📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਵਿਨਯਪਿਟਕੇ

ਮਹਾਵਗ੍ਗਪਾਲ਼ਿ

੧. ਮਹਾਖਨ੍ਧਕੋ

੧. ਬੋਧਿਕਥਾ

੧. [ਉਦਾ. ੧ ਆਦਯੋ] ਤੇਨ ਸਮਯੇਨ ਬੁਦ੍ਧੋ ਭਗਵਾ ਉਰੁਵੇਲਾਯਂ ਵਿਹਰਤਿ ਨਜ੍ਜਾ ਨੇਰਞ੍ਜਰਾਯ ਤੀਰੇ ਬੋਧਿਰੁਕ੍ਖਮੂਲੇ ਪਠਮਾਭਿਸਮ੍ਬੁਦ੍ਧੋ. ਅਥ ਖੋ ਭਗਵਾ ਬੋਧਿਰੁਕ੍ਖਮੂਲੇ ਸਤ੍ਤਾਹਂ ਏਕਪਲ੍ਲਙ੍ਕੇਨ ਨਿਸੀਦਿ ਵਿਮੁਤ੍ਤਿਸੁਖਪਟਿਸਂਵੇਦੀ [ਵਿਮੁਤ੍ਤਿਸੁਖਂ ਪਟਿਸਂਵੇਦੀ (ਕ.)]. ਅਥ ਖੋ ਭਗਵਾ ਰਤ੍ਤਿਯਾ ਪਠਮਂ ਯਾਮਂ ਪਟਿਚ੍ਚਸਮੁਪ੍ਪਾਦਂ ਅਨੁਲੋਮਪਟਿਲੋਮਂ ਮਨਸਾਕਾਸਿ – ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ, ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ, ਵਿਞ੍ਞਾਣਪਚ੍ਚਯਾ ਨਾਮਰੂਪਂ, ਨਾਮਰੂਪਪਚ੍ਚਯਾ ਸਲ਼ਾਯਤਨਂ, ਸਲ਼ਾਯਤਨਪਚ੍ਚਯਾ ਫਸ੍ਸੋ, ਫਸ੍ਸਪਚ੍ਚਯਾ ਵੇਦਨਾ, ਵੇਦਨਾਪਚ੍ਚਯਾ ਤਣ੍ਹਾ, ਤਣ੍ਹਾਪਚ੍ਚਯਾ ਉਪਾਦਾਨਂ, ਉਪਾਦਾਨਪਚ੍ਚਯਾ ਭਵੋ, ਭਵਪਚ੍ਚਯਾ ਜਾਤਿ, ਜਾਤਿਪਚ੍ਚਯਾ ਜਰਾਮਰਣਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਸਮ੍ਭਵਨ੍ਤਿ – ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤਿ. ‘‘ਅਵਿਜ੍ਜਾਯਤ੍ਵੇਵ ਅਸੇਸਵਿਰਾਗਨਿਰੋਧਾ ਸਙ੍ਖਾਰਨਿਰੋਧੋ, ਸਙ੍ਖਾਰਨਿਰੋਧਾ ਵਿਞ੍ਞਾਣਨਿਰੋਧੋ, ਵਿਞ੍ਞਾਣਨਿਰੋਧਾ ਨਾਮਰੂਪਨਿਰੋਧੋ, ਨਾਮਰੂਪਨਿਰੋਧਾ ਸਲ਼ਾਯਤਨਨਿਰੋਧੋ, ਸਲ਼ਾਯਤਨਨਿਰੋਧਾ ਫਸ੍ਸਨਿਰੋਧੋ, ਫਸ੍ਸਨਿਰੋਧਾ ਵੇਦਨਾਨਿਰੋਧੋ, ਵੇਦਨਾਨਿਰੋਧਾ ਤਣ੍ਹਾਨਿਰੋਧੋ, ਤਣ੍ਹਾਨਿਰੋਧਾ ਉਪਾਦਾਨਨਿਰੋਧੋ, ਉਪਾਦਾਨਨਿਰੋਧਾ ਭਵਨਿਰੋਧੋ, ਭਵਨਿਰੋਧਾ ਜਾਤਿਨਿਰੋਧੋ, ਜਾਤਿਨਿਰੋਧਾ ਜਰਾਮਰਣਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਨਿਰੁਜ੍ਝਨ੍ਤਿ – ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਨਿਰੋਧੋ ਹੋਤੀ’’ਤਿ.

ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

‘‘ਯਦਾ ਹਵੇ ਪਾਤੁਭਵਨ੍ਤਿ ਧਮ੍ਮਾ;

ਆਤਾਪਿਨੋ ਝਾਯਤੋ ਬ੍ਰਾਹ੍ਮਣਸ੍ਸ;

ਅਥਸ੍ਸ ਕਙ੍ਖਾ ਵਪਯਨ੍ਤਿ ਸਬ੍ਬਾ;

ਯਤੋ ਪਜਾਨਾਤਿ ਸਹੇਤੁਧਮ੍ਮ’’ਨ੍ਤਿ.

੨. [ਉਦਾ. ੨] ਅਥ ਖੋ ਭਗਵਾ ਰਤ੍ਤਿਯਾ ਮਜ੍ਝਿਮਂ ਯਾਮਂ ਪਟਿਚ੍ਚਸਮੁਪ੍ਪਾਦਂ ਅਨੁਲੋਮਪਟਿਲੋਮਂ ਮਨਸਾਕਾਸਿ – ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ, ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ, ਵਿਞ੍ਞਾਣਪਚ੍ਚਯਾ ਨਾਮਰੂਪਂ…ਪੇ… ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤੀ…ਪੇ… ਨਿਰੋਧੋ ਹੋਤੀ’’ਤਿ.

ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

‘‘ਯਦਾ ਹਵੇ ਪਾਤੁਭਵਨ੍ਤਿ ਧਮ੍ਮਾ;

ਆਤਾਪਿਨੋ ਝਾਯਤੋ ਬ੍ਰਾਹ੍ਮਣਸ੍ਸ;

ਅਥਸ੍ਸ ਕਙ੍ਖਾ ਵਪਯਨ੍ਤਿ ਸਬ੍ਬਾ;

ਯਤੋ ਖਯਂ ਪਚ੍ਚਯਾਨਂ ਅਵੇਦੀ’’ਤਿ.

੩. [ਉਦਾ. ੩] ਅਥ ਖੋ ਭਗਵਾ ਰਤ੍ਤਿਯਾ ਪਚ੍ਛਿਮਂ ਯਾਮਂ ਪਟਿਚ੍ਚਸਮੁਪ੍ਪਾਦਂ ਅਨੁਲੋਮਪਟਿਲੋਮਂ ਮਨਸਾਕਾਸਿ – ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ, ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ, ਵਿਞ੍ਞਾਣਪਚ੍ਚਯਾ ਨਾਮਰੂਪਂ…ਪੇ… ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤਿ…ਪੇ… ਨਿਰੋਧੋ ਹੋਤੀ’’ਤਿ.

ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

‘‘ਯਦਾ ਹਵੇ ਪਾਤੁਭਵਨ੍ਤਿ ਧਮ੍ਮਾ;

ਆਤਾਪਿਨੋ ਝਾਯਤੋ ਬ੍ਰਾਹ੍ਮਣਸ੍ਸ;

ਵਿਧੂਪਯਂ ਤਿਟ੍ਠਤਿ ਮਾਰਸੇਨਂ;

ਸੂਰਿਯੋਵ [ਸੁਰਿਯੋਵ (ਸੀ. ਸ੍ਯਾ. ਕਂ.)] ਓਭਾਸਯਮਨ੍ਤਲਿਕ੍ਖ’’ਨ੍ਤਿ.

ਬੋਧਿਕਥਾ ਨਿਟ੍ਠਿਤਾ.

੨. ਅਜਪਾਲਕਥਾ

੪. [ਉਦਾ. ੪] ਅਥ ਖੋ ਭਗਵਾ ਸਤ੍ਤਾਹਸ੍ਸ ਅਚ੍ਚਯੇਨ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ ਬੋਧਿਰੁਕ੍ਖਮੂਲਾ ਯੇਨ ਅਜਪਾਲਨਿਗ੍ਰੋਧੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਅਜਪਾਲਨਿਗ੍ਰੋਧਮੂਲੇ ਸਤ੍ਤਾਹਂ ਏਕਪਲ੍ਲਙ੍ਕੇਨ ਨਿਸੀਦਿ ਵਿਮੁਤ੍ਤਿਸੁਖਪਟਿਸਂਵੇਦੀ. ਅਥ ਖੋ ਅਞ੍ਞਤਰੋ ਹੁਂਹੁਙ੍ਕਜਾਤਿਕੋ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮਿ. ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਕਿਤ੍ਤਾਵਤਾ ਨੁ ਖੋ, ਭੋ ਗੋਤਮ, ਬ੍ਰਾਹ੍ਮਣੋ ਹੋਤਿ, ਕਤਮੇ ਚ ਪਨ ਬ੍ਰਾਹ੍ਮਣਕਰਣਾ [ਬ੍ਰਾਹ੍ਮਣਕਾਰਕਾ (ਕ.) ਬ੍ਰਾਹ੍ਮਣਕਰਾਣਾ (?)] ਧਮ੍ਮਾ’’ਤਿ? ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

[ਨੇਤ੍ਤਿ. ੧੦੩] ਯੋ ਬ੍ਰਾਹ੍ਮਣੋ ਬਾਹਿਤਪਾਪਧਮ੍ਮੋ;

ਨਿਹੁਂਹੁਙ੍ਕੋ ਨਿਕ੍ਕਸਾਵੋ ਯਤਤ੍ਤੋ;

ਵੇਦਨ੍ਤਗੂ ਵੁਸਿਤਬ੍ਰਹ੍ਮਚਰਿਯੋ;

ਧਮ੍ਮੇਨ ਸੋ ਬ੍ਰਹ੍ਮਵਾਦਂ ਵਦੇਯ੍ਯ;

ਯਸ੍ਸੁਸ੍ਸਦਾ ਨਤ੍ਥਿ ਕੁਹਿਞ੍ਚਿ ਲੋਕੇ’’ਤਿ.

ਅਜਪਾਲਕਥਾ ਨਿਟ੍ਠਿਤਾ.

੩. ਮੁਚਲਿਨ੍ਦਕਥਾ

੫. [ਉਦਾ. ੧੧] ਅਥ ਖੋ ਭਗਵਾ ਸਤ੍ਤਾਹਸ੍ਸ ਅਚ੍ਚਯੇਨ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ ਅਜਪਾਲਨਿਗ੍ਰੋਧਮੂਲਾ ਯੇਨ ਮੁਚਲਿਨ੍ਦੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਮੁਚਲਿਨ੍ਦਮੂਲੇ ਸਤ੍ਤਾਹਂ ਏਕਪਲ੍ਲਙ੍ਕੇਨ ਨਿਸੀਦਿ ਵਿਮੁਤ੍ਤਿਸੁਖਪਟਿਸਂਵੇਦੀ. ਤੇਨ ਖੋ ਪਨ ਸਮਯੇਨ ਮਹਾ ਅਕਾਲਮੇਘੋ ਉਦਪਾਦਿ, ਸਤ੍ਤਾਹਵਦ੍ਦਲਿਕਾ ਸੀਤਵਾਤਦੁਦ੍ਦਿਨੀ. ਅਥ ਖੋ ਮੁਚਲਿਨ੍ਦੋ ਨਾਗਰਾਜਾ ਸਕਭਵਨਾ ਨਿਕ੍ਖਮਿਤ੍ਵਾ ਭਗਵਤੋ ਕਾਯਂ ਸਤ੍ਤਕ੍ਖਤ੍ਤੁਂ ਭੋਗੇਹਿ ਪਰਿਕ੍ਖਿਪਿਤ੍ਵਾ ਉਪਰਿਮੁਦ੍ਧਨਿ ਮਹਨ੍ਤਂ ਫਣਂ ਕਰਿਤ੍ਵਾ ਅਟ੍ਠਾਸਿ – ‘‘ਮਾ ਭਗਵਨ੍ਤਂ ਸੀਤਂ, ਮਾ ਭਗਵਨ੍ਤਂ ਉਣ੍ਹਂ, ਮਾ ਭਗਵਨ੍ਤਂ ਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸੋ’’ਤਿ […ਸਿਰਿਂ ਸਪ… (ਸੀ. ਸ੍ਯਾ. ਕਂ.)]. ਅਥ ਖੋ ਮੁਚਲਿਨ੍ਦੋ ਨਾਗਰਾਜਾ ਸਤ੍ਤਾਹਸ੍ਸ ਅਚ੍ਚਯੇਨ ਵਿਦ੍ਧਂ ਵਿਗਤਵਲਾਹਕਂ ਦੇਵਂ ਵਿਦਿਤ੍ਵਾ ਭਗਵਤੋ ਕਾਯਾ ਭੋਗੇ ਵਿਨਿਵੇਠੇਤ੍ਵਾ ਸਕਵਣ੍ਣਂ ਪਟਿਸਂਹਰਿਤ੍ਵਾ ਮਾਣਵਕਵਣ੍ਣਂ ਅਭਿਨਿਮ੍ਮਿਨਿਤ੍ਵਾ ਭਗਵਤੋ ਪੁਰਤੋ ਅਟ੍ਠਾਸਿ ਪਞ੍ਜਲਿਕੋ ਭਗਵਨ੍ਤਂ ਨਮਸ੍ਸਮਾਨੋ. ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

[ਕਥਾ. ੩੩੮ ਕਥਾਵਤ੍ਥੁਪਾਲ਼ਿਯਮ੍ਪਿ]‘‘ਸੁਖੋ ਵਿਵੇਕੋ ਤੁਟ੍ਠਸ੍ਸ, ਸੁਤਧਮ੍ਮਸ੍ਸ ਪਸ੍ਸਤੋ;

ਅਬ੍ਯਾਪਜ੍ਜਂ ਸੁਖਂ ਲੋਕੇ, ਪਾਣਭੂਤੇਸੁ ਸਂਯਮੋ.

[ਕਥਾ. ੩੩੮ ਕਥਾਵਤ੍ਥੁਪਾਲ਼ਿਯਮ੍ਪਿ]‘‘ਸੁਖਾ ਵਿਰਾਗਤਾ ਲੋਕੇ, ਕਾਮਾਨਂ ਸਮਤਿਕ੍ਕਮੋ;

ਅਸ੍ਮਿਮਾਨਸ੍ਸ ਯੋ ਵਿਨਯੋ, ਏਤਂ ਵੇ ਪਰਮਂ ਸੁਖ’’ਨ੍ਤਿ.

ਮੁਚਲਿਨ੍ਦਕਥਾ ਨਿਟ੍ਠਿਤਾ.

੪. ਰਾਜਾਯਤਨਕਥਾ

੬. ਅਥ ਖੋ ਭਗਵਾ ਸਤ੍ਤਾਹਸ੍ਸ ਅਚ੍ਚਯੇਨ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ ਮੁਚਲਿਨ੍ਦਮੂਲਾ ਯੇਨ ਰਾਜਾਯਤਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਾਯਤਨਮੂਲੇ ਸਤ੍ਤਾਹਂ ਏਕਪਲ੍ਲਙ੍ਕੇਨ ਨਿਸੀਦਿ ਵਿਮੁਤ੍ਤਿਸੁਖਪਟਿਸਂਵੇਦੀ. ਤੇਨ ਖੋ ਪਨ ਸਮਯੇਨ ਤਪੁਸ੍ਸ [ਤਪਸ੍ਸੁ (ਸੀ.)] ਭਲ੍ਲਿਕਾ ਵਾਣਿਜਾ ਉਕ੍ਕਲਾ ਤਂ ਦੇਸਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਅਥ ਖੋ ਤਪੁਸ੍ਸਭਲ੍ਲਿਕਾਨਂ ਵਾਣਿਜਾਨਂ ਞਾਤਿਸਾਲੋਹਿਤਾ ਦੇਵਤਾ ਤਪੁਸ੍ਸਭਲ੍ਲਿਕੇ ਵਾਣਿਜੇ ਏਤਦਵੋਚ – ‘‘ਅਯਂ, ਮਾਰਿਸਾ, ਭਗਵਾ ਰਾਜਾਯਤਨਮੂਲੇ ਵਿਹਰਤਿ ਪਠਮਾਭਿਸਮ੍ਬੁਦ੍ਧੋ; ਗਚ੍ਛਥ ਤਂ ਭਗਵਨ੍ਤਂ ਮਨ੍ਥੇਨ ਚ ਮਧੁਪਿਣ੍ਡਿਕਾਯ ਚ ਪਤਿਮਾਨੇਥ; ਤਂ ਵੋ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਅਥ ਖੋ ਤਪੁਸ੍ਸਭਲ੍ਲਿਕਾ ਵਾਣਿਜਾ ਮਨ੍ਥਞ੍ਚ ਮਧੁਪਿਣ੍ਡਿਕਞ੍ਚ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਏਕਮਨ੍ਤਂ ਠਿਤਾ ਖੋ ਤਪੁਸ੍ਸਭਲ੍ਲਿਕਾ ਵਾਣਿਜਾ ਭਗਵਨ੍ਤਂ ਏਤਦਵੋਚੁਂ – ‘‘ਪਟਿਗ੍ਗਣ੍ਹਾਤੁ ਨੋ, ਭਨ੍ਤੇ, ਭਗਵਾ ਮਨ੍ਥਞ੍ਚ ਮਧੁਪਿਣ੍ਡਿਕਞ੍ਚ, ਯਂ ਅਮ੍ਹਾਕਂ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਨ ਖੋ ਤਥਾਗਤਾ ਹਤ੍ਥੇਸੁ ਪਟਿਗ੍ਗਣ੍ਹਨ੍ਤਿ. ਕਿਮ੍ਹਿ ਨੁ ਖੋ ਅਹਂ ਪਟਿਗ੍ਗਣ੍ਹੇਯ੍ਯਂ ਮਨ੍ਥਞ੍ਚ ਮਧੁਪਿਣ੍ਡਿਕਞ੍ਚਾ’’ਤਿ? ਅਥ ਖੋ ਚਤ੍ਤਾਰੋ ਮਹਾਰਾਜਾਨੋ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਚਤੁਦ੍ਦਿਸਾ ਚਤ੍ਤਾਰੋ ਸੇਲਮਯੇ ਪਤ੍ਤੇ ਭਗਵਤੋ ਉਪਨਾਮੇਸੁਂ – ‘‘ਇਧ, ਭਨ੍ਤੇ, ਭਗਵਾ ਪਟਿਗ੍ਗਣ੍ਹਾਤੁ ਮਨ੍ਥਞ੍ਚ ਮਧੁਪਿਣ੍ਡਿਕਞ੍ਚਾ’’ਤਿ. ਪਟਿਗ੍ਗਹੇਸਿ ਭਗਵਾ ਪਚ੍ਚਗ੍ਘੇ ਸੇਲਮਯੇ ਪਤ੍ਤੇ ਮਨ੍ਥਞ੍ਚ ਮਧੁਪਿਣ੍ਡਿਕਞ੍ਚ, ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿ. ਅਥ ਖੋ ਤਪੁਸ੍ਸਭਲ੍ਲਿਕਾ ਵਾਣਿਜਾ ਭਗਵਨ੍ਤਂ ਓਨੀਤਪਤ੍ਤਪਾਣਿਂ ਵਿਦਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ (ਓਨੀਤਪਤ੍ਤਪਾਣਿਂ ਵਿਦਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ) [( ) ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ] ਏਤਦਵੋਚੁਂ – ‘‘ਏਤੇ ਮਯਂ, ਭਨ੍ਤੇ, ਭਗਵਨ੍ਤਂ ਸਰਣਂ ਗਚ੍ਛਾਮ ਧਮ੍ਮਞ੍ਚ, ਉਪਾਸਕੇ ਨੋ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤੇ ਸਰਣਂ ਗਤੇ’’ਤਿ. ਤੇ ਚ ਲੋਕੇ ਪਠਮਂ ਉਪਾਸਕਾ ਅਹੇਸੁਂ ਦ੍ਵੇਵਾਚਿਕਾ.

ਰਾਜਾਯਤਨਕਥਾ ਨਿਟ੍ਠਿਤਾ.

੫. ਬ੍ਰਹ੍ਮਯਾਚਨਕਥਾ

੭. [ਅਯਂ ਬ੍ਰਹ੍ਮਯਾਚਨਕਥਾ ਦੀ. ਨਿ. ੨.੬੪ ਆਦਯੋ; ਮ. ਨਿ. ੧.੨੮੧ ਆਦਯੋ; ਮ. ਨਿ. ੨.੩੩੬ ਆਦਯੋ; ਸਂ. ਨਿ. ੧.੧੭੨ ਆਦਯੋ] ਅਥ ਖੋ ਭਗਵਾ ਸਤ੍ਤਾਹਸ੍ਸ ਅਚ੍ਚਯੇਨ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ ਰਾਜਾਯਤਨਮੂਲਾ ਯੇਨ ਅਜਪਾਲਨਿਗ੍ਰੋਧੋ ਤੇਨੁਪਸਙ੍ਕਮਿ. ਤਤ੍ਰ ਸੁਦਂ ਭਗਵਾ ਅਜਪਾਲਨਿਗ੍ਰੋਧਮੂਲੇ ਵਿਹਰਤਿ. ਅਥ ਖੋ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਅਧਿਗਤੋ ਖੋ ਮ੍ਯਾਯਂ ਧਮ੍ਮੋ ਗਮ੍ਭੀਰੋ ਦੁਦ੍ਦਸੋ ਦੁਰਨੁਬੋਧੋ ਸਨ੍ਤੋ ਪਣੀਤੋ ਅਤਕ੍ਕਾਵਚਰੋ ਨਿਪੁਣੋ ਪਣ੍ਡਿਤਵੇਦਨੀਯੋ. ਆਲਯਰਾਮਾ ਖੋ ਪਨਾਯਂ ਪਜਾ ਆਲਯਰਤਾ ਆਲਯਸਮ੍ਮੁਦਿਤਾ. ਆਲਯਰਾਮਾਯ ਖੋ ਪਨ ਪਜਾਯ ਆਲਯਰਤਾਯ ਆਲਯਸਮ੍ਮੁਦਿਤਾਯ ਦੁਦ੍ਦਸਂ ਇਦਂ ਠਾਨਂ ਯਦਿਦਂ ਇਦਪ੍ਪਚ੍ਚਯਤਾਪਅਚ੍ਚਸਮੁਪ੍ਪਾਦੋ; ਇਦਮ੍ਪਿ ਖੋ ਠਾਨਂ ਸੁਦੁਦ੍ਦਸਂ ਯਦਿਦਂ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗੋ ਤਣ੍ਹਾਕ੍ਖਯੋ ਵਿਰਾਗੋ ਨਿਰੋਧੋ ਨਿਬ੍ਬਾਨਂ. ਅਹਞ੍ਚੇਵ ਖੋ ਪਨ ਧਮ੍ਮਂ ਦੇਸੇਯ੍ਯਂ, ਪਰੇ ਚ ਮੇ ਨ ਆਜਾਨੇਯ੍ਯੁਂ, ਸੋ ਮਮਸ੍ਸ ਕਿਲਮਥੋ, ਸਾ ਮਮਸ੍ਸ ਵਿਹੇਸਾ’’ਤਿ. ਅਪਿਸ੍ਸੁ ਭਗਵਨ੍ਤਂ ਇਮਾ ਅਨਚ੍ਛਰਿਯਾ ਗਾਥਾਯੋ ਪਟਿਭਂਸੁ ਪੁਬ੍ਬੇ ਅਸ੍ਸੁਤਪੁਬ੍ਬਾ –

‘‘ਕਿਚ੍ਛੇਨ ਮੇ ਅਧਿਗਤਂ, ਹਲਂ ਦਾਨਿ ਪਕਾਸਿਤੁਂ;

ਰਾਗਦੋਸਪਰੇਤੇਹਿ, ਨਾਯਂ ਧਮ੍ਮੋ ਸੁਸਮ੍ਬੁਧੋ.

‘‘ਪਟਿਸੋਤਗਾਮਿਂ ਨਿਪੁਣਂ, ਗਮ੍ਭੀਰਂ ਦੁਦ੍ਦਸਂ ਅਣੁਂ;

ਰਾਗਰਤ੍ਤਾ ਨ ਦਕ੍ਖਨ੍ਤਿ, ਤਮੋਖਨ੍ਧੇਨ ਆਵੁਟਾ [ਆਵਟਾ (ਸੀ.)]’’ਤਿ.

ਇਤਿਹ ਭਗਵਤੋ ਪਟਿਸਞ੍ਚਿਕ੍ਖਤੋ ਅਪ੍ਪੋਸ੍ਸੁਕ੍ਕਤਾਯ ਚਿਤ੍ਤਂ ਨਮਤਿ, ਨੋ ਧਮ੍ਮਦੇਸਨਾਯ.

੮. ਅਥ ਖੋ ਬ੍ਰਹ੍ਮੁਨੋ ਸਹਮ੍ਪਤਿਸ੍ਸ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਏਤਦਹੋਸਿ – ‘‘ਨਸ੍ਸਤਿ ਵਤ ਭੋ ਲੋਕੋ, ਵਿਨਸ੍ਸਤਿ ਵਤ ਭੋ ਲੋਕੋ, ਯਤ੍ਰ ਹਿ ਨਾਮ ਤਥਾਗਤਸ੍ਸ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਅਪ੍ਪੋਸ੍ਸੁਕ੍ਕਤਾਯ ਚਿਤ੍ਤਂ ਨਮਤਿ [ਨਮਿਸ੍ਸਤਿ (?)], ਨੋ ਧਮ੍ਮਦੇਸਨਾਯਾ’’ਤਿ. ਅਥ ਖੋ ਬ੍ਰਹ੍ਮਾ ਸਹਮ੍ਪਤਿ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ ਏਵਮੇਵ – ਬ੍ਰਹ੍ਮਲੋਕੇ ਅਨ੍ਤਰਹਿਤੋ ਭਗਵਤੋ ਪੁਰਤੋ ਪਾਤੁਰਹੋਸਿ. ਅਥ ਖੋ ਬ੍ਰਹ੍ਮਾ ਸਹਮ੍ਪਤਿ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਦਕ੍ਖਿਣਜਾਣੁਮਣ੍ਡਲਂ ਪਥਵਿਯਂ ਨਿਹਨ੍ਤ੍ਵਾ ਯੇਨ ਭਗਵਾ ਤੇਨਞ੍ਜਲਿਂ ਪਣਾਮੇਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਦੇਸੇਤੁ, ਭਨ੍ਤੇ, ਭਗਵਾ ਧਮ੍ਮਂ, ਦੇਸੇਤੁ ਸੁਗਤੋ ਧਮ੍ਮਂ. ਸਨ੍ਤਿ ਸਤ੍ਤਾ ਅਪ੍ਪਰਜਕ੍ਖਜਾਤਿਕਾ, ਅਸ੍ਸਵਨਤਾ ਧਮ੍ਮਸ੍ਸ ਪਰਿਹਾਯਨ੍ਤਿ, ਭਵਿਸ੍ਸਨ੍ਤਿ ਧਮ੍ਮਸ੍ਸ ਅਞ੍ਞਾਤਾਰੋ’’ਤਿ. ਇਦਮਵੋਚ ਬ੍ਰਹ੍ਮਾ ਸਹਮ੍ਪਤਿ, ਇਦਂ ਵਤ੍ਵਾਨ ਅਥਾਪਰਂ ਏਤਦਵੋਚ –

‘‘ਪਾਤੁਰਹੋਸਿ ਮਗਧੇਸੁ ਪੁਬ੍ਬੇ;

ਧਮ੍ਮੋ ਅਸੁਦ੍ਧੋ ਸਮਲੇਹਿ ਚਿਨ੍ਤਿਤੋ;

ਅਪਾਪੁਰੇਤਂ [ਅਵਾਪੁਰੇਤਂ (ਸੀ.)] ਅਮਤਸ੍ਸ ਦ੍ਵਾਰਂ;

ਸੁਣਨ੍ਤੁ ਧਮ੍ਮਂ ਵਿਮਲੇਨਾਨੁਬੁਦ੍ਧਂ.

‘‘ਸੇਲੇ ਯਥਾ ਪਬ੍ਬਤਮੁਦ੍ਧਨਿਟ੍ਠਿਤੋ;

ਯਥਾਪਿ ਪਸ੍ਸੇ ਜਨਤਂ ਸਮਨ੍ਤਤੋ;

ਤਥੂਪਮਂ ਧਮ੍ਮਮਯਂ ਸੁਮੇਧ;

ਪਾਸਾਦਮਾਰੁਯ੍ਹ ਸਮਨ੍ਤਚਕ੍ਖੁ;

ਸੋਕਾਵਤਿਣ੍ਣਂ ਜਨਤਮਪੇਤਸੋਕੋ;

ਅਵੇਕ੍ਖਸ੍ਸੁ ਜਾਤਿਜਰਾਭਿਭੂਤਂ.

‘‘ਉਟ੍ਠੇਹਿ ਵੀਰ ਵਿਜਿਤਸਙ੍ਗਾਮ;

ਸਤ੍ਥਵਾਹ ਅਣਣ [ਅਨਣ (ਕ.)] ਵਿਚਰ ਲੋਕੇ;

ਦੇਸਸ੍ਸੁ [ਦੇਸੇਤੁ (ਕ.)] ਭਗਵਾ ਧਮ੍ਮਂ;

ਅਞ੍ਞਾਤਾਰੋ ਭਵਿਸ੍ਸਨ੍ਤੀ’’ਤਿ.

[[ ] ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ, ਮੂਲਪਣ੍ਣਾਸਕੇਸੁ ਪਾਸਰਾਸਿਸੁਤ੍ਥੇ ਬ੍ਰਹ੍ਮਯਾਚਨਾ ਸਕਿਂ ਯੇਵ ਆਗਤਾ] [ ਏਵਂ ਵੁਤ੍ਤੇ ਭਗਵਾ ਬ੍ਰਹ੍ਮਾਨਂ ਸਹਮ੍ਪਤਿਂ ਏਤਦਵੋਚ – ‘‘ਮਯ੍ਹਮ੍ਪਿ ਖੋ, ਬ੍ਰਹ੍ਮੇ, ਏਤਦਹੋਸਿ – ‘ਅਧਿਗਤੋ ਖੋ ਮ੍ਯਾਯਂ ਧਮ੍ਮੋ ਗਮ੍ਭੀਰੋ ਦੁਦ੍ਦਸੋ ਦੁਰਨੁਬੋਧੋ ਸਨ੍ਤੋ ਪਣੀਤੋ ਅਤਕ੍ਕਾਵਚਰੋ ਨਿਪੁਣੋ ਪਣ੍ਡਿਤਵੇਦਨੀਯੋ. ਆਲਯਰਾਮਾ ਖੋ ਪਨਾਯਂ ਪਜਾ ਆਲਯਰਤਾ ਆਲਯਸਮ੍ਮੁਦਿਤਾ. ਆਲਯਰਾਮਾਯ ਖੋ ਪਨ ਪਜਾਯ ਆਲਯਰਤਾਯ ਆਲਯਸਮ੍ਮੁਦਿਤਾਯ ਦੁਦ੍ਦਸਂ ਇਦਂ ਠਾਨਂ ਯਦਿਦਂ ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਾਦੋ; ਇਦਮ੍ਪਿ ਖੋ ਠਾਨਂ ਸੁਦੁਦ੍ਦਸਂ ਯਦਿਦਂ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗੋ ਤਣ੍ਹਾਕ੍ਖਯੋ ਵਿਰਾਗੋ ਨਿਰੋਧੋ ਨਿਬ੍ਬਾਨਂ. ਅਹਞ੍ਚੇਵ ਖੋ ਪਨ ਧਮ੍ਮਂ ਦੇਸੇਯ੍ਯਂ, ਪਰੇ ਚ ਮੇ ਨ ਆਜਾਨੇਯ੍ਯੁਂ, ਸੋ ਮਮਸ੍ਸ ਕਿਲਮਥੋ, ਸਾ ਮਮਸ੍ਸ ਵਿਹੇਸਾ’ਤਿ. ਅਪਿਸ੍ਸੁ ਮਂ, ਬ੍ਰਹ੍ਮੇ, ਇਮਾ ਅਨਚ੍ਛਰਿਯਾ ਗਾਥਾਯੋ ਪਟਿਭਂਸੁ ਪੁਬ੍ਬੇ ਅਸ੍ਸੁਤਪੁਬ੍ਬਾ –

‘ਕਿਚ੍ਛੇਨ ਮੇ ਅਧਿਗਤਂ, ਹਲਂ ਦਾਨਿ ਪਕਾਸਿਤੁਂ;

ਰਾਗਦੋਸਪਰੇਤੇਹਿ, ਨਾਯਂ ਧਮ੍ਮੋ ਸੁਸਮ੍ਬੁਧੋ.

‘ਪਟਿਸੋਤਗਾਮਿਂ ਨਿਪੁਣਂ, ਗਮ੍ਭੀਰਂ ਦੁਦ੍ਦਸਂ ਅਣੁਂ;

ਰਾਗਰਤ੍ਤਾ ਨ ਦਕ੍ਖਨ੍ਤਿ, ਤਮੋਖਨ੍ਧੇਨ ਆਵੁਟਾ’ਤਿ.

ਇਤਿਹ ਮੇ, ਬ੍ਰਹ੍ਮੇ, ਪਟਿਸਞ੍ਚਿਕ੍ਖਤੋ ਅਪ੍ਪੋਸ੍ਸੁਕ੍ਕਤਾਯ ਚਿਤ੍ਤਂ ਨਮਤਿ ਨੋ ਧਮ੍ਮਦੇਸਨਾਯਾ’’ਤਿ.

ਦੁਤਿਯਮ੍ਪਿ ਖੋ ਬ੍ਰਹ੍ਮਾ ਸਹਮ੍ਪਤਿ ਭਗਵਨ੍ਤਂ ਏਤਦਵੋਚ – ‘‘ਦੇਸੇਤੁ, ਭਨ੍ਤੇ, ਭਗਵਾ ਧਮ੍ਮਂ, ਦੇਸੇਤੁ ਸੁਗਤੋ ਧਮ੍ਮਂ; ਸਨ੍ਤਿ ਸਤ੍ਤਾ ਅਪ੍ਪਰਜਕ੍ਖਜਾਤਿਕਾ, ਅਸ੍ਸਵਨਤਾ ਧਮ੍ਮਸ੍ਸ ਪਰਿਹਾਯਨ੍ਤਿ, ਭਵਿਸ੍ਸਨ੍ਤਿ ਧਮ੍ਮਸ੍ਸ ਅਞ੍ਞਾਤਾਰੋ’’ਤਿ. ਇਦਮਵੋਚ ਬ੍ਰਹ੍ਮਾ ਸਹਮ੍ਪਤਿ, ਇਦਂ ਵਤ੍ਵਾਨ ਅਥਾਪਰਂ ਏਤਦਵੋਚ –

‘‘ਪਾਤੁਰਹੋਸਿ ਮਗਧੇਸੁ ਪੁਬ੍ਬੇ;

ਧਮ੍ਮੋ ਅਸੁਦ੍ਧੋ ਸਮਲੇਹਿ ਚਿਨ੍ਤਿਤੋ;

ਅਪਾਪੁਰੇਤਂ ਅਮਤਸ੍ਸ ਦ੍ਵਾਰਂ;

ਸੁਣਨ੍ਤੁ ਧਮ੍ਮਂ ਵਿਮਲੇਨਾਨੁਬੁਦ੍ਧਂ.

‘‘ਸੇਲੇ ਯਥਾ ਪਬ੍ਬਤਮੁਦ੍ਧਨਿਟ੍ਠਿਤੋ;

ਯਥਾਪਿ ਪਸ੍ਸੇ ਜਨਤਂ ਸਮਨ੍ਤਤੋ;

ਤਥੂਪਮਂ ਧਮ੍ਮਮਯਂ ਸੁਮੇਧ;

ਪਾਸਾਦਮਾਰੁਯ੍ਹ ਸਮਨ੍ਤਚਕ੍ਖੁ;

ਸੋਕਾਵਤਿਣ੍ਣਂ ਜਨਤਮਪੇਤਸੋਕੋ;

ਅਵੇਕ੍ਖਸ੍ਸੁ ਜਾਤਿਜਰਾਭਿਭੂਤਂ.

‘‘ਉਟ੍ਠੇਹਿ ਵੀਰ ਵਿਜਿਤਸਙ੍ਗਾਮ;

ਸਤ੍ਥਵਾਹ ਅਣਣ ਵਿਚਰ ਲੋਕੇ;

ਦੇਸਸ੍ਸੁ ਭਗਵਾ ਧਮ੍ਮਂ;

ਅਞ੍ਞਾਤਾਰੋ ਭਵਿਸ੍ਸਨ੍ਤੀ’’ਤਿ.

ਦੁਤਿਯਮ੍ਪਿ ਖੋ ਭਗਵਾ ਬ੍ਰਹ੍ਮਾਨਂ ਸਹਮ੍ਪਤਿਂ ਏਤਦਵੋਚ – ‘‘ਮਯ੍ਹਮ੍ਪਿ ਖੋ, ਬ੍ਰਹ੍ਮੇ, ਏਤਦਹੋਸਿ – ‘ਅਧਿਗਤੋ ਖੋ ਮ੍ਯਾਯਂ ਧਮ੍ਮੋ ਗਮ੍ਭੀਰੋ ਦੁਦ੍ਦਸੋ ਦੁਰਨੁਬੋਧੋ ਸਨ੍ਤੋ ਪਣੀਤੋ ਅਤਕ੍ਕਾਵਚਰੋ ਨਿਪੁਣੋ ਪਣ੍ਡਿਤਵੇਦਨੀਯੋ. ਆਲਯਰਾਮਾ ਖੋ ਪਨਾਯਂ ਪਜਾ ਆਲਯਰਤਾ ਆਲਯਸਮ੍ਮੁਦਿਤਾ. ਆਲਯਰਾਮਾਯ ਖੋ ਪਨ ਪਜਾਯ ਆਲਯਰਤਾਯ ਆਲਯਸਮ੍ਮੁਦਿਤਾਯ ਦੁਦ੍ਦਸਂ ਇਦਂ ਠਾਨਂ ਯਦਿਦਂ ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਾਦੋ; ਇਦਮ੍ਪਿ ਖੋ ਠਾਨਂ ਸੁਦੁਦ੍ਦਸਂ ਯਦਿਦਂ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗੋ ਤਣ੍ਹਾਕ੍ਖਯੋ ਵਿਰਾਗੋ ਨਿਰੋਧੋ ਨਿਬ੍ਬਾਨਂ. ਅਹਞ੍ਚੇਵ ਖੋ ਪਨ ਧਮ੍ਮਂ ਦੇਸੇਯ੍ਯਂ, ਪਰੇ ਚ ਮੇ ਨ ਆਜਾਨੇਯ੍ਯੁਂ, ਸੋ ਮਮਸ੍ਸ ਕਿਲਮਥੋ, ਸਾ ਮਮਸ੍ਸ ਵਿਹੇਸਾ’ਤਿ. ਅਪਿਸ੍ਸੁ ਮਂ, ਬ੍ਰਹ੍ਮੇ, ਇਮਾ ਅਨਚ੍ਛਰਿਯਾ ਗਾਥਾਯੋ ਪਟਿਭਂਸੁ ਪੁਬ੍ਬੇ ਅਸ੍ਸੁਤਪੁਬ੍ਬਾ –

‘ਕਿਚ੍ਛੇਨ ਮੇ ਅਧਿਗਤਂ, ਹਲਂ ਦਾਨਿ ਪਕਾਸਿਤੁਂ;

ਰਾਗਦੋਸਪਰੇਤੇਹਿ, ਨਾਯਂ ਧਮ੍ਮੋ ਸੁਸਮ੍ਬੁਧੋ.

‘ਪਟਿਸੋਤਗਾਮਿਂ ਨਿਪੁਣਂ, ਗਮ੍ਭੀਰਂ ਦੁਦ੍ਦਸਂ ਅਣੁਂ;

ਰਾਗਰਤ੍ਤਾ ਨ ਦਕ੍ਖਨ੍ਤਿ, ਤਮੋਖਨ੍ਧੇਨ ਆਵੁਟਾ’ਤਿ.

ਇਤਿਹ ਮੇ, ਬ੍ਰਹ੍ਮੇ, ਪਟਿਸਞ੍ਚਿਕ੍ਖਤੋ ਅਪ੍ਪੋਸ੍ਸੁਕ੍ਕਤਾਯ ਚਿਤ੍ਤਂ ਨਮਤਿ, ਨੋ ਧਮ੍ਮਦੇਸਨਾਯਾ’’ਤਿ.

ਤਤਿਯਮ੍ਪਿ ਖੋ ਬ੍ਰਹ੍ਮਾ ਸਹਮ੍ਪਤਿ ਭਗਵਨ੍ਤਂ ਏਤਦਵੋਚ – ‘‘ਦੇਸੇਤੁ, ਭਨ੍ਤੇ, ਭਗਵਾ ਧਮ੍ਮਂ, ਦੇਸੇਤੁ ਸੁਗਤੋ ਧਮ੍ਮਂ. ਸਨ੍ਤਿ ਸਤ੍ਤਾ ਅਪ੍ਪਰਜਕ੍ਖਜਾਤਿਕਾ, ਅਸ੍ਸਵਨਤਾ ਧਮ੍ਮਸ੍ਸ ਪਰਿਹਾਯਨ੍ਤਿ, ਭਵਿਸ੍ਸਨ੍ਤਿ ਧਮ੍ਮਸ੍ਸ ਅਞ੍ਞਾਤਾਰੋ’’ਤਿ. ਇਦਮਵੋਚ ਬ੍ਰਹ੍ਮਾ ਸਹਮ੍ਪਤਿ, ਇਦਂ ਵਤ੍ਵਾਨ ਅਥਾਪਰਂ ਏਤਦਵੋਚ –

‘‘ਪਾਤੁਰਹੋਸਿ ਮਗਧੇਸੁ ਪੁਬ੍ਬੇ;

ਧਮ੍ਮੋ ਅਸੁਦ੍ਧੋ ਸਮਲੇਹਿ ਚਿਨ੍ਤਿਤੋ;

ਅਪਾਪੁਰੇਤਂ ਅਮਤਸ੍ਸ ਦ੍ਵਾਰਂ;

ਸੁਣਨ੍ਤੁ ਧਮ੍ਮਂ ਵਿਮਲੇਨਾਨੁਬੁਦ੍ਧਂ.

‘‘ਸੇਲੇ ਯਥਾ ਪਬ੍ਬਤਮੁਦ੍ਧਨਿਟ੍ਠਿਤੋ;

ਯਥਾਪਿ ਪਸ੍ਸੇ ਜਨਤਂ ਸਮਨ੍ਤਤੋ;

ਤਥੂਪਮਂ ਧਮ੍ਮਮਯਂ ਸੁਮੇਧ;

ਪਾਸਾਦਮਾਰੁਯ੍ਹ ਸਮਨ੍ਤਚਕ੍ਖੁ;

ਸੋਕਾਵਤਿਣ੍ਣਂ ਜਨਤਮਪੇਤਸੋਕੋ;

ਅਵੇਕ੍ਖਸ੍ਸੁ ਜਾਤਿਜਰਾਭਿਭੂਤਂ.

‘‘ਉਟ੍ਠੇਹਿ ਵੀਰ ਵਿਜਿਤਸਙ੍ਗਾਮ;

ਸਤ੍ਥਵਾਹ ਅਣਣ ਵਿਚਰ ਲੋਕੇ;

ਦੇਸਸ੍ਸੁ ਭਗਵਾ ਧਮ੍ਮਂ;

ਅਞ੍ਞਾਤਾਰੋ ਭਵਿਸ੍ਸਨ੍ਤੀ’’ਤਿ.

੯. ਅਥ ਖੋ ਭਗਵਾ ਬ੍ਰਹ੍ਮੁਨੋ ਚ ਅਜ੍ਝੇਸਨਂ ਵਿਦਿਤ੍ਵਾ ਸਤ੍ਤੇਸੁ ਚ ਕਾਰੁਞ੍ਞਤਂ ਪਟਿਚ੍ਚ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਸਿ. ਅਦ੍ਦਸਾ ਖੋ ਭਗਵਾ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਸਤ੍ਤੇ ਅਪ੍ਪਰਜਕ੍ਖੇ ਮਹਾਰਜਕ੍ਖੇ ਤਿਕ੍ਖਿਨ੍ਦ੍ਰਿਯੇ ਮੁਦਿਨ੍ਦ੍ਰਿਯੇ ਸ੍ਵਾਕਾਰੇ ਦ੍ਵਾਕਾਰੇ ਸੁਵਿਞ੍ਞਾਪਯੇ ਦੁਵਿਞ੍ਞਾਪਯੇ, ਅਪ੍ਪੇਕਚ੍ਚੇ ਪਰਲੋਕਵਜ੍ਜਭਯਦਸ੍ਸਾਵਿਨੇ [ਦਸ੍ਸਾਵਿਨੋ (ਸੀ. ਸ੍ਯਾ. ਕਂ.)] ਵਿਹਰਨ੍ਤੇ, ਅਪ੍ਪੇਕਚ੍ਚੇ ਨ ਪਰਲੋਕਵਜ੍ਜਭਯਦਸ੍ਸਾਵਿਨੇ ਵਿਹਰਨ੍ਤੇ. ਸੇਯ੍ਯਥਾਪਿ ਨਾਮ ਉਪ੍ਪਲਿਨਿਯਂ ਵਾ ਪਦੁਮਿਨਿਯਂ ਵਾ ਪੁਣ੍ਡਰੀਕਿਨਿਯਂ ਵਾ ਅਪ੍ਪੇਕਚ੍ਚਾਨਿ ਉਪ੍ਪਲਾਨਿ ਵਾ ਪਦੁਮਾਨਿ ਵਾ ਪੁਣ੍ਡਰੀਕਾਨਿ ਵਾ ਉਦਕੇ ਜਾਤਾਨਿ ਉਦਕੇ ਸਂਵਡ੍ਢਾਨਿ ਉਦਕਾਨੁਗ੍ਗਤਾਨਿ ਅਨ੍ਤੋ ਨਿਮੁਗ੍ਗਪੋਸੀਨਿ, ਅਪ੍ਪੇਕਚ੍ਚਾਨਿ ਉਪ੍ਪਲਾਨਿ ਵਾ ਪਦੁਮਾਨਿ ਵਾ ਪੁਣ੍ਡਰੀਕਾਨਿ ਵਾ ਉਦਕੇ ਜਾਤਾਨਿ ਉਦਕੇ ਸਂਵਡ੍ਢਾਨਿ ਸਮੋਦਕਂ ਠਿਤਾਨਿ, ਅਪ੍ਪੇਕਚ੍ਚਾਨਿ ਉਪ੍ਪਲਾਨਿ ਵਾ ਪਦੁਮਾਨਿ ਵਾ ਪੁਣ੍ਡਰੀਕਾਨਿ ਵਾ ਉਦਕੇ ਜਾਤਾਨਿ ਉਦਕੇ ਸਂਵਡ੍ਢਾਨਿ ਉਦਕਂ ਅਚ੍ਚੁਗ੍ਗਮ੍ਮ ਠਿਤਾਨਿ [ਤਿਟ੍ਠਨ੍ਤਿ (ਸੀ. ਸ੍ਯਾ.)] ਅਨੁਪਲਿਤ੍ਤਾਨਿ ਉਦਕੇਨ, ਏਵਮੇਵਂ ਭਗਵਾ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਅਦ੍ਦਸ ਸਤ੍ਤੇ ਅਪ੍ਪਰਜਕ੍ਖੇ ਮਹਾਰਜਕ੍ਖੇ ਤਿਕ੍ਖਿਨ੍ਦ੍ਰਿਯੇ ਮੁਦਿਨ੍ਦ੍ਰਿਯੇ ਸ੍ਵਾਕਾਰੇ ਦ੍ਵਾਕਾਰੇ ਸੁਵਿਞ੍ਞਾਪਯੇ ਦੁਵਿਞ੍ਞਾਪਯੇ, ਅਪ੍ਪੇਕਚ੍ਚੇ ਪਰਲੋਕਵਜ੍ਜਭਯਦਸ੍ਸਾਵਿਨੇ ਵਿਹਰਨ੍ਤੇ, ਅਪ੍ਪੇਕਚ੍ਚੇ ਨ ਪਰਲੋਕਵਜ੍ਜਭਯਦਸ੍ਸਾਵਿਨੇ ਵਿਹਰਨ੍ਤੇ; ਦਿਸ੍ਵਾਨ ਬ੍ਰਹ੍ਮਾਨਂ ਸਹਮ੍ਪਤਿਂ ਗਾਥਾਯ ਪਚ੍ਚਭਾਸਿ –

‘‘ਅਪਾਰੁਤਾ ਤੇਸਂ ਅਮਤਸ੍ਸ ਦ੍ਵਾਰਾ;

ਯੇ ਸੋਤਵਨ੍ਤੋ ਪਮੁਞ੍ਚਨ੍ਤੁ ਸਦ੍ਧਂ;

ਵਿਹਿਂਸਸਞ੍ਞੀ ਪਗੁਣਂ ਨ ਭਾਸਿਂ;

ਧਮ੍ਮਂ ਪਣੀਤਂ ਮਨੁਜੇਸੁ ਬ੍ਰਹ੍ਮੇ’’ਤਿ.

ਅਥ ਖੋ ਬ੍ਰਹ੍ਮਾ ਸਹਮ੍ਪਤਿ ‘‘ਕਤਾਵਕਾਸੋ ਖੋਮ੍ਹਿ ਭਗਵਤਾ ਧਮ੍ਮਦੇਸਨਾਯਾ’’ਤਿ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਤਤ੍ਥੇਵਨ੍ਤਰਧਾਯਿ.

ਬ੍ਰਹ੍ਮਯਾਚਨਕਥਾ ਨਿਟ੍ਠਿਤਾ.

੬. ਪਞ੍ਚਵਗ੍ਗਿਯਕਥਾ

੧੦. [ਮ. ਨਿ. ੧.੨੮੪ ਆਦਯੋ; ਮ. ਨਿ. ੨.੩੩੯ ਆਦਯੋ] ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯਂ? ਕੋ ਇਮਂ ਧਮ੍ਮਂ ਖਿਪ੍ਪਮੇਵ ਆਜਾਨਿਸ੍ਸਤੀ’’ਤਿ? ਅਥ ਖੋ ਭਗਵਤੋ ਏਤਦਹੋਸਿ – ‘‘ਅਯਂ ਖੋ ਆਲ਼ਾਰੋ ਕਾਲਾਮੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਦੀਘਰਤ੍ਤਂ ਅਪ੍ਪਰਜਕ੍ਖਜਾਤਿਕੋ; ਯਂਨੂਨਾਹਂ ਆਲ਼ਾਰਸ੍ਸ ਕਾਲਾਮਸ੍ਸ ਪਠਮਂ ਧਮ੍ਮਂ ਦੇਸੇਯ੍ਯਂ, ਸੋ ਇਮਂ ਧਮ੍ਮਂ ਖਿਪ੍ਪਮੇਵ ਆਜਾਨਿਸ੍ਸਤੀ’’ਤਿ. ਅਥ ਖੋ ਅਨ੍ਤਰਹਿਤਾ ਦੇਵਤਾ ਭਗਵਤੋ ਆਰੋਚੇਸਿ – ‘‘ਸਤ੍ਤਾਹਕਾਲਙ੍ਕਤੋ, ਭਨ੍ਤੇ, ਆਲ਼ਾਰੋ ਕਾਲਾਮੋ’’ਤਿ. ਭਗਵਤੋਪਿ ਖੋ ਞਾਣਂ ਉਦਪਾਦਿ – ‘‘ਸਤ੍ਤਾਹਕਾਲਙ੍ਕਤੋ ਆਲ਼ਾਰੋ ਕਾਲਾਮੋ’’ਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਮਹਾਜਾਨਿਯੋ ਖੋ ਆਲ਼ਾਰੋ ਕਾਲਾਮੋ; ਸਚੇ ਹਿ ਸੋ ਇਮਂ ਧਮ੍ਮਂ ਸੁਣੇਯ੍ਯ, ਖਿਪ੍ਪਮੇਵ ਆਜਾਨੇਯ੍ਯਾ’’ਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯਂ? ਕੋ ਇਮਂ ਧਮ੍ਮਂ ਖਿਪ੍ਪਮੇਵ ਆਜਾਨਿਸ੍ਸਤੀ’’ਤਿ? ਅਥ ਖੋ ਭਗਵਤੋ ਏਤਦਹੋਸਿ – ‘‘ਅਯਂ ਖੋ ਉਦਕੋ [ਉਦ੍ਦਕੋ (ਸੀ. ਸ੍ਯਾ.)] ਰਾਮਪੁਤ੍ਤੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਦੀਘਰਤ੍ਤਂ ਅਪ੍ਪਰਜਕ੍ਖਜਾਤਿਕੋ; ਯਂਨੂਨਾਹਂ ਉਦਕਸ੍ਸ ਰਾਮਪੁਤ੍ਤਸ੍ਸ ਪਠਮਂ ਧਮ੍ਮਂ ਦੇਸੇਯ੍ਯਂ, ਸੋ ਇਮਂ ਧਮ੍ਮਂ ਖਿਪ੍ਪਮੇਵ ਆਜਾਨਿਸ੍ਸਤੀ’’ਤਿ. ਅਥ ਖੋ ਅਨ੍ਤਰਹਿਤਾ ਦੇਵਤਾ ਭਗਵਤੋ ਆਰੋਚੇਸਿ – ‘‘ਅਭਿਦੋਸਕਾਲਙ੍ਕਤੋ, ਭਨ੍ਤੇ, ਉਦਕੋ ਰਾਮਪੁਤ੍ਤੋ’’ਤਿ. ਭਗਵਤੋਪਿ ਖੋ ਞਾਣਂ ਉਦਪਾਦਿ – ‘‘ਅਭਿਦੋਸਕਾਲਙ੍ਕਤੋ ਉਦਕੋ ਰਾਮਪੁਤ੍ਤੋ’’ਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਮਹਾਜਾਨਿਯੋ ਖੋ ਉਦਕੋ ਰਾਮਪੁਤ੍ਤੋ; ਸਚੇ ਹਿ ਸੋ ਇਮਂ ਧਮ੍ਮਂ ਸੁਣੇਯ੍ਯ, ਖਿਪ੍ਪਮੇਵ ਆਜਾਨੇਯ੍ਯਾ’’ਤਿ

ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯਂ? ਕੋ ਇਮਂ ਧਮ੍ਮਂ ਖਿਪ੍ਪਮੇਵ ਆਜਾਨਿਸ੍ਸਤੀ’’ਤਿ? ਅਥ ਖੋ ਭਗਵਤੋ ਏਤਦਹੋਸਿ – ‘‘ਬਹੁਕਾਰਾ ਖੋ ਮੇ ਪਞ੍ਚਵਗ੍ਗਿਯਾ ਭਿਕ੍ਖੂ, ਯੇ ਮਂ ਪਧਾਨਪਹਿਤਤ੍ਤਂ ਉਪਟ੍ਠਹਿਂਸੁ; ਯਂਨੂਨਾਹਂ ਪਞ੍ਚਵਗ੍ਗਿਯਾਨਂ ਭਿਕ੍ਖੂਨਂ ਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਹਂ ਨੁ ਖੋ ਏਤਰਹਿ ਪਞ੍ਚਵਗ੍ਗਿਯਾ ਭਿਕ੍ਖੂ ਵਿਹਰਨ੍ਤੀ’’ਤਿ? ਅਦ੍ਦਸਾ ਖੋ ਭਗਵਾ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਪਞ੍ਚਵਗ੍ਗਿਯੇ ਭਿਕ੍ਖੂ ਬਾਰਾਣਸਿਯਂ ਵਿਹਰਨ੍ਤੇ ਇਸਿਪਤਨੇ ਮਿਗਦਾਯੇ. ਅਥ ਖੋ ਭਗਵਾ ਉਰੁਵੇਲਾਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਬਾਰਾਣਸੀ ਤੇਨ ਚਾਰਿਕਂ ਪਕ੍ਕਾਮਿ.

੧੧. ਅਦ੍ਦਸਾ ਖੋ ਉਪਕੋ ਆਜੀਵਕੋ ਭਗਵਨ੍ਤਂ ਅਨ੍ਤਰਾ ਚ ਗਯਂ ਅਨ੍ਤਰਾ ਚ ਬੋਧਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ, ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ ਪਰਿਯੋਦਾਤੋ. ਕਂਸਿ ਤ੍ਵਂ, ਆਵੁਸੋ, ਉਦ੍ਦਿਸ੍ਸ ਪਬ੍ਬਜਿਤੋ? ਕੋ ਵਾ ਤੇ ਸਤ੍ਥਾ? ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’ਤਿ? ਏਵਂ ਵੁਤ੍ਤੇ ਭਗਵਾ ਉਪਕਂ ਆਜੀਵਕਂ ਗਾਥਾਹਿ ਅਜ੍ਝਭਾਸਿ –

[ਧ. ਪ. ੩੫੩; ਕਥਾ. ੪੦੫] ‘‘ਸਬ੍ਬਾਭਿਭੂ ਸਬ੍ਬਵਿਦੂਹਮਸ੍ਮਿ,

ਸਬ੍ਬੇਸੁ ਧਮ੍ਮੇਸੁ ਅਨੂਪਲਿਤ੍ਤੋ;

ਸਬ੍ਬਞ੍ਜਹੋ ਤਣ੍ਹਾਕ੍ਖਯੇ ਵਿਮੁਤ੍ਤੋ,

ਸਯਂ ਅਭਿਞ੍ਞਾਯ ਕਮੁਦ੍ਦਿਸੇਯ੍ਯਂ.

[ਮਿ. ਪ. ੪.੫.੧੧ ਮਿਲਿਨ੍ਦਪਞ੍ਹੇਪਿ; ਕਥਾ. ੪੦੫] ‘‘ਨ ਮੇ ਆਚਰਿਯੋ ਅਤ੍ਥਿ, ਸਦਿਸੋ ਮੇ ਨ ਵਿਜ੍ਜਤਿ;

ਸਦੇਵਕਸ੍ਮਿਂ ਲੋਕਸ੍ਮਿਂ, ਨਤ੍ਥਿ ਮੇ ਪਟਿਪੁਗ੍ਗਲੋ.

[ਕਥਾ. ੪੦੫ ਕਥਾਵਤ੍ਥੁਪਾਲ਼ਿਯਮ੍ਪਿ] ‘‘ਅਹਞ੍ਹਿ ਅਰਹਾ ਲੋਕੇ, ਅਹਂ ਸਤ੍ਥਾ ਅਨੁਤ੍ਤਰੋ;

ਏਕੋਮ੍ਹਿ ਸਮ੍ਮਾਸਮ੍ਬੁਦ੍ਧੋ, ਸੀਤਿਭੂਤੋਸ੍ਮਿ ਨਿਬ੍ਬੁਤੋ.

[ਕਥਾ. ੪੦੫ ਕਥਾਵਤ੍ਥੁਪਾਲ਼ਿਯਮ੍ਪਿ]‘‘ਧਮ੍ਮਚਕ੍ਕਂ ਪਵਤ੍ਤੇਤੁਂ, ਗਚ੍ਛਾਮਿ ਕਾਸਿਨਂ ਪੁਰਂ;

ਅਨ੍ਧੀਭੂਤਸ੍ਮਿਂ ਲੋਕਸ੍ਮਿਂ, ਆਹਞ੍ਛਂ [ਆਹਞ੍ਞਿਂ (ਕ.)] ਅਮਤਦੁਨ੍ਦੁਭਿ’’ਨ੍ਤਿ.

ਯਥਾ ਖੋ ਤ੍ਵਂ, ਆਵੁਸੋ, ਪਟਿਜਾਨਾਸਿ, ਅਰਹਸਿ ਅਨਨ੍ਤਜਿਨੋਤਿ.

[ਕਥਾ. ੪੦੫ ਕਥਾਵਤ੍ਥੁਪਾਲ਼ਿਯਮ੍ਪਿ] ‘‘ਮਾਦਿਸਾ ਵੇ ਜਿਨਾ ਹੋਨ੍ਤਿ, ਯੇ ਪਤ੍ਤਾ ਆਸਵਕ੍ਖਯਂ;

ਜਿਤਾ ਮੇ ਪਾਪਕਾ ਧਮ੍ਮਾ, ਤਸ੍ਮਾਹਮੁਪਕ [ਤਸ੍ਮਾਹਮੁਪਕਾ (ਸੀ.)] ਜਿਨੋ’’ਤਿ.

ਏਵਂ ਵੁਤ੍ਤੇ ਉਪਕੋ ਆਜੀਵਕੋ ਹੁਪੇਯ੍ਯਪਾਵੁਸੋਤਿ [ਹੁਵੇਯ੍ਯਪਾਵੁਸੋ (ਸੀ.) ਹੁਵੇਯ੍ਯਾਵੁਸੋ (ਸ੍ਯਾ.)] ਵਤ੍ਵਾ ਸੀਸਂ ਓਕਮ੍ਪੇਤ੍ਵਾ ਉਮ੍ਮਗ੍ਗਂ ਗਹੇਤ੍ਵਾ ਪਕ੍ਕਾਮਿ.

੧੨. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਬਾਰਾਣਸੀ ਇਸਿਪਤਨਂ ਮਿਗਦਾਯੋ, ਯੇਨ ਪਞ੍ਚਵਗ੍ਗਿਯਾ ਭਿਕ੍ਖੂ ਤੇਨੁਪਸਙ੍ਕਮਿ. ਅਦ੍ਦਸਂਸੁ ਖੋ ਪਞ੍ਚਵਗ੍ਗਿਯਾ ਭਿਕ੍ਖੂ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ; ਦਿਸ੍ਵਾਨ ਅਞ੍ਞਮਞ੍ਞਂ ਕਤਿਕਂ [ਇਦਂ ਪਦਂ ਕੇਸੁਚਿ ਨਤ੍ਥਿ] ਸਣ੍ਠਪੇਸੁਂ – ‘‘ਅਯਂ, ਆਵੁਸੋ, ਸਮਣੋ ਗੋਤਮੋ ਆਗਚ੍ਛਤਿ, ਬਾਹੁਲ੍ਲਿਕੋ ਪਧਾਨਵਿਬ੍ਭਨ੍ਤੋ ਆਵਤ੍ਤੋ ਬਾਹੁਲ੍ਲਾਯ. ਸੋ ਨੇਵ ਅਭਿਵਾਦੇਤਬ੍ਬੋ, ਨ ਪਚ੍ਚੁਟ੍ਠਾਤਬ੍ਬੋ, ਨਾਸ੍ਸ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ; ਅਪਿ ਚ ਖੋ ਆਸਨਂ ਠਪੇਤਬ੍ਬਂ, ਸਚੇ ਸੋ ਆਕਙ੍ਖਿਸ੍ਸਤਿ ਨਿਸੀਦਿਸ੍ਸਤੀ’’ਤਿ. ਯਥਾ ਯਥਾ ਖੋ ਭਗਵਾ ਪਞ੍ਚਵਗ੍ਗਿਯੇ ਭਿਕ੍ਖੂ ਉਪਸਙ੍ਕਮਤਿ, ਤਥਾ ਤਥਾ [ਤਥਾ ਤਥਾ ਤੇ (ਸੀ. ਸ੍ਯਾ.)] ਪਞ੍ਚਵਗ੍ਗਿਯਾ ਭਿਕ੍ਖੂ ਨਾਸਕ੍ਖਿਂਸੁ ਸਕਾਯ ਕਤਿਕਾਯ ਸਣ੍ਠਾਤੁਂ. ਅਸਣ੍ਠਹਨ੍ਤਾ ਭਗਵਨ੍ਤਂ ਪਚ੍ਚੁਗ੍ਗਨ੍ਤ੍ਵਾ ਏਕੋ ਭਗਵਤੋ ਪਤ੍ਤਚੀਵਰਂ ਪਟਿਗ੍ਗਹੇਸਿ, ਏਕੋ ਆਸਨਂ ਪਞ੍ਞਪੇਸਿ, ਏਕੋ ਪਾਦੋਦਕਂ, ਏਕੋ ਪਾਦਪੀਠਂ, ਏਕੋ ਪਾਦਕਠਲਿਕਂ ਉਪਨਿਕ੍ਖਿਪਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ; ਨਿਸਜ੍ਜ ਖੋ ਭਗਵਾ ਪਾਦੇ ਪਕ੍ਖਾਲੇਸਿ. ਅਪਿਸ੍ਸੁ [ਅਪਿ ਚ ਖੋ (ਪਾਸਰਾਸਿਸੁਤ੍ਥ)] ਭਗਵਨ੍ਤਂ ਨਾਮੇਨ ਚ ਆਵੁਸੋਵਾਦੇਨ ਚ ਸਮੁਦਾਚਰਨ੍ਤਿ. ਏਵਂ ਵੁਤ੍ਤੇ ਭਗਵਾ ਪਞ੍ਚਵਗ੍ਗਿਯੇ ਭਿਕ੍ਖੂ ਏਤਦਵੋਚ – ‘‘ਮਾ, ਭਿਕ੍ਖਵੇ, ਤਥਾਗਤਂ ਨਾਮੇਨ ਚ ਆਵੁਸੋਵਾਦੇਨ ਚ ਸਮੁਦਾਚਰਥ [ਸਮੁਦਾਚਰਿਤ੍ਥ (ਸੀ. ਸ੍ਯਾ.)]. ਅਰਹਂ, ਭਿਕ੍ਖਵੇ, ਤਥਾਗਤੋ ਸਮ੍ਮਾਸਮ੍ਬੁਦ੍ਧੋ, ਓਦਹਥ, ਭਿਕ੍ਖਵੇ, ਸੋਤਂ, ਅਮਤਮਧਿਗਤਂ, ਅਹਮਨੁਸਾਸਾਮਿ, ਅਹਂ ਧਮ੍ਮਂ ਦੇਸੇਮਿ. ਯਥਾਨੁਸਿਟ੍ਠਂ ਤਥਾ ਪਟਿਪਜ੍ਜਮਾਨਾ [ਯਥਾਨੁਸਿਟ੍ਠਂ ਪਟਿਪਜ੍ਜਮਾਨਾ (ਸ੍ਯਾ.)] ਨਚਿਰਸ੍ਸੇਵ – ਯਸ੍ਸਤ੍ਥਾਯ ਕੁਲਪੁਤ੍ਤਾ ਸਮ੍ਮਦੇਵ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਨ੍ਤਿ ਤਦਨੁਤ੍ਤਰਂ – ਬ੍ਰਹ੍ਮਚਰਿਯਪਰਿਯੋਸਾਨਂ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਿਸ੍ਸਥਾ’’ਤਿ. ਏਵਂ ਵੁਤ੍ਤੇ ਪਞ੍ਚਵਗ੍ਗਿਯਾ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘‘ਤਾਯਪਿ ਖੋ ਤ੍ਵਂ, ਆਵੁਸੋ ਗੋਤਮ, ਇਰਿਯਾਯ [ਚਰਿਯਾਯ (ਸ੍ਯਾ.)], ਤਾਯ ਪਟਿਪਦਾਯ, ਤਾਯ ਦੁਕ੍ਕਰਕਾਰਿਕਾਯ ਨੇਵਜ੍ਝਗਾ ਉਤ੍ਤਰਿ ਮਨੁਸ੍ਸਧਮ੍ਮਾ [ਉਤ੍ਤਰਿਮਨੁਸ੍ਸਧਮ੍ਮਂ (ਸ੍ਯਾ. ਕ.)] ਅਲਮਰਿਯਞਾਣਦਸ੍ਸਨਵਿਸੇਸਂ, ਕਿਂ ਪਨ ਤ੍ਵਂ ਏਤਰਹਿ, ਬਾਹੁਲ੍ਲਿਕੋ ਪਧਾਨਵਿਬ੍ਭਨ੍ਤੋ ਆਵਤ੍ਤੋ ਬਾਹੁਲ੍ਲਾਯ, ਅਧਿਗਮਿਸ੍ਸਸਿ ਉਤ੍ਤਰਿ ਮਨੁਸ੍ਸਧਮ੍ਮਾ ਅਲਮਰਿਯਞਾਣਦਸ੍ਸਨਵਿਸੇਸ’’ਨ੍ਤਿ? ਏਵਂ ਵੁਤ੍ਤੇ ਭਗਵਾ ਪਞ੍ਚਵਗ੍ਗਿਯੇ ਭਿਕ੍ਖੂ ਏਤਦਵੋਚ – ‘‘ਨ, ਭਿਕ੍ਖਵੇ, ਤਥਾਗਤੋ ਬਾਹੁਲ੍ਲਿਕੋ, ਨ ਪਧਾਨਵਿਬ੍ਭਨ੍ਤੋ, ਨ ਆਵਤ੍ਤੋ ਬਾਹੁਲ੍ਲਾਯ; ਅਰਹਂ, ਭਿਕ੍ਖਵੇ, ਤਥਾਗਤੋ ਸਮ੍ਮਾਸਮ੍ਬੁਦ੍ਧੋ. ਓਦਹਥ, ਭਿਕ੍ਖਵੇ, ਸੋਤਂ, ਅਮਤਮਧਿਗਤਂ, ਅਹਮਨੁਸਾਸਾਮਿ, ਅਹਂ ਧਮ੍ਮਂ ਦੇਸੇਮਿ. ਯਥਾਨੁਸਿਟ੍ਠਂ ਤਥਾ ਪਟਿਪਜ੍ਜਮਾਨਾ ਨਚਿਰਸ੍ਸੇਵ – ਯਸ੍ਸਤ੍ਥਾਯ ਕੁਲਪੁਤ੍ਤਾ ਸਮ੍ਮਦੇਵ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਨ੍ਤਿ ਤਦਨੁਤ੍ਤਰਂ – ਬ੍ਰਹ੍ਮਚਰਿਯਪਰਿਯੋਸਾਨਂ ਦਿਟ੍ਠੇਵਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਿਸ੍ਸਥਾ’’ਤਿ. ਦੁਤਿਯਮ੍ਪਿ ਖੋ ਪਞ੍ਚਵਗ੍ਗਿਯਾ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ…ਪੇ…. ਦੁਤਿਯਮ੍ਪਿ ਖੋ ਭਗਵਾ ਪਞ੍ਚਵਗ੍ਗਿਯੇ ਭਿਕ੍ਖੂ ਏਤਦਵੋਚ…ਪੇ…. ਤਤਿਯਮ੍ਪਿ ਖੋ ਪਞ੍ਚਵਗ੍ਗਿਯਾ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘‘ਤਾਯਪਿ ਖੋ ਤ੍ਵਂ, ਆਵੁਸੋ ਗੋਤਮ, ਇਰਿਯਾਯ, ਤਾਯ ਪਟਿਪਦਾਯ, ਤਾਯ ਦੁਕ੍ਕਰਕਾਰਿਕਾਯ ਨੇਵਜ੍ਝਗਾ ਉਤ੍ਤਰਿ ਮਨੁਸ੍ਸਧਮ੍ਮਾ ਅਲਮਰਿਯਞਾਣਦਸ੍ਸਨਵਿਸੇਸਂ, ਕਿਂ ਪਨ ਤ੍ਵਂ ਏਤਰਹਿ, ਬਾਹੁਲ੍ਲਿਕੋ ਪਧਾਨਵਿਬ੍ਭਨ੍ਤੋ ਆਵਤ੍ਤੋ ਬਾਹੁਲ੍ਲਾਯ, ਅਧਿਗਮਿਸ੍ਸਸਿ ਉਤ੍ਤਰਿ ਮਨੁਸ੍ਸਧਮ੍ਮਾ ਅਲਮਰਿਯਞਾਣਦਸ੍ਸਨਵਿਸੇਸ’’ਨ੍ਤਿ? ਏਵਂ ਵੁਤ੍ਤੇ ਭਗਵਾ ਪਞ੍ਚਵਗ੍ਗਿਯੇ ਭਿਕ੍ਖੂ ਏਤਦਵੋਚ – ‘‘ਅਭਿਜਾਨਾਥ ਮੇ ਨੋ ਤੁਮ੍ਹੇ, ਭਿਕ੍ਖਵੇ, ਇਤੋ ਪੁਬ੍ਬੇ ਏਵਰੂਪਂ ਪਭਾਵਿਤਮੇਤ’’ਨ੍ਤਿ [ਭਾਸਿਤਮੇਤਨ੍ਤਿ (ਸੀ. ਸ੍ਯਾ. ਕ.) ਟੀਕਾਯੋ ਓਲੋਕੇਤਬ੍ਬਾ]? ‘‘ਨੋਹੇਤਂ, ਭਨ੍ਤੇ’’. ਅਰਹਂ, ਭਿਕ੍ਖਵੇ, ਤਥਾਗਤੋ ਸਮ੍ਮਾਸਮ੍ਬੁਦ੍ਧੋ, ਓਦਹਥ, ਭਿਕ੍ਖਵੇ, ਸੋਤਂ, ਅਮਤਮਧਿਗਤਂ, ਅਹਮਨੁਸਾਸਾਮਿ, ਅਹਂ ਧਮ੍ਮਂ ਦੇਸੇਮਿ. ਯਥਾਨੁਸਿਟ੍ਠਂ ਤਥਾ ਪਟਿਪਜ੍ਜਮਾਨਾ ਨਚਿਰਸ੍ਸੇਵ – ਯਸ੍ਸਤ੍ਥਾਯ ਕੁਲਪੁਤ੍ਤਾ ਸਮ੍ਮਦੇਵ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਨ੍ਤਿ ਤਦਨੁਤ੍ਤਰਂਬ੍ਰਹ੍ਮਚਰਿਯਪਰਿਯੋਸਾਨਂ ਦਿਟ੍ਠੇਵਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਿਸ੍ਸਥਾਤਿ. ਅਸਕ੍ਖਿ ਖੋ ਭਗਵਾ ਪਞ੍ਚਵਗ੍ਗਿਯੇ ਭਿਕ੍ਖੂ ਸਞ੍ਞਾਪੇਤੁਂ. ਅਥ ਖੋ ਪਞ੍ਚਵਗ੍ਗਿਯਾ ਭਿਕ੍ਖੂ ਭਗਵਨ੍ਤਂ ਸੁਸ੍ਸੂਸਿਂਸੁ, ਸੋਤਂ ਓਦਹਿਂਸੁ, ਅਞ੍ਞਾ ਚਿਤ੍ਤਂ ਉਪਟ੍ਠਾਪੇਸੁਂ.

੧੩. ਅਥ ਖੋ ਭਗਵਾ ਪਞ੍ਚਵਗ੍ਗਿਯੇ ਭਿਕ੍ਖੂ ਆਮਨ੍ਤੇਸਿ –

‘‘[ਸਂ. ਨਿ. ੫.੧੦੮੧ ਆਦਯੋ] ਦ੍ਵੇਮੇ, ਭਿਕ੍ਖਵੇ, ਅਨ੍ਤਾ ਪਬ੍ਬਜਿਤੇਨ ਨ ਸੇਵਿਤਬ੍ਬਾ. ਕਤਮੇ ਦ੍ਵੇ [ਇਦਂ ਪਦਦ੍ਵਯਂ ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ]? ਯੋ ਚਾਯਂ ਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗੋ ਹੀਨੋ ਗਮ੍ਮੋ ਪੋਥੁਜ੍ਜਨਿਕੋ ਅਨਰਿਯੋ ਅਨਤ੍ਥਸਂਹਿਤੋ, ਯੋ ਚਾਯਂ ਅਤ੍ਤਕਿਲਮਥਾਨੁਯੋਗੋ ਦੁਕ੍ਖੋ ਅਨਰਿਯੋ ਅਨਤ੍ਥਸਂਹਿਤੋ. ਏਤੇ ਖੋ, ਭਿਕ੍ਖਵੇ, ਉਭੋ ਅਨ੍ਤੇ ਅਨੁਪਗਮ੍ਮ, ਮਜ੍ਝਿਮਾ ਪਟਿਪਦਾ ਤਥਾਗਤੇਨ ਅਭਿਸਮ੍ਬੁਦ੍ਧਾ, ਚਕ੍ਖੁਕਰਣੀ ਞਾਣਕਰਣੀ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ. ਕਤਮਾ ਚ ਸਾ, ਭਿਕ੍ਖਵੇ, ਮਜ੍ਝਿਮਾ ਪਟਿਪਦਾ ਤਥਾਗਤੇਨ ਅਭਿਸਮ੍ਬੁਦ੍ਧਾ, ਚਕ੍ਖੁਕਰਣੀ ਞਾਣਕਰਣੀ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ? ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ, ਸੇਯ੍ਯਥਿਦਂ – ਸਮ੍ਮਾਦਿਟ੍ਠਿ, ਸਮ੍ਮਾਸਙ੍ਕਪ੍ਪੋ, ਸਮ੍ਮਾਵਾਚਾ, ਸਮ੍ਮਾਕਮ੍ਮਨ੍ਤੋ, ਸਮ੍ਮਾਆਜੀਵੋ, ਸਮ੍ਮਾਵਾਯਾਮੋ, ਸਮ੍ਮਾਸਤਿ, ਸਮ੍ਮਾਸਮਾਧਿ. ਅਯਂ ਖੋ ਸਾ, ਭਿਕ੍ਖਵੇ, ਮਜ੍ਝਿਮਾ ਪਟਿਪਦਾ ਤਥਾਗਤੇਨ ਅਭਿਸਮ੍ਬੁਦ੍ਧਾ, ਚਕ੍ਖੁਕਰਣੀ ਞਾਣਕਰਣੀ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ.

੧੪. ‘‘ਇਦਂ ਖੋ ਪਨ, ਭਿਕ੍ਖਵੇ, ਦੁਕ੍ਖਂ ਅਰਿਯਸਚ੍ਚਂ. ਜਾਤਿਪਿ ਦੁਕ੍ਖਾ, ਜਰਾਪਿ ਦੁਕ੍ਖਾ, ਬ੍ਯਾਧਿਪਿ ਦੁਕ੍ਖੋ, ਮਰਣਮ੍ਪਿ ਦੁਕ੍ਖਂ, ਅਪ੍ਪਿਯੇਹਿ ਸਮ੍ਪਯੋਗੋ ਦੁਕ੍ਖੋ, ਪਿਯੇਹਿ ਵਿਪ੍ਪਯੋਗੋ ਦੁਕ੍ਖੋ, ਯਮ੍ਪਿਚ੍ਛਂ ਨ ਲਭਤਿ ਤਮ੍ਪਿ ਦੁਕ੍ਖਂ. ਸਂਖਿਤ੍ਤੇਨ, ਪਞ੍ਚੁਪਾਦਾਨਕ੍ਖਨ੍ਧਾ [ਪਞ੍ਚੁਪਾਦਾਨਖਨ੍ਧਾਪਿ (ਕ)] ਦੁਕ੍ਖਾ. ‘‘ਇਦਂ ਖੋ ਪਨ, ਭਿਕ੍ਖਵੇ, ਦੁਕ੍ਖਸਮੁਦਯਂ [ਏਤ੍ਥ ‘‘ਇਦਂ ਦੁਕ੍ਖਂ ਅਰਿਯਸਚ੍ਚਨ੍ਤਿ ਆਦੀਸੁ ਦੁਕ੍ਖਸਮੁਦਯੋ ਦੁਕ੍ਖਨਿਰੋਧੋਤਿ ਵਤ੍ਤਬ੍ਬੇ ਦੁਕ੍ਖਸਮੁਦਯਂ ਦੁਕ੍ਖਨਿਰੋਧਨ੍ਤਿ ਲਿਙ੍ਗਵਿਪਲ੍ਲਾਸੋ ਤਤੋ’’ਤਿ ਪਟਿਸਮ੍ਭਿਦਾਮਗ੍ਗਟ੍ਠਕਥਾਯਂ ਵੁਤ੍ਤਂ. ਵਿਸੁਦ੍ਧਿਮਗ੍ਗਟੀਕਾਯਂ ਪਨ ਉਪ੍ਪਾਦੋ ਭਯਨ੍ਤਿਪਾਠਵਣ੍ਣਨਾਯਂ ‘‘ਸਤਿਪਿ ਦ੍ਵਿਨ੍ਨਂ ਪਦਾਨਂ ਸਮਾਨਾਧਿਕਰਣਭਾਵੇ ਲਿਙ੍ਗਭੇਦੋ ਗਹਿਤੋ, ਯਥਾ ਦੁਕ੍ਖਸਮੁਦਯੋ ਅਰਿਯਸਚ੍ਚ’’ਨ੍ਤਿ ਵੁਤ੍ਤਂ. ਤੇਸੁ ਦੁਕ੍ਖਸਮੁਦਯੋ ਅਰਿਯਸਚ੍ਚ’’ਨ੍ਤਿ ਸਕਲਿਙ੍ਗਿਕਪਾਠੋ ‘‘ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚ’’ਨ੍ਤਿ ਪਾਲ਼ਿਯਾ ਸਮੇਤਿ.] ਅਰਿਯਸਚ੍ਚਂ – ਯਾਯਂ ਤਣ੍ਹਾ ਪੋਨੋਬ੍ਭਵਿਕਾ [ਪੋਨੋਭਵਿਕਾ (ਕ.)] ਨਨ੍ਦੀਰਾਗਸਹਗਤਾ [ਨਨ੍ਦਿਰਾਗਸਹਗਤਾ (ਸੀ. ਸ੍ਯਾ.)] ਤਤ੍ਰਤਤ੍ਰਾਭਿਨਨ੍ਦਿਨੀ, ਸੇਯ੍ਯਥਿਦਂ – ਕਾਮਤਣ੍ਹਾ, ਭਵਤਣ੍ਹਾ, ਵਿਭਵਤਣ੍ਹਾ.

‘‘ਇਦਂ ਖੋ ਪਨ, ਭਿਕ੍ਖਵੇ, ਦੁਕ੍ਖਨਿਰੋਧਂ ਅਰਿਯਸਚ੍ਚਂ – ਯੋ ਤਸ੍ਸਾ ਯੇਵ ਤਣ੍ਹਾਯ ਅਸੇਸਵਿਰਾਗਨਿਰੋਧੋ, ਚਾਗੋ, ਪਟਿਨਿਸ੍ਸਗ੍ਗੋ, ਮੁਤ੍ਤਿ, ਅਨਾਲਯੋ. ‘‘ਇਦਂ ਖੋ ਪਨ, ਭਿਕ੍ਖਵੇ, ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਂ – ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ, ਸੇਯ੍ਯਥਿਦਂ – ਸਮ੍ਮਾਦਿਟ੍ਠਿ, ਸਮ੍ਮਾਸਙ੍ਕਪ੍ਪੋ, ਸਮ੍ਮਾਵਾਚਾ, ਸਮ੍ਮਾਕਮ੍ਮਨ੍ਤੋ, ਸਮ੍ਮਾਆਜੀਵੋ, ਸਮ੍ਮਾਵਾਯਾਮੋ, ਸਮ੍ਮਾਸਤਿ, ਸਮ੍ਮਾਸਮਾਧਿ.

੧੫. ‘‘ਇਦਂ ਦੁਕ੍ਖਂ ਅਰਿਯਸਚ੍ਚਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ. ਤਂ ਖੋ ਪਨਿਦਂ ਦੁਕ੍ਖਂ ਅਰਿਯਸਚ੍ਚਂ ਪਰਿਞ੍ਞੇਯ੍ਯਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ. ਤਂ ਖੋ ਪਨਿਦਂ ਦੁਕ੍ਖਂ ਅਰਿਯਸਚ੍ਚਂ ਪਰਿਞ੍ਞਾਤਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ.

‘‘ਇਦਂ ਦੁਕ੍ਖਸਮੁਦਯਂ ਅਰਿਯਸਚ੍ਚਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ. ਤਂ ਖੋ ਪਨਿਦਂ ਦੁਕ੍ਖਸਮੁਦਯਂ ਅਰਿਯਸਚ੍ਚਂ ਪਹਾਤਬ੍ਬਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ. ਤਂ ਖੋ ਪਨਿਦਂ ਦੁਕ੍ਖਸਮੁਦਯਂ ਅਰਿਯਸਚ੍ਚਂ ਪਹੀਨਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ.

‘‘ਇਦਂ ਦੁਕ੍ਖਨਿਰੋਧਂ ਅਰਿਯਸਚ੍ਚਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ. ਤਂ ਖੋ ਪਨਿਦਂ ਦੁਕ੍ਖਨਿਰੋਧਂ ਅਰਿਯਸਚ੍ਚਂ ਸਚ੍ਛਿਕਾਤਬ੍ਬਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ. ਤਂ ਖੋ ਪਨਿਦਂ ਦੁਕ੍ਖਨਿਰੋਧਂ ਅਰਿਯਸਚ੍ਚਂ ਸਚ੍ਛਿਕਤਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ.

‘‘ਇਦਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ. ਤਂ ਖੋ ਪਨਿਦਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਂ ਭਾਵੇਤਬ੍ਬਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ. ਤਂ ਖੋ ਪਨਿਦਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਂ ਭਾਵਿਤਨ੍ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ.

੧੬. ‘‘ਯਾਵਕੀਵਞ੍ਚ ਮੇ, ਭਿਕ੍ਖਵੇ, ਇਮੇਸੁ ਚਤੂਸੁ ਅਰਿਯਸਚ੍ਚੇਸੁ ਏਵਂ ਤਿਪਰਿਵਟ੍ਟਂ ਦ੍ਵਾਦਸਾਕਾਰਂ ਯਥਾਭੂਤਂ ਞਾਣਦਸ੍ਸਨਂ ਨ ਸੁਵਿਸੁਦ੍ਧਂ ਅਹੋਸਿ, ਨੇਵ ਤਾਵਾਹਂ, ਭਿਕ੍ਖਵੇ, ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋਤਿ ਪਚ੍ਚਞ੍ਞਾਸਿਂ. ਯਤੋ ਚ ਖੋ ਮੇ, ਭਿਕ੍ਖਵੇ, ਇਮੇਸੁ ਚਤੂਸੁ ਅਰਿਯਸਚ੍ਚੇਸੁ ਏਵਂ ਤਿਪਰਿਵਟ੍ਟਂ ਦ੍ਵਾਦਸਾਕਾਰਂ ਯਥਾਭੂਤਂ ਞਾਣਦਸ੍ਸਨਂ ਸੁਵਿਸੁਦ੍ਧਂ ਅਹੋਸਿ, ਅਥਾਹਂ, ਭਿਕ੍ਖਵੇ, ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋਤਿ [ਅਭਿਸਮ੍ਬੁਦ੍ਧੋ (ਸੀ. ਸ੍ਯਾ.)] ਪਚ੍ਚਞ੍ਞਾਸਿਂ. ਞਾਣਞ੍ਚ ਪਨ ਮੇ ਦਸ੍ਸਨਂ ਉਦਪਾਦਿ – ਅਕੁਪ੍ਪਾ ਮੇ ਵਿਮੁਤ੍ਤਿ, ਅਯਮਨ੍ਤਿਮਾ ਜਾਤਿ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. ਇਦਮਵੋਚ ਭਗਵਾ ਅਤ੍ਤਮਨਾ ਪਞ੍ਚਵਗ੍ਗਿਯਾ ਭਿਕ੍ਖੂ ਭਗਵਤੋ ਭਾਸਿਤਂ ਅਭਿਨਨ੍ਦੁਨ੍ਤਿ [ਇਦਮਵੋਚ…ਪੇ… ਅਭਿਨਨ੍ਦੁਨ੍ਤਿਵਾਕ੍ਯਂ ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ].

ਇਮਸ੍ਮਿਞ੍ਚ ਪਨ ਵੇਯ੍ਯਾਕਰਣਸ੍ਮਿਂ ਭਞ੍ਞਮਾਨੇ ਆਯਸ੍ਮਤੋ ਕੋਣ੍ਡਞ੍ਞਸ੍ਸ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ.

੧੭. ਪਵਤ੍ਤਿਤੇ ਚ ਪਨ ਭਗਵਤਾ ਧਮ੍ਮਚਕ੍ਕੇ, ਭੁਮ੍ਮਾ ਦੇਵਾ ਸਦ੍ਦਮਨੁਸ੍ਸਾਵੇਸੁਂ – ‘‘ਏਤਂ ਭਗਵਤਾ ਬਾਰਾਣਸਿਯਂ ਇਸਿਪਤਨੇ ਮਿਗਦਾਯੇ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤਿਤਂ, ਅਪ੍ਪਟਿਵਤ੍ਤਿਯਂ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿ’’ਨ੍ਤਿ. ਭੁਮ੍ਮਾਨਂ ਦੇਵਾਨਂ ਸਦ੍ਦਂ ਸੁਤ੍ਵਾ ਚਾਤੁਮਹਾਰਾਜਿਕਾ ਦੇਵਾ ਸਦ੍ਦਮਨੁਸ੍ਸਾਵੇਸੁਂ…ਪੇ… ਚਾਤੁਮਹਾਰਾਜਿਕਾਨਂ ਦੇਵਾਨਂ ਸਦ੍ਦਂ ਸੁਤ੍ਵਾ ਤਾਵਤਿਂਸਾ ਦੇਵਾ…ਪੇ… ਯਾਮਾ ਦੇਵਾ…ਪੇ… ਤੁਸਿਤਾ ਦੇਵਾ…ਪੇ… ਨਿਮ੍ਮਾਨਰਤੀ ਦੇਵਾ…ਪੇ… ਪਰਨਿਮ੍ਮਿਤਵਸਵਤ੍ਤੀ ਦੇਵਾ…ਪੇ… ਬ੍ਰਹ੍ਮਕਾਯਿਕਾ ਦੇਵਾ ਸਦ੍ਦਮਨੁਸ੍ਸਾਵੇਸੁਂ – ‘‘ਏਤਂ ਭਗਵਤਾ ਬਾਰਾਣਸਿਯਂ ਇਸਿਪਤਨੇ ਮਿਗਦਾਯੇ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤਿਤਂ ਅਪ੍ਪਟਿਵਤ੍ਤਿਯਂ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿ’’ਨ੍ਤਿ. ਇਤਿਹ, ਤੇਨ ਖਣੇਨ, ਤੇਨ ਲਯੇਨ [ਤੇਨ ਲਯੇਨਾਤਿ ਪਦਦ੍ਵਯਂ ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ] ਤੇਨ ਮੁਹੁਤ੍ਤੇਨ ਯਾਵ ਬ੍ਰਹ੍ਮਲੋਕਾ ਸਦ੍ਦੋ ਅਬ੍ਭੁਗ੍ਗਚ੍ਛਿ. ਅਯਞ੍ਚ ਦਸਸਹਸ੍ਸਿਲੋਕਧਾਤੁ ਸਂਕਮ੍ਪਿ ਸਮ੍ਪਕਮ੍ਪਿ ਸਮ੍ਪਵੇਧਿ; ਅਪ੍ਪਮਾਣੋ ਚ ਉਲ਼ਾਰੋ ਓਭਾਸੋ ਲੋਕੇ ਪਾਤੁਰਹੋਸਿ, ਅਤਿਕ੍ਕਮ੍ਮ ਦੇਵਾਨਂ ਦੇਵਾਨੁਭਾਵਂ. ਅਥ ਖੋ ਭਗਵਾ ਇਮਂ ਉਦਾਨਂ ਉਦਾਨੇਸਿ – ‘‘ਅਞ੍ਞਾਸਿ ਵਤ, ਭੋ ਕੋਣ੍ਡਞ੍ਞੋ, ਅਞ੍ਞਾਸਿ ਵਤ ਭੋ ਕੋਣ੍ਡਞ੍ਞੋ’’ਤਿ. ਇਤਿ ਹਿਦਂ ਆਯਸ੍ਮਤੋ ਕੋਣ੍ਡਞ੍ਞਸ੍ਸ ‘ਅਞ੍ਞਾਸਿਕੋਣ੍ਡਞ੍ਞੋ’ ਤ੍ਵੇਵ ਨਾਮਂ ਅਹੋਸਿ.

੧੮. ਅਥ ਖੋ ਆਯਸ੍ਮਾ ਅਞ੍ਞਾਸਿਕੋਣ੍ਡਞ੍ਞੋ ਦਿਟ੍ਠਧਮ੍ਮੋ ਪਤ੍ਤਧਮ੍ਮੋ ਵਿਦਿਤਧਮ੍ਮੋ ਪਰਿਯੋਗਾਲ਼੍ਹਧਮ੍ਮੋ ਤਿਣ੍ਣਵਿਚਿਕਿਚ੍ਛੋ ਵਿਗਤਕਥਂਕਥੋ ਵੇਸਾਰਜ੍ਜਪ੍ਪਤ੍ਤੋ ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਲਭੇਯ੍ਯਾਹਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਂ ਉਪਸਮ੍ਪਦ’’ਨ੍ਤਿ. ‘‘ਏਹਿ ਭਿਕ੍ਖੂ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤਸ੍ਸ ਆਯਸ੍ਮਤੋ ਉਪਸਮ੍ਪਦਾ ਅਹੋਸਿ.

੧੯. ਅਥ ਖੋ ਭਗਵਾ ਤਦਵਸੇਸੇ ਭਿਕ੍ਖੂ ਧਮ੍ਮਿਯਾ ਕਥਾਯ ਓਵਦਿ ਅਨੁਸਾਸਿ. ਅਥ ਖੋ ਆਯਸ੍ਮਤੋ ਚ ਵਪ੍ਪਸ੍ਸ ਆਯਸ੍ਮਤੋ ਚ ਭਦ੍ਦਿਯਸ੍ਸ ਭਗਵਤਾ ਧਮ੍ਮਿਯਾ ਕਥਾਯ ਓਵਦਿਯਮਾਨਾਨਂ ਅਨੁਸਾਸਿਯਮਾਨਾਨਂ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ.

ਤੇ ਦਿਟ੍ਠਧਮ੍ਮਾ ਪਤ੍ਤਧਮ੍ਮਾ ਵਿਦਿਤਧਮ੍ਮਾ ਪਰਿਯੋਗਾਲ਼੍ਹਧਮ੍ਮਾ ਤਿਣ੍ਣਵਿਚਿਕਿਚ੍ਛਾ ਵਿਗਤਕਥਂਕਥਾ ਵੇਸਾਰਜ੍ਜਪ੍ਪਤ੍ਤਾ ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

ਅਥ ਖੋ ਭਗਵਾ ਤਦਵਸੇਸੇ ਭਿਕ੍ਖੂ ਨੀਹਾਰਭਤ੍ਤੋ ਧਮ੍ਮਿਯਾ ਕਥਾਯ ਓਵਦਿ ਅਨੁਸਾਸਿ. ਯਂ ਤਯੋ ਭਿਕ੍ਖੂ ਪਿਣ੍ਡਾਯ ਚਰਿਤ੍ਵਾ ਆਹਰਨ੍ਤਿ, ਤੇਨ ਛਬ੍ਬਗ੍ਗੋ ਯਾਪੇਤਿ. ਅਥ ਖੋ ਆਯਸ੍ਮਤੋ ਚ ਮਹਾਨਾਮਸ੍ਸ ਆਯਸ੍ਮਤੋ ਚ ਅਸ੍ਸਜਿਸ੍ਸ ਭਗਵਤਾ ਧਮ੍ਮਿਯਾ ਕਥਾਯ ਓਵਦਿਯਮਾਨਾਨਂ ਅਨੁਸਾਸਿਯਮਾਨਾਨਂ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ. ਤੇ ਦਿਟ੍ਠਧਮ੍ਮਾ ਪਤ੍ਤਧਮ੍ਮਾ ਵਿਦਿਤਧਮ੍ਮਾ ਪਰਿਯੋਗਾਲ਼੍ਹਧਮ੍ਮਾ ਤਿਣ੍ਣਵਿਚਿਕਿਚ੍ਛਾ ਵਿਗਤਕਥਂਕਥਾ ਵੇਸਾਰਜ੍ਜਪ੍ਪਤ੍ਤਾ ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

੨੦. ਅਥ ਖੋ ਭਗਵਾ ਪਞ੍ਚਵਗ੍ਗਿਯੇ ਭਿਕ੍ਖੂ ਆਮਨ੍ਤੇਸਿ –

[ਸਂ. ਨਿ. ੩.੫੯ ਆਦਯੋ] ‘‘ਰੂਪਂ, ਭਿਕ੍ਖਵੇ, ਅਨਤ੍ਤਾ. ਰੂਪਞ੍ਚ ਹਿਦਂ, ਭਿਕ੍ਖਵੇ, ਅਤ੍ਤਾ ਅਭਵਿਸ੍ਸ, ਨਯਿਦਂ ਰੂਪਂ ਆਬਾਧਾਯ ਸਂਵਤ੍ਤੇਯ੍ਯ, ਲਬ੍ਭੇਥ ਚ ਰੂਪੇ – ‘ਏਵਂ ਮੇ ਰੂਪਂ ਹੋਤੁ, ਏਵਂ ਮੇ ਰੂਪਂ ਮਾ ਅਹੋਸੀ’ਤਿ. ਯਸ੍ਮਾ ਚ ਖੋ, ਭਿਕ੍ਖਵੇ, ਰੂਪਂ ਅਨਤ੍ਤਾ, ਤਸ੍ਮਾ ਰੂਪਂ ਆਬਾਧਾਯ ਸਂਵਤ੍ਤਤਿ, ਨ ਚ ਲਬ੍ਭਤਿ ਰੂਪੇ – ‘ਏਵਂ ਮੇ ਰੂਪਂ ਹੋਤੁ, ਏਵਂ ਮੇ ਰੂਪਂ ਮਾ ਅਹੋਸੀ’ਤਿ. ਵੇਦਨਾ, ਅਨਤ੍ਤਾ. ਵੇਦਨਾ ਚ ਹਿਦਂ, ਭਿਕ੍ਖਵੇ, ਅਤ੍ਤਾ ਅਭਵਿਸ੍ਸ, ਨਯਿਦਂ ਵੇਦਨਾ ਆਬਾਧਾਯ ਸਂਵਤ੍ਤੇਯ੍ਯ, ਲਬ੍ਭੇਥ ਚ ਵੇਦਨਾਯ – ‘ਏਵਂ ਮੇ ਵੇਦਨਾ ਹੋਤੁ, ਏਵਂ ਮੇ ਵੇਦਨਾ ਮਾ ਅਹੋਸੀ’ਤਿ. ਯਸ੍ਮਾ ਚ ਖੋ, ਭਿਕ੍ਖਵੇ, ਵੇਦਨਾ ਅਨਤ੍ਤਾ, ਤਸ੍ਮਾ ਵੇਦਨਾ ਆਬਾਧਾਯ ਸਂਵਤ੍ਤਤਿ, ਨ ਚ ਲਬ੍ਭਤਿ ਵੇਦਨਾਯ – ‘ਏਵਂ ਮੇ ਵੇਦਨਾ ਹੋਤੁ, ਏਵਂ ਮੇ ਵੇਦਨਾ ਮਾ ਅਹੋਸੀ’ਤਿ. ਸਞ੍ਞਾ, ਅਨਤ੍ਤਾ. ਸਞ੍ਞਾ ਚ ਹਿਦਂ, ਭਿਕ੍ਖਵੇ, ਅਤ੍ਤਾ ਅਭਵਿਸ੍ਸ, ਨਯਿਦਂ ਸਞ੍ਞਾ ਆਬਾਧਾਯ ਸਂਵਤ੍ਤੇਯ੍ਯ, ਲਬ੍ਭੇਥ ਚ ਸਞ੍ਞਾਯ – ‘ਏਵਂ ਮੇ ਸਞ੍ਞਾ ਹੋਤੁ, ਏਵਂ ਮੇ ਸਞ੍ਞਾ ਮਾ ਅਹੋਸੀ’ਤਿ. ਯਸ੍ਮਾ ਚ ਖੋ, ਭਿਕ੍ਖਵੇ, ਸਞ੍ਞਾ ਅਨਤ੍ਤਾ, ਤਸ੍ਮਾ ਸਞ੍ਞਾ ਆਬਾਧਾਯ ਸਂਵਤ੍ਤਤਿ, ਨ ਚ ਲਬ੍ਭਤਿ ਸਞ੍ਞਾਯ – ‘ਏਵਂ ਮੇ ਸਞ੍ਞਾ ਹੋਤੁ, ਏਵਂ ਮੇ ਸਞ੍ਞਾ ਮਾ ਅਹੋਸੀ’ਤਿ. ਸਙ੍ਖਾਰਾ, ਅਨਤ੍ਤਾ. ਸਙ੍ਖਾਰਾ ਚ ਹਿਦਂ, ਭਿਕ੍ਖਵੇ, ਅਤ੍ਤਾ ਅਭਵਿਸ੍ਸਂਸੁ, ਨਯਿਦਂ [ਨਯਿਮੇ (ਕ.)] ਸਙ੍ਖਾਰਾ ਆਬਾਧਾਯ ਸਂਵਤ੍ਤੇਯ੍ਯੁਂ, ਲਬ੍ਭੇਥ ਚ ਸਙ੍ਖਾਰੇਸੁ – ‘ਏਵਂ ਮੇ ਸਙ੍ਖਾਰਾ ਹੋਨ੍ਤੁ, ਏਵਂ ਮੇ ਸਙ੍ਖਾਰਾ ਮਾ ਅਹੇਸੁ’ਨ੍ਤਿ. ਯਸ੍ਮਾ ਚ ਖੋ, ਭਿਕ੍ਖਵੇ, ਸਙ੍ਖਾਰਾ ਅਨਤ੍ਤਾ, ਤਸ੍ਮਾ ਸਙ੍ਖਾਰਾ ਆਬਾਧਾਯ ਸਂਵਤ੍ਤਨ੍ਤਿ, ਨ ਚ ਲਬ੍ਭਤਿ ਸਙ੍ਖਾਰੇਸੁ – ‘ਏਵਂ ਮੇ ਸਙ੍ਖਾਰਾ ਹੋਨ੍ਤੁ, ਏਵਂ ਮੇ ਸਙ੍ਖਾਰਾ ਮਾ ਅਹੇਸੁ’ਨ੍ਤਿ. ਵਿਞ੍ਞਾਣਂ, ਅਨਤ੍ਤਾ. ਵਿਞ੍ਞਾਣਞ੍ਚ ਹਿਦਂ, ਭਿਕ੍ਖਵੇ, ਅਤ੍ਤਾ ਅਭਵਿਸ੍ਸ, ਨਯਿਦਂ ਵਿਞ੍ਞਾਣਂ ਆਬਾਧਾਯ ਸਂਵਤ੍ਤੇਯ੍ਯ, ਲਬ੍ਭੇਥ ਚ ਵਿਞ੍ਞਾਣੇ – ‘ਏਵਂ ਮੇ ਵਿਞ੍ਞਾਣਂ ਹੋਤੁ, ਏਵਂ ਮੇ ਵਿਞ੍ਞਾਣਂ ਮਾ ਅਹੋਸੀ’ਤਿ. ਯਸ੍ਮਾ ਚ ਖੋ, ਭਿਕ੍ਖਵੇ, ਵਿਞ੍ਞਾਣਂ ਅਨਤ੍ਤਾ, ਤਸ੍ਮਾ ਵਿਞ੍ਞਾਣਂ ਆਬਾਧਾਯ ਸਂਵਤ੍ਤਤਿ, ਨ ਚ ਲਬ੍ਭਤਿ ਵਿਞ੍ਞਾਣੇ – ‘ਏਵਂ ਮੇ ਵਿਞ੍ਞਾਣਂ ਹੋਤੁ, ਏਵਂ ਮੇ ਵਿਞ੍ਞਾਣਂ ਮਾ ਅਹੋਸੀ’ਤਿ.

੨੧. ‘‘ਤਂ ਕਿਂ ਮਞ੍ਞਥ, ਭਿਕ੍ਖਵੇ, ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾਤਿ? ਅਨਿਚ੍ਚਂ, ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਾ ਤਂ ਸੁਖਂ ਵਾਤਿ? ਦੁਕ੍ਖਂ, ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਕਲ੍ਲਂ ਨੁ ਤਂ ਸਮਨੁਪਸ੍ਸਿਤੁਂ – ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾਤਿ? ਨੋ ਹੇਤਂ, ਭਨ੍ਤੇ. ਵੇਦਨਾ ਨਿਚ੍ਚਾ ਵਾ ਅਨਿਚ੍ਚਾ ਵਾਤਿ? ਅਨਿਚ੍ਚਾ, ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਾ ਤਂ ਸੁਖਂ ਵਾਤਿ? ਦੁਕ੍ਖਂ, ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਕਲ੍ਲਂ ਨੁ ਤਂ ਸਮਨੁਪਸ੍ਸਿਤੁਂ – ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾਤਿ? ਨੋ ਹੇਤਂ, ਭਨ੍ਤੇ. ਸਞ੍ਞਾ ਨਿਚ੍ਚਾ ਵਾ ਅਨਿਚ੍ਚਾ ਵਾਤਿ? ਅਨਿਚ੍ਚਾ, ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਾ ਤਂ ਸੁਖਂ ਵਾਤਿ? ਦੁਕ੍ਖਂ, ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਕਲ੍ਲਂ ਨੁ ਤਂ ਸਮਨੁਪਸ੍ਸਿਤੁਂ – ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾਤਿ? ਨੋ ਹੇਤਂ, ਭਨ੍ਤੇ. ਸਙ੍ਖਾਰਾ ਨਿਚ੍ਚਾ ਵਾ ਅਨਿਚ੍ਚਾ ਵਾਤਿ? ਅਨਿਚ੍ਚਾ, ਭਨ੍ਤੇ. ਯਂ ਪਨਾਨਿਚ੍ਚਂ, ਦੁਕ੍ਖਂ ਵਾ ਤਂ ਸੁਖਂ ਵਾਤਿ? ਦੁਕ੍ਖਂ, ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਕਲ੍ਲਂ ਨੁ ਤਂ ਸਮਨੁਪਸ੍ਸਿਤੁਂ – ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾਤਿ? ਨੋ ਹੇਤਂ, ਭਨ੍ਤੇ. ਵਿਞ੍ਞਾਣਂ ਨਿਚ੍ਚਂ ਵਾ ਅਨਿਚ੍ਚਂ ਵਾਤਿ? ਅਨਿਚ੍ਚਂ, ਭਨ੍ਤੇ. ਯਂ ਪਨਾਨਿਚ੍ਚਂ, ਦੁਕ੍ਖਂ ਵਾ ਤਂ ਸੁਖਂ ਵਾਤਿ? ਦੁਕ੍ਖਂ, ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਕਲ੍ਲਂ ਨੁ ਤਂ ਸਮਨੁਪਸ੍ਸਿਤੁਂ – ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾਤਿ? ਨੋ ਹੇਤਂ, ਭਨ੍ਤੇ.

੨੨. ‘‘ਤਸ੍ਮਾਤਿਹ, ਭਿਕ੍ਖਵੇ, ਯਂ ਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕਂ ਵਾ ਸੁਖੁਮਂ ਵਾ ਹੀਨਂ ਵਾ ਪਣੀਤਂ ਵਾ ਯਂ ਦੂਰੇ [ਯਂ ਦੂਰੇ ਵਾ (ਸ੍ਯਾ.)] ਸਨ੍ਤਿਕੇ ਵਾ, ਸਬ੍ਬਂ ਰੂਪਂ – ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾਤਿ – ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਯਾ ਕਾਚਿ ਵੇਦਨਾ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕਾ ਵਾ ਸੁਖੁਮਾ ਵਾ ਹੀਨਾ ਵਾ ਪਣੀਤਾ ਵਾ ਯਾ ਦੂਰੇ ਸਨ੍ਤਿਕੇ ਵਾ, ਸਬ੍ਬਾ ਵੇਦਨਾ – ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾਤਿ – ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਯਾ ਕਾਚਿ ਸਞ੍ਞਾ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕਾ ਵਾ ਸੁਖੁਮਾ ਵਾ ਹੀਨਾ ਵਾ ਪਣੀਤਾ ਵਾ ਯਾ ਦੂਰੇ ਸਨ੍ਤਿਕੇ ਵਾ, ਸਬ੍ਬਾ ਸਞ੍ਞਾ – ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾਤਿ – ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਯੇ ਕੇਚਿ ਸਙ੍ਖਾਰਾ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕਾ ਵਾ ਸੁਖੁਮਾ ਵਾ ਹੀਨਾ ਵਾ ਪਣੀਤਾ ਵਾ ਯੇ ਦੂਰੇ ਸਨ੍ਤਿਕੇ ਵਾ, ਸਬ੍ਬੇ ਸਙ੍ਖਾਰਾ – ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾਤਿ – ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਯਂ ਕਿਞ੍ਚਿ ਵਿਞ੍ਞਾਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕਂ ਵਾ ਸੁਖੁਮਂ ਵਾ ਹੀਨਂ ਵਾ ਪਣੀਤਂ ਵਾ ਯਂ ਦੂਰੇ ਸਨ੍ਤਿਕੇ ਵਾ, ਸਬ੍ਬਂ ਵਿਞ੍ਞਾਣਂ – ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾਤਿ – ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ.

੨੩. ‘‘ਏਵਂ ਪਸ੍ਸਂ, ਭਿਕ੍ਖਵੇ, ਸੁਤਵਾ ਅਰਿਯਸਾਵਕੋ ਰੂਪਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਵੇਦਨਾਯਪਿ ਨਿਬ੍ਬਿਨ੍ਦਤਿ, ਸਞ੍ਞਾਯਪਿ ਨਿਬ੍ਬਿਨ੍ਦਤਿ, ਸਙ੍ਖਾਰੇਸੁਪਿ ਨਿਬ੍ਬਿਨ੍ਦਤਿ, ਵਿਞ੍ਞਾਣਸ੍ਮਿਮ੍ਪਿ ਨਿਬ੍ਬਿਨ੍ਦਤਿ; ਨਿਬ੍ਬਿਨ੍ਦਂ ਵਿਰਜ੍ਜਤਿ; ਵਿਰਾਗਾ ਵਿਮੁਚ੍ਚਤਿ; ਵਿਮੁਤ੍ਤਸ੍ਮਿਂ ਵਿਮੁਤ੍ਤਮਿਤਿ ਞਾਣਂ ਹੋਤਿ, ‘ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾ’ਤਿ ਪਜਾਨਾਤੀ’’ਤਿ.

੨੪. ਇਦਮਵੋਚ ਭਗਵਾ. ਅਤ੍ਤਮਨਾ ਪਞ੍ਚਵਗ੍ਗਿਯਾ ਭਿਕ੍ਖੂ ਭਗਵਤੋ ਭਾਸਿਤਂ ਅਭਿਨਨ੍ਦੁਨ੍ਤਿ [ਅਭਿਨਨ੍ਦੁਂ (ਸ੍ਯਾ.)]. ਇਮਸ੍ਮਿਞ੍ਚ ਪਨ ਵੇਯ੍ਯਾਕਰਣਸ੍ਮਿਂ ਭਞ੍ਞਮਾਨੇ ਪਞ੍ਚਵਗ੍ਗਿਯਾਨਂ ਭਿਕ੍ਖੂਨਂ ਅਨੁਪਾਦਾਯ ਆਸਵੇਹਿ ਚਿਤ੍ਤਾਨਿ ਵਿਮੁਚ੍ਚਿਂਸੁ. ਤੇਨ ਖੋ ਪਨ ਸਮਯੇਨ ਛ ਲੋਕੇ ਅਰਹਨ੍ਤੋ ਹੋਨ੍ਤਿ.

ਪਞ੍ਚਵਗ੍ਗਿਯਕਥਾ ਨਿਟ੍ਠਿਤਾ.

ਪਠਮਭਾਣਵਾਰੋ.

੭. ਪਬ੍ਬਜ੍ਜਾਕਥਾ

੨੫. ਤੇਨ ਖੋ ਪਨ ਸਮਯੇਨ ਬਾਰਾਣਸਿਯਂ ਯਸੋ ਨਾਮ ਕੁਲਪੁਤ੍ਤੋ ਸੇਟ੍ਠਿਪੁਤ੍ਤੋ ਸੁਖੁਮਾਲੋ ਹੋਤਿ. ਤਸ੍ਸ ਤਯੋ ਪਾਸਾਦਾ ਹੋਨ੍ਤਿ – ਏਕੋ ਹੇਮਨ੍ਤਿਕੋ, ਏਕੋ ਗਿਮ੍ਹਿਕੋ, ਏਕੋ ਵਸ੍ਸਿਕੋ. ਸੋ ਵਸ੍ਸਿਕੇ ਪਾਸਾਦੇ ਚਤ੍ਤਾਰੋ ਮਾਸੇ [ਵਸ੍ਸਿਕੇ ਪਾਸਾਦੇ ਵਸ੍ਸਿਕੇ ਚਤ੍ਤਾਰੋ ਮਾਸੇ (ਸੀ.)] ਨਿਪ੍ਪੁਰਿਸੇਹਿ ਤੂਰਿਯੇਹਿ ਪਰਿਚਾਰਯਮਾਨੋ ਨ ਹੇਟ੍ਠਾਪਾਸਾਦਂ ਓਰੋਹਤਿ. ਅਥ ਖੋ ਯਸਸ੍ਸ ਕੁਲਪੁਤ੍ਤਸ੍ਸ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤਸ੍ਸ ਸਮਙ੍ਗੀਭੂਤਸ੍ਸ ਪਰਿਚਾਰਯਮਾਨਸ੍ਸ ਪਟਿਕਚ੍ਚੇਵ [ਪਟਿਗਚ੍ਚੇਵ (ਸੀ.)] ਨਿਦ੍ਦਾ ਓਕ੍ਕਮਿ, ਪਰਿਜਨਸ੍ਸਪਿ ਨਿਦ੍ਦਾ ਓਕ੍ਕਮਿ, ਸਬ੍ਬਰਤ੍ਤਿਯੋ ਚ ਤੇਲਪਦੀਪੋ ਝਾਯਤਿ. ਅਥ ਖੋ ਯਸੋ ਕੁਲਪੁਤ੍ਤੋ ਪਟਿਕਚ੍ਚੇਵ ਪਬੁਜ੍ਝਿਤ੍ਵਾ ਅਦ੍ਦਸ ਸਕਂ ਪਰਿਜਨਂ ਸੁਪਨ੍ਤਂ – ਅਞ੍ਞਿਸ੍ਸਾ ਕਚ੍ਛੇ ਵੀਣਂ, ਅਞ੍ਞਿਸ੍ਸਾ ਕਣ੍ਠੇ ਮੁਦਿਙ੍ਗਂ, ਅਞ੍ਞਿਸ੍ਸਾ ਕਚ੍ਛੇ ਆਲ਼ਮ੍ਬਰਂ, ਅਞ੍ਞਂ ਵਿਕੇਸਿਕਂ, ਅਞ੍ਞਂ ਵਿਕ੍ਖੇਲ਼ਿਕਂ, ਅਞ੍ਞਾ ਵਿਪ੍ਪਲਪਨ੍ਤਿਯੋ, ਹਤ੍ਥਪ੍ਪਤ੍ਤਂ ਸੁਸਾਨਂ ਮਞ੍ਞੇ. ਦਿਸ੍ਵਾਨਸ੍ਸ ਆਦੀਨਵੋ ਪਾਤੁਰਹੋਸਿ, ਨਿਬ੍ਬਿਦਾਯ ਚਿਤ੍ਤਂ ਸਣ੍ਠਾਸਿ. ਅਥ ਖੋ ਯਸੋ ਕੁਲਪੁਤ੍ਤੋ ਉਦਾਨਂ ਉਦਾਨੇਸਿ – ‘‘ਉਪਦ੍ਦੁਤਂ ਵਤ ਭੋ, ਉਪਸ੍ਸਟ੍ਠਂ ਵਤ ਭੋ’’ਤਿ.

ਅਥ ਖੋ ਯਸੋ ਕੁਲਪੁਤ੍ਤੋ ਸੁਵਣ੍ਣਪਾਦੁਕਾਯੋ ਆਰੋਹਿਤ੍ਵਾ ਯੇਨ ਨਿਵੇਸਨਦ੍ਵਾਰਂ ਤੇਨੁਪਸਙ੍ਕਮਿ. ਅਮਨੁਸ੍ਸਾ ਦ੍ਵਾਰਂ ਵਿਵਰਿਂਸੁ – ਮਾ ਯਸਸ੍ਸ ਕੁਲਪੁਤ੍ਤਸ੍ਸ ਕੋਚਿ ਅਨ੍ਤਰਾਯਮਕਾਸਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਾਯਾਤਿ. ਅਥ ਖੋ ਯਸੋ ਕੁਲਪੁਤ੍ਤੋ ਯੇਨ ਨਗਰਦ੍ਵਾਰਂ ਤੇਨੁਪਸਙ੍ਕਮਿ. ਅਮਨੁਸ੍ਸਾ ਦ੍ਵਾਰਂ ਵਿਵਰਿਂਸੁ – ਮਾ ਯਸਸ੍ਸ ਕੁਲਪੁਤ੍ਤਸ੍ਸ ਕੋਚਿ ਅਨ੍ਤਰਾਯਮਕਾਸਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਾਯਾਤਿ. ਅਥ ਖੋ ਯਸੋ ਕੁਲਪੁਤ੍ਤੋ ਯੇਨ ਇਸਿਪਤਨਂ ਮਿਗਦਾਯੋ ਤੇਨੁਪਸਙ੍ਕਮਿ.

੨੬. ਤੇਨ ਖੋ ਪਨ ਸਮਯੇਨ ਭਗਵਾ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਅਜ੍ਝੋਕਾਸੇ ਚਙ੍ਕਮਤਿ. ਅਦ੍ਦਸਾ ਖੋ ਭਗਵਾ ਯਸਂ ਕੁਲਪੁਤ੍ਤਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਚਙ੍ਕਮਾ ਓਰੋਹਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਯਸੋ ਕੁਲਪੁਤ੍ਤੋ ਭਗਵਤੋ ਅਵਿਦੂਰੇ ਉਦਾਨਂ ਉਦਾਨੇਸਿ – ‘‘ਉਪਦ੍ਦੁਤਂ ਵਤ ਭੋ, ਉਪਸ੍ਸਟ੍ਠਂ ਵਤ ਭੋ’’ਤਿ. ਅਥ ਖੋ ਭਗਵਾ ਯਸਂ ਕੁਲਪੁਤ੍ਤਂ ਏਤਦਵੋਚ – ‘‘ਇਦਂ ਖੋ, ਯਸ, ਅਨੁਪਦ੍ਦੁਤਂ, ਇਦਂ ਅਨੁਪਸ੍ਸਟ੍ਠਂ. ਏਹਿ ਯਸ, ਨਿਸੀਦ, ਧਮ੍ਮਂ ਤੇ ਦੇਸੇਸ੍ਸਾਮੀ’’ਤਿ. ਅਥ ਖੋ ਯਸੋ ਕੁਲਪੁਤ੍ਤੋ – ਇਦਂ ਕਿਰ ਅਨੁਪਦ੍ਦੁਤਂ, ਇਦਂ ਅਨੁਪਸ੍ਸਟ੍ਠਨ੍ਤਿ ਹਟ੍ਠੋ ਉਦਗ੍ਗੋ ਸੁਵਣ੍ਣਪਾਦੁਕਾਹਿ ਓਰੋਹਿਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਸ੍ਸ ਖੋ ਯਸਸ੍ਸ ਕੁਲਪੁਤ੍ਤਸ੍ਸ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ ਸੀਲਕਥਂ ਸਗ੍ਗਕਥਂ, ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ, ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਯਦਾ ਭਗਵਾ ਅਞ੍ਞਾਸਿ ਯਸਂ ਕੁਲਪੁਤ੍ਤਂ ਕਲ੍ਲਚਿਤ੍ਤਂ, ਮੁਦੁਚਿਤ੍ਤਂ, ਵਿਨੀਵਰਣਚਿਤ੍ਤਂ, ਉਦਗ੍ਗਚਿਤ੍ਤਂ, ਪਸਨ੍ਨਚਿਤ੍ਤਂ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ ਤਂ ਪਕਾਸੇਸਿ – ਦੁਕ੍ਖਂ, ਸਮੁਦਯਂ, ਨਿਰੋਧਂ, ਮਗ੍ਗਂ. ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵ ਯਸਸ੍ਸ ਕੁਲਪੁਤ੍ਤਸ੍ਸ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ.

੨੭. ਅਥ ਖੋ ਯਸਸ੍ਸ ਕੁਲਪੁਤ੍ਤਸ੍ਸ ਮਾਤਾ ਪਾਸਾਦਂ ਅਭਿਰੁਹਿਤ੍ਵਾ ਯਸਂ ਕੁਲਪੁਤ੍ਤਂ ਅਪਸ੍ਸਨ੍ਤੀ ਯੇਨ ਸੇਟ੍ਠਿ ਗਹਪਤਿ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸੇਟ੍ਠਿਂ ਗਹਪਤਿਂ ਏਤਦਵੋਚ – ‘‘ਪੁਤ੍ਤੋ ਤੇ, ਗਹਪਤਿ, ਯਸੋ ਨ ਦਿਸ੍ਸਤੀ’’ਤਿ. ਅਥ ਖੋ ਸੇਟ੍ਠਿ ਗਹਪਤਿ ਚਤੁਦ੍ਦਿਸਾ ਅਸ੍ਸਦੂਤੇ ਉਯ੍ਯੋਜੇਤ੍ਵਾ ਸਾਮਂਯੇਵ ਯੇਨ ਇਸਿਪਤਨਂ ਮਿਗਦਾਯੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਸੇਟ੍ਠਿ ਗਹਪਤਿ ਸੁਵਣ੍ਣਪਾਦੁਕਾਨਂ ਨਿਕ੍ਖੇਪਂ, ਦਿਸ੍ਵਾਨ ਤਂਯੇਵ ਅਨੁਗਮਾਸਿ [ਅਨੁਗਮਾ (ਸੀ. ਸ੍ਯਾ.)]. ਅਦ੍ਦਸਾ ਖੋ ਭਗਵਾ ਸੇਟ੍ਠਿਂ ਗਹਪਤਿਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਭਗਵਤੋ ਏਤਦਹੋਸਿ – ‘‘ਯਂਨੂਨਾਹਂ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰੇਯ੍ਯਂ ਯਥਾ ਸੇਟ੍ਠਿ ਗਹਪਤਿ ਇਧ ਨਿਸਿਨ੍ਨੋ ਇਧ ਨਿਸਿਨ੍ਨਂ ਯਸਂ ਕੁਲਪੁਤ੍ਤਂ ਨ ਪਸ੍ਸੇਯ੍ਯਾ’’ਤਿ. ਅਥ ਖੋ ਭਗਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰੇਸਿ. ਅਥ ਖੋ ਸੇਟ੍ਠਿ ਗਹਪਤਿ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਅਪਿ, ਭਨ੍ਤੇ, ਭਗਵਾ ਯਸਂ ਕੁਲਪੁਤ੍ਤਂ ਪਸ੍ਸੇਯ੍ਯਾ’’ਤਿ? ਤੇਨ ਹਿ, ਗਹਪਤਿ, ਨਿਸੀਦ, ਅਪ੍ਪੇਵ ਨਾਮ ਇਧ ਨਿਸਿਨ੍ਨੋ ਇਧ ਨਿਸਿਨ੍ਨਂ ਯਸਂ ਕੁਲਪੁਤ੍ਤਂ ਪਸ੍ਸੇਯ੍ਯਾਸੀਤਿ. ਅਥ ਖੋ ਸੇਟ੍ਠਿ ਗਹਪਤਿ – ਇਧੇਵ ਕਿਰਾਹਂ ਨਿਸਿਨ੍ਨੋ ਇਧ ਨਿਸਿਨ੍ਨਂ ਯਸਂ ਕੁਲਪੁਤ੍ਤਂ ਪਸ੍ਸਿਸ੍ਸਾਮੀਤਿ ਹਟ੍ਠੋ ਉਦਗ੍ਗੋ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਸ੍ਸ ਖੋ ਸੇਟ੍ਠਿਸ੍ਸ ਗਹਪਤਿਸ੍ਸ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ ਸੀਲਕਥਂ ਸਗ੍ਗਕਥਂ, ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ, ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਯਦਾ ਭਗਵਾ ਅਞ੍ਞਾਸਿ ਸੇਟ੍ਠਿਂ ਗਹਪਤਿਂ ਕਲ੍ਲਚਿਤ੍ਤਂ, ਮੁਦੁਚਿਤ੍ਤਂ, ਵਿਨੀਵਰਣਚਿਤ੍ਤਂ, ਉਦਗ੍ਗਚਿਤ੍ਤਂ, ਪਸਨ੍ਨਚਿਤ੍ਤਂ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ, ਤਂ ਪਕਾਸੇਸਿ – ਦੁਕ੍ਖਂ, ਸਮੁਦਯਂ, ਨਿਰੋਧਂ, ਮਗ੍ਗਂ. ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ ਏਵਮੇਵ ਸੇਟ੍ਠਿਸ੍ਸ ਗਹਪਤਿਸ੍ਸ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ. ਅਥ ਖੋ ਸੇਟ੍ਠਿ ਗਹਪਤਿ ਦਿਟ੍ਠਧਮ੍ਮੋ ਪਤ੍ਤਧਮ੍ਮੋ ਵਿਦਿਤਧਮ੍ਮੋ ਪਰਿਯੋਗਾਲ਼੍ਹਧਮ੍ਮੋ ਤਿਣ੍ਣਵਿਚਿਕਿਚ੍ਛੋ ਵਿਗਤਕਥਂਕਥੋ ਵੇਸਾਰਜ੍ਜਪ੍ਪਤ੍ਤੋ ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭਨ੍ਤੇ, ਅਭਿਕ੍ਕਨ੍ਤਂ, ਭਨ੍ਤੇ, ਸੇਯ੍ਯਥਾਪਿ, ਭਨ੍ਤੇ, ਨਿਕ੍ਕੁਜ੍ਜਿਤਂ [ਨਿਕੁਜ੍ਜਿਤਂ (ਕ.)] ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ, ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ – ਚਕ੍ਖੁਮਨ੍ਤੋ ਰੂਪਾਨਿ ਦਕ੍ਖਨ੍ਤੀਤਿ – ਏਵਮੇਵਂ ਭਗਵਤਾ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ. ਏਸਾਹਂ, ਭਨ੍ਤੇ, ਭਗਵਨ੍ਤਂ ਸਰਣਂ ਗਚ੍ਛਾਮਿ, ਧਮ੍ਮਞ੍ਚ, ਭਿਕ੍ਖੁਸਙ੍ਘਞ੍ਚ. ਉਪਾਸਕਂ ਮਂ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ. ਸੋਵ ਲੋਕੇ ਪਠਮਂ ਉਪਾਸਕੋ ਅਹੋਸਿ ਤੇਵਾਚਿਕੋ.

੨੮. ਅਥ ਖੋ ਯਸਸ੍ਸ ਕੁਲਪੁਤ੍ਤਸ੍ਸ ਪਿਤੁਨੋ ਧਮ੍ਮੇ ਦੇਸਿਯਮਾਨੇ ਯਥਾਦਿਟ੍ਠਂ ਯਥਾਵਿਦਿਤਂ ਭੂਮਿਂ ਪਚ੍ਚਵੇਕ੍ਖਨ੍ਤਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਯਸਸ੍ਸ ਖੋ ਕੁਲਪੁਤ੍ਤਸ੍ਸ ਪਿਤੁਨੋ ਧਮ੍ਮੇ ਦੇਸਿਯਮਾਨੇ ਯਥਾਦਿਟ੍ਠਂ ਯਥਾਵਿਦਿਤਂ ਭੂਮਿਂ ਪਚ੍ਚਵੇਕ੍ਖਨ੍ਤਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤਂ. ਅਭਬ੍ਬੋ ਖੋ ਯਸੋ ਕੁਲਪੁਤ੍ਤੋ ਹੀਨਾਯਾਵਤ੍ਤਿਤ੍ਵਾ ਕਾਮੇ ਪਰਿਭੁਞ੍ਜਿਤੁਂ, ਸੇਯ੍ਯਥਾਪਿ ਪੁਬ੍ਬੇ ਅਗਾਰਿਕਭੂਤੋ; ਯਂਨੂਨਾਹਂ ਤਂ ਇਦ੍ਧਾਭਿਸਙ੍ਖਾਰਂ ਪਟਿਪ੍ਪਸ੍ਸਮ੍ਭੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਤਂ ਇਦ੍ਧਾਭਿਸਙ੍ਖਾਰਂ ਪਟਿਪ੍ਪਸ੍ਸਮ੍ਭੇਸਿ. ਅਦ੍ਦਸਾ ਖੋ ਸੇਟ੍ਠਿ ਗਹਪਤਿ ਯਸਂ ਕੁਲਪੁਤ੍ਤਂ ਨਿਸਿਨ੍ਨਂ, ਦਿਸ੍ਵਾਨ ਯਸਂ ਕੁਲਪੁਤ੍ਤਂ ਏਤਦਵੋਚ – ‘‘ਮਾਤਾ ਤੇ ਤਾਤ, ਯਸ, ਪਰਿਦੇਵ [ਪਰਿਦੇਵੀ (ਕ.)] ਸੋਕਸਮਾਪਨ੍ਨਾ, ਦੇਹਿ ਮਾਤੁਯਾ ਜੀਵਿਤ’’ਨ੍ਤਿ. ਅਥ ਖੋ ਯਸੋ ਕੁਲਪੁਤ੍ਤੋ ਭਗਵਨ੍ਤਂ ਉਲ੍ਲੋਕੇਸਿ. ਅਥ ਖੋ ਭਗਵਾ ਸੇਟ੍ਠਿਂ ਗਹਪਤਿਂ ਏਤਦਵੋਚ – ‘‘ਤਂ ਕਿਂ ਮਞ੍ਞਸਿ, ਗਹਪਤਿ, ਯਸ੍ਸ ਸੇਕ੍ਖੇਨ ਞਾਣੇਨ ਸੇਕ੍ਖੇਨ ਦਸ੍ਸਨੇਨ ਧਮ੍ਮੋ ਦਿਟ੍ਠੋ ਵਿਦਿਤੋ ਸੇਯ੍ਯਥਾਪਿ ਤਯਾ? ਤਸ੍ਸ ਯਥਾਦਿਟ੍ਠਂ ਯਥਾਵਿਦਿਤਂ ਭੂਮਿਂ ਪਚ੍ਚਵੇਕ੍ਖਨ੍ਤਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤਂ. ਭਬ੍ਬੋ ਨੁ ਖੋ ਸੋ, ਗਹਪਤਿ, ਹੀਨਾਯਾਵਤ੍ਤਿਤ੍ਵਾ ਕਾਮੇ ਪਰਿਭੁਞ੍ਜਿਤੁਂ ਸੇਯ੍ਯਥਾਪਿ ਪੁਬ੍ਬੇ ਅਗਾਰਿਕਭੂਤੋ’’ਤਿ? ‘‘ਨੋ ਹੇਤਂ, ਭਨ੍ਤੇ’’. ‘‘ਯਸਸ੍ਸ ਖੋ, ਗਹਪਤਿ, ਕੁਲਪੁਤ੍ਤਸ੍ਸ ਸੇਕ੍ਖੇਨ ਞਾਣੇਨ ਸੇਕ੍ਖੇਨ ਦਸ੍ਸਨੇਨ ਧਮ੍ਮੋ ਦਿਟ੍ਠੋ ਵਿਦਿਤੋ ਸੇਯ੍ਯਥਾਪਿ ਤਯਾ. ਤਸ੍ਸ ਯਥਾਦਿਟ੍ਠਂ ਯਥਾਵਿਦਿਤਂ ਭੂਮਿਂ ਪਚ੍ਚਵੇਕ੍ਖਨ੍ਤਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤਂ. ਅਭਬ੍ਬੋ ਖੋ, ਗਹਪਤਿ, ਯਸੋ ਕੁਲਪੁਤ੍ਤੋ ਹੀਨਾਯਾਵਤ੍ਤਿਤ੍ਵਾ ਕਾਮੇ ਪਰਿਭੁਞ੍ਜਿਤੁਂ ਸੇਯ੍ਯਥਾਪਿ ਪੁਬ੍ਬੇ ਅਗਾਰਿਕਭੂਤੋ’’ਤਿ. ‘‘ਲਾਭਾ, ਭਨ੍ਤੇ, ਯਸਸ੍ਸ ਕੁਲਪੁਤ੍ਤਸ੍ਸ, ਸੁਲਦ੍ਧਂ, ਭਨ੍ਤੇ, ਯਸਸ੍ਸ ਕੁਲਪੁਤ੍ਤਸ੍ਸ, ਯਥਾ ਯਸਸ੍ਸ ਕੁਲਪੁਤ੍ਤਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤਂ. ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਅਜ੍ਜਤਨਾਯ ਭਤ੍ਤਂ ਯਸੇਨ ਕੁਲਪੁਤ੍ਤੇਨ ਪਚ੍ਛਾਸਮਣੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਸੇਟ੍ਠਿ ਗਹਪਤਿ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਯਸੋ ਕੁਲਪੁਤ੍ਤੋ ਅਚਿਰਪਕ੍ਕਨ੍ਤੇ ਸੇਟ੍ਠਿਮ੍ਹਿ ਗਹਪਤਿਮ੍ਹਿ ਭਗਵਨ੍ਤਂ ਏਤਦਵੋਚ – ‘‘ਲਭੇਯ੍ਯਾਹਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਂ ਉਪਸਮ੍ਪਦ’’ਨ੍ਤਿ. ‘‘ਏਹਿ ਭਿਕ੍ਖੂ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤਸ੍ਸ ਆਯਸ੍ਮਤੋ ਉਪਸਮ੍ਪਦਾ ਅਹੋਸਿ. ਤੇਨ ਖੋ ਪਨ ਸਮਯੇਨ ਸਤ੍ਤ ਲੋਕੇ ਅਰਹਨ੍ਤੋ ਹੋਨ੍ਤਿ.

ਯਸਸ੍ਸ ਪਬ੍ਬਜ੍ਜਾ ਨਿਟ੍ਠਿਤਾ.

੨੯. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਆਯਸ੍ਮਤਾ ਯਸੇਨ ਪਚ੍ਛਾਸਮਣੇਨ ਯੇਨ ਸੇਟ੍ਠਿਸ੍ਸ ਗਹਪਤਿਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਆਯਸ੍ਮਤੋ ਯਸਸ੍ਸ ਮਾਤਾ ਚ ਪੁਰਾਣਦੁਤਿਯਿਕਾ ਚ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਤਾਸਂ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ ਸੀਲਕਥਂ ਸਗ੍ਗਕਥਂ, ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ, ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਯਦਾ ਤਾ ਭਗਵਾ ਅਞ੍ਞਾਸਿ ਕਲ੍ਲਚਿਤ੍ਤਾ, ਮੁਦੁਚਿਤ੍ਤਾ, ਵਿਨੀਵਰਣਚਿਤ੍ਤਾ, ਉਦਗ੍ਗਚਿਤ੍ਤਾ, ਪਸਨ੍ਨਚਿਤ੍ਤਾ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ ਤਂ ਪਕਾਸੇਸਿ – ਦੁਕ੍ਖਂ, ਸਮੁਦਯਂ, ਨਿਰੋਧਂ, ਮਗ੍ਗਂ. ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵ ਤਾਸਂ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ. ਤਾ ਦਿਟ੍ਠਧਮ੍ਮਾ ਪਤ੍ਤਧਮ੍ਮਾ ਵਿਦਿਤਧਮ੍ਮਾ ਪਰਿਯੋਗਾਲ਼੍ਹਧਮ੍ਮਾ ਤਿਣ੍ਣਵਿਚਿਕਿਚ੍ਛਾ ਵਿਗਤਕਥਂਕਥਾ ਵੇਸਾਰਜ੍ਜਪ੍ਪਤ੍ਤਾ ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚੁਂ – ‘‘ਅਭਿਕ੍ਕਨ੍ਤਂ, ਭਨ੍ਤੇ, ਅਭਿਕ੍ਕਨ੍ਤਂ, ਭਨ੍ਤੇ…ਪੇ… ਏਤਾ ਮਯਂ, ਭਨ੍ਤੇ, ਭਗਵਨ੍ਤਂ ਸਰਣਂ ਗਚ੍ਛਾਮ, ਧਮ੍ਮਞ੍ਚ, ਭਿਕ੍ਖੁਸਙ੍ਘਞ੍ਚ. ਉਪਾਸਿਕਾਯੋ ਨੋ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਾ ਸਰਣਂ ਗਤਾ’’ਤਿ. ਤਾ ਚ ਲੋਕੇ ਪਠਮਂ ਉਪਾਸਿਕਾ ਅਹੇਸੁਂ ਤੇਵਾਚਿਕਾ.

ਅਥ ਖੋ ਆਯਸ੍ਮਤੋ ਯਸਸ੍ਸ ਮਾਤਾ ਚ ਪਿਤਾ ਚ ਪੁਰਾਣਦੁਤਿਯਿਕਾ ਚ ਭਗਵਨ੍ਤਞ੍ਚ ਆਯਸ੍ਮਨ੍ਤਞ੍ਚ ਯਸਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ, ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ, ਏਕਮਨ੍ਤਂ ਨਿਸੀਦਿਂਸੁ. ਅਥ ਖੋ ਭਗਵਾ ਆਯਸ੍ਮਤੋ ਯਸਸ੍ਸ ਮਾਤਰਞ੍ਚ ਪਿਤਰਞ੍ਚ ਪੁਰਾਣਦੁਤਿਯਿਕਞ੍ਚ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

੩੦. ਅਸ੍ਸੋਸੁਂ ਖੋ ਆਯਸ੍ਮਤੋ ਯਸਸ੍ਸ ਚਤ੍ਤਾਰੋ ਗਿਹਿਸਹਾਯਕਾ ਬਾਰਾਣਸਿਯਂ ਸੇਟ੍ਠਾਨੁਸੇਟ੍ਠੀਨਂ ਕੁਲਾਨਂ ਪੁਤ੍ਤਾ – ਵਿਮਲੋ, ਸੁਬਾਹੁ, ਪੁਣ੍ਣਜਿ, ਗਵਮ੍ਪਤਿ – ਯਸੋ ਕਿਰ ਕੁਲਪੁਤ੍ਤੋ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋਤਿ. ਸੁਤ੍ਵਾਨ ਨੇਸਂ ਏਤਦਹੋਸਿ – ‘‘ਨ ਹਿ ਨੂਨ ਸੋ ਓਰਕੋ ਧਮ੍ਮਵਿਨਯੋ, ਨ ਸਾ ਓਰਕਾ ਪਬ੍ਬਜ੍ਜਾ, ਯਤ੍ਥ ਯਸੋ ਕੁਲਪੁਤ੍ਤੋ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ’’ਤਿ. ਤੇ [ਤੇ ਚਤ੍ਤਾਰੋ ਜਨਾ (ਕ.)] ਯੇਨਾਯਸ੍ਮਾ ਯਸੋ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਯਸਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਅਥ ਖੋ ਆਯਸ੍ਮਾ ਯਸੋ ਤੇ ਚਤ੍ਤਾਰੋ ਗਿਹਿਸਹਾਯਕੇ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਯਸੋ ਭਗਵਨ੍ਤਂ ਏਤਦਵੋਚ – ‘‘ਇਮੇ ਮੇ, ਭਨ੍ਤੇ, ਚਤ੍ਤਾਰੋ ਗਿਹਿਸਹਾਯਕਾ ਬਾਰਾਣਸਿਯਂ ਸੇਟ੍ਠਾਨੁਸੇਟ੍ਠੀਨਂ ਕੁਲਾਨਂ ਪੁਤ੍ਤਾ – ਵਿਮਲੋ, ਸੁਬਾਹੁ, ਪੁਣ੍ਣਜਿ, ਗਵਮ੍ਪਤਿ. ਇਮੇ [ਇਮੇ ਚਤ੍ਤਾਰੋ (ਕ.)] ਭਗਵਾ ਓਵਦਤੁ ਅਨੁਸਾਸਤੂ’’ਤਿ. ਤੇਸਂ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ ਸੀਲਕਥਂ ਸਗ੍ਗਕਥਂ ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ, ਯਦਾ ਤੇ ਭਗਵਾ ਅਞ੍ਞਾਸਿ ਕਲ੍ਲਚਿਤ੍ਤੇ ਮੁਦੁਚਿਤ੍ਤੇ ਵਿਨੀਵਰਣਚਿਤ੍ਤੇ ਉਦਗ੍ਗਚਿਤ੍ਤੇ ਪਸਨ੍ਨਚਿਤ੍ਤੇ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ, ਤਂ ਪਕਾਸੇਸਿ ਦੁਕ੍ਖਂ ਸਮੁਦਯਂ ਨਿਰੋਧਂ ਮਗ੍ਗਂ, ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵ ਤੇਸਂ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ. ਤੇ ਦਿਟ੍ਠਧਮ੍ਮਾ ਪਤ੍ਤਧਮ੍ਮਾ ਵਿਦਿਤਧਮ੍ਮਾ ਪਰਿਯੋਗਾਲ਼੍ਹਧਮ੍ਮਾ ਤਿਣ੍ਣਵਿਚਿਕਿਚ੍ਛਾ ਵਿਗਤਕਥਂਕਥਾ ਵੇਸਾਰਜ੍ਜਪ੍ਪਤ੍ਤਾ ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ. ਅਥ ਖੋ ਭਗਵਾ ਤੇ ਭਿਕ੍ਖੂ ਧਮ੍ਮਿਯਾ ਕਥਾਯ ਓਵਦਿ ਅਨੁਸਾਸਿ. ਤੇਸਂ ਭਗਵਤਾ ਧਮ੍ਮਿਯਾ ਕਥਾਯ ਓਵਦਿਯਮਾਨਾਨਂ ਅਨੁਸਾਸਿਯਮਾਨਾਨਂ ਅਨੁਪਾਦਾਯ ਆਸਵੇਹਿ ਚਿਤ੍ਤਾਨਿ ਵਿਮੁਚ੍ਚਿਂਸੁ. ਤੇਨ ਖੋ ਪਨ ਸਮਯੇਨ ਏਕਾਦਸ ਲੋਕੇ ਅਰਹਨ੍ਤੋ ਹੋਨ੍ਤਿ.

ਚਤੁਗਿਹਿਸਹਾਯਕਪਬ੍ਬਜ੍ਜਾ ਨਿਟ੍ਠਿਤਾ.

੩੧. ਅਸ੍ਸੋਸੁਂ ਖੋ ਆਯਸ੍ਮਤੋ ਯਸਸ੍ਸ ਪਞ੍ਞਾਸਮਤ੍ਤਾ ਗਿਹਿਸਹਾਯਕਾ ਜਾਨਪਦਾ ਪੁਬ੍ਬਾਨੁਪੁਬ੍ਬਕਾਨਂ ਕੁਲਾਨਂ ਪੁਤ੍ਤਾ – ਯਸੋ ਕਿਰ ਕੁਲਪੁਤ੍ਤੋ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋਤਿ. ਸੁਤ੍ਵਾਨ ਨੇਸਂ ਏਤਦਹੋਸਿ – ‘‘ਨ ਹਿ ਨੂਨ ਸੋ ਓਰਕੋ ਧਮ੍ਮਵਿਨਯੋ, ਨ ਸਾ ਓਰਕਾ ਪਬ੍ਬਜ੍ਜਾ, ਯਤ੍ਥ ਯਸੋ ਕੁਲਪੁਤ੍ਤੋ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ’’ਤਿ. ਤੇ ਯੇਨਾਯਸ੍ਮਾ ਯਸੋ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਯਸਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਅਥ ਖੋ ਆਯਸ੍ਮਾ ਯਸੋ ਤੇ ਪਞ੍ਞਾਸਮਤ੍ਤੇ ਗਿਹਿਸਹਾਯਕੇ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਯਸੋ ਭਗਵਨ੍ਤਂ ਏਤਦਵੋਚ – ‘‘ਇਮੇ ਮੇ, ਭਨ੍ਤੇ, ਪਞ੍ਞਾਸਮਤ੍ਤਾ ਗਿਹਿਸਹਾਯਕਾ ਜਾਨਪਦਾ ਪੁਬ੍ਬਾਨੁਪੁਬ੍ਬਕਾਨਂ ਕੁਲਾਨਂ ਪੁਤ੍ਤਾ. ਇਮੇ ਭਗਵਾ ਓਵਦਤੁ ਅਨੁਸਾਸਤੂ’’ਤਿ. ਤੇਸਂ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ ਸੀਲਕਥਂ ਸਗ੍ਗਕਥਂ ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਯਦਾ ਤੇ ਭਗਵਾ ਅਞ੍ਞਾਸਿ ਕਲ੍ਲਚਿਤ੍ਤੇ ਮੁਦੁਚਿਤ੍ਤੇ ਵਿਨੀਵਰਣਚਿਤ੍ਤੇ ਉਦਗ੍ਗਚਿਤ੍ਤੇ ਪਸਨ੍ਨਚਿਤ੍ਤੇ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ, ਤਂ ਪਕਾਸੇਸਿ ਦੁਕ੍ਖਂ ਸਮੁਦਯਂ ਨਿਰੋਧਂ ਮਗ੍ਗਂ, ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵ ਤੇਸਂ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ. ਤੇ ਦਿਟ੍ਠਧਮ੍ਮਾ ਪਤ੍ਤਧਮ੍ਮਾ ਵਿਦਿਤਧਮ੍ਮਾ ਪਰਿਯੋਗਾਲ਼੍ਹਧਮ੍ਮਾ ਤਿਣ੍ਣਵਿਚਿਕਿਚ੍ਛਾ ਵਿਗਤਕਥਂਕਥਾ ਵੇਸਾਰਜ੍ਜਪ੍ਪਤ੍ਤਾ ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ. ਅਥ ਖੋ ਭਗਵਾ ਤੇ ਭਿਕ੍ਖੂ ਧਮ੍ਮਿਯਾ ਕਥਾਯ ਓਵਦਿ ਅਨੁਸਾਸਿ. ਤੇਸਂ ਭਗਵਤਾ ਧਮ੍ਮਿਯਾ ਕਥਾਯ ਓਵਦਿਯਮਾਨਾਨਂ ਅਨੁਸਾਸਿਯਮਾਨਾਨਂ ਅਨੁਪਾਦਾਯ ਆਸਵੇਹਿ ਚਿਤ੍ਤਾਨਿ ਵਿਮੁਚ੍ਚਿਂਸੁ. ਤੇਨ ਖੋ ਪਨ ਸਮਯੇਨ ਏਕਸਟ੍ਠਿ ਲੋਕੇ ਅਰਹਨ੍ਤੋ ਹੋਨ੍ਤਿ.

ਪਞ੍ਞਾਸਗਿਹਿਸਹਾਯਕਪਬ੍ਬਜ੍ਜਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਪਬ੍ਬਜ੍ਜਾਕਥਾ.

੮. ਮਾਰਕਥਾ

੩੨. ਅਥ ਖੋ ਭਗਵਾ ਤੇ ਭਿਕ੍ਖੂ ਆਮਨ੍ਤੇਸਿ [ਸਂ. ਨਿ. ੧.੧੪੧ ਮਾਰਸਂਯੁਤ੍ਤੇਪਿ] – ‘‘ਮੁਤ੍ਤਾਹਂ, ਭਿਕ੍ਖਵੇ, ਸਬ੍ਬਪਾਸੇਹਿ, ਯੇ ਦਿਬ੍ਬਾ ਯੇ ਚ ਮਾਨੁਸਾ. ਤੁਮ੍ਹੇਪਿ, ਭਿਕ੍ਖਵੇ, ਮੁਤ੍ਤਾ ਸਬ੍ਬਪਾਸੇਹਿ, ਯੇ ਦਿਬ੍ਬਾ ਯੇ ਚ ਮਾਨੁਸਾ. ਚਰਥ, ਭਿਕ੍ਖਵੇ, ਚਾਰਿਕਂ ਬਹੁਜਨਹਿਤਾਯ ਬਹੁਜਨਸੁਖਾਯ ਲੋਕਾਨੁਕਮ੍ਪਾਯ ਅਤ੍ਥਾਯ ਹਿਤਾਯ ਸੁਖਾਯ ਦੇਵਮਨੁਸ੍ਸਾਨਂ. ਮਾ ਏਕੇਨ ਦ੍ਵੇ ਅਗਮਿਤ੍ਥ. ਦੇਸੇਥ, ਭਿਕ੍ਖਵੇ, ਧਮ੍ਮਂ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਥ. ਸਨ੍ਤਿ ਸਤ੍ਤਾ ਅਪ੍ਪਰਜਕ੍ਖਜਾਤਿਕਾ, ਅਸ੍ਸਵਨਤਾ ਧਮ੍ਮਸ੍ਸ ਪਰਿਹਾਯਨ੍ਤਿ, ਭਵਿਸ੍ਸਨ੍ਤਿ ਧਮ੍ਮਸ੍ਸ ਅਞ੍ਞਾਤਾਰੋ. ਅਹਮ੍ਪਿ, ਭਿਕ੍ਖਵੇ, ਯੇਨ ਉਰੁਵੇਲਾ ਸੇਨਾਨਿਗਮੋ ਤੇਨੁਪਸਙ੍ਕਮਿਸ੍ਸਾਮਿ ਧਮ੍ਮਦੇਸਨਾਯਾ’’ਤਿ.

੩੩. ਅਥ ਖੋ ਮਾਰੋ ਪਾਪਿਮਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਬਦ੍ਧੋਸਿ ਸਬ੍ਬਪਾਸੇਹਿ, ਯੇ ਦਿਬ੍ਬਾ ਯੇ ਚ ਮਾਨੁਸਾ;

ਮਹਾਬਨ੍ਧਨਬਦ੍ਧੋਸਿ, ਨ ਮੇ ਸਮਣ ਮੋਕ੍ਖਸੀ’’ਤਿ.

‘‘ਮੁਤ੍ਤਾਹਂ [ਮੁਤ੍ਤੋਹਂ (ਸੀ. ਸ੍ਯਾ.)] ਸਬ੍ਬਪਾਸੇਹਿ, ਯੇ ਦਿਬ੍ਬਾ ਯੇ ਚ ਮਾਨੁਸਾ;

ਮਹਾਬਨ੍ਧਨਮੁਤ੍ਤੋਮ੍ਹਿ, ਨਿਹਤੋ ਤ੍ਵਮਸਿ ਅਨ੍ਤਕਾਤਿ.

[ਸਂ. ਨਿ. ੧.੧੫੧ ਮਾਰਸਂਯੁਤ੍ਤੇਪਿ] ‘‘ਅਨ੍ਤਲਿਕ੍ਖਚਰੋ ਪਾਸੋ, ਯ੍ਵਾਯਂ ਚਰਤਿ ਮਾਨਸੋ;

ਤੇਨ ਤਂ ਬਾਧਯਿਸ੍ਸਾਮਿ, ਨ ਮੇ ਸਮਣ ਮੋਕ੍ਖਸੀਤਿ.

[ਸਂ. ਨਿ. ੧.੧੧੫੧ ਮਾਰਸਂਯੁਤ੍ਤੇਪਿ] ‘‘ਰੂਪਾ ਸਦ੍ਦਾ ਰਸਾ ਗਨ੍ਧਾ, ਫੋਟ੍ਠਬ੍ਬਾ ਚ ਮਨੋਰਮਾ;

ਏਤ੍ਥ ਮੇ ਵਿਗਤੋ ਛਨ੍ਦੋ, ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ.

ਅਥ ਖੋ ਮਾਰੋ ਪਾਪਿਮਾ – ਜਾਨਾਤਿ ਮਂ ਭਗਵਾ, ਜਾਨਾਤਿ ਮਂ ਸੁਗਤੋਤਿ ਦੁਕ੍ਖੀ ਦੁਮ੍ਮਨੋ

ਤਤ੍ਥੇਵਨ੍ਤਰਧਾਯੀਤਿ.

ਮਾਰਕਥਾ ਨਿਟ੍ਠਿਤਾ.

੯. ਪਬ੍ਬਜ੍ਜੂਪਸਮ੍ਪਦਾਕਥਾ

੩੪. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਨਾਨਾਦਿਸਾ ਨਾਨਾਜਨਪਦਾ ਪਬ੍ਬਜ੍ਜਾਪੇਕ੍ਖੇ ਚ ਉਪਸਮ੍ਪਦਾਪੇਕ੍ਖੇ ਚ ਆਨੇਨ੍ਤਿ – ਭਗਵਾ ਨੇ ਪਬ੍ਬਾਜੇਸ੍ਸਤਿ ਉਪਸਮ੍ਪਾਦੇਸ੍ਸਤੀਤਿ. ਤਤ੍ਥ ਭਿਕ੍ਖੂ ਚੇਵ ਕਿਲਮਨ੍ਤਿ ਪਬ੍ਬਜ੍ਜਾਪੇਕ੍ਖਾ ਚ ਉਪਸਮ੍ਪਦਾਪੇਕ੍ਖਾ ਚ. ਅਥ ਖੋ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਏਤਰਹਿ ਖੋ ਭਿਕ੍ਖੂ ਨਾਨਾਦਿਸਾ ਨਾਨਾਜਨਪਦਾ ਪਬ੍ਬਜ੍ਜਾਪੇਕ੍ਖੇ ਚ ਉਪਸਮ੍ਪਦਾਪੇਕ੍ਖੇ ਚ ਆਨੇਨ੍ਤਿ – ਭਗਵਾ ਨੇ ਪਬ੍ਬਾਜੇਸ੍ਸਤਿ ਉਪਸਮ੍ਪਾਦੇਸ੍ਸਤੀਤਿ. ਤਤ੍ਥ ਭਿਕ੍ਖੂ ਚੇਵ ਕਿਲਮਨ੍ਤਿ ਪਬ੍ਬਜ੍ਜਾਪੇਕ੍ਖਾ ਚ ਉਪਸਮ੍ਪਦਾਪੇਕ੍ਖਾ ਚ. ਯਂਨੂਨਾਹਂ ਭਿਕ੍ਖੂਨਂ ਅਨੁਜਾਨੇਯ੍ਯਂ – ਤੁਮ੍ਹੇਵ ਦਾਨਿ, ਭਿਕ੍ਖਵੇ, ਤਾਸੁ ਤਾਸੁ ਦਿਸਾਸੁ ਤੇਸੁ ਤੇਸੁ ਜਨਪਦੇਸੁ ਪਬ੍ਬਾਜੇਥ ਉਪਸਮ੍ਪਾਦੇਥਾ’’ਤਿ. ਅਥ ਖੋ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਇਧ ਮਯ੍ਹਂ, ਭਿਕ੍ਖਵੇ, ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘ਏਤਰਹਿ ਖੋ ਭਿਕ੍ਖੂ ਨਾਨਾਦਿਸਾ ਨਾਨਾਜਨਪਦਾ ਪਬ੍ਬਜ੍ਜਾਪੇਕ੍ਖੇ ਚ ਉਪਸਮ੍ਪਦਾਪੇਕ੍ਖੇ ਚ ਆਨੇਨ੍ਤਿ ਭਗਵਾ ਨੇ ਪਬ੍ਬਾਜੇਸ੍ਸਤਿ ਉਪਸਮ੍ਪਾਦੇਸ੍ਸਤੀਤਿ, ਤਤ੍ਥ ਭਿਕ੍ਖੂ ਚੇਵ ਕਿਲਮਨ੍ਤਿ ਪਬ੍ਬਜ੍ਜਾਪੇਕ੍ਖਾ ਚ ਉਪਸਮ੍ਪਦਾਪੇਕ੍ਖਾ ਚ, ਯਂਨੂਨਾਹਂ ਭਿਕ੍ਖੂਨਂ ਅਨੁਜਾਨੇਯ੍ਯਂ ਤੁਮ੍ਹੇਵ ਦਾਨਿ, ਭਿਕ੍ਖਵੇ, ਤਾਸੁ ਤਾਸੁ ਦਿਸਾਸੁ ਤੇਸੁ ਤੇਸੁ ਜਨਪਦੇਸੁ ਪਬ੍ਬਾਜੇਥ ਉਪਸਮ੍ਪਾਦੇਥਾ’’’ਤਿ, ਅਨੁਜਾਨਾਮਿ, ਭਿਕ੍ਖਵੇ, ਤੁਮ੍ਹੇਵ ਦਾਨਿ ਤਾਸੁ ਤਾਸੁ ਦਿਸਾਸੁ ਤੇਸੁ ਤੇਸੁ ਜਨਪਦੇਸੁ ਪਬ੍ਬਾਜੇਥ ਉਪਸਮ੍ਪਾਦੇਥ. ਏਵਞ੍ਚ ਪਨ, ਭਿਕ੍ਖਵੇ, ਪਬ੍ਬਾਜੇਤਬ੍ਬੋ ਉਪਸਮ੍ਪਾਦੇਤਬ੍ਬੋ –

ਪਠਮਂ ਕੇਸਮਸ੍ਸੁਂ ਓਹਾਰਾਪੇਤ੍ਵਾ [ਓਹਾਰੇਤ੍ਵਾ (ਕ.)], ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦਾਪੇਤ੍ਵਾ, ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ, ਭਿਕ੍ਖੂਨਂ ਪਾਦੇ ਵਨ੍ਦਾਪੇਤ੍ਵਾ, ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ, ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ, ਏਵਂ ਵਦੇਹੀਤਿ ਵਤ੍ਤਬ੍ਬੋ – ਬੁਦ੍ਧਂ ਸਰਣਂ ਗਚ੍ਛਾਮਿ, ਧਮ੍ਮਂ ਸਰਣਂ ਗਚ੍ਛਾਮਿ, ਸਙ੍ਘਂ ਸਰਣਂ ਗਚ੍ਛਾਮਿ; ਦੁਤਿਯਮ੍ਪਿ ਬੁਦ੍ਧਂ ਸਰਣਂ ਗਚ੍ਛਾਮਿ, ਦੁਤਿਯਮ੍ਪਿ ਧਮ੍ਮਂ ਸਰਣਂ ਗਚ੍ਛਾਮਿ, ਦੁਤਿਯਮ੍ਪਿ ਸਙ੍ਘਂ ਸਰਣਂ ਗਚ੍ਛਾਮਿ; ਤਤਿਯਮ੍ਪਿ ਬੁਦ੍ਧਂ ਸਰਣਂ ਗਚ੍ਛਾਮਿ, ਤਤਿਯਮ੍ਪਿ ਧਮ੍ਮਂ ਸਰਣਂ ਗਚ੍ਛਾਮਿ, ਤਤਿਯਮ੍ਪਿ ਸਙ੍ਘਂ ਸਰਣਂ ਗਚ੍ਛਾਮੀ’’ਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਤੀਹਿ ਸਰਣਗਮਨੇਹਿ ਪਬ੍ਬਜ੍ਜਂ ਉਪਸਮ੍ਪਦ’’ਨ੍ਤਿ.

ਤੀਹਿ ਸਰਣਗਮਨੇਹਿ ਉਪਸਮ੍ਪਦਾਕਥਾ ਨਿਟ੍ਠਿਤਾ.

੧੦. ਦੁਤਿਯਮਾਰਕਥਾ

੩੫. ਅਥ ਖੋ ਭਗਵਾ ਵਸ੍ਸਂਵੁਟ੍ਠੋ [ਵਸ੍ਸਂਵੁਤ੍ਥੋ (ਸੀ.)] ਭਿਕ੍ਖੂ ਆਮਨ੍ਤੇਸਿ [ਸਂ. ਨਿ. ੧.੧੫੫] – ‘‘ਮਯ੍ਹਂ ਖੋ, ਭਿਕ੍ਖਵੇ, ਯੋਨਿਸੋ ਮਨਸਿਕਾਰਾ ਯੋਨਿਸੋ ਸਮ੍ਮਪ੍ਪਧਾਨਾ ਅਨੁਤ੍ਤਰਾ ਵਿਮੁਤ੍ਤਿ ਅਨੁਪ੍ਪਤ੍ਤਾ, ਅਨੁਤ੍ਤਰਾ ਵਿਮੁਤ੍ਤਿ ਸਚ੍ਛਿਕਤਾ. ਤੁਮ੍ਹੇਪਿ, ਭਿਕ੍ਖਵੇ, ਯੋਨਿਸੋ ਮਨਸਿਕਾਰਾ ਯੋਨਿਸੋ ਸਮ੍ਮਪ੍ਪਧਾਨਾ ਅਨੁਤ੍ਤਰਂ ਵਿਮੁਤ੍ਤਿਂ ਅਨੁਪਾਪੁਣਾਥ, ਅਨੁਤ੍ਤਰਂ ਵਿਮੁਤ੍ਤਿਂ ਸਚ੍ਛਿਕਰੋਥਾ’’ਤਿ. ਅਥ ਖੋ ਮਾਰੋ ਪਾਪਿਮਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਬਦ੍ਧੋਸਿ ਮਾਰਪਾਸੇਹਿ, ਯੇ ਦਿਬ੍ਬਾ ਯੇ ਚ ਮਾਨੁਸਾ;

ਮਹਾਬਨ੍ਧਨਬਦ੍ਧੋਸਿ [ਮਾਰਬਨ੍ਧਨਬਦ੍ਧੋਸਿ (ਸੀ. ਸ੍ਯਾ.)], ਨ ਮੇ ਸਮਣ ਮੋਕ੍ਖਸੀ’’ਤਿ.

‘‘ਮੁਤ੍ਤਾਹਂ ਮਾਰਪਾਸੇਹਿ, ਯੇ ਦਿਬ੍ਬਾ ਯੇ ਚ ਮਾਨੁਸਾ;

ਮਹਾਬਨ੍ਧਨਮੁਤ੍ਤੋਮ੍ਹਿ [ਮਾਰਬਨ੍ਧਨਮੁਤ੍ਤੋਮ੍ਹਿ (ਸੀ. ਸ੍ਯਾ.)], ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ.

ਅਥ ਖੋ ਮਾਰੋ ਪਾਪਿਮਾ – ਜਾਨਾਤਿ ਮਂ ਭਗਵਾ, ਜਾਨਾਤਿ ਮਂ ਸੁਗਤੋਤਿ ਦੁਕ੍ਖੀ ਦੁਮ੍ਮਨੋ

ਤਤ੍ਥੇਵਨ੍ਤਰਧਾਯਿ.

ਦੁਤਿਯਮਾਰਕਥਾ ਨਿਟ੍ਠਿਤਾ.

੧੧. ਭਦ੍ਦਵਗ੍ਗਿਯਵਤ੍ਥੁ

੩੬. ਅਥ ਖੋ ਭਗਵਾ ਬਾਰਾਣਸਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਉਰੁਵੇਲਾ ਤੇਨ ਚਾਰਿਕਂ ਪਕ੍ਕਾਮਿ. ਅਥ ਖੋ ਭਗਵਾ ਮਗ੍ਗਾ ਓਕ੍ਕਮ੍ਮ ਯੇਨ ਅਞ੍ਞਤਰੋ ਵਨਸਣ੍ਡੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਵਨਸਣ੍ਡਂ ਅਜ੍ਝੋਗਾਹੇਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਤੇਨ ਖੋ ਪਨ ਸਮਯੇਨ ਤਿਂਸਮਤ੍ਤਾ ਭਦ੍ਦਵਗ੍ਗਿਯਾ ਸਹਾਯਕਾ ਸਪਜਾਪਤਿਕਾ ਤਸ੍ਮਿਂ ਵਨਸਣ੍ਡੇ ਪਰਿਚਾਰੇਨ੍ਤਿ. ਏਕਸ੍ਸ ਪਜਾਪਤਿ ਨਾਹੋਸਿ; ਤਸ੍ਸ ਅਤ੍ਥਾਯ ਵੇਸੀ ਆਨੀਤਾ ਅਹੋਸਿ. ਅਥ ਖੋ ਸਾ ਵੇਸੀ ਤੇਸੁ ਪਮਤ੍ਤੇਸੁ ਪਰਿਚਾਰੇਨ੍ਤੇਸੁ ਭਣ੍ਡਂ ਆਦਾਯ ਪਲਾਯਿਤ੍ਥ. ਅਥ ਖੋ ਤੇ ਸਹਾਯਕਾ ਸਹਾਯਕਸ੍ਸ ਵੇਯ੍ਯਾਵਚ੍ਚਂ ਕਰੋਨ੍ਤਾ, ਤਂ ਇਤ੍ਥਿਂ ਗਵੇਸਨ੍ਤਾ, ਤਂ ਵਨਸਣ੍ਡਂ ਆਹਿਣ੍ਡਨ੍ਤਾ ਅਦ੍ਦਸਂਸੁ ਭਗਵਨ੍ਤਂ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨਂ. ਦਿਸ੍ਵਾਨ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਅਪਿ, ਭਨ੍ਤੇ, ਭਗਵਾ ਏਕਂ ਇਤ੍ਥਿਂ ਪਸ੍ਸੇਯ੍ਯਾ’’ਤਿ? ‘‘ਕਿਂ ਪਨ ਵੋ, ਕੁਮਾਰਾ, ਇਤ੍ਥਿਯਾ’’ਤਿ? ‘‘ਇਧ ਮਯਂ, ਭਨ੍ਤੇ, ਤਿਂਸਮਤ੍ਤਾ ਭਦ੍ਦਵਗ੍ਗਿਯਾ ਸਹਾਯਕਾ ਸਪਜਾਪਤਿਕਾ ਇਮਸ੍ਮਿਂ ਵਨਸਣ੍ਡੇ ਪਰਿਚਾਰਿਮ੍ਹਾ. ਏਕਸ੍ਸ ਪਜਾਪਤਿ ਨਾਹੋਸਿ; ਤਸ੍ਸ ਅਤ੍ਥਾਯ ਵੇਸੀ ਆਨੀਤਾ ਅਹੋਸਿ. ਅਥ ਖੋ ਸਾ, ਭਨ੍ਤੇ, ਵੇਸੀ ਅਮ੍ਹੇਸੁ ਪਮਤ੍ਤੇਸੁ ਪਰਿਚਾਰੇਨ੍ਤੇਸੁ ਭਣ੍ਡਂ ਆਦਾਯ ਪਲਾਯਿਤ੍ਥ. ਤੇ ਮਯਂ, ਭਨ੍ਤੇ, ਸਹਾਯਕਾ ਸਹਾਯਕਸ੍ਸ ਵੇਯ੍ਯਾਵਚ੍ਚਂ ਕਰੋਨ੍ਤਾ, ਤਂ ਇਤ੍ਥਿਂ ਗਵੇਸਨ੍ਤਾ, ਇਮਂ ਵਨਸਣ੍ਡਂ ਆਹਿਣ੍ਡਾਮਾ’’ਤਿ. ‘‘ਤਂ ਕਿਂ ਮਞ੍ਞਥ ਵੋ, ਕੁਮਾਰਾ, ਕਤਮਂ ਨੁ ਖੋ ਤੁਮ੍ਹਾਕਂ ਵਰਂ – ਯਂ ਵਾ ਤੁਮ੍ਹੇ ਇਤ੍ਥਿਂ ਗਵੇਸੇਯ੍ਯਾਥ, ਯਂ ਵਾ ਅਤ੍ਤਾਨਂ ਗਵੇਸੇਯ੍ਯਾਥਾ’’ਤਿ? ‘‘ਏਤਦੇਵ, ਭਨ੍ਤੇ, ਅਮ੍ਹਾਕਂ ਵਰਂ ਯਂ ਮਯਂ ਅਤ੍ਤਾਨਂ ਗਵੇਸੇਯ੍ਯਾਮਾ’’ਤਿ. ‘‘ਤੇਨ ਹਿ ਵੋ, ਕੁਮਾਰਾ, ਨਿਸੀਦਥ, ਧਮ੍ਮਂ ਵੋ ਦੇਸੇਸ੍ਸਾਮੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਤੇ ਭਦ੍ਦਵਗ੍ਗਿਯਾ ਸਹਾਯਕਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਤੇਸਂ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ ਸੀਲਕਥਂ ਸਗ੍ਗਕਥਂ ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ, ਯਦਾ ਤੇ ਭਗਵਾ ਅਞ੍ਞਾਸਿ ਕਲ੍ਲਚਿਤ੍ਤੇ ਮੁਦੁਚਿਤ੍ਤੇ ਵਿਨੀਵਰਣਚਿਤ੍ਤੇ ਉਦਗ੍ਗਚਿਤ੍ਤੇ ਪਸਨ੍ਨਚਿਤ੍ਤੇ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ, ਤਂ ਪਕਾਸੇਸਿ ਦੁਕ੍ਖਂ ਸਮੁਦਯਂ ਨਿਰੋਧਂ ਮਗ੍ਗਂ, ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵ ਤੇਸਂ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ. ਤੇ ਦਿਟ੍ਠਧਮ੍ਮਾ ਪਤ੍ਤਧਮ੍ਮਾ ਵਿਦਿਤਧਮ੍ਮਾ ਪਰਿਯੋਗਾਲ਼੍ਹਧਮ੍ਮਾ ਤਿਣ੍ਣਵਿਚਿਕਿਚ੍ਛਾ ਵਿਗਤਕਥਂਕਥਾ ਵੇਸਾਰਜ੍ਜਪ੍ਪਤ੍ਤਾ ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

ਭਦ੍ਦਵਗ੍ਗਿਯਸਹਾਯਕਾਨਂ ਵਤ੍ਥੁ ਨਿਟ੍ਠਿਤਂ.

ਦੁਤਿਯਭਾਣਵਾਰੋ.

੧੨. ਉਰੁਵੇਲਪਾਟਿਹਾਰਿਯਕਥਾ

੩੭. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਉਰੁਵੇਲਾ ਤਦਵਸਰਿ. ਤੇਨ ਖੋ ਪਨ ਸਮਯੇਨ ਉਰੁਵੇਲਾਯਂ ਤਯੋ ਜਟਿਲਾ ਪਟਿਵਸਨ੍ਤਿ – ਉਰੁਵੇਲਕਸ੍ਸਪੋ, ਨਦੀਕਸ੍ਸਪੋ, ਗਯਾਕਸ੍ਸਪੋਤਿ. ਤੇਸੁ ਉਰੁਵੇਲਕਸ੍ਸਪੋ ਜਟਿਲੋ ਪਞ੍ਚਨ੍ਨਂ ਜਟਿਲਸਤਾਨਂ ਨਾਯਕੋ ਹੋਤਿ, ਵਿਨਾਯਕੋ ਅਗ੍ਗੋ ਪਮੁਖੋ ਪਾਮੋਕ੍ਖੋ. ਨਦੀਕਸ੍ਸਪੋ ਜਟਿਲੋ ਤਿਣ੍ਣਂ ਜਟਿਲਸਤਾਨਂ ਨਾਯਕੋ ਹੋਤਿ, ਵਿਨਾਯਕੋ ਅਗ੍ਗੋ ਪਮੁਖੋ ਪਾਮੋਕ੍ਖੋ. ਗਯਾਕਸ੍ਸਪੋ ਜਟਿਲੋ ਦ੍ਵਿਨ੍ਨਂ ਜਟਿਲਸਤਾਨਂ ਨਾਯਕੋ ਹੋਤਿ, ਵਿਨਾਯਕੋ ਅਗ੍ਗੋ ਪਮੁਖੋ ਪਾਮੋਕ੍ਖੋ. ਅਥ ਖੋ ਭਗਵਾ ਯੇਨ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਅਸ੍ਸਮੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਸਚੇ ਤੇ, ਕਸ੍ਸਪ, ਅਗਰੁ, ਵਸੇਯ੍ਯਾਮ ਏਕਰਤ੍ਤਂ ਅਗ੍ਯਾਗਾਰੇ’’ਤਿ? ‘‘ਨ ਖੋ ਮੇ, ਮਹਾਸਮਣ, ਗਰੁ, ਚਣ੍ਡੇਤ੍ਥ ਨਾਗਰਾਜਾ ਇਦ੍ਧਿਮਾ ਆਸਿਵਿਸੋ ਘੋਰਵਿਸੋ, ਸੋ ਤਂ ਮਾ ਵਿਹੇਠੇਸੀ’’ਤਿ. ਦੁਤਿਯਮ੍ਪਿ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਸਚੇ ਤੇ, ਕਸ੍ਸਪ, ਅਗਰੁ, ਵਸੇਯ੍ਯਾਮ ਏਕਰਤ੍ਤਂ ਅਗ੍ਯਾਗਾਰੇ’’ਤਿ? ‘‘ਨ ਖੋ ਮੇ, ਮਹਾਸਮਣ, ਗਰੁ, ਚਣ੍ਡੇਤ੍ਥ ਨਾਗਰਾਜਾ ਇਦ੍ਧਿਮਾ ਆਸਿਵਿਸੋ ਘੋਰਵਿਸੋ, ਸੋ ਤਂ ਮਾ ਵਿਹੇਠੇਸੀ’’ਤਿ. ਤਤਿਯਮ੍ਪਿ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਸਚੇ ਤੇ, ਕਸ੍ਸਪ, ਅਗਰੁ, ਵਸੇਯ੍ਯਾਮ ਏਕਰਤ੍ਤਂ ਅਗ੍ਯਾਗਾਰੇ’’ਤਿ? ‘‘ਨ ਖੋ ਮੇ, ਮਹਾਸਮਣ, ਗਰੁ, ਚਣ੍ਡੇਤ੍ਥ ਨਾਗਰਾਜਾ ਇਦ੍ਧਿਮਾ ਆਸਿਵਿਸੋ ਘੋਰਵਿਸੋ, ਸੋ ਤਂ ਮਾ ਵਿਹੇਠੇਸੀ’’ਤਿ. ‘‘ਅਪ੍ਪੇਵ ਮਂ ਨ ਵਿਹੇਠੇਯ੍ਯ, ਇਙ੍ਘ ਤ੍ਵਂ, ਕਸ੍ਸਪ, ਅਨੁਜਾਨਾਹਿ ਅਗ੍ਯਾਗਾਰ’’ਨ੍ਤਿ. ‘‘ਵਿਹਰ, ਮਹਾਸਮਣ, ਯਥਾਸੁਖ’’ਨ੍ਤਿ. ਅਥ ਖੋ ਭਗਵਾ ਅਗ੍ਯਾਗਾਰਂ ਪਵਿਸਿਤ੍ਵਾ ਤਿਣਸਨ੍ਥਾਰਕਂ ਪਞ੍ਞਪੇਤ੍ਵਾ ਨਿਸੀਦਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ.

੩੮. ਅਦ੍ਦਸਾ ਖੋ ਸੋ ਨਾਗੋ ਭਗਵਨ੍ਤਂ ਪਵਿਟ੍ਠਂ, ਦਿਸ੍ਵਾਨ ਦੁਮ੍ਮਨੋ [ਦੁਕ੍ਖੀ ਦੁਮ੍ਮਨੋ (ਸੀ. ਸ੍ਯਾ.)] ਪਧੂਪਾਯਿ [ਪਖੂਪਾਸਿ (ਕ.)]. ਅਥ ਖੋ ਭਗਵਤੋ ਏਤਦਹੋਸਿ – ‘‘ਯਂਨੂਨਾਹਂ ਇਮਸ੍ਸ ਨਾਗਸ੍ਸ ਅਨੁਪਹਚ੍ਚ ਛਵਿਞ੍ਚ ਚਮ੍ਮਞ੍ਚ ਮਂਸਞ੍ਚ ਨ੍ਹਾਰੁਞ੍ਚ ਅਟ੍ਠਿਞ੍ਚ ਅਟ੍ਠਿਮਿਞ੍ਜਞ੍ਚ ਤੇਜਸਾ ਤੇਜਂ ਪਰਿਯਾਦਿਯੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰਿਤ੍ਵਾ ਪਧੂਪਾਯਿ. ਅਥ ਖੋ ਸੋ ਨਾਗੋ ਮਕ੍ਖਂ ਅਸਹਮਾਨੋ ਪਜ੍ਜਲਿ. ਭਗਵਾਪਿ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਪਜ੍ਜਲਿ. ਉਭਿਨ੍ਨਂ ਸਜੋਤਿਭੂਤਾਨਂ ਅਗ੍ਯਾਗਾਰਂ ਆਦਿਤ੍ਤਂ ਵਿਯ ਹੋਤਿ ਸਮ੍ਪਜ੍ਜਲਿਤਂ ਸਜੋਤਿਭੂਤਂ. ਅਥ ਖੋ ਤੇ ਜਟਿਲਾ ਅਗ੍ਯਾਗਾਰਂ ਪਰਿਵਾਰੇਤ੍ਵਾ ਏਵਮਾਹਂਸੁ – ‘‘ਅਭਿਰੂਪੋ ਵਤ ਭੋ ਮਹਾਸਮਣੋ ਨਾਗੇਨ ਵਿਹੇਠਿਯਤੀ’’ਤਿ. ਅਥ ਖੋ ਭਗਵਾ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਤਸ੍ਸ ਨਾਗਸ੍ਸ ਅਨੁਪਹਚ੍ਚ ਛਵਿਞ੍ਚ ਚਮ੍ਮਞ੍ਚ ਮਂਸਞ੍ਚ ਨ੍ਹਾਰੁਞ੍ਚ ਅਟ੍ਠਿਞ੍ਚ ਅਟ੍ਠਿਮਿਞ੍ਜਞ੍ਚ ਤੇਜਸਾ ਤੇਜਂ ਪਰਿਯਾਦਿਯਿਤ੍ਵਾ ਪਤ੍ਤੇ ਪਕ੍ਖਿਪਿਤ੍ਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਦਸ੍ਸੇਸਿ – ‘‘ਅਯਂ ਤੇ, ਕਸ੍ਸਪ, ਨਾਗੋ ਪਰਿਯਾਦਿਨ੍ਨੋ [ਪਰਿਯਾਦਿਣ੍ਣੋ (ਕ.)] ਅਸ੍ਸ ਤੇਜਸਾ ਤੇਜੋ’’ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਚਣ੍ਡਸ੍ਸ ਨਾਗਰਾਜਸ੍ਸ ਇਦ੍ਧਿਮਤੋ ਆਸਿਵਿਸਸ੍ਸ ਘੋਰਵਿਸਸ੍ਸ ਤੇਜਸਾ ਤੇਜਂ ਪਰਿਯਾਦਿਯਿਸ੍ਸਤਿ, ਨਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

੩੯.

ਨੇਰਞ੍ਜਰਾਯਂ ਭਗਵਾ, ਉਰੁਵੇਲਕਸ੍ਸਪਂ ਜਟਿਲਂ ਅਵੋਚ;

‘‘ਸਚੇ ਤੇ ਕਸ੍ਸਪ ਅਗਰੁ, ਵਿਹਰੇਮੁ ਅਜ੍ਜਣ੍ਹੋ ਅਗ੍ਗਿਸਾਲਮ੍ਹੀ’’ਤਿ [ਅਗ੍ਗਿਸਰਣਮ੍ਹੀਤਿ (ਸੀ. ਸ੍ਯਾ.)].

‘‘ਨ ਖੋ ਮੇ ਮਹਾਸਮਣ ਗਰੁ;

ਫਾਸੁਕਾਮੋਵ ਤਂ ਨਿਵਾਰੇਮਿ;

ਚਣ੍ਡੇਤ੍ਥ ਨਾਗਰਾਜਾ;

ਇਦ੍ਧਿਮਾ ਆਸਿਵਿਸੋ ਘੋਰਵਿਸੋ;

ਸੋ ਤਂ ਮਾ ਵਿਹੇਠੇਸੀ’’ਤਿ.

‘‘ਅਪ੍ਪੇਵ ਮਂ ਨ ਵਿਹੇਠੇਯ੍ਯ;

ਇਙ੍ਘ ਤ੍ਵਂ ਕਸ੍ਸਪ ਅਨੁਜਾਨਾਹਿ ਅਗ੍ਯਾਗਾਰ’’ਨ੍ਤਿ;

ਦਿਨ੍ਨਨ੍ਤਿ ਨਂ ਵਿਦਿਤ੍ਵਾ;

ਅਭੀਤੋ [ਅਸਮ੍ਭੀਤੋ (ਸੀ.)] ਪਾਵਿਸਿ ਭਯਮਤੀਤੋ.

ਦਿਸ੍ਵਾ ਇਸਿਂ ਪਵਿਟ੍ਠਂ, ਅਹਿਨਾਗੋ ਦੁਮ੍ਮਨੋ ਪਧੂਪਾਯਿ;

ਸੁਮਨਮਨਸੋ ਅਧਿਮਨੋ [ਅਵਿਮਨੋ (ਕਤ੍ਥਚਿ), ਨਵਿਮਨੋ (ਸ੍ਯਾ.)], ਮਨੁਸ੍ਸਨਾਗੋਪਿ ਤਤ੍ਥ ਪਧੂਪਾਯਿ.

ਮਕ੍ਖਞ੍ਚ ਅਸਹਮਾਨੋ, ਅਹਿਨਾਗੋ ਪਾਵਕੋਵ ਪਜ੍ਜਲਿ;

ਤੇਜੋਧਾਤੁਸੁ ਕੁਸਲੋ, ਮਨੁਸ੍ਸਨਾਗੋਪਿ ਤਤ੍ਥ ਪਜ੍ਜਲਿ.

ਉਭਿਨ੍ਨਂ ਸਜੋਤਿਭੂਤਾਨਂ;

ਅਗ੍ਯਾਗਾਰਂ ਆਦਿਤ੍ਤਂ ਹੋਤਿ ਸਮ੍ਪਜ੍ਜਲਿਤਂ ਸਜੋਤਿਭੂਤਂ;

ਉਦਿਚ੍ਛਰੇ ਜਟਿਲਾ;

‘‘ਅਭਿਰੂਪੋ ਵਤ ਭੋ ਮਹਾਸਮਣੋ;

ਨਾਗੇਨ ਵਿਹੇਠਿਯਤੀ’’ਤਿ ਭਣਨ੍ਤਿ.

ਅਥ ਤਸ੍ਸਾ ਰਤ੍ਤਿਯਾ [ਅਥ ਰਤ੍ਤਿਯਾ (ਸੀ. ਸ੍ਯਾ.)] ਅਚ੍ਚਯੇਨ;

ਹਤਾ ਨਾਗਸ੍ਸ ਅਚ੍ਚਿਯੋ ਹੋਨ੍ਤਿ [ਅਹਿਨਾਗਸ੍ਸ ਅਚ੍ਚਿਯੋ ਨ ਹੋਨ੍ਤਿ (ਸੀ. ਸ੍ਯਾ.)];

ਇਦ੍ਧਿਮਤੋ ਪਨ ਠਿਤਾ [ਇਦ੍ਧਿਮਤੋ ਪਨੁਟ੍ਠਿਤਾ (ਸੀ.)];

ਅਨੇਕਵਣ੍ਣਾ ਅਚ੍ਚਿਯੋ ਹੋਨ੍ਤਿ.

ਨੀਲਾ ਅਥ ਲੋਹਿਤਿਕਾ;

ਮਞ੍ਜਿਟ੍ਠਾ ਪੀਤਕਾ ਫਲਿਕਵਣ੍ਣਾਯੋ;

ਅਙ੍ਗੀਰਸਸ੍ਸ ਕਾਯੇ;

ਅਨੇਕਵਣ੍ਣਾ ਅਚ੍ਚਿਯੋ ਹੋਨ੍ਤਿ.

ਪਤ੍ਤਮ੍ਹਿ ਓਦਹਿਤ੍ਵਾ;

ਅਹਿਨਾਗਂ ਬ੍ਰਾਹ੍ਮਣਸ੍ਸ ਦਸ੍ਸੇਸਿ;

‘‘ਅਯਂ ਤੇ ਕਸ੍ਸਪ ਨਾਗੋ;

ਪਰਿਯਾਦਿਨ੍ਨੋ ਅਸ੍ਸ ਤੇਜਸਾ ਤੇਜੋ’’ਤਿ.

ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਭਗਵਤੋ ਇਮਿਨਾ ਇਦ੍ਧਿਪਾਟਿਹਾਰਿਯੇਨ ਅਭਿਪ੍ਪਸਨ੍ਨੋ ਭਗਵਨ੍ਤਂ ਏਤਦਵੋਚ – ‘‘ਇਧੇਵ, ਮਹਾਸਮਣ, ਵਿਹਰ, ਅਹਂ ਤੇ [ਤੇ ਉਪਟ੍ਠਾਮਿ (ਇਤਿਪਿ)] ਧੁਵਭਤ੍ਤੇਨਾ’’ਤਿ.

ਪਠਮਂ ਪਾਟਿਹਾਰਿਯਂ.

੪੦. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਅਸ੍ਸਮਸ੍ਸ ਅਵਿਦੂਰੇ ਅਞ੍ਞਤਰਸ੍ਮਿਂ ਵਨਸਣ੍ਡੇ ਵਿਹਾਸਿ. ਅਥ ਖੋ ਚਤ੍ਤਾਰੋ ਮਹਾਰਾਜਾਨੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਚਤੁਦ੍ਦਿਸਾ ਅਟ੍ਠਂਸੁ ਸੇਯ੍ਯਥਾਪਿ ਮਹਨ੍ਤਾ ਅਗ੍ਗਿਕ੍ਖਨ੍ਧਾ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤਂ. ਕੇ ਨੁ ਖੋ ਤੇ, ਮਹਾਸਮਣ, ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਤ੍ਵਂ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਤਂ ਅਭਿਵਾਦੇਤ੍ਵਾ ਚਤੁਦ੍ਦਿਸਾ ਅਟ੍ਠਂਸੁ ‘‘ਸੇਯ੍ਯਥਾਪਿ ਮਹਨ੍ਤਾ ਅਗ੍ਗਿਕ੍ਖਨ੍ਧਾ’’ਤਿ. ‘‘ਏਤੇ ਖੋ, ਕਸ੍ਸਪ, ਚਤ੍ਤਾਰੋ ਮਹਾਰਾਜਾਨੋ ਯੇਨਾਹਂ ਤੇਨੁਪਸਙ੍ਕਮਿਂਸੁ ਧਮ੍ਮਸ੍ਸਵਨਾਯਾ’’ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਚਤ੍ਤਾਰੋਪਿ ਮਹਾਰਾਜਾਨੋ ਉਪਸਙ੍ਕਮਿਸ੍ਸਨ੍ਤਿ ਧਮ੍ਮਸ੍ਸਵਨਾਯ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਦੁਤਿਯਂ ਪਾਟਿਹਾਰਿਯਂ.

੪੧. ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ ਸੇਯ੍ਯਥਾਪਿ ਮਹਾਅਗ੍ਗਿਕ੍ਖਨ੍ਧੋ, ਪੁਰਿਮਾਹਿ ਵਣ੍ਣਨਿਭਾਹਿ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤਂ. ਕੋ ਨੁ ਖੋ ਸੋ, ਮਹਾਸਮਣ, ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਤ੍ਵਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ ਸੇਯ੍ਯਥਾਪਿ ਮਹਾਅਗ੍ਗਿਕ੍ਖਨ੍ਧੋ, ਪੁਰਿਮਾਹਿ ਵਣ੍ਣਨਿਭਾਹਿ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚਾ’’ਤਿ? ‘‘ਏਸੋ ਖੋ, ਕਸ੍ਸਪ, ਸਕ੍ਕੋ ਦੇਵਾਨਮਿਨ੍ਦੋ ਯੇਨਾਹਂ ਤੇਨੁਪਸਙ੍ਕਮਿ ਧਮ੍ਮਸ੍ਸਵਨਾਯਾ’’ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਸਕ੍ਕੋਪਿ ਦੇਵਾਨਮਿਨ੍ਦੋ ਉਪਸਙ੍ਕਮਿਸ੍ਸਤਿ ਧਮ੍ਮਸ੍ਸਵਨਾਯ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਤਤਿਯਂ ਪਾਟਿਹਾਰਿਯਂ.

੪੨. ਅਥ ਖੋ ਬ੍ਰਹ੍ਮਾ ਸਹਮ੍ਪਤਿ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ ਸੇਯ੍ਯਥਾਪਿ ਮਹਾਅਗ੍ਗਿਕ੍ਖਨ੍ਧੋ, ਪੁਰਿਮਾਹਿ ਵਣ੍ਣਨਿਭਾਹਿ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤਂ. ਕੋ ਨੁ ਖੋ ਸੋ, ਮਹਾਸਮਣ, ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਤ੍ਵਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ ਸੇਯ੍ਯਥਾਪਿ ਮਹਾਅਗ੍ਗਿਕ੍ਖਨ੍ਧੋ, ਪੁਰਿਮਾਹਿ ਵਣ੍ਣਨਿਭਾਹਿ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚਾ’’ਤਿ? ‘‘ਏਸੋ ਖੋ, ਕਸ੍ਸਪ, ਬ੍ਰਹ੍ਮਾ ਸਹਮ੍ਪਤਿ ਯੇਨਾਹਂ ਤੇਨੁਪਸਙ੍ਕਮਿ ਧਮ੍ਮਸ੍ਸਵਨਾਯਾ’’ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਬ੍ਰਹ੍ਮਾਪਿ ਸਹਮ੍ਪਤਿ ਉਪਸਙ੍ਕਮਿਸ੍ਸਤਿ ਧਮ੍ਮਸ੍ਸਵਨਾਯ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਚਤੁਤ੍ਥਂ ਪਾਟਿਹਾਰਿਯਂ.

੪੩. ਤੇਨ ਖੋ ਪਨ ਸਮਯੇਨ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਮਹਾਯਞ੍ਞੋ ਪਚ੍ਚੁਪਟ੍ਠਿਤੋ ਹੋਤਿ, ਕੇਵਲਕਪ੍ਪਾ ਚ ਅਙ੍ਗਮਗਧਾ ਪਹੂਤਂ ਖਾਦਨੀਯਂ ਭੋਜਨੀਯਂ ਆਦਾਯ ਅਭਿਕ੍ਕਮਿਤੁਕਾਮਾ ਹੋਨ੍ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਏਤਰਹਿ ਖੋ ਮੇ ਮਹਾਯਞ੍ਞੋ ਪਚ੍ਚੁਪਟ੍ਠਿਤੋ, ਕੇਵਲਕਪ੍ਪਾ ਚ ਅਙ੍ਗਮਗਧਾ ਪਹੂਤਂ ਖਾਦਨੀਯਂ ਭੋਜਨੀਯਂ ਆਦਾਯ ਅਭਿਕ੍ਕਮਿਸ੍ਸਨ੍ਤਿ. ਸਚੇ ਮਹਾਸਮਣੋ ਮਹਾਜਨਕਾਯੇ ਇਦ੍ਧਿਪਾਟਿਹਾਰਿਯਂ ਕਰਿਸ੍ਸਤਿ, ਮਹਾਸਮਣਸ੍ਸ ਲਾਭਸਕ੍ਕਾਰੋ ਅਭਿਵਡ੍ਢਿਸ੍ਸਤਿ, ਮਮ ਲਾਭਸਕ੍ਕਾਰੋ ਪਰਿਹਾਯਿਸ੍ਸਤਿ. ਅਹੋ ਨੂਨ ਮਹਾਸਮਣੋ ਸ੍ਵਾਤਨਾਯ ਨਾਗਚ੍ਛੇਯ੍ਯਾ’’ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਉਤ੍ਤਰਕੁਰੁਂ ਗਨ੍ਤ੍ਵਾ ਤਤੋ ਪਿਣ੍ਡਪਾਤਂ ਆਹਰਿਤ੍ਵਾ ਅਨੋਤਤ੍ਤਦਹੇ ਪਰਿਭੁਞ੍ਜਿਤ੍ਵਾ ਤਤ੍ਥੇਵ ਦਿਵਾਵਿਹਾਰਂ ਅਕਾਸਿ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤਂ. ਕਿਂ ਨੁ ਖੋ, ਮਹਾਸਮਣ, ਹਿਯ੍ਯੋ ਨਾਗਮਾਸਿ? ਅਪਿ ਚ ਮਯਂ ਤਂ ਸਰਾਮ – ਕਿਂ ਨੁ ਖੋ ਮਹਾਸਮਣੋ ਨਾਗਚ੍ਛਤੀਤਿ? ਖਾਦਨੀਯਸ੍ਸ ਚ ਭੋਜਨੀਯਸ੍ਸ ਚ ਤੇ ਪਟਿਵੀਸੋ [ਪਟਿਵਿਂਸੋ (ਸੀ.), ਪਟਿਵਿਸੋ (ਸ੍ਯਾ.)] ਠਪਿਤੋ’’ਤਿ. ਨਨੁ ਤੇ, ਕਸ੍ਸਪ, ਏਤਦਹੋਸਿ – ‘‘‘ਏਤਰਹਿ ਖੋ ਮੇ ਮਹਾਯਞ੍ਞੋ ਪਚ੍ਚੁਪਟ੍ਠਿਤੋ, ਕੇਵਲਕਪ੍ਪਾ ਚ ਅਙ੍ਗਮਗਧਾ ਪਹੂਤਂ ਖਾਦਨੀਯਂ ਭੋਜਨੀਯਂ ਆਦਾਯ ਅਭਿਕ੍ਕਮਿਸ੍ਸਨ੍ਤਿ, ਸਚੇ ਮਹਾਸਮਣੋ ਮਹਾਜਨਕਾਯੇ ਇਦ੍ਧਿਪਾਟਿਹਾਰਿਯਂ ਕਰਿਸ੍ਸਤਿ, ਮਹਾਸਮਣਸ੍ਸ ਲਾਭਸਕ੍ਕਾਰੋ ਅਭਿਵਡ੍ਢਿਸ੍ਸਤਿ, ਮਮ ਲਾਭਸਕ੍ਕਾਰੋ ਪਰਿਹਾਯਿਸ੍ਸਤਿ, ਅਹੋ ਨੂਨ ਮਹਾਸਮਣੋ ਸ੍ਵਾਤਨਾਯ ਨਾਗਚ੍ਛੇਯ੍ਯਾ’ਤਿ. ਸੋ ਖੋ ਅਹਂ, ਕਸ੍ਸਪ, ਤਵ ਚੇਤਸਾ ਚੇਤੋਪਰਿਵਿਤਕ੍ਕਂ ਅਞ੍ਞਾਯ ਉਤ੍ਤਰਕੁਰੁਂ ਗਨ੍ਤ੍ਵਾ ਤਤੋ ਪਿਣ੍ਡਪਾਤਂ ਆਹਰਿਤ੍ਵਾ ਅਨੋਤਤ੍ਤਦਹੇ ਪਰਿਭੁਞ੍ਜਿਤ੍ਵਾ ਤਤ੍ਥੇਵ ਦਿਵਾਵਿਹਾਰਂ ਅਕਾਸਿ’’ਨ੍ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਚੇਤਸਾਪਿ ਚਿਤ੍ਤਂ ਪਜਾਨਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਪਞ੍ਚਮਂ ਪਾਟਿਹਾਰਿਯਂ.

੪੪. ਤੇਨ ਖੋ ਪਨ ਸਮਯੇਨ ਭਗਵਤੋ ਪਂਸੁਕੂਲਂ ਉਪ੍ਪਨ੍ਨਂ ਹੋਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਤ੍ਥ ਨੁ ਖੋ ਅਹਂ ਪਂਸੁਕੂਲਂ ਧੋਵੇਯ੍ਯ’’ਨ੍ਤਿ? ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਪਾਣਿਨਾ ਪੋਕ੍ਖਰਣਿਂ ਖਣਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਇਧ, ਭਨ੍ਤੇ, ਭਗਵਾ ਪਂਸੁਕੂਲਂ ਧੋਵਤੂ’’ਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਪਂਸੁਕੂਲਂ ਪਰਿਮਦ੍ਦੇਯ੍ਯ’’ਨ੍ਤਿ? ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਮਹਤਿਂ ਸਿਲਂ ਉਪਨਿਕ੍ਖਿਪਿ – ਇਧ, ਭਨ੍ਤੇ, ਭਗਵਾ ਪਂਸੁਕੂਲਂ ਪਰਿਮਦ੍ਦਤੂਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ [ਅਹਂ ਪਂਸੁਕੂਲਂ (ਕ.)] ਆਲਮ੍ਬਿਤ੍ਵਾ ਉਤ੍ਤਰੇਯ੍ਯ’’ਨ੍ਤਿ? ਅਥ ਖੋ ਕਕੁਧੇ ਅਧਿਵਤ੍ਥਾ ਦੇਵਤਾ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਸਾਖਂ ਓਨਾਮੇਸਿ – ਇਧ, ਭਨ੍ਤੇ, ਭਗਵਾ ਆਲਮ੍ਬਿਤ੍ਵਾ ਉਤ੍ਤਰਤੂਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਪਂਸੁਕੂਲਂ ਵਿਸ੍ਸਜ੍ਜੇਯ੍ਯ’’ਨ੍ਤਿ? ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਮਹਤਿਂ ਸਿਲਂ ਉਪਨਿਕ੍ਖਿਪਿ – ਇਧ, ਭਨ੍ਤੇ, ਭਗਵਾ ਪਂਸੁਕੂਲਂ ਵਿਸ੍ਸਜ੍ਜੇਤੂਤਿ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤਂ. ਕਿਂ ਨੁ ਖੋ, ਮਹਾਸਮਣ, ਨਾਯਂ ਪੁਬ੍ਬੇ ਇਧ ਪੋਕ੍ਖਰਣੀ, ਸਾਯਂ ਇਧ ਪੋਕ੍ਖਰਣੀ. ਨਯਿਮਾ ਸਿਲਾ ਪੁਬ੍ਬੇ ਉਪਨਿਕ੍ਖਿਤ੍ਤਾ. ਕੇਨਿਮਾ ਸਿਲਾ ਉਪਨਿਕ੍ਖਿਤ੍ਤਾ? ਨਯਿਮਸ੍ਸ ਕਕੁਧਸ੍ਸ ਪੁਬ੍ਬੇ ਸਾਖਾ ਓਨਤਾ, ਸਾਯਂ ਸਾਖਾ ਓਨਤਾ’’ਤਿ. ਇਧ ਮੇ, ਕਸ੍ਸਪ, ਪਂਸੁਕੂਲਂ ਉਪ੍ਪਨ੍ਨਂ ਅਹੋਸਿ. ਤਸ੍ਸ ਮਯ੍ਹਂ, ਕਸ੍ਸਪ, ਏਤਦਹੋਸਿ – ‘‘ਕਤ੍ਥ ਨੁ ਖੋ ਅਹਂ ਪਂਸੁਕੂਲਂ ਧੋਵੇਯ੍ਯ’’ਨ੍ਤਿ? ਅਥ ਖੋ, ਕਸ੍ਸਪ, ਸਕ੍ਕੋ ਦੇਵਾਨਮਿਨ੍ਦੋ ਮਮ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਪਾਣਿਨਾ ਪੋਕ੍ਖਰਣਿਂ ਖਣਿਤ੍ਵਾ ਮਂ ਏਤਦਵੋਚ – ‘‘ਇਧ, ਭਨ੍ਤੇ, ਭਗਵਾ ਪਂਸੁਕੂਲਂ ਧੋਵਤੂ’’ਤਿ. ਸਾਯਂ ਕਸ੍ਸਪ ਅਮਨੁਸ੍ਸੇਨ ਪਾਣਿਨਾ ਖਣਿਤਾ ਪੋਕ੍ਖਰਣੀ. ਤਸ੍ਸ ਮਯ੍ਹਂ, ਕਸ੍ਸਪ, ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਪਂਸੁਕੂਲਂ ਪਰਿਮਦ੍ਦੇਯ੍ਯ’’ਨ੍ਤਿ? ਅਥ ਖੋ, ਕਸ੍ਸਪ, ਸਕ੍ਕੋ ਦੇਵਾਨਮਿਨ੍ਦੋ ਮਮ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਮਹਤਿਂ ਸਿਲਂ ਉਪਨਿਕ੍ਖਿਪਿ – ‘‘ਇਧ, ਭਨ੍ਤੇ, ਭਗਵਾ ਪਂਸੁਕੂਲਂ ਪਰਿਮਦ੍ਦਤੂ’’ਤਿ. ਸਾਯਂ ਕਸ੍ਸਪ ਅਮਨੁਸ੍ਸੇਨ ਉਪਨਿਕ੍ਖਿਤ੍ਤਾ ਸਿਲਾ. ਤਸ੍ਸ ਮਯ੍ਹਂ, ਕਸ੍ਸਪ, ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਆਲਮ੍ਬਿਤ੍ਵਾ ਉਤ੍ਤਰੇਯ੍ਯ’’ਨ੍ਤਿ? ਅਥ ਖੋ, ਕਸ੍ਸਪ, ਕਕੁਧੇ ਅਧਿਵਤ੍ਥਾ ਦੇਵਤਾ ਜ ਮਮ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਸਾਖਂ ਓਨਾਮੇਸਿ – ‘‘ਇਧ, ਭਨ੍ਤੇ, ਭਗਵਾ ਆਲਮ੍ਬਿਤ੍ਵਾ ਉਤ੍ਤਰਤੂ’’ਤਿ. ਸ੍ਵਾਯਂ ਆਹਰਹਤ੍ਥੋ ਕਕੁਧੋ. ਤਸ੍ਸ ਮਯ੍ਹਂ, ਕਸ੍ਸਪ, ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਪਂਸੁਕੂਲਂ ਵਿਸ੍ਸਜ੍ਜੇਯ੍ਯ’’ਨ੍ਤਿ? ਅਥ ਖੋ, ਕਸ੍ਸਪ, ਸਕ੍ਕੋ ਦੇਵਾਨਮਿਨ੍ਦੋ ਮਮ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਮਹਤਿਂ ਸਿਲਂ ਉਪਨਿਕ੍ਖਿਪਿ – ‘‘ਇਧ, ਭਨ੍ਤੇ, ਭਗਵਾ ਪਂਸੁਕੂਲਂ ਵਿਸ੍ਸਜ੍ਜੇਤੂ’’ਤਿ. ਸਾਯਂ ਕਸ੍ਸਪ ਅਮਨੁਸ੍ਸੇਨ ਉਪਨਿਕ੍ਖਿਤ੍ਤਾ ਸਿਲਾਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਸਕ੍ਕੋਪਿ ਦੇਵਾਨਮਿਨ੍ਦੋ ਵੇਯ੍ਯਾਵਚ੍ਚਂ ਕਰਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਤੋ ਕਾਲਂ ਆਰੋਚੇਸਿ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ‘‘ਗਚ੍ਛ ਤ੍ਵਂ, ਕਸ੍ਸਪ, ਆਯਾਮਹ’’ਨ੍ਤਿ ਉਰੁਵੇਲਕਸ੍ਸਪਂ ਜਟਿਲਂ ਉਯ੍ਯੋਜੇਤ੍ਵਾ ਯਾਯ ਜਮ੍ਬੁਯਾ ‘ਜਮ੍ਬੁਦੀਪੋ’ ਪਞ੍ਞਾਯਤਿ, ਤਤੋ ਫਲਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸੀਦਿ. ਅਦ੍ਦਸਾ ਖੋ ਉਰੁਵੇਲਕਸ੍ਸਪੋ ਜਟਿਲੋ ਭਗਵਨ੍ਤਂ ਅਗ੍ਯਾਗਾਰੇ ਨਿਸਿਨ੍ਨਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ‘‘ਕਤਮੇਨ ਤ੍ਵਂ, ਮਹਾਸਮਣ, ਮਗ੍ਗੇਨ ਆਗਤੋ? ਅਹਂ ਤਯਾ ਪਠਮਤਰਂ ਪਕ੍ਕਨ੍ਤੋ, ਸੋ ਤ੍ਵਂ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸਿਨ੍ਨੋ’’ਤਿ. ‘‘ਇਧਾਹਂ, ਕਸ੍ਸਪ, ਤਂ ਉਯ੍ਯੋਜੇਤ੍ਵਾ ਯਾਯ ਜਮ੍ਬੁਯਾ ‘ਜਮ੍ਬੁਦੀਪੋ’ ਪਞ੍ਞਾਯਤਿ, ਤਤੋ ਫਲਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸਿਨ੍ਨੋ. ਇਦਂ ਖੋ, ਕਸ੍ਸਪ, ਜਮ੍ਬੁਫਲਂ ਵਣ੍ਣਸਮ੍ਪਨ੍ਨਂ ਗਨ੍ਧਸਮ੍ਪਨ੍ਨਂ ਰਸਸਮ੍ਪਨ੍ਨਂ. ਸਚੇ ਆਕਙ੍ਖਸਿ ਪਰਿਭੁਞ੍ਜਾ’’ਤਿ. ‘‘ਅਲਂ, ਮਹਾਸਮਣ, ਤ੍ਵਂਯੇਵ ਤਂ ਅਰਹਸਿ, ਤ੍ਵਂਯੇਵ ਤਂ [ਤ੍ਵਂਯੇਵੇਤਂ ਆਹਰਸਿ, ਤ੍ਵਂਯੇਵੇਤਂ (ਸੀ. ਸ੍ਯਾ.)] ਪਰਿਭੁਞ੍ਜਾਹੀ’’ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਮਂ ਪਠਮਤਰਂ ਉਯ੍ਯੋਜੇਤ੍ਵਾ ਯਾਯ ਜਮ੍ਬੁਯਾ ‘ਜਮ੍ਬੁਦੀਪੋ’ ਪਞ੍ਞਾਯਤਿ, ਤਤੋ ਫਲਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸੀਦਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

੪੫. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਤੋ ਕਾਲਂ ਆਰੋਚੇਸਿ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਗਚ੍ਛ ਤ੍ਵਂ, ਕਸ੍ਸਪ, ਆਯਾਮਹਨ੍ਤਿ ਉਰੁਵੇਲਕਸ੍ਸਪਂ ਜਟਿਲਂ ਉਯ੍ਯੋਜੇਤ੍ਵਾ ਯਾਯ ਜਮ੍ਬੁਯਾ ‘ਜਮ੍ਬੁਦੀਪੋ’ ਪਞ੍ਞਾਯਤਿ, ਤਸ੍ਸਾ ਅਵਿਦੂਰੇ ਅਮ੍ਬੋ…ਪੇ… ਤਸ੍ਸਾ ਅਵਿਦੂਰੇ ਆਮਲਕੀ…ਪੇ… ਤਸ੍ਸਾ ਅਵਿਦੂਰੇ ਹਰੀਤਕੀ…ਪੇ… ਤਾਵਤਿਂਸਂ ਗਨ੍ਤ੍ਵਾ ਪਾਰਿਚ੍ਛਤ੍ਤਕਪੁਪ੍ਫਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸੀਦਿ. ਅਦ੍ਦਸਾ ਖੋ ਉਰੁਵੇਲਕਸ੍ਸਪੋ ਜਟਿਲੋ ਭਗਵਨ੍ਤਂ ਅਗ੍ਯਾਗਾਰੇ ਨਿਸਿਨ੍ਨਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ‘‘ਕਤਮੇਨ ਤ੍ਵਂ, ਮਹਾਸਮਣ, ਮਗ੍ਗੇਨ ਆਗਤੋ? ਅਹਂ ਤਯਾ ਪਠਮਤਰਂ ਪਕ੍ਕਨ੍ਤੋ, ਸੋ ਤ੍ਵਂ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸਿਨ੍ਨੋ’’ਤਿ. ‘‘ਇਧਾਹਂ, ਕਸ੍ਸਪ, ਤਂ ਉਯ੍ਯੋਜੇਤ੍ਵਾ ਤਾਵਤਿਂਸਂ ਗਨ੍ਤ੍ਵਾ ਪਾਰਿਚ੍ਛਤ੍ਤਕਪੁਪ੍ਫਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸਿਨ੍ਨੋ. ਇਦਂ ਖੋ, ਕਸ੍ਸਪ, ਪਾਰਿਚ੍ਛਤ੍ਤਕਪੁਪ੍ਫਂ ਵਣ੍ਣਸਮ੍ਪਨ੍ਨਂ ਗਨ੍ਧਸਮ੍ਪਨ੍ਨਂ [ਸੁਗਨ੍ਧਿਕਂ (ਕ.)]. (ਸਚੇ ਆਕਙ੍ਖਸਿ ਗਣ੍ਹਾ’’ਤਿ. ‘‘ਅਲਂ, ਮਹਾਸਮਣ, ਤ੍ਵਂਯੇਵ ਤਂ ਅਰਹਸਿ, ਤ੍ਵਂਯੇਵ ਤਂ ਗਣ੍ਹਾ’’ਤਿ) [( ) ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ]. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਮਂ ਪਠਮਤਰਂ ਉਯ੍ਯੋਜੇਤ੍ਵਾ ਤਾਵਤਿਂਸਂ ਗਨ੍ਤ੍ਵਾ ਪਾਰਿਚ੍ਛਤ੍ਤਕਪੁਪ੍ਫਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸੀਦਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

੪੬. ਤੇਨ ਖੋ ਪਨ ਸਮਯੇਨ ਤੇ ਜਟਿਲਾ ਅਗ੍ਗਿਂ ਪਰਿਚਰਿਤੁਕਾਮਾ ਨ ਸਕ੍ਕੋਨ੍ਤਿ ਕਟ੍ਠਾਨਿ ਫਾਲੇਤੁਂ. ਅਥ ਖੋ ਤੇਸਂ ਜਟਿਲਾਨਂ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਮਹਾਸਮਣਸ੍ਸ ਇਦ੍ਧਾਨੁਭਾਵੋ, ਯਥਾ ਮਯਂ ਨ ਸਕ੍ਕੋਮ ਕਟ੍ਠਾਨਿ ਫਾਲੇਤੁ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਫਾਲਿਯਨ੍ਤੁ, ਕਸ੍ਸਪ, ਕਟ੍ਠਾਨੀ’’ਤਿ. ‘‘ਫਾਲਿਯਨ੍ਤੁ, ਮਹਾਸਮਣਾ’’ਤਿ. ਸਕਿਦੇਵ ਪਞ੍ਚ ਕਟ੍ਠਸਤਾਨਿ ਫਾਲਿਯਿਂਸੁ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਕਟ੍ਠਾਨਿਪਿ ਫਾਲਿਯਿਸ੍ਸਨ੍ਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

੪੭. ਤੇਨ ਖੋ ਪਨ ਸਮਯੇਨ ਤੇ ਜਟਿਲਾ ਅਗ੍ਗਿਂ ਪਰਿਚਰਿਤੁਕਾਮਾ ਨ ਸਕ੍ਕੋਨ੍ਤਿ ਅਗ੍ਗਿਂ ਉਜ੍ਜਲੇਤੁਂ [ਜਾਲੇਤੁਂ (ਸੀ.), ਉਜ੍ਜਲਿਤੁਂ (ਕ.)]. ਅਥ ਖੋ ਤੇਸਂ ਜਟਿਲਾਨਂ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਮਹਾਸਮਣਸ੍ਸ ਇਦ੍ਧਾਨੁਭਾਵੋ, ਯਥਾ ਮਯਂ ਨ ਸਕ੍ਕੋਮ ਅਗ੍ਗਿਂ ਉਜ੍ਜਲੇਤੁ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਉਜ੍ਜਲਿਯਨ੍ਤੁ, ਕਸ੍ਸਪ, ਅਗ੍ਗੀ’’ਤਿ. ‘‘ਉਜ੍ਜਲਿਯਨ੍ਤੁ, ਮਹਾਸਮਣਾ’’ਤਿ. ਸਕਿਦੇਵ ਪਞ੍ਚ ਅਗ੍ਗਿਸਤਾਨਿ ਉਜ੍ਜਲਿਯਿਂਸੁ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਅਗ੍ਗੀਪਿ ਉਜ੍ਜਲਿਯਿਸ੍ਸਨ੍ਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

੪੮. ਤੇਨ ਖੋ ਪਨ ਸਮਯੇਨ ਤੇ ਜਟਿਲਾ ਅਗ੍ਗਿਂ ਪਰਿਚਰਿਤ੍ਵਾ ਨ ਸਕ੍ਕੋਨ੍ਤਿ ਅਗ੍ਗਿਂ ਵਿਜ੍ਝਾਪੇਤੁਂ. ਅਥ ਖੋ ਤੇਸਂ ਜਟਿਲਾਨਂ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਮਹਾਸਮਣਸ੍ਸ ਇਦ੍ਧਾਨੁਭਾਵੋ, ਯਥਾ ਮਯਂ ਨ ਸਕ੍ਕੋਮ ਅਗ੍ਗਿਂ ਵਿਜ੍ਝਾਪੇਤੁ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਵਿਜ੍ਝਾਯਨ੍ਤੁ, ਕਸ੍ਸਪ, ਅਗ੍ਗੀ’’ਤਿ. ‘‘ਵਿਜ੍ਝਾਯਨ੍ਤੁ, ਮਹਾਸਮਣਾ’’ਤਿ. ਸਕਿਦੇਵ ਪਞ੍ਚ ਅਗ੍ਗਿਸਤਾਨਿ ਵਿਜ੍ਝਾਯਿਂਸੁ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਅਗ੍ਗੀਪਿ ਵਿਜ੍ਝਾਯਿਸ੍ਸਨ੍ਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

੪੯. ਤੇਨ ਖੋ ਪਨ ਸਮਯੇਨ ਤੇ ਜਟਿਲਾ ਸੀਤਾਸੁ ਹੇਮਨ੍ਤਿਕਾਸੁ ਰਤ੍ਤੀਸੁ ਅਨ੍ਤਰਟ੍ਠਕਾਸੁ ਹਿਮਪਾਤਸਮਯੇ ਨਜ੍ਜਾ ਨੇਰਞ੍ਜਰਾਯ ਉਮ੍ਮੁਜ੍ਜਨ੍ਤਿਪਿ, ਨਿਮੁਜ੍ਜਨ੍ਤਿਪਿ, ਉਮ੍ਮੁਜ੍ਜਨਨਿਮੁਜ੍ਜਨਮ੍ਪਿ ਕਰੋਨ੍ਤਿ. ਅਥ ਖੋ ਭਗਵਾ ਪਞ੍ਚਮਤ੍ਤਾਨਿ ਮਨ੍ਦਾਮੁਖਿਸਤਾਨਿ ਅਭਿਨਿਮ੍ਮਿਨਿ, ਯਤ੍ਥ ਤੇ ਜਟਿਲਾ ਉਤ੍ਤਰਿਤ੍ਵਾ ਵਿਸਿਬ੍ਬੇਸੁਂ. ਅਥ ਖੋ ਤੇਸਂ ਜਟਿਲਾਨਂ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਮਹਾਸਮਣਸ੍ਸ ਇਦ੍ਧਾਨੁਭਾਵੋ, ਯਥਯਿਮਾ ਮਨ੍ਦਾਮੁਖਿਯੋ ਨਿਮ੍ਮਿਤਾ’’ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਤਾਵ ਬਹੂ ਮਨ੍ਦਾਮੁਖਿਯੋਪਿ ਅਭਿਨਿਮ੍ਮਿਨਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

੫੦. ਤੇਨ ਖੋ ਪਨ ਸਮਯੇਨ ਮਹਾ ਅਕਾਲਮੇਘੋ ਪਾਵਸ੍ਸਿ, ਮਹਾ ਉਦਕਵਾਹਕੋ ਸਞ੍ਜਾਯਿ. ਯਸ੍ਮਿਂ ਪਦੇਸੇ ਭਗਵਾ ਵਿਹਰਤਿ, ਸੋ ਪਦੇਸੋ ਉਦਕੇਨ ਨ ਓਤ੍ਥਟੋ [ਉਦਕੇਨ ਓਤ੍ਥਟੋ (ਸੀ. ਸ੍ਯਾ.)] ਹੋਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਯਂਨੂਨਾਹਂ ਸਮਨ੍ਤਾ ਉਦਕਂ ਉਸ੍ਸਾਰੇਤ੍ਵਾ ਮਜ੍ਝੇ ਰੇਣੁਹਤਾਯ ਭੂਮਿਯਾ ਚਙ੍ਕਮੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਸਮਨ੍ਤਾ ਉਦਕਂ ਉਸ੍ਸਾਰੇਤ੍ਵਾ ਮਜ੍ਝੇ ਰੇਣੁਹਤਾਯ ਭੂਮਿਯਾ ਚਙ੍ਕਮਿ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ – ਮਾਹੇਵ ਖੋ ਮਹਾਸਮਣੋ ਉਦਕੇਨ ਵੂਲ਼੍ਹੋ ਅਹੋਸੀਤਿ ਨਾਵਾਯ ਸਮ੍ਬਹੁਲੇਹਿ ਜਟਿਲੇਹਿ ਸਦ੍ਧਿਂ ਯਸ੍ਮਿਂ ਪਦੇਸੇ ਭਗਵਾ ਵਿਹਰਤਿ ਤਂ ਪਦੇਸਂ ਅਗਮਾਸਿ. ਅਦ੍ਦਸਾ ਖੋ ਉਰੁਵੇਲਕਸ੍ਸਪੋ ਜਟਿਲੋ ਭਗਵਨ੍ਤਂ ਸਮਨ੍ਤਾ ਉਦਕਂ ਉਸ੍ਸਾਰੇਤ੍ਵਾ ਮਜ੍ਝੇ ਰੇਣੁਹਤਾਯ ਭੂਮਿਯਾ ਚਙ੍ਕਮਨ੍ਤਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ‘‘ਇਦਂ ਨੁ ਤ੍ਵਂ, ਮਹਾਸਮਣਾ’’ਤਿ? ‘‘ਅਯਮਹਮਸ੍ਮਿ [ਆਮ ਅਹਮਸ੍ਮਿ (ਸ੍ਯਾ.)], ਕਸ੍ਸਪਾ’’ਤਿ ਭਗਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਨਾਵਾਯ ਪਚ੍ਚੁਟ੍ਠਾਸਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਉਦਕਮ੍ਪਿ ਨ ਪਵਾਹਿਸ੍ਸਤਿ [ਨਪ੍ਪਸਹਿਸ੍ਸਤਿ (ਸੀ.)], ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

੫੧. ਅਥ ਖੋ ਭਗਵਤੋ ਏਤਦਹੋਸਿ – ‘‘ਚਿਰਮ੍ਪਿ ਖੋ ਇਮਸ੍ਸ ਮੋਘਪੁਰਿਸਸ੍ਸ ਏਵਂ ਭਵਿਸ੍ਸਤਿ – ‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’ਨ੍ਤਿ; ਯਂਨੂਨਾਹਂ ਇਮਂ ਜਟਿਲਂ ਸਂਵੇਜੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਨੇਵ ਚ ਖੋ ਤ੍ਵਂ, ਕਸ੍ਸਪ, ਅਰਹਾ, ਨਾਪਿ ਅਰਹਤ੍ਤਮਗ੍ਗਸਮਾਪਨ੍ਨੋ. ਸਾਪਿ ਤੇ ਪਟਿਪਦਾ ਨਤ੍ਥਿ, ਯਾਯ ਤ੍ਵਂ ਅਰਹਾ ਵਾ ਅਸ੍ਸਸਿ, ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨੋ’’ਤਿ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਲਭੇਯ੍ਯਾਹਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਂ ਉਪਸਮ੍ਪਦ’’ਨ੍ਤਿ. ਤ੍ਵਂ ਖੋਸਿ, ਕਸ੍ਸਪ, ਪਞ੍ਚਨ੍ਨਂ ਜਟਿਲਸਤਾਨਂ ਨਾਯਕੋ ਵਿਨਾਯਕੋ ਅਗ੍ਗੋ ਪਮੁਖੋ ਪਾਮੋਕ੍ਖੋ. ਤੇਪਿ ਤਾਵ ਅਪਲੋਕੇਹਿ, ਯਥਾ ਤੇ ਮਞ੍ਞਿਸ੍ਸਨ੍ਤਿ ਤਥਾ ਤੇ ਕਰਿਸ੍ਸਨ੍ਤੀਤਿ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਯੇਨ ਤੇ ਜਟਿਲਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤੇ ਜਟਿਲੇ ਏਤਦਵੋਚ – ‘‘ਇਚ੍ਛਾਮਹਂ, ਭੋ, ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਿਤੁਂ, ਯਥਾ ਭਵਨ੍ਤੋ ਮਞ੍ਞਨ੍ਤਿ ਤਥਾ ਕਰੋਨ੍ਤੂ’’ਤਿ. ‘‘ਚਿਰਪਟਿਕਾ ਮਯਂ, ਭੋ, ਮਹਾਸਮਣੇ ਅਭਿਪ੍ਪਸਨ੍ਨਾ, ਸਚੇ ਭਵਂ, ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਿਸ੍ਸਤਿ, ਸਬ੍ਬੇਵ ਮਯਂ ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਿਸ੍ਸਾਮਾ’’ਤਿ. ਅਥ ਖੋ ਤੇ ਜਟਿਲਾ ਕੇਸਮਿਸ੍ਸਂ ਜਟਾਮਿਸ੍ਸਂ ਖਾਰਿਕਾਜਮਿਸ੍ਸਂ ਅਗ੍ਗਿਹੁਤਮਿਸ੍ਸਂ ਉਦਕੇ ਪਵਾਹੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

੫੨. ਅਦ੍ਦਸਾ ਖੋ ਨਦੀਕਸ੍ਸਪੋ ਜਟਿਲੋ ਕੇਸਮਿਸ੍ਸਂ ਜਟਾਮਿਸ੍ਸਂ ਖਾਰਿਕਾਜਮਿਸ੍ਸਂ ਅਗ੍ਗਿਹੁਤਮਿਸ੍ਸਂ ਉਦਕੇ ਵੁਯ੍ਹਮਾਨੇ, ਦਿਸ੍ਵਾਨਸ੍ਸ ਏਤਦਹੋਸਿ – ‘‘ਮਾਹੇਵ ਮੇ ਭਾਤੁਨੋ ਉਪਸਗ੍ਗੋ ਅਹੋਸੀ’’ਤਿ. ਜਟਿਲੇ ਪਾਹੇਸਿ – ਗਚ੍ਛਥ ਮੇ ਭਾਤਰਂ ਜਾਨਾਥਾਤਿ. ਸਾਮਞ੍ਚ ਤੀਹਿ ਜਟਿਲਸਤੇਹਿ ਸਦ੍ਧਿਂ ਯੇਨਾਯਸ੍ਮਾ ਉਰੁਵੇਲਕਸ੍ਸਪੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਰੁਵੇਲਕਸ੍ਸਪਂ ਏਤਦਵੋਚ – ‘‘ਇਦਂ ਨੁ ਖੋ, ਕਸ੍ਸਪ, ਸੇਯ੍ਯੋ’’ਤਿ? ‘‘ਆਮਾਵੁਸੋ, ਇਦਂ ਸੇਯ੍ਯੋ’’ਤਿ. ਅਥ ਖੋ ਤੇ ਜਟਿਲਾ ਕੇਸਮਿਸ੍ਸਂ ਜਟਾਮਿਸ੍ਸਂ ਖਾਰਿਕਾਜਮਿਸ੍ਸਂ ਅਗ੍ਗਿਹੁਤਮਿਸ੍ਸਂ ਉਦਕੇ ਪਵਾਹੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

੫੩. ਅਦ੍ਦਸਾ ਖੋ ਗਯਾਕਸ੍ਸਪੋ ਜਟਿਲੋ ਕੇਸਮਿਸ੍ਸਂ ਜਟਾਮਿਸ੍ਸਂ ਖਾਰਿਕਾਜਮਿਸ੍ਸਂ ਅਗ੍ਗਿਹੁਤਮਿਸ੍ਸਂ ਉਦਕੇ ਵੁਯ੍ਹਮਾਨੇ, ਦਿਸ੍ਵਾਨਸ੍ਸ ਏਤਦਹੋਸਿ – ‘‘ਮਾਹੇਵ ਮੇ ਭਾਤੂਨਂ ਉਪਸਗ੍ਗੋ ਅਹੋਸੀ’’ਤਿ. ਜਟਿਲੇ ਪਾਹੇਸਿ – ਗਚ੍ਛਥ ਮੇ ਭਾਤਰੋ ਜਾਨਾਥਾਤਿ. ਸਾਮਞ੍ਚ ਦ੍ਵੀਹਿ ਜਟਿਲਸਤੇਹਿ ਸਦ੍ਧਿਂ ਯੇਨਾਯਸ੍ਮਾ ਉਰੁਵੇਲਕਸ੍ਸਪੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਰੁਵੇਲਕਸ੍ਸਪਂ ਏਤਦਵੋਚ – ‘‘ਇਦਂ ਨੁ ਖੋ, ਕਸ੍ਸਪ, ਸੇਯ੍ਯੋ’’ਤਿ? ‘‘ਆਮਾਵੁਸੋ, ਇਦਂ ਸੇਯ੍ਯੋ’’ਤਿ. ਅਥ ਖੋ ਤੇ ਜਟਿਲਾ ਕੇਸਮਿਸ੍ਸਂ ਜਟਾਮਿਸ੍ਸਂ ਖਾਰਿਕਾਜਮਿਸ੍ਸਂ ਅਗ੍ਗਿਹੁਤਮਿਸ੍ਸਂ ਉਦਕੇ ਪਵਾਹੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

ਭਗਵਤੋ ਅਧਿਟ੍ਠਾਨੇਨ ਪਞ੍ਚ ਕਟ੍ਠਸਤਾਨਿ ਨ ਫਾਲਿਯਿਂਸੁ, ਫਾਲਿਯਿਂਸੁ; ਅਗ੍ਗੀ ਨ ਉਜ੍ਜਲਿਯਿਂਸੁ, ਉਜ੍ਜਲਿਯਿਂਸੁ; ਨ ਵਿਜ੍ਝਾਯਿਂਸੁ, ਵਿਜ੍ਝਾਯਿਂਸੁ; ਪਞ੍ਚਮਨ੍ਦਾਮੁਖਿਸਤਾਨਿ ਅਭਿਨਿਮ੍ਮਿਨਿ. ਏਤੇਨ ਨਯੇਨ ਅਡ੍ਢੁਡ੍ਢਪਾਟਿਹਾਰਿਯਸਹਸ੍ਸਾਨਿ ਹੋਨ੍ਤਿ.

੫੪. ਅਥ ਖੋ ਭਗਵਾ ਉਰੁਵੇਲਾਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਗਯਾਸੀਸਂ ਤੇਨ ਪਕ੍ਕਾਮਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਭਿਕ੍ਖੁਸਹਸ੍ਸੇਨ ਸਬ੍ਬੇਹੇਵ ਪੁਰਾਣਜਟਿਲੇਹਿ. ਤਤ੍ਰ ਸੁਦਂ ਭਗਵਾ ਗਯਾਯਂ ਵਿਹਰਤਿ ਗਯਾਸੀਸੇ ਸਦ੍ਧਿਂ ਭਿਕ੍ਖੁਸਹਸ੍ਸੇਨ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ –

[ਸਂ. ਨਿ. ੪.੨੯] ‘‘ਸਬ੍ਬਂ, ਭਿਕ੍ਖਵੇ, ਆਦਿਤ੍ਤਂ. ਕਿਞ੍ਚ, ਭਿਕ੍ਖਵੇ, ਸਬ੍ਬਂ ਆਦਿਤ੍ਤਂ? ਚਕ੍ਖੁ ਆਦਿਤ੍ਤਂ, ਰੂਪਾ ਆਦਿਤ੍ਤਾ, ਚਕ੍ਖੁਵਿਞ੍ਞਾਣਂ ਆਦਿਤ੍ਤਂ, ਚਕ੍ਖੁਸਮ੍ਫਸ੍ਸੋ ਆਦਿਤ੍ਤੋ, ਯਮਿਦਂ ਚਕ੍ਖੁਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਆਦਿਤ੍ਤਂ. ਕੇਨ ਆਦਿਤ੍ਤਂ? ਰਾਗਗ੍ਗਿਨਾ ਦੋਸਗ੍ਗਿਨਾ ਮੋਹਗ੍ਗਿਨਾ ਆਦਿਤ੍ਤਂ, ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਆਦਿਤ੍ਤਨ੍ਤਿ ਵਦਾਮਿ. ਸੋਤਂ ਆਦਿਤ੍ਤਂ, ਸਦ੍ਦਾ ਆਦਿਤ੍ਤਾ, ਸੋਤਵਿਞ੍ਞਾਣਂ ਆਦਿਤ੍ਤਂ, ਸੋਤਸਮ੍ਫਸ੍ਸੋ ਆਦਿਤ੍ਤੋ, ਯਮਿਦਂ ਸੋਤਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਆਦਿਤ੍ਤਂ. ਕੇਨ ਆਦਿਤ੍ਤਂ? ਰਾਗਗ੍ਗਿਨਾ ਦੋਸਗ੍ਗਿਨਾ ਮੋਹਗ੍ਗਿਨਾ ਆਦਿਤ੍ਤਂ, ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਆਦਿਤ੍ਤਨ੍ਤਿ ਵਦਾਮਿ. ਘਾਨਂ ਆਦਿਤ੍ਤਂ, ਗਨ੍ਧਾ ਆਦਿਤ੍ਤਾ, ਘਾਨਵਿਞ੍ਞਾਣਂ ਆਦਿਤ੍ਤਂ, ਘਾਨਸਮ੍ਫਸ੍ਸੋ ਆਦਿਤ੍ਤੋ, ਯਮਿਦਂ ਘਾਨਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਆਦਿਤ੍ਤਂ. ਕੇਨ ਆਦਿਤ੍ਤਂ? ਰਾਗਗ੍ਗਿਨਾ ਦੋਸਗ੍ਗਿਨਾ ਮੋਹਗ੍ਗਿਨਾ ਆਦਿਤ੍ਤਂ, ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਆਦਿਤ੍ਤਨ੍ਤਿ ਵਦਾਮਿ. ਜਿਵ੍ਹਾ ਆਦਿਤ੍ਤਾ, ਰਸਾ ਆਦਿਤ੍ਤਾ, ਜਿਵ੍ਹਾਵਿਞ੍ਞਾਣਂ ਆਦਿਤ੍ਤਂ ਜਿਵ੍ਹਾਸਮ੍ਫਸ੍ਸੋ ਆਦਿਤ੍ਤੋ, ਯਮਿਦਂ ਜਿਵ੍ਹਾਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਆਦਿਤ੍ਤਂ. ਕੇਨ ਆਦਿਤ੍ਤਂ? ਰਾਗਗ੍ਗਿਨਾ ਦੋਸਗ੍ਗਿਨਾ ਮੋਹਗ੍ਗਿਨਾ ਆਦਿਤ੍ਤਂ, ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਆਦਿਤ੍ਤਨ੍ਤਿ ਵਦਾਮਿ. ਕਾਯੋ ਆਦਿਤ੍ਤੋ, ਫੋਟ੍ਠਬ੍ਬਾ ਆਦਿਤ੍ਤਾ, ਕਾਯਵਿਞ੍ਞਾਣਂ ਆਦਿਤ੍ਤਂ ਕਾਯਸਮ੍ਫਸ੍ਸੋ ਆਦਿਤ੍ਤੋ, ਯਮਿਦਂ ਕਾਯਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਆਦਿਤ੍ਤਂ. ਕੇਨ ਆਦਿਤ੍ਤਂ? ਰਾਗਗ੍ਗਿਨਾ ਦੋਸਗ੍ਗਿਨਾ ਮੋਹਗ੍ਗਿਨਾ ਆਦਿਤ੍ਤਂ, ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਆਦਿਤ੍ਤਨ੍ਤਿ ਵਦਾਮਿ. ਮਨੋ ਆਦਿਤ੍ਤੋ, ਧਮ੍ਮਾ ਆਦਿਤ੍ਤਾ, ਮਨੋਵਿਞ੍ਞਾਣਂ ਆਦਿਤ੍ਤਂ ਮਨੋਸਮ੍ਫਸ੍ਸੋ ਆਦਿਤ੍ਤੋ, ਯਮਿਦਂ ਮਨੋਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਆਦਿਤ੍ਤਂ. ਕੇਨ ਆਦਿਤ੍ਤਂ? ਰਾਗਗ੍ਗਿਨਾ ਦੋਸਗ੍ਗਿਨਾ ਮੋਹਗ੍ਗਿਨਾ ਆਦਿਤ੍ਤਂ, ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਆਦਿਤ੍ਤਨ੍ਤਿ ਵਦਾਮਿ.

‘‘ਏਵਂ ਪਸ੍ਸਂ, ਭਿਕ੍ਖਵੇ, ਸੁਤਵਾ ਅਰਿਯਸਾਵਕੋ ਚਕ੍ਖੁਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਰੂਪੇਸੁਪਿ ਨਿਬ੍ਬਿਨ੍ਦਤਿ, ਚਕ੍ਖੁਵਿਞ੍ਞਾਣੇਪਿ ਨਿਬ੍ਬਿਨ੍ਦਤਿ, ਚਕ੍ਖੁਸਮ੍ਫਸ੍ਸੇਪਿ ਨਿਬ੍ਬਿਨ੍ਦਤਿ, ਯਮਿਦਂ ਚਕ੍ਖੁਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ, ਤਸ੍ਮਿਮ੍ਪਿ ਨਿਬ੍ਬਿਨ੍ਦਤਿ. ਸੋਤਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਸਦ੍ਦੇਸੁਪਿ ਨਿਬ੍ਬਿਨ੍ਦਤਿ…ਪੇ… ਘਾਨਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਗਨ੍ਧੇਸੁਪਿ ਨਿਬ੍ਬਿਨ੍ਦਤਿ…ਪੇ… ਜਿਵ੍ਹਾਯਪਿ ਨਿਬ੍ਬਿਨ੍ਦਤਿ, ਰਸੇਸੁਪਿ ਨਿਬ੍ਬਿਨ੍ਦਤਿ…ਪੇ… ਕਾਯਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਫੋਟ੍ਠਬ੍ਬੇਸੁਪਿ ਨਿਬ੍ਬਿਨ੍ਦਤਿ…ਪੇ… ਮਨਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਧਮ੍ਮੇਸੁਪਿ ਨਿਬ੍ਬਿਨ੍ਦਤਿ, ਮਨੋਵਿਞ੍ਞਾਣੇਪਿ ਨਿਬ੍ਬਿਨ੍ਦਤਿ, ਮਨੋਸਮ੍ਫਸ੍ਸੇਪਿ ਨਿਬ੍ਬਿਨ੍ਦਤਿ, ਯਮਿਦਂ ਮਨੋਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਨਿਬ੍ਬਿਨ੍ਦਂ ਵਿਰਜ੍ਜਤਿ, ਵਿਰਾਗਾ ਵਿਮੁਚ੍ਚਤਿ, ਵਿਮੁਤ੍ਤਸ੍ਮਿਂ ਵਿਮੁਤ੍ਤਮਿਤਿ ਞਾਣਂ ਹੋਤਿ. ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

ਇਮਸ੍ਮਿਞ੍ਚ ਪਨ ਵੇਯ੍ਯਾਕਰਣਸ੍ਮਿਂ ਭਞ੍ਞਮਾਨੇ ਤਸ੍ਸ ਭਿਕ੍ਖੁਸਹਸ੍ਸਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਾਨਿ ਵਿਮੁਚ੍ਚਿਂਸੁ.

ਆਦਿਤ੍ਤਪਰਿਯਾਯਸੁਤ੍ਤਂ ਨਿਟ੍ਠਿਤਂ.

ਉਰੁਵੇਲਪਾਟਿਹਾਰਿਯਂ ਤਤਿਯਭਾਣਵਾਰੋ ਨਿਟ੍ਠਿਤੋ.

੧੩. ਬਿਮ੍ਬਿਸਾਰਸਮਾਗਮਕਥਾ

੫੫. ਅਥ ਖੋ ਭਗਵਾ ਗਯਾਸੀਸੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਰਾਜਗਹਂ ਤੇਨ ਚਾਰਿਕਂ ਪਕ੍ਕਾਮਿ, ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਭਿਕ੍ਖੁਸਹਸ੍ਸੇਨ ਸਬ੍ਬੇਹੇਵ ਪੁਰਾਣਜਟਿਲੇਹਿ. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਰਾਜਗਹਂ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਰਾਜਗਹੇ ਵਿਹਰਤਿ ਲਟ੍ਠਿਵਨੇ [ਲਟ੍ਠਿਵਨੁਯ੍ਯਾਨੇ (ਸ੍ਯਾ.)] ਸੁਪ੍ਪਤਿਟ੍ਠੇ ਚੇਤਿਯੇ. ਅਸ੍ਸੋਸਿ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ – ਸਮਣੋ ਖਲੁ ਭੋ ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਰਾਜਗਹਂ ਅਨੁਪ੍ਪਤ੍ਤੋ ਰਾਜਗਹੇ ਵਿਹਰਤਿ ਲਟ੍ਠਿਵਨੇ ਸੁਪ੍ਪਤਿਟ੍ਠੇ ਚੇਤਿਯੇ. ਤਂ ਖੋ ਪਨ ਭਗਵਨ੍ਤਂ [ਭਵਨ੍ਤਂ (ਕ.)] ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ [ਭਗਵਾਤਿ (ਕ.)]. ਸੋ ਇਮਂ ਲੋਕਂ ਸਦੇਵਕਂ ਸਮਾਰਕਂ ਸਬ੍ਰਹ੍ਮਕਂ ਸਸ੍ਸਮਣਬ੍ਰਾਹ੍ਮਣਿਂ ਪਜਂ ਸਦੇਵਮਨੁਸ੍ਸਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਤਿ. ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਤਿ. ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀਤਿ.

ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਦ੍ਵਾਦਸਨਹੁਤੇਹਿ [ਦ੍ਵਾਦਸਨਿਯੁਤੇਹਿ (ਯੋਜਨਾ)] ਮਾਗਧਿਕੇਹਿ ਬ੍ਰਾਹ੍ਮਣਗਹਪਤਿਕੇਹਿ ਪਰਿਵੁਤੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਤੇਪਿ ਖੋ ਦ੍ਵਾਦਸਨਹੁਤਾ ਮਾਗਧਿਕਾ ਬ੍ਰਾਹ੍ਮਣਗਹਪਤਿਕਾ ਅਪ੍ਪੇਕਚ੍ਚੇ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ, ਅਪ੍ਪੇਕਚ੍ਚੇ ਭਗਵਤਾ ਸਦ੍ਧਿਂ ਸਮ੍ਮੋਦਿਂਸੁ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ, ਅਪ੍ਪੇਕਚ੍ਚੇ ਯੇਨ ਭਗਵਾ ਤੇਨਞ੍ਜਲਿਂ ਪਣਾਮੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ, ਅਪ੍ਪੇਕਚ੍ਚੇ ਭਗਵਤੋ ਸਨ੍ਤਿਕੇ ਨਾਮਗੋਤ੍ਤਂ ਸਾਵੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ, ਅਪ੍ਪੇਕਚ੍ਚੇ ਤੁਣ੍ਹੀਭੂਤਾ ਏਕਮਨ੍ਤਂ ਨਿਸੀਦਿਂਸੁ. ਅਥ ਖੋ ਤੇਸਂ ਦ੍ਵਾਦਸਨਹੁਤਾਨਂ [ਦ੍ਵਾਦਸਨਿਯੁਤਾਨਂ (ਯੋਜਨਾ)] ਮਾਗਧਿਕਾਨਂ ਬ੍ਰਾਹ੍ਮਣਗਹਪਤਿਕਾਨਂ ਏਤਦਹੋਸਿ – ‘‘ਕਿਂ ਨੁ ਖੋ ਮਹਾਸਮਣੋ ਉਰੁਵੇਲਕਸ੍ਸਪੇ ਬ੍ਰਹ੍ਮਚਰਿਯਂ ਚਰਤਿ, ਉਦਾਹੁ ਉਰੁਵੇਲਕਸ੍ਸਪੋ ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਤੀ’’ਤਿ? ਅਥ ਖੋ ਭਗਵਾ ਤੇਸਂ ਦ੍ਵਾਦਸਨਹੁਤਾਨਂ ਮਾਗਧਿਕਾਨਂ ਬ੍ਰਾਹ੍ਮਣਗਹਪਤਿਕਾਨਂ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਆਯਸ੍ਮਨ੍ਤਂ ਉਰੁਵੇਲਕਸ੍ਸਪਂ ਗਾਥਾਯ ਅਜ੍ਝਭਾਸਿ –

‘‘ਕਿਮੇਵ ਦਿਸ੍ਵਾ ਉਰੁਵੇਲਵਾਸਿ, ਪਹਾਸਿ ਅਗ੍ਗਿਂ ਕਿਸਕੋਵਦਾਨੋ;

ਪੁਚ੍ਛਾਮਿ ਤਂ ਕਸ੍ਸਪ, ਏਤਮਤ੍ਥਂ ਕਥਂ ਪਹੀਨਂ ਤਵ ਅਗ੍ਗਿਹੁਤ੍ਤਨ੍ਤਿ.

‘‘ਰੂਪੇ ਚ ਸਦ੍ਦੇ ਚ ਅਥੋ ਰਸੇ ਚ;

ਕਾਮਿਤ੍ਥਿਯੋ ਚਾਭਿਵਦਨ੍ਤਿ ਯਞ੍ਞਾ;

ਏਤਂ ਮਲਨ੍ਤਿ ਉਪਧੀਸੁ ਞਤ੍ਵਾ;

ਤਸ੍ਮਾ ਨ ਯਿਟ੍ਠੇ ਨ ਹੁਤੇ ਅਰਞ੍ਜਿਨ੍ਤਿ.

‘‘ਏਤ੍ਥੇਵ ਤੇ ਮਨੋ ਨ ਰਮਿਤ੍ਥ (ਕਸ੍ਸਪਾਤਿ ਭਗਵਾ);

ਰੂਪੇਸੁ ਸਦ੍ਦੇਸੁ ਅਥੋ ਰਸੇਸੁ;

ਅਥ ਕੋ ਚਰਹਿ ਦੇਵਮਨੁਸ੍ਸਲੋਕੇ;

ਰਤੋ ਮਨੋ ਕਸ੍ਸਪ, ਬ੍ਰੂਹਿ ਮੇਤਨ੍ਤਿ.

‘‘ਦਿਸ੍ਵਾ ਪਦਂ ਸਨ੍ਤਮਨੂਪਧੀਕਂ;

ਅਕਿਞ੍ਚਨਂ ਕਾਮਭਵੇ ਅਸਤ੍ਤਂ;

ਅਨਞ੍ਞਥਾਭਾਵਿਮਨਞ੍ਞਨੇਯ੍ਯਂ;

ਤਸ੍ਮਾ ਨ ਯਿਟ੍ਠੇ ਨ ਹੁਤੇ ਅਰਞ੍ਜਿ’’ਨ੍ਤਿ.

੫੬. ਅਥ ਖੋ ਆਯਸ੍ਮਾ ਉਰੁਵੇਲਕਸ੍ਸਪੋ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਸਤ੍ਥਾ ਮੇ, ਭਨ੍ਤੇ, ਭਗਵਾ, ਸਾਵਕੋਹਮਸ੍ਮਿ; ਸਤ੍ਥਾ ਮੇ, ਭਨ੍ਤੇ, ਭਗਵਾ, ਸਾਵਕੋਹਮਸ੍ਮੀ’’ਤਿ. ਅਥ ਖੋ ਤੇਸਂ ਦ੍ਵਾਦਸਨਹੁਤਾਨਂ ਮਾਗਧਿਕਾਨਂ ਬ੍ਰਾਹ੍ਮਣਗਹਪਤਿਕਾਨਂ ਏਤਦਹੋਸਿ – ‘‘ਉਰੁਵੇਲਕਸ੍ਸਪੋ ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਤੀ’’ਤਿ. ਅਥ ਖੋ ਭਗਵਾ ਤੇਸਂ ਦ੍ਵਾਦਸਨਹੁਤਾਨਂ ਮਾਗਧਿਕਾਨਂ ਬ੍ਰਾਹ੍ਮਣਗਹਪਤਿਕਾਨਂ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ ਸੀਲਕਥਂ ਸਗ੍ਗਕਥਂ ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਯਦਾ ਤੇ ਭਗਵਾ ਅਞ੍ਞਾਸਿ ਕਲ੍ਲਚਿਤ੍ਤੇ ਮੁਦੁਚਿਤ੍ਤੇ ਵਿਨੀਵਰਣਚਿਤ੍ਤੇ ਉਦਗ੍ਗਚਿਤ੍ਤੇ ਪਸਨ੍ਨਚਿਤ੍ਤੇ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ, ਤਂ ਪਕਾਸੇਸਿ – ਦੁਕ੍ਖਂ, ਸਮੁਦਯਂ, ਨਿਰੋਧਂ, ਮਗ੍ਗਂ. ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵ ਏਕਾਦਸਨਹੁਤਾਨਂ ਮਾਗਧਿਕਾਨਂ ਬ੍ਰਾਹ੍ਮਣਗਹਪਤਿਕਾਨਂ ਬਿਮ੍ਬਿਸਾਰਪ੍ਪਮੁਖਾਨਂ ਤਸ੍ਮਿਂ ਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ. ਏਕਨਹੁਤਂ ਉਪਾਸਕਤ੍ਤਂ ਪਟਿਵੇਦੇਸਿ.

੫੭. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਦਿਟ੍ਠਧਮ੍ਮੋ ਪਤ੍ਤਧਮ੍ਮੋ ਵਿਦਿਤਧਮ੍ਮੋ ਪਰਿਯੋਗਾਲ਼੍ਹਧਮ੍ਮੋ ਤਿਣ੍ਣਵਿਚਿਕਿਚ੍ਛੋ ਵਿਗਤਕਥਂਕਥੋ ਵੇਸਾਰਜ੍ਜਪ੍ਪਤ੍ਤੋ ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਪੁਬ੍ਬੇ ਮੇ, ਭਨ੍ਤੇ, ਕੁਮਾਰਸ੍ਸ ਸਤੋ ਪਞ੍ਚ ਅਸ੍ਸਾਸਕਾ ਅਹੇਸੁਂ, ਤੇ ਮੇ ਏਤਰਹਿ ਸਮਿਦ੍ਧਾ. ਪੁਬ੍ਬੇ ਮੇ, ਭਨ੍ਤੇ, ਕੁਮਾਰਸ੍ਸ ਸਤੋ ਏਤਦਹੋਸਿ – ‘ਅਹੋ ਵਤ ਮਂ ਰਜ੍ਜੇ ਅਭਿਸਿਞ੍ਚੇਯ੍ਯੁ’ਨ੍ਤਿ, ਅਯਂ ਖੋ ਮੇ, ਭਨ੍ਤੇ, ਪਠਮੋ ਅਸ੍ਸਾਸਕੋ ਅਹੋਸਿ, ਸੋ ਮੇ ਏਤਰਹਿ ਸਮਿਦ੍ਧੋ. ‘ਤਸ੍ਸ ਚ ਮੇ ਵਿਜਿਤਂ ਅਰਹਂ ਸਮ੍ਮਾਸਮ੍ਬੁਦ੍ਧੋ ਓਕ੍ਕਮੇਯ੍ਯਾ’ਤਿ, ਅਯਂ ਖੋ ਮੇ, ਭਨ੍ਤੇ, ਦੁਤਿਯੋ ਅਸ੍ਸਾਸਕੋ ਅਹੋਸਿ, ਸੋ ਮੇ ਏਤਰਹਿ ਸਮਿਦ੍ਧੋ. ‘ਤਞ੍ਚਾਹਂ ਭਗਵਨ੍ਤਂ ਪਯਿਰੁਪਾਸੇਯ੍ਯ’ਨ੍ਤਿ, ਅਯਂ ਖੋ ਮੇ, ਭਨ੍ਤੇ, ਤਤਿਯੋ ਅਸ੍ਸਾਸਕੋ ਅਹੋਸਿ, ਸੋ ਮੇ ਏਤਰਹਿ ਸਮਿਦ੍ਧੋ. ‘ਸੋ ਚ ਮੇ ਭਗਵਾ ਧਮ੍ਮਂ ਦੇਸੇਯ੍ਯਾ’ਤਿ, ਅਯਂ ਖੋ ਮੇ, ਭਨ੍ਤੇ, ਚਤੁਤ੍ਥੋ ਅਸ੍ਸਾਸਕੋ ਅਹੋਸਿ, ਸੋ ਮੇ ਏਤਰਹਿ ਸਮਿਦ੍ਧੋ. ‘ਤਸ੍ਸ ਚਾਹਂ ਭਗਵਤੋ ਧਮ੍ਮਂ ਆਜਾਨੇਯ੍ਯ’ਨ੍ਤਿ, ਅਯਂ ਖੋ ਮੇ, ਭਨ੍ਤੇ, ਪਞ੍ਚਮੋ ਅਸ੍ਸਾਸਕੋ ਅਹੋਸਿ, ਸੋ ਮੇ ਏਤਰਹਿ ਸਮਿਦ੍ਧੋ. ਪੁਬ੍ਬੇ ਮੇ, ਭਨ੍ਤੇ, ਕੁਮਾਰਸ੍ਸ ਸਤੋ ਇਮੇ ਪਞ੍ਚ ਅਸ੍ਸਾਸਕਾ ਅਹੇਸੁਂ, ਤੇ ਮੇ ਏਤਰਹਿ ਸਮਿਦ੍ਧਾ. ਅਭਿਕ੍ਕਨ੍ਤਂ, ਭਨ੍ਤੇ, ਅਭਿਕ੍ਕਨ੍ਤਂ, ਭਨ੍ਤੇ, ਸੇਯ੍ਯਥਾਪਿ, ਭਨ੍ਤੇ, ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ, ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ ਚਕ੍ਖੁਮਨ੍ਤੋ ਰੂਪਾਨਿ ਦਕ੍ਖਨ੍ਤੀਤਿ – ਏਵਮੇਵਂ ਭਗਵਤਾ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ. ਏਸਾਹਂ, ਭਨ੍ਤੇ, ਭਗਵਨ੍ਤਂ ਸਰਣਂ ਗਚ੍ਛਾਮਿ, ਧਮ੍ਮਞ੍ਚ, ਭਿਕ੍ਖੁਸਙ੍ਘਞ੍ਚ. ਉਪਾਸਕਂ ਮਂ [ਮਂ ਭਨ੍ਤੇ (ਕ.)], ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤਂ, ਅਧਿਵਾਸੇਤੁ ਚ ਮੇ, ਭਨ੍ਤੇ, ਭਗਵਾ, ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ.

੫੮. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹਂ ਪਾਵਿਸਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਭਿਕ੍ਖੁਸਹਸ੍ਸੇਨ ਸਬ੍ਬੇਹੇਵ ਪੁਰਾਣਜਟਿਲੇਹਿ. ਤੇਨ ਖੋ ਪਨ ਸਮਯੇਨ ਸਕ੍ਕੋ ਦੇਵਾਨਮਿਨ੍ਦੋ ਮਾਣਵਕਵਣ੍ਣਂ ਅਭਿਨਿਮ੍ਮਿਨਿਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਪੁਰਤੋ ਪੁਰਤੋ ਗਚ੍ਛਤਿ ਇਮਾ ਗਾਥਾਯੋ ਗਾਯਮਾਨੋ –

‘‘ਦਨ੍ਤੋ ਦਨ੍ਤੇਹਿ ਸਹ ਪੁਰਾਣਜਟਿਲੇਹਿ, ਵਿਪ੍ਪਮੁਤ੍ਤੋ ਵਿਪ੍ਪਮੁਤ੍ਤੇਹਿ;

ਸਿਙ੍ਗੀਨਿਕ੍ਖਸਵਣ੍ਣੋ, ਰਾਜਗਹਂ ਪਾਵਿਸਿ ਭਗਵਾ.

‘‘ਮੁਤ੍ਤੋ ਮੁਤ੍ਤੇਹਿ ਸਹ ਪੁਰਾਣਜਟਿਲੇਹਿ, ਵਿਪ੍ਪਮੁਤ੍ਤੋ ਵਿਪ੍ਪਮੁਤ੍ਤੇਹਿ;

ਸਿਙ੍ਗੀਨਿਕ੍ਖਸਵਣ੍ਣੋ, ਰਾਜਗਹਂ ਪਾਵਿਸਿ ਭਗਵਾ.

‘‘ਤਿਣ੍ਣੋ ਤਿਣ੍ਣੇਹਿ ਸਹ ਪੁਰਾਣਜਟਿਲੇਹਿ;

ਵਿਪ੍ਪਮੁਤ੍ਤੋ ਵਿਪ੍ਪਮੁਤ੍ਤੇਹਿ;

ਸਿਙ੍ਗੀਨਿਕ੍ਖਸੁਵਣ੍ਣੋ;

ਰਾਜਗਹਂ ਪਾਵਿਸਿ ਭਗਵਾ.

‘‘ਸਨ੍ਤੋ ਸਨ੍ਤੇਹਿ ਸਹ ਪੁਰਾਣਜਟਿਲੇਹਿ;

ਵਿਪ੍ਪਮੁਤ੍ਤੋ ਵਿਪ੍ਪਮੁਤ੍ਤੇਹਿ;

ਸਿਙ੍ਗੀਨਿਕ੍ਖਸਵਣ੍ਣੋ;

ਰਾਜਗਹਂ ਪਾਵਿਸਿ ਭਗਵਾ.

‘‘ਦਸਵਾਸੋ ਦਸਬਲੋ, ਦਸਧਮ੍ਮਵਿਦੂ ਦਸਭਿ ਚੁਪੇਤੋ;

ਸੋ ਦਸਸਤਪਰਿਵਾਰੋ [ਪਰਿਵਾਰਕੋ (ਕ.)] ਰਾਜਗਹਂ, ਪਾਵਿਸਿ ਭਗਵਾ’’ਤਿ.

ਮਨੁਸ੍ਸਾ ਸਕ੍ਕਂ ਦੇਵਾਨਮਿਨ੍ਦਂ ਪਸ੍ਸਿਤ੍ਵਾ ਏਵਮਾਹਂਸੁ – ‘‘ਅਭਿਰੂਪੋ ਵਤਾਯਂ ਮਾਣਵਕੋ, ਦਸ੍ਸਨੀਯੋ ਵਤਾਯਂ ਮਾਣਵਕੋ, ਪਾਸਾਦਿਕੋ ਵਤਾਯਂ ਮਾਣਵਕੋ. ਕਸ੍ਸ ਨੁ ਖੋ ਅਯਂ ਮਾਣਵਕੋ’’ਤਿ? ਏਵਂ ਵੁਤ੍ਤੇ ਸਕ੍ਕੋ ਦੇਵਾਨਮਿਨ੍ਦੋ ਤੇ ਮਨੁਸ੍ਸੇ ਗਾਥਾਯ ਅਜ੍ਝਭਾਸਿ –

‘‘ਯੋ ਧੀਰੋ ਸਬ੍ਬਧਿ ਦਨ੍ਤੋ, ਸੁਦ੍ਧੋ ਅਪ੍ਪਟਿਪੁਗ੍ਗਲੋ;

ਅਰਹਂ ਸੁਗਤੋ ਲੋਕੇ, ਤਸ੍ਸਾਹਂ ਪਰਿਚਾਰਕੋ’’ਤਿ.

੫੯. ਅਥ ਖੋ ਭਗਵਾ ਯੇਨ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਸ੍ਸ ਖੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਏਤਦਹੋਸਿ [ਚੂਲ਼ਵ. ੩੦੭] – ‘‘ਕਤ੍ਥ ਨੁ ਖੋ ਭਗਵਾ ਵਿਹਰੇਯ੍ਯ? ਯਂ ਅਸ੍ਸ ਗਾਮਤੋ ਨੇਵ ਅਵਿਦੂਰੇ ਨ ਅਚ੍ਚਾਸਨ੍ਨੇ, ਗਮਨਾਗਮਨਸਮ੍ਪਨ੍ਨਂ, ਅਤ੍ਥਿਕਾਨਂ ਅਤ੍ਥਿਕਾਨਂ ਮਨੁਸ੍ਸਾਨਂ ਅਭਿਕ੍ਕਮਨੀਯਂ, ਦਿਵਾ ਅਪ੍ਪਾਕਿਣ੍ਣਂ [ਅਪ੍ਪਕਿਣ੍ਣਂ (ਸੀ. ਸ੍ਯਾ.), ਅਬ੍ਭੋਕਿਣ੍ਣਂ (ਕ.)], ਰਤ੍ਤਿਂ ਅਪ੍ਪਸਦ੍ਦਂ ਅਪ੍ਪਨਿਗ੍ਘੋਸਂ ਵਿਜਨਵਾਤਂ, ਮਨੁਸ੍ਸਰਾਹਸ੍ਸੇਯ੍ਯਕਂ, ਪਟਿਸਲ੍ਲਾਨਸਾਰੁਪ੍ਪ’’ਨ੍ਤਿ. ਅਥ ਖੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਏਤਦਹੋਸਿ – ‘‘ਇਦਂ ਖੋ ਅਮ੍ਹਾਕਂ ਵੇਲ਼ੁਵਨਂ ਉਯ੍ਯਾਨਂ ਗਾਮਤੋ ਨੇਵ ਅਵਿਦੂਰੇ ਨ ਅਚ੍ਚਾਸਨ੍ਨੇ ਗਮਨਾਗਮਨਸਮ੍ਪਨ੍ਨਂ ਅਤ੍ਥਿਕਾਨਂ ਅਤ੍ਥਿਕਾਨਂ ਮਨੁਸ੍ਸਾਨਂ ਅਭਿਕ੍ਕਮਨੀਯਂ ਦਿਵਾ ਅਪ੍ਪਾਕਿਣ੍ਣਂ ਰਤ੍ਤਿਂ ਅਪ੍ਪਸਦ੍ਦਂ ਅਪ੍ਪਨਿਗ੍ਘੋਸਂ ਵਿਜਨਵਾਤਂ ਮਨੁਸ੍ਸਰਾਹਸ੍ਸੇਯ੍ਯਕਂ ਪਟਿਸਲ੍ਲਾਨਸਾਰੁਪ੍ਪਂ. ਯਂਨੂਨਾਹਂ ਵੇਲ਼ੁਵਨਂ ਉਯ੍ਯਾਨਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਦੇਯ੍ਯ’’ਨ੍ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਸੋਵਣ੍ਣਮਯਂ ਭਿਙ੍ਕਾਰਂ ਗਹੇਤ੍ਵਾ ਭਗਵਤੋ ਓਣੋਜੇਸਿ – ‘‘ਏਤਾਹਂ, ਭਨ੍ਤੇ, ਵੇਲ਼ੁਵਨਂ ਉਯ੍ਯਾਨਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਮ੍ਮੀ’’ਤਿ. ਪਟਿਗ੍ਗਹੇਸਿ ਭਗਵਾ ਆਰਾਮਂ. ਅਥ ਖੋ ਭਗਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਆਰਾਮ’’ਨ੍ਤਿ.

ਬਿਮ੍ਬਿਸਾਰਸਮਾਗਮਕਥਾ ਨਿਟ੍ਠਿਤਾ.

੧੪. ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾ

੬੦. ਤੇਨ ਖੋ ਪਨ ਸਮਯੇਨ ਸਞ੍ਚਯੋ [ਸਞ੍ਜਯੋ (ਸੀ. ਸ੍ਯਾ.)] ਪਰਿਬ੍ਬਾਜਕੋ ਰਾਜਗਹੇ ਪਟਿਵਸਤਿ ਮਹਤਿਯਾ ਪਰਿਬ੍ਬਾਜਕਪਰਿਸਾਯ ਸਦ੍ਧਿਂ ਅਡ੍ਢਤੇਯ੍ਯੇਹਿ ਪਰਿਬ੍ਬਾਜਕਸਤੇਹਿ. ਤੇਨ ਖੋ ਪਨ ਸਮਯੇਨ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਸਞ੍ਚਯੇ ਪਰਿਬ੍ਬਾਜਕੇ ਬ੍ਰਹ੍ਮਚਰਿਯਂ ਚਰਨ੍ਤਿ. ਤੇਹਿ ਕਤਿਕਾ ਕਤਾ ਹੋਤਿ – ਯੋ ਪਠਮਂ ਅਮਤਂ ਅਧਿਗਚ੍ਛਤਿ, ਸੋ ਇਤਰਸ੍ਸ ਆਰੋਚੇਤੂਤਿ. ਅਥ ਖੋ ਆਯਸ੍ਮਾ ਅਸ੍ਸਜਿ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹਂ ਪਿਣ੍ਡਾਯ ਪਾਵਿਸਿ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ ਵਿਲੋਕਿਤੇਨ ਸਮਿਞ੍ਜਿਤੇਨ ਪਸਾਰਿਤੇਨ, ਓਕ੍ਖਿਤ੍ਤਚਕ੍ਖੁ ਇਰਿਯਾਪਥਸਮ੍ਪਨ੍ਨੋ. ਅਦ੍ਦਸਾ ਖੋ ਸਾਰਿਪੁਤ੍ਤੋ ਪਰਿਬ੍ਬਾਜਕੋ ਆਯਸ੍ਮਨ੍ਤਂ ਅਸ੍ਸਜਿਂ ਰਾਜਗਹੇ ਪਿਣ੍ਡਾਯ ਚਰਨ੍ਤਂ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ ਵਿਲੋਕਿਤੇਨ ਸਮਿਞ੍ਜਿਤੇਨ ਪਸਾਰਿਤੇਨ ਓਕ੍ਖਿਤ੍ਤਚਕ੍ਖੁਂ ਇਰਿਯਾਪਥਸਮ੍ਪਨ੍ਨਂ. ਦਿਸ੍ਵਾਨਸ੍ਸ ਏਤਦਹੋਸਿ – ‘‘ਯੇ ਵਤ ਲੋਕੇ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ, ਅਯਂ ਤੇਸਂ ਭਿਕ੍ਖੁ ਅਞ੍ਞਤਰੋ. ਯਂਨੂਨਾਹਂ ਇਮਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਪੁਚ੍ਛੇਯ੍ਯਂ – ‘ਕਂਸਿ ਤ੍ਵਂ, ਆਵੁਸੋ, ਉਦ੍ਦਿਸ੍ਸ ਪਬ੍ਬਜਿਤੋ, ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’’ਤਿ? ਅਥ ਖੋ ਸਾਰਿਪੁਤ੍ਤਸ੍ਸ ਪਰਿਬ੍ਬਾਜਕਸ੍ਸ ਏਤਦਹੋਸਿ – ‘‘ਅਕਾਲੋ ਖੋ ਇਮਂ ਭਿਕ੍ਖੁਂ ਪੁਚ੍ਛਿਤੁਂ, ਅਨ੍ਤਰਘਰਂ ਪਵਿਟ੍ਠੋ ਪਿਣ੍ਡਾਯ ਚਰਤਿ. ਯਂਨੂਨਾਹਂ ਇਮਂ ਭਿਕ੍ਖੁਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧੇਯ੍ਯਂ, ਅਤ੍ਥਿਕੇਹਿ ਉਪਞ੍ਞਾਤਂ ਮਗ੍ਗ’’ਨ੍ਤਿ. ਅਥ ਖੋ ਆਯਸ੍ਮਾ ਅਸ੍ਸਜਿ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਂ ਆਦਾਯ ਪਟਿਕ੍ਕਮਿ. ਅਥ ਖੋ ਸਾਰਿਪੁਤ੍ਤੋਪਿ ਪਰਿਬ੍ਬਾਜਕੋ ਯੇਨਾਯਸ੍ਮਾ ਅਸ੍ਸਜਿ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਤਾ ਅਸ੍ਸਜਿਨਾ ਸਦ੍ਧਿਂ ਸਮ੍ਮੋਦਿ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸਾਰਿਪੁਤ੍ਤੋ ਪਰਿਬ੍ਬਾਜਕੋ ਆਯਸ੍ਮਨ੍ਤਂ ਅਸ੍ਸਜਿਂ ਏਤਦਵੋਚ – ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ, ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ ਪਰਿਯੋਦਾਤੋ. ਕਂਸਿ ਤ੍ਵਂ, ਆਵੁਸੋ, ਉਦ੍ਦਿਸ੍ਸ ਪਬ੍ਬਜਿਤੋ, ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’ਤਿ? ‘‘ਅਤ੍ਥਾਵੁਸੋ, ਮਹਾਸਮਣੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ, ਤਾਹਂ ਭਗਵਨ੍ਤਂ ਉਦ੍ਦਿਸ੍ਸ ਪਬ੍ਬਜਿਤੋ, ਸੋ ਚ ਮੇ ਭਗਵਾ ਸਤ੍ਥਾ, ਤਸ੍ਸ ਚਾਹਂ ਭਗਵਤੋ ਧਮ੍ਮਂ ਰੋਚੇਮੀ’’ਤਿ. ‘‘ਕਿਂਵਾਦੀ ਪਨਾਯਸ੍ਮਤੋ ਸਤ੍ਥਾ, ਕਿਮਕ੍ਖਾਯੀ’’ਤਿ? ‘‘ਅਹਂ ਖੋ, ਆਵੁਸੋ, ਨਵੋ ਅਚਿਰਪਬ੍ਬਜਿਤੋ, ਅਧੁਨਾਗਤੋ ਇਮਂ ਧਮ੍ਮਵਿਨਯਂ, ਨ ਤਾਹਂ ਸਕ੍ਕੋਮਿ ਵਿਤ੍ਥਾਰੇਨ ਧਮ੍ਮਂ ਦੇਸੇਤੁਂ, ਅਪਿ ਚ ਤੇ ਸਂਖਿਤ੍ਤੇਨ ਅਤ੍ਥਂ ਵਕ੍ਖਾਮੀ’’ਤਿ. ਅਥ ਖੋ ਸਾਰਿਪੁਤ੍ਤੋ ਪਰਿਬ੍ਬਾਜਕੋ ਆਯਸ੍ਮਨ੍ਤਂ ਅਸ੍ਸਜਿਂ ਏਤਦਵੋਚ – ‘‘ਹੋਤੁ, ਆਵੁਸੋ –

‘‘ਅਪ੍ਪਂ ਵਾ ਬਹੁਂ ਵਾ ਭਾਸਸ੍ਸੁ, ਅਤ੍ਥਂਯੇਵ ਮੇ ਬ੍ਰੂਹਿ;

ਅਤ੍ਥੇਨੇਵ ਮੇ ਅਤ੍ਥੋ, ਕਿਂ ਕਾਹਸਿ ਬ੍ਯਞ੍ਜਨਂ ਬਹੁ’’ਨ੍ਤਿ.

ਅਥ ਖੋ ਆਯਸ੍ਮਾ ਅਸ੍ਸਜਿ ਸਾਰਿਪੁਤ੍ਤਸ੍ਸ ਪਰਿਬ੍ਬਾਜਕਸ੍ਸ ਇਮਂ ਧਮ੍ਮਪਰਿਯਾਯਂ ਅਭਾਸਿ –

[ਅਪ. ੧.੧.੨੮੬ ਥੇਰਾਪਦਾਨੇਪਿ] ‘‘ਯੇ ਧਮ੍ਮਾ ਹੇਤੁਪ੍ਪਭਵਾ, ਤੇਸਂ ਹੇਤੁਂ ਤਥਾਗਤੋ ਆਹ;

ਤੇਸਞ੍ਚ ਯੋ ਨਿਰੋਧੋ, ਏਵਂਵਾਦੀ ਮਹਾਸਮਣੋ’’ਤਿ.

ਅਥ ਖੋ ਸਾਰਿਪੁਤ੍ਤਸ੍ਸ ਪਰਿਬ੍ਬਾਜਕਸ੍ਸ ਇਮਂ ਧਮ੍ਮਪਰਿਯਾਯਂ ਸੁਤ੍ਵਾ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ.

[ਅਪ. ੧.੧.੨੮੯ ਥੇਰਾਪਦਾਨੇਪਿ] ਏਸੇਵ ਧਮ੍ਮੋ ਯਦਿ ਤਾਵਦੇਵ, ਪਚ੍ਚਬ੍ਯਤ੍ਥ ਪਦਮਸੋਕਂ;

ਅਦਿਟ੍ਠਂ ਅਬ੍ਭਤੀਤਂ, ਬਹੁਕੇਹਿ ਕਪ੍ਪਨਹੁਤੇਹੀਤਿ.

੬੧. ਅਥ ਖੋ ਸਾਰਿਪੁਤ੍ਤੋ ਪਰਿਬ੍ਬਾਜਕੋ ਯੇਨ ਮੋਗ੍ਗਲ੍ਲਾਨੋ ਪਰਿਬ੍ਬਾਜਕੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਮੋਗ੍ਗਲ੍ਲਾਨੋ ਪਰਿਬ੍ਬਾਜਕੋ ਸਾਰਿਪੁਤ੍ਤਂ ਪਰਿਬ੍ਬਾਜਕਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਸਾਰਿਪੁਤ੍ਤਂ ਪਰਿਬ੍ਬਾਜਕਂ ਏਤਦਵੋਚ – ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ, ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ ਪਰਿਯੋਦਾਤੋ. ਕਚ੍ਚਿ ਨੁ ਤ੍ਵਂ, ਆਵੁਸੋ, ਅਮਤਂ ਅਧਿਗਤੋ’’ਤਿ? ‘‘ਆਮਾਵੁਸੋ, ਅਮਤਂ ਅਧਿਗਤੋ’’ਤਿ. ‘‘ਯਥਾਕਥਂ ਪਨ ਤ੍ਵਂ, ਆਵੁਸੋ, ਅਮਤਂ ਅਧਿਗਤੋ’’ਤਿ? ‘‘ਇਧਾਹਂ, ਆਵੁਸੋ, ਅਦ੍ਦਸਂ ਅਸ੍ਸਜਿਂ ਭਿਕ੍ਖੁਂ ਰਾਜਗਹੇ ਪਿਣ੍ਡਾਯ ਚਰਨ੍ਤਂ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ ਵਿਲੋਕਿਤੇਨ ਸਮਿਞ੍ਜਿਤੇਨ ਪਸਾਰਿਤੇਨ ਓਕ੍ਖਿਤ੍ਤਚਕ੍ਖੁਂ ਇਰਿਯਾਪਥਸਮ੍ਪਨ੍ਨਂ. ਦਿਸ੍ਵਾਨ ਮੇ ਏਤਦਹੋਸਿ – ‘ਯੇ ਵਤ ਲੋਕੇ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ, ਅਯਂ ਤੇਸਂ ਭਿਕ੍ਖੁ ਅਞ੍ਞਤਰੋ. ਯਂਨੂਨਾਹਂ ਇਮਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਪੁਚ੍ਛੇਯ੍ਯਂ – ਕਂਸਿ ਤ੍ਵਂ, ਆਵੁਸੋ ਉਦ੍ਦਿਸ੍ਸ ਪਬ੍ਬਜਿਤੋ, ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’’ਤਿ. ਤਸ੍ਸ ਮਯ੍ਹਂ, ਆਵੁਸੋ, ਏਤਦਹੋਸਿ – ‘‘ਅਕਾਲੋ ਖੋ ਇਮਂ ਭਿਕ੍ਖੁਂ ਪੁਚ੍ਛਿਤੁਂ ਅਨ੍ਤਰਘਰਂ ਪਵਿਟ੍ਠੋ ਪਿਣ੍ਡਾਯ ਚਰਤਿ, ਯਂਨੂਨਾਹਂ ਇਮਂ ਭਿਕ੍ਖੁਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧੇਯ੍ਯਂ ਅਤ੍ਥਿਕੇਹਿ ਉਪਞ੍ਞਾਤਂ ਮਗ੍ਗ’’ਨ੍ਤਿ. ਅਥ ਖੋ, ਆਵੁਸੋ, ਅਸ੍ਸਜਿ ਭਿਕ੍ਖੁ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਂ ਆਦਾਯ ਪਟਿਕ੍ਕਮਿ. ਅਥ ਖ੍ਵਾਹਂ, ਆਵੁਸੋ, ਯੇਨ ਅਸ੍ਸਜਿ ਭਿਕ੍ਖੁ ਤੇਨੁਪਸਙ੍ਕਮਿਂ, ਉਪਸਙ੍ਕਮਿਤ੍ਵਾ ਅਸ੍ਸਜਿਨਾ ਭਿਕ੍ਖੁਨਾ ਸਦ੍ਧਿਂ ਸਮ੍ਮੋਦਿਂ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਅਟ੍ਠਾਸਿਂ. ਏਕਮਨ੍ਤਂ ਠਿਤੋ ਖੋ ਅਹਂ, ਆਵੁਸੋ, ਅਸ੍ਸਜਿਂ ਭਿਕ੍ਖੁਂ ਏਤਦਵੋਚਂ – ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ, ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ ਪਰਿਯੋਦਾਤੋ. ‘ਕਂਸਿ ਤ੍ਵਂ, ਆਵੁਸੋ, ਉਦ੍ਦਿਸ੍ਸ ਪਬ੍ਬਜਿਤੋ, ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’’ਤਿ? ‘ਅਤ੍ਥਾਵੁਸੋ, ਮਹਾਸਮਣੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ, ਤਾਹਂ ਭਗਵਨ੍ਤਂ ਉਦ੍ਦਿਸ੍ਸ ਪਬ੍ਬਜਿਤੋ, ਸੋ ਚ ਮੇ ਭਗਵਾ ਸਤ੍ਥਾ, ਤਸ੍ਸ ਚਾਹਂ ਭਗਵਤੋ ਧਮ੍ਮਂ ਰੋਚੇਮੀ’ਤਿ. ‘ਕਿਂਵਾਦੀ ਪਨਾਯਸ੍ਮਤੋ ਸਤ੍ਥਾ ਕਿਮਕ੍ਖਾਯੀ’ਤਿ. ‘ਅਹਂ ਖੋ, ਆਵੁਸੋ, ਨਵੋ ਅਚਿਰਪਬ੍ਬਜਿਤੋ ਅਧੁਨਾਗਤੋ ਇਮਂ ਧਮ੍ਮਵਿਨਯਂ, ਨ ਤਾਹਂ ਸਕ੍ਕੋਮਿ ਵਿਤ੍ਥਾਰੇਨ ਧਮ੍ਮਂ ਦੇਸੇਤੁਂ, ਅਪਿ ਚ ਤੇ ਸਂਖਿਤ੍ਤੇਨ ਅਤ੍ਥਂ ਵਕ੍ਖਾਮੀ’’’ਤਿ. ਅਥ ਖ੍ਵਾਹਂ, ਆਵੁਸੋ, ਅਸ੍ਸਜਿਂ ਭਿਕ੍ਖੁਂ ਏਤਦਵੋਚਂ – ‘‘ਹੋਤੁ, ਆਵੁਸੋ,

ਅਪ੍ਪਂ ਵਾ ਬਹੁਂ ਵਾ ਭਾਸਸ੍ਸੁ, ਅਤ੍ਥਂਯੇਵ ਮੇ ਬ੍ਰੂਹਿ;

ਅਤ੍ਥੇਨੇਵ ਮੇ ਅਤ੍ਥੋ, ਕਿਂ ਕਾਹਸਿ ਬ੍ਯਞ੍ਜਨਂ ਬਹੁ’’ਨ੍ਤਿ.

ਅਥ ਖੋ, ਆਵੁਸੋ, ਅਸ੍ਸਜਿ ਭਿਕ੍ਖੁ ਇਮਂ ਧਮ੍ਮਪਰਿਯਾਯਂ ਅਭਾਸਿ –

‘‘ਯੇ ਧਮ੍ਮਾ ਹੇਤੁਪ੍ਪਭਵਾ, ਤੇਸਂ ਹੇਤੁਂ ਤਥਾਗਤੋ ਆਹ;

ਤੇਸਞ੍ਚ ਯੋ ਨਿਰੋਧੋ, ਏਵਂਵਾਦੀ ਮਹਾਸਮਣੋ’’ਤਿ.

ਅਥ ਖੋ ਮੋਗ੍ਗਲ੍ਲਾਨਸ੍ਸ ਪਰਿਬ੍ਬਾਜਕਸ੍ਸ ਇਮਂ ਧਮ੍ਮਪਰਿਯਾਯਂ ਸੁਤ੍ਵਾ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ.

ਏਸੇਵ ਧਮ੍ਮੋ ਯਦਿ ਤਾਵਦੇਵ, ਪਚ੍ਚਬ੍ਯਤ੍ਥ ਪਦਮਸੋਕਂ;

ਅਦਿਟ੍ਠਂ ਅਬ੍ਭਤੀਤਂ, ਬਹੁਕੇਹਿ ਕਪ੍ਪਨਹੁਤੇਹੀਤਿ.

੬੨. ਅਥ ਖੋ ਮੋਗ੍ਗਲ੍ਲਾਨੋ ਪਰਿਬ੍ਬਾਜਕੋ ਸਾਰਿਪੁਤ੍ਤਂ ਪਰਿਬ੍ਬਾਜਕਂ ਏਤਦਵੋਚ ‘‘ਗਚ੍ਛਾਮ ਮਯਂ, ਆਵੁਸੋ, ਭਗਵਤੋ ਸਨ੍ਤਿਕੇ, ਸੋ ਨੋ ਭਗਵਾ ਸਤ੍ਥਾ’’ਤਿ. ‘‘ਇਮਾਨਿ ਖੋ, ਆਵੁਸੋ, ਅਡ੍ਢਤੇਯ੍ਯਾਨਿ ਪਰਿਬ੍ਬਾਜਕਸਤਾਨਿ ਅਮ੍ਹੇ ਨਿਸ੍ਸਾਯ ਅਮ੍ਹੇ ਸਮ੍ਪਸ੍ਸਨ੍ਤਾ ਇਧ ਵਿਹਰਨ੍ਤਿ, ਤੇਪਿ ਤਾਵ ਅਪਲੋਕੇਮ [ਅਪਲੋਕਾਮ (ਕ)]. ਯਥਾ ਤੇ ਮਞ੍ਞਿਸ੍ਸਨ੍ਤਿ, ਤਥਾ ਤੇ ਕਰਿਸ੍ਸਨ੍ਤੀ’’ਤਿ. ਅਥ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਯੇਨ ਤੇ ਪਰਿਬ੍ਬਾਜਕਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਤੇ ਪਰਿਬ੍ਬਾਜਕੇ ਏਤਦਵੋਚੁਂ – ‘‘ਗਚ੍ਛਾਮ ਮਯਂ, ਆਵੁਸੋ, ਭਗਵਤੋ ਸਨ੍ਤਿਕੇ, ਸੋ ਨੋ ਭਗਵਾ ਸਤ੍ਥਾ’’ਤਿ. ‘‘ਮਯਂ ਆਯਸ੍ਮਨ੍ਤੇ ਨਿਸ੍ਸਾਯ ਆਯਸ੍ਮਨ੍ਤੇ ਸਮ੍ਪਸ੍ਸਨ੍ਤਾ ਇਧ ਵਿਹਰਾਮ, ਸਚੇ ਆਯਸ੍ਮਨ੍ਤਾ ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਿਸ੍ਸਨ੍ਤਿ, ਸਬ੍ਬੇਵ ਮਯਂ ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਿਸ੍ਸਾਮਾ’’ਤਿ. ਅਥ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਯੇਨ ਸਞ੍ਚਯੋ ਪਰਿਬ੍ਬਾਜਕੋ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਸਞ੍ਚਯਂ ਪਰਿਬ੍ਬਾਜਕਂ ਏਤਦਵੋਚੁਂ – ‘‘ਗਚ੍ਛਾਮ ਮਯਂ, ਆਵੁਸੋ, ਭਗਵਤੋ ਸਨ੍ਤਿਕੇ, ਸੋ ਨੋ ਭਗਵਾ ਸਤ੍ਥਾ’’ਤਿ. ‘‘ਅਲਂ, ਆਵੁਸੋ, ਮਾ ਅਗਮਿਤ੍ਥ, ਸਬ੍ਬੇਵ ਤਯੋ ਇਮਂ ਗਣਂ ਪਰਿਹਰਿਸ੍ਸਾਮਾ’’ਤਿ. ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਸਞ੍ਚਯਂ ਪਰਿਬ੍ਬਾਜਕਂ ਏਤਦਵੋਚੁਂ – ‘‘ਗਚ੍ਛਾਮ ਮਯਂ, ਆਵੁਸੋ, ਭਗਵਤੋ ਸਨ੍ਤਿਕੇ, ਸੋ ਨੋ ਭਗਵਾ ਸਤ੍ਥਾ’’ਤਿ. ‘‘ਅਲਂ, ਆਵੁਸੋ, ਮਾ ਅਗਮਿਤ੍ਥ, ਸਬ੍ਬੇਵ ਤਯੋ ਇਮਂ ਗਣਂ ਪਰਿਹਰਿਸ੍ਸਾਮਾ’’ਤਿ. ਅਥ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਤਾਨਿ ਅਡ੍ਢਤੇਯ੍ਯਾਨਿ ਪਰਿਬ੍ਬਾਜਕਸਤਾਨਿ ਆਦਾਯ ਯੇਨ ਵੇਲ਼ੁਵਨਂ ਤੇਨੁਪਸਙ੍ਕਮਿਂਸੁ. ਸਞ੍ਚਯਸ੍ਸ ਪਨ ਪਰਿਬ੍ਬਾਜਕਸ੍ਸ ਤਤ੍ਥੇਵ ਉਣ੍ਹਂ ਲੋਹਿਤਂ ਮੁਖਤੋ ਉਗ੍ਗਞ੍ਛਿ.

