📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਵਿਨਯਪਿਟਕੇ

ਵਿਮਤਿਵਿਨੋਦਨੀ-ਟੀਕਾ (ਪਠਮੋ ਭਾਗੋ)

ਗਨ੍ਥਾਰਮ੍ਭਕਥਾ

ਕਰੁਣਾਪੁਣ੍ਣਹਦਯਂ ¶ ¶ , ਸੁਗਤਂ ਹਿਤਦਾਯਕਂ;

ਨਤ੍ਵਾ ਧਮ੍ਮਞ੍ਚ ਵਿਮਲਂ, ਸਙ੍ਘਞ੍ਚ ਗੁਣਸਮ੍ਪਦਂ.

ਵਣ੍ਣਨਾ ਨਿਪੁਣਾਹੇਸੁਂ, ਵਿਨਯਟ੍ਠਕਥਾਯ ਯਾ;

ਪੁਬ੍ਬਕੇਹਿ ਕਤਾ ਨੇਕਾ, ਨਾਨਾਨਯਸਮਾਕੁਲਾ.

ਤਤ੍ਥ ¶ ਕਾਚਿ ਸੁਵਿਤ੍ਥਿਣ੍ਣਾ, ਦੁਕ੍ਖੋਗਾਹਾ ਚ ਗਨ੍ਥਤੋ;

ਵਿਰਦ੍ਧਾ ਅਤ੍ਥਤੋ ਚਾਪਿ, ਸਦ੍ਦਤੋ ਚਾਪਿ ਕਤ੍ਥਚਿ.

ਕਾਚਿ ਕਤ੍ਥਚਿ ਅਪੁਣ੍ਣਾ, ਕਾਚਿ ਸਮ੍ਮੋਹਕਾਰਿਨੀ;

ਤਸ੍ਮਾ ਤਾਹਿ ਸਮਾਦਾਯ, ਸਾਰਂ ਸਙ੍ਖੇਪਰੂਪਤੋ.

ਲੀਨਤ੍ਥਞ੍ਚ ਪਕਾਸੇਨ੍ਤੋ, ਵਿਰਦ੍ਧਞ੍ਚ ਵਿਸੋਧਯਂ;

ਉਪਟ੍ਠਿਤਨਯਞ੍ਚਾਪਿ, ਤਤ੍ਥ ਤਤ੍ਥ ਪਕਾਸਯਂ.

ਵਿਨਯੇ ਵਿਮਤਿਂ ਛੇਤੁਂ, ਭਿਕ੍ਖੂਨਂ ਲਹੁਵੁਤ੍ਤਿਨਂ;

ਸਙ੍ਖੇਪੇਨ ਲਿਖਿਸ੍ਸਾਮਿ, ਤਸ੍ਸਾ ਲੀਨਤ੍ਥਵਣ੍ਣਨਂ.

ਗਨ੍ਥਾਰਮ੍ਭਕਥਾਵਣ੍ਣਨਾ

ਵਿਨਯਸਂਵਣ੍ਣਨਾਰਮ੍ਭੇ ਰਤਨਤ੍ਤਯਂ ਨਮਸ੍ਸਿਤੁਕਾਮੋ ਤਸ੍ਸ ਵਿਸਿਟ੍ਠਗੁਣਯੋਗਸਨ੍ਦਸ੍ਸਨਤ੍ਥਂ ਯੋ ਕਪ੍ਪਕੋਟੀਹਿਪੀਤਿਆਦਿਮਾਹ. ਵਿਸਿਟ੍ਠਗੁਣਯੋਗੇਨ ਹਿ ਵਨ੍ਦਨਾਰਹਭਾਵੋ, ਵਨ੍ਦਨਾਰਹੇ ਚ ਕਤਾ ਵਨ੍ਦਨਾ ਯਥਾਧਿਪ੍ਪੇਤਮਤ੍ਥਂ ਸਾਧੇਤਿ ¶ . ਏਤ੍ਥ ਚ ਸਂਵਣ੍ਣਨਾਰਮ੍ਭੇ ਰਤਨਤ੍ਤਯਪਣਾਮਕਰਣਪ੍ਪਯੋਜਨਂ ਤਤ੍ਥ ਤਤ੍ਥ ਬਹੁਧਾ ਪਪਞ੍ਚੇਨ੍ਤਿ ਆਚਰਿਯਾ, ਮਯਂ ਪਨ ਇਧਾਧਿਪ੍ਪੇਤਮੇਵ ਪਯੋਜਨਂ ਦਸ੍ਸਯਿਸ੍ਸਾਮ. ਤਸ੍ਮਾ ਸਂਵਣ੍ਣਨਾਰਮ੍ਭੇ ਰਤਨਤ੍ਤਯਪਣਾਮਕਰਣਂ ਯਥਾਪਟਿਞ੍ਞਾਤਸਂਵਣ੍ਣਨਾਯ ਅਨਨ੍ਤਰਾਯੇਨ ਪਰਿਸਮਾਪਨਤ੍ਥਨ੍ਤਿ ਵੇਦਿਤਬ੍ਬਂ. ਤਥਾ ਹਿ ਵੁਤ੍ਤਂ ‘‘ਤਸ੍ਸਾਨੁਭਾਵੇਨ ਹਤਨ੍ਤਰਾਯੋ’’ਤਿ. ਰਤਨਤ੍ਤਯਪਣਾਮਕਰਣੇਨ ਹਿ ਰਾਗਾਦਿਦੋਸਵਿਗਮਤੋ ਪਞ੍ਞਾਦਿਗੁਣਪਾਟਵਤੋ ਆਯੁਆਦਿਵਡ੍ਢਨਤੋ ਪੁਞ੍ਞਾਤਿਸਯਭਾਵਾਦਿਤੋ ਚ ਹੋਤੇਵ ਯਥਾਪਟਿਞ੍ਞਾਤਸਂਵਣ੍ਣਨਾਯ ਅਨਨ੍ਤਰਾਯੇਨ ਪਰਿਸਮਾਪਨਂ.

