ਪਿਤਾ, ਨਤ੍ਥਿ ਸਤ੍ਤਾ ਓਪਪਾਤਿਕਾ, ਨਤ੍ਥਿ ਲੋਕੇ ਸਮਣਬ੍ਰਾਹ੍ਮਣਾ ਸਮ੍ਮਗ੍ਗਤਾ ਸਮ੍ਮਾਪਟਿਪਨ੍ਨਾ’’ਤਿ. ਪਰਲੋਕੇ ਹਿ ਸਤਿ ਇਧਲੋਕੋਪਿ ਨਾਮ ਭਵੇਯ੍ਯ, ਸੋਯੇਵ ਚ ਨਤ੍ਥਿ. ਮਾਤਾਪਿਤੂਸੁ ਸਨ੍ਤੇਸੁ ਪੁਤ੍ਤਧੀਤਰੋ ਨਾਮ ਭਵੇਯ੍ਯੂਉਂ, ਤੇਯੇਵ ਚ ਨਤ੍ਥਿ. ਧਮ੍ਮੇ ਸਤਿ ਧਮ੍ਮਿਕਸਮਣਬ੍ਰਾਹ੍ਮਣਾ ਭਵੇਯ੍ਯੂਂ, ਤੇਯੇਵ ਚ ਨਤ੍ਥਿ. ਕਿਂ ਦਾਨਂ ਦੇਨ੍ਤੀ ਸੀਲਂ ਰਕ੍ਖਨ੍ਤੀ ਨਿਰਤ੍ਥਂ ਵਿਹਞ੍ਞਸੀਤਿ.

੧੨੩੮.

‘‘ਵੇਦੇਹਸ੍ਸ ਵਚੋ ਸੁਤ੍ਵਾ, ਰੁਚਾ ਰੁਚਿਰਵਣ੍ਣਿਨੀ;

ਜਾਨਂ ਪੁਬ੍ਬਾਪਰਂ ਧਮ੍ਮਂ, ਪਿਤਰਂ ਏਤਦਬ੍ਰਵਿ.

੧੨੩੯.

‘ਸੁਤਮੇਵ ਪੁਰੇ ਆਸਿ, ਸਕ੍ਖਿ ਦਿਟ੍ਠਮਿਦਂ ਮਯਾ;

ਬਾਲੂਪਸੇਵੀ ਯੋ ਹੋਤਿ, ਬਾਲੋਵ ਸਮਪਜ੍ਜਥ.

੧੨੪੦.

‘ਮੂਲ਼੍ਹੋ ¶ ਹਿ ਮੂਲ਼੍ਹਮਾਗਮ੍ਮ, ਭਿਯ੍ਯੋ ਮੋਹਂ ਨਿਗਚ੍ਛਤਿ;

ਪਤਿਰੂਪਂ ਅਲਾਤੇਨ, ਬੀਜਕੇਨ ਚ ਮੁਯ੍ਹਿਤੁ’’’ਨ੍ਤਿ.

ਤਤ੍ਥ ਪੁਬ੍ਬਾਪਰਂ ਧਮ੍ਮਨ੍ਤਿ ਭਿਕ੍ਖਵੇ, ਪਿਤੁ ਵਚਨਂ ਸੁਤ੍ਵਾ ਰੁਚਾ ਰਾਜਧੀਤਾ ਅਤੀਤੇ ਸਤ੍ਤਜਾਤਿਵਸੇਨ ਪੁਬ੍ਬਧਮ੍ਮਂ, ਅਨਾਗਤੇ ਸਤ੍ਤਜਾਤਿਵਸੇਨ ਅਨਾਗਤਧਮ੍ਮਞ੍ਚ ਜਾਨਨ੍ਤੀ ਪਿਤਰਂ ਮਿਚ੍ਛਾਦਿਟ੍ਠਿਤੋ ਮੋਚੇਤੁਕਾਮਾ ਏਤਂ ‘‘ਸੁਤਮੇਵਾ’’ਤਿਆਦਿਮਾਹ. ਤਤ੍ਥ ਸਮਪਜ੍ਜਥਾਤਿ ਯੋ ਪੁਗ੍ਗਲੋ ਬਾਲੂਪਸੇਵੀ ਹੋਤਿ, ਸੋ ਬਾਲੋਵ ਸਮਪਜ੍ਜਤੀਤਿ ਏਤਂ ਮਯਾ ਪੁਬ੍ਬੇ ਸੁਤਮੇਵ, ਅਜ੍ਜ ਪਨ ਪਚ੍ਚਕ੍ਖਤੋ ਦਿਟ੍ਠਂ. ਮੂਲ਼੍ਹੋਤਿ ਮਗ੍ਗਮੂਲ਼੍ਹਂ ਆਗਮ੍ਮ ਮਗ੍ਗਮੂਲ਼੍ਹੋ ਵਿਯ ਦਿਟ੍ਠਿਮੂਲ਼੍ਹਂ ਆਗਮ੍ਮ ਦਿਟ੍ਠਿਮੂਲ਼੍ਹੋਪਿ ਉਤ੍ਤਰਿ ਮੋਹਂ ਨਿਗਚ੍ਛਤਿ, ਮੂਲ਼੍ਹਤਰੋ ਹੋਤਿ. ਅਲਾਤੇਨਾਤਿ ਦੇਵ, ਤੁਮ੍ਹੇਹਿ ਜਾਤਿਗੋਤ੍ਤਕੁਲਪਦੇਸਇਸ੍ਸਰਿਯਪੁਞ੍ਞਪਞ੍ਞਾਹੀਨੇਨ ਅਲਾਤਸੇਨਾਪਤਿਨਾ ਅਚ੍ਚਨ੍ਤਹੀਨੇਨ ਦੁਪ੍ਪਞ੍ਞੇਨ ਬੀਜਕਦਾਸੇਨ ਚ ਗਾਮਦਾਰਕਸਦਿਸਂ ਅਹਿਰਿਕਂ ਬਾਲਂ ਗੁਣਂ ਆਜੀਵਕਂ ਆਗਮ੍ਮ ਮੁਯ੍ਹਿਤੁਂ ਪਤਿਰੂਪਂ ਅਨੁਚ੍ਛਵਿਕਂ. ਕਿਂ ਤੇ ਨ ਮੁਯ੍ਹਿਸ੍ਸਨ੍ਤੀਤਿ?

ਏਵਂ ਤੇ ਉਭੋਪਿ ਗਰਹਿਤ੍ਵਾ ਦਿਟ੍ਠਿਤੋ ਮੋਚੇਤੁਕਾਮਤਾਯ ਪਿਤਰਂ ਵਣ੍ਣੇਨ੍ਤੀ ਆਹ –

੧੨੪੧.

‘‘ਤ੍ਵਞ੍ਚ ¶ ਦੇਵਾਸਿ ਸਪ੍ਪਞ੍ਞੋ, ਧੀਰੋ ਅਤ੍ਥਸ੍ਸ ਕੋਵਿਦੋ;

ਕਥਂ ਬਾਲੇਭਿ ਸਦਿਸਂ, ਹੀਨਦਿਟ੍ਠਿਂ ਉਪਾਗਮਿ.

੧੨੪੨.

‘‘ਸਚੇਪਿ ¶ ਸਂਸਾਰਪਥੇਨ ਸੁਜ੍ਝਤਿ, ਨਿਰਤ੍ਥਿਯਾ ਪਬ੍ਬਜ੍ਜਾ ਗੁਣਸ੍ਸ;

ਕੀਟੋਵ ਅਗ੍ਗਿਂ ਜਲਿਤਂ ਅਪਾਪਤਂ, ਉਪਪਜ੍ਜਤਿ ਮੋਹਮੂਲ਼੍ਹੋ ਨਗ੍ਗਭਾਵਂ.

੧੨੪੩.

‘‘ਸਂਸਾਰਸੁਦ੍ਧੀਤਿ ਪੁਰੇ ਨਿਵਿਟ੍ਠਾ, ਕਮ੍ਮਂ ਵਿਦੂਸੇਨ੍ਤਿ ਬਹੂ ਅਜਾਨਂ;

ਪੁਬ੍ਬੇ ਕਲੀ ਦੁਗ੍ਗਹਿਤੋਵਨਤ੍ਥਾ, ਦੁਮ੍ਮੋਚਯਾ ਬਲਿਸਾ ਅਮ੍ਬੁਜੋਵਾ’’ਤਿ.

ਤਤ੍ਥ ਸਪ੍ਪਞ੍ਞੋਤਿ ਯਸਵਯਪੁਞ੍ਞਤਿਤ੍ਥਾਵਾਸਯੋਨਿਸੋਮਨਸਿਕਾਰਸਾਕਚ੍ਛਾਵਸੇਨ ਲਦ੍ਧਾਯ ਪਞ੍ਞਾਯ ਸਪ੍ਪਞ੍ਞੋ, ਤੇਨੇਵ ਕਾਰਣੇਨ ਧੀਰੋ, ਧੀਰਤਾਯ ਅਤ੍ਥਾਨਤ੍ਥਸ੍ਸ ਕਾਰਣਾਕਾਰਣਸ੍ਸ ਕੋਵਿਦੋ. ਬਾਲੇਭਿ ਸਦਿਸਨ੍ਤਿ ਯਥਾ ਤੇ ਬਾਲਾ ਉਪਗਤਾ, ਤਥਾ ਕਥਂ ¶ ਤ੍ਵਂ ਹੀਨਦਿਟ੍ਠਿਂ ਉਪਗਤੋ. ਅਪਾਪਤਨ੍ਤਿ ਅਪਿ ਆਪਤਂ, ਪਤਨ੍ਤੋਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਤਾਤ, ਸਂਸਾਰੇਨ ਸੁਦ੍ਧੀਤਿ ਲਦ੍ਧਿਯਾ ਸਤਿ ਯਥਾ ਪਟਙ੍ਗਕੀਟੋ ਰਤ੍ਤਿਭਾਗੇ ਜਲਿਤਂ ਅਗ੍ਗਿਂ ਦਿਸ੍ਵਾ ਤਪ੍ਪਚ੍ਚਯਂ ਦੁਕ੍ਖਂ ਅਜਾਨਿਤ੍ਵਾ ਮੋਹੇਨ ਤਤ੍ਥ ਪਤਨ੍ਤੋ ਮਹਾਦੁਕ੍ਖਂ ਆਪਜ੍ਜਤਿ, ਤਥਾ ਗੁਣੋਪਿ ਪਞ੍ਚ ਕਾਮਗੁਣੇ ਪਹਾਯ ਮੋਹਮੂਲ਼੍ਹੋ ਨਿਰਸ੍ਸਾਦਂ ਨਗ੍ਗਭਾਵਂ ਉਪਪਜ੍ਜਤਿ.

ਪੁਰੇ ਨਿਵਿਟ੍ਠਾਤਿ ਤਾਤ, ਸਂਸਾਰੇਨ ਸੁਦ੍ਧੀਤਿ ਕਸ੍ਸਚਿ ਵਚਨਂ ਅਸੁਤ੍ਵਾ ਪਠਮਮੇਵ ਨਿਵਿਟ੍ਠੋ ਨਤ੍ਥਿ, ਸੁਕਤਦੁਕ੍ਕਟਾਨਂ ਕਮ੍ਮਾਨਂ ਫਲਨ੍ਤਿ ਗਹਿਤਤ੍ਤਾ ਬਹੂ ਜਨਾ ਅਜਾਨਨ੍ਤਾ ਕਮ੍ਮਂ ਵਿਦੂਸੇਨ੍ਤਾ ਕਮ੍ਮਫਲਮ੍ਪਿ ਵਿਦੂਸੇਨ੍ਤਿਯੇਵ, ਏਵਂ ਤੇਸਂ ਪੁਬ੍ਬੇ ਗਹਿਤੋ ਕਲਿ ਪਰਾਜਯਗਾਹੋ ਦੁਗ੍ਗਹਿਤੋਵ ਹੋਤੀਤਿ ਅਤ੍ਥੋ. ਦੁਮ੍ਮੋਚਯਾ ਬਲਿਸਾ ਅਮ੍ਬੁਜੋਵਾਤਿ ਤੇ ਪਨ ਏਵਂ ਅਜਾਨਨ੍ਤਾ ਮਿਚ੍ਛਾਦਸ੍ਸਨੇਨ ਅਨਤ੍ਥਂ ਗਹੇਤ੍ਵਾ ਠਿਤਾ ਬਾਲਾ ਯਥਾ ਨਾਮ ਬਲਿਸਂ ਗਿਲਿਤ੍ਵਾ ਠਿਤੋ ਮਚ੍ਛੋ ਬਲਿਸਾ ਦੁਮ੍ਮੋਚਯੋ ਹੋਤਿ, ਏਵਂ ਤਮ੍ਹਾ ਅਨਤ੍ਥਾ ਦੁਮ੍ਮੋਚਯਾ ਹੋਨ੍ਤਿ.

ਉਤ੍ਤਰਿਪਿ ਉਦਾਹਰਣਂ ਆਹਰਨ੍ਤੀ ਆਹ –

੧੨੪੪.

‘‘ਉਪਮਂ ਤੇ ਕਰਿਸ੍ਸਾਮਿ, ਮਹਾਰਾਜ ਤਵਤ੍ਥਿਯਾ;

ਉਪਮਾਯ ਮਿਧੇਕਚ੍ਚੇ, ਅਤ੍ਥਂ ਜਾਨਨ੍ਤਿ ਪਣ੍ਡਿਤਾ.

੧੨੪੫.

‘‘ਵਾਣਿਜਾਨਂ ਯਥਾ ਨਾਵਾ, ਅਪ੍ਪਮਾਣਭਰਾ ਗਰੁ;

ਅਤਿਭਾਰਂ ਸਮਾਦਾਯ, ਅਣ੍ਣਵੇ ਅਵਸੀਦਤਿ.

੧੨੪੬.

‘‘ਏਵਮੇਵ ¶ ਨਰੋ ਪਾਪਂ, ਥੋਕਂ ਥੋਕਮ੍ਪਿ ਆਚਿਨਂ;

ਅਤਿਭਾਰਂ ਸਮਾਦਾਯ, ਨਿਰਯੇ ਅਵਸੀਦਤਿ.

੧੨੪੭.

‘‘ਨ ਤਾਵ ਭਾਰੋ ਪਰਿਪੂਰੋ, ਅਲਾਤਸ੍ਸ ਮਹੀਪਤਿ;

ਆਚਿਨਾਤਿ ਚ ਤਂ ਪਾਪਂ, ਯੇਨ ਗਚ੍ਛਤਿ ਦੁਗ੍ਗਤਿਂ.

੧੨੪੮.

‘‘ਪੁਬ੍ਬੇਵਸ੍ਸ ਕਤਂ ਪੁਞ੍ਞਂ, ਅਲਾਤਸ੍ਸ ਮਹੀਪਤਿ;

ਤਸ੍ਸੇਵ ਦੇਵ ਨਿਸ੍ਸਨ੍ਦੋ, ਯਞ੍ਚੇਸੋ ਲਭਤੇ ਸੁਖਂ.

੧੨੪੯.

‘‘ਖੀਯਤੇ ਚਸ੍ਸ ਤਂ ਪੁਞ੍ਞਂ, ਤਥਾ ਹਿ ਅਗੁਣੇ ਰਤੋ;

ਉਜੁਮਗ੍ਗਂ ਅਵਹਾਯ, ਕੁਮ੍ਮਗ੍ਗਮਨੁਧਾਵਤਿ.

੧੨੫੦.

‘‘ਤੁਲਾ ¶ ¶ ਯਥਾ ਪਗ੍ਗਹਿਤਾ, ਓਹਿਤੇ ਤੁਲਮਣ੍ਡਲੇ;

ਉਨ੍ਨਮੇਤਿ ਤੁਲਾਸੀਸਂ, ਭਾਰੇ ਓਰੋਪਿਤੇ ਸਤਿ.

੧੨੫੧.

‘‘ਏਵਮੇਵ ਨਰੋ ਪੁਞ੍ਞਂ, ਥੋਕਂ ਥੋਕਮ੍ਪਿ ਆਚਿਨਂ;

ਸਗ੍ਗਾਤਿਮਾਨੋ ਦਾਸੋਵ, ਬੀਜਕੋ ਸਾਤਵੇ ਰਤੋ’’ਤਿ.

ਤਤ੍ਥ ਨਿਰਯੇਤਿ ਅਟ੍ਠਵਿਧੇ ਮਹਾਨਿਰਯੇ, ਸੋਲ਼ਸਵਿਧੇ ਉਸ੍ਸਦਨਿਰਯੇ, ਲੋਕਨ੍ਤਰਨਿਰਯੇ ਚ. ਭਾਰੋਤਿ ਤਾਤ, ਨ ਤਾਵ ਅਲਾਤਸ੍ਸ ਅਕੁਸਲਭਾਰੋ ਪੂਰਤਿ. ਤਸ੍ਸੇਵਾਤਿ ਤਸ੍ਸ ਪੁਬ੍ਬੇ ਕਤਸ੍ਸ ਪੁਞ੍ਞਸ੍ਸੇਵ ਨਿਸ੍ਸਨ੍ਦੋ, ਯਂ ਸੋ ਅਲਾਤਸੇਨਾਪਤਿ ਅਜ੍ਜ ਸੁਖਂ ਲਭਤਿ. ਨ ਹਿ ਤਾਤ, ਏਤਂ ਗੋਘਾਤਕਕਮ੍ਮਸ੍ਸ ਫਲਂ. ਪਾਪਕਮ੍ਮਸ੍ਸ ਹਿ ਨਾਮ ਵਿਪਾਕੋ ਇਟ੍ਠੋ ਕਨ੍ਤੋ ਭਵਿਸ੍ਸਤੀਤਿ ਅਟ੍ਠਾਨਮੇਤਂ. ਅਗੁਣੇ ਰਤੋਤਿ ਤਥਾਹੇਸ ਇਦਾਨਿ ਅਕੁਸਲਕਮ੍ਮੇ ਰਤੋ. ਉਜੁਮਗ੍ਗਨ੍ਤਿ ਦਸਕੁਸਲਕਮ੍ਮਪਥਮਗ੍ਗਂ. ਕੁਮ੍ਮਗ੍ਗਨ੍ਤਿ ਨਿਰਯਗਾਮਿਅਕੁਸਲਮਗ੍ਗਂ.

ਓਹਿਤੇ ਤੁਲਮਣ੍ਡਲੇਤਿ ਭਣ੍ਡਪਟਿਚ੍ਛਨਤ੍ਥਾਯ ਤੁਲਮਣ੍ਡਲੇ ਲਗ੍ਗੇਤ੍ਵਾ ਠਪਿਤੇ. ਉਨ੍ਨਮੇਤੀਤਿ ਉਦ੍ਧਂ ਉਕ੍ਖਿਪਤਿ. ਆਚਿਨਨ੍ਤਿ ਥੋਕਂ ਥੋਕਮ੍ਪਿ ਪੁਞ੍ਞਂ ਆਚਿਨਨ੍ਤੋ ਪਾਪਭਾਰਂ ਓਤਾਰੇਤ੍ਵਾ ਨਰੋ ਕਲ੍ਯਾਣਕਮ੍ਮਸ੍ਸ ਸੀਸਂ ਉਕ੍ਖਿਪਿਤ੍ਵਾ ਦੇਵਲੋਕਂ ਗਚ੍ਛਤਿ. ਸਗ੍ਗਾਤਿਮਾਨੋਤਿ ਸਗ੍ਗੇ ਅਤਿਮਾਨੋ ਸਗ੍ਗਸਮ੍ਪਾਪਕੇ ਸਾਤਫਲੇ ਕਲ੍ਯਾਣਕਮ੍ਮੇ ਅਭਿਰਤੋ. ‘‘ਸਗ੍ਗਾਧਿਮਾਨੋ’’ਤਿਪਿ ਪਾਠੋ, ਸਗ੍ਗਂ ਅਧਿਕਾਰਂ ਕਤ੍ਵਾ ਠਿਤਚਿਤ੍ਤੋਤਿ ¶ ਅਤ੍ਥੋ. ਸਾਤਵੇ ਰਤੋਤਿ ਏਸ ਬੀਜਕਦਾਸੋ ਸਾਤਵੇ ਮਧੁਰਵਿਪਾਕੇ ਕੁਸਲਧਮ੍ਮੇਯੇਵ ਰਤੋ. ਸੋ ਇਮਸ੍ਸ ਪਾਪਕਮ੍ਮਸ੍ਸ ਖੀਣਕਾਲੇ, ਕਲ੍ਯਾਣਕਮ੍ਮਸ੍ਸ ਫਲੇਨ ਦੇਵਲੋਕੇ ਨਿਬ੍ਬਤ੍ਤਿਸ੍ਸਤਿ.

ਯਞ੍ਚੇਸ ਇਦਾਨਿ ਦਾਸਤ੍ਤਂ ਉਪਗਤੋ, ਨ ਤਂ ਕਲ੍ਯਾਣਕਮ੍ਮਸ੍ਸ ਫਲੇਨ. ਦਾਸਤ੍ਤਸਂਵਤ੍ਤਨਿਕਞ੍ਹਿਸ੍ਸ ਪੁਬ੍ਬੇ ਕਤਂ ਪਾਪਂ ਭਵਿਸ੍ਸਤੀਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਨ੍ਤਿ ਇਮਮਤ੍ਥਂ ਪਕਾਸੇਨ੍ਤੀ ਆਹ –

੧੨੫੨.

‘‘ਯਮਜ੍ਜ ਬੀਜਕੋ ਦਾਸੋ, ਦੁਕ੍ਖਂ ਪਸ੍ਸਤਿ ਅਤ੍ਤਨਿ;

ਪੁਬ੍ਬੇਵਸ੍ਸ ਕਤਂ ਪਾਪਂ, ਤਮੇਸੋ ਪਟਿਸੇਵਤਿ.

੧੨੫੩.

‘‘ਖੀਯਤੇ ਚਸ੍ਸ ਤਂ ਪਾਪਂ, ਤਥਾ ਹਿ ਵਿਨਯੇ ਰਤੋ;

ਕਸ੍ਸਪਞ੍ਚ ਸਮਾਪਜ੍ਜ, ਮਾ ਹੇਵੁਪ੍ਪਥਮਾਗਮਾ’’ਤਿ.

ਤਤ੍ਥ ¶ ਮਾ ਹੇਵੁਪ੍ਪਥਮਾਗਮਾਤਿ ਤਾਤ, ਤ੍ਵਂ ਇਮਂ ਨਗ੍ਗਂ ਕਸ੍ਸਪਾਜੀਵਕਂ ਉਪਗਨ੍ਤ੍ਵਾ ਮਾ ਹੇਵ ਨਿਰਯਗਾਮਿਂ ਉਪ੍ਪਥਂ ਅਗਮਾ, ਮਾ ਪਾਪਮਕਾਸੀਤਿ ਪਿਤਰਂ ਓਵਦਤਿ.

ਇਦਾਨਿਸ੍ਸ ਪਾਪੂਪਸੇਵਨਾਯ ਦੋਸਂ ਕਲ੍ਯਾਣਮਿਤ੍ਤੂਪਸੇਵਨਾਯ ਚ ਗੁਣਂ ਦਸ੍ਸੇਨ੍ਤੀ ਆਹ –

੧੨੫੪.

‘‘ਯਂ ਯਞ੍ਹਿ ਰਾਜ ਭਜਤਿ, ਸਨ੍ਤਂ ਵਾ ਯਦਿ ਵਾ ਅਸਂ;

ਸੀਲਵਨ੍ਤਂ ਵਿਸੀਲਂ ਵਾ, ਵਸਂ ਤਸ੍ਸੇਵ ਗਚ੍ਛਤਿ.

੧੨੫੫.

‘‘ਯਾਦਿਸਂ ਕੁਰੁਤੇ ਮਿਤ੍ਤਂ, ਯਾਦਿਸਂ ਚੂਪਸੇਵਤਿ;

ਸੋਪਿ ਤਾਦਿਸਕੋ ਹੋਤਿ, ਸਹਵਾਸੋ ਹਿ ਤਾਦਿਸੋ.

੧੨੫੬.

‘‘ਸੇਵਮਾਨੋ ¶ ਸੇਵਮਾਨਂ, ਸਮ੍ਫੁਟ੍ਠੋ ਸਮ੍ਫੁਸਂ ਪਰਂ;

ਸਰੋ ਦਿਦ੍ਧੋ ਕਲਾਪਂਵ, ਅਲਿਤ੍ਤਮੁਪਲਿਮ੍ਪਤਿ;

ਉਪਲੇਪਭਯਾ ਧੀਰੋ, ਨੇਵ ਪਾਪਸਖਾ ਸਿਯਾ.

੧੨੫੭.

‘‘ਪੂਤਿਮਚ੍ਛਂ ਕੁਸਗ੍ਗੇਨ, ਯੋ ਨਰੋ ਉਪਨਯ੍ਹਤਿ;

ਕੁਸਾਪਿ ਪੂਤਿ ਵਾਯਨ੍ਤਿ, ਏਵਂ ਬਾਲੂਪਸੇਵਨਾ.

੧੨੫੮.

‘‘ਤਗਰਞ੍ਚ ¶ ਪਲਾਸੇਨ, ਯੋ ਨਰੋ ਉਪਨਯ੍ਹਤਿ;

ਪਤ੍ਤਾਪਿ ਸੁਰਭਿ ਵਾਯਨ੍ਤਿ, ਏਵਂ ਧੀਰੂਪਸੇਵਨਾ.

੧੨੫੯.

‘‘ਤਸ੍ਮਾ ਪਤ੍ਤਪੁਟਸ੍ਸੇਵ, ਞਤ੍ਵਾ ਸਮ੍ਪਾਕਮਤ੍ਤਨੋ

ਅਸਨ੍ਤੇ ਨੋਪਸੇਵੇਯ੍ਯ, ਸਨ੍ਤੇ ਸੇਵੇਯ੍ਯ ਪਣ੍ਡਿਤੋ;

ਅਸਨ੍ਤੋ ਨਿਰਯਂ ਨੇਨ੍ਤਿ, ਸਨ੍ਤੋ ਪਾਪੇਨ੍ਤਿ ਸੁਗ੍ਗਤਿ’’ਨ੍ਤਿ.

ਤਤ੍ਥ ਸਨ੍ਤਂ ਵਾਤਿ ਸਪ੍ਪੁਰਿਸਂ ਵਾ. ਯਦਿ ਵਾ ਅਸਨ੍ਤਿ ਅਸਪ੍ਪੁਰਿਸਂ ਵਾ. ਸਰੋ ਦਿਦ੍ਧੋ ਕਲਾਪਂਵਾਤਿ ਮਹਾਰਾਜ, ਯਥਾ ਨਾਮ ਹਲਾਹਲਵਿਸਲਿਤ੍ਤੋ ਸਰੋ ਸਰਕਲਾਪੇ ਖਿਤ੍ਤੋ ਸਬ੍ਬਂ ਤਂ ਵਿਸੇਨ ਅਲਿਤ੍ਤਮ੍ਪਿ ਸਰਕਲਾਪਂ ਲਿਮ੍ਪਤਿ, ਵਿਸਦਿਦ੍ਧਮੇਵ ਕਰੋਤਿ, ਏਵਮੇਵ ਪਾਪਮਿਤ੍ਤੋ ਪਾਪਂ ਸੇਵਮਾਨੋ ਅਤ੍ਤਾਨਂ ਸੇਵਮਾਨਂ ਪਰਂ, ਤੇਨ ਸਮ੍ਫੁਟ੍ਠੋ ਤਂ ਸਮ੍ਫੁਸਂ ਅਲਿਤ੍ਤਂ ਪਾਪੇਨ ਪੁਰਿਸਂ ਅਤ੍ਤਨਾ ਏਕਜ੍ਝਾਸਯਂ ਕਰੋਨ੍ਤੋ ਉਪਲਿਮ੍ਪਤਿ. ਪੂਤਿ ਵਾਯਨ੍ਤੀਤਿ ਤਸ੍ਸ ਤੇ ਕੁਸਾਪਿ ਦੁਗ੍ਗਨ੍ਧਾ ਵਾਯਨ੍ਤਿ. ਤਗਰਞ੍ਚਾਤਿ ਤਗਰਞ੍ਚ ਅਞ੍ਞਞ੍ਚ ਗਨ੍ਧਸਮ੍ਪਨ੍ਨਂ ਗਨ੍ਧਜਾਤਂ. ਏਵਨ੍ਤਿ ਏਵਰੂਪਾ ਧੀਰੂਪਸੇਵਨਾ. ਧੀਰੋ ਹਿ ਅਤ੍ਤਾਨਂ ਸੇਵਮਾਨਂ ਧੀਰਮੇਵ ਕਰੋਤਿ.

ਤਸ੍ਮਾ ¶ ਪਤ੍ਤਪੁਟਸ੍ਸੇਵਾਤਿ ਯਸ੍ਮਾ ਤਗਰਾਦਿਪਲਿਵੇਠਮਾਨਾਨਿ ਪਣ੍ਣਾਨਿਪਿ ਸੁਗਨ੍ਧਾਨਿ ਹੋਨ੍ਤਿ, ਤਸ੍ਮਾ ਪਲਾਸਪਤ੍ਤਪੁਟਸ੍ਸੇਵ ਪਣ੍ਡਿਤੂਪਸੇਵਨੇਨ ਅਹਮ੍ਪਿ ਪਣ੍ਡਿਤੋ ਭਵਿਸ੍ਸਾਮੀਤਿ ਏਵਂ. ਞਤ੍ਵਾ ਸਮ੍ਪਾਕਮਤ੍ਤਨੋਤਿ ਅਤ੍ਤਨੋ ਪਰਿਪਾਕਂ ਪਣ੍ਡਿਤਭਾਵਂ ਪਰਿਮਾਣਂ ਞਤ੍ਵਾ ਅਸਨ੍ਤੇ ਪਹਾਯ ਪਣ੍ਡਿਤੇ ਸਨ੍ਤੇ ਸੇਵੇਯ੍ਯ. ‘‘ਨਿਰਯਂ ਨੇਨ੍ਤੀ’’ਤਿ ਏਤ੍ਥ ਦੇਵਦਤ੍ਤਾਦੀਹਿ ਨਿਰਯਂ, ‘‘ਪਾਪੇਨ੍ਤਿ ਸੁਗ੍ਗਤਿ’’ਨ੍ਤਿ ਏਤ੍ਥ ਸਾਰਿਪੁਤ੍ਤਤ੍ਥੇਰਾਦੀਹਿ ਸੁਗਤਿਂ ਨੀਤਾਨਂ ਵਸੇਨ ਉਦਾਹਰਣਾਨਿ ਆਹਰਿਤਬ੍ਬਾਨਿ.

ਏਵਂ ਰਾਜਧੀਤਾ ਛਹਿ ਗਾਥਾਹਿ ਪਿਤੁ ਧਮ੍ਮਂ ਕਥੇਤ੍ਵਾ ਇਦਾਨਿ ਅਤੀਤੇ ਅਤ੍ਤਨਾ ਅਨੁਭੂਤਂ ਦੁਕ੍ਖਂ ਦਸ੍ਸੇਨ੍ਤੀ ਆਹ –

੧੨੬੦.

‘‘ਅਹਮ੍ਪਿ ਜਾਤਿਯੋ ਸਤ੍ਤ, ਸਰੇ ਸਂਸਰਿਤਤ੍ਤਨੋ;

ਅਨਾਗਤਾਪਿ ਸਤ੍ਤੇਵ, ਯਾ ਗਮਿਸ੍ਸਂ ਇਤੋ ਚੁਤਾ.

੧੨੬੧.

‘‘ਯਾ ਮੇ ਸਾ ਸਤ੍ਤਮੀ ਜਾਤਿ, ਅਹੁ ਪੁਬ੍ਬੇ ਜਨਾਧਿਪ;

ਕਮ੍ਮਾਰਪੁਤ੍ਤੋ ਮਗਧੇਸੁ, ਅਹੁਂ ਰਾਜਗਹੇ ਪੁਰੇ.

੧੨੬੨.

‘‘ਪਾਪਂ ¶ ਸਹਾਯਮਾਗਮ੍ਮ, ਬਹੁਂ ਪਾਪਂ ਕਤਂ ਮਯਾ;

ਪਰਦਾਰਸ੍ਸ ਹੇਠੇਨ੍ਤੋ, ਚਰਿਮ੍ਹਾ ਅਮਰਾ ਵਿਯ.

੧੨੬੩.

‘‘ਤਂ ਕਮ੍ਮਂ ਨਿਹਿਤਂ ਅਟ੍ਠਾ, ਭਸ੍ਮਚ੍ਛਨ੍ਨੋਵ ਪਾਵਕੋ;

ਅਥ ਅਞ੍ਞੇਹਿ ਕਮ੍ਮੇਹਿ, ਅਜਾਯਿਂ ਵਂਸਭੂਮਿਯਂ.

੧੨੬੪.

‘‘ਕੋਸਮ੍ਬਿਯਂ ¶ ਸੇਟ੍ਠਿਕੁਲੇ, ਇਦ੍ਧੇ ਫੀਤੇ ਮਹਦ੍ਧਨੇ;

ਏਕਪੁਤ੍ਤੋ ਮਹਾਰਾਜ, ਨਿਚ੍ਚਂ ਸਕ੍ਕਤਪੂਜਿਤੋ.

੧੨੬੫.

‘‘ਤਤ੍ਥ ਮਿਤ੍ਤਂ ਅਸੇਵਿਸ੍ਸਂ, ਸਹਾਯਂ ਸਾਤਵੇ ਰਤਂ;

ਪਣ੍ਡਿਤਂ ਸੁਤਸਮ੍ਪਨ੍ਨਂ, ਸੋ ਮਂ ਅਤ੍ਥੇ ਨਿਵੇਸਯਿ.

੧੨੬੬.

‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਬਹੁਂ ਰਤ੍ਤਿਂ ਉਪਾਵਸਿਂ;

ਤਂ ਕਮ੍ਮਂ ਨਿਹਿਤਂ ਅਟ੍ਠਾ, ਨਿਧੀਵ ਉਦਕਨ੍ਤਿਕੇ.

੧੨੬੭.

‘‘ਅਥ ਪਾਪਾਨ ਕਮ੍ਮਾਨਂ, ਯਮੇਤਂ ਮਗਧੇ ਕਤਂ;

ਫਲਂ ਪਰਿਯਾਗ ਮਂ ਪਚ੍ਛਾ, ਭੁਤ੍ਵਾ ਦੁਟ੍ਠਵਿਸਂ ਯਥਾ.

੧੨੬੮.

‘‘ਤਤੋ ਚੁਤਾਹਂ ਵੇਦੇਹ, ਰੋਰੁਵੇ ਨਿਰਯੇ ਚਿਰਂ;

ਸਕਮ੍ਮੁਨਾ ਅਪਚ੍ਚਿਸ੍ਸਂ, ਤਂ ਸਰਂ ਨ ਸੁਖਂ ਲਭੇ.

੧੨੬੯.

‘‘ਬਹੁਵਸ੍ਸਗਣੇ ¶ ਤਤ੍ਥ, ਖੇਪਯਿਤ੍ਵਾ ਬਹੁਂ ਦੁਖਂ;

ਭਿਨ੍ਨਾਗਤੇ ਅਹੁਂ ਰਾਜ, ਛਗਲੋ ਉਦ੍ਧਤਪ੍ਫਲੋ’’ਤਿ.

ਤਤ੍ਥ ਸਤ੍ਤਾਤਿ ਮਹਾਰਾਜ, ਇਧਲੋਕਪਰਲੋਕਾ ਨਾਮ ਸੁਕਤਦੁਕ੍ਕਟਾਨਞ੍ਚ ਫਲਂ ਨਾਮ ਅਤ੍ਥਿ. ਨ ਹਿ ਸਂਸਾਰੋ ਸਤ੍ਤੇ ਸੋਧੇਤੁਂ ਸਕ੍ਕੋਤਿ, ਸਕਮ੍ਮੁਨਾ ਏਵ ਸਤ੍ਤਾ ਸੁਜ੍ਝਨ੍ਤਿ. ਅਲਾਤਸੇਨਾਪਤਿ ਚ ਬੀਜਕਦਾਸੋ ਚ ਏਕਮੇਵ ਜਾਤਿਂ ਅਨੁਸ੍ਸਰਨ੍ਤਿ. ਨ ਕੇਵਲਂ ਏਤੇਵ ਜਾਤਿਂ ਸਰਨ੍ਤਿ, ਅਹਮ੍ਪਿ ਅਤੀਤੇ ਸਤ੍ਤ ਜਾਤਿਯੋ ਅਤ੍ਤਨੋ ਸਂਸਰਿਤਂ ਸਰਾਮਿ, ਅਨਾਗਤੇਪਿ ਇਤੋ ਗਨ੍ਤਬ੍ਬਾ ਸਤ੍ਤੇਵ ਜਾਨਾਮਿ. ਯਾ ਮੇ ਸਾਤਿ ਯਾ ਸਾ ਮਮ ਅਤੀਤੇ ਸਤ੍ਤਮੀ ਜਾਤਿ ਆਸਿ. ਕਮ੍ਮਾਰਪੁਤ੍ਤੋਤਿ ਤਾਯ ਜਾਤਿਯਾ ਅਹਂ ਮਗਧੇਸੁ ਰਾਜਗਹਨਗਰੇ ਸੁਵਣ੍ਣਕਾਰਪੁਤ੍ਤੋ ਅਹੋਸਿਂ.

ਪਰਦਾਰਸ੍ਸ ¶ ਹੇਠੇਨ੍ਤੋਤਿ ਪਰਦਾਰਂ ਹੇਠੇਨ੍ਤਾ ਪਰੇਸਂ ਰਕ੍ਖਿਤਗੋਪਿਤੇ ਵਰਭਣ੍ਡੇ ਅਪਰਜ੍ਝਨ੍ਤਾ. ਅਟ੍ਠਾਤਿ ਤਂ ਤਦਾ ਮਯਾ ਕਤਂ ਪਾਪਕਮ੍ਮਂ ਓਕਾਸਂ ਅਲਭਿਤ੍ਵਾ ਓਕਾਸੇ ਸਤਿ ਵਿਪਾਕਦਾਯਕਂ ਹੁਤ੍ਵਾ ਭਸ੍ਮਪਟਿਚ੍ਛਨ੍ਨੋ ਅਗ੍ਗਿ ਵਿਯ ਨਿਹਿਤਂ ਅਟ੍ਠਾਸਿ. ਵਂਸਭੂਮਿਯਨ੍ਤਿ ਵਂਸਰਟ੍ਠੇ. ਏਕਪੁਤ੍ਤੋਤਿ ਅਸੀਤਿਕੋਟਿਵਿਭਵੇ ਸੇਟ੍ਠਿਕੁਲੇ ਅਹਂ ਏਕਪੁਤ੍ਤਕੋਵ ਅਹੋਸਿਂ. ਸਾਤਵੇ ਰਤਨ੍ਤਿ ਕਲ੍ਯਾਣਕਮ੍ਮੇ ਅਭਿਰਤਂ. ਸੋ ਮਨ੍ਤਿ ਸੋ ਸਹਾਯਕੋ ਮਂ ਅਤ੍ਥੇ ਕੁਸਲਕਮ੍ਮੇ ਪਤਿਟ੍ਠਾਪੇਸਿ.

ਤਂ ਕਮ੍ਮਨ੍ਤਿ ਤਮ੍ਪਿ ਮੇ ਕਤਂ ਕਲ੍ਯਾਣਕਮ੍ਮਂ ਤਦਾ ਓਕਾਸਂ ਅਲਭਿਤ੍ਵਾ ਓਕਾਸੇ ਸਤਿ ਵਿਪਾਕਦਾਯਕਂ ਹੁਤ੍ਵਾ ਉਦਕਨ੍ਤਿਕੇ ਨਿਧਿ ਵਿਯ ਨਿਹਿਤਂ ਅਟ੍ਠਾਸਿ. ਯਮੇਤਨ੍ਤਿ ਅਥ ਮਮ ਸਨ੍ਤਕੇਸੁ ਪਾਪਕਮ੍ਮੇਸੁ ਯਂ ਏਤਂ ਮਯਾ ਮਗਧੇਸੁ ਪਰਦਾਰਿਕਕਮ੍ਮਂ ਕਤਂ, ਤਸ੍ਸ ਫਲਂ ਪਚ੍ਛਾ ਮਂ ਪਰਿਯਾਗਂ ਉਪਗਤਨ੍ਤਿ ਅਤ੍ਥੋ. ਯਥਾ ਕਿਂ? ਭੁਤ੍ਵਾ ਦੁਟ੍ਠਵਿਸਂ ਯਥਾ, ਯਥਾ ਸਵਿਸਂ ਭੋਜਨਂ ਭੁਞ੍ਜਿਤ੍ਵਾ ਠਿਤਸ੍ਸ ਤਂ ਦੁਟ੍ਠਂ ਕਕ੍ਖਲ਼ਂ ਹਲਾਹਲਂ ਵਿਸਂ ਕੁਪ੍ਪਤਿ, ਤਥਾ ਮਂ ਪਰਿਯਾਗਤਨ੍ਤਿ ਅਤ੍ਥੋ. ਤਤੋਤਿ ਤਤੋ ਕੋਸਮ੍ਬਿਯਂ ਸੇਟ੍ਠਿਕੁਲਤੋ. ਤਂ ਸਰਨ੍ਤਿ ਤਂ ਤਸ੍ਮਿਂ ਨਿਰਯੇ ਅਨੁਭੂਤਦੁਕ੍ਖਂ ਸਰਨ੍ਤੀ ਚਿਤ੍ਤਸੁਖਂ ਨਾਮ ਨ ਲਭਾਮਿ, ਭਯਮੇਵ ਮੇ ਉਪ੍ਪਜ੍ਜਤਿ. ਭਿਨ੍ਨਾਗਤੇਤਿ ਭਿਨ੍ਨਾਗਤੇ ਨਾਮ ਰਟ੍ਠੇ. ਉਦ੍ਧਤਪ੍ਫਲੋਤਿ ਉਦ੍ਧਤਬੀਜੋ.

ਸੋ ਪਨ ਛਗਲਕੋ ਬਲਸਮ੍ਪਨ੍ਨੋ ਅਹੋਸਿ. ਪਿਟ੍ਠਿਯਂ ਅਭਿਰੁਯ੍ਹਪਿ ਨਂ ਵਾਹਯਿਂਸੁ, ਯਾਨਕੇਪਿ ਯੋਜਯਿਂਸੁ. ਇਮਮਤ੍ਥਂ ¶ ਪਕਾਸੇਨ੍ਤੀ ਆਹ –

੧੨੭੦.

‘‘ਸਾਤਪੁਤ੍ਤਾ ¶ ਮਯਾ ਵੂਲ਼੍ਹਾ, ਪਿਟ੍ਠਿਯਾ ਚ ਰਥੇਨ ਚ;

ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੋ, ਪਰਦਾਰਗਮਨਸ੍ਸ ਮੇ’’ਤਿ.

ਤਤ੍ਥ ਸਾਤਪੁਤ੍ਤਾਤਿ ਅਮਚ੍ਚਪੁਤ੍ਤਾ. ਤਸ੍ਸ ਕਮ੍ਮਸ੍ਸਾਤਿ ਦੇਵ, ਰੋਰੁਵੇ ਮਹਾਨਿਰਯੇ ਪਚ੍ਚਨਞ੍ਚ ਛਗਲਕਕਾਲੇ ਬੀਜੁਪ੍ਪਾਟਨਞ੍ਚ ਪਿਟ੍ਠਿਵਾਹਨਯਾਨਕਯੋਜਨਾਨਿ ਚ ਸਬ੍ਬੋਪੇਸ ਤਸ੍ਸ ਨਿਸ੍ਸਨ੍ਦੋ ਪਰਦਾਰਗਮਨਸ੍ਸ ਮੇਤਿ.

ਤਤੋ ਪਨ ਚਵਿਤ੍ਵਾ ਅਰਞ੍ਞੇ ਕਪਿਯੋਨਿਯਂ ਪਟਿਸਨ੍ਧਿਂ ਗਣ੍ਹਿ. ਅਥ ਨਂ ਜਾਤਦਿਵਸੇ ਯੂਥਪਤਿਨੋ ਦਸ੍ਸੇਸੁਂ. ਸੋ ‘‘ਆਨੇਥ ਮੇ, ਪੁਤ੍ਤ’’ਨ੍ਤਿ ਦਲ਼੍ਹਂ ਗਹੇਤ੍ਵਾ ਤਸ੍ਸ ਵਿਰਵਨ੍ਤਸ੍ਸ ਦਨ੍ਤੇਹਿ ਫਲਾਨਿ ਉਪ੍ਪਾਟੇਸਿ. ਤਮਤ੍ਥਂ ਪਕਾਸੇਨ੍ਤੀ ਆਹ –

੧੨੭੧.

‘‘ਤਤੋ ¶ ਚੁਤਾਹਂ ਵੇਦੇਹ, ਕਪਿ ਆਸਿਂ ਬ੍ਰਹਾਵਨੇ;

ਨਿਲੁਞ੍ਚਿਤਫਲੋਯੇਵ, ਯੂਥਪੇਨ ਪਗਬ੍ਭਿਨਾ;

ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੋ, ਪਰਦਾਰਗਮਨਸ੍ਸ ਮੇ’’ਤਿ.

ਤਤ੍ਥ ਨਿਲੁਞ੍ਚਿਤਫਲੋਯੇਵਾਤਿ ਤਤ੍ਰਪਾਹਂ ਪਗਬ੍ਭੇਨ ਯੂਥਪਤਿਨਾ ਲੁਞ੍ਚਿਤ੍ਵਾ ਉਪ੍ਪਾਟਿਤਫਲੋਯੇਵ ਅਹੋਸਿਨ੍ਤਿ ਅਤ੍ਥੋ.

ਅਥ ਅਪਰਾਪਿ ਜਾਤਿਯੋ ਦਸ੍ਸੇਨ੍ਤੀ ਆਹ –

੧੨੭੨.

‘‘ਤਤੋ ਚੁਤਾਹਂ ਵੇਦੇਹ, ਦਸ੍ਸਨੇਸੁ ਪਸੂ ਅਹੁਂ;

ਨਿਲੁਞ੍ਚਿਤੋ ਜਵੋ ਭਦ੍ਰੋ, ਯੋਗ੍ਗਂ ਵੂਲ਼੍ਹਂ ਚਿਰਂ ਮਯਾ;

ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੋ, ਪਰਦਾਰਗਮਨਸ੍ਸ ਮੇ.

੧੨੭੩.

‘‘ਤਤੋ ਚੁਤਾਹਂ ਵੇਦੇਹ, ਵਜ੍ਜੀਸੁ ਕੁਲਮਾਗਮਾ;

ਨੇਵਿਤ੍ਥੀ ਨ ਪੁਮਾ ਆਸਿਂ, ਮਨੁਸ੍ਸਤ੍ਤੇ ਸੁਦੁਲ੍ਲਭੇ;

ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੋ, ਪਰਦਾਰਗਮਨਸ੍ਸ ਮੇ.

੧੨੭੪.

‘‘ਤਤੋ ਚੁਤਾਹਂ ਵੇਦੇਹ, ਅਜਾਯਿਂ ਨਨ੍ਦਨੇ ਵਨੇ;

ਭਵਨੇ ਤਾਵਤਿਂਸਾਹਂ, ਅਚ੍ਛਰਾ ਕਾਮਵਣ੍ਣਿਨੀ.

੧੨੭੫.

‘‘ਵਿਚਿਤ੍ਰਵਤ੍ਥਾਭਰਣਾ, ਆਮੁਤ੍ਤਮਣਿਕੁਣ੍ਡਲਾ;

ਕੁਸਲਾ ਨਚ੍ਚਗੀਤਸ੍ਸ, ਸਕ੍ਕਸ੍ਸ ਪਰਿਚਾਰਿਕਾ.

੧੨੭੬.

‘‘ਤਤ੍ਥ ¶ ਠਿਤਾਹਂ ਵੇਦੇਹ, ਸਰਾਮਿ ਜਾਤਿਯੋ ਇਮਾ;

ਅਨਾਗਤਾਪਿ ਸਤ੍ਤੇਵ, ਯਾ ਗਮਿਸ੍ਸਂ ਇਤੋ ਚੁਤਾ.

੧੨੭੭.

‘‘ਪਰਿਯਾਗਤਂ ਤਂ ਕੁਸਲਂ, ਯਂ ਮੇ ਕੋਸਮ੍ਬਿਯਂ ਕਤਂ;

ਦੇਵੇ ਚੇਵ ਮਨੁਸ੍ਸੇ ਚ, ਸਨ੍ਧਾਵਿਸ੍ਸਂ ਇਤੋ ਚੁਤਾ.

੧੨੭੮.

‘‘ਸਤ੍ਤ ¶ ਜਚ੍ਚੋ ਮਹਾਰਾਜ, ਨਿਚ੍ਚਂ ਸਕ੍ਕਤਪੂਜਿਤਾ;

ਥੀਭਾਵਾਪਿ ਨ ਮੁਚ੍ਚਿਸ੍ਸਂ, ਛਟ੍ਠਾ ਨਿਗਤਿਯੋ ਇਮਾ.

੧੨੭੯.

‘‘ਸਤ੍ਤਮੀ ¶ ਚ ਗਤਿ ਦੇਵ, ਦੇਵਪੁਤ੍ਤੋ ਮਹਿਦ੍ਧਿਕੋ;

ਪੁਮਾ ਦੇਵੋ ਭਵਿਸ੍ਸਾਮਿ, ਦੇਵਕਾਯਸ੍ਮਿਮੁਤ੍ਤਮੋ.

੧੨੮੦.

‘‘ਅਜ੍ਜਾਪਿ ਸਨ੍ਤਾਨਮਯਂ, ਮਾਲਂ ਗਨ੍ਥੇਨ੍ਤਿ ਨਨ੍ਦਨੇ;

ਦੇਵਪੁਤ੍ਤੋ ਜਵੋ ਨਾਮ, ਯੋ ਮੇ ਮਾਲਂ ਪਟਿਚ੍ਛਤਿ.

੧੨੮੧.

‘‘ਮੁਹੁਤ੍ਤੋ ਵਿਯ ਸੋ ਦਿਬ੍ਯੋ, ਇਧ ਵਸ੍ਸਾਨਿ ਸੋਲ਼ਸ;

ਰਤ੍ਤਿਨ੍ਦਿਵੋ ਚ ਸੋ ਦਿਬ੍ਯੋ, ਮਾਨੁਸਿਂ ਸਰਦੋਸਤਂ.

੧੨੮੨.

‘‘ਇਤਿ ਕਮ੍ਮਾਨਿ ਅਨ੍ਵੇਨ੍ਤਿ, ਅਸਙ੍ਖੇਯ੍ਯਾਪਿ ਜਾਤਿਯੋ;

ਕਲ੍ਯਾਣਂ ਯਦਿ ਵਾ ਪਾਪਂ, ਨ ਹਿ ਕਮ੍ਮਂ ਵਿਨਸ੍ਸਤੀ’’ਤਿ.

ਤਤ੍ਥ ਦਸ੍ਸਨੇਸੂਤਿ ਦਸ੍ਸਨਰਟ੍ਠੇਸੁ. ਪਸੂਤਿ ਗੋਣੋ ਅਹੋਸਿਂ. ਨਿਲੁਞ੍ਚਿਤੋਤਿ ਵਚ੍ਛਕਾਲੇਯੇਵ ਮਂ ਏਵਂ ਮਨਾਪੋ ਭਵਿਸ੍ਸਤੀਤਿ ਨਿਬ੍ਬੀਜਕਮਕਂਸੁ. ਸੋਹਂ ਨਿਲੁਞ੍ਚਿਤੋ ਉਦ੍ਧਤਬੀਜੋ ਜਵੋ ਭਦ੍ਰੋ ਅਹੋਸਿਂ. ਵਜ੍ਜੀਸੁ ਕੁਲਮਾਗਮਾਤਿ ਗੋਯੋਨਿਤੋ ਚਵਿਤ੍ਵਾ ਵਜ੍ਜਿਰਟ੍ਠੇ ਏਕਸ੍ਮਿਂ ਮਹਾਭੋਗਕੁਲੇ ਨਿਬ੍ਬਤ੍ਤਿਨ੍ਤਿ ਦਸ੍ਸੇਤਿ. ਨੇਵਿਤ੍ਥੀ ਨ ਪੁਮਾਤਿ ਨਪੁਂਸਕਤ੍ਤਂ ਸਨ੍ਧਾਯ ਆਹ. ਭਵਨੇ ਤਾਵਤਿਂਸਾਹਨ੍ਤਿ ਤਾਵਤਿਂਸਭਵਨੇ ਅਹਂ.

ਤਤ੍ਥ ਠਿਤਾਹਂ, ਵੇਦੇਹ, ਸਰਾਮਿ ਜਾਤਿਯੋ ਇਮਾਤਿ ਸਾ ਕਿਰ ਤਸ੍ਮਿਂ ਦੇਵਲੋਕੇ ਠਿਤਾ ‘‘ਅਹਂ ਏਵਰੂਪਂ ਦੇਵਲੋਕਂ ਆਗਚ੍ਛਨ੍ਤੀ ਕੁਤੋ ਨੁ ਖੋ ਆਗਤਾ’’ਤਿ ਓਲੋਕੇਨ੍ਤੀ ਵਜ੍ਜਿਰਟ੍ਠੇ ਮਹਾਭੋਗਕੁਲੇ ਨਪੁਂਸਕਤ੍ਤਭਾਵਤੋ ਚਵਿਤ੍ਵਾ ਤਤ੍ਥ ਨਿਬ੍ਬਤ੍ਤਭਾਵਂ ਪਸ੍ਸਿ. ਤਤੋ ‘‘ਕੇਨ ਨੁ ਖੋ ਕਮ੍ਮੇਨ ਏਵਰੂਪੇ ਰਮਣੀਯੇ ਠਾਨੇ ਨਿਬ੍ਬਤ੍ਤਾਮ੍ਹੀ’’ਤਿ ਓਲੋਕੇਨ੍ਤੀ ਕੋਸਮ੍ਬਿਯਂ ਸੇਟ੍ਠਿਕੁਲੇ ¶ ਨਿਬ੍ਬਤ੍ਤਿਤ੍ਵਾ ਕਤਂ ਦਾਨਾਦਿਕੁਸਲਂ ਦਿਸ੍ਵਾ ‘‘ਏਤਸ੍ਸ ਫਲੇਨ ਨਿਬ੍ਬਤ੍ਤਾਮ੍ਹੀ’’ਤਿ ਞਤ੍ਵਾ ‘‘ਅਨਨ੍ਤਰਾਤੀਤੇ ਨਪੁਂਸਕਤ੍ਤਭਾਵੇ ਨਿਬ੍ਬਤ੍ਤਮਾਨਾ ਕੁਤੋ ਆਗਤਾਮ੍ਹੀ’’ਤਿ ਓਲੋਕੇਨ੍ਤੀ ਦਸ੍ਸਨਰਟ੍ਠੇਸੁ ਗੋਯੋਨਿਯਂ ਮਹਾਦੁਕ੍ਖਸ੍ਸ ਅਨੁਭੂਤਭਾਵਂ ਅਞ੍ਞਾਸਿ. ਤਤੋ ਅਨਨ੍ਤਰਂ ਜਾਤਿਂ ਅਨੁਸ੍ਸਰਮਾਨਾ ਵਾਨਰਯੋਨਿਯਂ ਉਦ੍ਧਤਫਲਭਾਵਂ ਅਦ੍ਦਸ. ਤਤੋ ਅਨਨ੍ਤਰਂ ਅਨੁਸ੍ਸਰਨ੍ਤੀ ਭਿਨ੍ਨਾਗਤੇ ਛਗਲਕਯੋਨਿਯਂ ਉਦ੍ਧਤਬੀਜਭਾਵਂ ਅਨੁਸ੍ਸਰਿ. ਤਤੋ ਪਰਂ ਅਨੁਸ੍ਸਰਮਾਨਾ ਰੋਰੁਵੇ ਨਿਬ੍ਬਤ੍ਤਭਾਵਂ ਅਨੁਸ੍ਸਰਿ.

ਅਥਸ੍ਸਾ ¶ ਨਿਰਯੇ ਤਿਰਚ੍ਛਾਨਯੋਨਿਯਞ੍ਚ ਅਨੁਭੂਤਂ ਦੁਕ੍ਖਂ ਅਨੁਸ੍ਸਰਨ੍ਤਿਯਾ ਭਯਂ ਉਪ੍ਪਜ੍ਜਿ. ਤਤੋ ‘‘ਕੇਨ ਨੁ ਖੋ ਕਮ੍ਮੇਨ ਏਵਰੂਪਂ ਦੁਕ੍ਖਂ ਅਨੁਭੂਤਂ ਮਯਾ’’ਤਿ ਛਟ੍ਠਂ ਜਾਤਿਂ ਓਲੋਕੇਨ੍ਤੀ ਤਾਯ ਜਾਤਿਯਾ ਕੋਸਮ੍ਬਿਨਗਰੇ ਕਤਂ ਕਲ੍ਯਾਣਕਮ੍ਮਂ ਦਿਸ੍ਵਾ ਸਤ੍ਤਮਂ ਓਲੋਕੇਨ੍ਤੀ ਮਗਧਰਟ੍ਠੇ ਪਾਪਸਹਾਯਂ ਨਿਸ੍ਸਾਯ ਕਤਂ ਪਰਦਾਰਿਕਕਮ੍ਮਂ ਦਿਸ੍ਵਾ ‘‘ਏਤਸ੍ਸ ਫਲੇਨ ਮੇ ਤਂ ਮਹਾਦੁਕ੍ਖਂ ਅਨੁਭੂਤ’’ਨ੍ਤਿ ਅਞ੍ਞਾਸਿ. ਅਥ ‘‘ਇਤੋ ਚਵਿਤ੍ਵਾ ਅਨਾਗਤੇ ਕੁਹਿਂ ਨਿਬ੍ਬਤ੍ਤਿਸ੍ਸਾਮੀ’’ਤਿ ਓਲੋਕੇਨ੍ਤੀ ‘‘ਯਾਵਤਾਯੁਕਂ ਠਤ੍ਵਾ ਪੁਨ ਸਕ੍ਕਸ੍ਸੇਵ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿਸ੍ਸਾਮੀ’’ਤਿ ਅਞ੍ਞਾਸਿ. ਏਵਂ ਪੁਨਪ੍ਪੁਨਂ ਓਲੋਕਯਮਾਨਾ ‘‘ਤਤਿਯੇਪਿ ਅਤ੍ਤਭਾਵੇ ਸਕ੍ਕਸ੍ਸੇਵ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿਸ੍ਸਾਮਿ, ਤਥਾ ਚਤੁਤ੍ਥੇ, ਪਞ੍ਚਮੇ ਪਨ ਤਸ੍ਮਿਂਯੇਵ ਦੇਵਲੋਕੇ ਜਵਨਦੇਵਪੁਤ੍ਤਸ੍ਸ ਅਗ੍ਗਮਹੇਸੀ ਹੁਤ੍ਵਾ ਨਿਬ੍ਬਤ੍ਤਿਸ੍ਸਾਮੀ’’ਤਿ ਞਤ੍ਵਾ ਤਤੋ ਅਨਨ੍ਤਰਂ ਓਲੋਕੇਨ੍ਤੀ ‘‘ਛਟ੍ਠੇ ਅਤ੍ਤਭਾਵੇ ਇਤੋ ਤਾਵਤਿਂਸਭਵਨਤੋ ਚਵਿਤ੍ਵਾ ਅਙ੍ਗਤਿਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿਸ੍ਸਾਮਿ, ‘ਰੁਚਾ’ਤਿ ਮੇ ਨਾਮਂ ਭਵਿਸ੍ਸਤੀ’’ਤਿ ਞਤ੍ਵਾ ‘‘ਤਤੋ ਅਨਨ੍ਤਰਾ ਕੁਹਿਂ ਨਿਬ੍ਬਤ੍ਤਿਸ੍ਸਾਮੀ’’ਤਿ ਓਲੋਕੇਨ੍ਤੀ ‘‘ਸਤ੍ਤਮਾਯ ਜਾਤਿਯਾ ਤਤੋ ਚਵਿਤ੍ਵਾ ਤਾਵਤਿਂਸਭਵਨੇ ਮਹਿਦ੍ਧਿਕੋ ਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿਸ੍ਸਾਮਿ, ਇਤ੍ਥਿਭਾਵਤੋ ¶ ਮੁਚ੍ਚਿਸ੍ਸਾਮੀ’’ਤਿ ਅਞ੍ਞਾਸਿ. ਤਸ੍ਮਾ –

‘‘ਤਤ੍ਥ ਠਿਤਾਹਂ ਵੇਦੇਹ, ਸਰਾਮਿ ਸਤ੍ਤ ਜਾਤਿਯੋ;

ਅਨਾਗਤਾਪਿ ਸਤ੍ਤੇਵ, ਯਾ ਗਮਿਸ੍ਸਂ ਇਤੋ ਚੁਤਾ’’ਤਿ. – ਆਦਿਮਾਹ;

ਤਤ੍ਥ ਪਰਿਯਾਗਤਨ੍ਤਿ ਪਰਿਯਾਯੇਨ ਅਤ੍ਤਨੋ ਵਾਰੇਨ ਆਗਤਂ. ਸਤ੍ਤ ਜਚ੍ਚੋਤਿ ਵਜ੍ਜਿਰਟ੍ਠੇ ਨਪੁਂਸਕਜਾਤਿਯਾ ਸਦ੍ਧਿਂ ਦੇਵਲੋਕੇ ਪਞ੍ਚ, ਅਯਞ੍ਚ ਛਟ੍ਠਾਤਿ ਸਤ੍ਤ ਜਾਤਿਯੋਤਿ ਵੁਚ੍ਚਨ੍ਤਿ. ਏਤਾ ਸਤ੍ਤ ਜਾਤਿਯੋ ਨਿਚ੍ਚਂ ਸਕ੍ਕਤਪੂਜਿਤਾ ¶ ਅਹੋਸਿਨ੍ਤਿ ਦਸ੍ਸੇਤਿ. ਛਟ੍ਠਾ ਨਿਗਤਿਯੋਤਿ ਦੇਵਲੋਕੇ ਪਨ ਪਞ੍ਚ, ਅਯਞ੍ਚ ਏਕਾਤਿ ਇਮਾ ਛ ਗਤਿਯੋ ਇਤ੍ਥਿਭਾਵਾਨ ਮੁਚ੍ਚਿਸ੍ਸਨ੍ਤਿ ਵਦਤਿ. ਸਤ੍ਤਮੀ ਚਾਤਿ ਇਤੋ ਚਵਿਤ੍ਵਾ ਅਨਨ੍ਤਰਂ. ਸਨ੍ਤਾਨਮਯਨ੍ਤਿ ਏਕਤੋਵਣ੍ਟਕਾਦਿਵਸੇਨ ਕਤਸਨ੍ਤਾਨਂ. ਗਨ੍ਥੇਨ੍ਤੀਤਿ ਯਥਾ ਸਨ੍ਤਾਨਮਯਾ ਹੋਨ੍ਤਿ, ਏਵਂ ਅਜ੍ਜਪਿ ਮਮ ਪਰਿਚਾਰਿਕਾ ਨਨ੍ਦਨਵਨੇ ਮਾਲਂ ਗਨ੍ਥੇਨ੍ਤਿਯੇਵ. ਯੋ ਮੇ ਮਾਲਂ ਪਟਿਚ੍ਛਤੀਤਿ ਮਹਾਰਾਜ, ਅਨਨ੍ਤਰਜਾਤਿਯਂ ਮਮ ਸਾਮਿਕੋ ਜਵੋ ਨਾਮ ਦੇਵਪੁਤ੍ਤੋ ਯੋ ਰੁਕ੍ਖਤੋ ਪਤਿਤਪਤਿਤਂ ਮਾਲਂ ਪਟਿਚ੍ਛਤਿ.

ਸੋਲ਼ਸਾਤਿ ਮਹਾਰਾਜ, ਮਮ ਜਾਤਿਯਾ ਇਮਾਨਿ ਸੋਲ਼ਸ ਵਸ੍ਸਾਨਿ, ਏਤ੍ਤਕੋ ਪਨ ਕਾਲੋ ਦੇਵਾਨਂ ਏਕੋ ਮੁਹੁਤ੍ਤੋ, ਤੇਨ ਤਾ ਮਮ ਚੁਤਭਾਵਮ੍ਪਿ ਅਜਾਨਨ੍ਤਾ ਮਮਤ੍ਥਾਯ ਮਾਲਂ ਗਨ੍ਥੇਨ੍ਤਿਯੇਵ. ਮਾਨੁਸਿਨ੍ਤਿ ਮਨੁਸ੍ਸਾਨਂ ਵਸ੍ਸਗਣਨਂ ਆਗਮ੍ਮ ਏਸ ਸਰਦੋਸਤਂ ਵਸ੍ਸਸਤਂ ਹੋਤਿ, ਏਵਂ ਦੀਘਾਯੁਕਾ ਦੇਵਾ ¶ . ਇਮਿਨਾ ਪਨ ਕਾਰਣੇਨ ਪਰਲੋਕਸ੍ਸ ਚ ਕਲ੍ਯਾਣਪਾਪਕਾਨਞ੍ਚ ਕਮ੍ਮਾਨਂ ਅਤ੍ਥਿਤਂ ਜਾਨਾਹਿ, ਦੇਵਾਤਿ.

ਅਨ੍ਵੇਨ੍ਤੀਤਿ ਯਥਾ ਮਂ ਅਨੁਬਨ੍ਧਿਂਸੁ, ਏਵਂ ਅਨੁਬਨ੍ਧਨ੍ਤਿ. ਨ ਹਿ ਕਮ੍ਮਂ ਵਿਨਸ੍ਸਤੀਤਿ ਦਿਟ੍ਠਧਮ੍ਮਵੇਦਨੀਯਂ ਤਸ੍ਮਿਂਯੇਵ ਅਤ੍ਤਭਾਵੇ, ਉਪਪਜ੍ਜਵੇਦਨੀਯਂ ਅਨਨ੍ਤਰਭਵੇ ਵਿਪਾਕਂ ਦੇਤਿ, ਅਪਰਾਪਰਿਯਵੇਦਨੀਯਂ ਪਨ ਵਿਪਾਕਂ ਅਦਤ੍ਵਾ ਨ ਨਸ੍ਸਤਿ. ਤਂ ਸਨ੍ਧਾਯ ‘‘ਨ ਹਿ ਕਮ੍ਮਂ ਵਿਨਸ੍ਸਤੀ’’ਤਿ ਵਤ੍ਵਾ ‘‘ਦੇਵ, ਅਹਂ ਪਰਦਾਰਿਕਕਮ੍ਮਸ੍ਸ ਨਿਸ੍ਸਨ੍ਦੇਨ ਨਿਰਯੇ ਚ ਤਿਰਚ੍ਛਾਨਯੋਨਿਯਞ੍ਚ ਮਹਨ੍ਤਂ ਦੁਕ੍ਖਂ ਅਨੁਭਵਿਂ. ਸਚੇ ਪਨ ਤੁਮ੍ਹੇਪਿ ਇਦਾਨਿ ਗੁਣਸ੍ਸ ਕਥਂ ਗਹੇਤ੍ਵਾ ਏਵਂ ਕਰਿਸ੍ਸਥ, ਮਯਾ ਅਨੁਭੂਤਸਦਿਸਮੇਵ ਦੁਕ੍ਖਂ ਅਨੁਭਵਿਸ੍ਸਥ, ਤਸ੍ਮਾ ਏਵਂ ਮਾ ਕਰਿਤ੍ਥਾ’’ਤਿ ਆਹ.

ਅਥਸ੍ਸ ਉਤ੍ਤਰਿ ਧਮ੍ਮਂ ਦੇਸੇਨ੍ਤੀ ਆਹ –

੧੨੮੩.

‘‘ਯੋ ਇਚ੍ਛੇ ਪੁਰਿਸੋ ਹੋਤੁਂ, ਜਾਤਿਂ ਜਾਤਿਂ ਪੁਨਪ੍ਪੁਨਂ;

ਪਰਦਾਰਂ ਵਿਵਜ੍ਜੇਯ੍ਯ, ਧੋਤਪਾਦੋਵ ਕਦ੍ਦਮਂ.

੧੨੮੪.

‘‘ਯਾ ਇਚ੍ਛੇ ਪੁਰਿਸੋ ਹੋਤੁਂ, ਜਾਤਿਂ ਜਾਤਿਂ ਪੁਨਪ੍ਪੁਨਂ;

ਸਾਮਿਕਂ ਅਪਚਾਯੇਯ੍ਯ, ਇਨ੍ਦਂਵ ਪਰਿਚਾਰਿਕਾ.

੧੨੮੫.

‘‘ਯੋ ਇਚ੍ਛੇ ਦਿਬ੍ਯਭੋਗਞ੍ਚ, ਦਿਬ੍ਬਮਾਯੁਂ ਯਸਂ ਸੁਖਂ;

ਪਾਪਾਨਿ ਪਰਿਵਜ੍ਜੇਤ੍ਵਾ, ਤਿਵਿਧਂ ਧਮ੍ਮਮਾਚਰੇ.

੧੨੮੬.

‘‘ਕਾਯੇਨ ¶ ਵਾਚਾ ਮਨਸਾ, ਅਪ੍ਪਮਤ੍ਤੋ ਵਿਚਕ੍ਖਣੋ;

ਅਤ੍ਤਨੋ ਹੋਤਿ ਅਤ੍ਥਾਯ, ਇਤ੍ਥੀ ਵਾ ਯਦਿ ਵਾ ਪੁਮਾ.

੧੨੮੭.

‘‘ਯੇ ਕੇਚਿਮੇ ਮਾਨੁਜਾ ਜੀਵਲੋਕੇ, ਯਸਸ੍ਸਿਨੋ ਸਬ੍ਬਸਮਨ੍ਤਭੋਗਾ;

ਅਸਂਸਯਂ ਤੇਹਿ ਪੁਰੇ ਸੁਚਿਣ੍ਣਂ, ਕਮ੍ਮਸ੍ਸਕਾਸੇ ਪੁਥੁ ਸਬ੍ਬਸਤ੍ਤਾ.

੧੨੮੮.

‘‘ਇਙ੍ਘਾਨੁਚਿਨ੍ਤੇਸਿ ਸਯਮ੍ਪਿ ਦੇਵ, ਕੁਤੋਨਿਦਾਨਾ ਤੇ ਇਮਾ ਜਨਿਨ੍ਦ;

ਯਾ ਤੇ ਇਮਾ ਅਚ੍ਛਰਾਸਨ੍ਨਿਕਾਸਾ, ਅਲਙ੍ਕਤਾ ਕਞ੍ਚਨਜਾਲਛਨ੍ਨਾ’’ਤਿ.

ਤਤ੍ਥ ¶ ¶ ਹੋਤੁਨ੍ਤਿ ਭਵਿਤੁਂ. ਸਬ੍ਬਸਮਨ੍ਤਭੋਗਾਤਿ ਪਰਿਪੁਣ੍ਣਸਬ੍ਬਭੋਗਾ. ਸੁਚਿਣ੍ਣਨ੍ਤਿ ਸੁਟ੍ਠੁ ਚਿਣ੍ਣਂ ਕਲ੍ਯਾਣਕਮ੍ਮਂ ਕਤਂ. ਕਮ੍ਮਸ੍ਸਕਾਸੇਤਿ ਕਮ੍ਮਸ੍ਸਕਾ ਅਤ੍ਤਨਾ ਕਤਕਮ੍ਮਸ੍ਸੇਵ ਵਿਪਾਕਪਟਿਸਂਵੇਦਿਨੋ. ਨ ਹਿ ਮਾਤਾਪਿਤੂਹਿ ਕਤਂ ਕਮ੍ਮਂ ਪੁਤ੍ਤਧੀਤਾਨਂ ਵਿਪਾਕਂ ਦੇਤਿ, ਨ ਤਾਹਿ ਪੁਤ੍ਤਧੀਤਾਹਿ ਕਤਂ ਕਮ੍ਮਂ ਮਾਤਾਪਿਤੂਨਂ ਵਿਪਾਕਂ ਦੇਤਿ. ਸੇਸੇਹਿ ਕਤਂ ਸੇਸਾਨਂ ਕਿਮੇਵ ਦਸ੍ਸਤਿ? ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ. ਅਨੁਚਿਨ੍ਤੇਸੀਤਿ ਪੁਨਪ੍ਪੁਨਂ ਚਿਨ੍ਤੇਯ੍ਯਾਸਿ. ਯਾ ਤੇ ਇਮਾਤਿ ਯਾ ਇਮਾ ਸੋਲ਼ਸਸਹਸ੍ਸਾ ਇਤ੍ਥਿਯੋ ਤਂ ਉਪਟ੍ਠਹਨ੍ਤਿ, ਇਮਾ ਤੇ ਕੁਤੋਨਿਦਾਨਾ, ਕਿਂ ਨਿਪਜ੍ਜਿਤ੍ਵਾ ਨਿਦ੍ਦਾਯਨ੍ਤੇਨ ਲਦ੍ਧਾ, ਉਦਾਹੁ ਪਨ੍ਥਦੂਸਨਸਨ੍ਧਿਚ੍ਛੇਦਾਦੀਨਿ ਪਾਪਾਨਿ ਕਤ੍ਵਾ, ਅਦੁ ਕਲ੍ਯਾਣਕਮ੍ਮਂ ਨਿਸ੍ਸਾਯ ਲਦ੍ਧਾਤਿ ਇਦਂ ਤਾਵ ਅਤ੍ਤਨਾਪਿ ਚਿਨ੍ਤੇਯ੍ਯਾਸਿ, ਦੇਵਾਤਿ.

ਏਵਂ ਸਾ ਪਿਤਰਂ ਅਨੁਸਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੨੮੯.

‘‘ਇਚ੍ਚੇਵਂ ਪਿਤਰਂ ਕਞ੍ਞਾ, ਰੁਚਾ ਤੋਸੇਸਿ ਅਙ੍ਗਤਿਂ;

ਮੂਲ਼੍ਹਸ੍ਸ ਮਗ੍ਗਮਾਚਿਕ੍ਖਿ, ਧਮ੍ਮਮਕ੍ਖਾਸਿ ਸੁਬ੍ਬਤਾ’’ਤਿ.

ਤਤ੍ਥ ਇਚ੍ਚੇਵਨ੍ਤਿ ਭਿਕ੍ਖਵੇ, ਇਤਿ ਇਮੇਹਿ ਏਵਰੂਪੇਹਿ ਮਧੁਰੇਹਿ ਵਚਨੇਹਿ ਰੁਚਾਕਞ੍ਞਾ ਪਿਤਰਂ ਤੋਸੇਸਿ, ਮੂਲ਼੍ਹਸ੍ਸ ਮਗ੍ਗਂ ਵਿਯ ਤਸ੍ਸ ਸੁਗਤਿਮਗ੍ਗਂ ਆਚਿਕ੍ਖਿ, ਨਾਨਾਨਯੇਹਿ ਸੁਚਰਿਤਧਮ੍ਮਂ ਅਕ੍ਖਾਸਿ. ਧਮ੍ਮਂ ਕਥੇਨ੍ਤੀਯੇਵ ਸਾ ਸੁਬ੍ਬਤਾ ਸੁਨ੍ਦਰਵਤਾ ਅਤ੍ਤਨੋ ਅਤੀਤਜਾਤਿਯੋਪਿ ਕਥੇਸਿ.

ਏਵਂ ਪੁਬ੍ਬਣ੍ਹਤੋ ਪਟ੍ਠਾਯ ਸਬ੍ਬਰਤ੍ਤਿਂ ਪਿਤੁ ਧਮ੍ਮਂ ਦੇਸੇਤ੍ਵਾ ‘‘ਮਾ, ਦੇਵ, ਨਗ੍ਗਸ੍ਸ ਮਿਚ੍ਛਾਦਿਟ੍ਠਿਕਸ੍ਸ ਵਚਨਂ ਗਣ੍ਹਿ, ‘ਅਤ੍ਥਿ ਅਯਂ ਲੋਕੋ, ਅਤ੍ਥਿ ਪਰਲੋਕੋ ¶ , ਅਤ੍ਥਿ ਸੁਕਟਦੁਕ੍ਕਟਕਮ੍ਮਾਨਂ ਫਲ’ਨ੍ਤਿ ਵਦਨ੍ਤਸ੍ਸ ਮਾਦਿਸਸ੍ਸ ਕਲ੍ਯਾਣਮਿਤ੍ਤਸ੍ਸ ਵਚਨਂ ਗਣ੍ਹ, ਮਾ ਅਤਿਤ੍ਥੇਨ ਪਕ੍ਖਨ੍ਦੀ’’ਤਿ ਆਹ. ਏਵਂ ਸਨ੍ਤੇਪਿ ਪਿਤਰਂ ਮਿਚ੍ਛਾਦਸ੍ਸਨਾ ਮੋਚੇਤੁਂ ਨਾਸਕ੍ਖਿ. ਸੋ ਹਿ ਕੇਵਲਂ ਤਸ੍ਸਾ ਮਧੁਰਵਚਨਂ ਸੁਤ੍ਵਾ ਤੁਸ੍ਸਿ. ਮਾਤਾਪਿਤਰੋ ਹਿ ਪਿਯਪੁਤ੍ਤਾਨਂ ਵਚਨਂ ਪਿਯਾਯਨ੍ਤਿ, ਨ ਪਨ ਤਂ ਮਿਚ੍ਛਾਦਸ੍ਸਨਂ ਵਿਸ੍ਸਜ੍ਜੇਸਿ. ਨਗਰੇਪਿ ‘‘ਰੁਚਾ ਕਿਰ ਰਾਜਧੀਤਾ ਪਿਤੁ ਧਮ੍ਮਂ ਦੇਸੇਤ੍ਵਾ ਮਿਚ੍ਛਾਦਸ੍ਸਨਂ ਵਿਸ੍ਸਜ੍ਜਾਪੇਸੀ’’ਤਿ ਏਕਕੋਲਾਹਲਂ ਅਹੋਸਿ. ‘‘ਪਣ੍ਡਿਤਾ ਰਾਜਧੀਤਾ ਅਜ੍ਜ ਪਿਤਰਂ ਮਿਚ੍ਛਾਦਸ੍ਸਨਾ ਮੋਚੇਤ੍ਵਾ ਨਗਰਵਾਸੀਨਂ ਸੋਤ੍ਥਿਭਾਵਂ ਕਰਿਸ੍ਸਤੀ’’ਤਿ ਮਹਾਜਨੋ ਤੁਸ੍ਸਿ. ਸਾ ਪਿਤਰਂ ਬੋਧੇਤੁਂ ਅਸਕ੍ਕੋਨ੍ਤੀ ਵੀਰਿਯਂ ਅਵਿਸ੍ਸਜ੍ਜੇਤ੍ਵਾਵ ‘‘ਯੇਨ ਕੇਨਚਿ ਉਪਾਯੇਨ ਪਿਤੁ ਸੋਤ੍ਥਿਭਾਵਂ ਕਰਿਸ੍ਸਾਮੀ’’ਤਿ ਸਿਰਸ੍ਮਿਂ ਅਞ੍ਜਲਿਂ ਪਤਿਟ੍ਠਪੇਤ੍ਵਾ ਦਸਦਿਸਾ ਨਮਸ੍ਸਿਤ੍ਵਾ ‘‘ਇਮਸ੍ਮਿਂ ਲੋਕੇ ਲੋਕਸਨ੍ਧਾਰਕਾ ਧਮ੍ਮਿਕਸਮਣਬ੍ਰਾਹ੍ਮਣਾ ਨਾਮ ਲੋਕਪਾਲਦੇਵਤਾ ਨਾਮ ਮਹਾਬ੍ਰਹ੍ਮਾਨੋ ਨਾਮ ਅਤ੍ਥਿ, ਤੇ ਇਧਾਗਨ੍ਤ੍ਵਾ ਅਤ੍ਤਨੋ ਬਲੇਨ ਮਮ ਪਿਤਰਂ ਮਿਚ੍ਛਾਦਸ੍ਸਨਂ ਵਿਸ੍ਸਜ੍ਜਾਪੇਨ੍ਤੁ ¶ , ਏਤਸ੍ਸ ਗੁਣੇ ਅਸਤਿਪਿ ਮਮ ¶ ਗੁਣੇਨ ਮਮ ਸੀਲੇਨ ਮਮ ਸਚ੍ਚੇਨ ਇਧਾਗਨ੍ਤ੍ਵਾ ਇਮਂ ਮਿਚ੍ਛਾਦਸ੍ਸਨਂ ਵਿਸ੍ਸਜ੍ਜਾਪੇਤ੍ਵਾ ਸਕਲਲੋਕਸ੍ਸ ਸੋਤ੍ਥਿਂ ਕਰੋਨ੍ਤੂ’’ਤਿ ਅਧਿਟ੍ਠਹਿਤ੍ਵਾ ਨਮਸ੍ਸਿ.

ਤਦਾ ਬੋਧਿਸਤ੍ਤੋ ਨਾਰਦੋ ਨਾਮ ਮਹਾਬ੍ਰਹ੍ਮਾ ਅਹੋਸਿ. ਬੋਧਿਸਤ੍ਤਾ ਚ ਨਾਮ ਅਤ੍ਤਨੋ ਮੇਤ੍ਤਾਭਾਵਨਾਯ ਅਨੁਦ੍ਦਯਾਯ ਮਹਨ੍ਤਭਾਵੇਨ ਸੁਪ੍ਪਟਿਪਨ੍ਨਦੁਪ੍ਪਟਿਪਨ੍ਨੇ ਸਤ੍ਤੇ ਦਸ੍ਸਨਤ੍ਥਂ ਕਾਲਾਨੁਕਾਲਂ ਲੋਕਂ ਓਲੋਕੇਨ੍ਤਿ. ਸੋ ਤਂ ਦਿਵਸਂ ਲੋਕਂ ਓਲੋਕੇਨ੍ਤੋ ਤਂ ਰਾਜਧੀਤਰਂ ਪਿਤੁ ਮਿਚ੍ਛਾਦਿਟ੍ਠਿਮੋਚਨਤ੍ਥਂ ਲੋਕਸਨ੍ਧਾਰਕਦੇਵਤਾਯੋ ਨਮਸ੍ਸਮਾਨਂ ਦਿਸ੍ਵਾ, ‘‘ਠਪੇਤ੍ਵਾ ਮਂ ਅਞ੍ਞੋ ਏਤਂ ਰਾਜਾਨਂ ਮਿਚ੍ਛਾਦਸ੍ਸਨਂ ਵਿਸ੍ਸਜ੍ਜਾਪੇਤੁਂ ਸਮਤ੍ਥੋ ਨਾਮ ਨਤ੍ਥਿ, ਅਜ੍ਜ ਮਯਾ ਰਾਜਧੀਤੁ ਸਙ੍ਗਹਂ, ਰਞ੍ਞੋ ਚ ਸਪਰਿਜਨਸ੍ਸ ਸੋਤ੍ਥਿਭਾਵਂ ਕਤ੍ਵਾ ਆਗਨ੍ਤੁਂ ਵਟ੍ਟਤਿ, ਕੇਨ ਨੁ ਖੋ ਵੇਸੇਨ ਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਮਨੁਸ੍ਸਾਨਂ ਪਬ੍ਬਜਿਤਾ ਪਿਯਾ ਚੇਵ ਗਰੁਨੋ ਚ ਆਦੇਯ੍ਯਵਚਨਾ ਚ, ਤਸ੍ਮਾ ਪਬ੍ਬਜਿਤਵੇਸੇਨ ਗਮਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਪਾਸਾਦਿਕਂ ਸੁਵਣ੍ਣਵਣ੍ਣਂ ਮਨੁਸ੍ਸਤ੍ਤਭਾਵਂ ਮਾਪੇਤ੍ਵਾ ਮਨੁਞ੍ਞਂ ਜਟਾਮਣ੍ਡਲਂ ਬਨ੍ਧਿਤ੍ਵਾ ਜਟਨ੍ਤਰੇ ਕਞ੍ਚਨਸੂਚਿਂ ਓਦਹਿਤ੍ਵਾ ਅਨ੍ਤੋ ਰਤ੍ਤਪਟਂ ਉਪਰਿ ਰਤ੍ਤਵਾਕਚੀਰਂ ਨਿਵਾਸੇਤ੍ਵਾ ਪਾਰੁਪਿਤ੍ਵਾ ਸੁਵਣ੍ਣਤਾਰਾਖਚਿਤਂ ਰਜਤਮਯਂ ਅਜਿਨਚਮ੍ਮਂ ਏਕਂਸੇ ਕਤ੍ਵਾ ਮੁਤ੍ਤਾਸਿਕ੍ਕਾਯ ਪਕ੍ਖਿਤ੍ਤਂ ਸੁਵਣ੍ਣਮਯਂ ਭਿਕ੍ਖਾਭਾਜਨਂ ਆਦਾਯ ਤੀਸੁ ਠਾਨੇਸੁ ਓਨਤਂ ਸੁਵਣ੍ਣਕਾਜਂ ਖਨ੍ਧੇ ਕਤ੍ਵਾ ਮੁਤ੍ਤਾਸਿਕ੍ਕਾਯ ¶ ਏਵ ਪਵਾਲ਼ਕਮਣ੍ਡਲੁਂ ਆਦਾਯ ਇਮਿਨਾ ਇਸਿਵੇਸੇਨ ਗਗਨਤਲੇ ਚਨ੍ਦੋ ਵਿਯ ਵਿਰੋਚਮਾਨੋ ਆਕਾਸੇਨ ਆਗਨ੍ਤ੍ਵਾ ਅਲਙ੍ਕਤਚਨ੍ਦਕਪਾਸਾਦਮਹਾਤਲਂ ਪਵਿਸਿਤ੍ਵਾ ਰਞ੍ਞੋ ਪੁਰਤੋ ਆਕਾਸੇ ਅਟ੍ਠਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੨੯੦.

‘‘ਅਥਾਗਮਾ ਬ੍ਰਹ੍ਮਲੋਕਾ, ਨਾਰਦੋ ਮਾਨੁਸਿਂ ਪਜਂ;

ਜਮ੍ਬੁਦੀਪਂ ਅਵੇਕ੍ਖਨ੍ਤੋ, ਅਦ੍ਦਾ ਰਾਜਾਨਮਙ੍ਗਤਿਂ.

੧੨੯੧.