ਅਦ੍ਦਸਾ ਖੋ ਭਗਵਾ [ਭਗਵਾਤੇ (ਕ)] ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਦੂਰਤੋਵ ਆਗਚ੍ਛਨ੍ਤੇ, ਦਿਸ੍ਵਾਨ ਭਿਕ੍ਖੂ ਆਮਨ੍ਤੇਸਿ – ‘‘ਏਤੇ, ਭਿਕ੍ਖਵੇ, ਦ੍ਵੇ ਸਹਾਯਕਾ ਆਗਚ੍ਛਨ੍ਤਿ, ਕੋਲਿਤੋ ਉਪਤਿਸ੍ਸੋ ਚ. ਏਤਂ ਮੇ ਸਾਵਕਯੁਗਂ ਭਵਿਸ੍ਸਤਿ ਅਗ੍ਗਂ ਭਦ੍ਦਯੁਗ’’ਨ੍ਤਿ.

ਗਮ੍ਭੀਰੇ ਞਾਣਵਿਸਯੇ, ਅਨੁਤ੍ਤਰੇ ਉਪਧਿਸਙ੍ਖਯੇ;

ਵਿਮੁਤ੍ਤੇ ਅਪ੍ਪਤ੍ਤੇ ਵੇਲ਼ੁਵਨਂ, ਅਥ ਨੇ ਸਤ੍ਥਾ ਬ੍ਯਾਕਾਸਿ.

ਏਤੇ ਦ੍ਵੇ ਸਹਾਯਕਾ, ਆਗਚ੍ਛਨ੍ਤਿ ਕੋਲਿਤੋ ਉਪਤਿਸ੍ਸੋ ਚ;

ਏਤਂ ਮੇ ਸਾਵਕਯੁਗਂ, ਭਵਿਸ੍ਸਤਿ ਅਗ੍ਗਂ ਭਦ੍ਦਯੁਗਨ੍ਤਿ.

ਅਥ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ

ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

ਅਭਿਞ੍ਞਾਤਾਨਂ ਪਬ੍ਬਜ੍ਜਾ

੬੩. ਤੇਨ ਖੋ ਪਨ ਸਮਯੇਨ ਅਭਿਞ੍ਞਾਤਾ ਅਭਿਞ੍ਞਾਤਾ ਮਾਗਧਿਕਾ ਕੁਲਪੁਤ੍ਤਾ ਭਗਵਤਿ ਬ੍ਰਹ੍ਮਚਰਿਯਂ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਅਪੁਤ੍ਤਕਤਾਯ ਪਟਿਪਨ੍ਨੋ ਸਮਣੋ ਗੋਤਮੋ, ਵੇਧਬ੍ਯਾਯ ਪਟਿਪਨ੍ਨੋ ਸਮਣੋ ਗੋਤਮੋ, ਕੁਲੁਪਚ੍ਛੇਦਾਯ ਪਟਿਪਨ੍ਨੋ ਸਮਣੋ ਗੋਤਮੋ, ਇਦਾਨਿ ਅਨੇਨ ਜਟਿਲਸਹਸ੍ਸਂ ਪਬ੍ਬਾਜਿਤਂ, ਇਮਾਨਿ ਚ ਅਡ੍ਢਤੇਯ੍ਯਾਨਿ ਪਰਿਬ੍ਬਾਜਕਸਤਾਨਿ ਸਞ੍ਚਯਾਨਿ [ਸਞ੍ਜੇਯ੍ਯਾਨਿ (ਸੀ.), ਸਞ੍ਜਯਾਨਿ (ਸ੍ਯਾ.)] ਪਬ੍ਬਾਜਿਤਾਨਿ. ਇਮੇ ਚ ਅਭਿਞ੍ਞਾਤਾ ਅਭਿਞ੍ਞਾਤਾ ਮਾਗਧਿਕਾ ਕੁਲਪੁਤ੍ਤਾ ਸਮਣੇ ਗੋਤਮੇ ਬ੍ਰਹ੍ਮਚਰਿਯਂ ਚਰਨ੍ਤੀਤਿ. ਅਪਿਸ੍ਸੁ ਭਿਕ੍ਖੂ ਦਿਸ੍ਵਾ ਇਮਾਯ ਗਾਥਾਯ ਚੋਦੇਨ੍ਤਿ –

‘‘ਆਗਤੋ ਖੋ ਮਹਾਸਮਣੋ, ਮਾਗਧਾਨਂ ਗਿਰਿਬ੍ਬਜਂ;

ਸਬ੍ਬੇ ਸਞ੍ਚਯੇ ਨੇਤ੍ਵਾਨ [ਸਞ੍ਜੇਯ੍ਯਕੇ ਨੇਤ੍ਵਾ (ਸੀ.)], ਕਂਸੁ ਦਾਨਿ ਨਯਿਸ੍ਸਤੀ’’ਤਿ.

ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਨ, ਭਿਕ੍ਖਵੇ, ਸੋ ਸਦ੍ਦੋ ਚਿਰਂ ਭਵਿਸ੍ਸਤਿ, ਸਤ੍ਤਾਹਮੇਵ ਭਵਿਸ੍ਸਤਿ, ਸਤ੍ਤਾਹਸ੍ਸ ਅਚ੍ਚਯੇਨ ਅਨ੍ਤਰਧਾਯਿਸ੍ਸਤਿ. ਤੇਨ ਹਿ, ਭਿਕ੍ਖਵੇ, ਯੇ ਤੁਮ੍ਹੇ ਇਮਾਯ ਗਾਥਾਯ ਚੋਦੇਨ੍ਤਿ –

‘‘ਆਗਤੋ ਖੋ ਮਹਾਸਮਣੋ, ਮਾਗਧਾਨਂ ਗਿਰਿਬ੍ਬਜਂ;

ਸਬ੍ਬੇ ਸਞ੍ਚਯੇ ਨੇਤ੍ਵਾਨ, ਕਂਸੁ ਦਾਨਿ ਨਯਿਸ੍ਸਤੀ’’ਤਿ.

ਤੇ ਤੁਮ੍ਹੇ ਇਮਾਯ ਗਾਥਾਯ ਪਟਿਚੋਦੇਥ –

‘‘ਨਯਨ੍ਤਿ ਵੇ ਮਹਾਵੀਰਾ, ਸਦ੍ਧਮ੍ਮੇਨ ਤਥਾਗਤਾ;

ਧਮ੍ਮੇਨ ਨਯਮਾਨਾਨਂ [ਨੀਯਮਾਨਾਨਂ (ਕ.)], ਕਾ ਉਸੂਯਾ [ਉਸ੍ਸੁਯਾ (ਕ.)] ਵਿਜਾਨਤ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੂ ਦਿਸ੍ਵਾ ਇਮਾਯ ਗਾਥਾਯ ਚੋਦੇਨ੍ਤਿ –

‘‘ਆਗਤੋ ਖੋ ਮਹਾਸਮਣੋ, ਮਾਗਧਾਨਂ ਗਿਰਿਬ੍ਬਜਂ;

ਸਬ੍ਬੇ ਸਞ੍ਚਯੇ ਨੇਤ੍ਵਾਨ, ਕਂਸੁ ਦਾਨਿ ਨਯਿਸ੍ਸਤੀ’’ਤਿ.

ਭਿਕ੍ਖੂ ਤੇ ਮਨੁਸ੍ਸੇ ਇਮਾਯ ਗਾਥਾਯ ਪਟਿਚੋਦੇਨ੍ਤਿ –

‘‘ਨਯਨ੍ਤਿ ਵੇ ਮਹਾਵੀਰਾ, ਸਦ੍ਧਮ੍ਮੇਨ ਤਥਾਗਤਾ;

ਧਮ੍ਮੇਨ ਨਯਮਾਨਾਨਂ, ਕਾ ਉਸੂਯਾ ਵਿਜਾਨਤ’’ਨ੍ਤਿ.

ਮਨੁਸ੍ਸਾ ਧਮ੍ਮੇਨ ਕਿਰ ਸਮਣਾ ਸਕ੍ਯਪੁਤ੍ਤਿਯਾ ਨੇਨ੍ਤਿ ਨੋ ਅਧਮ੍ਮੇਨਾਤਿ ਸਤ੍ਤਾਹਮੇਵ ਸੋ ਸਦ੍ਦੋ ਅਹੋਸਿ, ਸਤ੍ਤਾਹਸ੍ਸ ਅਚ੍ਚਯੇਨ ਅਨ੍ਤਰਧਾਯਿ.

ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾ ਨਿਟ੍ਠਿਤਾ.

ਚਤੁਤ੍ਥਭਾਣਵਾਰੋ ਨਿਟ੍ਠਿਤੋ.

੧੫. ਉਪਜ੍ਝਾਯਵਤ੍ਤਕਥਾ

੬੪. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਨੁਪਜ੍ਝਾਯਕਾ ਅਨਾਚਰਿਯਕਾ [ਇਦਂ ਪਦਂ ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ] ਅਨੋਵਦਿਯਮਾਨਾ ਅਨਨੁਸਾਸਿਯਮਾਨਾ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਨ੍ਤਿ; ਮਨੁਸ੍ਸਾਨਂ [ਤੇ ਮਨੁਸ੍ਸਾਨਂ (ਕ.)] ਭੁਞ੍ਜਮਾਨਾਨਂ ਉਪਰਿਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਖਾਦਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਸਾਯਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ; ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤਿ; ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਸ੍ਸਨ੍ਤਿ; ਮਨੁਸ੍ਸਾਨਂ ਭੁਞ੍ਜਮਾਨਾਨਂ, ਉਪਰਿਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਖਾਦਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਸਾਯਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ; ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਿਸ੍ਸਨ੍ਤਿ; ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਿਸ੍ਸਨ੍ਤਿ ਸੇਯ੍ਯਥਾਪਿ ਬ੍ਰਾਹ੍ਮਣਾ ਬ੍ਰਾਹ੍ਮਣਭੋਜਨੇ’’ਤਿ.

ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ, ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਸ੍ਸਨ੍ਤਿ; ਮਨੁਸ੍ਸਾਨਂ ਭੁਞ੍ਜਮਾਨਾਨਂ, ਉਪਰਿਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਖਾਦਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਸਾਯਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ; ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਿਸ੍ਸਨ੍ਤਿ; ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਿਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ…ਪੇ… ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਨ੍ਤਿ, ਮਨੁਸ੍ਸਾਨਂ ਭੁਞ੍ਜਮਾਨਾਨਂ ਉਪਰਿ ਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਖਾਦਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਸਾਯਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤਿ, ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਿਕ੍ਖਵੇ, ਤੇਸਂ ਮੋਘਪੁਰਿਸਾਨਂ ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਸ੍ਸਨ੍ਤਿ, ਮਨੁਸ੍ਸਾਨਂ ਭੁਞ੍ਜਮਾਨਾਨਂ ਉਪਰਿਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਖਾਦਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਸਾਯਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਿਸ੍ਸਨ੍ਤਿ, ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਿਸ੍ਸਨ੍ਤਿ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ, ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ. ਅਥ ਖ੍ਵੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਞ੍ਚੇਵ ਅਪ੍ਪਸਾਦਾਯ, ਪਸਨ੍ਨਾਨਞ੍ਚ ਏਕਚ੍ਚਾਨਂ ਅਞ੍ਞਥਤ੍ਤਾਯਾ’’ਤਿ. ਅਥ ਖੋ ਭਗਵਾ ਤੇ ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਦੁਬ੍ਭਰਤਾਯ ਦੁਪ੍ਪੋਸਤਾਯ ਮਹਿਚ੍ਛਤਾਯ ਅਸਨ੍ਤੁਟ੍ਠਿਤਾਯ [ਅਸਨ੍ਤੁਟ੍ਠਿਯਾ (ਸੀ.), ਅਸਨ੍ਤੁਟ੍ਠਤਾਯ (ਸ੍ਯਾ)] ਸਙ੍ਗਣਿਕਾਯ ਕੋਸਜ੍ਜਸ੍ਸ ਅਵਣ੍ਣਂ ਭਾਸਿਤ੍ਵਾ ਅਨੇਕਪਰਿਯਾਯੇਨ ਸੁਭਰਤਾਯ ਸੁਪੋਸਤਾਯ ਅਪ੍ਪਿਚ੍ਛਸ੍ਸ ਸਨ੍ਤੁਟ੍ਠਸ੍ਸ ਸਲ੍ਲੇਖਸ੍ਸ ਧੁਤਸ੍ਸ ਪਾਸਾਦਿਕਸ੍ਸ ਅਪਚਯਸ੍ਸ ਵੀਰਿਯਾਰਮ੍ਭਸ੍ਸ [ਵਿਰਿਯਾਰਮ੍ਭਸ੍ਸ (ਸੀ. ਸ੍ਯਾ.)] ਵਣ੍ਣਂ ਭਾਸਿਤ੍ਵਾ ਭਿਕ੍ਖੂਨਂ ਤਦਨੁਚ੍ਛਵਿਕਂ ਤਦਨੁਲੋਮਿਕਂ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੬੫. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਪਜ੍ਝਾਯਂ. ਉਪਜ੍ਝਾਯੋ, ਭਿਕ੍ਖਵੇ, ਸਦ੍ਧਿਵਿਹਾਰਿਕਮ੍ਹਿ ਪੁਤ੍ਤਚਿਤ੍ਤਂ ਉਪਟ੍ਠਪੇਸ੍ਸਤਿ, ਸਦ੍ਧਿਵਿਹਾਰਿਕੋ ਉਪਜ੍ਝਾਯਮ੍ਹਿ ਪਿਤੁਚਿਤ੍ਤਂ ਉਪਟ੍ਠਪੇਸ੍ਸਤਿ. ਏਵਂ ਤੇ ਅਞ੍ਞਮਞ੍ਞਂ ਸਗਾਰਵਾ ਸਪ੍ਪਤਿਸ੍ਸਾ ਸਭਾਗਵੁਤ੍ਤਿਨੋ ਵਿਹਰਨ੍ਤਾ ਇਮਸ੍ਮਿਂ ਧਮ੍ਮਵਿਨਯੇ ਵੁਡ੍ਢਿਂ ਵਿਰੁਲ਼੍ਹਿਂ ਵੇਪੁਲ੍ਲਂ ਆਪਜ੍ਜਿਸ੍ਸਨ੍ਤਿ. ਏਵਞ੍ਚ ਪਨ, ਭਿਕ੍ਖਵੇ, ਉਪਜ੍ਝਾਯੋ ਗਹੇਤਬ੍ਬੋ – ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਉਪਜ੍ਝਾਯੋ ਮੇ, ਭਨ੍ਤੇ, ਹੋਹਿ; ਉਪਜ੍ਝਾਯੋ ਮੇ, ਭਨ੍ਤੇ, ਹੋਹਿ; ਉਪਜ੍ਝਾਯੋ ਮੇ, ਭਨ੍ਤੇ, ਹੋਹੀ’ਤਿ. ਸਾਹੂਤਿ ਵਾ ਲਹੂਤਿ ਵਾ ਓਪਾਯਿਕਨ੍ਤਿ ਵਾ ਪਤਿਰੂਪਨ੍ਤਿ ਵਾ ਪਾਸਾਦਿਕੇਨ ਸਮ੍ਪਾਦੇਹੀਤਿ ਵਾ ਕਾਯੇਨ ਵਿਞ੍ਞਾਪੇਤਿ, ਵਾਚਾਯ ਵਿਞ੍ਞਾਪੇਤਿ, ਕਾਯੇਨ ਵਾਚਾਯ [ਨ ਵਾਚਾਯ (ਕ.)] ਵਿਞ੍ਞਾਪੇਤਿ, ਗਹਿਤੋ ਹੋਤਿ ਉਪਜ੍ਝਾਯੋ; ਨ ਕਾਯੇਨ ਵਿਞ੍ਞਾਪੇਤਿ, ਨ ਵਾਚਾਯ ਵਿਞ੍ਞਾਪੇਤਿ, ਨ ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਨ ਗਹਿਤੋ ਹੋਤਿ ਉਪਜ੍ਝਾਯੋ.

੬੬. [ਚੂਲ਼ਵ. ੩੭੬ ਆਦਯੋ]‘‘ਸਦ੍ਧਿਵਿਹਾਰਿਕੇਨ, ਭਿਕ੍ਖਵੇ, ਉਪਜ੍ਝਾਯਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ –

‘‘ਕਾਲਸ੍ਸੇਵ ਵੁਟ੍ਠਾਯ ਉਪਾਹਨਾ ਓਮੁਞ੍ਚਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ. ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਉਪਜ੍ਝਾਯੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ [ਸਉਦਕੋ (ਕ.)] ਦਾਤਬ੍ਬੋ. ਸਚੇ ਉਪਜ੍ਝਾਯੋ ਪਚ੍ਛਾਸਮਣਂ ਆਕਙ੍ਖਤਿ, ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਉਪਜ੍ਝਾਯਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ. ਨਾਤਿਦੂਰੇ ਗਨ੍ਤਬ੍ਬਂ, ਨਾਚ੍ਚਾਸਨ੍ਨੇ ਗਨ੍ਤਬ੍ਬਂ, ਪਤ੍ਤਪਰਿਯਾਪਨ੍ਨਂ ਪਟਿਗ੍ਗਹੇਤਬ੍ਬਂ. ਨ ਉਪਜ੍ਝਾਯਸ੍ਸ ਭਣਮਾਨਸ੍ਸ ਅਨ੍ਤਰਨ੍ਤਰਾ ਕਥਾ ਓਪਾਤੇਤਬ੍ਬਾ. ਉਪਜ੍ਝਾਯੋ ਆਪਤ੍ਤਿਸਾਮਨ੍ਤਾ ਭਣਮਾਨੋ ਨਿਵਾਰੇਤਬ੍ਬੋ.

‘‘ਨਿਵਤ੍ਤਨ੍ਤੇਨ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਟਿਨਿਵਾਸਨਂ ਦਾਤਬ੍ਬਂ, ਨਿਵਾਸਨਂ ਪਟਿਗ੍ਗਹੇਤਬ੍ਬਂ. ਸਚੇ ਚੀਵਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬਂ; ਚੀਵਰਂ ਸਙ੍ਘਰਿਤਬ੍ਬਂ, ਚੀਵਰਂ ਸਙ੍ਘਰਨ੍ਤੇਨ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਂ ਸਙ੍ਘਰਿਤਬ੍ਬਂ – ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ. ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਂ.

‘‘ਸਚੇ ਪਿਣ੍ਡਪਾਤੋ ਹੋਤਿ, ਉਪਜ੍ਝਾਯੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ. ਉਪਜ੍ਝਾਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਉਪਜ੍ਝਾਯੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

‘‘ਸਚੇ ਉਪਜ੍ਝਾਯੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਉਪਜ੍ਝਾਯਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰਂ ਪਵਿਸਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਜਨ੍ਤਾਘਰੇ ਉਪਜ੍ਝਾਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

‘‘ਉਦਕੇਪਿ ਉਪਜ੍ਝਾਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਉਪਜ੍ਝਾਯਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਉਪਜ੍ਝਾਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਸਚੇ ਉਦ੍ਦਿਸਾਪੇਤੁਕਾਮੋ ਹੋਤਿ, ਉਦ੍ਦਿਸਿਤਬ੍ਬੋ. ਸਚੇ ਪਰਿਪੁਚ੍ਛਿਤੁਕਾਮੋ ਹੋਤਿ, ਪਰਿਪੁਚ੍ਛਿਤਬ੍ਬੋ.

‘‘ਯਸ੍ਮਿਂ ਵਿਹਾਰੇ ਉਪਜ੍ਝਾਯੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਭਿਸਿਬਿਬ੍ਬੋਹਨਂ [ਭਿਸਿਬਿਮ੍ਬੋਹਨਂ (ਸੀ. ਸ੍ਯਾ.)] ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ. ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ. ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ. ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਭੂਮਤ੍ਥਰਣਂ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ – ਮਾ ਵਿਹਾਰੋ ਰਜੇਨ ਉਹਞ੍ਞੀਤਿ. ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

‘‘ਭੂਮਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਮਞ੍ਚਪਟਿਪਾਦਕਾ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਾ. ਮਞ੍ਚੋ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬੋ. ਪੀਠਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਭਿਸਿਬਿਬ੍ਬੋਹਨਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਨਿਸੀਦਨਪਚ੍ਚਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਖੇਲ਼ਮਲ੍ਲਕੋ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬੋ. ਅਪਸ੍ਸੇਨਫਲਕਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਂ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ.

‘‘ਸਚੇ ਪੁਰਤ੍ਥਿਮਾ ਸਰਜਾ ਵਾਤਾ ਵਾਯਨ੍ਤਿ, ਪੁਰਤ੍ਥਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਪਚ੍ਛਿਮਾ ਸਰਜਾ ਵਾਤਾ ਵਾਯਨ੍ਤਿ, ਪਚ੍ਛਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਉਤ੍ਤਰਾ ਸਰਜਾ ਵਾਤਾ ਵਾਯਨ੍ਤਿ, ਉਤ੍ਤਰਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਦਕ੍ਖਿਣਾ ਸਰਜਾ ਵਾਤਾ ਵਾਯਨ੍ਤਿ, ਦਕ੍ਖਿਣਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਸੀਤਕਾਲੋ ਹੋਤਿ, ਦਿਵਾ ਵਾਤਪਾਨਾ ਵਿਵਰਿਤਬ੍ਬਾ, ਰਤ੍ਤਿਂ ਥਕੇਤਬ੍ਬਾ. ਸਚੇ ਉਣ੍ਹਕਾਲੋ ਹੋਤਿ, ਦਿਵਾ ਵਾਤਪਾਨਾ ਥਕੇਤਬ੍ਬਾ, ਰਤ੍ਤਿਂ ਵਿਵਰਿਤਬ੍ਬਾ.

‘‘ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ. ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਉਪਟ੍ਠਾਨਸਾਲਾ ਉਕ੍ਲਾਪਾ ਹੋਤਿ, ਉਪਟ੍ਠਾਨਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਅਗ੍ਗਿਸਾਲਾ ਉਕ੍ਲਾਪਾ ਹੋਤਿ, ਅਗ੍ਗਿਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਵਚ੍ਚਕੁਟਿ ਉਕ੍ਲਾਪਾ ਹੋਤਿ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ. ਸਚੇ ਪਾਨੀਯਂ ਨ ਹੋਤਿ, ਪਾਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਪਰਿਭੋਜਨੀਯਂ ਨ ਹੋਤਿ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

‘‘ਸਚੇ ਉਪਜ੍ਝਾਯਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਸਦ੍ਧਿਵਿਹਾਰਿਕੇਨ ਵੂਪਕਾਸੇਤਬ੍ਬੋ, ਵੂਪਕਾਸਾਪੇਤਬ੍ਬੋ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਸਦ੍ਧਿਵਿਹਾਰਿਕੇਨ ਵਿਨੋਦੇਤਬ੍ਬਂ, ਵਿਨੋਦਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਸਦ੍ਧਿਵਿਹਾਰਿਕੇਨ ਵਿਵੇਚੇਤਬ੍ਬਂ, ਵਿਵੇਚਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਪਰਿਵਾਸਂ ਦਦੇਯ੍ਯਾਤਿ. ਸਚੇ ਉਪਜ੍ਝਾਯੋ ਮੂਲਾਯ ਪਟਿਕਸ੍ਸਨਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਂ ਮੂਲਾਯ ਪਟਿਕਸ੍ਸੇਯ੍ਯਾਤਿ. ਸਚੇ ਉਪਜ੍ਝਾਯੋ ਮਾਨਤ੍ਤਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਮਾਨਤ੍ਤਂ ਦਦੇਯ੍ਯਾਤਿ. ਸਚੇ ਉਪਜ੍ਝਾਯੋ ਅਬ੍ਭਾਨਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਂ ਅਬ੍ਭੇਯ੍ਯਾਤਿ. ਸਚੇ ਸਙ੍ਘੋ ਉਪਜ੍ਝਾਯਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ ਤਜ੍ਜਨੀਯਂ ਵਾ ਨਿਯਸ੍ਸਂ [ਨਿਯਸਂ (ਕ.)] ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਕਮ੍ਮਂ ਨ ਕਰੇਯ੍ਯ ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ. ਕਤਂ ਵਾ ਪਨਸ੍ਸ ਹੋਤਿ ਸਙ੍ਘੇਨ ਕਮ੍ਮਂ ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ.

‘‘ਸਚੇ ਉਪਜ੍ਝਾਯਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਧੋਵਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਧੋਵਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਕਾਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਕਰਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਪਚਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਰਜਨਂ ਪਚਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਚੀਵਰਂ ਰਜਿਤਬ੍ਬਂ [ਰਜੇਤਬ੍ਬਂ (ਸੀ. ਸ੍ਯਾ.)] ਹੋਤਿ, ਸਦ੍ਧਿਵਿਹਾਰਿਕੇਨ ਰਜਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਰਜਿਯੇਥਾਤਿ. ਚੀਵਰਂ ਰਜਨ੍ਤੇਨ [ਰਜੇਨ੍ਤੇਨ (ਸੀ. ਸ੍ਯਾ.)] ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ.

‘‘ਨ ਉਪਜ੍ਝਾਯਂ ਅਨਾਪੁਚ੍ਛਾ ਏਕਚ੍ਚਸ੍ਸ ਪਤ੍ਤੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਤ੍ਤੋ ਪਟਿਗ੍ਗਹੇਤਬ੍ਬੋ; ਨ ਏਕਚ੍ਚਸ੍ਸ ਚੀਵਰਂ ਦਾਤਬ੍ਬਂ, ਨ ਏਕਚ੍ਚਸ੍ਸ ਚੀਵਰਂ ਪਟਿਗ੍ਗਹੇਤਬ੍ਬਂ; ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਪਟਿਗ੍ਗਹੇਤਬ੍ਬੋ; ਨ ਏਕਚ੍ਚਸ੍ਸ ਕੇਸਾ ਛੇਦੇਤਬ੍ਬਾ [ਛੇਤ੍ਤਬ੍ਬਾ (ਸੀ.), ਛੇਦਿਤਬ੍ਬਾ (ਕ.)], ਨ ਏਕਚ੍ਚੇਨ ਕੇਸਾ ਛੇਦਾਪੇਤਬ੍ਬਾ; ਨ ਏਕਚ੍ਚਸ੍ਸ ਪਰਿਕਮ੍ਮਂ ਕਾਤਬ੍ਬਂ, ਨ ਏਕਚ੍ਚੇਨ ਪਰਿਕਮ੍ਮਂ ਕਾਰਾਪੇਤਬ੍ਬਂ; ਨ ਏਕਚ੍ਚਸ੍ਸ ਵੇਯ੍ਯਾਵਚ੍ਚੋ [ਵੇਯ੍ਯਾਵਚ੍ਚਂ (ਕਤ੍ਥਚਿ)] ਕਾਤਬ੍ਬੋ, ਨ ਏਕਚ੍ਚੇਨ ਵੇਯ੍ਯਾਵਚ੍ਚੋ ਕਾਰਾਪੇਤਬ੍ਬੋ; ਨ ਏਕਚ੍ਚਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ, ਨ ਏਕਚ੍ਚੋ ਪਚ੍ਛਾਸਮਣੋ ਆਦਾਤਬ੍ਬੋ; ਨ ਏਕਚ੍ਚਸ੍ਸ ਪਿਣ੍ਡਪਾਤੋ ਨੀਹਰਿਤਬ੍ਬੋ, ਨ ਏਕਚ੍ਚੇਨ ਪਿਣ੍ਡਪਾਤੋ ਨੀਹਰਾਪੇਤਬ੍ਬੋ; ਨ ਉਪਜ੍ਝਾਯਂ ਅਨਾਪੁਚ੍ਛਾ ਗਾਮੋ ਪਵਿਸਿਤਬ੍ਬੋ; ਨ ਸੁਸਾਨਂ ਗਨ੍ਤਬ੍ਬਂ; ਨ ਦਿਸਾ ਪਕ੍ਕਮਿਤਬ੍ਬਾ. ਸਚੇ ਉਪਜ੍ਝਾਯੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬ’’ਨ੍ਤਿ.

ਉਪਜ੍ਝਾਯਵਤ੍ਤਂ ਨਿਟ੍ਠਿਤਂ.

੧੬. ਸਦ੍ਧਿਵਿਹਾਰਿਕਵਤ੍ਤਕਥਾ

੬੭. [ਚੂਲ਼ਵ. ੩੭੮ ਆਦਯੋ] ‘‘ਉਪਜ੍ਝਾਯੇਨ, ਭਿਕ੍ਖਵੇ, ਸਦ੍ਧਿਵਿਹਾਰਿਕਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ –

‘‘ਉਪਜ੍ਝਾਯੇਨ, ਭਿਕ੍ਖਵੇ, ਸਦ੍ਧਿਵਿਹਾਰਿਕੋ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋ ਉਦ੍ਦੇਸੇਨ ਪਰਿਪੁਚ੍ਛਾਯ ਓਵਾਦੇਨ ਅਨੁਸਾਸਨਿਯਾ. ਸਚੇ ਉਪਜ੍ਝਾਯਸ੍ਸ ਪਤ੍ਤੋ ਹੋਤਿ, ਸਦ੍ਧਿਵਿਹਾਰਿਕਸ੍ਸ ਪਤ੍ਤੋ ਨ ਹੋਤਿ, ਉਪਜ੍ਝਾਯੇਨ ਸਦ੍ਧਿਵਿਹਾਰਿਕਸ੍ਸ ਪਤ੍ਤੋ ਦਾਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਪਤ੍ਤੋ ਉਪ੍ਪਜ੍ਜਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਚੀਵਰਂ ਹੋਤਿ, ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਨ ਹੋਤਿ, ਉਪਜ੍ਝਾਯੇਨ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਦਾਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਉਪ੍ਪਜ੍ਜਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਪਰਿਕ੍ਖਾਰੋ ਹੋਤਿ, ਸਦ੍ਧਿਵਿਹਾਰਿਕਸ੍ਸ ਪਰਿਕ੍ਖਾਰੋ ਨ ਹੋਤਿ, ਉਪਜ੍ਝਾਯੇਨ ਸਦ੍ਧਿਵਿਹਾਰਿਕਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਪਰਿਕ੍ਖਾਰੋ ਉਪ੍ਪਜ੍ਜਿਯੇਥਾਤਿ.

‘‘ਸਚੇ ਸਦ੍ਧਿਵਿਹਾਰਿਕੋ ਗਿਲਾਨੋ ਹੋਤਿ, ਕਾਲਸ੍ਸੇਵ ਉਟ੍ਠਾਯ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ. ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਸਦ੍ਧਿਵਿਹਾਰਿਕਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਸਦ੍ਧਿਵਿਹਾਰਿਕੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ ਦਾਤਬ੍ਬੋ. ਏਤ੍ਤਾਵਤਾ ਨਿਵਤ੍ਤਿਸ੍ਸਤੀਤਿ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਟਿਨਿਵਾਸਨਂ ਦਾਤਬ੍ਬਂ, ਨਿਵਾਸਨਂ ਪਟਿਗ੍ਗਹੇਤਬ੍ਬਂ. ਸਚੇ ਚੀਵਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬਂ; ਚੀਵਰਂ ਸਙ੍ਘਰਿਤਬ੍ਬਂ, ਚੀਵਰਂ ਸਙ੍ਘਰਨ੍ਤੇਨ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਂ ਸਙ੍ਘਰਿਤਬ੍ਬਂ – ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ. ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਂ.

‘‘ਸਚੇ ਪਿਣ੍ਡਪਾਤੋ ਹੋਤਿ, ਸਦ੍ਧਿਵਿਹਾਰਿਕੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ. ਸਦ੍ਧਿਵਿਹਾਰਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਸਦ੍ਧਿਵਿਹਾਰਿਕਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਸਦ੍ਧਿਵਿਹਾਰਿਕੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

‘‘ਸਚੇ ਸਦ੍ਧਿਵਿਹਾਰਿਕੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰਂ ਪਵਿਸਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਜਨ੍ਤਾਘਰੇ ਸਦ੍ਧਿਵਿਹਾਰਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

‘‘ਉਦਕੇਪਿ ਸਦ੍ਧਿਵਿਹਾਰਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਸਦ੍ਧਿਵਿਹਾਰਿਕਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ. ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ. ਸਦ੍ਧਿਵਿਹਾਰਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ.

‘‘ਯਸ੍ਮਿਂ ਵਿਹਾਰੇ ਸਦ੍ਧਿਵਿਹਾਰਿਕੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭਿਸਿਬਿਬ੍ਬੋਹਨਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ; ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭੂਮਤ੍ਥਰਣਂ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ – ਮਾ ਵਿਹਾਰੋ ਰਜੇਨ ਉਹਞ੍ਞੀਤਿ. ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

‘‘ਭੂਮਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਮਞ੍ਚਪਟਿਪਾਦਕਾ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਾ. ਮਞ੍ਚੋ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬੋ. ਪੀਠਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਭਿਸਿਬਿਬ੍ਬੋਹਨਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਨਿਸੀਦਨਪਚ੍ਚਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਖੇਲ਼ਮਲ੍ਲਕੋ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬੋ. ਅਪਸ੍ਸੇਨਫਲਕਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਂ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ.

‘‘ਸਚੇ ਪੁਰਤ੍ਥਿਮਾ ਸਰਜਾ ਵਾਤਾ ਵਾਯਨ੍ਤਿ, ਪੁਰਤ੍ਥਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਪਚ੍ਛਿਮਾ ਸਰਜਾ ਵਾਤਾ ਵਾਯਨ੍ਤਿ, ਪਚ੍ਛਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਉਤ੍ਤਰਾ ਸਰਜਾ ਵਾਤਾ ਵਾਯਨ੍ਤਿ, ਉਤ੍ਤਰਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਦਕ੍ਖਿਣਾ ਸਰਜਾ ਵਾਤਾ ਵਾਯਨ੍ਤਿ, ਦਕ੍ਖਿਣਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਸੀਤਕਾਲੋ ਹੋਤਿ, ਦਿਵਾ ਵਾਤਪਾਨਾ ਵਿਵਰਿਤਬ੍ਬਾ, ਰਤ੍ਤਿਂ ਥਕੇਤਬ੍ਬਾ. ਸਚੇ ਉਣ੍ਹਕਾਲੋ ਹੋਤਿ, ਦਿਵਾ ਵਾਤਪਾਨਾ ਥਕੇਤਬ੍ਬਾ, ਰਤ੍ਤਿਂ ਵਿਵਰਿਤਬ੍ਬਾ.

‘‘ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ. ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਉਪਟ੍ਠਾਨਸਾਲਾ ਉਕ੍ਲਾਪਾ ਹੋਤਿ, ਉਪਟ੍ਠਾਨਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਅਗ੍ਗਿਸਾਲਾ ਉਕ੍ਲਾਪਾ ਹੋਤਿ, ਅਗ੍ਗਿਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਵਚ੍ਚਕੁਟਿ ਉਕ੍ਲਾਪਾ ਹੋਤਿ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ. ਸਚੇ ਪਾਨੀਯਂ ਨ ਹੋਤਿ, ਪਾਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਪਰਿਭੋਜਨੀਯਂ ਨ ਹੋਤਿ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

‘‘ਸਚੇ ਸਦ੍ਧਿਵਿਹਾਰਿਕਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਉਪਜ੍ਝਾਯੇਨ ਵੂਪਕਾਸੇਤਬ੍ਬੋ, ਵੂਪਕਾਸਾਪੇਤਬ੍ਬੋ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਸਦ੍ਧਿਵਿਹਾਰਿਕਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਉਪਜ੍ਝਾਯੇਨ ਵਿਨੋਦੇਤਬ੍ਬਂ, ਵਿਨੋਦਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਸਦ੍ਧਿਵਿਹਾਰਿਕਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਉਪਜ੍ਝਾਯੇਨ ਵਿਵੇਚੇਤਬ੍ਬਂ, ਵਿਵੇਚਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਸਦ੍ਧਿਵਿਹਾਰਿਕੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਸਦ੍ਧਿਵਿਹਾਰਿਕਸ੍ਸ ਪਰਿਵਾਸਂ ਦਦੇਯ੍ਯਾਤਿ. ਸਚੇ ਸਦ੍ਧਿਵਿਹਾਰਿਕੋ ਮੂਲਾਯ ਪਟਿਕਸ੍ਸਨਾਰਹੋ ਹੋਤਿ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਸਦ੍ਧਿਵਿਹਾਰਿਕਂ ਮੂਲਾਯ ਪਟਿਕਸ੍ਸੇਯ੍ਯਾਤਿ. ਸਚੇ ਸਦ੍ਧਿਵਿਹਾਰਿਕੋ ਮਾਨਤ੍ਤਾਰਹੋ ਹੋਤਿ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਸਦ੍ਧਿਵਿਹਾਰਿਕਸ੍ਸ ਮਾਨਤ੍ਤਂ ਦਦੇਯ੍ਯਾਤਿ. ਸਚੇ ਸਦ੍ਧਿਵਿਹਾਰਿਕੋ ਅਬ੍ਭਾਨਾਰਹੋ ਹੋਤਿ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਸਦ੍ਧਿਵਿਹਾਰਿਕਂ ਅਬ੍ਭੇਯ੍ਯਾਤਿ. ਸਚੇ ਸਙ੍ਘੋ ਸਦ੍ਧਿਵਿਹਾਰਿਕਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਸਦ੍ਧਿਵਿਹਾਰਿਕਸ੍ਸ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ. ਕਤਂ ਵਾ ਪਨਸ੍ਸ ਹੋਤਿ ਸਙ੍ਘੇਨ ਕਮ੍ਮਂ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ.

‘‘ਸਚੇ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਉਪਜ੍ਝਾਯੇਨ ਆਚਿਕ੍ਖਿਤਬ੍ਬਂ ਏਵਂ ਧੋਵੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਧੋਵਿਯੇਥਾਤਿ. ਸਚੇ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਉਪਜ੍ਝਾਯੇਨ ਆਚਿਕ੍ਖਿਤਬ੍ਬਂ ਏਵਂ ਕਰੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਕਰਿਯੇਥਾਤਿ. ਸਚੇ ਸਦ੍ਧਿਵਿਹਾਰਿਕਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਉਪਜ੍ਝਾਯੇਨ ਆਚਿਕ੍ਖਿਤਬ੍ਬਂ ਏਵਂ ਪਚੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਰਜਨਂ ਪਚਿਯੇਥਾਤਿ. ਸਚੇ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਰਜਿਤਬ੍ਬਂ ਹੋਤਿ, ਉਪਜ੍ਝਾਯੇਨ ਆਚਿਕ੍ਖਿਤਬ੍ਬਂ, ਏਵਂ ਰਜੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਰਜਿਯੇਥਾਤਿ. ਚੀਵਰਂ ਰਜਨ੍ਤੇਨ ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ. ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ. ਸਚੇ ਸਦ੍ਧਿਵਿਹਾਰਿਕੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬ’’ਨ੍ਤਿ.

ਸਦ੍ਧਿਵਿਹਾਰਿਕਵਤ੍ਤਂ ਨਿਟ੍ਠਿਤਂ.

੧੭. ਪਣਾਮਿਤਕਥਾ

੬੮. ਤੇਨ ਖੋ ਪਨ ਸਮਯੇਨ ਸਦ੍ਧਿਵਿਹਾਰਿਕਾ ਉਪਜ੍ਝਾਯੇਸੁ ਨ ਸਮ੍ਮਾ ਵਤ੍ਤਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਦ੍ਧਿਵਿਹਾਰਿਕਾ ਉਪਜ੍ਝਾਯੇਸੁ ਨ ਸਮ੍ਮਾ ਵਤ੍ਤਿਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਸਦ੍ਧਿਵਿਹਾਰਿਕਾ ਉਪਜ੍ਝਾਯੇਸੁ ਨ ਸਮ੍ਮਾ ਵਤ੍ਤਨ੍ਤੀਤਿ? ਸਚ੍ਚਂ ਭਗਵਾਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਸਦ੍ਧਿਵਿਹਾਰਿਕਾ ਉਪਜ੍ਝਾਯੇਸੁ ਨ ਸਮ੍ਮਾ ਵਤ੍ਤਿਸ੍ਸਨ੍ਤੀਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਸਦ੍ਧਿਵਿਹਾਰਿਕੇਨ ਉਪਜ੍ਝਾਯਮ੍ਹਿ ਨ ਸਮ੍ਮਾ ਵਤ੍ਤਿਤਬ੍ਬਂ. ਯੋ ਨ ਸਮ੍ਮਾ ਵਤ੍ਤੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ. ਨੇਵ ਸਮ੍ਮਾ ਵਤ੍ਤਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਸਮ੍ਮਾਵਤ੍ਤਨ੍ਤਂ ਪਣਾਮੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਪਣਾਮੇਤਬ੍ਬੋ – ‘‘ਪਣਾਮੇਮਿ ਤ’’ਨ੍ਤਿ ਵਾ, ‘‘ਮਾਯਿਧ ਪਟਿਕ੍ਕਮੀ’’ਤਿ ਵਾ, ‘‘ਨੀਹਰ ਤੇ ਪਤ੍ਤਚੀਵਰ’’ਨ੍ਤਿ ਵਾ, ‘‘ਨਾਹਂ ਤਯਾ ਉਪਟ੍ਠਾਤਬ੍ਬੋ’’ਤਿ ਵਾ, ਕਾਯੇਨ ਵਿਞ੍ਞਾਪੇਤਿ, ਵਾਚਾਯ ਵਿਞ੍ਞਾਪੇਤਿ, ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਪਣਾਮਿਤੋ ਹੋਤਿ ਸਦ੍ਧਿਵਿਹਾਰਿਕੋ; ਨ ਕਾਯੇਨ ਵਿਞ੍ਞਾਪੇਤਿ, ਨ ਵਾਚਾਯ ਵਿਞ੍ਞਾਪੇਤਿ, ਨ ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਨ ਪਣਾਮਿਤੋ ਹੋਤਿ ਸਦ੍ਧਿਵਿਹਾਰਿਕੋਤਿ.

ਤੇਨ ਖੋ ਪਨ ਸਮਯੇਨ ਸਦ੍ਧਿਵਿਹਾਰਿਕਾ ਪਣਾਮਿਤਾ ਨ ਖਮਾਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਖਮਾਪੇਤੁਨ੍ਤਿ. ਨੇਵ ਖਮਾਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਪਣਾਮਿਤੇਨ ਨ ਖਮਾਪੇਤਬ੍ਬੋ. ਯੋ ਨ ਖਮਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਉਪਜ੍ਝਾਯਾ ਖਮਾਪਿਯਮਾਨਾ ਨ ਖਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਖਮਿਤੁਨ੍ਤਿ. ਨੇਵ ਖਮਨ੍ਤਿ. ਸਦ੍ਧਿਵਿਹਾਰਿਕਾ ਪਕ੍ਕਮਨ੍ਤਿਪਿ ਵਿਬ੍ਭਮਨ੍ਤਿਪਿ ਤਿਤ੍ਥਿਯੇਸੁਪਿ ਸਙ੍ਕਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਖਮਾਪਿਯਮਾਨੇਨ ਨ ਖਮਿਤਬ੍ਬਂ. ਯੋ ਨ ਖਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਉਪਜ੍ਝਾਯਾ ਸਮ੍ਮਾਵਤ੍ਤਨ੍ਤਂ ਪਣਾਮੇਨ੍ਤਿ, ਅਸਮ੍ਮਾਵਤ੍ਤਨ੍ਤਂ ਨ ਪਣਾਮੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਮ੍ਮਾਵਤ੍ਤਨ੍ਤੋ ਪਣਾਮੇਤਬ੍ਬੋ. ਯੋ ਪਣਾਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਅਸਮ੍ਮਾਵਤ੍ਤਨ੍ਤੋ ਨ ਪਣਾਮੇਤਬ੍ਬੋ. ਯੋ ਨ ਪਣਾਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਸਦ੍ਧਿਵਿਹਾਰਿਕੋ ਪਣਾਮੇਤਬ੍ਬੋ. ਉਪਜ੍ਝਾਯਮ੍ਹਿ ਨਾਧਿਮਤ੍ਤਂ ਪੇਮਂ ਹੋਤਿ, ਨਾਧਿਮਤ੍ਤੋ ਪਸਾਦੋ ਹੋਤਿ, ਨਾਧਿਮਤ੍ਤਾ ਹਿਰੀ ਹੋਤਿ, ਨਾਧਿਮਤ੍ਤੋ ਗਾਰਵੋ ਹੋਤਿ, ਨਾਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਸਦ੍ਧਿਵਿਹਾਰਿਕੋ ਪਣਾਮੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਸਦ੍ਧਿਵਿਹਾਰਿਕੋ ਨ ਪਣਾਮੇਤਬ੍ਬੋ. ਉਪਜ੍ਝਾਯਮ੍ਹਿ ਅਧਿਮਤ੍ਤਂ ਪੇਮਂ ਹੋਤਿ, ਅਧਿਮਤ੍ਤੋ ਪਸਾਦੋ ਹੋਤਿ, ਅਧਿਮਤ੍ਤਾ ਹਿਰੀ ਹੋਤਿ, ਅਧਿਮਤ੍ਤੋ ਗਾਰਵੋ ਹੋਤਿ, ਅਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਸਦ੍ਧਿਵਿਹਾਰਿਕੋ ਨ ਪਣਾਮੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਸਦ੍ਧਿਵਿਹਾਰਿਕੋ ਅਲਂ ਪਣਾਮੇਤੁਂ. ਉਪਜ੍ਝਾਯਮ੍ਹਿ ਨਾਧਿਮਤ੍ਤਂ ਪੇਮਂ ਹੋਤਿ, ਨਾਧਿਮਤ੍ਤੋ ਪਸਾਦੋ ਹੋਤਿ, ਨਾਧਿਮਤ੍ਤਾ ਹਿਰੀ ਹੋਤਿ, ਨਾਧਿਮਤ੍ਤਾ ਗਾਰਵੋ ਹੋਤਿ, ਨਾਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਸਦ੍ਧਿਵਿਹਾਰਿਕੋ ਅਲਂ ਪਣਾਮੇਤੁਂ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਸਦ੍ਧਿਵਿਹਾਰਿਕੋ ਨਾਲਂ ਪਣਾਮੇਤੁਂ. ਉਪਜ੍ਝਾਯਮ੍ਹਿ ਅਧਿਮਤ੍ਤਂ ਪੇਮਂ ਹੋਤਿ, ਅਧਿਮਤ੍ਤੋ ਪਸਾਦੋ ਹੋਤਿ, ਅਧਿਮਤ੍ਤਾ ਹਿਰੀ ਹੋਤਿ, ਅਧਿਮਤ੍ਤੋ ਗਾਰਵੋ ਹੋਤਿ, ਅਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਸਦ੍ਧਿਵਿਹਾਰਿਕੋ ਨਾਲਂ ਪਣਾਮੇਤੁਂ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਸਦ੍ਧਿਵਿਹਾਰਿਕਂ ਅਪ੍ਪਣਾਮੇਨ੍ਤੋ ਉਪਜ੍ਝਾਯੋ ਸਾਤਿਸਾਰੋ ਹੋਤਿ, ਪਣਾਮੇਨ੍ਤੋ ਅਨਤਿਸਾਰੋ ਹੋਤਿ. ਉਪਜ੍ਝਾਯਮ੍ਹਿ ਨਾਧਿਮਤ੍ਤਂ ਪੇਮਂ ਹੋਤਿ, ਨਾਧਿਮਤ੍ਤੋ ਪਸਾਦੋ ਹੋਤਿ, ਨਾਧਿਮਤ੍ਤਾ ਹਿਰੀ ਹੋਤਿ, ਨਾਧਿਮਤ੍ਤੋ ਗਾਰਵੋ ਹੋਤਿ, ਨਾਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਸਦ੍ਧਿਵਿਹਾਰਿਕਂ ਅਪ੍ਪਣਾਮੇਨ੍ਤੋ ਉਪਜ੍ਝਾਯੋ ਸਾਤਿਸਾਰੋ ਹੋਤਿ, ਪਣਾਮੇਨ੍ਤੋ ਅਨਤਿਸਾਰੋ ਹੋਤਿ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਸਦ੍ਧਿਵਿਹਾਰਿਕਂ ਪਣਾਮੇਨ੍ਤੋ ਉਪਜ੍ਝਾਯੋ ਸਾਤਿਸਾਰੋ ਹੋਤਿ, ਅਪ੍ਪਣਾਮੇਨ੍ਤੋ ਅਨਤਿਸਾਰੋ ਹੋਤਿ. ਉਪਜ੍ਝਾਯਮ੍ਹਿ ਅਧਿਮਤ੍ਤਂ ਪੇਮਂ ਹੋਤਿ, ਅਧਿਮਤ੍ਤੋ ਪਸਾਦੋ ਹੋਤਿ, ਅਧਿਮਤ੍ਤਾ ਹਿਰੀ ਹੋਤਿ, ਅਧਿਮਤ੍ਤੋ ਗਾਰਵੋ ਹੋਤਿ, ਅਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਸਦ੍ਧਿਵਿਹਾਰਿਕਂ ਪਣਾਮੇਨ੍ਤੋ ਉਪਜ੍ਝਾਯੋ ਸਾਤਿਸਾਰੋ ਹੋਤਿ, ਅਪ੍ਪਣਾਮੇਨ੍ਤੋ ਅਨਤਿਸਾਰੋ ਹੋਤੀ’’ਤਿ.

੬੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਬ੍ਰਾਹ੍ਮਣੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਂ ਭਿਕ੍ਖੂ ਨ ਇਚ੍ਛਿਂਸੁ ਪਬ੍ਬਾਜੇਤੁਂ. ਸੋ ਭਿਕ੍ਖੂਸੁ ਪਬ੍ਬਜ੍ਜਂ ਅਲਭਮਾਨੋ ਕਿਸੋ ਅਹੋਸਿ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ. ਅਦ੍ਦਸਾ ਖੋ ਭਗਵਾ ਤਂ ਬ੍ਰਾਹ੍ਮਣਂ ਕਿਸਂ ਲੂਖਂ ਦੁਬ੍ਬਣ੍ਣਂ ਉਪ੍ਪਣ੍ਡੁਪ੍ਪਣ੍ਡੁਕਜਾਤਂ ਧਮਨਿਸਨ੍ਥਤਗਤ੍ਤਂ, ਦਿਸ੍ਵਾਨ ਭਿਕ੍ਖੂ ਆਮਨ੍ਤੇਸਿ – ‘‘ਕਿਂ ਨੁ ਖੋ ਸੋ, ਭਿਕ੍ਖਵੇ, ਬ੍ਰਾਹ੍ਮਣੋ ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ’’ਤਿ? ਏਸੋ, ਭਨ੍ਤੇ, ਬ੍ਰਾਹ੍ਮਣੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਂ ਭਿਕ੍ਖੂ ਨ ਇਚ੍ਛਿਂਸੁ ਪਬ੍ਬਾਜੇਤੁਂ. ਸੋ ਭਿਕ੍ਖੂਸੁ ਪਬ੍ਬਜ੍ਜਂ ਅਲਭਮਾਨੋ ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋਤਿ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਕੋ ਨੁ ਖੋ, ਭਿਕ੍ਖਵੇ, ਤਸ੍ਸ ਬ੍ਰਾਹ੍ਮਣਸ੍ਸ ਅਧਿਕਾਰਂ ਸਰਸੀ’’ਤਿ? ਏਵਂ ਵੁਤ੍ਤੇ ਆਯਸ੍ਮਾ ਸਾਰਿਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਅਹਂ ਖੋ, ਭਨ੍ਤੇ, ਤਸ੍ਸ ਬ੍ਰਾਹ੍ਮਣਸ੍ਸ ਅਧਿਕਾਰਂ ਸਰਾਮੀ’’ਤਿ. ‘‘ਕਿਂ ਪਨ ਤ੍ਵਂ, ਸਾਰਿਪੁਤ੍ਤ, ਤਸ੍ਸ ਬ੍ਰਾਹ੍ਮਣਸ੍ਸ ਅਧਿਕਾਰਂ ਸਰਸੀ’’ਤਿ? ‘‘ਇਧ ਮੇ, ਭਨ੍ਤੇ, ਸੋ ਬ੍ਰਾਹ੍ਮਣੋ ਰਾਜਗਹੇ ਪਿਣ੍ਡਾਯ ਚਰਨ੍ਤਸ੍ਸ ਕਟਚ੍ਛੁਭਿਕ੍ਖਂ ਦਾਪੇਸਿ. ਇਮਂ ਖੋ ਅਹਂ, ਭਨ੍ਤੇ, ਤਸ੍ਸ ਬ੍ਰਾਹ੍ਮਣਸ੍ਸ ਅਧਿਕਾਰਂ ਸਰਾਮੀ’’ਤਿ. ‘‘ਸਾਧੁ ਸਾਧੁ, ਸਾਰਿਪੁਤ੍ਤ, ਕਤਞ੍ਞੁਨੋ ਹਿ, ਸਾਰਿਪੁਤ੍ਤ, ਸਪ੍ਪੁਰਿਸਾ ਕਤਵੇਦਿਨੋ. ਤੇਨ ਹਿ ਤ੍ਵਂ, ਸਾਰਿਪੁਤ੍ਤ, ਤਂ ਬ੍ਰਾਹ੍ਮਣਂ ਪਬ੍ਬਾਜੇਹਿ ਉਪਸਮ੍ਪਾਦੇਹੀ’’ਤਿ. ‘‘ਕਥਾਹਂ, ਭਨ੍ਤੇ, ਤਂ ਬ੍ਰਾਹ੍ਮਣਂ ਪਬ੍ਬਾਜੇਮਿ ਉਪਸਮ੍ਪਾਦੇਮੀ’’ਤਿ? ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ਯਾ ਸਾ, ਭਿਕ੍ਖਵੇ, ਮਯਾ ਤੀਹਿ ਸਰਣਗਮਨੇਹਿ ਉਪਸਮ੍ਪਦਾ ਅਨੁਞ੍ਞਾਤਾ, ਤਂ ਅਜ੍ਜਤਗ੍ਗੇ ਪਟਿਕ੍ਖਿਪਾਮਿ. ਅਨੁਜਾਨਾਮਿ, ਭਿਕ੍ਖਵੇ, ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਉਪਸਮ੍ਪਾਦੇਤੁਂ [ਉਪਸਮ੍ਪਦਂ (ਸੀ. ਸ੍ਯਾ.)]. ਏਵਞ੍ਚ ਪਨ, ਭਿਕ੍ਖਵੇ, ਉਪਸਮ੍ਪਾਦੇਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੭੦. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਉਪਸਮ੍ਪਨ੍ਨੋ ਸਙ੍ਘੇਨ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੭੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਉਪਸਮ੍ਪਨ੍ਨਸਮਨਨ੍ਤਰਾ ਅਨਾਚਾਰਂ ਆਚਰਤਿ. ਭਿਕ੍ਖੂ ਏਵਮਾਹਂਸੁ – ‘‘ਮਾਵੁਸੋ, ਏਵਰੂਪਂ ਅਕਾਸਿ, ਨੇਤਂ ਕਪ੍ਪਤੀ’’ਤਿ. ਸੋ ਏਵਮਾਹ – ‘‘ਨੇਵਾਹਂ ਆਯਸ੍ਮਨ੍ਤੇ ਯਾਚਿਂ ਉਪਸਮ੍ਪਾਦੇਥ ਮਨ੍ਤਿ. ਕਿਸ੍ਸ ਮਂ ਤੁਮ੍ਹੇ ਅਯਾਚਿਤਾ ਉਪਸਮ੍ਪਾਦਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਯਾਚਿਤੇਨ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਯਾਚਿਤੇਨ ਉਪਸਮ੍ਪਾਦੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਯਾਚਿਤਬ੍ਬੋ. ਤੇਨ ਉਪਸਮ੍ਪਦਾਪੇਕ੍ਖੇਨ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਸਙ੍ਘਂ, ਭਨ੍ਤੇ, ਉਪਸਮ੍ਪਦਂ ਯਾਚਾਮਿ, ਉਲ੍ਲੁਮ੍ਪਤੁ ਮਂ, ਭਨ੍ਤੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯਾ’’ਤਿ. ਦੁਤਿਯਮ੍ਪਿ ਯਾਚਿਤਬ੍ਬੋ. ਤਤਿਯਮ੍ਪਿ ਯਾਚਿਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੭੨. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ….

‘‘ਉਪਸਮ੍ਪਨ੍ਨੋ ਸਙ੍ਘੇਨ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੭੩. ਤੇਨ ਖੋ ਪਨ ਸਮਯੇਨ ਰਾਜਗਹੇ ਪਣੀਤਾਨਂ ਭਤ੍ਤਾਨਂ ਭਤ੍ਤਪਟਿਪਾਟਿ ਅਟ੍ਠਿਤਾ [ਅਧਿਟ੍ਠਿਤਾ (ਕ.)] ਹੋਤਿ. ਅਥ ਖੋ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਸੁਖਸੀਲਾ ਸੁਖਸਮਾਚਾਰਾ, ਸੁਭੋਜਨਾਨਿ ਭੁਞ੍ਜਿਤ੍ਵਾ ਨਿਵਾਤੇਸੁ ਸਯਨੇਸੁ ਸਯਨ੍ਤਿ. ਯਂਨੂਨਾਹਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯ’’ਨ੍ਤਿ. ਅਥ ਖੋ ਸੋ ਬ੍ਰਾਹ੍ਮਣੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਂ ਭਿਕ੍ਖੂ ਪਬ੍ਬਾਜੇਸੁਂ ਉਪਸਮ੍ਪਾਦੇਸੁਂ. ਤਸ੍ਮਿਂ ਪਬ੍ਬਜਿਤੇ ਭਤ੍ਤਪਟਿਪਾਟਿ ਖੀਯਿਤ੍ਥ. ਭਿਕ੍ਖੂ ਏਵਮਾਹਂਸੁ – ‘‘ਏਹਿ ਦਾਨਿ, ਆਵੁਸੋ, ਪਿਣ੍ਡਾਯ ਚਰਿਸ੍ਸਾਮਾ’’ਤਿ. ਸੋ ਏਵਮਾਹ – ‘‘ਨਾਹਂ, ਆਵੁਸੋ, ਏਤਂਕਾਰਣਾ ਪਬ੍ਬਜਿਤੋ ਪਿਣ੍ਡਾਯ ਚਰਿਸ੍ਸਾਮੀਤਿ. ਸਚੇ ਮੇ ਦਸ੍ਸਥ ਭੁਞ੍ਜਿਸ੍ਸਾਮਿ, ਨੋ ਚੇ ਮੇ ਦਸ੍ਸਥ ਵਿਬ੍ਭਮਿਸ੍ਸਾਮੀ’’ਤਿ. ‘‘ਕਿਂ ਪਨ ਤ੍ਵਂ, ਆਵੁਸੋ, ਉਦਰਸ੍ਸ ਕਾਰਣਾ ਪਬ੍ਬਜਿਤੋ’’ਤਿ? ‘‘ਏਵਮਾਵੁਸੋ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਕਥਞ੍ਹਿ ਨਾਮ ਭਿਕ੍ਖੁ ਏਵਂ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਉਦਰਸ੍ਸ ਕਾਰਣਾ ਪਬ੍ਬਜਿਸ੍ਸਤੀਤਿ. ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਉਦਰਸ੍ਸ ਕਾਰਣਾ ਪਬ੍ਬਜਿਤੋਤਿ? ਸਚ੍ਚਂ ਭਗਵਾਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਏਵਂ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਉਦਰਸ੍ਸ ਕਾਰਣਾ ਪਬ੍ਬਜਿਸ੍ਸਸਿ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ’’…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਉਪਸਮ੍ਪਾਦੇਨ੍ਤੇਨ ਚਤ੍ਤਾਰੋ ਨਿਸ੍ਸਯੇ ਆਚਿਕ੍ਖਿਤੁਂ – ਪਿਣ੍ਡਿਯਾਲੋਪਭੋਜਨਂ ਨਿਸ੍ਸਾਯ ਪਬ੍ਬਜ੍ਜਾ, ਤਤ੍ਥ ਤੇ ਯਾਵਜੀਵਂ ਉਸ੍ਸਾਹੋ ਕਰਣੀਯੋ; ਅਤਿਰੇਕਲਾਭੋ – ਸਙ੍ਘਭਤ੍ਤਂ, ਉਦ੍ਦੇਸਭਤ੍ਤਂ, ਨਿਮਨ੍ਤਨਂ, ਸਲਾਕਭਤ੍ਤਂ, ਪਕ੍ਖਿਕਂ, ਉਪੋਸਥਿਕਂ, ਪਾਟਿਪਦਿਕਂ. ਪਂਸੁਕੂਲਚੀਵਰਂ ਨਿਸ੍ਸਾਯ ਪਬ੍ਬਜ੍ਜਾ, ਤਤ੍ਥ ਤੇ ਯਾਵਜੀਵਂ ਉਸ੍ਸਾਹੋ ਕਰਣੀਯੋ; ਅਤਿਰੇਕਲਾਭੋ – ਖੋਮਂ, ਕਪ੍ਪਾਸਿਕਂ, ਕੋਸੇਯ੍ਯਂ, ਕਮ੍ਬਲਂ, ਸਾਣਂ, ਭਙ੍ਗਂ. ਰੁਕ੍ਖਮੂਲਸੇਨਾਸਨਂ ਨਿਸ੍ਸਾਯ ਪਬ੍ਬਜ੍ਜਾ, ਤਤ੍ਥ ਤੇ ਯਾਵਜੀਵਂ ਉਸ੍ਸਾਹੋ ਕਰਣੀਯੋ; ਅਤਿਰੇਕਲਾਭੋ – ਵਿਹਾਰੋ, ਅਡ੍ਢਯੋਗੋ, ਪਾਸਾਦੋ, ਹਮ੍ਮਿਯਂ, ਗੁਹਾ. ਪੂਤਿਮੁਤ੍ਤਭੇਸਜ੍ਜਂ ਨਿਸ੍ਸਾਯ ਪਬ੍ਬਜ੍ਜਾ, ਤਤ੍ਥ ਤੇ ਯਾਵਜੀਵਂ ਉਸ੍ਸਾਹੋ ਕਰਣੀਯੋ; ਅਤਿਰੇਕਲਾਭੋ – ਸਪ੍ਪਿ, ਨਵਨੀਤਂ, ਤੇਲਂ, ਮਧੁ, ਫਾਣਿਤ’’ਨ੍ਤਿ.

ਪਣਾਮਿਤਕਥਾ ਨਿਟ੍ਠਿਤਾ.

ਉਪਜ੍ਝਾਯਵਤ੍ਤਭਾਣਵਾਰੋ ਨਿਟ੍ਠਿਤੋ ਪਞ੍ਚਮੋ.

ਪਞ੍ਚਮਭਾਣਵਾਰੋ

੧੮. ਆਚਰਿਯਵਤ੍ਤਕਥਾ

੭੪. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਮਾਣਵਕੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਸ੍ਸ ਭਿਕ੍ਖੂ ਪਟਿਕਚ੍ਚੇਵ ਨਿਸ੍ਸਯੇ ਆਚਿਕ੍ਖਿਂਸੁ. ਸੋ ਏਵਮਾਹ – ‘‘ਸਚੇ ਮੇ, ਭਨ੍ਤੇ, ਪਬ੍ਬਜਿਤੇ ਨਿਸ੍ਸਯੇ ਆਚਿਕ੍ਖੇਯ੍ਯਾਥ, ਅਭਿਰਮੇਯ੍ਯਾਮਹਂ [ਅਭਿਰਮੇਯ੍ਯਞ੍ਚਾਹਂ (ਸੀ.), ਅਭਿਰਮੇਯ੍ਯਂ ਸ੍ਵਾਹਂ (ਕ.)]. ਨ ਦਾਨਾਹਂ, ਭਨ੍ਤੇ, ਪਬ੍ਬਜਿਸ੍ਸਾਮਿ; ਜੇਗੁਚ੍ਛਾ ਮੇ ਨਿਸ੍ਸਯਾ ਪਟਿਕੂਲਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਪਟਿਕਚ੍ਚੇਵ ਨਿਸ੍ਸਯਾ ਆਚਿਕ੍ਖਿਤਬ੍ਬਾ. ਯੋ ਆਚਿਕ੍ਖੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਉਪਸਮ੍ਪਨ੍ਨਸਮਨਨ੍ਤਰਾ ਨਿਸ੍ਸਯੇ ਆਚਿਕ੍ਖਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਦੁਵਗ੍ਗੇਨਪਿ ਤਿਵਗ੍ਗੇਨਪਿ ਗਣੇਨ ਉਪਸਮ੍ਪਾਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਊਨਦਸਵਗ੍ਗੇਨ ਗਣੇਨ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਦਸਵਗ੍ਗੇਨ ਵਾ ਅਤਿਰੇਕਦਸਵਗ੍ਗੇਨ ਵਾ ਗਣੇਨ ਉਪਸਮ੍ਪਾਦੇਤੁਨ੍ਤਿ.

੭੫. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਏਕਵਸ੍ਸਾਪਿ ਦੁਵਸ੍ਸਾਪਿ ਸਦ੍ਧਿਵਿਹਾਰਿਕਂ ਉਪਸਮ੍ਪਾਦੇਨ੍ਤਿ. ਆਯਸ੍ਮਾਪਿ ਉਪਸੇਨੋ ਵਙ੍ਗਨ੍ਤਪੁਤ੍ਤੋ ਏਕਵਸ੍ਸੋ ਸਦ੍ਧਿਵਿਹਾਰਿਕਂ ਉਪਸਮ੍ਪਾਦੇਸਿ. ਸੋ ਵਸ੍ਸਂਵੁਟ੍ਠੋ ਦੁਵਸ੍ਸੋ ਏਕਵਸ੍ਸਂ ਸਦ੍ਧਿਵਿਹਾਰਿਕਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਉਪਸੇਨਂ ਵਙ੍ਗਨ੍ਤਪੁਤ੍ਤਂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖੁ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਤ੍ਵਂ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤੋ’’ਤਿ? ‘‘ਖਮਨੀਯਂ, ਭਗਵਾ, ਯਾਪਨੀਯਂ, ਭਗਵਾ. ਅਪ੍ਪਕਿਲਮਥੇਨ ਮਯਂ, ਭਨ੍ਤੇ, ਅਦ੍ਧਾਨਂ ਆਗਤਾ’’ਤਿ. ਜਾਨਨ੍ਤਾਪਿ ਤਥਾਗਤਾ ਪੁਚ੍ਛਨ੍ਤਿ, ਜਾਨਨ੍ਤਾਪਿ ਨ ਪੁਚ੍ਛਨ੍ਤਿ, ਕਾਲਂ ਵਿਦਿਤ੍ਵਾ ਪੁਚ੍ਛਨ੍ਤਿ, ਕਾਲਂ ਵਿਦਿਤ੍ਵਾ ਨ ਪੁਚ੍ਛਨ੍ਤਿ; ਅਤ੍ਥਸਂਹਿਤਂ ਤਥਾਗਤਾ ਪੁਚ੍ਛਨ੍ਤਿ; ਨੋ ਅਨਤ੍ਥਸਂਹਿਤਂ. ਅਨਤ੍ਥਸਂਹਿਤੇ ਸੇਤੁਘਾਤੋ ਤਥਾਗਤਾਨਂ. ਦ੍ਵੀਹਿ ਆਕਾਰੇਹਿ ਬੁਦ੍ਧਾ ਭਗਵਨ੍ਤੋ ਭਿਕ੍ਖੂ ਪਟਿਪੁਚ੍ਛਨ੍ਤਿ – ਧਮ੍ਮਂ ਵਾ ਦੇਸੇਸ੍ਸਾਮ, ਸਾਵਕਾਨਂ ਵਾ ਸਿਕ੍ਖਾਪਦਂ ਪਞ੍ਞਪੇਸ੍ਸਾਮਾਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਉਪਸੇਨਂ ਵਙ੍ਗਨ੍ਤਪੁਤ੍ਤਂ ਏਤਦਵੋਚ – ‘‘ਕਤਿਵਸ੍ਸੋਸਿ ਤ੍ਵਂ, ਭਿਕ੍ਖੂ’’ਤਿ? ‘‘ਦੁਵਸ੍ਸੋਹਂ, ਭਗਵਾ’’ਤਿ. ‘‘ਅਯਂ ਪਨ ਭਿਕ੍ਖੁ ਕਤਿਵਸ੍ਸੋ’’ਤਿ? ‘‘ਏਕਵਸ੍ਸੋ, ਭਗਵਾ’’ਤਿ. ‘‘ਕਿਂ ਤਾਯਂ ਭਿਕ੍ਖੁ ਹੋਤੀ’’ਤਿ? ‘‘ਸਦ੍ਧਿਵਿਹਾਰਿਕੋ ਮੇ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਅਞ੍ਞੇਹਿ ਓਵਦਿਯੋ ਅਨੁਸਾਸਿਯੋ ਅਞ੍ਞਂ ਓਵਦਿਤੁਂ ਅਨੁਸਾਸਿਤੁਂ ਮਞ੍ਞਿਸ੍ਸਸਿ. ਅਤਿਲਹੁਂ ਖੋ ਤ੍ਵਂ, ਮੋਘਪੁਰਿਸ, ਬਾਹੁਲ੍ਲਾਯ ਆਵਤ੍ਤੋ, ਯਦਿਦਂ ਗਣਬਨ੍ਧਿਕਂ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ’’…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਊਨਦਸਵਸ੍ਸੇਨ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਦਸਵਸ੍ਸੇਨ ਵਾ ਅਤਿਰੇਕਦਸਵਸ੍ਸੇਨ ਵਾ ਉਪਸਮ੍ਪਾਦੇਤੁ’’ਨ੍ਤਿ.

੭੬. ਤੇਨ ਖੋ ਪਨ ਸਮਯੇਨ ਭਿਕ੍ਖੂ – ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾਤਿ – ਬਾਲਾ ਅਬ੍ਯਤ੍ਤਾ ਉਪਸਮ੍ਪਾਦੇਨ੍ਤਿ. ਦਿਸ੍ਸਨ੍ਤਿ ਉਪਜ੍ਝਾਯਾ ਬਾਲਾ, ਸਦ੍ਧਿਵਿਹਾਰਿਕਾ ਪਣ੍ਡਿਤਾ. ਦਿਸ੍ਸਨ੍ਤਿ ਉਪਜ੍ਝਾਯਾ ਅਬ੍ਯਤ੍ਤਾ, ਸਦ੍ਧਿਵਿਹਾਰਿਕਾ ਬ੍ਯਤ੍ਤਾ. ਦਿਸ੍ਸਨ੍ਤਿ ਉਪਜ੍ਝਾਯਾ ਅਪ੍ਪਸ੍ਸੁਤਾ, ਸਦ੍ਧਿਵਿਹਾਰਿਕਾ ਬਹੁਸ੍ਸੁਤਾ. ਦਿਸ੍ਸਨ੍ਤਿ ਉਪਜ੍ਝਾਯਾ ਦੁਪ੍ਪਞ੍ਞਾ, ਸਦ੍ਧਿਵਿਹਾਰਿਕਾ ਪਞ੍ਞਵਨ੍ਤੋ. ਅਞ੍ਞਤਰੋਪਿ ਅਞ੍ਞਤਿਤ੍ਥਿਯਪੁਬ੍ਬੋ ਉਪਜ੍ਝਾਯੇਨ ਸਹਧਮ੍ਮਿਕਂ ਵੁਚ੍ਚਮਾਨੋ ਉਪਜ੍ਝਾਯਸ੍ਸ ਵਾਦਂ ਆਰੋਪੇਤ੍ਵਾ ਤਂਯੇਵ ਤਿਤ੍ਥਾਯਤਨਂ ਸਙ੍ਕਮਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਕਥਞ੍ਹਿ ਨਾਮ ਭਿਕ੍ਖੂ – ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾਤਿ – ਬਾਲਾ ਅਬ੍ਯਤ੍ਤਾ ਉਪਸਮ੍ਪਾਦੇਸ੍ਸਨ੍ਤਿ. ਦਿਸ੍ਸਨ੍ਤਿ ਉਪਜ੍ਝਾਯਾ ਬਾਲਾ ਸਦ੍ਧਿਵਿਹਾਰਿਕਾ ਪਣ੍ਡਿਤਾ, ਦਿਸ੍ਸਨ੍ਤਿ ਉਪਜ੍ਝਾਯਾ ਅਬ੍ਯਤ੍ਤਾ ਸਦ੍ਧਿਵਿਹਾਰਿਕਾ ਬ੍ਯਤ੍ਤਾ, ਦਿਸ੍ਸਨ੍ਤਿ ਉਪਜ੍ਝਾਯਾ ਅਪ੍ਪਸ੍ਸੁਤਾ ਸਦ੍ਧਿਵਿਹਾਰਿਕਾ ਬਹੁਸ੍ਸੁਤਾ, ਦਿਸ੍ਸਨ੍ਤਿ ਉਪਜ੍ਝਾਯਾ ਦੁਪ੍ਪਞ੍ਞਾ, ਸਦ੍ਧਿਵਿਹਾਰਿਕਾ ਪਞ੍ਞਵਨ੍ਤੋਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ – ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾਤਿ – ਬਾਲਾ ਅਬ੍ਯਤ੍ਤਾ ਉਪਸਮ੍ਪਾਦੇਨ੍ਤਿ. ਦਿਸ੍ਸਨ੍ਤਿ ਉਪਜ੍ਝਾਯਾ ਬਾਲਾ, ਸਦ੍ਧਿਵਿਹਾਰਿਕਾ ਪਣ੍ਡਿਤਾ, ਦਿਸ੍ਸਨ੍ਤਿ ਉਪਜ੍ਝਾਯਾ ਅਬ੍ਯਤ੍ਤਾ ਸਦ੍ਧਿਵਿਹਾਰਿਕਾ ਬ੍ਯਤ੍ਤਾ, ਦਿਸ੍ਸਨ੍ਤਿ ਉਪਜ੍ਝਾਯਾ ਅਪ੍ਪਸ੍ਸੁਤਾ, ਸਦ੍ਧਿਵਿਹਾਰਿਕਾ ਬਹੁਸ੍ਸੁਤਾ, ਦਿਸ੍ਸਨ੍ਤਿ ਉਪਜ੍ਝਾਯਾ ਦੁਪ੍ਪਞ੍ਞਾ, ਸਦ੍ਧਿਵਿਹਾਰਿਕਾ ਪਞ੍ਞਵਨ੍ਤੋ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ – ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾਤਿ – ਬਾਲਾ ਅਬ੍ਯਤ੍ਤਾ ਉਪਸਮ੍ਪਾਦੇਸ੍ਸਨ੍ਤਿ. ਦਿਸ੍ਸਨ੍ਤਿ ਉਪਜ੍ਝਾਯਾ ਬਾਲਾ, ਸਦ੍ਧਿਵਿਹਾਰਿਕਾ ਪਣ੍ਡਿਤਾ, ਦਿਸ੍ਸਨ੍ਤਿ ਉਪਜ੍ਝਾਯਾ ਅਬ੍ਯਤ੍ਤਾ ਸਦ੍ਧਿਵਿਹਾਰਿਕਾ ਬ੍ਯਤ੍ਤਾ, ਦਿਸ੍ਸਨ੍ਤਿ ਉਪਜ੍ਝਾਯਾ ਅਪ੍ਪਸ੍ਸੁਤਾ, ਸਦ੍ਧਿਵਿਹਾਰਿਕਾ ਬਹੁਸ੍ਸੁਤਾ, ਦਿਸ੍ਸਨ੍ਤਿ ਉਪਜ੍ਝਾਯਾ ਦੁਪ੍ਪਞ੍ਞਾ, ਸਦ੍ਧਿਵਿਹਾਰਿਕਾ ਪਞ੍ਞਵਨ੍ਤੋ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਬਾਲੇਨ ਅਬ੍ਯਤ੍ਤੇਨ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਦਸਵਸ੍ਸੇਨ ਵਾ ਅਤਿਰੇਕਦਸਵਸ੍ਸੇਨ ਵਾ ਉਪਸਮ੍ਪਾਦੇਤੁ’’ਨ੍ਤਿ.

੭੭. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਉਪਜ੍ਝਾਯੇਸੁ ਪਕ੍ਕਨ੍ਤੇਸੁਪਿ ਵਿਬ੍ਭਨ੍ਤੇਸੁਪਿ ਕਾਲਙ੍ਕਤੇਸੁਪਿ ਪਕ੍ਖਸਙ੍ਕਨ੍ਤੇਸੁਪਿ ਅਨਾਚਰਿਯਕਾ ਅਨੋਵਦਿਯਮਾਨਾ ਅਨਨੁਸਾਸਿਯਮਾਨਾ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਨ੍ਤਿ, ਮਨੁਸ੍ਸਾਨਂ ਭੁਞ੍ਜਮਾਨਾਨਂ ਉਪਰਿਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਖਾਦਨੀਯੇਪਿ – ਉਪਰਿਸਾਯਨੀਯੇਪਿ – ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ; ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤਿ; ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਸ੍ਸਨ੍ਤਿ; ਮਨੁਸ੍ਸਾਨਂ ਭੁਞ੍ਜਮਾਨਾਨਂ ਉਪਰਿਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਖਾਦਨੀਯੇਪਿ – ਉਪਰਿਸਾਯਨੀਯੇਪਿ – ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ; ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਿਸ੍ਸਨ੍ਤਿ; ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਿਸ੍ਸਨ੍ਤਿ, ਸੇਯ੍ਯਥਾਪਿ ਬ੍ਰਾਹ੍ਮਣਾ ਬ੍ਰਾਹ੍ਮਣਭੋਜਨੇ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ …ਪੇ… ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਸਚ੍ਚਂ ਕਿਰ, ਭਿਕ੍ਖਵੇ…ਪੇ… ਸਚ੍ਚਂ, ਭਗਵਾਤਿ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

‘‘ਅਨੁਜਾਨਾਮਿ, ਭਿਕ੍ਖਵੇ, ਆਚਰਿਯਂ. ਆਚਰਿਯੋ, ਭਿਕ੍ਖਵੇ, ਅਨ੍ਤੇਵਾਸਿਕਮ੍ਹਿ ਪੁਤ੍ਤਚਿਤ੍ਤਂ ਉਪਟ੍ਠਾਪੇਸ੍ਸਤਿ, ਅਨ੍ਤੇਵਾਸਿਕੋ ਆਚਰਿਯਮ੍ਹਿ ਪਿਤੁਚਿਤ੍ਤਂ ਉਪਟ੍ਠਾਪੇਸ੍ਸਤਿ. ਏਵਂ ਤੇ ਅਞ੍ਞਮਞ੍ਞਂ ਸਗਾਰਵਾ ਸਪ੍ਪਤਿਸ੍ਸਾ ਸਭਾਗਵੁਤ੍ਤਿਨੋ ਵਿਹਰਨ੍ਤਾ ਇਮਸ੍ਮਿਂ ਧਮ੍ਮਵਿਨਯੇ ਵੁਦ੍ਧਿਂ ਵਿਰੁਲ਼੍ਹਿਂ ਵੇਪੁਲ੍ਲਂ ਆਪਜ੍ਜਿਸ੍ਸਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਦਸਵਸ੍ਸਂ ਨਿਸ੍ਸਾਯ ਵਤ੍ਥੁਂ, ਦਸਵਸ੍ਸੇਨ ਨਿਸ੍ਸਯਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਆਚਰਿਯੋ ਗਹੇਤਬ੍ਬੋ. ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਆਚਰਿਯੋ ਮੇ, ਭਨ੍ਤੇ, ਹੋਹਿ, ਆਯਸ੍ਮਤੋ ਨਿਸ੍ਸਾਯ ਵਚ੍ਛਾਮਿ; ਆਚਰਿਯੋ ਮੇ, ਭਨ੍ਤੇ, ਹੋਹਿ, ਆਯਸ੍ਮਤੋ ਨਿਸ੍ਸਾਯ ਵਚ੍ਛਾਮਿ; ਆਚਰਿਯੋ ਮੇ, ਭਨ੍ਤੇ, ਹੋਹਿ, ਆਯਸ੍ਮਤੋ ਨਿਸ੍ਸਾਯ ਵਚ੍ਛਾਮੀ’ਤਿ. ‘ਸਾਹੂਤਿ’ ਵਾ ‘ਲਹੂਤਿ’ ਵਾ ‘ਓਪਾਯਿਕ’ਨ੍ਤਿ ਵਾ ‘ਪਤਿਰੂਪ’ਨ੍ਤਿ ਵਾ ‘ਪਾਸਾਦਿਕੇਨ ਸਮ੍ਪਾਦੇਹੀ’ਤਿ ਵਾ ਕਾਯੇਨ ਵਿਞ੍ਞਾਪੇਤਿ, ਵਾਚਾਯ ਵਿਞ੍ਞਾਪੇਤਿ, ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਗਹਿਤੋ ਹੋਤਿ ਆਚਰਿਯੋ; ਨ ਕਾਯੇਨ ਵਿਞ੍ਞਾਪੇਤਿ, ਨ ਵਾਚਾਯ ਵਿਞ੍ਞਾਪੇਤਿ, ਨ ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਨ ਗਹਿਤੋ ਹੋਤਿ ਆਚਰਿਯੋ.

੭੮. [ਚੂਲ਼ਵ. ੩੮੦ ਆਦਯੋ] ‘‘ਅਨ੍ਤੇਵਾਸਿਕੇਨ, ਭਿਕ੍ਖਵੇ, ਆਚਰਿਯਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ –

‘‘ਕਾਲਸ੍ਸੇਵ ਉਟ੍ਠਾਯ ਉਪਾਹਨਂ ਓਮੁਞ੍ਚਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ. ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਆਚਰਿਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਆਚਰਿਯੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ ਦਾਤਬ੍ਬੋ. ਸਚੇ ਆਚਰਿਯੋ ਪਚ੍ਛਾਸਮਣਂ ਆਕਙ੍ਖਤਿ, ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਆਚਰਿਯਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ. ਨਾਤਿਦੂਰੇ ਗਨ੍ਤਬ੍ਬਂ, ਨਾਚ੍ਚਾਸਨ੍ਨੇ ਗਨ੍ਤਬ੍ਬਂ, ਪਤ੍ਤਪਰਿਯਾਪਨ੍ਨਂ ਪਟਿਗ੍ਗਹੇਤਬ੍ਬਂ. ਨ ਆਚਰਿਯਸ੍ਸ ਭਣਮਾਨਸ੍ਸ ਅਨ੍ਤਰਨ੍ਤਰਾ ਕਥਾ ਓਪਾਤੇਤਬ੍ਬਾ. ਆਚਰਿਯੋ ਆਪਤ੍ਤਿਸਾਮਨ੍ਤਾ ਭਣਮਾਨੋ ਨਿਵਾਰੇਤਬ੍ਬੋ.

‘‘ਨਿਵਤ੍ਤਨ੍ਤੇਨ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਟਿਨਿਵਾਸਨਂ ਦਾਤਬ੍ਬਂ, ਨਿਵਾਸਨਂ ਪਟਿਗ੍ਗਹੇਤਬ੍ਬਂ. ਸਚੇ ਚੀਵਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬਂ. ਚੀਵਰਂ ਸਙ੍ਘਰਿਤਬ੍ਬਂ. ਚੀਵਰਂ ਸਙ੍ਘਰਨ੍ਤੇਨ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਂ ਸਙ੍ਘਰਿਤਬ੍ਬਂ – ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ. ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਂ.

‘‘ਸਚੇ ਪਿਣ੍ਡਪਾਤੋ ਹੋਤਿ, ਆਚਰਿਯੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ. ਆਚਰਿਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਆਚਰਿਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਆਚਰਿਯੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

‘‘ਸਚੇ ਆਚਰਿਯੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਆਚਰਿਯਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰਂ ਪਵਿਸਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਜਨ੍ਤਾਘਰੇ ਆਚਰਿਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

‘‘ਉਦਕੇਪਿ ਆਚਰਿਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਆਚਰਿਯਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ. ਆਚਰਿਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਸਚੇ ਉਦ੍ਦਿਸਾਪੇਤੁਕਾਮੋ ਹੋਤਿ, ਉਦ੍ਦਿਸਾਪੇਤਬ੍ਬੋ. ਸਚੇ ਪਰਿਪੁਚ੍ਛਿਤੁਕਾਮੋ ਹੋਤਿ, ਪਰਿਪੁਚ੍ਛਿਤਬ੍ਬੋ.

‘‘ਯਸ੍ਮਿਂ ਵਿਹਾਰੇ ਆਚਰਿਯੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭਿਸਿਬਿਬ੍ਬੋਹਨਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ; ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭੂਮਤ੍ਥਰਣਂ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ – ਮਾ ਵਿਹਾਰੋ ਰਜੇਨ ਉਹਞ੍ਞੀਤਿ. ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

‘‘ਭੂਮਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਮਞ੍ਚਪਟਿਪਾਦਕਾ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਾ. ਮਞ੍ਚੋ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬੋ. ਪੀਠਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਭਿਸਿਬਿਬ੍ਬੋਹਨਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਨਿਸੀਦਨਪਚ੍ਚਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਖੇਲ਼ਮਲ੍ਲਕੋ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬੋ. ਅਪਸ੍ਸੇਨਫਲਕਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਂ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ.

‘‘ਸਚੇ ਪੁਰਤ੍ਥਿਮਾ ਸਰਜਾ ਵਾਤਾ ਵਾਯਨ੍ਤਿ, ਪੁਰਤ੍ਥਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਪਚ੍ਛਿਮਾ ਸਰਜਾ ਵਾਤਾ ਵਾਯਨ੍ਤਿ, ਪਚ੍ਛਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਉਤ੍ਤਰਾ ਸਰਜਾ ਵਾਤਾ ਵਾਯਨ੍ਤਿ, ਉਤ੍ਤਰਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਦਕ੍ਖਿਣਾ ਸਰਜਾ ਵਾਤਾ ਵਾਯਨ੍ਤਿ, ਦਕ੍ਖਿਣਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਸੀਤਕਾਲੋ ਹੋਤਿ, ਦਿਵਾ ਵਾਤਪਾਨਾ ਵਿਵਰਿਤਬ੍ਬਾ, ਰਤ੍ਤਿਂ ਥਕੇਤਬ੍ਬਾ. ਸਚੇ ਉਣ੍ਹਕਾਲੋ ਹੋਤਿ, ਦਿਵਾ ਵਾਤਪਾਨਾ ਥਕੇਤਬ੍ਬਾ, ਰਤ੍ਤਿਂ ਵਿਵਰਿਤਬ੍ਬਾ.

‘‘ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ. ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਉਪਟ੍ਠਾਨਸਾਲਾ ਉਕ੍ਲਾਪਾ ਹੋਤਿ, ਉਪਟ੍ਠਾਨਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਅਗ੍ਗਿਸਾਲਾ ਉਕ੍ਲਾਪਾ ਹੋਤਿ, ਅਗ੍ਗਿਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਵਚ੍ਚਕੁਟਿ ਉਕ੍ਲਾਪਾ ਹੋਤਿ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ. ਸਚੇ ਪਾਨੀਯਂ ਨ ਹੋਤਿ, ਪਾਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਪਰਿਭੋਜਨੀਯਂ ਨ ਹੋਤਿ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਆਚਮਨਕੁਮ੍ਭਿਯਂ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

‘‘ਸਚੇ ਆਚਰਿਯਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਅਨ੍ਤੇਵਾਸਿਕੇਨ ਵੂਪਕਾਸੇਤਬ੍ਬੋ, ਵੂਪਕਾਸਾਪੇਤਬ੍ਬੋ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਆਚਰਿਯਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਅਨ੍ਤੇਵਾਸਿਕੇਨ ਵਿਨੋਦੇਤਬ੍ਬਂ, ਵਿਨੋਦਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਆਚਰਿਯਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਅਨ੍ਤੇਵਾਸਿਕੇਨ ਵਿਵੇਚੇਤਬ੍ਬਂ, ਵਿਵੇਚਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਆਚਰਿਯੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਆਚਰਿਯਸ੍ਸ ਪਰਿਵਾਸਂ ਦਦੇਯ੍ਯਾਤਿ. ਸਚੇ ਆਚਰਿਯੋ ਮੂਲਾਯ ਪਟਿਕਸ੍ਸਨਾਰਹੋ ਹੋਤਿ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਆਚਰਿਯਂ ਮੂਲਾਯ ਪਟਿਕਸ੍ਸੇਯ੍ਯਾਤਿ. ਸਚੇ ਆਚਰਿਯੋ ਮਾਨਤ੍ਤਾਰਹੋ ਹੋਤਿ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਆਚਰਿਯਸ੍ਸ ਮਾਨਤ੍ਤਂ ਦਦੇਯ੍ਯਾਤਿ. ਸਚੇ ਆਚਰਿਯੋ ਅਬ੍ਭਾਨਾਰਹੋ ਹੋਤਿ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਆਚਰਿਯਂ ਅਬ੍ਭੇਯ੍ਯਾਤਿ. ਸਚੇ ਸਙ੍ਘੋ ਆਚਰਿਯਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਆਚਰਿਯਸ੍ਸ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ. ਕਤਂ ਵਾ ਪਨਸ੍ਸ ਹੋਤਿ ਸਙ੍ਘੇਨ ਕਮ੍ਮਂ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਆਚਰਿਯੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ.

‘‘ਸਚੇ ਆਚਰਿਯਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਅਨ੍ਤੇਵਾਸਿਕੇਨ ਧੋਵਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਆਚਰਿਯਸ੍ਸ ਚੀਵਰਂ ਧੋਵਿਯੇਥਾਤਿ. ਸਚੇ ਆਚਰਿਯਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਅਨ੍ਤੇਵਾਸਿਕੇਨ ਕਾਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਆਚਰਿਯਸ੍ਸ ਚੀਵਰਂ ਕਰਿਯੇਥਾਤਿ. ਸਚੇ ਆਚਰਿਯਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਅਨ੍ਤੇਵਾਸਿਕੇਨ ਪਚਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਆਚਰਿਯਸ੍ਸ ਰਜਨਂ ਪਚਿਯੇਥਾਤਿ. ਸਚੇ ਆਚਰਿਯਸ੍ਸ ਚੀਵਰਂ ਰਜਿਤਬ੍ਬਂ ਹੋਤਿ, ਅਨ੍ਤੇਵਾਸਿਕੇਨ ਰਜਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਆਚਰਿਯਸ੍ਸ ਚੀਵਰਂ ਰਜਿਯੇਥਾਤਿ. ਚੀਵਰਂ ਰਜਨ੍ਤੇਨ ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ.

‘‘ਨ ਆਚਰਿਯਂ ਅਨਾਪੁਚ੍ਛਾ ਏਕਚ੍ਚਸ੍ਸ ਪਤ੍ਤੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਤ੍ਤੋ ਪਟਿਗ੍ਗਹੇਤਬ੍ਬੋ; ਨ ਏਕਚ੍ਚਸ੍ਸ ਚੀਵਰਂ ਦਾਤਬ੍ਬਂ; ਨ ਏਕਚ੍ਚਸ੍ਸ ਚੀਵਰਂ ਪਟਿਗ੍ਗਹੇਤਬ੍ਬਂ; ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਦਾਤਬ੍ਬੋ; ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਪਟਿਗ੍ਗਹੇਤਬ੍ਬੋ; ਨ ਏਕਚ੍ਚਸ੍ਸ ਕੇਸਾ ਛੇਦੇਤਬ੍ਬਾ; ਨ ਏਕਚ੍ਚੇਨ ਕੇਸਾ ਛੇਦਾਪੇਤਬ੍ਬਾ; ਨ ਏਕਚ੍ਚਸ੍ਸ ਪਰਿਕਮ੍ਮਂ ਕਾਤਬ੍ਬਂ; ਨ ਏਕਚ੍ਚੇਨ ਪਰਿਕਮ੍ਮਂ ਕਾਰਾਪੇਤਬ੍ਬਂ; ਨ ਏਕਚ੍ਚਸ੍ਸ ਵੇਯ੍ਯਾਵਚ੍ਚੋ ਕਾਤਬ੍ਬੋ; ਨ ਏਕਚ੍ਚੇਨ ਵੇਯ੍ਯਾਵਚ੍ਚੋ ਕਾਰਾਪੇਤਬ੍ਬੋ; ਨ ਏਕਚ੍ਚਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ; ਨ ਏਕਚ੍ਚੋ ਪਚ੍ਛਾਸਮਣੋ ਆਦਾਤਬ੍ਬੋ; ਨ ਏਕਚ੍ਚਸ੍ਸ ਪਿਣ੍ਡਪਾਤੋ ਨੀਹਰਿਤਬ੍ਬੋ; ਨ ਏਕਚ੍ਚੇਨ ਪਿਣ੍ਡਪਾਤੋ ਨੀਹਰਾਪੇਤਬ੍ਬੋ. ਨ ਆਚਰਿਯਂ ਅਨਾਪੁਚ੍ਛਾ ਗਾਮੋ ਪਵਿਸਿਤਬ੍ਬੋ, ਨ ਸੁਸਾਨਂ ਗਨ੍ਤਬ੍ਬਂ, ਨ ਦਿਸਾ ਪਕ੍ਕਮਿਤਬ੍ਬਾ. ਸਚੇ ਆਚਰਿਯੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬ’’ਨ੍ਤਿ.

ਆਚਰਿਯਵਤ੍ਤਂ ਨਿਟ੍ਠਿਤਂ.

੧੯. ਅਨ੍ਤੇਵਾਸਿਕਵਤ੍ਤਕਥਾ

੭੯. [ਚੂਲ਼ਵ. ੩੮੧-੩੮੨] ‘‘ਆਚਰਿਯੇਨ, ਭਿਕ੍ਖਵੇ, ਅਨ੍ਤੇਵਾਸਿਕਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ –

‘‘ਆਚਰਿਯੇਨ, ਭਿਕ੍ਖਵੇ, ਅਨ੍ਤੇਵਾਸਿਕੋ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋ ਉਦ੍ਦੇਸੇਨ ਪਰਿਪੁਚ੍ਛਾਯ ਓਵਾਦੇਨ ਅਨੁਸਾਸਨਿਯਾ. ਸਚੇ ਆਚਰਿਯਸ੍ਸ ਪਤ੍ਤੋ ਹੋਤਿ, ਅਨ੍ਤੇਵਾਸਿਕਸ੍ਸ ਪਤ੍ਤੋ ਨ ਹੋਤਿ, ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਪਤ੍ਤੋ ਦਾਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਪਤ੍ਤੋ ਉਪ੍ਪਜ੍ਜਿਯੇਥਾਤਿ. ਸਚੇ ਆਚਰਿਯਸ੍ਸ ਚੀਵਰਂ ਹੋਤਿ, ਅਨ੍ਤੇਵਾਸਿਕਸ੍ਸ ਚੀਵਰਂ ਨ ਹੋਤਿ, ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਚੀਵਰਂ ਦਾਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਉਪ੍ਪਜ੍ਜਿਯੇਥਾਤਿ. ਸਚੇ ਆਚਰਿਯਸ੍ਸ ਪਰਿਕ੍ਖਾਰੋ ਹੋਤਿ, ਅਨ੍ਤੇਵਾਸਿਕਸ੍ਸ ਪਰਿਕ੍ਖਾਰੋ ਨ ਹੋਤਿ, ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਪਰਿਕ੍ਖਾਰੋ ਉਪ੍ਪਜ੍ਜਿਯੇਥਾਤਿ.

‘‘ਸਚੇ ਅਨ੍ਤੇਵਾਸਿਕੋ ਗਿਲਾਨੋ ਹੋਤਿ, ਕਾਲਸ੍ਸੇਵ ਉਟ੍ਠਾਯ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ. ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਅਨ੍ਤੇਵਾਸਿਕਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਅਨ੍ਤੇਵਾਸਿਕੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ ਦਾਤਬ੍ਬੋ.

‘‘ਏਤ੍ਤਾਵਤਾ ਨਿਵਤ੍ਤਿਸ੍ਸਤੀਤਿ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਟਿਨਿਵਾਸਨਂ ਦਾਤਬ੍ਬਂ, ਨਿਵਾਸਨਂ ਪਟਿਗ੍ਗਹੇਤਬ੍ਬਂ. ਸਚੇ ਚੀਵਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬਂ. ਚੀਵਰਂ ਸਙ੍ਘਰਿਤਬ੍ਬਂ. ਚੀਵਰਂ ਸਙ੍ਘਰਨ੍ਤੇਨ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਂ ਸਙ੍ਘਰਿਤਬ੍ਬਂ – ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ. ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਂ.

‘‘ਸਚੇ ਪਿਣ੍ਡਪਾਤੋ ਹੋਤਿ, ਅਨ੍ਤੇਵਾਸਿਕੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ. ਅਨ੍ਤੇਵਾਸਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਅਨ੍ਤੇਵਾਸਿਕਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਅਨ੍ਤੇਵਾਸਿਕੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

‘‘ਸਚੇ ਅਨ੍ਤੇਵਾਸਿਕੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰਂ ਪਵਿਸਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਚ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ, ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਜਨ੍ਤਾਘਰੇ ਅਨ੍ਤੇਵਾਸਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

‘‘ਉਦਕੇਪਿ ਅਨ੍ਤੇਵਾਸਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਅਨ੍ਤੇਵਾਸਿਕਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ. ਅਨ੍ਤੇਵਾਸਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ.

‘‘ਯਸ੍ਮਿਂ ਵਿਹਾਰੇ ਅਨ੍ਤੇਵਾਸਿਕੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭਿਸਿਬਿਬ੍ਬੋਹਨਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ; ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭੂਮਤ੍ਥਰਣਂ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਤਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ – ਮਾ ਵਿਹਾਰੋ ਰਜੇਨ ਉਹਞ੍ਞੀਤਿ. ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

‘‘ਭੂਮਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਮਞ੍ਚਪਟਿਪਾਦਕਾ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਾ. ਮਞ੍ਚੋ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬੋ. ਪੀਠਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਭਿਸਿਬਿਬ੍ਬੋਹਨਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਨਿਸੀਦਨਪਚ੍ਚਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਖੇਲ਼ਮਲ੍ਲਕੋ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬੋ. ਅਪਸ੍ਸੇਨਫਲਕਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਂ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ.

‘‘ਸਚੇ ਪੁਰਤ੍ਥਿਮਾ ਸਰਜਾ ਵਾਤਾ ਵਾਯਨ੍ਤਿ, ਪੁਰਤ੍ਥਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਪਚ੍ਛਿਮਾ ਸਰਜਾ ਵਾਤਾ ਵਾਯਨ੍ਤਿ, ਪਚ੍ਛਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਉਤ੍ਤਰਾ ਸਰਜਾ ਵਾਤਾ ਵਾਯਨ੍ਤਿ, ਉਤ੍ਤਰਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਦਕ੍ਖਿਣਾ ਸਰਜਾ ਵਾਤਾ ਵਾਯਨ੍ਤਿ, ਦਕ੍ਖਿਣਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਸੀਤਕਾਲੋ ਹੋਤਿ, ਦਿਵਾ ਵਾਤਪਾਨਾ ਵਿਵਰਿਤਬ੍ਬਾ, ਰਤ੍ਤਿਂ ਥਕੇਤਬ੍ਬਾ. ਸਚੇ ਉਣ੍ਹਕਾਲੋ ਹੋਤਿ, ਦਿਵਾ ਵਾਤਪਾਨਾ ਥਕੇਤਬ੍ਬਾ, ਰਤ੍ਤਿਂ ਵਿਵਰਿਤਬ੍ਬਾ.

‘‘ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ. ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਉਪਟ੍ਠਾਨਸਾਲਾ ਉਕ੍ਲਾਪਾ ਹੋਤਿ, ਉਪਟ੍ਠਾਨਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਅਗ੍ਗਿਸਾਲਾ ਉਕ੍ਲਾਪਾ ਹੋਤਿ, ਅਗ੍ਗਿਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਵਚ੍ਚਕੁਟਿ ਉਕ੍ਲਾਪਾ ਹੋਤਿ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ. ਸਚੇ ਪਾਨੀਯਂ ਨ ਹੋਤਿ, ਪਾਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਪਰਿਭੋਜਨੀਯਂ ਨ ਹੋਤਿ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

‘‘ਸਚੇ ਅਨ੍ਤੇਵਾਸਿਕਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਆਚਰਿਯੇਨ ਵੂਪਕਾਸੇਤਬ੍ਬੋ, ਵੂਪਕਾਸਾਪੇਤਬ੍ਬੋ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਅਨ੍ਤੇਵਾਸਿਕਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਆਚਰਿਯੇਨ ਵਿਨੋਦੇਤਬ੍ਬਂ, ਵਿਨੋਦਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਅਨ੍ਤੇਵਾਸਿਕਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਆਚਰਿਯੇਨ ਵਿਵੇਚੇਤਬ੍ਬਂ, ਵਿਵੇਚਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਅਨ੍ਤੇਵਾਸਿਕੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ, ਅਨ੍ਤੇਵਾਸਿਕਸ੍ਸ ਪਰਿਵਾਸਂ ਦਦੇਯ੍ਯਾਤਿ. ਸਚੇ ਅਨ੍ਤੇਵਾਸਿਕੋ ਮੂਲਾਯ ਪਟਿਕਸ੍ਸਨਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਂ ਮੂਲਾਯ ਪਟਿਕਸ੍ਸੇਯ੍ਯਾਤਿ. ਸਚੇ ਅਨ੍ਤੇਵਾਸਿਕੋ ਮਾਨਤ੍ਤਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਸ੍ਸ ਮਾਨਤ੍ਤਂ ਦਦੇਯ੍ਯਾਤਿ. ਸਚੇ ਅਨ੍ਤੇਵਾਸਿਕੋ ਅਬ੍ਭਾਨਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਂ ਅਬ੍ਭੇਯ੍ਯਾਤਿ. ਸਚੇ ਸਙ੍ਘੋ ਅਨ੍ਤੇਵਾਸਿਕਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਸ੍ਸ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ. ਕਤਂ ਵਾ ਪਨਸ੍ਸ ਹੋਤਿ ਸਙ੍ਘੇਨ ਕਮ੍ਮਂ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ.

‘‘ਸਚੇ ਅਨ੍ਤੇਵਾਸਿਕਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ‘ਏਵਂ ਧੋਵੇਯ੍ਯਾਸੀ’ਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਧੋਵਿਯੇਥਾਤਿ. ਸਚੇ ਅਨ੍ਤੇਵਾਸਿਕਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ‘ਏਵਂ ਕਰੇਯ੍ਯਾਸੀ’ਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਕਰਿਯੇਥਾਤਿ. ਸਚੇ ਅਨ੍ਤੇਵਾਸਿਕਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ‘ਏਵਂ ਪਚੇਯ੍ਯਾਸੀ’ਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਰਜਨਂ ਪਚਿਯੇਥਾਤਿ. ਸਚੇ ਅਨ੍ਤੇਵਾਸਿਕਸ੍ਸ ਚੀਵਰਂ ਰਜਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ‘ਏਵਂ ਰਜੇਯ੍ਯਾਸੀ’ਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਰਜਿਯੇਥਾਤਿ. ਚੀਵਰਂ ਰਜਨ੍ਤੇਨ ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ. ਸਚੇ ਅਨ੍ਤੇਵਾਸਿਕੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬ’’ਨ੍ਤਿ.

ਅਨ੍ਤੇਵਾਸਿਕਵਤ੍ਤਂ ਨਿਟ੍ਠਿਤਂ.

ਛਟ੍ਠਭਾਣਵਾਰੋ.

੨੦. ਪਣਾਮਨਾ ਖਮਾਪਨਾ

੮੦. ਤੇਨ ਖੋ ਪਨ ਸਮਯੇਨ ਅਨ੍ਤੇਵਾਸਿਕਾ ਆਚਰਿਯੇਸੁ ਨ ਸਮ੍ਮਾ ਵਤ੍ਤਨ੍ਤਿ…ਪੇ… ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਨ, ਭਿਕ੍ਖਵੇ, ਅਨ੍ਤੇਵਾਸਿਕੇਨ ਆਚਰਿਯਮ੍ਹਿ ਨ ਸਮ੍ਮਾ ਵਤ੍ਤਿਤਬ੍ਬਂ. ਯੋ ਨ ਸਮ੍ਮਾ ਵਤ੍ਤੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ. ਨੇਵ ਸਮ੍ਮਾ ਵਤ੍ਤਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਅਸਮ੍ਮਾਵਤ੍ਤਨ੍ਤਂ ਪਣਾਮੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਪਣਾਮੇਤਬ੍ਬੋ – ਪਣਾਮੇਮਿ ਤਨ੍ਤਿ ਵਾ, ਮਾਯਿਧ ਪਟਿਕ੍ਕਮੀਤਿ ਵਾ, ਨੀਹਰ ਤੇ ਪਤ੍ਤਚੀਵਰਨ੍ਤਿ ਵਾ, ਨਾਹਂ ਤਯਾ ਉਪਟ੍ਠਾਤਬ੍ਬੋਤਿ ਵਾ. ਕਾਯੇਨ ਵਿਞ੍ਞਾਪੇਤਿ, ਵਾਚਾਯ ਵਿਞ੍ਞਾਪੇਤਿ, ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਪਣਾਮਿਤੋ ਹੋਤਿ ਅਨ੍ਤੇਵਾਸਿਕੋ; ਨ ਕਾਯੇਨ ਵਿਞ੍ਞਾਪੇਤਿ, ਨ ਵਾਚਾਯ ਵਿਞ੍ਞਾਪੇਤਿ, ਨ ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਨ ਪਣਾਮਿਤੋ ਹੋਤਿ ਅਨ੍ਤੇਵਾਸਿਕੋਤਿ.

ਤੇਨ ਖੋ ਪਨ ਸਮਯੇਨ ਅਨ੍ਤੇਵਾਸਿਕਾ ਪਣਾਮਿਤਾ ਨ ਖਮਾਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਖਮਾਪੇਤੁਨ੍ਤਿ. ਨੇਵ ਖਮਾਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਪਣਾਮਿਤੇਨ ਨ ਖਮਾਪੇਤਬ੍ਬੋ. ਯੋ ਨ ਖਮਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਆਚਰਿਯਾ ਖਮਾਪਿਯਮਾਨਾ ਨ ਖਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਖਮਿਤੁਨ੍ਤਿ. ਨੇਵ ਖਮਨ੍ਤਿ. ਅਨ੍ਤੇਵਾਸਿਕਾ ਪਕ੍ਕਮਨ੍ਤਿਪਿ ਵਿਬ੍ਭਮਨ੍ਤਿਪਿ ਤਿਤ੍ਥਿਯੇਸੁਪਿ ਸਙ੍ਕਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਖਮਾਪਿਯਮਾਨੇਨ ਨ ਖਮਿਤਬ੍ਬਂ. ਯੋ ਨ ਖਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਆਚਰਿਯਾ ਸਮ੍ਮਾਵਤ੍ਤਨ੍ਤਂ ਪਣਾਮੇਨ੍ਤਿ, ਅਸਮ੍ਮਾਵਤ੍ਤਨ੍ਤਂ ਨ ਪਣਾਮੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਮ੍ਮਾਵਤ੍ਤਨ੍ਤੋ ਪਣਾਮੇਤਬ੍ਬੋ. ਯੋ ਪਣਾਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਅਸਮ੍ਮਾਵਤ੍ਤਨ੍ਤੋ ਨ ਪਣਾਮੇਤਬ੍ਬੋ. ਯੋ ਨ ਪਣਾਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

੮੧. ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਅਨ੍ਤੇਵਾਸਿਕੋ ਪਣਾਮੇਤਬ੍ਬੋ. ਆਚਰਿਯਮ੍ਹਿ ਨਾਧਿਮਤ੍ਤਂ ਪੇਮਂ ਹੋਤਿ, ਨਾਧਿਮਤ੍ਤੋ ਪਸਾਦੋ ਹੋਤਿ, ਨਾਧਿਮਤ੍ਤਾ ਹਿਰੀ ਹੋਤਿ, ਨਾਧਿਮਤ੍ਤੋ ਗਾਰਵੋ ਹੋਤਿ, ਨਾਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਅਨ੍ਤੇਵਾਸਿਕੋ ਪਣਾਮੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਅਨ੍ਤੇਵਾਸਿਕੋ ਨ ਪਣਾਮੇਤਬ੍ਬੋ. ਆਚਰਿਯਮ੍ਹਿ ਅਧਿਮਤ੍ਤਂ ਪੇਮਂ ਹੋਤਿ, ਅਧਿਮਤ੍ਤੋ ਪਸਾਦੋ ਹੋਤਿ, ਅਧਿਮਤ੍ਤਾ ਹਿਰੀ ਹੋਤਿ, ਅਧਿਮਤ੍ਤੋ ਗਾਰਵੋ ਹੋਤਿ, ਅਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਅਨ੍ਤੇਵਾਸਿਕੋ ਨ ਪਣਾਮੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਅਨ੍ਤੇਵਾਸਿਕੋ ਅਲਂ ਪਣਾਮੇਤੁਂ. ਆਚਰਿਯਮ੍ਹਿ ਨਾਧਿਮਤ੍ਤਂ ਪੇਮਂ ਹੋਤਿ, ਨਾਧਿਮਤ੍ਤੋ ਪਸਾਦੋ ਹੋਤਿ, ਨਾਧਿਮਤ੍ਤਾ ਹਿਰੀ ਹੋਤਿ, ਨਾਧਿਮਤ੍ਤੋ ਗਾਰਵੋ ਹੋਤਿ, ਨਾਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਅਨ੍ਤੇਵਾਸਿਕੋ ਅਲਂ ਪਣਾਮੇਤੁਂ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਅਨ੍ਤੇਵਾਸਿਕੋ ਨਾਲਂ ਪਣਾਮੇਤੁਂ. ਆਚਰਿਯਮ੍ਹਿ ਅਧਿਮਤ੍ਤਂ ਪੇਮਂ ਹੋਤਿ, ਅਧਿਮਤ੍ਤੋ ਪਸਾਦੋ ਹੋਤਿ, ਅਧਿਮਤ੍ਤਾ ਹਿਰੀ ਹੋਤਿ, ਅਧਿਮਤ੍ਤੋ ਗਾਰਵੋ ਹੋਤਿ, ਅਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਅਨ੍ਤੇਵਾਸਿਕੋ ਨਾਲਂ ਪਣਾਮੇਤੁਂ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਅਨ੍ਤੇਵਾਸਿਕਂ ਅਪ੍ਪਣਾਮੇਨ੍ਤੋ ਆਚਰਿਯੋ ਸਾਤਿਸਾਰੋ ਹੋਤਿ, ਪਣਾਮੇਨ੍ਤੋ ਅਨਤਿਸਾਰੋ ਹੋਤਿ. ਆਚਰਿਯਮ੍ਹਿ ਨਾਧਿਮਤ੍ਤਂ ਪੇਮਂ ਹੋਤਿ, ਨਾਧਿਮਤ੍ਤੋ ਪਸਾਦੋ ਹੋਤਿ, ਨਾਧਿਮਤ੍ਤਾ ਹਿਰੀ ਹੋਤਿ, ਨਾਧਿਮਤ੍ਤੋ ਗਾਰਵੋ ਹੋਤਿ, ਨਾਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਅਨ੍ਤੇਵਾਸਿਕਂ ਅਪ੍ਪਣਾਮੇਨ੍ਤੋ ਆਚਰਿਯੋ ਸਾਤਿਸਾਰੋ ਹੋਤਿ, ਪਣਾਮੇਨ੍ਤੋ ਅਨਤਿਸਾਰੋ ਹੋਤਿ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਅਨ੍ਤੇਵਾਸਿਕਂ ਪਣਾਮੇਨ੍ਤੋ ਆਚਰਿਯੋ ਸਾਤਿਸਾਰੋ ਹੋਤਿ, ਅਪ੍ਪਣਾਮੇਨ੍ਤੋ ਅਨਤਿਸਾਰੋ ਹੋਤਿ. ਆਚਰਿਯਮ੍ਹਿ ਅਧਿਮਤ੍ਤਂ ਪੇਮਂ ਹੋਤਿ, ਅਧਿਮਤ੍ਤੋ ਪਸਾਦੋ ਹੋਤਿ, ਅਧਿਮਤ੍ਤਾ ਹਿਰੀ ਹੋਤਿ, ਅਧਿਮਤ੍ਤੋ ਗਾਰਵੋ ਹੋਤਿ, ਅਧਿਮਤ੍ਤਾ ਭਾਵਨਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਅਨ੍ਤੇਵਾਸਿਕਂ ਪਣਾਮੇਨ੍ਤੋ ਆਚਰਿਯੋ ਸਾਤਿਸਾਰੋ ਹੋਤਿ, ਅਪ੍ਪਣਾਮੇਨ੍ਤੋ ਅਨਤਿਸਾਰੋ ਹੋਤੀ’’ਤਿ.

ਪਣਾਮਨਾ ਖਮਾਪਨਾ ਨਿਟ੍ਠਿਤਾ.

੨੧. ਬਾਲਅਬ੍ਯਤ੍ਤਵਤ੍ਥੁ

੮੨. ਤੇਨ ਖੋ ਪਨ ਸਮਯੇਨ ਭਿਕ੍ਖੂ, ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾਤਿ, ਬਾਲਾ ਅਬ੍ਯਤ੍ਤਾ ਨਿਸ੍ਸਯਂ ਦੇਨ੍ਤਿ. ਦਿਸ੍ਸਨ੍ਤਿ ਆਚਰਿਯਾ ਬਾਲਾ, ਅਨ੍ਤੇਵਾਸਿਕਾ ਪਣ੍ਡਿਤਾ. ਦਿਸ੍ਸਨ੍ਤਿ ਆਚਰਿਯਾ ਅਬ੍ਯਤ੍ਤਾ, ਅਨ੍ਤੇਵਾਸਿਕਾ ਬ੍ਯਤ੍ਤਾ. ਦਿਸ੍ਸਨ੍ਤਿ ਆਚਰਿਯਾ ਅਪ੍ਪਸ੍ਸੁਤਾ, ਅਨ੍ਤੇਵਾਸਿਕਾ ਬਹੁਸ੍ਸੁਤਾ. ਦਿਸ੍ਸਨ੍ਤਿ ਆਚਰਿਯਾ ਦੁਪ੍ਪਞ੍ਞਾ, ਅਨ੍ਤੇਵਾਸਿਕਾ ਪਞ੍ਞਵਨ੍ਤੋ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ, ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾਤਿ, ਬਾਲਾ ਅਬ੍ਯਤ੍ਤਾ ਨਿਸ੍ਸਯਂ ਦਸ੍ਸਨ੍ਤਿ. ਦਿਸ੍ਸਨ੍ਤਿ ਆਚਰਿਯਾ ਬਾਲਾ ਅਨ੍ਤੇਵਾਸਿਕਾ ਪਣ੍ਡਿਤਾ, ਦਿਸ੍ਸਨ੍ਤਿ ਆਚਰਿਯਾ ਅਬ੍ਯਤ੍ਤਾ ਅਨ੍ਤੇਵਾਸਿਕਾ ਬ੍ਯਤ੍ਤਾ, ਦਿਸ੍ਸਨ੍ਤਿ ਆਚਰਿਯਾ ਅਪ੍ਪਸ੍ਸੁਤਾ ਅਨ੍ਤੇਵਾਸਿਕਾ ਬਹੁਸ੍ਸੁਤਾ, ਦਿਸ੍ਸਨ੍ਤਿ ਆਚਰਿਯਾ ਦੁਪ੍ਪਞ੍ਞਾ ਅਨ੍ਤੇਵਾਸਿਕਾ ਪਞ੍ਞਵਨ੍ਤੋ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ, ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾਤਿ, ਬਾਲਾ ਅਬ੍ਯਤ੍ਤਾ ਨਿਸ੍ਸਯਂ ਦੇਨ੍ਤਿ…ਪੇ… ਸਚ੍ਚਂ, ਭਗਵਾਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਬਾਲੇਨ ਅਬ੍ਯਤ੍ਤੇਨ ਨਿਸ੍ਸਯੋ ਦਾਤਬ੍ਬੋ. ਯੋ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਦਸਵਸ੍ਸੇਨ ਵਾ ਅਤਿਰੇਕਦਸਵਸ੍ਸੇਨ ਵਾ ਨਿਸ੍ਸਯਂ ਦਾਤੁ’’ਨ੍ਤਿ.

ਬਾਲਅਬ੍ਯਤ੍ਤਵਤ੍ਥੁ ਨਿਟ੍ਠਿਤਂ.

੨੨. ਨਿਸ੍ਸਯਪਟਿਪ੍ਪਸ੍ਸਦ੍ਧਿਕਥਾ

੮੩. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਆਚਰਿਯੁਪਜ੍ਝਾਯੇਸੁ ਪਕ੍ਕਨ੍ਤੇਸੁਪਿ ਵਿਬ੍ਭਨ੍ਤੇਸੁਪਿ ਕਾਲਙ੍ਕਤੇਸੁਪਿ ਪਕ੍ਖਸਙ੍ਕਨ੍ਤੇਸੁਪਿ ਨਿਸ੍ਸਯਪਟਿਪ੍ਪਸ੍ਸਦ੍ਧਿਯੋ ਨ ਜਾਨਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

‘‘ਪਞ੍ਚਿਮਾ, ਭਿਕ੍ਖਵੇ, ਨਿਸ੍ਸਯਪਟਿਪ੍ਪਸ੍ਸਦ੍ਧਿਯੋ ਉਪਜ੍ਝਾਯਮ੍ਹਾ – ਉਪਜ੍ਝਾਯੋ ਪਕ੍ਕਨ੍ਤੋ ਵਾ ਹੋਤਿ, ਵਿਬ੍ਭਨ੍ਤੋ ਵਾ, ਕਾਲਙ੍ਕਤੋ ਵਾ, ਪਕ੍ਖਸਙ੍ਕਨ੍ਤੋ ਵਾ, ਆਣਤ੍ਤਿਯੇਵ ਪਞ੍ਚਮੀ. ਇਮਾ ਖੋ, ਭਿਕ੍ਖਵੇ, ਪਞ੍ਚ ਨਿਸ੍ਸਯਪਟਿਪ੍ਪਸ੍ਸਦ੍ਧਿਯੋ ਉਪਜ੍ਝਾਯਮ੍ਹਾ.

‘‘ਛਯਿਮਾ, ਭਿਕ੍ਖਵੇ, ਨਿਸ੍ਸਯਪਟਿਪ੍ਪਸ੍ਸਦ੍ਧਿਯੋ ਆਚਰਿਯਮ੍ਹਾ – ਆਚਰਿਯੋ ਪਕ੍ਕਨ੍ਤੋ ਵਾ ਹੋਤਿ, ਵਿਬ੍ਭਨ੍ਤੋ ਵਾ, ਕਾਲਙ੍ਕਤੋ ਵਾ, ਪਕ੍ਖਸਙ੍ਕਨ੍ਤੋ ਵਾ, ਆਣਤ੍ਤਿਯੇਵ ਪਞ੍ਚਮੀ, ਉਪਜ੍ਝਾਯੇਨ ਵਾ ਸਮੋਧਾਨਗਤੋ ਹੋਤਿ. ਇਮਾ ਖੋ, ਭਿਕ੍ਖਵੇ, ਛ ਨਿਸ੍ਸਯਪਟਿਪ੍ਪਸ੍ਸਦ੍ਧਿਯੋ ਆਚਰਿਯਮ੍ਹਾ’’.

ਨਿਸ੍ਸਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੩. ਉਪਸਮ੍ਪਾਦੇਤਬ੍ਬਪਞ੍ਚਕਂ

੮੪. ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਨ ਅਸੇਕ੍ਖੇਨ [ਨ ਅਸੇਖੇਨ (ਕ.)] ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਅਤ੍ਤਨਾ ਨ ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਪਰਂ ਅਸੇਕ੍ਖੇ ਸੀਲਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਨ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਪਰਂ ਅਸੇਕ੍ਖੇ ਸਮਾਧਿਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਨ ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਪਰਂ ਅਸੇਕ੍ਖੇ ਪਞ੍ਞਾਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਨ ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਪਰਂ ਅਸੇਕ੍ਖੇ ਵਿਮੁਤ੍ਤਿਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਨ ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਪਰਂ ਅਸੇਕ੍ਖੇ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇ ਸਮਾਦਪੇਤਾ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਅਤ੍ਤਨਾ ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਸੀਲਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਸਮਾਧਿਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਪਞ੍ਞਾਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਵਿਮੁਤ੍ਤਿਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇ ਸਮਾਦਪੇਤਾ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਅਸ੍ਸਦ੍ਧੋ ਹੋਤਿ, ਅਹਿਰਿਕੋ ਹੋਤਿ, ਅਨੋਤ੍ਤਪ੍ਪੀ ਹੋਤਿ, ਕੁਸੀਤੋ ਹੋਤਿ, ਮੁਟ੍ਠਸ੍ਸਤਿ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਸਦ੍ਧੋ ਹੋਤਿ, ਹਿਰਿਮਾ ਹੋਤਿ, ਓਤ੍ਤਪ੍ਪੀ ਹੋਤਿ, ਆਰਦ੍ਧਵੀਰਿਯੋ ਹੋਤਿ, ਉਪਟ੍ਠਿਤਸ੍ਸਤਿ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ, ਅਪ੍ਪਸ੍ਸੁਤੋ ਹੋਤਿ, ਦੁਪ੍ਪਞ੍ਞੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਨ ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਨ ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਨ ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ, ਬਹੁਸ੍ਸੁਤੋ ਹੋਤਿ, ਪਞ੍ਞਵਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਨ ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਗਿਲਾਨਂ ਉਪਟ੍ਠਾਤੁਂ ਵਾ ਉਪਟ੍ਠਾਪੇਤੁਂ ਵਾ, ਅਨਭਿਰਤਂ [ਅਨਭਿਰਤਿਂ (ਸ੍ਯਾ.), ਉਪ੍ਪਨ੍ਨਂ ਅਨਭਿਰਤਿਂ (ਕ.)] ਵੂਪਕਾਸੇਤੁਂ ਵਾ ਵੂਪਕਾਸਾਪੇਤੁਂ ਵਾ, ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਧਮ੍ਮਤੋ ਵਿਨੋਦੇਤੁਂ [ਵਿਨੋਦੇਤੁਂ ਵਾ ਵਿਨੋਦਾਪੇਤੁਂ ਵਾ (ਸਬ੍ਬਤ੍ਥ, ਵਿਮਤਿਵਿਨੋਦਨੀ ਟੀਕਾ ਓਲੋਕੇਤਬ੍ਬਾ)] ਆਪਤ੍ਤਿਂ ਨ ਜਾਨਾਤਿ, ਆਪਤ੍ਤਿਯਾ ਵੁਟ੍ਠਾਨਂ ਨ ਜਾਨਾਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਗਿਲਾਨਂ ਉਪਟ੍ਠਾਤੁਂ ਵਾ ਉਪਟ੍ਠਾਪੇਤੁਂ ਵਾ, ਅਨਭਿਰਤਂ ਵੂਪਕਾਸੇਤੁਂ ਵਾ ਵੂਪਕਾਸਾਪੇਤੁਂ ਵਾ, ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਧਮ੍ਮਤੋ ਵਿਨੋਦੇਤੁਂ ਆਪਤ੍ਤਿਂ ਜਾਨਾਤਿ, ਆਪਤ੍ਤਿਯਾ ਵੁਟ੍ਠਾਨਂ ਜਾਨਾਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਨ ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਅਭਿਸਮਾਚਾਰਿਕਾਯ ਸਿਕ੍ਖਾਯ ਸਿਕ੍ਖਾਪੇਤੁਂ, ਆਦਿਬ੍ਰਹ੍ਮਚਰਿਯਕਾਯ ਸਿਕ੍ਖਾਯ ਵਿਨੇਤੁਂ, ਅਭਿਧਮ੍ਮੇ ਵਿਨੇਤੁਂ, ਅਭਿਵਿਨਯੇ ਵਿਨੇਤੁਂ, ਉਪ੍ਪਨ੍ਨਂ ਦਿਟ੍ਠਿਗਤਂ ਧਮ੍ਮਤੋ ਵਿਵੇਚੇਤੁਂ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਅਭਿਸਮਾਚਾਰਿਕਾਯ ਸਿਕ੍ਖਾਯ ਸਿਕ੍ਖਾਪੇਤੁਂ, ਆਦਿਬ੍ਰਹ੍ਮਚਰਿਯਕਾਯ ਸਿਕ੍ਖਾਯ ਵਿਨੇਤੁਂ, ਅਭਿਧਮ੍ਮੇ ਵਿਨੇਤੁਂ, ਅਭਿਵਿਨਯੇ ਵਿਨੇਤੁਂ, ਉਪ੍ਪਨ੍ਨਂ ਦਿਟ੍ਠਿਗਤਂ ਧਮ੍ਮਤੋ ਵਿਵੇਚੇਤੁਂ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਆਪਤ੍ਤਿਂ ਨ ਜਾਨਾਤਿ, ਅਨਾਪਤ੍ਤਿਂ ਨ ਜਾਨਾਤਿ, ਲਹੁਕਂ ਆਪਤ੍ਤਿਂ ਨ ਜਾਨਾਤਿ, ਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਨ ਸ੍ਵਾਗਤਾਨਿ ਹੋਨ੍ਤਿ ਨ ਸੁਵਿਭਤ੍ਤਾਨਿ ਨ ਸੁਪ੍ਪਵਤ੍ਤੀਨਿ ਨ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਆਪਤ੍ਤਿਂ ਜਾਨਾਤਿ, ਅਨਾਪਤ੍ਤਿਂ ਜਾਨਾਤਿ, ਲਹੁਕਂ ਆਪਤ੍ਤਿਂ ਜਾਨਾਤਿ, ਗਰੁਕਂ ਆਪਤ੍ਤਿਂ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਸ੍ਵਾਗਤਾਨਿ ਹੋਨ੍ਤਿ ਸੁਵਿਭਤ੍ਤਾਨਿ ਸੁਪ੍ਪਵਤ੍ਤੀਨਿ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਆਪਤ੍ਤਿਂ ਨ ਜਾਨਾਤਿ, ਅਨਾਪਤ੍ਤਿਂ ਨ ਜਾਨਾਤਿ, ਲਹੁਕਂ ਆਪਤ੍ਤਿਂ ਨ ਜਾਨਾਤਿ, ਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਊਨਦਸਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਆਪਤ੍ਤਿਂ ਜਾਨਾਤਿ, ਅਨਾਪਤ੍ਤਿਂ ਜਾਨਾਤਿ, ਲਹੁਕਂ ਆਪਤ੍ਤਿਂ ਜਾਨਾਤਿ, ਗਰੁਕਂ ਆਪਤ੍ਤਿਂ ਜਾਨਾਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ’’ਤਿ.

ਉਪਸਮ੍ਪਾਦੇਤਬ੍ਬਪਞ੍ਚਕਂ ਨਿਟ੍ਠਿਤਂ.

੨੪. ਉਪਸਮ੍ਪਾਦੇਤਬ੍ਬਛਕ੍ਕਂ

੮੫. ‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਨ ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਊਨਦਸਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਅਤ੍ਤਨਾ ਨ ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਪਰਂ ਅਸੇਕ੍ਖੇ ਸੀਲਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਨ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਪਰਂ ਅਸੇਕ੍ਖੇ ਸਮਾਧਿਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਨ ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਪਰਂ ਅਸੇਕ੍ਖੇ ਪਞ੍ਞਾਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਨ ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਪਰਂ ਅਸੇਕ੍ਖੇ ਵਿਮੁਤ੍ਤਿਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਨ ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਪਰਂ ਅਸੇਕ੍ਖੇ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇ ਸਮਾਦਪੇਤਾ; ਊਨਦਸਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਅਤ੍ਤਨਾ ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਸੀਲਕ੍ਖਨ੍ਧੇ ਸਮਾਦਪੇਤਾ ਅਤ੍ਤਨਾ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਸਮਾਧਿਕ੍ਖਨ੍ਧੇ ਸਮਾਦਪੇਤਾ. ਅਤ੍ਤਨਾ ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਪਞ੍ਞਾਕ੍ਖਨ੍ਧੇ ਸਮਾਦਪੇਤਾ. ਅਤ੍ਤਨਾ ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਵਿਮੁਤ੍ਤਿਕ੍ਖਨ੍ਧੇ ਸਮਾਦਪੇਤਾ. ਅਤ੍ਤਨਾ ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇ ਸਮਾਦਪੇਤਾ; ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਅਸ੍ਸਦ੍ਧੋ ਹੋਤਿ, ਅਹਿਰਿਕੋ ਹੋਤਿ, ਅਨੋਤ੍ਤਪ੍ਪੀ ਹੋਤਿ, ਕੁਸੀਤੋ ਹੋਤਿ, ਮੁਟ੍ਠਸ੍ਸਤਿ ਹੋਤਿ, ਊਨਦਸਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਸਦ੍ਧੋ ਹੋਤਿ, ਹਿਰਿਮਾ ਹੋਤਿ, ਓਤ੍ਤਪ੍ਪੀ ਹੋਤਿ, ਆਰਦ੍ਧਵੀਰਿਯੋ ਹੋਤਿ, ਉਪਟ੍ਠਿਤਸ੍ਸਤਿ ਹੋਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ, ਅਪ੍ਪਸ੍ਸੁਤੋ ਹੋਤਿ, ਦੁਪ੍ਪਞ੍ਞੋ ਹੋਤਿ, ਊਨਦਸਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਨ ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਨ ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਨ ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ, ਬਹੁਸ੍ਸੁਤੋ ਹੋਤਿ, ਪਞ੍ਞਵਾ ਹੋਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਨ ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਗਿਲਾਨਂ ਉਪਟ੍ਠਾਤੁਂ ਵਾ ਉਪਟ੍ਠਾਪੇਤੁਂ ਵਾ, ਅਨਭਿਰਤਂ ਵੂਪਕਾਸੇਤੁਂ ਵਾ ਵੂਪਕਾਸਾਪੇਤੁਂ ਵਾ, ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਧਮ੍ਮਤੋ ਵਿਨੋਦੇਤੁਂ, ਆਪਤ੍ਤਿਂ ਨ ਜਾਨਾਤਿ, ਆਪਤ੍ਤਿਯਾ ਵੁਟ੍ਠਾਨਂ ਨ ਜਾਨਾਤਿ, ਊਨਦਸਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਗਿਲਾਨਂ ਉਪਟ੍ਠਾਤੁਂ ਵਾ ਉਪਟ੍ਠਾਪੇਤੁਂ ਵਾ, ਅਨਭਿਰਤਂ ਵੂਪਕਾਸੇਤੁਂ ਵਾ ਵੂਪਕਾਸਾਪੇਤੁਂ ਵਾ, ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਧਮ੍ਮਤੋ ਵਿਨੋਦੇਤੁਂ, ਆਪਤ੍ਤਿਂ ਜਾਨਾਤਿ, ਆਪਤ੍ਤਿਯਾ ਵੁਟ੍ਠਾਨਂ ਜਾਨਾਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਨ ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਅਭਿਸਮਾਚਾਰਿਕਾਯ ਸਿਕ੍ਖਾਯ ਸਿਕ੍ਖਾਪੇਤੁਂ, ਆਦਿਬ੍ਰਹ੍ਮਚਰਿਯਕਾਯ ਸਿਕ੍ਖਾਯ ਵਿਨੇਤੁਂ, ਅਭਿਧਮ੍ਮੇ ਵਿਨੇਤੁਂ, ਅਭਿਵਿਨਯੇ ਵਿਨੇਤੁਂ, ਉਪ੍ਪਨ੍ਨਂ ਦਿਟ੍ਠਿਗਤਂ ਧਮ੍ਮਤੋ ਵਿਵੇਚੇਤੁਂ, ਊਨਦਸਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਅਭਿਸਮਾਚਾਰਿਕਾਯ ਸਿਕ੍ਖਾਯ ਸਿਕ੍ਖਾਪੇਤੁਂ ਆਦਿਬ੍ਰਹ੍ਮਚਰਿਯਕਾਯ ਸਿਕ੍ਖਾਯ ਵਿਨੇਤੁਂ, ਅਭਿਧਮ੍ਮੇ ਵਿਨੇਤੁਂ, ਅਭਿਵਿਨਯੇ ਵਿਨੇਤੁਂ, ਉਪ੍ਪਨ੍ਨਂ ਦਿਟ੍ਠਿਗਤਂ ਧਮ੍ਮਤੋ ਵਿਵੇਚੇਤੁਂ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਅਪਰੇਹਿਪਿ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਆਪਤ੍ਤਿਂ ਨ ਜਾਨਾਤਿ, ਅਨਾਪਤ੍ਤਿਂ ਨ ਜਾਨਾਤਿ, ਲਹੁਕਂ ਆਪਤ੍ਤਿਂ ਨ ਜਾਨਾਤਿ, ਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਨ ਸ੍ਵਾਗਤਾਨਿ ਹੋਨ੍ਤਿ ਨ ਸੁਵਿਭਤ੍ਤਾਨਿ ਨ ਸੁਪ੍ਪਵਤ੍ਤੀਨਿ ਨ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ, ਊਨਦਸਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਆਪਤ੍ਤਿਂ ਜਾਨਾਤਿ, ਅਨਾਪਤ੍ਤਿਂ ਜਾਨਾਤਿ, ਲਹੁਕਂ ਆਪਤ੍ਤਿਂ ਜਾਨਾਤਿ, ਗਰੁਕਂ ਆਪਤ੍ਤਿਂ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਸ੍ਵਾਗਤਾਨਿ ਹੋਨ੍ਤਿ ਸੁਵਿਭਤ੍ਤਾਨਿ ਸੁਪ੍ਪਵਤ੍ਤੀਨਿ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ, ਨਿਸ੍ਸਯੋ ਦਾਤਬ੍ਬੋ, ਸਾਮਣੇਰੋ ਉਪਟ੍ਠਾਪੇਤਬ੍ਬੋ’’ਤਿ.

ਉਪਸਮ੍ਪਾਦੇਤਬ੍ਬਛਕ੍ਕਂ ਨਿਟ੍ਠਿਤਂ.

੨੫. ਅਞ੍ਞਤਿਤ੍ਥਿਯਪੁਬ੍ਬਕਥਾ

੮੬. ਤੇਨ ਖੋ ਪਨ ਸਮਯੇਨ ਯੋ ਸੋ ਅਞ੍ਞਤਿਤ੍ਥਿਯਪੁਬ੍ਬੋ [ਯੋ ਸੋ ਪਸੁਰਪਰਿਬ੍ਬਾਜਕੋ ਅਞ੍ਞਤਿਤ੍ਥਿਯਪੁਬ੍ਬੋ (ਕ.)] ਪਜ੍ਝਾਯੇਨ ਸਹਧਮ੍ਮਿਕਂ ਵੁਚ੍ਚਮਾਨੋ ਉਪਜ੍ਝਾਯਸ੍ਸ ਵਾਦਂ ਆਰੋਪੇਤ੍ਵਾ ਤਂਯੇਵ ਤਿਤ੍ਥਾਯਤਨਂ ਸਙ੍ਕਮਿ. ਸੋ ਪੁਨ ਪਚ੍ਚਾਗਨ੍ਤ੍ਵਾ ਭਿਕ੍ਖੂ ਉਪਸਮ੍ਪਦਂ ਯਾਚਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਯੋ ਸੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਉਪਜ੍ਝਾਯੇਨ ਸਹਧਮ੍ਮਿਕਂ ਵੁਚ੍ਚਮਾਨੋ ਉਪਜ੍ਝਾਯਸ੍ਸ ਵਾਦਂ ਆਰੋਪੇਤ੍ਵਾ ਤਂਯੇਵ ਤਿਤ੍ਥਾਯਤਨਂ ਸਙ੍ਕਨ੍ਤੋ, ਸੋ ਆਗਤੋ ਨ ਉਪਸਮ੍ਪਾਦੇਤਬ੍ਬੋ. ਯੋ ਸੋ, ਭਿਕ੍ਖਵੇ, ਅਞ੍ਞੋਪਿ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਤਿ ਪਬ੍ਬਜ੍ਜਂ, ਆਕਙ੍ਖਤਿ ਉਪਸਮ੍ਪਦਂ, ਤਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸੋ ਦਾਤਬ੍ਬੋ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬੋ – ਪਠਮਂ ਕੇਸਮਸ੍ਸੁਂ ਓਹਾਰਾਪੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦਾਪੇਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਾਪੇਤ੍ਵਾ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ਏਵਂ ਵਦੇਹੀਤਿ ਵਤ੍ਤਬ੍ਬੋ – ‘‘ਬੁਦ੍ਧਂ ਸਰਣਂ ਗਚ੍ਛਾਮਿ, ਧਮ੍ਮਂ ਸਰਣਂ ਗਚ੍ਛਾਮਿ, ਸਙ੍ਘਂ ਸਰਣਂ ਗਚ੍ਛਾਮਿ; ਦੁਤਿਯਮ੍ਪਿ ਬੁਦ੍ਧਂ ਸਰਣਂ ਗਚ੍ਛਾਮਿ, ਦੁਤਿਯਮ੍ਪਿ ਧਮ੍ਮਂ ਸਰਣਂ ਗਚ੍ਛਾਮਿ, ਦੁਤਿਯਮ੍ਪਿ ਸਙ੍ਘਂ ਸਰਣਂ ਗਚ੍ਛਾਮਿ; ਤਤਿਯਮ੍ਪਿ ਬੁਦ੍ਧਂ ਸਰਣਂ ਗਚ੍ਛਾਮਿ, ਤਤਿਯਮ੍ਪਿ ਧਮ੍ਮਂ ਸਰਣਂ ਗਚ੍ਛਾਮਿ, ਤਤਿਯਮ੍ਪਿ ਸਙ੍ਘਂ ਸਰਣਂ ਗਚ੍ਛਾਮੀ’’ਤਿ.

ਤੇਨ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੇਨ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਭਨ੍ਤੇ, ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਾਮਿ ਉਪਸਮ੍ਪਦਂ. ਸੋਹਂ, ਭਨ੍ਤੇ, ਸਙ੍ਘਂ ਚਤ੍ਤਾਰੋ ਮਾਸੇ ਪਰਿਵਾਸਂ ਯਾਚਾਮੀ’’ਤਿ. ਦੁਤਿਯਮ੍ਪਿ ਯਾਚਿਤਬ੍ਬੋ. ਤਤਿਯਮ੍ਪਿ ਯਾਚਿਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਤਿ ਉਪਸਮ੍ਪਦਂ. ਸੋ ਸਙ੍ਘਂ ਚਤ੍ਤਾਰੋ ਮਾਸੇ ਪਰਿਵਾਸਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ ਸਙ੍ਘੋ ਇਤ੍ਥਨ੍ਨਾਮਸ੍ਸ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸਂ ਦਦੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਤਿ ਉਪਸਮ੍ਪਦਂ. ਸੋ ਸਙ੍ਘਂ ਚਤ੍ਤਾਰੋ ਮਾਸੇ ਪਰਿਵਾਸਂ ਯਾਚਤਿ. ਸਙ੍ਘੋ ਇਤ੍ਥਨ੍ਨਾਮਸ੍ਸ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸਂ ਦੇਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸਸ੍ਸ ਦਾਨਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨੋ ਸਙ੍ਘੇਨ ਇਤ੍ਥਨ੍ਨਾਮਸ੍ਸ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੮੭. ‘‘ਏਵਂ ਖੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ, ਏਵਂ ਅਨਾਰਾਧਕੋ. ਕਥਞ੍ਚ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ? ਇਧ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਤਿਕਾਲੇਨ ਗਾਮਂ ਪਵਿਸਤਿ, ਅਤਿਦਿਵਾ ਪਟਿਕ੍ਕਮਤਿ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਵੇਸਿਯਾਗੋਚਰੋ ਵਾ ਹੋਤਿ, ਵਿਧਵਾਗੋਚਰੋ ਵਾ ਹੋਤਿ, ਥੁਲ੍ਲਕੁਮਾਰਿਕਾਗੋਚਰੋ ਵਾ ਹੋਤਿ, ਪਣ੍ਡਕਗੋਚਰੋ ਵਾ ਹੋਤਿ, ਭਿਕ੍ਖੁਨਿਗੋਚਰੋ ਵਾ ਹੋਤਿ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਯਾਨਿ ਤਾਨਿ ਸਬ੍ਰਹ੍ਮਚਾਰੀਨਂ ਉਚ੍ਚਾਵਚਾਨਿ ਕਰਣੀਯਾਨਿ, ਤਤ੍ਥ ਨ ਦਕ੍ਖੋ ਹੋਤਿ, ਨ ਅਨਲਸੋ, ਨ ਤਤ੍ਰੁਪਾਯਾਯ ਵੀਮਂਸਾਯ ਸਮਨ੍ਨਾਗਤੋ, ਨ ਅਲਂ ਕਾਤੁਂ, ਨ ਅਲਂ ਸਂਵਿਧਾਤੁਂ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਨ ਤਿਬ੍ਬਚ੍ਛਨ੍ਦੋ ਹੋਤਿ ਉਦ੍ਦੇਸੇ, ਪਰਿਪੁਚ੍ਛਾਯ, ਅਧਿਸੀਲੇ, ਅਧਿਚਿਤ੍ਤੇ, ਅਧਿਪਞ੍ਞਾਯ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਯਸ੍ਸ ਤਿਤ੍ਥਾਯਤਨਾ ਸਙ੍ਕਨ੍ਤੋ ਹੋਤਿ, ਤਸ੍ਸ ਸਤ੍ਥੁਨੋ ਤਸ੍ਸ ਦਿਟ੍ਠਿਯਾ ਤਸ੍ਸ ਖਨ੍ਤਿਯਾ ਤਸ੍ਸ ਰੁਚਿਯਾ ਤਸ੍ਸ ਆਦਾਯਸ੍ਸ ਅਵਣ੍ਣੇ ਭਞ੍ਞਮਾਨੇ ਕੁਪਿਤੋ ਹੋਤਿ ਅਨਤ੍ਤਮਨੋ ਅਨਭਿਰਦ੍ਧੋ, ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਅਵਣ੍ਣੇ ਭਞ੍ਞਮਾਨੇ ਅਤ੍ਤਮਨੋ ਹੋਤਿ ਉਦਗ੍ਗੋ ਅਭਿਰਦ੍ਧੋ. ਯਸ੍ਸ ਵਾ ਪਨ ਤਿਤ੍ਥਾਯਤਨਾ ਸਙ੍ਕਨ੍ਤੋ ਹੋਤਿ, ਤਸ੍ਸ ਸਤ੍ਥੁਨੋ ਤਸ੍ਸ ਦਿਟ੍ਠਿਯਾ ਤਸ੍ਸ ਖਨ੍ਤਿਯਾ ਤਸ੍ਸ ਰੁਚਿਯਾ ਤਸ੍ਸ ਆਦਾਯਸ੍ਸ ਵਣ੍ਣੇ ਭਞ੍ਞਮਾਨੇ ਅਤ੍ਤਮਨੋ ਹੋਤਿ ਉਦਗ੍ਗੋ ਅਭਿਰਦ੍ਧੋ, ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਵਣ੍ਣੇ ਭਞ੍ਞਮਾਨੇ ਕੁਪਿਤੋ ਹੋਤਿ ਅਨਤ੍ਤਮਨੋ ਅਨਭਿਰਦ੍ਧੋ. ਇਦਂ, ਭਿਕ੍ਖਵੇ, ਸਙ੍ਘਾਤਨਿਕਂ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਅਨਾਰਾਧਨੀਯਸ੍ਮਿਂ. ਏਵਮ੍ਪਿ ਖੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ. ਏਵਂ ਅਨਾਰਾਧਕੋ ਖੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਗਤੋ ਨ ਉਪਸਮ੍ਪਾਦੇਤਬ੍ਬੋ.

‘‘ਕਥਞ੍ਚ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ? ਇਧ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਨਾਤਿਕਾਲੇਨ ਗਾਮਂ ਪਵਿਸਤਿ ਨਾਤਿਦਿਵਾ ਪਟਿਕ੍ਕਮਤਿ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਨ ਵੇਸਿਯਾਗੋਚਰੋ ਹੋਤਿ, ਨ ਵਿਧਵਾਗੋਚਰੋ ਹੋਤਿ, ਨ ਥੁਲ੍ਲਕੁਮਾਰਿਕਾਗੋਚਰੋ ਹੋਤਿ, ਨ ਪਣ੍ਡਕਗੋਚਰੋ ਹੋਤਿ, ਨ ਭਿਕ੍ਖੁਨਿਗੋਚਰੋ ਹੋਤਿ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਯਾਨਿ ਤਾਨਿ ਸਬ੍ਰਹ੍ਮਚਾਰੀਨਂ ਉਚ੍ਚਾਵਚਾਨਿ ਕਰਣੀਯਾਨਿ, ਤਤ੍ਥ ਦਕ੍ਖੋ ਹੋਤਿ, ਅਨਲਸੋ, ਤਤ੍ਰੁਪਾਯਾਯ ਵੀਮਂਸਾਯ ਸਮਨ੍ਨਾਗਤੋ, ਅਲਂ ਕਾਤੁਂ, ਅਲਂ ਸਂਵਿਧਾਤੁਂ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਤਿਬ੍ਬਚ੍ਛਨ੍ਦੋ ਹੋਤਿ ਉਦ੍ਦੇਸੇ, ਪਰਿਪੁਚ੍ਛਾਯ, ਅਧਿਸੀਲੇ, ਅਧਿਚਿਤ੍ਤੇ, ਅਧਿਪਞ੍ਞਾਯ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਯਸ੍ਸ ਤਿਤ੍ਥਾਯਤਨਾ ਸਙ੍ਕਨ੍ਤੋ ਹੋਤਿ, ਤਸ੍ਸ ਸਤ੍ਥੁਨੋ ਤਸ੍ਸ ਦਿਟ੍ਠਿਯਾ ਤਸ੍ਸ ਖਨ੍ਤਿਯਾ ਤਸ੍ਸ ਰੁਚਿਯਾ ਤਸ੍ਸ ਆਦਾਯਸ੍ਸ ਅਵਣ੍ਣੇ ਭਞ੍ਞਮਾਨੇ ਅਤ੍ਤਮਨੋ ਹੋਤਿ ਉਦਗ੍ਗੋ ਅਭਿਰਦ੍ਧੋ, ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਅਵਣ੍ਣੇ ਭਞ੍ਞਮਾਨੇ ਕੁਪਿਤੋ ਹੋਤਿ ਅਨਤ੍ਤਮਨੋ ਅਨਭਿਰਦ੍ਧੋ. ਯਸ੍ਸ ਵਾ ਪਨ ਤਿਤ੍ਥਾਯਤਨਾ ਸਙ੍ਕਨ੍ਤੋ ਹੋਤਿ, ਤਸ੍ਸ ਸਤ੍ਥੁਨੋ ਤਸ੍ਸ ਦਿਟ੍ਠਿਯਾ ਤਸ੍ਸ ਖਨ੍ਤਿਯਾ ਤਸ੍ਸ ਰੁਚਿਯਾ ਤਸ੍ਸ ਆਦਾਯਸ੍ਸ ਵਣ੍ਣੇ ਭਞ੍ਞਮਾਨੇ ਕੁਪਿਤੋ ਹੋਤਿ ਅਨਤ੍ਤਮਨੋ ਅਨਭਿਰਦ੍ਧੋ, ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਵਣ੍ਣੇ ਭਞ੍ਞਮਾਨੇ ਅਤ੍ਤਮਨੋ ਹੋਤਿ ਉਦਗ੍ਗੋ ਅਭਿਰਦ੍ਧੋ. ਇਦਂ, ਭਿਕ੍ਖਵੇ, ਸਙ੍ਘਾਤਨਿਕਂ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਆਰਾਧਨੀਯਸ੍ਮਿਂ. ਏਵਮ੍ਪਿ ਖੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ. ਏਵਂ ਆਰਾਧਕੋ ਖੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਗਤੋ ਉਪਸਮ੍ਪਾਦੇਤਬ੍ਬੋ.

‘‘ਸਚੇ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਨਗ੍ਗੋ ਆਗਚ੍ਛਤਿ, ਉਪਜ੍ਝਾਯਮੂਲਕਂ ਚੀਵਰਂ ਪਰਿਯੇਸਿਤਬ੍ਬਂ. ਸਚੇ ਅਚ੍ਛਿਨ੍ਨਕੇਸੋ ਆਗਚ੍ਛਤਿ, ਸਙ੍ਘੋ ਅਪਲੋਕੇਤਬ੍ਬੋ ਭਣ੍ਡੁਕਮ੍ਮਾਯ. ਯੇ ਤੇ, ਭਿਕ੍ਖਵੇ, ਅਗ੍ਗਿਕਾ ਜਟਿਲਕਾ, ਤੇ ਆਗਤਾ ਉਪਸਮ੍ਪਾਦੇਤਬ੍ਬਾ, ਨ ਤੇਸਂ ਪਰਿਵਾਸੋ ਦਾਤਬ੍ਬੋ. ਤਂ ਕਿਸ੍ਸ ਹੇਤੁ? ਕਮ੍ਮਵਾਦਿਨੋ ਏਤੇ, ਭਿਕ੍ਖਵੇ, ਕਿਰਿਯਵਾਦਿਨੋ. ਸਚੇ, ਭਿਕ੍ਖਵੇ, ਜਾਤਿਯਾ ਸਾਕਿਯੋ ਅਞ੍ਞਤਿਤ੍ਥਿਯਪੁਬ੍ਬੋ ਆਗਚ੍ਛਤਿ, ਸੋ ਆਗਤੋ ਉਪਸਮ੍ਪਾਦੇਤਬ੍ਬੋ, ਨ ਤਸ੍ਸ ਪਰਿਵਾਸੋ ਦਾਤਬ੍ਬੋ. ਇਮਾਹਂ, ਭਿਕ੍ਖਵੇ, ਞਾਤੀਨਂ ਆਵੇਣਿਕਂ ਪਰਿਹਾਰਂ ਦਮ੍ਮੀ’’ਤਿ.

ਅਞ੍ਞਤਿਤ੍ਥਿਯਪੁਬ੍ਬਕਥਾ ਨਿਟ੍ਠਿਤਾ.

ਸਤ੍ਤਮਭਾਣਵਾਰੋ.

੨੬. ਪਞ੍ਚਾਬਾਧਵਤ੍ਥੁ

੮੮. ਤੇਨ ਖੋ ਪਨ ਸਮਯੇਨ ਮਗਧੇਸੁ ਪਞ੍ਚ ਆਬਾਧਾ ਉਸ੍ਸਨ੍ਨਾ ਹੋਨ੍ਤਿ – ਕੁਟ੍ਠਂ, ਗਣ੍ਡੋ, ਕਿਲਾਸੋ, ਸੋਸੋ, ਅਪਮਾਰੋ. ਮਨੁਸ੍ਸਾ ਪਞ੍ਚਹਿ ਆਬਾਧੇਹਿ ਫੁਟ੍ਠਾ ਜੀਵਕਂ ਕੋਮਾਰਭਚ੍ਚਂ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘‘ਸਾਧੁ ਨੋ, ਆਚਰਿਯ, ਤਿਕਿਚ੍ਛਾਹੀ’’ਤਿ. ‘‘ਅਹਂ ਖ੍ਵਯ੍ਯੋ, ਬਹੁਕਿਚ੍ਚੋ ਬਹੁਕਰਣੀਯੋ; ਰਾਜਾ ਚ ਮੇ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਉਪਟ੍ਠਾਤਬ੍ਬੋ ਇਤ੍ਥਾਗਾਰਞ੍ਚ ਬੁਦ੍ਧਪ੍ਪਮੁਖੋ ਚ ਭਿਕ੍ਖੁਸਙ੍ਘੋ; ਨਾਹਂ ਸਕ੍ਕੋਮਿ ਤਿਕਿਚ੍ਛਿਤੁ’’ਨ੍ਤਿ. ‘‘ਸਬ੍ਬਂ ਸਾਪਤੇਯ੍ਯਞ੍ਚ ਤੇ, ਆਚਰਿਯ, ਹੋਤੁ; ਮਯਞ੍ਚ ਤੇ ਦਾਸਾ; ਸਾਧੁ, ਨੋ, ਆਚਰਿਯ, ਤਿਕਿਚ੍ਛਾਹੀ’’ਤਿ. ‘‘ਅਹਂ ਖ੍ਵਯ੍ਯੋ, ਬਹੁਕਿਚ੍ਚੋ ਬਹੁਕਰਣੀਯੋ ਰਾਜਾ ਚ ਮੇ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਉਪਟ੍ਠਾਤਬ੍ਬੋ ਇਤ੍ਥਾਗਾਰਞ੍ਚ ਬੁਦ੍ਧਪ੍ਪਮੁਖੋ ਚ ਭਿਕ੍ਖੁਸਙ੍ਘੋ; ਨਾਹਂ ਸਕ੍ਕੋਮਿ ਤਿਕਿਚ੍ਛਿਤੁ’’ਨ੍ਤਿ. ਅਥ ਖੋ ਤੇਸਂ ਮਨੁਸ੍ਸਾਨਂ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਸੁਖਸੀਲਾ ਸੁਖਸਮਾਚਾਰਾ, ਸੁਭੋਜਨਾਨਿ ਭੁਞ੍ਜਿਤ੍ਵਾ ਨਿਵਾਤੇਸੁ ਸਯਨੇਸੁ ਸਯਨ੍ਤਿ. ਯਂਨੂਨ ਮਯਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯਾਮ. ਤਤ੍ਥ ਭਿਕ੍ਖੂ ਚੇਵ ਉਪਟ੍ਠਹਿਸ੍ਸਨ੍ਤਿ, ਜੀਵਕੋ ਚ ਕੋਮਾਰਭਚ੍ਚੋ ਤਿਕਿਚ੍ਛਿਸ੍ਸਤੀ’’ਤਿ. ਅਥ ਖੋ ਤੇ ਮਨੁਸ੍ਸਾ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿਂਸੁ. ਤੇ ਭਿਕ੍ਖੂ ਪਬ੍ਬਾਜੇਸੁਂ, ਉਪਸਮ੍ਪਾਦੇਸੁਂ. ਤੇ ਭਿਕ੍ਖੂ ਚੇਵ ਉਪਟ੍ਠਹਿਂਸੁ ਜੀਵਕੋ ਚ ਕੋਮਾਰਭਚ੍ਚੋ ਤਿਕਿਚ੍ਛਿ. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਬਹੂ ਗਿਲਾਨੇ ਭਿਕ੍ਖੂ ਉਪਟ੍ਠਹਨ੍ਤਾ ਯਾਚਨਬਹੁਲਾ ਵਿਞ੍ਞਤ੍ਤਿਬਹੁਲਾ ਵਿਹਰਨ੍ਤਿ – ਗਿਲਾਨਭਤ੍ਤਂ ਦੇਥ, ਗਿਲਾਨੁਪਟ੍ਠਾਕਭਤ੍ਤਂ ਦੇਥ, ਗਿਲਾਨਭੇਸਜ੍ਜਂ ਦੇਥਾਤਿ. ਜੀਵਕੋਪਿ ਕੋਮਾਰਭਚ੍ਚੋ ਬਹੂ ਗਿਲਾਨੇ ਭਿਕ੍ਖੂ ਤਿਕਿਚ੍ਛਨ੍ਤੋ ਅਞ੍ਞਤਰਂ ਰਾਜਕਿਚ੍ਚਂ ਪਰਿਹਾਪੇਸਿ.

੮੯. ਅਞ੍ਞਤਰੋਪਿ ਪੁਰਿਸੋ ਪਞ੍ਚਹਿ ਆਬਾਧੇਹਿ ਫੁਟ੍ਠੋ ਜੀਵਕਂ ਕੋਮਾਰਭਚ੍ਚਂ ਉਪਸਙ੍ਕਮਿਤ੍ਵਾ ਏਤਦਵੋਚ – ‘‘ਸਾਧੁ ਮਂ, ਆਚਰਿਯ, ਤਿਕਿਚ੍ਛਾਹੀ’’ਤਿ. ‘‘ਅਹਂ ਖ੍ਵਯ੍ਯੋ, ਬਹੁਕਿਚ੍ਚੋ, ਬਹੁਕਰਣੀਯੋ, ਰਾਜਾ ਚ ਮੇ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਉਪਟ੍ਠਾਤਬ੍ਬੋ ਇਤ੍ਥਾਗਾਰਞ੍ਚ ਬੁਦ੍ਧਪ੍ਪਮੁਖੋ ਚ ਭਿਕ੍ਖੁਸਙ੍ਘੋ; ਨਾਹਂ ਸਕ੍ਕੋਮਿ ਤਿਕਿਚ੍ਛਿਤੁ’’ਨ੍ਤਿ. ‘‘ਸਬ੍ਬਂ ਸਾਪਤੇਯ੍ਯਞ੍ਚ ਤੇ, ਆਚਰਿਯ, ਹੋਤੁ, ਅਹਞ੍ਚ ਤੇ ਦਾਸੋ; ਸਾਧੁ ਮਂ, ਆਚਰਿਯ, ਤਿਕਿਚ੍ਛਾਹੀ’’ਤਿ. ‘‘ਅਹਂ ਖ੍ਵਯ੍ਯੋ, ਬਹੁਕਿਚ੍ਚੋ ਬਹੁਕਰਣੀਯੋ, ਰਾਜਾ ਚ ਮੇ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਉਪਟ੍ਠਾਤਬ੍ਬੋ ਇਤ੍ਥਾਗਾਰਞ੍ਚ ਬੁਦ੍ਧਪ੍ਪਮੁਖੋ ਚ ਭਿਕ੍ਖੁਸਙ੍ਘੋ, ਨਾਹਂ ਸਕ੍ਕੋਮਿ ਤਿਕਿਚ੍ਛਿਤੁ’’ਨ੍ਤਿ. ਅਥ ਖੋ ਤਸ੍ਸ ਪੁਰਿਸਸ੍ਸ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਸੁਖਸੀਲਾ ਸੁਖਸਮਾਚਾਰਾ, ਸੁਭੋਜਨਾਨਿ ਭੁਞ੍ਜਿਤ੍ਵਾ ਨਿਵਾਤੇਸੁ ਸਯਨੇਸੁ ਸਯਨ੍ਤਿ. ਯਂਨੂਨਾਹਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯਂ. ਤਤ੍ਥ ਭਿਕ੍ਖੂ ਚੇਵ ਉਪਟ੍ਠਹਿਸ੍ਸਨ੍ਤਿ, ਜੀਵਕੋ ਚ ਕੋਮਾਰਭਚ੍ਚੋ ਤਿਕਿਚ੍ਛਿਸ੍ਸਤਿ. ਸੋਮ੍ਹਿ [ਸੋਹਂ (ਬਹੂਸੁ, ਵਿਮਤਿਵਿਨੋਦਨੀਟੀਕਾ ਓਲੋਕੇਤਬ੍ਬਾ)] ਅਰੋਗੋ ਵਿਬ੍ਭਮਿਸ੍ਸਾਮੀ’’ਤਿ. ਅਥ ਖੋ ਸੋ ਪੁਰਿਸੋ ਭਿਕ੍ਖੁ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਂ ਭਿਕ੍ਖੂ ਪਬ੍ਬਾਜੇਸੁਂ, ਉਪਸਮ੍ਪਾਦੇਸੁਂ. ਤਂ ਭਿਕ੍ਖੂ ਚੇਵ ਉਪਟ੍ਠਹਿਂਸੁ, ਜੀਵਕੋ ਚ ਕੋਮਾਰਭਚ੍ਚੋ ਤਿਕਿਚ੍ਛਿ. ਸੋ ਅਰੋਗੋ ਵਿਬ੍ਭਮਿ. ਅਦ੍ਦਸਾ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਪੁਰਿਸਂ ਵਿਬ੍ਭਨ੍ਤਂ, ਦਿਸ੍ਵਾਨ ਤਂ ਪੁਰਿਸਂ ਏਤਦਵੋਚ – ‘‘ਨਨੁ ਤ੍ਵਂ, ਅਯ੍ਯੋ, ਭਿਕ੍ਖੂਸੁ ਪਬ੍ਬਜਿਤੋ ਅਹੋਸੀ’’ਤਿ? ‘‘ਏਵਂ, ਆਚਰਿਯਾ’’ਤਿ. ‘‘ਕਿਸ੍ਸ ਪਨ ਤ੍ਵਂ, ਅਯ੍ਯੋ, ਏਵਰੂਪਮਕਾਸੀ’’ਤਿ? ਅਥ ਖੋ ਸੋ ਪੁਰਿਸੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਮਤ੍ਥਂ ਆਰੋਚੇਸਿ. ਜੀਵਕੋ ਕੋਮਾਰਭਚ੍ਚੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ [ਭਦ੍ਦਨ੍ਤਾ (ਕ.)] ਪਞ੍ਚਹਿ ਆਬਾਧੇਹਿ ਫੁਟ੍ਠਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਸਾਧੁ, ਭਨ੍ਤੇ, ਅਯ੍ਯਾ ਪਞ੍ਚਹਿ ਆਬਾਧੇਹਿ ਫੁਟ੍ਠਂ ਨ ਪਬ੍ਬਾਜੇਯ੍ਯੁ’’ਨ੍ਤਿ. ਅਥ ਖੋ ਭਗਵਾ ਜੀਵਕਂ ਕੋਮਾਰਭਚ੍ਚਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਪਞ੍ਚਹਿ ਆਬਾਧੇਹਿ ਫੁਟ੍ਠੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਪਞ੍ਚਾਬਾਧਵਤ੍ਥੁ ਨਿਟ੍ਠਿਤਂ.

੨੭. ਰਾਜਭਟਵਤ੍ਥੁ

੯੦. ਤੇਨ ਖੋ ਪਨ ਸਮਯੇਨ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਚ੍ਚਨ੍ਤੋ ਕੁਪਿਤੋ ਹੋਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਸੇਨਾਨਾਯਕੇ ਮਹਾਮਤ੍ਤੇ ਆਣਾਪੇਸਿ – ‘‘ਗਚ੍ਛਥ, ਭਣੇ, ਪਚ੍ਚਨ੍ਤਂ ਉਚ੍ਚਿਨਥਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਸੇਨਾਨਾਯਕਾ ਮਹਾਮਤ੍ਤਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਚ੍ਚਸ੍ਸੋਸੁਂ. ਅਥ ਖੋ ਅਭਿਞ੍ਞਾਤਾਨਂ ਅਭਿਞ੍ਞਾਤਾਨਂ ਯੋਧਾਨਂ ਏਤਦਹੋਸਿ – ‘‘ਮਯਂ ਖੋ ਯੁਦ੍ਧਾਭਿਨਨ੍ਦਿਨੋ ਗਚ੍ਛਨ੍ਤਾ ਪਾਪਞ੍ਚ ਕਰੋਮ, ਬਹੁਞ੍ਚ ਅਪੁਞ੍ਞਂ ਪਸਵਾਮ. ਕੇਨ ਨੁ ਖੋ ਮਯਂ ਉਪਾਯੇਨ ਪਾਪਾ ਚ ਵਿਰਮੇਯ੍ਯਾਮ ਕਲ੍ਯਾਣਞ੍ਚ ਕਰੇਯ੍ਯਾਮਾ’’ਤਿ? ਅਥ ਖੋ ਤੇਸਂ ਯੋਧਾਨਂ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ. ਸਚੇ ਖੋ ਮਯਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯਾਮ, ਏਵਂ ਮਯਂ ਪਾਪਾ ਚ ਵਿਰਮੇਯ੍ਯਾਮ ਕਲ੍ਯਾਣਞ੍ਚ ਕਰੇਯ੍ਯਾਮਾ’’ਤਿ. ਅਥ ਖੋ ਤੇ ਯੋਧਾ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿਂਸੁ. ਤੇ ਭਿਕ੍ਖੂ ਪਬ੍ਬਾਜੇਸੁਂ, ਉਪਸਮ੍ਪਾਦੇਸੁਂ. ਸੇਨਾਨਾਯਕਾ ਮਹਾਮਤ੍ਤਾ ਰਾਜਭਟੇ ਪੁਚ੍ਛਿਂਸੁ – ‘‘ਕਿਂ ਨੁ ਖੋ, ਭਣੇ, ਇਤ੍ਥਨ੍ਨਾਮੋ ਚ ਇਤ੍ਥਨ੍ਨਾਮੋ ਚ ਯੋਧਾ ਨ ਦਿਸ੍ਸਨ੍ਤੀ’’ਤਿ? ‘‘ਇਤ੍ਥਨ੍ਨਾਮੋ ਚ ਇਤ੍ਥਨ੍ਨਾਮੋ ਚ, ਸਾਮਿ, ਯੋਧਾ ਭਿਕ੍ਖੂਸੁ ਪਬ੍ਬਜਿਤਾ’’ਤਿ. ਸੇਨਾਨਾਯਕਾ ਮਹਾਮਤ੍ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਰਾਜਭਟਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਸੇਨਾਨਾਯਕਾ ਮਹਾਮਤ੍ਤਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਵੋਹਾਰਿਕੇ ਮਹਾਮਤ੍ਤੇ ਪੁਚ੍ਛਿ – ‘‘ਯੋ, ਭਣੇ, ਰਾਜਭਟਂ ਪਬ੍ਬਾਜੇਤਿ, ਕਿਂ ਸੋ ਪਸਵਤੀ’’ਤਿ? ‘‘ਉਪਜ੍ਝਾਯਸ੍ਸ, ਦੇਵ, ਸੀਸਂ ਛੇਤਬ੍ਬਂ, ਅਨੁਸ੍ਸਾਵਕਸ੍ਸ [ਅਨੁਸਾਵਕਸ੍ਸ (ਕ.)] ਜਿਵ੍ਹਾ ਉਦ੍ਧਰਿਤਬ੍ਬਾ, ਗਣਸ੍ਸ ਉਪਡ੍ਢਫਾਸੁਕਾ ਭਞ੍ਜਿਤਬ੍ਬਾ’’ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਭਗਵਨ੍ਤਂ ਏਤਦਵੋਚ – ‘‘ਸਨ੍ਤਿ, ਭਨ੍ਤੇ, ਰਾਜਾਨੋ ਅਸ੍ਸਦ੍ਧਾ ਅਪ੍ਪਸਨ੍ਨਾ. ਤੇ ਅਪ੍ਪਮਤ੍ਤਕੇਨਪਿ ਭਿਕ੍ਖੂ ਵਿਹੇਠੇਯ੍ਯੁਂ. ਸਾਧੁ, ਭਨ੍ਤੇ, ਅਯ੍ਯਾ ਰਾਜਭਟਂ ਨ ਪਬ੍ਬਾਜੇਯ੍ਯੁ’’ਨ੍ਤਿ. ਅਥ ਖੋ ਭਗਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਰਾਜਭਟੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਰਾਜਭਟਵਤ੍ਥੁ ਨਿਟ੍ਠਿਤਂ.

੨੮. ਅਙ੍ਗੁਲਿਮਾਲਚੋਰਵਤ੍ਥੁ

੯੧. ਤੇਨ ਖੋ ਪਨ ਸਮਯੇਨ ਚੋਰੋ ਅਙ੍ਗੁਲਿਮਾਲੋ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਮਨੁਸ੍ਸਾ ਪਸ੍ਸਿਤ੍ਵਾ ਉਬ੍ਬਿਜ੍ਜਨ੍ਤਿਪਿ, ਉਤ੍ਤਸਨ੍ਤਿਪਿ, ਪਲਾਯਨ੍ਤਿਪਿ, ਅਞ੍ਞੇਨਪਿ ਗਚ੍ਛਨ੍ਤਿ, ਅਞ੍ਞੇਨਪਿ ਮੁਖਂ ਕਰੋਨ੍ਤਿ, ਦ੍ਵਾਰਮ੍ਪਿ ਥਕੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਧਜਬਨ੍ਧਂ ਚੋਰਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਨ, ਭਿਕ੍ਖਵੇ, ਧਜਬਨ੍ਧੋ ਚੋਰੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਅਙ੍ਗੁਲਿਮਾਲਚੋਰਵਤ੍ਥੁ ਨਿਟ੍ਠਿਤਂ.

੨੯. ਕਾਰਭੇਦਕਚੋਰਵਤ੍ਥੁ

੯੨. ਤੇਨ ਖੋ ਪਨ ਸਮਯੇਨ ਰਞ੍ਞਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨ ਅਨੁਞ੍ਞਾਤਂ ਹੋਤਿ – ‘‘ਯੇ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜਨ੍ਤਿ, ਨ ਤੇ ਲਬ੍ਭਾ ਕਿਞ੍ਚਿ ਕਾਤੁਂ; ਸ੍ਵਾਕ੍ਖਾਤੋ ਧਮ੍ਮੋ, ਚਰਨ੍ਤੁ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਿਸੋ ਚੋਰਿਕਂ ਕਤ੍ਵਾ ਕਾਰਾਯ ਬਦ੍ਧੋ ਹੋਤਿ. ਸੋ ਕਾਰਂ ਭਿਨ੍ਦਿਤ੍ਵਾ ਪਲਾਯਿਤ੍ਵਾ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਮਨੁਸ੍ਸਾ ਪਸ੍ਸਿਤ੍ਵਾ ਏਵਮਾਹਂਸੁ – ‘‘ਅਯਂ ਸੋ ਕਾਰਭੇਦਕੋ ਚੋਰੋ. ਹਨ੍ਦ, ਨਂ ਨੇਮਾ’’ਤਿ. ਏਕਚ੍ਚੇ ਏਵਮਾਹਂਸੁ – ‘‘ਮਾਯ੍ਯੋ, ਏਵਂ ਅਵਚੁਤ੍ਥ. ਅਨੁਞ੍ਞਾਤਂ ਰਞ੍ਞਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨ – ‘‘ਯੇ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜਨ੍ਤਿ, ਨ ਤੇ ਲਬ੍ਭਾ ਕਿਞ੍ਚਿ ਕਾਤੁਂ; ਸ੍ਵਾਕ੍ਖਾਤੋ ਧਮ੍ਮੋ, ਚਰਨ੍ਤੁ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਭਯੂਵਰਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ, ਨਯਿਮੇ ਲਬ੍ਭਾ ਕਿਞ੍ਚਿ ਕਾਤੁਂ. ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਕਾਰਭੇਦਕਂ ਚੋਰਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਕਾਰਭੇਦਕੋ ਚੋਰੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਕਾਰਭੇਦਕਚੋਰਵਤ੍ਥੁ ਨਿਟ੍ਠਿਤਂ.

੩੦. ਲਿਖਿਤਕਚੋਰਵਤ੍ਥੁ

੯੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਿਸੋ ਚੋਰਿਕਂ ਕਤ੍ਵਾ ਪਲਾਯਿਤ੍ਵਾ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਸੋ ਚ ਰਞ੍ਞੋ ਅਨ੍ਤੇਪੁਰੇ ਲਿਖਿਤੋ ਹੋਤਿ – ਯਤ੍ਥ ਪਸ੍ਸਤਿ, ਤਤ੍ਥ ਹਨ੍ਤਬ੍ਬੋਤਿ. ਮਨੁਸ੍ਸਾ ਪਸ੍ਸਿਤ੍ਵਾ ਏਵਮਾਹਂਸੁ – ‘‘ਅਯਂ ਸੋ ਲਿਖਿਤਕੋ ਚੋਰੋ. ਹਨ੍ਦ, ਨਂ ਹਨਾਮਾ’’ਤਿ. ਏਕਚ੍ਚੇ ਏਵਮਾਹਂਸੁ – ‘‘ਮਾਯ੍ਯੋ, ਏਵਂ ਅਵਚੁਤ੍ਥ. ਅਨੁਞ੍ਞਾਤਂ ਰਞ੍ਞਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨ ‘‘ਯੇ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜਨ੍ਤਿ, ਨ ਤੇ ਲਬ੍ਭਾ ਕਿਞ੍ਚਿ ਕਾਤੁਂ, ਸ੍ਵਾਕ੍ਖਾਤੋ ਧਮ੍ਮੋ, ਚਰਨ੍ਤੁ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਭਯੂਵਰਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ, ਨਯਿਮੇ ਲਬ੍ਭਾ ਕਿਞ੍ਚਿ ਕਾਤੁਂ. ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਲਿਖਿਤਕਂ ਚੋਰਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਲਿਖਿਤਕੋ ਚੋਰੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਲਿਖਿਤਕਚੋਰਵਤ੍ਥੁ ਨਿਟ੍ਠਿਤਂ.

੩੧. ਕਸਾਹਤਵਤ੍ਥੁ

੯੪. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਿਸੋ ਕਸਾਹਤੋ ਕਤਦਣ੍ਡਕਮ੍ਮੋ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਕਸਾਹਤਂ ਕਤਦਣ੍ਡਕਮ੍ਮਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਕਸਾਹਤੋ ਕਤਦਣ੍ਡਕਮ੍ਮੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਕਸਾਹਤਵਤ੍ਥੁ ਨਿਟ੍ਠਿਤਂ.

੩੨. ਲਕ੍ਖਣਾਹਤਵਤ੍ਥੁ

੯੫. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਿਸੋ ਲਕ੍ਖਣਾਹਤੋ ਕਤਦਣ੍ਡਕਮ੍ਮੋ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਲਕ੍ਖਣਾਹਤਂ ਕਤਦਣ੍ਡਕਮ੍ਮਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਲਕ੍ਖਣਾਹਤੋ ਕਤਦਣ੍ਡਕਮ੍ਮੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਲਕ੍ਖਣਾਹਤਵਤ੍ਥੁ ਨਿਟ੍ਠਿਤਂ.

੩੩. ਇਣਾਯਿਕਵਤ੍ਥੁ

੯੬. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਿਸੋ ਇਣਾਯਿਕੋ ਪਲਾਯਿਤ੍ਵਾ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਧਨਿਯਾ ਪਸ੍ਸਿਤ੍ਵਾ ਏਵਮਾਹਂਸੁ – ‘‘ਅਯਂ ਸੋ ਅਮ੍ਹਾਕਂ ਇਣਾਯਿਕੋ. ਹਨ੍ਦ, ਨਂ ਨੇਮਾ’’ਤਿ. ਏਕਚ੍ਚੇ ਏਵਮਾਹਂਸੁ – ‘‘ਮਾਯ੍ਯੋ, ਏਵਂ ਅਵਚੁਤ੍ਥ. ਅਨੁਞ੍ਞਾਤਂ ਰਞ੍ਞਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨ – ‘‘ਯੇ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜਨ੍ਤਿ, ਨ ਤੇ ਲਬ੍ਭਾ ਕਿਞ੍ਚਿ ਕਾਤੁਂ; ਸ੍ਵਾਕ੍ਖਾਤੋ ਧਮ੍ਮੋ, ਚਰਨ੍ਤੁ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਭਯੂਵਰਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ. ਨਯਿਮੇ ਲਬ੍ਭਾ ਕਿਞ੍ਚਿ ਕਾਤੁਂ. ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਇਣਾਯਿਕਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਇਣਾਯਿਕੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਇਣਾਯਿਕਵਤ੍ਥੁ ਨਿਟ੍ਠਿਤਂ.

੩੪. ਦਾਸਵਤ੍ਥੁ

੯੭. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਦਾਸੋ ਪਲਾਯਿਤ੍ਵਾ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਅਯ੍ਯਕਾ [ਅਯ੍ਯਿਕਾ (ਕ.), ਅਯਿਰਕਾ (ਸੀ.)] ਪਸ੍ਸਿਤ੍ਵਾ ਏਵਮਾਹਂਸੁ – ‘‘ਅਯਂ ਸੋ ਅਮ੍ਹਾਕਂ ਦਾਸੋ. ਹਨ੍ਦ, ਨਂ ਨੇਮਾ’’ਤਿ. ਏਕਚ੍ਚੇ ਏਵਮਾਹਂਸੁ – ‘‘ਮਾਯ੍ਯੋ, ਏਵਂ ਅਵਚੁਤ੍ਥ, ਅਨੁਞ੍ਞਾਤਂ ਰਞ੍ਞਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨ ‘‘ਯੇ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜਨ੍ਤਿ, ਨ ਤੇ ਲਬ੍ਭਾ ਕਿਞ੍ਚਿ ਕਾਤੁਂ, ਸ੍ਵਾਕ੍ਖਾਤੋ ਧਮ੍ਮੋ, ਚਰਨ੍ਤੁ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਭਯੂਵਰਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ, ਨਯਿਮੇ ਲਬ੍ਭਾ ਕਿਞ੍ਚਿ ਕਾਤੁਂ. ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਦਾਸਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਦਾਸੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਦਾਸਵਤ੍ਥੁ ਨਿਟ੍ਠਿਤਂ.

੩੫. ਕਮ੍ਮਾਰਭਣ੍ਡੁਵਤ੍ਥੁ

੯੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਕਮ੍ਮਾਰਭਣ੍ਡੁ ਮਾਤਾਪਿਤੂਹਿ ਸਦ੍ਧਿਂ ਭਣ੍ਡਿਤ੍ਵਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਅਥ ਖੋ ਤਸ੍ਸ ਕਮ੍ਮਾਰਭਣ੍ਡੁਸ੍ਸ ਮਾਤਾਪਿਤਰੋ ਤਂ ਕਮ੍ਮਾਰਭਣ੍ਡੁਂ ਵਿਚਿਨਨ੍ਤਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂ ਪੁਚ੍ਛਿਂਸੁ – ‘‘ਅਪਿ, ਭਨ੍ਤੇ, ਏਵਰੂਪਂ ਦਾਰਕਂ ਪਸ੍ਸੇਯ੍ਯਾਥਾ’’ਤਿ? ਭਿਕ੍ਖੂ ਅਜਾਨਂਯੇਵ ਆਹਂਸੁ – ‘‘ਨ ਜਾਨਾਮਾ’’ਤਿ, ਅਪਸ੍ਸਂਯੇਵ ਆਹਂਸੁ – ‘‘ਨ ਪਸ੍ਸਾਮਾ’’ਤਿ. ਅਥ ਖੋ ਤਸ੍ਸ ਕਮ੍ਮਾਰਭਣ੍ਡੁਸ੍ਸ ਮਾਤਾਪਿਤਰੋ ਤਂ ਕਮ੍ਮਾਰਭਣ੍ਡੁਂ ਵਿਚਿਨਨ੍ਤਾ ਭਿਕ੍ਖੂਸੁ ਪਬ੍ਬਜਿਤਂ ਦਿਸ੍ਵਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਲਜ੍ਜਿਨੋ ਇਮੇ ਸਮਣਾ ਸਕ੍ਯਪੁਤ੍ਤਿਯਾ, ਦੁਸ੍ਸੀਲਾ ਮੁਸਾਵਾਦਿਨੋ. ਜਾਨਂਯੇਵ ਆਹਂਸੁ – ‘ਨ ਜਾਨਾਮਾ’ਤਿ, ਪਸ੍ਸਂਯੇਵ ਆਹਂਸੁ – ‘ਨ ਪਸ੍ਸਾਮਾ’ਤਿ. ਅਯਂ ਦਾਰਕੋ ਭਿਕ੍ਖੂਸੁ ਪਬ੍ਬਜਿਤੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤਸ੍ਸ ਕਮ੍ਮਾਰਭਣ੍ਡੁਸ੍ਸ ਮਾਤਾਪਿਤੂਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਂ ਅਪਲੋਕੇਤੁਂ ਭਣ੍ਡੁਕਮ੍ਮਾਯਾਤਿ.

ਕਮ੍ਮਾਰਭਣ੍ਡੁਵਤ੍ਥੁ ਨਿਟ੍ਠਿਤਂ.

੩੬. ਉਪਾਲਿਦਾਰਕਵਤ੍ਥੁ

੯੯. [ਇਦਂ ਵਤ੍ਥੁ ਪਾਚਿ. ੪੦੨ ਆਦਯੋ] ਤੇਨ ਖੋ ਪਨ ਸਮਯੇਨ ਰਾਜਗਹੇ ਸਤ੍ਤਰਸਵਗ੍ਗਿਯਾ ਦਾਰਕਾ ਸਹਾਯਕਾ ਹੋਨ੍ਤਿ. ਉਪਾਲਿਦਾਰਕੋ ਤੇਸਂ ਪਾਮੋਕ੍ਖੋ ਹੋਤਿ. ਅਥ ਖੋ ਉਪਾਲਿਸ੍ਸ ਮਾਤਾਪਿਤੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਉਪਾਯੇਨ ਉਪਾਲਿ ਅਮ੍ਹਾਕਂ ਅਚ੍ਚਯੇਨ ਸੁਖਞ੍ਚ ਜੀਵੇਯ੍ਯ, ਨ ਚ ਕਿਲਮੇਯ੍ਯਾ’’ਤਿ? ਅਥ ਖੋ ਉਪਾਲਿਸ੍ਸ ਮਾਤਾਪਿਤੂਨਂ ਏਤਦਹੋਸਿ – ‘‘ਸਚੇ ਖੋ ਉਪਾਲਿ ਲੇਖਂ ਸਿਕ੍ਖੇਯ੍ਯ, ਏਵਂ ਖੋ ਉਪਾਲਿ ਅਮ੍ਹਾਕਂ ਅਚ੍ਚਯੇਨ ਸੁਖਞ੍ਚ ਜੀਵੇਯ੍ਯ, ਨ ਚ ਕਿਲਮੇਯ੍ਯਾ’’ਤਿ. ਅਥ ਖੋ ਉਪਾਲਿਸ੍ਸ ਮਾਤਾਪਿਤੂਨਂ ਏਤਦਹੋਸਿ – ‘‘ਸਚੇ ਖੋ ਉਪਾਲਿ ਲੇਖਂ ਸਿਕ੍ਖਿਸ੍ਸਤਿ, ਅਙ੍ਗੁਲਿਯੋ ਦੁਕ੍ਖਾ ਭਵਿਸ੍ਸਨ੍ਤਿ. ਸਚੇ ਖੋ ਉਪਾਲਿ ਗਣਨਂ ਸਿਕ੍ਖੇਯ੍ਯ, ਏਵਂ ਖੋ ਉਪਾਲਿ ਅਮ੍ਹਾਕਂ ਅਚ੍ਚਯੇਨ ਸੁਖਞ੍ਚ ਜੀਵੇਯ੍ਯ, ਨ ਚ ਕਿਲਮੇਯ੍ਯਾ’’ਤਿ. ਅਥ ਖੋ ਉਪਾਲਿਸ੍ਸ ਮਾਤਾਪਿਤੂਨਂ ਏਤਦਹੋਸਿ – ‘‘ਸਚੇ ਖੋ ਉਪਾਲਿ ਗਣਨਂ ਸਿਕ੍ਖਿਸ੍ਸਤਿ, ਉਰਸ੍ਸ ਦੁਕ੍ਖੋ ਭਵਿਸ੍ਸਤਿ. ਸਚੇ ਖੋ ਉਪਾਲਿ ਰੂਪਂ ਸਿਕ੍ਖੇਯ੍ਯ, ਏਵਂ ਖੋ ਉਪਾਲਿ ਅਮ੍ਹਾਕਂ ਅਚ੍ਚਯੇਨ ਸੁਖਞ੍ਚ ਜੀਵੇਯ੍ਯ, ਨ ਚ ਕਿਲਮੇਯ੍ਯਾ’’ਤਿ. ਅਥ ਖੋ ਉਪਾਲਿਸ੍ਸ ਮਾਤਾਪਿਤੂਨਂ ਏਤਦਹੋਸਿ – ‘‘ਸਚੇ ਖੋ ਉਪਾਲਿ ਰੂਪਂ ਸਿਕ੍ਖਿਸ੍ਸਤਿ, ਅਕ੍ਖੀਨਿ ਦੁਕ੍ਖਾ ਭਵਿਸ੍ਸਨ੍ਤਿ. ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਸੁਖਸੀਲਾ ਸੁਖਸਮਾਚਾਰਾ, ਸੁਭੋਜਨਾਨਿ ਭੁਞ੍ਜਿਤ੍ਵਾ ਨਿਵਾਤੇਸੁ ਸਯਨੇਸੁ ਸਯਨ੍ਤਿ. ਸਚੇ ਖੋ ਉਪਾਲਿ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯ, ਏਵਂ ਖੋ ਉਪਾਲਿ ਅਮ੍ਹਾਕਂ ਅਚ੍ਚਯੇਨ ਸੁਖਞ੍ਚ ਜੀਵੇਯ੍ਯ, ਨ ਚ ਕਿਲਮੇਯ੍ਯਾ’’ਤਿ.

ਅਸ੍ਸੋਸਿ ਖੋ ਉਪਾਲਿਦਾਰਕੋ ਮਾਤਾਪਿਤੂਨਂ ਇਮਂ ਕਥਾਸਲ੍ਲਾਪਂ. ਅਥ ਖੋ ਉਪਾਲਿਦਾਰਕੋ ਯੇਨ ਤੇ ਦਾਰਕਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤੇ ਦਾਰਕੇ ਏਤਦਵੋਚ – ‘‘ਏਥ ਮਯਂ, ਅਯ੍ਯਾ, ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜਿਸ੍ਸਾਮਾ’’ਤਿ. ‘‘ਸਚੇ ਖੋ ਤ੍ਵਂ, ਅਯ੍ਯ, ਪਬ੍ਬਜਿਸ੍ਸਸਿ, ਏਵਂ ਮਯਮ੍ਪਿ ਪਬ੍ਬਜਿਸ੍ਸਾਮਾ’’ਤਿ. ਅਥ ਖੋ ਤੇ ਦਾਰਕਾ ਏਕਮੇਕਸ੍ਸ ਮਾਤਾਪਿਤਰੋ ਉਪਸਙ੍ਕਮਿਤ੍ਵਾ ਏਤਦਵੋਚੁਂ – ‘‘ਅਨੁਜਾਨਾਥ ਮਂ ਅਗਾਰਸ੍ਮਾ ਅਨਾਗਾਰਿਯਂ ਪਬ੍ਬਜ੍ਜਾਯਾ’’ਤਿ. ਅਥ ਖੋ ਤੇਸਂ ਦਾਰਕਾਨਂ ਮਾਤਾਪਿਤਰੋ – ‘‘ਸਬ੍ਬੇਪਿਮੇ ਦਾਰਕਾ ਸਮਾਨਚ੍ਛਨ੍ਦਾ ਕਲ੍ਯਾਣਾਧਿਪ੍ਪਾਯਾ’’ਤਿ – ਅਨੁਜਾਨਿਂਸੁ. ਤੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿਂਸੁ. ਤੇ ਭਿਕ੍ਖੂ ਪਬ੍ਬਾਜੇਸੁਂ ਉਪਸਮ੍ਪਾਦੇਸੁਂ. ਤੇ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਰੋਦਨ੍ਤਿ – ‘‘ਯਾਗੁਂ ਦੇਥ, ਭਤ੍ਤਂ ਦੇਥ, ਖਾਦਨੀਯਂ ਦੇਥਾ’’ਤਿ. ਭਿਕ੍ਖੂ ਏਵਮਾਹਂਸੁ – ‘‘ਆਗਮੇਥ, ਆਵੁਸੋ, ਯਾਵ ਰਤ੍ਤਿ ਵਿਭਾਯਤਿ. ਸਚੇ ਯਾਗੁ ਭਵਿਸ੍ਸਤਿ ਪਿਵਿਸ੍ਸਥ, ਸਚੇ ਭਤ੍ਤਂ ਭਵਿਸ੍ਸਤਿ ਭੁਞ੍ਜਿਸ੍ਸਥ, ਸਚੇ ਖਾਦਨੀਯਂ ਭਵਿਸ੍ਸਤਿ ਖਾਦਿਸ੍ਸਥ; ਨੋ ਚੇ ਭਵਿਸ੍ਸਤਿ ਯਾਗੁ ਵਾ ਭਤ੍ਤਂ ਵਾ ਖਾਦਨੀਯਂ ਵਾ, ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਸ੍ਸਥਾ’’ਤਿ. ਏਵਮ੍ਪਿ ਖੋ ਤੇ ਭਿਕ੍ਖੂ ਭਿਕ੍ਖੂਹਿ ਵੁਚ੍ਚਮਾਨਾ ਰੋਦਨ੍ਤਿਯੇਵ ‘‘ਯਾਗੁਂ ਦੇਥ, ਭਤ੍ਤਂ ਦੇਥ, ਖਾਦਨੀਯਂ ਦੇਥਾ’’ਤਿ; ਸੇਨਾਸਨਂ ਉਹਦਨ੍ਤਿਪਿ ਉਮ੍ਮਿਹਨ੍ਤਿਪਿ.

ਅਸ੍ਸੋਸਿ ਖੋ ਭਗਵਾ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਦਾਰਕਸਦ੍ਦਂ. ਸੁਤ੍ਵਾਨ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕਿਂ ਨੁ ਖੋ ਸੋ, ਆਨਨ੍ਦ, ਦਾਰਕਸਦ੍ਦੋ’’ਤਿ? ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਏਤਮਤ੍ਥਂ ਆਰੋਚੇਸਿ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਜਾਨਂ ਊਨਵੀਸਤਿਵਸ੍ਸਂ ਪੁਗ੍ਗਲਂ ਉਪਸਮ੍ਪਾਦੇਨ੍ਤੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਜਾਨਂ ਊਨਵੀਸਤਿਵਸ੍ਸਂ ਪੁਗ੍ਗਲਂ ਉਪਸਮ੍ਪਾਦੇਸ੍ਸਨ੍ਤਿ. ਊਨਵੀਸਤਿਵਸ੍ਸੋ, ਭਿਕ੍ਖਵੇ, ਪੁਗ੍ਗਲੋ ਅਕ੍ਖਮੋ ਹੋਤਿ ਸੀਤਸ੍ਸ ਉਣ੍ਹਸ੍ਸ ਜਿਘਚ੍ਛਾਯ ਪਿਪਾਸਾਯ ਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸਾਨਂ ਦੁਰੁਤ੍ਤਾਨਂ ਦੁਰਾਗਤਾਨਂ ਵਚਨਪਥਾਨਂ ਉਪ੍ਪਨ੍ਨਾਨਂ ਸਾਰੀਰਿਕਾਨਂ ਵੇਦਨਾਨਂ ਦੁਕ੍ਖਾਨਂ ਤਿਬ੍ਬਾਨਂ ਖਰਾਨਂ ਕਟੁਕਾਨਂ ਅਸਾਤਾਨਂ ਅਮਨਾਪਾਨਂ ਪਾਣਹਰਾਨਂ ਅਨਧਿਵਾਸਕਜਾਤਿਕੋ ਹੋਤਿ. ਵੀਸਤਿਵਸ੍ਸੋਵ ਖੋ, ਭਿਕ੍ਖਵੇ, ਪੁਗ੍ਗਲੋ ਖਮੋ ਹੋਤਿ ਸੀਤਸ੍ਸ ਉਣ੍ਹਸ੍ਸ ਜਿਘਚ੍ਛਾਯ ਪਿਪਾਸਾਯ ਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸਾਨਂ ਦੁਰੁਤ੍ਤਾਨਂ ਦੁਰਾਗਤਾਨਂ ਵਚਨਪਥਾਨਂ, ਉਪ੍ਪਨ੍ਨਾਨਂ ਸਾਰੀਰਿਕਾਨਂ ਵੇਦਨਾਨਂ ਦੁਕ੍ਖਾਨਂ ਤਿਬ੍ਬਾਨਂ ਖਰਾਨਂ ਕਟੁਕਾਨਂ ਅਸਾਤਾਨਂ ਅਮਨਾਪਾਨਂ ਪਾਣਹਰਾਨਂ ਅਧਿਵਾਸਕਜਾਤਿਕੋ ਹੋਤਿ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ, ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਜਾਨਂ ਊਨਵੀਸਤਿਵਸ੍ਸੋ ਪੁਗ੍ਗਲੋ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਉਪਾਲਿਦਾਰਕਵਤ੍ਥੁ ਨਿਟ੍ਠਿਤਂ.

੩੭. ਅਹਿਵਾਤਕਰੋਗਵਤ੍ਥੁ

੧੦੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰਂ ਕੁਲਂ ਅਹਿਵਾਤਕਰੋਗੇਨ ਕਾਲਙ੍ਕਤਂ ਹੋਤਿ. ਤਸ੍ਸ ਪਿਤਾਪੁਤ੍ਤਕਾ ਸੇਸਾ ਹੋਨ੍ਤਿ. ਤੇ ਭਿਕ੍ਖੂਸੁ ਪਬ੍ਬਜਿਤ੍ਵਾ ਏਕਤੋਵ ਪਿਣ੍ਡਾਯ ਚਰਨ੍ਤਿ. ਅਥ ਖੋ ਸੋ ਦਾਰਕੋ ਪਿਤੁਨੋ ਭਿਕ੍ਖਾਯ ਦਿਨ੍ਨਾਯ ਉਪਧਾਵਿਤ੍ਵਾ ਏਤਦਵੋਚ – ‘‘ਮਯ੍ਹਮ੍ਪਿ, ਤਾਤ, ਦੇਹਿ; ਮਯ੍ਹਮ੍ਪਿ, ਤਾਤ, ਦੇਹੀ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਬ੍ਰਹ੍ਮਚਾਰਿਨੋ ਇਮੇ ਸਮਣਾ ਸਕ੍ਯਪੁਤ੍ਤਿਯਾ. ਅਯਮ੍ਪਿ ਦਾਰਕੋ ਭਿਕ੍ਖੁਨਿਯਾ ਜਾਤੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਊਨਪਨ੍ਨਰਸਵਸ੍ਸੋ ਦਾਰਕੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਆਨਨ੍ਦਸ੍ਸ ਉਪਟ੍ਠਾਕਕੁਲਂ ਸਦ੍ਧਂ ਪਸਨ੍ਨਂ ਅਹਿਵਾਤਕਰੋਗੇਨ ਕਾਲਙ੍ਕਤਂ ਹੋਤਿ, ਦ੍ਵੇ ਚ ਦਾਰਕਾ ਸੇਸਾ ਹੋਨ੍ਤਿ. ਤੇ ਪੋਰਾਣਕੇਨ ਆਚਿਣ੍ਣਕਪ੍ਪੇਨ ਭਿਕ੍ਖੂ ਪਸ੍ਸਿਤ੍ਵਾ ਉਪਧਾਵਨ੍ਤਿ. ਭਿਕ੍ਖੂ ਅਪਸਾਦੇਨ੍ਤਿ. ਤੇ ਭਿਕ੍ਖੂਹਿ ਅਪਸਾਦਿਯਮਾਨਾ ਰੋਦਨ੍ਤਿ. ਅਥ ਖੋ ਆਯਸ੍ਮਤੋ ਆਨਨ੍ਦਸ੍ਸ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਊਨਪਨ੍ਨਰਸਵਸ੍ਸੋ ਦਾਰਕੋ ਪਬ੍ਬਾਜੇਤਬ੍ਬੋ’ਤਿ. ਇਮੇ ਚ ਦਾਰਕਾ ਊਨਪਨ੍ਨਰਸਵਸ੍ਸਾ. ਕੇਨ ਨੁ ਖੋ ਉਪਾਯੇਨ ਇਮੇ ਦਾਰਕਾ ਨ ਵਿਨਸ੍ਸੇਯ੍ਯੁ’’ਨ੍ਤਿ? ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਉਸ੍ਸਹਨ੍ਤਿ ਪਨ ਤੇ, ਆਨਨ੍ਦ, ਦਾਰਕਾ ਕਾਕੇ ਉਡ੍ਡਾਪੇਤੁਨ੍ਤਿ? ਉਸ੍ਸਹਨ੍ਤਿ, ਭਗਵਾਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਊਨਪਨ੍ਨਰਸਵਸ੍ਸਂ ਦਾਰਕਂ ਕਾਕੁਡ੍ਡੇਪਕਂ ਪਬ੍ਬਾਜੇਤੁ’’ਨ੍ਤਿ.

ਅਹਿਵਾਤਕਰੋਗਵਤ੍ਥੁ ਨਿਟ੍ਠਿਤਂ.

੩੮. ਕਣ੍ਟਕਵਤ੍ਥੁ

੧੦੧. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਦ੍ਵੇ ਸਾਮਣੇਰਾ ਹੋਨ੍ਤਿ – ਕਣ੍ਟਕੋ ਚ ਮਹਕੋ ਚ. ਤੇ ਅਞ੍ਞਮਞ੍ਞਂ ਦੂਸੇਸੁਂ. ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਾਮਣੇਰਾ ਏਵਰੂਪਂ ਅਨਾਚਾਰਂ ਆਚਰਿਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਏਕੇਨ ਦ੍ਵੇ ਸਾਮਣੇਰਾ ਉਪਟ੍ਠਾਪੇਤਬ੍ਬਾ. ਯੋ ਉਪਟ੍ਠਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਕਣ੍ਟਕਵਤ੍ਥੁ ਨਿਟ੍ਠਿਤਂ.

੩੯. ਆਹੁਨ੍ਦਰਿਕਵਤ੍ਥੁ

੧੦੨. ਤੇਨ ਖੋ ਪਨ ਸਮਯੇਨ ਭਗਵਾ ਤਤ੍ਥੇਵ ਰਾਜਗਹੇ ਵਸ੍ਸਂ ਵਸਿ, ਤਤ੍ਥ ਹੇਮਨ੍ਤਂ, ਤਤ੍ਥ ਗਿਮ੍ਹਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਆਹੁਨ੍ਦਰਿਕਾ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਦਿਸਾ ਅਨ੍ਧਕਾਰਾ, ਨ ਇਮੇਸਂ ਦਿਸਾ ਪਕ੍ਖਾਯਨ੍ਤੀ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਗਚ੍ਛਾਨਨ੍ਦ, ਅਵਾਪੁਰਣਂ [ਅਪਾਪੁਰਣਂ (ਕ.)] ਆਦਾਯ ਅਨੁਪਰਿਵੇਣਿਯਂ ਭਿਕ੍ਖੂਨਂ ਆਰੋਚੇਹਿ – ‘‘ਇਚ੍ਛਤਾਵੁਸੋ ਭਗਵਾ ਦਕ੍ਖਿਣਾਗਿਰਿਂ ਚਾਰਿਕਂ ਪਕ੍ਕਮਿਤੁਂ. ਯਸ੍ਸਾਯਸ੍ਮਤੋ ਅਤ੍ਥੋ, ਸੋ ਆਗਚ੍ਛਤੂ’’ਤਿ. ਏਵਂ, ਭਨ੍ਤੇ, ਤਿ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਪਟਿਸ੍ਸੁਣਿਤ੍ਵਾ ਅਵਾਪੁਰਣਂ ਆਦਾਯ ਅਨੁਪਰਿਵੇਣਿਯਂ ਭਿਕ੍ਖੂਨਂ ਆਰੋਚੇਸਿ – ‘ਇਚ੍ਛਤਾਵੁਸੋ ਭਗਵਾ ਦਕ੍ਖਿਣਾਗਿਰਿਂ ਚਾਰਿਕਂ ਪਕ੍ਕਮਿਤੁਂ. ਯਸ੍ਸਾਯਸ੍ਮਤੋ ਅਤ੍ਥੋ, ਸੋ ਆਗਚ੍ਛਤੂ’’’ਤਿ. ਭਿਕ੍ਖੂ ਏਵਮਾਹਂਸੁ – ‘‘ਭਗਵਤਾ, ਆਵੁਸੋ ਆਨਨ੍ਦ, ਪਞ੍ਞਤ੍ਤਂ ਦਸਵਸ੍ਸਾਨਿ ਨਿਸ੍ਸਾਯ ਵਤ੍ਥੁਂ, ਦਸਵਸ੍ਸੇਨ ਨਿਸ੍ਸਯਂ ਦਾਤੁਂ. ਤਤ੍ਥ ਚ ਨੋ ਗਨ੍ਤਬ੍ਬਂ ਭਵਿਸ੍ਸਤਿ, ਨਿਸ੍ਸਯੋ ਚ ਗਹੇਤਬ੍ਬੋ ਭਵਿਸ੍ਸਤਿ, ਇਤ੍ਤਰੋ ਚ ਵਾਸੋ ਭਵਿਸ੍ਸਤਿ, ਪੁਨ ਚ ਪਚ੍ਚਾਗਨ੍ਤਬ੍ਬਂ ਭਵਿਸ੍ਸਤਿ, ਪੁਨ ਚ ਨਿਸ੍ਸਯੋ ਗਹੇਤਬ੍ਬੋ ਭਵਿਸ੍ਸਤਿ. ਸਚੇ ਅਮ੍ਹਾਕਂ ਆਚਰਿਯੁਪਜ੍ਝਾਯਾ ਗਮਿਸ੍ਸਨ੍ਤਿ, ਮਯਮ੍ਪਿ ਗਮਿਸ੍ਸਾਮ; ਨੋ ਚੇ ਅਮ੍ਹਾਕਂ ਆਚਰਿਯੁਪਜ੍ਝਾਯਾ ਗਮਿਸ੍ਸਨ੍ਤਿ, ਮਯਮ੍ਪਿ ਨ ਗਮਿਸ੍ਸਾਮ. ਲਹੁਚਿਤ੍ਤਕਤਾ ਨੋ, ਆਵੁਸੋ ਆਨਨ੍ਦ, ਪਞ੍ਞਾਯਿਸ੍ਸਤੀ’’ਤਿ. ਅਥ ਖੋ ਭਗਵਾ ਓਗਣੇਨ ਭਿਕ੍ਖੁਸਙ੍ਘੇਨ ਦਕ੍ਖਿਣਾਗਿਰਿਂ ਚਾਰਿਕਂ ਪਕ੍ਕਾਮਿ.

ਆਹੁਨ੍ਦਰਿਕਵਤ੍ਥੁ ਨਿਟ੍ਠਿਤਂ.

੪੦. ਨਿਸ੍ਸਯਮੁਚ੍ਚਨਕਕਥਾ

੧੦੩. ਅਥ ਖੋ ਭਗਵਾ ਦਕ੍ਖਿਣਾਗਿਰਿਸ੍ਮਿਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਪੁਨਦੇਵ ਰਾਜਗਹਂ ਪਚ੍ਚਾਗਚ੍ਛਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕਿਂ ਨੁ ਖੋ, ਆਨਨ੍ਦ, ਤਥਾਗਤੋ ਓਗਣੇਨ ਭਿਕ੍ਖੁਸਙ੍ਘੇਨ ਦਕ੍ਖਿਣਾਗਿਰਿਂ ਚਾਰਿਕਂ ਪਕ੍ਕਨ੍ਤੋ’’ਤਿ? ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਪਞ੍ਚਵਸ੍ਸਾਨਿ ਨਿਸ੍ਸਾਯ ਵਤ੍ਥੁਂ, ਅਬ੍ਯਤ੍ਤੇਨ ਯਾਵਜੀਵਂ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਨ ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ ਨ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ, ਨ ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ ਨ ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਨ ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ. ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ… ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ… ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਅਸ੍ਸਦ੍ਧੋ ਹੋਤਿ, ਅਹਿਰਿਕੋ ਹੋਤਿ, ਅਨੋਤ੍ਤਪ੍ਪੀ ਹੋਤਿ, ਕੁਸੀਤੋ ਹੋਤਿ, ਮੁਟ੍ਠਸ੍ਸਤਿ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਸਦ੍ਧੋ ਹੋਤਿ, ਹਿਰਿਮਾ ਹੋਤਿ, ਓਤ੍ਤਪ੍ਪੀ ਹੋਤਿ, ਆਰਦ੍ਧਵੀਰਿਯੋ ਹੋਤਿ, ਉਪਟ੍ਠਿਤਸ੍ਸਤਿ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ, ਅਪ੍ਪਸ੍ਸੁਤੋ ਹੋਤਿ, ਦੁਪ੍ਪਞ੍ਞੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਨ ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਨ ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਨ ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ, ਬਹੁਸ੍ਸੁਤੋ ਹੋਤਿ, ਪਞ੍ਞਵਾ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਆਪਤ੍ਤਿਂ ਨ ਜਾਨਾਤਿ, ਅਨਾਪਤ੍ਤਿਂ ਨ ਜਾਨਾਤਿ, ਲਹੁਕਂ ਆਪਤ੍ਤਿਂ ਨ ਜਾਨਾਤਿ, ਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਨ ਸ੍ਵਾਗਤਾਨਿ ਹੋਨ੍ਤਿ ਨ ਸੁਵਿਭਤ੍ਤਾਨਿ ਨ ਸੁਪ੍ਪਵਤ੍ਤੀਨਿ ਨ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਆਪਤ੍ਤਿਂ ਜਾਨਾਤਿ, ਅਨਾਪਤ੍ਤਿਂ ਜਾਨਾਤਿ, ਲਹੁਕਂ ਆਪਤ੍ਤਿਂ ਜਾਨਾਤਿ, ਗਰੁਕਂ ਆਪਤ੍ਤਿਂ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਸ੍ਵਾਗਤਾਨਿ ਹੋਨ੍ਤਿ ਸੁਵਿਭਤ੍ਤਾਨਿ ਸੁਪ੍ਪਵਤ੍ਤੀਨਿ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਆਪਤ੍ਤਿਂ ਨ ਜਾਨਾਤਿ, ਅਨਾਪਤ੍ਤਿਂ ਨ ਜਾਨਾਤਿ, ਲਹੁਕਂ ਆਪਤ੍ਤਿਂ ਨ ਜਾਨਾਤਿ, ਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਊਨਪਞ੍ਚਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਆਪਤ੍ਤਿਂ ਜਾਨਾਤਿ, ਅਨਾਪਤ੍ਤਿਂ ਜਾਨਾਤਿ, ਲਹੁਕਂ ਆਪਤ੍ਤਿਂ ਜਾਨਾਤਿ, ਗਰੁਕਂ ਆਪਤ੍ਤਿਂ ਜਾਨਾਤਿ, ਪਞ੍ਚਵਸ੍ਸੋ ਵਾ ਹੋਤਿ ਅਤਿਰੇਕ ਪਞ੍ਚਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ.

ਨਿਸ੍ਸਯਮੁਚ੍ਚਨਕਕਥਾ ਨਿਟ੍ਠਿਤਾ.

ਪਞ੍ਚਕਦਸਵਾਰੋ ਨਿਟ੍ਠਿਤੋ.

੧੦੪. ‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਨ ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਨ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ, ਨ ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ, ਨ ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ, ਨ ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਊਨਪਞ੍ਚਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ, ਅਸੇਕ੍ਖੇਨ ਪਞ੍ਞਾਕ੍ਖਨ੍ਧੇਨ, ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ, ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਞ੍ਚਵਸ੍ਸੋ ਵਾ ਹੋਤਿ ਅਤਿਰੇਕਪਞ੍ਚਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਅਸ੍ਸਦ੍ਧੋ ਹੋਤਿ, ਅਹਿਰਿਕੋ ਹੋਤਿ, ਅਨੋਤ੍ਤਪ੍ਪੀ ਹੋਤਿ, ਕੁਸੀਤੋ ਹੋਤਿ, ਮੁਟ੍ਠਸ੍ਸਤਿ ਹੋਤਿ, ਊਨਪਞ੍ਚਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਸਦ੍ਧੋ ਹੋਤਿ, ਹਿਰਿਮਾ ਹੋਤਿ, ਓਤ੍ਤਪ੍ਪੀ ਹੋਤਿ, ਆਰਦ੍ਧਵੀਰਿਯੋ ਹੋਤਿ, ਉਪਟ੍ਠਿਤਸ੍ਸਤਿ ਹੋਤਿ, ਪਞ੍ਚਵਸ੍ਸੋ ਵਾ ਹੋਤਿ ਅਤਿਰੇਕਪਞ੍ਚਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ, ਅਪ੍ਪਸ੍ਸੁਤੋ ਹੋਤਿ, ਦੁਪ੍ਪਞ੍ਞੋ ਹੋਤਿ, ਊਨਪਞ੍ਚਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਨ ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਨ ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਨ ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ, ਬਹੁਸ੍ਸੁਤੋ ਹੋਤਿ, ਪਞ੍ਞਵਾ ਹੋਤਿ, ਪਞ੍ਚਵਸ੍ਸੋ ਵਾ ਹੋਤਿ ਅਤਿਰੇਕਪਞ੍ਚਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਆਪਤ੍ਤਿਂ ਨ ਜਾਨਾਤਿ, ਅਨਾਪਤ੍ਤਿਂ ਨ ਜਾਨਾਤਿ, ਲਹੁਕਂ ਆਪਤ੍ਤਿਂ ਨ ਜਾਨਾਤਿ, ਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਨ ਸ੍ਵਾਗਤਾਨਿ ਹੋਨ੍ਤਿ ਨ ਸੁਵਿਭਤ੍ਤਾਨਿ ਨ ਸੁਪ੍ਪਵਤ੍ਤੀਨਿ ਨ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ, ਊਨਪਞ੍ਚਵਸ੍ਸੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਅਨਿਸ੍ਸਿਤੇਨ ਵਤ੍ਥਬ੍ਬਂ.

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ. ਆਪਤ੍ਤਿਂ ਜਾਨਾਤਿ, ਅਨਾਪਤ੍ਤਿਂ ਜਾਨਾਤਿ, ਲਹੁਕਂ ਆਪਤ੍ਤਿਂ ਜਾਨਾਤਿ, ਗਰੁਕਂ ਆਪਤ੍ਤਿਂ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਸ੍ਵਾਗਤਾਨਿ ਹੋਨ੍ਤਿ ਸੁਵਿਭਤ੍ਤਾਨਿ ਸੁਪ੍ਪਵਤ੍ਤੀਨਿ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ, ਪਞ੍ਚਵਸ੍ਸੋ ਵਾ ਹੋਤਿ ਅਤਿਰੇਕਪਞ੍ਚਵਸ੍ਸੋ ਵਾ – ਇਮੇਹਿ ਖੋ, ਭਿਕ੍ਖਵੇ, ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬ’’ਨ੍ਤਿ.

ਅਭਯੂਵਰਭਾਣਵਾਰੋ ਨਿਟ੍ਠਿਤੋ ਅਟ੍ਠਮੋ.

ਅਟ੍ਠਮਭਾਣਵਾਰੋ.

੪੧. ਰਾਹੁਲਵਤ੍ਥੁ

੧੦੫. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਕਪਿਲਵਤ੍ਥੁ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਕਪਿਲਵਤ੍ਥੁ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਸੁਦ੍ਧੋਦਨਸ੍ਸ ਸਕ੍ਕਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਰਾਹੁਲਮਾਤਾ ਦੇਵੀ ਰਾਹੁਲਂ ਕੁਮਾਰਂ ਏਤਦਵੋਚ – ‘‘ਏਸੋ ਤੇ, ਰਾਹੁਲ, ਪਿਤਾ. ਗਚ੍ਛਸ੍ਸੁ [ਗਚ੍ਛਸ੍ਸ (ਸ੍ਯਾ.)], ਦਾਯਜ੍ਜਂ ਯਾਚਾਹੀ’’ਤਿ. ਅਥ ਖੋ ਰਾਹੁਲੋ ਕੁਮਾਰੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਤੋ ਪੁਰਤੋ, ਅਟ੍ਠਾਸਿ – ‘‘ਸੁਖਾ ਤੇ, ਸਮਣ, ਛਾਯਾ’’ਤਿ. ਅਥ ਖੋ ਭਗਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਰਾਹੁਲੋ ਕੁਮਾਰੋ ਭਗਵਨ੍ਤਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿ – ‘‘ਦਾਯਜ੍ਜਂ ਮੇ, ਸਮਣ, ਦੇਹਿ; ਦਾਯਜ੍ਜਂ ਮੇ, ਸਮਣ, ਦੇਹੀ’’ਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਆਮਨ੍ਤੇਸਿ – ‘‘ਤੇਨ ਹਿ ਤ੍ਵਂ, ਸਾਰਿਪੁਤ੍ਤ, ਰਾਹੁਲਂ ਕੁਮਾਰਂ ਪਬ੍ਬਾਜੇਹੀ’’ਤਿ. ‘‘ਕਥਾਹਂ, ਭਨ੍ਤੇ, ਰਾਹੁਲਂ ਕੁਮਾਰਂ ਪਬ੍ਬਾਜੇਮੀ’’ਤਿ? ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਤੀਹਿ ਸਰਣਗਮਨੇਹਿ ਸਾਮਣੇਰਪਬ੍ਬਜ੍ਜਂ. ਏਵਞ੍ਚ ਪਨ, ਭਿਕ੍ਖਵੇ, ਪਬ੍ਬਾਜੇਤਬ੍ਬੋ – ਪਠਮਂ ਕੇਸਮਸ੍ਸੁਂ ਓਹਾਰਾਪੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦਾਪੇਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਾਪੇਤ੍ਵਾ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ਏਵਂ ਵਦੇਹੀਤਿ ਵਤ੍ਤਬ੍ਬੋ – ਬੁਦ੍ਧਂ ਸਰਣਂ ਗਚ੍ਛਾਮਿ, ਧਮ੍ਮਂ ਸਰਣਂ ਗਚ੍ਛਾਮਿ, ਸਙ੍ਘਂ ਸਰਣਂ ਗਚ੍ਛਾਮਿ; ਦੁਤਿਯਮ੍ਪਿ ਬੁਦ੍ਧਂ ਸਰਣਂ ਗਚ੍ਛਾਮਿ, ਦੁਤਿਯਮ੍ਪਿ ਧਮ੍ਮਂ ਸਰਣਂ ਗਚ੍ਛਾਮਿ, ਦੁਤਿਯਮ੍ਪਿ ਸਙ੍ਘਂ ਸਰਣਂ ਗਚ੍ਛਾਮਿ; ਤਤਿਯਮ੍ਪਿ ਬੁਦ੍ਧਂ ਸਰਣਂ ਗਚ੍ਛਾਮਿ, ਤਤਿਯਮ੍ਪਿ ਧਮ੍ਮਂ ਸਰਣਂ ਗਚ੍ਛਾਮਿ, ਤਤਿਯਮ੍ਪਿ ਸਙ੍ਘਂ ਸਰਣਂ ਗਚ੍ਛਾਮੀਤਿ. ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਤੀਹਿ ਸਰਣਗਮਨੇਹਿ ਸਾਮਣੇਰਪਬ੍ਬਜ੍ਜ’’ਨ੍ਤਿ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਰਾਹੁਲਂ ਕੁਮਾਰਂ ਪਬ੍ਬਾਜੇਸਿ.

ਅਥ ਖੋ ਸੁਦ੍ਧੋਦਨੋ ਸਕ੍ਕੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੁਦ੍ਧੋਦਨੋ ਸਕ੍ਕੋ ਭਗਵਨ੍ਤਂ ਏਤਦਵੋਚ – ‘‘ਏਕਾਹਂ, ਭਨ੍ਤੇ, ਭਗਵਨ੍ਤਂ ਵਰਂ ਯਾਚਾਮੀ’’ਤਿ. ‘‘ਅਤਿਕ੍ਕਨ੍ਤਵਰਾ ਖੋ, ਗੋਤਮ, ਤਥਾਗਤਾ’’ਤਿ. ‘‘ਯਞ੍ਚ, ਭਨ੍ਤੇ, ਕਪ੍ਪਤਿ, ਯਞ੍ਚ ਅਨਵਜ੍ਜ’’ਨ੍ਤਿ. ‘‘ਵਦੇਹਿ, ਗੋਤਮਾ’’ਤਿ. ‘‘ਭਗਵਤਿ ਮੇ, ਭਨ੍ਤੇ, ਪਬ੍ਬਜਿਤੇ ਅਨਪ੍ਪਕਂ ਦੁਕ੍ਖਂ ਅਹੋਸਿ, ਤਥਾ ਨਨ੍ਦੇ, ਅਧਿਮਤ੍ਤਂ ਰਾਹੁਲੇ. ਪੁਤ੍ਤਪੇਮਂ, ਭਨ੍ਤੇ, ਛਵਿਂ ਛਿਨ੍ਦਤਿ, ਛਵਿਂ ਛੇਤ੍ਵਾ ਚਮ੍ਮਂ ਛਿਨ੍ਦਤਿ, ਚਮ੍ਮਂ ਛੇਤ੍ਵਾ ਮਂਸਂ ਛਿਨ੍ਦਤਿ, ਮਂਸਂ ਛੇਤ੍ਵਾ ਨ੍ਹਾਰੁਂ ਛਿਨ੍ਦਤਿ, ਨ੍ਹਾਰੁਂ ਛੇਤ੍ਵਾ ਅਟ੍ਠਿਂ ਛਿਨ੍ਦਤਿ, ਅਟ੍ਠਿਂ ਛੇਤ੍ਵਾ ਅਟ੍ਠਿਮਿਞ੍ਜਂ ਆਹਚ੍ਚ ਤਿਟ੍ਠਤਿ. ਸਾਧੁ, ਭਨ੍ਤੇ, ਅਯ੍ਯਾ ਅਨਨੁਞ੍ਞਾਤਂ ਮਾਤਾਪਿਤੂਹਿ ਪੁਤ੍ਤਂ ਨ ਪਬ੍ਬਾਜੇਯ੍ਯੁ’’ਨ੍ਤਿ. ਅਥ ਖੋ ਭਗਵਾ ਸੁਦ੍ਧੋਦਨਂ ਸਕ੍ਕਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਸੁਦ੍ਧੋਦਨੋ ਸਕ੍ਕੋ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਅਨਨੁਞ੍ਞਾਤੋ ਮਾਤਾਪਿਤੂਹਿ ਪੁਤ੍ਤੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਅਥ ਖੋ ਭਗਵਾ ਕਪਿਲਵਤ੍ਥੁਸ੍ਮਿਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਉਪਟ੍ਠਾਕਕੁਲਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਸਨ੍ਤਿਕੇ ਦਾਰਕਂ ਪਾਹੇਸਿ – ‘‘ਇਮਂ ਦਾਰਕਂ ਥੇਰੋ ਪਬ੍ਬਾਜੇਤੂ’’ਤਿ. ਅਥ ਖੋ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਏਕੇਨ ਦ੍ਵੇ ਸਾਮਣੇਰਾ ਉਪਟ੍ਠਾਪੇਤਬ੍ਬਾ’ਤਿ. ਅਯਞ੍ਚ ਮੇ ਰਾਹੁਲੋ ਸਾਮਣੇਰੋ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸਿ. ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਏਕੇਨ ਦ੍ਵੇ ਸਾਮਣੇਰੇ ਉਪਟ੍ਠਾਪੇਤੁਂ, ਯਾਵਤਕੇ ਵਾ ਪਨ ਉਸ੍ਸਹਤਿ ਓਵਦਿਤੁਂ ਅਨੁਸਾਸਿਤੁਂ ਤਾਵਤਕੇ ਉਪਟ੍ਠਾਪੇਤੁਨ੍ਤਿ.

ਰਾਹੁਲਵਤ੍ਥੁ ਨਿਟ੍ਠਿਤਂ.

੪੨. ਸਿਕ੍ਖਾਪਦਕਥਾ

੧੦੬. ਅਥ ਖੋ ਸਾਮਣੇਰਾਨਂ ਏਤਦਹੋਸਿ – ‘‘ਕਤਿ ਨੁ ਖੋ ਅਮ੍ਹਾਕਂ ਸਿਕ੍ਖਾਪਦਾਨਿ, ਕਤ੍ਥ ਚ ਅਮ੍ਹੇਹਿ ਸਿਕ੍ਖਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਸਾਮਣੇਰਾਨਂ ਦਸ ਸਿਕ੍ਖਾਪਦਾਨਿ, ਤੇਸੁ ਚ ਸਾਮਣੇਰੇਹਿ ਸਿਕ੍ਖਿਤੁਂ – ਪਾਣਾਤਿਪਾਤਾ ਵੇਰਮਣੀ [ਵੇਰਮਣਿ, ਵੇਰਮਣਿਂ (ਕ.)], ਅਦਿਨ੍ਨਾਦਾਨਾ ਵੇਰਮਣੀ, ਅਬ੍ਰਹ੍ਮਚਰਿਯਾ ਵੇਰਮਣੀ, ਮੁਸਾਵਾਦਾ ਵੇਰਮਣੀ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਵੇਰਮਣੀ, ਵਿਕਾਲਭੋਜਨਾ ਵੇਰਮਣੀ, ਨਚ੍ਚਗੀਤਵਾਦਿਤਵਿਸੂਕਦਸ੍ਸਨਾ ਵੇਰਮਣੀ, ਮਾਲਾਗਨ੍ਧਵਿਲੇਪਨਧਾਰਣਮਣ੍ਡਨਵਿਭੂਸਨਟ੍ਠਾਨਾ ਵੇਰਮਣੀ, ਉਚ੍ਚਾਸਯਨਮਹਾਸਯਨਾ ਵੇਰਮਣੀ, ਜਾਤਰੂਪਰਜਤਪਟਿਗ੍ਗਹਣਾ ਵੇਰਮਣੀ. ਅਨੁਜਾਨਾਮਿ, ਭਿਕ੍ਖਵੇ, ਸਾਮਣੇਰਾਨਂ ਇਮਾਨਿ ਦਸ ਸਿਕ੍ਖਾਪਦਾਨਿ, ਇਮੇਸੁ ਚ ਸਾਮਣੇਰੇਹਿ ਸਿਕ੍ਖਿਤੁਨ੍ਤਿ.

ਸਿਕ੍ਖਾਪਦਕਥਾ ਨਿਟ੍ਠਿਤਾ.

੪੩. ਦਣ੍ਡਕਮ੍ਮਵਤ੍ਥੁ

੧੦੭. ਤੇਨ ਖੋ ਪਨ ਸਮਯੇਨ ਸਾਮਣੇਰਾ ਭਿਕ੍ਖੂਸੁ ਅਗਾਰਵਾ ਅਪ੍ਪਤਿਸ੍ਸਾ ਅਸਭਾਗਵੁਤ੍ਤਿਕਾ ਵਿਹਰਨ੍ਤਿ. ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਾਮਣੇਰਾ ਭਿਕ੍ਖੂਸੁ ਅਗਾਰਵਾ ਅਪ੍ਪਤਿਸ੍ਸਾ ਅਸਭਾਗਵੁਤ੍ਤਿਕਾ ਵਿਹਰਿਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਸਾਮਣੇਰਸ੍ਸ ਦਣ੍ਡਕਮ੍ਮਂ ਕਾਤੁਂ. ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਨਤ੍ਥਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਵਾਸਾਯ ਪਰਿਸਕ੍ਕਤਿ, ਭਿਕ੍ਖੂ ਅਕ੍ਕੋਸਤਿ ਪਰਿਭਾਸਤਿ, ਭਿਕ੍ਖੂ ਭਿਕ੍ਖੂਹਿ ਭੇਦੇਤਿ – ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਸਾਮਣੇਰਸ੍ਸ ਦਣ੍ਡਕਮ੍ਮਂ ਕਾਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਆਵਰਣਂ ਕਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸਾਮਣੇਰਾਨਂ ਸਬ੍ਬਂ ਸਙ੍ਘਾਰਾਮਂ ਆਵਰਣਂ ਕਰੋਨ੍ਤਿ. ਸਾਮਣੇਰਾ ਆਰਾਮਂ ਪਵਿਸਿਤੁਂ ਅਲਭਮਾਨਾ ਪਕ੍ਕਮਨ੍ਤਿਪਿ, ਵਿਬ੍ਭਮਨ੍ਤਿਪਿ, ਤਿਤ੍ਥਿਯੇਸੁਪਿ ਸਙ੍ਕਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਬ੍ਬੋ ਸਙ੍ਘਾਰਾਮੋ ਆਵਰਣਂ ਕਾਤਬ੍ਬੋ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਯਤ੍ਥ ਵਾ ਵਸਤਿ, ਯਤ੍ਥ ਵਾ ਪਟਿਕ੍ਕਮਤਿ, ਤਤ੍ਥ ਆਵਰਣਂ ਕਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸਾਮਣੇਰਾਨਂ ਮੁਖਦ੍ਵਾਰਿਕਂ ਆਹਾਰਂ ਆਵਰਣਂ ਕਰੋਨ੍ਤਿ. ਮਨੁਸ੍ਸਾ ਯਾਗੁਪਾਨਮ੍ਪਿ ਸਙ੍ਘਭਤ੍ਤਮ੍ਪਿ ਕਰੋਨ੍ਤਾ ਸਾਮਣੇਰੇ ਏਵਂ ਵਦੇਨ੍ਤਿ – ‘‘ਏਥ, ਭਨ੍ਤੇ, ਯਾਗੁਂ ਪਿਵਥ; ਏਥ, ਭਨ੍ਤੇ, ਭਤ੍ਤਂ ਭੁਞ੍ਜਥਾ’’ਤਿ. ਸਾਮਣੇਰਾ ਏਵਂ ਵਦੇਨ੍ਤਿ – ‘‘ਨਾਵੁਸੋ, ਲਬ੍ਭਾ. ਭਿਕ੍ਖੂਹਿ ਆਵਰਣਂ ਕਤ’’ਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ ਸਾਮਣੇਰਾਨਂ ਮੁਖਦ੍ਵਾਰਿਕਂ ਆਹਾਰਂ ਆਵਰਣਂ ਕਰਿਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਮੁਖਦ੍ਵਾਰਿਕੋ ਆਹਾਰੋ ਆਵਰਣਂ ਕਾਤਬ੍ਬੋ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਦਣ੍ਡਕਮ੍ਮਵਤ੍ਥੁ ਨਿਟ੍ਠਿਤਂ.

੪੪. ਅਨਾਪੁਚ੍ਛਾਵਰਣਵਤ੍ਥੁ

੧੦੮. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਪਜ੍ਝਾਯੇ ਅਨਾਪੁਚ੍ਛਾ ਸਾਮਣੇਰਾਨਂ ਆਵਰਣਂ ਕਰੋਨ੍ਤਿ. ਉਪਜ੍ਝਾਯਾ ਗਵੇਸਨ੍ਤਿ – ਕਥਂ [ਕਹਂ (ਕ.)] ਨੁ ਖੋ ਅਮ੍ਹਾਕਂ ਸਾਮਣੇਰਾ ਨ ਦਿਸ੍ਸਨ੍ਤੀਤਿ. ਭਿਕ੍ਖੂ ਏਵਮਾਹਂਸੁ – ‘‘ਛਬ੍ਬਗ੍ਗਿਯੇਹਿ, ਆਵੁਸੋ, ਭਿਕ੍ਖੂਹਿ ਆਵਰਣਂ ਕਤ’’ਨ੍ਤਿ. ਉਪਜ੍ਝਾਯਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਅਮ੍ਹੇ ਅਨਾਪੁਚ੍ਛਾ ਅਮ੍ਹਾਕਂ ਸਾਮਣੇਰਾਨਂ ਆਵਰਣਂ ਕਰਿਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਉਪਜ੍ਝਾਯੇ ਅਨਾਪੁਚ੍ਛਾ ਆਵਰਣਂ ਕਾਤਬ੍ਬਂ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਅਨਾਪੁਚ੍ਛਾਵਰਣਵਤ੍ਥੁ ਨਿਟ੍ਠਿਤਂ.

੪੫. ਅਪਲਾਲ਼ਨਵਤ੍ਥੁ

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਥੇਰਾਨਂ ਭਿਕ੍ਖੂਨਂ ਸਾਮਣੇਰੇ ਅਪਲਾਲ਼ੇਨ੍ਤਿ. ਥੇਰਾ ਸਾਮਂ ਦਨ੍ਤਕਟ੍ਠਮ੍ਪਿ ਮੁਖੋਦਕਮ੍ਪਿ ਗਣ੍ਹਨ੍ਤਾ ਕਿਲਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਞ੍ਞਸ੍ਸ ਪਰਿਸਾ ਅਪਲਾਲ਼ੇਤਬ੍ਬਾ. ਯੋ ਅਪਲਾਲ਼ੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ ਤਿ.

ਅਪਲਾਲ਼ਨਵਤ੍ਥੁ ਨਿਟ੍ਠਿਤਂ.

੪੬. ਕਣ੍ਟਕਸਾਮਣੇਰਵਤ੍ਥੁ

ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਕਣ੍ਟਕੋ ਨਾਮ ਸਾਮਣੇਰੋ ਕਣ੍ਟਕਿਂ ਨਾਮ ਭਿਕ੍ਖੁਨਿਂ ਦੂਸੇਸਿ. ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਾਮਣੇਰੋ ਏਵਰੂਪਂ ਅਨਾਚਾਰਂ ਆਚਰਿਸ੍ਸਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦਸਹਙ੍ਗੇਹਿ ਸਮਨ੍ਨਾਗਤਂ ਸਾਮਣੇਰਂ ਨਾਸੇਤੁਂ. ਪਾਣਾਤਿਪਾਤੀ ਹੋਤਿ, ਅਦਿਨ੍ਨਾਦਾਯੀ ਹੋਤਿ, ਅਬ੍ਰਹ੍ਮਚਾਰੀ ਹੋਤਿ, ਮੁਸਾਵਾਦੀ ਹੋਤਿ, ਮਜ੍ਜਪਾਯੀ ਹੋਤਿ, ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਸਙ੍ਘਸ੍ਸ ਅਵਣ੍ਣਂ ਭਾਸਤਿ, ਮਿਚ੍ਛਾਦਿਟ੍ਠਿਕੋ ਹੋਤਿ, ਭਿਕ੍ਖੁਨਿਦੂਸਕੋ ਹੋਤਿ – ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਦਸਹਙ੍ਗੇਹਿ ਸਮਨ੍ਨਾਗਤਂ ਸਾਮਣੇਰਂ ਨਾਸੇਤੁਨ੍ਤਿ.

੪੭. ਪਣ੍ਡਕਵਤ੍ਥੁ

੧੦੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪਣ੍ਡਕੋ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਸੋ ਦਹਰੇ ਦਹਰੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਵਂ ਵਦੇਤਿ – ‘‘ਏਥ, ਮਂ ਆਯਸ੍ਮਨ੍ਤੋ ਦੂਸੇਥਾ’’ਤਿ. ਭਿਕ੍ਖੂ ਅਪਸਾਦੇਨ੍ਤਿ – ‘‘ਨਸ੍ਸ, ਪਣ੍ਡਕ, ਵਿਨਸ੍ਸ, ਪਣ੍ਡਕ, ਕੋ ਤਯਾ ਅਤ੍ਥੋ’’ਤਿ. ਸੋ ਭਿਕ੍ਖੂਹਿ ਅਪਸਾਦਿਤੋ ਮਹਨ੍ਤੇ ਮਹਨ੍ਤੇ ਮੋਲ਼ਿਗਲ੍ਲੇ ਸਾਮਣੇਰੇ ਉਪਸਙ੍ਕਮਿਤ੍ਵਾ ਏਵਂ ਵਦੇਤਿ – ‘‘ਏਥ, ਮਂ ਆਵੁਸੋ ਦੂਸੇਥਾ’’ਤਿ. ਸਾਮਣੇਰਾ ਅਪਸਾਦੇਨ੍ਤਿ – ‘‘ਨਸ੍ਸ, ਪਣ੍ਡਕ, ਵਿਨਸ੍ਸ, ਪਣ੍ਡਕ, ਕੋ ਤਯਾ ਅਤ੍ਥੋ’’ਤਿ. ਸੋ ਸਾਮਣੇਰੇਹਿ ਅਪਸਾਦਿਤੋ ਹਤ੍ਥਿਭਣ੍ਡੇ ਅਸ੍ਸਭਣ੍ਡੇ ਉਪਸਙ੍ਕਮਿਤ੍ਵਾ ਏਵਂ ਵਦੇਤਿ – ‘‘ਏਥ, ਮਂ, ਆਵੁਸੋ, ਦੂਸੇਥਾ’’ਤਿ. ਹਤ੍ਥਿਭਣ੍ਡਾ ਅਸ੍ਸਭਣ੍ਡਾ ਦੂਸੇਸੁਂ. ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਪਣ੍ਡਕਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ. ਯੇਪਿ ਇਮੇਸਂ ਨ ਪਣ੍ਡਕਾ, ਤੇਪਿ ਇਮੇ ਪਣ੍ਡਕੇ ਦੂਸੇਨ੍ਤਿ. ਏਵਂ ਇਮੇ ਸਬ੍ਬੇਵ ਅਬ੍ਰਹ੍ਮਚਾਰਿਨੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਹਤ੍ਥਿਭਣ੍ਡਾਨਂ ਅਸ੍ਸਭਣ੍ਡਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਪਣ੍ਡਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ.

੪੮. ਥੇਯ੍ਯਸਂਵਾਸਕਵਤ੍ਥੁ

੧੧੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਾਣਕੁਲਪੁਤ੍ਤੋ ਖੀਣਕੋਲਞ੍ਞੋ ਸੁਖੁਮਾਲੋ ਹੋਤਿ. ਅਥ ਖੋ ਤਸ੍ਸ ਪੁਰਾਣਕੁਲਪੁਤ੍ਤਸ੍ਸ ਖੀਣਕੋਲਞ੍ਞਸ੍ਸ ਏਤਦਹੋਸਿ – ‘‘ਅਹਂ ਖੋ ਸੁਖੁਮਾਲੋ, ਨ ਪਟਿਬਲੋ ਅਨਧਿਗਤਂ ਵਾ ਭੋਗਂ ਅਧਿਗਨ੍ਤੁਂ, ਅਧਿਗਤਂ ਵਾ ਭੋਗਂ ਫਾਤਿਂ ਕਾਤੁਂ. ਕੇਨ ਨੁ ਖੋ ਅਹਂ ਉਪਾਯੇਨ ਸੁਖਞ੍ਚ ਜੀਵੇਯ੍ਯਂ, ਨ ਚ ਕਿਲਮੇਯ੍ਯ’’ਨ੍ਤਿ? ਅਥ ਖੋ ਤਸ੍ਸ ਪੁਰਾਣਕੁਲਪੁਤ੍ਤਸ੍ਸ ਖੀਣਕੋਲਞ੍ਞਸ੍ਸ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਸੁਖਸੀਲਾ ਸੁਖਸਮਾਚਾਰਾ, ਸੁਭੋਜਨਾਨਿ ਭੁਞ੍ਜਿਤ੍ਵਾ ਨਿਵਾਤੇਸੁ ਸਯਨੇਸੁ ਸਯਨ੍ਤਿ. ਯਂਨੂਨਾਹਂ ਸਾਮਂ ਪਤ੍ਤਚੀਵਰਂ ਪਟਿਯਾਦੇਤ੍ਵਾ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂਹਿ ਸਦ੍ਧਿਂ ਸਂਵਸੇਯ੍ਯ’’ਨ੍ਤਿ. ਅਥ ਖੋ ਸੋ ਪੁਰਾਣਕੁਲਪੁਤ੍ਤੋ ਖੀਣਕੋਲਞ੍ਞੋ ਸਾਮਂ ਪਤ੍ਤਚੀਵਰਂ ਪਟਿਯਾਦੇਤ੍ਵਾ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂ ਅਭਿਵਾਦੇਤਿ. ਭਿਕ੍ਖੂ ਏਵਮਾਹਂਸੁ – ‘‘ਕਤਿਵਸ੍ਸੋਸਿ ਤ੍ਵਂ, ਆਵੁਸੋ’’ਤਿ? ਕਿਂ ਏਤਂ, ਆਵੁਸੋ, ਕਤਿਵਸ੍ਸੋ ਨਾਮਾਤਿ? ਕੋ ਪਨ ਤੇ, ਆਵੁਸੋ, ਉਪਜ੍ਝਾਯੋਤਿ? ਕਿਂ ਏਤਂ, ਆਵੁਸੋ, ਉਪਜ੍ਝਾਯੋ ਨਾਮਾਤਿ? ਭਿਕ੍ਖੂ ਆਯਸ੍ਮਨ੍ਤਂ ਉਪਾਲਿਂ ਏਤਦਵੋਚੁਂ – ‘‘ਇਙ੍ਘਾਵੁਸੋ ਉਪਾਲਿ, ਇਮਂ ਪਬ੍ਬਜਿਤਂ ਅਨੁਯੁਞ੍ਜਾਹੀ’’ਤਿ. ਅਥ ਖੋ ਸੋ ਪੁਰਾਣਕੁਲਪੁਤ੍ਤੋ ਖੀਣਕੋਲਞ੍ਞੋ ਆਯਸ੍ਮਤਾ ਉਪਾਲਿਨਾ ਅਨੁਯੁਞ੍ਜਿਯਮਾਨੋ ਏਤਮਤ੍ਥਂ ਆਰੋਚੇਸਿ. ਆਯਸ੍ਮਾ ਉਪਾਲਿ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਥੇਯ੍ਯਸਂਵਾਸਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ. ਤਿਤ੍ਥਿਯਪਕ੍ਕਨ੍ਤਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ.

੪੯. ਤਿਰਚ੍ਛਾਨਗਤਵਤ੍ਥੁ

੧੧੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਨਾਗੋ ਨਾਗਯੋਨਿਯਾ ਅਟ੍ਟੀਯਤਿ ਹਰਾਯਤਿ ਜਿਗੁਚ੍ਛਤਿ. ਅਥ ਖੋ ਤਸ੍ਸ ਨਾਗਸ੍ਸ ਏਤਦਹੋਸਿ – ‘‘ਕੇਨ ਨੁ ਖੋ ਅਹਂ ਉਪਾਯੇਨ ਨਾਗਯੋਨਿਯਾ ਚ ਪਰਿਮੁਚ੍ਚੇਯ੍ਯਂ ਖਿਪ੍ਪਞ੍ਚ ਮਨੁਸ੍ਸਤ੍ਤਂ ਪਟਿਲਭੇਯ੍ਯ’’ਨ੍ਤਿ. ਅਥ ਖੋ ਤਸ੍ਸ ਨਾਗਸ੍ਸ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ. ਸਚੇ ਖੋ ਅਹਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯਂ, ਏਵਾਹਂ ਨਾਗਯੋਨਿਯਾ ਚ ਪਰਿਮੁਚ੍ਚੇਯ੍ਯਂ, ਖਿਪ੍ਪਞ੍ਚ ਮਨੁਸ੍ਸਤ੍ਤਂ ਪਟਿਲਭੇਯ੍ਯ’’ਨ੍ਤਿ. ਅਥ ਖੋ ਸੋ ਨਾਗੋ ਮਾਣਵਕਵਣ੍ਣੇਨ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਂ ਭਿਕ੍ਖੂ ਪਬ੍ਬਾਜੇਸੁਂ, ਉਪਸਮ੍ਪਾਦੇਸੁਂ. ਤੇਨ ਖੋ ਪਨ ਸਮਯੇਨ ਸੋ ਨਾਗੋ ਅਞ੍ਞਤਰੇਨ ਭਿਕ੍ਖੁਨਾ ਸਦ੍ਧਿਂ ਪਚ੍ਚਨ੍ਤਿਮੇ ਵਿਹਾਰੇ ਪਟਿਵਸਤਿ. ਅਥ ਖੋ ਸੋ ਭਿਕ੍ਖੁ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਅਜ੍ਝੋਕਾਸੇ ਚਙ੍ਕਮਤਿ. ਅਥ ਖੋ ਸੋ ਨਾਗੋ ਤਸ੍ਸ ਭਿਕ੍ਖੁਨੋ ਨਿਕ੍ਖਨ੍ਤੇ ਵਿਸ੍ਸਟ੍ਠੋ ਨਿਦ੍ਦਂ ਓਕ੍ਕਮਿ. ਸਬ੍ਬੋ ਵਿਹਾਰੋ ਅਹਿਨਾ ਪੁਣ੍ਣੋ, ਵਾਤਪਾਨੇਹਿ ਭੋਗਾ ਨਿਕ੍ਖਨ੍ਤਾ ਹੋਨ੍ਤਿ. ਅਥ ਖੋ ਸੋ ਭਿਕ੍ਖੁ ਵਿਹਾਰਂ ਪਵਿਸਿਸ੍ਸਾਮੀਤਿ ਕਵਾਟਂ ਪਣਾਮੇਨ੍ਤੋ ਅਦ੍ਦਸ ਸਬ੍ਬਂ ਵਿਹਾਰਂ ਅਹਿਨਾ ਪੁਣ੍ਣਂ, ਵਾਤਪਾਨੇਹਿ ਭੋਗੇ ਨਿਕ੍ਖਨ੍ਤੇ, ਦਿਸ੍ਵਾਨ ਭੀਤੋ ਵਿਸ੍ਸਰਮਕਾਸਿ. ਭਿਕ੍ਖੂ ਉਪਧਾਵਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚੁਂ – ‘‘ਕਿਸ੍ਸ ਤ੍ਵਂ, ਆਵੁਸੋ, ਵਿਸ੍ਸਰਮਕਾਸੀ’’ਤਿ? ‘‘ਅਯਂ, ਆਵੁਸੋ, ਸਬ੍ਬੋ ਵਿਹਾਰੋ ਅਹਿਨਾ ਪੁਣ੍ਣੋ, ਵਾਤਪਾਨੇਹਿ ਭੋਗਾ ਨਿਕ੍ਖਨ੍ਤਾ’’ਤਿ. ਅਥ ਖੋ ਸੋ ਨਾਗੋ ਤੇਨ ਸਦ੍ਦੇਨ ਪਟਿਬੁਜ੍ਝਿਤ੍ਵਾ ਸਕੇ ਆਸਨੇ ਨਿਸੀਦਿ. ਭਿਕ੍ਖੂ ਏਵਮਾਹਂਸੁ – ‘‘ਕੋਸਿ ਤ੍ਵਂ, ਆਵੁਸੋ’’ਤਿ? ‘‘ਅਹਂ, ਭਨ੍ਤੇ, ਨਾਗੋ’’ਤਿ. ‘‘ਕਿਸ੍ਸ ਪਨ ਤ੍ਵਂ, ਆਵੁਸੋ, ਏਵਰੂਪਂ ਅਕਾਸੀ’’ਤਿ? ਅਥ ਖੋ ਸੋ ਨਾਗੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਤਂ ਨਾਗਂ ਏਤਦਵੋਚ – ‘‘ਤੁਮ੍ਹੇ ਖੋਤ੍ਥ ਨਾਗਾ ਅਵਿਰੁਲ਼੍ਹਿਧਮ੍ਮਾ ਇਮਸ੍ਮਿਂ ਧਮ੍ਮਵਿਨਯੇ. ਗਚ੍ਛ ਤ੍ਵਂ, ਨਾਗ, ਤਤ੍ਥੇਵ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਉਪੋਸਥਂ ਉਪਵਸ, ਏਵਂ ਤ੍ਵਂ ਨਾਗਯੋਨਿਯਾ ਚ ਪਰਿਮੁਚ੍ਚਿਸ੍ਸਸਿ, ਖਿਪ੍ਪਞ੍ਚ ਮਨੁਸ੍ਸਤ੍ਤਂ ਪਟਿਲਭਿਸ੍ਸਸੀ’’ਤਿ. ਅਥ ਖੋ ਸੋ ਨਾਗੋ ਅਵਿਰੁਲ਼੍ਹਿਧਮ੍ਮੋ ਕਿਰਾਹਂ ਇਮਸ੍ਮਿਂ ਧਮ੍ਮਵਿਨਯੇਤਿ ਦੁਕ੍ਖੀ ਦੁਮ੍ਮਨੋ ਅਸ੍ਸੂਨਿ ਪਵਤ੍ਤਯਮਾਨੋ ਵਿਸ੍ਸਰਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਦ੍ਵੇਮੇ, ਭਿਕ੍ਖਵੇ, ਪਚ੍ਚਯਾ ਨਾਗਸ੍ਸ ਸਭਾਵਪਾਤੁਕਮ੍ਮਾਯ. ਯਦਾ ਚ ਸਜਾਤਿਯਾ ਮੇਥੁਨਂ ਧਮ੍ਮਂ ਪਟਿਸੇਵਤਿ, ਯਦਾ ਚ ਵਿਸ੍ਸਟ੍ਠੋ ਨਿਦ੍ਦਂ ਓਕ੍ਕਮਤਿ – ਇਮੇ ਖੋ, ਭਿਕ੍ਖਵੇ, ਦ੍ਵੇ ਪਚ੍ਚਯਾ ਨਾਗਸ੍ਸ ਸਭਾਵਪਾਤੁਕਮ੍ਮਾਯ. ਤਿਰਚ੍ਛਾਨਗਤੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ’’ਤਿ.

੫੦. ਮਾਤੁਘਾਤਕਵਤ੍ਥੁ

੧੧੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਮਾਣਵਕੋ ਮਾਤਰਂ ਜੀਵਿਤਾ ਵੋਰੋਪੇਸਿ. ਸੋ ਤੇਨ ਪਾਪਕੇਨ ਕਮ੍ਮੇਨ ਅਟ੍ਟੀਯਤਿ ਹਰਾਯਤਿ ਜਿਗੁਚ੍ਛਤਿ. ਅਥ ਖੋ ਤਸ੍ਸ ਮਾਣਵਕਸ੍ਸ ਏਤਦਹੋਸਿ – ‘‘ਕੇਨ ਨੁ ਖੋ ਅਹਂ ਉਪਾਯੇਨ ਇਮਸ੍ਸ ਪਾਪਕਸ੍ਸ ਕਮ੍ਮਸ੍ਸ ਨਿਕ੍ਖਨ੍ਤਿਂ ਕਰੇਯ੍ਯ’’ਨ੍ਤਿ? ਅਥ ਖੋ ਤਸ੍ਸ ਮਾਣਵਕਸ੍ਸ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ. ਸਚੇ ਖੋ ਅਹਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯਂ, ਏਵਾਹਂ ਇਮਸ੍ਸ ਪਾਪਕਸ੍ਸ ਕਮ੍ਮਸ੍ਸ ਨਿਕ੍ਖਨ੍ਤਿਂ ਕਰੇਯ੍ਯ’’ਨ੍ਤਿ. ਅਥ ਖੋ ਸੋ ਮਾਣਵਕੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਭਿਕ੍ਖੂ ਆਯਸ੍ਮਨ੍ਤਂ ਉਪਾਲਿਂ ਏਤਦਵੋਚੁਂ – ‘‘ਪੁਬ੍ਬੇਪਿ ਖੋ, ਆਵੁਸੋ ਉਪਾਲਿ, ਨਾਗੋ ਮਾਣਵਕਵਣ੍ਣੇਨ ਭਿਕ੍ਖੂਸੁ ਪਬ੍ਬਜਿਤੋ. ਇਙ੍ਘਾਵੁਸੋ ਉਪਾਲਿ, ਇਮਂ ਮਾਣਵਕਂ ਅਨੁਯੁਞ੍ਜਾਹੀ’’ਤਿ. ਅਥ ਖੋ ਸੋ ਮਾਣਵਕੋ ਆਯਸ੍ਮਤਾ ਉਪਾਲਿਨਾ ਅਨੁਯੁਞ੍ਜੀਯਮਾਨੋ ਏਤਮਤ੍ਥਂ ਆਰੋਚੇਸਿ. ਆਯਸ੍ਮਾ ਉਪਾਲਿ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਮਾਤੁਘਾਤਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ.

੫੧. ਪਿਤੁਘਾਤਕਵਤ੍ਥੁ

੧੧੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਮਾਣਵਕੋ ਪਿਤਰਂ ਜੀਵਿਤਾ ਵੋਰੋਪੇਸਿ. ਸੋ ਤੇਨ ਪਾਪਕੇਨ ਕਮ੍ਮੇਨ ਅਟ੍ਟੀਯਤਿ ਹਰਾਯਤਿ ਜਿਗੁਚ੍ਛਤਿ. ਅਥ ਖੋ ਤਸ੍ਸ ਮਾਣਵਕਸ੍ਸ ਏਤਦਹੋਸਿ ‘‘ਕੇਨ ਨੁ ਖੋ ਅਹਂ ਉਪਾਯੇਨ ਇਮਸ੍ਸ ਪਾਪਕਸ੍ਸ ਕਮ੍ਮਸ੍ਸ ਨਿਕ੍ਖਨ੍ਤਿਂ ਕਰੇਯ੍ਯ’’ਨ੍ਤਿ. ਅਥ ਖੋ ਤਸ੍ਸ ਮਾਣਵਕਸ੍ਸ ਏਤਦਹੋਸਿ ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ, ਸਚੇ ਖੋ ਅਹਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯਂ, ਏਵਾਹਂ ਇਮਸ੍ਸ ਪਾਪਕਸ੍ਸ ਕਮ੍ਮਸ੍ਸ ਨਿਕ੍ਖਨ੍ਤਿਂ ਕਰੇਯ੍ਯ’’ਨ੍ਤਿ. ਅਥ ਖੋ ਸੋ ਮਾਣਵਕੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਭਿਕ੍ਖੂ ਆਯਸ੍ਮਨ੍ਤਂ ਉਪਾਲਿਂ ਏਤਦਵੋਚੁਂ – ‘‘ਪੁਬ੍ਬੇਪਿ ਖੋ, ਆਵੁਸੋ ਉਪਾਲਿ, ਨਾਗੋ ਮਾਣਵਕਵਣ੍ਣੇਨ ਭਿਕ੍ਖੂਸੁ ਪਬ੍ਬਜਿਤੋ, ਇਙ੍ਘਾਵੁਸੋ, ਉਪਾਲਿ, ਇਮਂ ਮਾਣਵਕਂ ਅਨੁਯੁਞ੍ਜਾਹੀ’’ਤਿ. ਅਥ ਖੋ ਸੋ ਮਾਣਵਕੋ ਆਯਸ੍ਮਤਾ ਉਪਾਲਿਨਾ ਅਨੁਯੁਞ੍ਜੀਯਮਾਨੋ ਏਤਮਤ੍ਥਂ ਆਰੋਚੇਸਿ. ਆਯਸ੍ਮਾ ਉਪਾਲਿ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਪਿਤੁਘਾਤਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ.

੫੨. ਅਰਹਨ੍ਤਘਾਤਕਵਤ੍ਥੁ

੧੧੪. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਸਾਕੇਤਾ ਸਾਵਤ੍ਥਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਅਨ੍ਤਰਾਮਗ੍ਗੇ ਚੋਰਾ ਨਿਕ੍ਖਮਿਤ੍ਵਾ ਏਕਚ੍ਚੇ ਭਿਕ੍ਖੂ ਅਚ੍ਛਿਨ੍ਦਿਂਸੁ, ਏਕਚ੍ਚੇ ਭਿਕ੍ਖੂ ਹਨਿਂਸੁ. ਸਾਵਤ੍ਥਿਯਾ ਰਾਜਭਟਾ ਨਿਕ੍ਖਮਿਤ੍ਵਾ ਏਕਚ੍ਚੇ ਚੋਰੇ ਅਗ੍ਗਹੇਸੁਂ, ਏਕਚ੍ਚੇ ਚੋਰਾ ਪਲਾਯਿਂਸੁ. ਯੇ ਤੇ ਪਲਾਯਿਂਸੁ ਤੇ ਭਿਕ੍ਖੂਸੁ ਪਬ੍ਬਜਿਂਸੁ, ਯੇ ਤੇ ਗਹਿਤਾ ਤੇ ਵਧਾਯ ਓਨਿਯ੍ਯਨ੍ਤਿ. ਅਦ੍ਦਸਂਸੁ ਖੋ ਤੇ ਪਲਾਯਿਤ੍ਵਾ ਪਬ੍ਬਜਿਤਾ ਤੇ ਚੋਰੇ ਵਧਾਯ ਓਨਿਯ੍ਯਮਾਨੇ, ਦਿਸ੍ਵਾਨ ਏਵਮਾਹਂਸੁ – ‘‘ਸਾਧੁ ਖੋ ਮਯਂ ਪਲਾਯਿਮ੍ਹਾ, ਸਚਾ ਚ [ਸਚੇ ਚ, ਸਚਜ੍ਜ (ਅਟ੍ਠਕਥਾਯਂ ਪਾਠਨ੍ਤਰਾ)] ਮਯਂ ਗਯ੍ਹੇਯ੍ਯਾਮ [ਗਣ੍ਹੇਯ੍ਯਾਮ (ਕ.)], ਮਯਮ੍ਪਿ ਏਵਮੇਵ ਹਞ੍ਞੇਯ੍ਯਾਮਾ’’ਤਿ. ਭਿਕ੍ਖੂ ਏਵਮਾਹਂਸੁ – ‘‘ਕਿਂ ਪਨ ਤੁਮ੍ਹੇ, ਆਵੁਸੋ, ਅਕਤ੍ਥਾ’’ਤਿ? ਅਥ ਖੋ ਤੇ ਪਬ੍ਬਜਿਤਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਰਹਨ੍ਤੋ ਏਤੇ, ਭਿਕ੍ਖਵੇ, ਭਿਕ੍ਖੂ. ਅਰਹਨ੍ਤਘਾਤਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ.

੫੩. ਭਿਕ੍ਖੁਨੀਦੂਸਕਵਤ੍ਥੁ

੧੧੫. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੁਨਿਯੋ ਸਾਕੇਤਾ ਸਾਵਤ੍ਥਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਅਨ੍ਤਰਾਮਗ੍ਗੇ ਚੋਰਾ ਨਿਕ੍ਖਮਿਤ੍ਵਾ ਏਕਚ੍ਚਾ ਭਿਕ੍ਖੁਨਿਯੋ ਅਚ੍ਛਿਨ੍ਦਿਂਸੁ, ਏਕਚ੍ਚਾ ਭਿਕ੍ਖੁਨਿਯੋ ਦੂਸੇਸੁਂ. ਸਾਵਤ੍ਥਿਯਾ ਰਾਜਭਟਾ ਨਿਕ੍ਖਮਿਤ੍ਵਾ ਏਕਚ੍ਚੇ ਚੋਰੇ ਅਗ੍ਗਹੇਸੁਂ, ਏਕਚ੍ਚੇ ਚੋਰਾ ਪਲਾਯਿਂਸੁ. ਯੇ ਤੇ ਪਲਾਯਿਂਸੁ, ਤੇ ਭਿਕ੍ਖੂਸੁ ਪਬ੍ਬਜਿਂਸੁ. ਯੇ ਤੇ ਗਹਿਤਾ, ਤੇ ਵਧਾਯ ਓਨਿਯ੍ਯਨ੍ਤਿ. ਅਦ੍ਦਸਂਸੁ ਖੋ ਤੇ ਪਲਾਯਿਤ੍ਵਾ ਪਬ੍ਬਜਿਤਾ ਤੇ ਚੋਰੇ ਵਧਾਯ ਓਨਿਯ੍ਯਮਾਨੇ, ਦਿਸ੍ਵਾਨ ਏਵਮਾਹਂਸੁ ‘‘ਸਾਧੁ ਖੋ ਮਯਂ ਪਲਾਯਿਮ੍ਹਾ, ਸਚਾ ਚ ਮਯਂ ਗਯ੍ਹੇਯ੍ਯਾਮ, ਮਯਮ੍ਪਿ ਏਵਮੇਵ ਹਞ੍ਞੇਯ੍ਯਾਮਾ’’ਤਿ. ਭਿਕ੍ਖੂ ਏਵਮਾਹਂਸੁ ‘‘ਕਿਂ ਪਨ ਤੁਮ੍ਹੇ, ਆਵੁਸੋ, ਅਕਤ੍ਥਾ’’ਤਿ. ਅਥ ਖੋ ਤੇ ਪਬ੍ਬਜਿਤਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੁਨਿਦੂਸਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ. ਸਙ੍ਘਭੇਦਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ. ਲੋਹਿਤੁਪ੍ਪਾਦਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ.

੫੪. ਉਭਤੋਬ੍ਯਞ੍ਜਨਕਵਤ੍ਥੁ

੧੧੬. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਉਭਤੋਬ੍ਯਞ੍ਜਨਕੋ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਸੋ ਕਰੋਤਿਪਿ ਕਾਰਾਪੇਤਿਪਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਉਭਤੋਬ੍ਯਞ੍ਜਨਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ.

੫੫. ਅਨੁਪਜ੍ਝਾਯਕਾਦਿਵਤ੍ਥੂਨਿ

੧੧੭. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਨੁਪਜ੍ਝਾਯਕਂ ਉਪਸਮ੍ਪਾਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਨੁਪਜ੍ਝਾਯਕੋ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸਙ੍ਘੇਨ ਉਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਙ੍ਘੇਨ ਉਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਗਣੇਨ ਉਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਗਣੇਨ ਉਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪਣ੍ਡਕੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ…ਪੇ… ਥੇਯ੍ਯਸਂਵਾਸਕੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ…ਪੇ… ਤਿਤ੍ਥਿਯਪਕ੍ਕਨ੍ਤਕੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ …ਪੇ… ਤਿਰਚ੍ਛਾਨਗਤੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ…ਪੇ… ਮਾਤੁਘਾਤਕੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ…ਪੇ… ਪਿਤੁਘਾਤਕੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ…ਪੇ… ਅਰਹਨ੍ਤਘਾਤਕੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ…ਪੇ… ਭਿਕ੍ਖੁਨਿਦੂਸਕੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ…ਪੇ… ਸਙ੍ਘਭੇਦਕੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ…ਪੇ… ਲੋਹਿਤੁਪ੍ਪਾਦਕੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ…ਪੇ… ਉਭਤੋਬ੍ਯਞ੍ਜਨਕੁਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਪਣ੍ਡਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ…ਪੇ… ਨ, ਭਿਕ੍ਖਵੇ, ਥੇਯ੍ਯਸਂਵਾਸਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ…ਪੇ… ਨ, ਭਿਕ੍ਖਵੇ, ਤਿਤ੍ਥਿਯਪਕ੍ਕਨ੍ਤਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ…ਪੇ… ਨ, ਭਿਕ੍ਖਵੇ, ਤਿਰਚ੍ਛਾਨਗਤੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ…ਪੇ… ਨ, ਭਿਕ੍ਖਵੇ, ਮਾਤੁਘਾਤਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ …ਪੇ… ਨ, ਭਿਕ੍ਖਵੇ, ਪਿਤੁਘਾਤਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ…ਪੇ… ਨ, ਭਿਕ੍ਖਵੇ, ਅਰਹਨ੍ਤਘਾਤਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ…ਪੇ… ਨ, ਭਿਕ੍ਖਵੇ, ਭਿਕ੍ਖੁਨਿਦੂਸਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ …ਪੇ… ਨ, ਭਿਕ੍ਖਵੇ, ਸਙ੍ਘਭੇਦਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ…ਪੇ… ਨ, ਭਿਕ੍ਖਵੇ, ਲੋਹਿਤੁਪ੍ਪਾਦਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ…ਪੇ… ਨ, ਭਿਕ੍ਖਵੇ, ਉਭਤੋਬ੍ਯਞ੍ਜਨਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੫੬. ਅਪਤ੍ਤਕਾਦਿਵਤ੍ਥੁ

੧੧੮. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਪਤ੍ਤਕਂ ਉਪਸਮ੍ਪਾਦੇਨ੍ਤਿ. ਹਤ੍ਥੇਸੁ ਪਿਣ੍ਡਾਯ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਤਿਤ੍ਥਿਯਾਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਪਤ੍ਤਕੋ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਚੀਵਰਕਂ ਉਪਸਮ੍ਪਾਦੇਨ੍ਤਿ. ਨਗ੍ਗਾ ਪਿਣ੍ਡਾਯ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਤਿਤ੍ਥਿਯਾਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਚੀਵਰਕੋ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਪਤ੍ਤਚੀਵਰਕਂ ਉਪਸਮ੍ਪਾਦੇਨ੍ਤਿ. ਨਗ੍ਗਾ ਹਤ੍ਥੇਸੁ ਪਿਣ੍ਡਾਯ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਤਿਤ੍ਥਿਯਾਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਪਤ੍ਤਚੀਵਰਕੋ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਯਾਚਿਤਕੇਨ ਪਤ੍ਤੇਨ ਉਪਸਮ੍ਪਾਦੇਨ੍ਤਿ. ਉਪਸਮ੍ਪਨ੍ਨੇ ਪਤ੍ਤਂ ਪਟਿਹਰਨ੍ਤਿ. ਹਤ੍ਥੇਸੁ ਪਿਣ੍ਡਾਯ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਤਿਤ੍ਥਿਯਾਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਯਾਚਿਤਕੇਨ ਪਤ੍ਤੇਨ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਯਾਚਿਤਕੇਨ ਚੀਵਰੇਨ ਉਪਸਮ੍ਪਾਦੇਨ੍ਤਿ. ਉਪਸਮ੍ਪਨ੍ਨੇ ਚੀਵਰਂ ਪਟਿਹਰਨ੍ਤਿ. ਨਗ੍ਗਾ ਪਿਣ੍ਡਾਯ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਤਿਤ੍ਥਿਯਾਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਯਾਚਿਤਕੇਨ ਚੀਵਰੇਨ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਯਾਚਿਤਕੇਨ ਪਤ੍ਤਚੀਵਰੇਨ ਉਪਸਮ੍ਪਾਦੇਨ੍ਤਿ. ਉਪਸਮ੍ਪਨ੍ਨੇ ਪਤ੍ਤਚੀਵਰਂ ਪਟਿਹਰਨ੍ਤਿ. ਨਗ੍ਗਾ ਹਤ੍ਥੇਸੁ ਪਿਣ੍ਡਾਯ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਤਿਤ੍ਥਿਯਾਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਯਾਚਿਤਕੇਨ ਪਤ੍ਤਚੀਵਰੇਨ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਨਉਪਸਮ੍ਪਾਦੇਤਬ੍ਬੇਕਵੀਸਤਿਵਾਰੋ ਨਿਟ੍ਠਿਤੋ.

੫੭. ਨਪਬ੍ਬਾਜੇਤਬ੍ਬਦ੍ਵਤ੍ਤਿਂਸਵਾਰੋ

੧੧੯. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਹਤ੍ਥਚ੍ਛਿਨ੍ਨਂ ਪਬ੍ਬਾਜੇਨ੍ਤਿ…ਪੇ… ਪਾਦਚ੍ਛਿਨ੍ਨਂ ਪਬ੍ਬਾਜੇਨ੍ਤਿ…ਪੇ… ਹਤ੍ਥਪਾਦਚ੍ਛਿਨ੍ਨਂ ਪਬ੍ਬਾਜੇਨ੍ਤਿ…ਪੇ… ਕਣ੍ਣਚ੍ਛਿਨ੍ਨਂ ਪਬ੍ਬਾਜੇਨ੍ਤਿ…ਪੇ… ਨਾਸਚ੍ਛਿਨ੍ਨਂ ਪਬ੍ਬਾਜੇਨ੍ਤਿ…ਪੇ… ਕਣ੍ਣਨਾਸਚ੍ਛਿਨ੍ਨਂ ਪਬ੍ਬਾਜੇਨ੍ਤਿ…ਪੇ… ਅਙ੍ਗੁਲਿਚ੍ਛਿਨ੍ਨਂ ਪਬ੍ਬਾਜੇਨ੍ਤਿ…ਪੇ… ਅਲ਼ਚ੍ਛਿਨ੍ਨਂ ਪਬ੍ਬਾਜੇਨ੍ਤਿ…ਪੇ… ਕਣ੍ਡਰਚ੍ਛਿਨ੍ਨਂ ਪਬ੍ਬਾਜੇਨ੍ਤਿ…ਪੇ… ਫਣਹਤ੍ਥਕਂ ਪਬ੍ਬਾਜੇਨ੍ਤਿ…ਪੇ… ਖੁਜ੍ਜਂ ਪਬ੍ਬਾਜੇਨ੍ਤਿ…ਪੇ… ਵਾਮਨਂ ਪਬ੍ਬਾਜੇਨ੍ਤਿ…ਪੇ… ਗਲਗਣ੍ਡਿਂ ਪਬ੍ਬਾਜੇਨ੍ਤਿ…ਪੇ… ਲਕ੍ਖਣਾਹਤਂ ਪਬ੍ਬਾਜੇਨ੍ਤਿ…ਪੇ… ਕਸਾਹਤਂ ਪਬ੍ਬਾਜੇਨ੍ਤਿ…ਪੇ… ਲਿਖਿਤਕਂ ਪਬ੍ਬਾਜੇਨ੍ਤਿ…ਪੇ… ਸੀਪਦਿਂ ਪਬ੍ਬਾਜੇਨ੍ਤਿ…ਪੇ… ਪਾਪਰੋਗਿਂ ਪਬ੍ਬਾਜੇਨ੍ਤਿ…ਪੇ… ਪਰਿਸਦੂਸਕਂ ਪਬ੍ਬਾਜੇਨ੍ਤਿ…ਪੇ… ਕਾਣਂ ਪਬ੍ਬਾਜੇਨ੍ਤਿ…ਪੇ… ਕੁਣਿਂ ਪਬ੍ਬਾਜੇਨ੍ਤਿ…ਪੇ… ਖਞ੍ਜਂ ਪਬ੍ਬਾਜੇਨ੍ਤਿ…ਪੇ… ਪਕ੍ਖਹਤਂ ਪਬ੍ਬਾਜੇਨ੍ਤਿ…ਪੇ… ਛਿਨ੍ਨਿਰਿਯਾਪਥਂ ਪਬ੍ਬਾਜੇਨ੍ਤਿ…ਪੇ… ਜਰਾਦੁਬ੍ਬਲਂ ਪਬ੍ਬਾਜੇਨ੍ਤਿ…ਪੇ… ਅਨ੍ਧਂ ਪਬ੍ਬਾਜੇਨ੍ਤਿ…ਪੇ… ਮੂਗਂ ਪਬ੍ਬਾਜੇਨ੍ਤਿ…ਪੇ… ਬਧਿਰਂ ਪਬ੍ਬਾਜੇਨ੍ਤਿ…ਪੇ… ਅਨ੍ਧਮੂਗਂ ਪਬ੍ਬਾਜੇਨ੍ਤਿ…ਪੇ… ਅਨ੍ਧਬਧਿਰਂ ਪਬ੍ਬਾਜੇਨ੍ਤਿ…ਪੇ… ਮੂਗਬਧਿਰਂ ਪਬ੍ਬਾਜੇਨ੍ਤਿ…ਪੇ… ਅਨ੍ਧਮੂਗਬਧਿਰਂ ਪਬ੍ਬਾਜੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਨ, ਭਿਕ੍ਖਵੇ, ਹਤ੍ਥਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਪਾਦਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਹਤ੍ਥਪਾਦਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਕਣ੍ਣਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਨਾਸਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਕਣ੍ਣਨਾਸਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਅਙ੍ਗੁਲਿਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਅਲ਼ਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਕਣ੍ਡਰਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਫਣਹਤ੍ਥਕੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਖੁਜ੍ਜੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਵਾਮਨੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਗਲਗਣ੍ਡੀ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਲਕ੍ਖਣਾਹਤੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਕਸਾਹਤੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਲਿਖਿਤਕੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਸੀਪਦੀ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਪਾਪਰੋਗੀ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਪਰਿਸਦੂਸਕੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਕਾਣੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਕੁਣੀ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਖਞ੍ਜੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਪਕ੍ਖਹਤੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਛਿਨ੍ਨਿਰਿਯਾਪਥੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਜਰਾਦੁਬ੍ਬਲੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਅਨ੍ਧੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਮੂਗੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਬਧਿਰੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਅਨ੍ਧਮੂਗੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਅਨ੍ਧਬਧਿਰੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਮੂਗਬਧਿਰੋ ਪਬ੍ਬਾਜੇਤਬ੍ਬੋ…ਪੇ… ਨ, ਭਿਕ੍ਖਵੇ, ਅਨ੍ਧਮੂਗਬਧਿਰੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਨਪਬ੍ਬਾਜੇਤਬ੍ਬਦ੍ਵਤ੍ਤਿਂਸਵਾਰੋ ਨਿਟ੍ਠਿਤੋ.

ਦਾਯਜ੍ਜਭਾਣਵਾਰੋ ਨਿਟ੍ਠਿਤੋ ਨਵਮੋ.

੫੮. ਅਲਜ੍ਜੀਨਿਸ੍ਸਯਵਤ੍ਥੂਨਿ

੧੨੦. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਅਲਜ੍ਜੀਨਂ ਨਿਸ੍ਸਯਂ ਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਲਜ੍ਜੀਨਂ ਨਿਸ੍ਸਯੋ ਦਾਤਬ੍ਬੋ. ਯੋ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਲਜ੍ਜੀਨਂ ਨਿਸ੍ਸਾਯ ਵਸਨ੍ਤਿ. ਤੇਪਿ ਨਚਿਰਸ੍ਸੇਵ ਅਲਜ੍ਜਿਨੋ ਹੋਨ੍ਤਿ ਪਾਪਕਾਭਿਕ੍ਖੂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਲਜ੍ਜੀਨਂ ਨਿਸ੍ਸਾਯ ਵਤ੍ਥਬ੍ਬਂ. ਯੋ ਵਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਅਲਜ੍ਜੀਨਂ ਨਿਸ੍ਸਯੋ ਦਾਤਬ੍ਬੋ, ਨ ਅਲਜ੍ਜੀਨਂ ਨਿਸ੍ਸਾਯ ਵਤ੍ਥਬ੍ਬ’ਨ੍ਤਿ. ਕਥਂ ਨੁ ਖੋ ਮਯਂ ਜਾਨੇਯ੍ਯਾਮ ਲਜ੍ਜਿਂ ਵਾ ਅਲਜ੍ਜਿਂ ਵਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਚਤੂਹਪਞ੍ਚਾਹਂ ਆਗਮੇਤੁਂ ਯਾਵ ਭਿਕ੍ਖੁਸਭਾਗਤਂ ਜਾਨਾਮੀਤਿ.

੫੯. ਗਮਿਕਾਦਿਨਿਸ੍ਸਯਵਤ੍ਥੂਨਿ

੧੨੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ ਹੋਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਅਨਿਸ੍ਸਿਤੇਨ ਵਤ੍ਥਬ੍ਬ’ਨ੍ਤਿ. ਅਹਞ੍ਚਮ੍ਹਿ ਨਿਸ੍ਸਯਕਰਣੀਯੋ ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ, ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਦ੍ਧਾਨਮਗ੍ਗਪ੍ਪਟਿਪਨ੍ਨੇਨ ਭਿਕ੍ਖੁਨਾ ਨਿਸ੍ਸਯਂ ਅਲਭਮਾਨੇਨ ਅਨਿਸ੍ਸਿਤੇਨ ਵਤ੍ਥੁਨ੍ਤਿ.

ਤੇਨ ਖੋ ਪਨ ਸਮਯੇਨ ਦ੍ਵੇ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਤੇ ਅਞ੍ਞਤਰਂ ਆਵਾਸਂ ਉਪਗਚ੍ਛਿਂਸੁ. ਤਤ੍ਥ ਏਕੋ ਭਿਕ੍ਖੁ ਗਿਲਾਨੋ ਹੋਤਿ. ਅਥ ਖੋ ਤਸ੍ਸ ਗਿਲਾਨਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਅਨਿਸ੍ਸਿਤੇਨ ਵਤ੍ਥਬ੍ਬ’ਨ੍ਤਿ. ਅਹਞ੍ਚਮ੍ਹਿ ਨਿਸ੍ਸਯਕਰਣੀਯੋ ਗਿਲਾਨੋ, ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨੇਨ ਭਿਕ੍ਖੁਨਾ ਨਿਸ੍ਸਯਂ ਅਲਭਮਾਨੇਨ ਅਨਿਸ੍ਸਿਤੇਨ ਵਤ੍ਥੁਨ੍ਤਿ.

ਅਥ ਖੋ ਤਸ੍ਸ ਗਿਲਾਨੁਪਟ੍ਠਾਕਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਅਨਿਸ੍ਸਿਤੇਨ ਵਤ੍ਥਬ੍ਬ’ਨ੍ਤਿ. ਅਹਞ੍ਚਮ੍ਹਿ ਨਿਸ੍ਸਯਕਰਣੀਯੋ, ਅਯਞ੍ਚ ਭਿਕ੍ਖੁ ਗਿਲਾਨੋ, ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨੁਪਟ੍ਠਾਕੇਨ ਭਿਕ੍ਖੁਨਾ ਨਿਸ੍ਸਯਂ ਅਲਭਮਾਨੇਨ ਯਾਚਿਯਮਾਨੇਨ ਅਨਿਸ੍ਸਿਤੇਨ ਵਤ੍ਥੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਰਞ੍ਞੇ ਵਿਹਰਤਿ. ਤਸ੍ਸ ਚ ਤਸ੍ਮਿਂ ਸੇਨਾਸਨੇ ਫਾਸੁ ਹੋਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਅਨਿਸ੍ਸਿਤੇਨ ਵਤ੍ਥਬ੍ਬ’ਨ੍ਤਿ. ਅਹਞ੍ਚਮ੍ਹਿ ਨਿਸ੍ਸਯਕਰਣੀਯੋ ਅਰਞ੍ਞੇ ਵਿਹਰਾਮਿ, ਮਯ੍ਹਞ੍ਚ ਇਮਸ੍ਮਿਂ ਸੇਨਾਸਨੇ ਫਾਸੁ ਹੋਤਿ, ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਆਰਞ੍ਞਿਕੇਨ ਭਿਕ੍ਖੁਨਾ ਫਾਸੁਵਿਹਾਰਂ ਸਲ੍ਲਕ੍ਖੇਨ੍ਤੇਨ ਨਿਸ੍ਸਯਂ ਅਲਭਮਾਨੇਨ ਅਨਿਸ੍ਸਿਤੇਨ ਵਤ੍ਥੁਂ – ਯਦਾ ਪਤਿਰੂਪੋ ਨਿਸ੍ਸਯਦਾਯਕੋ ਆਗਚ੍ਛਿਸ੍ਸਤਿ, ਤਦਾ ਤਸ੍ਸ ਨਿਸ੍ਸਾਯ ਵਸਿਸ੍ਸਾਮੀਤਿ.

੬੦. ਗੋਤ੍ਤੇਨ ਅਨੁਸ੍ਸਾਵਨਾਨੁਜਾਨਨਾ

੧੨੨. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਮਹਾਕਸ੍ਸਪਸ੍ਸ ਉਪਸਮ੍ਪਦਾਪੇਕ੍ਖੋ ਹੋਤਿ. ਅਥ ਖੋ ਆਯਸ੍ਮਾ ਮਹਾਕਸ੍ਸਪੋ ਆਯਸ੍ਮਤੋ ਆਨਨ੍ਦਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ – ਆਗਚ੍ਛਤੁ ਆਨਨ੍ਦੋ ਇਮਂ ਅਨੁਸ੍ਸਾਵੇਸ੍ਸਤੂਤਿ [ਅਨੁਸ੍ਸਾਵੇਸ੍ਸਤੀਤਿ (ਸ੍ਯਾ.)]. ਆਯਸ੍ਮਾ ਆਨਨ੍ਦੋ ਏਵਮਾਹ – ‘‘ਨਾਹਂ ਉਸ੍ਸਹਾਮਿ ਥੇਰਸ੍ਸ ਨਾਮਂ ਗਹੇਤੁਂ, ਗਰੁ ਮੇ ਥੇਰੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗੋਤ੍ਤੇਨਪਿ ਅਨੁਸ੍ਸਾਵੇਤੁਨ੍ਤਿ.

੬੧. ਦ੍ਵੇਉਪਸਮ੍ਪਦਾਪੇਕ੍ਖਾਦਿਵਤ੍ਥੁ

੧੨੩. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਮਹਾਕਸ੍ਸਪਸ੍ਸ ਦ੍ਵੇ ਉਪਸਮ੍ਪਦਾਪੇਕ੍ਖਾ ਹੋਨ੍ਤਿ. ਤੇ ਵਿਵਦਨ੍ਤਿ – ਅਹਂ ਪਠਮਂ ਉਪਸਮ੍ਪਜ੍ਜਿਸ੍ਸਾਮਿ, ਅਹਂ ਪਠਮਂ ਉਪਸਮ੍ਪਜ੍ਜਿਸ੍ਸਾਮੀਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਏਕਾਨੁਸ੍ਸਾਵਨੇ ਕਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾਨਂ ਥੇਰਾਨਂ ਉਪਸਮ੍ਪਦਾਪੇਕ੍ਖਾ ਹੋਨ੍ਤਿ. ਤੇ ਵਿਵਦਨ੍ਤਿ – ਅਹਂ ਪਠਮਂ ਉਪਸਮ੍ਪਜ੍ਜਿਸ੍ਸਾਮਿ, ਅਹਂ ਪਠਮਂ ਉਪਸਮ੍ਪਜ੍ਜਿਸ੍ਸਾਮੀਤਿ. ਥੇਰਾ ਏਵਮਾਹਂਸੁ – ‘‘ਹਨ੍ਦ, ਮਯਂ, ਆਵੁਸੋ, ਸਬ੍ਬੇਵ ਏਕਾਨੁਸ੍ਸਾਵਨੇ ਕਰੋਮਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਤਯੋ ਏਕਾਨੁਸ੍ਸਾਵਨੇ ਕਾਤੁਂ, ਤਞ੍ਚ ਖੋ ਏਕੇਨ ਉਪਜ੍ਝਾਯੇਨ, ਨ ਤ੍ਵੇਵ ਨਾਨੁਪਜ੍ਝਾਯੇਨਾਤਿ.