ਤਤ੍ਥ ਪਠਮਂ ਤਾਵ ਭਗਵਤੋ ਵਨ੍ਦਨਂ ਕਤ੍ਤੁਕਾਮੋ ‘‘ਯੋ ਕਪ੍ਪਕੋਟੀਹਿਪਿ…ਪੇ… ਤਸ੍ਸਾ’’ਤਿ ਆਹ. ਇਮਿਸ੍ਸਾ ਪਨ ਵਿਨਯਦੇਸਨਾਯ ਕਰੁਣਾਪ੍ਪਧਾਨਞਾਣਸਮੁਟ੍ਠਿਤਤਾਯ ਕਰੁਣਾਪ੍ਪਧਾਨਮੇਵ ਥੋਮਨਂ ਆਰਦ੍ਧਂ. ਏਸਾ ਹਿ ਆਚਰਿਯਸ੍ਸ ਪਕਤਿ, ਯਦਿਦਂ ਆਰਮ੍ਭਾਨੁਰੂਪਥੋਮਨਾ. ਕਰੁਣਾਗ੍ਗਹਣੇਨ ਚੇਤ੍ਥ ਅਪਰਿਮੇਯ੍ਯਪ੍ਪਭਾਵਾ ਸਬ੍ਬੇਪਿ ਬੁਦ੍ਧਗੁਣਾ ਨਯਤੋ ਸਙ੍ਗਹਿਤਾਤਿ ਦਟ੍ਠਬ੍ਬਾ ਤਂਮੂਲਕਤ੍ਤਾ ਸੇਸਬੁਦ੍ਧਗੁਣਾਨਂ. ਤਤ੍ਥ ਯੋਤਿ ਇਮਸ੍ਸ ਅਨਿਯਮਵਚਨਸ੍ਸ ਨਾਥੋਤਿ ਇਮਿਨਾ ਸਮ੍ਬਨ੍ਧੋ. ਕਪ੍ਪਕੋਟੀਹਿਪਿ ਅਪ੍ਪਮੇਯ੍ਯਂ ਕਾਲਨ੍ਤਿ ¶ ਕਪ੍ਪਕੋਟਿਗਣਨਾਵਸੇਨਪਿ ‘‘ਏਤ੍ਤਕਾ ਕਪ੍ਪਕੋਟਿਯੋ’’ਤਿ ਪਮੇਤੁਂ ਅਸਕ੍ਕੁਣੇਯ੍ਯਂ ਕਾਲਂ. ਅਪਿ-ਸਦ੍ਦੇਨ ਪਗੇਵ ਵਸ੍ਸਗਣਨਾਯਾਤਿ ਦਸ੍ਸੇਤਿ. ਅਪ੍ਪਮੇਯ੍ਯਂ ਕਾਲਨ੍ਤਿ ਚ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ, ਤੇਨ ਕਪ੍ਪਕੋਟਿਗਣਨਾਵਸੇਨ ਪਰਿਚ੍ਛਿਨ੍ਦਿਤੁਮਸਕ੍ਕੁਣੇਯ੍ਯਮਪਿ, ਅਸਙ੍ਖ੍ਯੇਯ੍ਯਵਸੇਨ ਪਨ ਪਰਿਚ੍ਛਿਨ੍ਦਿਤਬ੍ਬਤੋ ਸਲਕ੍ਖਂ ਚਤੁਰਸਙ੍ਖ੍ਯੇਯ੍ਯਕਪ੍ਪਕਾਲਂ ਅਚ੍ਚਨ੍ਤਮੇਵ ਨਿਰਨ੍ਤਰਂ ਪਞ੍ਚਮਹਾਪਅਚ੍ਚਾਗਾਦਿਅਤਿਦੁਕ੍ਕਰਾਨਿ ਕਰੋਨ੍ਤੋ ਖੇਦਂ ਕਾਯਿਕਂ ਪਰਿਸ੍ਸਮਂ ਪਤ੍ਤੋਤਿ ਦਸ੍ਸੇਤਿ.

ਲੋਕਹਿਤਾਯਾਤਿ ਸਤ੍ਤਲੋਕਸ੍ਸ ਹਿਤਾਯ. ਨਾਥਤੀਤਿ ਨਾਥੋ, ਵੇਨੇਯ੍ਯਾਨਂ ਹਿਤਸੁਖਂ ਆਸੀਸਤੀਤਿ ਅਤ੍ਥੋ. ਅਥ ਵਾ ਨਾਥਤਿ ਵੇਨੇਯ੍ਯਗਤੇ ਕਿਲੇਸੇ ਉਪਤਾਪੇਤਿ, ਨਾਥਤਿ ਵਾ ਯਾਚਤਿ ਵੇਨੇਯ੍ਯੇ ਅਤ੍ਤਨੋ ਹਿਤਕਰਣੇ ਯਾਚਿਤ੍ਵਾਪਿ ਨਿਯੋਜੇਤੀਤਿ ਨਾਥੋ, ਲੋਕਪਟਿਸਰਣੋ ਲੋਕਸਾਮੀ ਲੋਕਨਾਯਕੋਤਿ ਵੁਤ੍ਤਂ ਹੋਤਿ. ਮਹਾਕਾਰੁਣਿਕਸ੍ਸਾਤਿ ਯੋ ਕਰੁਣਾਯ ਕਮ੍ਪਿਤਹਦਯਤ੍ਤਾ ਲੋਕਹਿਤਤ੍ਥਂ ਅਤਿਦੁਕ੍ਕਰਕਿਰਿਯਾਯ ਅਨੇਕਪ੍ਪਕਾਰਂ ਤਾਦਿਸਂ ਦੁਕ੍ਖਂ ਅਨੁਭਵਿਤ੍ਵਾ ਆਗਤੋ, ਤਸ੍ਸ ਮਹਾਕਾਰੁਣਿਕਸ੍ਸਾਤਿ ਅਤ੍ਥੋ. ਤਤ੍ਥ ਕਿਰਤੀਤਿ ਕਰੁਣਾ, ਪਰਦੁਕ੍ਖਂ ਵਿਕ੍ਖਿਪਤਿ ਅਪਨੇਤੀਤਿ ਅਤ੍ਥੋ. ਦੁਕ੍ਖਿਤੇਸੁ ਵਾ ਕਿਰਿਯਤਿ ਪਸਾਰਿਯਤੀਤਿ ਕਰੁਣਾ. ਅਥ ਵਾ ਕਿਣਾਤੀਤਿ ਕਰੁਣਾ, ਪਰਦੁਕ੍ਖੇ ਸਤਿ ਕਾਰੁਣਿਕਂ ¶ ਹਿਂਸਤਿ ਵਿਬਾਧੇਤਿ, ਵਿਨਾਸੇਤਿ ਵਾ ਪਰਸ੍ਸ ਦੁਕ੍ਖਨ੍ਤਿ ਅਤ੍ਥੋ. ਪਰਦੁਕ੍ਖੇ ਸਤਿ ਸਾਧੂਨਂ ਕਮ੍ਪਨਂ ਹਦਯਖੇਦਂ ਕਰੋਤੀਤਿ ਵਾ ਕਰੁਣਾ. ਅਥ ਵਾ ਕਮਿਤਿ ਸੁਖਂ, ਤਂ ਰੁਨ੍ਧਤੀਤਿ ਕਰੁਣਾ. ਏਸਾ ਹਿ ਪਰਦੁਕ੍ਖਾਪਨਯਨਕਾਮਤਾਲਕ੍ਖਣਾ ਅਤ੍ਤਸੁਖਨਿਰਪੇਕ੍ਖਤਾਯ ਕਾਰੁਣਿਕਾਨਂ ਸੁਖਂ ਰੁਨ੍ਧਤਿ ਵਿਬਾਧੇਤਿ. ਕਰੁਣਾਯ ਨਿਯੁਤ੍ਤੋ ਕਾਰੁਣਿਕੋ, ਮਹਨ੍ਤੋ ਕਾਰੁਣਿਕੋ ਮਹਾਕਾਰੁਣਿਕੋ, ਤਸ੍ਸ ਨਮੋ ਅਤ੍ਥੂਤਿ ਪਾਠਸੇਸੋ.