‘‘ਤਤੋ ਪਤਿਟ੍ਠਾ ਪਾਸਾਦੇ, ਵੇਦੇਹਸ੍ਸ ਪੁਰਤ੍ਥਤੋ;

ਤਞ੍ਚ ਦਿਸ੍ਵਾਨਾਨੁਪ੍ਪਤ੍ਤਂ, ਰੁਚਾ ਇਸਿਮਵਨ੍ਦਥਾ’’ਤਿ.

ਤਤ੍ਥ ਅਦ੍ਦਾਤਿ ਬ੍ਰਹ੍ਮਲੋਕੇ ਠਿਤੋਵ ਜਮ੍ਬੁਦੀਪਂ ਅਵੇਕ੍ਖਨ੍ਤੋ ਗੁਣਾਜੀਵਕਸ੍ਸ ਸਨ੍ਤਿਕੇ ਗਹਿਤਮਿਚ੍ਛਾਦਸ੍ਸਨਂ ਰਾਜਾਨਂ ਅਙ੍ਗਤਿਂ ਅਦ੍ਦਸ, ਤਸ੍ਮਾ ਆਗਤੋਤਿ ਅਤ੍ਥੋ. ਤਤੋ ਪਤਿਟ੍ਠਾਤਿ ਤਤੋ ਸੋ ਬ੍ਰਹ੍ਮਾ ਤਸ੍ਸ ਰਞ੍ਞੋ ਅਮਚ੍ਚਗਣਪਰਿਵੁਤਸ੍ਸ ਨਿਸਿਨ੍ਨਸ੍ਸ ਪੁਰਤੋ ¶ ਤਸ੍ਮਿਂ ਪਾਸਾਦੇ ਅਪਦੇ ਪਦਂ ਦਸ੍ਸੇਨ੍ਤੋ ਆਕਾਸੇ ਪਤਿਟ੍ਠਹਿ. ਅਨੁਪ੍ਪਤ੍ਤਨ੍ਤਿ ਆਗਤਂ. ਇਸਿਨ੍ਤਿ ਇਸਿਵੇਸੇਨ ਆਗਤਤ੍ਤਾ ਸਤ੍ਥਾ ‘‘ਇਸਿ’’ਨ੍ਤਿ ਆਹ. ਅਵਨ੍ਦਥਾਤਿ ‘‘ਮਮਾਨੁਗ੍ਗਹੇਨ ਮਮ ਪਿਤਰਿ ਕਾਰੁਞ੍ਞਂ ਕਤ੍ਵਾ ਏਕੋ ਦੇਵਰਾਜਾ ਆਗਤੋ ¶ ਭਵਿਸ੍ਸਤੀ’’ਤਿ ਹਟ੍ਠਪਹਟ੍ਠਾ ਵਾਤਾਭਿਹਟਾ ਸੁਵਣ੍ਣਕਦਲੀ ਵਿਯ ਓਨਮਿਤ੍ਵਾ ਨਾਰਦਬ੍ਰਹ੍ਮਾਨਂ ਅਵਨ੍ਦਿ.

ਰਾਜਾਪਿ ਤਂ ਦਿਸ੍ਵਾਵ ਬ੍ਰਹ੍ਮਤੇਜੇਨ ਤਜ੍ਜਿਤੋ ਅਤ੍ਤਨੋ ਆਸਨੇ ਸਣ੍ਠਾਤੁਂ ਅਸਕ੍ਕੋਨ੍ਤੋ ਆਸਨਾ ਓਰੁਯ੍ਹ ਭੂਮਿਯਂ ਠਤ੍ਵਾ ਆਗਤਟ੍ਠਾਨਞ੍ਚ ਨਾਮਗੋਤ੍ਤਞ੍ਚ ਪੁਚ੍ਛਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੨੯੨.

‘‘ਅਥਾਸਨਮ੍ਹਾ ਓਰੁਯ੍ਹ, ਰਾਜਾ ਬ੍ਯਥਿਤਮਾਨਸੋ;

ਨਾਰਦਂ ਪਰਿਪੁਚ੍ਛਨ੍ਤੋ, ਇਦਂ ਵਚਨਮਬ੍ਰਵਿ.

੧੨੯੩.

‘ਕੁਤੋ ਨੁ ਆਗਚ੍ਛਸਿ ਦੇਵਵਣ੍ਣਿ, ਓਭਾਸਯਂ ਸਬ੍ਬਦਿਸਾ ਚਨ੍ਦਿਮਾਵ;

ਅਕ੍ਖਾਹਿ ਮੇ ਪੁਚ੍ਛਿਤੋ ਨਾਮਗੋਤ੍ਤਂ, ਕਥਂ ਤਂ ਜਾਨਨ੍ਤਿ ਮਨੁਸ੍ਸਲੋਕੇ’’’ਤਿ.

ਤਤ੍ਥ ਬ੍ਯਥਿਤਮਾਨਸੋਤਿ ਭੀਤਚਿਤ੍ਤੋ. ਕੁਤੋ ਨੂਤਿ ਕਚ੍ਚਿ ਨੁ ਖੋ ਵਿਜ੍ਜਾਧਰੋ ਭਵੇਯ੍ਯਾਤਿ ਮਞ੍ਞਮਾਨੋ ਅਵਨ੍ਦਿਤ੍ਵਾਵ ਏਵਂ ਪੁਚ੍ਛਿ.

ਅਥ ¶ ਸੋ ‘‘ਅਯਂ ਰਾਜਾ ‘ਪਰਲੋਕੋ ਨਤ੍ਥੀ’ਤਿ ਮਞ੍ਞਤਿ, ਪਰਲੋਕਮੇਵਸ੍ਸ ਤਾਵ ਆਚਿਕ੍ਖਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੨੯੪.

‘‘ਅਹਞ੍ਹਿ ਦੇਵਤੋ ਇਦਾਨਿ ਏਮਿ, ਓਭਾਸਯਂ ਸਬ੍ਬਦਿਸਾ ਚਨ੍ਦਿਮਾਵ;

ਅਕ੍ਖਾਮਿ ਤੇ ਪੁਚ੍ਛਿਤੋ ਨਾਮਗੋਤ੍ਤਂ, ਜਾਨਨ੍ਤਿ ਮਂ ਨਾਰਦੋ ਕਸ੍ਸਪੋ ਚਾ’’ਤਿ.

ਤਤ੍ਥ ਦੇਵਤੋਤਿ ਦੇਵਲੋਕਤੋ. ਨਾਰਦੋ ਕਸ੍ਸਪੋ ਚਾਤਿ ਮਂ ਨਾਮੇਨ ਨਾਰਦੋ, ਗੋਤ੍ਤੇਨ ਕਸ੍ਸਪੋਤਿ ਜਾਨਨ੍ਤਿ.

ਅਥ ਰਾਜਾ ‘‘ਇਮਂ ਪਚ੍ਛਾਪਿ ਪਰਲੋਕਂ ਪੁਚ੍ਛਿਸ੍ਸਾਮਿ, ਇਦ੍ਧਿਯਾ ਲਦ੍ਧਕਾਰਣਂ ਤਾਵ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੨੯੫.

‘‘ਅਚ੍ਛੇਰਰੂਪਂ ਤਵ ਯਾਦਿਸਞ੍ਚ, ਵੇਹਾਯਸਂ ਗਚ੍ਛਸਿ ਤਿਟ੍ਠਸੀ ਚ;

ਪੁਚ੍ਛਾਮਿ ਤਂ ਨਾਰਦ ਏਤਮਤ੍ਥਂ, ਅਥ ਕੇਨ ਵਣ੍ਣੇਨ ਤਵਾਯਮਿਦ੍ਧੀ’’ਤਿ.

ਤਤ੍ਥ ¶ ਯਾਦਿਸਞ੍ਚਾਤਿ ਯਾਦਿਸਞ੍ਚ ਤਵ ਸਣ੍ਠਾਨਂ, ਯਞ੍ਚ ਤ੍ਵਂ ਆਕਾਸੇ ਗਚ੍ਛਸਿ ਤਿਟ੍ਠਸਿ ਚ, ਇਦਂ ਅਚ੍ਛਰਿਯਜਾਤਂ.

ਨਾਰਦੋ ¶ ਆਹ –

੧੨੯੬.

‘‘ਸਚ੍ਚਞ੍ਚ ਧਮ੍ਮੋ ਚ ਦਮੋ ਚ ਚਾਗੋ, ਗੁਣਾ ਮਮੇਤੇ ਪਕਤਾ ਪੁਰਾਣਾ;

ਤੇਹੇਵ ਧਮ੍ਮੇਹਿ ਸੁਸੇਵਿਤੇਹਿ, ਮਨੋਜਲੋ ਯੇਨ ਕਾਮਂ ਗਤੋਸ੍ਮੀ’’ਤਿ.

ਤਤ੍ਥ ਸਚ੍ਚਨ੍ਤਿ ਮੁਸਾਵਾਦਵਿਰਹਿਤਂ ਵਚੀਸਚ੍ਚਂ. ਧਮ੍ਮੋਤਿ ਤਿਵਿਧਸੁਚਰਿਤਧਮ੍ਮੋ ਚੇਵ ਕਸਿਣਪਰਿਕਮ੍ਮਝਾਨਧਮ੍ਮੋ ਚ. ਦਮੋਤਿ ਇਨ੍ਦ੍ਰਿਯਦਮਨਂ. ਚਾਗੋਤਿ ਕਿਲੇਸਪਰਿਚ੍ਚਾਗੋ ਚ ਦੇਯ੍ਯਧਮ੍ਮਪਰਿਚ੍ਚਾਗੋ ਚ. ਮਮੇਤੇ ਗੁਣਾਤਿ ਮਮ ਏਤੇ ਗੁਣਸਮ੍ਪਯੁਤ੍ਤਾ ਗੁਣਸਹਗਤਾ. ਪਕਤਾ ਪੁਰਾਣਾਤਿ ਮਯਾ ਪੁਰਿਮਭਵੇ ਕਤਾਤਿ ਦਸ੍ਸੇਤਿ. ‘‘ਤੇਹੇਵ ਧਮ੍ਮੇਹਿ ਸੁਸੇਵਿਤੇਹੀ’’ਤਿ ਤੇ ਸਬ੍ਬੇ ਗੁਣੇ ਸੁਸੇਵਿਤੇ ਪਰਿਚਾਰਿਤੇ ਦਸ੍ਸੇਤਿ. ਮਨੋਜਵੋਤਿ ਇਦ੍ਧਿਯਾ ¶ ਕਾਰਣੇਨ ਪਟਿਲਦ੍ਧੋ. ਯੇਨ ਕਾਮਂ ਗਤੋਸ੍ਮੀਤਿ ਯੇਨ ਦੇਵਟ੍ਠਾਨੇ ਚ ਮਨੁਸ੍ਸਟ੍ਠਾਨੇ ਚ ਗਨ੍ਤੁਂ ਇਚ੍ਛਨਂ, ਤੇਨ ਗਤੋਸ੍ਮੀਤਿ ਅਤ੍ਥੋ.

ਰਾਜਾ ਏਵਂ ਤਸ੍ਮਿਂ ਕਥੇਨ੍ਤੇਪਿ ਮਿਚ੍ਛਾਦਸ੍ਸਨਸ੍ਸ ਗਹਿਤਤ੍ਤਾ ਪਰਲੋਕਂ ਅਸਦ੍ਦਹਨ੍ਤੋ ‘‘ਅਤ੍ਥਿ ਨੁ ਖੋ ਪੁਞ੍ਞਵਿਪਾਕੋ’’ਤਿ ਵਤ੍ਵਾ ਗਾਥਮਾਹ –

੧੨੯੭.

‘‘ਅਚ੍ਛੇਰਮਾਚਿਕ੍ਖਸਿ ਪੁਞ੍ਞਸਿਦ੍ਧਿਂ, ਸਚੇ ਹਿ ਏਤੇਹਿ ਯਥਾ ਵਦੇਸਿ;

ਪੁਚ੍ਛਾਮਿ ਤਂ ਨਾਰਦ ਏਤਮਤ੍ਥਂ, ਪੁਟ੍ਠੋ ਚ ਮੇ ਸਾਧੁ ਵਿਯਾਕਰੋਹੀ’’ਤਿ.

ਤਤ੍ਥ ਪੁਞ੍ਞਸਿਦ੍ਧਿਨ੍ਤਿ ਪੁਞ੍ਞਾਨਂ ਸਿਦ੍ਧਿਂ ਫਲਦਾਯਕਤ੍ਤਂ ਆਚਿਕ੍ਖਨ੍ਤੋ ਅਚ੍ਛਰਿਯਂ ਆਚਿਕ੍ਖਸਿ.

ਨਾਰਦੋ ਆਹ –

੧੨੯੮.

‘‘ਪੁਚ੍ਛਸ੍ਸੁ ਮਂ ਰਾਜ ਤਵੇਸ ਅਤ੍ਥੋ, ਯਂ ਸਂਸਯਂ ਕੁਰੁਸੇ ਭੂਮਿਪਾਲ;

ਅਹਂ ਤਂ ਨਿਸ੍ਸਂਸਯਤਂ ਗਮੇਮਿ, ਨਯੇਹਿ ਞਾਯੇਹਿ ਚ ਹੇਤੁਭੀ ਚਾ’’ਤਿ.

ਤਤ੍ਥ ਤਵੇਸ ਅਤ੍ਥੋਤਿ ਪੁਚ੍ਛਿਤਬ੍ਬਕੋ ਨਾਮ ਤਵ ਏਸ ਅਤ੍ਥੋ. ਯਂ ਸਂਸਯਨ੍ਤਿ ਯਂ ਕਿਸ੍ਮਿਞ੍ਚਿਦੇਵ ¶ ਅਤ੍ਥੇ ਸਂਸਯਂ ਕਰੋਸਿ, ਤਂ ਮਂ ਪੁਚ੍ਛ. ਨਿਸ੍ਸਂਸਯਤਨ੍ਤਿ ਅਹਂ ਤਂ ਨਿਸ੍ਸਂਸਯਭਾਵਂ ਗਮੇਮਿ. ਨਯੇਹੀਤਿ ਕਾਰਣਵਚਨੇਹਿ. ਞਾਯੇਹੀਤਿ ਞਾਣੇਹਿ. ਹੇਤੁਭੀਤਿ ਪਚ੍ਚਯੇਹਿ, ਪਟਿਞ੍ਞਾਮਤ੍ਤੇਨੇਵ ਅਵਤ੍ਵਾ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਕਾਰਣਵਚਨੇਨ ਚ ਤੇਸਂ ਧਮ੍ਮਾਨਂ ਸਮੁਟ੍ਠਾਪਕਪਚ੍ਚਯੇਹਿ ਚ ਤਂ ਨਿਸ੍ਸਂਸਯਂ ਕਰਿਸ੍ਸਾਮੀਤਿ ਅਤ੍ਥੋ.

ਰਾਜਾ ¶ ਆਹ –

੧੨੯੯.

‘‘ਪੁਚ੍ਛਾਮਿ ਤਂ ਨਾਰਦ ਏਤਮਤ੍ਥਂ, ਪੁਟ੍ਠੋ ਚ ਮੇ ਨਾਰਦ ਮਾ ਮੁਸਾ ਭਣਿ;

ਅਤ੍ਥਿ ਨੁ ਦੇਵਾ ਪਿਤਰੋ ਨੁ ਅਤ੍ਥਿ, ਲੋਕੋ ਪਰੋ ਅਤ੍ਥਿ ਜਨੋ ਯਮਾਹੂ’’ਤਿ.

ਤਤ੍ਥ ਜਨੋ ਯਮਾਹੂਤਿ ਯਂ ਜਨੋ ਏਵਮਾਹ – ‘‘ਅਤ੍ਥਿ ਦੇਵਾ, ਅਤ੍ਥਿ ਪਿਤਰੋ, ਅਤ੍ਥਿ ਪਰੋ ਲੋਕੋ’’ਤਿ, ਤਂ ਸਬ੍ਬਂ ਅਤ੍ਥਿ ਨੁ ਖੋਤਿ ਪੁਚ੍ਛਤਿ.

ਨਾਰਦੋ ¶ ਆਹ –

੧੩੦੦.

‘‘ਅਤ੍ਥੇਵ ਦੇਵਾ ਪਿਤਰੋ ਚ ਅਤ੍ਥਿ, ਲੋਕੋ ਪਰੋ ਅਤ੍ਥਿ ਜਨੋ ਯਮਾਹੁ;

ਕਾਮੇਸੁ ਗਿਦ੍ਧਾ ਚ ਨਰਾ ਪਮੂਲ਼੍ਹਾ, ਲੋਕਂ ਪਰਂ ਨ ਵਿਦੂ ਮੋਹਯੁਤ੍ਤਾ’’ਤਿ.

ਤਤ੍ਥ ਅਤ੍ਥੇਵ ਦੇਵਾਤਿ ਮਹਾਰਾਜ, ਦੇਵਾ ਚ ਪਿਤਰੋ ਚ ਅਤ੍ਥਿ, ਯਮ੍ਪਿ ਜਨੋ ਪਰਲੋਕਮਾਹ, ਸੋਪਿ ਅਤ੍ਥੇਵ. ਨ ਵਿਦੂਤਿ ਕਾਮਗਿਦ੍ਧਾ ਪਨ ਮੋਹਮੂਲ਼੍ਹਾ ਜਨਾ ਪਰਲੋਕਂ ਨ ਵਿਦਨ੍ਤਿ ਨ ਜਾਨਨ੍ਤੀਤਿ.

ਤਂ ਸੁਤ੍ਵਾ ਰਾਜਾ ਪਰਿਹਾਸਂ ਕਰੋਨ੍ਤੋ ਏਵਮਾਹ –

੧੩੦੧.

‘‘ਅਤ੍ਥੀਤਿ ਚੇ ਨਾਰਦ ਸਦ੍ਦਹਾਸਿ, ਨਿਵੇਸਨਂ ਪਰਲੋਕੇ ਮਤਾਨਂ;

ਇਧੇਵ ਮੇ ਪਞ੍ਚ ਸਤਾਨਿ ਦੇਹਿ, ਦਸ੍ਸਾਮਿ ਤੇ ਪਰਲੋਕੇ ਸਹਸ੍ਸ’’ਨ੍ਤਿ.

ਤਤ੍ਥ ਨਿਵੇਸਨਨ੍ਤਿ ਨਿਵਾਸਟ੍ਠਾਨਂ. ਪਞ੍ਚ ਸਤਾਨੀਤਿ ਪਞ੍ਚ ਕਹਾਪਣਸਤਾਨਿ.

ਅਥ ਨਂ ਮਹਾਸਤ੍ਤੋ ਪਰਿਸਮਜ੍ਝੇਯੇਵ ਗਰਹਨ੍ਤੋ ਆਹ –

੧੩੦੨.

‘‘ਦਜ੍ਜੇਮੁ ¶ ਖੋ ਪਞ੍ਚ ਸਤਾਨਿ ਭੋਤੋ, ਜਞ੍ਞਾਮੁ ਚੇ ਸੀਲਵਨ੍ਤਂ ਵਦਞ੍ਞੁਂ;

ਲੁਦ੍ਦਂ ਤਂ ਭੋਨ੍ਤਂ ਨਿਰਯੇ ਵਸਨ੍ਤਂ, ਕੋ ਚੋਦਯੇ ਪਰਲੋਕੇ ਸਹਸ੍ਸਂ.

੧੩੦੩.

‘‘ਇਧੇਵ ਯੋ ਹੋਤਿ ਅਧਮ੍ਮਸੀਲੋ, ਪਾਪਾਚਾਰੋ ਅਲਸੋ ਲੁਦ੍ਦਕਮ੍ਮੋ;

ਨ ਪਣ੍ਡਿਤਾ ਤਸ੍ਮਿਂ ਇਣਂ ਦਦਨ੍ਤਿ, ਨ ਹਿ ਆਗਮੋ ਹੋਤਿ ਤਥਾਵਿਧਮ੍ਹਾ.

੧੩੦੪.

‘‘ਦਕ੍ਖਞ੍ਚ ¶ ਪੋਸਂ ਮਨੁਜਾ ਵਿਦਿਤ੍ਵਾ, ਉਟ੍ਠਾਨਕਂ ਸੀਲਵਨ੍ਤਂ ਵਦਞ੍ਞੁਂ;

ਸਯਮੇਵ ਭੋਗੇਹਿ ਨਿਮਨ੍ਤਯਨ੍ਤਿ, ਕਮ੍ਮਂ ਕਰਿਤ੍ਵਾ ਪੁਨ ਮਾਹਰੇਸੀ’’ਤਿ.

ਤਤ੍ਥ ¶ ਜਞ੍ਞਾਮੁ ਚੇਤਿ ਯਦਿ ਮਯਂ ਭਵਨ੍ਤਂ ‘‘ਸੀਲਵਾ ਏਸ ਵਦਞ੍ਞੂ, ਧਮ੍ਮਿਕਸਮਣਬ੍ਰਾਹ੍ਮਣਾਨਂ ਇਮਸ੍ਮਿਂ ਕਾਲੇ ਇਮਿਨਾ ਨਾਮਤ੍ਥੋਤਿ ਜਾਨਿਤ੍ਵਾ ਤਸ੍ਸ ਤਸ੍ਸ ਕਿਚ੍ਚਸ੍ਸ ਕਾਰਕੋ ਵਦਞ੍ਞੂ’’ਤਿ ਜਾਨੇਯ੍ਯਾਮ. ਅਥ ਤੇ ਵਡ੍ਢਿਯਾ ਪਞ੍ਚ ਸਤਾਨਿ ਦਦੇਯ੍ਯਾਮ, ਤ੍ਵਂ ਪਨ ਲੁਦ੍ਦੋ ਸਾਹਸਿਕੋ ਮਿਚ੍ਛਾਦਸ੍ਸਨਂ ਗਹੇਤ੍ਵਾ ਦਾਨਸਾਲਂ ਵਿਦ੍ਧਂਸੇਤ੍ਵਾ ਪਰਦਾਰੇਸੁ ਅਪਰਜ੍ਝਸਿ, ਇਤੋ ਚੁਤੋ ਨਿਰਯੇ ਉਪ੍ਪਜ੍ਜਿਸ੍ਸਸਿ, ਏਵਂ ਲੁਦ੍ਦਂ ਤਂ ਨਿਰਯੇ ਵਸਨ੍ਤਂ ਭੋਨ੍ਤਂ ਤਤ੍ਥ ਗਨ੍ਤ੍ਵਾ ਕੋ ‘‘ਸਹਸ੍ਸਂ ਮੇ ਦੇਹੀ’’ਤਿ ਚੋਦੇਸ੍ਸਤਿ. ਤਥਾਵਿਧਮ੍ਹਾਤਿ ਤਾਦਿਸਾ ਪੁਰਿਸਾ ਦਿਨ੍ਨਸ੍ਸ ਇਣਸ੍ਸ ਪੁਨ ਆਗਮੋ ਨਾਮ ਨ ਹੋਤਿ. ਦਕ੍ਖਨ੍ਤਿ ਧਨੁਪ੍ਪਾਦਨਕੁਸਲਂ. ਪੁਨ ਮਾਹਰੇਸੀਤਿ ਅਤ੍ਤਨੋ ਕਮ੍ਮਂ ਕਰਿਤ੍ਵਾ ਧਨਂ ਉਪ੍ਪਾਦੇਤ੍ਵਾ ਪੁਨ ਅਮ੍ਹਾਕਂ ਸਨ੍ਤਕਂ ਆਹਰੇਯ੍ਯਾਸਿ, ਮਾ ਨਿਕ੍ਕਮ੍ਮੋ ਵਸੀਤਿ ਸਯਮੇਵ ਭੋਗੇਹਿ ਨਿਮਨ੍ਤਯਨ੍ਤੀਤਿ.

ਇਤਿ ਰਾਜਾ ਤੇਨ ਨਿਗ੍ਗਯ੍ਹਮਾਨੋ ਅਪ੍ਪਟਿਭਾਨੋ ਅਹੋਸਿ. ਮਹਾਜਨੋ ਹਟ੍ਠਤੁਟ੍ਠੋ ਹੁਤ੍ਵਾ ‘‘ਮਹਿਦ੍ਧਿਕੋ ਦੇਵੋਪਿ ਅਜ੍ਜ ਰਾਜਾਨਂ ਮਿਚ੍ਛਾਦਸ੍ਸਨਂ ਵਿਸ੍ਸਜ੍ਜਾਪੇਸ੍ਸਤੀ’’ਤਿ ਸਕਲਨਗਰਂ ਏਕਕੋਲਾਹਲਂ ਅਹੋਸਿ. ਮਹਾਸਤ੍ਤਸ੍ਸਾਨੁਭਾਵੇਨ ਤਦਾ ਸਤ੍ਤਯੋਜਨਿਕਾਯ ਮਿਥਿਲਾਯ ਤਸ੍ਸ ਧਮ੍ਮਦੇਸਨਂ ਅਸ੍ਸੁਣਨ੍ਤੋ ਨਾਮ ਨਾਹੋਸਿ. ਅਥ ਮਹਾਸਤ੍ਤੋ ‘‘ਅਯਂ ਰਾਜਾ ਅਤਿਵਿਯ ਦਲ਼੍ਹਂ ਮਿਚ੍ਛਾਦਸ੍ਸਨਂ ਗਣ੍ਹਿ, ਨਿਰਯਭਯੇਨ ਨਂ ਸਨ੍ਤਜ੍ਜੇਤ੍ਵਾ ਮਿਚ੍ਛਾਦਿਟ੍ਠਿਂ ਵਿਸ੍ਸਜ੍ਜਾਪੇਤ੍ਵਾ ਪੁਨ ਦੇਵਲੋਕੇਨ ਅਸ੍ਸਾਸੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਮਹਾਰਾਜ, ਸਚੇ ਦਿਟ੍ਠਿਂ ਨ ਵਿਸ੍ਸਜ੍ਜੇਸ੍ਸਸਿ, ਏਵਂ ਅਨਨ੍ਤਦੁਕ੍ਖਂ ਨਿਰਯਂ ਗਮਿਸ੍ਸਸੀ’’ਤਿ ਵਤ੍ਵਾ ਨਿਰਯਕਥਂ ਪਟ੍ਠਪੇਸਿ –

੧੩੦੫.

‘‘ਇਤੋ ਚੁਤੋ ਦਕ੍ਖਸਿ ਤਤ੍ਥ ਰਾਜ, ਕਾਕੋਲਸਙ੍ਘੇਹਿ ਵਿਕਸ੍ਸਮਾਨਂ;

ਤਂ ਖਜ੍ਜਮਾਨਂ ਨਿਰਯੇ ਵਸਨ੍ਤਂ, ਕਾਕੇਹਿ ਗਿਜ੍ਝੇਹਿ ਚ ਸੇਨਕੇਹਿ;

ਸਞ੍ਛਿਨ੍ਨਗਤ੍ਤਂ ਰੁਹਿਰਂ ਸਵਨ੍ਤਂ, ਕੋ ਚੋਦਯੇ ਪਰਲੋਕੇ ਸਹਸ੍ਸ’’ਨ੍ਤਿ.

ਤਤ੍ਥ ¶ ਕਾਕੋਲਸਙ੍ਘੇਹੀਤਿ ਲੋਹਤੁਣ੍ਡੇਹਿ ਕਾਕਸਙ੍ਘੇਹਿ. ਵਿਕਸ੍ਸਮਾਨਨ੍ਤਿ ਅਤ੍ਤਾਨਂ ਆਕਡ੍ਢਿਯਮਾਨਂ ਤਤ੍ਥ ਨਿਰਯੇ ਪਸ੍ਸਿਸ੍ਸਸਿ. ਤਨ੍ਤਿ ਤਂ ਭਵਨ੍ਤਂ.

ਤਂ ¶ ¶ ਪਨ ਕਾਕੋਲਨਿਰਯਂ ਵਣ੍ਣੇਤ੍ਵਾ ‘‘ਸਚੇਪਿ ਏਤ੍ਥ ਨ ਨਿਬ੍ਬਤ੍ਤਿਸ੍ਸਸਿ, ਲੋਕਨ੍ਤਰਨਿਰਯੇ ਨਿਬ੍ਬਤ੍ਤਿਸ੍ਸਸੀ’’ਤਿ ਵਤ੍ਵਾ ਤਂ ਨਿਰਯਂ ਦਸ੍ਸੇਤੁਂ ਗਾਥਮਾਹ –

੧੩੦੬.

‘‘ਅਨ੍ਧਂਤਮਂ ਤਤ੍ਥ ਨ ਚਨ੍ਦਸੂਰਿਯਾ, ਨਿਰਯੋ ਸਦਾ ਤੁਮੁਲੋ ਘੋਰਰੂਪੋ;

ਸਾ ਨੇਵ ਰਤ੍ਤੀ ਨ ਦਿਵਾ ਪਞ੍ਞਾਯਤਿ, ਤਥਾਵਿਧੇ ਕੋ ਵਿਚਰੇ ਧਨਤ੍ਥਿਕੋ’’ਤਿ.

ਤਤ੍ਥ ਅਨ੍ਧਂ ਤਮਨ੍ਤਿ ਮਹਾਰਾਜ, ਯਮ੍ਹਿ ਲੋਕਨ੍ਤਰਨਿਰਯੇ ਮਿਚ੍ਛਾਦਿਟ੍ਠਿਕਾ ਨਿਬ੍ਬਤ੍ਤਨ੍ਤਿ, ਤਤ੍ਥ ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਤ੍ਤਿਨਿਵਾਰਣਂ ਅਨ੍ਧਤਮਂ. ਸਦਾ ਤੁਮੁਲੋਤਿ ਸੋ ਨਿਰਯੋ ਨਿਚ੍ਚਂ ਬਹਲਨ੍ਧਕਾਰੋ. ਘੋਰਰੂਪੋਤਿ ਭੀਸਨਕਜਾਤਿਕੋ. ਸਾ ਨੇਵ ਰਤ੍ਤੀਤਿ ਯਾ ਇਧ ਰਤ੍ਤਿ ਦਿਵਾ ਚ, ਸਾ ਨੇਵ ਤਤ੍ਥ ਪਞ੍ਞਾਯਤਿ. ਕੋ ਵਿਚਰੇਤਿ ਕੋ ਉਦ੍ਧਾਰਂ ਸੋਧੇਨ੍ਤੋ ਵਿਚਰਿਸ੍ਸਤਿ.

ਤਮ੍ਪਿਸ੍ਸ ਲੋਕਨ੍ਤਰਨਿਰਯਂ ਵਿਤ੍ਥਾਰੇਨ ਵਣ੍ਣੇਤ੍ਵਾ ‘‘ਮਹਾਰਾਜ, ਮਿਚ੍ਛਾਦਿਟ੍ਠਿਂ ਅਵਿਸ੍ਸਜ੍ਜੇਨ੍ਤੋ ਨ ਕੇਵਲਂ ਏਤਦੇਵ, ਅਞ੍ਞਮ੍ਪਿ ਦੁਕ੍ਖਂ ਅਨੁਭਵਿਸ੍ਸਸੀ’’ਤਿ ਦਸ੍ਸੇਨ੍ਤੋ ਗਾਥਮਾਹ –

੧੩੦੭.

‘‘ਸਬਲੋ ਚ ਸਾਮੋ ਚ ਦੁਵੇ ਸੁਵਾਨਾ, ਪਵਦ੍ਧਕਾਯਾ ਬਲਿਨੋ ਮਹਨ੍ਤਾ;

ਖਾਦਨ੍ਤਿ ਦਨ੍ਤੇਹਿ ਅਯੋਮਯੇਹਿ, ਇਤੋ ਪਣੁਨ੍ਨਂ ਪਰਲੋਕਪਤ੍ਤ’’ਨ੍ਤਿ.

ਤਤ੍ਥ ਇਤੋ ਪਣੁਨ੍ਨਨ੍ਤਿ ਇਮਮ੍ਹਾ ਮਨੁਸ੍ਸਲੋਕਾ ਚੁਤਂ. ਪਰਤੋ ਨਿਰਯੇਸੁਪਿ ਏਸੇਵ ਨਯੋ. ਤਸ੍ਮਾ ਸਬ੍ਬਾਨਿ ਤਾਨਿ ਨਿਰਯਟ੍ਠਾਨਾਨਿ ਨਿਰਯਪਾਲਾਨਂ ਉਪਕ੍ਕਮੇਹਿ ਸਦ੍ਧਿਂ ਹੇਟ੍ਠਾ ਵੁਤ੍ਤਨਯੇਨੇਵ ਵਿਤ੍ਥਾਰੇਤ੍ਵਾ ਤਾਸਂ ਤਾਸਂ ਗਾਥਾਨਂ ਅਨੁਤ੍ਤਾਨਾਨਿ ਪਦਾਨਿ ਵਣ੍ਣੇਤਬ੍ਬਾਨਿ.

੧੩੦੮.

‘‘ਤਂ ਖਜ੍ਜਮਾਨਂ ਨਿਰਯੇ ਵਸਨ੍ਤਂ, ਲੁਦ੍ਦੇਹਿ ਵਾਲ਼ੇਹਿ ਅਘਮ੍ਮਿਗੇਹਿ ਚ;

ਸਞ੍ਛਿਨ੍ਨਗਤ੍ਤਂ ਰੁਹਿਰਂ ਸਵਨ੍ਤਂ, ਕੋ ਚੋਦਯੇ ਪਰਲੋਕੇ ਸਹਸ੍ਸ’’ਨ੍ਤਿ.

ਤਤ੍ਥ ਲੁਦ੍ਦੇਹੀਤਿ ਦਾਰੁਣੇਹਿ. ਵਾਲ਼ੇਹੀਤਿ ਦੁਟ੍ਠੇਹਿ. ਅਘਮ੍ਮਿਗੇਹੀਤਿ ਅਘਾਵਹੇਹਿ ਮਿਗੇਹਿ, ਦੁਕ੍ਖਾਵਹੇਹਿ ਸੁਨਖੇਹੀਤਿ ਅਤ੍ਥੋ.

੧੩੦੯.

‘‘ਉਸੂਹਿ ¶ ¶ ¶ ਸਤ੍ਤੀਹਿ ਚ ਸੁਨਿਸਿਤਾਹਿ, ਹਨਨ੍ਤਿ ਵਿਜ੍ਝਨ੍ਤਿ ਚ ਪਚ੍ਚਮਿਤ੍ਤਾ;

ਕਾਲ਼ੂਪਕਾਲ਼ਾ ਨਿਰਯਮ੍ਹਿ ਘੋਰੇ, ਪੁਬ੍ਬੇ ਨਰਂ ਦੁਕ੍ਕਟਕਮ੍ਮਕਾਰਿ’’ਨ੍ਤਿ.

ਤਤ੍ਥ ਹਨਨ੍ਤਿ ਵਿਜ੍ਝਨ੍ਤਿ ਚਾਤਿ ਜਲਿਤਾਯ ਅਯਪਥਵਿਯਂ ਪਾਤੇਤ੍ਵਾ ਸਕਲਸਰੀਰਂ ਛਿਦ੍ਦਾਵਛਿਦ੍ਦਂ ਕਰੋਨ੍ਤਾ ਪਹਰਨ੍ਤਿ ਚੇਵ ਵਿਜ੍ਝਨ੍ਤਿ ਚ. ਕਾਲ਼ੂਪਕਾਲ਼ਾਤਿ ਏਵਂਨਾਮਕਾ ਨਿਰਯਪਾਲਾ. ਨਿਰਯਮ੍ਹੀਤਿ ਤਸ੍ਮਿਂ ਤੇਸਞ੍ਞੇਵ ਵਸੇਨ ਕਾਲ਼ੂਪਕਾਲ਼ਸਙ੍ਖਾਤੇ ਨਿਰਯੇ. ਦੁਕ੍ਕਟਕਮ੍ਮਕਾਰਿਨ੍ਤਿ ਮਿਚ੍ਛਾਦਿਟ੍ਠਿਵਸੇਨ ਦੁਕ੍ਕਟਾਨਂ ਕਮ੍ਮਾਨਂ ਕਾਰਕਂ.

੧੩੧੦.

‘‘ਤਂ ਹਞ੍ਞਮਾਨਂ ਨਿਰਯੇ ਵਜਨ੍ਤਂ, ਕੁਚ੍ਛਿਸ੍ਮਿਂ ਪਸ੍ਸਸ੍ਮਿਂ ਵਿਪ੍ਫਾਲਿਤੂਦਰਂ;

ਸਞ੍ਛਿਨ੍ਨਗਤ੍ਤਂ ਰੁਹਿਰਂ ਸਵਨ੍ਤਂ, ਕੋ ਚੋਦਯੇ ਪਰਲੋਕੇ ਸਹਸ੍ਸ’’ਨ੍ਤਿ.

ਤਤ੍ਥ ਤਨ੍ਤਿ ਤਂ ਭਵਨ੍ਤਂ ਤਤ੍ਥ ਨਿਰਯੇ ਤਥਾ ਹਞ੍ਞਮਾਨਂ. ਵਜਨ੍ਤਨ੍ਤਿ ਇਤੋ ਚਿਤੋ ਚ ਧਾਵਨ੍ਤਂ. ਕੁਚ੍ਛਿਸ੍ਮਿਨ੍ਤਿ ਕੁਚ੍ਛਿਯਞ੍ਚ ਪਸ੍ਸੇ ਚ ਹਞ੍ਞਮਾਨਂ ਵਿਜ੍ਝਿਯਮਾਨਨ੍ਤਿ ਅਤ੍ਥੋ.

੧੩੧੧.

‘‘ਸਤ੍ਤੀ ਉਸੂ ਤੋਮਰਭਿਣ੍ਡਿਵਾਲਾ, ਵਿਵਿਧਾਵੁਧਾ ਵਸ੍ਸਨ੍ਤਿ ਤਤ੍ਥ ਦੇਵਾ;

ਪਤਨ੍ਤਿ ਅਙ੍ਗਾਰਮਿਵਚ੍ਚਿਮਨ੍ਤੋ, ਸਿਲਾਸਨੀ ਵਸ੍ਸਤਿ ਲੁਦ੍ਦਕਮ੍ਮੇਤਿ.

ਤਤ੍ਥ ਅਙ੍ਗਾਰਮਿਵਚ੍ਚਿਮਨ੍ਤੋਤਿ ਜਲਿਤਅਙ੍ਗਾਰਾ ਵਿਯ ਅਚ੍ਚਿਮਨ੍ਤਾ ਆਵੁਧਵਿਸੇਸਾ ਪਤਨ੍ਤਿ. ਸਿਲਾਸਨੀਤਿ ਜਲਿਤਸਿਲਾਸਨਿ. ਵਸ੍ਸਤਿ ਲੁਦ੍ਦਕਮ੍ਮੇਤਿ ਯਥਾ ਨਾਮ ਦੇਵੇ ਵਸ੍ਸਨ੍ਤੇ ਅਸਨਿ ਪਤਤਿ, ਏਵਮੇਵ ਆਕਾਸੇ ਸਮੁਟ੍ਠਾਯ ਚਿਚ੍ਚਿਟਾਯਮਾਨਂ ਜਲਿਤਸਿਲਾਵਸ੍ਸਂ ਤੇਸਂ ਲੁਦ੍ਦਕਮ੍ਮਾਨਂ ਉਪਰਿ ਪਤਤਿ.

੧੩੧੨.

‘‘ਉਣ੍ਹੋ ਚ ਵਾਤੋ ਨਿਰਯਮ੍ਹਿ ਦੁਸ੍ਸਹੋ, ਨ ਤਮ੍ਹਿ ਸੁਖਂ ਲਬ੍ਭਤਿ ਇਤ੍ਤਰਮ੍ਪਿ;

ਤਂ ਤਂ ਵਿਧਾਵਨ੍ਤਮਲੇਨਮਾਤੁਰਂ, ਕੋ ਚੋਦਯੇ ਪਰਲੋਕੇ ਸਹਸ੍ਸ’’ਨ੍ਤਿ.

ਤਤ੍ਥ ਇਤ੍ਤਰਮ੍ਪੀਤਿ ਪਰਿਤ੍ਤਕਮ੍ਪਿ. ਵਿਧਾਵਨ੍ਤਨ੍ਤਿ ਵਿਵਿਧਾ ਧਾਵਨ੍ਤਂ.

੧੩੧੩.

‘‘ਸਨ੍ਧਾਵਮਾਨਮ੍ਪਿ ¶ ਰਥੇਸੁ ਯੁਤ੍ਤਂ, ਸਜੋਤਿਭੂਤਂ ਪਥਵਿਂ ਕਮਨ੍ਤਂ;

ਪਤੋਦਲਟ੍ਠੀਹਿ ¶ ਸੁਚੋਦਯਨ੍ਤਂ, ਕੋ ਚੋਦਯੇ ਪਰਲੋਕੇ ਸਹਸ੍ਸ’’ਨ੍ਤਿ.

ਤਤ੍ਥ ¶ ਰਥੇਸੁ ਯੁਤ੍ਤਨ੍ਤਿ ਵਾਰੇਨ ਵਾਰਂ ਤੇਸੁ ਜਲਿਤਲੋਹਰਥੇਸੁ ਯੁਤ੍ਤਂ. ਕਮਨ੍ਤਨ੍ਤਿ ਅਕ੍ਕਮਮਾਨਂ. ਸੁਚੋਦਯਨ੍ਤਨ੍ਤਿ ਸੁਟ੍ਠੁ ਚੋਦਯਨ੍ਤਂ.

੧੩੧੪.

‘‘ਤਮਾਰੁਹਨ੍ਤਂ ਖੁਰਸਞ੍ਚਿਤਂ ਗਿਰਿਂ, ਵਿਭਿਂਸਨਂ ਪਜ੍ਜਲਿਤਂ ਭਯਾਨਕਂ;

ਸਞ੍ਛਿਨ੍ਨਗਤ੍ਤਂ ਰੁਹਿਰਂ ਸਵਨ੍ਤਂ, ਕੋ ਚੋਦਯੇ ਪਰਲੋਕੇ ਸਹਸ੍ਸ’’ਨ੍ਤਿ.

ਤਤ੍ਥ ਤਮਾਰੁਹਨ੍ਤਨ੍ਤਿ ਤਂ ਭਵਨ੍ਤਂ ਜਲਿਤਾਵੁਧਪਹਾਰੇ ਅਸਹਿਤ੍ਵਾ ਜਲਿਤਖੁਰੇਹਿ ਸਞ੍ਚਿਤਂ ਜਲਿਤਲੋਹਪਬ੍ਬਤਂ ਆਰੁਹਨ੍ਤਂ.

੧੩੧੫.

‘‘ਤਮਾਰੁਹਨ੍ਤਂ ਪਬ੍ਬਤਸਨ੍ਨਿਕਾਸਂ, ਅਙ੍ਗਾਰਰਾਸਿਂ ਜਲਿਤਂ ਭਯਾਨਕਂ;

ਸੁਦਡ੍ਢਗਤ੍ਤਂ ਕਪਣਂ ਰੁਦਨ੍ਤਂ, ਕੋ ਚੋਦਯੇ ਪਰਲੋਕੇ ਸਹਸ੍ਸ’’ਨ੍ਤਿ.

ਤਤ੍ਥ ਸੁਦਡ੍ਢਗਤ੍ਤਨ੍ਤਿ ਸੁਟ੍ਠੁ ਦਡ੍ਢਸਰੀਰਂ.

੧੩੧੬.

‘‘ਅਬ੍ਭਕੂਟਸਮਾ ਉਚ੍ਚਾ, ਕਣ੍ਟਕਨਿਚਿਤਾ ਦੁਮਾ;

ਅਯੋਮਯੇਹਿ ਤਿਕ੍ਖੇਹਿ, ਨਰਲੋਹਿਤਪਾਯਿਭੀ’’ਤਿ.

ਤਤ੍ਥ ਕਣ੍ਟਕਨਿਚਿਤਾਤਿ ਜਲਿਤਕਣ੍ਟਕੇਹਿ ਚਿਤਾ. ‘‘ਅਯੋਮਯੇਹੀ’’ਤਿ ਇਦਂ ਯੇਹਿ ਕਣ੍ਟਕੇਹਿ ਆਚਿਤਾ, ਤੇ ਦਸ੍ਸੇਤੁਂ ਵੁਤ੍ਤਂ.

੧੩੧੭.

‘‘ਤਮਾਰੁਹਨ੍ਤਿ ਨਾਰਿਯੋ, ਨਰਾ ਚ ਪਰਦਾਰਗੂ;

ਚੋਦਿਤਾ ਸਤ੍ਤਿਹਤ੍ਥੇਹਿ, ਯਮਨਿਦ੍ਦੇਸਕਾਰਿਭੀ’’ਤਿ.

ਤਤ੍ਥ ਤਮਾਰੁਹਨ੍ਤੀਤਿ ਤਂ ਏਵਰੂਪਂ ਸਿਮ੍ਬਲਿਰੁਕ੍ਖਂ ਆਰੁਹਨ੍ਤਿ. ਯਮਨਿਦ੍ਦੇਸਕਾਰਿਭੀਤਿ ਯਮਸ੍ਸ ਵਚਨਕਰੇਹਿ, ਨਿਰਯਪਾਲੇਹੀਤਿ ਅਤ੍ਥੋ.

੧੩੧੮.

‘‘ਤਮਾਰੁਹਨ੍ਤਂ ¶ ਨਿਰਯਂ, ਸਿਮ੍ਬਲਿਂ ਰੁਹਿਰਮਕ੍ਖਿਤਂ;

ਵਿਦਡ੍ਢਕਾਯਂ ਵਿਤਚਂ, ਆਤੁਰਂ ਗਾਲ਼੍ਹਵੇਦਨਂ.

੧੩੧੯.

‘‘ਪਸ੍ਸਸਨ੍ਤਂ ¶ ਮੁਹੁਂ ਉਣ੍ਹਂ, ਪੁਬ੍ਬਕਮ੍ਮਾਪਰਾਧਿਕਂ;

ਦੁਮਗ੍ਗੇ ਵਿਤਚਂ ਗਤ੍ਤਂ, ਕੋ ਤਂ ਯਾਚੇਯ੍ਯ ਤਂ ਧਨ’’ਨ੍ਤਿ.

ਤਤ੍ਥ ਵਿਦਡ੍ਢਕਾਯਨ੍ਤਿ ਵਿਹਿਂਸਿਤਕਾਯਂ. ਵਿਤਚਨ੍ਤਿ ਚਮ੍ਮਮਂਸਾਨਂ ਛਿਦ੍ਦਾਵਛਿਦ੍ਦਂ ਛਿਨ੍ਨਤਾਯ ਕੋਵਿਲ਼ਾਰਪੁਪ੍ਫਂ ਵਿਯ ਕਿਂਸੁਕਪੁਪ੍ਫਂ ਵਿਯ ਚ.

੧੩੨੦.

‘‘ਅਬ੍ਭਕੂਟਸਮਾ ¶ ਉਚ੍ਚਾ, ਅਸਿਪਤ੍ਤਾਚਿਤਾ ਦੁਮਾ;

ਅਯੋਮਯੇਹਿ ਤਿਕ੍ਖੇਹਿ, ਨਰਲੋਹਿਤਪਾਯਿਭੀ’’ਤਿ.

ਤਤ੍ਥ ਅਸਿਪਤ੍ਤਾਚਿਤਾਤਿ ਅਸਿਮਯੇਹਿ ਪਤ੍ਤੇਹਿ ਚਿਤਾ.

੧੩੨੧.

‘‘ਤਮਾਰੁਹਨ੍ਤਂ ਅਸਿਪਤ੍ਤਪਾਦਪਂ, ਅਸੀਹਿ ਤਿਕ੍ਖੇਹਿ ਚ ਛਿਜ੍ਜਮਾਨਂ;

ਸਞ੍ਛਿਨ੍ਨਗਤ੍ਤਂ ਰੁਹਿਰਂ ਸਵਨ੍ਤਂ, ਕੋ ਚੋਦਯੇ ਪਰਲੋਕੇ ਸਹਸ੍ਸ’’ਨ੍ਤਿ.

ਤਤ੍ਥ ਤਮਾਰੁਹਨ੍ਤਨ੍ਤਿ ਤਂ ਭਵਨ੍ਤਂ ਨਿਰਯਪਾਲਾਨਂ ਆਵੁਧਪਹਾਰੇ ਅਸਹਿਤ੍ਵਾ ਆਰੁਹਨ੍ਤਂ.

੧੩੨੨.

‘‘ਤਤੋ ਨਿਕ੍ਖਨ੍ਤਮਤ੍ਤਂ ਤਂ, ਅਸਿਪਤ੍ਤਾਚਿਤਾ ਦੁਮਾ;

ਸਮ੍ਪਤਿਤਂ ਵੇਤਰਣਿਂ, ਕੋ ਤਂ ਯਾਚੇਯ੍ਯ ਤਂ ਧਨ’’ਨ੍ਤਿ.

ਤਤ੍ਥ ਸਮ੍ਪਤਿਤਨ੍ਤਿ ਪਤਿਤਂ.

੧੩੨੩.

‘‘ਖਰਾ ਖਾਰੋਦਿਕਾ ਤਤ੍ਤਾ, ਦੁਗ੍ਗਾ ਵੇਤਰਣੀ ਨਦੀ;

ਅਯੋਪੋਕ੍ਖਰਸਞ੍ਛਨ੍ਨਾ, ਤਿਕ੍ਖਾ ਪਤ੍ਤੇਹਿ ਸਨ੍ਦਤਿ’’.

ਤਤ੍ਥ ਖਰਾਤਿ ਫਰੁਸਾ. ਅਯੋਪੋਕ੍ਖਰਸਞ੍ਛਨ੍ਨਾਤਿ ਅਯੋਮਯੇਹਿ ਤਿਖਿਣਪਰਿਯਨ੍ਤੇਹਿ ਪੋਕ੍ਖਰਪਤ੍ਤੇਹਿ ਸਞ੍ਛਨ੍ਨਾ. ਪਤ੍ਤੇਹੀਤਿ ਤੇਹਿ ਪਤ੍ਤੇਹਿ ਸਾ ਨਦੀ ਤਿਕ੍ਖਾ ਹੁਤ੍ਵਾ ਸਨ੍ਦਤਿ.

੧੩੨੪.

‘‘ਤਤ੍ਥ ਸਞ੍ਛਿਨ੍ਨਗਤ੍ਤਂ ਤਂ, ਵੁਯ੍ਹਨ੍ਤਂ ਰੁਹਿਰਮਕ੍ਖਿਤਂ;

ਵੇਤਰਞ੍ਞੇ ਅਨਾਲਮ੍ਬੇ, ਕੋ ਤਂ ਯਾਚੇਯ੍ਯ ਤਂ ਧਨ’’ਨ੍ਤਿ.

ਤਤ੍ਥ ¶ ਵੇਤਰਞ੍ਞੇਤਿ ਵੇਤਰਣੀਉਦਕੇ.

ਇਮਂ ¶ ਪਨ ਮਹਾਸਤ੍ਤਸ੍ਸ ਨਿਰਯਕਥਂ ਸੁਤ੍ਵਾ ਰਾਜਾ ਸਂਵਿਗ੍ਗਹਦਯੋ ਮਹਾਸਤ੍ਤਞ੍ਞੇਵ ਤਾਣਗਵੇਸੀ ਹੁਤ੍ਵਾ ਆਹ –

੧੩੨੫.

‘‘ਵੇਧਾਮਿ ਰੁਕ੍ਖੋ ਵਿਯ ਛਿਜ੍ਜਮਾਨੋ, ਦਿਸਂ ਨ ਜਾਨਾਮਿ ਪਮੂਲ਼੍ਹਸਞ੍ਞੋ;

ਭਯਾਨੁਤਪ੍ਪਾਮਿ ਮਹਾ ਚ ਮੇ ਭਯਾ, ਸੁਤ੍ਵਾਨ ਕਥਾ ਤਵ ਭਾਸਿਤਾ ਇਸੇ.

੧੩੨੬.

‘‘ਆਦਿਤ੍ਤੇ ਵਾਰਿਮਜ੍ਝਂਵ, ਦੀਪਂਵੋਘੇ ਮਹਣ੍ਣਵੇ;

ਅਨ੍ਧਕਾਰੇਵ ਪਜ੍ਜੋਤੋ, ਤ੍ਵਂ ਨੋਸਿ ਸਰਣਂ ਇਸੇ.

੧੩੨੭.

‘‘ਅਤ੍ਥਞ੍ਚ ¶ ਧਮ੍ਮਂ ਅਨੁਸਾਸ ਮਂ ਇਸੇ, ਅਤੀਤਮਦ੍ਧਾ ਅਪਰਾਧਿਤਂ ਮਯਾ;

ਆਚਿਕ੍ਖ ਮੇ ਨਾਰਦ ਸੁਦ੍ਧਿਮਗ੍ਗਂ, ਯਥਾ ਅਹਂ ਨੋ ਨਿਰਯਂ ਪਤੇਯ੍ਯ’’ਨ੍ਤਿ.

ਤਤ੍ਥ ਭਯਾਨੁਤਪ੍ਪਾਮੀਤਿ ਅਤ੍ਤਨਾ ਕਤਸ੍ਸ ਪਾਪਸ੍ਸ ਭਯੇਨ ਅਨੁਤਪ੍ਪਾਮਿ. ਮਹਾ ਚ ਮੇ ਭਯਾਤਿ ਮਹਨ੍ਤਞ੍ਚ ਮੇ ਨਿਰਯਭਯਂ ਉਪ੍ਪਨ੍ਨਂ. ਦਿਪਂਵੋਘੇਤਿ ਦੀਪਂਵ ਓਘੇ. ਇਦਂ ਵੁਤ੍ਤਂ ਹੋਤਿ – ਆਦਿਤ੍ਤੇ ਕਾਲੇ ਵਾਰਿਮਜ੍ਝਂ ਵਿਯ ਭਿਨ੍ਨਨਾਵਾਨਂ ਓਘੇ ਅਣ੍ਣਵੇ ਪਤਿਟ੍ਠਂ ਅਲਭਮਾਨਾਨਂ ਦੀਪਂ ਵਿਯ ਅਨ੍ਧਕਾਰਗਤਾਨਂ ਪਜ੍ਜੋਤੋ ਵਿਯ ਚ ਤ੍ਵਂ ਨੋ ਇਸੇ ਸਰਣਂ ਭਵ. ਅਤੀਤਮਦ੍ਧਾ ਅਪਰਾਧਿਤਂ ਮਯਾਤਿ ਏਕਂਸੇਨ ਮਯਾ ਅਤੀਤਂ ਕਮ੍ਮਂ ਅਪਰਾਧਿਤਂ ਵਿਰਾਧਿਤਂ, ਕੁਸਲਂ ਅਤਿਕ੍ਕਮਿਤ੍ਵਾ ਅਕੁਸਲਮੇਵ ਕਤਨ੍ਤਿ.

ਅਥਸ੍ਸ ਮਹਾਸਤ੍ਤੋ ਵਿਸੁਦ੍ਧਿਮਗ੍ਗਂ ਆਚਿਕ੍ਖਿਤੁਂ ਸਮ੍ਮਾਪਟਿਪਨ੍ਨੇ ਪੋਰਾਣਕਰਾਜਾਨੋ ਉਦਾਹਰਣਵਸੇਨ ਦਸ੍ਸੇਨ੍ਤੋ ਆਹ –

੧੩੨੮.

‘‘ਯਥਾ ਅਹੂ ਧਤਰਟ੍ਠੋ, ਵੇਸ੍ਸਾਮਿਤ੍ਤੋ ਅਟ੍ਠਕੋ ਯਾਮਤਗ੍ਗਿ;

ਉਸਿਨ੍ਦਰੋ ਚਾਪਿ ਸਿਵੀ ਚ ਰਾਜਾ, ਪਰਿਚਾਰਕਾ ਸਮਣਬ੍ਰਾਹ੍ਮਣਾਨਂ.

੧੩੨੯.

‘‘ਏਤੇ ਚਞ੍ਞੇ ਚ ਰਾਜਾਨੋ, ਯੇ ਸਗ੍ਗਵਿਸਯਂ ਗਤਾ;

ਅਧਮ੍ਮਂ ਪਰਿਵਜ੍ਜੇਤ੍ਵਾ, ਧਮ੍ਮਂ ਚਰ ਮਹੀਪਤਿ.

੧੩੩੦.

‘‘ਅਨ੍ਨਹਤ੍ਥਾ ¶ ¶ ਚ ਤੇ ਬ੍ਯਮ੍ਹੇ, ਘੋਸਯਨ੍ਤੁ ਪੁਰੇ ਤਵ;

‘ਕੋ ਛਾਤੋ ਕੋ ਚ ਤਸਿਤੋ, ਕੋ ਮਾਲਂ ਕੋ ਵਿਲੇਪਨਂ;

ਨਾਨਾਰਤ੍ਤਾਨਂ ਵਤ੍ਥਾਨਂ, ਕੋ ਨਗ੍ਗੋ ਪਰਿਦਹਿਸ੍ਸਤਿ.

੧੩੩੧.

‘ਕੋ ਪਨ੍ਥੇ ਛਤ੍ਤਮਾਨੇਤਿ, ਪਾਦੁਕਾ ਚ ਮੁਦੂ ਸੁਭਾ’;

ਇਤਿ ਸਾਯਞ੍ਚ ਪਾਤੋ ਚ, ਘੋਸਯਨ੍ਤੁ ਪੁਰੇ ਤਵ.

੧੩੩੨.

‘‘ਜਿਣ੍ਣਂ ਪੋਸਂ ਗਵਾਸ੍ਸਞ੍ਚ, ਮਾਸ੍ਸੁ ਯੁਞ੍ਜ ਯਥਾ ਪੁਰੇ;

ਪਰਿਹਾਰਞ੍ਚ ਦਜ੍ਜਾਸਿ, ਅਧਿਕਾਰਕਤੋ ਬਲੀ’’ਤਿ.

ਤਤ੍ਥ ਏਤੇ ਚਾਤਿ ਯਥਾ ਏਤੇ ਚ ਧਤਰਟ੍ਠੋ ਵੇਸ੍ਸਾਮਿਤ੍ਤੋ ਅਟ੍ਠਕੋ ਯਾਮਤਗ੍ਗਿ ਉਸਿਨ੍ਦਰੋ ਸਿਵੀਤਿ ਛ ਰਾਜਾਨੋ ਅਞ੍ਞੇ ਚ ਧਮ੍ਮਂ ਚਰਿਤ੍ਵਾ ਸਗ੍ਗਵਿਸਯਂ ਗਤਾ, ਏਵਂ ਤ੍ਵਮ੍ਪਿ ਅਧਮ੍ਮਂ ਪਰਿਵਜ੍ਜੇਤ੍ਵਾ ਧਮ੍ਮਂ ਚਰ. ਕੋ ਛਾਤੋਤਿ ਮਹਾਰਾਜ, ਤਵ ਬ੍ਯਮ੍ਹੇ ਪੁਰੇ ਰਾਜਨਿਵੇਸਨੇ ਚੇਵ ਨਗਰੇ ਚ ਅਨ੍ਨਹਤ੍ਥਾ ਪੁਰਿਸਾ ‘‘ਕੋ ਛਾਤੋ, ਕੋ ਤਸਿਤੋ’’ਤਿ ਤੇਸਂ ਦਾਤੁਕਾਮਤਾਯ ਘੋਸੇਨ੍ਤੁ. ਕੋ ਮਾਲਨ੍ਤਿ ਕੋ ਮਾਲਂ ਇਚ੍ਛਤਿ, ਕੋ ¶ ਵਿਲੇਪਨਂ ਇਚ੍ਛਤਿ, ਨਾਨਾਰਤ੍ਤਾਨਂ ਵਤ੍ਥਾਨਂ ਯਂ ਯਂ ਇਚ੍ਛਤਿ, ਤਂ ਤਂ ਕੋ ਨਗ੍ਗੋ ਪਰਿਦਹਿਸ੍ਸਤੀਤਿ ਘੋਸੇਨ੍ਤੁ. ਕੋ ਪਨ੍ਥੇ ਛਤ੍ਤਮਾਨੇਤੀਤਿ ਕੋ ਪਨ੍ਥੇ ਛਤ੍ਤਂ ਧਾਰਯਿਸ੍ਸਤਿ. ਪਾਦੁਕਾ ਚਾਤਿ ਉਪਾਹਨਾ ਚ ਮੁਦੂ ਸੁਭਾ ਕੋ ਇਚ੍ਛਤਿ.

ਜਿਣ੍ਣਂ ਪੋਸਨ੍ਤਿ ਯੋ ਤੇ ਉਪਟ੍ਠਾਕੇਸੁ ਅਮਚ੍ਚੋ ਵਾ ਅਞ੍ਞੋ ਵਾ ਪੁਬ੍ਬੇ ਕਤੂਪਕਾਰੋ ਜਰਾਜਿਣ੍ਣਕਾਲੇ ਯਥਾ ਪੋਰਾਣਕਾਲੇ ਕਮ੍ਮਂ ਕਾਤੁਂ ਨ ਸਕ੍ਕੋਤਿ, ਯੇਪਿ ਤੇ ਗਵਾਸ੍ਸਾਦਯੋ ਜਿਣ੍ਣਤਾਯ ਕਮ੍ਮਂ ਕਾਤੁਂ ਨ ਸਕ੍ਕੋਨ੍ਤਿ, ਤੇਸੁ ਏਕਮ੍ਪਿ ਪੁਬ੍ਬੇ ਵਿਯ ਕਮ੍ਮੇਸੁ ਮਾ ਯੋਜਯਿ. ਜਿਣ੍ਣਕਾਲਸ੍ਮਿਞ੍ਹਿ ਤੇ ਤਾਨਿ ਕਮ੍ਮਾਨਿ ਕਾਤੁਂ ਨ ਸਕ੍ਕੋਨ੍ਤਿ. ਪਰਿਹਾਰਞ੍ਚਾਤਿ ਇਧ ਪਰਿਵਾਰੋ ‘‘ਪਰਿਹਾਰੋ’’ਤਿ ਵੁਤ੍ਤੋ. ਇਦਂ ਵੁਤ੍ਤਂ ਹੋਤਿ – ਯੋ ਚ ਤੇ ਬਲੀ ਹੁਤ੍ਵਾ ਅਧਿਕਾਰਕਤੋ ਪੁਬ੍ਬੇ ਕਤੂਪਕਾਰੋ ਹੋਤਿ, ਤਸ੍ਸ ਜਰਾਜਿਣ੍ਣਕਾਲੇ ਯਥਾਪੋਰਾਣਪਰਿਵਾਰਂ ਦਦੇਯ੍ਯਾਸਿ. ਅਸਪ੍ਪੁਰਿਸਾ ਹਿ ਅਤ੍ਤਨੋ ਉਪਕਾਰਕਾਨਂ ਉਪਕਾਰਂ ਕਾਤੁਂ ਸਮਤ੍ਥਕਾਲੇਯੇਵ ਸਮ੍ਮਾਨਂ ਕਰੋਨ੍ਤਿ, ਸਮਤ੍ਥਕਾਲੇ ਪਨ ਨ ਓਲੋਕੇਨ੍ਤਿ. ਸਪ੍ਪੁਰਿਸਾ ਪਨ ਅਸਮਤ੍ਥਕਾਲੇਪਿ ਤੇਸਂ ਤਥੇਵ ਸਕ੍ਕਾਰਂ ਕਰੋਨ੍ਤਿ, ਤਸ੍ਮਾ ਤੁਵਮ੍ਪਿ ਏਵਂ ਕਰੇਯ੍ਯਾਸੀਤਿ.

ਇਤਿ ¶ ਮਹਾਸਤ੍ਤੋ ਰਞ੍ਞੋ ਦਾਨਕਥਞ੍ਚ ਸੀਲਕਥਞ੍ਚ ਕਥੇਤ੍ਵਾ ਇਦਾਨਿ ਯਸ੍ਮਾ ਅਯਂ ਰਾਜਾ ਅਤ੍ਤਨੋ ¶ ਅਤ੍ਤਭਾਵੇ ਰਥੇਨ ਉਪਮੇਤ੍ਵਾ ਵਣ੍ਣਿਯਮਾਨੇ ਤੁਸ੍ਸਿਸ੍ਸਤਿ, ਤਸ੍ਮਾਸ੍ਸ ਸਬ੍ਬਕਾਮਦੁਹਰਥੋਪਮਾਯ ਧਮ੍ਮਂ ਦੇਸੇਨ੍ਤੋ ਆਹ –

੧੩੩੩.

‘‘ਕਾਯੋ ਤੇ ਰਥਸਞ੍ਞਾਤੋ, ਮਨੋਸਾਰਥਿਕੋ ਲਹੁ;

ਅਵਿਹਿਂਸਾਸਾਰਿਤਕ੍ਖੋ, ਸਂਵਿਭਾਗਪਟਿਚ੍ਛਦੋ.

੧੩੩੪.

‘‘ਪਾਦਸਞ੍ਞਮਨੇਮਿਯੋ, ਹਤ੍ਥਸਞ੍ਞਮਪਕ੍ਖਰੋ;

ਕੁਚ੍ਛਿਸਞ੍ਞਮਨਬ੍ਭਨ੍ਤੋ, ਵਾਚਾਸਞ੍ਞਮਕੂਜਨੋ.

੧੩੩੫.

‘‘ਸਚ੍ਚਵਾਕ੍ਯਸਮਤ੍ਤਙ੍ਗੋ, ਅਪੇਸੁਞ੍ਞਸੁਸਞ੍ਞਤੋ;

ਗਿਰਾਸਖਿਲਨੇਲਙ੍ਗੋ, ਮਿਤਭਾਣਿਸਿਲੇਸਿਤੋ.

੧੩੩੬.

‘‘ਸਦ੍ਧਾਲੋਭਸੁਸਙ੍ਖਾਰੋ, ਨਿਵਾਤਞ੍ਜਲਿਕੁਬ੍ਬਰੋ;

ਅਥਦ੍ਧਤਾਨਤੀਸਾਕੋ, ਸੀਲਸਂਵਰਨਨ੍ਧਨੋ.

੧੩੩੭.

‘‘ਅਕ੍ਕੋਧਨਮਨੁਗ੍ਘਾਤੀ, ਧਮ੍ਮਪਣ੍ਡਰਛਤ੍ਤਕੋ;

ਬਾਹੁਸਚ੍ਚਮਪਾਲਮ੍ਬੋ, ਠਿਤਚਿਤ੍ਤਮੁਪਾਧਿਯੋ.

੧੩੩੮.

‘‘ਕਾਲਞ੍ਞੁਤਾਚਿਤ੍ਤਸਾਰੋ, ਵੇਸਾਰਜ੍ਜਤਿਦਣ੍ਡਕੋ;

ਨਿਵਾਤਵੁਤ੍ਤਿਯੋਤ੍ਤਕੋ, ਅਨਤਿਮਾਨਯੁਗੋ ਲਹੁ.

੧੩੩੯.

‘‘ਅਲੀਨਚਿਤ੍ਤਸਨ੍ਥਾਰੋ, ਵੁਦ੍ਧਿਸੇਵੀ ਰਜੋਹਤੋ;

ਸਤਿਪਤੋਦੋ ਧੀਰਸ੍ਸ, ਧਿਤਿ ਯੋਗੋ ਚ ਰਸ੍ਮਿਯੋ.

੧੩੪੦.

‘‘ਮਨੋ ਦਨ੍ਤਂ ਪਥਂ ਨੇਤਿ, ਸਮਦਨ੍ਤੇਹਿ ਵਾਹਿਭਿ;

ਇਚ੍ਛਾ ਲੋਭੋ ਚ ਕੁਮ੍ਮਗ੍ਗੋ, ਉਜੁਮਗ੍ਗੋ ਚ ਸਂਯਮੋ.

੧੩੪੧.

‘‘ਰੂਪੇ ¶ ਸਦ੍ਦੇ ਰਸੇ ਗਨ੍ਧੇ, ਵਾਹਨਸ੍ਸ ਪਧਾਵਤੋ;

ਪਞ੍ਞਾ ਆਕੋਟਨੀ ਰਾਜ, ਤਤ੍ਥ ਅਤ੍ਤਾਵ ਸਾਰਥਿ.

੧੩੪੨.

‘‘ਸਚੇ ¶ ਏਤੇਨ ਯਾਨੇਨ, ਸਮਚਰਿਯਾ ਦਲ਼੍ਹਾ ਧਿਤਿ;

ਸਬ੍ਬਕਾਮਦੁਹੋ ਰਾਜ, ਨ ਜਾਤੁ ਨਿਰਯਂ ਵਜੇ’’ਤਿ.

ਤਤ੍ਥ ¶ ਰਥਸਞ੍ਞਾਤੋਤਿ ਮਹਾਰਾਜ, ਤਵ ਕਾਯੋ ਰਥੋਤਿ ਸਞ੍ਞਾਤੋ ਹੋਤੁ. ਮਨੋਸਾਰਥਿਕੋਤਿ ਮਨਸਙ੍ਖਾਤੇਨ ਕੁਸਲਚਿਤ੍ਤੇਨ ਸਾਰਥਿਨਾ ਸਮਨ੍ਨਾਗਤੋ. ਲਹੂਤਿ ਵਿਗਤਥਿਨਮਿਦ੍ਧਤਾਯ ਸਲ੍ਲਹੁਕੋ. ਅਵਿਹਿਂਸਾਸਾਰਿਤਕ੍ਖੋਤਿ ਅਵਿਹਿਂਸਾਮਯੇਨ ਸਾਰਿਤੇਨ ਸੁਟ੍ਠੁ ਪਰਿਨਿਟ੍ਠਿਤੇਨ ਅਕ੍ਖੇਨ ਸਮਨ੍ਨਾਗਤੋ. ਸਂਵਿਭਾਗਪਟਿਚ੍ਛਦੋਤਿ ਦਾਨਸਂਵਿਭਾਗਮਯੇਨ ਪਟਿਚ੍ਛਦੇਨ ਸਮਨ੍ਨਾਗਤੋ. ਪਾਦਸਞ੍ਞਮਨੇਮਿਯੋਤਿ ਪਾਦਸਂਯਮਮਯਾਯ ਨੇਮਿਯਾ ਸਮਨ੍ਨਾਗਤੋ. ਹਤ੍ਥਸਞ੍ਞਮਪਕ੍ਖਰੋਤਿ ਹਤ੍ਥਸਂਯਮਮਯੇਨ ਪਕ੍ਖਰੇਨ ਸਮਨ੍ਨਾਗਤੋ. ਕੁਚ੍ਛਿਸਞ੍ਞਮਨਬ੍ਭਨ੍ਤੋਤਿ ਕੁਚ੍ਛਿਸਂਯਮਸਙ੍ਖਾਤੇਨ ਮਿਤਭੋਜਨਮਯੇਨ ਤੇਲੇਨ ਅਬ੍ਭਨ੍ਤੋ. ‘‘ਅਬ੍ਭਞ੍ਜਿਤਬ੍ਬੋ ਨਾਭਿ ਹੋਤੂ’’ਤਿਪਿ ਪਾਠੋ. ਵਾਚਾਸਞ੍ਞਮਕੂਜਨੋਤਿ ਵਾਚਾਸਂਯਮੇਨ ਅਕੂਜਨੋ.

ਸਚ੍ਚਵਾਕ੍ਯਸਮਤ੍ਤਙ੍ਗੋਤਿ ਸਚ੍ਚਵਾਕ੍ਯੇਨ ਪਰਿਪੁਣ੍ਣਅਙ੍ਗੋ ਅਖਣ੍ਡਰਥਙ੍ਗੋ. ਅਪੇਸੁਞ੍ਞਸੁਸਞ੍ਞਤੋਤਿ ਅਪੇਸੁਞ੍ਞੇਨ ਸੁਟ੍ਠੁ ਸਞ੍ਞਤੋ ਸਮੁਸ੍ਸਿਤੋ. ਗਿਰਾਸਖਿਲਨੇਲਙ੍ਗੋਤਿ ਸਖਿਲਾਯ ਸਣ੍ਹਵਾਚਾਯ ਨਿਦ੍ਦੋਸਙ੍ਗੋ ਮਟ੍ਠਰਥਙ੍ਗੋ. ਮਿਤਭਾਣਿਸਿਲੇਸਿਤੋ ਮਿਤਭਾਣਸਙ੍ਖਾਤੇਨ ਸਿਲੇਸੇਨ ਸੁਟ੍ਠੁ ਸਮ੍ਬਨ੍ਧੋ. ਸਦ੍ਧਾਲੋਭਸੁਸਙ੍ਖਾਰੋਤਿ ਕਮ੍ਮਫਲਸਦ੍ਦਹਨਸਦ੍ਧਾਮਯੇਨ ਚ ਅਲੋਭਮਯੇਨ ਚ ਸੁਨ੍ਦਰੇਨ ਅਲਙ੍ਕਾਰੇਨ ਸਮਨ੍ਨਾਗਤੋ. ਨਿਵਾਤਞ੍ਜਲਿਕੁਬ੍ਬਰੋਤਿ ਸੀਲਵਨ੍ਤਾਨਂ ਨਿਵਾਤਮਯੇਨ ਚੇਵ ਅਞ੍ਜਲਿਕਮ੍ਮਮਯੇਨ ਚ ਕੁਬ੍ਬਰੇਨ ਸਮਨ੍ਨਾਗਤੋ. ਅਥਦ੍ਧਤਾਨਤੀਸਾਕੋਤਿ ਸਖਿਲਸਮ੍ਮੋਦਭਾਵਸਙ੍ਖਾਤਾਯ ਅਥਦ੍ਧਤਾਯ ਅਨਤਈਸੋ, ਥੋਕਨਤਈਸੋਤਿ ਅਤ੍ਥੋ. ਸੀਲਸਂਵਰਨਨ੍ਧਨੋਤਿ ਅਖਣ੍ਡਪਞ੍ਚਸੀਲਚਕ੍ਖੁਨ੍ਦ੍ਰਿਯਾਦਿਸਂਵਰਸਙ੍ਖਾਤਾਯ ਨਨ੍ਧਨਰਜ੍ਜੁਯਾ ਸਮਨ੍ਨਾਗਤੋ.

ਅਕ੍ਕੋਧਨਮਨੁਗ੍ਘਾਤੀਤਿ ਅਕ੍ਕੋਧਨਭਾਵਸਙ੍ਖਾਤੇਨ ਅਨੁਗ੍ਘਾਤੇਨ ਸਮਨ੍ਨਾਗਤੋ. ਧਮ੍ਮਪਣ੍ਡਰ-ਛਤ੍ਤਕੋਤਿ ਦਸਕੁਸਲਧਮ੍ਮਸਙ੍ਖਾਤੇਨ ਪਣ੍ਡਰਚ੍ਛਤ੍ਤੇਨ ਸਮਨ੍ਨਾਗਤੋ. ਬਾਹੁਸਚ੍ਚਮਪਾਲਮ੍ਬੋਤਿ ਅਤ੍ਥਸਨ੍ਨਿਸ੍ਸਿਤਬਹੁਸ੍ਸੁਤਭਾਵਮਯੇਨ ਅਪਾਲਮ੍ਬੇਨ ਸਮਨ੍ਨਾਗਤੋ. ਠਿਤਚਿਤ੍ਤਮੁਪਾਧਿਯੋਤਿ ਲੋਕਧਮ੍ਮੇਹਿ ਅਵਿਕਮ੍ਪਨਭਾਵੇਨ ਸੁਟ੍ਠੁ ਠਿਤਏਕਗ੍ਗਭਾਵਪ੍ਪਤ੍ਤਚਿਤ੍ਤਸਙ੍ਖਾਤੇਨ ਉਪਾਧਿਨਾ ਉਤ੍ਤਰਤ੍ਥਰਣੇਨ ਵਾ ਰਾਜਾਸਨੇਨ ਸਮਨ੍ਨਾਗਤੋ. ਕਾਲਞ੍ਞੁਤਾਚਿਤ੍ਤਸਾਰੋਤਿ ‘‘ਅਯਂ ਦਾਨਸ੍ਸ ਦਿਨ੍ਨਕਾਲੋ, ਅਯਂ ਸੀਲਸ੍ਸ ਰਕ੍ਖਨਕਾਲੋ’’ਤਿ ਏਵਂ ਕਾਲਞ੍ਞੁਤਾਸਙ੍ਖਾਤੇਨ ਕਾਲਂ ਜਾਨਿਤ੍ਵਾ ਕਤੇਨ ਚਿਤ੍ਤੇਨ ¶ ਕੁਸਲਸਾਰੇਨ ਸਮਨ੍ਨਾਗਤੋ. ਇਦਂ ਵੁਤ੍ਤਂ ਹੋਤਿ – ਯਥਾ, ਮਹਾਰਾਜ, ਰਥਸ੍ਸ ਨਾਮ ਆਣਿਂ ਆਦਿਂ ਕਤ੍ਵਾ ਦਬ੍ਬਸਮ੍ਭਾਰਜਾਤਂ ਪਰਿਸੁਦ੍ਧਂ ਸਾਰਮਯਞ੍ਚ ਇਚ੍ਛਿਤਬ੍ਬਂ, ਏਵਞ੍ਹਿ ਸੋ ਰਥੋ ਅਦ੍ਧਾਨਕ੍ਖਮੋ ਹੋਤਿ, ਏਵਂ ਤਵਪਿ ਕਾਯਰਥੋ ਕਾਲਂ ਜਾਨਿਤ੍ਵਾ ਕਤੇਨ ਚਿਤ੍ਤੇਨ ਪਰਿਸੁਦ੍ਧੇਨ ਦਾਨਾਦਿਕੁਸਲਸਾਰੇਨ ਸਮਨ੍ਨਾਗਤੋ ਹੋਤੂਤਿ. ਵੇਸਾਰਜ੍ਜਤਿਦਣ੍ਡਕੋਤਿ ਪਰਿਸਮਜ੍ਝੇ ਕਥੇਨ੍ਤਸ੍ਸਪਿ ਵਿਸਾਰਦਭਾਵਸਙ੍ਖਾਤੇਨ ਤਿਦਣ੍ਡੇਨ ¶ ਸਮਨ੍ਨਾਗਤੋ. ਨਿਵਾਤਵੁਤ੍ਤਿਯੋਤ੍ਤਕੋਤਿ ਓਵਾਦੇ ਪਵਤ੍ਤਨਸਙ੍ਖਾਤੇਨ ਮੁਦੁਨਾ ਧੁਰਯੋਤ੍ਤੇਨ ਸਮਨ੍ਨਾਗਤੋ ¶ . ਮੁਦੁਨਾ ਹਿ ਧੁਰਯੋਤ੍ਤੇਨ ਬਦ੍ਧਰਥਂ ਸਿਨ੍ਧਵਾ ਸੁਖਂ ਵਹਨ੍ਤਿ, ਏਵਂ ਤਵ ਕਾਯਰਥੋਪਿ ਪਣ੍ਡਿਤਾਨਂ ਓਵਾਦਪ੍ਪਵਤ੍ਤਿਤਾਯ ਆਬਦ੍ਧੋ ਸੁਖਂ ਯਾਤੂਤਿ ਅਤ੍ਥੋ. ਅਨਤਿਮਾਨਯੁਗੋ ਲਹੂਤਿ ਅਨਤਿਮਾਨਸਙ੍ਖਾਤੇਨ ਲਹੁਕੇਨ ਯੁਗੇਨ ਸਮਨ੍ਨਾਗਤੋ.

ਅਲੀਨਚਿਤ੍ਤਸਨ੍ਥਾਰੋਤਿ ਯਥਾ ਰਥੋ ਨਾਮ ਦਨ੍ਤਮਯੇਨ ਉਲ਼ਾਰੇਨ ਸਨ੍ਥਾਰੇਨ ਸੋਭਤਿ, ਏਵਂ ਤਵ ਕਾਯਰਥੋਪਿ ਦਾਨਾਦਿਨਾ ਅਲੀਨਅਸਙ੍ਕੁਟਿਤਚਿਤ੍ਤਸਨ੍ਥਾਰੋ ਹੋਤੁ. ਵੁਦ੍ਧਿਸੇਵੀ ਰਜੋਹਤੋਤਿ ਯਥਾ ਰਥੋ ਨਾਮ ਵਿਸਮੇਨ ਰਜੁਟ੍ਠਾਨਮਗ੍ਗੇਨ ਗਚ੍ਛਨ੍ਤੋ ਰਜੋਕਿਣ੍ਣੋ ਨ ਸੋਭਤਿ, ਸਮੇਨ ਵਿਰਜੇਨ ਮਗ੍ਗੇਨ ਗਚ੍ਛਨ੍ਤੋ ਸੋਭਤਿ, ਏਵਂ ਤਵ ਕਾਯਰਥੋਪਿ ਪਞ੍ਞਾਵੁਦ੍ਧਿਸੇਵਿਤਾਯ ਸਮਤਲਂ ਉਜੁਮਗ੍ਗਂ ਪਟਿਪਜ੍ਜਿਤ੍ਵਾ ਹਤਰਜੋ ਹੋਤੁ. ਸਤਿਪਤੋਦੋ ਧੀਰਸ੍ਸਾਤਿ ਪਣ੍ਡਿਤਸ੍ਸ ਤਵ ਤਸ੍ਮਿਂ ਕਾਯਰਥੇ ਸੁਪਤਿਟ੍ਠਿਤਸਤਿਪਤੋਦੋ ਹੋਤੁ. ਧਿਤਿ ਯੋਗੋ ਚ ਰਸ੍ਮਿਯੋਤਿ ਅਬ੍ਬੋਚ੍ਛਿਨ੍ਨਵੀਰਿਯਸਙ੍ਖਾਤਾ ਧਿਤਿ ਚ ਹਿਤਪ੍ਪਟਿਪਤ੍ਤਿਯਂ ਯੁਞ੍ਜਨਭਾਵਸਙ੍ਖਾਤੋ ਯੋਗੋ ਚ ਤਵ ਤਸ੍ਮਿਂ ਕਾਯਰਥੇ ਵਟ੍ਟਿਤਾ ਥਿਰਾ ਰਸ੍ਮਿਯੋ ਹੋਨ੍ਤੁ. ਮਨੋ ਦਨ੍ਤਂ ਪਥਂ ਨੇਤਿ, ਸਮਦਨ੍ਤੇਹਿ ਵਾਹਿਭੀਤਿ ਯਥਾ ਰਥੋ ਨਾਮ ਵਿਸਮਦਨ੍ਤੇਹਿ ਸਿਨ੍ਧਵੇਹਿ ਉਪ੍ਪਥਂ ਯਾਤਿ, ਸਮਦਨ੍ਤੇਹਿ ਸਮਸਿਕ੍ਖਿਤੇਹਿ ਯੁਤ੍ਤੋ ਉਜੁਪਥਮੇਵ ਅਨ੍ਵੇਤਿ, ਏਵਂ ਮਨੋਪਿ ਦਨ੍ਤਂ ਨਿਬ੍ਬਿਸੇਵਨਂ ਕੁਮ੍ਮਗ੍ਗਂ ਪਹਾਯ ਉਜੁਮਗ੍ਗਂ ਗਣ੍ਹਾਤਿ. ਤਸ੍ਮਾ ਸੁਦਨ੍ਤਂ ਆਚਾਰਸਮ੍ਪਨ੍ਨਂ ਚਿਤ੍ਤਂ ਤਵ ਕਾਯਰਥਸ੍ਸ ਸਿਨ੍ਧਵਕਿਚ੍ਚਂ ਸਾਧੇਤੁ. ਇਚ੍ਛਾਲੋਭੋ ਚਾਤਿ ਅਪ੍ਪਤ੍ਤੇਸੁ ਵਤ੍ਥੂਸੁ ਇਚ੍ਛਾ, ਪਤ੍ਤੇਸੁ ਲੋਭੋਤਿ ਅਯਂ ਇਚ੍ਛਾ ਚ ਲੋਭੋ ਚ ਕੁਮ੍ਮਗ੍ਗੋ ਨਾਮ. ਕੁਟਿਲੋ ਅਨੁਜੁਮਗ੍ਗੋ ਅਪਾਯਮੇਵ ਨੇਤਿ. ਦਸਕੁਸਲਕਮ੍ਮਪਥਵਸੇਨ ਪਨ ਅਟ੍ਠਙ੍ਗਿਕਮਗ੍ਗਵਸੇਨ ਵਾ ਪਵਤ੍ਤੋ ਸੀਲਸਂਯਮੋ ਉਜੁਮਗ੍ਗੋ ਨਾਮ. ਸੋ ਤਵ ਕਾਯਰਥਸ੍ਸ ਮਗ੍ਗੋ ਹੋਤੁ.

ਰੂਪੇਤਿ ¶ ਏਤੇਸੁ ਮਨਾਪਿਯੇਸੁ ਰੂਪਾਦੀਸੁ ਕਾਮਗੁਣੇਸੁ ਨਿਮਿਤ੍ਤਂ ਗਹੇਤ੍ਵਾ ਧਾਵਨ੍ਤਸ੍ਸ ਤਵ ਕਾਯਰਥਸ੍ਸ ਉਪ੍ਪਥਂ ਪਟਿਪਨ੍ਨਸ੍ਸ ਰਾਜਰਥਸ੍ਸ ਸਿਨ੍ਧਵੇ ਆਕੋਟੇਤ੍ਵਾ ਨਿਵਾਰਣਪਤੋਦਯਟ੍ਠਿ ਵਿਯ ਪਞ੍ਞਾ ਆਕੋਟਨੀ ਹੋਤੁ. ਸਾ ਹਿ ਤਂ ਉਪ੍ਪਥਗਮਨਤੋ ਨਿਵਾਰੇਤ੍ਵਾ ਉਜੁਂ ਸੁਚਰਿਤਮਗ੍ਗਂ ਆਰੋਪੇਸ੍ਸਤਿ. ਤਤ੍ਥ ਅਤ੍ਤਾਵ ਸਾਰਥੀਤਿ ਤਸ੍ਮਿਂ ਪਨ ਤੇ ਕਾਯਰਥੇ ਅਞ੍ਞੋ ਸਾਰਥਿ ਨਾਮ ਨਤ੍ਥਿ, ਤਵ ਅਤ੍ਤਾਵ ਸਾਰਥਿ ਹੋਤੁ. ਸਚੇ ਏਤੇਨ ਯਾਨੇਨਾਤਿ ਮਹਾਰਾਜ, ਯਸ੍ਸੇਤਂ ਏਵਰੂਪਂ ਯਾਨਂ ਸਚੇ ਅਤ੍ਥਿ, ਏਤੇਨ ਯਾਨੇਨ. ਸਮਚਰਿਯਾ ਦਲ਼੍ਹਾ ਧਿਤੀਤਿ ਯਸ੍ਸ ਸਮਚਰਿਯਾ ਚ ਧਿਤਿ ਚ ਦਲ਼੍ਹਾ ਹੋਤਿ ਥਿਰਾ, ਸੋ ਏਤੇਨ ਯਾਨੇਨ ਯਸ੍ਮਾ ਏਸ ਰਥੋ ਸਬ੍ਬਕਾਮਦੁਹੋ ਰਾਜ, ਯਥਾਧਿਪ੍ਪੇਤੇ ਸਬ੍ਬਕਾਮੇ ਦੇਤਿ, ਤਸ੍ਮਾ ਨ ਜਾਤੁ ਨਿਰਯਂ ਵਜੇ, ਏਕਂਸੇਨੇਤਂ ਧਾਰੇਹਿ, ਏਵਰੂਪੇਨ ਯਾਨੇਨ ਨਿਰਯਂ ਨ ਗਚ੍ਛਸੀਤਿ ਅਤ੍ਥੋ. ਇਤਿ ਖੋ, ਮਹਾਰਾਜ, ਯਂ ਮਂ ਅਵਚ ‘‘ਆਚਿਕ੍ਖ ਮੇ, ਨਾਰਦ, ਸੁਦ੍ਧਿਮਗ੍ਗਂ, ਯਥਾ ਅਹਂ ਨੋ ਨਿਰਯੇ ਪਤੇਯ੍ਯ’’ਨ੍ਤਿ, ਅਯਂ ਤੇ ਸੋ ਮਯਾ ਅਨੇਕਪਰਿਯਾਯੇਨ ਅਕ੍ਖਾਤੋਤਿ.