੬੨. ਗਬ੍ਭਵੀਸੂਪਸਮ੍ਪਦਾਨੁਜਾਨਨਾ

੧੨੪. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਕੁਮਾਰਕਸ੍ਸਪੋ ਗਬ੍ਭਵੀਸੋ ਉਪਸਮ੍ਪਨ੍ਨੋ ਅਹੋਸਿ. ਅਥ ਖੋ ਆਯਸ੍ਮਤੋ ਕੁਮਾਰਕਸ੍ਸਪਸ੍ਸ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਊਨਵੀਸਤਿਵਸ੍ਸੋ ਪੁਗ੍ਗਲੋ ਉਪਸਮ੍ਪਾਦੇਤਬ੍ਬੋ’ਤਿ. ਅਹਞ੍ਚਮ੍ਹਿ ਗਬ੍ਭਵੀਸੋ ਉਪਸਮ੍ਪਨ੍ਨੋ. ਉਪਸਮ੍ਪਨ੍ਨੋ ਨੁ ਖੋਮ੍ਹਿ, ਨਨੁ ਖੋ ਉਪਸਮ੍ਪਨ੍ਨੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਯਂ, ਭਿਕ੍ਖਵੇ, ਮਾਤੁਕੁਚ੍ਛਿਸ੍ਮਿਂ ਪਠਮਂ ਚਿਤ੍ਤਂ ਉਪ੍ਪਨ੍ਨਂ, ਪਠਮਂ ਵਿਞ੍ਞਾਣਂ ਪਾਤੁਭੂਤਂ, ਤਦੁਪਾਦਾਯ ਸਾਵਸ੍ਸ ਜਾਤਿ. ਅਨੁਜਾਨਾਮਿ, ਭਿਕ੍ਖਵੇ, ਗਬ੍ਭਵੀਸਂ ਉਪਸਮ੍ਪਾਦੇਤੁਨ੍ਤਿ.

੬੩. ਉਪਸਮ੍ਪਦਾਵਿਧਿ

੧੨੫. ਤੇਨ ਖੋ ਪਨ ਸਮਯੇਨ ਉਪਸਮ੍ਪਨ੍ਨਾ ਦਿਸ੍ਸਨ੍ਤਿ ਕੁਟ੍ਠਿਕਾਪਿ ਗਣ੍ਡਿਕਾਪਿ ਕਿਲਾਸਿਕਾਪਿ ਸੋਸਿਕਾਪਿ ਅਪਮਾਰਿਕਾਪਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਪਸਮ੍ਪਾਦੇਨ੍ਤੇਨ ਤੇਰਸ [ਤਸ੍ਸ (ਕ.)] ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਪੁਚ੍ਛਿਤਬ੍ਬੋ – ‘‘ਸਨ੍ਤਿ ਤੇ ਏਵਰੂਪਾ ਆਬਾਧਾ – ਕੁਟ੍ਠਂ, ਗਣ੍ਡੋ, ਕਿਲਾਸੋ, ਸੋਸੋ, ਅਪਮਾਰੋ? ਮਨੁਸ੍ਸੋਸਿ? ਪੁਰਿਸੋਸਿ? ਭੁਜਿਸ੍ਸੋਸਿ? ਅਣਣੋਸਿ? ਨਸਿ ਰਾਜਭਟੋ? ਅਨੁਞ੍ਞਾਤੋਸਿ ਮਾਤਾਪਿਤੂਹਿ? ਪਰਿਪੁਣ੍ਣਵੀਸਤਿਵਸ੍ਸੋਸਿ? ਪਰਿਪੁਣ੍ਣਂ ਤੇ ਪਤ੍ਤਚੀਵਰਂ? ਕਿਂਨਾਮੋਸਿ? ਕੋਨਾਮੋ ਤੇ ਉਪਜ੍ਝਾਯੋ’’ਤਿ?

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਨਨੁਸਿਟ੍ਠੇ ਉਪਸਮ੍ਪਦਾਪੇਕ੍ਖੇ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਨ੍ਤਿ. ਉਪਸਮ੍ਪਦਾਪੇਕ੍ਖਾ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਠਮਂ ਅਨੁਸਾਸਿਤ੍ਵਾ ਪਚ੍ਛਾ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਿਤੁਨ੍ਤਿ.

ਤਤ੍ਥੇਵ ਸਙ੍ਘਮਜ੍ਝੇ ਅਨੁਸਾਸਨ੍ਤਿ. ਉਪਸਮ੍ਪਦਾਪੇਕ੍ਖਾ ਤਥੇਵ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਏਕਮਨ੍ਤਂ ਅਨੁਸਾਸਿਤ੍ਵਾ ਸਙ੍ਘਮਜ੍ਝੇ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਅਨੁਸਾਸਿਤਬ੍ਬੋ –

੧੨੬. ਪਠਮਂ ਉਪਜ੍ਝਂ ਗਾਹਾਪੇਤਬ੍ਬੋ. ਉਪਜ੍ਝਂ ਗਾਹਾਪੇਤ੍ਵਾ ਪਤ੍ਤਚੀਵਰਂ ਆਚਿਕ੍ਖਿਤਬ੍ਬਂ – ਅਯਂ ਤੇ ਪਤ੍ਤੋ, ਅਯਂ ਸਙ੍ਘਾਟਿ, ਅਯਂ ਉਤ੍ਤਰਾਸਙ੍ਗੋ, ਅਯਂ ਅਨ੍ਤਰਵਾਸਕੋ. ਗਚ੍ਛ, ਅਮੁਮ੍ਹਿ ਓਕਾਸੇ ਤਿਟ੍ਠਾਹੀਤਿ.

ਬਾਲਾ ਅਬ੍ਯਤ੍ਤਾ ਅਨੁਸਾਸਨ੍ਤਿ. ਦੁਰਨੁਸਿਟ੍ਠਾ ਉਪਸਮ੍ਪਦਾਪੇਕ੍ਖਾ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਬਾਲੇਨ ਅਬ੍ਯਤ੍ਤੇਨ ਅਨੁਸਾਸਿਤਬ੍ਬੋ. ਯੋ ਅਨੁਸਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਅਨੁਸਾਸਿਤੁਨ੍ਤਿ.

ਅਸਮ੍ਮਤਾ ਅਨੁਸਾਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਸਮ੍ਮਤੇਨ ਅਨੁਸਾਸਿਤਬ੍ਬੋ. ਯੋ ਅਨੁਸਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਮਤੇਨ ਅਨੁਸਾਸਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ [ਸਮ੍ਮਨਿਤਬ੍ਬੋ (ਕ.)] – ਅਤ੍ਤਨਾ ਵਾ [ਅਤ੍ਤਨਾਵ (ਸ੍ਯਾ.)] ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ, ਪਰੇਨ ਵਾ ਪਰੋ ਸਮ੍ਮਨ੍ਨਿਤਬ੍ਬੋ.

ਕਥਞ੍ਚ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ? ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯ’’ਨ੍ਤਿ. ਏਵਂ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ.

ਕਥਞ੍ਚ ਪਨ ਪਰੇਨ ਪਰੋ ਸਮ੍ਮਨ੍ਨਿਤਬ੍ਬੋ? ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯਾ’’ਤਿ. ਏਵਂ ਪਰੇਨ ਪਰੋ ਸਮ੍ਮਨ੍ਨਿਤਬ੍ਬੋ.

ਤੇਨ ਸਮ੍ਮਤੇਨ ਭਿਕ੍ਖੁਨਾ ਉਪਸਮ੍ਪਦਾਪੇਕ੍ਖੋ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ – ‘‘ਸੁਣਸਿ, ਇਤ੍ਥਨ੍ਨਾਮ, ਅਯਂ ਤੇ ਸਚ੍ਚਕਾਲੋ ਭੂਤਕਾਲੋ. ਯਂ ਜਾਤਂ ਤਂ ਸਙ੍ਘਮਜ੍ਝੇ ਪੁਚ੍ਛਨ੍ਤੇ ਸਨ੍ਤਂ ਅਤ੍ਥੀਤਿ ਵਤ੍ਤਬ੍ਬਂ, ਅਸਨ੍ਤਂ ਨਤ੍ਥੀ’’ਤਿ ਵਤ੍ਤਬ੍ਬਂ. ਮਾ ਖੋ ਵਿਤ੍ਥਾਯਿ, ਮਾ ਖੋ ਮਙ੍ਕੁ ਅਹੋਸਿ. ਏਵਂ ਤਂ ਪੁਚ੍ਛਿਸ੍ਸਨ੍ਤਿ – ‘‘ਸਨ੍ਤਿ ਤੇ ਏਵਰੂਪਾ ਆਬਾਧਾ – ਕੁਟ੍ਠਂ, ਗਣ੍ਡੋ, ਕਿਲਾਸੋ, ਸੋਸੋ, ਅਪਮਾਰੋ? ਮਨੁਸ੍ਸੋਸਿ? ਪੁਰਿਸੋਸਿ? ਭੁਜਿਸ੍ਸੋਸਿ? ਅਣਣੋਸਿ? ਨਸਿ ਰਾਜਭਟੋ? ਅਨੁਞ੍ਞਾਤੋਸਿ ਮਾਤਾਪਿਤੂਹਿ? ਪਰਿਪੁਣ੍ਣਵੀਸਤਿਵਸ੍ਸੋਸਿ? ਪਰਿਪੁਣ੍ਣਂ ਤੇ ਪਤ੍ਤਚੀਵਰਂ? ਕਿਂਨਾਮੋਸਿ? ਕੋਨਾਮੋ ਤੇ ਉਪਜ੍ਝਾਯੋ’’ਤਿ?

ਏਕਤੋ ਆਗਚ੍ਛਨ੍ਤਿ. ਨ, ਭਿਕ੍ਖਵੇ, ਏਕਤੋ ਆਗਨ੍ਤਬ੍ਬਂ. ਅਨੁਸਾਸਕੇਨ ਪਠਮਤਰਂ ਆਗਨ੍ਤ੍ਵਾ ਸਙ੍ਘੋ ਞਾਪੇਤਬ੍ਬੋ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਅਨੁਸਿਟ੍ਠੋ ਸੋ ਮਯਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਆਗਚ੍ਛੇਯ੍ਯਾ’’ਤਿ. ਆਗਚ੍ਛਾਹੀਤਿ ਵਤ੍ਤਬ੍ਬੋ.

ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਾਪੇਤ੍ਵਾ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ਉਪਸਮ੍ਪਦਂ ਯਾਚਾਪੇਤਬ੍ਬੋ – ‘‘ਸਙ੍ਘਂ, ਭਨ੍ਤੇ, ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਭਨ੍ਤੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਦੁਤਿਯਮ੍ਪਿ, ਭਨ੍ਤੇ, ਸਙ੍ਘਂ ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਭਨ੍ਤੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਤਤਿਯਮ੍ਪਿ, ਭਨ੍ਤੇ, ਸਙ੍ਘਂ ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਭਨ੍ਤੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯਾ’’ਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛੇਯ੍ਯ’’ਨ੍ਤਿ? ਸੁਣਸਿ, ਇਤ੍ਥਨ੍ਨਾਮ, ਅਯਂ ਤੇ ਸਚ੍ਚਕਾਲੋ ਭੂਤਕਾਲੋ. ਯਂ ਜਾਤਂ ਤਂ ਪੁਚ੍ਛਾਮਿ. ਸਨ੍ਤਂ ਅਤ੍ਥੀਤਿ ਵਤ੍ਤਬ੍ਬਂ, ਅਸਨ੍ਤਂ ਨਤ੍ਥੀਤਿ ਵਤ੍ਤਬ੍ਬਂ. ਸਨ੍ਤਿ ਤੇ ਏਵਰੂਪਾ ਆਬਾਧਾ – ਕੁਟ੍ਠਂ ਗਣ੍ਡੋ ਕਿਲੇਸੋ ਸੋਸੋ ਅਪਮਾਰੋ, ਮਨੁਸ੍ਸੋਸਿ, ਪੁਰਿਸੋਸਿ, ਭੁਜਿਸ੍ਸੋਸਿ, ਅਣਣੋਸਿ, ਨਸਿ ਰਾਜਭਟੋ, ਅਨੁਞ੍ਞਾਤੋਸਿ ਮਾਤਾਪਿਤੂਹਿ, ਪਰਿਪੁਣ੍ਣਵੀਸਤਿਵਸ੍ਸੋਸਿ, ਪਰਿਪੁਣ੍ਣਂ ਤੇ ਪਤ੍ਤਚੀਵਰਂ, ਕਿਂਨਾਮੋਸਿ, ਕੋਨਾਮੋ ਤੇ ਉਪਜ੍ਝਾਯੋਤਿ? ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੧੨੭. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ, ਪਰਿਸੁਦ੍ਧੋ ਅਨ੍ਤਰਾਯਿਕੇਹਿ ਧਮ੍ਮੇਹਿ, ਪਰਿਪੁਣ੍ਣਸ੍ਸ ਪਤ੍ਤਚੀਵਰਂ. ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ, ਪਰਿਸੁਦ੍ਧੋ ਅਨ੍ਤਰਾਯਿਕੇਹਿ ਧਮ੍ਮੇਹਿ, ਪਰਿਪੁਣ੍ਣਸ੍ਸ ਪਤ੍ਤਚੀਵਰਂ. ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ, ਪਰਿਸੁਦ੍ਧੋ ਅਨ੍ਤਰਾਯਿਕੇਹਿ ਧਮ੍ਮੇਹਿ, ਪਰਿਪੁਣ੍ਣਸ੍ਸ ਪਤ੍ਤਚੀਵਰਂ. ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ, ਪਰਿਸੁਦ੍ਧੋ ਅਨ੍ਤਰਾਯਿਕੇਹਿ ਧਮ੍ਮੇਹਿ, ਪਰਿਪੁਣ੍ਣਸ੍ਸ ਪਤ੍ਤਚੀਵਰਂ. ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਉਪਸਮ੍ਪਨ੍ਨੋ ਸਙ੍ਘੇਨ ਇਤ੍ਥਨ੍ਨਾਮੋ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਉਪਸਮ੍ਪਦਾਕਮ੍ਮਂ ਨਿਟ੍ਠਿਤਂ.

੬੪. ਚਤ੍ਤਾਰੋ ਨਿਸ੍ਸਯਾ

੧੨੮. ਤਾਵਦੇਵ ਛਾਯਾ ਮੇਤਬ੍ਬਾ, ਉਤੁਪ੍ਪਮਾਣਂ ਆਚਿਕ੍ਖਿਤਬ੍ਬਂ, ਦਿਵਸਭਾਗੋ ਆਚਿਕ੍ਖਿਤਬ੍ਬੋ, ਸਙ੍ਗੀਤਿ ਆਚਿਕ੍ਖਿਤਬ੍ਬਾ, ਚਤ੍ਤਾਰੋ ਨਿਸ੍ਸਯਾ ਆਚਿਕ੍ਖਿਤਬ੍ਬਾ [ਆਚਿਕ੍ਖਿਤਬ੍ਬਾ, ਚਤ੍ਤਾਰਿ ਅਕਰਣੀਯਾਨਿ ਆਚਿਕ੍ਖਿਤਬ੍ਬਾਨਿ. (ਕ.)] –

‘‘ਪਿਣ੍ਡਿਯਾਲੋਪਭੋਜਨਂ ਨਿਸ੍ਸਾਯ ਪਬ੍ਬਜ੍ਜਾ. ਤਤ੍ਥ ਤੇ ਯਾਵਜੀਵਂ ਉਸ੍ਸਾਹੋ ਕਰਣੀਯੋ. ਅਤਿਰੇਕਲਾਭੋ – ਸਙ੍ਘਭਤ੍ਤਂ, ਉਦ੍ਦੇਸਭਤ੍ਤਂ, ਨਿਮਨ੍ਤਨਂ, ਸਲਾਕਭਤ੍ਤਂ, ਪਕ੍ਖਿਕਂ, ਉਪੋਸਥਿਕਂ, ਪਾਟਿਪਦਿਕਂ.

‘‘ਪਂਸੁਕੂਲਚੀਵਰਂ ਨਿਸ੍ਸਾਯ ਪਬ੍ਬਜ੍ਜਾ. ਤਤ੍ਥ ਤੇ ਯਾਵਜੀਵਂ ਉਸ੍ਸਾਹੋ ਕਰਣੀਯੋ. ਅਤਿਰੇਕਲਾਭੋ – ਖੋਮਂ, ਕਪ੍ਪਾਸਿਕਂ, ਕੋਸੇਯ੍ਯਂ, ਕਮ੍ਬਲਂ, ਸਾਣਂ, ਭਙ੍ਗਂ.

‘‘ਰੁਕ੍ਖਮੂਲਸੇਨਾਸਨਂ ਨਿਸ੍ਸਾਯ ਪਬ੍ਬਜ੍ਜਾ. ਤਤ੍ਥ ਤੇ ਯਾਵਜੀਵਂ ਉਸ੍ਸਾਹੋ ਕਰਣੀਯੋ. ਅਤਿਰੇਕਲਾਭੋ – ਵਿਹਾਰੋ, ਅਡ੍ਢਯੋਗੋ, ਪਾਸਾਦੋ, ਹਮ੍ਮਿਯਂ, ਗੁਹਾ.

‘‘ਪੂਤਿਮੁਤ੍ਤਭੇਸਜ੍ਜਂ ਨਿਸ੍ਸਾਯ ਪਬ੍ਬਜ੍ਜਾ. ਤਤ੍ਥ ਤੇ ਯਾਵਜੀਵਂ ਉਸ੍ਸਾਹੋ ਕਰਣੀਯੋ. ਅਤਿਰੇਕਲਾਭੋ – ਸਪ੍ਪਿ, ਨਵਨੀਤਂ, ਤੇਲਂ, ਮਧੁ, ਫਾਣਿਤ’’ਨ੍ਤਿ.

ਚਤ੍ਤਾਰੋ ਨਿਸ੍ਸਯਾ ਨਿਟ੍ਠਿਤਾ.

੬੫. ਚਤ੍ਤਾਰਿ ਅਕਰਣੀਯਾਨਿ

੧੨੯. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਞ੍ਞਤਰਂ ਭਿਕ੍ਖੁਂ ਉਪਸਮ੍ਪਾਦੇਤ੍ਵਾ ਏਕਕਂ ਓਹਾਯ ਪਕ੍ਕਮਿਂਸੁ. ਸੋ ਪਚ੍ਛਾ ਏਕਕੋਵ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਪੁਰਾਣਦੁਤਿਯਿਕਾਯ ਸਮਾਗਞ੍ਛਿ. ਸਾ ਏਵਮਾਹ – ‘‘ਕਿਂਦਾਨਿ ਪਬ੍ਬਜਿਤੋਸੀ’’ਤਿ? ‘‘ਆਮ, ਪਬ੍ਬਜਿਤੋਮ੍ਹੀ’’ਤਿ. ‘‘ਦੁਲ੍ਲਭੋ ਖੋ ਪਬ੍ਬਜਿਤਾਨਂ ਮੇਥੁਨੋ ਧਮ੍ਮੋ; ਏਹਿ, ਮੇਥੁਨਂ ਧਮ੍ਮਂ ਪਟਿਸੇਵਾ’’ਤਿ. ਸੋ ਤਸ੍ਸਾ ਮੇਥੁਨਂ ਧਮ੍ਮਂ ਪਟਿਸੇਵਿਤ੍ਵਾ ਚਿਰੇਨ ਅਗਮਾਸਿ. ਭਿਕ੍ਖੂ ਏਵਮਾਹਂਸੁ – ‘‘ਕਿਸ੍ਸ ਤ੍ਵਂ, ਆਵੁਸੋ, ਏਵਂ ਚਿਰਂ ਅਕਾਸੀ’’ਤਿ? ਅਥ ਖੋ ਸੋ ਭਿਕ੍ਖੁ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਪਸਮ੍ਪਾਦੇਤ੍ਵਾ ਦੁਤਿਯਂ ਦਾਤੁਂ, ਚਤ੍ਤਾਰਿ ਚ ਅਕਰਣੀਯਾਨਿ ਆਚਿਕ੍ਖਿਤੁਂ –

‘‘ਉਪਸਮ੍ਪਨ੍ਨੇਨ ਭਿਕ੍ਖੁਨਾ ਮੇਥੁਨੋ ਧਮ੍ਮੋ ਨ ਪਟਿਸੇਵਿਤਬ੍ਬੋ, ਅਨ੍ਤਮਸੋ ਤਿਰਚ੍ਛਾਨਗਤਾਯਪਿ. ਯੋ ਭਿਕ੍ਖੁ ਮੇਥੁਨਂ ਧਮ੍ਮਂ ਪਟਿਸੇਵਤਿ, ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਸੇਯ੍ਯਥਾਪਿ ਨਾਮ ਪੁਰਿਸੋ ਸੀਸਚ੍ਛਿਨ੍ਨੋ ਅਭਬ੍ਬੋ ਤੇਨ ਸਰੀਰਬਨ੍ਧਨੇਨ ਜੀਵਿਤੁਂ, ਏਵਮੇਵ ਭਿਕ੍ਖੁ ਮੇਥੁਨਂ ਧਮ੍ਮਂ ਪਟਿਸੇਵਿਤ੍ਵਾ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਤਂ ਤੇ ਯਾਵਜੀਵਂ ਅਕਰਣੀਯਂ.

‘‘ਉਪਸਮ੍ਪਨ੍ਨੇਨ ਭਿਕ੍ਖੁਨਾ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਨ ਆਦਾਤਬ੍ਬਂ, ਅਨ੍ਤਮਸੋ ਤਿਣਸਲਾਕਂ ਉਪਾਦਾਯ. ਯੋ ਭਿਕ੍ਖੁ ਪਾਦਂ ਵਾ ਪਾਦਾਰਹਂ ਵਾ ਅਤਿਰੇਕਪਾਦਂ ਵਾ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯਤਿ, ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਸੇਯ੍ਯਥਾਪਿ ਨਾਮ ਪਣ੍ਡੁਪਲਾਸੋ ਬਨ੍ਧਨਾ ਪਮੁਤ੍ਤੋ ਅਭਬ੍ਬੋ ਹਰਿਤਤ੍ਥਾਯ, ਏਵਮੇਵ ਭਿਕ੍ਖੁ ਪਾਦਂ ਵਾ ਪਾਦਾਰਹਂ ਵਾ ਅਤਿਰੇਕਪਾਦਂ ਵਾ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯਿਤ੍ਵਾ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਤਂ ਤੇ ਯਾਵਜੀਵਂ ਅਕਰਣੀਯਂ.

‘‘ਉਪਸਮ੍ਪਨ੍ਨੇਨ ਭਿਕ੍ਖੁਨਾ ਸਞ੍ਚਿਚ੍ਚ ਪਾਣੋ ਜੀਵਿਤਾ ਨ ਵੋਰੋਪੇਤਬ੍ਬੋ, ਅਨ੍ਤਮਸੋ ਕੁਨ੍ਥਕਿਪਿਲ੍ਲਿਕਂ ਉਪਾਦਾਯ. ਯੋ ਭਿਕ੍ਖੁ ਸਞ੍ਚਿਚ੍ਚ ਮਨੁਸ੍ਸਵਿਗ੍ਗਹਂ ਜੀਵਿਤਾ ਵੋਰੋਪੇਤਿ, ਅਨ੍ਤਮਸੋ ਗਬ੍ਭਪਾਤਨਂ ਉਪਾਦਾਯ, ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਸੇਯ੍ਯਥਾਪਿ ਨਾਮ ਪੁਥੁਸਿਲਾ ਦ੍ਵੇਧਾ ਭਿਨ੍ਨਾ ਅਪ੍ਪਟਿਸਨ੍ਧਿਕਾ ਹੋਤਿ, ਏਵਮੇਵ ਭਿਕ੍ਖੁ ਸਞ੍ਚਿਚ੍ਚ ਮਨੁਸ੍ਸਵਿਗ੍ਗਹਂ ਜੀਵਿਤਾ ਵੋਰੋਪੇਤ੍ਵਾ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਤਂ ਤੇ ਯਾਵਜੀਵਂ ਅਕਰਣੀਯਂ.

‘‘ਉਪਸਮ੍ਪਨ੍ਨੇਨ ਭਿਕ੍ਖੁਨਾ ਉਤ੍ਤਰਿਮਨੁਸ੍ਸਧਮ੍ਮੋ ਨ ਉਲ੍ਲਪਿਤਬ੍ਬੋ, ਅਨ੍ਤਮਸੋ ‘ਸੁਞ੍ਞਾਗਾਰੇ ਅਭਿਰਮਾਮੀ’ਤਿ. ਯੋ ਭਿਕ੍ਖੁ ਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਤਿ ਝਾਨਂ ਵਾ ਵਿਮੋਕ੍ਖਂ ਵਾ ਸਮਾਧਿਂ ਵਾ ਸਮਾਪਤ੍ਤਿਂ ਵਾ ਮਗ੍ਗਂ ਵਾ ਫਲਂ ਵਾ, ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਸੇਯ੍ਯਥਾਪਿ ਨਾਮ ਤਾਲੋ ਮਤ੍ਥਕਚ੍ਛਿਨ੍ਨੋ ਅਭਬ੍ਬੋ ਪੁਨ ਵਿਰੁਲ਼੍ਹਿਯਾ, ਏਵਮੇਵ ਭਿਕ੍ਖੁ ਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਿਤ੍ਵਾ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਤਂ ਤੇ ਯਾਵਜੀਵਂ ਅਕਰਣੀਯ’’ਨ੍ਤਿ.

ਚਤ੍ਤਾਰਿ ਅਕਰਣੀਯਾਨਿ ਨਿਟ੍ਠਿਤਾਨਿ.

੬੬. ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕਵਤ੍ਥੂਨਿ

੧੩੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ ਵਿਬ੍ਭਮਿ. ਸੋ ਪੁਨ ਪਚ੍ਚਾਗਨ੍ਤ੍ਵਾ ਭਿਕ੍ਖੂ ਉਪਸਮ੍ਪਦਂ ਯਾਚਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ ਵਿਬ੍ਭਮਤਿ. ਸੋ ਪੁਨ ਪਚ੍ਚਾਗਨ੍ਤ੍ਵਾ ਭਿਕ੍ਖੂ ਉਪਸਮ੍ਪਦਂ ਯਾਚਤਿ. ਸੋ ਏਵਮਸ੍ਸ ਵਚਨੀਯੋ – ‘‘ਪਸ੍ਸਿਸ੍ਸਸਿ ਤਂ ਆਪਤ੍ਤਿ’’ਨ੍ਤਿ? ਸਚਾਹਂ ਪਸ੍ਸਿਸ੍ਸਾਮੀਤਿ, ਪਬ੍ਬਾਜੇਤਬ੍ਬੋ. ਸਚਾਹਂ ਨ ਪਸ੍ਸਿਸ੍ਸਾਮੀਤਿ, ਨ ਪਬ੍ਬਾਜੇਤਬ੍ਬੋ. ਪਬ੍ਬਾਜੇਤ੍ਵਾ ਵਤ੍ਤਬ੍ਬੋ – ‘‘ਪਸ੍ਸਿਸ੍ਸਸਿ ਤਂ ਆਪਤ੍ਤਿ’’ਨ੍ਤਿ? ਸਚਾਹਂ ਪਸ੍ਸਿਸ੍ਸਾਮੀਤਿ, ਉਪਸਮ੍ਪਾਦੇਤਬ੍ਬੋ. ਸਚਾਹਂ ਨ ਪਸ੍ਸਿਸ੍ਸਾਮੀਤਿ, ਨ ਉਪਸਮ੍ਪਾਦੇਤਬ੍ਬੋ. ਉਪਸਮ੍ਪਾਦੇਤ੍ਵਾ ਵਤ੍ਤਬ੍ਬੋ – ‘‘ਪਸ੍ਸਿਸ੍ਸਸਿ ਤਂ ਆਪਤ੍ਤਿ’’ਨ੍ਤਿ? ਸਚਾਹਂ ਪਸ੍ਸਿਸ੍ਸਾਮੀਤਿ, ਓਸਾਰੇਤਬ੍ਬੋ. ਸਚਾਹਂ ਨ ਪਸ੍ਸਿਸ੍ਸਾਮੀਤਿ, ਨ ਓਸਾਰੇਤਬ੍ਬੋ. ਓਸਾਰੇਤ੍ਵਾ ਵਤ੍ਤਬ੍ਬੋ – ‘‘ਪਸ੍ਸਸਿ [ਪਸ੍ਸਾਹਿ (ਸੀ.)] ਤਂ ਆਪਤ੍ਤਿ’’ਨ੍ਤਿ? ਸਚੇ ਪਸ੍ਸਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਪਸ੍ਸਤਿ, ਲਬ੍ਭਮਾਨਾਯ ਸਾਮਗ੍ਗਿਯਾ ਪੁਨ ਉਕ੍ਖਿਪਿਤਬ੍ਬੋ. ਅਲਬ੍ਭਮਾਨਾਯ ਸਾਮਗ੍ਗਿਯਾ ਅਨਾਪਤ੍ਤਿ ਸਮ੍ਭੋਗੇ ਸਂਵਾਸੇ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ ਵਿਬ੍ਭਮਤਿ. ਸੋ ਪੁਨ ਪਚ੍ਚਾਗਨ੍ਤ੍ਵਾ ਭਿਕ੍ਖੂ ਉਪਸਮ੍ਪਦਂ ਯਾਚਤਿ. ਸੋ ਏਵਮਸ੍ਸ ਵਚਨੀਯੋ – ‘‘ਪਟਿਕਰਿਸ੍ਸਸਿ ਤਂ ਆਪਤ੍ਤਿ’’ਨ੍ਤਿ? ਸਚਾਹਂ ਪਟਿਕਰਿਸ੍ਸਾਮੀਤਿ, ਪਬ੍ਬਾਜੇਤਬ੍ਬੋ. ਸਚਾਹਂ ਨ ਪਟਿਕਰਿਸ੍ਸਾਮੀਤਿ, ਨ ਪਬ੍ਬਾਜੇਤਬ੍ਬੋ. ਪਬ੍ਬਾਜੇਤ੍ਵਾ ਵਤ੍ਤਬ੍ਬੋ – ‘‘ਪਟਿਕਰਿਸ੍ਸਸਿ ਤਂ ਆਪਤ੍ਤਿ’’ਨ੍ਤਿ? ਸਚਾਹਂ ਪਟਿਕਰਿਸ੍ਸਾਮੀਤਿ, ਉਪਸਮ੍ਪਾਦੇਤਬ੍ਬੋ. ਸਚਾਹਂ ਨ ਪਟਿਕਰਿਸ੍ਸਾਮੀਤਿ, ਨ ਉਪਸਮ੍ਪਾਦੇਤਬ੍ਬੋ. ਉਪਸਮ੍ਪਾਦੇਤ੍ਵਾ ਵਤ੍ਤਬ੍ਬੋ – ‘‘ਪਟਿਕਰਿਸ੍ਸਸਿ ਤਂ ਆਪਤ੍ਤਿ’’ਨ੍ਤਿ? ਸਚਾਹਂ ਪਟਿਕਰਿਸ੍ਸਾਮੀਤਿ, ਓਸਾਰੇਤਬ੍ਬੋ. ਸਚਾਹਂ ਨ ਪਟਿਕਰਿਸ੍ਸਾਮੀਤਿ, ਨ ਓਸਾਰੇਤਬ੍ਬੋ. ਓਸਾਰੇਤ੍ਵਾ ਵਤ੍ਤਬ੍ਬੋ – ‘‘ਪਟਿਕਰੋਹਿ ਤਂ ਆਪਤ੍ਤਿ’’ਨ੍ਤਿ. ਸਚੇ ਪਟਿਕਰੋਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਪਟਿਕਰੋਤਿ ਲਬ੍ਭਮਾਨਾਯ ਸਾਮਗ੍ਗਿਯਾ ਪੁਨ ਉਕ੍ਖਿਪਿਤਬ੍ਬੋ. ਅਲਬ੍ਭਮਾਨਾਯ ਸਾਮਗ੍ਗਿਯਾ ਅਨਾਪਤ੍ਤਿ ਸਮ੍ਭੋਗੇ ਸਂਵਾਸੇ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋ ਵਿਬ੍ਭਮਤਿ. ਸੋ ਪੁਨ ਪਚ੍ਚਾਗਨ੍ਤ੍ਵਾ ਭਿਕ੍ਖੂ ਉਪਸਮ੍ਪਦਂ ਯਾਚਤਿ. ਸੋ ਏਵਮਸ੍ਸ ਵਚਨੀਯੋ – ‘‘ਪਟਿਨਿਸ੍ਸਜ੍ਜਿਸ੍ਸਸਿ ਤਂ ਪਾਪਿਕਂ ਦਿਟ੍ਠਿ’’ਨ੍ਤਿ? ਸਚਾਹਂ ਪਟਿਨਿਸ੍ਸਜ੍ਜਿਸ੍ਸਾਮੀਤਿ, ਪਬ੍ਬਾਜੇਤਬ੍ਬੋ. ਸਚਾਹਂ ਨ ਪਟਿਨਿਸ੍ਸਜ੍ਜਿਸ੍ਸਾਮੀਤਿ, ਨ ਪਬ੍ਬਾਜੇਤਬ੍ਬੋ. ਪਬ੍ਬਾਜੇਤ੍ਵਾ ਵਤ੍ਤਬ੍ਬੋ – ‘‘ਪਟਿਨਿਸ੍ਸਜ੍ਜਿਸ੍ਸਸਿ ਤਂ ਪਾਪਿਕਂ ਦਿਟ੍ਠਿ’’ਨ੍ਤਿ? ਸਚਾਹਂ ਪਟਿਨਿਸ੍ਸਜ੍ਜਿਸ੍ਸਾਮੀਤਿ, ਉਪਸਮ੍ਪਾਦੇਤਬ੍ਬੋ. ਸਚਾਹਂ ਨ ਪਟਿਨਿਸ੍ਸਜ੍ਜਿਸ੍ਸਾਮੀਤਿ, ਨ ਉਪਸਮ੍ਪਾਦੇਤਬ੍ਬੋ. ਉਪਸਮ੍ਪਾਦੇਤ੍ਵਾ ਵਤ੍ਤਬ੍ਬੋ – ‘‘ਪਟਿਨਿਸ੍ਸਜ੍ਜਿਸ੍ਸਸਿ ਤਂ ਪਾਪਿਕਂ ਦਿਟ੍ਠਿ’’ਨ੍ਤਿ? ਸਚਾਹਂ ਪਟਿਨਿਸ੍ਸਜ੍ਜਿਸ੍ਸਾਮੀਤਿ, ਓਸਾਰੇਤਬ੍ਬੋ. ਸਚਾਹਂ ਨ ਪਟਿਨਿਸ੍ਸਜ੍ਜਿਸ੍ਸਾਮੀਤਿ, ਨ ਓਸਾਰੇਤਬ੍ਬੋ. ਓਸਾਰੇਤ੍ਵਾ ਵਤ੍ਤਬ੍ਬੋ – ‘‘ਪਟਿਨਿਸ੍ਸਜ੍ਜੇਹਿ ਤਂ ਪਾਪਿਕਂ ਦਿਟ੍ਠਿ’’ਨ੍ਤਿ. ਸਚੇ ਪਟਿਨਿਸ੍ਸਜ੍ਜਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਪਟਿਨਿਸ੍ਸਜ੍ਜਤਿ, ਲਬ੍ਭਮਾਨਾਯ ਸਾਮਗ੍ਗਿਯਾ ਪੁਨ ਉਕ੍ਖਿਪਿਤਬ੍ਬੋ. ਅਲਬ੍ਭਮਾਨਾਯ ਸਾਮਗ੍ਗਿਯਾ ਅਨਾਪਤ੍ਤਿ ਸਮ੍ਭੋਗੇ ਸਂਵਾਸੇਤਿ.

ਮਹਾਖਨ੍ਧਕੋ ਪਠਮੋ.

੬੭. ਤਸ੍ਸੁਦ੍ਦਾਨਂ

੧੩੧.

ਵਿਨਯਮ੍ਹਿ ਮਹਤ੍ਥੇਸੁ, ਪੇਸਲਾਨਂ ਸੁਖਾਵਹੇ;

ਨਿਗ੍ਗਹਾਨਞ੍ਚ ਪਾਪਿਚ੍ਛੇ, ਲਜ੍ਜੀਨਂ ਪਗ੍ਗਹੇਸੁ ਚ.

ਸਾਸਨਾਧਾਰਣੇ ਚੇਵ, ਸਬ੍ਬਞ੍ਞੁਜਿਨਗੋਚਰੇ;

ਅਨਞ੍ਞਵਿਸਯੇ ਖੇਮੇ, ਸੁਪਞ੍ਞਤ੍ਤੇ ਅਸਂਸਯੇ.

ਖਨ੍ਧਕੇ ਵਿਨਯੇ ਚੇਵ, ਪਰਿਵਾਰੇ ਚ ਮਾਤਿਕੇ;

ਯਥਾਤ੍ਥਕਾਰੀ ਕੁਸਲੋ, ਪਟਿਪਜ੍ਜਤਿ ਯੋਨਿਸੋ.

ਯੋ ਗਵਂ ਨ ਵਿਜਾਨਾਤਿ, ਨ ਸੋ ਰਕ੍ਖਤਿ ਗੋਗਣਂ;

ਏਵਂ ਸੀਲਂ ਅਜਾਨਨ੍ਤੋ, ਕਿਂ ਸੋ ਰਕ੍ਖੇਯ੍ਯ ਸਂਵਰਂ.

ਪਮੁਟ੍ਠਮ੍ਹਿ ਚ ਸੁਤ੍ਤਨ੍ਤੇ, ਅਭਿਧਮ੍ਮੇ ਚ ਤਾਵਦੇ;

ਵਿਨਯੇ ਅਵਿਨਟ੍ਠਮ੍ਹਿ, ਪੁਨ ਤਿਟ੍ਠਤਿ ਸਾਸਨਂ.

ਤਸ੍ਮਾ ਸਙ੍ਗਾਹਣਾਹੇਤੁਂ [ਸਙ੍ਗਾਹਨਾਹੇਤੁਂ (ਕ.)], ਉਦ੍ਦਾਨਂ ਅਨੁਪੁਬ੍ਬਸੋ;

ਪਵਕ੍ਖਾਮਿ ਯਥਾਞਾਯਂ, ਸੁਣਾਥ ਮਮ ਭਾਸਤੋ.

ਵਤ੍ਥੁ ਨਿਦਾਨਂ ਆਪਤ੍ਤਿ, ਨਯਾ ਪੇਯ੍ਯਾਲਮੇਵ ਚ;

ਦੁਕ੍ਕਰਂ ਤਂ ਅਸੇਸੇਤੁਂ, ਨਯਤੋ ਤਂ ਵਿਜਾਨਥਾਤਿ.

ਬੋਧਿ ਰਾਜਾਯਤਨਞ੍ਚ, ਅਜਪਾਲੋ ਸਹਮ੍ਪਤਿ;

ਬ੍ਰਹ੍ਮਾ ਆਲ਼ਾਰੋ ਉਦਕੋ, ਭਿਕ੍ਖੁ ਚ ਉਪਕੋ ਇਸਿ.

ਕੋਣ੍ਡਞ੍ਞੋ ਵਪ੍ਪੋ ਭਦ੍ਦਿਯੋ, ਮਹਾਨਾਮੋ ਚ ਅਸ੍ਸਜਿ;

ਯਸੋ ਚਤ੍ਤਾਰੋ ਪਞ੍ਞਾਸ, ਸਬ੍ਬੇ ਪੇਸੇਸਿ ਸੋ ਦਿਸਾ.

ਵਤ੍ਥੁ ਮਾਰੇਹਿ ਤਿਂਸਾ ਚ, ਉਰੁਵੇਲਂ ਤਯੋ ਜਟੀ;

ਅਗ੍ਯਾਗਾਰਂ ਮਹਾਰਾਜਾ, ਸਕ੍ਕੋ ਬ੍ਰਹ੍ਮਾ ਚ ਕੇਵਲਾ.

ਪਂਸੁਕੂਲਂ ਪੋਕ੍ਖਰਣੀ, ਸਿਲਾ ਚ ਕਕੁਧੋ ਸਿਲਾ;

ਜਮ੍ਬੁ ਅਮ੍ਬੋ ਚ ਆਮਲੋ, ਪਾਰਿਪੁਪ੍ਫਞ੍ਚ ਆਹਰਿ.

ਫਾਲਿਯਨ੍ਤੁ ਉਜ੍ਜਲਨ੍ਤੁ, ਵਿਜ੍ਝਾਯਨ੍ਤੁ ਚ ਕਸ੍ਸਪ;

ਨਿਮੁਜ੍ਜਨ੍ਤਿ ਮੁਖੀ ਮੇਘੋ, ਗਯਾ ਲਟ੍ਠਿ ਚ ਮਾਗਧੋ.

ਉਪਤਿਸ੍ਸੋ ਕੋਲਿਤੋ ਚ, ਅਭਿਞ੍ਞਾਤਾ ਚ ਪਬ੍ਬਜੁਂ;

ਦੁਨ੍ਨਿਵਤ੍ਥਾ ਪਣਾਮਨਾ, ਕਿਸੋ ਲੂਖੋ ਚ ਬ੍ਰਾਹ੍ਮਣੋ.

ਅਨਾਚਾਰਂ ਆਚਰਤਿ, ਉਦਰਂ ਮਾਣਵੋ ਗਣੋ;

ਵਸ੍ਸਂ ਬਾਲੇਹਿ ਪਕ੍ਕਨ੍ਤੋ, ਦਸ ਵਸ੍ਸਾਨਿ ਨਿਸ੍ਸਯੋ.

ਨ ਵਤ੍ਤਨ੍ਤਿ ਪਣਾਮੇਤੁਂ, ਬਾਲਾ ਪਸ੍ਸਦ੍ਧਿ ਪਞ੍ਚ ਛ;

ਯੋ ਸੋ ਅਞ੍ਞੋ ਚ ਨਗ੍ਗੋ ਚ, ਅਚ੍ਛਿਨ੍ਨਜਟਿਲਸਾਕਿਯੋ.

ਮਗਧੇਸੁ ਪਞ੍ਚਾਬਾਧਾ, ਏਕੋ ਰਾਜਾ [ਭਟੋ ਚੋਰੋ (ਸ੍ਯਾ.)] ਚ ਅਙ੍ਗੁਲਿ;

ਮਾਗਧੋ ਚ ਅਨੁਞ੍ਞਾਸਿ, ਕਾਰਾ ਲਿਖਿ ਕਸਾਹਤੋ.

ਲਕ੍ਖਣਾ ਇਣਾ ਦਾਸੋ ਚ, ਭਣ੍ਡੁਕੋ ਉਪਾਲਿ ਅਹਿ;

ਸਦ੍ਧਂ ਕੁਲਂ ਕਣ੍ਟਕੋ ਚ, ਆਹੁਨ੍ਦਰਿਕਮੇਵ ਚ.

ਵਤ੍ਥੁਮ੍ਹਿ ਦਾਰਕੋ ਸਿਕ੍ਖਾ, ਵਿਹਰਨ੍ਤਿ ਚ ਕਿਂ ਨੁ ਖੋ;

ਸਬ੍ਬਂ ਮੁਖਂ ਉਪਜ੍ਝਾਯੇ, ਅਪਲਾਲ਼ਨ ਕਣ੍ਟਕੋ.

ਪਣ੍ਡਕੋ ਥੇਯ੍ਯਪਕ੍ਕਨ੍ਤੋ, ਅਹਿ ਚ ਮਾਤਰੀ ਪਿਤਾ;

ਅਰਹਨ੍ਤਭਿਕ੍ਖੁਨੀਭੇਦਾ, ਰੁਹਿਰੇਨ ਚ ਬ੍ਯਞ੍ਜਨਂ.

ਅਨੁਪਜ੍ਝਾਯਸਙ੍ਘੇਨ, ਗਣਪਣ੍ਡਕਪਤ੍ਤਕੋ;

ਅਚੀਵਰਂ ਤਦੁਭਯਂ, ਯਾਚਿਤੇਨਪਿ ਯੇ ਤਯੋ.

ਹਤ੍ਥਾ ਪਾਦਾ ਹਤ੍ਥਪਾਦਾ, ਕਣ੍ਣਾ ਨਾਸਾ ਤਦੂਭਯਂ;

ਅਙ੍ਗੁਲਿਅਲ਼ਕਣ੍ਡਰਂ, ਫਣਂ ਖੁਜ੍ਜਞ੍ਚ ਵਾਮਨਂ.

ਗਲਗਣ੍ਡੀ ਲਕ੍ਖਣਾ ਚੇਵ, ਕਸਾ ਲਿਖਿਤਸੀਪਦੀ;

ਪਾਪਪਰਿਸਦੂਸੀ ਚ, ਕਾਣਂ ਕੁਣਿ ਤਥੇਵ ਚ.

ਖਞ੍ਜਂ ਪਕ੍ਖਹਤਞ੍ਚੇਵ, ਸਚ੍ਛਿਨ੍ਨਇਰਿਯਾਪਥਂ;

ਜਰਾਨ੍ਧਮੂਗਬਧਿਰਂ, ਅਨ੍ਧਮੂਗਞ੍ਚ ਯਂ ਤਹਿਂ.

ਅਨ੍ਧਬਧਿਰਂ ਯਂ ਵੁਤ੍ਤਂ, ਮੂਗਬਧਿਰਮੇਵ ਚ;

ਅਨ੍ਧਮੂਗਬਧਿਰਞ੍ਚ, ਅਲਜ੍ਜੀਨਞ੍ਚ ਨਿਸ੍ਸਯਂ.

ਵਤ੍ਥਬ੍ਬਞ੍ਚ ਤਥਾਦ੍ਧਾਨਂ, ਯਾਚਮਾਨੇਨ ਲਕ੍ਖਣਾ [ਪੇਕ੍ਖਨਾ (ਸਬ੍ਬਤ੍ਥ)];

ਆਗਚ੍ਛਤੁ ਵਿਵਦਨ੍ਤਿ, ਏਕੁਪਜ੍ਝਾਯੇਨ ਕਸ੍ਸਪੋ.

ਦਿਸ੍ਸਨ੍ਤਿ ਉਪਸਮ੍ਪਨ੍ਨਾ, ਆਬਾਧੇਹਿ ਚ ਪੀਲ਼ਿਤਾ;

ਅਨਨੁਸਿਟ੍ਠਾ ਵਿਤ੍ਥੇਨ੍ਤਿ, ਤਤ੍ਥੇਵ ਅਨੁਸਾਸਨਾ.

ਸਙ੍ਘੇਪਿ ਚ ਅਥੋ ਬਾਲਾ, ਅਸਮ੍ਮਤਾ ਚ ਏਕਤੋ;

ਉਲ੍ਲੁਮ੍ਪਤੁਪਸਮ੍ਪਦਾ, ਨਿਸ੍ਸਯੋ ਏਕਕੋ ਤਯੋਤਿ.

ਇਮਮ੍ਹਿ ਖਨ੍ਧਕੇ ਵਤ੍ਥੂਨਿ ਏਕਸਤਞ੍ਚ ਦ੍ਵਾਸਤ੍ਤਤਿ.

ਮਹਾਖਨ੍ਧਕੋ ਨਿਟ੍ਠਿਤੋ.

੨. ਉਪੋਸਥਕ੍ਖਨ੍ਧਕੋ

੬੮. ਸਨ੍ਨਿਪਾਤਾਨੁਜਾਨਨਾ

੧੩੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਗਿਜ੍ਝਕੂਟੇ ਪਬ੍ਬਤੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤਿਤ੍ਵਾ ਧਮ੍ਮਂ ਭਾਸਨ੍ਤਿ. ਤੇ ਮਨੁਸ੍ਸਾ ਉਪਸਙ੍ਕਮਨ੍ਤਿ ਧਮ੍ਮਸ੍ਸਵਨਾਯ. ਤੇ ਲਭਨ੍ਤਿ ਅਞ੍ਞਤਿਤ੍ਥਿਯੇਸੁ ਪਰਿਬ੍ਬਾਜਕੇਸੁ ਪੇਮਂ, ਲਭਨ੍ਤਿ ਪਸਾਦਂ, ਲਭਨ੍ਤਿ ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਪਕ੍ਖਂ. ਅਥ ਖੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਏਤਰਹਿ ਖੋ ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤਿਤ੍ਵਾ ਧਮ੍ਮਂ ਭਾਸਨ੍ਤਿ. ਤੇ ਮਨੁਸ੍ਸਾ ਉਪਸਙ੍ਕਮਨ੍ਤਿ ਧਮ੍ਮਸ੍ਸਵਨਾਯ. ਤੇ ਲਭਨ੍ਤਿ ਅਞ੍ਞਤਿਤ੍ਥਿਯੇਸੁ ਪਰਿਬ੍ਬਾਜਕੇਸੁ ਪੇਮਂ, ਲਭਨ੍ਤਿ ਪਸਾਦਂ, ਲਭਨ੍ਤਿ ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਪਕ੍ਖਂ. ਯਂਨੂਨ ਅਯ੍ਯਾਪਿ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤੇਯ੍ਯੁ’’ਨ੍ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਭਗਵਨ੍ਤਂ ਏਤਦਵੋਚ – ‘‘ਇਧ ਮਯ੍ਹਂ, ਭਨ੍ਤੇ, ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ ‘ਏਤਰਹਿ ਖੋ ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤਿਤ੍ਵਾ ਧਮ੍ਮਂ ਭਾਸਨ੍ਤਿ. ਤੇ ਮਨੁਸ੍ਸਾ ਉਪਸਙ੍ਕਮਨ੍ਤਿ ਧਮ੍ਮਸ੍ਸਵਨਾਯ. ਤੇ ਲਭਨ੍ਤਿ ਅਞ੍ਞਤਿਤ੍ਥਿਯੇਸੁ ਪਰਿਬ੍ਬਾਜਕੇਸੁ ਪੇਮਂ, ਲਭਨ੍ਤਿ ਪਸਾਦਂ, ਲਭਨ੍ਤਿ ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਪਕ੍ਖਂ. ਯਂਨੂਨ ਅਯ੍ਯਾਪਿ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤੇਯ੍ਯੁ’ਨ੍ਤਿ. ਸਾਧੁ, ਭਨ੍ਤੇ, ਅਯ੍ਯਾਪਿ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤੇਯ੍ਯੁ’’ਨ੍ਤਿ. ਅਥ ਖੋ ਭਗਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤਿਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ – ਭਗਵਤਾ ਅਨੁਞ੍ਞਾਤਾ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤਿਤੁਨ੍ਤਿ – ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤਿਤ੍ਵਾ ਤੁਣ੍ਹੀ ਨਿਸੀਦਨ੍ਤਿ. ਤੇ ਮਨੁਸ੍ਸਾ ਉਪਸਙ੍ਕਮਨ੍ਤਿ ਧਮ੍ਮਸ੍ਸਵਨਾਯ. ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤਿਤ੍ਵਾ ਤੁਣ੍ਹੀ ਨਿਸੀਦਿਸ੍ਸਨ੍ਤਿ, ਸੇਯ੍ਯਥਾਪਿ ਮੂਗਸੂਕਰਾ. ਨਨੁ ਨਾਮ ਸਨ੍ਨਿਪਤਿਤੇਹਿ ਧਮ੍ਮੋ ਭਾਸਿਤਬ੍ਬੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤਿਤ੍ਵਾ ਧਮ੍ਮਂ ਭਾਸਿਤੁ’’ਨ੍ਤਿ.

੬੯. ਪਾਤਿਮੋਕ੍ਖੁਦ੍ਦੇਸਾਨੁਜਾਨਨਾ

੧੩੩. ਅਥ ਖੋ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਯਂਨੂਨਾਹਂ ਯਾਨਿ ਮਯਾ ਭਿਕ੍ਖੂਨਂ ਪਞ੍ਞਤ੍ਤਾਨਿ ਸਿਕ੍ਖਾਪਦਾਨਿ, ਤਾਨਿ ਨੇਸਂ ਪਾਤਿਮੋਕ੍ਖੁਦ੍ਦੇਸਂ ਅਨੁਜਾਨੇਯ੍ਯਂ. ਸੋ ਨੇਸਂ ਭਵਿਸ੍ਸਤਿ ਉਪੋਸਥਕਮ੍ਮ’’ਨ੍ਤਿ. ਅਥ ਖੋ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ਇਧ ਮਯ੍ਹਂ, ਭਿਕ੍ਖਵੇ, ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ ‘ਯਂਨੂਨਾਹਂ ਯਾਨਿ ਮਯਾ ਭਿਕ੍ਖੂਨਂ ਪਞ੍ਞਤ੍ਤਾਨਿ ਸਿਕ੍ਖਾਪਦਾਨਿ, ਤਾਨਿ ਨੇਸਂ ਪਾਤਿਮੋਕ੍ਖੁਦ੍ਦੇਸਂ ਅਨੁਜਾਨੇਯ੍ਯਂ. ਸੋ ਨੇਸਂ ਭਵਿਸ੍ਸਤਿ ਉਪੋਸਥਕਮ੍ਮ’ਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਪਾਤਿਮੋਕ੍ਖਂ ਉਦ੍ਦਿਸਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਉਦ੍ਦਿਸਿਤਬ੍ਬਂ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੧੩੪. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਉਪੋਸਥਂ ਕਰੇਯ੍ਯ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯ. ਕਿਂ ਸਙ੍ਘਸ੍ਸ ਪੁਬ੍ਬਕਿਚ੍ਚਂ? ਪਾਰਿਸੁਦ੍ਧਿਂ ਆਯਸ੍ਮਨ੍ਤੋ ਆਰੋਚੇਥ. ਪਾਤਿਮੋਕ੍ਖਂ ਉਦ੍ਦਿਸਿਸ੍ਸਾਮਿ. ਤਂ ਸਬ੍ਬੇਵ ਸਨ੍ਤਾ ਸਾਧੁਕਂ ਸੁਣੋਮ ਮਨਸਿ ਕਰੋਮ. ਯਸ੍ਸ ਸਿਯਾ ਆਪਤ੍ਤਿ, ਸੋ ਆਵਿਕਰੇਯ੍ਯ. ਅਸਨ੍ਤਿਯਾ ਆਪਤ੍ਤਿਯਾ ਤੁਣ੍ਹੀ ਭਵਿਤਬ੍ਬਂ. ਤੁਣ੍ਹੀਭਾਵੇਨ ਖੋ ਪਨਾਯਸ੍ਮਨ੍ਤੇ ਪਰਿਸੁਦ੍ਧਾਤਿ ਵੇਦਿਸ੍ਸਾਮਿ. ਯਥਾ ਖੋ ਪਨ ਪਚ੍ਚੇਕਪੁਟ੍ਠਸ੍ਸ ਵੇਯ੍ਯਾਕਰਣਂ ਹੋਤਿ, ਏਵਮੇਵਂ [ਏਵਮੇਵ (ਕ)] ਏਵਰੂਪਾਯ ਪਰਿਸਾਯ ਯਾਵਤਤਿਯਂ ਅਨੁਸ੍ਸਾਵਿਤਂ ਹੋਤਿ. ਯੋ ਪਨ ਭਿਕ੍ਖੁ ਯਾਵਤਤਿਯਂ ਅਨੁਸ੍ਸਾਵਿਯਮਾਨੇ ਸਰਮਾਨੋ ਸਨ੍ਤਿਂ ਆਪਤ੍ਤਿਂ ਨਾਵਿਕਰੇਯ੍ਯ, ਸਮ੍ਪਜਾਨਮੁਸਾਵਾਦਸ੍ਸ ਹੋਤਿ. ਸਮ੍ਪਜਾਨਮੁਸਾਵਾਦੋ ਖੋ ਪਨਾਯਸ੍ਮਨ੍ਤੋ ਅਨ੍ਤਰਾਯਿਕੋ ਧਮ੍ਮੋ ਵੁਤ੍ਤੋ ਭਗਵਤਾ. ਤਸ੍ਮਾ, ਸਰਮਾਨੇਨ ਭਿਕ੍ਖੁਨਾ ਆਪਨ੍ਨੇਨ ਵਿਸੁਦ੍ਧਾਪੇਕ੍ਖੇਨ ਸਨ੍ਤੀ ਆਪਤ੍ਤਿ ਆਵਿਕਾਤਬ੍ਬਾ; ਆਵਿਕਤਾ ਹਿਸ੍ਸ ਫਾਸੁ ਹੋਤੀ’’ਤਿ.

੧੩੫. ਪਾਤਿਮੋਕ੍ਖਨ੍ਤਿ ਆਦਿਮੇਤਂ ਮੁਖਮੇਤਂ ਪਮੁਖਮੇਤਂ ਕੁਸਲਾਨਂ ਧਮ੍ਮਾਨਂ. ਤੇਨ ਵੁਚ੍ਚਤਿ ਪਾਤਿਮੋਕ੍ਖਨ੍ਤਿ. ਆਯਸ੍ਮਨ੍ਤੋਤਿ ਪਿਯਵਚਨਮੇਤਂ ਗਰੁਵਚਨਮੇਤਂ ਸਗਾਰਵਸਪ੍ਪਤਿਸ੍ਸਾਧਿਵਚਨਮੇਤਂ ਆਯਸ੍ਮਨ੍ਤੋਤਿ. ਉਦ੍ਦਿਸਿਸ੍ਸਾਮੀਤਿ ਆਚਿਕ੍ਖਿਸ੍ਸਾਮਿ ਦੇਸੇਸ੍ਸਾਮਿ ਪਞ੍ਞਪੇਸ੍ਸਾਮਿ ਪਟ੍ਠਪੇਸ੍ਸਾਮਿ ਵਿਵਰਿਸ੍ਸਾਮਿ ਵਿਭਜਿਸ੍ਸਾਮਿ ਉਤ੍ਤਾਨਿਂ ਕਰਿਸ੍ਸਾਮਿ [ਉਤ੍ਤਾਨੀ ਕਰਿਸ੍ਸਾਮਿ (ਸੀ. ਸ੍ਯਾ.)] ਪਕਾਸੇਸ੍ਸਾਮਿ. ਤਨ੍ਤਿ ਪਾਤਿਮੋਕ੍ਖਂ ਵੁਚ੍ਚਤਿ. ਸਬ੍ਬੇਵ ਸਨ੍ਤਾਤਿ ਯਾਵਤਿਕਾ ਤਸ੍ਸਾ ਪਰਿਸਾਯ ਥੇਰਾ ਚ ਨਵਾ ਚ ਮਜ੍ਝਿਮਾ ਚ, ਏਤੇ ਵੁਚ੍ਚਨ੍ਤਿ ਸਬ੍ਬੇਵ ਸਨ੍ਤਾਤਿ. ਸਾਧੁਕਂ ਸੁਣੋਮਾਤਿ ਅਟ੍ਠਿਂ ਕਤ੍ਵਾ ਮਨਸਿ ਕਤ੍ਵਾ ਸਬ੍ਬਚੇਤਸਾ [ਸਬ੍ਬਂ ਚੇਤਸਾ (ਸ੍ਯਾ. ਕ.)] ਸਮਨ੍ਨਾਹਰਾਮ. ਮਨਸਿ ਕਰੋਮਾਤਿ ਏਕਗ੍ਗਚਿਤ੍ਤਾ ਅਵਿਕ੍ਖਿਤ੍ਤਚਿਤ੍ਤਾ ਅਵਿਸਾਹਟਚਿਤ੍ਤਾ ਨਿਸਾਮੇਮ. ਯਸ੍ਸ ਸਿਯਾ ਆਪਤ੍ਤੀਤਿ ਥੇਰਸ੍ਸ ਵਾ ਨਵਸ੍ਸ ਵਾ ਮਜ੍ਝਿਮਸ੍ਸ ਵਾ, ਪਞ੍ਚਨ੍ਨਂ ਵਾ ਆਪਤ੍ਤਿਕ੍ਖਨ੍ਧਾਨਂ ਅਞ੍ਞਤਰਾ ਆਪਤ੍ਤਿ, ਸਤ੍ਤਨ੍ਨਂ ਵਾ ਆਪਤ੍ਤਿਕ੍ਖਨ੍ਧਾਨਂ ਅਞ੍ਞਤਰਾ ਆਪਤ੍ਤਿ. ਸੋ ਆਵਿਕਰੇਯ੍ਯਾਤਿ ਸੋ ਦੇਸੇਯ੍ਯ, ਸੋ ਵਿਵਰੇਯ੍ਯ, ਸੋ ਉਤ੍ਤਾਨਿਂ ਕਰੇਯ੍ਯ, ਸੋ ਪਕਾਸੇਯ੍ਯ ਸਙ੍ਘਮਜ੍ਝੇ ਵਾ ਗਣਮਜ੍ਝੇ ਵਾ ਏਕਪੁਗ੍ਗਲੇ ਵਾ. ਅਸਨ੍ਤੀ ਨਾਮ ਆਪਤ੍ਤਿ ਅਨਜ੍ਝਾਪਨ੍ਨਾ ਵਾ ਹੋਤਿ, ਆਪਜ੍ਜਿਤ੍ਵਾ ਵਾ ਵੁਟ੍ਠਿਤਾ. ਤੁਣ੍ਹੀ ਭਵਿਤਬ੍ਬਨ੍ਤਿ ਅਧਿਵਾਸੇਤਬ੍ਬਂ ਨ ਬ੍ਯਾਹਰਿਤਬ੍ਬਂ. ਪਰਿਸੁਦ੍ਧਾਤਿ ਵੇਦਿਸ੍ਸਾਮੀਤਿ ਜਾਨਿਸ੍ਸਾਮਿ ਧਾਰੇਸ੍ਸਾਮਿ. ਯਥਾ ਖੋ ਪਨ ਪਚ੍ਚੇਕਪੁਟ੍ਠਸ੍ਸ ਵੇਯ੍ਯਾਕਰਣਂ ਹੋਤੀਤਿ ਯਥਾ ਏਕੇਨ ਏਕੋ ਪੁਟ੍ਠੋ ਬ੍ਯਾਕਰੇਯ੍ਯ, ਏਵਮੇਵ ਤਸ੍ਸਾ ਪਰਿਸਾਯ ਜਾਨਿਤਬ੍ਬਂ ਮਂ ਪੁਚ੍ਛਤੀਤਿ. ਏਵਰੂਪਾ ਨਾਮ ਪਰਿਸਾ ਭਿਕ੍ਖੁਪਰਿਸਾ ਵੁਚ੍ਚਤਿ. ਯਾਵਤਤਿਯਂ ਅਨੁਸ੍ਸਾਵਿਤਂ ਹੋਤੀਤਿ ਸਕਿਮ੍ਪਿ ਅਨੁਸ੍ਸਾਵਿਤਂ ਹੋਤਿ, ਦੁਤਿਯਮ੍ਪਿ ਅਨੁਸ੍ਸਾਵਿਤਂ ਹੋਤਿ, ਤਤਿਯਮ੍ਪਿ ਅਨੁਸ੍ਸਾਵਿਤਂ ਹੋਤਿ. ਸਰਮਾਨੋਤਿ ਜਾਨਮਾਨੋ ਸਞ੍ਜਾਨਮਾਨੋ. ਸਨ੍ਤੀ ਨਾਮ ਆਪਤ੍ਤਿ ਅਜ੍ਝਾਪਨ੍ਨਾ ਵਾ ਹੋਤਿ, ਆਪਜ੍ਜਿਤ੍ਵਾ ਵਾ ਅਵੁਟ੍ਠਿਤਾ. ਨਾਵਿਕਰੇਯ੍ਯਾਤਿ ਨ ਦੇਸੇਯ੍ਯ, ਨ ਵਿਵਰੇਯ੍ਯ, ਨ ਉਤ੍ਤਾਨਿਂ ਕਰੇਯ੍ਯ, ਨ ਪਕਾਸੇਯ੍ਯ ਸਙ੍ਘਮਜ੍ਝੇ ਵਾ ਗਣਮਜ੍ਝੇ ਵਾ ਏਕਪੁਗ੍ਗਲੇ ਵਾ. ਸਮ੍ਪਜਾਨਮੁਸਾਵਾਦਸ੍ਸ ਹੋਤੀਤਿ. ਸਮ੍ਪਜਾਨਮੁਸਾਵਾਦੇ ਕਿਂ ਹੋਤਿ? ਦੁਕ੍ਕਟਂ ਹੋਤਿ. ਅਨ੍ਤਰਾਯਿਕੋ ਧਮ੍ਮੋ ਵੁਤ੍ਤੋ ਭਗਵਤਾਤਿ. ਕਿਸ੍ਸ ਅਨ੍ਤਰਾਯਿਕੋ? ਪਠਮਸ੍ਸ ਝਾਨਸ੍ਸ ਅਧਿਗਮਾਯ ਅਨ੍ਤਰਾਯਿਕੋ, ਦੁਤਿਯਸ੍ਸ ਝਾਨਸ੍ਸ ਅਧਿਗਮਾਯ ਅਨ੍ਤਰਾਯਿਕੋ, ਤਤਿਯਸ੍ਸ ਝਾਨਸ੍ਸ ਅਧਿਗਮਾਯ ਅਨ੍ਤਰਾਯਿਕੋ, ਚਤੁਤ੍ਥਸ੍ਸ ਝਾਨਸ੍ਸ ਅਧਿਗਮਾਯ ਅਨ੍ਤਰਾਯਿਕੋ, ਝਾਨਾਨਂ ਵਿਮੋਕ੍ਖਾਨਂ ਸਮਾਧੀਨਂ ਸਮਾਪਤ੍ਤੀਨਂ ਨੇਕ੍ਖਮ੍ਮਾਨਂ ਨਿਸ੍ਸਰਣਾਨਂ ਪਵਿਵੇਕਾਨਂ ਕੁਸਲਾਨਂ ਧਮ੍ਮਾਨਂ ਅਧਿਗਮਾਯ ਅਨ੍ਤਰਾਯਿਕੋ. ਤਸ੍ਮਾਤਿ ਤਙ੍ਕਾਰਣਾ. ਸਰਮਾਨੇਨਾਤਿ ਜਾਨਮਾਨੇਨ ਸਞ੍ਜਾਨਮਾਨੇਨ. ਵਿਸੁਦ੍ਧਾਪੇਕ੍ਖੇਨਾਤਿ ਵੁਟ੍ਠਾਤੁਕਾਮੇਨ ਵਿਸੁਜ੍ਝਿਤੁਕਾਮੇਨ. ਸਨ੍ਤੀ ਨਾਮ ਆਪਤ੍ਤਿ ਅਜ੍ਝਾਪਨ੍ਨਾ ਵਾ ਹੋਤਿ, ਆਪਜ੍ਜਿਤ੍ਵਾ ਵਾ ਅਵੁਟ੍ਠਿਤਾ. ਆਵਿਕਾਤਬ੍ਬਾਤਿ ਆਵਿਕਾਤਬ੍ਬਾ ਸਙ੍ਘਮਜ੍ਝੇ ਵਾ ਗਣਮਜ੍ਝੇ ਵਾ ਏਕਪੁਗ੍ਗਲੇ ਵਾ. ਆਵਿਕਤਾ ਹਿਸ੍ਸ ਫਾਸੁ ਹੋਤੀਤਿ. ਕਿਸ੍ਸ ਫਾਸੁ ਹੋਤਿ? ਪਠਮਸ੍ਸ ਝਾਨਸ੍ਸ ਅਧਿਗਮਾਯ ਫਾਸੁ ਹੋਤਿ, ਦੁਤਿਯਸ੍ਸ ਝਾਨਸ੍ਸ ਅਧਿਗਮਾਯ ਫਾਸੁ ਹੋਤਿ, ਤਤਿਯਸ੍ਸ ਝਾਨਸ੍ਸ ਅਧਿਗਮਾਯ ਫਾਸੁ ਹੋਤਿ, ਚਤੁਤ੍ਥਸ੍ਸ ਝਾਨਸ੍ਸ ਅਧਿਗਮਾਯ ਫਾਸੁ ਹੋਤਿ, ਝਾਨਾਨਂ ਵਿਮੋਕ੍ਖਾਨਂ ਸਮਾਧੀਨਂ ਸਮਾਪਤ੍ਤੀਨਂ ਨੇਕ੍ਖਮ੍ਮਾਨਂ ਨਿਸ੍ਸਰਣਾਨਂ ਪਵਿਵੇਕਾਨਂ ਕੁਸਲਾਨਂ ਧਮ੍ਮਾਨਂ ਅਧਿਗਮਾਯ ਫਾਸੁ ਹੋਤੀਤਿ.

੧੩੬. ਤੇਨ ਖੋ ਪਨ ਸਮਯੇਨ ਭਿਕ੍ਖੂ – ਭਗਵਤਾ ਪਾਤਿਮੋਕ੍ਖੁਦ੍ਦੇਸੋ ਅਨੁਞ੍ਞਾਤੋਤਿ – ਦੇਵਸਿਕਂ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਦੇਵਸਿਕਂ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਉਪੋਸਥੇ ਪਾਤਿਮੋਕ੍ਖਂ ਉਦ੍ਦਿਸਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ – ਭਗਵਤਾ ਉਪੋਸਥੇ ਪਾਤਿਮੋਕ੍ਖੁਦ੍ਦੇਸੋ ਅਨੁਞ੍ਞਾਤੋਤਿ – ਪਕ੍ਖਸ੍ਸ ਤਿਕ੍ਖਤ੍ਤੁਂ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਪਕ੍ਖਸ੍ਸ ਤਿਕ੍ਖਤ੍ਤੁਂ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਕਿਂ ਪਕ੍ਖਸ੍ਸ ਚਾਤੁਦ੍ਦਸੇ ਵਾ ਪਨ੍ਨਰਸੇ ਵਾ ਪਾਤਿਮੋਕ੍ਖਂ ਉਦ੍ਦਿਸਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਯਥਾਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ ਸਕਾਯ ਸਕਾਯ ਪਰਿਸਾਯ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਯਥਾਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ ਸਕਾਯ ਸਕਾਯ ਪਰਿਸਾਯ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਮਗ੍ਗਾਨਂ ਉਪੋਸਥਕਮ੍ਮਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਸਮਗ੍ਗਾਨਂ ਉਪੋਸਥਕਮ੍ਮ’ਨ੍ਤਿ. ਕਿਤ੍ਤਾਵਤਾ ਨੁ ਖੋ ਸਾਮਗ੍ਗੀ ਹੋਤਿ, ਯਾਵਤਾ ਏਕਾਵਾਸੋ, ਉਦਾਹੁ ਸਬ੍ਬਾ ਪਥਵੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਏਤ੍ਤਾਵਤਾ ਸਾਮਗ੍ਗੀ ਯਾਵਤਾ ਏਕਾਵਾਸੋਤਿ.

੭੦. ਮਹਾਕਪ੍ਪਿਨਵਤ੍ਥੁ

੧੩੭. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਮਹਾਕਪ੍ਪਿਨੋ ਰਾਜਗਹੇ ਵਿਹਰਤਿ ਮਦ੍ਦਕੁਚ੍ਛਿਮ੍ਹਿ ਮਿਗਦਾਯੇ. ਅਥ ਖੋ ਆਯਸ੍ਮਤੋ ਮਹਾਕਪ੍ਪਿਨਸ੍ਸ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਗਚ੍ਛੇਯ੍ਯਂ ਵਾਹਂ ਉਪੋਸਥਂ ਨ ਵਾ ਗਚ੍ਛੇਯ੍ਯਂ, ਗਚ੍ਛੇਯ੍ਯਂ ਵਾਹਂ ਸਙ੍ਘਕਮ੍ਮਂ ਨ ਵਾ ਗਚ੍ਛੇਯ੍ਯਂ, ਅਥ ਖ੍ਵਾਹਂ ਵਿਸੁਦ੍ਧੋ ਪਰਮਾਯ ਵਿਸੁਦ੍ਧਿਯਾ’’ਤਿ? ਅਥ ਖੋ ਭਗਵਾ ਆਯਸ੍ਮਤੋ ਮਹਾਕਪ੍ਪਿਨਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ, ਏਵਮੇਵ – ਗਿਜ੍ਝਕੂਟੇ ਪਬ੍ਬਤੇ ਅਨ੍ਤਰਹਿਤੋ ਮਦ੍ਦਕੁਚ੍ਛਿਮ੍ਹਿ ਮਿਗਦਾਯੇ ਆਯਸ੍ਮਤੋ ਮਹਾਕਪ੍ਪਿਨਸ੍ਸ ਸਮ੍ਮੁਖੇ ਪਾਤੁਰਹੋਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਆਯਸ੍ਮਾਪਿ ਖੋ ਮਹਾਕਪ੍ਪਿਨੋ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਮਹਾਕਪ੍ਪਿਨਂ ਭਗਵਾ ਏਤਦਵੋਚ – ‘‘ਨਨੁ ਤੇ, ਕਪ੍ਪਿਨ, ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ਗਚ੍ਛੇਯ੍ਯਂ ਵਾਹਂ ਉਪੋਸਥਂ ਨ ਵਾ ਗਚ੍ਛੇਯ੍ਯਂ, ਗਚ੍ਛੇਯ੍ਯਂ ਵਾਹਂ ਸਙ੍ਘਕਮ੍ਮਂ ਨ ਵਾ ਗਚ੍ਛੇਯ੍ਯਂ, ਅਥ ਖ੍ਵਾਹਂ ਵਿਸੁਦ੍ਧੋ ਪਰਮਾਯ ਵਿਸੁਦ੍ਧਿਯਾ’’ਤਿ? ‘‘ਏਵਂ, ਭਨ੍ਤੇ’’. ‘‘ਤੁਮ੍ਹੇ ਚੇ ਬ੍ਰਾਹ੍ਮਣਾ ਉਪੋਸਥਂ ਨ ਸਕ੍ਕਰਿਸ੍ਸਥ ਨ ਗਰੁਕਰਿਸ੍ਸਥ [ਨ ਗਰੁਂ ਕਰਿਸ੍ਸਥ (ਕ.)] ਨ ਮਾਨੇਸ੍ਸਥ ਨ ਪੂਜੇਸ੍ਸਥ, ਅਥ ਕੋ ਚਰਹਿ ਉਪੋਸਥਂ ਸਕ੍ਕਰਿਸ੍ਸਤਿ ਗਰੁਕਰਿਸ੍ਸਤਿ ਮਾਨੇਸ੍ਸਤਿ ਪੂਜੇਸ੍ਸਤਿ? ਗਚ੍ਛ ਤ੍ਵਂ, ਬ੍ਰਾਹ੍ਮਣ, ਉਪੋਸਥਂ, ਮਾ ਨੋ ਅਗਮਾਸਿ. ਗਚ੍ਛ ਤ੍ਵਂ ਸਙ੍ਘਕਮ੍ਮਂ, ਮਾ ਨੋ ਅਗਮਾਸੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਆਯਸ੍ਮਾ ਮਹਾਕਪ੍ਪਿਨੋ ਭਗਵਤੋ ਪਚ੍ਚਸ੍ਸੋਸਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਮਹਾਕਪ੍ਪਿਨਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ, ਏਵਮੇਵ – ਮਦ੍ਦਕੁਚ੍ਛਿਮ੍ਹਿ ਮਿਗਦਾਯੇ ਆਯਸ੍ਮਤੋ ਮਹਾਕਪ੍ਪਿਨਸ੍ਸ ਸਮ੍ਮੁਖੇ ਅਨ੍ਤਰਹਿਤੋ ਗਿਜ੍ਝਕੂਟੇ ਪਬ੍ਬਤੇ ਪਾਤੁਰਹੋਸਿ.

੭੧. ਸੀਮਾਨੁਜਾਨਨਾ

੧੩੮. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਏਤ੍ਤਾਵਤਾ ਸਾਮਗ੍ਗੀ ਯਾਵਤਾ ਏਕਾਵਾਸੋ’ਤਿ, ਕਿਤ੍ਤਾਵਤਾ ਨੁ ਖੋ ਏਕਾਵਾਸੋ ਹੋਤੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸੀਮਂ ਸਮ੍ਮਨ੍ਨਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ – ਪਠਮਂ ਨਿਮਿਤ੍ਤਾ ਕਿਤ੍ਤੇਤਬ੍ਬਾ – ਪਬ੍ਬਤਨਿਮਿਤ੍ਤਂ, ਪਾਸਾਣਨਿਮਿਤ੍ਤਂ, ਵਨਨਿਮਿਤ੍ਤਂ, ਰੁਕ੍ਖਨਿਮਿਤ੍ਤਂ, ਮਗ੍ਗਨਿਮਿਤ੍ਤਂ, ਵਮ੍ਮਿਕਨਿਮਿਤ੍ਤਂ, ਨਦੀਨਿਮਿਤ੍ਤਂ, ਉਦਕਨਿਮਿਤ੍ਤਂ. ਨਿਮਿਤ੍ਤੇ ਕਿਤ੍ਤੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੧੩੯. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਏਤੇਹਿ ਨਿਮਿਤ੍ਤੇਹਿ ਸੀਮਂ ਸਮ੍ਮਨ੍ਨੇਯ੍ਯ ਸਮਾਨਸਂਵਾਸਂ ਏਕੁਪੋਸਥਂ [ਏਕੂਪੋਸਥਂ (ਕ.)]. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ. ਸਙ੍ਘੋ ਏਤੇਹਿ ਨਿਮਿਤ੍ਤੇਹਿ ਸੀਮਂ ਸਮ੍ਮਨ੍ਨਤਿ ਸਮਾਨਸਂਵਾਸਂ ਏਕੁਪੋਸਥਂ. ਯਸ੍ਸਾਯਸ੍ਮਤੋ ਖਮਤਿ ਏਤੇਹਿ ਨਿਮਿਤ੍ਤੇਹਿ ਸੀਮਾਯ ਸਮ੍ਮੁਤਿ [ਸਮ੍ਮਤਿ (ਸ੍ਯਾ.)] ਸਮਾਨਸਂਵਾਸਾਯ ਏਕੁਪੋਸਥਾਯ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਸਮ੍ਮਤਾ ਸੀਮਾ ਸਙ੍ਘੇਨ ਏਤੇਹਿ ਨਿਮਿਤ੍ਤੇਹਿ ਸਮਾਨਸਂਵਾਸਾ ਏਕੁਪੋਸਥਾ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੧੪੦. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ – ਭਗਵਤਾ ਸੀਮਾਸਮ੍ਮੁਤਿ ਅਨੁਞ੍ਞਾਤਾਤਿ – ਅਤਿਮਹਤਿਯੋ ਸੀਮਾਯੋ ਸਮ੍ਮਨ੍ਨਨ੍ਤਿ, ਚਤੁਯੋਜਨਿਕਾਪਿ ਪਞ੍ਚਯੋਜਨਿਕਾਪਿ ਛਯੋਜਨਿਕਾਪਿ. ਭਿਕ੍ਖੂ ਉਪੋਸਥਂ ਆਗਚ੍ਛਨ੍ਤਾ ਉਦ੍ਦਿਸ੍ਸਮਾਨੇਪਿ ਪਾਤਿਮੋਕ੍ਖੇ ਆਗਚ੍ਛਨ੍ਤਿ, ਉਦ੍ਦਿਟ੍ਠਮਤ੍ਤੇਪਿ ਆਗਚ੍ਛਨ੍ਤਿ, ਅਨ੍ਤਰਾਪਿ ਪਰਿਵਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਤਿਮਹਤੀ ਸੀਮਾ ਸਮ੍ਮਨ੍ਨਿਤਬ੍ਬਾ, ਚਤੁਯੋਜਨਿਕਾ ਵਾ ਪਞ੍ਚਯੋਜਨਿਕਾ ਵਾ ਛਯੋਜਨਿਕਾ ਵਾ. ਯੋ ਸਮ੍ਮਨ੍ਨੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਿਯੋਜਨਪਰਮਂ ਸੀਮਂ ਸਮ੍ਮਨ੍ਨਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਨਦੀਪਾਰਸੀਮਂ [ਨਦੀਪਾਰਂ ਸੀਮਂ (ਸੀ. ਸ੍ਯਾ.)] ਸਮ੍ਮਨ੍ਨਨ੍ਤਿ. ਉਪੋਸਥਂ ਆਗਚ੍ਛਨ੍ਤਾ ਭਿਕ੍ਖੂਪਿ ਵੁਯ੍ਹਨ੍ਤਿ, ਪਤ੍ਤਾਪਿ ਵੁਯ੍ਹਨ੍ਤਿ, ਚੀਵਰਾਨਿਪਿ ਵੁਯ੍ਹਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਨਦੀਪਾਰਸੀਮਾ ਸਮ੍ਮਨ੍ਨਿਤਬ੍ਬਾ. ਯੋ ਸਮ੍ਮਨ੍ਨੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਯਤ੍ਥਸ੍ਸ ਧੁਵਨਾਵਾ ਵਾ ਧੁਵਸੇਤੁ ਵਾ, ਏਵਰੂਪਂ ਨਦੀਪਾਰਸੀਮਂ ਸਮ੍ਮਨ੍ਨਿਤੁਨ੍ਤਿ.

੭੨. ਉਪੋਸਥਾਗਾਰਕਥਾ

੧੪੧. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਨੁਪਰਿਵੇਣਿਯਂ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ ਅਸਙ੍ਕੇਤੇਨ. ਆਗਨ੍ਤੁਕਾ ਭਿਕ੍ਖੂ ਨ ਜਾਨਨ੍ਤਿ – ‘‘ਕਤ੍ਥ ਵਾ ਅਜ੍ਜੁਪੋਸਥੋ ਕਰੀਯਿਸ੍ਸਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਨੁਪਰਿਵੇਣਿਯਂ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ ਅਸਙ੍ਕੇਤੇਨ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਉਪੋਸਥਾਗਾਰਂ ਸਮ੍ਮਨ੍ਨਿਤ੍ਵਾ ਉਪੋਸਥਂ ਕਾਤੁਂ, ਯਂ ਸਙ੍ਘੋ ਆਕਙ੍ਖਤਿ ਵਿਹਾਰਂ ਵਾ ਅਡ੍ਢਯੋਗਂ ਵਾ ਪਾਸਾਦਂ ਵਾ ਹਮ੍ਮਿਯਂ ਵਾ ਗੁਹਂ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਂ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਉਪੋਸਥਾਗਾਰਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਉਪੋਸਥਾਗਾਰਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਵਿਹਾਰਸ੍ਸ ਉਪੋਸਥਾਗਾਰਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਵਿਹਾਰੋ ਉਪੋਸਥਾਗਾਰਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਦ੍ਵੇ ਉਪੋਸਥਾਗਾਰਾਨਿ ਸਮ੍ਮਤਾਨਿ ਹੋਨ੍ਤਿ. ਭਿਕ੍ਖੂ ਉਭਯਤ੍ਥ ਸਨ੍ਨਿਪਤਨ੍ਤਿ – ‘‘ਇਧ ਉਪੋਸਥੋ ਕਰੀਯਿਸ੍ਸਤਿ, ਇਧ ਉਪੋਸਥੋ ਕਰੀਯਿਸ੍ਸਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਏਕਸ੍ਮਿਂ ਆਵਾਸੇ ਦ੍ਵੇ ਉਪੋਸਥਾਗਾਰਾਨਿ ਸਮ੍ਮਨ੍ਨਿਤਬ੍ਬਾਨਿ. ਯੋ ਸਮ੍ਮਨ੍ਨੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਏਕਂ ਸਮੂਹਨਿਤ੍ਵਾ [ਸਮੁਹਨਿਤ੍ਵਾ (ਕ.)] ਏਕਤ੍ਥ ਉਪੋਸਥਂ ਕਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮੂਹਨ੍ਤਬ੍ਬਂ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਉਪੋਸਥਾਗਾਰਂ ਸਮੂਹਨੇਯ੍ਯ [ਸਮੁਹਨੇਯ੍ਯ (ਕ.)]. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਉਪੋਸਥਾਗਾਰਂ ਸਮੂਹਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਉਪੋਸਥਾਗਾਰਸ੍ਸ ਸਮੁਗ੍ਘਾਤੋ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਸਮੂਹਤਂ ਸਙ੍ਘੇਨ ਇਤ੍ਥਨ੍ਨਾਮਂ ਉਪੋਸਥਾਗਾਰਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੭੩. ਉਪੋਸਥਪ੍ਪਮੁਖਾਨੁਜਾਨਨਾ

੧੪੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਅਤਿਖੁਦ੍ਦਕਂ ਉਪੋਸਥਾਗਾਰਂ ਸਮ੍ਮਤਂ ਹੋਤਿ, ਤਦਹੁਪੋਸਥੇ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ ਹੋਤਿ. ਭਿਕ੍ਖੂ ਅਸਮ੍ਮਤਾਯ ਭੂਮਿਯਾ ਨਿਸਿਨ੍ਨਾ ਪਾਤਿਮੋਕ੍ਖਂ ਅਸ੍ਸੋਸੁਂ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ ‘‘ਭਗਵਤਾ ਪਞ੍ਞਤ੍ਤਂ ‘ਉਪੋਸਥਾਗਾਰਂ ਸਮ੍ਮਨ੍ਨਿਤ੍ਵਾ ਉਪੋਸਥੋ ਕਾਤਬ੍ਬੋ’ਤਿ, ਮਯਞ੍ਚਮ੍ਹਾ ਅਸਮ੍ਮਤਾਯ ਭੂਮਿਯਾ ਨਿਸਿਨ੍ਨੋ ਪਾਤਿਮੋਕ੍ਖਂ ਅਸ੍ਸੁਮ੍ਹਾ, ਕਤੋ ਨੁ ਖੋ ਅਮ੍ਹਾਕਂ ਉਪੋਸਥੋ, ਅਕਤੋ ਨੁ ਖੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਸਮ੍ਮਤਾਯ ਵਾ, ਭਿਕ੍ਖਵੇ, ਭੂਮਿਯਾ ਨਿਸਿਨ੍ਨਾ ਅਸਮ੍ਮਤਾਯ ਵਾ ਯਤੋ ਪਾਤਿਮੋਕ੍ਖਂ ਸੁਣਾਤਿ, ਕਤੋਵਸ੍ਸ ਉਪੋਸਥੋ. ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਯਾਵ ਮਹਨ੍ਤਂ ਉਪੋਸਥਪ੍ਪਮੁਖਂ [ਉਪੋਸਥਮੁਖਂ (ਸ੍ਯਾ.)] ਆਕਙ੍ਖਤਿ, ਤਾਵ ਮਹਨ੍ਤਂ ਉਪੋਸਥਪ੍ਪਮੁਖਂ ਸਮ੍ਮਨ੍ਨਤੁ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਂ. ਪਠਮਂ ਨਿਮਿਤ੍ਤਾ ਕਿਤ੍ਤੇਤਬ੍ਬਾ. ਨਿਮਿਤ੍ਤੇ ਕਿਤ੍ਤੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਏਤੇਹਿ ਨਿਮਿਤ੍ਤੇਹਿ ਉਪੋਸਥਪ੍ਪਮੁਖਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ. ਸਙ੍ਘੋ ਏਤੇਹਿ ਨਿਮਿਤ੍ਤੇਹਿ ਉਪੋਸਥਪ੍ਪਮੁਖਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਏਤੇਹਿ ਨਿਮਿਤ੍ਤੇਹਿ ਉਪੋਸਥਪ੍ਪਮੁਖਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਸਮ੍ਮਤਂ ਸਙ੍ਘੇਨ ਏਤੇਹਿ ਨਿਮਿਤ੍ਤੇਹਿ ਉਪੋਸਥਪ੍ਪਮੁਖਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਨਵਕਾ ਭਿਕ੍ਖੂ ਪਠਮਤਰਂ ਸਨ੍ਨਿਪਤਿਤ੍ਵਾ – ‘‘ਨ ਤਾਵ ਥੇਰਾ ਆਗਚ੍ਛਨ੍ਤੀ’’ਤਿ – ਪਕ੍ਕਮਿਂਸੁ. ਉਪੋਸਥੋ ਵਿਕਾਲੇ ਅਹੋਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਦਹੁਪੋਸਥੇ ਥੇਰੇਹਿ ਭਿਕ੍ਖੂਹਿ ਪਠਮਤਰਂ ਸਨ੍ਨਿਪਤਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਰਾਜਗਹੇ ਸਮ੍ਬਹੁਲਾ ਆਵਾਸਾ ਸਮਾਨਸੀਮਾ ਹੋਨ੍ਤਿ. ਤਤ੍ਥ ਭਿਕ੍ਖੂ ਵਿਵਦਨ੍ਤਿ – ‘‘ਅਮ੍ਹਾਕਂ ਆਵਾਸੇ ਉਪੋਸਥੋ ਕਰੀਯਤੁ, ਅਮ੍ਹਾਕਂ ਆਵਾਸੇ ਉਪੋਸਥੋ ਕਰੀਯਤੂ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਇਧ ਪਨ, ਭਿਕ੍ਖਵੇ, ਸਮ੍ਬਹੁਲਾ ਆਵਾਸਾ ਸਮਾਨਸੀਮਾ ਹੋਨ੍ਤਿ. ਤਤ੍ਥ ਭਿਕ੍ਖੂ ਵਿਵਦਨ੍ਤਿ – ‘‘ਅਮ੍ਹਾਕਂ ਆਵਾਸੇ ਉਪੋਸਥੋ ਕਰੀਯਤੁ, ਅਮ੍ਹਾਕਂ ਆਵਾਸੇ ਉਪੋਸਥੋ ਕਰੀਯਤੂ’’ਤਿ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤ੍ਵਾ ਉਪੋਸਥੋ ਕਾਤਬ੍ਬੋ. ਯਤ੍ਥ ਵਾ ਪਨ ਥੇਰੋ ਭਿਕ੍ਖੁ ਵਿਹਰਤਿ, ਤਤ੍ਥ ਸਨ੍ਨਿਪਤਿਤ੍ਵਾ ਉਪੋਸਥੋ ਕਾਤਬ੍ਬੋ, ਨ ਤ੍ਵੇਵ ਵਗ੍ਗੇਨ ਸਙ੍ਘੇਨ ਉਪੋਸਥੋ ਕਾਤਬ੍ਬੋ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੭੪. ਅਵਿਪ੍ਪਵਾਸਸੀਮਾਨੁਜਾਨਨਾ

੧੪੩. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਮਹਾਕਸ੍ਸਪੋ ਅਨ੍ਧਕਵਿਨ੍ਦਾ ਰਾਜਗਹਂ ਉਪੋਸਥਂ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਨਦਿਂ ਤਰਨ੍ਤੋ ਮਨਂ ਵੂਲ਼੍ਹੋ ਅਹੋਸਿ, ਚੀਵਰਾਨਿਸ੍ਸ [ਤੇਨ ਚੀਵਰਾਨਿਸ੍ਸ (ਕ.)] ਅਲ੍ਲਾਨਿ. ਭਿਕ੍ਖੂ ਆਯਸ੍ਮਨ੍ਤਂ ਮਹਾਕਸ੍ਸਪਂ ਏਤਦਵੋਚੁਂ – ‘‘ਕਿਸ੍ਸ ਤੇ, ਆਵੁਸੋ, ਚੀਵਰਾਨਿ ਅਲ੍ਲਾਨੀ’’ਤਿ? ‘‘ਇਧਾਹਂ, ਆਵੁਸੋ, ਅਨ੍ਧਕਵਿਨ੍ਦਾ ਰਾਜਗਹਂ ਉਪੋਸਥਂ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਨਦਿਂ ਤਰਨ੍ਤੋ ਮਨਮ੍ਹਿ ਵੂਲ਼੍ਹੋ. ਤੇਨ ਮੇ ਚੀਵਰਾਨਿ ਅਲ੍ਲਾਨੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਯਾ ਸਾ, ਭਿਕ੍ਖਵੇ, ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੁਪੋਸਥਾ, ਸਙ੍ਘੋ ਤਂ ਸੀਮਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮ੍ਮਨ੍ਨਤੁ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੁਪੋਸਥਾ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ ਸਙ੍ਘੋ ਤਂ ਸੀਮਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੁਪੋਸਥਾ, ਸਙ੍ਘੋ ਤਂ ਸੀਮਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਏਤਿਸ੍ਸਾ ਸੀਮਾਯ ਤਿਚੀਵਰੇਨ ਅਵਿਪ੍ਪਵਾਸਾਯ [ਅਵਿਪ੍ਪਵਾਸਸ੍ਸ (ਸ੍ਯਾ.)] ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਸਮ੍ਮਤਾ ਸਾ ਸੀਮਾ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸਾ [ਅਵਿਪ੍ਪਵਾਸੋ (ਸ੍ਯਾ.)]. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਗਵਤਾ ਤਿਚੀਵਰੇਨ ਅਵਿਪ੍ਪਵਾਸਸਮ੍ਮੁਤਿ ਅਨੁਞ੍ਞਾਤਾਤਿ ਅਨ੍ਤਰਘਰੇ ਚੀਵਰਾਨਿ ਨਿਕ੍ਖਿਪਨ੍ਤਿ. ਤਾਨਿ ਚੀਵਰਾਨਿ ਨਸ੍ਸਨ੍ਤਿਪਿ ਡਯ੍ਹਨ੍ਤਿਪਿ ਉਨ੍ਦੂਰੇਹਿਪਿ ਖਜ੍ਜਨ੍ਤਿ. ਭਿਕ੍ਖੂ ਦੁਚ੍ਚੋਲ਼ਾ ਹੋਨ੍ਤਿ ਲੂਖਚੀਵਰਾ. ਭਿਕ੍ਖੂ ਏਵਮਾਹਂਸੁ – ‘‘ਕਿਸ੍ਸ ਤੁਮ੍ਹੇ, ਆਵੁਸੋ, ਦੁਚ੍ਚੋਲ਼ਾ ਲੂਖਚੀਵਰਾ’’ਤਿ? ‘‘ਇਧ ਮਯਂ, ਆਵੁਸੋ, ਭਗਵਤਾ ਤਿਚੀਵਰੇਨ ਅਵਿਪ੍ਪਵਾਸਸਮ੍ਮੁਤਿ ਅਨੁਞ੍ਞਾਤਾਤਿ ਅਨ੍ਤਰਘਰੇ ਚੀਵਰਾਨਿ ਨਿਕ੍ਖਿਪਿਮ੍ਹਾ. ਤਾਨਿ ਚੀਵਰਾਨਿ ਨਟ੍ਠਾਨਿਪਿ ਦਡ੍ਢਾਨਿਪਿ, ਉਨ੍ਦੂਰੇਹਿਪਿ ਖਾਯਿਤਾਨਿ, ਤੇਨ ਮਯਂ ਦੁਚ੍ਚੋਲ਼ਾ ਲੂਖਚੀਵਰਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਯਾ ਸਾ, ਭਿਕ੍ਖਵੇ, ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੁਪੋਸਥਾ, ਸਙ੍ਘੋ ਤਂ ਸੀਮਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮ੍ਮਨ੍ਨਤੁ, ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੧੪੪. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੁਪੋਸਥਾ ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਤਂ ਸੀਮਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮ੍ਮਨ੍ਨੇਯ੍ਯ, ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੁਪੋਸਥਾ, ਸਙ੍ਘੋ ਤਂ ਸੀਮਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮ੍ਮਨ੍ਨਤਿ, ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ. ਯਸ੍ਸਾਯਸ੍ਮਤੋ ਖਮਤਿ ਏਤਿਸ੍ਸਾ ਸੀਮਾਯ ਤਿਚੀਵਰੇਨ ਅਵਿਪ੍ਪਵਾਸਾਯ [ਅਵਿਪ੍ਪਵਾਸਸ੍ਸ (ਸ੍ਯਾ.)] ਸਮ੍ਮੁਤਿ, ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਸਮ੍ਮਤਾ ਸਾ ਸੀਮਾ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸਾ [ਅਵਿਪ੍ਪਵਾਸੋ (ਸ੍ਯਾ.)], ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੭੫. ਸੀਮਾਸਮੂਹਨਨ

‘‘ਸੀਮਂ, ਭਿਕ੍ਖਵੇ, ਸਮ੍ਮਨ੍ਨਨ੍ਤੇਨ ਪਠਮਂ ਸਮਾਨਸਂਵਾਸਸੀਮਾ [ਸਮਾਨਸਂਵਾਸਾ ਸੀਮਾ (ਸ੍ਯਾ.)] ਸਮ੍ਮਨ੍ਨਿਤਬ੍ਬਾ, ਪਚ੍ਛਾ ਤਿਚੀਵਰੇਨ ਅਵਿਪ੍ਪਵਾਸੋ ਸਮ੍ਮਨ੍ਨਿਤਬ੍ਬੋ. ਸੀਮਂ, ਭਿਕ੍ਖਵੇ, ਸਮੂਹਨਨ੍ਤੇਨ ਪਠਮਂ ਤਿਚੀਵਰੇਨ ਅਵਿਪ੍ਪਵਾਸੋ ਸਮੂਹਨ੍ਤਬ੍ਬੋ, ਪਚ੍ਛਾ ਸਮਾਨਸਂਵਾਸਸੀਮਾ ਸਮੂਹਨ੍ਤਬ੍ਬਾ. ਏਵਞ੍ਚ ਪਨ, ਭਿਕ੍ਖਵੇ, ਤਿਚੀਵਰੇਨ ਅਵਿਪ੍ਪਵਾਸੋ ਸਮੂਹਨ੍ਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੧੪੫. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯੋ ਸੋ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸੋ ਸਮ੍ਮਤੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਤਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮੂਹਨੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯੋ ਸੋ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸੋ ਸਮ੍ਮਤੋ, ਸਙ੍ਘੋ ਤਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮੂਹਨਤਿ. ਯਸ੍ਸਾਯਸ੍ਮਤੋ ਖਮਤਿ ਏਤਸ੍ਸ ਤਿਚੀਵਰੇਨ ਅਵਿਪ੍ਪਵਾਸਸ੍ਸ ਸਮੁਗ੍ਘਾਤੋ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਸਮੂਹਤੋ ਸੋ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਏਵਞ੍ਚ ਪਨ, ਭਿਕ੍ਖਵੇ, ਸੀਮਾ [ਸਮਾਨਸਂਵਾਸਾ ਸੀਮਾ (ਸ੍ਯਾ.)]. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੧੪੬. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੁਪੋਸਥਾ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਤਂ ਸੀਮਂ ਸਮੂਹਨੇਯ੍ਯ ਸਮਾਨਸਂਵਾਸਂ ਏਕੁਪੋਸਥਂ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੁਪੋਸਥਾ, ਸਙ੍ਘੋ ਤਂ ਸੀਮਂ ਸਮੂਹਨਤਿ ਸਮਾਨਸਂਵਾਸਂ ਏਕੁਪੋਸਥਂ. ਯਸ੍ਸਾਯਸ੍ਮਤੋ ਖਮਤਿ ਏਤਿਸ੍ਸਾ ਸੀਮਾਯ ਸਮਾਨਸਂਵਾਸਾਯ ਏਕੁਪੋਸਥਾਯ ਸਮੁਗ੍ਘਾਤੋ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਸਮੂਹਤਾ ਸਾ ਸੀਮਾ ਸਙ੍ਘੇਨ ਸਮਾਨਸਂਵਾਸਾ ਏਕੁਪੋਸਥਾ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੭੬. ਗਾਮਸੀਮਾਦਿ

੧੪੭. ਅਸਮ੍ਮਤਾਯ, ਭਿਕ੍ਖਵੇ, ਸੀਮਾਯ ਅਟ੍ਠਪਿਤਾਯ, ਯਂ ਗਾਮਂ ਵਾ ਨਿਗਮਂ ਵਾ ਉਪਨਿਸ੍ਸਾਯ ਵਿਹਰਤਿ, ਯਾ ਤਸ੍ਸ ਵਾ ਗਾਮਸ੍ਸ ਗਾਮਸੀਮਾ, ਨਿਗਮਸ੍ਸ ਵਾ ਨਿਗਮਸੀਮਾ, ਅਯਂ ਤਤ੍ਥ ਸਮਾਨਸਂਵਾਸਾ ਏਕੁਪੋਸਥਾ. ਅਗਾਮਕੇ ਚੇ, ਭਿਕ੍ਖਵੇ, ਅਰਞ੍ਞੇ ਸਮਨ੍ਤਾ ਸਤ੍ਤਬ੍ਭਨ੍ਤਰਾ, ਅਯਂ ਤਤ੍ਥ ਸਮਾਨਸਂਵਾਸਾ ਏਕੁਪੋਸਥਾ. ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ; ਸਬ੍ਬੋ ਸਮੁਦ੍ਦੋ ਅਸੀਮੋ; ਸਬ੍ਬੋ ਜਾਤਸ੍ਸਰੋ ਅਸੀਮੋ. ਨਦਿਯਾ ਵਾ, ਭਿਕ੍ਖਵੇ, ਸਮੁਦ੍ਦੇ ਵਾ ਜਾਤਸ੍ਸਰੇ ਵਾ ਯਂ ਮਜ੍ਝਿਮਸ੍ਸ ਪੁਰਿਸਸ੍ਸ ਸਮਨ੍ਤਾ ਉਦਕੁਕ੍ਖੇਪਾ, ਅਯਂ ਤਤ੍ਥ ਸਮਾਨਸਂਵਾਸਾ ਏਕੁਪੋਸਥਾਤਿ.

੧੪੮. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਯੇਸਂ, ਭਿਕ੍ਖਵੇ, ਸੀਮਾ ਪਠਮਂ ਸਮ੍ਮਤਾ ਤੇਸਂ ਤਂ ਕਮ੍ਮਂ ਧਮ੍ਮਿਕਂ ਅਕੁਪ੍ਪਂ ਠਾਨਾਰਹਂ. ਯੇਸਂ, ਭਿਕ੍ਖਵੇ, ਸੀਮਾ ਪਚ੍ਛਾ ਸਮ੍ਮਤਾ ਤੇਸਂ ਤਂ ਕਮ੍ਮਂ ਅਧਮ੍ਮਿਕਂ ਕੁਪ੍ਪਂ ਅਟ੍ਠਾਨਾਰਹਂ. ਨ, ਭਿਕ੍ਖਵੇ, ਸੀਮਾਯ ਸੀਮਾ ਸਮ੍ਭਿਨ੍ਦਿਤਬ੍ਬਾ. ਯੋ ਸਮ੍ਭਿਨ੍ਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸੀਮਾਯ ਸੀਮਂ ਅਜ੍ਝੋਤ੍ਥਰਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਯੇਸਂ, ਭਿਕ੍ਖਵੇ, ਸੀਮਾ ਪਠਮਂ ਸਮ੍ਮਤਾ ਤੇਸਂ ਤਂ ਕਮ੍ਮਂ ਧਮ੍ਮਿਕਂ ਅਕੁਪ੍ਪਂ ਠਾਨਾਰਹਂ. ਯੇਸਂ, ਭਿਕ੍ਖਵੇ, ਸੀਮਾ ਪਚ੍ਛਾ ਸਮ੍ਮਤਾ ਤੇਸਂ ਤਂ ਕਮ੍ਮਂ ਅਧਮ੍ਮਿਕਂ ਕੁਪ੍ਪਂ ਅਟ੍ਠਾਨਾਰਹਂ. ਨ, ਭਿਕ੍ਖਵੇ, ਸੀਮਾਯ ਸੀਮਾ ਅਜ੍ਝੋਤ੍ਥਰਿਤਬ੍ਬਾ. ਯੋ ਅਜ੍ਝੋਤ੍ਥਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ. ਅਨੁਜਾਨਾਮਿ, ਭਿਕ੍ਖਵੇ, ਸੀਮਂ ਸਮ੍ਮਨ੍ਨਨ੍ਤੇਨ ਸੀਮਨ੍ਤਰਿਕਂ ਠਪੇਤ੍ਵਾ ਸੀਮਂ ਸਮ੍ਮਨ੍ਨਿਤੁਨ੍ਤਿ.

੭੭. ਉਪੋਸਥਭੇਦਾਦਿ

੧੪੯. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਤਿ ਨੁ ਖੋ ਉਪੋਸਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਦ੍ਵੇਮੇ, ਭਿਕ੍ਖਵੇ, ਉਪੋਸਥਾ – ਚਾਤੁਦ੍ਦਸਿਕੋ ਚ ਪਨ੍ਨਰਸਿਕੋ ਚ. ਇਮੇ ਖੋ, ਭਿਕ੍ਖਵੇ, ਦ੍ਵੇ ਉਪੋਸਥਾਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਤਿ ਨੁ ਖੋ ਉਪੋਸਥਕਮ੍ਮਾਨੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਚਤ੍ਤਾਰਿਮਾਨਿ, ਭਿਕ੍ਖਵੇ, ਉਪੋਸਥਕਮ੍ਮਾਨਿ – ਅਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ, ਅਧਮ੍ਮੇਨ ਸਮਗ੍ਗਂ ਉਪੋਸਥਕਮ੍ਮਂ, ਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ, ਧਮ੍ਮੇਨ ਸਮਗ੍ਗਂ ਉਪੋਸਥਕਮ੍ਮਨ੍ਤਿ. ਤਤ੍ਰ, ਭਿਕ੍ਖਵੇ, ਯਦਿਦਂ ਅਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ, ਨ, ਭਿਕ੍ਖਵੇ, ਏਵਰੂਪਂ ਉਪੋਸਥਕਮ੍ਮਂ, ਕਾਤਬ੍ਬਂ. ਨ ਚ ਮਯਾ ਏਵਰੂਪਂ ਉਪੋਸਥਕਮ੍ਮਂ ਅਨੁਞ੍ਞਾਤਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਅਧਮ੍ਮੇਨ ਸਮਗ੍ਗਂ ਉਪੋਸਥਕਮ੍ਮਂ, ਨ, ਭਿਕ੍ਖਵੇ, ਏਵਰੂਪਂ ਉਪੋਸਥਕਮ੍ਮਂ ਕਾਤਬ੍ਬਂ. ਨ ਚ ਮਯਾ ਏਵਰੂਪਂ ਉਪੋਸਥਕਮ੍ਮਂ ਅਨੁਞ੍ਞਾਤਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ, ਨ, ਭਿਕ੍ਖਵੇ, ਏਵਰੂਪਂ ਉਪੋਸਥਕਮ੍ਮਂ ਕਾਤਬ੍ਬਂ. ਨ ਚ ਮਯਾ ਏਵਰੂਪਂ ਉਪੋਸਥਕਮ੍ਮਂ ਅਨੁਞ੍ਞਾਤਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਧਮ੍ਮੇਨ ਸਮਗ੍ਗਂ ਉਪੋਸਥਕਮ੍ਮਂ, ਏਵਰੂਪਂ, ਭਿਕ੍ਖਵੇ, ਉਪੋਸਥਕਮ੍ਮਂ ਕਾਤਬ੍ਬਂ, ਏਵਰੂਪਞ੍ਚ ਮਯਾ ਉਪੋਸਥਕਮ੍ਮਂ ਅਨੁਞ੍ਞਾਤਂ. ਤਸ੍ਮਾਤਿਹ, ਭਿਕ੍ਖਵੇ, ਏਵਰੂਪਂ ਉਪੋਸਥਕਮ੍ਮਂ ਕਰਿਸ੍ਸਾਮ ਯਦਿਦਂ ਧਮ੍ਮੇਨ ਸਮਗ੍ਗਨ੍ਤਿ – ਏਵਞ੍ਹਿ ਵੋ, ਭਿਕ੍ਖਵੇ, ਸਿਕ੍ਖਿਤਬ੍ਬਨ੍ਤਿ.

੭੮. ਸਂਖਿਤ੍ਤੇਨ ਪਾਤਿਮੋਕ੍ਖੁਦ੍ਦੇਸਾਦਿ

੧੫੦. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਤਿ ਨੁ ਖੋ ਪਾਤਿਮੋਕ੍ਖੁਦ੍ਦੇਸਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਪਞ੍ਚਿਮੇ, ਭਿਕ੍ਖਵੇ, ਪਾਤਿਮੋਕ੍ਖੁਦ੍ਦੇਸਾ – ਨਿਦਾਨਂ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ. ਅਯਂ ਪਠਮੋ ਪਾਤਿਮੋਕ੍ਖੁਦ੍ਦੇਸੋ. ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ. ਅਯਂ ਦੁਤਿਯੋ ਪਾਤਿਮੋਕ੍ਖੁਦ੍ਦੇਸੋ. ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਤੇਰਸ ਸਙ੍ਘਾਦਿਸੇਸੇ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ. ਅਯਂ ਤਤਿਯੋ ਪਾਤਿਮੋਕ੍ਖੁਦ੍ਦੇਸੋ. ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਤੇਰਸ ਸਙ੍ਘਾਦਿਸੇਸੇ ਉਦ੍ਦਿਸਿਤ੍ਵਾ ਦ੍ਵੇ ਅਨਿਯਤੇ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ. ਅਯਂ ਚਤੁਤ੍ਥੋ ਪਾਤਿਮੋਕ੍ਖੁਦ੍ਦੇਸੋ. ਵਿਤ੍ਥਾਰੇਨੇਵ ਪਞ੍ਚਮੋ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਪਾਤਿਮੋਕ੍ਖੁਦ੍ਦੇਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ – ਭਗਵਤਾ ਸਂਖਿਤ੍ਤੇਨ ਪਾਤਿਮੋਕ੍ਖੁਦ੍ਦੇਸੋ ਅਨੁਞ੍ਞਾਤੋਤਿ – ਸਬ੍ਬਕਾਲਂ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਵਰਭਯਂ [ਸਂਚਰਭਯਂ (ਸ੍ਯਾ.)] ਅਹੋਸਿ. ਭਿਕ੍ਖੂ ਨਾਸਕ੍ਖਿਂਸੁ ਵਿਤ੍ਥਾਰੇਨ ਪਾਤਿਮੋਕ੍ਖਂ ਉਦ੍ਦਿਸਿਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਤਿ ਅਨ੍ਤਰਾਯੇ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਅਸਤਿਪਿ ਅਨ੍ਤਰਾਯੇ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਸਤਿ ਅਨ੍ਤਰਾਯੇ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਤਿ ਅਨ੍ਤਰਾਯੇ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤੁਂ. ਤਤ੍ਰਿਮੇ ਅਨ੍ਤਰਾਯਾ – ਰਾਜਨ੍ਤਰਾਯੋ, ਚੋਰਨ੍ਤਰਾਯੋ, ਅਗ੍ਯਨ੍ਤਰਾਯੋ, ਉਦਕਨ੍ਤਰਾਯੋ, ਮਨੁਸ੍ਸਨ੍ਤਰਾਯੋ, ਅਮਨੁਸ੍ਸਨ੍ਤਰਾਯੋ, ਵਾਲ਼ਨ੍ਤਰਾਯੋ, ਸਰੀਸਪਨ੍ਤਰਾਯੋ, ਜੀਵਿਤਨ੍ਤਰਾਯੋ, ਬ੍ਰਹ੍ਮਚਰਿਯਨ੍ਤਰਾਯੋਤਿ. ਅਨੁਜਾਨਾਮਿ, ਭਿਕ੍ਖਵੇ, ਏਵਰੂਪੇਸੁ ਅਨ੍ਤਰਾਯੇਸੁ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤੁਂ, ਅਸਤਿ ਅਨ੍ਤਰਾਯੇ ਵਿਤ੍ਥਾਰੇਨਾਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਙ੍ਘਮਜ੍ਝੇ ਅਨਜ੍ਝਿਟ੍ਠਾ ਧਮ੍ਮਂ ਭਾਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਙ੍ਘਮਜ੍ਝੇ ਅਨਜ੍ਝਿਟ੍ਠੇਨ ਧਮ੍ਮੋ ਭਾਸਿਤਬ੍ਬੋ. ਯੋ ਭਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਸਾਮਂ ਵਾ ਧਮ੍ਮਂ ਭਾਸਿਤੁਂ ਪਰਂ ਵਾ ਅਜ੍ਝੇਸਿਤੁਨ੍ਤਿ.

੭੯. ਵਿਨਯਪੁਚ੍ਛਨਕਥਾ

੧੫੧. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਙ੍ਘਮਜ੍ਝੇ ਅਸਮ੍ਮਤਾ ਵਿਨਯਂ ਪੁਚ੍ਛਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਙ੍ਘਮਜ੍ਝੇ ਅਸਮ੍ਮਤੇਨ ਵਿਨਯੋ ਪੁਚ੍ਛਿਤਬ੍ਬੋ. ਯੋ ਪੁਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਮਜ੍ਝੇ ਸਮ੍ਮਤੇਨ ਵਿਨਯਂ ਪੁਚ੍ਛਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ – ਅਤ੍ਤਨਾ ਵਾ [ਅਤ੍ਤਨਾਵ (ਸ੍ਯਾ.)] ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ, ਪਰੇਨ ਵਾ ਪਰੋ ਸਮ੍ਮਨ੍ਨਿਤਬ੍ਬੋ. ਕਥਞ੍ਚ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ? ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਵਿਨਯਂ ਪੁਚ੍ਛੇਯ੍ਯ’’ਨ੍ਤਿ. ਏਵਂ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ.

ਕਥਞ੍ਚ ਪਰੇਨ ਪਰੋ ਸਮ੍ਮਨ੍ਨਿਤਬ੍ਬੋ? ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਵਿਨਯਂ ਪੁਚ੍ਛੇਯ੍ਯਾ’’ਤਿ. ਏਵਂ ਪਰੇਨ ਪਰੋ ਸਮ੍ਮਨ੍ਨਿਤਬ੍ਬੋਤਿ.

ਤੇਨ ਖੋ ਪਨ ਸਮਯੇਨ ਪੇਸਲਾ ਭਿਕ੍ਖੂ ਸਙ੍ਘਮਜ੍ਝੇ ਸਮ੍ਮਤਾ ਵਿਨਯਂ ਪੁਚ੍ਛਨ੍ਤਿ. ਛਬ੍ਬਗ੍ਗਿਯਾ ਭਿਕ੍ਖੂ ਲਭਨ੍ਤਿ ਆਘਾਤਂ, ਲਭਨ੍ਤਿ ਅਪ੍ਪਚ੍ਚਯਂ, ਵਧੇਨ ਤਜ੍ਜੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਮਜ੍ਝੇ ਸਮ੍ਮਤੇਨਪਿ ਪਰਿਸਂ ਓਲੋਕੇਤ੍ਵਾ ਪੁਗ੍ਗਲਂ ਤੁਲਯਿਤ੍ਵਾ ਵਿਨਯਂ ਪੁਚ੍ਛਿਤੁਨ੍ਤਿ.

੮੦. ਵਿਨਯਵਿਸ੍ਸਜ੍ਜਨਕਥਾ

੧੫੨. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਙ੍ਘਮਜ੍ਝੇ ਅਸਮ੍ਮਤਾ ਵਿਨਯਂ ਵਿਸ੍ਸਜ੍ਜੇਨ੍ਤਿ [ਵਿਸ੍ਸਜ੍ਜਨ੍ਤਿ (ਕ.)]. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਙ੍ਘਮਜ੍ਝੇ ਅਸਮ੍ਮਤੇਨ ਵਿਨਯੋ ਵਿਸ੍ਸਜ੍ਜੇਤਬ੍ਬੋ. ਯੋ ਵਿਸ੍ਸਜ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਮਜ੍ਝੇ ਸਮ੍ਮਤੇਨ ਵਿਨਯਂ ਵਿਸ੍ਸਜ੍ਜੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਂ. ਅਤ੍ਤਨਾ ਵਾ [ਅਤ੍ਤਨਾਵ (ਸ੍ਯਾ.)] ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ, ਪਰੇਨ ਵਾ ਪਰੋ ਸਮ੍ਮਨ੍ਨਿਤਬ੍ਬੋ. ਕਥਞ੍ਚ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ? ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮੇਨ ਵਿਨਯਂ ਪੁਟ੍ਠੋ ਵਿਸ੍ਸਜ੍ਜੇਯ੍ਯ’’ਨ੍ਤਿ. ਏਵਂ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ.

ਕਥਞ੍ਚ ਪਰੇਨ ਪਰੋ ਸਮ੍ਮਨ੍ਨਿਤਬ੍ਬੋ? ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮੇਨ ਵਿਨਯਂ ਪੁਟ੍ਠੋ ਵਿਸ੍ਸਜ੍ਜੇਯ੍ਯਾ’’ਤਿ. ਏਵਂ ਪਰੇਨ ਪਰੋ ਸਮ੍ਮਨ੍ਨਿਤਬ੍ਬੋਤਿ.

ਤੇਨ ਖੋ ਪਨ ਸਮਯੇਨ ਪੇਸਲਾ ਭਿਕ੍ਖੂ ਸਙ੍ਘਮਜ੍ਝੇ ਸਮ੍ਮਤਾ ਵਿਨਯਂ ਵਿਸ੍ਸਜ੍ਜੇਨ੍ਤਿ. ਛਬ੍ਬਗ੍ਗਿਯਾ ਭਿਕ੍ਖੂ ਲਭਨ੍ਤਿ ਆਘਾਤਂ, ਲਭਨ੍ਤਿ ਅਪ੍ਪਚ੍ਚਯਂ, ਵਧੇਨ ਤਜ੍ਜੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਮਜ੍ਝੇ ਸਮ੍ਮਤੇਨਪਿ ਪਰਿਸਂ ਓਲੋਕੇਤ੍ਵਾ ਪੁਗ੍ਗਲਂ ਤੁਲਯਿਤ੍ਵਾ ਵਿਨਯਂ ਵਿਸ੍ਸਜ੍ਜੇਤੁਨ੍ਤਿ.

੮੧. ਚੋਦਨਾਕਥਾ

੧੫੩. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਅਨੋਕਾਸਕਤਂ ਭਿਕ੍ਖੁਂ ਆਪਤ੍ਤਿਯਾ ਚੋਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਨੋਕਾਸਕਤੋ ਭਿਕ੍ਖੁ ਆਪਤ੍ਤਿਯਾ ਚੋਦੇਤਬ੍ਬੋ. ਯੋ ਚੋਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਓਕਾਸਂ ਕਾਰਾਪੇਤ੍ਵਾ ਆਪਤ੍ਤਿਯਾ ਚੋਦੇਤੁਂ – ਕਰੋਤੁ ਆਯਸ੍ਮਾ ਓਕਾਸਂ, ਅਹਂ ਤਂ ਵਤ੍ਤੁਕਾਮੋਤਿ.

ਤੇਨ ਖੋ ਪਨ ਸਮਯੇਨ ਪੇਸਲਾ ਭਿਕ੍ਖੂ ਛਬ੍ਬਗ੍ਗਿਯੇ ਭਿਕ੍ਖੂ ਓਕਾਸਂ ਕਾਰਾਪੇਤ੍ਵਾ ਆਪਤ੍ਤਿਯਾ ਚੋਦੇਨ੍ਤਿ. ਛਬ੍ਬਗ੍ਗਿਯਾ ਭਿਕ੍ਖੂ ਲਭਨ੍ਤਿ ਆਘਾਤਂ, ਲਭਨ੍ਤਿ ਅਪ੍ਪਚ੍ਚਯਂ, ਵਧੇਨ ਤਜ੍ਜੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਤੇਪਿ ਓਕਾਸੇ ਪੁਗ੍ਗਲਂ ਤੁਲਯਿਤ੍ਵਾ ਆਪਤ੍ਤਿਯਾ ਚੋਦੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ – ਪੁਰਮ੍ਹਾਕਂ ਪੇਸਲਾ ਭਿਕ੍ਖੂ ਓਕਾਸਂ ਕਾਰਾਪੇਨ੍ਤੀਤਿ – ਪਟਿਕਚ੍ਚੇਵ ਸੁਦ੍ਧਾਨਂ ਭਿਕ੍ਖੂਨਂ ਅਨਾਪਤ੍ਤਿਕਾਨਂ ਅਵਤ੍ਥੁਸ੍ਮਿਂ ਅਕਾਰਣੇ ਓਕਾਸਂ ਕਾਰਾਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸੁਦ੍ਧਾਨਂ ਭਿਕ੍ਖੂਨਂ ਅਨਾਪਤ੍ਤਿਕਾਨਂ ਅਵਤ੍ਥੁਸ੍ਮਿਂ ਅਕਾਰਣੇ ਓਕਾਸੋ ਕਾਰਾਪੇਤਬ੍ਬੋ. ਯੋ ਕਾਰਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਪੁਗ੍ਗਲਂ ਤੁਲਯਿਤ੍ਵਾ ਓਕਾਸਂ ਕਾਤੁ [ਕਾਰਾਪੇਤੁਂ (ਸ੍ਯਾ.)] ਨ੍ਤਿ.

੮੨. ਅਧਮ੍ਮਕਮ੍ਮਪਟਿਕ੍ਕੋਸਨਾਦਿ

੧੫੪. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਙ੍ਘਮਜ੍ਝੇ ਅਧਮ੍ਮਕਮ੍ਮਂ ਕਰੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਧਮ੍ਮਕਮ੍ਮਂ ਕਾਤਬ੍ਬਂ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ. ਕਰੋਨ੍ਤਿਯੇਵ ਅਧਮ੍ਮਕਮ੍ਮਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਧਮ੍ਮਕਮ੍ਮੇ ਕਯਿਰਮਾਨੇ ਪਟਿਕ੍ਕੋਸਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਪੇਸਲਾ ਭਿਕ੍ਖੂ ਛਬ੍ਬਗ੍ਗਿਯੇਹਿ ਭਿਕ੍ਖੂਹਿ ਅਧਮ੍ਮਕਮ੍ਮੇ ਕਯਿਰਮਾਨੇ ਪਟਿਕ੍ਕੋਸਨ੍ਤਿ. ਛਬ੍ਬਗ੍ਗਿਯਾ ਭਿਕ੍ਖੂ ਲਭਨ੍ਤਿ ਆਘਾਤਂ, ਲਭਨ੍ਤਿ ਅਪ੍ਪਚ੍ਚਯਂ, ਵਧੇਨ ਤਜ੍ਜੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦਿਟ੍ਠਿਮ੍ਪਿ ਆਵਿਕਾਤੁਨ੍ਤਿ. ਤੇਸਂਯੇਵ ਸਨ੍ਤਿਕੇ ਦਿਟ੍ਠਿਂ ਆਵਿਕਰੋਨ੍ਤਿ. ਛਬ੍ਬਗ੍ਗਿਯਾ ਭਿਕ੍ਖੂ ਲਭਨ੍ਤਿ ਆਘਾਤਂ, ਲਭਨ੍ਤਿ ਅਪ੍ਪਚ੍ਚਯਂ, ਵਧੇਨ ਤਜ੍ਜੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਚਤੂਹਿ ਪਞ੍ਚਹਿ ਪਟਿਕ੍ਕੋਸਿਤੁਂ, ਦ੍ਵੀਹਿ ਤੀਹਿ ਦਿਟ੍ਠਿਂ ਆਵਿਕਾਤੁਂ, ਏਕੇਨ ਅਧਿਟ੍ਠਾਤੁਂ – ‘ਨ ਮੇਤਂ ਖਮਤੀ’ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਙ੍ਘਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਮਾਨਾ ਸਞ੍ਚਿਚ੍ਚ ਨ ਸਾਵੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਪਾਤਿਮੋਕ੍ਖੁਦ੍ਦੇਸਕੇਨ ਸਞ੍ਚਿਚ੍ਚ ਨ ਸਾਵੇਤਬ੍ਬਂ. ਯੋ ਨ ਸਾਵੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਦਾਯੀ ਸਙ੍ਘਸ੍ਸ ਪਾਤਿਮੋਕ੍ਖੁਦ੍ਦੇਸਕੋ ਹੋਤਿ ਕਾਕਸ੍ਸਰਕੋ. ਅਥ ਖੋ ਆਯਸ੍ਮਤੋ ਉਦਾਯਿਸ੍ਸ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਪਾਤਿਮੋਕ੍ਖੁਦ੍ਦੇਸਕੇਨ ਸਾਵੇਤਬ੍ਬ’ਨ੍ਤਿ, ਅਹਞ੍ਚਮ੍ਹਿ ਕਾਕਸ੍ਸਰਕੋ, ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਾਤਿਮੋਕ੍ਖੁਦ੍ਦੇਸਕੇਨ ਵਾਯਮਿਤੁਂ – ‘ਕਥਂ ਸਾਵੇਯ੍ਯ’ਨ੍ਤਿ. ਵਾਯਮਨ੍ਤਸ੍ਸ ਅਨਾਪਤ੍ਤੀਤਿ.

ਤੇਨ ਖੋ ਪਨ ਸਮਯੇਨ ਦੇਵਦਤ੍ਤੋ ਸਗਹਟ੍ਠਾਯ ਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਗਹਟ੍ਠਾਯ ਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਙ੍ਘਮਜ੍ਝੇ ਅਨਜ੍ਝਿਟ੍ਠਾ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਙ੍ਘਮਜ੍ਝੇ ਅਨਜ੍ਝਿਟ੍ਠੇਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਥੇਰਾਧਿਕਂ [ਥੇਰਾਧੇਯ੍ਯਂ (ਅਟ੍ਠਕਥਾਯਂ ਪਾਠਨ੍ਤਰਂ)] ਪਾਤਿਮੋਕ੍ਖਨ੍ਤਿ.

ਅਞ੍ਞਤਿਤ੍ਥਿਯਭਾਣਵਾਰੋ ਨਿਟ੍ਠਿਤੋ ਪਠਮੋ [ਏਕਾਦਸਮੋ (ਕ.)].

੮੩. ਪਾਤਿਮੋਕ੍ਖੁਦ੍ਦੇਸਕਅਜ੍ਝੇਸਨਾਦਿ

੧੫੫. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਚੋਦਨਾਵਤ੍ਥੁ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਚੋਦਨਾਵਤ੍ਥੁ ਤਦਵਸਰਿ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਸਮ੍ਬਹੁਲਾ ਭਿਕ੍ਖੂ ਵਿਹਰਨ੍ਤਿ. ਤਤ੍ਥ ਥੇਰੋ ਭਿਕ੍ਖੁ ਬਾਲੋ ਹੋਤਿ ਅਬ੍ਯਤ੍ਤੋ. ਸੋ ਨ ਜਾਨਾਤਿ ਉਪੋਸਥਂ ਵਾ ਉਪੋਸਥਕਮ੍ਮਂ ਵਾ, ਪਾਤਿਮੋਕ੍ਖਂ ਵਾ ਪਾਤਿਮੋਕ੍ਖੁਦ੍ਦੇਸਂ ਵਾ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਥੇਰਾਧਿਕਂ ਪਾਤਿਮੋਕ੍ਖ’ਨ੍ਤਿ, ਅਯਞ੍ਚ ਅਮ੍ਹਾਕਂ ਥੇਰੋ ਬਾਲੋ ਅਬ੍ਯਤ੍ਤੋ, ਨ ਜਾਨਾਤਿ ਉਪੋਸਥਂ ਵਾ ਉਪੋਸਥਕਮ੍ਮਂ ਵਾ, ਪਾਤਿਮੋਕ੍ਖਂ ਵਾ ਪਾਤਿਮੋਕ੍ਖੁਦ੍ਦੇਸਂ ਵਾ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯੋ ਤਤ੍ਥ ਭਿਕ੍ਖੁ ਬ੍ਯਤ੍ਤੋ ਪਟਿਬਲੋ ਤਸ੍ਸਾਧੇਯ੍ਯਂ ਪਾਤਿਮੋਕ੍ਖਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਭਿਕ੍ਖੂ ਵਿਹਰਨ੍ਤਿ ਬਾਲਾ ਅਬ੍ਯਤ੍ਤਾ. ਤੇ ਨ ਜਾਨਨ੍ਤਿ ਉਪੋਸਥਂ ਵਾ ਉਪੋਸਥਕਮ੍ਮਂ ਵਾ, ਪਾਤਿਮੋਕ੍ਖਂ ਵਾ ਪਾਤਿਮੋਕ੍ਖੁਦ੍ਦੇਸਂ ਵਾ. ਤੇ ਥੇਰਂ ਅਜ੍ਝੇਸਿਂਸੁ – ‘‘ਉਦ੍ਦਿਸਤੁ, ਭਨ੍ਤੇ, ਥੇਰੋ ਪਾਤਿਮੋਕ੍ਖ’’ਨ੍ਤਿ. ਸੋ ਏਵਮਾਹ – ‘‘ਨ ਮੇ, ਆਵੁਸੋ, ਵਤ੍ਤਤੀ’’ਤਿ. ਦੁਤਿਯਂ ਥੇਰਂ ਅਜ੍ਝੇਸਿਂਸੁ – ‘‘ਉਦ੍ਦਿਸਤੁ, ਭਨ੍ਤੇ, ਥੇਰੋ ਪਾਤਿਮੋਕ੍ਖ’’ਨ੍ਤਿ. ਸੋਪਿ ਏਵਮਾਹ – ‘‘ਨ ਮੇ, ਆਵੁਸੋ, ਵਤ੍ਤਤੀ’’ਤਿ. ਤਤਿਯਂ ਥੇਰਂ ਅਜ੍ਝੇਸਿਂਸੁ – ‘‘ਉਦ੍ਦਿਸਤੁ, ਭਨ੍ਤੇ, ਥੇਰੋ ਪਾਤਿਮੋਕ੍ਖ’’ਨ੍ਤਿ. ਸੋਪਿ ਏਵਮਾਹ – ‘‘ਨ ਮੇ, ਆਵੁਸੋ, ਵਤ੍ਤਤੀ’’ਤਿ. ਏਤੇਨੇਵ ਉਪਾਯੇਨ ਯਾਵ ਸਙ੍ਘਨਵਕਂ ਅਜ੍ਝੇਸਿਂਸੁ – ‘‘ਉਦ੍ਦਿਸਤੁ ਆਯਸ੍ਮਾ ਪਾਤਿਮੋਕ੍ਖ’’ਨ੍ਤਿ. ਸੋਪਿ ਏਵਮਾਹ – ‘‘ਨ ਮੇ, ਭਨ੍ਤੇ, ਵਤ੍ਤਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਭਿਕ੍ਖੂ ਵਿਹਰਨ੍ਤਿ ਬਾਲਾ ਅਬ੍ਯਤ੍ਤਾ. ਤੇ ਨ ਜਾਨਨ੍ਤਿ ਉਪੋਸਥਂ ਵਾ ਉਪੋਸਥਕਮ੍ਮਂ ਵਾ, ਪਾਤਿਮੋਕ੍ਖਂ ਵਾ ਪਾਤਿਮੋਕ੍ਖੁਦ੍ਦੇਸਂ ਵਾ. ਤੇ ਥੇਰਂ ਅਜ੍ਝੇਸਨ੍ਤਿ – ‘‘ਉਦ੍ਦਿਸਤੁ, ਭਨ੍ਤੇ, ਥੇਰੋ ਪਾਤਿਮੋਕ੍ਖ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨ ਮੇ, ਆਵੁਸੋ, ਵਤ੍ਤਤੀ’’ਤਿ. ਦੁਤਿਯਂ ਥੇਰਂ ਅਜ੍ਝੇਸਨ੍ਤਿ – ‘‘ਉਦ੍ਦਿਸਤੁ, ਭਨ੍ਤੇ, ਥੇਰੋ ਪਾਤਿਮੋਕ੍ਖ’’ਨ੍ਤਿ. ਸੋਪਿ ਏਵਂ ਵਦੇਤਿ – ‘‘ਨ ਮੇ, ਆਵੁਸੋ, ਵਤ੍ਤਤੀ’’ਤਿ. ਤਤਿਯਂ ਥੇਰਂ ਅਜ੍ਝੇਸਨ੍ਤਿ – ‘‘ਉਦ੍ਦਿਸਤੁ, ਭਨ੍ਤੇ, ਥੇਰੋ ਪਾਤਿਮੋਕ੍ਖ’’ਨ੍ਤਿ. ਸੋਪਿ ਏਵਂ ਵਦੇਤਿ – ‘‘ਨ ਮੇ, ਆਵੁਸੋ, ਵਤ੍ਤਤੀ’’ਤਿ. ਏਤੇਨੇਵ ਉਪਾਯੇਨ ਯਾਵ ਸਙ੍ਘਨਵਕਂ ਅਜ੍ਝੇਸਨ੍ਤਿ – ‘‘ਉਦ੍ਦਿਸਤੁ ਆਯਸ੍ਮਾ ਪਾਤਿਮੋਕ੍ਖ’’ਨ੍ਤਿ. ਸੋਪਿ ਏਵਂ ਵਦੇਤਿ – ‘‘ਨ ਮੇ, ਭਨ੍ਤੇ, ਵਤ੍ਤਤੀ’’ਤਿ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ – ਗਚ੍ਛਾਵੁਸੋ, ਸਂਖਿਤ੍ਤੇਨ ਵਾ ਵਿਤ੍ਥਾਰੇਨ ਵਾ ਪਾਤਿਮੋਕ੍ਖਂ ਪਰਿਯਾਪੁਣਿਤ੍ਵਾਨ ਆਗਚ੍ਛਾਹੀਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਪਾਹੇਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਨਵਂ ਭਿਕ੍ਖੁਂ ਆਣਾਪੇਤੁਨ੍ਤਿ. ਥੇਰੇਨ ਆਣਤ੍ਤਾ ਨਵਾ ਭਿਕ੍ਖੂ ਨ ਗਚ੍ਛਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਥੇਰੇਨ ਆਣਤ੍ਤੇਨ ਅਗਿਲਾਨੇਨ ਨ ਗਨ੍ਤਬ੍ਬਂ. ਯੋ ਨ ਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੮੪. ਪਕ੍ਖਗਣਨਾਦਿਉਗ੍ਗਹਣਾਨੁਜਾਨਨਾ

੧੫੬. ਅਥ ਖੋ ਭਗਵਾ ਚੋਦਨਾਵਤ੍ਥੁਸ੍ਮਿਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਪੁਨਦੇਵ ਰਾਜਗਹਂ ਪਚ੍ਚਾਗਞ੍ਛਿ.

ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੂ ਪਿਣ੍ਡਾਯ ਚਰਨ੍ਤੇ ਪੁਚ੍ਛਨ੍ਤਿ – ‘‘ਕਤਿਮੀ, ਭਨ੍ਤੇ, ਪਕ੍ਖਸ੍ਸਾ’’ਤਿ? ਭਿਕ੍ਖੂ ਏਵਮਾਹਂਸੁ – ‘‘ਨ ਖੋ ਮਯਂ, ਆਵੁਸੋ, ਜਾਨਾਮਾ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਪਕ੍ਖਗਣਨਮਤ੍ਤਮਮ੍ਪਿਮੇ ਸਮਣਾ ਸਕ੍ਯਪੁਤ੍ਤਿਯਾ ਨ ਜਾਨਨ੍ਤਿ, ਕਿਂ ਪਨਿਮੇ ਅਞ੍ਞਂ ਕਿਞ੍ਚਿ ਕਲ੍ਯਾਣਂ ਜਾਨਿਸ੍ਸਨ੍ਤੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਕ੍ਖਗਣਨਂ ਉਗ੍ਗਹੇਤੁਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਪਕ੍ਖਗਣਨਾ ਉਗ੍ਗਹੇਤਬ੍ਬਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬੇਹੇਵ ਪਕ੍ਖਗਣਨਂ ਉਗ੍ਗਹੇਤੁਨ੍ਤਿ.

੧੫੭. ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੂ ਪਿਣ੍ਡਾਯ ਚਰਨ੍ਤੇ ਪੁਚ੍ਛਨ੍ਤਿ – ‘‘ਕੀਵਤਿਕਾ, ਭਨ੍ਤੇ, ਭਿਕ੍ਖੂ’’ਤਿ? ਭਿਕ੍ਖੂ ਏਵਮਾਹਂਸੁ – ‘‘ਨ ਖੋ ਮਯਂ, ਆਵੁਸੋ, ਜਾਨਾਮਾ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਞ੍ਞਮਞ੍ਞਮ੍ਪਿਮੇ ਸਮਣਾ ਸਕ੍ਯਪੁਤ੍ਤਿਯਾ ਨ ਜਾਨਨ੍ਤਿ, ਕਿਂ ਪਨਿਮੇ ਅਞ੍ਞਂ ਕਿਞ੍ਚਿ ਕਲ੍ਯਾਣਂ ਜਾਨਿਸ੍ਸਨ੍ਤੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂ ਗਣੇਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਦਾ ਨੁ ਖੋ ਭਿਕ੍ਖੂ ਗਣੇਤਬ੍ਬਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਦਹੁਪੋਸਥੇ ਨਾਮਗ੍ਗੇਨ [ਨਾਮਮਤ੍ਤੇਨ (ਸ੍ਯਾ.), ਗਣਮਗ੍ਗੇਨ (ਕ.)] ਗਣੇਤੁਂ, ਸਲਾਕਂ ਵਾ ਗਾਹੇਤੁਨ੍ਤਿ.

੧੫੮. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਜਾਨਨ੍ਤਾ ਅਜ੍ਜੁਪੋਸਥੋਤਿ ਦੂਰਂ ਗਾਮਂ ਪਿਣ੍ਡਾਯ ਚਰਨ੍ਤਿ. ਤੇ ਉਦ੍ਦਿਸ੍ਸਮਾਨੇਪਿ ਪਾਤਿਮੋਕ੍ਖੇ ਆਗਚ੍ਛਨ੍ਤਿ, ਉਦ੍ਦਿਟ੍ਠਮਤ੍ਤੇਪਿ ਆਗਚ੍ਛਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਆਰੋਚੇਤੁਂ ‘ਅਜ੍ਜੁਪੋਸਥੋ’ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਆਰੋਚੇਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਕਾਲਵਤੋ ਆਰੋਚੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਥੇਰੋ ਕਾਲਵਤੋ ਨਸ੍ਸਰਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਭਤ੍ਤਕਾਲੇਪਿ ਆਰੋਚੇਤੁਨ੍ਤਿ.

ਭਤ੍ਤਕਾਲੇਪਿ ਨਸ੍ਸਰਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯਂ ਕਾਲਂ ਸਰਤਿ, ਤਂ ਕਾਲਂ ਆਰੋਚੇਤੁਨ੍ਤਿ.

੮੫. ਪੁਬ੍ਬਕਰਣਾਨੁਜਾਨਨਾ

੧੫੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਉਪੋਸਥਾਗਾਰਂ ਉਕ੍ਲਾਪਂ ਹੋਤਿ. ਆਗਨ੍ਤੁਕਾ ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਵਾਸਿਕਾ ਭਿਕ੍ਖੂ ਉਪੋਸਥਾਗਾਰਂ ਨ ਸਮ੍ਮਜ੍ਜਿਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਪੋਸਥਾਗਾਰਂ ਸਮ੍ਮਜ੍ਜਿਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਉਪੋਸਥਾਗਾਰਂ ਸਮ੍ਮਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਨਵਂ ਭਿਕ੍ਖੁਂ ਆਣਾਪੇਤੁਨ੍ਤਿ.

ਥੇਰੇਨ ਆਣਤ੍ਤਾ ਨਵਾ ਭਿਕ੍ਖੂ ਨ ਸਮ੍ਮਜ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਥੇਰੇਨ ਆਣਤ੍ਤੇਨ ਅਗਿਲਾਨੇਨ ਨ ਸਮ੍ਮਜ੍ਜਿਤਬ੍ਬਂ. ਯੋ ਨ ਸਮ੍ਮਜ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੧੬੦. ਤੇਨ ਖੋ ਪਨ ਸਮਯੇਨ ਉਪੋਸਥਾਗਾਰੇ ਆਸਨਂ ਅਪਞ੍ਞਤ੍ਤਂ ਹੋਤਿ. ਭਿਕ੍ਖੂ ਛਮਾਯਂ ਨਿਸੀਦਨ੍ਤਿ, ਗਤ੍ਤਾਨਿਪਿ ਚੀਵਰਾਨਿਪਿ ਪਂਸੁਕਿਤਾਨਿ ਹੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਪੋਸਥਾਗਾਰੇ ਆਸਨਂ ਪਞ੍ਞਪੇਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਉਪੋਸਥਾਗਾਰੇ ਆਸਨਂ ਪਞ੍ਞਪੇਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਨਵਂ ਭਿਕ੍ਖੁਂ ਆਣਾਪੇਤੁਨ੍ਤਿ.

ਥੇਰੇਨ ਆਣਤ੍ਤਾ ਨਵਾ ਭਿਕ੍ਖੂ ਨ ਪਞ੍ਞਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਥੇਰੇਨ ਆਣਤ੍ਤੇਨ ਅਗਿਲਾਨੇਨ ਨ ਪਞ੍ਞਪੇਤਬ੍ਬਂ. ਯੋ ਨ ਪਞ੍ਞਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੧੬੧. ਤੇਨ ਖੋ ਪਨ ਸਮਯੇਨ ਉਪੋਸਥਾਗਾਰੇ ਪਦੀਪੋ ਨ ਹੋਤਿ. ਭਿਕ੍ਖੂ ਅਨ੍ਧਕਾਰੇ ਕਾਯਮ੍ਪਿ ਚੀਵਰਮ੍ਪਿ ਅਕ੍ਕਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਪੋਸਥਾਗਾਰੇ ਪਦੀਪਂ ਕਾਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਉਪੋਸਥਾਗਾਰੇ ਪਦੀਪੋ ਕਾਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਨਵਂ ਭਿਕ੍ਖੁਂ ਆਣਾਪੇਤੁਨ੍ਤਿ.

ਥੇਰੇਨ ਆਣਤ੍ਤਾ ਨਵਾ ਭਿਕ੍ਖੂ ਨ ਪਦੀਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਥੇਰੇਨ ਆਣਤ੍ਤੇਨ ਅਗਿਲਾਨੇਨ ਨ ਪਦੀਪੇਤਬ੍ਬੋ. ਯੋ ਨ ਪਦੀਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੧੬੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਆਵਾਸਿਕਾ ਭਿਕ੍ਖੂ ਨੇਵ ਪਾਨੀਯਂ ਉਪਟ੍ਠਾਪੇਨ੍ਤਿ, ਨ ਪਰਿਭੋਜਨੀਯਂ ਉਪਟ੍ਠਾਪੇਨ੍ਤਿ. ਆਗਨ੍ਤੁਕਾ ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਵਾਸਿਕਾ ਭਿਕ੍ਖੂ ਨੇਵ ਪਾਨੀਯਂ ਉਪਟ੍ਠਾਪੇਸ੍ਸਨ੍ਤਿ, ਨ ਪਰਿਭੋਜਨੀਯਂ ਉਪਟ੍ਠਾਪੇਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਨਵਂ ਭਿਕ੍ਖੁਂ ਆਣਾਪੇਤੁਨ੍ਤਿ.

ਥੇਰੇਨ ਆਣਤ੍ਤਾ ਨਵਾ ਭਿਕ੍ਖੂ ਨ ਉਪਟ੍ਠਾਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਥੇਰੇਨ ਆਣਤ੍ਤੇਨ ਅਗਿਲਾਨੇਨ ਨ ਉਪਟ੍ਠਾਪੇਤਬ੍ਬਂ. ਯੋ ਨ ਉਪਟ੍ਠਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੮੬. ਦਿਸਂਗਮਿਕਾਦਿਵਤ੍ਥੁ

੧੬੩. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਬਾਲਾ ਅਬ੍ਯਤ੍ਤਾ ਦਿਸਂਗਮਿਕਾ ਆਚਰਿਯੁਪਜ੍ਝਾਯੇ ਨ ਆਪੁਚ੍ਛਿਂਸੁ [ਨ ਆਪੁਚ੍ਛਿਂਸੁ (ਕ.)]. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਸਮ੍ਬਹੁਲਾ ਭਿਕ੍ਖੂ ਬਾਲਾ ਅਬ੍ਯਤ੍ਤਾ ਦਿਸਂਗਮਿਕਾ ਆਚਰਿਯੁਪਜ੍ਝਾਯੇ ਨ ਆਪੁਚ੍ਛਨ੍ਤਿ [ਨ ਆਪੁਚ੍ਛਨ੍ਤਿ (ਕ.)]. ਤੇ [ਤੇਹਿ (ਕ.)], ਭਿਕ੍ਖਵੇ, ਆਚਰਿਯੁਪਜ੍ਝਾਯੇਹਿ ਪੁਚ੍ਛਿਤਬ੍ਬਾ – ‘‘ਕਹਂ ਗਮਿਸ੍ਸਥ, ਕੇਨ ਸਦ੍ਧਿਂ ਗਮਿਸ੍ਸਥਾ’’ਤਿ? ਤੇ ਚੇ, ਭਿਕ੍ਖਵੇ, ਬਾਲਾ ਅਬ੍ਯਤ੍ਤਾ ਅਞ੍ਞੇ ਬਾਲੇ ਅਬ੍ਯਤ੍ਤੇ ਅਪਦਿਸੇਯ੍ਯੁਂ, ਨ, ਭਿਕ੍ਖਵੇ, ਆਚਰਿਯੁਪਜ੍ਝਾਯੇਹਿ ਅਨੁਜਾਨਿਤਬ੍ਬਾ. ਅਨੁਜਾਨੇਯ੍ਯੁਂ ਚੇ, ਆਪਤ੍ਤਿ ਦੁਕ੍ਕਟਸ੍ਸ. ਤੇ ਚ, ਭਿਕ੍ਖਵੇ, ਬਾਲਾ ਅਬ੍ਯਤ੍ਤਾ ਅਨਨੁਞ੍ਞਾਤਾ ਆਚਰਿਯੁਪਜ੍ਝਾਯੇਹਿ ਗਚ੍ਛੇਯ੍ਯੁਂ ਚੇ, ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਸਮ੍ਬਹੁਲਾ ਭਿਕ੍ਖੂ ਵਿਹਰਨ੍ਤਿ ਬਾਲਾ ਅਬ੍ਯਤ੍ਤਾ. ਤੇ ਨ ਜਾਨਨ੍ਤਿ ਉਪੋਸਥਂ ਵਾ ਉਪੋਸਥਕਮ੍ਮਂ ਵਾ, ਪਾਤਿਮੋਕ੍ਖਂ ਵਾ ਪਾਤਿਮੋਕ੍ਖੁਦ੍ਦੇਸਂ ਵਾ. ਤਤ੍ਥ ਅਞ੍ਞੋ ਭਿਕ੍ਖੁ ਆਗਚ੍ਛਤਿ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਸੋ ਭਿਕ੍ਖੁ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋ ਉਪਲਾਪੇਤਬ੍ਬੋ ਉਪਟ੍ਠਾਪੇਤਬ੍ਬੋ ਚੁਣ੍ਣੇਨ ਮਤ੍ਤਿਕਾਯ ਦਨ੍ਤਕਟ੍ਠੇਨ ਮੁਖੋਦਕੇਨ. ਨੋ ਚੇ ਸਙ੍ਗਣ੍ਹੇਯ੍ਯੁਂ ਅਨੁਗ੍ਗਣ੍ਹੇਯ੍ਯੁਂ ਉਪਲਾਪੇਯ੍ਯੁਂ ਉਪਟ੍ਠਾਪੇਯ੍ਯੁਂ ਚੁਣ੍ਣੇਨ ਮਤ੍ਤਿਕਾਯ ਦਨ੍ਤਕਟ੍ਠੇਨ ਮੁਖੋਦਕੇਨ, ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਭਿਕ੍ਖੂ ਵਿਹਰਨ੍ਤਿ ਬਾਲਾ ਅਬ੍ਯਤ੍ਤਾ. ਤੇ ਨ ਜਾਨਨ੍ਤਿ ਉਪੋਸਥਂ ਵਾ ਉਪੋਸਥਕਮ੍ਮਂ ਵਾ, ਪਾਤਿਮੋਕ੍ਖਂ ਵਾ ਪਾਤਿਮੋਕ੍ਖੁਦ੍ਦੇਸਂ ਵਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ – ‘‘ਗਚ੍ਛਾਵੁਸੋ, ਸਂਖਿਤ੍ਤੇਨ ਵਾ ਵਿਤ੍ਥਾਰੇਨ ਵਾ ਪਾਤਿਮੋਕ੍ਖਂ ਪਰਿਯਾਪੁਣਿਤ੍ਵਾ ਆਗਚ੍ਛਾ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਸਬ੍ਬੇਹੇਵ ਯਤ੍ਥ ਜਾਨਨ੍ਤਿ ਉਪੋਸਥਂ ਵਾ ਉਪੋਸਥਕਮ੍ਮਂ ਵਾ ਪਾਤਿਮੋਕ੍ਖਂ ਵਾ ਪਾਤਿਮੋਕ੍ਖੁਦ੍ਦੇਸਂ ਵਾ, ਸੋ ਆਵਾਸੋ ਗਨ੍ਤਬ੍ਬੋ. ਨੋ ਚੇ ਗਚ੍ਛੇਯ੍ਯੁਂ, ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਸਮ੍ਬਹੁਲਾ ਭਿਕ੍ਖੂ ਵਸ੍ਸਂ ਵਸਨ੍ਤਿ ਬਾਲਾ ਅਬ੍ਯਤ੍ਤਾ. ਤੇ ਨ ਜਾਨਨ੍ਤਿ ਉਪੋਸਥਂ ਵਾ ਉਪੋਸਥਕਮ੍ਮਂ ਵਾ ਪਾਤਿਮੋਕ੍ਖਂ ਵਾ ਪਾਤਿਮੋਕ੍ਖੁਦ੍ਦੇਸਂ ਵਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ – ‘‘ਗਚ੍ਛਾਵੁਸੋ, ਸਂਖਿਤ੍ਤੇਨ ਵਾ ਵਿਤ੍ਥਾਰੇਨ ਵਾ ਪਾਤਿਮੋਕ੍ਖਂ ਪਰਿਯਾਪੁਣਿਤ੍ਵਾ ਆਗਚ੍ਛਾ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਏਕੋ ਭਿਕ੍ਖੁ ਸਤ੍ਤਾਹਕਾਲਿਕਂ ਪਾਹੇਤਬ੍ਬੋ – ‘‘ਗਚ੍ਛਾਵੁਸੋ, ਸਂਖਿਤ੍ਤੇਨ ਵਾ ਵਿਤ੍ਥਾਰੇਨ ਵਾ ਪਾਤਿਮੋਕ੍ਖਂ ਪਰਿਯਾਪੁਣਿਤ੍ਵਾ ਆਗਚ੍ਛਾ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਨ, ਭਿਕ੍ਖਵੇ, ਤੇਹਿ ਭਿਕ੍ਖੂਹਿ ਤਸ੍ਮਿਂ ਆਵਾਸੇ ਵਸ੍ਸਂ ਵਸਿਤਬ੍ਬਂ. ਵਸੇਯ੍ਯੁਂ ਚੇ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੮੭. ਪਾਰਿਸੁਦ੍ਧਿਦਾਨਕਥਾ

੧੬੪. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਸਨ੍ਨਿਪਤਥ, ਭਿਕ੍ਖਵੇ, ਸਙ੍ਘੋ ਉਪੋਸਥਂ ਕਰਿਸ੍ਸਤੀ’’ਤਿ. ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਅਤ੍ਥਿ, ਭਨ੍ਤੇ, ਭਿਕ੍ਖੁ ਗਿਲਾਨੋ, ਸੋ ਅਨਾਗਤੋ’’ਤਿ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨੇਨ ਭਿਕ੍ਖੁਨਾ ਪਾਰਿਸੁਦ੍ਧਿਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬਾ – ਤੇਨ ਗਿਲਾਨੇਨ ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਪਾਰਿਸੁਦ੍ਧਿਂ ਦਮ੍ਮਿ, ਪਾਰਿਸੁਦ੍ਧਿਂ ਮੇ ਹਰ, ਪਾਰਿਸੁਦ੍ਧਿਂ ਮੇ ਆਰੋਚੇਹੀ’’ਤਿ. ਕਾਯੇਨ ਵਿਞ੍ਞਾਪੇਤਿ, ਵਾਚਾਯ ਵਿਞ੍ਞਾਪੇਤਿ, ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਦਿਨ੍ਨਾ ਹੋਤਿ ਪਾਰਿਸੁਦ੍ਧਿ. ਨ ਕਾਯੇਨ ਵਿਞ੍ਞਾਪੇਤਿ, ਨ ਵਾਚਾਯ ਵਿਞ੍ਞਾਪੇਤਿ, ਨ ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਨ ਦਿਨ੍ਨਾ ਹੋਤਿ ਪਾਰਿਸੁਦ੍ਧਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਸੋ, ਭਿਕ੍ਖਵੇ, ਗਿਲਾਨੋ ਭਿਕ੍ਖੁ ਮਞ੍ਚੇਨ ਵਾ ਪੀਠੇਨ ਵਾ ਸਙ੍ਘਮਜ੍ਝੇ ਆਨੇਤ੍ਵਾ ਉਪੋਸਥੋ ਕਾਤਬ੍ਬੋ. ਸਚੇ, ਭਿਕ੍ਖਵੇ, ਗਿਲਾਨੁਪਟ੍ਠਾਕਾਨਂ ਭਿਕ੍ਖੂਨਂ ਏਵਂ ਹੋਤਿ – ‘‘ਸਚੇ ਖੋ ਮਯਂ ਗਿਲਾਨਂ ਠਾਨਾ ਚਾਵੇਸ੍ਸਾਮ, ਆਬਾਧੋ ਵਾ ਅਭਿਵਡ੍ਢਿਸ੍ਸਤਿ ਕਾਲਂਕਿਰਿਯਾ ਵਾ ਭਵਿਸ੍ਸਤੀ’’ਤਿ, ਨ, ਭਿਕ੍ਖਵੇ, ਗਿਲਾਨੋ ਭਿਕ੍ਖੁ ਠਾਨਾ ਚਾਵੇਤਬ੍ਬੋ. ਸਙ੍ਘੇਨ ਤਤ੍ਥ ਗਨ੍ਤ੍ਵਾ ਉਪੋਸਥੋ ਕਾਤਬ੍ਬੋ. ਨ ਤ੍ਵੇਵ ਵਗ੍ਗੇਨ ਸਙ੍ਘੇਨ ਉਪੋਸਥੋ ਕਾਤਬ੍ਬੋ. ਕਰੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸ.

ਪਾਰਿਸੁਦ੍ਧਿਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਾਰਿਸੁਦ੍ਧਿਯਾ ਤਤ੍ਥੇਵ ਪਕ੍ਕਮਤਿ, ਅਞ੍ਞਸ੍ਸ ਦਾਤਬ੍ਬਾ ਪਾਰਿਸੁਦ੍ਧਿ. ਪਾਰਿਸੁਦ੍ਧਿਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਾਰਿਸੁਦ੍ਧਿਯਾ ਤਤ੍ਥੇਵ ਵਿਬ੍ਭਮਤਿ,…ਪੇ… ਕਾਲਂ ਕਰੋਤਿ – ਸਾਮਣੇਰੋ ਪਟਿਜਾਨਾਤਿ – ਸਿਕ੍ਖਂ ਪਚ੍ਚਕ੍ਖਾਤਕੋ ਪਟਿਜਾਨਾਤਿ – ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ ਪਟਿਜਾਨਾਤਿ – ਉਮ੍ਮਤ੍ਤਕੋ ਪਟਿਜਾਨਾਤਿ – ਖਿਤ੍ਤਚਿਤ੍ਤੋ ਪਟਿਜਾਨਾਤਿ – ਵੇਦਨਾਟ੍ਟੋ ਪਟਿਜਾਨਾਤਿ – ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ ਪਟਿਜਾਨਾਤਿ – ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ ਪਟਿਜਾਨਾਤਿ – ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋ ਪਟਿਜਾਨਾਤਿ – ਪਣ੍ਡਕੋ ਪਟਿਜਾਨਾਤਿ – ਥੇਯ੍ਯਸਂਵਾਸਕੋ ਪਟਿਜਾਨਾਤਿ – ਤਿਤ੍ਥਿਯਪਕ੍ਕਨ੍ਤਕੋ ਪਟਿਜਾਨਾਤਿ – ਤਿਰਚ੍ਛਾਨਗਤੋ ਪਟਿਜਾਨਾਤਿ – ਮਾਤੁਘਾਤਕੋ ਪਟਿਜਾਨਾਤਿ – ਪਿਤੁਘਾਤਕੋ ਪਟਿਜਾਨਾਤਿ – ਅਰਹਨ੍ਤਘਾਤਕੋ ਪਟਿਜਾਨਾਤਿ – ਭਿਕ੍ਖੁਨਿਦੂਸਕੋ ਪਟਿਜਾਨਾਤਿ – ਸਙ੍ਘਭੇਦਕੋ ਪਟਿਜਾਨਾਤਿ – ਲੋਹਿਤੁਪ੍ਪਾਦਕੋ ਪਟਿਜਾਨਾਤਿ – ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਅਞ੍ਞਸ੍ਸ ਦਾਤਬ੍ਬਾ ਪਾਰਿਸੁਦ੍ਧਿ.

ਪਾਰਿਸੁਦ੍ਧਿਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਾਰਿਸੁਦ੍ਧਿਯਾ ਅਨ੍ਤਰਾਮਗ੍ਗੇ ਪਕ੍ਕਮਤਿ, ਅਨਾਹਟਾ ਹੋਤਿ ਪਾਰਿਸੁਦ੍ਧਿ. ਪਾਰਿਸੁਦ੍ਧਿਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਾਰਿਸੁਦ੍ਧਿਯਾ ਅਨ੍ਤਰਾਮਗ੍ਗੇ ਵਿਬ੍ਭਮਤਿ,…ਪੇ… ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਅਨਾਹਟਾ ਹੋਤਿ ਪਾਰਿਸੁਦ੍ਧਿ.

ਪਾਰਿਸੁਦ੍ਧਿਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਾਰਿਸੁਦ੍ਧਿਯਾ ਸਙ੍ਘਪ੍ਪਤ੍ਤੋ ਪਕ੍ਕਮਤਿ, ਆਹਟਾ ਹੋਤਿ ਪਾਰਿਸੁਦ੍ਧਿ. ਪਾਰਿਸੁਦ੍ਧਿਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਾਰਿਸੁਦ੍ਧਿਯਾ ਸਙ੍ਘਪ੍ਪਤ੍ਤੋ ਵਿਬ੍ਭਮਤਿ,…ਪੇ… ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਆਹਟਾ ਹੋਤਿ ਪਾਰਿਸੁਦ੍ਧਿ.

ਪਾਰਿਸੁਦ੍ਧਿਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਾਰਿਸੁਦ੍ਧਿਯਾ ਸਙ੍ਘਪ੍ਪਤ੍ਤੋ ਸੁਤ੍ਤੋ ਨ ਆਰੋਚੇਤਿ, ਪਮਤ੍ਤੋ ਨ ਆਰੋਚੇਤਿ, ਸਮਾਪਨ੍ਨੋ ਨ ਆਰੋਚੇਤਿ, ਆਹਟਾ ਹੋਤਿ ਪਾਰਿਸੁਦ੍ਧਿ. ਪਾਰਿਸੁਦ੍ਧਿਹਾਰਕਸ੍ਸ ਅਨਾਪਤ੍ਤਿ.

ਪਾਰਿਸੁਦ੍ਧਿਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਾਰਿਸੁਦ੍ਧਿਯਾ ਸਙ੍ਘਪ੍ਪਤ੍ਤੋ ਸਞ੍ਚਿਚ੍ਚ ਨ ਆਰੋਚੇਤਿ, ਆਹਟਾ ਹੋਤਿ ਪਾਰਿਸੁਦ੍ਧਿ. ਪਾਰਿਸੁਦ੍ਧਿਹਾਰਕਸ੍ਸ ਆਪਤ੍ਤਿ ਦੁਕ੍ਕਟਸ੍ਸਾਤਿ.

੮੮. ਛਨ੍ਦਦਾਨਕਥਾ

੧੬੫. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਸਨ੍ਨਿਪਤਥ, ਭਿਕ੍ਖਵੇ, ਸਙ੍ਘੋ ਕਮ੍ਮਂ ਕਰਿਸ੍ਸਤੀ’’ਤਿ. ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਅਤ੍ਥਿ, ਭਨ੍ਤੇ, ਭਿਕ੍ਖੁ ਗਿਲਾਨੋ, ਸੋ ਅਨਾਗਤੋ’’ਤਿ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨੇਨ ਭਿਕ੍ਖੁਨਾ ਛਨ੍ਦਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬੋ. ਤੇਨ ਗਿਲਾਨੇਨ ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਛਨ੍ਦਂ ਦਮ੍ਮਿ, ਛਨ੍ਦਂ ਮੇ ਹਰ, ਛਨ੍ਦਂ ਮੇ ਆਰੋਚੇਹੀ’’ਤਿ. ਕਾਯੇਨ ਵਿਞ੍ਞਾਪੇਤਿ, ਵਾਚਾਯ ਵਿਞ੍ਞਾਪੇਤਿ, ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਦਿਨ੍ਨੋ ਹੋਤਿ ਛਨ੍ਦੋ. ਨ ਕਾਯੇਨ ਵਿਞ੍ਞਾਪੇਤਿ, ਨ ਵਾਚਾਯ ਵਿਞ੍ਞਾਪੇਤਿ, ਨ ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਨ ਦਿਨ੍ਨੋ ਹੋਤਿ ਛਨ੍ਦੋ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਸੋ, ਭਿਕ੍ਖਵੇ, ਗਿਲਾਨੋ ਭਿਕ੍ਖੁ ਮਞ੍ਚੇਨ ਵਾ ਪੀਠੇਨ ਵਾ ਸਙ੍ਘਮਜ੍ਝੇ ਆਨੇਤ੍ਵਾ ਕਮ੍ਮਂ ਕਾਤਬ੍ਬਂ. ਸਚੇ, ਭਿਕ੍ਖਵੇ, ਗਿਲਾਨੁਪਟ੍ਠਾਕਾਨਂ ਭਿਕ੍ਖੂਨਂ ਏਵਂ ਹੋਤਿ – ‘‘ਸਚੇ ਖੋ ਮਯਂ ਗਿਲਾਨਂ ਠਾਨਾ ਚਾਵੇਸ੍ਸਾਮ, ਆਬਾਧੋ ਵਾ ਅਭਿਵਡ੍ਢਿਸ੍ਸਤਿ ਕਾਲਂਕਿਰਿਯਾ ਵਾ ਭਵਿਸ੍ਸਤੀ’’ਤਿ, ਨ, ਭਿਕ੍ਖਵੇ, ਗਿਲਾਨੋ ਭਿਕ੍ਖੁ ਠਾਨਾ ਚਾਵੇਤਬ੍ਬੋ. ਸਙ੍ਘੇਨ ਤਤ੍ਥ ਗਨ੍ਤ੍ਵਾ ਕਮ੍ਮਂ ਕਾਤਬ੍ਬਂ. ਨ ਤ੍ਵੇਵ ਵਗ੍ਗੇਨ ਸਙ੍ਘੇਨ ਕਮ੍ਮਂ ਕਾਤਬ੍ਬਂ. ਕਰੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸ.

ਛਨ੍ਦਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨੇ ਛਨ੍ਦੇ ਤਤ੍ਥੇਵ ਪਕ੍ਕਮਤਿ, ਅਞ੍ਞਸ੍ਸ ਦਾਤਬ੍ਬੋ ਛਨ੍ਦੋ. ਛਨ੍ਦਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨੇ ਛਨ੍ਦੇ ਤਤ੍ਥੇਵ ਵਿਬ੍ਭਮਤਿ…ਪੇ… ਕਾਲਂਕਰੋਤਿ – ਸਾਮਣੇਰੋ ਪਟਿਜਾਨਾਤਿ – ਸਿਕ੍ਖਂ ਪਚ੍ਚਕ੍ਖਾਤਕੋ ਪਟਿਜਾਨਾਤਿ – ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ ਪਟਿਜਾਨਾਤਿ – ਉਮ੍ਮਤ੍ਤਕੋ ਪਟਿਜਾਨਾਤਿ – ਖਿਤ੍ਤਚਿਤ੍ਤੋ ਪਟਿਜਾਨਾਤਿ – ਵੇਦਨਾਟ੍ਟੋ ਪਟਿਜਾਨਾਤਿ – ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ ਪਟਿਜਾਨਾਤਿ – ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ ਪਟਿਜਾਨਾਤਿ – ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋ ਪਟਿਜਾਨਾਤਿ – ਪਣ੍ਡਕੋ ਪਟਿਜਾਨਾਤਿ – ਥੇਯ੍ਯਸਂਵਾਸਕੋ ਪਟਿਜਾਨਾਤਿ – ਤਿਤ੍ਥਿਯਪਕ੍ਕਨ੍ਤਕੋ ਪਟਿਜਾਨਾਤਿ – ਤਿਰਚ੍ਛਾਨਗਤੋ ਪਟਿਜਾਨਾਤਿ – ਮਾਤੁਘਾਤਕੋ ਪਟਿਜਾਨਾਤਿ – ਪਿਤੁਘਾਤਕੋ ਪਟਿਜਾਨਾਤਿ – ਅਰਹਨ੍ਤਘਾਤਕੋ ਪਟਿਜਾਨਾਤਿ – ਭਿਕ੍ਖੁਨਿਦੂਸਕੋ ਪਟਿਜਾਨਾਤਿ – ਸਙ੍ਘਭੇਦਕੋ ਪਟਿਜਾਨਾਤਿ – ਲੋਹਿਤੁਪ੍ਪਾਦਕੋ ਪਟਿਜਾਨਾਤਿ – ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਅਞ੍ਞਸ੍ਸ ਦਾਤਬ੍ਬੋ ਛਨ੍ਦੋ.

ਛਨ੍ਦਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨੇ ਛਨ੍ਦੇ ਅਨ੍ਤਰਾਮਗ੍ਗੇ ਪਕ੍ਕਮਤਿ, ਅਨਾਹਟੋ ਹੋਤਿ ਛਨ੍ਦੋ. ਛਨ੍ਦਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨੇ ਛਨ੍ਦੇ ਅਨ੍ਤਰਾਮਗ੍ਗੇ ਵਿਬ੍ਭਮਤਿ…ਪੇ… ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਅਨਾਹਟੋ ਹੋਤਿ ਛਨ੍ਦੋ.

ਛਨ੍ਦਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨੇ ਛਨ੍ਦੇ ਸਙ੍ਘਪ੍ਪਤ੍ਤੋ ਪਕ੍ਕਮਤਿ, ਆਹਟੋ ਹੋਤਿ ਛਨ੍ਦੋ. ਛਨ੍ਦਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨੇ ਛਨ੍ਦੇ ਸਙ੍ਘਪ੍ਪਤ੍ਤੋ ਵਿਬ੍ਭਮਤਿ…ਪੇ… ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਆਹਟੋ ਹੋਤਿ ਛਨ੍ਦੋ.

ਛਨ੍ਦਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨੇ ਛਨ੍ਦੇ ਸਙ੍ਘਪ੍ਪਤ੍ਤੋ ਸੁਤ੍ਤੋ ਨ ਆਰੋਚੇਤਿ, ਪਮਤ੍ਤੋ ਨ ਆਰੋਚੇਤਿ, ਸਮਾਪਨ੍ਨੋ ਨ ਆਰੋਚੇਤਿ, ਆਹਟੋ ਹੋਤਿ ਛਨ੍ਦੋ. ਛਨ੍ਦਹਾਰਕਸ੍ਸ ਅਨਾਪਤ੍ਤਿ.

ਛਨ੍ਦਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨੇ ਛਨ੍ਦੇ ਸਙ੍ਘਪ੍ਪਤ੍ਤੋ ਸਞ੍ਚਿਚ੍ਚ ਨ ਆਰੋਚੇਤਿ, ਆਹਟੋ ਹੋਤਿ ਛਨ੍ਦੋ. ਛਨ੍ਦਹਾਰਕਸ੍ਸ ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਦਹੁਪੋਸਥੇ ਪਾਰਿਸੁਦ੍ਧਿਂ ਦੇਨ੍ਤੇਨ ਛਨ੍ਦਮ੍ਪਿ ਦਾਤੁਂ, ਸਨ੍ਤਿ ਸਙ੍ਘਸ੍ਸ ਕਰਣੀਯਨ੍ਤਿ.

੮੯. ਞਾਤਕਾਦਿਗ੍ਗਹਣਕਥਾ

੧੬੬. ਤੇਨ ਖੋ ਪਨ ਸਮਯੇਨ ਅਞ੍ਞਤਰਂ ਭਿਕ੍ਖੁਂ ਤਦਹੁਪੋਸਥੇ ਞਾਤਕਾ ਗਣ੍ਹਿਂਸੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਂ ਤਦਹੁਪੋਸਥੇ ਞਾਤਕਾ ਗਣ੍ਹਨ੍ਤਿ. ਤੇ ਞਾਤਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਇਮਂ ਭਿਕ੍ਖੁਂ ਮੁਹੁਤ੍ਤਂ ਮੁਞ੍ਚਥ, ਯਾਵਾਯਂ ਭਿਕ੍ਖੁ ਉਪੋਸਥਂ ਕਰੋਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਤੇ ਞਾਤਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਮੁਹੁਤ੍ਤਂ ਏਕਮਨ੍ਤਂ ਹੋਥ, ਯਾਵਾਯਂ ਭਿਕ੍ਖੁ ਪਾਰਿਸੁਦ੍ਧਿਂ ਦੇਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਤੇ ਞਾਤਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਇਮਂ ਭਿਕ੍ਖੁਂ ਮੁਹੁਤ੍ਤਂ ਨਿਸ੍ਸੀਮਂ ਨੇਥ, ਯਾਵ ਸਙ੍ਘੋ ਉਪੋਸਥਂ ਕਰੋਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਨ ਤ੍ਵੇਵ ਵਗ੍ਗੇਨ ਸਙ੍ਘੇਨ ਉਪੋਸਥੋ ਕਾਤਬ੍ਬੋ. ਕਰੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਂ ਤਦਹੁਪੋਸਥੇ ਰਾਜਾਨੋ ਗਣ੍ਹਨ੍ਤਿ,…ਪੇ… ਚੋਰਾ ਗਣ੍ਹਨ੍ਤਿ – ਧੁਤ੍ਤਾ ਗਣ੍ਹਨ੍ਤਿ – ਭਿਕ੍ਖੁਪਚ੍ਚਤ੍ਥਿਕਾ ਗਣ੍ਹਨ੍ਤਿ, ਤੇ ਭਿਕ੍ਖੁਪਚ੍ਚਤ੍ਥਿਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਇਮਂ ਭਿਕ੍ਖੁਂ ਮੁਹੁਤ੍ਤਂ ਮੁਞ੍ਚਥ, ਯਾਵਾਯਂ ਭਿਕ੍ਖੁ ਉਪੋਸਥਂ ਕਰੋਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਤੇ ਭਿਕ੍ਖੁਪਚ੍ਚਤ੍ਥਿਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਮੁਹੁਤ੍ਤਂ ਏਕਮਨ੍ਤਂ ਹੋਥ, ਯਾਵਾਯਂ ਭਿਕ੍ਖੁ ਪਾਰਿਸੁਦ੍ਧਿਂ ਦੇਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਤੇ ਭਿਕ੍ਖੁਪਚ੍ਚਤ੍ਥਿਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਇਮਂ ਭਿਕ੍ਖੁਂ ਮੁਹੁਤ੍ਤਂ ਨਿਸ੍ਸੀਮਂ ਨੇਥ, ਯਾਵ ਸਙ੍ਘੋ ਉਪੋਸਥਂ ਕਰੋਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਨ ਤ੍ਵੇਵ ਵਗ੍ਗੇਨ ਸਙ੍ਘੇਨ ਉਪੋਸਥੋ ਕਾਤਬ੍ਬੋ. ਕਰੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੯੦. ਉਮ੍ਮਤ੍ਤਕਸਮ੍ਮੁਤਿ

੧੬੭. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਸਨ੍ਨਿਪਤਥ, ਭਿਕ੍ਖਵੇ, ਅਤ੍ਥਿ ਸਙ੍ਘਸ੍ਸ ਕਰਣੀਯ’’ਨ੍ਤਿ. ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਅਤ੍ਥਿ, ਭਨ੍ਤੇ, ਗਗ੍ਗੋ ਨਾਮ ਭਿਕ੍ਖੁ ਉਮ੍ਮਤ੍ਤਕੋ, ਸੋ ਅਨਾਗਤੋ’’ਤਿ.

‘‘ਦ੍ਵੇਮੇ, ਭਿਕ੍ਖਵੇ, ਉਮ੍ਮਤ੍ਤਕਾ – ਅਤ੍ਥਿ, ਭਿਕ੍ਖਵੇ, ਭਿਕ੍ਖੁ ਉਮ੍ਮਤ੍ਤਕੋ ਸਰਤਿਪਿ ਉਪੋਸਥਂ ਨਪਿ ਸਰਤਿ, ਸਰਤਿਪਿ ਸਙ੍ਘਕਮ੍ਮਂ ਨਪਿ ਸਰਤਿ, ਅਤ੍ਥਿ ਨੇਵ ਸਰਤਿ; ਆਗਚ੍ਛਤਿਪਿ ਉਪੋਸਥਂ ਨਪਿ ਆਗਚ੍ਛਤਿ, ਆਗਚ੍ਛਤਿਪਿ ਸਙ੍ਘਕਮ੍ਮਂ ਨਪਿ ਆਗਚ੍ਛਤਿ, ਅਤ੍ਥਿ ਨੇਵ ਆਗਚ੍ਛਤਿ. ਤਤ੍ਰ, ਭਿਕ੍ਖਵੇ, ਯ੍ਵਾਯਂ ਉਮ੍ਮਤ੍ਤਕੋ ਸਰਤਿਪਿ ਉਪੋਸਥਂ ਨਪਿ ਸਰਤਿ, ਸਰਤਿਪਿ ਸਙ੍ਘਕਮ੍ਮਂ ਨਪਿ ਸਰਤਿ, ਆਗਚ੍ਛਤਿਪਿ ਉਪੋਸਥਂ ਨਪਿ ਆਗਚ੍ਛਤਿ, ਆਗਚ੍ਛਤਿਪਿ ਸਙ੍ਘਕਮ੍ਮਂ ਨਪਿ ਆਗਚ੍ਛਤਿ, ਅਨੁਜਾਨਾਮਿ, ਭਿਕ੍ਖਵੇ, ਏਵਰੂਪਸ੍ਸ ਉਮ੍ਮਤ੍ਤਕਸ੍ਸ ਉਮ੍ਮਤ੍ਤਕਸਮ੍ਮੁਤ੍ਤਿਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਗਗ੍ਗੋ ਭਿਕ੍ਖੁ ਉਮ੍ਮਤ੍ਤਕੋ – ਸਰਤਿਪਿ ਉਪੋਸਥਂ ਨਪਿ ਸਰਤਿ, ਸਰਤਿਪਿ ਸਙ੍ਘਕਮ੍ਮਂ ਨਪਿ ਸਰਤਿ, ਆਗਚ੍ਛਤਿਪਿ ਉਪੋਸਥਂ ਨਪਿ ਆਗਚ੍ਛਤਿ, ਆਗਚ੍ਛਤਿਪਿ ਸਙ੍ਘਕਮ੍ਮਂ ਨਪਿ ਆਗਚ੍ਛਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਗਗ੍ਗਸ੍ਸ ਭਿਕ੍ਖੁਨੋ ਉਮ੍ਮਤ੍ਤਕਸ੍ਸ ਉਮ੍ਮਤ੍ਤਕਸਮ੍ਮੁਤਿਂ ਦਦੇਯ੍ਯ. ਸਰੇਯ੍ਯ ਵਾ ਗਗ੍ਗੋ ਭਿਕ੍ਖੁ ਉਪੋਸਥਂ ਨ ਵਾ ਸਰੇਯ੍ਯ, ਸਰੇਯ੍ਯ ਵਾ ਸਙ੍ਘਕਮ੍ਮਂ ਨ ਵਾ ਸਰੇਯ੍ਯ, ਆਗਚ੍ਛੇਯ੍ਯ ਵਾ ਉਪੋਸਥਂ ਨ ਵਾ ਆਗਚ੍ਛੇਯ੍ਯ, ਆਗਚ੍ਛੇਯ੍ਯ ਵਾ ਸਙ੍ਘਕਮ੍ਮਂ ਨ ਵਾ ਆਗਚ੍ਛੇਯ੍ਯ, ਸਙ੍ਘੋ ਸਹ ਵਾ ਗਗ੍ਗੇਨ ਵਿਨਾ ਵਾ ਗਗ੍ਗੇਨ ਉਪੋਸਥਂ ਕਰੇਯ੍ਯ, ਸਙ੍ਘਕਮ੍ਮਂ ਕਰੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਗਗ੍ਗੋ ਭਿਕ੍ਖੁ ਉਮ੍ਮਤ੍ਤਕੋ – ਸਰਤਿਪਿ ਉਪੋਸਥਂ ਨਪਿ ਸਰਤਿ, ਸਰਤਿਪਿ ਸਙ੍ਘਕਮ੍ਮਂ ਨਪਿ ਸਰਤਿ, ਆਗਚ੍ਛਤਿਪਿ ਉਪੋਸਥਂ ਨਪਿ ਆਗਚ੍ਛਤਿ, ਆਗਚ੍ਛਤਿਪਿ ਸਙ੍ਘਕਮ੍ਮਂ ਨਪਿ ਆਗਚ੍ਛਤਿ. ਸਙ੍ਘੋ ਗਗ੍ਗਸ੍ਸ ਭਿਕ੍ਖੁਨੋ ਉਮ੍ਮਤ੍ਤਕਸ੍ਸ ਉਮ੍ਮਤ੍ਤਕਸਮ੍ਮੁਤਿਂ ਦੇਤਿ. ਸਰੇਯ੍ਯ ਵਾ ਗਗ੍ਗੋ ਭਿਕ੍ਖੁ ਉਪੋਸਥਂ ਨ ਵਾ ਸਰੇਯ੍ਯ, ਸਰੇਯ੍ਯ ਵਾ ਸਙ੍ਘਕਮ੍ਮਂ ਨ ਵਾ ਸਰੇਯ੍ਯਂ, ਆਗਚ੍ਛੇਯ੍ਯ ਵਾ ਉਪੋਸਥਂ ਨ ਵਾ ਆਗਚ੍ਛੇਯ੍ਯ, ਆਗਚ੍ਛੇਯ੍ਯ ਵਾ ਸਙ੍ਘਕਮ੍ਮਂ ਨ ਵਾ ਆਗਚ੍ਛੇਯ੍ਯ, ਸਙ੍ਘੋ ਸਹ ਵਾ ਗਗ੍ਗੇਨ, ਵਿਨਾ ਵਾ ਗਗ੍ਗੇਨ ਉਪੋਸਥਂ ਕਰਿਸ੍ਸਤਿ, ਸਙ੍ਘਕਮ੍ਮਂ ਕਰਿਸ੍ਸਤਿ. ਯਸ੍ਸਾਯਸ੍ਮਤੋ ਖਮਤਿ ਗਗ੍ਗਸ੍ਸ ਭਿਕ੍ਖੁਨੋ ਉਮ੍ਮਤ੍ਤਕਸ੍ਸ ਉਮ੍ਮਤ੍ਤਕਸਮ੍ਮੁਤਿਯਾ ਦਾਨਂ – ਸਰੇਯ੍ਯ ਵਾ ਗਗ੍ਗੋ ਭਿਕ੍ਖੁ ਉਪੋਸਥਂ ਨ ਵਾ ਸਰੇਯ੍ਯ, ਸਰੇਯ੍ਯ ਵਾ ਸਙ੍ਘਕਮ੍ਮਂ ਨ ਵਾ ਸਰੇਯ੍ਯ, ਆਗਚ੍ਛੇਯ੍ਯ ਵਾ ਉਪੋਸਥਂ ਨ ਵਾ ਆਗਚ੍ਛੇਯ੍ਯ, ਆਗਚ੍ਛੇਯ੍ਯ ਵਾ ਸਙ੍ਘਕਮ੍ਮਂ ਨ ਵਾ ਆਗਚ੍ਛੇਯ੍ਯ, ਸਙ੍ਘੋ ਸਹ ਵਾ ਗਗ੍ਗੇਨ, ਵਿਨਾ ਵਾ ਗਗ੍ਗੇਨ ਉਪੋਸਥਂ ਕਰਿਸ੍ਸਤਿ, ਸਙ੍ਘਕਮ੍ਮਂ ਕਰਿਸ੍ਸਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨਾ ਸਙ੍ਘੇਨ ਗਗ੍ਗਸ੍ਸ ਭਿਕ੍ਖੁਨੋ ਉਮ੍ਮਤ੍ਤਕਸ੍ਸ ਉਮ੍ਮਤ੍ਤਕਸਮ੍ਮੁਤਿ. ਸਰੇਯ੍ਯ ਵਾ ਗਗ੍ਗੋ ਭਿਕ੍ਖੁ ਉਪੋਸਥਂ ਨ ਵਾ ਸਰੇਯ੍ਯ, ਸਰੇਯ੍ਯ ਵਾ ਸਙ੍ਘਕਮ੍ਮਂ ਨ ਵਾ ਸਰੇਯ੍ਯ, ਆਗਚ੍ਛੇਯ੍ਯ ਵਾ ਉਪੋਸਥਂ ਨ ਵਾ ਆਗਚ੍ਛੇਯ੍ਯ, ਆਗਚ੍ਛੇਯ੍ਯ ਵਾ ਸਙ੍ਘਕਮ੍ਮਂ ਨ ਵਾ ਆਗਚ੍ਛੇਯ੍ਯ, ਸਙ੍ਘੋ ਸਹ ਵਾ ਗਗ੍ਗੇਨ ਵਿਨਾ ਵਾ ਗਗ੍ਗੇਨ ਉਪੋਸਥਂ ਕਰਿਸ੍ਸਤਿ, ਸਙ੍ਘਕਮ੍ਮਂ ਕਰਿਸ੍ਸਤਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੯੧. ਸਙ੍ਘੁਪੋਸਥਾਦਿਪ੍ਪਭੇਦਂ

੧੬੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਚਤ੍ਤਾਰੋ ਭਿਕ੍ਖੂ ਵਿਹਰਨ੍ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਉਪੋਸਥੋ ਕਾਤਬ੍ਬੋ’ਤਿ, ਮਯਞ੍ਚਮ੍ਹਾ ਚਤ੍ਤਾਰੋ ਜਨਾ, ਕਥਂ ਨੁ ਖੋ ਅਮ੍ਹੇਹਿ ਉਪੋਸਥੋ ਕਾਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਚਤੁਨ੍ਨਂ ਪਾਤਿਮੋਕ੍ਖਂ ਉਦ੍ਦਿਸਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਤਯੋ ਭਿਕ੍ਖੂ ਵਿਹਰਨ੍ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਅਨੁਞ੍ਞਾਤਂ ਚਤੁਨ੍ਨਂ ਪਾਤਿਮੋਕ੍ਖਂ ਉਦ੍ਦਿਸਿਤੁਂ, ਮਯਞ੍ਚਮ੍ਹਾ ਤਯੋ ਜਨਾ, ਕਥਂ ਨੁ ਖੋ ਅਮ੍ਹੇਹਿ ਉਪੋਸਥੋ ਕਾਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਿਣ੍ਣਂ ਪਾਰਿਸੁਦ੍ਧਿਉਪੋਸਥਂ ਕਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਤੇ ਭਿਕ੍ਖੂ ਞਾਪੇਤਬ੍ਬਾ –

‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ. ਅਜ੍ਜੁਪੋਸਥੋ ਪਨ੍ਨਰਸੋ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਮਯਂ ਅਞ੍ਞਮਞ੍ਞਂ ਪਾਰਿਸੁਦ੍ਧਿਉਪੋਸਥਂ ਕਰੇਯ੍ਯਾਮਾ’’ਤਿ.

ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਤੇ ਭਿਕ੍ਖੂ ਏਵਮਸ੍ਸੁ ਵਚਨੀਯਾ – ‘‘ਪਰਿਸੁਦ੍ਧੋ ਅਹਂ, ਆਵੁਸੋ; ਪਰਿਸੁਦ੍ਧੋਤਿ ਮਂ ਧਾਰੇਥ. ਪਰਿਸੁਦ੍ਧੋ ਅਹਂ, ਆਵੁਸੋ; ਪਰਿਸੁਦ੍ਧੋਤਿ ਮਂ ਧਾਰੇਥ. ਪਰਿਸੁਦ੍ਧੋ ਅਹਂ, ਆਵੁਸੋ; ਪਰਿਸੁਦ੍ਧੋਤਿ ਮਂ ਧਾਰੇਥਾ’’ਤਿ.

ਨਵਕੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਤੇ ਭਿਕ੍ਖੂ ਏਵਮਸ੍ਸੁ ਵਚਨੀਯਾ – ‘‘ਪਰਿਸੁਦ੍ਧੋ ਅਹਂ, ਭਨ੍ਤੇ; ਪਰਿਸੁਦ੍ਧੋਤਿ ਮਂ ਧਾਰੇਥ. ਪਰਿਸੁਦ੍ਧੋ ਅਹਂ, ਭਨ੍ਤੇ; ਪਰਿਸੁਦ੍ਧੋਤਿ ਮਂ ਧਾਰੇਥ. ਪਰਿਸੁਦ੍ਧੋ ਅਹਂ, ਭਨ੍ਤੇ; ਪਰਿਸੁਦ੍ਧੋਤਿ ਮਂ ਧਾਰੇਥਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਦ੍ਵੇ ਭਿਕ੍ਖੂ ਵਿਹਰਨ੍ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਅਨੁਞ੍ਞਾਤਂ ਚਤੁਨ੍ਨਂ ਪਾਤਿਮੋਕ੍ਖਂ ਉਦ੍ਦਿਸਿਤੁਂ, ਤਿਣ੍ਣਨ੍ਨਂ ਪਾਰਿਸੁਦ੍ਧਿਉਪੋਸਥਂ ਕਾਤੁਂ. ਮਯਞ੍ਚਮ੍ਹਾ ਦ੍ਵੇ ਜਨਾ. ਕਥਂ ਨੁ ਖੋ ਅਮ੍ਹੇਹਿ ਉਪੋਸਥੋ ਕਾਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵਿਨ੍ਨਂ ਪਾਰਿਸੁਦ੍ਧਿਉਪੋਸਥਂ ਕਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬੋ. ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਨਵੋ ਭਿਕ੍ਖੁ ਏਵਮਸ੍ਸ ਵਚਨੀਯੋ – ‘‘ਪਰਿਸੁਦ੍ਧੋ ਅਹਂ, ਆਵੁਸੋ; ਪਰਿਸੁਦ੍ਧੋਤਿ ਮਂ ਧਾਰੇਹਿ. ਪਰਿਸੁਦ੍ਧੋ ਅਹਂ, ਆਵੁਸੋ; ਪਰਿਸੁਦ੍ਧੋਤਿ ਮਂ ਧਾਰੇਹਿ. ਪਰਿਸੁਦ੍ਧੋ ਅਹਂ, ਆਵੁਸੋ; ਪਰਿਸੁਦ੍ਧੋਤਿ ਮਂ ਧਾਰੇਹੀ’’ਤਿ.

ਨਵਕੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਥੇਰੋ ਭਿਕ੍ਖੁ ਏਵਮਸ੍ਸ ਵਚਨੀਯੋ – ‘‘ਪਰਿਸੁਦ੍ਧੋ ਅਹਂ, ਭਨ੍ਤੇ; ਪਰਿਸੁਦ੍ਧੋਤਿ ਮਂ ਧਾਰੇਥ. ਪਰਿਸੁਦ੍ਧੋ ਅਹਂ, ਭਨ੍ਤੇ; ਪਰਿਸੁਦ੍ਧੋਤਿ ਮਂ ਧਾਰੇਥ. ਪਰਿਸੁਦ੍ਧੋ ਅਹਂ, ਭਨ੍ਤੇ; ਪਰਿਸੁਦ੍ਧੋਤਿ ਮਂ ਧਾਰੇਥਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਏਕੋ ਭਿਕ੍ਖੁ ਵਿਹਰਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਅਨੁਞ੍ਞਾਤਂ ਚਤੁਨ੍ਨਂ ਪਾਤਿਮੋਕ੍ਖਂ ਉਦ੍ਦਿਸਿਤੁਂ, ਤਿਣ੍ਣਨ੍ਨਂ ਪਾਰਿਸੁਦ੍ਧਿਉਪੋਸਥਂ ਕਾਤੁਂ, ਦ੍ਵਿਨ੍ਨਂ ਪਾਰਿਸੁਦ੍ਧਿਉਪੋਸਥਂ ਕਾਤੁਂ. ਅਹਞ੍ਚਮ੍ਹਿ ਏਕਕੋ. ਕਥਂ ਨੁ ਖੋ ਮਯਾ ਉਪੋਸਥੋ ਕਾਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਏਕੋ ਭਿਕ੍ਖੁ ਵਿਹਰਤਿ. ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਯਤ੍ਥ ਭਿਕ੍ਖੂ ਪਟਿਕ੍ਕਮਨ੍ਤਿ ਉਪਟ੍ਠਾਨਸਾਲਾਯ ਵਾ, ਮਣ੍ਡਪੇ ਵਾ, ਰੁਕ੍ਖਮੂਲੇ ਵਾ, ਸੋ ਦੇਸੋ ਸਮ੍ਮਜ੍ਜਿਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਪਦੀਪਂ ਕਤ੍ਵਾ ਨਿਸੀਦਿਤਬ੍ਬਂ. ਸਚੇ ਅਞ੍ਞੇ ਭਿਕ੍ਖੂ ਆਗਚ੍ਛਨ੍ਤਿ, ਤੇਹਿ ਸਦ੍ਧਿਂ ਉਪੋਸਥੋ ਕਾਤਬ੍ਬੋ. ਨੋ ਚੇ ਆਗਚ੍ਛਨ੍ਤਿ, ਅਜ੍ਜ ਮੇ ਉਪੋਸਥੋਤਿ ਅਧਿਟ੍ਠਾਤਬ੍ਬੋ. ਨੋ ਚੇ ਅਧਿਟ੍ਠਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

ਤਤ੍ਰ, ਭਿਕ੍ਖਵੇ, ਯਤ੍ਥ ਚਤ੍ਤਾਰੋ ਭਿਕ੍ਖੂ ਵਿਹਰਨ੍ਤਿ, ਨ ਏਕਸ੍ਸ ਪਾਰਿਸੁਦ੍ਧਿਂ ਆਹਰਿਤ੍ਵਾ ਤੀਹਿ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦਿਸੇਯ੍ਯੁਂ ਚੇ, ਆਪਤ੍ਤਿ ਦੁਕ੍ਕਟਸ੍ਸ. ਤਤ੍ਰ, ਭਿਕ੍ਖਵੇ, ਯਤ੍ਥ ਤਯੋ ਭਿਕ੍ਖੂ ਵਿਹਰਨ੍ਤਿ, ਨ ਏਕਸ੍ਸ ਪਾਰਿਸੁਦ੍ਧਿਂ ਆਹਰਿਤ੍ਵਾ ਦ੍ਵੀਹਿ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ. ਕਰੇਯ੍ਯੁਂ ਚੇ, ਆਪਤ੍ਤਿ ਦੁਕ੍ਕਟਸ੍ਸ. ਤਤ੍ਰ, ਭਿਕ੍ਖਵੇ, ਯਤ੍ਥ ਦ੍ਵੇ ਭਿਕ੍ਖੂ ਵਿਹਰਨ੍ਤਿ, ਨ ਏਕਸ੍ਸ ਪਾਰਿਸੁਦ੍ਧਿਂ ਆਹਰਿਤ੍ਵਾ ਏਕੇਨ ਅਧਿਟ੍ਠਾਤਬ੍ਬੋ. ਅਧਿਟ੍ਠਹੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੯੨. ਆਪਤ੍ਤਿਪਟਿਕਮ੍ਮਵਿਧਿ

੧੬੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਤਦਹੁਪੋਸਥੇ ਆਪਤ੍ਤਿਂ ਆਪਨ੍ਨੋ ਹੋਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਸਾਪਤ੍ਤਿਕੇਨ ਉਪੋਸਥੋ ਕਾਤਬ੍ਬੋ’ਤਿ. ਅਹਞ੍ਚਮ੍ਹਿ ਆਪਤ੍ਤਿਂ ਆਪਨ੍ਨੋ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁਪੋਸਥੇ ਆਪਤ੍ਤਿਂ ਆਪਨ੍ਨੋ ਹੋਤਿ. ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ, ਤਂ ਪਟਿਦੇਸੇਮੀ’’ਤਿ. ਤੇਨ ਵਤ੍ਤਬ੍ਬੋ – ‘‘ਪਸ੍ਸਸੀ’’ਤਿ. ‘‘ਆਮ ਪਸ੍ਸਾਮੀ’’ਤਿ. ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁਪੋਸਥੇ ਆਪਤ੍ਤਿਯਾ ਵੇਮਤਿਕੋ ਹੋਤਿ. ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਾਯ ਆਪਤ੍ਤਿਯਾ ਵੇਮਤਿਕੋ; ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ, ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ ਵਤ੍ਵਾ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਸੋਤਬ੍ਬਂ, ਨ ਤ੍ਵੇਵ ਤਪ੍ਪਚ੍ਚਯਾ ਉਪੋਸਥਸ੍ਸ ਅਨ੍ਤਰਾਯੋ ਕਾਤਬ੍ਬੋਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਭਾਗਂ ਆਪਤ੍ਤਿਂ ਦੇਸੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਭਾਗਾ ਆਪਤ੍ਤਿ ਦੇਸੇਤਬ੍ਬਾ. ਯੋ ਦੇਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਭਾਗਂ ਆਪਤ੍ਤਿਂ ਪਟਿਗ੍ਗਣ੍ਹਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਭਾਗਾ ਆਪਤ੍ਤਿ ਪਟਿਗ੍ਗਹੇਤਬ੍ਬਾ. ਯੋ ਪਟਿਗ੍ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੯੩. ਆਪਤ੍ਤਿਆਵਿਕਰਣਵਿਧਿ

੧੭੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇ ਆਪਤ੍ਤਿਂ ਸਰਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਸਾਪਤ੍ਤਿਕੇਨ ਉਪੋਸਥੋ ਕਾਤਬ੍ਬੋ’ਤਿ. ਅਹਞ੍ਚਮ੍ਹਿ ਆਪਤ੍ਤਿਂ ਆਪਨ੍ਨੋ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇ ਆਪਤ੍ਤਿਂ ਸਰਤਿ. ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਾਮਨ੍ਤੋ ਭਿਕ੍ਖੁ ਏਵਮਸ੍ਸ ਵਚਨੀਯੋ – ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ. ਇਤੋ ਵੁਟ੍ਠਹਿਤ੍ਵਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ ਵਤ੍ਵਾ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਸੋਤਬ੍ਬਂ, ਨ ਤ੍ਵੇਵ ਤਪ੍ਪਚ੍ਚਯਾ ਉਪੋਸਥਸ੍ਸ ਅਨ੍ਤਰਾਯੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇ ਆਪਤ੍ਤਿਯਾ ਵੇਮਤਿਕੋ ਹੋਤਿ. ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਾਮਨ੍ਤੋ ਭਿਕ੍ਖੁ ਏਵਮਸ੍ਸ ਵਚਨੀਯੋ – ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਾਯ ਆਪਤ੍ਤਿਯਾ ਵੇਮਤਿਕੋ. ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ, ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ ਵਤ੍ਵਾ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਸੋਤਬ੍ਬਂ; ਨ ਤ੍ਵੇਵ ਤਪ੍ਪਚ੍ਚਯਾ ਉਪੋਸਥਸ੍ਸ ਅਨ੍ਤਰਾਯੋ ਕਾਤਬ੍ਬੋਤਿ.

੯੪. ਸਭਾਗਾਪਤ੍ਤਿਪਟਿਕਮ੍ਮਵਿਧਿ

੧੭੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ ਹੋਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਸਭਾਗਾ ਆਪਤ੍ਤਿ ਦੇਸੇਤਬ੍ਬਾ, ਨ ਸਭਾਗਾ ਆਪਤ੍ਤਿ ਪਟਿਗ੍ਗਹੇਤਬ੍ਬਾ’ਤਿ. ਅਯਞ੍ਚ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ ਹੋਤਿ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ – ਗਚ੍ਛਾਵੁਸੋ, ਤਂ ਆਪਤ੍ਤਿਂ ਪਟਿਕਰਿਤ੍ਵਾ ਆਗਚ੍ਛ; ਮਯਂ ਤੇ ਸਨ੍ਤਿਕੇ ਆਪਤ੍ਤਿਂ ਪਟਿਕਰਿਸ੍ਸਾਮਾਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ. ਯਦਾ ਅਞ੍ਞਂ ਭਿਕ੍ਖੁਂ ਸੁਦ੍ਧਂ ਅਨਾਪਤ੍ਤਿਕਂ ਪਸ੍ਸਿਸ੍ਸਤਿ, ਤਦਾ ਤਸ੍ਸ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’’ਤਿ ਵਤ੍ਵਾ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ, ਨ ਤ੍ਵੇਵ ਤਪ੍ਪਚ੍ਚਯਾ ਉਪੋਸਥਸ੍ਸ ਅਨ੍ਤਰਾਯੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਬ੍ਬੋ ਸਙ੍ਘੋ ਸਭਾਗਾਯ ਆਪਤ੍ਤਿਯਾ ਵੇਮਤਿਕੋ ਹੋਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸਬ੍ਬੋ ਸਙ੍ਘੋ ਸਭਾਗਾਯ ਆਪਤ੍ਤਿਯਾ ਵੇਮਤਿਕੋ. ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਤਿ, ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’’ਤਿ ਵਤ੍ਵਾ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ; ਨ ਤ੍ਵੇਵ ਤਪ੍ਪਚ੍ਚਯਾ ਉਪੋਸਥਸ੍ਸ ਅਨ੍ਤਰਾਯੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸੂਪਗਤੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ ਹੋਤਿ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ – ਗਚ੍ਛਾਵੁਸੋ, ਤਂ ਆਪਤ੍ਤਿਂ ਪਟਿਕਰਿਤ੍ਵਾ ਆਗਚ੍ਛ; ਮਯਂ ਤੇ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮਾਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਏਕੋ ਭਿਕ੍ਖੁ ਸਤ੍ਤਾਹਕਾਲਿਕਂ ਪਾਹੇਤਬ੍ਬੋ – ਗਚ੍ਛਾਵੁਸੋ, ਤਂ ਆਪਤ੍ਤਿਂ ਪਟਿਕਰਿਤ੍ਵਾ ਆਗਚ੍ਛ; ਮਯਂ ਤੇ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮਾਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਨ ਜਾਨਾਤਿ ਤਸ੍ਸਾ ਆਪਤ੍ਤਿਯਾ ਨਾਮਗੋਤ੍ਤਂ. ਤਤ੍ਥ ਅਞ੍ਞੋ ਭਿਕ੍ਖੁ ਆਗਚ੍ਛਤਿ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਤਮੇਨਂ ਅਞ੍ਞਤਰੋ ਭਿਕ੍ਖੁ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਯੋ ਨੁ ਖੋ, ਆਵੁਸੋ, ਏਵਞ੍ਚੇਵਞ੍ਚ ਕਰੋਤਿ, ਕਿਂ ਨਾਮ ਸੋ ਆਪਤ੍ਤਿਂ ਆਪਜ੍ਜਤੀ’’ਤਿ? ਸੋ ਏਵਮਾਹ – ‘‘ਯੋ ਖੋ, ਆਵੁਸੋ, ਏਵਞ੍ਚੇਵਞ੍ਚ ਕਰੋਤਿ, ਇਮਂ ਨਾਮ ਸੋ ਆਪਤ੍ਤਿਂ ਆਪਜ੍ਜਤਿ. ਇਮਂ ਨਾਮ ਤ੍ਵਂ, ਆਵੁਸੋ, ਆਪਤ੍ਤਿਂ ਆਪਨ੍ਨੋ; ਪਟਿਕਰੋਹਿ ਤਂ ਆਪਤ੍ਤਿ’’ਨ੍ਤਿ. ਸੋ ਏਵਮਾਹ – ‘‘ਨ ਖੋ ਅਹਂ, ਆਵੁਸੋ, ਏਕੋਵ ਇਮਂ ਆਪਤ੍ਤਿਂ ਆਪਨ੍ਨੋ; ਅਯਂ ਸਬ੍ਬੋ ਸਙ੍ਘੋ ਇਮਂ ਆਪਤ੍ਤਿਂ ਆਪਨ੍ਨੋ’’ਤਿ. ਸੋ ਏਵਮਾਹ – ‘‘ਕਿਂ ਤੇ, ਆਵੁਸੋ, ਕਰਿਸ੍ਸਤਿ ਪਰੋ ਆਪਨ੍ਨੋ ਵਾ ਅਨਾਪਨ੍ਨੋ ਵਾ. ਇਙ੍ਘ, ਤ੍ਵਂ, ਆਵੁਸੋ, ਸਕਾਯ ਆਪਤ੍ਤਿਯਾ ਵੁਟ੍ਠਾਹੀ’’ਤਿ. ਅਥ ਖੋ ਸੋ ਭਿਕ੍ਖੁ ਤਸ੍ਸ ਭਿਕ੍ਖੁਨੋ ਵਚਨੇਨ ਤਂ ਆਪਤ੍ਤਿਂ ਪਟਿਕਰਿਤ੍ਵਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤੇ ਭਿਕ੍ਖੂ ਏਤਦਵੋਚ – ‘‘ਯੋ ਕਿਰ, ਆਵੁਸੋ, ਏਵਞ੍ਚੇਵਞ੍ਚ ਕਰੋਤਿ, ਇਮਂ ਨਾਮ ਸੋ ਆਪਤ੍ਤਿਂ ਆਪਜ੍ਜਤਿ. ਇਮਂ ਨਾਮ ਤੁਮ੍ਹੇ, ਆਵੁਸੋ, ਆਪਤ੍ਤਿਂ ਆਪਨ੍ਨਾ; ਪਟਿਕਰੋਥ ਤਂ ਆਪਤ੍ਤਿ’’ਨ੍ਤਿ. ਅਥ ਖੋ ਤੇ ਭਿਕ੍ਖੂ ਨ ਇਚ੍ਛਿਂਸੁ ਤਸ੍ਸ ਭਿਕ੍ਖੁਨੋ ਵਚਨੇਨ ਤਂ ਆਪਤ੍ਤਿਂ ਪਟਿਕਾਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਨ ਜਾਨਾਤਿ ਤਸ੍ਸਾ ਆਪਤ੍ਤਿਯਾ ਨਾਮਗੋਤ੍ਤਂ. ਤਤ੍ਥ ਅਞ੍ਞੋ ਭਿਕ੍ਖੁ ਆਗਚ੍ਛਤਿ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਤਮੇਨਂ ਅਞ੍ਞਤਰੋ ਭਿਕ੍ਖੁ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਏਵਂ ਵਦੇਤਿ – ‘‘ਯੋ ਨੁ ਖੋ, ਆਵੁਸੋ, ਏਵਞ੍ਚੇਵਞ੍ਚ ਕਰੋਤਿ, ਕਿਂ ਨਾਮ ਸੋ ਆਪਤ੍ਤਿਂ ਆਪਜ੍ਜਤੀ’’ਤਿ? ਸੋ ਏਵਂ ਵਦੇਤਿ – ‘‘ਯੋ ਖੋ, ਆਵੁਸੋ, ਏਵਞ੍ਚੇਵਞ੍ਚ ਕਰੋਤਿ, ਇਮਂ ਨਾਮ ਸੋ ਆਪਤ੍ਤਿਂ ਆਪਜ੍ਜਤਿ. ਇਮਂ ਨਾਮ ਤ੍ਵਂ, ਆਵੁਸੋ, ਆਪਤ੍ਤਿਂ ਆਪਨ੍ਨੋ; ਪਟਿਕਰੋਹਿ ਤਂ ਆਪਤ੍ਤਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨ ਖੋ ਅਹਂ, ਆਵੁਸੋ, ਏਕੋਵ ਇਮਂ ਆਪਤ੍ਤਿਂ ਆਪਨ੍ਨੋ. ਅਯਂ ਸਬ੍ਬੋ ਸਙ੍ਘੋ ਇਮਂ ਆਪਤ੍ਤਿਂ ਆਪਨ੍ਨੋ’’ਤਿ. ਸੋ ਏਵਂ ਵਦੇਤਿ – ‘‘ਕਿਂ ਤੇ, ਆਵੁਸੋ, ਕਰਿਸ੍ਸਤਿ ਪਰੋ ਆਪਨ੍ਨੋ ਵਾ ਅਨਾਪਨ੍ਨੋ ਵਾ. ਇਙ੍ਘ, ਤ੍ਵਂ, ਆਵੁਸੋ, ਸਕਾਯ ਆਪਤ੍ਤਿਯਾ ਵੁਟ੍ਠਾਹੀ’’ਤਿ. ਸੋ ਚੇ, ਭਿਕ੍ਖਵੇ, ਭਿਕ੍ਖੁ ਤਸ੍ਸ ਭਿਕ੍ਖੁਨੋ ਵਚਨੇਨ ਤਂ ਆਪਤ੍ਤਿਂ ਪਟਿਕਰਿਤ੍ਵਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤੇ ਭਿਕ੍ਖੂ ਏਵਂ ਵਦੇਤਿ – ‘‘ਯੋ ਕਿਰ, ਆਵੁਸੋ, ਏਵਞ੍ਚੇਵਞ੍ਚ ਕਰੋਤਿ ਇਮਂ ਨਾਮ ਸੋ ਆਪਤ੍ਤਿਂ ਆਪਜ੍ਜਤਿ, ਇਮਂ ਨਾਮ ਤੁਮ੍ਹੇ ਆਵੁਸੋ ਆਪਤ੍ਤਿਂ ਆਪਨ੍ਨਾ, ਪਟਿਕਰੋਥ ਤਂ ਆਪਤ੍ਤਿ’’ਨ੍ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਤਸ੍ਸ ਭਿਕ੍ਖੁਨੋ ਵਚਨੇਨ ਤਂ ਆਪਤ੍ਤਿਂ ਪਟਿਕਰੇਯ੍ਯੁਂ, ਇਚ੍ਚੇਤਂ ਕੁਸਲਂ. ਨੋ ਚੇ ਪਟਿਕਰੇਯ੍ਯੁਂ, ਨ ਤੇ, ਭਿਕ੍ਖਵੇ, ਭਿਕ੍ਖੂ ਤੇਨ ਭਿਕ੍ਖੁਨਾ ਅਕਾਮਾ ਵਚਨੀਯਾਤਿ.

ਚੋਦਨਾਵਤ੍ਥੁਭਾਣਵਾਰੋ ਨਿਟ੍ਠਿਤੋ ਦੁਤਿਯੋ.

੯੫. ਅਨਾਪਤ੍ਤਿਪਨ੍ਨਰਸਕਂ

੧੭੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਿਂਸੁ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਿਂਸੁ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਅਕਂਸੁ, ਪਾਤਿਮੋਕ੍ਖਂ ਉਦ੍ਦਿਸਿਂਸੁ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਿਂਸੁ ਬਹੁਤਰਾ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਅਵਸੇਸਂ ਸੋਤਬ੍ਬਂ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਅਵਸੇਸਂ ਸੋਤਬ੍ਬਂ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਾਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਅਨਾਪਤ੍ਤਿ.

ਅਨਾਪਤ੍ਤਿਪਨ੍ਨਰਸਕਂ ਨਿਟ੍ਠਿਤਂ.

੯੬. ਵਗ੍ਗਾਵਗ੍ਗਸਞ੍ਞੀਪਨ੍ਨਰਸਕਂ

੧੭੩. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਵਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਅਵਸੇਸਂ ਸੋਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਵਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਅਵਸੇਸਂ ਸੋਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਵਗ੍ਗਸਞ੍ਞਿਨੋ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ…ਪੇ… ਅਵੁਟ੍ਠਿਤਾਯ ਪਰਿਸਾਯ…ਪੇ… ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ…ਪੇ… ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ…ਪੇ… ਸਮਸਮਾ…ਪੇ… ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਵਗ੍ਗਾਵਗ੍ਗਸਞ੍ਞਿਪਨ੍ਨਰਸਕਂ ਨਿਟ੍ਠਿਤਂ.

੯੭. ਵੇਮਤਿਕਪਨ੍ਨਰਸਕਂ

੧੭੪. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ, ਕਪ੍ਪਤਿ ਨੁ ਖੋ ਅਮ੍ਹਾਕਂ ਉਪੋਸਥੋ ਕਾਤੁਂ ਨ ਨੁ ਖੋ ਕਪ੍ਪਤੀਤਿ, ਵੇਮਤਿਕਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ, ਤੇ ‘‘ਕਪ੍ਪਤਿ ਨੁ ਖੋ ਅਮ੍ਹਾਕਂ ਉਪੋਸਥੋ ਕਾਤੁਂ, ਨ ਨੁ ਖੋ ਕਪ੍ਪਤੀ’’ਤਿ, ਵੇਮਤਿਕਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਅਵਸੇਸਂ ਸੋਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾਤਿ, ਤੇ ਕਪ੍ਪਤਿ ਨੁ ਖੋ ਅਮ੍ਹਾਕਂ ਉਪੋਸਥੋ ਕਾਤੁਂ, ਨ ਨੁ ਖੋ ਕਪ੍ਪਤੀਤਿ, ਵੇਮਤਿਕਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਅਵਸੇਸਂ ਸੋਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ, ‘‘ਕਪ੍ਪਤਿ ਨੁ ਖੋ ਅਮ੍ਹਾਕਂ ਉਪੋਸਥੋ ਕਾਤੁਂ ਨ ਨੁ ਖੋ ਕਪ੍ਪਤੀ’’ਤਿ, ਵੇਮਤਿਕਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ,…ਪੇ… ਅਵੁਟ੍ਠਿਤਾਯ ਪਰਿਸਾਯ…ਪੇ… ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ…ਪੇ… ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ…ਪੇ… ਸਮਸਮਾ…ਪੇ… ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਵੇਮਤਿਕਪਨ੍ਨਰਸਕਂ ਨਿਟ੍ਠਿਤਂ.

੯੮. ਕੁਕ੍ਕੁਚ੍ਚਪਕਤਪਨ੍ਨਰਸਕਂ

੧੭੫. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤੇਵ ਅਮ੍ਹਾਕਂ ਉਪੋਸਥੋ ਕਾਤੁਂ ਨਾਮ੍ਹਾਕਂ ਨ ਕਪ੍ਪਤੀ’’ਤਿ, ਕੁਕ੍ਕੁਚ੍ਚਪਕਤਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤੇਵ ਅਮ੍ਹਾਕਂ ਉਪੋਸਥੋ ਕਾਤੁਂ ਨਾਮ੍ਹਾਕਂ ਨ ਕਪ੍ਪਤੀ’’ਤਿ, ਕੁਕ੍ਕੁਚ੍ਚਪਕਤਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਅਵਸੇਸਂ ਸੋਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤੇਵ ਅਮ੍ਹਾਕਂ ਉਪੋਸਥੋ ਕਾਤੁਂ, ਨਾਮ੍ਹਾਕਂ ਨ ਕਪ੍ਪਤੀ’’ਤਿ, ਕੁਕ੍ਕੁਚ੍ਚਪਕਤਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਅਵਸੇਸਂ ਸੋਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤੇਵ ਅਮ੍ਹਾਕਂ ਉਪੋਸਥੋ ਕਾਤੁਂ ਨਾਮ੍ਹਾਕਂ ਨ ਕਪ੍ਪਤੀ’’ਤਿ, ਕੁਕ੍ਕੁਚ੍ਚਪਕਤਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ,…ਪੇ… ਅਵੁਟ੍ਠਿਤਾਯ ਪਰਿਸਾਯ…ਪੇ… ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ…ਪੇ… ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ…ਪੇ… ਸਮਸਮਾ …ਪੇ… ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਕੁਕ੍ਕੁਚ੍ਚਪਕਤਪਨ੍ਨਰਸਕਂ ਨਿਟ੍ਠਿਤਂ.

੯੯. ਭੇਦਪੁਰੇਕ੍ਖਾਰਪਨ੍ਨਰਸਕਂ

੧੭੬. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਅਵਸੇਸਂ ਸੋਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਸ੍ਸਮਾਨੇ ਪਾਤਿਮੋਕ੍ਖੇ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਅਵਸੇਸਂ ਸੋਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ, ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਤੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ. ਉਦ੍ਦੇਸਕਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਭੇਦਪੁਰੇਕ੍ਖਾਰਪਨ੍ਨਰਸਕਂ ਨਿਟ੍ਠਿਤਂ.

ਪਞ੍ਚਵੀਸਤਿਕਾ ਨਿਟ੍ਠਿਤਾ.

੧੦੦. ਸੀਮੋਕ੍ਕਨ੍ਤਿਕਪੇਯ੍ਯਾਲਂ

੧੭੭. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਞ੍ਞੇ ਆਵਾਸਿਕਾ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਮਨ੍ਤੀ’’ਤਿ …ਪੇ… ਤੇ ਨ ਜਾਨਨ੍ਤਿ ‘‘ਅਞ੍ਞੇ ਆਵਾਸਿਕਾ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਨ੍ਤਾ’’ਤਿ…ਪੇ… ਤੇ ਨ ਪਸ੍ਸਨ੍ਤਿ ਅਞ੍ਞੇ ਆਵਾਸਿਕੇ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਮਨ੍ਤੇ …ਪੇ… ਤੇ ਨ ਪਸ੍ਸਨ੍ਤਿ ਅਞ੍ਞੇ ਆਵਾਸਿਕੇ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਨ੍ਤੇ…ਪੇ… ਤੇ ਨ ਸੁਣਨ੍ਤਿ ‘‘ਅਞ੍ਞੇ ਆਵਾਸਿਕਾ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਮਨ੍ਤੀ’’ਤਿ…ਪੇ… ਤੇ ਨ ਸੁਣਨ੍ਤਿ ‘‘ਅਞ੍ਞੇ ਆਵਾਸਿਕਾ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਨ੍ਤਾ’’ਤਿ…ਪੇ….

ਆਵਾਸਿਕੇਨ ਆਵਾਸਿਕਾ ਏਕਸਤਪਞ੍ਚਸਤ੍ਤਤਿ ਤਿਕਨਯਤੋ, ਆਵਾਸਿਕੇਨ ਆਗਨ੍ਤੁਕਾ, ਆਗਨ੍ਤੁਕੇਨ ਆਵਾਸਿਕਾ, ਆਗਨ੍ਤੁਕੇਨ ਆਗਨ੍ਤੁਕਾ ਪੇਯ੍ਯਾਲਮੁਖੇਨ ਸਤ੍ਤ ਤਿਕਸਤਾਨਿ ਹੋਨ੍ਤਿ.

੧੭੮. ਇਧ ਪਨ, ਭਿਕ੍ਖਵੇ, ਆਵਾਸਿਕਾਨਂ ਭਿਕ੍ਖੂਨਂ ਚਾਤੁਦ੍ਦਸੋ ਹੋਤਿ, ਆਗਨ੍ਤੁਕਾਨਂ ਪਨ੍ਨਰਸੋ. ਸਚੇ ਆਵਾਸਿਕਾ ਬਹੁਤਰਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬਂ. ਸਚੇ ਸਮਸਮਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬਂ. ਸਚੇ ਆਗਨ੍ਤੁਕਾ ਬਹੁਤਰਾ ਹੋਨ੍ਤਿ, ਆਵਾਸਿਕੇਹਿ ਆਗਨ੍ਤੁਕਾਨਂ ਅਨੁਵਤ੍ਤਿਤਬ੍ਬਂ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾਨਂ ਭਿਕ੍ਖੂਨਂ ਪਨ੍ਨਰਸੋ ਹੋਤਿ, ਆਗਨ੍ਤੁਕਾਨਂ ਚਾਤੁਦ੍ਦਸੋ. ਸਚੇ ਆਵਾਸਿਕਾ ਬਹੁਤਰਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬਂ. ਸਚੇ ਸਮਸਮਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬਂ. ਸਚੇ ਆਗਨ੍ਤੁਕਾ ਬਹੁਤਰਾ ਹੋਨ੍ਤਿ, ਆਵਾਸਿਕੇਹਿ ਆਗਨ੍ਤੁਕਾਨਂ ਅਨੁਵਤ੍ਤਿਤਬ੍ਬਂ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾਨਂ ਭਿਕ੍ਖੂਨਂ ਪਾਟਿਪਦੋ ਹੋਤਿ, ਆਗਨ੍ਤੁਕਾਨਂ ਪਨ੍ਨਰਸੋ. ਸਚੇ ਆਵਾਸਿਕਾ ਬਹੁਤਰਾ ਹੋਨ੍ਤਿ, ਆਵਾਸਿਕੇਹਿ ਆਗਨ੍ਤੁਕਾਨਂ ਨਾਕਾਮਾ ਦਾਤਬ੍ਬਾ ਸਾਮਗ੍ਗੀ. ਆਗਨ੍ਤੁਕੇਹਿ ਨਿਸ੍ਸੀਮਂ ਗਨ੍ਤ੍ਵਾ ਉਪੋਸਥੋ ਕਾਤਬ੍ਬੋ. ਸਚੇ ਸਮਸਮਾ ਹੋਨ੍ਤਿ, ਆਵਾਸਿਕੇਹਿ ਆਗਨ੍ਤੁਕਾਨਂ ਨਾਕਾਮਾ ਦਾਤਬ੍ਬਾ ਸਾਮਗ੍ਗੀ. ਆਗਨ੍ਤੁਕੇਹਿ ਨਿਸ੍ਸੀਮਂ ਗਨ੍ਤ੍ਵਾ ਉਪੋਸਥੋ ਕਾਤਬ੍ਬੋ. ਸਚੇ ਆਗਨ੍ਤੁਕਾ ਬਹੁਤਰਾ ਹੋਨ੍ਤਿ, ਆਵਾਸਿਕੇਹਿ ਆਗਨ੍ਤੁਕਾਨਂ ਸਾਮਗ੍ਗੀ ਵਾ ਦਾਤਬ੍ਬਾ ਨਿਸ੍ਸੀਮਂ ਵਾ ਗਨ੍ਤਬ੍ਬਂ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾਨਂ ਭਿਕ੍ਖੂਨਂ ਪਨ੍ਨਰਸੋ ਹੋਤਿ, ਆਗਨ੍ਤੁਕਾਨਂ

ਪਾਟਿਪਦੋ. ਸਚੇ ਆਵਾਸਿਕਾ ਬਹੁਤਰਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਸਾਮਗ੍ਗੀ ਵਾ ਦਾਤਬ੍ਬਾ ਨਿਸ੍ਸੀਮਂ ਵਾ ਗਨ੍ਤਬ੍ਬਂ. ਸਚੇ ਸਮਸਮਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਸਾਮਗ੍ਗੀ ਵਾ ਦਾਤਬ੍ਬਾ ਨਿਸ੍ਸੀਮਂ ਵਾ ਗਨ੍ਤਬ੍ਬਂ. ਸਚੇ ਆਗਨ੍ਤੁਕਾ ਬਹੁਤਰਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਨਾਕਾਮਾ ਦਾਤਬ੍ਬਾ ਸਾਮਗ੍ਗੀ. ਆਵਾਸਿਕੇਹਿ ਨਿਸ੍ਸੀਮਂ ਗਨ੍ਤ੍ਵਾ ਉਪੋਸਥੋ ਕਾਤਬ੍ਬੋ.

ਸੀਮੋਕ੍ਕਨ੍ਤਿਕਪੇਯ੍ਯਾਲਂ ਨਿਟ੍ਠਿਤਂ.

੧੦੧. ਲਿਙ੍ਗਾਦਿਦਸ੍ਸਨਂ

੧੭੯. ਇਧ ਪਨ, ਭਿਕ੍ਖਵੇ, ਆਗਨ੍ਤੁਕਾ ਭਿਕ੍ਖੂ ਪਸ੍ਸਨ੍ਤਿ ਆਵਾਸਿਕਾਨਂ ਭਿਕ੍ਖੂਨਂ ਆਵਾਸਿਕਾਕਾਰਂ, ਆਵਾਸਿਕਲਿਙ੍ਗਂ, ਆਵਾਸਿਕਨਿਮਿਤ੍ਤਂ, ਆਵਾਸਿਕੁਦ੍ਦੇਸਂ, ਸੁਪਞ੍ਞਤ੍ਤਂ ਮਞ੍ਚਪੀਠਂ, ਭਿਸਿਬਿਬ੍ਬੋਹਨਂ, ਪਾਨੀਯਂ ਪਰਿਭੋਜਨੀਯਂ ਸੂਪਟ੍ਠਿਤਂ, ਪਰਿਵੇਣਂ ਸੁਸਮ੍ਮਟ੍ਠਂ; ਪਸ੍ਸਿਤ੍ਵਾ ਵੇਮਤਿਕਾ ਹੋਨ੍ਤਿ – ‘‘ਅਤ੍ਥਿ ਨੁ ਖੋ ਆਵਾਸਿਕਾ ਭਿਕ੍ਖੂ ਨਤ੍ਥਿ ਨੁ ਖੋ’’ਤਿ. ਤੇ ਵੇਮਤਿਕਾ ਨ ਵਿਚਿਨਨ੍ਤਿ; ਅਵਿਚਿਨਿਤ੍ਵਾ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਨ ਪਸ੍ਸਨ੍ਤਿ; ਅਪਸ੍ਸਿਤ੍ਵਾ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ ਪਾਟੇਕ੍ਕਂ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ – ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਆਗਨ੍ਤੁਕਾ ਭਿਕ੍ਖੂ ਸੁਣਨ੍ਤਿ ਆਵਾਸਿਕਾਨਂ ਭਿਕ੍ਖੂਨਂ ਆਵਾਸਿਕਾਕਾਰਂ, ਆਵਾਸਿਕਲਿਙ੍ਗਂ, ਆਵਾਸਿਕਨਿਮਿਤ੍ਤਂ, ਆਵਾਸਿਕੁਦ੍ਦੇਸਂ, ਚਙ੍ਕਮਨ੍ਤਾਨਂ ਪਦਸਦ੍ਦਂ, ਸਜ੍ਝਾਯਸਦ੍ਦਂ, ਉਕ੍ਕਾਸਿਤਸਦ੍ਦਂ, ਖਿਪਿਤਸਦ੍ਦਂ; ਸੁਤ੍ਵਾ ਵੇਮਤਿਕਾ ਹੋਨ੍ਤਿ – ‘‘ਅਤ੍ਥਿ ਨੁ ਖੋ ਆਵਾਸਿਕਾ ਭਿਕ੍ਖੂ ਨਤ੍ਥਿ ਨੁ ਖੋ’’ਤਿ. ਤੇ ਵੇਮਤਿਕਾ ਨ ਵਿਚਿਨਨ੍ਤਿ; ਅਵਿਚਿਨਿਤ੍ਵਾ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਨ ਪਸ੍ਸਨ੍ਤਿ; ਅਪਸ੍ਸਿਤ੍ਵਾ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ ਪਾਟੇਕ੍ਕਂ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ – ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾ ਭਿਕ੍ਖੂ ਪਸ੍ਸਨ੍ਤਿ ਆਗਨ੍ਤੁਕਾਨਂ ਭਿਕ੍ਖੂਨਂ ਆਗਨ੍ਤੁਕਾਕਾਰਂ, ਆਗਨ੍ਤੁਕਲਿਙ੍ਗਂ, ਆਗਨ੍ਤੁਕਨਿਮਿਤ੍ਤਂ, ਆਗਨ੍ਤੁਕੁਦ੍ਦੇਸਂ, ਅਞ੍ਞਾਤਕਂ ਪਤ੍ਤਂ, ਅਞ੍ਞਾਤਕਂ ਚੀਵਰਂ, ਅਞ੍ਞਾਤਕਂ ਨਿਸੀਦਨਂ, ਪਾਦਾਨਂ ਧੋਤਂ, ਉਦਕਨਿਸ੍ਸੇਕਂ; ਪਸ੍ਸਿਤ੍ਵਾ ਵੇਮਤਿਕਾ ਹੋਨ੍ਤਿ – ‘‘ਅਤ੍ਥਿ ਨੁ ਖੋ ਆਗਨ੍ਤੁਕਾ ਭਿਕ੍ਖੂ ਨਤ੍ਥਿ ਨੁ ਖੋ’’ਤਿ. ਤੇ ਵੇਮਤਿਕਾ ਨ ਵਿਚਿਨਨ੍ਤਿ; ਅਵਿਚਿਨਿਤ੍ਵਾ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਨ ਪਸ੍ਸਨ੍ਤਿ; ਅਪਸ੍ਸਿਤ੍ਵਾ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ ਪਾਟੇਕ੍ਕਂ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ – ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾ ਭਿਕ੍ਖੂ ਸੁਣਨ੍ਤਿ ਆਗਨ੍ਤੁਕਾਨਂ ਭਿਕ੍ਖੂਨਂ ਆਗਨ੍ਤੁਕਾਕਾਰਂ, ਆਗਨ੍ਤੁਕਲਿਙ੍ਗਂ, ਆਗਨ੍ਤੁਕਨਿਮਿਤ੍ਤਂ, ਆਗਨ੍ਤੁਕੁਦ੍ਦੇਸਂ, ਆਗਚ੍ਛਨ੍ਤਾਨਂ ਪਦਸਦ੍ਦਂ, ਉਪਾਹਨਪਪ੍ਫੋਟਨਸਦ੍ਦਂ, ਉਕ੍ਕਾਸਿਤਸਦ੍ਦਂ, ਖਿਪਿਤਸਦ੍ਦਂ; ਸੁਤ੍ਵਾ ਵੇਮਤਿਕਾ ਹੋਨ੍ਤਿ – ‘‘ਅਤ੍ਥਿ ਨੁ ਖੋ ਆਗਨ੍ਤੁਕਾ ਭਿਕ੍ਖੂ ਨਤ੍ਥਿ ਨੁ ਖੋ’’ਤਿ. ਤੇ ਵੇਮਤਿਕਾ ਨ ਵਿਚਿਨਨ੍ਤਿ; ਅਵਿਚਿਨਿਤ੍ਵਾ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਨ ਪਸ੍ਸਨ੍ਤਿ; ਅਪਸ੍ਸਿਤ੍ਵਾ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ ਪਾਟੇਕ੍ਕਂ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ; ਵਿਚਿਨਿਤ੍ਵਾ ਪਸ੍ਸਨ੍ਤਿ; ਪਸ੍ਸਿਤ੍ਵਾ – ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਲਿਙ੍ਗਾਦਿਦਸ੍ਸਨਂ ਨਿਟ੍ਠਿਤਂ.

੧੦੨. ਨਾਨਾਸਂਵਾਸਕਾਦੀਹਿ ਉਪੋਸਥਕਰਣਂ

੧੮੦. ਇਧ ਪਨ, ਭਿਕ੍ਖਵੇ, ਆਗਨ੍ਤੁਕਾ ਭਿਕ੍ਖੂ ਪਸ੍ਸਨ੍ਤਿ ਆਵਾਸਿਕੇ ਭਿਕ੍ਖੂ ਨਾਨਾਸਂਵਾਸਕੇ. ਤੇ ਸਮਾਨਸਂਵਾਸਕਦਿਟ੍ਠਿਂ ਪਟਿਲਭਨ੍ਤਿ; ਸਮਾਨਸਂਵਾਸਕਦਿਟ੍ਠਿਂ ਪਟਿਲਭਿਤ੍ਵਾ ਨ ਪੁਚ੍ਛਨ੍ਤਿ; ਅਪੁਚ੍ਛਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ. ਤੇ ਪੁਚ੍ਛਨ੍ਤਿ; ਪੁਚ੍ਛਿਤ੍ਵਾ ਨਾਭਿਵਿਤਰਨ੍ਤਿ; ਅਨਭਿਵਿਤਰਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ; ਪੁਚ੍ਛਿਤ੍ਵਾ ਨਾਭਿਵਿਤਰਨ੍ਤਿ; ਅਨਭਿਵਿਤਰਿਤ੍ਵਾ ਪਾਟੇਕ੍ਕਂ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਆਗਨ੍ਤੁਕਾ ਭਿਕ੍ਖੂ ਪਸ੍ਸਨ੍ਤਿ ਆਵਾਸਿਕੇ ਭਿਕ੍ਖੂ ਸਮਾਨਸਂਵਾਸਕੇ. ਤੇ ਨਾਨਾਸਂਵਾਸਕਦਿਟ੍ਠਿਂ ਪਟਿਲਭਨ੍ਤਿ; ਨਾਨਾਸਂਵਾਸਕਦਿਟ੍ਠਿਂ ਪਟਿਲਭਿਤ੍ਵਾ ਨ ਪੁਚ੍ਛਨ੍ਤਿ; ਅਪੁਚ੍ਛਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ; ਪੁਚ੍ਛਿਤ੍ਵਾ ਅਭਿਵਿਤਰਨ੍ਤਿ; ਅਭਿਵਿਤਰਿਤ੍ਵਾ ਪਾਟੇਕ੍ਕਂ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ; ਪੁਚ੍ਛਿਤ੍ਵਾ ਅਭਿਵਿਤਰਨ੍ਤਿ; ਅਭਿਵਿਤਰਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾ ਭਿਕ੍ਖੂ ਪਸ੍ਸਨ੍ਤਿ ਆਗਨ੍ਤੁਕੇ ਭਿਕ੍ਖੂ ਨਾਨਾਸਂਵਾਸਕੇ. ਤੇ ਸਮਾਨਸਂਵਾਸਕਦਿਟ੍ਠਿਂ ਪਟਿਲਭਨ੍ਤਿ; ਸਮਾਨਸਂਵਾਸਕਦਿਟ੍ਠਿਂ ਪਟਿਲਭਿਤ੍ਵਾ ਨ ਪੁਚ੍ਛਨ੍ਤਿ; ਅਪੁਚ੍ਛਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ. ਤੇ ਪੁਚ੍ਛਨ੍ਤਿ; ਪੁਚ੍ਛਿਤ੍ਵਾ ਨਾਭਿਵਿਤਰਨ੍ਤਿ; ਅਨਭਿਵਿਤਰਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ; ਪੁਚ੍ਛਿਤ੍ਵਾ ਨਾਭਿਵਿਤਰਨ੍ਤਿ; ਅਨਭਿਵਿਤਰਿਤ੍ਵਾ ਪਾਟੇਕ੍ਕਂ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾ ਭਿਕ੍ਖੂ ਪਸ੍ਸਨ੍ਤਿ ਆਗਨ੍ਤੁਕੇ ਭਿਕ੍ਖੂ ਸਮਾਨਸਂਵਾਸਕੇ. ਤੇ ਨਾਨਾਸਂਵਾਸਕਦਿਟ੍ਠਿਂ ਪਟਿਲਭਨ੍ਤਿ; ਨਾਨਾਸਂਵਾਸਕਦਿਟ੍ਠਿਂ ਪਟਿਲਭਿਤ੍ਵਾ ਨ ਪੁਚ੍ਛਨ੍ਤਿ; ਅਪੁਚ੍ਛਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ; ਪੁਚ੍ਛਿਤ੍ਵਾ ਅਭਿਵਿਤਰਨ੍ਤਿ; ਅਭਿਵਿਤਰਿਤ੍ਵਾ ਪਾਟੇਕ੍ਕਂ ਉਪੋਸਥਂ ਕਰੋਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ; ਪੁਚ੍ਛਿਤ੍ਵਾ ਅਭਿਵਿਤਰਨ੍ਤਿ; ਅਭਿਵਿਤਰਿਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਅਨਾਪਤ੍ਤਿ.

ਨਾਨਾਸਂਵਾਸਕਾਦੀਹਿ ਉਪੋਸਥਕਰਣਂ ਨਿਟ੍ਠਿਤਂ.

੧੦੩. ਨਗਨ੍ਤਬ੍ਬਵਾਰੋ

੧੮੧. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ.

ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਅਨਾਵਾਸਾ ਅਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਅਨਾਵਾਸਾ ਅਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਅਨਾਵਾਸਾ ਅਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ.

ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ.

ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ.

ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ.

ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ.

ਨਗਨ੍ਤਬ੍ਬਵਾਰੋ ਨਿਟ੍ਠਿਤੋ.

੧੦੪. ਗਨ੍ਤਬ੍ਬਵਾਰੋ

੧੮੨. ਗਨ੍ਤਬ੍ਬੋ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਆਵਾਸੋ, ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ, ਯਂ ਜਞ੍ਞਾ – ‘‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’’ਨ੍ਤਿ. ਗਨ੍ਤਬ੍ਬੋ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਅਨਾਵਾਸੋ…ਪੇ… ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ, ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ, ਯਂ ਜਞ੍ਞਾ – ‘‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’’ਨ੍ਤਿ.

ਗਨ੍ਤਬ੍ਬੋ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਆਵਾਸੋ…ਪੇ… ਸਭਿਕ੍ਖੁਕੋ ਅਨਾਵਾਸੋ…ਪੇ… ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ, ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ, ਯਂ ਜਞ੍ਞਾ – ‘‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’’ਨ੍ਤਿ.

ਗਨ੍ਤਬ੍ਬੋ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਆਵਾਸੋ…ਪੇ… ਸਭਿਕ੍ਖੁਕੋ ਅਨਾਵਾਸੋ…ਪੇ… ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ, ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ, ਯਂ ਜਞ੍ਞਾ – ‘‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’’ਨ੍ਤਿ.

ਗਨ੍ਤਬ੍ਬਵਾਰੋ ਨਿਟ੍ਠਿਤੋ.

੧੦੫. ਵਜ੍ਜਨੀਯਪੁਗ੍ਗਲਸਨ੍ਦਸ੍ਸਨਾ

੧੮੩. ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਨਿਸਿਨ੍ਨਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਸਿਕ੍ਖਮਾਨਾਯ…ਪੇ… ਨ ਸਾਮਣੇਰਸ੍ਸ …ਪੇ… ਨ ਸਾਮਣੇਰਿਯਾ…ਪੇ… ਨ ਸਿਕ੍ਖਾਪਚ੍ਚਕ੍ਖਾਤਕਸ੍ਸ…ਪੇ… ਨ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕਸ੍ਸ ਨਿਸਿਨ੍ਨਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

ਨ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕਸ੍ਸ ਨਿਸਿਨ੍ਨਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ. ਨ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕਸ੍ਸ ਨਿਸਿਨ੍ਨਪਰਿਸਾਯ…ਪੇ… ਨ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕਸ੍ਸ ਨਿਸਿਨ੍ਨਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ.

ਨ ਪਣ੍ਡਕਸ੍ਸ ਨਿਸਿਨ੍ਨਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਥੇਯ੍ਯਸਂਵਾਸਕਸ੍ਸ…ਪੇ… ਨ ਤਿਤ੍ਥਿਯਪਕ੍ਕਨ੍ਤਕਸ੍ਸ…ਪੇ… ਨ ਤਿਰਚ੍ਛਾਨਗਤਸ੍ਸ…ਪੇ… ਨ ਮਾਤੁਘਾਤਕਸ੍ਸ…ਪੇ… ਨ ਪਿਤੁਘਾਤਕਸ੍ਸ…ਪੇ… ਨ ਅਰਹਨ੍ਤਘਾਤਕਸ੍ਸ…ਪੇ… ਨ ਭਿਕ੍ਖੁਨਿਦੂਸਕਸ੍ਸ…ਪੇ… ਨ ਸਙ੍ਘਭੇਦਕਸ੍ਸ…ਪੇ… ਨ ਲੋਹਿਤੁਪ੍ਪਾਦਕਸ੍ਸ…ਪੇ… ਨ ਉਭਤੋਬ੍ਯਞ੍ਜਨਕਸ੍ਸ ਨਿਸਿਨ੍ਨਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

ਨ, ਭਿਕ੍ਖਵੇ, ਪਾਰਿਵਾਸਿਕਪਾਰਿਸੁਦ੍ਧਿਦਾਨੇਨ ਉਪੋਸਥੋ ਕਾਤਬ੍ਬੋ, ਅਞ੍ਞਤ੍ਰ ਅਵੁਟ੍ਠਿਤਾਯ ਪਰਿਸਾਯ. ਨ ਚ, ਭਿਕ੍ਖਵੇ, ਅਨੁਪੋਸਥੇ ਉਪੋਸਥੋ ਕਾਤਬ੍ਬੋ, ਅਞ੍ਞਤ੍ਰ ਸਙ੍ਘਸਾਮਗ੍ਗਿਯਾਤਿ.

ਵਜ੍ਜਨੀਯਪੁਗ੍ਗਲਸਨ੍ਦਸ੍ਸਨਾ ਨਿਟ੍ਠਿਤਾ.

ਤਤਿਯਭਾਣਵਾਰੋ ਨਿਟ੍ਠਿਤੋ.

ਉਪੋਸਥਕ੍ਖਨ੍ਧਕੋ ਦੁਤਿਯੋ.

੧੦੬. ਤਸ੍ਸੁਦ੍ਦਾਨਂ

ਤਿਤ੍ਥਿਯਾ ਬਿਮ੍ਬਿਸਾਰੋ ਚ, ਸਨ੍ਨਿਪਤਿਤੁਂ ਤੁਣ੍ਹਿਕਾ;

ਧਮ੍ਮਂ ਰਹੋ ਪਾਤਿਮੋਕ੍ਖਂ, ਦੇਵਸਿਕਂ ਤਦਾ ਸਕਿਂ.

ਯਥਾਪਰਿਸਾ ਸਮਗ੍ਗਂ, ਸਾਮਗ੍ਗੀ ਮਦ੍ਦਕੁਚ੍ਛਿ ਚ;

ਸੀਮਾ ਮਹਤੀ ਨਦਿਯਾ, ਅਨੁ ਦ੍ਵੇ ਖੁਦ੍ਦਕਾਨਿ ਚ.

ਨਵਾ ਰਾਜਗਹੇ ਚੇਵ, ਸੀਮਾ ਅਵਿਪ੍ਪਵਾਸਨਾ;

ਸਮ੍ਮਨ੍ਨੇ [ਸਮ੍ਮਨੇ (ਕ.)] ਪਠਮਂ ਸੀਮਂ, ਪਚ੍ਛਾ ਸੀਮਂ ਸਮੂਹਨੇ.

ਅਸਮ੍ਮਤਾ ਗਾਮਸੀਮਾ, ਨਦਿਯਾ ਸਮੁਦ੍ਦੇ ਸਰੇ;

ਉਦਕੁਕ੍ਖੇਪੋ ਭਿਨ੍ਦਨ੍ਤਿ, ਤਥੇਵਜ੍ਝੋਤ੍ਥਰਨ੍ਤਿ ਚ.

ਕਤਿ ਕਮ੍ਮਾਨਿ ਉਦ੍ਦੇਸੋ, ਸਵਰਾ ਅਸਤੀਪਿ ਚ;

ਧਮ੍ਮਂ ਵਿਨਯਂ ਤਜ੍ਜੇਨ੍ਤਿ, ਪੁਨ ਵਿਨਯਤਜ੍ਜਨਾ.

ਚੋਦਨਾ ਕਤੇ ਓਕਾਸੇ, ਅਧਮ੍ਮਪ੍ਪਟਿਕ੍ਕੋਸਨਾ;

ਚਤੁਪਞ੍ਚਪਰਾ ਆਵਿ, ਸਞ੍ਚਿਚ੍ਚ ਚੇਪਿ ਵਾਯਮੇ.

ਸਗਹਟ੍ਠਾ ਅਨਜ੍ਝਿਟ੍ਠਾ, ਚੋਦਨਮ੍ਹਿ ਨ ਜਾਨਤਿ;

ਸਮ੍ਬਹੁਲਾ ਨ ਜਾਨਨ੍ਤਿ, ਸਜ੍ਜੁਕਂ ਨ ਚ ਗਚ੍ਛਰੇ.

ਕਤਿਮੀ ਕੀਵਤਿਕਾ ਦੂਰੇ, ਆਰੋਚੇਤੁਞ੍ਚ ਨਸ੍ਸਰਿ;

ਉਕ੍ਲਾਪਂ ਆਸਨਂ ਦੀਪੋ, ਦਿਸਾ ਅਞ੍ਞੋ ਬਹੁਸ੍ਸੁਤੋ.

ਸਜ੍ਜੁਕਂ [ਸਜ੍ਜੁਵਸ੍ਸਰੁਪੋਸਥੋ (ਕ.)] ਵਸ੍ਸੁਪੋਸਥੋ, ਸੁਦ੍ਧਿਕਮ੍ਮਞ੍ਚ ਞਾਤਕਾ;

ਗਗ੍ਗੋ ਚਤੁਤਯੋ ਦ੍ਵੇਕੋ, ਆਪਤ੍ਤਿਸਭਾਗਾ ਸਰਿ.

ਸਬ੍ਬੋ ਸਙ੍ਘੋ ਵੇਮਤਿਕੋ, ਨ ਜਾਨਨ੍ਤਿ ਬਹੁਸ੍ਸੁਤੋ;

ਬਹੂ ਸਮਸਮਾ ਥੋਕਾ, ਪਰਿਸਾ ਅਵੁਟ੍ਠਿਤਾਯ ਚ.

ਏਕਚ੍ਚਾ ਵੁਟ੍ਠਿਤਾ ਸਬ੍ਬਾ, ਜਾਨਨ੍ਤਿ ਚ ਵੇਮਤਿਕਾ;

ਕਪ੍ਪਤੇਵਾਤਿ ਕੁਕ੍ਕੁਚ੍ਚਾ, ਜਾਨਂ ਪਸ੍ਸਂ ਸੁਣਨ੍ਤਿ ਚ.

ਆਵਾਸਿਕੇਨ ਆਗਨ੍ਤੁ, ਚਾਤੁਪਨ੍ਨਰਸੋ ਪੁਨ;

ਪਾਟਿਪਦੋ ਪਨ੍ਨਰਸੋ, ਲਿਙ੍ਗਸਂਵਾਸਕਾ ਉਭੋ.

ਪਾਰਿਵਾਸਾਨੁਪੋਸਥੋ, ਅਞ੍ਞਤ੍ਰ ਸਙ੍ਘਸਾਮਗ੍ਗਿਯਾ;

ਏਤੇ ਵਿਭਤ੍ਤਾ ਉਦ੍ਦਾਨਾ, ਵਤ੍ਥੁਵਿਭੂਤਕਾਰਣਾਤਿ.

ਇਮਸ੍ਮਿਂ ਖਨ੍ਧਕੇ ਵਤ੍ਥੂਨਿ ਛਅਸੀਤਿ.

ਉਪੋਸਥਕ੍ਖਨ੍ਧਕੋ ਨਿਟ੍ਠਿਤੋ.

੩. ਵਸ੍ਸੂਪਨਾਯਿਕਕ੍ਖਨ੍ਧਕੋ

੧੦੭. ਵਸ੍ਸੂਪਨਾਯਿਕਾਨੁਜਾਨਨਾ

੧੮੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਭਗਵਤਾ ਭਿਕ੍ਖੂਨਂ ਵਸ੍ਸਾਵਾਸੋ ਅਪਞ੍ਞਤ੍ਤੋ ਹੋਤਿ. ਤੇਇਧ ਭਿਕ੍ਖੂ ਹੇਮਨ੍ਤਮ੍ਪਿ ਗਿਮ੍ਹਮ੍ਪਿ ਵਸ੍ਸਮ੍ਪਿ ਚਾਰਿਕਂ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਹੇਮਨ੍ਤਮ੍ਪਿ ਗਿਮ੍ਹਮ੍ਪਿ ਵਸ੍ਸਮ੍ਪਿ ਚਾਰਿਕਂ ਚਰਿਸ੍ਸਨ੍ਤਿ, ਹਰਿਤਾਨਿ ਤਿਣਾਨਿ ਸਮ੍ਮਦ੍ਦਨ੍ਤਾ, ਏਕਿਨ੍ਦ੍ਰਿਯਂ ਜੀਵਂ ਵਿਹੇਠੇਨ੍ਤਾ, ਬਹੂ ਖੁਦ੍ਦਕੇ ਪਾਣੇ ਸਙ੍ਘਾਤਂ ਆਪਾਦੇਨ੍ਤਾ. ਇਮੇ ਹਿ ਨਾਮ ਅਞ੍ਞਤਿਤ੍ਥਿਯਾ ਦੁਰਕ੍ਖਾਤਧਮ੍ਮਾ ਵਸ੍ਸਾਵਾਸਂ ਅਲ੍ਲੀਯਿਸ੍ਸਨ੍ਤਿ ਸਙ੍ਕਸਾਯਿਸ੍ਸਨ੍ਤਿ. ਇਮੇ ਹਿ ਨਾਮ ਸਕੁਨ੍ਤਕਾ ਰੁਕ੍ਖਗ੍ਗੇਸੁ ਕੁਲਾਵਕਾਨਿ ਕਰਿਤ੍ਵਾ ਵਸ੍ਸਾਵਾਸਂ ਅਲ੍ਲੀਯਿਸ੍ਸਨ੍ਤਿ ਸਙ੍ਕਸਾਯਿਸ੍ਸਨ੍ਤਿ [ਸਙ੍ਕਾਸਯਿਸ੍ਸਨ੍ਤਿ (ਸੀ. ਸ੍ਯਾ.)]. ਇਮੇ ਪਨ ਸਮਣਾ ਸਕ੍ਯਪੁਤ੍ਤਿਯਾ ਹੇਮਨ੍ਤਮ੍ਪਿ ਗਿਮ੍ਹਮ੍ਪਿ ਵਸ੍ਸਮ੍ਪਿ ਚਾਰਿਕਂ ਚਰਨ੍ਤਿ, ਹਰਿਤਾਨਿ ਤਿਣਾਨਿ ਸਮ੍ਮਦ੍ਦਨ੍ਤਾ, ਏਕਿਨ੍ਦ੍ਰਿਯਂ ਜੀਵਂ ਵਿਹੇਠੇਨ੍ਤਾ, ਬਹੂ ਖੁਦ੍ਦਕੇ ਪਾਣੇ ਸਙ੍ਘਾਤਂ ਆਪਾਦੇਨ੍ਤਾ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤੁ’’ਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਦਾ ਨੁ ਖੋ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਾਨੇ ਵਸ੍ਸਂ ਉਪਗਨ੍ਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਤਿ ਨੁ ਖੋ ਵਸ੍ਸੂਪਨਾਯਿਕਾ’’ਤਿ? ਭਗਵਤੋ ਏਤਮਤ੍ਥਂ

ਆਰੋਚੇਸੁਂ. ਦ੍ਵੇਮਾ, ਭਿਕ੍ਖਵੇ, ਵਸ੍ਸੂਪਨਾਯਿਕਾ – ਪੁਰਿਮਿਕਾ, ਪਚ੍ਛਿਮਿਕਾ. ਅਪਰਜ੍ਜੁਗਤਾਯ ਆਸਾਲ਼੍ਹਿਯਾ ਪੁਰਿਮਿਕਾ ਉਪਗਨ੍ਤਬ੍ਬਾ, ਮਾਸਗਤਾਯ ਆਸਾਲ਼੍ਹਿਯਾ ਪਚ੍ਛਿਮਿਕਾ ਉਪਗਨ੍ਤਬ੍ਬਾ – ਇਮਾ ਖੋ, ਭਿਕ੍ਖਵੇ, ਦ੍ਵੇ ਵਸ੍ਸੂਪਨਾਯਿਕਾਤਿ.

ਵਸ੍ਸੂਪਨਾਯਿਕਾਨੁਜਾਨਨਾ ਨਿਟ੍ਠਿਤਾ.

੧੦੮. ਵਸ੍ਸਾਨੇ ਚਾਰਿਕਾਪਟਿਕ੍ਖੇਪਾਦਿ

੧੮੫. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਵਸ੍ਸਂ ਉਪਗਨ੍ਤ੍ਵਾ ਅਨ੍ਤਰਾਵਸ੍ਸਂ ਚਾਰਿਕਂ ਚਰਨ੍ਤਿ. ਮਨੁਸ੍ਸਾ ਤਥੇਵ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਹੇਮਨ੍ਤਮ੍ਪਿ ਗਿਮ੍ਹਮ੍ਪਿ ਵਸ੍ਸਮ੍ਪਿ ਚਾਰਿਕਂ ਚਰਿਸ੍ਸਨ੍ਤਿ, ਹਰਿਤਾਨਿ ਤਿਣਾਨਿ ਸਮ੍ਮਦ੍ਦਨ੍ਤਾ, ਏਕਿਨ੍ਦ੍ਰਿਯਂ ਜੀਵਂ ਵਿਹੇਠੇਨ੍ਤਾ, ਬਹੂ ਖੁਦ੍ਦਕੇ ਪਾਣੇ ਸਙ੍ਘਾਤਂ ਆਪਾਦੇਨ੍ਤਾ. ਇਮੇ ਹਿ ਨਾਮ ਅਞ੍ਞਤਿਤ੍ਥਿਯਾ ਦੁਰਕ੍ਖਾਤਧਮ੍ਮਾ ਵਸ੍ਸਾਵਾਸਂ ਅਲ੍ਲੀਯਿਸ੍ਸਨ੍ਤਿ ਸਙ੍ਕਸਾਯਿਸ੍ਸਨ੍ਤਿ. ਇਮੇ ਹਿ ਨਾਮ ਸਕੁਨ੍ਤਕਾ ਰੁਕ੍ਖਗ੍ਗੇਸੁ ਕੁਲਾਵਕਾਨਿ ਕਰਿਤ੍ਵਾ ਵਸ੍ਸਾਵਾਸਂ ਅਲ੍ਲੀਯਿਸ੍ਸਨ੍ਤਿ ਸਙ੍ਕਸਾਯਿਸ੍ਸਨ੍ਤਿ. ਇਮੇ ਪਨ ਸਮਣਾ ਸਕ੍ਯਪੁਤ੍ਤਿਯਾ ਹੇਮਨ੍ਤਮ੍ਪਿ ਗਿਮ੍ਹਮ੍ਪਿ ਵਸ੍ਸਮ੍ਪਿ ਚਾਰਿਕਂ ਚਰਨ੍ਤਿ, ਹਰਿਤਾਨਿ ਤਿਣਾਨਿ ਸਮ੍ਮਦ੍ਦਨ੍ਤਾ, ਏਕਿਨ੍ਦ੍ਰਿਯਂ ਜੀਵਂ ਵਿਹੇਠੇਨ੍ਤਾ, ਬਹੂ ਖੁਦ੍ਦਕੇ ਪਾਣੇ ਸਙ੍ਘਾਤਂ ਆਪਾਦੇਨ੍ਤਾ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਵਸ੍ਸਂ ਉਪਗਨ੍ਤ੍ਵਾ ਅਨ੍ਤਰਾਵਸ੍ਸਂ ਚਾਰਿਕਂ ਚਰਿਸ੍ਸਨ੍ਤੀ’’ਤਿ? ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤ੍ਵਾ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ. ਯੋ ਪਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੧੮੬. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਨ ਇਚ੍ਛਨ੍ਤਿ ਵਸ੍ਸਂ ਉਪਗਨ੍ਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਵਸ੍ਸਂ ਨ ਉਪਗਨ੍ਤਬ੍ਬਂ. ਯੋ ਨ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਤਦਹੁ ਵਸ੍ਸੂਪਨਾਯਿਕਾਯ ਵਸ੍ਸਂ ਅਨੁਪਗਨ੍ਤੁਕਾਮਾ ਸਞ੍ਚਿਚ੍ਚ ਆਵਾਸਂ ਅਤਿਕ੍ਕਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਤਦਹੁ ਵਸ੍ਸੂਪਨਾਯਿਕਾਯ ਵਸ੍ਸਂ ਅਨੁਪਗਨ੍ਤੁਕਾਮੇਨ ਸਞ੍ਚਿਚ੍ਚ ਆਵਾਸੋ ਅਤਿਕ੍ਕਮਿਤਬ੍ਬੋ. ਯੋ ਅਤਿਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਵਸ੍ਸਂ ਉਕ੍ਕਡ੍ਢਿਤੁਕਾਮੋ

ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ਯਦਿ ਪਨਾਯ੍ਯਾ ਆਗਮੇ ਜੁਣ੍ਹੇ ਵਸ੍ਸਂ ਉਪਗਚ੍ਛੇਯ੍ਯੁਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਰਾਜੂਨਂ ਅਨੁਵਤ੍ਤਿਤੁਨ੍ਤਿ.

ਵਸ੍ਸਾਨੇ ਚਾਰਿਕਾਪਟਿਕ੍ਖੇਪਾਦਿ ਨਿਟ੍ਠਿਤਾ.

੧੦੯. ਸਤ੍ਤਾਹਕਰਣੀਯਾਨੁਜਾਨਨਾ

੧੮੭. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਕੋਸਲੇਸੁ ਜਨਪਦੇ ਉਦੇਨੇਨ ਉਪਾਸਕੇਨ ਸਙ੍ਘਂ ਉਦ੍ਦਿਸ੍ਸ ਵਿਹਾਰੋ ਕਾਰਾਪਿਤੋ ਹੋਤਿ. ਸੋ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਆਗਚ੍ਛਨ੍ਤੁ ਭਦਨ੍ਤਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ, ਧਮ੍ਮਞ੍ਚ ਸੋਤੁਂ, ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ. ਭਿਕ੍ਖੂ ਏਵਮਾਹਂਸੁ – ‘‘ਭਗਵਤਾ, ਆਵੁਸੋ, ਪਞ੍ਞਤ੍ਤਂ ‘ਨ ਵਸ੍ਸਂ ਉਪਗਨ੍ਤ੍ਵਾ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ’ਤਿ. ਆਗਮੇਤੁ ਉਦੇਨੋ ਉਪਾਸਕੋ, ਯਾਵ ਭਿਕ੍ਖੂ ਵਸ੍ਸਂ ਵਸਨ੍ਤਿ. ਵਸ੍ਸਂਵੁਟ੍ਠਾ ਆਗਮਿਸ੍ਸਨ੍ਤਿ. ਸਚੇ ਪਨਸ੍ਸ ਅਚ੍ਚਾਯਿਕਂ ਕਰਣੀਯਂ, ਤਤ੍ਥੇਵ ਆਵਾਸਿਕਾਨਂ ਭਿਕ੍ਖੂਨਂ ਸਨ੍ਤਿਕੇ ਵਿਹਾਰਂ ਪਤਿਟ੍ਠਾਪੇਤੂ’’ਤਿ. ਉਦੇਨੋ ਉਪਾਸਕੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ ਮਯਾ ਪਹਿਤੇ ਨ ਆਗਚ੍ਛਿਸ੍ਸਨ੍ਤਿ. ਅਹਞ੍ਹਿ ਦਾਯਕੋ ਕਾਰਕੋ ਸਙ੍ਘੁਪਟ੍ਠਾਕੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਉਦੇਨਸ੍ਸ ਉਪਾਸਕਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਪਹਿਤੇ ਗਨ੍ਤੁਂ, ਨ ਤ੍ਵੇਵ ਅਪ੍ਪਹਿਤੇ. ਭਿਕ੍ਖੁਸ੍ਸ, ਭਿਕ੍ਖੁਨਿਯਾ, ਸਿਕ੍ਖਮਾਨਾਯ, ਸਾਮਣੇਰਸ੍ਸ, ਸਾਮਣੇਰਿਯਾ, ਉਪਾਸਕਸ੍ਸ, ਉਪਾਸਿਕਾਯ – ਅਨੁਜਾਨਾਮਿ, ਭਿਕ੍ਖਵੇ, ਇਮੇਸਂ ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਪਹਿਤੇ ਗਨ੍ਤੁਂ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ’’.

੧੮੮. ਇਧ ਪਨ, ਭਿਕ੍ਖਵੇ, ਉਪਾਸਕੇਨ ਸਙ੍ਘਂ ਉਦ੍ਦਿਸ੍ਸ ਵਿਹਾਰੋ ਕਾਰਾਪਿਤੋ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਆਗਚ੍ਛਨ੍ਤੁ ਭਦਨ੍ਤਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ, ਧਮ੍ਮਞ੍ਚ ਸੋਤੁਂ, ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਉਪਾਸਕੇਨ ਸਙ੍ਘਂ ਉਦ੍ਦਿਸ੍ਸ ਅਡ੍ਢਯੋਗੋ ਕਾਰਾਪਿਤੋ ਹੋਤਿ…ਪੇ… ਪਾਸਾਦੋ ਕਾਰਾਪਿਤੋ ਹੋਤਿ… ਹਮ੍ਮਿਯਂ ਕਾਰਾਪਿਤਂ ਹੋਤਿ… ਗੁਹਾ ਕਾਰਾਪਿਤਾ ਹੋਤਿ… ਪਰਿਵੇਣਂ ਕਾਰਾਪਿਤਂ ਹੋਤਿ… ਕੋਟ੍ਠਕੋ ਕਾਰਾਪਿਤੋ ਹੋਤਿ… ਉਪਟ੍ਠਾਨਸਾਲਾ ਕਾਰਾਪਿਤਾ ਹੋਤਿ… ਅਗ੍ਗਿਸਾਲਾ ਕਾਰਾਪਿਤਾ ਹੋਤਿ… ਕਪ੍ਪਿਯਕੁਟਿ ਕਾਰਾਪਿਤਾ ਹੋਤਿ… ਵਚ੍ਚਕੁਟਿ ਕਾਰਾਪਿਤਾ ਹੋਤਿ… ਚਙ੍ਕਮੋ ਕਾਰਾਪਿਤੋ ਹੋਤਿ … ਚਙ੍ਕਮਨਸਾਲਾ ਕਾਰਾਪਿਤਾ ਹੋਤਿ… ਉਦਪਾਨੋ ਕਾਰਾਪਿਤੋ ਹੋਤਿ … ਉਦਪਾਨਸਾਲਾ ਕਾਰਾਪਿਤਾ ਹੋਤਿ… ਜਨ੍ਤਾਘਰਂ ਕਾਰਾਪਿਤਂ ਹੋਤਿ… ਜਨ੍ਤਾਘਰਸਾਲਾ ਕਾਰਾਪਿਤਾ ਹੋਤਿ… ਪੋਕ੍ਖਰਣੀ ਕਾਰਾਪਿਤਾ ਹੋਤਿ… ਮਣ੍ਡਪੋ ਕਾਰਾਪਿਤੋ ਹੋਤਿ… ਆਰਾਮੋ ਕਾਰਾਪਿਤੋ ਹੋਤਿ… ਆਰਾਮਵਤ੍ਥੁ ਕਾਰਾਪਿਤਂ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਆਗਚ੍ਛਨ੍ਤੁ ਭਦਨ੍ਤਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ, ਧਮ੍ਮਞ੍ਚ ਸੋਤੁਂ, ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਉਪਾਸਕੇਨ ਸਮ੍ਬਹੁਲੇ ਭਿਕ੍ਖੂ ਉਦ੍ਦਿਸ੍ਸ…ਪੇ… ਏਕਂ ਭਿਕ੍ਖੁਂ ਉਦ੍ਦਿਸ੍ਸ ਵਿਹਾਰੋ ਕਾਰਾਪਿਤੋ ਹੋਤਿ… ਅਡ੍ਢਯੋਗੋ ਕਾਰਾਪਿਤੋ ਹੋਤਿ… ਪਾਸਾਦੋ ਕਾਰਾਪਿਤੋ ਹੋਤਿ … ਹਮ੍ਮਿਯਂ ਕਾਰਾਪਿਤਂ ਹੋਤਿ… ਗੁਹਾ ਕਾਰਾਪਿਤਾ ਹੋਤਿ… ਪਰਿਵੇਣਂ ਕਾਰਾਪਿਤਂ ਹੋਤਿ… ਕੋਟ੍ਠਕੋ ਕਾਰਾਪਿਤੋ ਹੋਤਿ… ਉਪਟ੍ਠਾਨਸਾਲਾ ਕਾਰਾਪਿਤਾ ਹੋਤਿ… ਅਗ੍ਗਿਸਾਲਾ ਕਾਰਾਪਿਤਾ ਹੋਤਿ… ਕਪ੍ਪਿਯਕੁਟਿ ਕਾਰਾਪਿਤਾ ਹੋਤਿ… ਵਚ੍ਚਕੁਟਿ ਕਾਰਾਪਿਤਾ ਹੋਤਿ… ਚਙ੍ਕਮੋ ਕਾਰਾਪਿਤੋ ਹੋਤਿ… ਚਙ੍ਕਮਨਸਾਲਾ ਕਾਰਾਪਿਤਾ ਹੋਤਿ… ਉਦਪਾਨੋ ਕਾਰਾਪਿਤੋ ਹੋਤਿ… ਉਦਪਾਨਸਾਲਾ ਕਾਰਾਪਿਤਾ ਹੋਤਿ… ਜਨ੍ਤਾਘਰਂ ਕਾਰਾਪਿਤਂ ਹੋਤਿ… ਜਨ੍ਤਾਘਰਸਾਲਾ ਕਾਰਾਪਿਤਾ ਹੋਤਿ… ਪੋਕ੍ਖਰਣੀ ਕਾਰਾਪਿਤਾ ਹੋਤਿ… ਮਣ੍ਡਪੋ ਕਾਰਾਪਿਤੋ ਹੋਤਿ… ਆਰਾਮੋ ਕਾਰਾਪਿਤੋ ਹੋਤਿ… ਆਰਾਮਵਤ੍ਥੁ ਕਾਰਾਪਿਤਂ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਆਗਚ੍ਛਨ੍ਤੁ ਭਦਨ੍ਤਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ, ਧਮ੍ਮਞ੍ਚ ਸੋਤੁਂ, ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਉਪਾਸਕੇਨ ਭਿਕ੍ਖੁਨਿਸਙ੍ਘਂ ਉਦ੍ਦਿਸ੍ਸ…ਪੇ… ਸਮ੍ਬਹੁਲਾ ਭਿਕ੍ਖੁਨਿਯੋ ਉਦ੍ਦਿਸ੍ਸ…ਪੇ… ਏਕਂ ਭਿਕ੍ਖੁਨਿਂ ਉਦ੍ਦਿਸ੍ਸ…ਪੇ… ਸਮ੍ਬਹੁਲਾ ਸਿਕ੍ਖਮਾਨਾਯੋ ਉਦ੍ਦਿਸ੍ਸ…ਪੇ… ਏਕਂ ਸਿਕ੍ਖਮਾਨਂ ਉਦ੍ਦਿਸ੍ਸ…ਪੇ… ਸਮ੍ਬਹੁਲੇ ਸਾਮਣੇਰੇ ਉਦ੍ਦਿਸ੍ਸ…ਪੇ… ਏਕਂ ਸਾਮਣੇਰਂ ਉਦ੍ਦਿਸ੍ਸ…ਪੇ… ਸਮ੍ਬਹੁਲਾ ਸਾਮਣੇਰਿਯੋ ਉਦ੍ਦਿਸ੍ਸ…ਪੇ… ਏਕਂ ਸਾਮਣੇਰਿਂ ਉਦ੍ਦਿਸ੍ਸ ਵਿਹਾਰੋ ਕਾਰਾਪਿਤੋ ਹੋਤਿ…ਪੇ… ਅਡ੍ਢਯੋਗੋ ਕਾਰਾਪਿਤੋ ਹੋਤਿ… ਪਾਸਾਦੋ ਕਾਰਾਪਿਤੋ ਹੋਤਿ… ਹਮ੍ਮਿਯਂ ਕਾਰਾਪਿਤਂ ਹੋਤਿ… ਗੁਹਾ ਕਾਰਾਪਿਤਾ ਹੋਤਿ… ਪਰਿਵੇਣਂ ਕਾਰਾਪਿਤਂ ਹੋਤਿ… ਕੋਟ੍ਠਕੋ ਕਾਰਾਪਿਤੋ ਹੋਤਿ… ਉਪਟ੍ਠਾਨਸਾਲਾ ਕਾਰਾਪਿਤਾ ਹੋਤਿ… ਅਗ੍ਗਿਸਾਲਾ ਕਾਰਾਪਿਤਾ ਹੋਤਿ … ਕਪ੍ਪਿਯਕੁਟਿ ਕਾਰਾਪਿਤਾ ਹੋਤਿ… ਚਙ੍ਕਮੋ ਕਾਰਾਪਿਤੋ ਹੋਤਿ… ਚਙ੍ਕਮਨਸਾਲਾ ਕਾਰਾਪਿਤਾ ਹੋਤਿ… ਉਦਪਾਨੋ ਕਾਰਾਪਿਤੋ ਹੋਤਿ… ਉਦਪਾਨਸਾਲਾ ਕਾਰਾਪਿਤਾ ਹੋਤਿ… ਪੋਕ੍ਖਰਣੀ ਕਾਰਾਪਿਤਾ ਹੋਤਿ… ਮਣ੍ਡਪੋ ਕਾਰਾਪਿਤੋ ਹੋਤਿ… ਆਰਾਮੋ ਕਾਰਾਪਿਤੋ ਹੋਤਿ… ਆਰਾਮਵਤ੍ਥੁ ਕਾਰਾਪਿਤਂ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਆਗਚ੍ਛਨ੍ਤੁ ਭਦਨ੍ਤਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ, ਧਮ੍ਮਞ੍ਚ ਸੋਤੁਂ, ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

੧੮੯. ਇਧ ਪਨ, ਭਿਕ੍ਖਵੇ, ਉਪਾਸਕੇਨ ਅਤ੍ਤਨੋ ਅਤ੍ਥਾਯ ਨਿਵੇਸਨਂ ਕਾਰਾਪਿਤਂ ਹੋਤਿ…ਪੇ… ਸਯਨਿਘਰਂ ਕਾਰਾਪਿਤਂ ਹੋਤਿ… ਉਦੋਸਿਤੋ ਕਾਰਾਪਿਤੋ ਹੋਤਿ… ਅਟ੍ਟੋ ਕਾਰਾਪਿਤੋ ਹੋਤਿ… ਮਾਲ਼ੋ ਕਾਰਾਪਿਤੋ ਹੋਤਿ… ਆਪਣੋ ਕਾਰਾਪਿਤੋ ਹੋਤਿ… ਆਪਣਸਾਲਾ ਕਾਰਾਪਿਤਾ ਹੋਤਿ… ਪਾਸਾਦੋ ਕਾਰਾਪਿਤੋ ਹੋਤਿ… ਹਮ੍ਮਿਯਂ ਕਾਰਾਪਿਤਂ ਹੋਤਿ… ਗੁਹਾ ਕਾਰਾਪਿਤਾ ਹੋਤਿ… ਪਰਿਵੇਣਂ ਕਾਰਾਪਿਤਂ ਹੋਤਿ… ਕੋਟ੍ਠਕੋ ਕਾਰਾਪਿਤੋ ਹੋਤਿ… ਉਪਟ੍ਠਾਨਸਾਲਾ ਕਾਰਾਪਿਤਾ ਹੋਤਿ… ਅਗ੍ਗਿਸਾਲਾ ਕਾਰਾਪਿਤਾ ਹੋਤਿ… ਰਸਵਤੀ ਕਾਰਾਪਿਤਾ ਹੋਤਿ… ਚਙ੍ਕਮੋ ਕਾਰਾਪਿਤੋ ਹੋਤਿ… ਚਙ੍ਕਮਨਸਾਲਾ ਕਾਰਾਪਿਤਾ ਹੋਤਿ… ਉਦਪਾਨੋ ਕਾਰਾਪਿਤੋ ਹੋਤਿ… ਉਦਪਾਨਸਾਲਾ ਕਾਰਾਪਿਤਾ ਹੋਤਿ… ਪੋਕ੍ਖਰਣੀ ਕਾਰਾਪਿਤਾ ਹੋਤਿ… ਮਣ੍ਡਪੋ ਕਾਰਾਪਿਤੋ ਹੋਤਿ… ਆਰਾਮੋ ਕਾਰਾਪਿਤੋ ਹੋਤਿ … ਆਰਾਮਵਤ੍ਥੁ ਕਾਰਾਪਿਤਂ ਹੋਤਿ… ਪੁਤ੍ਤਸ੍ਸ ਵਾ ਵਾਰੇਯ੍ਯਂ ਹੋਤਿ… ਧੀਤੁਯਾ ਵਾ ਵਾਰੇਯ੍ਯਂ ਹੋਤਿ… ਗਿਲਾਨੋ ਵਾ ਹੋਤਿ… ਅਭਿਞ੍ਞਾਤਂ ਵਾ ਸੁਤ੍ਤਨ੍ਤਂ ਭਣਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘ਆਗਚ੍ਛਨ੍ਤੁ ਭਦਨ੍ਤਾ, ਇਮਂ ਸੁਤ੍ਤਨ੍ਤਂ ਪਰਿਯਾਪੁਣਿਸ੍ਸਨ੍ਤਿ, ਪੁਰਾਯਂ ਸੁਤ੍ਤਨ੍ਤੋ ਨ ਪਲੁਜ੍ਜਤੀ’ਤਿ. ਅਞ੍ਞਤਰਂ ਵਾ ਪਨਸ੍ਸ ਕਿਚ੍ਚਂ ਹੋਤਿ – ਕਰਣੀਯਂ ਵਾ, ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਆਗਚ੍ਛਨ੍ਤੁ ਭਦਨ੍ਤਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ, ਧਮ੍ਮਞ੍ਚ ਸੋਤੁਂ, ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

੧੯੦. ਇਧ ਪਨ, ਭਿਕ੍ਖਵੇ, ਉਪਾਸਿਕਾਯ ਸਙ੍ਘਂ ਉਦ੍ਦਿਸ੍ਸ ਵਿਹਾਰੋ ਕਾਰਾਪਿਤੋ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ, ਧਮ੍ਮਞ੍ਚ ਸੋਤੁਂ, ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਉਪਾਸਿਕਾਯ ਸਙ੍ਘਂ ਉਦ੍ਦਿਸ੍ਸ ਅਡ੍ਢਯੋਗੋ ਕਾਰਾਪਿਤੋ ਹੋਤਿ…ਪੇ… ਪਾਸਾਦੋ ਕਾਰਾਪਿਤੋ ਹੋਤਿ… ਹਮ੍ਮਿਯਂ ਕਾਰਾਪਿਤਂ ਹੋਤਿ… ਗੁਹਾ ਕਾਰਾਪਿਤਾ ਹੋਤਿ… ਪਰਿਵੇਣਂ ਕਾਰਾਪਿਤਂ ਹੋਤਿ… ਕੋਟ੍ਠਕੋ ਕਾਰਾਪਿਤੋ ਹੋਤਿ… ਉਪਟ੍ਠਾਨਸਾਲਾ ਕਾਰਾਪਿਤਾ ਹੋਤਿ… ਅਗ੍ਗਿਸਾਲਾ ਕਾਰਾਪਿਤਾ ਹੋਤਿ… ਕਪ੍ਪਿਯਕੁਟਿ ਕਾਰਾਪਿਤਾ ਹੋਤਿ… ਵਚ੍ਚਕੁਟਿ ਕਾਰਾਪਿਤਾ ਹੋਤਿ… ਚਙ੍ਕਮੋ ਕਾਰਾਪਿਤੋ ਹੋਤਿ… ਚਙ੍ਕਮਨਸਾਲਾ ਕਾਰਾਪਿਤਾ ਹੋਤਿ… ਉਦਪਾਨੋ ਕਾਰਾਪਿਤੋ ਹੋਤਿ… ਉਦਪਾਨਸਾਲਾ ਕਾਰਾਪਿਤਾ ਹੋਤਿ… ਜਨ੍ਤਾਘਰਂ ਕਾਰਾਪਿਤਂ ਹੋਤਿ… ਜਨ੍ਤਾਘਰਸਾਲਾ ਕਾਰਾਪਿਤਾ ਹੋਤਿ… ਪੋਕ੍ਖਰਣੀ ਕਾਰਾਪਿਤਾ ਹੋਤਿ… ਮਣ੍ਡਪੋ ਕਾਰਾਪਿਤੋ ਹੋਤਿ… ਆਰਾਮੋ ਕਾਰਾਪਿਤੋ ਹੋਤਿ… ਆਰਾਮਵਤ੍ਥੁ ਕਾਰਾਪਿਤਂ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ, ਧਮ੍ਮਞ੍ਚ ਸੋਤੁਂ, ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਉਪਾਸਿਕਾਯ ਸਮ੍ਬਹੁਲੇ ਭਿਕ੍ਖੂ ਉਦ੍ਦਿਸ੍ਸ…ਪੇ… ਏਕਂ ਭਿਕ੍ਖੁਂ ਉਦ੍ਦਿਸ੍ਸ…ਪੇ… ਭਿਕ੍ਖੁਨਿਸਙ੍ਘਂ ਉਦ੍ਦਿਸ੍ਸ…ਪੇ… ਸਮ੍ਬਹੁਲਾ ਭਿਕ੍ਖੁਨਿਯੋ ਉਦ੍ਦਿਸ੍ਸ…ਪੇ… ਏਕਂ ਭਿਕ੍ਖੁਨਿਂ ਉਦ੍ਦਿਸ੍ਸ…ਪੇ… ਸਮ੍ਬਹੁਲਾ ਸਿਕ੍ਖਮਾਨਾਯੋ ਉਦ੍ਦਿਸ੍ਸ…ਪੇ… ਏਕਂ ਸਿਕ੍ਖਮਾਨਂ ਉਦ੍ਦਿਸ੍ਸ…ਪੇ… ਸਮ੍ਬਹੁਲੇ ਸਾਮਣੇਰੇ ਉਦ੍ਦਿਸ੍ਸ…ਪੇ… ਏਕਂ ਸਾਮਣੇਰਂ ਉਦ੍ਦਿਸ੍ਸ…ਪੇ… ਸਮ੍ਬਹੁਲਾ ਸਾਮਣੇਰਿਯੋ ਉਦ੍ਦਿਸ੍ਸ…ਪੇ… ਏਕਂ ਸਾਮਣੇਰਿਂ ਉਦ੍ਦਿਸ੍ਸ…ਪੇ….

੧੯੧. ਇਧ ਪਨ, ਭਿਕ੍ਖਵੇ, ਉਪਾਸਿਕਾਯ ਅਤ੍ਤਨੋ ਅਤ੍ਥਾਯ ਨਿਵੇਸਨਂ ਕਾਰਾਪਿਤਂ ਹੋਤਿ…ਪੇ… ਸਯਨਿਘਰਂ ਕਾਰਾਪਿਤਂ ਹੋਤਿ… ਉਦੋਸਿਤੋ ਕਾਰਾਪਿਤੋ ਹੋਤਿ… ਅਟ੍ਟੋ ਕਾਰਾਪਿਤੋ ਹੋਤਿ… ਮਾਲ਼ੋ ਕਾਰਾਪਿਤੋ ਹੋਤਿ… ਆਪਣੋ ਕਾਰਾਪਿਤੋ ਹੋਤਿ… ਆਪਣਸਾਲਾ ਕਾਰਾਪਿਤਾ ਹੋਤਿ… ਪਾਸਾਦੋ ਕਾਰਾਪਿਤੋ ਹੋਤਿ… ਹਮ੍ਮਿਯਂ ਕਾਰਾਪਿਤਂ ਹੋਤਿ… ਗੁਹਾ ਕਾਰਾਪਿਤਾ ਹੋਤਿ… ਪਰਿਵੇਣਂ ਕਾਰਾਪਿਤਂ ਹੋਤਿ… ਕੋਟ੍ਠਕੋ ਕਾਰਾਪਿਤੋ ਹੋਤਿ… ਉਪਟ੍ਠਾਨਸਾਲਾ ਕਾਰਾਪਿਤਾ ਹੋਤਿ… ਅਗ੍ਗਿਸਾਲਾ ਕਾਰਾਪਿਤਾ ਹੋਤਿ… ਰਸਵਤੀ ਕਾਰਾਪਿਤਾ ਹੋਤਿ… ਚਙ੍ਕਮੋ ਕਾਰਾਪਿਤੋ ਹੋਤਿ… ਚਙ੍ਕਮਨਸਾਲਾ ਕਾਰਾਪਿਤਾ ਹੋਤਿ… ਉਦਪਾਨੋ ਕਾਰਾਪਿਤੋ ਹੋਤਿ … ਉਦਪਾਨਸਾਲਾ ਕਾਰਾਪਿਤਾ ਹੋਤਿ… ਪੋਕ੍ਖਰਣੀ ਕਾਰਾਪਿਤਾ ਹੋਤਿ… ਮਣ੍ਡਪੋ ਕਾਰਾਪਿਤੋ ਹੋਤਿ… ਆਰਾਮੋ ਕਾਰਾਪਿਤੋ ਹੋਤਿ… ਆਰਾਮਵਤ੍ਥੁ ਕਾਰਾਪਿਤਂ ਹੋਤਿ… ਪੁਤ੍ਤਸ੍ਸ ਵਾ ਵਾਰੇਯ੍ਯਂ ਹੋਤਿ… ਧੀਤੁਯਾ ਵਾ ਵਾਰੇਯ੍ਯਂ ਹੋਤਿ… ਗਿਲਾਨਾ ਵਾ ਹੋਤਿ… ਅਭਿਞ੍ਞਾਤਂ ਵਾ ਸੁਤ੍ਤਨ੍ਤਂ ਭਣਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਆਗਚ੍ਛਨ੍ਤੁ ਅਯ੍ਯਾ, ਇਮਂ ਸੁਤ੍ਤਨ੍ਤਂ ਪਰਿਯਾਪੁਣਿਸ੍ਸਨ੍ਤਿ, ਪੁਰਾਯਂ ਸੁਤ੍ਤਨ੍ਤੋ ਪਲੁਜ੍ਜਤੀ’’ਤਿ. ਅਞ੍ਞਤਰਂ ਵਾ ਪਨਸ੍ਸਾ ਕਿਚ੍ਚਂ ਹੋਤਿ ਕਰਣੀਯਂ ਵਾ, ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ, ਧਮ੍ਮਞ੍ਚ ਸੋਤੁਂ, ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

੧੯੨. ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਸਙ੍ਘਂ ਉਦ੍ਦਿਸ੍ਸ…ਪੇ… ਭਿਕ੍ਖੁਨਿਯਾ ਸਙ੍ਘਂ ਉਦ੍ਦਿਸ੍ਸ… ਸਿਕ੍ਖਮਾਨਾਯ ਸਙ੍ਘਂ ਉਦ੍ਦਿਸ੍ਸ… ਸਾਮਣੇਰੇਨ ਸਙ੍ਘਂ ਉਦ੍ਦਿਸ੍ਸ… ਸਾਮਣੇਰਿਯਾ ਸਙ੍ਘਂ ਉਦ੍ਦਿਸ੍ਸ … ਸਮ੍ਬਹੁਲੇ ਭਿਕ੍ਖੂ ਉਦ੍ਦਿਸ੍ਸ… ਏਕਂ ਭਿਕ੍ਖੁਂ ਉਦ੍ਦਿਸ੍ਸ… ਭਿਕ੍ਖੁਨਿਸਙ੍ਘਂ ਉਦ੍ਦਿਸ੍ਸ… ਸਮ੍ਬਹੁਲਾ ਭਿਕ੍ਖੁਨਿਯੋ ਉਦ੍ਦਿਸ੍ਸ… ਏਕਂ ਭਿਕ੍ਖੁਨਿਂ ਉਦ੍ਦਿਸ੍ਸ… ਸਮ੍ਬਹੁਲਾ ਸਿਕ੍ਖਮਾਨਾਯੋ ਉਦ੍ਦਿਸ੍ਸ… ਏਕਂ ਸਿਕ੍ਖਮਾਨਂ ਉਦ੍ਦਿਸ੍ਸ… ਸਮ੍ਬਹੁਲੇ ਸਾਮਣੇਰੇ ਉਦ੍ਦਿਸ੍ਸ… ਏਕਂ ਸਾਮਣੇਰਂ ਉਦ੍ਦਿਸ੍ਸ… ਸਮ੍ਬਹੁਲਾ ਸਾਮਣੇਰਿਯੋ ਉਦ੍ਦਿਸ੍ਸ… ਏਕਂ ਸਾਮਣੇਰਿਂ ਉਦ੍ਦਿਸ੍ਸ… ਅਤ੍ਤਨੋ ਅਤ੍ਥਾਯ ਵਿਹਾਰੋ ਕਾਰਾਪਿਤੋ ਹੋਤਿ…ਪੇ… ਅਡ੍ਢਯੋਗੋ ਕਾਰਾਪਿਤੋ ਹੋਤਿ… ਪਾਸਾਦੋ ਕਾਰਾਪਿਤੋ ਹੋਤਿ… ਹਮ੍ਮਿਯਂ ਕਾਰਾਪਿਤਂ ਹੋਤਿ… ਗੁਹਾ ਕਾਰਾਪਿਤਾ ਹੋਤਿ… ਪਰਿਵੇਣਂ ਕਾਰਾਪਿਤਂ ਹੋਤਿ … ਕੋਟ੍ਠਕੋ ਕਾਰਾਪਿਤੋ ਹੋਤਿ… ਉਪਟ੍ਠਾਨਸਾਲਾ ਕਾਰਾਪਿਤਾ ਹੋਤਿ… ਅਗ੍ਗਿਸਾਲਾ ਕਾਰਾਪਿਤਾ ਹੋਤਿ… ਕਪ੍ਪਿਯਕੁਟਿ ਕਾਰਾਪਿਤਾ ਹੋਤਿ… ਚਙ੍ਕਮੋ ਕਾਰਾਪਿਤੋ ਹੋਤਿ… ਚਙ੍ਕਮਨਸਾਲਾ ਕਾਰਾਪਿਤਾ ਹੋਤਿ… ਉਦਪਾਨੋ ਕਾਰਾਪਿਤੋ ਹੋਤਿ… ਉਦਪਾਨਸਾਲਾ ਕਾਰਾਪਿਤਾ ਹੋਤਿ… ਪੋਕ੍ਖਰਣੀ ਕਾਰਾਪਿਤਾ ਹੋਤਿ… ਮਣ੍ਡਪੋ ਕਾਰਾਪਿਤੋ ਹੋਤਿ… ਆਰਾਮੋ ਕਾਰਾਪਿਤੋ ਹੋਤਿ… ਆਰਾਮਵਤ੍ਥੁ ਕਾਰਾਪਿਤਂ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ… ‘‘ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ, ਧਮ੍ਮਞ੍ਚ ਸੋਤੁਂ, ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋਤਿ.