ਏਵਂ ਕਰੁਣਾਮੁਖੇਨ ਸਙ੍ਖੇਪਤੋ ਸਕਲਸਬ੍ਬਞ੍ਞੁਗੁਣੇਹਿ ਭਗਵਨ੍ਤਂ ਥੋਮੇਤ੍ਵਾ ਇਦਾਨਿ ਸਦ੍ਧਮ੍ਮਂ ਥੋਮੇਤੁਂ ਅਸਮ੍ਬੁਧਨ੍ਤਿਆਦਿਮਾਹ. ਤਤ੍ਥ ਬੁਦ੍ਧਨਿਸੇਵਿਤਂ ਯਂ ਅਸਮ੍ਬੁਧਂ ਜੀਵਲੋਕੋ ਭਵਾ ਭਵਂ ਗਚ੍ਛਤਿ, ਤਸ੍ਸ ਧਮ੍ਮਵਰਸ੍ਸ ਨਮੋਤਿ ਸਮ੍ਬਨ੍ਧੋ. ਤਤ੍ਥ ਅਸਮ੍ਬੁਧਨ੍ਤਿ ਅਸਮ੍ਬੁਜ੍ਝਨ੍ਤੋ, ਯਥਾਸਭਾਵਂ ਅਪ੍ਪਟਿਵਿਜ੍ਝਨਤੋਤਿ ਵੁਤ੍ਤਂ ਹੋਤਿ. ਹੇਤੁਅਤ੍ਥੋ ਹੇਤ੍ਥ ਅਨ੍ਤਪਚ੍ਚਯੋ. ਯਨ੍ਤਿ ਅਨਿਯਮਤੋ ਸਪਰਿਯਤ੍ਤਿਕੋ ਨਵਲੋਕੁਤ੍ਤਰਧਮ੍ਮੋ ਕਮ੍ਮਭਾਵੇਨ ਨਿਦ੍ਦਿਟ੍ਠੋ. ਬੁਦ੍ਧਨਿਸੇਵਿਤਨ੍ਤਿ ਤਸ੍ਸੇਵ ਵਿਸੇਸਨਂ, ਸਮ੍ਮਾਸਮ੍ਬੁਦ੍ਧੇਨ, ਪਚ੍ਚੇਕਬੁਦ੍ਧਸਾਵਕਬੁਦ੍ਧੇਹਿਪਿ ਵਾ ਗੋਚਰਾਸੇਵਨਭਾਵਨਾਸੇਵਨਾਹਿ ਯਥਾਰਹਂ ਨਿਸੇਵਿਤਂ, ਅਜਹਿਤਨ੍ਤਿ ਅਤ੍ਥੋ. ਤਤ੍ਥ ਪਰਿਯਤ੍ਤਿਫਲਨਿਬ੍ਬਾਨਾਨਿ ਗੋਚਰਾਸੇਵਨਵਸੇਨੇਵ ਨਿਸੇਵਿਤਾਨਿ, ਮਗ੍ਗੋ ਪਨ ਭਾਵਨਾਸੇਵਨਵਸੇਨਾਪਿ ਪਚ੍ਚਵੇਕ੍ਖਣਞਾਣਾਦਿਵਸੇਨ ਗੋਚਰਾਸੇਵਨਵਸੇਨਾਪਿ ਨਿਸੇਵਿਤੋ. ਭਵਾਭਵਨ੍ਤਿ ਭਵਤੋ ਭਵਂ. ਅਥ ਵਾ ਹੀਨਪਣੀਤਾਦਿਵਸੇਨ ਖੁਦ੍ਦਕਂ ਮਹਨ੍ਤਞ੍ਚ ਭਵਨ੍ਤਿ ਅਤ੍ਥੋ. ਵੁਡ੍ਢਤ੍ਥੋਪਿ ਹਿ ਅ-ਕਾਰੋ ਦਿਸ੍ਸਤਿ ਅਸੇਕ੍ਖਾ ਧਮ੍ਮਾਤਿਆਦੀਸੁ (ਧ. ਸ. ਤਿਕਮਾਤਿਕਾ ੧੧) ਵਿਯ. ਅਥ ਵਾ ਭਵੋਤਿ ਵੁਡ੍ਢਿ, ਅਭਵੋਤਿ ਹਾਨਿ. ਭਵੋਤਿ ਵਾ ਸਸ੍ਸਤਦਿਟ੍ਠਿ, ਅਭਵੋਤਿ ਉਚ੍ਛੇਦਦਿਟ੍ਠਿ ¶ . ਵੁਤ੍ਤਪ੍ਪਕਾਰੋ ਭਵੋ ਚ ਅਭਵੋ ਚ ਭਵਾਭਵੋ, ਤਂ ਭਵਾਭਵਂ. ਗਚ੍ਛਤੀਤਿ ਉਪਗਚ੍ਛਤਿ. ਜੀਵਲੋਕੋਤਿ ਸਤ੍ਤਲੋਕੋ. ਅਵਿਜ੍ਜਾਦਿਕਿਲੇਸਜਾਲਵਿਦ੍ਧਂਸਿਨੋਤਿ ਧਮ੍ਮਵਿਸੇਸਨਂ. ਤਤ੍ਥ ਨ ਵਿਦਤਿ ਧਮ੍ਮਾਨਂ ਯਥਾਸਭਾਵਂ ਨ ਵਿਜਾਨਾਤੀਤਿ ਅਵਿਜ੍ਜਾ, ਅਞ੍ਞਾਣਂ. ਸਾ ਆਦਿ ਯੇਸਂ ਤਣ੍ਹਾਦੀਨਂ, ਤੇਯੇਵ ਕਿਲਿਸ੍ਸਨ੍ਤਿ ਏਤੇਹਿ ਸਤ੍ਤਾਤਿ ਕਿਲੇਸਾ, ਤੇਯੇਵ ਚ ਸਤ੍ਤਾਨਂ ਵਿਬਾਧਨਟ੍ਠੇਨ ਜਾਲਸਦਿਸਾਤਿ ਜਾਲਂ, ਤਂ ਵਿਦ੍ਧਂਸੇਤਿ ਸਬ੍ਬਸੋ ਵਿਨਾਸੇਤਿ ਸੀਲੇਨਾਤਿ ਅਵਿਜ੍ਜਾਦਿਕਿਲੇਸਜਾਲਵਿਦ੍ਧਂਸੀ, ਤਸ੍ਸ.

ਨਨੁ ਚੇਤ੍ਥ ਸਪਰਿਯਤ੍ਤਿਕੋ ਨਵਲੋਕੁਤ੍ਤਰਧਮ੍ਮੋ ਅਧਿਪ੍ਪੇਤੋ, ਤਤ੍ਥ ਚ ਮਗ੍ਗੋਯੇਵ ਕਿਲੇਸੇ ਵਿਦ੍ਧਂਸੇਤਿ, ਨੇਤਰੇਤਿ ਚੇ? ਵੁਚ੍ਚਤੇ – ਮਗ੍ਗਸ੍ਸਾਪਿ ਨਿਬ੍ਬਾਨਮਾਗਮ੍ਮ ¶ ਕਿਲੇਸਵਿਦ੍ਧਂਸਨਤੋ ਨਿਬ੍ਬਾਨਮ੍ਪਿ ਕਿਲੇਸੇ ਵਿਦ੍ਧਂਸੇਤਿ ਨਾਮ, ਮਗ੍ਗਸ੍ਸ ਕਿਲੇਸਵਿਦ੍ਧਂਸਨਕਿਚ੍ਚਂ ਫਲੇਨ ਨਿਟ੍ਠਿਤਨ੍ਤਿ ਫਲਮ੍ਪਿ ‘‘ਕਿਲੇਸਵਿਦ੍ਧਂਸੀ’’ਤਿ ਵੁਚ੍ਚਤਿ, ਪਰਿਯਤ੍ਤਿਧਮ੍ਮੋਪਿ ਕਿਲੇਸਵਿਦ੍ਧਂਸਨਸ੍ਸ ਉਪਨਿਸ੍ਸਯਪਚ੍ਚਯਤ੍ਤਾ ‘‘ਕਿਲੇਸਵਿਦ੍ਧਂਸੀ’’ਤਿ ਵਤ੍ਤੁਂ ਅਰਹਤੀਤਿ ਨ ਕੋਚਿ ਦੋਸੋ. ਧਮ੍ਮਵਰਸ੍ਸ ਤਸ੍ਸਾਤਿ ਪੁਬ੍ਬੇ ਅਨਿਯਮਿਤਸ੍ਸ ਨਿਯਾਮਕਵਚਨਂ. ਤਤ੍ਥ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੇ ਚਤੂਸੁ ਅਪਾਯੇਸੁ ਸਂਸਾਰਦੁਕ੍ਖੇ ਚ ਅਪਤਮਾਨੇ ਧਾਰੇਤੀਤਿ ਧਮ੍ਮੋ. ਵੁਤ੍ਤਪ੍ਪਕਾਰੋ ਧਮ੍ਮੋ ਏਵ ਅਤ੍ਤਨੋ ਉਤ੍ਤਰਿਤਰਾਭਾਵੇਨ ਵਰੋ ਪਵਰੋ ਅਨੁਤ੍ਤਰੋਤਿ ਧਮ੍ਮਵਰੋ, ਤਸ੍ਸ ਧਮ੍ਮਵਰਸ੍ਸ ਨਮੋ ਅਤ੍ਥੂਤਿ ਅਤ੍ਥੋ.