ਏਵਮਸ੍ਸ ¶ ਧਮ੍ਮਂ ਦੇਸੇਤ੍ਵਾ ਮਿਚ੍ਛਾਦਿਟ੍ਠਿਂ ਜਹਾਪੇਤ੍ਵਾ ਸੀਲੇ ਪਤਿਟ੍ਠਾਪੇਤ੍ਵਾ ‘‘ਇਤੋ ਪਟ੍ਠਾਯ ਪਾਪਮਿਤ੍ਤੇ ਪਹਾਯ ਕਲ੍ਯਾਣਮਿਤ੍ਤੇ ਉਪਸਙ੍ਕਮ, ਨਿਚ੍ਚਂ ਅਪ੍ਪਮਤ੍ਤੋ ਹੋਹੀ’’ਤਿ ਓਵਾਦਂ ਦਤ੍ਵਾ ਰਾਜਧੀਤੁ ਗੁਣਂ ਵਣ੍ਣੇਤ੍ਵਾ ਰਾਜਪਰਿਸਾਯ ¶ ਚ ਰਾਜੋਰੋਧਾਨਞ੍ਚ ਓਵਾਦਂ ਦਤ੍ਵਾ ਮਹਨ੍ਤੇਨਾਨੁਭਾਵੇਨ ਤੇਸਂ ਪਸ੍ਸਨ੍ਤਾਨਞ੍ਞੇਵ ਬ੍ਰਹ੍ਮਲੋਕਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਮਯਾ ਦਿਟ੍ਠਿਜਾਲਂ ਭਿਨ੍ਦਿਤ੍ਵਾ ਉਰੁਵੇਲਕਸ੍ਸਪੋ ਦਮਿਤੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਨ੍ਤੋ ਇਮਾ ਗਾਥਾ ਅਭਾਸਿ –

੧੩੪੩.

‘‘ਅਲਾਤੋ ਦੇਵਦਤ੍ਤੋਸਿ, ਸੁਨਾਮੋ ਆਸਿ ਭਦ੍ਦਜਿ;

ਵਿਜਯੋ ਸਾਰਿਪੁਤ੍ਤੋਸਿ, ਮੋਗ੍ਗਲ੍ਲਾਨੋਸਿ ਬੀਜਕੋ.

੧੩੪੪.

‘‘ਸੁਨਕ੍ਖਤ੍ਤੋ ਲਿਚ੍ਛਵਿਪੁਤ੍ਤੋ, ਗੁਣੋ ਆਸਿ ਅਚੇਲਕੋ;

ਆਨਨ੍ਦੋ ਸਾ ਰੁਚਾ ਆਸਿ, ਯਾ ਰਾਜਾਨਂ ਪਸਾਦਯਿ.

੧੩੪੫.

‘‘ਉਰੁਵੇਲਕਸ੍ਸਪੋ ਰਾਜਾ, ਪਾਪਦਿਟ੍ਠਿ ਤਦਾ ਅਹੁ;

ਮਹਾਬ੍ਰਹ੍ਮਾ ਬੋਧਿਸਤ੍ਤੋ, ਏਵਂ ਧਾਰੇਥ ਜਾਤਕ’’ਨ੍ਤਿ.

ਮਹਾਨਾਰਦਕਸ੍ਸਪਜਾਤਕਵਣ੍ਣਨਾ ਅਟ੍ਠਮਾ.

[੫੪੬] ੯. ਵਿਧੁਰਜਾਤਕਵਣ੍ਣਨਾ

ਚਤੁਪੋਸਥਕਣ੍ਡਂ

ਪਣ੍ਡੁ ¶ ¶ ਕਿਸਿਯਾਸਿ ਦੁਬ੍ਬਲਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਤ੍ਤਨੋ ਪਞ੍ਞਾਪਾਰਮਿਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਸਤ੍ਥਾ ਮਹਾਪਞ੍ਞੋ ਪੁਥੁਪਞ੍ਞੋ ਗਮ੍ਭੀਰਪਞ੍ਞੋ ਜਵਨਪਞ੍ਞੋ ਹਾਸਪਞ੍ਞੋ ਤਿਕ੍ਖਪਞ੍ਞੋ ਨਿਬ੍ਬੇਧਿਕਪਞ੍ਞੋ ਪਰਪ੍ਪਵਾਦਮਦ੍ਦਨੋ, ਅਤ੍ਤਨੋ ਪਞ੍ਞਾਨੁਭਾਵੇਨ ਖਤ੍ਤਿਯਪਣ੍ਡਿਤਾਦੀਹਿ ਅਭਿਸਙ੍ਖਤੇ ਸੁਖੁਮਪਞ੍ਹੇ ਭਿਨ੍ਦਿਤ੍ਵਾ ਤੇ ਦਮੇਤ੍ਵਾ ਨਿਬ੍ਬਿਸੇਵਨੇ ਕਤ੍ਵਾ ਤੀਸੁ ਸਰਣੇਸੁ ਚੇਵ ਸੀਲੇਸੁ ਚ ਪਤਿਟ੍ਠਾਪੇਤ੍ਵਾ ਅਮਤਗਾਮਿਮਗ੍ਗਂ ਪਟਿਪਾਦੇਸੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਯਂ ਤਥਾਗਤੋ ਪਰਮਾਭਿਸਮ੍ਬੋਧਿਪ੍ਪਤ੍ਤੋ ਪਰਪ੍ਪਵਾਦਂ ਭਿਨ੍ਦਿਤ੍ਵਾ ਖਤ੍ਤਿਯਾਦਯੋ ਦਮੇਯ੍ਯ. ਪੁਰਿਮਭਵਸ੍ਮਿਞ੍ਹਿ ਬੋਧਿਞਾਣਂ ਪਰਿਯੇਸਨ੍ਤੋਪਿ ਤਥਾਗਤੋ ਪਞ੍ਞਵਾ ਪਰਪ੍ਪਵਾਦਮਦ੍ਦਨੋਯੇਵ. ਤਥਾ ਹਿ ਅਹਂ ਵਿਧੁਰਕਾਲੇ ਸਟ੍ਠਿਯੋਜਨੁਬ੍ਬੇਧੇ ਕਾਲ਼ਪਬ੍ਬਤਮੁਦ੍ਧਨਿ ਪੁਣ੍ਣਕਂ ਨਾਮ ਯਕ੍ਖਸੇਨਾਪਤਿਂ ਅਤ੍ਤਨੋ ਞਾਣਬਲੇਨੇਵ ਦਮੇਤ੍ਵਾ ਨਿਬ੍ਬਿਸੇਵਨਂ ਕਤ੍ਵਾ ਪਞ੍ਚਸੀਲੇਸੁ ਪਤਿਟ੍ਠਾਪੇਨ੍ਤੋ ਅਤ੍ਤਨੋ ਜੀਵਿਤਂ ਦਾਪੇਸਿ’’ਨ੍ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਕੁਰੁਰਟ੍ਠੇ ਇਨ੍ਦਪਤ੍ਥਨਗਰੇ ਧਨਞ੍ਚਯਕੋਰਬ੍ਯੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਵਿਧੁਰਪਣ੍ਡਿਤੋ ਨਾਮ ਅਮਚ੍ਚੋ ਤਸ੍ਸ ਅਤ੍ਥਧਮ੍ਮਾਨੁਸਾਸਕੋ ਅਹੋਸਿ. ਸੋ ਮਧੁਰਕਥੋ ਮਹਾਧਮ੍ਮਕਥਿਕੋ ਸਕਲਜਮ੍ਬੁਦੀਪੇ ਰਾਜਾਨੋ ਹਤ੍ਥਿਕਨ੍ਤਵੀਣਾਸਰੇਨ ਪਲੁਦ੍ਧਹਤ੍ਥਿਨੋ ਵਿਯ ¶ ਅਤ੍ਤਨੋ ਮਧੁਰਧਮ੍ਮਦੇਸਨਾਯ ਪਲੋਭੇਤ੍ਵਾ ਤੇਸਂ ਸਕਸਕਰਜ੍ਜਾਨਿ ਗਨ੍ਤੁਂ ਅਦਦਮਾਨੋ ਬੁਦ੍ਧਲੀਲਾਯ ਮਹਾਜਨਸ੍ਸ ਧਮ੍ਮਂ ਦੇਸੇਨ੍ਤੋ ਮਹਨ੍ਤੇਨ ਯਸੇਨ ਤਸ੍ਮਿਂ ਨਗਰੇ ਪਟਿਵਸਿ.

ਤਦਾ ਹਿ ਬਾਰਾਣਸਿਯਮ੍ਪਿ ਗਿਹਿਸਹਾਯਕਾ ਚਤ੍ਤਾਰੋ ਬ੍ਰਾਹ੍ਮਣਮਹਾਸਾਲਾ ਮਹਲ੍ਲਕਕਾਲੇ ਕਾਮੇਸੁ ਆਦੀਨਵਂ ਦਿਸ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਵਨਮੂਲਫਲਾਹਾਰਾ ਤਤ੍ਥੇਵ ਚਿਰਂ ਵਸਿਤ੍ਵਾ ਲੋਣਮ੍ਬਿਲਸੇਵਨਤ੍ਥਾਯ ਚਾਰਿਕਂ ¶ ਚਰਮਾਨਾ ਅਙ੍ਗਰਟ੍ਠੇ ¶ ਕਾਲਚਮ੍ਪਾਨਗਰਂ ਪਤ੍ਵਾ ਰਾਜੁਯ੍ਯਾਨੇ ਵਸਿਤ੍ਵਾ ਪੁਨਦਿਵਸੇ ਭਿਕ੍ਖਾਯ ਨਗਰਂ ਪਵਿਸਿਂਸੁ. ਤਤ੍ਥ ਚਤ੍ਤਾਰੋ ਸਹਾਯਕਾ ਕੁਟੁਮ੍ਬਿਕਾ ਤੇਸਂ ਇਰਿਯਾਪਥੇਸੁ ਪਸੀਦਿਤ੍ਵਾ ਵਨ੍ਦਿਤ੍ਵਾ ਭਿਕ੍ਖਾਭਾਜਨਂ ਗਹੇਤ੍ਵਾ ਏਕੇਕਂ ਅਤ੍ਤਨੋ ਨਿਵੇਸਨੇ ਨਿਸੀਦਾਪੇਤ੍ਵਾ ਪਣੀਤੇਨ ਆਹਾਰੇਨ ਪਰਿਵਿਸਿਤ੍ਵਾ ਪਟਿਞ੍ਞਂ ਗਾਹਾਪੇਤ੍ਵਾ ਉਯ੍ਯਾਨੇਯੇਵ ਵਾਸਾਪੇਸੁਂ. ਤੇ ਚਤ੍ਤਾਰੋ ਤਾਪਸਾ ਚਤੁਨ੍ਨਂ ਕੁਟੁਮ੍ਬਿਕਾਨਂ ਗੇਹੇਸੁ ਨਿਬਦ੍ਧਂ ਭੁਞ੍ਜਿਤ੍ਵਾ ਦਿਵਾਵਿਹਾਰਤ੍ਥਾਯ ਏਕੋ ਤਾਪਸੋ ਤਾਵਤਿਂਸਭਵਨਂ ਗਚ੍ਛਤਿ, ਏਕੋ ਨਾਗਭਵਨਂ, ਏਕੋ ਸੁਪਣ੍ਣਭਵਨਂ, ਏਕੋ ਕੋਰਬ੍ਯਰਞ੍ਞੋ ਮਿਗਾਜਿਨਉਯ੍ਯਾਨਂ ਗਚ੍ਛਤਿ. ਤੇਸੁ ਯੋ ਦੇਵਲੋਕਂ ਗਨ੍ਤ੍ਵਾ ਦਿਵਾਵਿਹਾਰਂ ਕਰੋਤਿ, ਸੋ ਸਕ੍ਕਸ੍ਸ ਯਸਂ ਓਲੋਕੇਤ੍ਵਾ ਅਤ੍ਤਨੋ ਉਪਟ੍ਠਾਕਸ੍ਸ ਤਮੇਵ ਵਣ੍ਣੇਤਿ. ਯੋ ਨਾਗਭਵਨਂ ਗਨ੍ਤ੍ਵਾ ਦਿਵਾਵਿਹਾਰਂ ਕਰੋਤਿ, ਸੋ ਨਾਗਰਾਜਸ੍ਸ ਸਮ੍ਪਤ੍ਤਿਂ ਓਲੋਕੇਤ੍ਵਾ ਅਤ੍ਤਨੋ ਉਪਟ੍ਠਾਕਸ੍ਸ ਤਮੇਵ ਵਣ੍ਣੇਤਿ. ਯੋ ਸੁਪਣ੍ਣਭਵਨਂ ਗਨ੍ਤ੍ਵਾ ਦਿਵਾਵਿਹਾਰਂ ਕਰੋਤਿ, ਸੋ ਸੁਪਣ੍ਣਰਾਜਸ੍ਸ ਵਿਭੂਤਿਂ ਓਲੋਕੇਤ੍ਵਾ ਅਤ੍ਤਨੋ ਉਪਟ੍ਠਾਕਸ੍ਸ ਤਮੇਵ ਵਣ੍ਣੇਤਿ. ਯੋ ਧਨਞ੍ਚਯਕੋਰਬ੍ਯਰਾਜਸ੍ਸ ਉਯ੍ਯਾਨਂ ਗਨ੍ਤ੍ਵਾ ਦਿਵਾਵਿਹਾਰਂ ਕਰੋਤਿ, ਸੋ ਧਨਞ੍ਚਯਕੋਰਬ੍ਯਰਞ੍ਞੋ ਸਿਰਿਸੋਭਗ੍ਗਂ ਓਲੋਕੇਤ੍ਵਾ ਅਤ੍ਤਨੋ ਉਪਟ੍ਠਾਕਸ੍ਸ ਤਮੇਵ ਵਣ੍ਣੇਤਿ.

ਤੇ ਚਤ੍ਤਾਰੋਪਿ ਜਨਾ ਤਂ ਤਦੇਵ ਠਾਨਂ ਪਤ੍ਥੇਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਆਯੁਪਰਿਯੋਸਾਨੇ ਏਕੋ ਸਕ੍ਕੋ ਹੁਤ੍ਵਾ ਨਿਬ੍ਬਤ੍ਤਿ, ਏਕੋ ਸਪੁਤ੍ਤਦਾਰੋ ਨਾਗਭਵਨੇ ਨਾਗਰਾਜਾ ਹੁਤ੍ਵਾ ਨਿਬ੍ਬਤ੍ਤਿ, ਏਕੋ ਸੁਪਣ੍ਣਭਵਨੇ ਸਿਮ੍ਬਲਿਵਿਮਾਨੇ ਸੁਪਣ੍ਣਰਾਜਾ ਹੁਤ੍ਵਾ ਨਿਬ੍ਬਤ੍ਤਿ. ਏਕੋ ਧਨਞ੍ਚਯਕੋਰਬ੍ਯਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਤੇਪਿ ਤਾਪਸਾ ਅਪਰਿਹੀਨਜ੍ਝਾਨਾ ਕਾਲਂ ਕਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਂਸੁ. ਕੋਰਬ੍ਯਕੁਮਾਰੋ ਵੁਡ੍ਢਿਮਨ੍ਵਾਯ ਪਿਤੁ ਅਚ੍ਚਯੇਨ ਰਜ੍ਜੇ ਪਤਿਟ੍ਠਹਿਤ੍ਵਾ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਸਿ. ਸੋ ਪਨ ਜੂਤਵਿਤ੍ਤਕੋ ਅਹੋਸਿ. ਸੋ ਵਿਧੁਰਪਣ੍ਡਿਤਸ੍ਸ ਓਵਾਦੇ ਠਤ੍ਵਾ ਦਾਨਂ ਦੇਤਿ, ਸੀਲਂ ਰਕ੍ਖਤਿ, ਉਪੋਸਥਂ ਉਪਵਸਤਿ.

ਸੋ ਏਕਦਿਵਸਂ ਸਮਾਦਿਨ੍ਨੁਪੋਸਥੋ ‘‘ਵਿਵੇਕਮਨੁਬ੍ਰੂਹਿਸ੍ਸਾਮੀ’’ਤਿ ¶ ਉਯ੍ਯਾਨਂ ਗਨ੍ਤ੍ਵਾ ਮਨੁਞ੍ਞਟ੍ਠਾਨੇ ਨਿਸੀਦਿਤ੍ਵਾ ਸਮਣਧਮ੍ਮਂ ਅਕਾਸਿ. ਸਕ੍ਕੋਪਿ ਸਮਾਦਿਨ੍ਨੁਪੋਸਥੋ ‘‘ਦੇਵਲੋਕੇ ਪਲਿਬੋਧੋ ਹੋਤੀ’’ਤਿ ਮਨੁਸ੍ਸਲੋਕੇ ਤਮੇਵ ਉਯ੍ਯਾਨਂ ਆਗਨ੍ਤ੍ਵਾ ਏਕਸ੍ਮਿਂ ਮਨੁਞ੍ਞਟ੍ਠਾਨੇ ਨਿਸੀਦਿਤ੍ਵਾ ਸਮਣਧਮ੍ਮਂ ਅਕਾਸਿ. ਵਰੁਣਨਾਗਰਾਜਾਪਿ ਸਮਾਦਿਨ੍ਨੁਪੋਸਥੋ ‘‘ਨਾਗਭਵਨੇ ਪਲਿਬੋਧੋ ਹੋਤੀ’’ਤਿ ਤਤ੍ਥੇਵਾਗਨ੍ਤ੍ਵਾ ਏਕਸ੍ਮਿਂ ਮਨੁਞ੍ਞਟ੍ਠਾਨੇ ਨਿਸੀਦਿਤ੍ਵਾ ¶ ਸਮਣਧਮ੍ਮਂ ਅਕਾਸਿ. ਸੁਪਣ੍ਣਰਾਜਾਪਿ ਸਮਾਦਿਨ੍ਨੁਪੋਸਥੋ ‘‘ਸੁਪਣ੍ਣਭਵਨੇ ਪਲਿਬੋਧੋ ਹੋਤੀ’’ਤਿ ਤਤ੍ਥੇਵਾਗਨ੍ਤ੍ਵਾ ਏਕਸ੍ਮਿਂ ਮਨੁਞ੍ਞਟ੍ਠਾਨੇ ਨਿਸੀਦਿਤ੍ਵਾ ਸਮਣਧਮ੍ਮਂ ਅਕਾਸਿ. ਤੇਪਿ ਚਤ੍ਤਾਰੋ ਜਨਾ ਸਾਯਨ੍ਹਸਮਯੇ ਸਕਟ੍ਠਾਨੇਹਿ ਨਿਕ੍ਖਮਿਤ੍ਵਾ ਮਙ੍ਗਲਪੋਕ੍ਖਰਣਿਤੀਰੇ ਸਮਾਗਨ੍ਤ੍ਵਾ ਅਞ੍ਞਮਞ੍ਞਂ ਓਲੋਕੇਤ੍ਵਾ ਪੁਬ੍ਬਸਿਨੇਹਵਸੇਨ ਸਮਗ੍ਗਾ ਸਮ੍ਮੋਦਮਾਨਾ ਹੁਤ੍ਵਾ ਅਞ੍ਞਮਞ੍ਞਂ ਮੇਤ੍ਤਚਿਤ੍ਤਂ ਉਪਟ੍ਠਪੇਤ੍ਵਾ ਮਧੁਰਪਟਿਸਨ੍ਥਾਰਂ ਕਰਿਂਸੁ. ਤੇਸੁ ਸਕ੍ਕੋ ਮਙ੍ਗਲਸਿਲਾਪਟ੍ਟੇ ਨਿਸੀਦਿ, ਇਤਰੇਪਿ ਅਤ੍ਤਨੋ ਅਤ੍ਤਨੋ ਯੁਤ੍ਤਾਸਨਂ ਞਤ੍ਵਾ ਨਿਸੀਦਿਂਸੁ. ਅਥ ਨੇ ਸਕ੍ਕੋ ਆਹ ‘‘ਮਯਂ ਚਤ੍ਤਾਰੋਪਿ ਰਾਜਾਨੋਵ ¶ , ਅਮ੍ਹੇਸੁ ਪਨ ਕਸ੍ਸ ਸੀਲਂ ਮਹਨ੍ਤ’’ਨ੍ਤਿ? ਅਥ ਨਂ ਵਰੁਣਨਾਗਰਾਜਾ ਆਹ ‘‘ਤੁਮ੍ਹਾਕਂ ਤਿਣ੍ਣਂ ਜਨਾਨਂ ਸੀਲਤੋ ਮਯ੍ਹਂ ਸੀਲਂ ਮਹਨ੍ਤ’’ਨ੍ਤਿ. ‘‘ਕਿਮੇਤ੍ਥ ਕਾਰਣ’’ਨ੍ਤਿ? ‘‘ਅਯਂ ਸੁਪਣ੍ਣਰਾਜਾ ਅਮ੍ਹਾਕਂ ਜਾਤਾਨਮ੍ਪਿ ਅਜਾਤਾਨਮ੍ਪਿ ਪਚ੍ਚਾਮਿਤ੍ਤੋਵ, ਅਹਂ ਏਵਰੂਪਂ ਅਮ੍ਹਾਕਂ ਜੀਵਿਤਕ੍ਖਯਕਰਂ ਪਚ੍ਚਾਮਿਤ੍ਤਂ ਦਿਸ੍ਵਾਪਿ ਕੋਧਂ ਨ ਕਰੋਮਿ, ਇਮਿਨਾ ਕਾਰਣੇਨ ਮਮ ਸੀਲਂ ਮਹਨ੍ਤ’’ਨ੍ਤਿ ਵਤ੍ਵਾ ਇਦਂ ਦਸਕਨਿਪਾਤੇ ਚਤੁਪੋਸਥਜਾਤਕੇ ਪਠਮਂ ਗਾਥਮਾਹ –

‘‘ਯੋ ਕੋਪਨੇਯ੍ਯੇ ਨ ਕਰੋਤਿ ਕੋਪਂ, ਨ ਕੁਜ੍ਝਤਿ ਸਪ੍ਪੁਰਿਸੋ ਕਦਾਚਿ;

ਕੁਦ੍ਧੋਪਿ ਸੋ ਨਾਵਿਕਰੋਤਿ ਕੋਪਂ, ਤਂ ਵੇ ਨਰਂ ਸਮਣਮਾਹੁ ਲੋਕੇ’’ਤਿ. (ਜਾ. ੧.੧੦.੨੪);

ਤਤ੍ਥ ਯੋਤਿ ਖਤ੍ਤਿਯਾਦੀਸੁ ਯੋ ਕੋਚਿ. ਕੋਪਨੇਯ੍ਯੇਤਿ ਕੁਜ੍ਝਿਤਬ੍ਬਯੁਤ੍ਤਕੇ ਪੁਗ੍ਗਲੇ ਖਨ੍ਤੀਵਾਦੀਤਾਪਸੋ ਵਿਯ ਕੋਪਂ ਨ ਕਰੋਤਿ. ਕਦਾਚੀਤਿ ਯੋ ਕਿਸ੍ਮਿਞ੍ਚਿ ਕਾਲੇ ਨ ਕੁਜ੍ਝਤੇਵ. ਕੁਦ੍ਧੋਪੀਤਿ ਸਚੇ ਪਨ ਸੋ ਸਪ੍ਪੁਰਿਸੋ ਕੁਜ੍ਝਤਿ, ਅਥ ਕੁਦ੍ਧੋਪਿ ਤਂ ਕੋਪਂ ਨਾਵਿਕਰੋਤਿ ਚੂਲ਼ਬੋਧਿਤਾਪਸੋ ਵਿਯ. ਤਂ ਵੇ ਨਰਨ੍ਤਿ ਮਹਾਰਾਜਾਨੋ ਤਂ ਵੇ ਪੁਰਿਸਂ ਸਮਿਤਪਾਪਤਾਯ ਲੋਕੇ ਪਣ੍ਡਿਤਾ ‘‘ਸਮਣ’’ਨ੍ਤਿ ਕਥੇਨ੍ਤਿ. ਇਮੇ ¶ ਪਨ ਗੁਣਾ ਮਯਿ ਸਨ੍ਤਿ, ਤਸ੍ਮਾ ਮਮੇਵ ਸੀਲਂ ਮਹਨ੍ਤਨ੍ਤਿ.

ਤਂ ਸੁਤ੍ਵਾ ਸੁਪਣ੍ਣਰਾਜਾ ‘‘ਅਯਂ ਨਾਗੋ ਮਮ ਅਗ੍ਗਭਕ੍ਖੋ, ਯਸ੍ਮਾ ਪਨਾਹਂ ਏਵਰੂਪਂ ਅਗ੍ਗਭਕ੍ਖਂ ਦਿਸ੍ਵਾਪਿ ਖੁਦਂ ਅਧਿਵਾਸੇਤ੍ਵਾ ਆਹਾਰਹੇਤੁ ਪਾਪਂ ਨ ਕਰੋਮਿ, ਤਸ੍ਮਾ ਮਮੇਵ ਸੀਲਂ ਮਹਨ੍ਤ’’ਨ੍ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਊਨੂਦਰੋ ¶ ਯੋ ਸਹਤੇ ਜਿਘਚ੍ਛਂ, ਦਨ੍ਤੋ ਤਪਸ੍ਸੀ ਮਿਤਪਾਨਭੋਜਨੋ;

ਆਹਾਰਹੇਤੁ ਨ ਕਰੋਤਿ ਪਾਪਂ, ਤਂ ਵੇ ਨਰਂ ਸਮਣਮਾਹੁ ਲੋਕੇ’’ਤਿ. (ਜਾ. ੧.੧੦.੨੫);

ਤਤ੍ਥ ਦਨ੍ਤੋਤਿ ਇਨ੍ਦ੍ਰਿਯਦਮਨੇਨ ਸਮਨ੍ਨਾਗਤੋ. ਤਪਸ੍ਸੀਤਿ ਤਪਨਿਸ੍ਸਿਤਕੋ. ਆਹਾਰਹੇਤੂਤਿ ਅਤਿਜਿਘਚ੍ਛਪਿਲ਼ਿਤੋਪਿ ਯੋ ਪਾਪਂ ਲਾਮਕਕਮ੍ਮਂ ਨ ਕਰੋਤਿ ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰੋ ਵਿਯ. ਅਹਂ ਪਨਜ੍ਜ ਆਹਾਰਹੇਤੁ ਪਾਪਂ ਨ ਕਰੋਮਿ, ਤਸ੍ਮਾ ਮਮੇਵ ਸੀਲਂ ਮਹਨ੍ਤਨ੍ਤਿ.

ਤਤੋ ਸਕ੍ਕੋ ਦੇਵਰਾਜਾ ‘‘ਅਹਂ ਨਾਨਪ੍ਪਕਾਰਂ ਸੁਖਪਦਟ੍ਠਾਨਂ ਦੇਵਲੋਕਸਮ੍ਪਤ੍ਤਿਂ ਪਹਾਯ ਸੀਲਰਕ੍ਖਣਤ੍ਥਾਯ ਮਨੁਸ੍ਸਲੋਕਂ ਆਗਤੋ, ਤਸ੍ਮਾ ਮਮੇਵ ਸੀਲਂ ਮਹਨ੍ਤ’’ਨ੍ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਖਿਡ੍ਡਂ ¶ ਰਤਿਂ ਵਿਪ੍ਪਜਹਿਤ੍ਵਾਨ ਸਬ੍ਬਂ, ਨ ਚਾਲਿਕਂ ਭਾਸਤਿ ਕਿਞ੍ਚਿ ਲੋਕੇ;

ਵਿਭੂਸਟ੍ਠਾਨਾ ਵਿਰਤੋ ਮੇਥੁਨਸ੍ਮਾ, ਤਂ ਵੇ ਨਰਂ ਸਮਣਮਾਹੁ ਲੋਕੇ’’ਤਿ. (ਜਾ. ੧.੧੦.੨੬);

ਤਤ੍ਥ ਖਿਡ੍ਡਨ੍ਤਿ ਕਾਯਿਕਵਾਚਸਿਕਖਿਡ੍ਡਂ. ਰਤਿਨ੍ਤਿ ਦਿਬ੍ਬਕਾਮਗੁਣਰਤਿਂ. ਕਿਞ੍ਚੀਤਿ ਅਪ੍ਪਮਤ੍ਤਕਮ੍ਪਿ. ਵਿਭੂਸਟ੍ਠਾਨਾਤਿ ਮਂਸਵਿਭੂਸਾ ਛਵਿਵਿਭੂਸਾਤਿ ਦ੍ਵੇ ਵਿਭੂਸਾ. ਤਤ੍ਥ ਅਜ੍ਝੋਹਰਣੀਯਾਹਾਰੋ ਮਂਸਵਿਭੂਸਾ ਨਾਮ, ਮਾਲਾਗਨ੍ਧਾਦੀਨਿ ਛਵਿਵਿਭੂਸਾ ਨਾਮ, ਯੇਨ ਅਕੁਸਲਚਿਤ੍ਤੇਨ ਧਾਰੀਯਤਿ, ਤਂ ਤਸ੍ਸ ਠਾਨਂ, ਤਤੋ ਵਿਰਤੋ ਮੇਥੁਨਸੇਵਨਤੋ ਚ ਯੋ ਪਟਿਵਿਰਤੋ. ਤਂ ਵੇ ਨਰਂ ਸਮਣਮਾਹੁ ਲੋਕੇਤਿ ਅਹਂ ਅਜ੍ਜ ਦੇਵਚ੍ਛਰਾਯੋ ਪਹਾਯ ਇਧਾਗਨ੍ਤ੍ਵਾ ਸਮਣਧਮ੍ਮਂ ਕਰੋਮਿ, ਤਸ੍ਮਾ ਮਮੇਵ ਸੀਲਂ ਮਹਨ੍ਤਨ੍ਤਿ. ਏਵਂ ਸਕ੍ਕੋਪਿ ਅਤ੍ਤਨੋ ਸੀਲਮੇਵ ਵਣ੍ਣੇਤਿ.

ਤਂ ਸੁਤ੍ਵਾ ਧਨਞ੍ਚਯਰਾਜਾ ‘‘ਅਹਂ ਅਜ੍ਜ ਮਹਨ੍ਤਂ ਪਰਿਗ੍ਗਹਂ ਸੋਲ਼ਸਸਹਸ੍ਸਨਾਟਕਿਤ੍ਥਿਪਰਿਪੁਣ੍ਣਂ ਅਨ੍ਤੇਪੁਰਂ ਚਜਿਤ੍ਵਾ ਉਯ੍ਯਾਨੇ ਸਮਣਧਮ੍ਮਂ ਕਰੋਮਿ, ਤਸ੍ਮਾ ਮਮੇਵ ਸੀਲਂ ਮਹਨ੍ਤ’’ਨ੍ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਪਰਿਗ੍ਗਹਂ ¶ ¶ ਲੋਭਧਮ੍ਮਞ੍ਚ ਸਬ੍ਬਂ, ਯੋ ਵੇ ਪਰਿਞ੍ਞਾਯ ਪਰਿਚ੍ਚਜੇਤਿ;

ਦਨ੍ਤਂ ਠਿਤਤ੍ਤਂ ਅਮਮਂ ਨਿਰਾਸਂ, ਤਂ ਵੇ ਨਰਂ ਸਮਣਮਾਹੁ ਲੋਕੇ’’ਤਿ. (ਜਾ. ੧.੧੦.੨੭);

ਤਤ੍ਥ ਪਰਿਗ੍ਗਹਨ੍ਤਿ ਨਾਨਪ੍ਪਕਾਰਂ ਵਤ੍ਥੁਕਾਮਂ. ਲੋਭਧਮ੍ਮਨ੍ਤਿ ਤਸ੍ਮਿਂ ਉਪ੍ਪਜ੍ਜਨਤਣ੍ਹਂ. ਪਰਿਞ੍ਞਾਯਾਤਿ ਞਾਤਪਰਿਞ੍ਞਾ, ਤੀਰਣਪਰਿਞ੍ਞਾ, ਪਹਾਨਪਰਿਞ੍ਞਾਤਿ ਇਮਾਹਿ ਤੀਹਿ ਪਰਿਞ੍ਞਾਹਿ ਪਰਿਜਾਨਿਤ੍ਵਾ. ਤਤ੍ਥ ਖਨ੍ਧਾਦੀਨਂ ਦੁਕ੍ਖਾਦਿਸਭਾਵਜਾਨਨਂ ਞਾਤਪਰਿਞ੍ਞਾ, ਤੇਸੁ ਅਗੁਣਂ ਉਪਧਾਰੇਤ੍ਵਾ ਤੀਰਣਂ ਤੀਰਣਪਰਿਞ੍ਞਾ, ਤੇਸੁ ਦੋਸਂ ਦਿਸ੍ਵਾ ਛਨ੍ਦਰਾਗਸ੍ਸਾਪਕਡ੍ਢਨਂ ਪਹਾਨਪਰਿਞ੍ਞਾ. ਯੋ ਇਮਾਹਿ ਤੀਹਿ ਪਰਿਞ੍ਞਾਹਿ ਜਾਨਿਤ੍ਵਾ ਵਤ੍ਥੁਕਾਮਕਿਲੇਸਕਾਮੇ ਪਰਿਚ੍ਚਜਤਿ, ਛਡ੍ਡੇਤ੍ਵਾ ਗਚ੍ਛਤਿ. ਦਨ੍ਤਨ੍ਤਿ ਨਿਬ੍ਬਿਸੇਵਨਂ. ਠਿਤਤ੍ਤਨ੍ਤਿ ਮਿਚ੍ਛਾਵਿਤਕ੍ਕਾਭਾਵੇਨ ਠਿਤਸਭਾਵਂ. ਅਮਮਨ੍ਤਿ ਅਹਨ੍ਤਿ ਮਮਾਯਨਤਣ੍ਹਾਰਹਿਤਂ. ਨਿਰਾਸਨ੍ਤਿ ਪੁਤ੍ਤਦਾਰਾਦੀਸੁ ਨਿਚ੍ਛਨ੍ਦਰਾਗਂ. ਤਂ ਵੇ ਨਰਨ੍ਤਿ ਤਂ ਏਵਰੂਪਂ ਪੁਗ੍ਗਲਂ ‘‘ਸਮਣ’’ਨ੍ਤਿ ਵਦਨ੍ਤਿ.

ਇਤਿ ਤੇ ਸਬ੍ਬੇਪਿ ਅਤ੍ਤਨੋ ਅਤ੍ਤਨੋ ਸੀਲਮੇਵ ਮਹਨ੍ਤਨ੍ਤਿ ਵਣ੍ਣੇਤ੍ਵਾ ਸਕ੍ਕਾਦਯੋ ਧਨਞ੍ਚਯਂ ਪੁਚ੍ਛਿਂਸੁ ‘‘ਅਤ੍ਥਿ ਪਨ, ਮਹਾਰਾਜ, ਕੋਚਿ ਤੁਮ੍ਹਾਕਂ ਸਨ੍ਤਿਕੇ ਪਣ੍ਡਿਤੋ, ਯੋ ਨੋ ਇਮਂ ਕਙ੍ਖਂ ਵਿਨੋਦੇਯ੍ਯਾ’’ਤਿ ¶ . ‘‘ਆਮ, ਮਹਾਰਾਜਾਨੋ ਮਮ ਅਤ੍ਥਧਮ੍ਮਾਨੁਸਾਸਕੋ ਮਹਾਪਞ੍ਞੋ ਅਸਮਧੁਰੋ ਵਿਧੁਰਪਣ੍ਡਿਤੋ ਨਾਮ ਅਤ੍ਥਿ, ਸੋ ਨੋ ਇਮਂ ਕਙ੍ਖਂ ਵਿਨੋਦੇਸ੍ਸਤਿ, ਤਸ੍ਸ ਸਨ੍ਤਿਕਂ ਗਚ੍ਛਾਮਾ’’ਤਿ. ਅਥ ਤੇ ਸਬ੍ਬੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਂਸੁ. ਅਥ ਸਬ੍ਬੇਪਿ ਉਯ੍ਯਾਨਾ ਨਿਕ੍ਖਮਿਤ੍ਵਾ ਧਮ੍ਮਸਭਂ ਗਨ੍ਤ੍ਵਾ ਪਲ੍ਲਙ੍ਕਂ ਅਲਙ੍ਕਾਰਾਪੇਤ੍ਵਾ ਬੋਧਿਸਤ੍ਤਂ ਪਲ੍ਲਙ੍ਕਵਰਮਜ੍ਝੇ ਨਿਸੀਦਾਪੇਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਏਕਮਨ੍ਤਂ ਨਿਸਿਨ੍ਨਾ ‘‘ਪਣ੍ਡਿਤ, ਅਮ੍ਹਾਕਂ ਕਙ੍ਖਾ ਉਪ੍ਪਨ੍ਨਾ, ਤਂ ਨੋ ਵਿਨੋਦੇਹੀ’’ਤਿ ਵਤ੍ਵਾ ਇਮਂ ਗਾਥਮਾਹਂਸੁ –

‘‘ਪੁਚ੍ਛਾਮ ਕਤ੍ਤਾਰਮਨੋਮਪਞ੍ਞਂ, ਕਥਾਸੁ ਨੋ ਵਿਗ੍ਗਹੋ ਅਤ੍ਥਿ ਜਾਤੋ;

ਛਿਨ੍ਦਜ੍ਜ ਕਙ੍ਖਂ ਵਿਚਿਕਿਚ੍ਛਿਤਾਨਿ, ਤਦਜ੍ਜ ਕਙ੍ਖਂ ਵਿਤਰੇਮੁ ਸਬ੍ਬੇ’’ਤਿ. (ਜਾ. ੧.੧੦.੨੮);

ਤਤ੍ਥ ਕਤ੍ਤਾਰਨ੍ਤਿ ਕਤ੍ਤਬ੍ਬਯੁਤ੍ਤਕਕਾਰਕਂ. ਵਿਗ੍ਗਹੋ ਅਤ੍ਥਿ ਜਾਤੋਤਿ ਏਕੋ ਸੀਲਵਿਗ੍ਗਹੋ ਸੀਲਵਿਵਾਦੋ ਉਪ੍ਪਨ੍ਨੋ ਅਤ੍ਥਿ. ਛਿਨ੍ਦਜ੍ਜਾਤਿ ਅਮ੍ਹਾਕਂ ਤਂ ¶ ਕਙ੍ਖਂ ਤਾਨਿ ਚ ਵਿਚਿਕਿਚ੍ਛਿਤਾਨਿ ਵਜਿਰੇਨ ਸਿਨੇਰੁਂ ਪਹਰਨ੍ਤੋ ਵਿਯ ਅਜ੍ਜ ਛਿਨ੍ਦ. ਵਿਤਰੇਮੂਤਿ ਵਿਤਰੇਯ੍ਯਾਮ.

ਪਣ੍ਡਿਤੋ ¶ ਤੇਸਂ ਕਥਂ ਸੁਤ੍ਵਾ ‘‘ਮਹਾਰਾਜਾਨੋ ਤੁਮ੍ਹਾਕਂ ਸੀਲਂ ਨਿਸ੍ਸਾਯ ਉਪ੍ਪਨ੍ਨਂ ਵਿਵਾਦਕਥਂ ਸੁਕਥਿਤਦੁਕ੍ਕਥਿਤਂ ਜਾਨਿਸ੍ਸਾਮੀ’’ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਯੇ ਪਣ੍ਡਿਤਾ ਅਤ੍ਥਦਸਾ ਭਵਨ੍ਤਿ, ਭਾਸਨ੍ਤਿ ਤੇ ਯੋਨਿਸੋ ਤਤ੍ਥ ਕਾਲੇ;

ਕਥਂ ਨੁ ਕਥਾਨਂ ਅਭਾਸਿਤਾਨਂ, ਅਤ੍ਥਂ ਨਯੇਯ੍ਯੁਂ ਕੁਸਲਾ ਜਨਿਨ੍ਦਾ’’ਤਿ. (ਜਾ. ੧.੧੦.੨੯);

ਤਤ੍ਥ ਅਤ੍ਥਦਸਾਤਿ ਅਤ੍ਥਦਸ੍ਸਨਸਮਤ੍ਥਾ. ਤਤ੍ਥ ਕਾਲੇਤਿ ਤਸ੍ਮਿਂ ਵਿਗ੍ਗਹੇ ਆਰੋਚਿਤੇ ਯੁਤ੍ਤਪ੍ਪਯੁਤ੍ਤਕਾਲੇ ਤੇ ਪਣ੍ਡਿਤਾ ਤਮਤ੍ਥਂ ਆਚਿਕ੍ਖਨ੍ਤਾ ਯੋਨਿਸੋ ਭਾਸਨ੍ਤਿ. ਅਤ੍ਥਂ ਨਯੇਯ੍ਯੁਂ ਕੁਸਲਾਤਿ ਕੁਸਲਾ ਛੇਕਾਪਿ ਸਮਾਨਾ ਅਭਾਸਿਤਾਨਂ ਕਥਾਨਂ ਕਥਂ ਨੁ ਅਤ੍ਥਂ ਞਾਣੇਨ ਨਯੇਯ੍ਯੁਂ ਉਪਪਰਿਕ੍ਖੇਯ੍ਯੁਂ. ਜਨਿਨ੍ਦਾਤਿ ਰਾਜਾਨੋ ਆਲਪਤਿ. ਤਸ੍ਮਾ ਇਦਂ ਤਾਵ ਮੇ ਵਦੇਥ.

‘‘ਕਥਂ ਹਵੇ ਭਾਸਤਿ ਨਾਗਰਾਜਾ, ਗਰੁਲ਼ੋ ਪਨ ਵੇਨਤੇਯ੍ਯੋ ਕਿਮਾਹ;

ਗਨ੍ਧਬ੍ਬਰਾਜਾ ਪਨ ਕਿਂ ਵਦੇਤਿ, ਕਥਂ ਪਨ ਕੁਰੂਨਂ ਰਾਜਸੇਟ੍ਠੋ’’ਤਿ. (ਜਾ. ੧.੧੦.੩੦);

ਤਤ੍ਥ ¶ ਗਨ੍ਧਬ੍ਬਰਾਜਾਤਿ ਸਕ੍ਕਂ ਸਨ੍ਧਾਯਾਹ.

ਅਥਸ੍ਸ ਤੇ ਇਮਂ ਗਾਥਮਾਹਂਸੁ –

‘‘ਖਨ੍ਤਿਂ ਹਵੇ ਭਾਸਤਿ ਨਾਗਰਾਜਾ, ਅਪ੍ਪਾਹਾਰਂ ਗਰੁਲ਼ੋ ਵੇਨਤੇਯ੍ਯੋ;

ਗਨ੍ਧਬ੍ਬਰਾਜਾ ਰਤਿਵਿਪ੍ਪਹਾਨਂ, ਅਕਿਞ੍ਚਨਂ ਕੁਰੂਨਂ ਰਾਜਸੇਟ੍ਠੋ’’ਤਿ. (ਜਾ. ੧.੧੦.੩੧);

ਤਸ੍ਸਤ੍ਥੋ – ਪਣ੍ਡਿਤ, ਨਾਗਰਾਜਾ ਤਾਵ ਕੋਪਨੇਯ੍ਯੇਪਿ ਪੁਗ੍ਗਲੇ ਅਕੁਪ੍ਪਨਸਙ੍ਖਾਤਂ ਅਧਿਵਾਸਨਖਨ੍ਤਿਂ ਵਣ੍ਣੇਤਿ, ਗਰੁਲ਼ੋ ਅਪ੍ਪਾਹਾਰਤਾਸਙ੍ਖਾਤਂ ਆਹਾਰਹੇਤੁ ¶ ਪਾਪਸ੍ਸ ਅਕਰਣਂ, ਸਕ੍ਕੋ ਪਞ੍ਚਕਾਮਗੁਣਰਤੀਨਂ ਵਿਪ੍ਪਹਾਨਂ, ਕੁਰੁਰਾਜਾ ਨਿਪ੍ਪਲਿਬੋਧਭਾਵਂ ਵਣ੍ਣੇਤੀਤਿ.

ਅਥ ਤੇਸਂ ਕਥਂ ਸੁਤ੍ਵਾ ਮਹਾਸਤ੍ਤੋ ਇਮਂ ਗਾਥਮਾਹ –

‘‘ਸਬ੍ਬਾਨਿ ਏਤਾਨਿ ਸੁਭਾਸਿਤਾਨਿ, ਨ ਹੇਤ੍ਥ ਦੁਬ੍ਭਾਸਿਤਮਤ੍ਥਿ ਕਿਞ੍ਚਿ;

ਯਸ੍ਮਿਞ੍ਚ ਏਤਾਨਿ ਪਤਿਟ੍ਠਿਤਾਨਿ, ਅਰਾਵ ¶ ਨਾਭ੍ਯਾ ਸੁਸਮੋਹਿਤਾਨਿ;

ਚਤੁਬ੍ਭਿ ਧਮ੍ਮੇਹਿ ਸਮਙ੍ਗਿਭੂਤਂ, ਤਂ ਵੇ ਨਰਂ ਸਮਣਮਾਹੁ ਲੋਕੇ’’ਤਿ. (ਜਾ. ੧.੧੦.੩੨);

ਤਤ੍ਥ ਏਤਾਨੀਤਿ ਏਤਾਨਿ ਚਤ੍ਤਾਰਿਪਿ ਗੁਣਜਾਤਾਨਿ ਯਸ੍ਮਿਂ ਪੁਗ੍ਗਲੇ ਸਕਟਨਾਭਿਯਂ ਸੁਟ੍ਠੁ ਸਮੋਹਿਤਾਨਿ ਅਰਾ ਵਿਯ ਪਤਿਟ੍ਠਿਤਾਨਿ, ਚਤੂਹਿਪੇਤੇਹਿ ਧਮ੍ਮੇਹਿ ਸਮਨ੍ਨਾਗਤਂ ਪੁਗ੍ਗਲਂ ਪਣ੍ਡਿਤਾ ‘‘ਸਮਣ’’ਨ੍ਤਿ ਆਹੁ ਲੋਕੇਤਿ.

ਏਵਂ ਮਹਾਸਤ੍ਤੋ ਚਤੁਨ੍ਨਮ੍ਪਿ ਸੀਲਂ ਏਕਸਮਮੇਵ ਅਕਾਸਿ. ਤਂ ਸੁਤ੍ਵਾ ਚਤ੍ਤਾਰੋਪਿ ਰਾਜਾਨੋ ਤਸ੍ਸ ਤੁਟ੍ਠਾ ਥੁਤਿਂ ਕਰੋਨ੍ਤਾ ਇਮਂ ਗਾਥਮਾਹਂਸੁ –

‘‘ਤੁਵਞ੍ਹਿ ਸੇਟ੍ਠੋ ਤ੍ਵਮਨੁਤ੍ਤਰੋਸਿ, ਤ੍ਵਂ ਧਮ੍ਮਗੂ ਧਮ੍ਮਵਿਦੂ ਸੁਮੇਧੋ;

ਪਞ੍ਞਾਯ ਪਞ੍ਹਂ ਸਮਧਿਗ੍ਗਹੇਤ੍ਵਾ, ਅਚ੍ਛੇਚ੍ਛਿ ਧੀਰੋ ਵਿਚਿਕਿਚ੍ਛਿਤਾਨਿ;

ਅਚ੍ਛੇਚ੍ਛਿ ਕਙ੍ਖਂ ਵਿਚਿਕਿਚ੍ਛਿਤਾਨਿ, ਚੁਨ੍ਦੋ ਯਥਾ ਨਾਗਦਨ੍ਤਂ ਖਰੇਨਾ’’ਤਿ. (ਜਾ. ੧.੧੦.੩੩).

ਤਤ੍ਥ ¶ ਤ੍ਵਮਨੁਤ੍ਤਰੋਸੀਤਿ ਤ੍ਵਂ ਅਨੁਤ੍ਤਰੋ ਅਸਿ, ਨਤ੍ਥਿ ਤਯਾ ਉਤ੍ਤਰਿਤਰੋ ਨਾਮ. ਧਮ੍ਮਗੂਤਿ ਧਮ੍ਮਸ੍ਸ ਗੋਪਕੋ ਚੇਵ ਧਮ੍ਮਞ੍ਞੂ ਚ. ਧਮ੍ਮਵਿਦੂਤਿ ਪਾਕਟਧਮ੍ਮੋ. ਸੁਮੇਧੋਤਿ ਸੁਨ੍ਦਰਪਞ੍ਞੋ ਪਞ੍ਞਾਯਾਤਿ ਅਤ੍ਤਨੋ ਪਞ੍ਞਾਯ ਅਮ੍ਹਾਕਂ ਪਞ੍ਹਂ ਸੁਟ੍ਠੁ ਅਧਿਗਣ੍ਹਿਤ੍ਵਾ ‘‘ਇਦਮੇਤ੍ਥ ਕਾਰਣ’’ਨ੍ਤਿ ਯਥਾਭੂਤਂ ਞਤ੍ਵਾ. ਅਚ੍ਛੇਚ੍ਛੀਤਿ ਤ੍ਵਂ ਧੀਰੋ ਅਮ੍ਹਾਕਂ ਵਿਚਿਕਿਚ੍ਛਿਤਾਨਿ ਛਿਨ੍ਦਿ, ਏਵਂ ਛਿਨ੍ਦਨ੍ਤੋ ਚ ‘‘ਛਿਨ੍ਦਜ੍ਜ ਕਙ੍ਖਂ ਵਿਚਿਕਿਚ੍ਛਿਤਾਨੀ’’ਤਿ ਇਦਂ ਅਮ੍ਹਾਕਂ ਆਯਾਚਨਂ ਸਮ੍ਪਾਦੇਨ੍ਤੋ ਅਚ੍ਛੇਚ੍ਛਿ ਕਙ੍ਖਂ ਵਿਚਿਕਿਚ੍ਛਿਤਾਨਿ ¶ . ਚੁਨ੍ਦੋ ਯਥਾ ਨਾਗਦਨ੍ਤਂ ਖਰੇਨਾਤਿ ਯਥਾ ਦਨ੍ਤਕਾਰੋ ਕਕਚੇਨ ਹਤ੍ਥਿਦਨ੍ਤਂ ਛਿਨ੍ਦੇਯ੍ਯ, ਏਵਂ ਛਿਨ੍ਦੀਤਿ ਅਤ੍ਥੋ.

ਏਵਂ ਤੇ ਚਤ੍ਤਾਰੋਪਿ ਰਾਜਾਨੋ ਤਸ੍ਸ ਪਞ੍ਹਬ੍ਯਾਕਰਣੇਨ ਤੁਟ੍ਠਮਾਨਸਾ ਅਹੇਸੁਂ. ਅਥ ਨਂ ਸਕ੍ਕੋ ਦਿਬ੍ਬਦੁਕੂਲੇਨ ਪੂਜੇਸਿ, ਗਰੁਲ਼ੋ ਸੁਵਣ੍ਣਮਾਲਾਯ, ਵਰੁਣੋ ਨਾਗਰਾਜਾ ਮਣਿਨਾ, ਧਨਞ੍ਚਯਰਾਜਾ ਗਵਸਹਸ੍ਸਾਦੀਹਿ ਪੂਜੇਸਿ. ਤੇਨੇਵਾਹ –

‘‘ਨੀਲੁਪ੍ਪਲਾਭਂ ਵਿਮਲਂ ਅਨਗ੍ਘਂ, ਵਤ੍ਥਂ ਇਦਂ ਧੂਮਸਮਾਨਵਣ੍ਣਂ;

ਪਞ੍ਹਸ੍ਸ ਵੇਯ੍ਯਾਕਰਣੇਨ ਤੁਟ੍ਠੋ, ਦਦਾਮਿ ਤੇ ਧਮ੍ਮਪੂਜਾਯ ਧੀਰ.

‘‘ਸੁਵਣ੍ਣਮਾਲਂ ਸਤਪਤ੍ਤਫੁਲ੍ਲਿਤਂ, ਸਕੇਸਰਂ ਰਤ੍ਨਸਹਸ੍ਸਮਣ੍ਡਿਤਂ;

ਪਞ੍ਹਸ੍ਸ ਵੇਯ੍ਯਾਕਰਣੇਨ ਤੁਟ੍ਠੋ, ਦਦਾਮਿ ਤੇ ਧਮ੍ਮਪੂਜਾਯ ਧੀਰ.

‘‘ਮਣਿਂ ਅਨਗ੍ਘਂ ਰੁਚਿਰਂ ਪਭਸ੍ਸਰਂ, ਕਣ੍ਠਾਵਸਤ੍ਤਂ ਮਣਿਭੂਸਿਤਂ ਮੇ;

ਪਞ੍ਹਸ੍ਸ ਵੇਯ੍ਯਾਕਰਣੇਨ ਤੁਟ੍ਠੋ, ਦਦਾਮਿ ਤੇ ਧਮ੍ਮਪੂਜਾਯ ਧੀਰ.

‘‘ਗਵਂ ਸਹਸ੍ਸਂ ਉਸਭਞ੍ਚ ਨਾਗਂ, ਆਜਞ੍ਞਯੁਤ੍ਤੇ ਚ ਰਥੇ ਦਸ ਇਮੇ;

ਪਞ੍ਹਸ੍ਸ ਵੇਯ੍ਯਾਕਰਣੇਨ ਤੁਟ੍ਠੋ, ਦਦਾਮਿ ਤੇ ਗਾਮਵਰਾਨਿ ਸੋਲ਼ਸਾ’’ਤਿ. (ਜਾ. ੧.੧੦.੩੪-੩੭);

ਏਵਂ ਸਕ੍ਕਾਦਯੋ ¶ ਮਹਾਸਤ੍ਤਂ ਪੂਜੇਤ੍ਵਾ ਸਕਟ੍ਠਾਨਮੇਵ ਅਗਮਿਂਸੁ.

ਚਤੁਪੋਸਥਕਣ੍ਡਂ ਨਿਟ੍ਠਿਤਂ.

ਦੋਹਲ਼ਕਣ੍ਡਂ

ਤੇਸੁ ¶ ¶ ਨਾਗਰਾਜਸ੍ਸ ਭਰਿਯਾ ਵਿਮਲਾਦੇਵੀ ਨਾਮ. ਸਾ ਤਸ੍ਸ ਗੀਵਾਯ ਪਿਲ਼ਨ੍ਧਨਮਣਿਂ ਅਪਸ੍ਸਨ੍ਤੀ ਪੁਚ੍ਛਿ ‘‘ਦੇਵ, ਕਹਂ ਪਨ ਤੇ ਮਣੀ’’ਤਿ? ‘‘ਭਦ੍ਦੇ, ਚਨ੍ਦਬ੍ਰਾਹ੍ਮਣਪੁਤ੍ਤਸ੍ਸ ਵਿਧੁਰਪਣ੍ਡਿਤਸ੍ਸ ਧਮ੍ਮਕਥਂ ਸੁਤ੍ਵਾ ਪਸਨ੍ਨਚਿਤ੍ਤੋ ਅਹਂ ਤੇਨ ਮਣਿਨਾ ਤਂ ਪੂਜੇਸਿਂ. ਨ ਕੇਵਲਞ੍ਚ ਅਹਮੇਵ, ਸਕ੍ਕੋਪਿ ਤਂ ਦਿਬ੍ਬਦੁਕੂਲੇਨ ਪੂਜੇਸਿ, ਸੁਪਣ੍ਣਰਾਜਾ ਸੁਵਣ੍ਣਮਾਲਾਯ, ਧਨਞ੍ਚਯਰਾਜਾ ਗਵਸ੍ਸਸਹਸ੍ਸਾਦੀਹਿ ਪੂਜੇਸੀ’’ਤਿ. ‘‘ਧਮ੍ਮਕਥਿਕੋ ਸੋ, ਦੇਵਾ’’ਤਿ. ‘‘ਭਦ੍ਦੇ, ਕਿਂ ਵਦੇਸਿ, ਜਮ੍ਬੁਦੀਪਤਲੇ ਬੁਦ੍ਧੁਪ੍ਪਾਦੋ ਵਿਯ ਪਵਤ੍ਤਤਿ, ਸਕਲਜਮ੍ਬੁਦੀਪੇ ਏਕਸਤਰਾਜਾਨੋ ਤਸ੍ਸ ਮਧੁਰਧਮ੍ਮਕਥਾਯ ਬਜ੍ਝਿਤ੍ਵਾ ਹਤ੍ਥਿਕਨ੍ਤਵੀਣਾਸਰੇਨ ਪਲੁਦ੍ਧਮਤ੍ਤਵਾਰਣਾ ਵਿਯ ਅਤ੍ਤਨੋ ਅਤ੍ਤਨੋ ਰਜ੍ਜਾਨਿ ਗਨ੍ਤੁਂ ਨ ਇਚ੍ਛਨ੍ਤਿ, ਏਵਰੂਪੋ ਸੋ ਮਧੁਰਧਮ੍ਮਕਥਿਕੋ’’ਤਿ ਤਸ੍ਸ ਗੁਣਂ ਵਣ੍ਣੇਸਿ. ਸਾ ਵਿਧੁਰਪਣ੍ਡਿਤਸ੍ਸ ਗੁਣਕਥਂ ਸੁਤ੍ਵਾ ਤਸ੍ਸ ਧਮ੍ਮਕਥਂ ਸੋਤੁਕਾਮਾ ਹੁਤ੍ਵਾ ਚਿਨ੍ਤੇਸਿ ‘‘ਸਚਾਹਂ ਵਕ੍ਖਾਮਿ ‘ਦੇਵ, ਤਸ੍ਸ ਧਮ੍ਮਕਥਂ ਸੋਤੁਕਾਮਾ, ਇਧ ਨਂ ਆਨੇਹੀ’ਤਿ, ਨ ਮੇਤਂ ਆਨੇਸ੍ਸਤਿ. ਯਂਨੂਨਾਹਂ ‘ਤਸ੍ਸ ਮੇ ਹਦਯੇ ਦੋਹਲ਼ੋ ਉਪ੍ਪਨ੍ਨੋ’ਤਿ ਗਿਲਾਨਾਲਯਂ ਕਰੇਯ੍ਯ’’ਨ੍ਤਿ. ਸਾ ਤਥਾ ਕਤ੍ਵਾ ਸਿਰਗਬ੍ਭਂ ਪਵਿਸਿਤ੍ਵਾ ਅਤ੍ਤਨੋ ਪਰਿਚਾਰਿਕਾਨਂ ਸਞ੍ਞਂ ਦਤ੍ਵਾ ਸਿਰਿਸਯਨੇ ਨਿਪਜ੍ਜਿ. ਨਾਗਰਾਜਾ ਉਪਟ੍ਠਾਨਵੇਲਾਯ ਤਂ ਅਪਸ੍ਸਨ੍ਤੋ ‘‘ਕਹਂ ਵਿਮਲਾ’’ਤਿ ਪਰਿਚਾਰਿਕਾਯੋ ਪੁਚ੍ਛਿਤ੍ਵਾ ‘‘ਗਿਲਾਨਾ, ਦੇਵਾ’’ਤਿ ਵੁਤ੍ਤੇ ਉਟ੍ਠਾਯਾਸਨਾ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ਸਯਨਪਸ੍ਸੇ ਨਿਸੀਦਿਤ੍ਵਾ ਸਰੀਰਂ ਪਰਿਮਜ੍ਜਨ੍ਤੋ ਪਠਮਂ ਗਾਥਮਾਹ –

੧੩੪੬.

‘‘ਪਣ੍ਡੁ ਕਿਸਿਯਾਸਿ ਦੁਬ੍ਬਲਾ, ਵਣ੍ਣਰੂਪਂ ਨ ਤਵੇਦਿਸਂ ਪੁਰੇ;

ਵਿਮਲੇ ਅਕ੍ਖਾਹਿ ਪੁਚ੍ਛਿਤਾ, ਕੀਦਿਸੀ ਤੁਯ੍ਹਂ ਸਰੀਰਵੇਦਨਾ’’ਤਿ.

ਤਤ੍ਥ ਪਣ੍ਡੂਤਿ ਪਣ੍ਡੁਪਲਾਸਵਣ੍ਣਾ. ਕਿਸਿਯਾਤਿ ਕਿਸਾ. ਦੁਬ੍ਬਲਾਤਿ ਅਪ੍ਪਥਾਮਾ. ਵਣ੍ਣਰੂਪਂ ਨ ਤਵੇਦਿਸਂ ਪੁਰੇਤਿ ਤਵ ਵਣ੍ਣਸਙ੍ਖਾਤਂ ਰੂਪਂ ਪੁਰੇ ਏਦਿਸਂ ਨ ਹੋਤਿ, ਨਿਦ੍ਦੋਸਂ ਅਨਵਜ੍ਜਂ, ਤਂ ਇਦਾਨਿ ਪਰਿਵਤ੍ਤਿਤ੍ਵਾ ਅਮਨੁਞ੍ਞਸਭਾਵਂ ਜਾਤਂ. ਵਿਮਲੇਤਿ ਤਂ ਆਲਪਤਿ.

ਅਥਸ੍ਸ ¶ ਸਾ ਆਚਿਕ੍ਖਨ੍ਤੀ ਦੁਤਿਯਂ ਗਾਥਮਾਹ –

੧੩੪੭.

‘‘ਧਮ੍ਮੋ ¶ ਮਨੁਜੇਸੁ ਮਾਤੀਨਂ, ਦੋਹਲ਼ੋ ਨਾਮ ਜਨਿਨ੍ਦ ਵੁਚ੍ਚਤਿ;

ਧਮ੍ਮਾਹਟਂ ਨਾਗਕੁਞ੍ਜਰ, ਵਿਧੁਰਸ੍ਸ ਹਦਯਾਭਿਪਤ੍ਥਯੇ’’ਤਿ.

ਤਤ੍ਥ ¶ ਧਮ੍ਮੋਤਿ ਸਭਾਵੋ. ਮਾਤੀਨਨ੍ਤਿ ਇਤ੍ਥੀਨਂ. ਜਨਿਨ੍ਦਾਤਿ ਨਾਗਜਨਸ੍ਸ ਇਨ੍ਦ. ਧਮ੍ਮਾਹਟਂ ਨਾਗਕੁਞ੍ਜਰ, ਵਿਧੁਰਸ੍ਸ ਹਦਯਾਭਿਪਤ੍ਥਯੇਤਿ ਨਾਗਸੇਟ੍ਠ, ਅਹਂ ਧਮ੍ਮੇਨ ਸਮੇਨ ਅਸਾਹਸਿਕਕਮ੍ਮੇਨ ਆਹਟਂ ਵਿਧੁਰਸ੍ਸ ਹਦਯਂ ਅਭਿਪਤ੍ਥਯਾਮਿ, ਤਂ ਮੇ ਲਭਮਾਨਾਯ ਜੀਵਿਤਂ ਅਤ੍ਥਿ, ਅਲਭਮਾਨਾਯ ਇਧੇਵ ਮਰਣਨ੍ਤਿ ਤਸ੍ਸ ਪਞ੍ਞਂ ਸਨ੍ਧਾਯੇਵਮਾਹ –

ਤਂ ਸੁਤ੍ਵਾ ਨਾਗਰਾਜਾ ਤਤਿਯਂ ਗਾਥਮਾਹ –

੧੩੪੮.

‘‘ਚਨ੍ਦਂ ਖੋ ਤ੍ਵਂ ਦੋਹਲ਼ਾਯਸਿ, ਸੂਰਿਯਂ ਵਾ ਅਥ ਵਾਪਿ ਮਾਲੁਤਂ;

ਦੁਲ੍ਲਭਞ੍ਹਿ ਵਿਧੁਰਸ੍ਸ ਦਸ੍ਸਨਂ, ਕੋ ਵਿਧੁਰਮਿਧ ਮਾਨਯਿਸ੍ਸਤੀ’’ਤਿ.

ਤਤ੍ਥ ਦੁਲ੍ਲਭਞ੍ਹਿ ਵਿਧੁਰਸ੍ਸ ਦਸ੍ਸਨਨ੍ਤਿ ਅਸਮਧੁਰਸ੍ਸ ਵਿਧੁਰਸ੍ਸ ਦਸ੍ਸਨਮੇਵ ਦੁਲ੍ਲਭਂ. ਤਸ੍ਸ ਹਿ ਸਕਲਜਮ੍ਬੁਦੀਪੇ ਰਾਜਾਨੋ ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਂ ਪਚ੍ਚੁਪਟ੍ਠਾਪੇਤ੍ਵਾ ਵਿਚਰਨ੍ਤਿ, ਪਸ੍ਸਿਤੁਮ੍ਪਿ ਨਂ ਕੋਚਿ ਨ ਲਭਤਿ, ਤਂ ਕੋ ਇਧ ਆਨਯਿਸ੍ਸਤੀਤਿ ਵਦਤਿ.

ਸਾ ਤਸ੍ਸ ਵਚਨਂ ਸੁਤ੍ਵਾ ‘‘ਅਲਭਮਾਨਾਯ ਮੇ ਇਧੇਵ ਮਰਣ’’ਨ੍ਤਿ ਪਰਿਵਤ੍ਤਿਤ੍ਵਾ ਪਿਟ੍ਠਿਂ ਦਤ੍ਵਾ ਸਾਲ਼ਕਕਣ੍ਣੇਨ ਮੁਖਂ ਪਿਦਹਿਤ੍ਵਾ ਨਿਪਜ੍ਜਿ. ਨਾਗਰਾਜਾ ਅਨਤ੍ਤਮਨੋ ਸਿਰਿਗਬ੍ਭਂ ਪਵਿਸਿਤ੍ਵਾ ਸਯਨਪਿਟ੍ਠੇ ਨਿਸਿਨ੍ਨੋ ‘‘ਵਿਮਲਾ ਵਿਧੁਰਪਣ੍ਡਿਤਸ੍ਸ ਹਦਯਮਂਸਂ ਆਹਰਾਪੇਤੀ’’ਤਿ ਸਞ੍ਞੀ ਹੁਤ੍ਵਾ ‘‘ਪਣ੍ਡਿਤਸ੍ਸ ਹਦਯਂ ਅਲਭਨ੍ਤਿਯਾ ਵਿਮਲਾਯ ਜੀਵਿਤਂ ਨਤ੍ਥਿ, ਕਥਂ ਨੁ ਖੋ ਤਸ੍ਸ ਹਦਯਮਂਸਂ ਲਭਿਸ੍ਸਾਮੀ’’ਤਿ ਚਿਨ੍ਤੇਸਿ. ਅਥਸ੍ਸ ਧੀਤਾ ਇਰਨ੍ਧਤੀ ਨਾਮ ਨਾਗਕਞ੍ਞਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਮਹਨ੍ਤੇਨ ਸਿਰਿਵਿਲਾਸੇਨ ਪਿਤੁ ਉਪਟ੍ਠਾਨਂ ਆਗਨ੍ਤ੍ਵਾ ਪਿਤਰਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤਾ, ਸਾ ਤਸ੍ਸ ਇਨ੍ਦ੍ਰਿਯਵਿਕਾਰਂ ਦਿਸ੍ਵਾ ‘‘ਤਾਤ, ਅਤਿਵਿਯ ਦੋਮਨਸ੍ਸਪ੍ਪਤ੍ਤੋਸਿ, ਕਿਂ ਨੁ ਖੋ ਕਾਰਣ’’ਨ੍ਤਿ ਪੁਚ੍ਛਨ੍ਤੀ ਇਮਂ ਗਾਥਮਾਹ –

੧੩੪੯.

‘‘ਕਿਂ ¶ ਨੁ ਤਾਤ ਤੁਵਂ ਪਜ੍ਝਾਯਸਿ, ਪਦੁਮਂ ਹਤ੍ਥਗਤਂਵ ਤੇ ਮੁਖਂ;

ਕਿਂ ਨੁ ਦੁਮ੍ਮਨਰੂਪੋਸਿ ¶ ਇਸ੍ਸਰ, ਮਾ ਤ੍ਵਂ ਸੋਚਿ ਅਮਿਤ੍ਤਤਾਪਨਾ’’ਤਿ.

ਤਤ੍ਥ ਪਜ੍ਝਾਯਸੀਤਿ ਪੁਨਪ੍ਪੁਨਂ ਚਿਨ੍ਤੇਸਿ. ਹਤ੍ਥਗਤਨ੍ਤਿ ਹਤ੍ਥੇਨ ਪਰਿਮਦ੍ਦਿਤਂ ਪਦੁਮਂ ਵਿਯ ਤੇ ਮੁਖਂ ਜਾਤਂ. ਇਸ੍ਸਰਾਤਿ ਪਞ੍ਚਯੋਜਨਸਤਿਕਸ੍ਸ ਮਨ੍ਦਿਰਨਾਗਭਵਨਸ੍ਸ, ਸਾਮੀਤਿ.

ਧੀਤੁ ਵਚਨਂ ਸੁਤ੍ਵਾ ਨਾਗਰਾਜਾ ਤਮਤ੍ਥਂ ਆਰੋਚੇਨ੍ਤੋ ਆਹ –

੧੩੫੦.

‘‘ਮਾਤਾ ¶ ਹਿ ਤਵ ਇਰਨ੍ਧਤਿ, ਵਿਧੁਰਸ੍ਸ ਹਦਯਂ ਧਨਿਯਤਿ;

ਦੁਲ੍ਲਭਞ੍ਹਿ ਵਿਧੁਰਸ੍ਸ ਦਸ੍ਸਨਂ, ਕੋ ਵਿਧੁਰਮਿਧ ਮਾਨਯਿਸ੍ਸਤੀ’’ਤਿ.

ਤਤ੍ਥ ਧਨਿਯਤੀਤਿ ਪਤ੍ਥੇਤਿ ਇਚ੍ਛਤਿ.

ਅਥ ਨਂ ਨਾਗਰਾਜਾ ‘‘ਅਮ੍ਮ, ਮਮ ਸਨ੍ਤਿਕੇ ਵਿਧੁਰਂ ਆਨੇਤੁਂ ਸਮਤ੍ਥੋ ਨਤ੍ਥਿ, ਤ੍ਵਂ ਮਾਤੁ ਜੀਵਿਤਂ ਦੇਹਿ, ਵਿਧੁਰਂ ਆਨੇਤੁਂ ਸਮਤ੍ਥਂ ਭਤ੍ਤਾਰਂ ਪਰਿਯੇਸਾਹੀ’’ਤਿ ਉਯ੍ਯੋਜੇਨ੍ਤੋ ਉਪਡ੍ਢਗਾਥਮਾਹ –

੧੩੫੧.

‘‘ਤਸ੍ਸ ਭਤ੍ਤੁਪਰਿਯੇਸਨਂ ਚਰ, ਯੋ ਵਿਧੁਰਮਿਧ ਮਾਨਯਿਸ੍ਸਤੀ’’ਤਿ.

ਤਤ੍ਥ ਚਰਾਤਿ ਵਿਚਰ.

ਇਤਿ ਸੋ ਕਿਲੇਸਾਭਿਰਤਭਾਵੇਨ ਧੀਤੁ ਅਨਨੁਚ੍ਛਵਿਕਂ ਕਥਂ ਕਥੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

‘‘ਪਿਤੁਨੋ ਚ ਸਾ ਸੁਤ੍ਵਾਨ ਵਾਕ੍ਯਂ, ਰਤ੍ਤਿਂ ਨਿਕ੍ਖਮ੍ਮ ਅਵਸ੍ਸੁਤਿਂ ਚਰੀ’’ਤਿ.

ਤਤ੍ਥ ਅਵਸ੍ਸੁਤਿਨ੍ਤਿ ਭਿਕ੍ਖਵੇ, ਸਾ ਨਾਗਮਾਣਵਿਕਾ ਪਿਤੁ ਵਚਨਂ ਸੁਤ੍ਵਾ ਪਿਤਰਂ ਅਸ੍ਸਾਸੇਤ੍ਵਾ ਮਾਤੁ ਸਨ੍ਤਿਕਂ ਗਨ੍ਤ੍ਵਾ ਤਮ੍ਪਿ ਅਸ੍ਸਾਸੇਤ੍ਵਾ ਅਤ੍ਤਨੋ ਸਿਰਿਗਬ੍ਭਂ ਗਨ੍ਤ੍ਵਾ ਸਬ੍ਬਾਲਙ੍ਕਾਰੇਹਿ ਅਤ੍ਤਾਨਂ ਅਲਙ੍ਕਰਿਤ੍ਵਾ ਏਕਂ ਕੁਸੁਮ੍ਭਰਤ੍ਤਵਤ੍ਥਂ ਨਿਵਾਸੇਤ੍ਵਾ ਏਕਂ ਏਕਂਸੇ ਕਤ੍ਵਾ ਤਮੇਵ ਰਤ੍ਤਿਂ ਉਦਕਂ ਦ੍ਵਿਧਾ ਕਤ੍ਵਾ ਨਾਗਭਵਨਤੋ ਨਿਕ੍ਖਮ੍ਮ ¶ ਹਿਮਵਨ੍ਤਪ੍ਪਦੇਸੇ ਸਮੁਦ੍ਦਤੀਰੇ ਠਿਤਂ ਸਟ੍ਠਿਯੋਜਨੁਬ੍ਬੇਧਂ ਏਕਗ੍ਘਨਂ ਕਾਲ਼ਪਬ੍ਬਤਂ ਨਾਮ ਅਞ੍ਜਨਗਿਰਿਂ ਗਨ੍ਤ੍ਵਾ ਅਵਸ੍ਸੁਤਿਂ ਚਰਿ ਕਿਲੇਸਅਵਸ੍ਸੁਤਿਂ ਭਤ੍ਤੁਪਰਿਯੇਸਨਂ ਚਰੀਤਿ ਅਤ੍ਥੋ.

ਚਰਨ੍ਤੀ ¶ ਚ ਯਾਨਿ ਹਿਮਵਨ੍ਤੇ ਵਣ੍ਣਗਨ੍ਧਸਮ੍ਪਨ੍ਨਾਨਿ ਪੁਪ੍ਫਾਨਿ, ਤਾਨਿ ਆਹਰਿਤ੍ਵਾ ਸਕਲਪਬ੍ਬਤਂ ਮਣਿਅਗ੍ਘਿਯਂ ਵਿਯ ਅਲਙ੍ਕਰਿਤ੍ਵਾ ਉਪਰਿਤਲੇ ਪੁਪ੍ਫਸਨ੍ਥਾਰਂ ਕਤ੍ਵਾ ਮਨੋਰਮੇਨਾਕਾਰੇਨ ਨਚ੍ਚਿਤ੍ਵਾ ਮਧੁਰਗੀਤਂ ਗਾਯਨ੍ਤੀ ਸਤ੍ਤਮਂ ਗਾਥਮਾਹ –

੧੩੫੨.

‘‘ਕੇ ਗਨ੍ਧਬ੍ਬੇ ਰਕ੍ਖਸੇ ਚ ਨਾਗੇ, ਕੇ ਕਿਮ੍ਪੁਰਿਸੇ ਚਾਪਿ ਮਾਨੁਸੇ;

ਕੇ ਪਣ੍ਡਿਤੇ ਸਬ੍ਬਕਾਮਦਦੇ, ਦੀਘਰਤ੍ਤਂ ਭਤ੍ਤਾ ਮੇ ਭਵਿਸ੍ਸਤੀ’’ਤਿ.

ਤਤ੍ਥ ¶ ਕੇ ਗਨ੍ਧਬ੍ਬੇ ਰਕ੍ਖਸੇ ਚ ਨਾਗੇਤਿ ਕੋ ਗਨ੍ਧਬ੍ਬੋ ਵਾ ਰਕ੍ਖਸੋ ਵਾ ਨਾਗੋ ਵਾ. ਕੇ ਪਣ੍ਡਿਤੇ ਸਬ੍ਬਕਾਮਦਦੇਤਿ ਕੋ ਏਤੇਸੁ ਗਨ੍ਧਬ੍ਬਾਦੀਸੁ ਪਣ੍ਡਿਤੋ ਸਬ੍ਬਕਾਮਂ ਦਾਤੁਂ ਸਮਤ੍ਥੋ, ਸੋ ਵਿਧੁਰਸ੍ਸ ਹਦਯਮਂਸਦੋਹਲ਼ਿਨਿਯਾ ਮਮ ਮਾਤੁ ਮਨੋਰਥਂ ਮਤ੍ਥਕਂ ਪਾਪੇਤ੍ਵਾ ਮਯ੍ਹਂ ਦੀਘਰਤ੍ਤਂ ਭਤ੍ਤਾ ਭਵਿਸ੍ਸਤੀਤਿ.

ਤਸ੍ਮਿਂ ਖਣੇ ਵੇਸ੍ਸਵਣਮਹਾਰਾਜਸ੍ਸ ਭਾਗਿਨੇਯ੍ਯੋ ਪੁਣ੍ਣਕੋ ਨਾਮ ਯਕ੍ਖਸੇਨਾਪਤਿ ਤਿਗਾਵੁਤਪ੍ਪਮਾਣਂ ਮਨੋਮਯਸਿਨ੍ਧਵਂ ਅਭਿਰੁਯ੍ਹ ਕਾਲ਼ਪਬ੍ਬਤਮਤ੍ਥਕੇਨ ਯਕ੍ਖਸਮਾਗਮਂ ਗਚ੍ਛਨ੍ਤੋ ਤਂ ਤਾਯ ਗੀਤਸਦ੍ਦਂ ਅਸ੍ਸੋਸਿ. ਅਨਨ੍ਤਰੇ ਅਤ੍ਤਭਾਵੇ ਅਨੁਭੂਤਪੁਬ੍ਬਾਯ ਇਤ੍ਥਿਯਾ ਗੀਤਸਦ੍ਦੋ ਤਸ੍ਸ ਛਵਿਆਦੀਨਿ ਛਿਨ੍ਦਿਤ੍ਵਾ ਅਟ੍ਠਿਮਿਞ੍ਜਂ ਆਹਚ੍ਚ ਅਟ੍ਠਾਸਿ. ਸੋ ਤਾਯ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਨਿਵਤ੍ਤਿਤ੍ਵਾ ਸਿਨ੍ਧਵਪਿਟ੍ਠੇ ਨਿਸਿਨ੍ਨੋਵ ‘‘ਭਦ੍ਦੇ, ਅਹਂ ਮਮ ਪਞ੍ਞਾਯ ਧਮ੍ਮੇਨ ਸਮੇਨ ਵਿਧੁਰਸ੍ਸ ਹਦਯਂ ਆਨੇਤੁਂ ਸਮਤ੍ਥੋਮ੍ਹਿ, ਤ੍ਵਂ ਮਾ ਚਿਨ੍ਤਯੀ’’ਤਿ ਤਂ ਅਸ੍ਸਾਸੇਨ੍ਤੋ ਅਟ੍ਠਮਂ ਗਾਥਮਾਹ –

੧੩੫੩.

‘‘ਅਸ੍ਸਾਸ ਹੇਸ੍ਸਾਮਿ ਤੇ ਪਤਿ, ਭਤ੍ਤਾ ਤੇ ਹੇਸ੍ਸਾਮਿ ਅਨਿਨ੍ਦਲੋਚਨੇ;

ਪਞ੍ਞਾ ਹਿ ਮਮਂ ਤਥਾਵਿਧਾ, ਅਸ੍ਸਾਸ ਹੇਸ੍ਸਸਿ ਭਰਿਯਾ ਮਮਾ’’ਤਿ.

ਤਤ੍ਥ ¶ ਅਨਿਨ੍ਦਲੋਚਨੇਤਿ ਅਨਿਨ੍ਦਿਤਬ੍ਬਲੋਚਨੇ. ਤਥਾਵਿਧਾਤਿ ਵਿਧੁਰਸ੍ਸ ਹਦਯਮਂਸਂ ਆਹਰਣਸਮਤ੍ਥਾ.

ਅਥ ਨਂ ਇਰਨ੍ਧਤੀ ‘‘ਤੇਨ ਹਿ ਏਹਿ, ਗਚ੍ਛਾਮ ਮੇ ਪਿਤੁ ਸਨ੍ਤਿਕ’’ਨ੍ਤਿ ਆਨੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੫੪.

‘‘ਅਵਚਾਸਿ ਪੁਣ੍ਣਕਂ ਇਰਨ੍ਧਤੀ, ਪੁਬ੍ਬਪਥਾਨੁਗਤੇਨ ਚੇਤਸਾ;

ਏਹਿ ¶ ਗਚ੍ਛਾਮ ਪਿਤੁ ਮਮਨ੍ਤਿਕੇ, ਏਸੋਵ ਤੇ ਏਤਮਤ੍ਥਂ ਪਵਕ੍ਖਤੀ’’ਤਿ.

ਤਤ੍ਥ ਪੁਬ੍ਬਪਥਾਨੁਗਤੇਨਾਤਿ ਅਨਨ੍ਤਰੇ ਅਤ੍ਤਭਾਵੇ ਭੂਤਪੁਬ੍ਬਸਾਮਿਕੇ ਤਸ੍ਮਿਂ ਪੁਬ੍ਬਪਥੇਨੇਵ ਅਨੁਗਤੇਨ. ਏਹਿ ਗਚ੍ਛਾਮਾਤਿ ਭਿਕ੍ਖਵੇ, ਸੋ ਯਕ੍ਖਸੇਨਾਪਤਿ ਏਵਂ ਵਤ੍ਵਾ ‘‘ਇਮਂ ਅਸ੍ਸਪਿਟ੍ਠਿਂ ਆਰੋਪੇਤ੍ਵਾ ਨੇਸ੍ਸਾਮੀ’’ਤਿ ਪਬ੍ਬਤਮਤ੍ਥਕਾ ਓਤਰਿਤ੍ਵਾ ਤਸ੍ਸਾ ਗਹਣਤ੍ਥਂ ਹਤ੍ਥਂ ਪਸਾਰੇਸਿ. ਸਾ ਅਤ੍ਤਨੋ ਹਤ੍ਥਂ ਗਣ੍ਹਿਤੁਂ ਅਦਤ੍ਵਾ ਤੇਨ ਪਸਾਰਿਤਹਤ੍ਥਂ ਸਯਂ ਗਹੇਤ੍ਵਾ ‘‘ਸਾਮਿ, ਨਾਹਂ ਅਨਾਥਾ, ਮਯ੍ਹਂ ਪਿਤਾ ਵਰੁਣੋ ਨਾਮ ਨਾਗਰਾਜਾ, ਮਾਤਾ ਵਿਮਲਾ ਨਾਮ ਦੇਵੀ, ਏਹਿ ਮਮ ਪਿਤੁ ਸਨ੍ਤਿਕਂ ਗਚ੍ਛਾਮ, ਏਸੋ ਏਵ ਤੇ ਯਥਾ ਅਮ੍ਹਾਕਂ ਮਙ੍ਗਲਕਿਰਿਯਾਯ ਭਵਿਤਬ੍ਬਂ, ਏਵਂ ਏਤਮਤ੍ਥਂ ਪਵਕ੍ਖਤੀ’’ਤਿ ਅਵਚਾਸਿ.

ਏਵਂ ¶ ਵਤ੍ਵਾ ਸਾ ਯਕ੍ਖਂ ਗਹੇਤ੍ਵਾ ਪਿਤੁ ਸਨ੍ਤਿਕਂ ਅਗਮਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੫੫.

‘‘ਅਲਙ੍ਕਤਾ ਸੁਵਸਨਾ, ਮਾਲਿਨੀ ਚਨ੍ਦਨੁਸ੍ਸਦਾ;

ਯਕ੍ਖਂ ਹਤ੍ਥੇ ਗਹੇਤ੍ਵਾਨ, ਪਿਤੁਸਨ੍ਤਿਕੁਪਾਗਮੀ’’ਤਿ.

ਤਤ੍ਥ ਪਿਤੁਸਨ੍ਤਿਕੁਪਾਗਮੀਤਿ ਅਤ੍ਤਨੋ ਪਿਤੁਨੋ ਨਾਗਰਞ੍ਞੋ ਸਨ੍ਤਿਕਂ ਉਪਾਗਮਿ.

ਪੁਣ੍ਣਕੋਪਿ ਯਕ੍ਖੋ ਪਟਿਹਰਿਤ੍ਵਾ ਨਾਗਰਾਜਸ੍ਸ ਸਨ੍ਤਿਕਂ ਗਨ੍ਤ੍ਵਾ ਇਰਨ੍ਧਤਿਂ ਯਾਚਨ੍ਤੋ ਆਹ –

੧੩੫੬.

‘‘ਨਾਗਵਰ ਵਚੋ ਸੁਣੋਹਿ ਮੇ, ਪਤਿਰੂਪਂ ਪਟਿਪਜ੍ਜ ਸੁਙ੍ਕਿਯਂ;

ਪਤ੍ਥੇਮਿ ਅਹਂ ਇਰਨ੍ਧਤਿਂ, ਤਾਯ ਸਮਙ੍ਗਿਂ ਕਰੋਹਿ ਮਂ ਤੁਵਂ.

੧੩੫੭.

‘‘ਸਤਂ ¶ ਹਤ੍ਥੀ ਸਤਂ ਅਸ੍ਸਾ, ਸਤਂ ਅਸ੍ਸਤਰੀਰਥਾ;

ਸਤਂ ਵਲਭਿਯੋ ਪੁਣ੍ਣਾ, ਨਾਨਾਰਤ੍ਨਸ੍ਸ ਕੇਵਲਾ;

ਤੇ ਨਾਗ ਪਟਿਪਜ੍ਜਸ੍ਸੁ, ਧੀਤਰਂ ਦੇਹਿਰਨ੍ਧਤਿ’’ਨ੍ਤਿ.