ਸਤ੍ਤਾਹਕਰਣੀਯਾਨੁਜਾਨਤਾ ਨਿਟ੍ਠਿਤਾ.

੧੧੦. ਪਞ੍ਚਨ੍ਨਂ ਅਪ੍ਪਹਿਤੇਪਿ ਅਨੁਜਾਨਨਾ

੧੯੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਸੋ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਅਹਞ੍ਹਿ ਗਿਲਾਨੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇਵ ਪਹਿਤੇ. ਭਿਕ੍ਖੁਸ੍ਸ, ਭਿਕ੍ਖੁਨਿਯਾ, ਸਿਕ੍ਖਮਾਨਾਯ, ਸਾਮਣੇਰਸ੍ਸ, ਸਾਮਣੇਰਿਯਾ – ਅਨੁਜਾਨਾਮਿ, ਭਿਕ੍ਖਵੇ, ਇਮੇਸਂ ਪਞ੍ਚਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇਵ ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਗਿਲਾਨੋ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਗਿਲਾਨਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ, ਉਪਟ੍ਠਹਿਸ੍ਸਾਮਿ ਵਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਨਭਿਰਤਿ ਮੇ ਉਪ੍ਪਨ੍ਨਾ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਅਨਭਿਰਤਂ ਵੂਪਕਾਸੇਸ੍ਸਾਮਿ ਵਾ, ਵੂਪਕਾਸਾਪੇਸ੍ਸਾਮਿ ਵਾ, ਧਮ੍ਮਕਥਂ ਵਾਸ੍ਸ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਕੁਕ੍ਕੁਚ੍ਚਂ ਮੇ ਉਪ੍ਪਨ੍ਨਂ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਕੁਕ੍ਕੁਚ੍ਚਂ ਵਿਨੋਦੇਸ੍ਸਾਮਿ ਵਾ, ਵਿਨੋਦਾਪੇਸ੍ਸਾਮਿ ਵਾ, ਧਮ੍ਮਕਥਂ ਵਾਸ੍ਸ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਦਿਟ੍ਠਿਗਤਂ ਮੇ ਉਪ੍ਪਨ੍ਨਂ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਦਿਟ੍ਠਿਗਤਂ ਵਿਵੇਚੇਸ੍ਸਾਮਿ ਵਾ, ਵਿਵੇਚਾਪੇਸ੍ਸਾਮਿ ਵਾ, ਧਮ੍ਮਕਥਂ ਵਾਸ੍ਸ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਰੁਧਮ੍ਮਂ ਅਜ੍ਝਾਪਨ੍ਨੋ ਪਰਿਵਾਸਾਰਹੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਪਰਿਵਾਸਦਾਨਂ ਉਸ੍ਸੁਕ੍ਕਂ ਕਰਿਸ੍ਸਾਮਿ ਵਾ, ਅਨੁਸ੍ਸਾਵੇਸ੍ਸਾਮਿ ਵਾ, ਗਣਪੂਰਕੋ ਵਾ ਭਵਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਮੂਲਾਯ ਪਟਿਕਸ੍ਸਨਾਰਹੋ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਮੂਲਾਯ ਪਟਿਕਸ੍ਸਨਾਰਹੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਮੂਲਾਯ ਪਟਿਕਸ੍ਸਨਂ ਉਸ੍ਸੁਕ੍ਕਂ ਕਰਿਸ੍ਸਾਮਿ ਵਾ, ਅਨੁਸ੍ਸਾਵੇਸ੍ਸਾਮਿ ਵਾ, ਗਣਪੂਰਕੋ ਵਾ ਭਵਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਮਾਨਤ੍ਤਾਰਹੋ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਮਾਨਤ੍ਤਾਰਹੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਮਾਨਤ੍ਤਦਾਨਂ ਉਸ੍ਸੁਕ੍ਕਂ ਕਰਿਸ੍ਸਾਮਿ ਵਾ, ਅਨੁਸ੍ਸਾਵੇਸ੍ਸਾਮਿ ਵਾ, ਗਣਪੂਰਕੋ ਵਾ ਭਵਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਅਬ੍ਭਾਨਾਰਹੋ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਅਬ੍ਭਾਨਾਰਹੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਅਬ੍ਭਾਨਂ ਉਸ੍ਸੁਕ੍ਕਂ ਕਰਿਸ੍ਸਾਮਿ ਵਾ, ਅਨੁਸ੍ਸਾਵੇਸ੍ਸਾਮਿ ਵਾ, ਗਣਪੂਰਕੋ ਵਾ ਭਵਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਸਙ੍ਘੋ ਕਮ੍ਮਂ ਕਤ੍ਤੁਕਾਮੋ ਹੋਤਿ ਤਜ੍ਜਨੀਯਂ ਵਾ, ਨਿਯਸ੍ਸਂ ਵਾ, ਪਬ੍ਬਾਜਨੀਯਂ ਵਾ, ਪਟਿਸਾਰਣੀਯਂ ਵਾ, ਉਕ੍ਖੇਪਨੀਯਂ ਵਾ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਸਙ੍ਘੋ ਮੇ ਕਮ੍ਮਂ ਕਤ੍ਤੁਕਾਮੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਕਿਨ੍ਤਿ ਨੁ ਖੋ ਸਙ੍ਘੋ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਕਤਂ ਵਾ ਪਨਸ੍ਸ ਹੋਤਿ ਸਙ੍ਘੇਨ ਕਮ੍ਮਂ ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ ‘‘ਸਙ੍ਘੋ ਮੇ ਕਮ੍ਮਂ ਅਕਾਸਿ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਕਿਨ੍ਤਿ ਨੁ ਖੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

੧੯੪. ਇਧ ਪਨ, ਭਿਕ੍ਖਵੇ, ਭਿਕ੍ਖੁਨੀ ਗਿਲਾਨਾ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਗਿਲਾਨਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ, ਉਪਟ੍ਠਹਿਸ੍ਸਾਮਿ ਵਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਿਯਾ ਅਨਭਿਰਤਿ ਉਪ੍ਪਨ੍ਨਾ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਨਭਿਰਤਿ ਮੇ ਉਪ੍ਪਨ੍ਨਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਅਨਭਿਰਤਂ ਵੂਪਕਾਸੇਸ੍ਸਾਮਿ ਵਾ, ਵੂਪਕਾਸਾਪੇਸ੍ਸਾਮਿ ਵਾ, ਧਮ੍ਮਕਥਂ ਵਾਸ੍ਸਾ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਿਯਾ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਕੁਕ੍ਕੁਚ੍ਚਂ ਮੇ ਉਪ੍ਪਨ੍ਨਂ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਕੁਕ੍ਕੁਚ੍ਚਂ ਵਿਨੋਦੇਸ੍ਸਾਮਿ ਵਾ, ਵਿਨੋਦਾਪੇਸ੍ਸਾਮਿ ਵਾ, ਧਮ੍ਮਕਥਂ ਵਾਸ੍ਸਾ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਿਯਾ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਦਿਟ੍ਠਿਗਤਂ ਮੇ ਉਪ੍ਪਨ੍ਨਂ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਦਿਟ੍ਠਿਗਤਂ ਵਿਵੇਚੇਸ੍ਸਾਮਿ ਵਾ, ਵਿਵੇਚਾਪੇਸ੍ਸਾਮਿ ਵਾ, ਧਮ੍ਮਕਥਂ ਵਾਸ੍ਸਾ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨੀ ਗਰੁਧਮ੍ਮਂ ਅਜ੍ਝਾਪਨ੍ਨਾ ਹੋਤਿ ਮਾਨਤ੍ਤਾਰਹਾ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਰੁਧਮ੍ਮਂ ਅਜ੍ਝਾਪਨ੍ਨਾ ਮਾਨਤ੍ਤਾਰਹਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਮਾਨਤ੍ਤਦਾਨਂ ਉਸ੍ਸੁਕ੍ਕਂ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨੀ ਮੂਲਾਯ ਪਟਿਕਸ੍ਸਨਾਰਹਾ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਮੂਲਾਯ ਪਟਿਕਸ੍ਸਨਾਰਹਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਮੂਲਾਯ ਪਟਿਕਸ੍ਸਨਂ ਉਸ੍ਸੁਕ੍ਕਂ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨੀ ਅਬ੍ਭਾਨਾਰਹਾ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਅਬ੍ਭਾਨਾਰਹਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਅਬ੍ਭਾਨਂ ਉਸ੍ਸੁਕ੍ਕਂ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਿਯਾ ਸਙ੍ਘੋ ਕਮ੍ਮਂ ਕਤ੍ਤੁਕਾਮੋ ਹੋਤਿ – ਤਜ੍ਜਨੀਯਂ ਵਾ, ਨਿਯਸ੍ਸਂ ਵਾ, ਪਬ੍ਬਾਜਨੀਯਂ ਵਾ, ਪਟਿਸਾਰਣੀਯਂ ਵਾ, ਉਕ੍ਖੇਪਨੀਯਂ ਵਾ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਸਙ੍ਘੋ ਮੇ ਕਮ੍ਮਂ ਕਤ੍ਤੁਕਾਮੋ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਕਿਨ੍ਤਿ ਨੁ ਖੋ ਸਙ੍ਘੋ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਕਤਂ ਵਾ ਪਨਸ੍ਸਾ ਹੋਤਿ ਸਙ੍ਘੇਨ ਕਮ੍ਮਂ – ਤਜ੍ਜਨੀਯਂ ਵਾ, ਨਿਯਸ੍ਸਂ ਵਾ, ਪਬ੍ਬਾਜਨੀਯਂ ਵਾ, ਪਟਿਸਾਰਣੀਯਂ ਵਾ, ਉਕ੍ਖੇਪਨੀਯਂ ਵਾ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਸਙ੍ਘੋ ਮੇ ਕਮ੍ਮਂ ਅਕਾਸਿ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਕਿਨ੍ਤਿ ਨੁ ਖੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

੧੯੫. ਇਧ ਪਨ, ਭਿਕ੍ਖਵੇ, ਸਿਕ੍ਖਮਾਨਾ ਗਿਲਾਨਾ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ – ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਗਿਲਾਨਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ, ਉਪਟ੍ਠਹਿਸ੍ਸਾਮਿ ਵਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਸਿਕ੍ਖਮਾਨਾਯ ਅਨਭਿਰਤਿ ਉਪ੍ਪਨ੍ਨਾ ਹੋਤਿ…ਪੇ… ਸਿਕ੍ਖਮਾਨਾਯ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ… ਸਿਕ੍ਖਮਾਨਾਯ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ… ਸਿਕ੍ਖਮਾਨਾਯ ਸਿਕ੍ਖਾ ਕੁਪਿਤਾ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਸਿਕ੍ਖਾ ਮੇ ਕੁਪਿਤਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਸਿਕ੍ਖਾਸਮਾਦਾਨਂ ਉਸ੍ਸੁਕ੍ਕਂ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਸਿਕ੍ਖਮਾਨਾ ਉਪਸਮ੍ਪਜ੍ਜਿਤੁਕਾਮਾ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਉਪਸਮ੍ਪਜ੍ਜਿਤੁਕਾਮਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ਉਪਸਮ੍ਪਦਂ ਉਸ੍ਸੁਕ੍ਕਂ ਕਰਿਸ੍ਸਾਮਿ ਵਾ, ਅਨੁਸ੍ਸਾਵੇਸ੍ਸਾਮਿ ਵਾ, ਗਣਪੂਰਕੋ ਵਾ ਭਵਿਸ੍ਸਾਮੀਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

੧੯੬. ਇਧ ਪਨ, ਭਿਕ੍ਖਵੇ, ਸਾਮਣੇਰੋ ਗਿਲਾਨੋ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਗਿਲਾਨਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ, ਉਪਟ੍ਠਹਿਸ੍ਸਾਮਿ ਵਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਸਾਮਣੇਰਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ…ਪੇ… ਸਾਮਣੇਰਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ… ਸਾਮਣੇਰਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ… ਸਾਮਣੇਰੋ ਵਸ੍ਸਂ ਪੁਚ੍ਛਿਤੁਕਾਮੋ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਵਸ੍ਸਂ ਪੁਚ੍ਛਿਤੁਕਾਮੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਪੁਚ੍ਛਿਸ੍ਸਾਮਿ ਵਾ, ਆਚਿਕ੍ਖਿਸ੍ਸਾਮਿ ਵਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਸਾਮਣੇਰੋ ਉਪਸਮ੍ਪਜ੍ਜਿਤੁਕਾਮੋ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਉਪਸਮ੍ਪਜ੍ਜਿਤੁਕਾਮੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਉਪਸਮ੍ਪਦਂ ਉਸ੍ਸੁਕ੍ਕਂ ਕਰਿਸ੍ਸਾਮਿ ਵਾ, ਅਨੁਸ੍ਸਾਵੇਸ੍ਸਾਮਿ ਵਾ, ਗਣਪੂਰਕੋ ਵਾ ਭਵਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

੧੯੭. ਇਧ ਪਨ, ਭਿਕ੍ਖਵੇ, ਸਾਮਣੇਰੀ ਗਿਲਾਨਾ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਗਿਲਾਨਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ, ਉਪਟ੍ਠਹਿਸ੍ਸਾਮਿ ਵਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਸਾਮਣੇਰਿਯਾ ਅਨਭਿਰਤਿ ਉਪ੍ਪਨ੍ਨਾ ਹੋਤਿ…ਪੇ… ਸਾਮਣੇਰਿਯਾ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ… ਸਾਮਣੇਰਿਯਾ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ… ਸਾਮਣੇਰੀ ਵਸ੍ਸਂ ਪੁਚ੍ਛਿਤੁਕਾਮਾ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਵਸ੍ਸਂ ਪੁਚ੍ਛਿਤੁਕਾਮਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਪੁਚ੍ਛਿਸ੍ਸਾਮਿ ਵਾ, ਆਚਿਕ੍ਖਿਸ੍ਸਾਮਿ ਵਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਸਾਮਣੇਰੀ ਸਿਕ੍ਖਂ ਸਮਾਦਿਯਿਤੁਕਾਮਾ ਹੋਤਿ. ਸਾ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਸਿਕ੍ਖਂ ਸਮਾਦਿਯਿਤੁਕਾਮਾ, ਆਗਚ੍ਛਨ੍ਤੁ ਅਯ੍ਯਾ, ਇਚ੍ਛਾਮਿ ਅਯ੍ਯਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਸਿਕ੍ਖਾਸਮਾਦਾਨਂ ਉਸ੍ਸੁਕ੍ਕਂ ਕਰਿਸ੍ਸਾਮੀ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋਤਿ.

ਪਞ੍ਚਨ੍ਨਂ ਅਪ੍ਪਹਿਤੇਪਿ ਅਨੁਜਾਨਨਾ ਨਿਟ੍ਠਿਤਾ.

੧੧੧. ਸਤ੍ਤਨ੍ਨਂ ਅਪ੍ਪਹਿਤੇਪਿ ਅਨੁਜਾਨਨਾ

੧੯੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਮਾਤਾ ਗਿਲਾਨਾ ਹੋਤਿ. ਸਾ ਪੁਤ੍ਤਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਅਹਞ੍ਹਿ ਗਿਲਾਨਾ, ਆਗਚ੍ਛਤੁ ਮੇ ਪੁਤ੍ਤੋ, ਇਚ੍ਛਾਮਿ ਪੁਤ੍ਤਸ੍ਸ ਆਗਤ’’ਨ੍ਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਪਹਿਤੇ ਗਨ੍ਤੁਂ, ਨ ਤ੍ਵੇਵ ਅਪ੍ਪਹਿਤੇ; ਪਞ੍ਚਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇਵ ਪਹਿਤੇਤਿ. ਅਯਞ੍ਚ ਮੇ ਮਾਤਾ ਗਿਲਾਨਾ, ਸਾ ਚ ਅਨੁਪਾਸਿਕਾ, ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇਵ ਪਹਿਤੇ. ਭਿਕ੍ਖੁਸ੍ਸ, ਭਿਕ੍ਖੁਨਿਯਾ, ਸਿਕ੍ਖਮਾਨਾਯ, ਸਾਮਣੇਰਸ੍ਸ, ਸਾਮਣੇਰਿਯਾ, ਮਾਤੁਯਾ ਚ ਪਿਤੁਸ੍ਸ ਚ – ਅਨੁਜਾਨਾਮਿ, ਭਿਕ੍ਖਵੇ, ਇਮੇਸਂ ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇਵ ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਮਾਤਾ ਗਿਲਾਨਾ ਹੋਤਿ. ਸਾ ਚੇ ਪੁਤ੍ਤਸ੍ਸ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨਾ, ਆਗਚ੍ਛਤੁ ਮੇ ਪੁਤ੍ਤੋ, ਇਚ੍ਛਾਮਿ ਪੁਤ੍ਤਸ੍ਸ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਗਿਲਾਨਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ, ਉਪਟ੍ਠਹਿਸ੍ਸਾਮਿ ਵਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਪਿਤਾ ਗਿਲਾਨੋ ਹੋਤਿ. ਸੋ ਚੇ ਪੁਤ੍ਤਸ੍ਸ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨੋ, ਆਗਚ੍ਛਤੁ ਮੇ ਪੁਤ੍ਤੋ, ਇਚ੍ਛਾਮਿ ਪੁਤ੍ਤਸ੍ਸ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇਵ ਪਹਿਤੇ – ‘‘ਗਿਲਾਨਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ, ਉਪਟ੍ਠਹਿਸ੍ਸਾਮਿ ਵਾ’’ਤਿ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਸਤ੍ਤਨ੍ਨਂ ਅਪ੍ਪਹਿਤੇਪਿ ਅਨੁਜਾਨਨਾ ਨਿਟ੍ਠਿਤਾ.

੧੧੨. ਪਹਿਤੇਯੇਵ ਅਨੁਜਾਨਨਾ

੧੯੯ . ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਭਾਤਾ ਗਿਲਾਨੋ ਹੋਤਿ. ਸੋ ਚੇ ਭਾਤੁਨੋ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨੋ, ਆਗਚ੍ਛਤੁ ਮੇ ਭਾਤਾ, ਇਚ੍ਛਾਮਿ ਭਾਤੁਨੋ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਭਗਿਨੀ ਗਿਲਾਨਾ ਹੋਤਿ. ਸਾ ਚੇ ਭਾਤੁਨੋ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨਾ, ਆਗਚ੍ਛਤੁ ਮੇ ਭਾਤਾ, ਇਚ੍ਛਾਮਿ ਭਾਤੁਨੋ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਞਾਤਕੋ ਗਿਲਾਨੋ ਹੋਤਿ. ਸੋ ਚੇ ਭਿਕ੍ਖੁਸ੍ਸ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨੋ, ਆਗਚ੍ਛਤੁ ਭਦਨ੍ਤੋ, ਇਚ੍ਛਾਮਿ ਭਦਨ੍ਤਸ੍ਸ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਗਤਿਕੋ ਗਿਲਾਨੋ ਹੋਤਿ. ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨੋ, ਆਗਚ੍ਛਨ੍ਤੁ ਭਦਨ੍ਤਾ, ਇਚ੍ਛਾਮਿ ਭਦਨ੍ਤਾਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ, ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ.

ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਵਿਹਾਰੋ ਉਨ੍ਦ੍ਰਿਯਤਿ. ਅਞ੍ਞਤਰੇਨ ਉਪਾਸਕੇਨ ਅਰਞ੍ਞੇ ਭਣ੍ਡਂ ਛੇਦਾਪਿਤਂ ਹੋਤਿ. ਸੋ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਸਚੇ ਭਦਨ੍ਤਾ ਤਂ ਭਣ੍ਡਂ ਆਵਹਾਪੇਯ੍ਯੁਂ, ਦਜ੍ਜਾਹਂ ਤਂ ਭਣ੍ਡ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਕਰਣੀਯੇਨ ਗਨ੍ਤੁਂ. ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋਤਿ.

ਪਹਿਤੇਯੇਵ ਅਨੁਜਾਨਨਾ ਨਿਟ੍ਠਿਤਾ.

ਵਸ੍ਸਾਵਾਸਭਾਣਵਾਰੋ ਨਿਟ੍ਠਿਤੋ.

੧੧੩. ਅਨ੍ਤਰਾਯੇ ਅਨਾਪਤ੍ਤਿਵਸ੍ਸਚ੍ਛੇਦਵਾਰੋ

੨੦੦. ਤੇਨ ਖੋ ਪਨ ਸਮਯੇਨ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸੂਪਗਤਾ ਭਿਕ੍ਖੂ ਵਾਲ਼ੇਹਿ ਉਬ੍ਬਾਲ਼੍ਹਾ ਹੋਨ੍ਤਿ. ਗਣ੍ਹਿਂਸੁਪਿ ਪਰਿਪਾਤਿਂਸੁਪਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾ ਭਿਕ੍ਖੂ ਵਾਲ਼ੇਹਿ ਉਬ੍ਬਾਲ਼੍ਹਾ ਹੋਨ੍ਤਿ. ਗਣ੍ਹਨ੍ਤਿਪਿ ਪਰਿਪਾਤੇਨ੍ਤਿਪਿ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾ ਭਿਕ੍ਖੂ ਸਰੀਸਪੇਹਿ ਉਬ੍ਬਾਲ਼੍ਹਾ ਹੋਨ੍ਤਿ. ਡਂਸਨ੍ਤਿਪਿ ਪਰਿਪਾਤੇਨ੍ਤਿਪਿ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾ ਭਿਕ੍ਖੂ ਚੋਰੇਹਿ ਉਬ੍ਬਾਲ਼੍ਹਾ ਹੋਨ੍ਤਿ. ਵਿਲੁਮ੍ਪਨ੍ਤਿਪਿ ਆਕੋਟੇਨ੍ਤਿਪਿ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾ ਭਿਕ੍ਖੂ ਪਿਸਾਚੇਹਿ ਉਬ੍ਬਾਲ਼੍ਹਾ ਹੋਨ੍ਤਿ. ਆਵਿਸਨ੍ਤਿਪਿ ਹਨਨ੍ਤਿਪਿ [ਓਜਮ੍ਪਿ ਹਰਨ੍ਤਿ (ਸੀ.), ਹਰਨ੍ਤਿਪਿ (ਸ੍ਯਾ.)]. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾਨਂ ਭਿਕ੍ਖੂਨਂ ਗਾਮੋ ਅਗ੍ਗਿਨਾ ਦਡ੍ਢੋ ਹੋਤਿ. ਭਿਕ੍ਖੂ ਪਿਣ੍ਡਕੇਨ ਕਿਲਮਨ੍ਤਿ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾਨਂ ਭਿਕ੍ਖੂਨਂ ਸੇਨਾਸਨਂ ਅਗ੍ਗਿਨਾ ਦਡ੍ਢਂ ਹੋਤਿ. ਭਿਕ੍ਖੂ ਸੇਨਾਸਨੇਨ ਕਿਲਮਨ੍ਤਿ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾਨਂ ਭਿਕ੍ਖੂਨਂ ਗਾਮੋ ਉਦਕੇਨ ਵੂਲ਼੍ਹੋ ਹੋਤਿ. ਭਿਕ੍ਖੂ ਪਿਣ੍ਡਕੇਨ ਕਿਲਮਨ੍ਤਿ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾਨਂ ਭਿਕ੍ਖੂਨਂ ਸੇਨਾਸਨਂ ਉਦਕੇਨ ਵੂਲ਼੍ਹਂ ਹੋਤਿ. ਭਿਕ੍ਖੂ ਸੇਨਾਸਨੇਨ ਕਿਲਮਨ੍ਤਿ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸਾਤਿ.

੨੦੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸੂਪਗਤਾਨਂ ਭਿਕ੍ਖੂਨਂ ਗਾਮੋ ਚੋਰੇਹਿ ਵੁਟ੍ਠਾਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯੇਨ ਗਾਮੋ ਤੇਨ ਗਨ੍ਤੁਨ੍ਤਿ.

ਗਾਮੋ ਦ੍ਵੇਧਾ ਭਿਜ੍ਜਿਤ੍ਥ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯੇਨ ਬਹੁਤਰਾ ਤੇਨ ਗਨ੍ਤੁਨ੍ਤਿ.

ਬਹੁਤਰਾ ਅਸ੍ਸਦ੍ਧਾ ਹੋਨ੍ਤਿ ਅਪ੍ਪਸਨ੍ਨਾ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯੇਨ ਸਦ੍ਧਾ ਪਸਨ੍ਨਾ ਤੇਨ ਗਨ੍ਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸੂਪਗਤਾ ਭਿਕ੍ਖੂ ਨ ਲਭਿਂਸੁ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾ ਭਿਕ੍ਖੂ ਨ ਲਭਨ੍ਤਿ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾ ਭਿਕ੍ਖੂ ਲਭਨ੍ਤਿ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ, ਨ ਲਭਨ੍ਤਿ ਸਪ੍ਪਾਯਾਨਿ ਭੋਜਨਾਨਿ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾ ਭਿਕ੍ਖੂ ਲਭਨ੍ਤਿ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ, ਲਭਨ੍ਤਿ ਸਪ੍ਪਾਯਾਨਿ ਭੋਜਨਾਨਿ, ਨ ਲਭਨ੍ਤਿ ਸਪ੍ਪਾਯਾਨਿ ਭੇਸਜ੍ਜਾਨਿ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਾ ਭਿਕ੍ਖੂ ਲਭਨ੍ਤਿ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ, ਲਭਨ੍ਤਿ ਸਪ੍ਪਾਯਾਨਿ ਭੋਜਨਾਨਿ, ਲਭਨ੍ਤਿ ਸਪ੍ਪਾਯਾਨਿ ਭੇਸਜ੍ਜਾਨਿ, ਨ ਲਭਨ੍ਤਿ ਪਤਿਰੂਪਂ ਉਪਟ੍ਠਾਕਂ. ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਂ ਭਿਕ੍ਖੁਂ ਇਤ੍ਥੀ ਨਿਮਨ੍ਤੇਤਿ – ‘‘ਏਹਿ, ਭਨ੍ਤੇ, ਹਿਰਞ੍ਞਂ ਵਾ ਤੇ ਦੇਮਿ, ਸੁਵਣ੍ਣਂ ਵਾ ਤੇ ਦੇਮਿ, ਖੇਤ੍ਤਂ ਵਾ ਤੇ ਦੇਮਿ, ਵਤ੍ਥੁਂ ਵਾ ਤੇ ਦੇਮਿ, ਗਾਵੁਂ ਵਾ ਤੇ ਦੇਮਿ, ਗਾਵਿਂ ਵਾ ਤੇ ਦੇਮਿ, ਦਾਸਂ ਵਾ ਤੇ ਦੇਮਿ, ਦਾਸਿਂ ਵਾ ਤੇ ਦੇਮਿ, ਧੀਤਰਂ ਵਾ ਤੇ ਦੇਮਿ ਭਰਿਯਤ੍ਥਾਯ, ਅਹਂ ਵਾ ਤੇ ਭਰਿਯਾ ਹੋਮਿ, ਅਞ੍ਞਂ ਵਾ ਤੇ ਭਰਿਯਂ ਆਨੇਮੀ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ, ‘ਲਹੁਪਰਿਵਤ੍ਤਂ ਖੋ ਚਿਤ੍ਤਂ ਵੁਤ੍ਤਂ ਭਗਵਤਾ, ਸਿਯਾਪਿ ਮੇ ਬ੍ਰਹ੍ਮਚਰਿਯਸ੍ਸ ਅਨ੍ਤਰਾਯੋ’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤਂ ਭਿਕ੍ਖੁਂ ਵੇਸੀ ਨਿਮਨ੍ਤੇਤਿ…ਪੇ… ਥੁਲ੍ਲਕੁਮਾਰੀ ਨਿਮਨ੍ਤੇਤਿ… ਪਣ੍ਡਕੋ ਨਿਮਨ੍ਤੇਤਿ… ਞਾਤਕਾ ਨਿਮਨ੍ਤੇਨ੍ਤਿ… ਰਾਜਾਨੋ ਨਿਮਨ੍ਤੇਨ੍ਤਿ… ਚੋਰਾ ਨਿਮਨ੍ਤੇਨ੍ਤਿ… ਧੁਤ੍ਤਾ ਨਿਮਨ੍ਤੇਨ੍ਤਿ – ‘‘ਏਹਿ, ਭਨ੍ਤੇ, ਹਿਰਞ੍ਞਂ ਵਾ ਤੇ ਦੇਮ, ਸੁਵਣ੍ਣਂ ਵਾ ਤੇ ਦੇਮ, ਖੇਤ੍ਤਂ ਵਾ ਤੇ ਦੇਮ, ਵਤ੍ਥੁਂ ਵਾ ਤੇ ਦੇਮ, ਗਾਵੁਂ ਵਾ ਤੇ ਦੇਮ, ਗਾਵਿਂ ਵਾ ਤੇ ਦੇਮ, ਦਾਸਂ ਵਾ ਤੇ ਦੇਮ, ਦਾਸਿਂ ਵਾ ਤੇ ਦੇਮ, ਧੀਤਰਂ ਵਾ ਤੇ ਦੇਮ ਭਰਿਯਤ੍ਥਾਯ, ਅਞ੍ਞਂ ਵਾ ਤੇ ਭਰਿਯਂ ਆਨੇਮਾ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ, ‘ਲਹੁਪਰਿਵਤ੍ਤਂ ਖੋ ਚਿਤ੍ਤਂ ਵੁਤ੍ਤਂ ਭਗਵਤਾ, ਸਿਯਾਪਿ ਮੇ ਬ੍ਰਹ੍ਮਚਰਿਯਸ੍ਸ ਅਨ੍ਤਰਾਯੋ’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਅਸ੍ਸਾਮਿਕਂ ਨਿਧਿਂ ਪਸ੍ਸਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ, ‘ਲਹੁਪਰਿਵਤ੍ਤਂ ਖੋ ਚਿਤ੍ਤਂ ਵੁਤ੍ਤਂ ਭਗਵਤਾ, ਸਿਯਾਪਿ ਮੇ ਬ੍ਰਹ੍ਮਚਰਿਯਸ੍ਸ ਅਨ੍ਤਰਾਯੋ’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਅਨ੍ਤਰਾਯੇ ਅਨਾਪਤ੍ਤਿਵਸ੍ਸਚ੍ਛੇਦਵਾਰੋ ਨਿਟ੍ਠਿਤੋ.

੧੧੪. ਸਙ੍ਘਭੇਦੇ ਅਨਾਪਤ੍ਤਿਵਸ੍ਸਚ੍ਛੇਦਵਾਰੋ

੨੦੨. ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਪਸ੍ਸਤਿ ਸਮ੍ਬਹੁਲੇ ਭਿਕ੍ਖੂ ਸਙ੍ਘਭੇਦਾਯ ਪਰਕ੍ਕਮਨ੍ਤੇ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ, ‘ਗਰੁਕੋ ਖੋ ਸਙ੍ਘਭੇਦੋ ਵੁਤ੍ਤੋ ਭਗਵਤਾ; ਮਾ ਮਯਿ ਸਮ੍ਮੁਖੀਭੂਤੇ ਸਙ੍ਘੋ ਭਿਜ੍ਜੀ’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਸੁਣਾਤਿ – ‘‘ਅਸੁਕਸ੍ਮਿਂ ਕਿਰ ਆਵਾਸੇ ਸਮ੍ਬਹੁਲਾ ਭਿਕ੍ਖੂ ਸਙ੍ਘਭੇਦਾਯ ਪਰਕ੍ਕਮਨ੍ਤੀ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ, ‘ਗਰੁਕੋ ਖੋ ਸਙ੍ਘਭੇਦੋ ਵੁਤ੍ਤੋ ਭਗਵਤਾ; ਮਾ ਮਯਿ ਸਮ੍ਮੁਖੀਭੂਤੇ ਸਙ੍ਘੋ ਭਿਜ੍ਜੀ’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਸੁਣਾਤਿ – ‘‘ਅਸੁਕਸ੍ਮਿਂ ਕਿਰ ਆਵਾਸੇ ਸਮ੍ਬਹੁਲਾ ਭਿਕ੍ਖੂ ਸਙ੍ਘਭੇਦਾਯ ਪਰਕ੍ਕਮਨ੍ਤੀ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ – ‘‘ਤੇ ਖੋ ਮੇ ਭਿਕ੍ਖੂ ਮਿਤ੍ਤਾ. ਤ੍ਯਾਹਂ ਵਕ੍ਖਾਮਿ ‘ਗਰੁਕੋ ਖੋ, ਆਵੁਸੋ, ਸਙ੍ਘਭੇਦੋ ਵੁਤ੍ਤੋ ਭਗਵਤਾ; ਮਾਯਸ੍ਮਨ੍ਤਾਨਂ ਸਙ੍ਘਭੇਦੋ ਰੁਚ੍ਚਿਤ੍ਥਾ’ਤਿ. ਕਰਿਸ੍ਸਨ੍ਤਿ ਮੇ ਵਚਨਂ, ਸੁਸ੍ਸੂਸਿਸ੍ਸਨ੍ਤਿ, ਸੋਤਂ ਓਦਹਿਸ੍ਸਨ੍ਤੀ’’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਸੁਣਾਤਿ – ‘‘ਅਸੁਕਸ੍ਮਿਂ ਕਿਰ ਆਵਾਸੇ ਸਮ੍ਬਹੁਲਾ ਭਿਕ੍ਖੂ ਸਙ੍ਘਭੇਦਾਯ ਪਰਕ੍ਕਮਨ੍ਤੀ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ – ‘‘ਤੇ ਖੋ ਮੇ ਭਿਕ੍ਖੂ ਨ ਮਿਤ੍ਤਾ; ਅਪਿ ਚ ਯੇ ਤੇਸਂ ਮਿਤ੍ਤਾ, ਤੇ ਮੇ ਮਿਤ੍ਤਾ. ਤ੍ਯਾਹਂ ਵਕ੍ਖਾਮਿ. ਤੇ ਵੁਤ੍ਤਾ ਤੇ ਵਕ੍ਖਨ੍ਤਿ ‘ਗਰੁਕੋ ਖੋ, ਆਵੁਸੋ, ਸਙ੍ਘਭੇਦੋ ਵੁਤ੍ਤੋ ਭਗਵਤਾ; ਮਾਯਸ੍ਮਨ੍ਤਾਨਂ ਸਙ੍ਘਭੇਦੋ ਰੁਚ੍ਚਿਤ੍ਥਾ’ਤਿ. ਕਰਿਸ੍ਸਨ੍ਤਿ ਤੇਸਂ ਵਚਨਂ, ਸੁਸ੍ਸੂਸਿਸ੍ਸਨ੍ਤਿ, ਸੋਤਂ ਓਦਹਿਸ੍ਸਨ੍ਤੀ’’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਸੁਣਾਤਿ – ‘‘ਅਸੁਕਸ੍ਮਿਂ ਕਿਰ ਆਵਾਸੇ ਸਮ੍ਬਹੁਲੇਹਿ ਭਿਕ੍ਖੂਹਿ ਸਙ੍ਘੋ ਭਿਨ੍ਨੋ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ – ‘‘ਤੇ ਖੋ ਮੇ ਭਿਕ੍ਖੂ ਮਿਤ੍ਤਾ. ਤ੍ਯਾਹਂ ਵਕ੍ਖਾਮਿ ‘ਗਰੁਕੋ ਖੋ, ਆਵੁਸੋ, ਸਙ੍ਘਭੇਦੋ ਵੁਤ੍ਤੋ ਭਗਵਤਾ; ਮਾਯਸ੍ਮਨ੍ਤਾਨਂ ਸਙ੍ਘਭੇਦੋ ਰੁਚ੍ਚਿਤ੍ਥਾ’ਤਿ. ਕਰਿਸ੍ਸਨ੍ਤਿ ਮੇ ਵਚਨਂ, ਸੁਸ੍ਸੂਸਿਸ੍ਸਨ੍ਤਿ, ਸੋਤਂ ਓਦਹਿਸ੍ਸਨ੍ਤੀ’’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਸੁਣਾਤਿ – ‘‘ਅਸੁਕਸ੍ਮਿਂ ਕਿਰ ਆਵਾਸੇ ਸਮ੍ਬਹੁਲੇਹਿ ਭਿਕ੍ਖੂਹਿ ਸਙ੍ਘੋ ਭਿਨ੍ਨੋ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ – ‘‘ਤੇ ਖੋ ਮੇ ਭਿਕ੍ਖੂ ਨ ਮਿਤ੍ਤਾ; ਅਪਿ ਚ, ਯੇ ਤੇਸਂ ਮਿਤ੍ਤਾ ਤੇ ਮੇ ਮਿਤ੍ਤਾ. ਤ੍ਯਾਹਂ ਵਕ੍ਖਾਮਿ. ਤੇ ਵੁਤ੍ਤਾ ਤੇ ਵਕ੍ਖਨ੍ਤਿ ‘ਗਰੁਕੋ ਖੋ, ਆਵੁਸੋ, ਸਙ੍ਘਭੇਦੋ ਵੁਤ੍ਤੋ ਭਗਵਤਾ; ਮਾਯਸ੍ਮਨ੍ਤਾਨਂ ਸਙ੍ਘਭੇਦੋ ਰੁਚ੍ਚਿਤ੍ਥਾ’ਤਿ. ਕਰਿਸ੍ਸਨ੍ਤਿ ਤੇਸਂ ਵਚਨਂ, ਸੁਸ੍ਸੂਸਿਸ੍ਸਨ੍ਤਿ, ਸੋਤਂ ਓਦਹਿਸ੍ਸਨ੍ਤੀ’’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਸੁਣਾਤਿ – ‘‘ਅਮੁਕਸ੍ਮਿਂ ਕਿਰ ਆਵਾਸੇ ਸਮ੍ਬਹੁਲਾ ਭਿਕ੍ਖੁਨਿਯੋ ਸਙ੍ਘਭੇਦਾਯ ਪਰਕ੍ਕਮਨ੍ਤੀ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ – ‘‘ਤਾ ਖੋ ਮੇ ਭਿਕ੍ਖੁਨਿਯੋ ਮਿਤ੍ਤਾ. ਤਾਹਂ ਵਕ੍ਖਾਮਿ ‘ਗਰੁਕੋ ਖੋ, ਭਗਿਨਿਯੋ, ਸਙ੍ਘਭੇਦੋ ਵੁਤ੍ਤੋ ਭਗਵਤਾ; ਮਾ ਭਗਿਨੀਨਂ ਸਙ੍ਘਭੇਦੋ ਰੁਚ੍ਚਿਤ੍ਥਾ’ਤਿ. ਕਰਿਸ੍ਸਨ੍ਤਿ ਮੇ ਵਚਨਂ, ਸੁਸ੍ਸੂਸਿਸ੍ਸਨ੍ਤਿ, ਸੋਤਂ ਓਦਹਿਸ੍ਸਨ੍ਤੀ’’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਸੁਣਾਤਿ – ‘‘ਅਮੁਕਸ੍ਮਿਂ ਕਿਰ ਆਵਾਸੇ ਸਮ੍ਬਹੁਲਾ ਭਿਕ੍ਖੁਨਿਯੋ ਸਙ੍ਘਭੇਦਾਯ ਪਰਕ੍ਕਮਨ੍ਤੀ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ – ‘‘ਤਾ ਖੋ ਮੇ ਭਿਕ੍ਖੁਨਿਯੋ ਨ ਮਿਤ੍ਤਾ. ਅਪਿ ਚ, ਯਾ ਤਾਸਂ ਮਿਤ੍ਤਾ, ਤਾ ਮੇ ਮਿਤ੍ਤਾ. ਤਾਹਂ ਵਕ੍ਖਾਮਿ. ਤਾ ਵੁਤ੍ਤਾ ਤਾ ਵਕ੍ਖਨ੍ਤਿ ‘ਗਰੁਕੋ ਖੋ, ਭਗਿਨਿਯੋ, ਸਙ੍ਘਭੇਦੋ ਵੁਤ੍ਤੋ ਭਗਵਤਾ. ਮਾ ਭਗਿਨੀਨਂ ਸਙ੍ਘਭੇਦੋ ਰੁਚ੍ਚਿਤ੍ਥਾ’ਤਿ. ਕਰਿਸ੍ਸਨ੍ਤਿ ਤਾਸਂ ਵਚਨਂ, ਸੁਸ੍ਸੂਸਿਸ੍ਸਨ੍ਤਿ, ਸੋਤਂ ਓਦਹਿਸ੍ਸਨ੍ਤੀ’’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸਤਿ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਸੁਣਾਤਿ – ‘‘ਅਮੁਕਸ੍ਮਿਂ ਕਿਰ ਆਵਾਸੇ ਸਮ੍ਬਹੁਲਾਹਿ ਭਿਕ੍ਖੁਨੀਹਿ ਸਙ੍ਘੋ ਭਿਨ੍ਨੋ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ – ‘‘ਤਾ ਖੋ ਮੇ ਭਿਕ੍ਖੁਨਿਯੋ ਮਿਤ੍ਤਾ. ਤਾਹਂ ਵਕ੍ਖਾਮਿ ‘ਗਰੁਕੋ ਖੋ, ਭਗਿਨਿਯੋ, ਸਙ੍ਘਭੇਦੋ ਵੁਤ੍ਤੋ ਭਗਵਤਾ. ਮਾ ਭਗਿਨੀਨਂ ਸਙ੍ਘਭੇਦੋ ਰੁਚ੍ਚਿਤ੍ਥਾ’ਤਿ. ਕਰਿਸ੍ਸਨ੍ਤਿ ਮੇ ਵਚਨਂ, ਸੁਸ੍ਸੂਸਿਸ੍ਸਨ੍ਤਿ, ਸੋਤਂ ਓਦਹਿਸ੍ਸਨ੍ਤੀ’’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸਤਿ.

ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਸੁਣਾਤਿ – ‘‘ਅਮੁਕਸ੍ਮਿਂ ਕਿਰ ਆਵਾਸੇ ਸਮ੍ਬਹੁਲਾਹਿ ਭਿਕ੍ਖੁਨੀਹਿ ਸਙ੍ਘੋ ਭਿਨ੍ਨੋ’’ਤਿ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ – ‘‘ਤਾ ਖੋ ਮੇ ਭਿਕ੍ਖੁਨਿਯੋ ਨ ਮਿਤ੍ਤਾ. ਅਪਿ ਚ, ਯਾ ਤਾਸਂ ਮਿਤ੍ਤਾ ਤਾ ਮੇ ਮਿਤ੍ਤਾ. ਤਾਹਂ ਵਕ੍ਖਾਮਿ. ਤਾ ਵੁਤ੍ਤਾ ਤਾ ਵਕ੍ਖਨ੍ਤਿ ‘ਗਰੁਕੋ ਖੋ, ਭਗਿਨਿਯੋ [ਅਯ੍ਯਾਯੋ (ਸੀ.)], ਸਙ੍ਘਭੇਦੋ ਵੁਤ੍ਤੋ ਭਗਵਤਾ; ਮਾ ਭਗਿਨੀਨਂ [ਅਯ੍ਯਾਨਂ (ਸੀ.)] ਸਙ੍ਘਭੇਦੋ ਰੁਚ੍ਚਿਤ੍ਥਾ’ਤਿ. ਕਰਿਸ੍ਸਨ੍ਤਿ ਤਾਸਂ ਵਚਨਂ, ਸੁਸ੍ਸੂਸਿਸ੍ਸਨ੍ਤਿ, ਸੋਤਂ ਓਦਹਿਸ੍ਸਨ੍ਤੀ’’ਤਿ, ਪਕ੍ਕਮਿਤਬ੍ਬਂ. ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸਾਤਿ.

ਸਙ੍ਘਭੇਦੇ ਅਨਾਪਤ੍ਤਿਵਸ੍ਸਚ੍ਛੇਦਵਾਰੋ ਨਿਟ੍ਠਿਤੋ.

੧੧੫. ਵਜਾਦੀਸੁ ਵਸ੍ਸੂਪਗਮਨਂ

੨੦੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਵਜੇ ਵਸ੍ਸਂ ਉਪਗਨ੍ਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਜੇ ਵਸ੍ਸਂ ਉਪਗਨ੍ਤੁਨ੍ਤਿ. ਵਜੋ ਵੁਟ੍ਠਾਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯੇਨ ਵਜੋ ਤੇਨ ਗਨ੍ਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਸਤ੍ਥੇਨ ਗਨ੍ਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਥੇ ਵਸ੍ਸਂ ਉਪਗਨ੍ਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਨਾਵਾਯ ਗਨ੍ਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਨਾਵਾਯ ਵਸ੍ਸਂ ਉਪਗਨ੍ਤੁਨ੍ਤਿ.

ਵਜਾਦੀਸੁ ਵਸ੍ਸੂਪਗਮਨਂ ਨਿਟ੍ਠਿਤਂ.

੧੧੬. ਵਸ੍ਸਂ ਅਨੁਪਗਨ੍ਤਬ੍ਬਟ੍ਠਾਨਾਨਿ

੨੦੪. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਰੁਕ੍ਖਸੁਸਿਰੇ ਵਸ੍ਸਂ ਉਪਗਚ੍ਛਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਪਿਸਾਚਿਲ੍ਲਿਕਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਰੁਕ੍ਖਸੁਸਿਰੇ ਵਸ੍ਸਂ ਉਪਗਨ੍ਤਬ੍ਬਂ. ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਰੁਕ੍ਖਵਿਟਭਿਯਾ ਵਸ੍ਸਂ ਉਪਗਚ੍ਛਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਮਿਗਲੁਦ੍ਦਕਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਰੁਕ੍ਖਵਿਟਭਿਯਾ ਵਸ੍ਸਂ ਉਪਗਨ੍ਤਬ੍ਬਂ. ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਜ੍ਝੋਕਾਸੇ ਵਸ੍ਸਂ ਉਪਗਚ੍ਛਨ੍ਤਿ. ਦੇਵੇ ਵਸ੍ਸਨ੍ਤੇ ਰੁਕ੍ਖਮੂਲਮ੍ਪਿ ਨਿਬ੍ਬਕੋਸਮ੍ਪਿ ਉਪਧਾਵਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਜ੍ਝੋਕਾਸੇ ਵਸ੍ਸਂ ਉਪਗਨ੍ਤਬ੍ਬਂ. ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਸੇਨਾਸਨਿਕਾ ਵਸ੍ਸਂ ਉਪਗਚ੍ਛਨ੍ਤਿ. ਸੀਤੇਨਪਿ ਕਿਲਮਨ੍ਤਿ, ਉਣ੍ਹੇਨਪਿ ਕਿਲਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬਂ. ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਛਵਕੁਟਿਕਾਯ ਵਸ੍ਸਂ ਉਪਗਚ੍ਛਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਛਵਡਾਹਕਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਛਵਕੁਟਿਕਾਯ ਵਸ੍ਸਂ ਉਪਗਨ੍ਤਬ੍ਬਂ. ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਛਤ੍ਤੇ ਵਸ੍ਸਂ ਉਪਗਚ੍ਛਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਗੋਪਾਲਕਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਛਤ੍ਤੇ ਵਸ੍ਸਂ ਉਪਗਨ੍ਤਬ੍ਬਂ. ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਚਾਟਿਯਾ ਵਸ੍ਸਂ ਉਪਗਚ੍ਛਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਤਿਤ੍ਥਿਯਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਚਾਟਿਯਾ ਵਸ੍ਸਂ ਉਪਗਨ੍ਤਬ੍ਬਂ. ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਵਸ੍ਸਂ ਅਨੁਪਗਨ੍ਤਬ੍ਬਟ੍ਠਾਨਾਨਿ ਨਿਟ੍ਠਿਤਾ.

੧੧੭. ਅਧਮ੍ਮਿਕਕਤਿਕਾ

੨੦੫. ਤੇਨ ਖੋ ਪਨ ਸਮਯੇਨ ਸਾਵਤ੍ਥਿਯਾ ਸਙ੍ਘੇਨ ਏਵਰੂਪਾ ਕਤਿਕਾ ਕਤਾ ਹੋਤਿ – ਅਨ੍ਤਰਾਵਸ੍ਸਂ ਨ ਪਬ੍ਬਾਜੇਤਬ੍ਬਨ੍ਤਿ. ਵਿਸਾਖਾਯ ਮਿਗਾਰਮਾਤੁਯਾ ਨਤ੍ਤਾ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਭਿਕ੍ਖੂ ਏਵਮਾਹਂਸੁ – ‘‘ਸਙ੍ਘੇਨ ਖੋ, ਆਵੁਸੋ, ਏਵਰੂਪਾ ਕਤਿਕਾ ਕਤਾ ‘ਅਨ੍ਤਰਾਵਸ੍ਸਂ ਨ ਪਬ੍ਬਾਜੇਤਬ੍ਬ’ਨ੍ਤਿ. ਆਗਮੇਹਿ, ਆਵੁਸੋ, ਯਾਵ ਭਿਕ੍ਖੂ ਵਸ੍ਸਂ ਵਸਨ੍ਤਿ. ਵਸ੍ਸਂਵੁਟ੍ਠਾ ਪਬ੍ਬਾਜੇਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਵਸ੍ਸਂਵੁਟ੍ਠਾ ਵਿਸਾਖਾਯ ਮਿਗਾਰਮਾਤੁਯਾ ਨਤ੍ਤਾਰਂ ਏਤਦਵੋਚੁਂ – ‘‘ਏਹਿ, ਦਾਨਿ, ਆਵੁਸੋ, ਪਬ੍ਬਜਾਹੀ’’ਤਿ. ਸੋ ਏਵਮਾਹ – ‘‘ਸਚਾਹਂ, ਭਨ੍ਤੇ, ਪਬ੍ਬਜਿਤੋ ਅਸ੍ਸਂ, ਅਭਿਰਮੇਯ੍ਯਾਮਹਂ [ਅਭਿਰਮੇਯ੍ਯਂ ਚਾਹਂ (ਸੀ.)]. ਨ ਦਾਨਾਹਂ, ਭਨ੍ਤੇ, ਪਬ੍ਬਜਿਸ੍ਸਾਮੀ’’ਤਿ. ਵਿਸਾਖਾ ਮਿਗਾਰਮਾਤਾ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਏਵਰੂਪਂ ਕਤਿਕਂ ਕਰਿਸ੍ਸਨ੍ਤਿ ‘ਨ ਅਨ੍ਤਰਾਵਸ੍ਸਂ ਪਬ੍ਬਾਜੇਤਬ੍ਬ’ਨ੍ਤਿ. ਕਂ ਕਾਲਂ ਧਮ੍ਮੋ ਨ ਚਰਿਤਬ੍ਬੋ’’ਤਿ? ਅਸ੍ਸੋਸੁਂ ਖੋ ਭਿਕ੍ਖੂ ਵਿਸਾਖਾਯ ਮਿਗਾਰਮਾਤੁਯਾ ਉਜ੍ਝਾਯਨ੍ਤਿਯਾ ਖਿਯ੍ਯਨ੍ਤਿਯਾ ਵਿਪਾਚੇਨ੍ਤਿਯਾ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਏਵਰੂਪਾ ਕਤਿਕਾ ਕਾਤਬ੍ਬਾ – ‘ਨ ਅਨ੍ਤਰਾਵਸ੍ਸਂ ਪਬ੍ਬਾਜੇਤਬ੍ਬ’ਨ੍ਤਿ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਅਧਮ੍ਮਿਕਕਤਿਕਾ ਨਿਟ੍ਠਿਤਾ.

੧੧੮. ਪਟਿਸ੍ਸਵਦੁਕ੍ਕਟਾਪਤ੍ਤਿ

੨੦੬. ਤੇਨ ਖੋ ਪਨ ਸਮਯੇਨ ਆਯਸ੍ਮਤਾ ਉਪਨਨ੍ਦੇਨ ਸਕ੍ਯਪੁਤ੍ਤੇਨ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਅਦ੍ਦਸ ਅਨ੍ਤਰਾਮਗ੍ਗੇ ਦ੍ਵੇ ਆਵਾਸੇ ਬਹੁਚੀਵਰਕੇ. ਤਸ੍ਸ ਏਤਦਹੋਸਿ – ‘‘ਯਂਨੂਨਾਹਂ ਇਮੇਸੁ ਦ੍ਵੀਸੁ ਆਵਾਸੇਸੁ ਵਸ੍ਸਂ ਵਸੇਯ੍ਯਂ. ਏਵਂ ਮੇ ਬਹੁਂ ਚੀਵਰਂ [ਬਹੁਚੀਵਰਂ (ਕ.)] ਉਪ੍ਪਜ੍ਜਿਸ੍ਸਤੀ’’ਤਿ. ਸੋ ਤੇਸੁ ਦ੍ਵੀਸੁ ਆਵਾਸੇਸੁ ਵਸ੍ਸਂ ਵਸਿ. ਰਾਜਾ ਪਸੇਨਦਿ ਕੋਸਲੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਅਯ੍ਯੋ ਉਪਨਨ੍ਦੋ ਸਕ੍ਯਪੁਤ੍ਤੋ ਅਮ੍ਹਾਕਂ ਵਸ੍ਸਾਵਾਸਂ ਪਟਿਸ੍ਸੁਣਿਤ੍ਵਾ ਵਿਸਂਵਾਦੇਸ੍ਸਤਿ. ਨਨੁ ਭਗਵਤਾ ਅਨੇਕਪਰਿਯਾਯੇਨ ਮੁਸਾਵਾਦੋ ਗਰਹਿਤੋ, ਮੁਸਾਵਾਦਾ ਵੇਰਮਣੀ ਪਸਤ੍ਥਾ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਵਸ੍ਸਾਵਾਸਂ ਪਟਿਸ੍ਸੁਣਿਤ੍ਵਾ ਵਿਸਂਵਾਦੇਸ੍ਸਤਿ. ਨਨੁ ਭਗਵਤਾ ਅਨੇਕਪਰਿਯਾਯੇਨ ਮੁਸਾਵਾਦੋ ਗਰਹਿਤੋ, ਮੁਸਾਵਾਦਾ ਵੇਰਮਣੀ ਪਸਤ੍ਥਾ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ ਤ੍ਵਂ, ਉਪਨਨ੍ਦ, ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਵਸ੍ਸਾਵਾਸਂ ਪਟਿਸ੍ਸੁਣਿਤ੍ਵਾ ਵਿਸਂਵਾਦੇਸੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਵਸ੍ਸਾਵਾਸਂ ਪਟਿਸ੍ਸੁਣਿਤ੍ਵਾ ਵਿਸਂਵਾਦੇਸ੍ਸਸਿ. ਨਨੁ ਮਯਾ, ਮੋਘਪੁਰਿਸ, ਅਨੇਕਪਰਿਯਾਯੇਨ ਮੁਸਾਵਾਦੋ ਗਰਹਿਤੋ, ਮੁਸਾਵਾਦਾ ਵੇਰਮਣੀ ਪਸਤ੍ਥਾ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੨੦੭. ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਪਸ੍ਸਤਿ ਅਨ੍ਤਰਾਮਗ੍ਗੇ ਦ੍ਵੇ ਆਵਾਸੇ ਬਹੁਚੀਵਰਕੇ. ਤਸ੍ਸ ਏਵਂ ਹੋਤਿ – ‘‘ਯਂਨੂਨਾਹਂ ਇਮੇਸੁ ਦ੍ਵੀਸੁ ਆਵਾਸੇਸੁ ਵਸ੍ਸਂ ਵਸੇਯ੍ਯਂ. ਏਵਂ ਮੇ ਬਹੁਂ ਚੀਵਰਂ ਉਪ੍ਪਜ੍ਜਿਸ੍ਸਤੀ’’ਤਿ. ਸੋ ਤੇਸੁ ਦ੍ਵੀਸੁ ਆਵਾਸੇਸੁ ਵਸ੍ਸਂ ਵਸਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ [ਪਾਟਿਪਦੇਨ (ਕ.)] ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਤਦਹੇਵ ਅਕਰਣੀਯੋ ਪਕ੍ਕਮਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਤਦਹੇਵ ਸਕਰਣੀਯੋ ਪਕ੍ਕਮਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਦ੍ਵੀਹਤੀਹਂ ਵਸਿਤ੍ਵਾ ਅਕਰਣੀਯੋ ਪਕ੍ਕਮਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਕਰਣੀਯੋ ਪਕ੍ਕਮਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਤ੍ਤਾਹਕਰਣੀਯੇਨ ਪਕ੍ਕਮਤਿ. ਸੋ ਤਂ ਸਤ੍ਤਾਹਂ ਬਹਿਦ੍ਧਾ ਵੀਤਿਨਾਮੇਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਤ੍ਤਾਹਕਰਣੀਯੇਨ ਪਕ੍ਕਮਤਿ. ਸੋ ਤਂ ਸਤ੍ਤਾਹਂ ਅਨ੍ਤੋ ਸਨ੍ਨਿਵਤ੍ਤਂ ਕਰੋਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਪਞ੍ਞਾਯਤਿ, ਪਟਿਸ੍ਸਵੇ ਚ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਸਤ੍ਤਾਹਂ ਅਨਾਗਤਾਯ ਪਵਾਰਣਾਯ ਸਕਰਣੀਯੋ ਪਕ੍ਕਮਤਿ. ਆਗਚ੍ਛੇਯ੍ਯ ਵਾ ਸੋ, ਭਿਕ੍ਖਵੇ, ਭਿਕ੍ਖੁ ਤਂ ਆਵਾਸਂ ਨ ਵਾ ਆਗਚ੍ਛੇਯ੍ਯ, ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਪਞ੍ਞਾਯਤਿ, ਪਟਿਸ੍ਸਵੇ ਚ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਨ੍ਤ੍ਵਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਤਦਹੇਵ ਅਕਰਣੀਯੋ ਪਕ੍ਕਮਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪੁਰਿਮਿਕਾਯ. ਸੋ ਤਂ ਆਵਾਸਂ ਗਨ੍ਤ੍ਵਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਤਦਹੇਵ ਸਕਰਣੀਯੋ ਪਕ੍ਕਮਤਿ…ਪੇ… ਸੋ ਦ੍ਵੀਹਤੀਹਂ ਵਸਿਤ੍ਵਾ ਅਕਰਣੀਯੋ ਪਕ੍ਕਮਤਿ…ਪੇ… ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਕਰਣੀਯੋ ਪਕ੍ਕਮਤਿ…ਪੇ… ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਤ੍ਤਾਹਕਰਣੀਯੇਨ ਪਕ੍ਕਮਤਿ. ਸੋ ਤਂ ਸਤ੍ਤਾਹਂ ਬਹਿਦ੍ਧਾ ਵੀਤਿਨਾਮੇਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਤ੍ਤਾਹਕਰਣੀਯੇਨ ਪਕ੍ਕਮਤਿ. ਸੋ ਤਂ ਸਤ੍ਤਾਹਂ ਅਨ੍ਤੋ ਸਨ੍ਨਿਵਤ੍ਤਂ ਕਰੋਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਪਞ੍ਞਾਯਤਿ, ਪਟਿਸ੍ਸਵੇ ਚ ਅਨਾਪਤ੍ਤਿ…ਪੇ… ਸੋ ਸਤ੍ਤਾਹਂ ਅਨਾਗਤਾਯ ਪਵਾਰਣਾਯ ਸਕਰਣੀਯੋ ਪਕ੍ਕਮਤਿ. ਆਗਚ੍ਛੇਯ੍ਯ ਵਾ ਸੋ, ਭਿਕ੍ਖਵੇ, ਭਿਕ੍ਖੁ ਤਂ ਆਵਾਸਂ ਨ ਵਾ ਆਗਚ੍ਛੇਯ੍ਯ, ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਪਞ੍ਞਾਯਤਿ, ਪਟਿਸ੍ਸਵੇ ਚ ਅਨਾਪਤ੍ਤਿ.

੨੦੮. ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਤਦਹੇਵ ਅਕਰਣੀਯੋ ਪਕ੍ਕਮਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਤਦਹੇਵ ਸਕਰਣੀਯੋ ਪਕ੍ਕਮਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਦ੍ਵੀਹਤੀਹਂ ਵਸਿਤ੍ਵਾ ਅਕਰਣੀਯੋ ਪਕ੍ਕਮਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਕਰਣੀਯੋ ਪਕ੍ਕਮਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਤ੍ਤਾਹਕਰਣੀਯੇਨ ਪਕ੍ਕਮਤਿ. ਸੋ ਤਂ ਸਤ੍ਤਾਹਂ ਬਹਿਦ੍ਧਾ ਵੀਤਿਨਾਮੇਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਤ੍ਤਾਹਕਰਣੀਯੇਨ ਪਕ੍ਕਮਤਿ. ਸੋ ਤਂ ਸਤ੍ਤਾਹਂ ਅਨ੍ਤੋ ਸਨ੍ਨਿਵਤ੍ਤਂ ਕਰੋਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਪਞ੍ਞਾਯਤਿ, ਪਟਿਸ੍ਸਵੇ ਚ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯ. ਸੋ ਤਂ ਆਵਾਸਂ ਗਚ੍ਛਨ੍ਤੋ ਬਹਿਦ੍ਧਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਸਤ੍ਤਾਹਂ ਅਨਾਗਤਾਯ ਕੋਮੁਦਿਯਾ ਚਾਤੁਮਾਸਿਨਿਯਾ ਸਕਰਣੀਯੋ ਪਕ੍ਕਮਤਿ. ਆਗਚ੍ਛੇਯ੍ਯ ਵਾ ਸੋ, ਭਿਕ੍ਖਵੇ, ਭਿਕ੍ਖੁ ਤਂ ਆਵਾਸਂ ਨ ਵਾ ਆਗਚ੍ਛੇਯ੍ਯ, ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਪਞ੍ਞਾਯਤਿ, ਪਟਿਸ੍ਸਵੇ ਚ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯ. ਸੋ ਤਂ ਆਵਾਸਂ ਗਨ੍ਤ੍ਵਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਤਦਹੇਵ ਅਕਰਣੀਯੋ ਪਕ੍ਕਮਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯ. ਸੋ ਤਂ ਆਵਾਸਂ ਗਨ੍ਤ੍ਵਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਤਦਹੇਵ ਸਕਰਣੀਯੋ ਪਕ੍ਕਮਤਿ…ਪੇ… ਸੋ ਦ੍ਵੀਹਤੀਹਂ ਵਸਿਤ੍ਵਾ ਅਕਰਣੀਯੋ ਪਕ੍ਕਮਤਿ …ਪੇ… ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਕਰਣੀਯੋ ਪਕ੍ਕਮਤਿ…ਪੇ… ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਤ੍ਤਾਹਕਰਣੀਯੇਨ ਪਕ੍ਕਮਤਿ. ਸੋ ਤਂ ਸਤ੍ਤਾਹਂ ਬਹਿਦ੍ਧਾ ਵੀਤਿਨਾਮੇਤਿ. ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਸੋ ਦ੍ਵੀਹਤੀਹਂ ਵਸਿਤ੍ਵਾ ਸਤ੍ਤਾਹਕਰਣੀਯੇਨ ਪਕ੍ਕਮਤਿ. ਸੋ ਤਂ ਸਤ੍ਤਾਹਂ ਅਨ੍ਤੋ ਸਨ੍ਨਿਵਤ੍ਤਂ ਕਰੋਤਿ. ਤਸ੍ਸ ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਪਞ੍ਞਾਯਤਿ, ਪਟਿਸ੍ਸਵੇ ਚ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਨਾ ਵਸ੍ਸਾਵਾਸੋ ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯ. ਸੋ ਤਂ ਆਵਾਸਂ ਗਨ੍ਤ੍ਵਾ ਉਪੋਸਥਂ ਕਰੋਤਿ, ਪਾਟਿਪਦੇ ਵਿਹਾਰਂ ਉਪੇਤਿ, ਸੇਨਾਸਨਂ ਪਞ੍ਞਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਪਰਿਵੇਣਂ ਸਮ੍ਮਜ੍ਜਤਿ. ਸੋ ਸਤ੍ਤਾਹਂ ਅਨਾਗਤਾਯ ਕੋਮੁਦਿਯਾ ਚਾਤੁਮਾਸਿਨਿਯਾ ਸਕਰਣੀਯੋ ਪਕ੍ਕਮਤਿ. ਆਗਚ੍ਛੇਯ੍ਯ ਵਾ ਸੋ, ਭਿਕ੍ਖਵੇ, ਭਿਕ੍ਖੁ ਤਂ ਆਵਾਸਂ ਨ ਵਾ ਆਗਚ੍ਛੇਯ੍ਯ, ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪਚ੍ਛਿਮਿਕਾ ਚ ਪਞ੍ਞਾਯਤਿ, ਪਟਿਸ੍ਸਵੇ ਚ ਅਨਾਪਤ੍ਤੀਤਿ.

ਪਟਿਸ੍ਸਵਦੁਕ੍ਕਟਾਪਤ੍ਤਿ ਨਿਟ੍ਠਿਤਾ.

ਵਸ੍ਸੂਪਨਾਯਿਕਕ੍ਖਨ੍ਧਕੋ ਤਤਿਯੋ.

੧੧੯. ਤਸ੍ਸੁਦ੍ਦਾਨਂ

ਉਪਗਨ੍ਤੁਂ ਕਦਾ ਚੇਵ, ਕਤਿ ਅਨ੍ਤਰਾਵਸ੍ਸ ਚ;

ਨ ਇਚ੍ਛਨ੍ਤਿ ਚ ਸਞ੍ਚਿਚ੍ਚ, ਉਕ੍ਕਡ੍ਢਿਤੁਂ ਉਪਾਸਕੋ.

ਗਿਲਾਨੋ ਮਾਤਾ ਚ ਪਿਤਾ, ਭਾਤਾ ਚ ਅਥ ਞਾਤਕੋ;

ਭਿਕ੍ਖੁਗਤਿਕੋ ਵਿਹਾਰੋ, ਵਾਲ਼ਾ ਚਾਪਿ ਸਰੀਸਪਾ.

ਚੋਰੋ ਚੇਵ ਪਿਸਾਚਾ ਚ, ਦਡ੍ਢਾ ਤਦੁਭਯੇਨ ਚ;

ਵੂਲ਼੍ਹੋਦਕੇਨ ਵੁਟ੍ਠਾਸਿ, ਬਹੁਤਰਾ ਚ ਦਾਯਕਾ.

ਲੂਖਪ੍ਪਣੀਤਸਪ੍ਪਾਯ, ਭੇਸਜ੍ਜੁਪਟ੍ਠਕੇਨ ਚ;

ਇਤ੍ਥੀ ਵੇਸੀ ਕੁਮਾਰੀ ਚ, ਪਣ੍ਡਕੋ ਞਾਤਕੇਨ ਚ.

ਰਾਜਾ ਚੋਰਾ ਧੁਤ੍ਤਾ ਨਿਧਿ, ਭੇਦਅਟ੍ਠਵਿਧੇਨ [ਭੇਦਾ ਅਟ੍ਠਵਿਧੇਨ (ਸੀ. ਸ੍ਯਾ.)] ਚ;

ਵਜਸਤ੍ਥਾ ਚ ਨਾਵਾ ਚ, ਸੁਸਿਰੇ ਵਿਟਭਿਯਾ ਚ.

ਅਜ੍ਝੋਕਾਸੇ ਵਸ੍ਸਾਵਾਸੋ, ਅਸੇਨਾਸਨਿਕੇਨ ਚ;

ਛਵਕੁਟਿਕਾ ਛਤ੍ਤੇ ਚ, ਚਾਟਿਯਾ ਚ ਉਪੇਨ੍ਤਿ ਤੇ.

ਕਤਿਕਾ ਪਟਿਸ੍ਸੁਣਿਤ੍ਵਾ, ਬਹਿਦ੍ਧਾ ਚ ਉਪੋਸਥਾ;

ਪੁਰਿਮਿਕਾ ਪਚ੍ਛਿਮਿਕਾ, ਯਥਾਞਾਯੇਨ ਯੋਜਯੇ.

ਅਕਰਣੀ ਪਕ੍ਕਮਤਿ, ਸਕਰਣੀ ਤਥੇਵ ਚ;

ਦ੍ਵੀਹਤੀਹਾ ਚ ਪੁਨ ਚ [ਦ੍ਵੀਹਤੀਹਂ ਵਸਿਤ੍ਵਾਨ (ਸੀ.)], ਸਤ੍ਤਾਹਕਰਣੀਯੇਨ ਚ.

ਸਤ੍ਤਾਹਨਾਗਤਾ ਚੇਵ, ਆਗਚ੍ਛੇਯ੍ਯ ਨ ਏਯ੍ਯ ਵਾ;

ਵਤ੍ਥੁਦ੍ਦਾਨੇ ਅਨ੍ਤਰਿਕਾ, ਤਨ੍ਤਿਮਗ੍ਗਂ ਨਿਸਾਮਯੇਤਿ.

ਇਮਮ੍ਹਿ ਖਨ੍ਧਕੇ ਵਤ੍ਥੂਨਿ ਦ੍ਵੇਪਣ੍ਣਾਸ.

ਵਸ੍ਸੂਪਨਾਯਿਕਕ੍ਖਨ੍ਧਕੋ ਨਿਟ੍ਠਿਤੋ.

੪. ਪਵਾਰਣਾਕ੍ਖਨ੍ਧਕੋ

੧੨੦. ਅਫਾਸੁਕਵਿਹਾਰੋ

੨੦੯. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸਂ ਉਪਗਚ੍ਛਿਂਸੁ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਮਯਂ ਉਪਾਯੇਨ ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸੇਯ੍ਯਾਮ, ਨ ਚ ਪਿਣ੍ਡਕੇਨ ਕਿਲਮੇਯ੍ਯਾਮਾ’’ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਸਚੇ ਖੋ ਮਯਂ ਅਞ੍ਞਮਞ੍ਞਂ ਨੇਵ ਆਲਪੇਯ੍ਯਾਮ ਨ ਸਲ੍ਲਪੇਯ੍ਯਾਮ – ਯੋ ਪਠਮਂ ਗਾਮਤੋ ਪਿਣ੍ਡਾਯ ਪਟਿਕ੍ਕਮੇਯ੍ਯ ਸੋ ਆਸਨਂ ਪਞ੍ਞਪੇਯ੍ਯ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪੇਯ੍ਯ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਉਪਟ੍ਠਾਪੇਯ੍ਯ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਯ੍ਯ; ਯੋ ਪਚ੍ਛਾ ਗਾਮਤੋ ਪਿਣ੍ਡਾਯ ਪਟਿਕ੍ਕਮੇਯ੍ਯ, ਸਚਸ੍ਸ ਭੁਤ੍ਤਾਵਸੇਸੋ, ਸਚੇ ਆਕਙ੍ਖੇਯ੍ਯ ਭੁਞ੍ਜੇਯ੍ਯ, ਨੋ ਚੇ ਆਕਙ੍ਖੇਯ੍ਯ ਅਪ੍ਪਹਰਿਤੇ ਵਾ ਛਡ੍ਡੇਯ੍ਯ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਯ੍ਯ; ਸੋ ਆਸਨਂ ਉਦ੍ਧਰੇਯ੍ਯ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਯ੍ਯ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਪਟਿਸਾਮੇਯ੍ਯ, ਪਾਨੀਯਂ ਪਰਿਭੋਜਨੀਯਂ ਪਟਿਸਾਮੇਯ੍ਯ, ਭਤ੍ਤਗ੍ਗਂ ਸਮ੍ਮਜ੍ਜੇਯ੍ਯ; ਯੋ ਪਸ੍ਸੇਯ੍ਯ ਪਾਨੀਯਘਟਂ ਵਾ ਪਰਿਭੋਜਨੀਯਘਟਂ ਵਾ ਵਚ੍ਚਘਟਂ ਵਾ ਰਿਤ੍ਤਂ ਤੁਚ੍ਛਂ ਸੋ ਉਪਟ੍ਠਾਪੇਯ੍ਯ; ਸਚਸ੍ਸ ਹੋਤਿ ਅਵਿਸਯ੍ਹਂ, ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਾਪੇਯ੍ਯ; ਨ ਤ੍ਵੇਵ ਤਪ੍ਪਚ੍ਚਯਾ ਵਾਚਂ ਭਿਨ੍ਦੇਯ੍ਯ – ਏਵਂ ਖੋ ਮਯਂ ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸੇਯ੍ਯਾਮ, ਨ ਚ ਪਿਣ੍ਡਕੇਨ ਕਿਲਮੇਯ੍ਯਾਮਾ’’ਤਿ. ਅਥ ਖੋ ਤੇ ਭਿਕ੍ਖੂ ਅਞ੍ਞਮਞ੍ਞਂ ਨੇਵ ਆਲਪਿਂਸੁ, ਨ ਸਲ੍ਲਪਿਂਸੁ. ਯੋ ਪਠਮਂ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਸੋ ਆਸਨਂ ਪਞ੍ਞਪੇਤਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਤਿ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਉਪਟ੍ਠਾਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ. ਯੋ ਪਚ੍ਛਾ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਸਚੇ ਹੋਤਿ ਭੁਤ੍ਤਾਵਸੇਸੋ, ਸਚੇ ਆਕਙ੍ਖਤਿ ਭੁਞ੍ਜਤਿ, ਨੋ ਚੇ ਆਕਙ੍ਖਤਿ ਅਪ੍ਪਹਰਿਤੇ ਵਾ ਛਡ੍ਡੇਤਿ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਤਿ; ਸੋ ਆਸਨਂ ਉਦ੍ਧਰਤਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਿ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਪਟਿਸਾਮੇਤਿ, ਪਾਨੀਯਂ ਪਰਿਭੋਜਨੀਯਂ ਪਟਿਸਾਮੇਤਿ, ਭਤ੍ਤਗ੍ਗਂ ਸਮ੍ਮਜ੍ਜਤਿ. ਯੋ ਪਸ੍ਸਤਿ ਪਾਨੀਯਘਟਂ ਵਾ ਪਰਿਭੋਜਨੀਯਘਟਂ ਵਾ ਵਚ੍ਚਘਟਂ ਵਾ ਰਿਤ੍ਤਂ ਤੁਚ੍ਛਂ ਸੋ ਉਪਟ੍ਠਾਪੇਤਿ. ਸਚਸ੍ਸ ਹੋਤਿ ਅਵਿਸਯ੍ਹਂ, ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਾਪੇਤਿ, ਨ ਤ੍ਵੇਵ ਤਪ੍ਪਚ੍ਚਯਾ ਵਾਚਂ ਭਿਨ੍ਦਤਿ.

ਆਚਿਣ੍ਣਂ ਖੋ ਪਨੇਤਂ ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਭਗਵਨ੍ਤਂ ਦਸ੍ਸਨਾਯ ਉਪਸਙ੍ਕਮਿਤੁਂ. ਅਥ ਖੋ ਤੇ ਭਿਕ੍ਖੂ ਵਸ੍ਸਂਵੁਟ੍ਠਾ ਤੇਮਾਸਚ੍ਚਯੇਨ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਸਾਵਤ੍ਥਿ ਤੇਨ ਪਕ੍ਕਮਿਂਸੁ. ਅਨੁਪੁਬ੍ਬੇਨ ਯੇਨ ਸਾਵਤ੍ਥਿ ਜੇਤਵਨਂ ਅਨਾਥਪਿਣ੍ਡਿਕਸ੍ਸ ਆਰਾਮੋ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸਿਤ੍ਥ, ਨ ਚ ਪਿਣ੍ਡਕੇਨ ਕਿਲਮਿਤ੍ਥਾ’’ਤਿ? ‘‘ਖਮਨੀਯਂ ਭਗਵਾ, ਯਾਪਨੀਯਂ ਭਗਵਾ. ਸਮਗ੍ਗਾ ਚ ਮਯਂ, ਭਨ੍ਤੇ, ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸਿਮ੍ਹਾ, ਨ ਚ ਪਿਣ੍ਡਕੇਨ ਕਿਲਮਿਮ੍ਹਾ’’ਤਿ. ਜਾਨਨ੍ਤਾਪਿ ਤਥਾਗਤਾ ਪੁਚ੍ਛਨ੍ਤਿ, ਜਾਨਨ੍ਤਾਪਿ ਨ ਪੁਚ੍ਛਨ੍ਤਿ. ਕਾਲਂ ਵਿਦਿਤ੍ਵਾ ਪੁਚ੍ਛਨ੍ਤਿ, ਕਾਲਂ ਵਿਦਿਤ੍ਵਾ ਨ ਪੁਚ੍ਛਨ੍ਤਿ. ਅਤ੍ਥਸਂਹਿਤਂ ਤਥਾਗਤਾ ਪੁਚ੍ਛਨ੍ਤਿ, ਨੋ ਅਨਤ੍ਥਸਂਹਿਤਂ. ਅਨਤ੍ਥਸਂਹਿਤੇ ਸੇਤੁਘਾਤੋ ਤਥਾਗਤਾਨਂ. ਦ੍ਵੀਹਾਕਾਰੇਹਿ ਬੁਦ੍ਧਾ ਭਗਵਨ੍ਤੋ ਭਿਕ੍ਖੂ ਪਟਿਪੁਚ੍ਛਨ੍ਤਿ – ਧਮ੍ਮਂ ਵਾ ਦੇਸੇਸ੍ਸਾਮ, ਸਾਵਕਾਨਂ ਵਾ ਸਿਕ੍ਖਾਪਦਂ ਪਞ੍ਞਪੇਸ੍ਸਾਮਾਤਿ. ਅਥ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਯਥਾਕਥਂ ਪਨ ਤੁਮ੍ਹੇ, ਭਿਕ੍ਖਵੇ, ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸਿਤ੍ਥ, ਨ ਚ ਪਿਣ੍ਡਕੇਨ ਕਿਲਮਿਤ੍ਥਾ’’ਤਿ.

ਇਧ ਮਯਂ, ਭਨ੍ਤੇ, ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸਂ ਉਪਗਚ੍ਛਿਮ੍ਹਾ. ਤੇਸਂ ਨੋ, ਭਨ੍ਤੇ, ਅਮ੍ਹਾਕਂ ਏਤਦਹੋਸਿ – ‘‘ਕੇਨ ਨੁ ਖੋ ਮਯਂ ਉਪਾਯੇਨ ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸੇਯ੍ਯਾਮ, ਨ ਚ ਪਿਣ੍ਡਕੇਨ ਕਿਲਮੇਯ੍ਯਾਮਾ’’ਤਿ. ਤੇਸਂ ਨੋ, ਭਨ੍ਤੇ, ਅਮ੍ਹਾਕਂ ਏਤਦਹੋਸਿ – ‘‘ਸਚੇ ਖੋ ਮਯਂ ਅਞ੍ਞਮਞ੍ਞਂ ਨੇਵ ਆਲਪੇਯ੍ਯਾਮ ਨ ਸਲ੍ਲਪੇਯ੍ਯਾਮ – ਯੋ ਪਠਮਂ ਗਾਮਤੋ ਪਿਣ੍ਡਾਯ ਪਟਿਕ੍ਕਮੇਯ੍ਯ ਸੋ ਆਸਨਂ ਪਞ੍ਞਪੇਯ੍ਯ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪੇਯ੍ਯ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਉਪਟ੍ਠਾਪੇਯ੍ਯ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਯ੍ਯ; ਯੋ ਪਚ੍ਛਾ ਗਾਮਤੋ ਪਿਣ੍ਡਾਯ ਪਟਿਕ੍ਕਮੇਯ੍ਯ, ਸਚਸ੍ਸ ਭੁਤ੍ਤਾਵਸੇਸੋ, ਸਚੇ ਆਕਙ੍ਖੇਯ੍ਯ ਭੁਞ੍ਜੇਯ੍ਯ, ਨੋ ਚੇ ਆਕਙ੍ਖੇਯ੍ਯ ਅਪ੍ਪਹਰਿਤੇ ਵਾ ਛਡ੍ਡੇਯ੍ਯ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਯ੍ਯ; ਸੋ ਆਸਨਂ ਉਦ੍ਧਰੇਯ੍ਯ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਯ੍ਯ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਪਟਿਸਾਮੇਯ੍ਯ, ਪਾਨੀਯਂ ਪਰਿਭੋਜਨੀਯਂ ਪਟਿਸਾਮੇਯ੍ਯ, ਭਤ੍ਤਗ੍ਗਂ ਸਮ੍ਮਜ੍ਜੇਯ੍ਯ; ਯੋ ਪਸ੍ਸੇਯ੍ਯ ਪਾਨੀਯਘਟਂ ਵਾ ਪਰਿਭੋਜਨੀਯਘਟਂ ਵਾ ਵਚ੍ਚਘਟਂ ਵਾ ਰਿਤ੍ਤਂ ਤੁਚ੍ਛਂ ਸੋ ਉਪਟ੍ਠਾਪੇਯ੍ਯ; ਸਚਸ੍ਸ ਹੋਤਿ ਅਵਿਸਯ੍ਹਂ, ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਾਪੇਯ੍ਯ; ਨ ਤ੍ਵੇਵ ਤਪ੍ਪਚ੍ਚਯਾ ਵਾਚਂ ਭਿਨ੍ਦੇਯ੍ਯ – ਏਵਂ ਖੋ ਮਯਂ ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸੇਯ੍ਯਾਮ, ਨ ਚ ਪਿਣ੍ਡਕੇਨ ਕਿਲਮੇਯ੍ਯਾਮਾ’’ਤਿ. ਅਥ ਖੋ ਮਯਂ, ਭਨ੍ਤੇ, ਅਞ੍ਞਮਞ੍ਞਂ ਨੇਵ ਆਲਪਿਮ੍ਹਾ ਨ ਸਲ੍ਲਵਿਮ੍ਹਾ. ਯੋ ਪਠਮਂ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ ਸੋ ਆਸਨਂ ਪਞ੍ਞਪੇਤਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਤਿ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਉਪਟ੍ਠਾਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ. ਯੋ ਪਚ੍ਛਾ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਸਚੇ ਹੋਤਿ ਭੁਤ੍ਤਾਵਸੇਸੋ, ਸਚੇ ਆਕਙ੍ਖਤਿ ਭੁਞ੍ਜਤਿ, ਨੋ ਚੇ ਆਕਙ੍ਖਤਿ ਅਪ੍ਪਹਰਿਤੇ ਵਾ ਛਡ੍ਡੇਤਿ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਤਿ, ਸੋ ਆਸਨਂ ਉਦ੍ਧਰਤਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਿ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਪਟਿਸਾਮੇਤਿ, ਪਾਨੀਯਂ ਪਰਿਭੋਜਨੀਯਂ ਪਟਿਸਾਮੇਤਿ, ਭਤ੍ਤਗ੍ਗਂ ਸਮ੍ਮਜ੍ਜਤਿ. ਯੋ ਪਸ੍ਸਤਿ ਪਾਨੀਯਘਟਂ ਵਾ ਪਰਿਭੋਜਨੀਯਘਟਂ ਵਾ ਵਚ੍ਚਘਟਂ ਵਾ ਰਿਤ੍ਤਂ ਤੁਚ੍ਛਂ ਸੋ ਉਪਟ੍ਠਾਪੇਤਿ. ਸਚਸ੍ਸ ਹੋਤਿ ਅਵਿਸਯ੍ਹਂ, ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਾਪੇਤਿ, ਨ ਤ੍ਵੇਵ ਤਪ੍ਪਚ੍ਚਯਾ ਵਾਚਂ ਭਿਨ੍ਦਤਿ. ਏਵਂ ਖੋ ਮਯਂ, ਭਨ੍ਤੇ, ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸਿਮ੍ਹਾ, ਨ ਚ ਪਿਣ੍ਡਕੇਨ ਕਿਲਮਿਮ੍ਹਾਤਿ.

ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਫਾਸੁਞ੍ਞੇਵ [ਅਫਾਸੁਕਞ੍ਞੇਵ (ਸੀ.)] ਕਿਰਮੇ [ਕਿਰਿਮੇ (ਕ.)], ਭਿਕ੍ਖਵੇ, ਮੋਘਪੁਰਿਸਾ ਵੁਟ੍ਠਾ [ਵੁਤ੍ਥਾ (ਕ.)] ਸਮਾਨਾ ਫਾਸੁਮ੍ਹਾ [ਫਾਸੁਕਮ੍ਹਾ (ਸੀ.)] ਵੁਟ੍ਠਾਤਿ ਪਟਿਜਾਨਨ੍ਤਿ. ਪਸੁਸਂਵਾਸਞ੍ਞੇਵ ਕਿਰਮੇ, ਭਿਕ੍ਖਵੇ, ਮੋਘਪੁਰਿਸਾ ਵੁਟ੍ਠਾ ਸਮਾਨਾ ਫਾਸੁਮ੍ਹਾ ਵੁਟ੍ਠਾਤਿ ਪਟਿਜਾਨਨ੍ਤਿ. ਏਲ਼ਕਸਂਵਾਸਞ੍ਞੇਵ ਕਿਰਮੇ, ਭਿਕ੍ਖਵੇ, ਮੋਘਪੁਰਿਸਾ ਵੁਟ੍ਠਾ ਸਮਾਨਾ ਫਾਸੁਮ੍ਹਾ ਵੁਟ੍ਠਾਤਿ ਪਟਿਜਾਨਨ੍ਤਿ. ਸਪਤ੍ਤਸਂਵਾਸਞ੍ਞੇਵ ਕਿਰਮੇ, ਭਿਕ੍ਖਵੇ, ਮੋਘਪੁਰਿਸਾ ਵੁਟ੍ਠਾ ਸਮਾਨਾ ਫਾਸੁਮ੍ਹਾ ਵੁਟ੍ਠਾਤਿ ਪਟਿਜਾਨਨ੍ਤਿ. ਕਥਞ੍ਹਿ ਨਾਮਿਮੇ, ਭਿਕ੍ਖਵੇ, ਮੋਘਪੁਰਿਸਾ ਮੂਗਬ੍ਬਤਂ ਤਿਤ੍ਥਿਯਸਮਾਦਾਨਂ ਸਮਾਦਿਯਿਸ੍ਸ’’ਨ੍ਤਿ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ਨ, ਭਿਕ੍ਖਵੇ, ਮੂਗਬ੍ਬਤਂ ਤਿਤ੍ਥਿਯਸਮਾਦਾਨਂ ਸਮਾਦਿਯਿਤਬ੍ਬਂ. ਯੋ ਸਮਾਦਿਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਤੀਹਿ ਠਾਨੇਹਿ ਪਵਾਰੇਤੁਂ – ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਸਾ ਵੋ ਭਵਿਸ੍ਸਤਿ ਅਞ੍ਞਮਞ੍ਞਾਨੁਲੋਮਤਾ ਆਪਤ੍ਤਿਵੁਟ੍ਠਾਨਤਾ ਵਿਨਯਪੁਰੇਕ੍ਖਾਰਤਾ. ਏਵਞ੍ਚ ਪਨ, ਭਿਕ੍ਖਵੇ, ਪਵਾਰੇਤਬ੍ਬਂ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੨੧੦. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਜ੍ਜ ਪਵਾਰਣਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ.

ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਸਙ੍ਘਂ, ਆਵੁਸੋ, ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ, ਆਵੁਸੋ, ਸਙ੍ਘਂ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਤਤਿਯਮ੍ਪਿ, ਆਵੁਸੋ, ਸਙ੍ਘਂ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ.

ਨਵਕੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਸਙ੍ਘਂ, ਭਨ੍ਤੇ, ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ, ਭਨ੍ਤੇ, ਸਙ੍ਘਂ…ਪੇ… ਤਤਿਯਮ੍ਪਿ, ਭਨ੍ਤੇ, ਸਙ੍ਘਂ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ.

੨੧੧. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਥੇਰੇਸੁ ਭਿਕ੍ਖੂਸੁ ਉਕ੍ਕੁਟਿਕਂ ਨਿਸਿਨ੍ਨੇਸੁ ਪਵਾਰਯਮਾਨੇਸੁ ਆਸਨੇਸੁ ਅਚ੍ਛਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਥੇਰੇਸੁ ਭਿਕ੍ਖੂਸੁ ਉਕ੍ਕੁਟਿਕਂ ਨਿਸਿਨ੍ਨੇਸੁ ਪਵਾਰਯਮਾਨੇਸੁ ਆਸਨੇਸੁ ਅਚ੍ਛਿਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਥੇਰੇਸੁ ਭਿਕ੍ਖੂਸੁ ਉਕ੍ਕੁਟਿਕਂ ਨਿਸਿਨ੍ਨੇਸੁ ਪਵਾਰਯਮਾਨੇਸੁ ਆਸਨੇਸੁ ਅਚ੍ਛਨ੍ਤੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਥੇਰੇਸੁ ਭਿਕ੍ਖੂਸੁ ਉਕ੍ਕੁਟਿਕਂ ਨਿਸਿਨ੍ਨੇਸੁ ਪਵਾਰਯਮਾਨੇਸੁ ਆਸਨੇਸੁ ਅਚ੍ਛਿਸ੍ਸ’’ਨ੍ਤਿ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ, ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਥੇਰੇਸੁ ਭਿਕ੍ਖੂਸੁ ਉਕ੍ਕੁਟਿਕਂ ਨਿਸਿਨ੍ਨੇਸੁ ਪਵਾਰਯਮਾਨੇਸੁ ਆਸਨੇਸੁ ਅਚ੍ਛਿਤਬ੍ਬਂ. ਯੋ ਅਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬੇਹੇਵ ਉਕ੍ਕੁਟਿਕਂ ਨਿਸਿਨ੍ਨੇਹਿ ਪਵਾਰੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਥੇਰੋ ਜਰਾਦੁਬ੍ਬਲੋ ਯਾਵ ਸਬ੍ਬੇ ਪਵਾਰੇਨ੍ਤੀਤਿ [ਯਾਵ ਸਬ੍ਬੇ ਪਵਾਰੇਨ੍ਤਿ (ਸ੍ਯਾ.)] ਉਕ੍ਕੁਟਿਕਂ ਨਿਸਿਨ੍ਨੋ ਆਗਮਯਮਾਨੋ ਮੁਚ੍ਛਿਤੋ ਪਪਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਦਮਨ੍ਤਰਾ ਉਕ੍ਕੁਟਿਕਂ ਨਿਸੀਦਿਤੁਂ ਯਾਵ ਪਵਾਰੇਤਿ, ਪਵਾਰੇਤ੍ਵਾ ਆਸਨੇ ਨਿਸੀਦਿਤੁਨ੍ਤਿ.

ਅਫਾਸੁਕਵਿਹਾਰੋ ਨਿਟ੍ਠਿਤੋ.

੧੨੧. ਪਵਾਰਣਾਭੇਦਾ

੨੧੨. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਤਿ ਨੁ ਖੋ ਪਵਾਰਣਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਦ੍ਵੇਮਾ, ਭਿਕ੍ਖਵੇ, ਪਵਾਰਣਾ – ਚਾਤੁਦ੍ਦਸਿਕਾ ਚ ਪਨ੍ਨਰਸਿਕਾ ਚ. ਇਮਾ ਖੋ, ਭਿਕ੍ਖਵੇ, ਦ੍ਵੇ ਪਵਾਰਣਾਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਤਿ ਨੁ ਖੋ ਪਵਾਰਣਕਮ੍ਮਾਨੀ’’ਤਿ? [ਪਵਾਰਣਾਕਮ੍ਮਾਨੀਤਿ (ਸ੍ਯਾ.)] ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਚਤ੍ਤਾਰਿਮਾਨਿ, ਭਿਕ੍ਖਵੇ, ਪਵਾਰਣਕਮ੍ਮਾਨਿ – ਅਧਮ੍ਮੇਨ ਵਗ੍ਗਂ ਪਵਾਰਣਕਮ੍ਮਂ, ਅਧਮ੍ਮੇਨ ਸਮਗ੍ਗਂ ਪਵਾਰਣਕਮ੍ਮਂ, ਧਮ੍ਮੇਨ ਵਗ੍ਗਂ ਪਵਾਰਣਕਮ੍ਮਂ, ਧਮ੍ਮੇਨ ਸਮਗ੍ਗਂ ਪਵਾਰਣਕਮ੍ਮਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਅਧਮ੍ਮੇਨ ਵਗ੍ਗਂ ਪਵਾਰਣਕਮ੍ਮਂ, ਨ, ਭਿਕ੍ਖਵੇ, ਏਵਰੂਪਂ ਪਵਾਰਣਕਮ੍ਮਂ ਕਾਤਬ੍ਬਂ; ਨ ਚ ਮਯਾ ਏਵਰੂਪਂ ਪਵਾਰਣਕਮ੍ਮਂ ਅਨੁਞ੍ਞਾਤਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਅਧਮ੍ਮੇਨ ਸਮਗ੍ਗਂ ਪਵਾਰਣਕਮ੍ਮਂ, ਨ, ਭਿਕ੍ਖਵੇ, ਏਵਰੂਪਂ ਪਵਾਰਣਕਮ੍ਮਂ ਕਾਤਬ੍ਬਂ; ਨ ਚ ਮਯਾ ਏਵਰੂਪਂ ਪਵਾਰਣਕਮ੍ਮਂ ਅਨੁਞ੍ਞਾਤਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਧਮ੍ਮੇਨ ਵਗ੍ਗਂ ਪਵਾਰਣਕਮ੍ਮਂ, ਨ, ਭਿਕ੍ਖਵੇ, ਏਵਰੂਪਂ ਪਵਾਰਣਕਮ੍ਮਂ ਕਾਤਬ੍ਬਂ; ਨ ਚ ਮਯਾ ਏਵਰੂਪਂ ਪਵਾਰਣਕਮ੍ਮਂ ਅਨੁਞ੍ਞਾਤਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਧਮ੍ਮੇਨ ਸਮਗ੍ਗਂ ਪਵਾਰਣਕਮ੍ਮਂ, ਏਵਰੂਪਂ, ਭਿਕ੍ਖਵੇ, ਪਵਾਰਣਕਮ੍ਮਂ ਕਾਤਬ੍ਬਂ; ਏਵਰੂਪਞ੍ਚ ਮਯਾ ਪਵਾਰਣਕਮ੍ਮਂ ਅਨੁਞ੍ਞਾਤਂ. ਤਸ੍ਮਾਤਿਹ, ਭਿਕ੍ਖਵੇ, ਏਵਰੂਪਂ ਪਵਾਰਣਕਮ੍ਮਂ ਕਰਿਸ੍ਸਾਮ ਯਦਿਦਂ ਧਮ੍ਮੇਨ ਸਮਗ੍ਗਨ੍ਤਿ, ਏਵਞ੍ਹਿ ਵੋ, ਭਿਕ੍ਖਵੇ, ਸਿਕ੍ਖਿਤਬ੍ਬਨ੍ਤਿ.

ਪਵਾਰਣਾਭੇਦਾ ਨਿਟ੍ਠਿਤਾ.

੧੨੨. ਪਵਾਰਣਾਦਾਨਾਨੁਜਾਨਨਾ

੨੧੩. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਸਨ੍ਨਿਪਤਥ, ਭਿਕ੍ਖਵੇ. ਸਙ੍ਘੋ ਪਵਾਰੇਸ੍ਸਤੀ’’ਤਿ. ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਅਤ੍ਥਿ, ਭਨ੍ਤੇ, ਭਿਕ੍ਖੁ ਗਿਲਾਨੋ, ਸੋ ਅਨਾਗਤੋ’’ਤਿ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨੇਨ ਭਿਕ੍ਖੁਨਾ ਪਵਾਰਣਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬਾ – ਤੇਨ ਗਿਲਾਨੇਨ ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਪਵਾਰਣਂ ਦਮ੍ਮਿ, ਪਵਾਰਣਂ ਮੇ ਹਰ, ਪਵਾਰਣਂ ਮੇ ਆਰੋਚੇਹਿ, ਮਮਤ੍ਥਾਯ ਪਵਾਰੇਹੀ’’ਤਿ ਕਾਯੇਨ ਵਿਞ੍ਞਾਪੇਤਿ, ਵਾਚਾਯ ਵਿਞ੍ਞਾਪੇਤਿ, ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਦਿਨ੍ਨਾ ਹੋਤਿ ਪਵਾਰਣਾ; ਨ ਕਾਯੇਨ ਵਿਞ੍ਞਾਪੇਤਿ, ਨ ਵਾਚਾਯ ਵਿਞ੍ਞਾਪੇਤਿ, ਨ ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਨ ਦਿਨ੍ਨਾ ਹੋਤਿ ਪਵਾਰਣਾ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਸੋ, ਭਿਕ੍ਖਵੇ, ਗਿਲਾਨੋ ਭਿਕ੍ਖੁ ਮਞ੍ਚੇਨ ਵਾ ਪੀਠੇਨ ਵਾ ਸਙ੍ਘਮਜ੍ਝੇ ਆਨੇਤ੍ਵਾ ਪਵਾਰੇਤਬ੍ਬਂ. ਸਚੇ, ਭਿਕ੍ਖਵੇ, ਗਿਲਾਨੁਪਟ੍ਠਾਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਸਚੇ ਖੋ ਮਯਂ ਗਿਲਾਨਂ ਠਾਨਾ ਚਾਵੇਸ੍ਸਾਮ, ਆਬਾਧੋ ਵਾ ਅਭਿਵਡ੍ਢਿਸ੍ਸਤਿ, ਕਾਲਂਕਿਰਿਯਾ ਵਾ ਭਵਿਸ੍ਸਤੀ’’ਤਿ ਨ, ਭਿਕ੍ਖਵੇ, ਗਿਲਾਨੋ ਭਿਕ੍ਖੁ ਠਾਨਾ ਚਾਵੇਤਬ੍ਬੋ. ਸਙ੍ਘੇਨ ਤਤ੍ਥ ਗਨ੍ਤ੍ਵਾ ਪਵਾਰੇਤਬ੍ਬਂ; ਨ ਤ੍ਵੇਵ ਵਗ੍ਗੇਨ ਸਙ੍ਘੇਨ ਪਵਾਰੇਤਬ੍ਬਂ. ਪਵਾਰੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸ.

ਪਵਾਰਣਹਾਰਕੋ [ਪਵਾਰਣਾਹਾਰਕੋ (ਸ੍ਯਾ.)] ਚੇ, ਭਿਕ੍ਖਵੇ, ਦਿਨ੍ਨਾਯ ਪਵਾਰਣਾਯ ਤਤ੍ਥੇਵ ਪਕ੍ਕਮਤਿ, ਅਞ੍ਞਸ੍ਸ ਦਾਤਬ੍ਬਾ ਪਵਾਰਣਾ. ਪਵਾਰਣਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਵਾਰਣਾਯ ਤਤ੍ਥੇਵ ਵਿਬ੍ਭਮਤਿ…ਪੇ… ਕਾਲਂਕਰੋਤਿ… ਸਾਮਣੇਰੋ ਪਟਿਜਾਨਾਤਿ… ਸਿਕ੍ਖਂ ਪਚ੍ਚਕ੍ਖਾਤਕੋ ਪਟਿਜਾਨਾਤਿ… ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ ਪਟਿਜਾਨਾਤਿ… ਉਮ੍ਮਤ੍ਤਕੋ ਪਟਿਜਾਨਾਤਿ… ਖਿਤ੍ਤਚਿਤ੍ਤੋ ਪਟਿਜਾਨਾਤਿ… ਵੇਦਨਾਟ੍ਟੋ ਪਟਿਜਾਨਾਤਿ… ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ ਪਟਿਜਾਨਾਤਿ… ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ ਪਟਿਜਾਨਾਤਿ… ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋ ਪਟਿਜਾਨਾਤਿ… ਪਣ੍ਡਕੋ ਪਟਿਜਾਨਾਤਿ… ਥੇਯ੍ਯਸਂਵਾਸਕੋ ਪਟਿਜਾਨਾਤਿ… ਤਿਤ੍ਥਿਯਪਕ੍ਕਨ੍ਤਕੋ ਪਟਿਜਾਨਾਤਿ… ਤਿਰਚ੍ਛਾਨਗਤੋ ਪਟਿਜਾਨਾਤਿ… ਮਾਤੁਘਾਤਕੋ ਪਟਿਜਾਨਾਤਿ… ਪਿਤੁਘਾਤਕੋ ਪਟਿਜਾਨਾਤਿ… ਅਰਹਨ੍ਤਘਾਤਕੋ ਪਟਿਜਾਨਾਤਿ… ਭਿਕ੍ਖੁਨਿਦੂਸਕੋ ਪਟਿਜਾਨਾਤਿ… ਸਙ੍ਘਭੇਦਕੋ ਪਟਿਜਾਨਾਤਿ … ਲੋਹਿਤੁਪ੍ਪਾਦਕੋ ਪਟਿਜਾਨਾਤਿ… ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਅਞ੍ਞਸ੍ਸ ਦਾਤਬ੍ਬਾ ਪਵਾਰਣਾ.

ਪਵਾਰਣਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਵਾਰਣਾਯ ਅਨ੍ਤਰਾਮਗ੍ਗੇ ਪਕ੍ਕਮਤਿ, ਅਨਾਹਟਾ ਹੋਤਿ ਪਵਾਰਣਾ. ਪਵਾਰਣਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਵਾਰਣਾਯ ਅਨ੍ਤਰਾਮਗ੍ਗੇ ਵਿਬ੍ਭਮਤਿ…ਪੇ… ਕਾਲਂਕਰੋਤਿ… ਸਾਮਣੇਰੋ ਪਟਿਜਾਨਾਤਿ… ਸਿਕ੍ਖਂ ਪਚ੍ਚਕ੍ਖਾਤਕੋ ਪਟਿਜਾਨਾਤਿ… ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ ਪਟਿਜਾਨਾਤਿ… ਉਮ੍ਮਤ੍ਤਕੋ ਪਟਿਜਾਨਾਤਿ… ਖਿਤ੍ਤਚਿਤ੍ਤੋ ਪਟਿਜਾਨਾਤਿ… ਵੇਦਨਾਟ੍ਟੋ ਪਟਿਜਾਨਾਤਿ… ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ ਪਟਿਜਾਨਾਤਿ… ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ ਪਟਿਜਾਨਾਤਿ… ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋ ਪਟਿਜਾਨਾਤਿ… ਪਣ੍ਡਕੋ ਪਟਿਜਾਨਾਤਿ… ਥੇਯ੍ਯਸਂਵਾਸਕੋ ਪਟਿਜਾਨਾਤਿ… ਤਿਤ੍ਥਿਯਪਕ੍ਕਨ੍ਤਕੋ ਪਟਿਜਾਨਾਤਿ… ਤਿਰਚ੍ਛਾਨਗਤੋ ਪਟਿਜਾਨਾਤਿ… ਮਾਤੁਘਾਤਕੋ ਪਟਿਜਾਨਾਤਿ… ਪਿਤੁਘਾਤਕੋ ਪਟਿਜਾਨਾਤਿ… ਅਰਹਨ੍ਤਘਾਤਕੋ ਪਟਿਜਾਨਾਤਿ… ਭਿਕ੍ਖੁਨਿਦੂਸਕੋ ਪਟਿਜਾਨਾਤਿ… ਸਙ੍ਘਭੇਦਕੋ ਪਟਿਜਾਨਾਤਿ… ਲੋਹਿਤੁਪ੍ਪਾਦਕੋ ਪਟਿਜਾਨਾਤਿ… ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਅਨਾਹਟਾ ਹੋਤਿ ਪਵਾਰਣਾ.

ਪਵਾਰਣਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਵਾਰਣਾਯ ਸਙ੍ਘਪ੍ਪਤ੍ਤੋ ਪਕ੍ਕਮਤਿ, ਆਹਟਾ ਹੋਤਿ ਪਵਾਰਣਾ. ਪਵਾਰਣਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਵਾਰਣਾਯ ਸਙ੍ਘਪ੍ਪਤ੍ਤੋ ਵਿਬ੍ਭਮਤਿ…ਪੇ… ਕਾਲਂਕਰੋਤਿ… ਸਾਮਣੇਰੋ ਪਟਿਜਾਨਾਤਿ… ਸਿਕ੍ਖਂ ਪਚ੍ਚਕ੍ਖਾਤਕੋ ਪਟਿਜਾਨਾਤਿ… ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ ਪਟਿਜਾਨਾਤਿ… ਉਮ੍ਮਤ੍ਤਕੋ ਪਟਿਜਾਨਾਤਿ… ਖਿਤ੍ਤਚਿਤ੍ਤੋ ਪਟਿਜਾਨਾਤਿ… ਵੇਦਨਾਟ੍ਟੋ ਪਟਿਜਾਨਾਤਿ… ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ ਪਟਿਜਾਨਾਤਿ… ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ ਪਟਿਜਾਨਾਤਿ… ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋ ਪਟਿਜਾਨਾਤਿ… ਪਣ੍ਡਕੋ ਪਟਿਜਾਨਾਤਿ… ਥੇਯ੍ਯਸਂਵਾਸਕੋ ਪਟਿਜਾਨਾਤਿ… ਤਿਤ੍ਥਿਯਪਕ੍ਕਨ੍ਤਕੋ ਪਟਿਜਾਨਾਤਿ… ਤਿਰਚ੍ਛਾਨਗਤੋ ਪਟਿਜਾਨਾਤਿ… ਮਾਤੁਘਾਤਕੋ ਪਟਿਜਾਨਾਤਿ… ਪਿਤੁਘਾਤਕੋ ਪਟਿਜਾਨਾਤਿ… ਅਰਹਨ੍ਤਘਾਤਕੋ ਪਟਿਜਾਨਾਤਿ… ਭਿਕ੍ਖੁਨਿਦੂਸਕੋ ਪਟਿਜਾਨਾਤਿ… ਸਙ੍ਘਭੇਦਕੋ ਪਟਿਜਾਨਾਤਿ… ਲੋਹਿਤੁਪ੍ਪਾਦਕੋ ਪਟਿਜਾਨਾਤਿ… ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਆਹਟਾ ਹੋਤਿ ਪਵਾਰਣਾ.

ਪਵਾਰਣਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਵਾਰਣਾਯ ਸਙ੍ਘਪ੍ਪਤ੍ਤੋ ਸੁਤ੍ਤੋ ਨਾਰੋਚੇਤਿ, ਆਹਟਾ ਹੋਤਿ ਪਵਾਰਣਾ. ਪਵਾਰਣਹਾਰਕਸ੍ਸ ਅਨਾਪਤ੍ਤਿ. ਪਵਾਰਣਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਵਾਰਣਾਯ ਸਙ੍ਘਪ੍ਪਤ੍ਤੋ ਪਮਤ੍ਤੋ ਨਾਰੋਚੇਤਿ…ਪੇ… ਸਮਾਪਨ੍ਨੋ ਨਾਰੋਚੇਤਿ, ਆਹਟਾ ਹੋਤਿ ਪਵਾਰਣਾ. ਪਵਾਰਣਹਾਰਕਸ੍ਸ ਅਨਾਪਤ੍ਤਿ.

ਪਵਾਰਣਹਾਰਕੋ ਚੇ, ਭਿਕ੍ਖਵੇ, ਦਿਨ੍ਨਾਯ ਪਵਾਰਣਾਯ ਸਙ੍ਘਪ੍ਪਤ੍ਤੋ ਸਞ੍ਚਿਚ੍ਚ ਨਾਰੋਚੇਤਿ, ਆਹਟਾ ਹੋਤਿ ਪਵਾਰਣਾ. ਪਵਾਰਣਹਾਰਕਸ੍ਸ ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਦਹੁ ਪਵਾਰਣਾਯ ਪਵਾਰਣਂ ਦੇਨ੍ਤੇਨ ਛਨ੍ਦਮ੍ਪਿ ਦਾਤੁਂ, ਸਨ੍ਤਿ ਸਙ੍ਘਸ੍ਸ ਕਰਣੀਯਨ੍ਤਿ.

ਪਵਾਰਣਾਦਾਨਾਨੁਜਾਨਨਾ ਨਿਟ੍ਠਿਤਾ.

੧੨੩. ਞਾਤਕਾਦਿਗ੍ਗਹਣਕਥਾ

੨੧੪. ਤੇਨ ਖੋ ਪਨ ਸਮਯੇਨ ਅਞ੍ਞਤਰਂ ਭਿਕ੍ਖੁਂ ਤਦਹੁ ਪਵਾਰਣਾਯ ਞਾਤਕਾ ਗਣ੍ਹਿਂਸੁ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਇਧ ਪਨ, ਭਿਕ੍ਖਵੇ, ਭਿਕ੍ਖੁਂ ਤਦਹੁ ਪਵਾਰਣਾਯ ਞਾਤਕਾ ਗਣ੍ਹਨ੍ਤਿ. ਤੇ ਞਾਤਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਇਮਂ ਭਿਕ੍ਖੁਂ ਮੁਹੁਤ੍ਤਂ ਮੁਞ੍ਚਥ, ਯਾਵਾਯਂ ਭਿਕ੍ਖੁ ਪਵਾਰੇਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਤੇ ਞਾਤਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਮੁਹੁਤ੍ਤਂ ਏਕਮਨ੍ਤਂ ਹੋਥ, ਯਾਵਾਯਂ ਭਿਕ੍ਖੁ ਪਵਾਰਣਂ ਦੇਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਤੇ ਞਾਤਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਇਮਂ ਭਿਕ੍ਖੁਂ ਮੁਹੁਤ੍ਤਂ ਨਿਸ੍ਸੀਮਂ ਨੇਥ, ਯਾਵ ਸਙ੍ਘੋ ਪਵਾਰੇਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਨ ਤ੍ਵੇਵ ਵਗ੍ਗੇਨ ਸਙ੍ਘੇਨ ਪਵਾਰੇਤਬ੍ਬਂ. ਪਵਾਰੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਂ ਤਦਹੁ ਪਵਾਰਣਾਯ ਰਾਜਾਨੋ ਗਣ੍ਹਨ੍ਤਿ…ਪੇ… ਚੋਰਾ ਗਣ੍ਹਨ੍ਤਿ … ਧੁਤ੍ਤਾ ਗਣ੍ਹਨ੍ਤਿ… ਭਿਕ੍ਖੁਪਚ੍ਚਤ੍ਥਿਕਾ ਗਣ੍ਹਨ੍ਤਿ. ਤੇ ਭਿਕ੍ਖੁਪਚ੍ਚਤ੍ਥਿਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਇਮਂ ਭਿਕ੍ਖੁਂ ਮੁਹੁਤ੍ਤਂ ਮੁਞ੍ਚਥ, ਯਾਵਾਯਂ ਭਿਕ੍ਖੁ ਪਵਾਰੇਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਤੇ ਭਿਕ੍ਖੁਪਚ੍ਚਤ੍ਥਿਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਮੁਹੁਤ੍ਤਂ ਏਕਮਨ੍ਤਂ ਹੋਥ, ਯਾਵਾਯਂ ਭਿਕ੍ਖੁ ਪਵਾਰਣਂ ਦੇਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਤੇ ਭਿਕ੍ਖੁਪਚ੍ਚਤ੍ਥਿਕਾ ਭਿਕ੍ਖੂਹਿ ਏਵਮਸ੍ਸੁ ਵਚਨੀਯਾ – ‘‘ਇਙ੍ਘ, ਤੁਮ੍ਹੇ ਆਯਸ੍ਮਨ੍ਤੋ ਇਮਂ ਭਿਕ੍ਖੁਂ ਮੁਹੁਤ੍ਤਂ ਨਿਸ੍ਸੀਮਂ ਨੇਥ, ਯਾਵ ਸਙ੍ਘੋ ਪਵਾਰੇਤੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਨ ਤ੍ਵੇਵ ਵਗ੍ਗੇਨ ਸਙ੍ਘੇਨ ਪਵਾਰੇਤਬ੍ਬਂ. ਪਵਾਰੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਞਾਤਕਾਦਿਗ੍ਗਹਣਕਥਾ ਨਿਟ੍ਠਿਤਾ.

੧੨੪. ਸਙ੍ਘਪਵਾਰਣਾਦਿਪ੍ਪਭੇਦਾ

੨੧੫. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਪਞ੍ਚ ਭਿਕ੍ਖੂ ਵਿਹਰਨ੍ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਸਙ੍ਘੇਨ ਪਵਾਰੇਤਬ੍ਬ’ਨ੍ਤਿ. ਮਯਞ੍ਚਮ੍ਹਾ ਪਞ੍ਚ ਜਨਾ. ਕਥਂ ਨੁ ਖੋ ਅਮ੍ਹੇਹਿ ਪਵਾਰੇਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਨ੍ਨਂ ਸਙ੍ਘੇ ਪਵਾਰੇਤੁਨ੍ਤਿ.

੨੧੬. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਚਤ੍ਤਾਰੋ ਭਿਕ੍ਖੂ ਵਿਹਰਨ੍ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਅਨੁਞ੍ਞਾਤਂ ਪਞ੍ਚਨ੍ਨਂ ਸਙ੍ਘੇ ਪਵਾਰੇਤੁਨ੍ਤਿ. ਮਯਞ੍ਚਮ੍ਹਾ ਚਤ੍ਤਾਰੋ ਜਨਾ. ਕਥਂ ਨੁ ਖੋ ਅਮ੍ਹੇਹਿ ਪਵਾਰੇਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਚਤੁਨ੍ਨਂ ਅਞ੍ਞਮਞ੍ਞਂ ਪਵਾਰੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਪਵਾਰੇਤਬ੍ਬਂ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਤੇ ਭਿਕ੍ਖੂ ਞਾਪੇਤਬ੍ਬਾ –

‘‘ਸੁਣਨ੍ਤੁ ਮੇ ਆਯਸ੍ਮਨ੍ਤੋ. ਅਜ੍ਜ ਪਵਾਰਣਾ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਮਯਂ ਅਞ੍ਞਮਞ੍ਞਂ ਪਵਾਰੇਯ੍ਯਾਮਾ’’ਤਿ.

ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਤੇ ਭਿਕ੍ਖੂ ਏਵਮਸ੍ਸੁ ਵਚਨੀਯਾ – ‘‘ਅਹਂ, ਆਵੁਸੋ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਅਹਂ, ਆਵੁਸੋ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ.

ਨਵਕੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਤੇ ਭਿਕ੍ਖੂ ਏਵਮਸ੍ਸੁ ਵਚਨੀਯਾ – ‘‘ਅਹਂ, ਭਨ੍ਤੇ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਅਹਂ, ਭਨ੍ਤੇ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਤਯੋ ਭਿਕ੍ਖੂ ਵਿਹਰਨ੍ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਅਨੁਞ੍ਞਾਤਂ ਪਞ੍ਚਨ੍ਨਂ ਸਙ੍ਘੇ ਪਵਾਰੇਤੁਂ, ਚਤੁਨ੍ਨਂ ਅਞ੍ਞਮਞ੍ਞਂ ਪਵਾਰੇਤੁਂ. ਮਯਞ੍ਚਮ੍ਹਾ ਤਯੋ ਜਨਾ. ਕਥਂ ਨੁ ਖੋ ਅਮ੍ਹੇਹਿ ਪਵਾਰੇਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਿਣ੍ਣਂ ਅਞ੍ਞਮਞ੍ਞਂ ਪਵਾਰੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਪਵਾਰੇਤਬ੍ਬਂ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਤੇ ਭਿਕ੍ਖੂ ਞਾਪੇਤਬ੍ਬਾ –

‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ. ਅਜ੍ਜ ਪਵਾਰਣਾ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਮਯਂ ਅਞ੍ਞਮਞ੍ਞਂ ਪਵਾਰੇਯ੍ਯਾਮਾ’’ਤਿ.

ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਤੇ ਭਿਕ੍ਖੂ ਏਵਮਸ੍ਸੁ ਵਚਨੀਯਾ – ‘‘ਅਹਂ, ਆਵੁਸੋ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤਾ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਅਹਂ, ਆਵੁਸੋ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤਾ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ.

ਨਵਕੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਤੇ ਭਿਕ੍ਖੂ ਏਵਮਸ੍ਸੁ ਵਚਨੀਯਾ – ‘‘ਅਹਂ, ਭਨ੍ਤੇ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤਾ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਅਹਂ, ਭਨ੍ਤੇ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਨ੍ਤੁ ਮਂ ਆਯਸ੍ਮਨ੍ਤਾ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ.

੨੧੭. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਦ੍ਵੇ ਭਿਕ੍ਖੂ ਵਿਹਰਨ੍ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਅਨੁਞ੍ਞਾਤਂ ਪਞ੍ਚਨ੍ਨਂ ਸਙ੍ਘੇ ਪਵਾਰੇਤੁਂ, ਚਤੁਨ੍ਨਂ ਅਞ੍ਞਮਞ੍ਞਂ ਪਵਾਰੇਤੁਂ, ਤਿਣ੍ਣਂ ਅਞ੍ਞਮਞ੍ਞਂ ਪਵਾਰੇਤੁਂ. ਮਯਞ੍ਚਮ੍ਹਾ ਦ੍ਵੇ ਜਨਾ. ਕਥਂ ਨੁ ਖੋ ਅਮ੍ਹੇਹਿ ਪਵਾਰੇਤਬ੍ਬ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵਿਨ੍ਨਂ ਅਞ੍ਞਮਞ੍ਞਂ ਪਵਾਰੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਪਵਾਰੇਤਬ੍ਬਂ. ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਨਵੋ ਭਿਕ੍ਖੁ ਏਵਮਸ੍ਸ ਵਚਨੀਯੋ – ‘‘ਅਹਂ, ਆਵੁਸੋ, ਆਯਸ੍ਮਨ੍ਤਂ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਤੁ ਮਂ ਆਯਸ੍ਮਾ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਅਹਂ, ਆਵੁਸੋ, ਆਯਸ੍ਮਨ੍ਤਂ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਤੁ ਮਂ ਆਯਸ੍ਮਾ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ.

ਨਵਕੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਥੇਰੋ ਭਿਕ੍ਖੁ ਏਵਮਸ੍ਸ ਵਚਨੀਯੋ – ‘‘ਅਹਂ, ਭਨ੍ਤੇ, ਆਯਸ੍ਮਨ੍ਤਂ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਤੁ ਮਂ ਆਯਸ੍ਮਾ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਅਹਂ, ਭਨ੍ਤੇ, ਆਯਸ੍ਮਨ੍ਤਂ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਤੁ ਮਂ ਆਯਸ੍ਮਾ ਅਨੁਕਮ੍ਪਂ ਉਪਾਦਾਯ. ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ.

੨੧੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਏਕੋ ਭਿਕ੍ਖੁ ਵਿਹਰਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਅਨੁਞ੍ਞਾਤਂ ਪਞ੍ਚਨ੍ਨਂ ਸਙ੍ਘੇ ਪਵਾਰੇਤੁਂ, ਚਤੁਨ੍ਨਂ ਅਞ੍ਞਮਞ੍ਞਂ ਪਵਾਰੇਤੁਂ, ਤਿਣ੍ਣਂ ਅਞ੍ਞਮਞ੍ਞਂ ਪਵਾਰੇਤੁਂ, ਦ੍ਵਿਨ੍ਨਂ ਅਞ੍ਞਮਞ੍ਞਂ ਪਵਾਰੇਤੁਂ. ਅਹਞ੍ਚਮ੍ਹਿ ਏਕਕੋ. ਕਥਂ ਨੁ ਖੋ ਮਯਾ ਪਵਾਰੇਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਏਕੋ ਭਿਕ੍ਖੁ ਵਿਹਰਤਿ. ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਯਤ੍ਥ ਭਿਕ੍ਖੂ ਪਟਿਕ੍ਕਮਨ੍ਤਿ ਉਪਟ੍ਠਾਨਸਾਲਾਯ ਵਾ ਮਣ੍ਡਪੇ ਵਾ ਰੁਕ੍ਖਮੂਲੇ ਵਾ, ਸੋ ਦੇਸੋ ਸਮ੍ਮਜ੍ਜਿਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਪਦੀਪਂ ਕਤ੍ਵਾ ਨਿਸੀਦਿਤਬ੍ਬਂ. ਸਚੇ ਅਞ੍ਞੇ ਭਿਕ੍ਖੂ ਆਗਚ੍ਛਨ੍ਤਿ, ਤੇਹਿ ਸਦ੍ਧਿਂ ਪਵਾਰੇਤਬ੍ਬਂ; ਨੋ ਚੇ ਆਗਚ੍ਛਨ੍ਤਿ, ‘ਅਜ੍ਜ ਮੇ ਪਵਾਰਣਾ’ਤਿ ਅਧਿਟ੍ਠਾਤਬ੍ਬਂ. ਨੋ ਚੇ ਅਧਿਟ੍ਠੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

ਤਤ੍ਰ, ਭਿਕ੍ਖਵੇ, ਯਤ੍ਥ ਪਞ੍ਚ ਭਿਕ੍ਖੂ ਵਿਹਰਨ੍ਤਿ, ਨ ਏਕਸ੍ਸ ਪਵਾਰਣਂ ਆਹਰਿਤ੍ਵਾ

ਚਤੂਹਿ ਸਙ੍ਘੇ ਪਵਾਰੇਤਬ੍ਬਂ. ਪਵਾਰੇਯ੍ਯੁਂ ਚੇ, ਆਪਤ੍ਤਿ ਦੁਕ੍ਕਟਸ੍ਸ. ਤਤ੍ਰ, ਭਿਕ੍ਖਵੇ, ਯਤ੍ਥ ਚਤ੍ਤਾਰੋ ਭਿਕ੍ਖੂ ਵਿਹਰਨ੍ਤਿ, ਨ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਤੀਹਿ ਅਞ੍ਞਮਞ੍ਞਂ ਪਵਾਰੇਤਬ੍ਬਂ. ਪਵਾਰੇਯ੍ਯੁਂ ਚੇ, ਆਪਤ੍ਤਿ ਦੁਕ੍ਕਟਸ੍ਸ. ਤਤ੍ਰ, ਭਿਕ੍ਖਵੇ, ਯਤ੍ਥ ਤਯੋ ਭਿਕ੍ਖੂ ਵਿਹਰਨ੍ਤਿ, ਨ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਦ੍ਵੀਹਿ ਅਞ੍ਞਮਞ੍ਞਂ ਪਵਾਰੇਤਬ੍ਬਂ. ਪਵਾਰੇਯ੍ਯੁਂ ਚੇ, ਆਪਤ੍ਤਿ ਦੁਕ੍ਕਟਸ੍ਸ. ਤਤ੍ਰ, ਭਿਕ੍ਖਵੇ, ਯਤ੍ਥ ਦ੍ਵੇ ਭਿਕ੍ਖੂ ਵਿਹਰਨ੍ਤਿ, ਨ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਏਕੇਨ ਅਧਿਟ੍ਠਾਤਬ੍ਬਂ. ਅਧਿਟ੍ਠੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਸਙ੍ਘਪਵਾਰਣਾਦਿਪ੍ਪਭੇਦਾ ਨਿਟ੍ਠਿਤਾ.

੧੨੫. ਆਪਤ੍ਤਿਪਟਿਕਮ੍ਮਵਿਧਿ

੨੧੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਤਦਹੁ ਪਵਾਰਣਾਯ ਆਪਤ੍ਤਿਂ ਆਪਨ੍ਨੋ ਹੋਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਸਾਪਤ੍ਤਿਕੇਨ ਪਵਾਰੇਤਬ੍ਬ’ਨ੍ਤਿ. ਅਹਞ੍ਚਮ੍ਹਿ ਆਪਤ੍ਤਿਂ ਆਪਨ੍ਨੋ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ [ਆਰੋਚੇਸਿ (ਕ.)].

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁ ਪਵਾਰਣਾਯ ਆਪਤ੍ਤਿਂ ਆਪਨ੍ਨੋ ਹੋਤਿ. ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ, ਤਂ ਪਟਿਦੇਸੇਮੀ’’ਤਿ. ਤੇਨ ਵਤ੍ਤਬ੍ਬੋ – ‘‘ਪਸ੍ਸਸੀ’’ਤਿ. ਆਮ ਪਸ੍ਸਾਮੀਤਿ. ਆਯਤਿਂ ਸਂਵਰੇਯ੍ਯਾਸੀਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁ ਪਵਾਰਣਾਯ ਆਪਤ੍ਤਿਯਾ ਵੇਮਤਿਕੋ ਹੋਤਿ. ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਾਯ ਆਪਤ੍ਤਿਯਾ ਵੇਮਤਿਕੋ; ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ ਵਤ੍ਵਾ ਪਵਾਰੇਤਬ੍ਬਂ; ਨ ਤ੍ਵੇਵ ਤਪ੍ਪਚ੍ਚਯਾ ਪਵਾਰਣਾਯ ਅਨ੍ਤਰਾਯੋ ਕਾਤਬ੍ਬੋਤਿ.

ਆਪਤ੍ਤਿਪਟਿਕਮ੍ਮਵਿਧਿ ਨਿਟ੍ਠਿਤਾ.

੧੨੬. ਆਪਤ੍ਤਿਆਵਿਕਰਣਵਿਧਿ

੨੨੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਪਵਾਰਯਮਾਨੋ ਆਪਤ੍ਤਿਂ ਸਰਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਸਾਪਤ੍ਤਿਕੇਨ ਪਵਾਰੇਤਬ੍ਬ’ਨ੍ਤਿ. ਅਹਞ੍ਚਮ੍ਹਿ ਆਪਤ੍ਤਿਂ ਆਪਨ੍ਨੋ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਵਾਰਯਮਾਨੋ ਆਪਤ੍ਤਿਂ ਸਰਤਿ. ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਾਮਨ੍ਤੋ ਭਿਕ੍ਖੁ ਏਵਮਸ੍ਸ ਵਚਨੀਯੋ – ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ. ਇਤੋ ਵੁਟ੍ਠਹਿਤ੍ਵਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ ਵਤ੍ਵਾ ਪਵਾਰੇਤਬ੍ਬਂ; ਨ ਤ੍ਵੇਵ ਤਪ੍ਪਚ੍ਚਯਾ ਪਵਾਰਣਾਯ ਅਨ੍ਤਰਾਯੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਵਾਰਯਮਾਨੋ ਆਪਤ੍ਤਿਯਾ ਵੇਮਤਿਕੋ ਹੋਤਿ. ਤੇਨ, ਭਿਕ੍ਖਵੇ,

ਭਿਕ੍ਖੁਨਾ ਸਾਮਨ੍ਤੋ ਭਿਕ੍ਖੁ ਏਵਮਸ੍ਸ ਵਚਨੀਯੋ – ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਾਯ ਆਪਤ੍ਤਿਯਾ ਵੇਮਤਿਕੋ; ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ ਵਤ੍ਵਾ ਪਵਾਰੇਤਬ੍ਬਂ; ਨ ਤ੍ਵੇਵ ਤਪ੍ਪਚ੍ਚਯਾ ਪਵਾਰਣਾਯ ਅਨ੍ਤਰਾਯੋ ਕਾਤਬ੍ਬੋਤਿ.

ਆਪਤ੍ਤਿ ਆਵਿਕਰਣਵਿਧਿ ਨਿਟ੍ਠਿਤਾ.

੧੨੭. ਸਭਾਗਾਪਤ੍ਤਿਪਟਿਕਮ੍ਮਵਿਧਿ

੨੨੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ ਹੋਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਸਭਾਗਾ ਆਪਤ੍ਤਿ ਦੇਸੇਤਬ੍ਬਾ, ਨ ਸਭਾਗਾ ਆਪਤ੍ਤਿ ਪਟਿਗ੍ਗਹੇਤਬ੍ਬਾ’ਤਿ. ਅਯਞ੍ਚ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ ਹੋਤਿ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ – ਗਚ੍ਛਾਵੁਸੋ, ਤਂ ਆਪਤ੍ਤਿਂ ਪਟਿਕਰਿਤ੍ਵਾ ਆਗਚ੍ਛ, ਮਯਂ ਤੇ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮਾਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ. ਯਦਾ ਅਞ੍ਞਂ ਭਿਕ੍ਖੁਂ ਸੁਦ੍ਧਂ ਅਨਾਪਤ੍ਤਿਕਂ ਪਸ੍ਸਿਸ੍ਸਤਿ ਤਦਾ ਤਸ੍ਸ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’’ਤਿ ਵਤ੍ਵਾ ਪਵਾਰੇਤਬ੍ਬਂ; ਨ ਤ੍ਵੇਵ ਤਪ੍ਪਚ੍ਚਯਾ ਪਵਾਰਣਾਯ ਅਨ੍ਤਰਾਯੋ ਕਾਤਬ੍ਬੋ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਬ੍ਬੋ ਸਙ੍ਘੋ ਸਭਾਗਾਯ ਆਪਤ੍ਤਿਯਾ ਵੇਮਤਿਕੋ ਹੋਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸਬ੍ਬੋ ਸਙ੍ਘੋ ਸਭਾਗਾਯ ਆਪਤ੍ਤਿਯਾ ਵੇਮਤਿਕੋ. ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਤਿ ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’’ਤਿ ਵਤ੍ਵਾ, ਪਵਾਰੇਤਬ੍ਬਂ, ਨ ਤ੍ਵੇਵ ਤਪ੍ਪਚ੍ਚਯਾ ਪਵਾਰਣਾਯ ਅਨ੍ਤਰਾਯੋ ਕਾਤਬ੍ਬੋਤਿ.

ਸਭਾਗਾਪਤ੍ਤਿਪਟਿਕਮ੍ਮਵਿਧਿ ਨਿਟ੍ਠਿਤਾ.

ਪਠਮਭਾਣਵਾਰੋ ਨਿਟ੍ਠਿਤੋ.

੧੨੮. ਅਨਾਪਤ੍ਤਿਪਨ੍ਨਰਸਕਂ

੨੨੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਿਂਸੁ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਿਂਸੁ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਸੁਂ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਿਂਸੁ ਬਹੁਤਰਾ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਅਵਸੇਸੇਹਿ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਅਵਸੇਸੇਹਿ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਸਮਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਅਨਾਪਤ੍ਤਿ.

ਅਨਾਪਤ੍ਤਿਪਨ੍ਨਰਸਕਂ ਨਿਟ੍ਠਿਤਂ.

੧੨੯. ਵਗ੍ਗਾਵਗ੍ਗਸਞ੍ਞੀਪਨ੍ਨਰਸਕਂ

੨੨੩. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਵਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਵਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਅਵਸੇਸੇਹਿ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਵਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਅਵਸੇਸੇਹਿ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ਧਮ੍ਮਸਞ੍ਞਿਨੋ ਵਿਨਯਸਞ੍ਞਿਨੋ ਵਗ੍ਗਾ ਵਗ੍ਗਸਞ੍ਞਿਨੋ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ,…ਪੇ… ਅਵੁਟ੍ਠਿਤਾਯ ਪਰਿਸਾਯ…ਪੇ… ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ…ਪੇ… ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ…ਪੇ… ਸਮਸਮਾ…ਪੇ… ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਵਗ੍ਗਾਵਗ੍ਗਸਞ੍ਞੀਪਨ੍ਨਰਸਕਂ ਨਿਟ੍ਠਿਤਂ.

੧੩੦. ਵੇਮਤਿਕਪਨ੍ਨਰਸਕਂ

੨੨੪. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤਿ ਨੁ ਖੋ ਅਮ੍ਹਾਕਂ ਪਵਾਰੇਤੁਂ, ਨ ਨੁ ਖੋ ਕਪ੍ਪਤੀ’’ਤਿ ਵੇਮਤਿਕਾ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤਿ ਨੁ ਖੋ ਅਮ੍ਹਾਕਂ ਪਵਾਰੇਤੁਂ, ਨ ਨੁ ਖੋ ਕਪ੍ਪਤੀ’’ਤਿ ਵੇਮਤਿਕਾ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਅਵਸੇਸੇਹਿ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤਿ ਨੁ ਖੋ ਅਮ੍ਹਾਕਂ ਪਵਾਰੇਤੁਂ, ਨ ਨੁ ਖੋ ਕਪ੍ਪਤੀ’’ਤਿ ਵੇਮਤਿਕਾ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਅਵਸੇਸੇਹਿ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤਿ ਨੁ ਖੋ ਅਮ੍ਹਾਕਂ ਪਵਾਰੇਤੁਂ, ਨ ਨੁ ਖੋ ਕਪ੍ਪਤੀ’’ਤਿ ਵੇਮਤਿਕਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ…ਪੇ… ਅਵੁਟ੍ਠਿਤਾਯ ਪਰਿਸਾਯ…ਪੇ… ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ…ਪੇ… ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ…ਪੇ… ਸਮਸਮਾ…ਪੇ… ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਵੇਮਤਿਕਪਨ੍ਨਰਸਕਂ ਨਿਟ੍ਠਿਤਂ.

੧੩੧. ਕੁਕ੍ਕੁਚ੍ਚਪਕਤਪਨ੍ਨਰਸਕਂ

੨੨੫. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤੇਵ ਅਮ੍ਹਾਕਂ ਪਵਾਰੇਤੁਂ, ਨਾਮ੍ਹਾਕਂ ਨ ਕਪ੍ਪਤੀ’’ਤਿ ਕੁਕ੍ਕੁਚ੍ਚਪਕਤਾ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤੇਵ ਅਮ੍ਹਾਕਂ ਪਵਾਰੇਤੁਂ, ਨਾਮ੍ਹਾਕਂ ਨ ਕਪ੍ਪਤੀ’’ਤਿ ਕੁਕ੍ਕੁਚ੍ਚਪਕਤਾ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਅਵਸੇਸੇਹਿ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤੇਵ ਅਮ੍ਹਾਕਂ ਪਵਾਰੇਤੁਂ, ਨਾਮ੍ਹਾਕਂ ਨ ਕਪ੍ਪਤੀ’’ਤਿ ਕੁਕ੍ਕੁਚ੍ਚਪਕਤਾ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਅਵਸੇਸੇਹਿ [ਅਵਸੇਸੇਹਿ ਤੇਸਂ ਸਨ੍ਤਿਕੇ (ਕ.)] ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਕਪ੍ਪਤੇਵ ਅਮ੍ਹਾਕਂ ਪਵਾਰੇਤੁਂ, ਨਾਮ੍ਹਾਕਂ ਨ ਕਪ੍ਪਤੀ’’ਤਿ ਕੁਕ੍ਕੁਚ੍ਚਪਕਤਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ,…ਪੇ… ਅਵੁਟ੍ਠਿਤਾਯ ਪਰਿਸਾਯ…ਪੇ… ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ…ਪੇ… ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ…ਪੇ… ਸਮਸਮਾ…ਪੇ… ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਦੁਕ੍ਕਟਸ੍ਸ.

ਕੁਕ੍ਕੁਚ੍ਚਪਕਤਪਨ੍ਨਰਸਕਂ ਨਿਟ੍ਠਿਤਂ.

੧੩੨. ਭੇਦਪੁਰੇਕ੍ਖਾਰਪਨ੍ਨਰਸਕਂ

੨੨੬. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਅਵਸੇਸੇਹਿ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਯਮਾਨੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਅਵਸੇਸੇਹਿ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ, ਤੇਹਿ ਭਿਕ੍ਖਵੇ ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ, ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਅਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਏਕਚ੍ਚਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਬਹੁਤਰਾ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਸਮਸਮਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ

ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਜਾਨਨ੍ਤਿ ‘‘ਅਤ੍ਥਞ੍ਞੇ ਆਵਾਸਿਕਾ ਭਿਕ੍ਖੂ ਅਨਾਗਤਾ’’ਤਿ. ਤੇ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਤੇਹਿ ਪਵਾਰਿਤਮਤ੍ਤੇ, ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ, ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤਿ ਥੋਕਤਰਾ. ਪਵਾਰਿਤਾ ਸੁਪ੍ਪਵਾਰਿਤਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ. ਪਵਾਰਿਤਾਨਂ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਭੇਦਪੁਰੇਕ੍ਖਾਰਪਨ੍ਨਰਸਕਂ ਨਿਟ੍ਠਿਤਂ.

ਪਞ੍ਚਵੀਸਤ੍ਤਿਕਾ ਨਿਟ੍ਠਿਤਾ.

੧੩੩. ਸੀਮੋਤ੍ਤਨ੍ਤਿਕਪੇਯ੍ਯਾਲਂ

੨੨੭. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਮ੍ਬਹੁਲਾ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ, ਪਞ੍ਚ ਵਾ ਅਤਿਰੇਕਾ ਵਾ. ਤੇ ਨ ਜਾਨਨ੍ਤਿ ‘‘ਅਞ੍ਞੇ ਆਵਾਸਿਕਾ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਮਨ੍ਤੀ’’ਤਿ…ਪੇ… ਤੇ ਨ ਜਾਨਨ੍ਤਿ ‘‘ਅਞ੍ਞੇ ਆਵਾਸਿਕਾ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਨ੍ਤਾ’’ਤਿ…ਪੇ… ਤੇ ਨ ਪਸ੍ਸਨ੍ਤਿ ਅਞ੍ਞੇ ਆਵਾਸਿਕੇ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਮਨ੍ਤੇ…ਪੇ… ਤੇ ਨ ਪਸ੍ਸਨ੍ਤਿ ਅਞ੍ਞੇ ਆਵਾਸਿਕੇ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਨ੍ਤੇ…ਪੇ… ਤੇ ਨ ਸੁਣਨ੍ਤਿ ‘‘ਅਞ੍ਞੇ ਆਵਾਸਿਕਾ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਮਨ੍ਤੀ’’ਤਿ…ਪੇ… ਤੇ ਨ ਸੁਣਨ੍ਤਿ ‘‘ਅਞ੍ਞੇ ਆਵਾਸਿਕਾ ਭਿਕ੍ਖੂ ਅਨ੍ਤੋਸੀਮਂ ਓਕ੍ਕਨ੍ਤਾ’’ਤਿ…ਪੇ….

ਆਵਾਸਿਕੇਨ ਆਵਾਸਿਕਾ ਏਕਸਤਪਞ੍ਚਸਤ੍ਤਤਿ ਤਿਕਨਯਤੋ, ਆਵਾਸਿਕੇਨ ਆਗਨ੍ਤੁਕਾ, ਆਗਨ੍ਤੁਕੇਨ ਆਵਾਸਿਕਾ, ਆਗਨ੍ਤੁਕੇਨ ਆਗਨ੍ਤੁਕਾ, ਪੇਯ੍ਯਾਲਮੁਖੇਨ ਸਤ੍ਤ ਤਿਕਸਤਾਨਿ ਹੋਨ੍ਤਿ.

ਸੀਮੋਕ੍ਕਨ੍ਤਿਕਪੇਯ੍ਯਾਲਂ ਨਿਟ੍ਠਿਤਂ.

੧੩੪. ਦਿਵਸਨਾਨਤ੍ਤਂ

੨੨੮. ਇਧ ਪਨ, ਭਿਕ੍ਖਵੇ, ਆਵਾਸਿਕਾਨਂ ਭਿਕ੍ਖੂਨਂ ਚਾਤੁਦ੍ਦਸੋ ਹੋਤਿ, ਆਗਨ੍ਤੁਕਾਨਂ ਪਨ੍ਨਰਸੋ. ਸਚੇ ਆਵਾਸਿਕਾ ਬਹੁਤਰਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬਂ. ਸਚੇ ਸਮਸਮਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬਂ. ਸਚੇ ਆਗਨ੍ਤੁਕਾ ਬਹੁਤਰਾ ਹੋਨ੍ਤਿ, ਆਵਾਸਿਕੇਹਿ ਆਗਨ੍ਤੁਕਾਨਂ ਅਨੁਵਤ੍ਤਿਤਬ੍ਬਂ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾਨਂ ਭਿਕ੍ਖੂਨਂ ਪਨ੍ਨਰਸੋ ਹੋਤਿ, ਆਗਨ੍ਤੁਕਾਨਂ ਚਾਤੁਦ੍ਦਸੋ. ਸਚੇ ਆਵਾਸਿਕਾ ਬਹੁਤਰਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬਂ. ਸਚੇ ਸਮਸਮਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬਂ. ਸਚੇ ਆਗਨ੍ਤੁਕਾ ਬਹੁਤਰਾ ਹੋਨ੍ਤਿ, ਆਵਾਸਿਕੇਹਿ ਆਗਨ੍ਤੁਕਾਨਂ ਅਨੁਵਤ੍ਤਿਤਬ੍ਬਂ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾਨਂ ਭਿਕ੍ਖੂਨਂ ਪਾਟਿਪਦੋ ਹੋਤਿ, ਆਗਨ੍ਤੁਕਾਨਂ ਪਨ੍ਨਰਸੋ. ਸਚੇ ਆਵਾਸਿਕਾ ਬਹੁਤਰਾ ਹੋਨ੍ਤਿ, ਆਵਾਸਿਕੇਹਿ ਆਗਨ੍ਤੁਕਾਨਂ ਨਾਕਾਮਾ ਦਾਤਬ੍ਬਾ ਸਾਮਗ੍ਗੀ; ਆਗਨ੍ਤੁਕੇਹਿ ਨਿਸ੍ਸੀਮਂ ਗਨ੍ਤ੍ਵਾ ਪਵਾਰੇਤਬ੍ਬਂ. ਸਚੇ ਸਮਸਮਾ ਹੋਨ੍ਤਿ, ਆਵਾਸਿਕੇਹਿ ਆਗਨ੍ਤੁਕਾਨਂ ਨਾਕਾਮਾ ਦਾਤਬ੍ਬਾ ਸਾਮਗ੍ਗੀ; ਆਗਨ੍ਤੁਕੇਹਿ ਨਿਸ੍ਸੀਮਂ ਗਨ੍ਤ੍ਵਾ ਪਵਾਰੇਤਬ੍ਬਂ. ਸਚੇ ਆਗਨ੍ਤੁਕਾ ਬਹੁਤਰਾ ਹੋਨ੍ਤਿ, ਆਵਾਸਿਕੇਹਿ ਆਗਨ੍ਤੁਕਾਨਂ ਸਾਮਗ੍ਗੀ ਵਾ ਦਾਤਬ੍ਬਾ, ਨਿਸ੍ਸੀਮਂ ਵਾ ਗਨ੍ਤਬ੍ਬਂ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾਨਂ ਭਿਕ੍ਖੂਨਂ ਪਨ੍ਨਰਸੋ ਹੋਤਿ, ਆਗਨ੍ਤੁਕਾਨਂ ਪਾਟਿਪਦੋ. ਸਚੇ ਆਵਾਸਿਕਾ ਬਹੁਤਰਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਸਾਮਗ੍ਗੀ ਵਾ ਦਾਤਬ੍ਬਾ, ਨਿਸ੍ਸੀਮਂ ਵਾ ਗਨ੍ਤਬ੍ਬਂ. ਸਚੇ ਸਮਸਮਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਸਾਮਗ੍ਗੀ ਵਾ ਦਾਤਬ੍ਬਾ, ਨਿਸ੍ਸੀਮਂ ਵਾ ਗਨ੍ਤਬ੍ਬਂ. ਸਚੇ ਆਗਨ੍ਤੁਕਾ ਬਹੁਤਰਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਨਾਕਾਮਾ ਦਾਤਬ੍ਬਾ ਸਾਮਗ੍ਗੀ; ਆਵਾਸਿਕੇਹਿ ਨਿਸ੍ਸੀਮਂ ਗਨ੍ਤ੍ਵਾ ਪਵਾਰੇਤਬ੍ਬਂ.

ਦਿਵਸਨਾਨਤ੍ਤਂ ਨਿਟ੍ਠਿਤਂ.

੧੩੫. ਲਿਙ੍ਗਾਦਿਦਸ੍ਸਨਂ

੨੨੯. ਇਧ ਪਨ, ਭਿਕ੍ਖਵੇ, ਆਗਨ੍ਤੁਕਾ ਭਿਕ੍ਖੂ ਪਸ੍ਸਨ੍ਤਿ ਆਵਾਸਿਕਾਨਂ ਭਿਕ੍ਖੂਨਂ ਆਵਾਸਿਕਾਕਾਰਂ, ਆਵਾਸਿਕਲਿਙ੍ਗਂ, ਆਵਾਸਿਕਨਿਮਿਤ੍ਤਂ, ਆਵਾਸਿਕੁਦ੍ਦੇਸਂ, ਸੁਪ੍ਪਞ੍ਞਤ੍ਤਂ ਮਞ੍ਚਪੀਠਂ ਭਿਸਿਬਿਬ੍ਬੋਹਨਂ, ਪਾਨੀਯਂ ਪਰਿਭੋਜਨੀਯਂ ਸਪਟ੍ਠਿਤਂ, ਪਰਿਵੇਣਂ ਸੁਸਮ੍ਮਟ੍ਠਂ; ਪਸ੍ਸਿਤ੍ਵਾ ਵੇਮਤਿਕਾ ਹੋਨ੍ਤਿ – ‘‘ਅਤ੍ਥਿ ਨੁ ਖੋ ਆਵਾਸਿਕਾ ਭਿਕ੍ਖੂ, ਨਤ੍ਥਿ ਨੁ ਖੋ’’ਤਿ. ਤੇ ਵੇਮਤਿਕਾ ਨ ਵਿਚਿਨਨ੍ਤਿ, ਅਵਿਚਿਨਿਤ੍ਵਾ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਨ ਪਸ੍ਸਨ੍ਤਿ, ਅਪਸ੍ਸਿਤ੍ਵਾ ਪਵਾਰੇਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ ਏਕਤੋ ਪਵਾਰੇਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ ਪਾਟੇਕ੍ਕਂ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ – ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ – ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਆਗਨ੍ਤੁਕਾ ਭਿਕ੍ਖੂ ਸੁਣਨ੍ਤਿ ਆਵਾਸਿਕਾਨਂ ਭਿਕ੍ਖੂਨਂ ਆਵਾਸਿਕਾਕਾਰਂ, ਆਵਾਸਿਕਲਿਙ੍ਗਂ, ਆਵਾਸਿਕਨਿਮਿਤ੍ਤਂ, ਆਵਾਸਿਕੁਦ੍ਦੇਸਂ, ਚਙ੍ਕਮਨ੍ਤਾਨਂ ਪਦਸਦ੍ਦਂ, ਸਜ੍ਝਾਯਸਦ੍ਦਂ, ਉਕ੍ਕਾਸਿਤਸਦ੍ਦਂ, ਖਿਪਿਤਸਦ੍ਦਂ; ਸੁਤ੍ਵਾ ਵੇਮਤਿਕਾ ਹੋਨ੍ਤਿ – ‘‘ਅਤ੍ਥਿ ਨੁ ਖੋ ਆਵਾਸਿਕਾ ਭਿਕ੍ਖੂ, ਨਤ੍ਥਿ ਨੁ ਖੋ’’ਤਿ. ਤੇ ਵੇਮਤਿਕਾ ਨ ਵਿਚਿਨਨ੍ਤਿ, ਅਵਿਚਿਨਿਤ੍ਵਾ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਨ ਪਸ੍ਸਨ੍ਤਿ, ਅਪਸ੍ਸਿਤ੍ਵਾ ਪਵਾਰੇਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ ਏਕਤੋ ਪਵਾਰੇਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ ਪਾਟੇਕ੍ਕਂ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾ ਭਿਕ੍ਖੂ ਪਸ੍ਸਨ੍ਤਿ ਆਗਨ੍ਤੁਕਾਨਂ ਭਿਕ੍ਖੂਨਂ ਆਗਨ੍ਤੁਕਾਕਾਰਂ, ਆਗਨ੍ਤੁਕਲਿਙ੍ਗਂ, ਆਗਨ੍ਤੁਕਨਿਮਿਤ੍ਤਂ, ਆਗਨ੍ਤੁਕੁਦ੍ਦੇਸਂ, ਅਞ੍ਞਾਤਕਂ ਪਤ੍ਤਂ, ਅਞ੍ਞਾਤਕਂ ਚੀਵਰਂ, ਅਞ੍ਞਾਤਕਂ ਨਿਸੀਦਨਂ, ਪਾਦਾਨਂ ਧੋਤਂ, ਉਦਕਨਿਸ੍ਸੇਕਂ; ਪਸ੍ਸਿਤ੍ਵਾ ਵੇਮਤਿਕਾ ਹੋਨ੍ਤਿ – ‘‘ਅਤ੍ਥਿ ਨੁ ਖੋ ਆਗਨ੍ਤੁਕਾ ਭਿਕ੍ਖੂ, ਨਤ੍ਥਿ ਨੁ ਖੋ’’ਤਿ. ਤੇ ਵੇਮਤਿਕਾ ਨ ਵਿਚਿਨਨ੍ਤਿ, ਅਵਿਚਿਨਿਤ੍ਵਾ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਨ ਪਸ੍ਸਨ੍ਤਿ, ਅਪਸ੍ਸਿਤ੍ਵਾ ਪਵਾਰੇਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ ਏਕਤੋ ਪਵਾਰੇਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ ਪਾਟੇਕ੍ਕਂ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ – ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋਤਿ – ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾ ਭਿਕ੍ਖੂ ਸੁਣਨ੍ਤਿ ਆਗਨ੍ਤੁਕਾਨਂ ਭਿਕ੍ਖੂਨਂ ਆਗਨ੍ਤੁਕਾਕਾਰਂ,

ਆਗਨ੍ਤੁਕਲਿਙ੍ਗਂ, ਆਗਨ੍ਤੁਕਨਿਮਿਤ੍ਤਂ, ਆਗਨ੍ਤੁਕੁਦ੍ਦੇਸਂ, ਆਗਚ੍ਛਨ੍ਤਾਨਂ ਪਦਸਦ੍ਦਂ, ਉਪਾਹਨਪਪ੍ਫੋਟਨਸਦ੍ਦਂ, ਉਕ੍ਕਾਸਿਤਸਦ੍ਦਂ, ਖਿਪਿਤਸਦ੍ਦਂ; ਸੁਤ੍ਵਾ ਵੇਮਤਿਕਾ ਹੋਨ੍ਤਿ – ‘‘ਅਤ੍ਥਿ ਨੁ ਖੋ ਆਗਨ੍ਤੁਕਾ ਭਿਕ੍ਖੂ, ਨਤ੍ਥਿ ਨੁ ਖੋ’’ਤਿ. ਤੇ ਵੇਮਤਿਕਾ ਨ ਵਿਚਿਨਨ੍ਤਿ, ਅਵਿਚਿਨਿਤ੍ਵਾ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਨ ਪਸ੍ਸਨ੍ਤਿ, ਅਪਸ੍ਸਿਤ੍ਵਾ ਪਵਾਰੇਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ ਏਕਤੋ ਪਵਾਰੇਨ੍ਤਿ. ਅਨਾਪਤ੍ਤਿ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ ਪਾਟੇਕ੍ਕਂ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਵੇਮਤਿਕਾ ਵਿਚਿਨਨ੍ਤਿ, ਵਿਚਿਨਿਤ੍ਵਾ ਪਸ੍ਸਨ੍ਤਿ, ਪਸ੍ਸਿਤ੍ਵਾ – ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋਤਿ – ਭੇਦਪੁਰੇਕ੍ਖਾਰਾ ਪਵਾਰੇਨ੍ਤਿ. ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਲਿਙ੍ਗਾਦਿਦਸ੍ਸਨਂ ਨਿਟ੍ਠਿਤਂ.

੧੩੬. ਨਾਨਾਸਂਵਾਸਕਾਦੀਹਿ ਪਵਾਰਣਾ

੨੩੦. ਇਧ ਪਨ, ਭਿਕ੍ਖਵੇ, ਆਗਨ੍ਤੁਕਾ ਭਿਕ੍ਖੂ ਪਸ੍ਸਨ੍ਤਿ ਆਵਾਸਿਕੇ ਭਿਕ੍ਖੂ ਨਾਨਾਸਂਵਾਸਕੇ. ਤੇ ਸਮਾਨਸਂਵਾਸਕਦਿਟ੍ਠਿਂ ਪਟਿਲਭਨ੍ਤਿ, ਸਮਾਨਸਂਵਾਸਕਦਿਟ੍ਠਿਂ ਪਟਿਲਭਿਤ੍ਵਾ ਨ ਪੁਚ੍ਛਨ੍ਤਿ, ਅਪੁਚ੍ਛਿਤ੍ਵਾ ਏਕਤੋ ਪਵਾਰੇਨ੍ਤਿ. ਅਨਾਪਤ੍ਤਿ. ਤੇ ਪੁਚ੍ਛਨ੍ਤਿ, ਪੁਚ੍ਛਿਤ੍ਵਾ ਨਾਭਿਵਿਤਰਨ੍ਤਿ, ਅਨਭਿਵਿਤਰਿਤ੍ਵਾ ਏਕਤੋ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ, ਪੁਚ੍ਛਿਤ੍ਵਾ ਨਾਭਿਵਿਤਰਨ੍ਤਿ, ਅਨਭਿਵਿਤਰਿਤ੍ਵਾ ਪਾਟੇਕ੍ਕਂ ਪਵਾਰੇਨ੍ਤਿ. ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਆਗਨ੍ਤੁਕਾ ਭਿਕ੍ਖੂ ਪਸ੍ਸਨ੍ਤਿ ਆਵਾਸਿਕੇ ਭਿਕ੍ਖੂ ਸਮਾਨਸਂਵਾਸਕੇ. ਤੇ ਨਾਨਾਸਂਵਾਸਕਦਿਟ੍ਠਿਂ ਪਟਿਲਭਨ੍ਤਿ, ਨਾਨਾਸਂਵਾਸਕਦਿਟ੍ਠਿਂ ਪਟਿਲਭਿਤ੍ਵਾ ਨ ਪੁਚ੍ਛਨ੍ਤਿ, ਅਪੁਚ੍ਛਿਤ੍ਵਾ ਏਕਤੋ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ, ਪੁਚ੍ਛਿਤ੍ਵਾ ਅਭਿਵਿਤਰਨ੍ਤਿ, ਅਭਿਵਿਤਰਿਤ੍ਵਾ ਪਾਟੇਕ੍ਕਂ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ, ਪੁਚ੍ਛਿਤ੍ਵਾ ਅਭਿਵਿਤਰਨ੍ਤਿ, ਅਭਿਵਿਤਰਿਤ੍ਵਾ ਏਕਤੋ ਪਵਾਰੇਨ੍ਤਿ. ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾ ਭਿਕ੍ਖੂ ਪਸ੍ਸਨ੍ਤਿ ਆਗਨ੍ਤੁਕੇ ਭਿਕ੍ਖੂ ਨਾਨਾਸਂਵਾਸਕੇ. ਤੇ ਸਮਾਨਸਂਵਾਸਕਦਿਟ੍ਠਿਂ ਪਟਿਲਭਨ੍ਤਿ, ਸਮਾਨਸਂਵਾਸਕਦਿਟ੍ਠਿਂ ਪਟਿਲਭਿਤ੍ਵਾ ਨ ਪੁਚ੍ਛਨ੍ਤਿ, ਅਪੁਚ੍ਛਿਤ੍ਵਾ ਏਕਤੋ ਪਵਾਰੇਨ੍ਤਿ. ਅਨਾਪਤ੍ਤਿ. ਤੇ ਪੁਚ੍ਛਨ੍ਤਿ, ਪੁਚ੍ਛਿਤ੍ਵਾ ਨਾਭਿਵਿਤਰਨ੍ਤਿ, ਅਨਭਿਵਿਤਰਿਤ੍ਵਾ ਏਕਤੋ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ, ਪੁਚ੍ਛਿਤ੍ਵਾ ਨਾਭਿਵਿਤਰਨ੍ਤਿ, ਅਨਭਿਵਿਤਰਿਤ੍ਵਾ ਪਾਟੇਕ੍ਕਂ ਪਵਾਰੇਨ੍ਤਿ. ਅਨਾਪਤ੍ਤਿ.

ਇਧ ਪਨ, ਭਿਕ੍ਖਵੇ, ਆਵਾਸਿਕਾ ਭਿਕ੍ਖੂ ਪਸ੍ਸਨ੍ਤਿ ਆਗਨ੍ਤੁਕੇ ਭਿਕ੍ਖੂ ਸਮਾਨਸਂਵਾਸਕੇ. ਤੇ ਨਾਨਾਸਂਵਾਸਕਦਿਟ੍ਠਿਂ ਪਟਿਲਭਨ੍ਤਿ, ਨਾਨਾਸਂਵਾਸਕਦਿਟ੍ਠਿਂ ਪਟਿਲਭਿਤ੍ਵਾ ਨ ਪੁਚ੍ਛਨ੍ਤਿ, ਅਪੁਚ੍ਛਿਤ੍ਵਾ ਏਕਤੋ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ, ਪੁਚ੍ਛਿਤ੍ਵਾ ਅਭਿਵਿਤਰਨ੍ਤਿ, ਅਭਿਵਿਤਰਿਤ੍ਵਾ ਪਾਟੇਕ੍ਕਂ ਪਵਾਰੇਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸ. ਤੇ ਪੁਚ੍ਛਨ੍ਤਿ, ਪੁਚ੍ਛਿਤ੍ਵਾ ਅਭਿਵਿਤਰਨ੍ਤਿ, ਅਭਿਵਿਤਰਿਤ੍ਵਾ ਏਕਤੋ ਪਵਾਰੇਨ੍ਤਿ. ਅਨਾਪਤ੍ਤਿ.

ਨਾਨਾਸਂਵਾਸਕਾਦੀਹਿ ਪਵਾਰਣਾ ਨਿਟ੍ਠਿਤਾ.

੧੩੭. ਨ ਗਨ੍ਤਬ੍ਬਵਾਰੋ

੨੩੧. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ.

ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਅਨਾਵਾਸਾ ਅਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਅਨਾਵਾਸਾ ਅਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਅਨਾਵਾਸਾ ਅਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ.

ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ.

ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ.

ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ.

ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ

ਵਾ ਸਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ, ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ, ਅਞ੍ਞਤ੍ਰ ਸਙ੍ਘੇਨ, ਅਞ੍ਞਤ੍ਰ ਅਨ੍ਤਰਾਯਾ.

ਨ ਗਨ੍ਤਬ੍ਬਵਾਰੋ ਨਿਟ੍ਠਿਤੋ.

੧੩੮. ਗਨ੍ਤਬ੍ਬਵਾਰੋ

੨੩੨. ਗਨ੍ਤਬ੍ਬੋ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਆਵਾਸੋ, ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ, ਯਂ ਜਞ੍ਞਾ ‘‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’’ਨ੍ਤਿ. ਗਨ੍ਤਬ੍ਬੋ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਅਨਾਵਾਸੋ…ਪੇ… ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ, ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ, ਯਂ ਜਞ੍ਞਾ ‘‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’’ਨ੍ਤਿ.

ਗਨ੍ਤਬ੍ਬੋ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਆਵਾਸੋ…ਪੇ… ਸਭਿਕ੍ਖੁਕੋ ਅਨਾਵਾਸੋ…ਪੇ… ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ, ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ, ਯਂ ਜਞ੍ਞਾ ‘‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’’ਨ੍ਤਿ.

ਗਨ੍ਤਬ੍ਬੋ, ਭਿਕ੍ਖਵੇ, ਤਦਹੁ ਪਵਾਰਣਾਯ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ

ਆਵਾਸੋ…ਪੇ… ਸਭਿਕ੍ਖੁਕੋ ਅਨਾਵਾਸੋ…ਪੇ… ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ, ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ, ਯਂ ਜਞ੍ਞਾ ‘‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’’ਨ੍ਤਿ.

ਗਨ੍ਤਬ੍ਬਵਾਰੋ ਨਿਟ੍ਠਿਤੋ.

੧੩੯. ਵਜ੍ਜਨੀਯਪੁਗ੍ਗਲਸਨ੍ਦਸ੍ਸਨਾ

੨੩੩. ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਨਿਸਿਨ੍ਨਪਰਿਸਾਯ ਪਵਾਰੇਤਬ੍ਬਂ. ਯੋ ਪਵਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ, ਭਿਕ੍ਖਵੇ, ਸਿਕ੍ਖਮਾਨਾਯ…ਪੇ… ਨ ਸਾਮਣੇਰਸ੍ਸ…ਪੇ… ਨ ਸਾਮਣੇਰਿਯਾ…ਪੇ… ਨ ਸਿਕ੍ਖਂ ਪਚ੍ਚਕ੍ਖਾਤਕਸ੍ਸ…ਪੇ… ਨ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕਸ੍ਸ ਨਿਸਿਨ੍ਨਪਰਿਸਾਯ ਪਵਾਰੇਤਬ੍ਬਂ. ਯੋ ਪਵਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

ਨ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕਸ੍ਸ ਨਿਸਿਨ੍ਨਪਰਿਸਾਯ ਪਵਾਰੇਤਬ੍ਬਂ. ਯੋ ਪਵਾਰੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ. ਨ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕਸ੍ਸ…ਪੇ… ਨ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕਸ੍ਸ ਨਿਸਿਨ੍ਨਪਰਿਸਾਯ ਪਵਾਰੇਤਬ੍ਬਂ. ਯੋ ਪਵਾਰੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ.

ਨ ਪਣ੍ਡਕਸ੍ਸ ਨਿਸਿਨ੍ਨਪਰਿਸਾਯ ਪਵਾਰੇਤਬ੍ਬਂ. ਯੋ ਪਵਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਥੇਯ੍ਯਸਂਵਾਸਕਸ੍ਸ…ਪੇ… ਨ ਤਿਤ੍ਥਿਯਪਕ੍ਕਨ੍ਤਕਸ੍ਸ…ਪੇ… ਨ ਤਿਰਚ੍ਛਾਨਗਤਸ੍ਸ…ਪੇ… ਨ ਮਾਤੁਘਾਤਕਸ੍ਸ…ਪੇ… ਨ ਪਿਤੁਘਾਤਕਸ੍ਸ…ਪੇ… ਨ ਅਰਹਨ੍ਤਘਾਤਕਸ੍ਸ…ਪੇ… ਨ ਭਿਕ੍ਖੁਨਿਦੂਸਕਸ੍ਸ …ਪੇ… ਨ ਸਙ੍ਘਭੇਦਕਸ੍ਸ…ਪੇ… ਨ ਲੋਹਿਤੁਪ੍ਪਾਦਕਸ੍ਸ …ਪੇ… ਨ ਉਭਤੋਬ੍ਯਞ੍ਜਨਕਸ੍ਸ ਨਿਸਿਨ੍ਨਪਰਿਸਾਯ ਪਵਾਰੇਤਬ੍ਬਂ. ਯੋ ਪਵਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

ਨ, ਭਿਕ੍ਖਵੇ, ਪਾਰਿਵਾਸਿਕਪਵਾਰਣਾਦਾਨੇਨ ਪਵਾਰੇਤਬ੍ਬਂ, ਅਞ੍ਞਤ੍ਰ ਅਵੁਟ੍ਠਿਤਾਯ ਪਰਿਸਾਯ. ਨ ਚ, ਭਿਕ੍ਖਵੇ, ਅਪ੍ਪਵਾਰਣਾਯ ਪਵਾਰੇਤਬ੍ਬਂ, ਅਞ੍ਞਤ੍ਰ ਸਙ੍ਘਸਾਮਗ੍ਗਿਯਾਤਿ.

ਵਜ੍ਜਨੀਯਪੁਗ੍ਗਲਸਨ੍ਦਸ੍ਸਨਾ ਨਿਟ੍ਠਿਤਾ.

ਦੁਤਿਯਭਾਣਵਾਰੋ ਨਿਟ੍ਠਿਤੋ.

੧੪੦. ਦ੍ਵੇਵਾਚਿਕਾਦਿਪਵਾਰਣਾ

੨੩੪. ਤੇਨ ਖੋ ਪਨ ਸਮਯੇਨ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਵਰਭਯਂ ਅਹੋਸਿ. ਭਿਕ੍ਖੂ ਨਾਸਕ੍ਖਿਂਸੁ ਤੇਵਾਚਿਕਂ ਪਵਾਰੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇਵਾਚਿਕਂ ਪਵਾਰੇਤੁਨ੍ਤਿ.

ਬਾਲ਼੍ਹਤਰਂ ਸਵਰਭਯਂ ਅਹੋਸਿ. ਭਿਕ੍ਖੂ ਨਾਸਕ੍ਖਿਂਸੁ ਦ੍ਵੇਵਾਚਿਕਂ ਪਵਾਰੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਏਕਵਾਚਿਕਂ ਪਵਾਰੇਤੁਨ੍ਤਿ.

ਬਾਲ਼੍ਹਤਰਂ ਸਵਰਭਯਂ ਅਹੋਸਿ. ਭਿਕ੍ਖੂ ਨਾਸਕ੍ਖਿਂਸੁ ਏਕਵਾਚਿਕਂ ਪਵਾਰੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਮਾਨਵਸ੍ਸਿਕਂ ਪਵਾਰੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਮਨੁਸ੍ਸੇਹਿ ਦਾਨਂ ਦੇਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ ਹੋਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਮਨੁਸ੍ਸੇਹਿ ਦਾਨਂ ਦੇਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਤ੍ਤਿ ਵਿਭਾਯਿਸ੍ਸਤਿ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਮਨੁਸ੍ਸੇਹਿ ਦਾਨਂ ਦੇਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ ਹੋਤਿ. ਤਤ੍ਰ ਚੇ, ਭਿਕ੍ਖਵੇ, ਭਿਕ੍ਖੂਨਂ ਏਵਂ ਹੋਤਿ – ‘‘ਮਨੁਸ੍ਸੇਹਿ ਦਾਨਂ ਦੇਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਤ੍ਤਿ ਵਿਭਾਯਿਸ੍ਸਤੀ’’ਤਿ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਮਨੁਸ੍ਸੇਹਿ ਦਾਨਂ ਦੇਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਤ੍ਤਿ ਵਿਭਾਯਿਸ੍ਸਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਦ੍ਵੇਵਾਚਿਕਂ, ਏਕਵਾਚਿਕਂ, ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਭਿਕ੍ਖੂਹਿ ਧਮ੍ਮਂ ਭਣਨ੍ਤੇਹਿ…ਪੇ… ਸੁਤ੍ਤਨ੍ਤਿਕੇਹਿ ਸੁਤ੍ਤਨ੍ਤਂ ਸਙ੍ਗਾਯਨ੍ਤੇਹਿ… ਵਿਨਯਧਰੇਹਿ ਵਿਨਯਂ ਵਿਨਿਚ੍ਛਿਨਨ੍ਤੇਹਿ… ਧਮ੍ਮਕਥਿਕੇਹਿ ਧਮ੍ਮਂ ਸਾਕਚ੍ਛਨ੍ਤੇਹਿ… ਭਿਕ੍ਖੂਹਿ ਕਲਹਂ ਕਰੋਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ ਹੋਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਭਿਕ੍ਖੂਹਿ ਕਲਹਂ ਕਰੋਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਤ੍ਤਿ ਵਿਭਾਯਿਸ੍ਸਤੀ’’ਤਿ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਭਿਕ੍ਖੂਹਿ ਕਲਹਂ ਕਰੋਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਤ੍ਤਿ ਵਿਭਾਯਿਸ੍ਸਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਦ੍ਵੇਵਾਚਿਕਂ, ਏਕਵਾਚਿਕਂ, ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ.

ਤੇਨ ਖੋ ਪਨ ਸਮਯੇਨ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ ਹੋਤਿ, ਪਰਿਤ੍ਤਞ੍ਚ ਅਨੋਵਸ੍ਸਿਕਂ [ਅਨੋਵਸ੍ਸਕਂ (ਕ.)] ਹੋਤਿ, ਮਹਾ ਚ ਮੇਘੋ ਉਗ੍ਗਤੋ ਹੋਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਅਯਂ ਖੋ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ, ਪਰਿਤ੍ਤਞ੍ਚ ਅਨੋਵਸ੍ਸਿਕਂ, ਮਹਾ ਚ ਮੇਘੋ ਉਗ੍ਗਤੋ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਮੇਘੋ ਪਵਸ੍ਸਿਸ੍ਸਤਿ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ ਹੋਤਿ, ਪਰਿਤ੍ਤਞ੍ਚ ਅਨੋਵਸ੍ਸਿਕਂ ਹੋਤਿ, ਮਹਾ ਚ ਮੇਘੋ ਉਗ੍ਗਤੋ ਹੋਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ, ਪਰਿਤ੍ਤਞ੍ਚ ਅਨੋਵਸ੍ਸਿਕਂ, ਮਹਾ ਚ ਮੇਘੋ ਉਗ੍ਗਤੋ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਮੇਘੋ ਪਵਸ੍ਸਿਸ੍ਸਤੀ’’ਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ, ਪਰਿਤ੍ਤਞ੍ਚ ਅਨੋਵਸ੍ਸਿਕਂ, ਮਹਾ ਚ ਮੇਘੋ ਉਗ੍ਗਤੋ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਮੇਘੋ ਪਵਸ੍ਸਿਸ੍ਸਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਦ੍ਵੇਵਾਚਿਕਂ, ਏਕਵਾਚਿਕਂ, ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਰਾਜਨ੍ਤਰਾਯੋ ਹੋਤਿ…ਪੇ… ਚੋਰਨ੍ਤਰਾਯੋ ਹੋਤਿ… ਅਗ੍ਯਨ੍ਤਰਾਯੋ ਹੋਤਿ… ਉਦਕਨ੍ਤਰਾਯੋ ਹੋਤਿ… ਮਨੁਸ੍ਸਨ੍ਤਰਾਯੋ ਹੋਤਿ… ਅਮਨੁਸ੍ਸਨ੍ਤਰਾਯੋ ਹੋਤਿ… ਵਾਲ਼ਨ੍ਤਰਾਯੋ ਹੋਤਿ… ਸਰੀਸਪਨ੍ਤਰਾਯੋ ਹੋਤਿ… ਜੀਵਿਤਨ੍ਤਰਾਯੋ ਹੋਤਿ… ਬ੍ਰਹ੍ਮਚਰਿਯਨ੍ਤਰਾਯੋ ਹੋਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਬ੍ਰਹ੍ਮਚਰਿਯਨ੍ਤਰਾਯੋ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਬ੍ਰਹ੍ਮਚਰਿਯਨ੍ਤਰਾਯੋ ਭਵਿਸ੍ਸਤੀ’’ਤਿ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਬ੍ਰਹ੍ਮਚਰਿਯਨ੍ਤਰਾਯੋ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਬ੍ਰਹ੍ਮਚਰਿਯਨ੍ਤਰਾਯੋ ਭਵਿਸ੍ਸਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਦ੍ਵੇਵਾਚਿਕਂ, ਏਕਵਾਚਿਕਂ, ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ.

ਦ੍ਵੇਵਾਚਿਕਾਦਿਪਵਾਰਣਾ ਨਿਟ੍ਠਿਤਾ.

੧੪੧. ਪਵਾਰਣਾਠਪਨਂ

੨੩੫. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਾਪਤ੍ਤਿਕਾ ਪਵਾਰੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਾਪਤ੍ਤਿਕੇਨ ਪਵਾਰੇਤਬ੍ਬਂ. ਯੋ ਪਵਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਯੋ ਸਾਪਤ੍ਤਿਕੋ ਪਵਾਰੇਤਿ, ਤਸ੍ਸ ਓਕਾਸਂ ਕਾਰਾਪੇਤ੍ਵਾ ਆਪਤ੍ਤਿਯਾ ਚੋਦੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਓਕਾਸਂ ਕਾਰਾਪਿਯਮਾਨਾ ਨ ਇਚ੍ਛਨ੍ਤਿ ਓਕਾਸਂ ਕਾਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਓਕਾਸਂ ਅਕਰੋਨ੍ਤਸ੍ਸ ਪਵਾਰਣਂ ਠਪੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਠਪੇਤਬ੍ਬਾ. ਤਦਹੁ ਪਵਾਰਣਾਯ ਚਾਤੁਦ੍ਦਸੇ ਵਾ ਪਨ੍ਨਰਸੇ ਵਾ ਤਸ੍ਮਿਂ ਪੁਗ੍ਗਲੇ ਸਮ੍ਮੁਖੀਭੂਤੇ ਸਙ੍ਘਮਜ੍ਝੇ ਉਦਾਹਰਿਤਬ੍ਬਂ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮੋ ਪੁਗ੍ਗਲੋ ਸਾਪਤ੍ਤਿਕੋ. ਤਸ੍ਸ ਪਵਾਰਣਂ ਠਪੇਮਿ. ਨ ਤਸ੍ਮਿਂ ਸਮ੍ਮੁਖੀਭੂਤੇ ਪਵਾਰੇਤਬ੍ਬ’’ਨ੍ਤਿ. ਠਪਿਤਾ ਹੋਤਿ ਪਵਾਰਣਾਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ – ਪੁਰਮ੍ਹਾਕਂ ਪੇਸਲਾ ਭਿਕ੍ਖੂ ਪਵਾਰਣਂ ਠਪੇਨ੍ਤੀਤਿ – ਪਟਿਕਚ੍ਚੇਵ ਸੁਦ੍ਧਾਨਂ ਭਿਕ੍ਖੂਨਂ ਅਨਾਪਤ੍ਤਿਕਾਨਂ ਅਵਤ੍ਥੁਸ੍ਮਿਂ ਅਕਾਰਣੇ ਪਵਾਰਣਂ ਠਪੇਨ੍ਤਿ, ਪਵਾਰਿਤਾਨਮ੍ਪਿ ਪਵਾਰਣਂ ਠਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸੁਦ੍ਧਾਨਂ ਭਿਕ੍ਖੂਨਂ ਅਨਾਪਤ੍ਤਿਕਾਨਂ ਅਵਤ੍ਥੁਸ੍ਮਿਂ ਅਕਾਰਣੇ ਪਵਾਰਣਾ ਠਪੇਤਬ੍ਬਾ. ਯੋ ਠਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ, ਭਿਕ੍ਖਵੇ, ਪਵਾਰਿਤਾਨਮ੍ਪਿ ਪਵਾਰਣਾ ਠਪੇਤਬ੍ਬਾ. ਯੋ ਠਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

੨੩੬. ਏਵਂ ਖੋ, ਭਿਕ੍ਖਵੇ, ਠਪਿਤਾ ਹੋਤਿ ਪਵਾਰਣਾ, ਏਵਂ ਅਟ੍ਠਪਿਤਾ. ਕਥਞ੍ਚ, ਭਿਕ੍ਖਵੇ, ਅਟ੍ਠਪਿਤਾ ਹੋਤਿ ਪਵਾਰਣਾ? ਤੇਵਾਚਿਕਾਯ ਚੇ, ਭਿਕ੍ਖਵੇ, ਪਵਾਰਣਾਯ ਭਾਸਿਤਾਯ ਲਪਿਤਾਯ ਪਰਿਯੋਸਿਤਾਯ ਪਵਾਰਣਂ ਠਪੇਤਿ, ਅਟ੍ਠਪਿਤਾ ਹੋਤਿ ਪਵਾਰਣਾ. ਦ੍ਵੇਵਾਚਿਕਾਯ ਚੇ, ਭਿਕ੍ਖਵੇ,… ਏਕਵਾਚਿਕਾਯ ਚੇ, ਭਿਕ੍ਖਵੇ,… ਸਮਾਨਵਸ੍ਸਿਕਾਯ ਚੇ, ਭਿਕ੍ਖਵੇ, ਪਵਾਰਣਾਯ ਭਾਸਿਤਾਯ ਲਪਿਤਾਯ ਪਰਿਯੋਸਿਤਾਯ ਪਵਾਰਣਂ ਠਪੇਤਿ, ਅਟ੍ਠਪਿਤਾ ਹੋਤਿ ਪਵਾਰਣਾ. ਏਵਂ ਖੋ, ਭਿਕ੍ਖਵੇ, ਅਟ੍ਠਪਿਤਾ ਹੋਤਿ ਪਵਾਰਣਾ.

ਕਥਞ੍ਚ, ਭਿਕ੍ਖਵੇ, ਠਪਿਤਾ ਹੋਤਿ ਪਵਾਰਣਾ? ਤੇਵਾਚਿਕਾਯ, ਚੇ, ਭਿਕ੍ਖਵੇ, ਪਵਾਰਣਾਯ ਭਾਸਿਤਾਯ ਲਪਿਤਾਯ ਅਪਰਿਯੋਸਿਤਾਯ ਪਵਾਰਣਂ ਠਪੇਤਿ, ਠਪਿਤਾ ਹੋਤਿ ਪਵਾਰਣਾ. ਦ੍ਵੇਵਾਚਿਕਾਯ ਚੇ, ਭਿਕ੍ਖਵੇ,… ਏਕਵਾਚਿਕਾਯ ਚੇ, ਭਿਕ੍ਖਵੇ,… ਸਮਾਨਵਸ੍ਸਿਕਾਯ ਚੇ, ਭਿਕ੍ਖਵੇ, ਪਵਾਰਣਾਯ ਭਾਸਿਤਾਯ ਲਪਿਤਾਯ ਅਪਰਿਯੋਸਿਤਾਯ ਪਵਾਰਣਂ ਠਪੇਤਿ, ਠਪਿਤਾ ਹੋਤਿ ਪਵਾਰਣਾ. ਏਵਂ ਖੋ, ਭਿਕ੍ਖਵੇ, ਠਪਿਤਾ ਹੋਤਿ ਪਵਾਰਣਾ.

੨੩੭. ਇਧ ਪਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਭਿਕ੍ਖੁ ਭਿਕ੍ਖੁਸ੍ਸ ਪਵਾਰਣਂ ਠਪੇਤਿ. ਤਂ ਚੇ ਭਿਕ੍ਖੁਂ ਅਞ੍ਞੇ ਭਿਕ੍ਖੂ ਜਾਨਨ੍ਤਿ, ‘‘ਅਯਂ ਖੋ ਆਯਸ੍ਮਾ ਅਪਰਿਸੁਦ੍ਧਕਾਯਸਮਾਚਾਰੋ, ਅਪਰਿਸੁਦ੍ਧਵਚੀਸਮਾਚਾਰੋ, ਅਪਰਿਸੁਦ੍ਧਾਜੀਵੋ, ਬਾਲੋ, ਅਬ੍ਯਤ੍ਤੋ, ਨ ਪਟਿਬਲੋ ਅਨੁਯੁਞ੍ਜੀਯਮਾਨੋ ਅਨੁਯੋਗਂ ਦਾਤੁ’’ਨ੍ਤਿ, ‘ਅਲਂ, ਭਿਕ੍ਖੁ, ਮਾ ਭਣ੍ਡਨਂ, ਮਾ ਕਲਹਂ, ਮਾ ਵਿਗ੍ਗਹਂ, ਮਾ ਵਿਵਾਦ’ਨ੍ਤਿ ਓਮਦ੍ਦਿਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ.

ਇਧ ਪਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਭਿਕ੍ਖੁ ਭਿਕ੍ਖੁਸ੍ਸ ਪਵਾਰਣਂ ਠਪੇਤਿ. ਤਂ ਚੇ ਭਿਕ੍ਖੁਂ ਅਞ੍ਞੇ ਭਿਕ੍ਖੂ ਜਾਨਨ੍ਤਿ, ‘‘ਅਯਂ ਖੋ ਆਯਸ੍ਮਾ ਪਰਿਸੁਦ੍ਧਕਾਯਸਮਾਚਾਰੋ, ਅਪਰਿਸੁਦ੍ਧਵਚੀਸਮਾਚਾਰੋ, ਅਪਰਿਸੁਦ੍ਧਾਜੀਵੋ, ਬਾਲੋ, ਅਬ੍ਯਤ੍ਤੋ, ਨ ਪਟਿਬਲੋ ਅਨੁਯੁਞ੍ਜੀਯਮਾਨੋ ਅਨੁਯੋਗਂ ਦਾਤੁ’’ਨ੍ਤਿ, ‘ਅਲਂ, ਭਿਕ੍ਖੁ, ਮਾ ਭਣ੍ਡਨਂ, ਮਾ ਕਲਹਂ, ਮਾ ਵਿਗ੍ਗਹਂ, ਮਾ ਵਿਵਾਦ’ਨ੍ਤਿ ਓਮਦ੍ਦਿਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ.

ਇਧ ਪਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਭਿਕ੍ਖੁ ਭਿਕ੍ਖੁਸ੍ਸ ਪਵਾਰਣਂ ਠਪੇਤਿ. ਤਂ ਚੇ ਭਿਕ੍ਖੁਂ ਅਞ੍ਞੇ ਭਿਕ੍ਖੂ ਜਾਨਨ੍ਤਿ, ‘‘ਅਯਂ ਖੋ ਆਯਸ੍ਮਾ ਪਰਿਸੁਦ੍ਧਕਾਯਸਮਾਚਾਰੋ, ਪਰਿਸੁਦ੍ਧਵਚੀਸਮਾਚਾਰੋ, ਅਪਰਿਸੁਦ੍ਧਾਜੀਵੋ, ਬਾਲੋ, ਅਬ੍ਯਤ੍ਤੋ, ਨ ਪਟਿਬਲੋ ਅਨੁਯੁਞ੍ਜੀਯਮਾਨੋ ਅਨੁਯੋਗਂ ਦਾਤੁ’’ਨ੍ਤਿ, ‘ਅਲਂ, ਭਿਕ੍ਖੁ, ਮਾ ਭਣ੍ਡਨਂ, ਮਾ ਕਲਹਂ, ਮਾ ਵਿਗ੍ਗਹਂ, ਮਾ ਵਿਵਾਦ’ਨ੍ਤਿ ਓਮਦ੍ਦਿਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ.

ਇਧ ਪਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਭਿਕ੍ਖੁ ਭਿਕ੍ਖੁਸ੍ਸ ਪਵਾਰਣਂ ਠਪੇਤਿ. ਤਂ ਚੇ ਭਿਕ੍ਖੁਂ ਅਞ੍ਞੇ ਭਿਕ੍ਖੂ ਜਾਨਨ੍ਤਿ, ‘‘ਅਯਂ ਖੋ ਆਯਸ੍ਮਾ ਪਰਿਸੁਦ੍ਧਕਾਯਸਮਾਚਾਰੋ, ਪਰਿਸੁਦ੍ਧਵਚੀਸਮਾਚਾਰੋ, ਪਰਿਸੁਦ੍ਧਾਜੀਵੋ, ਬਾਲੋ, ਅਬ੍ਯਤ੍ਤੋ, ਨ ਪਟਿਬਲੋ ਅਨੁਯੁਞ੍ਜੀਯਮਾਨੋ ਅਨੁਯੋਗਂ ਦਾਤੁ’’ਨ੍ਤਿ, ‘ਅਲਂ, ਭਿਕ੍ਖੁ, ਮਾ ਭਣ੍ਡਨਂ, ਮਾ ਕਲਹਂ, ਮਾ ਵਿਗ੍ਗਹਂ, ਮਾ ਵਿਵਾਦ’ਨ੍ਤਿ ਓਮਦ੍ਦਿਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ.

ਇਧ ਪਨ, ਭਿਕ੍ਖਵੇ, ਤਦਹੁ ਪਵਾਰਣਾਯ ਭਿਕ੍ਖੁ ਭਿਕ੍ਖੁਸ੍ਸ ਪਵਾਰਣਂ ਠਪੇਤਿ. ਤਂ ਚੇ ਭਿਕ੍ਖੁਂ ਅਞ੍ਞੇ ਭਿਕ੍ਖੂ ਜਾਨਨ੍ਤਿ, ‘‘ਅਯਂ ਖੋ ਆਯਸ੍ਮਾ ਪਰਿਸੁਦ੍ਧਕਾਯਸਮਾਚਾਰੋ, ਪਰਿਸੁਦ੍ਧਵਚੀਸਮਾਚਾਰੋ, ਪਰਿਸੁਦ੍ਧਾਜੀਵੋ, ਪਣ੍ਡਿਤੋ, ਬ੍ਯਤ੍ਤੋ, ਪਟਿਬਲੋ ਅਨੁਯੁਞ੍ਜੀਯਮਾਨੋ ਅਨੁਯੋਗਂ ਦਾਤੁ’’ਨ੍ਤਿ, ਸੋ ਏਵਮਸ੍ਸ ਵਚਨੀਯੋ, ‘‘ਯਂ ਖੋ ਤ੍ਵਂ, ਆਵੁਸੋ, ਇਮਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਸਿ, ਕਿਮ੍ਹਿ ਨਂ ਠਪੇਸਿ, ਸੀਲਵਿਪਤ੍ਤਿਯਾ ਵਾ ਠਪੇਸਿ, ਆਚਾਰਵਿਪਤ੍ਤਿਯਾ ਵਾ ਠਪੇਸਿ, ਦਿਟ੍ਠਿਵਿਪਤ੍ਤਿਯਾ ਵਾ ਠਪੇਸੀ’’ਤਿ? ਸੋ ਚੇ ਏਵਂ ਵਦੇਯ੍ਯ – ‘‘ਸੀਲਵਿਪਤ੍ਤਿਯਾ ਵਾ ਠਪੇਮਿ, ਆਚਾਰਵਿਪਤ੍ਤਿਯਾ ਵਾ ਠਪੇਮਿ, ਦਿਟ੍ਠਿਵਿਪਤ੍ਤਿਯਾ ਵਾ ਠਪੇਮੀ’’ਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਜਾਨਾਸਿ ਪਨਾਯਸ੍ਮਾ ਸੀਲਵਿਪਤ੍ਤਿਂ, ਜਾਨਾਸਿ ਆਚਾਰਵਿਪਤ੍ਤਿਂ, ਜਾਨਾਸਿ ਦਿਟ੍ਠਿਵਿਪਤ੍ਤਿ’’ਨ੍ਤਿ? ਸੋ ਚੇ ਏਵਂ ਵਦੇਯ੍ਯ – ‘‘ਜਾਨਾਮਿ ਖੋ ਅਹਂ, ਆਵੁਸੋ, ਸੀਲਵਿਪਤ੍ਤਿਂ, ਜਾਨਾਮਿ ਆਚਾਰਵਿਪਤ੍ਤਿਂ, ਜਾਨਾਮਿ ਦਿਟ੍ਠਿਵਿਪਤ੍ਤਿ’’ਨ੍ਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਕਤਮਾ ਪਨਾਵੁਸੋ, ਸੀਲਵਿਪਤ੍ਤਿ, ਕਤਮਾ ਆਚਾਰਵਿਪਤ੍ਤਿ, ਕਤਮਾ ਦਿਟ੍ਠਿਵਿਪਤ੍ਤੀ’’ਤਿ? ਸੋ ਚੇ ਏਵਂ ਵਦੇਯ੍ਯ – ‘‘ਚਤ੍ਤਾਰਿ ਪਾਰਾਜਿਕਾਨਿ, ਤੇਰਸ ਸਙ੍ਘਾਦਿਸੇਸਾ, ਅਯਂ ਸੀਲਵਿਪਤ੍ਤਿ; ਥੁਲ੍ਲਚ੍ਚਯਂ, ਪਾਚਿਤ੍ਤਿਯਂ, ਪਾਟਿਦੇਸਨੀਯਂ, ਦੁਕ੍ਕਟਂ, ਦੁਬ੍ਭਾਸਿਤਂ, ਅਯਂ ਆਚਾਰਵਿਪਤ੍ਤਿ; ਮਿਚ੍ਛਾਦਿਟ੍ਠਿ, ਅਨ੍ਤਗ੍ਗਾਹਿਕਾਦਿਟ੍ਠਿ, ਅਯਂ ਦਿਟ੍ਠਿਵਿਪਤ੍ਤੀ’’ਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਯਂ ਖੋ ਤ੍ਵਂ, ਆਵੁਸੋ, ਇਮਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਸਿ, ਦਿਟ੍ਠੇਨ ਵਾ ਠਪੇਸਿ, ਸੁਤੇਨ ਵਾ ਠਪੇਸਿ, ਪਰਿਸਙ੍ਕਾਯ ਵਾ ਠਪੇਸੀ’’ਤਿ? ਸੋ ਚੇ ਏਵਂ ਵਦੇਯ੍ਯ – ‘‘ਦਿਟ੍ਠੇਨ ਵਾ ਠਪੇਮਿ, ਸੁਤੇਨ ਵਾ ਠਪੇਮਿ, ਪਰਿਸਙ੍ਕਾਯ ਵਾ ਠਪੇਮੀ’’ਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਯਂ ਖੋ ਤ੍ਵਂ, ਆਵੁਸੋ, ਇਮਸ੍ਸ ਭਿਕ੍ਖੁਨੋ ਦਿਟ੍ਠੇਨ ਪਵਾਰਣਂ ਠਪੇਸਿ, ਕਿਂ ਤੇ ਦਿਟ੍ਠਂ, ਕਿਨ੍ਤਿ ਤੇ ਦਿਟ੍ਠਂ, ਕਦਾ ਤੇ ਦਿਟ੍ਠਂ, ਕਤ੍ਥ ਤੇ ਦਿਟ੍ਠਂ, ਪਾਰਾਜਿਕਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ, ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ, ਥੁਲ੍ਲਚ੍ਚਯਂ… ਪਾਚਿਤ੍ਤਿਯਂ… ਪਾਟਿਦੇਸਨੀਯਂ… ਦੁਕ੍ਕਟਂ… ਦੁਬ੍ਭਾਸਿਤਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ, ਕਤ੍ਥ ਚ ਤ੍ਵਂ ਅਹੋਸਿ, ਕਤ੍ਥ ਚਾਯਂ ਭਿਕ੍ਖੁ ਅਹੋਸਿ, ਕਿਞ੍ਚ ਤ੍ਵਂ ਕਰੋਸਿ, ਕਿਞ੍ਚਾਯਂ ਭਿਕ੍ਖੁ ਕਰੋਤੀ’’ਤਿ? ਸੋ ਚੇ ਏਵਂ ਵਦੇਯ੍ਯ – ‘‘ਨ ਖੋ ਅਹਂ, ਆਵੁਸੋ, ਇਮਸ੍ਸ ਭਿਕ੍ਖੁਨੋ ਦਿਟ੍ਠੇਨ ਪਵਾਰਣਂ ਠਪੇਮਿ, ਅਪਿਚ ਸੁਤੇਨ ਪਵਾਰਣਂ ਠਪੇਮੀ’’ਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਯਂ ਖੋ ਤ੍ਵਂ, ਆਵੁਸੋ, ਇਮਸ੍ਸ ਭਿਕ੍ਖੁਨੋ ਸੁਤੇਨ ਪਵਾਰਣਂ ਠਪੇਸਿ, ਕਿਂ ਤੇ ਸੁਤਂ, ਕਿਨ੍ਤਿ ਤੇ ਸੁਤਂ, ਕਦਾ ਤੇ ਸੁਤਂ, ਕਤ੍ਥ ਤੇ ਸੁਤਂ, ਪਾਰਾਜਿਕਂ ਅਜ੍ਝਾਪਨ੍ਨੋਤਿ ਸੁਤਂ, ਸਙ੍ਘਾਦਿਸੇਸਂ ਅਜ੍ਝਾਪਨ੍ਨੋਤਿ ਸੁਤਂ, ਥੁਲ੍ਲਚ੍ਚਯਂ… ਪਾਚਿਤ੍ਤਿਯਂ… ਪਾਟਿਦੇਸਨੀਯਂ… ਦੁਕ੍ਕਟਂ… ਦੁਬ੍ਭਾਸਿਤਂ ਅਜ੍ਝਾਪਨ੍ਨੋਤਿ ਸੁਤਂ, ਭਿਕ੍ਖੁਸ੍ਸ ਸੁਤਂ, ਭਿਕ੍ਖੁਨਿਯਾ ਸੁਤਂ, ਸਿਕ੍ਖਮਾਨਾਯ ਸੁਤਂ, ਸਾਮਣੇਰਸ੍ਸ ਸੁਤਂ, ਸਾਮਣੇਰਿਯਾ ਸੁਤਂ, ਉਪਾਸਕਸ੍ਸ ਸੁਤਂ, ਉਪਾਸਿਕਾਯ ਸੁਤਂ, ਰਾਜੂਨਂ ਸੁਤਂ, ਰਾਜਮਹਾਮਤ੍ਤਾਨਂ ਸੁਤਂ, ਤਿਤ੍ਥਿਯਾਨਂ ਸੁਤਂ, ਤਿਤ੍ਥਿਯਸਾਵਕਾਨਂ ਸੁਤ’’ਨ੍ਤਿ? ਸੋ ਚੇ ਏਵਂ ਵਦੇਯ੍ਯ – ‘‘ਨ ਖੋ ਅਹਂ, ਆਵੁਸੋ, ਇਮਸ੍ਸ ਭਿਕ੍ਖੁਨੋ ਸੁਤੇਨ ਪਵਾਰਣਂ ਠਪੇਮਿ, ਅਪਿਚ ਪਰਿਸਙ੍ਕਾਯ ਪਵਾਰਣਂ ਠਪੇਮੀ’’ਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਯਂ ਖੋ ਤ੍ਵਂ, ਆਵੁਸੋ, ਇਮਸ੍ਸ ਭਿਕ੍ਖੁਨੋ ਪਰਿਸਙ੍ਕਾਯ ਪਵਾਰਣਂ ਠਪੇਸਿ, ਕਿਂ ਪਰਿਸਙ੍ਕਸਿ, ਕਿਨ੍ਤਿ ਪਰਿਸਙ੍ਕਸਿ, ਕਦਾ ਪਰਿਸਙ੍ਕਸਿ, ਕਤ੍ਥ ਪਰਿਸਙ੍ਕਸਿ, ਪਾਰਾਜਿਕਂ ਅਜ੍ਝਾਪਨ੍ਨੋਤਿ ਪਰਿਸਙ੍ਕਸਿ, ਸਙ੍ਘਾਦਿਸੇਸਂ ਅਜ੍ਝਾਪਨ੍ਨੋਤਿ ਪਰਿਸਙ੍ਕਸਿ, ਥੁਲ੍ਲਚ੍ਚਯਂ… ਪਾਚਿਤ੍ਤਿਯਂ… ਪਾਟਿਦੇਸਨੀਯਂ… ਦੁਕ੍ਕਟਂ… ਦੁਬ੍ਭਾਸਿਤਂ ਅਜ੍ਝਾਪਨ੍ਨੋਤਿ ਪਰਿਸਙ੍ਕਸਿ, ਭਿਕ੍ਖੁਸ੍ਸ ਸੁਤ੍ਵਾ ਪਰਿਸਙ੍ਕਸਿ, ਭਿਕ੍ਖੁਨਿਯਾ ਸੁਤ੍ਵਾ ਪਰਿਸਙ੍ਕਸਿ, ਸਿਕ੍ਖਮਾਨਾਯ ਸੁਤ੍ਵਾ ਪਰਿਸਙ੍ਕਸਿ, ਸਾਮਣੇਰਸ੍ਸ ਸੁਤ੍ਵਾ ਪਰਿਸਙ੍ਕਸਿ, ਸਾਮਣੇਰਿਯਾ ਸੁਤ੍ਵਾ ਪਰਿਸਙ੍ਕਸਿ, ਉਪਾਸਕਸ੍ਸ ਸੁਤ੍ਵਾ ਪਰਿਸਙ੍ਕਸਿ, ਉਪਾਸਿਕਾਯ ਸੁਤ੍ਵਾ ਪਰਿਸਙ੍ਕਸਿ, ਰਾਜੂਨਂ ਸੁਤ੍ਵਾ ਪਰਿਸਙ੍ਕਸਿ, ਰਾਜਮਹਾਮਤ੍ਤਾਨਂ ਸੁਤ੍ਵਾ ਪਰਿਸਙ੍ਕਸਿ, ਤਿਤ੍ਥਿਯਾਨਂ ਸੁਤ੍ਵਾ ਪਰਿਸਙ੍ਕਸਿ, ਤਿਤ੍ਥਿਯਸਾਵਕਾਨਂ ਸੁਤ੍ਵਾ ਪਰਿਸਙ੍ਕਸੀ’’ਤਿ? ਸੋ ਚੇ ਏਵਂ ਵਦੇਯ੍ਯ – ‘‘ਨ ਖੋ ਅਹਂ, ਆਵੁਸੋ, ਇਮਸ੍ਸ ਭਿਕ੍ਖੁਨੋ ਪਰਿਸਙ੍ਕਾਯ ਪਵਾਰਣਂ ਠਪੇਮਿ, ਅਪਿ ਚ ਅਹਮ੍ਪਿ ਨ ਜਾਨਾਮਿ ਕੇਨ ਪਨਾਹਂ ਇਮਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਮੀ’’ਤਿ. ਸੋ ਚੇ, ਭਿਕ੍ਖਵੇ, ਚੋਦਕੋ ਭਿਕ੍ਖੁ ਅਨੁਯੋਗੇਨ ਵਿਞ੍ਞੂਨਂ ਸਬ੍ਰਹ੍ਮਚਾਰੀਨਂ ਚਿਤ੍ਤਂ ਨ ਆਰਾਧੇਤਿ, ਅਨਨੁਵਾਦੋ ਚੁਦਿਤੋ ਭਿਕ੍ਖੂਤਿ ਅਲਂ ਵਚਨਾਯ. ਸੋ ਚੇ, ਭਿਕ੍ਖਵੇ, ਚੋਦਕੋ ਭਿਕ੍ਖੁ ਅਨੁਯੋਗੇਨ ਵਿਞ੍ਞੂਨਂ ਸਬ੍ਰਹ੍ਮਚਾਰੀਨਂ ਚਿਤ੍ਤਂ ਆਰਾਧੇਤਿ, ਸਾਨੁਵਾਦੋ ਚੁਦਿਤੋ ਭਿਕ੍ਖੂਤਿ ਅਲਂ ਵਚਨਾਯ. ਸੋ ਚੇ, ਭਿਕ੍ਖਵੇ, ਚੋਦਕੋ ਭਿਕ੍ਖੁ ਅਮੂਲਕੇਨ ਪਾਰਾਜਿਕੇਨ ਅਨੁਦ੍ਧਂਸਿਤਂ ਪਟਿਜਾਨਾਤਿ, ਸਙ੍ਘਾਦਿਸੇਸਂ ਆਰੋਪੇਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ. ਸੋ ਚੇ, ਭਿਕ੍ਖਵੇ, ਚੋਦਕੋ ਭਿਕ੍ਖੁ ਅਮੂਲਕੇਨ ਸਙ੍ਘਾਦਿਸੇਸੇਨ ਅਨੁਦ੍ਧਂਸਿਤਂ ਪਟਿਜਾਨਾਤਿ, ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ. ਸੋ ਚੇ, ਭਿਕ੍ਖਵੇ, ਚੋਦਕੋ, ਭਿਕ੍ਖੁ ਅਮੂਲਕੇਨ ਥੁਲ੍ਲਚ੍ਚਯੇਨ… ਪਾਚਿਤ੍ਤਿਯੇਨ… ਪਾਟਿਦੇਸਨੀਯੇਨ… ਦੁਕ੍ਕਟੇਨ… ਦੁਬ੍ਭਾਸਿਤੇਨ ਅਨੁਦ੍ਧਂਸਿਤਂ ਪਟਿਜਾਨਾਤਿ, ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ. ਸੋ ਚੇ, ਭਿਕ੍ਖਵੇ, ਚੁਦਿਤੋ ਭਿਕ੍ਖੁ ਪਾਰਾਜਿਕਂ ਅਜ੍ਝਾਪਨ੍ਨੋਤਿ ਪਟਿਜਾਨਾਤਿ, ਨਾਸੇਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ. ਸੋ ਚੇ, ਭਿਕ੍ਖਵੇ, ਚੁਦਿਤੋ ਭਿਕ੍ਖੁ ਸਙ੍ਘਾਦਿਸੇਸਂ ਅਜ੍ਝਾਪਨ੍ਨੋਤਿ ਪਟਿਜਾਨਾਤਿ, ਸਙ੍ਘਾਦਿਸੇਸਂ ਆਰੋਪੇਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ. ਸੋ ਚੇ, ਭਿਕ੍ਖਵੇ, ਚੁਦਿਤੋ ਭਿਕ੍ਖੁ ਥੁਲ੍ਲਚ੍ਚਯਂ… ਪਾਚਿਤ੍ਤਿਯਂ… ਪਾਟਿਦੇਸਨੀਯਂ… ਦੁਕ੍ਕਟਂ… ਦੁਬ੍ਭਾਸਿਤਂ ਅਜ੍ਝਾਪਨ੍ਨੋਤਿ ਪਟਿਜਾਨਾਤਿ, ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ.

ਪਵਾਰਣਾਠਪਨਂ ਨਿਟ੍ਠਿਤਂ.

੧੪੨. ਥੁਲ੍ਲਚ੍ਚਯਵਤ੍ਥੁਕਾਦਿ

੨੩੮. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁ ਪਵਾਰਣਾਯ ਥੁਲ੍ਲਚ੍ਚਯਂ ਅਜ੍ਝਾਪਨ੍ਨੋ ਹੋਤਿ. ਏਕਚ੍ਚੇ ਭਿਕ੍ਖੂ ਥੁਲ੍ਲਚ੍ਚਯਦਿਟ੍ਠਿਨੋ ਹੋਨ੍ਤਿ, ਏਕਚ੍ਚੇ ਭਿਕ੍ਖੂ ਸਙ੍ਘਾਦਿਸੇਸਦਿਟ੍ਠਿਨੋ ਹੋਨ੍ਤਿ. ਯੇ ਤੇ, ਭਿਕ੍ਖਵੇ, ਭਿਕ੍ਖੂ ਥੁਲ੍ਲਚ੍ਚਯਦਿਟ੍ਠਿਨੋ, ਤੇਹਿ ਸੋ, ਭਿਕ੍ਖਵੇ, ਭਿਕ੍ਖੁ ਏਕਮਨ੍ਤਂ ਅਪਨੇਤ੍ਵਾ ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ – ‘‘ਯਂ ਖੋ ਸੋ, ਆਵੁਸੋ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ, ਸਾਸ੍ਸ ਯਥਾਧਮ੍ਮਂ ਪਟਿਕਤਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁ ਪਵਾਰਣਾਯ ਥੁਲ੍ਲਚ੍ਚਯਂ ਅਜ੍ਝਾਪਨ੍ਨੋ ਹੋਤਿ. ਏਕਚ੍ਚੇ ਭਿਕ੍ਖੂ ਥੁਲ੍ਲਚ੍ਚਯਦਿਟ੍ਠਿਨੋ ਹੋਨ੍ਤਿ, ਏਕਚ੍ਚੇ ਭਿਕ੍ਖੂ ਪਾਚਿਤ੍ਤਿਯਦਿਟ੍ਠਿਨੋ ਹੋਨ੍ਤਿ…ਪੇ… ਏਕਚ੍ਚੇ ਭਿਕ੍ਖੂ ਥੁਲ੍ਲਚ੍ਚਯਦਿਟ੍ਠਿਨੋ ਹੋਨ੍ਤਿ, ਏਕਚ੍ਚੇ ਭਿਕ੍ਖੂ ਪਾਟਿਦੇਸਨੀਯਦਿਟ੍ਠਿਨੋ ਹੋਨ੍ਤਿ… ਏਕਚ੍ਚੇ ਭਿਕ੍ਖੂ ਥੁਲ੍ਲਚ੍ਚਯਦਿਟ੍ਠਿਨੋ ਹੋਨ੍ਤਿ, ਏਕਚ੍ਚੇ ਭਿਕ੍ਖੂ ਦੁਕ੍ਕਟਦਿਟ੍ਠਿਨੋ ਹੋਨ੍ਤਿ… ਏਕਚ੍ਚੇ ਭਿਕ੍ਖੂ ਥੁਲ੍ਲਚ੍ਚਯਦਿਟ੍ਠਿਨੋ ਹੋਨ੍ਤਿ, ਏਕਚ੍ਚੇ ਭਿਕ੍ਖੂ ਦੁਬ੍ਭਾਸਿਤਦਿਟ੍ਠਿਨੋ ਹੋਨ੍ਤਿ. ਯੇ ਤੇ, ਭਿਕ੍ਖਵੇ, ਭਿਕ੍ਖੂ ਥੁਲ੍ਲਚ੍ਚਯਦਿਟ੍ਠਿਨੋ, ਤੇਹਿ ਸੋ, ਭਿਕ੍ਖਵੇ, ਭਿਕ੍ਖੁ ਏਕਮਨ੍ਤਂ ਅਪਨੇਤ੍ਵਾ ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ – ‘‘ਯਂ ਖੋ ਸੋ, ਆਵੁਸੋ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ, ਸਾਸ੍ਸ ਯਥਾਧਮ੍ਮਂ ਪਟਿਕਤਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁ ਪਵਾਰਣਾਯ ਪਾਚਿਤ੍ਤਿਯਂ ਅਜ੍ਝਾਪਨ੍ਨੋ ਹੋਤਿ…ਪੇ… ਪਾਟਿਦੇਸਨੀਯਂ ਅਜ੍ਝਾਪਨ੍ਨੋ ਹੋਤਿ… ਦੁਕ੍ਕਟਂ ਅਜ੍ਝਾਪਨ੍ਨੋ ਹੋਤਿ… ਦੁਬ੍ਭਾਸਿਤਂ ਅਜ੍ਝਾਪਨ੍ਨੋ ਹੋਤਿ. ਏਕਚ੍ਚੇ ਭਿਕ੍ਖੂ ਦੁਬ੍ਭਾਸਿਤਦਿਟ੍ਠਿਨੋ ਹੋਨ੍ਤਿ, ਏਕਚ੍ਚੇ ਭਿਕ੍ਖੂ ਸਙ੍ਘਾਦਿਸੇਸਦਿਟ੍ਠਿਨੋ ਹੋਨ੍ਤਿ. ਯੇ ਤੇ, ਭਿਕ੍ਖਵੇ, ਭਿਕ੍ਖੂ ਦੁਬ੍ਭਾਸਿਤਦਿਟ੍ਠਿਨੋ, ਤੇਹਿ ਸੋ, ਭਿਕ੍ਖਵੇ, ਭਿਕ੍ਖੁ ਏਕਮਨ੍ਤਂ ਅਪਨੇਤ੍ਵਾ ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ – ‘‘ਯਂ ਖੋ ਸੋ, ਆਵੁਸੋ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ, ਸਾਸ੍ਸ ਯਥਾਧਮ੍ਮਂ ਪਟਿਕਤਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁ ਪਵਾਰਣਾਯ ਦੁਬ੍ਭਾਸਿਤਂ ਅਜ੍ਝਾਪਨ੍ਨੋ ਹੋਤਿ. ਏਕਚ੍ਚੇ ਭਿਕ੍ਖੂ ਦੁਬ੍ਭਾਸਿਤਦਿਟ੍ਠਿਨੋ ਹੋਨ੍ਤਿ, ਏਕਚ੍ਚੇ ਭਿਕ੍ਖੂ ਥੁਲ੍ਲਚ੍ਚਯਦਿਟ੍ਠਿਨੋ ਹੋਨ੍ਤਿ…ਪੇ… ਏਕਚ੍ਚੇ ਭਿਕ੍ਖੂ ਦੁਬ੍ਭਾਸਿਤਦਿਟ੍ਠਿਨੋ ਹੋਨ੍ਤਿ, ਏਕਚ੍ਚੇ ਭਿਕ੍ਖੂ ਪਾਚਿਤ੍ਤਿਯਦਿਟ੍ਠਿਨੋ ਹੋਨ੍ਤਿ… ਏਕਚ੍ਚੇ ਭਿਕ੍ਖੂ ਦੁਬ੍ਭਾਸਿਤਦਿਟ੍ਠਿਨੋ ਹੋਨ੍ਤਿ, ਏਕਚ੍ਚੇ ਭਿਕ੍ਖੂ ਪਾਟਿਦੇਸਨੀਯਦਿਟ੍ਠਿਨੋ ਹੋਨ੍ਤਿ… ਏਕਚ੍ਚੇ ਭਿਕ੍ਖੂ ਦੁਬ੍ਭਾਸਿਤਦਿਟ੍ਠਿਨੋ ਹੋਨ੍ਤਿ, ਏਕਚ੍ਚੇ ਭਿਕ੍ਖੂ ਦੁਕ੍ਕਟਦਿਟ੍ਠਿਨੋ ਹੋਨ੍ਤਿ. ਯੇ ਤੇ, ਭਿਕ੍ਖਵੇ, ਭਿਕ੍ਖੂ ਦੁਬ੍ਭਾਸਿਤਦਿਟ੍ਠਿਨੋ, ਤੇਹਿ ਸੋ, ਭਿਕ੍ਖਵੇ, ਭਿਕ੍ਖੁ ਏਕਮਨ੍ਤਂ ਅਪਨੇਤ੍ਵਾ ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ – ‘‘ਯਂ ਖੋ ਸੋ, ਆਵੁਸੋ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ, ਸਾਸ੍ਸ ਯਥਾਧਮ੍ਮਂ ਪਟਿਕਤਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ.

ਥੁਲ੍ਲਚ੍ਚਯਵਤ੍ਥੁਕਾਦਿ ਨਿਟ੍ਠਿਤਾ.

੧੪੩. ਵਤ੍ਥੁਠਪਨਾਦਿ

੨੩੯. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁ ਪਵਾਰਣਾਯ ਸਙ੍ਘਮਜ੍ਝੇ ਉਦਾਹਰੇਯ੍ਯ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਵਤ੍ਥੁ ਪਞ੍ਞਾਯਤਿ, ਨ ਪੁਗ੍ਗਲੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਵਤ੍ਥੁਂ ਠਪੇਤ੍ਵਾ ਸਙ੍ਘੋ ਪਵਾਰੇਯ੍ਯਾ’’ਤਿ. ਸੋ ਏਵਮਸ੍ਸ ਵਚਨੀਯੋ – ‘‘ਭਗਵਤਾ ਖੋ, ਆਵੁਸੋ, ਵਿਸੁਦ੍ਧਾਨਂ ਪਵਾਰਣਾ ਪਞ੍ਞਤ੍ਤਾ. ਸਚੇ ਵਤ੍ਥੁ ਪਞ੍ਞਾਯਤਿ, ਨ ਪੁਗ੍ਗਲੋ, ਇਦਾਨੇਵ ਨਂ ਵਦੇਹੀ’’ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁ ਪਵਾਰਣਾਯ ਸਙ੍ਘਮਜ੍ਝੇ ਉਦਾਹਰੇਯ੍ਯ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਪੁਗ੍ਗਲੋ ਪਞ੍ਞਾਯਤਿ, ਨ ਵਤ੍ਥੁ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਪੁਗ੍ਗਲਂ ਠਪੇਤ੍ਵਾ ਸਙ੍ਘੋ ਪਵਾਰੇਯ੍ਯਾ’’ਤਿ. ਸੋ ਏਵਮਸ੍ਸ ਵਚਨੀਯੋ – ‘‘ਭਗਵਤਾ ਖੋ, ਆਵੁਸੋ, ਸਮਗ੍ਗਾਨਂ ਪਵਾਰਣਾ ਪਞ੍ਞਤ੍ਤਾ. ਸਚੇ ਪੁਗ੍ਗਲੋ ਪਞ੍ਞਾਯਤਿ, ਨ ਵਤ੍ਥੁ, ਇਦਾਨੇਵ ਨਂ ਵਦੇਹੀ’’ਤਿ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਤਦਹੁ ਪਵਾਰਣਾਯ ਸਙ੍ਘਮਜ੍ਝੇ ਉਦਾਹਰੇਯ੍ਯ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਵਤ੍ਥੁ ਚ ਪੁਗ੍ਗਲੋ ਚ ਪਞ੍ਞਾਯਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਵਤ੍ਥੁਞ੍ਚ ਪੁਗ੍ਗਲਞ੍ਚ ਠਪੇਤ੍ਵਾ ਸਙ੍ਘੋ ਪਵਾਰੇਯ੍ਯਾ’’ਤਿ. ਸੋ ਏਵਮਸ੍ਸ ਵਚਨੀਯੋ – ‘‘ਭਗਵਤਾ ਖੋ, ਆਵੁਸੋ, ਵਿਸੁਦ੍ਧਾਨਞ੍ਚ ਸਮਗ੍ਗਾਨਞ੍ਚ ਪਵਾਰਣਾ ਪਞ੍ਞਤ੍ਤਾ. ਸਚੇ ਵਤ੍ਥੁ ਚ ਪੁਗ੍ਗਲੋ ਚ ਪਞ੍ਞਾਯਤਿ, ਇਦਾਨੇਵ ਨਂ ਵਦੇਹੀ’’ਤਿ.

ਪੁਬ੍ਬੇ ਚੇ, ਭਿਕ੍ਖਵੇ, ਪਵਾਰਣਾਯ ਵਤ੍ਥੁ ਪਞ੍ਞਾਯਤਿ, ਪਚ੍ਛਾ ਪੁਗ੍ਗਲੋ, ਕਲ੍ਲਂ ਵਚਨਾਯ. ਪੁਬ੍ਬੇ ਚੇ, ਭਿਕ੍ਖਵੇ, ਪਵਾਰਣਾਯ ਪੁਗ੍ਗਲੋ ਪਞ੍ਞਾਯਤਿ, ਪਚ੍ਛਾ ਵਤ੍ਥੁ, ਕਲ੍ਲਂ ਵਚਨਾਯ. ਪੁਬ੍ਬੇ ਚੇ, ਭਿਕ੍ਖਵੇ, ਪਵਾਰਣਾਯ ਵਤ੍ਥੁ ਚ ਪੁਗ੍ਗਲੋ ਚ ਪਞ੍ਞਾਯਤਿ, ਤਂ ਚੇ ਕਤਾਯ ਪਵਾਰਣਾਯ ਉਕ੍ਕੋਟੇਤਿ, ਉਕ੍ਕੋਟਨਕਂ ਪਾਚਿਤ੍ਤਿਯਨ੍ਤਿ.

ਵਤ੍ਥੁਠਪਨਾਦਿ ਨਿਟ੍ਠਿਤਾ.

੧੪੪. ਭਣ੍ਡਨਕਾਰਕਵਤ੍ਥੁ

੨੪੦. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸਂ ਉਪਗਚ੍ਛਿਂਸੁ. ਤੇਸਂ ਸਾਮਨ੍ਤਾ ਅਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਵਸ੍ਸਂ ਉਪਗਚ੍ਛਿਂਸੁ – ਮਯਂ ਤੇਸਂ ਭਿਕ੍ਖੂਨਂ ਵਸ੍ਸਂਵੁਟ੍ਠਾਨਂ ਪਵਾਰਣਾਯ ਪਵਾਰਣਂ ਠਪੇਸ੍ਸਾਮਾਤਿ. ਅਸ੍ਸੋਸੁਂ ਖੋ ਤੇ ਭਿਕ੍ਖੂ – ‘‘ਅਮ੍ਹਾਕਂ ਕਿਰ ਸਾਮਨ੍ਤਾ ਅਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਵਸ੍ਸਂ ਉਪਗਤਾ – ਮਯਂ ਤੇਸਂ ਭਿਕ੍ਖੂਨਂ ਵਸ੍ਸਂਵੁਟ੍ਠਾਨਂ ਪਵਾਰਣਾਯ ਪਵਾਰਣਂ ਠਪੇਸ੍ਸਾਮਾ’’ਤਿ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸਂ ਉਪਗਚ੍ਛਨ੍ਤਿ. ਤੇਸਂ ਸਾਮਨ੍ਤਾ ਅਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਵਸ੍ਸਂ ਉਪਗਚ੍ਛਨ੍ਤਿ – ਮਯਂ ਤੇਸਂ ਭਿਕ੍ਖੂਨਂ ਵਸ੍ਸਂਵੁਟ੍ਠਾਨਂ ਪਵਾਰਣਾਯ ਪਵਾਰਣਂ ਠਪੇਸ੍ਸਾਮਾਤਿ. ਅਨੁਜਾਨਾਮਿ, ਭਿਕ੍ਖਵੇ, ਤੇਹਿ ਭਿਕ੍ਖੂਹਿ ਦ੍ਵੇ ਤਯੋ ਉਪੋਸਥੇ ਚਾਤੁਦ੍ਦਸਿਕੇ ਕਾਤੁਂ – ਕਥਂ ਮਯਂ ਤੇਹਿ ਭਿਕ੍ਖੂਹਿ ਪਠਮਤਰਂ ਪਵਾਰੇਯ੍ਯਾਮਾਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤਂ ਆਵਾਸਂ ਆਗਚ੍ਛਨ੍ਤਿ, ਤੇਹਿ, ਭਿਕ੍ਖਵੇ, ਆਵਾਸਿਕੇਹਿ ਭਿਕ੍ਖੂਹਿ ਲਹੁਂ ਲਹੁਂ ਸਨ੍ਨਿਪਤਿਤ੍ਵਾ ਪਵਾਰੇਤਬ੍ਬਂ, ਪਵਾਰੇਤ੍ਵਾ ਵਤ੍ਤਬ੍ਬਾ – ‘‘ਪਵਾਰਿਤਾ ਖੋ ਮਯਂ, ਆਵੁਸੋ; ਯਥਾਯਸ੍ਮਨ੍ਤਾ ਮਞ੍ਞਨ੍ਤਿ ਤਥਾ ਕਰੋਨ੍ਤੂ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਅਸਂਵਿਹਿਤਾ ਤਂ ਆਵਾਸਂ ਆਗਚ੍ਛਨ੍ਤਿ, ਤੇਹਿ, ਭਿਕ੍ਖਵੇ, ਆਵਾਸਿਕੇਹਿ ਭਿਕ੍ਖੂਹਿ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਾਨੀਯੇਨ ਪਰਿਪੁਚ੍ਛਿਤਬ੍ਬਾ; ਤੇਸਂ ਵਿਕ੍ਖਿਤ੍ਵਾ [ਵਿਕ੍ਖਿਪਾਪੇਤ੍ਵਾ (ਪਟਿਵਿਸੋਧਕਾਨਂ ਮਤਿ), ਆਚਿਕ੍ਖਿਤ੍ਵਾ (ਕ.)] ਨਿਸ੍ਸੀਮਂ ਗਨ੍ਤ੍ਵਾ ਪਵਾਰੇਤਬ੍ਬਂ, ਪਵਾਰੇਤ੍ਵਾ ਵਤ੍ਤਬ੍ਬਾ – ‘‘ਪਵਾਰਿਤਾ ਖੋ ਮਯਂ, ਆਵੁਸੋ; ਯਥਾਯਸ੍ਮਨ੍ਤਾ ਮਞ੍ਞਨ੍ਤਿ ਤਥਾ ਕਰੋਨ੍ਤੂ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਆਵਾਸਿਕੇਨ ਭਿਕ੍ਖੁਨਾ ਬ੍ਯਤ੍ਤੇਨ ਪਟਿਬਲੇਨ ਆਵਾਸਿਕਾ ਭਿਕ੍ਖੂ ਞਾਪੇਤਬ੍ਬਾ –

‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤੋ [ਆਯਸ੍ਮਨ੍ਤਾ (ਕ.)], ਆਵਾਸਿਕਾ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਦਾਨਿ ਉਪੋਸਥਂ ਕਰੇਯ੍ਯਾਮ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾਮ, ਆਗਮੇ ਕਾਲ਼ੇ ਪਵਾਰੇਯ੍ਯਾਮਾ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤੇ ਭਿਕ੍ਖੂ ਏਵਂ ਵਦੇਯ੍ਯੁਂ – ‘‘ਸਾਧਾਵੁਸੋ, ਇਦਾਨੇਵ ਨੋ ਪਵਾਰੇਥਾ’’ਤਿ, ਤੇ ਏਵਮਸ੍ਸੁ ਵਚਨੀਯਾ – ‘‘ਅਨਿਸ੍ਸਰਾ ਖੋ ਤੁਮ੍ਹੇ, ਆਵੁਸੋ, ਅਮ੍ਹਾਕਂ ਪਵਾਰਣਾਯ; ਨ ਤਾਵ ਮਯਂ ਪਵਾਰੇਯ੍ਯਾਮਾ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤਂ ਕਾਲ਼ਂ ਅਨੁਵਸੇਯ੍ਯੁਂ, ਆਵਾਸਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਬ੍ਯਤ੍ਤੇਨ ਪਟਿਬਲੇਨ ਆਵਾਸਿਕਾ ਭਿਕ੍ਖੂ ਞਾਪੇਤਬ੍ਬਾ –

‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤੋ, ਆਵਾਸਿਕਾ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਦਾਨਿ ਉਪੋਸਥਂ ਕਰੇਯ੍ਯਾਮ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾਮ, ਆਗਮੇ ਜੁਣ੍ਹੇ ਪਵਾਰੇਯ੍ਯਾਮਾ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤੇ ਭਿਕ੍ਖੂ ਏਵਂ ਵਦੇਯ੍ਯੁਂ – ‘‘ਸਾਧਾਵੁਸੋ, ਇਦਾਨੇਵ ਨੋ ਪਵਾਰੇਯ੍ਯਾਥਾ’’ਤਿ, ਤੇ ਏਵਮਸ੍ਸੁ ਵਚਨੀਯਾ – ‘‘ਅਨਿਸ੍ਸਰਾ ਖੋ ਤੁਮ੍ਹੇ, ਆਵੁਸੋ, ਅਮ੍ਹਾਕਂ ਪਵਾਰਣਾਯ, ਨ ਤਾਵ ਮਯਂ ਪਵਾਰੇਯ੍ਯਾਮਾ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤਮ੍ਪਿ ਜੁਣ੍ਹਂ ਅਨੁਵਸੇਯ੍ਯੁਂ, ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਸਬ੍ਬੇਹੇਵ ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਅਕਾਮਾ ਪਵਾਰੇਤਬ੍ਬਂ.

ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਗਿਲਾਨੋ ਅਗਿਲਾਨਸ੍ਸ ਪਵਾਰਣਂ ਠਪੇਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਆਯਸ੍ਮਾ ਖੋ ਗਿਲਾਨੋ. ਗਿਲਾਨੋ ਚ ਅਨਨੁਯੋਗਕ੍ਖਮੋ ਵੁਤ੍ਤੋ ਭਗਵਤਾ. ਆਗਮੇਹਿ, ਆਵੁਸੋ, ਯਾਵ ਅਰੋਗੋ ਹੋਸਿ. ਅਰੋਗੋ ਆਕਙ੍ਖਮਾਨੋ ਚੋਦੇਸ੍ਸਸੀ’’ਤਿ. ਏਵਞ੍ਚੇ ਵੁਚ੍ਚਮਾਨੋ ਚੋਦੇਤਿ, ਅਨਾਦਰਿਯੇ ਪਾਚਿਤ੍ਤਿਯਂ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਅਗਿਲਾਨੋ ਗਿਲਾਨਸ੍ਸ ਪਵਾਰਣਂ ਠਪੇਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਗਿਲਾਨੋ. ਗਿਲਾਨੋ ਚ ਅਨਨੁਯੋਗਕ੍ਖਮੋ ਵੁਤ੍ਤੋ ਭਗਵਤਾ. ਆਗਮੇਹਿ, ਆਵੁਸੋ, ਯਾਵਾਯਂ ਭਿਕ੍ਖੁ ਅਰੋਗੋ ਹੋਤਿ. ਅਰੋਗਂ ਆਕਙ੍ਖਮਾਨੋ ਚੋਦੇਸ੍ਸਸੀ’’ਤਿ. ਏਵਞ੍ਚੇ ਵੁਚ੍ਚਮਾਨੋ ਚੋਦੇਤਿ, ਅਨਾਦਰਿਯੇ ਪਾਚਿਤ੍ਤਿਯਂ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਗਿਲਾਨੋ ਗਿਲਾਨਸ੍ਸ ਪਵਾਰਣਂ ਠਪੇਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਆਯਸ੍ਮਨ੍ਤਾ ਖੋ ਗਿਲਾਨਾ. ਗਿਲਾਨੋ ਚ ਅਨਨੁਯੋਗਕ੍ਖਮੋ ਵੁਤ੍ਤੋ ਭਗਵਤਾ. ਆਗਮੇਹਿ, ਆਵੁਸੋ, ਯਾਵ ਅਰੋਗਾ ਹੋਥ. ਅਰੋਗੋ ਅਰੋਗਂ ਆਕਙ੍ਖਮਾਨੋ ਚੋਦੇਸ੍ਸਸੀ’’ਤਿ [ਯਾਵ ਅਰੋਗੋ ਹੋਤਿ, ਅਰੋਗਂ ਆਕਙ੍ਖਮਾਨੋ ਚੋਦੇਸ੍ਸਸੀਤਿ (ਕ.)]. ਏਵਞ੍ਚੇ ਵੁਚ੍ਚਮਾਨੋ ਚੋਦੇਤਿ, ਅਨਾਦਰਿਯੇ ਪਾਚਿਤ੍ਤਿਯਂ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਅਗਿਲਾਨੋ ਅਗਿਲਾਨਸ੍ਸ ਪਵਾਰਣਂ ਠਪੇਤਿ, ਉਭੋ ਸਙ੍ਘੇਨ ਸਮਨੁਯੁਞ੍ਜਿਤ੍ਵਾ ਸਮਨੁਗਾਹਿਤ੍ਵਾ [ਸਮਨੁਭਾਸਿਤ੍ਵਾ (ਸੀ.)] ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘੇਨ ਪਵਾਰੇਤਬ੍ਬਨ੍ਤਿ.

ਭਣ੍ਡਨਕਾਰਕਵਤ੍ਥੁ ਨਿਟ੍ਠਿਤਂ.

੧੪੫. ਪਵਾਰਣਾਸਙ੍ਗਹੋ

੨੪੧. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸਂ ਉਪਗਚ੍ਛਿਂਸੁ. ਤੇਸਂ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ ਹੋਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਅਮ੍ਹਾਕਂ ਖੋ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ. ਸਚੇ ਮਯਂ ਇਦਾਨਿ ਪਵਾਰੇਸ੍ਸਾਮ, ਸਿਯਾਪਿ ਭਿਕ੍ਖੂ ਪਵਾਰੇਤ੍ਵਾ ਚਾਰਿਕਂ ਪਕ੍ਕਮੇਯ੍ਯੁਂ. ਏਵਂ ਮਯਂ ਇਮਮ੍ਹਾ ਫਾਸੁਵਿਹਾਰਾ ਪਰਿਬਾਹਿਰਾ ਭਵਿਸ੍ਸਾਮ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸਂ ਉਪਗਚ੍ਛਨ੍ਤਿ. ਤੇਸਂ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ ਹੋਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਮ੍ਹਾਕਂ ਖੋ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ. ਸਚੇ ਮਯਂ ਇਦਾਨਿ ਪਵਾਰੇਸ੍ਸਾਮ, ਸਿਯਾਪਿ ਭਿਕ੍ਖੂ ਪਵਾਰੇਤ੍ਵਾ ਚਾਰਿਕਂ ਪਕ੍ਕਮੇਯ੍ਯੁਂ. ਏਵਂ ਮਯਂ ਇਮਮ੍ਹਾ ਫਾਸੁਵਿਹਾਰਾ ਪਰਿਬਾਹਿਰਾ ਭਵਿਸ੍ਸਾਮਾ’’ਤਿ, ਅਨੁਜਾਨਾਮਿ, ਭਿਕ੍ਖਵੇ, ਤੇਹਿ ਭਿਕ੍ਖੂਹਿ ਪਵਾਰਣਾਸਙ੍ਗਹਂ ਕਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬੋ. ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬਂ – ਸਨ੍ਨਿਪਤਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਮ੍ਹਾਕਂ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ. ਸਚੇ ਮਯਂ ਇਦਾਨਿ ਪਵਾਰੇਸ੍ਸਾਮ, ਸਿਯਾਪਿ ਭਿਕ੍ਖੂ ਪਵਾਰੇਤ੍ਵਾ ਚਾਰਿਕਂ ਪਕ੍ਕਮੇਯ੍ਯੁਂ. ਏਵਂ ਮਯਂ ਇਮਮ੍ਹਾ ਫਾਸੁਵਿਹਾਰਾ ਪਰਿਬਾਹਿਰਾ ਭਵਿਸ੍ਸਾਮ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰਣਾਸਙ੍ਗਹਂ ਕਰੇਯ੍ਯ, ਇਦਾਨਿ ਉਪੋਸਥਂ ਕਰੇਯ੍ਯ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯ, ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਪਵਾਰੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਮ੍ਹਾਕਂ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ. ਸਚੇ ਮਯਂ ਇਦਾਨਿ ਪਵਾਰੇਸ੍ਸਾਮ, ਸਿਯਾਪਿ ਭਿਕ੍ਖੂ ਪਵਾਰੇਤ੍ਵਾ ਚਾਰਿਕਂ ਪਕ੍ਕਮੇਯ੍ਯੁਂ. ਏਵਂ ਮਯਂ ਇਮਮ੍ਹਾ ਫਾਸੁਵਿਹਾਰਾ ਪਰਿਬਾਹਿਰਾ ਭਵਿਸ੍ਸਾਮ. ਸਙ੍ਘੋ ਪਵਾਰਣਾਸਙ੍ਗਹਂ ਕਰੋਤਿ, ਇਦਾਨਿ ਉਪੋਸਥਂ ਕਰਿਸ੍ਸਤਿ, ਪਾਤਿਮੋਕ੍ਖਂ ਉਦ੍ਦਿਸਿਸ੍ਸਤਿ, ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਪਵਾਰੇਸ੍ਸਤਿ. ਯਸ੍ਸਾਯਸ੍ਮਤੋ ਖਮਤਿ ਪਵਾਰਣਾਸਙ੍ਗਹਸ੍ਸ ਕਰਣਂ, ਇਦਾਨਿ ਉਪੋਸਥਂ ਕਰਿਸ੍ਸਤਿ, ਪਾਤਿਮੋਕ੍ਖਂ ਉਦ੍ਦਿਸਿਸ੍ਸਤਿ, ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਪਵਾਰੇਸ੍ਸਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਕਤੋ ਸਙ੍ਘੇਨ ਪਵਾਰਣਾਸਙ੍ਗਹੋ, ਇਦਾਨਿ ਉਪੋਸਥਂ ਕਰਿਸ੍ਸਤਿ, ਪਾਤਿਮੋਕ੍ਖਂ ਉਦ੍ਦਿਸਿਸ੍ਸਤਿ, ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਪਵਾਰੇਸ੍ਸਤਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਕਤੇ ਪਵਾਰਣਾਸਙ੍ਗਹੇ ਅਞ੍ਞਤਰੋ ਭਿਕ੍ਖੁ ਏਵਂ ਵਦੇਯ੍ਯ – ‘‘ਇਚ੍ਛਾਮਹਂ, ਆਵੁਸੋ, ਜਨਪਦਚਾਰਿਕਂ ਪਕ੍ਕਮਿਤੁਂ; ਅਤ੍ਥਿ ਮੇ ਜਨਪਦੇ ਕਰਣੀਯ’’ਨ੍ਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਸਾਧਾਵੁਸੋ, ਪਵਾਰੇਤ੍ਵਾ ਗਚ੍ਛਾਹੀ’’ਤਿ. ਸੋ ਚੇ, ਭਿਕ੍ਖਵੇ, ਭਿਕ੍ਖੁ ਪਵਾਰਯਮਾਨੋ ਅਞ੍ਞਤਰਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਅਨਿਸ੍ਸਰੋ ਖੋ ਮੇ ਤ੍ਵਂ, ਆਵੁਸੋ, ਪਵਾਰਣਾਯ, ਨ ਤਾਵਾਹਂ ਪਵਾਰੇਸ੍ਸਾਮੀ’’ਤਿ. ਤਸ੍ਸ ਚੇ, ਭਿਕ੍ਖਵੇ, ਭਿਕ੍ਖੁਨੋ ਪਵਾਰਯਮਾਨਸ੍ਸ ਅਞ੍ਞਤਰੋ ਭਿਕ੍ਖੁ ਤਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਤਿ, ਉਭੋ ਸਙ੍ਘੇਨ ਸਮਨੁਯੁਞ੍ਜਿਤ੍ਵਾ ਸਮਨੁਗਾਹਿਤ੍ਵਾ ਯਥਾਧਮ੍ਮਂ ਕਾਰਾਪੇਤਬ੍ਬਾ. ਸੋ ਚੇ, ਭਿਕ੍ਖਵੇ, ਭਿਕ੍ਖੁ ਜਨਪਦੇ ਤਂ ਕਰਣੀਯਂ ਤੀਰੇਤ੍ਵਾ ਪੁਨਦੇਵ ਅਨ੍ਤੋ ਕੋਮੁਦਿਯਾ ਚਾਤੁਮਾਸਿਨਿਯਾ ਤਂ ਆਵਾਸਂ ਆਗਚ੍ਛਤਿ, ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਅਞ੍ਞਤਰੋ ਭਿਕ੍ਖੁ ਤਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਅਨਿਸ੍ਸਰੋ ਖੋ ਮੇ ਤ੍ਵਂ, ਆਵੁਸੋ, ਪਵਾਰਣਾਯ; ਪਵਾਰਿਤੋ ਅਹ’’ਨ੍ਤਿ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਸੋ ਭਿਕ੍ਖੁ ਅਞ੍ਞਤਰਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਤਿ, ਉਭੋ ਸਙ੍ਘੇਨ ਸਮਨੁਯੁਞ੍ਜਿਤ੍ਵਾ ਸਮਨੁਗਾਹਿਤ੍ਵਾ ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘੇਨ ਪਵਾਰੇਤਬ੍ਬਨ੍ਤਿ.

ਪਵਾਰਣਾਸਙ੍ਗਹੋ ਨਿਟ੍ਠਿਤੋ.

ਪਵਾਰਣਾਕ੍ਖਨ੍ਧਕੋ ਚਤੁਤ੍ਥੋ.

੧੪੬. ਤਸ੍ਸੁਦ੍ਦਾਨਂ

ਵਸ੍ਸਂਵੁਟ੍ਠਾ ਕੋਸਲੇਸੁ, ਅਗਮੁਂ ਸਤ੍ਥੁ ਦਸ੍ਸਨਂ;

ਅਫਾਸੁਂ ਪਸੁਸਂਵਾਸਂ, ਅਞ੍ਞਮਞ੍ਞਾਨੁਲੋਮਤਾ.

ਪਵਾਰੇਨ੍ਤਾ ਪਣਾਮਞ੍ਚ [ਪਵਾਰੇਨ੍ਤਾਸਨੇ ਦ੍ਵੇ ਚ (ਸੀ. ਸ੍ਯਾ.)], ਕਮ੍ਮਂ ਗਿਲਾਨਞਾਤਕਾ;

ਰਾਜਾ ਚੋਰਾ ਚ ਧੁਤ੍ਤਾ ਚ, ਭਿਕ੍ਖੁਪਚ੍ਚਤ੍ਥਿਕਾ ਤਥਾ.

ਪਞ੍ਚ ਚਤੁਤਯੋ ਦ੍ਵੇਕੋ, ਆਪਨ੍ਨੋ ਵੇਮਤੀ ਸਰਿ;

ਸਬ੍ਬੋ ਸਙ੍ਘੋ ਵੇਮਤਿਕੋ, ਬਹੂ ਸਮਾ ਚ ਥੋਕਿਕਾ.

ਆਵਾਸਿਕਾ ਚਾਤੁਦ੍ਦਸ, ਲਿਙ੍ਗਸਂਵਾਸਕਾ ਉਭੋ;

ਗਨ੍ਤਬ੍ਬਂ ਨ ਨਿਸਿਨ੍ਨਾਯ, ਛਨ੍ਦਦਾਨੇ ਪਵਾਰਣਾ [ਛਨ੍ਦਦਾਨਪਵਾਰਣਾ (ਕ.)].

ਸਵਰੇਹਿ ਖੇਪਿਤਾ ਮੇਘੋ, ਅਨ੍ਤਰਾ ਚ ਪਵਾਰਣਾ;

ਨ ਇਚ੍ਛਨ੍ਤਿ ਪੁਰਮ੍ਹਾਕਂ, ਅਟ੍ਠਪਿਤਾ ਚ ਭਿਕ੍ਖੁਨੋ.

ਕਿਮ੍ਹਿ ਵਾਤਿ ਕਤਮਞ੍ਚ, ਦਿਟ੍ਠੇਨ ਸੁਤਸਙ੍ਕਾਯ;

ਚੋਦਕੋ ਚੁਦਿਤਕੋ ਚ, ਥੁਲ੍ਲਚ੍ਚਯਂ ਵਤ੍ਥੁ ਭਣ੍ਡਨਂ;

ਪਵਾਰਣਾਸਙ੍ਗਹੋ ਚ, ਅਨਿਸ੍ਸਰੋ ਪਵਾਰਯੇਤਿ.

ਇਮਮ੍ਹਿ ਖਨ੍ਧਕੇ ਵਤ੍ਥੂਨਿ ਛਚਤ੍ਤਾਰੀਸਾਤਿ.

ਪਵਾਰਣਾਕ੍ਖਨ੍ਧਕੋ ਨਿਟ੍ਠਿਤੋ.

੫. ਚਮ੍ਮਕ੍ਖਨ੍ਧਕੋ

੧੪੭. ਸੋਣਕੋਲ਼ਿਵਿਸਵਤ੍ਥੁ

੨੪੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਗਿਜ੍ਝਕੂਟੇ ਪਬ੍ਬਤੇ. ਤੇਨ ਖੋ ਪਨ ਸਮਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਅਸੀਤਿਯਾ ਗਾਮਸਹਸ੍ਸੇਸੁ ਇਸ੍ਸਰਿਯਾਧਿਪਚ੍ਚਂ ਰਜ੍ਜਂ ਕਾਰੇਤਿ. ਤੇਨ ਖੋ ਪਨ ਸਮਯੇਨ ਚਮ੍ਪਾਯਂ ਸੋਣੋ ਨਾਮ ਕੋਲ਼ਿਵਿਸੋ [ਕੋਲ਼ਿਵੀਸੋ (ਸੀ.)] ਸੇਟ੍ਠਿਪੁਤ੍ਤੋ ਸੁਖੁਮਾਲੋ ਹੋਤਿ. ਤਸ੍ਸ ਪਾਦਤਲੇਸੁ ਲੋਮਾਨਿ ਜਾਤਾਨਿ ਹੋਨ੍ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤਾਨਿ ਅਸੀਤਿ ਗਾਮਿਕਸਹਸ੍ਸਾਨਿ ਸਨ੍ਨਿਪਾਤਾਪੇਤ੍ਵਾ ਕੇਨਚਿਦੇਵ ਕਰਣੀਯੇਨ ਸੋਣਸ੍ਸ ਕੋਲ਼ਿਵਿਸਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ – ਆਗਚ੍ਛਤੁ ਸੋਣੋ, ਇਚ੍ਛਾਮਿ ਸੋਣਸ੍ਸ ਆਗਤਨ੍ਤਿ. ਅਥ ਖੋ ਸੋਣਸ੍ਸ ਕੋਲ਼ਿਵਿਸਸ੍ਸ ਮਾਤਾਪਿਤਰੋ ਸੋਣਂ ਕੋਲ਼ਿਵਿਸਂ ਏਤਦਵੋਚੁਂ – ‘‘ਰਾਜਾ ਤੇ, ਤਾਤ ਸੋਣ, ਪਾਦੇ ਦਕ੍ਖਿਤੁਕਾਮੋ. ਮਾ ਖੋ ਤ੍ਵਂ, ਤਾਤ ਸੋਣ, ਯੇਨ ਰਾਜਾ ਤੇਨ ਪਾਦੇ ਅਭਿਪ੍ਪਸਾਰੇਯ੍ਯਾਸਿ. ਰਞ੍ਞੋ ਪੁਰਤੋ ਪਲ੍ਲਙ੍ਕੇਨ ਨਿਸੀਦ. ਨਿਸਿਨ੍ਨਸ੍ਸ ਤੇ ਰਾਜਾ ਪਾਦੇ ਦਕ੍ਖਿਸ੍ਸਤੀ’’ਤਿ. ਅਥ ਖੋ ਸੋਣਂ ਕੋਲ਼ਿਵਿਸਂ ਸਿਵਿਕਾਯ ਆਨੇਸੁਂ. ਅਥ ਖੋ ਸੋਣੋ ਕੋਲ਼ਿਵਿਸੋ ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਅਭਿਵਾਦੇਤ੍ਵਾ ਰਞ੍ਞੋ ਪੁਰਤੋ ਪਲ੍ਲਙ੍ਕੇਨ ਨਿਸੀਦਿ. ਅਦ੍ਦਸਾ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਸੋਣਸ੍ਸ ਕੋਲ਼ਿਵਿਸਸ੍ਸ ਪਾਦਤਲੇਸੁ ਲੋਮਾਨਿ ਜਾਤਾਨਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤਾਨਿ ਅਸੀਤਿ ਗਾਮਿਕਸਹਸ੍ਸਾਨਿ ਦਿਟ੍ਠਧਮ੍ਮਿਕੇ ਅਤ੍ਥੇ ਅਨੁਸਾਸਿਤ੍ਵਾ ਉਯ੍ਯੋਜੇਸਿ – ‘‘ਤੁਮ੍ਹੇ ਖ੍ਵਤ੍ਥ, ਭਣੇ, ਮਯਾ ਦਿਟ੍ਠਧਮ੍ਮਿਕੇ ਅਤ੍ਥੇ ਅਨੁਸਾਸਿਤਾ; ਗਚ੍ਛਥ, ਤਂ ਭਗਵਨ੍ਤਂ ਪਯਿਰੁਪਾਸਥ; ਸੋ ਨੋ ਭਗਵਾ ਸਮ੍ਪਰਾਯਿਕੇ ਅਤ੍ਥੇ ਅਨੁਸਾਸਿਸ੍ਸਤੀ’’ਤਿ.

ਅਥ ਖੋ ਤਾਨਿ ਅਸੀਤਿ ਗਾਮਿਕਸਹਸ੍ਸਾਨਿ ਯੇਨ ਗਿਜ੍ਝਕੂਟੋ ਪਬ੍ਬਤੋ ਤੇਨੁਪਸਙ੍ਕਮਿਂਸੁ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਸਾਗਤੋ ਭਗਵਤੋ ਉਪਟ੍ਠਾਕੋ ਹੋਤਿ. ਅਥ ਖੋ ਤਾਨਿ ਅਸੀਤਿ ਗਾਮਿਕਸਹਸ੍ਸਾਨਿ ਯੇਨਾਯਸ੍ਮਾ ਸਾਗਤੋ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸਾਗਤਂ ਏਤਦਵੋਚੁਂ – ‘‘ਇਮਾਨਿ, ਭਨ੍ਤੇ, ਅਸੀਤਿ ਗਾਮਿਕਸਹਸ੍ਸਾਨਿ ਇਧੂਪਸਙ੍ਕਨ੍ਤਾਨਿ ਭਗਵਨ੍ਤਂ ਦਸ੍ਸਨਾਯ; ਸਾਧੁ ਮਯਂ, ਭਨ੍ਤੇ, ਲਭੇਯ੍ਯਾਮ ਭਗਵਨ੍ਤਂ ਦਸ੍ਸਨਾਯਾ’’ਤਿ. ‘‘ਤੇਨ ਹਿ ਤੁਮ੍ਹੇ ਆਯਸ੍ਮਨ੍ਤੋ ਮੁਹੁਤ੍ਤਂ ਇਧੇਵ ਤਾਵ ਹੋਥ, ਯਾਵਾਹਂ ਭਗਵਨ੍ਤਂ ਪਟਿਵੇਦੇਮੀ’’ਤਿ. ਅਥ ਖੋ ਆਯਸ੍ਮਾ ਸਾਗਤੋ ਤੇਸਂ ਅਸੀਤਿਯਾ ਗਾਮਿਕਸਹਸ੍ਸਾਨਂ ਪੁਰਤੋ ਪੇਕ੍ਖਮਾਨਾਨਂ ਪਾਟਿਕਾਯ ਨਿਮੁਜ੍ਜਿਤ੍ਵਾ ਭਗਵਤੋ ਪੁਰਤੋ ਉਮ੍ਮੁਜ੍ਜਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਇਮਾਨਿ, ਭਨ੍ਤੇ, ਅਸੀਤਿ ਗਾਮਿਕਸਹਸ੍ਸਾਨਿ ਇਧੂਪਸਙ੍ਕਨ੍ਤਾਨਿ ਭਗਵਨ੍ਤਂ ਦਸ੍ਸਨਾਯ; ਯਸ੍ਸ ਦਾਨਿ, ਭਨ੍ਤੇ, ਭਗਵਾ ਕਾਲਂ ਮਞ੍ਞਤੀ’’ਤਿ. ‘‘ਤੇਨ ਹਿ ਤ੍ਵਂ, ਸਾਗਤ, ਵਿਹਾਰਪਚ੍ਛਾਯਾਯਂ ਆਸਨਂ ਪਞ੍ਞਪੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਆਯਸ੍ਮਾ ਸਾਗਤੋ ਭਗਵਤੋ ਪਟਿਸ੍ਸੁਣਿਤ੍ਵਾ ਪੀਠਂ ਗਹੇਤ੍ਵਾ ਭਗਵਤੋ ਪੁਰਤੋ ਨਿਮੁਜ੍ਜਿਤ੍ਵਾ ਤੇਸਂ ਅਸੀਤਿਯਾ ਗਾਮਿਕਸਹਸ੍ਸਾਨਂ ਪੁਰਤੋ ਪੇਕ੍ਖਮਾਨਾਨਂ ਪਾਟਿਕਾਯ ਉਮ੍ਮੁਜ੍ਜਿਤ੍ਵਾ ਵਿਹਾਰਪਚ੍ਛਾਯਾਯਂ ਆਸਨਂ ਪਞ੍ਞਪੇਤਿ. ਅਥ ਖੋ ਭਗਵਾ ਵਿਹਾਰਾ ਨਿਕ੍ਖਮਿਤ੍ਵਾ ਵਿਹਾਰਪਚ੍ਛਾਯਾਯਂ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਤਾਨਿ ਅਸੀਤਿ ਗਾਮਿਕਸਹਸ੍ਸਾਨਿ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਅਥ ਖੋ ਤਾਨਿ ਅਸੀਤਿ ਗਾਮਿਕਸਹਸ੍ਸਾਨਿ ਆਯਸ੍ਮਨ੍ਤਂਯੇਵ ਸਾਗਤਂ ਸਮਨ੍ਨਾਹਰਨ੍ਤਿ, ਨੋ ਤਥਾ ਭਗਵਨ੍ਤਂ. ਅਥ ਖੋ ਭਗਵਾ ਤੇਸਂ ਅਸੀਤਿਯਾ ਗਾਮਿਕਸਹਸ੍ਸਾਨਂ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਆਯਸ੍ਮਨ੍ਤਂ ਸਾਗਤਂ ਆਮਨ੍ਤੇਸਿ – ‘‘ਤੇਨ ਹਿ ਤ੍ਵਂ, ਸਾਗਤ, ਭਿਯ੍ਯੋਸੋਮਤ੍ਤਾਯ ਉਤ੍ਤਰਿਮਨੁਸ੍ਸਧਮ੍ਮਂ ਇਦ੍ਧਿਪਾਟਿਹਾਰਿਯਂ ਦਸ੍ਸੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਆਯਸ੍ਮਾ ਸਾਗਤੋ ਭਗਵਤੋ ਪਟਿਸ੍ਸੁਣਿਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਆਕਾਸੇ ਅਨ੍ਤਲਿਕ੍ਖੇ ਚਙ੍ਕਮਤਿਪਿ, ਤਿਟ੍ਠਤਿਪਿ, ਨਿਸੀਦਤਿਪਿ, ਸੇਯ੍ਯਮ੍ਪਿ ਕਪ੍ਪੇਤਿ, ਧੂਮਾਯਤਿਪਿ [ਧੂਪਾਯਤਿਪਿ (ਸੀ.), ਪਧੂਪਾਯਤਿਪਿ (ਸ੍ਯਾ.)] ਪਜ੍ਜਲਤਿਪਿ, ਅਨ੍ਤਰਧਾਯਤਿਪਿ. ਅਥ ਖੋ ਆਯਸ੍ਮਾ ਸਾਗਤੋ ਆਕਾਸੇ ਅਨ੍ਤਲਿਕ੍ਖੇ ਅਨੇਕਵਿਹਿਤਂ ਉਤ੍ਤਰਿਮਨੁਸ੍ਸਧਮ੍ਮਂ ਇਦ੍ਧਿਪਾਟਿਹਾਰਿਯਂ ਦਸ੍ਸੇਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਸਤ੍ਥਾ ਮੇ, ਭਨ੍ਤੇ, ਭਗਵਾ; ਸਾਵਕੋਹਮਸ੍ਮਿ. ਸਤ੍ਥਾ ਮੇ, ਭਨ੍ਤੇ, ਭਗਵਾ; ਸਾਵਕੋਹਮਸ੍ਮੀ’’ਤਿ. ਅਥ ਖੋ ਤਾਨਿ ਅਸੀਤਿ ਗਾਮਿਕਸਹਸ੍ਸਾਨਿ ‘‘ਅਚ੍ਛਰਿਯਂ ਵਤ ਭੋ! ਅਬ੍ਭੁਤਂ ਵਤ ਭੋ! ਸਾਵਕੋਪਿ ਨਾਮ ਏਵਂ ਮਹਿਦ੍ਧਿਕੋ ਭਵਿਸ੍ਸਤਿ, ਏਵਂ ਮਹਾਨੁਭਾਵੋ, ਅਹੋ ਨੂਨ ਸਤ੍ਥਾ’’ਤਿ ਭਗਵਨ੍ਤਂਯੇਵ ਸਮਨ੍ਨਾਹਰਨ੍ਤਿ, ਨੋ ਤਥਾ ਆਯਸ੍ਮਨ੍ਤਂ ਸਾਗਤਂ.

ਅਥ ਖੋ ਭਗਵਾ ਤੇਸਂ ਅਸੀਤਿਯਾ ਗਾਮਿਕਸਹਸ੍ਸਾਨਂ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ ਸੀਲਕਥਂ ਸਗ੍ਗਕਥਂ, ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ, ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਯਦਾ ਤੇ ਭਗਵਾ ਅਞ੍ਞਾਸਿ ਕਲ੍ਲਚਿਤ੍ਤੇ, ਮੁਦੁਚਿਤ੍ਤੇ, ਵਿਨੀਵਰਣਚਿਤ੍ਤੇ, ਉਦਗ੍ਗਚਿਤ੍ਤੇ, ਪਸਨ੍ਨਚਿਤ੍ਤੇ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ, ਤਂ ਪਕਾਸੇਸਿ – ਦੁਕ੍ਖਂ, ਸਮੁਦਯਂ, ਨਿਰੋਧਂ, ਮਗ੍ਗਂ. ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵਂ ਤੇਸਂ ਅਸੀਤਿਯਾ ਗਾਮਿਕਸਹਸ੍ਸਾਨਂ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘‘ਯਂਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ. ਤੇ ਦਿਟ੍ਠਧਮ੍ਮਾ ਪਤ੍ਤਧਮ੍ਮਾ ਵਿਦਿਤਧਮ੍ਮਾ ਪਰਿਯੋਗਾਲ਼੍ਹਧਮ੍ਮਾ ਤਿਣ੍ਣਵਿਚਿਕਿਚ੍ਛਾ ਵਿਗਤਕਥਂਕਥਾ ਵੇਸਾਰਜ੍ਜਪ੍ਪਤ੍ਤਾ ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚੁਂ – ‘‘ਅਭਿਕ੍ਕਨ੍ਤਂ, ਭਨ੍ਤੇ, ਅਭਿਕ੍ਕਨ੍ਤਂ, ਭਨ੍ਤੇ. ਸੇਯ੍ਯਥਾਪਿ, ਭਨ੍ਤੇ, ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ, ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ – ‘‘ਚਕ੍ਖੁਮਨ੍ਤੋ ਰੂਪਾਨਿ ਦਕ੍ਖਨ੍ਤੀ’’ਤਿ, ਏਵਮੇਵਂ ਭਗਵਤਾ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ. ਏਤੇ ਮਯਂ, ਭਨ੍ਤੇ, ਭਗਵਨ੍ਤਂ ਸਰਣਂ ਗਚ੍ਛਾਮ. ਧਮ੍ਮਞ੍ਚ, ਭਿਕ੍ਖੁਸਙ੍ਘਞ੍ਚ. ਉਪਾਸਕੇ ਨੋ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤੇ ਸਰਣਂ ਗਤੇ’’ਤਿ.

ਸੋਣਸ੍ਸ ਪਬ੍ਬਜ੍ਜਾ

੨੪੩. ਅਥ ਖੋ ਸੋਣਸ੍ਸ ਕੋਲ਼ਿਵਿਸਸ੍ਸ ਏਤਦਹੋਸਿ ‘‘ਯਥਾ ਯਥਾ ਖੋ ਅਹਂ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮਿ, ਨਯਿਦਂ ਸੁਕਰਂ ਅਗਾਰਂ ਅਜ੍ਝਾਵਸਤਾ ਏਕਨ੍ਤਪਰਿਪੁਣ੍ਣਂ ਏਕਨ੍ਤਪਰਿਸੁਦ੍ਧਂ ਸਙ੍ਖਲਿਖਿਤਂ ਬ੍ਰਹ੍ਮਚਰਿਯਂ ਚਰਿਤੁਂ; ਯਂਨੂਨਾਹਂ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜੇਯ੍ਯ’’ਨ੍ਤਿ. ਅਥ ਖੋ ਤਾਨਿ ਅਸੀਤਿ ਗਾਮਿਕਸਹਸ੍ਸਾਨਿ ਭਗਵਤੋ ਭਾਸਿਤਂ ਅਭਿਨਨ੍ਦਿਤ੍ਵਾ ਅਨੁਮੋਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਮਿਸੁਂ. ਅਥ ਖੋ ਸੋਣੋ ਕੋਲ਼ਿਵਿਸੋ ਅਚਿਰਪਕ੍ਕਨ੍ਤੇਸੁ ਤੇਸੁ ਅਸੀਤਿਯਾ ਗਾਮਿਕਸਹਸ੍ਸੇਸੁ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋਣੋ ਕੋਲ਼ਿਵਿਸੋ ਭਗਵਨ੍ਤਂ ਏਤਦਵੋਚ – ‘‘ਯਥਾ ਯਥਾਹਂ, ਭਨ੍ਤੇ, ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮਿ, ਨਯਿਦਂ ਸੁਕਰਂ ਅਗਾਰਂ ਅਜ੍ਝਾਵਸਤਾ ਏਕਨ੍ਤਪਰਿਪੁਣ੍ਣਂ ਏਕਨ੍ਤਪਰਿਸੁਦ੍ਧਂ ਸਙ੍ਖਲਿਖਿਤਂ ਬ੍ਰਹ੍ਮਚਰਿਯਂ ਚਰਿਤੁਂ. ਇਚ੍ਛਾਮਹਂ, ਭਨ੍ਤੇ, ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੁਂ. ਪਬ੍ਬਾਜੇਤੁ ਮਂ, ਭਨ੍ਤੇ, ਭਗਵਾ’’ਤਿ. ਅਲਤ੍ਥ ਖੋ ਸੋਣੋ ਕੋਲ਼ਿਵਿਸੋ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਅਲਤ੍ਥ ਉਪਸਮ੍ਪਦਂ. ਅਚਿਰੁਪਸਮ੍ਪਨ੍ਨੋ ਚ ਪਨਾਯਸ੍ਮਾ ਸੋਣੋ ਸੀਤਵਨੇ ਵਿਹਰਤਿ. ਤਸ੍ਸ ਅਚ੍ਚਾਰਦ੍ਧਵੀਰਿਯਸ੍ਸ ਚਙ੍ਕਮਤੋ ਪਾਦਾ ਭਿਜ੍ਜਿਂਸੁ. ਚਙ੍ਕਮੋ ਲੋਹਿਤੇਨ ਫੁਟੋ ਹੋਤਿ, ਸੇਯ੍ਯਥਾਪਿ ਗਵਾਘਾਤਨਂ. [ਇਤੋ ਪਰਂ ਯਾਵ ਇਮਸ੍ਸ ਵਤ੍ਥੁਸ੍ਸ ਅਵਸਾਨਂ ਤਾਵ ਪਾਠੋ ਅ. ਨਿ. ੬.੫੫ ਆਦਯੋ] ਅਥ ਖੋ ਆਯਸ੍ਮਤੋ ਸੋਣਸ੍ਸ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਯੇ ਖੋ ਕੇਚਿ ਭਗਵਤੋ ਸਾਵਕਾ ਆਰਦ੍ਧਵੀਰਿਯਾ ਵਿਹਰਨ੍ਤਿ, ਅਹਂ ਤੇਸਂ ਅਞ੍ਞਤਰੋ. ਅਥ ਚ ਪਨ ਮੇ ਨਾਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚਤਿ. ਸਂਵਿਜ੍ਜਨ੍ਤਿ ਖੋ ਪਨ ਮੇ ਕੁਲੇ ਭੋਗਾ; ਸਕ੍ਕਾ ਭੋਗੇ ਚ ਭੁਞ੍ਜਿਤੁਂ, ਪੁਞ੍ਞਾਨਿ ਚ ਕਾਤੁਂ. ਯਂਨੂਨਾਹਂ ਹੀਨਾਯਾਵਤ੍ਤਿਤ੍ਵਾ ਭੋਗੇ ਚ ਭੁਞ੍ਜੇਯ੍ਯਂ, ਪੁਞ੍ਞਾਨਿ ਚ ਕਰੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਆਯਸ੍ਮਤੋ ਸੋਣਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ ਏਵਮੇਵ – ਗਿਜ੍ਝਕੂਟੇ ਪਬ੍ਬਤੇ ਅਨ੍ਤਰਹਿਤੋ ਸੀਤਵਨੇ ਪਾਤੁਰਹੋਸਿ. ਅਥ ਖੋ ਭਗਵਾ ਸਮ੍ਬਹੁਲੇਹਿ ਭਿਕ੍ਖੂਹਿ ਸਦ੍ਧਿਂ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਯੇਨਾਯਸ੍ਮਤੋ ਸੋਣਸ੍ਸ ਚਙ੍ਕਮੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਭਗਵਾ ਆਯਸ੍ਮਤੋ ਸੋਣਸ੍ਸ ਚਙ੍ਕਮਂ ਲੋਹਿਤੇਨ ਫੁਟਂ, ਦਿਸ੍ਵਾਨ ਭਿਕ੍ਖੂ ਆਮਨ੍ਤੇਸਿ – ‘‘ਕਸ੍ਸ ਨ੍ਵਾਯਂ, ਭਿਕ੍ਖਵੇ, ਚਙ੍ਕਮੋ ਲੋਹਿਤੇਨ ਫੁਟੋ, ਸੇਯ੍ਯਥਾਪਿ ਗਵਾਘਾਤਨ’’ਨ੍ਤਿ? ‘‘ਆਯਸ੍ਮਤੋ, ਭਨ੍ਤੇ, ਸੋਣਸ੍ਸ ਅਚ੍ਚਾਰਦ੍ਧਵੀਰਿਯਸ੍ਸ ਚਙ੍ਕਮਤੋ ਪਾਦਾ ਭਿਜ੍ਜਿਂਸੁ. ਤਸ੍ਸਾਯਂ ਚਙ੍ਕਮੋ ਲੋਹਿਤੇਨ ਫੁਟੋ, ਸੇਯ੍ਯਥਾਪਿ ਗਵਾਘਾਤਨ’’ਨ੍ਤਿ.

ਅਥ ਖੋ ਭਗਵਾ ਯੇਨਾਯਸ੍ਮਤੋ ਸੋਣਸ੍ਸ ਵਿਹਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਆਯਸ੍ਮਾਪਿ ਖੋ ਸੋਣੋ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਸੋਣਂ ਭਗਵਾ ਏਤਦਵੋਚ – ‘‘ਨਨੁ ਤੇ, ਸੋਣ, ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘ਯੇ ਖੋ ਕੇਚਿ ਭਗਵਤੋ ਸਾਵਕਾ ਆਰਦ੍ਧਵੀਰਿਯਾ ਵਿਹਰਨ੍ਤਿ, ਅਹਂ ਤੇਸਂ ਅਞ੍ਞਤਰੋ. ਅਥ ਚ ਪਨ ਮੇ ਨਾਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚਤਿ. ਸਂਵਿਜ੍ਜਨ੍ਤਿ ਖੋ ਪਨ ਮੇ ਕੁਲੇ ਭੋਗਾ; ਸਕ੍ਕਾ ਭੋਗੇ ਚ ਭੁਞ੍ਜਿਤੁਂ, ਪੁਞ੍ਞਾਨਿ ਚ ਕਾਤੁਂ. ਯਂਨੂਨਾਹਂ ਹੀਨਾਯਾਵਤ੍ਤਿਤ੍ਵਾ ਭੋਗੇ ਚ ਭੁਞ੍ਜੇਯ੍ਯਂ, ਪੁਞ੍ਞਾਨਿ ਚ ਕਰੇਯ੍ਯ’’’ਨ੍ਤਿ? ‘‘ਏਵਂ, ਭਨ੍ਤੇ’’ਤਿ. ‘‘ਤਂ ਕਿਂ ਮਞ੍ਞਸਿ, ਸੋਣ, ਕੁਸਲੋ ਤ੍ਵਂ ਪੁਬ੍ਬੇ ਅਗਾਰਿਕਭੂਤੋ ਵੀਣਾਯ ਤਨ੍ਤਿਸ੍ਸਰੇ’’ਤਿ? ‘‘ਏਵਂ, ਭਨ੍ਤੇ’’ਤਿ. ‘‘ਤਂ ਕਿਂ ਮਞ੍ਞਸਿ, ਸੋਣ, ਯਦਾ ਤੇ ਵੀਣਾਯ ਤਨ੍ਤਿਯੋ ਅਚ੍ਚਾਯਤਾ ਹੋਨ੍ਤਿ, ਅਪਿ ਨੁ ਤੇ ਵੀਣਾ ਤਸ੍ਮਿਂ ਸਮਯੇ ਸਰਵਤੀ ਵਾ ਹੋਤਿ, ਕਮ੍ਮਞ੍ਞਾ ਵਾ’’ਤਿ? ‘‘ਨੋ ਹੇਤਂ, ਭਨ੍ਤੇ’’ਤਿ. ‘‘ਤਂ ਕਿਂ ਮਞ੍ਞਸਿ, ਸੋਣ, ਯਦਾ ਤੇ ਵੀਣਾਯ ਤਨ੍ਤਿਯੋ ਅਤਿਸਿਥਿਲਾ ਹੋਨ੍ਤਿ, ਅਪਿ ਨੁ ਤੇ ਵੀਣਾ ਤਸ੍ਮਿਂ ਸਮਯੇ ਸਰਵਤੀ ਵਾ ਹੋਤਿ, ਕਮ੍ਮਞ੍ਞਾ ਵਾ’’ਤਿ? ‘‘ਨੋ ਹੇਤਂ, ਭਨ੍ਤੇ’’ਤਿ. ‘‘ਤਂ ਕਿਂ ਮਞ੍ਞਸਿ, ਸੋਣ, ਯਦਾ ਤੇ ਵੀਣਾਯ ਤਨ੍ਤਿਯੋ ਨੇਵ ਅਚ੍ਚਾਯਤਾ ਹੋਨ੍ਤਿ ਨਾਤਿਸਿਥਿਲਾ, ਸਮੇ ਗੁਣੇ ਪਤਿਟ੍ਠਿਤਾ, ਅਪਿ ਨੁ ਤੇ ਵੀਣਾ ਤਸ੍ਮਿਂ ਸਮਯੇ ਸਰਵਤੀ ਵਾ ਹੋਤਿ, ਕਮ੍ਮਞ੍ਞਾ ਵਾ’’ਤਿ? ‘‘ਏਵਂ, ਭਨ੍ਤੇ’’ਤਿ. ‘‘ਏਵਮੇਵ ਖੋ, ਸੋਣ, ਅਚ੍ਚਾਰਦ੍ਧਵੀਰਿਯਂ ਉਦ੍ਧਚ੍ਚਾਯ ਸਂਵਤ੍ਤਤਿ, ਅਤਿਲੀਨਵੀਰਿਯਂ ਕੋਸਜ੍ਜਾਯ ਸਂਵਤ੍ਤਤਿ. ਤਸ੍ਮਾਤਿਹ ਤ੍ਵਂ, ਸੋਣ, ਵੀਰਿਯਸਮਤਂ ਅਧਿਟ੍ਠਹ, ਇਨ੍ਦ੍ਰਿਯਾਨਞ੍ਚ ਸਮਤਂ ਪਟਿਵਿਜ੍ਝ, ਤਤ੍ਥ ਚ ਨਿਮਿਤ੍ਤਂ ਗਣ੍ਹਾਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਆਯਸ੍ਮਾ ਸੋਣੋ ਭਗਵਤੋ ਪਚ੍ਚਸ੍ਸੋਸਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਸੋਣਂ ਇਮਿਨਾ ਓਵਾਦੇਨ ਓਵਦਿਤ੍ਵਾ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮ੍ਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ ਏਵਮੇਵ – ਸੀਤਵਨੇ ਆਯਸ੍ਮਤੋ ਸੋਣਸ੍ਸ ਸਮ੍ਮੁਖੇ ਅਨ੍ਤਰਹਿਤੋ ਗਿਜ੍ਝਕੂਟੇ ਪਬ੍ਬਤੇ ਪਾਤੁਰਹੋਸਿ. ਅਥ ਖੋ ਆਯਸ੍ਮਾ ਸੋਣੋ ਅਪਰੇਨ ਸਮਯੇਨ ਵੀਰਿਯਸਮਤਂ ਅਧਿਟ੍ਠਾਸਿ, ਇਨ੍ਦ੍ਰਿਯਾਨਞ੍ਚ ਸਮਤਂ ਪਟਿਵਿਜ੍ਝਿ, ਤਤ੍ਥ ਚ ਨਿਮਿਤ੍ਤਂ ਅਗ੍ਗਹੇਸਿ. ਅਥ ਖੋ ਆਯਸ੍ਮਾ ਸੋਣੋ, ਏਕੋ ਵੂਪਕਟ੍ਠੋ ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ ਵਿਹਰਨ੍ਤੋ, ਨ ਚਿਰਸ੍ਸੇਵ – ਯਸ੍ਸਤ੍ਥਾਯ ਕੁਲਪੁਤ੍ਤਾ ਸਮ੍ਮਦੇਵ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਨ੍ਤਿ – ਤਦਨੁਤ੍ਤਰਂ ਬ੍ਰਹ੍ਮਚਰਿਯਪਰਿਯੋਸਾਨਂ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਾਸਿ. ‘ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾ’ਤਿ ਅਭਿਞ੍ਞਾਸਿ. ਅਞ੍ਞਤਰੋ ਚ ਪਨਾਯਸ੍ਮਾ ਸੋਣੋ ਅਰਹਤਂ ਅਹੋਸਿ.

੨੪੪. ਅਥ ਖੋ ਆਯਸ੍ਮਤੋ ਸੋਣਸ੍ਸ ਅਰਹਤ੍ਤਪ੍ਪਤ੍ਤਸ੍ਸ ਏਤਦਹੋਸਿ – ‘‘ਯਂਨੂਨਾਹਂ ਭਗਵਤੋ ਸਨ੍ਤਿਕੇ ਅਞ੍ਞਂ ਬ੍ਯਾਕਰੇਯ੍ਯ’’ਨ੍ਤਿ. ਅਥ ਖੋ ਆਯਸ੍ਮਾ ਸੋਣੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸੋਣੋ ਭਗਵਨ੍ਤਂ ਏਤਦਵੋਚ – ਯੋ ਸੋ, ਭਨ੍ਤੇ, ਭਿਕ੍ਖੁ ਅਰਹਂ ਖੀਣਾਸਵੋ ਵੁਸਿਤਵਾ ਕਤਕਰਣੀਯੋ ਓਹਿਤਭਾਰੋ ਅਨੁਪ੍ਪਤ੍ਤਸਦਤ੍ਥੋ ਪਰਿਕ੍ਖੀਣਭਵਸਞ੍ਞੋਜਨੋ ਸਮ੍ਮਦਞ੍ਞਾ ਵਿਮੁਤ੍ਤੋ, ਸੋ ਛਟ੍ਠਾਨਾਨਿ ਅਧਿਮੁਤ੍ਤੋ ਹੋਤਿ – ਨੇਕ੍ਖਮ੍ਮਾਧਿਮੁਤ੍ਤੋ ਹੋਤਿ, ਪਵਿਵੇਕਾਧਿਮੁਤ੍ਤੋ ਹੋਤਿ, ਅਬ੍ਯਾਪਜ੍ਜਾਧਿਮੁਤ੍ਤੋ ਹੋਤਿ, ਉਪਾਦਾਨਕ੍ਖਯਾਧਿਮੁਤ੍ਤੋ ਹੋਤਿ, ਤਣ੍ਹਕ੍ਖਯਾਧਿਮੁਤ੍ਤੋ ਹੋਤਿ, ਅਸਮ੍ਮੋਹਾਧਿਮੁਤ੍ਤੋ ਹੋਤਿ.

‘‘ਸਿਯਾ ਖੋ ਪਨ, ਭਨ੍ਤੇ, ਇਧੇਕਚ੍ਚਸ੍ਸ ਆਯਸ੍ਮਤੋ ਏਵਮਸ੍ਸ – ‘ਕੇਵਲਂ ਸਦ੍ਧਾਮਤ੍ਤਕਂ ਨੂਨ ਅਯਮਾਯਸ੍ਮਾ ਨਿਸ੍ਸਾਯ ਨੇਕ੍ਖਮ੍ਮਾਧਿਮੁਤ੍ਤੋ’ਤਿ, ਨ ਖੋ ਪਨੇਤਂ, ਭਨ੍ਤੇ, ਏਵਂ ਦਟ੍ਠਬ੍ਬਂ. ਖੀਣਾਸਵੋ, ਭਨ੍ਤੇ, ਭਿਕ੍ਖੁ, ਵੁਸਿਤਵਾ, ਕਤਕਰਣੀਯੋ, ਕਰਣੀਯਮਤ੍ਤਾਨਂ ਅਸਮਨੁਪਸ੍ਸਨ੍ਤੋ ਕਤਸ੍ਸ ਵਾ ਪਟਿਚਯਂ ਖਯਾ ਰਾਗਸ੍ਸ ਵੀਤਰਾਗਤ੍ਤਾ ਨੇਕ੍ਖਮ੍ਮਾਧਿਮੁਤ੍ਤੋ ਹੋਤਿ, ਖਯਾ ਦੋਸਸ੍ਸ ਵੀਤਦੋਸਤ੍ਤਾ ਨੇਕ੍ਖਮ੍ਮਾਧਿਮੁਤ੍ਤੋ ਹੋਤਿ, ਖਯਾ ਮੋਹਸ੍ਸ ਵੀਤਮੋਹਤ੍ਤਾ ਨੇਕ੍ਖਮ੍ਮਾਧਿਮੁਤ੍ਤੋ ਹੋਤਿ.

‘‘ਸਿਯਾ ਖੋ ਪਨ, ਭਨ੍ਤੇ, ਇਧੇਕਚ੍ਚਸ੍ਸ ਆਯਸ੍ਮਤੋ ਏਵਮਸ੍ਸ – ‘ਲਾਭਸਕ੍ਕਾਰਸਿਲੋਕਂ ਨੂਨ ਅਯਮਾਯਸ੍ਮਾ ਨਿਕਾਮਯਮਾਨੋ ਪਵਿਵੇਕਾਧਿਮੁਤ੍ਤੋ’ਤਿ. ਨ ਖੋ ਪਨੇਤਂ, ਭਨ੍ਤੇ, ਏਵਂ ਦਟ੍ਠਬ੍ਬਂ. ਖੀਣਾਸਵੋ, ਭਨ੍ਤੇ, ਭਿਕ੍ਖੁ, ਵੁਸਿਤਵਾ, ਕਤਕਰਣੀਯੋ, ਕਰਣੀਯਮਤ੍ਤਾਨਂ [ਕਰਣੀਯਂ ਅਤ੍ਤਨੋ (ਅਙ੍ਗੁਤ੍ਤਰਪਾਲ਼ਿਯਂ)] ਅਸਮਨੁਪਸ੍ਸਨ੍ਤੋ ਕਤਸ੍ਸ ਵਾ ਪਟਿਚਯਂ, ਖਯਾ ਰਾਗਸ੍ਸ ਵੀਤਰਾਗਤ੍ਤਾ ਪਵਿਵੇਕਾਧਿਮੁਤ੍ਤੋ ਹੋਤਿ, ਖਯਾ ਦੋਸਸ੍ਸ ਵੀਤਦੋਸਤ੍ਤਾ ਪਵਿਵੇਕਾਧਿਮੁਤ੍ਤੋ ਹੋਤਿ, ਖਯਾ ਮੋਹਸ੍ਸ ਵੀਤਮੋਹਤ੍ਤਾ ਪਵਿਵੇਕਾਧਿਮੁਤ੍ਤੋ ਹੋਤਿ.

‘‘ਸਿਯਾ ਖੋ ਪਨ, ਭਨ੍ਤੇ, ਇਧੇਕਚ੍ਚਸ੍ਸ ਆਯਸ੍ਮਤੋ ਏਵਮਸ੍ਸ – ‘ਸੀਲਬ੍ਬਤਪਰਾਮਾਸਂ ਨੂਨ ਅਯਮਾਯਸ੍ਮਾ ਸਾਰਤੋ ਪਚ੍ਚਾਗਚ੍ਛਨ੍ਤੋ ਅਬ੍ਯਾਪਜ੍ਜਾਧਿਮੁਤ੍ਤੋ’ਤਿ. ਨ ਖੋ ਪਨੇਤਂ, ਭਨ੍ਤੇ, ਏਵਂ ਦਟ੍ਠਬ੍ਬਂ. ਖੀਣਾਸਵੋ, ਭਨ੍ਤੇ, ਭਿਕ੍ਖੁ, ਵੁਸਿਤਵਾ, ਕਤਕਰਣੀਯੋ, ਕਰਣੀਯਮਤ੍ਤਾਨਂ ਅਸਮਨੁਪਸ੍ਸਨ੍ਤੋ ਕਤਸ੍ਸ ਵਾ ਪਟਿਚਯਂ, ਖਯਾ ਰਾਗਸ੍ਸ ਵੀਤਰਾਗਤ੍ਤਾ ਅਬ੍ਯਾਪਜ੍ਜਾਧਿਮੁਤ੍ਤੋ ਹੋਤਿ, ਖਯਾ ਦੋਸਸ੍ਸ ਵੀਤਦੋਸਤ੍ਤਾ ਅਬ੍ਯਾਪਜ੍ਜਾਧਿਮੁਤ੍ਤੋ ਹੋਤਿ, ਖਯਾ ਮੋਹਸ੍ਸ ਵੀਤਮੋਹਤ੍ਤਾ ਅਬ੍ਯਾਪਜ੍ਜਾਧਿਮੁਤ੍ਤੋ ਹੋਤਿ.

‘‘ਖਯਾ ਰਾਗਸ੍ਸ ਵੀਤਰਾਗਤ੍ਤਾ ਉਪਾਦਾਨਕ੍ਖਯਾਧਿਮੁਤ੍ਤੋ ਹੋਤਿ, ਖਯਾ ਦੋਸਸ੍ਸ ਵੀਤਦੋਸਤ੍ਤਾ ਉਪਾਦਾਨਕ੍ਖਯਾਧਿਮੁਤ੍ਤੋ ਹੋਤਿ, ਖਯਾ ਮੋਹਸ੍ਸ ਵੀਤਮੋਹਤ੍ਤਾ ਉਪਾਦਾਨਕ੍ਖਯਾਧਿਮੁਤ੍ਤੋ ਹੋਤਿ.