ਏਵਂ ਸਙ੍ਖੇਪਨਯੇਨੇਵ ਸਬ੍ਬਧਮ੍ਮਗੁਣੇਹਿ ਸਦ੍ਧਮ੍ਮਂ ਥੋਮੇਤ੍ਵਾ ਇਦਾਨਿ ਅਰਿਯਸਙ੍ਘਂ ਥੋਮੇਤੁਂ ਗੁਣੇਹੀਤਿਆਦਿਮਾਹ. ਤਤ੍ਥ ਗੁਣੇਹਿ ਯੋ ਯੁਤ੍ਤੋ, ਤਮਰਿਯਸਙ੍ਘਂ ਨਮਾਮੀਤਿ ਸਮ੍ਬਨ੍ਧੋ. ਸੀਲਾਦਯੋ ਗੁਣਾ ਚੇਤ੍ਥ ਲੋਕਿਯਲੋਕੁਤ੍ਤਰਾ ਅਧਿਪ੍ਪੇਤਾ. ‘‘ਵਿਮੁਤ੍ਤਿਵਿਮੁਤ੍ਤਿਞਾਣ’’ਨ੍ਤਿ ਵਤ੍ਤਬ੍ਬੇ ਏਕਦੇਸਸਰੂਪੇਕਸੇਸਨਯੇਨ ‘‘ਵਿਮੁਤ੍ਤਿਞਾਣ’’ਨ੍ਤਿ ਵੁਤ੍ਤਂ, ਆਦਿਸਦ੍ਦਪਰਿਯਾਯੇਨ ਪਭੁਤਿਸਦ੍ਦੇਨ ਵਾ ਵਿਮੁਤ੍ਤਿਗ੍ਗਹਣਂ ਵੇਦਿਤਬ੍ਬਂ. ਤਤ੍ਥ ਵਿਮੁਤ੍ਤੀਤਿ ਫਲਂ. ਵਿਮੁਤ੍ਤਿਞਾਣਨ੍ਤਿ ਪਚ੍ਚਵੇਕ੍ਖਣਞਾਣਂ. ਪਭੁਤਿ-ਸਦ੍ਦੇਨ ਛਲ਼ਭਿਞ੍ਞਾਚਤੁਪਟਿਸਮ੍ਭਿਦਾਦਯੋ ਗੁਣਾ ਸਙ੍ਗਹਿਤਾਤਿ ਦਟ੍ਠਬ੍ਬਾ. ਕੁਸਲਤ੍ਥਿਕਾਨਂ ਜਨਾਨਂ ਪੁਞ੍ਞਾਤਿਸਯਵੁਡ੍ਢਿਯਾ ਖੇਤ੍ਤਸਦਿਸਤ੍ਤਾ ਖੇਤ੍ਤਨ੍ਤਿ ਆਹ ‘‘ਖੇਤ੍ਤਂ ਜਨਾਨਂ ਕੁਸਲਤ੍ਥਿਕਾਨ’’ਨ੍ਤਿ. ਖਿਤ੍ਤਂ ਬੀਜਂ ਮਹਪ੍ਫਲਭਾਵਕਰਣੇਨ ਤਾਯਤੀਤਿ ਹਿ ਖੇਤ੍ਤਂ. ਅਰਿਯਸਙ੍ਘਨ੍ਤਿ ਏਤ੍ਥ ਆਰਕਤ੍ਤਾ ਕਿਲੇਸੇਹਿ, ਅਨਯੇ ਨ ਇਰਿਯਨਤੋ, ਅਯੇ ਚ ਇਰਿਯਨਤੋ, ਸਦੇਵਕੇਨ ਲੋਕੇਨ ‘‘ਸਰਣ’’ਨ੍ਤਿ ਅਰਣੀਯਤੋ ਉਪਗਨ੍ਤਬ੍ਬਤੋ, ਉਪਗਤਾਨਞ੍ਚ ਤਦਤ੍ਥਸਿਦ੍ਧਿਤੋ ਅਰਿਯਾ, ਅਟ੍ਠ ਅਰਿਯਪੁਗ੍ਗਲਾ, ਅਰਿਯਾਨਂ ਸਙ੍ਘੋ ਸਮੂਹੋਤਿ ਅਰਿਯਸਙ੍ਘੋ, ਤਂ ਅਰਿਯਸਙ੍ਘਂ.

ਇਦਾਨਿ ਰਤਨਤ੍ਤਯਪਣਾਮਜਨਿਤਂ ਕੁਸਲਾਭਿਸਨ੍ਦਂ ਯਥਾਧਿਪ੍ਪੇਤੇ ਪਯੋਜਨੇ ਨਿਯੋਜੇਤ੍ਵਾ ਅਤ੍ਤਨਾ ਸਂਵਣ੍ਣਿਯਮਾਨਸ੍ਸ ਵਿਨਯਸ੍ਸ ਸਕਲਸਾਸਨਮੂਲਭਾਵਦਸ੍ਸਨਮੁਖੇਨ ਸਂਵਣ੍ਣਨਾਕਰਣਸ੍ਸਾਪਿ ਸਾਸਨਮੂਲਤਂ ¶ ਦਸ੍ਸੇਤੁਂ ਇਚ੍ਚੇਵਮਿਚ੍ਚਾਦਿਗਾਥਾਦ੍ਵਯਮਾਹ. ਪੁਞ੍ਞਾਭਿਸਨ੍ਦਨ੍ਤਿ ਪੁਞ੍ਞੋਘਂ, ਪੁਞ੍ਞਪ੍ਪਵਾਹਂ ਪੁਞ੍ਞਰਾਸਿਨ੍ਤਿ ਅਤ੍ਥੋ. ਤਸ੍ਸਾਨੁਭਾਵੇਨਾਤਿ ਤਸ੍ਸ ਯਥਾਵੁਤ੍ਤਸ੍ਸ ਪੁਞ੍ਞਪ੍ਪਵਾਹਸ੍ਸ ਆਨੁਭਾਵੇਨ ਬਲੇਨ ਹਤਨ੍ਤਰਾਯੋ ਵਿਨਯਂ ਵਣ੍ਣਯਿਸ੍ਸਨ੍ਤਿ ਸਮ੍ਬਨ੍ਧੋ.

ਅਟ੍ਠਿਤਸ੍ਸ ਸੁਸਣ੍ਠਿਤਸ੍ਸ ਭਗਵਤੋ ਸਾਸਨਂ ਯਸ੍ਮਿਂ ਠਿਤੇ ਪਤਿਟ੍ਠਿਤਂ ਹੋਤੀਤਿ ਯੋਜੇਤਬ੍ਬਂ. ਤਤ੍ਥ ਯਸ੍ਮਿਨ੍ਤਿ ਯਸ੍ਮਿਂ ਵਿਨਯਪਿਟਕੇ. ਠਿਤੇਤਿ ਪਾਲ਼ਿਤੋ ਚ ਅਤ੍ਥਤੋ ਚ ਅਨੂਨਂ ਹੁਤ੍ਵਾ ਲਜ੍ਜੀਪੁਗ੍ਗਲੇਸੁ ਪਵਤ੍ਤਨਟ੍ਠੇਨ ਠਿਤੇ. ਸਾਸਨਨ੍ਤਿ ¶ ਸਿਕ੍ਖਤ੍ਤਯਸਙ੍ਗਹਿਤਂ ਸਾਸਨਂ. ਅਟ੍ਠਿਤਸ੍ਸਾਤਿ ਕਾਮਸੁਖਲ੍ਲਿਕਤ੍ਤਕਿਲਮਥਾਨੁਯੋਗਸਙ੍ਖਾਤੇ ਅਨ੍ਤਦ੍ਵਯੇ ਅਟ੍ਠਿਤਸ੍ਸ, ‘‘ਪਰਿਨਿਬ੍ਬੁਤਸ੍ਸਪਿ ਭਗਵਤੋ’’ਤਿਪਿ ਵਦਨ੍ਤਿ. ਸੁਸਣ੍ਠਿਤਸ੍ਸਾਤਿ ਅਨ੍ਤਦ੍ਵਯਵਿਰਹਿਤਾਯ ਮਜ੍ਝਿਮਾਯ ਪਟਿਪਦਾਯ ਸੁਟ੍ਠੁ ਠਿਤਸ੍ਸ. ਅਮਿਸ੍ਸਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਨਿਕਾਯਨ੍ਤਰਲਦ੍ਧੀਹਿ ਅਸਮ੍ਮਿਸ੍ਸਂ ਕਤ੍ਵਾ ਅਨਾਕੁਲਂ ਕਤ੍ਵਾ ਵਣ੍ਣਯਿਸ੍ਸਨ੍ਤਿ ਵੁਤ੍ਤਂ ਹੋਤਿ. ਨਿਸ੍ਸਾਯ ਪੁਬ੍ਬਾਚਰਿਯਾਨੁਭਾਵਨ੍ਤਿ ਪੁਬ੍ਬਾਚਰਿਯੇਹਿ ਸਂਵਣ੍ਣਿਤਂ ਅਟ੍ਠਕਥਂ ਨਿਸ੍ਸਾਯ, ਨ ਅਤ੍ਤਨੋ ਬਲੇਨਾਤਿ ਅਧਿਪ੍ਪਾਯੋ.