ਤਤ੍ਥ ਸੁਙ੍ਕਿਯਨ੍ਤਿ ਅਤ੍ਤਨੋ ਕੁਲਪਦੇਸਾਨੁਰੂਪਂ ਧਿਤੁ ਸੁਙ੍ਕਂ ਧਨਂ ਪਟਿਪਜ੍ਜ ਗਣ੍ਹ. ਸਮਙ੍ਗਿਂ ਕਰੋਹੀਤਿ ਮਂ ਤਾਯ ਸਦ੍ਧਿਂ ਸਮਙ੍ਗਿਭੂਤਂ ਕਰੋਹਿ. ਵਲਭਿਯੋਤਿ ਭਣ੍ਡਸਕਟਿਯੋ. ਨਾਨਾਰਤ੍ਨਸ੍ਸ ਕੇਵਲਾਤਿ ਨਾਨਾਰਤਨਸ੍ਸ ਸਕਲਪਰਿਪੁਣ੍ਣਾ.

ਅਥ ਨਂ ਨਾਗਰਾਜਾ ਆਹ –

੧੩੫੮.

‘‘ਯਾਵ ਆਮਨ੍ਤਯੇ ਞਾਤੀ, ਮਿਤ੍ਤੇ ਚ ਸੁਹਦਜ੍ਜਨੇ;

ਅਨਾਮਨ੍ਤ ਕਤਂ ਕਮ੍ਮਂ, ਤਂ ਪਚ੍ਛਾ ਅਨੁਤਪ੍ਪਤੀ’’ਤਿ.

ਤਤ੍ਥ ਯਾਵ ਆਮਨ੍ਤਯੇ ਞਾਤੀਤਿ ਭੋ ਯਕ੍ਖਸੇਨਾਪਤਿ, ਅਹਂ ਤੁਯ੍ਹਂ ਧੀਤਰਂ ਦੇਮਿ, ਨੋ ਨ ਦੇਮਿ, ਥੋਕਂ ਪਨ ਆਗਮੇਹਿ, ਯਾਵ ਞਾਤਕੇਪਿ ਜਾਨਾਪੇਮਿ. ਤਂ ਪਚ੍ਛਾ ਅਨੁਤਪ੍ਪਤੀਤਿ ਇਤ੍ਥਿਯੋ ਹਿ ਗਤਗਤਟ੍ਠਾਨੇ ਅਭਿਰਮਨ੍ਤਿਪਿ ਅਨਭਿਰਮਨ੍ਤਿਪਿ, ਅਨਭਿਰਤਿਕਾਲੇ ਞਾਤਕਾਦਯੋ ਅਮ੍ਹੇਹਿ ¶ ਸਦ੍ਧਿਂ ਅਨਾਮਨ੍ਤੇਤ੍ਵਾ ¶ ਕਤਂ ਕਮ੍ਮਂ ਨਾਮ ਏਵਰੂਪਂ ਹੋਤੀਤਿ ਉਸ੍ਸੁਕ੍ਕਂ ਨ ਕਰੋਨ੍ਤਿ, ਏਵਂ ਤਂ ਕਮ੍ਮਂ ਪਚ੍ਛਾ ਅਨੁਤਾਪਂ ਆਵਹਤੀਤਿ.

ਏਵਂ ਵਤ੍ਵਾ ਸੋ ਭਰਿਯਾਯ ਵਸਨਟ੍ਠਾਨਂ ਗਨ੍ਤ੍ਵਾ ਤਾਯ ਸਦ੍ਧਿਂ ਸਲ੍ਲਪਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੫੯.

‘‘ਤਤੋ ਸੋ ਵਰੁਣੋ ਨਾਗੋ, ਪਵਿਸਿਤ੍ਵਾ ਨਿਵੇਸਨਂ;

ਭਰਿਯਂ ਆਮਨ੍ਤਯਿਤ੍ਵਾਨ, ਇਦਂ ਵਚਨਮਬ੍ਰਵਿ.

੧੩੬੦.

‘‘‘ਅਯਂ ਸੋ ਪੁਣ੍ਣਕੋ ਯਕ੍ਖੋ, ਯਾਚਤੀ ਮਂ ਇਰਨ੍ਧਤਿਂ;

ਬਹੁਨਾ ਵਿਤ੍ਤਲਾਭੇਨ, ਤਸ੍ਸ ਦੇਮ ਪਿਯਂ ਮਮ’’’ਨ੍ਤਿ.

ਤਤ੍ਥ ਪਵਿਸਿਤ੍ਵਾਤਿ ਵਰੁਣੋ ਪੁਣ੍ਣਕਂ ਤਤ੍ਥੇਵ ਠਪੇਤ੍ਵਾ ਸਯਂ ਉਟ੍ਠਾਯ ਯਤ੍ਥਸ੍ਸ ਭਰਿਯਾ ਨਿਪਨ੍ਨਾ, ਤਂ ਨਿਵੇਸਨਂ ਪਵਿਸਿਤ੍ਵਾ. ਪਿਯਂ ਮਮਨ੍ਤਿ ਮਮ ਪਿਯਂ ਧੀਤਰਂ ਤਸ੍ਸ ਬਹੁਨਾ ਵਿਤ੍ਤਲਾਭੇਨ ਦੇਮਾਤਿ ਪੁਚ੍ਛਤਿ.

ਵਿਮਲਾ ¶ ਆਹ –

੧੩੬੧.

‘‘ਨ ਧਨੇਨ ਨ ਵਿਤ੍ਤੇਨ, ਲਬ੍ਭਾ ਅਮ੍ਹਂ ਇਰਨ੍ਧਤੀ;

ਸਚੇ ਚ ਖੋ ਹਦਯਂ ਪਣ੍ਡਿਤਸ੍ਸ, ਧਮ੍ਮੇਨ ਲਦ੍ਧਾ ਇਧ ਮਾਹਰੇਯ੍ਯ;

ਏਤੇਨ ਵਿਤ੍ਤੇਨ ਕੁਮਾਰਿ ਲਬ੍ਭਾ, ਨਾਞ੍ਞਂ ਧਨਂ ਉਤ੍ਤਰਿ ਪਤ੍ਥਯਾਮਾ’’ਤਿ.

ਤਤ੍ਥ ਅਮ੍ਹਂ ਇਰਨ੍ਧਤੀਤਿ ਅਮ੍ਹਾਕਂ ਧੀਤਾ ਇਰਨ੍ਧਤੀ. ਏਤੇਨ ਵਿਤ੍ਤੇਨਾਤਿ ਏਤੇਨ ਤੁਟ੍ਠਿਕਾਰਣੇਨ.

ਸੋ ਤਾਯ ਸਦ੍ਧਿਂ ਮਨ੍ਤੇਤ੍ਵਾ ਪੁਨਦੇਵ ਪੁਣ੍ਣਕੇਨ ਸਦ੍ਧਿਂ ਮਨ੍ਤੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੬੨.

‘‘ਤਤੋ ਸੋ ਵਰੁਣੋ ਨਾਗੋ, ਨਿਕ੍ਖਮਿਤ੍ਵਾ ਨਿਵੇਸਨਾ;

ਪੁਣ੍ਣਕਾਮਨ੍ਤਯਿਤ੍ਵਾਨ, ਇਦਂ ਵਚਨਮਬ੍ਰਵਿ.

੧੩੬੩.

‘‘‘ਨ ¶ ਧਨੇਨ ਨ ਵਿਤ੍ਤੇਨ, ਲਬ੍ਭਾ ਅਮ੍ਹਂ ਇਰਨ੍ਧਤੀ;

ਸਚੇ ਤੁਵਂ ਹਦਯਂ ਪਣ੍ਡਿਤਸ, ਧਮ੍ਮੇਨ ਲਦ੍ਧਾ ਇਧ ਮਾਹਰੇਸਿ;

ਏਤੇਨ ਵਿਤ੍ਤੇਨ ਕੁਮਾਰਿ ਲਬ੍ਭਾ, ਨਾਞ੍ਞਂ ਧਨਂ ਉਤ੍ਤਰਿ ਪਤ੍ਥਯਾਮਾ’’’ਤਿ.

ਤਤ੍ਥ ਪੁਣ੍ਣਕਾਮਨ੍ਤਯਿਤ੍ਵਾਨਾਤਿ ਪੁਣ੍ਣਕਂ ਆਮਨ੍ਤਯਿਤ੍ਵਾ.

ਪੁਣ੍ਣਕੋ ਆਹ –

੧੩੬੪.

‘‘ਯਂ ਪਣ੍ਡਿਤੋਤ੍ਯੇਕੇ ਵਦਨ੍ਤਿ ਲੋਕੇ, ਤਮੇਵ ਬਾਲੋਤਿ ਪੁਨਾਹੁ ਅਞ੍ਞੇ;

ਅਕ੍ਖਾਹਿ ਮੇ ਵਿਪ੍ਪਵਦਨ੍ਤਿ ਏਤ੍ਥ, ਕਂ ਪਣ੍ਡਿਤਂ ਨਾਗ ਤੁਵਂ ਵਦੇਸੀ’’ਤਿ.

ਤਤ੍ਥ ਯਂ ¶ ਪਣ੍ਡਿਤੋਤ੍ਯੇਕੇਤਿ ਸੋ ਕਿਰ ‘‘ਹਦਯਂ ਪਣ੍ਡਿਤਸ੍ਸਾ’’ਤਿ ਸੁਤ੍ਵਾ ਚਿਨ੍ਤੇਸਿ ‘‘ਯਂ ਏਕੇ ਪਣ੍ਡਿਤੋਤਿ ਵਦਨ੍ਤਿ, ਤਮੇਵ ਅਞ੍ਞੇ ਬਾਲੋਤਿ ਕਥੇਨ੍ਤਿ. ਕਿਞ੍ਚਾਪਿ ਮੇ ਇਰਨ੍ਧਤਿਯਾ ਵਿਧੁਰੋਤਿ ਅਕ੍ਖਾਤਂ, ਤਥਾਪਿ ਤਥਤੋ ਜਾਨਿਤੁਂ ਪੁਚ੍ਛਿਸ੍ਸਾਮਿ ਨ’’ਨ੍ਤਿ. ਤਸ੍ਮਾ ਏਵਮਾਹ.

ਨਾਗਰਾਜਾ ¶ ਆਹ –

੧੩੬੫.

‘‘ਕੋਰਬ੍ਯਰਾਜਸ੍ਸ ਧਨਞ੍ਚਯਸ੍ਸ, ਯਦਿ ਤੇ ਸੁਤੋ ਵਿਧੁਰੋ ਨਾਮ ਕਤ੍ਤਾ;

ਆਨੇਹਿ ਤਂ ਪਣ੍ਡਿਤਂ ਧਮ੍ਮਲਦ੍ਧਾ, ਇਰਨ੍ਧਤੀ ਪਦਚਰਾ ਤੇ ਹੋਤੂ’’ਤਿ.

ਤਤ੍ਥ ਧਮ੍ਮਲਦ੍ਧਾਤਿ ਧਮ੍ਮੇਨ ਲਭਿਤ੍ਵਾ. ਪਦਚਰਾਤਿ ਪਾਦਪਰਿਚਾਰਿਕਾ.

ਤਂ ਸੁਤ੍ਵਾ ਪੁਣ੍ਣਕੋ ਸੋਮਨਸ੍ਸਪ੍ਪਤ੍ਤੋ ਸਿਨ੍ਧਵਂ ਨਯਨਤ੍ਥਾਯ ਉਪਟ੍ਠਾਕਂ ਆਣਾਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੬੬.

‘‘ਇਦਞ੍ਚ ਸੁਤ੍ਵਾ ਵਰੁਣਸ੍ਸ ਵਾਕ੍ਯਂ, ਉਟ੍ਠਾਯ ਯਕ੍ਖੋ ਪਰਮਪ੍ਪਤੀਤੋ;

ਤਤ੍ਥੇਵ ਸਨ੍ਤੋ ਪੁਰਿਸਂ ਅਸਂਸਿ, ਆਨੇਹਿ ਆਜਞ੍ਞਮਿਧੇਵ ਯੁਤ੍ਤ’’ਨ੍ਤਿ.

ਤਤ੍ਥ ਪੁਰਿਸਂ ਅਸਂਸੀਤਿ ਅਤ੍ਤਨੋ ਉਪਟ੍ਠਾਕਂ ਆਣਾਪੇਸਿ. ਆਜਞ੍ਞਨ੍ਤਿ ਕਾਰਣਾਕਾਰਣਜਾਨਨਕਸਿਨ੍ਧਵਂ. ਯੁਤ੍ਤਨ੍ਤਿ ਕਪ੍ਪਿਤਂ.

੧੩੬੭.

‘‘ਜਾਤਰੂਪਮਯਾ ¶ ਕਣ੍ਣਾ, ਕਾਚਮ੍ਹਿਚਮਯਾ ਖੁਰਾ;

ਜਮ੍ਬੋਨਦਸ੍ਸ ਪਾਕਸ੍ਸ, ਸੁਵਣ੍ਣਸ੍ਸ ਉਰਚ੍ਛਦੋ’’ਤਿ.

ਤਤ੍ਥ ਜਾਤਰੂਪਮਯਾ ਕਣ੍ਣਾਤਿ ਤਮੇਵ ਸਿਨ੍ਧਵਂ ਵਣ੍ਣੇਨ੍ਤੋ ਆਹ. ਤਸ੍ਸ ਹਿ ਮਨੋਮਯਸ੍ਸ ਸਿਨ੍ਧਵਸ੍ਸ ਜਾਤਰੂਪਮਯਾ ਕਣ੍ਣਾ, ਕਾਚਮ੍ਹਿਚਮਯਾ ਖੁਰਾ, ਤਸ੍ਸ ਖੁਰਾ ਰਤ੍ਤਮਣਿਮਯਾਤਿ ਅਤ੍ਥੋ. ਜਮ੍ਬੋਨਦਸ੍ਸ ਪਾਕਸ੍ਸਾਤਿ ਜਮ੍ਬੋਨਦਸ੍ਸ ਪਕ੍ਕਸ੍ਸ ਰਤ੍ਤਸੁਵਣ੍ਣਸ੍ਸ ਉਰਚ੍ਛਦੋ.

ਸੋ ਪੁਰਿਸੋ ਤਾਵਦੇਵ ਤਂ ਸਿਨ੍ਧਵਂ ਆਨੇਸਿ. ਪੁਣ੍ਣਕੋ ਤਂ ਅਭਿਰੁਯ੍ਹ ਆਕਾਸੇਨ ਵੇਸ੍ਸਵਣਸ੍ਸ ਸਨ੍ਤਿਕਂ ਗਨ੍ਤ੍ਵਾ ਨਾਗਭਵਨਂ ਵਣ੍ਣੇਤ੍ਵਾ ਤਂ ਪਵਤ੍ਤਿਂ ਆਰੋਚੇਸਿ. ਤਸ੍ਸਤ੍ਥਸ੍ਸ ਪਕਾਸਨਤ੍ਥਂ ਇਦਂ ਵੁਤ੍ਤਂ –

੧੩੬੮.

‘‘ਦੇਵਵਾਹਵਹਂ ਯਾਨਂ, ਅਸ੍ਸਮਾਰੁਯ੍ਹ ਪੁਣ੍ਣਕੋ;

ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੁ, ਪਕ੍ਕਾਮਿ ਵੇਹਾਯਸਮਨ੍ਤਲਿਕ੍ਖੇ.

੧੩੬੯.

‘‘ਸੋ ¶ ਪੁਣ੍ਣਕੋ ਕਾਮਰਾਗੇਨ ਗਿਦ੍ਧੋ, ਇਰਨ੍ਧਤਿਂ ਨਾਗਕਞ੍ਞਂ ਜਿਗੀਸਂ;

ਗਨ੍ਤ੍ਵਾਨ ¶ ਤਂ ਭੂਤਪਤਿਂ ਯਸਸ੍ਸਿਂ, ਇਚ੍ਚਬ੍ਰਵੀ ਵੇਸ੍ਸਵਣਂ ਕੁਵੇਰਂ.

੧੩੭੦.

‘‘ਭੋਗਵਤੀ ਨਾਮ ਮਨ੍ਦਿਰੇ, ਵਾਸਾ ਹਿਰਞ੍ਞਵਤੀਤਿ ਵੁਚ੍ਚਤਿ;

ਨਗਰੇ ਨਿਮ੍ਮਿਤੇ ਕਞ੍ਚਨਮਯੇ, ਮਣ੍ਡਲਸ੍ਸ ਉਰਗਸ੍ਸ ਨਿਟ੍ਠਿਤਂ.

੧੩੭੧.

‘‘ਅਟ੍ਟਾਲਕਾ ਓਟ੍ਠਗੀਵਿਯੋ, ਲੋਹਿਤਙ੍ਕਸ੍ਸ ਮਸਾਰਗਲ੍ਲਿਨੋ;

ਪਾਸਾਦੇਤ੍ਥ ਸਿਲਾਮਯਾ, ਸੋਵਣ੍ਣਰਤਨੇਹਿ ਛਾਦਿਤਾ.

੧੩੭੨.

‘‘ਅਮ੍ਬਾ ਤਿਲਕਾ ਚ ਜਮ੍ਬੁਯੋ, ਸਤ੍ਤਪਣ੍ਣਾ ਮੁਚਲਿਨ੍ਦਕੇਤਕਾ;

ਪਿਯਙ੍ਗੁ ਉਦ੍ਦਾਲਕਾ ਸਹਾ, ਉਪਰਿਭਦ੍ਦਕਾ ਸਿਨ੍ਦੁਵਾਰਕਾ.

੧੩੭੩.

‘‘ਚਮ੍ਪੇਯ੍ਯਕਾ ਨਾਗਮਲ੍ਲਿਕਾ, ਭਗਿਨੀਮਾਲਾ ਅਥ ਮੇਤ੍ਥ ਕੋਲਿਯਾ;

ਏਤੇ ਦੁਮਾ ਪਰਿਣਾਮਿਤਾ, ਸੋਭਯਨ੍ਤਿ ਉਰਗਸ੍ਸ ਮਨ੍ਦਿਰਂ.

੧੩੭੪.

‘‘ਖਜ੍ਜੁਰੇਤ੍ਥ ¶ ਸਿਲਾਮਯਾ, ਸੋਵਣ੍ਣਧੁਵਪੁਪ੍ਫਿਤਾ ਬਹੂ;

ਯਤ੍ਥ ਵਸਤੋਪਪਾਤਿਕੋ, ਨਾਗਰਾਜਾ ਵਰੁਣੋ ਮਹਿਦ੍ਧਿਕੋ.

੧੩੭੫.

‘‘ਤਸ੍ਸ ਕੋਮਾਰਿਕਾ ਭਰਿਯਾ, ਵਿਮਲਾ ਕਞ੍ਚਨਵੇਲ੍ਲਿਵਿਗ੍ਗਹਾ;

ਕਾਲਾ ਤਰੁਣਾਵ ਉਗ੍ਗਤਾ, ਪੁਚਿਮਨ੍ਦਤ੍ਥਨੀ ਚਾਰੁਦਸ੍ਸਨਾ.

੧੩੭੬.

‘‘ਲਾਖਾਰਸਰਤ੍ਤਸੁਚ੍ਛਵੀ ¶ , ਕਣਿਕਾਰਾਵ ਨਿਵਾਤਪੁਪ੍ਫਿਤਾ;

ਤਿਦਿਵੋਕਚਰਾਵ ਅਚ੍ਛਰਾ, ਵਿਜ੍ਜੁਵਬ੍ਭਘਨਾ ਵਿਨਿਸ੍ਸਟਾ.

੧੩੭੭.

‘‘ਸਾ ¶ ਦੋਹਲ਼ਿਨੀ ਸੁਵਿਮ੍ਹਿਤਾ, ਵਿਧੁਰਸ੍ਸ ਹਦਯਂ ਧਨਿਯਤਿ;

ਤਂ ਤੇਸਂ ਦੇਮਿ ਇਸ੍ਸਰ, ਤੇਨ ਤੇ ਦੇਨ੍ਤਿ ਇਰਨ੍ਧਤਿਂ ਮਮ’’ਨ੍ਤਿ.

ਤਤ੍ਥ ਦੇਵਵਾਹਵਹਂ ਯਾਨਨ੍ਤਿ ਵਹਿਤਬ੍ਬੋਤਿ ਵਾਹੋ, ਦੇਵਸਙ੍ਖਾਤਂ ਵਾਹਂ ਵਹਤੀਤਿ ਦੇਵਵਾਹਵਹਂ. ਯਨ੍ਤਿ ਏਤੇਨਾਤਿ ਯਾਨਂ. ਕਪ੍ਪਿਤਕੇਸਮਸ੍ਸੂਤਿ ਮਣ੍ਡਨਵਸੇਨ ਸੁਸਂਵਿਹਿਤਕੇਸਮਸ੍ਸੁ. ਦੇਵਾਨਂ ਪਨ ਕੇਸਮਸ੍ਸੁਕਰਣਕਮ੍ਮਂ ਨਾਮ ਨਤ੍ਥਿ, ਵਿਚਿਤ੍ਤਕਥਿਕੇਨ ਪਨ ਕਥਿਤਂ. ਜਿਗੀਸਨ੍ਤਿ ਪਤ੍ਥਯਨ੍ਤੋ. ਵੇਸ੍ਸਵਣਨ੍ਤਿ ਵਿਸਾਣਾਯ ਰਾਜਧਾਨਿਯਾ ਇਸ੍ਸਰਰਾਜਾਨਂ. ਕੁਵੇਰਨ੍ਤਿ ਏਵਂਨਾਮਕਂ. ਭੋਗਵਤੀ ਨਾਮਾਤਿ ਸਮ੍ਪਨ੍ਨਭੋਗਤਾਯ ਏਵਂਲਦ੍ਧਨਾਮਂ. ਮਨ੍ਦਿਰੇਤਿ ਮਨ੍ਦਿਰਂ, ਭਵਨਨ੍ਤਿ ਅਤ੍ਥੋ. ਵਾਸਾ ਹਿਰਞ੍ਞਵਤੀਤਿ ਨਾਗਰਾਜਸ੍ਸ ਵਸਨਟ੍ਠਾਨਤ੍ਤਾ ਵਾਸਾਤਿ ਚ, ਕਞ੍ਚਨਵਤਿਯਾ ਸੁਵਣ੍ਣਪਾਕਾਰੇਨ ਪਰਿਕ੍ਖਿਤ੍ਤਤ੍ਤਾ ਹਿਰਞ੍ਞਵਤੀਤਿ ਚ ਵੁਚ੍ਚਤਿ. ਨਗਰੇ ਨਿਮ੍ਮਿਤੇਤਿ ਨਗਰਂ ਨਿਮ੍ਮਿਤਂ. ਕਞ੍ਚਨਮਯੇਤਿ ਸੁਵਣ੍ਣਮਯਂ. ਮਣ੍ਡਲਸ੍ਸਾਤਿ ਭੋਗਮਣ੍ਡਲੇਨ ਸਮਨ੍ਨਾਗਤਸ੍ਸ. ਨਿਟ੍ਠਿਤਨ੍ਤਿ ਕਰਣਪਰਿਨਿਟ੍ਠਿਤਂ. ਓਟ੍ਠਗੀਵਿਯੋਤਿ ਓਟ੍ਠਗੀਵਾਸਣ੍ਠਾਨੇਨ ਕਤਾ ਰਤ੍ਤਮਣਿਮਸਾਰਗਲ੍ਲਮਯਾ ਅਟ੍ਟਾਲਕਾ. ਪਾਸਾਦੇਤ੍ਥਾਤਿ ਏਤ੍ਥ ਨਾਗਭਵਨੇ ਪਾਸਾਦਾ. ਸਿਲਾਮਯਾਤਿ ਮਣਿਮਯਾ. ਸੋਵਣ੍ਣਰਤਨੇਹੀਤਿ ਸੁਵਣ੍ਣਸਙ੍ਖਾਤੇਹਿ ਰਤਨੇਹਿ, ਸੁਵਣ੍ਣਿਟ੍ਠਕਾਹਿ ਛਾਦਿਤਾਤਿ ਅਤ੍ਥੋ. ਸਹਾਤਿ ਸਹਕਾਰਾ. ਉਪਰਿਭਦ੍ਦਕਾਤਿ ਉਦ੍ਦਾਲਕਜਾਤਿਕਾਯੇਵ ਰੁਕ੍ਖਾ. ਚਮ੍ਪੇਯ੍ਯਕਾ ਨਾਗਮਲ੍ਲਿਕਾਤਿ ਚਮ੍ਪਕਾ ਚ ਨਾਗਾ ਚ ਮਲ੍ਲਿਕਾ ਚ. ਭਗਿਨੀਮਾਲਾ ਅਥ ਮੇਤ੍ਥ ਕੋਲਿਯਾਤਿ ਭਗਿਨੀਮਾਲਾ ਚੇਵ ਅਥ ਏਤ੍ਥ ਨਾਗਭਵਨੇ ਕੋਲਿਯਾ ਨਾਮ ਰੁਕ੍ਖਾ ਚ. ਏਤੇ ਦੁਮਾ ਪਰਿਣਾਮਿਤਾਤਿ ਏਤੇ ਪੁਪ੍ਫੂਪਗਫਲੂਪਗਰੁਕ੍ਖਾ ਅਞ੍ਞਮਞ੍ਞਂ ਸਙ੍ਘਟ੍ਟਸਾਖਤਾਯ ਪਰਿਣਾਮਿਤਾ ਆਕੁਲਸਮਾਕੁਲਾ. ਖਜ੍ਜੁਰੇਤ੍ਥਾਤਿ ਖਜ੍ਜੁਰਿਰੁਕ੍ਖਾ ਏਤ੍ਥ. ਸਿਲਾਮਯਾਤਿ ਇਨ੍ਦਨੀਲਮਣਿਮਯਾ. ਸੋਵਣ੍ਣਧੁਵਪੁਪ੍ਫਿਤਾਤਿ ਤੇ ਪਨ ਸੁਵਣ੍ਣਪੁਪ੍ਫੇਹਿ ਨਿਚ੍ਚਪੁਪ੍ਫਿਤਾ. ਯਤ੍ਥ ਵਸਤੋਪਪਾਤਿਕੋਤਿ ਯਤ੍ਥ ਨਾਗਭਵਨੇ ਓਪਪਾਤਿਕੋ ਨਾਗਰਾਜਾ ਵਸਤਿ. ਕਞ੍ਚਨਵੇਲ੍ਲਿਵਿਗ੍ਗਹਾਤਿ ¶ ਸੁਵਣ੍ਣਰਾਸਿਸਸ੍ਸਿਰਿਕਸਰੀਰਾ. ਕਾਲਾ ਤਰੁਣਾਵ ਉਗ੍ਗਤਾਤਿ ਵਿਲਾਸਯੁਤ੍ਤਤਾਯ ਮਨ੍ਦਵਾਤੇਰਿਤਾ ਕਾਲਵਲ੍ਲਿਪਲ੍ਲਵਾ ਵਿਯ ਉਗ੍ਗਤਾ. ਪੁਚਿਮਨ੍ਦਤ੍ਥਨੀਤਿ ਨਿਮ੍ਬਫਲਸਣ੍ਠਾਨਚੂਚੁਕਾ ¶ . ਲਾਖਾਰਸਰਤ੍ਤਸੁਚ੍ਛਵੀਤਿ ਹਤ੍ਥਪਾਦਤਲਛਵਿਂ ਸਨ੍ਧਾਯ ਵੁਤ੍ਤਂ. ਤਿਦਿਵੋਕਚਰਾਤਿ ਤਿਦਸਭਵਨਚਰਾ. ਵਿਜ੍ਜੁਵਬ੍ਭਘਨਾਤਿ ਅਬ੍ਭਘਨਵਲਾਹਕਨ੍ਤਰਤੋ ਨਿਸ੍ਸਟਾ ਵਿਜ੍ਜੁਲਤਾ ਵਿਯ. ਤਂ ਤੇਸਂ ਦੇਮੀਤਿ ਤਂ ਤਸ੍ਸ ਹਦਯਂ ਅਹਂ ਤੇਸਂ ਦੇਮਿ, ਏਵਂ ਜਾਨਸ੍ਸੁ. ਇਸ੍ਸਰਾਤਿ ਮਾਤੁਲਂ ਆਲਪਤਿ.

ਇਤਿ ਸੋ ਵੇਸ੍ਸਵਣੇਨ ਅਨਨੁਞ੍ਞਾਤੋ ਗਨ੍ਤੁਂ ਅਵਿਸਹਿਤ੍ਵਾ ਤਂ ਅਨੁਜਾਨਾਪੇਤੁਂ ਏਤਾ ਏਤ੍ਤਕਾ ਗਾਥਾ ਕਥੇਸਿ. ਵੇਸ੍ਸਵਣੋ ਪਨ ਤਸ੍ਸ ਕਥਂ ਨ ਸੁਣਾਤਿ. ਕਿਂਕਾਰਣਾ? ਦ੍ਵਿਨ੍ਨਂ ਦੇਵਪੁਤ੍ਤਾਨਂ ਵਿਮਾਨਅਡ੍ਡਂ ਪਰਿਚ੍ਛਿਨ੍ਦਤੀਤਿ. ਪੁਣ੍ਣਕੋ ਅਤ੍ਤਨੋ ਵਚਨਸ੍ਸ ਅਸ੍ਸੁਤਭਾਵਂ ਞਤ੍ਵਾ ਜਿਨਕਦੇਵਪੁਤ੍ਤਸ੍ਸ ¶ ਸਨ੍ਤਿਕੇ ਅਟ੍ਠਾਸਿ. ਵੇਸ੍ਸਵਣੋ ਅਡ੍ਡਂ ਵਿਨਿਚ੍ਛਿਨਿਤ੍ਵਾ ਪਰਾਜਿਤਂ ਅਨੁਟ੍ਠਾਪੇਤ੍ਵਾ ਇਤਰਂ ‘‘ਗਚ੍ਛ ਤ੍ਵਂ, ਤਵ ਵਿਮਾਨੇ ਵਸਾਹੀ’’ਤਿ ਆਹ. ਪੁਣ੍ਣਕੋ ‘‘ਗਚ੍ਛ ਤ੍ਵ’’ਨ੍ਤਿ ਵੁਤ੍ਤਕ੍ਖਣੇਯੇਵ ‘‘ਮਯ੍ਹਂ ਮਾਤੁਲੇਨ ਮਮ ਪੇਸਿਤਭਾਵਂ ਜਾਨਾਥਾ’’ਤਿ ਕਤਿਪਯਦੇਵਪੁਤ੍ਤੇ ਸਕ੍ਖਿਂ ਕਤ੍ਵਾ ਹੇਟ੍ਠਾ ਵੁਤ੍ਤਨਯੇਨੇਵ ਸਿਨ੍ਧਵਂ ਆਹਰਾਪੇਤ੍ਵਾ ਅਭਿਰੁਯ੍ਹ ਪਕ੍ਕਾਮਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੭੮.

‘‘ਸੋ ਪੁਣ੍ਣਕੋ ਭੂਤਪਤਿਂ ਯਸਸ੍ਸਿਂ, ਆਮਨ੍ਤਯ ਵੇਸ੍ਸਵਣਂ ਕੁਵੇਰਂ;

ਤਤ੍ਥੇਵ ਸਨ੍ਤੋ ਪੁਰਿਸਂ ਅਸਂਸਿ, ਆਨੇਹਿ ਆਜਞ੍ਞਮਿਧੇਵ ਯੁਤ੍ਤਂ.

੧੩੭੯.

‘‘ਜਾਤਰੂਪਮਯਾ ਕਣ੍ਣਾ, ਕਾਚਮ੍ਹਿਚਮਯਾ ਖੁਰਾ;

ਜਮ੍ਬੋਨਦਸ੍ਸ ਪਾਕਸ੍ਸ, ਸੁਵਣ੍ਣਸ੍ਸ ਉਰਚ੍ਛਦੋ.

੧੩੮੦.

‘‘ਦੇਵਵਾਹਵਹਂ ਯਾਨਂ, ਅਸ੍ਸਮਾਰੁਯ੍ਹ ਪੁਣ੍ਣਕੋ;

ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੁ, ਪਕ੍ਕਾਮਿ ਵੇਹਾਯਸਮਨ੍ਤਲਿਕ੍ਖੇ’’ਤਿ.

ਤਤ੍ਥ ਆਮਨ੍ਤਯਾਤਿ ਆਮਨ੍ਤਯਿਤ੍ਵਾ.

ਸੋ ਆਕਾਸੇਨ ਗਚ੍ਛਨ੍ਤੋਯੇਵ ਚਿਨ੍ਤੇਸਿ ‘‘ਵਿਧੁਰਪਣ੍ਡਿਤੋ ਮਹਾਪਰਿਵਾਰੋ, ਨ ਸਕ੍ਕਾ ਤਂ ਗਣ੍ਹਿਤੁਂ, ਧਨਞ੍ਚਯਕੋਰਬ੍ਯੋ ਪਨ ਜੂਤਵਿਤ੍ਤਕੋ, ਤਂ ਜੂਤੇਨ ¶ ਜਿਨਿਤ੍ਵਾ ਵਿਧੁਰਂ ਗਣ੍ਹਿਸ੍ਸਾਮਿ, ਘਰੇ ਪਨਸ੍ਸ ਬਹੂਨਿ ਰਤਨਾਨਿ, ਅਪ੍ਪਗ੍ਘੇਨ ਲਕ੍ਖੇਨ ਜੂਤਂ ਨ ਕੀਲ਼ਿਸ੍ਸਤਿ, ਮਹਗ੍ਘਰਤਨਂ ਹਰਿਤੁਂ ਵਟ੍ਟਤਿ, ਅਞ੍ਞਂ ਰਤਨਂ ਰਾਜਾ ਨ ਗਣ੍ਹਿਸ੍ਸਤਿ, ਰਾਜਗਹਸ੍ਸ ਸਾਮਨ੍ਤਾ ਵੇਪੁਲ੍ਲਪਬ੍ਬਤਬ੍ਭਨ੍ਤਰੇ ਚਕ੍ਕਵਤ੍ਤਿਰਞ੍ਞੋ ਪਰਿਭੋਗਮਣਿਰਤਨਂ ਅਤ੍ਥਿ ਮਹਾਨੁਭਾਵਂ, ਤਂ ਗਹੇਤ੍ਵਾ ਤੇਨ ਰਾਜਾਨਂ ਪਲੋਭੇਤ੍ਵਾ ਜਿਨਿਸ੍ਸਾਮੀ’’ਤਿ. ਸੋ ਤਥਾ ਅਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੮੧.

‘‘ਸੋ ¶ ਅਗ੍ਗਮਾ ਰਾਜਗਹਂ ਸੁਰਮ੍ਮਂ, ਅਙ੍ਗਸ੍ਸ ਰਞ੍ਞੋ ਨਗਰਂ ਦੁਰਾਯੁਤਂ;

ਪਹੂਤਭਕ੍ਖਂ ਬਹੁਅਨ੍ਨਪਾਨਂ, ਮਸਕ੍ਕਸਾਰਂ ਵਿਯ ਵਾਸਵਸ੍ਸ.

੧੩੮੨.

‘‘ਮਯੂਰਕੋਞ੍ਚਾਗਣਸਮ੍ਪਘੁਟ੍ਠਂ ¶ , ਦਿਜਾਭਿਘੁਟ੍ਠਂ ਦਿਜਸਙ੍ਘਸੇਵਿਤਂ;

ਨਾਨਾਸਕੁਨ੍ਤਾਭਿਰੁਦਂ ਸੁਵਙ੍ਗਣਂ, ਪੁਪ੍ਫਾਭਿਕਿਣ੍ਣਂ ਹਿਮਵਂਵ ਪਬ੍ਬਤਂ.

੧੩੮੩.

‘‘ਸੋ ਪੁਣ੍ਣਕੋ ਵੇਪੁਲਮਾਭਿਰੂਹਿ, ਸਿਲੁਚ੍ਚਯਂ ਕਿਮ੍ਪੁਰਿਸਾਨੁਚਿਣ੍ਣਂ;

ਅਨ੍ਵੇਸਮਾਨੋ ਮਣਿਰਤਨਂ ਉਲ਼ਾਰਂ, ਤਮਦ੍ਦਸਾ ਪਬ੍ਬਤਕੂਟਮਜ੍ਝੇ’’ਤਿ.

ਤਤ੍ਥ ਅਙ੍ਗਸ੍ਸ ਰਞ੍ਞੋਤਿ ਤਦਾ ਅਙ੍ਗਸ੍ਸ ਰਞ੍ਞੋਵ ਮਗਧਰਜ੍ਜਂ ਅਹੋਸਿ. ਤੇਨ ਵੁਤ੍ਤਂ – ‘‘ਅਙ੍ਗਸ੍ਸ ਰਞ੍ਞੋ ਨਗਰ’’ਨ੍ਤਿ. ਦੁਰਾਯੁਤਨ੍ਤਿ ਪਚ੍ਚਤ੍ਥਿਕੇਹਿ ਦੁਰਾਯੁਤ੍ਤਂ. ਮਸਕ੍ਕਸਾਰਂ ਵਿਯ ਵਾਸਵਸ੍ਸਾਤਿ ਮਸਕ੍ਕਸਾਰਸਙ੍ਖਾਤੇ ਸਿਨੇਰੁਪਬ੍ਬਤਮਤ੍ਥਕੇ ਮਾਪਿਤਤ੍ਤਾ ‘‘ਮਸਕ੍ਕਸਾਰ’’ਨ੍ਤਿ ਲਦ੍ਧਨਾਮਂ ਵਾਸਵਸ੍ਸ ਭਵਨਂ ਵਿਯ. ਦਿਜਾਭਿਘੁਟ੍ਠਨ੍ਤਿ ਅਞ੍ਞੇਹਿ ਚ ਪਕ੍ਖੀਹਿ ਅਭਿਸਙ੍ਘੁਟ੍ਠਂ ਨਿਨ੍ਨਾਦਿਤਂ. ਨਾਨਾਸਕੁਨ੍ਤਾਭਿਰੁਦਨ੍ਤਿ ਮਧੁਰਸ੍ਸਰੇਨ ਗਾਯਨ੍ਤੇਹਿ ਵਿਯ ਨਾਨਾਵਿਧੇਹਿ ਸਕੁਣੇਹਿ ਅਭਿਰੁਦਂ, ਅਭਿਗੀਤਨ੍ਤਿ ਅਤ੍ਥੋ. ਸੁਵਙ੍ਗਣਨ੍ਤਿ ਸੁਨ੍ਦਰਅਙ੍ਗਣਂ ਮਨੁਞ੍ਞਤਲਂ. ਹਿਮਵਂਵ ਪਬ੍ਬਤਨ੍ਤਿ ਹਿਮਵਨ੍ਤਪਬ੍ਬਤਂ ਵਿਯ. ਵੇਪੁਲਮਾਭਿਰੂਹੀਤਿ ਭਿਕ੍ਖਵੇ, ਸੋ ਪੁਣ੍ਣਕੋ ਏਵਰੂਪਂ ਵੇਪੁਲ੍ਲਪਬ੍ਬਤਂ ਅਭਿਰੁਹਿ. ਪਬ੍ਬਤਕੂਟਮਜ੍ਝੇਤਿ ਪਬ੍ਬਤਕੂਟਅਨ੍ਤਰੇ ਤਂ ਮਣਿਂ ਅਦ੍ਦਸ.

੧੩੮੪.

‘‘ਦਿਸ੍ਵਾ ¶ ਮਣਿਂ ਪਭਸ੍ਸਰਂ ਜਾਤਿਮਨ੍ਤਂ, ਮਨੋਹਰਂ ਮਣਿਰਤਨਂ ਉਲ਼ਾਰਂ;

ਦਦ੍ਦਲ੍ਲਮਾਨਂ ਯਸਸਾ ਯਸਸ੍ਸਿਨਂ, ਓਭਾਸਤੀ ਵਿਜ੍ਜੁਰਿਵਨ੍ਤਲਿਕ੍ਖੇ.

੧੩੮੫.

‘‘ਤਮਗ੍ਗਹੀ ਵੇਲ਼ੁਰਿਯਂ ਮਹਗ੍ਘਂ, ਮਨੋਹਰਂ ਨਾਮ ਮਹਾਨੁਭਾਵਂ;

ਆਜਞ੍ਞਮਾਰੁਯ੍ਹ ਮਨੋਮਵਣ੍ਣੋ, ਪਕ੍ਕਾਮਿ ਵੇਹਾਯਸਮਨ੍ਤਲਿਕ੍ਖੇ’’ਤਿ.

ਤਤ੍ਥ ਮਨੋਹਰਨ੍ਤਿ ਮਨਸਾਭਿਪਤ੍ਥਿਤਸ੍ਸ ਧਨਸ੍ਸ ਆਹਰਣਸਮਤ੍ਥਂ. ਦਦ੍ਦਲ੍ਲਮਾਨਨ੍ਤਿ ਉਜ੍ਜਲਮਾਨਂ. ਯਸਸਾਤਿ ਪਰਿਵਾਰਮਣਿਗਣੇਨ. ਓਭਾਸਤੀਤਿ ਤਂ ਮਣਿਰਤਨਂ ਆਕਾਸੇ ਵਿਜ੍ਜੁਰਿਵ ਓਭਾਸਤਿ. ਤਮਗ੍ਗਹੀਤਿ ਤਂ ਮਣਿਰਤਨਂ ਅਗ੍ਗਹੇਸਿ. ਤਂ ਪਨ ਮਣਿਰਤਨਂ ਕੁਮ੍ਭਿਰੋ ਨਾਮ ਯਕ੍ਖੋ ਕੁਮ੍ਭਣ੍ਡਸਹਸ੍ਸਪਰਿਵਾਰੋ ਰਕ੍ਖਤਿ. ਸੋ ਪਨ ਤੇਨ ਕੁਜ੍ਝਿਤ੍ਵਾ ਓਲੋਕਿਤਮਤ੍ਤੇਨੇਵ ਭੀਤਤਸਿਤੋ ਪਲਾਯਿਤ੍ਵਾ ਚਕ੍ਕਵਾਲ਼ਪਬ੍ਬਤਂ ਪਤ੍ਵਾ ਕਮ੍ਪਮਾਨੋ ਓਲੋਕੇਨ੍ਤੋ ਅਟ੍ਠਾਸਿ. ਇਤਿ ਤਂ ਪਲਾਪੇਤ੍ਵਾ ਪੁਣ੍ਣਕੋ ਮਣਿਰਤਨਂ ਅਗ੍ਗਹੇਸਿ. ਮਨੋਹਰਂ ਨਾਮਾਤਿ ਮਨਸਾ ਚਿਨ੍ਤਿਤਂ ਧਨਂ ਆਹਰਿਤੁਂ ਸਕ੍ਕੋਤੀਤਿ ਏਵਂਲਦ੍ਧਨਾਮਂ.

ਇਤਿ ¶ ਸੋ ਤਂ ਗਹੇਤ੍ਵਾ ਆਕਾਸੇਨ ਗਚ੍ਛਨ੍ਤੋ ਤਂ ਨਗਰਂ ਪਤ੍ਤੋ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੩੮੬.

‘‘ਸੋ ਅਗ੍ਗਮਾ ਨਗਰਮਿਨ੍ਦਪਤ੍ਥਂ, ਓਰੁਯ੍ਹੁਪਾਗਚ੍ਛਿ ਸਭਂ ਕੁਰੂਨਂ;

ਸਮਾਗਤੇ ¶ ਏਕਸਤਂ ਸਮਗ੍ਗੇ, ਅਵ੍ਹੇਤ੍ਥ ਯਕ੍ਖੋ ਅਵਿਕਮ੍ਪਮਾਨੋ.

੧੩੮੭.

‘‘ਕੋ ਨੀਧ ਰਞ੍ਞਂ ਵਰਮਾਭਿਜੇਤਿ, ਕਮਾਭਿਜੇਯ੍ਯਾਮ ਵਰਦ੍ਧਨੇਨ;

ਕਮਨੁਤ੍ਤਰਂ ਰਤਨਵਰਂ ਜਿਨਾਮ, ਕੋ ਵਾਪਿ ਨੋ ਜੇਤਿ ਵਰਦ੍ਧਨੇਨਾ’’ਤਿ.

ਤਤ੍ਥ ¶ ਓਰੁਯ੍ਹੁਪਾਗਚ੍ਛਿ ਸਭਂ ਕੁਰੂਨਨ੍ਤਿ ਭਿਕ੍ਖਵੇ, ਸੋ ਪੁਣ੍ਣਕੋ ਅਸ੍ਸਪਿਟ੍ਠਿਤੋ ਓਰੁਯ੍ਹ ਅਸ੍ਸਂ ਅਦਿਸ੍ਸਮਾਨਰੂਪਂ ਠਪੇਤ੍ਵਾ ਮਾਣਵਕਵਣ੍ਣੇਨ ਕੁਰੂਨਂ ਸਭਂ ਉਪਗਤੋ. ਏਕਸਤਨ੍ਤਿ ਏਕਸਤਰਾਜਾਨੋ ਅਛਮ੍ਭੀਤੋ ਹੁਤ੍ਵਾ ‘‘ਕੋ ਨੀਧਾ’’ਤਿਆਦੀਨਿ ਵਦਨ੍ਤੋ ਜੂਤੇਨ ਅਵ੍ਹੇਤ੍ਥ. ਕੋ ਨੀਧਾਤਿ ਕੋ ਨੁ ਇਮਸ੍ਮਿਂ ਰਾਜਸਮਾਗਮੇ. ਰਞ੍ਞਨ੍ਤਿ ਰਾਜੂਨਂ ਅਨ੍ਤਰੇ. ਵਰਮਾਭਿਜੇਤੀਤਿ ਅਮ੍ਹਾਕਂ ਸਨ੍ਤਕਂ ਸੇਟ੍ਠਰਤਨਂ ਅਭਿਜੇਤਿ, ‘‘ਅਹਂ ਜਿਨਾਮੀ’’ਤਿ ਵਤ੍ਤੁਂ ਉਸ੍ਸਹਤਿ. ਕਮਾਭਿਜੇਯ੍ਯਾਮਾਤਿ ਕਂ ਵਾ ਮਯਂ ਜਿਨੇਯ੍ਯਾਮ. ਵਰਦ੍ਧਨੇਨਾਤਿ ਉਤ੍ਤਮਧਨੇਨ. ਕਮਨੁਤ੍ਤਰਨ੍ਤਿ ਜਿਨਨ੍ਤੋ ਚ ਕਤਰਂ ਰਾਜਾਨਂ ਅਨੁਤ੍ਤਰਂ ਰਤਨਵਰਂ ਜਿਨਾਮ. ਕੋ ਵਾਪਿ ਨੋ ਜੇਤੀਤਿ ਅਥ ਵਾ ਕੋ ਨਾਮ ਰਾਜਾ ਅਮ੍ਹੇ ਵਰਧਨੇਨ ਜੇਤਿ. ਇਤਿ ਸੋ ਚਤੂਹਿ ਪਦੇਹਿ ਕੋਰਬ੍ਯਮੇਵ ਘਟ੍ਟੇਤਿ.

ਅਥ ਰਾਜਾ ‘‘ਮਯਾ ਇਤੋ ਪੁਬ੍ਬੇ ਏਵਂ ਸੂਰੋ ਹੁਤ੍ਵਾ ਕਥੇਨ੍ਤੋ ਨਾਮ ਨ ਦਿਟ੍ਠਪੁਬ੍ਬੋ, ਕੋ ਨੁ ਖੋ ਏਸੋ’’ਤਿ ਚਿਨ੍ਤੇਤ੍ਵਾ ਪੁਚ੍ਛਨ੍ਤੋ ਗਾਥਮਾਹ –

੧੩੮੮.

‘‘ਕੁਹਿਂ ਨੁ ਰਟ੍ਠੇ ਤਵ ਜਾਤਿਭੂਮਿ, ਨ ਕੋਰਬ੍ਯਸ੍ਸੇਵ ਵਚੋ ਤਵੇਦਂ;

ਅਭੀਤੋਸਿ ਨੋ ਵਣ੍ਣਨਿਭਾਯ ਸਬ੍ਬੇ, ਅਕ੍ਖਾਹਿ ਮੇ ਨਾਮਞ੍ਚ ਬਨ੍ਧਵੇ ਚਾ’’ਤਿ.

ਤਤ੍ਥ ਨ ਕੋਰਬ੍ਯਸ੍ਸੇਵਾਤਿ ਕੁਰੁਰਟ੍ਠਵਾਸਿਕਸ੍ਸੇਵ ਤਵ ਵਚਨਂ ਨ ਹੋਤਿ.

ਤਂ ਸੁਤ੍ਵਾ ਇਤਰੋ ‘‘ਅਯਂ ਰਾਜਾ ਮਮ ਨਾਮਂ ਪੁਚ੍ਛਤਿ, ਪੁਣ੍ਣਕੋ ਚ ਨਾਮ ਦਾਸੋ ਹੋਤਿ. ਸਚਾਹਂ ‘ਪੁਣ੍ਣਕੋਸ੍ਮੀ’ਤਿ ਵਕ੍ਖਾਮਿ, ‘ਏਸ ਦਾਸੋ, ਤਸ੍ਮਾ ਮਂ ਪਗਬ੍ਭਤਾਯ ਏਵਂ ਵਦੇਤੀ’ਤਿ ਅਵਮਞ੍ਞਿਸ੍ਸਤਿ, ਅਨਨ੍ਤਰਾਤੀਤੇ ਅਤ੍ਤਭਾਵੇ ਨਾਮਮਸ੍ਸ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੩੮੯.

‘‘ਕਚ੍ਚਾਯਨੋ ¶ ਮਾਣਵਕੋਸ੍ਮਿ ਰਾਜ, ਅਨੂਨਨਾਮੋ ਇਤਿ ਮਵ੍ਹਯਨ੍ਤਿ;

ਅਙ੍ਗੇਸੁ ¶ ਮੇ ਞਾਤਯੋ ਬਨ੍ਧਵਾ ਚ, ਅਕ੍ਖੇਨ ਦੇਵਸ੍ਮਿ ਇਧਾਨੁਪਤ੍ਤੋ’’ਤਿ.

ਤਤ੍ਥ ਅਨੂਨਨਾਮੋਤਿ ਨ ਊਨਨਾਮੋ. ਇਮਿਨਾ ਅਤ੍ਤਨੋ ਪੁਣ੍ਣਕਨਾਮਮੇਵ ਪਟਿਚ੍ਛਨ੍ਨਂ ਕਤ੍ਵਾ ਕਥੇਤਿ. ਇਤਿ ਮਵ੍ਹਯਨ੍ਤੀਤਿ ਇਤਿ ਮਂ ਅਵ੍ਹਯਨ੍ਤਿ ਪਕ੍ਕੋਸਨ੍ਤਿ ¶ . ਅਙ੍ਗੇਸੂਤਿ ਅਙ੍ਗਰਟ੍ਠੇ ਕਾਲਚਮ੍ਪਾਨਗਰੇ ਵਸਨ੍ਤਿ. ਅਕ੍ਖੇਨ ਦੇਵਸ੍ਮੀਤਿ ਦੇਵ, ਜੂਤਕੀਲ਼ਨਤ੍ਥੇਨ ਇਧ ਅਨੁਪ੍ਪਤ੍ਤੋਸ੍ਮਿ.

ਅਥ ਰਾਜਾ ‘‘ਮਾਣਵ, ਤ੍ਵਂ ਜੂਤੇਨ ਜਿਤੋ ਕਿਂ ਦਸ੍ਸਸਿ, ਕਿਂ ਤੇ ਅਤ੍ਥੀ’’ਤਿ ਪੁਚ੍ਛਨ੍ਤੋ ਗਾਥਮਾਹ –

੧੩੯੦.

‘‘ਕਿਂ ਮਾਣਵਸ੍ਸ ਰਤਨਾਨਿ ਅਤ੍ਥਿ, ਯੇ ਤਂ ਜਿਨਨ੍ਤੋ ਹਰੇ ਅਕ੍ਖਧੁਤ੍ਤੋ;

ਬਹੂਨਿ ਰਞ੍ਞੋ ਰਤਨਾਨਿ ਅਤ੍ਥਿ, ਤੇ ਤ੍ਵਂ ਦਲਿਦ੍ਦੋ ਕਥਮਵ੍ਹਯੇਸੀ’’ਤਿ.

ਤਸ੍ਸਤ੍ਥੋ – ਕਿਤ੍ਤਕਾਨਿ ਭੋਤੋ ਮਾਣਵਸ੍ਸ ਰਤਨਾਨਿ ਅਤ੍ਥਿ, ਯੇ ਤਂ ਜਿਨਨ੍ਤੋ ਅਕ੍ਖਧੁਤ੍ਤੋ ‘‘ਆਹਰਾ’’ਤਿ ਵਤ੍ਵਾ ਹਰੇਯ੍ਯ. ਰਞ੍ਞੋ ਪਨ ਨਿਵੇਸਨੇ ਬਹੂਨਿ ਰਤਨਾਨਿ ਅਤ੍ਥਿ, ਤੇ ਰਾਜਾਨੋ ਏਵਂ ਬਹੁਧਨੇ ਤ੍ਵਂ ਦਲਿਦ੍ਦੋ ਸਮਾਨੋ ਕਥਂ ਜੂਤੇਨ ਅਵ੍ਹਯਸੀਤਿ.

ਤਤੋ ਪੁਣ੍ਣਕੋ ਗਾਥਮਾਹ –

੧੩੯੧.

‘‘ਮਨੋਹਰੋ ਨਾਮ ਮਣੀ ਮਮਾਯਂ, ਮਨੋਹਰਂ ਮਣਿਰਤਨਂ ਉਲ਼ਾਰਂ;

ਇਮਞ੍ਚ ਆਜਞ੍ਞਮਮਿਤ੍ਤਤਾਪਨਂ, ਏਤਂ ਮੇ ਜਿਨਿਤ੍ਵਾ ਹਰੇ ਅਕ੍ਖਧੁਤ੍ਤੋ’’ਤਿ.

ਪਾਲ਼ਿਪੋਤ੍ਥਕੇਸੁ ਪਨ ‘‘ਮਣਿ ਮਮ ਵਿਜ੍ਜਤਿ ਲੋਹਿਤਙ੍ਕੋ’’ਤਿ ਲਿਖਿਤਂ. ਸੋ ਪਨ ਮਣਿ ਵੇਲ਼ੁਰਿਯੋ, ਤਸ੍ਮਾ ਇਦਮੇਵ ਸਮੇਤਿ.

ਤਤ੍ਥ ਆਜਞ੍ਞਨ੍ਤਿ ਇਮਂ ਆਜਾਨੀਯਸ੍ਸਞ੍ਚ ਮਣਿਞ੍ਚਾਤਿ ਏਤਂ ਮੇ ਉਭਯਂ ਹਰੇਯ੍ਯ ਅਕ੍ਖਧੁਤ੍ਤੋਤਿ ਅਸ੍ਸਂ ਦਸ੍ਸੇਤ੍ਵਾ ਏਵਮਾਹ.

ਤਂ ਸੁਤ੍ਵਾ ਰਾਜਾ ਗਾਥਮਾਹ –

੧੩੯੨.

‘‘ਏਕੋ ¶ ਮਣੀ ਮਾਣਵ ਕਿਂ ਕਰਿਸ੍ਸਤਿ, ਆਜਾਨਿਯੇਕੋ ਪਨ ਕਿਂ ਕਰਿਸ੍ਸਤਿ;

ਬਹੂਨਿ ਰਞ੍ਞੋ ਮਣਿਰਤਨਾਨਿ ਅਤ੍ਥਿ, ਆਜਾਨਿਯਾ ਵਾਤਜਵਾ ਅਨਪ੍ਪਕਾ’’ਤਿ.

ਦੋਹਲ਼ਕਣ੍ਡਂ ਨਿਟ੍ਠਿਤਂ.

ਮਣਿਕਣ੍ਡਂ

ਸੋ ¶ ¶ ਰਞ੍ਞੋ ਕਥਂ ਸੁਤ੍ਵਾ ‘‘ਮਹਾਰਾਜ, ਕਿਂ ਨਾਮ ਏਤਂ ਵਦੇਥ, ਏਕੋ ਅਸ੍ਸੋ ਅਸ੍ਸਸਹਸ੍ਸਂ ਲਕ੍ਖਂ ਹੋਤਿ, ਏਕੋ ਮਣਿ ਮਣਿਸਹਸ੍ਸਂ ਲਕ੍ਖਂ ਹੋਤਿ. ਨ ਹਿ ਸਬ੍ਬੇ ਅਸ੍ਸਾ ਏਕਸਦਿਸਾ, ਇਮਸ੍ਸ ਤਾਵ ਜਵਂ ਪਸ੍ਸਥਾ’’ਤਿ ਵਤ੍ਵਾ ਅਸ੍ਸਂ ਅਭਿਰੁਹਿਤ੍ਵਾ ਪਾਕਾਰਮਤ੍ਥਕੇਨ ਪੇਸੇਸਿ. ਸਤ੍ਤਯੋਜਨਿਕਂ ਨਗਰਂ ਅਸ੍ਸੇਹਿ ਗੀਵਾਯ ਗੀਵਂ ਪਹਰਨ੍ਤੇਹਿ ਪਰਿਕ੍ਖਿਤ੍ਤਂ ਵਿਯ ਅਹੋਸਿ. ਅਥਾਨੁਕ੍ਕਮੇਨ ਅਸ੍ਸੋਪਿ ਨ ਪਞ੍ਞਾਯਿ, ਯਕ੍ਖੋਪਿ ਨ ਪਞ੍ਞਾਯਿ, ਉਦਰੇ ਬਦ੍ਧਰਤ੍ਤਪਟੋਵ ਪਞ੍ਞਾਯਿ. ਸੋ ਅਸ੍ਸਤੋ ਓਰੁਯ੍ਹ ‘‘ਦਿਟ੍ਠੋ, ਮਹਾਰਾਜ, ਅਸ੍ਸਸ੍ਸ ਵੇਗੋ’’ਤਿ ਵਤ੍ਵਾ ‘‘ਆਮ, ਦਿਟ੍ਠੋ’’ਤਿ ਵੁਤ੍ਤੇ ‘‘ਇਦਾਨਿ ਪੁਨ ਪਸ੍ਸ, ਮਹਾਰਾਜਾ’’ਤਿ ਵਤ੍ਵਾ ਅਸ੍ਸਂ ਅਨ੍ਤੋਨਗਰੇ ਉਯ੍ਯਾਨੇ ਪੋਕ੍ਖਰਣਿਯਾ ਉਦਕਪਿਟ੍ਠੇ ਪੇਸੇਸਿ, ਖੁਰਗ੍ਗਾਨਿ ਅਤੇਮੇਨ੍ਤੋਵ ਪਕ੍ਖਨ੍ਦਿ. ਅਥ ਨਂ ਪਦੁਮਪਤ੍ਤੇਸੁ ਵਿਚਰਾਪੇਤ੍ਵਾ ਪਾਣਿਂ ਪਹਰਿਤ੍ਵਾ ਹਤ੍ਥਂ ਪਸਾਰੇਸਿ, ਅਸ੍ਸੋ ਆਗਨ੍ਤ੍ਵਾ ਪਾਣਿਤਲੇ ਪਤਿਟ੍ਠਾਸਿ. ਤਤੋ ‘‘ਵਟ੍ਟਤੇ ਏਵਰੂਪਂ ਅਸ੍ਸਰਤਨਂ ਨਰਿਨ੍ਦਾ’’ਤਿ ਵਤ੍ਵਾ ‘‘ਵਟ੍ਟਤੀ’’ਤਿ ਵੁਤ੍ਤੇ ‘‘ਮਹਾਰਾਜ, ਅਸ੍ਸਰਤਨਂ ਤਾਵ ਤਿਟ੍ਠਤੁ, ਮਣਿਰਤਨਸ੍ਸ ਮਹਾਨੁਭਾਵਂ ਪਸ੍ਸਾ’’ਤਿ ਵਤ੍ਵਾ ਤਸ੍ਸਾਨੁਭਾਵਂ ਪਕਾਸੇਨ੍ਤੋ ਆਹ –

੧੩੯੩.

‘‘ਇਦਞ੍ਚ ਮੇ ਮਣਿਰਤਨਂ, ਪਸ੍ਸ ਤ੍ਵਂ ਦ੍ਵਿਪਦੁਤ੍ਤਮ;

ਇਤ੍ਥੀਨਂ ਵਿਗ੍ਗਹਾ ਚੇਤ੍ਥ, ਪੁਰਿਸਾਨਞ੍ਚ ਵਿਗ੍ਗਹਾ.

੧੩੯੪.

‘‘ਮਿਗਾਨਂ ਵਿਗ੍ਗਹਾ ਚੇਤ੍ਥ, ਸਕੁਣਾਨਞ੍ਚ ਵਿਗ੍ਗਹਾ;

ਨਾਗਰਾਜਾ ਸੁਪਣ੍ਣਾ ਚ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਇਤ੍ਥੀਨਨ੍ਤਿ ਏਤਸ੍ਮਿਞ੍ਹਿ ਮਣਿਰਤਨੇ ਅਲਙ੍ਕਤਪਟਿਯਤ੍ਤਾ ਅਨੇਕਾ ਇਤ੍ਥਿਵਿਗ੍ਗਹਾ ਪੁਰਿਸਵਿਗ੍ਗਹਾ ਨਾਨਪ੍ਪਕਾਰਾ ਮਿਗਪਕ੍ਖਿਸਙ੍ਘਾ ਸੇਨਙ੍ਗਾਦੀਨਿ ਚ ਪਞ੍ਞਾਯਨ੍ਤਿ, ਤਾਨਿ ਦਸ੍ਸੇਨ੍ਤੋ ਏਵਮਾਹ. ਨਿਮ੍ਮਿਤਨ੍ਤਿ ਇਦਂ ਏਵਰੂਪਂ ਅਚ੍ਛੇਰਕਂ ਮਣਿਮ੍ਹਿ ਨਿਮ੍ਮਿਤਂ ਪਸ੍ਸ.

‘‘ਅਪਰਮ੍ਪਿ ਪਸ੍ਸਾਹੀ’’ਤਿ ਵਤ੍ਵਾ ਗਾਥਾ ਆਹ –

੧੩੯੫.

‘‘ਹਤ੍ਥਾਨੀਕਂ ¶ ਰਥਾਨੀਕਂ, ਅਸ੍ਸੇ ਪਤ੍ਤੀ ਚ ਵਮ੍ਮਿਨੇ;

ਚਤੁਰਙ੍ਗਿਨਿਮਂ ਸੇਨਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੩੯੬.

‘‘ਹਤ੍ਥਾਰੋਹੇ ¶ ਅਨੀਕਟ੍ਠੇ, ਰਥਿਕੇ ਪਤ੍ਤਿਕਾਰਕੇ;

ਬਲਗ੍ਗਾਨਿ ਵਿਯੂਲ਼੍ਹਾਨਿ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਬਲਗ੍ਗਾਨੀਤਿ ਬਲਾਨੇਵ. ਵਿਯੂਲ਼੍ਹਾਨੀਤਿ ਬ੍ਯੂਹਵਸੇਨ ਠਿਤਾਨਿ.

੧੩੯੭.

‘‘ਪੁਰਂ ¶ ਉਦ੍ਧਾਪਸਮ੍ਪਨ੍ਨਂ, ਬਹੁਪਾਕਾਰਤੋਰਣਂ;

ਸਿਙ੍ਘਾਟਕੇ ਸੁਭੂਮਿਯੋ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੩੯੮.

‘‘ਏਸਿਕਾ ਪਰਿਖਾਯੋ ਚ, ਪਲਿਖਂ ਅਗ੍ਗਲ਼ਾਨਿ ਚ;

ਅਟ੍ਟਾਲਕੇ ਚ ਦ੍ਵਾਰੇ ਚ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਪੁਰਨ੍ਤਿ ਨਗਰਂ. ਉਦ੍ਧਾਪਸਮ੍ਪਨ੍ਨਨ੍ਤਿ ਪਾਕਾਰਵਤ੍ਥੁਨਾ ਸਮ੍ਪਨ੍ਨਂ. ਬਹੁਪਾਕਾਰਤੋਰਣਨ੍ਤਿ ਉਚ੍ਚਪਾਕਾਰਤੋਰਣਨਗਰਦ੍ਵਾਰੇਨ ਸਮ੍ਪਨ੍ਨਂ. ਸਿਙ੍ਘਾਟਕੇਤਿ ਵੀਥਿਚਤੁਕ੍ਕਾਨਿ. ਸੁਭੂਮਿਯੋਤਿ ਨਗਰੂਪਚਾਰੇ ਵਿਚਿਤ੍ਤਾ ਰਮਣੀਯਭੂਮਿਯੋ. ਏਸਿਕਾਤਿ ਨਗਰਦ੍ਵਾਰੇਸੁ ਉਟ੍ਠਾਪਿਤੇ ਏਸਿਕਤ੍ਥਮ੍ਭੇ. ਪਲਿਖਨ੍ਤਿ ਪਲਿਘਂ, ਅਯਮੇਵ ਵਾ ਪਾਠੋ. ਅਗ੍ਗਲ਼ਾਨੀਤਿ ਨਗਰਦ੍ਵਾਰਕਵਾਟਾਨਿ. ਦ੍ਵਾਰੇ ਚਾਤਿ ਗੋਪੁਰਾਨਿ ਚ.

੧੩੯੯.

‘‘ਪਸ੍ਸ ਤੋਰਣਮਗ੍ਗੇਸੁ, ਨਾਨਾਦਿਜਗਣਾ ਬਹੂ;

ਹਂਸਾ ਕੋਞ੍ਚਾ ਮਯੂਰਾ ਚ, ਚਕ੍ਕਵਾਕਾ ਚ ਕੁਕ੍ਕੁਹਾ.

੧੪੦੦.

‘‘ਕੁਣਾਲਕਾ ਬਹੂ ਚਿਤ੍ਰਾ, ਸਿਖਣ੍ਡੀ ਜੀਵਜੀਵਕਾ;

ਨਾਨਾਦਿਜਗਣਾਕਿਣ੍ਣਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਤੋਰਣਮਗ੍ਗੇਸੂਤਿ ਏਤਸ੍ਮਿਂ ਨਗਰੇ ਤੋਰਣਗ੍ਗੇਸੁ. ਕੁਣਾਲਕਾਤਿ ਕਾਲ਼ਕੋਕਿਲਾ. ਚਿਤ੍ਰਾਤਿ ਚਿਤ੍ਰਪਤ੍ਤਕੋਕਿਲਾ.

੧੪੦੧.

‘‘ਪਸ੍ਸ ਨਗਰਂ ਸੁਪਾਕਾਰਂ, ਅਬ੍ਭੁਤਂ ਲੋਮਹਂਸਨਂ;

ਸਮੁਸ੍ਸਿਤਧਜਂ ਰਮ੍ਮਂ, ਸੋਣ੍ਣਵਾਲੁਕਸਨ੍ਥਤਂ.

੧੪੦੨.

‘‘ਪਸ੍ਸੇਤ੍ਥ ¶ ਪਣ੍ਣਸਾਲਾਯੋ, ਵਿਭਤ੍ਤਾ ਭਾਗਸੋ ਮਿਤਾ;

ਨਿਵੇਸਨੇ ਨਿਵੇਸੇ ਚ, ਸਨ੍ਧਿਬ੍ਯੂਹੇ ਪਥਦ੍ਧਿਯੋ’’ਤਿ.

ਤਤ੍ਥ ਸੁਪਾਕਾਰਨ੍ਤਿ ਕਞ੍ਚਨਪਾਕਾਰਪਰਿਕ੍ਖਿਤ੍ਤਂ. ਪਣ੍ਣਸਾਲਾਯੋਤਿ ਨਾਨਾਭਣ੍ਡਪੁਣ੍ਣੇ ਆਪਣੇ. ਨਿਵੇਸਨੇ ਨਿਵੇਸੇ ਚਾਤਿ ਗੇਹਾਨਿ ਚੇਵ ਗੇਹਵਤ੍ਥੂਨਿ ਚ. ਸਨ੍ਧਿਬ੍ਯੂਹੇਤਿ ਘਰਸਨ੍ਧਿਯੋ ਚ ਅਨਿਬ੍ਬਿਦ੍ਧਰਚ੍ਛਾ ਚ. ਪਥਦ੍ਧਿਯੋਤਿ ਨਿਬ੍ਬਿਦ੍ਧਵੀਥਿਯੋ.

੧੪੦੩.

‘‘ਪਾਨਾਗਾਰੇ ¶ ਚ ਸੋਣ੍ਡੇ ਚ, ਸੂਨਾ ਓਦਨਿਯਾ ਘਰਾ;

ਵੇਸੀ ਚ ਗਣਿਕਾਯੋ ਚ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੪.

‘‘ਮਾਲਾਕਾਰੇ ਚ ਰਜਕੇ, ਗਨ੍ਧਿਕੇ ਅਥ ਦੁਸ੍ਸਿਕੇ;

ਸੁਵਣ੍ਣਕਾਰੇ ਮਣਿਕਾਰੇ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੫.

‘‘ਆਲ਼ਾਰਿਕੇ ਚ ਸੂਦੇ ਚ, ਨਟਨਾਟਕਗਾਯਿਨੋ;

ਪਾਣਿਸ੍ਸਰੇ ਕੁਮ੍ਭਥੂਨਿਕੇ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਸੋਣ੍ਡੇ ਚਾਤਿ ਅਤ੍ਤਨੋ ਅਨੁਰੂਪੇਹਿ ਕਣ੍ਠਕਣ੍ਣਪਿਲਨ੍ਧਨੇਹਿ ਸਮਨ੍ਨਾਗਤੇ ਆਪਾਨਭੂਮਿਂ ¶ ਸਜ੍ਜੇਤ੍ਵਾ ਨਿਸਿਨ੍ਨੇ ਸੁਰਾਸੋਣ੍ਡੇ ਚ. ਆਲ਼ਾਰਿਕੇਤਿ ਪੂਵਪਾਕੇ. ਸੂਦੇਤਿ ਭਤ੍ਤਕਾਰਕੇ. ਪਾਣਿਸ੍ਸਰੇਤਿ ਪਾਣਿਪ੍ਪਹਾਰੇਨ ਗਾਯਨ੍ਤੇ. ਕੁਮ੍ਭਥੂਨਿਕੇਤਿ ਘਟਦਦ੍ਦਰਿਵਾਦਕੇ.

੧੪੦੬.

‘‘ਪਸ੍ਸ ਭੇਰੀ ਮੁਦਿਙ੍ਗਾ ਚ, ਸਙ੍ਖਾ ਪਣਵਦਿਨ੍ਦਿਮਾ;

ਸਬ੍ਬਞ੍ਚ ਤਾਲ਼ਾਵਚਰਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੭.

‘‘ਸਮ੍ਮਤਾਲਞ੍ਚ ਵੀਣਞ੍ਚ, ਨਚ੍ਚਗੀਤਂ ਸੁਵਾਦਿਤਂ;

ਤੂਰਿਯਤਾਲ਼ਿਤਸਙ੍ਘੁਟ੍ਠਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੦੮.

‘‘ਲਙ੍ਘਿਕਾ ਮੁਟ੍ਠਿਕਾ ਚੇਤ੍ਥ, ਮਾਯਾਕਾਰਾ ਚ ਸੋਭਿਯਾ;

ਵੇਤਾਲਿਕੇ ਚ ਜਲ੍ਲੇ ਚ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਸਮ੍ਮਤਾਲਞ੍ਚਾਤਿ ਖਦਿਰਾਦਿਸਮ੍ਮਞ੍ਚੇਵ ਕਂਸਤਾਲਞ੍ਚ. ਤੂਰਿਯਤਾਲ਼ਿਤਸਙ੍ਘੁਟ੍ਠਨ੍ਤਿ ਨਾਨਾਤੂਰਿਯਾਨਂ ¶ ਤਾਲ਼ਿਤੇਹਿ ਸਙ੍ਘੁਟ੍ਠਂ. ਮੁਟ੍ਠਿਕਾਤਿ ਮੁਟ੍ਠਿਕਮਲ੍ਲਾ. ਸੋਭਿਯਾਤਿ ਨਗਰਸੋਭਨਾ ਇਤ੍ਥੀ ਚ ਸਮ੍ਪਨ੍ਨਰੂਪਾ ਪੁਰਿਸਾ ਚ. ਵੇਤਾਲਿਕੇਤਿ ਵੇਤਾਲਉਟ੍ਠਾਪਕੇ. ਜਲ੍ਲੇਤਿ ਮਸ੍ਸੂਨਿ ਕਰੋਨ੍ਤੇ ਨ੍ਹਾਪਿਤੇ.

੧੪੦੯.

‘‘ਸਮਜ੍ਜਾ ਚੇਤ੍ਥ ਵਤ੍ਤਨ੍ਤਿ, ਆਕਿਣ੍ਣਾ ਨਰਨਾਰਿਭਿ;

ਮਞ੍ਚਾਤਿਮਞ੍ਚੇ ਭੂਮਿਯੋ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਮਞ੍ਚਾਤਿਮਞ੍ਚੇਤਿ ਮਞ੍ਚਾਨਂ ਉਪਰਿ ਬਦ੍ਧਮਞ੍ਚੇ. ਭੂਮਿਯੋਤਿ ਰਮਣੀਯਾ ਸਮਜ੍ਜਭੂਮਿਯੋ.

੧੪੧੦.

‘‘ਪਸ੍ਸ ¶ ਮਲ੍ਲੇ ਸਮਜ੍ਜਸ੍ਮਿਂ, ਫੋਟੇਨ੍ਤੇ ਦਿਗੁਣਂ ਭੁਜਂ;

ਨਿਹਤੇ ਨਿਹਤਮਾਨੇ ਚ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਸਮਜ੍ਜਸ੍ਮਿਨ੍ਤਿ ਮਲ੍ਲਰਙ੍ਗੇ. ਨਿਹਤੇਤਿ ਨਿਹਨਿਤ੍ਵਾ ਜਿਨਿਤ੍ਵਾ ਠਿਤੇ. ਨਿਹਤਮਾਨੇਤਿ ਪਰਾਜਿਤੇ.

੧੪੧੧.

‘‘ਪਸ੍ਸ ਪਬ੍ਬਤਪਾਦੇਸੁ, ਨਾਨਾਮਿਗਗਣਾ ਬਹੂ;

ਸੀਹਾ ਬ੍ਯਗ੍ਘਾ ਵਰਾਹਾ ਚ, ਅਚ੍ਛਕੋਕਤਰਚ੍ਛਯੋ.

੧੪੧੨.

‘‘ਪਲਾਸਾਦਾ ਗਵਜਾ ਚ, ਮਹਿਂਸਾ ਰੋਹਿਤਾ ਰੁਰੂ;

ਏਣੇਯ੍ਯਾ ਚ ਵਰਾਹਾ ਚ, ਗਣਿਨੋ ਨੀਕਸੂਕਰਾ.

੧੪੧੩.

‘‘ਕਦਲਿਮਿਗਾ ਬਹੂ ਚਿਤ੍ਰਾ, ਬਿਲ਼ਾਰਾ ਸਸਕਣ੍ਟਕਾ;

ਨਾਨਾਮਿਗਗਣਾਕਿਣ੍ਣਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਪਲਾਸਾਦਾਤਿ ਖਗ੍ਗਮਿਗਾ. ‘‘ਪਲਤਾ’’ਤਿਪਿ ਪਾਠੋ. ਗਵਜਾਤਿ ਗਵਯਾ. ਵਰਾਹਾਤਿ ਏਕਾ ਮਿਗਜਾਤਿਕਾ. ਤਥਾ ਗਣਿਨੋ ਚੇਵ ਨੀਕਸੂਕਰਾ ਚ. ਬਹੂ ਚਿਤ੍ਰਾਤਿ ਨਾਨਪ੍ਪਕਾਰਾ ਚਿਤ੍ਰਾ ਮਿਗਾ. ਬਿਲ਼ਾਰਾਤਿ ਅਰਞ੍ਞਬਿਲ਼ਾਰਾ. ਸਸਕਣ੍ਟਕਾਤਿ ਸਸਾ ਚ ਕਣ੍ਟਕਾ ਚ.

੧੪੧੪.

‘‘ਨਜ੍ਜਾਯੋ ¶ ਸੁਪ੍ਪਤਿਤ੍ਥਾਯੋ, ਸੋਣ੍ਣਵਾਲੁਕਸਨ੍ਥਤਾ;

ਅਚ੍ਛਾ ਸਵਨ੍ਤਿ ਅਮ੍ਬੂਨਿ, ਮਚ੍ਛਗੁਮ੍ਬਨਿਸੇਵਿਤਾ.

੧੪੧੫.

‘‘ਕੁਮ੍ਭੀਲਾ ¶ ਮਕਰਾ ਚੇਤ੍ਥ, ਸੁਸੁਮਾਰਾ ਚ ਕਚ੍ਛਪਾ;

ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ ਮੁਞ੍ਚਰੋਹਿਤਾ’’ਤਿ.

ਤਤ੍ਥ ਨਜ੍ਜਾਯੋਤਿ ਨਦਿਯੋ. ਸੋਣ੍ਣਵਾਲੁਕਸਨ੍ਥਤਾਤਿ ਸੁਵਣ੍ਣਵਾਲੁਕਾਯ ਸਨ੍ਥਤਤਲਾ. ਕੁਮ੍ਭੀਲਾਤਿ ਇਮੇ ਏਵਰੂਪਾ ਜਲਚਰਾ ਅਨ੍ਤੋਨਦਿਯਂ ਵਿਚਰਨ੍ਤਿ, ਤੇਪਿ ਮਣਿਮ੍ਹਿ ਪਸ੍ਸਾਹੀਤਿ.

੧੪੧੬.

‘‘ਨਾਨਾਦਿਜਗਣਾਕਿਣ੍ਣਾ, ਨਾਨਾਦੁਮਗਣਾਯੁਤਾ;

ਵੇਲ਼ੁਰਿਯਕਰੋਦਾਯੋ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ¶ ਵੇਲ਼ੁਰਿਯਕਰੋਦਾਯੋਤਿ ਵੇਲ਼ੁਰਿਯਪਾਸਾਣੇ ਪਹਰਿਤ੍ਵਾ ਸਦ੍ਦਂ ਕਰੋਨ੍ਤਿਯੋ ਏਵਰੂਪਾ ਨਜ੍ਜਾਯੋਤਿ.

੧੪੧੭.

‘‘ਪਸ੍ਸੇਤ੍ਥ ਪੋਕ੍ਖਰਣਿਯੋ, ਸੁਵਿਭਤ੍ਤਾ ਚਤੁਦ੍ਦਿਸਾ;

ਨਾਨਾਦਿਜਗਣਾਕਿਣ੍ਣਾ, ਪੁਥੁਲੋਮਨਿਸੇਵਿਤਾ.

੧੪੧੮.

‘‘ਸਮਨ੍ਤੋਦਕਸਮ੍ਪਨ੍ਨਂ, ਮਹਿਂ ਸਾਗਰਕੁਣ੍ਡਲਂ;

ਉਪੇਤਂ ਵਨਰਾਜੇਹਿ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਪੁਥੁਲੋਮਨਿਸੇਵਿਤਾਤਿ ਮਹਾਮਚ੍ਛੇਹਿ ਨਿਸੇਵਿਤਾ. ਵਨਰਾਜੇਹੀਤਿ ਵਨਰਾਜੀਹਿ, ਅਯਮੇਵ ਵਾ ਪਾਠੋ.

੧੪੧੯.

‘‘ਪੁਰਤੋ ਵਿਦੇਹੇ ਪਸ੍ਸ, ਗੋਯਾਨਿਯੇ ਚ ਪਚ੍ਛਤੋ;

ਕੁਰੁਯੋ ਜਮ੍ਬੁਦੀਪਞ੍ਚ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੨੦.

‘‘ਪਸ੍ਸ ਚਨ੍ਦਂ ਸੂਰਿਯਞ੍ਚ, ਓਭਾਸਨ੍ਤੇ ਚਤੁਦ੍ਦਿਸਾ;

ਸਿਨੇਰੁਂ ਅਨੁਪਰਿਯਨ੍ਤੇ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੨੧.

‘‘ਸਿਨੇਰੁਂ ਹਿਮਵਨ੍ਤਞ੍ਚ, ਸਾਗਰਞ੍ਚ ਮਹੀਤਲਂ;

ਚਤ੍ਤਾਰੋ ਚ ਮਹਾਰਾਜੇ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੨੨.

‘‘ਆਰਾਮੇ ¶ ਵਨਗੁਮ੍ਬੇ ਚ, ਪਾਟਿਯੇ ਚ ਸਿਲੁਚ੍ਚਯੇ;

ਰਮ੍ਮੇ ਕਿਮ੍ਪੁਰਿਸਾਕਿਣ੍ਣੇ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੨੩.

‘‘ਫਾਰੁਸਕਂ ਚਿਤ੍ਤਲਤਂ, ਮਿਸ੍ਸਕਂ ਨਨ੍ਦਨਂ ਵਨਂ;

ਵੇਜਯਨ੍ਤਞ੍ਚ ਪਾਸਾਦਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੨੪.

‘‘ਸੁਧਮ੍ਮਂ ਤਾਵਤਿਂਸਞ੍ਚ, ਪਾਰਿਛਤ੍ਤਞ੍ਚ ਪੁਪ੍ਫਿਤਂ;

ਏਰਾਵਣਂ ਨਾਗਰਾਜਂ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੨੫.

‘‘ਪਸ੍ਸੇਤ੍ਥ ਦੇਵਕਞ੍ਞਾਯੋ, ਨਭਾ ਵਿਜ੍ਜੁਰਿਵੁਗ੍ਗਤਾ;

ਨਨ੍ਦਨੇ ਵਿਚਰਨ੍ਤਿਯੋ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੨੬.

‘‘ਪਸ੍ਸੇਤ੍ਥ ¶ ¶ ਦੇਵਕਞ੍ਞਾਯੋ, ਦੇਵਪੁਤ੍ਤਪਲੋਭਿਨੀ;

ਦੇਵਪੁਤ੍ਤੇ ਰਮਮਾਨੇ, ਮਣਿਮ੍ਹਿ ਪਸ੍ਸ ਨਿਮ੍ਮਿਤ’’ਨ੍ਤਿ.

ਤਤ੍ਥ ਵਿਦੇਹੇਤਿ ਪੁਬ੍ਬਵਿਦੇਹਦੀਪਂ. ਗੋਯਾਨਿਯੇਤਿ ਅਪਰਗੋਯਾਨਦੀਪਂ. ਕੁਰੁਯੋਤਿ ਉਤ੍ਤਰਕੁਰੁ ਚ ਦਕ੍ਖਿਣਤੋ ਜਮ੍ਬੁਦੀਪਞ੍ਚ. ਅਨੁਪਰਿਯਨ੍ਤੇਤਿ ਏਤੇ ਚਨ੍ਦਿਮਸੂਰਿਯੇ ਸਿਨੇਰੁਂ ਅਨੁਪਰਿਯਾਯਨ੍ਤੇ. ਪਾਟਿਯੇਤਿ ਪਤ੍ਥਰਿਤ੍ਵਾ ਠਪਿਤੇ ਵਿਯ ਪਿਟ੍ਠਿਪਾਸਾਣੇ.

੧੪੨੭.

‘‘ਪਰੋਸਹਸ੍ਸਪਾਸਾਦੇ, ਵੇਲ਼ੁਰਿਯਫਲਸਨ੍ਥਤੇ;

ਪਜ੍ਜਲਨ੍ਤੇ ਚ ਵਣ੍ਣੇਨ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੨੮.

‘‘ਤਾਵਤਿਂਸੇ ਚ ਯਾਮੇ ਚ, ਤੁਸਿਤੇ ਚਾਪਿ ਨਿਮ੍ਮਿਤੇ;

ਪਰਨਿਮ੍ਮਿਤਵਸਵਤ੍ਤਿਨੋ, ਮਣਿਮ੍ਹਿ ਪਸ੍ਸ ਨਿਮ੍ਮਿਤਂ.

੧੪੨੯.

‘‘ਪਸ੍ਸੇਤ੍ਥ ਪੋਕ੍ਖਰਣਿਯੋ, ਵਿਪ੍ਪਸਨ੍ਨੋਦਿਕਾ ਸੁਚੀ;

ਮਨ੍ਦਾਲਕੇਹਿ ਸਞ੍ਛਨ੍ਨਾ, ਪਦੁਮੁਪ੍ਪਲਕੇਹਿ ਚਾ’’ਤਿ.

ਤਤ੍ਥ ਪਰੋਸਹਸ੍ਸਨ੍ਤਿ ਤਾਵਤਿਂਸਭਵਨੇ ਅਤਿਰੇਕਸਹਸ੍ਸਪਾਸਾਦੇ.

੧੪੩੦.

‘‘ਦਸੇਤ੍ਥ ¶ ਰਾਜਿਯੋ ਸੇਤਾ, ਦਸ ਨੀਲਾ ਮਨੋਰਮਾ;

ਛ ਪਿਙ੍ਗਲਾ ਪਨ੍ਨਰਸ, ਹਲਿਦ੍ਦਾ ਚ ਚਤੁਦ੍ਦਸ.

੧੪੩੧.

‘‘ਵੀਸਤਿ ਤਤ੍ਥ ਸੋਵਣ੍ਣਾ, ਵੀਸਤਿ ਰਜਤਾਮਯਾ;

ਇਨ੍ਦਗੋਪਕਵਣ੍ਣਾਭਾ, ਤਾਵ ਦਿਸ੍ਸਨ੍ਤਿ ਤਿਂਸਤਿ.

੧੪੩੨.

‘‘ਦਸੇਤ੍ਥ ਕਾਲ਼ਿਯੋ ਛਚ੍ਚ, ਮਞ੍ਜੇਟ੍ਠਾ ਪਨ੍ਨਵੀਸਤਿ;

ਮਿਸ੍ਸਾ ਬਨ੍ਧੁਕਪੁਪ੍ਫੇਹਿ, ਨੀਲੁਪ੍ਪਲਵਿਚਿਤ੍ਤਿਕਾ.

੧੪੩੩.