‘‘ਖਯਾ ਰਾਗਸ੍ਸ ਵੀਤਰਾਗਤ੍ਤਾ ਤਣ੍ਹਕ੍ਖਯਾਧਿਮੁਤ੍ਤੋ ਹੋਤਿ, ਖਯਾ ਦੋਸਸ੍ਸ ਵੀਤਦੋਸਤ੍ਤਾ ਤਣ੍ਹਕ੍ਖਯਾਧਿਮੁਤ੍ਤੋ ਹੋਤਿ, ਖਯਾ ਮੋਹਸ੍ਸ ਵੀਤਮੋਹਤ੍ਤਾ ਤਣ੍ਹਕ੍ਖਯਾਧਿਮੁਤ੍ਤੋ ਹੋਤਿ.

‘‘ਖਯਾ ਰਾਗਸ੍ਸ ਵੀਤਰਾਗਤ੍ਤਾ ਅਸਮ੍ਮੋਹਾਧਿਮੁਤ੍ਤੋ ਹੋਤਿ, ਖਯਾ ਦੋਸਸ੍ਸ ਵੀਤਦੋਸਤ੍ਤਾ ਅਸਮ੍ਮੋਹਾਧਿਮੁਤ੍ਤੋ ਹੋਤਿ, ਖਯਾ ਮੋਹਸ੍ਸ ਵੀਤਮੋਹਤ੍ਤਾ ਅਸਮ੍ਮੋਹਾਧਿਮੁਤ੍ਤੋ ਹੋਤਿ.

‘‘ਏਵਂ ਸਮ੍ਮਾ ਵਿਮੁਤ੍ਤਚਿਤ੍ਤਸ੍ਸ, ਭਨ੍ਤੇ, ਭਿਕ੍ਖੁਨੋ ਭੁਸਾ ਚੇਪਿ ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਚਕ੍ਖੁਸ੍ਸ ਆਪਾਥਂ ਆਗਚ੍ਛਨ੍ਤਿ, ਨੇਵਸ੍ਸ ਚਿਤ੍ਤਂ ਪਰਿਯਾਦਿਯਨ੍ਤਿ. ਅਮਿਸ੍ਸੀਕਤਮੇਵਸ੍ਸ ਚਿਤ੍ਤਂ ਹੋਤਿ, ਠਿਤਂ, ਆਨੇਞ੍ਜਪ੍ਪਤ੍ਤਂ, ਵਯਞ੍ਚਸ੍ਸਾਨੁਪਸ੍ਸਤਿ. ਭੁਸਾ ਚੇਪਿ ਸੋਤਵਿਞ੍ਞੇਯ੍ਯਾ ਸਦ੍ਦਾ…ਪੇ… ਘਾਨਵਿਞ੍ਞੇਯ੍ਯਾ ਗਨ੍ਧਾ… ਜਿਵ੍ਹਾਵਿਞ੍ਞੇਯ੍ਯਾ ਰਸਾ… ਕਾਯਵਿਞ੍ਞੇਯ੍ਯਾ ਫੋਟ੍ਠਬ੍ਬਾ… ਮਨੋਵਿਞ੍ਞੇਯ੍ਯਾ ਧਮ੍ਮਾ ਮਨਸ੍ਸ ਆਪਾਥਂ ਆਗਚ੍ਛਨ੍ਤਿ, ਨੇਵਸ੍ਸ ਚਿਤ੍ਤਂ ਪਰਿਯਾਦਿਯਨ੍ਤਿ; ਅਮਿਸ੍ਸੀਕਤਮੇਵਸ੍ਸ ਚਿਤ੍ਤਂ ਹੋਤਿ, ਠਿਤਂ, ਆਨੇਞ੍ਜਪ੍ਪਤ੍ਤਂ, ਵਯਞ੍ਚਸ੍ਸਾਨੁਪਸ੍ਸਤਿ. ਸੇਯ੍ਯਥਾਪਿ, ਭਨ੍ਤੇ, ਸੇਲੋ ਪਬ੍ਬਤੋ ਅਚ੍ਛਿਦ੍ਦੋ ਅਸੁਸਿਰੋ ਏਕਗ੍ਘਨੋ, ਪੁਰਤ੍ਥਿਮਾਯ ਚੇਪਿ ਦਿਸਾਯ ਆਗਚ੍ਛੇਯ੍ਯ ਭੁਸਾ ਵਾਤਵੁਟ੍ਠਿ, ਨੇਵ ਨਂ ਸਙ੍ਕਮ੍ਪੇਯ੍ਯ ਨ ਸਮ੍ਪਕਮ੍ਪੇਯ੍ਯ ਨ ਸਮ੍ਪਵੇਧੇਯ੍ਯ; ਪਚ੍ਛਿਮਾਯ ਚੇਪਿ ਦਿਸਾਯ ਆਗਚ੍ਛੇਯ੍ਯ ਭੁਸਾ ਵਾਤਵੁਟ੍ਠਿ…ਪੇ… ਉਤ੍ਤਰਾਯ ਚੇਪਿ ਦਿਸਾਯ…ਪੇ… ਦਕ੍ਖਿਣਾਯ ਚੇਪਿ ਦਿਸਾਯ ਆਗਚ੍ਛੇਯ੍ਯ ਭੁਸਾ ਵਾਤਵੁਟ੍ਠਿ, ਨੇਵ ਨਂ ਸਙ੍ਕਮ੍ਪੇਯ੍ਯ ਨ ਸਮ੍ਪਕਮ੍ਪੇਯ੍ਯ ਨ ਸਮ੍ਪਵੇਧੇਯ੍ਯ, ਏਵਮੇਵ ਖੋ, ਭਨ੍ਤੇ, ਏਵਂ ਸਮ੍ਮਾ ਵਿਮੁਤ੍ਤਚਿਤ੍ਤਸ੍ਸ ਭਿਕ੍ਖੁਨੋ ਭੁਸਾ ਚੇਪਿ ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਚਕ੍ਖੁਸ੍ਸ ਆਪਾਥਂ ਆਗਚ੍ਛਨ੍ਤਿ, ਨੇਵਸ੍ਸ ਚਿਤ੍ਤਂ ਪਰਿਯਾਦਿਯਨ੍ਤਿ; ਅਮਿਸ੍ਸੀਕਤਮੇਵਸ੍ਸ ਚਿਤ੍ਤਂ ਹੋਤਿ, ਠਿਤਂ, ਆਨੇਞ੍ਜਪ੍ਪਤ੍ਤਂ, ਵਯਞ੍ਚਸ੍ਸਾਨੁਪਸ੍ਸਤਿ. ਭੁਸਾ ਚੇਪਿ ਸੋਤਵਿਞ੍ਞੇਯ੍ਯਾ ਸਦ੍ਦਾ…ਪੇ… ਘਾਨਵਿਞ੍ਞੇਯ੍ਯਾ ਗਨ੍ਧਾ… ਜਿਵ੍ਹਾਵਿਞ੍ਞੇਯ੍ਯਾ ਰਸਾ… ਕਾਯਵਿਞ੍ਞੇਯ੍ਯਾ ਫੋਟ੍ਠਬ੍ਬਾ… ਮਨੋਵਿਞ੍ਞੇਯ੍ਯਾ ਧਮ੍ਮਾ ਮਨਸ੍ਸ ਆਪਾਥਂ ਆਗਚ੍ਛਨ੍ਤਿ, ਨੇਵਸ੍ਸ ਚਿਤ੍ਤਂ ਪਰਿਯਾਦਿਯਨ੍ਤਿ; ਅਮਿਸ੍ਸੀਕਤਮੇਵਸ੍ਸ ਚਿਤ੍ਤਂ ਹੋਤਿ, ਠਿਤਂ, ਆਨੇਞ੍ਜਪ੍ਪਤ੍ਤਂ, ਵਯਞ੍ਚਸ੍ਸਾਨੁਪਸ੍ਸਤੀ’’ਤਿ.

ਨੇਕ੍ਖਮ੍ਮਂ ਅਧਿਮੁਤ੍ਤਸ੍ਸ, ਪਵਿਵੇਕਞ੍ਚ ਚੇਤਸੋ;

ਅਬ੍ਯਾਪਜ੍ਜਾਧਿਮੁਤ੍ਤਸ੍ਸ, ਉਪਾਦਾਨਕ੍ਖਯਸ੍ਸ ਚ.

ਤਣ੍ਹਕ੍ਖਯਾਧਿਮੁਤ੍ਤਸ੍ਸ, ਅਸਮ੍ਮੋਹਞ੍ਚ ਚੇਤਸੋ;

ਦਿਸ੍ਵਾ ਆਯਤਨੁਪ੍ਪਾਦਂ, ਸਮ੍ਮਾ ਚਿਤ੍ਤਂ ਵਿਮੁਚ੍ਚਤਿ.

ਤਸ੍ਸ ਸਮ੍ਮਾਵਿਮੁਤ੍ਤਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;

ਕਤਸ੍ਸ ਪਟਿਚਯੋ ਨਤ੍ਥਿ, ਕਰਣੀਯਂ ਨ ਵਿਜ੍ਜਤਿ.

ਸੇਲੋ ਯਥਾ ਏਕਗ੍ਘਨੋ, ਵਾਤੇਨ ਨ ਸਮੀਰਤਿ;

ਏਵਂ ਰੂਪਾ ਰਸਾ ਸਦ੍ਦਾ, ਗਨ੍ਧਾ ਫਸ੍ਸਾ ਚ ਕੇਵਲਾ.

ਇਟ੍ਠਾ ਧਮ੍ਮਾ ਅਨਿਟ੍ਠਾ ਚ, ਨ ਪਵੇਧੇਨ੍ਤਿ ਤਾਦਿਨੋ;

ਠਿਤਂ ਚਿਤ੍ਤਂ ਵਿਪ੍ਪਮੁਤ੍ਤਂ, ਵਯਞ੍ਚਸ੍ਸਾਨੁਪਸ੍ਸਤੀਤਿ.

ਸੋਣਕੋਲ਼ਿਵਿਸਵਤ੍ਥੁ ਨਿਟ੍ਠਿਤਂ.

੧੪੮. ਦਿਗੁਣਾਦਿਉਪਾਹਨਪਟਿਕ੍ਖੇਪੋ

੨੪੫. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਏਵਂ ਖੋ, ਭਿਕ੍ਖਵੇ, ਕੁਲਪੁਤ੍ਤਾ ਅਞ੍ਞਂ ਬ੍ਯਾਕਰੋਨ੍ਤਿ, ਅਤ੍ਥੋ ਚ ਵੁਤ੍ਤੋ, ਅਤ੍ਤਾ ਚ ਅਨੁਪਨੀਤੋ. ਅਥ ਚ, ਪਨਿਧੇਕਚ੍ਚੇ ਮੋਘਪੁਰਿਸਾ ਹਸਮਾਨਕਂ, ਮਞ੍ਞੇ, ਅਞ੍ਞਂ ਬ੍ਯਾਕਰੋਨ੍ਤਿ, ਤੇ ਪਚ੍ਛਾ ਵਿਘਾਤਂ ਆਪਜ੍ਜਨ੍ਤੀ’’ਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਸੋਣਂ ਆਮਨ੍ਤੇਸਿ – ‘‘ਤ੍ਵਂ ਖੋਸਿ, ਸੋਣ, ਸੁਖੁਮਾਲੋ. ਅਨੁਜਾਨਾਮਿ ਤੇ, ਸੋਣ, ਏਕਪਲਾਸਿਕਂ ਉਪਾਹਨ’’ਨ੍ਤਿ. ‘‘ਅਹਂ ਖੋ, ਭਨ੍ਤੇ, ਅਸੀਤਿਸਕਟਵਾਹੇ ਹਿਰਞ੍ਞਂ ਓਹਾਯ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ, ਸਤ੍ਤਹਤ੍ਥਿਕਞ੍ਚ ਅਨੀਕਂ. ਅਥਾਹਂ ਭਨ੍ਤੇ ਏਕਪਲਾਸਿਕਂ ਚੇ ਉਪਾਹਨਂ ਪਰਿਹਰਿਸ੍ਸਾਮਿ, ਤਸ੍ਸ ਮੇ ਭਵਿਸ੍ਸਨ੍ਤਿ ਵਤ੍ਤਾਰੋ ‘ਸੋਣੋ ਕੋਲ਼ਿਵਿਸੋ ਅਸੀਤਿਸਕਟਵਾਹੇ ਹਿਰਞ੍ਞਂ ਓਹਾਯ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ, ਸਤ੍ਤਹਤ੍ਥਿਕਞ੍ਚ ਅਨੀਕਂ. ਸੋ ਦਾਨਾਯਂ ਏਕਪਲਾਸਿਕਾਸੁ ਉਪਾਹਨਾਸੁ ਸਤ੍ਤੋ’ਤਿ. ਸਚੇ ਭਗਵਾ ਭਿਕ੍ਖੁਸਙ੍ਘਸ੍ਸ ਅਨੁਜਾਨਿਸ੍ਸਤਿ ਅਹਮ੍ਪਿ ਪਰਿਭੁਞ੍ਜਿਸ੍ਸਾਮਿ; ਨੋ ਚੇ ਭਗਵਾ ਭਿਕ੍ਖੁਸਙ੍ਘਸ੍ਸ ਅਨੁਜਾਨਿਸ੍ਸਤਿ, ਅਹਮ੍ਪਿ ਨ ਪਰਿਭੁਞ੍ਜਿਸ੍ਸਾਮੀ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਪਲਾਸਿਕਂ ਉਪਾਹਨਂ. ਨ, ਭਿਕ੍ਖਵੇ, ਦਿਗੁਣਾ ਉਪਾਹਨਾ ਧਾਰੇਤਬ੍ਬਾ. ਨ ਤਿਗੁਣਾ ਉਪਾਹਨਾ ਧਾਰੇਤਬ੍ਬਾ. ਨ ਗੁਣਙ੍ਗੁਣੂਪਾਹਨਾ [ਗਣਙ੍ਗਣੂਪਾਹਨਾ (ਬਹੂਸੁ)] ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਦਿਗੁਣਾਦਿਉਪਾਹਨਪਟਿਕ੍ਖੇਪੋ ਨਿਟ੍ਠਿਤੋ.

੧੪੯. ਸਬ੍ਬਨੀਲਿਕਾਦਿਪਟਿਕ੍ਖੇਪੋ

੨੪੬. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਬ੍ਬਨੀਲਿਕਾ ਉਪਾਹਨਾਯੋ ਧਾਰੇਨ੍ਤਿ…ਪੇ… ਸਬ੍ਬਪੀਤਿਕਾ ਉਪਾਹਨਾਯੋ ਧਾਰੇਨ੍ਤਿ… ਸਬ੍ਬਲੋਹਿਤਿਕਾ ਉਪਾਹਨਾਯੋ ਧਾਰੇਨ੍ਤਿ… ਸਬ੍ਬਮਞ੍ਜਿਟ੍ਠਿਕਾ [ਸਬ੍ਬਮਞ੍ਜੇਟ੍ਠਿਕਾ (ਕ.)] ਉਪਾਹਨਾਯੋ ਧਾਰੇਨ੍ਤਿ … ਸਬ੍ਬਕਣ੍ਹਾ ਉਪਾਹਨਾਯੋ ਧਾਰੇਨ੍ਤਿ… ਸਬ੍ਬਮਹਾਰਙ੍ਗਰਤ੍ਤਾ ਉਪਾਹਨਾਯੋ ਧਾਰੇਨ੍ਤਿ… ਸਬ੍ਬਮਹਾਨਾਮਰਤ੍ਤਾ ਉਪਾਹਨਾਯੋ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ, ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਬ੍ਬਨੀਲਿਕਾ ਉਪਾਹਨਾ ਧਾਰੇਤਬ੍ਬਾ…ਪੇ… ਨ ਸਬ੍ਬਪੀਤਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਸਬ੍ਬਲੋਹਿਤਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਸਬ੍ਬਮਞ੍ਜਿਟ੍ਠਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਸਬ੍ਬਕਣ੍ਹਾ ਉਪਾਹਨਾ ਧਾਰੇਤਬ੍ਬਾ, ਨ ਸਬ੍ਬਮਹਾਰਙ੍ਗਰਤ੍ਤਾ ਉਪਾਹਨਾ ਧਾਰੇਤਬ੍ਬਾ, ਨ ਸਬ੍ਬਮਹਾਨਾਮਰਤ੍ਤਾ ਉਪਾਹਨਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਨੀਲਕਵਦ੍ਧਿਕਾ [ਵਟ੍ਟਿਕਾ (ਸੀ.)] ਉਪਾਹਨਾਯੋ ਧਾਰੇਨ੍ਤਿ, ਪੀਤਕਵਦ੍ਧਿਕਾ ਉਪਾਹਨਾਯੋ ਧਾਰੇਨ੍ਤਿ, ਲੋਹਿਤਕਵਦ੍ਧਿਕਾ ਉਪਾਹਨਾਯੋ ਧਾਰੇਨ੍ਤਿ, ਮਞ੍ਜਿਟ੍ਠਿਕਵਦ੍ਧਿਕਾ ਉਪਾਹਨਾਯੋ ਧਾਰੇਨ੍ਤਿ, ਕਣ੍ਹਵਦ੍ਧਿਕਾ ਉਪਾਹਨਾਯੋ ਧਾਰੇਨ੍ਤਿ, ਮਹਾਰਙ੍ਗਰਤ੍ਤਵਦ੍ਧਿਕਾ ਉਪਾਹਨਾਯੋ ਧਾਰੇਨ੍ਤਿ, ਮਹਾਨਾਮਰਤ੍ਤਵਦ੍ਧਿਕਾ ਉਪਾਹਨਾਯੋ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ, ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਨੀਲਕਵਦ੍ਧਿਕਾ ਉਪਾਹਨਾ ਧਾਰੇਤਬ੍ਬਾ…ਪੇ… ਨ ਪੀਤਕਵਦ੍ਧਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਲੋਹਿਤਕਵਦ੍ਧਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਮਞ੍ਜਿਟ੍ਠਿਕਵਦ੍ਧਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਕਣ੍ਹਵਦ੍ਧਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਮਹਾਰਙ੍ਗਰਤ੍ਤਵਦ੍ਧਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਮਹਾਨਾਮਰਤ੍ਤਵਦ੍ਧਿਕਾ ਉਪਾਹਨਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਖਲ੍ਲਕਬਦ੍ਧਾ […ਬਨ੍ਧਾ (ਕ.)] ਉਪਾਹਨਾਯੋ ਧਾਰੇਨ੍ਤਿ…ਪੇ… ਪੁਟਬਦ੍ਧਾ ਉਪਾਹਨਾਯੋ ਧਾਰੇਨ੍ਤਿ, ਪਾਲਿਗੁਣ੍ਠਿਮਾ ਉਪਾਹਨਾਯੋ ਧਾਰੇਨ੍ਤਿ, ਤੂਲਪੁਣ੍ਣਿਕਾ ਉਪਾਹਨਾਯੋ ਧਾਰੇਨ੍ਤਿ, ਤਿਤ੍ਤਿਰਪਤ੍ਤਿਕਾ ਉਪਾਹਨਾਯੋ ਧਾਰੇਨ੍ਤਿ, ਮੇਣ੍ਡਵਿਸਾਣਵਦ੍ਧਿਕਾ ਉਪਾਹਨਾਯੋ ਧਾਰੇਨ੍ਤਿ, ਅਜਵਿਸਾਣਵਦ੍ਧਿਕਾ ਉਪਾਹਨਾਯੋ ਧਾਰੇਨ੍ਤਿ, ਵਿਚ੍ਛਿਕਾਲ਼ਿਕਾ ਉਪਾਹਨਾਯੋ ਧਾਰੇਨ੍ਤਿ, ਮੋਰਪਿਞ੍ਛ [ਮੋਰਪਿਞ੍ਜ (ਸੀ. ਸ੍ਯਾ.)] ਪਰਿਸਿਬ੍ਬਿਤਾ ਉਪਾਹਨਾਯੋ ਧਾਰੇਨ੍ਤਿ, ਚਿਤ੍ਰਾ ਉਪਾਹਨਾਯੋ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ, ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਖਲ੍ਲਕਬਦ੍ਧਾ ਉਪਾਹਨਾ ਧਾਰੇਤਬ੍ਬਾ…ਪੇ… ਨ ਪੁਟਬਦ੍ਧਾ ਉਪਾਹਨਾ ਧਾਰੇਤਬ੍ਬਾ, ਨ ਪਾਲਿਗੁਣ੍ਠਿਮਾ ਉਪਾਹਨਾ ਧਾਰੇਤਬ੍ਬਾ, ਨ ਤੂਲਪੁਣ੍ਣਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਤਿਤ੍ਤਿਰਪਤ੍ਤਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਮੇਣ੍ਡਵਿਸਾਣਵਦ੍ਧਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਅਜਵਿਸਾਣਵਦ੍ਧਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਵਿਚ੍ਛਿਕਾਲ਼ਿਕਾ ਉਪਾਹਨਾ ਧਾਰੇਤਬ੍ਬਾ, ਨ ਮੋਰਪਿਞ੍ਛਪਰਿਸਿਬ੍ਬਿਤਾ ਉਪਾਹਨਾ ਧਾਰੇਤਬ੍ਬਾ, ਨ ਚਿਤ੍ਰਾ ਉਪਾਹਨਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸੀਹਚਮ੍ਮਪਰਿਕ੍ਖਟਾ ਉਪਾਹਨਾਯੋ ਧਾਰੇਨ੍ਤਿ…ਪੇ… ਬ੍ਯਗ੍ਘਚਮ੍ਮਪਰਿਕ੍ਖਟਾ ਉਪਾਹਨਾਯੋ ਧਾਰੇਨ੍ਤਿ, ਦੀਪਿਚਮ੍ਮਪਰਿਕ੍ਖਟਾ ਉਪਾਹਨਾਯੋ ਧਾਰੇਨ੍ਤਿ, ਅਜਿਨਚਮ੍ਮਪਰਿਕ੍ਖਟਾ ਉਪਾਹਨਾਯੋ ਧਾਰੇਨ੍ਤਿ, ਉਦ੍ਦਚਮ੍ਮਪਰਿਕ੍ਖਟਾ ਉਪਾਹਨਾਯੋ ਧਾਰੇਨ੍ਤਿ, ਮਜ੍ਜਾਰਚਮ੍ਮਪਰਿਕ੍ਖਟਾ ਉਪਾਹਨਾਯੋ ਧਾਰੇਨ੍ਤਿ, ਕਾਲ਼ਕਚਮ੍ਮਪਰਿਕ੍ਖਟਾ ਉਪਾਹਨਾਯੋ ਧਾਰੇਨ੍ਤਿ, ਲੁਵਕਚਮ੍ਮਪਰਿਕ੍ਖਟਾ [ਉਲੂਕਚਮ੍ਮਪਰਿਕ੍ਖਟਾ (ਯੋਜਨਾ)] ਉਪਾਹਨਾਯੋ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ, ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸੀਹਚਮ੍ਮਪਰਿਕ੍ਖਟਾ ਉਪਾਹਨਾ ਧਾਰੇਤਬ੍ਬਾ…ਪੇ… ਨ ਬ੍ਯਗ੍ਘਚਮ੍ਮਪਰਿਕ੍ਖਟਾ ਉਪਾਹਨਾ ਧਾਰੇਤਬ੍ਬਾ, ਨ ਦੀਪਿਚਮ੍ਮਪਰਿਕ੍ਖਟਾ ਉਪਾਹਨਾ ਧਾਰੇਤਬ੍ਬਾ, ਨ ਅਜਿਨਚਮ੍ਮਪਰਿਕ੍ਖਟਾ ਉਪਾਹਨਾ ਧਾਰੇਤਬ੍ਬਾ, ਨ ਉਦ੍ਦਚਮ੍ਮਪਰਿਕ੍ਖਟਾ ਉਪਾਹਨਾ ਧਾਰੇਤਬ੍ਬਾ, ਨ ਮਜ੍ਜਾਰਚਮ੍ਮਪਰਿਕ੍ਖਟਾ ਉਪਾਹਨਾ ਧਾਰੇਤਬ੍ਬਾ, ਨ ਕਾਲ਼ਕਚਮ੍ਮਪਰਿਕ੍ਖਟਾ ਉਪਾਹਨਾ ਧਾਰੇਤਬ੍ਬਾ, ਨ ਲੁਵਕਚਮ੍ਮਪਰਿਕ੍ਖਟਾ ਉਪਾਹਨਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਸਬ੍ਬਨੀਲਿਕਾਦਿਪਟਿਕ੍ਖੇਪੋ ਨਿਟ੍ਠਿਤੋ.

੧੫੦. ਓਮੁਕ੍ਕਗੁਣਙ੍ਗੁਣੂਪਾਹਨਾਨੁਜਾਨਨਾ

੨੪੭. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹਂ ਪਿਣ੍ਡਾਯ ਪਾਵਿਸਿ, ਅਞ੍ਞਤਰੇਨ ਭਿਕ੍ਖੁਨਾ ਪਚ੍ਛਾਸਮਣੇਨ. ਅਥ ਖੋ ਸੋ ਭਿਕ੍ਖੁ ਖਞ੍ਜਮਾਨੋ ਭਗਵਨ੍ਤਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿ. ਅਦ੍ਦਸਾ ਖੋ ਅਞ੍ਞਤਰੋ ਉਪਾਸਕੋ ਗੁਣਙ੍ਗੁਣੂਪਾਹਨਾ ਆਰੋਹਿਤ੍ਵਾ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ; ਦਿਸ੍ਵਾ ਉਪਾਹਨਾ ਆਰੋਹਿਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਅਭਿਵਾਦੇਤ੍ਵਾ ਏਤਦਵੋਚ – ‘‘ਕਿਸ੍ਸ, ਭਨ੍ਤੇ, ਅਯ੍ਯੋ ਖਞ੍ਜਤੀ’’ਤਿ? ‘‘ਪਾਦਾ ਮੇ, ਆਵੁਸੋ, ਫਲਿਤਾ’’ਤਿ [ਫਾਲਿਤਾਤਿ (ਕ.)]. ‘‘ਹਨ੍ਦ, ਭਨ੍ਤੇ, ਉਪਾਹਨਾਯੋ’’ਤਿ. ‘‘ਅਲਂ, ਆਵੁਸੋ, ਪਟਿਕ੍ਖਿਤ੍ਤਾ ਭਗਵਤਾ ਗੁਣਙ੍ਗੁਣੂਪਾਹਨਾ’’ਤਿ. ‘‘ਗਣ੍ਹਾਹੇਤਾ, ਭਿਕ੍ਖੁ, ਉਪਾਹਨਾਯੋ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਓਮੁਕ੍ਕਂ ਗੁਣਙ੍ਗੁਣੂਪਾਹਨਂ. ਨ, ਭਿਕ੍ਖਵੇ, ਨਵਾ ਗੁਣਙ੍ਗੁਣੂਪਾਹਨਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਓਮੁਕ੍ਕਗੁਣਙ੍ਗੁਣੂਪਾਹਨਾਨੁਜਾਨਨਾ ਨਿਟ੍ਠਿਤਾ.

੧੫੧. ਅਜ੍ਝਾਰਾਮੇ ਉਪਾਹਨਪਟਿਕ੍ਖੇਪੋ

੨੪੮. ਤੇਨ ਖੋ ਪਨ ਸਮਯੇਨ ਭਗਵਾ ਅਜ੍ਝੋਕਾਸੇ ਅਨੁਪਾਹਨੋ ਚਙ੍ਕਮਤਿ. ਸਤ੍ਥਾ ਅਨੁਪਾਹਨੋ ਚਙ੍ਕਮਤੀਤਿ, ਥੇਰਾਪਿ ਭਿਕ੍ਖੂ ਅਨੁਪਾਹਨਾ ਚਙ੍ਕਮਨ੍ਤਿ. ਛਬ੍ਬਗ੍ਗਿਯਾ ਭਿਕ੍ਖੂ, ਸਤ੍ਥਰਿ ਅਨੁਪਾਹਨੇ ਚਙ੍ਕਮਮਾਨੇ, ਥੇਰੇਸੁਪਿ ਭਿਕ੍ਖੂਸੁ ਅਨੁਪਾਹਨੇਸੁ ਚਙ੍ਕਮਮਾਨੇਸੁ, ਸਉਪਾਹਨਾ ਚਙ੍ਕਮਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ, ਸਤ੍ਥਰਿ ਅਨੁਪਾਹਨੇ ਚਙ੍ਕਮਮਾਨੇ, ਥੇਰੇਸੁਪਿ ਭਿਕ੍ਖੂਸੁ ਅਨੁਪਾਹਨੇਸੁ ਚਙ੍ਕਮਮਾਨੇਸੁ, ਸਉਪਾਹਨਾ ਚਙ੍ਕਮਿਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ, ਸਤ੍ਥਰਿ ਅਨੁਪਾਹਨੇ ਚਙ੍ਕਮਮਾਨੇ, ਥੇਰੇਸੁਪਿ ਭਿਕ੍ਖੂਸੁ ਅਨੁਪਾਹਨੇਸੁ ਚਙ੍ਕਮਮਾਨੇਸੁ, ਸਉਪਾਹਨਾ ਚਙ੍ਕਮਨ੍ਤੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ, ਸਤ੍ਥਰਿ ਅਨੁਪਾਹਨੇ ਚਙ੍ਕਮਮਾਨੇ, ਥੇਰੇਸੁਪਿ ਭਿਕ੍ਖੂਸੁ ਅਨੁਪਾਹਨੇਸੁ ਚਙ੍ਕਮਮਾਨੇਸੁ, ਸਉਪਾਹਨਾ ਚਙ੍ਕਮਿਸ੍ਸਨ੍ਤਿ. ਇਮੇ ਹਿ ਨਾਮ, ਭਿਕ੍ਖਵੇ, ਗਿਹੀ ਓਦਾਤਵਤ੍ਥਵਸਨਕਾ ਅਭਿਜੀਵਨਿਕਸ੍ਸ ਸਿਪ੍ਪਸ੍ਸ ਕਾਰਣਾ ਆਚਰਿਯੇਸੁ ਸਗਾਰਵਾ ਸਪ੍ਪਤਿਸ੍ਸਾ ਸਭਾਗਵੁਤ੍ਤਿਕਾ ਵਿਹਰਿਸ੍ਸਨ੍ਤਿ. ਇਧ ਖੋ ਤਂ, ਭਿਕ੍ਖਵੇ, ਸੋਭੇਥ, ਯਂ ਤੁਮ੍ਹੇ ਏਵਂ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਪਬ੍ਬਜਿਤਾ ਸਮਾਨਾ ਆਚਰਿਯੇਸੁ ਆਚਰਿਯਮਤ੍ਤੇਸੁ ਉਪਜ੍ਝਾਯੇਸੁ ਉਪਜ੍ਝਾਯਮਤ੍ਤੇਸੁ ਅਗਾਰਵਾ ਅਪ੍ਪਤਿਸ੍ਸਾ ਅਸਭਾਗਵੁਤ੍ਤਿਕਾ [ਸਗਾਰਵਾ ਸਗ੍ਗਤਿਸ੍ਸਾ ਸਭਾਗਵੁਤ੍ਤਿਕਾ (ਕ.)] ਵਿਹਰੇਯ੍ਯਾਥ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਆਚਰਿਯੇਸੁ ਆਚਰਿਯਮਤ੍ਤੇਸੁ ਉਪਜ੍ਝਾਯੇਸੁ ਉਪਜ੍ਝਾਯਮਤ੍ਤੇਸੁ ਅਨੁਪਾਹਨੇਸੁ ਚਙ੍ਕਮਮਾਨੇਸੁ ਸਉਪਾਹਨੇਨ ਚਙ੍ਕਮਿਤਬ੍ਬਂ. ਯੋ ਚਙ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਅਜ੍ਝਾਰਾਮੇ ਉਪਾਹਨਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੨੪੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਪਾਦਖਿਲਾਬਾਧੋ ਹੋਤਿ. ਤਂ ਭਿਕ੍ਖੂ ਪਰਿਗ੍ਗਹੇਤ੍ਵਾ ਉਚ੍ਚਾਰਮ੍ਪਿ ਪਸ੍ਸਾਵਮ੍ਪਿ ਨਿਕ੍ਖਾਮੇਨ੍ਤਿ. ਅਦ੍ਦਸਾ ਖੋ ਭਗਵਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤੇ ਭਿਕ੍ਖੂ ਤਂ ਭਿਕ੍ਖੁਂ ਪਰਿਗ੍ਗਹੇਤ੍ਵਾ ਉਚ੍ਚਾਰਮ੍ਪਿ ਪਸ੍ਸਾਵਮ੍ਪਿ ਨਿਕ੍ਖਾਮੇਨ੍ਤੇ, ਦਿਸ੍ਵਾਨ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਿਂ ਇਮਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਆਬਾਧੋ’’ਤਿ? ‘‘ਇਮਸ੍ਸ, ਭਨ੍ਤੇ, ਆਯਸ੍ਮਤੋ ਪਾਦਖਿਲਾਬਾਧੋ; ਇਮਂ ਮਯਂ ਪਰਿਗ੍ਗਹੇਤ੍ਵਾ ਉਚ੍ਚਾਰਮ੍ਪਿ ਪਸ੍ਸਾਵਮ੍ਪਿ ਨਿਕ੍ਖਾਮੇਮਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਯਸ੍ਸ ਪਾਦਾ ਵਾ ਦੁਕ੍ਖਾ, ਪਾਦਾ ਵਾ ਫਲਿਤਾ, ਪਾਦਖਿਲੋ ਵਾ ਆਬਾਧੋ [ਪਾਦਖਿਲਾਬਾਧੋ ਵਾ (ਸ੍ਯਾ.)] ਉਪਾਹਨਂ ਧਾਰੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਧੋਤੇਹਿ ਪਾਦੇਹਿ ਮਞ੍ਚਮ੍ਪਿ ਪੀਠਮ੍ਪਿ ਅਭਿਰੁਹਨ੍ਤਿ; ਚੀਵਰਮ੍ਪਿ ਸੇਨਾਸਨਮ੍ਪਿ ਦੁਸ੍ਸਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ‘ਇਦਾਨਿ ਮਞ੍ਚਂ ਵਾ ਪੀਠਂ ਵਾ ਅਭਿਰੁਹਿਸ੍ਸਾਮੀ’’ਤਿ ਉਪਾਹਨਂ ਧਾਰੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਰਤ੍ਤਿਯਾ ਉਪੋਸਥਗ੍ਗਮ੍ਪਿ ਸਨ੍ਨਿਸਜ੍ਜਮ੍ਪਿ ਗਚ੍ਛਨ੍ਤਾ ਅਨ੍ਧਕਾਰੇ ਖਾਣੁਮ੍ਪਿ ਕਣ੍ਟਕਮ੍ਪਿ ਅਕ੍ਕਮਨ੍ਤਿ; ਪਾਦਾ ਦੁਕ੍ਖਾ ਹੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਜ੍ਝਾਰਾਮੇ ਉਪਾਹਨਂ ਧਾਰੇਤੁਂ, ਉਕ੍ਕਂ, ਪਦੀਪਂ, ਕਤ੍ਤਰਦਣ੍ਡਨ੍ਤਿ.

ਅਜ੍ਝਾਰਾਮੇ ਉਪਾਹਨਪਟਿਕ੍ਖੇਪੋ ਨਿਟ੍ਠਿਤੋ.

੧੫੨. ਕਟ੍ਠਪਾਦੁਕਾਦਿਪਟਿਕ੍ਖੇਪੋ

੨੫੦. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਕਟ੍ਠਪਾਦੁਕਾਯੋ ਅਭਿਰੁਹਿਤ੍ਵਾ ਅਜ੍ਝੋਕਾਸੇ ਚਙ੍ਕਮਨ੍ਤਿ, ਉਚ੍ਚਾਸਦ੍ਦਾ ਮਹਾਸਦ੍ਦਾ ਖਟਖਟਸਦ੍ਦਾ, ਅਨੇਕਵਿਹਿਤਂ ਤਿਰਚ੍ਛਾਨਕਥਂ ਕਥੇਨ੍ਤਾ, ਸੇਯ੍ਯਥਿਦਂ [ਇਮਾ ਤਿਰਚ੍ਛਾਨਕਥਾਯੋ ਪਾਚਿ. ੫੦੮; ਦੀ. ਨਿ. ੧.੭; ਮ. ਨਿ. ੨.੨੨੩; ਸਂ. ਨਿ. ੫.੧੦੮੦; ਅ. ਨਿ. ੧੦.੬੯ ਆਦਯੋ] – ਰਾਜਕਥਂ, ਚੋਰਕਥਂ, ਮਹਾਮਤ੍ਤਕਥਂ, ਸੇਨਾਕਥਂ, ਭਯਕਥਂ, ਯੁਦ੍ਧਕਥਂ, ਅਨ੍ਨਕਥਂ, ਪਾਨਕਥਂ, ਵਤ੍ਥਕਥਂ, ਸਯਨਕਥਂ, ਮਾਲਾਕਥਂ, ਗਨ੍ਧਕਥਂ, ਞਾਤਿਕਥਂ, ਯਾਨਕਥਂ, ਗਾਮਕਥਂ, ਨਿਗਮਕਥਂ, ਨਗਰਕਥਂ, ਜਨਪਦਕਥਂ, ਇਤ੍ਥਿਕਥਂ [ਇਤ੍ਥਿਕਥਂ ਪੁਰਿਸਕਥਂ (ਕ.)], ਸੂਰਕਥਂ, ਵਿਸਿਖਾਕਥਂ, ਕੁਮ੍ਭਟ੍ਠਾਨਕਥਂ, ਪੁਬ੍ਬਪੇਤਕਥਂ, ਨਾਨਤ੍ਤਕਥਂ, ਲੋਕਕ੍ਖਾਯਿਕਂ, ਸਮੁਦ੍ਦਕ੍ਖਾਯਿਕਂ, ਇਤਿਭਵਾਭਵਕਥਂ ਇਤਿ ਵਾ; ਕੀਟਕਮ੍ਪਿ ਅਕ੍ਕਮਿਤ੍ਵਾ ਮਾਰੇਨ੍ਤਿ, ਭਿਕ੍ਖੂਪਿ ਸਮਾਧਿਮ੍ਹਾ ਚਾਵੇਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਕਟ੍ਠਪਾਦੁਕਾਯੋ ਅਭਿਰੁਹਿਤ੍ਵਾ ਅਜ੍ਝੋਕਾਸੇ ਚਙ੍ਕਮਿਸ੍ਸਨ੍ਤਿ, ਉਚ੍ਚਾਸਦ੍ਦਾ ਮਹਾਸਦ੍ਦਾ ਖਟਖਟਸਦ੍ਦਾ ਅਨੇਕਵਿਹਿਤਂ ਤਿਰਚ੍ਛਾਨਕਥਂ ਕਥੇਨ੍ਤਾ, ਸੇਯ੍ਯਥਿਦਂ – ਰਾਜਕਥਂ, ਚੋਰਕਥਂ…ਪੇ… ਇਤਿਭਵਾਭਵਕਥਂ ਇਤਿ ਵਾ, ਕੀਟਕਮ੍ਪਿ ਅਕ੍ਕਮਿਤ੍ਵਾ ਮਾਰੇਸ੍ਸਨ੍ਤਿ, ਭਿਕ੍ਖੂਪਿ ਸਮਾਧਿਮ੍ਹਾ ਚਾਵੇਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਕਟ੍ਠਪਾਦੁਕਾਯੋ ਅਭਿਰੁਹਿਤ੍ਵਾ ਅਜ੍ਝੋਕਾਸੇ ਚਙ੍ਕਮਨ੍ਤਿ, ਉਚ੍ਚਾਸਦ੍ਦਾ ਮਹਾਸਦ੍ਦਾ ਖਟਖਟਸਦ੍ਦਾ, ਅਨੇਕਵਿਹਿਤਂ ਤਿਰਚ੍ਛਾਨਕਥਂ ਕਥੇਨ੍ਤਾ, ਸੇਯ੍ਯਥਿਦਂ, – ਰਾਜਕਥਂ, ਚੋਰਕਥਂ…ਪੇ… ਇਤਿਭਵਾਭਵਕਥਂ ਇਤਿ ਵਾ, ਕੀਟਕਮ੍ਪਿ ਅਕ੍ਕਮਿਤ੍ਵਾ ਮਾਰੇਨ੍ਤਿ, ਭਿਕ੍ਖੂਪਿ ਸਮਾਧਿਮ੍ਹਾ ਚਾਵੇਨ੍ਤੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਕਟ੍ਠਪਾਦੁਕਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਬਾਰਾਣਸੀ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਬਾਰਾਣਸੀ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਬਾਰਾਣਸਿਯਂ ਵਿਹਰਤਿ ਇਸਿਪਤਨੇ ਮਿਗਦਾਯੇ. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ – ਭਗਵਤਾ ਕਟ੍ਠਪਾਦੁਕਾ ਪਟਿਕ੍ਖਿਤ੍ਤਾਤਿ – ਤਾਲਤਰੁਣੇ ਛੇਦਾਪੇਤ੍ਵਾ ਤਾਲਪਤ੍ਤਪਾਦੁਕਾਯੋ ਧਾਰੇਨ੍ਤਿ; ਤਾਨਿ ਤਾਲਤਰੁਣਾਨਿ ਛਿਨ੍ਨਾਨਿ ਮਿਲਾਯਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਤਾਲਤਰੁਣੇ ਛੇਦਾਪੇਤ੍ਵਾ ਤਾਲਪਤ੍ਤਪਾਦੁਕਾਯੋ ਧਾਰੇਸ੍ਸਨ੍ਤਿ; ਤਾਨਿ ਤਾਲਤਰੁਣਾਨਿ ਛਿਨ੍ਨਾਨਿ ਮਿਲਾਯਨ੍ਤਿ; ਏਕਿਨ੍ਦ੍ਰਿਯਂ ਸਮਣਾ ਸਕ੍ਯਪੁਤ੍ਤਿਯਾ ਜੀਵਂ ਵਿਹੇਠੇਨ੍ਤੀ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਤਾਲਤਰੁਣੇ ਛੇਦਾਪੇਤ੍ਵਾ ਤਾਲਪਤ੍ਤਪਾਦੁਕਾਯੋ ਧਾਰੇਨ੍ਤਿ; ਤਾਨਿ ਤਾਲਤਰੁਣਾਨਿ ਛਿਨ੍ਨਾਨਿ ਮਿਲਾਯਨ੍ਤੀ’’ਤਿ? ਸਚ੍ਚਂ ਭਗਵਾਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਤਾਲਤਰੁਣੇ ਛੇਦਾਪੇਤ੍ਵਾ ਤਾਲਪਤ੍ਤਪਾਦੁਕਾਯੋ ਧਾਰੇਸ੍ਸਨ੍ਤਿ; ਤਾਨਿ ਤਾਲਤਰੁਣਾਨਿ ਛਿਨ੍ਨਾਨਿ ਮਿਲਾਯਨ੍ਤਿ. ਜੀਵਸਞ੍ਞਿਨੋ ਹਿ, ਭਿਕ੍ਖਵੇ, ਮਨੁਸ੍ਸਾ ਰੁਕ੍ਖਸ੍ਮਿਂ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਤਾਲਪਤ੍ਤਪਾਦੁਕਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ‘ਭਗਵਤਾ ਤਾਲਪਤ੍ਤਪਾਦੁਕਾ ਪਟਿਕ੍ਖਿਤ੍ਤਾ’ਤਿ ਵੇਲ਼ੁਤਰੁਣੇ ਛੇਦਾਪੇਤ੍ਵਾ ਵੇਲ਼ੁਪਤ੍ਤਪਾਦੁਕਾਯੋ ਧਾਰੇਨ੍ਤਿ. ਤਾਨਿ ਵੇਲ਼ੁਤਰੁਣਾਨਿ ਛਿਨ੍ਨਾਨਿ ਮਿਲਾਯਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਵੇਲ਼ੁਤਰੁਣੇ ਛੇਦਾਪੇਤ੍ਵਾ ਵੇਲ਼ੁਪਤ੍ਤਪਾਦੁਕਾਯੋ ਧਾਰੇਸ੍ਸਨ੍ਤਿ. ਤਾਨਿ ਵੇਲ਼ੁਤਰੁਣਾਨਿ ਛਿਨ੍ਨਾਨਿ ਮਿਲਾਯਨ੍ਤਿ. ਏਕਿਨ੍ਦ੍ਰਿਯਂ ਸਮਣਾ ਸਕ੍ਯਪੁਤ੍ਤਿਯਾ ਜੀਵਂ ਵਿਹੇਠੇਨ੍ਤੀ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਜੀਵਸਞ੍ਞਿਨੋ ਹਿ, ਭਿਕ੍ਖਵੇ, ਮਨੁਸ੍ਸਾ ਰੁਕ੍ਖਸ੍ਮਿਂ…ਪੇ… ਨ, ਭਿਕ੍ਖਵੇ, ਵੇਲ਼ੁਪਤ੍ਤਪਾਦੁਕਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੨੫੧. ਅਥ ਖੋ ਭਗਵਾ ਬਾਰਾਣਸਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਭਦ੍ਦਿਯਂ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਭਦ੍ਦਿਯਂ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਭਦ੍ਦਿਯੇ ਵਿਹਰਤਿ ਜਾਤਿਯਾ ਵਨੇ. ਤੇਨ ਖੋ ਪਨ ਸਮਯੇਨ ਭਦ੍ਦਿਯਾ ਭਿਕ੍ਖੂ ਅਨੇਕਵਿਹਿਤਂ ਪਾਦੁਕਮਣ੍ਡਨਾਨੁਯੋਗਮਨੁਯੁਤ੍ਤਾ ਵਿਹਰਨ੍ਤਿ, ਤਿਣਪਾਦੁਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਮੁਞ੍ਜਪਾਦੁਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਪਬ੍ਬਜਪਾਦੁਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਹਿਨ੍ਤਾਲਪਾਦੁਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਕਮਲਪਾਦੁਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਕਮ੍ਬਲਪਾਦੁਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਰਿਞ੍ਚਨ੍ਤਿ ਉਦ੍ਦੇਸਂ ਪਰਿਪੁਚ੍ਛਂ ਅਧਿਸੀਲਂ ਅਧਿਚਿਤ੍ਤਂ ਅਧਿਪਞ੍ਞਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਦ੍ਦਿਯਾ ਭਿਕ੍ਖੂ ਅਨੇਕਵਿਹਿਤਂ ਪਾਦੁਕਮਣ੍ਡਨਾਨੁਯੋਗਮਨੁਯੁਤ੍ਤਾ ਵਿਹਰਿਸ੍ਸਨ੍ਤਿ, ਤਿਣਪਾਦੁਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਮੁਞ੍ਜਪਾਦੁਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਪਬ੍ਬਜਪਾਦੁਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਹਿਨ੍ਤਾਲਪਾਦੁਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਕਮਲਪਾਦੁਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਕਮ੍ਬਲਪਾਦੁਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਰਿਞ੍ਚਿਸ੍ਸਨ੍ਤਿ ਉਦ੍ਦੇਸਂ ਪਰਿਪੁਚ੍ਛਂ ਅਧਿਸੀਲਂ ਅਧਿਚਿਤ੍ਤਂ ਅਧਿਪਞ੍ਞ’’ਨ੍ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਦ੍ਦਿਯਾ ਭਿਕ੍ਖੂ ਅਨੇਕਵਿਹਿਤਂ ਪਾਦੁਕਮਣ੍ਡਨਾਨੁਯੋਗਮਨੁਯੁਤ੍ਤਾ ਵਿਹਰਨ੍ਤਿ, ਤਿਣਪਾਦੁਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ…ਪੇ… ਰਿਞ੍ਚਨ੍ਤਿ ਉਦ੍ਦੇਸਂ ਪਰਿਪੁਚ੍ਛਂ ਅਧਿਸੀਲਂ ਅਧਿਚਿਤ੍ਤਂ ਅਧਿਪਞ੍ਞ’’ਨ੍ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਅਨੇਕਵਿਹਿਤਂ ਪਾਦੁਕਮਣ੍ਡਨਾਨੁਯੋਗਮਨੁਯੁਤ੍ਤਾ ਵਿਹਰਿਸ੍ਸਨ੍ਤਿ, ਤਿਣਪਾਦੁਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ…ਪੇ… ਰਿਞ੍ਚਿਸ੍ਸਨ੍ਤਿ ਉਦ੍ਦੇਸਂ ਪਰਿਪੁਚ੍ਛਂ ਅਧਿਸੀਲਂ ਅਧਿਚਿਤ੍ਤਂ ਅਧਿਪਞ੍ਞਂ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਤਿਣਪਾਦੁਕਾ ਧਾਰੇਤਬ੍ਬਾ, ਨ ਮੁਞ੍ਜਪਾਦੁਕਾ ਧਾਰੇਤਬ੍ਬਾ, ਨ ਪਬ੍ਬਜਪਾਦੁਕਾ ਧਾਰੇਤਬ੍ਬਾ, ਨ ਹਿਨ੍ਤਾਲਪਾਦੁਕਾ ਧਾਰੇਤਬ੍ਬਾ, ਨ ਕਮਲਪਾਦੁਕਾ ਧਾਰੇਤਬ੍ਬਾ, ਨ ਕਮ੍ਬਲਪਾਦੁਕਾ ਧਾਰੇਤਬ੍ਬਾ, ਨ ਸੋਵਣ੍ਣਮਯਾ ਪਾਦੁਕਾ ਧਾਰੇਤਬ੍ਬਾ, ਨ ਰੂਪਿਯਮਯਾ ਪਾਦੁਕਾ ਧਾਰੇਤਬ੍ਬਾ, ਨ ਮਣਿਮਯਾ ਪਾਦੁਕਾ ਧਾਰੇਤਬ੍ਬਾ, ਨ ਵੇਲ਼ੁਰਿਯਮਯਾ ਪਾਦੁਕਾ ਧਾਰੇਤਬ੍ਬਾ, ਨ ਫਲਿਕਮਯਾ ਪਾਦੁਕਾ ਧਾਰੇਤਬ੍ਬਾ, ਨ ਕਂਸਮਯਾ ਪਾਦੁਕਾ ਧਾਰੇਤਬ੍ਬਾ, ਨ ਕਾਚਮਯਾ ਪਾਦੁਕਾ ਧਾਰੇਤਬ੍ਬਾ, ਨ ਤਿਪੁਮਯਾ ਪਾਦੁਕਾ ਧਾਰੇਤਬ੍ਬਾ, ਨ ਸੀਸਮਯਾ ਪਾਦੁਕਾ ਧਾਰੇਤਬ੍ਬਾ, ਨ ਤਮ੍ਬਲੋਹਮਯਾ ਪਾਦੁਕਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਕਾਚਿ ਸਙ੍ਕਮਨਿਯਾ ਪਾਦੁਕਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਪਾਦੁਕਾ ਧੁਵਟ੍ਠਾਨਿਯਾ ਅਸਙ੍ਕਮਨਿਯਾਯੋ – ਵਚ੍ਚਪਾਦੁਕਂ, ਪਸ੍ਸਾਵਪਾਦੁਕਂ, ਆਚਮਨਪਾਦੁਕ’’ਨ੍ਤਿ.

੨੫੨. ਅਥ ਖੋ ਭਗਵਾ ਭਦ੍ਦਿਯੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਅਚਿਰਵਤਿਯਾ ਨਦਿਯਾ ਗਾਵੀਨਂ ਤਰਨ੍ਤੀਨਂ ਵਿਸਾਣੇਸੁਪਿ ਗਣ੍ਹਨ੍ਤਿ, ਕਣ੍ਣੇਸੁਪਿ ਗਣ੍ਹਨ੍ਤਿ, ਗੀਵਾਯਪਿ ਗਣ੍ਹਨ੍ਤਿ, ਛੇਪ੍ਪਾਪਿ ਗਣ੍ਹਨ੍ਤਿ, ਪਿਟ੍ਠਿਮ੍ਪਿ ਅਭਿਰੁਹਨ੍ਤਿ, ਰਤ੍ਤਚਿਤ੍ਤਾਪਿ ਅਙ੍ਗਜਾਤਂ ਛੁਪਨ੍ਤਿ, ਵਚ੍ਛਤਰਿਮ੍ਪਿ ਓਗਾਹੇਤ੍ਵਾ ਮਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਗਾਵੀਨਂ ਤਰਨ੍ਤੀਨਂ ਵਿਸਾਣੇਸੁਪਿ ਗਹੇਸ੍ਸਨ੍ਤਿ…ਪੇ… ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ,…ਪੇ… ਸਚ੍ਚਂ ਭਗਵਾਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਗਾਵੀਨਂ ਵਿਸਾਣੇਸੁ ਗਹੇਤਬ੍ਬਂ, ਨ ਕਣ੍ਣੇਸੁ ਗਹੇਤਬ੍ਬਂ, ਨ ਗੀਵਾਯ ਗਹੇਤਬ੍ਬਂ, ਨ ਛੇਪ੍ਪਾਯ ਗਹੇਤਬ੍ਬਂ, ਨ ਪਿਟ੍ਠਿ ਅਭਿਰੁਹਿਤਬ੍ਬਾ. ਯੋ ਅਭਿਰੁਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਰਤ੍ਤਚਿਤ੍ਤੇਨ ਅਙ੍ਗਜਾਤਂ ਛੁਪਿਤਬ੍ਬਂ. ਯੋ ਛੁਪੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਨ ਵਚ੍ਛਤਰੀ ਮਾਰੇਤਬ੍ਬਾ. ਯੋ ਮਾਰੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਕਟ੍ਠਪਾਦੁਕਾਦਿਪਟਿਕ੍ਖੇਪੋ ਨਿਟ੍ਠਿਤੋ.

੧੫੩. ਯਾਨਾਦਿਪਟਿਕ੍ਖੇਪੋ

੨੫੩. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਯਾਨੇਨ ਯਾਯਨ੍ਤਿ, ਇਤ੍ਥਿਯੁਤ੍ਤੇਨਪਿ ਪੁਰਿਸਨ੍ਤਰੇਨ, ਪੁਰਿਸਯੁਤ੍ਤੇਨਪਿ ਇਤ੍ਥਨ੍ਤਰੇਨ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਗਙ੍ਗਾਮਹਿਯਾਯਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਯਾਨੇਨ ਯਾਯਿਤਬ੍ਬਂ. ਯੋ ਯਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਕੋਸਲੇਸੁ ਜਨਪਦੇ ਸਾਵਤ੍ਥਿਂ ਗਚ੍ਛਨ੍ਤੋ ਭਗਵਨ੍ਤਂ ਦਸ੍ਸਨਾਯ ਅਨ੍ਤਰਾਮਗ੍ਗੇ ਗਿਲਾਨੋ ਹੋਤਿ. ਅਥ ਖੋ ਸੋ ਭਿਕ੍ਖੁ ਮਗ੍ਗਾ ਓਕ੍ਕਮ੍ਮ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਮਨੁਸ੍ਸਾ ਤਂ ਭਿਕ੍ਖੁਂ ਦਿਸ੍ਵਾ ਏਤਦਵੋਚੁਂ – ‘‘ਕਹਂ, ਭਨ੍ਤੇ, ਅਯ੍ਯੋ ਗਮਿਸ੍ਸਤੀ’’ਤਿ? ‘‘ਸਾਵਤ੍ਥਿਂ ਖੋ ਅਹਂ, ਆਵੁਸੋ, ਗਮਿਸ੍ਸਾਮਿ ਭਗਵਨ੍ਤਂ ਦਸ੍ਸਨਾਯਾ’’ਤਿ. ‘‘ਏਹਿ, ਭਨ੍ਤੇ, ਗਮਿਸ੍ਸਾਮਾ’’ਤਿ. ‘‘ਨਾਹਂ, ਆਵੁਸੋ, ਸਕ੍ਕੋਮਿ, ਗਿਲਾਨੋਮ੍ਹੀ’’ਤਿ. ‘‘ਏਹਿ, ਭਨ੍ਤੇ, ਯਾਨਂ ਅਭਿਰੁਹਾ’’ਤਿ. ‘‘ਅਲਂ, ਆਵੁਸੋ, ਪਟਿਕ੍ਖਿਤ੍ਤਂ ਭਗਵਤਾ ਯਾਨ’’ਨ੍ਤਿ ਕੁਕ੍ਕੁਚ੍ਚਾਯਨ੍ਤੋ ਯਾਨਂ ਨਾਭਿਰੁਹਿ. ਅਥ ਖੋ ਸੋ ਭਿਕ੍ਖੁ ਸਾਵਤ੍ਥਿਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਯਾਨਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਇਤ੍ਥਿਯੁਤ੍ਤਂ ਨੁ ਖੋ ਪੁਰਿਸਯੁਤ੍ਤਂ ਨੁ ਖੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪੁਰਿਸਯੁਤ੍ਤਂ ਹਤ੍ਥਵਟ੍ਟਕਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਯਾਨੁਗ੍ਘਾਤੇਨ ਬਾਲ਼੍ਹਤਰਂ ਅਫਾਸੁ ਅਹੋਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਿਵਿਕਂ ਪਾਟਙ੍ਕਿਨ੍ਤਿ.

ਯਾਨਾਦਿਪਟਿਕ੍ਖੇਪੋ ਨਿਟ੍ਠਿਤੋ.

੧੫੪. ਉਚ੍ਚਾਸਯਨਮਹਾਸਯਨਪਟਿਕ੍ਖੇਪੋ

੨੫੪. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾਸਯਨਮਹਾਸਯਨਾਨਿ ਧਾਰੇਨ੍ਤਿ, ਸੇਯ੍ਯਥਿਦਂ – ਆਸਨ੍ਦਿਂ, ਪਲ੍ਲਙ੍ਕਂ, ਗੋਨਕਂ, ਚਿਤ੍ਤਕਂ, ਪਟਿਕਂ, ਪਟਲਿਕਂ, ਤੂਲਿਕਂ, ਵਿਕਤਿਕਂ, ਉਦ੍ਧਲੋਮਿਂ [ਉਨ੍ਦਲੋਮਿਂ (ਕ.), ਉਦ੍ਦਲੋਮਿਂ (ਕ.)], ਏਕਨ੍ਤਲੋਮਿਂ, ਕਟ੍ਟਿਸ੍ਸਂ, ਕੋਸੇਯ੍ਯਂ, ਕੁਤ੍ਤਕਂ, ਹਤ੍ਥਤ੍ਥਰਂ, ਅਸ੍ਸਤ੍ਥਰਂ, ਰਥਤ੍ਥਰਂ, ਅਜਿਨਪਵੇਣਿਂ, ਕਦਲਿਮਿਗਪਵਰਪਚ੍ਚਤ੍ਥਰਣਂ, ਸਉਤ੍ਤਰਚ੍ਛਦਂ, ਉਭਤੋਲੋਹਿਤਕੂਪਧਾਨਨ੍ਤਿ. ਮਨੁਸ੍ਸਾ ਵਿਹਾਰਚਾਰਿਕਂ ਆਹਿਣ੍ਡਨ੍ਤਾ ਪਸ੍ਸਿਤ੍ਵਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਉਚ੍ਚਾਸਯਨਮਹਾਸਯਨਾਨਿ ਧਾਰੇਤਬ੍ਬਾਨਿ, ਸੇਯ੍ਯਥਿਦਂ – ਆਸਨ੍ਦਿ, ਪਲ੍ਲਙ੍ਕੋ, ਗੋਨਕੋ, ਚਿਤ੍ਤਕੋ, ਪਟਿਕਾ, ਪਟਲਿਕਾ, ਤੂਲਿਕਾ, ਵਿਕਤਿਕਾ, ਉਦ੍ਧਲੋਮਿ, ਏਕਨ੍ਤਲੋਮਿ, ਕਟ੍ਟਿਸ੍ਸਂ, ਕੋਸੇਯ੍ਯਂ, ਕੁਤ੍ਤਕਂ, ਹਤ੍ਥਤ੍ਥਰਂ, ਅਸ੍ਸਤ੍ਥਰਂ, ਰਥਤ੍ਥਰਂ, ਅਜਿਨਪਵੇਣਿ, ਕਦਲਿਮਿਗਪਵਰਪਚ੍ਚਤ੍ਥਰਣਂ, ਸਉਤ੍ਤਰਚ੍ਛਦਂ, ਉਭਤੋਲੋਹਿਤਕੂਪਧਾਨਂ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਉਚ੍ਚਾਸਯਨਮਹਾਸਯਨਪਟਿਕ੍ਖੇਪੋ ਨਿਟ੍ਠਿਤੋ.

੧੫੫. ਸਬ੍ਬਚਮ੍ਮਪਟਿਕ੍ਖੇਪੋ

੨੫੫. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ – ਭਗਵਤਾ ਉਚ੍ਚਾਸਯਨਮਹਾਸਯਨਾਨਿ ਪਟਿਕ੍ਖਿਤ੍ਤਾਨੀਤਿ – ਮਹਾਚਮ੍ਮਾਨਿ ਧਾਰੇਨ੍ਤਿ, ਸੀਹਚਮ੍ਮਂ ਬ੍ਯਗ੍ਘਚਮ੍ਮਂ ਦੀਪਿਚਮ੍ਮਂ. ਤਾਨਿ ਮਞ੍ਚਪ੍ਪਮਾਣੇਨਪਿ ਛਿਨ੍ਨਾਨਿ ਹੋਨ੍ਤਿ, ਪੀਠਪ੍ਪਮਾਣੇਨਪਿ ਛਿਨ੍ਨਾਨਿ ਹੋਨ੍ਤਿ, ਅਨ੍ਤੋਪਿ ਮਞ੍ਚੇ ਪਞ੍ਞਤ੍ਤਾਨਿ ਹੋਨ੍ਤਿ, ਬਹਿਪਿ ਮਞ੍ਚੇ ਪਞ੍ਞਤ੍ਤਾਨਿ ਹੋਨ੍ਤਿ, ਅਨ੍ਤੋਪਿ ਪੀਠੇ ਪਞ੍ਞਤ੍ਤਾਨਿ ਹੋਨ੍ਤਿ, ਬਹਿਪਿ ਪੀਠੇ ਪਞ੍ਞਤ੍ਤਾਨਿ ਹੋਨ੍ਤਿ. ਮਨੁਸ੍ਸਾ ਵਿਹਾਰਚਾਰਿਕਂ ਆਹਿਣ੍ਡਨ੍ਤਾ ਪਸ੍ਸਿਤ੍ਵਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਮਹਾਚਮ੍ਮਾਨਿ ਧਾਰੇਤਬ੍ਬਾਨਿ, ਸੀਹਚਮ੍ਮਂ ਬ੍ਯਗ੍ਘਚਮ੍ਮਂ ਦੀਪਿਚਮ੍ਮਂ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ – ਭਗਵਤਾ ਮਹਾਚਮ੍ਮਾਨਿ ਪਟਿਕ੍ਖਿਤ੍ਤਾਨੀਤਿ – ਗੋਚਮ੍ਮਾਨਿ ਧਾਰੇਨ੍ਤਿ. ਤਾਨਿ ਮਞ੍ਚਪ੍ਪਮਾਣੇਨਪਿ ਛਿਨ੍ਨਾਨਿ ਹੋਨ੍ਤਿ, ਪੀਠਪ੍ਪਮਾਣੇਨਪਿ ਛਿਨ੍ਨਾਨਿ ਹੋਨ੍ਤਿ, ਅਨ੍ਤੋਪਿ ਮਞ੍ਚੇ ਪਞ੍ਞਤ੍ਤਾਨਿ ਹੋਨ੍ਤਿ, ਬਹਿਪਿ ਮਞ੍ਚੇ ਪਞ੍ਞਤ੍ਤਾਨਿ ਹੋਨ੍ਤਿ, ਅਨ੍ਤੋਪਿ ਪੀਠੇ ਪਞ੍ਞਤ੍ਤਾਨਿ ਹੋਨ੍ਤਿ, ਬਹਿਪਿ ਪੀਠੇ ਪਞ੍ਞਤ੍ਤਾਨਿ ਹੋਨ੍ਤਿ. ਅਞ੍ਞਤਰੋਪਿ ਪਾਪਭਿਕ੍ਖੁ ਅਞ੍ਞਤਰਸ੍ਸ ਪਾਪੁਪਾਸਕਸ੍ਸ ਕੁਲੂਪਕੋ ਹੋਤਿ. ਅਥ ਖੋ ਸੋ ਪਾਪਭਿਕ੍ਖੁ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਤਸ੍ਸ ਪਾਪੁਪਾਸਕਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਸੋ ਪਾਪੁਪਾਸਕੋ ਯੇਨ ਸੋ ਪਾਪਭਿਕ੍ਖੁ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਪਾਪਭਿਕ੍ਖੁਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਤੇਨ ਖੋ ਪਨ ਸਮਯੇਨ ਤਸ੍ਸ ਪਾਪੁਪਾਸਕਸ੍ਸ ਵਚ੍ਛਕੋ ਹੋਤਿ ਤਰੁਣਕੋ ਅਭਿਰੂਪੋ ਦਸ੍ਸਨੀਯੋ ਪਾਸਾਦਿਕੋ ਚਿਤ੍ਰੋ, ਸੇਯ੍ਯਥਾਪਿ ਦੀਪਿਚ੍ਛਾਪੋ. ਅਥ ਖੋ ਸੋ ਪਾਪਭਿਕ੍ਖੁ ਤਂ ਵਚ੍ਛਕਂ ਸਕ੍ਕਚ੍ਚਂ ਉਪਨਿਜ੍ਝਾਯਤਿ. ਅਥ ਖੋ ਸੋ ਪਾਪੁਪਾਸਕੋ ਤਂ ਪਾਪਭਿਕ੍ਖੁਂ ਏਤਦਵੋਚ – ‘‘ਕਿਸ੍ਸ, ਭਨ੍ਤੇ, ਅਯ੍ਯੋ ਇਮਂ ਵਚ੍ਛਕਂ ਸਕ੍ਕਚ੍ਚਂ ਉਪਨਿਜ੍ਝਾਯਤੀ’’ਤਿ? ‘‘ਅਤ੍ਥੋ ਮੇ, ਆਵੁਸੋ, ਇਮਸ੍ਸ ਵਚ੍ਛਕਸ੍ਸ ਚਮ੍ਮੇਨਾ’’ਤਿ. ਅਥ ਖੋ ਸੋ ਪਾਪੁਪਾਸਕੋ ਤਂ ਵਚ੍ਛਕਂ ਵਧਿਤ੍ਵਾ ਚਮ੍ਮਂ ਵਿਧੁਨਿਤ੍ਵਾ ਤਸ੍ਸ ਪਾਪਭਿਕ੍ਖੁਨੋ ਪਾਦਾਸਿ. ਅਥ ਖੋ ਸੋ ਪਾਪਭਿਕ੍ਖੁ ਤਂ ਚਮ੍ਮਂ ਸਙ੍ਘਾਟਿਯਾ ਪਟਿਚ੍ਛਾਦੇਤ੍ਵਾ ਅਗਮਾਸਿ. ਅਥ ਖੋ ਸਾ ਗਾਵੀ ਵਚ੍ਛਗਿਦ੍ਧਿਨੀ ਤਂ ਪਾਪਭਿਕ੍ਖੁਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿ. ਭਿਕ੍ਖੂ ਏਵਮਾਹਂਸੁ – ‘‘ਕਿਸ੍ਸ ਤ੍ਯਾਯਂ, ਆਵੁਸੋ, ਗਾਵੀ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧੀ’’ਤਿ? ‘‘ਅਹਮ੍ਪਿ ਖੋ, ਆਵੁਸੋ, ਨ ਜਾਨਾਮਿ ਕੇਨ [ਕੇਨਚਿ (ਕ.)] ਮ੍ਯਾਯਂ ਗਾਵੀ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧੀ’’ਤਿ. ਤੇਨ ਖੋ ਪਨ ਸਮਯੇਨ ਤਸ੍ਸ ਪਾਪਭਿਕ੍ਖੁਨੋ ਸਙ੍ਘਾਟਿ ਲੋਹਿਤੇਨ ਮਕ੍ਖਿਤਾ ਹੋਤਿ. ਭਿਕ੍ਖੂ ਏਵਮਾਹਂਸੁ – ‘‘ਅਯਂ ਪਨ ਤੇ, ਆਵੁਸੋ, ਸਙ੍ਘਾਟਿ ਕਿਂ ਕਤਾ’’ਤਿ? ਅਥ ਖੋ ਸੋ ਪਾਪਭਿਕ੍ਖੁ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ‘‘ਕਿਂ ਪਨ ਤ੍ਵਂ, ਆਵੁਸੋ, ਪਾਣਾਤਿਪਾਤੇ ਸਮਾਦਪੇਸੀ’’ਤਿ? ‘‘ਏਵਮਾਵੁਸੋ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁ ਪਾਣਾਤਿਪਾਤੇ ਸਮਾਦਪੇਸ੍ਸਤਿ, ਨਨੁ ਭਗਵਤਾ ਅਨੇਕਪਰਿਯਾਯੇਨ ਪਾਣਾਤਿਪਾਤੋ ਗਰਹਿਤੋ, ਪਾਣਾਤਿਪਾਤਾ ਵੇਰਮਣੀ ਪਸਤ੍ਥਾ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਤਂ ਪਾਪਭਿਕ੍ਖੁਂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਪਾਣਾਤਿਪਾਤੇ ਸਮਾਦਪੇਸੀ’’ਤਿ? ਸਚ੍ਚਂ ਭਗਵਾਤਿ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਪਾਣਾਤਿਪਾਤੇ ਸਮਾਦਪੇਸ੍ਸਸਿ, ਨਨੁ ਮਯਾ, ਮੋਘਪੁਰਿਸ, ਅਨੇਕਪਰਿਯਾਯੇਨ ਪਾਣਾਤਿਪਾਤੋ ਗਰਹਿਤੋ, ਪਾਣਾਤਿਪਾਤਾ ਵੇਰਮਣੀ ਪਸਤ੍ਥਾ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਪਾਣਾਤਿਪਾਤੇ ਸਮਾਦਪੇਤਬ੍ਬਂ. ਯੋ ਸਮਾਦਪੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ. ਨ, ਭਿਕ੍ਖਵੇ, ਗੋਚਮ੍ਮਂ ਧਾਰੇਤਬ੍ਬਂ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਕਿਞ੍ਚਿ ਚਮ੍ਮਂ ਧਾਰੇਤਬ੍ਬਂ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਸਬ੍ਬਚਮ੍ਮਪਟਿਕ੍ਖੇਪੋ ਨਿਟ੍ਠਿਤੋ.

੧੫੬. ਗਿਹਿਵਿਕਤਾਨੁਞ੍ਞਾਤਾਦਿ

੨੫੬. ਤੇਨ ਖੋ ਪਨ ਸਮਯੇਨ ਮਨੁਸ੍ਸਾਨਂ ਮਞ੍ਚਮ੍ਪਿ ਪੀਠਮ੍ਪਿ ਚਮ੍ਮੋਨਦ੍ਧਾਨਿ ਹੋਨ੍ਤਿ, ਚਮ੍ਮਵਿਨਦ੍ਧਾਨਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਾਭਿਨਿਸੀਦਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਿਹਿਵਿਕਤਂ ਅਭਿਨਿਸੀਦਿਤੁਂ, ਨ ਤ੍ਵੇਵ ਅਭਿਨਿਪਜ੍ਜਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਵਿਹਾਰਾ ਚਮ੍ਮਵਦ੍ਧੇਹਿ ਓਗੁਮ੍ਫਿਯਨ੍ਤਿ [ਓਗੁਮ੍ਭਿਯਨ੍ਤਿ (ਕ.)]. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਾਭਿਨਿਸੀਦਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਬਨ੍ਧਨਮਤ੍ਤਂ ਅਭਿਨਿਸੀਦਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਉਪਾਹਨਾ ਗਾਮਂ ਪਵਿਸਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਉਪਾਹਨੇਨ ਗਾਮੋ ਪਵਿਸਿਤਬ੍ਬੋ. ਯੋ ਪਵਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ, ਨ ਸਕ੍ਕੋਤਿ ਵਿਨਾ ਉਪਾਹਨੇਨ ਗਾਮਂ ਪਵਿਸਿਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨੇਨ ਭਿਕ੍ਖੁਨਾ ਸਉਪਾਹਨੇਨ ਗਾਮਂ ਪਵਿਸਿਤੁਨ੍ਤਿ.

ਗਿਹਿਵਿਕਤਾਨੁਞ੍ਞਾਤਾਦਿ ਨਿਟ੍ਠਿਤਾ.

੧੫੭. ਸੋਣਕੁਟਿਕਣ੍ਣਵਤ੍ਥੁ

੨੫੭. [ਉਦਾ. ੪੬ ਸੋਕਸੁਤ੍ਤੇਨ ਸਂਸਨ੍ਦਿਤ੍ਵਾ ਪਸ੍ਸਿਤਬ੍ਬਂ] ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਮਹਾਕਚ੍ਚਾਨੋ ਅਵਨ੍ਤੀਸੁ ਵਿਹਰਤਿ ਕੁਰਰਘਰੇ [ਕੁਰੁਰਘਰੇ (ਕ.)] ਪਪਤਕੇ [ਪਪਾਤੇ (ਸੀ. ਸ੍ਯਾ.) ਪਵਤ੍ਥੇ (ਉਦਾ. ੪੬)] ਪਬ੍ਬਤੇ. ਤੇਨ ਖੋ ਪਨ ਸਮਯੇਨ ਸੋਣੋ ਉਪਾਸਕੋ ਕੁਟਿਕਣ੍ਣੋ ਆਯਸ੍ਮਤੋ ਮਹਾਕਚ੍ਚਾਨਸ੍ਸ ਉਪਟ੍ਠਾਕੋ ਹੋਤਿ. ਅਥ ਖੋ ਸੋਣੋ ਉਪਾਸਕੋ ਕੁਟਿਕਣ੍ਣੋ ਯੇਨਾਯਸ੍ਮਾ ਮਹਾਕਚ੍ਚਾਨੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਮਹਾਕਚ੍ਚਾਨਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋਣੋ ਉਪਾਸਕੋ ਕੁਟਿਕਣ੍ਣੋ ਆਯਸ੍ਮਨ੍ਤਂ ਮਹਾਕਚ੍ਚਾਨਂ ਏਤਦਵੋਚ – ‘‘ਯਥਾ ਯਥਾਹਂ, ਭਨ੍ਤੇ, ਅਯ੍ਯੇਨ ਮਹਾਕਚ੍ਚਾਨੇਨ ਧਮ੍ਮਂ ਦੇਸਿਤਂ ਆਜਾਨਾਮਿ, ਨਯਿਦਂ ਸੁਕਰਂ ਅਗਾਰਂ ਅਜ੍ਝਾਵਸਤਾ ਏਕਨ੍ਤਪਰਿਪੁਣ੍ਣਂ ਏਕਨ੍ਤਪਰਿਸੁਦ੍ਧਂ ਸਙ੍ਖਲਿਖਿਤਂ ਬ੍ਰਹ੍ਮਚਰਿਯਂ ਚਰਿਤੁਂ. ਇਚ੍ਛਾਮਹਂ, ਭਨ੍ਤੇ, ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੁਂ. ਪਬ੍ਬਾਜੇਤੁ ਮਂ, ਭਨ੍ਤੇ, ਅਯ੍ਯੋ ਮਹਾਕਚ੍ਚਾਨੋ’’ਤਿ. ( ) [(ਏਵਂ ਵੁਤ੍ਤੇ ਆਯਸ੍ਮਾ ਮਹਾਕਚ੍ਚਾਯਨੋ ਸੋਣਂ ਉਪਾਸਕਂ ਕੁਟਿਕਣ੍ਣਂ ਏਤਦਵੋਚ) (ਸ੍ਯਾ. ਉਦਾ. ੪੬)] ‘‘ਦੁਕ੍ਕਰਂ ਖੋ, ਸੋਣ, ਯਾਵਜੀਵਂ ਏਕਸੇਯ੍ਯਂ ਏਕਭਤ੍ਤਂ ਬ੍ਰਹ੍ਮਚਰਿਯਂ ਚਰਿਤੁਂ. ਇਙ੍ਘ, ਤ੍ਵਂ, ਸੋਣ, ਤਤ੍ਥੇਵ ਅਗਾਰਿਕਭੂਤੋ ਬੁਦ੍ਧਾਨਂ ਸਾਸਨਂ ਅਨੁਯੁਞ੍ਜ, ਕਾਲਯੁਤ੍ਤਂ ਏਕਸੇਯ੍ਯਂ ਏਕਭਤ੍ਤਂ ਬ੍ਰਹ੍ਮਚਰਿਯ’’ਨ੍ਤਿ. ਅਥ ਖੋ ਸੋਣਸ੍ਸ ਉਪਾਸਕਸ੍ਸ ਕੁਟਿਕਣ੍ਣਸ੍ਸ ਯੋ ਅਹੋਸਿ ਪਬ੍ਬਜ੍ਜਾਭਿਸਙ੍ਖਾਰੋ ਸੋ ਪਟਿਪ੍ਪਸ੍ਸਮ੍ਭਿ. ਦੁਤਿਯਮ੍ਪਿ ਖੋ ਸੋਣੋ ਉਪਾਸਕੋ ਕੁਟਿਕਣ੍ਣੋ …ਪੇ… ਤਤਿਯਮ੍ਪਿ ਖੋ ਸੋਣੋ ਉਪਾਸਕੋ ਕੁਟਿਕਣ੍ਣੋ ਯੇਨਾਯਸ੍ਮਾ ਮਹਾਕਚ੍ਚਾਨੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਮਹਾਕਚ੍ਚਾਨਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋਣੋ ਉਪਾਸਕੋ ਕੁਟਿਕਣ੍ਣੋ ਆਯਸ੍ਮਨ੍ਤਂ ਮਹਾਕਚ੍ਚਾਨਂ ਏਤਦਵੋਚ – ‘‘ਯਥਾ ਯਥਾਹਂ, ਭਨ੍ਤੇ, ਅਯ੍ਯੇਨ ਮਹਾਕਚ੍ਚਾਨੇਨ ਧਮ੍ਮਂ ਦੇਸਿਤਂ ਆਜਾਨਾਮਿ, ਨਯਿਦਂ ਸੁਕਰਂ ਅਗਾਰਂ ਅਜ੍ਝਾਵਸਤਾ ਏਕਨ੍ਤਪਰਿਪੁਣ੍ਣਂ ਏਕਨ੍ਤਪਰਿਸੁਦ੍ਧਂ ਸਙ੍ਖਲਿਖਿਤਂ ਬ੍ਰਹ੍ਮਚਰਿਯਂ ਚਰਿਤੁਂ. ਇਚ੍ਛਾਮਹਂ, ਭਨ੍ਤੇ, ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੁਂ. ਪਬ੍ਬਾਜੇਤੁ ਮਂ, ਭਨ੍ਤੇ, ਅਯ੍ਯੋ ਮਹਾਕਚ੍ਚਾਨੋ’’ਤਿ. ਅਥ ਖੋ ਆਯਸ੍ਮਾ ਮਹਾਕਚ੍ਚਾਨੋ ਸੋਣਂ ਉਪਾਸਕਂ ਕੁਟਿਕਣ੍ਣਂ ਪਬ੍ਬਾਜੇਸਿ. ਤੇਨ ਖੋ ਪਨ ਸਮਯੇਨ ਅਵਨ੍ਤਿਦਕ੍ਖਿਣਾਪਥੋ ਅਪ੍ਪਭਿਕ੍ਖੁਕੋ ਹੋਤਿ. ਅਥ ਖੋ ਆਯਸ੍ਮਾ ਮਹਾਕਚ੍ਚਾਨੋ ਤਿਣ੍ਣਂ ਵਸ੍ਸਾਨਂ ਅਚ੍ਚਯੇਨ ਕਿਚ੍ਛੇਨ ਕਸਿਰੇਨ ਤਤੋ ਤਤੋ ਦਸਵਗ੍ਗਂ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਆਯਸ੍ਮਨ੍ਤਂ ਸੋਣਂ ਉਪਸਮ੍ਪਾਦੇਸਿ.

ਸੋਣਕੁਟਿਕਣ੍ਣਵਤ੍ਥੁ ਨਿਟ੍ਠਿਤਂ.

੧੫੮. ਮਹਾਕਚ੍ਚਾਨਸ੍ਸ ਪਞ੍ਚਵਰਪਰਿਦਸ੍ਸਨਾ

ਅਥ ਖੋ ਆਯਸ੍ਮਤੋ ਸੋਣਸ੍ਸ ਵਸ੍ਸਂਵੁਟ੍ਠਸ੍ਸ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਸੁਤੋਯੇਵ ਖੋ ਮੇ ਸੋ ਭਗਵਾ ਏਦਿਸੋ ਚ ਏਦਿਸੋ ਚਾਤਿ, ਨ ਚ ਮਯਾ ਸਮ੍ਮੁਖਾ ਦਿਟ੍ਠੋ, ਗਚ੍ਛੇਯ੍ਯਾਹਂ ਤਂ ਭਗਵਨ੍ਤਂ ਦਸ੍ਸਨਾਯ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ, ਸਚੇ ਮਂ ਉਪਜ੍ਝਾਯੋ ਅਨੁਜਾਨੇਯ੍ਯਾ’’ਤਿ. ਅਥ ਖੋ ਆਯਸ੍ਮਾ ਸੋਣੋ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨਾਯਸ੍ਮਾ ਮਹਾਕਚ੍ਚਾਨੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਮਹਾਕਚ੍ਚਾਨਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸੋਣੋ ਆਯਸ੍ਮਨ੍ਤਂ ਮਹਾਕਚ੍ਚਾਨਂ ਏਤਦਵੋਚ – ‘‘ਇਧ ਮਯ੍ਹਂ, ਭਨ੍ਤੇ, ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘ਸੁਤੋ ਯੇਵ ਖੋ ਮੇ ਸੋ ਭਗਵਾ ਏਦਿਸੋ ਚ ਏਦਿਸੋ ਚਾਤਿ, ਨ ਚ ਮਯਾ ਸਮ੍ਮੁਖਾ ਦਿਟ੍ਠੋ, ਗਚ੍ਛੇਯ੍ਯਾਹਂ ਤਂ ਭਗਵਨ੍ਤਂ ਦਸ੍ਸਨਾਯ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ, ਸਚੇ ਮਂ ਉਪਜ੍ਝਾਯੋ ਅਨੁਜਾਨੇਯ੍ਯਾ’ਤਿ; ਗਚ੍ਛੇਯ੍ਯਾਹਂ, ਭਨ੍ਤੇ, ਤਂ ਭਗਵਨ੍ਤਂ ਦਸ੍ਸਨਾਯ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ, ਸਚੇ ਮਂ ਉਪਜ੍ਝਾਯੋ ਅਨੁਜਾਨਾਤੀ’’ਤਿ. ‘‘ਸਾਧੁ ਸਾਧੁ, ਸੋਣ. ਗਚ੍ਛ ਤ੍ਵਂ, ਸੋਣ, ਤਂ ਭਗਵਨ੍ਤਂ ਦਸ੍ਸਨਾਯ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ. ਦਕ੍ਖਿਸ੍ਸਸਿ ਤ੍ਵਂ, ਸੋਣ, ਤਂ ਭਗਵਨ੍ਤਂ ਪਾਸਾਦਿਕਂ ਪਸਾਦਨੀਯਂ ਸਨ੍ਤਿਨ੍ਦ੍ਰਿਯਂ ਸਨ੍ਤਮਾਨਸਂ ਉਤ੍ਤਮਦਮਥਸਮਥਂ ਅਮਨੁਪ੍ਪਤ੍ਤਂ ਦਨ੍ਤਂ ਗੁਤ੍ਤਂ ਯਤਿਨ੍ਦ੍ਰਿਯਂ ਨਾਗਂ. ਤੇਨ ਹਿ ਤ੍ਵਂ, ਸੋਣ, ਮਮ ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦ – ‘ਉਪਜ੍ਝਾਯੋ ਮੇ, ਭਨ੍ਤੇ, ਆਯਸ੍ਮਾ ਮਹਾਕਚ੍ਚਾਨੋ ਭਗਵਤੋ ਪਾਦੇ ਸਿਰਸਾ ਵਨ੍ਦਤੀ’’’ਤਿ. ਏਵਞ੍ਚ ਵਦੇਹਿ – ‘‘ਅਵਨ੍ਤਿਦਕ੍ਖਿਣਾਪਥੋ, ਭਨ੍ਤੇ, ਅਪ੍ਪਭਿਕ੍ਖੁਕੋ, ਤਿਣ੍ਣਂ ਮੇ ਵਸ੍ਸਾਨਂ ਅਚ੍ਚਯੇਨ ਕਿਚ੍ਛੇਨ ਕਸਿਰੇਨ ਤਤੋ ਤਤੋ ਦਸਵਗ੍ਗਂ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਉਪਸਮ੍ਪਦਂ ਅਲਤ੍ਥਂ; ਅਪ੍ਪੇਵ ਨਾਮ ਭਗਵਾ ਅਵਨ੍ਤਿਦਕ੍ਖਿਣਾਪਥੇ ਅਪ੍ਪਤਰੇਨ ਗਣੇਨ ਉਪਸਮ੍ਪਦਂ ਅਨੁਜਾਨੇਯ੍ਯ. ਅਵਨ੍ਤਿਦਕ੍ਖਿਣਾਪਥੇ, ਭਨ੍ਤੇ, ਕਣ੍ਹੁਤ੍ਤਰਾ ਭੂਮਿ ਖਰਾ ਗੋਕਣ੍ਟਕਹਤਾ; ਅਪ੍ਪੇਵ ਨਾਮ ਭਗਵਾ ਅਵਨ੍ਤਿਦਕ੍ਖਿਣਾਪਥੇ ਗੁਣਙ੍ਗੁਣੂਪਾਹਨਂ ਅਨੁਜਾਨੇਯ੍ਯ. ਅਵਨ੍ਤਿਦਕ੍ਖਿਣਾਪਥੇ, ਭਨ੍ਤੇ, ਨਹਾਨਗਰੁਕਾ ਮਨੁਸ੍ਸਾ ਉਦਕਸੁਦ੍ਧਿਕਾ; ਅਪ੍ਪੇਵ ਨਾਮ ਭਗਵਾ ਅਵਨ੍ਤਿਦਕ੍ਖਿਣਾਪਥੇ ਧੁਵਨਹਾਨਂ ਅਨੁਜਾਨੇਯ੍ਯ. ਅਵਨ੍ਤਿਦਕ੍ਖਿਣਾਪਥੇ, ਭਨ੍ਤੇ, ਚਮ੍ਮਾਨਿ ਅਤ੍ਥਰਣਾਨਿ, ਏਲ਼ਕਚਮ੍ਮਂ ਅਜਚਮ੍ਮਂ ਮਿਗਚਮ੍ਮਂ. ਸੇਯ੍ਯਥਾਪਿ, ਭਨ੍ਤੇ, ਮਜ੍ਝਿਮੇਸੁ ਜਨਪਦੇਸੁ ਏਰਗੂ ਮੋਰਗੂ ਮਜ੍ਜਾਰੂ [ਮਜ੍ਝਾਰੂ (ਕ.)] ਜਨ੍ਤੂ, ਏਵਮੇਵ ਖੋ, ਭਨ੍ਤੇ, ਅਵਨ੍ਤਿਦਕ੍ਖਿਣਾਪਥੇ ਚਮ੍ਮਾਨਿ ਅਤ੍ਥਰਣਾਨਿ, ਏਲ਼ਕਚਮ੍ਮਂ ਅਜਚਮ੍ਮਂ ਮਿਗਚਮ੍ਮਂ; ਅਪ੍ਪੇਵ ਨਾਮ ਭਗਵਾ ਅਵਨ੍ਤਿਦਕ੍ਖਿਣਾਪਥੇ ਚਮ੍ਮਾਨਿ ਅਤ੍ਥਰਣਾਨਿ ਅਨੁਜਾਨੇਯ੍ਯ, ਏਲ਼ਕਚਮ੍ਮਂ ਅਜਚਮ੍ਮਂ ਮਿਗਚਮ੍ਮਂ. ਏਤਰਹਿ, ਭਨ੍ਤੇ, ਮਨੁਸ੍ਸਾ ਨਿਸ੍ਸੀਮਗਤਾਨਂ ਭਿਕ੍ਖੂਨਂ ਚੀਵਰਂ ਦੇਨ੍ਤਿ – ‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਮਾ’’’ਤਿ. ਤੇ ਆਗਨ੍ਤ੍ਵਾ ਆਰੋਚੇਨ੍ਤਿ – ‘ਇਤ੍ਥਨ੍ਨਾਮੇਹਿ ਤੇ, ਆਵੁਸੋ, ਮਨੁਸ੍ਸੇਹਿ ਚੀਵਰਂ ਦਿਨ੍ਨ’ਨ੍ਤਿ ਤੇ ਕੁਕ੍ਕੁਚ੍ਚਾਯਨ੍ਤਾ ਨ ਸਾਦਿਯਨ੍ਤਿ – ‘ਮਾ ਨੋ ਨਿਸ੍ਸਗ੍ਗਿਯਂ ਅਹੋਸੀ’ਤਿ; ਅਪ੍ਪੇਵ ਨਾਮ ਭਗਵਾ ਚੀਵਰੇ ਪਰਿਯਾਯਂ ਆਚਿਕ੍ਖੇਯ੍ਯਾ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਆਯਸ੍ਮਾ ਸੋਣੋ ਆਯਸ੍ਮਤੋ ਮਹਾਕਚ੍ਚਾਨਸ੍ਸ ਪਟਿਸ੍ਸੁਤ੍ਵਾ ਉਟ੍ਠਾਯਾਸਨਾ ਆਯਸ੍ਮਨ੍ਤਂ ਮਹਾਕਚ੍ਚਾਨਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਸਾਵਤ੍ਥਿ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਸਾਵਤ੍ਥਿ ਜੇਤਵਨਂ ਅਨਾਥਪਿਣ੍ਡਿਕਸ੍ਸ ਆਰਾਮੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਇਮਸ੍ਸ, ਆਨਨ੍ਦ, ਆਗਨ੍ਤੁਕਸ੍ਸ ਭਿਕ੍ਖੁਨੋ ਸੇਨਾਸਨਂ ਪਞ੍ਞਾਪੇਹੀ’’ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ – ‘‘ਯਸ੍ਸ ਖੋ ਮਂ ਭਗਵਾ ਆਣਾਪੇਤਿ, ‘ਇਮਸ੍ਸ, ਆਨਨ੍ਦ, ਆਗਨ੍ਤੁਕਸ੍ਸ ਭਿਕ੍ਖੁਨੋ ਸੇਨਾਸਨਂ ਪਞ੍ਞਾਪੇਹੀ’ਤਿ, ਇਚ੍ਛਤਿ ਭਗਵਾ ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਵਿਹਾਰੇ ਵਤ੍ਥੁਂ, ਇਚ੍ਛਤਿ ਭਗਵਾ ਆਯਸ੍ਮਤਾ ਸੋਣੇਨ ਸਦ੍ਧਿਂ ਏਕਵਿਹਾਰੇ ਵਤ੍ਥੁ’’ਨ੍ਤਿ – ਯਸ੍ਮਿਂ ਵਿਹਾਰੇ ਭਗਵਾ ਵਿਹਰਤਿ ਤਸ੍ਮਿਂ ਵਿਹਾਰੇ ਆਯਸ੍ਮਤੋ ਸੋਣਸ੍ਸ ਸੇਨਾਸਨਂ ਪਞ੍ਞਾਪੇਸਿ.

੨੫੮. ਅਥ ਖੋ ਭਗਵਾ ਬਹੁਦੇਵ ਰਤ੍ਤਿਂ ਅਜ੍ਝੋਕਾਸੇ ਵੀਤਿਨਾਮੇਤ੍ਵਾ ਵਿਹਾਰਂ ਪਾਵਿਸਿ. ਆਯਸ੍ਮਾਪਿ ਖੋ ਸੋਣੋ ਬਹੁਦੇਵ ਰਤ੍ਤਿਂ ਅਜ੍ਝੋਕਾਸੇ ਵੀਤਿਨਾਮੇਤ੍ਵਾ ਵਿਹਾਰਂ ਪਾਵਿਸਿ. ਅਥ ਖੋ ਭਗਵਾ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਆਯਸ੍ਮਨ੍ਤਂ ਸੋਣਂ ਅਜ੍ਝੇਸਿ – ‘‘ਪਟਿਭਾਤੁ ਤਂ, ਭਿਕ੍ਖੁ, ਧਮ੍ਮੋ ਭਾਸਿਤੁ’’ਨ੍ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਆਯਸ੍ਮਾ ਸੋਣੋ ਭਗਵਤੋ ਪਟਿਸ੍ਸੁਣਿਤ੍ਵਾ ਸਬ੍ਬਾਨੇਵ ਅਟ੍ਠਕਵਗ੍ਗਿਕਾਨਿ ਸਰੇਨ ਅਭਾਸਿ. ਅਥ ਖੋ ਭਗਵਾ ਆਯਸ੍ਮਤੋ ਸੋਣਸ੍ਸ ਸਰਭਞ੍ਞਪਰਿਯੋਸਾਨੇ ਅਬ੍ਭਾਨੁਮੋਦਿ – ‘‘ਸਾਧੁ, ਸਾਧੁ, ਭਿਕ੍ਖੁ. ਸੁਗ੍ਗਹਿਤਾਨਿ ਖੋ ਤੇ, ਭਿਕ੍ਖੁ, ਅਟ੍ਠਕਵਗ੍ਗਿਕਾਨਿ, ਸੁਮਨਸਿਕਤਾਨਿ ਸੂਪਧਾਰਿਤਾਨਿ. ਕਲ੍ਯਾਣਿਯਾਪਿ ਵਾਚਾਯ ਸਮਨ੍ਨਾਗਤੋ, ਵਿਸ੍ਸਟ੍ਠਾਯ, ਅਨੇਲਗਲਾਯ [ਅਨੇਲ਼ਗਲਾਯ (ਕ.)], ਅਤ੍ਥਸ੍ਸ ਵਿਞ੍ਞਾਪਨਿਯਾ. ਕਤਿਵਸ੍ਸੋਸਿ ਤ੍ਵਂ, ਭਿਕ੍ਖੂ’’ਤਿ? ‘‘ਏਕਵਸ੍ਸੋਹਂ, ਭਗਵਾ’’ਤਿ. ‘‘ਕਿਸ੍ਸ ਪਨ ਤ੍ਵਂ, ਭਿਕ੍ਖੁ, ਏਵਂ ਚਿਰਂ ਅਕਾਸੀ’’ਤਿ? ‘‘ਚਿਰਂ ਦਿਟ੍ਠੋ ਮੇ, ਭਨ੍ਤੇ, ਕਾਮੇਸੁ ਆਦੀਨਵੋ, ਅਪਿ ਚ ਸਮ੍ਬਾਧਾ ਘਰਾਵਾਸਾ ਬਹੁਕਿਚ੍ਚਾ ਬਹੁਕਰਣੀਯਾ’’ਤਿ. ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

[ਉਦਾ. ੪੬ ਉਦਾਨੇਪਿ] ‘‘ਦਿਸ੍ਵਾ ਆਦੀਨਵਂ ਲੋਕੇ, ਞਤ੍ਵਾ ਧਮ੍ਮਂ ਨਿਰੂਪਧਿਂ;

ਅਰਿਯੋ ਨ ਰਮਤੀ ਪਾਪੇ, ਪਾਪੇ ਨ ਰਮਤੀ ਸੁਚੀ’’ਤਿ.

ਅਥ ਖੋ ਆਯਸ੍ਮਾ ਸੋਣੋ – ਪਟਿਸਮ੍ਮੋਦਤਿ ਖੋ ਮਂ ਭਗਵਾ, ਅਯਂ ਖ੍ਵਸ੍ਸ ਕਾਲੋ ਯਂ ਮੇ ਉਪਜ੍ਝਾਯੋ ਪਰਿਦਸ੍ਸੀਤਿ – ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਉਪਜ੍ਝਾਯੋ ਮੇ, ਭਨ੍ਤੇ, ਆਯਸ੍ਮਾ ਮਹਾਕਚ੍ਚਾਨੋ ਭਗਵਤੋ ਪਾਦੇ ਸਿਰਸਾ ਵਨ੍ਦਤਿ, ਏਵਞ੍ਚ ਵਦੇਤਿ ਅਵਨ੍ਤਿਦਕ੍ਖਿਣਾਪਥੋ, ਭਨ੍ਤੇ, ਅਪ੍ਪਭਿਕ੍ਖੁਕੋ. ਤਿਣ੍ਣਂ ਮੇ ਵਸ੍ਸਾਨਂ ਅਚ੍ਚਯੇਨ ਕਿਚ੍ਛੇਨ ਕਸਿਰੇਨ ਤਤੋ ਤਤੋ ਦਸਵਗ੍ਗਂ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਉਪਸਮ੍ਪਦਂ ਅਲਤ੍ਥਂ, ਅਪ੍ਪੇਵ ਨਾਮ ਭਗਵਾ ਅਵਨ੍ਤਿਦਕ੍ਖਿਣਾਪਥੇ ਅਪ੍ਪਤਰੇਨ ਗਣੇਨ ਉਪਸਮ੍ਪਦਂ ਅਨੁਜਾਨੇਯ੍ਯ. ਅਵਨ੍ਤਿਦਕ੍ਖਿਣਾਪਥੇ, ਭਨ੍ਤੇ, ਕਣ੍ਹੁਤ੍ਤਰਾ ਭੂਮਿ ਖਰਾ ਗੋਕਣ੍ਟਕਹਤਾ; ਅਪ੍ਪੇਵ ਨਾਮ ਭਗਵਾ ਅਵਨ੍ਤਿਦਕ੍ਖਿਣਾਪਥੇ ਗੁਣਙ੍ਗੁਣੂਪਾਹਨਂ ਅਨੁਜਾਨੇਯ੍ਯ. ਅਵਨ੍ਤਿਦਕ੍ਖਿਣਾਪਥੇ, ਭਨ੍ਤੇ, ਨਹਾਨਗਰੁਕਾ ਮਨੁਸ੍ਸਾ ਉਦਕਸੁਦ੍ਧਿਕਾ, ਅਪ੍ਪੇਵ ਨਾਮ ਭਗਵਾ ਅਵਨ੍ਤਿਦਕ੍ਖਿਣਾਪਥੇ ਧੁਵਨਹਾਨਂ ਅਨੁਜਾਨੇਯ੍ਯ. ਅਵਨ੍ਤਿਦਕ੍ਖਿਣਾਪਥੇ, ਭਨ੍ਤੇ, ਚਮ੍ਮਾਨਿ ਅਤ੍ਥਰਣਾਨਿ, ਏਲ਼ਕਚਮ੍ਮਂ ਅਜਚਮ੍ਮਂ ਮਿਗਚਮ੍ਮਂ. ਸੇਯ੍ਯਥਾਪਿ, ਭਨ੍ਤੇ, ਮਜ੍ਝਿਮੇਸੁ ਜਨਪਦੇਸੁ ਏਰਗੂ ਮੋਰਗੂ ਮਜ੍ਜਾਰੂ ਜਨ੍ਤੂ, ਏਵਮੇਵ ਖੋ, ਭਨ੍ਤੇ, ਅਵਨ੍ਤਿਦਕ੍ਖਿਣਾਪਥੇ ਚਮ੍ਮਾਨਿ ਅਤ੍ਥਰਣਾਨਿ, ਏਲ਼ਕਚਮ੍ਮਂ ਅਜਚਮ੍ਮਂ ਮਿਗਚਮ੍ਮਂ; ਅਪ੍ਪੇਵ ਨਾਮ ਭਗਵਾ ਅਵਨ੍ਤਿਦਕ੍ਖਿਣਾਪਥੇ ਚਮ੍ਮਾਨਿ ਅਤ੍ਥਰਣਾਨਿ ਅਨੁਜਾਨੇਯ੍ਯ, ਏਲ਼ਕਚਮ੍ਮਂ ਅਜਚਮ੍ਮਂ ਮਿਗਚਮ੍ਮਂ. ਏਤਰਹਿ, ਭਨ੍ਤੇ, ਮਨੁਸ੍ਸਾ ਨਿਸ੍ਸੀਮਗਤਾਨਂ ਭਿਕ੍ਖੂਨਂ ਚੀਵਰਂ ਦੇਨ੍ਤਿ – ‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਮਾ’ਤਿ. ਤੇ ਆਗਨ੍ਤ੍ਵਾ ਆਰੋਚੇਨ੍ਤਿ – ‘ਇਤ੍ਥਨ੍ਨਾਮੇਹਿ ਤੇ, ਆਵੁਸੋ, ਮਨੁਸ੍ਸੇਹਿ ਚੀਵਰਂ ਦਿਨ੍ਨ’ਨ੍ਤਿ. ਤੇ ਕੁਕ੍ਕੁਚ੍ਚਾਯਨ੍ਤਾ ਨ ਸਾਦਿਯਨ੍ਤਿ – ‘ਮਾ ਨੋ ਨਿਸ੍ਸਗ੍ਗਿਯਂ ਅਹੋਸੀ’ਤਿ; ਅਪ੍ਪੇਵ ਨਾਮ ਭਗਵਾ ਚੀਵਰੇ ਪਰਿਯਾਯਂ ਆਚਿਕ੍ਖੇਯ੍ਯਾ’’ਤਿ.

੨੫੯. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਵਨ੍ਤਿਦਕ੍ਖਿਣਾਪਥੋ, ਭਿਕ੍ਖਵੇ, ਅਪ੍ਪਭਿਕ੍ਖੁਕੋ. ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਪਚ੍ਚਨ੍ਤਿਮੇਸੁ ਜਨਪਦੇਸੁ ਵਿਨਯਧਰਪਞ੍ਚਮੇਨ ਗਣੇਨ ਉਪਸਮ੍ਪਦਂ. ਤਤ੍ਰਿਮੇ ਪਚ੍ਚਨ੍ਤਿਮਾ ਜਨਪਦਾ – ਪੁਰਤ੍ਥਿਮਾਯ ਦਿਸਾਯ ਗਜਙ੍ਗਲਂ [ਕਜਙ੍ਗਲਂ (ਸੀ. ਸ੍ਯਾ.)] ਨਾਮ ਨਿਗਮੋ, ਤਸ੍ਸ ਪਰੇਨ ਮਹਾਸਾਲਾ, ਤਤੋ ਪਰਾ ਪਚ੍ਚਨ੍ਤਿਮਾ ਜਨਪਦਾ, ਓਰਤੋ ਮਜ੍ਝੇ; ਪੁਰਤ੍ਥਿਮਦਕ੍ਖਿਣਾਯ ਦਿਸਾਯ ਸਲ੍ਲਵਤੀ [ਸਲਲਵਤੀ (ਸੀ.)] ਨਾਮ ਨਦੀ, ਤਤੋ ਪਰਾ ਪਚ੍ਚਨ੍ਤਿਮਾ ਜਨਪਦਾ, ਓਰਤੋ ਮਜ੍ਝੇ; ਦਕ੍ਖਿਣਾਯ ਦਿਸਾਯ ਸੇਤਕਣ੍ਣਿਕਂ ਨਾਮ ਨਿਗਮੋ, ਤਤੋ ਪਰਾ ਪਚ੍ਚਨ੍ਤਿਮਾ ਜਨਪਦਾ, ਓਰਤੋ ਮਜ੍ਝੇ; ਪਚ੍ਛਿਮਾਯ ਦਿਸਾਯ ਥੂਣਂ ਨਾਮ ਬ੍ਰਾਹ੍ਮਣਗਾਮੋ, ਤਤੋ ਪਰਾ ਪਚ੍ਚਨ੍ਤਿਮਾ ਜਨਪਦਾ, ਓਰਤੋ ਮਜ੍ਝੇ; ਉਤ੍ਤਰਾਯ ਦਿਸਾਯ ਉਸੀਰਦ੍ਧਜੋ ਨਾਮ ਪਬ੍ਬਤੋ, ਤਤੋ ਪਰਾ ਪਚ੍ਚਨ੍ਤਿਮਾ ਜਨਪਦਾ, ਓਰਤੋ ਮਜ੍ਝੇ. ਅਨੁਜਾਨਾਮਿ, ਭਿਕ੍ਖਵੇ, ਏਵਰੂਪੇਸੁ ਪਚ੍ਚਨ੍ਤਿਮੇਸੁ ਜਨਪਦੇਸੁ ਵਿਨਯਧਰਪਞ੍ਚਮੇਨ ਗਣੇਨ ਉਪਸਮ੍ਪਦਂ. ਅਵਨ੍ਤਿਦਕ੍ਖਿਣਾਪਥੇ, ਭਿਕ੍ਖਵੇ, ਕਣ੍ਹੁਤ੍ਤਰਾ ਭੂਮਿ ਖਰਾ ਗੋਕਣ੍ਟਕਹਤਾ. ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਪਚ੍ਚਨ੍ਤਿਮੇਸੁ ਜਨਪਦੇਸੁ ਗੁਣਙ੍ਗੁਣੂਪਾਹਨਂ. ਅਵਨ੍ਤਿਦਕ੍ਖਿਣਾਪਥੇ, ਭਿਕ੍ਖਵੇ, ਨਹਾਨਗਰੁਕਾ ਮਨੁਸ੍ਸਾ ਉਦਕਸੁਦ੍ਧਿਕਾ. ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਪਚ੍ਚਨ੍ਤਿਮੇਸੁ ਜਨਪਦੇਸੁ ਧੁਵਨਹਾਨਂ. ਅਵਨ੍ਤਿਦਕ੍ਖਿਣਾਪਥੇ, ਭਿਕ੍ਖਵੇ, ਚਮ੍ਮਾਨਿ ਅਤ੍ਥਰਣਾਨਿ, ਏਲ਼ਕਚਮ੍ਮਂ ਅਜਚਮ੍ਮਂ ਮਿਗਚਮ੍ਮਂ. ਸੇਯ੍ਯਥਾਪਿ, ਭਿਕ੍ਖਵੇ, ਮਜ੍ਝਿਮੇਸੁ ਜਨਪਦੇਸੁ ਏਰਗੂ ਮੋਰਗੂ ਮਜ੍ਜਾਰੂ ਜਨ੍ਤੂ, ਏਵਮੇਵ ਖੋ, ਭਿਕ੍ਖਵੇ, ਅਵਨ੍ਤਿਦਕ੍ਖਿਣਾਪਥੇ ਚਮ੍ਮਾਨਿ ਅਤ੍ਥਰਣਾਨਿ, ਏਲ਼ਕਚਮ੍ਮਂ ਅਜਚਮ੍ਮਂ ਮਿਗਚਮ੍ਮਂ. ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਪਚ੍ਚਨ੍ਤਿਮੇਸੁ ਜਨਪਦੇਸੁ ਚਮ੍ਮਾਨਿ ਅਤ੍ਥਰਣਾਨਿ, ਏਲ਼ਕਚਮ੍ਮਂ ਅਜਚਮ੍ਮਂ ਮਿਗਚਮ੍ਮਂ. ਇਧ ਪਨ, ਭਿਕ੍ਖਵੇ, ਮਨੁਸ੍ਸਾ ਨਿਸ੍ਸੀਮਗਤਾਨਂ ਭਿਕ੍ਖੂਨਂ ਚੀਵਰਂ ਦੇਨ੍ਤਿ – ‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਮਾ’ਤਿ. ਅਨੁਜਾਨਾਮਿ, ਭਿਕ੍ਖਵੇ, ਸਾਦਿਤੁਂ, ਨ ਤਾਵ ਤਂ ਗਣਨੂਪਗਂ ਯਾਵ ਨ ਹਤ੍ਥਂ ਗਚ੍ਛਤੀ’’ਤਿ.

ਮਹਾਕਚ੍ਚਾਨਸ੍ਸ ਪਞ੍ਚਵਰਪਰਿਦਸ੍ਸਨਾ ਨਿਟ੍ਠਿਤਾ.

ਚਮ੍ਮਕ੍ਖਨ੍ਧਕੋ ਪਞ੍ਚਮੋ.

੧੫੯. ਤਸ੍ਸੁਦ੍ਦਾਨਂ

ਰਾਜਾ ਚ ਮਾਗਧੋ ਸੋਣੋ, ਅਸੀਤਿਸਹਸ੍ਸਿਸ੍ਸਰੋ;

ਸਾਗਤੋ ਗਿਜ੍ਝਕੂਟਸ੍ਮਿਂ, ਬਹੁਂ ਦਸ੍ਸੇਤਿ ਉਤ੍ਤਰਿਂ.

ਪਬ੍ਬਜ੍ਜਾਰਦ੍ਧਭਿਜ੍ਜਿਂਸੁ, ਵੀਣਂ ਏਕਪਲਾਸਿਕਂ;

ਨੀਲਾ ਪੀਤਾ ਲੋਹਿਤਿਕਾ, ਮਞ੍ਜਿਟ੍ਠਾ ਕਣ੍ਹਮੇਵ ਚ.

ਮਹਾਰਙ੍ਗਮਹਾਨਾਮਾ, ਵਦ੍ਧਿਕਾ ਚ ਪਟਿਕ੍ਖਿਪਿ;

ਖਲ੍ਲਕਾ ਪੁਟਪਾਲਿ ਚ, ਤੂਲਤਿਤ੍ਤਿਰਮੇਣ੍ਡਜਾ.

ਵਿਚ੍ਛਿਕਾ ਮੋਰਚਿਤ੍ਰਾ ਚ, ਸੀਹਬ੍ਯਗ੍ਘਾ ਚ ਦੀਪਿਕਾ;

ਅਜਿਨੁਦ੍ਦਾ ਮਜ੍ਜਾਰੀ ਚ, ਕਾਲ਼ਲੁਵਕਪਰਿਕ੍ਖਟਾ.

ਫਲਿਤੁਪਾਹਨਾ ਖਿਲਾ, ਧੋਤਖਾਣੁਖਟਖਟਾ;

ਤਾਲਵੇਲ਼ੁਤਿਣਂ ਚੇਵ, ਮੁਞ੍ਜਪਬ੍ਬਜਹਿਨ੍ਤਾਲਾ.

ਕਮਲਕਮ੍ਬਲਸੋਵਣ੍ਣਾ, ਰੂਪਿਕਾ ਮਣਿਵੇਲ਼ੁਰਿਯਾ;

ਫਲਿਕਾ ਕਂਸਕਾਚਾ ਚ, ਤਿਪੁਸੀਸਞ੍ਚ ਤਮ੍ਬਕਾ.

ਗਾਵੀ ਯਾਨਂ ਗਿਲਾਨੋ ਚ, ਪੁਰਿਸਾਯੁਤ੍ਤਸਿਵਿਕਾ;

ਸਯਨਾਨਿ ਮਹਾਚਮ੍ਮਾ, ਗੋਚਮ੍ਮੇਹਿ ਚ ਪਾਪਕੋ.

ਗਿਹੀਨਂ ਚਮ੍ਮਵਦ੍ਧੇਹਿ, ਪਵਿਸਨ੍ਤਿ ਗਿਲਾਯਨੋ;

ਮਹਾਕਚ੍ਚਾਯਨੋ ਸੋਣੋ, ਸਰੇਨ ਅਟ੍ਠਕਵਗ੍ਗਿਕਂ.

ਉਪਸਮ੍ਪਦਂ ਪਞ੍ਚਹਿ, ਗੁਣਙ੍ਗੁਣਾ ਧੁਵਸਿਨਾ;

ਚਮ੍ਮਤ੍ਥਰਣਾਨੁਞ੍ਞਾਸਿ, ਨ ਤਾਵ ਗਣਨੂਪਗਂ;

ਅਦਾਸਿ ਮੇ ਵਰੇ ਪਞ੍ਚ, ਸੋਣਤ੍ਥੇਰਸ੍ਸ ਨਾਯਕੋਤਿ.

ਇਮਮ੍ਹਿ ਖਨ੍ਧਕੇ ਵਤ੍ਥੂਨਿ ਤੇਸਟ੍ਠਿ.

ਚਮ੍ਮਕ੍ਖਨ੍ਧਕੋ ਨਿਟ੍ਠਿਤੋ.

੬. ਭੇਸਜ੍ਜਕ੍ਖਨ੍ਧਕੋ

੧੬੦. ਪਞ੍ਚਭੇਸਜ੍ਜਕਥਾ

੨੬੦. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਸਾਰਦਿਕੇਨ ਆਬਾਧੇਨ ਫੁਟ੍ਠਾਨਂ ਯਾਗੁਪਿ ਪੀਤਾ ਉਗ੍ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਉਗ੍ਗਚ੍ਛਤਿ. ਤੇ ਤੇਨ ਕਿਸਾ ਹੋਨ੍ਤਿ, ਲੂਖਾ, ਦੁਬ੍ਬਣ੍ਣਾ, ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ, ਧਮਨਿਸਨ੍ਥਤਗਤ੍ਤਾ. ਅਦ੍ਦਸਾ ਖੋ ਭਗਵਾ ਤੇ ਭਿਕ੍ਖੂ ਕਿਸੇ ਲੂਖੇ ਦੁਬ੍ਬਣ੍ਣੇ ਉਪ੍ਪਣ੍ਡੁਪ੍ਪਣ੍ਡੁਕਜਾਤੇ ਧਮਨਿਸਨ੍ਥਤਗਤ੍ਤੇ, ਦਿਸ੍ਵਾਨ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕਿਂ ਨੁ ਖੋ, ਆਨਨ੍ਦ, ਏਤਰਹਿ ਭਿਕ੍ਖੂ ਕਿਸਾ, ਲੂਖਾ, ਦੁਬ੍ਬਣ੍ਣਾ, ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ, ਧਮਨਿਸਨ੍ਥਤਗਤ੍ਤਾ’’ਤਿ? ‘‘ਏਤਰਹਿ, ਭਨ੍ਤੇ, ਭਿਕ੍ਖੂਨਂ ਸਾਰਦਿਕੇਨ ਆਬਾਧੇਨ ਫੁਟ੍ਠਾਨਂ ਯਾਗੁਪਿ ਪੀਤਾ ਉਗ੍ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਉਗ੍ਗਚ੍ਛਤਿ. ਤੇ ਤੇਨ ਕਿਸਾ ਹੋਨ੍ਤਿ, ਲੂਖਾ, ਦੁਬ੍ਬਣ੍ਣਾ, ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ, ਧਮਨਿਸਨ੍ਥਤਗਤ੍ਤਾ’’ਤਿ. ਅਥ ਖੋ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਏਤਰਹਿ ਖੋ ਭਿਕ੍ਖੂਨਂ ਸਾਰਦਿਕੇਨ ਆਬਾਧੇਨ ਫੁਟ੍ਠਾਨਂ ਯਾਗੁਪਿ ਪੀਤਾ ਉਗ੍ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਉਗ੍ਗਚ੍ਛਤਿ. ਤੇ ਤੇਨ ਕਿਸਾ ਹੋਨ੍ਤਿ, ਲੂਖਾ, ਦੁਬ੍ਬਣ੍ਣਾ, ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ, ਧਮਨਿਸਨ੍ਥਤਗਤ੍ਤਾ. ਕਿਂ ਨੁ ਖੋ ਅਹਂ ਭਿਕ੍ਖੂਨਂ ਭੇਸਜ੍ਜਂ ਅਨੁਜਾਨੇਯ੍ਯਂ, ਯਂ ਭੇਸਜ੍ਜਞ੍ਚੇਵ ਅਸ੍ਸ ਭੇਸਜ੍ਜਸਮ੍ਮਤਞ੍ਚ ਲੋਕਸ੍ਸ, ਆਹਾਰਤ੍ਥਞ੍ਚ ਫਰੇਯ੍ਯ, ਨ ਚ ਓਲ਼ਾਰਿਕੋ ਆਹਾਰੋ ਪਞ੍ਞਾਯੇਯ੍ਯਾ’’ਤਿ? ਅਥ ਖੋ ਭਗਵਤੋ ਏਤਦਹੋਸਿ – ‘‘ਇਮਾਨਿ ਖੋ ਪਞ੍ਚ ਭੇਸਜ੍ਜਾਨਿ, ਸੇਯ੍ਯਥਿਦਂ – ਸਪ੍ਪਿ, ਨਵਨੀਤਂ, ਤੇਲਂ, ਮਧੁ, ਫਾਣਿਤਂ; ਭੇਸਜ੍ਜਾਨਿ ਚੇਵ ਭੇਸਜ੍ਜਸਮ੍ਮਤਾਨਿ ਚ ਲੋਕਸ੍ਸ, ਆਹਾਰਤ੍ਥਞ੍ਚ ਫਰਨ੍ਤਿ, ਨ ਚ ਓਲ਼ਾਰਿਕੋ ਆਹਾਰੋ ਪਞ੍ਞਾਯਤਿ. ਯਂਨੂਨਾਹਂ ਭਿਕ੍ਖੂਨਂ ਇਮਾਨਿ ਪਞ੍ਚ ਭੇਸਜ੍ਜਾਨਿ ਅਨੁਜਾਨੇਯ੍ਯਂ, ਕਾਲੇ ਪਟਿਗ੍ਗਹੇਤ੍ਵਾ ਕਾਲੇ ਪਰਿਭੁਞ੍ਜਿਤੁ’’ਨ੍ਤਿ. ਅਥ ਖੋ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਇਧ ਮਯ੍ਹਂ, ਭਿਕ੍ਖਵੇ, ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘ਏਤਰਹਿ ਖੋ ਭਿਕ੍ਖੂਨਂ ਸਾਰਦਿਕੇਨ ਆਬਾਧੇਨ ਫੁਟ੍ਠਾਨਂ ਯਾਗੁਪਿ ਪੀਤਾ ਉਗ੍ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਉਗ੍ਗਚ੍ਛਤਿ. ਤੇ ਤੇਨ ਕਿਸਾ ਹੋਨ੍ਤਿ, ਲੂਖਾ, ਦੁਬ੍ਬਣ੍ਣਾ, ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ, ਧਮਨਿਸਨ੍ਥਤਗਤ੍ਤਾ. ਕਿਂ ਨੁ ਖੋ ਅਹਂ ਭਿਕ੍ਖੂਨਂ ਭੇਸਜ੍ਜਂ ਅਨੁਜਾਨੇਯ੍ਯਂ, ਯਂ ਭੇਸਜ੍ਜਞ੍ਚੇਵ ਅਸ੍ਸ ਭੇਸਜ੍ਜਸਮ੍ਮਤਞ੍ਚ ਲੋਕਸ੍ਸ, ਆਹਾਰਤ੍ਥਞ੍ਚ ਫਰੇਯ੍ਯ, ਨ ਚ ਓਲ਼ਾਰਿਕੋ ਆਹਾਰੋ ਪਞ੍ਞਾਯੇਯ੍ਯਾ’ਤਿ. ਤਸ੍ਸ ਮਯ੍ਹਂ, ਭਿਕ੍ਖਵੇ, ਏਤਦਹੋਸਿ ‘ਇਮਾਨਿ ਖੋ ਪਞ੍ਚ ਭੇਸਜ੍ਜਾਨਿ, ਸੇਯ੍ਯਥਿਦਂ – ਸਪ੍ਪਿ, ਨਵਨੀਤਂ, ਤੇਲਂ, ਮਧੁ, ਫਾਣਿਤਂ; ਭੇਸਜ੍ਜਾਨਿ ਚੇਵ ਭੇਸਜ੍ਜਸਮ੍ਮਤਾਨਿ ਚ ਲੋਕਸ੍ਸ, ਆਹਾਰਤ੍ਥਞ੍ਚ ਫਰਨ੍ਤਿ, ਨ ਚ ਓਲ਼ਾਰਿਕੋ ਆਹਾਰੋ ਪਞ੍ਞਾਯਤਿ. ਯਂਨੂਨਾਹਂ ਭਿਕ੍ਖੂਨਂ ਇਮਾਨਿ ਪਞ੍ਚ ਭੇਸਜ੍ਜਾਨਿ ਅਨੁਜਾਨੇਯ੍ਯਂ, ਕਾਲੇ ਪਟਿਗ੍ਗਹੇਤ੍ਵਾ ਕਾਲੇ ਪਰਿਭੁਞ੍ਜਿਤੁ’ਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਤਾਨਿ ਪਞ੍ਚ ਭੇਸਜ੍ਜਾਨਿ ਕਾਲੇ ਪਟਿਗ੍ਗਹੇਤ੍ਵਾ ਕਾਲੇ ਪਰਿਭੁਞ੍ਜਿਤੁ’’ਨ੍ਤਿ.

੨੬੧. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਤਾਨਿ ਪਞ੍ਚ ਭੇਸਜ੍ਜਾਨਿ ਕਾਲੇ ਪਟਿਗ੍ਗਹੇਤ੍ਵਾ ਕਾਲੇ ਪਰਿਭੁਞ੍ਜਨ੍ਤਿ. ਤੇਸਂ ਯਾਨਿਪਿ ਤਾਨਿ ਪਾਕਤਿਕਾਨਿ ਲੂਖਾਨਿ ਭੋਜਨਾਨਿ ਤਾਨਿਪਿ ਨਚ੍ਛਾਦੇਨ੍ਤਿ, ਪਗੇਵ ਸੇਨੇਸਿਤਾਨਿ [ਸੇਨੇਸਿਕਾਨਿ (ਸੀ. ਸ੍ਯਾ.), ਸੇਨੇਹਿਕਾਨਿ (ਯੋਜਨਾ)]. ਤੇ ਤੇਨ ਚੇਵ ਸਾਰਦਿਕੇਨ ਆਬਾਧੇਨ ਫੁਟ੍ਠਾ, ਇਮਿਨਾ ਚ ਭਤ੍ਤਾਚ੍ਛਾਦਕੇਨ [ਭਤ੍ਤਾਚ੍ਛਨ੍ਨਕੇਨ (ਕ.)], ਤਦੁਭਯੇਨ ਭਿਯ੍ਯੋਸੋਮਤ੍ਤਾਯ ਕਿਸਾ ਹੋਨ੍ਤਿ, ਲੂਖਾ, ਦੁਬ੍ਬਣ੍ਣਾ, ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ, ਧਮਨਿਸਨ੍ਥਤਗਤ੍ਤਾ. ਅਦ੍ਦਸਾ ਖੋ ਭਗਵਾ ਤੇ ਭਿਕ੍ਖੂ ਭਿਯ੍ਯੋਸੋਮਤ੍ਤਾਯ ਕਿਸੇ ਲੂਖੇ ਦੁਬ੍ਬਣ੍ਣੇ ਉਪ੍ਪਣ੍ਡੁਪ੍ਪਣ੍ਡੁਕਜਾਤੇ ਧਮਨਿਸਨ੍ਥਤਗਤ੍ਤੇ, ਦਿਸ੍ਵਾਨ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕਿਂ ਨੁ ਖੋ, ਆਨਨ੍ਦ, ਏਤਰਹਿ ਭਿਕ੍ਖੂ ਭਿਯ੍ਯੋਸੋਮਤ੍ਤਾਯ ਕਿਸਾ, ਲੂਖਾ, ਦੁਬ੍ਬਣ੍ਣਾ, ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ, ਧਮਨਿਸਨ੍ਥਤਗਤ੍ਤਾ’’ਤਿ? ‘‘ਏਤਰਹਿ, ਭਨ੍ਤੇ, ਭਿਕ੍ਖੂ ਤਾਨਿ ਚ ਪਞ੍ਚ ਭੇਸਜ੍ਜਾਨਿ ਕਾਲੇ ਪਟਿਗ੍ਗਹੇਤ੍ਵਾ ਕਾਲੇ ਪਰਿਭੁਞ੍ਜਨ੍ਤਿ. ਤੇਸਂ ਯਾਨਿਪਿ ਤਾਨਿ ਪਾਕਤਿਕਾਨਿ ਲੂਖਾਨਿ ਭੋਜਨਾਨਿ ਤਾਨਿਪਿ ਨਚ੍ਛਾਦੇਨ੍ਤਿ, ਪਗੇਵ ਸੇਨੇਸਿਕਾਨਿ. ਤੇ ਤੇਨ ਚੇਵ ਸਾਰਦਿਕੇਨ ਆਬਾਧੇਨ ਫੁਟ੍ਠਾ, ਇਮਿਨਾ ਚ ਭਤ੍ਤਾਚ੍ਛਾਦਕੇਨ, ਤਦੁਭਯੇਨ ਭਿਯ੍ਯੋਸੋਮਤ੍ਤਾਯ ਕਿਸਾ, ਲੂਖਾ, ਦੁਬ੍ਬਣ੍ਣਾ, ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ, ਧਮਨਿਸਨ੍ਥਤਗਤ੍ਤਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਤਾਨਿ ਪਞ੍ਚ ਭੇਸਜ੍ਜਾਨਿ ਪਟਿਗ੍ਗਹੇਤ੍ਵਾ ਕਾਲੇਪਿ ਵਿਕਾਲੇਪਿ ਪਰਿਭੁਞ੍ਜਿਤੁ’’ਨ੍ਤਿ.

੨੬੨. ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਵਸੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਸਾਨਿ ਭੇਸਜ੍ਜਾਨਿ – ਅਚ੍ਛਵਸਂ, ਮਚ੍ਛਵਸਂ, ਸੁਸੁਕਾਵਸਂ, ਸੂਕਰਵਸਂ, ਗਦ੍ਰਭਵਸਂ – ਕਾਲੇ ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ [ਨਿਪਕ੍ਕਂ (ਕ.)] ਕਾਲੇ ਸਂਸਟ੍ਠਂ ਤੇਲਪਰਿਭੋਗੇਨ ਪਰਿਭੁਞ੍ਜਿਤੁਂ. ਵਿਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਵਿਕਾਲੇ ਨਿਪ੍ਪਕ੍ਕਂ ਵਿਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਤਿਣ੍ਣਂ ਦੁਕ੍ਕਟਾਨਂ. ਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਵਿਕਾਲੇ ਨਿਪ੍ਪਕ੍ਕਂ ਵਿਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ. ਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਵਿਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਅਨਾਪਤ੍ਤੀਤਿ.

ਪਞ੍ਚਭੇਸਜ੍ਜਕਥਾ ਨਿਟ੍ਠਿਤਾ.

੧੬੧. ਮੂਲਾਦਿਭੇਸਜ੍ਜਕਥਾ

੨੬੩. ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਮੂਲੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਮੂਲਾਨਿ ਭੇਸਜ੍ਜਾਨਿ – ਹਲਿਦ੍ਦਿਂ, ਸਿਙ੍ਗਿਵੇਰਂ, ਵਚਂ, ਵਚਤ੍ਥਂ [ਵਚਤ੍ਥਂ (ਸੀ. ਸ੍ਯਾ.)], ਅਤਿਵਿਸਂ, ਕਟੁਕਰੋਹਿਣਿਂ, ਉਸੀਰਂ, ਭਦ੍ਦਮੁਤ੍ਤਕਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਮੂਲਾਨਿ ਭੇਸਜ੍ਜਾਨਿ, ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ, ਤਾਨਿ – ਪਟਿਗ੍ਗਹੇਤ੍ਵਾ ਯਾਵਜੀਵਂ ਪਰਿਹਰਿਤੁਂ; ਸਤਿ ਪਚ੍ਚਯੇ ਪਰਿਭੁਞ੍ਜਿਤੁਂ. ਅਸਤਿ ਪਚ੍ਚਯੇ ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਮੂਲੇਹਿ ਭੇਸਜ੍ਜੇਹਿ ਪਿਟ੍ਠੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਨਿਸਦਂ ਨਿਸਦਪੋਤਕਨ੍ਤਿ.

ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਕਸਾਵੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਸਾਵਾਨਿ [ਕਸਾਵਭੇਸਜ੍ਜਾਨਿ (ਕ.)] ਭੇਸਜ੍ਜਾਨਿ – ਨਿਮ੍ਬਕਸਾਵਂ, ਕੁਟਜਕਸਾਵਂ, ਪਟੋਲਕਸਾਵਂ, ਫਗ੍ਗਵਕਸਾਵਂ, ਨਤ੍ਤਮਾਲਕਸਾਵਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਕਸਾਵਾਨਿ ਭੇਸਜ੍ਜਾਨਿ ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ, ਤਾਨਿ – ਪਟਿਗ੍ਗਹੇਤ੍ਵਾ ਯਾਵਜੀਵਂ ਪਰਿਹਰਿਤੁਂ; ਸਤਿ ਪਚ੍ਚਯੇ ਪਰਿਭੁਞ੍ਜਿਤੁਂ. ਅਸਤਿ ਪਚ੍ਚਯੇ ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਪਣ੍ਣੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਣ੍ਣਾਨਿ ਭੇਸਜ੍ਜਾਨਿ – ਨਿਮ੍ਬਪਣ੍ਣਂ, ਕੁਟਜਪਣ੍ਣਂ, ਪਟੋਲਪਣ੍ਣਂ, ਸੁਲਸਿਪਣ੍ਣਂ, ਕਪ੍ਪਾਸਪਣ੍ਣਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਪਣ੍ਣਾਨਿ ਭੇਸਜ੍ਜਾਨਿ, ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ…ਪੇ….

ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਫਲੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਫਲਾਨਿ ਭੇਸਜ੍ਜਾਨਿ – ਬਿਲਙ੍ਗਂ, ਪਿਪ੍ਪਲਿਂ, ਮਰਿਚਂ, ਹਰੀਤਕਂ, ਵਿਭੀਤਕਂ, ਆਮਲਕਂ, ਗੋਟ੍ਠਫਲਂ [ਗੋਠਫਲਂ (ਸ੍ਯਾ.), ਕੋਟ੍ਠਫਲਂ (ਕ.)], ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਫਲਾਨਿ ਭੇਸਜ੍ਜਾਨਿ, ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ…ਪੇ….

ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਜਤੂਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਜਤੂਨਿ ਭੇਸਜ੍ਜਾਨਿ – ਹਿਙ੍ਗੁਂ, ਹਿਙ੍ਗੁਜਤੁਂ, ਹਿਙ੍ਗੁਸਿਪਾਟਿਕਂ, ਤਕਂ, ਤਕਪਤ੍ਤਿਂ, ਤਕਪਣ੍ਣਿਂ, ਸਜ੍ਜੁਲਸਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਜਤੂਨਿ ਭੇਸਜ੍ਜਾਨਿ, ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ…ਪੇ….

ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਲੋਣੇਹਿ ਭੇਸਜ੍ਜੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਲੋਣਾਨਿ ਭੇਸਜ੍ਜਾਨਿ – ਸਾਮੁਦ੍ਦਂ, ਕਾਲ਼ਲੋਣਂ, ਸਿਨ੍ਧਵਂ, ਉਬ੍ਭਿਦਂ [ਉਬ੍ਭਿਰਂ (ਕ.)], ਬਿਲਂ [ਬਿਲ਼ਾਲਂ (ਸੀ.)], ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਲੋਣਾਨਿ ਭੇਸਜ੍ਜਾਨਿ, ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ, ਤਾਨਿ – ਪਟਿਗ੍ਗਹੇਤ੍ਵਾ ਯਾਵਜੀਵਂ ਪਰਿਹਰਿਤੁਂ; ਸਤਿ ਪਚ੍ਚਯੇ ਪਰਿਭੁਞ੍ਜਿਤੁਂ. ਅਸਤਿ ਪਚ੍ਚਯੇ ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸਾਤਿ.

੨੬੪. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਆਨਨ੍ਦਸ੍ਸ ਉਪਜ੍ਝਾਯਸ੍ਸ ਆਯਸ੍ਮਤੋ ਬੇਲਟ੍ਠਸੀਸਸ੍ਸ ਥੁਲ੍ਲਕਚ੍ਛਾਬਾਧੋ ਹੋਤਿ. ਤਸ੍ਸ ਲਸਿਕਾਯ ਚੀਵਰਾਨਿ ਕਾਯੇ ਲਗ੍ਗਨ੍ਤਿ, ਤਾਨਿ ਭਿਕ੍ਖੂ ਉਦਕੇਨ ਤੇਮੇਤ੍ਵਾ ਤੇਮੇਤ੍ਵਾ ਅਪਕਡ੍ਢਨ੍ਤਿ. ਅਦ੍ਦਸਾ ਖੋ ਭਗਵਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤੇ ਭਿਕ੍ਖੂ ਤਾਨਿ ਚੀਵਰਾਨਿ ਉਦਕੇਨ ਤੇਮੇਤ੍ਵਾ ਤੇਮੇਤ੍ਵਾ ਅਪਕਡ੍ਢਨ੍ਤੇ, ਦਿਸ੍ਵਾਨ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਿਂ ਇਮਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਆਬਾਧੋ’’ਤਿ? ‘‘ਇਮਸ੍ਸ, ਭਨ੍ਤੇ, ਆਯਸ੍ਮਤੋ ਥੁਲ੍ਲਕਚ੍ਛਾਬਾਧੋ, ਲਸਿਕਾਯ ਚੀਵਰਾਨਿ ਕਾਯੇ ਲਗ੍ਗਨ੍ਤਿ, ਤਾਨਿ ਮਯਂ ਉਦਕੇਨ ਤੇਮੇਤ੍ਵਾ ਤੇਮੇਤ੍ਵਾ ਅਪਕਡ੍ਢਾਮਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਯਸ੍ਸ ਕਣ੍ਡੁ ਵਾ, ਪਿਲ਼ਕਾ ਵਾ, ਅਸ੍ਸਾਵੋ ਵਾ, ਥੁਲ੍ਲਕਚ੍ਛੁ ਵਾ ਆਬਾਧੋ, ਕਾਯੋ ਵਾ ਦੁਗ੍ਗਨ੍ਧੋ, ਚੁਣ੍ਣਾਨਿ ਭੇਸਜ੍ਜਾਨਿ; ਅਗਿਲਾਨਸ੍ਸ ਛਕਣਂ ਮਤ੍ਤਿਕਂ ਰਜਨਨਿਪ੍ਪਕ੍ਕਂ. ਅਨੁਜਾਨਾਮਿ, ਭਿਕ੍ਖਵੇ, ਉਦੁਕ੍ਖਲਂ ਮੁਸਲ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਗਿਲਾਨਾਨਂ ਭਿਕ੍ਖੂਨਂ ਚੁਣ੍ਣੇਹਿ ਭੇਸਜ੍ਜੇਹਿ ਚਾਲਿਤੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਚੁਣ੍ਣਚਾਲਿਨਿਨ੍ਤਿ. ਸਣ੍ਹੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦੁਸ੍ਸਚਾਲਿਨਿਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਅਮਨੁਸ੍ਸਿਕਾਬਾਧੋ ਹੋਤਿ. ਤਂ ਆਚਰਿਯੁਪਜ੍ਝਾਯਾ ਉਪਟ੍ਠਹਨ੍ਤਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਸੋ ਸੂਕਰਸੂਨਂ ਗਨ੍ਤ੍ਵਾ ਆਮਕਮਂਸਂ ਖਾਦਿ, ਆਮਕਲੋਹਿਤਂ ਪਿਵਿ. ਤਸ੍ਸ ਸੋ ਅਮਨੁਸ੍ਸਿਕਾਬਾਧੋ ਪਟਿਪ੍ਪਸ੍ਸਮ੍ਭਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਮਨੁਸ੍ਸਿਕਾਬਾਧੇ ਆਮਕਮਂਸਂ ਆਮਕਲੋਹਿਤਨ੍ਤਿ.

੨੬੫. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਚਕ੍ਖੁਰੋਗਾਬਾਧੋ ਹੋਤਿ. ਤਂ ਭਿਕ੍ਖੂ ਪਰਿਗ੍ਗਹੇਤ੍ਵਾ ਉਚ੍ਚਾਰਮ੍ਪਿ ਪਸ੍ਸਾਵਮ੍ਪਿ ਨਿਕ੍ਖਾਮੇਨ੍ਤਿ. ਅਦ੍ਦਸਾ ਖੋ ਭਗਵਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤੇ ਭਿਕ੍ਖੂ ਤਂ ਭਿਕ੍ਖੁਂ ਪਰਿਗ੍ਗਹੇਤ੍ਵਾ ਉਚ੍ਚਾਰਮ੍ਪਿ ਪਸ੍ਸਾਵਮ੍ਪਿ ਨਿਕ੍ਖਾਮੇਨ੍ਤੇ, ਦਿਸ੍ਵਾਨ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਿਂ ਇਮਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਆਬਾਧੋ’’ਤਿ? ‘‘ਇਮਸ੍ਸ, ਭਨ੍ਤੇ, ਆਯਸ੍ਮਤੋ ਚਕ੍ਖੁਰੋਗਾਬਾਧੋ. ਇਮਂ ਮਯਂ ਪਰਿਗ੍ਗਹੇਤ੍ਵਾ ਉਚ੍ਚਾਰਮ੍ਪਿ ਪਸ੍ਸਾਵਮ੍ਪਿ ਨਿਕ੍ਖਾਮੇਮਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਅਞ੍ਜਨਂ – ਕਾਲ਼ਞ੍ਜਨਂ, ਰਸਞ੍ਜਨਂ, ਸੋਤਞ੍ਜਨਂ, ਗੇਰੁਕਂ, ਕਪਲ੍ਲ’’ਨ੍ਤਿ. ਅਞ੍ਜਨੂਪਪਿਸਨੇਹਿ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਚਨ੍ਦਨਂ, ਤਗਰਂ, ਕਾਲ਼ਾਨੁਸਾਰਿਯਂ, ਤਾਲੀਸਂ, ਭਦ੍ਦਮੁਤ੍ਤਕਨ੍ਤਿ. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪਿਟ੍ਠਾਨਿ ਅਞ੍ਜਨਾਨਿ ਚਰੁਕੇਸੁਪਿ [ਥਾਲਕੇਸੁਪਿ (ਸੀ. ਸ੍ਯਾ.)] ਸਰਾਵਕੇਸੁਪਿ ਨਿਕ੍ਖਿਪਨ੍ਤਿ; ਤਿਣਚੁਣ੍ਣੇਹਿਪਿ ਪਂਸੁਕੇਹਿਪਿ ਓਕਿਰਿਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਞ੍ਜਨਿਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾਵਚਾ ਅਞ੍ਜਨਿਯੋ ਧਾਰੇਨ੍ਤਿ – ਸੋਵਣ੍ਣਮਯਂ, ਰੂਪਿਯਮਯਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਉਚ੍ਚਾਵਚਾ ਅਞ੍ਜਨੀ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਿਮਯਂ, ਦਨ੍ਤਮਯਂ, ਵਿਸਾਣਮਯਂ, ਨਲ਼ਮਯਂ, ਵੇਲ਼ੁਮਯਂ, ਕਟ੍ਠਮਯਂ, ਜਤੁਮਯਂ, ਫਲਮਯਂ, ਲੋਹਮਯਂ, ਸਙ੍ਖਨਾਭਿਮਯਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਜਨਿਯੋ ਅਪਾਰੁਤਾ ਹੋਨ੍ਤਿ, ਤਿਣਚੁਣ੍ਣੇਹਿਪਿ ਪਂਸੁਕੇਹਿਪਿ ਓਕਿਰਿਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਪਿਧਾਨਨ੍ਤਿ. ਅਪਿਧਾਨਂ ਨਿਪਤਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸੁਤ੍ਤਕੇਨ ਬਨ੍ਧਿਤ੍ਵਾ ਅਞ੍ਜਨਿਯਾ ਬਨ੍ਧਿਤੁਨ੍ਤਿ. ਅਞ੍ਜਨੀ ਫਲਤਿ [ਨਿਪਤਤਿ (ਕ.)]. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸੁਤ੍ਤਕੇਨ ਸਿਬ੍ਬੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਙ੍ਗੁਲਿਯਾ ਅਞ੍ਜਨ੍ਤਿ, ਅਕ੍ਖੀਨਿ ਦੁਕ੍ਖਾਨਿ ਹੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਞ੍ਜਨਿਸਲਾਕਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾਵਚਾ ਅਞ੍ਜਨਿਸਲਾਕਾਯੋ ਧਾਰੇਨ੍ਤਿ – ਸੋਵਣ੍ਣਮਯਂ ਰੂਪਿਯਮਯਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ, ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਉਚ੍ਚਾਵਚਾ ਅਞ੍ਜਨਿਸਲਾਕਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਿਮਯਂ…ਪੇ… ਸਙ੍ਖਨਾਭਿਮਯਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਜਨਿਸਲਾਕਾ ਭੂਮਿਯਂ ਪਤਿਤਾ ਫਰੁਸਾ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਲਾਕਠਾਨਿਯਨ੍ਤਿ [ਸਲਾਕੋਧਾਨਿਯਨ੍ਤਿ (ਸੀ. ਸ੍ਯਾ.)].

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਞ੍ਜਨਿਮ੍ਪਿ ਅਞ੍ਜਨਿਸਲਾਕਮ੍ਪਿ ਹਤ੍ਥੇਨ ਪਰਿਹਰਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਞ੍ਜਨਿਤ੍ਥਵਿਕਨ੍ਤਿ. ਅਂਸਬਦ੍ਧਕੋ ਨ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਂਸਬਦ੍ਧਕਂ ਬਨ੍ਧਨਸੁਤ੍ਤਕਨ੍ਤਿ.

੨੬੬. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਸੀਸਾਭਿਤਾਪੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਮੁਦ੍ਧਨਿ ਤੇਲਕਨ੍ਤਿ. ਨਕ੍ਖਮਨਿਯੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਨਤ੍ਥੁਕਮ੍ਮਨ੍ਤਿ. ਨਤ੍ਥੁ ਗਲਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਨਤ੍ਥੁਕਰਣਿਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾਵਚਾ ਨਤ੍ਥੁਕਰਣਿਯੋ ਧਾਰੇਨ੍ਤਿ – ਸੋਵਣ੍ਣਮਯਂ ਰੂਪਿਯਮਯਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ, ‘‘ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਉਚ੍ਚਾਵਚਾ ਨਤ੍ਥੁਕਰਣੀ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਿਮਯਂ…ਪੇ… ਸਙ੍ਖਨਾਭਿਮਯਨ੍ਤਿ. ਨਤ੍ਥੁਂ ਵਿਸਮਂ ਆਸਿਞ੍ਚਨ੍ਤਿ [ਨਤ੍ਥੁ ਵਿਸਮਂ ਆਸਿਞ੍ਚਿਯਤਿ (ਸੀ. ਸ੍ਯਾ.)]. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯਮਕਨਤ੍ਥੁਕਰਣਿਨ੍ਤਿ. ਨਕ੍ਖਮਨਿਯੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਧੂਮਂ ਪਾਤੁਨ੍ਤਿ. ਤਞ੍ਞੇਵ ਵਟ੍ਟਿਂ ਆਲਿਮ੍ਪੇਤ੍ਵਾ ਪਿਵਨ੍ਤਿ, ਕਣ੍ਠੋ ਦਹਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਧੂਮਨੇਤ੍ਤਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾਵਚਾਨਿ ਧੂਮਨੇਤ੍ਤਾਨਿ ਧਾਰੇਨ੍ਤਿ – ਸੋਵਣ੍ਣਮਯਂ ਰੂਪਿਯਮਯਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਉਚ੍ਚਾਵਚਾਨਿ ਧੂਮਨੇਤ੍ਤਾਨਿ ਧਾਰੇਤਬ੍ਬਾਨਿ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਿਮਯਂ…ਪੇ… ਸਙ੍ਖਨਾਭਿਮਯਨ੍ਤਿ.

ਤੇਨ ਖੋ ਪਨ ਸਮਯੇਨ ਧੂਮਨੇਤ੍ਤਾਨਿ ਅਪਾਰੁਤਾਨਿ ਹੋਨ੍ਤਿ, ਪਾਣਕਾ ਪਵਿਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਪਿਧਾਨਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਧੂਮਨੇਤ੍ਤਾਨਿ ਹਤ੍ਥੇਨ ਪਰਿਹਰਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਧੂਮਨੇਤ੍ਤਥਵਿਕਨ੍ਤਿ. ਏਕਤੋ ਘਂਸਿਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯਮਕਥਵਿਕਨ੍ਤਿ. ਅਂਸਬਦ੍ਧਕੋ ਨ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਂਸਬਦ੍ਧਕਂ ਬਨ੍ਧਨਸੁਤ੍ਤਕਨ੍ਤਿ.

੨੬੭. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਵਾਤਾਬਾਧੋ ਹੋਤਿ. ਵੇਜ੍ਜਾ ਏਵਮਾਹਂਸੁ – ‘‘ਤੇਲਂ ਪਚਿਤਬ੍ਬ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤੇਲਪਾਕਨ੍ਤਿ. ਤਸ੍ਮਿਂ ਖੋ ਪਨ ਤੇਲਪਾਕੇ ਮਜ੍ਜਂ ਪਕ੍ਖਿਪਿਤਬ੍ਬਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤੇਲਪਾਕੇ ਮਜ੍ਜਂ ਪਕ੍ਖਿਪਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਅਤਿਪਕ੍ਖਿਤ੍ਤਮਜ੍ਜਾਨਿ [ਅਤਿਖਿਤ੍ਤਮਜ੍ਜਾਨਿ (ਕ.)] ਤੇਲਾਨਿ ਪਚਨ੍ਤਿ, ਤਾਨਿ ਪਿਵਿਤ੍ਵਾ ਮਜ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਤਿਪਕ੍ਖਿਤ੍ਤਮਜ੍ਜਂ ਤੇਲਂ ਪਾਤਬ੍ਬਂ. ਯੋ ਪਿਵੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ. ਅਨੁਜਾਨਾਮਿ, ਭਿਕ੍ਖਵੇ, ਯਸ੍ਮਿਂ ਤੇਲਪਾਕੇ ਮਜ੍ਜਸ੍ਸ ਨ ਵਣ੍ਣੋ ਨ ਗਨ੍ਧੋ ਨ ਰਸੋ ਪਞ੍ਞਾਯਤਿ, ਏਵਰੂਪਂ ਮਜ੍ਜਪਕ੍ਖਿਤ੍ਤਂ ਤੇਲਂ ਪਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਬਹੁਂ ਅਤਿਪਕ੍ਖਿਤ੍ਤਮਜ੍ਜਂ ਤੇਲਂ ਪਕ੍ਕਂ ਹੋਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਅਤਿਪਕ੍ਖਿਤ੍ਤਮਜ੍ਜੇ ਤੇਲੇ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਬ੍ਭਞ੍ਜਨਂ ਅਧਿਟ੍ਠਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਬਹੁਤਰਂ ਤੇਲਂ ਪਕ੍ਕਂ ਹੋਤਿ, ਤੇਲਭਾਜਨਂ ਨ ਵਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤੀਣਿ ਤੁਮ੍ਬਾਨਿ – ਲੋਹਤੁਮ੍ਬਂ, ਕਟ੍ਠਤੁਮ੍ਬਂ, ਫਲਤੁਮ੍ਬਨ੍ਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਅਙ੍ਗਵਾਤੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸੇਦਕਮ੍ਮਨ੍ਤਿ. ਨਕ੍ਖਮਨਿਯੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਭਾਰਸੇਦਨ੍ਤਿ. ਨਕ੍ਖਮਨਿਯੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਮਹਾਸੇਦਨ੍ਤਿ. ਨਕ੍ਖਮਨਿਯੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਭਙ੍ਗੋਦਕਨ੍ਤਿ. ਨਕ੍ਖਮਨਿਯੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਦਕਕੋਟ੍ਠਕਨ੍ਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਪਬ੍ਬਵਾਤੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਲੋਹਿਤਂ ਮੋਚੇਤੁਨ੍ਤਿ. ਨਕ੍ਖਮਨਿਯੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਲੋਹਿਤਂ ਮੋਚੇਤ੍ਵਾ ਵਿਸਾਣੇਨ ਗਾਹੇਤੁਨ੍ਤਿ [ਗਹੇਤੁਨ੍ਤਿ (ਸੀ. ਸ੍ਯਾ.)].

ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਪਾਦਾ ਫਲਿਤਾ [ਫਾਲਿਤਾ (ਕ.)] ਹੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਾਦਬ੍ਭਞ੍ਜਨਨ੍ਤਿ. ਨਕ੍ਖਮਨਿਯੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਜ੍ਜਂ ਅਭਿਸਙ੍ਖਰਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਗਣ੍ਡਾਬਾਧੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਥਕਮ੍ਮਨ੍ਤਿ. ਕਸਾਵੋਦਕੇਨ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਸਾਵੋਦਕਨ੍ਤਿ. ਤਿਲਕਕ੍ਕੇਨ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਿਲਕਕ੍ਕਨ੍ਤਿ. ਕਬਲ਼ਿਕਾਯ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਬਲ਼ਿਕਨ੍ਤਿ. ਵਣਬਨ੍ਧਨਚੋਲ਼ੇਨ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਣਬਨ੍ਧਨਚੋਲ਼ਨ੍ਤਿ. ਵਣੋ ਕਣ੍ਡੁਵਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਾਸਪਕੁਟ੍ਟੇਨ [ਸਾਸਪਕੁਡ੍ਡੇਨ (ਸੀ. ਸ੍ਯਾ.)] ਫੋਸਿਤੁਨ੍ਤਿ. ਵਣੋ ਕਿਲਿਜ੍ਜਿਤ੍ਥ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਧੂਮਂ ਕਾਤੁਨ੍ਤਿ. ਵਡ੍ਢਮਂਸਂ ਵੁਟ੍ਠਾਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਲੋਣਸਕ੍ਖਰਿਕਾਯ ਛਿਨ੍ਦਿਤੁਨ੍ਤਿ. ਵਣੋ ਨ ਰੁਹਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਣਤੇਲਨ੍ਤਿ. ਤੇਲਂ ਗਲਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਿਕਾਸਿਕਂ ਸਬ੍ਬਂ ਵਣਪਟਿਕਮ੍ਮਨ੍ਤਿ.

੨੬੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਹਿਨਾ ਦਟ੍ਠੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਚਤ੍ਤਾਰਿ ਮਹਾਵਿਕਟਾਨਿ ਦਾਤੁਂ – ਗੂਥਂ, ਮੁਤ੍ਤਂ, ਛਾਰਿਕਂ, ਮਤ੍ਤਿਕਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਅਪ੍ਪਟਿਗ੍ਗਹਿਤਾਨਿ ਨੁ ਖੋ ਉਦਾਹੁ ਪਟਿਗ੍ਗਹੇਤਬ੍ਬਾਨੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਤਿ ਕਪ੍ਪਿਯਕਾਰਕੇ ਪਟਿਗ੍ਗਹਾਪੇਤੁਂ, ਅਸਤਿ ਕਪ੍ਪਿਯਕਾਰਕੇ ਸਾਮਂ ਗਹੇਤ੍ਵਾ ਪਰਿਭੁਞ੍ਜਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੇਨ ਭਿਕ੍ਖੁਨਾ ਵਿਸਂ ਪੀਤਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ ਭਿਕ੍ਖਵੇ ਗੂਥਂ ਪਾਯੇਤੁਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਅਪ੍ਪਟਿਗ੍ਗਹਿਤਂ ਨੁ ਖੋ ਉਦਾਹੁ ਪਟਿਗ੍ਗਹੇਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯਂ ਕਰੋਨ੍ਤੋ ਪਟਿਗ੍ਗਣ੍ਹਾਤਿ, ਸ੍ਵੇਵ ਪਟਿਗ੍ਗਹੋ ਕਤੋ, ਨ ਪੁਨ [ਕਤੋ ਪਨ (?)] ਪਟਿਗ੍ਗਹੇਤਬ੍ਬੋਤਿ.

੨੬੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਘਰਦਿਨ੍ਨਕਾਬਾਧੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸੀਤਾਲੋਲ਼ਿਂ ਪਾਯੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਦੁਟ੍ਠਗਹਣਿਕੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਆਮਿਸਖਾਰਂ ਪਾਯੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਪਣ੍ਡੁਰੋਗਾਬਾਧੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਮੁਤ੍ਤਹਰੀਤਕਂ ਪਾਯੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਛਵਿਦੋਸਾਬਾਧੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਨ੍ਧਾਲੇਪਂ ਕਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਭਿਸਨ੍ਨਕਾਯੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਿਰੇਚਨਂ ਪਾਤੁਨ੍ਤਿ. ਅਚ੍ਛਕਞ੍ਜਿਯਾ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਚ੍ਛਕਞ੍ਜਿਨ੍ਤਿ. ਅਕਟਯੂਸੇਨ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਕਟਯੂਸਨ੍ਤਿ. ਕਟਾਕਟੇਨ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਟਾਕਟਨ੍ਤਿ. ਪਟਿਚ੍ਛਾਦਨੀਯੇਨ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਟਿਚ੍ਛਾਦਨੀਯਨ੍ਤਿ.

ਮੂਲਾਦਿਭੇਸਜ੍ਜਕਥਾ ਨਿਟ੍ਠਿਤਾ.

੧੬੨. ਪਿਲਿਨ੍ਦਵਚ੍ਛਵਤ੍ਥੁ

੨੭੦. [ਇਦਂ ਵਤ੍ਥੁ ਪਾਰਾ. ੬੧੮ ਆਦਯੋ] ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਾਜਗਹੇ ਪਬ੍ਭਾਰਂ ਸੋਧਾਪੇਤਿ ਲੇਣਂ ਕਤ੍ਤੁਕਾਮੋ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨਾਯਸ੍ਮਾ ਪਿਲਿਨ੍ਦਵਚ੍ਛੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਏਤਦਵੋਚ – ‘‘ਕਿਂ, ਭਨ੍ਤੇ, ਥੇਰੋ ਕਾਰਾਪੇਤੀ’’ਤਿ? ‘‘ਪਬ੍ਭਾਰਂ, ਮਹਾਰਾਜ, ਸੋਧਾਪੇਮਿ, ਲੇਣਂ ਕਤ੍ਤੁਕਾਮੋ’’ਤਿ. ‘‘ਅਤ੍ਥੋ, ਭਨ੍ਤੇ, ਅਯ੍ਯਸ੍ਸ ਆਰਾਮਿਕੇਨਾ’’ਤਿ? ‘‘ਨ ਖੋ, ਮਹਾਰਾਜ, ਭਗਵਤਾ ਆਰਾਮਿਕੋ ਅਨੁਞ੍ਞਾਤੋ’’ਤਿ. ‘‘ਤੇਨ ਹਿ, ਭਨ੍ਤੇ, ਭਗਵਨ੍ਤਂ ਪਟਿਪੁਚ੍ਛਿਤ੍ਵਾ ਮਮ ਆਰੋਚੇਯ੍ਯਾਥਾ’’ਤਿ. ‘ਏਵਂ, ਮਹਾਰਾਜਾ’ਤਿ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਚ੍ਚਸ੍ਸੋਸਿ. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ, ਸਮਾਦਪੇਸਿ, ਸਮੁਤ੍ਤੇਜੇਸਿ, ਸਮ੍ਪਹਂਸੇਸਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਤਾ ਪਿਲਿਨ੍ਦਵਚ੍ਛੇਨ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਭਗਵਤੋ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਰਾਜਾ, ਭਨ੍ਤੇ, ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਰਾਮਿਕਂ ਦਾਤੁਕਾਮੋ. ਕਥਂ ਨੁ ਖੋ, ਭਨ੍ਤੇ, ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਆਰਾਮਿਕ’’ਨ੍ਤਿ. ਦੁਤਿਯਮ੍ਪਿ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨਾਯਸ੍ਮਾ ਪਿਲਿਨ੍ਦਵਚ੍ਛੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਏਤਦਵੋਚ – ‘‘ਅਨੁਞ੍ਞਾਤੋ, ਭਨ੍ਤੇ, ਭਗਵਤਾ ਆਰਾਮਿਕੋ’’ਤਿ? ‘‘ਏਵਂ, ਮਹਾਰਾਜਾ’’ਤਿ. ‘‘ਤੇਨ ਹਿ, ਭਨ੍ਤੇ, ਅਯ੍ਯਸ੍ਸ ਆਰਾਮਿਕਂ ਦਮ੍ਮੀ’’ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਆਰਾਮਿਕਂ ਪਟਿਸ੍ਸੁਤ੍ਵਾ, ਵਿਸ੍ਸਰਿਤ੍ਵਾ, ਚਿਰੇਨ ਸਤਿਂ ਪਟਿਲਭਿਤ੍ਵਾ, ਅਞ੍ਞਤਰਂ ਸਬ੍ਬਤ੍ਥਕਂ ਮਹਾਮਤ੍ਤਂ ਆਮਨ੍ਤੇਸਿ – ‘‘ਯੋ ਮਯਾ, ਭਣੇ, ਅਯ੍ਯਸ੍ਸ ਆਰਾਮਿਕੋ ਪਟਿਸ੍ਸੁਤੋ, ਦਿਨ੍ਨੋ ਸੋ ਆਰਾਮਿਕੋ’’ਤਿ? ‘‘ਨ ਖੋ, ਦੇਵ, ਅਯ੍ਯਸ੍ਸ ਆਰਾਮਿਕੋ ਦਿਨ੍ਨੋ’’ਤਿ. ‘‘ਕੀਵ ਚਿਰਂ ਨੁ ਖੋ, ਭਣੇ, ਇਤੋ [ਇਤੋ ਰਤ੍ਤਿ (ਸ੍ਯਾ.)] ਹਿ ਤਂ ਹੋਤੀ’’ਤਿ? ਅਥ ਖੋ ਸੋ ਮਹਾਮਤ੍ਤੋ ਰਤ੍ਤਿਯੋ ਗਣੇਤ੍ਵਾ [ਵਿਗਣੇਤ੍ਵਾ (ਸੀ.)] ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਪਞ੍ਚ, ਦੇਵ, ਰਤ੍ਤਿਸਤਾਨੀ’’ਤਿ. ਤੇਨ ਹਿ, ਭਣੇ, ਅਯ੍ਯਸ੍ਸ ਪਞ੍ਚ ਆਰਾਮਿਕਸਤਾਨਿ ਦੇਹੀਤਿ. ‘‘ਏਵਂ, ਦੇਵਾ’’ਤਿ ਖੋ ਸੋ ਮਹਾਮਤ੍ਤੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਤ੍ਵਾ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਪਞ੍ਚ ਆਰਾਮਿਕਸਤਾਨਿ ਪਾਦਾਸਿ, ਪਾਟਿਯੇਕ੍ਕੋ ਗਾਮੋ ਨਿਵਿਸਿ. ‘ਆਰਾਮਿਕਗਾਮਕੋਤਿ’ਪਿ ਨਂ ਆਹਂਸੁ, ‘ਪਿਲਿਨ੍ਦਗਾਮਕੋ’ਤਿਪਿ ਨਂ ਆਹਂਸੁ.

੨੭੧. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਪਿਲਿਨ੍ਦਵਚ੍ਛੋ ਤਸ੍ਮਿਂ ਗਾਮਕੇ ਕੁਲੂਪਕੋ ਹੋਤਿ. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਪਿਲਿਨ੍ਦਗਾਮਂ ਪਿਣ੍ਡਾਯ ਪਾਵਿਸਿ. ਤੇਨ ਖੋ ਪਨ ਸਮਯੇਨ ਤਸ੍ਮਿਂ ਗਾਮਕੇ ਉਸ੍ਸਵੋ ਹੋਤਿ. ਦਾਰਕਾ ਅਲਙ੍ਕਤਾ ਮਾਲਾਕਿਤਾ ਕੀਲ਼ਨ੍ਤਿ. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਪਿਲਿਨ੍ਦਗਾਮਕੇ ਸਪਦਾਨਂ ਪਿਣ੍ਡਾਯ ਚਰਮਾਨੋ ਯੇਨ ਅਞ੍ਞਤਰਸ੍ਸ ਆਰਾਮਿਕਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਤੇਨ ਖੋ ਪਨ ਸਮਯੇਨ ਤਸ੍ਸਾ ਆਰਾਮਿਕਿਨਿਯਾ ਧੀਤਾ ਅਞ੍ਞੇ ਦਾਰਕੇ ਅਲਙ੍ਕਤੇ ਮਾਲਾਕਿਤੇ ਪਸ੍ਸਿਤ੍ਵਾ ਰੋਦਤਿ – ‘ਮਾਲਂ ਮੇ ਦੇਥ, ਅਲਙ੍ਕਾਰਂ ਮੇ ਦੇਥਾ’ਤਿ. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਤਂ ਆਰਾਮਿਕਿਨਿਂ ਏਤਦਵੋਚ – ‘‘ਕਿਸ੍ਸਾਯਂ ਦਾਰਿਕਾ ਰੋਦਤੀ’’ਤਿ? ‘‘ਅਯਂ, ਭਨ੍ਤੇ, ਦਾਰਿਕਾ ਅਞ੍ਞੇ ਦਾਰਕੇ ਅਲਙ੍ਕਤੇ ਮਾਲਾਕਿਤੇ ਪਸ੍ਸਿਤ੍ਵਾ ਰੋਦਤਿ – ‘ਮਾਲਂ ਮੇ ਦੇਥ, ਅਲਙ੍ਕਾਰਂ ਮੇ ਦੇਥਾ’ਤਿ. ਕੁਤੋ ਅਮ੍ਹਾਕਂ ਦੁਗ੍ਗਤਾਨਂ ਮਾਲਾ, ਕੁਤੋ ਅਲਙ੍ਕਾਰੋ’’ਤਿ? ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਅਞ੍ਞਤਰਂ ਤਿਣਣ੍ਡੁਪਕਂ ਗਹੇਤ੍ਵਾ ਤਂ ਆਰਾਮਿਕਿਨਿਂ ਏਤਦਵੋਚ – ‘‘ਹਨ੍ਦਿਮਂ ਤਿਣਣ੍ਡੁਪਕਂ ਤਸ੍ਸਾ ਦਾਰਿਕਾਯ ਸੀਸੇ ਪਟਿਮੁਞ੍ਚਾ’’ਤਿ. ਅਥ ਖੋ ਸਾ ਆਰਾਮਿਕਿਨੀ ਤਂ ਤਿਣਣ੍ਡੁਪਕਂ ਗਹੇਤ੍ਵਾ ਤਸ੍ਸਾ ਦਾਰਿਕਾਯ ਸੀਸੇ ਪਟਿਮੁਞ੍ਚਿ. ਸਾ ਅਹੋਸਿ ਸੁਵਣ੍ਣਮਾਲਾ ਅਭਿਰੂਪਾ, ਦਸ੍ਸਨੀਯਾ, ਪਾਸਾਦਿਕਾ; ਨਤ੍ਥਿ ਤਾਦਿਸਾ ਰਞ੍ਞੋਪਿ ਅਨ੍ਤੇਪੁਰੇ ਸੁਵਣ੍ਣਮਾਲਾ. ਮਨੁਸ੍ਸਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਆਰੋਚੇਸੁਂ – ‘‘ਅਮੁਕਸ੍ਸ, ਦੇਵ, ਆਰਾਮਿਕਸ੍ਸ ਘਰੇ ਸੁਵਣ੍ਣਮਾਲਾ ਅਭਿਰੂਪਾ, ਦਸ੍ਸਨੀਯਾ, ਪਾਸਾਦਿਕਾ; ਨਤ੍ਥਿ ਤਾਦਿਸਾ ਦੇਵਸ੍ਸਪਿ ਅਨ੍ਤੇਪੁਰੇ ਸੁਵਣ੍ਣਮਾਲਾ; ਕੁਤੋ ਤਸ੍ਸ ਦੁਗ੍ਗਤਸ੍ਸ? ਨਿਸ੍ਸਂਸਯਂ ਚੋਰਿਕਾਯ ਆਭਤਾ’’ਤਿ.

ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤਂ ਆਰਾਮਿਕਕੁਲਂ ਬਨ੍ਧਾਪੇਸਿ. ਦੁਤਿਯਮ੍ਪਿ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਪਿਲਿਨ੍ਦਗਾਮਂ ਪਿਣ੍ਡਾਯ ਪਾਵਿਸਿ. ਪਿਲਿਨ੍ਦਗਾਮਕੇ ਸਪਦਾਨਂ ਪਿਣ੍ਡਾਯ ਚਰਮਾਨੋ ਯੇਨ ਤਸ੍ਸ ਆਰਾਮਿਕਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਟਿਵਿਸ੍ਸਕੇ ਪੁਚ੍ਛਿ – ‘‘ਕਹਂ ਇਮਂ ਆਰਾਮਿਕਕੁਲਂ ਗਤ’’ਨ੍ਤਿ? ‘‘ਏਤਿਸ੍ਸਾ, ਭਨ੍ਤੇ, ਸੁਵਣ੍ਣਮਾਲਾਯ ਕਾਰਣਾ ਰਞ੍ਞਾ ਬਨ੍ਧਾਪਿਤ’’ਨ੍ਤਿ. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਯੇਨ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨਾਯਸ੍ਮਾ ਪਿਲਿਨ੍ਦਵਚ੍ਛੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਆਯਸ੍ਮਾ ਪਿਲਿਨ੍ਦਵਚ੍ਛੋ ਏਤਦਵੋਚ – ‘‘ਕਿਸ੍ਸ, ਮਹਾਰਾਜ, ਆਰਾਮਿਕਕੁਲਂ ਬਨ੍ਧਾਪਿਤ’’ਨ੍ਤਿ? ‘‘ਤਸ੍ਸ, ਭਨ੍ਤੇ, ਆਰਾਮਿਕਸ੍ਸ ਘਰੇ ਸੁਵਣ੍ਣਮਾਲਾ ਅਭਿਰੂਪਾ, ਦਸ੍ਸਨੀਯਾ, ਪਾਸਾਦਿਕਾ; ਨਤ੍ਥਿ ਤਾਦਿਸਾ ਅਮ੍ਹਾਕਮ੍ਪਿ ਅਨ੍ਤੇਪੁਰੇ ਸੁਵਣ੍ਣਮਾਲਾ; ਕੁਤੋ ਤਸ੍ਸ ਦੁਗ੍ਗਤਸ੍ਸ? ਨਿਸ੍ਸਂਸਯਂ ਚੋਰਿਕਾਯ ਆਭਤਾ’’ਤਿ. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਾਸਾਦਂ ਸੁਵਣ੍ਣਨ੍ਤਿ ਅਧਿਮੁਚ੍ਚਿ; ਸੋ ਅਹੋਸਿ ਸਬ੍ਬਸੋਵਣ੍ਣਮਯੋ. ‘‘ਇਦਂ ਪਨ ਤੇ, ਮਹਾਰਾਜ, ਤਾਵ ਬਹੁਂ ਸੁਵਣ੍ਣਂ ਕੁਤੋ’’ਤਿ? ‘ਅਞ੍ਞਾਤਂ, ਭਨ੍ਤੇ, ਅਯ੍ਯਸ੍ਸੇਵੇਸੋ ਇਦ੍ਧਾਨੁਭਾਵੋ’ਤਿ ਤਂ ਆਰਾਮਿਕਕੁਲਂ ਮੁਞ੍ਚਾਪੇਸਿ.

ਮਨੁਸ੍ਸਾ ‘‘ਅਯ੍ਯੇਨ ਕਿਰ ਪਿਲਿਨ੍ਦਵਚ੍ਛੇਨ ਸਰਾਜਿਕਾਯ ਪਰਿਸਾਯ ਉਤ੍ਤਰਿਮਨੁਸ੍ਸਧਮ੍ਮਂ ਇਦ੍ਧਿਪਾਟਿਹਾਰਿਯਂ ਦਸ੍ਸਿਤ’’ਨ੍ਤਿ ਅਤ੍ਤਮਨਾ ਅਭਿਪ੍ਪਸਨ੍ਨਾ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਪਞ੍ਚ ਭੇਸਜ੍ਜਾਨਿ ਅਭਿਹਰਿਂਸੁ, ਸੇਯ੍ਯਥਿਦਂ – ਸਪ੍ਪਿਂ, ਨਵਨੀਤਂ, ਤੇਲਂ, ਮਧੁਂ [ਸਪ੍ਪਿ ਨਵਨੀਤਂ ਤੇਲਂ ਮਧੁ (ਕ.)], ਫਾਣਿਤਂ. ਪਕਤਿਯਾਪਿ ਚ ਆਯਸ੍ਮਾ ਪਿਲਿਨ੍ਦਵਚ੍ਛੋ ਲਾਭੀ ਹੋਤਿ ਪਞ੍ਚਨ੍ਨਂ ਭੇਸਜ੍ਜਾਨਂ; ਲਦ੍ਧਂ ਲਦ੍ਧਂ ਪਰਿਸਾਯ ਵਿਸ੍ਸਜ੍ਜੇਤਿ. ਪਰਿਸਾ ਚਸ੍ਸ ਹੋਤਿ ਬਾਹੁਲ੍ਲਿਕਾ; ਲਦ੍ਧਂ ਲਦ੍ਧਂ ਕੋਲਮ੍ਬੇਪਿ [ਕੋਲ਼ੁਮ੍ਬੇਪਿ (ਕ.)], ਘਟੇਪਿ, ਪੂਰੇਤ੍ਵਾ ਪਟਿਸਾਮੇਤਿ; ਪਰਿਸ੍ਸਾਵਨਾਨਿਪਿ, ਥਵਿਕਾਯੋਪਿ, ਪੂਰੇਤ੍ਵਾ ਵਾਤਪਾਨੇਸੁ ਲਗ੍ਗੇਤਿ. ਤਾਨਿ ਓਲੀਨਵਿਲੀਨਾਨਿ ਤਿਟ੍ਠਨ੍ਤਿ. ਉਨ੍ਦੂਰੇਹਿਪਿ ਵਿਹਾਰਾ ਓਕਿਣ੍ਣਵਿਕਿਣ੍ਣਾ ਹੋਨ੍ਤਿ. ਮਨੁਸ੍ਸਾ ਵਿਹਾਰਚਾਰਿਕਂ ਆਹਿਣ੍ਡਨ੍ਤਾ ਪਸ੍ਸਿਤ੍ਵਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਨ੍ਤੋਕੋਟ੍ਠਾਗਾਰਿਕਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ, ਸੇਯ੍ਯਥਾਪਿ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ, ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਏਵਰੂਪਾਯ ਬਾਹੁਲ੍ਲਾਯ ਚੇਤੇਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਤੇ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਏਵਰੂਪਾਯ ਬਾਹੁਲ੍ਲਾਯ ਚੇਤੇਨ੍ਤੀ’’ਤਿ? ‘‘ਸਚ੍ਚਂ ਭਗਵਾਤਿ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਯਾਨਿ ਖੋ ਪਨ ਤਾਨਿ ਗਿਲਾਨਾਨਂ ਭਿਕ੍ਖੂਨਂ ਪਟਿਸਾਯਨੀਯਾਨਿ ਭੇਸਜ੍ਜਾਨਿ, ਸੇਯ੍ਯਥਿਦਂ – ਸਪ੍ਪਿ, ਨਵਨੀਤਂ, ਤੇਲਂ, ਮਧੁ, ਫਾਣਿਤਂ, ਤਾਨਿ ਪਟਿਗ੍ਗਹੇਤ੍ਵਾ ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨਿ. ਤਂ ਅਤਿਕ੍ਕਾਮਯਤੋ ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਪਿਲਿਨ੍ਦਵਚ੍ਛਵਤ੍ਥੁ ਨਿਟ੍ਠਿਤਂ.

ਭੇਸਜ੍ਜਾਨੁਞ੍ਞਾਤਭਾਣਵਾਰੋ ਨਿਟ੍ਠਿਤੋ ਪਠਮੋ.

੧੬੩. ਗੁਲ਼ਾਦਿਅਨੁਜਾਨਨਾ

੨੭੨. ਅਥ ਖੋ ਭਗਵਾ ਸਾਵਤ੍ਥਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਰਾਜਗਹਂ ਤੇਨ ਚਾਰਿਕਂ ਪਕ੍ਕਾਮਿ. ਅਦ੍ਦਸਾ ਖੋ ਆਯਸ੍ਮਾ ਕਙ੍ਖਾਰੇਵਤੋ ਅਨ੍ਤਰਾਮਗ੍ਗੇ ਗੁਲ਼ਕਰਣਂ, ਓਕ੍ਕਮਿਤ੍ਵਾ ਗੁਲ਼ੇ ਪਿਟ੍ਠਮ੍ਪਿ ਛਾਰਿਕਮ੍ਪਿ ਪਕ੍ਖਿਪਨ੍ਤੇ, ਦਿਸ੍ਵਾਨ ‘‘ਅਕਪ੍ਪਿਯੋ ਗੁਲ਼ੋ ਸਾਮਿਸੋ, ਨ ਕਪ੍ਪਤਿ ਗੁਲ਼ੋ ਵਿਕਾਲੇ ਪਰਿਭੁਞ੍ਜਿਤੁ’’ਨ੍ਤਿ ਕੁਕ੍ਕੁਚ੍ਚਾਯਨ੍ਤੋ ਸਪਰਿਸੋ ਗੁਲ਼ਂ ਨ ਪਰਿਭੁਞ੍ਜਤਿ. ਯੇਪਿਸ੍ਸ ਸੋਤਬ੍ਬਂ ਮਞ੍ਞਨ੍ਤਿ, ਤੇਪਿ ਗੁਲ਼ਂ ਨ ਪਰਿਭੁਞ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਕਿਮਤ੍ਥਾਯ [ਕਿਮਤ੍ਥਿਯਾ (ਕ.)], ਭਿਕ੍ਖਵੇ, ਗੁਲ਼ੇ ਪਿਟ੍ਠਮ੍ਪਿ ਛਾਰਿਕਮ੍ਪਿ ਪਕ੍ਖਿਪਨ੍ਤੀਤਿ? ਥਦ੍ਧਤ੍ਥਾਯ [ਬਨ੍ਧਨਤ੍ਥਾਯ (ਸੀ. ਸ੍ਯਾ.)] ਭਗਵਾਤਿ. ਸਚੇ, ਭਿਕ੍ਖਵੇ, ਥਦ੍ਧਤ੍ਥਾਯ ਗੁਲ਼ੇ ਪਿਟ੍ਠਮ੍ਪਿ ਛਾਰਿਕਮ੍ਪਿ ਪਕ੍ਖਿਪਨ੍ਤਿ, ਸੋ ਚ ਗੁਲ਼ੋਤ੍ਵੇਵ ਸਙ੍ਖਂ ਗਚ੍ਛਤਿ. ਅਨੁਜਾਨਾਮਿ, ਭਿਕ੍ਖਵੇ, ਯਥਾਸੁਖਂ ਗੁਲ਼ਂ ਪਰਿਭੁਞ੍ਜਿਤੁਨ੍ਤਿ.

ਅਦ੍ਦਸਾ ਖੋ ਆਯਸ੍ਮਾ ਕਙ੍ਖਾਰੇਵਤੋ ਅਨ੍ਤਰਾਮਗ੍ਗੇ ਵਚ੍ਚੇ ਮੁਗ੍ਗਂ ਜਾਤਂ, ਪਸ੍ਸਿਤ੍ਵਾ ‘‘ਅਕਪ੍ਪਿਯਾ ਮੁਗ੍ਗਾ; ਪਕ੍ਕਾਪਿ ਮੁਗ੍ਗਾ ਜਾਯਨ੍ਤੀਤਿ’’ ਕੁਕ੍ਕੁਚ੍ਚਾਯਨ੍ਤੋ ਸਪਰਿਸੋ ਮੁਗ੍ਗਂ ਨ ਪਰਿਭੁਞ੍ਜਤਿ. ਯੇਪਿਸ੍ਸ ਸੋਤਬ੍ਬਂ ਮਞ੍ਞਨ੍ਤਿ, ਤੇਪਿ ਮੁਗ੍ਗਂ ਨ ਪਰਿਭੁਞ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਸਚੇ [ਸਚੇਪਿ (?)], ਭਿਕ੍ਖਵੇ, ਪਕ੍ਕਾਪਿ ਮੁਗ੍ਗਾ ਜਾਯਨ੍ਤਿ, ਅਨੁਜਾਨਾਮਿ, ਭਿਕ੍ਖਵੇ, ਯਥਾਸੁਖਂ ਮੁਗ੍ਗਂ ਪਰਿਭੁਞ੍ਜਿਤੁਨ੍ਤਿ.

੨੭੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਉਦਰਵਾਤਾਬਾਧੋ ਹੋਤਿ. ਸੋ ਲੋਣਸੋਵੀਰਕਂ ਅਪਾਯਿ. ਤਸ੍ਸ ਸੋ ਉਦਰਵਾਤਾਬਾਧੋ ਪਟਿਪ੍ਪਸ੍ਸਮ੍ਭਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਲੋਣਸੋਵੀਰਕਂ; ਅਗਿਲਾਨਸ੍ਸ ਉਦਕਸਮ੍ਭਿਨ੍ਨਂ ਪਾਨਪਰਿਭੋਗੇਨ ਪਰਿਭੁਞ੍ਜਿਤੁਨ੍ਤਿ.

ਗੁਲ਼ਾਦਿਅਨੁਜਾਨਨਾ ਨਿਟ੍ਠਿਤਾ.

੧੬੪. ਅਨ੍ਤੋਵੁਟ੍ਠਾਦਿਪਟਿਕ੍ਖੇਪਕਥਾ

੨੭੪. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਰਾਜਗਹਂ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਭਗਵਤੋ ਉਦਰਵਾਤਾਬਾਧੋ ਹੋਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ – ‘ਪੁਬ੍ਬੇਪਿ ਭਗਵਤੋ ਉਦਰਵਾਤਾਬਾਧੋ ਤੇਕਟੁਲਯਾਗੁਯਾ ਫਾਸੁ ਹੋਤੀ’ਤਿ – ਸਾਮਂ ਤਿਲਮ੍ਪਿ, ਤਣ੍ਡੁਲਮ੍ਪਿ, ਮੁਗ੍ਗਮ੍ਪਿ ਵਿਞ੍ਞਾਪੇਤ੍ਵਾ, ਅਨ੍ਤੋ ਵਾਸੇਤ੍ਵਾ, ਅਨ੍ਤੋ ਸਾਮਂ ਪਚਿਤ੍ਵਾ ਭਗਵਤੋ ਉਪਨਾਮੇਸਿ – ‘‘ਪਿਵਤੁ ਭਗਵਾ ਤੇਕਟੁਲਯਾਗੁ’’ਨ੍ਤਿ. ਜਾਨਨ੍ਤਾਪਿ ਤਥਾਗਤਾ ਪੁਚ੍ਛਨ੍ਤਿ, ਜਾਨਨ੍ਤਾਪਿ ਨ ਪੁਚ੍ਛਨ੍ਤਿ; ਕਾਲਂ ਵਿਦਿਤ੍ਵਾ ਪੁਚ੍ਛਨ੍ਤਿ, ਕਾਲਂ ਵਿਦਿਤ੍ਵਾ ਨ ਪੁਚ੍ਛਨ੍ਤਿ; ਅਤ੍ਥਸਂਹਿਤਂ ਤਥਾਗਤਾ ਪੁਚ੍ਛਨ੍ਤਿ, ਨੋ ਅਨਤ੍ਥਸਂਹਿਤਂ. ਅਨਤ੍ਥਸਂਹਿਤੇ ਸੇਤੁਘਾਤੋ ਤਥਾਗਤਾਨਂ. ਦ੍ਵੀਹਿ ਆਕਾਰੇਹਿ ਬੁਦ੍ਧਾ ਭਗਵਨ੍ਤੋ ਭਿਕ੍ਖੂ ਪਟਿਪੁਚ੍ਛਨ੍ਤਿ – ਧਮ੍ਮਂ ਵਾ ਦੇਸੇਸ੍ਸਾਮ, ਸਾਵਕਾਨਂ ਵਾ ਸਿਕ੍ਖਾਪਦਂ ਪਞ੍ਞਪੇਸ੍ਸਾਮਾਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕੁਤਾਯਂ, ਆਨਨ੍ਦ, ਯਾਗੂ’’ਤਿ? ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਵਿਗਰਹਿ ਬੁਦ੍ਧੋ ਭਗਵਾ – ‘ਅਨਨੁਚ੍ਛਵਿਕਂ, ਆਨਨ੍ਦ, ਅਨਨੁਲੋਮਿਕਂ, ਅਪ੍ਪਤਿਰੂਪਂ, ਅਸ੍ਸਾਮਣਕਂ, ਅਕਪ੍ਪਿਯਂ, ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਆਨਨ੍ਦ, ਏਵਰੂਪਾਯ ਬਾਹੁਲ੍ਲਾਯ ਚੇਤੇਸ੍ਸਸਿ. ਯਦਪਿ, ਆਨਨ੍ਦ, ਅਨ੍ਤੋ ਵੁਟ੍ਠਂ [ਵੁਤ੍ਥਂ (ਸੀ. ਸ੍ਯਾ. ਕ.)] ਤਦਪਿ ਅਕਪ੍ਪਿਯਂ; ਯਦਪਿ ਅਨ੍ਤੋ ਪਕ੍ਕਂ ਤਦਪਿ ਅਕਪ੍ਪਿਯਂ; ਯਦਪਿ ਸਾਮਂ ਪਕ੍ਕਂ, ਤਦਪਿ ਅਕਪ੍ਪਿਯਂ. ਨੇਤਂ, ਆਨਨ੍ਦ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਅਨ੍ਤੋ ਵੁਟ੍ਠਂ, ਅਨ੍ਤੋ ਪਕ੍ਕਂ, ਸਾਮਂ ਪਕ੍ਕਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨ੍ਤੋ ਚੇ, ਭਿਕ੍ਖਵੇ, ਵੁਟ੍ਠਂ, ਅਨ੍ਤੋ ਪਕ੍ਕਂ, ਸਾਮਂ ਪਕ੍ਕਂ ਤਞ੍ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਤਿਣ੍ਣਂ ਦੁਕ੍ਕਟਾਨਂ. ਅਨ੍ਤੋ ਚੇ, ਭਿਕ੍ਖਵੇ, ਵੁਟ੍ਠਂ, ਅਨ੍ਤੋ ਪਕ੍ਕਂ, ਅਞ੍ਞੇਹਿ ਪਕ੍ਕਂ, ਤਞ੍ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ. ਅਨ੍ਤੋ ਚੇ, ਭਿਕ੍ਖਵੇ, ਵੁਟ੍ਠਂ, ਬਹਿ ਪਕ੍ਕਂ, ਸਾਮਂ ਪਕ੍ਕਂ, ਤਞ੍ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ. ਬਹਿ ਚੇ, ਭਿਕ੍ਖਵੇ, ਵੁਟ੍ਠਂ, ਅਨ੍ਤੋ ਪਕ੍ਕਂ, ਸਾਮਂ ਪਕ੍ਕਂ, ਤਞ੍ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ. ਅਨ੍ਤੋ ਚੇ, ਭਿਕ੍ਖਵੇ, ਵੁਟ੍ਠਂ, ਬਹਿ ਪਕ੍ਕਂ, ਅਞ੍ਞੇਹਿ ਪਕ੍ਕਂ, ਤਞ੍ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਬਹਿ ਚੇ, ਭਿਕ੍ਖਵੇ, ਵੁਟ੍ਠਂ, ਅਨ੍ਤੋ ਪਕ੍ਕਂ, ਅਞ੍ਞੇਹਿ ਪਕ੍ਕਂ, ਤਞ੍ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਬਹਿ ਚੇ, ਭਿਕ੍ਖਵੇ, ਵੁਟ੍ਠਂ, ਬਹਿ ਪਕ੍ਕਂ, ਸਾਮਂ ਪਕ੍ਕਂ, ਤਞ੍ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਬਹਿ ਚੇ, ਭਿਕ੍ਖਵੇ, ਵੁਟ੍ਠਂ, ਬਹਿ ਪਕ੍ਕਂ, ਅਞ੍ਞੇਹਿ ਪਕ੍ਕਂ, ਤਞ੍ਚੇ ਪਰਿਭੁਞ੍ਜੇਯ੍ਯ, ਅਨਾਪਤ੍ਤੀ’’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ‘‘ਭਗਵਤਾ ਸਾਮਂਪਾਕੋ ਪਟਿਕ੍ਖਿਤ੍ਤੋ’’ਤਿ ਪੁਨ ਪਾਕੇ ਕੁਕ੍ਕੁਚ੍ਚਾਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪੁਨ ਪਾਕਂ ਪਚਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਰਾਜਗਹਂ ਦੁਬ੍ਭਿਕ੍ਖਂ ਹੋਤਿ. ਮਨੁਸ੍ਸਾ ਲੋਣਮ੍ਪਿ, ਤੇਲਮ੍ਪਿ, ਤਣ੍ਡੁਲਮ੍ਪਿ, ਖਾਦਨੀਯਮ੍ਪਿ ਆਰਾਮਂ ਆਹਰਨ੍ਤਿ. ਤਾਨਿ ਭਿਕ੍ਖੂ ਬਹਿ ਵਾਸੇਨ੍ਤਿ; ਉਕ੍ਕਪਿਣ੍ਡਕਾਪਿ ਖਾਦਨ੍ਤਿ, ਚੋਰਾਪਿ ਹਰਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਨ੍ਤੋ ਵਾਸੇਤੁਨ੍ਤਿ. ਅਨ੍ਤੋ ਵਾਸੇਤ੍ਵਾ ਬਹਿ ਪਾਚੇਨ੍ਤਿ. ਦਮਕਾ ਪਰਿਵਾਰੇਨ੍ਤਿ. ਭਿਕ੍ਖੂ ਅਵਿਸ੍ਸਟ੍ਠਾ ਪਰਿਭੁਞ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਨ੍ਤੋ ਪਚਿਤੁਨ੍ਤਿ. ਦੁਬ੍ਭਿਕ੍ਖੇ ਕਪ੍ਪਿਯਕਾਰਕਾ ਬਹੁਤਰਂ ਹਰਨ੍ਤਿ, ਅਪ੍ਪਤਰਂ ਭਿਕ੍ਖੂਨਂ ਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਾਮਂ ਪਚਿਤੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਨ੍ਤੋ ਵੁਟ੍ਠਂ, ਅਨ੍ਤੋ ਪਕ੍ਕਂ, ਸਾਮਂ ਪਕ੍ਕਨ੍ਤਿ.

ਅਨ੍ਤੋਵੁਟ੍ਠਾਦਿਪਟਿਕ੍ਖੇਪਕਥਾ ਨਿਟ੍ਠਿਤਾ.

੧੬੫. ਉਗ੍ਗਹਿਤਪਟਿਗ੍ਗਹਣਾ

੨੭੫. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕਾਸੀਸੁ ਵਸ੍ਸਂਵੁਟ੍ਠਾ ਰਾਜਗਹਂ ਗਚ੍ਛਨ੍ਤਾ ਭਗਵਨ੍ਤਂ ਦਸ੍ਸਨਾਯ ਅਨ੍ਤਰਾਮਗ੍ਗੇ ਨ ਲਭਿਂਸੁ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ; ਬਹੁਞ੍ਚ ਫਲਖਾਦਨੀਯਂ ਅਹੋਸਿ; ਕਪ੍ਪਿਯਕਾਰਕੋ ਚ ਨ ਅਹੋਸਿ. ਅਥ ਖੋ ਤੇ ਭਿਕ੍ਖੂ ਕਿਲਨ੍ਤਰੂਪਾ ਯੇਨ ਰਾਜਗਹਂ ਵੇਲ਼ੁਵਨਂ ਕਲਨ੍ਦਕਨਿਵਾਪੋ, ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿਤ੍ਥ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤਾ; ਕੁਤੋ ਚ ਤੁਮ੍ਹੇ, ਭਿਕ੍ਖਵੇ, ਆਗਚ੍ਛਥਾ’’ਤਿ? ‘‘ਖਮਨੀਯਂ ਭਗਵਾ, ਯਾਪਨੀਯਂ ਭਗਵਾ. ਇਧ ਮਯਂ, ਭਨ੍ਤੇ, ਕਾਸੀਸੁ ਵਸ੍ਸਂਵੁਟ੍ਠਾ ਰਾਜਗਹਂ ਆਗਚ੍ਛਨ੍ਤਾ ਭਗਵਨ੍ਤਂ ਦਸ੍ਸਨਾਯ ਅਨ੍ਤਰਾਮਗ੍ਗੇ ਨ ਲਭਿਮ੍ਹਾ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ; ਬਹੁਞ੍ਚ ਫਲਖਾਦਨੀਯਂ ਅਹੋਸਿ; ਕਪ੍ਪਿਯਕਾਰਕੋ ਚ ਨ ਅਹੋਸਿ; ਤੇਨ ਮਯਂ ਕਿਲਨ੍ਤਰੂਪਾ ਅਦ੍ਧਾਨਂ ਆਗਤਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਯਤ੍ਥ ਫਲਖਾਦਨੀਯਂ ਪਸ੍ਸਤਿ, ਕਪ੍ਪਿਯਕਾਰਕੋ ਚ ਨ ਹੋਤਿ, ਸਾਮਂ ਗਹੇਤ੍ਵਾ, ਹਰਿਤ੍ਵਾ, ਕਪ੍ਪਿਯਕਾਰਕੇ ਪਸ੍ਸਿਤ੍ਵਾ, ਭੂਮਿਯਂ ਨਿਕ੍ਖਿਪਿਤ੍ਵਾ, ਪਟਿਗ੍ਗਹਾਪੇਤ੍ਵਾ ਪਰਿਭੁਞ੍ਜਿਤੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਗ੍ਗਹਿਤਂ ਪਟਿਗ੍ਗਹਿਤੁ’’ਨ੍ਤਿ.

੨੭੬. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਨਵਾ ਚ ਤਿਲਾ ਨਵਞ੍ਚ ਮਧੁ ਉਪ੍ਪਨ੍ਨਾ ਹੋਨ੍ਤਿ. ਅਥ ਖੋ ਤਸ੍ਸ ਬ੍ਰਾਹ੍ਮਣਸ੍ਸ ਏਤਦਹੋਸਿ – ‘‘ਯਂਨੂਨਾਹਂ ਨਵੇ ਚ ਤਿਲੇ ਨਵਞ੍ਚ ਮਧੁਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਦੇਯ੍ਯ’’ਨ੍ਤਿ. ਅਥ ਖੋ ਸੋ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਪਟਿਸਮ੍ਮੋਦਿ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਅਧਿਵਾਸੇਤੁ ਮੇ ਭਵਂ ਗੋਤਮੋ ਸ੍ਵਾਤਨਾਯ ਭਤ੍ਤਂ, ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਸੋ ਬ੍ਰਾਹ੍ਮਣੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਪਕ੍ਕਾਮਿ. ਅਥ ਖੋ ਸੋ ਬ੍ਰਾਹ੍ਮਣੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭੋ ਗੋਤਮ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਤਸ੍ਸ ਬ੍ਰਾਹ੍ਮਣਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਸੋ ਬ੍ਰਾਹ੍ਮਣੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਤਂ ਬ੍ਰਾਹ੍ਮਣਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ, ਸਮਾਦਪੇਤ੍ਵਾ, ਸਮੁਤ੍ਤੇਜੇਤ੍ਵਾ, ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

ਅਥ ਖੋ ਤਸ੍ਸ ਬ੍ਰਾਹ੍ਮਣਸ੍ਸ ਅਚਿਰਪਕ੍ਕਨ੍ਤਸ੍ਸ ਭਗਵਤੋ ਏਤਦਹੋਸਿ – ‘‘ਯੇਸਂ ਖੋ ਮਯਾ ਅਤ੍ਥਾਯ ਬੁਦ੍ਧਪ੍ਪਮੁਖੋ ਭਿਕ੍ਖੁਸਙ੍ਘੋ ਨਿਮਨ੍ਤਿਤੋ, ‘ਨਵੇ ਚ ਤਿਲੇ ਨਵਞ੍ਚ ਮਧੁਂ ਦਸ੍ਸਾਮੀ’ਤਿ, ਤੇ ਮਯਾ ਪਮੁਟ੍ਠਾ ਦਾਤੁਂ. ਯਂਨੂਨਾਹਂ ਨਵੇ ਚ ਤਿਲੇ ਨਵਞ੍ਚ ਮਧੁਂ ਕੋਲਮ੍ਬੇਹਿ ਚ ਘਟੇਹਿ ਚ ਆਰਾਮਂ ਹਰਾਪੇਯ੍ਯ’’ਨ੍ਤਿ. ਅਥ ਖੋ ਸੋ ਬ੍ਰਾਹ੍ਮਣੋ ਨਵੇ ਚ ਤਿਲੇ ਨਵਞ੍ਚ ਮਧੁਂ ਕੋਲਮ੍ਬੇਹਿ ਚ ਘਟੇਹਿ ਚ ਆਰਾਮਂ ਹਰਾਪੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਯੇਸਂ ਖੋ ਮਯਾ, ਭੋ ਗੋਤਮ, ਅਤ੍ਥਾਯ ਬੁਦ੍ਧਪ੍ਪਮੁਖੋ ਭਿਕ੍ਖੁਸਙ੍ਘੋ ਨਿਮਨ੍ਤਿਤੋ, ‘ਨਵੇ ਚ ਤਿਲੇ ਨਵਞ੍ਚ ਮਧੁਂ ਦਸ੍ਸਾਮੀ’ਤਿ, ਤੇ ਮਯਾ ਪਮੁਟ੍ਠਾ ਦਾਤੁਂ. ਪਟਿਗ੍ਗਣ੍ਹਾਤੁ ਮੇ ਭਵਂ ਗੋਤਮੋ ਨਵੇ ਚ ਤਿਲੇ ਨਵਞ੍ਚ ਮਧੁ’’ਨ੍ਤਿ. ਤੇਨ ਹਿ, ਬ੍ਰਾਹ੍ਮਣ, ਭਿਕ੍ਖੂਨਂ ਦੇਹੀਤਿ. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਦੁਬ੍ਭਿਕ੍ਖੇ ਅਪ੍ਪਮਤ੍ਤਕੇਪਿ ਪਵਾਰੇਨ੍ਤਿ, ਪਟਿਸਙ੍ਖਾਪਿ ਪਟਿਕ੍ਖਿਪਨ੍ਤਿ, ਸਬ੍ਬੋ ਚ ਸਙ੍ਘੋ ਪਵਾਰਿਤੋ ਹੋਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਪਟਿਗ੍ਗਣ੍ਹਨ੍ਤਿ. ਪਟਿਗ੍ਗਣ੍ਹਥ, ਭਿਕ੍ਖਵੇ, ਪਰਿਭੁਞ੍ਜਥ. ਅਨੁਜਾਨਾਮਿ, ਭਿਕ੍ਖਵੇ, ਤਤੋ ਨੀਹਟਂ ਭੁਤ੍ਤਾਵਿਨਾ ਪਵਾਰਿਤੇਨ ਅਨਤਿਰਿਤ੍ਤਂ ਪਰਿਭੁਞ੍ਜਿਤੁਨ੍ਤਿ.

ਉਗ੍ਗਹਿਤਪਟਿਗ੍ਗਹਣਾ ਨਿਟ੍ਠਿਤਾ.

੧੬੬. ਪਟਿਗ੍ਗਹਿਤਾਦਿਅਨੁਜਾਨਨਾ

੨੭੭. [ਪਾਚਿ. ੨੯੫] ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਉਪਟ੍ਠਾਕਕੁਲਂ ਸਙ੍ਘਸ੍ਸਤ੍ਥਾਯ ਖਾਦਨੀਯਂ ਪਾਹੇਸਿ – ਅਯ੍ਯਸ੍ਸ ਉਪਨਨ੍ਦਸ੍ਸ ਦਸ੍ਸੇਤ੍ਵਾ ਸਙ੍ਘਸ੍ਸ ਦਾਤਬ੍ਬਨ੍ਤਿ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਗਾਮਂ ਪਿਣ੍ਡਾਯ ਪਵਿਟ੍ਠੋ ਹੋਤਿ. ਅਥ ਖੋ ਤੇ ਮਨੁਸ੍ਸਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂ ਪੁਚ੍ਛਿਂਸੁ – ‘‘ਕਹਂ, ਭਨ੍ਤੇ, ਅਯ੍ਯੋ ਉਪਨਨ੍ਦੋ’’ਤਿ? ‘‘ਏਸਾਵੁਸੋ, ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਗਾਮਂ ਪਿਣ੍ਡਾਯ ਪਵਿਟ੍ਠੋ’’ਤਿ. ‘‘ਇਦਂ, ਭਨ੍ਤੇ, ਖਾਦਨੀਯਂ ਅਯ੍ਯਸ੍ਸ ਉਪਨਨ੍ਦਸ੍ਸ ਦਸ੍ਸੇਤ੍ਵਾ ਸਙ੍ਘਸ੍ਸ ਦਾਤਬ੍ਬ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਤੇਨ ਹਿ, ਭਿਕ੍ਖਵੇ, ਪਟਿਗ੍ਗਹੇਤ੍ਵਾ ਨਿਕ੍ਖਿਪਥ ਯਾਵ ਉਪਨਨ੍ਦੋ ਆਗਚ੍ਛਤੀਤਿ. ਅਥ ਖੋ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਪੁਰੇਭਤ੍ਤਂ ਕੁਲਾਨਿ ਪਯਿਰੁਪਾਸਿਤ੍ਵਾ ਦਿਵਾ ਆਗਚ੍ਛਤਿ. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਦੁਬ੍ਭਿਕ੍ਖੇ ਅਪ੍ਪਮਤ੍ਤਕੇਪਿ ਪਵਾਰੇਨ੍ਤਿ, ਪਟਿਸਙ੍ਖਾਪਿ ਪਟਿਕ੍ਖਿਪਨ੍ਤਿ, ਸਬ੍ਬੋ ਚ ਸਙ੍ਘੋ ਪਵਾਰਿਤੋ ਹੋਤਿ, ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਪਟਿਗ੍ਗਣ੍ਹਨ੍ਤਿ. ਪਟਿਗ੍ਗਣ੍ਹਥ, ਭਿਕ੍ਖਵੇ, ਪਰਿਭੁਞ੍ਜਥ. ਅਨੁਜਾਨਾਮਿ, ਭਿਕ੍ਖਵੇ, ਪੁਰੇਭਤ੍ਤਂ ਪਟਿਗ੍ਗਹਿਤਂ ਭੁਤ੍ਤਾਵਿਨਾ ਪਵਾਰਿਤੇਨ ਅਨਤਿਰਿਤ੍ਤਂ ਪਰਿਭੁਞ੍ਜਿਤੁਨ੍ਤਿ.

੨੭੮. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਕਾਯਡਾਹਾਬਾਧੋ ਹੋਤਿ. ਅਥ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਯੇਨਾਯਸ੍ਮਾ ਸਾਰਿਪੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ – ‘‘ਪੁਬ੍ਬੇ ਤੇ, ਆਵੁਸੋ ਸਾਰਿਪੁਤ੍ਤ, ਕਾਯਡਾਹਾਬਾਧੋ ਕੇਨ ਫਾਸੁ ਹੋਤੀ’’ਤਿ? ‘‘ਭਿਸੇਹਿ ਚ ਮੇ, ਆਵੁਸੋ, ਮੁਲ਼ਾਲਿਕਾਹਿ ਚਾ’’ਤਿ. ਅਥ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮ੍ਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ, ਏਵਮੇਵ ਜੇਤਵਨੇ ਅਨ੍ਤਰਹਿਤੋ ਮਨ੍ਦਾਕਿਨਿਯਾ ਪੋਕ੍ਖਰਣਿਯਾ ਤੀਰੇ ਪਾਤੁਰਹੋਸਿ. ਅਦ੍ਦਸਾ ਖੋ ਅਞ੍ਞਤਰੋ ਨਾਗੋ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਏਤਦਵੋਚ – ‘‘ਏਤੁ ਖੋ, ਭਨ੍ਤੇ, ਅਯ੍ਯੋ ਮਹਾਮੋਗ੍ਗਲ੍ਲਾਨੋ. ਸ੍ਵਾਗਤਂ, ਭਨ੍ਤੇ, ਅਯ੍ਯਸ੍ਸ ਮਹਾਮੋਗ੍ਗਲ੍ਲਾਨਸ੍ਸ. ਕੇਨ, ਭਨ੍ਤੇ, ਅਯ੍ਯਸ੍ਸ ਅਤ੍ਥੋ; ਕਿਂ ਦਮ੍ਮੀ’’ਤਿ? ‘‘ਭਿਸੇਹਿ ਚ ਮੇ, ਆਵੁਸੋ, ਅਤ੍ਥੋ, ਮੁਲ਼ਾਲਿਕਾਹਿ ਚਾ’’ਤਿ. ਅਥ ਖੋ ਸੋ ਨਾਗੋ ਅਞ੍ਞਤਰਂ ਨਾਗਂ ਆਣਾਪੇਸਿ – ‘‘ਤੇਨ ਹਿ, ਭਣੇ, ਅਯ੍ਯਸ੍ਸ ਭਿਸੇ ਚ ਮੁਲ਼ਾਲਿਕਾਯੋ ਚ ਯਾਵਦਤ੍ਥਂ ਦੇਹੀ’’ਤਿ. ਅਥ ਖੋ ਸੋ ਨਾਗੋ ਮਨ੍ਦਾਕਿਨਿਂ ਪੋਕ੍ਖਰਣਿਂ ਓਗਾਹੇਤ੍ਵਾ, ਸੋਣ੍ਡਾਯ ਭਿਸਞ੍ਚ ਮੁਲ਼ਾਲਿਕਞ੍ਚ ਅਬ੍ਬਾਹਿਤ੍ਵਾ, ਸੁਵਿਕ੍ਖਾਲਿਤਂ ਵਿਕ੍ਖਾਲੇਤ੍ਵਾ, ਭਣ੍ਡਿਕਂ ਬਨ੍ਧਿਤ੍ਵਾ ਯੇਨਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤੇਨੁਪਸਙ੍ਕਮਿ. ਅਥ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ, ਏਵਮੇਵ – ਮਨ੍ਦਾਕਿਨਿਯਾ ਪੋਕ੍ਖਰਣਿਯਾ ਤੀਰੇ ਅਨ੍ਤਰਹਿਤੋ ਜੇਤਵਨੇ ਪਾਤੁਰਹੋਸਿ. ਸੋਪਿ ਖੋ ਨਾਗੋ ਮਨ੍ਦਾਕਿਨਿਯਾ ਪੋਕ੍ਖਰਣਿਯਾ ਤੀਰੇ ਅਨ੍ਤਰਹਿਤੋ ਜੇਤਵਨੇ ਪਾਤੁਰਹੋਸਿ. ਅਥ ਖੋ ਸੋ ਨਾਗੋ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਭਿਸੇ ਚ ਮੁਲ਼ਾਲਿਕਾਯੋ ਚ ਪਟਿਗ੍ਗਹਾਪੇਤ੍ਵਾ ਜੇਤਵਨੇ ਅਨ੍ਤਰਹਿਤੋ ਮਨ੍ਦਾਕਿਨਿਯਾ ਪੋਕ੍ਖਰਣਿਯਾ ਤੀਰੇ ਪਾਤੁਰਹੋਸਿ. ਅਥ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਭਿਸੇ ਚ ਮੁਲ਼ਾਲਿਕਾਯੋ ਚ ਉਪਨਾਮੇਸਿ. ਅਥ ਖੋ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਭਿਸੇ ਚ ਮੁਲ਼ਾਲਿਕਾਯੋ ਚ ਭੁਤ੍ਤਸ੍ਸ ਕਾਯਡਾਹਾਬਾਧੋ ਪਟਿਪ੍ਪਸ੍ਸਮ੍ਭਿ. ਬਹੂ ਭਿਸਾ ਚ ਮੁਲ਼ਾਲਿਕਾਯੋ ਚ ਅਵਸਿਟ੍ਠਾ ਹੋਨ੍ਤਿ. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਦੁਬ੍ਭਿਕ੍ਖੇ ਅਪ੍ਪਮਤ੍ਤਕੇਪਿ ਪਵਾਰੇਨ੍ਤਿ, ਪਟਿਸਙ੍ਖਾਪਿ ਪਟਿਕ੍ਖਿਪਨ੍ਤਿ, ਸਬ੍ਬੋ ਚ ਸਙ੍ਘੋ ਪਵਾਰਿਤੋ ਹੋਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਪਟਿਗ੍ਗਣ੍ਹਨ੍ਤਿ. ਪਟਿਗ੍ਗਣ੍ਹਥ, ਭਿਕ੍ਖਵੇ, ਪਰਿਭੁਞ੍ਜਥ. ਅਨੁਜਾਨਾਮਿ, ਭਿਕ੍ਖਵੇ, ਵਨਟ੍ਠਂ ਪੋਕ੍ਖਰਟ੍ਠਂ ਭੁਤ੍ਤਾਵਿਨਾ ਪਵਾਰਿਤੇਨ ਅਨਤਿਰਿਤ੍ਤਂ ਪਰਿਭੁਞ੍ਜਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਸਾਵਤ੍ਥਿਯਂ ਬਹੁਂ ਫਲਖਾਦਨੀਯਂ ਉਪ੍ਪਨ੍ਨਂ ਹੋਤਿ, ਕਪ੍ਪਿਯਕਾਰਕੋ ਚ ਨ ਹੋਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਫਲਂ ਨ ਪਰਿਭੁਞ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਬੀਜਂ ਨਿਬ੍ਬਤ੍ਤਬੀਜਂ [ਨਿਬ੍ਬਟ੍ਟਬੀਜਂ (ਸੀ.), ਨਿਬ੍ਬਟਬੀਜਂ (ਸ੍ਯਾ.), ਨਿਪ੍ਪਟ੍ਟਬੀਜਂ (ਕ.)] ਅਕਤਕਪ੍ਪਂ ਫਲਂ ਪਰਿਭੁਞ੍ਜਿਤੁਨ੍ਤਿ.

ਪਟਿਗ੍ਗਹਿਤਾਦਿ ਅਨੁਜਾਨਨਾ ਨਿਟ੍ਠਿਤਾ.

੧੬੭. ਸਤ੍ਥਕਮ੍ਮਪਟਿਕ੍ਖੇਪਕਥਾ

੨੭੯. ਅਥ ਖੋ ਭਗਵਾ ਸਾਵਤ੍ਥਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਰਾਜਗਹਂ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਰਾਜਗਹਂ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਭਗਨ੍ਦਲਾਬਾਧੋ ਹੋਤਿ. ਆਕਾਸਗੋਤ੍ਤੋ ਵੇਜ੍ਜੋ ਸਤ੍ਥਕਮ੍ਮਂ ਕਰੋਤਿ. ਅਥ ਖੋ ਭਗਵਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਯੇਨ ਤਸ੍ਸ ਭਿਕ੍ਖੁਨੋ ਵਿਹਾਰੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਆਕਾਸਗੋਤ੍ਤੋ ਵੇਜ੍ਜੋ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ‘‘ਆਗਚ੍ਛਤੁ ਭਵਂ ਗੋਤਮੋ, ਇਮਸ੍ਸ ਭਿਕ੍ਖੁਨੋ ਵਚ੍ਚਮਗ੍ਗਂ ਪਸ੍ਸਤੁ, ਸੇਯ੍ਯਥਾਪਿ ਗੋਧਾਮੁਖ’’ਨ੍ਤਿ. ਅਥ ਖੋ ਭਗਵਾ – ‘‘ਸੋ ਮਂ ਖ੍ਵਾਯਂ ਮੋਘਪੁਰਿਸੋ ਉਪ੍ਪਣ੍ਡੇਤੀ’’ਤਿ – ਤਤੋਵ ਪਟਿਨਿਵਤ੍ਤਿਤ੍ਵਾ, ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ, ਭਿਕ੍ਖੂ ਪਟਿਪੁਚ੍ਛਿ – ‘‘ਅਤ੍ਥਿ ਕਿਰ, ਭਿਕ੍ਖਵੇ, ਅਮੁਕਸ੍ਮਿਂ ਵਿਹਾਰੇ ਭਿਕ੍ਖੁ ਗਿਲਾਨੋ’’ਤਿ? ‘‘ਅਤ੍ਥਿ ਭਗਵਾ’’ਤਿ. ‘‘ਕਿਂ ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਆਬਾਧੋ’’ਤਿ? ‘‘ਤਸ੍ਸ, ਭਨ੍ਤੇ, ਆਯਸ੍ਮਤੋ ਭਗਨ੍ਦਲਾਬਾਧੋ, ਆਕਾਸਗੋਤ੍ਤੋ ਵੇਜ੍ਜੋ ਸਤ੍ਥਕਮ੍ਮਂ ਕਰੋਤੀ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਿਕ੍ਖਵੇ, ਤਸ੍ਸ ਮੋਘਪੁਰਿਸਸ੍ਸ, ਅਨਨੁਲੋਮਿਕਂ, ਅਪ੍ਪਤਿਰੂਪਂ, ਅਸ੍ਸਾਮਣਕਂ, ਅਕਪ੍ਪਿਯਂ, ਅਕਰਣੀਯਂ. ਕਥਞ੍ਹਿ ਨਾਮ ਸੋ, ਭਿਕ੍ਖਵੇ, ਮੋਘਪੁਰਿਸੋ ਸਮ੍ਬਾਧੇ ਸਤ੍ਥਕਮ੍ਮਂ ਕਾਰਾਪੇਸ੍ਸਤਿ. ਸਮ੍ਬਾਧੇ, ਭਿਕ੍ਖਵੇ, ਸੁਖੁਮਾ ਛਵਿ, ਦੁਰੋਪਯੋ ਵਣੋ, ਦੁਪ੍ਪਰਿਹਾਰਂ ਸਤ੍ਥਂ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਸਮ੍ਬਾਧੇ ਸਤ੍ਥਕਮ੍ਮਂ ਕਾਰਾਪੇਤਬ੍ਬਂ. ਯੋ ਕਾਰਾਪੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ – ਭਗਵਤਾ ਸਤ੍ਥਕਮ੍ਮਂ ਪਟਿਕ੍ਖਿਤ੍ਤਨ੍ਤਿ – ਵਤ੍ਥਿਕਮ੍ਮਂ ਕਾਰਾਪੇਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ, ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਵਤ੍ਥਿਕਮ੍ਮਂ ਕਾਰਾਪੇਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਵਤ੍ਥਿਕਮ੍ਮਂ ਕਾਰਾਪੇਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਸਮ੍ਬਾਧਸ੍ਸ ਸਾਮਨ੍ਤਾ ਦ੍ਵਙ੍ਗੁਲਾ ਸਤ੍ਥਕਮ੍ਮਂ ਵਾ ਵਤ੍ਥਿਕਮ੍ਮਂ ਵਾ ਕਾਰਾਪੇਤਬ੍ਬਂ. ਯੋ ਕਾਰਾਪੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.

ਸਤ੍ਥਕਮ੍ਮਪਟਿਕ੍ਖੇਪਕਥਾ ਨਿਟ੍ਠਿਤਾ.

੧੬੮. ਮਨੁਸ੍ਸਮਂਸਪਟਿਕ੍ਖੇਪਕਥਾ

੨੮੦. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਬਾਰਾਣਸੀ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਬਾਰਾਣਸੀ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਬਾਰਾਣਸਿਯਂ ਵਿਹਰਤਿ ਇਸਿਪਤਨੇ ਮਿਗਦਾਯੇ. ਤੇਨ ਖੋ ਪਨ ਸਮਯੇਨ ਬਾਰਾਣਸਿਯਂ ਸੁਪ੍ਪਿਯੋ ਚ ਉਪਾਸਕੋ ਸੁਪ੍ਪਿਯਾ ਚ ਉਪਾਸਿਕਾ ਉਭਤੋਪਸਨ੍ਨਾ ਹੋਨ੍ਤਿ, ਦਾਯਕਾ, ਕਾਰਕਾ, ਸਙ੍ਘੁਪਟ੍ਠਾਕਾ. ਅਥ ਖੋ ਸੁਪ੍ਪਿਯਾ ਉਪਾਸਿਕਾ ਆਰਾਮਂ ਗਨ੍ਤ੍ਵਾ ਵਿਹਾਰੇਨ ਵਿਹਾਰਂ ਪਰਿਵੇਣੇਨ ਪਰਿਵੇਣਂ ਉਪਸਙ੍ਕਮਿਤ੍ਵਾ ਭਿਕ੍ਖੂ ਪੁਚ੍ਛਤਿ – ‘‘ਕੋ, ਭਨ੍ਤੇ, ਗਿਲਾਨੋ, ਕਸ੍ਸ ਕਿਂ ਆਹਰਿਯਤੂ’’ਤਿ? ਤੇਨ ਖੋ ਪਨ ਸਮਯੇਨ ਅਞ੍ਞਤਰੇਨ ਭਿਕ੍ਖੁਨਾ ਵਿਰੇਚਨਂ ਪੀਤਂ ਹੋਤਿ. ਅਥ ਖੋ ਸੋ ਭਿਕ੍ਖੁ ਸੁਪ੍ਪਿਯਂ ਉਪਾਸਿਕਂ ਏਤਦਵੋਚ – ‘‘ਮਯਾ ਖੋ, ਭਗਿਨਿ, ਵਿਰੇਚਨਂ ਪੀਤਂ. ਅਤ੍ਥੋ ਮੇ ਪਟਿਚ੍ਛਾਦਨੀਯੇਨਾ’’ਤਿ. ‘‘ਸੁਟ੍ਠੁ, ਅਯ੍ਯ, ਆਹਰਿਯਿਸ੍ਸਤੀ’’ਤਿ ਘਰਂ ਗਨ੍ਤ੍ਵਾ ਅਨ੍ਤੇਵਾਸਿਂ ਆਣਾਪੇਸਿ – ‘‘ਗਚ੍ਛ, ਭਣੇ, ਪਵਤ੍ਤਮਂਸਂ ਜਾਨਾਹੀ’’ਤਿ. ਏਵਂ, ਅਯ੍ਯੇਤਿ ਖੋ ਸੋ ਪੁਰਿਸੋ ਸੁਪ੍ਪਿਯਾਯ ਉਪਾਸਿਕਾਯ ਪਟਿਸ੍ਸੁਣਿਤ੍ਵਾ ਕੇਵਲਕਪ੍ਪਂ ਬਾਰਾਣਸਿਂ ਆਹਿਣ੍ਡਨ੍ਤੋ ਨ ਅਦ੍ਦਸ ਪਵਤ੍ਤਮਂਸਂ. ਅਥ ਖੋ ਸੋ ਪੁਰਿਸੋ ਯੇਨ ਸੁਪ੍ਪਿਯਾ ਉਪਾਸਿਕਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸੁਪ੍ਪਿਯਂ ਉਪਾਸਿਕਂ ਏਤਦਵੋਚ – ‘‘ਨਤ੍ਥਯ੍ਯੇ ਪਵਤ੍ਤਮਂਸਂ. ਮਾਘਾਤੋ ਅਜ੍ਜਾ’’ਤਿ. ਅਥ ਖੋ ਸੁਪ੍ਪਿਯਾਯ ਉਪਾਸਿਕਾਯ ਏਤਦਹੋਸਿ – ‘‘ਤਸ੍ਸ ਖੋ ਗਿਲਾਨਸ੍ਸ ਭਿਕ੍ਖੁਨੋ ਪਟਿਚ੍ਛਾਦਨੀਯਂ ਅਲਭਨ੍ਤਸ੍ਸ ਆਬਾਧੋ ਵਾ ਅਭਿਵਡ੍ਢਿਸ੍ਸਤਿ, ਕਾਲਙ੍ਕਿਰਿਯਾ ਵਾ ਭਵਿਸ੍ਸਤਿ. ਨ ਖੋ ਮੇਤਂ ਪਤਿਰੂਪਂ ਯਾਹਂ ਪਟਿਸ੍ਸੁਣਿਤ੍ਵਾ ਨ ਹਰਾਪੇਯ੍ਯ’’ਨ੍ਤਿ. ਪੋਤ੍ਥਨਿਕਂ ਗਹੇਤ੍ਵਾ ਊਰੁਮਂਸਂ ਉਕ੍ਕਨ੍ਤਿਤ੍ਵਾ ਦਾਸਿਯਾ ਅਦਾਸਿ – ‘‘ਹਨ੍ਦ, ਜੇ, ਇਮਂ ਮਂਸਂ ਸਮ੍ਪਾਦੇਤ੍ਵਾ ਅਮੁਕਸ੍ਮਿਂ ਵਿਹਾਰੇ ਭਿਕ੍ਖੁ ਗਿਲਾਨੋ, ਤਸ੍ਸ ਦਜ੍ਜਾਹਿ. ਯੋ ਚ ਮਂ ਪੁਚ੍ਛਤਿ, ‘ਗਿਲਾਨਾ’ਤਿ ਪਟਿਵੇਦੇਹੀ’’ਤਿ. ਉਤ੍ਤਰਾਸਙ੍ਗੇਨ ਊਰੁਂ ਵੇਠੇਤ੍ਵਾ ਓਵਰਕਂ ਪਵਿਸਿਤ੍ਵਾ ਮਞ੍ਚਕੇ ਨਿਪਜ੍ਜਿ. ਅਥ ਖੋ ਸੁਪ੍ਪਿਯੋ ਉਪਾਸਕੋ ਘਰਂ ਗਨ੍ਤ੍ਵਾ ਦਾਸਿਂ ਪੁਚ੍ਛਿ – ‘‘ਕਹਂ ਸੁਪ੍ਪਿਯਾ’’ਤਿ? ‘‘ਏਸਾਯ੍ਯ ਓਵਰਕੇ ਨਿਪਨ੍ਨਾ’’ਤਿ. ਅਥ ਖੋ ਸੁਪ੍ਪਿਯੋ ਉਪਾਸਕੋ ਯੇਨ ਸੁਪ੍ਪਿਯਾ ਉਪਾਸਿਕਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸੁਪ੍ਪਿਯਂ ਉਪਾਸਿਕਂ ਏਤਦਵੋਚ – ‘‘ਕਿਸ੍ਸ ਨਿਪਨ੍ਨਾਸੀ’’ਤਿ? ‘‘ਗਿਲਾਨਾਮ੍ਹੀ’’ਤਿ. ‘‘ਕਿਂ ਤੇ ਆਬਾਧੋ’’ਤਿ? ਅਥ ਖੋ ਸੁਪ੍ਪਿਯਾ ਉਪਾਸਿਕਾ ਸੁਪ੍ਪਿਯਸ੍ਸ ਉਪਾਸਕਸ੍ਸ ਏਤਮਤ੍ਥਂ ਆਰੋਚੇਸਿ. ਅਥ ਖੋ ਸੁਪ੍ਪਿਯੋ ਉਪਾਸਕੋ – ਅਚ੍ਛਰਿਯਂ ਵਤ ਭੋ! ਅਬ੍ਭੁਤਂ ਵਤ ਭੋ! ਯਾਵ ਸਦ੍ਧਾਯਂ ਸੁਪ੍ਪਿਯਾ ਪਸਨ੍ਨਾ, ਯਤ੍ਰ ਹਿ ਨਾਮ ਅਤ੍ਤਨੋਪਿ ਮਂਸਾਨਿ ਪਰਿਚ੍ਚਤ੍ਤਾਨਿ! ਕਿਮ੍ਪਿਮਾਯ [ਕਿਂ ਪਨਿਮਾਯ (ਸੀ. ਸ੍ਯਾ.)] ਅਞ੍ਞਂ ਕਿਞ੍ਚਿ ਅਦੇਯ੍ਯਂ ਭਵਿਸ੍ਸਤੀਤਿ – ਹਟ੍ਠੋ ਉਦਗ੍ਗੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੁਪ੍ਪਿਯੋ ਉਪਾਸਕੋ ਭਗਵਨ੍ਤਂ ਏਤਦਵੋਚ – ‘‘ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਸ੍ਵਾਤਨਾਯ ਭਤ੍ਤਂ, ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਸੁਪ੍ਪਿਯੋ ਉਪਾਸਕੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਸੁਪ੍ਪਿਯੋ ਉਪਾਸਕੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਸੁਪ੍ਪਿਯਸ੍ਸ ਉਪਾਸਕਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਸੁਪ੍ਪਿਯੋ ਉਪਾਸਕੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਂ ਖੋ ਸੁਪ੍ਪਿਯਂ ਉਪਾਸਕਂ ਭਗਵਾ ਏਤਦਵੋਚ – ‘‘ਕਹਂ ਸੁਪ੍ਪਿਯਾ’’ਤਿ? ‘‘ਗਿਲਾਨਾ ਭਗਵਾ’’ਤਿ. ‘‘ਤੇਨ ਹਿ ਆਗਚ੍ਛਤੂ’’ਤਿ. ‘‘ਨ ਭਗਵਾ ਉਸ੍ਸਹਤੀ’’ਤਿ. ‘‘ਤੇਨ ਹਿ ਪਰਿਗ੍ਗਹੇਤ੍ਵਾਪਿ ਆਨੇਥਾ’’ਤਿ. ਅਥ ਖੋ ਸੁਪ੍ਪਿਯੋ ਉਪਾਸਕੋ ਸੁਪ੍ਪਿਯਂ ਉਪਾਸਿਕਂ ਪਰਿਗ੍ਗਹੇਤ੍ਵਾ ਆਨੇਸਿ. ਤਸ੍ਸਾ, ਸਹ ਦਸ੍ਸਨੇਨ ਭਗਵਤੋ, ਤਾਵ ਮਹਾਵਣੋ ਰੁਲ਼ਹੋ ਅਹੋਸਿ, ਸੁਚ੍ਛਵਿਲੋਮਜਾਤੋ. ਅਥ ਖੋ ਸੁਪ੍ਪਿਯੋ ਚ ਉਪਾਸਕੋ ਸੁਪ੍ਪਿਯਾ ਚ ਉਪਾਸਿਕਾ – ‘‘ਅਚ੍ਛਰਿਯਂ ਵਤ ਭੋ! ਅਬ੍ਭੁਤਂ ਵਤ ਭੋ! ਤਥਾਗਤਸ੍ਸ ਮਹਿਦ੍ਧਿਕਤਾ ਮਹਾਨੁਭਾਵਤਾ, ਯਤ੍ਰ ਹਿ ਨਾਮ ਸਹ ਦਸ੍ਸਨੇਨ ਭਗਵਤੋ ਤਾਵ ਮਹਾਵਣੋ ਰੁਲ਼ਹੋ ਭਵਿਸ੍ਸਤਿ, ਸੁਚ੍ਛਵਿਲੋਮਜਾਤੋ’’ਤਿ – ਹਟ੍ਠਾ ਉਦਗ੍ਗਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿਂਸੁ. ਅਥ ਖੋ ਭਗਵਾ ਸੁਪ੍ਪਿਯਞ੍ਚ ਉਪਾਸਕਂ ਸੁਪ੍ਪਿਯਞ੍ਚ ਉਪਾਸਿਕਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ

ਪਟਿਪੁਚ੍ਛਿ – ‘‘ਕੋ, ਭਿਕ੍ਖਵੇ, ਸੁਪ੍ਪਿਯਂ ਉਪਾਸਿਕਂ ਮਂਸਂ ਵਿਞ੍ਞਾਪੇਸੀ’’ਤਿ? ਏਵਂ ਵੁਤ੍ਤੇ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਅਹਂ ਖੋ, ਭਨ੍ਤੇ, ਸੁਪ੍ਪਿਯਂ ਉਪਾਸਿਕਂ ਮਂਸਂ ਵਿਞ੍ਞਾਪੇਸਿ’’ਨ੍ਤਿ. ‘‘ਆਹਰਿਯਿਤ੍ਥ ਭਿਕ੍ਖੂ’’ਤਿ? ‘‘ਆਹਰਿਯਿਤ੍ਥ ਭਗਵਾ’’ਤਿ. ‘‘ਪਰਿਭੁਞ੍ਜਿ ਤ੍ਵਂ ਭਿਕ੍ਖੂ’’ਤਿ? ‘‘ਪਰਿਭੁਞ੍ਜਾਮਹਂ ਭਗਵਾ’’ਤਿ. ‘‘ਪਟਿਵੇਕ੍ਖਿ ਤ੍ਵਂ ਭਿਕ੍ਖੂ’’ਤਿ? ‘‘ਨਾਹਂ ਭਗਵਾ ਪਟਿਵੇਕ੍ਖਿ’’ਨ੍ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਅਪ੍ਪਟਿਵੇਕ੍ਖਿਤ੍ਵਾ ਮਂਸਂ ਪਰਿਭੁਞ੍ਜਿਸ੍ਸਸਿ. ਮਨੁਸ੍ਸਮਂਸਂ ਖੋ ਤਯਾ, ਮੋਘਪੁਰਿਸ, ਪਰਿਭੁਤ੍ਤਂ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਸਨ੍ਤਿ, ਭਿਕ੍ਖਵੇ, ਮਨੁਸ੍ਸਾ ਸਦ੍ਧਾ ਪਸਨ੍ਨਾ, ਤੇਹਿ ਅਤ੍ਤਨੋਪਿ ਮਂਸਾਨਿ ਪਰਿਚ੍ਚਤ੍ਤਾਨਿ. ਨ, ਭਿਕ੍ਖਵੇ, ਮਨੁਸ੍ਸਮਂਸਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਨ ਚ, ਭਿਕ੍ਖਵੇ, ਅਪ੍ਪਟਿਵੇਕ੍ਖਿਤ੍ਵਾ ਮਂਸਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਮਨੁਸ੍ਸਮਂਸਪਟਿਕ੍ਖੇਪਕਥਾ ਨਿਟ੍ਠਿਤਾ.

੧੬੯. ਹਤ੍ਥਿਮਂਸਾਦਿਪਟਿਕ੍ਖੇਪਕਥਾ

੨੮੧. ਤੇਨ ਖੋ ਪਨ ਸਮਯੇਨ ਰਞ੍ਞੋ ਹਤ੍ਥੀ ਮਰਨ੍ਤਿ. ਮਨੁਸ੍ਸਾ ਦੁਬ੍ਭਿਕ੍ਖੇ ਹਤ੍ਥਿਮਂਸਂ ਪਰਿਭੁਞ੍ਜਨ੍ਤਿ, ਭਿਕ੍ਖੂਨਂ ਪਿਣ੍ਡਾਯ ਚਰਨ੍ਤਾਨਂ ਹਤ੍ਥਿਮਂਸਂ ਦੇਨ੍ਤਿ. ਭਿਕ੍ਖੂ ਹਤ੍ਥਿਮਂਸਂ ਪਰਿਭੁਞ੍ਜਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਹਤ੍ਥਿਮਂਸਂ ਪਰਿਭੁਞ੍ਜਿਸ੍ਸਨ੍ਤਿ. ਰਾਜਙ੍ਗਂ ਹਤ੍ਥੀ, ਸਚੇ ਰਾਜਾ ਜਾਨੇਯ੍ਯ, ਨ ਨੇਸਂ ਅਤ੍ਤਮਨੋ ਅਸ੍ਸਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਹਤ੍ਥਿਮਂਸਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਰਞ੍ਞੋ ਅਸ੍ਸਾ ਮਰਨ੍ਤਿ. ਮਨੁਸ੍ਸਾ ਦੁਬ੍ਭਿਕ੍ਖੇ ਅਸ੍ਸਮਂਸਂ ਪਰਿਭੁਞ੍ਜਨ੍ਤਿ, ਭਿਕ੍ਖੂਨਂ ਪਿਣ੍ਡਾਯ ਚਰਨ੍ਤਾਨਂ ਅਸ੍ਸਮਂਸਂ ਦੇਨ੍ਤਿ. ਭਿਕ੍ਖੂ ਅਸ੍ਸਮਂਸਂ ਪਰਿਭੁਞ੍ਜਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਅਸ੍ਸਮਂਸਂ ਪਰਿਭੁਞ੍ਜਿਸ੍ਸਨ੍ਤਿ. ਰਾਜਙ੍ਗਂ ਅਸ੍ਸਾ, ਸਚੇ ਰਾਜਾ ਜਾਨੇਯ੍ਯ, ਨ ਨੇਸਂ ਅਤ੍ਤਮਨੋ ਅਸ੍ਸਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਸ੍ਸਮਂਸਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਦੁਬ੍ਭਿਕ੍ਖੇ ਸੁਨਖਮਂਸਂ ਪਰਿਭੁਞ੍ਜਨ੍ਤਿ, ਭਿਕ੍ਖੂਨਂ ਪਿਣ੍ਡਾਯ ਚਰਨ੍ਤਾਨਂ ਸੁਨਖਮਂਸਂ ਦੇਨ੍ਤਿ. ਭਿਕ੍ਖੂ ਸੁਨਖਮਂਸਂ ਪਰਿਭੁਞ੍ਜਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਸੁਨਖਮਂਸਂ ਪਰਿਭੁਞ੍ਜਿਸ੍ਸਨ੍ਤਿ, ਜੇਗੁਚ੍ਛੋ ਸੁਨਖੋ ਪਟਿਕੂਲੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸੁਨਖਮਂਸਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਦੁਬ੍ਭਿਕ੍ਖੇ ਅਹਿਮਂਸਂ ਪਰਿਭੁਞ੍ਜਨ੍ਤਿ, ਭਿਕ੍ਖੂਨਂ ਪਿਣ੍ਡਾਯ ਚਰਨ੍ਤਾਨਂ ਅਹਿਮਂਸਂ ਦੇਨ੍ਤਿ. ਭਿਕ੍ਖੂ ਅਹਿਮਂਸਂ ਪਰਿਭੁਞ੍ਜਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਅਹਿਮਂਸਂ ਪਰਿਭੁਞ੍ਜਿਸ੍ਸਨ੍ਤਿ, ਜੇਗੁਚ੍ਛੋ ਅਹਿ ਪਟਿਕੂਲੋ’’ਤਿ. ਸੁਪਸ੍ਸੋਪਿ [ਸੁਫਸ੍ਸੋ (ਸੀ.)] ਨਾਗਰਾਜਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸੁਪਸ੍ਸੋ ਨਾਗਰਾਜਾ ਭਗਵਨ੍ਤਂ ਏਤਦਵੋਚ – ‘‘ਸਨ੍ਤਿ, ਭਨ੍ਤੇ, ਨਾਗਾ ਅਸ੍ਸਦ੍ਧਾ ਅਪ੍ਪਸਨ੍ਨਾ. ਤੇ ਅਪ੍ਪਮਤ੍ਤਕੇਹਿਪਿ ਭਿਕ੍ਖੂ ਵਿਹੇਠੇਯ੍ਯੁਂ. ਸਾਧੁ, ਭਨ੍ਤੇ, ਅਯ੍ਯਾ ਅਹਿਮਂਸਂ ਨ ਪਰਿਭੁਞ੍ਜੇਯ੍ਯੁ’’ਨ੍ਤਿ. ਅਥ ਖੋ ਭਗਵਾ ਸੁਪਸ੍ਸਂ ਨਾਗਰਾਜਾਨਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ…ਪੇ… ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਅਹਿਮਂਸਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਲੁਦ੍ਦਕਾ ਸੀਹਂ ਹਨ੍ਤ੍ਵਾ ਸੀਹਮਂਸਂ [ਮਂਸਂ (ਕ.)] ਪਰਿਭੁਞ੍ਜਨ੍ਤਿ, ਭਿਕ੍ਖੂਨਂ ਪਿਣ੍ਡਾਯ ਚਰਨ੍ਤਾਨਂ ਸੀਹਮਂਸਂ ਦੇਨ੍ਤਿ. ਭਿਕ੍ਖੂ ਸੀਹਮਂਸਂ ਪਰਿਭੁਞ੍ਜਿਤ੍ਵਾ ਅਰਞ੍ਞੇ ਵਿਹਰਨ੍ਤਿ. ਸੀਹਾ ਸੀਹਮਂਸਗਨ੍ਧੇਨ ਭਿਕ੍ਖੂ ਪਰਿਪਾਤੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸੀਹਮਂਸਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਲੁਦ੍ਦਕਾ ਬ੍ਯਗ੍ਘਂ ਹਨ੍ਤ੍ਵਾ…ਪੇ… ਦੀਪਿਂ ਹਨ੍ਤ੍ਵਾ…ਪੇ… ਅਚ੍ਛਂ ਹਨ੍ਤ੍ਵਾ…ਪੇ… ਤਰਚ੍ਛਂ ਹਨ੍ਤ੍ਵਾ ਤਰਚ੍ਛਮਂਸਂ ਪਰਿਭੁਞ੍ਜਨ੍ਤਿ, ਭਿਕ੍ਖੂਨਂ ਪਿਣ੍ਡਾਯ ਚਰਨ੍ਤਾਨਂ ਤਰਚ੍ਛਮਂਸਂ ਦੇਨ੍ਤਿ. ਭਿਕ੍ਖੂ ਤਰਚ੍ਛਮਂਸਂ ਪਰਿਭੁਞ੍ਜਿਤ੍ਵਾ ਅਰਞ੍ਞੇ ਵਿਹਰਨ੍ਤਿ. ਤਰਚ੍ਛਾ ਤਰਚ੍ਛਮਂਸਗਨ੍ਧੇਨ ਭਿਕ੍ਖੂ ਪਰਿਪਾਤੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਤਰਚ੍ਛਮਂਸਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਹਤ੍ਥਿਮਂਸਾਦਿਪਟਿਕ੍ਖੇਪਕਥਾ ਨਿਟ੍ਠਿਤਾ.

ਸੁਪ੍ਪਿਯਭਾਣਵਾਰੋ ਨਿਟ੍ਠਿਤੋ ਦੁਤਿਯੋ.

੧੭੦. ਯਾਗੁਮਧੁਗੋਲ਼ਕਾਨੁਜਾਨਨਾ

੨੮੨. ਅਥ ਖੋ ਭਗਵਾ ਬਾਰਾਣਸਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਅਨ੍ਧਕਵਿਨ੍ਦਂ ਤੇਨ ਚਾਰਿਕਂ ਪਕ੍ਕਾਮਿ, ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ, ਅਡ੍ਢਤੇਲਸੇਹਿ ਭਿਕ੍ਖੁਸਤੇਹਿ. ਤੇਨ ਖੋ ਪਨ ਸਮਯੇਨ ਜਾਨਪਦਾ ਮਨੁਸ੍ਸਾ ਬਹੁਂ ਲੋਣਮ੍ਪਿ, ਤੇਲਮ੍ਪਿ, ਤਣ੍ਡੁਲਮ੍ਪਿ, ਖਾਦਨੀਯਮ੍ਪਿ ਸਕਟੇਸੁ ਆਰੋਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਾ ਹੋਨ੍ਤਿ – ਯਦਾ ਪਟਿਪਾਟਿਂ ਲਭਿਸ੍ਸਾਮ ਤਦਾ ਭਤ੍ਤਂ ਕਰਿਸ੍ਸਾਮਾਤਿ, ਪਞ੍ਚਮਤ੍ਤਾਨਿ ਚ ਵਿਘਾਸਾਦਸਤਾਨਿ. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਅਨ੍ਧਕਵਿਨ੍ਦਂ ਤਦਵਸਰਿ. ਅਥ ਖੋ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਪਟਿਪਾਟਿਂ ਅਲਭਨ੍ਤਸ੍ਸ ਏਤਦਹੋਸਿ – ‘‘ਅਤੀਤਾਨਿ [ਅਧਿਕਾਨਿ (ਸੀ. ਸ੍ਯਾ.)] ਖੋ ਮੇ ਦ੍ਵੇ ਮਾਸਾਨਿ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਅਨੁਬਨ੍ਧਨ੍ਤਸ੍ਸ ‘ਯਦਾ ਪਟਿਪਾਟਿਂ ਲਭਿਸ੍ਸਾਮਿ ਤਦਾ ਭਤ੍ਤਂ ਕਰਿਸ੍ਸਾਮੀ’ਤਿ, ਨ ਚ ਮੇ ਪਟਿਪਾਟਿ ਲਬ੍ਭਤਿ, ਅਹਞ੍ਚਮ੍ਹਿ ਏਕਤ੍ਤਕੋ [ਏਕਤੋ (ਸੀ. ਸ੍ਯਾ.)], ਬਹੁ ਚ ਮੇ ਘਰਾਵਾਸਤ੍ਥੋ ਹਾਯਤਿ. ਯਂਨੂਨਾਹਂ ਭਤ੍ਤਗ੍ਗਂ ਓਲੋਕੇਯ੍ਯਂ; ਯਂ ਭਤ੍ਤਗ੍ਗੇ ਨਾਸ੍ਸ, ਤਂ ਪਟਿਯਾਦੇਯ੍ਯ’’ਨ੍ਤਿ. ਅਥ ਖੋ ਸੋ ਬ੍ਰਾਹ੍ਮਣੋ ਭਤ੍ਤਗ੍ਗਂ ਓਲੋਕੇਨ੍ਤੋ ਦ੍ਵੇ ਨਾਦ੍ਦਸ – ਯਾਗੁਞ੍ਚ ਮਧੁਗੋਲ਼ਕਞ੍ਚ. ਅਥ ਖੋ ਸੋ ਬ੍ਰਾਹ੍ਮਣੋ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ – ‘‘ਇਧ ਮੇ, ਭੋ ਆਨਨ੍ਦ, ਪਟਿਪਾਟਿਂ ਅਲਭਨ੍ਤਸ੍ਸ ਏਤਦਹੋਸਿ ‘ਅਤੀਤਾਨਿ ਖੋ ਮੇ ਦ੍ਵੇ ਮਾਸਾਨਿ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਅਨੁਬਨ੍ਧਨ੍ਤਸ੍ਸ, ਯਦਾ ਪਟਿਪਾਟਿਂ ਲਭਿਸ੍ਸਾਮਿ ਤਦਾ ਭਤ੍ਤਂ ਕਰਿਸ੍ਸਾਮੀਤਿ. ਨ ਚ ਮੇ ਪਟਿਪਾਟਿ ਲਬ੍ਭਤਿ, ਅਹਞ੍ਚਮ੍ਹਿ ਏਕਤ੍ਤਕੋ, ਬਹੁ ਚ ਮੇ ਘਰਾਵਾਸਤ੍ਥੋ ਹਾਯਤਿ. ਯਂਨੂਨਾਹਂ ਭਤ੍ਤਗ੍ਗਂ ਓਲੋਕੇਯ੍ਯਂ; ਯਂ ਭਤ੍ਤਗ੍ਗੇ ਨਾਸ੍ਸ, ਤਂ ਪਟਿਯਾਦੇਯ੍ਯ’ਨ੍ਤਿ. ਸੋ ਖੋ ਅਹਂ, ਭੋ ਆਨਨ੍ਦ, ਭਤ੍ਤਗ੍ਗਂ ਓਲੋਕੇਨ੍ਤੋ ਦ੍ਵੇ ਨਾਦ੍ਦਸਂ – ਯਾਗੁਞ੍ਚ ਮਧੁਗੋਲ਼ਕਞ੍ਚ. ਸਚਾਹਂ, ਭੋ ਆਨਨ੍ਦ, ਪਟਿਯਾਦੇਯ੍ਯਂ ਯਾਗੁਞ੍ਚ ਮਧੁਗੋਲ਼ਕਞ੍ਚ, ਪਟਿਗ੍ਗਣ੍ਹੇਯ੍ਯ ਮੇ ਭਵਂ ਗੋਤਮੋ’’ਤਿ? ‘‘ਤੇਨ ਹਿ, ਬ੍ਰਾਹ੍ਮਣ, ਭਗਵਨ੍ਤਂ ਪਟਿਪੁਚ੍ਛਿਸ੍ਸਾਮੀ’’ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਤੇਨ ਹਾਨਨ੍ਦ, ਪਟਿਯਾਦੇਤੂਤਿ. ਤੇਨ ਹਿ, ਬ੍ਰਾਹ੍ਮਣ, ਪਟਿਯਾਦੇਹੀਤਿ. ਅਥ ਖੋ ਸੋ ਬ੍ਰਾਹ੍ਮਣੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਹੂਤਂ ਯਾਗੁਞ੍ਚ ਮਧੁਗੋਲ਼ਕਞ੍ਚ ਪਟਿਯਾਦਾਪੇਤ੍ਵਾ ਭਗਵਤੋ ਉਪਨਾਮੇਸਿ – ਪਟਿਗ੍ਗਣ੍ਹਾਤੁ ਮੇ ਭਵਂ ਗੋਤਮੋ ਯਾਗੁਞ੍ਚ ਮਧੁਗੋਲ਼ਕਞ੍ਚਾਤਿ. ਤੇਨ ਹਿ, ਬ੍ਰਾਹ੍ਮਣ, ਭਿਕ੍ਖੂਨਂ ਦੇਹੀਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਪਟਿਗ੍ਗਣ੍ਹਨ੍ਤਿ. ਪਟਿਗ੍ਗਣ੍ਹਥ, ਭਿਕ੍ਖਵੇ, ਪਰਿਭੁਞ੍ਜਥਾਤਿ. ਅਥ ਖੋ ਸੋ ਬ੍ਰਾਹ੍ਮਣੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਹੂਤਾਯ ਯਾਗੁਯਾ ਚ ਮਧੁਗੋਲ਼ਕੇਨ ਚ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਧੋਤਹਤ੍ਥਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਤਂ ਬ੍ਰਾਹ੍ਮਣਂ ਭਗਵਾ ਏਤਦਵੋਚ –

‘‘ਦਸਯਿਮੇ, ਬ੍ਰਾਹ੍ਮਣ, ਆਨਿਸਂਸਾ ਯਾਗੁਯਾ. ਕਤਮੇ ਦਸ? ਯਾਗੁਂ ਦੇਨ੍ਤੋ ਆਯੁਂ ਦੇਤਿ, ਵਣ੍ਣਂ ਦੇਤਿ, ਸੁਖਂ ਦੇਤਿ, ਬਲਂ ਦੇਤਿ, ਪਟਿਭਾਨਂ ਦੇਤਿ, ਯਾਗੁ ਪੀਤਾ ਖੁਦ੍ਦਂ [ਖੁਦਂ (ਸੀ. ਸ੍ਯਾ.)] ਪਟਿਹਨਤਿ, ਪਿਪਾਸਂ ਵਿਨੇਤਿ, ਵਾਤਂ ਅਨੁਲੋਮੇਤਿ, ਵਤ੍ਥਿਂ ਸੋਧੇਤਿ, ਆਮਾਵਸੇਸਂ ਪਾਚੇਤਿ – ਇਮੇ ਖੋ, ਬ੍ਰਾਹ੍ਮਣ, ਦਸਾਨਿਸਂਸਾ ਯਾਗੁਯਾ’’ਤਿ [ਪਚ੍ਛਿਮਾ ਪਞ੍ਚ ਆਨਿਸਂਸਾ ਅ. ਨਿ. ੫.੨੦੭].

[ਅ. ਨਿ. ੪.੫੮-੫੯ ਥੋਕਂ ਵਿਸਦਿਸਂ] ਯੋ ਸਞ੍ਞਤਾਨਂ ਪਰਦਤ੍ਤਭੋਜਿਨਂ;

ਕਾਲੇਨ ਸਕ੍ਕਚ੍ਚ ਦਦਾਤਿ ਯਾਗੁਂ;

ਦਸਸ੍ਸ ਠਾਨਾਨਿ ਅਨੁਪ੍ਪਵੇਚ੍ਛਤਿ;

ਆਯੁਞ੍ਚ ਵਣ੍ਣਞ੍ਚ ਸੁਖਂ ਬਲਞ੍ਚ.

ਪਟਿਭਾਨਮਸ੍ਸ ਉਪਜਾਯਤੇ ਤਤੋ;

ਖੁਦ੍ਦਂ ਪਿਪਾਸਞ੍ਚ ਬ੍ਯਪਨੇਤਿ ਵਾਤਂ;

ਸੋਧੇਤਿ ਵਤ੍ਥਿਂ ਪਰਿਣਾਮੇਤਿ ਭੁਤ੍ਤਂ;

ਭੇਸਜ੍ਜਮੇਤਂ ਸੁਗਤੇਨ ਵਣ੍ਣਿਤਂ.

ਤਸ੍ਮਾ ਹਿ ਯਾਗੁਂ ਅਲਮੇਵ ਦਾਤੁਂ;

ਨਿਚ੍ਚਂ ਮਨੁਸ੍ਸੇਨ ਸੁਖਤ੍ਥਿਕੇਨ;

ਦਿਬ੍ਬਾਨਿ ਵਾ ਪਤ੍ਥਯਤਾ ਸੁਖਾਨਿ;

ਮਨੁਸ੍ਸਸੋਭਗ੍ਯਤਮਿਚ੍ਛਤਾ ਵਾਤਿ.

ਅਥ ਖੋ ਭਗਵਾ ਤਂ ਬ੍ਰਾਹ੍ਮਣਂ ਇਮਾਹਿ ਗਾਥਾਹਿ ਅਨੁਮੋਦਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਯਾਗੁਞ੍ਚ ਮਧੁਗੋਲ਼ਕਞ੍ਚਾ’’ਤਿ.

ਯਾਗੁਮਧੁਗੋਲ਼ਕਾਨੁਜਾਨਨਾ ਨਿਟ੍ਠਿਤਾ.

੧੭੧. ਤਰੁਣਪਸਨ੍ਨਮਹਾਮਤ੍ਤਵਤ੍ਥੁ

੨੮੩. ਅਸ੍ਸੋਸੁਂ ਖੋ ਮਨੁਸ੍ਸਾ ਭਗਵਤਾ ਕਿਰ ਯਾਗੁ ਅਨੁਞ੍ਞਾਤਾ ਮਧੁਗੋਲ਼ਕਞ੍ਚਾਤਿ. ਤੇ ਕਾਲਸ੍ਸੇਵ, ਭੋਜ੍ਜਯਾਗੁਂ ਪਟਿਯਾਦੇਨ੍ਤਿ ਮਧੁਗੋਲ਼ਕਞ੍ਚ. ਭਿਕ੍ਖੂ ਕਾਲਸ੍ਸੇਵ ਭੋਜ੍ਜਯਾਗੁਯਾ ਧਾਤਾ ਮਧੁਗੋਲ਼ਕੇਨ ਚ ਭਤ੍ਤਗ੍ਗੇ ਨ ਚਿਤ੍ਤਰੂਪਂ ਪਰਿਭੁਞ੍ਜਨ੍ਤਿ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੇਨ ਤਰੁਣਪਸਨ੍ਨੇਨ ਮਹਾਮਤ੍ਤੇਨ ਸ੍ਵਾਤਨਾਯ ਬੁਦ੍ਧਪ੍ਪਮੁਖੋ ਭਿਕ੍ਖੁਸਙ੍ਘੋ ਨਿਮਨ੍ਤਿਤੋ ਹੋਤਿ. ਅਥ ਖੋ ਤਸ੍ਸ ਤਰੁਣਪਸਨ੍ਨਸ੍ਸ ਮਹਾਮਤ੍ਤਸ੍ਸ ਏਤਦਹੋਸਿ – ‘‘ਯਂਨੂਨਾਹਂ ਅਡ੍ਢਤੇਲਸਨ੍ਨਂ ਭਿਕ੍ਖੁਸਤਾਨਂ ਅਡ੍ਢਤੇਲਸਾਨਿ ਮਂਸਪਾਤਿਸਤਾਨਿ ਪਟਿਯਾਦੇਯ੍ਯਂ, ਏਕਮੇਕਸ੍ਸ ਭਿਕ੍ਖੁਨੋ ਏਕਮੇਕਂ ਮਂਸਪਾਤਿਂ ਉਪਨਾਮੇਯ੍ਯ’’ਨ੍ਤਿ. ਅਥ ਖੋ ਸੋ ਤਰੁਣਪਸਨ੍ਨੋ ਮਹਾਮਤ੍ਤੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਅਡ੍ਢਤੇਲਸਾਨਿ ਚ ਮਂਸਪਾਤਿਸਤਾਨਿ, ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਤਸ੍ਸ ਤਰੁਣਪਸਨ੍ਨਸ੍ਸ ਮਹਾਮਤ੍ਤਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਸੋ ਤਰੁਣਪਸਨ੍ਨੋ ਮਹਾਮਤ੍ਤੋ ਭਤ੍ਤਗ੍ਗੇ ਭਿਕ੍ਖੂ ਪਰਿਵਿਸਤਿ. ਭਿਕ੍ਖੂ ਏਵਮਾਹਂਸੁ – ‘‘ਥੋਕਂ, ਆਵੁਸੋ, ਦੇਹਿ; ਥੋਕਂ, ਆਵੁਸੋ, ਦੇਹੀ’’ਤਿ. ‘‘ਮਾ ਖੋ ਤੁਮ੍ਹੇ, ਭਨ੍ਤੇ, – ‘ਅਯਂ ਤਰੁਣਪਸਨ੍ਨੋ ਮਹਾਮਤ੍ਤੋ’ਤਿ – ਥੋਕਂ ਥੋਕਂ ਪਟਿਗ੍ਗਣ੍ਹਥ. ਬਹੁਂ ਮੇ ਖਾਦਨੀਯਂ ਭੋਜਨੀਯਂ ਪਟਿਯਤ੍ਤਂ, ਅਡ੍ਢਤੇਲਸਾਨਿ ਚ ਮਂਸਪਾਤਿਸਤਾਨਿ. ਏਕਮੇਕਸ੍ਸ ਭਿਕ੍ਖੁਨੋ ਏਕਮੇਕਂ ਮਂਸਪਾਤਿਂ ਉਪਨਾਮੇਸ੍ਸਾਮੀਤਿ. ਪਟਿਗ੍ਗਣ੍ਹਥ, ਭਨ੍ਤੇ, ਯਾਵਦਤ੍ਥ’’ਨ੍ਤਿ. ‘‘ਨ ਖੋ ਮਯਂ, ਆਵੁਸੋ, ਏਤਂਕਾਰਣਾ ਥੋਕਂ ਥੋਕਂ ਪਟਿਗ੍ਗਣ੍ਹਾਮ, ਅਪਿ ਚ ਮਯਂ ਕਾਲਸ੍ਸੇਵ ਭੋਜ੍ਜਯਾਗੁਯਾ ਧਾਤਾ ਮਧੁਗੋਲ਼ਕੇਨ ਚ. ਤੇਨ ਮਯਂ ਥੋਕਂ ਥੋਕਂ ਪਟਿਗ੍ਗਣ੍ਹਾਮਾ’’ਤਿ. ਅਥ ਖੋ ਸੋ ਤਰੁਣਪਸਨ੍ਨੋ ਮਹਾਮਤ੍ਤੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ ਮਯਾ ਨਿਮਨ੍ਤਿਤਾ ਅਞ੍ਞਸ੍ਸ ਭੋਜ੍ਜਯਾਗੁਂ ਪਰਿਭੁਞ੍ਜਿਸ੍ਸਨ੍ਤਿ, ਨ ਚਾਹਂ ਪਟਿਬਲੋ ਯਾਵਦਤ੍ਥਂ ਦਾਤੁ’’ਨ੍ਤਿ ਕੁਪਿਤੋ ਅਨਤ੍ਤਮਨੋ ਆਸਾਦਨਾਪੇਕ੍ਖੋ ਭਿਕ੍ਖੂਨਂ ਪਤ੍ਤੇ ਪੂਰੇਨ੍ਤੋ ਅਗਮਾਸਿ – ਭੁਞ੍ਜਥ ਵਾ ਹਰਥ ਵਾਤਿ. ਅਥ ਖੋ ਸੋ ਤਰੁਣਪਸਨ੍ਨੋ ਮਹਾਮਤ੍ਤੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਤਂ ਤਰੁਣਪਸਨ੍ਨਂ ਮਹਾਮਤ੍ਤਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

ਅਥ ਖੋ ਤਸ੍ਸ ਤਰੁਣਪਸਨ੍ਨਸ੍ਸ ਮਹਾਮਤ੍ਤਸ੍ਸ ਅਚਿਰਪਕ੍ਕਨ੍ਤਸ੍ਸ ਭਗਵਤੋ ਅਹੁਦੇਵ ਕੁਕ੍ਕੁਚ੍ਚਂ, ਅਹੁ ਵਿਪ੍ਪਟਿਸਾਰੋ – ‘‘ਅਲਾਭਾ ਵਤ ਮੇ, ਨ ਵਤ ਮੇ ਲਾਭਾ; ਦੁਲ੍ਲਦ੍ਧਂ ਵਤ ਮੇ, ਨ ਵਤ ਮੇ ਸੁਲਦ੍ਧਂ; ਯੋਹਂ ਕੁਪਿਤੋ ਅਨਤ੍ਤਮਨੋ ਆਸਾਦਨਾਪੇਕ੍ਖੋ ਭਿਕ੍ਖੂਨਂ ਪਤ੍ਤੇ ਪੂਰੇਨ੍ਤੋ ਅਗਮਾਸਿਂ – ‘ਭੁਞ੍ਜਥ ਵਾ ਹਰਥ ਵਾ’ਤਿ. ਕਿਂ ਨੁ ਖੋ ਮਯਾ ਬਹੁਂ ਪਸੁਤਂ ਪੁਞ੍ਞਂ ਵਾ ਅਪੁਞ੍ਞਂ ਵਾ’’ਤਿ? ਅਥ ਖੋ ਸੋ ਤਰੁਣਪਸਨ੍ਨੋ ਮਹਾਮਤ੍ਤੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਤਰੁਣਪਸਨ੍ਨੋ ਮਹਾਮਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਇਧ ਮਯ੍ਹਂ, ਭਨ੍ਤੇ, ਅਚਿਰਪਕ੍ਕਨ੍ਤਸ੍ਸ ਭਗਵਤੋ ਅਹੁਦੇਵ ਕੁਕ੍ਕੁਚ੍ਚਂ, ਅਹੁ ਵਿਪ੍ਪਟਿਸਾਰੋ ‘ਅਲਾਭਾ ਵਤ ਮੇ, ਨ ਵਤ ਮੇ ਲਾਭਾ; ਦੁਲ੍ਲਦ੍ਧਂ ਵਤ ਮੇ, ਨ ਵਤ ਮੇ ਸੁਲਦ੍ਧਂ; ਯੋਹਂ ਕੁਪਿਤੋ ਅਨਤ੍ਤਮਨੋ ਆਸਾਦਨਾਪੇਕ੍ਖੋ ਭਿਕ੍ਖੂਨਂ ਪਤ੍ਤੇ ਪੂਰੇਨ੍ਤੋ ਅਗਮਾਸਿਂ – ਭੁਞ੍ਜਥ ਵਾ ਹਰਥ ਵਾਤਿ. ਕਿਂ ਨੁ ਖੋ ਮਯਾ ਬਹੁਂ ਪਸੁਤਂ, ਪੁਞ੍ਞਂ ਵਾ ਅਪੁਞ੍ਞਂ ਵਾ’ਤਿ. ਕਿਂ ਨੁ ਖੋ ਮਯਾ, ਭਨ੍ਤੇ, ਬਹੁਂ ਪਸੁਤਂ, ਪੁਞ੍ਞਂ ਵਾ ਅਪੁਞ੍ਞਂ ਵਾ’’ਤਿ? ‘‘ਯਦਗ੍ਗੇਨ ਤਯਾ, ਆਵੁਸੋ, ਸ੍ਵਾਤਨਾਯ ਬੁਦ੍ਧਪ੍ਪਮੁਖੋ ਭਿਕ੍ਖੁਸਙ੍ਘੋ ਨਿਮਨ੍ਤਿਤੋ ਤਦਗ੍ਗੇਨ ਤੇ ਬਹੁਂ ਪੁਞ੍ਞਂ ਪਸੁਤਂ. ਯਦਗ੍ਗੇਨ ਤੇ ਏਕਮੇਕੇਨ ਭਿਕ੍ਖੁਨਾ ਏਕਮੇਕਂ ਸਿਤ੍ਥਂ ਪਟਿਗ੍ਗਹਿਤਂ ਤਦਗ੍ਗੇਨ ਤੇ ਬਹੁਂ ਪੁਞ੍ਞਂ ਪਸੁਤਂ, ਸਗ੍ਗਾ ਤੇ ਆਰਦ੍ਧਾ’’ਤਿ. ਅਥ ਖੋ ਸੋ ਤਰੁਣਪਸਨ੍ਨੋ ਮਹਾਮਤ੍ਤੋ – ‘‘ਲਾਭਾ ਕਿਰ ਮੇ, ਸੁਲਦ੍ਧਂ ਕਿਰ ਮੇ, ਬਹੁਂ ਕਿਰ ਮਯਾ ਪੁਞ੍ਞਂ ਪਸੁਤਂ, ਸਗ੍ਗਾ ਕਿਰ ਮੇ ਆਰਦ੍ਧਾ’’ਤਿ – ਹਟ੍ਠੋ ਉਦਗ੍ਗੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਅਞ੍ਞਤ੍ਰ ਨਿਮਨ੍ਤਿਤਾ ਅਞ੍ਞਸ੍ਸ ਭੋਜ੍ਜਯਾਗੁਂ ਪਰਿਭੁਞ੍ਜਨ੍ਤੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਅਞ੍ਞਤ੍ਰ ਨਿਮਨ੍ਤਿਤਾ ਅਞ੍ਞਸ੍ਸ ਭੋਜ੍ਜਯਾਗੁਂ ਪਰਿਭੁਞ੍ਜਿਸ੍ਸਨ੍ਤਿ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਅਞ੍ਞਤ੍ਰ ਨਿਮਨ੍ਤਿਤੇਨ ਅਞ੍ਞਸ੍ਸ ਭੋਜ੍ਜਯਾਗੁ ਪਰਿਭੁਞ੍ਜਿਤਬ੍ਬਾ. ਯੋ ਪਰਿਭੁਞ੍ਜੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਤਰੁਣਪਸਨ੍ਨਮਹਾਮਤ੍ਤਵਤ੍ਥੁ ਨਿਟ੍ਠਿਤਂ.

੧੭੨. ਬੇਲਟ੍ਠਕਚ੍ਚਾਨਵਤ੍ਥੁ

੨੮੪. ਅਥ ਖੋ ਭਗਵਾ ਅਨ੍ਧਕਵਿਨ੍ਦੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਰਾਜਗਹਂ ਤੇਨ ਚਾਰਿਕਂ ਪਕ੍ਕਾਮਿ, ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ, ਅਡ੍ਢਤੇਲਸੇਹਿ ਭਿਕ੍ਖੁਸਤੇਹਿ. ਤੇਨ ਖੋ ਪਨ ਸਮਯੇਨ ਬੇਲਟ੍ਠੋ ਕਚ੍ਚਾਨੋ ਰਾਜਗਹਾ ਅਨ੍ਧਕਵਿਨ੍ਦਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ ਹੋਤਿ, ਪਞ੍ਚਮਤ੍ਤੇਹਿ ਸਕਟਸਤੇਹਿ, ਸਬ੍ਬੇਹੇਵ ਗੁਲ਼ਕੁਮ੍ਭਪੂਰੇਹਿ. ਅਦ੍ਦਸਾ ਖੋ ਭਗਵਾ ਬੇਲਟ੍ਠਂ ਕਚ੍ਚਾਨਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਮਗ੍ਗਾ ਓਕ੍ਕਮ੍ਮ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਅਥ ਖੋ ਬੇਲਟ੍ਠੋ ਕਚ੍ਚਾਨੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਬੇਲਟ੍ਠੋ ਕਚ੍ਚਾਨੋ ਭਗਵਨ੍ਤਂ ਏਤਦਵੋਚ – ‘‘ਇਚ੍ਛਾਮਹਂ, ਭਨ੍ਤੇ, ਏਕਮੇਕਸ੍ਸ ਭਿਕ੍ਖੁਨੋ ਏਕਮੇਕਂ ਗੁਲ਼ਕੁਮ੍ਭਂ ਦਾਤੁ’’ਨ੍ਤਿ. ‘‘ਤੇਨ ਹਿ ਤ੍ਵਂ, ਕਚ੍ਚਾਨ, ਏਕਂਯੇਵ ਗੁਲ਼ਕੁਮ੍ਭਂ ਆਹਰਾ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਬੇਲਟ੍ਠੋ ਕਚ੍ਚਾਨੋ ਭਗਵਤੋ ਪਟਿਸ੍ਸੁਣਿਤ੍ਵਾ ਏਕਂਯੇਵ ਗੁਲ਼ਕੁਮ੍ਭਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਆਭਤੋ [ਆਹਟੋ (ਸੀ. ਸ੍ਯਾ. ਕ.)], ਭਨ੍ਤੇ, ਗੁਲ਼ਕੁਮ੍ਭੋ; ਕਥਾਹਂ, ਭਨ੍ਤੇ, ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਕਚ੍ਚਾਨ, ਭਿਕ੍ਖੂਨਂ ਗੁਲ਼ਂ ਦੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਬੇਲਟ੍ਠੋ ਕਚ੍ਚਾਨੋ ਭਗਵਤੋ ਪਟਿਸ੍ਸੁਣਿਤ੍ਵਾ ਭਿਕ੍ਖੂਨਂ ਗੁਲ਼ਂ ਦਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਦਿਨ੍ਨੋ, ਭਨ੍ਤੇ, ਭਿਕ੍ਖੂਨਂ ਗੁਲ਼ੋ, ਬਹੁ ਚਾਯਂ ਗੁਲ਼ੋ ਅਵਸਿਟ੍ਠੋ. ਕਥਾਹਂ, ਭਨ੍ਤੇ, ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਕਚ੍ਚਾਨ, ਭਿਕ੍ਖੂਨਂ ਗੁਲ਼ਂ ਯਾਵਦਤ੍ਥਂ ਦੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਬੇਲਟ੍ਠੋ ਕਚ੍ਚਾਨੋ ਭਗਵਤੋ ਪਟਿਸ੍ਸੁਣਿਤ੍ਵਾ ਭਿਕ੍ਖੂਨਂ ਗੁਲ਼ਂ ਯਾਵਦਤ੍ਥਂ ਦਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਦਿਨ੍ਨੋ, ਭਨ੍ਤੇ, ਭਿਕ੍ਖੂਨਂ ਗੁਲ਼ੋ ਯਾਵਦਤ੍ਥੋ, ਬਹੁ ਚਾਯਂ ਗੁਲ਼ੋ ਅਵਸਿਟ੍ਠੋ. ਕਥਾਹਂ, ਭਨ੍ਤੇ, ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਕਚ੍ਚਾਨ, ਭਿਕ੍ਖੂ ਗੁਲ਼ੇਹਿ ਸਨ੍ਤਪ੍ਪੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਬੇਲਟ੍ਠੋ ਕਚ੍ਚਾਨੋ ਭਗਵਤੋ ਪਟਿਸ੍ਸੁਣਿਤ੍ਵਾ ਭਿਕ੍ਖੂ ਗੁਲ਼ੇਹਿ ਸਨ੍ਤਪ੍ਪੇਸਿ. ਏਕਚ੍ਚੇ ਭਿਕ੍ਖੂ ਪਤ੍ਤੇਪਿ ਪੂਰੇਸੁਂ ਪਰਿਸ੍ਸਾਵਨਾਨਿਪਿ ਥਵਿਕਾਯੋਪਿ ਪੂਰੇਸੁਂ. ਅਥ ਖੋ ਬੇਲਟ੍ਠੋ ਕਚ੍ਚਾਨੋ ਭਿਕ੍ਖੂ ਗੁਲ਼ੇਹਿ ਸਨ੍ਤਪ੍ਪੇਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਸਨ੍ਤਪ੍ਪਿਤਾ, ਭਨ੍ਤੇ, ਭਿਕ੍ਖੂ ਗੁਲ਼ੇਹਿ, ਬਹੁ ਚਾਯਂ ਗੁਲ਼ੋ ਅਵਸਿਟ੍ਠੋ. ਕਥਾਹਂ, ਭਨ੍ਤੇ, ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਕਚ੍ਚਾਨ, ਵਿਘਾਸਾਦਾਨਂ ਗੁਲ਼ਂ ਦੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਬੇਲਟ੍ਠੋ ਕਚ੍ਚਾਨੋ ਭਗਵਤੋ ਪਟਿਸ੍ਸੁਣਿਤ੍ਵਾ ਵਿਘਾਸਾਦਾਨਂ ਗੁਲ਼ਂ ਦਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਦਿਨ੍ਨੋ, ਭਨ੍ਤੇ, ਵਿਘਾਸਾਦਾਨਂ ਗੁਲ਼ੋ, ਬਹੁ ਚਾਯਂ ਗੁਲ਼ੋ ਅਵਸਿਟ੍ਠੋ. ਕਥਾਹਂ, ਭਨ੍ਤੇ, ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਕਚ੍ਚਾਨ, ਵਿਘਾਸਾਦਾਨਂ ਗੁਲ਼ਂ ਯਾਵਦਤ੍ਥਂ ਦੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਬੇਲਟ੍ਠੋ ਕਚ੍ਚਾਨੋ ਭਗਵਤੋ ਪਟਿਸ੍ਸੁਣਿਤ੍ਵਾ ਵਿਘਾਸਾਦਾਨਂ ਗੁਲ਼ਂ ਯਾਵਦਤ੍ਥਂ ਦਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਦਿਨ੍ਨੋ, ਭਨ੍ਤੇ, ਵਿਘਾਸਾਦਾਨਂ ਗੁਲ਼ੋ ਯਾਵਦਤ੍ਥੋ, ਬਹੁ ਚਾਯਂ ਗੁਲ਼ੋ ਅਵਸਿਟ੍ਠੋ. ਕਥਾਹਂ, ਭਨ੍ਤੇ, ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਕਚ੍ਚਾਨ, ਵਿਘਾਸਾਦੇ ਗੁਲ਼ੇਹਿ ਸਨ੍ਤਪ੍ਪੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਬੇਲਟ੍ਠੋ ਕਚ੍ਚਾਨੋ ਭਗਵਤੋ ਪਟਿਸ੍ਸੁਣਿਤ੍ਵਾ ਵਿਘਾਸਾਦੇ ਗੁਲ਼ੇਹਿ ਸਨ੍ਤਪ੍ਪੇਸਿ. ਏਕਚ੍ਚੇ ਵਿਘਾਸਾਦਾ ਕੋਲਮ੍ਬੇਪਿ ਘਟੇਪਿ ਪੂਰੇਸੁਂ, ਪਿਟਕਾਨਿਪਿ ਉਚ੍ਛਙ੍ਗੇਪਿ ਪੂਰੇਸੁਂ. ਅਥ ਖੋ ਬੇਲਟ੍ਠੋ ਕਚ੍ਚਾਨੋ ਵਿਘਾਸਾਦੇ ਗੁਲ਼ੇਹਿ ਸਨ੍ਤਪ੍ਪੇਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਸਨ੍ਤਪ੍ਪਿਤਾ, ਭਨ੍ਤੇ, ਵਿਘਾਸਾਦਾ ਗੁਲ਼ੇਹਿ, ਬਹੁ ਚਾਯਂ ਗੁਲ਼ੋ ਅਵਸਿਟ੍ਠੋ. ਕਥਾਹਂ, ਭਨ੍ਤੇ, ਪਟਿਪਜ੍ਜਾਮੀ’’ਤਿ? ‘‘ਨਾਹਂ ਤਂ, ਕਚ੍ਚਾਨ, ਪਸ੍ਸਾਮਿ ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਯਸ੍ਸ ਸੋ ਗੁਲ਼ੋ ਪਰਿਭੁਤ੍ਤੋ ਸਮ੍ਮਾ ਪਰਿਣਾਮਂ ਗਚ੍ਛੇਯ੍ਯ, ਅਞ੍ਞਤ੍ਰ ਤਥਾਗਤਸ੍ਸ ਵਾ ਤਥਾਗਤਸਾਵਕਸ੍ਸ ਵਾ. ਤੇਨ ਹਿ ਤ੍ਵਂ, ਕਚ੍ਚਾਨ, ਤਂ ਗੁਲ਼ਂ ਅਪ੍ਪਹਰਿਤੇ ਵਾ ਛਡ੍ਡੇਹਿ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਬੇਲਟ੍ਠੋ ਕਚ੍ਚਾਨੋ ਭਗਵਤੋ ਪਟਿਸ੍ਸੁਣਿਤ੍ਵਾ ਤਂ ਗੁਲ਼ਂ ਅਪ੍ਪਾਣਕੇ ਉਦਕੇ ਓਪਿਲਾਪੇਤਿ. ਅਥ ਖੋ ਸੋ ਗੁਲ਼ੋ ਉਦਕੇ ਪਕ੍ਖਿਤ੍ਤੋ ਚਿਚ੍ਚਿਟਾਯਤਿ ਚਿਟਿਚਿਟਾਯਤਿ ਪਧੂਪਾਯਤਿ [ਸਨ੍ਧੂਪਾਯਤਿ (ਸੀ. ਸ੍ਯਾ.)] ਸਮ੍ਪਧੂਪਾਯਤਿ. ਸੇਯ੍ਯਥਾਪਿ ਨਾਮ ਫਾਲੋ ਦਿਵਸਂਸਨ੍ਤਤ੍ਤੋ ਉਦਕੇ ਪਕ੍ਖਿਤ੍ਤੋ ਚਿਚ੍ਚਿਟਾਯਤਿ ਚਿਟਿਚਿਟਾਯਤਿ ਪਧੂਪਾਯਤਿ ਸਮ੍ਪਧੂਪਾਯਤਿ, ਏਵਮੇਵ ਸੋ ਗੁਲ਼ੋ ਉਦਕੇ ਪਕ੍ਖਿਤ੍ਤੋ ਚਿਚ੍ਚਿਟਾਯਤਿ ਚਿਟਿਚਿਟਾਯਤਿ ਪਧੂਪਾਯਤਿ ਸਮ੍ਪਧੂਪਾਯਤਿ.

ਅਥ ਖੋ ਬੇਲਟ੍ਠੋ ਕਚ੍ਚਾਨੋ ਸਂਵਿਗ੍ਗੋ ਲੋਮਹਟ੍ਠਜਾਤੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਸ੍ਸ ਖੋ ਬੇਲਟ੍ਠਸ੍ਸ ਕਚ੍ਚਾਨਸ੍ਸ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ‘‘ਦਾਨਕਥਂ ਸੀਲਕਥਂ ਸਗ੍ਗਕਥਂ, ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ, ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਯਦਾ ਭਗਵਾ ਅਞ੍ਞਾਸਿ ਬੇਲਟ੍ਠਂ ਕਚ੍ਚਾਨਂ ਕਲ੍ਲਚਿਤ੍ਤਂ, ਮੁਦੁਚਿਤ੍ਤਂ, ਵਿਨੀਵਰਣਚਿਤ੍ਤਂ, ਉਦਗ੍ਗਚਿਤ੍ਤਂ, ਪਸਨ੍ਨਚਿਤ੍ਤਂ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ, ਤਂ ਪਕਾਸੇਸਿ…ਪੇ… ਏਵਮੇਵ ਬੇਲਟ੍ਠਸ੍ਸ ਕਚ੍ਚਾਨਸ੍ਸ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ਯਂ ਕਿਞ੍ਚਿ ਸਮੁਦਯਧਮ੍ਮਂ ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ. ਅਥ ਖੋ ਬੇਲਟ੍ਠੋ ਕਚ੍ਚਾਨੋ ਦਿਟ੍ਠਧਮ੍ਮੋ ਪਤ੍ਤਧਮ੍ਮੋ ਵਿਦਿਤਧਮ੍ਮੋ ਪਰਿਯੋਗਾਲ਼੍ਹਧਮ੍ਮੋ ਤਿਣ੍ਣਵਿਚਿਕਿਚ੍ਛੋ ਵਿਗਤਕਥਂਕਥੋ ਵੇਸਾਰਜ੍ਜਪ੍ਪਤ੍ਤੋ ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭਨ੍ਤੇ. ਅਭਿਕ੍ਕਨ੍ਤਂ, ਭਨ੍ਤੇ. ਸੇਯ੍ਯਥਾਪਿ, ਭਨ੍ਤੇ, ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ…ਪੇ… ਏਵਮੇਵਂ ਖੋ ਭਗਵਤਾ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ. ਏਸਾਹਂ, ਭਨ੍ਤੇ, ਭਗਵਨ੍ਤਂ ਸਰਣਂ ਗਚ੍ਛਾਮਿ, ਧਮ੍ਮਞ੍ਚ, ਭਿਕ੍ਖੁਸਙ੍ਘਞ੍ਚ. ਉਪਾਸਕਂ ਮਂ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਗਤ’’ਨ੍ਤਿ.

ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਰਾਜਗਹਂ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਰਾਜਗਹੇ ਗੁਲ਼ੋ ਉਸ੍ਸਨ੍ਨੋ ਹੋਤਿ. ਭਿਕ੍ਖੂ – ਗਿਲਾਨਸ੍ਸੇਵ ਭਗਵਤਾ ਗੁਲ਼ੋ ਅਨੁਞ੍ਞਾਤੋ, ਨੋ ਅਗਿਲਾਨਸ੍ਸਾਤਿ – ਕੁਕ੍ਕੁਚ੍ਚਾਯਨ੍ਤਾ ਗੁਲ਼ਂ ਨ ਭੁਞ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਗੁਲ਼ਂ, ਅਗਿਲਾਨਸ੍ਸ ਗੁਲ਼ੋਦਕਨ੍ਤਿ.

ਬੇਲਟ੍ਠਕਚ੍ਚਾਨਵਤ੍ਥੁ ਨਿਟ੍ਠਿਤਂ.

੧੭੩. ਪਾਟਲਿਗਾਮਵਤ੍ਥੁ

੨੮੫. [ਇਤੋ ਪਰਂ ਮਹਾਵ. ੨੮੬-੨੮੭ ‘ਤਿਣ੍ਣਾ ਮੇਧਾਵਿਨੋ ਜਨਾ’ਤਿ ਪਾਠੋ ਦੀ. ਨਿ. ੨.੧੪੮; ਉਦਾ. ੭੬ ਆਦਯੋ] ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਪਾਟਲਿਗਾਮੋ ਤੇਨ ਚਾਰਿਕਂ ਪਕ੍ਕਾਮਿ, ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ, ਅਡ੍ਢਤੇਲਸੇਹਿ ਭਿਕ੍ਖੁਸਤੇਹਿ. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਪਾਟਲਿਗਾਮੋ ਤਦਵਸਰਿ. ਅਸ੍ਸੋਸੁਂ ਖੋ ਪਾਟਲਿਗਾਮਿਕਾ ਉਪਾਸਕਾ – ‘‘ਭਗਵਾ ਕਿਰ ਪਾਟਲਿਗਾਮਂ ਅਨੁਪ੍ਪਤ੍ਤੋ’’ਤਿ. ਅਥ ਖੋ ਪਾਟਲਿਗਾਮਿਕਾ ਉਪਾਸਕਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨੇ ਖੋ ਪਾਟਲਿਗਾਮਿਕੇ ਉਪਾਸਕੇ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ, ਸਮਾਦਪੇਸਿ, ਸਮੁਤ੍ਤੇਜੇਸਿ, ਸਮ੍ਪਹਂਸੇਸਿ. ਅਥ ਖੋ ਪਾਟਲਿਗਾਮਿਕਾ ਉਪਾਸਕਾ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਭਗਵਨ੍ਤਂ ਏਤਦਵੋਚੁਂ – ‘‘ਅਧਿਵਾਸੇਤੁ ਨੋ, ਭਨ੍ਤੇ, ਭਗਵਾ ਆਵਸਥਾਗਾਰਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਪਾਟਲਿਗਾਮਿਕਾ ਉਪਾਸਕਾ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਯੇਨ ਆਵਸਥਾਗਾਰਂ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਸਬ੍ਬਸਨ੍ਥਰਿਂ ਆਵਸਥਾਗਾਰਂ ਸਨ੍ਥਰਿਤ੍ਵਾ, ਆਸਨਾਨਿ ਪਞ੍ਞਪੇਤ੍ਵਾ, ਉਦਕਮਣਿਕਂ ਪਤਿਟ੍ਠਾਪੇਤ੍ਵਾ, ਤੇਲਪਦੀਪਂ ਆਰੋਪੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਏਕਮਨ੍ਤਂ ਠਿਤਾ ਖੋ ਪਾਟਲਿਗਾਮਿਕਾ ਉਪਾਸਕਾ ਭਗਵਨ੍ਤਂ ਏਤਦਵੋਚੁਂ – ‘‘ਸਬ੍ਬਸਨ੍ਥਰਿਸਨ੍ਥਤਂ, ਭਨ੍ਤੇ, ਆਵਸਥਾਗਾਰਂ. ਆਸਨਾਨਿ ਪਞ੍ਞਤ੍ਤਾਨਿ. ਉਦਕਮਣਿਕੋ ਪਤਿਟ੍ਠਾਪਿਤੋ. ਤੇਲਪਦੀਪੋ ਆਰੋਪਿਤੋ. ਯਸ੍ਸਦਾਨਿ, ਭਨ੍ਤੇ, ਭਗਵਾ ਕਾਲਂ ਮਞ੍ਞਤੀ’’ਤਿ.