ਅਥ ਪੋਰਾਣਟ੍ਠਕਥਾਸੁ ਵਿਜ੍ਜਮਾਨਾਸੁ ਪੁਨ ਵਿਨਯਸਂਵਣ੍ਣਨਾ ਕਿਂਪਯੋਜਨਾਤਿ? ਆਹ ਕਾਮਞ੍ਚਾਤਿਆਦਿ. ਤਤ੍ਥ ਕਾਮਨ੍ਤਿ ਏਕਨ੍ਤੇਨ, ਯਥਿਚ੍ਛਕਂ ਵਾ, ਸਬ੍ਬਸੋਤਿ ਵੁਤ੍ਤਂ ਹੋਤਿ, ਤਸ੍ਸ ਸਂਵਣ੍ਣਿਤੋਯਂ ਵਿਨਯੋਤਿ ਇਮਿਨਾ ਸਮ੍ਬਨ੍ਧੋ. ਪੁਬ੍ਬਾਚਰਿਯਾਸਭੇਹੀਤਿ ਮਹਾਕਸ੍ਸਪਤ੍ਥੇਰਾਦਯੋ ਪੁਬ੍ਬਾਚਰਿਯਾ ਏਵ ਅਕਮ੍ਪਿਯਟ੍ਠੇਨ ਉਤ੍ਤਮਟ੍ਠੇਨ ਚ ਆਸਭਾ, ਤੇਹਿ ਪੁਬ੍ਬਾਚਰਿਯਵਰੇਹੀਤਿ ਵੁਤ੍ਤਂ ਹੋਤਿ. ਕੀਦਿਸਾ ਪਨ ਤੇ ਪੁਬ੍ਬਾਚਰਿਯਾਤਿ? ਆਹ ਞਾਣਮ੍ਬੂਤਿਆਦਿ. ਅਗ੍ਗਮਗ੍ਗਞਾਣਸਙ੍ਖਾਤੇਨ ਅਮ੍ਬੁਨਾ ਸਲਿਲੇਨ ਨਿਦ੍ਧੋਤਾਨਿ ਨਿਸ੍ਸੇਸਤੋ ਆਯਤਿਂ ਅਨੁਪ੍ਪਤ੍ਤਿਧਮ੍ਮਤਾਪਾਦਨੇਨ ਧੋਤਾਨਿ ਵਿਸੋਧਿਤਾਨਿ ਰਾਗਾਦੀਨਿ ਤੀਣਿ ਮਲਾਨਿ ਕਾਮਾਸਵਾਦਯੋ ਚ ਚਤ੍ਤਾਰੋ ਆਸਵਾ ਯੇਹਿ ਤੇ ਞਾਣਮ੍ਬੁਨਿਦ੍ਧੋਤਮਲਾਸਵਾ, ਤੇਹਿ ਖੀਣਾਸਵੇਹੀਤਿ ਅਤ੍ਥੋ. ਖੀਣਾਸਵਭਾਵੇਪਿ ਨ ਏਤੇ ਸੁਕ੍ਖਵਿਪਸ੍ਸਕਾਤਿ ਆਹ ‘‘ਵਿਸੁਦ੍ਧਵਿਜ੍ਜਾਪਟਿਸਮ੍ਭਿਦੇਹੀ’’ਤਿ. ਤਤ੍ਥ ਵਿਜ੍ਜਾਤਿ ਤਿਸ੍ਸੋ ਵਿਜ੍ਜਾ, ਅਟ੍ਠ ਵਿਜ੍ਜਾ ਵਾ. ਪਟਿਸਮ੍ਭਿਦਾਪ੍ਪਤ੍ਤੇਸੁਪਿ ਮਹਾਕਸ੍ਸਪਤ੍ਥੇਰਾਦੀਨਂ ਉਚ੍ਚਿਨਿਤ੍ਵਾ ਗਹਿਤਤਾਯ ਤੇਸਂ ਸਦ੍ਧਮ੍ਮਸਂਵਣ੍ਣਨੇ ਸਾਮਤ੍ਥਿਯਂ ਸਾਤਿਸਯਨ੍ਤਿ ਦਸ੍ਸੇਨ੍ਤੋ ਆਹ ‘‘ਸਦ੍ਧਮ੍ਮਸਂਵਣ੍ਣਨਕੋਵਿਦੇਹੀ’’ਤਿ.

ਕਿਲੇਸਜਾਤਂ, ਪਰਿਕ੍ਖਾਰਬਾਹੁਲ੍ਲਂ ਵਾ ਸਲ੍ਲਿਖਤਿ ਤਨੁਂ ਕਰੋਤੀਤਿ ਸਲ੍ਲੇਖੋ, ਅਪ੍ਪਿਚ੍ਛਤਾਦਿਗੁਣਸਮੂਹੋ, ਇਧ ਪਨ ਖੀਣਾਸਵਾਧਿਕਾਰਤ੍ਤਾ ਪਰਿਕ੍ਖਾਰਬਾਹੁਲ੍ਲਸ੍ਸ ਸਲ੍ਲਿਖਨਵਸੇਨੇਵ ਅਤ੍ਥੋ ਗਹੇਤਬ੍ਬੋ. ਸਲ੍ਲੇਖੇਨ ਨਿਬ੍ਬਤ੍ਤਂ ਸਲ੍ਲੇਖਿਯਂ, ਤਸ੍ਮਿਂ ਸਲ੍ਲੇਖਿਯੇ, ਧੁਤਙ੍ਗਪਰਿਹਰਣਾਦਿਸਲ੍ਲੇਖਪਅਪਤ੍ਤਿਯਨ੍ਤਿ ਵੁਤ੍ਤਂ ਹੋਤਿ. ਨੋਸੁਲਭੂਪਮੇਹੀਤਿ ਸਲ੍ਲੇਖਪਟਿਪਤ੍ਤਿਯਾ ‘‘ਅਸੁਕਸਦਿਸਾ’’ਤਿ ਨਤ੍ਥਿ ਸੁਲਭਾ ਉਪਮਾ ਏਤੇਸਨ੍ਤਿ ਨੋਸੁਲਭੂਪਮਾ, ਤੇਹਿ. ਮਹਾਵਿਹਾਰਸ੍ਸਾਤਿ ਇਮਿਨਾ ਨਿਕਾਯਨ੍ਤਰਂ ਪਟਿਕ੍ਖਿਪਤਿ ¶ . ਵਿਹਾਰਸੀਸੇਨ ਹੇਤ੍ਥ ਤਤ੍ਥ ਨਿਵਾਸੀਨਞ੍ਚੇਵ ਤੇਹਿ ਸਮਲਦ੍ਧਿਕਾਨਞ੍ਚ ਸਬ੍ਬੇਸਂ ਭਿਕ੍ਖੂਨਂ ਗਹਣਂ ਦਟ੍ਠਬ੍ਬਂ. ਤਸ੍ਮਾ ਤੇਸਂ ਮਹਾਵਿਹਾਰਵਾਸੀਨਂ ਦਿਟ੍ਠਿਸੀਲਵਿਸੁਦ੍ਧਿਯਾ ਪਭਵਤ੍ਤੇਨ ਸਞ੍ਞਾਣਭੂਤਤ੍ਤਾ ¶ ਧਮ੍ਮਸਙ੍ਗਾਹਕਾ ਮਹਾਕਸ੍ਸਪਤ੍ਥੇਰਾਦਯੋ ‘‘ਮਹਾਵਿਹਾਰਸ੍ਸ ਧਜੂਪਮਾ’’ਤਿ ਵੁਤ੍ਤਾ, ਤੇਹਿ ਅਯਂ ਵਿਨਯੋ ਸਂਵਣ੍ਣਿਤੋ ਸਮ੍ਮਾ ਅਨੂਨਂ ਕਤ੍ਵਾ ਵਣ੍ਣਿਤੋ. ਕਥਨ੍ਤਿ ਆਹ ‘‘ਚਿਤ੍ਤੇਹਿ ਨਯੇਹੀ’’ਤਿ. ਵਿਚਿਤ੍ਤੇਹਿ ਨਯੇਹਿ ਸਮ੍ਬੁਦ੍ਧਵਰਨ੍ਵਯੇਹਿ ਸਬ੍ਬਞ੍ਞੁਬੁਦ੍ਧਵਰਂ ਅਨੁਗਤੇਹਿ, ਭਗਵਤੋ ਅਧਿਪ੍ਪਾਯਾਨੁਗਤੇਹਿ ਨਯੇਹੀਤਿ ਵੁਤ੍ਤਂ ਹੋਤਿ.