‘‘ਏਵਂ ਸਬ੍ਬਙ੍ਗਸਮ੍ਪਨ੍ਨਂ, ਅਚ੍ਚਿਮਨ੍ਤਂ ਪਭਸ੍ਸਰਂ;

ਓਧਿਸੁਙ੍ਕਂ ਮਹਾਰਾਜ, ਪਸ੍ਸ ਤ੍ਵਂ ਦ੍ਵਿਪਦੁਤ੍ਤਮਾ’’ਤਿ.

ਤਤ੍ਥ ਦਸੇਤ੍ਥ ਰਾਜਿਯੋ ਸੇਤਾਤਿ ਏਤਸ੍ਮਿਂ ਮਣਿਕ੍ਖਨ੍ਧੇ ਦਸ ਸੇਤਰਾਜਿਯੋ. ਛ ਪਿਙ੍ਗਲਾ ਪਨ੍ਨਰਸਾਤਿ ਛ ਚ ਪਨ੍ਨਰਸ ਚਾਤਿ ਏਕਵੀਸਤਿ ਪਿਙ੍ਗਲਰਾਜਿਯੋ ¶ . ਹਲਿਦ੍ਦਾਤਿ ਹਲਿਦ੍ਦਵਣ੍ਣਾ ਚਤੁਦ੍ਦਸ. ਤਿਂਸਤੀਤਿ ਇਨ੍ਦਗੋਪਕਵਣ੍ਣਾਭਾ ਤਿਂਸ ਰਾਜਿਯੋ. ਦਸ ਛਚ੍ਚਾਤਿ ਦਸ ਚ ਛ ਚ ਸੋਲ਼ਸ ਕਾਲ਼ਰਾਜਿਯੋ. ਪਨ੍ਨਵੀਸਤੀਤਿ ਪਞ੍ਚਵੀਸਤਿ ਮਞ੍ਜੇਟ੍ਠਵਣ੍ਣਾ ਪਭਸ੍ਸਰਾ. ਮਿਸ੍ਸਾ ਬਨ੍ਧੁਕਪੁਪ੍ਫੇਹੀਤਿ ਕਾਲ਼ਮਞ੍ਜੇਟ੍ਠਵਣ੍ਣਰਾਜਿਯੋ ਏਤੇਹਿ ਮਿਸ੍ਸਾ ਵਿਚਿਤ੍ਤਿਕਾ ਪਸ੍ਸ. ਏਤ੍ਥ ਹਿ ਕਾਲ਼ਰਾਜਿਯੋ ਬਨ੍ਧੁਜੀਵਕਪੁਪ੍ਫੇਹਿ ਮਿਸ੍ਸਾ, ਮਞ੍ਜੇਟ੍ਠਰਾਜਿਯੋ ਨੀਲੁਪ੍ਪਲੇਹਿ ਵਿਚਿਤ੍ਤਿਕਾ. ਓਧਿਸੁਙ੍ਕਨ੍ਤਿ ਸੁਙ੍ਕਕੋਟ੍ਠਾਸਂ. ਯੋ ਮਂ ਜੂਤੇ ਜਿਨਿਸ੍ਸਤਿ, ਤਸ੍ਸਿਮਂ ਸੁਙ੍ਕਕੋਟ੍ਠਾਸਂ ਪਸ੍ਸਾਤਿ ਵਦਤਿ. ਅਟ੍ਠਕਥਾਯਂ ਪਨ ‘‘ਹੋਤੁ ਸੁਙ੍ਕਂ, ਮਹਾਰਾਜਾ’’ਤਿਪਿ ਪਾਠੋ. ਤਸ੍ਸਤ੍ਥੋ – ਦ੍ਵਿਪਦੁਤ੍ਤਮ ਪਸ੍ਸ ਤ੍ਵਂ ਇਮਂ ਏਵਰੂਪਂ ਮਣਿਕ੍ਖਨ੍ਧਂ, ਇਦਮੇਵ, ਮਹਾਰਾਜ, ਸੁਙ੍ਕਂ ਹੋਤੁ. ਯੋ ਮਂ ਜੂਤੇ ਜਿਨਿਸ੍ਸਤਿ, ਤਸ੍ਸਿਦਂ ਭਵਿਸ੍ਸਤੀਤਿ.

ਮਣਿਕਣ੍ਡਂ ਨਿਟ੍ਠਿਤਂ.

ਅਕ੍ਖਕਣ੍ਡਂ

ਏਵਂ ¶ ਵਤ੍ਵਾ ਪੁਣ੍ਣਕੋ ‘‘ਮਹਾਰਾਜ, ਅਹਂ ਤਾਵ ਜੂਤੇ ਪਰਾਜਿਤੋ ਇਮਂ ਮਣਿਰਤਨਂ ਦਸ੍ਸਾਮਿ, ਤ੍ਵਂ ਪਨ ਕਿਂ ਦਸ੍ਸਸੀ’’ਤਿ ਆਹ. ‘‘ਤਾਤ, ਮਮ ਸਰੀਰਞ੍ਚ ਦੇਵਿਞ੍ਚ ਸੇਤਚ੍ਛਤ੍ਤਞ੍ਚ ਠਪੇਤ੍ਵਾ ਸੇਸਂ ਮਮ ਸਨ੍ਤਕਂ ਸੁਙ੍ਕਂ ਹੋਤੂ’’ਤਿ. ‘‘ਤੇਨ ਹਿ, ਦੇਵ, ਮਾ ਚਿਰਾਯਿ, ਅਹਂ ਦੂਰਾਗਤੋ, ਖਿਪ੍ਪਂ ਜੂਤਮਣ੍ਡਲਂ ਸਜ੍ਜਾਪੇਹੀ’’ਤਿ. ਰਾਜਾ ਅਮਚ੍ਚੇ ਆਣਾਪੇਸਿ. ਤੇ ਖਿਪ੍ਪਂ ਜੂਤਮਣ੍ਡਲਂ ਸਜ੍ਜੇਤ੍ਵਾ ¶ ਰਞ੍ਞੋ ਵਰਪੋਤ੍ਥਕਤ੍ਥਰਣਂ ਸਨ੍ਥਰਿਤ੍ਵਾ ਸੇਸਰਾਜੂਨਞ੍ਚਾਪਿ ਆਸਨਾਨਿ ਪਞ੍ਞਪੇਤ੍ਵਾ ਪੁਣ੍ਣਕਸ੍ਸਪਿ ਪਤਿਰੂਪਂ ਆਸਨਂ ਪਞ੍ਞਪੇਤ੍ਵਾ ਰਞ੍ਞੋ ਕਾਲਂ ਆਰੋਚਯਿਂਸੁ. ਤਤੋ ਪੁਣ੍ਣਕੋ ਰਾਜਾਨਂ ਗਾਥਾਯ ਅਜ੍ਝਭਾਸਿ –

੧੪੩੪.

‘‘ਉਪਾਗਤਂ ਰਾਜ ਮੁਪੇਹਿ ਲਕ੍ਖਂ, ਨੇਤਾਦਿਸਂ ਮਣਿਰਤਨਂ ਤਵਤ੍ਥਿ;

ਧਮ੍ਮੇਨ ਜਿਸ੍ਸਾਮ ਅਸਾਹਸੇਨ, ਜਿਤੋ ਚ ਨੋ ਖਿਪ੍ਪਮਵਾਕਰੋਹੀ’’ਤਿ.

ਤਸ੍ਸਤ੍ਥੋ – ਮਹਾਰਾਜ, ਜੂਤਸਾਲਾਯ ਕਮ੍ਮਂ ਉਪਾਗਤਂ ਨਿਟ੍ਠਿਤਂ, ਏਤਾਦਿਸਂ ਮਣਿਰਤਨਂ ਤਵ ਨਤ੍ਥਿ, ਮਾ ਪਪਞ੍ਚਂ ਕਰੋਹਿ, ਉਪੇਹਿ ਲਕ੍ਖਂ ਅਕ੍ਖੇਹਿ ਕੀਲ਼ਨਟ੍ਠਾਨਂ ¶ ਉਪਗਚ੍ਛ. ਕੀਲ਼ਨ੍ਤਾ ਚ ਮਯਂ ਧਮ੍ਮੇਨ ਜਿਸ੍ਸਾਮ, ਧਮ੍ਮੇਨੇਵ ਨੋ ਅਸਾਹਸੇਨ ਜਯੋ ਹੋਤੁ. ਸਚੇ ਪਨ ਤ੍ਵਂ ਜਿਤੋ ਭਵਿਸ੍ਸਸਿ, ਅਥ ਨੋ ਖਿਪ੍ਪਮਵਾਕਰੋਹਿ, ਪਪਞ੍ਚਂ ਅਕਤ੍ਵਾਵ ਜਿਤੋ ਧਨਂ ਦਦੇਯ੍ਯਾਸੀਤਿ ਵੁਤ੍ਤਂ ਹੋਤਿ.

ਅਥ ਨਂ ਰਾਜਾ ‘‘ਮਾਣਵ, ਤ੍ਵਂ ਮਂ ‘ਰਾਜਾ’ਤਿ ਮਾ ਭਾਯਿ, ਧਮ੍ਮੇਨੇਵ ਨੋ ਅਸਾਹਸੇਨ ਜਯਪਰਾਜਯੋ ਭਵਿਸ੍ਸਤੀ’’ਤਿ ਆਹ. ਤਂ ਸੁਤ੍ਵਾ ਪੁਣ੍ਣਕੋ ‘‘ਅਮ੍ਹਾਕਂ ਧਮ੍ਮੇਨੇਵ ਜਯਪਰਾਜਯਭਾਵਂ ਜਾਨਾਥਾ’’ਤਿ ਤੇਪਿ ਰਾਜਾਨੋ ਸਕ੍ਖਿਂ ਕਰੋਨ੍ਤੋ ਗਾਥਮਾਹ –

੧੪੩੫.

‘‘ਪਞ੍ਚਾਲ ਪਚ੍ਚੁਗ੍ਗਤ ਸੂਰਸੇਨ, ਮਚ੍ਛਾ ਚ ਮਦ੍ਦਾ ਸਹ ਕੇਕਕੇਭਿ;

ਪਸ੍ਸਨ੍ਤੁ ਨੋਤੇ ਅਸਠੇਨ ਯੁਦ੍ਧਂ, ਨ ਨੋ ਸਭਾਯਂ ਨ ਕਰੋਨ੍ਤਿ ਕਿਞ੍ਚੀ’’ਤਿ.

ਤਤ੍ਥ ਪਚ੍ਚੁਗ੍ਗਤਾਤਿ ਉਗ੍ਗਤਤ੍ਤਾ ਪਞ੍ਞਾਤਤ੍ਤਾ ਪਾਕਟਤ੍ਤਾ ਪਞ੍ਚਾਲਰਾਜਾਨਮੇਵਾਲਪਤਿ. ਮਚ੍ਛਾ ਚਾਤਿ ਤ੍ਵਞ੍ਚ, ਸਮ੍ਮ ਮਚ੍ਛਰਾਜ. ਮਦ੍ਦਾਤਿ ਮਦ੍ਦਰਾਜ. ਸਹ ਕੇਕਕੇਭੀਤਿ ਕੇਕਕੇਭਿਨਾਮੇਨ ਜਨਪਦੇਨ ਸਹ ਵਤ੍ਤਮਾਨਕੇਕਕੇਭਿਰਾਜ, ਤ੍ਵਞ੍ਚ. ਅਥ ਵਾ ¶ ਸਹਸਦ੍ਦਂ ‘‘ਕੇਕਕੇਭੀ’’ਤਿ ਪਦਸ੍ਸ ਪਚ੍ਛਤੋ ਠਪੇਤ੍ਵਾ ਪਚ੍ਚੁਗ੍ਗਤਸਦ੍ਦਞ੍ਚ ਸੂਰਸੇਨਵਿਸੇਸਨਂ ਕਤ੍ਵਾ ਪਞ੍ਚਾਲਪਚ੍ਚੁਗ੍ਗਤਸੂਰਸੇਨ ਮਚ੍ਛਾ ਚ ਮਦ੍ਦਾ ਚ ਕੇਕਕੇਭਿ ਸਹ ਸੇਸਰਾਜਾਨੋ ਚਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਪਸ੍ਸਨ੍ਤੁ ਨੋਤੇਤਿ ਅਮ੍ਹਾਕਂ ਦ੍ਵਿਨ੍ਨਂ ਏਤੇ ਰਾਜਾਨੋ ਅਸਠੇਨ ਅਕ੍ਖਯੁਦ੍ਧਂ ਪਸ੍ਸਨ੍ਤੁ. ਨ ਨੋ ਸਭਾਯਂ ਨ ਕਰੋਨ੍ਤਿ ਕਿਞ੍ਚੀਤਿ ਏਤ੍ਥ ਨੋਤਿ ਨਿਪਾਤਮਤ੍ਤਂ, ਸਭਾਯਂ ਕਿਞ੍ਚਿ ਸਕ੍ਖਿਂ ਨ ਨ ਕਰੋਨ੍ਤਿ, ਖਤ੍ਤਿਯੇਪਿ ਬ੍ਰਾਹ੍ਮਣੇਪਿ ਕਰੋਨ੍ਤਿਯੇਵ, ਤਸ੍ਮਾ ਸਚੇ ਕਿਞ੍ਚਿ ਅਕਾਰਣਂ ਉਪ੍ਪਜ੍ਜਤਿ, ‘‘ਨ ਨੋ ਸੁਤਂ, ਨ ਨੋ ਦਿਟ੍ਠ’’ਨ੍ਤਿ ਵਤ੍ਤੁਂ ਨ ਲਭਿਸ੍ਸਥ, ਅਪ੍ਪਮਤ੍ਤਾ ਹੋਥਾਤਿ.

ਏਵਂ ਯਕ੍ਖਸੇਨਾਪਤਿ ਰਾਜਾਨੋ ਸਕ੍ਖਿਂ ਅਕਾਸਿ. ਰਾਜਾਪਿ ਏਕਸਤਰਾਜਪਰਿਵੁਤੋ ਪੁਣ੍ਣਕਂ ਗਹੇਤ੍ਵਾ ¶ ਜੂਤਸਾਲਂ ਪਾਵਿਸਿ. ਸਬ੍ਬੇਪਿ ਪਤਿਰੂਪਾਸਨੇਸੁ ਨਿਸੀਦਿਂਸੁ, ਰਜਤਫਲਕੇ ਸੁਵਣ੍ਣਪਾਸਕੇ ਠਪਯਿਂਸੁ. ਪੁਣ੍ਣਕੋ ਤੁਰਿਤਤੁਰਿਤੋ ਆਹ ‘‘ਮਹਾਰਾਜ, ਪਾਸਕੇਸੁ ਆਯਾ ਨਾਮ ਮਾਲਿਕਂ ਸਾਵਟ੍ਟਂ ਬਹੁਲਂ ਸਨ੍ਤਿਭਦ੍ਰਾਦਯੋ ਚਤੁਵੀਸਤਿ, ਤੇਸੁ ਤੁਮ੍ਹੇ ਅਤ੍ਤਨੋ ਰੁਚ੍ਚਨਕਂ ਆਯਂ ਗਣ੍ਹਥਾ’’ਤਿ. ਰਾਜਾ ‘‘ਸਾਧੂ’’ਤਿ ਬਹੁਲਂ ਗਣ੍ਹਿ. ਪੁਣ੍ਣਕੋ ¶ ਸਾਵਟ੍ਟਂ ਗਣ੍ਹਿ. ਅਥ ਨਂ ਰਾਜਾ ਆਹ ‘‘ਤੇਨ ਹਿ ਤਾਵ ਮਾਣਵ, ਪਾਸਕੇ ਪਾਤੇਹੀ’’ਤਿ. ‘‘ਮਹਾਰਾਜ, ਪਠਮਂ ਮਮ ਵਾਰੋ ਨ ਪਾਪੁਣਾਤਿ, ਤੁਮ੍ਹੇ ਪਾਤੇਥਾ’’ਤਿ ਵੁਤ੍ਤੇ ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਤਸ੍ਸ ਪਨ ਤਤਿਯੇ ਅਤ੍ਤਭਾਵੇ ਮਾਤੁਭੂਤਪੁਬ੍ਬਾ ਆਰਕ੍ਖਦੇਵਤਾ, ਤਸ੍ਸਾ ਆਨੁਭਾਵੇਨ ਰਾਜਾ ਜੂਤੇ ਜਿਨਾਤਿ. ਸਾ ਤਸ੍ਸ ਅਵਿਦੂਰੇ ਠਿਤਾ ਅਹੋਸਿ. ਰਾਜਾ ਦੇਵਧੀਤਰਂ ਅਨੁਸ੍ਸਰਿਤ੍ਵਾ ਜੂਤਗੀਤਂ ਗਾਯਨ੍ਤੋ ਇਮਾ ਗਾਥਾ ਆਹ –

‘‘ਸਬ੍ਬਾ ਨਦੀ ਵਙ੍ਕਗਤੀ, ਸਬ੍ਬੇ ਕਟ੍ਠਮਯਾ ਵਨਾ;

ਸਬ੍ਬਿਤ੍ਥਿਯੋ ਕਰੇ ਪਾਪਂ, ਲਭਮਾਨੇ ਨਿਵਾਤਕੇ. (ਜਾ. ੨.੨੧.੩੦੮);

‘‘ਅਥ ਪਸ੍ਸਤੁ ਮਂ ਅਮ੍ਮ, ਵਿਜਯਂ ਮੇ ਪਦਿਸ੍ਸਤੁ;

ਅਨੁਕਮ੍ਪਾਹਿ ਮੇ ਅਮ੍ਮ, ਮਹਨ੍ਤਂ ਜਯਮੇਸ੍ਸਤੁ.

‘‘ਦੇਵਤੇ ਤ੍ਵਜ੍ਜ ਰਕ੍ਖ ਦੇਵਿ, ਪਸ੍ਸ ਮਾ ਮਂ ਵਿਭਾਵੇਯ੍ਯ;

ਅਨੁਕਮ੍ਪਕਾ ਪਤਿਟ੍ਠਾ ਚ, ਪਸ੍ਸ ਭਦ੍ਰਾਨਿ ਰਕ੍ਖਿਤੁਂ.

‘‘ਜਮ੍ਬੋਨਦਮਯਂ ਪਾਸਂ, ਚਤੁਰਂਸਮਟ੍ਠਙ੍ਗੁਲਿ;

ਵਿਭਾਤਿ ਪਰਿਸਮਜ੍ਝੇ, ਸਬ੍ਬਕਾਮਦਦੋ ਭਵ.

‘‘ਦੇਵਤੇ ਮੇ ਜਯਂ ਦੇਹਿ, ਪਸ੍ਸ ਮਂ ਅਪ੍ਪਭਾਗਿਨਂ;

ਮਾਤਾਨੁਕਮ੍ਪਕੋ ਪੋਸੋ, ਸਦਾ ਭਦ੍ਰਾਨਿ ਪਸ੍ਸਤਿ.

‘‘ਅਟ੍ਠਕਂ ਮਾਲਿਕਂ ਵੁਤ੍ਤਂ, ਸਾਵਟ੍ਟਞ੍ਚ ਛਕਂ ਮਤਂ;

ਚਤੁਕ੍ਕਂ ਬਹੁਲਂ ਞੇਯ੍ਯਂ, ਦ੍ਵਿਬਿਨ੍ਦੁਸਨ੍ਤਿਭਦ੍ਰਕਂ;

ਚਤੁਵੀਸਤਿ ਆਯਾ ਚ, ਮੁਨਿਨ੍ਦੇਨ ਪਕਾਸਿਤਾ’’ਤਿ.

ਰਾਜਾ ਏਵਂ ਜੂਤਗੀਤਂ ਗਾਯਿਤ੍ਵਾ ਪਾਸਕੇ ਹਤ੍ਥੇਨ ਪਰਿਵਤ੍ਤੇਤ੍ਵਾ ਆਕਾਸੇ ਖਿਪਿ. ਪੁਣ੍ਣਕਸ੍ਸ ਆਨੁਭਾਵੇਨ ਪਾਸਕਾ ਰਞ੍ਞੋ ਪਰਾਜਯਾਯ ਭਸ੍ਸਨ੍ਤਿ. ਰਾਜਾ ਜੂਤਸਿਪ੍ਪਮ੍ਹਿ ਅਤਿਕੁਸਲਤਾਯ ਪਾਸਕੇ ਅਤ੍ਤਨੋ ¶ ਪਰਾਜਯਾਯ ¶ ਭਸ੍ਸਨ੍ਤੇ ਞਤ੍ਵਾ ਆਕਾਸੇਯੇਵ ਸਙ੍ਕਡ੍ਢਨ੍ਤੋ ਗਹੇਤ੍ਵਾ ਪੁਨ ਆਕਾਸੇ ਖਿਪਿ. ਦੁਤਿਯਮ੍ਪਿ ਅਤ੍ਤਨੋ ਪਰਾਜਯਾਯ ਭਸ੍ਸਨ੍ਤੇ ਞਤ੍ਵਾ ਤਥੇਵ ਅਗ੍ਗਹੇਸਿ. ਤਤੋ ਪੁਣ੍ਣਕੋ ਚਿਨ੍ਤੇਸਿ ‘‘ਅਯਂ ਰਾਜਾ ਮਾਦਿਸੇਨ ਯਕ੍ਖੇਨ ਸਦ੍ਧਿਂ ਜੂਤਂ ਕੀਲ਼ਨ੍ਤੋ ਭਸ੍ਸਮਾਨੇ ਪਾਸਕੇ ਸਙ੍ਕਡ੍ਢਿਤ੍ਵਾ ਗਣ੍ਹਾਤਿ, ਕਿਂ ਨੁ ਖੋ ਕਾਰਣ’’ਨ੍ਤਿ. ਸੋ ਓਲੋਕੇਨ੍ਤੋ ਤਸ੍ਸ ਆਰਕ੍ਖਦੇਵਤਾਯ ਆਨੁਭਾਵਂ ਞਤ੍ਵਾ ਅਕ੍ਖੀਨਿ ਉਮ੍ਮੀਲੇਤ੍ਵਾ ਕੁਦ੍ਧੋ ਵਿਯ ਨਂ ਓਲੋਕੇਸਿ. ਸਾ ਭੀਤਤਸਿਤਾ ¶ ਪਲਾਯਿਤ੍ਵਾ ਚਕ੍ਕਵਾਲ਼ਪਬ੍ਬਤਮਤ੍ਥਕਂ ਪਤ੍ਵਾ ਕਮ੍ਪਮਾਨਾ ਓਲੋਕੇਤ੍ਵਾ ਅਟ੍ਠਾਸਿ. ਰਾਜਾ ਤਤਿਯਮ੍ਪਿ ਪਾਸਕੇ ਖਿਪਿਤ੍ਵਾ ਅਤ੍ਤਨੋ ਪਰਾਜਯਾਯ ਭਸ੍ਸਨ੍ਤੇ ਞਤ੍ਵਾਪਿ ਪੁਣ੍ਣਕਸ੍ਸਾਨੁਭਾਵੇਨ ਹਤ੍ਥਂ ਪਸਾਰੇਤ੍ਵਾ ਗਣ੍ਹਿਤੁਂ ਨਾਸਕ੍ਖਿ. ਤੇ ਰਞ੍ਞੋ ਪਰਾਜਯਾਯ ਪਤਿਂਸੁ. ਅਥਸ੍ਸ ਪਰਾਜਿਤਭਾਵਂ ਞਤ੍ਵਾ ਪੁਣ੍ਣਕੋ ਅਪ੍ਫੋਟੇਤ੍ਵਾ ਮਹਨ੍ਤੇਨ ਸਦ੍ਦੇਨ ‘‘ਜਿਤਂ ਮੇ’’ਤਿ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿ. ਸੋ ਸਦ੍ਦੋ ਸਕਲਜਮ੍ਬੁਦੀਪਂ ਫਰਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੪੩੬.

‘‘ਤੇ ਪਾਵਿਸੁਂ ਅਕ੍ਖਮਦੇਨ ਮਤ੍ਤਾ, ਰਾਜਾ ਕੁਰੂਨਂ ਪੁਣ੍ਣਕੋ ਚਾਪਿ ਯਕ੍ਖੋ;

ਰਾਜਾ ਕਲਿਂ ਵਿਚ੍ਚਿਨਮਗ੍ਗਹੇਸਿ, ਕਟਂ ਅਗ੍ਗਹੀ ਪੁਣ੍ਣਕੋ ਨਾਮ ਯਕ੍ਖੋ.

੧੪੩੭.

‘‘ਤੇ ਤਤ੍ਥ ਜੂਤੇ ਉਭਯੇ ਸਮਾਗਤੇ, ਰਞ੍ਞਂ ਸਕਾਸੇ ਸਖੀਨਞ੍ਚ ਮਜ੍ਝੇ;

ਅਜੇਸਿ ਯਕ੍ਖੋ ਨਰਵੀਰਸੇਟ੍ਠਂ, ਤਤ੍ਥਪ੍ਪਨਾਦੋ ਤੁਮੁਲੋ ਬਭੂਵਾ’’ਤਿ.

ਤਤ੍ਥ ਪਾਵਿਸੁਨ੍ਤਿ ਜੂਤਸਾਲਂ ਪਵਿਸਿਂਸੁ. ਵਿਚ੍ਚਿਨਨ੍ਤਿ ਰਾਜਾ ਚਤੁਵੀਸਤਿਯਾ ਆਯੇਸੁ ਵਿਚਿਨਨ੍ਤੋ ਕਲਿਂ ਪਰਾਜਯਗ੍ਗਾਹਂ ਅਗ੍ਗਹੇਸਿ. ਕਟਂ ਅਗ੍ਗਹੀਤਿ ਪੁਣ੍ਣਕੋ ਨਾਮ ਯਕ੍ਖੋ ਜਯਗ੍ਗਾਹਂ ਗਣ੍ਹਿ. ਤੇ ਤਤ੍ਥ ਜੂਤੇ ਉਭਯੇ ਸਮਾਗਤੇਤਿ ਤੇ ਤਤ੍ਥ ਜੂਤੇ ਸਮਾਗਤਾ ਉਭੋ ਜੂਤਂ ਕੀਲ਼ਿਂਸੂਤਿ ਅਤ੍ਥੋ. ਰਞ੍ਞਨ੍ਤਿ ਅਥ ਤੇਸਂ ਏਕਸਤਰਾਜੂਨਂ ਸਕਾਸੇ ਅਵਸੇਸਾਨਞ੍ਚ ਸਖੀਨਂ ਮਜ੍ਝੇ ਸੋ ਯਕ੍ਖੋ ਨਰਵੀਰਸੇਟ੍ਠਂ ਰਾਜਾਨਂ ਅਜੇਸਿ. ਤਤ੍ਥਪ੍ਪਨਾਦੋ ਤੁਮੁਲੋ ਬਭੂਵਾਤਿ ਤਸ੍ਮਿਂ ਜੂਤਮਣ੍ਡਲੇ ‘‘ਰਞ੍ਞੋ ਪਰਾਜਿਤਭਾਵਂ ਜਾਨਾਥ, ਜਿਤਂ ਮੇ, ਜਿਤਂ ਮੇ’’ਤਿ ਮਹਨ੍ਤੋ ਸਦ੍ਦੋ ਅਹੋਸਿ.

ਰਾਜਾ ਪਰਾਜਿਤੋ ਅਨਤ੍ਤਮਨੋ ਅਹੋਸਿ. ਅਥ ਨਂ ਸਮਸ੍ਸਾਸੇਨ੍ਤੋ ਪੁਣ੍ਣਕੋ ਗਾਥਮਾਹ –

੧੪੩੮.

‘‘ਜਯੋ ¶ ¶ ਮਹਾਰਾਜ ਪਰਾਜਯੋ ਚ, ਆਯੂਹਤਂ ਅਞ੍ਞਤਰਸ੍ਸ ਹੋਤਿ;

ਜਨਿਨ੍ਦ ਜੀਨੋਸਿ ਵਰਦ੍ਧਨੇਨ, ਜਿਤੋ ਚ ਮੇ ਖਿਪ੍ਪਮਵਾਕਰੋਹੀ’’ਤਿ.

ਤਤ੍ਥ ਆਯੂਹਤਨ੍ਤਿ ਦ੍ਵਿਨ੍ਨਂ ਵਾਯਾਮਮਾਨਾਨਂ ਅਞ੍ਞਤਰਸ੍ਸ ਏਵ ਹੋਤਿ, ਤਸ੍ਮਾ ‘‘ਪਰਾਜਿਤੋਮ੍ਹੀ’’ਤਿ ¶ ਮਾ ਚਿਨ੍ਤਯਿ. ਜੀਨੋਸੀਤਿ ਪਰਿਹੀਨੋਸਿ. ਵਰਦ੍ਧਨੇਨਾਤਿ ਪਰਮਧਨੇਨ. ਖਿਪ੍ਪਮਵਾਕਰੋਹੀਤਿ ਖਿਪ੍ਪਂ ਮੇ ਜਯਂ ਧਨਂ ਦੇਹੀਤਿ.

ਅਥ ਨਂ ਰਾਜਾ ‘‘ਗਣ੍ਹ, ਤਾਤਾ’’ਤਿ ਵਦਨ੍ਤੋ ਗਾਥਮਾਹ –

੧੪੩੯.

‘‘ਹਤ੍ਥੀ ਗਵਾਸ੍ਸਾ ਮਣਿਕੁਣ੍ਡਲਾ ਚ, ਯਞ੍ਚਾਪਿ ਮਯ੍ਹਂ ਰਤਨਂ ਪਥਬ੍ਯਾ;

ਗਣ੍ਹਾਹਿ ਕਚ੍ਚਾਨ ਵਰਂ ਧਨਾਨਂ, ਆਦਾਯ ਯੇਨਿਚ੍ਛਸਿ ਤੇਨ ਗਚ੍ਛਾ’’ਤਿ.

ਪੁਣ੍ਣਕੋ ਆਹ –

੧੪੪੦.

‘‘ਹਤ੍ਥੀ ਗਵਾਸ੍ਸਾ ਮਣਿਕੁਣ੍ਡਲਾ ਚ, ਯਞ੍ਚਾਪਿ ਤੁਯ੍ਹਂ ਰਤਨਂ ਪਥਬ੍ਯਾ;

ਤੇਸਂ ਵਰੋ ਵਿਧੁਰੋ ਨਾਮ ਕਤ੍ਤਾ, ਸੋ ਮੇ ਜਿਤੋ ਤਂ ਮੇ ਅਵਾਕਰੋਹੀ’’ਤਿ.

ਤਤ੍ਥ ਸੋ ਮੇ ਜਿਤੋ ਤਂ ਮੇਤਿ ਮਯਾ ਹਿ ਤਵ ਵਿਜਿਤੇ ਉਤ੍ਤਮਂ ਰਤਨਂ ਜਿਤਂ, ਸੋ ਚ ਸਬ੍ਬਰਤਨਾਨਂ ਵਰੋ ਵਿਧੁਰੋ, ਤਸ੍ਮਾ, ਦੇਵ, ਸੋ ਮਯਾ ਜਿਤੋ ਨਾਮ ਹੋਤਿ, ਤਂ ਮੇ ਦੇਹੀਤਿ.

ਰਾਜਾ ਆਹ –

੧੪੪੧.

‘‘ਅਤ੍ਤਾ ਚ ਮੇ ਸੋ ਸਰਣਂ ਗਤੀ ਚ, ਦੀਪੋ ਚ ਲੇਣੋ ਚ ਪਰਾਯਣੋ ਚ;

ਅਸਨ੍ਤੁਲੇਯ੍ਯੋ ਮਮ ਸੋ ਧਨੇਨ, ਪਾਣੇਨ ਮੇ ਸਾਦਿਸੋ ਏਸ ਕਤ੍ਤਾ’’ਤਿ.

ਤਤ੍ਥ ਅਤ੍ਤਾ ਚ ਮੇ ਸੋਤਿ ਸੋ ਮਯ੍ਹਂ ਅਤ੍ਤਾ ਚ, ਮਯਾ ਚ ‘‘ਅਤ੍ਤਾਨਂ ਠਪੇਤ੍ਵਾ ਸੇਸਂ ਦਸ੍ਸਾਮੀ’’ਤਿ ਵੁਤ੍ਤਂ, ਤਸ੍ਮਾ ਤਂ ਮਾ ਗਣ੍ਹਿ. ਨ ਕੇਵਲਞ੍ਚ ਅਤ੍ਤਾਵ ¶ , ਅਥ ਖੋ ਮੇ ਸੋ ਸਰਣਞ੍ਚ ਗਤਿ ਚ ਦੀਪੋ ਚ ਲੇਣੋ ਚ ਪਰਾਯਣੋ ਚ. ਅਸਨ੍ਤੁਲੇਯ੍ਯੋ ਮਮ ਸੋ ਧਨੇਨਾਤਿ ਸਤ੍ਤਵਿਧੇਨ ਰਤਨੇਨ ਸਦ੍ਧਿਂ ਨ ਤੁਲੇਤਬ੍ਬੋਤਿ.

ਪੁਣ੍ਣਕੋ ਆਹ –

੧੪੪੨.

‘‘ਚਿਰਂ ਵਿਵਾਦੋ ਮਮ ਤੁਯ੍ਹਞ੍ਚਸ੍ਸ, ਕਾਮਞ੍ਚ ਪੁਚ੍ਛਾਮ ਤਮੇਵ ਗਨ੍ਤ੍ਵਾ;

ਏਸੋਵ ¶ ਨੋ ਵਿਵਰਤੁ ਏਤਮਤ੍ਥਂ, ਯਂ ਵਕ੍ਖਤੀ ਹੋਤੁ ਕਥਾ ਉਭਿਨ੍ਨ’’ਨ੍ਤਿ.

ਤਤ੍ਥ ¶ ਵਿਵਰਤੁ ਏਤਮਤ੍ਥਨ੍ਤਿ ‘‘ਸੋ ਤਵ ਅਤ੍ਤਾ ਵਾ ਨ ਵਾ’’ਤਿ ਏਤਮਤ੍ਥਂ ਏਸੋਵ ਪਕਾਸੇਤੁ. ਹੋਤੁ ਕਥਾ ਉਭਿਨ੍ਨਨ੍ਤਿ ਯਂ ਸੋ ਵਕ੍ਖਤਿ, ਸਾਯੇਵ ਨੋ ਉਭਿਨ੍ਨਂ ਕਥਾ ਹੋਤੁ, ਤਂ ਪਮਾਣਂ ਹੋਤੂਤਿ ਅਤ੍ਥੋ.

ਰਾਜਾ ਆਹ –

੧੪੪੩.

‘‘ਅਦ੍ਧਾ ਹਿ ਸਚ੍ਚਂ ਭਣਸਿ, ਨ ਚ ਮਾਣਵ ਸਾਹਸਂ;

ਤਮੇਵ ਗਨ੍ਤ੍ਵਾ ਪੁਚ੍ਛਾਮ, ਤੇਨ ਤੁਸ੍ਸਾਮੁਭੋ ਜਨਾ’’ਤਿ.

ਤਤ੍ਥ ਨ ਚ ਮਾਣਵ ਸਾਹਸਨ੍ਤਿ ਮਯ੍ਹਂ ਪਸਯ੍ਹ ਸਾਹਸਿਕਵਚਨਂ ਨ ਚ ਭਣਸਿ.

ਏਵਂ ਵਤ੍ਵਾ ਰਾਜਾ ਏਕਸਤਰਾਜਾਨੋ ਪੁਣ੍ਣਕਞ੍ਚ ਗਹੇਤ੍ਵਾ ਤੁਟ੍ਠਮਾਨਸੋ ਵੇਗੇਨ ਧਮ੍ਮਸਭਂ ਅਗਮਾਸਿ. ਪਣ੍ਡਿਤੋਪਿ ਆਸਨਾ ਓਰੁਯ੍ਹ ਰਾਜਾਨਂ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥ ਪੁਣ੍ਣਕੋ ਮਹਾਸਤ੍ਤਂ ਆਮਨ੍ਤੇਤ੍ਵਾ ‘‘ਪਣ੍ਡਿਤ, ‘ਤ੍ਵਂ ਧਮ੍ਮੇ ਠਿਤੋ ਜੀਵਿਤਹੇਤੁਪਿ ਮੁਸਾਵਾਦਂ ਨ ਭਣਸੀ’ਤਿ ਕਿਤ੍ਤਿਸਦ੍ਦੋ ਤੇ ਸਕਲਲੋਕੇ ਫੁਟੋ, ਅਹਂ ਪਨ ਤੇ ਅਜ੍ਜ ਧਮ੍ਮੇ ਠਿਤਭਾਵਂ ਜਾਨਿਸ੍ਸਾਮੀ’’ਤਿ ਵਤ੍ਵਾ ਗਾਥਮਾਹ –

੧੪੪੪.

‘‘ਸਚ੍ਚਂ ਨੁ ਦੇਵਾ ਵਿਦਹੂ ਕੁਰੂਨਂ, ਧਮ੍ਮੇ ਠਿਤਂ ਵਿਧੁਰਂ ਨਾਮਮਚ੍ਚਂ;

ਦਾਸੋਸਿ ਰਞ੍ਞੋ ਉਦ ਵਾਸਿ ਞਾਤਿ, ਵਿਧੁਰੋਤਿ ਸਙ੍ਖਾ ਕਤਮਾਸਿ ਲੋਕੇ’’ਤਿ.

ਤਤ੍ਥ ਸਚ੍ਚਂ ਨੁ ਦੇਵਾ ਵਿਦਹੂ ਕੁਰੂਨਂ, ਧਮ੍ਮੇ ਠਿਤਂ ਵਿਧੁਰਂ ਨਾਮਮਚ੍ਚਨ੍ਤਿ ‘‘ਕੁਰੂਨਂ ਰਟ੍ਠੇ ਵਿਧੁਰੋ ਨਾਮ ਅਮਚ੍ਚੋ ਧਮ੍ਮੇ ਠਿਤੋ ਜੀਵਿਤਹੇਤੁਪਿ ਮੁਸਾਵਾਦਂ ਨ ¶ ਭਣਤੀ’’ਤਿ ਏਵਂ ਦੇਵਾ ਵਿਦਹੂ ਵਿਦਹਨ੍ਤਿ ਕਥੇਨ੍ਤਿ ਪਕਾਸੇਨ੍ਤਿ, ਏਵਂ ਵਿਦਹਮਾਨਾ ਤੇ ਦੇਵਾ ਸਚ੍ਚਂ ਨੁ ਵਿਦਹਨ੍ਤਿ, ਉਦਾਹੁ ਅਭੂਤਵਾਦਾਯੇਵੇਤੇਤਿ. ਵਿਧੁਰੋਤਿ ਸਙ੍ਖਾ ਕਤਮਾਸਿ ਲੋਕੇਤਿ ਯਾ ਏਸਾ ਤਵ ‘‘ਵਿਧੁਰੋ’’ਤਿ ਲੋਕੇ ਸਙ੍ਖਾ ਪਞ੍ਞਤ੍ਤਿ, ਸਾ ਕਤਮਾ ਆਸਿ, ਤ੍ਵਂ ਪਕਾਸੇਹਿ, ਕਿਂ ਨੁ ਰਞ੍ਞੋ ਦਾਸੋ ਨੀਚਤਰਜਾਤਿਕੋ, ਉਦਾਹੁ ਸਮੋ ਵਾ ਉਤ੍ਤਰਿਤਰੋ ਵਾ ਞਾਤੀਤਿ ਇਦਂ ਤਾਵ ਮੇ ਆਚਿਕ੍ਖ, ਦਾਸੋਸਿ ਰਞ੍ਞੋ, ਉਦ ਵਾਸਿ ਞਾਤੀਤਿ.

ਅਥ ਮਹਾਸਤ੍ਤੋ ‘‘ਅਯਂ ਮਂ ਏਵਂ ਪੁਚ੍ਛਤਿ, ਅਹਂ ਖੋ ਪਨੇਤਂ ‘ਰਞ੍ਞੋ ਞਾਤੀ’ਤਿਪਿ ‘ਰਞ੍ਞੋ ਉਤ੍ਤਰਿਤਰੋ’ਤਿਪਿ ‘ਰਞ੍ਞੋ ਨ ਕਿਞ੍ਚਿ ਹੋਮੀ’ਤਿਪਿ ਸਞ੍ਞਾਪੇਤੁਂ ਸਕ੍ਕੋਮਿ, ਏਵਂ ਸਨ੍ਤੇਪਿ ਇਮਸ੍ਮਿਂ ਲੋਕੇ ¶ ਸਚ੍ਚਸਮੋ ਅਵਸ੍ਸਯੋ ¶ ਨਾਮ ਨਤ੍ਥਿ, ਸਚ੍ਚਮੇਵ ਕਥੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ‘‘ਮਾਣਵ, ਨੇਵਾਹਂ ਰਞ੍ਞੋ ਞਾਤਿ, ਨ ਉਤ੍ਤਰਿਤਰੋ, ਚਤੁਨ੍ਨਂ ਪਨ ਦਾਸਾਨਂ ਅਞ੍ਞਤਰੋ’’ਤਿ ਦਸ੍ਸੇਤੁਂ ਗਾਥਾਦ੍ਵਯਮਾਹ –

੧੪੪੫.

‘‘ਆਮਾਯਦਾਸਾਪਿ ਭਵਨ੍ਤਿ ਹੇਕੇ, ਧਨੇਨ ਕੀਤਾਪਿ ਭਵਨ੍ਤਿ ਦਾਸਾ;

ਸਯਮ੍ਪਿ ਹੇਕੇ ਉਪਯਨ੍ਤਿ ਦਾਸਾ, ਭਯਾ ਪਣੁਨ੍ਨਾਪਿ ਭਵਨ੍ਤਿ ਦਾਸਾ.

੧੪੪੬.

‘‘ਏਤੇ ਨਰਾਨਂ ਚਤੁਰੋਵ ਦਾਸਾ, ਅਦ੍ਧਾ ਹਿ ਯੋਨਿਤੋ ਅਹਮ੍ਪਿ ਜਾਤੋ;

ਭਵੋ ਚ ਰਞ੍ਞੋ ਅਭਵੋ ਚ ਰਞ੍ਞੋ, ਦਾਸਾਹਂ ਦੇਵਸ੍ਸ ਪਰਮ੍ਪਿ ਗਨ੍ਤ੍ਵਾ;

ਧਮ੍ਮੇਨ ਮਂ ਮਾਣਵ ਤੁਯ੍ਹ ਦਜ੍ਜਾ’’ਤਿ.

ਤਤ੍ਥ ਆਮਾਯਦਾਸਾਤਿ ਦਾਸਿਯਾ ਕੁਚ੍ਛਿਮ੍ਹਿ ਜਾਤਦਾਸਾ. ਸਯਮ੍ਪਿ ਹੇਕੇ ਉਪਯਨ੍ਤਿ ਦਾਸਾਤਿ ਯੇ ਕੇਚਿ ਉਪਟ੍ਠਾਕਜਾਤਿਕਾ, ਸਬ੍ਬੇ ਤੇ ਸਯਂ ਦਾਸਭਾਵਂ ਉਪਗਤਾ ਦਾਸਾ ਨਾਮ. ਭਯਾ ਪਣੁਨ੍ਨਾਤਿ ਰਾਜਭਯੇਨ ਵਾ ਚੋਰਭਯੇਨ ਵਾ ਅਤ੍ਤਨੋ ਵਸਨਟ੍ਠਾਨਤੋ ਪਣੁਨ੍ਨਾ ਕਰਮਰਾ ਹੁਤ੍ਵਾ ਪਰਵਿਸਯਂ ਗਤਾਪਿ ਦਾਸਾਯੇਵ ਨਾਮ. ਅਦ੍ਧਾ ਹਿ ਯੋਨਿਤੋ ਅਹਮ੍ਪਿ ਜਾਤੋਤਿ ਮਾਣਵ, ਏਕਂਸੇਨੇਵ ਅਹਮ੍ਪਿ ਚਤੂਸੁ ਦਾਸਯੋਨੀਸੁ ਏਕਤੋ ਸਯਂ ਦਾਸਯੋਨਿਤੋ ਨਿਬ੍ਬਤ੍ਤਦਾਸੋ. ਭਵੋ ਚ ਰਞ੍ਞੋ ਅਭਵੋ ਚ ਰਞ੍ਞੋਤਿ ਰਞ੍ਞੋ ¶ ਵੁਡ੍ਢਿ ਵਾ ਹੋਤੁ ਅਵੁਡ੍ਢਿ ਵਾ, ਨ ਸਕ੍ਕਾ ਮਯਾ ਮੁਸਾ ਭਾਸਿਤੁਂ. ਪਰਮ੍ਪੀਤਿ ਦੂਰਂ ਗਨ੍ਤ੍ਵਾਪਿ ਅਹਂ ਦੇਵਸ੍ਸ ਦਾਸੋਯੇਵ. ਦਜ੍ਜਾਤਿ ਮਂ ਰਾਜਾ ਜਯਧਨੇਨ ਖਣ੍ਡੇਤ੍ਵਾ ਤੁਯ੍ਹਂ ਦੇਨ੍ਤੋ ਧਮ੍ਮੇਨ ਸਭਾਵੇਨ ਦਦੇਯ੍ਯਾਤਿ.

ਤਂ ਸੁਤ੍ਵਾ ਪੁਣ੍ਣਕੋ ਹਟ੍ਠਤੁਟ੍ਠੋ ਪੁਨ ਅਪ੍ਫੋਟੇਤ੍ਵਾ ਗਾਥਮਾਹ –

੧੪੪੭.

‘‘ਅਯਂ ਦੁਤੀਯੋ ਵਿਜਯੋ ਮਮਜ੍ਜ, ਪੁਟ੍ਠੋ ਹਿ ਕਤ੍ਤਾ ਵਿਵਰੇਤ੍ਥ ਪਞ੍ਹਂ;

ਅਧਮ੍ਮਰੂਪੋ ਵਤ ਰਾਜਸੇਟ੍ਠੋ, ਸੁਭਾਸਿਤਂ ਨਾਨੁਜਾਨਾਸਿ ਮਯ੍ਹ’’ਨ੍ਤਿ.

ਤਤ੍ਥ ਰਾਜਸੇਟ੍ਠੋਤਿ ਅਯਂ ਰਾਜਸੇਟ੍ਠੋ ਅਧਮ੍ਮਰੂਪੋ ਵਤ. ਸੁਭਾਸਿਤਨ੍ਤਿ ਵਿਧੁਰਪਣ੍ਡਿਤੇਨ ਸੁਕਥਿਤਂ ਸੁਵਿਨਿਚ੍ਛਿਤਂ. ਨਾਨੁਜਾਨਾਸਿ ਮਯ੍ਹਨ੍ਤਿ ਇਦਾਨੇਤਂ ਵਿਧੁਰਪਣ੍ਡਿਤਂ ਮਯ੍ਹਂ ਕਸ੍ਮਾ ਨਾਨੁਜਾਨਾਸਿ, ਕਿਮਤ੍ਥਂ ਨ ਦੇਸੀਤਿ ਵਦਤਿ.

ਤਂ ਸੁਤ੍ਵਾ ਰਾਜਾ ਅਨਤ੍ਤਮਨੋ ਹੁਤ੍ਵਾ ‘‘ਪਣ੍ਡਿਤੋ ਮਾਦਿਸਂ ਯਸਦਾਯਕਂ ਅਨੋਲੋਕੇਤ੍ਵਾ ਇਦਾਨਿ ਦਿਟ੍ਠਂ ¶ ਮਾਣਵਕਂ ਓਲੋਕੇਤੀ’’ਤਿ ਮਹਾਸਤ੍ਤਸ੍ਸ ਕੁਜ੍ਝਿਤ੍ਵਾ ‘‘ਮਾਣਵ, ਸਚੇ ਸੋ ਦਾਸੋ ਮੇ ਭਵੇਯ੍ਯ, ਤਂ ਗਹੇਤ੍ਵਾ ਗਚ੍ਛਾ’’ਤਿ ਵਤ੍ਵਾ ਗਾਥਮਾਹ –

੧੪੪੮.

‘‘ਏਵਂ ¶ ਚੇ ਨੋ ਸੋ ਵਿਵਰੇਤ੍ਥ ਪਞ੍ਹਂ, ਦਾਸੋਹਮਸ੍ਮਿ ਨ ਚ ਖੋਸ੍ਮਿ ਞਾਤਿ;

ਗਣ੍ਹਾਹਿ ਕਚ੍ਚਾਨ ਵਰਂ ਧਨਾਨਂ, ਆਦਾਯ ਯੇਨਿਚ੍ਛਸਿ ਤੇਨ ਗਚ੍ਛਾ’’ਤਿ.

ਤਤ੍ਥ ਏਵਂ ਚੇ ਨੋ ਸੋ ਵਿਵਰੇਤ੍ਥ ਪਞ੍ਹਨ੍ਤਿ ਸਚੇ ਸੋ ਅਮ੍ਹਾਕਂ ਪਞ੍ਹਂ ‘‘ਦਾਸੋਹਮਸ੍ਮਿ, ਨ ਚ ਖੋਸ੍ਮਿ ਞਾਤੀ’’ਤਿ ਏਵਂ ਵਿਵਰਿ ਏਤ੍ਥ ਪਰਿਸਮਣ੍ਡਲੇ, ਅਥ ਕਿਂ ਅਚ੍ਛਸਿ, ਸਕਲਲੋਕੇ ਧਨਾਨਂ ਵਰਂ ਏਤਂ ਗਣ੍ਹ, ਗਹੇਤ੍ਵਾ ਚ ਪਨ ਯੇਨ ਇਚ੍ਛਸਿ, ਤੇਨ ਗਚ੍ਛਾਤਿ.

ਅਕ੍ਖਕਣ੍ਡਂ ਨਿਟ੍ਠਿਤਂ.

ਘਰਾਵਾਸਪਞ੍ਹਾ

ਏਵਞ੍ਚ ¶ ਪਨ ਵਤ੍ਵਾ ਰਾਜਾ ਚਿਨ੍ਤੇਸਿ ‘‘ਪਣ੍ਡਿਤਂ ਗਹੇਤ੍ਵਾ ਮਾਣਵੋ ਯਥਾਰੁਚਿ ਗਮਿਸ੍ਸਤਿ, ਤਸ੍ਸ ਗਤਕਾਲਤੋ ਪਟ੍ਠਾਯ ਮਯ੍ਹਂ ਮਧੁਰਧਮ੍ਮਕਥਾ ਦੁਲ੍ਲਭਾ ਭਵਿਸ੍ਸਤਿ, ਯਂਨੂਨਾਹਂ ਇਮਂ ਅਤ੍ਤਨੋ ਠਾਨੇ ਠਪੇਤ੍ਵਾ ਅਲਙ੍ਕਤਧਮ੍ਮਾਸਨੇ ਨਿਸੀਦਪੇਤ੍ਵਾ ਘਰਾਵਾਸਪਞ੍ਹਂ ਪੁਚ੍ਛੇਯ੍ਯ’’ਨ੍ਤਿ. ਅਥ ਨਂ ਰਾਜਾ ਏਵਮਾਹ ‘‘ਪਣ੍ਡਿਤ, ਤੁਮ੍ਹਾਕਂ ਗਤਕਾਲੇ ਮਮ ਮਧੁਰਧਮ੍ਮਕਥਾ ਦੁਲ੍ਲਭਾ ਭਵਿਸ੍ਸਤਿ, ਅਲਙ੍ਕਤਧਮ੍ਮਾਸਨੇ ਨਿਸੀਦਾਪੇਤ੍ਵਾ ਅਤ੍ਤਨੋ ਠਾਨੇ ਠਤ੍ਵਾ ਮਯ੍ਹਂ ਘਰਾਵਾਸਪਞ੍ਹਂ ਕਥੇਥਾ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਅਲਙ੍ਕਤਧਮ੍ਮਾਸਨੇ ਨਿਸੀਦਿਤ੍ਵਾ ਰਞ੍ਞਾ ਪਞ੍ਹਂ ਪੁਟ੍ਠੋ ਵਿਸ੍ਸਜ੍ਜੇਸਿ. ਤਤ੍ਰਾਯਂ ਪਞ੍ਹੋ –

੧੪੪੯.

‘‘ਵਿਧੁਰ ਵਸਮਾਨਸ੍ਸ, ਗਹਟ੍ਠਸ੍ਸ ਸਕਂ ਘਰਂ;

ਖੇਮਾ ਵੁਤ੍ਤਿ ਕਥਂ ਅਸ੍ਸ, ਕਥਂ ਨੁ ਅਸ੍ਸ ਸਙ੍ਗਹੋ.

੧੪੫੦.

‘‘ਅਬ੍ਯਾਬਜ੍ਝਂ ਕਥਂ ਅਸ੍ਸ, ਸਚ੍ਚਵਾਦੀ ਚ ਮਾਣਵੋ;

ਅਸ੍ਮਾ ਲੋਕਾ ਪਰਂ ਲੋਕਂ, ਕਥਂ ਪੇਚ੍ਚ ਨ ਸੋਚਤੀ’’ਤਿ.

ਤਤ੍ਥ ਖੇਮਾ ਵੁਤ੍ਤਿ ਕਥਂ ਅਸ੍ਸਾਤਿ ਕਥਂ ਘਰਾਵਾਸਂ ਵਸਨ੍ਤਸ੍ਸ ਗਹਟ੍ਠਸ੍ਸ ਖੇਮਾ ਨਿਬ੍ਭਯਾ ਵੁਤ੍ਤਿ ਭਵੇਯ੍ਯ. ਕਥਂ ਨੁ ਅਸ੍ਸ ਸਙ੍ਗਹੋਤਿ ਚਤੁਬ੍ਬਿਧੋ ਸਙ੍ਗਹਵਤ੍ਥੁਸਙ੍ਖਾਤੋ ਸਙ੍ਗਹੋ ਤਸ੍ਸ ਕਥਂ ਭਵੇਯ੍ਯ ¶ . ਅਬ੍ਯਾਬਜ੍ਝਨ੍ਤਿ ਨਿਦ੍ਦੁਕ੍ਖਤਾ. ਸਚ੍ਚਵਾਦੀ ਚਾਤਿ ਕਥਂ ਨੁ ਮਾਣਵੋ ਸਚ੍ਚਵਾਦੀ ਨਾਮ ਭਵੇਯ੍ਯ. ਪੇਚ੍ਚਾਤਿ ਪਰਲੋਕਂ ਗਨ੍ਤ੍ਵਾ.

ਤਂ ਸੁਤ੍ਵਾ ਪਣ੍ਡਿਤੋ ਰਞ੍ਞੋ ਪਞ੍ਹਂ ਕਥੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੪੫੧.

‘‘ਤਂ ਤਤ੍ਥ ਗਤਿਮਾ ਧਿਤਿਮਾ, ਮਤਿਮਾ ਅਤ੍ਥਦਸ੍ਸਿਮਾ;

ਸਙ੍ਖਾਤਾ ਸਬ੍ਬਧਮ੍ਮਾਨਂ, ਵਿਧੁਰੋ ਏਤਦਬ੍ਰਵਿ.

੧੪੫੨.

‘‘ਨ ਸਾਧਾਰਣਦਾਰਸ੍ਸ, ਨ ਭੁਞ੍ਜੇ ਸਾਦੁਮੇਕਕੋ;

ਨ ਸੇਵੇ ਲੋਕਾਯਤਿਕਂ, ਨੇਤਂ ਪਞ੍ਞਾਯ ਵਡ੍ਢਨਂ.

੧੪੫੩.

‘‘ਸੀਲਵਾ ਵਤ੍ਤਸਮ੍ਪਨ੍ਨੋ, ਅਪ੍ਪਮਤ੍ਤੋ ਵਿਚਕ੍ਖਣੋ;

ਨਿਵਾਤਵੁਤ੍ਤਿ ਅਤ੍ਥਦ੍ਧੋ, ਸੁਰਤੋ ਸਖਿਲੋ ਮੁਦੁ.

੧੪੫੪.

‘‘ਸਙ੍ਗਹੇਤਾ ¶ ¶ ਚ ਮਿਤ੍ਤਾਨਂ, ਸਂਵਿਭਾਗੀ ਵਿਧਾਨਵਾ;

ਤਪ੍ਪੇਯ੍ਯ ਅਨ੍ਨਪਾਨੇਨ, ਸਦਾ ਸਮਣਬ੍ਰਾਹ੍ਮਣੇ.

੧੪੫੫.

‘‘ਧਮ੍ਮਕਾਮੋ ਸੁਤਾਧਾਰੋ, ਭਵੇਯ੍ਯ ਪਰਿਪੁਚ੍ਛਕੋ;

ਸਕ੍ਕਚ੍ਚਂ ਪਯਿਰੁਪਾਸੇਯ੍ਯ, ਸੀਲਵਨ੍ਤੇ ਬਹੁਸ੍ਸੁਤੇ.

੧੪੫੬.

‘‘ਘਰਮਾਵਸਮਾਨਸ੍ਸ, ਗਹਟ੍ਠਸ੍ਸ ਸਕਂ ਘਰਂ;

ਖੇਮਾ ਵੁਤ੍ਤਿ ਸਿਯਾ ਏਵਂ, ਏਵਂ ਨੁ ਅਸ੍ਸ ਸਙ੍ਗਹੋ.

੧੪੫੭.

‘‘ਅਬ੍ਯਾਬਜ੍ਝਂ ਸਿਯਾ ਏਵਂ, ਸਚ੍ਚਵਾਦੀ ਚ ਮਾਣਵੋ;

ਅਸ੍ਮਾ ਲੋਕਾ ਪਰਂ ਲੋਕਂ, ਏਵਂ ਪੇਚ੍ਚ ਨ ਸੋਚਤੀ’’ਤਿ.

ਤਤ੍ਥ ਤਂ ਤਤ੍ਥਾਤਿ ਭਿਕ੍ਖਵੇ, ਤਂ ਰਾਜਾਨਂ ਤਤ੍ਥ ਧਮ੍ਮਸਭਾਯਂ ਞਾਣਗਤਿਯਾ ਗਤਿਮਾ, ਅਬ੍ਬੋਚ੍ਛਿਨ੍ਨਵੀਰਿਯੇਨ ਧਿਤਿਮਾ, ਭੂਰਿਸਮਾਯ ਵਿਪੁਲਾਯ ਪਞ੍ਞਾਯ ਮਤਿਮਾ, ਸਣ੍ਹਸੁਖੁਮਤ੍ਥਦਸ੍ਸਿਨਾ ਞਾਣੇਨ ਅਤ੍ਥਦਸ੍ਸਿਮਾ, ਪਰਿਚ੍ਛਿਨ੍ਦਿਤ੍ਵਾ ਜਾਨਨਞਾਣਸਙ੍ਖਾਤਾਯ ਪਞ੍ਞਾਯ ਸਬ੍ਬਧਮ੍ਮਾਨਂ ਸਙ੍ਖਾਤਾ, ਵਿਧੁਰਪਣ੍ਡਿਤੋ ਏਤਂ ‘‘ਨ ਸਾਧਾਰਣਦਾਰਸ੍ਸਾ’’ਤਿਆਦਿਵਚਨਂ ਅਬ੍ਰਵਿ. ਤਤ੍ਥ ਯੋ ਪਰੇਸਂ ਦਾਰੇਸੁ ਅਪਰਜ੍ਝਤਿ ¶ , ਸੋ ਸਾਧਾਰਣਦਾਰੋ ਨਾਮ, ਤਾਦਿਸੋ ਨ ਅਸ੍ਸ ਭਵੇਯ੍ਯ. ਨ ਭੁਞ੍ਜੇ ਸਾਦੁਮੇਕਕੋਤਿ ਸਾਦੁਰਸਂ ਪਣੀਤਭੋਜਨਂ ਅਞ੍ਞੇਸਂ ਅਦਤ੍ਵਾ ਏਕਕੋਵ ਨ ਭੁਞ੍ਜੇਯ੍ਯ. ਲੋਕਾਯਤਿਕਨ੍ਤਿ ਅਨਤ੍ਥਨਿਸ੍ਸਿਤਂ ਸਗ੍ਗਮਗ੍ਗਾਨਂ ਅਦਾਯਕਂ ਅਨਿਯ੍ਯਾਨਿਕਂ ਵਿਤਣ੍ਡਸਲ੍ਲਾਪਂ ਲੋਕਾਯਤਿਕਵਾਦਂ ਨ ਸੇਵੇਯ੍ਯ. ਨੇਤਂ ਪਞ੍ਞਾਯ ਵਡ੍ਢਨਨ੍ਤਿ ਨ ਹਿ ਏਤਂ ਲੋਕਾਯਤਿਕਂ ਪਞ੍ਞਾਯ ਵਡ੍ਢਨਂ. ਸੀਲਵਾਤਿ ਅਖਣ੍ਡੇਹਿ ਪਞ੍ਚਹਿ ਸੀਲੇਹਿ ਸਮਨ੍ਨਾਗਤੋ. ਵਤ੍ਤਸਮ੍ਪਨ੍ਨੋਤਿ ਘਰਾਵਾਸਵਤ੍ਤੇਨ ਵਾ ਰਾਜਵਤ੍ਤੇਨ ਵਾ ਸਮਨ੍ਨਾਗਤੋ. ਅਪ੍ਪਮਤ੍ਤੋਤਿ ਕੁਸਲਧਮ੍ਮੇਸੁ ਅਪ੍ਪਮਤ੍ਤੋ. ਨਿਵਾਤਵੁਤ੍ਤੀਤਿ ਅਤਿਮਾਨਂ ਅਕਤ੍ਵਾ ਨੀਚਵੁਤ੍ਤਿ ਓਵਾਦਾਨੁਸਾਸਨਿਪਟਿਚ੍ਛਕੋ. ਅਤ੍ਥਦ੍ਧੋਤਿ ਥਦ੍ਧਮਚ੍ਛਰਿਯਵਿਰਹਿਤੋ. ਸੁਰਤੋਤਿ ਸੋਰਚ੍ਚੇਨ ਸਮਨ੍ਨਾਗਤੋ. ਸਖਿਲੋਤਿ ਪੇਮਨੀਯਵਚਨੋ. ਮੁਦੂਤਿ ਕਾਯਵਾਚਾਚਿਤ੍ਤੇਹਿ ਅਫਰੁਸੋ.

ਸਙ੍ਗਹੇਤਾ ਚ ਮਿਤ੍ਤਾਨਨ੍ਤਿ ਕਲ੍ਯਾਣਮਿਤ੍ਤਾਨਂ ਸਙ੍ਗਹਕਰੋ. ਦਾਨਾਦੀਸੁ ਯੋ ਯੇਨ ਸਙ੍ਗਹਂ ਇਚ੍ਛਤਿ, ਤਸ੍ਸ ਤੇਨੇਵ ਸਙ੍ਗਾਹਕੋ. ਸਂਵਿਭਾਗੀਤਿ ਧਮ੍ਮਿਕਸਮਣਬ੍ਰਾਹ੍ਮਣਾਨਞ੍ਚੇਵ ਕਪਣਦ੍ਧਿਕਵਣਿਬ੍ਬਕਯਾਚਕਾਦੀਨਞ੍ਚ ਸਂਵਿਭਾਗਕਰੋ. ਵਿਧਾਨਵਾਤਿ ‘‘ਇਮਸ੍ਮਿਂ ਕਾਲੇ ਕਸਿਤੁਂ ਵਟ੍ਟਤਿ, ਇਮਸ੍ਮਿਂ ਕਾਲੇ ਵਪਿਤੁਂ ਵਟ੍ਟਤੀ’’ਤਿ ਏਵਂ ਸਬ੍ਬਕਿਚ੍ਚੇਸੁ ਵਿਧਾਨਸਮ੍ਪਨ੍ਨੋ. ਤਪ੍ਪੇਯ੍ਯਾਤਿ ਗਹਿਤਗਹਿਤਭਾਜਨਾਨਿ ¶ ਪੂਰੇਤ੍ਵਾ ਦਦਮਾਨੋ ਤਪ੍ਪੇਯ੍ਯ. ਧਮ੍ਮਕਾਮੋਤਿ ਪਵੇਣਿਧਮ੍ਮਮ੍ਪਿ ਸੁਚਰਿਤਧਮ੍ਮਮ੍ਪਿ ਕਾਮਯਮਾਨੋ ਪਤ੍ਥਯਮਾਨੋ. ਸੁਤਾਧਾਰੋਤਿ ਸੁਤਸ੍ਸ ਆਧਾਰਭੂਤੋ. ਪਰਿਪੁਚ੍ਛਕੋਤਿ ਧਮ੍ਮਿਕਸਮਣਬ੍ਰਾਹ੍ਮਣੇ ਉਪਸਙ੍ਕਮਿਤ੍ਵਾ ‘‘ਕਿਂ, ਭਨ੍ਤੇ, ਕੁਸਲ’’ਨ੍ਤਿਆਦਿਵਚਨੇਹਿ ਪਰਿਪੁਚ੍ਛਨਸੀਲੋ. ਸਕ੍ਕਚ੍ਚਨ੍ਤਿ ਗਾਰਵੇਨ. ਏਵਂ ਨੁ ਅਸ੍ਸ ਸਙ੍ਗਹੋਤਿ ਸਙ੍ਗਹੋਪਿਸ੍ਸ ਏਵਂ ਕਤੋ ਨਾਮ ਭਵੇਯ੍ਯ. ਸਚ੍ਚਵਾਦੀਤਿ ਏਵਂ ਪਟਿਪਨ੍ਨੋਯੇਵ ਸਭਾਵਵਾਦੀ ਨਾਮ ਸਿਯਾ.

ਏਵਂ ਮਹਾਸਤ੍ਤੋ ਰਞ੍ਞੋ ਘਰਾਵਾਸਪਞ੍ਹਂ ਕਥੇਤ੍ਵਾ ਪਲ੍ਲਙ੍ਕਾ ਓਰੁਯ੍ਹ ਰਾਜਾਨਂ ਵਨ੍ਦਿ. ਰਾਜਾਪਿਸ੍ਸ ਮਹਾਸਕ੍ਕਾਰਂ ਕਤ੍ਵਾ ਏਕਸਤਰਾਜੂਹਿ ਪਰਿਵੁਤੋ ਅਤ੍ਤਨੋ ਨਿਵੇਸਨਮੇਵ ਗਤੋ.

ਘਰਾਵਾਸਪਞ੍ਹਾ ਨਿਟ੍ਠਿਤਾ.

ਲਕ੍ਖਣਕਣ੍ਡਂ

ਮਹਾਸਤ੍ਤੋ ¶ ਪਨ ਪਟਿਨਿਵਤ੍ਤੋ. ਅਥ ਨਂ ਪੁਣ੍ਣਕੋ ਆਹ –

੧੪੫੮.

‘‘ਏਹਿ ਦਾਨਿ ਗਮਿਸ੍ਸਾਮ, ਦਿਨ੍ਨੋ ਨੋ ਇਸ੍ਸਰੇਨ ਮੇ;

ਮਮੇਵਤ੍ਥਂ ਪਟਿਪਜ੍ਜ, ਏਸ ਧਮ੍ਮੋ ਸਨਨ੍ਤਨੋ’’ਤਿ.

ਤਤ੍ਥ ¶ ਦਿਨ੍ਨੋ ਨੋਤਿ ਏਤ੍ਥ ਨੋਤਿ ਨਿਪਾਤਮਤ੍ਤਂ, ਤ੍ਵਂ ਇਸ੍ਸਰੇਨ ਮਯ੍ਹਂ ਦਿਨ੍ਨੋਤਿ ਅਤ੍ਥੋ. ਸਨਨ੍ਤਨੋਤਿ ਮਮ ਅਤ੍ਥਂ ਪਟਿਪਜ੍ਜਨ੍ਤੇਨ ਹਿ ਤਯਾ ਅਤ੍ਤਨੋ ਸਾਮਿਕਸ੍ਸ ਅਤ੍ਥੋ ਪਟਿਪਨ੍ਨੋ ਹੋਤਿ. ਯਞ੍ਚੇਤਂ ਸਾਮਿਕਸ੍ਸ ਅਤ੍ਥਕਰਣਂ ਨਾਮ, ਏਸ ਧਮ੍ਮੋ ਸਨਨ੍ਤਨੋ ਪੋਰਾਣਕਪਣ੍ਡਿਤਾਨਂ ਸਭਾਵੋਤਿ.

ਵਿਧੁਰਪਣ੍ਡਿਤੋ ਆਹ –

੧੪੫੯.

‘‘ਜਾਨਾਮਿ ਮਾਣਵ ਤਯਾਹਮਸ੍ਮਿ, ਦਿਨ੍ਨੋਹਮਸ੍ਮਿ ਤਵ ਇਸ੍ਸਰੇਨ;

ਤੀਹਞ੍ਚ ਤਂ ਵਾਸਯੇਮੁ ਅਗਾਰੇ, ਯੇਨਦ੍ਧੁਨਾ ਅਨੁਸਾਸੇਮੁ ਪੁਤ੍ਤੇ’’ਤਿ.

ਤਤ੍ਥ ਤਯਾਹਮਸ੍ਮੀਤਿ ਤਯਾ ਲਦ੍ਧੋਹਮਸ੍ਮੀਤਿ ਜਾਨਾਮਿ, ਲਭਨ੍ਤੇਨ ਚ ਨ ਅਞ੍ਞਥਾ ਲਦ੍ਧੋ. ਦਿਨ੍ਨੋਹਮਸ੍ਮਿ ਤਵ ਇਸ੍ਸਰੇਨਾਤਿ ਮਮ ਇਸ੍ਸਰੇਨ ਰਞ੍ਞਾ ¶ ਅਹਂ ਤਵ ਦਿਨ੍ਨੋ. ਤੀਹਂ ਚਾਤਿ ਮਾਣਵ, ਅਹਂ ਤਵ ਬਹੂਪਕਾਰੋ, ਰਾਜਾਨਂ ਅਨੋਲੋਕੇਤ੍ਵਾ ਸਚ੍ਚਮੇਵ ਕਥੇਸਿਂ, ਤੇਨਾਹਂ ਤਯਾ ਲਦ੍ਧੋ, ਤ੍ਵਂ ਮੇ ਮਹਨ੍ਤਗੁਣਭਾਵਂ ਜਾਨਾਹਿ, ਮਯਂ ਤੀਣਿਪਿ ਦਿਵਸਾਨਿ ਅਤ੍ਤਨੋ ਅਗਾਰੇ ਵਾਸੇਮੁ, ਤਸ੍ਮਾ ਯੇਨਦ੍ਧੁਨਾ ਯਤ੍ਤਕੇਨ ਕਾਲੇਨ ਮਯਂ ਪੁਤ੍ਤਾਦਾਰੇ ਅਨੁਸਾਸੇਮੁ, ਤਂ ਕਾਲਂ ਅਧਿਵਾਸੇਹੀਤਿ.

ਤਂ ਸੁਤ੍ਵਾ ਪੁਣ੍ਣਕੋ ‘‘ਸਚ੍ਚਂ ਪਣ੍ਡਿਤੋ ਆਹ, ਬਹੂਪਕਾਰੋ ਏਸ ਮਮ, ‘ਸਤ੍ਤਾਹਮ੍ਪਿ ਅਡ੍ਢਮਾਸਮ੍ਪਿ ਨਿਸੀਦਾਹੀ’ਤਿ ਵੁਤ੍ਤੇ ਅਧਿਵਾਸੇਤਬ੍ਬਮੇਵਾ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੪੬੦.

‘‘ਤਂ ਮੇ ਤਥਾ ਹੋਤੁ ਵਸੇਮੁ ਤੀਹਂ, ਕੁਰੁਤਂ ਭਵਜ੍ਜ ਘਰੇਸੁ ਕਿਚ੍ਚਂ;

ਅਨੁਸਾਸਤਂ ਪੁਤ੍ਤਦਾਰੇ ਭਵਜ੍ਜ, ਯਥਾ ਤਯੀ ਪੇਚ੍ਚ ਸੁਖੀ ਭਵੇਯ੍ਯਾ’’ਤਿ.

ਤਤ੍ਥ ਤਂ ਮੇਤਿ ਯਂ ਤ੍ਵਂ ਵਦੇਸਿ, ਸਬ੍ਬਂ ਤਂ ਮਮ ਤਥਾ ਹੋਤੁ. ਭਵਜ੍ਜਾਤਿ ਭਵਂ ਅਜ੍ਜ ਪਟ੍ਠਾਯ ਤੀਹਂ ਅਨੁਸਾਸਤੁ. ਤਯੀ ਪੇਚ੍ਚਾਤਿ ਯਥਾ ਤਯਿ ਗਤੇ ਪਚ੍ਛਾ ਤਵ ਪੁਤ੍ਤਦਾਰੋ ਸੁਖੀ ਭਵੇਯ੍ਯ, ਏਵਂ ਅਨੁਸਾਸਤੁ.

ਏਵਂ ਵਤ੍ਵਾ ਪੁਣ੍ਣਕੋ ਮਹਾਸਤ੍ਤੇਨ ਸਦ੍ਧਿਂਯੇਵ ਤਸ੍ਸ ਨਿਵੇਸਨਂ ਪਾਵਿਸਿ. ਤਮਤ੍ਥਂ ¶ ਪਕਾਸੇਨ੍ਤੋ ਸਤ੍ਥਾ ਆਹ –

੧੪੬੧.

‘‘ਸਾਧੂਤਿ ਵਤ੍ਵਾਨ ਪਹੂਤਕਾਮੋ, ਪਕ੍ਕਾਮਿ ਯਕ੍ਖੋ ਵਿਧੁਰੇਨ ਸਦ੍ਧਿਂ;

ਤਂ ਕੁਞ੍ਜਰਾਜਞ੍ਞਹਯਾਨੁਚਿਣ੍ਣਂ, ਪਾਵੇਕ੍ਖਿ ਅਨ੍ਤੇਪੁਰਮਰਿਯਸੇਟ੍ਠੋ’’ਤਿ.

ਤਤ੍ਥ ¶ ਪਹੂਤਕਾਮੋਤਿ ਮਹਾਭੋਗੋ. ਕੁਞ੍ਜਰਾਜਞ੍ਞਹਯਾਨੁਚਿਣ੍ਣਨ੍ਤਿ ਕੁਞ੍ਜਰੇਹਿ ਚ ਆਜਞ੍ਞਹਯੇਹਿ ਚ ਅਨੁਚਿਣ੍ਣਂ ਪਰਿਪੁਣ੍ਣਂ. ਅਰਿਯਸੇਟ੍ਠੋਤਿ ਆਚਾਰਅਰਿਯੇਸੁ ਉਤ੍ਤਮੋ ਪੁਣ੍ਣਕੋ ਯਕ੍ਖੋ ਪਣ੍ਡਿਤਸ੍ਸ ਅਨ੍ਤੇਪੁਰਂ ਪਾਵਿਸਿ.

ਮਹਾਸਤ੍ਤਸ੍ਸ ਪਨ ਤਿਣ੍ਣਂ ਉਤੂਨਂ ਅਤ੍ਥਾਯ ਤਯੋ ਪਾਸਾਦਾ ਅਹੇਸੁਂ. ਤੇਸੁ ਏਕੋ ਕੋਞ੍ਚੋ ਨਾਮ, ਏਕੋ ਮਯੂਰੋ ਨਾਮ, ਏਕੋ ਪਿਯਕੇਤੋ ਨਾਮ. ਤੇ ਸਨ੍ਧਾਯ ਅਯਂ ਗਾਥਾ ਵੁਤ੍ਤਾ –

੧੪੬੨.

‘‘ਕੋਞ੍ਚਂ ¶ ਮਯੂਰਞ੍ਚ ਪਿਯਞ੍ਚ ਕੇਤਂ, ਉਪਾਗਮੀ ਤਤ੍ਥ ਸੁਰਮ੍ਮਰੂਪਂ;

ਪਹੂਤਭਕ੍ਖਂ ਬਹੁਅਨ੍ਨਪਾਨਂ, ਮਸਕ੍ਕਸਾਰਂ ਵਿਯ ਵਾਸਵਸ੍ਸਾ’’ਤਿ.

ਤਤ੍ਥ ਤਤ੍ਥਾਤਿ ਤੇਸੁ ਤੀਸੁ ਪਾਸਾਦੇਸੁ ਯਤ੍ਥ ਤਸ੍ਮਿਂ ਸਮਯੇ ਅਤ੍ਤਨਾ ਵਸਤਿ, ਤਂ ਸੁਰਮ੍ਮਰੂਪਂ ਪਾਸਾਦਂ ਪੁਣ੍ਣਕਂ ਆਦਾਯ ਉਪਾਗਮਿ.

ਸੋ ਉਪਗਨ੍ਤ੍ਵਾ ਚ ਪਨ ਅਲਙ੍ਕਤਪਾਸਾਦਸ੍ਸ ਸਤ੍ਤਮਾਯ ਭੂਮਿਯਾ ਸਯਨਗਬ੍ਭਞ੍ਚੇਵ ਮਹਾਤਲਞ੍ਚ ਸਜ੍ਜਾਪੇਤ੍ਵਾ ਸਿਰਿਸਯਨਂ ਪਞ੍ਞਾਪੇਤ੍ਵਾ ਸਬ੍ਬਂ ਅਨ੍ਨਪਾਨਾਦਿਵਿਧਿਂ ਉਪਟ੍ਠਪੇਤ੍ਵਾ ਦੇਵਕਞ੍ਞਾਯੋ ਵਿਯ ਪਞ੍ਚਸਤਾ ਇਤ੍ਥਿਯੋ ‘‘ਇਮਾ ਤੇ ਪਾਦਪਰਿਚਾਰਿਕਾ ਹੋਨ੍ਤੁ, ਅਨੁਕ੍ਕਣ੍ਠਨ੍ਤੋ ਇਧ ਵਸਾਹੀ’’ਤਿ ਤਸ੍ਸ ਨਿਯ੍ਯਾਦੇਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਗਤੋ. ਤਸ੍ਸ ਗਤਕਾਲੇ ਤਾ ਇਤ੍ਥਿਯੋ ਨਾਨਾਤੂਰਿਯਾਨਿ ਗਹੇਤ੍ਵਾ ਪੁਣ੍ਣਕਸ੍ਸ ਪਰਿਚਰਿਯਾਯ ਨਚ੍ਚਾਦੀਨਿ ਪਟ੍ਠਪੇਸੁਂ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੪੬੩.

‘‘ਤਤ੍ਥ ਨਚ੍ਚਨ੍ਤਿ ਗਾਯਨ੍ਤਿ, ਅਵ੍ਹਯਨ੍ਤਿ ਵਰਾਵਰਂ;

ਅਚ੍ਛਰਾ ਵਿਯ ਦੇਵੇਸੁ, ਨਾਰਿਯੋ ਸਮਲਙ੍ਕਤਾ’’ਤਿ.

ਤਤ੍ਥ ਅਵ੍ਹਯਨ੍ਤਿ ਵਰਾਵਰਨ੍ਤਿ ਵਰਤੋ ਵਰਂ ਨਚ੍ਚਞ੍ਚ ਗੀਤਞ੍ਚ ਕਰੋਨ੍ਤਿਯੋ ਪਕ੍ਕੋਸਨ੍ਤਿ.

੧੪੬੪.

‘‘ਸਮਙ੍ਗਿਕਤ੍ਵਾ ਪਮਦਾਹਿ ਯਕ੍ਖਂ, ਅਨ੍ਨੇਨ ਪਾਨੇਨ ਚ ਧਮ੍ਮਪਾਲੋ;

ਅਤ੍ਥਤ੍ਥਮੇਵਾਨੁਵਿਚਿਨ੍ਤਯਨ੍ਤੋ ¶ , ਪਾਵੇਕ੍ਖਿ ਭਰਿਯਾਯ ਤਦਾ ਸਕਾਸੇ’’ਤਿ.

ਤਤ੍ਥ ਪਮਦਾਹੀਤਿ ਪਮਦਾਹਿ ਚੇਵ ਅਨ੍ਨਪਾਨੇਹਿ ਚ ਸਮਙ੍ਗਿਕਤ੍ਵਾ. ਧਮ੍ਮਪਾਲੋਤਿ ਧਮ੍ਮਸ੍ਸ ਪਾਲਕੋ ਗੋਪਕੋ. ਅਤ੍ਥਤ੍ਥਮੇਵਾਤਿ ਅਤ੍ਥਭੂਤਮੇਵ ਅਤ੍ਥਂ. ਭਰਿਯਾਯਾਤਿ ਸਬ੍ਬਜੇਟ੍ਠਿਕਾਯ ਭਰਿਯਾਯ.

੧੪੬੫.

‘‘ਤਂ ¶ ¶ ਚਨ੍ਦਨਗਨ੍ਧਰਸਾਨੁਲਿਤ੍ਤਂ, ਸੁਵਣ੍ਣਜਮ੍ਬੋਨਦਨਿਕ੍ਖਸਾਦਿਸਂ;

ਭਰਿਯਂਵਚਾ ‘ਏਹਿ ਸੁਣੋਹਿ ਭੋਤਿ, ਪੁਤ੍ਤਾਨਿ ਆਮਨ੍ਤਯ ਤਮ੍ਬਨੇਤ੍ਤੇ’’’ਤਿ.

ਤਤ੍ਥ ਭਰਿਯਂਵਚਾਤਿ ਜੇਟ੍ਠਭਰਿਯਂ ਅਵਚ. ਆਮਨ੍ਤਯਾਤਿ ਪਕ੍ਕੋਸ.

੧੪੬੬.

‘‘ਸੁਤ੍ਵਾਨ ਵਾਕ੍ਯਂ ਪਤਿਨੋ ਅਨੁਜ੍ਜਾ, ਸੁਣਿਸਂ ਵਚ ਤਮ੍ਬਨਖਿਂ ਸੁਨੇਤ੍ਤਂ;

‘ਆਮਨ੍ਤਯ ਵਮ੍ਮਧਰਾਨਿ ਚੇਤੇ, ਪੁਤ੍ਤਾਨਿ ਇਨ੍ਦੀਵਰਪੁਪ੍ਫਸਾਮੇ’’’ਤਿ.

ਤਤ੍ਥ ਅਨੁਜ੍ਜਾਤਿ ਏਵਂਨਾਮਿਕਾ. ਸੁਣਿਸਂਵਚ ਤਮ੍ਬਨਖਿਂ ਸੁਨੇਤ੍ਤਨ੍ਤਿ ਸਾ ਤਸ੍ਸ ਵਚਨਂ ਸੁਤ੍ਵਾ ਅਸ੍ਸੁਮੁਖੀ ਰੋਦਮਾਨਾ ‘‘ਸਯਂ ਗਨ੍ਤ੍ਵਾ ਪੁਤ੍ਤੇ ਪਕ੍ਕੋਸਿਤੁਂ ਅਯੁਤ੍ਤਂ, ਸੁਣਿਸਂ ਪੇਸੇਸ੍ਸਾਮੀ’’ਤਿ ਤਸ੍ਸਾ ਨਿਵਾਸਟ੍ਠਾਨਂ ਗਨ੍ਤ੍ਵਾ ਤਮ੍ਬਨਖਿਂ ਸੁਨੇਤ੍ਤਂ ਸੁਣਿਸਂ ਅਵਚ. ਵਮ੍ਮਧਰਾਨੀਤਿ ਵਮ੍ਮਧਰੇ ਸੂਰੇ, ਸਮਤ੍ਥੇਤਿ ਅਤ੍ਥੋ, ਆਭਰਣਭਣ੍ਡਮੇਵ ਵਾ ਇਧ ‘‘ਵਮ੍ਮ’’ਨ੍ਤਿ ਅਧਿਪ੍ਪੇਤਂ, ਤਸ੍ਮਾ ਆਭਰਣਧਰੇਤਿਪਿ ਅਤ੍ਥੋ. ਚੇਤੇਤਿ ਤਂ ਨਾਮੇਨਾਲਪਤਿ, ਪੁਤ੍ਤਾਨੀਤਿ ਮਮ ਪੁਤ੍ਤੇ ਚ ਧੀਤਰੋ ਚ. ਇਨ੍ਦੀਵਰਪੁਪ੍ਫਸਾਮੇਤਿ ਤਂ ਆਲਪਤਿ.

ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪਾਸਾਦਾ ਓਰੁਯ੍ਹ ਅਨੁਵਿਚਰਿਤ੍ਵਾ ‘‘ਪਿਤਾ ਵੋ ਓਵਾਦਂ ਦਾਤੁਕਾਮੋ ਪਕ੍ਕੋਸਤਿ, ਇਦਂ ਕਿਰ ਵੋ ਤਸ੍ਸ ਪਚ੍ਛਿਮਦਸ੍ਸਨ’’ਨ੍ਤਿ ਸਬ੍ਬਮੇਵਸ੍ਸ ਸੁਹਦਜਨਞ੍ਚ ਪੁਤ੍ਤਧੀਤਰੋ ਚ ਸਨ੍ਨਿਪਾਤੇਸਿ. ਧਮ੍ਮਪਾਲਕੁਮਾਰੋ ਪਨ ਤਂ ਵਚਨਂ ਸੁਤ੍ਵਾਵ ਰੋਦਨ੍ਤੋ ਕਨਿਟ੍ਠਭਾਤਿਕਗਣਪਰਿਵੁਤੋ ਪਿਤੁ ਸਨ੍ਤਿਕਂ ਅਗਮਾਸਿ. ਪਣ੍ਡਿਤੋ ਤੇ ਦਿਸ੍ਵਾਵ ਸਕਭਾਵੇਨ ਸਣ੍ਠਾਤੁਂ ਅਸਕ੍ਕੋਨ੍ਤੋ ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ ਆਲਿਙ੍ਗਿਤ੍ਵਾ ਸੀਸੇ ਚੁਮ੍ਬਿਤ੍ਵਾ ਜੇਟ੍ਠਪੁਤ੍ਤਂ ਮੁਹੁਤ੍ਤਂ ਹਦਯੇ ਨਿਪਜ੍ਜਾਪੇਤ੍ਵਾ ਹਦਯਾ ਓਤਾਰੇਤ੍ਵਾ ਸਿਰਿਗਬ੍ਭਤੋ ਨਿਕ੍ਖਮ੍ਮ ਮਹਾਤਲੇ ਪਲ੍ਲਙ੍ਕਮਜ੍ਝੇ ਨਿਸੀਦਿਤ੍ਵਾ ਪੁਤ੍ਤਸਹਸ੍ਸਸ੍ਸ ਓਵਾਦਂ ਅਦਾਸਿ. ਤਮਤ੍ਥਂ ¶ ਪਕਾਸੇਨ੍ਤੋ ਸਤ੍ਥਾ ਆਹ –

੧੪੬੭.