ਅਥ ਖੋ ਭਗਵਾ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਯੇਨ ਆਵਸਥਾਗਾਰਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਾਦੇ ਪਕ੍ਖਾਲੇਤ੍ਵਾ ਆਵਸਥਾਗਾਰਂ ਪਵਿਸਿਤ੍ਵਾ ਮਜ੍ਝਿਮਂ ਥਮ੍ਭਂ ਨਿਸ੍ਸਾਯ ਪੁਰਤ੍ਥਾਭਿਮੁਖੋ ਨਿਸੀਦਿ. ਭਿਕ੍ਖੁਸਙ੍ਘੋਪਿ ਖੋ ਪਾਦੇ ਪਕ੍ਖਾਲੇਤ੍ਵਾ ਆਵਸਥਾਗਾਰਂ ਪਵਿਸਿਤ੍ਵਾ ਪਚ੍ਛਿਮਂ ਭਿਤ੍ਤਿਂ ਨਿਸ੍ਸਾਯ ਪੁਰਤ੍ਥਾਭਿਮੁਖੋ ਨਿਸੀਦਿ, ਭਗਵਨ੍ਤਂਯੇਵ ਪੁਰਕ੍ਖਤ੍ਵਾ. ਪਾਟਲਿਗਾਮਿਕਾਪਿ ਖੋ ਉਪਾਸਕਾ ਪਾਦੇ ਪਕ੍ਖਾਲੇਤ੍ਵਾ ਆਵਸਥਾਗਾਰਂ ਪਵਿਸਿਤ੍ਵਾ ਪੁਰਤ੍ਥਿਮਂ ਭਿਤ੍ਤਿਂ ਨਿਸ੍ਸਾਯ ਪਚ੍ਛਿਮਾਭਿਮੁਖਾ ਨਿਸੀਦਿਂਸੁ, ਭਗਵਨ੍ਤਂਯੇਵ ਪੁਰਕ੍ਖਤ੍ਵਾ. ਅਥ ਖੋ ਭਗਵਾ ਪਾਟਲਿਗਾਮਿਕੇ ਉਪਾਸਕੇ ਆਮਨ੍ਤੇਸਿ –

[ਦੀ. ਨਿ. ੩.੩੧੬; ਅ. ਨਿ. ੫.੨੧੩ ਆਦਯੋ], ਗਹਪਤਯੋ, ਆਦੀਨਵਾ ਦੁਸ੍ਸੀਲਸ੍ਸ ਸੀਲਵਿਪਤ੍ਤਿਯਾ. ਕਤਮੇ ਪਞ੍ਚ? ਇਧ, ਗਹਪਤਯੋ, ਦੁਸ੍ਸੀਲੋ ਸੀਲਵਿਪਨ੍ਨੋ ਪਮਾਦਾਧਿਕਰਣਂ ਮਹਤਿਂ ਭੋਗਜਾਨਿਂ ਨਿਗਚ੍ਛਤਿ. ਅਯਂ ਪਠਮੋ ਆਦੀਨਵੋ ਦੁਸ੍ਸੀਲਸ੍ਸ ਸੀਲਵਿਪਤ੍ਤਿਯਾ. ਪੁਨ ਚਪਰਂ, ਗਹਪਤਯੋ, ਦੁਸ੍ਸੀਲਸ੍ਸ ਸੀਲਵਿਪਨ੍ਨਸ੍ਸ ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ. ਅਯਂ ਦੁਤਿਯੋ ਆਦੀਨਵੋ ਦੁਸ੍ਸੀਲਸ੍ਸ ਸੀਲਵਿਪਤ੍ਤਿਯਾ. ਪੁਨ ਚਪਰਂ, ਗਹਪਤਯੋ, ਦੁਸ੍ਸੀਲੋ ਸੀਲਵਿਪਨ੍ਨੋ ਯਞ੍ਞਦੇਵ ਪਰਿਸਂ ਉਪਸਙ੍ਕਮਤਿ, ਯਦਿ ਖਤ੍ਤਿਯਪਰਿਸਂ, ਯਦਿ ਬ੍ਰਾਹ੍ਮਣਪਰਿਸਂ, ਯਦਿ ਗਹਪਤਿਪਰਿਸਂ, ਯਦਿ ਸਮਣਪਰਿਸਂ, ਅਵਿਸਾਰਦੋ ਉਪਸਙ੍ਕਮਤਿ ਮਙ੍ਕੁਭੂਤੋ. ਅਯਂ ਤਤਿਯੋ ਆਦੀਨਵੋ ਦੁਸ੍ਸੀਲਸ੍ਸ ਸੀਲਵਿਪਤ੍ਤਿਯਾ. ਪੁਨ ਚਪਰਂ, ਗਹਪਤਯੋ, ਦੁਸ੍ਸੀਲੋ ਸੀਲਵਿਪਨ੍ਨੋ ਸਮ੍ਮੂਲ਼੍ਹੋ ਕਾਲਂਕਰੋਤਿ. ਅਯਂ ਚਤੁਤ੍ਥੋ ਆਦੀਨਵੋ ਦੁਸ੍ਸੀਲਸ੍ਸ ਸੀਲਵਿਪਤ੍ਤਿਯਾ. ਪੁਨ ਚਪਰਂ, ਗਹਪਤਯੋ, ਦੁਸ੍ਸੀਲੋ ਸੀਲਵਿਪਨ੍ਨੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤਿ. ਅਯਂ ਪਞ੍ਚਮੋ ਆਦੀਨਵੋ ਦੁਸ੍ਸੀਲਸ੍ਸ ਸੀਲਵਿਪਤ੍ਤਿਯਾ. ਇਮੇ ਖੋ, ਗਹਪਤਯੋ, ਪਞ੍ਚ ਆਦੀਨਵਾ ਦੁਸ੍ਸੀਲਸ੍ਸ ਸੀਲਵਿਪਤ੍ਤਿਯਾ.

[ਦੀ. ਨਿ. ੩.੩੧੬; ਅ. ਨਿ. ੫.੨੧੩ ਆਦਯੋ] ‘‘ਪਞ੍ਚਿਮੇ, ਗਹਪਤਯੋ, ਆਨਿਸਂਸਾ ਸੀਲਵਤੋ ਸੀਲਸਮ੍ਪਦਾਯ. ਕਤਮੇ ਪਞ੍ਚ? ਇਧ, ਗਹਪਤਯੋ, ਸੀਲਵਾ ਸੀਲਸਮ੍ਪਨ੍ਨੋ ਅਪ੍ਪਮਾਦਾਧਿਕਰਣਂ ਮਹਨ੍ਤਂ ਭੋਗਕ੍ਖਨ੍ਧਂ ਅਧਿਗਚ੍ਛਤਿ. ਅਯਂ ਪਠਮੋ ਆਨਿਸਂਸੋ ਸੀਲਵਤੋ ਸੀਲਸਮ੍ਪਦਾਯ. ਪੁਨ ਚਪਰਂ, ਗਹਪਤਯੋ, ਸੀਲਵਤੋ ਸੀਲਸਮ੍ਪਨ੍ਨਸ੍ਸ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ. ਅਯਂ ਦੁਤਿਯੋ ਆਨਿਸਂਸੋ ਸੀਲਵਤੋ ਸੀਲਸਮ੍ਪਦਾਯ. ਪੁਨ ਚਪਰਂ, ਗਹਪਤਯੋ, ਸੀਲਵਾ ਸੀਲਸਮ੍ਪਨ੍ਨੋ ਯਞ੍ਞਦੇਵ ਪਰਿਸਂ ਉਪਸਙ੍ਕਮਤਿ, ਯਦਿ ਖਤ੍ਤਿਯਪਰਿਸਂ, ਯਦਿ ਬ੍ਰਾਹ੍ਮਣਪਰਿਸਂ, ਯਦਿ ਗਹਪਤਿਪਰਿਸਂ, ਯਦਿ ਸਮਣਪਰਿਸਂ, ਵਿਸਾਰਦੋ ਉਪਸਙ੍ਕਮਤਿ ਅਮਙ੍ਕੁਭੂਤੋ. ਅਯਂ ਤਤਿਯੋ ਆਨਿਸਂਸੋ ਸੀਲਵਤੋ ਸੀਲਸਮ੍ਪਦਾਯ. ਪੁਨ ਚਪਰਂ, ਗਹਪਤਯੋ, ਸੀਲਵਾ ਸੀਲਸਮ੍ਪਨ੍ਨੋ ਅਸਮ੍ਮੂਲ਼੍ਹੋ ਕਾਲਂਕਰੋਤਿ. ਅਯਂ ਚਤੁਤ੍ਥੋ ਆਨਿਸਂਸੋ ਸੀਲਵਤੋ ਸੀਲਸਮ੍ਪਦਾਯ. ਪੁਨ ਚਪਰਂ, ਗਹਪਤਯੋ, ਸੀਲਵਾ ਸੀਲਸਮ੍ਪਨ੍ਨੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਅਯਂ ਪਞ੍ਚਮੋ ਆਨਿਸਂਸੋ ਸੀਲਵਤੋ ਸੀਲਸਮ੍ਪਦਾਯ. ਇਮੇ ਖੋ, ਗਹਪਤਯੋ, ਪਞ੍ਚ ਆਨਿਸਂਸਾ ਸੀਲਵਤੋ ਸੀਲਸਮ੍ਪਦਾਯਾਤਿ.

ਅਥ ਖੋ ਭਗਵਾ ਪਾਟਲਿਗਾਮਿਕੇ ਉਪਾਸਕੇ ਬਹੁਦੇਵ ਰਤ੍ਤਿਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਯ੍ਯੋਜੇਸਿ – ‘‘ਅਭਿਕ੍ਕਨ੍ਤਾ ਖੋ, ਗਹਪਤਯੋ, ਰਤ੍ਤਿ. ਯਸ੍ਸਦਾਨਿ ਤੁਮ੍ਹੇ ਕਾਲਂ ਮਞ੍ਞਥਾ’’ਤਿ. ‘‘ਏਵਂ, ਭਨ੍ਤੇ’’ਤਿ, ਖੋ ਪਾਟਲਿਗਾਮਿਕਾ ਉਪਾਸਕਾ ਭਗਵਤੋ ਪਟਿਸ੍ਸੁਣਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਮਿਂਸੁ. ਅਥ ਖੋ ਭਗਵਾ ਅਚਿਰਪਕ੍ਕਨ੍ਤੇਸੁ ਪਾਟਲਿਗਾਮਿਕੇਸੁ ਉਪਾਸਕੇਸੁ ਸੁਞ੍ਞਾਗਾਰਂ ਪਾਵਿਸਿ.

ਪਾਟਲਿਗਾਮਵਤ੍ਥੁ ਨਿਟ੍ਠਿਤਂ.

੧੭੪. ਸੁਨਿਧਵਸ੍ਸਕਾਰਵਤ੍ਥੁ

੨੮੬. ਤੇਨ ਖੋ ਪਨ ਸਮਯੇਨ ਸੁਨਿਧਵਸ੍ਸਕਾਰਾ ਮਗਧਮਹਾਮਤ੍ਤਾ ਪਾਟਲਿਗਾਮੇ ਨਗਰਂ ਮਾਪੇਨ੍ਤਿ ਵਜ੍ਜੀਨਂ ਪਟਿਬਾਹਾਯ. ਅਦ੍ਦਸਾ ਖੋ ਭਗਵਾ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਸਮ੍ਬਹੁਲਾ ਦੇਵਤਾਯੋ ਪਾਟਲਿਗਾਮੇ ਵਤ੍ਥੂਨਿ ਪਰਿਗ੍ਗਣ੍ਹਨ੍ਤਿਯੋ. ਯਸ੍ਮਿਂ ਪਦੇਸੇ ਮਹੇਸਕ੍ਖਾ ਦੇਵਤਾ ਵਤ੍ਥੂਨਿ ਪਰਿਗ੍ਗਣ੍ਹਨ੍ਤਿ, ਮਹੇਸਕ੍ਖਾਨਂ ਤਤ੍ਥ ਰਾਜੂਨਂ ਰਾਜਮਹਾਮਤ੍ਤਾਨਂ ਚਿਤ੍ਤਾਨਿ ਨਮਨ੍ਤਿ ਨਿਵੇਸਨਾਨਿ ਮਾਪੇਤੁਂ. ਯਸ੍ਮਿਂ ਪਦੇਸੇ ਮਜ੍ਝਿਮਾ ਦੇਵਤਾ ਵਤ੍ਥੂਨਿ ਪਰਿਗ੍ਗਣ੍ਹਨ੍ਤਿ, ਮਜ੍ਝਿਮਾਨਂ ਤਤ੍ਥ ਰਾਜੂਨਂ ਰਾਜਮਹਾਮਤ੍ਤਾਨਂ ਚਿਤ੍ਤਾਨਿ ਨਮਨ੍ਤਿ ਨਿਵੇਸਨਾਨਿ ਮਾਪੇਤੁਂ. ਯਸ੍ਮਿਂ ਪਦੇਸੇ ਨੀਚਾ ਦੇਵਤਾ ਵਤ੍ਥੂਨਿ ਪਰਿਗ੍ਗਣ੍ਹਨ੍ਤਿ, ਨੀਚਾਨਂ ਤਤ੍ਥ ਰਾਜੂਨਂ ਰਾਜਮਹਾਮਤ੍ਤਾਨਂ ਚਿਤ੍ਤਾਨਿ ਨਮਨ੍ਤਿ ਨਿਵੇਸਨਾਨਿ ਮਾਪੇਤੁਂ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕੇ ਨੁ ਖੋ ਤੇ, ਆਨਨ੍ਦ, ਪਾਟਲਿਗਾਮੇ ਨਗਰਂ ਮਾਪੇਨ੍ਤੀ’’ਤਿ? ‘‘ਸੁਨਿਧਵਸ੍ਸਕਾਰਾ, ਭਨ੍ਤੇ, ਮਗਧਮਹਾਮਤ੍ਤਾ ਪਾਟਲਿਗਾਮੇ ਨਗਰਂ ਮਾਪੇਨ੍ਤਿ ਵਜ੍ਜੀਨਂ ਪਟਿਬਾਹਾਯਾ’’ਤਿ. ਸੇਯ੍ਯਥਾਪਿ, ਆਨਨ੍ਦ, ਦੇਵੇਹਿ ਤਾਵਤਿਂਸੇਹਿ ਸਦ੍ਧਿਂ ਮਨ੍ਤੇਤ੍ਵਾ, ਏਵਮੇਵ ਖੋ, ਆਨਨ੍ਦ, ਸੁਨਿਧਵਸ੍ਸਕਾਰਾ ਮਗਧਮਹਾਮਤ੍ਤਾ ਪਾਟਲਿਗਾਮੇ ਨਗਰਂ ਮਾਪੇਨ੍ਤਿ ਵਜ੍ਜੀਨਂ ਪਟਿਬਾਹਾਯ. ਇਧਾਹਂ, ਆਨਨ੍ਦ, ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਅਦ੍ਦਸਂ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਸਮ੍ਬਹੁਲਾ ਦੇਵਤਾਯੋ ਪਾਟਲਿਗਾਮੇ ਵਤ੍ਥੂਨਿ ਪਰਿਗ੍ਗਣ੍ਹਨ੍ਤਿਯੋ. ਯਸ੍ਮਿਂ ਪਦੇਸੇ ਮਹੇਸਕ੍ਖਾ ਦੇਵਤਾ ਵਤ੍ਥੂਨਿ ਪਰਿਗ੍ਗਣ੍ਹਨ੍ਤਿ, ਮਹੇਸਕ੍ਖਾਨਂ ਤਤ੍ਥ ਰਾਜੂਨਂ ਰਾਜਮਹਾਮਤ੍ਤਾਨਂ ਚਿਤ੍ਤਾਨਿ ਨਮਨ੍ਤਿ ਨਿਵੇਸਨਾਨਿ ਮਾਪੇਤੁਂ. ਯਸ੍ਮਿਂ ਪਦੇਸੇ ਮਜ੍ਝਿਮਾ ਦੇਵਤਾ ਵਤ੍ਥੂਨਿ ਪਰਿਗ੍ਗਣ੍ਹਨ੍ਤਿ, ਮਜ੍ਝਿਮਾਨਂ ਤਤ੍ਥ ਰਾਜੂਨਂ ਰਾਜਮਹਾਮਤ੍ਤਾਨਂ ਚਿਤ੍ਤਾਨਿ ਨਮਨ੍ਤਿ ਨਿਵੇਸਨਾਨਿ ਮਾਪੇਤੁਂ. ਯਸ੍ਮਿਂ ਪਦੇਸੇ ਨੀਚਾ ਦੇਵਤਾ ਵਤ੍ਥੂਨਿ ਪਰਿਗ੍ਗਣ੍ਹਨ੍ਤਿ, ਨੀਚਾਨਂ ਤਤ੍ਥ ਰਾਜੂਨਂ ਰਾਜਮਹਾਮਤ੍ਤਾਨਂ ਚਿਤ੍ਤਾਨਿ ਨਮਨ੍ਤਿ ਨਿਵੇਸਨਾਨਿ ਮਾਪੇਤੁਂ. ਯਾਵਤਾ, ਆਨਨ੍ਦ, ਅਰਿਯਂ ਆਯਤਨਂ, ਯਾਵਤਾ ਵਣਿਪ੍ਪਥੋ, ਇਦਂ ਅਗ੍ਗਨਗਰਂ ਭਵਿਸ੍ਸਤਿ ਪਾਟਲਿਪੁਤ੍ਤਂ ਪੁਟਭੇਦਨਂ. ਪਾਟਲਿਪੁਤ੍ਤਸ੍ਸ ਖੋ, ਆਨਨ੍ਦ, ਤਯੋ ਅਨ੍ਤਰਾਯਾ ਭਵਿਸ੍ਸਨ੍ਤਿ – ਅਗ੍ਗਿਤੋ ਵਾ ਉਦਕਤੋ ਵਾ ਅਬ੍ਭਨ੍ਤਰਤੋ ਵਾ ਮਿਥੁਭੇਦਾਤਿ.

ਅਥ ਖੋ ਸੁਨਿਧਵਸ੍ਸਕਾਰਾ ਮਗਧਮਹਾਮਤ੍ਤਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿਂਸੁ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਏਕਮਨ੍ਤਂ ਠਿਤਾ ਖੋ ਸੁਨਿਧਵਸ੍ਸਕਾਰਾ ਮਗਧਮਹਾਮਤ੍ਤਾ ਭਗਵਨ੍ਤਂ ਏਤਦਵੋਚੁਂ – ‘‘ਅਧਿਵਾਸੇਤੁ ਨੋ ਭਵਂ ਗੋਤਮੋ ਅਜ੍ਜਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਸੁਨਿਧਵਸ੍ਸਕਾਰਾ ਮਗਧਮਹਾਮਤ੍ਤਾ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਪਕ੍ਕਮਿਂਸੁ. ਅਥ ਖੋ ਸੁਨਿਧਵਸ੍ਸਕਾਰਾ ਮਗਧਮਹਾਮਤ੍ਤਾ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸੁਂ – ‘‘ਕਾਲੋ, ਭੋ ਗੋਤਮ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਸੁਨਿਧਵਸ੍ਸਕਾਰਾਨਂ ਮਗਧਮਹਾਮਤ੍ਤਾਨਂ ਪਰਿਵੇਸਨਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਸੁਨਿਧਵਸ੍ਸਕਾਰਾ ਮਗਧਮਹਾਮਤ੍ਤਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨੇ ਖੋ ਸੁਨਿਧਵਸ੍ਸਕਾਰੇ ਮਗਧਮਹਾਮਤ੍ਤੇ ਭਗਵਾ ਇਮਾਹਿ ਗਾਥਾਹਿ ਅਨੁਮੋਦਿ –

‘‘ਯਸ੍ਮਿਂ ਪਦੇਸੇ ਕਪ੍ਪੇਤਿ, ਵਾਸਂ ਪਣ੍ਡਿਤਜਾਤਿਯੋ;

ਸੀਲਵਨ੍ਤੇਤ੍ਥ ਭੋਜੇਤ੍ਵਾ, ਸਞ੍ਞਤੇ ਬ੍ਰਹ੍ਮਚਾਰਯੋ [ਬ੍ਰਹ੍ਮਚਾਰਿਨੋ (ਸ੍ਯਾ.)].

‘‘ਯਾ ਤਤ੍ਥ ਦੇਵਤਾ ਆਸੁਂ, ਤਾਸਂ ਦਕ੍ਖਿਣਮਾਦਿਸੇ;

ਤਾ ਪੂਜਿਤਾ ਪੂਜਯਨ੍ਤਿ, ਮਾਨਿਤਾ ਮਾਨਯਨ੍ਤਿ ਨਂ.

‘‘ਤਤੋ ਨਂ ਅਨੁਕਮ੍ਪਨ੍ਤਿ, ਮਾਤਾ ਪੁਤ੍ਤਂਵ ਓਰਸਂ;

ਦੇਵਤਾਨੁਕਮ੍ਪਿਤੋ ਪੋਸੋ, ਸਦਾ ਭਦ੍ਰਾਨਿ ਪਸ੍ਸਤੀ’’ਤਿ.

ਅਥ ਖੋ ਭਗਵਾ ਸੁਨਿਧਵਸ੍ਸਕਾਰੇ ਮਗਧਮਹਾਮਤ੍ਤੇ ਇਮਾਹਿ ਗਾਥਾਹਿ ਅਨੁਮੋਦਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਤੇਨ ਖੋ ਪਨ ਸਮਯੇਨ ਸੁਨਿਧਵਸ੍ਸਕਾਰਾ ਮਗਧਮਹਾਮਤ੍ਤਾ ਭਗਵਨ੍ਤਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਾ ਹੋਨ੍ਤਿ, ‘‘ਯੇਨਜ੍ਜ ਸਮਣੋ ਗੋਤਮੋ ਦ੍ਵਾਰੇਨ ਨਿਕ੍ਖਮਿਸ੍ਸਤਿ, ਤਂ ਗੋਤਮਦ੍ਵਾਰਂ ਨਾਮ ਭਵਿਸ੍ਸਤਿ; ਯੇਨ ਤਿਤ੍ਥੇਨ ਗਙ੍ਗਂ ਨਦਿਂ ਉਤ੍ਤਰਿਸ੍ਸਤਿ, ਤਂ ਗੋਤਮਤਿਤ੍ਥਂ ਨਾਮ ਭਵਿਸ੍ਸਤੀ’’ਤਿ. ਅਥ ਖੋ ਭਗਵਾ ਯੇਨ ਦ੍ਵਾਰੇਨ ਨਿਕ੍ਖਮਿ, ਤਂ ਗੋਤਮਦ੍ਵਾਰਂ ਨਾਮ ਅਹੋਸਿ. ਅਥ ਖੋ ਭਗਵਾ ਯੇਨ ਗਙ੍ਗਾ ਨਦੀ ਤੇਨੁਪਸਙ੍ਕਮਿ. ਤੇਨ ਖੋ ਪਨ ਸਮਯੇਨ ਗਙ੍ਗਾ ਨਦੀ ਪੂਰਾ ਹੋਤਿ ਸਮਤਿਤ੍ਤਿਕਾ ਕਾਕਪੇਯ੍ਯਾ. ਮਨੁਸ੍ਸਾ ਅਞ੍ਞੇ ਨਾਵਂ ਪਰਿਯੇਸਨ੍ਤਿ, ਅਞ੍ਞੇ ਉਲ਼ੁਮ੍ਪਂ ਪਰਿਯੇਸਨ੍ਤਿ, ਅਞ੍ਞੇ ਕੁਲ੍ਲਂ ਬਨ੍ਧਨ੍ਤਿ ਓਰਾ ਪਾਰਂ ਗਨ੍ਤੁਕਾਮਾ. ਅਦ੍ਦਸਾ ਖੋ ਭਗਵਾ ਤੇ ਮਨੁਸ੍ਸੇ ਅਞ੍ਞੇ ਨਾਵਂ ਪਰਿਯੇਸਨ੍ਤੇ, ਅਞ੍ਞੇ ਉਲ਼ੁਮ੍ਪਂ ਪਰਿਯੇਸਨ੍ਤੇ, ਅਞ੍ਞੇ ਕੁਲ੍ਲਂ ਬਨ੍ਧਨ੍ਤੇ ਓਰਾ ਪਾਰਂ ਗਨ੍ਤੁਕਾਮੇ, ਦਿਸ੍ਵਾਨ ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ, ਏਵਮੇਵ ਖੋ ਗਙ੍ਗਾਯ ਨਦਿਯਾ ਓਰਿਮਤੀਰੇ ਅਨ੍ਤਰਹਿਤੋ ਪਾਰਿਮਤੀਰੇ ਪਚ੍ਚੁਟ੍ਠਾਸਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

‘‘ਯੇ ਤਰਨ੍ਤਿ ਅਣ੍ਣਵਂ ਸਰਂ;

ਸੇਤੁਂ ਕਤ੍ਵਾਨ ਵਿਸਜ੍ਜ ਪਲ੍ਲਲਾਨਿ;

ਕੁਲ੍ਲਞ੍ਹਿ ਜਨੋ ਬਨ੍ਧਤਿ;

ਤਿਣ੍ਣਾ ਮੇਧਾਵਿਨੋ ਜਨਾ’’ਤਿ.

ਸੁਨਿਧਵਸ੍ਸਕਾਰਵਤ੍ਥੁ ਨਿਟ੍ਠਿਤਂ.

੧੭੫. ਕੋਟਿਗਾਮੇ ਸਚ੍ਚਕਥਾ

੨੮੭. ਅਥ ਖੋ ਭਗਵਾ ਯੇਨ ਕੋਟਿਗਾਮੋ ਤੇਨੁਪਸਙ੍ਕਮਿ. ਤਤ੍ਰ ਸੁਦਂ ਭਗਵਾ ਕੋਟਿਗਾਮੇ ਵਿਹਰਤਿ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – [ਦੀ. ਨਿ. ੨.੧੫੫] ‘‘ਚਤੁਨ੍ਨਂ, ਭਿਕ੍ਖਵੇ, ਅਰਿਯਸਚ੍ਚਾਨਂ ਅਨਨੁਬੋਧਾ ਅਪ੍ਪਟਿਵੇਧਾ ਏਵਮਿਦਂ ਦੀਘਮਦ੍ਧਾਨਂ ਸਨ੍ਧਾਵਿਤਂ ਸਂਸਰਿਤਂ ਮਮਞ੍ਚੇਵ ਤੁਮ੍ਹਾਕਞ੍ਚ. ਕਤਮੇਸਂ ਚਤੁਨ੍ਨਂ? ਦੁਕ੍ਖਸ੍ਸ, ਭਿਕ੍ਖਵੇ, ਅਰਿਯਸਚ੍ਚਸ੍ਸ ਅਨਨੁਬੋਧਾ ਅਪ੍ਪਟਿਵੇਧਾ ਏਵਮਿਦਂ ਦੀਘਮਦ੍ਧਾਨਂ ਸਨ੍ਧਾਵਿਤਂ ਸਂਸਰਿਤਂ ਮਮਞ੍ਚੇਵ ਤੁਮ੍ਹਾਕਞ੍ਚ. ਦੁਕ੍ਖਸਮੁਦਯਸ੍ਸ ਅਰਿਯਸਚ੍ਚਸ੍ਸ…ਪੇ… ਦੁਕ੍ਖਨਿਰੋਧਸ੍ਸ ਅਰਿਯਸਚ੍ਚਸ੍ਸ…ਪੇ… ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਅਰਿਯਸਚ੍ਚਸ੍ਸ ਅਨਨੁਬੋਧਾ ਅਪ੍ਪਟਿਵੇਧਾ ਏਵਮਿਦਂ ਦੀਘਮਦ੍ਧਾਨਂ ਸਨ੍ਧਾਵਿਤਂ ਸਂਸਰਿਤਂ ਮਮਞ੍ਚੇਵ ਤੁਮ੍ਹਾਕਞ੍ਚ. ਤਯਿਦਂ, ਭਿਕ੍ਖਵੇ, ਦੁਕ੍ਖਂ ਅਰਿਯਸਚ੍ਚਂ ਅਨੁਬੁਦ੍ਧਂ ਪਟਿਵਿਦ੍ਧਂ, ਦੁਕ੍ਖਸਮੁਦਯਂ [ਦੁਕ੍ਖਸਮੁਦਯੋ (ਸ੍ਯਾ.)] ਅਰਿਯਸਚ੍ਚਂ ਅਨੁਬੁਦ੍ਧਂ ਪਟਿਵਿਦ੍ਧਂ, ਦੁਕ੍ਖਨਿਰੋਧਂ [ਦੁਕ੍ਖਨਿਰੋਧੋ (ਸ੍ਯਾ.)] ਅਰਿਯਸਚ੍ਚਂ ਅਨੁਬੁਦ੍ਧਂ ਪਟਿਵਿਦ੍ਧਂ, ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਂ ਅਨੁਬੁਦ੍ਧਂ ਪਟਿਵਿਦ੍ਧਂ, ਉਚ੍ਛਿਨ੍ਨਾ ਭਵਤਣ੍ਹਾ, ਖੀਣਾ ਭਵਨੇਤ੍ਤਿ, ਨਤ੍ਥਿਦਾਨਿ ਪੁਨਬ੍ਭਵੋ’’ਤਿ.

ਚਤੁਨ੍ਨਂ ਅਰਿਯਸਚ੍ਚਾਨਂ, ਯਥਾਭੂਤਂ ਅਦਸ੍ਸਨਾ;

ਸਂਸਿਤਂ ਦੀਘਮਦ੍ਧਾਨਂ, ਤਾਸੁ ਤਾਸ੍ਵੇਵ ਜਾਤਿਸੁ.

ਤਾਨਿ ਏਤਾਨਿ ਦਿਟ੍ਠਾਨਿ, ਭਵਨੇਤ੍ਤਿ ਸਮੂਹਤਾ;

ਉਚ੍ਛਿਨ੍ਨਂ ਮੂਲਂ ਦੁਕ੍ਖਸ੍ਸ, ਨਤ੍ਥਿਦਾਨਿ ਪੁਨਬ੍ਭਵੋਤਿ.

ਕੋਟਿਗਾਮੇ ਸਚ੍ਚਕਥਾ ਨਿਟ੍ਠਿਤਾ.

੧੭੬. ਅਮ੍ਬਪਾਲੀਵਤ੍ਥੁ

੨੮੮. [ਦੀ. ਨਿ. ੨.੧੬੧ ਆਦਯੋ] ਅਸ੍ਸੋਸਿ ਖੋ ਅਮ੍ਬਪਾਲੀ ਗਣਿਕਾ – ਭਗਵਾ ਕਿਰ ਕੋਟਿਗਾਮਂ ਅਨੁਪ੍ਪਤ੍ਤੋਤਿ. ਅਥ ਖੋ ਅਮ੍ਬਪਾਲੀ ਗਣਿਕਾ ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ ਯੋਜਾਪੇਤ੍ਵਾ ਭਦ੍ਰਂ ਭਦ੍ਰਂ ਯਾਨਂ ਅਭਿਰੁਹਿਤ੍ਵਾ ਭਦ੍ਰੇਹਿ ਭਦ੍ਰੇਹਿ ਯਾਨੇਹਿ ਵੇਸਾਲਿਯਾ ਨਿਯ੍ਯਾਸਿ ਭਗਵਨ੍ਤਂ ਦਸ੍ਸਨਾਯ. ਯਾਵਤਿਕਾ ਯਾਨਸ੍ਸ ਭੂਮਿ, ਯਾਨੇਨ ਗਨ੍ਤ੍ਵਾ, ਯਾਨਾ ਪਚ੍ਚੋਰੋਹਿਤ੍ਵਾ, ਪਤ੍ਤਿਕਾਵ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਅਮ੍ਬਪਾਲਿਂ ਗਣਿਕਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਅਮ੍ਬਪਾਲੀ ਗਣਿਕਾ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਭਗਵਨ੍ਤਂ ਏਤਦਵੋਚ – ‘‘ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਅਮ੍ਬਪਾਲੀ ਗਣਿਕਾ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

ਅਮ੍ਬਪਾਲੀਵਤ੍ਥੁ ਨਿਟ੍ਠਿਤਂ.

੧੭੭. ਲਿਚ੍ਛਵੀਵਤ੍ਥੁ

੨੮੯. [ਦੀ. ਨਿ. ੨.੧੬੧ ਆਦਯੋ] ਅਸ੍ਸੋਸੁਂ ਖੋ ਵੇਸਾਲਿਕਾ ਲਿਚ੍ਛਵੀ – ਭਗਵਾ ਕਿਰ ਕੋਟਿਗਾਮਂ ਅਨੁਪ੍ਪਤ੍ਤੋਤਿ. ਅਥ ਖੋ ਵੇਸਾਲਿਕਾ ਲਿਚ੍ਛਵੀ ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ ਯੋਜਾਪੇਤ੍ਵਾ ਭਦ੍ਰਂ ਭਦ੍ਰਂ ਯਾਨਂ ਅਭਿਰੁਹਿਤ੍ਵਾ ਭਦ੍ਰੇਹਿ ਭਦ੍ਰੇਹਿ ਯਾਨੇਹਿ ਵੇਸਾਲਿਯਾ ਨਿਯ੍ਯਾਸੁਂ ਭਗਵਨ੍ਤਂ ਦਸ੍ਸਨਾਯ. ਅਪ੍ਪੇਕਚ੍ਚੇ ਲਿਚ੍ਛਵੀ ਨੀਲਾ ਹੋਨ੍ਤਿ ਨੀਲਵਣ੍ਣਾ ਨੀਲਵਤ੍ਥਾ ਨੀਲਾਲਙ੍ਕਾਰਾ, ਅਪ੍ਪੇਕਚ੍ਚੇ ਲਿਚ੍ਛਵੀ ਪੀਤਾ ਹੋਨ੍ਤਿ ਪੀਤਵਣ੍ਣਾ ਪੀਤਵਤ੍ਥਾ ਪੀਤਾਲਙ੍ਕਾਰਾ, ਅਪ੍ਪੇਕਚ੍ਚੇ ਲਿਚ੍ਛਵੀ ਲੋਹਿਤਾ ਹੋਨ੍ਤਿ ਲੋਹਿਤਵਣ੍ਣਾ ਲੋਹਿਤਵਤ੍ਥਾ ਲੋਹਿਤਾਲਙ੍ਕਾਰਾ, ਅਪ੍ਪੇਕਚ੍ਚੇ ਲਿਚ੍ਛਵੀ ਓਦਾਤਾ ਹੋਨ੍ਤਿ ਓਦਾਤਵਣ੍ਣਾ ਓਦਾਤਵਤ੍ਥਾ ਓਦਾਤਾਲਙ੍ਕਾਰਾ. ਅਥ ਖੋ ਅਮ੍ਬਪਾਲੀ ਗਣਿਕਾ ਦਹਰਾਨਂ ਦਹਰਾਨਂ ਲਿਚ੍ਛਵੀਨਂ ਈਸਾਯ ਈਸਂ ਯੁਗੇਨ ਯੁਗਂ ਚਕ੍ਕੇਨ ਚਕ੍ਕਂ ਅਕ੍ਖੇਨ ਅਕ੍ਖਂ ਪਟਿਵਟ੍ਟੇਸਿ [ਪਟਿਵਤ੍ਤੇਸਿ (ਕ.)]. ਅਥ ਖੋ ਤੇ ਲਿਚ੍ਛਵੀ ਅਮ੍ਬਪਾਲਿਂ ਗਣਿਕਂ ਏਤਦਵੋਚੁਂ – ‘‘ਕਿਸ੍ਸ, ਜੇ ਅਮ੍ਬਪਾਲਿ, ਦਹਰਾਨਂ ਦਹਰਾਨਂ [ਅਮ੍ਹਾਕਂ ਦਹਰਾਨਂ ਦਹਰਾਨਂ (ਸੀ. ਸ੍ਯਾ.)] ਲਿਚ੍ਛਵੀਨਂ ਈਸਾਯ ਈਸਂ ਯੁਗੇਨ ਯੁਗਂ ਚਕ੍ਕੇਨ ਚਕ੍ਕਂ ਅਕ੍ਖੇਨ ਅਕ੍ਖਂ ਪਟਿਵਟ੍ਟੇਸੀ’’ਤਿ? ‘‘ਤਥਾ ਹਿ ਪਨ ਮਯਾ, ਅਯ੍ਯਪੁਤ੍ਤਾ, ਸ੍ਵਾਤਨਾਯ ਬੁਦ੍ਧਪ੍ਪਮੁਖੋ ਭਿਕ੍ਖੁਸਙ੍ਘੋ ਨਿਮਨ੍ਤਿਤੋ’’ਤਿ. ‘‘ਦੇਹਿ, ਜੇ ਅਮ੍ਬਪਾਲਿ, ਅਮ੍ਹਾਕਂ ਏਤਂ ਭਤ੍ਤਂ ਸਤਸਹਸ੍ਸੇਨਾ’’ਤਿ. ‘‘ਸਚੇਪਿ ਮੇ, ਅਯ੍ਯਪੁਤ੍ਤਾ, ਵੇਸਾਲਿਂ ਸਾਹਾਰਂ ਦਜ੍ਜੇਯ੍ਯਾਥ, ਨੇਵ ਦਜ੍ਜਾਹਂ ਤਂ ਭਤ੍ਤ’’ਨ੍ਤਿ. ਅਥ ਖੋ ਤੇ ਲਿਚ੍ਛਵੀ ਅਙ੍ਗੁਲਿਂ ਫੋਟੇਸੁਂ – ‘‘ਜਿਤਮ੍ਹਾ ਵਤ, ਭੋ, ਅਮ੍ਬਕਾਯ, ਪਰਾਜਿਤਮ੍ਹ ਵਤ, ਭੋ, ਅਮ੍ਬਕਾਯਾ’’ਤਿ. ਅਥ ਖੋ ਤੇ ਲਿਚ੍ਛਵੀ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ. ਅਦ੍ਦਸਾ ਖੋ ਭਗਵਾ ਤੇ ਲਿਚ੍ਛਵੀ ਦੂਰਤੋਵ ਆਗਚ੍ਛਨ੍ਤੇ, ਦਿਸ੍ਵਾਨ ਭਿਕ੍ਖੂ ਆਮਨ੍ਤੇਸਿ – ‘‘ਯੇਹਿ, ਭਿਕ੍ਖਵੇ, ਭਿਕ੍ਖੂਹਿ ਦੇਵਾ ਤਾਵਤਿਂਸਾ ਅਦਿਟ੍ਠਪੁਬ੍ਬਾ, ਓਲੋਕੇਥ, ਭਿਕ੍ਖਵੇ, ਲਿਚ੍ਛਵੀਪਰਿਸਂ; ਅਪਲੋਕੇਥ, ਭਿਕ੍ਖਵੇ, ਲਿਚ੍ਛਵੀਪਰਿਸਂ; ਉਪਸਂਹਰਥ, ਭਿਕ੍ਖਵੇ, ਲਿਚ੍ਛਵੀਪਰਿਸਂ ਤਾਵਤਿਂਸਪਰਿਸ’’ਨ੍ਤਿ. ਅਥ ਖੋ ਤੇ ਲਿਚ੍ਛਵੀ ਯਾਵਤਿਕਾ ਯਾਨਸ੍ਸ ਭੂਮਿ, ਯਾਨੇਨ ਗਨ੍ਤ੍ਵਾ ਯਾਨਾ ਪਚ੍ਚੋਰੋਹਿਤ੍ਵਾ ਪਤ੍ਤਿਕਾਵ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨੇ ਖੋ ਤੇ ਲਿਚ੍ਛਵੀ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਤੇ ਲਿਚ੍ਛਵੀ, ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਭਗਵਨ੍ਤਂ ਏਤਦਵੋਚੁਂ – ‘‘ਅਧਿਵਾਸੇਤੁ ਨੋ, ਭਨ੍ਤੇ, ਭਗਵਾ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ‘‘ਅਧਿਵੁਟ੍ਠੋਮ੍ਹਿ, ਲਿਚ੍ਛਵੀ, ਸ੍ਵਾਤਨਾਯ ਅਮ੍ਬਪਾਲਿਯਾ ਗਣਿਕਾਯ ਭਤ੍ਤ’’ਨ੍ਤਿ. ਅਥ ਖੋ ਤੇ ਲਿਚ੍ਛਵੀ ਅਙ੍ਗੁਲਿਂ ਫੋਟੇਸੁਂ – ‘‘ਜਿਤਮ੍ਹ ਵਤ, ਭੋ, ਅਮ੍ਬਕਾਯ, ਪਰਾਜਿਤਮ੍ਹ ਵਤ, ਭੋ, ਅਮ੍ਬਕਾਯਾ’’ਤਿ. ਅਥ ਖੋ ਤੇ ਲਿਚ੍ਛਵੀ ਭਗਵਤੋ ਭਾਸਿਤਂ ਅਭਿਨਨ੍ਦਿਤ੍ਵਾ ਅਨੁਮੋਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਮਿਂਸੁ.

ਅਥ ਖੋ ਭਗਵਾ ਕੋਟਿਗਾਮੇ ਯਥਾਭਿਰਨ੍ਤਂ ਵਿਹਰਿਤ੍ਵਾ [ਮਹਾਪਰਿਨਿਬ੍ਬਾਨਸੁਤ੍ਤੇ ਅਨੁਸਨ੍ਧਿ ਅਞ੍ਞਥਾ ਆਗਤੋ] ਯੇਨ ਨਾਤਿਕਾ [ਨਾਦਿਕਾ (ਸੀ. ਸ੍ਯਾ.)] ਤੇਨੁਪਸਙ੍ਕਮਿ. ਤਤ੍ਰ ਸੁਦਂ ਭਗਵਾ ਨਾਤਿਕੇ ਵਿਹਰਤਿ ਗਿਞ੍ਜਕਾਵਸਥੇ. ਅਥ ਖੋ ਅਮ੍ਬਪਾਲੀ ਗਣਿਕਾ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਸਕੇ ਆਰਾਮੇ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਅਮ੍ਬਪਾਲਿਯਾ ਗਣਿਕਾਯ ਪਰਿਵੇਸਨਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਅਮ੍ਬਪਾਲੀ ਗਣਿਕਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਅਮ੍ਬਪਾਲੀ ਗਣਿਕਾ ਭਗਵਨ੍ਤਂ ਏਤਦਵੋਚ – ‘‘ਇਮਾਹਂ, ਭਨ੍ਤੇ, ਅਮ੍ਬਵਨਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਮ੍ਮੀ’’ਤਿ. ਪਟਿਗ੍ਗਹੇਸਿ ਭਗਵਾ ਆਰਾਮਂ. ਅਥ ਖੋ ਭਗਵਾ ਅਮ੍ਬਪਾਲਿਂ ਗਣਿਕਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਯੇਨ ਮਹਾਵਨਂ ਤੇਨੁਪਸਙ੍ਕਮਿ. ਤਤ੍ਰ ਸੁਦਂ ਭਗਵਾ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ.

ਲਿਚ੍ਛਵੀਵਤ੍ਥੁ ਨਿਟ੍ਠਿਤਂ.

ਲਿਚ੍ਛਵਿਭਾਣਵਾਰੋ ਨਿਟ੍ਠਿਤੋ ਤਤਿਯੋ.

੧੭੮. ਸੀਹਸੇਨਾਪਤਿਵਤ੍ਥੁ

੨੯੦. [ਅ. ਨਿ. ੮.੧੨ ਆਦਯੋ] ਤੇਨ ਖੋ ਪਨ ਸਮਯੇਨ ਅਭਿਞ੍ਞਾਤਾ ਅਭਿਞ੍ਞਾਤਾ ਲਿਚ੍ਛਵੀ ਸਨ੍ਧਾਗਾਰੇ [ਸਨ੍ਥਾਗਾਰੇ (ਸੀ. ਸ੍ਯਾ.)] ਸਨ੍ਨਿਸਿਨ੍ਨਾ ਸਨ੍ਨਿਪਤਿਤਾ ਅਨੇਕਪਰਿਯਾਯੇਨ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤਿ, ਧਮ੍ਮਸ੍ਸ ਵਣ੍ਣਂ ਭਾਸਨ੍ਤਿ, ਸਙ੍ਘਸ੍ਸ ਵਣ੍ਣਂ ਭਾਸਨ੍ਤਿ. ਤੇਨ ਖੋ ਪਨ ਸਮਯੇਨ ਸੀਹੋ ਸੇਨਾਪਤਿ ਨਿਗਣ੍ਠਸਾਵਕੋ ਤਸ੍ਸਂ ਪਰਿਸਾਯਂ ਨਿਸਿਨ੍ਨੋ ਹੋਤਿ. ਅਥ ਖੋ ਸੀਹਸ੍ਸ ਸੇਨਾਪਤਿਸ੍ਸ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਭਵਿਸ੍ਸਤਿ, ਤਥਾ ਹਿਮੇ ਅਭਿਞ੍ਞਾਤਾ ਅਭਿਞ੍ਞਾਤਾ ਲਿਚ੍ਛਵੀ ਸਨ੍ਥਾਗਾਰੇ ਸਨ੍ਨਿਸਿਨ੍ਨਾ ਸਨ੍ਨਿਪਤਿਤਾ ਅਨੇਕਪਰਿਯਾਯੇਨ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤਿ, ਧਮ੍ਮਸ੍ਸ ਵਣ੍ਣਂ ਭਾਸਨ੍ਤਿ, ਸਙ੍ਘਸ੍ਸ ਵਣ੍ਣਂ ਭਾਸਨ੍ਤਿ. ਯਂਨੂਨਾਹਂ ਤਂ ਭਗਵਨ੍ਤਂ ਦਸ੍ਸਨਾਯ ਉਪਸਙ੍ਕਮੇਯ੍ਯਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧ’’ਨ੍ਤਿ. ਅਥ ਖੋ ਸੀਹੋ ਸੇਨਾਪਤਿ ਯੇਨ ਨਿਗਣ੍ਠੋ ਨਾਟਪੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਨਿਗਣ੍ਠਂ ਨਾਟਪੁਤ੍ਤਂ ਏਤਦਵੋਚ – ‘‘ਇਚ੍ਛਾਮਹਂ, ਭਨ੍ਤੇ, ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁ’’ਨ੍ਤਿ. ‘‘ਕਿਂ ਪਨ ਤ੍ਵਂ, ਸੀਹ, ਕਿਰਿਯਵਾਦੋ ਸਮਾਨੋ ਅਕਿਰਿਯਵਾਦਂ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਸਿ? ਸਮਣੋ ਹਿ, ਸੀਹ, ਗੋਤਮੋ ਅਕਿਰਿਯਵਾਦੋ ਅਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀ’’ਤਿ. ਅਥ ਖੋ ਸੀਹਸ੍ਸ ਸੇਨਾਪਤਿਸ੍ਸ ਯੋ ਅਹੋਸਿ ਗਮਿਕਾਭਿਸਙ੍ਖਾਰੋ ਭਗਵਨ੍ਤਂ ਦਸ੍ਸਨਾਯ, ਸੋ ਪਟਿਪ੍ਪਸ੍ਸਮ੍ਭਿ. ਦੁਤਿਯਮ੍ਪਿ ਖੋ ਅਭਿਞ੍ਞਾਤਾ ਅਭਿਞ੍ਞਾਤਾ ਲਿਚ੍ਛਵੀ ਸਨ੍ਧਾਗਾਰੇ ਸਨ੍ਨਿਸਿਨ੍ਨਾ ਸਨ੍ਨਿਪਤਿਤਾ ਅਨੇਕਪਰਿਯਾਨੇਨ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤਿ, ਧਮ੍ਮਸ੍ਸ ਵਣ੍ਣਂ ਭਾਸਨ੍ਤਿ, ਸਙ੍ਘਸ੍ਸ ਵਣ੍ਣਂ ਭਾਸਨ੍ਤਿ. ਦੁਤਿਯਮ੍ਪਿ ਖੋ ਸੀਹਸ੍ਸ ਸੇਨਾਪਤਿਸ੍ਸ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਭਵਿਸ੍ਸਤਿ, ਤਥਾ ਹਿਮੇ ਅਭਿਞ੍ਞਾਤਾ ਅਭਿਞ੍ਞਾਤਾ ਲਿਚ੍ਛਵੀ ਸਨ੍ਧਾਗਾਰੇ ਸਨ੍ਨਿਸਿਨ੍ਨਾ ਸਨ੍ਨਿਪਤਿਤਾ ਅਨੇਕਪਰਿਯਾਯੇਨ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤਿ, ਧਮ੍ਮਸ੍ਸ ਵਣ੍ਣਂ ਭਾਸਨ੍ਤਿ, ਸਙ੍ਘਸ੍ਸ ਵਣ੍ਣਂ ਭਾਸਨ੍ਤਿ. ਯਂਨੂਨਾਹਂ ਤਂ ਭਗਵਨ੍ਤਂ ਦਸ੍ਸਨਾਯ ਉਪਸਙ੍ਕਮੇਯ੍ਯਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧ’’ਨ੍ਤਿ. ਦੁਤਿਯਮ੍ਪਿ ਖੋ ਸੀਹੋ ਸੇਨਾਪਤਿ ਯੇਨ ਨਿਗਣ੍ਠੋ ਨਾਟਪੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਨਿਗਣ੍ਠਂ ਨਾਟਪੁਤ੍ਤਂ ਏਤਦਵੋਚ – ‘‘ਇਚ੍ਛਾਮਹਂ, ਭਨ੍ਤੇ, ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁ’’ਨ੍ਤਿ. ‘‘ਕਿਂ ਪਨ ਤ੍ਵਂ, ਸੀਹ, ਕਿਰਿਯਵਾਦੋ ਸਮਾਨੋ ਅਕਿਰਿਯਵਾਦਂ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਸਿ? ਸਮਣੋ ਹਿ, ਸੀਹ, ਗੋਤਮੋ ਅਕਿਰਿਯਵਾਦੋ ਅਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀ’’ਤਿ. ਦੁਤਿਯਮ੍ਪਿ ਖੋ ਸੀਹਸ੍ਸ ਸੇਨਾਪਤਿਸ੍ਸ ਯੋ ਅਹੋਸਿ ਗਮਿਕਾਭਿਸਙ੍ਖਾਰੋ ਭਗਵਨ੍ਤਂ ਦਸ੍ਸਨਾਯ, ਸੋ ਪਟਿਪ੍ਪਸ੍ਸਮ੍ਭਿ. ਤਤਿਯਮ੍ਪਿ ਖੋ ਅਭਿਞ੍ਞਾਤਾ ਅਭਿਞ੍ਞਾਤਾ ਲਿਚ੍ਛਵੀ ਸਨ੍ਧਾਗਾਰੇ ਸਨ੍ਨਿਸਿਨ੍ਨਾ ਸਨ੍ਨਿਪਤਿਤਾ ਅਨੇਕਪਰਿਯਾਯੇਨ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤਿ, ਧਮ੍ਮਸ੍ਸ ਵਣ੍ਣਂ ਭਾਸਨ੍ਤਿ, ਸਙ੍ਘਸ੍ਸ ਵਣ੍ਣਂ ਭਾਸਨ੍ਤਿ. ਤਤਿਯਮ੍ਪਿ ਖੋ ਸੀਹਸ੍ਸ ਸੇਨਾਪਤਿਸ੍ਸ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਭਵਿਸ੍ਸਤਿ, ਤਥਾ ਹਿਮੇ ਅਭਿਞ੍ਞਾਤਾ ਅਭਿਞ੍ਞਾਤਾ ਲਿਚ੍ਛਵੀ ਸਨ੍ਧਾਗਾਰੇ ਸਨ੍ਨਿਸਿਨ੍ਨਾ ਸਨ੍ਨਿਪਤਿਤਾ ਅਨੇਕਪਰਿਯਾਯੇਨ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤਿ, ਧਮ੍ਮਸ੍ਸ ਵਣ੍ਣਂ ਭਾਸਨ੍ਤਿ, ਸਙ੍ਘਸ੍ਸ ਵਣ੍ਣਂ ਭਾਸਨ੍ਤਿ. ਕਿਞ੍ਹਿ ਮੇ ਕਰਿਸ੍ਸਨ੍ਤਿ ਨਿਗਣ੍ਠਾ ਅਪਲੋਕਿਤਾ ਵਾ ਅਨਪਲੋਕਿਤਾ ਵਾ? ਯਂਨੂਨਾਹਂ ਅਨਪਲੋਕੇਤ੍ਵਾਵ ਨਿਗਣ੍ਠੇ ਤਂ ਭਗਵਨ੍ਤਂ ਦਸ੍ਸਨਾਯ ਉਪਸਙ੍ਕਮੇਯ੍ਯਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧ’’ਨ੍ਤਿ.

ਅਥ ਖੋ ਸੀਹੋ ਸੇਨਾਪਤਿ ਪਞ੍ਚਹਿ ਰਥਸਤੇਹਿ ਦਿਵਾ ਦਿਵਸ੍ਸ ਵੇਸਾਲਿਯਾ ਨਿਯ੍ਯਾਸਿ ਭਗਵਨ੍ਤਂ ਦਸ੍ਸਨਾਯ. ਯਾਵਤਿਕਾ ਯਾਨਸ੍ਸ ਭੂਮਿ, ਯਾਨੇਨ ਗਨ੍ਤ੍ਵਾ ਯਾਨਾ ਪਚ੍ਚੋਰੋਹਿਤ੍ਵਾ ਪਤ੍ਤਿਕੋਵ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੀਹੋ ਸੇਨਾਪਤਿ ਭਗਵਨ੍ਤਂ ਏਤਦਵੋਚ – ‘‘ਸੁਤਂ ਮੇ ਤਂ, ਭਨ੍ਤੇ, ‘ਅਕਿਰਿਯਵਾਦੋ ਸਮਣੋ ਗੋਤਮੋ ਅਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀ’ਤਿ. ਯੇ ਤੇ, ਭਨ੍ਤੇ, ਏਵਮਾਹਂਸੁ ‘ਅਕਿਰਿਯਵਾਦੋ ਸਮਣੋ ਗੋਤਮੋ, ਅਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀ’ਤਿ. ਕਚ੍ਚਿ ਤੇ, ਭਨ੍ਤੇ, ਭਗਵਤੋ ਵੁਤ੍ਤਵਾਦਿਨੋ, ਨ ਚ ਭਗਵਨ੍ਤਂ ਅਭੂਤੇਨ ਅਬ੍ਭਾਚਿਕ੍ਖਨ੍ਤਿ, ਧਮ੍ਮਸ੍ਸ ਚਾਨੁਧਮ੍ਮਂ ਬ੍ਯਾਕਰੋਨ੍ਤਿ, ਨ ਚ ਕੋਚਿ ਸਹਧਮ੍ਮਿਕੋ ਵਾਦਾਨੁਵਾਦੋ ਗਾਰਯ੍ਹਂ ਠਾਨਂ ਆਗਚ੍ਛਤਿ? ਅਨਬ੍ਭਕ੍ਖਾਤੁਕਾਮਾ ਹਿ ਮਯਂ, ਭਨ੍ਤੇ, ਭਗਵਨ੍ਤ’’ਨ੍ਤਿ.

੨੯੧. ‘‘ਅਤ੍ਥਿ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਅਕਿਰਿਯਵਾਦੋ ਸਮਣੋ ਗੋਤਮੋ, ਅਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ. ਅਤ੍ਥਿ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਕਿਰਿਯਵਾਦੋ ਸਮਣੋ ਗੋਤਮੋ ਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ. ਅਤ੍ਥਿ, ਸੀਹ, ਪਰਿਯਾਯੋ ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਉਚ੍ਛੇਦਵਾਦੋ ਸਮਣੋ ਗੋਤਮੋ ਉਚ੍ਛੇਦਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ. ਅਤ੍ਥਿ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਜੇਗੁਚ੍ਛੀ ਸਮਣੋ ਗੋਤਮੋ, ਜੇਗੁਚ੍ਛਿਤਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ. ਅਤ੍ਥਿ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਵੇਨਯਿਕੋ ਸਮਣੋ ਗੋਤਮੋ, ਵਿਨਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ. ਅਤ੍ਥਿ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਤਪਸ੍ਸੀ ਸਮਣੋ ਗੋਤਮੋ, ਤਪਸ੍ਸਿਤਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ. ਅਤ੍ਥਿ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਅਪਗਬ੍ਭੋ ਸਮਣੋ ਗੋਤਮੋ, ਅਪਗਬ੍ਭਤਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ. ਅਤ੍ਥਿ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਅਸ੍ਸਤ੍ਥੋ ਸਮਣੋ ਗੋਤਮੋ, ਅਸ੍ਸਾਸਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ.

੨੯੨. ‘‘ਕਤਮੋ ਚ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਅਕਿਰਿਯਵਾਦੋ ਸਮਣੋ ਗੋਤਮੋ, ਅਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ? ਅਹਞ੍ਹਿ, ਸੀਹ, ਅਕਿਰਿਯਂ ਵਦਾਮਿ ਕਾਯਦੁਚ੍ਚਰਿਤਸ੍ਸ ਵਚੀਦੁਚ੍ਚਰਿਤਸ੍ਸ ਮਨੋਦੁਚ੍ਚਰਿਤਸ੍ਸ; ਅਨੇਕਵਿਹਿਤਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਕਿਰਿਯਂ ਵਦਾਮਿ. ਅਯਂ ਖੋ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਅਕਿਰਿਯਵਾਦੋ ਸਮਣੋ ਗੋਤਮੋ, ਅਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ.

‘‘ਕਤਮੋ ਚ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਕਿਰਿਯਵਾਦੋ ਸਮਣੋ ਗੋਤਮੋ, ਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ? ਅਹਞ੍ਹਿ, ਸੀਹ, ਕਿਰਿਯਂ ਵਦਾਮਿ ਕਾਯਸੁਚਰਿਤਸ੍ਸ ਵਚੀਸੁਚਰਿਤਸ੍ਸ ਮਨੋਸੁਚਰਿਤਸ੍ਸ, ਅਨੇਕਵਿਹਿਤਾਨਂ ਕੁਸਲਾਨਂ ਧਮ੍ਮਾਨਂ ਕਿਰਿਯਂ ਵਦਾਮਿ. ਅਯਂ ਖੋ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਕਿਰਿਯਵਾਦੋ ਸਮਣੋ ਗੋਤਮੋ, ਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ.

‘‘ਕਤਮੋ ਚ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਉਚ੍ਛੇਦਵਾਦੋ ਸਮਣੋ ਗੋਤਮੋ, ਉਚ੍ਛੇਦਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ? ਅਹਞ੍ਹਿ, ਸੀਹ, ਉਚ੍ਛੇਦਂ ਵਦਾਮਿ ਰਾਗਸ੍ਸ ਦੋਸਸ੍ਸ ਮੋਹਸ੍ਸ; ਅਨੇਕਵਿਹਿਤਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਉਚ੍ਛੇਦਂ ਵਦਾਮਿ. ਅਯਂ ਖੋ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਉਚ੍ਛੇਦਵਾਦੋ ਸਮਣੋ ਗੋਤਮੋ ਉਚ੍ਛੇਦਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ.

‘‘ਕਤਮੋ ਚ, ਸੀਹ, ਪਰਿਯਾਯੋ ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਜੇਗੁਚ੍ਛੀ ਸਮਣੋ ਗੋਤਮੋ, ਜੇਗੁਚ੍ਛਿਤਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ? ਅਹਞ੍ਹਿ, ਸੀਹ, ਜਿਗੁਚ੍ਛਾਮਿ ਕਾਯਦੁਚ੍ਚਰਿਤੇਨ ਵਚੀਦੁਚ੍ਚਰਿਤੇਨ ਮਨੋਦੁਚ੍ਚਰਿਤੇਨ; ਅਨੇਕਵਿਹਿਤਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਸਮਾਪਤ੍ਤਿਯਾ ਜਿਗੁਚ੍ਛਾਮਿ. ਅਯਂ ਖੋ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਜੇਗੁਚ੍ਛੀ ਸਮਣੋ ਗੋਤਮੋ, ਜੇਗੁਚ੍ਛਿਤਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ.

‘‘ਕਤਮੋ ਚ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਵੇਨਯਿਕੋ ਸਮਣੋ ਗੋਤਮੋ, ਵਿਨਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ? ਅਹਞ੍ਹਿ, ਸੀਹ, ਵਿਨਯਾਯ ਧਮ੍ਮਂ ਦੇਸੇਮਿ ਰਾਗਸ੍ਸ ਦੋਸਸ੍ਸ ਮੋਹਸ੍ਸ; ਅਨੇਕਵਿਹਿਤਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਵਿਨਯਾਯ ਧਮ੍ਮਂ ਦੇਸੇਮਿ. ਅਯਂ ਖੋ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਵੇਨਯਿਕੋ ਸਮਣੋ ਗੋਤਮੋ, ਵਿਨਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ.

‘‘ਕਤਮੋ ਚ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਤਪਸ੍ਸੀ ਸਮਣੋ ਗੋਤਮੋ, ਤਪਸ੍ਸਿਤਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ? ਤਪਨੀਯਾਹਂ, ਸੀਹ, ਪਾਪਕੇ ਅਕੁਸਲੇ ਧਮ੍ਮੇ ਵਦਾਮਿ – ਕਾਯਦੁਚ੍ਚਰਿਤਂ ਵਚੀਦੁਚ੍ਚਰਿਤਂ ਮਨੋਦੁਚ੍ਚਰਿਤਂ. ਯਸ੍ਸ ਖੋ, ਸੀਹ, ਤਪਨੀਯਾ ਪਾਪਕਾ ਅਕੁਸਲਾ ਧਮ੍ਮਾ ਪਹੀਨਾ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਙ੍ਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ, ਤਮਹਂ ਤਪਸ੍ਸੀਤਿ ਵਦਾਮਿ. ਤਥਾਗਤਸ੍ਸ ਖੋ, ਸੀਹ, ਤਪਨੀਯਾ ਪਾਪਕਾ ਅਕੁਸਲਾ ਧਮ੍ਮਾ ਪਹੀਨਾ ਉਚ੍ਛੀਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ. ਅਯਂ ਖੋ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ ‘‘ਤਪਸ੍ਸੀ ਸਮਣੋ ਗੋਤਮੋ ਤਪਸ੍ਸਿਤਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀ’’ਤਿ.

‘‘ਕਤਮੋ ਚ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਅਪਗਬ੍ਭੋ ਸਮਣੋ ਗੋਤਮੋ ਅਪਗਬ੍ਭਤਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ? ਯਸ੍ਸ ਖੋ, ਸੀਹ, ਆਯਤਿਂ ਗਬ੍ਭਸੇਯ੍ਯਾ ਪੁਨਬ੍ਭਵਾਭਿਨਿਬ੍ਬਤ੍ਤਿ ਪਹੀਨਾ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ, ਤਮਹਂ ਅਪਗਬ੍ਭੋਤਿ ਵਦਾਮਿ. ਤਥਾਗਤਸ੍ਸ ਖੋ, ਸੀਹ, ਆਯਤਿਂ ਗਬ੍ਭਸੇਯ੍ਯਾ ਪੁਨਬ੍ਭਵਾਭਿਨਿਬ੍ਬਤ੍ਤਿ ਪਹੀਨਾ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ. ਅਯਂ ਖੋ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਅਪਗਬ੍ਭੋ ਸਮਣੋ ਗੋਤਮੋ, ਅਪਗਬ੍ਭਤਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ.

‘‘ਕਤਮੋ ਚ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਅਸ੍ਸਤ੍ਥੋ ਸਮਣੋ ਗੋਤਮੋ ਅਸ੍ਸਾਸਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀਤਿ? ਅਹਞ੍ਹਿ, ਸੀਹ, ਅਸ੍ਸਤ੍ਥੋ ਪਰਮੇਨ ਅਸ੍ਸਾਸੇਨ, ਅਸ੍ਸਾਸਾਯ ਧਮ੍ਮਂ ਦੇਸੇਮਿ, ਤੇਨ ਚ ਸਾਵਕੇ ਵਿਨੇਮਿ. ਅਯਂ ਖੋ, ਸੀਹ, ਪਰਿਯਾਯੋ, ਯੇਨ ਮਂ ਪਰਿਯਾਯੇਨ ਸਮ੍ਮਾ ਵਦਮਾਨੋ ਵਦੇਯ੍ਯ – ਅਸ੍ਸਤ੍ਥੋ ਸਮਣੋ ਗੋਤਮੋ ਅਸ੍ਸਾਸਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀ’’ਤਿ.

੨੯੩. ਏਵਂ ਵੁਤ੍ਤੇ ਸੀਹੋ ਸੇਨਾਪਤਿ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭਨ੍ਤੇ…ਪੇ… ਉਪਾਸਕਂ ਮਂ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ. ‘‘ਅਨੁਵਿਚ੍ਚਕਾਰਂ [ਅਨੁਵਿਜ੍ਜਕਾਰਂ (ਕ.)] ਖੋ, ਸੀਹ, ਕਰੋਹਿ; ਅਨੁਵਿਚ੍ਚਕਾਰੋ ਤੁਮ੍ਹਾਦਿਸਾਨਂ ਞਾਤਮਨੁਸ੍ਸਾਨਂ ਸਾਧੁ ਹੋਤੀ’’ਤਿ. ‘‘ਇਮਿਨਾਪਾਹਂ, ਭਨ੍ਤੇ, ਭਗਵਤੋ ਭਿਯ੍ਯੋਸੋਮਤ੍ਤਾਯ ਅਤ੍ਤਮਨੋ ਅਭਿਰਦ੍ਧੋ, ਯਂ ਮਂ ਭਗਵਾ ਏਵਮਾਹ – ‘ਅਨੁਵਿਚ੍ਚਕਾਰਂ ਖੋ, ਸੀਹ, ਕਰੋਹਿ; ਅਨੁਵਿਚ੍ਚਕਾਰੋ ਤੁਮ੍ਹਾਦਿਸਾਨਂ ਞਾਤਮਨੁਸ੍ਸਾਨਂ ਸਾਧੁ ਹੋਤੀ’ਤਿ. ਮਮਞ੍ਹਿ, ਭਨ੍ਤੇ, ਅਞ੍ਞਤਿਤ੍ਥਿਯਾ ਸਾਵਕਂ ਲਭਿਤ੍ਵਾ ਕੇਵਲਕਪ੍ਪਂ ਵੇਸਾਲਿਂ ਪਟਾਕਂ ਪਰਿਹਰੇਯ੍ਯੁਂ – ‘ਸੀਹੋ ਖੋ ਅਮ੍ਹਾਕਂ ਸੇਨਾਪਤਿ ਸਾਵਕਤ੍ਤਂ ਉਪਗਤੋ’ਤਿ. ਅਥ ਚ ਪਨ ਮਂ ਭਗਵਾ ਏਵਮਾਹ – ‘ਅਨੁਵਿਚ੍ਚਕਾਰਂ ਖੋ, ਸੀਹ, ਕਰੋਹਿ; ਅਨੁਵਿਚ੍ਚਕਾਰੋ ਤੁਮ੍ਹਾਦਿਸਾਨਂ ਞਾਤਮਨੁਸ੍ਸਾਨਂ ਸਾਧੁ ਹੋਤੀ’ਤਿ. ਏਸਾਹਂ, ਭਨ੍ਤੇ, ਦੁਤਿਯਮ੍ਪਿ ਭਗਵਨ੍ਤਂ ਸਰਣਂ ਗਚ੍ਛਾਮਿ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ. ਉਪਾਸਕਂ ਮਂ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ. ‘‘ਦੀਘਰਤ੍ਤਂ ਖੋ ਤੇ, ਸੀਹ, ਨਿਗਣ੍ਠਾਨਂ ਓਪਾਨਭੂਤਂ ਕੁਲਂ, ਯੇਨ ਨੇਸਂ ਉਪਗਤਾਨਂ ਪਿਣ੍ਡਕਂ ਦਾਤਬ੍ਬਂ ਮਞ੍ਞੇਯ੍ਯਾਸੀ’’ਤਿ. ‘‘ਇਮਿਨਾਪਾਹਂ, ਭਨ੍ਤੇ, ਭਗਵਤੋ ਭਿਯ੍ਯੋਸੋਮਤ੍ਤਾਯ ਅਤ੍ਤਮਨੋ ਅਭਿਰਦ੍ਧੋ, ਯਂ ਮਂ ਭਗਵਾ ਏਵਮਾਹ – ‘ਦੀਘਰਤ੍ਤਂ ਖੋ ਤੇ, ਸੀਹ, ਨਿਗਣ੍ਠਾਨਂ ਓਪਾਨਭੂਤਂ ਕੁਲਂ, ਯੇਨ ਨੇਸਂ ਉਪਗਤਾਨਂ ਪਿਣ੍ਡਕਂ ਦਾਤਬ੍ਬਂ ਮਞ੍ਞੇਯ੍ਯਾਸੀ’ਤਿ. ਸੁਤਂ ਮੇ ਤਂ, ਭਨ੍ਤੇ, ਸਮਣੋ ਗੋਤਮੋ ਏਵਮਾਹ – ‘ਮਯ੍ਹਮੇਵ ਦਾਨਂ ਦਾਤਬ੍ਬਂ, ਨ ਅਞ੍ਞੇਸਂ ਦਾਨਂ ਦਾਤਬ੍ਬਂ; ਮਯ੍ਹਮੇਵ ਸਾਵਕਾਨਂ ਦਾਨਂ ਦਾਤਬ੍ਬਂ, ਨ ਅਞ੍ਞੇਸਂ ਸਾਵਕਾਨਂ ਦਾਨਂ ਦਾਤਬ੍ਬਂ; ਮਯ੍ਹਮੇਵ ਦਿਨ੍ਨਂ ਮਹਪ੍ਫਲਂ, ਨ ਅਞ੍ਞੇਸਂ ਦਿਨ੍ਨਂ ਮਹਪ੍ਫਲਂ; ਮਯ੍ਹਮੇਵ ਸਾਵਕਾਨਂ ਦਿਨ੍ਨਂ ਮਹਪ੍ਫਲਂ, ਨ ਅਞ੍ਞੇਸਂ ਸਾਵਕਾਨਂ ਦਿਨ੍ਨਂ ਮਹਪ੍ਫਲ’ਨ੍ਤਿ. ਅਥ ਚ ਪਨ ਮਂ ਭਗਵਾ ਨਿਗਣ੍ਠੇਸੁਪਿ ਦਾਨੇ ਸਮਾਦਪੇਤਿ. ਅਪਿ ਚ, ਭਨ੍ਤੇ, ਮਯਮੇਤ੍ਥ ਕਾਲਂ ਜਾਨਿਸ੍ਸਾਮ. ਏਸਾਹਂ, ਭਨ੍ਤੇ, ਤਤਿਯਮ੍ਪਿ ਭਗਵਨ੍ਤਂ ਸਰਣਂ ਗਚ੍ਛਾਮਿ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ. ਉਪਾਸਕਂ ਮਂ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ.

ਅਥ ਖੋ ਭਗਵਾ ਸੀਹਸ੍ਸ ਸੇਨਾਪਤਿਸ੍ਸ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ…ਪੇ… ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਸੀਹੋ ਸੇਨਾਪਤਿ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

੨੯੪. ਅਥ ਖੋ ਸੀਹੋ ਸੇਨਾਪਤਿ ਅਞ੍ਞਤਰਂ ਪੁਰਿਸਂ ਆਣਾਪੇਸਿ – ‘‘ਗਚ੍ਛ, ਭਣੇ, ਪਵਤ੍ਤਮਂਸਂ ਜਾਨਾਹੀ’’ਤਿ. ਅਥ ਖੋ ਸੀਹੋ ਸੇਨਾਪਤਿ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਸੀਹਸ੍ਸ ਸੇਨਾਪਤਿਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ.

ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਨਿਗਣ੍ਠਾ ਵੇਸਾਲਿਯਂ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਬਾਹਾ ਪਗ੍ਗਯ੍ਹ ਕਨ੍ਦਨ੍ਤਿ – ‘‘ਅਜ੍ਜ ਸੀਹੇਨ ਸੇਨਾਪਤਿਨਾ ਥੂਲਂ ਪਸੁਂ ਵਧਿਤ੍ਵਾ ਸਮਣਸ੍ਸ ਗੋਤਮਸ੍ਸ ਭਤ੍ਤਂ ਕਤਂ, ਤਂ ਸਮਣੋ ਗੋਤਮੋ ਜਾਨਂ ਉਦ੍ਦਿਸ੍ਸਕਤਂ ਮਂਸਂ ਪਰਿਭੁਞ੍ਜਤਿ ਪਟਿਚ੍ਚਕਮ੍ਮ’’ਨ੍ਤਿ. ਅਥ ਖੋ ਅਞ੍ਞਤਰੋ ਪੁਰਿਸੋ ਯੇਨ ਸੀਹੋ ਸੇਨਾਪਤਿ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸੀਹਸ੍ਸ ਸੇਨਾਪਤਿਸ੍ਸ ਉਪਕਣ੍ਣਕੇ ਆਰੋਚੇਸਿ ‘‘ਯਗ੍ਘੇ, ਭਨ੍ਤੇ, ਜਾਨੇਯ੍ਯਾਸਿ, ਏਤੇ ਸਮ੍ਬਹੁਲਾ ਨਿਗਣ੍ਠਾ ਵੇਸਾਲਿਯਂ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਬਾਹਾ ਪਗ੍ਗਯ੍ਹ ਕਨ੍ਦਨ੍ਤਿ – ‘ਅਜ੍ਜ ਸੀਹੇਨ ਸੇਨਾਪਤਿਨਾ ਥੂਲਂ ਪਸੁਂ ਵਧਿਤ੍ਵਾ ਸਮਣਸ੍ਸ ਗੋਤਮਸ੍ਸ ਭਤ੍ਤਂ ਕਤਂ, ਤਂ ਸਮਣੋ ਗੋਤਮੋ ਜਾਨਂ ਉਦ੍ਦਿਸ੍ਸਕਤਂ ਮਂਸਂ ਪਰਿਭੁਞ੍ਜਤਿ ਪਟਿਚ੍ਚਕਮ੍ਮ’’’ਨ੍ਤਿ. ‘‘ਅਲਂ ਅਯ੍ਯੋ, ਦੀਘਰਤ੍ਤਮ੍ਪਿ ਤੇ ਆਯਸ੍ਮਨ੍ਤਾ ਅਵਣ੍ਣਕਾਮਾ ਬੁਦ੍ਧਸ੍ਸ, ਅਵਣ੍ਣਕਾਮਾ ਧਮ੍ਮਸ੍ਸ, ਅਵਣ੍ਣਕਾਮਾ ਸਙ੍ਘਸ੍ਸ; ਨ ਚ ਪਨ ਤੇ ਆਯਸ੍ਮਨ੍ਤਾ ਜਿਰਿਦਨ੍ਤਿ ਤਂ ਭਗਵਨ੍ਤਂ ਅਸਤਾ ਤੁਚ੍ਛਾ ਮੁਸਾ ਅਭੂਤੇਨ ਅਬ੍ਭਾਚਿਕ੍ਖਨ੍ਤਾ; ਨ ਚ ਮਯਂ ਜੀਵਿਤਹੇਤੁਪਿ ਸਞ੍ਚਿਚ੍ਚ ਪਾਣਂ ਜੀਵਿਤਾ ਵੋਰੋਪੇਯ੍ਯਾਮਾ’’ਤਿ. ਅਥ ਖੋ ਸੀਹੋ ਸੇਨਾਪਤਿ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਸੀਹਂ ਸੇਨਾਪਤਿਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਜਾ ਨਂ ਉਦ੍ਦਿਸ੍ਸਕਤਂ ਮਂਸਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਿਕੋਟਿਪਰਿਸੁਦ੍ਧਂ ਮਚ੍ਛਮਂਸਂ – ਅਦਿਟ੍ਠਂ ਅਸ੍ਸੁਤਂ ਅਪਰਿਸਙ੍ਕਿਤ’’ਨ੍ਤਿ.

ਸੀਹਸੇਨਾਪਤਿਵਤ੍ਥੁ ਨਿਟ੍ਠਿਤਂ.

੧੭੯. ਕਪ੍ਪਿਯਭੂਮਿਅਨੁਜਾਨਨਾ

੨੯੫. ਤੇਨ ਖੋ ਪਨ ਸਮਯੇਨ ਵੇਸਾਲੀ ਸੁਭਿਕ੍ਖਾ ਹੋਤਿ ਸੁਸਸ੍ਸਾ ਸੁਲਭਪਿਣ੍ਡਾ, ਸੁਕਰਾ ਉਞ੍ਛੇਨ ਪਗ੍ਗਹੇਨ ਯਾਪੇਤੁਂ. ਅਥ ਖੋ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਯਾਨਿ ਤਾਨਿ ਮਯਾ ਭਿਕ੍ਖੂਨਂ ਅਨੁਞ੍ਞਾਤਾਨਿ ਦੁਬ੍ਭਿਕ੍ਖੇ ਦੁਸ੍ਸਸ੍ਸੇ ਦੁਲ੍ਲਭਪਿਣ੍ਡੇ ਅਨ੍ਤੋ ਵੁਟ੍ਠਂ ਅਨ੍ਤੋ ਪਕ੍ਕਂ ਸਾਮਂ ਪਕ੍ਕਂ ਉਗ੍ਗਹਿਤਪਟਿਗ੍ਗਹਿਤਕਂ ਤਤੋ ਨੀਹਟਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਵਨਟ੍ਠਂ ਪੋਕ੍ਖਰਟ੍ਠਂ, ਅਜ੍ਜਾਪਿ ਨੁ ਖੋ ਤਾਨਿ ਭਿਕ੍ਖੂ ਪਰਿਭੁਞ੍ਜਨ੍ਤੀ’’ਤਿ. ਅਥ ਖੋ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਯਾਨਿ ਤਾਨਿ, ਆਨਨ੍ਦ, ਮਯਾ ਭਿਕ੍ਖੂਨਂ ਅਨੁਞ੍ਞਾਤਾਨਿ ਦੁਬ੍ਭਿਕ੍ਖੇ ਦੁਸ੍ਸਸ੍ਸੇ ਦੁਲ੍ਲਭਪਿਣ੍ਡੇ ਅਨ੍ਤੋ ਵੁਟ੍ਠਂ ਅਨ੍ਤੋ ਪਕ੍ਕਂ ਸਾਮਂ ਪਕ੍ਕਂ ਉਗ੍ਗਹਿਤਪਟਿਗ੍ਗਹਿਤਕਂ ਤਤੋ ਨੀਹਟਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਵਨਟ੍ਠਂ ਪੋਕ੍ਖਰਟ੍ਠਂ, ਅਜ੍ਜਾਪਿ ਨੁ ਖੋ ਤਾਨਿ ਭਿਕ੍ਖੂ ਪਰਿਭੁਞ੍ਜਨ੍ਤੀ’’ਤਿ? ‘‘ਪਰਿਭੁਞ੍ਜਨ੍ਤਿ ਭਗਵਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਯਾਨਿ ਤਾਨਿ, ਭਿਕ੍ਖਵੇ, ਮਯਾ ਭਿਕ੍ਖੂਨਂ ਅਨੁਞ੍ਞਾਤਾਨਿ ਦੁਬ੍ਭਿਕ੍ਖੇ ਦੁਸ੍ਸਸ੍ਸੇ ਦੁਲ੍ਲਭਪਿਣ੍ਡੇ ਅਨ੍ਤੋ ਵੁਟ੍ਠਂ ਅਨ੍ਤੋ ਪਕ੍ਕਂ ਸਾਮਂ ਪਕ੍ਕਂ ਉਗ੍ਗਹਿਤਪਟਿਗ੍ਗਹਿਤਕਂ ਤਤੋ ਨੀਹਟਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਵਨਟ੍ਠਂ ਪੋਕ੍ਖਰਟ੍ਠਂ, ਤਾਨਾਹਂ ਅਜ੍ਜਤਗ੍ਗੇ ਪਟਿਕ੍ਖਿਪਾਮਿ. ਨ, ਭਿਕ੍ਖਵੇ, ਅਨ੍ਤੋ ਵੁਟ੍ਠਂ ਅਨ੍ਤੋ ਪਕ੍ਕਂ ਸਾਮਂ ਪਕ੍ਕਂ ਉਗ੍ਗਹਿਤਪਟਿਗ੍ਗਹਿਤਕਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਤਤੋ ਨੀਹਟਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਵਨਟ੍ਠਂ ਪੋਕ੍ਖਰਟ੍ਠਂ ਭੁਤ੍ਤਾਵਿਨਾ ਪਵਾਰਿਤੇਨ ਅਨਤਿਰਿਤ੍ਤਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਜਾਨਪਦਾ ਮਨੁਸ੍ਸਾ ਬਹੁਂ ਲੋਣਮ੍ਪਿ, ਤੇਲਮ੍ਪਿ, ਤਣ੍ਡੁਲਮ੍ਪਿ, ਖਾਦਨੀਯਮ੍ਪਿ ਸਕਟੇਸੁ ਆਰੋਪੇਤ੍ਵਾ ਬਹਾਰਾਮਕੋਟ੍ਠਕੇ ਸਕਟਪਰਿਵਟ੍ਟਂ ਕਰਿਤ੍ਵਾ ਅਚ੍ਛਨ੍ਤਿ – ਯਦਾ ਪਟਿਪਾਟਿਂ ਲਭਿਸ੍ਸਾਮ, ਤਦਾ ਭਤ੍ਤਂ ਕਰਿਸ੍ਸਾਮਾਤਿ. ਮਹਾ ਚ ਮੇਘੋ ਉਗ੍ਗਤੋ ਹੋਤਿ. ਅਥ ਖੋ ਤੇ ਮਨੁਸ੍ਸਾ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚੁਂ – ‘‘ਇਧ, ਭਨ੍ਤੇ ਆਨਨ੍ਦ, ਬਹੁਂ ਲੋਣਮ੍ਪਿ, ਤੇਲਮ੍ਪਿ, ਤਣ੍ਡੁਲਮ੍ਪਿ, ਖਾਦਨੀਯਮ੍ਪਿ ਸਕਟੇਸੁ ਆਰੋਪਿਤਾ ਤਿਟ੍ਠਨ੍ਤਿ, ਮਹਾ ਚ ਮੇਘੋ ਉਗ੍ਗਤੋ; ਕਥਂ ਨੁ ਖੋ, ਭਨ੍ਤੇ ਆਨਨ੍ਦ, ਪਟਿਪਜ੍ਜਿਤਬ੍ਬ’’ਨ੍ਤਿ? ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਤੇਨ ਹਾਨਨ੍ਦ, ਸਙ੍ਘੋ ਪਚ੍ਚਨ੍ਤਿਮਂ ਵਿਹਾਰਂ ਕਪ੍ਪਿਯਭੂਮਿਂ ਸਮ੍ਮਨ੍ਨਿਤ੍ਵਾ ਤਤ੍ਥ ਵਾਸੇਤੁ, ਯਂ ਸਙ੍ਘੋ ਆਕਙ੍ਖਤਿ ਵਿਹਾਰਂ ਵਾ ਅਡ੍ਢਯੋਗਂ ਵਾ ਪਾਸਾਦਂ ਵਾ ਹਮ੍ਮਿਯਂ ਵਾ ਗੁਹਂ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਕਪ੍ਪਿਯਭੂਮਿਂ ਸਮ੍ਮਨ੍ਨੇਯ੍ਯ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਕਪ੍ਪਿਯਭੂਮਿਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਵਿਹਾਰਸ੍ਸ ਕਪ੍ਪਿਯਭੂਮਿਯਾ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਵਿਹਾਰੋ ਕਪ੍ਪਿਯਭੂਮਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਤਤ੍ਥੇਵ ਸਮ੍ਮੁਤਿਯਾ [ਸਮ੍ਮਤਿਕਾਯ (ਸ੍ਯਾ.)] ਕਪ੍ਪਿਯਭੂਮਿਯਾ ਯਾਗੁਯੋ ਪਚਨ੍ਤਿ, ਭਤ੍ਤਾਨਿ ਪਚਨ੍ਤਿ, ਸੂਪਾਨਿ ਸਮ੍ਪਾਦੇਨ੍ਤਿ, ਮਂਸਾਨਿ ਕੋਟ੍ਟੇਨ੍ਤਿ, ਕਟ੍ਠਾਨਿ ਫਾਲੇਨ੍ਤਿ. ਅਸ੍ਸੋਸਿ ਖੋ ਭਗਵਾ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਉਚ੍ਚਾਸਦ੍ਦਂ ਮਹਾਸਦ੍ਦਂ ਕਾਕੋਰਵਸਦ੍ਦਂ, ਸੁਤ੍ਵਾਨ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕਿਂ ਨੁ ਖੋ ਸੋ, ਆਨਨ੍ਦ, ਉਚ੍ਚਾਸਦ੍ਦੋ ਮਹਾਸਦ੍ਦੋ ਕਾਕੋਰਵਸਦ੍ਦੋ’’ਤਿ? ‘‘ਏਤਰਹਿ, ਭਨ੍ਤੇ, ਮਨੁਸ੍ਸਾ ਤਤ੍ਥੇਵ ਸਮ੍ਮੁਤਿਯਾ ਕਪ੍ਪਿਯਭੂਮਿਯਾ ਯਾਗੁਯੋ ਪਚਨ੍ਤਿ, ਭਤ੍ਤਾਨਿ ਪਚਨ੍ਤਿ, ਸੂਪਾਨਿ ਸਮ੍ਪਾਦੇਨ੍ਤਿ, ਮਂਸਾਨਿ ਕੋਟ੍ਟੇਨ੍ਤਿ, ਕਟ੍ਠਾਨਿ ਫਾਲੇਨ੍ਤਿ. ਸੋ ਏਸੋ, ਭਗਵਾ, ਉਚ੍ਚਾਸਦ੍ਦੋ ਮਹਾਸਦ੍ਦੋ ਕਾਕੋਰਵਸਦ੍ਦੋ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਸਮ੍ਮੁਤਿ [ਸਮ੍ਮਤਿਕਾ (ਸ੍ਯਾ.)] ਕਪ੍ਪਿਯਭੂਮਿ ਪਰਿਭੁਞ੍ਜਿਤਬ੍ਬਾ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਕਪ੍ਪਿਯਭੂਮਿਯੋ – ਉਸ੍ਸਾਵਨਨ੍ਤਿਕਂ ਗੋਨਿਸਾਦਿਕਂ ਗਹਪਤਿ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਯਸੋਜੋ ਗਿਲਾਨੋ ਹੋਤਿ. ਤਸ੍ਸਤ੍ਥਾਯ ਭੇਸਜ੍ਜਾਨਿ ਆਹਰਿਯਨ੍ਤਿ. ਤਾਨਿ ਭਿਕ੍ਖੂ ਬਹਿ ਵਾਸੇਨ੍ਤਿ. ਉਕ੍ਕਪਿਣ੍ਡਿਕਾਪਿ ਖਾਦਨ੍ਤਿ, ਚੋਰਾਪਿ ਹਰਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਮੁਤਿਂ ਕਪ੍ਪਿਯਭੂਮਿਂ ਪਰਿਭੁਞ੍ਜਿਤੁਂ. ਅਨੁਜਾਨਾਮਿ, ਭਿਕ੍ਖਵੇ, ਚਤਸ੍ਸੋ ਕਪ੍ਪਿਯਭੂਮਿਯੋ – ਉਸ੍ਸਾਵਨਨ੍ਤਿਕਂ ਗੋਨਿਸਾਦਿਕਂ ਗਹਪਤਿਂ ਸਮ੍ਮੁਤਿਨ੍ਤਿ.

ਕਪ੍ਪਿਯਭੂਮਿਅਨੁਜਾਨਨਾ ਨਿਟ੍ਠਿਤਾ.

ਸੀਹਭਾਣਵਾਰੋ ਨਿਟ੍ਠਿਤੋ ਚਤੁਤ੍ਥੋ.

੧੮੦. ਮੇਣ੍ਡਕਗਹਪਤਿਵਤ੍ਥੁ

੨੯੬. ਤੇਨ ਖੋ ਪਨ ਸਮਯੇਨ ਭਦ੍ਦਿਯਨਗਰੇ ਮੇਣ੍ਡਕੋ ਗਹਪਤਿ ਪਟਿਵਸਤਿ. ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ ਹੋਤਿ – ਸੀਸਂ ਨਹਾਯਿਤ੍ਵਾ ਧਞ੍ਞਾਗਾਰਂ ਸਮ੍ਮਜ੍ਜਾਪੇਤ੍ਵਾ ਬਹਿਦ੍ਵਾਰੇ ਨਿਸੀਦਤਿ, ਅਨ੍ਤਲਿਕ੍ਖਾ ਧਞ੍ਞਸ੍ਸ ਧਾਰਾ ਓਪਤਿਤ੍ਵਾ ਧਞ੍ਞਾਗਾਰਂ ਪੂਰੇਤਿ. ਭਰਿਯਾਯ ਏਵਰੂਪੋ ਇਦ੍ਧਾਨੁਭਾਵੋ ਹੋਤਿ – ਏਕਂਯੇਵ ਆਲ਼੍ਹਕਥਾਲਿਕਂ ਉਪਨਿਸੀਦਿਤ੍ਵਾ ਏਕਞ੍ਚ ਸੂਪਭਿਞ੍ਜਨਕਂ [ਸੂਪਭਿਞ੍ਜਰਕਂ (ਸੀ.)] ਦਾਸਕਮ੍ਮਕਰਪੋਰਿਸਂ ਭਤ੍ਤੇਨ ਪਰਿਵਿਸਤਿ, ਨ ਤਾਵ ਤਂ ਖਿਯ੍ਯਤਿ [ਖੀਯਤਿ (ਸੀ. ਸ੍ਯਾ.)] ਯਾਵ ਸਾ ਨ ਵੁਟ੍ਠਾਤਿ. ਪੁਤ੍ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ ਹੋਤਿ – ਏਕਂਯੇਵ ਸਹਸ੍ਸਥਵਿਕਂ ਗਹੇਤ੍ਵਾ ਦਾਸਕਮ੍ਮਕਰਪੋਰਿਸਸ੍ਸ ਛਮਾਸਿਕਂ ਵੇਤਨਂ ਦੇਤਿ, ਨ ਤਾਵ ਤਂ ਖਿਯ੍ਯਤਿ ਯਾਵਸ੍ਸ ਹਤ੍ਥਗਤਾ. ਸੁਣਿਸਾਯ ਏਵਰੂਪੋ ਇਦ੍ਧਾਨੁਭਾਵੋ ਹੋਤਿ – ਏਕਂਯੇਵ ਚਤੁਦੋਣਿਕਂ ਪਿਟਕਂ ਉਪਨਿਸੀਦਿਤ੍ਵਾ ਦਾਸਕਮ੍ਮਕਰਪੋਰਿਸਸ੍ਸ ਛਮਾਸਿਕਂ ਭਤ੍ਤਂ ਦੇਤਿ, ਨ ਤਾਵ ਤਂ ਖਿਯ੍ਯਤਿ ਯਾਵ ਸਾ ਨ ਵੁਟ੍ਠਾਤਿ. ਦਾਸਸ੍ਸ ਏਵਰੂਪੋ ਇਦ੍ਧਾਨੁਭਾਵੋ ਹੋਤਿ – ਏਕੇਨ ਨਙ੍ਗਲੇਨ ਕਸਨ੍ਤਸ੍ਸ ਸਤ੍ਤ ਸੀਤਾਯੋ ਗਚ੍ਛਨ੍ਤਿ.

ਅਸ੍ਸੋਸਿ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ – ‘‘ਅਮ੍ਹਾਕਂ ਕਿਰ ਵਿਜਿਤੇ ਭਦ੍ਦਿਯਨਗਰੇ ਮੇਣ੍ਡਕੋ ਗਹਪਤਿ ਪਟਿਵਸਤਿ. ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ – ਸੀਸਂ ਨਹਾਯਿਤ੍ਵਾ ਧਞ੍ਞਾਗਾਰਂ ਸਮ੍ਮਜ੍ਜਾਪੇਤ੍ਵਾ ਬਹਿਦ੍ਵਾਰੇ ਨਿਸੀਦਤਿ, ਅਨ੍ਤਲਿਕ੍ਖਾ ਧਞ੍ਞਸ੍ਸ ਧਾਰਾ ਓਪਤਿਤ੍ਵਾ ਧਞ੍ਞਾਗਾਰਂ ਪੂਰੇਤਿ. ਭਰਿਯਾਯ ਏਵਰੂਪੋ ਇਦ੍ਧਾਨੁਭਾਵੋ – ਏਕਂਯੇਵ ਆਲ਼੍ਹਕਥਾਲਿਕਂ ਉਪਨਿਸੀਦਿਤ੍ਵਾ ਏਕਞ੍ਚ ਸੂਪਭਿਞ੍ਜਨਕਂ ਦਾਸਕਮ੍ਮਕਰਪੋਰਿਸਂ ਭਤ੍ਤੇਨ ਪਰਿਵਿਸਤਿ, ਨ ਤਾਵ ਤਂ ਖਿਯ੍ਯਤਿ ਯਾਵ ਸਾ ਨ ਵੁਟ੍ਠਾਤਿ. ਪੁਤ੍ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ – ਏਕਂਯੇਵ ਸਹਸ੍ਸਥਵਿਕਂ ਗਹੇਤ੍ਵਾ ਦਾਸਕਮ੍ਮਕਰਪੋਰਿਸਸ੍ਸ ਛਮਾਸਿਕਂ ਵੇਤਨਂ ਦੇਤਿ, ਨ ਤਾਵ ਤਂ ਖਿਯ੍ਯਤਿ ਯਾਵਸ੍ਸ ਹਤ੍ਥਗਤਾ. ਸੁਣਿਸਾਯ ਏਵਰੂਪੋ ਇਦ੍ਧਾਨੁਭਾਵੋ – ਏਕਂਯੇਵ ਚਤੁਦੋਣਿਕਂ ਪਿਟਕਂ ਉਪਨਿਸੀਦਿਤ੍ਵਾ ਦਾਸਕਮ੍ਮਕਰਪੋਰਿਸਸ੍ਸ ਛਮਾਸਿਕਂ ਭਤ੍ਤਂ ਦੇਤਿ, ਨ ਤਾਵ ਤਂ ਖਿਯ੍ਯਤਿ ਯਾਵ ਸਾ ਨ ਵੁਟ੍ਠਾਤਿ. ਦਾਸਸ੍ਸ ਏਵਰੂਪੋ ਇਦ੍ਧਾਨੁਭਾਵੋ – ਏਕੇਨ ਨਙ੍ਗਲੇਨ ਕਸਨ੍ਤਸ੍ਸ ਸਤ੍ਤ ਸੀਤਾਯੋ ਗਚ੍ਛਨ੍ਤੀ’’ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਅਞ੍ਞਤਰਂ ਸਬ੍ਬਤ੍ਥਕਂ ਮਹਾਮਤ੍ਤਂ ਆਮਨ੍ਤੇਸਿ – ‘‘ਅਮ੍ਹਾਕਂ ਕਿਰ, ਭਣੇ, ਵਿਜਿਤੇ ਭਦ੍ਦਿਯਨਗਰੇ ਮੇਣ੍ਡਕੋ ਗਹਪਤਿ ਪਟਿਵਸਤਿ. ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ – ਸੀਸਂ ਨਹਾਯਿਤ੍ਵਾ ਧਞ੍ਞਾਗਾਰਂ ਸਮ੍ਮਜ੍ਜਾਪੇਤ੍ਵਾ ਬਹਿਦ੍ਵਾਰੇ ਨਿਸੀਦਤਿ, ਅਨ੍ਤਲਿਕ੍ਖਾ ਧਞ੍ਞਸ੍ਸ ਧਾਰਾ ਓਪਤਿਤ੍ਵਾ ਧਞ੍ਞਾਗਾਰਂ ਪੂਰੇਤਿ. ਭਰਿਯਾਯ…ਪੇ… ਪੁਤ੍ਤਸ੍ਸ… ਸੁਣਿਸਾਯ… ਦਾਸਸ੍ਸ ਏਵਰੂਪੋ ਇਦ੍ਧਾਨੁਭਾਵੋ, ਏਕੇਨ ਨਙ੍ਗਲੇਨ ਕਸਨ੍ਤਸ੍ਸ ਸਤ੍ਤ ਸੀਤਾਯੋ ਗਚ੍ਛਨ੍ਤੀਤਿ. ਗਚ੍ਛ, ਭਣੇ, ਜਾਨਾਹਿ. ਯਥਾ ਮਯਾ ਸਾਮਂ ਦਿਟ੍ਠੋ, ਏਵਂ ਤਵ ਦਿਟ੍ਠੋ ਭਵਿਸ੍ਸਤੀ’’ਤਿ.

੨੯੭. ਏਵਂ, ਦੇਵਾਤਿ ਖੋ ਸੋ ਮਹਾਮਤ੍ਤੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਣਿਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਯੇਨ ਭਦ੍ਦਿਯਂ ਤੇਨ ਪਾਯਾਸਿ. ਅਨੁਪੁਬ੍ਬੇਨ ਯੇਨ ਭਦ੍ਦਿਯਂ ਯੇਨ ਮੇਣ੍ਡਕੋ ਗਹਪਤਿ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮੇਣ੍ਡਕਂ ਗਹਪਤਿਂ ਏਤਦਵੋਚ – ‘‘ਅਹਞ੍ਹਿ, ਗਹਪਤਿ, ਰਞ੍ਞਾ ਆਣਤ੍ਤੋ ‘ਅਮ੍ਹਾਕਂ ਕਿਰ, ਭਣੇ, ਵਿਜਿਤੇ ਭਦ੍ਦਿਯਨਗਰੇ ਮੇਣ੍ਡਕੋ ਗਹਪਤਿ ਪਟਿਵਸਤਿ, ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ, ਸੀਸਂ ਨਹਾਯਿਤ੍ਵਾ…ਪੇ… ਭਰਿਯਾਯ… ਪੁਤ੍ਤਸ੍ਸ… ਸੁਣਿਸਾਯ… ਦਾਸਸ੍ਸ ਏਵਰੂਪੋ ਇਦ੍ਧਾਨੁਭਾਵੋ, ਏਕੇਨ ਨਙ੍ਗਲੇਨ ਕਸਨ੍ਤਸ੍ਸ ਸਤ੍ਤ ਸੀਤਾਯੋ ਗਚ੍ਛਨ੍ਤੀ’ਤਿ, ਗਚ੍ਛ, ਭਣੇ, ਜਾਨਾਹਿ. ਯਥਾ ਮਯਾ ਸਾਮਂ ਦਿਟ੍ਠੋ, ਏਵਂ ਤਵ ਦਿਟ੍ਠੋ ਭਵਿਸ੍ਸਤੀ’ਤਿ. ਪਸ੍ਸਾਮ ਤੇ, ਗਹਪਤਿ, ਇਦ੍ਧਾਨੁਭਾਵ’’ਨ੍ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਸੀਸਂ ਨਹਾਯਿਤ੍ਵਾ ਧਞ੍ਞਾਗਾਰਂ ਸਮ੍ਮਜ੍ਜਾਪੇਤ੍ਵਾ ਬਹਿਦ੍ਵਾਰੇ ਨਿਸੀਦਿ, ਅਨ੍ਤਲਿਕ੍ਖਾ ਧਞ੍ਞਸ੍ਸ ਧਾਰਾ ਓਪਤਿਤ੍ਵਾ ਧਞ੍ਞਾਗਾਰਂ ਪੂਰੇਸਿ. ‘‘ਦਿਟ੍ਠੋ ਤੇ, ਗਹਪਤਿ, ਇਦ੍ਧਾਨੁਭਾਵੋ. ਭਰਿਯਾਯ ਤੇ ਇਦ੍ਧਾਨੁਭਾਵਂ ਪਸ੍ਸਿਸ੍ਸਾਮਾ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਭਰਿਯਂ ਆਣਾਪੇਸਿ – ‘‘ਤੇਨ ਹਿ ਚਤੁਰਙ੍ਗਿਨਿਂ ਸੇਨਂ ਭਤ੍ਤੇਨ ਪਰਿਵਿਸਾ’’ਤਿ. ਅਥ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਭਰਿਯਾ ਏਕਂਯੇਵ ਆਲ਼੍ਹਕਥਾਲਿਕਂ ਉਪਨਿਸੀਦਿਤ੍ਵਾ ਏਕਞ੍ਚ ਸੂਪਭਿਞ੍ਜਨਕਂ ਚਤੁਰਙ੍ਗਿਨਿਂ ਸੇਨਂ ਭਤ੍ਤੇਨ ਪਰਿਵਿਸਿ, ਨ ਤਾਵ ਤਂ ਖਿਯ੍ਯਤਿ, ਯਾਵ ਸਾ ਨ ਵੁਟ੍ਠਾਤਿ. ‘‘ਦਿਟ੍ਠੋ ਤੇ, ਗਹਪਤਿ, ਭਰਿਯਾਯਪਿ ਇਦ੍ਧਾਨੁਭਾਵੋ. ਪੁਤ੍ਤਸ੍ਸ ਤੇ ਇਦ੍ਧਾਨੁਭਾਵਂ ਪਸ੍ਸਿਸ੍ਸਾਮਾ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਪੁਤ੍ਤਂ ਆਣਾਪੇਸਿ – ‘‘ਤੇਨ ਹਿ ਚਤੁਰਙ੍ਗਿਨਿਯਾ ਸੇਨਾਯ ਛਮਾਸਿਕਂ ਵੇਤਨਂ ਦੇਹੀ’’ਤਿ. ਅਥ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਪੁਤ੍ਤੋ ਏਕਂਯੇਵ ਸਹਸ੍ਸਥਵਿਕਂ ਗਹੇਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਛਮਾਸਿਕਂ ਵੇਤਨਂ ਅਦਾਸਿ, ਨ ਤਾਵ ਤਂ ਖਿਯ੍ਯਤਿ, ਯਾਵਸ੍ਸ ਹਤ੍ਥਗਤਾ. ‘‘ਦਿਟ੍ਠੋ ਤੇ, ਗਹਪਤਿ, ਪੁਤ੍ਤਸ੍ਸਪਿ ਇਦ੍ਧਾਨੁਭਾਵੋ. ਸੁਣਿਸਾਯ ਤੇ ਇਦ੍ਧਾਨੁਭਾਵਂ ਪਸ੍ਸਿਸ੍ਸਾਮਾ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਸੁਣਿਸਂ ਆਣਾਪੇਸਿ – ‘‘ਤੇਨ ਹਿ ਚਤੁਰਙ੍ਗਿਨਿਯਾ ਸੇਨਾਯ ਛਮਾਸਿਕਂ ਭਤ੍ਤਂ ਦੇਹੀ’’ਤਿ. ਅਥ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਸੁਣਿਸਾ ਏਕਂਯੇਵ ਚਤੁਦੋਣਿਕਂ ਪਿਟਕਂ ਉਪਨਿਸੀਦਿਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਛਮਾਸਿਕਂ ਭਤ੍ਤਂ ਅਦਾਸਿ, ਨ ਤਾਵ ਤਂ ਖਿਯ੍ਯਤਿ ਯਾਵ ਸਾ ਨ ਵੁਟ੍ਠਾਤਿ. ‘‘ਦਿਟ੍ਠੋ ਤੇ, ਗਹਪਤਿ, ਸੁਣਿਸਾਯਪਿ ਇਦ੍ਧਾਨੁਭਾਵੋ. ਦਾਸਸ੍ਸ ਤੇ ਇਦ੍ਧਾਨੁਭਾਵਂ ਪਸ੍ਸਿਸ੍ਸਾਮਾ’’ਤਿ. ‘‘ਮਯ੍ਹਂ ਖੋ, ਸਾਮਿ, ਦਾਸਸ੍ਸ ਇਦ੍ਧਾਨੁਭਾਵੋ ਖੇਤ੍ਤੇ ਪਸ੍ਸਿਤਬ੍ਬੋ’’ਤਿ. ‘‘ਅਲਂ, ਗਹਪਤਿ, ਦਿਟ੍ਠੋ ਤੇ ਦਾਸਸ੍ਸਪਿ ਇਦ੍ਧਾਨੁਭਾਵੋ’’ਤਿ. ਅਥ ਖੋ ਸੋ ਮਹਾਮਤ੍ਤੋ ਚਤੁਰਙ੍ਗਿਨਿਯਾ ਸੇਨਾਯ ਪੁਨਦੇਵ ਰਾਜਗਹਂ ਪਚ੍ਚਾਗਞ੍ਛਿ. ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਏਤਮਤ੍ਥਂ ਆਰੋਚੇਸਿ.

੨੯੮. ਅਥ ਖੋ ਭਗਵਾ ਵੇਸਾਲਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਭਦ੍ਦਿਯਂ ਤੇਨ ਚਾਰਿਕਂ ਪਕ੍ਕਾਮਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹਿ. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਭਦ੍ਦਿਯਂ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਭਦ੍ਦਿਯੇ ਵਿਹਰਤਿ ਜਾਤਿਯਾ ਵਨੇ. ਅਸ੍ਸੋਸਿ ਖੋ ਮੇਣ੍ਡਕੋ ਗਹਪਤਿ – ‘‘ਸਮਣੋ ਖਲੁ ਭੋ ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਭਦ੍ਦਿਯਂ ਅਨੁਪ੍ਪਤ੍ਤੋ ਭਦ੍ਦਿਯੇ ਵਿਹਰਤਿ ਜਾਤਿਯਾ ਵਨੇ. ਤਂ ਖੋ ਪਨ ਭਗਵਨ੍ਤਂ ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’ [ਭਗਵਾਤਿ (ਕ.)]. ਸੋ ਇਮਂ ਲੋਕਂ ਸਦੇਵਕਂ ਸਮਾਰਕਂ ਸਬ੍ਰਹ੍ਮਕਂ ਸਸ੍ਸਮਣਬ੍ਰਾਹ੍ਮਣਿਂ ਪਜਂ ਸਦੇਵਮਨੁਸ੍ਸਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਤਿ. ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਤਿ. ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ ਯੋਜਾਪੇਤ੍ਵਾ ਭਦ੍ਰਂ ਭਦ੍ਰਂ ਯਾਨਂ ਅਭਿਰੁਹਿਤ੍ਵਾ ਭਦ੍ਰੇਹਿ ਭਦ੍ਰੇਹਿ ਯਾਨੇਹਿ ਭਦ੍ਦਿਯਾ ਨਿਯ੍ਯਾਸਿ ਭਗਵਨ੍ਤਂ ਦਸ੍ਸਨਾਯ. ਅਦ੍ਦਸਂਸੁ ਖੋ ਸਮ੍ਬਹੁਲਾ ਤਿਤ੍ਥਿਯਾ ਮੇਣ੍ਡਕਂ ਗਹਪਤਿਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਮੇਣ੍ਡਕਂ ਗਹਪਤਿਂ ਏਤਦਵੋਚੁਂ – ‘‘ਕਹਂ ਤ੍ਵਂ, ਗਹਪਤਿ, ਗਚ੍ਛਸੀ’’ਤਿ? ‘‘ਗਚ੍ਛਾਮਹਂ, ਭਨ੍ਤੇ, ਭਗਵਨ੍ਤਂ [ਇਦਂ ਪਦਂ ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ] ਸਮਣਂ ਗੋਤਮਂ ਦਸ੍ਸਨਾਯਾ’’ਤਿ. ‘‘ਕਿਂ ਪਨ ਤ੍ਵਂ, ਗਹਪਤਿ, ਕਿਰਿਯਵਾਦੋ ਸਮਾਨੋ ਅਕਿਰਿਯਵਾਦਂ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਸਿ? ਸਮਣੋ ਹਿ, ਗਹਪਤਿ, ਗੋਤਮੋ ਅਕਿਰਿਯਵਾਦੋ ਅਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀ’’ਤਿ. ਅਥ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਏਤਦਹੋਸਿ – ‘‘ਨਿਸ੍ਸਂਸਯਂ, ਖੋ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਭਵਿਸ੍ਸਤਿ, ਯਥਯਿਮੇ ਤਿਤ੍ਥਿਯਾ ਉਸੂਯਨ੍ਤੀ’’ਤਿ. ਯਾਵਤਿਕਾ ਯਾਨਸ੍ਸ ਭੂਮਿ, ਯਾਨੇਨ ਗਨ੍ਤ੍ਵਾ ਯਾਨਾ ਪਚ੍ਚੋਰੋਹਿਤ੍ਵਾ ਪਤ੍ਤਿਕੋਵ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਸ੍ਸ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ…ਪੇ… ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭਨ੍ਤੇ…ਪੇ… ਉਪਾਸਕਂ ਮਂ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤਂ. ਅਧਿਵਾਸੇਤੁ ਚ ਮੇ, ਭਨ੍ਤੇ, ਭਗਵਾ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਮੇਣ੍ਡਕੋ ਗਹਪਤਿ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

ਅਥ ਖੋ ਮੇਣ੍ਡਕੋ ਗਹਪਤਿ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਮੇਣ੍ਡਕਸ੍ਸ ਗਹਪਤਿਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਭਰਿਯਾ ਚ ਪੁਤ੍ਤੋ ਚ ਸੁਣਿਸਾ ਚ ਦਾਸੋ ਚ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਤੇਸਂ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ…ਪੇ… ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚੁਂ – ‘‘ਅਭਿਕ੍ਕਨ੍ਤਂ, ਭਨ੍ਤੇ…ਪੇ… ਏਤੇ ਮਯਂ, ਭਨ੍ਤੇ, ਭਗਵਨ੍ਤਂ ਸਰਣਂ ਗਚ੍ਛਾਮ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ. ਉਪਾਸਕੇ ਨੋ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤੇ ਸਰਣਂ ਗਤੇ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਮੇਣ੍ਡਕੋ ਗਹਪਤਿ ਭਗਵਨ੍ਤਂ ਏਤਦਵੋਚ – ‘‘ਯਾਵ, ਭਨ੍ਤੇ, ਭਗਵਾ ਭਦ੍ਦਿਯੇ ਵਿਹਰਤਿ ਤਾਵ ਅਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਧੁਵਭਤ੍ਤੇਨਾ’’ਤਿ. ਅਥ ਖੋ ਭਗਵਾ ਮੇਣ੍ਡਕਂ ਗਹਪਤਿਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

ਮੇਣ੍ਡਕਗਹਪਤਿਵਤ੍ਥ ਨਿਟ੍ਠਿਤਂ.

੧੮੧. ਪਞ੍ਚਗੋਰਸਾਦਿਅਨੁਜਾਨਨਾ

੨੯੯. ਅਥ ਖੋ ਭਗਵਾ ਭਦ੍ਦਿਯੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਮੇਣ੍ਡਕਂ ਗਹਪਤਿਂ ਅਨਾਪੁਚ੍ਛਾ ਯੇਨ ਅਙ੍ਗੁਤ੍ਤਰਾਪੋ ਤੇਨ ਚਾਰਿਕਂ ਪਕ੍ਕਾਮਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹਿ. ਅਸ੍ਸੋਸਿ ਖੋ ਮੇਣ੍ਡਕੋ ਗਹਪਤਿ – ‘‘ਭਗਵਾ ਕਿਰ ਯੇਨ ਅਙ੍ਗੁਤ੍ਤਰਾਪੋ ਤੇਨ ਚਾਰਿਕਂ ਪਕ੍ਕਨ੍ਤੋ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹੀ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਦਾਸੇ ਚ ਕਮ੍ਮਕਰੇ ਚ ਆਣਾਪੇਸਿ – ‘‘ਤੇਨ ਹਿ, ਭਣੇ, ਬਹੁਂ ਲੋਣਮ੍ਪਿ, ਤੇਲਮ੍ਪਿ, ਤਣ੍ਡੁਲਮ੍ਪਿ, ਖਾਦਨੀਯਮ੍ਪਿ ਸਕਟੇਸੁ ਆਰੋਪੇਤ੍ਵਾ ਆਗਚ੍ਛਥ, ਅਡ੍ਢਤੇਲਸਾਨਿ ਚ ਗੋਪਾਲਕਸਤਾਨਿ ਅਡ੍ਢਤੇਲਸਾਨਿ ਚ ਧੇਨੁਸਤਾਨਿ ਆਦਾਯ ਆਗਚ੍ਛਨ੍ਤੁ, ਯਤ੍ਥ ਭਗਵਨ੍ਤਂ ਪਸ੍ਸਿਸ੍ਸਾਮ ਤਤ੍ਥ ਤਰੁਣੇਨ [ਧਾਰੁਣ੍ਹੇਨ (ਸੀ. ਸ੍ਯਾ.)] ਖੀਰੇਨ ਭੋਜੇਸ੍ਸਾਮਾ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਭਗਵਨ੍ਤਂ ਅਨ੍ਤਰਾਮਗ੍ਗੇ ਕਨ੍ਤਾਰੇ ਸਮ੍ਭਾਵੇਸਿ. ਅਥ ਖੋ ਮੇਣ੍ਡਕੋ ਗਹਪਤਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਮੇਣ੍ਡਕੋ ਗਹਪਤਿ ਭਗਵਨ੍ਤਂ ਏਤਦਵੋਚ – ‘‘ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਮੇਣ੍ਡਕੋ ਗਹਪਤਿ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

ਅਥ ਖੋ ਮੇਣ੍ਡਕੋ ਗਹਪਤਿ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਮੇਣ੍ਡਕਸ੍ਸ ਗਹਪਤਿਸ੍ਸ ਪਰਿਵੇਸਨਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਮੇਣ੍ਡਕੋ ਗਹਪਤਿ ਅਡ੍ਢਤੇਲਸਾਨਿ ਗੋਪਾਲਕਸਤਾਨਿ ਆਣਾਪੇਸਿ – ‘‘ਤੇਨਹਿ, ਭਣੇ, ਏਕਮੇਕਂ ਧੇਨੁਂ ਗਹੇਤ੍ਵਾ ਏਕਮੇਕਸ੍ਸ ਭਿਕ੍ਖੁਨੋ ਉਪਤਿਟ੍ਠਥ ਤਰੁਣੇਨ ਖੀਰੇਨ ਭੋਜੇਸ੍ਸਾਮਾ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਸਿ ਸਮ੍ਪਵਾਰੇਸਿ, ਤਰੁਣੇਨ ਚ ਖੀਰੇਨ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਖੀਰਂ ਨ ਪਟਿਗ੍ਗਣ੍ਹਨ੍ਤਿ. ਪਟਿਗ੍ਗਣ੍ਹਥ, ਭਿਕ੍ਖਵੇ, ਪਰਿਭੁਞ੍ਜਥਾਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਤਰੁਣੇਨ ਚ ਖੀਰੇਨ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਮੇਣ੍ਡਕੋ ਗਹਪਤਿ ਭਗਵਨ੍ਤਂ ਏਤਦਵੋਚ – ‘‘ਸਨ੍ਤਿ, ਭਨ੍ਤੇ, ਮਗ੍ਗਾ ਕਨ੍ਤਾਰਾ, ਅਪ੍ਪੋਦਕਾ ਅਪ੍ਪਭਕ੍ਖਾ, ਨ ਸੁਕਰਾ ਅਪਾਥੇਯ੍ਯੇਨ ਗਨ੍ਤੁਂ. ਸਾਧੁ, ਭਨ੍ਤੇ, ਭਗਵਾ ਭਿਕ੍ਖੂਨਂ ਪਾਥੇਯ੍ਯਂ ਅਨੁਜਾਨਾਤੂ’’ਤਿ. ਅਥ ਖੋ ਭਗਵਾ ਮੇਣ੍ਡਕਂ ਗਹਪਤਿਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚ ਗੋਰਸੇ – ਖੀਰਂ, ਦਧਿਂ, ਤਕ੍ਕਂ, ਨਵਨੀਤਂ, ਸਪ੍ਪਿਂ. ਸਨ੍ਤਿ, ਭਿਕ੍ਖਵੇ, ਮਗ੍ਗਾ ਕਨ੍ਤਾਰਾ ਅਪ੍ਪੋਦਕਾ ਅਪ੍ਪਭਕ੍ਖਾ, ਨ ਸੁਕਰਾ ਅਪਾਥੇਯ੍ਯੇਨ ਗਨ੍ਤੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਾਥੇਯ੍ਯਂ ਪਰਿਯੇਸਿਤੁਂ ਤਣ੍ਡੁਲੋ ਤਣ੍ਡੁਲਤ੍ਥਿਕੇਨ, ਮੁਗ੍ਗੋ ਮੁਗ੍ਗਤ੍ਥਿਕੇਨ, ਮਾਸੋ ਮਾਸਤ੍ਥਿਕੇਨ, ਲੋਣਂ ਲੋਣਤ੍ਥਿਕੇਨ, ਗੁਲ਼ੋ ਗੁਲ਼ਤ੍ਥਿਕੇਨ, ਤੇਲਂ ਤੇਲਤ੍ਥਿਕੇਨ, ਸਪ੍ਪਿ ਸਪ੍ਪਿਤ੍ਥਿਕੇਨ. ਸਨ੍ਤਿ, ਭਿਕ੍ਖਵੇ, ਮਨੁਸ੍ਸਾ, ਸਦ੍ਧਾ ਪਸਨ੍ਨਾ, ਤੇ ਕਪ੍ਪਿਯਕਾਰਕਾਨਂ ਹਤ੍ਥੇ ਹਿਰਞ੍ਞਂ ਉਪਨਿਕ੍ਖਿਪਨ੍ਤਿ – ‘ਇਮਿਨਾ ਅਯ੍ਯਸ੍ਸ ਯਂ ਕਪ੍ਪਿਯਂ ਤਂ ਦੇਥਾ’ਤਿ. ਅਨੁਜਾਨਾਮਿ, ਭਿਕ੍ਖਵੇ, ਯਂ ਤਤੋ ਕਪ੍ਪਿਯਂ ਤਂ ਸਾਦਿਤੁਂ; ਨ ਤ੍ਵੇਵਾਹਂ, ਭਿਕ੍ਖਵੇ, ਕੇਨਚਿ ਪਰਿਯਾਯੇਨ ਜਾਤਰੂਪਰਜਤਂ ਸਾਦਿਤਬ੍ਬਂ ਪਰਿਯੇਸਿਤਬ੍ਬਨ੍ਤਿ ਵਦਾਮੀ’’ਤਿ.

ਪਞ੍ਚਗੋਰਸਾਦਿਅਨੁਜਾਨਨਾ ਨਿਟ੍ਠਿਤਾ.

੧੮੨. ਕੇਣਿਯਜਟਿਲਵਤ੍ਥੁ

੩੦੦. [ਮ. ਨਿ. ੨.੩੯੬ ਆਦਯੋ; ਸੁ. ਨਿ. ਸੇਲਸੁਤ੍ਤਮ੍ਪਿ ਪਸ੍ਸਿਤਬ੍ਬਂ] ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਆਪਣਂ ਤਦਵਸਰਿ. ਅਸ੍ਸੋਸਿ ਖੋ ਕੇਣਿਯੋ ਜਟਿਲੋ – ‘‘ਸਮਣੋ ਖਲੁ ਭੋ ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਆਪਣਂ ਅਨੁਪ੍ਪਤ੍ਤੋ, ਤਂ ਖੋ ਪਨ ਭਵਨ੍ਤਂ ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ…ਪੇ… ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’ਤਿ. ਅਥ ਖੋ ਕੇਣਿਯਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਕਿਂ ਨੁ ਖੋ ਅਹਂ ਸਮਣਸ੍ਸ ਗੋਤਮਸ੍ਸ ਹਰਾਪੇਯ੍ਯ’’ਨ੍ਤਿ. ਅਥ ਖੋ ਕੇਣਿਯਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਯੇਪਿ ਖੋ ਤੇ ਬ੍ਰਾਹ੍ਮਣਾਨਂ [ਅਯਂ ਪਾਠੋ ਦੀ. ਨਿ. ੧.੨੮੫, ੫੨੬, ੫੩੬; ਮ. ਨਿ. ੨.੪੨੭; ਅ. ਨਿ. ੫.੧੯੧-੧੯੨ ਆਦਯੋ] ਪੁਬ੍ਬਕਾ ਇਸਯੋ ਮਨ੍ਤਾਨਂ ਕਤ੍ਤਾਰੋ ਮਨ੍ਤਾਨਂ ਪਵਤ੍ਤਾਰੋ, ਯੇਸਮਿਦਂ ਏਤਰਹਿ ਬ੍ਰਾਹ੍ਮਣਾ ਪੋਰਾਣਂ ਮਨ੍ਤਪਦਂ ਗੀਤਂ ਪਵੁਤ੍ਤਂ ਸਮਿਹਿਤਂ, ਤਦਨੁਗਾਯਨ੍ਤਿ ਤਦਨੁਭਾਸਨ੍ਤਿ, ਭਾਸਿਤਮਨੁਭਾਸਨ੍ਤਿ, ਵਾਚਿਤਮਨੁਵਾਚੇਨ੍ਤਿ, ਸੇਯ੍ਯਥਿਦਂ – ਅਟ੍ਠਕੋ ਵਾਮਕੋ ਵਾਮਦੇਵੋ ਵੇਸ੍ਸਾਮਿਤ੍ਤੋ ਯਮਤਗ੍ਗਿ [ਯਮਦਗ੍ਗਿ (ਕ.)] ਅਙ੍ਗੀਰਸੋ ਭਾਰਦ੍ਵਾਜੋ ਵਾਸੇਟ੍ਠੋ ਕਸ੍ਸਪੋ ਭਗੁ [ਅਯਂ ਪਾਠੋ ਦੀ. ਨਿ. ੧.੨੮੫, ੫੨੬, ੫੩੬; ਮ. ਨਿ. ੨.੪੨੭; ਅ. ਨਿ. ੫.੧੯੧-੧੯੨ ਆਦਯੋ], ਰਤ੍ਤੂਪਰਤਾ ਵਿਰਤਾ ਵਿਕਾਲਭੋਜਨਾ, ਤੇ ਏਵਰੂਪਾਨਿ ਪਾਨਾਨਿ ਸਾਦਿਯਿਂਸੁ. ਸਮਣੋਪਿ ਗੋਤਮੋ ਰਤ੍ਤੂਪਰਤੋ ਵਿਰਤੋ ਵਿਕਾਲਭੋਜਨਾ, ਅਰਹਤਿ ਸਮਣੋਪਿ ਗੋਤਮੋ ਏਵਰੂਪਾਨਿ ਪਾਨਾਨਿ ਸਾਦਿਯਿਤੁ’’ਨ੍ਤਿ ਪਹੂਤਂ ਪਾਨਂ ਪਟਿਯਾਦਾਪੇਤ੍ਵਾ ਕਾਜੇਹਿ ਗਾਹਾਪੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ; ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਕੇਣਿਯੋ ਜਟਿਲੋ ਭਗਵਨ੍ਤਂ ਏਤਦਵੋਚ – ‘‘ਪਟਿਗ੍ਗਣ੍ਹਾਤੁ ਮੇ ਭਵਂ ਗੋਤਮੋ ਪਾਨ’’ਨ੍ਤਿ. ਤੇਨ ਹਿ, ਕੇਣਿਯ, ਭਿਕ੍ਖੂਨਂ ਦੇਹੀਤਿ. ਅਥ ਖੋ ਕੇਣਿਯੋ ਜਟਿਲੋ ਭਿਕ੍ਖੂਨਂ ਦੇਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਪਟਿਗ੍ਗਣ੍ਹਨ੍ਤਿ. ਪਟਿਗ੍ਗਣ੍ਹਥ, ਭਿਕ੍ਖਵੇ, ਪਰਿਭੁਞ੍ਜਥਾਤਿ. ਅਥ ਖੋ ਕੇਣਿਯੋ ਜਟਿਲੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਹੂਤੇਹਿ ਪਾਨੇਹਿ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਧੋਤਹਤ੍ਥਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਕੇਣਿਯਂ ਜਟਿਲਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਕੇਣਿਯੋ ਜਟਿਲੋ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਭਗਵਨ੍ਤਂ ਏਤਦਵੋਚ – ‘‘ਅਧਿਵਾਸੇਤੁ ਮੇ ਭਵਂ ਗੋਤਮੋ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਮਹਾ ਖੋ, ਕੇਣਿਯ, ਭਿਕ੍ਖੁਸਙ੍ਘੋ ਅਡ੍ਢਤੇਲਸਾਨਿ ਭਿਕ੍ਖੁਸਤਾਨਿ, ਤ੍ਵਞ੍ਚ ਬ੍ਰਾਹ੍ਮਣੇਸੁ ਅਭਿਪ੍ਪਸਨ੍ਨੋਤਿ. ਦੁਤਿਯਮ੍ਪਿ ਖੋ ਕੇਣਿਯੋ ਜਟਿਲੋ ਭਗਵਨ੍ਤਂ ਏਤਦਵੋਚ – ‘‘ਕਿਞ੍ਚਾਪਿ ਖੋ, ਭੋ ਗੋਤਮ, ਮਹਾ ਭਿਕ੍ਖੁਸਙ੍ਘੋ ਅਡ੍ਢਤੇਲਸਾਨਿ ਭਿਕ੍ਖੁਸਤਾਨਿ, ਅਹਞ੍ਚ ਬ੍ਰਾਹ੍ਮਣੇਸੁ ਅਭਿਪ੍ਪਸਨ੍ਨੋ, ਅਧਿਵਾਸੇਤੁ ਮੇ ਭਵਂ ਗੋਤਮੋ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਮਹਾ ਖੋ, ਕੇਣਿਯ, ਭਿਕ੍ਖੁਸਙ੍ਘੋ ਅਡ੍ਢਤੇਲਸਾਨਿ ਭਿਕ੍ਖੁਸਤਾਨਿ, ਤ੍ਵਞ੍ਚ ਬ੍ਰਾਹ੍ਮਣੇਸੁ ਅਭਿਪ੍ਪਸਨ੍ਨੋਤਿ. ਤਤਿਯਮ੍ਪਿ ਖੋ ਕੇਣਿਯੋ ਜਟਿਲੋ ਭਗਵਨ੍ਤਂ ਏਤਦਵੋਚ – ‘‘ਕਿਞ੍ਚਾਪਿ ਖੋ, ਭੋ ਗੋਤਮ, ਮਹਾ ਭਿਕ੍ਖੁਸਙ੍ਘੋ ਅਡ੍ਢਤੇਲਸਾਨਿ ਭਿਕ੍ਖੁਸਤਾਨਿ, ਅਹਞ੍ਚ ਬ੍ਰਾਹ੍ਮਣੇਸੁ ਅਭਿਪ੍ਪਸਨ੍ਨੋ, ਅਧਿਵਾਸੇਤੁ ਭਵਂ ਗੋਤਮੋ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਕੇਣਿਯੋ ਜਟਿਲੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠ ਪਾਨਾਨਿ – ਅਮ੍ਬਪਾਨਂ ਜਮ੍ਬੁਪਾਨਂ ਚੋਚਪਾਨਂ ਮੋਚਪਾਨਂ ਮਧੂਕਪਾਨਂ [ਮਧੁਪਾਨਂ (ਸੀ. ਸ੍ਯਾ.)] ਮੁਦ੍ਦਿਕਪਾਨਂ ਸਾਲੂਕਪਾਨਂ ਫਾਰੁਸਕਪਾਨਂ. ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਫਲਰਸਂ ਠਪੇਤ੍ਵਾ ਧਞ੍ਞਫਲਰਸਂ. ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਪਤ੍ਤਰਸਂ ਠਪੇਤ੍ਵਾ ਡਾਕਰਸਂ. ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਪੁਪ੍ਫਰਸਂ ਠਪੇਤ੍ਵਾ ਮਧੂਕਪੁਪ੍ਫਰਸਂ. ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਛੁਰਸ’’ਨ੍ਤਿ.

ਅਥ ਖੋ ਕੇਣਿਯੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਸਕੇ ਅਸ੍ਸਮੇ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭੋ ਗੋਤਮ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਕੇਣਿਯਸ੍ਸ ਜਟਿਲਸ੍ਸ ਅਸ੍ਸਮੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਕੇਣਿਯੋ ਜਟਿਲੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਕੇਣਿਯਂ ਜਟਿਲਂ ਭਗਵਾ ਇਮਾਹਿ ਗਾਥਾਹਿ ਅਨੁਮੋਦਿ –

‘‘ਅਗ੍ਗਿਹੁਤ੍ਤਮੁਖਾ ਯਞ੍ਞਾ, ਸਾਵਿਤ੍ਤੀ ਛਨ੍ਦਸੋ ਮੁਖਂ;

ਰਾਜਾ ਮੁਖਂ ਮਨੁਸ੍ਸਾਨਂ, ਨਦੀਨਂ ਸਾਗਰੋ ਮੁਖਂ.

‘‘ਨਕ੍ਖਤ੍ਤਾਨਂ ਮੁਖਂ ਚਨ੍ਦੋ, ਆਦਿਚ੍ਚੋ ਤਪਤਂ ਮੁਖਂ;

ਪੁਞ੍ਞਂ ਆਕਙ੍ਖਮਾਨਾਨਂ ਸਙ੍ਘੋ, ਵੇ ਯਜਤਂ ਮੁਖ’’ਨ੍ਤਿ.

ਅਥ ਖੋ ਭਗਵਾ ਕੇਣਿਯਂ ਜਟਿਲਂ ਇਮਾਹਿ ਗਾਥਾਹਿ ਅਨੁਮੋਦਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

ਕੇਣਿਯਜਟਿਲਵਤ੍ਥੁ ਨਿਟ੍ਠਿਤਂ.

੧੮੩. ਰੋਜਮਲ੍ਲਵਤ੍ਥੁ

੩੦੧. ਅਥ ਖੋ ਭਗਵਾ ਆਪਣੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਕੁਸਿਨਾਰਾ ਤੇਨ ਚਾਰਿਕਂ ਪਕ੍ਕਾਮਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹਿ. ਅਸ੍ਸੋਸੁਂ ਖੋ ਕੋਸਿਨਾਰਕਾ ਮਲ੍ਲਾ – ‘‘ਭਗਵਾ ਕਿਰ ਕੁਸਿਨਾਰਂ ਆਗਚ੍ਛਤਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹੀ’’ਤਿ. ਤੇ ਸਙ੍ਗਰਂ [ਸਙ੍ਕਰਂ (ਕ.)] ਅਕਂਸੁ – ‘‘ਯੋ ਭਗਵਤੋ ਪਚ੍ਚੁਗ੍ਗਮਨਂ ਨ ਕਰਿਸ੍ਸਤਿ, ਪਞ੍ਚਸਤਾਨਿਸ੍ਸ ਦਣ੍ਡੋ’’ਤਿ. ਤੇਨ ਖੋ ਪਨ ਸਮਯੇਨ ਰੋਜੋ ਮਲ੍ਲੋ ਆਯਸ੍ਮਤੋ ਆਨਨ੍ਦਸ੍ਸ ਸਹਾਯੋ ਹੋਤਿ. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਕੁਸਿਨਾਰਾ ਤਦਵਸਰਿ. ਅਥ ਖੋ ਕੋਸਿਨਾਰਕਾ ਮਲ੍ਲਾ ਭਗਵਤੋ ਪਚ੍ਚੁਗ੍ਗਮਨਂ ਅਕਂਸੁ. ਅਥ ਖੋ ਰੋਜੋ ਮਲ੍ਲੋ ਭਗਵਤੋ ਪਚ੍ਚੁਗ੍ਗਮਨਂ ਕਰਿਤ੍ਵਾ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਂ ਖੋ ਰੋਜਂ ਮਲ੍ਲਂ ਆਯਸ੍ਮਾ ਆਨਨ੍ਦੋ ਏਤਦਵੋਚ – ‘‘ਉਲ਼ਾਰਂ ਖੋ ਤੇ ਇਦਂ, ਆਵੁਸੋ ਰੋਜ, ਯਂ ਤ੍ਵਂ ਭਗਵਤੋ ਪਚ੍ਚੁਗ੍ਗਮਨਂ ਅਕਾਸੀ’’ਤਿ. ‘‘ਨਾਹਂ, ਭਨ੍ਤੇ ਆਨਨ੍ਦ, ਬਹੁਕਤੋ ਬੁਦ੍ਧੇ ਵਾ ਧਮ੍ਮੇ ਵਾ ਸਙ੍ਘੇ ਵਾ; ਅਪਿ ਚ ਞਾਤੀਹਿ ਸਙ੍ਗਰੋ ਕਤੋ – ‘ਯੋ ਭਗਵਤੋ ਪਚ੍ਚੁਗ੍ਗਮਨਂ ਨ ਕਰਿਸ੍ਸਤਿ, ਪਞ੍ਚਸਤਾਨਿਸ੍ਸ ਦਣ੍ਡੋ’’’ਤਿ; ਸੋ ਖੋ ਅਹਂ, ਭਨ੍ਤੇ ਆਨਨ੍ਦ, ਞਾਤੀਨਂ ਦਣ੍ਡਭਯਾ ਏਵਾਹਂ ਭਗਵਤੋ ਪਚ੍ਚੁਗ੍ਗਮਨਂ ਅਕਾਸਿਨ੍ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਅਨਤ੍ਤਮਨੋ ਅਹੋਸਿ’ ਕਥਞ੍ਹਿ ਨਾਮ ਰੋਜੋ ਮਲ੍ਲੋ ਏਵਂ ਵਕ੍ਖਤੀ’ਤਿ? ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਅਯਂ, ਭਨ੍ਤੇ, ਰੋਜੋ ਮਲ੍ਲੋ ਅਭਿਞ੍ਞਾਤੋ ਞਾਤਮਨੁਸ੍ਸੋ. ਮਹਤ੍ਥਿਕੋ ਖੋ ਪਨ ਏਵਰੂਪਾਨਂ ਞਾਤਮਨੁਸ੍ਸਾਨਂ ਇਮਸ੍ਮਿਂ ਧਮ੍ਮਵਿਨਯੇ ਪਸਾਦੋ. ਸਾਧੁ, ਭਨ੍ਤੇ, ਭਗਵਾ ਤਥਾ ਕਰੋਤੁ, ਯਥਾ ਰੋਜੋ ਮਲ੍ਲੋ ਇਮਸ੍ਮਿਂ ਧਮ੍ਮਵਿਨਯੇ ਪਸੀਦੇਯ੍ਯਾ’’ਤਿ. ‘‘ਨ ਖੋ ਤਂ, ਆਨਨ੍ਦ, ਦੁਕ੍ਕਰਂ ਤਥਾਗਤੇਨ, ਯਥਾ ਰੋਜੋ ਮਲ੍ਲੋ ਇਮਸ੍ਮਿਂ ਧਮ੍ਮਵਿਨਯੇ ਪਸੀਦੇਯ੍ਯਾ’’ਤਿ.

ਅਥ ਖੋ ਭਗਵਾ ਰੋਜਂ ਮਲ੍ਲਂ ਮੇਤ੍ਤੇਨ ਚਿਤ੍ਤੇਨ ਫਰਿਤ੍ਵਾ ਉਟ੍ਠਾਯਾਸਨਾ ਵਿਹਾਰਂ ਪਾਵਿਸਿ. ਅਥ ਖੋ ਰੋਜੋ ਮਲ੍ਲੋ ਭਗਵਤੋ ਮੇਤ੍ਤੇਨ ਚਿਤ੍ਤੇਨ ਫੁਟ੍ਠੋ, ਸੇਯ੍ਯਥਾਪਿ ਨਾਮ ਗਾਵਿਂ ਤਰੁਣਵਚ੍ਛੋ, ਏਵਮੇਵ, ਵਿਹਾਰੇਨ ਵਿਹਾਰਂ ਪਰਿਵੇਣੇਨ ਪਰਿਵੇਣਂ ਉਪਸਙ੍ਕਮਿਤ੍ਵਾ ਭਿਕ੍ਖੂ ਪੁਚ੍ਛਤਿ – ‘‘ਕਹਂ ਨੁ ਖੋ, ਭਨ੍ਤੇ, ਏਤਰਹਿ ਸੋ ਭਗਵਾ ਵਿਹਰਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ, ਦਸ੍ਸਨਕਾਮਾ ਹਿ ਮਯਂ ਤਂ ਭਗਵਨ੍ਤਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧ’’ਨ੍ਤਿ. ‘‘ਏਸਾਵੁਸੋ ਰੋਜ, ਵਿਹਾਰੋ ਸਂਵੁਤਦ੍ਵਾਰੋ, ਤੇਨ ਅਪ੍ਪਸਦ੍ਦੋ ਉਪਸਙ੍ਕਮਿਤ੍ਵਾ ਅਤਰਮਾਨੋ ਆਲ਼ਿਨ੍ਦਂ ਪਵਿਸਿਤ੍ਵਾ ਉਕ੍ਕਾਸਿਤ੍ਵਾ ਅਗ੍ਗਲ਼ਂ ਆਕੋਟੇਹਿ, ਵਿਵਰਿਸ੍ਸਤਿ ਤੇ ਭਗਵਾ ਦ੍ਵਾਰ’’ਨ੍ਤਿ. ਅਥ ਖੋ ਰੋਜੋ ਮਲ੍ਲੋ ਯੇਨ ਸੋ ਵਿਹਾਰੋ ਸਂਵੁਤਦ੍ਵਾਰੋ, ਤੇਨ ਅਪ੍ਪਸਦ੍ਦੋ ਉਪਸਙ੍ਕਮਿਤ੍ਵਾ ਅਤਰਮਾਨੋ ਆਲ਼ਿਨ੍ਦਂ ਪਵਿਸਿਤ੍ਵਾ ਉਕ੍ਕਾਸਿਤ੍ਵਾ ਅਗ੍ਗਲ਼ਂ ਆਕੋਟੇਸਿ. ਵਿਵਰਿ ਭਗਵਾ ਦ੍ਵਾਰਂ. ਅਥ ਖੋ ਰੋਜੋ ਮਲ੍ਲੋ ਵਿਹਾਰਂ ਪਵਿਸਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਸ੍ਸ ਖੋ ਰੋਜਸ੍ਸ ਮਲ੍ਲਸ੍ਸ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ…ਪੇ… ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਸਾਧੁ, ਭਨ੍ਤੇ, ਅਯ੍ਯਾ ਮਮਞ੍ਞੇਵ ਪਟਿਗ੍ਗਣ੍ਹੇਯ੍ਯੁਂ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਂ, ਨੋ ਅਞ੍ਞੇਸ’’ਨ੍ਤਿ. ‘‘ਯੇਸਂ ਖੋ, ਰੋਜ, ਸੇਕ੍ਖੇਨ ਞਾਣੇਨ ਸੇਕ੍ਖੇਨ ਦਸ੍ਸਨੇਨ ਧਮ੍ਮੋ ਦਿਟ੍ਠੋ ਸੇਯ੍ਯਥਾਪਿ ਤਯਾ, ਤੇਸਮ੍ਪਿ ਏਵਂ ਹੋਤਿ – ‘ਅਹੋ ਨੂਨ ਅਯ੍ਯਾ ਅਮ੍ਹਾਕਞ੍ਞੇਵ ਪਟਿਗ੍ਗਣ੍ਹੇਯ੍ਯੁਂ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਂ, ਨੋ ਅਞ੍ਞੇਸ’ਨ੍ਤਿ. ਤੇਨ ਹਿ, ਰੋਜ, ਤਵ ਚੇਵ ਪਟਿਗ੍ਗਹਿਸ੍ਸਨ੍ਤਿ ਅਞ੍ਞੇਸਞ੍ਚਾ’’ਤਿ.

੩੦੨. ਤੇਨ ਖੋ ਪਨ ਸਮਯੇਨ ਕੁਸਿਨਾਰਾਯਂ ਪਣੀਤਾਨਂ ਭਤ੍ਤਾਨਂ ਭਤ੍ਤਪਟਿਪਾਟਿ ਅਟ੍ਠਿਤਾ ਹੋਤਿ. ਅਥ ਖੋ ਰੋਜਸ੍ਸ ਮਲ੍ਲਸ੍ਸ ਪਟਿਪਾਟਿਂ ਅਲਭਨ੍ਤਸ੍ਸ ਏਤਦਹੋਸਿ – ‘‘ਯਂਨੂਨਾਹਂ ਭਤ੍ਤਗ੍ਗਂ ਓਲੋਕੇਯ੍ਯਂ, ਯਂ ਭਤ੍ਤਗ੍ਗੇ ਨਾਸ੍ਸ, ਤਂ ਪਟਿਯਾਦੇਯ੍ਯ’’ਨ੍ਤਿ. ਅਥ ਖੋ ਰੋਜੋ ਮਲ੍ਲੋ ਭਤ੍ਤਗ੍ਗਂ ਓਲੋਕੇਨ੍ਤੋ ਦ੍ਵੇ ਨਾਦ੍ਦਸ – ਡਾਕਞ੍ਚ ਪਿਟ੍ਠਖਾਦਨੀਯਞ੍ਚ. ਅਥ ਖੋ ਰੋਜੋ ਮਲ੍ਲੋ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ – ‘‘ਇਧ ਮੇ, ਭਨ੍ਤੇ ਆਨਨ੍ਦ, ਪਟਿਪਾਟਿਂ ਅਲਭਨ੍ਤਸ੍ਸ ਏਤਦਹੋਸਿ – ‘ਯਂਨੂਨਾਹਂ ਭਤ੍ਤਗ੍ਗਂ ਓਲੋਕੇਯ੍ਯਂ, ਯਂ ਭਤ੍ਤਗ੍ਗੇ ਨਾਸ੍ਸ, ਤਂ ਪਟਿਯਾਦੇਯ੍ਯ’ਨ੍ਤਿ. ਸੋ ਖੋ ਅਹਂ, ਭਨ੍ਤੇ ਆਨਨ੍ਦ, ਭਤ੍ਤਗ੍ਗਂ ਓਲੋਕੇਨ੍ਤੋ ਦ੍ਵੇ ਨਾਦ੍ਦਸਂ – ਡਾਕਞ੍ਚ ਪਿਟ੍ਠਖਾਦਨੀਯਞ੍ਚ. ਸਚਾਹਂ, ਭਨ੍ਤੇ ਆਨਨ੍ਦ, ਪਟਿਯਾਦੇਯ੍ਯਂ ਡਾਕਞ੍ਚ ਪਿਟ੍ਠਖਾਦਨੀਯਞ੍ਚ, ਪਟਿਗ੍ਗਣ੍ਹੇਯ੍ਯ ਮੇ ਭਗਵਾ’’ਤਿ? ‘‘ਤੇਨ ਹਿ, ਰੋਜ, ਭਗਵਨ੍ਤਂ ਪਟਿਪੁਚ੍ਛਿਸ੍ਸਾਮੀ’’ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਤੇਨ ਹਾਨਨ੍ਦ, ਪਟਿਯਾਦੇਤੂ’’ਤਿ. ‘‘ਤੇਨ ਹਿ, ਰੋਜ, ਪਟਿਯਾਦੇਹੀ’’ਤਿ. ਅਥ ਖੋ ਰੋਜੋ ਮਲ੍ਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਹੂਤਂ ਡਾਕਞ੍ਚ ਪਿਟ੍ਠਖਾਦਨੀਯਞ੍ਚ ਪਟਿਯਾਦਾਪੇਤ੍ਵਾ ਭਗਵਤੋ ਉਪਨਾਮੇਸਿ ‘‘ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਡਾਕਞ੍ਚ ਪਿਟ੍ਠਖਾਦਨੀਯਞ੍ਚਾ’’ਤਿ. ‘‘ਤੇਨ ਹਿ, ਰੋਜ, ਭਿਕ੍ਖੂਨਂ ਦੇਹੀ’’ਤਿ. ਅਥ ਖੋ ਰੋਜੋ ਮਲ੍ਲੋ ਭਿਕ੍ਖੂਨਂ ਦੇਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਪਟਿਗ੍ਗਣ੍ਹਨ੍ਤਿ. ‘‘ਪਟਿਗ੍ਗਣ੍ਹਥ, ਭਿਕ੍ਖਵੇ, ਪਰਿਭੁਞ੍ਜਥਾ’’ਤਿ. ਅਥ ਖੋ ਰੋਜੋ ਮਲ੍ਲੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਹੂਤੇਹਿ ਡਾਕੇਹਿ ਚ ਪਿਟ੍ਠਖਾਦਨੀਯੇਹਿ ਚ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਧੋਤਹਤ੍ਥਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਰੋਜਂ ਮਲ੍ਲਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਞ੍ਚ ਡਾਕਂ ਸਬ੍ਬਞ੍ਚ ਪਿਟ੍ਠਖਾਦਨੀਯ’’ਨ੍ਤਿ.

ਰੋਜਮਲ੍ਲਵਤ੍ਥੁ ਨਿਟ੍ਠਿਤਂ.

੧੮੪. ਵੁਡ੍ਢਪਬ੍ਬਜਿਤਵਤ੍ਥੁ

੩੦੩. ਅਥ ਖੋ ਭਗਵਾ ਕੁਸਿਨਾਰਾਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਆਤੁਮਾ ਤੇਨ ਚਾਰਿਕਂ ਪਕ੍ਕਾਮਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹਿ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਵੁਡ੍ਢਪਬ੍ਬਜਿਤੋ ਆਤੁਮਾਯਂ ਪਟਿਵਸਤਿ ਨਹਾਪਿਤਪੁਬ੍ਬੋ. ਤਸ੍ਸ ਦ੍ਵੇ ਦਾਰਕਾ ਹੋਨ੍ਤਿ, ਮਞ੍ਜੁਕਾ ਪਟਿਭਾਨੇਯ੍ਯਕਾ, ਦਕ੍ਖਾ ਪਰਿਯੋਦਾਤਸਿਪ੍ਪਾ ਸਕੇ ਆਚਰਿਯਕੇ ਨਹਾਪਿਤਕਮ੍ਮੇ. ਅਸ੍ਸੋਸਿ ਖੋ ਸੋ ਵੁਡ੍ਢਪਬ੍ਬਜਿਤੋ – ‘‘ਭਗਵਾ ਕਿਰ ਆਤੁਮਂ ਆਗਚ੍ਛਤਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹੀ’’ਤਿ. ਅਥ ਖੋ ਸੋ ਵੁਡ੍ਢਪਬ੍ਬਜਿਤੋ ਤੇ ਦਾਰਕੇ ਏਤਦਵੋਚ – ‘‘ਭਗਵਾ ਕਿਰ, ਤਾਤਾ, ਆਤੁਮਂ ਆਗਚ੍ਛਤਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹਿ. ਗਚ੍ਛਥ ਤੁਮ੍ਹੇ, ਤਾਤਾ, ਖੁਰਭਣ੍ਡਂ ਆਦਾਯ ਨਾਲ਼ਿਯਾਵਾਪਕੇਨ ਅਨੁਘਰਕਂ ਅਨੁਘਰਕਂ ਆਹਿਣ੍ਡਥ, ਲੋਣਮ੍ਪਿ, ਤੇਲਮ੍ਪਿ, ਤਣ੍ਡੁਲਮ੍ਪਿ, ਖਾਦਨੀਯਮ੍ਪਿ ਸਂਹਰਥ, ਭਗਵਤੋ ਆਗਤਸ੍ਸ ਯਾਗੁਪਾਨਂ ਕਰਿਸ੍ਸਾਮਾ’’ਤਿ. ‘‘ਏਵਂ, ਤਾਤਾ’’ਤਿ ਖੋ ਤੇ ਦਾਰਕਾ ਤਸ੍ਸ ਵੁਡ੍ਢਪਬ੍ਬਜਿਤਸ੍ਸ ਪਟਿਸ੍ਸੁਣਿਤ੍ਵਾ ਖੁਰਭਣ੍ਡਂ ਆਦਾਯ ਨਾਲ਼ਿਯਾਵਾਪਕੇਨ ਅਨੁਘਰਕਂ ਅਨੁਘਰਕਂ ਆਹਿਣ੍ਡਨ੍ਤਿ, ਲੋਣਮ੍ਪਿ, ਤੇਲਮ੍ਪਿ, ਤਣ੍ਡੁਲਮ੍ਪਿ, ਖਾਦਨੀਯਮ੍ਪਿ ਸਂਹਰਨ੍ਤਾ. ਮਨੁਸ੍ਸਾ ਤੇ ਦਾਰਕੇ ਮਞ੍ਜੁਕੇ ਪਟਿਭਾਨੇਯ੍ਯਕੇ ਪਸ੍ਸਿਤ੍ਵਾ ਯੇਪਿ ਨ ਕਾਰਾਪੇਤੁਕਾਮਾ ਤੇਪਿ ਕਾਰਾਪੇਨ੍ਤਿ, ਕਾਰਾਪੇਤ੍ਵਾਪਿ ਬਹੁਂ ਦੇਨ੍ਤਿ. ਅਥ ਖੋ ਤੇ ਦਾਰਕਾ ਬਹੁਂ ਲੋਣਮ੍ਪਿ, ਤੇਲਮ੍ਪਿ, ਤਣ੍ਡੁਲਮ੍ਪਿ, ਖਾਦਨੀਯਮ੍ਪਿ ਸਂਹਰਿਂਸੁ.

ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਆਤੁਮਾ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਆਤੁਮਾਯਂ ਵਿਹਰਤਿ ਭੁਸਾਗਾਰੇ. ਅਥ ਖੋ ਸੋ ਵੁਡ੍ਢਪਬ੍ਬਜਿਤੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਹੂਤਂ ਯਾਗੁਂ ਪਟਿਯਾਦਾਪੇਤ੍ਵਾ ਭਗਵਤੋ ਉਪਨਾਮੇਸਿ – ‘‘ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਯਾਗੁ’’ਨ੍ਤਿ. ਜਾਨਨ੍ਤਾਪਿ ਤਥਾਗਤਾ ਪੁਚ੍ਛਨ੍ਤਿ…ਪੇ… ਸਾਵਕਾਨਂ ਵਾ ਸਿਕ੍ਖਾਪਦਂ ਪਞ੍ਞਪੇਸ੍ਸਾਮਾਤਿ. ਅਥ ਖੋ ਭਗਵਾ ਤਂ ਵੁਡ੍ਢਪਬ੍ਬਜਿਤਂ ਏਤਦਵੋਚ – ‘‘ਕੁਤਾਯਂ, ਭਿਕ੍ਖੁ ਯਾਗੂ’’ਤਿ? ਅਥ ਖੋ ਸੋ ਵੁਡ੍ਢਪਬ੍ਬਜਿਤੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਵਿਗਰਹਿ ਬੁਦ੍ਧੋ ਭਗਵਾ, ‘‘ਅਨਨੁਚ੍ਛਵਿਕਂ, ਮੋਘਪੁਰਿਸ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਪਬ੍ਬਜਿਤੋ ਅਕਪ੍ਪਿਯੇ ਸਮਾਦਪੇਸ੍ਸਸਿ [ਸਮਾਦਪੇਸਿ (ਕ.)]. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ ‘ਨ, ਭਿਕ੍ਖਵੇ, ਪਬ੍ਬਜਿਤੇਨ ਅਕਪ੍ਪਿਯੇ ਸਮਾਦਪੇਤਬ੍ਬਂ, ਯੋ ਸਮਾਦਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਨਹਾਪਿਤਪੁਬ੍ਬੇਨ ਖੁਰਭਣ੍ਡਂ ਪਰਿਹਰਿਤਬ੍ਬਂ. ਯੋ ਪਰਿਹਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’’ਤਿ.

ਅਥ ਖੋ ਭਗਵਾ ਆਤੁਮਾਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਸਾਵਤ੍ਥਿਯਂ ਬਹੁਂ ਫਲਖਾਦਨੀਯਂ ਉਪ੍ਪਨ੍ਨਂ ਹੋਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਭਗਵਤਾ ਫਲਖਾਦਨੀਯਂ ਅਨੁਞ੍ਞਾਤਂ, ਕਿਂ ਅਨਨੁਞ੍ਞਾਤ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਫਲਖਾਦਨੀਯ’’ਨ੍ਤਿ.

੩੦੪. ਤੇਨ ਖੋ ਪਨ ਸਮਯੇਨ ਸਙ੍ਘਿਕਾਨਿ ਬੀਜਾਨਿ ਪੁਗ੍ਗਲਿਕਾਯ ਭੂਮਿਯਾ ਰੋਪਿਯਨ੍ਤਿ, ਪੁਗ੍ਗਲਿਕਾਨਿ ਬੀਜਾਨਿ ਸਙ੍ਘਿਕਾਯ ਭੂਮਿਯਾ ਰੋਪਿਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਸਙ੍ਘਿਕਾਨਿ, ਭਿਕ੍ਖਵੇ, ਬੀਜਾਨਿ ਪੁਗ੍ਗਲਿਕਾਯ ਭੂਮਿਯਾ ਰੋਪਿਤਾਨਿ ਭਾਗਂ ਦਤ੍ਵਾ ਪਰਿਭੁਞ੍ਜਿਤਬ੍ਬਾਨਿ. ਪੁਗ੍ਗਲਿਕਾਨਿ ਬੀਜਾਨਿ ਸਙ੍ਘਿਕਾਯ ਭੂਮਿਯਾ ਰੋਪਿਤਾਨਿ ਭਾਗਂ ਦਤ੍ਵਾ ਪਰਿਭੁਞ੍ਜਿਤਬ੍ਬਾਨੀਤਿ.

ਵੁਡ੍ਢਪਬ੍ਬਜਿਤਵਤ੍ਥੁ ਨਿਟ੍ਠਿਤਂ.

੧੮੫. ਚਤੁਮਹਾਪਦੇਸਕਥਾ

੩੦੫. ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਕਿਸ੍ਮਿਞ੍ਚਿ ਕਿਸ੍ਮਿਞ੍ਚਿ ਠਾਨੇ ਕੁਕ੍ਕੁਚ੍ਚਂ ਉਪ੍ਪਜ੍ਜਤਿ – ‘‘ਕਿਂ ਨੁ ਖੋ ਭਗਵਤਾ ਅਨੁਞ੍ਞਾਤਂ, ਕਿਂ ਅਨਨੁਞ੍ਞਾਤ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਯਂ, ਭਿਕ੍ਖਵੇ, ਮਯਾ ‘ਇਦਂ ਨ ਕਪ੍ਪਤੀ’ਤਿ ਅਪ੍ਪਟਿਕ੍ਖਿਤ੍ਤਂ ਤਞ੍ਚੇ ਅਕਪ੍ਪਿਯਂ ਅਨੁਲੋਮੇਤਿ, ਕਪ੍ਪਿਯਂ ਪਟਿਬਾਹਤਿ, ਤਂ ਵੋ ਨ ਕਪ੍ਪਤਿ. ਯਂ, ਭਿਕ੍ਖਵੇ, ਮਯਾ ‘ਇਦਂ ਨ ਕਪ੍ਪਤੀ’ਤਿ ਅਪ੍ਪਟਿਕ੍ਖਿਤ੍ਤਂ ਤਞ੍ਚੇ ਕਪ੍ਪਿਯਂ ਅਨੁਲੋਮੇਤਿ, ਅਕਪ੍ਪਿਯਂ ਪਟਿਬਾਹਤਿ, ਤਂ ਵੋ ਕਪ੍ਪਤਿ. ਯਂ, ਭਿਕ੍ਖਵੇ, ਮਯਾ ‘ਇਦਂ ਕਪ੍ਪਤੀ’ਤਿ ਅਨਨੁਞ੍ਞਾਤਂ ਤਞ੍ਚੇ ਅਕਪ੍ਪਿਯਂ ਅਨੁਲੋਮੇਤਿ, ਕਪ੍ਪਿਯਂ ਪਟਿਬਾਹਤਿ, ਤਂ ਵੋ ਨ ਕਪ੍ਪਤਿ. ਯਂ, ਭਿਕ੍ਖਵੇ, ਮਯਾ ‘ਇਦਂ ਕਪ੍ਪਤੀ’ਤਿ ਅਨਨੁਞ੍ਞਾਤਂ, ਤਞ੍ਚੇ ਕਪ੍ਪਿਯਂ ਅਨੁਲੋਮੇਤਿ, ਅਕਪ੍ਪਿਯਂ ਪਟਿਬਾਹਤਿ, ਤਂ ਵੋ ਕਪ੍ਪਤੀ’’ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਪ੍ਪਤਿ ਨੁ ਖੋ ਯਾਵਕਾਲਿਕੇਨ ਯਾਮਕਾਲਿਕਂ, ਨ ਨੁ ਖੋ ਕਪ੍ਪਤਿ? ਕਪ੍ਪਤਿ ਨੁ ਖੋ ਯਾਵਕਾਲਿਕੇਨ ਸਤ੍ਤਾਹਕਾਲਿਕਂ, ਨ ਨੁ ਖੋ ਕਪ੍ਪਤਿ? ਕਪ੍ਪਤਿ ਨੁ ਖੋ ਯਾਵਕਾਲਿਕੇਨ ਯਾਵਜੀਵਿਕਂ, ਨ ਨੁ ਖੋ ਕਪ੍ਪਤਿ? ਕਪ੍ਪਤਿ ਨੁ ਖੋ ਯਾਮਕਾਲਿਕੇਨ ਸਤ੍ਤਾਹਕਾਲਿਕਂ, ਨ ਨੁ ਖੋ ਕਪ੍ਪਤਿ? ਕਪ੍ਪਤਿ ਨੁ ਖੋ ਯਾਮਕਾਲਿਕੇਨ ਯਾਵਜੀਵਿਕਂ, ਨ ਨੁ ਖੋ ਕਪ੍ਪਤਿ? ਕਪ੍ਪਤਿ ਨੁ ਖੋ ਸਤ੍ਤਾਹਕਾਲਿਕੇਨ ਯਾਵਜੀਵਿਕਂ, ਨ ਨੁ ਖੋ ਕਪ੍ਪਤੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਯਾਵਕਾਲਿਕੇਨ, ਭਿਕ੍ਖਵੇ, ਯਾਮਕਾਲਿਕਂ, ਤਦਹੁ ਪਟਿਗ੍ਗਹਿਤਂ ਕਾਲੇ ਕਪ੍ਪਤਿ, ਵਿਕਾਲੇ ਨ ਕਪ੍ਪਤਿ. ਯਾਵਕਾਲਿਕੇਨ, ਭਿਕ੍ਖਵੇ, ਸਤ੍ਤਾਹਕਾਲਿਕਂ, ਤਦਹੁ ਪਟਿਗ੍ਗਹਿਤਂ ਕਾਲੇ ਕਪ੍ਪਤਿ, ਵਿਕਾਲੇ ਨ ਕਪ੍ਪਤਿ. ਯਾਵਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ, ਤਦਹੁ ਪਟਿਗ੍ਗਹਿਤਂ ਕਾਲੇ ਕਪ੍ਪਤਿ, ਵਿਕਾਲੇ ਨ ਕਪ੍ਪਤਿ. ਯਾਮਕਾਲਿਕੇਨ, ਭਿਕ੍ਖਵੇ, ਸਤ੍ਤਾਹਕਾਲਿਕਂ, ਤਦਹੁ ਪਟਿਗ੍ਗਹਿਤਂ ਯਾਮੇ ਕਪ੍ਪਤਿ, ਯਾਮਾਤਿਕ੍ਕਨ੍ਤੇ ਨ ਕਪ੍ਪਤਿ. ਯਾਮਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ, ਤਦਹੁ ਪਟਿਗ੍ਗਹਿਤਂ ਯਾਮੇ ਕਪ੍ਪਤਿ, ਯਾਮਾਤਿਕ੍ਕਨ੍ਤੇ ਨ ਕਪ੍ਪਤਿ. ਸਤ੍ਤਾਹਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ ਪਟਿਗ੍ਗਹਿਤਂ, ਸਤ੍ਤਾਹਂ ਕਪ੍ਪਤਿ, ਸਤ੍ਤਾਹਾਤਿਕ੍ਕਨ੍ਤੇ ਨ ਕਪ੍ਪਤੀ’’ਤਿ.

ਚਤੁਮਹਾਪਦੇਸਕਥਾ ਨਿਟ੍ਠਿਤਾ.

ਭੇਸਜ੍ਜਕ੍ਖਨ੍ਧਕੋ ਛਟ੍ਠੋ.

੧੮੬. ਤਸ੍ਸੁਦ੍ਦਾਨਂ

ਸਾਰਦਿਕੇ ਵਿਕਾਲੇਪਿ, ਵਸਂ ਮੂਲੇ ਪਿਟ੍ਠੇਹਿ ਚ;

ਕਸਾਵੇਹਿ ਪਣ੍ਣਂ ਫਲਂ, ਜਤੁ ਲੋਣਂ ਛਕਣਞ੍ਚ.

ਚੁਣ੍ਣਂ ਚਾਲਿਨਿ ਮਂਸਞ੍ਚ, ਅਞ੍ਜਨਂ ਉਪਪਿਸਨੀ [ਉਪਪਿਂ ਸਨੀ (ਸੀ.), ਉਪਪਿਂ ਸਨਂ (ਸ੍ਯਾ.)];

ਅਞ੍ਜਨੀ ਉਚ੍ਚਾਪਾਰੁਤਾ, ਸਲਾਕਾ ਸਲਾਕਠਾਨਿਂ [ਸਲਾਕੋਧਨੀ (ਸੀ. ਸ੍ਯਾ.)].

ਥਵਿਕਂਸਬਦ੍ਧਕਂ ਸੁਤ੍ਤਂ, ਮੁਦ੍ਧਨਿਤੇਲਨਤ੍ਥੁ ਚ;

ਨਤ੍ਥੁਕਰਣੀ ਧੂਮਞ੍ਚ, ਨੇਤ੍ਤਞ੍ਚਾਪਿਧਨਤ੍ਥਵਿ.

ਤੇਲਪਾਕੇਸੁ ਮਜ੍ਜਞ੍ਚ, ਅਤਿਕ੍ਖਿਤ੍ਤਂ ਅਬ੍ਭਞ੍ਜਨਂ;

ਤੁਮ੍ਬਂ ਸੇਦਂ ਸਮ੍ਭਾਰਞ੍ਚ, ਮਹਾ ਭਙ੍ਗੋਦਕਂ ਤਥਾ.

ਦਕਕੋਟ੍ਠਂ ਲੋਹਿਤਞ੍ਚ, ਵਿਸਾਣਂ ਪਾਦਬ੍ਭਞ੍ਜਨਂ;

ਪਜ੍ਜਂ ਸਤ੍ਥਂ ਕਸਾਵਞ੍ਚ, ਤਿਲਕਕ੍ਕਂ ਕਬਲ਼ਿਕਂ.

ਚੋਲ਼ਂ ਸਾਸਪਕੁਟ੍ਟਞ੍ਚ, ਧੂਮ ਸਕ੍ਖਰਿਕਾਯ ਚ;

ਵਣਤੇਲਂ ਵਿਕਾਸਿਕਂ, ਵਿਕਟਞ੍ਚ ਪਟਿਗ੍ਗਹਂ.

ਗੂਥਂ ਕਰੋਨ੍ਤੋ ਲੋਲ਼ਿਞ੍ਚ, ਖਾਰਂ ਮੁਤ੍ਤਹਰੀਤਕਂ;

ਗਨ੍ਧਾ ਵਿਰੇਚਨਞ੍ਚੇਵ, ਅਚ੍ਛਾਕਟਂ ਕਟਾਕਟਂ.

ਪਟਿਚ੍ਛਾਦਨਿ ਪਬ੍ਭਾਰਾ, ਆਰਾਮ ਸਤ੍ਤਾਹੇਨ ਚ;

ਗੁਲ਼ਂ ਮੁਗ੍ਗਂ ਸੋਵੀਰਞ੍ਚ, ਸਾਮਂਪਾਕਾ ਪੁਨਾਪਚੇ.

ਪੁਨਾਨੁਞ੍ਞਾਸਿ ਦੁਬ੍ਭਿਕ੍ਖੇ, ਫਲਞ੍ਚ ਤਿਲਖਾਦਨੀ;

ਪੁਰੇਭਤ੍ਤਂ ਕਾਯਡਾਹੋ, ਨਿਬ੍ਬਤ੍ਤਞ੍ਚ ਭਗਨ੍ਦਲਂ.

ਵਤ੍ਥਿਕਮ੍ਮਞ੍ਚ ਸੁਪ੍ਪਿਞ੍ਚ, ਮਨੁਸ੍ਸਮਂਸਮੇਵ ਚ;

ਹਤ੍ਥਿਅਸ੍ਸਾ ਸੁਨਖੋ ਚ, ਅਹਿ ਸੀਹਞ੍ਚ ਦੀਪਿਕਂ [ਹਤ੍ਥਿਅਸ੍ਸਸੁਨਖਾਹਿ, ਸੀਹਬ੍ਯਗ੍ਘਞ੍ਚ ਦੀਪਿਕਂ (ਸੀ.)].

ਅਚ੍ਛਤਰਚ੍ਛਮਂਸਞ੍ਚ, ਪਟਿਪਾਟਿ ਚ ਯਾਗੁ ਚ;

ਤਰੁਣਂ ਅਞ੍ਞਤ੍ਰ ਗੁਲ਼ਂ, ਸੁਨਿਧਾਵਸਥਾਗਾਰਂ.

ਗਙ੍ਗਾ ਕੋਟਿਸਚ੍ਚਕਥਾ, ਅਮ੍ਬਪਾਲੀ ਚ ਲਿਚ੍ਛਵੀ;

ਉਦ੍ਦਿਸ੍ਸ ਕਤਂ ਸੁਭਿਕ੍ਖਂ, ਪੁਨਦੇਵ ਪਟਿਕ੍ਖਿਪਿ.

ਮੇਘੋ ਯਸੋ ਮੇਣ੍ਡਕੋ, ਚ ਗੋਰਸਂ ਪਾਥੇਯ੍ਯਕੇਨ ਚ;

ਕੇਣਿ ਅਮ੍ਬੋ ਜਮ੍ਬੁ ਚੋਚ, ਮੋਚਮਧੁਮੁਦ੍ਦਿਕਸਾਲੁਕਂ.

ਫਾਰੁਸਕਾ ਡਾਕਪਿਟ੍ਠਂ, ਆਤੁਮਾਯਂ ਨਹਾਪਿਤੋ;

ਸਾਵਤ੍ਥਿਯਂ ਫਲਂ ਬੀਜਂ, ਕਿਸ੍ਮਿਂ ਠਾਨੇ ਚ ਕਾਲਿਕੇਤਿ.

ਇਮਮ੍ਹਿ ਖਨ੍ਧਕੇ ਵਤ੍ਥੂ ਏਕਸਤਂ ਛਵਤ੍ਥੁ.

ਭੇਸਜ੍ਜਕ੍ਖਨ੍ਧਕੋ ਨਿਟ੍ਠਿਤੋ.

੭. ਕਥਿਨਕ੍ਖਨ੍ਧਕੋ

੧੮੭. ਕਥਿਨਾਨੁਜਾਨਨਾ

੩੦੬. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਤਿਂਸਮਤ੍ਤਾ ਪਾਵੇਯ੍ਯਕਾ [ਪਾਠੇਯ੍ਯਕਾ (ਸੀ. ਸ੍ਯਾ.)] ਭਿਕ੍ਖੂ, ਸਬ੍ਬੇ ਆਰਞ੍ਞਿਕਾ ਸਬ੍ਬੇ ਪਿਣ੍ਡਪਾਤਿਕਾ ਸਬ੍ਬੇ ਪਂਸੁਕੂਲਿਕਾ ਸਬ੍ਬੇ ਤੇਚੀਵਰਿਕਾ ਸਾਵਤ੍ਥਿਂ ਆਗਚ੍ਛਨ੍ਤਾ ਭਗਵਨ੍ਤਂ ਦਸ੍ਸਨਾਯ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਨਾਸਕ੍ਖਿਂਸੁ ਸਾਵਤ੍ਥਿਯਂ ਵਸ੍ਸੂਪਨਾਯਿਕਂ ਸਮ੍ਭਾਵੇਤੁਂ; ਅਨ੍ਤਰਾਮਗ੍ਗੇ ਸਾਕੇਤੇ ਵਸ੍ਸਂ ਉਪਗਚ੍ਛਿਂਸੁ. ਤੇ ਉਕ੍ਕਣ੍ਠਿਤਰੂਪਾ ਵਸ੍ਸਂ ਵਸਿਂਸੁ – ਆਸਨ੍ਨੇਵ ਨੋ ਭਗਵਾ ਵਿਹਰਤਿ ਇਤੋ ਛਸੁ ਯੋਜਨੇਸੁ, ਨ ਚ ਮਯਂ ਲਭਾਮ ਭਗਵਨ੍ਤਂ ਦਸ੍ਸਨਾਯਾਤਿ. ਅਥ ਖੋ ਤੇ ਭਿਕ੍ਖੂ ਵਸ੍ਸਂਵੁਟ੍ਠਾ, ਤੇਮਾਸਚ੍ਚਯੇਨ ਕਤਾਯ ਪਵਾਰਣਾਯ, ਦੇਵੇ ਵਸ੍ਸਨ੍ਤੇ, ਉਦਕਸਙ੍ਗਹੇ ਉਦਕਚਿਕ੍ਖਲ੍ਲੇ ਓਕਪੁਣ੍ਣੇਹਿ ਚੀਵਰੇਹਿ ਕਿਲਨ੍ਤਰੂਪਾ ਯੇਨ ਸਾਵਤ੍ਥਿ ਜੇਤਵਨਂ ਅਨਾਥਪਿਣ੍ਡਿਕਸ੍ਸ ਆਰਾਮੋ, ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸਿਤ੍ਥ, ਨ ਚ ਪਿਣ੍ਡਕੇਨ ਕਿਲਮਿਤ੍ਥਾ’’ਤਿ? ‘‘ਖਮਨੀਯਂ, ਭਗਵਾ; ਯਾਪਨੀਯਂ, ਭਗਵਾ; ਸਮਗ੍ਗਾ ਚ ਮਯਂ, ਭਨ੍ਤੇ, ਸਮ੍ਮੋਦਮਾਨਾ ਅਵਿਵਦਮਾਨਾ ਵਸ੍ਸਂ ਵਸਿਮ੍ਹਾ, ਨ ਚ ਪਿਣ੍ਡਕੇਨ ਕਿਲਮਿਮ੍ਹਾ. ਇਧ ਮਯਂ, ਭਨ੍ਤੇ, ਤਿਂਸਮਤ੍ਤਾ ਪਾਵੇਯ੍ਯਕਾ ਭਿਕ੍ਖੂ ਸਾਵਤ੍ਥਿਂ ਆਗਚ੍ਛਨ੍ਤਾ ਭਗਵਨ੍ਤਂ ਦਸ੍ਸਨਾਯ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਨਾਸਕ੍ਖਿਮ੍ਹਾ ਸਾਵਤ੍ਥਿਯਂ ਵਸ੍ਸੂਪਨਾਯਿਕਂ ਸਮ੍ਭਾਵੇਤੁਂ, ਅਨ੍ਤਰਾਮਗ੍ਗੇ ਸਾਕੇਤੇ ਵਸ੍ਸਂ ਉਪਗਚ੍ਛਿਮ੍ਹਾ. ਤੇ ਮਯਂ, ਭਨ੍ਤੇ, ਉਕ੍ਕਣ੍ਠਿਤਰੂਪਾ ਵਸ੍ਸਂ ਵਸਿਮ੍ਹਾ – ‘ਆਸਨ੍ਨੇਵ ਨੋ ਭਗਵਾ ਵਿਹਰਤਿ ਇਤੋ ਛਸੁ ਯੋਜਨੇਸੁ, ਨ ਚ ਮਯਂ ਲਭਾਮ ਭਗਵਨ੍ਤਂ ਦਸ੍ਸਨਾਯਾ’ਤਿ. ਅਥ ਖੋ ਮਯਂ, ਭਨ੍ਤੇ, ਵਸ੍ਸਂਵੁਟ੍ਠਾ, ਤੇਮਾਸਚ੍ਚਯੇਨ ਕਤਾਯ ਪਵਾਰਣਾਯ, ਦੇਵੇ ਵਸ੍ਸਨ੍ਤੇ, ਉਦਕਸਙ੍ਗਹੇ ਉਦਕਚਿਕ੍ਖਲ੍ਲੇ ਓਕਪੁਣ੍ਣੇਹਿ ਚੀਵਰੇਹਿ ਕਿਲਨ੍ਤਰੂਪਾ ਅਦ੍ਧਾਨਂ ਆਗਤਾਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਕਥਿਨਂ [ਕਠਿਨਂ (ਸੀ. ਸ੍ਯਾ.)] ਅਤ੍ਥਰਿਤੁਂ. ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਪਞ੍ਚ ਕਪ੍ਪਿਸ੍ਸਨ੍ਤਿ – ਅਨਾਮਨ੍ਤਚਾਰੋ, ਅਸਮਾਦਾਨਚਾਰੋ, ਗਣਭੋਜਨਂ, ਯਾਵਦਤ੍ਥਚੀਵਰਂ, ਯੋ ਚ ਤਤ੍ਥ ਚੀਵਰੁਪ੍ਪਾਦੋ ਸੋ ਨੇਸਂ ਭਵਿਸ੍ਸਤੀਤਿ. ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਇਮਾਨਿ ਪਞ੍ਚ ਕਪ੍ਪਿਸ੍ਸਨ੍ਤਿ. ਏਵਞ੍ਚ ਪਨ, ਭਿਕ੍ਖਵੇ, ਕਥਿਨਂ ਅਤ੍ਥਰਿਤਬ੍ਬਂ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੩੦੭. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯ ਕਥਿਨਂ ਅਤ੍ਥਰਿਤੁਂ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ. ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦੇਤਿ ਕਥਿਨਂ ਅਤ੍ਥਰਿਤੁਂ. ਯਸ੍ਸਾਯਸ੍ਮਤੋ ਖਮਤਿ ਇਮਸ੍ਸ ਕਥਿਨਦੁਸ੍ਸਸ੍ਸ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਾਨਂ ਕਥਿਨਂ ਅਤ੍ਥਰਿਤੁਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨਂ ਇਦਂ ਸਙ੍ਘੇਨ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕਥਿਨਂ ਅਤ੍ਥਰਿਤੁਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੩੦੮. ‘‘ਏਵਂ ਖੋ, ਭਿਕ੍ਖਵੇ, ਅਤ੍ਥਤਂ ਹੋਤਿ ਕਥਿਨਂ, ਏਵਂ ਅਨਤ੍ਥਤਂ. ਕਥਞ੍ਚ ਪਨ, ਭਿਕ੍ਖਵੇ, ਅਨਤ੍ਥਤਂ ਹੋਤਿ ਕਥਿਨਂ? ਨ ਉਲ੍ਲਿਖਿਤਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਧੋਵਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਚੀਵਰਵਿਚਾਰਣਮਤ੍ਤੇਨ [ਨ ਗਣ੍ਟੁਸਕਰਣਮਤ੍ਤੇਨ (ਕ.)] ਅਤ੍ਥਤਂ ਹੋਤਿ ਕਥਿਨਂ, ਨ ਛੇਦਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਬਨ੍ਧਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਓਵਟ੍ਟਿਯਕਰਣਮਤ੍ਤੇਨ [ਨ ਓਵਟ੍ਟੇਯ੍ਯਕਰਣਮਤ੍ਤੇਨ (ਸੀ. ਸ੍ਯਾ.), ਨ ਓਵਦੇਯ੍ਯਕਰਣਮਤ੍ਤੇਨ (ਕ.)] ਅਤ੍ਥਤਂ ਹੋਤਿ ਕਥਿਨਂ, ਨ ਕਣ੍ਡੁਸਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਦਲ਼੍ਹੀਕਮ੍ਮਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਨੁਵਾਤਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਪਰਿਭਣ੍ਡਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਓਵਦ੍ਧੇਯ੍ਯਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਕਮ੍ਬਲਮਦ੍ਦਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਨਿਮਿਤ੍ਤਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਪਰਿਕਥਾਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਕੁਕ੍ਕੁਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਸਨ੍ਨਿਧਿਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਨਿਸ੍ਸਗ੍ਗਿਯੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਕਪ੍ਪਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਸਙ੍ਘਾਟਿਯਾ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਉਤ੍ਤਰਾਸਙ੍ਗੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਅਨ੍ਤਰਵਾਸਕੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਪਞ੍ਚਕੇਨ ਵਾ ਅਤਿਰੇਕਪਞ੍ਚਕੇਨ ਵਾ ਤਦਹੇਵ ਸਞ੍ਛਿਨ੍ਨੇਨ ਸਮਣ੍ਡਲੀਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਪੁਗ੍ਗਲਸ੍ਸ ਅਤ੍ਥਾਰਾ ਅਤ੍ਥਤਂ ਹੋਤਿ ਕਥਿਨਂ; ਸਮ੍ਮਾ ਚੇਵ ਅਤ੍ਥਤਂ ਹੋਤਿ ਕਥਿਨਂ, ਤਞ੍ਚੇ ਨਿਸ੍ਸੀਮਟ੍ਠੋ ਅਨੁਮੋਦਤਿ, ਏਵਮ੍ਪਿ ਅਨਤ੍ਥਤਂ ਹੋਤਿ ਕਥਿਨਂ. ਏਵਂ ਖੋ, ਭਿਕ੍ਖਵੇ, ਅਨਤ੍ਥਤਂ ਹੋਤਿ ਕਥਿਨਂ.

੩੦੯. ‘‘ਕਥਞ੍ਚ, ਭਿਕ੍ਖਵੇ, ਅਤ੍ਥਤਂ ਹੋਤਿ ਕਥਿਨਂ? ਅਹਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਹਤਕਪ੍ਪੇਨ ਅਤ੍ਥਤਂ ਹੋਤਿ ਕਥਿਨਂ, ਪਿਲੋਤਿਕਾਯ ਅਤ੍ਥਤਂ ਹੋਤਿ ਕਥਿਨਂ, ਪਂਸੁਕੂਲੇਨ ਅਤ੍ਥਤਂ ਹੋਤਿ ਕਥਿਨਂ, ਪਾਪਣਿਕੇਨ ਅਤ੍ਥਤਂ ਹੋਤਿ ਕਥਿਨਂ, ਅਨਿਮਿਤ੍ਤਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਪਰਿਕਥਾਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਕੁਕ੍ਕੁਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਸਨ੍ਨਿਧਿਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਨਿਸ੍ਸਗ੍ਗਿਯੇਨ ਅਤ੍ਥਤਂ ਹੋਤਿ ਕਥਿਨਂ, ਕਪ੍ਪਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਸਙ੍ਘਾਟਿਯਾ ਅਤ੍ਥਤਂ ਹੋਤਿ ਕਥਿਨਂ, ਉਤ੍ਤਰਾਸਙ੍ਗੇਨ ਅਤ੍ਥਤਂ ਹੋਤਿ ਕਥਿਨਂ, ਅਨ੍ਤਰਵਾਸਕੇਨ ਅਤ੍ਥਤਂ ਹੋਤਿ ਕਥਿਨਂ, ਪਞ੍ਚਕੇਨ ਵਾ ਅਤਿਰੇਕਪਞ੍ਚਕੇਨ ਵਾ ਤਦਹੇਵ ਸਞ੍ਛਿਨ੍ਨੇਨ ਸਮਣ੍ਡਲੀਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਪੁਗ੍ਗਲਸ੍ਸ ਅਤ੍ਥਾਰਾ ਅਤ੍ਥਤਂ ਹੋਤਿ ਕਥਿਨਂ; ਸਮ੍ਮਾ ਚੇ ਅਤ੍ਥਤਂ ਹੋਤਿ ਕਥਿਨਂ, ਤਞ੍ਚੇ ਸੀਮਟ੍ਠੋ ਅਨੁਮੋਦਤਿ, ਏਵਮ੍ਪਿ ਅਤ੍ਥਤਂ ਹੋਤਿ ਕਥਿਨਂ. ਏਵਂ ਖੋ, ਭਿਕ੍ਖਵੇ, ਅਤ੍ਥਤਂ ਹੋਤਿ ਕਥਿਨਂ.

੩੧੦. ‘‘ਕਥਞ੍ਚ, ਭਿਕ੍ਖਵੇ, ਉਬ੍ਭਤਂ ਹੋਤਿ ਕਥਿਨਂ? ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ ਕਥਿਨਸ੍ਸ ਉਬ੍ਭਾਰਾਯ – ਪਕ੍ਕਮਨਨ੍ਤਿਕਾ, ਨਿਟ੍ਠਾਨਨ੍ਤਿਕਾ, ਸਨ੍ਨਿਟ੍ਠਾਨਨ੍ਤਿਕਾ, ਨਾਸਨਨ੍ਤਿਕਾ, ਸਵਨਨ੍ਤਿਕਾ, ਆਸਾਵਚ੍ਛੇਦਿਕਾ, ਸੀਮਾਤਿਕ੍ਕਨ੍ਤਿਕਾ, ਸਹੁਬ੍ਭਾਰਾ’’ਤਿ [ਸਉਬ੍ਭਾਰਾਤਿ (ਕ.)].

ਕਥਿਨਾਨੁਜਾਨਨਾ ਨਿਟ੍ਠਿਤਾ.

੧੮੮. ਆਦਾਯਸਤ੍ਤਕਂ

੩੧੧. ਭਿਕ੍ਖੁ ਅਤ੍ਥਤਕਥਿਨੋ ਕਤਚੀਵਰਂ ਆਦਾਯ ਪਕ੍ਕਮਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਪਕ੍ਕਮਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ – ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ਸੁਣਾਤਿ ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਵਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ – ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ – ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ – ਬਹਿਦ੍ਧਾ ਕਥਿਨੁਦ੍ਧਾਰਂ ਵੀਤਿਨਾਮੇਤਿ. ਤਸ੍ਸ ਭਿਕ੍ਖੁਨੋ ਸੀਮਾਤਿਕ੍ਕਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ – ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ – ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ – ਸਮ੍ਭੁਣਾਤਿ ਕਥਿਨੁਦ੍ਧਾਰਂ. ਤਸ੍ਸ ਭਿਕ੍ਖੁਨੋ ਸਹ ਭਿਕ੍ਖੂਹਿ ਕਥਿਨੁਦ੍ਧਾਰੋ.

ਆਦਾਯਸਤ੍ਤਕਂ ਨਿਟ੍ਠਿਤਂ […ਦੁਤਿਯਂ ਨਿਟ੍ਠਿਤਂ (ਕ.)].

੧੮੯. ਸਮਾਦਾਯਸਤ੍ਤਕਂ

੩੧੨. ਭਿਕ੍ਖੁ ਅਤ੍ਥਤਕਥਿਨੋ ਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਪਕ੍ਕਮਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਸਮਾਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਸਮਾਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਸਮਾਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਸਮਾਦਾਯ ਪਕ੍ਕਮਤਿ – ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ਸੁਣਾਤਿ – ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਵਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਸਮਾਦਾਯ ਪਕ੍ਕਮਤਿ – ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ – ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ – ਬਹਿਦ੍ਧਾ ਕਥਿਨੁਦ੍ਧਾਰਂ ਵੀਤਿਨਾਮੇਤਿ. ਤਸ੍ਸ ਭਿਕ੍ਖੁਨੋ ਸੀਮਾਤਿਕ੍ਕਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਸਮਾਦਾਯ ਪਕ੍ਕਮਤਿ – ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ – ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ – ਸਮ੍ਭੁਣਾਤਿ ਕਥਿਨੁਦ੍ਧਾਰਂ. ਤਸ੍ਸ ਭਿਕ੍ਖੁਨੋ ਸਹ ਭਿਕ੍ਖੂਹਿ ਕਥਿਨੁਦ੍ਧਾਰੋ.

ਸਮਾਦਾਯਸਤ੍ਤਕਂ ਨਿਟ੍ਠਿਤਂ.

੧੯੦. ਆਦਾਯਛਕ੍ਕਂ

੩੧੩. ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਆਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਆਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਆਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸਂ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਆਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ਸੁਣਾਤਿ – ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਵਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਆਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ ਬਹਿਦ੍ਧਾ ਕਥਿਨੁਦ੍ਧਾਰਂ ਵੀਤਿਨਾਮੇਤਿ. ਤਸ੍ਸ ਭਿਕ੍ਖੁਨੋ ਸੀਮਾਤਿਕ੍ਕਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਆਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ ਸਮ੍ਭੁਣਾਤਿ ਕਥਿਨੁਦ੍ਧਾਰਂ. ਤਸ੍ਸ ਭਿਕ੍ਖੁਨੋ ਸਹ ਭਿਕ੍ਖੂਹਿ ਕਥਿਨੁਦ੍ਧਾਰੋ.

ਆਦਾਯਛਕ੍ਕਂ ਨਿਟ੍ਠਿਤਂ.

੧੯੧. ਸਮਾਦਾਯਛਕ੍ਕਂ

੩੧੪. ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ਸੁਣਾਤਿ – ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਵਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ ਬਹਿਦ੍ਧਾ ਕਥਿਨੁਦ੍ਧਾਰਂ ਵੀਤਿਨਾਮੇਤਿ. ਤਸ੍ਸ ਭਿਕ੍ਖੁਨੋ ਸੀਮਾਤਿਕ੍ਕਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ ਸਮ੍ਭੁਣਾਤਿ ਕਥਿਨੁਦ੍ਧਾਰਂ. ਤਸ੍ਸ ਭਿਕ੍ਖੁਨੋ ਸਹ ਭਿਕ੍ਖੂਹਿ ਕਥਿਨੁਦ੍ਧਾਰੋ.

ਸਮਾਦਾਯਛਕ੍ਕਂ ਨਿਟ੍ਠਿਤਂ.

੧੯੨. ਆਦਾਯਪਨ੍ਨਰਸਕਂ

੩੧੫. ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ –

‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਤਿਕਂ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਤਿਕਂ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਤਿਕਂ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ਸੁਣਾਤਿ – ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਵਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ – ਬਹਿਦ੍ਧਾ ਕਥਿਨੁਦ੍ਧਾਰਂ ਵੀਤਿਨਾਮੇਤਿ. ਤਸ੍ਸ ਭਿਕ੍ਖੁਨੋ ਸੀਮਾਤਿਕ੍ਕਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਆਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ – ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ ਸਮ੍ਭੁਣਾਤਿ ਕਥਿਨੁਦ੍ਧਾਰਂ. ਤਸ੍ਸ ਭਿਕ੍ਖੁਨੋ ਸਹ ਭਿਕ੍ਖੂਹਿ ਕਥਿਨੁਦ੍ਧਾਰੋ.

ਛਕ੍ਕਂ.

ਆਦਾਯਪਨ੍ਨਰਸਕਂ ਨਿਟ੍ਠਿਤਂ.

੧੯੩. ਸਮਾਦਾਯਪਨ੍ਨਰਸਕਾਦਿ

੩੧੬. ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਂ ਸਮਾਦਾਯ ਪਕ੍ਕਮਤਿ…ਪੇ….

(ਆਦਾਯਵਾਰਸਦਿਸਂ ਏਵਂ ਵਿਤ੍ਥਾਰੇਤਬ੍ਬਂ.)

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਆਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ…ਪੇ….

(ਸਮਾਦਾਯਵਾਰਸਦਿਸਂ ਏਵਂ ਵਿਤ੍ਥਾਰੇਤਬ੍ਬਂ.)

ਸਮਾਦਾਯਪਨ੍ਨਰਸਕਾਦਿ ਨਿਟ੍ਠਿਤਾ.

੧੯੪. ਵਿਪ੍ਪਕਤਸਮਾਦਾਯਪਨ੍ਨਰਸਕਂ

੩੧੭. ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਤਿਕਂ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਤਿਕਂ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਤਿਕਂ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ਸੁਣਾਤਿ – ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਵਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ – ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ ਬਹਿਦ੍ਧਾ ਕਥਿਨੁਦ੍ਧਾਰਂ ਵੀਤਿਨਾਮੇਤਿ. ਤਸ੍ਸ ਭਿਕ੍ਖੁਨੋ ਸੀਮਾਤਿਕ੍ਕਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ ਸਮ੍ਭੁਣਾਤਿ ਕਥਿਨੁਦ੍ਧਾਰਂ. ਤਸ੍ਸ ਭਿਕ੍ਖੁਨੋ ਸਹ ਭਿਕ੍ਖੂਹਿ ਕਥਿਨੁਦ੍ਧਾਰੋ.

ਛਕ੍ਕਂ.

ਵਿਪ੍ਪਕਤਸਮਾਦਾਯਪਨ੍ਨਰਸਕਂ ਨਿਟ੍ਠਿਤਂ.

ਆਦਾਯਭਾਣਵਾਰੋ.

੧੯੫. ਅਨਾਸਾਦੋਲ਼ਸਕਂ

੩੧੮. ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਤਸ੍ਸ ਸਾ ਚੀਵਰਾਸਾ ਉਪਚ੍ਛਿਜ੍ਜਤਿ. ਤਸ੍ਸ ਭਿਕ੍ਖੁਨੋ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਤਸ੍ਸ ਸਾ ਚੀਵਰਾਸਾ ਉਪਚ੍ਛਿਜ੍ਜਤਿ. ਤਸ੍ਸ ਭਿਕ੍ਖੁਨੋ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਤਸ੍ਸ ਸਾ ਚੀਵਰਾਸਾ ਉਪਚ੍ਛਿਜ੍ਜਤਿ. ਤਸ੍ਸ ਭਿਕ੍ਖੁਨੋ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ.

ਅਨਾਸਾਦੋਲ਼ਸਕਂ [ਅਨਾਸਾਦ੍ਵਾਦਸਕਂ (ਸੀ.)] ਨਿਟ੍ਠਿਤਂ.

੧੯੬. ਆਸਾਦੋਲ਼ਸਕਂ

੩੧੯. ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਆਸਾਯ ਲਭਤਿ, ਅਨਾਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਆਸਾਯ ਲਭਤਿ, ਅਨਾਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਆਸਾਯ ਲਭਤਿ, ਅਨਾਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਤਸ੍ਸ ਸਾ ਚੀਵਰਾਸਾ ਉਪਚ੍ਛਿਜ੍ਜਤਿ. ਤਸ੍ਸ ਭਿਕ੍ਖੁਨੋ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਸੁਣਾਤਿ – ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਏਵਂ ਹੋਤਿ – ‘‘ਯਤੋ ਤਸ੍ਮਿਂ ਆਵਾਸੇ ਉਬ੍ਭਤਂ ਕਥਿਨਂ, ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਆਸਾਯ ਲਭਤਿ, ਅਨਾਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਸੁਣਾਤਿ – ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਏਵਂ ਹੋਤਿ – ‘‘ਯਤੋ ਤਸ੍ਮਿਂ ਆਵਾਸੇ ਉਬ੍ਭਤਂ ਕਥਿਨਂ, ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਆਸਾਯ ਲਭਤਿ, ਅਨਾਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਸੁਣਾਤਿ – ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਏਵਂ ਹੋਤਿ – ‘‘ਯਤੋ ਤਸ੍ਮਿਂ ਆਵਾਸੇ ਉਬ੍ਭਤਂ ਕਥਿਨਂ, ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਆਸਾਯ ਲਭਤਿ, ਅਨਾਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਸੁਣਾਤਿ – ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਏਵਂ ਹੋਤਿ – ‘‘ਯਤੋ ਤਸ੍ਮਿਂ ਆਵਾਸੇ ਉਬ੍ਭਤਂ ਕਥਿਨਂ, ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਤਸ੍ਸ ਸਾ ਚੀਵਰਾਸਾ ਉਪਚ੍ਛਿਜ੍ਜਤਿ. ਤਸ੍ਸ ਭਿਕ੍ਖੁਨੋ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਆਸਾਯ ਲਭਤਿ, ਅਨਾਸਾਯ ਨ ਲਭਤਿ. ਸੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ਸੁਣਾਤਿ – ‘‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਵਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਤਸ੍ਸ ਸਾ ਚੀਵਰਾਸਾ ਉਪਚ੍ਛਿਜ੍ਜਤਿ. ਤਸ੍ਸ ਭਿਕ੍ਖੁਨੋ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਆਸਾਯ ਲਭਤਿ, ਅਨਾਸਾਯ ਨ ਲਭਤਿ. ਸੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ – ਬਹਿਦ੍ਧਾ ਕਥਿਨੁਦ੍ਧਾਰਂ ਵੀਤਿਨਾਮੇਤਿ. ਤਸ੍ਸ ਭਿਕ੍ਖੁਨੋ ਸੀਮਾਤਿਕ੍ਕਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਚੀਵਰਾਸਾਯ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਆਸਾਯ ਲਭਤਿ, ਅਨਾਸਾਯ ਨ ਲਭਤਿ. ਸੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ – ਸਮ੍ਭੁਣਾਤਿ ਕਥਿਨੁਦ੍ਧਾਰਂ. ਤਸ੍ਸ ਭਿਕ੍ਖੁਨੋ ਸਹ ਭਿਕ੍ਖੂਹਿ ਕਥਿਨੁਦ੍ਧਾਰੋ.

ਆਸਾਦੋਲ਼ਸਕਂ ਨਿਟ੍ਠਿਤਂ.

੧੯੭. ਕਰਣੀਯਦੋਲ਼ਸਕਂ

੩੨੦. ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਤਸ੍ਸ ਸਾ ਚੀਵਰਾਸਾ ਉਪਚ੍ਛਿਜ੍ਜਤਿ. ਤਸ੍ਸ ਭਿਕ੍ਖੁਨੋ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਤਸ੍ਸ ਸਾ ਚੀਵਰਾਸਾ ਉਪਚ੍ਛਿਜ੍ਜਤਿ. ਤਸ੍ਸ ਭਿਕ੍ਖੁਨੋ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਅਨਾਸਾਯ ਲਭਤਿ, ਆਸਾਯ ਨ ਲਭਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਕੇਨਚਿਦੇਵ ਕਰਣੀਯੇਨ ਪਕ੍ਕਮਤਿ ਅਨਧਿਟ੍ਠਿਤੇਨ; ਨੇਵਸ੍ਸ ਹੋਤਿ – ‘‘ਪਚ੍ਚੇਸ੍ਸ’’ਨ੍ਤਿ, ਨ ਪਨਸ੍ਸ ਹੋਤਿ – ‘‘ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਚੀਵਰਾਸਾ ਉਪ੍ਪਜ੍ਜਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਾਸਂ ਪਯਿਰੁਪਾਸਿਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਾਸਂ ਪਯਿਰੁਪਾਸਤਿ. ਤਸ੍ਸ ਸਾ ਚੀਵਰਾਸਾ ਉਪਚ੍ਛਿਜ੍ਜਤਿ. ਤਸ੍ਸ ਭਿਕ੍ਖੁਨੋ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ.

ਕਰਣੀਯਦੋਲ਼ਸਕਂ ਨਿਟ੍ਠਿਤਂ.

੧੯੮. ਅਪਵਿਲਾਯਨਨਵਕਂ

੩੨੧. ਭਿਕ੍ਖੁ ਅਤ੍ਥਤਕਥਿਨੋ ਦਿਸਂਗਮਿਕੋ ਪਕ੍ਕਮਤਿ ਚੀਵਰਪਟਿਵੀਸਂ ਅਪਵਿਲਾਯਮਾਨੋ [ਅਪਵਿਨਯਮਾਨੋ (ਸੀ.), ਅਪਚਿਨਯਮਾਨੋ (ਕ.)]. ਤਮੇਨਂ ਦਿਸਙ੍ਗਤਂ ਭਿਕ੍ਖੂ ਪੁਚ੍ਛਨ੍ਤਿ – ‘‘ਕਹਂ ਤ੍ਵਂ, ਆਵੁਸੋ, ਵਸ੍ਸਂਵੁਟ੍ਠੋ, ਕਤ੍ਥ ਚ ਤੇ ਚੀਵਰਪਟਿਵੀਸੋ’’ਤਿ? ਸੋ ਏਵਂ ਵਦੇਤਿ – ‘‘ਅਮੁਕਸ੍ਮਿਂ ਆਵਾਸੇ ਵਸ੍ਸਂਵੁਟ੍ਠੋਮ੍ਹਿ. ਤਤ੍ਥ ਚ ਮੇ ਚੀਵਰਪਟਿਵੀਸੋ’’ਤਿ. ਤੇ ਏਵਂ ਵਦਨ੍ਤਿ – ‘‘ਗਚ੍ਛਾਵੁਸੋ, ਤਂ ਚੀਵਰਂ ਆਹਰ, ਮਯਂ ਤੇ ਇਧ ਚੀਵਰਂ ਕਰਿਸ੍ਸਾਮਾ’’ਤਿ. ਸੋ ਤਂ ਆਵਾਸਂ ਗਨ੍ਤ੍ਵਾ ਭਿਕ੍ਖੂ ਪੁਚ੍ਛਤਿ – ‘‘ਕਹਂ ਮੇ, ਆਵੁਸੋ, ਚੀਵਰਪਟਿਵੀਸੋ’’ਤਿ? ਤੇ ਏਵਂ ਵਦਨ੍ਤਿ – ‘‘ਅਯਂ ਤੇ, ਆਵੁਸੋ, ਚੀਵਰਪਟਿਵੀਸੋ; ਕਹਂ ਗਮਿਸ੍ਸਸੀ’’ਤਿ? ਸੋ ਏਵਂ ਵਦੇਤਿ – ‘‘ਅਮੁਕਂ ਨਾਮ [ਅਮੁਕਞ੍ਚ (ਕ.)] ਆਵਾਸਂ ਗਮਿਸ੍ਸਾਮਿ, ਤਤ੍ਥ ਮੇ ਭਿਕ੍ਖੂ ਚੀਵਰਂ ਕਰਿਸ੍ਸਨ੍ਤੀ’’ਤਿ. ਤੇ ਏਵਂ ਵਦਨ੍ਤਿ – ‘‘ਅਲਂ, ਆਵੁਸੋ, ਮਾ ਅਗਮਾਸਿ. ਮਯਂ ਤੇ ਇਧ ਚੀਵਰਂ ਕਰਿਸ੍ਸਾਮਾ’’ਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਦਿਸਂਗਮਿਕੋ ਪਕ੍ਕਮਤਿ…ਪੇ… ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਦਿਸਂਗਮਿਕੋ ਪਕ੍ਕਮਤਿ…ਪੇ… ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

੩੨੨. ਭਿਕ੍ਖੁ ਅਤ੍ਥਤਕਥਿਨੋ ਦਿਸਂਗਮਿਕੋ ਪਕ੍ਕਮਤਿ ਚੀਵਰਪਟਿਵੀਸਂ ਅਪਵਿਲਾਯਮਾਨੋ. ਤਮੇਨਂ ਦਿਸਂਗਤਂ ਭਿਕ੍ਖੂ ਪੁਚ੍ਛਨ੍ਤਿ – ‘‘ਕਹਂ ਤ੍ਵਂ, ਆਵੁਸੋ, ਵਸ੍ਸਂਵੁਟ੍ਠੋ, ਕਤ੍ਥ ਚ ਤੇ ਚੀਵਰਪਟਿਵੀਸੋ’’ਤਿ? ਸੋ ਏਵਂ ਵਦੇਤਿ – ‘‘ਅਮੁਕਸ੍ਮਿਂ ਆਵਾਸੇ ਵਸ੍ਸਂਵੁਟ੍ਠੋਮ੍ਹਿ, ਤਤ੍ਥ ਚ ਮੇ ਚੀਵਰਪਟਿਵੀਸੋ’’ਤਿ. ਤੇ ਏਵਂ ਵਦਨ੍ਤਿ – ‘‘ਗਚ੍ਛਾਵੁਸੋ, ਤਂ ਚੀਵਰਂ ਆਹਰ, ਮਯਂ ਤੇ ਇਧ ਚੀਵਰਂ ਕਰਿਸ੍ਸਾਮਾ’’ਤਿ. ਸੋ ਤਂ ਆਵਾਸਂ ਗਨ੍ਤ੍ਵਾ ਭਿਕ੍ਖੂ ਪੁਚ੍ਛਤਿ – ‘‘ਕਹਂ ਮੇ, ਆਵੁਸੋ, ਚੀਵਰਪਟਿਵੀਸੋ’’ਤਿ? ਤੇ ਏਵਂ ਵਦਨ੍ਤਿ – ‘‘ਅਯਂ ਤੇ, ਆਵੁਸੋ, ਚੀਵਰਪਟਿਵੀਸੋ’’ਤਿ. ਸੋ ਤਂ ਚੀਵਰਂ ਆਦਾਯ ਤਂ ਆਵਾਸਂ ਗਚ੍ਛਤਿ. ਤਮੇਨਂ ਅਨ੍ਤਰਾਮਗ੍ਗੇ ਭਿਕ੍ਖੂ ਪੁਚ੍ਛਨ੍ਤਿ – ‘‘ਆਵੁਸੋ, ਕਹਂ ਗਮਿਸ੍ਸਸੀ’’ਤਿ? ਸੋ ਏਵਂ ਵਦੇਤਿ – ‘‘ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ, ਤਤ੍ਥ ਮੇ ਭਿਕ੍ਖੂ ਚੀਵਰਂ ਕਰਿਸ੍ਸਨ੍ਤੀ’’ਤਿ. ਤੇ ਏਵਂ ਵਦਨ੍ਤਿ – ‘‘ਅਲਂ, ਆਵੁਸੋ, ਮਾ ਅਗਮਾਸਿ, ਮਯਂ ਤੇ ਇਧ ਚੀਵਰਂ ਕਰਿਸ੍ਸਾਮਾ’’ਤਿ. ਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਦਿਸਂਗਮਿਕੋ ਪਕ੍ਕਮਤਿ ਚੀਵਰਪਟਿਵੀਸਂ ਅਪਵਿਲਾਯਮਾਨੋ. ਤਮੇਨਂ ਦਿਸਂਗਤਂ ਭਿਕ੍ਖੂ ਪੁਚ੍ਛਨ੍ਤਿ – ‘‘ਕਹਂ ਤ੍ਵਂ, ਆਵੁਸੋ, ਵਸ੍ਸਂਵੁਟ੍ਠੋ, ਕਤ੍ਥ ਚ ਤੇ ਚੀਵਰਪਟਿਵੀਸੋ’’ਤਿ? ਸੋ ਏਵਂ ਵਦੇਤਿ – ‘‘ਅਮੁਕਸ੍ਮਿਂ ਆਵਾਸੇ ਵਸ੍ਸਂਵੁਟ੍ਠੋਮ੍ਹਿ, ਤਤ੍ਥ ਚ ਮੇ ਚੀਵਰਪਟਿਵੀਸੋ’’ਤਿ. ਤੇ ਏਵਂ ਵਦਨ੍ਤਿ – ‘‘ਗਚ੍ਛਾਵੁਸੋ, ਤਂ ਚੀਵਰਂ ਆਹਰ, ਮਯਂ ਤੇ ਇਧ ਚੀਵਰਂ ਕਰਿਸ੍ਸਾਮਾ’’ਤਿ. ਸੋ ਤਂ ਆਵਾਸਂ ਗਨ੍ਤ੍ਵਾ ਭਿਕ੍ਖੂ ਪੁਚ੍ਛਤਿ – ‘‘ਕਹਂ ਮੇ, ਆਵੁਸੋ, ਚੀਵਰਪਟਿਵੀਸੋ’’ਤਿ? ਤੇ ਏਵਂ ਵਦਨ੍ਤਿ – ‘‘ਅਯਂ ਤੇ, ਆਵੁਸੋ, ਚੀਵਰਪਟਿਵੀਸੋ’’ਤਿ. ਸੋ ਤਂ ਚੀਵਰਂ ਆਦਾਯ ਤਂ ਆਵਾਸਂ ਗਚ੍ਛਤਿ. ਤਮੇਨਂ ਅਨ੍ਤਰਾਮਗ੍ਗੇ ਭਿਕ੍ਖੂ ਪੁਚ੍ਛਨ੍ਤਿ – ‘‘ਆਵੁਸੋ, ਕਹਂ ਗਮਿਸ੍ਸਸੀ’’ਤਿ? ਸੋ ਏਵਂ ਵਦੇਤਿ – ‘‘ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ, ਤਤ੍ਥ ਮੇ ਭਿਕ੍ਖੂ ਚੀਵਰਂ ਕਰਿਸ੍ਸਨ੍ਤੀ’’ਤਿ. ਤੇ ਏਵਂ ਵਦਨ੍ਤਿ – ‘‘ਅਲਂ, ਆਵੁਸੋ, ਮਾ ਅਗਮਾਸਿ, ਮਯਂ ਤੇ ਇਧ ਚੀਵਰਂ ਕਰਿਸ੍ਸਾਮਾ’’ਤਿ. ਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਦਿਸਂਗਮਿਕੋ ਪਕ੍ਕਮਤਿ…ਪੇ… ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

੩੨੩. ਭਿਕ੍ਖੁ ਅਤ੍ਥਤਕਥਿਨੋ ਦਿਸਂਗਮਿਕੋ ਪਕ੍ਕਮਤਿ ਚੀਵਰਪਟਿਵੀਸਂ ਅਪਵਿਲਾਯਮਾਨੋ. ਤਮੇਨਂ ਦਿਸਂਗਤਂ ਭਿਕ੍ਖੂ ਪੁਚ੍ਛਨ੍ਤਿ – ‘‘ਕਹਂ ਤ੍ਵਂ, ਆਵੁਸੋ, ਵਸ੍ਸਂਵੁਟ੍ਠੋ, ਕਤ੍ਥ ਚ ਤੇ ਚੀਵਰਪਟਿਵੀਸੋ’’ਤਿ? ਸੋ ਏਵਂ ਵਦੇਤਿ – ‘‘ਅਮੁਕਸ੍ਮਿਂ ਆਵਾਸੇ ਵਸ੍ਸਂਵੁਟ੍ਠੋਮ੍ਹਿ, ਤਤ੍ਥ ਚ ਮੇ ਚੀਵਰਪਟਿਵੀਸੋ’’ਤਿ. ਤੇ ਏਵਂ ਵਦਨ੍ਤਿ – ‘‘ਗਚ੍ਛਾਵੁਸੋ, ਤਂ ਚੀਵਰਂ ਆਹਰ, ਮਯਂ ਤੇ ਇਧ ਚੀਵਰਂ ਕਰਿਸ੍ਸਾਮਾ’’ਤਿ. ਸੋ ਤਂ ਆਵਾਸਂ ਗਨ੍ਤ੍ਵਾ ਭਿਕ੍ਖੂ ਪੁਚ੍ਛਤਿ – ‘‘ਕਹਂ ਮੇ, ਆਵੁਸੋ, ਚੀਵਰਪਟਿਵੀਸੋ’’ਤਿ? ਤੇ ਏਵਂ ਵਦਨ੍ਤਿ – ‘‘ਅਯਂ ਤੇ, ਆਵੁਸੋ, ਚੀਵਰਪਟਿਵੀਸੋ’’ਤਿ. ਸੋ ਤਂ ਚੀਵਰਂ ਆਦਾਯ ਤਂ ਆਵਾਸਂ ਗਚ੍ਛਤਿ. ਤਸ੍ਸ ਤਂ ਆਵਾਸਂ ਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਦਿਸਂਗਮਿਕੋ ਪਕ੍ਕਮਤਿ…ਪੇ… ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਦਿਸਂਗਮਿਕੋ ਪਕ੍ਕਮਤਿ…ਪੇ… ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਅਪਵਿਲਾਯਨਨਵਕਂ ਨਿਟ੍ਠਿਤਂ.

੧੯੯. ਫਾਸੁਵਿਹਾਰਪਞ੍ਚਕਂ

੩੨੪. ਭਿਕ੍ਖੁ ਅਤ੍ਥਤਕਥਿਨੋ ਫਾਸੁਵਿਹਾਰਿਕੋ ਚੀਵਰਂ ਆਦਾਯ ਪਕ੍ਕਮਤਿ – ‘‘ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਫਾਸੁਵਿਹਾਰਿਕੋ ਚੀਵਰਂ ਆਦਾਯ ਪਕ੍ਕਮਤਿ – ‘‘ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਭਿਕ੍ਖੁਨੋ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਫਾਸੁਵਿਹਾਰਿਕੋ ਚੀਵਰਂ ਆਦਾਯ ਪਕ੍ਕਮਤਿ – ‘‘ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਪਚ੍ਚੇਸ੍ਸ’’ਨ੍ਤਿ. ਤਸ੍ਸ ਬਹਿਸੀਮਗਤਸ੍ਸ ਏਵਂ ਹੋਤਿ – ‘‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ. ਸੋ ਤਂ ਚੀਵਰਂ ਕਾਰੇਤਿ. ਤਸ੍ਸ ਤਂ ਚੀਵਰਂ ਕਯਿਰਮਾਨਂ ਨਸ੍ਸਤਿ. ਤਸ੍ਸ ਭਿਕ੍ਖੁਨੋ ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਫਾਸੁਵਿਹਾਰਿਕੋ ਚੀਵਰਂ ਆਦਾਯ ਪਕ੍ਕਮਤਿ – ‘‘ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ – ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ ਬਹਿਦ੍ਧਾ ਕਥਿਨੁਦ੍ਧਾਰਂ ਵੀਤਿਨਾਮੇਤਿ. ਤਸ੍ਸ ਭਿਕ੍ਖੁਨੋ ਸੀਮਾਤਿਕ੍ਕਨ੍ਤਿਕੋ ਕਥਿਨੁਦ੍ਧਾਰੋ.

ਭਿਕ੍ਖੁ ਅਤ੍ਥਤਕਥਿਨੋ ਫਾਸੁਵਿਹਾਰਿਕੋ ਚੀਵਰਂ ਆਦਾਯ ਪਕ੍ਕਮਤਿ – ‘‘ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਅਮੁਕਂ ਨਾਮ ਆਵਾਸਂ ਗਮਿਸ੍ਸਾਮਿ; ਤਤ੍ਥ ਮੇ ਫਾਸੁ ਭਵਿਸ੍ਸਤਿ ਵਸਿਸ੍ਸਾਮਿ, ਨੋ ਚੇ ਮੇ ਫਾਸੁ ਭਵਿਸ੍ਸਤਿ, ਪਚ੍ਚੇਸ੍ਸ’’ਨ੍ਤਿ. ਸੋ ਬਹਿਸੀਮਗਤੋ ਤਂ ਚੀਵਰਂ ਕਾਰੇਤਿ. ਸੋ ਕਤਚੀਵਰੋ ‘‘ਪਚ੍ਚੇਸ੍ਸਂ ਪਚ੍ਚੇਸ੍ਸ’’ਨ੍ਤਿ ਸਮ੍ਭੁਣਾਤਿ ਕਥਿਨੁਦ੍ਧਾਰਂ. ਤਸ੍ਸ ਭਿਕ੍ਖੁਨੋ ਸਹ ਭਿਕ੍ਖੂਹਿ ਕਥਿਨੁਦ੍ਧਾਰੋ.

ਫਾਸੁਵਿਹਾਰਪਞ੍ਚਕਂ ਨਿਟ੍ਠਿਤਂ.

੨੦੦. ਪਲਿਬੋਧਾਪਲਿਬੋਧਕਥਾ

੩੨੫. ਦ੍ਵੇਮੇ, ਭਿਕ੍ਖਵੇ, ਕਥਿਨਸ੍ਸ ਪਲਿਬੋਧਾ, ਦ੍ਵੇ ਅਪਲਿਬੋਧਾ. ਕਤਮੇ ਚ, ਭਿਕ੍ਖਵੇ, ਦ੍ਵੇ ਕਥਿਨਸ੍ਸ ਪਲਿਬੋਧਾ? ਆਵਾਸਪਲਿਬੋਧੋ ਚ ਚੀਵਰਪਲਿਬੋਧੋ ਚ. ਕਥਞ੍ਚ, ਭਿਕ੍ਖਵੇ, ਆਵਾਸਪਲਿਬੋਧੋ ਹੋਤਿ? ਇਧ, ਭਿਕ੍ਖਵੇ, ਭਿਕ੍ਖੁ ਵਸਤਿ ਵਾ ਤਸ੍ਮਿਂ ਆਵਾਸੇ, ਸਾਪੇਕ੍ਖੋ ਵਾ ਪਕ੍ਕਮਤਿ ‘‘ਪਚ੍ਚੇਸ੍ਸ’’ਨ੍ਤਿ. ਏਵਂ ਖੋ, ਭਿਕ੍ਖਵੇ, ਆਵਾਸਪਲਿਬੋਧੋ ਹੋਤਿ. ਕਥਞ੍ਚ, ਭਿਕ੍ਖਵੇ, ਚੀਵਰਪਲਿਬੋਧੋ ਹੋਤਿ? ਇਧ, ਭਿਕ੍ਖਵੇ, ਭਿਕ੍ਖੁਨੋ ਚੀਵਰਂ ਅਕਤਂ ਵਾ ਹੋਤਿ ਵਿਪ੍ਪਕਤਂ ਵਾ, ਚੀਵਰਾਸਾ ਵਾ ਅਨੁਪਚ੍ਛਿਨ੍ਨਾ. ਏਵਂ ਖੋ, ਭਿਕ੍ਖਵੇ, ਚੀਵਰਪਲਿਬੋਧੋ ਹੋਤਿ. ਇਮੇ ਖੋ, ਭਿਕ੍ਖਵੇ, ਦ੍ਵੇ ਕਥਿਨਸ੍ਸ ਪਲਿਬੋਧਾ.

ਕਤਮੇ ਚ, ਭਿਕ੍ਖਵੇ, ਦ੍ਵੇ ਕਥਿਨਸ੍ਸ ਅਪਲਿਬੋਧਾ? ਆਵਾਸਅਪਲਿਬੋਧੋ ਚ ਚੀਵਰਅਪਲਿਬੋਧੋ ਚ. ਕਥਞ੍ਚ, ਭਿਕ੍ਖਵੇ, ਆਵਾਸਅਪਲਿਬੋਧੋ ਹੋਤਿ? ਇਧ, ਭਿਕ੍ਖਵੇ, ਭਿਕ੍ਖੁ ਪਕ੍ਕਮਤਿ ਤਮ੍ਹਾ ਆਵਾਸਾ ਚਤ੍ਤੇਨ ਵਨ੍ਤੇਨ ਮੁਤ੍ਤੇਨ ਅਨਪੇਕ੍ਖੋ [ਅਨਪੇਕ੍ਖੇਨ (ਕ.)] ‘‘ਨ ਪਚ੍ਚੇਸ੍ਸ’’ਨ੍ਤਿ. ਏਵਂ ਖੋ, ਭਿਕ੍ਖਵੇ, ਆਵਾਸਅਪਲਿਬੋਧੋ ਹੋਤਿ. ਕਥਞ੍ਚ, ਭਿਕ੍ਖਵੇ, ਚੀਵਰਅਪਲਿਬੋਧੋ ਹੋਤਿ? ਇਧ, ਭਿਕ੍ਖਵੇ, ਭਿਕ੍ਖੁਨੋ ਚੀਵਰਂ ਕਤਂ ਵਾ ਹੋਤਿ, ਨਟ੍ਠਂ ਵਾ ਵਿਨਟ੍ਠਂ ਵਾ ਦਡ੍ਢਂ ਵਾ, ਚੀਵਰਾਸਾ ਵਾ ਉਪਚ੍ਛਿਨ੍ਨਾ. ਏਵਂ ਖੋ, ਭਿਕ੍ਖਵੇ, ਚੀਵਰਅਪਲਿਬੋਧੋ ਹੋਤਿ. ਇਮੇ ਖੋ, ਭਿਕ੍ਖਵੇ, ਦ੍ਵੇ ਕਥਿਨਸ੍ਸ ਅਪਲਿਬੋਧਾਤਿ.

ਪਲਿਬੋਧਾਪਲਿਬੋਧਕਥਾ ਨਿਟ੍ਠਿਤਾ.

ਕਥਿਨਕ੍ਖਨ੍ਧਕੋ ਨਿਟ੍ਠਿਤੋ ਸਤ੍ਤਮੋ.

੨੦੧. ਤਸ੍ਸੁਦ੍ਦਾਨਂ

ਤਿਂਸ ਪਾਵੇਯ੍ਯਕਾ ਭਿਕ੍ਖੂ, ਸਾਕੇਤੁਕ੍ਕਣ੍ਠਿਤਾ ਵਸੁਂ;

ਵਸ੍ਸਂਵੁਟ੍ਠੋਕਪੁਣ੍ਣੇਹਿ, ਅਗਮੁਂ ਜਿਨਦਸ੍ਸਨਂ.

ਇਦਂ ਵਤ੍ਥੁ ਕਥਿਨਸ੍ਸ, ਕਪ੍ਪਿਸ੍ਸਨ੍ਤਿ ਚ ਪਞ੍ਚਕਾ;

ਅਨਾਮਨ੍ਤਾ ਅਸਮਾਚਾਰਾ, ਤਥੇਵ ਗਣਭੋਜਨਂ.

ਯਾਵਦਤ੍ਥਞ੍ਚ ਉਪ੍ਪਾਦੋ, ਅਤ੍ਥਤਾਨਂ ਭਵਿਸ੍ਸਤਿ;

ਞਤ੍ਤਿ ਏਵਤ੍ਥਤਞ੍ਚੇਵ, ਏਵਞ੍ਚੇਵ ਅਨਤ੍ਥਤਂ.

ਉਲ੍ਲਿਖਿ ਧੋਵਨਾ ਚੇਵ, ਵਿਚਾਰਣਞ੍ਚ ਛੇਦਨਂ;

ਬਨ੍ਧਨੋ ਵਟ੍ਟਿ ਕਣ੍ਡੁਸ, ਦਲ਼੍ਹੀਕਮ੍ਮਾਨੁਵਾਤਿਕਾ.

ਪਰਿਭਣ੍ਡਂ ਓਵਦ੍ਧੇਯ੍ਯਂ, ਮਦ੍ਦਨਾ ਨਿਮਿਤ੍ਤਂ ਕਥਾ;

ਕੁਕ੍ਕੁ ਸਨ੍ਨਿਧਿ ਨਿਸ੍ਸਗ੍ਗਿ, ਨ ਕਪ੍ਪਞ੍ਞਤ੍ਰ ਤੇ ਤਯੋ.

ਅਞ੍ਞਤ੍ਰ ਪਞ੍ਚਾਤਿਰੇਕੇ, ਸਞ੍ਛਿਨ੍ਨੇਨ ਸਮਣ੍ਡਲੀ;

ਨਾਞ੍ਞਤ੍ਰ ਪੁਗ੍ਗਲਾ ਸਮ੍ਮਾ, ਨਿਸ੍ਸੀਮਟ੍ਠੋਨੁਮੋਦਤਿ.

ਕਥਿਨਾਨਤ੍ਥਤਂ ਹੋਤਿ, ਏਵਂ ਬੁਦ੍ਧੇਨ ਦੇਸਿਤਂ;

ਅਹਤਾਕਪ੍ਪਪਿਲੋਤਿ, ਪਂਸੁ ਪਾਪਣਿਕਾਯ ਚ.

ਅਨਿਮਿਤ੍ਤਾਪਰਿਕਥਾ, ਅਕੁਕ੍ਕੁ ਚ ਅਸਨ੍ਨਿਧਿ;

ਅਨਿਸ੍ਸਗ੍ਗਿ ਕਪ੍ਪਕਤੇ, ਤਥਾ ਤਿਚੀਵਰੇਨ ਚ.

ਪਞ੍ਚਕੇ ਵਾਤਿਰੇਕੇ ਵਾ, ਛਿਨ੍ਨੇ ਸਮਣ੍ਡਲੀਕਤੇ;

ਪੁਗ੍ਗਲਸ੍ਸਤ੍ਥਾਰਾ ਸਮ੍ਮਾ, ਸੀਮਟ੍ਠੋ ਅਨੁਮੋਦਤਿ.

ਏਵਂ ਕਥਿਨਤ੍ਥਰਣਂ, ਉਬ੍ਭਾਰਸ੍ਸਟ੍ਠਮਾਤਿਕਾ;

ਪਕ੍ਕਮਨਨ੍ਤਿ ਨਿਟ੍ਠਾਨਂ, ਸਨ੍ਨਿਟ੍ਠਾਨਞ੍ਚ ਨਾਸਨਂ.

ਸਵਨਂ ਆਸਾਵਚ੍ਛੇਦਿ, ਸੀਮਾ ਸਹੁਬ੍ਭਾਰਟ੍ਠਮੀ;

ਕਤਚੀਵਰਮਾਦਾਯ, ‘‘ਨ ਪਚ੍ਚੇਸ੍ਸ’’ਨ੍ਤਿ ਗਚ੍ਛਤਿ.

ਤਸ੍ਸ ਤਂ ਕਥਿਨੁਦ੍ਧਾਰਾ,ਏ ਹੋਤਿ ਪਕ੍ਕਮਨਨ੍ਤਿਕੋ;

ਆਦਾਯ ਚੀਵਰਂ ਯਾਤਿ, ਨਿਸ੍ਸੀਮੇ ਇਦਂ ਚਿਨ੍ਤਯਿ.

‘‘ਕਾਰੇਸ੍ਸਂ ਨ ਪਚ੍ਚੇਸ੍ਸ’’ਨ੍ਤਿ, ਨਿਟ੍ਠਾਨੇ ਕਥਿਨੁਦ੍ਧਾਰੋ;

ਆਦਾਯ ਨਿਸ੍ਸੀਮਂ ਨੇਵ, ‘‘ਨ ਪਚ੍ਚੇਸ੍ਸ’’ਨ੍ਤਿ ਮਾਨਸੋ.

ਤਸ੍ਸ ਤਂ ਕਥਿਨੁਦ੍ਧਾਰੋ, ਸਨ੍ਨਿਟ੍ਠਾਨਨ੍ਤਿਕੋ ਭਵੇ;

ਆਦਾਯ ਚੀਵਰਂ ਯਾਤਿ, ਨਿਸ੍ਸੀਮੇ ਇਦਂ ਚਿਨ੍ਤਯਿ.

‘‘ਕਾਰੇਸ੍ਸਂ ਨ ਪਚ੍ਚੇਸ੍ਸ’’ਨ੍ਤਿ, ਕਯਿਰਂ ਤਸ੍ਸ ਨਸ੍ਸਤਿ;

ਤਸ੍ਸ ਤਂ ਕਥਿਨੁਦ੍ਧਾਰੋ, ਭਵਤਿ ਨਾਸਨਨ੍ਤਿਕੋ.

ਆਦਾਯ ਯਾਤਿ ‘‘ਪਚ੍ਚੇਸ੍ਸਂ’’, ਬਹਿ ਕਾਰੇਤਿ ਚੀਵਰਂ;

ਕਤਚੀਵਰੋ ਸੁਣਾਤਿ, ਉਬ੍ਭਤਂ ਕਥਿਨਂ ਤਹਿਂ.

ਤਸ੍ਸ ਤਂ ਕਥਿਨੁਦ੍ਧਾਰੋ, ਭਵਤਿ ਸਵਨਨ੍ਤਿਕੋ;

ਆਦਾਯ ਯਾਤਿ ‘‘ਪਚ੍ਚੇਸ੍ਸਂ’’, ਬਹਿ ਕਾਰੇਤਿ ਚੀਵਰਂ.

ਕਤਚੀਵਰੋ ਬਹਿਦ੍ਧਾ, ਨਾਮੇਤਿ ਕਥਿਨੁਦ੍ਧਾਰਂ;

ਤਸ੍ਸ ਤਂ ਕਥਿਨੁਦ੍ਧਾਰੋ, ਸੀਮਾਤਿਕ੍ਕਨ੍ਤਿਕੋ ਭਵੇ.

ਆਦਾਯ ਯਾਤਿ ‘‘ਪਚ੍ਚੇਸ੍ਸਂ’’, ਬਹਿ ਕਾਰੇਤਿ ਚੀਵਰਂ;

ਕਤਚੀਵਰੋ ਪਚ੍ਚੇਸ੍ਸਂ, ਸਮ੍ਭੋਤਿ ਕਥਿਨੁਦ੍ਧਾਰਂ.

ਤਸ੍ਸ ਤਂ ਕਥਿਨੁਦ੍ਧਾਰੋ, ਸਹ ਭਿਕ੍ਖੂਹਿ ਜਾਯਤਿ;

ਆਦਾਯ ਚ ਸਮਾਦਾਯ, ਸਤ੍ਤ-ਸਤ੍ਤਵਿਧਾ ਗਤਿ.

ਪਕ੍ਕਮਨਨ੍ਤਿਕਾ ਨਤ੍ਥਿ, ਛਕ੍ਕੇ ਵਿਪ੍ਪਕਤੇ [ਛਟ੍ਠੇ ਵਿਪ੍ਪਕਤਾ (ਸੀ.), ਛਚ੍ਚਾ ਵਿਪ੍ਪਕਥਾ (ਕ.)] ਗਤਿ;

ਆਦਾਯ ਨਿਸ੍ਸੀਮਗਤਂ, ਕਾਰੇਸ੍ਸਂ ਇਤਿ ਜਾਯਤਿ.

ਨਿਟ੍ਠਾਨਂ ਸਨ੍ਨਿਟ੍ਠਾਨਞ੍ਚ, ਨਾਸਨਞ੍ਚ ਇਮੇ ਤਯੋ;

ਆਦਾਯ ‘‘ਨ ਪਚ੍ਚੇਸ੍ਸ’’ਨ੍ਤਿ, ਬਹਿਸੀਮੇ ਕਰੋਮਿਤਿ.

ਨਿਟ੍ਠਾਨਂ ਸਨ੍ਨਿਟ੍ਠਾਨਮ੍ਪਿ, ਨਾਸਨਮ੍ਪਿ ਇਦਂ ਤਯੋ;

ਅਨਧਿਟ੍ਠਿਤੇਨ ਨੇਵਸ੍ਸ, ਹੇਟ੍ਠਾ ਤੀਣਿ ਨਯਾਵਿਧਿ.

ਆਦਾਯ ਯਾਤਿ ਪਚ੍ਚੇਸ੍ਸਂ, ਬਹਿਸੀਮੇ ਕਰੋਮਿਤਿ;

‘‘ਨ ਪਚ੍ਚੇਸ੍ਸ’’ਨ੍ਤਿ ਕਾਰੇਤਿ, ਨਿਟ੍ਠਾਨੇ ਕਥਿਨੁਦ੍ਧਾਰੋ.

ਸਨ੍ਨਿਟ੍ਠਾਨਂ ਨਾਸਨਞ੍ਚ, ਸਵਨਸੀਮਾਤਿਕ੍ਕਮਾ;

ਸਹ ਭਿਕ੍ਖੂਹਿ ਜਾਯੇਥ, ਏਵਂ ਪਨ੍ਨਰਸਂ ਗਤਿ.

ਸਮਾਦਾਯ ਵਿਪ੍ਪਕਤਾ, ਸਮਾਦਾਯ ਪੁਨਾ ਤਥਾ;

ਇਮੇ ਤੇ ਚਤੁਰੋ ਵਾਰਾ, ਸਬ੍ਬੇ ਪਨ੍ਨਰਸਵਿਧਿ.

ਅਨਾਸਾਯ ਚ ਆਸਾਯ, ਕਰਣੀਯੋ ਚ ਤੇ ਤਯੋ;

ਨਯਤੋ ਤਂ ਵਿਜਾਨੇਯ੍ਯ, ਤਯੋ ਦ੍ਵਾਦਸ ਦ੍ਵਾਦਸ.

ਅਪਵਿਲਾਨਾ ਨਵੇਤ੍ਥ [ਅਪਵਿਲਾਯਮਾਨੇਵ (ਸ੍ਯਾ.), ਅਪਵਿਨਾ ਨਵ ਚੇਤ੍ਥ (ਸੀ.)], ਫਾਸੁ ਪਞ੍ਚਵਿਧਾ ਤਹਿਂ;

ਪਲਿਬੋਧਾਪਲਿਬੋਧਾ, ਉਦ੍ਦਾਨਂ ਨਯਤੋ ਕਤਨ੍ਤਿ.

ਇਮਮ੍ਹਿ ਖਨ੍ਧਕੇ ਵਤ੍ਥੂ ਦੋਲ਼ਸਕਪੇਯ੍ਯਾਲਮੁਖਾਨਿ ਏਕਸਤਂ ਅਟ੍ਠਾਰਸ.

ਕਥਿਨਕ੍ਖਨ੍ਧਕੋ ਨਿਟ੍ਠਿਤੋ.

੮. ਚੀਵਰਕ੍ਖਨ੍ਧਕੋ

੨੦੨. ਜੀਵਕਵਤ੍ਥੁ

੩੨੬. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਵੇਸਾਲੀ ਇਦ੍ਧਾ ਚੇਵ ਹੋਤਿ ਫਿਤਾ [ਫੀਤਾ (ਬਹੂਸੁ)] ਚ ਬਹੁਜਨਾ ਚ ਆਕਿਣ੍ਣਮਨੁਸ੍ਸਾ ਚ ਸੁਭਿਕ੍ਖਾ ਚ; ਸਤ੍ਤ ਚ ਪਾਸਾਦਸਹਸ੍ਸਾਨਿ ਸਤ੍ਤ ਚ ਪਾਸਾਦਸਤਾਨਿ ਸਤ੍ਤ ਚ ਪਾਸਾਦਾ; ਸਤ੍ਤ ਚ ਕੂਟਾਗਾਰਸਹਸ੍ਸਾਨਿ ਸਤ੍ਤ ਚ ਕੂਟਾਗਾਰਸਤਾਨਿ ਸਤ੍ਤ ਚ ਕੂਟਾਗਾਰਾਨਿ; ਸਤ੍ਤ ਚ ਆਰਾਮਸਹਸ੍ਸਾਨਿ ਸਤ੍ਤ ਚ ਆਰਾਮਸਤਾਨਿ ਸਤ੍ਤ ਚ ਆਰਾਮਾ; ਸਤ੍ਤ ਚ ਪੋਕ੍ਖਰਣੀਸਹਸ੍ਸਾਨਿ ਸਤ੍ਤ ਚ ਪੋਕ੍ਖਰਣੀਸਤਾਨਿ ਸਤ੍ਤ ਚ ਪੋਕ੍ਖਰਣਿਯੋ; ਅਮ੍ਬਪਾਲੀ ਚ ਗਣਿਕਾ ਅਭਿਰੂਪਾ ਹੋਤਿ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ, ਪਦਕ੍ਖਿਣਾ [ਪਦਕ੍ਖਾ (ਸ੍ਯਾ.)] ਨਚ੍ਚੇ ਚ ਗੀਤੇ ਚ ਵਾਦਿਤੇ ਚ, ਅਭਿਸਟਾ ਅਤ੍ਥਿਕਾਨਂ ਅਤ੍ਥਿਕਾਨਂ ਮਨੁਸ੍ਸਾਨਂ ਪਞ੍ਞਾਸਾਯ ਚ ਰਤ੍ਤਿਂ ਗਚ੍ਛਤਿ; ਤਾਯ ਚ ਵੇਸਾਲੀ ਭਿਯ੍ਯੋਸੋਮਤ੍ਤਾਯ ਉਪਸੋਭਤਿ. ਅਥ ਖੋ ਰਾਜਗਹਕੋ ਨੇਗਮੋ ਵੇਸਾਲਿਂ ਅਗਮਾਸਿ ਕੇਨਚਿਦੇਵ ਕਰਣੀਯੇਨ. ਅਦ੍ਦਸਾ ਖੋ ਰਾਜਗਹਕੋ ਨੇਗਮੋ ਵੇਸਾਲਿਂ ਇਦ੍ਧਞ੍ਚੇਵ ਫਿਤਞ੍ਚ ਬਹੁਜਨਞ੍ਚ ਆਕਿਣ੍ਣਮਨੁਸ੍ਸਞ੍ਚ ਸੁਭਿਕ੍ਖਞ੍ਚ; ਸਤ੍ਤ ਚ ਪਾਸਾਦਸਹਸ੍ਸਾਨਿ ਸਤ੍ਤ ਚ ਪਾਸਾਦਸਤਾਨਿ ਸਤ੍ਤ ਚ ਪਾਸਾਦੇ; ਸਤ੍ਤ ਚ ਕੂਟਾਗਾਰਸਹਸ੍ਸਾਨਿ ਸਤ੍ਤ ਚ ਕੂਟਾਗਾਰਸਤਾਨਿ ਸਤ੍ਤ ਚ ਕੂਟਾਗਾਰਾਨਿ; ਸਤ੍ਤ ਚ ਆਰਾਮਸਹਸ੍ਸਾਨਿ ਸਤ੍ਤ ਚ ਆਰਾਮਸਤਾਨਿ ਸਤ੍ਤ ਚ ਆਰਾਮੇ; ਸਤ੍ਤ ਚ ਪੋਕ੍ਖਰਣੀਸਹਸ੍ਸਾਨਿ ਸਤ੍ਤ ਚ ਪੋਕ੍ਖਰਣੀਸਤਾਨਿ ਸਤ੍ਤ ਚ ਪੋਕ੍ਖਰਣਿਯੋ; ਅਮ੍ਬਪਾਲਿਞ੍ਚ ਗਣਿਕਂ ਅਭਿਰੂਪਂ ਦਸ੍ਸਨੀਯਂ ਪਾਸਾਦਿਕਂ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਂ, ਪਦਕ੍ਖਿਣਂ [ਪਦਕ੍ਖਂ (ਸ੍ਯਾ.)] ਨਚ੍ਚੇ ਚ ਗੀਤੇ ਚ ਵਾਦਿਤੇ ਚ, ਅਭਿਸਟਂ ਅਤ੍ਥਿਕਾਨਂ ਅਤ੍ਥਿਕਾਨਂ ਮਨੁਸ੍ਸਾਨਂ ਪਞ੍ਞਾਸਾਯ ਚ ਰਤ੍ਤਿਂ ਗਚ੍ਛਨ੍ਤਿਂ, ਤਾਯ ਚ ਵੇਸਾਲਿਂ ਭਿਯ੍ਯੋਸੋਮਤ੍ਤਾਯ ਉਪਸੋਭਨ੍ਤਿਂ.

੩੨੭. ਅਥ ਖੋ ਰਾਜਗਹਕੋ ਨੇਗਮੋ ਵੇਸਾਲਿਯਂ ਤਂ ਕਰਣੀਯਂ ਤੀਰੇਤ੍ਵਾ ਪੁਨਦੇਵ ਰਾਜਗਹਂ ਪਚ੍ਚਾਗਞ੍ਛਿ. ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਵੇਸਾਲੀ, ਦੇਵ, ਇਦ੍ਧਾ ਚੇਵ ਫਿਤਾ ਚ ਬਹੁਜਨਾ ਚ ਆਕਿਣ੍ਣਮਨੁਸ੍ਸਾ ਚ ਸੁਭਿਕ੍ਖਾ ਚ; ਸਤ੍ਤ ਚ ਪਾਸਾਦਸਹਸ੍ਸਾਨਿ…ਪੇ… ਤਾਯ ਚ ਵੇਸਾਲੀ ਭਿਯ੍ਯੋਸੋਮਤ੍ਤਾਯ ਉਪਸੋਭਤਿ. ਸਾਧੁ, ਦੇਵ, ਮਯਮ੍ਪਿ ਗਣਿਕਂ ਵੁਟ੍ਠਾਪੇਸ੍ਸਾਮਾ’’ਤਿ [ਵੁਟ੍ਠਾਪੇਯ੍ਯਾਮ (ਕ.)]. ‘‘ਤੇਨ ਹਿ, ਭਣੇ, ਤਾਦਿਸਿਂ ਕੁਮਾਰਿਂ ਜਾਨਾਥ ਯਂ ਤੁਮ੍ਹੇ ਗਣਿਕਂ ਵੁਟ੍ਠਾਪੇਯ੍ਯਾਥਾ’’ਤਿ. ਤੇਨ ਖੋ ਪਨ ਸਮਯੇਨ ਰਾਜਗਹੇ ਸਾਲਵਤੀ ਨਾਮ ਕੁਮਾਰੀ ਅਭਿਰੂਪਾ ਹੋਤਿ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ. ਅਥ ਖੋ ਰਾਜਗਹਕੋ ਨੇਗਮੋ ਸਾਲਵਤਿਂ ਕੁਮਾਰਿਂ ਗਣਿਕਂ ਵੁਟ੍ਠਾਪੇਸਿ. ਅਥ ਖੋ ਸਾਲਵਤੀ ਗਣਿਕਾ ਨਚਿਰਸ੍ਸੇਵ ਪਦਕ੍ਖਿਣਾ ਅਹੋਸਿ ਨਚ੍ਚੇ ਚ ਗੀਤੇ ਚ ਵਾਦਿਤੇ ਚ, ਅਭਿਸਟਾ ਅਤ੍ਥਿਕਾਨਂ ਅਤ੍ਥਿਕਾਨਂ ਮਨੁਸ੍ਸਾਨਂ ਪਟਿਸਤੇਨ ਚ ਰਤ੍ਤਿਂ ਗਚ੍ਛਤਿ. ਅਥ ਖੋ ਸਾਲਵਤੀ ਗਣਿਕਾ ਨਚਿਰਸ੍ਸੇਵ ਗਬ੍ਭਿਨੀ ਅਹੋਸਿ. ਅਥ ਖੋ ਸਾਲਵਤਿਯਾ ਗਣਿਕਾਯ ਏਤਦਹੋਸਿ – ‘‘ਇਤ੍ਥੀ ਖੋ ਗਬ੍ਭਿਨੀ ਪੁਰਿਸਾਨਂ ਅਮਨਾਪਾ. ਸਚੇ ਮਂ ਕੋਚਿ ਜਾਨਿਸ੍ਸਤਿ ਸਾਲਵਤੀ ਗਣਿਕਾ ਗਬ੍ਭਿਨੀਤਿ, ਸਬ੍ਬੋ ਮੇ ਸਕ੍ਕਾਰੋ ਭਞ੍ਜਿਸ੍ਸਤਿ [ ਪਰਿਹਾਯਿਸ੍ਸਤਿ (ਸੀ. ਸ੍ਯਾ.)]. ਯਂਨੂਨਾਹਂ ਗਿਲਾਨਂ ਪਟਿਵੇਦੇਯ੍ਯ’’ਨ੍ਤਿ. ਅਥ ਖੋ ਸਾਲਵਤੀ ਗਣਿਕਾ ਦੋਵਾਰਿਕਂ ਆਣਾਪੇਸਿ – ‘‘ਮਾ, ਭਣੇ ਦੋਵਾਰਿਕ, ਕੋਚਿ ਪੁਰਿਸੋ ਪਾਵਿਸਿ. ਯੋ ਚ ਮਂ ਪੁਚ੍ਛਤਿ, ‘ਗਿਲਾਨਾ’ਤਿ ਪਟਿਵੇਦੇਹੀ’’ਤਿ. ‘‘ਏਵਂ, ਅਯ੍ਯੇ’’ਤਿ ਖੋ ਸੋ ਦੋਵਾਰਿਕੋ ਸਾਲਵਤਿਯਾ ਗਣਿਕਾਯ ਪਚ੍ਚਸ੍ਸੋਸਿ. ਅਥ ਖੋ ਸਾਲਵਤੀ ਗਣਿਕਾ ਤਸ੍ਸ ਗਬ੍ਭਸ੍ਸ ਪਰਿਪਾਕਮਨ੍ਵਾਯ ਪੁਤ੍ਤਂ ਵਿਜਾਯਿ. ਅਥ ਖੋ ਸਾਲਵਤੀ ਗਣਿਕਾ ਦਾਸਿਂ ਆਣਾਪੇਸਿ – ‘‘ਹਨ੍ਦ, ਜੇ, ਇਮਂ ਦਾਰਕਂ ਕਤ੍ਤਰਸੁਪ੍ਪੇ ਪਕ੍ਖਿਪਿਤ੍ਵਾ ਨੀਹਰਿਤ੍ਵਾ ਸਙ੍ਕਾਰਕੂਟੇ ਛਡ੍ਡੇਹੀ’’ਤਿ. ‘‘ਏਵਂ, ਅਯ੍ਯੇ’’ਤਿ ਖੋ ਸਾ ਦਾਸੀ ਸਾਲਵਤਿਯਾ ਗਣਿਕਾਯ ਪਟਿਸ੍ਸੁਤ੍ਵਾ ਤਂ ਦਾਰਕਂ ਕਤ੍ਤਰਸੁਪ੍ਪੇ ਪਕ੍ਖਿਪਿਤ੍ਵਾ ਨੀਹਰਿਤ੍ਵਾ ਸਙ੍ਕਾਰਕੂਟੇ ਛਡ੍ਡੇਸਿ.

੩੨੮. ਤੇਨ ਖੋ ਪਨ ਸਮਯੇਨ ਅਭਯੋ ਨਾਮ ਰਾਜਕੁਮਾਰੋ ਕਾਲਸ੍ਸੇਵ ਰਾਜੁਪਟ੍ਠਾਨਂ ਗਚ੍ਛਨ੍ਤੋ ਅਦ੍ਦਸ ਤਂ ਦਾਰਕਂ ਕਾਕੇਹਿ ਸਮ੍ਪਰਿਕਿਣ੍ਣਂ, ਦਿਸ੍ਵਾਨ ਮਨੁਸ੍ਸੇ ਪੁਚ੍ਛਿ – ‘‘ਕਿਂ ਏਤਂ, ਭਣੇ, ਕਾਕੇਹਿ ਸਮ੍ਪਰਿਕਿਣ੍ਣ’’ਨ੍ਤਿ? ‘‘ਦਾਰਕੋ, ਦੇਵਾ’’ਤਿ. ‘‘ਜੀਵਤਿ, ਭਣੇ’’ਤਿ? ‘‘ਜੀਵਤਿ, ਦੇਵਾ’’ਤਿ. ‘‘ਤੇਨ ਹਿ, ਭਣੇ, ਤਂ ਦਾਰਕਂ ਅਮ੍ਹਾਕਂ ਅਨ੍ਤੇਪੁਰਂ ਨੇਤ੍ਵਾ ਧਾਤੀਨਂ ਦੇਥ ਪੋਸੇਤੁ’’ਨ੍ਤਿ. ‘‘ਏਵਂ, ਦੇਵਾ’’ਤਿ ਖੋ ਤੇ ਮਨੁਸ੍ਸਾ ਅਭਯਸ੍ਸ ਰਾਜਕੁਮਾਰਸ੍ਸ ਪਟਿਸ੍ਸੁਤ੍ਵਾ ਤਂ ਦਾਰਕਂ ਅਭਯਸ੍ਸ ਰਾਜਕੁਮਾਰਸ੍ਸ ਅਨ੍ਤੇਪੁਰਂ ਨੇਤ੍ਵਾ ਧਾਤੀਨਂ ਅਦਂਸੁ – ‘‘ਪੋਸੇਥਾ’’ਤਿ. ਤਸ੍ਸ ਜੀਵਤੀਤਿ ‘ਜੀਵਕੋ’ਤਿ ਨਾਮਂ ਅਕਂਸੁ. ਕੁਮਾਰੇਨ ਪੋਸਾਪਿਤੋਤਿ ‘ਕੋਮਾਰਭਚ੍ਚੋ’ਤਿ ਨਾਮਂ ਅਕਂਸੁ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਨਚਿਰਸ੍ਸੇਵ ਵਿਞ੍ਞੁਤਂ ਪਾਪੁਣਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਅਭਯੋ ਰਾਜਕੁਮਾਰੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਅਭਯਂ ਰਾਜਕੁਮਾਰਂ ਏਤਦਵੋਚ – ‘‘ਕਾ ਮੇ, ਦੇਵ, ਮਾਤਾ, ਕੋ ਪਿਤਾ’’ਤਿ? ‘‘ਅਹਮ੍ਪਿ ਖੋ ਤੇ, ਭਣੇ ਜੀਵਕ, ਮਾਤਰਂ ਨ ਜਾਨਾਮਿ; ਅਪਿ ਚਾਹਂ ਤੇ ਪਿਤਾ; ਮਯਾਸਿ [ਮਯਾਪਿ (ਕ.)] ਪੋਸਾਪਿਤੋ’’ਤਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਇਮਾਨਿ ਖੋ ਰਾਜਕੁਲਾਨਿ ਨ ਸੁਕਰਾਨਿ ਅਸਿਪ੍ਪੇਨ ਉਪਜੀਵਿਤੁਂ. ਯਂਨੂਨਾਹਂ ਸਿਪ੍ਪਂ ਸਿਕ੍ਖੇਯ੍ਯ’’ਨ੍ਤਿ.

੩੨੯. ਤੇਨ ਖੋ ਪਨ ਸਮਯੇਨ ਤਕ੍ਕਸਿਲਾਯਂ [ਤਕ੍ਕਸੀਲਾਯਂ (ਕ.)] ਦਿਸਾਪਾਮੋਕ੍ਖੋ ਵੇਜ੍ਜੋ ਪਟਿਵਸਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਅਭਯਂ ਰਾਜਕੁਮਾਰਂ ਅਨਾਪੁਚ੍ਛਾ ਯੇਨ ਤਕ੍ਕਸਿਲਾ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਤਕ੍ਕਸਿਲਾ, ਯੇਨ ਵੇਜ੍ਜੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਵੇਜ੍ਜਂ ਏਤਦਵੋਚ – ‘‘ਇਚ੍ਛਾਮਹਂ, ਆਚਰਿਯ, ਸਿਪ੍ਪਂ ਸਿਕ੍ਖਿਤੁ’’ਨ੍ਤਿ. ‘‘ਤੇਨ ਹਿ, ਭਣੇ ਜੀਵਕ, ਸਿਕ੍ਖਸ੍ਸੂ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਬਹੁਞ੍ਚ ਗਣ੍ਹਾਤਿ ਲਹੁਞ੍ਚ ਗਣ੍ਹਾਤਿ ਸੁਟ੍ਠੁ ਚ ਉਪਧਾਰੇਤਿ, ਗਹਿਤਞ੍ਚਸ੍ਸ ਨ ਸਮ੍ਮੁਸ੍ਸਤਿ [ਨ ਪਮੁਸ੍ਸਤਿ (ਸੀ. ਸ੍ਯਾ.)]. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਸਤ੍ਤਨ੍ਨਂ ਵਸ੍ਸਾਨਂ ਅਚ੍ਚਯੇਨ ਏਤਦਹੋਸਿ – ‘‘ਅਹਂ, ਖੋ ਬਹੁਞ੍ਚ ਗਣ੍ਹਾਮਿ ਲਹੁਞ੍ਚ ਗਣ੍ਹਾਮਿ ਸੁਟ੍ਠੁ ਚ ਉਪਧਾਰੇਮਿ, ਗਹਿਤਞ੍ਚ ਮੇ ਨ ਸਮ੍ਮੁਸ੍ਸਤਿ, ਸਤ੍ਤ ਚ ਮੇ ਵਸ੍ਸਾਨਿ ਅਧੀਯਨ੍ਤਸ੍ਸ, ਨਯਿਮਸ੍ਸ ਸਿਪ੍ਪਸ੍ਸ ਅਨ੍ਤੋ ਪਞ੍ਞਾਯਤਿ. ਕਦਾ ਇਮਸ੍ਸ ਸਿਪ੍ਪਸ੍ਸ ਅਨ੍ਤੋ ਪਞ੍ਞਾਯਿਸ੍ਸਤੀ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਸੋ ਵੇਜ੍ਜੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਵੇਜ੍ਜਂ ਏਤਦਵੋਚ – ‘‘ਅਹਂ ਖੋ, ਆਚਰਿਯ, ਬਹੁਞ੍ਚ ਗਣ੍ਹਾਮਿ ਲਹੁਞ੍ਚ ਗਣ੍ਹਾਮਿ ਸੁਟ੍ਠੁ ਚ ਉਪਧਾਰੇਮਿ, ਗਹਿਤਞ੍ਚ ਮੇ ਨ ਸਮ੍ਮੁਸ੍ਸਤਿ, ਸਤ੍ਤ ਚ ਮੇ ਵਸ੍ਸਾਨਿ ਅਧੀਯਨ੍ਤਸ੍ਸ, ਨਯਿਮਸ੍ਸ ਸਿਪ੍ਪਸ੍ਸ ਅਨ੍ਤੋ ਪਞ੍ਞਾਯਤਿ. ਕਦਾ ਇਮਸ੍ਸ ਸਿਪ੍ਪਸ੍ਸ ਅਨ੍ਤੋ ਪਞ੍ਞਾਯਿਸ੍ਸਤੀ’’ਤਿ? ‘‘ਤੇਨ ਹਿ, ਭਣੇ ਜੀਵਕ, ਖਣਿਤ੍ਤਿਂ ਆਦਾਯ ਤਕ੍ਕਸਿਲਾਯ ਸਮਨ੍ਤਾ ਯੋਜਨਂ ਆਹਿਣ੍ਡਿਤ੍ਵਾ ਯਂ ਕਿਞ੍ਚਿ ਅਭੇਸਜ੍ਜਂ ਪਸ੍ਸੇਯ੍ਯਾਸਿ ਤਂ ਆਹਰਾ’’ਤਿ. ‘‘ਏਵਂ, ਆਚਰਿਯਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਤਸ੍ਸ ਵੇਜ੍ਜਸ੍ਸ ਪਟਿਸ੍ਸੁਤ੍ਵਾ ਖਣਿਤ੍ਤਿਂ ਆਦਾਯ ਤਕ੍ਕਸਿਲਾਯ ਸਮਨ੍ਤਾ ਯੋਜਨਂ ਆਹਿਣ੍ਡਨ੍ਤੋ ਨ ਕਿਞ੍ਚਿ ਅਭੇਸਜ੍ਜਂ ਅਦ੍ਦਸ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਸੋ ਵੇਜ੍ਜੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਵੇਜ੍ਜਂ ਏਤਦਵੋਚ – ‘‘ਆਹਿਣ੍ਡਨ੍ਤੋਮ੍ਹਿ, ਆਚਰਿਯ, ਤਕ੍ਕਸਿਲਾਯ ਸਮਨ੍ਤਾ ਯੋਜਨਂ, ਨ ਕਿਞ੍ਚਿ [ਆਹਿਣ੍ਟਨ੍ਤੋ ਨ ਕਿਞ੍ਚਿ (ਕ.)] ਅਭੇਸਜ੍ਜਂ ਅਦ੍ਦਸ’’ਨ੍ਤਿ. ‘‘ਸੁਸਿਕ੍ਖਿਤੋਸਿ, ਭਣੇ ਜੀਵਕ. ਅਲਂ ਤੇ ਏਤ੍ਤਕਂ ਜੀਵਿਕਾਯਾ’’ਤਿ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਪਰਿਤ੍ਤਂ ਪਾਥੇਯ੍ਯਂ ਪਾਦਾਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਪਰਿਤ੍ਤਂ ਪਾਥੇਯ੍ਯਂ ਆਦਾਯ ਯੇਨ ਰਾਜਗਹਂ ਤੇਨ ਪਕ੍ਕਾਮਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਤਂ ਪਰਿਤ੍ਤਂ ਪਾਥੇਯ੍ਯਂ ਅਨ੍ਤਰਾਮਗ੍ਗੇ ਸਾਕੇਤੇ ਪਰਿਕ੍ਖਯਂ ਅਗਮਾਸਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਇਮੇ ਖੋ ਮਗ੍ਗਾ ਕਨ੍ਤਾਰਾ ਅਪ੍ਪੋਦਕਾ ਅਪ੍ਪਭਕ੍ਖਾ, ਨ ਸੁਕਰਾ ਅਪਾਥੇਯ੍ਯੇਨ ਗਨ੍ਤੁਂ. ਯਂਨੂਨਾਹਂ ਪਾਥੇਯ੍ਯਂ ਪਰਿਯੇਸੇਯ੍ਯ’’ਨ੍ਤਿ.

ਜੀਵਕਵਤ੍ਥੁ ਨਿਟ੍ਠਿਤਂ.

੨੦੩. ਸੇਟ੍ਠਿਭਰਿਯਾਵਤ੍ਥੁ

੩੩੦. ਤੇਨ ਖੋ ਪਨ ਸਮਯੇਨ ਸਾਕੇਤੇ ਸੇਟ੍ਠਿਭਰਿਯਾਯ ਸਤ੍ਤਵਸ੍ਸਿਕੋ ਸੀਸਾਬਾਧੋ ਹੋਤਿ. ਬਹੂ ਮਹਨ੍ਤਾ ਮਹਨ੍ਤਾ ਦਿਸਾਪਾਮੋਕ੍ਖਾ ਵੇਜ੍ਜਾ ਆਗਨ੍ਤ੍ਵਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਬਹੁਂ ਹਿਰਞ੍ਞਂ ਆਦਾਯ ਅਗਮਂਸੁ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਸਾਕੇਤਂ ਪਵਿਸਿਤ੍ਵਾ ਮਨੁਸ੍ਸੇ ਪੁਚ੍ਛਿ – ‘‘ਕੋ, ਭਣੇ, ਗਿਲਾਨੋ, ਕਂ ਤਿਕਿਚ੍ਛਾਮੀ’’ਤਿ? ‘‘ਏਤਿਸ੍ਸਾ, ਆਚਰਿਯ, ਸੇਟ੍ਠਿਭਰਿਯਾਯ ਸਤ੍ਤਵਸ੍ਸਿਕੋ ਸੀਸਾਬਾਧੋ; ਗਚ੍ਛ, ਆਚਰਿਯ, ਸੇਟ੍ਠਿਭਰਿਯਂ ਤਿਕਿਚ੍ਛਾਹੀ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਸੇਟ੍ਠਿਸ੍ਸ ਗਹਪਤਿਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਦੋਵਾਰਿਕਂ ਆਣਾਪੇਸਿ – ‘‘ਗਚ੍ਛ, ਭਣੇ ਦੋਵਾਰਿਕ, ਸੇਟ੍ਠਿਭਰਿਯਾਯ ਪਾਵਦ – ‘ਵੇਜ੍ਜੋ, ਅਯ੍ਯੇ, ਆਗਤੋ, ਸੋ ਤਂ ਦਟ੍ਠੁਕਾਮੋ’’’ਤਿ. ‘‘ਏਵਂ, ਆਚਰਿਯਾ’’ਤਿ ਖੋ ਸੋ ਦੋਵਾਰਿਕੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਪਟਿਸ੍ਸੁਤ੍ਵਾ ਯੇਨ ਸੇਟ੍ਠਿਭਰਿਯਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸੇਟ੍ਠਿਭਰਿਯਂ ਏਤਦਵੋਚ – ‘‘ਵੇਜ੍ਜੋ, ਅਯ੍ਯੇ, ਆਗਤੋ; ਸੋ ਤਂ ਦਟ੍ਠੁਕਾਮੋ’’ਤਿ. ‘‘ਕੀਦਿਸੋ, ਭਣੇ ਦੋਵਾਰਿਕ, ਵੇਜ੍ਜੋ’’ਤਿ? ‘‘ਦਹਰਕੋ, ਅਯ੍ਯੇ’’ਤਿ. ‘‘ਅਲਂ, ਭਣੇ ਦੋਵਾਰਿਕ, ਕਿਂ ਮੇ ਦਹਰਕੋ ਵੇਜ੍ਜੋ ਕਰਿਸ੍ਸਤਿ? ਬਹੂ ਮਹਨ੍ਤਾ ਮਹਨ੍ਤਾ ਦਿਸਾਪਾਮੋਕ੍ਖਾ ਵੇਜ੍ਜਾ ਆਗਨ੍ਤ੍ਵਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਬਹੁਂ ਹਿਰਞ੍ਞਂ ਆਦਾਯ ਅਗਮਂਸੂ’’ਤਿ. ਅਥ ਖੋ ਸੋ ਦੋਵਾਰਿਕੋ ਯੇਨ ਜੀਵਕੋ ਕੋਮਾਰਭਚ੍ਚੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਸੇਟ੍ਠਿਭਰਿਯਾ, ਆਚਰਿਯ, ਏਵਮਾਹ – ‘ਅਲਂ, ਭਣੇ ਦੋਵਾਰਿਕ, ਕਿਂ ਮੇ ਦਹਰਕੋ ਵੇਜ੍ਜੋ ਕਰਿਸ੍ਸਤਿ? ਬਹੂ ਮਹਨ੍ਤਾ ਮਹਨ੍ਤਾ ਦਿਸਾਪਾਮੋਕ੍ਖਾ ਵੇਜ੍ਜਾ ਆਗਨ੍ਤ੍ਵਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਬਹੁਂ ਹਿਰਞ੍ਞਂ ਆਦਾਯ ਅਗਮਂਸੂ’’’ਤਿ. ‘‘ਗਚ੍ਛ, ਭਣੇ ਦੋਵਾਰਿਕ, ਸੇਟ੍ਠਿਭਰਿਯਾਯ ਪਾਵਦ – ‘ਵੇਜ੍ਜੋ, ਅਯ੍ਯੇ, ਏਵਮਾਹ – ਮਾ ਕਿਰ, ਅਯ੍ਯੇ, ਪੁਰੇ ਕਿਞ੍ਚਿ ਅਦਾਸਿ. ਯਦਾ ਅਰੋਗਾ ਅਹੋਸਿ ਤਦਾ ਯਂ ਇਚ੍ਛੇਯ੍ਯਾਸਿ ਤਂ ਦਜ੍ਜੇਯ੍ਯਾਸੀ’’’ਤਿ. ‘‘ਏਵਂ, ਆਚਰਿਯਾ’’ਤਿ ਖੋ ਸੋ ਦੋਵਾਰਿਕੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਪਟਿਸ੍ਸੁਤ੍ਵਾ ਯੇਨ ਸੇਟ੍ਠਿਭਰਿਯਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਸੇਟ੍ਠਿਭਰਿਯਂ ਏਤਦਵੋਚ – ‘‘ਵੇਜ੍ਜੋ, ਅਯ੍ਯੇ, ਏਵਮਾਹ – ‘ਮਾ ਕਿਰ, ਅਯ੍ਯੇ, ਪੁਰੇ ਕਿਞ੍ਚਿ ਅਦਾਸਿ. ਯਦਾ ਅਰੋਗਾ ਅਹੋਸਿ ਤਦਾ ਯਂ ਇਚ੍ਛੇਯ੍ਯਾਸਿ ਤਂ ਦਜ੍ਜੇਯ੍ਯਾਸੀ’’’ਤਿ. ‘‘ਤੇਨ ਹਿ, ਭਣੇ ਦੋਵਾਰਿਕ, ਵੇਜ੍ਜੋ ਆਗਚ੍ਛਤੂ’’ਤਿ. ‘‘ਏਵਂ, ਅਯ੍ਯੇ’’ਤਿ ਖੋ ਸੋ ਦੋਵਾਰਿਕੋ ਸੇਟ੍ਠਿਭਰਿਯਾਯ ਪਟਿਸ੍ਸੁਤ੍ਵਾ ਯੇਨ ਜੀਵਕੋ ਕੋਮਾਰਭਚ੍ਚੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਸੇਟ੍ਠਿਭਰਿਯਾ ਤਂ, ਆਚਰਿਯ, ਪਕ੍ਕੋਸਤੀ’’ਤਿ.

ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਸੇਟ੍ਠਿਭਰਿਯਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸੇਟ੍ਠਿਭਰਿਯਾਯ ਵਿਕਾਰਂ ਸਲ੍ਲਕ੍ਖੇਤ੍ਵਾ ਸੇਟ੍ਠਿਭਰਿਯਂ ਏਤਦਵੋਚ – ‘‘ਪਸਤੇਨ, ਅਯ੍ਯੇ, ਸਪ੍ਪਿਨਾ ਅਤ੍ਥੋ’’ਤਿ. ਅਥ ਖੋ ਸੇਟ੍ਠਿਭਰਿਯਾ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਪਸਤਂ ਸਪ੍ਪਿਂ ਦਾਪੇਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਪਸਤਂ ਸਪ੍ਪਿਂ ਨਾਨਾਭੇਸਜ੍ਜੇਹਿ ਨਿਪ੍ਪਚਿਤ੍ਵਾ ਸੇਟ੍ਠਿਭਰਿਯਂ ਮਞ੍ਚਕੇ ਉਤ੍ਤਾਨਂ ਨਿਪਾਤੇਤ੍ਵਾ [ਨਿਪਜ੍ਜਾਪੇਤ੍ਵਾ (ਸੀ. ਸ੍ਯਾ.)] ਨਤ੍ਥੁਤੋ ਅਦਾਸਿ. ਅਥ ਖੋ ਤਂ ਸਪ੍ਪਿਂ ਨਤ੍ਥੁਤੋ ਦਿਨ੍ਨਂ ਮੁਖਤੋ ਉਗ੍ਗਞ੍ਛਿ. ਅਥ ਖੋ ਸੇਟ੍ਠਿਭਰਿਯਾ ਪਟਿਗ੍ਗਹੇ ਨਿਟ੍ਠੁਭਿਤ੍ਵਾ ਦਾਸਿਂ ਆਣਾਪੇਸਿ – ‘‘ਹਨ੍ਦ, ਜੇ, ਇਮਂ ਸਪ੍ਪਿਂ ਪਿਚੁਨਾ ਗਣ੍ਹਾਹੀ’’ਤਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਅਚ੍ਛਰਿਯਂ [ਅਚ੍ਛਰਿਯਂ ਵਤ ਭੋ (ਸ੍ਯਾ.)] ਯਾਵ ਲੂਖਾਯਂ ਘਰਣੀ, ਯਤ੍ਰ ਹਿ ਨਾਮ ਇਮਂ ਛਡ੍ਡਨੀਯਧਮ੍ਮਂ ਸਪ੍ਪਿਂ ਪਿਚੁਨਾ ਗਾਹਾਪੇਸ੍ਸਤਿ. ਬਹੁਕਾਨਿ ਚ ਮੇ ਮਹਗ੍ਘਾਨਿ [ਮਹਗ੍ਘਾਨਿ ਮਹਗ੍ਘਾਨਿ (ਸੀ. ਸ੍ਯਾ.)] ਭੇਸਜ੍ਜਾਨਿ ਉਪਗਤਾਨਿ. ਕਿਮ੍ਪਿ ਮਾਯਂ ਕਿਞ੍ਚਿ [ਕਞ੍ਚਿ (ਸ੍ਯਾ.)] ਦੇਯ੍ਯਧਮ੍ਮਂ ਦਸ੍ਸਤੀ’’ਤਿ. ਅਥ ਖੋ ਸੇਟ੍ਠਿਭਰਿਯਾ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਵਿਕਾਰਂ ਸਲ੍ਲਕ੍ਖੇਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਆਚਰਿਯ, ਵਿਮਨੋਸੀ’’ਤਿ? ਇਧ ਮੇ ਏਤਦਹੋਸਿ – ‘‘ਅਚ੍ਛਰਿਯਂ ਯਾਵ ਲੂਖਾਯਂ ਧਰਣੀ, ਯਤ੍ਰ ਹਿ ਨਾਮ ਇਮਂ ਛਡ੍ਡਨੀਯਧਮ੍ਮਂ ਸਪ੍ਪਿਂ ਪਿਚੁਨਾ ਗਾਹਾਪੇਸ੍ਸਤਿ. ਬਹੁਕਾਨਿ ਚ ਮੇ ਮਹਗ੍ਘਾਨਿ ਸਜ੍ਜਾਨਿ ਉਪਗਤਾਨਿ. ਕਿਮ੍ਪਿ ਮਾਯਂ ਕਿਞ੍ਚਿ ਦੇਯ੍ਯਧਮ੍ਮਂ ਦਸ੍ਸਤੀ’’ਤਿ. ‘‘ਮਯਂ ਖੋ, ਆਚਰਿਯ, ਆਗਾਰਿਕਾ ਨਾਮ ਉਪਜਾਨਾਮੇਤਸ੍ਸ ਸਂਯਮਸ੍ਸ. ਵਰਮੇਤਂ ਸਪ੍ਪਿ ਦਾਸਾਨਂ ਵਾ ਕਮ੍ਮਕਰਾਨਂ ਵਾ ਪਾਦਬ੍ਭਞ੍ਜਨਂ ਵਾ ਪਦੀਪਕਰਣੇ ਵਾ ਆਸਿਤ੍ਤਂ. ਮਾ ਖੋ ਤ੍ਵਂ, ਆਚਰਿਯ, ਵਿਮਨੋ ਅਹੋਸਿ. ਨ ਤੇ ਦੇਯ੍ਯਧਮ੍ਮੋ ਹਾਯਿਸ੍ਸਤੀ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਸੇਟ੍ਠਿਭਰਿਯਾਯ ਸਤ੍ਤਵਸ੍ਸਿਕਂ ਸੀਸਾਬਾਧਂ ਏਕੇਨੇਵ ਨਤ੍ਥੁਕਮ੍ਮੇਨ ਅਪਕਡ੍ਢਿ. ਅਥ ਖੋ ਸੇਟ੍ਠਿਭਰਿਯਾ ਅਰੋਗਾ ਸਮਾਨਾ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਚਤ੍ਤਾਰਿ ਸਹਸ੍ਸਾਨਿ ਪਾਦਾਸਿ. ਪੁਤ੍ਤੋ – ਮਾਤਾ ਮੇ ਅਰੋਗਾ ਠਿਤਾਤਿ ਚਤ੍ਤਾਰਿ ਸਹਸ੍ਸਾਨਿ ਪਾਦਾਸਿ. ਸੁਣਿਸਾ – ਸਸ੍ਸੁ ਮੇ ਅਰੋਗਾ ਠਿਤਾਤਿ ਚਤ੍ਤਾਰਿ ਸਹਸ੍ਸਾਨਿ ਪਾਦਾਸਿ. ਸੇਟ੍ਠਿ ਗਹਪਤਿ – ਭਰਿਯਾ ਮੇ ਅਰੋਗਾ ਠਿਤਾਤਿ ਚਤ੍ਤਾਰਿ ਸਹਸ੍ਸਾਨਿ ਪਾਦਾਸਿ ਦਾਸਞ੍ਚ ਦਾਸਿਞ੍ਚ ਅਸ੍ਸਰਥਞ੍ਚ.

ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਾਨਿ ਸੋਲ਼ਸਸਹਸ੍ਸਾਨਿ ਆਦਾਯ ਦਾਸਞ੍ਚ ਦਾਸਿਞ੍ਚ ਅਸ੍ਸਰਥਞ੍ਚ ਯੇਨ ਰਾਜਗਹਂ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਰਾਜਗਹਂ ਯੇਨ ਅਭਯੋ ਰਾਜਕੁਮਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਅਭਯਂ ਰਾਜਕੁਮਾਰਂ ਏਤਦਵੋਚ – ‘‘ਇਦਂ ਮੇ, ਦੇਵ, ਪਠਮਕਮ੍ਮਂ ਸੋਲ਼ਸਸਹਸ੍ਸਾਨਿ ਦਾਸੋ ਚ ਦਾਸੀ ਚ ਅਸ੍ਸਰਥੋ ਚ. ਪਟਿਗ੍ਗਣ੍ਹਾਤੁ ਮੇ ਦੇਵੋ ਪੋਸਾਵਨਿਕ’’ਨ੍ਤਿ. ‘‘ਅਲਂ, ਭਣੇ ਜੀਵਕ; ਤੁਯ੍ਹਮੇਵ ਹੋਤੁ. ਅਮ੍ਹਾਕਞ੍ਞੇਵ ਅਨ੍ਤੇਪੁਰੇ ਨਿਵੇਸਨਂ ਮਾਪੇਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਅਭਯਸ੍ਸ ਰਾਜਕੁਮਾਰਸ੍ਸ ਪਟਿਸ੍ਸੁਤ੍ਵਾ ਅਭਯਸ੍ਸ ਰਾਜਕੁਮਾਰਸ੍ਸ ਅਨ੍ਤੇਪੁਰੇ ਨਿਵੇਸਨਂ ਮਾਪੇਸਿ.

ਸੇਟ੍ਠਿਭਰਿਯਾਵਤ੍ਥੁ ਨਿਟ੍ਠਿਤਂ.

੨੦੪. ਬਿਮ੍ਬਿਸਾਰਰਾਜਵਤ੍ਥੁ

੩੩੧. ਤੇਨ ਖੋ ਪਨ ਸਮਯੇਨ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਭਗਨ੍ਦਲਾਬਾਧੋ ਹੋਤਿ. ਸਾਟਕਾ ਲੋਹਿਤੇਨ ਮਕ੍ਖਿਯਨ੍ਤਿ. ਦੇਵਿਯੋ ਦਿਸ੍ਵਾ ਉਪ੍ਪਣ੍ਡੇਨ੍ਤਿ – ‘‘ਉਤੁਨੀ ਦਾਨਿ ਦੇਵੋ, ਪੁਪ੍ਫਂ ਦੇਵਸ੍ਸ ਉਪ੍ਪਨ੍ਨਂ, ਨ ਚਿਰਂ [ਨਚਿਰਸ੍ਸੇਵ (ਸ੍ਯਾ.)] ਦੇਵੋ ਵਿਜਾਯਿਸ੍ਸਤੀ’’ਤਿ. ਤੇਨ ਰਾਜਾ ਮਙ੍ਕੁ ਹੋਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਅਭਯਂ ਰਾਜਕੁਮਾਰਂ ਏਤਦਵੋਚ – ‘‘ਮਯ੍ਹਂ ਖੋ, ਭਣੇ ਅਭਯ, ਤਾਦਿਸੋ ਆਬਾਧੋ, ਸਾਟਕਾ ਲੋਹਿਤੇਨ ਮਕ੍ਖਿਯਨ੍ਤਿ, ਦੇਵਿਯੋ ਮਂ ਦਿਸ੍ਵਾ ਉਪ੍ਪਣ੍ਡੇਨ੍ਤਿ – ‘ਉਤੁਨੀ ਦਾਨਿ ਦੇਵੋ, ਪੁਪ੍ਫਂ ਦੇਵਸ੍ਸ ਉਪ੍ਪਨ੍ਨਂ, ਨ ਚਿਰਂ ਦੇਵੋ ਵਿਜਾਯਿਸ੍ਸਤੀ’ਤਿ. ਇਙ੍ਘ, ਭਣੇ ਅਭਯ, ਤਾਦਿਸਂ ਵੇਜ੍ਜਂ ਜਾਨਾਹਿ ਯੋ ਮਂ ਤਿਕਿਚ੍ਛੇਯ੍ਯਾ’’ਤਿ. ‘‘ਅਯਂ, ਦੇਵ, ਅਮ੍ਹਾਕਂ ਜੀਵਕੋ ਵੇਜ੍ਜੋ ਤਰੁਣੋ ਭਦ੍ਰਕੋ. ਸੋ ਦੇਵਂ ਤਿਕਿਚ੍ਛਿਸ੍ਸਤੀ’’ਤਿ. ‘‘ਤੇਨ ਹਿ, ਭਣੇ ਅਭਯ, ਜੀਵਕਂ ਵੇਜ੍ਜਂ ਆਣਾਪੇਹਿ; ਸੋ ਮਂ ਤਿਕਿਚ੍ਛਿਸ੍ਸਤੀ’’ਤਿ. ਅਥ ਖੋ ਅਭਯੋ ਰਾਜਕੁਮਾਰੋ ਜੀਵਕਂ ਕੋਮਾਰਭਚ੍ਚਂ ਆਣਾਪੇਸਿ – ‘‘ਗਚ੍ਛ, ਭਣੇ ਜੀਵਕ, ਰਾਜਾਨਂ ਤਿਕਿਚ੍ਛਾਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਅਭਯਸ੍ਸ ਰਾਜਕੁਮਾਰਸ੍ਸ ਪਟਿਸ੍ਸੁਤ੍ਵਾ ਨਖੇਨ ਭੇਸਜ੍ਜਂ ਆਦਾਯ ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਆਬਾਧਂ ਤੇ, ਦੇਵ, ਪਸ੍ਸਾਮਾ’’ਤਿ [ਪਸ੍ਸਾਮੀਤਿ (ਸ੍ਯਾ.)]. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਭਗਨ੍ਦਲਾਬਾਧਂ ਏਕੇਨੇਵ ਆਲੇਪੇਨ ਅਪਕਡ੍ਢਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਅਰੋਗੋ ਸਮਾਨੋ ਪਞ੍ਚ ਇਤ੍ਥਿਸਤਾਨਿ ਸਬ੍ਬਾਲਙ੍ਕਾਰਂ ਭੂਸਾਪੇਤ੍ਵਾ ਓਮੁਞ੍ਚਾਪੇਤ੍ਵਾ ਪੁਞ੍ਜਂ ਕਾਰਾਪੇਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਏਤਂ, ਭਣੇ ਜੀਵਕ, ਪਞ੍ਚਨ੍ਨਂ ਇਤ੍ਥਿਸਤਾਨਂ ਸਬ੍ਬਾਲਙ੍ਕਾਰਂ ਤੁਯ੍ਹਂ ਹੋਤੂ’’ਤਿ. ‘‘ਅਲਂ, ਦੇਵ, ਅਧਿਕਾਰਂ ਮੇ ਦੇਵੋ ਸਰਤੂ’’ਤਿ. ‘‘ਤੇਨ ਹਿ, ਭਣੇ ਜੀਵਕ, ਮਂ ਉਪਟ੍ਠਹ, ਇਤ੍ਥਾਗਾਰਞ੍ਚ, ਬੁਦ੍ਧਪ੍ਪਮੁਖਞ੍ਚ ਭਿਕ੍ਖੁਸਙ੍ਘ’’ਨ੍ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਚ੍ਚਸ੍ਸੋਸਿ.

ਬਿਮ੍ਬਿਸਾਰਰਾਜਵਤ੍ਥੁ ਨਿਟ੍ਠਿਤਂ.

੨੦੫. ਰਾਜਗਹਸੇਟ੍ਠਿਵਤ੍ਥੁ

੩੩੨. ਤੇਨ ਖੋ ਪਨ ਸਮਯੇਨ ਰਾਜਗਹਕਸ੍ਸ ਸੇਟ੍ਠਿਸ੍ਸ ਸਤ੍ਤਵਸ੍ਸਿਕੋ ਸੀਸਾਬਾਧੋ ਹੋਤਿ. ਬਹੂ ਮਹਨ੍ਤਾ ਮਹਨ੍ਤਾ ਦਿਸਾਪਾਮੋਕ੍ਖਾ ਵੇਜ੍ਜਾ ਆਗਨ੍ਤ੍ਵਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਬਹੁਂ ਹਿਰਞ੍ਞਂ ਆਦਾਯ ਅਗਮਂਸੁ. ਅਪਿ ਚ, ਵੇਜ੍ਜੇਹਿ ਪਚ੍ਚਕ੍ਖਾਤੋ ਹੋਤਿ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ‘‘ਪਞ੍ਚਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀ’’ਤਿ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ‘‘ਸਤ੍ਤਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀ’’ਤਿ. ਅਥ ਖੋ ਰਾਜਗਹਕਸ੍ਸ ਨੇਗਮਸ੍ਸ ਏਤਦਹੋਸਿ – ‘‘ਅਯਂ ਖੋ ਸੇਟ੍ਠਿ ਗਹਪਤਿ ਬਹੂਪਕਾਰੋ ਰਞ੍ਞੋ ਚੇਵ ਨੇਗਮਸ੍ਸ ਚ. ਅਪਿ ਚ, ਵੇਜ੍ਜੇਹਿ ਪਚ੍ਚਕ੍ਖਾਤੋ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ‘ਪਞ੍ਚਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀ’ਤਿ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ‘ਸਤ੍ਤਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀ’ਤਿ. ਅਯਞ੍ਚ ਰਞ੍ਞੋ ਜੀਵਕੋ ਵੇਜ੍ਜੋ ਤਰੁਣੋ ਭਦ੍ਰਕੋ. ਯਂਨੂਨ ਮਯਂ ਰਾਜਾਨਂ ਜੀਵਕਂ ਵੇਜ੍ਜਂ ਯਾਚੇਯ੍ਯਾਮ ਸੇਟ੍ਠਿਂ ਗਹਪਤਿਂ ਤਿਕਿਚ੍ਛਿਤੁ’’ਨ੍ਤਿ. ਅਥ ਖੋ ਰਾਜਗਹਕੋ ਨੇਗਮੋ ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਅਯਂ, ਦੇਵ, ਸੇਟ੍ਠਿ ਗਹਪਤਿ ਬਹੂਪਕਾਰੋ ਦੇਵਸ੍ਸ ਚੇਵ ਨੇਗਮਸ੍ਸ ਚ; ਅਪਿ ਚ, ਵੇਜ੍ਜੇਹਿ ਪਚ੍ਚਕ੍ਖਾਤੋ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ਪਞ੍ਚਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀਤਿ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ਸਤ੍ਤਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀਤਿ. ਸਾਧੁ ਦੇਵੋ ਜੀਵਕਂ ਵੇਜ੍ਜਂ ਆਣਾਪੇਤੁ ਸੇਟ੍ਠਿਂ ਗਹਪਤਿਂ ਤਿਕਿਚ੍ਛਿਤੁ’’ਨ੍ਤਿ.

ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਜੀਵਕਂ ਕੋਮਾਰਭਚ੍ਚਂ ਆਣਾਪੇਸਿ – ‘‘ਗਚ੍ਛ, ਭਣੇ ਜੀਵਕ, ਸੇਟ੍ਠਿਂ ਗਹਪਤਿਂ ਤਿਕਿਚ੍ਛਾਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਤ੍ਵਾ ਯੇਨ ਸੇਟ੍ਠਿ ਗਹਪਤਿ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਸੇਟ੍ਠਿਸ੍ਸ ਗਹਪਤਿਸ੍ਸ ਵਿਕਾਰਂ ਸਲ੍ਲਕ੍ਖੇਤ੍ਵਾ ਸੇਟ੍ਠਿਂ ਗਹਪਤਿਂ ਏਤਦਵੋਚ – ‘‘ਸਚੇ ਤ੍ਵਂ, ਗਹਪਤਿ, ਅਰੋਗੋ ਭਵੇਯ੍ਯਾਸਿ [ਸਚਾਹਂ ਤਂ ਗਹਪਤਿ ਅਰੋਗਾਪੇਯ੍ਯਂ (ਸੀ.), ਸਚਾਹਂ ਤਂ ਗਹਪਤਿ ਅਰੋਗਂ ਕਰੇਯ੍ਯਂ (ਸ੍ਯਾ.)] ਕਿਂ ਮੇ ਅਸ੍ਸ ਦੇਯ੍ਯਧਮ੍ਮੋ’’ਤਿ? ‘‘ਸਬ੍ਬਂ ਸਾਪਤੇਯ੍ਯਞ੍ਚ ਤੇ, ਆਚਰਿਯ, ਹੋਤੁ, ਅਹਞ੍ਚ ਤੇ ਦਾਸੋ’’ਤਿ. ‘‘ਸਕ੍ਖਿਸ੍ਸਸਿ ਪਨ ਤ੍ਵਂ, ਗਹਪਤਿ, ਏਕੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਕ੍ਕੋਮਹਂ, ਆਚਰਿਯ, ਏਕੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਸਕ੍ਖਿਸ੍ਸਸਿ ਪਨ ਤ੍ਵਂ, ਗਹਪਤਿ, ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਕ੍ਕੋਮਹਂ, ਆਚਰਿਯ, ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਸਕ੍ਖਿਸ੍ਸਸਿ ਪਨ ਤ੍ਵਂ, ਗਹਪਤਿ, ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਕ੍ਕੋਮਹਂ, ਆਚਰਿਯ, ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ.

ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਸੇਟ੍ਠਿਂ ਗਹਪਤਿਂ ਮਞ੍ਚਕੇ ਨਿਪਾਤੇਤ੍ਵਾ [ਨਿਪਜ੍ਜਾਪੇਤ੍ਵਾ (ਸੀ. ਸ੍ਯਾ.)] ਮਞ੍ਚਕੇ [ਮਞ੍ਚਕੇਨ (ਸੀ.)] ਸਮ੍ਬਨ੍ਧਿਤ੍ਵਾ ਸੀਸਚ੍ਛਵਿਂ ਉਪ੍ਪਾਟੇਤ੍ਵਾ [ਫਾਲੇਤ੍ਵਾ (ਸੀ.)] ਸਿਬ੍ਬਿਨਿਂ ਵਿਨਾਮੇਤ੍ਵਾ ਦ੍ਵੇ ਪਾਣਕੇ ਨੀਹਰਿਤ੍ਵਾ ਮਹਾਜਨਸ੍ਸ ਦਸ੍ਸੇਸਿ – ‘‘ਪਸ੍ਸਥਯ੍ਯੇ [ਪਸ੍ਸੇਸ੍ਯਾਥ (ਸੀ.), ਪਸ੍ਸਥ (ਸ੍ਯਾ.), ਪਸ੍ਸਥਯ੍ਯੋ (ਕ.)], ਇਮੇ ਦ੍ਵੇ ਪਾਣਕੇ, ਏਕਂ ਖੁਦ੍ਦਕਂ ਏਕਂ ਮਹਲ੍ਲਕਂ. ਯੇ ਤੇ ਆਚਰਿਯਾ ਏਵਮਾਹਂਸੁ – ਪਞ੍ਚਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀਤਿ – ਤੇਹਾਯਂ ਮਹਲ੍ਲਕੋ ਪਾਣਕੋ ਦਿਟ੍ਠੋ. ਪਞ੍ਚਮਂ ਦਿਵਸਂ ਸੇਟ੍ਠਿਸ੍ਸ ਗਹਪਤਿਸ੍ਸ ਮਤ੍ਥਲੁਙ੍ਗਂ ਪਰਿਯਾਦਿਯਿਸ੍ਸਤਿ. ਮਤ੍ਥਲੁਙ੍ਗਸ੍ਸ ਪਰਿਯਾਦਾਨਾ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤਿ. ਸੁਦਿਟ੍ਠੋ ਤੇਹਿ ਆਚਰਿਯੇਹਿ. ਯੇ ਤੇ ਆਚਰਿਯਾ ਏਵਮਾਹਂਸੁ – ਸਤ੍ਤਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀਤਿ – ਤੇਹਾਯਂ ਖੁਦ੍ਦਕੋ ਪਾਣਕੋ ਦਿਟ੍ਠੋ. ਸਤ੍ਤਮਂ ਦਿਵਸਂ ਸੇਟ੍ਠਿਸ੍ਸ ਗਹਪਤਿਸ੍ਸ ਮਤ੍ਥਲੁਙ੍ਗਂ ਪਰਿਯਾਦਿਯਿਸ੍ਸਤਿ. ਮਤ੍ਥਲੁਙ੍ਗਸ੍ਸ ਪਰਿਯਾਦਾਨਾ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤਿ. ਸੁਦਿਟ੍ਠੋ ਤੇਹਿ ਆਚਰਿਯੇਹੀ’’ਤਿ. ਸਿਬ੍ਬਿਨਿਂ ਸਮ੍ਪਟਿਪਾਟੇਤ੍ਵਾ ਸੀਸਚ੍ਛਵਿਂ ਸਿਬ੍ਬਿਤ੍ਵਾ ਆਲੇਪਂ ਅਦਾਸਿ. ਅਥ ਖੋ ਸੇਟ੍ਠਿ ਗਹਪਤਿ ਸਤ੍ਤਾਹਸ੍ਸ ਅਚ੍ਚਯੇਨ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਨਾਹਂ, ਆਚਰਿਯ, ਸਕ੍ਕੋਮਿ ਏਕੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਨਨੁ ਮੇ ਤ੍ਵਂ, ਗਹਪਤਿ, ਪਟਿਸ੍ਸੁਣਿ – ਸਕ੍ਕੋਮਹਂ, ਆਚਰਿਯ, ਏਕੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਚ੍ਚਾਹਂ, ਆਚਰਿਯ, ਪਟਿਸ੍ਸੁਣਿਂ, ਅਪਾਹਂ ਮਰਿਸ੍ਸਾਮਿ, ਨਾਹਂ ਸਕ੍ਕੋਮਿ ਏਕੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਤੇਨ ਹਿ ਤ੍ਵਂ, ਗਹਪਤਿ, ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਾਹੀ’’ਤਿ. ਅਥ ਖੋ ਸੇਟ੍ਠਿ ਗਹਪਤਿ ਸਤ੍ਤਾਹਸ੍ਸ ਅਚ੍ਚਯੇਨ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਨਾਹਂ, ਆਚਰਿਯ, ਸਕ੍ਕੋਮਿ ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਨਨੁ ਮੇ ਤ੍ਵਂ, ਗਹਪਤਿ, ਪਟਿਸ੍ਸੁਣਿ – ਸਕ੍ਕੋਮਹਂ, ਆਚਰਿਯ, ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਚ੍ਚਾਹਂ, ਆਚਰਿਯ, ਪਟਿਸ੍ਸੁਣਿਂ, ਅਪਾਹਂ ਮਰਿਸ੍ਸਾਮਿ, ਨਾਹਂ, ਆਚਰਿਯ, ਸਕ੍ਕੋਮਿ ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਤੇਨ ਹਿ ਤ੍ਵਂ, ਗਹਪਤਿ, ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਾਹੀ’’ਤਿ. ਅਥ ਖੋ ਸੇਟ੍ਠਿ ਗਹਪਤਿ ਸਤ੍ਤਾਹਸ੍ਸ ਅਚ੍ਚਯੇਨ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਨਾਹਂ, ਆਚਰਿਯ, ਸਕ੍ਕੋਮਿ ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਨਨੁ ਮੇ ਤ੍ਵਂ, ਗਹਪਤਿ, ਪਟਿਸ੍ਸੁਣਿ – ਸਕ੍ਕੋਮਹਂ, ਆਚਰਿਯ, ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਚ੍ਚਾਹਂ, ਆਚਰਿਯ, ਪਟਿਸ੍ਸੁਣਿਂ, ਅਪਾਹਂ ਮਰਿਸ੍ਸਾਮਿ, ਨਾਹਂ ਸਕ੍ਕੋਮਿ ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਅਹਂ ਚੇ ਤਂ, ਗਹਪਤਿ, ਨ ਵਦੇਯ੍ਯਂ, ਏਤ੍ਤਕਮ੍ਪਿ ਤ੍ਵਂ ਨ ਨਿਪਜ੍ਜੇਯ੍ਯਾਸਿ, ਅਪਿ ਚ ਪਟਿਕਚ੍ਚੇਵ ਮਯਾ ਞਾਤੋ – ਤੀਹਿ ਸਤ੍ਤਾਹੇਹਿ ਸੇਟ੍ਠਿ ਗਹਪਤਿ ਅਰੋਗੋ ਭਵਿਸ੍ਸਤੀਤਿ. ਉਟ੍ਠੇਹਿ, ਗਹਪਤਿ, ਅਰੋਗੋਸਿ. ਜਾਨਾਸਿ ਕਿਂ ਮੇ ਦੇਯ੍ਯਧਮ੍ਮੋ’’ਤਿ? ‘‘ਸਬ੍ਬਂ ਸਾਪਤੇਯ੍ਯਞ੍ਚ ਤੇ, ਆਚਰਿਯ, ਹੋਤੁ, ਅਹਞ੍ਚ ਤੇ ਦਾਸੋ’’ਤਿ. ‘‘ਅਲਂ, ਗਹਪਤਿ, ਮਾ ਮੇ ਤ੍ਵਂ ਸਬ੍ਬਂ ਸਾਪਤੇਯ੍ਯਂ ਅਦਾਸਿ, ਮਾ ਚ ਮੇ ਦਾਸੋ. ਰਞ੍ਞੋ ਸਤਸਹਸ੍ਸਂ ਦੇਹਿ, ਮਯ੍ਹਂ ਸਤਸਹਸ੍ਸ’’ਨ੍ਤਿ. ਅਥ ਖੋ ਸੇਟ੍ਠਿ ਗਹਪਤਿ ਅਰੋਗੋ ਸਮਾਨੋ ਰਞ੍ਞੋ ਸਤਸਹਸ੍ਸਂ ਅਦਾਸਿ, ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਸਤਸਹਸ੍ਸਂ.

ਰਾਜਗਹਸੇਟ੍ਠਿਵਤ੍ਥੁ ਨਿਟ੍ਠਿਤਂ.

੨੦੬. ਸੇਟ੍ਠਿਪੁਤ੍ਤਵਤ੍ਥੁ

੩੩੩. ਤੇਨ ਖੋ ਪਨ ਸਮਯੇਨ ਬਾਰਾਣਸੇਯ੍ਯਕਸ੍ਸ ਸੇਟ੍ਠਿਪੁਤ੍ਤਸ੍ਸ ਮੋਕ੍ਖਚਿਕਾਯ ਕੀਲ਼ਨ੍ਤਸ੍ਸ ਅਨ੍ਤਗਣ੍ਠਾਬਾਧੋ ਹੋਤਿ, ਯੇਨ ਯਾਗੁਪਿ ਪੀਤਾ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਉਚ੍ਚਾਰੋਪਿ ਪਸ੍ਸਾਵੋਪਿ ਨ ਪਗੁਣੋ. ਸੋ ਤੇਨ ਕਿਸੋ ਹੋਤਿ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ. ਅਥ ਖੋ ਬਾਰਾਣਸੇਯ੍ਯਕਸ੍ਸ ਸੇਟ੍ਠਿਸ੍ਸ ਏਤਦਹੋਸਿ – ‘‘ਮਯ੍ਹਂ ਖੋ ਪੁਤ੍ਤਸ੍ਸ ਤਾਦਿਸੋ ਆਬਾਧੋ, ਯੇਨ ਯਾਗੁਪਿ ਪੀਤਾ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਉਚ੍ਚਾਰੋਪਿ ਪਸ੍ਸਾਵੋਪਿ ਨ ਪਗੁਣੋ. ਸੋ ਤੇਨ ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ. ਯਂਨੂਨਾਹਂ ਰਾਜਗਹਂ ਗਨ੍ਤ੍ਵਾ ਰਾਜਾਨਂ ਜੀਵਕਂ ਵੇਜ੍ਜਂ ਯਾਚੇਯ੍ਯਂ ਪੁਤ੍ਤਂ ਮੇ ਤਿਕਿਚ੍ਛਿਤੁ’’ਨ੍ਤਿ. ਅਥ ਖੋ ਬਾਰਾਣਸੇਯ੍ਯਕੋ ਸੇਟ੍ਠਿ ਰਾਜਗਹਂ ਗਨ੍ਤ੍ਵਾ ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਮਯ੍ਹਂ ਖੋ, ਦੇਵ, ਪੁਤ੍ਤਸ੍ਸ ਤਾਦਿਸੋ ਆਬਾਧੋ, ਯੇਨ ਯਾਗੁਪਿ ਪੀਤਾ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਉਚ੍ਚਾਰੋਪਿ ਪਸ੍ਸਾਵੋਪਿ ਨ ਪਗੁਣੋ. ਸੋ ਤੇਨ ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ. ਸਾਧੁ ਦੇਵੋ ਜੀਵਕਂ ਵੇਜ੍ਜਂ ਆਣਾਪੇਤੁ ਪੁਤ੍ਤਂ ਮੇ ਤਿਕਿਚ੍ਛਿਤੁ’’ਨ੍ਤਿ.

ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਜੀਵਕਂ ਕੋਮਾਰਭਚ੍ਚਂ ਆਣਾਪੇਸਿ – ‘‘ਗਚ੍ਛ, ਭਣੇ ਜੀਵਕ, ਬਾਰਾਣਸਿਂ ਗਨ੍ਤ੍ਵਾ ਬਾਰਾਣਸੇਯ੍ਯਕਂ ਸੇਟ੍ਠਿਪੁਤ੍ਤਂ ਤਿਕਿਚ੍ਛਾਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਯੇਨ ਬਾਰਾਣਸੇਯ੍ਯਕੋ ਸੇਟ੍ਠਿਪੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਬਾਰਾਣਸੇਯ੍ਯਕਸ੍ਸ ਸੇਟ੍ਠਿਪੁਤ੍ਤਸ੍ਸ ਵਿਕਾਰਂ ਸਲ੍ਲਕ੍ਖੇਤ੍ਵਾ ਜਨਂ ਉਸ੍ਸਾਰੇਤ੍ਵਾ ਤਿਰੋਕਰਣਿਯਂ ਪਰਿਕ੍ਖਿਪਿਤ੍ਵਾ ਥਮ੍ਭੇ ਉਬ੍ਬਨ੍ਧਿਤ੍ਵਾ [ਉਪਨਿਬਨ੍ਧਿਤ੍ਵਾ (ਸੀ. ਸ੍ਯਾ.)] ਭਰਿਯਂ ਪੁਰਤੋ ਠਪੇਤ੍ਵਾ ਉਦਰਚ੍ਛਵਿਂ ਉਪ੍ਪਾਟੇਤ੍ਵਾ ਅਨ੍ਤਗਣ੍ਠਿਂ ਨੀਹਰਿਤ੍ਵਾ ਭਰਿਯਾਯ ਦਸ੍ਸੇਸਿ – ‘‘ਪਸ੍ਸ ਤੇ ਸਾਮਿਕਸ੍ਸ ਆਬਾਧਂ, ਇਮਿਨਾ ਯਾਗੁਪਿ ਪੀਤਾ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਉਚ੍ਚਾਰੋਪਿ ਪਸ੍ਸਾਵੋਪਿ ਨ ਪਗੁਣੋ; ਇਮਿਨਾਯਂ ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ’’ਤਿ. ਅਨ੍ਤਗਣ੍ਠਿਂ ਵਿਨਿਵੇਠੇਤ੍ਵਾ ਅਨ੍ਤਾਨਿ ਪਟਿਪਵੇਸੇਤ੍ਵਾ ਉਦਰਚ੍ਛਵਿਂ ਸਿਬ੍ਬਿਤ੍ਵਾ ਆਲੇਪਂ ਅਦਾਸਿ. ਅਥ ਖੋ ਬਾਰਾਣਸੇਯ੍ਯਕੋ ਸੇਟ੍ਠਿਪੁਤ੍ਤੋ ਨਚਿਰਸ੍ਸੇਵ ਅਰੋਗੋ ਅਹੋਸਿ. ਅਥ ਖੋ ਬਾਰਾਣਸੇਯ੍ਯਕੋ ਸੇਟ੍ਠਿ ‘ਪੁਤ੍ਤੋ ਮੇ ਅਰੋਗੋ ਠਿਤੋ’ਤਿ [ਅਰੋਗਾਪਿਤੋਤਿ (ਸੀ.)] ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਸੋਲ਼ਸਸਹਸ੍ਸਾਨਿ ਪਾਦਾਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਾਨਿ ਸੋਲ਼ਸਸਹਸ੍ਸਾਨਿ ਆਦਾਯ ਪੁਨਦੇਵ ਰਾਜਗਹਂ ਪਚ੍ਚਾਗਞ੍ਛਿ.

ਸੇਟ੍ਠਿਪੁਤ੍ਤਵਤ੍ਥੁ ਨਿਟ੍ਠਿਤਂ.

੨੦੭. ਪਜ੍ਜੋਤਰਾਜਵਤ੍ਥੁ

੩੩੪. ਤੇਨ ਖੋ ਪਨ ਸਮਯੇਨ ਰਞ੍ਞੋ [ਉਜ੍ਜੇਨਿਯਂ ਰਞ੍ਞੋ (ਸ੍ਯਾ.)] ਪਜ੍ਜੋਤਸ੍ਸ ਪਣ੍ਡੁਰੋਗਾਬਾਧੋ ਹੋਤਿ. ਬਹੂ ਮਹਨ੍ਤਾ ਮਹਨ੍ਤਾ ਦਿਸਾਪਾਮੋਕ੍ਖਾ ਵੇਜ੍ਜਾ ਆਗਨ੍ਤ੍ਵਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਬਹੁਂ ਹਿਰਞ੍ਞਂ ਆਦਾਯ ਅਗਮਂਸੁ. ਅਥ ਖੋ ਰਾਜਾ ਪਜ੍ਜੋਤੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਮਯ੍ਹਂ ਖੋ ਤਾਦਿਸੋ ਆਬਾਧੋ, ਸਾਧੁ ਦੇਵੋ ਜੀਵਕਂ ਵੇਜ੍ਜਂ ਆਣਾਪੇਤੁ, ਸੋ ਮਂ ਤਿਕਿਚ੍ਛਿਸ੍ਸਤੀ’’ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਜੀਵਕਂ ਕੋਮਾਰਭਚ੍ਚਂ ਆਣਾਪੇਸਿ – ‘‘ਗਚ੍ਛ, ਭਣੇ ਜੀਵਕ; ਉਜ੍ਜੇਨਿਂ ਗਨ੍ਤ੍ਵਾ ਰਾਜਾਨਂ ਪਜ੍ਜੋਤਂ ਤਿਕਿਚ੍ਛਾਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਤ੍ਵਾ ਉਜ੍ਜੇਨਿਂ ਗਨ੍ਤ੍ਵਾ ਯੇਨ ਰਾਜਾ ਪਜ੍ਜੋਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਰਞ੍ਞੋ ਪਜ੍ਜੋਤਸ੍ਸ ਵਿਕਾਰਂ ਸਲ੍ਲਕ੍ਖੇਤ੍ਵਾ ਰਾਜਾਨਂ ਪਜ੍ਜੋਤਂ ਏਤਦਵੋਚ – ‘‘ਸਪ੍ਪਿਂ ਦੇਹਿ [ਇਦਂ ਪਦਦ੍ਵਯਂ ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ], ਸਪ੍ਪਿਂ ਦੇਵ, ਨਿਪ੍ਪਚਿਸ੍ਸਾਮਿ. ਤਂ ਦੇਵੋ ਪਿਵਿਸ੍ਸਤੀ’’ਤਿ. ‘‘ਅਲਂ, ਭਣੇ ਜੀਵਕ, ਯਂ ਤੇ ਸਕ੍ਕਾ ਵਿਨਾ ਸਪ੍ਪਿਨਾ ਅਰੋਗਂ ਕਾਤੁਂ ਤਂ ਕਰੋਹਿ. ਜੇਗੁਚ੍ਛਂ ਮੇ ਸਪ੍ਪਿ, ਪਟਿਕੂਲ’’ਨ੍ਤਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਇਮਸ੍ਸ ਖੋ ਰਞ੍ਞੋ ਤਾਦਿਸੋ ਆਬਾਧੋ, ਨ ਸਕ੍ਕਾ ਵਿਨਾ ਸਪ੍ਪਿਨਾ ਅਰੋਗਂ ਕਾਤੁਂ. ਯਂਨੂਨਾਹਂ ਸਪ੍ਪਿਂ ਨਿਪ੍ਪਚੇਯ੍ਯਂ ਕਸਾਵਵਣ੍ਣਂ ਕਸਾਵਗਨ੍ਧਂ ਕਸਾਵਰਸ’’ਨ੍ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਨਾਨਾਭੇਸਜ੍ਜੇਹਿ ਸਪ੍ਪਿਂ ਨਿਪ੍ਪਚਿ ਕਸਾਵਵਣ੍ਣਂ ਕਸਾਵਗਨ੍ਧਂ ਕਸਾਵਰਸਂ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਇਮਸ੍ਸ ਖੋ ਰਞ੍ਞੋ ਸਪ੍ਪਿ ਪੀਤਂ ਪਰਿਣਾਮੇਨ੍ਤਂ ਉਦ੍ਦੇਕਂ ਦਸ੍ਸਤਿ. ਚਣ੍ਡੋਯਂ ਰਾਜਾ ਘਾਤਾਪੇਯ੍ਯਾਪਿ ਮਂ. ਯਂਨੂਨਾਹਂ ਪਟਿਕਚ੍ਚੇਵ ਆਪੁਚ੍ਛੇਯ੍ਯ’’ਨ੍ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਰਾਜਾ ਪਜ੍ਜੋਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਾਨਂ ਪਜ੍ਜੋਤਂ ਏਤਦਵੋਚ – ‘‘ਮਯਂ ਖੋ, ਦੇਵ, ਵੇਜ੍ਜਾ ਨਾਮ ਤਾਦਿਸੇਨ ਮੁਹੁਤ੍ਤੇਨ ਮੂਲਾਨਿ ਉਦ੍ਧਰਾਮ ਭੇਸਜ੍ਜਾਨਿ ਸਂਹਰਾਮ. ਸਾਧੁ ਦੇਵੋ ਵਾਹਨਾਗਾਰੇਸੁ ਚ ਦ੍ਵਾਰੇਸੁ ਚ ਆਣਾਪੇਤੁ – ਯੇਨ ਵਾਹਨੇਨ ਜੀਵਕੋ ਇਚ੍ਛਤਿ ਤੇਨ ਵਾਹਨੇਨ ਗਚ੍ਛਤੁ, ਯੇਨ ਦ੍ਵਾਰੇਨ ਇਚ੍ਛਤਿ ਤੇਨ ਦ੍ਵਾਰੇਨ ਗਚ੍ਛਤੁ, ਯਂ ਕਾਲਂ ਇਚ੍ਛਤਿ ਤਂ ਕਾਲਂ ਗਚ੍ਛਤੁ, ਯਂ ਕਾਲਂ ਇਚ੍ਛਤਿ ਤਂ ਕਾਲਂ ਪਵਿਸਤੂ’’ਤਿ. ਅਥ ਖੋ ਰਾਜਾ ਪਜ੍ਜੋਤੋ ਵਾਹਨਾਗਾਰੇਸੁ ਚ ਦ੍ਵਾਰੇਸੁ ਚ ਆਣਾਪੇਸਿ – ‘‘ਯੇਨ ਵਾਹਨੇਨ ਜੀਵਕੋ ਇਚ੍ਛਤਿ ਤੇਨ ਵਾਹਨੇਨ ਗਚ੍ਛਤੁ, ਯੇਨ ਦ੍ਵਾਰੇਨ ਇਚ੍ਛਤਿ ਤੇਨ ਦ੍ਵਾਰੇਨ ਗਚ੍ਛਤੁ, ਯਂ ਕਾਲਂ ਇਚ੍ਛਤਿ ਤਂ ਕਾਲਂ ਗਚ੍ਛਤੁ, ਯਂ ਕਾਲਂ ਇਚ੍ਛਤਿ ਤਂ ਕਾਲਂ ਪਵਿਸਤੂ’’ਤਿ.

ਤੇਨ ਖੋ ਪਨ ਸਮਯੇਨ ਰਞ੍ਞੋ ਪਜ੍ਜੋਤਸ੍ਸ ਭਦ੍ਦਵਤਿਕਾ ਨਾਮ ਹਤ੍ਥਿਨਿਕਾ ਪਞ੍ਞਾਸਯੋਜਨਿਕਾ ਹੋਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਪਜ੍ਜੋਤਸ੍ਸ ਸਪ੍ਪਿਂ [ਤਂ ਸਪ੍ਪਿਂ (ਸ੍ਯਾ.)] ਉਪਨਾਮੇਸਿ – ‘‘ਕਸਾਵਂ ਦੇਵੋ ਪਿਵਤੂ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਰਾਜਾਨਂ ਪਜ੍ਜੋਤਂ ਸਪ੍ਪਿਂ ਪਾਯੇਤ੍ਵਾ ਹਤ੍ਥਿਸਾਲਂ ਗਨ੍ਤ੍ਵਾ ਭਦ੍ਦਵਤਿਕਾਯ ਹਤ੍ਥਿਨਿਕਾਯ ਨਗਰਮ੍ਹਾ ਨਿਪ੍ਪਤਿ.

ਅਥ ਖੋ ਰਞ੍ਞੋ ਪਜ੍ਜੋਤਸ੍ਸ ਤਂ ਸਪ੍ਪਿ ਪੀਤਂ ਪਰਿਣਾਮੇਨ੍ਤਂ ਉਦ੍ਦੇਕਂ ਅਦਾਸਿ. ਅਥ ਖੋ ਰਾਜਾ ਪਜ੍ਜੋਤੋ ਮਨੁਸ੍ਸੇ ਏਤਦਵੋਚ – ‘‘ਦੁਟ੍ਠੇਨ, ਭਣੇ, ਜੀਵਕੇਨ ਸਪ੍ਪਿਂ ਪਾਯਿਤੋਮ੍ਹਿ. ਤੇਨ ਹਿ, ਭਣੇ, ਜੀਵਕਂ ਵੇਜ੍ਜਂ ਵਿਚਿਨਥਾ’’ਤਿ. ‘‘ਭਦ੍ਦਵਤਿਕਾਯ, ਦੇਵ, ਹਤ੍ਥਿਨਿਕਾਯ ਨਗਰਮ੍ਹਾ ਨਿਪ੍ਪਤਿਤੋ’’ਤਿ. ਤੇਨ ਖੋ ਪਨ ਸਮਯੇਨ ਰਞ੍ਞੋ ਪਜ੍ਜੋਤਸ੍ਸ ਕਾਕੋ ਨਾਮ ਦਾਸੋ ਸਟ੍ਠਿਯੋਜਨਿਕੋ ਹੋਤਿ, ਅਮਨੁਸ੍ਸੇਨ ਪਟਿਚ੍ਚ ਜਾਤੋ. ਅਥ ਖੋ ਰਾਜਾ ਪਜ੍ਜੋਤੋ ਕਾਕਂ ਦਾਸਂ ਆਣਾਪੇਸਿ – ‘‘ਗਚ੍ਛ, ਭਣੇ ਕਾਕ, ਜੀਵਕਂ ਵੇਜ੍ਜਂ ਨਿਵਤ੍ਤੇਹਿ – ਰਾਜਾ ਤਂ, ਆਚਰਿਯ, ਨਿਵਤ੍ਤਾਪੇਤੀਤਿ. ਏਤੇ ਖੋ, ਭਣੇ ਕਾਕ, ਵੇਜ੍ਜਾ ਨਾਮ ਬਹੁਮਾਯਾ. ਮਾ ਚਸ੍ਸ ਕਿਞ੍ਚਿ ਪਟਿਗ੍ਗਹੇਸੀ’’ਤਿ.

ਅਥ ਖੋ ਕਾਕੋ ਦਾਸੋ ਜੀਵਕਂ ਕੋਮਾਰਭਚ੍ਚਂ ਅਨ੍ਤਰਾਮਗ੍ਗੇ ਕੋਸਮ੍ਬਿਯਂ ਸਮ੍ਭਾਵੇਸਿ

ਪਾਤਰਾਸਂ ਕਰੋਨ੍ਤਂ. ਅਥ ਖੋ ਕਾਕੋ ਦਾਸੋ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਰਾਜਾ ਤਂ, ਆਚਰਿਯ, ਨਿਵਤ੍ਤਾਪੇਤੀ’’ਤਿ. ‘‘ਆਗਮੇਹਿ, ਭਣੇ ਕਾਕ, ਯਾਵ ਭੁਞ੍ਜਾਮ [ਭੁਞ੍ਜਾਮਿ (ਸੀ. ਸ੍ਯਾ.)]. ਹਨ੍ਦ, ਭਣੇ ਕਾਕ, ਭੁਞ੍ਜਸ੍ਸੂ’’ਤਿ. ‘‘ਅਲਂ, ਆਚਰਿਯ, ਰਞ੍ਞਾਮ੍ਹਿ ਆਣਤ੍ਤੋ – ਏਤੇ ਖੋ, ਭਣੇ ਕਾਕ, ਵੇਜ੍ਜਾ ਨਾਮ ਬਹੁਮਾਯਾ, ਮਾ ਚਸ੍ਸ ਕਿਞ੍ਚਿ ਪਟਿਗ੍ਗਹੇਸੀ’’ਤਿ. ਤੇਨ ਖੋ ਪਨ ਸਮਯੇਨ ਜੀਵਕੋ ਕੋਮਾਰਭਚ੍ਚੋ ਨਖੇਨ ਭੇਸਜ੍ਜਂ ਓਲੁਮ੍ਪੇਤ੍ਵਾ ਆਮਲਕਞ੍ਚ ਖਾਦਤਿ ਪਾਨੀਯਞ੍ਚ ਪਿਵਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਕਾਕਂ ਦਾਸਂ ਏਤਦਵੋਚ – ‘‘ਹਨ੍ਦ, ਭਣੇ ਕਾਕ, ਆਮਲਕਞ੍ਚ ਖਾਦ ਪਾਨੀਯਞ੍ਚ ਪਿਵਸ੍ਸੂ’’ਤਿ. ਅਥ ਖੋ ਕਾਕੋ ਦਾਸੋ – ਅਯਂ ਖੋ ਵੇਜ੍ਜੋ ਆਮਲਕਞ੍ਚ ਖਾਦਤਿ ਪਾਨੀਯਞ੍ਚ ਪਿਵਤਿ, ਨ ਅਰਹਤਿ ਕਿਞ੍ਚਿ ਪਾਪਕਂ ਹੋਤੁਨ੍ਤਿ – ਉਪਡ੍ਢਾਮਲਕਞ੍ਚ ਖਾਦਿ ਪਾਨੀਯਞ੍ਚ ਅਪਾਯਿ. ਤਸ੍ਸ ਤਂ ਉਪਡ੍ਢਾਮਲਕਂ ਖਾਦਿਤਂ ਤਤ੍ਥੇਵ ਨਿਚ੍ਛਾਰੇਸਿ. ਅਥ ਖੋ ਕਾਕੋ ਦਾਸੋ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਅਤ੍ਥਿ ਮੇ, ਆਚਰਿਯ, ਜੀਵਿਤ’’ਨ੍ਤਿ? ‘‘ਮਾ, ਭਣੇ ਕਾਕ, ਭਾਯਿ, ਤ੍ਵਂ ਚੇਵ ਅਰੋਗੋ ਭਵਿਸ੍ਸਸਿ ਰਾਜਾ ਚ. ਚਣ੍ਡੋ ਸੋ ਰਾਜਾ ਘਾਤਾਪੇਯ੍ਯਾਪਿ ਮਂ, ਤੇਨਾਹਂ ਨ ਨਿਵਤ੍ਤਾਮੀ’’ਤਿ ਭਦ੍ਦਵਤਿਕਂ ਹਤ੍ਥਿਨਿਕਂ ਕਾਕਸ੍ਸ ਨਿਯ੍ਯਾਦੇਤ੍ਵਾ ਯੇਨ ਰਾਜਗਹਂ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਏਤਮਤ੍ਥਂ ਆਰੋਚੇਸਿ. ‘‘ਸੁਟ੍ਠੁ, ਭਣੇ ਜੀਵਕ, ਅਕਾਸਿ ਯਮ੍ਪਿ ਨ ਨਿਵਤ੍ਤੋ, ਚਣ੍ਡੋ ਸੋ ਰਾਜਾ ਘਾਤਾਪੇਯ੍ਯਾਪਿ ਤ’’ਨ੍ਤਿ. ਅਥ ਖੋ ਰਾਜਾ ਪਜ੍ਜੋਤੋ ਅਰੋਗੋ ਸਮਾਨੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਆਗਚ੍ਛਤੁ ਜੀਵਕੋ, ਵਰਂ ਦਸ੍ਸਾਮੀ’’ਤਿ. ‘‘ਅਲਂ, ਅਯ੍ਯੋ [ਦੇਵ (ਸ੍ਯਾ.)], ਅਧਿਕਾਰਂ ਮੇ ਦੇਵੋ ਸਰਤੂ’’ਤਿ.

ਪਜ੍ਜੋਤਰਾਜਵਤ੍ਥੁ ਨਿਟ੍ਠਿਤਂ.

੨੦੮. ਸਿਵੇਯ੍ਯਕਦੁਸ੍ਸਯੁਗਕਥਾ

੩੩੫. ਤੇਨ ਖੋ ਪਨ ਸਮਯੇਨ ਰਞ੍ਞੋ ਪਜ੍ਜੋਤਸ੍ਸ ਸਿਵੇਯ੍ਯਕਂ ਦੁਸ੍ਸਯੁਗਂ ਉਪ੍ਪਨ੍ਨਂ ਹੋਤਿ – ਬਹੂਨਂ [ਬਹੁਨ੍ਨਂ (ਸੀ. ਸ੍ਯਾ.)] ਦੁਸ੍ਸਾਨਂ ਬਹੂਨਂ ਦੁਸ੍ਸਯੁਗਾਨਂ ਬਹੂਨਂ ਦੁਸ੍ਸਯੁਗਸਤਾਨਂ ਬਹੂਨਂ ਦੁਸ੍ਸਯੁਗਸਹਸ੍ਸਾਨਂ ਬਹੂਨਂ ਦੁਸ੍ਸਯੁਗਸਤਸਹਸ੍ਸਾਨਂ ਅਗ੍ਗਞ੍ਚ ਸੇਟ੍ਠਞ੍ਚ ਮੋਕ੍ਖਞ੍ਚ ਉਤ੍ਤਮਞ੍ਚ ਪਵਰਞ੍ਚ. ਅਥ ਖੋ ਰਾਜਾ ਪਜ੍ਜੋਤੋ ਤਂ ਸਿਵੇਯ੍ਯਕਂ ਦੁਸ੍ਸਯੁਗਂ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਪਾਹੇਸਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਇਦਂ ਖੋ ਮੇ ਸਿਵੇਯ੍ਯਕਂ ਦੁਸ੍ਸਯੁਗਂ ਰਞ੍ਞਾ ਪਜ੍ਜੋਤੇਨ ਪਹਿਤਂ – ਬਹੂਨਂ ਦੁਸ੍ਸਾਨਂ ਬਹੂਨਂ ਦੁਸ੍ਸਯੁਗਾਨਂ ਬਹੂਨਂ ਦੁਸ੍ਸਯੁਗਸਤਾਨਂ ਬਹੂਨਂ ਦੁਸ੍ਸਯੁਗਸਹਸ੍ਸਾਨਂ ਬਹੂਨਂ ਦੁਸ੍ਸਯੁਗਸਤਸਹਸ੍ਸਾਨਂ ਅਗ੍ਗਞ੍ਚ ਸੇਟ੍ਠਞ੍ਚ ਮੋਕ੍ਖਞ੍ਚ ਉਤ੍ਤਮਞ੍ਚ ਪਵਰਞ੍ਚ. ਨਯਿਦਂ ਅਞ੍ਞੋ ਕੋਚਿ ਪਚ੍ਚਾਰਹਤਿ ਅਞ੍ਞਤ੍ਰ ਤੇਨ ਭਗਵਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ, ਰਞ੍ਞਾ ਵਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨਾ’’ਤਿ.

ਸਿਵੇਯ੍ਯਕਦੁਸ੍ਸਯੁਗਕਥਾ ਨਿਟ੍ਠਿਤਾ.

੨੦੯. ਸਮਤ੍ਤਿਂਸਵਿਰੇਚਨਕਥਾ

੩੩੬. ਤੇਨ ਖੋ ਪਨ ਸਮਯੇਨ ਭਗਵਤੋ ਕਾਯੋ ਦੋਸਾਭਿਸਨ੍ਨੋ ਹੋਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਦੋਸਾਭਿਸਨ੍ਨੋ ਖੋ, ਆਨਨ੍ਦ, ਤਥਾਗਤਸ੍ਸ ਕਾਯੋ. ਇਚ੍ਛਤਿ ਤਥਾਗਤੋ ਵਿਰੇਚਨਂ ਪਾਤੁ’’ਨ੍ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਜੀਵਕੋ ਕੋਮਾਰਭਚ੍ਚੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਦੋਸਾਭਿਸਨ੍ਨੋ ਖੋ, ਆਵੁਸੋ ਜੀਵਕ, ਤਥਾਗਤਸ੍ਸ ਕਾਯੋ. ਇਚ੍ਛਤਿ ਤਥਾਗਤੋ ਵਿਰੇਚਨਂ ਪਾਤੁ’’ਨ੍ਤਿ. ‘‘ਤੇਨ ਹਿ, ਭਨ੍ਤੇ ਆਨਨ੍ਦ, ਭਗਵਤੋ ਕਾਯਂ ਕਤਿਪਾਹਂ ਸਿਨੇਹੇਥਾ’’ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਕਾਯਂ ਕਤਿਪਾਹਂ ਸਿਨੇਹੇਤ੍ਵਾ ਯੇਨ ਜੀਵਕੋ ਕੋਮਾਰਭਚ੍ਚੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਸਿਨਿਦ੍ਧੋ ਖੋ, ਆਵੁਸੋ ਜੀਵਕ, ਤਥਾਗਤਸ੍ਸ ਕਾਯੋ. ਯਸ੍ਸ ਦਾਨਿ ਕਾਲਂ ਮਞ੍ਞਸੀ’’ਤਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਨ ਖੋ ਮੇਤਂ ਪਤਿਰੂਪਂ ਯੋਹਂ ਭਗਵਤੋ ਓਲ਼ਾਰਿਕਂ ਵਿਰੇਚਨਂ ਦਦੇਯ੍ਯ’’ਨ੍ਤਿ. ਤੀਣਿ ਉਪ੍ਪਲਹਤ੍ਥਾਨਿ ਨਾਨਾਭੇਸਜ੍ਜੇਹਿ ਪਰਿਭਾਵੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਏਕਂ ਉਪ੍ਪਲਹਤ੍ਥਂ ਭਗਵਤੋ ਉਪਨਾਮੇਸਿ – ‘‘ਇਮਂ, ਭਨ੍ਤੇ, ਭਗਵਾ ਪਠਮਂ ਉਪ੍ਪਲਹਤ੍ਥਂ ਉਪਸਿਙ੍ਘਤੁ. ਇਦਂ ਭਗਵਨ੍ਤਂ ਦਸਕ੍ਖਤ੍ਤੁਂ ਵਿਰੇਚੇਸ੍ਸਤੀ’’ਤਿ. ਦੁਤਿਯਂ ਉਪ੍ਪਲਹਤ੍ਥਂ ਭਗਵਤੋ ਉਪਨਾਮੇਸਿ – ‘‘ਇਮਂ, ਭਨ੍ਤੇ, ਭਗਵਾ ਦੁਤਿਯਂ ਉਪ੍ਪਲਹਤ੍ਥਂ ਉਪਸਿਙ੍ਘਤੁ. ਇਦਂ ਭਗਵਨ੍ਤਂ ਦਸਕ੍ਖਤ੍ਤੁਂ ਵਿਰੇਚੇਸ੍ਸਤੀ’’ਤਿ. ਤਤਿਯਂ ਉਪ੍ਪਲਹਤ੍ਥਂ ਭਗਵਤੋ ਉਪਨਾਮੇਸਿ – ‘‘ਇਮਂ, ਭਨ੍ਤੇ, ਭਗਵਾ ਤਤਿਯਂ ਉਪ੍ਪਲਹਤ੍ਥਂ ਉਪਸਿਙ੍ਘਤੁ. ਇਦਂ ਭਗਵਨ੍ਤਂ ਦਸਕ੍ਖਤ੍ਤੁਂ ਵਿਰੇਚੇਸ੍ਸਤੀ’’ਤਿ. ਏਵਂ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਭਵਿਸ੍ਸਤੀਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਦਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਬਹਿ ਦ੍ਵਾਰਕੋਟ੍ਠਕਾ ਨਿਕ੍ਖਨ੍ਤਸ੍ਸ ਏਤਦਹੋਸਿ – ‘‘ਮਯਾ ਖੋ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਦਿਨ੍ਨਂ. ਦੋਸਾਭਿਸਨ੍ਨੋ ਤਥਾਗਤਸ੍ਸ ਕਾਯੋ. ਨ ਭਗਵਨ੍ਤਂ ਸਮਤ੍ਤਿਂਸਕ੍ਖਤ੍ਤੁਂ ਵਿਰੇਚੇਸ੍ਸਤਿ, ਏਕੂਨਤ੍ਤਿਂਸਕ੍ਖਤ੍ਤੁਂ ਭਗਵਨ੍ਤਂ ਵਿਰੇਚੇਸ੍ਸਤਿ. ਅਪਿ ਚ, ਭਗਵਾ ਵਿਰਿਤ੍ਤੋ ਨਹਾਯਿਸ੍ਸਤਿ. ਨਹਾਤਂ ਭਗਵਨ੍ਤਂ ਸਕਿਂ ਵਿਰੇਚੇਸ੍ਸਤਿ. ਏਵਂ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਭਵਿਸ੍ਸਤੀ’’ਤਿ.

ਅਥ ਖੋ ਭਗਵਾ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਇਧਾਨਨ੍ਦ, ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਬਹਿ ਦ੍ਵਾਰਕੋਟ੍ਠਕਾ ਨਿਕ੍ਖਨ੍ਤਸ੍ਸ ਏਤਦਹੋਸਿ – ‘ਮਯਾ ਖੋ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਦਿਨ੍ਨਂ. ਦੋਸਾਭਿਸਨ੍ਨੋ ਤਥਾਗਤਸ੍ਸ ਕਾਯੋ. ਨ ਭਗਵਨ੍ਤਂ ਸਮਤਿਂਸਕ੍ਖਤ੍ਤੁਂ ਵਿਰੇਚੇਸ੍ਸਤਿ, ਏਕੂਨਤਿਂਸਕ੍ਖਤ੍ਤੁਂ ਭਗਵਨ੍ਤਂ ਵਿਰੇਚੇਸ੍ਸਤਿ. ਅਪਿ ਚ, ਭਗਵਾ ਵਿਰਿਤ੍ਤੋ ਨਹਾਯਿਸ੍ਸਤਿ. ਨਹਾਤਂ ਭਗਵਨ੍ਤਂ ਸਕਿਂ ਵਿਰੇਚੇਸ੍ਸਤਿ. ਏਵਂ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਭਵਿਸ੍ਸਤੀ’ਤਿ. ਤੇਨ ਹਾਨਨ੍ਦ, ਉਣ੍ਹੋਦਕਂ ਪਟਿਯਾਦੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਪਟਿਸ੍ਸੁਣਿਤ੍ਵਾ ਉਣ੍ਹੋਦਕਂ ਪਟਿਯਾਦੇਸਿ.

ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਵਿਰਿਤ੍ਤੋ, ਭਨ੍ਤੇ, ਭਗਵਾ’’ਤਿ? ‘‘ਵਿਰਿਤ੍ਤੋਮ੍ਹਿ, ਜੀਵਕਾ’’ਤਿ. ਇਧ ਮਯ੍ਹਂ, ਭਨ੍ਤੇ, ਬਹਿ ਦ੍ਵਾਰਕੋਟ੍ਠਕਾ ਨਿਕ੍ਖਨ੍ਤਸ੍ਸ ਏਤਦਹੋਸਿ – ‘‘ਮਯਾ ਖੋ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਦਿਨ੍ਨਂ. ਦੋਸਾਭਿਸਨ੍ਨੋ ਤਥਾਗਤਸ੍ਸ ਕਾਯੋ. ਨ ਭਗਵਨ੍ਤਂ ਸਮਤ੍ਤਿਂਸਕ੍ਖਤ੍ਤੁਂ ਵਿਰੇਚੇਸ੍ਸਤਿ, ਏਕੂਨਤ੍ਤਿਂਸਕ੍ਖਤ੍ਤੁਂ ਭਗਵਨ੍ਤਂ ਵਿਰੇਚੇਸ੍ਸਤਿ. ਅਪਿ ਚ, ਭਗਵਾ ਵਿਰਿਤ੍ਤੋ ਨਹਾਯਿਸ੍ਸਤਿ. ਨਹਾਤਂ ਭਗਵਨ੍ਤਂ ਸਕਿਂ ਵਿਰੇਚੇਸ੍ਸਤਿ. ਏਵਂ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਭਵਿਸ੍ਸਤੀ’’ਤਿ. ਨਹਾਯਤੁ, ਭਨ੍ਤੇ, ਭਗਵਾ, ਨਹਾਯਤੁ ਸੁਗਤੋਤਿ. ਅਥ ਖੋ ਭਗਵਾ ਉਣ੍ਹੋਦਕਂ ਨਹਾਯਿ. ਨਹਾਤਂ ਭਗਵਨ੍ਤਂ ਸਕਿਂ ਵਿਰੇਚੇਸਿ. ਏਵਂ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਅਹੋਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਯਾਵ, ਭਨ੍ਤੇ, ਭਗਵਤੋ ਕਾਯੋ ਪਕਤਤ੍ਤੋ ਹੋਤਿ, ਅਲਂ [ਅਹਂ ਤਾਵ ਯੂਸਪਿਣ੍ਟਪਾਤੇਨਾਤਿ (ਸੀ.), ਅਲਂ ਯੂਸਪਿਣ੍ਟਕੇਨਾਤਿ (ਸ੍ਯਾ.)] ਯੂਸਪਿਣ੍ਡਪਾਤੇਨਾ’’ਤਿ.

ਸਮਤ੍ਤਿਂਸਵਿਰੇਚਨਕਥਾ ਨਿਟ੍ਠਿਤਾ.

੨੧੦. ਵਰਯਾਚਨਾਕਥਾ

੩੩੭. ਅਥ ਖੋ ਭਗਵਤੋ ਕਾਯੋ ਨਚਿਰਸ੍ਸੇਵ ਪਕਤਤ੍ਤੋ ਅਹੋਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਸਿਵੇਯ੍ਯਕਂ ਦੁਸ੍ਸਯੁਗਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਏਕਾਹਂ, ਭਨ੍ਤੇ, ਭਗਵਨ੍ਤਂ ਵਰਂ ਯਾਚਾਮੀ’’ਤਿ. ‘‘ਅਤਿਕ੍ਕਨ੍ਤਵਰਾ ਖੋ, ਜੀਵਕ, ਤਥਾਗਤਾ’’ਤਿ. ‘‘ਯਞ੍ਚ, ਭਨ੍ਤੇ, ਕਪ੍ਪਤਿ ਯਞ੍ਚ ਅਨਵਜ੍ਜ’’ਨ੍ਤਿ. ‘‘ਵਦੇਹਿ, ਜੀਵਕਾ’’ਤਿ. ‘‘ਭਗਵਾ, ਭਨ੍ਤੇ, ਪਂਸੁਕੂਲਿਕੋ, ਭਿਕ੍ਖੁਸਙ੍ਘੋ ਚ. ਇਦਂ ਮੇ, ਭਨ੍ਤੇ, ਸਿਵੇਯ੍ਯਕਂ ਦੁਸ੍ਸਯੁਗਂ ਰਞ੍ਞਾ ਪਜ੍ਜੋਤੇਨ ਪਹਿਤਂ – ਬਹੂਨਂ ਦੁਸ੍ਸਾਨਂ ਬਹੂਨਂ ਦੁਸ੍ਸਯੁਗਾਨਂ ਬਹੂਨਂ ਦੁਸ੍ਸਯੁਗਸਤਾਨਂ ਬਹੂਨਂ ਦੁਸ੍ਸਯੁਗਸਹਸ੍ਸਾਨਂ ਬਹੂਨਂ ਦੁਸ੍ਸਯੁਗਸਤਸਹਸ੍ਸਾਨਂ ਅਗ੍ਗਞ੍ਚ ਸੇਟ੍ਠਞ੍ਚ ਮੋਕ੍ਖਞ੍ਚ ਉਤ੍ਤਮਞ੍ਚ ਪਵਰਞ੍ਚ. ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਸਿਵੇਯ੍ਯਕਂ ਦੁਸ੍ਸਯੁਗਂ; ਭਿਕ੍ਖੁਸਙ੍ਘਸ੍ਸ ਚ ਗਹਪਤਿਚੀਵਰਂ ਅਨੁਜਾਨਾਤੂ’’ਤਿ. ਪਟਿਗ੍ਗਹੇਸਿ ਭਗਵਾ ਸਿਵੇਯ੍ਯਕਂ ਦੁਸ੍ਸਯੁਗਂ. ਅਥ ਖੋ ਭਗਵਾ ਜੀਵਕਂ ਕੋਮਾਰਭਚ੍ਚਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਗਹਪਤਿਚੀਵਰਂ. ਯੋ ਇਚ੍ਛਤਿ, ਪਂਸੁਕੂਲਿਕੋ ਹੋਤੁ. ਯੋ ਇਚ੍ਛਤਿ, ਗਹਪਤਿਚੀਵਰਂ ਸਾਦਿਯਤੁ. ਇਤਰੀਤਰੇਨਪਾਹਂ [ਪਹਂ (ਸੀ.), ਚਾਹਂ (ਸ੍ਯਾ.)], ਭਿਕ੍ਖਵੇ, ਸਨ੍ਤੁਟ੍ਠਿਂ ਵਣ੍ਣੇਮੀ’’ਤਿ.

ਅਸ੍ਸੋਸੁਂ ਖੋ ਰਾਜਗਹੇ ਮਨੁਸ੍ਸਾ – ‘‘ਭਗਵਤਾ ਕਿਰ ਭਿਕ੍ਖੂਨਂ ਗਹਪਤਿਚੀਵਰਂ ਅਨੁਞ੍ਞਾਤ’’ਨ੍ਤਿ. ਤੇ ਚ ਮਨੁਸ੍ਸਾ ਹਟ੍ਠਾ ਅਹੇਸੁਂ ਉਦਗ੍ਗਾ ‘‘ਇਦਾਨਿ ਖੋ ਮਯਂ ਦਾਨਾਨਿ ਦਸ੍ਸਾਮ ਪੁਞ੍ਞਾਨਿ ਕਰਿਸ੍ਸਾਮ, ਯਤੋ ਭਗਵਤਾ ਭਿਕ੍ਖੂਨਂ ਗਹਪਤਿਚੀਵਰਂ ਅਨੁਞ੍ਞਾਤ’’ਨ੍ਤਿ. ਏਕਾਹੇਨੇਵ ਰਾਜਗਹੇ ਬਹੂਨਿ ਚੀਵਰਸਹਸ੍ਸਾਨਿ ਉਪ੍ਪਜ੍ਜਿਂਸੁ.

ਅਸ੍ਸੋਸੁਂ ਖੋ ਜਾਨਪਦਾ ਮਨੁਸ੍ਸਾ – ‘‘ਭਗਵਤਾ ਕਿਰ ਭਿਕ੍ਖੂਨਂ ਗਹਪਤਿਚੀਵਰਂ ਅਨੁਞ੍ਞਾਤ’’ਨ੍ਤਿ. ਤੇ ਚ ਮਨੁਸ੍ਸਾ ਹਟ੍ਠਾ ਅਹੇਸੁਂ ਉਦਗ੍ਗਾ – ‘‘ਇਦਾਨਿ ਖੋ ਮਯਂ ਦਾਨਾਨਿ ਦਸ੍ਸਾਮ ਪੁਞ੍ਞਾਨਿ ਕਰਿਸ੍ਸਾਮ, ਯਤੋ ਭਗਵਤਾ ਭਿਕ੍ਖੂਨਂ ਗਹਪਤਿਚੀਵਰਂ ਅਨੁਞ੍ਞਾਤ’’ਨ੍ਤਿ. ਜਨਪਦੇਪਿ ਏਕਾਹੇਨੇਵ ਬਹੂਨਿ ਚੀਵਰਸਹਸ੍ਸਾਨਿ ਉਪ੍ਪਜ੍ਜਿਂਸੁ.

ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਪਾਵਾਰੋ ਉਪ੍ਪਨ੍ਨੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਾਵਾਰਨ੍ਤਿ.

ਕੋਸੇਯ੍ਯਪਾਵਾਰੋ ਉਪ੍ਪਨ੍ਨੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕੋਸੇਯ੍ਯਪਾਵਾਰਨ੍ਤਿ.

ਕੋਜਵਂ ਉਪ੍ਪਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕੋਜਵਨ੍ਤਿ.

ਵਰਯਾਚਨਾਕਥਾ ਨਿਟ੍ਠਿਤਾ.

ਪਠਮਭਾਣਵਾਰੋ ਨਿਟ੍ਠਿਤੋ.

੨੧੧. ਕਮ੍ਬਲਾਨੁਜਾਨਨਾਦਿਕਥਾ

੩੩੮. ਤੇਨ ਖੋ ਪਨ ਸਮਯੇਨ ਕਾਸਿਰਾਜਾ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਅਡ੍ਢਕਾਸਿਕਂ ਕਮ੍ਬਲਂ ਪਾਹੇਸਿ ਉਪਡ੍ਢਕਾਸਿਨਂ ਖਮਮਾਨਂ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਅਡ੍ਢਕਾਸਿਕਂ ਕਮ੍ਬਲਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਅਯਂ ਮੇ, ਭਨ੍ਤੇ, ਅਡ੍ਢਕਾਸਿਕੋ ਕਮ੍ਬਲੋ ਕਾਸਿਰਞ੍ਞਾ ਪਹਿਤੋ ਉਪਡ੍ਢਕਾਸਿਨਂ ਖਮਮਾਨੋ. ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਕਮ੍ਬਲਂ, ਯਂ ਮਮਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਪਟਿਗ੍ਗਹੇਸਿ ਭਗਵਾ ਕਮ੍ਬਲਂ. ਅਥ ਖੋ ਭਗਵਾ ਜੀਵਕਂ ਕੋਮਾਰਭਚ੍ਚਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ…ਪੇ… ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਕਮ੍ਬਲ’’ਨ੍ਤਿ.

੩੩੯. ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਉਚ੍ਚਾਵਚਾਨਿ ਚੀਵਰਾਨਿ ਉਪ੍ਪਨ੍ਨਾਨਿ ਹੋਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਭਗਵਤਾ ਚੀਵਰਂ ਅਨੁਞ੍ਞਾਤਂ, ਕਿਂ ਅਨਨੁਞ੍ਞਾਤ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਛ ਚੀਵਰਾਨਿ – ਖੋਮਂ ਕਪ੍ਪਾਸਿਕਂ ਕੋਸੇਯ੍ਯਂ ਕਮ੍ਬਲਂ ਸਾਣਂ ਭਙ੍ਗਨ੍ਤਿ.

੩੪੦. ਤੇਨ ਖੋ ਪਨ ਸਮਯੇਨ ਯੇ ਤੇ ਭਿਕ੍ਖੂ ਗਹਪਤਿਚੀਵਰਂ ਸਾਦਿਯਨ੍ਤਿ ਤੇ ਕੁਕ੍ਕੁਚ੍ਚਾਯਨ੍ਤਾ ਪਂਸੁਕੂਲਂ ਨ ਸਾਦਿਯਨ੍ਤਿ – ਏਕਂਯੇਵ ਭਗਵਤਾ ਚੀਵਰਂ ਅਨੁਞ੍ਞਾਤਂ, ਨ ਦ੍ਵੇਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਹਪਤਿਚੀਵਰਂ ਸਾਦਿਯਨ੍ਤੇਨ ਪਂਸੁਕੂਲਮ੍ਪਿ ਸਾਦਿਯਿਤੁਂ; ਤਦੁਭਯੇਨਪਾਹਂ, ਭਿਕ੍ਖਵੇ, ਸਨ੍ਤੁਟ੍ਠਿਂ ਵਣ੍ਣੇਮੀਤਿ.

ਕਮ੍ਬਲਾਨੁਜਾਨਨਾਦਿਕਥਾ ਨਿਟ੍ਠਿਤਾ.

੨੧੨. ਪਂਸੁਕੂਲਪਰਿਯੇਸਨਕਥਾ

੩੪੧. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਏਕਚ੍ਚੇ ਭਿਕ੍ਖੂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ, ਏਕਚ੍ਚੇ ਭਿਕ੍ਖੂ ਨਾਗਮੇਸੁਂ. ਯੇ ਤੇ ਭਿਕ੍ਖੂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ ਤੇ ਪਂਸੁਕੂਲਾਨਿ ਲਭਿਂਸੁ. ਯੇ ਤੇ ਭਿਕ੍ਖੂ ਨਾਗਮੇਸੁਂ ਤੇ ਏਵਮਾਹਂਸੁ – ‘‘ਅਮ੍ਹਾਕਮ੍ਪਿ, ਆਵੁਸੋ, ਭਾਗਂ ਦੇਥਾ’’ਤਿ. ਤੇ ਏਵਮਾਹਂਸੁ – ‘‘ਨ ਮਯਂ, ਆਵੁਸੋ, ਤੁਮ੍ਹਾਕਂ ਭਾਗਂ ਦਸ੍ਸਾਮ. ਕਿਸ੍ਸ ਤੁਮ੍ਹੇ ਨਾਗਮਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਨਾਗਮੇਨ੍ਤਾਨਂ ਨਾਕਾਮਾ ਭਾਗਂ ਦਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਏਕਚ੍ਚੇ ਭਿਕ੍ਖੂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ, ਏਕਚ੍ਚੇ ਭਿਕ੍ਖੂ ਆਗਮੇਸੁਂ. ਯੇ ਤੇ ਭਿਕ੍ਖੂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ ਤੇ ਪਂਸੁਕੂਲਾਨਿ ਲਭਿਂਸੁ. ਯੇ ਤੇ ਭਿਕ੍ਖੂ ਆਗਮੇਸੁਂ ਤੇ ਏਵਮਾਹਂਸੁ – ‘‘ਅਮ੍ਹਾਕਮ੍ਪਿ, ਆਵੁਸੋ, ਭਾਗਂ ਦੇਥਾ’’ਤਿ. ਤੇ ਏਵਮਾਹਂਸੁ – ‘‘ਨ ਮਯਂ, ਆਵੁਸੋ, ਤੁਮ੍ਹਾਕਂ ਭਾਗਂ ਦਸ੍ਸਾਮ. ਕਿਸ੍ਸ ਤੁਮ੍ਹੇ ਨ ਓਕ੍ਕਮਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਆਗਮੇਨ੍ਤਾਨਂ ਅਕਾਮਾ ਭਾਗਂ ਦਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਏਕਚ੍ਚੇ ਭਿਕ੍ਖੂ ਪਠਮਂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ, ਏਕਚ੍ਚੇ ਭਿਕ੍ਖੂ ਪਚ੍ਛਾ ਓਕ੍ਕਮਿਂਸੁ. ਯੇ ਤੇ ਭਿਕ੍ਖੂ ਪਠਮਂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ ਤੇ ਪਂਸੁਕੂਲਾਨਿ ਲਭਿਂਸੁ. ਯੇ ਤੇ ਭਿਕ੍ਖੂ ਪਚ੍ਛਾ ਓਕ੍ਕਮਿਂਸੁ ਤੇ ਨ ਲਭਿਂਸੁ. ਤੇ ਏਵਮਾਹਂਸੁ – ‘‘ਅਮ੍ਹਾਕਮ੍ਪਿ, ਆਵੁਸੋ, ਭਾਗਂ ਦੇਥਾ’’ਤਿ. ਤੇ ਏਵਮਾਹਂਸੁ – ‘‘ਨ ਮਯਂ, ਆਵੁਸੋ, ਤੁਮ੍ਹਾਕਂ ਭਾਗਂ ਦਸ੍ਸਾਮ. ਕਿਸ੍ਸ ਤੁਮ੍ਹੇ ਪਚ੍ਛਾ ਓਕ੍ਕਮਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਚ੍ਛਾ ਓਕ੍ਕਨ੍ਤਾਨਂ ਨਾਕਾਮਾ ਭਾਗਂ ਦਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਤੇ ਸਦਿਸਾ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ. ਏਕਚ੍ਚੇ ਭਿਕ੍ਖੂ ਪਂਸੁਕੂਲਾਨਿ ਲਭਿਂਸੁ, ਏਕਚ੍ਚੇ ਭਿਕ੍ਖੂ ਨ ਲਭਿਂਸੁ. ਯੇ ਤੇ ਭਿਕ੍ਖੂ ਨ ਲਭਿਂਸੁ, ਤੇ ਏਵਮਾਹਂਸੁ – ‘‘ਅਮ੍ਹਾਕਮ੍ਪਿ, ਆਵੁਸੋ, ਭਾਗਂ ਦੇਥਾ’’ਤਿ. ਤੇ ਏਵਮਾਹਂਸੁ – ‘‘ਨ ਮਯਂ, ਆਵੁਸੋ, ਤੁਮ੍ਹਾਕਂ ਭਾਗਂ ਦਸ੍ਸਾਮ. ਕਿਸ੍ਸ ਤੁਮ੍ਹੇ ਨ ਲਭਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਦਿਸਾਨਂ ਓਕ੍ਕਨ੍ਤਾਨਂ ਅਕਾਮਾ ਭਾਗਂ ਦਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਤੇ ਕਤਿਕਂ ਕਤ੍ਵਾ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ. ਏਕਚ੍ਚੇ ਭਿਕ੍ਖੂ ਪਂਸੁਕੂਲਾਨਿ ਲਭਿਂਸੁ, ਏਕਚ੍ਚੇ ਭਿਕ੍ਖੂ ਨ ਲਭਿਂਸੁ. ਯੇ ਤੇ ਭਿਕ੍ਖੂ ਨ ਲਭਿਂਸੁ ਤੇ ਏਵਮਾਹਂਸੁ – ‘‘ਅਮ੍ਹਾਕਮ੍ਪਿ, ਆਵੁਸੋ, ਭਾਗਂ ਦੇਥਾ’’ਤਿ. ਤੇ ਏਵਮਾਹਂਸੁ – ‘‘ਨ ਮਯਂ, ਆਵੁਸੋ, ਤੁਮ੍ਹਾਕਂ ਭਾਗਂ ਦਸ੍ਸਾਮ. ਕਿਸ੍ਸ ਤੁਮ੍ਹੇ ਨ ਲਭਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਤਿਕਂ ਕਤ੍ਵਾ ਓਕ੍ਕਨ੍ਤਾਨਂ ਅਕਾਮਾ ਭਾਗਂ ਦਾਤੁਨ੍ਤਿ.

ਪਂਸੁਕੂਲਪਰਿਯੇਸਨਕਥਾ ਨਿਟ੍ਠਿਤਾ.

੨੧੩. ਚੀਵਰਪਟਿਗ੍ਗਾਹਕਸਮ੍ਮੁਤਿਕਥਾ

੩੪੨. ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਚੀਵਰਂ ਆਦਾਯ ਆਰਾਮਂ ਆਗਚ੍ਛਨ੍ਤਿ. ਤੇ ਪਟਿਗ੍ਗਾਹਕਂ ਅਲਭਮਾਨਾ ਪਟਿਹਰਨ੍ਤਿ. ਚੀਵਰਂ ਪਰਿਤ੍ਤਂ ਉਪ੍ਪਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਚੀਵਰਪਟਿਗ੍ਗਾਹਕਂ ਸਮ੍ਮਨ੍ਨਿਤੁਂ – ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਗਹਿਤਾਗਹਿਤਞ੍ਚ ਜਾਨੇਯ੍ਯ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਪਠਮਂ ਭਿਕ੍ਖੁ ਯਾਚਿਤਬ੍ਬੋ; ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਪਟਿਗ੍ਗਾਹਕਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਪਟਿਗ੍ਗਾਹਕਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਚੀਵਰਪਟਿਗ੍ਗਾਹਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਚੀਵਰਪਟਿਗ੍ਗਾਹਕੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਨ ਖੋ ਪਨ ਸਮਯੇਨ ਚੀਵਰਪਟਿਗ੍ਗਾਹਕਾ ਭਿਕ੍ਖੂ ਚੀਵਰਂ ਪਟਿਗ੍ਗਹੇਤ੍ਵਾ ਤਤ੍ਥੇਵ ਉਜ੍ਝਿਤ੍ਵਾ ਪਕ੍ਕਮਨ੍ਤਿ. ਚੀਵਰਂ ਨਸ੍ਸਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਚੀਵਰਨਿਦਹਕਂ ਸਮ੍ਮਨ੍ਨਿਤੁਂ – ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਨਿਹਿਤਾਨਿਹਿਤਞ੍ਚ ਜਾਨੇਯ੍ਯ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਪਠਮਂ ਭਿਕ੍ਖੁ ਯਾਚਿਤਬ੍ਬੋ; ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਨਿਦਹਕਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਨਿਦਹਕਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਚੀਵਰਨਿਦਹਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਚੀਵਰਨਿਦਹਕੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਚੀਵਰਪਟਿਗ੍ਗਾਹਕਸਮ੍ਮੁਤਿਕਥਾ ਨਿਟ੍ਠਿਤਾ.

੨੧੪. ਭਣ੍ਡਾਗਾਰਸਮ੍ਮੁਤਿਆਦਿਕਥਾ

੩੪੩. ਤੇਨ ਖੋ ਪਨ ਸਮਯੇਨ ਚੀਵਰਨਿਦਹਕੋ ਭਿਕ੍ਖੁ ਮਣ੍ਡਪੇਪਿ ਰੁਕ੍ਖਮੂਲੇਪਿ ਨਿਬ੍ਬਕੋਸੇਪਿ ਚੀਵਰਂ ਨਿਦਹਤਿ, ਉਨ੍ਦੂਰੇਹਿਪਿ ਉਪਚਿਕਾਹਿਪਿ ਖਜ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਭਣ੍ਡਾਗਾਰਂ ਸਮ੍ਮਨ੍ਨਿਤੁਂ, ਯਂ ਸਙ੍ਘੋ ਆਕਙ੍ਖਤਿ ਵਿਹਾਰਂ ਵਾ ਅਡ੍ਢਯੋਗਂ ਵਾ ਪਾਸਾਦਂ ਵਾ ਹਮ੍ਮਿਯਂ ਵਾ ਗੁਹਂ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਭਣ੍ਡਾਗਾਰਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਭਣ੍ਡਾਗਾਰਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਵਿਹਾਰਸ੍ਸ ਭਣ੍ਡਾਗਾਰਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਵਿਹਾਰੋ ਭਣ੍ਡਾਗਾਰਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਭਣ੍ਡਾਗਾਰੇ ਚੀਵਰਂ ਅਗੁਤ੍ਤਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਭਣ੍ਡਾਗਾਰਿਕਂ ਸਮ੍ਮਨ੍ਨਿਤੁਂ – ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਗੁਤ੍ਤਾਗੁਤ੍ਤਞ੍ਚ ਜਾਨੇਯ੍ਯ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਪਠਮਂ ਭਿਕ੍ਖੁ ਯਾਚਿਤਬ੍ਬੋ; ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਭਣ੍ਡਾਗਾਰਿਕਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਭਣ੍ਡਾਗਾਰਿਕਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਭਣ੍ਡਾਗਾਰਿਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਭਣ੍ਡਾਗਾਰਿਕੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਭਣ੍ਡਾਗਾਰਿਕਂ ਵੁਟ੍ਠਾਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਭਣ੍ਡਾਗਾਰਿਕੋ ਵੁਟ੍ਠਾਪੇਤਬ੍ਬੋ. ਯੋ ਵੁਟ੍ਠਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਭਣ੍ਡਾਗਾਰੇ ਚੀਵਰਂ ਉਸ੍ਸਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਮੁਖੀਭੂਤੇਨ ਸਙ੍ਘੇਨ ਭਾਜੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਸਙ੍ਘੋ ਚੀਵਰਂ ਭਾਜੇਨ੍ਤੋ ਕੋਲਾਹਲਂ ਅਕਾਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਚੀਵਰਭਾਜਕਂ ਸਮ੍ਮਨ੍ਨਿਤੁਂ – ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਭਾਜਿਤਾਭਾਜਿਤਞ੍ਚ ਜਾਨੇਯ੍ਯ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਪਠਮਂ ਭਿਕ੍ਖੁ ਯਾਚਿਤਬ੍ਬੋ; ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਭਾਜਕਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਭਾਜਕਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਚੀਵਰਭਾਜਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਚੀਵਰਭਾਜਕੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਅਥ ਖੋ ਚੀਵਰਭਾਜਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਚੀਵਰਂ ਭਾਜੇਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਠਮਂ ਉਚ੍ਚਿਨਿਤ੍ਵਾ ਤੁਲਯਿਤ੍ਵਾ ਵਣ੍ਣਾਵਣ੍ਣਂ ਕਤ੍ਵਾ ਭਿਕ੍ਖੂ ਗਣੇਤ੍ਵਾ ਵਗ੍ਗਂ ਬਨ੍ਧਿਤ੍ਵਾ ਚੀਵਰਪਟਿਵੀਸਂ ਠਪੇਤੁਨ੍ਤਿ.

ਅਥ ਖੋ ਚੀਵਰਭਾਜਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਸਾਮਣੇਰਾਨਂ ਚੀਵਰਪਟਿਵੀਸੋ ਦਾਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਾਮਣੇਰਾਨਂ ਉਪਡ੍ਢਪਟਿਵੀਸਂ ਦਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਕੇਨ ਭਾਗੇਨ ਉਤ੍ਤਰਿਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਤ੍ਤਰਨ੍ਤਸ੍ਸ ਸਕਂ ਭਾਗਂ ਦਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਤਿਰੇਕਭਾਗੇਨ ਉਤ੍ਤਰਿਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਨੁਕ੍ਖੇਪੇ ਦਿਨ੍ਨੇ ਅਤਿਰੇਕਭਾਗਂ ਦਾਤੁਨ੍ਤਿ.

ਅਥ ਖੋ ਚੀਵਰਭਾਜਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਚੀਵਰਪਟਿਵੀਸੋ ਦਾਤਬ੍ਬੋ, ਆਗਤਪਟਿਪਾਟਿਯਾ [ਆਗਤਾਗਤਪਟਿਪਾਟਿਯਾ (ਕ.)] ਨੁ ਖੋ ਉਦਾਹੁ ਯਥਾਵੁਡ੍ਢ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਿਕਲਕੇ ਤੋਸੇਤ੍ਵਾ ਕੁਸਪਾਤਂ ਕਾਤੁਨ੍ਤਿ.

ਭਣ੍ਡਾਗਾਰਸਮ੍ਮੁਤਿਆਦਿਕਥਾ ਨਿਟ੍ਠਿਤਾ.

੨੧੫. ਚੀਵਰਰਜਨਕਥਾ

੩੪੪. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਛਕਣੇਨਪਿ ਪਣ੍ਡੁਮਤ੍ਤਿਕਾਯਪਿ ਚੀਵਰਂ ਰਜਨ੍ਤਿ. ਚੀਵਰਂ ਦੁਬ੍ਬਣ੍ਣਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਛ ਰਜਨਾਨਿ – ਮੂਲਰਜਨਂ, ਖਨ੍ਧਰਜਨਂ, ਤਚਰਜਨਂ, ਪਤ੍ਤਰਜਨਂ, ਪੁਪ੍ਫਰਜਨਂ, ਫਲਰਜਨਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸੀਤੁਦਕਾਯ [ਸੀਤੁਨ੍ਦਿਕਾਯ (ਸੀ.), ਸੀਤੂਦਕਾਯ (ਸ੍ਯਾ.)] ਚੀਵਰਂ ਰਜਨ੍ਤਿ. ਚੀਵਰਂ ਦੁਗ੍ਗਨ੍ਧਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਰਜਨਂ ਪਚਿਤੁਂ ਚੁਲ੍ਲਂ ਰਜਨਕੁਮ੍ਭਿਨ੍ਤਿ. ਰਜਨਂ ਉਤ੍ਤਰਿਯਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਤ੍ਤਰਾਲ਼ੁਮ੍ਪਂ [ਉਤ੍ਤਰਾਲ਼ੁਪਂ (ਯੋਜਨਾ), ਉਤ੍ਤਰਾਲ਼ੁਪਂ (ਸ੍ਯਾ.)] ਬਨ੍ਧਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਨ ਜਾਨਨ੍ਤਿ ਰਜਨਂ ਪਕ੍ਕਂ ਵਾ ਅਪਕ੍ਕਂ ਵਾ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਦਕੇ ਵਾ ਨਖਪਿਟ੍ਠਿਕਾਯ ਵਾ ਥੇਵਕਂ ਦਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਰਜਨਂ ਓਰੋਪੇਨ੍ਤਾ ਕੁਮ੍ਭਿਂ ਆਵਿਞ੍ਛਨ੍ਤਿ [ਆਵਿਞ੍ਜਨ੍ਤਿ (ਸੀ.), ਆਵਟ੍ਟਨ੍ਤਿ (ਸ੍ਯਾ.)]. ਕੁਮ੍ਭੀ ਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਰਜਨੁਲ਼ੁਙ੍ਕਂ [ਰਜਨਾਲ਼ੁਙ੍ਕਂ (ਯੋਜਨਾ)] ਦਣ੍ਡਕਥਾਲਕਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਰਜਨਭਾਜਨਂ ਨ ਸਂਵਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਰਜਨਕੋਲਮ੍ਬਂ ਰਜਨਘਟਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪਾਤਿਯਾਪਿ ਪਤ੍ਤੇਪਿ ਚੀਵਰਂ ਓਮਦ੍ਦਨ੍ਤਿ. ਚੀਵਰਂ ਪਰਿਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਰਜਨਦੋਣਿਕਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਛਮਾਯ ਚੀਵਰਂ ਪਤ੍ਥਰਨ੍ਤਿ. ਚੀਵਰਂ ਪਂਸੁਕਿਤਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਿਣਸਨ੍ਥਾਰਕਨ੍ਤਿ.

ਤਿਣਸਨ੍ਥਾਰਕੋ ਉਪਚਿਕਾਹਿ ਖਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਚੀਵਰਵਂਸਂ ਚੀਵਰਰਜ੍ਜੁਨ੍ਤਿ.

ਮਜ੍ਝੇਨ ਲਗ੍ਗੇਨ੍ਤਿ. ਰਜਨਂ ਉਭਤੋ ਗਲਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਣ੍ਣੇ ਬਨ੍ਧਿਤੁਨ੍ਤਿ.

ਕਣ੍ਣੋ ਜੀਰਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਣ੍ਣਸੁਤ੍ਤਕਨ੍ਤਿ.

ਰਜਨਂ ਏਕਤੋ ਗਲਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜੇਤੁਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਚੀਵਰਂ ਪਤ੍ਥਿਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਦਕੇ ਓਸਾਰੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਚੀਵਰਂ ਫਰੁਸਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਾਣਿਨਾ ਆਕੋਟੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਚ੍ਛਿਨ੍ਨਕਾਨਿ ਚੀਵਰਾਨਿ ਧਾਰੇਨ੍ਤਿ ਦਨ੍ਤਕਾਸਾਵਾਨਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਨਾਮ [ਸੇਯ੍ਯਥਾਪਿ (?)] ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਚ੍ਛਿਨ੍ਨਕਾਨਿ ਚੀਵਰਾਨਿ ਧਾਰੇਤਬ੍ਬਾਨਿ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਚੀਵਰਰਜਨਕਥਾ ਨਿਟ੍ਠਿਤਾ.

੨੧੬. ਛਿਨ੍ਨਕਚੀਵਰਾਨੁਜਾਨਨਾ

੩੪੫. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਦਕ੍ਖਿਣਾਗਿਰਿ ਤੇਨ ਚਾਰਿਕਂ ਪਕ੍ਕਾਮਿ. ਅਦ੍ਦਸਾ ਖੋ ਭਗਵਾ ਮਗਧਖੇਤ੍ਤਂ ਅਚ੍ਛਿਬਦ੍ਧਂ [ਅਚ੍ਚਿਬਦ੍ਧਂ (ਸੀ. ਸ੍ਯਾ.), ਅਚ੍ਛਿਬਨ੍ਧਂ (ਕ.)] ਪਾਲ਼ਿਬਦ੍ਧਂ ਮਰਿਯਾਦਬਦ੍ਧਂ ਸਿਙ੍ਘਾਟਕਬਦ੍ਧਂ, ਦਿਸ੍ਵਾਨ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਪਸ੍ਸਸਿ ਨੋ ਤ੍ਵਂ, ਆਨਨ੍ਦ, ਮਗਧਖੇਤ੍ਤਂ ਅਚ੍ਛਿਬਦ੍ਧਂ ਪਾਲ਼ਿਬਦ੍ਧਂ ਮਰਿਯਾਦਬਦ੍ਧਂ ਸਿਙ੍ਘਾਟਕਬਦ੍ਧ’’ਨ੍ਤਿ? ‘‘ਏਵਂ, ਭਨ੍ਤੇ’’ਤਿ. ‘‘ਉਸ੍ਸਹਸਿ ਤ੍ਵਂ, ਆਨਨ੍ਦ, ਭਿਕ੍ਖੂਨਂ ਏਵਰੂਪਾਨਿ ਚੀਵਰਾਨਿ ਸਂਵਿਦਹਿਤੁ’’ਨ੍ਤਿ? ‘‘ਉਸ੍ਸਹਾਮਿ, ਭਗਵਾ’’ਤਿ. ਅਥ ਖੋ ਭਗਵਾ ਦਕ੍ਖਿਣਾਗਿਰਿਸ੍ਮਿਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਪੁਨਦੇਵ ਰਾਜਗਹਂ ਪਚ੍ਚਾਗਞ੍ਛਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਸਮ੍ਬਹੁਲਾਨਂ ਭਿਕ੍ਖੂਨਂ ਚੀਵਰਾਨਿ ਸਂਵਿਦਹਿਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਪਸ੍ਸਤੁ ਮੇ [ਪਸ੍ਸਥ ਤੁਮ੍ਹੇ (ਕ.)], ਭਨ੍ਤੇ, ਭਗਵਾ ਚੀਵਰਾਨਿ ਸਂਵਿਦਹਿਤਾਨੀ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਪਣ੍ਡਿਤੋ, ਭਿਕ੍ਖਵੇ, ਆਨਨ੍ਦੋ; ਮਹਾਪਞ੍ਞੋ, ਭਿਕ੍ਖਵੇ, ਆਨਨ੍ਦੋ; ਯਤ੍ਰ ਹਿ ਨਾਮ ਮਯਾ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਆਜਾਨਿਸ੍ਸਤਿ, ਕੁਸਿਮ੍ਪਿ ਨਾਮ ਕਰਿਸ੍ਸਤਿ, ਅਡ੍ਢਕੁਸਿਮ੍ਪਿ ਨਾਮ ਕਰਿਸ੍ਸਤਿ, ਮਣ੍ਡਲਮ੍ਪਿ ਨਾਮ ਕਰਿਸ੍ਸਤਿ, ਅਡ੍ਢਮਣ੍ਡਲਮ੍ਪਿ ਨਾਮ ਕਰਿਸ੍ਸਤਿ, ਵਿਵਟ੍ਟਮ੍ਪਿ ਨਾਮ ਕਰਿਸ੍ਸਤਿ, ਅਨੁਵਿਵਟ੍ਟਮ੍ਪਿ ਨਾਮ ਕਰਿਸ੍ਸਤਿ, ਗੀਵੇਯ੍ਯਕਮ੍ਪਿ ਨਾਮ ਕਰਿਸ੍ਸਤਿ, ਜਙ੍ਘੇਯ੍ਯਕਮ੍ਪਿ ਨਾਮ ਕਰਿਸ੍ਸਤਿ, ਬਾਹਨ੍ਤਮ੍ਪਿ ਨਾਮ ਕਰਿਸ੍ਸਤਿ, ਛਿਨ੍ਨਕਂ ਭਵਿਸ੍ਸਤਿ, ਸਤ੍ਥਲੂਖਂ ਸਮਣਸਾਰੁਪ੍ਪਂ ਪਚ੍ਚਤ੍ਥਿਕਾਨਞ੍ਚ ਅਨਭਿਚ੍ਛਿਤਂ. ਅਨੁਜਾਨਾਮਿ, ਭਿਕ੍ਖਵੇ, ਛਿਨ੍ਨਕਂ ਸਙ੍ਘਾਟਿਂ ਛਿਨ੍ਨਕਂ ਉਤ੍ਤਰਾਸਙ੍ਗਂ ਛਿਨ੍ਨਕਂ ਅਨ੍ਤਰਵਾਸਕ’’ਨ੍ਤਿ.

ਛਿਨ੍ਨਕਚੀਵਰਾਨੁਜਾਨਨਾ ਨਿਟ੍ਠਿਤਾ.

੨੧੭. ਤਿਚੀਵਰਾਨੁਜਾਨਨਾ

੩੪੬. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਵੇਸਾਲੀ ਤੇਨ ਚਾਰਿਕਂ ਪਕ੍ਕਾਮਿ. ਅਦ੍ਦਸ ਖੋ ਭਗਵਾ ਅਨ੍ਤਰਾ ਚ ਰਾਜਗਹਂ ਅਨ੍ਤਰਾ ਚ ਵੇਸਾਲਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ ਸਮ੍ਬਹੁਲੇ ਭਿਕ੍ਖੂ ਚੀਵਰੇਹਿ ਉਬ੍ਭਣ੍ਡਿਤੇ [ਉਬ੍ਭਣ੍ਡੀਕਤੇ (ਸ੍ਯਾ.)] ਸੀਸੇਪਿ ਚੀਵਰਭਿਸਿਂ ਕਰਿਤ੍ਵਾ ਖਨ੍ਧੇਪਿ ਚੀਵਰਭਿਸਿਂ ਕਰਿਤ੍ਵਾ ਕਟਿਯਾਪਿ ਚੀਵਰਭਿਸਿਂ ਕਰਿਤ੍ਵਾ ਆਗਚ੍ਛਨ੍ਤੇ, ਦਿਸ੍ਵਾਨ ਭਗਵਤੋ ਏਤਦਹੋਸਿ – ‘‘ਅਤਿਲਹੁਂ ਖੋ ਇਮੇ ਮੋਘਪੁਰਿਸਾ ਚੀਵਰੇ ਬਾਹੁਲ੍ਲਾਯ ਆਵਤ੍ਤਾ. ਯਂਨੂਨਾਹਂ ਭਿਕ੍ਖੂਨਂ ਚੀਵਰੇ ਸੀਮਂ ਬਨ੍ਧੇਯ੍ਯਂ, ਮਰਿਯਾਦਂ ਠਪੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਵੇਸਾਲੀ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਵੇਸਾਲਿਯਂ ਵਿਹਰਤਿ ਗੋਤਮਕੇ ਚੇਤਿਯੇ. ਤੇਨ ਖੋ ਪਨ ਸਮਯੇਨ ਭਗਵਾ ਸੀਤਾਸੁ ਹੇਮਨ੍ਤਿਕਾਸੁ ਰਤ੍ਤੀਸੁ ਅਨ੍ਤਰਟ੍ਠਕਾਸੁ ਹਿਮਪਾਤਸਮਯੇ ਰਤ੍ਤਿਂ ਅਜ੍ਝੋਕਾਸੇ ਏਕਚੀਵਰੋ ਨਿਸੀਦਿ. ਨ ਭਗਵਨ੍ਤਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਪਠਮੇ ਯਾਮੇ ਸੀਤਂ ਭਗਵਨ੍ਤਂ ਅਹੋਸਿ. ਦੁਤਿਯਂ ਭਗਵਾ ਚੀਵਰਂ ਪਾਰੁਪਿ. ਨ ਭਗਵਨ੍ਤਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਮਜ੍ਝਿਮੇ ਯਾਮੇ ਸੀਤਂ ਭਗਵਨ੍ਤਂ ਅਹੋਸਿ. ਤਤਿਯਂ ਭਗਵਾ ਚੀਵਰਂ ਪਾਰੁਪਿ. ਨ ਭਗਵਨ੍ਤਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਪਚ੍ਛਿਮੇ ਯਾਮੇ ਉਦ੍ਧਸ੍ਤੇ ਅਰੁਣੇ ਨਨ੍ਦਿਮੁਖਿਯਾ ਰਤ੍ਤਿਯਾ ਸੀਤਂ ਭਗਵਨ੍ਤਂ ਅਹੋਸਿ. ਚਤੁਤ੍ਥਂ ਭਗਵਾ ਚੀਵਰਂ ਪਾਰੁਪਿ. ਨ ਭਗਵਨ੍ਤਂ ਸੀਤਂ ਅਹੋਸਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਯੇਪਿ ਖੋ ਤੇ ਕੁਲਪੁਤ੍ਤਾ ਇਮਸ੍ਮਿਂ ਧਮ੍ਮਵਿਨਯੇ ਸੀਤਾਲੁਕਾ ਸੀਤਭੀਰੁਕਾ ਤੇਪਿ ਸਕ੍ਕੋਨ੍ਤਿ ਤਿਚੀਵਰੇਨ ਯਾਪੇਤੁਂ. ਯਂਨੂਨਾਹਂ ਭਿਕ੍ਖੂਨਂ ਚੀਵਰੇ ਸੀਮਂ ਬਨ੍ਧੇਯ੍ਯਂ, ਮਰਿਯਾਦਂ ਠਪੇਯ੍ਯਂ, ਤਿਚੀਵਰਂ ਅਨੁਜਾਨੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਇਧਾਹਂ, ਭਿਕ੍ਖਵੇ, ਅਨ੍ਤਰਾ ਚ ਰਾਜਗਹਂ ਅਨ੍ਤਰਾ ਚ ਵੇਸਾਲਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ ਅਦ੍ਦਸਂ ਸਮ੍ਬਹੁਲੇ ਭਿਕ੍ਖੂ ਚੀਵਰੇਹਿ ਉਬ੍ਭਣ੍ਡਿਤੇ ਸੀਸੇਪਿ ਚੀਵਰਭਿਸਿਂ ਕਰਿਤ੍ਵਾ ਖਨ੍ਧੇਪਿ ਚੀਵਰਭਿਸਿਂ ਕਰਿਤ੍ਵਾ ਕਟਿਯਾਪਿ ਚੀਵਰਭਿਸਿਂ ਕਰਿਤ੍ਵਾ ਆਗਚ੍ਛਨ੍ਤੇ, ਦਿਸ੍ਵਾਨ ਮੇ ਏਤਦਹੋਸਿ – ‘ਅਤਿਲਹੁਂ ਖੋ ਇਮੇ ਮੋਘਪੁਰਿਸਾ ਚੀਵਰੇ ਬਾਹੁਲ੍ਲਾਯ ਆਵਤ੍ਤਾ. ਯਂਨੂਨਾਹਂ ਭਿਕ੍ਖੂਨਂ ਚੀਵਰੇ ਸੀਮਂ ਬਨ੍ਧੇਯ੍ਯਂ, ਮਰਿਯਾਦਂ ਠਪੇਯ੍ਯ’ਨ੍ਤਿ. ਇਧਾਹਂ, ਭਿਕ੍ਖਵੇ, ਸੀਤਾਸੁ ਹੇਮਨ੍ਤਿਕਾਸੁ ਰਤ੍ਤੀਸੁ ਅਨ੍ਤਰਟ੍ਠਕਾਸੁ ਹਿਮਪਾਤਸਮਯੇ ਰਤ੍ਤਿਂ ਅਜ੍ਝੋਕਾਸੇ ਏਕਚੀਵਰੋ ਨਿਸੀਦਿਂ. ਨ ਮਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਪਠਮੇ ਯਾਮੇ ਸੀਤਂ ਮਂ ਅਹੋਸਿ. ਦੁਤਿਯਾਹਂ ਚੀਵਰਂ ਪਾਰੁਪਿਂ. ਨ ਮਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਮਜ੍ਝਿਮੇ ਯਾਮੇ ਸੀਤਂ ਮਂ ਅਹੋਸਿ. ਤਤਿਯਾਹਂ ਚੀਵਰਂ ਪਾਰੁਪਿਂ. ਨ ਮਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਪਚ੍ਛਿਮੇ ਯਾਮੇ ਉਦ੍ਧਸ੍ਤੇ ਅਰੁਣੇ ਨਨ੍ਦਿਮੁਖਿਯਾ ਰਤ੍ਤਿਯਾ ਸੀਤਂ ਮਂ ਅਹੋਸਿ. ਚਤੁਤ੍ਥਾਹਂ ਚੀਵਰਂ ਪਾਰੁਪਿਂ. ਨ ਮਂ ਸੀਤਂ ਅਹੋਸਿ. ਤਸ੍ਸ ਮਯ੍ਹਂ, ਭਿਕ੍ਖਵੇ, ਏਤਦਹੋਸਿ – ‘‘ਯੇਪਿ ਖੋ ਤੇ ਕੁਲਪੁਤ੍ਤਾ ਇਮਸ੍ਮਿਂ ਧਮ੍ਮਵਿਨਯੇ ਸੀਤਾਲੁਕਾ ਸੀਤਭੀਰੁਕਾ ਤੇਪਿ ਸਕ੍ਕੋਨ੍ਤਿ ਤਿਚੀਵਰੇਨ ਯਾਪੇਤੁਂ. ਯਂਨੂਨਾਹਂ ਭਿਕ੍ਖੂਨਂ ਚੀਵਰੇ ਸੀਮਂ ਬਨ੍ਧੇਯ੍ਯਂ, ਮਰਿਯਾਦਂ ਠਪੇਯ੍ਯਂ, ਤਿਚੀਵਰਂ ਅਨੁਜਾਨੇਯ੍ਯ’ਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਤਿਚੀਵਰਂ – ਦਿਗੁਣਂ ਸਙ੍ਘਾਟਿਂ, ਏਕਚ੍ਚਿਯਂ ਉਤ੍ਤਰਾਸਙ੍ਗਂ, ਏਕਚ੍ਚਿਯਂ ਅਨ੍ਤਰਵਾਸਕ’’ਨ੍ਤਿ.

ਤਿਚੀਵਰਾਨੁਜਾਨਨਾ ਨਿਟ੍ਠਿਤਾ.

੨੧੮. ਅਤਿਰੇਕਚੀਵਰਕਥਾ

੩੪੭. [ਪਾਰਾ. ੪੬੧] ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਭਗਵਤਾ ਤਿਚੀਵਰਂ ਅਨੁਞ੍ਞਾਤਨ੍ਤਿ ਅਞ੍ਞੇਨੇਵ ਤਿਚੀਵਰੇਨ ਗਾਮਂ ਪਵਿਸਨ੍ਤਿ, ਅਞ੍ਞੇਨ ਤਿਚੀਵਰੇਨ ਆਰਾਮੇ ਅਚ੍ਛਨ੍ਤਿ, ਅਞ੍ਞੇਨ ਤਿਚੀਵਰੇਨ ਨਹਾਨਂ ਓਤਰਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਅਤਿਰੇਕਚੀਵਰਂ ਧਾਰੇਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਅਤਿਰੇਕਚੀਵਰਂ ਧਾਰੇਤਬ੍ਬਂ. ਯੋ ਧਾਰੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

[ਪਾਰਾ. ੪੬੧] ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਆਨਨ੍ਦਸ੍ਸ ਅਤਿਰੇਕਚੀਵਰਂ ਉਪ੍ਪਨ੍ਨਂ ਹੋਤਿ. ਆਯਸ੍ਮਾ ਚ ਆਨਨ੍ਦੋ ਤਂ ਚੀਵਰਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਦਾਤੁਕਾਮੋ ਹੋਤਿ. ਆਯਸ੍ਮਾ ਚ ਸਾਰਿਪੁਤ੍ਤੋ ਸਾਕੇਤੇ ਵਿਹਰਤਿ. ਅਥ ਖੋ ਆਯਸ੍ਮਤੋ ਆਨਨ੍ਦਸ੍ਸ ਏਤਦਹੋਸਿ – ‘‘ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ ‘ਨ ਅਤਿਰੇਕਚੀਵਰਂ ਧਾਰੇਤਬ੍ਬ’ਨ੍ਤਿ. ਇਦਞ੍ਚ ਮੇ ਅਤਿਰੇਕਚੀਵਰਂ ਉਪ੍ਪਨ੍ਨਂ. ਅਹਞ੍ਚਿਮਂ ਚੀਵਰਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਦਾਤੁਕਾਮੋ. ਆਯਸ੍ਮਾ ਚ ਸਾਰਿਪੁਤ੍ਤੋ ਸਾਕੇਤੇ ਵਿਹਰਤਿ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਕੀਵਚਿਰਂ ਪਨਾਨਨ੍ਦ, ਸਾਰਿਪੁਤ੍ਤੋ ਆਗਚ੍ਛਿਸ੍ਸਤੀ’’ਤਿ? ‘‘ਨਵਮਂ ਵਾ, ਭਗਵਾ, ਦਿਵਸਂ, ਦਸਮਂ ਵਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਅਤਿਰੇਕਚੀਵਰਂ ਉਪ੍ਪਨ੍ਨਂ ਹੋਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਅਮ੍ਹੇਹਿ ਅਤਿਰੇਕਚੀਵਰੇ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਤਿਰੇਕਚੀਵਰਂ ਵਿਕਪ੍ਪੇਤੁਨ੍ਤਿ.

੩੪੮. ਅਥ ਖੋ ਭਗਵਾ ਵੇਸਾਲਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਬਾਰਾਣਸੀ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਬਾਰਾਣਸੀ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਬਾਰਾਣਸਿਯਂ ਵਿਹਰਤਿ ਇਸਿਪਤਨੇ ਮਿਗਦਾਯੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਅਨ੍ਤਰਵਾਸਕੋ ਛਿਦ੍ਦੋ ਹੋਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਤਿਚੀਵਰਂ ਅਨੁਞ੍ਞਾਤਂ – ਦਿਗੁਣਾ ਸਙ੍ਘਾਟਿ, ਏਕਚ੍ਚਿਯੋ ਉਤ੍ਤਰਾਸਙ੍ਗੋ, ਏਕਚ੍ਚਿਯੋ ਅਨ੍ਤਰਵਾਸਕੋ. ਅਯਞ੍ਚ ਮੇ ਅਨ੍ਤਰਵਾਸਕੋ ਛਿਦ੍ਦੋ. ਯਂਨੂਨਾਹਂ ਅਗ੍ਗਲ਼ਂ ਅਚ੍ਛੁਪੇਯ੍ਯਂ, ਸਮਨ੍ਤਤੋ ਦੁਪਟ੍ਟਂ ਭਵਿਸ੍ਸਤਿ, ਮਜ੍ਝੇ ਏਕਚ੍ਚਿਯ’’ਨ੍ਤਿ. ਅਥ ਖੋ ਸੋ ਭਿਕ੍ਖੁ ਅਗ੍ਗਲ਼ਂ ਅਚ੍ਛੁਪੇਸਿ. ਅਦ੍ਦਸਾ ਖੋ ਭਗਵਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤਂ ਭਿਕ੍ਖੁਂ ਅਗ੍ਗਲ਼ਂ ਅਚ੍ਛੁਪੇਨ੍ਤਂ [ਅਚ੍ਛੁਪਨ੍ਤਂ (ਕ.)], ਦਿਸ੍ਵਾਨ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਕਿਂ ਤ੍ਵਂ, ਭਿਕ੍ਖੁ, ਕਰੋਸੀ’’ਤਿ? ‘‘ਅਗ੍ਗਲ਼ਂ, ਭਗਵਾ, ਅਚ੍ਛੁਪੇਮੀ’’ਤਿ. ‘‘ਸਾਧੁ ਸਾਧੁ, ਭਿਕ੍ਖੁ; ਸਾਧੁ ਖੋ ਤ੍ਵਂ, ਭਿਕ੍ਖੁ, ਅਗ੍ਗਲ਼ਂ ਅਚ੍ਛੁਪੇਸੀ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਅਹਤਾਨਂ ਦੁਸ੍ਸਾਨਂ ਅਹਤਕਪ੍ਪਾਨਂ ਦਿਗੁਣਂ ਸਙ੍ਘਾਟਿਂ, ਏਕਚ੍ਚਿਯਂ ਉਤ੍ਤਰਾਸਙ੍ਗਂ, ਏਕਚ੍ਚਿਯਂ ਅਨ੍ਤਰਵਾਸਕਂ; ਉਤੁਦ੍ਧਟਾਨਂ ਦੁਸ੍ਸਾਨਂ ਚਤੁਗ੍ਗੁਣਂ ਸਙ੍ਘਾਟਿਂ, ਦਿਗੁਣਂ ਉਤ੍ਤਰਾਸਙ੍ਗਂ, ਦਿਗੁਣਂ ਅਨ੍ਤਰਵਾਸਕਂ; ਪਂਸੁਕੂਲੇ ਯਾਵਦਤ੍ਥਂ; ਪਾਪਣਿਕੇ ਉਸ੍ਸਾਹੋ ਕਰਣੀਯੋ. ਅਨੁਜਾਨਾਮਿ, ਭਿਕ੍ਖਵੇ, ਅਗ੍ਗਲ਼ਂ ਤੁਨ੍ਨਂ ਓਵਟ੍ਟਿਕਂ ਕਣ੍ਡੁਸਕਂ ਦਲ਼੍ਹੀਕਮ੍ਮ’’ਨ੍ਤਿ.

ਅਤਿਰੇਕਚੀਵਰਕਥਾ ਨਿਟ੍ਠਿਤਾ.

੨੧੯. ਵਿਸਾਖਾਵਤ੍ਥੁ

੩੪੯. ਅਥ ਖੋ ਭਗਵਾ ਬਾਰਾਣਸਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਵਿਸਾਖਂ ਮਿਗਾਰਮਾਤਰਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ, ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ, ਭਗਵਨ੍ਤਂ ਏਤਦਵੋਚ – ‘‘ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

ਤੇਨ ਖੋ ਪਨ ਸਮਯੇਨ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਚਾਤੁਦ੍ਦੀਪਿਕੋ ਮਹਾਮੇਘੋ ਪਾਵਸ੍ਸਿ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਯਥਾ, ਭਿਕ੍ਖਵੇ, ਜੇਤਵਨੇ ਵਸ੍ਸਤਿ ਏਵਂ ਚਤੂਸੁ ਦੀਪੇਸੁ ਵਸ੍ਸਤਿ. ਓਵਸ੍ਸਾਪੇਥ, ਭਿਕ੍ਖਵੇ, ਕਾਯਂ. ਅਯਂ ਪਚ੍ਛਿਮਕੋ ਚਾਤੁਦ੍ਦੀਪਿਕੋ ਮਹਾਮੇਘੋ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਤੇ ਭਿਕ੍ਖੂ ਭਗਵਤੋ ਪਟਿਸ੍ਸੁਣਿਤ੍ਵਾ ਨਿਕ੍ਖਿਤ੍ਤਚੀਵਰਾ ਕਾਯਂ ਓਵਸ੍ਸਾਪੇਨ੍ਤਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਦਾਸਿਂ ਆਣਾਪੇਸਿ – ‘‘ਗਚ੍ਛ, ਜੇ. ਆਰਾਮਂ ਗਨ੍ਤ੍ਵਾ ਕਾਲਂ ਆਰੋਚੇਹਿ – ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ‘‘ਏਵਂ, ਅਯ੍ਯੇ’’ਤਿ ਖੋ ਸਾ ਦਾਸੀ ਵਿਸਾਖਾਯ ਮਿਗਾਰਮਾਤੁਯਾ ਪਟਿਸ੍ਸੁਣਿਤ੍ਵਾ ਆਰਾਮਂ ਗਨ੍ਤ੍ਵਾ ਅਦ੍ਦਸ ਭਿਕ੍ਖੂ ਨਿਕ੍ਖਿਤ੍ਤਚੀਵਰੇ ਕਾਯਂ ਓਵਸ੍ਸਾਪੇਨ੍ਤੇ, ਦਿਸ੍ਵਾਨ ‘ਨਤ੍ਥਿ ਆਰਾਮੇ ਭਿਕ੍ਖੂ, ਆਜੀਵਕਾ ਕਾਯਂ ਓਵਸ੍ਸਾਪੇਨ੍ਤੀ’ਤਿ ਯੇਨ ਵਿਸਾਖਾ ਮਿਗਾਰਮਾਤਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਵਿਸਾਖਂ ਮਿਗਾਰਮਾਤਰਂ ਏਤਦਵੋਚ – ‘‘ਨਤ੍ਥਯ੍ਯੇ, ਆਰਾਮੇ ਭਿਕ੍ਖੂ, ਆਜੀਵਕਾ ਕਾਯਂ ਓਵਸ੍ਸਾਪੇਨ੍ਤੀ’’ਤਿ. ਅਥ ਖੋ ਵਿਸਾਖਾਯ ਮਿਗਾਰਮਾਤੁਯਾ ਪਣ੍ਡਿਤਾਯ ਵਿਯਤ੍ਤਾਯ ਮੇਧਾਵਿਨਿਯਾ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਅਯ੍ਯਾ ਨਿਕ੍ਖਿਤ੍ਤਚੀਵਰਾ ਕਾਯਂ ਓਵਸ੍ਸਾਪੇਨ੍ਤਿ. ਸਾਯਂ ਬਾਲਾ ਮਞ੍ਞਿਤ੍ਥ – ਨਤ੍ਥਿ ਆਰਾਮੇ ਭਿਕ੍ਖੂ, ਆਜੀਵਕਾ ਕਾਯਂ ਓਵਸ੍ਸਾਪੇਨ੍ਤੀ’’ਤਿ, ਪੁਨ ਦਾਸਿਂ ਆਣਾਪੇਸਿ – ‘‘ਗਚ੍ਛ, ਜੇ. ਆਰਾਮਂ ਗਨ੍ਤ੍ਵਾ ਕਾਲਂ ਆਰੋਚੇਹਿ – ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਤੇ ਭਿਕ੍ਖੂ ਗਤ੍ਤਾਨਿ ਸੀਤਿਂ ਕਰਿਤ੍ਵਾ [ਸੀਤੀਕਰਿਤ੍ਵਾ (ਸ੍ਯਾ.)] ਕਲ੍ਲਕਾਯਾ ਚੀਵਰਾਨਿ ਗਹੇਤ੍ਵਾ ਯਥਾਵਿਹਾਰਂ ਪਵਿਸਿਂਸੁ. ਅਥ ਖੋ ਸਾ ਦਾਸੀ ਆਰਾਮਂ ਗਨ੍ਤ੍ਵਾ ਭਿਕ੍ਖੂ ਅਪਸ੍ਸਨ੍ਤੀ ‘ਨਤ੍ਥਿ ਆਰਾਮੇ ਭਿਕ੍ਖੂ, ਸੁਞ੍ਞੋ ਆਰਾਮੋ’ਤਿ ਯੇਨ ਵਿਸਾਖਾ ਮਿਗਾਰਮਾਤਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਵਿਸਾਖਂ ਮਿਗਾਰਮਾਤਰਂ ਏਤਦਵੋਚ – ‘‘ਨਤ੍ਥਯ੍ਯੇ, ਆਰਾਮੇ ਭਿਕ੍ਖੂ, ਸੁਞ੍ਞੋ ਆਰਾਮੋ’’ਤਿ. ਅਥ ਖੋ ਵਿਸਾਖਾਯ ਮਿਗਾਰਮਾਤੁਯਾ ਪਣ੍ਡਿਤਾਯ ਵਿਯਤ੍ਤਾਯ ਮੇਧਾਵਿਨਿਯਾ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਅਯ੍ਯਾ ਗਤ੍ਤਾਨਿ ਸੀਤਿਂ ਕਰਿਤ੍ਵਾ ਕਲ੍ਲਕਾਯਾ ਚੀਵਰਾਨਿ ਗਹੇਤ੍ਵਾ ਯਥਾਵਿਹਾਰਂ ਪਵਿਟ੍ਠਾ. ਸਾਯਂ ਬਾਲਾ ਮਞ੍ਞਿਤ੍ਥ – ਨਤ੍ਥਿ ਆਰਾਮੇ ਭਿਕ੍ਖੂ, ਸੁਞ੍ਞੋ ਆਰਾਮੋ’’ਤਿ, ਪੁਨ ਦਾਸਿਂ ਆਣਾਪੇਸਿ – ‘‘ਗਚ੍ਛ, ਜੇ. ਆਰਾਮਂ ਗਨ੍ਤ੍ਵਾ ਕਾਲਂ ਆਰੋਚੇਹਿ – ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ.

੩੫੦. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਸਨ੍ਦਹਥ [ਸਨ੍ਨਹਥ (ਸੀ. ਸ੍ਯਾ.)], ਭਿਕ੍ਖਵੇ, ਪਤ੍ਤਚੀਵਰਂ; ਕਾਲੋ ਭਤ੍ਤਸ੍ਸਾ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮ੍ਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ, ਏਵਮੇਵ – ਜੇਤਵਨੇ ਅਨ੍ਤਰਹਿਤੋ ਵਿਸਾਖਾਯ ਮਿਗਾਰਮਾਤੁਯਾ ਕੋਟ੍ਠਕੇ ਪਾਤੁਰਹੋਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਵਿਸਾਖਾ ਮਿਗਾਰਮਾਤਾ – ‘‘ਅਚ੍ਛਰਿਯਂ ਵਤ ਭੋ! ਅਬ੍ਭੁਤਂ ਵਤ ਭੋ! ਤਥਾਗਤਸ੍ਸ ਮਹਿਦ੍ਧਿਕਤਾ ਮਹਾਨੁਭਾਵਤਾ, ਯਤ੍ਰ ਹਿ ਨਾਮ ਜਣ੍ਣੁਕਮਤ੍ਤੇਸੁਪਿ ਓਘੇਸੁ ਪਵਤ੍ਤਮਾਨੇਸੁ, ਕਟਿਮਤ੍ਤੇਸੁਪਿ ਓਘੇਸੁ ਪਵਤ੍ਤਮਾਨੇਸੁ, ਨ ਹਿ ਨਾਮ ਏਕਭਿਕ੍ਖੁਸ੍ਸਪਿ [ਪਵਤ੍ਤਮਾਨੇਸੁ ਨ ਏਕਭਿਕ੍ਖੁਸ੍ਸਪਿ (?)] ਪਾਦਾ ਵਾ ਚੀਵਰਾਨਿ ਵਾ ਅਲ੍ਲਾਨਿ ਭਵਿਸ੍ਸਨ੍ਤੀ’’ਤਿ – ਹਟ੍ਠਾ ਉਦਗ੍ਗਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਵਿਸਾਖਾ ਮਿਗਾਰਮਾਤਾ ਭਗਵਨ੍ਤਂ ਏਤਦਵੋਚ – ‘‘ਅਟ੍ਠਾਹਂ, ਭਨ੍ਤੇ, ਭਗਵਨ੍ਤਂ ਵਰਾਨਿ ਯਾਚਾਮੀ’’ਤਿ. ‘‘ਅਤਿਕ੍ਕਨ੍ਤਵਰਾ ਖੋ, ਵਿਸਾਖੇ, ਤਥਾਗਤਾ’’ਤਿ. ‘‘ਯਾਨਿ ਚ, ਭਨ੍ਤੇ, ਕਪ੍ਪਿਯਾਨਿ ਯਾਨਿ ਚ ਅਨਵਜ੍ਜਾਨੀ’’ਤਿ. ‘‘ਵਦੇਹਿ, ਵਿਸਾਖੇ’’ਤਿ. ‘‘ਇਚ੍ਛਾਮਹਂ, ਭਨ੍ਤੇ, ਸਙ੍ਘਸ੍ਸ ਯਾਵਜੀਵਂ ਵਸ੍ਸਿਕਸਾਟਿਕਂ ਦਾਤੁਂ, ਆਗਨ੍ਤੁਕਭਤ੍ਤਂ ਦਾਤੁਂ, ਗਮਿਕਭਤ੍ਤਂ ਦਾਤੁਂ, ਗਿਲਾਨਭਤ੍ਤਂ ਦਾਤੁਂ, ਗਿਲਾਨੁਪਟ੍ਠਾਕਭਤ੍ਤਂ ਦਾਤੁਂ, ਗਿਲਾਨਭੇਸਜ੍ਜਂ ਦਾਤੁਂ, ਧੁਵਯਾਗੁਂ ਦਾਤੁਂ, ਭਿਕ੍ਖੁਨਿਸਙ੍ਘਸ੍ਸ ਉਦਕਸਾਟਿਕਂ ਦਾਤੁ’’ਨ੍ਤਿ. ‘‘ਕਿਂ ਪਨ ਤ੍ਵਂ, ਵਿਸਾਖੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਤਥਾਗਤਂ ਅਟ੍ਠ ਵਰਾਨਿ ਯਾਚਸੀ’’ਤਿ?

‘‘ਇਧਾਹਂ, ਭਨ੍ਤੇ, ਦਾਸਿਂ ਆਣਾਪੇਸਿਂ – ‘ਗਚ੍ਛ, ਜੇ. ਆਰਾਮਂ ਗਨ੍ਤ੍ਵਾ ਕਾਲਂ ਆਰੋਚੇਹਿ – ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’’ਨ੍ਤਿ. ਅਥ ਖੋ ਸਾ, ਭਨ੍ਤੇ, ਦਾਸੀ ਆਰਾਮਂ ਗਨ੍ਤ੍ਵਾ ਅਦ੍ਦਸ ਭਿਕ੍ਖੂ ਨਿਕ੍ਖਿਤ੍ਤਚੀਵਰੇ ਕਾਯਂ ਓਵਸ੍ਸਾਪੇਨ੍ਤੇ, ਦਿਸ੍ਵਾਨ ‘‘ਨਤ੍ਥਿ ਆਰਾਮੇ ਭਿਕ੍ਖੂ, ਆਜੀਵਕਾ ਕਾਯਂ ਓਵਸ੍ਸਾਪੇਨ੍ਤੀ’’ਤਿ ਯੇਨਾਹਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮਂ ਏਤਦਵੋਚ – ‘‘ਨਤ੍ਥਯ੍ਯੇ, ਆਰਾਮੇ ਭਿਕ੍ਖੂ, ਆਜੀਵਕਾ ਕਾਯਂ ਓਵਸ੍ਸਾਪੇਨ੍ਤੀ’’ਤਿ. ਅਸੁਚਿ, ਭਨ੍ਤੇ, ਨਗ੍ਗਿਯਂ ਜੇਗੁਚ੍ਛਂ ਪਟਿਕੂਲਂ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਵਸ੍ਸਿਕਸਾਟਿਕਂ ਦਾਤੁਂ.

‘‘ਪੁਨ ਚਪਰਂ, ਭਨ੍ਤੇ, ਆਗਨ੍ਤੁਕੋ ਭਿਕ੍ਖੁ ਨ ਵੀਥਿਕੁਸਲੋ ਨ ਗੋਚਰਕੁਸਲੋ ਕਿਲਨ੍ਤੋ ਪਿਣ੍ਡਾਯ ਚਰਤਿ. ਸੋ ਮੇ ਆਗਨ੍ਤੁਕਭਤ੍ਤਂ ਭੁਞ੍ਜਿਤ੍ਵਾ ਵੀਥਿਕੁਸਲੋ ਗੋਚਰਕੁਸਲੋ ਅਕਿਲਨ੍ਤੋ ਪਿਣ੍ਡਾਯ ਚਰਿਸ੍ਸਤਿ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਆਗਨ੍ਤੁਕਭਤ੍ਤਂ ਦਾਤੁਂ.

‘‘ਪੁਨ ਚਪਰਂ, ਭਨ੍ਤੇ, ਗਮਿਕੋ ਭਿਕ੍ਖੁ ਅਤ੍ਤਨੋ ਭਤ੍ਤਂ ਪਰਿਯੇਸਮਾਨੋ ਸਤ੍ਥਾ ਵਾ ਵਿਹਾਯਿਸ੍ਸਤਿ, ਯਤ੍ਥ ਵਾ ਵਾਸਂ ਗਨ੍ਤੁਕਾਮੋ ਭਵਿਸ੍ਸਤਿ ਤਤ੍ਥ ਵਿਕਾਲੇ ਉਪਗਚ੍ਛਿਸ੍ਸਤਿ, ਕਿਲਨ੍ਤੋ ਅਦ੍ਧਾਨਂ ਗਮਿਸ੍ਸਤਿ. ਸੋ ਮੇ ਗਮਿਕਭਤ੍ਤਂ ਭੁਞ੍ਜਿਤ੍ਵਾ ਸਤ੍ਥਾ ਨ ਵਿਹਾਯਿਸ੍ਸਤਿ, ਯਤ੍ਥ ਵਾਸਂ ਗਨ੍ਤੁਕਾਮੋ ਭਵਿਸ੍ਸਤਿ ਤਤ੍ਥ ਕਾਲੇ ਉਪਗਚ੍ਛਿਸ੍ਸਤਿ, ਅਕਿਲਨ੍ਤੋ ਅਦ੍ਧਾਨਂ ਗਮਿਸ੍ਸਤਿ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਗਮਿਕਭਤ੍ਤਂ ਦਾਤੁਂ.

‘‘ਪੁਨ ਚਪਰਂ, ਭਨ੍ਤੇ, ਗਿਲਾਨਸ੍ਸ ਭਿਕ੍ਖੁਨੋ ਸਪ੍ਪਾਯਾਨਿ ਭੋਜਨਾਨਿ ਅਲਭਨ੍ਤਸ੍ਸ ਆਬਾਧੋ ਵਾ ਅਭਿਵਡ੍ਢਿਸ੍ਸਤਿ, ਕਾਲਂਕਿਰਿਯਾ ਵਾ ਭਵਿਸ੍ਸਤਿ. ਤਸ੍ਸ ਮੇ ਗਿਲਾਨਭਤ੍ਤਂ ਭੁਤ੍ਤਸ੍ਸ ਆਬਾਧੋ ਨ ਅਭਿਵਡ੍ਢਿਸ੍ਸਤਿ, ਕਾਲਂਕਿਰਿਯਾ ਨ ਭਵਿਸ੍ਸਤਿ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਗਿਲਾਨਭਤ੍ਤਂ ਦਾਤੁਂ. ‘‘ਪੁਨ ਚਪਰਂ, ਭਨ੍ਤੇ, ਗਿਲਾਨੁਪਟ੍ਠਾਕੋ ਭਿਕ੍ਖੁ ਅਤ੍ਤਨੋ ਭਤ੍ਤਂ ਪਰਿਯੇਸਮਾਨੋ ਗਿਲਾਨਸ੍ਸ ਉਸ੍ਸੂਰੇ ਭਤ੍ਤਂ ਨੀਹਰਿਸ੍ਸਤਿ, ਭਤ੍ਤਚ੍ਛੇਦਂ ਕਰਿਸ੍ਸਤਿ. ਸੋ ਮੇ ਗਿਲਾਨੁਪਟ੍ਠਾਕਭਤ੍ਤਂ ਭੁਞ੍ਜਿਤ੍ਵਾ ਗਿਲਾਨਸ੍ਸ ਕਾਲੇਨ ਭਤ੍ਤਂ ਨੀਹਰਿਸ੍ਸਤਿ, ਭਤ੍ਤਚ੍ਛੇਦਂ ਨ ਕਰਿਸ੍ਸਤਿ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਗਿਲਾਨੁਪਟ੍ਠਾਕਭਤ੍ਤਂ ਦਾਤੁਂ.

‘‘ਪੁਨ ਚਪਰਂ, ਭਨ੍ਤੇ, ਗਿਲਾਨਸ੍ਸ ਭਿਕ੍ਖੁਨੋ ਸਪ੍ਪਾਯਾਨਿ ਭੇਸਜ੍ਜਾਨਿ ਅਲਭਨ੍ਤਸ੍ਸ ਆਬਾਧੋ ਵਾ ਅਭਿਵਡ੍ਢਿਸ੍ਸਤਿ, ਕਾਲਂਕਿਰਿਯਾ ਵਾ ਭਵਿਸ੍ਸਤਿ. ਤਸ੍ਸ ਮੇ ਗਿਲਾਨਭੇਸਜ੍ਜਂ ਪਰਿਭੁਤ੍ਤਸ੍ਸ ਆਬਾਧੋ ਨ ਅਭਿਵਡ੍ਢਿਸ੍ਸਤਿ, ਕਾਲਂਕਿਰਿਯਾ ਨ ਭਵਿਸ੍ਸਤਿ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਗਿਲਾਨਭੇਸਜ੍ਜਂ ਦਾਤੁਂ.

‘‘ਪੁਨ ਚਪਰਂ, ਭਨ੍ਤੇ, ਭਗਵਤਾ ਅਨ੍ਧਕਵਿਨ੍ਦੇ ਦਸਾਨਿਸਂਸੇ ਸਮ੍ਪਸ੍ਸਮਾਨੇਨ ਯਾਗੁ ਅਨੁਞ੍ਞਾਤਾ. ਤ੍ਯਾਹਂ, ਭਨ੍ਤੇ, ਆਨਿਸਂਸੇ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਧੁਵਯਾਗੁਂ ਦਾਤੁਂ.

‘‘ਇਧ, ਭਨ੍ਤੇ, ਭਿਕ੍ਖੁਨਿਯੋ ਅਚਿਰਵਤਿਯਾ ਨਦਿਯਾ ਵੇਸਿਯਾਹਿ ਸਦ੍ਧਿਂ ਨਗ੍ਗਾ ਏਕਤਿਤ੍ਥੇ ਨਹਾਯਨ੍ਤਿ. ਤਾ, ਭਨ੍ਤੇ, ਵੇਸਿਯਾ ਭਿਕ੍ਖੁਨਿਯੋ ਉਪ੍ਪਣ੍ਡੇਸੁਂ – ‘ਕਿਂ ਨੁ ਖੋ ਨਾਮ ਤੁਮ੍ਹਾਕਂ, ਅਯ੍ਯੇ, ਦਹਰਾਨਂ [ਦਹਰਾਨਂ ਦਹਰਾਨਂ (ਸੀ.)] ਬ੍ਰਹ੍ਮਚਰਿਯਂ ਚਿਣ੍ਣੇਨ, ਨਨੁ ਨਾਮ ਕਾਮਾ ਪਰਿਭੁਞ੍ਜਿਤਬ੍ਬਾ; ਯਦਾ ਜਿਣ੍ਣਾ ਭਵਿਸ੍ਸਥ ਤਦਾ ਬ੍ਰਹ੍ਮਚਰਿਯਂ ਚਰਿਸ੍ਸਥ. ਏਵਂ ਤੁਮ੍ਹਾਕਂ ਉਭੋ ਅਤ੍ਥਾ ਪਰਿਗ੍ਗਹਿਤਾ ਭਵਿਸ੍ਸਨ੍ਤੀ’ਤਿ. ਤਾ, ਭਨ੍ਤੇ, ਭਿਕ੍ਖੁਨਿਯੋ ਵੇਸਿਯਾਹਿ ਉਪ੍ਪਣ੍ਡਿਯਮਾਨਾ ਮਙ੍ਕੂ ਅਹੇਸੁਂ. ਅਸੁਚਿ, ਭਨ੍ਤੇ, ਮਾਤੁਗਾਮਸ੍ਸ ਨਗ੍ਗਿਯਂ ਜੇਗੁਚ੍ਛਂ ਪਟਿਕੂਲਂ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਭਿਕ੍ਖੁਨਿਸਙ੍ਘਸ੍ਸ ਯਾਵਜੀਵਂ ਉਦਕਸਾਟਿਕਂ ਦਾਤੁ’’ਨ੍ਤਿ.

੩੫੧. ‘‘ਕਿਂ ਪਨ ਤ੍ਵਂ, ਵਿਸਾਖੇ, ਆਨਿਸਂਸਂ ਸਮ੍ਪਸ੍ਸਮਾਨਾ ਤਥਾਗਤਂ ਅਟ੍ਠ ਵਰਾਨਿ ਯਾਚਸੀ’’ਤਿ? ‘‘ਇਧ, ਭਨ੍ਤੇ, ਦਿਸਾਸੁ ਵਸ੍ਸਂਵੁਟ੍ਠਾ ਭਿਕ੍ਖੂ ਸਾਵਤ੍ਥਿਂ ਆਗਚ੍ਛਿਸ੍ਸਨ੍ਤਿ ਭਗਵਨ੍ਤਂ ਦਸ੍ਸਨਾਯ. ਤੇ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਨ੍ਤਿ – ‘ਇਤ੍ਥਨ੍ਨਾਮੋ, ਭਨ੍ਤੇ, ਭਿਕ੍ਖੁ ਕਾਲਙ੍ਕਤੋ, ਤਸ੍ਸ ਕਾ ਗਤਿ ਕੋ ਅਭਿਸਮ੍ਪਰਾਯੋ’ਤਿ? ਤਂ ਭਗਵਾ ਬ੍ਯਾਕਰਿਸ੍ਸਤਿ ਸੋਤਾਪਤ੍ਤਿਫਲੇ ਵਾ ਸਕਦਾਗਾਮਿਫਲੇ ਵਾ ਅਨਾਗਾਮਿਫਲੇ ਵਾ ਅਰਹਤ੍ਤੇ ਵਾ. ਤ੍ਯਾਹਂ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਾਮਿ – ‘ਆਗਤਪੁਬ੍ਬਾ ਨੁ ਖੋ, ਭਨ੍ਤੇ, ਤੇਨ ਅਯ੍ਯੇਨ ਸਾਵਤ੍ਥੀ’ਤਿ? ਸਚੇ ਮੇ ਵਕ੍ਖਨ੍ਤਿ – ‘ਆਗਤਪੁਬ੍ਬਾ ਤੇਨ ਭਿਕ੍ਖੁਨਾ ਸਾਵਤ੍ਥੀ’ਤਿ ਨਿਟ੍ਠਮੇਤ੍ਥ ਗਚ੍ਛਿਸ੍ਸਾਮਿ – ਨਿਸ੍ਸਂਸਯਂ ਮੇ ਪਰਿਭੁਤ੍ਤਂ ਤੇਨ ਅਯ੍ਯੇਨ ਵਸ੍ਸਿਕਸਾਟਿਕਾ ਵਾ ਆਗਨ੍ਤੁਕਭਤ੍ਤਂ ਵਾ ਗਮਿਕਭਤ੍ਤਂ ਵਾ ਗਿਲਾਨਭਤ੍ਤਂ ਵਾ ਗਿਲਾਨੁਪਟ੍ਠਾਕਭਤ੍ਤਂ ਵਾ ਗਿਲਾਨਭੇਸਜ੍ਜਂ ਵਾ ਧੁਵਯਾਗੁ ਵਾਤਿ. ਤਸ੍ਸਾ ਮੇ ਤਦਨੁਸ੍ਸਰਨ੍ਤਿਯਾ ਪਾਮੁਜ੍ਜਂ ਜਾਯਿਸ੍ਸਤਿ, ਪਮੁਦਿਤਾਯ ਪੀਤਿ ਜਾਯਿਸ੍ਸਤਿ, ਪੀਤਿਮਨਾਯ ਕਾਯੋ ਪਸ੍ਸਮ੍ਭਿਸ੍ਸਤਿ, ਪਸ੍ਸਦ੍ਧਕਾਯਾ ਸੁਖਂ ਵੇਦਿਯਿਸ੍ਸਾਮਿ, ਸੁਖਿਨਿਯਾ ਚਿਤ੍ਤਂ ਸਮਾਧਿਯਿਸ੍ਸਤਿ. ਸਾ ਮੇ ਭਵਿਸ੍ਸਤਿ ਇਨ੍ਦ੍ਰਿਯਭਾਵਨਾ ਬਲਭਾਵਨਾ ਬੋਜ੍ਝਙ੍ਗਭਾਵਨਾ. ਇਮਾਹਂ, ਭਨ੍ਤੇ, ਆਨਿਸਂਸਂ ਸਮ੍ਪਸ੍ਸਮਾਨਾ ਤਥਾਗਤਂ ਅਟ੍ਠ ਵਰਾਨਿ ਯਾਚਾਮੀ’’ਤਿ. ‘‘ਸਾਧੁ ਸਾਧੁ, ਵਿਸਾਖੇ; ਸਾਧੁ ਖੋ ਤ੍ਵਂ, ਵਿਸਾਖੇ, ਇਮਂ ਆਨਿਸਂਸਂ ਸਮ੍ਪਸ੍ਸਮਾਨਾ ਤਥਾਗਤਂ ਅਟ੍ਠ ਵਰਾਨਿ ਯਾਚਸਿ. ਅਨੁਜਾਨਾਮਿ ਤੇ, ਵਿਸਾਖੇ, ਅਟ੍ਠ ਵਰਾਨੀ’’ਤਿ. ਅਥ ਖੋ ਭਗਵਾ ਵਿਸਾਖਂ ਮਿਗਾਰਮਾਤਰਂ ਇਮਾਹਿ ਗਾਥਾਹਿ ਅਨੁਮੋਦਿ –

‘‘ਯਾ ਅਨ੍ਨਪਾਨਂ ਦਦਤਿਪ੍ਪਮੋਦਿਤਾ;

ਸੀਲੂਪਪਨ੍ਨਾ ਸੁਗਤਸ੍ਸ ਸਾਵਿਕਾ;

ਦਦਾਤਿ ਦਾਨਂ ਅਭਿਭੁਯ੍ਯ ਮਚ੍ਛਰਂ;

ਸੋਵਗ੍ਗਿਕਂ ਸੋਕਨੁਦਂ ਸੁਖਾਵਹਂ.

‘‘ਦਿਬ੍ਬਂ ਸਾ ਲਭਤੇ ਆਯੁਂ [ਦਿਬ੍ਬਂ ਬਲਂ ਸਾ ਲਭਤੇ ਚ ਆਯੁਂ (ਸੀ. ਸ੍ਯਾ.)];

ਆਗਮ੍ਮ ਮਗ੍ਗਂ ਵਿਰਜਂ ਅਨਙ੍ਗਣਂ;

ਸਾ ਪੁਞ੍ਞਕਾਮਾ ਸੁਖਿਨੀ ਅਨਾਮਯਾ;

ਸਗ੍ਗਮ੍ਹਿ ਕਾਯਮ੍ਹਿ ਚਿਰਂ ਪਮੋਦਤੀ’’ਤਿ.

੩੫੨. ਅਥ ਖੋ ਭਗਵਾ ਵਿਸਾਖਂ ਮਿਗਾਰਮਾਤਰਂ ਇਮਾਹਿ ਗਾਥਾਹਿ ਅਨੁਮੋਦਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਿਕਸਾਟਿਕਂ, ਆਗਨ੍ਤੁਕਭਤ੍ਤਂ, ਗਮਿਕਭਤ੍ਤਂ, ਗਿਲਾਨਭਤ੍ਤਂ, ਗਿਲਾਨੁਪਟ੍ਠਾਕਭਤ੍ਤਂ, ਗਿਲਾਨਭੇਸਜ੍ਜਂ, ਧੁਵਯਾਗੁਂ, ਭਿਕ੍ਖੁਨਿਸਙ੍ਘਸ੍ਸ ਉਦਕਸਾਟਿਕ’’ਨ੍ਤਿ.

ਵਿਸਾਖਾਵਤ੍ਥੁ ਨਿਟ੍ਠਿਤਂ.

ਵਿਸਾਖਾਭਾਣਵਾਰੋ ਨਿਟ੍ਠਿਤੋ.

੨੨੦. ਨਿਸੀਦਨਾਦਿਅਨੁਜਾਨਨਾ

੩੫੩. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪਣੀਤਾਨਿ ਭੋਜਨਾਨਿ ਭੁਞ੍ਜਿਤ੍ਵਾ ਮੁਟ੍ਠਸ੍ਸਤੀ ਅਸਮ੍ਪਜਾਨਾ ਨਿਦ੍ਦਂ ਓਕ੍ਕਮਨ੍ਤਿ. ਤੇਸਂ ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਂ ਸੁਪਿਨਨ੍ਤੇਨ ਅਸੁਚਿ ਮੁਚ੍ਚਤਿ, ਸੇਨਾਸਨਂ ਅਸੁਚਿਨਾ ਮਕ੍ਖਿਯਤਿ. ਅਥ ਖੋ ਭਗਵਾ ਆਯਸ੍ਮਤਾ ਆਨਨ੍ਦੇਨ ਪਚ੍ਛਾਸਮਣੇਨ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਅਦ੍ਦਸ ਸੇਨਾਸਨਂ ਅਸੁਚਿਨਾ ਮਕ੍ਖਿਤਂ, ਦਿਸ੍ਵਾਨ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕਿਂ ਏਤਂ, ਆਨਨ੍ਦ, ਸੇਨਾਸਨਂ ਮਕ੍ਖਿਤ’’ਨ੍ਤਿ? ‘‘ਏਤਰਹਿ, ਭਨ੍ਤੇ, ਭਿਕ੍ਖੂ ਪਣੀਤਾਨਿ ਭੋਜਨਾਨਿ ਭੁਞ੍ਜਿਤ੍ਵਾ ਮੁਟ੍ਠਸ੍ਸਤੀ ਅਸਮ੍ਪਜਾਨਾ ਨਿਦ੍ਦਂ ਓਕ੍ਕਮਨ੍ਤਿ. ਤੇਸਂ ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਂ ਸੁਪਿਨਨ੍ਤੇਨ ਅਸੁਚਿ ਮੁਚ੍ਚਤਿ; ਤਯਿਦਂ, ਭਗਵਾ, ਸੇਨਾਸਨਂ ਅਸੁਚਿਨਾ ਮਕ੍ਖਿਤ’’ਨ੍ਤਿ. ‘‘ਏਵਮੇਤਂ, ਆਨਨ੍ਦ, ਏਵਮੇਤਂ, ਆਨਨ੍ਦ. ਮੁਚ੍ਚਤਿ ਹਿ, ਆਨਨ੍ਦ, ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਂ ਸੁਪਿਨਨ੍ਤੇਨ ਅਸੁਚਿ. ਯੇ ਤੇ, ਆਨਨ੍ਦ, ਭਿਕ੍ਖੂ ਉਪਟ੍ਠਿਤਸ੍ਸਤੀ ਸਮ੍ਪਜਾਨਾ ਨਿਦ੍ਦਂ ਓਕ੍ਕਮਨ੍ਤਿ, ਤੇਸਂ ਅਸੁਚਿ ਨ ਮੁਚ੍ਚਤਿ. ਯੇਪਿ ਤੇ, ਆਨਨ੍ਦ, ਪੁਥੁਜ੍ਜਨਾ ਕਾਮੇਸੁ ਵੀਤਰਾਗਾ, ਤੇਸਮ੍ਪਿ ਅਸੁਚਿ ਨ ਮੁਚ੍ਚਤਿ. ਅਟ੍ਠਾਨਮੇਤਂ, ਆਨਨ੍ਦ, ਅਨਵਕਾਸੋ ਯਂ ਅਰਹਤੋ ਅਸੁਚਿ ਮੁਚ੍ਚੇਯ੍ਯਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਇਧਾਹਂ, ਭਿਕ੍ਖਵੇ, ਆਨਨ੍ਦੇਨ ਪਚ੍ਛਾਸਮਣੇਨ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਅਦ੍ਦਸਂ ਸੇਨਾਸਨਂ ਅਸੁਚਿਨਾ ਮਕ੍ਖਿਤਂ, ਦਿਸ੍ਵਾਨ ਆਨਨ੍ਦਂ ਆਮਨ੍ਤੇਸਿਂ ‘ਕਿਂ ਏਤਂ, ਆਨਨ੍ਦ, ਸੇਨਾਸਨਂ ਮਕ੍ਖਿਤ’ਨ੍ਤਿ? ‘ਏਤਰਹਿ, ਭਨ੍ਤੇ, ਭਿਕ੍ਖੂ ਪਣੀਤਾਨਿ ਭੋਜਨਾਨਿ ਭੁਞ੍ਜਿਤ੍ਵਾ ਮੁਟ੍ਠਸ੍ਸਤੀ ਅਸਮ੍ਪਜਾਨਾ ਨਿਦ੍ਦਂ ਓਕ੍ਕਮਨ੍ਤਿ. ਤੇਸਂ ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਂ ਸੁਪਿਨਨ੍ਤੇਨ ਅਸੁਚਿ ਮੁਚ੍ਚਤਿ; ਤਯਿਦਂ, ਭਗਵਾ, ਸੇਨਾਸਨਂ ਅਸੁਚਿਨਾ ਮਕ੍ਖਿਤ’ਨ੍ਤਿ. ‘ਏਵਮੇਤਂ, ਆਨਨ੍ਦ, ਏਵਮੇਤਂ, ਆਨਨ੍ਦ, ਮੁਚ੍ਚਤਿ ਹਿ, ਆਨਨ੍ਦ, ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਂ ਸੁਪਿਨਨ੍ਤੇਨ ਅਸੁਚਿ. ਯੇ ਤੇ, ਆਨਨ੍ਦ, ਭਿਕ੍ਖੂ ਉਪਟ੍ਠਿਤਸ੍ਸਤੀ ਸਮ੍ਪਜਾਨਾ ਨਿਦ੍ਦਂ ਓਕ੍ਕਮਨ੍ਤਿ, ਤੇਸਂ ਅਸੁਚਿ ਨ ਮੁਚ੍ਚਤਿ. ਯੇਪਿ ਤੇ, ਆਨਨ੍ਦ, ਪੁਥੁਜ੍ਜਨਾ ਕਾਮੇਸੁ ਵੀਤਰਾਗਾ ਤੇਸਮ੍ਪਿ ਅਸੁਚਿ ਨ ਮੁਚ੍ਚਤਿ. ਅਟ੍ਠਾਨਮੇਤਂ, ਆਨਨ੍ਦ, ਅਨਵਕਾਸੋ ਯਂ ਅਰਹਤੋ ਅਸੁਚਿ ਮੁਚ੍ਚੇਯ੍ਯਾ’’’ਤਿ.

‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਮੁਟ੍ਠਸ੍ਸਤਿਸ੍ਸ ਅਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ – ਦੁਕ੍ਖਂ ਸੁਪਤਿ, ਦੁਕ੍ਖਂ ਪਟਿਬੁਜ੍ਝਤਿ, ਪਾਪਕਂ ਸੁਪਿਨਂ ਪਸ੍ਸਤਿ, ਦੇਵਤਾ ਨ ਰਕ੍ਖਨ੍ਤਿ, ਅਸੁਚਿ ਮੁਚ੍ਚਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਮੁਟ੍ਠਸ੍ਸਤਿਸ੍ਸ ਅਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ.

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਉਪਟ੍ਠਿਤਸ੍ਸਤਿਸ੍ਸ ਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ – ਸੁਖਂ ਸੁਪਤਿ, ਸੁਖਂ ਪਟਿਬੁਜ੍ਝਤਿ, ਨ ਪਾਪਕਂ ਸੁਪਿਨਂ ਪਸ੍ਸਤਿ, ਦੇਵਤਾ ਰਕ੍ਖਨ੍ਤਿ, ਅਸੁਚਿ ਨ ਮੁਚ੍ਚਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਉਪਟ੍ਠਿਤਸ੍ਸਤਿਸ੍ਸ ਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ.

‘‘ਅਨੁਜਾਨਾਮਿ, ਭਿਕ੍ਖਵੇ, ਕਾਯਗੁਤ੍ਤਿਯਾ ਚੀਵਰਗੁਤ੍ਤਿਯਾ ਸੇਨਾਸਨਗੁਤ੍ਤਿਯਾ ਨਿਸੀਦਨ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਤਿਖੁਦ੍ਦਕਂ ਨਿਸੀਦਨਂ ਨ ਸਬ੍ਬਂ ਸੇਨਾਸਨਂ ਸਂਗੋਪੇਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯਾਵਮਹਨ੍ਤਂ ਪਚ੍ਚਤ੍ਥਰਣਂ ਆਕਙ੍ਖਤਿ ਤਾਵਮਹਨ੍ਤਂ ਪਚ੍ਚਤ੍ਥਰਣਂ ਕਾਤੁਨ੍ਤਿ.

੩੫੪. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਆਨਨ੍ਦਸ੍ਸ ਉਪਜ੍ਝਾਯਸ੍ਸ ਆਯਸ੍ਮਤੋ ਬੇਲਟ੍ਠਸੀਸਸ੍ਸ ਥੁਲ੍ਲਕਚ੍ਛਾਬਾਧੋ ਹੋਤਿ. ਤਸ੍ਸ ਲਸਿਕਾਯ ਚੀਵਰਾਨਿ ਕਾਯੇ ਲਗ੍ਗਨ੍ਤਿ. ਤਾਨਿ ਭਿਕ੍ਖੂ ਉਦਕੇਨ ਤੇਮੇਤ੍ਵਾ ਤੇਮੇਤ੍ਵਾ ਅਪਕਡ੍ਢਨ੍ਤਿ. ਅਦ੍ਦਸਾ ਖੋ ਭਗਵਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤੇ ਭਿਕ੍ਖੂ ਤਾਨਿ ਚੀਵਰਾਨਿ ਉਦਕੇਨ ਤੇਮੇਤ੍ਵਾ ਤੇਮੇਤ੍ਵਾ ਅਪਕਡ੍ਢਨ੍ਤੇ, ਦਿਸ੍ਵਾਨ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਙ੍ਕਮਿਤ੍ਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਿਂ ਇਮਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਆਬਾਧੋ’’ਤਿ? ‘‘ਇਮਸ੍ਸ, ਭਨ੍ਤੇ, ਆਯਸ੍ਮਤੋ ਥੁਲ੍ਲਕਚ੍ਛਾਬਾਧੋ. ਲਸਿਕਾਯ ਚੀਵਰਾਨਿ ਕਾਯੇ ਲਗ੍ਗਨ੍ਤਿ. ਤਾਨਿ ਮਯਂ ਉਦਕੇਨ ਤੇਮੇਤ੍ਵਾ ਤੇਮੇਤ੍ਵਾ ਅਪਕਡ੍ਢਾਮਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਯਸ੍ਸ ਕਣ੍ਡੁ ਵਾ ਪਿਲ਼ਕਾ ਵਾ ਅਸ੍ਸਾਵੋ ਵਾ ਥੁਲ੍ਲਕਚ੍ਛੁ ਵਾ ਆਬਾਧੋ ਕਣ੍ਡੁਪ੍ਪਟਿਚ੍ਛਾਦਿ’’ਨ੍ਤਿ.

੩੫੫. ਅਥ ਖੋ ਵਿਸਾਖਾ ਮਿਗਾਰਮਾਤਾ ਮੁਖਪੁਞ੍ਛਨਚੋਲ਼ਂ [ਮੁਖਪੁਞ੍ਜਨਚੋਲ਼ਂ (ਕ.)] ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਵਿਸਾਖਾ ਮਿਗਾਰਮਾਤਾ ਭਗਵਨ੍ਤਂ ਏਤਦਵੋਚ – ‘‘ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਮੁਖਪੁਞ੍ਛਨਚੋਲ਼ਂ, ਯਂ ਮਮਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਪਟਿਗ੍ਗਹੇਸਿ ਭਗਵਾ ਮੁਖਪੁਞ੍ਛਨਚੋਲ਼ਂ. ਅਥ ਖੋ ਭਗਵਾ ਵਿਸਾਖਂ ਮਿਗਾਰਮਾਤਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਮੁਖਪੁਞ੍ਛਨਚੋਲ਼ਕ’’ਨ੍ਤਿ [ਮੁਖਪੁਞ੍ਛਨਚੋਲਨ੍ਤਿ (ਸ੍ਯਾ.)].

੩੫੬. ਤੇਨ ਖੋ ਪਨ ਸਮਯੇਨ ਰੋਜੋ ਮਲ੍ਲੋ ਆਯਸ੍ਮਤੋ ਆਨਨ੍ਦਸ੍ਸ ਸਹਾਯੋ ਹੋਤਿ. ਰੋਜਸ੍ਸ ਮਲ੍ਲਸ੍ਸ ਖੋਮਪਿਲੋਤਿਕਾ ਆਯਸ੍ਮਤੋ ਆਨਨ੍ਦਸ੍ਸ ਹਤ੍ਥੇ ਨਿਕ੍ਖਿਤ੍ਤਾ ਹੋਤਿ. ਆਯਸ੍ਮਤੋ ਚ ਆਨਨ੍ਦਸ੍ਸ ਖੋਮਪਿਲੋਤਿਕਾਯ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਵਿਸ੍ਸਾਸਂ ਗਹੇਤੁਂ – ਸਨ੍ਦਿਟ੍ਠੋ ਚ ਹੋਤਿ, ਸਮ੍ਭਤ੍ਤੋ ਚ, ਆਲਪਿਤੋ ਚ, ਜੀਵਤਿ ਚ, ਜਾਨਾਤਿ ਚ, ਗਹਿਤੇ ਮੇ ਅਤ੍ਤਮਨੋ ਭਵਿਸ੍ਸਤੀਤਿ. ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਵਿਸ੍ਸਾਸਂ ਗਹੇਤੁਨ੍ਤਿ.

੩੫੭. ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਪਰਿਪੁਣ੍ਣਂ ਹੋਤਿ ਤਿਚੀਵਰਂ. ਅਤ੍ਥੋ ਚ ਹੋਤਿ ਪਰਿਸ੍ਸਾਵਨੇਹਿਪਿ ਥਵਿਕਾਹਿਪਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਰਿਕ੍ਖਾਰਚੋਲ਼ਕਨ੍ਤਿ.

ਨਿਸੀਦਨਾਦਿਅਨੁਜਾਨਨਾ ਨਿਟ੍ਠਿਤਾ.

੨੨੧. ਪਚ੍ਛਿਮਵਿਕਪ੍ਪਨੁਪਗਚੀਵਰਾਦਿਕਥਾ

੩੫੮. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਯਾਨਿ ਤਾਨਿ ਭਗਵਤਾ ਅਨੁਞ੍ਞਾਤਾਨਿ ਤਿਚੀਵਰਨ੍ਤਿ ਵਾ ਵਸ੍ਸਿਕਸਾਟਿਕਾਤਿ ਵਾ ਨਿਸੀਦਨਨ੍ਤਿ ਵਾ ਪਚ੍ਚਤ੍ਥਰਣਨ੍ਤਿ ਵਾ ਕਣ੍ਡੁਪ੍ਪਟਿਚ੍ਛਾਦੀਤਿ ਵਾ ਮੁਖਪੁਞ੍ਛਨਚੋਲ਼ਨ੍ਤਿ ਵਾ ਪਰਿਕ੍ਖਾਰਚੋਲ਼ਨ੍ਤਿ ਵਾ, ਸਬ੍ਬਾਨਿ ਤਾਨਿ ਅਧਿਟ੍ਠਾਤਬ੍ਬਾਨਿ ਨੁ ਖੋ, ਉਦਾਹੁ, ਵਿਕਪ੍ਪੇਤਬ੍ਬਾਨੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਿਚੀਵਰਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਵਸ੍ਸਿਕਸਾਟਿਕਂ ਵਸ੍ਸਾਨਂ ਚਾਤੁਮਾਸਂ ਅਧਿਟ੍ਠਾਤੁਂ, ਤਤੋ ਪਰਂ ਵਿਕਪ੍ਪੇਤੁਂ; ਨਿਸੀਦਨਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਪਚ੍ਚਤ੍ਥਰਣਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਕਣ੍ਡੁਪ੍ਪਟਿਚ੍ਛਾਦਿਂ ਯਾਵਆਬਾਧਾ ਅਧਿਟ੍ਠਾਤੁਂ ਤਤੋ ਪਰਂ ਵਿਕਪ੍ਪੇਤੁਂ; ਮੁਖਪੁਞ੍ਛਨਚੋਲ਼ਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਤ੍ਤਕਂ ਪਚ੍ਛਿਮਂ ਨੁ ਖੋ ਚੀਵਰਂ ਵਿਕਪ੍ਪੇਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਆਯਾਮੇਨ ਅਟ੍ਠਙ੍ਗੁਲਂ ਸੁਗਤਙ੍ਗੁਲੇਨ ਚਤੁਰਙ੍ਗੁਲਵਿਤ੍ਥਤਂ ਪਚ੍ਛਿਮਂ ਚੀਵਰਂ ਵਿਕਪ੍ਪੇਤੁਨ੍ਤਿ.

੩੫੯. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਮਹਾਕਸ੍ਸਪਸ੍ਸ ਪਂਸੁਕੂਲਕਤੋ ਗਰੁਕੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸੁਤ੍ਤਲੂਖਂ ਕਾਤੁਨ੍ਤਿ. ਵਿਕਣ੍ਣੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਿਕਣ੍ਣਂ ਉਦ੍ਧਰਿਤੁਨ੍ਤਿ. ਸੁਤ੍ਤਾ ਓਕਿਰਿਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਨੁਵਾਤਂ ਪਰਿਭਣ੍ਡਂ ਆਰੋਪੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਸਙ੍ਘਾਟਿਯਾ ਪਤ੍ਤਾ ਲੁਜ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਪਦਕਂ ਕਾਤੁਨ੍ਤਿ.

੩੬੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਤਿਚੀਵਰੇ ਕਯਿਰਮਾਨੇ ਸਬ੍ਬਂ ਛਿਨ੍ਨਕਂ ਨਪ੍ਪਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਛਿਨ੍ਨਕਾਨਿ ਏਕਂ ਅਚ੍ਛਿਨ੍ਨਕਨ੍ਤਿ.

ਦ੍ਵੇ ਛਿਨ੍ਨਕਾਨਿ ਏਕਂ ਅਚ੍ਛਿਨ੍ਨਕਂ ਨਪ੍ਪਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਅਚ੍ਛਿਨ੍ਨਕਾਨਿ ਏਕਂ ਛਿਨ੍ਨਕਨ੍ਤਿ.

ਦ੍ਵੇ ਅਚ੍ਛਿਨ੍ਨਕਾਨਿ ਏਕਂ ਛਿਨ੍ਨਕਂ ਨਪ੍ਪਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਨ੍ਵਾਧਿਕਮ੍ਪਿ ਆਰੋਪੇਤੁਂ, ਨ ਚ, ਭਿਕ੍ਖਵੇ, ਸਬ੍ਬਂ ਅਚ੍ਛਿਨ੍ਨਕਂ ਧਾਰੇਤਬ੍ਬਂ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੩੬੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਬਹੁਂ ਚੀਵਰਂ ਉਪ੍ਪਨ੍ਨਂ ਹੋਤਿ. ਸੋ ਚ ਤਂ ਚੀਵਰਂ ਮਾਤਾਪਿਤੂਨਂ ਦਾਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਮਾਤਾਪਿਤਰੋਤਿ [ਮਾਤਾਪਿਤੂਨਂ ਖੋ (ਸੀ.)] ਖੋ, ਭਿਕ੍ਖਵੇ, ਦਦਮਾਨੇ [ਵਦਮਾਨੋ (ਕ.), ਵਦਮਾਨੇ (?)] ਕਿਂ ਵਦੇਯ੍ਯਾਮ? ਅਨੁਜਾਨਾਮਿ, ਭਿਕ੍ਖਵੇ, ਮਾਤਾਪਿਤੂਨਂ ਦਾਤੁਂ. ਨ ਚ, ਭਿਕ੍ਖਵੇ, ਸਦ੍ਧਾਦੇਯ੍ਯਂ ਵਿਨਿਪਾਤੇਤਬ੍ਬਂ. ਯੋ ਵਿਨਿਪਾਤੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੩੬੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਨ੍ਧਵਨੇ ਚੀਵਰਂ ਨਿਕ੍ਖਿਪਿਤ੍ਵਾ ਸਨ੍ਤਰੁਤ੍ਤਰੇਨ ਗਾਮਂ ਪਿਣ੍ਡਾਯ ਪਾਵਿਸਿ. ਚੋਰਾ ਤਂ ਚੀਵਰਂ ਅਵਹਰਿਂਸੁ. ਸੋ ਭਿਕ੍ਖੁ ਦੁਚ੍ਚੋਲ਼ੋ ਹੋਤਿ ਲੂਖਚੀਵਰੋ. ਭਿਕ੍ਖੂ ਏਵਮਾਹਂਸੁ – ‘‘ਕਿਸ੍ਸ ਤ੍ਵਂ, ਆਵੁਸੋ, ਦੁਚ੍ਚੋਲ਼ੋ ਲੂਖਚੀਵਰੋਸੀ’’ਤਿ? ‘‘ਇਧਾਹਂ [ਸੋ ਅਹਂ (ਕਤ੍ਥਚਿ)], ਆਵੁਸੋ, ਅਨ੍ਧਵਨੇ ਚੀਵਰਂ ਨਿਕ੍ਖਿਪਿਤ੍ਵਾ ਸਨ੍ਤਰੁਤ੍ਤਰੇਨ ਗਾਮਂ ਪਿਣ੍ਡਾਯ ਪਾਵਿਸਿਂ. ਚੋਰਾ ਤਂ ਚੀਵਰਂ ਅਵਹਰਿਂਸੁ. ਤੇਨਾਹਂ ਦੁਚ੍ਚੋਲ਼ੋ ਲੂਖਚੀਵਰੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਨ੍ਤਰੁਤ੍ਤਰੇਨ ਗਾਮੋ ਪਵਿਸਿਤਬ੍ਬੋ. ਯੋ ਪਵਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਆਨਨ੍ਦੋ ਅਸ੍ਸਤਿਯਾ ਸਨ੍ਤਰੁਤ੍ਤਰੇਨ ਗਾਮਂ ਪਿਣ੍ਡਾਯ ਪਾਵਿਸਿ. ਭਿਕ੍ਖੂ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚੁਂ – ‘‘ਨਨੁ, ਆਵੁਸੋ ਆਨਨ੍ਦ, ਭਗਵਤਾ ਪਞ੍ਞਤ੍ਤਂ – ‘ਨ ਸਨ੍ਤਰੁਤ੍ਤਰੇਨ ਗਾਮੋ ਪਵਿਸਿਤਬ੍ਬੋ’ਤਿ? ਕਿਸ੍ਸ ਤ੍ਵਂ, ਆਵੁਸੋ ਆਨਨ੍ਦ, ਸਨ੍ਤਰੁਤ੍ਤਰੇਨ ਗਾਮਂ ਪਵਿਟ੍ਠੋ’’ਤਿ? ‘‘ਸਚ੍ਚਂ, ਆਵੁਸੋ, ਭਗਵਤਾ ਪਞ੍ਞਤ੍ਤਂ – ‘ਨ ਸਨ੍ਤਰੁਤ੍ਤਰੇਨ ਗਾਮੋ ਪਵਿਸਿਤਬ੍ਬੋ’ਤਿ. ਅਪਿ ਚਾਹਂ ਅਸ੍ਸਤਿਯਾ ਪਵਿਟ੍ਠੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਪਞ੍ਚਿਮੇ, ਭਿਕ੍ਖਵੇ, ਪਚ੍ਚਯਾ ਸਙ੍ਘਾਟਿਯਾ ਨਿਕ੍ਖੇਪਾਯ – ਗਿਲਾਨੋ ਵਾ ਹੋਤਿ, ਵਸ੍ਸਿਕਸਙ੍ਕੇਤਂ ਵਾ ਹੋਤਿ, ਨਦੀਪਾਰਂ ਗਨ੍ਤੁਂ ਵਾ ਹੋਤਿ, ਅਗ੍ਗਲ਼ਗੁਤ੍ਤਿਵਿਹਾਰੋ ਵਾ ਹੋਤਿ, ਅਤ੍ਥਤਕਥਿਨਂ ਵਾ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਪਚ੍ਚਯਾ ਸਙ੍ਘਾਟਿਯਾ ਨਿਕ੍ਖੇਪਾਯ.

ਪਞ੍ਚਿਮੇ, ਭਿਕ੍ਖਵੇ, ਪਚ੍ਚਯਾ ਉਤ੍ਤਰਾਸਙ੍ਗਸ੍ਸ ਨਿਕ੍ਖੇਪਾਯ…ਪੇ… ਅਨ੍ਤਰਵਾਸਕਸ੍ਸ ਨਿਕ੍ਖੇਪਾਯ – ਗਿਲਾਨੋ ਵਾ ਹੋਤਿ, ਵਸ੍ਸਿਕਸਙ੍ਕੇਤਂ ਵਾ ਹੋਤਿ, ਨਦੀਪਾਰਂ ਗਨ੍ਤੁਂ ਵਾ ਹੋਤਿ, ਅਗ੍ਗਲ਼ਗੁਤ੍ਤਿਵਿਹਾਰੋ ਵਾ ਹੋਤਿ, ਅਤ੍ਥਤਕਥਿਨਂ ਵਾ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਪਚ੍ਚਯਾ ਉਤ੍ਤਰਾਸਙ੍ਗਸ੍ਸ ਅਨ੍ਤਰਵਾਸਕਸ੍ਸ ਨਿਕ੍ਖੇਪਾਯ.

ਪਞ੍ਚਿਮੇ, ਭਿਕ੍ਖਵੇ, ਪਚ੍ਚਯਾ ਵਸ੍ਸਿਕਸਾਟਿਕਾਯ ਨਿਕ੍ਖੇਪਾਯ – ਗਿਲਾਨੋ ਵਾ ਹੋਤਿ, ਨਿਸ੍ਸੀਮਂ ਗਨ੍ਤੁਂ ਵਾ ਹੋਤਿ, ਨਦੀਪਾਰਂ ਗਨ੍ਤੁਂ ਵਾ ਹੋਤਿ, ਅਗ੍ਗਲ਼ਗੁਤ੍ਤਿਵਿਹਾਰੋ ਵਾ ਹੋਤਿ, ਵਸ੍ਸਿਕਸਾਟਿਕਾ ਅਕਤਾ ਵਾ ਹੋਤਿ ਵਿਪ੍ਪਕਤਾ ਵਾ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਪਚ੍ਚਯਾ ਵਸ੍ਸਿਕਸਾਟਿਕਾਯ ਨਿਕ੍ਖੇਪਾਯਾਤਿ.

ਪਚ੍ਛਿਮਵਿਕਪ੍ਪਨੁਪਗਚੀਵਰਾਦਿਕਥਾ ਨਿਟ੍ਠਿਤਾ.

੨੨੨. ਸਙ੍ਘਿਕਚੀਵਰੁਪ੍ਪਾਦਕਥਾ

੩੬੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਏਕੋ ਵਸ੍ਸਂ ਵਸਿ. ਤਤ੍ਥ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਅਦਂਸੁ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਚਤੁਵਗ੍ਗੋ ਪਚ੍ਛਿਮੋ ਸਙ੍ਘੋ’ਤਿ. ਅਹਞ੍ਚਮ੍ਹਿ ਏਕਕੋ. ਇਮੇ ਚ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਅਦਂਸੁ. ਯਂਨੂਨਾਹਂ ਇਮਾਨਿ ਸਙ੍ਘਿਕਾਨਿ ਚੀਵਰਾਨਿ ਸਾਵਤ੍ਥਿਂ ਹਰੇਯ੍ਯ’’ਨ੍ਤਿ. ਅਥ ਖੋ ਸੋ ਭਿਕ੍ਖੁ ਤਾਨਿ ਚੀਵਰਾਨਿ ਆਦਾਯ ਸਾਵਤ੍ਥਿਂ ਗਨ੍ਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਤੁਯ੍ਹੇਵ, ਭਿਕ੍ਖੁ, ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾਯਾ’’ਤਿ. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਏਕੋ ਵਸ੍ਸਂ ਵਸਤਿ. ਤਤ੍ਥ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਦੇਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਤਸ੍ਸੇਵ ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾਯਾਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਉਤੁਕਾਲਂ ਏਕੋ ਵਸਿ. ਤਤ੍ਥ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਅਦਂਸੁ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਚਤੁਵਗ੍ਗੋ ਪਚ੍ਛਿਮੋ ਸਙ੍ਘੋ’ਤਿ. ਅਹਞ੍ਚਮ੍ਹਿ ਏਕਕੋ. ਇਮੇ ਚ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਅਦਂਸੁ. ਯਂਨੂਨਾਹਂ ਇਮਾਨਿ ਸਙ੍ਘਿਕਾਨਿ ਚੀਵਰਾਨਿ ਸਾਵਤ੍ਥਿਂ ਹਰੇਯ੍ਯ’’ਨ੍ਤਿ. ਅਥ ਖੋ ਸੋ ਭਿਕ੍ਖੁ ਤਾਨਿ ਚੀਵਰਾਨਿ ਆਦਾਯ ਸਾਵਤ੍ਥਿਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਮੁਖੀਭੂਤੇਨ ਸਙ੍ਘੇਨ ਭਾਜੇਤੁਂ. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਉਤੁਕਾਲਂ ਏਕੋ ਵਸਤਿ. ਤਤ੍ਥ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਦੇਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਤੇਨ ਭਿਕ੍ਖੁਨਾ ਤਾਨਿ ਚੀਵਰਾਨਿ ਅਧਿਟ੍ਠਾਤੁਂ – ‘‘ਮਯ੍ਹਿਮਾਨਿ ਚੀਵਰਾਨੀ’’ਤਿ. ਤਸ੍ਸ ਚੇ, ਭਿਕ੍ਖਵੇ, ਭਿਕ੍ਖੁਨੋ ਤਂ ਚੀਵਰਂ ਅਨਧਿਟ੍ਠਿਤੇ ਅਞ੍ਞੋ ਭਿਕ੍ਖੁ ਆਗਚ੍ਛਤਿ, ਸਮਕੋ ਦਾਤਬ੍ਬੋ ਭਾਗੋ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਤਂ ਚੀਵਰਂ ਭਾਜਿਯਮਾਨੇ, ਅਪਾਤਿਤੇ ਕੁਸੇ, ਅਞ੍ਞੋ ਭਿਕ੍ਖੁ ਆਗਚ੍ਛਤਿ, ਸਮਕੋ ਦਾਤਬ੍ਬੋ ਭਾਗੋ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਤਂ ਚੀਵਰਂ ਭਾਜਿਯਮਾਨੇ, ਪਾਤਿਤੇ ਕੁਸੇ, ਅਞ੍ਞੋ ਭਿਕ੍ਖੁ ਆਗਚ੍ਛਤਿ, ਨਾਕਾਮਾ ਦਾਤਬ੍ਬੋ ਭਾਗੋਤਿ.

ਤੇਨ ਖੋ ਪਨ ਸਮਯੇਨ ਦ੍ਵੇ ਭਾਤਿਕਾ ਥੇਰਾ, ਆਯਸ੍ਮਾ ਚ ਇਸਿਦਾਸੋ ਆਯਸ੍ਮਾ ਚ ਇਸਿਭਟੋ, ਸਾਵਤ੍ਥਿਯਂ ਵਸ੍ਸਂਵੁਟ੍ਠਾ ਅਞ੍ਞਤਰਂ ਗਾਮਕਾਵਾਸਂ ਅਗਮਂਸੁ. ਮਨੁਸ੍ਸਾ ਚਿਰਸ੍ਸਾਪਿ ਥੇਰਾ ਆਗਤਾਤਿ ਸਚੀਵਰਾਨਿ ਭਤ੍ਤਾਨਿ ਅਦਂਸੁ. ਆਵਾਸਿਕਾ ਭਿਕ੍ਖੂ ਥੇਰੇ ਪੁਚ੍ਛਿਂਸੁ – ‘‘ਇਮਾਨਿ, ਭਨ੍ਤੇ, ਸਙ੍ਘਿਕਾਨਿ ਚੀਵਰਾਨਿ ਥੇਰੇ ਆਗਮ੍ਮ ਉਪ੍ਪਨ੍ਨਾਨਿ, ਸਾਦਿਯਿਸ੍ਸਨ੍ਤਿ ਥੇਰਾ ਭਾਗ’’ਨ੍ਤਿ. ਥੇਰਾ ਏਵਮਾਹਂਸੁ – ‘‘ਯਥਾ ਖੋ ਮਯਂ, ਆਵੁਸੋ, ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮ, ਤੁਮ੍ਹਾਕਂਯੇਵ ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾਯਾ’’ਤਿ.

ਤੇਨ ਖੋ ਪਨ ਸਮਯੇਨ ਤਯੋ ਭਿਕ੍ਖੂ ਰਾਜਗਹੇ ਵਸ੍ਸਂ ਵਸਨ੍ਤਿ. ਤਤ੍ਥ ਮਨੁਸ੍ਸਾ ਸਙ੍ਘਸ੍ਸ

ਦੇਮਾਤਿ ਚੀਵਰਾਨਿ ਦੇਨ੍ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਚਤੁਵਗ੍ਗੋ ਪਚ੍ਛਿਮੋ ਸਙ੍ਘੋ’ਤਿ. ਮਯਞ੍ਚਮ੍ਹਾ ਤਯੋ ਜਨਾ. ਇਮੇ ਚ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਦੇਨ੍ਤਿ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਥੇਰਾ, ਆਯਸ੍ਮਾ ਚ ਨਿਲਵਾਸੀ ਆਯਸ੍ਮਾ ਚ ਸਾਣਵਾਸੀ ਆਯਸ੍ਮਾ ਚ ਗੋਤਕੋ ਆਯਸ੍ਮਾ ਚ ਭਗੁ ਆਯਸ੍ਮਾ ਚ ਫਲ਼ਿਕਸਨ੍ਤਾਨੋ, ਪਾਟਲਿਪੁਤ੍ਤੇ ਵਿਹਰਨ੍ਤਿ ਕੁਕ੍ਕੁਟਾਰਾਮੇ. ਅਥ ਖੋ ਤੇ ਭਿਕ੍ਖੂ ਪਾਟਲਿਪੁਤ੍ਤਂ ਗਨ੍ਤ੍ਵਾ ਥੇਰੇ ਪੁਚ੍ਛਿਂਸੁ. ਥੇਰਾ ਏਵਮਾਹਂਸੁ – ‘‘ਯਥਾ ਖੋ ਮਯਂ ਆਵੁਸੋ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮ, ਤੁਮ੍ਹਾਕਂਯੇਵ ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾਯਾ’’ਤਿ.

ਸਙ੍ਘਿਕਚੀਵਰੁਪ੍ਪਾਦਕਥਾ ਨਿਟ੍ਠਿਤਾ.

੨੨੩. ਉਪਨਨ੍ਦਸਕ੍ਯਪੁਤ੍ਤਵਤ੍ਥੁ

੩੬੪. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਸਾਵਤ੍ਥਿਯਂ ਵਸ੍ਸਂਵੁਟ੍ਠੋ ਅਞ੍ਞਤਰਂ ਗਾਮਕਾਵਾਸਂ ਅਗਮਾਸਿ. ਤਤ੍ਥ ਚ ਭਿਕ੍ਖੂ ਚੀਵਰਂ ਭਾਜੇਤੁਕਾਮਾ ਸਨ੍ਨਿਪਤਿਂਸੁ. ਤੇ ਏਵਮਾਹਂਸੁ – ‘‘ਇਮਾਨਿ ਖੋ, ਆਵੁਸੋ, ਸਙ੍ਘਿਕਾਨਿ ਚੀਵਰਾਨਿ ਭਾਜਿਯਿਸ੍ਸਨ੍ਤਿ, ਸਾਦਿਯਿਸ੍ਸਸਿ ਭਾਗ’’ਨ੍ਤਿ? ‘‘ਆਮਾਵੁਸੋ, ਸਾਦਿਯਿਸ੍ਸਾਮੀ’’ਤਿ. ਤਤੋ ਚੀਵਰਭਾਗਂ ਗਹੇਤ੍ਵਾ ਅਞ੍ਞਂ ਆਵਾਸਂ ਅਗਮਾਸਿ. ਤਤ੍ਥਪਿ ਭਿਕ੍ਖੂ ਚੀਵਰਂ ਭਾਜੇਤੁਕਾਮਾ ਸਨ੍ਨਿਪਤਿਂਸੁ. ਤੇਪਿ ਏਵਮਾਹਂਸੁ – ‘‘ਇਮਾਨਿ ਖੋ, ਆਵੁਸੋ, ਸਙ੍ਘਿਕਾਨਿ ਚੀਵਰਾਨਿ ਭਾਜਿਯਿਸ੍ਸਨ੍ਤਿ, ਸਾਦਿਯਿਸ੍ਸਸਿ ਭਾਗ’’ਨ੍ਤਿ? ‘‘ਆਮਾਵੁਸੋ, ਸਾਦਿਯਿਸ੍ਸਾਮੀ’’ਤਿ. ਤਤੋਪਿ ਚੀਵਰਭਾਗਂ ਗਹੇਤ੍ਵਾ ਅਞ੍ਞਂ ਆਵਾਸਂ ਅਗਮਾਸਿ. ਤਤ੍ਥਪਿ ਭਿਕ੍ਖੂ ਚੀਵਰਂ ਭਾਜੇਤੁਕਾਮਾ ਸਨ੍ਨਿਪਤਿਂਸੁ. ਤੇਪਿ ਏਵਮਾਹਂਸੁ – ‘‘ਇਮਾਨਿ ਖੋ, ਆਵੁਸੋ, ਸਙ੍ਘਿਕਾਨਿ ਚੀਵਰਾਨਿ ਭਾਜਿਯਿਸ੍ਸਨ੍ਤਿ, ਸਾਦਿਯਿਸ੍ਸਸਿ ਭਾਗ’’ਨ੍ਤਿ? ‘‘ਆਮਾਵੁਸੋ, ਸਾਦਿਯਿਸ੍ਸਾਮੀ’’ਤਿ. ਤਤੋਪਿ ਚੀਵਰਭਾਗਂ ਗਹੇਤ੍ਵਾ ਮਹਨ੍ਤਂ ਚੀਵਰਭਣ੍ਡਿਕਂ ਆਦਾਯ ਪੁਨਦੇਵ ਸਾਵਤ੍ਥਿਂ ਪਚ੍ਚਾਗਞ੍ਛਿ. ਭਿਕ੍ਖੂ ਏਵਮਾਹਂਸੁ – ‘‘ਮਹਾਪੁਞ੍ਞੋਸਿ ਤ੍ਵਂ, ਆਵੁਸੋ ਉਪਨਨ੍ਦ, ਬਹੁਂ ਤੇ ਚੀਵਰਂ ਉਪ੍ਪਨ੍ਨ’’ਨ੍ਤਿ. ‘‘ਕੁਤੋ ਮੇ, ਆਵੁਸੋ, ਪੁਞ੍ਞਂ? ਇਧਾਹਂ, ਆਵੁਸੋ, ਸਾਵਤ੍ਥਿਯਂ ਵਸ੍ਸਂਵੁਟ੍ਠੋ ਅਞ੍ਞਤਰਂ ਗਾਮਕਾਵਾਸਂ ਅਗਮਾਸਿਂ. ਤਤ੍ਥ ਭਿਕ੍ਖੂ ਚੀਵਰਂ ਭਾਜੇਤੁਕਾਮਾ ਸਨ੍ਨਿਪਤਿਂਸੁ. ਤੇ ਮਂ ਏਵਮਾਹਂਸੁ – ‘ਇਮਾਨਿ ਖੋ, ਆਵੁਸੋ, ਸਙ੍ਘਿਕਾਨਿ ਚੀਵਰਾਨਿ ਭਾਜਿਯਿਸ੍ਸਨ੍ਤਿ, ਸਾਦਿਯਿਸ੍ਸਸਿ ਭਾਗ’ਨ੍ਤਿ? ‘ਆਮਾਵੁਸੋ, ਸਾਦਿਯਿਸ੍ਸਾਮੀ’ਤਿ. ਤਤੋ ਚੀਵਰਭਾਗਂ ਗਹੇਤ੍ਵਾ ਅਞ੍ਞਂ ਆਵਾਸਂ ਅਗਮਾਸਿਂ. ਤਤ੍ਥਪਿ ਭਿਕ੍ਖੂ ਚੀਵਰਂ ਭਾਜੇਤੁਕਾਮਾ ਸਨ੍ਨਿਪਤਿਂਸੁ. ਤੇਪਿ ਮਂ ਏਵਮਾਹਂਸੁ – ‘ਇਮਾਨਿ ਖੋ, ਆਵੁਸੋ, ਸਙ੍ਘਿਕਾਨਿ ਚੀਵਰਾਨਿ ਭਾਜਿਯਿਸ੍ਸਨ੍ਤਿ, ਸਾਦਿਯਿਸ੍ਸਸਿ ਭਾਗ’’’ਨ੍ਤਿ? ‘ਆਮਾਵੁਸੋ, ਸਾਦਿਯਿਸ੍ਸਾਮੀ’ਤਿ. ਤਤੋਪਿ ਚੀਵਰਭਾਗਂ ਗਹੇਤ੍ਵਾ ਅਞ੍ਞਂ ਆਵਾਸਂ ਅਗਮਾਸਿਂ. ਤਤ੍ਥਪਿ ਭਿਕ੍ਖੂ ਚੀਵਰਂ ਭਾਜੇਤੁਕਾਮਾ ਸਨ੍ਨਿਪਤਿਂਸੁ. ਤੇਪਿ ਮਂ ਏਵਮਾਹਂਸੁ – ‘ਇਮਾਨਿ ਖੋ, ਆਵੁਸੋ, ਸਙ੍ਘਿਕਾਨਿ ਚੀਵਰਾਨਿ ਭਾਜਿਯਿਸ੍ਸਨ੍ਤਿ, ਸਾਦਿਯਿਸ੍ਸਸਿ ਭਾਗ’ਨ੍ਤਿ? ‘ਆਮਾਵੁਸੋ, ਸਾਦਿਯਿਸ੍ਸਾਮੀ’ਤਿ. ਤਤੋਪਿ ਚੀਵਰਭਾਗਂ ਅਗ੍ਗਹੇਸਿਂ. ਏਵਂ ਮੇ ਬਹੁਂ ਚੀਵਰਂ ਉਪ੍ਪਨ੍ਨਨ੍ਤਿ. ‘‘ਕਿਂ ਪਨ ਤ੍ਵਂ, ਆਵੁਸੋ ਉਪਨਨ੍ਦ, ਅਞ੍ਞਤ੍ਰ ਵਸ੍ਸਂਵੁਟ੍ਠੋ ਅਞ੍ਞਤ੍ਰ ਚੀਵਰਭਾਗਂ ਸਾਦਿਯੀ’’ਤਿ? ‘‘ਏਵਮਾਵੁਸੋ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਅਞ੍ਞਤ੍ਰ ਵਸ੍ਸਂਵੁਟ੍ਠੋ ਅਞ੍ਞਤ੍ਰ ਚੀਵਰਭਾਗਂ ਸਾਦਿਯਿਸ੍ਸਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤ੍ਵਂ, ਉਪਨਨ੍ਦ, ਅਞ੍ਞਤ੍ਰ ਵਸ੍ਸਂਵੁਟ੍ਠੋ ਅਞ੍ਞਤ੍ਰ ਚੀਵਰਭਾਗਂ ਸਾਦਿਯੀ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਅਞ੍ਞਤ੍ਰ ਵਸ੍ਸਂਵੁਟ੍ਠੋ ਅਞ੍ਞਤ੍ਰ ਚੀਵਰਭਾਗਂ ਸਾਦਿਯਿਸ੍ਸਸਿ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਅਞ੍ਞਤ੍ਰ ਵਸ੍ਸਂਵੁਟ੍ਠੇਨ ਅਞ੍ਞਤ੍ਰ ਚੀਵਰਭਾਗੋ ਸਾਦਿਤਬ੍ਬੋ. ਯੋ ਸਾਦਿਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਏਕੋ ਦ੍ਵੀਸੁ ਆਵਾਸੇਸੁ ਵਸ੍ਸਂ ਵਸਿ – ‘‘ਏਵਂ ਮੇ ਬਹੁਂ ਚੀਵਰਂ ਉਪ੍ਪਜ੍ਜਿਸ੍ਸਤੀ’’ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਚੀਵਰਪਟਿਵੀਸੋ ਦਾਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਦੇਥ, ਭਿਕ੍ਖਵੇ, ਮੋਘਪੁਰਿਸਸ੍ਸ ਏਕਾਧਿਪ੍ਪਾਯਂ. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਏਕੋ ਦ੍ਵੀਸੁ ਆਵਾਸੇਸੁ ਵਸ੍ਸਂ ਵਸਤਿ – ‘‘ਏਵਂ ਮੇ ਬਹੁਂ ਚੀਵਰਂ ਉਪ੍ਪਜ੍ਜਿਸ੍ਸਤੀ’’ਤਿ. ਸਚੇ ਅਮੁਤ੍ਰ ਉਪਡ੍ਢਂ ਅਮੁਤ੍ਰ ਉਪਡ੍ਢਂ ਵਸਤਿ, ਅਮੁਤ੍ਰ ਉਪਡ੍ਢੋ ਅਮੁਤ੍ਰ ਉਪਡ੍ਢੋ ਚੀਵਰਪਟਿਵੀਸੋ ਦਾਤਬ੍ਬੋ. ਯਤ੍ਥ ਵਾ ਪਨ ਬਹੁਤਰਂ ਵਸਤਿ, ਤਤੋ ਚੀਵਰਪਟਿਵੀਸੋ ਦਾਤਬ੍ਬੋਤਿ.

ਉਪਨਨ੍ਦਸਕ੍ਯਪੁਤ੍ਤਵਤ੍ਥੁ ਨਿਟ੍ਠਿਤਂ.

੨੨੪. ਗਿਲਾਨਵਤ੍ਥੁਕਥਾ

੩੬੫. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਕੁਚ੍ਛਿਵਿਕਾਰਾਬਾਧੋ ਹੋਤਿ. ਸੋ ਸਕੇ ਮੁਤ੍ਤਕਰੀਸੇ ਪਲਿਪਨ੍ਨੋ ਸੇਤਿ. ਅਥ ਖੋ ਭਗਵਾ ਆਯਸ੍ਮਤਾ ਆਨਨ੍ਦੇਨ ਪਚ੍ਛਾਸਮਣੇਨ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਯੇਨ ਤਸ੍ਸ ਭਿਕ੍ਖੁਨੋ ਵਿਹਾਰੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਭਗਵਾ ਤਂ ਭਿਕ੍ਖੁਂ ਸਕੇ ਮੁਤ੍ਤਕਰੀਸੇ ਪਲਿਪਨ੍ਨਂ ਸਯਮਾਨਂ, ਦਿਸ੍ਵਾਨ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਕਿਂ ਤੇ, ਭਿਕ੍ਖੁ, ਆਬਾਧੋ’’ਤਿ? ‘‘ਕੁਚ੍ਛਿਵਿਕਾਰੋ ਮੇ, ਭਗਵਾ’’ਤਿ. ‘‘ਅਤ੍ਥਿ ਪਨ ਤੇ, ਭਿਕ੍ਖੁ, ਉਪਟ੍ਠਾਕੋ’’ਤਿ? ‘‘ਨਤ੍ਥਿ, ਭਗਵਾ’’ਤਿ. ‘‘ਕਿਸ੍ਸ ਤਂ ਭਿਕ੍ਖੂ ਨ ਉਪਟ੍ਠੇਨ੍ਤੀ’’ਤਿ? ‘‘ਅਹਂ ਖੋ, ਭਨ੍ਤੇ, ਭਿਕ੍ਖੂਨਂ ਅਕਾਰਕੋ; ਤੇਨ ਮਂ ਭਿਕ੍ਖੂ ਨ ਉਪਟ੍ਠੇਨ੍ਤੀ’’ਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਗਚ੍ਛਾਨਨ੍ਦ, ਉਦਕਂ ਆਹਰ, ਇਮਂ ਭਿਕ੍ਖੁਂ ਨਹਾਪੇਸ੍ਸਾਮਾ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਪਟਿਸ੍ਸੁਣਿਤ੍ਵਾ ਉਦਕਂ ਆਹਰਿ. ਭਗਵਾ ਉਦਕਂ ਆਸਿਞ੍ਚਿ. ਆਯਸ੍ਮਾ ਆਨਨ੍ਦੋ ਪਰਿਧੋਵਿ. ਭਗਵਾ ਸੀਸਤੋ ਅਗ੍ਗਹੇਸਿ. ਆਯਸ੍ਮਾ ਆਨਨ੍ਦੋ ਪਾਦਤੋ ਉਚ੍ਚਾਰੇਤ੍ਵਾ ਮਞ੍ਚਕੇ ਨਿਪਾਤੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਅਤ੍ਥਿ, ਭਿਕ੍ਖਵੇ, ਅਮੁਕਸ੍ਮਿਂ ਵਿਹਾਰੇ ਭਿਕ੍ਖੁ ਗਿਲਾਨੋ’’ਤਿ? ‘‘ਅਤ੍ਥਿ, ਭਗਵਾ’’ਤਿ. ‘‘ਕਿਂ ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਆਬਾਧੋ’’ਤਿ? ‘‘ਤਸ੍ਸ, ਭਨ੍ਤੇ, ਆਯਸ੍ਮਤੋ ਕੁਚ੍ਛਿਵਿਕਾਰਾਬਾਧੋ’’ਤਿ. ‘‘ਅਤ੍ਥਿ ਪਨ, ਭਿਕ੍ਖਵੇ, ਤਸ੍ਸ ਭਿਕ੍ਖੁਨੋ ਉਪਟ੍ਠਾਕੋ’’ਤਿ? ‘‘ਨਤ੍ਥਿ, ਭਗਵਾ’’ਤਿ. ‘‘ਕਿਸ੍ਸ ਤਂ ਭਿਕ੍ਖੂ ਨ ਉਪਟ੍ਠੇਨ੍ਤੀ’’ਤਿ? ‘‘ਏਸੋ, ਭਨ੍ਤੇ, ਭਿਕ੍ਖੁ ਭਿਕ੍ਖੂਨਂ ਅਕਾਰਕੋ; ਤੇਨ ਤਂ ਭਿਕ੍ਖੂ ਨ ਉਪਟ੍ਠੇਨ੍ਤੀ’’ਤਿ. ‘‘ਨਤ੍ਥਿ ਵੋ, ਭਿਕ੍ਖਵੇ, ਮਾਤਾ, ਨਤ੍ਥਿ ਪਿਤਾ, ਯੇ ਵੋ ਉਪਟ੍ਠਹੇਯ੍ਯੁਂ. ਤੁਮ੍ਹੇ ਚੇ, ਭਿਕ੍ਖਵੇ, ਅਞ੍ਞਮਞ੍ਞਂ ਨ ਉਪਟ੍ਠਹਿਸ੍ਸਥ, ਅਥ ਕੋ ਚਰਹਿ ਉਪਟ੍ਠਹਿਸ੍ਸਤਿ? ਯੋ, ਭਿਕ੍ਖਵੇ, ਮਂ ਉਪਟ੍ਠਹੇਯ੍ਯ ਸੋ ਗਿਲਾਨਂ ਉਪਟ੍ਠਹੇਯ੍ਯ. ਸਚੇ ਉਪਜ੍ਝਾਯੋ ਹੋਤਿ, ਉਪਜ੍ਝਾਯੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਆਚਰਿਯੋ ਹੋਤਿ, ਆਚਰਿਯੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਸਦ੍ਧਿਵਿਹਾਰਿਕੋ ਹੋਤਿ, ਸਦ੍ਧਿਵਿਹਾਰਿਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਅਨ੍ਤੇਵਾਸਿਕੋ ਹੋਤਿ, ਅਨ੍ਤੇਵਾਸਿਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਸਮਾਨੁਪਜ੍ਝਾਯਕੋ ਹੋਤਿ, ਸਮਾਨੁਪਜ੍ਝਾਯਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਸਮਾਨਾਚਰਿਯਕੋ ਹੋਤਿ, ਸਮਾਨਾਚਰਿਯਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਨ ਹੋਤਿ ਉਪਜ੍ਝਾਯੋ ਵਾ ਆਚਰਿਯੋ ਵਾ ਸਦ੍ਧਿਵਿਹਾਰਿਕੋ ਵਾ ਅਨ੍ਤੇਵਾਸਿਕੋ ਵਾ ਸਮਾਨੁਪਜ੍ਝਾਯਕੋ ਵਾ ਸਮਾਨਾਚਰਿਯਕੋ ਵਾ ਸਙ੍ਘੇਨ ਉਪਟ੍ਠਾਤਬ੍ਬੋ. ਨੋ ਚੇ ਉਪਟ੍ਠਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ’’.

੩੬੬. ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੋ ਦੂਪਟ੍ਠੋ ਹੋਤਿ – ਅਸਪ੍ਪਾਯਕਾਰੀ ਹੋਤਿ, ਸਪ੍ਪਾਯੇ ਮਤ੍ਤਂ ਨ ਜਾਨਾਤਿ, ਭੇਸਜ੍ਜਂ ਨ ਪਟਿਸੇਵਿਤਾ ਹੋਤਿ, ਅਤ੍ਥਕਾਮਸ੍ਸ ਗਿਲਾਨੁਪਟ੍ਠਾਕਸ੍ਸ ਯਥਾਭੂਤਂ ਆਬਾਧਂ ਨਾਵਿਕਤ੍ਤਾ ਹੋਤਿ ‘ਅਭਿਕ੍ਕਮਨ੍ਤਂ ਵਾ ਅਭਿਕ੍ਕਮਤੀਤਿ, ਪਟਿਕ੍ਕਮਨ੍ਤਂ ਵਾ ਪਟਿਕ੍ਕਮਤੀਤਿ, ਠਿਤਂ ਵਾ ਠਿਤੋ’ਤਿ, ਉਪ੍ਪਨ੍ਨਾਨਂ ਸਾਰੀਰਿਕਾਨਂ ਵੇਦਨਾਨਂ ਦੁਕ੍ਖਾਨਂ ਤਿਬ੍ਬਾਨਂ ਖਰਾਨਂ ਕਟੁਕਾਨਂ ਅਸਾਤਾਨਂ ਅਮਨਾਪਾਨਂ ਪਾਣਹਰਾਨਂ ਅਨਧਿਵਾਸਕਜਾਤਿਕੋ ਹੋਤਿ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਗਿਲਾਨੋ ਦੂਪਟ੍ਠੋ ਹੋਤਿ.

ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੋ ਸੂਪਟ੍ਠੋ ਹੋਤਿ – ਸਪ੍ਪਾਯਕਾਰੀ ਹੋਤਿ, ਸਪ੍ਪਾਯੇ ਮਤ੍ਤਂ ਜਾਨਾਤਿ, ਭੇਸਜ੍ਜਂ ਪਟਿਸੇਵਿਤਾ ਹੋਤਿ, ਅਤ੍ਥਕਾਮਸ੍ਸ ਗਿਲਾਨੁਪਟ੍ਠਾਕਸ੍ਸ ਯਥਾਭੂਤਂ ਆਬਾਧਂ ਆਵਿਕਤ੍ਤਾ ਹੋਤਿ ‘ਅਭਿਕ੍ਕਮਨ੍ਤਂ ਵਾ ਅਭਿਕ੍ਕਮਤੀਤਿ, ਪਟਿਕ੍ਕਮਨ੍ਤਂ ਵਾ ਪਟਿਕ੍ਕਮਤੀਤਿ, ਠਿਤਂ ਵਾ ਠਿਤੋ’ਤਿ, ਉਪ੍ਪਨ੍ਨਾਨਂ ਸਾਰੀਰਿਕਾਨਂ ਵੇਦਨਾਨਂ ਦੁਕ੍ਖਾਨਂ ਤਿਬ੍ਬਾਨਂ ਖਰਾਨਂ ਕਟੁਕਾਨਂ ਅਸਾਤਾਨਂ ਅਮਨਾਪਾਨਂ ਪਾਣਹਰਾਨਂ ਅਧਿਵਾਸਕਜਾਤਿਕੋ ਹੋਤਿ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਗਿਲਾਨੋ ਸੂਪਟ੍ਠੋ ਹੋਤਿ.

ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਨਾਲਂ ਗਿਲਾਨਂ ਉਪਟ੍ਠਾਤੁਂ – ਨ ਪਟਿਬਲੋ ਹੋਤਿ ਭੇਸਜ੍ਜਂ ਸਂਵਿਧਾਤੁਂ, ਸਪ੍ਪਾਯਾਸਪ੍ਪਾਯਂ ਨ ਜਾਨਾਤਿ, ਅਸਪ੍ਪਾਯਂ ਉਪਨਾਮੇਤਿ ਸਪ੍ਪਾਯਂ ਅਪਨਾਮੇਤਿ, ਆਮਿਸਨ੍ਤਰੋ ਗਿਲਾਨਂ ਉਪਟ੍ਠਾਤਿ ਨੋ ਮੇਤ੍ਤਚਿਤ੍ਤੋ, ਜੇਗੁਚ੍ਛੀ ਹੋਤਿ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਖੇਲ਼ਂ ਵਾ ਵਨ੍ਤਂ ਵਾ ਨੀਹਾਤੁਂ, ਨ ਪਟਿਬਲੋ ਹੋਤਿ ਗਿਲਾਨਂ ਕਾਲੇਨ ਕਾਲਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤੁਂ ਸਮਾਦਪੇਤੁਂ ਸਮੁਤ੍ਤੇਜੇਤੁਂ ਸਮ੍ਪਹਂਸੇਤੁਂ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਨਾਲਂ ਗਿਲਾਨਂ ਉਪਟ੍ਠਾਤੁਂ.

ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਅਲਂ ਗਿਲਾਨਂ ਉਪਟ੍ਠਾਤੁਂ – ਪਟਿਬਲੋ ਹੋਤਿ ਭੇਸਜ੍ਜਂ ਸਂਵਿਧਾਤੁਂ, ਸਪ੍ਪਾਯਾਸਪ੍ਪਾਯਂ ਜਾਨਾਤਿ, ਅਸਪ੍ਪਾਯਂ ਅਪਨਾਮੇਤਿ ਸਪ੍ਪਾਯਂ ਉਪਨਾਮੇਤਿ, ਮੇਤ੍ਤਚਿਤ੍ਤੋ ਗਿਲਾਨਂ ਉਪਟ੍ਠਾਤਿ ਨੋ ਆਮਿਸਨ੍ਤਰੋ, ਅਜੇਗੁਚ੍ਛੀ ਹੋਤਿ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਖੇਲ਼ਂ ਵਾ ਵਨ੍ਤਂ ਵਾ ਨੀਹਾਤੁਂ, ਪਟਿਬਲੋ ਹੋਤਿ ਗਿਲਾਨਂ ਕਾਲੇਨ ਕਾਲਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤੁਂ ਸਮਾਦਪੇਤੁਂ ਸਮੁਤ੍ਤੇਜੇਤੁਂ ਸਮ੍ਪਹਂਸੇਤੁਂ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਅਲਂ ਗਿਲਾਨਂ ਉਪਟ੍ਠਾਤੁਨ੍ਤਿ.

ਗਿਲਾਨਵਤ੍ਥੁਕਥਾ ਨਿਟ੍ਠਿਤਾ.

੨੨੫. ਮਤਸਨ੍ਤਕਕਥਾ

੩੬੭. ਤੇਨ ਖੋ ਪਨ ਸਮਯੇਨ ਦ੍ਵੇ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਤੇ ਅਞ੍ਞਤਰਂ ਆਵਾਸਂ ਉਪਗਚ੍ਛਿਂਸੁ. ਤਤ੍ਥ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਖੋ, ਆਵੁਸੋ, ਗਿਲਾਨੁਪਟ੍ਠਾਨਂ ਵਣ੍ਣਿਤਂ. ਹਨ੍ਦ, ਮਯਂ, ਆਵੁਸੋ, ਇਮਂ ਭਿਕ੍ਖੁਂ ਉਪਟ੍ਠਹੇਮਾ’’ਤਿ. ਤੇ ਤਂ ਉਪਟ੍ਠਹਿਂਸੁ. ਸੋ ਤੇਹਿ ਉਪਟ੍ਠਹਿਯਮਾਨੋ ਕਾਲਮਕਾਸਿ. ਅਥ ਖੋ ਤੇ ਭਿਕ੍ਖੂ ਤਸ੍ਸ ਭਿਕ੍ਖੁਨੋ ਪਤ੍ਤਚੀਵਰਮਾਦਾਯ ਸਾਵਤ੍ਥਿਂ ਗਨ੍ਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਭਿਕ੍ਖੁਸ੍ਸ, ਭਿਕ੍ਖਵੇ, ਕਾਲਙ੍ਕਤੇ ਸਙ੍ਘੋ ਸਾਮੀ ਪਤ੍ਤਚੀਵਰੇ, ਅਪਿਚ ਗਿਲਾਨੁਪਟ੍ਠਾਕਾ ਬਹੂਪਕਾਰਾ. ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘੇਨ ਤਿਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬਂ. ਤੇਨ ਗਿਲਾਨੁਪਟ੍ਠਾਕੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ – ‘ਇਤ੍ਥਨ੍ਨਾਮੋ, ਭਨ੍ਤੇ, ਭਿਕ੍ਖੁ ਕਾਲਙ੍ਕਤੋ. ਇਦਂ ਤਸ੍ਸ ਤਿਚੀਵਰਞ੍ਚ ਪਤ੍ਤੋ ਚਾ’’’ਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮੋ ਭਿਕ੍ਖੁ ਕਾਲਙ੍ਕਤੋ. ਇਦਂ ਤਸ੍ਸ ਤਿਚੀਵਰਞ੍ਚ ਪਤ੍ਤੋ ਚ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਤਿਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦਦੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮੋ ਭਿਕ੍ਖੁ ਕਾਲਙ੍ਕਤੋ. ਇਦਂ ਤਸ੍ਸ ਤਿਚੀਵਰਞ੍ਚ ਪਤ੍ਤੋ ਚ. ਸਙ੍ਘੋ ਇਮਂ ਤਿਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦੇਤਿ. ਯਸ੍ਸਾਯਸ੍ਮਤੋ ਖਮਤਿ ਇਮਸ੍ਸ ਤਿਚੀਵਰਸ੍ਸ ਚ ਪਤ੍ਤਸ੍ਸ ਚ ਗਿਲਾਨੁਪਟ੍ਠਾਕਾਨਂ ਦਾਨਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨਂ ਇਦਂ ਸਙ੍ਘੇਨ ਤਿਚੀਵਰਞ੍ਚ ਪਤ੍ਤੋ ਚ ਗਿਲਾਨੁਪਟ੍ਠਾਕਾਨਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੩੬੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਸਾਮਣੇਰੋ ਕਾਲਙ੍ਕਤੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਸਾਮਣੇਰਸ੍ਸ, ਭਿਕ੍ਖਵੇ, ਕਾਲਙ੍ਕਤੇ ਸਙ੍ਘੋ ਸਾਮੀ ਪਤ੍ਤਚੀਵਰੇ, ਅਪਿ ਚ ਗਿਲਾਨੁਪਟ੍ਠਾਕਾ ਬਹੂਪਕਾਰਾ. ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘੇਨ ਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬਂ. ਤੇਨ ਗਿਲਾਨੁਪਟ੍ਠਾਕੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ – ‘‘ਇਤ੍ਥਨ੍ਨਾਮੋ, ਭਨ੍ਤੇ, ਸਾਮਣੇਰੋ ਕਾਲਙ੍ਕਤੋ, ਇਦਂ ਤਸ੍ਸ ਚੀਵਰਞ੍ਚ ਪਤ੍ਤੋ ਚਾ’’ਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮੋ ਸਾਮਣੇਰੋ ਕਾਲਙ੍ਕਤੋ. ਇਦਂ ਤਸ੍ਸ ਚੀਵਰਞ੍ਚ ਪਤ੍ਤੋ ਚ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦਦੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮੋ ਸਾਮਣੇਰੋ ਕਾਲਙ੍ਕਤੋ. ਇਦਂ ਤਸ੍ਸ ਚੀਵਰਞ੍ਚ ਪਤ੍ਤੋ ਚ. ਸਙ੍ਘੋ ਇਮਂ ਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦੇਤਿ. ਯਸ੍ਸਾਯਸ੍ਮਤੋ ਖਮਤਿ ਇਮਸ੍ਸ ਚੀਵਰਸ੍ਸ ਚ ਪਤ੍ਤਸ੍ਸ ਚ ਗਿਲਾਨੁਪਟ੍ਠਾਕਾਨਂ ਦਾਨਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨਂ ਇਦਂ ਸਙ੍ਘੇਨ ਚੀਵਰਞ੍ਚ ਪਤ੍ਤੋ ਚ ਗਿਲਾਨੁਪਟ੍ਠਾਕਾਨਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੩੬੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਚ ਸਾਮਣੇਰੋ ਚ ਗਿਲਾਨਂ ਉਪਟ੍ਠਹਿਂਸੁ. ਸੋ ਤੇਹਿ ਉਪਟ੍ਠਹਿਯਮਾਨੋ ਕਾਲਮਕਾਸਿ. ਅਥ ਖੋ ਤਸ੍ਸ ਗਿਲਾਨੁਪਟ੍ਠਾਕਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਕਥਂ ਨੁ ਖੋ ਗਿਲਾਨੁਪਟ੍ਠਾਕਸ੍ਸ ਸਾਮਣੇਰਸ੍ਸ ਚੀਵਰਪਟਿਵੀਸੋ ਦਾਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨੁਪਟ੍ਠਾਕਸ੍ਸ ਸਾਮਣੇਰਸ੍ਸ ਸਮਕਂ ਪਟਿਵੀਸਂ ਦਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਬਹੁਭਣ੍ਡੋ ਬਹੁਪਰਿਕ੍ਖਾਰੋ ਕਾਲਙ੍ਕਤੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੁਸ੍ਸ, ਭਿਕ੍ਖਵੇ, ਕਾਲਙ੍ਕਤੇ ਸਙ੍ਘੋ ਸਾਮੀ ਪਤ੍ਤਚੀਵਰੇ, ਅਪਿ ਚ ਗਿਲਾਨੁਪਟ੍ਠਾਕਾ ਬਹੂਪਕਾਰਾ. ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘੇਨ ਤਿਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦਾਤੁਂ. ਯਂ ਤਤ੍ਥ ਲਹੁਭਣ੍ਡਂ ਲਹੁਪਰਿਕ੍ਖਾਰਂ ਤਂ ਸਮ੍ਮੁਖੀਭੂਤੇਨ ਸਙ੍ਘੇਨ ਭਾਜੇਤੁਂ. ਯਂ ਤਤ੍ਥ ਗਰੁਭਣ੍ਡਂ ਗਰੁਪਰਿਕ੍ਖਾਰਂ ਤਂ ਆਗਤਾਨਾਗਤਸ੍ਸ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ ਅਵਿਸ੍ਸਜ੍ਜਿਕਂ ਅਵੇਭਙ੍ਗਿਕਨ੍ਤਿ.

ਮਤਸਨ੍ਤਕਕਥਾ ਨਿਟ੍ਠਿਤਾ.

੨੨੬. ਨਗ੍ਗਿਯਪਟਿਕ੍ਖੇਪਕਥਾ

੩੭੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਨਗ੍ਗੋ ਹੁਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਭਗਵਾ, ਭਨ੍ਤੇ, ਅਨੇਕਪਰਿਯਾਯੇਨ ਅਪ੍ਪਿਚ੍ਛਸ੍ਸ ਸਨ੍ਤੁਟ੍ਠਸ੍ਸ ਸਲ੍ਲੇਖਸ੍ਸ ਧੁਤਸ੍ਸ ਪਾਸਾਦਿਕਸ੍ਸ ਅਪਚਯਸ੍ਸ ਵੀਰਿਯਾਰਮ੍ਭਸ੍ਸ ਵਣ੍ਣਵਾਦੀ. ਇਦਂ, ਭਨ੍ਤੇ, ਨਗ੍ਗਿਯਂ ਅਨੇਕਪਰਿਯਾਯੇਨ ਅਪ੍ਪਿਚ੍ਛਤਾਯ ਸਨ੍ਤੁਟ੍ਠਿਤਾਯ ਸਲ੍ਲੇਖਾਯ ਧੁਤਤਾਯ [ਧੁਤਤ੍ਤਾਯ (ਕ.)] ਪਾਸਾਦਿਕਤਾਯ ਅਪਚਯਾਯ ਵੀਰਿਯਾਰਮ੍ਭਾਯ ਸਂਵਤ੍ਤਤਿ. ਸਾਧੁ, ਭਨ੍ਤੇ, ਭਗਵਾ ਭਿਕ੍ਖੂਨਂ ਨਗ੍ਗਿਯਂ ਅਨੁਜਾਨਾਤੂ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਨਗ੍ਗਿਯਂ ਤਿਤ੍ਥਿਯਸਮਾਦਾਨਂ ਸਮਾਦਿਯਿਸ੍ਸਸਿ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ…’’ ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਨਗ੍ਗਿਯਂ ਤਿਤ੍ਥਿਯਸਮਾਦਾਨਂ ਸਮਾਦਿਯਿਤਬ੍ਬਂ. ਯੋ ਸਮਾਦਿਯੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.

ਨਗ੍ਗਿਯਪਟਿਕ੍ਖੇਪਕਥਾ ਨਿਟ੍ਠਿਤਾ.

੨੨੭. ਕੁਸਚੀਰਾਦਿਪਟਿਕ੍ਖੇਪਕਥਾ

੩੭੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਕੁਸਚੀਰਂ ਨਿਵਾਸੇਤ੍ਵਾ…ਪੇ… ਵਾਕਚੀਰਂ ਨਿਵਾਸੇਤ੍ਵਾ…ਪੇ… ਫਲਕਚੀਰਂ ਨਿਵਾਸੇਤ੍ਵਾ…ਪੇ… ਕੇਸਕਮ੍ਬਲਂ ਨਿਵਾਸੇਤ੍ਵਾ…ਪੇ… ਵਾਲ਼ਕਮ੍ਬਲਂ ਨਿਵਾਸੇਤ੍ਵਾ…ਪੇ… ਉਲੂਕਪਕ੍ਖਂ ਨਿਵਾਸੇਤ੍ਵਾ…ਪੇ… ਅਜਿਨਕ੍ਖਿਪਂ ਨਿਵਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਭਗਵਾ, ਭਨ੍ਤੇ, ਅਨੇਕਪਰਿਯਾਯੇਨ ਅਪ੍ਪਿਚ੍ਛਸ੍ਸ ਸਨ੍ਤੁਟ੍ਠਸ੍ਸ ਸਲ੍ਲੇਖਸ੍ਸ ਧੁਤਸ੍ਸ ਪਾਸਾਦਿਕਸ੍ਸ ਅਪਚਯਸ੍ਸ ਵੀਰਿਯਾਰਮ੍ਭਸ੍ਸ ਵਣ੍ਣਵਾਦੀ. ਇਦਂ, ਭਨ੍ਤੇ, ਅਜਿਨਕ੍ਖਿਪਂ ਅਨੇਕਪਰਿਯਾਯੇਨ ਅਪ੍ਪਿਚ੍ਛਤਾਯ ਸਨ੍ਤੁਟ੍ਠਿਤਾਯ ਸਲ੍ਲੇਖਾਯ ਧੁਤਤਾਯ ਪਾਸਾਦਿਕਤਾਯ ਅਪਚਯਾਯ ਵੀਰਿਯਾਰਮ੍ਭਾਯ ਸਂਵਤ੍ਤਤਿ. ਸਾਧੁ, ਭਨ੍ਤੇ, ਭਗਵਾ ਭਿਕ੍ਖੂਨਂ ਅਜਿਨਕ੍ਖਿਪਂ ਅਨੁਜਾਨਾਤੂ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਅਜਿਨਕ੍ਖਿਪਂ ਤਿਤ੍ਥਿਯਧਜਂ ਧਾਰੇਸ੍ਸਸਿ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਅਜਿਨਕ੍ਖਿਪਂ ਤਿਤ੍ਥਿਯਧਜਂ ਧਾਰੇਤਬ੍ਬਂ. ਯੋ ਧਾਰੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਕ੍ਕਨਾਲ਼ਂ ਨਿਵਾਸੇਤ੍ਵਾ…ਪੇ… ਪੋਤ੍ਥਕਂ ਨਿਵਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਭਗਵਾ, ਭਨ੍ਤੇ, ਅਨੇਕਪਰਿਯਾਯੇਨ ਅਪ੍ਪਿਚ੍ਛਸ੍ਸ ਸਨ੍ਤੁਟ੍ਠਸ੍ਸ ਸਲ੍ਲੇਖਸ੍ਸ ਧੁਤਸ੍ਸ ਪਾਸਾਦਿਕਸ੍ਸ ਅਪਚਯਸ੍ਸ ਵੀਰਿਯਾਰਮ੍ਭਸ੍ਸ, ਵਣ੍ਣਵਾਦੀ. ਅਯਂ, ਭਨ੍ਤੇ, ਪੋਤ੍ਥਕੋ ਅਨੇਕਪਰਿਯਾਯੇਨ ਅਪ੍ਪਿਚ੍ਛਤਾਯ ਸਨ੍ਤੁਟ੍ਠਿਤਾਯ ਸਲ੍ਲੇਖਾਯ ਧੁਤਤਾਯ ਪਾਸਾਦਿਕਤਾਯ ਅਪਚਯਾਯ ਵੀਰਿਯਾਰਮ੍ਭਾਯ ਸਂਵਤ੍ਤਤਿ. ਸਾਧੁ, ਭਨ੍ਤੇ, ਭਗਵਾ ਭਿਕ੍ਖੂਨਂ ਪੋਤ੍ਥਕਂ ਅਨੁਜਾਨਾਤੂ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਪੋਤ੍ਥਕਂ ਨਿਵਾਸੇਸ੍ਸਸਿ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਪੋਤ੍ਥਕੋ ਨਿਵਾਸੇਤਬ੍ਬੋ. ਯੋ ਨਿਵਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਕੁਸਚੀਰਾਦਿਪਟਿਕ੍ਖੇਪਕਥਾ ਨਿਟ੍ਠਿਤਾ.

੨੨੮. ਸਬ੍ਬਨੀਲਕਾਦਿਪਟਿਕ੍ਖੇਪਕਥਾ

੩੭੨. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਬ੍ਬਨੀਲਕਾਨਿ ਚੀਵਰਾਨਿ ਧਾਰੇਨ੍ਤਿ…ਪੇ… ਸਬ੍ਬਪੀਤਕਾਨਿ ਚੀਵਰਾਨਿ ਧਾਰੇਨ੍ਤਿ…ਪੇ… ਸਬ੍ਬਲੋਹਿਤਕਾਨਿ ਚੀਵਰਾਨਿ ਧਾਰੇਨ੍ਤਿ…ਪੇ… ਸਬ੍ਬਮਞ੍ਜਿਟ੍ਠਕਾਨਿ [ਸਬ੍ਬਮਞ੍ਜੇਟ੍ਠਕਾਨਿ (ਸੀ. ਸ੍ਯਾ.)] ਚੀਵਰਾਨਿ ਧਾਰੇਨ੍ਤਿ…ਪੇ… ਸਬ੍ਬਕਣ੍ਹਾਨਿ ਚੀਵਰਾਨਿ ਧਾਰੇਨ੍ਤਿ …ਪੇ… ਸਬ੍ਬਮਹਾਰਙ੍ਗਰਤ੍ਤਾਨਿ ਚੀਵਰਾਨਿ ਧਾਰੇਨ੍ਤਿ…ਪੇ… ਸਬ੍ਬਮਹਾਨਾਮਰਤ੍ਤਾਨਿ ਚੀਵਰਾਨਿ ਧਾਰੇਨ੍ਤਿ…ਪੇ… ਅਚ੍ਛਿਨ੍ਨਦਸਾਨਿ ਚੀਵਰਾਨਿ ਧਾਰੇਨ੍ਤਿ…ਪੇ… ਦੀਘਦਸਾਨਿ ਚੀਵਰਾਨਿ ਧਾਰੇਨ੍ਤਿ…ਪੇ… ਪੁਪ੍ਫਦਸਾਨਿ ਚੀਵਰਾਨਿ ਧਾਰੇਨ੍ਤਿ…ਪੇ… ਫਣਦਸਾਨਿ [ਫਲਦਸਾਨਿ (ਕ.)] ਚੀਵਰਾਨਿ ਧਾਰੇਨ੍ਤਿ…ਪੇ… ਕਞ੍ਚੁਕਂ ਧਾਰੇਨ੍ਤਿ…ਪੇ… ਤਿਰੀਟਕਂ ਧਾਰੇਨ੍ਤਿ…ਪੇ… ਵੇਠਨਂ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਵੇਠਨਂ ਧਾਰੇਸ੍ਸਨ੍ਤਿ, ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਬ੍ਬਨੀਲਕਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਸਬ੍ਬਪੀਤਕਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਸਬ੍ਬਲੋਹਿਤਕਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਸਬ੍ਬਮਞ੍ਜਿਟ੍ਠਕਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਸਬ੍ਬਕਣ੍ਹਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਸਬ੍ਬਮਹਾਰਙ੍ਗਰਤ੍ਤਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਸਬ੍ਬਮਹਾਨਾਮਰਤ੍ਤਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਅਚ੍ਛਿਨ੍ਨਦਸਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਦੀਘਦਸਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਪੁਪ੍ਫਦਸਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਫਣਦਸਾਨਿ ਚੀਵਰਾਨਿ ਧਾਰੇਤਬ੍ਬਾਨਿ, ਨ ਕਞ੍ਚੁਕਂ ਧਾਰੇਤਬ੍ਬਂ, ਨ ਤਿਰੀਟਕਂ ਧਾਰੇਤਬ੍ਬਂ, ਨ ਵੇਠਨਂ ਧਾਰੇਤਬ੍ਬਂ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਸਬ੍ਬਨੀਲਕਾਦਿਪਟਿਕ੍ਖੇਪਕਥਾ ਨਿਟ੍ਠਿਤਾ.

੨੨੯. ਵਸ੍ਸਂਵੁਟ੍ਠਾਨਂ ਅਨੁਪ੍ਪਨ੍ਨਚੀਵਰਕਥਾ

੩੭੩. ਤੇਨ ਖੋ ਪਨ ਸਮਯੇਨ ਵਸ੍ਸਂਵੁਟ੍ਠਾ ਭਿਕ੍ਖੂ ਅਨੁਪ੍ਪਨ੍ਨੇ ਚੀਵਰੇ ਪਕ੍ਕਮਨ੍ਤਿਪਿ, ਵਿਬ੍ਭਮਨ੍ਤਿਪਿ, ਕਾਲਮ੍ਪਿ ਕਰੋਨ੍ਤਿ, ਸਾਮਣੇਰਾਪਿ ਪਟਿਜਾਨਨ੍ਤਿ, ਸਿਕ੍ਖਂ ਪਚ੍ਚਕ੍ਖਾਤਕਾਪਿ ਪਟਿਜਾਨਨ੍ਤਿ, ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕਾਪਿ ਪਟਿਜਾਨਨ੍ਤਿ, ਉਮ੍ਮਤ੍ਤਕਾਪਿ ਪਟਿਜਾਨਨ੍ਤਿ, ਖਿਤ੍ਤਚਿਤ੍ਤਾਪਿ ਪਟਿਜਾਨਨ੍ਤਿ, ਵੇਦਨਾਟ੍ਟਾਪਿ ਪਟਿਜਾਨਨ੍ਤਿ, ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕਾਪਿ ਪਟਿਜਾਨਨ੍ਤਿ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕਾਪਿ ਪਟਿਜਾਨਨ੍ਤਿ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕਾਪਿ ਪਟਿਜਾਨਨ੍ਤਿ, ਪਣ੍ਡਕਾਪਿ ਪਟਿਜਾਨਨ੍ਤਿ, ਥੇਯ੍ਯਸਂਵਾਸਕਾਪਿ ਪਟਿਜਾਨਨ੍ਤਿ, ਤਿਤ੍ਥਿਯਪਕ੍ਕਨ੍ਤਕਾਪਿ ਪਟਿਜਾਨਨ੍ਤਿ, ਤਿਰਚ੍ਛਾਨਗਤਾਪਿ ਪਟਿਜਾਨਨ੍ਤਿ, ਮਾਤੁਘਾਤਕਾਪਿ ਪਟਿਜਾਨਨ੍ਤਿ, ਪਿਤੁਘਾਤਕਾਪਿ ਪਟਿਜਾਨਨ੍ਤਿ, ਅਰਹਨ੍ਤਘਾਤਕਾਪਿ ਪਟਿਜਾਨਨ੍ਤਿ, ਭਿਕ੍ਖੁਨਿਦੂਸਕਾਪਿ ਪਟਿਜਾਨਨ੍ਤਿ, ਸਙ੍ਘਭੇਦਕਾਪਿ ਪਟਿਜਾਨਨ੍ਤਿ, ਲੋਹਿਤੁਪ੍ਪਾਦਕਾਪਿ ਪਟਿਜਾਨਨ੍ਤਿ, ਉਭਤੋਬ੍ਯਞ੍ਜਨਕਾਪਿ ਪਟਿਜਾਨਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

੩੭੪. ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠੋ ਭਿਕ੍ਖੁ ਅਨੁਪ੍ਪਨ੍ਨੇ ਚੀਵਰੇ ਪਕ੍ਕਮਤਿ, ਸਨ੍ਤੇ ਪਤਿਰੂਪੇ ਗਾਹਕੇ ਦਾਤਬ੍ਬਂ.

ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠੋ ਭਿਕ੍ਖੁ ਅਨੁਪ੍ਪਨ੍ਨੇ ਚੀਵਰੇ ਵਿਬ੍ਭਮਤਿ, ਕਾਲਂ ਕਰੋਤਿ, ਸਾਮਣੇਰੋ ਪਟਿਜਾਨਾਤਿ, ਸਿਕ੍ਖਂ ਪਚ੍ਚਕ੍ਖਾਤਕੋ ਪਟਿਜਾਨਾਤਿ, ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ ਪਟਿਜਾਨਾਤਿ, ਸਙ੍ਘੋ ਸਾਮੀ.

ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠੋ ਭਿਕ੍ਖੁ ਅਨੁਪ੍ਪਨ੍ਨੇ ਚੀਵਰੇ ਉਮ੍ਮਤ੍ਤਕੋ ਪਟਿਜਾਨਾਤਿ, ਖਿਤ੍ਤਚਿਤ੍ਤੋ ਪਟਿਜਾਨਾਤਿ, ਵੇਦਨਾਟ੍ਟੋ ਪਟਿਜਾਨਾਤਿ, ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ ਪਟਿਜਾਨਾਤਿ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ ਪਟਿਜਾਨਾਤਿ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋ ਪਟਿਜਾਨਾਤਿ, ਸਨ੍ਤੇ ਪਤਿਰੂਪੇ ਗਾਹਕੇ ਦਾਤਬ੍ਬਂ.

ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠੋ ਭਿਕ੍ਖੁ ਅਨੁਪ੍ਪਨ੍ਨੇ ਚੀਵਰੇ ਪਣ੍ਡਕੋ ਪਟਿਜਾਨਾਤਿ, ਥੇਯ੍ਯਸਂਵਾਸਕੋ ਪਟਿਜਾਨਾਤਿ, ਤਿਤ੍ਥਿਯਪਕ੍ਕਨ੍ਤਕੋ ਪਟਿਜਾਨਾਤਿ, ਤਿਰਚ੍ਛਾਨਗਤੋ ਪਟਿਜਾਨਾਤਿ, ਮਾਤੁਘਾਤਕੋ ਪਟਿਜਾਨਾਤਿ, ਪਿਤੁਘਾਤਕੋ ਪਟਿਜਾਨਾਤਿ, ਅਰਹਨ੍ਤਘਾਤਕੋ ਪਟਿਜਾਨਾਤਿ, ਭਿਕ੍ਖੁਨਿਦੂਸਕੋ ਪਟਿਜਾਨਾਤਿ, ਸਙ੍ਘਭੇਦਕੋ ਪਟਿਜਾਨਾਤਿ, ਲੋਹਿਤੁਪ੍ਪਾਦਕੋ ਪਟਿਜਾਨਾਤਿ, ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਸਙ੍ਘੋ ਸਾਮੀ.

੩੭੫. ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠੋ ਭਿਕ੍ਖੁ ਉਪ੍ਪਨ੍ਨੇ ਚੀਵਰੇ ਅਭਾਜਿਤੇ ਪਕ੍ਕਮਤਿ, ਸਨ੍ਤੇ ਪਤਿਰੂਪੇ ਗਾਹਕੇ ਦਾਤਬ੍ਬਂ.

ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠੋ ਭਿਕ੍ਖੁ ਉਪ੍ਪਨ੍ਨੇ ਚੀਵਰੇ ਅਭਾਜਿਤੇ ਵਿਬ੍ਭਮਤਿ, ਕਾਲਂ ਕਰੋਤਿ, ਸਾਮਣੇਰੋ ਪਟਿਜਾਨਾਤਿ, ਸਿਕ੍ਖਂ ਪਚ੍ਚਕ੍ਖਾਤਕੋ ਪਟਿਜਾਨਾਤਿ, ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ ਪਟਿਜਾਨਾਤਿ, ਸਙ੍ਘੋ ਸਾਮੀ.

ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠੋ ਭਿਕ੍ਖੁ ਉਪ੍ਪਨ੍ਨੇ ਚੀਵਰੇ ਅਭਾਜਿਤੇ ਉਮ੍ਮਤ੍ਤਕੋ ਪਟਿਜਾਨਾਤਿ. ਖਿਤ੍ਤਚਿਤ੍ਤੋ ਪਟਿਜਾਨਾਤਿ, ਵੇਦਨਾਟ੍ਟੋ ਪਟਿਜਾਨਾਤਿ, ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ ਪਟਿਜਾਨਾਤਿ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ ਪਟਿਜਾਨਾਤਿ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋ ਪਟਿਜਾਨਾਤਿ, ਸਨ੍ਤੇ ਪਤਿਰੂਪੇ ਗਾਹਕੇ ਦਾਤਬ੍ਬਂ.

ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠੋ ਭਿਕ੍ਖੁ ਉਪ੍ਪਨ੍ਨੇ ਚੀਵਰੇ ਅਭਾਜਿਤੇ ਪਣ੍ਡਕੋ ਪਟਿਜਾਨਾਤਿ, ਥੇਯ੍ਯਸਂਵਾਸਕੋ ਪਟਿਜਾਨਾਤਿ, ਤਿਤ੍ਥਿਯਪਕ੍ਕਨ੍ਤਕੋ ਪਟਿਜਾਨਾਤਿ, ਤਿਰਚ੍ਛਾਨਗਤੋ ਪਟਿਜਾਨਾਤਿ, ਮਾਤੁਘਾਤਕੋ ਪਟਿਜਾਨਾਤਿ, ਪਿਤੁਘਾਤਕੋ ਪਟਿਜਾਨਾਤਿ, ਅਰਹਨ੍ਤਘਾਤਕੋ ਪਟਿਜਾਨਾਤਿ, ਭਿਕ੍ਖੁਨਿਦੂਸਕੋ ਪਟਿਜਾਨਾਤਿ, ਸਙ੍ਘਭੇਦਕੋ ਪਟਿਜਾਨਾਤਿ, ਲੋਹਿਤੁਪ੍ਪਾਦਕੋ ਪਟਿਜਾਨਾਤਿ, ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਸਙ੍ਘੋ ਸਾਮੀ.

ਵਸ੍ਸਂ ਵੁਟ੍ਠਾਨਂ ਅਨੁਪ੍ਪਨ੍ਨਚੀਵਰਕਥਾ ਨਿਟ੍ਠਿਤਾ.

੨੩੦. ਸਙ੍ਘੇ ਭਿਨ੍ਨੇ ਚੀਵਰੁਪ੍ਪਾਦਕਥਾ

੩੭੬. ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਅਨੁਪ੍ਪਨ੍ਨੇ ਚੀਵਰੇ ਸਙ੍ਘੋ ਭਿਜ੍ਜਤਿ. ਤਤ੍ਥ ਮਨੁਸ੍ਸਾ ਏਕਸ੍ਮਿਂ ਪਕ੍ਖੇ ਉਦਕਂ ਦੇਨ੍ਤਿ, ਏਕਸ੍ਮਿਂ ਪਕ੍ਖੇ ਚੀਵਰਂ ਦੇਨ੍ਤਿ – ਸਙ੍ਘਸ੍ਸ ਦੇਮਾਤਿ. ਸਙ੍ਘਸ੍ਸੇਵੇਤਂ.

ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਅਨੁਪ੍ਪਨ੍ਨੇ ਚੀਵਰੇ ਸਙ੍ਘੋ ਭਿਜ੍ਜਤਿ. ਤਤ੍ਥ ਮਨੁਸ੍ਸਾ ਏਕਸ੍ਮਿਂ ਪਕ੍ਖੇ ਉਦਕਂ ਦੇਨ੍ਤਿ, ਤਸ੍ਮਿਂਯੇਵ ਪਕ੍ਖੇ ਚੀਵਰਂ ਦੇਨ੍ਤਿ – ਸਙ੍ਘਸ੍ਸ ਦੇਮਾਤਿ. ਸਙ੍ਘਸ੍ਸੇਵੇਤਂ.

ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਅਨੁਪ੍ਪਨ੍ਨੇ ਚੀਵਰੇ ਸਙ੍ਘੋ ਭਿਜ੍ਜਤਿ. ਤਤ੍ਥ ਮਨੁਸ੍ਸਾ ਏਕਸ੍ਮਿਂ ਪਕ੍ਖੇ ਉਦਕਂ ਦੇਨ੍ਤਿ, ਏਕਸ੍ਮਿਂ ਪਕ੍ਖੇ ਚੀਵਰਂ ਦੇਨ੍ਤਿ – ਪਕ੍ਖਸ੍ਸ ਦੇਮਾਤਿ. ਪਕ੍ਖਸ੍ਸੇਵੇਤਂ.

ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਅਨੁਪ੍ਪਨ੍ਨੇ ਚੀਵਰੇ ਸਙ੍ਘੋ ਭਿਜ੍ਜਤਿ. ਤਤ੍ਥ ਮਨੁਸ੍ਸਾ ਏਕਸ੍ਮਿਂ ਪਕ੍ਖੇ ਉਦਕਂ ਦੇਨ੍ਤਿ, ਤਸ੍ਮਿਂਯੇਵ ਪਕ੍ਖੇ ਚੀਵਰਂ ਦੇਨ੍ਤਿ – ਪਕ੍ਖਸ੍ਸ ਦੇਮਾਤਿ. ਪਕ੍ਖਸ੍ਸੇਵੇਤਂ.

ਇਧ ਪਨ, ਭਿਕ੍ਖਵੇ, ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਉਪ੍ਪਨ੍ਨੇ ਚੀਵਰੇ ਅਭਾਜਿਤੇ ਸਙ੍ਘੋ ਭਿਜ੍ਜਤਿ. ਸਬ੍ਬੇਸਂ ਸਮਕਂ ਭਾਜੇਤਬ੍ਬਨ੍ਤਿ.

ਸਙ੍ਘੇ ਭਿਨ੍ਨੇ ਚੀਵਰੁਪ੍ਪਾਦਕਥਾ ਨਿਟ੍ਠਿਤਾ.

੨੩੧. ਦੁਗ੍ਗਹਿਤਸੁਗ੍ਗਹਿਤਾਦਿਕਥਾ

੩੭੭. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਰੇਵਤੋ ਅਞ੍ਞਤਰਸ੍ਸ ਭਿਕ੍ਖੁਨੋ ਹਤ੍ਥੇ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਚੀਵਰਂ ਪਾਹੇਸਿ – ‘‘ਇਮਂ ਚੀਵਰਂ ਥੇਰਸ੍ਸ ਦੇਹੀ’’ਤਿ. ਅਥ ਖੋ ਸੋ ਭਿਕ੍ਖੁ ਅਨ੍ਤਰਾਮਗ੍ਗੇ ਆਯਸ੍ਮਤੋ ਰੇਵਤਸ੍ਸ ਵਿਸ੍ਸਾਸਾ ਤਂ ਚੀਵਰਂ ਅਗ੍ਗਹੇਸਿ. ਅਥ ਖੋ ਆਯਸ੍ਮਾ ਰੇਵਤੋ ਆਯਸ੍ਮਤਾ ਸਾਰਿਪੁਤ੍ਤੇਨ ਸਮਾਗਨ੍ਤ੍ਵਾ ਪੁਚ੍ਛਿ – ‘‘ਅਹਂ, ਭਨ੍ਤੇ, ਥੇਰਸ੍ਸ ਚੀਵਰਂ ਪਾਹੇਸਿਂ. ਸਮ੍ਪਤ੍ਤਂ ਤਂ ਚੀਵਰ’’ਨ੍ਤਿ? ‘‘ਨਾਹਂ ਤਂ, ਆਵੁਸੋ, ਚੀਵਰਂ ਪਸ੍ਸਾਮੀ’’ਤਿ. ਅਥ ਖੋ ਆਯਸ੍ਮਾ ਰੇਵਤੋ ਤਂ ਭਿਕ੍ਖੁਂ ਏਤਦਵੋਚ – ‘‘ਅਹਂ, ਆਵੁਸੋ, ਆਯਸ੍ਮਤੋ ਹਤ੍ਥੇ ਥੇਰਸ੍ਸ ਚੀਵਰਂ ਪਾਹੇਸਿਂ. ਕਹਂ ਤਂ ਚੀਵਰ’’ਨ੍ਤਿ? ‘‘ਅਹਂ, ਭਨ੍ਤੇ, ਆਯਸ੍ਮਤੋ ਵਿਸ੍ਸਾਸਾ ਤਂ ਚੀਵਰਂ ਅਗ੍ਗਹੇਸਿ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

੩੭੮. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ – ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਹੀ’’ਤਿ. ਸੋ ਅਨ੍ਤਰਾਮਗ੍ਗੇ ਯੋ ਪਹਿਣਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਸੁਗ੍ਗਹਿਤਂ. ਯਸ੍ਸ ਪਹਿਯ੍ਯਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਦੁਗ੍ਗਹਿਤਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ – ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਹੀ’’ਤਿ. ਸੋ ਅਨ੍ਤਰਾਮਗ੍ਗੇ ਯਸ੍ਸ ਪਹਿਯ੍ਯਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਦੁਗ੍ਗਹਿਤਂ. ਯੋ ਪਹਿਣਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਸੁਗ੍ਗਹਿਤਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ – ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਹੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ – ਯੋ ਪਹਿਣਤਿ ਸੋ ਕਾਲਙ੍ਕਤੋਤਿ. ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ. ਸ੍ਵਾਧਿਟ੍ਠਿਤਂ. ਯਸ੍ਸ ਪਹਿਯ੍ਯਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਦੁਗ੍ਗਹਿਤਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ – ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਹੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ – ਯਸ੍ਸ ਪਹਿਯ੍ਯਤਿ ਸੋ ਕਾਲਙ੍ਕਤੋਤਿ. ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ. ਦ੍ਵਾਧਿਟ੍ਠਿਤਂ. ਯੋ ਪਹਿਣਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਸੁਗ੍ਗਹਿਤਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ – ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਹੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ – ਉਭੋ ਕਾਲਙ੍ਕਤਾਤਿ. ਯੋ ਪਹਿਣਤਿ ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ. ਸ੍ਵਾਧਿਟ੍ਠਿਤਂ. ਯਸ੍ਸ ਪਹਿਯ੍ਯਤਿ ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ. ਦ੍ਵਾਧਿਟ੍ਠਿਤਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ – ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ. ਸੋ ਅਨ੍ਤਰਾਮਗ੍ਗੇ ਯੋ ਪਹਿਣਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਦੁਗ੍ਗਹਿਤਂ. ਯਸ੍ਸ ਪਹਿਯ੍ਯਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਸੁਗ੍ਗਹਿਤਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ – ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ. ਸੋ ਅਨ੍ਤਰਾਮਗ੍ਗੇ ਯਸ੍ਸ ਪਹਿਯ੍ਯਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਸੁਗ੍ਗਹਿਤਂ. ਯੋ ਪਹਿਣਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਦੁਗ੍ਗਹਿਤਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ – ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ – ‘‘ਯੋ ਪਹਿਣਤਿ ਸੋ ਕਾਲਙ੍ਕਤੋ’’ਤਿ. ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ. ਦ੍ਵਾਧਿਟ੍ਠਿਤਂ. ਯਸ੍ਸ ਪਹਿਯ੍ਯਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਸੁਗ੍ਗਹਿਤਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ – ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ – ‘‘ਯਸ੍ਸ ਪਹਿਯ੍ਯਤਿ ਸੋ ਕਾਲਙ੍ਕਤੋ’’ਤਿ. ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ. ਸ੍ਵਾਧਿਟ੍ਠਿਤਂ. ਯੋ ਪਹਿਣਤਿ ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ. ਦੁਗ੍ਗਹਿਤਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ – ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ ‘‘ਉਭੋ ਕਾਲਙ੍ਕਤਾ’’ਤਿ. ਯੋ ਪਹਿਣਤਿ ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ. ਦ੍ਵਾਧਿਟ੍ਠਿਤਂ. ਯਸ੍ਸ ਪਹਿਯ੍ਯਤਿ ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ. ਸ੍ਵਾਧਿਟ੍ਠਿਤਂ.

ਦੁਗ੍ਗਹਿਤਸੁਗ੍ਗਹਿਤਾਦਿਕਥਾ ਨਿਟ੍ਠਿਤਾ.

੨੩੨. ਅਟ੍ਠਚੀਵਰਮਾਤਿਕਾ

੩੭੯. ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ ਚੀਵਰਸ੍ਸ ਉਪ੍ਪਾਦਾਯ – ਸੀਮਾਯ ਦੇਤਿ, ਕਤਿਕਾਯ ਦੇਤਿ, ਭਿਕ੍ਖਾਪਞ੍ਞਤ੍ਤਿਯਾ ਦੇਤਿ, ਸਙ੍ਘਸ੍ਸ ਦੇਤਿ, ਉਭਤੋਸਙ੍ਘਸ੍ਸ ਦੇਤਿ, ਵਸ੍ਸਂਵੁਟ੍ਠਸਙ੍ਘਸ੍ਸ ਦੇਤਿ, ਆਦਿਸ੍ਸ ਦੇਤਿ, ਪੁਗ੍ਗਲਸ੍ਸ ਦੇਤਿ.

ਸੀਮਾਯ ਦੇਤਿ – ਯਾਵਤਿਕਾ ਭਿਕ੍ਖੂ ਅਨ੍ਤੋਸੀਮਗਤਾ ਤੇਹਿ ਭਾਜੇਤਬ੍ਬਂ. ਕਤਿਕਾਯ ਦੇਤਿ – ਸਮ੍ਬਹੁਲਾ ਆਵਾਸਾ ਸਮਾਨਲਾਭਾ ਹੋਨ੍ਤਿ ਏਕਸ੍ਮਿਂ ਆਵਾਸੇ ਦਿਨ੍ਨੇ ਸਬ੍ਬਤ੍ਥ ਦਿਨ੍ਨਂ ਹੋਤਿ. ਭਿਕ੍ਖਾਪਞ੍ਞਤ੍ਤਿਯਾ ਦੇਤਿ, ਯਤ੍ਥ ਸਙ੍ਘਸ੍ਸ ਧੁਵਕਾਰਾ ਕਰਿਯ੍ਯਨ੍ਤਿ, ਤਤ੍ਥ ਦੇਤਿ. ਸਙ੍ਘਸ੍ਸ ਦੇਤਿ, ਸਮ੍ਮੁਖੀਭੂਤੇਨ ਸਙ੍ਘੇਨ ਭਾਜੇਤਬ੍ਬਂ. ਉਭਤੋਸਙ੍ਘਸ੍ਸ ਦੇਤਿ, ਬਹੁਕਾਪਿ ਭਿਕ੍ਖੂ ਹੋਨ੍ਤਿ, ਏਕਾ ਭਿਕ੍ਖੁਨੀ ਹੋਤਿ, ਉਪਡ੍ਢਂ ਦਾਤਬ੍ਬਂ, ਬਹੁਕਾਪਿ ਭਿਕ੍ਖੁਨਿਯੋ ਹੋਨ੍ਤਿ, ਏਕੋ ਭਿਕ੍ਖੁ ਹੋਤਿ, ਉਪਡ੍ਢਂ ਦਾਤਬ੍ਬਂ. ਵਸ੍ਸਂਵੁਟ੍ਠਸਙ੍ਘਸ੍ਸ ਦੇਤਿ, ਯਾਵਤਿਕਾ ਭਿਕ੍ਖੂ ਤਸ੍ਮਿਂ ਆਵਾਸੇ ਵਸ੍ਸਂਵੁਟ੍ਠਾ, ਤੇਹਿ ਭਾਜੇਤਬ੍ਬਂ. ਆਦਿਸ੍ਸ ਦੇਤਿ, ਯਾਗੁਯਾ ਵਾ ਭਤ੍ਤੇ ਵਾ ਖਾਦਨੀਯੇ ਵਾ ਚੀਵਰੇ ਵਾ ਸੇਨਾਸਨੇ ਵਾ ਭੇਸਜ੍ਜੇ ਵਾ. ਪੁਗ੍ਗਲਸ੍ਸ ਦੇਤਿ, ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ.

ਅਟ੍ਠਚੀਵਰਮਾਤਿਕਾ ਨਿਟ੍ਠਿਤਾ.

ਚੀਵਰਕ੍ਖਨ੍ਧਕੋ ਅਟ੍ਠਮੋ.

੨੩੩. ਤਸ੍ਸੁਦ੍ਦਾਨਂ

ਰਾਜਗਹਕੋ ਨੇਗਮੋ, ਦਿਸ੍ਵਾ ਵੇਸਾਲਿਯਂ ਗਣਿਂ;

ਪੁਨ ਰਾਜਗਹਂ ਗਨ੍ਤ੍ਵਾ, ਰਞ੍ਞੋ ਤਂ ਪਟਿਵੇਦਯਿ.

ਪੁਤ੍ਤੋ ਸਾਲਵਤਿਕਾਯ, ਅਭਯਸ੍ਸ ਹਿ ਅਤ੍ਰਜੋ;

ਜੀਵਤੀਤਿ ਕੁਮਾਰੇਨ, ਸਙ੍ਖਾਤੋ ਜੀਵਕੋ ਇਤਿ.

ਸੋ ਹਿ ਤਕ੍ਕਸੀਲਂ ਗਨ੍ਤ੍ਵਾ, ਉਗ੍ਗਹੇਤ੍ਵਾ ਮਹਾਭਿਸੋ;

ਸਤ੍ਤਵਸ੍ਸਿਕਆਬਾਧਂ, ਨਤ੍ਥੁਕਮ੍ਮੇਨ ਨਾਸਯਿ.

ਰਞ੍ਞੋ ਭਗਨ੍ਦਲਾਬਾਧਂ, ਆਲੇਪੇਨ ਅਪਾਕਡ੍ਢਿ;

ਮਮਞ੍ਚ ਇਤ੍ਥਾਗਾਰਞ੍ਚ, ਬੁਦ੍ਧਸਙ੍ਘਂ ਚੁਪਟ੍ਠਹਿ.

ਰਾਜਗਹਕੋ ਚ ਸੇਟ੍ਠਿ, ਅਨ੍ਤਗਣ੍ਠਿ ਤਿਕਿਚ੍ਛਿਤਂ;

ਪਜ੍ਜੋਤਸ੍ਸ ਮਹਾਰੋਗਂ, ਘਤਪਾਨੇਨ ਨਾਸਯਿ.

ਅਧਿਕਾਰਞ੍ਚ ਸਿਵੇਯ੍ਯਂ, ਅਭਿਸਨ੍ਨਂ ਸਿਨੇਹਤਿ;

ਤੀਹਿ ਉਪ੍ਪਲਹਤ੍ਥੇਹਿ, ਸਮਤ੍ਤਿਂਸਵਿਰੇਚਨਂ.

ਪਕਤਤ੍ਤਂ ਵਰਂ ਯਾਚਿ, ਸਿਵੇਯ੍ਯਞ੍ਚ ਪਟਿਗ੍ਗਹਿ;

ਚੀਵਰਞ੍ਚ ਗਿਹਿਦਾਨਂ, ਅਨੁਞ੍ਞਾਸਿ ਤਥਾਗਤੋ.

ਰਾਜਗਹੇ ਜਨਪਦੇ ਬਹੁਂ, ਉਪ੍ਪਜ੍ਜਿ ਚੀਵਰਂ;

ਪਾਵਾਰੋ ਕੋਸਿਯਞ੍ਚੇਵ, ਕੋਜਵੋ ਅਡ੍ਢਕਾਸਿਕਂ.

ਉਚ੍ਚਾਵਚਾ ਚ ਸਨ੍ਤੁਟ੍ਠਿ, ਨਾਗਮੇਸਾਗਮੇਸੁਂ ਚ;

ਪਠਮਂ ਪਚ੍ਛਾ ਸਦਿਸਾ, ਕਤਿਕਾ ਚ ਪਟਿਹਰੁਂ.

ਭਣ੍ਡਾਗਾਰਂ ਅਗੁਤ੍ਤਞ੍ਚ, ਵੁਟ੍ਠਾਪੇਨ੍ਤਿ ਤਥੇਵ ਚ;

ਉਸ੍ਸਨ੍ਨਂ ਕੋਲਾਹਲਞ੍ਚ, ਕਥਂ ਭਾਜੇ ਕਥਂ ਦਦੇ.

ਸਕਾਤਿਰੇਕਭਾਗੇਨ, ਪਟਿਵੀਸੋ ਕਥਂ ਦਦੇ;

ਛਕਣੇਨ ਸੀਤੁਦਕਾ [ਸੀਤੁਨ੍ਦੀ ਚ (ਸੀ.), ਸੀਤੁਣ੍ਹਿ ਚ (ਕਤ੍ਥਚਿ)], ਉਤ੍ਤਰਿਤੁ ਨ ਜਾਨਰੇ.

ਆਰੋਪੇਨ੍ਤਾ ਭਾਜਨਞ੍ਚ, ਪਾਤਿਯਾ ਚ ਛਮਾਯ ਚ;

ਉਪਚਿਕਾਮਜ੍ਝੇ ਜੀਰਨ੍ਤਿ, ਏਕਤੋ ਪਤ੍ਥਿਨ੍ਨੇਨ ਚ.

ਫਰੁਸਾਚ੍ਛਿਨ੍ਨਚ੍ਛਿਬਨ੍ਧਾ, ਅਦ੍ਦਸਾਸਿ ਉਬ੍ਭਣ੍ਡਿਤੇ;

ਵੀਮਂਸਿਤ੍ਵਾ ਸਕ੍ਯਮੁਨਿ, ਅਨੁਞ੍ਞਾਸਿ ਤਿਚੀਵਰਂ.

ਅਞ੍ਞੇਨ ਅਤਿਰੇਕੇਨ, ਉਪ੍ਪਜ੍ਜਿ ਛਿਦ੍ਦਮੇਵ ਚ;

ਚਾਤੁਦ੍ਦੀਪੋ ਵਰਂ ਯਾਚਿ, ਦਾਤੁਂ ਵਸ੍ਸਿਕਸਾਟਿਕਂ.

ਆਗਨ੍ਤੁਗਮਿਗਿਲਾਨਂ, ਉਪਟ੍ਠਾਕਞ੍ਚ ਭੇਸਜ੍ਜਂ;

ਧੁਵਂ ਉਦਕਸਾਟਿਞ੍ਚ, ਪਣੀਤਂ ਅਤਿਖੁਦ੍ਦਕਂ.

ਥੁਲ੍ਲਕਚ੍ਛੁਮੁਖਂ ਖੋਮਂ, ਪਰਿਪੁਣ੍ਣਂ ਅਧਿਟ੍ਠਾਨਂ;

ਪਚ੍ਛਿਮਂ ਕਤੋ ਗਰੁਕੋ, ਵਿਕਣ੍ਣੋ ਸੁਤ੍ਤਮੋਕਿਰਿ.

ਲੁਜ੍ਜਨ੍ਤਿ ਨਪ੍ਪਹੋਨ੍ਤਿ, ਚ ਅਨ੍ਵਾਧਿਕਂ ਬਹੂਨਿ ਚ;

ਅਨ੍ਧਵਨੇ ਅਸ੍ਸਤਿਯਾ, ਏਕੋ ਵਸ੍ਸਂ ਉਤੁਮ੍ਹਿ ਚ.

ਦ੍ਵੇ ਭਾਤੁਕਾ ਰਾਜਗਹੇ, ਉਪਨਨ੍ਦੋ ਪੁਨ ਦ੍ਵਿਸੁ;

ਕੁਚ੍ਛਿਵਿਕਾਰੋ ਗਿਲਾਨੋ, ਉਭੋ ਚੇਵ ਗਿਲਾਨਕਾ [ਗਿਲਾਯਨਾ (ਕ.)].

ਨਗ੍ਗਾ ਕੁਸਾ ਵਾਕਚੀਰਂ, ਫਲਕੋ ਕੇਸਕਮ੍ਬਲਂ;

ਵਾਲ਼ਉਲੂਕਪਕ੍ਖਞ੍ਚ, ਅਜਿਨਂ ਅਕ੍ਕਨਾਲ਼ਕਂ.

ਪੋਤ੍ਥਕਂ ਨੀਲਪੀਤਞ੍ਚ, ਲੋਹਿਤਂ ਮਞ੍ਜਿਟ੍ਠੇਨ ਚ;

ਕਣ੍ਹਾ ਮਹਾਰਙ੍ਗਨਾਮ, ਅਚ੍ਛਿਨ੍ਨਦਸਿਕਾ ਤਥਾ.

ਦੀਘਪੁਪ੍ਫਫਣਦਸਾ, ਕਞ੍ਚੁਤਿਰੀਟਵੇਠਨਂ;

ਅਨੁਪ੍ਪਨ੍ਨੇ ਪਕ੍ਕਮਤਿ, ਸਙ੍ਘੋ ਭਿਜ੍ਜਤਿ ਤਾਵਦੇ.

ਪਕ੍ਖੇ ਦਦਨ੍ਤਿ ਸਙ੍ਘਸ੍ਸ, ਆਯਸ੍ਮਾ ਰੇਵਤੋ ਪਹਿ;

ਵਿਸ੍ਸਾਸਗਾਹਾਧਿਟ੍ਠਾਤਿ, ਅਟ੍ਠ ਚੀਵਰਮਾਤਿਕਾਤਿ.

ਇਮਮ੍ਹਿ ਖਨ੍ਧਕੇ ਵਤ੍ਥੂ ਛਨ੍ਨਵੁਤਿ.

ਚੀਵਰਕ੍ਖਨ੍ਧਕੋ ਨਿਟ੍ਠਿਤੋ.

੯. ਚਮ੍ਪੇਯ੍ਯਕ੍ਖਨ੍ਧਕੋ

੨੩੪. ਕਸ੍ਸਪਗੋਤ੍ਤਭਿਕ੍ਖੁਵਤ੍ਥੁ

੩੮੦. ਤੇਨ ਸਮਯੇਨ ਬੁਦ੍ਧੋ ਭਗਵਾ ਚਮ੍ਪਾਯਂ ਵਿਹਰਤਿ ਗਗ੍ਗਰਾਯ ਪੋਕ੍ਖਰਣਿਯਾ ਤੀਰੇ. ਤੇਨ ਖੋ ਪਨ ਸਮਯੇਨ ਕਾਸੀਸੁ ਜਨਪਦੇ ਵਾਸਭਗਾਮੋ ਨਾਮ ਹੋਤਿ. ਤਤ੍ਥ ਕਸ੍ਸਪਗੋਤ੍ਤੋ ਨਾਮ ਭਿਕ੍ਖੁ ਆਵਾਸਿਕੋ ਹੋਤਿ ਤਨ੍ਤਿਬਦ੍ਧੋ ਉਸ੍ਸੁਕ੍ਕਂ ਆਪਨ੍ਨੋ – ਕਿਨ੍ਤਿ ਅਨਾਗਤਾ ਚ ਪੇਸਲਾ ਭਿਕ੍ਖੂ ਆਗਚ੍ਛੇਯ੍ਯੁਂ, ਆਗਤਾ ਚ ਪੇਸਲਾ ਭਿਕ੍ਖੂ ਫਾਸੁ ਵਿਹਰੇਯ੍ਯੁਂ, ਅਯਞ੍ਚ ਆਵਾਸੋ ਵੁਦ੍ਧਿਂ ਵਿਰੁਲ਼੍ਹਿਂ ਵੇਪੁਲ੍ਲਂ ਆਪਜ੍ਜੇਯ੍ਯਾਤਿ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕਾਸੀਸੁ ਚਾਰਿਕਂ ਚਰਮਾਨਾ ਯੇਨ ਵਾਸਭਗਾਮੋ ਤਦਵਸਰੁਂ. ਅਦ੍ਦਸਾ ਖੋ ਕਸ੍ਸਪਗੋਤ੍ਤੋ ਭਿਕ੍ਖੁ ਤੇ ਭਿਕ੍ਖੂ ਦੂਰਤੋਵ ਆਗਚ੍ਛਨ੍ਤੇ, ਦਿਸ੍ਵਾਨ ਆਸਨਂ ਪਞ੍ਞਪੇਸਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਸਿ, ਪਾਨੀਯੇਨ ਆਪੁਚ੍ਛਿ, ਨਹਾਨੇ ਉਸ੍ਸੁਕ੍ਕਂ ਅਕਾਸਿ, ਉਸ੍ਸੁਕ੍ਕਮ੍ਪਿ ਅਕਾਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਅਥ ਖੋ ਤੇਸਂ ਆਗਨ੍ਤੁਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਭਦ੍ਦਕੋ ਖੋ ਅਯਂ, ਆਵੁਸੋ, ਆਵਾਸਿਕੋ ਭਿਕ੍ਖੁ ਨਹਾਨੇ ਉਸ੍ਸੁਕ੍ਕਂ ਕਰੋਤਿ, ਉਸ੍ਸੁਕ੍ਕਮ੍ਪਿ ਕਰੋਤਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਹਨ੍ਦ, ਮਯਂ, ਆਵੁਸੋ, ਇਧੇਵ ਵਾਸਭਗਾਮੇ ਨਿਵਾਸਂ ਕਪ੍ਪੇਮਾ’’ਤਿ. ਅਥ ਖੋ ਤੇ ਆਗਨ੍ਤੁਕਾ ਭਿਕ੍ਖੂ ਤਤ੍ਥੇਵ ਵਾਸਭਗਾਮੇ ਨਿਵਾਸਂ ਕਪ੍ਪੇਸੁਂ.

ਅਥ ਖੋ ਕਸ੍ਸਪਗੋਤ੍ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਯੋ ਖੋ ਇਮੇਸਂ ਆਗਨ੍ਤੁਕਾਨਂ ਭਿਕ੍ਖੂਨਂ ਆਗਨ੍ਤੁਕਕਿਲਮਥੋ ਸੋ ਪਟਿਪ੍ਪਸ੍ਸਦ੍ਧੋ. ਯੇਪਿਮੇ ਗੋਚਰੇ ਅਪ੍ਪਕਤਞ੍ਞੁਨੋ ਤੇਦਾਨਿਮੇ ਗੋਚਰੇ ਪਕਤਞ੍ਞੁਨੋ. ਦੁਕ੍ਕਰਂ ਖੋ ਪਨ ਪਰਕੁਲੇਸੁ ਯਾਵਜੀਵਂ ਉਸ੍ਸੁਕ੍ਕਂ ਕਾਤੁਂ, ਵਿਞ੍ਞਤ੍ਤਿ ਚ ਮਨੁਸ੍ਸਾਨਂ ਅਮਨਾਪਾ. ਯਂਨੂਨਾਹਂ ਨ ਉਸ੍ਸੁਕ੍ਕਂ ਕਰੇਯ੍ਯਂ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿ’’ਨ੍ਤਿ. ਸੋ ਨ ਉਸ੍ਸੁਕ੍ਕਂ ਅਕਾਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਅਥ ਖੋ ਤੇਸਂ ਆਗਨ੍ਤੁਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਪੁਬ੍ਬੇ ਖ੍ਵਾਯਂ, ਆਵੁਸੋ, ਆਵਾਸਿਕੋ ਭਿਕ੍ਖੁ ਨਹਾਨੇ ਉਸ੍ਸੁਕ੍ਕਂ ਅਕਾਸਿ, ਉਸ੍ਸੁਕ੍ਕਮ੍ਪਿ ਅਕਾਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਸੋਦਾਨਾਯਂ ਨ ਉਸ੍ਸੁਕ੍ਕਂ ਕਰੋਤਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਦੁਟ੍ਠੋਦਾਨਾਯਂ, ਆਵੁਸੋ, ਆਵਾਸਿਕੋ ਭਿਕ੍ਖੁ. ਹਨ੍ਦ, ਮਯਂ, ਆਵੁਸੋ, ਆਵਾਸਿਕਂ [ਇਮਂ ਆਵਾਸਿਕਂ (ਸ੍ਯਾ.)] ਭਿਕ੍ਖੁਂ ਉਕ੍ਖਿਪਾਮਾ’’ਤਿ. ਅਥ ਖੋ ਤੇ ਆਗਨ੍ਤੁਕਾ ਭਿਕ੍ਖੂ ਸਨ੍ਨਿਪਤਿਤ੍ਵਾ ਕਸ੍ਸਪਗੋਤ੍ਤਂ ਭਿਕ੍ਖੁਂ ਏਤਦਵੋਚੁਂ – ‘‘ਪੁਬ੍ਬੇ ਖੋ ਤ੍ਵਂ, ਆਵੁਸੋ, ਨਹਾਨੇ ਉਸ੍ਸੁਕ੍ਕਂ ਕਰੋਸਿ, ਉਸ੍ਸੁਕ੍ਕਮ੍ਪਿ ਕਰੋਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਸੋਦਾਨਿ ਤ੍ਵਂ ਨ ਉਸ੍ਸੁਕ੍ਕਂ ਕਰੋਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ. ਪਸ੍ਸਸੇਤਂ ਆਪਤ੍ਤਿ’’ਨ੍ਤਿ? ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਸ੍ਸੇਯ੍ਯ’’ਨ੍ਤਿ. ਅਥ ਖੋ ਤੇ ਆਗਨ੍ਤੁਕਾ ਭਿਕ੍ਖੂ ਕਸ੍ਸਪਗੋਤ੍ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ.

ਅਥ ਖੋ ਕਸ੍ਸਪਗੋਤ੍ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਅਹਂ ਖੋ ਏਤਂ ਨ ਜਾਨਾਮਿ ‘ਆਪਤ੍ਤਿ ਵਾ ਏਸਾ ਅਨਾਪਤ੍ਤਿ ਵਾ, ਆਪਨ੍ਨੋ ਚਮ੍ਹਿ [ਵਮ੍ਹਿ (?)] ਅਨਾਪਨ੍ਨੋ ਵਾ, ਉਕ੍ਖਿਤ੍ਤੋ ਚਮ੍ਹਿ ਅਨੁਕ੍ਖਿਤ੍ਤੋ ਵਾ, ਧਮ੍ਮਿਕੇਨ ਵਾ ਅਧਮ੍ਮਿਕੇਨ ਵਾ, ਕੁਪ੍ਪੇਨ ਵਾ ਅਕੁਪ੍ਪੇਨ ਵਾ, ਠਾਨਾਰਹੇਨ ਵਾ ਅਟ੍ਠਾਨਾਰਹੇਨ ਵਾ’. ਯਂਨੂਨਾਹਂ ਚਮ੍ਪਂ ਗਨ੍ਤ੍ਵਾ ਭਗਵਨ੍ਤਂ ਏਤਮਤ੍ਥਂ ਪੁਚ੍ਛੇਯ੍ਯ’’ਨ੍ਤਿ. ਅਥ ਖੋ ਕਸ੍ਸਪਗੋਤ੍ਤੋ ਭਿਕ੍ਖੁ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਚਮ੍ਪਾ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਚਮ੍ਪਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਕਸ੍ਸਪਗੋਤ੍ਤਂ ਭਿਕ੍ਖੁਂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖੁ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤੋ, ਕੁਤੋ ਚ ਤ੍ਵਂ, ਭਿਕ੍ਖੁ, ਆਗਚ੍ਛਸੀ’’ਤਿ? ‘‘ਖਮਨੀਯਂ, ਭਗਵਾ; ਯਾਪਨੀਯਂ, ਭਗਵਾ; ਅਪ੍ਪਕਿਲਮਥੇਨ ਚਾਹਂ, ਭਨ੍ਤੇ, ਅਦ੍ਧਾਨਂ ਆਗਤੋ. ਅਤ੍ਥਿ, ਭਨ੍ਤੇ, ਕਾਸੀਸੁ ਜਨਪਦੇ ਵਾਸਭਗਾਮੋ ਨਾਮ. ਤਤ੍ਥਾਹਂ, ਭਗਵਾ, ਆਵਾਸਿਕੋ ਤਨ੍ਤਿਬਦ੍ਧੋ ਉਸ੍ਸੁਕ੍ਕਂ ਆਪਨ੍ਨੋ – ‘ਕਿਨ੍ਤਿ ਅਨਾਗਤਾ ਚ ਪੇਸਲਾ ਭਿਕ੍ਖੂ ਆਗਚ੍ਛੇਯ੍ਯੁਂ, ਆਗਤਾ ਚ ਪੇਸਲਾ ਭਿਕ੍ਖੂ ਫਾਸੁ ਵਿਹਰੇਯ੍ਯੁਂ, ਅਯਞ੍ਚ ਆਵਾਸੋ ਵੁਦ੍ਧਿਂ ਵਿਰੁਲ਼੍ਹਿਂ ਵੇਪੁਲ੍ਲਂ ਆਪਜ੍ਜੇਯ੍ਯਾ’ਤਿ. ਅਥ ਖੋ, ਭਨ੍ਤੇ, ਸਮ੍ਬਹੁਲਾ ਭਿਕ੍ਖੂ ਕਾਸੀਸੁ ਚਾਰਿਕਂ ਚਰਮਾਨਾ ਯੇਨ ਵਾਸਭਗਾਮੋ ਤਦਵਸਰੁਂ. ਅਦ੍ਦਸਂ ਖੋ ਅਹਂ, ਭਨ੍ਤੇ, ਤੇ ਭਿਕ੍ਖੂ ਦੂਰਤੋਵ ਆਗਚ੍ਛਨ੍ਤੇ, ਦਿਸ੍ਵਾਨ ਆਸਨਂ ਪਞ੍ਞਪੇਸਿਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਸਿਂ, ਪਾਨੀਯੇਨ ਅਪੁਚ੍ਛਿਂ, ਨਹਾਨੇ ਉਸ੍ਸੁਕ੍ਕਂ ਅਕਾਸਿਂ, ਉਸ੍ਸੁਕ੍ਕਮ੍ਪਿ ਅਕਾਸਿਂ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਅਥ ਖੋ ਤੇਸਂ, ਭਨ੍ਤੇ, ਆਗਨ੍ਤੁਕਾਨਂ ਭਿਕ੍ਖੂਨਂ ਏਤਦਹੋਸਿ – ‘ਭਦ੍ਦਕੋ ਖੋ ਅਯਂ ਆਵੁਸੋ ਆਵਾਸਿਕੋ ਭਿਕ੍ਖੁ ਨਹਾਨੇ ਉਸ੍ਸੁਕ੍ਕਂ ਕਰੋਤਿ, ਉਸ੍ਸੁਕ੍ਕਮ੍ਪਿ ਕਰੋਤਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਹਨ੍ਦ, ਮਯਂ, ਆਵੁਸੋ, ਇਧੇਵ ਵਾਸਭਗਾਮੇ ਨਿਵਾਸਂ ਕਪ੍ਪੇਮਾ’ਤਿ. ਅਥ ਖੋ ਤੇ, ਭਨ੍ਤੇ, ਆਗਨ੍ਤੁਕਾ ਭਿਕ੍ਖੂ ਤਤ੍ਥੇਵ ਵਾਸਭਗਾਮੇ ਨਿਵਾਸਂ ਕਪ੍ਪੇਸੁਂ. ਤਸ੍ਸ ਮਯ੍ਹਂ, ਭਨ੍ਤੇ, ਏਤਦਹੋਸਿ – ‘ਯੋ ਖੋ ਇਮੇਸਂ ਆਗਨ੍ਤੁਕਾਨਂ ਭਿਕ੍ਖੂਨਂ ਆਗਨ੍ਤੁਕਕਿਲਮਥੋ ਸੋ ਪਟਿਪ੍ਪਸ੍ਸਦ੍ਧੋ. ਯੇਪਿਮੇ ਗੋਚਰੇ ਅਪ੍ਪਕਤਞ੍ਞੁਨੋ ਤੇਦਾਨਿਮੇ ਗੋਚਰੇ ਪਕਤਞ੍ਞੁਨੋ. ਦੁਕ੍ਕਰਂ ਖੋ ਪਨ ਪਰਕੁਲੇਸੁ ਯਾਵਜੀਵਂ ਉਸ੍ਸੁਕ੍ਕਂ ਕਾਤੁਂ, ਵਿਞ੍ਞਤ੍ਤਿ ਚ ਮਨੁਸ੍ਸਾਨਂ ਅਮਨਾਪਾ. ਯਂਨੂਨਾਹਂ ਨ ਉਸ੍ਸੁਕ੍ਕਂ ਕਰੇਯ੍ਯਂ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿ’ਨ੍ਤਿ. ਸੋ ਖੋ ਅਹਂ, ਭਨ੍ਤੇ, ਨ ਉਸ੍ਸੁਕ੍ਕਂ ਅਕਾਸਿਂ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਅਥ ਖੋ ਤੇਸਂ, ਭਨ੍ਤੇ, ਆਗਨ੍ਤੁਕਾਨਂ ਭਿਕ੍ਖੂਨਂ ਏਤਦਹੋਸਿ – ‘ਪੁਬ੍ਬੇ ਖ੍ਵਾਯਂ, ਆਵੁਸੋ, ਆਵਾਸਿਕੋ ਭਿਕ੍ਖੁ ਨਹਾਨੇ ਉਸ੍ਸੁਕ੍ਕਂ ਕਰੋਤਿ, ਉਸ੍ਸੁਕ੍ਕਮ੍ਪਿ ਕਰੋਤਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਸੋਦਾਨਾਯਂ ਨ ਉਸ੍ਸੁਕ੍ਕਂ ਕਰੋਤਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਦੁਟ੍ਠੋਦਾਨਾਯਂ, ਆਵੁਸੋ, ਆਵਾਸਿਕੋ ਭਿਕ੍ਖੁ. ਹਨ੍ਦ, ਮਯਂ, ਆਵੁਸੋ, ਆਵਾਸਿਕਂ ਭਿਕ੍ਖੁਂ ਉਕ੍ਖਿਪਾਮਾ’ਤਿ. ਅਥ ਖੋ ਤੇ, ਭਨ੍ਤੇ, ਆਗਨ੍ਤੁਕਾ ਭਿਕ੍ਖੂ ਸਨ੍ਨਿਪਤਿਤ੍ਵਾ ਮਂ ਏਤਦਵੋਚੁਂ – ‘ਪੁਬ੍ਬੇ ਖੋ ਤ੍ਵਂ, ਆਵੁਸੋ, ਨਹਾਨੇ ਉਸ੍ਸੁਕ੍ਕਂ ਕਰੋਸਿ, ਉਸ੍ਸੁਕ੍ਕਮ੍ਪਿ ਕਰੋਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਸੋਦਾਨਿ ਤ੍ਵਂ ਨ ਉਸ੍ਸੁਕ੍ਕਂ ਕਰੋਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ. ਪਸ੍ਸਸੇਤਂ ਆਪਤ੍ਤਿ’ਨ੍ਤਿ? ‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ ਯਮਹਂ ਪਸ੍ਸੇਯ੍ਯ’ਨ੍ਤਿ. ਅਥ ਖੋ ਤੇ, ਭਨ੍ਤੇ, ਆਗਨ੍ਤੁਕਾ ਭਿਕ੍ਖੂ ਮਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ. ਤਸ੍ਸ ਮਯ੍ਹਂ, ਭਨ੍ਤੇ, ਏਤਦਹੋਸਿ – ‘ਅਹਂ ਖੋ ਏਤਂ ਨ ਜਾਨਾਮਿ ‘ਆਪਤ੍ਤਿ ਵਾ ਏਸਾ ਅਨਾਪਤ੍ਤਿ ਵਾ, ਆਪਨ੍ਨੋ ਚਮ੍ਹਿ ਅਨਾਪਨ੍ਨੋ ਵਾ, ਉਕ੍ਖਿਤ੍ਤੋ ਚਮ੍ਹਿ ਅਨੁਕ੍ਖਿਤ੍ਤੋ ਵਾ, ਧਮ੍ਮਿਕੇਨ ਵਾ ਅਧਮ੍ਮਿਕੇਨ ਵਾ, ਕੁਪ੍ਪੇਨ ਵਾ ਅਕੁਪ੍ਪੇਨ ਵਾ, ਠਾਨਾਰਹੇਨ ਵਾ ਅਟ੍ਠਾਨਾਰਹੇਨ ਵਾ’. ਯਂਨੂਨਾਹਂ ਚਮ੍ਪਂ ਗਨ੍ਤ੍ਵਾ ਭਗਵਨ੍ਤਂ ਏਤਮਤ੍ਥਂ ਪੁਚ੍ਛੇਯ੍ਯ’ਨ੍ਤਿ. ਤਤੋ ਅਹਂ, ਭਗਵਾ, ਆਗਚ੍ਛਾਮੀ’’ਤਿ. ‘‘ਅਨਾਪਤ੍ਤਿ ਏਸਾ, ਭਿਕ੍ਖੁ, ਨੇਸਾ ਆਪਤ੍ਤਿ. ਅਨਾਪਨ੍ਨੋਸਿ, ਨਸਿ ਆਪਨ੍ਨੋ. ਅਨੁਕ੍ਖਿਤ੍ਤੋਸਿ, ਨਸਿ ਉਕ੍ਖਿਤ੍ਤੋ. ਅਧਮ੍ਮਿਕੇਨਾਸਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ. ਗਚ੍ਛ ਤ੍ਵਂ, ਭਿਕ੍ਖੁ, ਤਤ੍ਥੇਵ ਵਾਸਭਗਾਮੇ ਨਿਵਾਸਂ ਕਪ੍ਪੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਕਸ੍ਸਪਗੋਤ੍ਤੋ ਭਿਕ੍ਖੁ ਭਗਵਤੋ ਪਟਿਸ੍ਸੁਣਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਯੇਨ ਵਾਸਭਗਾਮੋ ਤੇਨ ਪਕ੍ਕਾਮਿ.

੩੮੧. ਅਥ ਖੋ ਤੇਸਂ ਆਗਨ੍ਤੁਕਾਨਂ ਭਿਕ੍ਖੂਨਂ ਅਹੁਦੇਵ ਕੁਕ੍ਕੁਚ੍ਚਂ, ਅਹੁ ਵਿਪ੍ਪਟਿਸਾਰੋ – ‘‘ਅਲਾਭਾ ਵਤ ਨੋ, ਨ ਵਤ ਨੋ ਲਾਭਾ, ਦੁਲ੍ਲਦ੍ਧਂ ਵਤ ਨੋ, ਨ ਵਤ ਨੋ ਸੁਲਦ੍ਧਂ, ਯੇ ਮਯਂ ਸੁਦ੍ਧਂ ਭਿਕ੍ਖੁਂ ਅਨਾਪਤ੍ਤਿਕਂ ਅਵਤ੍ਥੁਸ੍ਮਿਂ ਅਕਾਰਣੇ ਉਕ੍ਖਿਪਿਮ੍ਹਾ. ਹਨ੍ਦ, ਮਯਂ, ਆਵੁਸੋ, ਚਮ੍ਪਂ ਗਨ੍ਤ੍ਵਾ ਭਗਵਤੋ ਸਨ੍ਤਿਕੇ ਅਚ੍ਚਯਂ ਅਚ੍ਚਯਤੋ ਦੇਸੇਮਾ’’ਤਿ. ਅਥ ਖੋ ਤੇ ਆਗਨ੍ਤੁਕਾ ਭਿਕ੍ਖੂ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਚਮ੍ਪਾ ਤੇਨ ਪਕ੍ਕਮਿਂਸੁ. ਅਨੁਪੁਬ੍ਬੇਨ ਯੇਨ ਚਮ੍ਪਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿਤ੍ਥ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤਾ, ਕੁਤੋ ਚ ਤੁਮ੍ਹੇ, ਭਿਕ੍ਖਵੇ, ਆਗਚ੍ਛਥਾ’’ਤਿ? ‘‘ਖਮਨੀਯਂ, ਭਗਵਾ; ਯਾਪਨੀਯਂ, ਭਗਵਾ; ਅਪ੍ਪਕਿਲਮਥੇਨ ਚ ਮਯਂ, ਭਨ੍ਤੇ, ਅਦ੍ਧਾਨਂ ਆਗਤਾ. ਅਤ੍ਥਿ, ਭਨ੍ਤੇ, ਕਾਸੀਸੁ ਜਨਪਦੇ ਵਾਸਭਗਾਮੋ ਨਾਮ. ਤਤੋ ਮਯਂ, ਭਗਵਾ, ਆਗਚ੍ਛਾਮਾ’’ਤਿ. ‘‘ਤੁਮ੍ਹੇ, ਭਿਕ੍ਖਵੇ, ਆਵਾਸਿਕਂ ਭਿਕ੍ਖੁਂ ਉਕ੍ਖਿਪਿਤ੍ਥਾ’’ਤਿ? ‘‘ਏਵਂ, ਭਨ੍ਤੇ’’ਤਿ. ‘‘ਕਿਸ੍ਮਿਂ, ਭਿਕ੍ਖਵੇ, ਵਤ੍ਥੁਸ੍ਮਿਂ ਕਾਰਣੇ’’ਤਿ? ‘‘ਅਵਤ੍ਥੁਸ੍ਮਿਂ, ਭਗਵਾ, ਅਕਾਰਣੇ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸਾ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਸੁਦ੍ਧਂ ਭਿਕ੍ਖੁਂ ਅਨਾਪਤ੍ਤਿਕਂ ਅਵਤ੍ਥੁਸ੍ਮਿਂ ਅਕਾਰਣੇ ਉਕ੍ਖਿਪਿਸ੍ਸਥ. ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ…’’ ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਸੁਦ੍ਧੋ ਭਿਕ੍ਖੁ ਅਨਾਪਤ੍ਤਿਕੋ ਅਵਤ੍ਥੁਸ੍ਮਿਂ ਅਕਾਰਣੇ ਉਕ੍ਖਿਪਿਤਬ੍ਬੋ. ਯੋ ਉਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਅਥ ਖੋ ਤੇ ਭਿਕ੍ਖੂ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਅਚ੍ਚਯੋ ਨੋ, ਭਨ੍ਤੇ, ਅਚ੍ਚਗਮਾ ਯਥਾਬਾਲੇ ਯਥਾਮੂਲ਼੍ਹੇ ਯਥਾਅਕੁਸਲੇ, ਯੇ ਮਯਂ ਸੁਦ੍ਧਂ ਭਿਕ੍ਖੁਂ ਅਨਾਪਤ੍ਤਿਕਂ ਅਵਤ੍ਥੁਸ੍ਮਿਂ ਅਕਾਰਣੇ ਉਕ੍ਖਿਪਿਮ੍ਹਾ. ਤੇਸਂ ਨੋ, ਭਨ੍ਤੇ, ਭਗਵਾ ਅਚ੍ਚਯਂ ਅਚ੍ਚਯਤੋ ਪਟਿਗ੍ਗਣ੍ਹਾਤੁ ਆਯਤਿਂ ਸਂਵਰਾਯਾ’’ਤਿ. ‘‘ਤਗ੍ਘ, ਤੁਮ੍ਹੇ, ਭਿਕ੍ਖਵੇ, ਅਚ੍ਚਯੋ ਅਚ੍ਚਗਮਾ ਯਥਾਬਾਲੇ ਯਥਾਮੂਲ਼੍ਹੇ ਯਥਾਅਕੁਸਲੇ, ਯੇ ਤੁਮ੍ਹੇ ਸੁਦ੍ਧਂ ਭਿਕ੍ਖੁਂ ਅਨਾਪਤ੍ਤਿਕਂ ਅਵਤ੍ਥੁਸ੍ਮਿਂ ਅਕਾਰਣੇ ਉਕ੍ਖਿਪਿਤ੍ਥ. ਯਤੋ ਚ ਖੋ ਤੁਮ੍ਹੇ, ਭਿਕ੍ਖਵੇ, ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਥ, ਤਂ ਵੋ ਮਯਂ ਪਟਿਗ੍ਗਣ੍ਹਾਮ. ਵੁਦ੍ਧਿਹੇਸਾ, ਭਿਕ੍ਖਵੇ, ਅਰਿਯਸ੍ਸ ਵਿਨਯੇ ਯੋ ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਤਿ, ਆਯਤਿਂ [ਆਯਤਿਂ ਚ (ਸੀ.)] ਸਂਵਰਂ ਆਪਜ੍ਜਤੀ’’ਤਿ.

ਕਸ੍ਸਪਗੋਤ੍ਤਭਿਕ੍ਖੁਵਤ੍ਥੁ ਨਿਟ੍ਠਿਤਂ.

੨੩੫. ਅਧਮ੍ਮੇਨ ਵਗ੍ਗਾਦਿਕਮ੍ਮਕਥਾ

੩੮੨. ਤੇਨ ਖੋ ਪਨ ਸਮਯੇਨ ਚਮ੍ਪਾਯਂ ਭਿਕ੍ਖੂ ਏਵਰੂਪਾਨਿ ਕਮ੍ਮਾਨਿ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਕਮ੍ਮਂ ਕਰੋਨ੍ਤਿ, ਅਧਮ੍ਮੇਨ ਸਮਗ੍ਗਕਮ੍ਮਂ ਕਰੋਨ੍ਤਿ; ਧਮ੍ਮੇਨ ਵਗ੍ਗਕਮ੍ਮਂ ਕਰੋਨ੍ਤਿ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ ਕਰੋਨ੍ਤਿ; ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ ਕਰੋਨ੍ਤਿ; ਏਕੋਪਿ ਏਕਂ ਉਕ੍ਖਿਪਤਿ, ਏਕੋਪਿ ਦ੍ਵੇ ਉਕ੍ਖਿਪਤਿ, ਏਕੋਪਿ ਸਮ੍ਬਹੁਲੇ ਉਕ੍ਖਿਪਤਿ, ਏਕੋਪਿ ਸਙ੍ਘਂ ਉਕ੍ਖਿਪਤਿ; ਦ੍ਵੇਪਿ ਏਕਂ ਉਕ੍ਖਿਪਨ੍ਤਿ, ਦ੍ਵੇਪਿ ਦ੍ਵੇ ਉਕ੍ਖਿਪਨ੍ਤਿ, ਦ੍ਵੇਪਿ ਸਮ੍ਬਹੁਲੇ ਉਕ੍ਖਿਪਨ੍ਤਿ, ਦ੍ਵੇਪਿ ਸਙ੍ਘਂ ਉਕ੍ਖਿਪਨ੍ਤਿ; ਸਮ੍ਬਹੁਲਾਪਿ ਏਕਂ ਉਕ੍ਖਿਪਨ੍ਤਿ; ਸਮ੍ਬਹੁਲਾਪਿ ਦ੍ਵੇ ਉਕ੍ਖਿਪਨ੍ਤਿ, ਸਮ੍ਬਹੁਲਾਪਿ ਸਮ੍ਬਹੁਲੇ ਉਕ੍ਖਿਪਨ੍ਤਿ, ਸਮ੍ਬਹੁਲਾਪਿ ਸਙ੍ਘਂ ਉਕ੍ਖਿਪਨ੍ਤਿ; ਸਙ੍ਘੋਪਿ ਸਙ੍ਘਂ ਉਕ੍ਖਿਪਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਚਮ੍ਪਾਯਂ ਭਿਕ੍ਖੂ ਏਵਰੂਪਾਨਿ ਕਮ੍ਮਾਨਿ ਕਰਿਸ੍ਸਨ੍ਤਿ – ਅਧਮ੍ਮੇਨ ਵਗ੍ਗਕਮ੍ਮਂ ਕਰਿਸ੍ਸਨ੍ਤਿ, ਅਧਮ੍ਮੇਨ ਸਮਗ੍ਗਕਮ੍ਮਂ ਕਰਿਸ੍ਸਨ੍ਤਿ, ਧਮ੍ਮੇਨ ਵਗ੍ਗਕਮ੍ਮਂ ਕਰਿਸ੍ਸਨ੍ਤਿ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ ਕਰਿਸ੍ਸਨ੍ਤਿ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ ਕਰਿਸ੍ਸਨ੍ਤਿ, ਏਕੋਪਿ ਏਕਂ ਉਕ੍ਖਿਪਿਸ੍ਸਤਿ, ਏਕੋਪਿ ਦ੍ਵੇ ਉਕ੍ਖਿਪਿਸ੍ਸਤਿ, ਏਕੋਪਿ ਸਮ੍ਬਹੁਲੇ ਉਕ੍ਖਿਪਿਸ੍ਸਤਿ, ਏਕੋਪਿ ਸਙ੍ਘਂ ਉਕ੍ਖਿਪਿਸ੍ਸਤਿ, ਦ੍ਵੇਪਿ ਏਕਂ ਉਕ੍ਖਿਪਿਸ੍ਸਨ੍ਤਿ, ਦ੍ਵੇਪਿ ਦ੍ਵੇ ਉਕ੍ਖਿਪਿਸ੍ਸਨ੍ਤਿ, ਦ੍ਵੇਪਿ ਸਮ੍ਬਹੁਲੇ ਉਕ੍ਖਿਪਿਸ੍ਸਨ੍ਤਿ, ਦ੍ਵੇਪਿ ਸਙ੍ਘਂ ਉਕ੍ਖਿਪਿਸ੍ਸਨ੍ਤਿ, ਸਮ੍ਬਹੁਲਾਪਿ ਏਕਂ ਉਕ੍ਖਿਪਿਸ੍ਸਨ੍ਤਿ, ਸਮ੍ਬਹੁਲਾਪਿ ਦ੍ਵੇ ਉਕ੍ਖਿਪਿਸ੍ਸਨ੍ਤਿ, ਸਮ੍ਬਹੁਲਾਪਿ ਸਮ੍ਬਹੁਲੇ ਉਕ੍ਖਿਪਿਸ੍ਸਨ੍ਤਿ, ਸਮ੍ਬਹੁਲਾਪਿ ਸਙ੍ਘਂ ਉਕ੍ਖਿਪਿਸ੍ਸਨ੍ਤਿ, ਸਙ੍ਘੋਪਿ ਸਙ੍ਘਂ ਉਕ੍ਖਿਪਿਸ੍ਸਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਚਮ੍ਪਾਯਂ ਭਿਕ੍ਖੂ ਏਵਰੂਪਾਨਿ ਕਮ੍ਮਾਨਿ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਕਮ੍ਮਂ ਕਰੋਨ੍ਤਿ…ਪੇ… ਸਙ੍ਘੋਪਿ ਸਙ੍ਘਂ ਉਕ੍ਖਿਪਤੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਿਕ੍ਖਵੇ, ਤੇਸਂ ਮੋਘਪੁਰਿਸਾਨਂ ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਏਵਰੂਪਾਨਿ ਕਮ੍ਮਾਨਿ ਕਰਿਸ੍ਸਨ੍ਤਿ – ਅਧਮ੍ਮੇਨ ਵਗ੍ਗਕਮ੍ਮਂ ਕਰਿਸ੍ਸਨ੍ਤਿ…ਪੇ… ਸਙ੍ਘੋਪਿ ਸਙ੍ਘਂ ਉਕ੍ਖਿਪਿਸ੍ਸਤਿ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੮੩. ‘‘ਅਧਮ੍ਮੇਨ ਚੇ, ਭਿਕ੍ਖਵੇ, ਵਗ੍ਗਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ, ਅਧਮ੍ਮੇਨ [ਅਧਮ੍ਮੇਨ ਚੇ ਭਿਕ੍ਖਵੇ (ਸ੍ਯਾ.)] ਸਮਗ੍ਗਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ, ਧਮ੍ਮੇਨ ਵਗ੍ਗਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ; ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ; ਏਕੋਪਿ ਏਕਂ ਉਕ੍ਖਿਪਤਿ ਅਕਮ੍ਮਂ ਨ ਚ ਕਰਣੀਯਂ, ਏਕੋਪਿ ਦ੍ਵੇ ਉਕ੍ਖਿਪਤਿ ਅਕਮ੍ਮਂ ਨ ਚ ਕਰਣੀਯਂ, ਏਕੋਪਿ ਸਮ੍ਬਹੁਲੇ ਉਕ੍ਖਿਪਤਿ ਅਕਮ੍ਮਂ ਨ ਚ ਕਰਣੀਯਂ, ਏਕੋਪਿ ਸਙ੍ਘਂ ਉਕ੍ਖਿਪਤਿ ਅਕਮ੍ਮਂ ਨ ਚ ਕਰਣੀਯਂ; ਦ੍ਵੇਪਿ ਏਕਂ ਉਕ੍ਖਿਪਨ੍ਤਿ ਅਕਮ੍ਮਂ ਨ ਚ ਕਰਣੀਯਂ, ਦ੍ਵੇਪਿ ਦ੍ਵੇ ਉਕ੍ਖਿਪਨ੍ਤਿ ਅਕਮ੍ਮਂ ਨ ਚ ਕਰਣੀਯਂ, ਦ੍ਵੇਪਿ ਸਮ੍ਬਹੁਲੇ ਉਕ੍ਖਿਪਨ੍ਤਿ ਅਕਮ੍ਮਂ ਨ ਚ ਕਰਣੀਯਂ, ਦ੍ਵੇਪਿ ਸਙ੍ਘਂ ਉਕ੍ਖਿਪਨ੍ਤਿ ਅਕਮ੍ਮਂ ਨ ਚ ਕਰਣੀਯਂ; ਸਮ੍ਬਹੁਲਾਪਿ ਏਕਂ ਉਕ੍ਖਿਪਨ੍ਤਿ ਅਕਮ੍ਮਂ ਨ ਚ ਕਰਣੀਯਂ, ਸਮ੍ਬਹੁਲਾਪਿ ਦ੍ਵੇ ਉਕ੍ਖਿਪਨ੍ਤਿ ਅਕਮ੍ਮਂ ਨ ਚ ਕਰਣੀਯਂ, ਸਮ੍ਬਹੁਲਾਪਿ ਸਮ੍ਬਹੁਲੇ ਉਕ੍ਖਿਪਨ੍ਤਿ ਅਕਮ੍ਮਂ ਨ ਚ ਕਰਣੀਯਂ, ਸਮ੍ਬਹੁਲਾਪਿ ਸਙ੍ਘਂ ਉਕ੍ਖਿਪਨ੍ਤਿ ਅਕਮ੍ਮਂ ਨ ਚ ਕਰਣੀਯਂ; ਸਙ੍ਘੋਪਿ ਸਙ੍ਘਂ ਉਕ੍ਖਿਪਤਿ ਅਕਮ੍ਮਂ ਨ ਚ ਕਰਣੀਯਂ.

੩੮੪. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਕਮ੍ਮਾਨਿ – ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮੇਨ ਸਮਗ੍ਗਕਮ੍ਮਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਅਧਮ੍ਮੇਨ ਵਗ੍ਗਕਮ੍ਮਂ, ਇਦਂ, ਭਿਕ੍ਖਵੇ, ਕਮ੍ਮਂ ਅਧਮ੍ਮਤ੍ਤਾ ਵਗ੍ਗਤ੍ਤਾ ਕੁਪ੍ਪਂ ਅਟ੍ਠਾਨਾਰਹਂ; ਨ, ਭਿਕ੍ਖਵੇ, ਏਵਰੂਪਂ ਕਮ੍ਮਂ ਕਾਤਬ੍ਬਂ, ਨ ਚ ਮਯਾ ਏਵਰੂਪਂ ਕਮ੍ਮਂ ਅਨੁਞ੍ਞਾਤਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਅਧਮ੍ਮੇਨ ਸਮਗ੍ਗਕਮ੍ਮਂ, ਇਦਂ, ਭਿਕ੍ਖਵੇ, ਕਮ੍ਮਂ ਅਧਮ੍ਮਤ੍ਤਾ ਕੁਪ੍ਪਂ ਅਟ੍ਠਾਨਾਰਹਂ; ਨ, ਭਿਕ੍ਖਵੇ, ਏਵਰੂਪਂ ਕਮ੍ਮਂ ਕਾਤਬ੍ਬਂ, ਨ ਚ ਮਯਾ ਏਵਰੂਪਂ ਕਮ੍ਮਂ ਅਨੁਞ੍ਞਾਤਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਧਮ੍ਮੇਨ ਵਗ੍ਗਕਮ੍ਮਂ, ਇਦਂ, ਭਿਕ੍ਖਵੇ, ਕਮ੍ਮਂ ਵਗ੍ਗਤ੍ਤਾ ਕੁਪ੍ਪਂ ਅਟ੍ਠਾਨਾਰਹਂ; ਨ, ਭਿਕ੍ਖਵੇ, ਏਵਰੂਪਂ ਕਮ੍ਮਂ ਕਾਤਬ੍ਬਂ, ਨ ਚ ਮਯਾ ਏਵਰੂਪਂ ਕਮ੍ਮਂ ਅਨੁਞ੍ਞਾਤਂ. ਤਤ੍ਰ, ਭਿਕ੍ਖਵੇ, ਯਦਿਦਂ ਧਮ੍ਮੇਨ ਸਮਗ੍ਗਕਮ੍ਮਂ, ਇਦਂ, ਭਿਕ੍ਖਵੇ, ਕਮ੍ਮਂ ਧਮ੍ਮਤ੍ਤਾ ਸਮਗ੍ਗਤ੍ਤਾ ਅਕੁਪ੍ਪਂ ਠਾਨਾਰਹਂ; ਏਵਰੂਪਂ, ਭਿਕ੍ਖਵੇ, ਕਮ੍ਮਂ ਕਾਤਬ੍ਬਂ, ਏਵਰੂਪਞ੍ਚ ਮਯਾ ਕਮ੍ਮਂ ਅਨੁਞ੍ਞਾਤਂ. ਤਸ੍ਮਾਤਿਹ, ਭਿਕ੍ਖਵੇ, ਏਵਰੂਪਂ ਕਮ੍ਮਂ ਕਰਿਸ੍ਸਾਮ ਯਦਿਦਂ ਧਮ੍ਮੇਨ ਸਮਗ੍ਗਨ੍ਤਿ – ਏਵਞ੍ਹਿ ਵੋ, ਭਿਕ੍ਖਵੇ, ਸਿਕ੍ਖਿਤਬ੍ਬ’’ਨ੍ਤਿ.

ਅਧਮ੍ਮੇਨ ਵਗ੍ਗਾਦਿਕਮ੍ਮਕਥਾ ਨਿਟ੍ਠਿਤਾ.