ਏਵਂ ਪੋਰਾਣਟ੍ਠਕਥਾਯ ਅਨੂਨਭਾਵਂ ਦਸ੍ਸੇਤ੍ਵਾ ਇਦਾਨਿ ਅਤ੍ਤਨੋ ਸਂਵਣ੍ਣਨਾਯ ਪਯੋਜਨਵਿਸੇਸਂ ਅਜ੍ਝੇਸਕਞ੍ਚ ਦਸ੍ਸੇਤੁਂ ਸਂਵਣ੍ਣਨਾਤਿਆਦਿਮਾਹ. ਤਤ੍ਥ ਸਙ੍ਖਤਤ੍ਤਾਤਿ ਰਚਿਤਤ੍ਤਾ. ਨ ਕਞ੍ਚਿ ਅਤ੍ਥਂ ਅਭਿਸਮ੍ਭੁਣਾਤੀਤਿ ਨ ਕਞ੍ਚਿ ਅਤ੍ਥਂ ਸਾਧੇਤਿ.

ਸਂਵਣ੍ਣਨਂ ਤਞ੍ਚਾਤਿਆਦਿਨਾ ਅਤ੍ਤਨੋ ਸਂਵਣ੍ਣਨਾਯ ਕਰਣਪ੍ਪਕਾਰਂ ਦਸ੍ਸੇਤਿ. ਤਤ੍ਥ ਤਞ੍ਚ ਇਦਾਨਿ ਵੁਚ੍ਚਮਾਨਂ ਸਂਵਣ੍ਣਨਂ ਸਮਾਰਭਨ੍ਤੋ ਸਕਲਾਯਪਿ ਮਹਾਅਟ੍ਠਕਥਾਯ ਇਧ ਗਹੇਤਬ੍ਬਤੋ ਮਹਾਅਟ੍ਠਕਥਂ ਤਸ੍ਸਾ ਇਦਾਨਿ ਵੁਚ੍ਚਮਾਨਾਯ ਸਂਵਣ੍ਣਨਾਯ ਸਰੀਰਂ ਕਤ੍ਵਾ ਮਹਾਪਚ੍ਚਰਿਯਂ ਯੋ ਵਿਨਿਚ੍ਛਯੋ ਵੁਤ੍ਤੋ, ਤਥੇਵ ਕੁਰੁਨ੍ਦੀਨਾਮਾਦੀਸੁ ਵਿਸ੍ਸੁਤਾਸੁ ਅਟ੍ਠਕਥਾਸੁ ਯੋ ਵਿਨਿਚ੍ਛਯੋ ਵੁਤ੍ਤੋ, ਤਤੋਪਿ ਵਿਨਿਚ੍ਛਯਤੋ ਯੁਤ੍ਤਮਤ੍ਥਂ ਅਪਰਿਚ੍ਚਜਨ੍ਤੋ ਅਨ੍ਤੋਗਧਤ੍ਥੇਰਵਾਦਂ ਕਤ੍ਵਾ ਸਂਵਣ੍ਣਨਂ ਸਮ੍ਮਾ ਸਮਾਰਭਿਸ੍ਸਨ੍ਤਿ ਪਦਤ੍ਥਸਮ੍ਬਨ੍ਧੋ ਵੇਦਿਤਬ੍ਬੋ. ਏਤ੍ਥ ਚ ਅਤ੍ਥੋ ਕਥੀਯਤਿ ਏਤਾਯਾਤਿ ਅਟ੍ਠਕਥਾ ਤ੍ਥ-ਕਾਰਸ੍ਸ ਟ੍ਠ-ਕਾਰਂ ਕਤ੍ਵਾ. ਮਹਾਪਚ੍ਚਰਿਯਨ੍ਤਿ ਮਹਾਪਚ੍ਚਰੀਨਾਮਿਕਂ. ਏਤ੍ਥ ਚ ਪਚ੍ਚਰੀਤਿ ਉਲ਼ੁਮ੍ਪਂ ਵੁਚ੍ਚਤਿ, ਤਸ੍ਮਿਂ ਨਿਸੀਦਿਤ੍ਵਾ ਕਤਤ੍ਤਾ ਤਮੇਵ ਨਾਮਂ ਜਾਤਂ. ‘‘ਕੁਰੁਨ੍ਦੀਵਲ੍ਲਿਵਿਹਾਰੋ ਨਾਮ ਅਤ੍ਥਿ, ਤਤ੍ਥ ਕਤਤ੍ਤਾ ‘ਕੁਰੁਨ੍ਦੀ’ਤਿ ਨਾਮਂ ਜਾਤ’’ਨ੍ਤਿ ਵਦਨ੍ਤਿ. ਆਦਿਸਦ੍ਦੇਨ ਅਨ੍ਧਕਟ੍ਠਕਥਂ ਸਙ੍ਖੇਪਟ੍ਠਕਥਞ੍ਚ ਸਙ੍ਗਣ੍ਹਾਤਿ.

ਯੁਤ੍ਤਮਤ੍ਥਨ੍ਤਿ ਮਹਾਅਟ੍ਠਕਥਾਨਯੇਨ, ਚਤੁਬ੍ਬਿਧਵਿਨਯਯੁਤ੍ਤਿਯਾ ਵਾ ਯੁਤ੍ਤਮਤ੍ਥਂ. ‘‘ਅਟ੍ਠਕਥਂਯੇਵ ਗਹੇਤ੍ਵਾ ਸਂਵਣ੍ਣਨਂ ਕਰਿਸ੍ਸਾਮੀ’’ਤਿ ਵੁਤ੍ਤੇ ਅਟ੍ਠਕਥਾਸੁ ਵੁਤ੍ਤਤ੍ਥੇਰਵਾਦਾਨਂ ਬਾਹਿਰਭਾਵੋ ਸਿਯਾਤਿ ਤੇਪਿ ਅਨ੍ਤੋਕਤ੍ਤੁਕਾਮੋ ‘‘ਅਨ੍ਤੋਗਧਥੇਰਵਾਦ’’ਨ੍ਤਿ ਆਹ, ਥੇਰਵਾਦੇਪਿ ਅਨ੍ਤੋਕਤ੍ਵਾਤਿ ਵੁਤ੍ਤਂ ਹੋਤਿ.