‘‘ਤੇ ਆਗਤੇ ਮੁਦ੍ਧਨਿ ਧਮ੍ਮਪਾਲੋ, ਚੁਮ੍ਬਿਤ੍ਵਾ ਪੁਤ੍ਤੇ ਅਵਿਕਮ੍ਪਮਾਨੋ;

ਆਮਨ੍ਤਯਿਤ੍ਵਾਨ ਅਵੋਚ ਵਾਕ੍ਯਂ, ਦਿਨ੍ਨਾਹਂ ਰਞ੍ਞਾ ਇਧ ਮਾਣਵਸ੍ਸ.

੧੪੬੮.

‘‘ਤਸ੍ਸਜ੍ਜਹਂ ¶ ਅਤ੍ਤਸੁਖੀ ਵਿਧੇਯ੍ਯੋ, ਆਦਾਯ ਯੇਨਿਚ੍ਛਤਿ ਤੇਨ ਗਚ੍ਛਤਿ;

ਅਹਞ੍ਚ ਵੋ ਸਾਸਿਤੁਮਾਗਤੋਸ੍ਮਿ, ਕਥਂ ਅਹਂ ਅਪਰਿਤ੍ਤਾਯ ਗਚ੍ਛੇ.

੧੪੬੯.

‘‘ਸਚੇ ¶ ਵੋ ਰਾਜਾ ਕੁਰੁਰਟ੍ਠਵਾਸੀ, ਜਨਸਨ੍ਧੋ ਪੁਚ੍ਛੇਯ੍ਯ ਪਹੂਤਕਾਮੋ;

ਕਿਮਾਭਿਜਾਨਾਥ ਪੁਰੇ ਪੁਰਾਣਂ, ਕਿਂ ਵੋ ਪਿਤਾ ਪੁਰਤ੍ਥਾ.

੧੪੭੦.

‘‘ਸਮਾਸਨਾ ਹੋਥ ਮਯਾਵ ਸਬ੍ਬੇ, ਕੋਨੀਧ ਰਞ੍ਞੋ ਅਬ੍ਭਤਿਕੋ ਮਨੁਸ੍ਸੋ;

ਤਮਞ੍ਜਲਿਂ ਕਰਿਯ ਵਦੇਥ ਏਵਂ, ਮਾ ਹੇਵਂ ਦੇਵ ਨ ਹਿ ਏਸ ਧਮ੍ਮੋ;

ਵਿਯਗ੍ਘਰਾਜਸ੍ਸ ਨਿਹੀਨਜਚ੍ਚੋ, ਸਮਾਸਨੋ ਦੇਵ ਕਥਂ ਭਵੇਯ੍ਯਾ’’ਤਿ.

ਤਤ੍ਥ ਧਮ੍ਮਪਾਲੋਤਿ ਮਹਾਸਤ੍ਤੋ. ਦਿਨ੍ਨਾਹਨ੍ਤਿ ਅਹਂ ਜਯਧਨੇਨ ਖਣ੍ਡੇਤ੍ਵਾ ਰਞ੍ਞਾ ਦਿਨ੍ਨੋ. ਤਸ੍ਸਜ੍ਜਹਂ ਅਤ੍ਤਸੁਖੀ ਵਿਧੇਯ੍ਯੋਤਿ ਅਜ੍ਜ ਪਟ੍ਠਾਯ ਤੀਹਮਤ੍ਤਂ ਅਹਂ ਇਮਿਨਾ ਅਤ੍ਤਨੋ ਸੁਖੇਨ ਅਤ੍ਤਸੁਖੀ, ਤਤੋ ਪਰਂ ਪਨ ਤਸ੍ਸ ਮਾਣਵਸ੍ਸਾਹਂ ਵਿਧੇਯ੍ਯੋ ਹੋਮਿ. ਸੋ ਹਿ ਇਤੋ ਚਤੁਤ੍ਥੇ ਦਿਵਸੇ ਏਕਂਸੇਨ ਮਂ ਆਦਾਯ ਯਤ੍ਥਿਚ੍ਛਤਿ, ਤਤ੍ਥ ਗਚ੍ਛਤਿ. ਅਪਰਿਤ੍ਤਾਯਾਤਿ ਤੁਮ੍ਹਾਕਂ ਪਰਿਤ੍ਤਂ ਅਕਤ੍ਵਾ ਕਥਂ ਗਚ੍ਛੇਯ੍ਯਨ੍ਤਿ ਅਨੁਸਾਸਿਤੁਂ ਆਗਤੋਸ੍ਮਿ. ਜਨਸਨ੍ਧੋਤਿ ਮਿਤ੍ਤਬਨ੍ਧਨੇਨ ਮਿਤ੍ਤਜਨਸ੍ਸ ਸਨ੍ਧਾਨਕਰੋ. ਪੁਰੇ ਪੁਰਾਣਨ੍ਤਿ ਇਤੋ ਪੁਬ੍ਬੇ ਤੁਮ੍ਹੇ ਕਿਂ ਪੁਰਾਣਕਾਰਣਂ ਅਭਿਜਾਨਾਥ. ਅਨੁਸਾਸੇਤਿ ਅਨੁਸਾਸਿ. ਏਵਂ ਤੁਮ੍ਹੇ ਰਞ੍ਞਾ ਪੁਟ੍ਠਾ ‘‘ਅਮ੍ਹਾਕਂ ਪਿਤਾ ਇਮਞ੍ਚਿਮਞ੍ਚ ਓਵਾਦਂ ਅਦਾਸੀ’’ਤਿ ਕਥੇਯ੍ਯਾਥ. ਸਮਾਸਨਾ ਹੋਥਾਤਿ ਸਚੇ ਵੋ ਰਾਜਾ ਮਯਾ ਦਿਨ੍ਨਸ੍ਸ ਓਵਾਦਸ੍ਸ ਕਥਿਤਕਾਲੇ ‘‘ਏਥ ਤੁਮ੍ਹੇ, ਅਜ੍ਜ ਮਯਾ ਸਦ੍ਧਿਂ ਸਮਾਸਨਾ ਹੋਥ, ਇਧ ਰਾਜਕੁਲੇ ਤੁਮ੍ਹੇਹਿ ਅਞ੍ਞੋ ਕੋ ਨੁ ਰਞ੍ਞੋ ਅਬ੍ਭਤਿਕੋ ਮਨੁਸ੍ਸੋ’’ਤਿ ਅਤ੍ਤਨੋ ਆਸਨੇ ਨਿਸੀਦਾਪੇਯ੍ਯ, ਅਥ ਤੁਮ੍ਹੇ ਅਞ੍ਜਲਿਂ ਕਤ੍ਵਾ ਤਂ ਰਾਜਾਨਂ ਏਵਂ ਵਦੇਯ੍ਯਾਥ ‘‘ਦੇਵ, ਏਵਂ ਮਾ ਅਵਚ. ਨ ਹਿ ਅਮ੍ਹਾਕਂ ਏਸਪਵੇਣਿਧਮ੍ਮੋ. ਵਿਯਗ੍ਘਰਾਜਸ੍ਸ ਕੇਸਰਸੀਹਸ੍ਸ ਨਿਹੀਨਜਚ੍ਚੋ ਜਰਸਿਙ੍ਗਾਲੋ ¶ , ਦੇਵ, ਕਥਂ ਸਮਾਸਨੋ ਭਵੇਯ੍ਯ. ਯਥਾ ਸਿਙ੍ਗਾਲੋ ਸੀਹਸ੍ਸ ਸਮਾਸਨੋ ਨ ਹੋਤਿ, ਤਥੇਵ ਮਯਂ ਤੁਮ੍ਹਾਕ’’ਨ੍ਤਿ.

ਇਮਂ ¶ ਪਨਸ੍ਸ ਕਥਂ ਸੁਤ੍ਵਾ ਪੁਤ੍ਤਧੀਤਰੋ ਚ ਞਾਤਿਸੁਹਜ੍ਜਾਦਯੋ ਚ ਦਾਸਕਮ੍ਮਕਰਪੋਰਿਸਾ ਚ ਤੇ ਸਬ੍ਬੇ ਸਕਭਾਵੇਨ ਸਣ੍ਠਾਤੁਂ ਅਸਕ੍ਕੋਨ੍ਤਾ ਮਹਾਵਿਰਵਂ ਵਿਰਵਿਂਸੁ. ਤੇਸਂ ਮਹਾਸਤ੍ਤੋ ਸਞ੍ਞਾਪੇਸਿ.

ਲਕ੍ਖਣਕਣ੍ਡਂ ਨਿਟ੍ਠਿਤਂ.

ਰਾਜਵਸਤਿਕਣ੍ਡ

ਅਥ ਨੇ ਪਣ੍ਡਿਤੋ ਪੁਤ੍ਤਧੀਤਰੋ ਚ ਞਾਤਯੋ ਚ ਉਪਸਙ੍ਕਮਿਤ੍ਵਾ ਤੁਣ੍ਹੀਭੂਤੇ ਦਿਸ੍ਵਾ ‘‘ਤਾਤਾ, ਮਾ ਚਿਨ੍ਤਯਿਤ੍ਥ, ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ, ਯਸੋ ਨਾਮ ਵਿਪਤ੍ਤਿਪਰਿਯੋਸਾਨੋ, ਅਪਿਚ ਤੁਮ੍ਹਾਕਂ ਰਾਜਵਸਤਿਂ ¶ ਨਾਮ ਯਸਪਟਿਲਾਭਕਾਰਣਂ ਕਥੇਸ੍ਸਾਮਿ, ਤਂ ਏਕਗ੍ਗਚਿਤ੍ਤਾ ਸੁਣਾਥਾ’’ਤਿ ਬੁਦ੍ਧਲੀਲਾਯ ਰਾਜਵਸਤਿਂ ਨਾਮ ਪਟ੍ਠਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੪੭੧.

‘‘ਸੋ ਚ ਪੁਤ੍ਤੇ ਅਮਚ੍ਚੇ ਚ, ਞਾਤਯੋ ਸੁਹਦਜ੍ਜਨੇ;

ਅਲੀਨਮਨਸਙ੍ਕਪ੍ਪੋ, ਵਿਧੁਰੋ ਏਤਦਬ੍ਰਵਿ.

੧੪੭੨.

‘‘ਏਥਯ੍ਯੋ ਰਾਜਵਸਤਿਂ, ਨਿਸੀਦਿਤ੍ਵਾ ਸੁਣਾਥ ਮੇ;

ਯਥਾ ਰਾਜਕੁਲਂ ਪਤ੍ਤੋ, ਯਸਂ ਪੋਸੋ ਨਿਗਚ੍ਛਤੀ’’ਤਿ.

ਤਤ੍ਥ ਸੁਹਦਜ੍ਜਨੇਤਿ ਸੁਹਦਯਜਨੇ. ਏਥਯ੍ਯੋਤਿ ਏਥ, ਅਯ੍ਯੋ. ਪਿਯਸਮੁਦਾਚਾਰੇਨ ਪੁਤ੍ਤੇ ਆਲਪਤਿ. ਰਾਜਵਸਤਿਨ੍ਤਿ ਮਯਾ ਵੁਚ੍ਚਮਾਨਂ ਰਾਜਪਾਰਿਚਰਿਯਂ ਸੁਣਾਥ. ਯਥਾਤਿ ਯੇਨ ਕਾਰਣੇਨ ਰਾਜਕੁਲਂ ਪਤ੍ਤੋ ਉਪਸਙ੍ਕਮਨ੍ਤੋ ਰਞ੍ਞੋ ਸਨ੍ਤਿਕੇ ਚਰਨ੍ਤੋ ਪੋਸੋ ਯਸਂ ਨਿਗਚ੍ਛਤਿ ਲਭਤਿ, ਤਂ ਕਾਰਣਂ ਸੁਣਾਥਾਤਿ ਅਤ੍ਥੋ.

੧੪੭੩.

‘‘ਨ ਹਿ ਰਾਜਕੁਲਂ ਪਤ੍ਤੋ, ਅਞ੍ਞਾਤੋ ਲਭਤੇ ਯਸਂ;

ਨਾਸੂਰੋ ਨਾਪਿ ਦੁਮ੍ਮੇਧੋ, ਨਪ੍ਪਮਤ੍ਤੋ ਕੁਦਾਚਨਂ.

੧੪੭੪.

‘‘ਯਦਾਸ੍ਸ ਸੀਲਂ ਪਞ੍ਞਞ੍ਚ, ਸੋਚੇਯ੍ਯਂ ਚਾਧਿਗਚ੍ਛਤਿ;

ਅਥ ਵਿਸ੍ਸਸਤੇ ਤ੍ਯਮ੍ਹਿ, ਗੁਯ੍ਹਞ੍ਚਸ੍ਸ ਨ ਰਕ੍ਖਤੀ’’ਤਿ.

ਤਤ੍ਥ ¶ ਅਞ੍ਞਾਤੋਤਿ ਅਪਾਕਟਗੁਣੋ ਅਵਿਦਿਤਕਮ੍ਮਾਵਦਾਨੋ. ਨਾਸੂਰੋਤਿ ਨ ਅਸੂਰੋ ਭੀਰੁਕਜਾਤਿਕੋ. ਯਦਾਸ੍ਸ ਸੀਲਨ੍ਤਿ ਯਦਾ ਅਸ੍ਸ ਸੇਵਕਸ੍ਸ ਰਾਜਾ ਸੀਲਞ੍ਚ ਪਞ੍ਞਞ੍ਚ ਸੋਚੇਯ੍ਯਞ੍ਚ ਅਧਿਗਚ੍ਛਤਿ, ਆਚਾਰਸਮ੍ਪਤ੍ਤਿਞ੍ਚ ਞਾਣਬਲਞ੍ਚ ਸੁਚਿਭਾਵਞ੍ਚ ਜਾਨਾਤਿ. ਅਥ ਵਿਸ੍ਸਸਤੇ ਤ੍ਯਮ੍ਹੀਤਿ ਅਥ ਰਾਜਾ ਤਮ੍ਹਿ ਵਿਸ੍ਸਸਤੇ ਵਿਸ੍ਸਾਸਂ ਕਰੋਤਿ, ਅਤ੍ਤਨੋ ਗੁਯ੍ਹਞ੍ਚਸ੍ਸ ਨ ਰਕ੍ਖਤਿ ਨ ਗੂਹਤਿ.

੧੪੭੫.

‘‘ਤੁਲਾ ਯਥਾ ਪਗ੍ਗਹਿਤਾ, ਸਮਦਣ੍ਡਾ ਸੁਧਾਰਿਤਾ;

ਅਜ੍ਝਿਟ੍ਠੋ ਨ ਵਿਕਮ੍ਪੇਯ੍ਯ, ਸ ਰਾਜਵਸਤਿਂ ਵਸੇ.

੧੪੭੬.

‘‘ਤੁਲਾ ¶ ਯਥਾ ਪਗ੍ਗਹਿਤਾ, ਸਮਦਣ੍ਡਾ ਸੁਧਾਰਿਤਾ;

ਸਬ੍ਬਾਨਿ ਅਭਿਸਮ੍ਭੋਨ੍ਤੋ, ਸ ਰਾਜਵਸਤਿਂ ਵਸੇ’’ਤਿ.

ਤਤ੍ਥ ਤੁਲਾ ¶ ਯਥਾਤਿ ਯਥਾ ਏਸਾ ਵੁਤ੍ਤਪ੍ਪਕਾਰਾ ਤੁਲਾ ਨ ਓਨਮਤਿ ਨ ਉਨ੍ਨਮਤਿ, ਏਵਮੇਵ ਰਾਜਸੇਵਕੋ ਕਿਸ੍ਮਿਞ੍ਚਿਦੇਵ ਕਮ੍ਮੇ ਰਞ੍ਞਾ ‘‘ਇਦਂ ਨਾਮ ਕਰੋਹੀ’’ਤਿ ਅਜ੍ਝਿਟ੍ਠੋ ਆਣਤ੍ਤੋ ਛਨ੍ਦਾਦਿਅਗਤਿਵਸੇਨ ਨ ਵਿਕਮ੍ਪੇਯ੍ਯ, ਸਬ੍ਬਕਿਚ੍ਚੇਸੁ ਪਗ੍ਗਹਿਤਤੁਲਾ ਵਿਯ ਸਮੋ ਭਵੇਯ੍ਯ. ਸ ਰਾਜਵਸਤਿਨ੍ਤਿ ਸੋ ਏਵਰੂਪੋ ਸੇਵਕੋ ਰਾਜਕੁਲੇ ਵਾਸਂ ਵਸੇਯ੍ਯ, ਰਾਜਾਨਂ ਪਰਿਚਰੇਯ੍ਯ, ਏਵਂ ਪਰਿਚਰਨ੍ਤੋ ਪਨ ਯਸਂ ਲਭੇਯ੍ਯਾਤਿ ਅਤ੍ਥੋ. ਸਬ੍ਬਾਨਿ ਅਭਿਸਮ੍ਭੋਨ੍ਤੋਤਿ ਸਬ੍ਬਾਨਿ ਰਾਜਕਿਚ੍ਚਾਨਿ ਕਰੋਨ੍ਤੋ.

੧੪੭੭.

‘‘ਦਿਵਾ ਵਾ ਯਦਿ ਵਾ ਰਤ੍ਤਿਂ, ਰਾਜਕਿਚ੍ਚੇਸੁ ਪਣ੍ਡਿਤੋ;

ਅਜ੍ਝਿਟ੍ਠੋ ਨ ਵਿਕਮ੍ਪੇਯ੍ਯ, ਸ ਰਾਜਵਸਤਿਂ ਵਸੇ.

੧੪੭੮.

‘‘ਦਿਵਾ ਵਾ ਯਦਿ ਵਾ ਰਤ੍ਤਿਂ, ਰਾਜਕਿਚ੍ਚੇਸੁ ਪਣ੍ਡਿਤੋ;

ਸਬ੍ਬਾਨਿ ਅਭਿਸਮ੍ਭੋਨ੍ਤੋ, ਸ ਰਾਜਵਸਤਿਂ ਵਸੇ.

੧੪੭੯.

‘‘ਯੋ ਚਸ੍ਸ ਸੁਕਤੋ ਮਗ੍ਗੋ, ਰਞ੍ਞੋ ਸੁਪ੍ਪਟਿਯਾਦਿਤੋ;

ਨ ਤੇਨ ਵੁਤ੍ਤੋ ਗਚ੍ਛੇਯ੍ਯ, ਸ ਰਾਜਵਸਤਿਂ ਵਸੇ’’ਤਿ.

ਤਤ੍ਥ ਨ ਵਿਕਮ੍ਪੇਯ੍ਯਾਤਿ ਅਵਿਕਮ੍ਪਮਾਨੋ ਤਾਨਿ ਕਿਚ੍ਚਾਨਿ ਕਰੇਯ੍ਯ. ਯੋ ਚਸ੍ਸਾਤਿ ਯੋ ਚ ਰਞ੍ਞੋ ਗਮਨਮਗ੍ਗੋ ਸੁਕਤੋ ਅਸ੍ਸ ਸੁਪ੍ਪਟਿਯਾਦਿਤੋ ਸੁਮਣ੍ਡਿਤੋ, ‘‘ਇਮਿਨਾ ਮਗ੍ਗੇਨ ਗਚ੍ਛਾ’’ਤਿ ਵੁਤ੍ਤੋਪਿ ਤੇਨ ਨ ਗਚ੍ਛੇਯ੍ਯ.

੧੪੮੦.

‘‘ਨ ¶ ਰਞ੍ਞੋ ਸਦਿਸਂ ਭੁਞ੍ਜੇ, ਕਾਮਭੋਗੇ ਕੁਦਾਚਨਂ;

ਸਬ੍ਬਤ੍ਥ ਪਚ੍ਛਤੋ ਗਚ੍ਛੇ, ਸ ਰਾਜਵਸਤਿਂ ਵਸੇ.

੧੪੮੧.

‘‘ਨ ਰਞ੍ਞੋ ਸਦਿਸਂ ਵਤ੍ਥਂ, ਨ ਮਾਲਂ ਨ ਵਿਲੇਪਨਂ;

ਆਕਪ੍ਪਂ ਸਰਕੁਤ੍ਤਿਂ ਵਾ, ਨ ਰਞ੍ਞੋ ਸਦਿਸਮਾਚਰੇ;

ਅਞ੍ਞਂ ਕਰੇਯ੍ਯ ਆਕਪ੍ਪਂ, ਸ ਰਾਜਵਸਤਿਂ ਵਸੇ’’ਤਿ.

ਤਤ੍ਥ ¶ ਨ ਰਞ੍ਞੋਤਿ ਰਞ੍ਞੋ ਕਾਮਭੋਗੇਨ ਸਮਂ ਕਾਮਭੋਗਂ ਨ ਭੁਞ੍ਜੇਯ੍ਯ. ਤਾਦਿਸਸ੍ਸ ਹਿ ਰਾਜਾ ਕੁਜ੍ਝਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਰੂਪਾਦੀਸੁ ਕਾਮਗੁਣੇਸੁ ਰਞ੍ਞੋ ਪਚ੍ਛਤੋਵ ਗਚ੍ਛੇਯ੍ਯ, ਹੀਨਤਰਮੇਵ ਸੇਵੇਯ੍ਯਾਤਿ ਅਤ੍ਥੋ. ਅਞ੍ਞਂ ਕਰੇਯ੍ਯਾਤਿ ਰਞ੍ਞੋ ਆਕਪ੍ਪਤੋ ਸਰਕੁਤ੍ਤਿਤੋ ਚ ਅਞ੍ਞਮੇਵ ਆਕਪ੍ਪਂ ਕਰੇਯ੍ਯ.

੧੪੮੨.

‘‘ਕੀਲ਼ੇ ਰਾਜਾ ਅਮਚ੍ਚੇਹਿ, ਭਰਿਯਾਹਿ ਪਰਿਵਾਰਿਤੋ;

ਨਾਮਚ੍ਚੋ ਰਾਜਭਰਿਯਾਸੁ, ਭਾਵਂ ਕੁਬ੍ਬੇਥ ਪਣ੍ਡਿਤੋ.

੧੪੮੩.

‘‘ਅਨੁਦ੍ਧਤੋ ਅਚਪਲੋ, ਨਿਪਕੋ ਸਂਵੁਤਿਨ੍ਦ੍ਰਿਯੋ;

ਮਨੋਪਣਿਧਿਸਮ੍ਪਨ੍ਨੋ, ਸ ਰਾਜਵਸਤਿਂ ਵਸੇ’’ਤਿ.

ਤਤ੍ਥ ਭਾਵਨ੍ਤਿ ਵਿਸ੍ਸਾਸਵਸੇਨ ਅਧਿਪ੍ਪਾਯਂ. ਅਚਪਲੋਤਿ ਅਮਣ੍ਡਨਸੀਲੋ. ਨਿਪਕੋਤਿ ਪਰਿਪਕ੍ਕਞਾਣੋ. ਸਂਵੁਤਿਨ੍ਦ੍ਰਿਯੋਤਿ ਪਿਹਿਤਛਲ਼ਿਨ੍ਦ੍ਰਿਯੋ ਰਞ੍ਞੋ ਵਾ ਅਙ੍ਗਪਚ੍ਚਙ੍ਗਾਨਿ ਓਰੋਧੇ ਵਾਸ੍ਸ ਨ ਓਲੋਕੇਯ੍ਯ. ਮਨੋਪਣਿਧਿਸਮ੍ਪਨ੍ਨੋਤਿ ਅਚਪਲੇਨ ਸੁਟ੍ਠੁ ਠਪਿਤੇਨ ਚਿਤ੍ਤੇਨ ਸਮਨ੍ਨਾਗਤੋ.

੧੪੮੪.

‘‘ਨਾਸ੍ਸ ¶ ਭਰਿਯਾਹਿ ਕੀਲ਼ੇਯ੍ਯ, ਨ ਮਨ੍ਤੇਯ੍ਯ ਰਹੋਗਤੋ;

ਨਾਸ੍ਸ ਕੋਸਾ ਧਨਂ ਗਣ੍ਹੇ, ਸ ਰਾਜਵਸਤਿਂ ਵਸੇ.

੧੪੮੫.

‘‘ਨ ਨਿਦ੍ਦਂ ਬਹੁ ਮਞ੍ਞੇਯ੍ਯ, ਨ ਮਦਾਯ ਸੁਰਂ ਪਿਵੇ;

ਨਾਸ੍ਸ ਦਾਯੇ ਮਿਗੇ ਹਞ੍ਞੇ, ਸ ਰਾਜਵਸਤਿਂ ਵਸੇ.

੧੪੮੬.

‘‘ਨਾਸ੍ਸ ਪੀਠਂ ਨ ਪਲ੍ਲਙ੍ਕਂ, ਨ ਕੋਚ੍ਛਂ ਨ ਨਾਵਂ ਰਥਂ;

ਸਮ੍ਮਤੋਮ੍ਹੀਤਿ ਆਰੂਹੇ, ਸ ਰਾਜਵਸਤਿਂ ਵਸੇ.

੧੪੮੭.

‘‘ਨਾਤਿਦੂਰੇ ਭਜੇ ਰਞ੍ਞੋ, ਨਚ੍ਚਾਸਨ੍ਨੇ ਵਿਚਕ੍ਖਣੋ;

ਸਮ੍ਮੁਖਞ੍ਚਸ੍ਸ ਤਿਟ੍ਠੇਯ੍ਯ, ਸਨ੍ਦਿਸ੍ਸਨ੍ਤੋ ਸਭਤ੍ਤੁਨੋ.

੧੪੮੮.

‘‘ਨ ¶ ਵੇ ਰਾਜਾ ਸਖਾ ਹੋਤਿ, ਨ ਰਾਜਾ ਹੋਤਿ ਮੇਥੁਨੋ;

ਖਿਪ੍ਪਂ ਕੁਜ੍ਝਨ੍ਤਿ ਰਾਜਾਨੋ, ਸੂਕੇਨਕ੍ਖੀਵ ਘਟ੍ਟਿਤਂ.

੧੪੮੯.

‘‘ਨ ¶ ਪੂਜਿਤੋ ਮਞ੍ਞਮਾਨੋ, ਮੇਧਾਵੀ ਪਣ੍ਡਿਤੋ ਨਰੋ;

ਫਰੁਸਂ ਪਤਿਮਨ੍ਤੇਯ੍ਯ, ਰਾਜਾਨਂ ਪਰਿਸਂਗਤ’’ਨ੍ਤਿ.

ਤਤ੍ਥ ਨ ਮਨ੍ਤੇਯ੍ਯਾਤਿ ਤਸ੍ਸ ਰਞ੍ਞੋ ਭਰਿਯਾਹਿ ਸਦ੍ਧਿਂ ਨੇਵ ਕੀਲ਼ੇਯ੍ਯ, ਨ ਰਹੋ ਮਨ੍ਤੇਯ੍ਯ. ਕੋਸਾ ਧਨਨ੍ਤਿ ਰਞ੍ਞੋ ਕੋਸਾ ਧਨਂ ਥੇਨੇਤ੍ਵਾ ਨ ਗਣ੍ਹੇਯ੍ਯ. ਨ ਮਦਾਯਾਤਿ ਤਾਤਾ, ਰਾਜਸੇਵਕੋ ਨਾਮ ਮਦਤ੍ਥਾਯ ਸੁਰਂ ਨ ਪਿਵੇਯ੍ਯ. ਨਾਸ੍ਸ ਦਾਯੇ ਮਿਗੇਤਿ ਅਸ੍ਸ ਰਞ੍ਞੋ ਦਿਨ੍ਨਾਭਯੇ ਮਿਗੇ ਨ ਹਞ੍ਞੇਯ੍ਯ. ਕੋਚ੍ਛਨ੍ਤਿ ਭਦ੍ਦਪੀਠਂ. ਸਮ੍ਮਤੋਮ੍ਹੀਤਿ ਅਹਂ ਸਮ੍ਮਤੋ ਹੁਤ੍ਵਾ ਏਵਂ ਕਰੋਮੀਤਿ ਨ ਆਰੁਹੇਯ੍ਯ. ਸਮ੍ਮੁਖਞ੍ਚਸ੍ਸ ਤਿਟ੍ਠੇਯ੍ਯਾਤਿ ਅਸ੍ਸ ਰਞ੍ਞੋ ਪੁਰਤੋ ਖੁਦ੍ਦਕਮਹਨ੍ਤਕਥਾਸਵਨਟ੍ਠਾਨੇ ਤਿਟ੍ਠੇਯ੍ਯ. ਸਨ੍ਦਿਸ੍ਸਨ੍ਤੋ ਸਭਤ੍ਤੁਨੋਤਿ ਯੋ ਰਾਜਸੇਵਕੋ ਤਸ੍ਸ ਭਤ੍ਤੁਨੋ ਦਸ੍ਸਨਟ੍ਠਾਨੇ ਤਿਟ੍ਠੇਯ੍ਯ. ਸੂਕੇਨਾਤਿ ਅਕ੍ਖਿਮ੍ਹਿ ਪਤਿਤੇਨ ਵੀਹਿਸੂਕਾਦਿਨਾ ਘਟ੍ਟਿਤਂ ਅਕ੍ਖਿ ਪਕਤਿਸਭਾਵਂ ਜਹਨ੍ਤਂ ਯਥਾ ਕੁਜ੍ਝਤਿ ਨਾਮ, ਏਵਂ ਕੁਜ੍ਝਨ੍ਤਿ, ਨ ਤੇਸੁ ਵਿਸ੍ਸਾਸੋ ਕਾਤਬ੍ਬੋ. ਪੂਜਿਤੋ ਮਞ੍ਞਮਾਨੋਤਿ ਅਹਂ ਰਾਜਪੂਜਿਤੋਮ੍ਹੀਤਿ ਮਞ੍ਞਮਾਨੋ. ਫਰੁਸਂ ਪਤਿਮਨ੍ਤੇਯ੍ਯਾਤਿ ਯੇਨ ਸੋ ਕੁਜ੍ਝਤਿ, ਤਥਾਰੂਪਂ ਨ ਮਨ੍ਤੇਯ੍ਯ.

੧੪੯੦.

‘‘ਲਦ੍ਧਦ੍ਵਾਰੋ ਲਭੇ ਦ੍ਵਾਰਂ, ਨੇਵ ਰਾਜੂਸੁ ਵਿਸ੍ਸਸੇ;

ਅਗ੍ਗੀਵ ਸਂਯਤੋ ਤਿਟ੍ਠੇ, ਸ ਰਾਜਵਸਤਿਂ ਵਸੇ.

੧੪੯੧.

‘‘ਪੁਤ੍ਤਂ ਵਾ ਭਾਤਰਂ ਵਾ ਸਂ, ਸਮ੍ਪਗ੍ਗਣ੍ਹਾਤਿ ਖਤ੍ਤਿਯੋ;

ਗਾਮੇਹਿ ਨਿਗਮੇਹਿ ਵਾ, ਰਟ੍ਠੇਹਿ ਜਨਪਦੇਹਿ ਵਾ;

ਤੁਣ੍ਹੀਭੂਤੋ ਉਪੇਕ੍ਖੇਯ੍ਯ, ਨ ਭਣੇ ਛੇਕਪਾਪਕ’’ਨ੍ਤਿ.

ਤਤ੍ਥ ਲਦ੍ਧਦ੍ਵਾਰੋ ¶ ਲਭੇ ਦ੍ਵਾਰਨ੍ਤਿ ਅਹਂ ਨਿਪ੍ਪਟਿਹਾਰੋ ਲਦ੍ਧਦ੍ਵਾਰੋਤਿ ਅਪ੍ਪਟਿਹਾਰੇਤ੍ਵਾ ਨ ਪਵਿਸੇਯ੍ਯ, ਪੁਨਪਿ ਦ੍ਵਾਰਂ ਲਭੇਯ੍ਯ, ਪਟਿਹਾਰੇਤ੍ਵਾਵ ਪਵਿਸੇਯ੍ਯਾਤਿ ਅਤ੍ਥੋ. ਸਂਯਤੋਤਿ ਅਪ੍ਪਮਤ੍ਤੋ ਹੁਤ੍ਵਾ. ਭਾਤਰਂ ਵਾ ਸਨ੍ਤਿ ਸਕਂ ਭਾਤਰਂ ਵਾ. ਸਮ੍ਪਗ੍ਗਣ੍ਹਾਤੀਤਿ ‘‘ਅਸੁਕਗਾਮਂ ਵਾ ਅਸੁਕਨਿਗਮਂ ਵਾ ਅਸ੍ਸ ਦੇਮਾ’’ਤਿ ਯਦਾ ਸੇਵਕੇਹਿ ਸਦ੍ਧਿਂ ਕਥੇਤਿ. ਨ ਭਣੇ ਛੇਕਪਾਪਕਨ੍ਤਿ ਤਦਾ ਗੁਣਂ ਵਾ ਅਗੁਣਂ ਵਾ ਨ ਭਣੇਯ੍ਯ.

੧੪੯੨.

‘‘ਹਤ੍ਥਾਰੋਹੇ ¶ ਅਨੀਕਟ੍ਠੇ, ਰਥਿਕੇ ਪਤ੍ਤਿਕਾਰਕੇ;

ਤੇਸਂ ਕਮ੍ਮਾਵਦਾਨੇਨ, ਰਾਜਾ ਵਡ੍ਢੇਤਿ ਵੇਤਨਂ;

ਨ ਤੇਸਂ ਅਨ੍ਤਰਾ ਗਚ੍ਛੇ, ਸ ਰਾਜਵਸਤਿਂ ਵਸੇ.

੧੪੯੩.

‘‘ਚਾਪੋਵੂਨੁਦਰੋ ¶ ਧੀਰੋ, ਵਂਸੋਵਾਪਿ ਪਕਮ੍ਪਯੇ;

ਪਟਿਲੋਮਂ ਨ ਵਤ੍ਤੇਯ੍ਯ, ਸ ਰਾਜਵਸਤਿਂ ਵਸੇ.

੧੪੯੪.

‘‘ਚਾਪੋਵੂਨੁਦਰੋ ਅਸ੍ਸ, ਮਚ੍ਛੋਵਸ੍ਸ ਅਜਿਵ੍ਹਵਾ;

ਅਪ੍ਪਾਸੀ ਨਿਪਕੋ ਸੂਰੋ, ਸ ਰਾਜਵਸਤਿਂ ਵਸੇ’’ਤਿ.

ਤਤ੍ਥ ਨ ਤੇਸਂ ਅਨ੍ਤਰਾ ਗਚ੍ਛੇਤਿ ਤੇਸਂ ਲਾਭਸ੍ਸ ਅਨ੍ਤਰਾ ਨ ਗਚ੍ਛੇ, ਅਨ੍ਤਰਾਯਂ ਨ ਕਰੇਯ੍ਯ. ਵਂਸੋਵਾਪੀਤਿ ਯਥਾ ਵਂਸਗੁਮ੍ਬਤੋ ਉਗ੍ਗਤਵਂਸੋ ਵਾਤੇਨ ਪਹਟਕਾਲੇ ਪਕਮ੍ਪਤਿ, ਏਵਂ ਰਞ੍ਞਾ ਕਥਿਤਕਾਲੇ ਪਕਮ੍ਪੇਯ੍ਯ. ਚਾਪੋਵੂਨੁਦਰੋਤਿ ਯਥਾ ਚਾਪੋ ਮਹੋਦਰੋ ਨ ਹੋਤਿ, ਏਵਂ ਮਹੋਦਰੋ ਨ ਸਿਯਾ. ਅਜਿਵ੍ਹਵਾਤਿ ਯਥਾ ਮਚ੍ਛੋ ਅਜਿਵ੍ਹਤਾਯ ਨ ਕਥੇਤਿ, ਤਥਾ ਸੇਵਕੋ ਮਨ੍ਦਕਥਤਾਯ ਅਜਿਵ੍ਹਵਾ ਭਵੇਯ੍ਯ. ਅਪ੍ਪਾਸੀਤਿ ਭੋਜਨਮਤ੍ਤਞ੍ਞੂ.

੧੪੯੫.

‘‘ਨ ਬਾਲ਼੍ਹਂ ਇਤ੍ਥਿਂ ਗਚ੍ਛੇਯ੍ਯ, ਸਮ੍ਪਸ੍ਸਂ ਤੇਜਸਙ੍ਖਯਂ;

ਕਾਸਂ ਸਾਸਂ ਦਰਂ ਬਾਲ੍ਯਂ, ਖੀਣਮੇਧੋ ਨਿਗਚ੍ਛਤਿ.

੧੪੯੬.

‘‘ਨਾਤਿਵੇਲਂ ਪਭਾਸੇਯ੍ਯ, ਨ ਤੁਣ੍ਹੀ ਸਬ੍ਬਦਾ ਸਿਯਾ;

ਅਵਿਕਿਣ੍ਣਂ ਮਿਤਂ ਵਾਚਂ, ਪਤ੍ਤੇ ਕਾਲੇ ਉਦੀਰਯੇ.

੧੪੯੭.

‘‘ਅਕ੍ਕੋਧਨੋ ਅਸਙ੍ਘਟ੍ਟੋ, ਸਚ੍ਚੋ ਸਣ੍ਹੋ ਅਪੇਸੁਣੋ;

ਸਮ੍ਫਂ ਗਿਰਂ ਨ ਭਾਸੇਯ੍ਯ, ਸ ਰਾਜਵਸਤਿਂ ਵਸੇ.

੧੪੯੮.

‘‘ਮਾਤਾਪੇਤ੍ਤਿਭਰੋ ਅਸ੍ਸ, ਕੁਲੇ ਜੇਟ੍ਠਾਪਚਾਯਿਕੋ;

ਸਣ੍ਹੋ ਸਖਿਲਸਮ੍ਭਾਸੋ, ਸ ਰਾਜਵਸਤਿਂ ਵਸੇ’’ਤਿ.

ਤਤ੍ਥ ਨ ਬਾਲ਼੍ਹਨ੍ਤਿ ਪੁਨਪ੍ਪੁਨਂ ਕਿਲੇਸਵਸੇਨ ਨ ਗਚ੍ਛੇਯ੍ਯ. ਤੇਜਸਙ੍ਖਯਨ੍ਤਿ ਏਵਂ ਗਚ੍ਛਨ੍ਤੋ ਹਿ ਪੁਰਿਸੋ ਤੇਜਸਙ੍ਖਯਂ ਗਚ੍ਛਤਿ ਪਾਪੁਣਾਤਿ, ਤਂ ਸਮ੍ਪਸ੍ਸਨ੍ਤੋ ਬਾਲ਼੍ਹਂ ਨ ਗਚ੍ਛੇਯ੍ਯ. ਦਰਨ੍ਤਿ ਕਾਯਦਰਥਂ. ਬਾਲ੍ਯਨ੍ਤਿ ਦੁਬ੍ਬਲਭਾਵਂ. ਖੀਣਮੇਧੋਤਿ ਪੁਨਪ੍ਪੁਨਂ ਕਿਲੇਸਰਤਿਵਸੇਨ ਖੀਣਪਞ੍ਞੋ ਪੁਰਿਸੋ ਏਤੇ ਕਾਸਾਦਯੋ ਨਿਗਚ੍ਛਤਿ. ਨਾਤਿਵੇਲਨ੍ਤਿ ਤਾਤਾ ਰਾਜੂਨਂ ਸਨ੍ਤਿਕੇ ਪਮਾਣਾਤਿਕ੍ਕਨ੍ਤਂ ਨ ਭਾਸੇਯ੍ਯ ¶ . ਪਤ੍ਤੇ ਕਾਲੇਤਿ ਅਤ੍ਤਨੋ ਵਚਨਕਾਲੇ ਸਮ੍ਪਤ੍ਤੇ. ਅਸਙ੍ਘਟ੍ਟੋਤਿ ਪਰਂ ਅਸਙ੍ਘਟ੍ਟੇਨ੍ਤੋ. ਸਮ੍ਫਨ੍ਤਿ ਨਿਰਤ੍ਥਕਂ. ਗਿਰਨ੍ਤਿ ਵਚਨਂ.

੧੪੯੯.

‘‘ਵਿਨੀਤੋ ¶ ¶ ਸਿਪ੍ਪਵਾ ਦਨ੍ਤੋ, ਕਤਤ੍ਤੋ ਨਿਯਤੋ ਮੁਦੁ;

ਅਪ੍ਪਮਤ੍ਤੋ ਸੁਚਿ ਦਕ੍ਖੋ, ਸ ਰਾਜਵਸਤਿਂ ਵਸੇ.

੧੫੦੦.

‘‘ਨਿਵਾਤਵੁਤ੍ਤਿ ਵੁਦ੍ਧੇਸੁ, ਸਪ੍ਪਤਿਸ੍ਸੋ ਸਗਾਰਵੋ;

ਸੁਰਤੋ ਸੁਖਸਂਵਾਸੋ, ਸ ਰਾਜਵਸਤਿਂ ਵਸੇ.

੧੫੦੧.

‘‘ਆਰਕਾ ਪਰਿਵਜ੍ਜੇਯ੍ਯ, ਸਹਿਤੁਂ ਪਹਿਤਂ ਜਨਂ;

ਭਤ੍ਤਾਰਞ੍ਞੇਵੁਦਿਕ੍ਖੇਯ੍ਯ, ਨ ਚ ਅਞ੍ਞਸ੍ਸ ਰਾਜਿਨੋ’’ਤਿ.

ਤਤ੍ਥ ਵਿਨੀਤੋਤਿ ਆਚਾਰਸਮ੍ਪਨ੍ਨੋ. ਸਿਪ੍ਪਵਾਤਿ ਅਤ੍ਤਨੋ ਕੁਲੇ ਸਿਕ੍ਖਿਤਬ੍ਬਸਿਪ੍ਪੇਨ ਸਮਨ੍ਨਾਗਤੋ. ਦਨ੍ਤੋਤਿ ਛਸੁ ਦ੍ਵਾਰੇਸੁ ਨਿਬ੍ਬਿਸੇਵਨੋ. ਕਤਤ੍ਤੋਤਿ ਸਮ੍ਪਾਦਿਤਤ੍ਤੋ. ਨਿਯਤੋਤਿ ਯਸਾਦੀਨਿ ਨਿਸ੍ਸਾਯ ਅਚਲਸਭਾਵੋ. ਮੁਦੂਤਿ ਅਨਤਿਮਾਨੀ. ਅਪ੍ਪਮਤ੍ਤੋਤਿ ਕਤ੍ਤਬ੍ਬਕਿਚ੍ਚੇਸੁ ਪਮਾਦਰਹਿਤੋ. ਦਕ੍ਖੋਤਿ ਉਪਟ੍ਠਾਨੇ ਛੇਕੋ. ਨਿਵਾਤਵੁਤ੍ਤੀਤਿ ਨੀਚਵੁਤ੍ਤਿ. ਸੁਖਸਂਵਾਸੋਤਿ ਗਰੁਸਂਵਾਸਸੀਲੋ. ਸਹਿਤੁਂ ਪਤਿਤਨ੍ਤਿ ਪਰਰਾਜੂਹਿ ਸਕਰਞ੍ਞੋ ਸਨ੍ਤਿਕਂ ਗੁਯ੍ਹਰਕ੍ਖਣਵਸੇਨ ਵਾ ਪਟਿਚ੍ਛਨ੍ਨਪਾਕਟਕਰਣਵਸੇਨਵਾ ਪੇਸਿਤਂ. ਤਥਾਰੂਪੇਨ ਹਿ ਸਦ੍ਧਿਂ ਕਥੇਨ੍ਤੋਪਿ ਰਞ੍ਞੋ ਸਮ੍ਮੁਖਾਵ ਕਥੇਯ੍ਯ. ਭਤ੍ਤਾਰਞ੍ਞੇਵੁਦਿਕ੍ਖੇਯ੍ਯਾਤਿ ਅਤ੍ਤਨੋ ਸਾਮਿਕਮੇਵ ਓਲੋਕੇਯ੍ਯ. ਨ ਚ ਅਞ੍ਞਸ੍ਸ ਰਾਜਿਨੋਤਿ ਅਞ੍ਞਸ੍ਸ ਰਞ੍ਞੋ ਸਨ੍ਤਕੋ ਨ ਭਵੇਯ੍ਯ.

੧੫੦੨.

‘‘ਸਮਣੇ ਬ੍ਰਾਹ੍ਮਣੇ ਚਾਪਿ, ਸੀਲਵਨ੍ਤੇ ਬਹੁਸ੍ਸੁਤੇ;

ਸਕ੍ਕਚ੍ਚਂ ਪਯਿਰੁਪਾਸੇਯ੍ਯ, ਸ ਰਾਜਵਸਤਿਂ ਵਸੇ.

੧੫੦੩.

‘‘ਸਮਣੇ ਬ੍ਰਾਹ੍ਮਣੇ ਚਾਪਿ, ਸੀਲਵਨ੍ਤੇ ਬਹੁਸ੍ਸੁਤੇ;

ਸਕ੍ਕਚ੍ਚਂ ਅਨੁਵਾਸੇਯ੍ਯ, ਸ ਰਾਜਵਸਤਿਂ ਵਸੇ.

੧੫੦੪.

‘‘ਸਮਣੇ ਬ੍ਰਾਹ੍ਮਣੇ ਚਾਪਿ, ਸੀਲਵਨ੍ਤੇ ਬਹੁਸ੍ਸੁਤੇ;

ਤਪ੍ਪੇਯ੍ਯ ਅਨ੍ਨਪਾਨੇਨ, ਸ ਰਾਜਵਸਤਿਂ ਵਸੇ.

੧੫੦੫.

‘‘ਸਮਣੇ ਬ੍ਰਾਹ੍ਮਣੇ ਚਾਪਿ, ਸੀਲਵਨ੍ਤੇ ਬਹੁਸ੍ਸੁਤੇ;

ਆਸਜ੍ਜ ਪਞ੍ਞੇ ਸੇਵੇਥ, ਆਕਙ੍ਖਂ ਵੁਦ੍ਧਿਮਤ੍ਤਨੋ’’ਤਿ.

ਤਤ੍ਥ ¶ ¶ ਸਕ੍ਕਚ੍ਚਂ ਪਯਿਰੁਪਾਸੇਯ੍ਯਾਤਿ ਗਾਰਵੇਨ ਪੁਨਪ੍ਪੁਨਂ ਉਪਸਙ੍ਕਮੇਯ੍ਯ. ਅਨੁਵਾਸੇਯ੍ਯਾਤਿ ਉਪੋਸਥਵਾਸਂ ਵਸਨ੍ਤੋ ਅਨੁਵਤ੍ਤੇਯ੍ਯ. ਤਪ੍ਪੇਯ੍ਯਾਤਿ ਯਾਵਦਤ੍ਥਂ ਦਾਨੇਨ ਤਪ੍ਪੇਯ੍ਯ. ਆਸਜ੍ਜਾਤਿ ਉਪਸਙ੍ਕਮਿਤ੍ਵਾ. ਪਞ੍ਞੇਤਿ ਪਣ੍ਡਿਤੇ, ਆਸਜ੍ਜਪਞ੍ਞੇ ਵਾ, ਅਸਜ੍ਜਮਾਨਪਞ੍ਞੇਤਿ ਅਤ੍ਥੋ.

੧੫੦੬.

‘‘ਦਿਨ੍ਨਪੁਬ੍ਬਂ ਨ ਹਾਪੇਯ੍ਯ, ਦਾਨਂ ਸਮਣਬ੍ਰਾਹ੍ਮਣੇ;

ਨ ਚ ਕਿਞ੍ਚਿ ਨਿਵਾਰੇਯ੍ਯ, ਦਾਨਕਾਲੇ ਵਣਿਬ੍ਬਕੇ.

੧੫੦੭.

‘‘ਪਞ੍ਞਵਾ ਬੁਦ੍ਧਿਸਮ੍ਪਨ੍ਨੋ, ਵਿਧਾਨਵਿਧਿਕੋਵਿਦੋ;

ਕਾਲਞ੍ਞੂ ਸਮਯਞ੍ਞੂ ਚ, ਸ ਰਾਜਵਸਤਿਂ ਵਸੇ.

੧੫੦੮.

‘‘ਉਟ੍ਠਾਤਾ ¶ ਕਮ੍ਮਧੇਯ੍ਯੇਸੁ, ਅਪ੍ਪਮਤ੍ਤੋ ਵਿਚਕ੍ਖਣੋ;

ਸੁਸਂਵਿਹਿਤਕਮ੍ਮਨ੍ਤੋ, ਸ ਰਾਜਵਸਤਿਂ ਵਸੇ’’ਤਿ.

ਤਤ੍ਥ ਦਿਨ੍ਨਪੁਬ੍ਬਨ੍ਤਿ ਪਕਤਿਪਟਿਯਤ੍ਤਂ ਦਾਨਵਤ੍ਤਂ. ਸਮਣਬ੍ਰਾਹ੍ਮਣੇਤਿ ਸਮਣੇ ਵਾ ਬ੍ਰਾਹ੍ਮਣੇ ਵਾ. ਵਣਿਬ੍ਬਕੇਤਿ ਦਾਨਕਾਲੇ ਵਣਿਬ੍ਬਕੇ ਆਗਤੇ ਦਿਸ੍ਵਾ ਕਿਞ੍ਚਿ ਨ ਨਿਵਾਰੇਯ੍ਯ. ਪਞ੍ਞਵਾਤਿ ਵਿਚਾਰਣਪਞ੍ਞਾਯ ਯੁਤ੍ਤੋ. ਬੁਦ੍ਧਿਸਮ੍ਪਨ੍ਨੋਤਿ ਅਵੇਕਲ੍ਲਬੁਦ੍ਧਿਸਮ੍ਪਨ੍ਨੋ. ਵਿਧਾਨਵਿਧਿਕੋਵਿਦੋਤਿ ਨਾਨਪ੍ਪਕਾਰੇਸੁ ਦਾਸਕਮ੍ਮਕਰਪੋਰਿਸਾਦੀਨਂ ਸਂਵਿਦਹਨਕੋਟ੍ਠਾਸੇਸੁ ਛੇਕੋ. ਕਾਲਞ੍ਞੂਤਿ ‘‘ਅਯਂ ਦਾਨਂ ਦਾਤੁਂ, ਅਯਂ ਸੀਲਂ ਰਕ੍ਖਿਤੁਂ, ਅਯਂ ਉਪੋਸਥਕਮ੍ਮਂ ਕਾਤੁਂ ਕਾਲੋ’’ਤਿ ਜਾਨੇਯ੍ਯ. ਸਮਯਞ੍ਞੂਤਿ ‘‘ਅਯਂ ਕਸਨਸਮਯੋ, ਅਯਂ ਵਪਨਸਮਯੋ, ਅਯਂ ਵੋਹਾਰਸਮਯੋ, ਅਯਂ ਉਪਟ੍ਠਾਨਸਮਯੋ’’ਤਿ ਜਾਨੇਯ੍ਯ. ਕਮ੍ਮਧੇਯ੍ਯੇਸੂਤਿ ਅਤ੍ਤਨੋ ਕਤ੍ਤਬ੍ਬਕਮ੍ਮੇਸੁ.

੧੫੦੯.

‘‘ਖਲਂ ਸਾਲਂ ਪਸੁਂ ਖੇਤ੍ਤਂ, ਗਨ੍ਤਾ ਚਸ੍ਸ ਅਭਿਕ੍ਖਣਂ;

ਮਿਤਂ ਧਞ੍ਞਂ ਨਿਧਾਪੇਯ੍ਯ, ਮਿਤਂਵ ਪਾਚਯੇ ਘਰੇ.

੧੫੧੦.

‘‘ਪੁਤ੍ਤਂ ਵਾ ਭਾਤਰਂ ਵਾ ਸਂ, ਸੀਲੇਸੁ ਅਸਮਾਹਿਤਂ;

ਅਨਙ੍ਗਵਾ ਹਿ ਤੇ ਬਾਲਾ, ਯਥਾ ਪੇਤਾ ਤਥੇਵ ਤੇ;

ਚੋਲ਼ਞ੍ਚ ਨੇਸਂ ਪਿਣ੍ਡਞ੍ਚ, ਆਸੀਨਾਨਂ ਪਦਾਪਯੇ.

੧੫੧੧.

‘‘ਦਾਸੇ ਕਮ੍ਮਕਰੇ ਪੇਸ੍ਸੇ, ਸੀਲੇਸੁ ਸੁਸਮਾਹਿਤੇ;

ਦਕ੍ਖੇ ਉਟ੍ਠਾਨਸਮ੍ਪਨ੍ਨੇ, ਆਧਿਪਚ੍ਚਮ੍ਹਿ ਠਾਪਯੇ’’ਤਿ.

ਤਤ੍ਥ ¶ ¶ ਪਸੁਂ ਖੇਤ੍ਤਨ੍ਤਿ ਗੋਕੁਲਞ੍ਚੇਵ ਸਸ੍ਸਟ੍ਠਾਨਞ੍ਚ. ਗਨ੍ਤਾਤਿ ਗਮਨਸੀਲੋ. ਮਿਤਨ੍ਤਿ ਮਿਨਿਤ੍ਵਾ ਏਤ੍ਤਕਨ੍ਤਿ ਞਤ੍ਵਾ ਕੋਟ੍ਠੇਸੁ ਨਿਧਾਪੇਯ੍ਯ. ਘਰੇਤਿ ਘਰੇਪਿ ਪਰਿਜਨਂ ਗਣੇਤ੍ਵਾ ਮਿਤਮੇਵ ਪਚਾਪੇਯ੍ਯ. ਸੀਲੇਸੁ ਅਸਮਾਹਿਤਨ੍ਤਿ ਏਵਰੂਪਂ ਦੁਸ੍ਸੀਲਂ ਅਨਾਚਾਰਂ ਕਿਸ੍ਮਿਞ੍ਚਿ ਆਧਿਪਚ੍ਚਟ੍ਠਾਨੇ ਨ ਠਪੇਯ੍ਯਾਤਿ ਅਤ੍ਥੋ. ਅਨਙ੍ਗਵਾ ਹਿ ਤੇ ਬਾਲਾਤਿ ‘‘ਅਙ੍ਗਮੇਤਂ ਮਨੁਸ੍ਸਾਨਂ, ਭਾਤਾ ਲੋਕੇ ਪਵੁਚ੍ਚਤੀ’’ਤਿ (ਜਾ. ੧.੪.੫੮) ਕਿਞ੍ਚਾਪਿ ਜੇਟ੍ਠਕਨਿਟ੍ਠਭਾਤਰੋ ਅਙ੍ਗਸਮਾਨਤਾਯ ‘‘ਅਙ੍ਗ’’ਨ੍ਤਿ ਵੁਤ੍ਤਾ, ਇਮੇ ਪਨ ਦੁਸ੍ਸੀਲਾ, ਤਸ੍ਮਾ ਅਙ੍ਗਸਮਾਨਾ ਨ ਹੋਨ੍ਤਿ. ਯਥਾ ਪਨ ਸੁਸਾਨੇ ਛਡ੍ਡਿਤਾ ਪੇਤਾ ਮਤਾ, ਤਥੇਵ ਤੇ. ਤਸ੍ਮਾ ਤਾਦਿਸਾ ਆਧਿਪਚ੍ਚਟ੍ਠਾਨੇ ਨ ਠਪੇਤਬ੍ਬਾ. ਕੁਟੁਮ੍ਬਞ੍ਹਿ ਤੇ ਵਿਨਾਸੇਨ੍ਤਿ, ਵਿਨਟ੍ਠਕੁਟੁਮ੍ਬਸ੍ਸ ਚ ਦਲਿਦ੍ਦਸ੍ਸ ਰਾਜਵਸਤਿ ਨਾਮ ਨ ਸਮ੍ਪਜ੍ਜਤਿ. ਆਸੀਨਾਨਨ੍ਤਿ ਆਗਨ੍ਤ੍ਵਾ ਨਿਸਿਨ੍ਨਾਨਂ ਪੁਤ੍ਤਭਾਤਾਨਂ ਮਤਸਤ੍ਤਾਨਂ ਮਤਕਭਤ੍ਤਂ ਵਿਯ ਦੇਨ੍ਤੋ ਘਾਸਚ੍ਛਾਦਨਮਤ੍ਤਮੇਵ ਪਦਾਪੇਯ੍ਯ. ਉਟ੍ਠਾਨਸਮ੍ਪਨ੍ਨੇਤਿ ਉਟ੍ਠਾਨਵੀਰਿਯੇਨ ਸਮਨ੍ਨਾਗਤੇ.

੧੫੧੨.

‘‘ਸੀਲਵਾ ਚ ਅਲੋਲੋ ਚ, ਅਨੁਰਕ੍ਖੋ ਚ ਰਾਜਿਨੋ;

ਆਵੀ ਰਹੋ ਹਿਤੋ ਤਸ੍ਸ, ਸ ਰਾਜਵਸਤਿਂ ਵਸੇ.

੧੫੧੩.

‘‘ਛਨ੍ਦਞ੍ਞੂ ਰਾਜਿਨੋ ਚਸ੍ਸ, ਚਿਤ੍ਤਟ੍ਠੋ ਅਸ੍ਸ ਰਾਜਿਨੋ;

ਅਸਙ੍ਕੁਸਕਵੁਤ੍ਤਿਂਸ੍ਸ, ਸ ਰਾਜਵਸਤਿਂ ਵਸੇ.

੧੫੧੪.

‘‘ਉਚ੍ਛਾਦਯੇ ¶ ਚ ਨ੍ਹਾਪਯੇ, ਧੋਵੇ ਪਾਦੇ ਅਧੋਸਿਰਂ;

ਆਹਤੋਪਿ ਨ ਕੁਪ੍ਪੇਯ੍ਯ, ਸ ਰਾਜਵਸਤਿਂ ਵਸੇ’’ਤਿ.

ਤਤ੍ਥ ਅਲੋਲੋਤਿ ਅਲੁਦ੍ਧੋ. ਚਿਤ੍ਤਟ੍ਠੋਤਿ ਚਿਤ੍ਤੇ ਠਿਤੋ, ਰਾਜਚਿਤ੍ਤਵਸਿਕੋਤਿ ਅਤ੍ਥੋ. ਅਸਙ੍ਕੁਸਕਵੁਤ੍ਤਿਸ੍ਸਾਤਿ ਅਪ੍ਪਟਿਲੋਮਵੁਤ੍ਤਿ ਅਸ੍ਸ. ਅਧੋਸਿਰਨ੍ਤਿ ਪਾਦੇ ਧੋਵਨ੍ਤੋਪਿ ਅਧੋਸਿਰਂ ਕਤ੍ਵਾ ਹੇਟ੍ਠਾਮੁਖੋਵ ਧੋਵੇਯ੍ਯ, ਨ ਰਞ੍ਞੋ ਮੁਖਂ ਉਲ੍ਲੋਕੇਯ੍ਯਾਤਿ ਅਤ੍ਥੋ.

੧੫੧੫.

‘‘ਕੁਮ੍ਭਮ੍ਪਞ੍ਜਲਿਂ ਕਰਿਯਾ, ਚਾਟਞ੍ਚਾਪਿ ਪਦਕ੍ਖਿਣਂ;

ਕਿਮੇਵ ਸਬ੍ਬਕਾਮਾਨਂ, ਦਾਤਾਰਂ ਧੀਰਮੁਤ੍ਤਮਂ.

੧੫੧੬.

‘‘ਯੋ ਦੇਤਿ ਸਯਨਂ ਵਤ੍ਥਂ, ਯਾਨਂ ਆਵਸਥਂ ਘਰਂ;

ਪਜ੍ਜੁਨ੍ਨੋਰਿਵ ਭੂਤਾਨਿ, ਭੋਗੇਹਿ ਅਭਿਵਸ੍ਸਤਿ.

੧੫੧੭.

‘‘ਏਸਯ੍ਯੋ ¶ ¶ ਰਾਜਵਸਤਿ, ਵਤ੍ਤਮਾਨੋ ਯਥਾ ਨਰੋ;

ਆਰਾਧਯਤਿ ਰਾਜਾਨਂ, ਪੂਜਂ ਲਭਤਿ ਭਤ੍ਤੁਸੂ’’ਤਿ.

ਤਤ੍ਥ ਕੁਮ੍ਭਮ੍ਪਞ੍ਜਲਿਂ ਕਰਿਯਾ, ਚਾਟਞ੍ਚਾਪਿ ਪਦਕ੍ਖਿਣਨ੍ਤਿ ਵੁਦ੍ਧਿਂ ਪਚ੍ਚਾਸੀਸਨ੍ਤੋ ਪੁਰਿਸੋ ਉਦਕਪੂਰਿਤਂ ਕੁਮ੍ਭਂ ਦਿਸ੍ਵਾ ਤਸ੍ਸ ਅਞ੍ਜਲਿਂ ਕਰੇਯ੍ਯ, ਚਾਟਞ੍ਚ ਸਕੁਣਂ ਪਦਕ੍ਖਿਣਂ ਕਰੇਯ੍ਯ. ਅਞ੍ਜਲਿਂ ਵਾ ਪਦਕ੍ਖਿਣਂ ਵਾ ਕਰੋਨ੍ਤਸ੍ਸ ਤੇ ਕਿਞ੍ਚਿ ਦਾਤੁਂ ਨ ਸਕ੍ਕੋਨ੍ਤਿ. ਕਿਮੇਵਾਤਿ ਯੋ ਪਨ ਸਬ੍ਬਕਾਮਾਨਂ ਦਾਤਾ ਧੀਰੋ ਚ, ਤਂ ਰਾਜਾਨਂ ਕਿਂਕਾਰਣਾ ਨ ਨਮਸ੍ਸੇਯ੍ਯ. ਰਾਜਾਯੇਵ ਹਿ ਨਮਸ੍ਸਿਤਬ੍ਬੋ ਚ ਆਰਾਧੇਤਬ੍ਬੋ ਚ. ਪਜ੍ਜੁਨ੍ਨੋਰਿਵਾਤਿ ਮੇਘੋ ਵਿਯ. ਏਸਯ੍ਯੋ ਰਾਜਵਸਤੀਤਿ ਅਯ੍ਯੋ ਯਾ ਅਯਂ ਮਯਾ ਕਥਿਤਾ, ਏਸਾ ਰਾਜਵਸਤਿ ਨਾਮ ਰਾਜਸੇਵਕਾਨਂ ਅਨੁਸਾਸਨੀ. ਯਥਾਤਿ ਯਾਯ ਰਾਜਵਸਤਿਯਾ ਵਤ੍ਤਮਾਨੋ ਨਰੋ ਰਾਜਾਨਂ ਆਰਾਧੇਤਿ, ਰਾਜੂਨਞ੍ਚ ਸਨ੍ਤਿਕਾ ਪੂਜਂ ਲਭਤਿ, ਸਾ ਏਸਾਤਿ.

ਏਵਂ ਅਸਮਧੁਰੋ ਵਿਧੁਰਪਣ੍ਡਿਤੋ ਬੁਦ੍ਧਲੀਲਾਯ ਰਾਜਵਸਤਿਂ ਕਥੇਸਿ;

ਰਾਜਵਸਤਿਕਣ੍ਡਂ ਨਿਟ੍ਠਿਤਂ.

ਅਨ੍ਤਰਪੇਯ੍ਯਾਲਂ

ਏਵਂ ਪੁਤ੍ਤਦਾਰਞਾਤਿਮਿਤ੍ਤਸੁਹਜ੍ਜਾਦਯੋ ਅਨੁਸਾਸਨ੍ਤਸ੍ਸੇਵ ਤਸ੍ਸ ਤਯੋ ਦਿਵਸਾ ਜਾਤਾ. ਸੋ ਦਿਵਸਸ੍ਸ ਪਾਰਿਪੂਰਿਂ ਞਤ੍ਵਾ ਪਾਤੋਵ ਨ੍ਹਤ੍ਵਾ ਨਾਨਗ੍ਗਰਸਭੋਜਨਂ ਭੁਞ੍ਜਿਤ੍ਵਾ ‘‘ਰਾਜਾਨਂ ਅਪਲੋਕੇਤ੍ਵਾ ਮਾਣਵੇਨ ਸਦ੍ਧਿਂ ਗਮਿਸ੍ਸਾਮੀ’’ਤਿ ਞਾਤਿਗਣਪਰਿਵੁਤੋ ਰਾਜਨਿਵੇਸਨਂ ਗਨ੍ਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ਵਤ੍ਤਬ੍ਬਯੁਤ੍ਤਕਂ ਵਚਨਂ ਅਵੋਚ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੫੧੮.

‘‘ਏਵਂ ਸਮਨੁਸਾਸਿਤ੍ਵਾ, ਞਾਤਿਸਙ੍ਘਂ ਵਿਚਕ੍ਖਣੋ;

ਪਰਿਕਿਣ੍ਣੋ ਸੁਹਦੇਹਿ, ਰਾਜਾਨਮੁਪਸਙ੍ਕਮਿ.

੧੫੧੯.

‘‘ਵਨ੍ਦਿਤ੍ਵਾ ¶ ਸਿਰਸਾ ਪਾਦੇ, ਕਤ੍ਵਾ ਚ ਨਂ ਪਦਕ੍ਖਿਣਂ;

ਵਿਧੁਰੋ ਅਵਚ ਰਾਜਾਨਂ, ਪਗ੍ਗਹੇਤ੍ਵਾਨ ਅਞ੍ਜਲਿਂ.

੧੫੨੦.

‘‘ਅਯਂ ¶ ¶ ਮਂ ਮਾਣਵੋ ਨੇਤਿ, ਕਤ੍ਤੁਕਾਮੋ ਯਥਾਮਤਿ;

ਞਾਤੀਨਤ੍ਥਂ ਪਵਕ੍ਖਾਮਿ, ਤਂ ਸੁਣੋਹਿ ਅਰਿਨ੍ਦਮ.

੧੫੨੧.

‘‘ਪੁਤ੍ਤੇ ਚ ਮੇ ਉਦਿਕ੍ਖੇਸਿ, ਯਞ੍ਚ ਮਞ੍ਞਂ ਘਰੇ ਧਨਂ;

ਯਥਾ ਪੇਚ੍ਚ ਨ ਹਾਯੇਥ, ਞਾਤਿਸਙ੍ਘੋ ਮਯੀ ਗਤੇ.

੧੫੨੨.

‘‘ਯਥੇਵ ਖਲਤੀ ਭੂਮ੍ਯਾ, ਭੂਮ੍ਯਾਯੇਵ ਪਤਿਟ੍ਠਤਿ;

ਏਵੇਤਂ ਖਲਿਤਂ ਮਯ੍ਹਂ, ਏਤਂ ਪਸ੍ਸਾਮਿ ਅਚ੍ਚਯ’’ਨ੍ਤਿ.

ਤਤ੍ਥ ਸੁਹਦੇਹੀਤਿ ਸੁਹਦਯੇਹਿ ਞਾਤਿਮਿਤ੍ਤਾਦੀਹਿ. ਯਞ੍ਚ ਮਞ੍ਞਨ੍ਤਿ ਯਞ੍ਚ ਮੇ ਅਞ੍ਞਂ ਤਯਾ ਚੇਵ ਅਞ੍ਞੇਹਿ ਚ ਰਾਜੂਹਿ ਦਿਨ੍ਨਂ ਘਰੇ ਅਪਰਿਮਾਣਂ ਧਨਂ, ਤਂ ਸਬ੍ਬਂ ਤ੍ਵਮੇਵ ਓਲੋਕੇਯ੍ਯਾਸਿ. ਪੇਚ੍ਚਾਤਿ ਪਚ੍ਛਾਕਾਲੇ. ਖਲਤੀਤਿ ਪਕ੍ਖਲਤਿ. ਏਵੇਤਨ੍ਤਿ ਏਵਂ ਏਤਂ. ਅਹਞ੍ਹਿ ਭੂਮਿਯਂ ਖਲਿਤ੍ਵਾ ਤਤ੍ਥੇਵ ਪਤਿਟ੍ਠਿਤਪੁਰਿਸੋ ਵਿਯ ਤੁਮ੍ਹੇਸੁ ਖਲਿਤ੍ਵਾ ਤੁਮ੍ਹੇਸੁਯੇਵ ਪਤਿਟ੍ਠਹਾਮਿ. ਏਤਂ ਪਸ੍ਸਾਮੀਤਿ ਯੋ ਏਸ ‘‘ਕਿਂ ਤੇ ਰਾਜਾ ਹੋਤੀ’’ਤਿ ਮਾਣਵੇਨ ਪੁਟ੍ਠਸ੍ਸ ਮਮ ਤੁਮ੍ਹੇ ਅਨੋਲੋਕੇਤ੍ਵਾ ਸਚ੍ਚਂ ਅਪੇਕ੍ਖਿਤ੍ਵਾ ‘‘ਦਾਸੋਹਮਸ੍ਮੀ’’ਤਿ ਵਦਨ੍ਤਸ੍ਸ ਅਚ੍ਚਯੋ, ਏਤਂ ਅਚ੍ਚਯਂ ਪਸ੍ਸਾਮਿ, ਅਞ੍ਞੋ ਪਨ ਮੇ ਦੋਸੋ ਨਤ੍ਥਿ, ਤਂ ਮੇ ਅਚ੍ਚਯਂ ਤੁਮ੍ਹੇ ਖਮਥ, ਏਤਂ ਹਦਯੇ ਕਤ੍ਵਾ ਪਚ੍ਛਾ ਮਮ ਪੁਤ੍ਤਦਾਰੇਸੁ ਮਾ ਅਪਰਜ੍ਝਿਤ੍ਥਾਤਿ.

ਤਂ ਸੁਤ੍ਵਾ ਰਾਜਾ ‘‘ਪਣ੍ਡਿਤ, ਤਵ ਗਮਨਂ ਮਯ੍ਹਂ ਨ ਰੁਚ੍ਚਤਿ, ਮਾਣਵਂ ਉਪਾਯੇਨ ਪਕ੍ਕੋਸਾਪੇਤ੍ਵਾ ਘਾਤੇਤ੍ਵਾ ਕਿਲਞ੍ਜੇਨ ਪਟਿਚ੍ਛਾਦੇਤੁਂ ਮਯ੍ਹਂ ਰੁਚ੍ਚਤੀ’’ਤਿ ਦੀਪੇਨ੍ਤੋ ਗਾਥਮਾਹ –

੧੫੨੩.

‘‘ਸਕ੍ਕਾ ਨ ਗਨ੍ਤੁਂ ਇਤਿ ਮਯ੍ਹ ਹੋਤਿ, ਛੇਤ੍ਵਾ ਵਧਿਤ੍ਵਾ ਇਧ ਕਾਤਿਯਾਨਂ;

ਇਧੇਵ ਹੋਹੀ ਇਤਿ ਮਯ੍ਹ ਰੁਚ੍ਚਤਿ, ਮਾ ਤ੍ਵਂ ਅਗਾ ਉਤ੍ਤਮਭੂਰਿਪਞ੍ਞਾ’’ਤਿ.

ਤਤ੍ਥ ਛੇਤ੍ਵਾਤਿ ਇਧੇਵ ਰਾਜਗੇਹੇ ਤਂ ਪੋਥੇਤ੍ਵਾ ਮਾਰੇਤ੍ਵਾ ਪਟਿਚ੍ਛਾਦੇਸ੍ਸਾਮੀਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਦੇਵ, ਤੁਮ੍ਹਾਕਂ ਅਜ੍ਝਾਸਯੋ ਏਵਰੂਪੋ ਹੋਤਿ, ਸੋ ਤੁਮ੍ਹੇਸੁ ਅਯੁਤ੍ਤੋ’’ਤਿ ਵਤ੍ਵਾ ਆਹ –

੧੫੨੪.

‘‘ਮਾ ¶ ਹੇਵਧਮ੍ਮੇਸੁ ਮਨਂ ਪਣੀਦਹਿ, ਅਤ੍ਥੇ ਚ ਧਮ੍ਮੇ ਚ ਯੁਤ੍ਤੋ ਭਵਸ੍ਸੁ;

ਧਿਰਤ੍ਥੁ ਕਮ੍ਮਂ ਅਕੁਸਲਂ ਅਨਰਿਯਂ, ਯਂ ਕਤ੍ਵਾ ਪਚ੍ਛਾ ਨਿਰਯਂ ਵਜੇਯ੍ਯ.

੧੫੨੫.

‘‘ਨੇਵੇਸ ¶ ¶ ਧਮ੍ਮੋ ਨ ਪੁਨੇਤ ਕਿਚ੍ਚਂ, ਅਯਿਰੋ ਹਿ ਦਾਸਸ੍ਸ ਜਨਿਨ੍ਦ ਇਸ੍ਸਰੋ;

ਘਾਤੇਤੁਂ ਝਾਪੇਤੁਂ ਅਥੋਪਿ ਹਨ੍ਤੁਂ, ਨ ਚ ਮਯ੍ਹ ਕੋਧਤ੍ਥਿ ਵਜਾਮਿ ਚਾਹ’’ਨ੍ਤਿ.

ਤਤ੍ਥ ਮਾ ਹੇਵਧਮ੍ਮੇਸੁ ਮਨਂ ਪਣੀਦਹੀਤਿ ਅਧਮ੍ਮੇਸੁ ਅਨਤ੍ਥੇਸੁ ਅਯੁਤ੍ਤੇਸੁ ਤਵ ਚਿਤ੍ਤਂ ਮਾ ਹੇਵ ਪਣਿਦਹੀਤਿ ਅਤ੍ਥੋ. ਪਚ੍ਛਾਤਿ ਯਂ ਕਮ੍ਮਂ ਕਤ੍ਵਾਪਿ ਅਜਰਾਮਰੋ ਨ ਹੋਤਿ, ਅਥ ਖੋ ਪਚ੍ਛਾ ਨਿਰਯਮੇਵ ਉਪਪਜ੍ਜੇਯ੍ਯ. ਧਿਰਤ੍ਥੁ ਕਮ੍ਮਨ੍ਤਿ ਤਂ ਕਮ੍ਮਂ ਗਰਹਿਤਂ ਅਤ੍ਥੁ ਅਸ੍ਸ ਭਵੇਯ੍ਯ. ਨੇਵੇਸਾਤਿ ਨੇਵ ਏਸ. ਅਯਿਰੋਤਿ ਸਾਮਿਕੋ. ਘਾਤੇਤੁਨ੍ਤਿ ਏਤਾਨਿ ਘਾਤਾਦੀਨਿ ਕਾਤੁਂ ਅਯਿਰੋ ਦਾਸਸ੍ਸ ਇਸ੍ਸਰੋ, ਸਬ੍ਬਾਨੇਤਾਨਿ ਕਾਤੁਂ ਲਭਤਿ, ਮਯ੍ਹਂ ਮਾਣਵੇ ਅਪ੍ਪਮਤ੍ਤਕੋਪਿ ਕੋਧੋ ਨਤ੍ਥਿ, ਦਿਨ੍ਨਕਾਲਤੋ ਪਟ੍ਠਾਯ ਤਵ ਚਿਤ੍ਤਂ ਸਨ੍ਧਾਰੇਤੁਂ ਵਟ੍ਟਤਿ, ਵਜਾਮਿ ਅਹਂ ਨਰਿਨ੍ਦਾਤਿ ਆਹ –

ਏਵਂ ਵਤ੍ਵਾ ਮਹਾਸਤ੍ਤੋ ਰਾਜਾਨਂ ਵਨ੍ਦਿਤ੍ਵਾ ਰਞ੍ਞੋ ਓਰੋਧੇ ਚ ਪੁਤ੍ਤਦਾਰੇ ਚ ਰਾਜਪਰਿਸਞ੍ਚ ਓਵਦਿਤ੍ਵਾ ਤੇਸੁ ਸਕਭਾਵੇਨ ਸਣ੍ਠਾਤੁਂ ਅਸਕ੍ਕੁਣਿਤ੍ਵਾ ਮਹਾਵਿਰਵਂ ਵਿਰਵਨ੍ਤੇਸੁਯੇਵ ਰਾਜਨਿਵੇਸਨਾ ਨਿਕ੍ਖਮਿ. ਸਕਲਨਗਰਵਾਸਿਨੋਪਿ ‘‘ਪਣ੍ਡਿਤੋ ਕਿਰ ਮਾਣਵੇਨ ਸਦ੍ਧਿਂ ਗਮਿਸ੍ਸਤਿ, ਏਥ, ਪਸ੍ਸਿਸ੍ਸਾਮ ਨ’’ਨ੍ਤਿ ਮਨ੍ਤਯਿਤ੍ਵਾ ਰਾਜਙ੍ਗਣੇਯੇਵ ਨਂ ਪਸ੍ਸਿਂਸੁ. ਅਥ ਨੇ ਮਹਾਸਤ੍ਤੋ ਅਸ੍ਸਾਸੇਤ੍ਵਾ ‘‘ਤੁਮ੍ਹੇ ਮਾ ਚਿਨ੍ਤਯਿਤ੍ਥ, ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ, ਸਰੀਰਂ ਅਦ੍ਧੁਵਂ, ਯਸੋ ਨਾਮ ਵਿਪਤ੍ਤਿਪਰਿਯੋਸਾਨੋ, ਅਪਿਚ ਤੁਮ੍ਹੇ ਦਾਨਾਦੀਸੁ ਪੁਞ੍ਞੇਸੁ ਅਪ੍ਪਮਤ੍ਤਾ ਹੋਥਾ’’ਤਿ ਤੇਸਂ ਓਵਾਦਂ ਦਤ੍ਵਾ ਨਿਵਤ੍ਤਾਪੇਤ੍ਵਾ ਅਤ੍ਤਨੋ ਗੇਹਾਭਿਮੁਖੋ ਪਾਯਾਸਿ. ਤਸ੍ਮਿਂ ਖਣੇ ਧਮ੍ਮਪਾਲਕੁਮਾਰੋ ਭਾਤਿਕਗਣਪਰਿਵੁਤੋ ‘‘ਪਿਤੁ ਪਚ੍ਚੁਗ੍ਗਮਨਂ ਕਰਿਸ੍ਸਾਮੀ’’ਤਿ ਨਿਕ੍ਖਨ੍ਤੋ ਨਿਵੇਸਨਦ੍ਵਾਰੇਯੇਵ ਪਿਤੁ ਸਮ੍ਮੁਖੋ ਅਹੋਸਿ. ਮਹਾਸਤ੍ਤੋ ਤਂ ਦਿਸ੍ਵਾ ਸਕਭਾਵੇਨ ਸਣ੍ਠਾਤੁਂ ਅਸਕ੍ਕੋਨ੍ਤੋ ਉਪਗੁਯ੍ਹ ਉਰੇ ਨਿਪਜ੍ਜਾਪੇਤ੍ਵਾ ਨਿਵੇਸਨਂ ਪਾਵਿਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੫੨੬.

‘‘ਜੇਟ੍ਠਪੁਤ੍ਤਂ ¶ ਉਪਗੁਯ੍ਹ, ਵਿਨੇਯ੍ਯ ਹਦਯੇ ਦਰਂ;

ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ, ਪਾਵਿਸੀ ਸੋ ਮਹਾਘਰ’’ਨ੍ਤਿ.

ਘਰੇ ਪਨਸ੍ਸ ਸਹਸ੍ਸਪੁਤ੍ਤਾ, ਸਹਸ੍ਸਧੀਤਰੋ, ਸਹਸ੍ਸਭਰਿਯਾਯੋ, ਚ ਸਤ੍ਤਵਣ੍ਣਦਾਸਿਸਤਾਨਿ ਚ ਸਨ੍ਤਿ, ਤੇਹਿ ਚੇਵ ਅਵਸੇਸਦਾਸਿਦਾਸਕਮ੍ਮਕਰਞਾਤਿਮਿਤ੍ਤਸੁਹਜ੍ਜਾਦੀਹਿ ਚ ਸਕਲਨਿਵੇਸਨਂ ਯੁਗਨ੍ਤਵਾਤਾਭਿਘਾਤਪਤਿਤੇਹਿ ਸਾਲੇਹਿ ਸਾਲਵਨਂ ਵਿਯ ਨਿਰਨ੍ਤਰਂ ਅਹੋਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੫੨੭.

‘‘ਸਾਲਾਵ ¶ ਸਮ੍ਮਪਤਿਤਾ, ਮਾਲੁਤੇਨ ਪਮਦ੍ਦਿਤਾ;

ਸੇਨ੍ਤਿ ਪੁਤ੍ਤਾ ਚ ਦਾਰਾ ਚ, ਵਿਧੁਰਸ੍ਸ ਨਿਵੇਸਨੇ.

੧੫੨੮.

‘‘ਇਤ੍ਥਿਸਹਸ੍ਸਂ ¶ ਭਰਿਯਾਨਂ, ਦਾਸਿਸਤ੍ਤਸਤਾਨਿ ਚ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ਵਿਧੁਰਸ੍ਸ ਨਿਵੇਸਨੇ.

੧੫੨੯.

‘‘ਓਰੋਧਾ ਚ ਕੁਮਾਰਾ ਚ, ਵੇਸਿਯਾਨਾ ਚ ਬ੍ਰਾਹ੍ਮਣਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ਵਿਧੁਰਸ੍ਸ ਨਿਵੇਸਨੇ.

੧੫੩੦.

‘‘ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ਵਿਧੁਰਸ੍ਸ ਨਿਵੇਸਨੇ.

੧੫੩੧.

‘‘ਸਮਾਗਤਾ ਜਾਨਪਦਾ, ਨੇਗਮਾ ਚ ਸਮਾਗਤਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ਵਿਧੁਰਸ੍ਸ ਨਿਵੇਸਨੇ.

੧੫੩੨.

‘‘ਇਤ੍ਥਿਸਹਸ੍ਸਂ ਭਰਿਯਾਨਂ, ਦਾਸਿਸਤ੍ਤਸਤਾਨਿ ਚ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਤੁਂ, ਕਸ੍ਮਾ ਨੋ ਵਿਜਹਿਸ੍ਸਸਿ.

੧੫੩੩.

‘‘ਓਰੋਧਾ ਚ ਕੁਮਾਰਾ ਚ, ਵੇਸਿਯਾਨਾ ਚ ਬ੍ਰਾਹ੍ਮਣਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ਕਸ੍ਮਾ ਨੋ ਵਿਜਹਿਸ੍ਸਸਿ.

੧੫੩੪.

‘‘ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ਕਸ੍ਮਾ ਨੋ ਵਿਜਹਿਸ੍ਸਸਿ.

੧੫੩੫.

‘‘ਸਮਾਗਤਾ ਜਾਨਪਦਾ, ਨੇਗਮਾ ਚ ਸਮਾਗਤਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ਕਸ੍ਮਾ ਨੋ ਵਿਜਹਿਸ੍ਸਸੀ’’ਤਿ.

ਤਤ੍ਥ ¶ ਸੇਨ੍ਤੀਤਿ ਮਹਾਤਲੇ ਛਿਨ੍ਨਪਾਦਾ ਵਿਯ ਪਤਿਤਾ ਆਵਤ੍ਤਨ੍ਤਾ ਪਰਿਵਤ੍ਤਨ੍ਤਾ ਸਯਨ੍ਤਿ. ਇਤ੍ਥਿਸਹਸ੍ਸਂ ਭਰਿਯਾਨਨ੍ਤਿ ਭਰਿਯਾਨਮੇਵ ਇਤ੍ਥੀਨਂ ਸਹਸ੍ਸਂ. ਕਸ੍ਮਾ ਨੋ ਵਿਜਹਿਸ੍ਸਸੀਤਿ ਕੇਨ ਕਾਰਣੇਨ ਅਮ੍ਹੇ ਵਿਜਹਿਸ੍ਸਸੀਤਿ ਪਰਿਦੇਵਿਂਸੁ.

ਮਹਾਸਤ੍ਤੋ ¶ ਸਬ੍ਬਂ ਤਂ ਮਹਾਜਨਂ ਅਸ੍ਸਾਸੇਤ੍ਵਾ ਘਰੇ ਅਵਸੇਸਕਿਚ੍ਚਾਨਿ ਕਤ੍ਵਾ ਅਨ੍ਤੋਜਨਞ੍ਚ ਬਹਿਜਨਞ੍ਚ ਓਵਦਿਤ੍ਵਾ ਆਚਿਕ੍ਖਿਤਬ੍ਬਯੁਤ੍ਤਕਂ ਸਬ੍ਬਂ ਆਚਿਕ੍ਖਿਤ੍ਵਾ ਪੁਣ੍ਣਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਤ੍ਤਨੋ ਨਿਟ੍ਠਿਤਕਿਚ੍ਚਤਂ ਆਰੋਚੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੫੩੬.

‘‘ਕਤ੍ਵਾ ਘਰੇਸੁ ਕਿਚ੍ਚਾਨਿ, ਅਨੁਸਾਸਿਤ੍ਵਾ ਸਕਂ ਜਨਂ;

ਮਿਤ੍ਤਾਮਚ੍ਚੇ ਚ ਭਚ੍ਚੇ ਚ, ਪੁਤ੍ਤਦਾਰੇ ਚ ਬਨ੍ਧਵੇ.

੧੫੩੭.

‘‘ਕਮ੍ਮਨ੍ਤਂ ਸਂਵਿਧੇਤ੍ਵਾਨ, ਆਚਿਕ੍ਖਿਤ੍ਵਾ ਘਰੇ ਧਨਂ;

ਨਿਧਿਞ੍ਚ ਇਣਦਾਨਞ੍ਚ, ਪੁਣ੍ਣਕਂ ਏਤਦਬ੍ਰਵਿ.

੧੫੩੮.

‘‘ਅਵਸੀ ਤੁਵਂ ਮਯ੍ਹ ਤੀਹਂ ਅਗਾਰੇ, ਕਤਾਨਿ ਕਿਚ੍ਚਾਨਿ ਘਰੇਸੁ ਮਯ੍ਹਂ;

ਅਨੁਸਾਸਿਤਾ ਪੁਤ੍ਤਦਾਰਾ ਮਯਾ ਚ, ਕਰੋਮ ਕਚ੍ਚਾਨ ਯਥਾਮਤਿਂ ਤੇ’’ਤਿ.

ਤਤ੍ਥ ਕਮ੍ਮਨ੍ਤਂ ਸਂਵਿਧੇਤ੍ਵਾਨਾਤਿ ‘‘ਏਵਞ੍ਚ ਕਾਤੁਂ ਵਟ੍ਟਤੀ’’ਤਿ ਘਰੇ ਕਤ੍ਤਬ੍ਬਯੁਤ੍ਤਕਂ ਕਮ੍ਮਂ ਸਂਵਿਦਹਿਤ੍ਵਾ. ਨਿਧਿਨ੍ਤਿ ਨਿਦਹਿਤ੍ਵਾ ਠਪਿਤਧਨਂ. ਇਣਦਾਨਨ੍ਤਿ ਇਣਵਸੇਨ ਸਂਯੋਜਿਤਧਨਂ. ਯਥਾਮਤਿਂ ਤੇਤਿ ਇਦਾਨਿ ਤਵ ਅਜ੍ਝਾਸਯਾਨੁਰੂਪਂ ਕਰੋਮਾਤਿ ਵਦਤਿ.