੨੩੬. ਞਤ੍ਤਿਵਿਪਨ੍ਨਕਮ੍ਮਾਦਿਕਥਾ

੩੮੫. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਏਵਰੂਪਾਨਿ ਕਮ੍ਮਾਨਿ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਕਮ੍ਮਂ ਕਰੋਨ੍ਤਿ, ਅਧਮ੍ਮੇਨ ਸਮਗ੍ਗਕਮ੍ਮਂ ਕਰੋਨ੍ਤਿ; ਧਮ੍ਮੇਨ ਵਗ੍ਗਕਮ੍ਮਂ ਕਰੋਨ੍ਤਿ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ ਕਰੋਨ੍ਤਿ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ ਕਰੋਨ੍ਤਿ; ਞਤ੍ਤਿਵਿਪਨ੍ਨਮ੍ਪਿ ਕਮ੍ਮਂ ਕਰੋਨ੍ਤਿ ਅਨੁਸ੍ਸਾਵਨਸਮ੍ਪਨ੍ਨਂ, ਅਨੁਸ੍ਸਾਵਨਵਿਪਨ੍ਨਮ੍ਪਿ ਕਮ੍ਮਂ ਕਰੋਨ੍ਤਿ ਞਤ੍ਤਿਸਮ੍ਪਨ੍ਨਂ, ਞਤ੍ਤਿਵਿਪਨ੍ਨਮ੍ਪਿ ਅਨੁਸ੍ਸਾਵਨਵਿਪਨ੍ਨਮ੍ਪਿ ਕਮ੍ਮਂ ਕਰੋਨ੍ਤਿ; ਅਞ੍ਞਤ੍ਰਾਪਿ ਧਮ੍ਮਾ ਕਮ੍ਮਂ ਕਰੋਨ੍ਤਿ, ਅਞ੍ਞਤ੍ਰਾਪਿ ਵਿਨਯਾ ਕਮ੍ਮਂ ਕਰੋਨ੍ਤਿ, ਅਞ੍ਞਤ੍ਰਾਪਿ ਸਤ੍ਥੁਸਾਸਨਾ ਕਮ੍ਮਂ ਕਰੋਨ੍ਤਿ; ਪਟਿਕੁਟ੍ਠਕਤਮ੍ਪਿ ਕਮ੍ਮਂ ਕਰੋਨ੍ਤਿ ਅਧਮ੍ਮਿਕਂ ਕੁਪ੍ਪਂ ਅਟ੍ਠਾਨਾਰਹਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਏਵਰੂਪਾਨਿ ਕਮ੍ਮਾਨਿ ਕਰਿਸ੍ਸਨ੍ਤਿ – ਅਧਮ੍ਮੇਨ ਵਗ੍ਗਕਮ੍ਮਂ ਕਰਿਸ੍ਸਨ੍ਤਿ, ਅਧਮ੍ਮੇਨ ਸਮਗ੍ਗਕਮ੍ਮਂ ਕਰਿਸ੍ਸਨ੍ਤਿ; ਧਮ੍ਮੇਨ ਵਗ੍ਗਕਮ੍ਮਂ ਕਰਿਸ੍ਸਨ੍ਤਿ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ ਕਰਿਸ੍ਸਨ੍ਤਿ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ ਕਰਿਸ੍ਸਨ੍ਤਿ; ਞਤ੍ਤਿਵਿਪਨ੍ਨਮ੍ਪਿ ਕਮ੍ਮਂ ਕਰਿਸ੍ਸਨ੍ਤਿ ਅਨੁਸ੍ਸਾਵਨਸਮ੍ਪਨ੍ਨਂ, ਅਨੁਸ੍ਸਾਵਨਵਿਪਨ੍ਨਮ੍ਪਿ ਕਮ੍ਮਂ ਕਰਿਸ੍ਸਨ੍ਤਿ ਞਤ੍ਤਿਸਮ੍ਪਨ੍ਨਂ, ਞਤ੍ਤਿਵਿਪਨ੍ਨਮ੍ਪਿ ਅਨੁਸ੍ਸਾਵਨਵਿਪਨ੍ਨਮ੍ਪਿ ਕਮ੍ਮਂ ਕਰਿਸ੍ਸਨ੍ਤਿ; ਅਞ੍ਞਤ੍ਰਾਪਿ ਧਮ੍ਮਾ ਕਮ੍ਮਂ ਕਰਿਸ੍ਸਨ੍ਤਿ, ਅਞ੍ਞਤ੍ਰਾਪਿ ਵਿਨਯਾ ਕਮ੍ਮਂ ਕਰਿਸ੍ਸਨ੍ਤਿ, ਅਞ੍ਞਤ੍ਰਾਪਿ ਸਤ੍ਥੁਸਾਸਨਾ ਕਮ੍ਮਂ ਕਰਿਸ੍ਸਨ੍ਤਿ; ਪਟਿਕੁਟ੍ਠਕਤਮ੍ਪਿ ਕਮ੍ਮਂ ਕਰਿਸ੍ਸਨ੍ਤਿ ਅਧਮ੍ਮਿਕਂ ਕੁਪ੍ਪਂ ਅਟ੍ਠਾਨਾਰਹ’’ਨ੍ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਏਵਰੂਪਾਨਿ ਕਮ੍ਮਾਨਿ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਕਮ੍ਮਂ ਕਰੋਨ੍ਤਿ…ਪੇ… ਪਟਿਕੁਟ੍ਠਕਤਮ੍ਪਿ ਕਮ੍ਮਂ ਕਰੋਨ੍ਤਿ ਅਧਮ੍ਮਿਕਂ ਕੁਪ੍ਪਂ ਅਟ੍ਠਾਨਾਰਹ’’ਨ੍ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੮੬. ‘‘ਅਧਮ੍ਮੇਨ ਚੇ, ਭਿਕ੍ਖਵੇ, ਵਗ੍ਗਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ; ਅਧਮ੍ਮੇਨ ਸਮਗ੍ਗਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ; ਧਮ੍ਮੇਨ ਵਗ੍ਗਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ; ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ; ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ. ਞਤ੍ਤਿਵਿਪਨ੍ਨਞ੍ਚੇ, ਭਿਕ੍ਖਵੇ, ਕਮ੍ਮਂ ਅਨੁਸ੍ਸਾਵਨਸਮ੍ਪਨ੍ਨਂ ਅਕਮ੍ਮਂ ਨ ਚ ਕਰਣੀਯਂ; ਅਨੁਸ੍ਸਾਵਨਵਿਪਨ੍ਨਞ੍ਚੇ, ਭਿਕ੍ਖਵੇ, ਕਮ੍ਮਂ ਞਤ੍ਤਿਸਮ੍ਪਨ੍ਨਂ ਅਕਮ੍ਮਂ ਨ ਚ ਕਰਣੀਯਂ; ਞਤ੍ਤਿਵਿਪਨ੍ਨਞ੍ਚੇ, ਭਿਕ੍ਖਵੇ, ਕਮ੍ਮਂ ਅਨੁਸ੍ਸਾਵਨਵਿਪਨ੍ਨਂ ਅਕਮ੍ਮਂ ਨ ਚ ਕਰਣੀਯਂ; ਅਞ੍ਞਤ੍ਰਾਪਿ ਧਮ੍ਮਾ ਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ; ਅਞ੍ਞਤ੍ਰਾਪਿ ਵਿਨਯਾ ਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ; ਅਞ੍ਞਤ੍ਰਾਪਿ ਸਤ੍ਥੁਸਾਸਨਾ ਕਮ੍ਮਂ ਅਕਮ੍ਮਂ ਨ ਚ ਕਰਣੀਯਂ; ਪਟਿਕੁਟ੍ਠਕਤਞ੍ਚੇ, ਭਿਕ੍ਖਵੇ, ਕਮ੍ਮਂ ਅਧਮ੍ਮਿਕਂ ਕੁਪ੍ਪਂ ਅਟ੍ਠਾਨਾਰਹਂ ਅਕਮ੍ਮਂ ਨ ਚ ਕਰਣੀਯਂ.

੩੮੭. ਛਯਿਮਾਨਿ, ਭਿਕ੍ਖਵੇ, ਕਮ੍ਮਾਨਿ – ਅਧਮ੍ਮਕਮ੍ਮਂ, ਵਗ੍ਗਕਮ੍ਮਂ, ਸਮਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਸਮਗ੍ਗਕਮ੍ਮਂ.

ਕਤਮਞ੍ਚ, ਭਿਕ੍ਖਵੇ, ਅਧਮ੍ਮਕਮ੍ਮਂ? ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਏਕਾਯ ਞਤ੍ਤਿਯਾ ਕਮ੍ਮਂ ਕਰੋਤਿ, ਨ ਚ ਕਮ੍ਮਵਾਚਂ ਅਨੁਸ੍ਸਾਵੇਤਿ – ਅਧਮ੍ਮਕਮ੍ਮਂ. ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਦ੍ਵੀਹਿ ਞਤ੍ਤੀਹਿ ਕਮ੍ਮਂ ਕਰੋਤਿ, ਨ ਚ ਕਮ੍ਮਵਾਚਂ ਅਨੁਸ੍ਸਾਵੇਤਿ – ਅਧਮ੍ਮਕਮ੍ਮਂ. ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਏਕਾਯ ਕਮ੍ਮਵਾਚਾਯ ਕਮ੍ਮਂ ਕਰੋਤਿ, ਨ ਚ ਞਤ੍ਤਿਂ ਠਪੇਤਿ – ਅਧਮ੍ਮਕਮ੍ਮਂ. ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਦ੍ਵੀਹਿ ਕਮ੍ਮਵਾਚਾਹਿ ਕਮ੍ਮਂ ਕਰੋਤਿ, ਨ ਚ ਞਤ੍ਤਿਂ ਠਪੇਤਿ – ਅਧਮ੍ਮਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਏਕਾਯ ਞਤ੍ਤਿਯਾ ਕਮ੍ਮਂ ਕਰੋਤਿ, ਨ ਚ ਕਮ੍ਮਵਾਚਂ ਅਨੁਸ੍ਸਾਵੇਤਿ – ਅਧਮ੍ਮਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਦ੍ਵੀਹਿ ਞਤ੍ਤੀਹਿ ਕਮ੍ਮਂ ਕਰੋਤਿ, ਨ ਚ ਕਮ੍ਮਵਾਚਂ ਅਨੁਸ੍ਸਾਵੇਤਿ – ਅਧਮ੍ਮਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਤੀਹਿ ਞਤ੍ਤੀਹਿ ਕਮ੍ਮਂ ਕਰੋਤਿ, ਨ ਚ ਕਮ੍ਮਵਾਚਂ ਅਨੁਸ੍ਸਾਵੇਤਿ – ਅਧਮ੍ਮਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਚਤੂਹਿ ਞਤ੍ਤੀਹਿ ਕਮ੍ਮਂ ਕਰੋਤਿ, ਨ ਚ ਕਮ੍ਮਵਾਚਂ ਅਨੁਸ੍ਸਾਵੇਤਿ – ਅਧਮ੍ਮਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਏਕਾਯ ਕਮ੍ਮਵਾਚਾਯ ਕਮ੍ਮਂ ਕਰੋਤਿ, ਨ ਚ ਞਤ੍ਤਿਂ ਠਪੇਤਿ – ਅਧਮ੍ਮਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਦ੍ਵੀਹਿ ਕਮ੍ਮਵਾਚਾਹਿ ਕਮ੍ਮਂ ਕਰੋਤਿ, ਨ ਚ ਞਤ੍ਤਿਂ ਠਪੇਤਿ – ਅਧਮ੍ਮਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਤੀਹਿ ਕਮ੍ਮਵਾਚਾਹਿ ਕਮ੍ਮਂ ਕਰੋਤਿ, ਨ ਚ ਞਤ੍ਤਿਂ ਠਪੇਤਿ – ਅਧਮ੍ਮਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਚਤੂਹਿ ਕਮ੍ਮਵਾਚਾਹਿ ਕਮ੍ਮਂ ਕਰੋਤਿ, ਨ ਚ ਞਤ੍ਤਿਂ ਠਪੇਤਿ – ਅਧਮ੍ਮਕਮ੍ਮਂ. ਇਦਂ ਵੁਚ੍ਚਤਿ, ਭਿਕ੍ਖਵੇ, ਅਧਮ੍ਮਕਮ੍ਮਂ.

ਕਤਮਞ੍ਚ, ਭਿਕ੍ਖਵੇ, ਵਗ੍ਗਕਮ੍ਮਂ? ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਅਨਾਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਵਗ੍ਗਕਮ੍ਮਂ. ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਵਗ੍ਗਕਮ੍ਮਂ. ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਵਗ੍ਗਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਅਨਾਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਵਗ੍ਗਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਵਗ੍ਗਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਵਗ੍ਗਕਮ੍ਮਂ. ਇਦਂ ਵੁਚ੍ਚਤਿ, ਭਿਕ੍ਖਵੇ, ਵਗ੍ਗਕਮ੍ਮਂ.

ਕਤਮਞ੍ਚ, ਭਿਕ੍ਖਵੇ, ਸਮਗ੍ਗਕਮ੍ਮਂ? ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਨ ਪਟਿਕ੍ਕੋਸਨ੍ਤਿ – ਸਮਗ੍ਗਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਨ ਪਟਿਕ੍ਕੋਸਨ੍ਤਿ – ਸਮਗ੍ਗਕਮ੍ਮਂ. ਇਦਂ ਵੁਚ੍ਚਤਿ, ਭਿਕ੍ਖਵੇ, ਸਮਗ੍ਗਕਮ੍ਮਂ.

ਕਤਮਞ੍ਚ, ਭਿਕ੍ਖਵੇ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ? ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਪਠਮਂ ਕਮ੍ਮਵਾਚਂ ਅਨੁਸ੍ਸਾਵੇਤਿ, ਪਚ੍ਛਾ ਞਤ੍ਤਿਂ ਠਪੇਤਿ, ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਅਨਾਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ. ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਪਠਮਂ ਕਮ੍ਮਵਾਚਂ ਅਨੁਸ੍ਸਾਵੇਤਿ, ਪਚ੍ਛਾ ਞਤ੍ਤਿਂ ਠਪੇਤਿ, ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ. ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਪਠਮਂ ਕਮ੍ਮਵਾਚਂ ਅਨੁਸ੍ਸਾਵੇਤਿ, ਪਚ੍ਛਾ ਞਤ੍ਤਿਂ ਠਪੇਤਿ, ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਪਠਮਂ ਕਮ੍ਮਵਾਚਂ ਅਨੁਸ੍ਸਾਵੇਤਿ, ਪਚ੍ਛਾ ਞਤ੍ਤਿਂ ਠਪੇਤਿ, ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਅਨਾਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਪਠਮਂ ਕਮ੍ਮਵਾਚਂ ਅਨੁਸ੍ਸਾਵੇਤਿ, ਪਚ੍ਛਾ ਞਤ੍ਤਿਂ ਠਪੇਤਿ, ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਪਠਮਂ ਕਮ੍ਮਵਾਚਂ ਅਨੁਸ੍ਸਾਵੇਤਿ, ਪਚ੍ਛਾ ਞਤ੍ਤਿਂ ਠਪੇਤਿ, ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ. ਇਦਂ ਵੁਚ੍ਚਤਿ, ਭਿਕ੍ਖਵੇ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ.

ਕਤਮਞ੍ਚ, ਭਿਕ੍ਖਵੇ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ? ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਪਠਮਂ ਕਮ੍ਮਵਾਚਂ ਅਨੁਸ੍ਸਾਵੇਤਿ, ਪਚ੍ਛਾ ਞਤ੍ਤਿਂ ਠਪੇਤਿ, ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਨ ਪਟਿਕ੍ਕੋਸਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਪਠਮਂ ਕਮ੍ਮਵਾਚਂ ਅਨੁਸ੍ਸਾਵੇਤਿ, ਪਚ੍ਛਾ ਞਤ੍ਤਿਂ ਠਪੇਤਿ, ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਨ ਪਟਿਕ੍ਕੋਸਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ. ਇਦਂ ਵੁਚ੍ਚਤਿ, ਭਿਕ੍ਖਵੇ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ.

ਕਤਮਞ੍ਚ, ਭਿਕ੍ਖਵੇ, ਧਮ੍ਮੇਨ ਸਮਗ੍ਗਕਮ੍ਮਂ? ਞਤ੍ਤਿਦੁਤਿਯੇ ਚੇ, ਭਿਕ੍ਖਵੇ, ਕਮ੍ਮੇ ਪਠਮਂ ਞਤ੍ਤਿਂ ਠਪੇਤਿ, ਪਚ੍ਛਾ ਏਕਾਯ ਕਮ੍ਮਵਾਚਾਯ ਕਮ੍ਮਂ ਕਰੋਤਿ, ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਨ ਪਟਿਕ੍ਕੋਸਨ੍ਤਿ – ਧਮ੍ਮੇਨ ਸਮਗ੍ਗਕਮ੍ਮਂ. ਞਤ੍ਤਿਚਤੁਤ੍ਥੇ ਚੇ, ਭਿਕ੍ਖਵੇ, ਕਮ੍ਮੇ ਪਠਮਂ ਞਤ੍ਤਿਂ ਠਪੇਤਿ, ਪਚ੍ਛਾ ਤੀਹਿ ਕਮ੍ਮਵਾਚਾਹਿ ਕਮ੍ਮਂ ਕਰੋਤਿ, ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਨ ਪਟਿਕ੍ਕੋਸਨ੍ਤਿ, ਧਮ੍ਮੇਨ ਸਮਗ੍ਗਕਮ੍ਮਂ. ਇਦਂ ਵੁਚ੍ਚਤਿ, ਭਿਕ੍ਖਵੇ, ਧਮ੍ਮੇਨ ਸਮਗ੍ਗਕਮ੍ਮਂ.

ਞਤ੍ਤਿਵਿਪਨ੍ਨਕਮ੍ਮਾਦਿਕਥਾ ਨਿਟ੍ਠਿਤਾ.

੨੩੭. ਚਤੁਵਗ੍ਗਕਰਣਾਦਿਕਥਾ

੩੮੮. ਪਞ੍ਚ ਸਙ੍ਘਾ – ਚਤੁਵਗ੍ਗੋ ਭਿਕ੍ਖੁਸਙ੍ਘੋ ਪਞ੍ਚਵਗ੍ਗੋ ਭਿਕ੍ਖੁਸਙ੍ਘੋ, ਦਸਵਗ੍ਗੋ ਭਿਕ੍ਖੁਸਙ੍ਘੋ, ਵੀਸਤਿਵਗ੍ਗੋ ਭਿਕ੍ਖੁਸਙ੍ਘੋ, ਅਤਿਰੇਕਵੀਸਤਿਵਗ੍ਗੋ ਭਿਕ੍ਖੁਸਙ੍ਘੋ. ਤਤ੍ਰ, ਭਿਕ੍ਖਵੇ, ਯ੍ਵਾਯਂ ਚਤੁਵਗ੍ਗੋ ਭਿਕ੍ਖੁਸਙ੍ਘੋ, ਠਪੇਤ੍ਵਾ ਤੀਣਿ ਕਮ੍ਮਾਨਿ – ਉਪਸਮ੍ਪਦਂ ਪਵਾਰਣਂ ਅਬ੍ਭਾਨਂ, ਧਮ੍ਮੇਨ ਸਮਗ੍ਗੋ ਸਬ੍ਬਕਮ੍ਮੇਸੁ ਕਮ੍ਮਪ੍ਪਤ੍ਤੋ. ਤਤ੍ਰ, ਭਿਕ੍ਖਵੇ, ਯ੍ਵਾਯਂ ਪਞ੍ਚਵਗ੍ਗੋ ਭਿਕ੍ਖੁਸਙ੍ਘੋ, ਠਪੇਤ੍ਵਾ ਦ੍ਵੇ ਕਮ੍ਮਾਨਿ – ਮਜ੍ਝਿਮੇਸੁ ਜਨਪਦੇਸੁ ਉਪਸਮ੍ਪਦਂ ਅਬ੍ਭਾਨਂ, ਧਮ੍ਮੇਨ ਸਮਗ੍ਗੋ ਸਬ੍ਬਕਮ੍ਮੇਸੁ ਕਮ੍ਮਪ੍ਪਤ੍ਤੋ. ਤਤ੍ਰ, ਭਿਕ੍ਖਵੇ, ਯ੍ਵਾਯਂ ਦਸਵਗ੍ਗੋ ਭਿਕ੍ਖੁਸਙ੍ਘੋ, ਠਪੇਤ੍ਵਾ ਏਕਂ ਕਮ੍ਮਂ – ਅਬ੍ਭਾਨਂ, ਧਮ੍ਮੇਨ ਸਮਗ੍ਗੋ ਸਬ੍ਬਕਮ੍ਮੇਸੁ ਕਮ੍ਮਪ੍ਪਤ੍ਤੋ. ਤਤ੍ਰ, ਭਿਕ੍ਖਵੇ, ਯ੍ਵਾਯਂ ਵੀਸਤਿਵਗ੍ਗੋ ਭਿਕ੍ਖੁਸਙ੍ਘੋ ਧਮ੍ਮੇਨ ਸਮਗ੍ਗੋ ਸਬ੍ਬਕਮ੍ਮੇਸੁ ਕਮ੍ਮਪ੍ਪਤ੍ਤੋ. ਤਤ੍ਰ, ਭਿਕ੍ਖਵੇ, ਯ੍ਵਾਯਂ ਅਤਿਰੇਕਵੀਸਤਿਵਗ੍ਗੋ ਭਿਕ੍ਖੁਸਙ੍ਘੋ ਧਮ੍ਮੇਨ ਸਮਗ੍ਗੋ ਸਬ੍ਬਕਮ੍ਮੇਸੁ ਕਮ੍ਮਪ੍ਪਤ੍ਤੋ.

੩੮੯. ਚਤੁਵਗ੍ਗਕਰਣਞ੍ਚੇ, ਭਿਕ੍ਖਵੇ, ਕਮ੍ਮਂ ਭਿਕ੍ਖੁਨਿਚਤੁਤ੍ਥੋ ਕਮ੍ਮਂ ਕਰੇਯ੍ਯ – ਅਕਮ੍ਮਂ ਨ ਚ ਕਰਣੀਯਂ. ਚਤੁਵਗ੍ਗਕਰਣਞ੍ਚੇ, ਭਿਕ੍ਖਵੇ, ਕਮ੍ਮਂ ਸਿਕ੍ਖਮਾਨਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ…ਪੇ…. ਸਾਮਣੇਰਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਸਾਮਣੇਰਿਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਸਿਕ੍ਖਂ ਪਚ੍ਚਕ੍ਖਾਤਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਪਣ੍ਡਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਥੇਯ੍ਯਸਂਵਾਸਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਤਿਤ੍ਥਿਯਪਕ੍ਕਨ੍ਤਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਤਿਰਚ੍ਛਾਨਗਤਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਮਾਤੁਘਾਤਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਪਿਤੁਘਾਤਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਅਰਹਨ੍ਤਘਾਤਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਭਿਕ੍ਖੁਨਿਦੂਸਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਸਙ੍ਘਭੇਦਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਲੋਹਿਤੁਪ੍ਪਾਦਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਉਭਤੋਬ੍ਯਞ੍ਜਨਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਨਾਨਾਸਂਵਾਸਕਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਨਾਨਾਸੀਮਾਯ ਠਿਤਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਇਦ੍ਧਿਯਾ ਵੇਹਾਸੇ ਠਿਤਚਤੁਤ੍ਥੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਤਂਚਤੁਤ੍ਥੋ ਕਮ੍ਮਂ ਕਰੇਯ੍ਯ … ਅਕਮ੍ਮਂ ਨ ਚ ਕਰਣੀਯਂ.

ਚਤੁਵਰਣਂ.

੩੯੦. ਪਞ੍ਚਵਗ੍ਗਕਰਣਞ੍ਚੇ, ਭਿਕ੍ਖਵੇ, ਕਮ੍ਮਂ ਭਿਕ੍ਖੁਨਿਪਞ੍ਚਮੋ ਕਮ੍ਮਂ ਕਰੇਯ੍ਯ… ਅਕਮ੍ਮਂ ਨ ਚ ਕਰਣੀਯਂ. ਪਞ੍ਚਵਗ੍ਗਕਰਣਞ੍ਚੇ, ਭਿਕ੍ਖਵੇ, ਕਮ੍ਮਂ ਸਿਕ੍ਖਮਾਨਪਞ੍ਚਮੋ ਕਮ੍ਮਂ ਕਰੇਯ੍ਯ…ਪੇ…. ਸਾਮਣੇਰਪਞ੍ਚਮੋ ਕਮ੍ਮਂ ਕਰੇਯ੍ਯ… ਸਾਮਣੇਰਿਪਞ੍ਚਮੋ ਕਮ੍ਮਂ ਕਰੇਯ੍ਯ … ਸਿਕ੍ਖਂ ਪਚ੍ਚਕ੍ਖਾਤਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਪਣ੍ਡਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਥੇਯ੍ਯਸਂਵਾਸਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਤਿਤ੍ਥਿਯਪਕ੍ਕਨ੍ਤਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਤਿਰਚ੍ਛਾਨਗਤਪਞ੍ਚਮੋ ਕਮ੍ਮਂ ਕਰੇਯ੍ਯ… ਮਾਤੁਘਾਤਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਪਿਤੁਘਾਤਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਅਰਹਨ੍ਤਘਾਤਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਭਿਕ੍ਖੁਨਿਦੂਸਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਸਙ੍ਘਭੇਦਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਲੋਹਿਤੁਪ੍ਪਾਦਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਉਭਤੋਬ੍ਯਞ੍ਜਨਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਨਾਨਾਸਂਵਾਸਕਪਞ੍ਚਮੋ ਕਮ੍ਮਂ ਕਰੇਯ੍ਯ… ਨਾਨਾਸੀਮਾਯ ਠਿਤਪਞ੍ਚਮੋ ਕਮ੍ਮਂ ਕਰੇਯ੍ਯ… ਇਦ੍ਧਿਯਾ ਵੇਹਾਸੇ ਠਿਤਪਞ੍ਚਮੋ ਕਮ੍ਮਂ ਕਰੇਯ੍ਯ… ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਤਂਪਞ੍ਚਮੋ ਕਮ੍ਮਂ ਕਰੇਯ੍ਯ – ਅਕਮ੍ਮਂ ਨ ਚ ਕਰਣੀਯਂ.

ਪਞ੍ਚਵਗ੍ਗਕਰਣਂ.

੩੯੧. ਦਸਵਗ੍ਗਕਰਣਞ੍ਚੇ, ਭਿਕ੍ਖਵੇ, ਕਮ੍ਮਂ ਭਿਕ੍ਖੁਨਿਦਸਮੋ ਕਮ੍ਮਂ ਕਰੇਯ੍ਯ, ਅਕਮ੍ਮਂ ਨ ਚ ਕਰਣੀਯਂ. ਦਸਵਗ੍ਗਕਰਣਞ੍ਚੇ, ਭਿਕ੍ਖਵੇ, ਕਮ੍ਮਂ ਸਿਕ੍ਖਮਾਨਦਸਮੋ ਕਮ੍ਮਂ ਕਰੇਯ੍ਯ, ਅਕਮ੍ਮਂ ਨ ਚ ਕਰਣੀਯਂ…ਪੇ…. ਦਸਵਗ੍ਗਕਰਣਞ੍ਚੇ, ਭਿਕ੍ਖਵੇ, ਕਮ੍ਮਂ ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਤਂਦਸਮੋ ਕਮ੍ਮਂ ਕਰੇਯ੍ਯ – ਅਕਮ੍ਮਂ ਨ ਚ ਕਰਣੀਯਂ.

ਦਸਵਗ੍ਗਕਰਣਂ.

੩੯੨. ਵੀਸਤਿਵਗ੍ਗਕਰਣਞ੍ਚੇ, ਭਿਕ੍ਖਵੇ, ਕਮ੍ਮਂ ਭਿਕ੍ਖੁਨਿਵੀਸੋ ਕਮ੍ਮਂ ਕਰੇਯ੍ਯ – ਅਕਮ੍ਮਂ ਨ ਚ ਕਰਣੀਯਂ. ਵੀਸਤਿਵਗ੍ਗਕਰਣਞ੍ਚੇ, ਭਿਕ੍ਖਵੇ, ਕਮ੍ਮਂ ਸਿਕ੍ਖਮਾਨਵੀਸੋ ਕਮ੍ਮਂ ਕਰੇਯ੍ਯ …ਪੇ… ਸਾਮਣੇਰਵੀਸੋ ਕਮ੍ਮਂ ਕਰੇਯ੍ਯ… ਸਾਮਣੇਰਿਵੀਸੋ ਕਮ੍ਮਂ ਕਰੇਯ੍ਯ… ਸਿਕ੍ਖਂ ਪਚ੍ਚਕ੍ਖਾਤਕਵੀਸੋ ਕਮ੍ਮਂ ਕਰੇਯ੍ਯ… ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕਵੀਸੋ ਕਮ੍ਮਂ ਕਰੇਯ੍ਯ… ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕਵੀਸੋ ਕਮ੍ਮਂ ਕਰੇਯ੍ਯ… ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕਵੀਸੋ ਕਮ੍ਮਂ ਕਰੇਯ੍ਯ… ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕਵੀਸੋ ਕਮ੍ਮਂ ਕਰੇਯ੍ਯ… ਪਣ੍ਡਕਵੀਸੋ ਕਮ੍ਮਂ ਕਰੇਯ੍ਯ… ਥੇਯ੍ਯਸਂਵਾਸਕਵੀਸੋ ਕਮ੍ਮਂ ਕਰੇਯ੍ਯ… ਤਿਤ੍ਥਿਯਪਕ੍ਕਨ੍ਤਕਵੀਸੋ ਕਮ੍ਮਂ ਕਰੇਯ੍ਯ… ਤਿਰਚ੍ਛਾਨਗਤਵੀਸੋ ਕਮ੍ਮਂ ਕਰੇਯ੍ਯ… ਮਾਤੁਘਾਤਕਵੀਸੋ ਕਮ੍ਮਂ ਕਰੇਯ੍ਯ… ਪਿਤੁਘਾਤਕਵੀਸੋ ਕਮ੍ਮਂ ਕਰੇਯ੍ਯ… ਅਰਹਨ੍ਤਘਾਤਕਵੀਸੋ ਕਮ੍ਮਂ ਕਰੇਯ੍ਯ… ਭਿਕ੍ਖੁਨਿਦੂਸਕਵੀਸੋ ਕਮ੍ਮਂ ਕਰੇਯ੍ਯ… ਸਙ੍ਘਭੇਦਕਵੀਸੋ ਕਮ੍ਮਂ ਕਰੇਯ੍ਯ… ਲੋਹਿਤੁਪ੍ਪਾਦਕਵੀਸੋ ਕਮ੍ਮਂ ਕਰੇਯ੍ਯ… ਉਭਤੋਬ੍ਯਞ੍ਜਨਕਵੀਸੋ ਕਮ੍ਮਂ ਕਰੇਯ੍ਯ… ਨਾਨਾਸਂਵਾਸਕਵੀਸੋ ਕਮ੍ਮਂ ਕਰੇਯ੍ਯ… ਨਾਨਾਸੀਮਾਯ ਠਿਤਵੀਸੋ ਕਮ੍ਮਂ ਕਰੇਯ੍ਯ… ਇਦ੍ਧਿਯਾ ਵੇਹਾਸੇ ਠਿਤਵੀਸੋ ਕਮ੍ਮਂ ਕਰੇਯ੍ਯ… ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਤਂਵੀਸੋ ਕਮ੍ਮਂ ਕਰੇਯ੍ਯ – ਅਕਮ੍ਮਂ ਨ ਚ ਕਰਣੀਯਂ.

ਵੀਸਤਿਵਗ੍ਗਕਰਣਂ.

ਚਤੁਵਗ੍ਗਕਰਣਾਦਿਕਥਾ ਨਿਟ੍ਠਿਤਾ.

੨੩੮. ਪਾਰਿਵਾਸਿਕਾਦਿਕਥਾ

੩੯੩. ਪਾਰਿਵਾਸਿਕਚਤੁਤ੍ਥੋ ਚੇ, ਭਿਕ੍ਖਵੇ, ਪਰਿਵਾਸਂ ਦਦੇਯ੍ਯ, ਮੂਲਾਯ ਪਟਿਕਸ੍ਸੇਯ੍ਯ, ਮਾਨਤ੍ਤਂ ਦਦੇਯ੍ਯ, ਤਂਵੀਸੋ ਅਬ੍ਭੇਯ੍ਯ – ਅਕਮ੍ਮਂ ਨ ਚ ਕਰਣੀਯਂ. ਮੂਲਾਯ ਪਟਿਕਸ੍ਸਨਾਰਹਚਤੁਤ੍ਥੋ ਚੇ, ਭਿਕ੍ਖਵੇ, ਪਰਿਵਾਸਂ ਦਦੇਯ੍ਯ, ਮੂਲਾਯ ਪਟਿਕਸ੍ਸੇਯ੍ਯ, ਮਾਨਤ੍ਤਂ ਦਦੇਯ੍ਯ, ਤਂਵੀਸੋ ਅਬ੍ਭੇਯ੍ਯ – ਅਕਮ੍ਮਂ ਨ ਚ ਕਰਣੀਯਂ. ਮਾਨਤ੍ਤਾਰਹਚਤੁਤ੍ਥੋ ਚੇ, ਭਿਕ੍ਖਵੇ, ਪਰਿਵਾਸਂ ਦਦੇਯ੍ਯ, ਮੂਲਾਯ ਪਟਿਕਸ੍ਸੇਯ੍ਯ, ਮਾਨਤ੍ਤਂ ਦਦੇਯ੍ਯ, ਤਂਵੀਸੋ ਅਬ੍ਭੇਯ੍ਯ – ਅਕਮ੍ਮਂ ਨ ਚ ਕਰਣੀਯਂ. ਮਾਨਤ੍ਤਚਾਰਿਕਚਤੁਤ੍ਥੋ ਚੇ, ਭਿਕ੍ਖਵੇ, ਪਰਿਵਾਸਂ ਦਦੇਯ੍ਯ, ਮੂਲਾਯ ਪਟਿਕਸ੍ਸੇਯ੍ਯ, ਮਾਨਤ੍ਤਂ ਦਦੇਯ੍ਯ, ਤਂਵੀਸੋ ਅਬ੍ਭੇਯ੍ਯ – ਅਕਮ੍ਮਂ ਨ ਚ ਕਰਣੀਯਂ. ਅਬ੍ਭਾਨਾਰਹਚਤੁਤ੍ਥੋ ਚੇ, ਭਿਕ੍ਖਵੇ, ਪਰਿਵਾਸਂ ਦਦੇਯ੍ਯ, ਮੂਲਾਯ ਪਟਿਕਸ੍ਸੇਯ੍ਯ, ਮਾਨਤ੍ਤਂ ਦਦੇਯ੍ਯ, ਤਂਵੀਸੋ ਅਬ੍ਭੇਯ੍ਯ – ਅਕਮ੍ਮਂ ਨ ਚ ਕਰਣੀਯਂ.

੩੯੪. ਏਕਚ੍ਚਸ੍ਸ, ਭਿਕ੍ਖਵੇ, ਸਙ੍ਘਮਜ੍ਝੇ ਪਟਿਕ੍ਕੋਸਨਾ ਰੁਹਤਿ, ਏਕਚ੍ਚਸ੍ਸ ਨ ਰੁਹਤਿ. ਕਸ੍ਸ ਚ, ਭਿਕ੍ਖਵੇ, ਸਙ੍ਘਮਜ੍ਝੇ ਪਟਿਕ੍ਕੋਸਨਾ ਨ ਰੁਹਤਿ? ਭਿਕ੍ਖੁਨਿਯਾ, ਭਿਕ੍ਖਵੇ, ਸਙ੍ਘਮਜ੍ਝੇ ਪਟਿਕ੍ਕੋਸਨਾ ਨ ਰੁਹਤਿ. ਸਿਕ੍ਖਮਾਨਾਯ, ਭਿਕ੍ਖਵੇ…ਪੇ… ਸਾਮਣੇਰਸ੍ਸ, ਭਿਕ੍ਖਵੇ… ਸਾਮਣੇਰਿਯਾ, ਭਿਕ੍ਖਵੇ… ਸਿਕ੍ਖਾਪਚ੍ਚਕ੍ਖਾਤਕਸ੍ਸ ਭਿਕ੍ਖਵੇ… ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕਸ੍ਸ, ਭਿਕ੍ਖਵੇ … ਉਮ੍ਮਤ੍ਤਕਸ੍ਸ, ਭਿਕ੍ਖਵੇ… ਖਿਤ੍ਤਚਿਤ੍ਤਸ੍ਸ, ਭਿਕ੍ਖਵੇ… ਵੇਦਨਾਟ੍ਟਸ੍ਸ, ਭਿਕ੍ਖਵੇ… ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕਸ੍ਸ, ਭਿਕ੍ਖਵੇ… ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕਸ੍ਸ, ਭਿਕ੍ਖਵੇ… ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕਸ੍ਸ, ਭਿਕ੍ਖਵੇ… ਪਣ੍ਡਕਸ੍ਸ, ਭਿਕ੍ਖਵੇ… ਥੇਯ੍ਯਸਂਵਾਸਕਸ੍ਸ, ਭਿਕ੍ਖਵੇ… ਤਿਤ੍ਥਿਯਪਕ੍ਕਨ੍ਤਕਸ੍ਸ, ਭਿਕ੍ਖਵੇ … ਤਿਰਚ੍ਛਾਨਗਤਸ੍ਸ ਭਿਕ੍ਖਵੇ… ਮਾਤੁਘਾਤਕਸ੍ਸ, ਭਿਕ੍ਖਵੇ… ਪਿਤੁਘਾਤਕਸ੍ਸ, ਭਿਕ੍ਖਵੇ… ਅਰਹਨ੍ਤਘਾਤਕਸ੍ਸ, ਭਿਕ੍ਖਵੇ… ਭਿਕ੍ਖੁਨਿਦੂਸਕਸ੍ਸ, ਭਿਕ੍ਖਵੇ… ਸਙ੍ਘਭੇਦਕਸ੍ਸ, ਭਿਕ੍ਖਵੇ… ਲੋਹਿਤੁਪ੍ਪਾਦਕਸ੍ਸ, ਭਿਕ੍ਖਵੇ… ਉਭਤੋਬ੍ਯਞ੍ਜਨਕਸ੍ਸ, ਭਿਕ੍ਖਵੇ… ਨਾਨਾਸਂਵਾਸਕਸ੍ਸ, ਭਿਕ੍ਖਵੇ… ਨਾਨਾਸੀਮਾਯ ਠਿਤਸ੍ਸ, ਭਿਕ੍ਖਵੇ… ਇਦ੍ਧਿਯਾ ਵੇਹਾਸੇ ਠਿਤਸ੍ਸ, ਭਿਕ੍ਖਵੇ, ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਤਸ੍ਸ ਚ [ਤਸ੍ਸ (ਸ੍ਯਾ.)], ਭਿਕ੍ਖਵੇ, ਸਙ੍ਘਮਜ੍ਝੇ ਪਟਿਕ੍ਕੋਸਨਾ ਨ ਰੁਹਤਿ. ਇਮੇਸਂ ਖੋ, ਭਿਕ੍ਖਵੇ, ਸਙ੍ਘਮਜ੍ਝੇ ਪਟਿਕ੍ਕੋਸਨਾ ਨ ਰੁਹਤਿ.

ਕਸ੍ਸ ਚ, ਭਿਕ੍ਖਵੇ, ਸਙ੍ਘਮਜ੍ਝੇ ਪਟਿਕ੍ਕੋਸਨਾ ਰੁਹਤਿ? ਭਿਕ੍ਖੁਸ੍ਸ, ਭਿਕ੍ਖਵੇ, ਪਕਤਤ੍ਤਸ੍ਸ

ਸਮਾਨਸਂਵਾਸਕਸ੍ਸ ਸਮਾਨਸੀਮਾਯ ਠਿਤਸ੍ਸ ਅਨ੍ਤਮਸੋ ਆਨਨ੍ਤਰਿਕਸ੍ਸਾਪਿ [ਅਨਨ੍ਤਰਿਕਸ੍ਸਾਪਿ (ਸ੍ਯਾ.)] ਭਿਕ੍ਖੁਨੋ ਵਿਞ੍ਞਾਪੇਨ੍ਤਸ੍ਸ ਸਙ੍ਘਮਜ੍ਝੇ ਪਟਿਕ੍ਕੋਸਨਾ ਰੁਹਤਿ. ਇਮਸ੍ਸ ਖੋ, ਭਿਕ੍ਖਵੇ, ਸਙ੍ਘਮਜ੍ਝੇ ਪਟਿਕ੍ਕੋਸਨਾ ਰੁਹਤਿ.

ਪਾਰਿਵਾਸਿਕਾਦਿਕਥਾ ਨਿਟ੍ਠਿਤਾ.

੨੩੯. ਦ੍ਵੇਨਿਸ੍ਸਾਰਣਾਦਿਕਥਾ

੩੯੫. ਦ੍ਵੇਮਾ, ਭਿਕ੍ਖਵੇ, ਨਿਸ੍ਸਾਰਣਾ. ਅਤ੍ਥਿ, ਭਿਕ੍ਖਵੇ, ਪੁਗ੍ਗਲੋ ਅਪ੍ਪਤ੍ਤੋ ਨਿਸ੍ਸਾਰਣਂ. ਤਞ੍ਚੇ ਸਙ੍ਘੋ ਨਿਸ੍ਸਾਰੇਤਿ, ਏਕਚ੍ਚੋ ਸੁਨਿਸ੍ਸਾਰਿਤੋ, ਏਕਚ੍ਚੋ ਦੁਨ੍ਨਿਸ੍ਸਾਰਿਤੋ. ਕਤਮੋ ਚ, ਭਿਕ੍ਖਵੇ, ਪੁਗ੍ਗਲੋ ਅਪ੍ਪਤ੍ਤੋ ਨਿਸ੍ਸਾਰਣਂ, ਤਞ੍ਚੇ ਸਙ੍ਘੋ ਨਿਸ੍ਸਾਰੇਤਿ – ਦੁਨ੍ਨਿਸ੍ਸਾਰਿਤੋ? ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸੁਦ੍ਧੋ ਹੋਤਿ ਅਨਾਪਤ੍ਤਿਕੋ. ਤਞ੍ਚੇ ਸਙ੍ਘੋ ਨਿਸ੍ਸਾਰੇਤਿ – ਦੁਨ੍ਨਿਸ੍ਸਾਰਿਤੋ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਪੁਗ੍ਗਲੋ ਅਪ੍ਪਤ੍ਤੋ ਨਿਸ੍ਸਾਰਣਂ, ਤਞ੍ਚੇ ਸਙ੍ਘੋ ਨਿਸ੍ਸਾਰੇਤਿ – ਦੁਨ੍ਨਿਸ੍ਸਾਰਿਤੋ.

ਕਤਮੋ ਚ, ਭਿਕ੍ਖਵੇ, ਪੁਗ੍ਗਲੋ ਅਪ੍ਪਤ੍ਤੋ ਨਿਸ੍ਸਾਰਣਂ, ਤਞ੍ਚੇ ਸਙ੍ਘੋ ਨਿਸ੍ਸਾਰੇਤਿ – ਸੁਨਿਸ੍ਸਾਰਿਤੋ? ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ, ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ, ਤਞ੍ਚੇ ਸਙ੍ਘੋ ਨਿਸ੍ਸਾਰੇਤਿ – ਸੁਨਿਸ੍ਸਾਰਿਤੋ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਪੁਗ੍ਗਲੋ ਅਪ੍ਪਤ੍ਤੋ ਨਿਸ੍ਸਾਰਣਂ, ਤਞ੍ਚੇ ਸਙ੍ਘੋ ਨਿਸ੍ਸਾਰੇਤਿ – ਸੁਨਿਸ੍ਸਾਰਿਤੋ.

੩੯੬. ਦ੍ਵੇਮਾ, ਭਿਕ੍ਖਵੇ, ਓਸਾਰਣਾ. ਅਤ੍ਥਿ, ਭਿਕ੍ਖਵੇ, ਪੁਗ੍ਗਲੋ ਅਪ੍ਪਤ੍ਤੋ ਓਸਾਰਣਂ ਤਞ੍ਚੇ ਸਙ੍ਘੋ ਓਸਾਰੇਤਿ, ਏਕਚ੍ਚੋ ਸੋਸਾਰਿਤੋ, ਏਕਚ੍ਚੋ ਦੋਸਾਰਿਤੋ. ਕਤਮੋ ਚ, ਭਿਕ੍ਖਵੇ, ਪੁਗ੍ਗਲੋ ਅਪ੍ਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ – ਦੋਸਾਰਿਤੋ? ਪਣ੍ਡਕੋ, ਭਿਕ੍ਖਵੇ, ਅਪ੍ਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ – ਦੋਸਾਰਿਤੋ. ਥੇਯ੍ਯਸਂਵਾਸਕੋ, ਭਿਕ੍ਖਵੇ, ਅਪ੍ਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ – ਦੋਸਾਰਿਤੋ. ਤਿਤ੍ਥਿਯਪਕ੍ਕਨ੍ਤਕੋ, ਭਿਕ੍ਖਵੇ…ਪੇ… ਤਿਰਚ੍ਛਾਨਗਤੋ, ਭਿਕ੍ਖਵੇ… ਮਾਤੁਘਾਤਕੋ, ਭਿਕ੍ਖਵੇ… ਪਿਤੁਘਾਤਕੋ, ਭਿਕ੍ਖਵੇ… ਅਰਹਨ੍ਤਘਾਤਕੋ, ਭਿਕ੍ਖਵੇ… ਭਿਕ੍ਖੁਨਿਦੂਸਕੋ, ਭਿਕ੍ਖਵੇ… ਸਙ੍ਘਭੇਦਕੋ, ਭਿਕ੍ਖਵੇ… ਲੋਹਿਤੁਪ੍ਪਾਦਕੋ, ਭਿਕ੍ਖਵੇ… ਉਭਤੋਬ੍ਯਞ੍ਜਨਕੋ, ਭਿਕ੍ਖਵੇ, ਅਪ੍ਪਤ੍ਤੋ, ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ – ਦੋਸਾਰਿਤੋ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਪੁਗ੍ਗਲੋ ਅਪ੍ਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ – ਦੋਸਾਰਿਤੋ. ਇਮੇ ਵੁਚ੍ਚਨ੍ਤਿ, ਭਿਕ੍ਖਵੇ, ਪੁਗ੍ਗਲਾ ਅਪ੍ਪਤ੍ਤਾ ਓਸਾਰਣਂ, ਤੇ ਚੇ ਸਙ੍ਘੋ ਓਸਾਰੇਤਿ – ਦੋਸਾਰਿਤਾ.

ਕਤਮੋ ਚ, ਭਿਕ੍ਖਵੇ, ਪੁਗ੍ਗਲੋ ਅਪ੍ਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ – ਸੋਸਾਰਿਤੋ? ਹਤ੍ਥਚ੍ਛਿਨ੍ਨੋ, ਭਿਕ੍ਖਵੇ, ਅਪ੍ਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ, ਸੋਸਾਰਿਤੋ. ਪਾਦਚ੍ਛਿਨ੍ਨੋ, ਭਿਕ੍ਖਵੇ…ਪੇ… ਹਤ੍ਥਪਾਦਚ੍ਛਿਨ੍ਨੋ, ਭਿਕ੍ਖਵੇ… ਕਣ੍ਣਚ੍ਛਿਨ੍ਨੋ, ਭਿਕ੍ਖਵੇ… ਨਾਸਚ੍ਛਿਨ੍ਨੋ, ਭਿਕ੍ਖਵੇ… ਕਣ੍ਣਨਾਸਚ੍ਛਿਨ੍ਨੋ, ਭਿਕ੍ਖਵੇ… ਅਙ੍ਗੁਲਿਚ੍ਛਿਨ੍ਨੋ, ਭਿਕ੍ਖਵੇ… ਅਲ਼ਚ੍ਛਿਨ੍ਨੋ, ਭਿਕ੍ਖਵੇ… ਕਣ੍ਡਰਚ੍ਛਿਨ੍ਨੋ, ਭਿਕ੍ਖਵੇ… ਫਣਹਤ੍ਥਕੋ, ਭਿਕ੍ਖਵੇ… ਖੁਜ੍ਜੋ, ਭਿਕ੍ਖਵੇ… ਵਾਮਨੋ, ਭਿਕ੍ਖਵੇ… ਗਲਗਣ੍ਡੀ, ਭਿਕ੍ਖਵੇ… ਲਕ੍ਖਣਾਹਤੋ, ਭਿਕ੍ਖਵੇ… ਕਸਾਹਤੋ, ਭਿਕ੍ਖਵੇ… ਲਿਖਿਤਕੋ, ਭਿਕ੍ਖਵੇ… ਸੀਪਦਿਕੋ, ਭਿਕ੍ਖਵੇ… ਪਾਪਰੋਗੀ, ਭਿਕ੍ਖਵੇ… ਪਰਿਸਦੂਸਕੋ, ਭਿਕ੍ਖਵੇ… ਕਾਣੋ, ਭਿਕ੍ਖਵੇ… ਕੁਣੀ, ਭਿਕ੍ਖਵੇ… ਖਞ੍ਜੋ, ਭਿਕ੍ਖਵੇ… ਪਕ੍ਖਹਤੋ, ਭਿਕ੍ਖਵੇ… ਛਿਨ੍ਨਿਰਿਯਾਪਥੋ, ਭਿਕ੍ਖਵੇ… ਜਰਾਦੁਬ੍ਬਲੋ, ਭਿਕ੍ਖਵੇ… ਅਨ੍ਧੋ, ਭਿਕ੍ਖਵੇ… ਮੂਗੋ, ਭਿਕ੍ਖਵੇ… ਬਧਿਰੋ, ਭਿਕ੍ਖਵੇ… ਅਨ੍ਧਮੂਗੋ, ਭਿਕ੍ਖਵੇ… ਅਨ੍ਧਬਧਿਰੋ, ਭਿਕ੍ਖਵੇ… ਮੂਗਬਧਿਰੋ, ਭਿਕ੍ਖਵੇ… ਅਨ੍ਧਮੂਗਬਧਿਰੋ, ਭਿਕ੍ਖਵੇ, ਅਪ੍ਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ – ਸੋਸਾਰਿਤੋ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਪੁਗ੍ਗਲੋ ਅਪ੍ਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ – ਸੋਸਾਰਿਤੋ. ਇਮੇ ਵੁਚ੍ਚਨ੍ਤਿ, ਭਿਕ੍ਖਵੇ, ਪੁਗ੍ਗਲਾ ਅਪ੍ਪਤ੍ਤਾ ਓਸਾਰਣਂ, ਤੇ ਚੇ ਸਙ੍ਘੋ ਓਸਾਰੇਤਿ – ਸੋਸਾਰਿਤਾ.

ਦ੍ਵੇਨਿਸ੍ਸਾਰਣਾਦਿਕਥਾ ਨਿਟ੍ਠਿਤਾ.

ਵਾਸਭਗਾਮਭਾਣਵਾਰੋ ਨਿਟ੍ਠਿਤੋ ਪਠਮੋ.

੨੪੦. ਅਧਮ੍ਮਕਮ੍ਮਾਦਿਕਥਾ

੩੯੭. ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਨ ਹੋਤਿ ਆਪਤ੍ਤਿ ਦਟ੍ਠਬ੍ਬਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿ’’ਨ੍ਤਿ? ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਸ੍ਸੇਯ੍ਯ’’ਨ੍ਤਿ. ਤਂ ਸਙ੍ਘੋ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਨ ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਟਿਕਰੋਹਿ ਤਂ ਆਪਤ੍ਤਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਯਂ ਪਟਿਕਰੇਯ੍ਯ’’ਨ੍ਤਿ. ਤਂ ਸਙ੍ਘੋ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਨ ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਪਾਪਿਕਾ ਤੇ, ਆਵੁਸੋ, ਦਿਟ੍ਠਿ, ਪਟਿਨਿਸ੍ਸਜ੍ਜੇਤਂ ਪਾਪਿਕਂ ਦਿਟ੍ਠਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਪਾਪਿਕਾ ਦਿਟ੍ਠਿ, ਯਮਹਂ ਪਟਿਨਿਸ੍ਸਜ੍ਜੇਯ੍ਯ’’ਨ੍ਤਿ. ਤਂ ਸਙ੍ਘੋ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਨ ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਨ ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿ? ਪਟਿਕਰੋਹਿ ਤਂ ਆਪਤ੍ਤਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਸ੍ਸੇਯ੍ਯਂ. ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਟਿਕਰੇਯ੍ਯ’’ਨ੍ਤਿ. ਤਂ ਸਙ੍ਘੋ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਨ ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਨ ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿਂ? ਪਾਪਿਕਾ ਤੇ ਦਿਟ੍ਠਿ, ਪਟਿਨਿਸ੍ਸਜ੍ਜੇਤਂ ਪਾਪਿਕਂ ਦਿਟ੍ਠਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਸ੍ਸੇਯ੍ਯਂ; ਨਤ੍ਥਿ ਮੇ, ਆਵੁਸੋ, ਪਾਪਿਕਾ ਦਿਟ੍ਠਿ, ਯਮਹਂ ਪਟਿਨਿਸ੍ਸਜ੍ਜੇਯ੍ਯ’’ਨ੍ਤਿ. ਤਂ ਸਙ੍ਘੋ ਅਦਸ੍ਸਨੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਨ ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ, ਨ ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਟਿਕਰੋਹਿ ਤਂ ਆਪਤ੍ਤਿਂ; ਪਾਪਿਕਾ ਤੇ ਦਿਟ੍ਠਿ, ਪਟਿਨਿਸ੍ਸਜ੍ਜੇਤਂ ਪਾਪਿਕਂ ਦਿਟ੍ਠਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਟਿਕਰੇਯ੍ਯਂ. ਨਤ੍ਥਿ ਮੇ, ਆਵੁਸੋ, ਪਾਪਿਕਾ ਦਿਟ੍ਠਿ, ਯਮਹਂ ਪਟਿਨਿਸ੍ਸਜ੍ਜੇਯ੍ਯ’’ਨ੍ਤਿ. ਤਂ ਸਙ੍ਘੋ ਅਪ੍ਪਟਿਕਮ੍ਮੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਨ ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਨ ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ, ਨ ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿਂ? ਪਟਿਕਰੋਹਿ ਤਂ ਆਪਤ੍ਤਿਂ; ਪਾਪਿਕਾ ਤੇ ਦਿਟ੍ਠਿ, ਪਟਿਨਿਸ੍ਸਜ੍ਜੇਤਂ ਪਾਪਿਕਂ ਦਿਟ੍ਠਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਸ੍ਸੇਯ੍ਯਂ. ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਟਿਕਰੇਯ੍ਯਂ. ਨਤ੍ਥਿ ਮੇ, ਆਵੁਸੋ, ਪਾਪਿਕਾ ਦਿਟ੍ਠਿ, ਯਮਹਂ ਪਟਿਨਿਸ੍ਸਜ੍ਜੇਯ੍ਯ’’ਨ੍ਤਿ. ਤਂ ਸਙ੍ਘੋ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

੩੯੮. ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਹੋਤਿ ਆਪਤ੍ਤਿ ਦਟ੍ਠਬ੍ਬਾ. ਤਮੇਨਂ ਚੋਦੇਤਿ. ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿ’’ਨ੍ਤਿ? ਸੋ ਏਵਂ ਵਦੇਤਿ – ‘‘ਆਮਾਵੁਸੋ, ਪਸ੍ਸਾਮੀ’’ਤਿ. ਤਂ ਸਙ੍ਘੋ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਟਿਕਰੋਹਿ ਤਂ ਆਪਤ੍ਤਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਆਮਾਵੁਸੋ, ਪਟਿਕਰਿਸ੍ਸਾਮੀ’’ਤਿ. ਤਂ ਸਙ੍ਘੋ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਪਾਪਿਕਾ ਤੇ, ਆਵੁਸੋ, ਦਿਟ੍ਠਿ; ਪਟਿਨਿਸ੍ਸਜ੍ਜੇਤਂ ਪਾਪਿਕਂ ਦਿਟ੍ਠਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਆਮਾਵੁਸੋ, ਪਟਿਨਿਸ੍ਸਜ੍ਜਿਸ੍ਸਾਮੀ’’ਤਿ. ਤਂ ਸਙ੍ਘੋ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ…ਪੇ… ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ…ਪੇ… ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ, ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ…ਪੇ… ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ, ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿਂ? ਪਟਿਕਰੋਹਿ ਤਂ ਆਪਤ੍ਤਿਂ; ਪਾਪਿਕਾ ਤੇ ਦਿਟ੍ਠਿ, ਪਟਿਨਿਸ੍ਸਜ੍ਜੇਤਂ ਪਾਪਿਕਂ ਦਿਟ੍ਠਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਆਮਾਵੁਸੋ, ਪਸ੍ਸਾਮਿ, ਆਮ ਪਟਿਕਰਿਸ੍ਸਾਮਿ, ਆਮ ਪਟਿਨਿਸ੍ਸਜ੍ਜਿਸ੍ਸਾਮੀ’’ਤਿ. ਤਂ ਸਙ੍ਘੋ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ ਉਕ੍ਖਿਪਤਿ – ਅਧਮ੍ਮਕਮ੍ਮਂ.

੩੯੯. ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਹੋਤਿ ਆਪਤ੍ਤਿ ਦਟ੍ਠਬ੍ਬਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿ’’ਨ੍ਤਿ? ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਸ੍ਸੇਯ੍ਯ’’ਨ੍ਤਿ. ਤਂ ਸਙ੍ਘੋ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਤਿ – ਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਟਿਕਰੋਹਿ ਤਂ ਆਪਤ੍ਤਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਟਿਕਰੇਯ੍ਯ’’ਨ੍ਤਿ. ਤਂ ਸਙ੍ਘੋ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਪਤਿ – ਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਪਾਪਿਕਾ ਤੇ, ਆਵੁਸੋ, ਦਿਟ੍ਠਿ, ਪਟਿਨਿਸ੍ਸਜ੍ਜੇਤਂ ਪਾਪਿਕਂ ਦਿਟ੍ਠਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਪਾਪਿਕਾ ਦਿਟ੍ਠਿ, ਯਮਹਂ ਪਟਿਨਿਸ੍ਸਜ੍ਜੇਯ੍ਯ’’ਨ੍ਤਿ. ਤਂ ਸਙ੍ਘੋ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਪਤਿ – ਧਮ੍ਮਕਮ੍ਮਂ.

ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ…ਪੇ…

ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ…ਪੇ… ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ, ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ …ਪੇ… ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਹੋਤਿ ਆਪਤ੍ਤਿ ਪਟਿਕਾਤਬ੍ਬਾ, ਹੋਤਿ ਪਾਪਿਕਾ ਦਿਟ੍ਠਿ ਪਟਿਨਿਸ੍ਸਜ੍ਜੇਤਾ. ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿਂ? ਪਟਿਕਰੋਹਿ ਤਂ ਆਪਤ੍ਤਿਂ. ਪਾਪਿਕਾ ਤੇ ਦਿਟ੍ਠਿ, ਪਟਿਨਿਸ੍ਸਜ੍ਜੇਤਂ ਪਾਪਿਕਂ ਦਿਟ੍ਠਿ’’ਨ੍ਤਿ. ਸੋ ਏਵਂ ਵਦੇਤਿ – ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਸ੍ਸੇਯ੍ਯਂ. ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ ਯਮਹਂ ਪਟਿਕਰੇਯ੍ਯਂ. ਨਤ੍ਥਿ ਮੇ, ਆਵੁਸੋ, ਪਾਪਿਕਾ ਦਿਟ੍ਠਿ, ਯਮਹਂ ਪਟਿਨਿਸ੍ਸਜ੍ਜੇਯ੍ਯ’’ਨ੍ਤਿ. ਤਂ ਸਙ੍ਘੋ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ ਉਕ੍ਖਿਪਤਿ – ਧਮ੍ਮਕਮ੍ਮਨ੍ਤਿ.

ਅਧਮ੍ਮਕਮ੍ਮਾਦਿਕਥਾ ਨਿਟ੍ਠਿਤਾ.

੨੪੧. ਉਪਾਲਿਪੁਚ੍ਛਾਕਥਾ

੪੦੦. ਅਥ ਖੋ ਆਯਸ੍ਮਾ ਉਪਾਲਿ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਉਪਾਲਿ ਭਗਵਨ੍ਤਂ ਏਤਦਵੋਚ – ‘‘ਯੋ ਨੁ ਖੋ, ਭਨ੍ਤੇ, ਸਮਗ੍ਗੋ ਸਙ੍ਘੋ ਸਮ੍ਮੁਖਾਕਰਣੀਯਂ ਕਮ੍ਮਂ ਅਸਮ੍ਮੁਖਾ ਕਰੋਤਿ, ਧਮ੍ਮਕਮ੍ਮਂ ਨੁ ਖੋ ਤਂ, ਭਨ੍ਤੇ, ਵਿਨਯਕਮ੍ਮ’’ਨ੍ਤਿ? ‘‘ਅਧਮ੍ਮਕਮ੍ਮਂ ਤਂ, ਉਪਾਲਿ, ਅਵਿਨਯਕਮ੍ਮ’’ਨ੍ਤਿ. ‘‘ਯੋ ਨੁ ਖੋ, ਭਨ੍ਤੇ, ਸਮਗ੍ਗੋ ਸਙ੍ਘੋ ਪਟਿਪੁਚ੍ਛਾਕਰਣੀਯਂ ਕਮ੍ਮਂ ਅਪ੍ਪਟਿਪੁਚ੍ਛਾ ਕਰੋਤਿ…ਪੇ… ਪਟਿਞ੍ਞਾਯਕਰਣੀਯਂ ਕਮ੍ਮਂ ਅਪਟਿਞ੍ਞਾਯ ਕਰੋਤਿ… ਸਤਿਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ… ਅਮੂਲ਼੍ਹਵਿਨਯਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ… ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ… ਤਜ੍ਜਨੀਯਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ … ਨਿਯਸ੍ਸਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ… ਪਬ੍ਬਾਜਨੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ… ਪਟਿਸਾਰਣੀਯਕਮ੍ਮਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ… ਉਕ੍ਖੇਪਨੀਯਕਮ੍ਮਾਰਹਸ੍ਸ ਪਰਿਵਾਸਂ ਦੇਤਿ… ਪਰਿਵਾਸਾਰਹਂ ਮੂਲਾਯ ਪਟਿਕਸ੍ਸਤਿ… ਮੂਲਾਯਪਟਿਕਸ੍ਸਨਾਰਹਸ੍ਸ ਮਾਨਤ੍ਤਂ ਦੇਤਿ… ਮਾਨਤ੍ਤਾਰਹਂ ਅਬ੍ਭੇਤਿ… ਅਬ੍ਭਾਨਾਰਹਂ ਉਪਸਮ੍ਪਾਦੇਤਿ, ਧਮ੍ਮਕਮ੍ਮਂ ਨੁ ਖੋ ਤਂ, ਭਨ੍ਤੇ, ਵਿਨਯਕਮ੍ਮ’’ਨ੍ਤਿ? ‘‘ਅਧਮ੍ਮਕਮ੍ਮਂ ਤਂ, ਉਪਾਲਿ, ਅਵਿਨਯਕਮ੍ਮਂ’’.

‘‘ਯੋ ਖੋ, ਉਪਾਲਿ, ਸਮਗ੍ਗੋ ਸਙ੍ਘੋ ਸਮ੍ਮੁਖਾਕਰਣੀਯਂ ਕਮ੍ਮਂ ਅਸਮ੍ਮੁਖਾ ਕਰੋਤਿ, ਏਵਂ ਖੋ, ਉਪਾਲਿ, ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ, ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤਿ. ਯੋ ਖੋ, ਉਪਾਲਿ, ਸਮਗ੍ਗੋ ਸਙ੍ਘੋ ਪਟਿਪੁਚ੍ਛਾਕਰਣੀਯਂ ਕਮ੍ਮਂ ਅਪ੍ਪਟਿਪੁਚ੍ਛਾ ਕਰੋਤਿ…ਪੇ… ਪਟਿਞ੍ਞਾਯਕਰਣੀਯਂ ਕਮ੍ਮਂ ਅਪਟਿਞ੍ਞਾਯ ਕਰੋਤਿ… ਸਤਿਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ… ਅਮੂਲ਼੍ਹਵਿਨਯਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ… ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ… ਤਜ੍ਜਨੀਯਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ… ਨਿਯਸ੍ਸਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ… ਪਬ੍ਬਾਜਨੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ… ਪਟਿਸਾਰਣੀਯਕਮ੍ਮਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ… ਉਕ੍ਖੇਪਨੀਯਕਮ੍ਮਾਰਹਸ੍ਸ ਪਰਿਵਾਸਂ ਦੇਤਿ… ਪਰਿਵਾਸਾਰਹਂ ਮੂਲਾਯ ਪਟਿਕਸ੍ਸਤਿ… ਮੂਲਾਯਪਟਿਕਸ੍ਸਨਾਰਹਸ੍ਸ ਮਾਨਤ੍ਤਂ ਦੇਤਿ… ਮਾਨਤ੍ਤਾਰਹਂ ਅਬ੍ਭੇਤਿ… ਅਬ੍ਭਾਨਾਰਹਂ ਉਪਸਮ੍ਪਾਦੇਤਿ, ਏਵਂ ਖੋ, ਉਪਾਲਿ, ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤੀ’’ਤਿ.

੪੦੧. ‘‘ਯੋ ਨੁ ਖੋ, ਭਨ੍ਤੇ, ਸਮਗ੍ਗੋ ਸਙ੍ਘੋ ਸਮ੍ਮੁਖਾਕਰਣੀਯਂ ਕਮ੍ਮਂ ਸਮ੍ਮੁਖਾ ਕਰੋਤਿ, ਧਮ੍ਮਕਮ੍ਮਂ ਨੁ ਖੋ ਤਂ, ਭਨ੍ਤੇ, ਵਿਨਯਕਮ੍ਮ’’ਨ੍ਤਿ? ‘‘ਧਮ੍ਮਕਮ੍ਮਂ ਤਂ, ਉਪਾਲਿ, ਵਿਨਯਕਮ੍ਮ’’ਨ੍ਤਿ. ‘‘ਯੋ ਨੁ ਖੋ, ਭਨ੍ਤੇ, ਸਮਗ੍ਗੋ ਸਙ੍ਘੋ ਪਟਿਪੁਚ੍ਛਾਕਰਣੀਯਂ ਕਮ੍ਮਂ ਪਟਿਪੁਚ੍ਛਾ ਕਰੋਤਿ…ਪੇ… ਪਟਿਞ੍ਞਾਯਕਰਣੀਯਂ ਕਮ੍ਮਂ ਪਟਿਞ੍ਞਾਯ ਕਰੋਤਿ… ਸਤਿਵਿਨਯਾਰਹਸ੍ਸ ਸਤਿਵਿਨਯਂ ਦੇਤਿ… ਅਮੂਲ਼੍ਹਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ… ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ… ਤਜ੍ਜਨੀਯਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ… ਨਿਯਸ੍ਸਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ… ਪਬ੍ਬਾਜਨੀਯਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ… ਪਟਿਸਾਰਣੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ… ਉਕ੍ਖੇਪਨੀਯਕਮ੍ਮਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ… ਪਰਿਵਾਸਾਰਹਸ੍ਸ ਪਰਿਵਾਸਂ ਦੇਤਿ ਮੂਲਾਯਪਟਿਕਸ੍ਸਨਾਰਹਂ ਮੂਲਾਯ ਪਟਿਕਸ੍ਸਤਿ… ਮਾਨਤ੍ਤਾਰਹਸ੍ਸ ਮਾਨਤ੍ਤਂ ਦੇਤਿ… ਅਬ੍ਭਾਨਾਰਹਂ ਅਬ੍ਭੇਤਿ… ਉਪਸਮ੍ਪਦਾਰਹਂ ਉਪਸਮ੍ਪਾਦੇਤਿ, ਧਮ੍ਮਕਮ੍ਮਂ ਨੁ ਖੋ ਤਂ, ਭਨ੍ਤੇ, ਵਿਨਯਕਮ੍ਮ’’ਨ੍ਤਿ? ‘‘ਧਮ੍ਮਕਮ੍ਮਂ ਤਂ, ਉਪਾਲਿ, ਵਿਨਯਕਮ੍ਮਂ.

‘‘ਯੋ ਖੋ, ਉਪਾਲਿ, ਸਮਗ੍ਗੋ ਸਙ੍ਘੋ ਸਮ੍ਮੁਖਾਕਰਣੀਯਂ ਕਮ੍ਮਂ ਸਮ੍ਮੁਖਾ ਕਰੋਤਿ, ਏਵਂ ਖੋ, ਉਪਾਲਿ, ਧਮ੍ਮਕਮ੍ਮਂ ਹੋਤਿ ਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਅਨਤਿਸਾਰੋ ਹੋਤਿ. ਯੋ ਖੋ, ਉਪਾਲਿ, ਸਮਗ੍ਗੋ ਸਙ੍ਘੋ ਪਟਿਪੁਚ੍ਛਾਕਰਣੀਯਂ ਕਮ੍ਮਂ ਪਟਿਪੁਚ੍ਛਾ ਕਰੋਤਿ… ਪਟਿਞ੍ਞਾਯਕਰਣੀਯਂ ਕਮ੍ਮਂ ਪਟਿਞ੍ਞਾਯ ਕਰੋਤਿ… ਸਤਿਵਿਨਯਾਰਹਸ੍ਸ ਸਤਿਵਿਨਯਂ ਦੇਤਿ… ਅਮੂਲ਼੍ਹਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ… ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ… ਤਜ੍ਜਨੀਯਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ… ਨਿਯਸ੍ਸਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ… ਪਬ੍ਬਾਜਨੀਯਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ … ਪਟਿਸਾਰਣੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ… ਉਕ੍ਖੇਪਨੀਯਕਮ੍ਮਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ… ਪਰਿਵਾਸਾਰਹਸ੍ਸ ਪਰਿਵਾਸਂ ਦੇਤਿ… ਮੂਲਾਯਪਟਿਕਸ੍ਸਨਾਰਹਂ ਮੂਲਾਯ ਪਟਿਕਸ੍ਸਤਿ… ਮਾਨਤ੍ਤਾਰਹਸ੍ਸ ਮਾਨਤ੍ਤਂ ਦੇਤਿ… ਅਬ੍ਭਾਨਾਰਹਂ ਅਬ੍ਭੇਤਿ… ਉਪਸਮ੍ਪਦਾਰਹਂ ਉਪਸਮ੍ਪਾਦੇਤਿ, ਏਵਂ ਖੋ, ਉਪਾਲਿ, ਧਮ੍ਮਕਮ੍ਮਂ ਹੋਤਿ ਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਅਨਤਿਸਾਰੋ ਹੋਤੀ’’ਤਿ.

੪੦੨. ‘‘ਯੋ ਨੁ ਖੋ, ਭਨ੍ਤੇ, ਸਮਗ੍ਗੋ ਸਙ੍ਘੋ ਸਤਿਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ, ਅਮੂਲ਼੍ਹਵਿਨਯਾਰਹਸ੍ਸ ਸਤਿਵਿਨਯਂ ਦੇਤਿ, ਧਮ੍ਮਕਮ੍ਮਂ ਨੁ ਖੋ ਤਂ, ਭਨ੍ਤੇ, ਵਿਨਯਕਮ੍ਮ’’ਨ੍ਤਿ? ‘‘ਅਧਮ੍ਮਕਮ੍ਮਂ ਤਂ, ਉਪਾਲਿ, ਅਵਿਨਯਕਮ੍ਮ’’ਨ੍ਤਿ. ‘‘ਯੋ ਨੁ ਖੋ, ਭਨ੍ਤੇ, ਸਮਗ੍ਗੋ ਸਙ੍ਘੋ ਅਮੂਲ਼੍ਹਵਿਨਯਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ, ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ…ਪੇ… ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ, ਤਜ੍ਜਨੀਯਕਮ੍ਮਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ… ਤਜ੍ਜਨੀਯਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ, ਨਿਯਸ੍ਸਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ… ਨਿਯਸ੍ਸਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ, ਪਬ੍ਬਾਜਨੀਯਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ… ਪਬ੍ਬਾਜਨੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ, ਪਟਿਸਾਰਣੀਯਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ… ਪਟਿਸਾਰਣੀਯਕਮ੍ਮਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ, ਉਕ੍ਖੇਪਨੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ… ਉਕ੍ਖੇਪਨੀਯਕਮ੍ਮਾਰਹਸ੍ਸ ਪਰਿਵਾਸਂ ਦੇਤਿ, ਪਰਿਵਾਸਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ… ਪਰਿਵਾਸਾਰਹਂ ਮੂਲਾਯ ਪਟਿਕਸ੍ਸਤਿ, ਮੂਲਾਯਪਟਿਕਸ੍ਸਨਾਰਹਸ੍ਸ ਪਰਿਵਾਸਂ ਦੇਤਿ… ਮੂਲਾਯਪਟਿਕਸ੍ਸਨਾਰਹਸ੍ਸ ਮਾਨਤ੍ਤਂ ਦੇਤਿ, ਮਾਨਤ੍ਤਾਰਹਂ ਮੂਲਾਯ ਪਟਿਕਸ੍ਸਤਿ… ਮਾਨਤ੍ਤਾਰਹਂ ਅਬ੍ਭੇਤਿ, ਅਬ੍ਭਾਨਾਰਹਸ੍ਸ ਮਾਨਤ੍ਤਂ ਦੇਤਿ… ਅਬ੍ਭਾਨਾਰਹਂ ਉਪਸਮ੍ਪਾਦੇਤਿ, ਉਪਸਮ੍ਪਦਾਰਹਂ ਅਬ੍ਭੇਤਿ, ਧਮ੍ਮਕਮ੍ਮਂ ਨੁ ਖੋ ਤਂ, ਭਨ੍ਤੇ, ਵਿਨਯਕਮ੍ਮ’’ਨ੍ਤਿ? ‘‘ਅਧਮ੍ਮਕਮ੍ਮਂ ਤਂ, ਉਪਾਲਿ, ਅਵਿਨਯਕਮ੍ਮ’’ਨ੍ਤਿ.

‘‘ਯੋ ਖੋ, ਉਪਾਲਿ, ਸਮਗ੍ਗੋ ਸਙ੍ਘੋ ਸਤਿਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ, ਅਮੂਲ਼੍ਹਵਿਨਯਾਰਹਸ੍ਸ ਸਤਿਵਿਨਯਂ ਦੇਤਿ, ਏਵਂ ਖੋ, ਉਪਾਲਿ, ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤਿ. ਯੋ ਖੋ, ਉਪਾਲਿ, ਸਮਗ੍ਗੋ ਸਙ੍ਘੋ ਅਮੂਲ਼੍ਹਵਿਨਯਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ, ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ…ਪੇ… ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ, ਤਜ੍ਜਨੀਯਕਮ੍ਮਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ… ਤਜ੍ਜਨੀਯਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ, ਨਿਯਸ੍ਸਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ… ਨਿਯਸ੍ਸਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ, ਪਬ੍ਬਾਜਨੀਯਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ… ਪਬ੍ਬਾਜਨੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ, ਪਟਿਸਾਰਣੀਯਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ… ਪਟਿਸਾਰਣੀਯਕਮ੍ਮਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ, ਉਕ੍ਖੇਪਨੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ… ਉਕ੍ਖੇਪਨੀਯਕਮ੍ਮਾਰਹਸ੍ਸ ਪਰਿਵਾਸਂ ਦੇਤਿ, ਪਰਿਵਾਸਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ… ਪਰਿਵਾਸਾਰਹਂ ਮੂਲਾਯ ਪਟਿਕਸ੍ਸਤਿ, ਮੂਲਾਯਪਟਿਕਸ੍ਸਨਾਰਹਸ੍ਸ ਪਰਿਵਾਸਂ ਦੇਤਿ… ਮੂਲਾਯਪਟਿਕਸ੍ਸਨਾਰਹਸ੍ਸ ਮਾਨਤ੍ਤਂ ਦੇਤਿ, ਮਾਨਤ੍ਤਾਰਹਂ ਮੂਲਾਯ ਪਟਿਕਸ੍ਸਤਿ – ਮਾਨਤ੍ਤਾਰਹਂ ਅਬ੍ਭੇਤਿ, ਅਬ੍ਭਾਨਾਰਹਸ੍ਸ ਮਾਨਤ੍ਤਂ ਦੇਤਿ… ਅਬ੍ਭਾਨਾਰਹਂ ਉਪਸਮ੍ਪਾਦੇਤਿ, ਉਪਸਮ੍ਪਦਾਰਹਂ ਅਬ੍ਭੇਤਿ, ਏਵਂ ਖੋ, ਉਪਾਲਿ, ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤੀ’’ਤਿ.

੪੦੩. ‘‘ਯੋ ਨੁ ਖੋ, ਭਨ੍ਤੇ, ਸਮਗ੍ਗੋ ਸਙ੍ਘੋ ਸਤਿਵਿਨਯਾਰਹਸ੍ਸ ਸਤਿਵਿਨਯਂ ਦੇਤਿ, ਅਮੂਲ਼੍ਹਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ, ਧਮ੍ਮਕਮ੍ਮਂ ਨੁ ਖੋ ਤਂ, ਭਨ੍ਤੇ, ਵਿਨਯਕਮ੍ਮ’’ਨ੍ਤਿ? ‘‘ਧਮ੍ਮਕਮ੍ਮਂ ਤਂ, ਉਪਾਲਿ, ਵਿਨਯਕਮ੍ਮ’’ਨ੍ਤਿ. ‘‘ਯੋ ਨੁ ਖੋ, ਭਨ੍ਤੇ, ਸਮਗ੍ਗੋ ਸਙ੍ਘੋ ਅਮੂਲ਼੍ਹਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ…ਪੇ… ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ…ਪੇ… ਤਜ੍ਜਨੀਯਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ…ਪੇ… ਨਿਯਸ੍ਸਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ…ਪੇ… ਪਬ੍ਬਾਜਨੀਯਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ…ਪੇ… ਪਟਿਸਾਰਣੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ…ਪੇ… ਉਕ੍ਖੇਪਨੀਯਕਮ੍ਮਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ…ਪੇ… ਪਰਿਵਾਸਾਰਹਸ੍ਸ ਪਰਿਵਾਸਂ ਦੇਤਿ…ਪੇ… ਮੂਲਾਯਪਟਿਕਸ੍ਸਨਾਰਹਂ ਮੂਲਾਯ ਪਟਿਕਸ੍ਸਤਿ…ਪੇ… ਮਾਨਤ੍ਤਾਰਹਸ੍ਸ ਮਾਨਤ੍ਤਂ ਦੇਤਿ…ਪੇ… ਅਬ੍ਭਾਨਾਰਹਂ ਅਬ੍ਭੇਤਿ, ਉਪਸਮ੍ਪਦਾਰਹਂ ਉਪਸਮ੍ਪਾਦੇਤਿ, ਧਮ੍ਮਕਮ੍ਮਂ ਨੁ ਖੋ ਤਂ, ਭਨ੍ਤੇ, ਵਿਨਯਕਮ੍ਮ’’ਨ੍ਤਿ? ‘‘ਧਮ੍ਮਕਮ੍ਮਂ ਤਂ, ਉਪਾਲਿ, ਵਿਨਯਕਮ੍ਮਂ’’.

‘‘ਯੋ ਖੋ, ਉਪਾਲਿ, ਸਮਗ੍ਗੋ ਸਙ੍ਘੋ ਸਤਿਵਿਨਯਾਰਹਸ੍ਸ ਸਤਿਵਿਨਯਂ ਦੇਤਿ, ਅਮੂਲ਼੍ਹਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ, ਏਵਂ ਖੋ, ਉਪਾਲਿ, ਧਮ੍ਮਕਮ੍ਮਂ ਹੋਤਿ ਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਅਨਤਿਸਾਰੋ ਹੋਤਿ. ਯੋ ਖੋ, ਉਪਾਲਿ, ਸਮਗ੍ਗੋ ਸਙ੍ਘੋ ਅਮੂਲ਼੍ਹਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ …ਪੇ… ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ…ਪੇ… ਤਜ੍ਜਨੀਯਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ…ਪੇ… ਨਿਯਸ੍ਸਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ…ਪੇ… ਪਬ੍ਬਾਜਨੀਯਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ…ਪੇ… ਪਟਿਸਾਰਣੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ…ਪੇ… ਉਕ੍ਖੇਪਨੀਯਕਮ੍ਮਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ…ਪੇ… ਪਰਿਵਾਸਾਰਹਸ੍ਸ ਪਰਿਵਾਸਂ ਦੇਤਿ…ਪੇ… ਮੂਲਾਯ ਪਟਿਕਸ੍ਸਨਾਰਹਂ ਮੂਲਾਯ ਪਟਿਕਸ੍ਸਤਿ…ਪੇ… ਮਾਨਤ੍ਤਾਰਹਸ੍ਸ ਮਾਨਤ੍ਤਂ ਦੇਤਿ…ਪੇ… ਅਬ੍ਭਾਨਾਰਹਂ ਅਬ੍ਭੇਤਿ, ਉਪਸਮ੍ਪਦਾਰਹਂ ਉਪਸਮ੍ਪਾਦੇਤਿ, ਏਵਂ ਖੋ, ਉਪਾਲਿ, ਧਮ੍ਮਕਮ੍ਮਂ ਹੋਤਿ ਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਅਨਤਿਸਾਰੋ ਹੋਤੀ’’ਤਿ.

੪੦੪. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ਯੋ ਖੋ, ਭਿਕ੍ਖਵੇ, ਸਮਗ੍ਗੋ ਸਙ੍ਘੋ ਸਤਿਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ, ਏਵਂ ਖੋ, ਭਿਕ੍ਖਵੇ, ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤਿ. ਯੋ ਖੋ, ਭਿਕ੍ਖਵੇ, ਸਮਗ੍ਗੋ ਸਙ੍ਘੋ ਸਤਿਵਿਨਯਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ…ਪੇ… ਸਤਿਵਿਨਯਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ… ਸਤਿਵਿਨਯਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ… ਸਤਿਵਿਨਯਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ… ਸਤਿਵਿਨਯਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ… ਸਤਿਵਿਨਯਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ … ਸਤਿਵਿਨਯਾਰਹਸ੍ਸ ਪਰਿਵਾਸਂ ਦੇਤਿ… ਸਤਿਵਿਨਯਾਰਹਂ ਮੂਲਾਯ ਪਟਿਕਸ੍ਸਤਿ… ਸਤਿਵਿਨਯਾਰਹਸ੍ਸ ਮਾਨਤ੍ਤਂ ਦੇਤਿ… ਸਤਿਵਿਨਯਾਰਹਂ ਅਬ੍ਭੇਤਿ… ਸਤਿਵਿਨਯਾਰਹਂ ਉਪਸਮ੍ਪਾਦੇਤਿ, ਏਵਂ ਖੋ, ਭਿਕ੍ਖਵੇ, ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤਿ.

੪੦੫. ਯੋ ਖੋ, ਭਿਕ੍ਖਵੇ, ਸਮਗ੍ਗੋ ਸਙ੍ਘੋ ਅਮੂਲ਼੍ਹਵਿਨਯਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ, ਏਵਂ ਖੋ, ਭਿਕ੍ਖਵੇ, ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤਿ. ਯੋ ਖੋ, ਭਿਕ੍ਖਵੇ, ਸਮਗ੍ਗੋ ਸਙ੍ਘੋ ਅਮੂਲ਼੍ਹਵਿਨਯਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ…ਪੇ… ਅਮੂਲ਼੍ਹਵਿਨਯਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ… ਅਮੂਲ਼੍ਹਵਿਨਯਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ… ਅਮੂਲ਼੍ਹਵਿਨਯਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ… ਅਮੂਲ਼੍ਹਵਿਨਯਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ… ਅਮੂਲ਼੍ਹਵਿਨਯਾਰਹਸ੍ਸ ਪਰਿਵਾਸਂ ਦੇਤਿ… ਅਮੂਲ਼੍ਹਵਿਨਯਾਰਹਂ ਮੂਲਾਯ ਪਟਿਕਸ੍ਸਤਿ… ਅਮੂਲ਼੍ਹਵਿਨਯਾਰਹਸ੍ਸ ਮਾਨਤ੍ਤਂ ਦੇਤਿ… ਅਮੂਲ਼੍ਹਵਿਨਯਾਰਹਂ ਅਬ੍ਭੇਤਿ… ਅਮੂਲ਼੍ਹਵਿਨਯਾਰਹਂ ਉਪਸਮ੍ਪਾਦੇਤਿ… ਅਮੂਲ਼੍ਹਵਿਨਯਾਰਹਸ੍ਸ ਸਤਿਵਿਨਯਂ ਦੇਤਿ, ਏਵਂ ਖੋ, ਭਿਕ੍ਖਵੇ, ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤਿ.

੪੦੬. ਯੋ ਖੋ, ਭਿਕ੍ਖਵੇ, ਸਮਗ੍ਗੋ ਸਙ੍ਘੋ ਤਸ੍ਸਪਾਪਿਯਸਿਕਾਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ…ਪੇ… ਤਜ੍ਜਨੀਯਕਮ੍ਮਾਰਹਸ੍ਸ… ਨਿਯਸ੍ਸਕਮ੍ਮਾਰਹਸ੍ਸ… ਪਬ੍ਬਾਜਨੀਯਕਮ੍ਮਾਰਹਸ੍ਸ… ਪਟਿਸਾਰਣੀਯਕਮ੍ਮਾਰਹਸ੍ਸ… ਉਕ੍ਖੇਪਨੀਯਕਮ੍ਮਾਰਹਸ੍ਸ… ਪਰਿਵਾਸਾਰਹਂ… ਮੂਲਾਯਪਟਿਕਸ੍ਸਨਾਰਹਸ੍ਸ… ਮਾਨਤ੍ਤਾਰਹਂ… ਅਬ੍ਭਾਨਾਰਹਂ… ਉਪਸਮ੍ਪਦਾਰਹਸ੍ਸ ਸਤਿਵਿਨਯਂ ਦੇਤਿ, ਏਵਂ ਖੋ, ਭਿਕ੍ਖਵੇ, ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤਿ. ਯੋ ਖੋ, ਭਿਕ੍ਖਵੇ, ਸਮਗ੍ਗੋ ਸਙ੍ਘੋ ਉਪਸਮ੍ਪਦਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ…ਪੇ… ਉਪਸਮ੍ਪਦਾਰਹਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਰੋਤਿ… ਉਪਸਮ੍ਪਦਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ… ਉਪਸਮ੍ਪਦਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ… ਉਪਸਮ੍ਪਦਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ… ਉਪਸਮ੍ਪਦਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ… ਉਪਸਮ੍ਪਦਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ… ਉਪਸਮ੍ਪਦਾਰਹਸ੍ਸ ਪਰਿਵਾਸਂ ਦੇਤਿ… ਉਪਸਮ੍ਪਦਾਰਹਂ ਮੂਲਾਯ ਪਟਿਕਸ੍ਸਤਿ… ਉਪਸਮ੍ਪਦਾਰਹਸ੍ਸ ਮਾਨਤ੍ਤਂ ਦੇਤਿ… ਉਪਸਮ੍ਪਦਾਰਹਂ ਅਬ੍ਭੇਤਿ, ਏਵਂ ਖੋ, ਭਿਕ੍ਖਵੇ, ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ. ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤੀਤਿ.

ਉਪਾਲਿਪੁਚ੍ਛਾਕਥਾ ਨਿਟ੍ਠਿਤਾ.

ਉਪਾਲਿਪੁਚ੍ਛਾਭਾਣਵਾਰੋ ਨਿਟ੍ਠਿਤੋ ਦੁਤਿਯੋ.

੨੪੨. ਤਜ੍ਜਨੀਯਕਮ੍ਮਕਥਾ

੪੦੭. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਭਣ੍ਡਨਕਾਰਕੋ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਅਧਮ੍ਮੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮਪਤਿਰੂਪਕੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ.

੪੦੮. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਭਣ੍ਡਨਕਾਰਕੋ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਅਧਮ੍ਮੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮਪਤਿਰੂਪਕੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮਪਤਿਰੂਪਕੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ.

੪੦੯. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਭਣ੍ਡਨਕਾਰਕੋ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮਪਤਿਰੂਪਕੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮਪਤਿਰੂਪਕੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ.

੪੧੦. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਭਣ੍ਡਨਕਾਰਕੋ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮਪਤਿਰੂਪਕੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮਪਤਿਰੂਪਕੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਅਧਮ੍ਮੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮੇਨ ਵਗ੍ਗਾ.

੪੧੧. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਭਣ੍ਡਨਕਾਰਕੋ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮਪਤਿਰੂਪਕੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਅਧਮ੍ਮੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ.

ਤਜ੍ਜਨੀਯਕਮ੍ਮਕਥਾ ਨਿਟ੍ਠਿਤਾ.

੨੪੩. ਨਿਯਸ੍ਸਕਮ੍ਮਕਥਾ

੪੧੨. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ, ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਬਾਲੋ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ, ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ. ਹਨ੍ਦਸ੍ਸ ਮਯਂ ਨਿਯਸ੍ਸਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਨਿਯਸ੍ਸਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਨਿਯਸ੍ਸਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਨਿਯਸ੍ਸਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਯਥਾ ਹੇਟ੍ਠਾ, ਤਥਾ ਚਕ੍ਕਂ ਕਾਤਬ੍ਬਂ.

ਨਿਯਸ੍ਸਕਮ੍ਮਕਥਾ ਨਿਟ੍ਠਿਤਾ.

੨੪੪. ਪਬ੍ਬਾਜਨੀਯਕਮ੍ਮਕਥਾ

੪੧੩. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਕੁਲਦੂਸਕੋ ਹੋਤਿ ਪਾਪਸਮਾਚਾਰੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਕੁਲਦੂਸਕੋ ਪਾਪਸਮਾਚਾਰੋ. ਹਨ੍ਦਸ੍ਸ ਮਯਂ ਪਬ੍ਬਾਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤੋ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਪਬ੍ਬਾਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਪਬ੍ਬਾਜਨੀਯਕਮ੍ਮਕਤਾ ਨਿਟ੍ਠਿਤਾ.

੨੪੫. ਪਟਿਸਾਰਣੀਯਕਮ੍ਮਕਥਾ

੪੧੪. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਗਿਹੀ ਅਕ੍ਕੋਸਤਿ ਪਰਿਭਾਸਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਗਿਹੀ ਅਕ੍ਕੋਸਤਿ ਪਰਿਭਾਸਤਿ. ਹਨ੍ਦਸ੍ਸ ਮਯਂ ਪਟਿਸਾਰਣੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਪਟਿਸਾਰਣੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਪਟਿਸਾਰਣੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਪਟਿਸਾਰਣੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਪਟਿਸਾਰਣੀਯਕਮ੍ਮਕਥਾ ਨਿਟ੍ਠਿਤਾ.

੨੪੬. ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਥਾ

੪੧੫. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁਂ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁਂ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਤੋ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਥਾ ਨਿਟ੍ਠਿਤਾ.

੨੪੭. ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਕਥਾ

੪੧੬. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਟਿਕਾਤੁਂ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਟਿਕਾਤੁਂ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਕਤੋ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਕਥਾ ਨਿਟ੍ਠਿਤਾ.

੨੪੮. ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਕਥਾ

੪੧੭. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਨ ਇਚ੍ਛਤਿ ਪਾਪਿਕਂ ਦਿਟ੍ਠਿਂ ਪਟਿਨਿਸ੍ਸਜ੍ਜਿਤੁਂ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਨ ਇਚ੍ਛਤਿ ਪਾਪਿਕਂ ਦਿਟ੍ਠਿਂ ਪਟਿਨਿਸ੍ਸਜ੍ਜਿਤੁਂ. ਹਨ੍ਦਸ੍ਸ ਮਯਂ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਕਤੋ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਕਥਾ ਨਿਟ੍ਠਿਤਾ.

੨੪੯. ਤਜ੍ਜਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੧੮. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮਪਤਿਰੂਪਕੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ.

੪੧੯. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮਪਤਿਰੂਪਕੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮਪਤਿਰੂਪਕੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ.

੪੨੦. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮਪਤਿਰੂਪਕੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮਪਤਿਰੂਪਕੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ.

੪੨੧. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮਪਤਿਰੂਪਕੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮਪਤਿਰੂਪਕੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮੇਨ ਵਗ੍ਗਾ.

੪੨੨. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮਪਤਿਰੂਪਕੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਸਮਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮੇਨ ਵਗ੍ਗਾ. ਸੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ.

ਤਜ੍ਜਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੫੦. ਨਿਯਸ੍ਸਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੨੩. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਨਿਯਸ੍ਸਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੫੧. ਪਬ੍ਬਾਜਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੨੪. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਬ੍ਬਾਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਬ੍ਬਾਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਪਬ੍ਬਾਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਪਬ੍ਬਾਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਪਬ੍ਬਾਜਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਪਬ੍ਬਾਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਪਬ੍ਬਾਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਪਬ੍ਬਾਜਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੫੨. ਪਟਿਸਾਰਣੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੨੫. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਪਟਿਸਾਰਣੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੫੩. ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੨੬. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੫੪. ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੨੭. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ – ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੫੫. ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੨੮. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਸੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਗਚ੍ਛਤਿ. ਤਤ੍ਥਪਿ ਭਿਕ੍ਖੂਨਂ ਏਵਂ ਹੋਤਿ – ‘‘ਇਮਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਸਙ੍ਘੇਨ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਦ੍ਧਂ – ਅਧਮ੍ਮੇਨ ਵਗ੍ਗੇਹਿ. ਹਨ੍ਦਸ੍ਸ ਮਯਂ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ… ਅਧਮ੍ਮੇਨ ਸਮਗ੍ਗਾ…ਪੇ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ…ਪੇ….

ਚਕ੍ਕਂ ਕਾਤਬ੍ਬਂ.

ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੫੬. ਤਜ੍ਜਨੀਯਕਮ੍ਮਵਿਵਾਦਕਥਾ

੪੨੯. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਭਣ੍ਡਨਕਾਰਕੋ…ਪੇ… ਸਙ੍ਘੇ ਅਧਿਕਰਣਕਾਰਕੋ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਧਮ੍ਮੇਨ ਵਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ.

੪੩੦. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਭਣ੍ਡਨਕਾਰਕੋ…ਪੇ… ਸਙ੍ਘੇ ਅਧਿਕਰਣਕਾਰਕੋ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਧਮ੍ਮੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ.

੪੩੧. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਭਣ੍ਡਨਕਾਰਕੋ…ਪੇ… ਸਙ੍ਘੇ ਅਧਿਕਰਣਕਾਰਕੋ ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮੇਨ ਵਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮੇਨ ਵਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ.

੪੩੨. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਭਣ੍ਡਨਕਾਰਕੋ…ਪੇ… ਸਙ੍ਘੇ ਅਧਿਕਰਣਕਾਰਕੋ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ.

੪੩੩. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ.

ਤਜ੍ਜਨੀਯਕਮ੍ਮਵਿਵਾਦਕਥਾ ਨਿਟ੍ਠਿਤਾ.

੨੫੭. ਨਿਯਸ੍ਸਕਮ੍ਮਵਿਵਾਦਕਥਾ

੪੩੪. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ, ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਬਾਲੋ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ, ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ. ਹਨ੍ਦਸ੍ਸ ਮਯਂ ਨਿਯਸ੍ਸਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਨਿਯਸ੍ਸਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇ ਪਞ੍ਚ ਵਾਰਾ ਸਂਖਿਤ੍ਤਾ.

ਨਿਯਸ੍ਸਕਮ੍ਮਵਿਵਾਦਕਥਾ ਨਿਟ੍ਠਿਤਾ.

੨੫੮. ਪਬ੍ਬਾਜਨੀਯਕਮ੍ਮਵਿਵਾਦਕਥਾ

੪੩੫. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਕੁਲਦੂਸਕੋ ਹੋਤਿ ਪਾਪਸਮਾਚਾਰੋ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਕੁਲਦੂਸਕੋ ਪਾਪਸਮਾਚਾਰੋ. ਹਨ੍ਦਸ੍ਸ ਮਯਂ ਪਬ੍ਬਾਜਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇ ਪਞ੍ਚ ਵਾਰਾ ਸਂਖਿਤ੍ਤਾ.

ਪਬ੍ਬਾਜਨੀਯਕਮ੍ਮਵਿਵਾਦਕਥਾ ਨਿਟ੍ਠਿਤਾ.

੨੫੯. ਪਟਿਸਾਰਣੀਯਕਮ੍ਮਵਿਵਾਦਕਥਾ

੪੩੬. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਗਿਹੀ ਅਕ੍ਕੋਸਤਿ ਪਰਿਭਾਸਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਗਿਹੀ ਅਕ੍ਕੋਸਤਿ ਪਰਿਭਾਸਤਿ. ਹਨ੍ਦਸ੍ਸ ਮਯਂ ਪਟਿਸਾਰਣੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਪਟਿਸਾਰਣੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇ ਪਞ੍ਚ ਵਾਰਾ ਸਂਖਿਤ੍ਤਾ.

ਪਟਿਸਾਰਣੀਯਕਮ੍ਮਵਿਵਾਦਕਥਾ ਨਿਟ੍ਠਿਤਾ.

੨੬੦. ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਵਿਵਾਦਕਥਾ

੪੩੭. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁਂ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁਂ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇ ਪਞ੍ਚ ਵਾਰਾ ਸਂਖਿਤ੍ਤਾ.

ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਵਿਵਾਦਕਥਾ ਨਿਟ੍ਠਿਤਾ.

੨੬੧. ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਵਿਵਾਦਕਥਾ

੪੩੮. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਟਿਕਾਤੁਂ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਟਿਕਾਤੁਂ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ; ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇ ਪਞ੍ਚ ਵਾਰਾ ਸਂਖਿਤ੍ਤਾ.

ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਵਿਵਾਦਕਥਾ ਨਿਟ੍ਠਿਤਾ.

੨੬੨. ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਵਿਵਾਦਕਥਾ

੪੩੯. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਨ ਇਚ੍ਛਤਿ ਪਾਪਿਕਂ ਦਿਟ੍ਠਿਂ ਪਟਿਨਿਸ੍ਸਜ੍ਜਿਤੁਂ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਨ ਇਚ੍ਛਤਿ ਪਾਪਿਕਂ ਦਿਟ੍ਠਿਂ ਪਟਿਨਿਸ੍ਸਜ੍ਜਿਤੁਂ. ਹਨ੍ਦਸ੍ਸ ਮਯਂ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇ ਪਞ੍ਚ ਵਾਰਾ ਸਂਖਿਤ੍ਤਾ.

ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਵਿਵਾਦਕਥਾ ਨਿਟ੍ਠਿਤਾ.

੨੬੩. ਤਜ੍ਜਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੪੦. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਧਮ੍ਮੇਨ ਵਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ.

੪੪੧. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਧਮ੍ਮੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ.

੪੪੨. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮੇਨ ਵਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮੇਨ ਵਗ੍ਗਕਮ੍ਮ’’ਨ੍ਤਿ ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ.

੪੪੩. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਵਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ.

੪੪੪. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਤਜ੍ਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ.

ਤਜ੍ਜਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੬੪. ਨਿਯਸ੍ਸਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੪੫. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇਪਿ [ਇਮੇ (ਸੀ. ਸ੍ਯਾ. ਏਵਮੁਪਰਿਪਿ)] ਪਞ੍ਚ ਵਾਰਾ ਸਂਖਿਤ੍ਤਾ.

ਨਿਯਸ੍ਸਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੬੫. ਪਬ੍ਬਾਜਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੪੬. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਬ੍ਬਾਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਬ੍ਬਾਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਪਬ੍ਬਾਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਪਬ੍ਬਾਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇਪਿ ਪਞ੍ਚ ਵਾਰਾ ਸਂਖਿਤ੍ਤਾ.

ਪਬ੍ਬਾਜਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੬੬. ਪਟਿਸਾਰਣੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੪੭. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇਪਿ ਪਞ੍ਚ ਵਾਰਾ ਸਂਖਿਤ੍ਤਾ.

ਪਟਿਸਾਰਣੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੬੭. ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੪੮. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇਪਿ ਪਞ੍ਚ ਵਾਰਾ ਸਂਖਿਤ੍ਤਾ.

ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੬੮. ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੪੯. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇਪਿ ਪਞ੍ਚ ਵਾਰਾ ਸਂਖਿਤ੍ਤਾ.

ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

੨੬੯. ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ

੪੫੦. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਙ੍ਘੇਨ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਸਙ੍ਘੇਨ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਹਨ੍ਦਸ੍ਸ ਮਯਂ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਮਾ’’ਤਿ. ਤੇ ਤਸ੍ਸ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਨ੍ਤਿ – ਅਧਮ੍ਮੇਨ ਵਗ੍ਗਾ…ਪੇ… ਅਧਮ੍ਮੇਨ ਸਮਗ੍ਗਾ… ਧਮ੍ਮੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਵਗ੍ਗਾ… ਧਮ੍ਮਪਤਿਰੂਪਕੇਨ ਸਮਗ੍ਗਾ. ਤਤ੍ਰਟ੍ਠੋ ਸਙ੍ਘੋ ਵਿਵਦਤਿ – ‘‘ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮਂ, ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ. ਤਤ੍ਰ, ਭਿਕ੍ਖਵੇ, ਯੇ ਤੇ ਭਿਕ੍ਖੂ ਏਵਮਾਹਂਸੁ – ‘‘ਧਮ੍ਮਪਤਿਰੂਪਕੇਨ ਸਮਗ੍ਗਕਮ੍ਮ’’ਨ੍ਤਿ, ਯੇ ਚ ਤੇ ਭਿਕ੍ਖੂ ਏਵਮਾਹਂਸੁ – ‘‘ਅਕਤਂ ਕਮ੍ਮਂ ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ, ਇਮੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ. ਇਮੇਪਿ ਪਞ੍ਚ ਵਾਰਾ ਸਂਖਿਤ੍ਤਾ.

ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਪਟਿਪ੍ਪਸ੍ਸਦ੍ਧਿਕਥਾ ਨਿਟ੍ਠਿਤਾ.

ਚਮ੍ਪੇਯ੍ਯਕ੍ਖਨ੍ਧਕੋ ਨਵਮੋ.

੨੭੦. ਤਸ੍ਸੁਦ੍ਦਾਨਂ

ਚਮ੍ਪਾਯਂ ਭਗਵਾ ਆਸਿ, ਵਤ੍ਥੁ ਵਾਸਭਗਾਮਕੇ;

ਆਗਨ੍ਤੁਕਾਨਮੁਸ੍ਸੁਕ੍ਕਂ, ਅਕਾਸਿ ਇਚ੍ਛਿਤਬ੍ਬਕੇ [ਇਚ੍ਛਿਤਬ੍ਬਕੋ (ਕ.)].

ਪਕਤਞ੍ਞੁਨੋਤਿ ਞਤ੍ਵਾ, ਉਸ੍ਸੁਕ੍ਕਂ ਨ ਕਰੀ ਤਦਾ;

ਉਕ੍ਖਿਤ੍ਤੋ ਨ ਕਰੋਤੀਤਿ, ਸਾਗਮਾ ਜਿਨਸਨ੍ਤਿਕੇ.

ਅਧਮ੍ਮੇਨ ਵਗ੍ਗਕਮ੍ਮਂ, ਸਮਗ੍ਗਂ ਅਧਮ੍ਮੇਨ ਚ;

ਧਮ੍ਮੇਨ ਵਗ੍ਗਕਮ੍ਮਞ੍ਚ, ਪਤਿਰੂਪਕੇਨ ਵਗ੍ਗਿਕਂ.

ਪਤਿਰੂਪਕੇਨ ਸਮਗ੍ਗਂ, ਏਕੋ ਉਕ੍ਖਿਪਤੇਕਕਂ;

ਏਕੋ ਚ ਦ੍ਵੇ ਸਮ੍ਬਹੁਲੇ, ਸਙ੍ਘਂ ਉਕ੍ਖਿਪਤੇਕਕੋ.

ਦੁਵੇਪਿ ਸਮ੍ਬਹੁਲਾਪਿ, ਸਙ੍ਘੋ ਸਙ੍ਘਞ੍ਚ ਉਕ੍ਖਿਪਿ;

ਸਬ੍ਬਞ੍ਞੁਪਵਰੋ ਸੁਤ੍ਵਾ, ਅਧਮ੍ਮਨ੍ਤਿ ਪਟਿਕ੍ਖਿਪਿ.

ਞਤ੍ਤਿਵਿਪਨ੍ਨਂ ਯਂ ਕਮ੍ਮਂ, ਸਮ੍ਪਨ੍ਨਂ ਅਨੁਸਾਵਨਂ;

ਅਨੁਸ੍ਸਾਵਨਵਿਪਨ੍ਨਂ, ਸਮ੍ਪਨ੍ਨਂ ਞਤ੍ਤਿਯਾ ਚ ਯਂ.

ਉਭਯੇਨ ਵਿਪਨ੍ਨਞ੍ਚ, ਅਞ੍ਞਤ੍ਰ ਧਮ੍ਮਮੇਵ ਚ;

ਵਿਨਯਾ ਸਤ੍ਥੁ ਪਟਿਕੁਟ੍ਠਂ, ਕੁਪ੍ਪਂ ਅਟ੍ਠਾਨਾਰਹਿਕਂ.

ਅਧਮ੍ਮਵਗ੍ਗਂ ਸਮਗ੍ਗਂ, ਧਮ੍ਮ ਪਤਿਰੂਪਾਨਿ ਯੇ ਦੁਵੇ;

ਧਮ੍ਮੇਨੇਵ ਚ ਸਾਮਗ੍ਗਿਂ, ਅਨੁਞ੍ਞਾਸਿ ਤਥਾਗਤੋ.

ਚਤੁਵਗ੍ਗੋ ਪਞ੍ਚਵਗ੍ਗੋ, ਦਸਵਗ੍ਗੋ ਚ ਵੀਸਤਿ;

ਪਰੋਵੀਸਤਿਵਗ੍ਗੋ ਚ [ਅਤਿਰੇਕਵੀਸਤਿਵਗ੍ਗੋ (ਸ੍ਯਾ.)], ਸਙ੍ਘੋ ਪਞ੍ਚਵਿਧੋ ਤਥਾ.

ਠਪੇਤ੍ਵਾ ਉਪਸਮ੍ਪਦਂ, ਯਞ੍ਚ ਕਮ੍ਮਂ ਪਵਾਰਣਂ;

ਅਬ੍ਭਾਨਕਮ੍ਮੇਨ ਸਹ, ਚਤੁਵਗ੍ਗੇਹਿ ਕਮ੍ਮਿਕੋ.

ਦੁਵੇ ਕਮ੍ਮੇ ਠਪੇਤ੍ਵਾਨ, ਮਜ੍ਝਦੇਸੂਪਸਮ੍ਪਦਂ;

ਅਬ੍ਭਾਨਂ ਪਞ੍ਚਵਗ੍ਗਿਕੋ, ਸਬ੍ਬਕਮ੍ਮੇਸੁ ਕਮ੍ਮਿਕੋ.

ਅਬ੍ਭਾਨੇਕਂ ਠਪੇਤ੍ਵਾਨ, ਯੇ ਭਿਕ੍ਖੂ ਦਸਵਗ੍ਗਿਕਾ;

ਸਬ੍ਬਕਮ੍ਮਕਰੋ ਸਙ੍ਘੋ, ਵੀਸੋ ਸਬ੍ਬਤ੍ਥ ਕਮ੍ਮਿਕੋ.

ਭਿਕ੍ਖੁਨੀ ਸਿਕ੍ਖਮਾਨਾ, ਚ ਸਾਮਣੇਰੋ ਸਾਮਣੇਰੀ;

ਪਚ੍ਚਕ੍ਖਾਤਨ੍ਤਿਮਵਤ੍ਥੂ, ਉਕ੍ਖਿਤ੍ਤਾਪਤ੍ਤਿਦਸ੍ਸਨੇ.

ਅਪ੍ਪਟਿਕਮ੍ਮੇ ਦਿਟ੍ਠਿਯਾ, ਪਣ੍ਡਕੋ ਥੇਯ੍ਯਸਂਵਾਸਕਂ;

ਤਿਤ੍ਥਿਯਾ ਤਿਰਚ੍ਛਾਨਗਤਂ, ਮਾਤੁ ਪਿਤੁ ਚ ਘਾਤਕਂ.

ਅਰਹਂ ਭਿਕ੍ਖੁਨੀਦੂਸਿ, ਭੇਦਕਂ ਲੋਹਿਤੁਪ੍ਪਾਦਂ;

ਬ੍ਯਞ੍ਜਨਂ ਨਾਨਾਸਂਵਾਸਂ, ਨਾਨਾਸੀਮਾਯ ਇਦ੍ਧਿਯਾ.

ਯਸ੍ਸ ਸਙ੍ਘੋ ਕਰੇ ਕਮ੍ਮਂ, ਹੋਨ੍ਤੇਤੇ ਚਤੁਵੀਸਤਿ;

ਸਮ੍ਬੁਦ੍ਧੇਨ ਪਟਿਕ੍ਖਿਤ੍ਤਾ, ਨ ਹੇਤੇ ਗਣਪੂਰਕਾ.

ਪਾਰਿਵਾਸਿਕਚਤੁਤ੍ਥੋ, ਪਰਿਵਾਸਂ ਦਦੇਯ੍ਯ ਵਾ;

ਮੂਲਾ ਮਾਨਤ੍ਤਮਬ੍ਭੇਯ੍ਯ, ਅਕਮ੍ਮਂ ਨ ਚ ਕਰਣਂ.

ਮੂਲਾ ਅਰਹਮਾਨਤ੍ਤਾ, ਅਬ੍ਭਾਨਾਰਹਮੇਵ ਚ;

ਨ ਕਮ੍ਮਕਾਰਕਾ ਪਞ੍ਚ, ਸਮ੍ਬੁਦ੍ਧੇਨ ਪਕਾਸਿਤਾ.

ਭਿਕ੍ਖੁਨੀ ਸਿਕ੍ਖਮਾਨਾ ਚ, ਸਾਮਣੇਰੋ ਸਾਮਣੇਰਿਕਾ;

ਪਚ੍ਚਕ੍ਖਨ੍ਤਿਮਉਮ੍ਮਤ੍ਤਾ, ਖਿਤ੍ਤਾਵੇਦਨਦਸ੍ਸਨੇ.

ਅਪ੍ਪਟਿਕਮ੍ਮੇ ਦਿਟ੍ਠਿਯਾ, ਪਣ੍ਡਕਾਪਿ ਚ ਬ੍ਯਞ੍ਜਨਾ [ਇਤੋ ਪਰਂ ਸ੍ਯਾਮਮੂਲੇ ਦਿਯਡ੍ਢਗਾਥਾਹਿ ਅਭਬ੍ਬਪੁਗ੍ਗਲਾ ਸਮਤ੍ਤਂ ਦਸ੍ਸਿਤਾ];

ਨਾਨਾਸਂਵਾਸਕਾ ਸੀਮਾ, ਵੇਹਾਸਂ ਯਸ੍ਸ ਕਮ੍ਮ ਚ.

ਅਟ੍ਠਾਰਸਨ੍ਨਮੇਤੇਸਂ, ਪਟਿਕ੍ਕੋਸਂ ਨ ਰੁਹਤਿ;

ਭਿਕ੍ਖੁਸ੍ਸ ਪਕਤਤ੍ਤਸ੍ਸ, ਰੁਹਤਿ ਪਟਿਕ੍ਕੋਸਨਾ.

ਸੁਦ੍ਧਸ੍ਸ ਦੁਨ੍ਨਿਸਾਰਿਤੋ, ਬਾਲੋ ਹਿ ਸੁਨਿਸ੍ਸਾਰਿਤੋ;

ਪਣ੍ਡਕੋ ਥੇਯ੍ਯਸਂਵਾਸੋ, ਪਕ੍ਕਨ੍ਤੋ ਤਿਰਚ੍ਛਾਨਗਤੋ.

ਮਾਤੁ ਪਿਤੁ ਅਰਹਨ੍ਤ, ਦੂਸਕੋ ਸਙ੍ਘਭੇਦਕੋ;

ਲੋਹਿਤੁਪ੍ਪਾਦਕੋ ਚੇਵ, ਉਭਤੋਬ੍ਯਞ੍ਜਨੋ ਚ ਯੋ.

ਏਕਾਦਸਨ੍ਨਂ ਏਤੇਸਂ, ਓਸਾਰਣਂ ਨ ਯੁਜ੍ਜਤਿ;

ਹਤ੍ਥਪਾਦਂ ਤਦੁਭਯਂ, ਕਣ੍ਣਨਾਸਂ ਤਦੂਭਯਂ.

ਅਙ੍ਗੁਲਿ ਅਲ਼ਕਣ੍ਡਰਂ, ਫਣਂ ਖੁਜ੍ਜੋ ਚ ਵਾਮਨੋ;

ਗਣ੍ਡੀ ਲਕ੍ਖਣਕਸਾ, ਚ ਲਿਖਿਤਕੋ ਚ ਸੀਪਦੀ.

ਪਾਪਾ ਪਰਿਸਕਾਣੋ ਚ, ਕੁਣੀ ਖਞ੍ਜੋ ਹਤੋਪਿ ਚ;

ਇਰਿਯਾਪਥਦੁਬ੍ਬਲੋ, ਅਨ੍ਧੋ ਮੂਗੋ ਚ ਬਧਿਰੋ.

ਅਨ੍ਧਮੂਗਨ੍ਧਬਧਿਰੋ ਮੂਗਬਧਿਰਮੇਵ ਚ;

ਅਨ੍ਧਮੂਗਬਧਿਰੋ ਚ, ਦ੍ਵਤ੍ਤਿਂਸੇਤੇ ਅਨੂਨਕਾ.

ਤੇਸਂ ਓਸਾਰਣਂ ਹੋਤਿ, ਸਮ੍ਬੁਦ੍ਧੇਨ ਪਕਾਸਿਤਂ;

ਦਟ੍ਠਬ੍ਬਾ ਪਟਿਕਾਤਬ੍ਬਾ, ਨਿਸ੍ਸਜ੍ਜੇਤਾ ਨ ਵਿਜ੍ਜਤਿ.

ਤਸ੍ਸ ਉਕ੍ਖੇਪਨਾ ਕਮ੍ਮਾ, ਸਤ੍ਤ ਹੋਨ੍ਤਿ ਅਧਮ੍ਮਿਕਾ;

ਆਪਨ੍ਨਂ ਅਨੁਵਤ੍ਤਨ੍ਤਂ, ਸਤ੍ਤ ਤੇਪਿ ਅਧਮ੍ਮਿਕਾ.

ਆਪਨ੍ਨਂ ਨਾਨੁਵਤ੍ਤਨ੍ਤਂ, ਸਤ੍ਤ ਕਮ੍ਮਾ ਸੁਧਮ੍ਮਿਕਾ;

ਸਮ੍ਮੁਖਾ ਪਟਿਪੁਚ੍ਛਾ ਚ, ਪਟਿਞ੍ਞਾਯ ਚ ਕਾਰਣਾ.

ਸਤਿ ਅਮੂਲ਼੍ਹਪਾਪਿਕਾ, ਤਜ੍ਜਨੀਨਿਯਸ੍ਸੇਨ ਚ;

ਪਬ੍ਬਾਜਨੀਯ ਪਟਿਸਾਰੋ, ਉਕ੍ਖੇਪਪਰਿਵਾਸ ਚ.

ਮੂਲਾ ਮਾਨਤ੍ਤਅਬ੍ਭਾਨਾ, ਤਥੇਵ ਉਪਸਮ੍ਪਦਾ;

ਅਞ੍ਞਂ ਕਰੇਯ੍ਯ ਅਞ੍ਞਸ੍ਸ, ਸੋਲ਼ਸੇਤੇ ਅਧਮ੍ਮਿਕਾ.

ਤਂ ਤਂ ਕਰੇਯ੍ਯ ਤਂ ਤਸ੍ਸ, ਸੋਲ਼ਸੇਤੇ ਸੁਧਮ੍ਮਿਕਾ;

ਪਚ੍ਚਾਰੋਪੇਯ੍ਯ ਅਞ੍ਞਞ੍ਞਂ, ਸੋਲ਼ਸੇਤੇ ਅਧਮ੍ਮਿਕਾ.

ਦ੍ਵੇ ਦ੍ਵੇ ਤਮ੍ਮੂਲਕਂ ਤਸ੍ਸ [ਦ੍ਵੇ ਦ੍ਵੇ ਮੂਲਾ ਕਤਾ ਕਸ੍ਸ (ਸ੍ਯਾ.), ਦੋਦੋਤਮੂਲਕਨ੍ਤਸ੍ਸ (ਕ.)], ਤੇਪਿ ਸੋਲ਼ਸ ਧਮ੍ਮਿਕਾ;

ਏਕੇਕਮੂਲਕਂ ਚਕ੍ਕਂ, ‘‘ਅਧਮ੍ਮ’’ਨ੍ਤਿ ਜਿਨੋਬ੍ਰਵਿ.

ਅਕਾਸਿ ਤਜ੍ਜਨੀਯਂ ਕਮ੍ਮਂ, ਸਙ੍ਘੋ ਭਣ੍ਡਨਕਾਰਕੋ;

ਅਧਮ੍ਮੇਨ ਵਗ੍ਗਕਮ੍ਮਂ, ਅਞ੍ਞਂ ਆਵਾਸਂ ਗਚ੍ਛਿ ਸੋ.

ਤਤ੍ਥਾਧਮ੍ਮੇਨ ਸਮਗ੍ਗਾ, ਤਸ੍ਸ ਤਜ੍ਜਨੀਯਂ ਕਰੁਂ;

ਅਞ੍ਞਤ੍ਥ ਵਗ੍ਗਾਧਮ੍ਮੇਨ, ਤਸ੍ਸ ਤਜ੍ਜਨੀਯਂ ਕਰੁਂ.

ਪਤਿਰੂਪੇਨ ਵਗ੍ਗਾਪਿ, ਸਮਗ੍ਗਾਪਿ ਤਥਾ ਕਰੁਂ;

ਅਧਮ੍ਮੇਨ ਸਮਗ੍ਗਾ ਚ, ਧਮ੍ਮੇਨ ਵਗ੍ਗਮੇਵ ਚ.

ਪਤਿਰੂਪਕੇਨ ਵਗ੍ਗਾ ਚ, ਸਮਗ੍ਗਾ ਚ ਇਮੇ ਪਦਾ;

ਏਕੇਕਮੂਲਕਂ ਕਤ੍ਵਾ, ਚਕ੍ਕਂ ਬਨ੍ਧੇ ਵਿਚਕ੍ਖਣੋ.

ਬਾਲਾ ਬ੍ਯਤ੍ਤਸ੍ਸ ਨਿਯਸ੍ਸਂ, ਪਬ੍ਬਾਜੇ ਕੁਲਦੂਸਕਂ;

ਪਟਿਸਾਰਣੀਯਂ ਕਮ੍ਮਂ, ਕਰੇ ਅਕ੍ਕੋਸਕਸ੍ਸ ਚ.

ਅਦਸ੍ਸਨਾਪ੍ਪਟਿਕਮ੍ਮੇ, ਯੋ ਚ ਦਿਟ੍ਠਿਂ ਨ ਨਿਸ੍ਸਜ੍ਜੇ;

ਤੇਸਂ ਉਕ੍ਖੇਪਨੀਯਕਮ੍ਮਂ, ਸਤ੍ਥਵਾਹੇਨ ਭਾਸਿਤਂ.

ਉਪਰਿ ਨਯਕਮ੍ਮਾਨਂ [ਉਪਵਿਨਯਕਮ੍ਮਾਨਂ (ਸ੍ਯਾ.), ਉਕ੍ਖੇਪਨੀਯਕਮ੍ਮਾਨਂ (ਕ.)] ਪਞ੍ਞੋ ਤਜ੍ਜਨੀਯਂ ਨਯੇ;

ਤੇਸਂਯੇਵ ਅਨੁਲੋਮਂ, ਸਮ੍ਮਾ ਵਤ੍ਤਤਿ ਯਾਚਿਤੇ [ਯਾਚਤਿ (ਸ੍ਯਾ.), ਯਾਚਿਤੋ (ਸੀ.)].

ਪਸ੍ਸਦ੍ਧਿ ਤੇਸਂ ਕਮ੍ਮਾਨਂ, ਹੇਟ੍ਠਾ ਕਮ੍ਮਨਯੇਨ ਚ;

ਤਸ੍ਮਿਂ ਤਸ੍ਮਿਂ ਤੁ ਕਮ੍ਮੇਸੁ, ਤਤ੍ਰਟ੍ਠੋ ਚ ਵਿਵਦਤਿ.

ਅਕਤਂ ਦੁਕ੍ਕਟਞ੍ਚੇਵ, ਪੁਨਕਾਤਬ੍ਬਕਨ੍ਤਿ ਚ;

ਕਮ੍ਮੇ ਪਸ੍ਸਦ੍ਧਿਯਾ ਚਾਪਿ, ਤੇ ਭਿਕ੍ਖੂ ਧਮ੍ਮਵਾਦਿਨੋ.

ਵਿਪਤ੍ਤਿਬ੍ਯਾਧਿਤੇ ਦਿਸ੍ਵਾ, ਕਮ੍ਮਪ੍ਪਤ੍ਤੇ ਮਹਾਮੁਨਿ;

ਪਟਿਪ੍ਪਸ੍ਸਦ੍ਧਿਮਕ੍ਖਾਸਿ, ਸਲ੍ਲਕਤ੍ਤੋਵ ਓਸਧਨ੍ਤਿ.

ਇਮਮ੍ਹਿ ਖਨ੍ਧਕੇ ਵਤ੍ਥੂਨਿ ਛਤ੍ਤਿਂਸਾਤਿ.

ਚਮ੍ਪੇਯ੍ਯਕ੍ਖਨ੍ਧਕੋ ਨਿਟ੍ਠਿਤੋ.

੧੦. ਕੋਸਮ੍ਬਕਕ੍ਖਨ੍ਧਕੋ

੨੭੧. ਕੋਸਮ੍ਬਕਵਿਵਾਦਕਥਾ

੪੫੧. ਤੇਨ ਸਮਯੇਨ ਬੁਦ੍ਧੋ ਭਗਵਾ ਕੋਸਮ੍ਬਿਯਂ ਵਿਹਰਤਿ ਘੋਸਿਤਾਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿ [ਆਪਤ੍ਤਿਦਿਟ੍ਠੀ (ਸੀ.)] ਹੋਤਿ; ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਸੋ ਅਪਰੇਨ ਸਮਯੇਨ ਤਸ੍ਸਾ ਆਪਤ੍ਤਿਯਾ ਅਨਾ ਪਤ੍ਤਿਦਿਟ੍ਠਿ ਹੋਤਿ; ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਅਥ ਖੋ ਤੇ ਭਿਕ੍ਖੂ ਤਂ ਭਿਕ੍ਖੁਂ ਏਤਦਵੋਚੁਂ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿ’’ਨ੍ਤਿ? ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ ਯਮਹਂ ਪਸ੍ਸੇਯ੍ਯ’’ਨ੍ਤਿ. ਅਥ ਖੋ ਤੇ ਭਿਕ੍ਖੂ ਸਾਮਗ੍ਗਿਂ ਲਭਿਤ੍ਵਾ ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ. ਸੋ ਚ ਭਿਕ੍ਖੁ ਬਹੁਸ੍ਸੁਤੋ ਹੋਤਿ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਅਥ ਖੋ ਸੋ ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਤਦਵੋਚ – ‘‘ਅਨਾਪਤ੍ਤਿ ਏਸਾ, ਆਵੁਸੋ, ਨੇਸਾ ਆਪਤ੍ਤਿ. ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ. ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ. ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ. ਹੋਥ ਮੇ ਆਯਸ੍ਮਨ੍ਤੋ ਧਮ੍ਮਤੋ ਵਿਨਯਤੋ ਪਕ੍ਖਾ’’ਤਿ. ਅਲਭਿ ਖੋ ਸੋ ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ. ਜਾਨਪਦਾਨਮ੍ਪਿ ਸਨ੍ਦਿਟ੍ਠਾਨਂ ਸਮ੍ਭਤ੍ਤਾਨਂ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ਅਨਾਪਤ੍ਤਿ ਏਸਾ, ਆਵੁਸੋ, ਨੇਸਾ ਆਪਤ੍ਤਿ. ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ. ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ. ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ. ਹੋਨ੍ਤੁ ਮੇ ਆਯਸ੍ਮਨ੍ਤੋ ਧਮ੍ਮਤੋ ਵਿਨਯਤੋ ਪਕ੍ਖਾ’’ਤਿ. ਅਲਭਿ ਖੋ ਸੋ ਭਿਕ੍ਖੁ ਜਾਨਪਦੇਪਿ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ. ਅਥ ਖੋ ਤੇ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਉਕ੍ਖੇਪਕੇ ਭਿਕ੍ਖੂ ਏਤਦਵੋਚੁਂ – ‘‘ਅਨਾਪਤ੍ਤਿ ਏਸਾ, ਆਵੁਸੋ, ਨੇਸਾ ਆਪਤ੍ਤਿ. ਅਨਾਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਆਪਨ੍ਨੋ. ਅਨੁਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਉਕ੍ਖਿਤ੍ਤੋ. ਅਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨਾ’’ਤਿ. ਏਵਂ ਵੁਤ੍ਤੇ ਉਕ੍ਖੇਪਕਾ ਭਿਕ੍ਖੂ ਉਕ੍ਖਿਤ੍ਤਾਨੁਵਤ੍ਤਕੇ ਭਿਕ੍ਖੂ ਏਤਦਵੋਚੁਂ – ‘‘ਆਪਤ੍ਤਿ ਏਸਾ ਆਵੁਸੋ, ਨੇਸਾ ਅਨਾਪਤ੍ਤਿ. ਆਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨਾਪਨ੍ਨੋ. ਉਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨੁਕ੍ਖਿਤ੍ਤੋ. ਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ. ਮਾ ਖੋ ਤੁਮ੍ਹੇ ਆਯਸ੍ਮਨ੍ਤੋ ਏਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁਵਤ੍ਤਿਤ੍ਥ ਅਨੁਪਰਿਵਾਰੇਥਾ’’ਤਿ. ਏਵਮ੍ਪਿ ਖੋ ਤੇ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਉਕ੍ਖੇਪਕੇਹਿ ਭਿਕ੍ਖੂਹਿ ਵੁਚ੍ਚਮਾਨਾ ਤਥੇਵ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁਵਤ੍ਤਿਂਸੁ ਅਨੁਪਰਿਵਾਰੇਸੁਂ.

੪੫੨. ਅਥ ਖੋ ਅਞ੍ਞਤਰੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਇਧ, ਭਨ੍ਤੇ, ਅਞ੍ਞਤਰੋ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਅਹੋਸਿ. ਸੋ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿ ਅਹੋਸਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿਨੋ ਅਹੇਸੁਂ. ਸੋ ਅਪਰੇਨ ਸਮਯੇਨ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਅਹੋਸਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਅਹੇਸੁਂ. ਅਥ ਖੋ ਤੇ, ਭਨ੍ਤੇ, ਭਿਕ੍ਖੂ ਤਂ ਭਿਕ੍ਖੁਂ ਏਤਦਵੋਚੁਂ – ‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿ’ਨ੍ਤਿ? ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ ਯਮਹਂ ਪਸ੍ਸੇਯ੍ਯ’’ਨ੍ਤਿ. ਅਥ ਖੋ ਤੇ, ਭਨ੍ਤੇ, ਭਿਕ੍ਖੂ ਸਾਮਗ੍ਗਿਂ ਲਭਿਤ੍ਵਾ ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ. ਸੋ ਚ, ਭਨ੍ਤੇ, ਭਿਕ੍ਖੁ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਅਥ ਖੋ ਸੋ, ਭਨ੍ਤੇ, ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਤਦਵੋਚ – ‘ਅਨਾਪਤ੍ਤਿ ਏਸਾ, ਆਵੁਸੋ; ਨੇਸਾ ਆਪਤ੍ਤਿ. ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ. ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ. ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ. ਹੋਥ ਮੇ ਆਯਸ੍ਮਨ੍ਤੋ ਧਮ੍ਮਤੋ ਵਿਨਯਤੋ ਪਕ੍ਖਾ’ਤਿ. ਅਲਭਿ ਖੋ ਸੋ, ਭਨ੍ਤੇ, ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ. ਜਾਨਪਦਾਨਮ੍ਪਿ ਸਨ੍ਦਿਟ੍ਠਾਨਂ ਸਮ੍ਭਤ੍ਤਾਨਂ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ‘ਅਨਾਪਤ੍ਤਿ ਏਸਾ, ਆਵੁਸੋ; ਨੇਸਾ ਆਪਤ੍ਤਿ. ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ. ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ. ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ. ਹੋਨ੍ਤੁ ਮੇ ਆਯਸ੍ਮਨ੍ਤੋ ਧਮ੍ਮਤੋ ਵਿਨਯਤੋ ਪਕ੍ਖਾ’ਤਿ. ਅਲਭਿ ਖੋ ਸੋ, ਭਨ੍ਤੇ, ਭਿਕ੍ਖੁ ਜਾਨਪਦੇਪਿ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ. ਅਥ ਖੋ ਤੇ, ਭਨ੍ਤੇ, ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਉਕ੍ਖੇਪਕੇ ਭਿਕ੍ਖੂ ਏਤਦਵੋਚੁਂ – ‘ਅਨਾਪਤ੍ਤਿ ਏਸਾ, ਆਵੁਸੋ; ਨੇਸਾ ਆਪਤ੍ਤਿ. ਅਨਾਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਆਪਨ੍ਨੋ. ਅਨੁਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਉਕ੍ਖਿਤ੍ਤੋ. ਅਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨਾ’ਤਿ. ਏਵਂ ਵੁਤ੍ਤੇ ਤੇ, ਭਨ੍ਤੇ, ਉਕ੍ਖੇਪਕਾ ਭਿਕ੍ਖੂ ਉਕ੍ਖਿਤ੍ਤਾਨੁਵਤ੍ਤਕੇ ਭਿਕ੍ਖੂ ਏਤਦਵੋਚੁਂ – ‘ਆਪਤ੍ਤਿ ਏਸਾ, ਆਵੁਸੋ; ਨੇਸਾ ਅਨਾਪਤ੍ਤਿ. ਆਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨਾਪਨ੍ਨੋ. ਉਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨੁਕ੍ਖਿਤ੍ਤੋ. ਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ. ਮਾ ਖੋ ਤੁਮ੍ਹੇ ਆਯਸ੍ਮਨ੍ਤੋ ਏਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁਵਤ੍ਤਿਤ੍ਥ ਅਨੁਪਰਿਵਾਰੇਥਾ’ਤਿ. ਏਵਮ੍ਪਿ ਖੋ ਤੇ, ਭਨ੍ਤੇ, ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਉਕ੍ਖੇਪਕੇਹਿ ਭਿਕ੍ਖੂਹਿ ਵੁਚ੍ਚਮਾਨਾ ਤਥੇਵ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁਵਤ੍ਤਨ੍ਤਿ ਅਨੁਪਰਿਵਾਰੇਨ੍ਤੀ’’ਤਿ.

੪੫੩. ਅਥ ਖੋ ਭਗਵਾ ‘ਭਿਨ੍ਨੋ ਭਿਕ੍ਖੁਸਙ੍ਘੋ, ਭਿਨ੍ਨੋ ਭਿਕ੍ਖੁਸਙ੍ਘੋ’ਤਿ – ਉਟ੍ਠਾਯਾਸਨਾ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਭਗਵਾ ਉਕ੍ਖੇਪਕੇ ਭਿਕ੍ਖੂ ਏਤਦਵੋਚ – ‘‘ਮਾ ਖੋ ਤੁਮ੍ਹੇ, ਭਿਕ੍ਖਵੇ, ‘ਪਟਿਭਾਤਿ ਨੋ, ਪਟਿਭਾਤਿ ਨੋ’ਤਿ ਯਸ੍ਮਿਂ ਵਾ ਤਸ੍ਮਿਂ ਵਾ ਭਿਕ੍ਖੁਂ ਉਕ੍ਖਿਪਿਤਬ੍ਬਂ ਮਞ੍ਞਿਤ੍ਥ’’.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਤਂ ਭਿਕ੍ਖੁਂ ਏਵਂ ਜਾਨਨ੍ਤਿ – ‘ਅਯਂ ਖੋ ਆਯਸ੍ਮਾ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਸਚੇ ਮਯਂ ਇਮਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਾਮ, ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਉਪੋਸਥਂ ਕਰਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਉਪੋਸਥਂ ਕਰਿਸ੍ਸਾਮ, ਭਵਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣ’ਨ੍ਤਿ, ਭੇਦਗਰੁਕੇਹਿ, ਭਿਕ੍ਖਵੇ, ਭਿਕ੍ਖੂਹਿ ਨ ਸੋ ਭਿਕ੍ਖੁ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਤਂ ਭਿਕ੍ਖੁਂ ਏਵਂ ਜਾਨਨ੍ਤਿ – ‘ਅਯਂ ਖੋ ਆਯਸ੍ਮਾ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਸਚੇ ਮਯਂ ਇਮਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਾਮ, ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਪਵਾਰੇਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਪਵਾਰੇਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਸਙ੍ਘਕਮ੍ਮਂ ਕਰਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਸਙ੍ਘਕਮ੍ਮਂ ਕਰਿਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਆਸਨੇ ਨਿਸੀਦਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਆਸਨੇ ਨਿਸੀਦਿਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਯਾਗੁਪਾਨੇ ਨਿਸੀਦਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਯਾਗੁਪਾਨੇ ਨਿਸੀਦਿਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਭਤ੍ਤਗ੍ਗੇ ਨਿਸੀਦਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਭਤ੍ਤਗ੍ਗੇ ਨਿਸੀਦਿਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਵਸਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਏਕਚ੍ਛਨ੍ਨੇ ਵਸਿਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਾਮ. ਭਵਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣ’ਨ੍ਤਿ, ਭੇਦਗਰੁਕੇਹਿ, ਭਿਕ੍ਖਵੇ, ਭਿਕ੍ਖੂਹਿ ਨ ਸੋ ਭਿਕ੍ਖੁ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਤਬ੍ਬੋ’’ਤਿ.

੪੫੪. ਅਥ ਖੋ ਭਗਵਾ ਉਕ੍ਖੇਪਕਾਨਂ ਭਿਕ੍ਖੂਨਂ ਏਤਮਤ੍ਥਂ ਭਾਸਿਤ੍ਵਾ ਉਟ੍ਠਾਯਾਸਨਾ ਯੇਨ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਭਗਵਾ ਉਕ੍ਖਿਤ੍ਤਾਨੁਵਤ੍ਤਕੇ ਭਿਕ੍ਖੂ ਏਤਦਵੋਚ – ‘‘ਮਾ ਖੋ ਤੁਮ੍ਹੇ, ਭਿਕ੍ਖਵੇ, ਆਪਤ੍ਤਿਂ ਆਪਜ੍ਜਿਤ੍ਵਾ ‘ਨਾਮ੍ਹ ਆਪਨ੍ਨਾ, ਨਾਮ੍ਹ ਆਪਨ੍ਨਾ’ਤਿ ਆਪਤ੍ਤਿਂ ਨ ਪਟਿਕਾਤਬ੍ਬਂ ਮਞ੍ਞਿਤ੍ਥ’’.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਸੋ ਚੇ, ਭਿਕ੍ਖਵੇ, ਭਿਕ੍ਖੁ ਤੇ ਭਿਕ੍ਖੂ ਏਵਂ ਜਾਨਾਤਿ – ‘ਇਮੇ ਖੋ ਆਯਸ੍ਮਨ੍ਤੋ [ਆਯਸ੍ਮਨ੍ਤਾ (ਕ.)] ਬਹੁਸ੍ਸੁਤਾ ਆਗਤਾਗਮਾ ਧਮ੍ਮਧਰਾ ਵਿਨਯਧਰਾ ਮਾਤਿਕਾਧਰਾ ਪਣ੍ਡਿਤਾ ਬ੍ਯਤ੍ਤਾ ਮੇਧਾਵਿਨੋ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ, ਨਾਲਂ ਮਮਂ ਵਾ ਕਾਰਣਾ ਅਞ੍ਞੇਸਂ ਵਾ ਕਾਰਣਾ ਛਨ੍ਦਾ ਦੋਸਾ ਮੋਹਾ ਭਯਾ ਅਗਤਿਂ ਗਨ੍ਤੁਂ. ਸਚੇ ਮਂ ਇਮੇ ਭਿਕ੍ਖੂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਨ੍ਤਿ, ਨ ਮਯਾ ਸਦ੍ਧਿਂ ਉਪੋਸਥਂ ਕਰਿਸ੍ਸਨ੍ਤਿ, ਵਿਨਾ ਮਯਾ ਉਪੋਸਥਂ ਕਰਿਸ੍ਸਨ੍ਤਿ, ਭਵਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣ’ਨ੍ਤਿ, ਭੇਦਗਰੁਕੇਨ, ਭਿਕ੍ਖਵੇ, ਭਿਕ੍ਖੁਨਾ ਪਰੇਸਮ੍ਪਿ ਸਦ੍ਧਾਯ ਸਾ ਆਪਤ੍ਤਿ ਦੇਸੇਤਬ੍ਬਾ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਸੋ ਚੇ, ਭਿਕ੍ਖਵੇ, ਭਿਕ੍ਖੁ ਤੇ ਭਿਕ੍ਖੂ ਏਵਂ ਜਾਨਾਤਿ – ‘ਇਮੇ ਖੋ ਆਯਸ੍ਮਨ੍ਤੋ ਬਹੁਸ੍ਸੁਤਾ ਆਗਤਾਗਮਾ ਧਮ੍ਮਧਰਾ ਵਿਨਯਧਰਾ ਮਾਤਿਕਾਧਰਾ ਪਣ੍ਡਿਤਾ ਬ੍ਯਤ੍ਤਾ ਮੇਧਾਵਿਨੋ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ, ਨਾਲਂ ਮਮਂ ਵਾ ਕਾਰਣਾ ਅਞ੍ਞੇਸਂ ਵਾ ਕਾਰਣਾ ਛਨ੍ਦਾ ਦੋਸਾ ਮੋਹਾ ਭਯਾ ਅਗਤਿਂ ਗਨ੍ਤੁਂ. ਸਚੇ ਮਂ ਇਮੇ ਭਿਕ੍ਖੂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਨ੍ਤਿ, ਨ ਮਯਾ ਸਦ੍ਧਿਂ ਪਵਾਰੇਸ੍ਸਨ੍ਤਿ, ਵਿਨਾ ਮਯਾ ਪਵਾਰੇਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਸਙ੍ਘਕਮ੍ਮਂ ਕਰਿਸ੍ਸਨ੍ਤਿ, ਵਿਨਾ ਮਯਾ ਸਙ੍ਘਕਮ੍ਮਂ ਕਰਿਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਆਸਨੇ ਨਿਸੀਦਿਸ੍ਸਨ੍ਤਿ, ਵਿਨਾ ਮਯਾ ਆਸਨੇ ਨਿਸੀਦਿਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਯਾਗੁਪਾਨੇ ਨਿਸੀਦਿਸ੍ਸਨ੍ਤਿ, ਵਿਨਾ ਮਯਾ ਯਾਗੁਪਾਨੇ ਨਿਸੀਦਿਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਭਤ੍ਤਗ੍ਗੇ ਨਿਸੀਦਿਸ੍ਸਨ੍ਤਿ ਵਿਨਾ ਮਯਾ ਭਤ੍ਤਗ੍ਗੇ ਨਿਸੀਦਿਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਏਕਚ੍ਛਨ੍ਨੇ ਵਸਿਸ੍ਸਨ੍ਤਿ, ਵਿਨਾ ਮਯਾ ਏਕਚ੍ਛਨ੍ਨੇ ਵਸਿਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਨ੍ਤਿ, ਵਿਨਾ ਮਯਾ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਨ੍ਤਿ, ਭਵਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣ’ਨ੍ਤਿ, ਭੇਦਗਰੁਕੇਨ, ਭਿਕ੍ਖਵੇ, ਭਿਕ੍ਖੁਨਾ ਪਰੇਸਮ੍ਪਿ ਸਦ੍ਧਾਯ ਸਾ ਆਪਤ੍ਤਿ ਦੇਸੇਤਬ੍ਬਾ’’ਤਿ. ਅਥ ਖੋ ਭਗਵਾ ਉਕ੍ਖਿਤ੍ਤਾਨੁਵਤ੍ਤਕਾਨਂ ਭਿਕ੍ਖੂਨਂ ਏਤਮਤ੍ਥਂ ਭਾਸਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

੪੫੫. ਤੇਨ ਖੋ ਪਨ ਸਮਯੇਨ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਤ੍ਥੇਵ ਅਨ੍ਤੋਸੀਮਾਯ ਉਪੋਸਥਂ ਕਰੋਨ੍ਤਿ, ਸਙ੍ਘਕਮ੍ਮਂ ਕਰੋਨ੍ਤਿ. ਉਕ੍ਖੇਪਕਾ ਪਨ ਭਿਕ੍ਖੂ ਨਿਸ੍ਸੀਮਂ ਗਨ੍ਤ੍ਵਾ ਉਪੋਸਥਂ ਕਰੋਨ੍ਤਿ, ਸਙ੍ਘਕਮ੍ਮਂ ਕਰੋਨ੍ਤਿ. ਅਥ ਖੋ ਅਞ੍ਞਤਰੋ ਉਕ੍ਖੇਪਕੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਤੇ, ਭਨ੍ਤੇ, ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਤ੍ਥੇਵ ਅਨ੍ਤੋਸੀਮਾਯ ਉਪੋਸਥਂ ਕਰੋਨ੍ਤਿ, ਸਙ੍ਘਕਮ੍ਮਂ ਕਰੋਨ੍ਤਿ. ਮਯਂ ਪਨ ਉਕ੍ਖੇਪਕਾ ਭਿਕ੍ਖੂ ਨਿਸ੍ਸੀਮਂ ਗਨ੍ਤ੍ਵਾ ਉਪੋਸਥਂ ਕਰੋਮ, ਸਙ੍ਘਕਮ੍ਮਂ ਕਰੋਮਾ’’ਤਿ. ‘‘ਤੇ ਚੇ, ਭਿਕ੍ਖੁ, ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਤ੍ਥੇਵ ਅਨ੍ਤੋਸੀਮਾਯ ਉਪੋਸਥਂ ਕਰਿਸ੍ਸਨ੍ਤਿ, ਸਙ੍ਘਕਮ੍ਮਂ ਕਰਿਸ੍ਸਨ੍ਤਿ, ਯਥਾ ਮਯਾ ਞਤ੍ਤਿ ਚ ਅਨੁਸ੍ਸਾਵਨਾ ਚ ਪਞ੍ਞਤ੍ਤਾ, ਤੇਸਂ ਤਾਨਿ ਕਮ੍ਮਾਨਿ ਧਮ੍ਮਿਕਾਨਿ ਕਮ੍ਮਾਨਿ ਭਵਿਸ੍ਸ’’ਨ੍ਤਿ ਅਕੁਪ੍ਪਾਨਿ ਠਾਨਾਰਹਾਨਿ. ਤੁਮ੍ਹੇ ਚੇ, ਭਿਕ੍ਖੁ, ਉਕ੍ਖੇਪਕਾ ਭਿਕ੍ਖੂ ਤਤ੍ਥੇਵ ਅਨ੍ਤੋਸੀਮਾਯ ਉਪੋਸਥਂ ਕਰਿਸ੍ਸਥ, ਸਙ੍ਘਕਮ੍ਮਂ ਕਰਿਸ੍ਸਥ, ਯਥਾ ਮਯਾ ਞਤ੍ਤਿ ਚ ਅਨੁਸ੍ਸਾਵਨਾ ਚ ਪਞ੍ਞਤ੍ਤਾ, ਤੁਮ੍ਹਾਕਮ੍ਪਿ ਤਾਨਿ ਕਮ੍ਮਾਨਿ ਧਮ੍ਮਿਕਾਨਿ ਕਮ੍ਮਾਨਿ ਭਵਿਸ੍ਸਨ੍ਤਿ ਅਕੁਪ੍ਪਾਨਿ ਠਾਨਾਰਹਾਨਿ. ਤਂ ਕਿਸ੍ਸ ਹੇਤੁ? ਨਾਨਾਸਂਵਾਸਕਾ ਏਤੇ [ਤੇ (ਸ੍ਯਾ.)] ਭਿਕ੍ਖੂ [ਭਿਕ੍ਖੁ (ਸੀ. ਸ੍ਯਾ.)] ਤੁਮ੍ਹੇਹਿ, ਤੁਮ੍ਹੇ ਚ ਤੇਹਿ ਨਾਨਾਸਂਵਾਸਕਾ.

‘‘ਦ੍ਵੇਮਾ, ਭਿਕ੍ਖੁ, ਨਾਨਾਸਂਵਾਸਕਭੂਮਿਯੋ – ਅਤ੍ਤਨਾ ਵਾ ਅਤ੍ਤਾਨਂ ਨਾਨਾਸਂਵਾਸਕਂ ਕਰੋਤਿ, ਸਮਗ੍ਗੋ ਵਾ ਨਂ ਸਙ੍ਘੋ ਉਕ੍ਖਿਪਤਿ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ. ਇਮਾ ਖੋ, ਭਿਕ੍ਖੁ, ਦ੍ਵੇ ਨਾਨਾਸਂਵਾਸਕਭੂਮਿਯੋ. ਦ੍ਵੇਮਾ, ਭਿਕ੍ਖੁ, ਸਮਾਨਸਂਵਾਸਕਭੂਮਿਯੋ – ਅਤ੍ਤਨਾ ਵਾ ਅਤ੍ਤਾਨਂ ਸਮਾਨਸਂਵਾਸਂ ਕਰੋਤਿ, ਸਮਗ੍ਗੋ ਵਾ ਨਂ ਸਙ੍ਘੋ ਉਕ੍ਖਿਤ੍ਤਂ ਓਸਾਰੇਤਿ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ. ਇਮਾ ਖੋ, ਭਿਕ੍ਖੁ, ਦ੍ਵੇ ਸਮਾਨਸਂਵਾਸਕਭੂਮਿਯੋ’’ਤਿ.

੪੫੬. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ ਵਚੀਕਮ੍ਮਂ ਉਪਦਂਸੇਨ੍ਤਿ, ਹਤ੍ਥਪਰਾਮਾਸਂ ਕਰੋਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ ਵਚੀਕਮ੍ਮਂ ਉਪਦਂਸੇਸ੍ਸਨ੍ਤਿ, ਹਤ੍ਥਪਰਾਮਾਸਂ ਕਰਿਸ੍ਸਨ੍ਤੀ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ ਵਚੀਕਮ੍ਮਂ ਉਪਦਂਸੇਸ੍ਸਨ੍ਤਿ, ਹਤ੍ਥਪਰਾਮਾਸਂ ਕਰਿਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ…ਪੇ… ਹਤ੍ਥਪਰਾਮਾਸਂ ਕਰੋਨ੍ਤੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਨ੍ਨੇ, ਭਿਕ੍ਖਵੇ, ਸਙ੍ਘੇ ਅਧਮ੍ਮਿਯਾਯਮਾਨੇ [ਅਧਮ੍ਮਿਯਮਾਨੇ (ਸੀ. ਸ੍ਯਾ. ਕਤ੍ਥਚਿ) ਅਧਮ੍ਮੀਯਮਾਨੇ (ਕ.)] ਅਸਮ੍ਮੋਦਿਕਾਯ ਵਤ੍ਤਮਾਨਾਯ [-‘‘ਅਸਮ੍ਮੋਦਿਕਾਵਤ੍ਤਮਾਨਾਯ’’ ਇਤਿ ਅਟ੍ਠਕਥਾਯਂ ਸਂਵਣ੍ਣੇਤਬ੍ਬਪਾਠੋ] ‘ਏਤ੍ਤਾਵਤਾ ਨ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ ਵਚੀਕਮ੍ਮਂ ਉਪਦਂਸੇਸ੍ਸਾਮ, ਹਤ੍ਥਪਰਾਮਾਸਂ ਕਰਿਸ੍ਸਾਮਾ’ਤਿ ਆਸਨੇ ਨਿਸੀਦਿਤਬ੍ਬਂ. ਭਿਨ੍ਨੇ, ਭਿਕ੍ਖਵੇ, ਸਙ੍ਘੇ ਧਮ੍ਮਿਯਾਯਮਾਨੇ ਸਮ੍ਮੋਦਿਕਾਯ ਵਤ੍ਤਮਾਨਾਯ ਆਸਨਨ੍ਤਰਿਕਾਯ ਨਿਸੀਦਿਤਬ੍ਬ’’ਨ੍ਤਿ.

੪੫੭. [ਮ. ਨਿ. ੩.੨੩੬ ਥੋਕਂ ਵਿਸਦਿਸਂ] ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸਙ੍ਘਮਜ੍ਝੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਮੁਖਸਤ੍ਤੀਹਿ ਵਿਤੁਦਨ੍ਤਾ ਵਿਹਰਨ੍ਤਿ. ਤੇ ਨ ਸਕ੍ਕੋਨ੍ਤਿ ਤਂ ਅਧਿਕਰਣਂ ਵੂਪਸਮੇਤੁਂ. ਅਥ ਖੋ ਅਞ੍ਞਤਰੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਇਧ, ਭਨ੍ਤੇ, ਭਿਕ੍ਖੂ ਸਙ੍ਘਮਜ੍ਝੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਮੁਖਸਤ੍ਤੀਹਿ ਵਿਤੁਦਨ੍ਤਾ ਵਿਹਰਨ੍ਤਿ. ਤੇ ਨ ਸਕ੍ਕੋਨ੍ਤਿ ਤਂ ਅਧਿਕਰਣਂ ਵੂਪਸਮੇਤੁਂ. ਸਾਧੁ, ਭਨ੍ਤੇ, ਭਗਵਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਤੁ ਅਨੁਕਮ੍ਪਂ ਉਪਾਦਾਯਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਭਗਵਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਅਲਂ, ਭਿਕ੍ਖਵੇ, ਮਾ ਭਣ੍ਡਨਂ ਮਾ ਕਲਹਂ ਮਾ ਵਿਗ੍ਗਹਂ ਮਾ ਵਿਵਾਦ’’ਨ੍ਤਿ. ਏਵਂ ਵੁਤ੍ਤੇ ਅਞ੍ਞਤਰੋ ਅਧਮ੍ਮਵਾਦੀ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਆਗਮੇਤੁ, ਭਨ੍ਤੇ, ਭਗਵਾ ਧਮ੍ਮਸ੍ਸਾਮੀ; ਅਪ੍ਪੋਸ੍ਸੁਕ੍ਕੋ, ਭਨ੍ਤੇ, ਭਗਵਾ ਦਿਟ੍ਠਧਮ੍ਮਸੁਖਵਿਹਾਰਮਨੁਯੁਤ੍ਤੋ ਵਿਹਰਤੁ. ਮਯਮੇਤੇਨ ਭਣ੍ਡਨੇਨ ਕਲਹੇਨ ਵਿਗ੍ਗਹੇਨ ਵਿਵਾਦੇਨ ਪਞ੍ਞਾਯਿਸ੍ਸਾਮਾ’’ਤਿ. ਦੁਤਿਯਮ੍ਪਿ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਅਲਂ, ਭਿਕ੍ਖਵੇ, ਮਾ ਭਣ੍ਡਨਂ ਮਾ ਕਲਹਂ ਮਾ ਵਿਗ੍ਗਹਂ ਮਾ ਵਿਵਾਦ’’ਨ੍ਤਿ. ਦੁਤਿਯਮ੍ਪਿ ਖੋ ਸੋ ਅਧਮ੍ਮਵਾਦੀ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਆਗਮੇਤੁ, ਭਨ੍ਤੇ, ਭਗਵਾ ਧਮ੍ਮਸ੍ਸਾਮੀ; ਅਪ੍ਪੋਸ੍ਸੁਕ੍ਕੋ, ਭਨ੍ਤੇ, ਭਗਵਾ ਦਿਟ੍ਠਧਮ੍ਮਸੁਖਵਿਹਾਰਮਨੁਯੁਤ੍ਤੋ ਵਿਹਰਤੁ. ਮਯਮੇਤੇਨ ਭਣ੍ਡਨੇਨ ਕਲਹੇਨ ਵਿਗ੍ਗਹੇਨ ਵਿਵਾਦੇਨ ਪਞ੍ਞਾਯਿਸ੍ਸਾਮਾ’’ਤਿ.

ਕੋਸਮ੍ਬਕਵਿਵਾਦਕਥਾ ਨਿਟ੍ਠਿਤਾ.

੨੭੨. ਦੀਘਾਵੁਵਤ੍ਥੁ

੪੫੮. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭੂਤਪੁਬ੍ਬਂ, ਭਿਕ੍ਖਵੇ, ਬਾਰਾਣਸਿਯਂ [ਵਜਿਰਬੁਦ੍ਧਿਟੀਕਾ ਓਲੋਕੇਤਬ੍ਬਾ] ਬ੍ਰਹ੍ਮਦਤ੍ਤੋ ਨਾਮ ਕਾਸਿਰਾਜਾ ਅਹੋਸਿ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਮਹਬ੍ਬਲੋ ਮਹਾਵਾਹਨੋ ਮਹਾਵਿਜਿਤੋ ਪਰਿਪੁਣ੍ਣਕੋਸਕੋਟ੍ਠਾਗਾਰੋ. ਦੀਘੀਤਿ ਨਾਮ ਕੋਸਲਰਾਜਾ ਅਹੋਸਿ ਦਲਿਦ੍ਦੋ ਅਪ੍ਪਧਨੋ ਅਪ੍ਪਭੋਗੋ ਅਪ੍ਪਬਲੋ ਅਪ੍ਪਵਾਹਨੋ ਅਪ੍ਪਵਿਜਿਤੋ ਅਪਰਿਪੁਣ੍ਣਕੋਸਕੋਟ੍ਠਾਗਾਰੋ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਚਤੁਰਙ੍ਗਿਨਿਂ ਸੇਨਂ ਸਨ੍ਨਯ੍ਹਿਤ੍ਵਾ ਦੀਘੀਤਿਂ ਕੋਸਲਰਾਜਾਨਂ ਅਬ੍ਭੁਯ੍ਯਾਸਿ. ਅਸ੍ਸੋਸਿ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ – ‘‘ਬ੍ਰਹ੍ਮਦਤ੍ਤੋ ਕਿਰ ਕਾਸਿਰਾਜਾ ਚਤੁਰਙ੍ਗਿਨਿਂ ਸੇਨਂ ਸਨ੍ਨਯ੍ਹਿਤ੍ਵਾ ਮਮਂ ਅਬ੍ਭੁਯ੍ਯਾਤੋ’’ਤਿ. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਏਤਦਹੋਸਿ – ‘‘ਬ੍ਰਹ੍ਮਦਤ੍ਤੋ ਖੋ ਕਾਸਿਰਾਜਾ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਮਹਬ੍ਬਲੋ ਮਹਾਵਾਹਨੋ ਮਹਾਵਿਜਿਤੋ ਪਰਿਪੁਣ੍ਣਕੋਸਕੋਟ੍ਠਾਗਾਰੋ, ਅਹਂ ਪਨਮ੍ਹਿ ਦਲਿਦ੍ਦੋ ਅਪ੍ਪਧਨੋ ਅਪ੍ਪਭੋਗੋ ਅਪ੍ਪਬਲੋ ਅਪ੍ਪਵਾਹਨੋ ਅਪ੍ਪਵਿਜਿਤੋ ਅਪਰਿਪੁਣ੍ਣਕੋਸਕੋਟ੍ਠਾਗਾਰੋ, ਨਾਹਂ ਪਟਿਬਲੋ ਬ੍ਰਹ੍ਮਦਤ੍ਤੇਨ ਕਾਸਿਰਞ੍ਞਾ ਏਕਸਙ੍ਘਾਤਮ੍ਪਿ ਸਹਿਤੁਂ. ਯਂਨੂਨਾਹਂ ਪਟਿਕਚ੍ਚੇਵ ਨਗਰਮ੍ਹਾ ਨਿਪ੍ਪਤੇਯ੍ਯ’’ਨ੍ਤਿ.

ਅਥ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਮਹੇਸਿਂ ਆਦਾਯ ਪਟਿਕਚ੍ਚੇਵ ਨਗਰਮ੍ਹਾ ਨਿਪ੍ਪਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘੀਤਿਸ੍ਸ ਕੋਸਲਰਞ੍ਞੋ ਬਲਞ੍ਚ ਵਾਹਨਞ੍ਚ ਜਨਪਦਞ੍ਚ ਕੋਸਞ੍ਚ ਕੋਟ੍ਠਾਗਾਰਞ੍ਚ ਅਭਿਵਿਜਿਯ ਅਜ੍ਝਾਵਸਤਿ. ਅਥ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਸਪਜਾਪਤਿਕੋ ਯੇਨ ਵਾਰਾਣਸੀ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਬਾਰਾਣਸੀ ਤਦਵਸਰਿ. ਤਤ੍ਰ ਸੁਦਂ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਸਪਜਾਪਤਿਕੋ ਬਾਰਾਣਸਿਯਂ ਅਞ੍ਞਤਰਸ੍ਮਿਂ ਪਚ੍ਚਨ੍ਤਿਮੇ ਓਕਾਸੇ ਕੁਮ੍ਭਕਾਰਨਿਵੇਸਨੇ ਅਞ੍ਞਾਤਕਵੇਸੇਨ ਪਰਿਬ੍ਬਾਜਕਚ੍ਛਨ੍ਨੇਨ ਪਟਿਵਸਤਿ. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਨਚਿਰਸ੍ਸੇਵ ਗਬ੍ਭਿਨੀ ਅਹੋਸਿ. ਤਸ੍ਸਾ ਏਵਰੂਪੋ ਦੋਹਲ਼ੋ ਉਪ੍ਪਨ੍ਨੋ ਹੋਤਿ – ‘‘ਇਚ੍ਛਤਿ ਸੂਰਿਯਸ੍ਸ ਉਗ੍ਗਮਨਕਾਲੇ ਚਤੁਰਙ੍ਗਿਨਿਂ ਸੇਨਂ ਸਨ੍ਨਦ੍ਧਂ ਵਮ੍ਮਿਕਂ ਸੁਭੂਮੇ ਠਿਤਂ ਪਸ੍ਸਿਤੁਂ, ਖਗ੍ਗਾਨਞ੍ਚ ਧੋਵਨਂ ਪਾਤੁਂ’’. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਦੀਘੀਤਿਂ ਕੋਸਲਰਾਜਾਨਂ ਏਤਦਵੋਚ – ‘‘ਗਬ੍ਭਿਨੀਮ੍ਹਿ, ਦੇਵ. ਤਸ੍ਸਾ ਮੇ ਏਵਰੂਪੋ ਦੋਹਲ਼ੋ ਉਪ੍ਪਨ੍ਨੋ – ਇਚ੍ਛਾਮਿ ਸੂਰਿਯਸ੍ਸ ਉਗ੍ਗਮਨਕਾਲੇ ਚਤੁਰਙ੍ਗਿਨਿਂ ਸੇਨਂ ਸਨ੍ਨਦ੍ਧਂ ਵਮ੍ਮਿਕਂ [ਵਮ੍ਮਿਤਂ (ਸੀ.)] ਸੁਭੂਮੇ ਠਿਤਂ ਪਸ੍ਸਿਤੁਂ, ਖਗ੍ਗਾਨਞ੍ਚ ਧੋਵਨਂ ਪਾਤੁ’’ਨ੍ਤਿ. ‘‘ਕੁਤੋ, ਦੇਵਿ, ਅਮ੍ਹਾਕਂ ਦੁਗ੍ਗਤਾਨਂ ਚਤੁਰਙ੍ਗਿਨੀ ਸੇਨਾ ਸਨ੍ਨਦ੍ਧਾ ਵਮ੍ਮਿਕਾ ਸੁਭੂਮੇ ਠਿਤਾ, ਖਗ੍ਗਾਨਞ੍ਚ ਧੋਵਨਂ ਪਾਤੁ’’ਨ੍ਤਿ [ਖਗ੍ਗਾਨਞ੍ਚ ਧੋਵਨਨ੍ਤਿ (ਸੀ. ਸ੍ਯਾ.)] ‘‘ਸਚਾਹਂ, ਦੇਵ, ਨ ਲਭਿਸ੍ਸਾਮਿ, ਮਰਿਸ੍ਸਾਮੀ’’ਤਿ.

੪੫੯. ਤੇਨ ਖੋ ਪਨ ਸਮਯੇਨ, ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਦੀਘੀਤਿਸ੍ਸ ਕੋਸਲਰਞ੍ਞੋ ਸਹਾਯੋ ਹੋਤਿ. ਅਥ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਯੇਨ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤਂ ਬ੍ਰਾਹ੍ਮਣਂ ਏਤਦਵੋਚ – ‘‘ਸਖੀ ਤੇ, ਸਮ੍ਮ, ਗਬ੍ਭਿਨੀ. ਤਸ੍ਸਾ ਏਵਰੂਪੋ ਦੋਹਲ਼ੋ ਉਪ੍ਪਨ੍ਨੋ – ਇਚ੍ਛਤਿ ਸੂਰਿਯਸ੍ਸ ਉਗ੍ਗਮਨਕਾਲੇ ਚਤੁਰਙ੍ਗਿਨਿਂ ਸੇਨਂ ਸਨ੍ਨਦ੍ਧਂ ਵਮ੍ਮਿਕਂ ਸੁਭੂਮੇ ਠਿਤਂ ਪਸ੍ਸਿਤੁਂ, ਖਗ੍ਗਾਨਞ੍ਚ ਧੋਵਨਂ ਪਾਤੁ’’ਨ੍ਤਿ. ‘‘ਤੇਨ ਹਿ, ਦੇਵ, ਮਯਮ੍ਪਿ ਦੇਵਿਂ ਪਸ੍ਸਾਮਾ’’ਤਿ. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਯੇਨ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸਿਂ ਦੂਰਤੋਵ ਆਗਚ੍ਛਨ੍ਤਿਂ, ਦਿਸ੍ਵਾਨ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਯੇਨ ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਤੇਨਞ੍ਜਲਿਂ ਪਣਾਮੇਤ੍ਵਾ ਤਿਕ੍ਖਤ੍ਤੁਂ ਉਦਾਨਂ ਉਦਾਨੇਸਿ – ‘‘ਕੋਸਲਰਾਜਾ ਵਤ ਭੋ ਕੁਚ੍ਛਿਗਤੋ, ਕੋਸਲਰਾਜਾ ਵਤ ਭੋ ਕੁਚ੍ਛਿਗਤੋ’’ਤਿ. ਅਤ੍ਤਮਨਾ [ਅਵਿਮਨਾ (ਸੀ. ਸ੍ਯਾ. ਕਤ੍ਥਚਿ], ਦੇਵਿ, ਹੋਹਿ. ਲਚ੍ਛਸਿ ਸੂਰਿਯਸ੍ਸ ਉਗ੍ਗਮਨਕਾਲੇ ਚਤੁਰਙ੍ਗਿਨਿਂ ਸੇਨਂ ਸਨ੍ਨਦ੍ਧਂ ਵਮ੍ਮਿਕਂ ਸੁਭੂਮੇ ਠਿਤਂ ਪਸ੍ਸਿਤੁਂ, ਖਗ੍ਗਾਨਞ੍ਚ ਧੋਵਨਂ ਪਾਤੁਨ੍ਤਿ.

ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਯੇਨ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਤਥਾ, ਦੇਵ, ਨਿਮਿਤ੍ਤਾਨਿ ਦਿਸ੍ਸਨ੍ਤਿ, ਸ੍ਵੇ ਸੂਰਿਯੁਗ੍ਗਮਨਕਾਲੇ ਚਤੁਰਙ੍ਗਿਨੀ ਸੇਨਾ ਸਨ੍ਨਦ੍ਧਾ ਵਮ੍ਮਿਕਾ ਸੁਭੂਮੇ ਤਿਟ੍ਠਤੁ, ਖਗ੍ਗਾ ਚ ਧੋਵਿਯਨ੍ਤੂ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਮਨੁਸ੍ਸੇ ਆਣਾਪੇਸਿ – ‘‘ਯਥਾ, ਭਣੇ, ਪੁਰੋਹਿਤੋ ਬ੍ਰਾਹ੍ਮਣੋ ਆਹ ਤਥਾ ਕਰੋਥਾ’’ਤਿ. ਅਲਭਿ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਸੂਰਿਯਸ੍ਸ ਉਗ੍ਗਮਨਕਾਲੇ ਚਤੁਰਙ੍ਗਿਨਿਂ ਸੇਨਂ ਸਨ੍ਨਦ੍ਧਂ ਵਮ੍ਮਿਕਂ ਸੁਭੂਮੇ ਠਿਤਂ ਪਸ੍ਸਿਤੁਂ, ਖਗ੍ਗਾਨਞ੍ਚ ਧੋਵਨਂ ਪਾਤੁਂ. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਤਸ੍ਸ ਗਬ੍ਭਸ੍ਸ ਪਰਿਪਾਕਮਨ੍ਵਾਯ ਪੁਤ੍ਤਂ ਵਿਜਾਯਿ. ਤਸ੍ਸ ਦੀਘਾਵੂਤਿ ਨਾਮਂ ਅਕਂਸੁ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਨਚਿਰਸ੍ਸੇਵ ਵਿਞ੍ਞੁਤਂ ਪਾਪੁਣਿ. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਏਤਦਹੋਸਿ – ‘‘ਅਯਂ ਖੋ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕੋ, ਇਮਿਨਾ ਅਮ੍ਹਾਕਂ ਬਲਞ੍ਚ ਵਾਹਨਞ੍ਚ ਜਨਪਦੋ ਚ ਕੋਸੋ ਚ ਕੋਟ੍ਠਾਗਾਰਞ੍ਚ ਅਚ੍ਛਿਨ੍ਨਂ, ਸਚਾਯਂ ਅਮ੍ਹੇ ਜਾਨਿਸ੍ਸਤਿ, ਸਬ੍ਬੇਵ ਤਯੋ ਘਾਤਾਪੇਸ੍ਸਤਿ, ਯਂਨੂਨਾਹਂ ਦੀਘਾਵੁਂ ਕੁਮਾਰਂ ਬਹਿਨਗਰੇ ਵਾਸੇਯ੍ਯ’’ਨ੍ਤਿ. ਅਥ ਖੋ ਭਿਕ੍ਖਵੇ ਦੀਘੀਤਿ ਕੋਸਲਰਾਜਾ ਦੀਘਾਵੁਂ ਕੁਮਾਰਂ ਬਹਿਨਗਰੇ ਵਾਸੇਸਿ. ਅਥ ਖੋ ਭਿਕ੍ਖਵੇ ਦੀਘਾਵੁ ਕੁਮਾਰੋ ਬਹਿਨਗਰੇ ਪਟਿਵਸਨ੍ਤੋ ਨਚਿਰਸ੍ਸੇਵ ਸਬ੍ਬਸਿਪ੍ਪਾਨਿ ਸਿਕ੍ਖਿ.

੪੬੦. ਤੇਨ ਖੋ ਪਨ ਸਮਯੇਨ ਦੀਘੀਤਿਸ੍ਸ ਕੋਸਲਰਞ੍ਞੋ ਕਪ੍ਪਕੋ ਬ੍ਰਹ੍ਮਦਤ੍ਤੇ ਕਾਸਿਰਞ੍ਞੇ ਪਟਿਵਸਤਿ. ਅਦ੍ਦਸਾ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਕਪ੍ਪਕੋ ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਬਾਰਾਣਸਿਯਂ ਅਞ੍ਞਤਰਸ੍ਮਿਂ ਪਚ੍ਚਨ੍ਤਿਮੇ ਓਕਾਸੇ ਕੁਮ੍ਭਕਾਰਨਿਵੇਸਨੇ ਅਞ੍ਞਾਤਕਵੇਸੇਨ ਪਰਿਬ੍ਬਾਜਕਚ੍ਛਨ੍ਨੇਨ ਪਟਿਵਸਨ੍ਤਂ, ਦਿਸ੍ਵਾਨ ਯੇਨ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਦੀਘੀਤਿ, ਦੇਵ, ਕੋਸਲਰਾਜਾ ਸਪਜਾਪਤਿਕੋ ਬਾਰਾਣਸਿਯਂ ਅਞ੍ਞਤਰਸ੍ਮਿਂ ਪਚ੍ਚਨ੍ਤਿਮੇ ਓਕਾਸੇ ਕੁਮ੍ਭਕਾਰਨਿਵੇਸਨੇ ਅਞ੍ਞਾਤਕਵੇਸੇਨ ਪਰਿਬ੍ਬਾਜਕਚ੍ਛਨ੍ਨੇਨ ਪਟਿਵਸਤੀ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਮਨੁਸ੍ਸੇ ਆਣਾਪੇਸਿ – ‘‘ਤੇਨ ਹਿ, ਭਣੇ, ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਆਨੇਥਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਤੇ ਮਨੁਸ੍ਸਾ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਆਨੇਸੁਂ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਮਨੁਸ੍ਸੇ ਆਣਾਪੇਸਿ – ‘‘ਤੇਨ ਹਿ, ਭਣੇ, ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਦਲ਼੍ਹਾਯ ਰਜ੍ਜੁਯਾ ਪਚ੍ਛਾਬਾਹਂ ਗਾਲ਼੍ਹਬਨ੍ਧਨਂ ਬਨ੍ਧਿਤ੍ਵਾ ਖੁਰਮੁਣ੍ਡਂ ਕਰਿਤ੍ਵਾ ਖਰਸ੍ਸਰੇਨ ਪਣਵੇਨ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਪਰਿਨੇਤ੍ਵਾ ਦਕ੍ਖਿਣੇਨ ਦ੍ਵਾਰੇਨ ਨਿਕ੍ਖਾਮੇਤ੍ਵਾ ਦਕ੍ਖਿਣਤੋ ਨਗਰਸ੍ਸ ਚਤੁਧਾ ਛਿਨ੍ਦਿਤ੍ਵਾ ਚਤੁਦ੍ਦਿਸਾ ਬਿਲਾਨਿ ਨਿਕ੍ਖਿਪਥਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਤੇ ਮਨੁਸ੍ਸਾ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਦਲ਼੍ਹਾਯ ਰਜ੍ਜੁਯਾ ਪਚ੍ਛਾਬਾਹਂ ਗਾਲ਼੍ਹਬਨ੍ਧਨਂ ਬਨ੍ਧਿਤ੍ਵਾ ਖੁਰਮੁਣ੍ਡਂ ਕਰਿਤ੍ਵਾ ਖਰਸ੍ਸਰੇਨ ਪਣਵੇਨ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਪਰਿਨੇਨ੍ਤਿ.

ਅਥ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਚਿਰਂਦਿਟ੍ਠਾ ਖੋ ਮੇ ਮਾਤਾਪਿਤਰੋ. ਯਂਨੂਨਾਹਂ ਮਾਤਾਪਿਤਰੋ ਪਸ੍ਸੇਯ੍ਯ’’ਨ੍ਤਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬਾਰਾਣਸਿਂ ਪਵਿਸਿਤ੍ਵਾ ਅਦ੍ਦਸ ਮਾਤਾਪਿਤਰੋ ਦਲ਼੍ਹਾਯ ਰਜ੍ਜੁਯਾ ਪਚ੍ਛਾਬਾਹਂ ਗਾਲ਼੍ਹਬਨ੍ਧਨਂ ਬਨ੍ਧਿਤ੍ਵਾ ਖੁਰਮੁਣ੍ਡਂ ਕਰਿਤ੍ਵਾ ਖਰਸ੍ਸਰੇਨ ਪਣਵੇਨ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਪਰਿਨੇਨ੍ਤੇ, ਦਿਸ੍ਵਾਨ ਯੇਨ ਮਾਤਾਪਿਤਰੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਦੀਘਾਵੁਂ ਕੁਮਾਰਂ ਦੂਰਤੋਵ ਆਗਚ੍ਛਨ੍ਤਂ; ਦਿਸ੍ਵਾਨ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ. ਏਵਂ ਵੁਤ੍ਤੇ, ਭਿਕ੍ਖਵੇ, ਤੇ ਮਨੁਸ੍ਸਾ ਦੀਘੀਤਿਂ ਕੋਸਲਰਾਜਾਨਂ ਏਤਦਵੋਚੁਂ – ‘‘ਉਮ੍ਮਤ੍ਤਕੋ ਅਯਂ ਦੀਘੀਤਿ ਕੋਸਲਰਾਜਾ ਵਿਪ੍ਪਲਪਤਿ. ਕੋ ਇਮਸ੍ਸ ਦੀਘਾਵੁ? ਕਂ ਅਯਂ ਏਵਮਾਹ – ‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ. ‘‘ਨਾਹਂ, ਭਣੇ, ਉਮ੍ਮਤ੍ਤਕੋ ਵਿਪ੍ਪਲਪਾਮਿ, ਅਪਿ ਚ ਯੋ ਵਿਞ੍ਞੂ ਸੋ ਵਿਭਾਵੇਸ੍ਸਤੀ’’ਤਿ. ਦੁਤਿਯਮ੍ਪਿ ਖੋ, ਭਿਕ੍ਖਵੇ…ਪੇ… ਤਤਿਯਮ੍ਪਿ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ. ਤਤਿਯਮ੍ਪਿ ਖੋ, ਭਿਕ੍ਖਵੇ, ਤੇ ਮਨੁਸ੍ਸਾ ਦੀਘੀਤਿਂ ਕੋਸਲਰਾਜਾਨਂ ਏਤਦਵੋਚੁਂ – ‘‘ਉਮ੍ਮਤ੍ਤਕੋ ਅਯਂ ਦੀਘੀਤਿ ਕੋਸਲਰਾਜਾ ਵਿਪ੍ਪਲਪਤਿ. ਕੋ ਇਮਸ੍ਸ ਦੀਘਾਵੁ? ਕਂ ਅਯਂ ਏਵਮਾਹ – ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ. ‘‘ਨਾਹਂ, ਭਣੇ, ਉਮ੍ਮਤ੍ਤਕੋ ਵਿਪ੍ਪਲਪਾਮਿ, ਅਪਿ ਚ ਯੋ ਵਿਞ੍ਞੂ ਸੋ ਵਿਭਾਵੇਸ੍ਸਤੀ’’ਤਿ. ਅਥ ਖੋ, ਭਿਕ੍ਖਵੇ, ਤੇ ਮਨੁਸ੍ਸਾ ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਪਰਿਨੇਤ੍ਵਾ ਦਕ੍ਖਿਣੇਨ ਦ੍ਵਾਰੇਨ ਨਿਕ੍ਖਾਮੇਤ੍ਵਾ ਦਕ੍ਖਿਣਤੋ ਨਗਰਸ੍ਸ ਚਤੁਧਾ ਛਿਨ੍ਦਿਤ੍ਵਾ ਚਤੁਦ੍ਦਿਸਾ ਬਿਲਾਨਿ ਨਿਕ੍ਖਿਪਿਤ੍ਵਾ ਗੁਮ੍ਬਂ ਠਪੇਤ੍ਵਾ ਪਕ੍ਕਮਿਂਸੁ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬਾਰਾਣਸਿਂ ਪਵਿਸਿਤ੍ਵਾ ਸੁਰਂ ਨੀਹਰਿਤ੍ਵਾ ਗੁਮ੍ਬਿਯੇ ਪਾਯੇਸਿ. ਯਦਾ ਤੇ ਮਤ੍ਤਾ ਅਹੇਸੁਂ ਪਤਿਤਾ, ਅਥ ਕਟ੍ਠਾਨਿ ਸਂਕਡ੍ਢਿਤ੍ਵਾ ਚਿਤਕਂ ਕਰਿਤ੍ਵਾ ਮਾਤਾਪਿਤੂਨਂ ਸਰੀਰਂ ਚਿਤਕਂ ਆਰੋਪੇਤ੍ਵਾ ਅਗ੍ਗਿਂ ਦਤ੍ਵਾ ਪਞ੍ਜਲਿਕੋ ਤਿਕ੍ਖਤ੍ਤੁਂ ਚਿਤਕਂ ਪਦਕ੍ਖਿਣਂ ਅਕਾਸਿ.

੪੬੧. ਤੇਨ ਖੋ ਪਨ ਸਮਯੇਨ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਉਪਰਿਪਾਸਾਦਵਰਗਤੋ ਹੋਤਿ. ਅਦ੍ਦਸਾ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਂ ਕੁਮਾਰਂ ਪਞ੍ਜਲਿਕਂ ਤਿਕ੍ਖਤ੍ਤੁਂ ਚਿਤਕਂ ਪਦਕ੍ਖਿਣਂ ਕਰੋਨ੍ਤਂ, ਦਿਸ੍ਵਾਨਸ੍ਸ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਸੋ ਮਨੁਸ੍ਸੋ ਦੀਘੀਤਿਸ੍ਸ ਕੋਸਲਰਞ੍ਞੋ ਞਾਤਿ ਵਾ ਸਾਲੋਹਿਤੋ ਵਾ, ਅਹੋ ਮੇ ਅਨਤ੍ਥਤੋ, ਨ ਹਿ ਨਾਮ ਮੇ ਕੋਚਿ ਆਰੋਚੇਸ੍ਸਤੀ’’ਤਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਅਰਞ੍ਞਂ ਗਨ੍ਤ੍ਵਾ ਯਾਵਦਤ੍ਥਂ ਕਨ੍ਦਿਤ੍ਵਾ ਰੋਦਿਤ੍ਵਾ ਖਪ੍ਪਂ [ਬਪ੍ਪਂ (ਸੀ. ਸ੍ਯਾ.)] ਪੁਞ੍ਛਿਤ੍ਵਾ ਬਾਰਾਣਸਿਂ ਪਵਿਸਿਤ੍ਵਾ ਅਨ੍ਤੇਪੁਰਸ੍ਸ ਸਾਮਨ੍ਤਾ ਹਤ੍ਥਿਸਾਲਂ ਗਨ੍ਤ੍ਵਾ ਹਤ੍ਥਾਚਰਿਯਂ ਏਤਦਵੋਚ – ‘‘ਇਚ੍ਛਾਮਹਂ, ਆਚਰਿਯ, ਸਿਪ੍ਪਂ ਸਿਕ੍ਖਿਤੁ’’ਨ੍ਤਿ. ‘‘ਤੇਨ ਹਿ, ਭਣੇ ਮਾਣਵਕ, ਸਿਕ੍ਖਸ੍ਸੂ’’ਤਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਹਤ੍ਥਿਸਾਲਾਯਂ ਮਞ੍ਜੁਨਾ ਸਰੇਨ ਗਾਯਿ, ਵੀਣਞ੍ਚ ਵਾਦੇਸਿ. ਅਸ੍ਸੋਸਿ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਹਤ੍ਥਿਸਾਲਾਯਂ ਮਞ੍ਜੁਨਾ ਸਰੇਨ ਗੀਤਂ ਵੀਣਞ੍ਚ ਵਾਦਿਤਂ, ਸੁਤ੍ਵਾਨ ਮਨੁਸ੍ਸੇ ਪੁਚ੍ਛਿ – ‘‘ਕੋ, ਭਣੇ, ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਹਤ੍ਥਿਸਾਲਾਯਂ ਮਞ੍ਜੁਨਾ ਸਰੇਨ ਗਾਯਿ, ਵੀਣਞ੍ਚ ਵਾਦੇਸੀ’’ਤਿ? ‘‘ਅਮੁਕਸ੍ਸ, ਦੇਵ, ਹਤ੍ਥਾਚਰਿਯਸ੍ਸ ਅਨ੍ਤੇਵਾਸੀ ਮਾਣਵਕੋ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਹਤ੍ਥਿਸਾਲਾਯਂ ਮਞ੍ਜੁਨਾ ਸਰੇਨ ਗਾਯਿ, ਵੀਣਞ੍ਚ ਵਾਦੇਸੀ’’ਤਿ. ‘‘ਤੇਨ ਹਿ, ਭਣੇ, ਤਂ ਮਾਣਵਕਂ ਆਨੇਥਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਤੇ ਮਨੁਸ੍ਸਾ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਦੀਘਾਵੁਂ ਕੁਮਾਰਂ ਆਨੇਸੁਂ. ‘‘ਤ੍ਵਂ ਭਣੇ ਮਾਣਵਕ, ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਹਤ੍ਥਿਸਾਲਾਯਂ ਮਞ੍ਜੁਨਾ ਸਰੇਨ ਗਾਯਿ, ਵੀਣਞ੍ਚ ਵਾਦੇਸੀ’’ਤਿ? ‘‘ਏਵਂ, ਦੇਵਾ’’ਤਿ. ‘‘ਤੇਨ ਹਿ ਤ੍ਵਂ, ਭਣੇ ਮਾਣਵਕ, ਗਾਯਸ੍ਸੁ, ਵੀਣਞ੍ਚ ਵਾਦੇਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਆਰਾਧਾਪੇਕ੍ਖੋ ਮਞ੍ਜੁਨਾ ਸਰੇਨ ਗਾਯਿ, ਵੀਣਞ੍ਚ ਵਾਦੇਸਿ. ‘‘ਤ੍ਵਂ, ਭਣੇ ਮਾਣਵਕ, ਮਂ ਉਪਟ੍ਠਹਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਚ੍ਚਸ੍ਸੋਸਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਬ੍ਬੁਟ੍ਠਾਯੀ ਅਹੋਸਿ ਪਚ੍ਛਾਨਿਪਾਤੀ ਕਿਙ੍ਕਾਰਪਟਿਸ੍ਸਾਵੀ ਮਨਾਪਚਾਰੀ ਪਿਯਵਾਦੀ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਂ ਕੁਮਾਰਂ ਨਚਿਰਸ੍ਸੇਵ ਅਬ੍ਭਨ੍ਤਰਿਮੇ ਵਿਸ੍ਸਾਸਿਕਟ੍ਠਾਨੇ ਠਪੇਸਿ.

੪੬੨. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਤੇਨ ਹਿ, ਭਣੇ ਮਾਣਵਕ, ਰਥਂ ਯੋਜੇਹਿ, ਮਿਗਵਂ ਗਮਿਸ੍ਸਾਮਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਰਥਂ ਯੋਜੇਤ੍ਵਾ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਯੁਤ੍ਤੋ ਖੋ ਤੇ, ਦੇਵ, ਰਥੋ, ਯਸ੍ਸ ਦਾਨਿ ਕਾਲਂ ਮਞ੍ਞਸੀ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਰਥਂ ਅਭਿਰੁਹਿ. ਦੀਘਾਵੁ ਕੁਮਾਰੋ ਰਥਂ ਪੇਸੇਸਿ. ਤਥਾ ਤਥਾ ਰਥਂ ਪੇਸੇਸਿ ਯਥਾ ਯਥਾ ਅਞ੍ਞੇਨੇਵ ਸੇਨਾ ਅਗਮਾਸਿ ਅਞ੍ਞੇਨੇਵ ਰਥੋ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੂਰਂ ਗਨ੍ਤ੍ਵਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਤੇਨ ਹਿ, ਭਣੇ ਮਾਣਵਕ, ਰਥਂ ਮੁਞ੍ਚਸ੍ਸੁ, ਕਿਲਨ੍ਤੋਮ੍ਹਿ, ਨਿਪਜ੍ਜਿਸ੍ਸਾਮੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਰਥਂ ਮੁਞ੍ਚਿਤ੍ਵਾ ਪਥਵਿਯਂ ਪਲ੍ਲਙ੍ਕੇਨ ਨਿਸੀਦਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਸ੍ਸ ਕੁਮਾਰਸ੍ਸ ਉਚ੍ਛਙ੍ਗੇ ਸੀਸਂ ਕਤ੍ਵਾ ਸੇਯ੍ਯਂ ਕਪ੍ਪੇਸਿ. ਤਸ੍ਸ ਕਿਲਨ੍ਤਸ੍ਸ ਮੁਹੁਤ੍ਤਕੇਨੇਵ ਨਿਦ੍ਦਾ ਓਕ੍ਕਮਿ. ਅਥ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਅਯਂ ਖੋ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕੋ. ਇਮਿਨਾ ਅਮ੍ਹਾਕਂ ਬਲਞ੍ਚ ਵਾਹਨਞ੍ਚ ਜਨਪਦੋ ਚ ਕੋਸੋ ਚ ਕੋਟ੍ਠਾਗਾਰਞ੍ਚ ਅਚ੍ਛਿਨ੍ਨਂ. ਇਮਿਨਾ ਚ ਮੇ ਮਾਤਾਪਿਤਰੋ ਹਤਾ. ਅਯਂ ਖ੍ਵਸ੍ਸ ਕਾਲੋ ਯੋਹਂ ਵੇਰਂ ਅਪ੍ਪੇਯ੍ਯ’’ਨ੍ਤਿ ਕੋਸਿਯਾ ਖਗ੍ਗਂ ਨਿਬ੍ਬਾਹਿ. ਅਥ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਪਿਤਾ ਖੋ ਮਂ ਮਰਣਕਾਲੇ ਅਵਚ ‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’ਤਿ. ਨ ਖੋ ਮੇਤਂ ਪਤਿਰੂਪਂ, ਯ੍ਵਾਹਂ ਪਿਤੁਵਚਨਂ ਅਤਿਕ੍ਕਮੇਯ੍ਯ’’ਨ੍ਤਿ ਕੋਸਿਯਾ ਖਗ੍ਗਂ ਪਵੇਸੇਸਿ. ਦੁਤਿਯਮ੍ਪਿ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਅਯਂ ਖੋ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕੋ, ਇਮਿਨੋ ਅਮ੍ਹਾਕਂ ਬਲਞ੍ਚ ਵਾਹਨਞ੍ਚ ਜਨਪਦੋ ਚ ਕੋਸੋ ਚ ਕੋਟ੍ਠਾਗਾਰਞ੍ਚ ਅਚ੍ਛਿਨ੍ਨਂ, ਇਮਿਨਾ ਚ ਮੇ ਮਾਤਾਪਿਤਰੋ ਹਤਾ, ਅਯਂ ਖ੍ਵਸ੍ਸ ਕਾਲੋ ਯੋਹਂ ਵੇਰਂ ਅਪ੍ਪੇਯ੍ਯ’’ਨ੍ਤਿ ਕੋਸਿਯਾ ਖਗ੍ਗਂ ਨਿਬ੍ਬਾਹਿ. ਦੁਤਿਯਮ੍ਪਿ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਪਿਤਾ ਖੋ ਮਂ ਮਰਣਕਾਲੇ ਅਵਚ ‘ਮਾ ਖੋ ਤ੍ਵਂ ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ, ਨ ਹਿ ਤਾਤ ਦੀਘਾਵੁ ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’ਤਿ. ਨ ਖੋ ਮੇਤਂ ਪਤਿਰੂਪਂ, ਯ੍ਵਾਹਂ ਪਿਤੁਵਚਨਂ ਅਤਿਕ੍ਕਮੇਯ੍ਯ’’ਨ੍ਤਿ. ਪੁਨਦੇਵ ਕੋਸਿਯਾ ਖਗ੍ਗਂ ਪਵੇਸੇਸਿ. ਤਤਿਯਮ੍ਪਿ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਅਯਂ ਖੋ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕੋ. ਇਮਿਨਾ ਅਮ੍ਹਾਕਂ ਬਲਞ੍ਚ ਵਾਹਨਞ੍ਚ ਜਨਪਦੋ ਚ ਕੋਸੋ ਚ ਕੋਟ੍ਠਾਗਾਰਞ੍ਚ ਅਚ੍ਛਿਨ੍ਨਂ. ਇਮਿਨਾ ਚ ਮੇ ਮਾਤਾਪਿਤਰੋ ਹਤਾ. ਅਯਂ ਖ੍ਵਸ੍ਸ ਕਾਲੋ ਯੋਹਂ ਵੇਰਂ ਅਪ੍ਪੇਯ੍ਯ’’ਨ੍ਤਿ ਕੋਸਿਯਾ ਖਗ੍ਗਂ ਨਿਬ੍ਬਾਹਿ. ਤਤਿਯਮ੍ਪਿ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਪਿਤਾ ਖੋ ਮਂ ਮਰਣਕਾਲੇ ਅਵਚ ‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’ਤਿ. ਨ ਖੋ ਮੇਤਂ ਪਤਿਰੂਪਂ, ਯ੍ਵਾਹਂ ਪਿਤੁਵਚਨਂ ਅਤਿਕ੍ਕਮੇਯ੍ਯ’’’ਨ੍ਤਿ ਪੁਨਦੇਵ ਕੋਸਿਯਾ ਖਗ੍ਗਂ ਪਵੇਸੇਸਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਭੀਤੋ ਉਬ੍ਬਿਗ੍ਗੋ ਉਸ੍ਸਙ੍ਕੀ ਉਤ੍ਰਸ੍ਤੋ ਸਹਸਾ ਵੁਟ੍ਠਾਸਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਦੇਵ, ਭੀਤੋ ਉਬ੍ਬਿਗ੍ਗੋ ਉਸ੍ਸਙ੍ਕੀ ਉਤ੍ਰਸ੍ਤੋ ਸਹਸਾ ਵੁਟ੍ਠਾਸੀ’’ਤਿ? ਇਧ ਮਂ, ਭਣੇ ਮਾਣਵਕ, ਦੀਘੀਤਿਸ੍ਸ ਕੋਸਲਰਞ੍ਞੋ ਪੁਤ੍ਤੋ ਦੀਘਾਵੁ ਕੁਮਾਰੋ ਸੁਪਿਨਨ੍ਤੇਨ ਖਗ੍ਗੇਨ ਪਰਿਪਾਤੇਸਿ. ਤੇਨਾਹਂ ਭੀਤੋ ਉਬ੍ਬਿਗ੍ਗੋ ਉਸ੍ਸਙ੍ਕੀ ਉਤ੍ਰਸ੍ਤੋ ਸਹਸਾ ਵੁਟ੍ਠਾਸਿਨ੍ਤਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਵਾਮੇਨ ਹਤ੍ਥੇਨ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਸੀਸਂ ਪਰਾਮਸਿਤ੍ਵਾ ਦਕ੍ਖਿਣੇਨ ਹਤ੍ਥੇਨ ਖਗ੍ਗਂ ਨਿਬ੍ਬਾਹੇਤ੍ਵਾ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਅਹਂ ਖੋ ਸੋ, ਦੇਵ, ਦੀਘੀਤਿਸ੍ਸ ਕੋਸਲਰਞ੍ਞੋ ਪੁਤ੍ਤੋ ਦੀਘਾਵੁ ਕੁਮਾਰੋ. ਬਹੁਨੋ ਤ੍ਵਂ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕੋ. ਤਯਾ ਅਮ੍ਹਾਕਂ ਬਲਞ੍ਚ ਵਾਹਨਞ੍ਚ ਜਨਪਦੋ ਚ ਕੋਸੋ ਚ ਕੋਟ੍ਠਾਗਾਰਞ੍ਚ ਅਚ੍ਛਿਨ੍ਨਂ. ਤਯਾ ਚ ਮੇ ਮਾਤਾਪਿਤਰੋ ਹਤਾ. ਅਯਂ ਖ੍ਵਸ੍ਸ ਕਾਲੋ ਯ੍ਵਾਹਂ ਵੇਰਂ ਅਪ੍ਪੇਯ੍ਯ’’ਨ੍ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਸ੍ਸ ਕੁਮਾਰਸ੍ਸ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਜੀਵਿਤਂ ਮੇ, ਤਾਤ ਦੀਘਾਵੁ, ਦੇਹਿ. ਜੀਵਿਤਂ ਮੇ, ਤਾਤ ਦੀਘਾਵੁ, ਦੇਹੀ’’ਤਿ. ‘‘ਕ੍ਯਾਹਂ ਉਸ੍ਸਹਾਮਿ ਦੇਵਸ੍ਸ ਜੀਵਿਤਂ ਦਾਤੁਂ? ਦੇਵੋ ਖੋ ਮੇ ਜੀਵਿਤਂ ਦਦੇਯ੍ਯਾ’’ਤਿ. ‘‘ਤੇਨ ਹਿ, ਤਾਤ ਦੀਘਾਵੁ, ਤ੍ਵਞ੍ਚੇਵ ਮੇ ਜੀਵਿਤਂ ਦੇਹਿ, ਅਹਞ੍ਚ ਤੇ ਜੀਵਿਤਂ ਦਮ੍ਮੀ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਚ ਕਾਸਿਰਾਜਾ ਦੀਘਾਵੁ ਚ ਕੁਮਾਰੋ ਅਞ੍ਞਮਞ੍ਞਸ੍ਸ ਜੀਵਿਤਂ ਅਦਂਸੁ, ਪਾਣਿਞ੍ਚ ਅਗ੍ਗਹੇਸੁਂ, ਸਪਥਞ੍ਚ ਅਕਂਸੁ ਅਦ੍ਦੂਭਾਯ [ਅਦ੍ਰੂਭਾਯ, ਅਦੁਬ੍ਭਾਯ (ਕ.)].

ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਤੇਨ ਹਿ, ਤਾਤ ਦੀਘਾਵੁ, ਰਥਂ ਯੋਜੇਹਿ, ਗਮਿਸ੍ਸਾਮਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਰਥਂ ਯੋਜੇਤ੍ਵਾ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਯੁਤ੍ਤੋ ਖੋ ਤੇ, ਦੇਵ, ਰਥੋ, ਯਸ੍ਸ ਦਾਨਿ ਕਾਲਂ ਮਞ੍ਞਸੀ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਰਥਂ ਅਭਿਰੁਹਿ. ਦੀਘਾਵੁ ਕੁਮਾਰੋ ਰਥਂ ਪੇਸੇਸਿ. ਤਥਾ ਤਥਾ ਰਥਂ ਪੇਸੇਸਿ ਯਥਾ ਯਥਾ ਨਚਿਰਸ੍ਸੇਵ ਸੇਨਾਯ ਸਮਾਗਞ੍ਛਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਬਾਰਾਣਸਿਂ ਪਵਿਸਿਤ੍ਵਾ ਅਮਚ੍ਚੇ ਪਾਰਿਸਜ੍ਜੇ ਸਨ੍ਨਿਪਾਤਾਪੇਤ੍ਵਾ ਏਤਦਵੋਚ – ‘‘ਸਚੇ, ਭਣੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਪੁਤ੍ਤਂ ਦੀਘਾਵੁਂ ਕੁਮਾਰਂ ਪਸ੍ਸੇਯ੍ਯਾਥ, ਕਿਨ੍ਤਿ ਨਂ ਕਰੇਯ੍ਯਾਥਾ’’ਤਿ? ਏਕਚ੍ਚੇ ਏਵਮਾਹਂਸੁ – ‘‘ਮਯਂ, ਦੇਵ, ਹਤ੍ਥੇ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਪਾਦੇ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਹਤ੍ਥਪਾਦੇ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਕਣ੍ਣੇ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਨਾਸਂ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਕਣ੍ਣਨਾਸਂ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਸੀਸਂ ਛਿਨ੍ਦੇਯ੍ਯਾਮਾ’’ਤਿ. ‘‘ਅਯਂ ਖੋ, ਭਣੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਪੁਤ੍ਤੋ ਦੀਘਾਵੁ ਕੁਮਾਰੋ. ਨਾਯਂ ਲਬ੍ਭਾ ਕਿਞ੍ਚਿ ਕਾਤੁਂ. ਇਮਿਨਾ ਚ ਮੇ ਜੀਵਿਤਂ ਦਿਨ੍ਨਂ, ਮਯਾ ਚ ਇਮਸ੍ਸ ਜੀਵਿਤਂ ਦਿਨ੍ਨ’’ਨ੍ਤਿ.

੪੬੩. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਯਂ ਖੋ ਤੇ, ਤਾਤ ਦੀਘਾਵੁ, ਪਿਤਾ ਮਰਣਕਾਲੇ ਅਵਚ ‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’ਤਿ, ਕਿਂ ਤੇ ਪਿਤਾ ਸਨ੍ਧਾਯ ਅਵਚਾ’’ਤਿ? ‘‘ਯਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ ‘ਮਾ ਦੀਘ’ਨ੍ਤਿ ਮਾ ਚਿਰਂ ਵੇਰਂ ਅਕਾਸੀਤਿ. ਇਮਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ ਮਾ ਦੀਘਨ੍ਤਿ. ਯਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ ‘ਮਾ ਰਸ੍ਸ’ਨ੍ਤਿ ਮਾ ਖਿਪ੍ਪਂ ਮਿਤ੍ਤੇਹਿ ਭਿਜ੍ਜਿਤ੍ਥਾ’’ਤਿ. ਇਮਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ ਮਾ ਰਸ੍ਸਨ੍ਤਿ. ਯਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ ‘‘ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ, ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ ਦੇਵੇਨ ਮੇ ਮਾਤਾਪਿਤਰੋ ਹਤਾਤਿ. ਸਚਾਹਂ ਦੇਵਂ ਜੀਵਿਤਾ ਵੋਰੋਪੇਯ੍ਯਂ, ਯੇ ਦੇਵਸ੍ਸ ਅਤ੍ਥਕਾਮਾ ਤੇ ਮਂ ਜੀਵਿਤਾ ਵੋਰੋਪੇਯ੍ਯੁਂ, ਯੇ ਮੇ ਅਤ੍ਥਕਾਮਾ ਤੇ ਤੇ ਜੀਵਿਤਾ ਵੋਰੋਪੇਯ੍ਯੁਂ – ਏਵਂ ਤਂ ਵੇਰਂ ਵੇਰੇਨ ਨ ਵੂਪਸਮੇਯ੍ਯ. ਇਦਾਨਿ ਚ ਪਨ ਮੇ ਦੇਵੇਨ ਜੀਵਿਤਂ ਦਿਨ੍ਨਂ, ਮਯਾ ਚ ਦੇਵਸ੍ਸ ਜੀਵਿਤਂ ਦਿਨ੍ਨਂ. ਏਵਂ ਤਂ ਵੇਰਂ ਅਵੇਰੇਨ ਵੂਪਸਨ੍ਤਂ. ਇਮਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ – ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ – ‘‘ਅਚ੍ਛਰਿਯਂ ਵਤ ਭੋ! ਅਬ੍ਭੁਤਂ ਵਤ ਭੋ! ਯਾਵ ਪਣ੍ਡਿਤੋ ਅਯਂ ਦੀਘਾਵੁ ਕੁਮਾਰੋ, ਯਤ੍ਰ ਹਿ ਨਾਮ ਪਿਤੁਨੋ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਆਜਾਨਿਸ੍ਸਤੀ’’ਤਿ ਪੇਤ੍ਤਿਕਂ ਬਲਞ੍ਚ ਵਾਹਨਞ੍ਚ ਜਨਪਦਞ੍ਚ ਕੋਸਞ੍ਚ ਕੋਟ੍ਠਾਗਾਰਞ੍ਚ ਪਟਿਪਾਦੇਸਿ, ਧੀਤਰਞ੍ਚ ਅਦਾਸਿ. ਤੇਸਞ੍ਹਿ ਨਾਮ, ਭਿਕ੍ਖਵੇ, ਰਾਜੂਨਂ ਆਦਿਨ੍ਨਦਣ੍ਡਾਨਂ ਆਦਿਨ੍ਨਸਤ੍ਥਾਨਂ ਏਵਰੂਪਂ ਖਨ੍ਤਿਸੋਰਚ੍ਚਂ ਭਵਿਸ੍ਸਤਿ. ਇਧ ਖੋ ਪਨ ਤਂ, ਭਿਕ੍ਖਵੇ, ਸੋਭੇਥ ਯਂ ਤੁਮ੍ਹੇ ਏਵਂ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਪਬ੍ਬਜਿਤਾ ਸਮਾਨਾ ਖਮਾ ਚ ਭਵੇਯ੍ਯਾਥ ਸੋਰਤਾ ਚਾਤਿ? ਤਤਿਯਮ੍ਪਿ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਅਲਂ, ਭਿਕ੍ਖਵੇ, ਮਾ ਭਣ੍ਡਨਂ ਮਾ ਕਲਹਂ ਮਾ ਵਿਗ੍ਗਹਂ ਮਾ ਵਿਵਾਦ’’ਨ੍ਤਿ. ਤਤਿਯਮ੍ਪਿ ਖੋ ਸੋ ਅਧਮ੍ਮਵਾਦੀ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਆਗਮੇਤੁ, ਭਨ੍ਤੇ, ਭਗਵਾ ਧਮ੍ਮਸ੍ਸਾਮੀ; ਅਪ੍ਪੋਸ੍ਸੁਕ੍ਕੋ, ਭਨ੍ਤੇ, ਭਗਵਾ ਦਿਟ੍ਠਧਮ੍ਮਸੁਖਵਿਹਾਰਮਨੁਯੁਤ੍ਤੋ ਵਿਹਰਤੁ. ਮਯਮੇਤੇਨ ਭਣ੍ਡਨੇਨ ਕਲਹੇਨ ਵਿਗ੍ਗਹੇਨ ਵਿਵਾਦੇਨ ਪਞ੍ਞਾਯਿਸ੍ਸਾਮਾ’’ਤਿ. ਅਥ ਖੋ ਭਗਵਾ – ਪਰਿਯਾਦਿਨ੍ਨਰੂਪਾ ਖੋ ਇਮੇ ਮੋਘਪੁਰਿਸਾ, ਨਯਿਮੇ ਸੁਕਰਾ ਸਞ੍ਞਾਪੇਤੁਨ੍ਤਿ – ਉਟ੍ਠਾਯਾਸਨਾ ਪਕ੍ਕਾਮਿ.

ਦੀਘਾਵੁਭਾਣਵਾਰੋ ਨਿਟ੍ਠਿਤੋ ਪਠਮੋ.

੪੬੪. [ਮ. ਨਿ. ੩.੨੩੬] ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਕੋਸਮ੍ਬਿਂ ਪਿਣ੍ਡਾਯ ਪਾਵਿਸਿ. ਕੋਸਮ੍ਬਿਯਂ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਸਙ੍ਘਮਜ੍ਝੇ ਠਿਤਕੋਵ ਇਮਾ ਗਾਥਾਯੋ ਅਭਾਸਿ –

[ਮ. ਨਿ. ੩.੨੩੭] ‘‘ਪੁਥੁਸਦ੍ਦੋ ਸਮਜਨੋ, ਨ ਬਾਲੋ ਕੋਚਿ ਮਞ੍ਞਥ;

ਸਙ੍ਘਸ੍ਮਿਂ ਭਿਜ੍ਜਮਾਨਸ੍ਮਿਂ, ਨਾਞ੍ਞਂ ਭਿਯ੍ਯੋ ਅਮਞ੍ਞਰੁਂ.

[ਮ. ਨਿ. ੩.੨੩੭] ‘‘ਪਰਿਮੁਟ੍ਠਾ ਪਣ੍ਡਿਤਾਭਾਸਾ, ਵਾਚਾਗੋਚਰਭਾਣਿਨੋ;

ਯਾਵਿਚ੍ਛਨ੍ਤਿ ਮੁਖਾਯਾਮਂ, ਯੇਨ ਨੀਤਾ ਨ ਤਂ ਵਿਦੂ.

[ਮ. ਨਿ. ੩.੨੩੭] ‘‘ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;

ਯੇ ਚ ਤਂ ਉਪਨਯ੍ਹਨ੍ਤਿ, ਵੇਰਂ ਤੇਸਂ ਨ ਸਮ੍ਮਤਿ.

[ਮ. ਨਿ. ੩.੨੩੭] ‘‘ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;

ਯੇ ਚ ਤਂ ਨੁਪਨਯ੍ਹਨ੍ਤਿ, ਵੇਰਂ ਤੇਸੂਪਸਮ੍ਮਤਿ.

[ਮ. ਨਿ. ੩.੨੩੭] ‘‘ਨ ਹਿ ਵੇਰੇਨ ਵੇਰਾਨਿ, ਸਮ੍ਮਨ੍ਤੀਧ ਕੁਦਾਚਨਂ;

ਅਵੇਰੇਨ ਚ ਸਮ੍ਮਨ੍ਤਿ, ਏਸਧਮ੍ਮੋ ਸਨਨ੍ਤਨੋ.

[ਮ. ਨਿ. ੩.੨੩੭] ‘‘ਪਰੇ ਚ ਨ ਵਿਜਾਨਨ੍ਤਿ, ਮਯਮੇਤ੍ਥ ਯਮਾਮਸੇ;

ਯੇ ਚ ਤਤ੍ਥ ਵਿਜਾਨਨ੍ਤਿ, ਤਤੋ ਸਮ੍ਮਨ੍ਤਿ ਮੇਧਗਾ.

[ਮ. ਨਿ. ੩.੨੩੭] ‘‘ਅਟ੍ਠਿਚ੍ਛਿਨ੍ਨਾ ਪਾਣਹਰਾ, ਗਵਾਸ੍ਸਧਨਹਾਰਿਨੋ;

ਰਟ੍ਠਂ ਵਿਲੁਮ੍ਪਮਾਨਾਨਂ, ਤੇਸਮ੍ਪਿ ਹੋਤਿ ਸਙ੍ਗਤਿ.

‘‘ਕਸ੍ਮਾ ਤੁਮ੍ਹਾਕ ਨੋ ਸਿਯਾ;

[ਮ. ਨਿ. ੩.੨੩੭] ‘‘ਸਚੇ ਲਭੇਥ ਨਿਪਕਂ ਸਹਾਯਂ;

ਸਦ੍ਧਿਂਚਰਂ ਸਾਧੁਵਿਹਾਰਿ ਧੀਰਂ;

ਅਭਿਭੁਯ੍ਯ ਸਬ੍ਬਾਨਿ ਪਰਿਸ੍ਸਯਾਨਿ;

ਚਰੇਯ੍ਯ ਤੇਨਤ੍ਤਮਨੋ ਸਤੀਮਾ.

[ਮ. ਨਿ. ੩.੨੩੭] ‘‘ਨੋ ਚੇ ਲਭੇਥ ਨਿਪਕਂ ਸਹਾਯਂ;

ਸਦ੍ਧਿਂ ਚਰਂ ਸਾਧੁਵਿਹਾਰਿ ਧੀਰਂ;

ਰਾਜਾਵ ਰਟ੍ਠਂ ਵਿਜਿਤਂ ਪਹਾਯ;

ਏਕੋ ਚਰੇ ਮਾਤਙ੍ਗਰਞ੍ਞੇਵ ਨਾਗੋ.

[ਮ. ਨਿ. ੩.੨੩੭] ‘‘ਏਕਸ੍ਸ ਚਰਿਤਂ ਸੇਯ੍ਯੋ;

ਨਤ੍ਥਿ ਬਾਲੇ ਸਹਾਯਤਾ;

ਏਕੋ ਚਰੇ ਨ ਚ ਪਾਪਾਨਿ ਕਯਿਰਾ;

ਅਪ੍ਪੋਸ੍ਸੁਕ੍ਕੋ ਮਾਤਙ੍ਗਰਞ੍ਞੇਵ ਨਾਗੋ’’ਤਿ.

ਦੀਘਾਵੁਵਤ੍ਥੁ ਨਿਟ੍ਠਿਤਂ.

੨੭੩. ਬਾਲਕਲੋਣਕਗਮਨਕਥਾ

੪੬੫. ਅਥ ਖੋ ਭਗਵਾ ਸਙ੍ਘਮਜ੍ਝੇ ਠਿਤਕੋਵ ਇਮਾ ਗਾਥਾਯੋ ਭਾਸਿਤ੍ਵਾ ਯੇਨ ਬਾਲਕਲੋਣਕਗਾਮੋ [ਬਾਲਕਲੋਣਕਾਰਗਾਮੋ (ਸੀ. ਸ੍ਯਾ.)] ਤੇਨੁਪਸਙ੍ਕਮਿ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਭਗੁ ਬਾਲਕਲੋਣਕਗਾਮੇ ਵਿਹਰਤਿ. ਅਦ੍ਦਸਾ ਖੋ ਆਯਸ੍ਮਾ ਭਗੁ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਆਸਨਂ ਪਞ੍ਞਪੇਸਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ, ਨਿਸਜ੍ਜ ਖੋ ਭਗਵਾ ਪਾਦੇ ਪਕ੍ਖਾਲੇਸਿ. ਆਯਸ੍ਮਾਪਿ ਖੋ ਭਗੁ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਭਗੁਂ ਭਗਵਾ ਏਤਦਵੋਚ – ‘‘ਕਚ੍ਚਿ, ਭਿਕ੍ਖੁ, ਖਮਨੀਯਂ; ਕਚ੍ਚਿ ਯਾਪਨੀਯਂ, ਕਚ੍ਚਿ ਪਿਣ੍ਡਕੇਨ ਨ ਕਿਲਮਸੀ’’ਤਿ? ‘‘ਖਮਨੀਯਂ, ਭਗਵਾ, ਯਾਪਨੀਯਂ, ਭਗਵਾ; ਨ ਚਾਹਂ, ਭਨ੍ਤੇ, ਪਿਣ੍ਡਕੇਨ ਕਿਲਮਾਮੀ’’ਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਭਗੁਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਯੇਨ ਪਾਚੀਨਵਂਸਦਾਯੋ ਤੇਨੁਪਸਙ੍ਕਮਿ.

ਬਾਲਕਲੋਣਕਗਮਨਕਥਾ ਨਿਟ੍ਠਿਤਾ.

੨੭੪. ਪਾਚੀਨਵਂਸਦਾਯਗਮਨਕਥਾ

੪੬੬. [ਮ. ਨਿ. ੧.੩੨੫ ਆਦਯੋ ਪਸ੍ਸਿਤਬ੍ਬਂ] ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਚ ਅਨੁਰੁਦ੍ਧੋ ਆਯਸ੍ਮਾ ਚ ਨਨ੍ਦਿਯੋ ਆਯਸ੍ਮਾ ਚ ਕਿਮਿਲੋ [ਕਿਮ੍ਬਿਲੋ (ਸੀ. ਸ੍ਯਾ.)] ਪਾਚੀਨਵਂਸਦਾਯੇ ਵਿਹਰਨ੍ਤਿ. ਅਦ੍ਦਸਾ ਖੋ ਦਾਯਪਾਲੋ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ‘‘ਮਾ, ਸਮਣ, ਏਤਂ ਦਾਯਂ ਪਾਵਿਸਿ. ਸਨ੍ਤੇਤ੍ਥ ਤਯੋ ਕੁਲਪੁਤ੍ਤਾ ਅਤ੍ਤਕਾਮਰੂਪਾ ਵਿਹਰਨ੍ਤਿ. ਮਾ ਤੇਸਂ ਅਫਾਸੁਮਕਾਸੀ’’ਤਿ. ਅਸ੍ਸੋਸਿ ਖੋ ਆਯਸ੍ਮਾ ਅਨੁਰੁਦ੍ਧੋ ਦਾਯਪਾਲਸ੍ਸ ਭਗਵਤਾ ਸਦ੍ਧਿਂ ਮਨ੍ਤਯਮਾਨਸ੍ਸ, ਸੁਤ੍ਵਾਨ ਦਾਯਪਾਲਂ ਏਤਦਵੋਚ – ‘‘ਮਾਵੁਸੋ, ਦਾਯਪਾਲ, ਭਗਵਨ੍ਤਂ ਵਾਰੇਸਿ. ਸਤ੍ਥਾ ਨੋ ਭਗਵਾ ਅਨੁਪ੍ਪਤ੍ਤੋ’’ਤਿ. ਅਥ ਖੋ ਆਯਸ੍ਮਾ ਅਨੁਰੁਦ੍ਧੋ ਯੇਨਾਯਸ੍ਮਾ ਚ ਨਨ੍ਦਿਯੋ ਆਯਸ੍ਮਾ ਚ ਕਿਮਿਲੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਞ੍ਚ ਨਨ੍ਦਿਯਂ ਆਯਸ੍ਮਨ੍ਤਞ੍ਚ ਕਿਮਿਲਂ ਏਤਦਵੋਚ – ‘‘ਅਭਿਕ੍ਕਮਥਾਯਸ੍ਮਨ੍ਤੋ ਅਭਿਕ੍ਕਮਥਾਯਸ੍ਮਨ੍ਤੋ, ਸਤ੍ਥਾ ਨੋ ਭਗਵਾ ਅਨੁਪ੍ਪਤ੍ਤੋ’’ਤਿ. ਅਥ ਖੋ ਆਯਸ੍ਮਾ ਚ ਅਨੁਰੁਦ੍ਧੋ ਆਯਸ੍ਮਾ ਚ ਨਨ੍ਦਿਯੋ ਆਯਸ੍ਮਾ ਚ ਕਿਮਿਲੋ ਭਗਵਨ੍ਤਂ ਪਚ੍ਚੁਗ੍ਗਨ੍ਤ੍ਵਾ ਏਕੋ ਭਗਵਤੋ ਪਤ੍ਤਚੀਵਰਂ ਪਟਿਗ੍ਗਹੇਸਿ, ਏਕੋ ਆਸਨਂ ਪਞ੍ਞਪੇਸਿ, ਏਕੋ ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ, ਨਿਸਜ੍ਜ ਖੋ ਭਗਵਾ ਪਾਦੇ ਪਕ੍ਖਾਲੇਸਿ. ਤੇਪਿ ਖੋ ਆਯਸ੍ਮਨ੍ਤੋ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਅਨੁਰੁਦ੍ਧਂ ਭਗਵਾ ਏਤਦਵੋਚ – ‘‘ਕਚ੍ਚਿ ਵੋ, ਅਨੁਰੁਦ੍ਧਾ, ਖਮਨੀਯਂ, ਕਚ੍ਚਿ ਯਾਪਨੀਯਂ; ਕਚ੍ਚਿ ਪਿਣ੍ਡਕੇਨ ਨ ਕਿਲਮਥਾ’’ਤਿ? ‘‘ਖਮਨੀਯਂ ਭਗਵਾ, ਯਾਪਨੀਯਂ ਭਗਵਾ; ਨ ਚ ਮਯਂ, ਭਨ੍ਤੇ, ਪਿਣ੍ਡਕੇਨ ਕਿਲਮਾਮਾ’’ਤਿ.

‘‘ਕਚ੍ਚਿ ਪਨ ਵੋ ਅਨੁਰੁਦ੍ਧਾ ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਖੀਰੋਦਕੀਭੂਤਾ ਅਞ੍ਞਮਞ੍ਞਂ ਪਿਯਚਕ੍ਖੂਹਿ ਸਮ੍ਪਸ੍ਸਨ੍ਤਾ ਵਿਹਰਥਾ’’ਤਿ? ‘‘ਤਗ੍ਘ ਮਯਂ, ਭਨ੍ਤੇ, ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਖੀਰੋਦਕੀਭੂਤਾ ਅਞ੍ਞਮਞ੍ਞਂ ਪਿਯਚਕ੍ਖੂਹਿ ਸਮ੍ਪਸ੍ਸਨ੍ਤਾ ਵਿਹਰਾਮਾ’’ਤਿ. ‘‘ਯਥਾ ਕਥਂ ਪਨ ਤੁਮ੍ਹੇ, ਅਨੁਰੁਦ੍ਧਾ, ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਖੀਰੋਦਕੀਭੂਤਾ ਅਞ੍ਞਮਞ੍ਞਂ ਪਿਯਚਕ੍ਖੂਹਿ ਸਮ੍ਪਸ੍ਸਨ੍ਤਾ ਵਿਹਰਥਾ’’ਤਿ? ‘‘ਇਧ ਮਯ੍ਹਂ, ਭਨ੍ਤੇ, ਏਵਂ ਹੋਤਿ – ‘ਲਾਭਾ ਵਤ ਮੇ, ਸੁਲਦ੍ਧਂ ਵਤ ਮੇ, ਯੋਹਂ ਏਵਰੂਪੇਹਿ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਵਿਹਰਾਮੀ’’’ਤਿ. ਤਸ੍ਸ ਮਯ੍ਹਂ, ਭਨ੍ਤੇ, ਇਮੇਸੁ ਆਯਸ੍ਮਨ੍ਤੇਸੁ ਮੇਤ੍ਤਂ ਕਾਯਕਮ੍ਮਂ ਪਚ੍ਚੁਪਟ੍ਠਿਤਂ ਆਵਿ ਚੇਵ ਰਹੋ ਚ; ਮੇਤ੍ਤਂ ਵਚੀਕਮ੍ਮਂ… ਮੇਤ੍ਤਂ ਮਨੋਕਮ੍ਮਂ ਪਚ੍ਚੁਪਟ੍ਠਿਤਂ ਆਵਿ ਚੇਵ ਰਹੋ ਚ. ਤਸ੍ਸ ਮਯ੍ਹਂ, ਭਨ੍ਤੇ, ਏਵਂ ਹੋਤਿ – ‘‘‘ਯਂਨੂਨਾਹਂ ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਮੇਸਂਯੇਵ ਆਯਸ੍ਮਨ੍ਤਾਨਂ ਚਿਤ੍ਤਸ੍ਸ ਵਸੇਨ ਵਤ੍ਤੇਯ੍ਯ’ਨ੍ਤਿ. ਸੋ ਖੋ ਅਹਂ, ਭਨ੍ਤੇ, ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਮੇਸਂਯੇਵ ਆਯਸ੍ਮਨ੍ਤਾਨਂ ਚਿਤ੍ਤਸ੍ਸ ਵਸੇਨ ਵਤ੍ਤਾਮਿ. ਨਾਨਾ ਹਿ ਖੋ ਨੋ, ਭਨ੍ਤੇ, ਕਾਯਾ, ਏਕਞ੍ਚ ਪਨ ਮਞ੍ਞੇ ਚਿਤ੍ਤ’’ਨ੍ਤਿ.

ਆਯਸ੍ਮਾਪਿ ਖੋ ਨਨ੍ਦਿਯੋ…ਪੇ… ਆਯਸ੍ਮਾਪਿ ਖੋ ਕਿਮਿਲੋ ਭਗਵਨ੍ਤਂ ਏਤਦਵੋਚ – ‘‘ਮਯ੍ਹਮ੍ਪਿ ਖੋ, ਭਨ੍ਤੇ, ਏਵਂ ਹੋਤਿ – ‘ਲਾਭਾ ਵਤ ਮੇ, ਸੁਲਦ੍ਧਂ ਵਤ ਮੇ, ਯੋਹਂ ਏਵਰੂਪੇਹਿ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਵਿਹਰਾਮੀ’ਤਿ. ਤਸ੍ਸ ਮਯ੍ਹਂ, ਭਨ੍ਤੇ, ਇਮੇਸੁ ਆਯਸ੍ਮਨ੍ਤੇਸੁ ਮੇਤ੍ਤਂ ਕਾਯਕਮ੍ਮਂ ਪਚ੍ਚੁਪਟ੍ਠਿਤਂ ਆਵਿ ਚੇਵ ਰਹੋ ਚ; ਮੇਤ੍ਤਂ ਵਚੀਕਮ੍ਮਂ ਮੇਤ੍ਤਂ ਮਨੋਕਮ੍ਮਂ ਪਚ੍ਚੁਪਟ੍ਠਿਤਂ ਆਵਿ ਚੇਵ ਰਹੋ ਚ. ਤਸ੍ਸ ਮਯ੍ਹਂ, ਭਨ੍ਤੇ, ਏਵਂ ਹੋਤਿ ‘ਯਂਨੂਨਾਹਂ ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਮੇਸਂਯੇਵ ਆਯਸ੍ਮਨ੍ਤਾਨਂ ਚਿਤ੍ਤਸ੍ਸ ਵਸੇਨ ਵਤ੍ਤੇਯ੍ਯ’ਨ੍ਤਿ. ਸੋ ਖੋ ਅਹਂ, ਭਨ੍ਤੇ, ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਮੇਸਂਯੇਵ ਆਯਸ੍ਮਨ੍ਤਾਨਂ ਚਿਤ੍ਤਸ੍ਸ ਵਸੇਨ ਵਤ੍ਤਾਮਿ. ਨਾਨਾ ਹਿ ਖੋ ਨੋ, ਭਨ੍ਤੇ, ਕਾਯਾ, ਏਕਞ੍ਚ ਪਨ ਮਞ੍ਞੇ ਚਿਤ੍ਤਨ੍ਤਿ. ਏਵਂ ਖੋ ਮਯਂ, ਭਨ੍ਤੇ, ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਖੀਰੋਦਕੀਭੂਤਾ ਅਞ੍ਞਮਞ੍ਞਂ ਪਿਯਚਕ੍ਖੂਹਿ ਸਮ੍ਪਸ੍ਸਨ੍ਤਾ ਵਿਹਰਾਮਾ’’ਤਿ.

‘‘ਕਚ੍ਚਿ ਪਨ ਵੋ, ਅਨੁਰੁਦ੍ਧਾ, ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਥਾ’’ਤਿ? ‘‘ਤਗ੍ਘ ਮਯਂ, ਭਨ੍ਤੇ, ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਾਮਾ’’ਤਿ. ‘‘ਯਥਾ ਕਥਂ ਪਨ ਤੁਮ੍ਹੇ, ਅਨੁਰੁਦ੍ਧਾ, ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਥਾ’’ਤਿ? ‘‘ਇਧ, ਭਨ੍ਤੇ, ਅਮ੍ਹਾਕਂ ਯੋ ਪਠਮਂ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ ਸੋ ਆਸਨਂ ਪਞ੍ਞਪੇਤਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਤਿ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਉਪਟ੍ਠਾਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ. ਯੋ ਪਚ੍ਛਾ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਸਚੇ ਹੋਤਿ ਭੁਤ੍ਤਾਵਸੇਸੋ, ਸਚੇ ਆਕਙ੍ਖਤਿ ਭੁਞ੍ਜਤਿ, ਨੋ ਚੇ ਆਕਙ੍ਖਤਿ ਅਪ੍ਪਹਰਿਤੇ ਵਾ ਛਡ੍ਡੇਤਿ. ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਤਿ. ਸੋ ਆਸਨਂ ਉਦ੍ਧਰਤਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਿ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਪਟਿਸਾਮੇਤਿ, ਪਾਨੀਯਂ ਪਰਿਭੋਜਨੀਯਂ ਪਟਿਸਾਮੇਤਿ, ਭਤ੍ਤਗ੍ਗਂ ਸਮ੍ਮਜ੍ਜਤਿ. ਯੋ ਪਸ੍ਸਤਿ ਪਾਨੀਯਘਟਂ ਵਾ ਪਰਿਭੋਜਨੀਯਘਟਂ ਵਾ ਵਚ੍ਚਘਟਂ ਵਾ ਰਿਤ੍ਤਂ ਤੁਚ੍ਛਂ ਸੋ ਉਪਟ੍ਠਾਪੇਤਿ. ਸਚਸ੍ਸ ਹੋਤਿ ਅਵਿਸਯ੍ਹਂ, ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਾਪੇਮ, ਨ ਤ੍ਵੇਵ ਮਯਂ, ਭਨ੍ਤੇ, ਤਪ੍ਪਚ੍ਚਯਾ ਵਾਚਂ ਭਿਨ੍ਦਾਮ. ਪਞ੍ਚਾਹਿਕਂ ਖੋ ਪਨ ਮਯਂ, ਭਨ੍ਤੇ, ਸਬ੍ਬਰਤ੍ਤਿਂ ਧਮ੍ਮਿਯਾ ਕਥਾਯ ਸਨ੍ਨਿਸੀਦਾਮ. ਏਵਂ ਖੋ ਮਯਂ, ਭਨ੍ਤੇ, ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਾਮਾ’’ਤਿ.

ਪਾਚਿਨਵਂਸਦਾਯਗਮਨਕਥਾ ਨਿਟ੍ਠਿਤਾ.

੨੭੫. ਪਾਲਿਲੇਯ੍ਯਕਗਮਨਕਥਾ

੪੬੭. [ਉਦਾ. ੩੫ ਆਦਯੋ ਥੋਕਂ ਵਿਸਦਿਸਂ] ਅਥ ਖੋ ਭਗਵਾ ਆਯਸ੍ਮਨ੍ਤਞ੍ਚ ਅਨੁਰੁਦ੍ਧਂ ਆਯਸ੍ਮਨ੍ਤਞ੍ਚ ਨਨ੍ਦਿਯਂ ਆਯਸ੍ਮਨ੍ਤਞ੍ਚ ਕਿਮਿਲਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਯੇਨ ਪਾਲਿਲੇਯ੍ਯਕਂ [ਪਾਰਿਲੇਯ੍ਯਕਂ (ਸੀ. ਸ੍ਯਾ.)] ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਪਾਲਿਲੇਯ੍ਯਕਂ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਪਾਲਿਲੇਯ੍ਯਕੇ ਵਿਹਰਤਿ ਰਕ੍ਖਿਤਵਨਸਣ੍ਡੇ ਭਦ੍ਦਸਾਲਮੂਲੇ. ਅਥ ਖੋ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਅਹਂ ਖੋ ਪੁਬ੍ਬੇ ਆਕਿਣ੍ਣੋ ਨ ਫਾਸੁ ਵਿਹਾਸਿਂ ਤੇਹਿ ਕੋਸਮ੍ਬਕੇਹਿ [ਕੋਸਬ੍ਭਿਕੇਹਿ (ਸ੍ਯਾ.)] ਭਿਕ੍ਖੂਹਿ ਭਣ੍ਡਨਕਾਰਕੇਹਿ ਕਲਹਕਾਰਕੇਹਿ ਵਿਵਾਦਕਾਰਕੇਹਿ ਭਸ੍ਸਕਾਰਕੇਹਿ ਸਙ੍ਘੇ ਅਧਿਕਰਣਕਾਰਕੇਹਿ. ਸੋਮ੍ਹਿ ਏਤਰਹਿ ਏਕੋ ਅਦੁਤਿਯੋ ਸੁਖਂ ਫਾਸੁ ਵਿਹਰਾਮਿ ਅਞ੍ਞਤ੍ਰੇਵ ਤੇਹਿ ਕੋਸਮ੍ਬਕੇਹਿ ਭਿਕ੍ਖੂਹਿ ਭਣ੍ਡਨਕਾਰਕੇਹਿ ਕਲਹਕਾਰਕੇਹਿ ਵਿਵਾਦਕਾਰਕੇਹਿ ਭਸ੍ਸਕਾਰਕੇਹਿ ਸਙ੍ਘੇ ਅਧਿਕਰਣਕਾਰਕੇਹੀ’’ਤਿ.

ਅਞ੍ਞਤਰੋਪਿ ਖੋ ਹਤ੍ਥਿਨਾਗੋ ਆਕਿਣ੍ਣੋ ਵਿਹਰਤਿ ਹਤ੍ਥੀਹਿ ਹਤ੍ਥਿਨੀਹਿ ਹਤ੍ਥਿਕਲ਼ਭੇਹਿ ਹਤ੍ਥਿਚ੍ਛਾਪੇਹਿ, ਛਿਨ੍ਨਗ੍ਗਾਨਿ ਚੇਵ ਤਿਣਾਨਿ ਖਾਦਤਿ, ਓਭਗ੍ਗੋਭਗ੍ਗਞ੍ਚਸ੍ਸ ਸਾਖਾਭਙ੍ਗਂ ਖਾਦਨ੍ਤਿ, ਆਵਿਲਾਨਿ ਚ ਪਾਨੀਯਾਨਿ ਪਿਵਤਿ, ਓਗਾਹਾ ਚਸ੍ਸ ਓਤਿਣ੍ਣਸ੍ਸ ਹਤ੍ਥਿਨਿਯੋ ਕਾਯਂ ਉਪਨਿਘਂਸਨ੍ਤਿਯੋ ਗਚ੍ਛਨ੍ਤਿ. ਅਥ ਖੋ ਤਸ੍ਸ ਹਤ੍ਥਿਨਾਗਸ੍ਸ ਏਤਦਹੋਸਿ – ‘‘ਅਹਂ ਖੋ ਆਕਿਣ੍ਣੋ ਵਿਹਰਾਮਿ ਹਤ੍ਥੀਹਿ ਹਤ੍ਥਿਨੀਹਿ ਹਤ੍ਥਿਕਲ਼ਭੇਹਿ ਹਤ੍ਥਿਚ੍ਛਾਪੇਹਿ, ਛਿਨ੍ਨਗ੍ਗਾਨਿ ਚੇਵ ਤਿਣਾਨਿ ਖਾਦਾਮਿ, ਓਭਗ੍ਗੋਭਗ੍ਗਞ੍ਚ ਮੇ ਸਾਖਾਭਙ੍ਗਂ ਖਾਦਨ੍ਤਿ, ਆਵਿਲਾਨਿ ਚ ਪਾਨੀਯਾਨਿ ਪਿਵਾਮਿ, ਓਗਾਹਾ ਚ ਮੇ ਓਤਿਣ੍ਣਸ੍ਸ ਹਤ੍ਥਿਨਿਯੋ ਕਾਯਂ ਉਪਨਿਘਂਸਨ੍ਤਿਯੋ ਗਚ੍ਛਨ੍ਤਿ. ਯਂਨੂਨਾਹਂ ਏਕੋਵ ਗਣਸ੍ਮਾ ਵੂਪਕਟ੍ਠੋ ਵਿਹਰੇਯ੍ਯ’’ਨ੍ਤਿ. ਅਥ ਖੋ ਸੋ ਹਤ੍ਥਿਨਾਗੋ ਯੂਥਾ ਅਪਕ੍ਕਮ੍ਮ ਯੇਨ ਪਾਲਿਲੇਯ੍ਯਕਂ ਰਕ੍ਖਿਤਵਨਸਣ੍ਡੋ ਭਦ੍ਦਸਾਲਮੂਲਂ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸੋਣ੍ਡਾਯ ਭਗਵਤੋ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਅਪ੍ਪਹਰਿਤਞ੍ਚ ਕਰੋਤਿ. ਅਥ ਖੋ ਤਸ੍ਸ ਹਤ੍ਥਿਨਾਗਸ੍ਸ ਏਤਦਹੋਸਿ – ‘‘ਅਹਂ ਖੋ ਪੁਬ੍ਬੇ ਆਕਿਣ੍ਣੋ ਨ ਫਾਸੁ ਵਿਹਾਸਿਂ ਹਤ੍ਥੀਹਿ ਹਤ੍ਥਿਨੀਹਿ ਹਤ੍ਥਿਕਲ਼ਭੇਹਿ ਹਤ੍ਥਿਚ੍ਛਾਪੇਹਿ, ਛਿਨ੍ਨਗ੍ਗਾਨਿ ਚੇਵ ਤਿਣਾਨਿ ਖਾਦਿਂ, ਓਭਗ੍ਗੋਭਗ੍ਗਞ੍ਚ ਮੇ ਸਾਖਾਭਙ੍ਗਂ ਖਾਦਿਂਸੁ, ਆਵਿਲਾਨਿ ਚ ਪਾਨੀਯਾਨਿ ਅਪਾਯਿਂ ਓਗਾਹਾ ਚ ਮੇ ਓਤਿਣ੍ਣਸ੍ਸ [ਓਗਾਹਞ੍ਚਸ੍ਸ ਓਤਿਣ੍ਣਸ੍ਸ (ਸ੍ਯਾ.), ਓਗਾਹਾ ਚਸ੍ਸ ਉਤ੍ਤਿਣ੍ਣਸ੍ਸ (ਸੀ.)] ਹਤ੍ਥਿਨਿਯੋ ਕਾਯਂ ਉਪਨਿਘਂਸਨ੍ਤਿਯੋ ਅਗਮਂਸੁ. ਸੋਮ੍ਹਿ ਏਤਰਹਿ ਏਕੋ ਅਦੁਤਿਯੋ ਸੁਖਂ ਫਾਸੁ ਵਿਹਰਾਮਿ ਅਞ੍ਞਤ੍ਰੇਵ ਹਤ੍ਥੀਹਿ ਹਤ੍ਥਿਨੀਹਿ ਹਤ੍ਥਿਕਲ਼ਭੇਹਿ ਹਤ੍ਥਿਚ੍ਛਾਪੇਹੀ’’ਤਿ.

ਅਥ ਖੋ ਭਗਵਾ ਅਤ੍ਤਨੋ ਚ ਪਵਿਵੇਕਂ ਵਿਦਿਤ੍ਵਾ ਤਸ੍ਸ ਚ ਹਤ੍ਥਿਨਾਗਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

[ਉਦਾ. ੩੫] ‘‘ਏਤਂ [ਏਵਂ (ਕ.)] ਨਾਗਸ੍ਸ ਨਾਗੇਨ, ਈਸਾਦਨ੍ਤਸ੍ਸ ਹਤ੍ਥਿਨੋ;

ਸਮੇਤਿ ਚਿਤ੍ਤਂ ਚਿਤ੍ਤੇਨ, ਯਦੇਕੋ ਰਮਤੀ ਵਨੇ’’ਤਿ.

ਅਥ ਖੋ ਭਗਵਾ ਪਾਲਿਲੇਯ੍ਯਕੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਕੋਸਮ੍ਬਕਾ ਉਪਾਸਕਾ – ‘‘ਇਮੇ ਖੋ ਅਯ੍ਯਾ ਕੋਸਮ੍ਬਕਾ ਭਿਕ੍ਖੂ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕਾ. ਇਮੇਹਿ ਉਬ੍ਬਾਲ਼੍ਹੋ ਭਗਵਾ ਪਕ੍ਕਨ੍ਤੋ. ਹਨ੍ਦ ਮਯਂ ਅਯ੍ਯੇ ਕੋਸਮ੍ਬਕੇ ਭਿਕ੍ਖੂ ਨੇਵ ਅਭਿਵਾਦੇਯ੍ਯਾਮ, ਨ ਪਚ੍ਚੁਟ੍ਠੇਯ੍ਯਾਮ, ਨ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰੇਯ੍ਯਾਮ, ਨ ਸਕ੍ਕਰੇਯ੍ਯਾਮ, ਨ ਗਰੁਂ ਕਰੇਯ੍ਯਾਮ, ਨ ਮਾਨੇਯ੍ਯਾਮ, ਨ ਭਜੇਯ੍ਯਾਮ, ਨ ਪੂਜੇਯ੍ਯਾਮ, ਉਪਗਤਾਨਮ੍ਪਿ ਪਿਣ੍ਡਕਂ ਨ ਦਜ੍ਜੇਯ੍ਯਾਮ – ਏਵਂ ਇਮੇ ਅਮ੍ਹੇਹਿ ਅਸਕ੍ਕਰਿਯਮਾਨਾ ਅਗਰੁਕਰਿਯਮਾਨਾ ਅਮਾਨਿਯਮਾਨਾ ਅਭਜਿਯਮਾਨਾ ਅਪੂਜਿਯਮਾਨਾ ਅਸਕ੍ਕਾਰਪਕਤਾ ਪਕ੍ਕਮਿਸ੍ਸਨ੍ਤਿ ਵਾ ਵਿਬ੍ਭਮਿਸ੍ਸਨ੍ਤਿ ਵਾ ਭਗਵਨ੍ਤਂ ਵਾ ਪਸਾਦੇਸ੍ਸਨ੍ਤੀ’’ਤਿ. ਅਥ ਖੋ ਕੋਸਮ੍ਬਕਾ ਉਪਾਸਕਾ ਕੋਸਮ੍ਬਕੇ ਭਿਕ੍ਖੂ ਨੇਵ ਅਭਿਵਾਦੇਸੁਂ, ਨ ਪਚ੍ਚੁਟ੍ਠੇਸੁਂ, ਨ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਅਕਂਸੁ, ਨ ਸਕ੍ਕਰਿਂਸੁ, ਨ ਗਰੁਂ ਕਰਿਂਸੁ, ਨ ਮਾਨੇਸੁਂ, ਨ ਭਜੇਸੁਂ ਨ ਪੂਜੇਸੁਂ, ਉਪਗਤਾਨਮ੍ਪਿ ਪਿਣ੍ਡਕਂ ਨ ਅਦਂਸੁ. ਅਥ ਖੋ ਕੋਸਮ੍ਬਕਾ ਭਿਕ੍ਖੂ ਕੋਸਮ੍ਬਕੇਹਿ ਉਪਾਸਕੇਹਿ ਅਸਕ੍ਕਰਿਯਮਾਨਾ ਅਗਰੁਕਰਿਯਮਾਨਾ ਅਮਾਨਿਯਮਾਨਾ ਅਭਜਿਯਮਾਨਾ ਅਪੂਜਿਯਮਾਨਾ ਅਸਕ੍ਕਾਰਪਕਤਾ ਏਵਮਾਹਂਸੁ – ‘‘ਹਨ੍ਦ ਮਯਂ, ਆਵੁਸੋ, ਸਾਵਤ੍ਥਿਂ ਗਨ੍ਤ੍ਵਾ ਭਗਵਤੋ ਸਨ੍ਤਿਕੇ ਇਮਂ ਅਧਿਕਰਣਂ ਵੂਪਸਮੇਯ੍ਯਾਮਾ’’ਤਿ.

ਪਾਲਿਲੇਯ੍ਯਕਗਮਨਕਥਾ ਨਿਟ੍ਠਿਤਾ.

੨੭੬. ਅਟ੍ਠਾਰਸਵਤ੍ਥੁਕਥਾ

੪੬੮. ਅਥ ਖੋ ਕੋਸਮ੍ਬਕਾ ਭਿਕ੍ਖੂ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਸਾਵਤ੍ਥਿ ਤੇਨੁਪਸਙ੍ਕਮਿਂਸੁ. ਅਸ੍ਸੋਸਿ ਖੋ ਆਯਸ੍ਮਾ ਸਾਰਿਪੁਤ੍ਤੋ – ‘‘ਤੇ ਕਿਰ ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤੀ’’ਤਿ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸਾਰਿਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤਿ. ਕਥਾਹਂ, ਭਨ੍ਤੇ, ਤੇਸੁ ਭਿਕ੍ਖੂਸੁ ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਸਾਰਿਪੁਤ੍ਤ, ਯਥਾ ਧਮ੍ਮੋ ਤਥਾ ਤਿਟ੍ਠਾਹੀ’’ਤਿ. ‘‘ਕਥਾਹਂ, ਭਨ੍ਤੇ, ਜਾਨੇਯ੍ਯਂ ਧਮ੍ਮਂ ਵਾ ਅਧਮ੍ਮਂ ਵਾ’’ਤਿ?

ਅਟ੍ਠਾਰਸਹਿ ਖੋ, ਸਾਰਿਪੁਤ੍ਤ, ਵਤ੍ਥੂਹਿ ਅਧਮ੍ਮਵਾਦੀ ਜਾਨਿਤਬ੍ਬੋ. ਇਧ, ਸਾਰਿਪੁਤ੍ਤ, ਭਿਕ੍ਖੁ ਅਧਮ੍ਮਂ ਧਮ੍ਮੋਤਿ ਦੀਪੇਤਿ, ਧਮ੍ਮਂ ਅਧਮ੍ਮੋਤਿ ਦੀਪੇਤਿ; ਅਵਿਨਯਂ ਵਿਨਯੋਤਿ ਦੀਪੇਤਿ, ਵਿਨਯਂ ਅਵਿਨਯੋਤਿ ਦੀਪੇਤਿ; ਅਭਾਸਿਤਂ ਅਲਪਿਤਂ ਤਥਾਗਤੇਨ ਭਾਸਿਤਂ ਲਪਿਤਂ ਤਥਾਗਤੇਨਾਤਿ ਦੀਪੇਤਿ, ਭਾਸਿਤਂ ਲਪਿਤਂ ਤਥਾਗਤੇਨ ਅਭਾਸਿਤਂ ਅਲਪਿਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਚਿਣ੍ਣਂ ਤਥਾਗਤੇਨ ਆਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ, ਆਚਿਣ੍ਣਂ ਤਥਾਗਤੇਨ ਅਨਾਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ; ਅਪਞ੍ਞਤ੍ਤਂ ਤਥਾਗਤੇਨ ਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ, ਪਞ੍ਞਤ੍ਤਂ ਤਥਾਗਤੇਨ ਅਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਪਤ੍ਤਿਂ ਆਪਤ੍ਤੀਤਿ ਦੀਪੇਤਿ, ਆਪਤ੍ਤਿਂ ਅਨਾਪਤ੍ਤੀਤਿ ਦੀਪੇਤਿ; ਲਹੁਕਂ ਆਪਤ੍ਤਿਂ ਗਰੁਕਾ ਆਪਤ੍ਤੀਤਿ ਦੀਪੇਤਿ, ਗਰੁਕਂ ਆਪਤ੍ਤਿਂ ਲਹੁਕਾ ਆਪਤ੍ਤੀਤਿ ਦੀਪੇਤਿ; ਸਾਵਸੇਸਂ ਆਪਤ੍ਤਿਂ ਅਨਵਸੇਸਾ ਆਪਤ੍ਤੀਤਿ ਦੀਪੇਤਿ, ਅਨਵਸੇਸਂ ਆਪਤ੍ਤਿਂ ਸਾਵਸੇਸਾ ਆਪਤ੍ਤੀਤਿ ਦੀਪੇਤਿ; ਦੁਟ੍ਠੁਲ੍ਲਂ ਆਪਤ੍ਤਿਂ ਅਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ, ਅਦੁਟ੍ਠੁਲ੍ਲਂ ਆਪਤ੍ਤਿਂ ਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ – ਇਮੇਹਿ ਖੋ, ਸਾਰਿਪੁਤ੍ਤ, ਅਟ੍ਠਾਰਸਹਿ ਵਤ੍ਥੂਹਿ ਅਧਮ੍ਮਵਾਦੀ ਜਾਨਿਤਬ੍ਬੋ.

ਅਟ੍ਠਾਰਸਹਿ ਚ ਖੋ, ਸਾਰਿਪੁਤ੍ਤ, ਵਤ੍ਥੂਹਿ ਧਮ੍ਮਵਾਦੀ ਜਾਨਿਤਬ੍ਬੋ. ਇਧ, ਸਾਰਿਪੁਤ੍ਤ, ਭਿਕ੍ਖੁ ਅਧਮ੍ਮਂ ਅਧਮ੍ਮੋਤਿ ਦੀਪੇਤਿ, ਧਮ੍ਮਂ ਧਮ੍ਮੋਤਿ ਦੀਪੇਤਿ; ਅਵਿਨਯਂ ਅਵਿਨਯੋਤਿ ਦੀਪੇਤਿ, ਵਿਨਯਂ ਵਿਨਯੋਤਿ ਦੀਪੇਤਿ; ਅਭਾਸਿਤਂ ਅਲਪਿਤਂ ਤਥਾਗਤੇਨ ਅਭਾਸਿਤਂ ਅਲਪਿਤਂ ਤਥਾਗਤੇਨਾਤਿ ਦੀਪੇਤਿ, ਭਾਸਿਤਂ ਲਪਿਤਂ ਤਥਾਗਤੇਨ ਭਾਸਿਤਂ ਲਪਿਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਚਿਣ੍ਣਂ ਤਥਾਗਤੇਨ ਅਨਾਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ, ਆਚਿਣ੍ਣਂ ਤਥਾਗਤੇਨ ਆਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ; ਅਪਞ੍ਞਤ੍ਤਂ ਤਥਾਗਤੇਨ ਅਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ, ਪਞ੍ਞਤ੍ਤਂ ਤਥਾਗਤੇਨ ਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਪਤ੍ਤਿਂ ਅਨਾਪਤ੍ਤੀਤਿ ਦੀਪੇਤਿ, ਆਪਤ੍ਤਿਂ ਆਪਤ੍ਤੀਤਿ ਦੀਪੇਤਿ; ਲਹੁਕਂ ਆਪਤ੍ਤਿਂ ਲਹੁਕਾ ਆਪਤ੍ਤੀਤਿ ਦੀਪੇਤਿ, ਗਰੁਕਂ ਆਪਤ੍ਤਿਂ ਗਰੁਕਾ ਆਪਤ੍ਤੀਤਿ ਦੀਪੇਤਿ; ਸਾਵਸੇਸਂ ਆਪਤ੍ਤਿਂ ਸਾਵਸੇਸਾ ਆਪਤ੍ਤੀਤਿ ਦੀਪੇਤਿ, ਅਨਵਸੇਸਂ ਆਪਤ੍ਤਿਂ ਅਨਵਸੇਸਾ ਆਪਤ੍ਤੀਤਿ ਦੀਪੇਤਿ; ਦੁਟ੍ਠੁਲ੍ਲਂ ਆਪਤ੍ਤਿਂ ਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ, ਅਦੁਟ੍ਠੁਲ੍ਲਂ ਆਪਤ੍ਤਿਂ ਅਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ – ਇਮੇਹਿ ਖੋ, ਸਾਰਿਪੁਤ੍ਤ, ਅਟ੍ਠਾਰਸਹਿ ਵਤ੍ਥੂਹਿ ਧਮ੍ਮਵਾਦੀ ਜਾਨਿਤਬ੍ਬੋਤਿ.

੪੬੯. ਅਸ੍ਸੋਸਿ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ…ਪੇ… ਅਸ੍ਸੋਸਿ ਖੋ ਆਯਸ੍ਮਾ ਮਹਾਕਸ੍ਸਪੋ… ਅਸ੍ਸੋਸਿ ਖੋ ਆਯਸ੍ਮਾ ਮਹਾਕਚ੍ਚਾਨੋ… ਅਸ੍ਸੋਸਿ ਖੋ ਆਯਸ੍ਮਾ ਮਹਾਕੋਟ੍ਠਿਕੋ … ਅਸ੍ਸੋਸਿ ਖੋ ਆਯਸ੍ਮਾ ਮਹਾਕਪ੍ਪਿਨੋ… ਅਸ੍ਸੋਸਿ ਖੋ ਆਯਸ੍ਮਾ ਮਹਾਚੁਨ੍ਦੋ… ਅਸ੍ਸੋਸਿ ਖੋ ਆਯਸ੍ਮਾ ਅਨੁਰੁਦ੍ਧੋ… ਅਸ੍ਸੋਸਿ ਖੋ ਆਯਸ੍ਮਾ ਰੇਵਤੋ … ਅਸ੍ਸੋਸਿ ਖੋ ਆਯਸ੍ਮਾ ਉਪਾਲਿ… ਅਸ੍ਸੋਸਿ ਖੋ ਆਯਸ੍ਮਾ ਆਨਨ੍ਦੋ… ਅਸ੍ਸੋਸਿ ਖੋ ਆਯਸ੍ਮਾ ਰਾਹੁਲੋ – ‘‘ਤੇ ਕਿਰ ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤੀ’’ਤਿ. ਅਥ ਖੋ ਆਯਸ੍ਮਾ ਰਾਹੁਲੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਰਾਹੁਲੋ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤਿ. ਕਥਾਹਂ, ਭਨ੍ਤੇ, ਤੇਸੁ ਭਿਕ੍ਖੂਸੁ ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਰਾਹੁਲ, ਯਥਾ ਧਮ੍ਮੋ ਤਥਾ ਤਿਟ੍ਠਾਹੀ’’ਤਿ. ‘‘ਕਥਾਹਂ, ਭਨ੍ਤੇ, ਜਾਨੇਯ੍ਯਂ ਧਮ੍ਮਂ ਵਾ ਅਧਮ੍ਮਂ ਵਾ’’ਤਿ?

ਅਟ੍ਠਾਰਸਹਿ ਖੋ, ਰਾਹੁਲ, ਵਤ੍ਥੂਹਿ ਅਧਮ੍ਮਵਾਦੀ ਜਾਨਿਤਬ੍ਬੋ. ਇਧ, ਰਾਹੁਲ, ਭਿਕ੍ਖੁ ਅਧਮ੍ਮਂ ਧਮ੍ਮੋਤਿ ਦੀਪੇਤਿ, ਧਮ੍ਮਂ ਅਧਮ੍ਮੋਤਿ ਦੀਪੇਤਿ; ਅਵਿਨਯਂ ਵਿਨਯੋਤਿ ਦੀਪੇਤਿ, ਵਿਨਯਂ ਅਵਿਨਯੋਤਿ ਦੀਪੇਤਿ; ਅਭਾਸਿਤਂ ਅਲਪਿਤਂ ਤਥਾਗਤੇਨ ਭਾਸਿਤਂ ਲਪਿਤਂ ਤਥਾਗਤੇਨਾਤਿ ਦੀਪੇਤਿ, ਭਾਸਿਤਂ ਲਪਿਤਂ ਤਥਾਗਤੇਨ ਅਭਾਸਿਤਂ ਅਲਪਿਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਚਿਣ੍ਣਂ ਤਥਾਗਤੇਨ ਆਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ, ਆਚਿਣ੍ਣਂ ਤਥਾਗਤੇਨ ਅਨਾਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ; ਅਪਞ੍ਞਤ੍ਤਂ ਤਥਾਗਤੇਨ ਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ, ਪਞ੍ਞਤ੍ਤਂ ਤਥਾਗਤੇਨ ਅਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਪਤ੍ਤਿਂ ਆਪਤ੍ਤੀਤਿ ਦੀਪੇਤਿ, ਆਪਤ੍ਤਿਂ ਅਨਾਪਤ੍ਤੀਤਿ ਦੀਪੇਤਿ; ਲਹੁਕਂ ਆਪਤ੍ਤਿਂ ਗਰੁਕਾ ਆਪਤ੍ਤੀਤਿ ਦੀਪੇਤਿ, ਗਰੁਕਂ ਆਪਤ੍ਤਿਂ ਲਹੁਕਾ ਆਪਤ੍ਤੀਤਿ ਦੀਪੇਤਿ; ਸਾਵਸੇਸਂ ਆਪਤ੍ਤਿਂ ਅਨਵਸੇਸਾ ਆਪਤ੍ਤੀਤਿ ਦੀਪੇਤਿ, ਅਨਵਸੇਸਂ ਆਪਤ੍ਤਿਂ ਸਾਵਸੇਸਾ ਆਪਤ੍ਤੀਤਿ ਦੀਪੇਤਿ; ਦੁਟ੍ਠੁਲ੍ਲਂ ਆਪਤ੍ਤਿਂ ਅਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ, ਅਦੁਟ੍ਠੁਲ੍ਲਂ ਆਪਤ੍ਤਿਂ ਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ – ਇਮੇਹਿ ਖੋ, ਰਾਹੁਲ, ਅਟ੍ਠਾਰਸਹਿ ਵਤ੍ਥੂਹਿ ਅਧਮ੍ਮਵਾਦੀ ਜਾਨਿਤਬ੍ਬੋ.

ਅਟ੍ਠਾਰਸਹਿ ਚ ਖੋ, ਰਾਹੁਲ, ਵਤ੍ਥੂਹਿ ਧਮ੍ਮਵਾਦੀ ਜਾਨਿਤਬ੍ਬੋ. ਇਧ, ਰਾਹੁਲ, ਭਿਕ੍ਖੁ ਅਧਮ੍ਮਂ ਅਧਮ੍ਮੋਤਿ ਦੀਪੇਤਿ, ਧਮ੍ਮਂ ਧਮ੍ਮੋਤਿ ਦੀਪੇਤਿ; ਅਵਿਨਯਂ ਅਵਿਨਯੋਤਿ ਦੀਪੇਤਿ, ਵਿਨਯਂ ਵਿਨਯੋਤਿ ਦੀਪੇਤਿ; ਅਭਾਸਿਤਂ ਅਲਪਿਤਂ ਤਥਾਗਤੇਨ ਅਭਾਸਿਤਂ ਅਲਪਿਤਂ ਤਥਾਗਤੇਨਾਤਿ ਦੀਪੇਤਿ, ਭਾਸਿਤਂ ਲਪਿਤਂ ਤਥਾਗਤੇਨ ਭਾਸਿਤਂ ਲਪਿਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਚਿਣ੍ਣਂ ਤਥਾਗਤੇਨ ਅਨਾਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ, ਆਚਿਣ੍ਣਂ ਤਥਾਗਤੇਨ ਆਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ; ਅਪਞ੍ਞਤ੍ਤਂ ਤਥਾਗਤੇਨ ਅਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ, ਪਞ੍ਞਤ੍ਤਂ ਤਥਾਗਤੇਨ ਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਪਤ੍ਤਿਂ ਅਨਾਪਤ੍ਤੀਤਿ ਦੀਪੇਤਿ, ਆਪਤ੍ਤਿਂ ਆਪਤ੍ਤੀਤਿ ਦੀਪੇਤਿ; ਲਹੁਕਂ ਆਪਤ੍ਤਿਂ ਲਹੁਕਾ ਆਪਤ੍ਤੀਤਿ ਦੀਪੇਤਿ, ਗਰੁਕਂ ਆਪਤ੍ਤਿਂ ਗਰੁਕਾ ਆਪਤ੍ਤੀਤਿ ਦੀਪੇਤਿ; ਸਾਵਸੇਸਂ ਆਪਤ੍ਤਿਂ ਸਾਵਸੇਸਾ ਆਪਤ੍ਤੀਤਿ ਦੀਪੇਤਿ, ਅਨਵਸੇਸਂ ਆਪਤ੍ਤਿਂ ਅਨਵਸੇਸਾ ਆਪਤ੍ਤੀਤਿ ਦੀਪੇਤਿ; ਦੁਟ੍ਠੁਲ੍ਲਂ ਆਪਤ੍ਤਿਂ ਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ, ਅਦੁਟ੍ਠੁਲ੍ਲਂ ਆਪਤ੍ਤਿਂ ਅਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ – ਇਮੇਹਿ ਖੋ, ਰਾਹੁਲ, ਅਟ੍ਠਾਰਸਹਿ ਵਤ੍ਥੂਹਿ ਧਮ੍ਮਵਾਦੀ ਜਾਨਿਤਬ੍ਬੋਤਿ.

੪੭੦. ਅਸ੍ਸੋਸਿ ਖੋ ਮਹਾਪਜਾਪਤਿ [ਮਹਾਪਜਾਪਤੀ (ਸੀ. ਸ੍ਯਾ.)] ਗੋਤਮੀ – ‘‘ਤੇ ਕਿਰ ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤੀ’’ਤਿ. ਅਥ ਖੋ ਮਹਾਪਜਾਪਤਿ ਗੋਤਮੀ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਮਹਾਪਜਾਪਤਿ ਗੋਤਮੀ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤਿ. ਕਥਾਹਂ, ਭਨ੍ਤੇ, ਤੇਸੁ ਭਿਕ੍ਖੂਸੁ ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਗੋਤਮਿ, ਉਭਯਤ੍ਥ ਧਮ੍ਮਂ ਸੁਣ. ਉਭਯਤ੍ਥ ਧਮ੍ਮਂ ਸੁਤ੍ਵਾ ਯੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ ਤੇਸਂ ਦਿਟ੍ਠਿਞ੍ਚ ਖਨ੍ਤਿਞ੍ਚ ਰੁਚਿਞ੍ਚ ਆਦਾਯਞ੍ਚ ਰੋਚੇਹਿ. ਯਞ੍ਚ ਕਿਞ੍ਚਿ ਭਿਕ੍ਖੁਨਿਸਙ੍ਘੇਨ ਭਿਕ੍ਖੁਸਙ੍ਘਤੋ ਪਚ੍ਚਾਸੀਸਿਤਬ੍ਬਂ ਸਬ੍ਬਂ ਤਂ ਧਮ੍ਮਵਾਦਿਤੋਵ ਪਚ੍ਚਾਸੀਸਿਤਬ੍ਬ’’ਨ੍ਤਿ.

੪੭੧. ਅਸ੍ਸੋਸਿ ਖੋ ਅਨਾਥਪਿਣ੍ਡਿਕੋ ਗਹਪਤਿ – ‘‘ਤੇ ਕਿਰ ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤੀ’’ਤਿ. ਅਥ ਖੋ ਅਨਾਥਪਿਣ੍ਡਿਕੋ ਗਹਪਤਿ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਅਨਾਥਪਿਣ੍ਡਿਕੋ ਗਹਪਤਿ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤਿ. ਕਥਾਹਂ, ਭਨ੍ਤੇ, ਤੇਸੁ ਭਿਕ੍ਖੂਸੁ ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਗਹਪਤਿ, ਉਭਯਤ੍ਥ ਦਾਨਂ ਦੇਹਿ. ਉਭਯਤ੍ਥ ਦਾਨਂ ਦਤ੍ਵਾ ਉਭਯਤ੍ਥ ਧਮ੍ਮਂ ਸੁਣ. ਉਭਯਤ੍ਥ ਧਮ੍ਮਂ ਸੁਤ੍ਵਾ ਯੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ ਤੇਸਂ ਦਿਟ੍ਠਿਞ੍ਚ ਖਨ੍ਤਿਞ੍ਚ ਰੁਚਿਞ੍ਚ ਆਦਾਯਞ੍ਚ ਰੋਚੇਹੀ’’ਤਿ.

੪੭੨. ਅਸ੍ਸੋਸਿ ਖੋ ਵਿਸਾਖਾ ਮਿਗਾਰਮਾਤਾ – ‘‘ਤੇ ਕਿਰ ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤੀ’’ਤਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਵਿਸਾਖਾ ਮਿਗਾਰਮਾਤਾ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤਿ. ਕਥਾਹਂ, ਭਨ੍ਤੇ, ਤੇਸੁ ਭਿਕ੍ਖੂਸੁ ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਵਿਸਾਖੇ, ਉਭਯਤ੍ਥ ਦਾਨਂ ਦੇਹਿ. ਉਭਯਤ੍ਥ ਦਾਨਂ ਦਤ੍ਵਾ ਉਭਯਤ੍ਥ ਧਮ੍ਮਂ ਸੁਣ. ਉਭਯਤ੍ਥ ਧਮ੍ਮਂ ਸੁਤ੍ਵਾ ਯੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ ਤੇਸਂ ਦਿਟ੍ਠਿਞ੍ਚ ਖਨ੍ਤਿਞ੍ਚ ਰੁਚਿਞ੍ਚ ਆਦਾਯਞ੍ਚ ਰੋਚੇਹੀ’’ਤਿ.

੪੭੩. ਅਥ ਖੋ ਕੋਸਮ੍ਬਕਾ ਭਿਕ੍ਖੂ ਅਨੁਪੁਬ੍ਬੇਨ ਯੇਨ ਸਾਵਤ੍ਥਿ ਤਦਵਸਰੁਂ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸਾਰਿਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਅਨੁਪ੍ਪਤ੍ਤਾ. ਕਥਂ ਨੁ ਖੋ, ਭਨ੍ਤੇ, ਤੇਸੁ ਭਿਕ੍ਖੂਸੁ ਸੇਨਾਸਨੇ [ਸੇਨਾਸਨੇਸੁ (ਕ.), ਸੇਨਾਸਨਂ (ਸ੍ਯਾ.)] ਪਟਿਪਜ੍ਜਿਤਬ੍ਬ’’ਨ੍ਤਿ? ‘‘ਤੇਨ ਹਿ, ਸਾਰਿਪੁਤ੍ਤ, ਵਿਵਿਤ੍ਤਂ ਸੇਨਾਸਨਂ ਦਾਤਬ੍ਬ’’ਨ੍ਤਿ. ‘‘ਸਚੇ ਪਨ, ਭਨ੍ਤੇ, ਵਿਵਿਤ੍ਤਂ ਨ ਹੋਤਿ, ਕਥਂ ਪਟਿਪਜ੍ਜਿਤਬ੍ਬ’’ਨ੍ਤਿ? ‘‘ਤੇਨ ਹਿ, ਸਾਰਿਪੁਤ੍ਤ, ਵਿਵਿਤ੍ਤਂ ਕਤ੍ਵਾਪਿ ਦਾਤਬ੍ਬਂ, ਨ ਤ੍ਵੇਵਾਹਂ, ਸਾਰਿਪੁਤ੍ਤ, ਕੇਨਚਿ ਪਰਿਯਾਯੇਨ ਵੁਡ੍ਢਤਰਸ੍ਸ ਭਿਕ੍ਖੁਨੋ ਸੇਨਾਸਨਂ ਪਟਿਬਾਹਿਤਬ੍ਬਨ੍ਤਿ ਵਦਾਮਿ. ਯੋ ਪਟਿਬਾਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

‘‘ਆਮਿਸੇ ਪਨ, ਭਨ੍ਤੇ, ਕਥਂ ਪਟਿਪਜ੍ਜਿਤਬ੍ਬ’’ਨ੍ਤਿ? ‘‘ਆਮਿਸਂ ਖੋ, ਸਾਰਿਪੁਤ੍ਤ, ਸਬ੍ਬੇਸਂ ਸਮਕਂ ਭਾਜੇਤਬ੍ਬ’’ਨ੍ਤਿ.

ਅਟ੍ਠਾਰਸਵਤ੍ਥੁਕਥਾ ਨਿਟ੍ਠਿਤਾ.

੨੭੭. ਓਸਾਰਣਾਨੁਜਾਨਨਾ

੪੭੪. ਅਥ ਖੋ ਤਸ੍ਸ ਉਕ੍ਖਿਤ੍ਤਕਸ੍ਸ ਭਿਕ੍ਖੁਨੋ ਧਮ੍ਮਞ੍ਚ ਵਿਨਯਞ੍ਚ ਪਚ੍ਚਵੇਕ੍ਖਨ੍ਤਸ੍ਸ ਏਤਦਹੋਸਿ – ‘‘ਆਪਤ੍ਤਿ ਏਸਾ, ਨੇਸਾ ਅਨਾਪਤ੍ਤਿ. ਆਪਨ੍ਨੋਮ੍ਹਿ, ਨਮ੍ਹਿ ਅਨਾਪਨ੍ਨੋ. ਉਕ੍ਖਿਤ੍ਤੋਮ੍ਹਿ, ਨਮ੍ਹਿ ਅਨੁਕ੍ਖਿਤ੍ਤੋ. ਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨਾ’’ਤਿ. ਅਥ ਖੋ ਸੋ ਉਕ੍ਖਿਤ੍ਤਕੋ ਭਿਕ੍ਖੁ ਯੇਨ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਉਕ੍ਖਿਤ੍ਤਾਨੁਵਤ੍ਤਕੇ ਭਿਕ੍ਖੂ ਏਤਦਵੋਚ – ‘‘ਆਪਤ੍ਤਿ ਏਸਾ, ਆਵੁਸੋ; ਨੇਸਾ ਅਨਾਪਤ੍ਤਿ. ਆਪਨ੍ਨੋਮ੍ਹਿ, ਨਮ੍ਹਿ ਅਨਾਪਨ੍ਨੋ. ਉਕ੍ਖਿਤ੍ਤੋਮ੍ਹਿ, ਨਮ੍ਹਿ ਅਨੁਕ੍ਖਿਤ੍ਤੋ. ਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ. ਏਥ ਮਂ ਆਯਸ੍ਮਨ੍ਤੋ ਓਸਾਰੇਥਾ’’ਤਿ. ਅਥ ਖੋ ਤੇ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘‘ਅਯਂ, ਭਨ੍ਤੇ, ਉਕ੍ਖਿਤ੍ਤਕੋ ਭਿਕ੍ਖੁ ਏਵਮਾਹ – ‘ਆਪਤ੍ਤਿ ਏਸਾ, ਆਵੁਸੋ; ਨੇਸਾ ਅਨਾਪਤ੍ਤਿ. ਆਪਨ੍ਨੋਮ੍ਹਿ, ਨਮ੍ਹਿ ਅਨਾਪਨ੍ਨੋ. ਉਕ੍ਖਿਤ੍ਤੋਮ੍ਹਿ, ਨਮ੍ਹਿ ਅਨੁਕ੍ਖਿਤ੍ਤੋ. ਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ. ਏਥ ਮਂ ਆਯਸ੍ਮਨ੍ਤੋ ਓਸਾਰੇਥਾ’ਤਿ. ਕਥਂ ਨੁ ਖੋ, ਭਨ੍ਤੇ, ਪਟਿਪਜ੍ਜਿਤਬ੍ਬ’’ਨ੍ਤਿ? ‘‘ਆਪਤ੍ਤਿ ਏਸਾ, ਭਿਕ੍ਖਵੇ; ਨੇਸਾ ਅਨਾਪਤ੍ਤਿ. ਆਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨਾਪਨ੍ਨੋ. ਉਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨੁਕ੍ਖਿਤ੍ਤੋ. ਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ. ਯਤੋ ਚ ਖੋ ਸੋ, ਭਿਕ੍ਖਵੇ, ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਤਿ ਚ, ਤੇਨ ਹਿ, ਭਿਕ੍ਖਵੇ, ਤਂ ਭਿਕ੍ਖੁਂ ਓਸਾਰੇਥਾ’’ਤਿ.

ਓਸਾਰਣਾਨੁਜਾਨਨਾ ਨਿਟ੍ਠਿਤਾ.

੨੭੮. ਸਙ੍ਘਸਾਮਗ੍ਗੀਕਥਾ

੪੭੫. ਅਥ ਖੋ ਤੇ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਓਸਾਰੇਤ੍ਵਾ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਉਕ੍ਖੇਪਕੇ ਭਿਕ੍ਖੂ ਏਤਦਵੋਚੁਂ – ‘‘ਯਸ੍ਮਿਂ, ਆਵੁਸੋ, ਵਤ੍ਥੁਸ੍ਮਿਂ ਅਹੋਸਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸੋ ਏਸੋ ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ [ਪਸ੍ਸੀ (ਇਤਿਪਿ)] ਚ ਓਸਾਰਿਤੋ ਚ. ਹਨ੍ਦ ਮਯਂ, ਆਵੁਸੋ, ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਮਾ’’ਤਿ.

ਅਥ ਖੋ ਤੇ ਉਕ੍ਖੇਪਕਾ ਭਿਕ੍ਖੂ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘‘ਤੇ, ਭਨ੍ਤੇ, ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਏਵਮਾਹਂਸੁ – ‘ਯਸ੍ਮਿਂ, ਆਵੁਸੋ, ਵਤ੍ਥੁਸ੍ਮਿਂ ਅਹੋਸਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸੋ ਏਸੋ ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ ਚ ਓਸਾਰਿਤੋ ਚ. ਹਨ੍ਦ ਮਯਂ, ਆਵੁਸੋ, ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਮਾ’ਤਿ. ਕਥਂ ਨੁ ਖੋ, ਭਨ੍ਤੇ, ਪਟਿਪਜ੍ਜਿਤਬ੍ਬ’’ਨ੍ਤਿ? ਯਤੋ ਚ ਖੋ ਸੋ, ਭਿਕ੍ਖਵੇ, ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ ਚ ਓਸਾਰਿਤੋ ਚ, ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਤੁ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬਾ. ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬਂ ਗਿਲਾਨੇਹਿ ਚ ਅਗਿਲਾਨੇਹਿ ਚ. ਨ ਕੇਹਿਚਿ ਛਨ੍ਦੋ ਦਾਤਬ੍ਬੋ. ਸਨ੍ਨਿਪਤਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਸ੍ਮਿਂ ਵਤ੍ਥੁਸ੍ਮਿਂ ਅਹੋਸਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸੋ ਏਸੋ ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ ਚ ਓਸਾਰਿਤੋ ਚ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਸ੍ਮਿਂ ਵਤ੍ਥੁਸ੍ਮਿਂ ਅਹੋਸਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸੋ ਏਸੋ ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ ਚ ਓਸਾਰਿਤੋ ਚ. ਸਙ੍ਘੋ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਤਿ. ਯਸ੍ਸਾਯਸ੍ਮਤੋ ਖਮਤਿ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਯਾ ਕਰਣਂ, ਸੋ ਤੁਣ੍ਹਸ੍ਸ, ਯਸ੍ਸ ਨਕ੍ਖਮਤਿ ਸੋ ਭਾਸੇਯ੍ਯ.

‘‘ਕਤਾ ਸਙ੍ਘੇਨ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗੀ. ਨਿਹਤੋ ਸਙ੍ਘਭੇਦੋ, ਨਿਹਤਾ ਸਙ੍ਘਰਾਜਿ, ਨਿਹਤਂ ਸਙ੍ਘਵਵਤ੍ਥਾਨਂ, ਨਿਹਤਂ ਸਙ੍ਘਨਾਨਾਕਰਣਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤਾਵਦੇਵ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਨ੍ਤਿ.

ਸਙ੍ਘਸਾਮਗ੍ਗੀਕਥਾ ਨਿਟ੍ਠਿਤਾ.

੨੭੯. ਉਪਾਲਿਸਙ੍ਘਸਾਮਗ੍ਗੀਪੁਚ੍ਛਾ

੪੭੬. ਅਥ ਖੋ ਆਯਸ੍ਮਾ ਉਪਾਲਿ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਉਪਾਲਿ ਭਗਵਨ੍ਤਂ ਏਤਦਵੋਚ – ‘‘ਯਸ੍ਮਿਂ, ਭਨ੍ਤੇ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਅਵਿਨਿਚ੍ਛਿਨਿਤ੍ਵਾ ਅਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਧਮ੍ਮਿਕਾ ਨੁ ਖੋ ਸਾ, ਭਨ੍ਤੇ, ਸਙ੍ਘਸਾਮਗ੍ਗੀ’’ਤਿ? ‘‘ਯਸ੍ਮਿਂ, ਉਪਾਲਿ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਅਵਿਨਿਚ੍ਛਿਨਿਤ੍ਵਾ ਅਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਅਧਮ੍ਮਿਕਾ ਸਾ, ਉਪਾਲਿ, ਸਙ੍ਘਸਾਮਗ੍ਗੀ’’ਤਿ.

‘‘ਯਸ੍ਮਿਂ ਪਨ, ਭਨ੍ਤੇ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਵਿਨਿਚ੍ਛਿਨਿਤ੍ਵਾ ਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਧਮ੍ਮਿਕਾ ਨੁ ਖੋ ਸਾ, ਭਨ੍ਤੇ, ਸਙ੍ਘਸਾਮਗ੍ਗੀ’’ਤਿ? ‘‘ਯਸ੍ਮਿਂ, ਉਪਾਲਿ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਵਿਨਿਚ੍ਛਿਨਿਤ੍ਵਾ ਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਧਮ੍ਮਿਕਾ ਸਾ, ਉਪਾਲਿ, ਸਙ੍ਘਸਾਮਗ੍ਗੀ’’ਤਿ.

‘‘ਕਤਿ ਨੁ ਖੋ, ਭਨ੍ਤੇ, ਸਙ੍ਘਸਾਮਗ੍ਗਿਯੋ’’ਤਿ? ‘‘ਦ੍ਵੇਮਾ, ਉਪਾਲਿ, ਸਙ੍ਘਸਾਮਗ੍ਗਿਯੋ – ਅਤ੍ਥੁਪਾਲਿ, ਸਙ੍ਘਸਾਮਗ੍ਗੀ ਅਤ੍ਥਾਪੇਤਾ ਬ੍ਯਞ੍ਜਨੁਪੇਤਾ; ਅਤ੍ਥੁਪਾਲਿ, ਸਙ੍ਘਸਾਮਗ੍ਗੀ ਅਤ੍ਥੁਪੇਤਾ ਚ ਬ੍ਯਞ੍ਜਨੁਪੇਤਾ ਚ. ਕਤਮਾ ਚ, ਉਪਾਲਿ, ਸਙ੍ਘਸਾਮਗ੍ਗੀ ਅਤ੍ਥਾਪੇਤਾ ਬ੍ਯਞ੍ਜਨੁਪੇਤਾ? ਯਸ੍ਮਿਂ, ਉਪਾਲਿ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਅਵਿਨਿਚ੍ਛਿਨਿਤ੍ਵਾ ਅਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਅਯਂ ਵੁਚ੍ਚਤਿ, ਉਪਾਲਿ, ਸਙ੍ਘਸਾਮਗ੍ਗੀ ਅਤ੍ਥਾਪੇਤਾ ਬ੍ਯਞ੍ਜਨੁਪੇਤਾ. ਕਤਮਾ ਚ, ਉਪਾਲਿ, ਸਙ੍ਘਸਾਮਗ੍ਗੀ ਅਤ੍ਥੁਪੇਤਾ ਚ ਬ੍ਯਞ੍ਜਨੁਪੇਤਾ ਚ? ਯਸ੍ਮਿਂ, ਉਪਾਲਿ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਵਿਨਿਚ੍ਛਿਨਿਤ੍ਵਾ ਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਅਯਂ ਵੁਚ੍ਚਤਿ, ਉਪਾਲਿ, ਸਙ੍ਘਸਾਮਗ੍ਗੀ ਅਤ੍ਥੁਪੇਤਾ ਚ ਬ੍ਯਞ੍ਜਨੁਪੇਤਾ ਚ. ਇਮਾ ਖੋ, ਉਪਾਲਿ, ਦ੍ਵੇ ਸਙ੍ਘਸਾਮਗ੍ਗਿਯੋ’’ਤਿ.

੪੭੭. ਅਥ ਖੋ ਆਯਸ੍ਮਾ ਉਪਾਲਿ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਯੇਨ ਭਗਵਾ ਤੇਨਞ੍ਜਲਿਂ ਪਣਾਮੇਤ੍ਵਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਸਙ੍ਘਸ੍ਸ ਕਿਚ੍ਚੇਸੁ ਚ ਮਨ੍ਤਨਾਸੁ ਚ;

ਅਤ੍ਥੇਸੁ ਜਾਤੇਸੁ ਵਿਨਿਚ੍ਛਯੇਸੁ ਚ;

ਕਥਂਪਕਾਰੋਧ ਨਰੋ ਮਹਤ੍ਥਿਕੋ;

ਭਿਕ੍ਖੁ ਕਥਂ ਹੋਤਿਧ ਪਗ੍ਗਹਾਰਹੋਤਿ.

‘‘ਅਨਾਨੁਵਜ੍ਜੋ ਪਠਮੇਨ ਸੀਲਤੋ;

ਅਵੇਕ੍ਖਿਤਾਚਾਰੋ ਸੁਸਂਵੁਤਿਨ੍ਦ੍ਰਿਯੋ;

ਪਚ੍ਚਤ੍ਥਿਕਾ ਨੂਪਵਦਨ੍ਤਿ ਧਮ੍ਮਤੋ;

ਨ ਹਿਸ੍ਸ ਤਂ ਹੋਤਿ ਵਦੇਯ੍ਯੁ ਯੇਨ ਨਂ.

‘‘ਸੋ ਤਾਦਿਸੋ ਸੀਲਵਿਸੁਦ੍ਧਿਯਾ ਠਿਤੋ;

ਵਿਸਾਰਦੋ ਹੋਤਿ ਵਿਸਯ੍ਹ ਭਾਸਤਿ;

ਨਚ੍ਛਮ੍ਭਤਿ ਪਰਿਸਗਤੋ ਨ ਵੇਧਤਿ;

ਅਤ੍ਥਂ ਨ ਹਾਪੇਤਿ ਅਨੁਯ੍ਯੁਤਂ ਭਣਂ.

‘‘ਤਥੇਵ ਪਞ੍ਹਂ ਪਰਿਸਾਸੁ ਪੁਚ੍ਛਿਤੋ;

ਨ ਚੇਵ ਪਜ੍ਝਾਯਤਿ ਨ ਮਙ੍ਕੁ ਹੋਤਿ;

ਸੋ ਕਾਲਾਗਤਂ ਬ੍ਯਾਕਰਣਾਰਹਂ ਵਚੋ;

ਰਞ੍ਜੇਤਿ ਵਿਞ੍ਞੂਪਰਿਸਂ ਵਿਚਕ੍ਖਣੋ.

‘‘ਸਗਾਰਵੋ ਵੁਡ੍ਢਤਰੇਸੁ ਭਿਕ੍ਖੁਸੁ;

ਆਚੇਰਕਮ੍ਹਿ ਚ ਸਕੇ ਵਿਸਾਰਦੋ;

ਅਲਂ ਪਮੇਤੁਂ ਪਗੁਣੋ ਕਥੇਤਵੇ;

ਪਚ੍ਚਤ੍ਥਿਕਾਨਞ੍ਚ ਵਿਰਦ੍ਧਿਕੋਵਿਦੋ.

‘‘ਪਚ੍ਚਤ੍ਥਿਕਾ ਯੇਨ ਵਜਨ੍ਤਿ ਨਿਗ੍ਗਹਂ;

ਮਹਾਜਨੋ ਸਞ੍ਞਪਨਞ੍ਚ ਗਚ੍ਛਤਿ;

ਸਕਞ੍ਚ ਆਦਾਯਮਯਂ ਨ ਰਿਞ੍ਚਤਿ;

ਵਿਯਾਕਰਂ [ਸੋ ਬ੍ਯਾਕਰਂ (ਸੀ.), ਵੇਯ੍ਯਾਕਰਂ (ਸ੍ਯਾ.)] ਪਞ੍ਹਮਨੂਪਘਾਤਿਕਂ.

‘‘ਦੂਤੇਯ੍ਯਕਮ੍ਮੇਸੁ ਅਲਂ ਸਮੁਗ੍ਗਹੋ;

ਸਙ੍ਘਸ੍ਸ ਕਿਚ੍ਚੇਸੁ ਚ ਆਹੁ ਨਂ ਯਥਾ;

ਕਰਂ ਵਚੋ ਭਿਕ੍ਖੁਗਣੇਨ ਪੇਸਿਤੋ;

ਅਹਂ ਕਰੋਮੀਤਿ ਨ ਤੇਨ ਮਞ੍ਞਤਿ.

‘‘ਆਪਜ੍ਜਤਿ ਯਾਵਤਕੇਸੁ ਵਤ੍ਥੁਸੁ;

ਆਪਤ੍ਤਿਯਾ ਹੋਤਿ ਯਥਾ ਚ ਵੁਟ੍ਠਿਤਿ;

ਏਤੇ ਵਿਭਙ੍ਗਾ ਉਭਯਸ੍ਸ ਸ੍ਵਾਗਤਾ;

ਆਪਤ੍ਤਿ ਵੁਟ੍ਠਾਨਪਦਸ੍ਸ ਕੋਵਿਦੋ.

‘‘ਨਿਸ੍ਸਾਰਣਂ ਗਚ੍ਛਤਿ ਯਾਨਿ ਚਾਚਰਂ;

ਨਿਸ੍ਸਾਰਿਤੋ ਹੋਤਿ ਯਥਾ ਚ ਵਤ੍ਤਨਾ [ਵਤ੍ਥੁਨਾ (ਸੀ. ਸ੍ਯਾ.)];

ਓਸਾਰਣਂ ਤਂਵੁਸਿਤਸ੍ਸ ਜਨ੍ਤੁਨੋ;

ਏਤਮ੍ਪਿ ਜਾਨਾਤਿ ਵਿਭਙ੍ਗਕੋਵਿਦੋ.

‘‘ਸਗਾਰਵੋ ਵੁਡ੍ਢਤਰੇਸੁ ਭਿਕ੍ਖੁਸੁ;

ਨਵੇਸੁ ਥੇਰੇਸੁ ਚ ਮਜ੍ਝਿਮੇਸੁ ਚ;

ਮਹਾਜਨਸ੍ਸਤ੍ਥਚਰੋਧ ਪਣ੍ਡਿਤੋ;

ਸੋ ਤਾਦਿਸੋ ਭਿਕ੍ਖੁ ਇਧ ਪਗ੍ਗਹਾਰਹੋ’’ਤਿ.

ਉਪਾਲਿਸਙ੍ਘਸਾਮਗ੍ਗੀਪੁਚ੍ਛਾ ਨਿਟ੍ਠਿਤਾ.

ਕੋਸਮ੍ਬਕਕ੍ਖਨ੍ਧਕੋ ਦਸਮੋ.

੨੮੦. ਤਸ੍ਸੁਦ੍ਦਾਨਂ

ਕੋਸਮ੍ਬਿਯਂ ਜਿਨਵਰੋ, ਵਿਵਾਦਾਪਤ੍ਤਿਦਸ੍ਸਨੇ;

ਨੁਕ੍ਖਿਪੇਯ੍ਯ ਯਸ੍ਮਿਂ ਤਸ੍ਮਿਂ, ਸਦ੍ਧਾਯਾਪਤ੍ਤਿ ਦੇਸਯੇ.

ਅਨ੍ਤੋਸੀਮਾਯਂ ਤਤ੍ਥੇਵ, ਬਾਲਕਞ੍ਚੇਵ ਵਂਸਦਾ;

ਪਾਲਿਲੇਯ੍ਯਾ ਚ ਸਾਵਤ੍ਥਿ, ਸਾਰਿਪੁਤ੍ਤੋ ਚ ਕੋਲਿਤੋ.

ਮਹਾਕਸ੍ਸਪਕਚ੍ਚਾਨਾ, ਕੋਟ੍ਠਿਕੋ ਕਪ੍ਪਿਨੇਨ ਚ;

ਮਹਾਚੁਨ੍ਦੋ ਚ ਅਨੁਰੁਦ੍ਧੋ, ਰੇਵਤੋ ਉਪਾਲਿ ਚੁਭੋ.

ਆਨਨ੍ਦੋ ਰਾਹੁਲੋ ਚੇਵ, ਗੋਤਮੀਨਾਥਪਿਣ੍ਡਿਕੋ;

ਸੇਨਾਸਨਂ ਵਿਵਿਤ੍ਤਞ੍ਚ, ਆਮਿਸਂ ਸਮਕਮ੍ਪਿ ਚ.

ਨ ਕੇਹਿ ਛਨ੍ਦੋ ਦਾਤਬ੍ਬੋ, ਉਪਾਲਿਪਰਿਪੁਚ੍ਛਿਤੋ;

ਅਨਾਨੁਵਜ੍ਜੋ ਸੀਲੇਨ, ਸਾਮਗ੍ਗੀ ਜਿਨਸਾਸਨੇਤਿ.

ਕੋਸਮ੍ਬਕਕ੍ਖਨ੍ਧਕੋ ਨਿਟ੍ਠਿਤੋ.

ਮਹਾਵਗ੍ਗਪਾਲ਼ਿ ਨਿਟ੍ਠਿਤਾ.