ਤਂ ਮੇਤਿ ਗਾਥਾਯ ਸੋਤੂਹਿ ਪਟਿਪਜ੍ਜਿਤਬ੍ਬਵਿਧਿਂ ਦਸ੍ਸੇਤਿ. ਤਤ੍ਥ ਧਮ੍ਮਪ੍ਪਦੀਪਸ੍ਸਾਤਿ ਧਮ੍ਮੋ ਏਵ ਮੋਹਨ੍ਧਕਾਰਵਿਦ੍ਧਂਸਨਤੋ ਪਦੀਪਸਦਿਸਤ੍ਤਾ ਪਦੀਪੋ ਅਸ੍ਸਾਤਿ ਧਮ੍ਮਪ੍ਪਦੀਪੋ, ਭਗਵਾ, ਤਸ੍ਸ. ਪਤਿਮਾਨਯਨ੍ਤਾਤਿ ਪੂਜੇਨ੍ਤਾ ਮਨਸਾ ਗਰੁਂ ਕਰੋਨ੍ਤਾ ਨਿਸਾਮੇਨ੍ਤੁ ਸੁਣਨ੍ਤੁ.

ਬੁਦ੍ਧੇਨਾਤਿਆਦਿਨਾ ¶ ਅਤ੍ਤਨੋ ਸਂਵਣ੍ਣਨਾਯ ਆਗਮਨਸੁਦ੍ਧਿਦਸ੍ਸਨਮੁਖੇਨ ਪਮਾਣਭਾਵਂ ਦਸ੍ਸੇਤ੍ਵਾ ਅਨੁਸਿਕ੍ਖਿਤਬ੍ਬਤਂ ¶ ਦਸ੍ਸੇਤਿ. ਤਤ੍ਥ ਯਥੇਵ ਬੁਦ੍ਧੇਨ ਯੋ ਧਮ੍ਮੋ ਵਿਨਯੋ ਚ ਵੁਤ੍ਤੋ, ਸੋ ਤਸ੍ਸ ਬੁਦ੍ਧਸ੍ਸ ਯੇਹਿ ਪੁਤ੍ਤੇਹਿ ਮਹਾਕਸ੍ਸਪਤ੍ਥੇਰਾਦੀਹਿ ਤਥੇਵ ਞਾਤੋ, ਤੇਸਂ ਬੁਦ੍ਧਪੁਤ੍ਤਾਨਂ ਮਤਿਮਚ੍ਚਜਨ੍ਤਾ ਸੀਹਲ਼ਟ੍ਠਕਥਾਚਰਿਯਾ ਯਸ੍ਮਾ ਪੁਰੇ ਅਟ੍ਠਕਥਾ ਅਕਂਸੂਤਿ ਸਮ੍ਬਨ੍ਧੋ ਵੇਦਿਤਬ੍ਬੋ. ਤਤ੍ਥ ਧਮ੍ਮੋਤਿ ਸੁਤ੍ਤਾਭਿਧਮ੍ਮੇ ਸਙ੍ਗਣ੍ਹਾਤਿ. ਵਿਨਯੋਤਿ ਸਕਲਂ ਵਿਨਯਪਿਟਕਂ. ਵੁਤ੍ਤੋਤਿ ਪਾਲ਼ਿਤੋ ਚ ਅਤ੍ਥਤੋ ਚ ਬੁਦ੍ਧੇਨ ਭਗਵਤਾ ਵੁਤ੍ਤੋ. ਨ ਹਿ ਭਗਵਤਾ ਅਬ੍ਯਾਕਤਂ ਨਾਮ ਤਨ੍ਤਿਪਦਂ ਅਤ੍ਥਿ, ਤਤ੍ਥ ਤਤ੍ਥ ਭਗਵਤਾ ਪਵਤ੍ਤਿਤਪਕਿਣ੍ਣਕਦੇਸਨਾਯੇਵ ਹਿ ਅਟ੍ਠਕਥਾ. ਤਥੇਵ ਞਾਤੋਤਿ ਯਥੇਵ ਬੁਦ੍ਧੇਨ ਵੁਤ੍ਤੋ, ਤਥੇਵ ਏਕਪਦਮ੍ਪਿ ਏਕਕ੍ਖਰਮ੍ਪਿ ਅਵਿਨਾਸੇਤ੍ਵਾ ਅਧਿਪ੍ਪਾਯਞ੍ਚ ਅਵਿਕੋਪੇਤ੍ਵਾ ਞਾਤੋ ਵਿਦਿਤੋਤਿ ਅਤ੍ਥੋ. ਤੇਸਂ ਮਤਿਮਚ੍ਚਜਨ੍ਤਾਤਿ ਤੇਸਂ ਬੁਦ੍ਧਪੁਤ੍ਤਾਨਂ ਮਤਿਸਙ੍ਖਾਤਂ ਥੇਰਪਰਮ੍ਪਰਾਯ ਉਗ੍ਗਹੇਤ੍ਵਾ ਆਭਤਂ ਅਬ੍ਬੋਚ੍ਛਿਨ੍ਨਂ ਪਾਲ਼ਿਵਣ੍ਣਨਾਵਸੇਨ ਚੇਵ ਪਾਲ਼ਿਮੁਤ੍ਤਕਵਸੇਨ ਚ ਪਵਤ੍ਤਂ ਸਬ੍ਬਂ ਅਟ੍ਠਕਥਾਵਿਨਿਚ੍ਛਯਂ ਅਪਰਿਚ੍ਚਜਨ੍ਤਾ. ਅਟ੍ਠਕਥਾ ਅਕਂਸੂਤਿ ਮਹਾਅਟ੍ਠਕਥਾਮਹਾਪਚ੍ਚਰਿਆਦਿਕਾ ਸੀਹਲ਼ਟ੍ਠਕਥਾਯੋ ਅਕਂਸੁ. ‘‘ਅਟ੍ਠਕਥਾਮਕਂਸੂ’’ਤਿਪਿ ਪਾਠੋ, ਤਤ੍ਥਾਪਿ ਸੋਯੇਵਤ੍ਥੋ.