ਪੁਣ੍ਣਕੋ ¶ ਆਹ –

੧੫੩੯.

‘‘ਸਚੇ ਹਿ ਕਤ੍ਤੇ ਅਨੁਸਾਸਿਤਾ ਤੇ, ਪੁਤ੍ਤਾ ਚ ਦਾਰਾ ਅਨੁਜੀਵਿਨੋ ਚ;

ਹਨ੍ਦੇਹਿ ਦਾਨੀ ਤਰਮਾਨਰੂਪੋ, ਦੀਘੋ ਹਿ ਅਦ੍ਧਾਪਿ ਅਯਂ ਪੁਰਤ੍ਥਾ.

੧੫੪੦.

‘‘ਅਛਮ੍ਭਿਤੋਵ ਗਣ੍ਹਾਹਿ, ਆਜਾਨੇਯ੍ਯਸ੍ਸ ਵਾਲਧਿਂ;

ਇਦਂ ਪਚ੍ਛਿਮਕਂ ਤੁਯ੍ਹਂ, ਜੀਵਲੋਕਸ੍ਸ ਦਸ੍ਸਨ’’ਨ੍ਤਿ.

ਤਤ੍ਥ ¶ ਕਤ੍ਤੇਤਿ ਸੋਮਨਸ੍ਸਪ੍ਪਤ੍ਤੋ ਯਕ੍ਖੋ ਮਹਾਸਤ੍ਤਂ ਆਲਪਤਿ. ਦੀਘੋ ਹਿ ਅਦ੍ਧਾਪੀਤਿ ਗਨ੍ਤਬ੍ਬਮਗ੍ਗੋਪਿ ਦੀਘੋ. ‘‘ਅਛਮ੍ਭਿਤੋਵਾ’’ਤਿ ਇਦਂ ਸੋ ਹੇਟ੍ਠਾਪਾਸਾਦਂ ਅਨੋਤਰਿਤ੍ਵਾ ਤਤੋਵ ਗਨ੍ਤੁਕਾਮੋ ਹੁਤ੍ਵਾ ਅਵਚ.

ਅਥ ਨਂ ਮਹਾਸਤ੍ਤੋ ਆਹ –

੧੫੪੧.

‘‘ਸੋਹਂ ¶ ਕਿਸ੍ਸ ਨੁ ਭਾਯਿਸ੍ਸਂ, ਯਸ੍ਸ ਮੇ ਨਤ੍ਥਿ ਦੁਕ੍ਕਟਂ;

ਕਾਯੇਨ ਵਾਚਾ ਮਨਸਾ, ਯੇਨ ਗਚ੍ਛੇਯ੍ਯ ਦੁਗ੍ਗਤਿ’’ਨ੍ਤਿ.

ਤਤ੍ਥ ਸੋਹਂ ਕਿਸ੍ਸ ਨੁ ਭਾਯਿਸ੍ਸਨ੍ਤਿ ਇਦਂ ਮਹਾਸਤ੍ਤੋ ‘‘ਅਛਮ੍ਭਿਤੋਵ ਗਣ੍ਹਾਹੀ’’ਤਿ ਵੁਤ੍ਤਤ੍ਤਾ ਏਵਮਾਹ.

ਏਵਂ ਮਹਾਸਤ੍ਤੋ ਸੀਹਨਾਦਂ ਨਦਿਤ੍ਵਾ ਅਛਮ੍ਭਿਤੋ ਕੇਸਰਸੀਹੋ ਵਿਯ ਨਿਬ੍ਭਯੋ ਹੁਤ੍ਵਾ ‘‘ਅਯਂ ਸਾਟਕੋ ਮਮ ਅਰੁਚਿਯਾ ਮਾ ਮੁਚ੍ਚਤੂ’’ਤਿ ਅਧਿਟ੍ਠਾਨਪਾਰਮਿਂ ਪੁਰੇਚਾਰਿਕਂ ਕਤ੍ਵਾ ਦਲ਼੍ਹਂ ਨਿਵਾਸੇਤ੍ਵਾ ਅਸ੍ਸਸ੍ਸ ਵਾਲਧਿਂ ਵਿਯੂਹਿਤ੍ਵਾ ਉਭੋਹਿ ਹਤ੍ਥੇਹਿ ਦਲ਼੍ਹਂ ਵਾਲਧਿਂ ਗਹੇਤ੍ਵਾ ਦ੍ਵੀਹਿ ਪਾਦੇਹਿ ਅਸ੍ਸਸ੍ਸ ਊਰੂਸੁ ਪਲਿਵੇਠੇਤ੍ਵਾ ‘‘ਮਾਣਵ, ਗਹਿਤੋ ਮੇ ਵਾਲਧਿ, ਯਥਾਰੁਚਿ ਯਾਹੀ’’ਤਿ ਆਹ. ਤਸ੍ਮਿਂ ਖਣੇ ਪੁਣ੍ਣਕੋ ਮਨੋਮਯਸਿਨ੍ਧਵਸ੍ਸ ਸਞ੍ਞਂ ਅਦਾਸਿ. ਸੋ ਪਣ੍ਡਿਤਂ ਆਦਾਯ ਆਕਾਸੇ ਪਕ੍ਖਨ੍ਦਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੫੪੨.

‘‘ਸੋ ਅਸ੍ਸਰਾਜਾ ਵਿਧੁਰਂ ਵਹਨ੍ਤੋ, ਪਕ੍ਕਾਮਿ ਵੇਹਾਯਸਮਨ੍ਤਲਿਕ੍ਖੇ;

ਸਾਖਾਸੁ ਸੇਲੇਸੁ ਅਸਜ੍ਜਮਾਨੋ, ਕਾਲ਼ਾਗਿਰਿਂ ਖਿਪ੍ਪਮੁਪਾਗਮਾਸੀ’’ਤਿ.

ਤਤ੍ਥ ਸਾਖਾਸੁ ਸੇਲੇਸੁ ਅਸਜ੍ਜਮਾਨੋਤਿ ਪੁਣ੍ਣਕੋ ਕਿਰ ਚਿਨ੍ਤੇਸਿ ‘‘ਦੂਰਂ ਅਗਨ੍ਤ੍ਵਾਵ ਇਮਂ ਹਿਮਵਨ੍ਤਪ੍ਪਦੇਸੇ ਰੁਕ੍ਖੇਸੁ ਪਬ੍ਬਤੇਸੁ ਚ ਪੋਥੇਤ੍ਵਾ ਮਾਰੇਤ੍ਵਾ ਹਦਯਮਂਸਂ ਆਦਾਯ ਕਲ਼ੇਵਰਂ ਪਬ੍ਬਤਨ੍ਤਰੇ ¶ ਛਡ੍ਡੇਤ੍ਵਾ ਨਾਗਭਵਨਮੇਵ ਗਮਿਸ੍ਸਾਮੀ’’ਤਿ. ਸੋ ਰੁਕ੍ਖੇ ਚ ਪਬ੍ਬਤੇ ਚ ਅਪਰਿਹਰਿਤ੍ਵਾ ਤੇਸਂ ਮਜ੍ਝੇਨੇਵ ਅਸ੍ਸਂ ਪੇਸੇਸਿ. ਮਹਾਸਤ੍ਤਸ੍ਸਾਨੁਭਾਵੇਨ ਰੁਕ੍ਖਾਪਿ ਪਬ੍ਬਤਾਪਿ ਸਰੀਰਤੋ ਉਭੋਸੁ ਪਸ੍ਸੇਸੁ ਰਤਨਮਤ੍ਤਂ ਪਟਿਕ੍ਕਮਨ੍ਤਿ. ਸੋ ‘‘ਮਤੋ ਵਾ, ਨੋ ਵਾ’’ਤਿ ਪਰਿਵਤ੍ਤਿਤ੍ਵਾ ਮਹਾਸਤ੍ਤਸ੍ਸ ਮੁਖਂ ਓਲੋਕੇਨ੍ਤੋ ਕਞ੍ਚਨਾਦਾਸਮਿਵ ਵਿਪ੍ਪਸਨ੍ਨਂ ਦਿਸ੍ਵਾ ‘‘ਅਯਂ ਏਵਂ ਨ ਮਰਤੀ’’ਤਿ ਪੁਨਪਿ ਸਕਲਹਿਮਵਨ੍ਤਪ੍ਪਦੇਸੇ ਰੁਕ੍ਖੇ ਚ ਪਬ੍ਬਤੇ ਚ ਤਿਕ੍ਖਤ੍ਤੁਂ ਪੋਥੇਨ੍ਤੋ ਪੇਸੇਸਿ ¶ . ਏਵਂ ਪੋਥੇਨ੍ਤੋਪਿ ਤਥੇਵ ਰੁਕ੍ਖਪਬ੍ਬਤਾ ਦੂਰਮੇਵ ਪਟਿਕ੍ਕਮਨ੍ਤਿਯੇਵ. ਮਹਾਸਤ੍ਤੋ ਪਨ ਕਿਲਨ੍ਤਕਾਯੋ ਅਹੋਸਿ. ਅਥ ਪੁਣ੍ਣਕੋ ‘‘ਅਯਂ ਨੇਵ ਮਰਤਿ, ਇਦਾਨਿ ਵਾਤਕ੍ਖਨ੍ਧੇ ਚੁਣ੍ਣਵਿਚੁਣ੍ਣਂ ਕਰਿਸ੍ਸਾਮੀ’’ਤਿ ਕੋਧਾਭਿਭੂਤੋ ਸਤ੍ਤਮਂ ਵਾਤਕ੍ਖਨ੍ਧਂ ਪਕ੍ਖਨ੍ਦਿ. ਬੋਧਿਸਤ੍ਤਸ੍ਸਾਨੁਭਾਵੇਨ ਵਾਤਕ੍ਖਨ੍ਧੋ ਦ੍ਵਿਧਾ ਹੁਤ੍ਵਾ ਬੋਧਿਸਤ੍ਤਸ੍ਸ ਓਕਾਸਂ ਅਕਾਸਿ. ਤਤੋ ਵੇਰਮ੍ਭਵਾਤੇਹਿ ਪਹਰਾਪੇਸਿ, ਵੇਰਮ੍ਭਵਾਤਾਪਿ ਸਤਸਹਸ੍ਸਅਸਨਿਸਦ੍ਦੋ ਵਿਯ ਹੁਤ੍ਵਾ ਬੋਧਿਸਤ੍ਤਸ੍ਸ ਓਕਾਸਂ ਅਦਂਸੁ. ਸੋ ਪੁਣ੍ਣਕੋ ਤਸ੍ਸ ਅਨ੍ਤਰਾਯਾਭਾਵਂ ਪਸ੍ਸਨ੍ਤੋ ਤਂ ਆਦਾਯ ਕਾਲ਼ਪਬ੍ਬਤਂ ਅਗਮਾਸਿ. ਤੇਨ ਵੁਤ੍ਤਂ –

‘‘ਸੋ ¶ ਅਸ੍ਸਰਾਜਾ ਵਿਧੁਰਂ ਵਹਨ੍ਤੋ, ਪਕ੍ਕਾਮਿ ਵੇਹਾਯਸਮਨ੍ਤਲਿਕ੍ਖੇ;

ਸਾਖਾਸੁ ਸੇਲੇਸੁ ਅਸਜ੍ਜਮਾਨੋ, ਕਾਲ਼ਾਗਿਰਿਂ ਖਿਪ੍ਪਮੁਪਾਗਮਾਸੀ’’ਤਿ.

ਤਤ੍ਥ ਅਸਜ੍ਜਮਾਨੋਤਿ ਅਲਗ੍ਗਮਾਨੋ ਅਪ੍ਪਟਿਹਞ੍ਞਮਾਨੋ ਵਿਧੁਰਪਣ੍ਡਿਤਂ ਵਹਨ੍ਤੋ ਕਾਲ਼ਪਬ੍ਬਤਮਤ੍ਥਕਂ ਉਪਾਗਤੋ.

ਏਵਂ ਪੁਣ੍ਣਕਸ੍ਸ ਮਹਾਸਤ੍ਤਂ ਗਹੇਤ੍ਵਾ ਗਤਕਾਲੇ ਪਣ੍ਡਿਤਸ੍ਸ ਪੁਤ੍ਤਦਾਰਾਦਯੋ ਪੁਣ੍ਣਕਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਤਤ੍ਥ ਮਹਾਸਤ੍ਤਂ ਅਦਿਸ੍ਵਾ ਛਿਨ੍ਨਪਾਦਾ ਵਿਯ ਪਤਿਤ੍ਵਾ ਅਪਰਾਪਰਂ ਪਰਿਵਤ੍ਤਮਾਨਾ ਮਹਾਸਦ੍ਦੇਨ ਪਰਿਦੇਵਿਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੫੪੩.

‘‘ਇਤ੍ਥਿਸਹਸ੍ਸਂ ਭਰਿਯਾਨਂ, ਦਾਸਿਸਤ੍ਤਸਤਾਨਿ ਚ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ‘ਯਕ੍ਖੋ ਬ੍ਰਾਹ੍ਮਣਵਣ੍ਣੇਨ;

ਵਿਧੁਰਂ ਆਦਾਯ ਗਚ੍ਛਤਿ’.

‘‘ਓਰੋਧਾ ਚ ਕੁਮਾਰਾ ਚ, ਵੇਸਿਯਾਨਾ ਚ ਬ੍ਰਾਹ੍ਮਣਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ‘ਯਕ੍ਖੋ ਬ੍ਰਾਹ੍ਮਣਵਣ੍ਣੇਨ;

ਵਿਧੁਰਂ ਆਦਾਯ ਗਚ੍ਛਤਿ’.

‘‘ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ‘ਯਕ੍ਖੋ ਬ੍ਰਾਹ੍ਮਣਵਣ੍ਣੇਨ;

ਵਿਧੁਰਂ ਆਦਾਯ ਗਚ੍ਛਤਿ’.

੧੫੪੪.

‘‘ਸਮਾਗਤਾ ¶ ਜਾਨਪਦਾ, ਨੇਗਮਾ ਚ ਸਮਾਗਤਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ‘ਯਕ੍ਖੋ ਬ੍ਰਾਹ੍ਮਣਵਣ੍ਣੇਨ;

ਵਿਧੁਰਂ ਆਦਾਯ ਗਚ੍ਛਤਿ’.

੧੫੪੫.

‘‘ਇਤ੍ਥਿਸਹਸ੍ਸਂ ਭਰਿਯਾਨਂ, ਦਾਸਿਸਤ੍ਤਸਤਾਨਿ ਚ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ‘ਪਣ੍ਡਿਤੋ ਸੋ ਕੁਹਿਂ ਗਤੋ’.

‘‘ਓਰੋਧਾ ¶ ਚ ਕੁਮਾਰਾ ਚ, ਵੇਸਿਯਾਨਾ ਚ ਬ੍ਰਾਹ੍ਮਣਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ‘ਪਣ੍ਡਿਤੋ ਸੋ ਕੁਹਿਂ ਗਤੋ’.

‘‘ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ‘ਪਣ੍ਡਿਤੋ ਸੋ ਕੁਹਿਂ ਗਤੋ’.

੧੫੪੬.

ਸਮਾਗਤਾ ਜਾਨਪਦਾ, ਨੇਗਮਾ ਚ ਸਮਾਗਤਾ;

ਬਾਹਾ ਪਗ੍ਗਯ੍ਹ ਪਕ੍ਕਨ੍ਦੁਂ, ‘ਪਣ੍ਡਿਤੋ ਸੋ ਕੁਹਿਂ ਗਤੋ’’’ਤਿ.

ਏਵਂ ਪਕ੍ਕਨ੍ਦਿਤ੍ਵਾ ਚ ਪਨ ਤੇ ਸਬ੍ਬੇਪਿ ਸਕਲਨਗਰਵਾਸੀਹਿ ਸਦ੍ਧਿਂ ਰੋਦਿਤ੍ਵਾ ਰਾਜਦ੍ਵਾਰਂ ਅਗਮਂਸੁ. ਰਾਜਾ ਮਹਨ੍ਤਂ ਪਰਿਦੇਵਸਦ੍ਦਂ ਸੁਤ੍ਵਾ ਸੀਹਪਞ੍ਜਰਂ ਵਿਵਰਿਤ੍ਵਾ ‘‘ਤੁਮ੍ਹੇ ਕਸ੍ਮਾ ਪਰਿਦੇਵਥਾ’’ਤਿ ਪੁਚ੍ਛਿ. ਅਥਸ੍ਸ ਤੇ ‘‘ਦੇਵ, ਸੋ ਕਿਰ ਮਾਣਵੋ ਨ ਬ੍ਰਾਹ੍ਮਣੋ, ਯਕ੍ਖੋ ਪਨ ਬ੍ਰਾਹ੍ਮਣਵਣ੍ਣੇਨ ਆਗਨ੍ਤ੍ਵਾ ਪਣ੍ਡਿਤਂ ਆਦਾਯ ਗਤੋ, ਤੇਨ ਵਿਨਾ ¶ ਅਮ੍ਹਾਕਂ ਜੀਵਿਤਂ ਨਤ੍ਥਿ. ਸਚੇ ਸੋ ਇਤੋ ਸਤ੍ਤਮੇ ਦਿਵਸੇ ਨਾਗਮਿਸ੍ਸਤਿ, ਸਕਟਸਤੇਹਿ ਸਕਟਸਹਸ੍ਸੇਹਿ ਚ ਦਾਰੂਨਿ ਸਙ੍ਕਡ੍ਢਿਤ੍ਵਾ ਸਬ੍ਬੇ ਮਯਂ ਅਗ੍ਗਿਂ ਉਜ੍ਜਾਲੇਤ੍ਵਾ ਪਵਿਸਿਸ੍ਸਾਮਾ’’ਤਿ ਇਮਮਤ੍ਥਂ ਆਰੋਚੇਨ੍ਤਾ ਇਮਂ ਗਾਥਮਾਹਂਸੁ –

੧੫੪੭.

‘‘ਸਚੇ ਸੋ ਸਤ੍ਤਰਤ੍ਤੇਨ, ਨਾਗਚ੍ਛਿਸ੍ਸਤਿ ਪਣ੍ਡਿਤੋ;

ਸਬ੍ਬੇ ਅਗ੍ਗਿਂ ਪਵੇਕ੍ਖਾਮ, ਨਤ੍ਥਤ੍ਥੋ ਜੀਵਿਤੇਨ ਨੋ’’ਤਿ.

ਸਮ੍ਮਾਸਮ੍ਬੁਦ੍ਧਸ੍ਸ ਪਰਿਨਿਬ੍ਬੁਤਕਾਲੇਪਿ ‘‘ਮਯਂ ਅਗ੍ਗਿਂ ਪਵਿਸਿਤ੍ਵਾ ਮਰਿਸ੍ਸਾਮਾ’’ਤਿ ਵਤ੍ਤਾਰੋ ਨਾਮ ਨਾਹੇਸੁਂ. ਅਹੋ ਸੁਭਾਸਿਤਂ ਮਹਾਸਤ੍ਤੇ ਨਾਗਰੇਹੀਤਿ. ਰਾਜਾ ਤੇਸਂ ਕਥਂ ਸੁਤ੍ਵਾ ‘‘ਤੁਮ੍ਹੇ ਮਾ ਚਿਨ੍ਤਯਿਤ੍ਥ, ਮਾ ¶ ਸੋਚਿਤ੍ਥ, ਮਾ ਪਰਿਦੇਵਿਤ੍ਥ, ਮਧੁਰਕਥੋ ਪਣ੍ਡਿਤੋ ਮਾਣਵਂ ਧਮ੍ਮਕਥਾਯ ਪਲੋਭੇਤ੍ਵਾ ਅਤ੍ਤਨੋ ਪਾਦੇਸੁ ਪਾਤੇਤ੍ਵਾ ਸਕਲਨਗਰਵਾਸੀਨਂ ਅਸ੍ਸੁਮੁਖਂ ਹਾਸਯਨ੍ਤੋ ਨ ਚਿਰਸ੍ਸੇਵ ਆਗਮਿਸ੍ਸਤੀ’’ਤਿ ਅਸ੍ਸਾਸੇਨ੍ਤੋ ਗਾਥਮਾਹ –

੧੫੪੮.

‘‘ਪਣ੍ਡਿਤੋ ਚ ਵਿਯਤ੍ਤੋ ਚ, ਵਿਭਾਵੀ ਚ ਵਿਚਕ੍ਖਣੋ;

ਖਿਪ੍ਪਂ ਮੋਚਿਯ ਅਤ੍ਤਾਨਂ, ਮਾ ਭਾਯਿਤ੍ਥਾਗਮਿਸ੍ਸਤੀ’’ਤਿ.

ਤਤ੍ਥ ਵਿਯਤ੍ਤੋਤਿ ਵੇਯ੍ਯਤ੍ਤਿਯਾ ਵਿਚਾਰਣਪਞ੍ਞਾਯ ਸਮਨ੍ਨਾਗਤੋ. ਵਿਭਾਵੀਤਿ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਵਿਭਾਵੇਤ੍ਵਾ ਦਸ੍ਸੇਤ੍ਵਾ ਕਥੇਤੁਂ ਸਮਤ੍ਥੋ. ਵਿਚਕ੍ਖਣੋਤਿ ਤਙ੍ਖਣੇਯੇਵ ਠਾਨੁਪ੍ਪਤ੍ਤਿਕਾਯ ਕਾਰਣਚਿਨ੍ਤਨਪਞ੍ਞਾਯ ¶ ਯੁਤ੍ਤੋ. ਮਾ ਭਾਯਿਤ੍ਥਾਤਿ ਮਾ ਭਾਯਥ, ਅਤ੍ਤਾਨਂ ਮੋਚੇਤ੍ਵਾ ਖਿਪ੍ਪਂ ਆਗਮਿਸ੍ਸਤੀਤਿ ਅਸ੍ਸਾਸੇਤਿ.

ਨਾਗਰਾਪਿ ‘‘ਪਣ੍ਡਿਤੋ ਕਿਰ ਰਞ੍ਞੋ ਕਥੇਤ੍ਵਾ ਗਤੋ ਭਵਿਸ੍ਸਤੀ’’ਤਿ ਅਸ੍ਸਾਸਂ ਪਟਿਲਭਿਤ੍ਵਾ ਅਤ੍ਤਨੋ ਗੇਹਾਨਿ ਪਕ੍ਕਮਿਂਸੁ.

ਅਨ੍ਤਰਪੇਯ੍ਯਾਲੋ ਨਿਟ੍ਠਿਤੋ.

ਸਾਧੁਨਰਧਮ੍ਮਕਣ੍ਡਂ

ਪੁਣ੍ਣਕੋਪਿ ਮਹਾਸਤ੍ਤਂ ਕਾਲ਼ਾਗਿਰਿਮਤ੍ਥਕੇ ਠਪੇਤ੍ਵਾ ‘‘ਇਮਸ੍ਮਿਂ ਜੀਵਮਾਨੇ ਮਯ੍ਹਂ ਵੁਡ੍ਢਿ ਨਾਮ ਨਤ੍ਥਿ, ਇਮਂ ਮਾਰੇਤ੍ਵਾ ਹਦਯਮਂਸਂ ਗਹੇਤ੍ਵਾ ਨਾਗਭਵਨਂ ਗਨ੍ਤ੍ਵਾ ਵਿਮਲਾਯ ਦਤ੍ਵਾ ਇਰਨ੍ਧਤਿਂ ਗਹੇਤ੍ਵਾ ਦੇਵਲੋਕਂ ਗਮਿਸ੍ਸਾਮੀ’’ਤਿ ਚਿਨ੍ਤੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੫੪੯.

‘‘ਸੋ ਤਤ੍ਥ ਗਨ੍ਤ੍ਵਾਨ ਵਿਚਿਨ੍ਤਯਨ੍ਤੋ, ਉਚ੍ਚਾਵਚਾ ਚੇਤਨਕਾ ਭਵਨ੍ਤਿ;

ਨਯਿਮਸ੍ਸ ਜੀਵੇਨ ਮਮਤ੍ਥਿ ਕਿਞ੍ਚਿ, ਹਨ੍ਤ੍ਵਾਨਿਮਂ ਹਦਯਮਾਨਯਿਸ੍ਸ’’ਨ੍ਤਿ.

ਤਤ੍ਥ ਸੋਤਿ ਸੋ ਪੁਣ੍ਣਕੋ. ਤਤ੍ਥ ਗਨ੍ਤ੍ਵਾਨਾਤਿ ਗਨ੍ਤ੍ਵਾ ਤਤ੍ਥ ਕਾਲ਼ਾਗਿਰਿਮਤ੍ਥਕੇ ਠਿਤੋ. ਉਚ੍ਚਾਵਚਾ ਚੇਤਨਕਾ ਭਵਨ੍ਤੀਤਿ ਖਣੇ ਖਣੇ ਉਪ੍ਪਜ੍ਜਮਾਨਾ ¶ ਚੇਤਨਾ ਉਚ੍ਚਾਪਿ ਅਵਚਾਪਿ ਉਪ੍ਪਜ੍ਜਨ੍ਤਿ. ਠਾਨਂ ਖੋ ਪਨੇਤਂ ਵਿਜ੍ਜਤਿ, ਯਂ ਮਮੇਤਸ੍ਸ ਜੀਵਿਤਦਾਨਚੇਤਨਾਪਿ ਉਪ੍ਪਜ੍ਜੇਯ੍ਯਾਤਿ. ਇਮਸ੍ਸ ¶ ਪਨ ਜੀਵਿਤੇਨ ਤਹਿਂ ਨਾਗਭਵਨੇ ਮਮ ਅਪ੍ਪਮਤ੍ਤਕਮ੍ਪਿ ਕਿਞ੍ਚਿ ਕਿਚ੍ਚਂ ਨਤ੍ਥਿ, ਇਧੇਵਿਮਂ ਮਾਰੇਤ੍ਵਾ ਅਸ੍ਸ ਹਦਯਂ ਆਨਯਿਸ੍ਸਾਮੀਤਿ ਸਨ੍ਨਿਟ੍ਠਾਨਮਕਾਸੀਤਿ ਅਤ੍ਥੋ.

ਤਤੋ ਪੁਨ ਚਿਨ੍ਤੇਸਿ ‘‘ਯਂਨੂਨਾਹਂ ਇਮਂ ਸਹਤ੍ਥੇਨ ਅਮਾਰੇਤ੍ਵਾ ਭੇਰਵਰੂਪਦਸ੍ਸਨੇਨ ਜੀਵਿਤਕ੍ਖਯਂ ਪਾਪੇਯ੍ਯ’’ਨ੍ਤਿ. ਸੋ ਭੇਰਵਯਕ੍ਖਰੂਪਂ ਨਿਮ੍ਮਿਨਿਤ੍ਵਾ ਮਹਾਸਤ੍ਤਂ ਤਜ੍ਜੇਨ੍ਤੋ ਆਗਨ੍ਤ੍ਵਾ ਤਂ ਪਾਤੇਤ੍ਵਾ ਦਾਠਾਨਂ ਅਨ੍ਤਰੇ ਕਤ੍ਵਾ ਖਾਦਿਤੁਕਾਮੋ ਵਿਯ ਅਹੋਸਿ, ਮਹਾਸਤ੍ਤਸ੍ਸ ਲੋਮਹਂਸਨਮਤ੍ਤਮ੍ਪਿ ਨਾਹੋਸਿ. ਤਤੋ ਸੀਹਰੂਪੇਨ ਮਤ੍ਤਮਹਾਹਤ੍ਥਿਰੂਪੇਨ ਚ ਆਗਨ੍ਤ੍ਵਾ ਦਾਠਾਹਿ ਚੇਵ ਦਨ੍ਤੇਹਿ ਚ ਵਿਜ੍ਝਿਤੁਕਾਮੋ ਵਿਯ ਅਹੋਸਿ. ਤਥਾਪਿ ਅਭਾਯਨ੍ਤਸ੍ਸ ਏਕਦੋਣਿਕਨਾਵਪ੍ਪਮਾਣਂ ਮਹਨ੍ਤਂ ਸਪ੍ਪਵਣ੍ਣਂ ਨਿਮ੍ਮਿਨਿਤ੍ਵਾ ਅਸ੍ਸਸਨ੍ਤੋ ਪਸ੍ਸਸਨ੍ਤੋ ‘‘ਸੁਸੂ’’ਤਿ ਸਦ੍ਦਂ ਕਰੋਨ੍ਤੋ ਆਗਨ੍ਤ੍ਵਾ ਮਹਾਸਤ੍ਤਸ੍ਸ ਸਕਲਸਰੀਰਂ ਵੇਠੇਤ੍ਵਾ ਮਤ੍ਥਕੇ ਫਣਂ ਕਤ੍ਵਾ ਅਟ੍ਠਾਸਿ, ਤਸ੍ਸ ਸਾਰਜ੍ਜਮਤ੍ਤਮ੍ਪਿ ਨਾਹੋਸਿ. ਅਥ ‘‘ਨਂ ਪਬ੍ਬਤਮਤ੍ਥਕੇ ਠਪੇਤ੍ਵਾ ਪਾਤੇਤ੍ਵਾ ¶ ਚੁਣ੍ਣਵਿਚੁਣ੍ਣਂ ਕਰਿਸ੍ਸਾਮੀ’’ਤਿ ਮਹਾਵਾਤਂ ਸਮੁਟ੍ਠਾਪੇਸਿ. ਸੋ ਤਸ੍ਸ ਕੇਸਗ੍ਗਮਤ੍ਤਮ੍ਪਿ ਚਾਲੇਤੁਂ ਨਾਸਕ੍ਖਿ. ਅਥ ਨਂ ਤਤ੍ਥੇਵ ਪਬ੍ਬਤਮਤ੍ਥਕੇ ਠਪੇਤ੍ਵਾ ਹਤ੍ਥੀ ਵਿਯ ਖਜ੍ਜੂਰਿਰੁਕ੍ਖਂ ਪਬ੍ਬਤਂ ਅਪਰਾਪਰਂ ਚਾਲੇਸਿ, ਤਥਾਪਿ ਨਂ ਠਿਤਟ੍ਠਾਨਤੋ ਕੇਸਗ੍ਗਮਤ੍ਤਮ੍ਪਿ ਚਾਲੇਤੁਂ ਨਾਸਕ੍ਖਿ.

ਤਤੋ ‘‘ਸਦ੍ਦਸਨ੍ਤਾਸੇਨਸ੍ਸ ਹਦਯਫਾਲਨਂ ਕਤ੍ਵਾ ਮਾਰੇਸ੍ਸਾਮੀ’’ਤਿ ਅਨ੍ਤੋਪਬ੍ਬਤਂ ਪਵਿਸਿਤ੍ਵਾ ਪਥਵਿਞ੍ਚ ਨਭਞ੍ਚ ਏਕਨਿਨ੍ਨਾਦਂ ਕਰੋਨ੍ਤੋ ਮਹਾਨਾਦਂ ਨਦਿ, ਏਵਮ੍ਪਿਸ੍ਸ ਸਾਰਜ੍ਜਮਤ੍ਤਮ੍ਪਿ ਨਾਹੋਸਿ. ਜਾਨਾਤਿ ਹਿ ਮਹਾਸਤ੍ਤੋ ‘‘ਯਕ੍ਖਸੀਹਹਤ੍ਥਿਨਾਗਰਾਜਵੇਸੇਹਿ ਆਗਤੋਪਿ ਮਹਾਵਾਤਵੁਟ੍ਠਿਂ ਸਮੁਟ੍ਠਾਪਕੋਪਿ ਪਬ੍ਬਤਚਲਨਂ ਕਰੋਨ੍ਤੋਪਿ ਅਨ੍ਤੋਪਬ੍ਬਤਂ ਪਵਿਸਿਤ੍ਵਾ ਨਾਦਂ ਵਿਸ੍ਸਜ੍ਜੇਨ੍ਤੋਪਿ ਮਾਣਵੋਯੇਵ, ਨ ਅਞ੍ਞੋ’’ਤਿ. ਤਤੋ ਪੁਣ੍ਣਕੋ ਚਿਨ੍ਤੇਸਿ ‘‘ਨਾਹਂ ਇਮਂ ਬਾਹਿਰੁਪਕ੍ਕਮੇਨ ਮਾਰੇਤੁਂ ਸਕ੍ਕੋਮਿ, ਸਹਤ੍ਥੇਨੇਵ ਨਂ ਮਾਰੇਸ੍ਸਾਮੀ’’ਤਿ. ਤਤੋ ਯਕ੍ਖੋ ਮਹਾਸਤ੍ਤਂ ਪਬ੍ਬਤਮੁਦ੍ਧਨਿ ਠਪੇਤ੍ਵਾ ਪਬ੍ਬਤਪਾਦਂ ਗਨ੍ਤ੍ਵਾ ਮਣਿਕ੍ਖਨ੍ਧੇ ਪਣ੍ਡੁਸੁਤ੍ਤਂ ਪਵੇਸੇਨ੍ਤੋ ਵਿਯ ਪਬ੍ਬਤਂ ਪਵਿਸਿਤ੍ਵਾ ਤਾਸੇਨ੍ਤੋ ਵਗ੍ਗਨ੍ਤੋ ਅਨ੍ਤੋਪਬ੍ਬਤੇਨ ਉਗ੍ਗਨ੍ਤ੍ਵਾ ਮਹਾਸਤ੍ਤਂ ਪਾਦੇ ਦਲ਼੍ਹਂ ¶ ਗਹੇਤ੍ਵਾ ਪਰਿਵਤ੍ਤੇਤ੍ਵਾ ਅਧੋਸਿਰਂ ਕਤ੍ਵਾ ਅਨਾਲਮ੍ਬੇ ਆਕਾਸੇ ਵਿਸ੍ਸਜ੍ਜੇਸਿ. ਤੇਨ ਵੁਤ੍ਤਂ –

੧੫੫੦.

‘‘ਸੋ ¶ ਤਤ੍ਥ ਗਨ੍ਤ੍ਵਾ ਪਬ੍ਬਤਨ੍ਤਰਸ੍ਮਿਂ, ਅਨ੍ਤੋ ਪਵਿਸਿਤ੍ਵਾਨ ਪਦੁਟ੍ਠਚਿਤ੍ਤੋ;

ਅਸਂਵੁਤਸ੍ਮਿਂ ਜਗਤਿਪ੍ਪਦੇਸੇ, ਅਧੋਸਿਰਂ ਧਾਰਯਿ ਕਾਤਿਯਾਨੋ’’ਤਿ.

ਤਤ੍ਥ ਸੋ ਤਤ੍ਥ ਗਨ੍ਤ੍ਵਾਤਿ ਸੋ ਪੁਣ੍ਣਕੋ ਪਬ੍ਬਤਮਤ੍ਥਕਾ ਪਬ੍ਬਤਪਾਦਂ ਗਨ੍ਤ੍ਵਾ ਤਤ੍ਥ ਪਬ੍ਬਤਨ੍ਤਰੇ ਠਤ੍ਵਾ ਤਸ੍ਸ ਅਨ੍ਤੋ ਪਵਿਸਿਤ੍ਵਾ ਪਬ੍ਬਤਮਤ੍ਥਕੇ ਠਿਤਸ੍ਸ ਹੇਟ੍ਠਾ ਪਞ੍ਞਾਯਮਾਨੋ ਅਸਂਵੁਤੇ ਭੂਮਿਪਦੇਸੇ ਧਾਰੇਸੀਤਿ. ਨ ਆਦਿਤੋਵ ਧਾਰੇਸਿ, ਤਤ੍ਥ ਪਨ ਤਂ ਖਿਪਿਤ੍ਵਾ ਪਨ੍ਨਰਸਯੋਜਨਮਤ੍ਤਂ ਭਟ੍ਠਕਾਲੇ ਪਬ੍ਬਤਮੁਦ੍ਧਨਿ ਠਿਤੋਵ ਹਤ੍ਥਂ ਵਡ੍ਢੇਤ੍ਵਾ ਅਧੋਸਿਰਂ ਭਸ੍ਸਨ੍ਤਂ ਪਾਦੇਸੁ ਗਹੇਤ੍ਵਾ ਅਧੋਸਿਰਮੇਵ ਉਕ੍ਖਿਪਿਤ੍ਵਾ ਮੁਖਂ ਓਲੋਕੇਨ੍ਤੋ ‘‘ਨ ਮਰਤੀ’’ਤਿ ਞਤ੍ਵਾ ਦੁਤਿਯਮ੍ਪਿ ਖਿਪਿਤ੍ਵਾ ਤਿਂਸਯੋਜਨਮਤ੍ਤਂ ਭਟ੍ਠਕਾਲੇ ਤਥੇਵ ਉਕ੍ਖਿਪਿਤ੍ਵਾ ਪੁਨ ਤਸ੍ਸ ਮੁਖਂ ਓਲੋਕੇਨ੍ਤੋ ਜੀਵਨ੍ਤਮੇਵ ਦਿਸ੍ਵਾ ਚਿਨ੍ਤੇਸਿ ‘‘ਸਚੇ ਇਦਾਨਿ ਸਟ੍ਠਿਯੋਜਨਮਤ੍ਤਂ ਭਸ੍ਸਿਤ੍ਵਾ ਨ ਮਰਿਸ੍ਸਤਿ, ਪਾਦੇਸੁ ਨਂ ਗਹੇਤ੍ਵਾ ਪਬ੍ਬਤਮੁਦ੍ਧਨਿ ਪੋਥੇਤ੍ਵਾ ਮਾਰੇਸ੍ਸਾਮੀ’’ਤਿ ਅਥ ਨਂ ਤਤਿਯਮ੍ਪਿ ਖਿਪਿਤ੍ਵਾ ਸਟ੍ਠਿਯੋਜਨਮਤ੍ਤਂ ਭਟ੍ਠਕਾਲੇ ਹਤ੍ਥਂ ਵਡ੍ਢੇਤ੍ਵਾ ਪਾਦੇਸੁ ਗਹੇਤ੍ਵਾ ਉਕ੍ਖਿਪਿ. ਤਤੋ ਮਹਾਸਤ੍ਤੋ ਚਿਨ੍ਤੇਸਿ ‘‘ਅਯਂ ਮਂ ਪਠਮਂ ਪਨ੍ਨਰਸਯੋਜਨਟ੍ਠਾਨਂ ਖਿਪਿ, ਦੁਤਿਯਮ੍ਪਿ ਤਿਂਸਯੋਜਨਂ, ਤਤਿਯਮ੍ਪਿ ਸਟ੍ਠਿਯੋਜਨਂ, ਇਦਾਨਿ ਪੁਨ ਮਂ ਨ ਖਿਪਿਸ੍ਸਤਿ, ਉਕ੍ਖਿਪਨ੍ਤੋਯੇਵ ਪਬ੍ਬਤਮੁਦ੍ਧਨਿ ਪਹਰਿਤ੍ਵਾ ਮਾਰੇਸ੍ਸਤਿ, ਯਾਵ ਮਂ ਉਕ੍ਖਿਪਿਤ੍ਵਾ ਪਬ੍ਬਤਮੁਦ੍ਧਨਿ ਨ ਪੋਥੇਤਿ, ਤਾਵ ਨਂ ਅਧੋਸਿਰੋ ਹੁਤ੍ਵਾ ਓਲਮ੍ਬਨ੍ਤੋਵ ਮਾਰਣਕਾਰਣਂ ਪੁਚ੍ਛਿਸ੍ਸਾਮੀ’’ਤਿ. ਏਵਂ ਚਿਨ੍ਤੇਤ੍ਵਾ ¶ ਚ ਪਨ ਸੋ ਅਛਮ੍ਭਿਤੋ ਅਸਨ੍ਤਸਨ੍ਤੋ ਤਥਾ ਅਕਾਸਿ. ਤੇਨ ਵੁਤ੍ਤਂ ‘‘ਧਾਰਯਿ ਕਾਤਿਯਾਨੋ’’ਤਿ, ਤਿਕ੍ਖਤ੍ਤੁਂ ਖਿਪਿਤ੍ਵਾ ਧਾਰਯੀਤਿ ਅਤ੍ਥੋ.

੧੫੫੧.

‘‘ਸੋ ਲਮ੍ਬਮਾਨੋ ਨਰਕੇ ਪਪਾਤੇ, ਮਹਬ੍ਭਯੇ ਲੋਮਹਂਸੇ ਵਿਦੁਗ੍ਗੇ;

ਅਸਨ੍ਤਸਨ੍ਤੋ ਕੁਰੂਨਂ ਕਤ੍ਤੁਸੇਟ੍ਠੋ, ਇਚ੍ਚਬ੍ਰਵਿ ਪੁਣ੍ਣਕਂ ਨਾਮ ਯਕ੍ਖਂ.

੧੫੫੨.

‘‘ਅਰਿਯਾਵਕਾਸੋਸਿ ¶ ਅਨਰਿਯਰੂਪੋ, ਅਸਞ੍ਞਤੋ ਸਞ੍ਞਤਸਨ੍ਨਿਕਾਸੋ;

ਅਚ੍ਚਾਹਿਤਂ ਕਮ੍ਮਂ ਕਰੋਸਿ ਲੁਦ੍ਰਂ, ਭਾਵੇ ਚ ਤੇ ਕੁਸਲਂ ਨਤ੍ਥਿ ਕਿਞ੍ਚਿ.

੧੫੫੩.

‘‘ਯਂ ਮਂ ਪਪਾਤਸ੍ਮਿਂ ਪਪਾਤੁਮਿਚ੍ਛਸਿ, ਕੋ ਨੁ ਤਵਤ੍ਥੋ ਮਰਣੇਨ ਮਯ੍ਹਂ;

ਅਮਾਨੁਸਸ੍ਸੇਵ ਤਵਜ੍ਜ ਵਣ੍ਣੋ, ਆਚਿਕ੍ਖ ਮੇ ਤ੍ਵਂ ਕਤਮਾਸਿ ਦੇਵਤਾਤਿ.

ਤਤ੍ਥ ਸੋ ਲਮ੍ਬਮਾਨੋਤਿ ਸੋ ਕੁਰੂਨਂ ਕਤ੍ਤੁਸੇਟ੍ਠੋ ਤਤਿਯਵਾਰੇ ਲਮ੍ਬਮਾਨੋ. ਅਰਿਯਾਵਕਾਸੋਤਿ ਰੂਪੇਨ ਅਰਿਯਸਦਿਸੋ ਦੇਵਵਣ੍ਣੋ ਹੁਤ੍ਵਾ ਚਰਸਿ. ਅਸਞ੍ਞਤੋਤਿ ਕਾਯਾਦੀਹਿ ਅਸਞ੍ਞਤੋ ¶ ਦੁਸ੍ਸੀਲੋ. ਅਚ੍ਚਾਹਿਤਨ੍ਤਿ ਹਿਤਾਤਿਕ੍ਕਨ੍ਤਂ, ਅਤਿਅਹਿਤਂ ਵਾ. ਭਾਵੇ ਚ ਤੇਤਿ ਤਵ ਚਿਤ੍ਤੇ ਅਪ੍ਪਮਤ੍ਤਕਮ੍ਪਿ ਕੁਸਲਂ ਨਤ੍ਥਿ. ਅਮਾਨੁਸਸ੍ਸੇਵ ਤਵਜ੍ਜ ਵਣ੍ਣੋਤਿ ਅਜ੍ਜ ਤਵ ਇਦਂ ਕਾਰਣਂ ਅਮਾਨੁਸਸ੍ਸੇਵ. ਕਤਮਾਸਿ ਦੇਵਤਾਤਿ ਯਕ੍ਖਾਨਂ ਅਨ੍ਤਰੇ ਕਤਰਯਕ੍ਖੋ ਨਾਮ ਤ੍ਵਂ.

ਪੁਣ੍ਣਕੋ ਆਹ –

੧੫੫੪.

‘‘ਯਦਿ ਤੇ ਸੁਤੋ ਪੁਣ੍ਣਕੋ ਨਾਮ ਯਕ੍ਖੋ, ਰਞ੍ਞੋ ਕੁਵੇਰਸ੍ਸ ਹਿ ਸੋ ਸਜਿਬ੍ਬੋ;

ਭੂਮਿਨ੍ਧਰੋ ਵਰੁਣੋ ਨਾਮ ਨਾਗੋ, ਬ੍ਰਹਾ ਸੁਚੀ ਵਣ੍ਣਬਲੂਪਪਨ੍ਨੋ.

੧੫੫੫.

‘‘ਤਸ੍ਸਾਨੁਜਂ ਧੀਤਰਂ ਕਾਮਯਾਮਿ, ਇਰਨ੍ਧਤੀ ਨਾਮ ਸਾ ਨਾਗਕਞ੍ਞਾ;

ਤਸ੍ਸਾ ਸੁਮਜ੍ਝਾਯ ਪਿਯਾਯ ਹੇਤੁ, ਪਤਾਰਯਿਂ ਤੁਯ੍ਹ ਵਧਾਯ ਧੀਰਾ’’ਤਿ.

ਤਤ੍ਥ ਸਜਿਬ੍ਬੋਤਿ ਸਜੀਵੋ ਅਮਚ੍ਚੋ. ਬ੍ਰਹਾਤਿ ਆਰੋਹਪਰਿਣਾਹਸਮ੍ਪਨ੍ਨੋ ਉਟ੍ਠਾਪਿਤਕਞ੍ਚਨਰੂਪਸਦਿਸੋ. ਵਣ੍ਣਬਲੂਪਪਨ੍ਨੋਤਿ ਸਰੀਰਵਣ੍ਣੇਨ ਚ ਕਾਯਬਲੇਨ ਚ ਉਪਗਤੋ. ਤਸ੍ਸਾਨੁਜਨ੍ਤਿ ਤਸ੍ਸ ਅਨੁਜਾਤਂ ਧੀਤਰਂ. ਪਤਾਰਯਿਨ੍ਤਿ ਚਿਤ੍ਤਂ ਪਵਤ੍ਤੇਸਿਂ, ਸਨ੍ਨਿਟ੍ਠਾਨਮਕਾਸਿਨ੍ਤਿ ਅਤ੍ਥੋ.

ਤਂ ¶ ¶ ਸੁਤ੍ਵਾ ਮਹਾਸਤ੍ਤੋ ‘‘ਅਯਂ ਲੋਕੋ ਦੁਗ੍ਗਹਿਤੇਨ ਨਸ੍ਸਤਿ, ਨਾਗਮਾਣਵਿਕਂ ਪਤ੍ਥੇਨ੍ਤਸ੍ਸ ਮਮ ਮਰਣੇਨ ਕਿਂ ਪਯੋਜਨਂ, ਤਥਤੋ ਕਾਰਣਂ ਜਾਨਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੫੫੬.

‘‘ਮਾ ਹੇਵ ਤ੍ਵਂ ਯਕ੍ਖ ਅਹੋਸਿ ਮੂਲ਼੍ਹੋ, ਨਟ੍ਠਾ ਬਹੂ ਦੁਗ੍ਗਹੀਤੇਨ ਲੋਕੇ;

ਕਿਂ ਤੇ ਸੁਮਜ੍ਝਾਯ ਪਿਯਾਯ ਕਿਚ੍ਚਂ, ਮਰਣੇਨ ਮੇ ਇਙ੍ਘ ਸੁਣੋਮਿ ਸਬ੍ਬ’’ਨ੍ਤਿ.

ਤਂ ਸੁਤ੍ਵਾ ਤਸ੍ਸ ਆਚਿਕ੍ਖਨ੍ਤੋ ਪੁਣ੍ਣਕੋ ਆਹ –

੧੫੫੭.

‘‘ਮਹਾਨੁਭਾਵਸ੍ਸ ਮਹੋਰਗਸ੍ਸ, ਧੀਤੁਕਾਮੋ ਞਾਤਿਭਤੋਹਮਸ੍ਮਿ;

ਤਂ ਯਾਚਮਾਨਂ ਸਸੁਰੋ ਅਵੋਚ, ਯਥਾ ਮਮਞ੍ਞਿਂਸੁ ਸੁਕਾਮਨੀਤਂ.

੧੫੫੮.

‘‘ਦਜ੍ਜੇਮੁ ਖੋ ਤੇ ਸੁਤਨੁਂ ਸੁਨੇਤ੍ਤਂ, ਸੁਚਿਮ੍ਹਿਤਂ ਚਨ੍ਦਨਲਿਤ੍ਤਗਤ੍ਤਂ;

ਸਚੇ ਤੁਵਂ ਹਦਯਂ ਪਣ੍ਡਿਤਸ੍ਸ, ਧਮ੍ਮੇਨ ਲਦ੍ਧਾ ਇਧ ਮਾਹਰੇਸਿ;

ਏਤੇਨ ¶ ਵਿਤ੍ਤੇਨ ਕੁਮਾਰਿ ਲਬ੍ਭਾ, ਨਞ੍ਞਂ ਧਨਂ ਉਤ੍ਤਰਿ ਪਤ੍ਥਯਾਮ.

੧੫੫੯.

‘‘ਏਵਂ ਨ ਮੂਲ਼੍ਹੋਸ੍ਮਿ ਸੁਣੋਹਿ ਕਤ੍ਤੇ, ਨ ਚਾਪਿ ਮੇ ਦੁਗ੍ਗਹਿਤਤ੍ਥਿ ਕਿਞ੍ਚਿ;

ਹਦਯੇਨ ਤੇ ਧਮ੍ਮਲਦ੍ਧੇਨ ਨਾਗਾ, ਇਰਨ੍ਧਤਿਂ ਨਾਗਕਞ੍ਞਂ ਦਦਨ੍ਤਿ.

੧੫੬੦.

‘‘ਤਸ੍ਮਾ ਅਹਂ ਤੁਯ੍ਹਂ ਵਧਾਯ ਯੁਤ੍ਤੋ, ਏਵਂ ਮਮਤ੍ਥੋ ਮਰਣੇਨ ਤੁਯ੍ਹਂ;

ਇਧੇਵ ਤਂ ਨਰਕੇ ਪਾਤਯਿਤ੍ਵਾ, ਹਨ੍ਤ੍ਵਾਨ ਤਂ ਹਦਯਮਾਨਯਿਸ੍ਸ’’ਨ੍ਤਿ.

ਤਤ੍ਥ ਧੀਤੁਕਾਮੋਤਿ ਧੀਤਰਂ ਕਾਮੇਮਿ ਪਤ੍ਥੇਮਿ, ਧੀਤੁ ਅਤ੍ਥਾਯ ਵਿਚਰਾਮਿ. ਞਾਤਿਭਤੋਹਮਸ੍ਮੀਤਿ ਤਸ੍ਮਾ ਤਸ੍ਸ ਞਾਤਿਭਤਕੋ ਨਾਮ ਅਹਂ ਅਮ੍ਹਿ. ਤਨ੍ਤਿ ¶ ਤਂ ਨਾਗਕਞ੍ਞਂ. ਯਾਚਮਾਨਨ੍ਤਿ ਯਾਚਨ੍ਤਂ ਮਂ. ਯਥਾ ਮਨ੍ਤਿ ਯਸ੍ਮਾ ਮਂ. ਅਞ੍ਞਿਂਸੂਤਿ ਜਾਨਿਂਸੁ. ਸੁਕਾਮਨੀਤਨ੍ਤਿ ਸੁਟ੍ਠੁ ਏਸ ਕਾਮੇਨ ਨੀਤੋਤਿ ਸੁਕਾਮਨੀਤੋ, ਤਂ ਸੁਕਾਮਨੀਤਂ. ਤਸ੍ਮਾ ਸਸੁਰੋ ‘ਦਜ੍ਜੇਮੁ ਖੋ ਤੇ’’ਤਿਆਦਿਮਵੋਚ. ਤਤ੍ਥ ਦਜ੍ਜੇਮੂਤਿ ਦਦੇਯ੍ਯਾਮ. ਸੁਤਨੁਨ੍ਤਿ ਸੁਨ੍ਦਰਸਰੀਰਂ. ਇਧ ਮਾਹਰੇਸੀਤਿ ਇਧ ਨਾਗਭਵਨੇ ਧਮ੍ਮੇਨ ਲਦ੍ਧਾ ਆਹਰੇਯ੍ਯਾਸੀਤਿ.

ਤਸ੍ਸ ਤਂ ਕਥਂ ਸੁਤ੍ਵਾ ਮਹਾਸਤ੍ਤੋ ਚਿਨ੍ਤੇਸਿ ‘‘ਵਿਮਲਾਯ ਮਮ ਹਦਯੇਨ ਕਿਚ੍ਚਂ ਨਤ੍ਥਿ, ਵਰੁਣਨਾਗਰਾਜੇਨ ਮਮ ਧਮ੍ਮਕਥਂ ਸੁਤ੍ਵਾ ਮਣਿਨਾ ਮਂ ਪੂਜੇਤ੍ਵਾ ਤਤ੍ਥ ਗਤੇਨ ਮਮ ਧਮ੍ਮਕਥਿਕਭਾਵੋ ਵਣ੍ਣਿਤੋ ¶ ਭਵਿਸ੍ਸਤਿ, ਤਤੋ ਵਿਮਲਾਯ ਮਮ ਧਮ੍ਮਕਥਾਯ ਦੋਹਲ਼ੋ ਉਪ੍ਪਨ੍ਨੋ ਭਵਿਸ੍ਸਤਿ, ਵਰੁਣੇਨ ਦੁਗ੍ਗਹਿਤਂ ਗਹੇਤ੍ਵਾ ਪੁਣ੍ਣਕੋ ਆਣਤ੍ਤੋ ਭਵਿਸ੍ਸਤਿ, ਸ੍ਵਾਯਂ ਅਤ੍ਤਨਾ ਦੁਗ੍ਗਹਿਤੇਨ ਮਂ ਮਾਰੇਤੁਂ ਏਵਰੂਪਂ ਦੁਕ੍ਖਂ ਪਾਪੇਸਿ, ਮਮ ਪਣ੍ਡਿਤਭਾਵੋ ਠਾਨੁਪ੍ਪਤ੍ਤਿਕਾਰਣਚਿਨ੍ਤਨਸਮਤ੍ਥਤਾ ਇਮਸ੍ਮਿਂ ਮਂ ਮਾਰੇਨ੍ਤੇ ਕਿਂ ਕਰਿਸ੍ਸਤਿ, ਹਨ੍ਦਾਹਂ ਸਞ੍ਞਾਪੇਸ੍ਸਾਮਿ ਨ’’ਨ੍ਤਿ. ਚਿਨ੍ਤੇਤ੍ਵਾ ਚ ਪਨ ‘‘ਮਾਣਵ, ਸਾਧੁਨਰਧਮ੍ਮਂ ਨਾਮ ਜਾਨਾਮਿ, ਯਾਵਾਹਂ ਨ ਮਰਾਮਿ, ਤਾਵ ਮਂ ਪਬ੍ਬਤਮੁਦ੍ਧਨਿ ਨਿਸੀਦਾਪੇਤ੍ਵਾ ਸਾਧੁਨਰਧਮ੍ਮਂ ਨਾਮ ਸੁਣੋਹਿ, ਪਚ੍ਛਾ ਯਂ ਇਚ੍ਛਸਿ, ਤਂ ਕਰੇਯ੍ਯਾਸੀ’’ਤਿ ਵਤ੍ਵਾ ਸਾਧੁਨਰਧਮ੍ਮਂ ਵਣ੍ਣੇਤ੍ਵਾ ਅਤ੍ਤਨੋ ਜੀਵਿਤਂ ਆਹਰਾਪੇਨ੍ਤੋ ਸੋ ਅਧੋਸਿਰੋ ਓਲਮ੍ਬਨ੍ਤੋਵ ਗਾਥਮਾਹ –

੧੫੬੧.

‘‘ਖਿਪ੍ਪਂ ਮਮਂ ਉਦ੍ਧਰ ਕਾਤਿਯਾਨ, ਹਦਯੇਨ ਮੇ ਯਦਿ ਤੇ ਅਤ੍ਥਿ ਕਿਚ੍ਚਂ;

ਯੇ ¶ ਕੇਚਿਮੇ ਸਾਧੁਨਰਸ੍ਸ ਧਮ੍ਮਾ, ਸਬ੍ਬੇਵ ਤੇ ਪਾਤੁਕਰੋਮਿ ਅਜ੍ਜਾ’’ਤਿ.

ਤਂ ਸੁਤ੍ਵਾ ਪੁਣ੍ਣਕੋ ‘‘ਅਯਂ ਪਣ੍ਡਿਤੇਨ ਦੇਵਮਨੁਸ੍ਸਾਨਂ ਅਕਥਿਤਪੁਬ੍ਬੋ ਧਮ੍ਮੋ ਭਵਿਸ੍ਸਤਿ, ਖਿਪ੍ਪਮੇਵ ਨਂ ਉਦ੍ਧਰਿਤ੍ਵਾ ਸਾਧੁਨਰਧਮ੍ਮਂ ਸੁਣਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਮਹਾਸਤ੍ਤਂ ਉਕ੍ਖਿਪਿਤ੍ਵਾ ਪਬ੍ਬਤਮੁਦ੍ਧਨਿ ਨਿਸੀਦਾਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੫੬੨.

‘‘ਸੋ ਪੁਣ੍ਣਕੋ ਕੁਰੂਨਂ ਕਤ੍ਤੁਸੇਟ੍ਠਂ, ਨਗਮੁਦ੍ਧਨਿ ਖਿਪ੍ਪਂ ਪਤਿਟ੍ਠਪੇਤ੍ਵਾ;

ਅਸ੍ਸਤ੍ਥਮਾਸੀਨਂ ਸਮੇਕ੍ਖਿਯਾਨ, ਪਰਿਪੁਚ੍ਛਿ ਕਤ੍ਤਾਰਮਨੋਮਪਞ੍ਞਂ.

੧੫੬੩.

‘‘ਸਮੁਦ੍ਧਟੋ ¶ ਮੇਸਿ ਤੁਵਂ ਪਪਾਤਾ, ਹਦਯੇਨ ਤੇ ਅਜ੍ਜ ਮਮਤ੍ਥਿ ਕਿਚ੍ਚਂ;

ਯੇ ਕੇਚਿਮੇ ਸਾਧੁਨਰਸ੍ਸ ਧਮ੍ਮਾ, ਸਬ੍ਬੇਵ ਮੇ ਪਾਤੁਕਰੋਹਿ ਅਜ੍ਜਾ’’ਤਿ.

ਤਤ੍ਥ ਅਸ੍ਸਤ੍ਥਮਾਸੀਨਨ੍ਤਿ ਲਦ੍ਧਸ੍ਸਾਸਂ ਹੁਤ੍ਵਾ ਨਿਸਿਨ੍ਨਂ. ਸਮੇਕ੍ਖਿਯਾਨਾਤਿ ਦਿਸ੍ਵਾ. ਸਾਧੁਨਰਸ੍ਸ ਧਮ੍ਮਾਤਿ ਨਰਸ੍ਸ ਸਾਧੁਧਮ੍ਮਾ, ਸੁਨ੍ਦਰਧਮ੍ਮਾਤਿ ਅਤ੍ਥੋ.

ਤਂ ਸੁਤ੍ਵਾ ਮਹਾਸਤ੍ਤੋ ਆਹ –

੧੫੬੪.

‘‘ਸਮੁਦ੍ਧਟੋ ਤ੍ਯਸ੍ਮਿ ਅਹਂ ਪਪਾਤਾ, ਹਦਯੇਨ ਮੇ ਯਦਿ ਤੇ ਅਤ੍ਥਿ ਕਿਚ੍ਚਂ;

ਯੇ ਕੇਚਿਮੇ ਸਾਧੁਨਰਸ੍ਸ ਧਮ੍ਮਾ, ਸਬ੍ਬੇਵ ਤੇ ਪਾਤੁਕਰੋਮਿ ਅਜ੍ਜਾ’’ਤਿ.

ਤਤ੍ਥ ਤ੍ਯਸ੍ਮੀਤਿ ਤਯਾ ਅਸ੍ਮਿ.

ਅਥ ¶ ਨਂ ਮਹਾਸਤ੍ਤੋ ‘‘ਕਿਲਿਟ੍ਠਗਤ੍ਤੋਮ੍ਹਿ, ਨ੍ਹਾਯਾਮਿ ਤਾਵਾ’’ਤਿ ਆਹ. ਯਕ੍ਖੋਪਿ ‘‘ਸਾਧੂ’’ਤਿ ਨ੍ਹਾਨੋਦਕਂ ਆਹਰਿਤ੍ਵਾ ਨ੍ਹਾਤਕਾਲੇ ਮਹਾਸਤ੍ਤਸ੍ਸ ਦਿਬ੍ਬਦੁਸ੍ਸਗਨ੍ਧਮਾਲਾਦੀਨਿ ਦਤ੍ਵਾ ਅਲਙ੍ਕਤਪ੍ਪਟਿਯਤ੍ਤਕਾਲੇ ਦਿਬ੍ਬਭੋਜਨਂ ਅਦਾਸਿ. ਅਥ ਮਹਾਸਤ੍ਤੋ ਭੁਤ੍ਤਭੋਜਨੋ ਕਾਲ਼ਾਗਿਰਿਮਤ੍ਥਕਂ ਅਲਙ੍ਕਾਰਾਪੇਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਅਲਙ੍ਕਤਧਮ੍ਮਾਸਨੇ ਨਿਸੀਦਿਤ੍ਵਾ ਬੁਦ੍ਧਲੀਲਾਯ ਸਾਧੁਨਰਧਮ੍ਮਂ ਦੇਸੇਨ੍ਤੋ ਗਾਥਮਾਹ –

੧੫੬੫.

‘‘ਯਾਤਾਨੁਯਾਯੀ ਚ ਭਵਾਹਿ ਮਾਣਵ, ਅਲ੍ਲਞ੍ਚ ਪਾਣਿਂ ਪਰਿਵਜ੍ਜਯਸ੍ਸੁ;

ਮਾ ¶ ਚਸ੍ਸੁ ਮਿਤ੍ਤੇਸੁ ਕਦਾਚਿ ਦੁਬ੍ਭੀ, ਮਾ ਚ ਵਸਂ ਅਸਤੀਨਂ ਨਿਗਚ੍ਛੇ’’ਤਿ.

ਤਤ੍ਥ ਅਲ੍ਲਞ੍ਚ ਪਾਣਿਂ ਪਰਿਵਜ੍ਜਯਸ੍ਸੂਤਿ ਅਲ੍ਲਂ ਤਿਨ੍ਤਂ ਪਾਣਿਂ ਮਾ ਦਹਿ ਮਾ ਝਾਪੇਹਿ.

ਯਕ੍ਖੋ ਸਂਖਿਤ੍ਤੇਨ ਭਾਸਿਤੇ ਚਤ੍ਤਾਰੋ ਸਾਧੁਨਰਧਮ੍ਮੇ ਬੁਜ੍ਝਿਤੁਂ ਅਸਕ੍ਕੋਨ੍ਤੋ ਵਿਤ੍ਥਾਰੇਨ ਪੁਚ੍ਛਨ੍ਤੋ ਗਾਥਮਾਹ –

੧੫੬੬.

‘‘ਕਥਂ ¶ ਨੁ ਯਾਤਂ ਅਨੁਯਾਯਿ ਹੋਤਿ, ਅਲ੍ਲਞ੍ਚ ਪਾਣਿਂ ਦਹਤੇ ਕਥਂ ਸੋ;

ਅਸਤੀ ਚ ਕਾ ਕੋ ਪਨ ਮਿਤ੍ਤਦੁਬ੍ਭੋ, ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥ’’ਨ੍ਤਿ.

ਮਹਾਸਤ੍ਤੋਪਿਸ੍ਸ ਕਥੇਸਿ –

੧੫੬੭.

‘‘ਅਸਨ੍ਥੁਤਂ ਨੋਪਿ ਚ ਦਿਟ੍ਠਪੁਬ੍ਬਂ, ਯੋ ਆਸਨੇਨਾਪਿ ਨਿਮਨ੍ਤਯੇਯ੍ਯ;

ਤਸ੍ਸੇਵ ਅਤ੍ਥਂ ਪੁਰਿਸੋ ਕਰੇਯ੍ਯ, ਯਾਤਾਨੁਯਾਯੀਤਿ ਤਮਾਹੁ ਪਣ੍ਡਿਤਾ.

੧੫੬੮.

‘‘ਯਸ੍ਸੇਕਰਤ੍ਤਮ੍ਪਿ ਘਰੇ ਵਸੇਯ੍ਯ, ਯਤ੍ਥਨ੍ਨਪਾਨਂ ਪੁਰਿਸੋ ਲਭੇਯ੍ਯ;

ਨ ਤਸ੍ਸ ਪਾਪਂ ਮਨਸਾਪਿ ਚਿਨ੍ਤਯੇ, ਅਦੁਬ੍ਭਪਾਣਿਂ ਦਹਤੇ ਮਿਤ੍ਤਦੁਬ੍ਭੋ.

੧੫੬੯.

‘‘ਯਸ੍ਸ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;

ਨ ਤਸ੍ਸ ਸਾਖਂ ਭਞ੍ਜੇਯ੍ਯ, ਮਿਤ੍ਤਦੁਬ੍ਭੋ ਹਿ ਪਾਪਕੋ.

੧੫੭੦.

‘‘ਪੁਣ੍ਣਮ੍ਪਿ ਚੇਮਂ ਪਥਵਿਂ ਧਨੇਨ, ਦਜ੍ਜਿਤ੍ਥਿਯਾ ਪੁਰਿਸੋ ਸਮ੍ਮਤਾਯ;

ਲਦ੍ਧਾ ਖਣਂ ਅਤਿਮਞ੍ਞੇਯ੍ਯ ਤਮ੍ਪਿ, ਤਾਸਂ ਵਸਂ ਅਸਤੀਨਂ ਨ ਗਚ੍ਛੇ.

੧੫੭੧.

‘‘ਏਵਂ ¶ ਖੋ ਯਾਤਂ ਅਨੁਯਾਯਿ ਹੋਤਿ,

ਅਲ੍ਲਞ੍ਚ ਪਾਣਿਂ ਦਹਤੇ ਪੁਨੇਵਂ;

ਅਸਤੀ ਚ ਸਾ ਸੋ ਪਨ ਮਿਤ੍ਤਦੁਬ੍ਭੋ,

ਸੋ ਧਮ੍ਮਿਕੋ ਹੋਹਿ ਜਹਸ੍ਸੁ ਅਧਮ੍ਮ’’ਨ੍ਤਿ.

ਤਤ੍ਥ ¶ ਅਸਨ੍ਥੁਤਨ੍ਤਿ ਏਕਾਹਦ੍ਵੀਹਮ੍ਪਿ ਏਕਤੋ ਅਵੁਤ੍ਥਪੁਬ੍ਬਂ. ਯੋ ਆਸਨੇਨਾਪੀਤਿ ਯੋ ਏਵਰੂਪਂ ਪੁਗ੍ਗਲਂ ਆਸਨਮਤ੍ਤੇਨਪਿ ਨਿਮਨ੍ਤਯੇਯ੍ਯ, ਪਗੇਵ ਅਨ੍ਨਪਾਨਾਦੀਹਿ. ਤਸ੍ਸੇਵਾਤਿ ਤਸ੍ਸ ਪੁਬ੍ਬਕਾਰਿਸ੍ਸ ਅਤ੍ਥਂ ਪੁਰਿਸੋ ਕਰੋਤੇਵ. ਯਾਤਾਨੁਯਾਯੀਤਿ ਪੁਬ੍ਬਕਾਰਿਤਾਯ ਯਾਤਸ੍ਸ ਪੁਗ੍ਗਲਸ੍ਸ ਅਨੁਯਾਯੀ ¶ . ਪਠਮਂ ਕਰੋਨ੍ਤੋ ਹਿ ਯਾਯੀ ਨਾਮ, ਪਚ੍ਛਾ ਕਰੋਨ੍ਤੋ ਅਨੁਯਾਯੀ ਨਾਮਾਤਿ ਏਵਂ ਪਣ੍ਡਿਤਾ ਕਥੇਨ੍ਤਿ. ਅਯਂ ਦੇਵਰਾਜ, ਪਠਮੋ ਸਾਧੁਨਰਧਮ੍ਮੋ. ਅਦੁਬ੍ਭਪਾਣਿਨ੍ਤਿ ਅਦੁਬ੍ਭਕਂ ਅਤ੍ਤਨੋ ਭੁਞ੍ਜਨਹਤ੍ਥਮੇਵ ਦਹਨ੍ਤੋ ਹਿ ਮਿਤ੍ਤਦੁਬ੍ਭੀ ਨਾਮ ਹੋਤਿ. ਇਤਿ ਅਲ੍ਲਹਤ੍ਥਸ੍ਸ ਅਜ੍ਝਾਪਨਂ ਨਾਮ ਅਯਂ ਦੁਤਿਯੋ ਸਾਧੁਨਰਧਮ੍ਮੋ. ਨ ਤਸ੍ਸਾਤਿ ਤਸ੍ਸ ਸਾਖਂ ਵਾ ਪਤ੍ਤਂ ਵਾ ਨ ਭਞ੍ਜੇਯ੍ਯ. ਕਿਂਕਾਰਣਾ? ਮਿਤ੍ਤਦੁਬ੍ਭੋ ਹਿ ਪਾਪਕੋ. ਇਤਿ ਪਰਿਭੁਤ੍ਤਚ੍ਛਾਯਸ੍ਸ ਅਚੇਤਨਸ੍ਸ ਰੁਕ੍ਖਸ੍ਸਪਿ ਪਾਪਂ ਕਰੋਨ੍ਤੋ ਮਿਤ੍ਤਦੁਬ੍ਭੀ ਨਾਮ ਹੋਤਿ, ਕਿਮਙ੍ਗਂ ਪਨ ਮਨੁਸ੍ਸਭੂਤਸ੍ਸਾਤਿ. ਏਵਂ ਮਿਤ੍ਤੇਸੁ ਅਦੁਬ੍ਭਨਂ ਨਾਮ ਅਯਂ ਤਤਿਯੋ ਸਾਧੁਨਰਧਮ੍ਮੋ. ਦਜ੍ਜਿਤ੍ਥਿਯਾਤਿ ਦਦੇਯ੍ਯ ਇਤ੍ਥਿਯਾ. ਸਮ੍ਮਤਾਯਾਤਿ ‘‘ਅਹਮੇਵ ਤਸ੍ਸਾ ਪਿਯੋ, ਨ ਅਞ੍ਞੋ, ਮਞ੍ਞੇਵ ਸਾ ਇਚ੍ਛਤੀ’’ਤਿ ਏਵਂ ਸੁਟ੍ਠੁ ਮਤਾਯ. ਲਦ੍ਧਾ ਖਣਨ੍ਤਿ ਅਤਿਚਾਰਸ੍ਸ ਓਕਾਸਂ ਲਭਿਤ੍ਵਾ. ਅਸਤੀਨਨ੍ਤਿ ਅਸਦ੍ਧਮ੍ਮਸਮਨ੍ਨਾਗਤਾਨਂ ਇਤ੍ਥੀਨਂ. ਇਤਿ ਮਾਤੁਗਾਮਂ ਨਿਸ੍ਸਾਯ ਪਾਪਸ੍ਸ ਅਕਰਣਂ ਨਾਮ ਅਯਂ ਚਤੁਤ੍ਥੋ ਸਾਧੁਨਰਧਮ੍ਮੋ. ਸੋ ਧਮ੍ਮਿਕੋ ਹੋਹੀਤਿ ਦੇਵਰਾਜ, ਸੋ ਤ੍ਵਂ ਇਮੇਹਿ ਚਤੂਹਿ ਸਾਧੁਨਰਧਮ੍ਮੇਹਿ ਯੁਤ੍ਤੋ ਹੋਹੀਤਿ.

ਏਵਂ ਮਹਾਸਤ੍ਤੋ ਯਕ੍ਖਸ੍ਸ ਚਤ੍ਤਾਰੋ ਸਾਧੁਨਰਧਮ੍ਮੇ ਬੁਦ੍ਧਲੀਲਾਯ ਕਥੇਸਿ.

ਸਾਧੁਨਰਧਮ੍ਮਕਣ੍ਡਂ ਨਿਟ੍ਠਿਤਂ.

ਕਾਲ਼ਾਗਿਰਿਕਣ੍ਡਂ

ਤੇ ਧਮ੍ਮੇ ਸੁਣਨ੍ਤੋਯੇਵ ਪੁਣ੍ਣਕੋ ਸਲ੍ਲਕ੍ਖੇਸਿ ‘‘ਚਤੂਸੁਪਿ ਠਾਨੇਸੁ ਪਣ੍ਡਿਤੋ ਅਤ੍ਤਨੋ ਜੀਵਿਤਮੇਵ ਯਾਚਤਿ, ਅਯਂ ਖੋ ਮਯ੍ਹਂ ਪੁਬ੍ਬੇ ਅਸਨ੍ਥੁਤਸ੍ਸੇਵ ਸਕ੍ਕਾਰਮਕਾਸਿ, ਅਹਮਸ੍ਸ ਨਿਵੇਸਨੇ ਤੀਹਂ ਮਹਨ੍ਤਂ ਯਸਂ ਅਨੁਭਵਨ੍ਤੋ ਵਸਿਂ, ਅਹਞ੍ਚਿਮਂ ਪਾਪਕਮ੍ਮਂ ਕਰੋਨ੍ਤੋ ਮਾਤੁਗਾਮਂ ਨਿਸ੍ਸਾਯ ਕਰੋਮਿ, ਸਬ੍ਬਥਾਪਿ ਅਹਮੇਵ ਮਿਤ੍ਤਦੁਬ੍ਭੀ. ਸਚੇ ਪਣ੍ਡਿਤਂ ਅਪਰਜ੍ਝਾਮਿ, ਨ ਸਾਧੁਨਰਧਮ੍ਮੇ ਵਤ੍ਤਿਸ੍ਸਾਮਿ ¶ ਨਾਮ, ਤਸ੍ਮਾ ਕਿਂ ਮੇ ਨਾਗਮਾਣਵਿਕਾਯ, ਇਨ੍ਦਪਤ੍ਥਨਗਰਵਾਸੀਨਂ ਅਸ੍ਸੁਮੁਖਾਨਿ ਹਾਸੇਨ੍ਤੋ ਇਮਂ ਵੇਗੇਨ ਤਤ੍ਥ ਨੇਤ੍ਵਾ ਧਮ੍ਮਸਭਾਯਂ ਓਤਾਰੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੫੭੨.

‘‘ਅਵਸਿਂ ¶ ਅਹਂ ਤੁਯ੍ਹ ਤੀਹਂ ਅਗਾਰੇ, ਅਨ੍ਨੇਨ ਪਾਨੇਨ ਉਪਟ੍ਠਿਤੋਸ੍ਮਿ;

ਮਿਤ੍ਤੋ ਮਮਾਸੀ ਵਿਸਜ੍ਜਾਮਹਂ ਤਂ, ਕਾਮਂ ਘਰਂ ਉਤ੍ਤਮਪਞ੍ਞ ਗਚ੍ਛ.

੧੫੭੩.

ਅਪਿ ¶ ਹਾਯਤੁ ਨਾਗਕੁਲਾ ਅਤ੍ਥੋ, ਅਲਮ੍ਪਿ ਮੇ ਨਾਗਕਞ੍ਞਾਯ ਹੋਤੁ;

ਸੋ ਤ੍ਵਂ ਸਕੇਨੇਵ ਸੁਭਾਸਿਤੇਨ, ਮੁਤ੍ਤੋਸਿ ਮੇ ਅਜ੍ਜ ਵਧਾਯ ਪਞ੍ਞਾ’’ਤਿ.

ਤਤ੍ਥ ਉਪਟ੍ਠਿਤੋਸ੍ਮੀਤਿ ਤਯਾ ਉਪਟ੍ਠਿਤੋਸ੍ਮਿ. ਵਿਸਜ੍ਜਾਮਹਂ ਤਨ੍ਤਿ ਵਿਸ੍ਸਜ੍ਜੇਮਿ ਅਹਂ ਤਂ. ਕਾਮਨ੍ਤਿ ਏਕਂਸੇਨ. ਵਧਾਯਾਤਿ ਵਧਤੋ. ਪਞ੍ਞਾਤਿ ਪਞ੍ਞਵਨ੍ਤ.

ਅਥ ਨਂ ਮਹਾਸਤ੍ਤੋ ‘‘ਮਾਣਵ, ਤ੍ਵਂ ਤਾਵ ਮਂ ਅਤ੍ਤਨੋ ਘਰਂ ਮਾ ਪੇਸੇਹਿ, ਨਾਗਭਵਨਮੇਵ ਮਂ ਨੇਹੀ’’ਤਿ ਵਦਨ੍ਤੋ ਗਾਥਮਾਹ –

੧੫੭੪.

‘‘ਹਨ੍ਦ ਤੁਵਂ ਯਕ੍ਖ ਮਮਮ੍ਪਿ ਨੇਹਿ, ਸਸੁਰਂ ਤੇ ਅਤ੍ਥਂ ਮਯਿ ਚਰਸ੍ਸੁ;

ਮਯਞ੍ਚ ਨਾਗਾਧਿਪਤਿਂ ਵਿਮਾਨਂ, ਦਕ੍ਖੇਮੁ ਨਾਗਸ੍ਸ ਅਦਿਟ੍ਠਪੁਬ੍ਬ’’ਨ੍ਤਿ.

ਤਤ੍ਥ ਹਨ੍ਦਾਤਿ ਵਵਸ੍ਸਗ੍ਗਤ੍ਥੇ ਨਿਪਾਤੋ. ਸਸੁਰਂ ਤੇ ਅਤ੍ਥਂ ਮਯਿ ਚਰਸ੍ਸੂਤਿ ਤਵ ਸਸੁਰਸ੍ਸ ਸਨ੍ਤਕਂ ਅਤ੍ਥਂ ਮਯਿ ਚਰ ਮਾ ਨਾਸੇਹਿ. ਨਾਗਾਧਿਪਤਿਂ ਵਿਮਾਨਨ੍ਤਿ ਅਹਮ੍ਪਿ ਨਾਗਾਧਿਪਤਿਞ੍ਚ ਵਿਮਾਨਞ੍ਚਸ੍ਸ ਅਦਿਟ੍ਠਪੁਬ੍ਬਂ ਪਸ੍ਸੇਯ੍ਯਂ.

ਤਂ ਸੁਤ੍ਵਾ ਪੁਣ੍ਣਕੋ ਆਹ –

੧੫੭੫.

‘‘ਯਂ ਵੇ ਨਰਸ੍ਸ ਅਹਿਤਾਯ ਅਸ੍ਸ, ਨ ਤਂ ਪਞ੍ਞੋ ਅਰਹਤਿ ਦਸ੍ਸਨਾਯ;

ਅਥ ਕੇਨ ਵਣ੍ਣੇਨ ਅਮਿਤ੍ਤਗਾਮਂ, ਤੁਵਮਿਚ੍ਛਸਿ ਉਤ੍ਤਮਪਞ੍ਞ ਗਨ੍ਤੁ’’ਨ੍ਤਿ.

ਤਤ੍ਥ ਅਮਿਤ੍ਤਗਾਮਨ੍ਤਿ ਅਮਿਤ੍ਤਸ੍ਸ ਵਸਨਟ੍ਠਾਨਂ, ਅਮਿਤ੍ਤਸਮਾਗਮਨ੍ਤਿ ਅਤ੍ਥੋ.

ਅਥ ¶ ਨਂ ਮਹਾਸਤ੍ਤੋ ਆਹ –

੧੫੭੬.

‘‘ਅਦ੍ਧਾ ¶ ਪਜਾਨਾਮਿ ਅਹਮ੍ਪਿ ਏਤਂ, ਨ ਤਂ ਪਞ੍ਞੋ ਅਰਹਤਿ ਦਸ੍ਸਨਾਯ;

ਪਾਪਞ੍ਚ ਮੇ ਨਤ੍ਥਿ ਕਤਂ ਕੁਹਿਞ੍ਚਿ, ਤਸ੍ਮਾ ਨ ਸਙ੍ਕੇ ਮਰਣਾਗਮਾਯਾ’’ਤਿ.

ਤਤ੍ਥ ਮਰਣਾਗਮਾਯਾਤਿ ਮਰਣਸ੍ਸ ਆਗਮਾਯ.

ਅਪਿਚ ¶ , ਦੇਵਰਾਜ, ਤਾਦਿਸੋ ਯਕ੍ਖੋ ਕਕ੍ਖਲ਼ੋ ਮਯਾ ਧਮ੍ਮਕਥਾਯ ਪਲੋਭੇਤ੍ਵਾ ਮੁਦੁਕਤੋ, ਇਦਾਨੇਵ ਮਂ ‘‘ਅਲਂ ਮੇ ਨਾਗਮਾਣਵਿਕਾਯ, ਅਤ੍ਤਨੋ ਘਰਂ ਯਾਹੀ’’ਤਿ ਵਦੇਸਿ, ਨਾਗਰਾਜਸ੍ਸ ਮੁਦੁਕਰਣਂ ਮਮ ਭਾਰੋ, ਨੇਹਿਯੇਵ ਮਂ ਤਤ੍ਥਾਤਿ. ਤਸ੍ਸ ਤਂ ਵਚਨਂ ਸੁਤ੍ਵਾ ਪੁਣ੍ਣਕੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤੁਟ੍ਠਚਿਤ੍ਤੋ ਆਹ –

੧੫੭੭.

‘‘ਹਨ੍ਦ ਚ ਠਾਨਂ ਅਤੁਲਾਨੁਭਾਵਂ, ਮਯਾ ਸਹ ਦਕ੍ਖਸਿ ਏਹਿ ਕਤ੍ਤੇ;

ਯਤ੍ਥਚ੍ਛਤਿ ਨਚ੍ਚਗੀਤੇਹਿ ਨਾਗੋ, ਰਾਜਾ ਯਥਾ ਵੇਸ੍ਸਵਣੋ ਨਲ਼ਿਞ੍ਞਂ.

੧੫੭੮.

‘‘ਨਂ ਨਾਗਕਞ੍ਞਾ ਚਰਿਤਂ ਗਣੇਨ, ਨਿਕੀਲ਼ਿਤਂ ਨਿਚ੍ਚਮਹੋ ਚ ਰਤ੍ਤਿਂ;

ਪਹੂਤਮਾਲ੍ਯਂ ਬਹੁਪੁਪ੍ਫਛਨ੍ਨਂ, ਓਭਾਸਤੀ ਵਿਜ੍ਜੁਰਿਵਨ੍ਤਲਿਕ੍ਖੇ.

੧੫੭੯.

‘‘ਅਨ੍ਨੇਨ ਪਾਨੇਨ ਉਪੇਤਰੂਪਂ, ਨਚ੍ਚੇਹਿ ਗੀਤੇਹਿ ਚ ਵਾਦਿਤੇਹਿ;

ਪਰਿਪੂਰਂ ਕਞ੍ਞਾਹਿ ਅਲਙ੍ਕਤਾਹਿ, ਉਪਸੋਭਤਿ ਵਤ੍ਥਪਿਲਨ੍ਧਨੇਨਾ’’ਤਿ.

ਤਤ੍ਥ ਹਨ੍ਦ ਚਾਤਿ ਨਿਪਾਤਮਤ੍ਤਮੇਵ. ਠਾਨਨ੍ਤਿ ਨਾਗਰਾਜਸ੍ਸ ਵਸਨਟ੍ਠਾਨਂ. ਨਲ਼ਿਞ੍ਞਨ੍ਤਿ ਨਲ਼ਿਨਿਯਂ ਨਾਮ ਰਾਜਧਾਨਿਯਂ. ਚਰਿਤਂ ਗਣੇਨਾਤਿ ਤਂ ਨਾਗਕਞ੍ਞਾਨਂ ਗਣੇਨ ਚਰਿਤਂ. ਨਿਕੀਲ਼ਿਤਨ੍ਤਿ ਨਿਚ੍ਚਂ ਅਹੋ ਚ ਰਤ੍ਤਿਞ੍ਚ ਨਾਗਕਞ੍ਞਾਹਿ ਕੀਲ਼ਿਤਾਨੁਕੀਲ਼ਿਤਂ.

ਏਵਞ੍ਚ ¶ ਪਨ ਵਤ੍ਵਾ ਪੁਣ੍ਣਕੋ ਮਹਾਸਤ੍ਤਂ ਅਸ੍ਸਪਿਟ੍ਠਂ ਆਰੋਪੇਤ੍ਵਾ ਤਤ੍ਥ ਨੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੫੮੦.

‘‘ਸੋ ਪੁਣ੍ਣਕੋ ਕੁਰੂਨਂ ਕਤ੍ਤੁਸੇਟ੍ਠਂ, ਨਿਸੀਦਯੀ ਪਚ੍ਛਤੋ ਆਸਨਸ੍ਮਿਂ;

ਆਦਾਯ ਕਤ੍ਤਾਰਮਨੋਮਪਞ੍ਞਂ, ਉਪਾਨਯੀ ਭਵਨਂ ਨਾਗਰਞ੍ਞੋ.

੧੫੮੧.

‘‘ਪਤ੍ਵਾਨ ¶ ਠਾਨਂ ਅਤੁਲਾਨੁਭਾਵਂ, ਅਟ੍ਠਾਸਿ ਕਤ੍ਤਾ ਪਚ੍ਛਤੋ ਪੁਣ੍ਣਕਸ੍ਸ;

ਸਾਮਗ੍ਗਿਪੇਕ੍ਖਮਾਨੋ ਨਾਗਰਾਜਾ, ਪੁਬ੍ਬੇਵ ਜਾਮਾਤਰਮਜ੍ਝਭਾਸਥਾ’’ਤਿ.

ਤਤ੍ਥ ਸੋ ¶ ਪੁਣ੍ਣਕੋਤਿ ਭਿਕ੍ਖਵੇ, ਸੋ ਏਵਂ ਨਾਗਭਵਨਂ ਵਣ੍ਣੇਤ੍ਵਾ ਪਣ੍ਡਿਤਂ ਅਤ੍ਤਨੋ ਆਜਞ੍ਞਂ ਆਰੋਪੇਤ੍ਵਾ ਨਾਗਭਵਨਂ ਨੇਸਿ. ਠਾਨਨ੍ਤਿ ਨਾਗਰਾਜਸ੍ਸ ਵਸਨਟ੍ਠਾਨਂ. ਪਚ੍ਛਤੋ ਪੁਣ੍ਣਕਸ੍ਸਾਤਿ ਪੁਣ੍ਣਕਸ੍ਸ ਕਿਰ ਏਤਦਹੋਸਿ ‘‘ਸਚੇ ਨਾਗਰਾਜਾ ਪਣ੍ਡਿਤਂ ਦਿਸ੍ਵਾ ਮੁਦੁਚਿਤ੍ਤੋ ਭਵਿਸ੍ਸਤਿ, ਇਚ੍ਚੇਤਂ ਕੁਸਲਂ. ਨੋ ਚੇ, ਤਸ੍ਸ ਤਂ ਅਪਸ੍ਸਨ੍ਤਸ੍ਸੇਵ ਸਿਨ੍ਧਵਂ ਆਰੋਪੇਤ੍ਵਾ ਆਦਾਯ ਗਮਿਸ੍ਸਾਮੀ’’ਤਿ. ਅਥ ਨਂ ਪਚ੍ਛਤੋ ਠਪੇਸਿ. ਤੇਨ ਵੁਤ੍ਤਂ ‘‘ਪਚ੍ਛਤੋ ਪੁਣ੍ਣਕਸ੍ਸਾ’’ਤਿ. ਸਾਮਗ੍ਗਿਪੇਕ੍ਖਮਾਨੋਤਿ ਸਾਮਗ੍ਗਿਂ ਅਪੇਕ੍ਖਮਾਨੋ. ‘‘ਸਾਮਂ ਅਪੇਕ੍ਖੀ’’ਤਿਪਿ ਪਾਠੋ, ਅਤ੍ਤਨੋ ਜਾਮਾਤਰਂ ਪਸ੍ਸਿਤ੍ਵਾ ਪਠਮਤਰਂ ਸਯਮੇਵ ਅਜ੍ਝਭਾਸਥਾਤਿ ਅਤ੍ਥੋ.

ਨਾਗਰਾਜਾ ਆਹ –

੧੫੮੨.

‘‘ਯਨ੍ਨੁ ਤੁਵਂ ਅਗਮਾ ਮਚ੍ਚਲੋਕਂ, ਅਨ੍ਵੇਸਮਾਨੋ ਹਦਯਂ ਪਣ੍ਡਿਤਸ੍ਸ;

ਕਚ੍ਚਿ ਸਮਿਦ੍ਧੇਨ ਇਧਾਨੁਪਤ੍ਤੋ, ਆਦਾਯ ਕਤ੍ਤਾਰਮਨੋਮਪਞ੍ਞ’’ਨ੍ਤਿ.

ਤਤ੍ਥ ਕਚ੍ਚਿ ਸਮਿਦ੍ਧੇਨਾਤਿ ਕਚ੍ਚਿ ਤੇ ਮਨੋਰਥੇਨ ਸਮਿਦ੍ਧੇਨ ਨਿਪ੍ਫਨ੍ਨੇਨ ਇਧਾਗਤੋਸੀਤਿ ਪੁਚ੍ਛਤਿ.

ਪੁਣ੍ਣਕੋ ¶ ਆਹ –

੧੫੮੩.

‘‘ਅਯਞ੍ਹਿ ਸੋ ਆਗਤੋ ਯਂ ਤ੍ਵਮਿਚ੍ਛਸਿ, ਧਮ੍ਮੇਨ ਲਦ੍ਧੋ ਮਮ ਧਮ੍ਮਪਾਲੋ;

ਤਂ ਪਸ੍ਸਥ ਸਮ੍ਮੁਖਾ ਭਾਸਮਾਨਂ, ਸੁਖੋ ਹਵੇ ਸਪ੍ਪੁਰਿਸੇਹਿ ਸਙ੍ਗਮੋ’’ਤਿ.

ਤਤ੍ਥ ਯਂ ਤ੍ਵਮਿਚ੍ਛਸੀਤਿ ਯਂ ਤ੍ਵਂ ਇਚ੍ਛਸਿ. ‘‘ਯਨ੍ਤੁ ਮਿਚ੍ਛਸੀ’’ਤਿਪਿ ਪਾਠੋ. ਸਮ੍ਮੁਖਾ ਭਾਸਮਾਨਨ੍ਤਿ ਤਂ ਲੋਕਸਕ੍ਕਤਂ ਧਮ੍ਮਪਾਲਂ ਇਦਾਨਿ ਮਧੁਰੇਨ ਸਰੇਨ ਧਮ੍ਮਂ ਭਾਸਮਾਨਂ ਸਮ੍ਮੁਖਾਵ ਪਸ੍ਸਥ, ਸਪ੍ਪੁਰਿਸੇਹਿ ਏਕਟ੍ਠਾਨੇ ਸਮਾਗਮੋ ਹਿ ਨਾਮ ਸੁਖੋ ਹੋਤੀਤਿ.

ਕਾਲ਼ਾਗਿਰਿਕਣ੍ਡਂ ਨਿਟ੍ਠਿਤਂ.

ਤਤੋ ¶ ਨਾਗਰਾਜਾ ਮਹਾਸਤ੍ਤਂ ਦਿਸ੍ਵਾ ਗਾਥਮਾਹ –

੧੫੮੪.

‘‘ਅਦਿਟ੍ਠਪੁਬ੍ਬਂ ਦਿਸ੍ਵਾਨ, ਮਚ੍ਚੋ ਮਚ੍ਚੁਭਯਟ੍ਟਿਤੋ;

ਬ੍ਯਮ੍ਹਿਤੋ ਨਾਭਿਵਾਦੇਸਿ, ਨਯਿਦਂ ਪਞ੍ਞਵਤਾਮਿਵਾ’’ਤਿ.

ਤਤ੍ਥ ਬ੍ਯਮ੍ਹਿਤੋਤਿ ਭੀਤੋ. ਇਦਂ ਵੁਤ੍ਤਂ ਹੋਤਿ – ਪਣ੍ਡਿਤ, ਤ੍ਵਂ ਅਦਿਟ੍ਠਪੁਬ੍ਬਂ ਨਾਗਭਵਨਂ ਦਿਸ੍ਵਾ ਮਰਣਭਯੇਨ ਅਟ੍ਟਿਤੋ ਭੀਤੋ ਹੁਤ੍ਵਾ ਯਂ ਮਂ ਨਾਭਿਵਾਦੇਸਿ, ਇਦਂ ਕਾਰਣਂ ਪਞ੍ਞਵਨ੍ਤਾਨਂ ਨ ਹੋਤੀਤਿ.

ਏਵਂ ਵਨ੍ਦਨਂ ਪਚ੍ਚਾਸੀਸਨ੍ਤਂ ਨਾਗਰਾਜਾਨਂ ਮਹਾਸਤ੍ਤੋ ‘‘ਨ ਤ੍ਵਂ ਮਯਾ ਵਨ੍ਦਿਤਬ੍ਬੋ’’ਤਿ ਅਵਤ੍ਵਾਵ ਅਤ੍ਤਨੋ ਞਾਣਵਨ੍ਤਤਾਯ ਉਪਾਯਕੋਸਲ੍ਲੇਨ ‘‘ਅਹਂ ਵਜ੍ਝਪ੍ਪਤ੍ਤਭਾਵੇਨ ਨਂ ਤਂ ਵਨ੍ਦਾਮੀ’’ਤਿ ਵਦਨ੍ਤੋ ਗਾਥਾਦ੍ਵਯਮਾਹ –

੧੫੮੫.

‘‘ਨ ¶ ਚਮ੍ਹਿ ਬ੍ਯਮ੍ਹਿਤੋ ਨਾਗ, ਨ ਚ ਮਚ੍ਚੁਭਯਟ੍ਟਿਤੋ;

ਨ ਵਜ੍ਝੋ ਅਭਿਵਾਦੇਯ੍ਯ, ਵਜ੍ਝਂ ਵਾ ਨਾਭਿਵਾਦਯੇ.

੧੫੮੬.

‘‘ਕਥਂ ਨੋ ਅਭਿਵਾਦੇਯ੍ਯ, ਅਭਿਵਾਦਾਪਯੇਥ ਵੇ;

ਯਂ ਨਰੋ ਹਨ੍ਤੁਮਿਚ੍ਛੇਯ੍ਯ, ਤਂ ਕਮ੍ਮਂ ਨੁਪਪਜ੍ਜਤੀ’’ਤਿ.

ਤਸ੍ਸਤ੍ਥੋ – ਨੇਵਾਹਂ, ਨਾਗਰਾਜ, ਅਦਿਟ੍ਠਪੁਬ੍ਬਂ ਨਾਗਭਵਨਂ ਦਿਸ੍ਵਾ ਭੀਤੋ, ਨ ਮਰਣਭਯਟ੍ਟਿਤੋ. ਮਾਦਿਸਸ੍ਸ ਹਿ ਮਰਣਭਯਂ ਨਾਮ ਨਤ੍ਥਿ, ਵਜ੍ਝੋ ਪਨ ਅਭਿਵਾਦੇਤੁਂ, ਵਜ੍ਝਂ ਵਾ ਅਵਜ੍ਝੋਪਿ ਅਭਿਵਾਦਾਪੇਤੁਂ ਨ ਲਭਤਿ. ਯਞ੍ਹਿ ਨਰੋ ¶ ਹਨ੍ਤੁਮਿਚ੍ਛੇਯ੍ਯ, ਸੋ ਤਂ ਕਥਂ ਨੁ ਅਭਿਵਾਦੇਯ੍ਯ, ਕਥਂ ਵਾ ਤੇਨ ਅਤ੍ਤਾਨਂ ਅਭਿਵਾਦਾਪਯੇਥ ਵੇ. ਤਸ੍ਸ ਹਿ ਤਂ ਕਮ੍ਮਂ ਨ ਉਪਪਜ੍ਜਤਿ. ਤ੍ਵਞ੍ਚ ਕਿਰ ਮਂ ਮਾਰਾਪੇਤੁਂ ਇਮਂ ਆਣਾਪੇਸਿ, ਕਥਾਹਂ ਤਂ ਵਨ੍ਦਾਧੀਤਿ.

ਤਂ ਸੁਤ੍ਵਾ ਨਾਗਰਾਜਾ ਮਹਾਸਤ੍ਤਸ੍ਸ ਥੁਤਿਂ ਕਰੋਨ੍ਤੋ ਦ੍ਵੇ ਗਾਥਾ ਅਭਾਸਿ –

੧੫੮੭.

‘‘ਏਵਮੇਤਂ ਯਥਾ ਬ੍ਰੂਸਿ, ਸਚ੍ਚਂ ਭਾਸਸਿ ਪਣ੍ਡਿਤ;

ਨ ਵਜ੍ਝੋ ਅਭਿਵਾਦੇਯ੍ਯ, ਵਜ੍ਝਂ ਵਾ ਨਾਭਿਵਾਦਯੇ.

੧੫੮੮.

ਕਥਂ ¶ ਨੋ ਅਭਿਵਾਦੇਯ੍ਯ, ਅਭਿਵਾਦਾਪਯੇਥ ਵੇ;

ਯਂ ਨਰੋ ਹਨ੍ਤੁਮਿਚ੍ਛੇਯ੍ਯ, ਤਂ ਕਮ੍ਮਂ ਨੁਪਪਜ੍ਜਤੀ’’ਤਿ.

ਇਦਾਨਿ ਮਹਾਸਤ੍ਤੋ ਨਾਗਰਾਜੇਨ ਸਦ੍ਧਿਂ ਪਟਿਸਨ੍ਥਾਰਂ ਕਰੋਨ੍ਤੋ ਆਹ –

੧੫੮੯.

‘‘ਅਸਸ੍ਸਤਂ ਸਸ੍ਸਤਂ ਨੁ ਤਵਯਿਦਂ, ਇਦ੍ਧੀ ਜੁਤੀ ਬਲਵੀਰਿਯੂਪਪਤ੍ਤਿ;

ਪੁਚ੍ਛਾਮਿ ਤਂ ਨਾਗਰਾਜੇਤਮਤ੍ਥਂ, ਕਥਂ ਨੁ ਤੇ ਲਦ੍ਧਮਿਦਂ ਵਿਮਾਨਂ.

੧੫੯੦.

‘‘ਅਧਿਚ੍ਚਲਦ੍ਧਂ ਪਰਿਣਾਮਜਂ ਤੇ, ਸਯਂਕਤਂ ਉਦਾਹੁ ਦੇਵੇਹਿ ਦਿਨ੍ਨਂ;

ਅਕ੍ਖਾਹਿ ਮੇ ਨਾਗਰਾਜੇਤਮਤ੍ਥਂ, ਯਥੇਵ ਤੇ ਲਦ੍ਧਮਿਦਂ ਵਿਮਾਨ’’ਨ੍ਤਿ.

ਤਤ੍ਥ ਤਵਯਿਦਨ੍ਤਿ ਇਦਂ ਤਵ ਯਸਜਾਤਂ, ਵਿਮਾਨਂ ਵਾ ਅਸਸ੍ਸਤਂ ਸਸ੍ਸਤਸਦਿਸਂ, ‘‘ਮਾ ਖੋ ਯਸਂ ਨਿਸ੍ਸਾਯ ਪਾਪਮਕਾਸੀ’’ਤਿ ਇਮਿਨਾ ਪਦੇਨ ਅਤ੍ਤਨੋ ਜੀਵਿਤਂ ਯਾਚਤਿ. ਇਦ੍ਧੀਤਿ ਨਾਗਇਦ੍ਧਿ ਚ ਨਾਗਜੁਤਿ ਚ ਕਾਯਬਲਞ੍ਚ ਚੇਤਸਿਕਵੀਰਿਯਞ੍ਚ ਨਾਗਭਵਨੇ ਉਪਪਤ੍ਤਿ ਚ ¶ ਯਞ੍ਚ ਤੇ ਇਦਂ ਵਿਮਾਨਂ, ਪੁਚ੍ਛਾਮਿ ਤਂ ਨਾਗਰਾਜ, ਏਤਮਤ੍ਥਂ, ਕਥਂ ਨੁ ਤੇ ਇਦਂ ਸਬ੍ਬਂ ਲਦ੍ਧਨ੍ਤਿ. ਅਧਿਚ੍ਚਲਦ੍ਧਨ੍ਤਿ ਕਿਂ ਨੁ ਤਯਾ ਇਦਂ ਵਿਮਾਨਂ ਏਵਂ ਸਮ੍ਪਨ੍ਨਂ ਅਧਿਚ੍ਚ ਅਕਾਰਣੇਨ ਲਦ੍ਧਂ, ਉਦਾਹੁ ਉਤੁਪਰਿਣਾਮਜਂ ਤੇ ਇਦਂ, ਉਦਾਹੁ ਸਯਂ ਸਹਤ੍ਥੇਨੇਵ ਕਤਂ, ਉਦਾਹੁ ਦੇਵੇਹਿ ਤੇ ਦਿਨ੍ਨਂ, ਯਥੇਵ ਤੇ ਇਦਂ ਲਦ੍ਧਂ, ਏਤਂ ਮੇ ਅਤ੍ਥਂ ਅਕ੍ਖਾਹੀਤਿ.

ਤਂ ¶ ਸੁਤ੍ਵਾ ਨਾਗਰਾਜਾ ਆਹ –

੧੫੯੧.

‘‘ਨਾਧਿਚ੍ਚਲਦ੍ਧਂ ਨ ਪਰਿਣਾਮਜਂ ਮੇ, ਨ ਸਯਂਕਤਂ ਨਾਪਿ ਦੇਵੇਹਿ ਦਿਨ੍ਨਂ;

ਸਕੇਹਿ ਕਮ੍ਮੇਹਿ ਅਪਾਪਕੇਹਿ, ਪੁਞ੍ਞੇਹਿ ਮੇ ਲਦ੍ਧਮਿਦਂ ਵਿਮਾਨ’’ਨ੍ਤਿ.

ਤਤ੍ਥ ਅਪਾਪਕੇਹੀਤਿ ਅਲਾਮਕੇਹਿ.

ਤਤੋ ਮਹਾਸਤ੍ਤੋ ਆਹ –

੧੫੯੨.

‘‘ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਇਦ੍ਧੀ ਜੁਤੀ ਬਲਵੀਰਿਯੂਪਪਤ੍ਤਿ, ਇਦਞ੍ਚ ਤੇ ਨਾਗ ਮਹਾਵਿਮਾਨ’’ਨ੍ਤਿ.

ਤਤ੍ਥ ¶ ਕਿਂ ਤੇ ਵਤਨ੍ਤਿ ਨਾਗਰਾਜ, ਪੁਰਿਮਭਵੇ ਤਵ ਕਿਂ ਵਤਂ ਅਹੋਸਿ, ਕੋ ਪਨ ਬ੍ਰਹ੍ਮਚਰਿਯਵਾਸੋ, ਕਤਰਸ੍ਸ ਸੁਚਰਿਤਸ੍ਸੇਵੇਸ ਇਦ੍ਧਿਆਦਿਕੋ ਵਿਪਾਕੋਤਿ.

ਤਂ ਸੁਤ੍ਵਾ ਨਾਗਰਾਜਾ ਆਹ –

੧੫੯੩.

‘‘ਅਹਞ੍ਚ ਭਰਿਯਾ ਚ ਮਨੁਸ੍ਸਲੋਕੇ, ਸਦ੍ਧਾ ਉਭੋ ਦਾਨਪਤੀ ਅਹੁਮ੍ਹਾ;

ਓਪਾਨਭੂਤਂ ਮੇ ਘਰਂ ਤਦਾਸਿ, ਸਨ੍ਤਪ੍ਪਿਤਾ ਸਮਣਬ੍ਰਾਹ੍ਮਣਾ ਚ.

੧੫੯੪.

‘‘ਮਾਲਞ੍ਚ ਗਨ੍ਧਞ੍ਚ ਵਿਲੇਪਨਞ੍ਚ, ਪਦੀਪਿਯਂ ਸੇਯ੍ਯਮੁਪਸ੍ਸਯਞ੍ਚ;

ਅਚ੍ਛਾਦਨਂ ਸਾਯਨਮਨ੍ਨਪਾਨਂ, ਸਕ੍ਕਚ੍ਚ ਦਾਨਾਨਿ ਅਦਮ੍ਹ ਤਤ੍ਥ.

੧੫੯੫.

‘‘ਤਂ ਮੇ ਵਤਂ ਤਂ ਪਨ ਬ੍ਰਹ੍ਮਚਰਿਯਂ, ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਇਦ੍ਧੀ ਜੁਤੀ ਬਲਵੀਰਿਯੂਪਪਤ੍ਤਿ, ਇਦਞ੍ਚ ਮੇ ਧੀਰ ਮਹਾਵਿਮਾਨ’’ਨ੍ਤਿ.

ਤਤ੍ਥ ¶ ¶ ਮਨੁਸ੍ਸਲੋਕੇਤਿ ਅਙ੍ਗਰਟ੍ਠੇ ਕਾਲਚਮ੍ਪਾਨਗਰੇ. ਤਂ ਮੇ ਵਤਨ੍ਤਿ ਤਂ ਸਕ੍ਕਚ੍ਚਂ ਦਿਨ੍ਨਦਾਨਮੇਵ ਮਯ੍ਹਂ ਵਤ੍ਤਸਮਾਦਾਨਞ੍ਚ ਬ੍ਰਹ੍ਮਚਰਿਯਞ੍ਚ ਅਹੋਸਿ, ਤਸ੍ਸੇਵ ਸੁਚਰਿਤਸ੍ਸ ਅਯਂ ਇਦ੍ਧਾਦਿਕੋ ਵਿਪਾਕੋਤਿ.

ਮਹਾਸਤ੍ਤੋ ਆਹ –

੧੫੯੬.

‘‘ਏਵਂ ਚੇ ਤੇ ਲਦ੍ਧਮਿਦਂ ਵਿਮਾਨਂ, ਜਾਨਾਸਿ ਪੁਞ੍ਞਾਨਂ ਫਲੂਪਪਤ੍ਤਿਂ;

ਤਸ੍ਮਾ ਹਿ ਧਮ੍ਮਂ ਚਰ ਅਪ੍ਪਮਤ੍ਤੋ, ਯਥਾ ਵਿਮਾਨਂ ਪੁਨ ਮਾਵਸੇਸੀ’’ਤਿ.

ਤਤ੍ਥ ਜਾਨਾਸੀਤਿ ਸਚੇ ਤਯਾ ਦਾਨਾਨੁਭਾਵੇਨ ਤਂ ਲਦ੍ਧਂ, ਏਵਂ ਸਨ੍ਤੇ ਜਾਨਾਸਿ ਨਾਮ ਪੁਞ੍ਞਾਨਂ ਫਲਞ੍ਚ ਪੁਞ੍ਞਫਲੇਨ ਨਿਬ੍ਬਤ੍ਤਂ ਉਪਪਤ੍ਤਿਞ੍ਚ. ਤਸ੍ਮਾ ਹੀਤਿ ਯਸ੍ਮਾ ਪੁਞ੍ਞੇਹਿ ਤਯਾ ਇਦਂ ਲਦ੍ਧਂ, ਤਸ੍ਮਾ. ਪੁਨ ਮਾਵਸੇਸੀਤਿ ਪੁਨਪਿ ਯਥਾ ਇਮਂ ਨਾਗਭਵਨਂ ਅਜ੍ਝਾਵਸਸਿ, ਏਵਂ ਧਮ੍ਮਂ ਚਰ.

ਤਂ ਸੁਤ੍ਵਾ ਨਾਗਰਾਜਾ ਆਹ –

੧੫੯੭.

‘‘ਨਯਿਧ ¶ ਸਨ੍ਤਿ ਸਮਣਬ੍ਰਾਹ੍ਮਣਾ ਚ, ਯੇਸਨ੍ਨਪਾਨਾਨਿ ਦਦੇਮੁ ਕਤ੍ਤੇ;

ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ, ਯਥਾ ਵਿਮਾਨਂ ਪੁਨ ਮਾਵਸੇਮਾ’’ਤਿ.

ਮਹਾਸਤ੍ਤੋ ਆਹ –

੧੫੯੮.

‘‘ਭੋਗੀ ਹਿ ਤੇ ਸਨ੍ਤਿ ਇਧੂਪਪਨ੍ਨਾ, ਪੁਤ੍ਤਾ ਚ ਦਾਰਾ ਅਨੁਜੀਵਿਨੋ ਚ;

ਤੇਸੁ ਤੁਵਂ ਵਚਸਾ ਕਮ੍ਮੁਨਾ ਚ, ਅਸਮ੍ਪਦੁਟ੍ਠੋ ਚ ਭਵਾਹਿ ਨਿਚ੍ਚਂ.

੧੫੯੯.

‘‘ਏਵਂ ਤੁਵਂ ਨਾਗ ਅਸਮ੍ਪਦੋਸਂ, ਅਨੁਪਾਲਯ ਵਚਸਾ ਕਮ੍ਮੁਨਾ ਚ;

ਠਤ੍ਵਾ ਇਧ ਯਾਵਤਾਯੁਕਂ ਵਿਮਾਨੇ, ਉਦ੍ਧਂ ਇਤੋ ਗਚ੍ਛਸਿ ਦੇਵਲੋਕ’’ਨ੍ਤਿ.

ਤਤ੍ਥ ¶ ਭੋਗੀਤਿ ਭੋਗਿਨੋ, ਨਾਗਾਤਿ ਅਤ੍ਥੋ. ਤੇਸੂਤਿ ਤੇਸੁ ਪੁਤ੍ਤਦਾਰਾਦੀਸੁ ਭੋਗੀਸੁ ਵਾਚਾਯ ਕਮ੍ਮੇਨ ਚ ਨਿਚ੍ਚਂ ਅਸਮ੍ਪਦੁਟ੍ਠੋ ਭਵ. ਅਨੁਪਾਲਯਾਤਿ ਏਵਂ ਪੁਤ੍ਤਾਦੀਸੁ ਚੇਵ ਸੇਸਸਤ੍ਤੇਸੁ ਚ ਮੇਤ੍ਤਚਿਤ੍ਤਸਙ੍ਖਾਤਂ ਅਸਮ੍ਪਦੋਸਂ ਅਨੁਰਕ੍ਖ. ਉਦ੍ਧਂ ਇਤੋਤਿ ਇਤੋ ਨਾਗਭਵਨਤੋ ਚੁਤੋ ਉਪਰਿਦੇਵਲੋਕਂ ਗਮਿਸ੍ਸਤਿ. ਮੇਤ੍ਤਚਿਤ੍ਤਞ੍ਹਿ ਦਾਨਤੋ ਅਤਿਰੇਕਤਰਂ ਪੁਞ੍ਞਨ੍ਤਿ.

ਤਤੋ ਨਾਗਰਾਜਾ ¶ ਮਹਾਸਤ੍ਤਸ੍ਸ ਧਮ੍ਮਕਥਂ ਸੁਤ੍ਵਾ ‘‘ਨ ਸਕ੍ਕਾ ਪਣ੍ਡਿਤੇਨ ਬਹਿ ਪਪਞ੍ਚਂ ਕਾਤੁਂ, ਵਿਮਲਾਯ ਦਸ੍ਸੇਤ੍ਵਾ ਸੁਭਾਸਿਤਂ ਸਾਵੇਤ੍ਵਾ ਦੋਹਲ਼ਂ ਪਟਿਪ੍ਪਸ੍ਸਮ੍ਭੇਤ੍ਵਾ ਧਨਞ੍ਚਯਰਾਜਾਨਂ ਹਾਸੇਨ੍ਤੋ ਪਣ੍ਡਿਤਂ ਪੇਸੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਗਾਥਮਾਹ –

੧੬੦੦.

‘‘ਅਦ੍ਧਾ ਹਿ ਸੋ ਸੋਚਤਿ ਰਾਜਸੇਟ੍ਠੋ, ਤਯਾ ਵਿਨਾ ਯਸ੍ਸ ਤੁਵਂ ਸਜਿਬ੍ਬੋ;

ਦੁਕ੍ਖੂਪਨੀਤੋਪਿ ਤਯਾ ਸਮੇਚ੍ਚ, ਵਿਨ੍ਦੇਯ੍ਯ ਪੋਸੋ ਸੁਖਮਾਤੁਰੋਪੀ’’ਤਿ.

ਤਤ੍ਥ ਸਜਿਬ੍ਬੋਤਿ ਸਜੀਵੋ ਅਮਚ੍ਚੋ. ਸਮੇਚ੍ਚਾਤਿ ਤਯਾ ਸਹ ਸਮਾਗਨ੍ਤ੍ਵਾ. ਆਤੁਰੋਪੀਤਿ ਬਾਲ਼੍ਹਗਿਲਾਨੋਪਿ ਸਮਾਨੋ.

ਤਂ ਸੁਤ੍ਵਾ ਮਹਾਸਤ੍ਤੋ ਨਾਗਰਾਜਸ੍ਸ ਥੁਤਿਂ ਕਰੋਨ੍ਤੋ ਇਤਰਂ ਗਾਥਮਾਹ –

੧੬੦੧.

‘‘ਅਦ੍ਧਾ ਸਤਂ ਭਾਸਸਿ ਨਾਗ ਧਮ੍ਮਂ, ਅਨੁਤ੍ਤਰਂ ਅਤ੍ਥਪਦਂ ਸੁਚਿਣ੍ਣਂ;

ਏਤਾਦਿਸਿਯਾਸੁ ਹਿ ਆਪਦਾਸੁ, ਪਞ੍ਞਾਯਤੇ ਮਾਦਿਸਾਨਂ ਵਿਸੇਸੋ’’ਤਿ.

ਤਤ੍ਥ ¶ ਅਦ੍ਧਾ ਸਤਨ੍ਤਿ ਏਕਂਸੇਨ ਸਨ੍ਤਾਨਂ ਪਣ੍ਡਿਤਾਨਂ ਧਮ੍ਮਂ ਭਾਸਸਿ. ਅਤ੍ਥਪਦਨ੍ਤਿ ਹਿਤਕੋਟ੍ਠਾਸਂ. ਏਤਾਦਿਸਿਯਾਸੂਤਿ ਏਵਰੂਪਾਸੁ ਆਪਦਾਸੁ ਏਤਾਦਿਸੇ ਭਯੇ ਉਪਟ੍ਠਿਤੇ ਮਾਦਿਸਾਨਂ ਪਞ੍ਞਵਨ੍ਤਾਨਂ ਵਿਸੇਸੋ ਪਞ੍ਞਾਯਤਿ.

ਤਂ ਸੁਤ੍ਵਾ ਨਾਗਰਾਜਾ ਅਤਿਰੇਕਤਰਂ ਤੁਟ੍ਠੋ ਤਮੇਵ ਪੁਚ੍ਛਨ੍ਤੋ ਗਾਥਮਾਹ –

੧੬੦੨.

‘‘ਅਕ੍ਖਾਹਿ ¶ ਨੋ ਤਾਯਂ ਮੁਧਾ ਨੁ ਲਦ੍ਧੋ, ਅਕ੍ਖੇਹਿ ਨੋ ਤਾਯਂ ਅਜੇਸਿ ਜੂਤੇ;

ਧਮ੍ਮੇਨ ਲਦ੍ਧੋ ਇਤਿ ਤਾਯਮਾਹ, ਕਥਂ ਨੁ ਤ੍ਵਂ ਹਤ੍ਥਮਿਮਸ੍ਸ ਮਾਗਤੋ’’ਤਿ.

ਤਤ੍ਥ ਅਕ੍ਖਾਹਿ ਨੋਤਿ ਆਚਿਕ੍ਖ ਅਮ੍ਹਾਕਂ. ਤਾਯਨ੍ਤਿ ਤਂ ਅਯਂ. ਮੁਧਾ ਨੁ ਲਦ੍ਧੋਤਿ ਕਿਂ ਨੁ ਖੋ ਮੁਧਾ ਅਮੂਲਕੇਨੇਵ ਲਭਿ, ਉਦਾਹੁ ਜੂਤੇ ਅਜੇਸਿ. ਇਤਿ ਤਾਯਮਾਹਾਤਿ ਅਯਂ ਪੁਣ੍ਣਕੋ ‘‘ਧਮ੍ਮੇਨ ਮੇ ਪਣ੍ਡਿਤੋ ਲਦ੍ਧੋ’’ਤਿ ਵਦਤਿ. ਕਥਂ ਨੁ ਤ੍ਵਂ ਹਤ੍ਥਮਿਮਸ੍ਸ ਮਾਗਤੋਤਿ ਤ੍ਵਂ ਕਥਂ ਇਮਸ੍ਸ ਹਤ੍ਥਂ ਆਗਤੋਸਿ.

ਮਹਾਸਤ੍ਤੋ ਆਹ –

੧੬੦੩.

‘‘ਯੋ ਮਿਸ੍ਸਰੋ ਤਤ੍ਥ ਅਹੋਸਿ ਰਾਜਾ, ਤਮਾਯਮਕ੍ਖੇਹਿ ਅਜੇਸਿ ਜੂਤੇ;

ਸੋ ¶ ਮਂ ਜਿਤੋ ਰਾਜਾ ਇਮਸ੍ਸਦਾਸਿ, ਧਮ੍ਮੇਨ ਲਦ੍ਧੋਸ੍ਮਿ ਅਸਾਹਸੇਨਾ’’ਤਿ.

ਤਤ੍ਥ ਯੋ ਮਿਸ੍ਸਰੋਤਿ ਯੋ ਮਂ ਇਸ੍ਸਰੋ. ਇਮਸ੍ਸਦਾਸੀਤਿ ਇਮਸ੍ਸ ਪੁਣ੍ਣਕਸ੍ਸ ਅਦਾਸਿ.

ਤਂ ਸੁਤ੍ਵਾ ਨਾਗਰਾਜਾ ਤੁਟ੍ਠੋ ਅਹੋਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੬੦੪.

‘‘ਮਹੋਰਗੋ ਅਤ੍ਤਮਨੋ ਉਦਗ੍ਗੋ, ਸੁਤ੍ਵਾਨ ਧੀਰਸ੍ਸ ਸੁਭਾਸਿਤਾਨਿ;

ਹਤ੍ਥੇ ਗਹੇਤ੍ਵਾਨ ਅਨੋਮਪਞ੍ਞਂ, ਪਾਵੇਕ੍ਖਿ ਭਰਿਯਾਯ ਤਦਾ ਸਕਾਸੇ.

੧੬੦੫.

‘‘ਯੇਨ ਤ੍ਵਂ ਵਿਮਲੇ ਪਣ੍ਡੁ, ਯੇਨ ਭਤ੍ਤਂ ਨ ਰੁਚ੍ਚਤਿ;

ਨ ਚ ਮੇਤਾਦਿਸੋ ਵਣ੍ਣੋ, ਅਯਮੇਸੋ ਤਮੋਨੁਦੋ.

੧੬੦੬.

‘‘ਯਸ੍ਸ ¶ ਤੇ ਹਦਯੇਨਤ੍ਥੋ, ਆਗਤਾਯਂ ਪਭਙ੍ਕਰੋ;

ਤਸ੍ਸ ਵਾਕ੍ਯਂ ਨਿਸਾਮੇਹਿ, ਦੁਲ੍ਲਭਂ ਦਸ੍ਸਨਂ ਪੁਨਾ’’ਤਿ.

ਤਤ੍ਥ ¶ ਪਾਵੇਕ੍ਖੀਤਿ ਪਵਿਟ੍ਠੋ. ਯੇਨਾਤਿ ਭਦ੍ਦੇ ਵਿਮਲੇ, ਯੇਨ ਕਾਰਣੇਨ ਤ੍ਵਂ ਪਣ੍ਡੁ ਚੇਵ, ਨ ਚ ਤੇ ਭਤ੍ਤਂ ਰੁਚ੍ਚਤਿ. ਨ ਚ ਮੇਤਾਦਿਸੋ ਵਣ੍ਣੋਤਿ ਪਥਵਿਤਲੇ ਵਾ ਦੇਵਲੋਕੇ ਵਾ ਨ ਚ ਤਾਦਿਸੋ ਵਣ੍ਣੋ ਅਞ੍ਞਸ੍ਸ ਕਸ੍ਸਚਿ ਅਤ੍ਥਿ, ਯਾਦਿਸੋ ਏਤਸ੍ਸ ਗੁਣਵਣ੍ਣੋ ਪਤ੍ਥਟੋ. ਅਯਮੇਸੋ ਤਮੋਨੁਦੋਤਿ ਯਂ ਨਿਸ੍ਸਾਯ ਤਵ ਦੋਹਲ਼ੋ ਉਪ੍ਪਨ੍ਨੋ, ਅਯਮੇਵ ਸੋ ਸਬ੍ਬਲੋਕਸ੍ਸ ਤਮੋਨੁਦੋ. ਪੁਨਾਤਿ ਪੁਨ ਏਤਸ੍ਸ ਦਸ੍ਸਨਂ ਨਾਮ ਦੁਲ੍ਲਭਨ੍ਤਿ ਵਦਤਿ.

ਵਿਮਲਾਪਿ ਤਂ ਦਿਸ੍ਵਾ ਪਟਿਸਨ੍ਥਾਰਂ ਅਕਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੬੦੭.

‘‘ਦਿਸ੍ਵਾਨ ਤਂ ਵਿਮਲਾ ਭੂਰਿਪਞ੍ਞਂ, ਦਸਙ੍ਗੁਲੀ ਅਞ੍ਜਲਿਂ ਪਗ੍ਗਹੇਤ੍ਵਾ;

ਹਟ੍ਠੇਨ ਭਾਵੇਨ ਪਤੀਤਰੂਪਾ, ਇਚ੍ਚਬ੍ਰਵਿ ਕੁਰੂਨਂ ਕਤ੍ਤੁਸੇਟ੍ਠ’’ਨ੍ਤਿ.

ਤਤ੍ਥ ਹਟ੍ਠੇਨ ਭਾਵੇਨਾਤਿ ਪਹਟ੍ਠੇਨ ਚਿਤ੍ਤੇਨ. ਪਤੀਤਰੂਪਾਤਿ ਸੋਮਨਸ੍ਸਜਾਤਾ.

ਇਤੋ ਪਰਂ ਵਿਮਲਾਯ ਚ ਮਹਾਸਤ੍ਤਸ੍ਸ ਚ ਵਚਨਪ੍ਪਟਿਵਚਨਗਾਥਾ –

੧੬੦੮.

‘‘ਅਦਿਟ੍ਠਪੁਬ੍ਬਂ ਦਿਸ੍ਵਾਨ, ਮਚ੍ਚੋ ਮਚ੍ਚੁਭਯਟ੍ਟਿਤੋ;

ਬ੍ਯਮ੍ਹਿਤੋ ਨਾਭਿਵਾਦੇਸਿ, ਨਯਿਦਂ ਪਞ੍ਞਵਤਾਮਿਵ.

੧੬੦੯.

‘‘ਨ ਚਮ੍ਹਿ ਬ੍ਯਮ੍ਹਿਤੋ ਨਾਗਿ, ਨ ਚ ਮਚ੍ਚੁਭਯਟ੍ਟਿਤੋ;

ਨ ਵਜ੍ਝੋ ਅਭਿਵਾਦੇਯ੍ਯ, ਵਜ੍ਝਂ ਵਾ ਨਾਭਿਵਾਦਯੇ.

੧੬੧੦.

‘‘ਕਥਂ ਨੋ ਅਭਿਵਾਦੇਯ੍ਯ, ਅਭਿਵਾਦਾਪਯੇਥ ਵੇ;

ਯਂ ਨਰੋ ਹਨ੍ਤੁਮਿਚ੍ਛੇਯ੍ਯ, ਤਂ ਕਮ੍ਮਂ ਨੁਪਪਜ੍ਜਤਿ.

੧੬੧੧.

‘‘ਏਵਮੇਤਂ ਯਥਾ ਬ੍ਰੂਸਿ, ਸਚ੍ਚਂ ਭਾਸਸਿ ਪਣ੍ਡਿਤ;

ਨ ਵਜ੍ਝੋ ਅਭਿਵਾਦੇਯ੍ਯ, ਵਜ੍ਝਂ ਵਾ ਨਾਭਿਵਾਦਯੇ.

੧੬੧੨.

‘‘ਕਥਂ ¶ ¶ ਨੋ ਅਭਿਵਾਦੇਯ੍ਯ, ਅਭਿਵਾਦਾਪਯੇਥ ਵੇ;

ਯਂ ਨਰੋ ਹਨ੍ਤੁਮਿਚ੍ਛੇਯ੍ਯ, ਤਂ ਕਮ੍ਮਂ ਨੁਪਪਜ੍ਜਤਿ.

੧੬੧੩.

‘‘ਅਸਸ੍ਸਤਂ ਸਸ੍ਸਤਂ ਨੁ ਤਵਯਿਦਂ, ਇਦ੍ਧੀ ਜੁਤੀ ਬਲਵੀਰਿਯੂਪਪਤ੍ਤਿ;

ਪੁਚ੍ਛਾਮਿ ਤਂ ਨਾਗਕਞ੍ਞੇਤਮਤ੍ਥਂ, ਕਥਂ ਨੁ ਤੇ ਲਦ੍ਧਮਿਦਂ ਵਿਮਾਨਂ.

੧੬੧੪.

‘‘ਅਧਿਚ੍ਚਲਦ੍ਧਂ ¶ ਪਰਿਣਾਮਜਂ ਤੇ, ਸਯਂਕਤਂ ਉਦਾਹੁ ਦੇਵੇਹਿ ਦਿਨ੍ਨਂ;

ਅਕ੍ਖਾਹਿ ਮੇ ਨਾਗਕਞ੍ਞੇਤਮਤ੍ਥਂ, ਯਥੇਵ ਤੇ ਲਦ੍ਧਮਿਦਂ ਵਿਮਾਨਂ.

੧੬੧੫.

‘‘ਨਾਧਿਚ੍ਚਲਦ੍ਧਂ ਨ ਪਰਿਣਾਮਜਂ ਮੇ, ਨ ਸਯਂਕਥਂ ਨਾਪਿ ਦੇਵੇਹਿ ਦਿਨ੍ਨਂ;

ਸਕੇਹਿ ਕਮ੍ਮੇਹਿ ਅਪਾਪਕੇਹਿ, ਪੁਞ੍ਞੇਹਿ ਮੇ ਲਦ੍ਧਮਿਦਂ ਵਿਮਾਨਂ.

੧੬੧੬.

‘‘ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਇਦ੍ਧੀ ਜੁਤੀ ਬਲਵੀਰਿਯੂਪਪਤ੍ਤਿ, ਇਦਞ੍ਚ ਤੇ ਨਾਗਿ ਮਹਾਵਿਮਾਨਂ.

੧੬੧੭.

‘‘ਅਹਞ੍ਚ ਖੋ ਸਾਮਿਕੋ ਚਾਪਿ ਮਯ੍ਹਂ, ਸਦ੍ਧਾ ਉਭੋ ਦਾਨਪਤੀ ਅਹੁਮ੍ਹਾ;

ਓਪਾਨਭੂਤਂ ਮੇ ਘਰਂ ਤਦਾਸਿ, ਸਨ੍ਤਪ੍ਪਿਤਾ ਸਮਣਬ੍ਰਾਹ੍ਮਣਾ ਚ.

੧੬੧੮.

‘‘ਮਾਲਞ੍ਚ ਗਨ੍ਧਞ੍ਚ ਵਿਲੇਪਨਞ੍ਚ, ਪਦੀਪਿਯਂ ਸੇਯ੍ਯਮੁਪਸ੍ਸਯਞ੍ਚ;

ਅਚ੍ਛਾਦਨਂ ਸਾਯਨਮਨ੍ਨਪਾਨਂ, ਸਕ੍ਕਚ੍ਚ ਦਾਨਾਨਿ ਅਦਮ੍ਹ ਤਤ੍ਥ.

੧੬੧੯.

‘‘ਤਂ ਮੇ ਵਤਂ ਤਂ ਪਨ ਬ੍ਰਹ੍ਮਚਰਿਯਂ, ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਇਦ੍ਧੀ ਜੁਤੀ ਬਲਵੀਰਿਯੂਪਪਤ੍ਤਿ, ਇਦਞ੍ਚ ਮੇ ਧੀਰ ਮਹਾਵਿਮਾਨਂ.

੧੬੨੦.

‘‘ਏਵਂ ¶ ਚੇ ਤੇ ਲਦ੍ਧਮਿਦਂ ਵਿਮਾਨਂ, ਜਾਨਾਸਿ ਪੁਞ੍ਞਾਨਂ ਫਲੂਪਪਤ੍ਤਿਂ;

ਤਸ੍ਮਾ ਹਿ ਧਮ੍ਮਂ ਚਰ ਅਪ੍ਪਮਤ੍ਤਾ, ਯਥਾ ਵਿਮਾਨਂ ਪੁਨ ਮਾਵਸੇਸਿ.

੧੬੨੧.

‘‘ਨਯਿਧ ¶ ਸਨ੍ਤਿ ਸਮਣਬ੍ਰਾਹ੍ਮਣਾ ਚ, ਯੇਸਨ੍ਨਪਾਨਾਨਿ ਦਦੇਮੁ ਕਤ੍ਤੇ;

ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ, ਯਥਾ ਵਿਮਾਨਂ ਪੁਨ ਮਾਵਸੇਮ.

੧੬੨੨.

‘‘ਭੋਗੀ ¶ ਹਿ ਤੇ ਸਨ੍ਤਿ ਇਧੂਪਪਨ੍ਨਾ, ਪੁਤ੍ਤਾ ਚ ਦਾਰਾ ਅਨੁਜੀਵਿਨੋ ਚ;

ਤੇਸੁ ਤੁਵਂ ਵਚਸਾ ਕਮ੍ਮੁਨਾ ਚ, ਅਸਮ੍ਪਦੁਟ੍ਠਾ ਚ ਭਵਾਹਿ ਨਿਚ੍ਚਂ.

੧੬੨੩.

‘‘ਏਵਂ ਤੁਵਂ ਨਾਗਿ ਅਸਮ੍ਪਦੋਸਂ, ਅਨੁਪਾਲਯ ਵਚਸਾ ਕਮ੍ਮੁਨਾ ਚ;

ਠਤ੍ਵਾ ਇਧ ਯਾਵਤਾਯੁਕਂ ਵਿਮਾਨੇ, ਉਦ੍ਧਂ ਇਤੋ ਗਚ੍ਛਸਿ ਦੇਵਲੋਕਂ.

੧੬੨੪.

‘‘ਅਦ੍ਧਾ ਹਿ ਸੋ ਸੋਚਤਿ ਰਾਜਸੇਟ੍ਠੋ, ਤਯਾ ਵਿਨਾ ਯਸ੍ਸ ਤੁਵਂ ਸਜਿਬ੍ਬੋ;

ਦੁਕ੍ਖੂਪਨੀਤੋਪਿ ਤਯਾ ਸਮੇਚ੍ਚ, ਵਿਨ੍ਦੇਯ੍ਯ ਪੋਸੋ ਸੁਖਮਾਤੁਰੋਪਿ.

੧੬੨੫.

‘‘ਅਦ੍ਧਾ ਸਤਂ ਭਾਸਸਿ ਨਾਗਿ ਧਮ੍ਮਂ, ਅਨੁਤ੍ਤਰਂ ਅਤ੍ਥਪਦਂ ਸੁਚਿਣ੍ਣਂ;

ਏਤਾਦਿਸਿਯਾਸੁ ਹਿ ਆਪਦਾਸੁ, ਪਞ੍ਞਾਯਤੇ ਮਾਦਿਸਾਨਂ ਵਿਸੇਸੋ.

੧੬੨੬.

‘‘ਅਕ੍ਖਾਹਿ ਨੋ ਤਾਯਂ ਮੁਧਾ ਨੁ ਲਦ੍ਧੋ, ਅਕ੍ਖੇਹਿ ਨੋ ਤਾਯਂ ਅਜੇਸਿ ਜੂਤੇ;

ਧਮ੍ਮੇਨ ਲਦ੍ਧੋ ਇਤਿ ਤਾਯਮਾਹ, ਕਥਂ ਨੁ ਤ੍ਵਂ ਹਤ੍ਥਮਿਮਸ੍ਸ ਮਾਗਤੋ.

੧੬੨੭.

‘‘ਯੋ ਮਿਸ੍ਸਰੋ ਤਤ੍ਥ ਅਹੋਸਿ ਰਾਜਾ, ਤਮਾਯਮਕ੍ਖੇਹਿ ਅਜੇਸਿ ਜੂਤੇ;

ਸੋ ¶ ਮਂ ਜਿਤੋ ਰਾਜਾ ਇਮਸ੍ਸਦਾਸਿ, ਧਮ੍ਮੇਨ ਲਦ੍ਧੋਸ੍ਮਿ ਅਸਾਹਸੇਨਾ’’ਤਿ.

ਇਮਾਸਂ ਗਾਥਾਨਂ ਅਤ੍ਥੋ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਮਹਾਸਤ੍ਤਸ੍ਸ ¶ ਵਚਨਂ ਸੁਤ੍ਵਾ ਅਤਿਰੇਕਤਰਂ ਤੁਟ੍ਠਾ ਵਿਮਲਾ ਮਹਾਸਤ੍ਤਂ ਗਹੇਤ੍ਵਾ ਸਹਸ੍ਸਗਨ੍ਧੋਦਕਘਟੇਹਿ ਨ੍ਹਾਪੇਤ੍ਵਾ ਨ੍ਹਾਨਕਾਲੇ ਮਹਾਸਤ੍ਤਸ੍ਸ ਦਿਬ੍ਬਦੁਸ੍ਸਦਿਬ੍ਬਗਨ੍ਧਮਾਲਾਦੀਨਿ ਦਤ੍ਵਾ ਅਲਙ੍ਕਤਪ੍ਪਟਿਯਤ੍ਤਕਾਲੇ ਦਿਬ੍ਬਭੋਜਨਂ ਭੋਜੇਸਿ. ਮਹਾਸਤ੍ਤੋ ਭੁਤ੍ਤਭੋਜਨੋ ਅਲਙ੍ਕਤਾਸਨਂ ਪਞ੍ਞਾਪੇਤ੍ਵਾ ਅਲਙ੍ਕਤਧਮ੍ਮਾਸਨੇ ਨਿਸੀਦਿਤ੍ਵਾ ਬੁਦ੍ਧਲੀਲਾਯ ਧਮ੍ਮਂ ਦੇਸੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੬੨੮.

‘‘ਯਥੇਵ ਵਰੁਣੋ ਨਾਗੋ, ਪਞ੍ਹਂ ਪੁਚ੍ਛਿਤ੍ਥ ਪਣ੍ਡਿਤਂ;

ਤਥੇਵ ਨਾਗਕਞ੍ਞਾਪਿ, ਪਞ੍ਹਂ ਪੁਚ੍ਛਿਤ੍ਥ ਪਣ੍ਡਿਤਂ.

੧੬੨੯.

‘‘ਯਥੇਵ ਵਰੁਣਂ ਨਾਗਂ, ਧੀਰੋ ਤੋਸੇਸਿ ਪੁਚ੍ਛਿਤੋ;

ਤਥੇਵ ਨਾਗਕਞ੍ਞਮ੍ਪਿ, ਧੀਰੋ ਤੋਸੇਸਿ ਪੁਚ੍ਛਿਤੋ.

੧੬੩੦.

‘‘ਉਭੋਪਿ ¶ ਤੇ ਅਤ੍ਤਮਨੇ ਵਿਦਿਤ੍ਵਾ, ਮਹੋਰਗਂ ਨਾਗਕਞ੍ਞਞ੍ਚ ਧੀਰੋ;

ਅਛਮ੍ਭੀ ਅਭੀਤੋ ਅਲੋਮਹਟ੍ਠੋ, ਇਚ੍ਚਬ੍ਰਵਿ ਵਰੁਣਂ ਨਾਗਰਾਜਾਨਂ.

੧੬੩੧.

‘‘ਮਾ ਰੋਧਯਿ ਨਾਗ ਆਯਾਹਮਸ੍ਮਿ, ਯੇਨ ਤਵਤ੍ਥੋ ਇਦਂ ਸਰੀਰਂ;

ਹਦਯੇਨ ਮਂਸੇਨ ਕਰੋਹਿ ਕਿਚ੍ਚਂ, ਸਯਂ ਕਰਿਸ੍ਸਾਮਿ ਯਥਾਮਤਿ ਤੇ’’ਤਿ.

ਤਤ੍ਥ ਅਛਮ੍ਭੀਤਿ ਨਿਕ੍ਕਮ੍ਪੋ. ਅਲੋਮਹਟ੍ਠੋਤਿ ਭਯੇਨ ਅਹਟ੍ਠਲੋਮੋ. ਇਚ੍ਚਬ੍ਰਵੀਤਿ ਵੀਮਂਸਨਵਸੇਨ ਇਤਿ ਅਬ੍ਰਵਿ. ਮਾ ਰੋਧਯੀਤਿ ‘‘ਮਿਤ੍ਤਦੁਬ੍ਭਿਕਮ੍ਮਂ ਕਰੋਮੀ’’ਤਿ ਮਾ ਭਾਯਿ, ‘‘ਕਥਂ ਨੁ ਖੋ ਇਮਂ ਇਦਾਨਿ ਮਾਰੇਸ੍ਸਾਮੀ’’ਤਿ ਵਾ ਮਾ ਚਿਨ੍ਤਯਿ. ਨਾਗਾਤਿ ਵਰੁਣਂ ਆਲਪਤਿ. ਆਯਾਹਮਸ੍ਮੀਤਿ ਆਯੋ ਅਹਂ ਅਸ੍ਮਿ, ਅਯਮੇਵ ਵਾ ਪਾਠੋ. ਸਯਂ ਕਰਿਸ੍ਸਾਮੀਤਿ ਸਚੇ ਤ੍ਵਂ ‘‘ਇਮਸ੍ਸ ਸਨ੍ਤਿਕੇ ਇਦਾਨਿ ਧਮ੍ਮੋ ਮੇ ਸੁਤੋ’’ਤਿ ਮਂ ਮਾਰੇਤੁਂ ਨ ਵਿਸਹਸਿ, ਅਹਮੇਵ ਯਥਾ ਤਵ ਅਜ੍ਝਾਸਯੋ, ਤਥਾ ਸਯਂ ਕਰਿਸ੍ਸਾਮੀਤਿ.

ਨਾਗਰਾਜਾ ¶ ਆਹ –

੧੬੩੨.

‘‘ਪਞ੍ਞਾ ਹਵੇ ਹਦਯਂ ਪਣ੍ਡਿਤਾਨਂ, ਤੇ ਤ੍ਯਮ੍ਹ ਪਞ੍ਞਾਯ ਮਯਂ ਸੁਤੁਟ੍ਠਾ;

ਅਨੂਨਨਾਮੋ ਲਭਤਜ੍ਜ ਦਾਰਂ, ਅਜ੍ਜੇਵ ਤਂ ਕੁਰੁਯੋ ਪਾਪਯਾਤੂ’’ਤਿ.

ਤਤ੍ਥ ਤੇ ਤ੍ਯਮ੍ਹਾਤਿ ਤੇ ਮਯਂ ਤਵ ਪਞ੍ਞਾਯ ਸੁਤੁਟ੍ਠਾ. ਅਨੂਨਨਾਮੋਤਿ ਸਮ੍ਪੁਣ੍ਣਨਾਮੋ ਪੁਣ੍ਣਕੋ ਯਕ੍ਖਸੇਨਾਪਤਿ. ਲਭਤਜ੍ਜ ਦਾਰਨ੍ਤਿ ਲਭਤੁ ਅਜ੍ਜ ਦਾਰਂ, ਦਦਾਮਿ ਅਸ੍ਸ ਧੀਤਰਂ ਇਰਨ੍ਧਤਿਂ. ਪਾਪਯਾਤੂਤਿ ਅਜ੍ਜੇਵ ਤਂ ਕੁਰੁਰਟ੍ਠਂ ਪੁਣ੍ਣਕੋ ਪਾਪੇਤੁ.

ਏਵਞ੍ਚ ¶ ਪਨ ਵਤ੍ਵਾ ਵਰੁਣੋ ਨਾਗਰਾਜਾ ਇਰਨ੍ਧਤਿਂ ਪੁਣ੍ਣਕਸ੍ਸ ਅਦਾਸਿ. ਸੋ ਤਂ ਲਭਿਤ੍ਵਾ ਤੁਟ੍ਠਚਿਤ੍ਤੋ ਮਹਾਸਤ੍ਤੇਨ ਸਦ੍ਧਿਂ ਸਲ੍ਲਪਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੬੩੩.

‘‘ਸ ਪੁਣ੍ਣਕੋ ਅਤ੍ਤਮਨੋ ਉਦਗ੍ਗੋ, ਇਰਨ੍ਧਤਿਂ ਨਾਗਕਞ੍ਞਂ ਲਭਿਤ੍ਵਾ;

ਹਟ੍ਠੇਨ ਭਾਵੇਨ ਪਤੀਤਰੂਪੋ, ਇਚ੍ਚਬ੍ਰਵਿ ਕੁਰੂਨਂ ਕਤ੍ਤੁਸੇਟ੍ਠਂ.

੧੬੩੪.

‘‘ਭਰਿਯਾਯ ਮਂ ਤ੍ਵਂ ਅਕਰਿ ਸਮਙ੍ਗਿਂ, ਅਹਞ੍ਚ ਤੇ ਵਿਧੁਰ ਕਰੋਮਿ ਕਿਚ੍ਚਂ;

ਇਦਞ੍ਚ ਤੇ ਮਣਿਰਤਨਂ ਦਦਾਮਿ, ਅਜ੍ਜੇਵ ਤਂ ਕੁਰੁਯੋ ਪਾਪਯਾਮੀ’’ਤਿ.

ਤਤ੍ਥ ¶ ਮਣਿਰਤਨਨ੍ਤਿ ਪਣ੍ਡਿਤ, ਅਹਂ ਤਵ ਗੁਣੇਸੁ ਪਸਨ੍ਨੋ ਅਰਹਾਮਿ ਤਵ ਅਨੁਚ੍ਛਵਿਕਂ ਕਿਚ੍ਚਂ ਕਾਤੁਂ, ਤਸ੍ਮਾ ਇਮਞ੍ਚ ਤੇ ਚਕ੍ਕਵਤ੍ਤਿਪਰਿਭੋਗਂ ਮਣਿਰਤਨਂ ਦੇਮਿ, ਅਜ੍ਜੇਵ ਤਂ ਇਨ੍ਦਪਤ੍ਥਂ ਪਾਪੇਮੀਤਿ.

ਅਥ ਮਹਾਸਤ੍ਤੋ ਤਸ੍ਸ ਥੁਤਿਂ ਕਰੋਨ੍ਤੋ ਇਤਰਂ ਗਾਥਮਾਹ –

੧੬੩੫.

‘‘ਅਜੇਯ੍ਯਮੇਸਾ ਤਵ ਹੋਤੁ ਮੇਤ੍ਤਿ, ਭਰਿਯਾਯ ਕਚ੍ਚਾਨ ਪਿਯਾਯ ਸਦ੍ਧਿਂ;

ਆਨਨ੍ਦਿ ਵਿਤ੍ਤੋ ਸੁਮਨੋ ਪਤੀਤੋ, ਦਤ੍ਵਾ ਮਣਿਂ ਮਞ੍ਚ ਨਯਿਨ੍ਦਪਤ੍ਥ’’ਨ੍ਤਿ.

ਤਤ੍ਥ ¶ ਅਜੇਯ੍ਯਮੇਸਾਤਿ ਏਸਾ ਤਵ ਭਰਿਯਾਯ ਸਦ੍ਧਿਂ ਪਿਯਸਂਵਾਸਮੇਤ੍ਤਿ ਅਜੇਯ੍ਯਾ ਹੋਤੁ. ‘‘ਆਨਨ੍ਦਿ ਵਿਤ੍ਤੋ’’ਤਿਆਦੀਹਿ ਪੀਤਿਸਮਙ੍ਗਿਭਾਵਮੇਵਸ੍ਸ ਵਦਤਿ. ਨਯਿਨ੍ਦਪਤ੍ਥਨ੍ਤਿ ਨਯ ਇਨ੍ਦਪਤ੍ਥਂ.

ਤਂ ਸੁਤ੍ਵਾ ਪੁਣ੍ਣਕੋ ਤਥਾ ਅਕਾਸਿ. ਤੇਨ ਵੁਤ੍ਤਂ –

੧੬੩੬.

‘‘ਸ ਪੁਣ੍ਣਕੋ ਕੁਰੂਨਂ ਕਤ੍ਤੁਸੇਟ੍ਠਂ, ਨਿਸੀਦਯੀ ਪੁਰਤੋ ਆਸਨਸ੍ਮਿਂ;

ਆਦਾਯ ਕਤ੍ਤਾਰਮਨੋਮਪਞ੍ਞਂ, ਉਪਾਨਯੀ ਨਗਰਂ ਇਨ੍ਦਪਤ੍ਥਂ.

੧੬੩੭.

‘‘ਮਨੋ ਮਨੁਸ੍ਸਸ੍ਸ ਯਥਾਪਿ ਗਚ੍ਛੇ, ਤਤੋਪਿਸ੍ਸ ਖਿਪ੍ਪਤਰਂ ਅਹੋਸਿ;

ਸ ਪੁਣ੍ਣਕੋ ਕੁਰੂਨਂ ਕਤ੍ਤੁਸੇਟ੍ਠਂ, ਉਪਾਨਯੀ ਨਗਰਂ ਇਨ੍ਦਪਤ੍ਥਂ.

੧੬੩੮.

‘‘ਏਤਿਨ੍ਦਪਤ੍ਥਂ ¶ ਨਗਰਂ ਪਦਿਸ੍ਸਤਿ, ਰਮ੍ਮਾਨਿ ਚ ਅਮ੍ਬਵਨਾਨਿ ਭਾਗਸੋ;

ਅਹਞ੍ਚ ਭਰਿਯਾਯ ਸਮਙ੍ਗਿਭੂਤੋ, ਤੁਵਞ੍ਚ ਪਤ੍ਤੋਸਿ ਸਕਂ ਨਿਕੇਤ’’ਨ੍ਤਿ.

ਤਤ੍ਥ ਯਥਾਪਿ ਗਚ੍ਛੇਤਿ ਮਨੋ ਨਾਮ ਕਿਞ੍ਚਾਪਿ ਨ ਗਚ੍ਛਤਿ, ਦੂਰੇ ਆਰਮ੍ਮਣਂ ਗਣ੍ਹਨ੍ਤੋ ਪਨ ਗਤੋਤਿ ਵੁਚ੍ਚਤਿ, ਤਸ੍ਮਾ ਮਨਸ੍ਸ ਆਰਮ੍ਮਣਗ੍ਗਹਣਤੋਪਿ ਖਿਪ੍ਪਤਰਂ ਤਸ੍ਸ ਮਨੋਮਯਸਿਨ੍ਧਵਸ੍ਸ ਗਮਨਂ ਅਹੋਸੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਏਤਿਨ੍ਦਪਤ੍ਥਨ੍ਤਿ ਅਸ੍ਸਪਿਟ੍ਠੇ ਨਿਸਿਨ੍ਨੋਯੇਵਸ੍ਸ ਦਸ੍ਸੇਨ੍ਤੋ ਏਵਮਾਹ. ਸਕਂ ਨਿਕੇਤਨ੍ਤਿ ਤ੍ਵਞ੍ਚ ਅਤ੍ਤਨੋ ਨਿਵੇਸਨਂ ਸਮ੍ਪਤ੍ਤੋਤਿ ਆਹ.

ਤਸ੍ਮਿਂ ਪਨ ਦਿਵਸੇ ਪਚ੍ਚੂਸਕਾਲੇ ਰਾਜਾ ਸੁਪਿਨਂ ਅਦ੍ਦਸ. ਏਵਰੂਪੋ ਸੁਪਿਨੋ ਅਹੋਸਿ – ਰਞ੍ਞੋ ਨਿਵੇਸਨਦ੍ਵਾਰੇ ਪਞ੍ਞਾਕ੍ਖਨ੍ਧੋ ਸੀਲਮਯਸਾਖੋ ਪਞ੍ਚਗੋਰਸਫਲੋ ਅਲਙ੍ਕਤਹਤ੍ਥਿਗਵਾਸ੍ਸਪਟਿਚ੍ਛਨ੍ਨੋ ਮਹਾਰੁਕ੍ਖੋ ¶ ਠਿਤੋ. ਮਹਾਜਨੋ ਤਸ੍ਸ ਸਕ੍ਕਾਰਂ ਕਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨੋ ¶ ਅਟ੍ਠਾਸਿ. ਅਥੇਕੋ ਕਣ੍ਹਪੁਰਿਸੋ ਫਰੁਸੋ ਰਤ੍ਤਸਾਟਕਨਿਵਤ੍ਥੋ ਰਤ੍ਤਪੁਪ੍ਫਕਣ੍ਣਧਰੋ ਆਵੁਧਹਤ੍ਥੋ ਆਗਨ੍ਤ੍ਵਾ ਮਹਾਜਨਸ੍ਸ ਪਰਿਦੇਵਨ੍ਤਸ੍ਸੇਵ ਤਂ ਰੁਕ੍ਖਂ ਸਮੂਲਂ ਛਿਨ੍ਦਿਤ੍ਵਾ ਆਕਡ੍ਢਨ੍ਤੋ ਆਦਾਯ ਗਨ੍ਤ੍ਵਾ ਪੁਨ ਤਂ ਆਹਰਿਤ੍ਵਾ ਪਕਤਿਟ੍ਠਾਨੇਯੇਵ ਠਪੇਤ੍ਵਾ ਪਕ੍ਕਾਮੀਤਿ. ਰਾਜਾ ਤਂ ਸੁਪਿਨਂ ਪਰਿਗ੍ਗਣ੍ਹਨ੍ਤੋ ‘‘ਮਹਾਰੁਕ੍ਖੋ ਵਿਯ ਨ ਅਞ੍ਞੋ ਕੋਚਿ, ਵਿਧੁਰਪਣ੍ਡਿਤੋ. ਮਹਾਜਨਸ੍ਸ ਪਰਿਦੇਵਨ੍ਤਸ੍ਸੇਵ ਤਂ ਸਮੂਲਂ ਛਿਨ੍ਦਿਤ੍ਵਾ ਆਦਾਯ ਗਤਪੁਰਿਸੋ ਵਿਯ ਨ ਅਞ੍ਞੋ ਕੋਚਿ, ਪਣ੍ਡਿਤਂ ਗਹੇਤ੍ਵਾ ਗਤਮਾਣਵੋ. ਪੁਨ ਤਂ ਆਹਰਿਤ੍ਵਾ ਪਕਤਿਟ੍ਠਾਨੇਯੇਵ ਠਪੇਤ੍ਵਾ ਗਤੋ ਵਿਯ ਸੋ ਮਾਣਵੋ ਪੁਨ ਤਂ ਪਣ੍ਡਿਤਂ ਆਨੇਤ੍ਵਾ ਧਮ੍ਮਸਭਾਯ ਦ੍ਵਾਰੇ ਠਪੇਤ੍ਵਾ ਪਕ੍ਕਮਿਸ੍ਸਤਿ. ਅਦ੍ਧਾ ਅਜ੍ਜ ਮਯਂ ਪਣ੍ਡਿਤਂ ਪਸ੍ਸਿਸ੍ਸਾਮਾ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਸੋਮਨਸ੍ਸਪਤ੍ਤੋ ਸਕਲਨਗਰਂ ਅਲਙ੍ਕਾਰਾਪੇਤ੍ਵਾ ਧਮ੍ਮਸਭਂ ਸਜ੍ਜਾਪੇਤ੍ਵਾ ਅਲਙ੍ਕਤਰਤਨਮਣ੍ਡਪੇ ਧਮ੍ਮਾਸਨਂ ਪਞ੍ਞਾਪੇਤ੍ਵਾ ਏਕਸਤਰਾਜਅਮਚ੍ਚਗਣਨਗਰਵਾਸਿਜਾਨਪਦਪਰਿਵੁਤੋ ‘‘ਅਜ੍ਜ ਤੁਮ੍ਹੇ ਪਣ੍ਡਿਤਂ ਪਸ੍ਸਿਸ੍ਸਥ, ਮਾ ਸੋਚਿਤ੍ਥਾ’’ਤਿ ਮਹਾਜਨਂ ਅਸ੍ਸਾਸੇਤ੍ਵਾ ਪਣ੍ਡਿਤਸ੍ਸ ਆਗਮਨਂ ਓਲੋਕੇਨ੍ਤੋ ਧਮ੍ਮਸਭਾਯਂ ਨਿਸੀਦਿ. ਅਮਚ੍ਚਾਦਯੋਪਿ ਨਿਸੀਦਿਂਸੁ. ਤਸ੍ਮਿਂ ਖਣੇ ਪੁਣ੍ਣਕੋਪਿ ਪਣ੍ਡਿਤਂ ਓਤਾਰੇਤ੍ਵਾ ਧਮ੍ਮਸਭਾਯ ਦ੍ਵਾਰੇ ਪਰਿਸਮਜ੍ਝੇਯੇਵ ਠਪੇਤ੍ਵਾ ਇਰਨ੍ਧਤਿਂ ਆਦਾਯ ਦੇਵਨਗਰਮੇਵ ਗਤੋ. ਤਮਤ੍ਥਂ ¶ ਪਕਾਸੇਨ੍ਤੋ ਸਤ੍ਥਾ ਆਹ –

੧੬੩੯.

‘‘ਨ ਪੁਣ੍ਣਕੋ ਕੁਰੂਨਂ ਕਤ੍ਤੁਸੇਟ੍ਠਂ, ਓਰੋਪਿਯ ਧਮ੍ਮਸਭਾਯ ਮਜ੍ਝੇ;

ਆਜਞ੍ਞਮਾਰੁਯ੍ਹ ਅਨੋਮਵਣ੍ਣੋ, ਪਕ੍ਕਾਮਿ ਵੇਹਾਯਸਮਨ੍ਤਲਿਕ੍ਖੇ.

੧੬੪੦.

‘‘ਤਂ ਦਿਸ੍ਵਾ ਰਾਜਾ ਪਰਮਪ੍ਪਤੀਤੋ, ਉਟ੍ਠਾਯ ਬਾਹਾਹਿ ਪਲਿਸ੍ਸਜਿਤ੍ਵਾ;

ਅਵਿਕਮ੍ਪਯਂ ਧਮ੍ਮਸਭਾਯ ਮਜ੍ਝੇ, ਨਿਸੀਦਯੀ ਪਮੁਖਮਾਸਨਸ੍ਮਿ’’ਨ੍ਤਿ.

ਤਤ੍ਥ ਅਨੋਮਵਣ੍ਣੋਤਿ ਅਹੀਨਵਣ੍ਣੋ ਉਤ੍ਤਮਵਣ੍ਣੋ. ਅਵਿਕਮ੍ਪਯਨ੍ਤਿ ਭਿਕ੍ਖਵੇ, ਸੋ ਰਾਜਾ ਪਣ੍ਡਿਤਂ ਪਲਿਸ੍ਸਜਿਤ੍ਵਾ ਮਹਾਜਨਮਜ੍ਝੇ ਅਵਿਕਮ੍ਪਨ੍ਤੋ ਅਨੋਲੀਯਨ੍ਤੋਯੇਵ ਹਤ੍ਥੇ ਗਹੇਤ੍ਵਾ ਅਤ੍ਤਨੋ ਅਭਿਮੁਖਂ ਕਤ੍ਵਾ ਅਲਙ੍ਕਤਧਮ੍ਮਾਸਨੇ ਨਿਸੀਦਾਪੇਸਿ.

ਅਥ ¶ ਰਾਜਾ ਤੇਨ ਸਦ੍ਧਿਂ ਸਮ੍ਮੋਦਿਤ੍ਵਾ ਮਧੁਰਪਟਿਸਨ੍ਥਾਰਂ ਕਰੋਨ੍ਤੋ ਗਾਥਮਾਹ –

੧੬੪੧.

‘‘ਤ੍ਵਂ ਨੋ ਵਿਨੇਤਾਸਿ ਰਥਂਵ ਨਦ੍ਧਂ, ਨਨ੍ਦਨ੍ਤਿ ਤਂ ਕੁਰੁਯੋ ਦਸ੍ਸਨੇਨ;

ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ, ਕਥਂ ਪਮੋਕ੍ਖੋ ਅਹੁ ਮਾਣਵਸ੍ਸਾ’’ਤਿ.

ਤਤ੍ਥ ¶ ਨਦ੍ਧਨ੍ਤਿ ਯਥਾ ਨਦ੍ਧਂ ਰਥਂ ਸਾਰਥਿ ਵਿਨੇਤਿ, ਏਵਂ ਤ੍ਵਂ ਅਮ੍ਹਾਕਂ ਕਾਰਣੇਨ ਨਯੇਨ ਹਿਤਕਿਰਿਯਾਸੁ ਵਿਨੇਤਾ. ਨਨ੍ਦਨ੍ਤਿ ਤਨ੍ਤਿ ਤਂ ਦਿਸ੍ਵਾਵ ਇਮੇ ਕੁਰੁਰਟ੍ਠਵਾਸਿਨੋ ਤਵ ਦਸ੍ਸਨੇਨ ਨਨ੍ਦਨ੍ਤਿ. ਮਾਣਵਸ੍ਸਾਤਿ ਮਾਣਵਸ੍ਸ ਸਨ੍ਤਿਕਾ ਕਥਂ ਤਵ ਪਮੋਕ੍ਖੋ ਅਹੋਸਿ? ਯੋ ਵਾ ਤਂ ਮੁਞ੍ਚਨ੍ਤਸ੍ਸ ਮਾਣਵਸ੍ਸ ਪਮੋਕ੍ਖੋ, ਸੋ ਕੇਨ ਕਾਰਣੇਨ ਅਹੋਸੀਤਿ ਅਤ੍ਥੋ.

ਮਹਾਸਤ੍ਤੋ ਆਹ –

੧੬੪੨.

‘‘ਯਂ ਮਾਣਵੋਤ੍ਯਾਭਿਵਦੀ ਜਨਿਨ੍ਦ, ਨ ਸੋ ਮਨੁਸ੍ਸੋ ਨਰਵੀਰਸੇਟ੍ਠ;

ਯਦਿ ਤੇ ਸੁਤੋ ਪੁਣ੍ਣਕੋ ਨਾਮ ਯਕ੍ਖੋ, ਰਞ੍ਞੋ ਕੁਵੇਰਸ੍ਸ ਹਿ ਸੋ ਸਜਿਬ੍ਬੋ.

੧੬੪੩.

‘‘ਭੂਮਿਨ੍ਧਰੋ ਵਰੁਣੋ ਨਾਮ ਨਾਗੋ, ਬ੍ਰਹਾ ਸੁਚੀ ਵਣ੍ਣਬਲੂਪਪਨ੍ਨੋ;

ਤਸ੍ਸਾਨੁਜਂ ਧੀਤਰਂ ਕਾਮਯਾਨੋ, ਇਰਨ੍ਧਤੀ ਨਾਮ ਸਾ ਨਾਗਕਞ੍ਞਾ.

੧੬੪੪.

‘‘ਤਸ੍ਸਾ ¶ ਸੁਮਜ੍ਝਾਯ ਪਿਯਾਯ ਹੇਤੁ, ਪਤਾਰਯਿਤ੍ਥ ਮਰਣਾਯ ਮਯ੍ਹਂ;

ਸੋ ਚੇਵ ਭਰਿਯਾਯ ਸਮਙ੍ਗਿਭੂਤੋ, ਅਹਞ੍ਚ ਅਨੁਞ੍ਞਾਤੋ ਮਣਿ ਚ ਲਦ੍ਧੋ’’ਤਿ.

ਤਤ੍ਥ ਯਂ ਮਾਣਵੋਤ੍ਯਾਭਿਵਦੀਤਿ ਜਨਿਨ੍ਦ ਯਂ ਤ੍ਵਂ ‘‘ਮਾਣਵੋ’’ਤਿ ਅਭਿਵਦਸਿ. ਭੂਮਿਨ੍ਧਰੋਤਿ ਭੂਮਿਨ੍ਧਰਨਾਗਭਵਨਵਾਸੀ. ਸਾ ਨਾਗਕਞ੍ਞਾਤਿ ਯਂ ਨਾਗਕਞ੍ਞਂ ਸੋ ਪਤ੍ਥਯਮਾਨੋ ਮਮ ਮਰਣਾਯ ਪਤਾਰਯਿ ਚਿਤ੍ਤਂ ਪਵਤ੍ਤੇਸਿ, ਸਾ ਨਾਗਕਞ੍ਞਾ ¶ ਇਰਨ੍ਧਤੀ ਨਾਮ. ਪਿਯਾਯ ਹੇਤੂਤਿ ਮਹਾਰਾਜ, ਸੋ ਹਿ ਨਾਗਰਾਜਾ ਚਤੁਪ੍ਪੋਸਥਿਕਪਞ੍ਹਵਿਸ੍ਸਜ੍ਜਨੇ ਪਸਨ੍ਨੋ ਮਂ ਮਣਿਨਾ ਪੂਜੇਤ੍ਵਾ ਨਾਗਭਵਨਂ ਗਤੋ ਵਿਮਲਾਯ ਨਾਮ ਦੇਵਿਯਾ ਤਂ ਮਣਿਂ ਅਦਿਸ੍ਵਾ ‘‘ਦੇਵ, ਕੁਹਿਂ ਮਣੀ’’ਤਿ ਪੁਚ੍ਛਿਤੋ ਮਮ ਧਮ੍ਮਕਥਿਕਭਾਵਂ ਵਣ੍ਣੇਸਿ. ਸਾ ਮਯ੍ਹਂ ਧਮ੍ਮਕਥਂ ਸੋਤੁਕਾਮਾ ਹੁਤ੍ਵਾ ਮਮ ਹਦਯੇ ਦੋਹਲ਼ਂ ਉਪ੍ਪਾਦੇਸਿ. ਨਾਗਰਾਜਾ ਦੁਗ੍ਗਹਿਤੇਨ ਪਨ ਧੀਤਰਂ ਇਰਨ੍ਧਤਿਂ ਆਹ – ‘‘ਮਾਤਾ, ਤੇ ਵਿਧੁਰਸ੍ਸ ਹਦਯਮਂਸੇ ਦੋਹਲ਼ਿਨੀ, ਤਸ੍ਸ ਹਦਯਮਂਸਂ ਆਹਰਿਤੁਂ ਸਮਤ੍ਥਂ ਸਾਮਿਕਂ ਪਰਿਯੇਸਾਹੀ’’ਤਿ. ਸਾ ਪਰਿਯੇਸਨ੍ਤੀ ਵੇਸ੍ਸਵਣਸ੍ਸ ਭਾਗਿਨੇਯ੍ਯਂ ਪੁਣ੍ਣਕਂ ਨਾਮ ਯਕ੍ਖਂ ਦਿਸ੍ਵਾ ਤਂ ਅਤ੍ਤਨਿ ਪਟਿਬਦ੍ਧਚਿਤ੍ਤਂ ਞਤ੍ਵਾ ਪਿਤੁ ਸਨ੍ਤਿਕਂ ਨੇਸਿ. ਅਥ ਨਂ ਸੋ ‘‘ਵਿਧੁਰਪਣ੍ਡਿਤਸ੍ਸ ਹਦਯਮਂਸਂ ਆਹਰਿਤੁਂ ਸਕ੍ਕੋਨ੍ਤੋ ਇਰਨ੍ਧਤਿਂ ਲਭਿਸ੍ਸਸੀ’’ਤਿ ਆਹ. ਪੁਣ੍ਣਕੋ ਵੇਪੁਲ੍ਲਪਬ੍ਬਤਤੋ ਚਕ੍ਕਵਤ੍ਤਿਪਰਿਭੋਗਂ ਮਣਿਰਤਨਂ ਆਹਰਿਤ੍ਵਾ ਤੁਮ੍ਹੇਹਿ ਸਦ੍ਧਿਂ ਜੂਤਂ ਕੀਲ਼ਿਤ੍ਵਾ ਮਂ ਜਿਨਿਤ੍ਵਾ ਲਭਿ. ਅਹਞ੍ਚ ਮਮ ਨਿਵੇਸਨੇ ਤੀਹਂ ਵਸਾਪੇਤ੍ਵਾ ਮਹਨ੍ਤਂ ਸਕ੍ਕਾਰਂ ਅਕਾਸਿਂ. ਸੋਪਿ ਮਂ ਅਸ੍ਸਵਾਲਧਿਂ ਗਾਹਾਪੇਤ੍ਵਾ ਹਿਮਵਨ੍ਤੇ ਰੁਕ੍ਖੇਸੁ ਚ ਪਬ੍ਬਤੇਸੁ ਚ ਪੋਥੇਤ੍ਵਾ ਮਾਰੇਤੁਂ ਅਸਕ੍ਕੋਨ੍ਤੋ ਸਤ੍ਤਮੇ ਵਾਤਕ੍ਖਨ੍ਧੇ ਵੇਰਮ੍ਭਵਾਤਮੁਖੇ ਚ ਪਕ੍ਖਨ੍ਦਿਤ੍ਵਾ ਅਨੁਪੁਬ੍ਬੇਨ ਸਟ੍ਠਿਯੋਜਨੁਬ੍ਬੇਧੇ ¶ ਕਾਲ਼ਾਗਿਰਿਮਤ੍ਥਕੇ ਠਪੇਤ੍ਵਾ ਸੀਹਵੇਸਾਦਿਵਸੇਨ ਇਦਞ੍ਚਿਦਞ੍ਚ ਰੂਪਂ ਕਤ੍ਵਾਪਿ ਮਾਰੇਤੁਂ ਅਸਕ੍ਕੋਨ੍ਤੋ ਮਯਾ ਅਤ੍ਤਨੋ ਮਾਰਣਕਾਰਣਂ ਪੁਟ੍ਠੋ ਆਚਿਕ੍ਖਿ. ਅਥਸ੍ਸਾਹਂ ਸਾਧੁਨਰਧਮ੍ਮੇ ਕਥੇਸਿਂ. ਤਂ ਸੁਤ੍ਵਾ ਪਸਨ੍ਨਚਿਤ੍ਤੋ ਮਂ ਇਧ ਆਨੇਤੁਕਾਮੋ ਅਹੋਸਿ.

ਅਥਾਹਂ ਤਂ ਆਦਾਯ ਨਾਗਭਵਨਂ ਗਨ੍ਤ੍ਵਾ ਨਾਗਰਞ੍ਞੋ ਚ ਵਿਮਲਾਯ ਚ ਧਮ੍ਮਂ ਦੇਸੇਸਿਂ. ਤਤੋ ਨਾਗਰਾਜਾ ਚ ਵਿਮਲਾ ਚ ਸਬ੍ਬਨਾਗਪਰਿਸਾ ਚ ਪਸੀਦਿਂਸੁ. ਨਾਗਰਾਜਾ ਤਤ੍ਥ ਮਯਾ ਛਾਹਂ ਵੁਤ੍ਥਕਾਲੇ ਇਰਨ੍ਧਤਿਂ ਪੁਣ੍ਣਕਸ੍ਸ ¶ ਅਦਾਸਿ. ਸੋ ਤਂ ਲਭਿਤ੍ਵਾ ਪਸਨ੍ਨਚਿਤ੍ਤੋ ਹੁਤ੍ਵਾ ਮਂ ਮਣਿਰਤਨੇਨ ਪੂਜੇਤ੍ਵਾ ਨਾਗਰਾਜੇਨ ਆਣਤ੍ਤੋ ਮਨੋਮਯਸਿਨ੍ਧਵਂ ਆਰੋਪੇਤ੍ਵਾ ਸਯਂ ਮਜ੍ਝਿਮਾਸਨੇ ਨਿਸੀਦਿਤ੍ਵਾ ਇਰਨ੍ਧਤਿਂ ਪਚ੍ਛਿਮਾਸਨੇ ਨਿਸੀਦਾਪੇਤ੍ਵਾ ਮਂ ਪੁਰਿਮਾਸਨੇ ਨਿਸੀਦਾਪੇਤ੍ਵਾ ਇਧਾਗਨ੍ਤ੍ਵਾ ਪਰਿਸਮਜ੍ਝੇ ਓਤਾਰੇਤ੍ਵਾ ਇਰਨ੍ਧਤਿਂ ਆਦਾਯ ਅਤ੍ਤਨੋ ਨਗਰਮੇਵ ਗਤੋ. ਏਵਂ, ਮਹਾਰਾਜ, ਸੋ ਪੁਣ੍ਣਕੋ ਤਸ੍ਸਾ ਸੁਮਜ੍ਝਾਯ ਪਿਯਾਯ ਹੇਤੁ ਪਤਾਰਯਿਤ੍ਥ ਮਰਣਾਯ ਮਯ੍ਹਂ. ਅਥੇਵਂ ਮਂ ਨਿਸ੍ਸਾਯ ਸੋ ਚੇਵ ਭਰਿਯਾਯ ਸਮਙ੍ਗਿਭੂਤੋ, ਮਮ ਧਮ੍ਮਕਥਂ ਸੁਤ੍ਵਾ ਪਸਨ੍ਨੇਨ ਨਾਗਰਾਜੇਨ ਅਹਞ੍ਚ ਅਨੁਞ੍ਞਾਤੋ, ਤਸ੍ਸ ਪੁਣ੍ਣਕਸ੍ਸ ਸਨ੍ਤਿਕਾ ਅਯਂ ਸਬ੍ਬਕਾਮਦਦੋ ਚਕ੍ਕਵਤ੍ਤਿਪਰਿਭੋਗਮਣਿ ਚ ਲਦ੍ਧੋ, ਗਣ੍ਹਥ, ਦੇਵ, ਇਮਂ ਮਣਿਨ੍ਤਿ ਰਞ੍ਞੋ ਰਤਨਂ ਅਦਾਸਿ.

ਤਤੋ ¶ ਰਾਜਾ ਪਚ੍ਚੂਸਕਾਲੇ ਅਤ੍ਤਨਾ ਦਿਟ੍ਠਸੁਪਿਨਂ ਨਗਰਵਾਸੀਨਂ ਕਥੇਤੁਕਾਮੋ ‘‘ਭੋਨ੍ਤੋ, ਨਗਰਵਾਸਿਨੋ ਅਜ੍ਜ ਮਯਾ ਦਿਟ੍ਠਸੁਪਿਨਂ ਸੁਣਾਥਾ’’ਤਿ ਵਤ੍ਵਾ ਆਹ –

੧੬੪੫.

‘‘ਰੁਕ੍ਖੋ ਹਿ ਮਯ੍ਹਂ ਪਦ੍ਵਾਰੇ ਸੁਜਾਤੋ, ਪਞ੍ਞਾਕ੍ਖਨ੍ਧੋ ਸੀਲਮਯਸ੍ਸ ਸਾਖਾ;

ਅਤ੍ਥੇ ਚ ਧਮ੍ਮੇ ਚ ਠਿਤੋ ਨਿਪਾਕੋ, ਗਵਪ੍ਫਲੋ ਹਤ੍ਥਿਗਵਾਸ੍ਸਛਨ੍ਨੋ.

੧੬੪੬.

‘‘ਨਚ੍ਚਗੀਤਤੂਰਿਯਾਭਿਨਾਦਿਤੇ, ਉਚ੍ਛਿਜ੍ਜ ਸੇਨਂ ਪੁਰਿਸੋ ਅਹਾਸਿ;

ਸੋ ਨੋ ਅਯਂ ਆਗਤੋ ਸਨ੍ਨਿਕੇਤਂ, ਰੁਕ੍ਖਸ੍ਸਿਮਸ੍ਸਾਪਚਿਤਿਂ ਕਰੋਥ.

੧੬੪੭.

‘‘ਯੇ ਕੇਚਿ ਵਿਤ੍ਤਾ ਮਮ ਪਚ੍ਚਯੇਨ, ਸਬ੍ਬੇਵ ਤੇ ਪਾਤੁਕਰੋਨ੍ਤੁ ਅਜ੍ਜ;

ਤਿਬ੍ਬਾਨਿ ਕਤ੍ਵਾਨ ਉਪਾਯਨਾਨਿ, ਰੁਕ੍ਖਸ੍ਸਿਮਸ੍ਸਾਪਚਿਤਿਂ ਕਰੋਥ.

੧੬੪੮.

‘‘ਯੇ ਕੇਚਿ ਬਦ੍ਧਾ ਮਮ ਅਤ੍ਥਿ ਰਟ੍ਠੇ, ਸਬ੍ਬੇਵ ਤੇ ਬਨ੍ਧਨਾ ਮੋਚਯਨ੍ਤੁ;

ਯਥੇਵਯਂ ਬਨ੍ਧਨਸ੍ਮਾ ਪਮੁਤ੍ਤੋ, ਏਵਮੇਤੇ ਮੁਞ੍ਚਰੇ ਬਨ੍ਧਨਸ੍ਮਾ.

੧੬੪੯.

‘‘ਉਨ੍ਨਙ੍ਗਲਾ ¶ ¶ ਮਾਸਮਿਮਂ ਕਰੋਨ੍ਤੁ, ਮਂਸੋਦਨਂ ਬ੍ਰਾਹ੍ਮਣਾ ਭਕ੍ਖਯਨ੍ਤੁ;

ਅਮਜ੍ਜਪਾ ਮ