ਤਸ੍ਮਾਤਿ ਯਸ੍ਮਾ ਤੇਸਂ ਬੁਦ੍ਧਪੁਤ੍ਤਾਨਂ ਅਧਿਪ੍ਪਾਯਂ ਅਵਿਕੋਪੇਤ੍ਵਾ ਪੁਰੇ ਅਟ੍ਠਕਥਾ ਅਕਂਸੁ, ਤਸ੍ਮਾ. ਯਂ ਅਟ੍ਠਕਥਾਸੁ ਵੁਤ੍ਤਂ, ਤਂ ਸਬ੍ਬਮ੍ਪਿ ਪਮਾਣਨ੍ਤਿ ਯੋਜਨਾ. ਹੀਤਿ ਨਿਪਾਤਮਤ੍ਤਂ ਹੇਤੁਅਤ੍ਥਸ੍ਸ ਤਸ੍ਮਾਤਿ ਇਮਿਨਾਯੇਵ ਪਕਾਸਿਤਤ੍ਤਾ, ਅਵਧਾਰਣਤ੍ਥੋ ਵਾ, ਪਮਾਣਮੇਵਾਤਿ. ਯਦਿ ਅਟ੍ਠਕਥਾਸੁ ਵੁਤ੍ਤਂ ਸਬ੍ਬਮ੍ਪਿ ਪਮਾਣਂ, ਏਵਂ ਸਤਿ ਤਤ੍ਥ ਪਮਾਦਲੇਖਾਪਿ ਪਮਾਣਂ ਸਿਯਾਤਿ ਆਹ ‘‘ਵਜ੍ਜਯਿਤ੍ਵਾਨ ਪਮਾਦਲੇਖ’’ਨ੍ਤਿ, ਅਪਰਾਪਰਂ ਲਿਖਨ੍ਤੇਹਿ ਪਮਾਦੇਨ ਸਤਿਂ ਅਪਚ੍ਚੁਪਟ੍ਠਪੇਤ੍ਵਾ ਅਞ੍ਞਤ੍ਥ ਲਿਖਿਤਬ੍ਬਂ ਅਞ੍ਞਤ੍ਥ ਲਿਖਨਾਦਿਵਸੇਨ ਪਵਤ੍ਤਿਤਾ ਪਮਾਦਲੇਖਾ ਨਾਮ, ਸਾ ਚ ਸਮਨ੍ਤਪਾਸਾਦਿਕਾਯਂ ਤਤ੍ਥ ਤਤ੍ਥ ਸਯਮੇਵ ਆਵਿਭਵਿਸ੍ਸਤਿ. ਪੁਨ ਯਸ੍ਮਾਤਿ ਪਦਸ੍ਸ ਸਮ੍ਬਨ੍ਧਦਸ੍ਸਨਵਸੇਨ ਅਯਂ ਅਤ੍ਥਯੋਜਨਾ – ਯਸ੍ਮਾ ਅਟ੍ਠਕਥਾਸੁ ਵੁਤ੍ਤਂ ਇਧ ਇਮਸ੍ਮਿਂ ਸਾਸਨੇ ਸਿਕ੍ਖਾਸੁ ਸਗਾਰਵਾਨਂ ਪਣ੍ਡਿਤਾਨਂ ਪਮਾਣਮੇਵ, ਯਸ੍ਮਾ ਚ ਅਯਂ ਵਣ੍ਣਨਾਪਿ ਭਾਸਨ੍ਤਰਪਰਿਚ੍ਚਾਗਾਦਿਮਤ੍ਤਵਿਸਿਟ੍ਠਤਾਯ ਅਤ੍ਥਤੋ ਅਭਿਨ੍ਨਾ, ਤਤੋ ਏਵ ਪਮਾਣਭੂਤਾਵ ਹੇਸ੍ਸਤਿ, ਤਸ੍ਮਾ ਅਨੁਸਿਕ੍ਖਿਤਬ੍ਬਾਤਿ.

ਤਤੋਤਿ ਤਾਹਿ ਅਟ੍ਠਕਥਾਹਿ. ਭਾਸਨ੍ਤਰਮੇਵ ਹਿਤ੍ਵਾਤਿ ਸੀਹਲ਼ਭਾਸਂਯੇਵ ਅਪਨੇਤ੍ਵਾ. ਵਿਤ੍ਥਾਰਮਗ੍ਗਞ੍ਚ ਸਮਾਸਯਿਤ੍ਵਾਤਿ ਪੋਰਾਣਟ੍ਠਕਥਾਸੁ ਯਥਾਠਾਨੇ ¶ ਵਤ੍ਤਬ੍ਬਮ੍ਪਿ ਪਦਤ੍ਥਵਿਨਿਚ੍ਛਯਾਦਿਕਂ ਅਤਿਵਿਤ੍ਥਿਣ੍ਣੇਨ ਵਚਨਕ੍ਕਮੇਨ ਚੇਵ ਵੁਤ੍ਤਮੇਵ ਅਤ੍ਥਨਯਂ ਅਪ੍ਪਮਤ੍ਤਕਵਿਸੇਸੇਨ ਪੁਨਪ੍ਪੁਨਂ ਕਥਨੇਨ ਚ ਤਤ੍ਥ ਤਤ੍ਥ ਪਪਞ੍ਚਿਤਂ ਤਾਦਿਸਂ ਵਿਤ੍ਥਾਰਮਗ੍ਗਂ ਪਹਾਯ ਸਲ੍ਲਹੁਕੇਨ ਅਤ੍ਥਵਿਞ੍ਞਾਪਕੇਨ ਪਦਕ੍ਕਮੇਨ ਚੇਵ ਵੁਤ੍ਤਨਯਸਦਿਸਂ ਵਤ੍ਤਬ੍ਬਂ ਅਤਿਦਿਸਿਤ੍ਵਾ ਚ ਸਙ੍ਖੇਪਨਯੇਨੇਵ ਵਣ੍ਣਯਿਸ੍ਸਾਮਾਤਿ ਅਧਿਪ੍ਪਾਯੋ. ਸਾਰਤ੍ਥਦੀਪਨਿਯਂ ਪਨ ਵਿਨਯਟੀਕਾਯਂ ‘‘ਪੋਰਾਣਟ੍ਠਕਥਾਸੁ ਉਪਰਿ ਵੁਚ੍ਚਮਾਨਮ੍ਪਿ ਆਨੇਤ੍ਵਾ ਤਤ੍ਥ ਤਤ੍ਥ ਪਪਞ੍ਚਿਤਂ ਞਤ੍ਤਿਚਤੁਤ੍ਥੇਨ ਕਮ੍ਮੇਨ…ਪੇ… ਉਪਸਮ੍ਪਨ੍ਨੋਤਿ ਭਿਕ੍ਖੂਤਿ ਏਤ੍ਥ ਅਪਲੋਕਨਾਦੀਨਂ ਚਤੁਨ੍ਨਮ੍ਪਿ ¶ ਕਮ੍ਮਾਨਂ ਵਿਤ੍ਥਾਰਕਥਾ ਵਿਯ ਤਾਦਿਸਂ ਵਿਤ੍ਥਾਰਮਗ੍ਗਂ ਸਙ੍ਖਿਪਿਤ੍ਵਾ’’ਤਿ ਵੁਤ੍ਤਂ, ਤਂ ਤਨ੍ਤਿਕ੍ਕਮਂ ਕਞ੍ਚਿ ਅਵੋਕ੍ਕਮਿਤ੍ਵਾਤਿ ਏਤ੍ਥੇਵ ਵਤ੍ਤੁਂ ਯੁਤ੍ਤਂ. ਅਞ੍ਞਤ੍ਥ ਪਾਲ਼ਿਯਾ ਵਤ੍ਤਬ੍ਬਂ ਅਞ੍ਞਤ੍ਥ ਕਥਨਞ੍ਹਿ ਤਨ੍ਤਿਕ੍ਕਮਂ ਵੋਕ੍ਕਮਿਤ੍ਵਾ ਕਥਨਂ ਨਾਮ. ਤਥਾ ਹਿ ਵੁਤ੍ਤਂ ‘‘ਤਥੇਵ ਵਣ੍ਣਿਤੁਂ ਯੁਤ੍ਤਰੂਪਂ ਹੁਤ੍ਵਾ ਅਨੁਕ੍ਕਮੇਨ ਆਗਤਂ ਪਾਲ਼ਿਂ ਪਰਿਚ੍ਚਜਿਤ੍ਵਾ ਸਂਵਣ੍ਣਨਤੋ ਸੀਹਲ਼ਟ੍ਠਕਥਾਸੁ ਅਯੁਤ੍ਤਟ੍ਠਾਨੇ ਵਣ੍ਣਿਤਂ ਯਥਾਠਾਨੇਯੇਵ ਵਣ੍ਣਨਤੋ ਚ ਵੁਤ੍ਤਂ ‘ਤਨ੍ਤਿਕ੍ਕਮਂ ਕਞ੍ਚਿ ਅਵੋਕ੍ਕਮਿਤ੍ਵਾ’’’ਤਿ. ਤਸ੍ਮਾ ਯਥਾਵੁਤ੍ਤਨਯੇਨੇਵ ਅਤ੍ਥੋ ਗਹੇਤਬ੍ਬੋ. ਕਥਂ ਪਨ ਵਿਤ੍ਥਾਰਮਗ੍ਗਸ੍ਸ ਸਙ੍ਖਿਪਨੇ ਵਿਨਿਚ੍ਛਯੋ ਨ ਹੀਯਤੀਤਿ? ਆਹ ‘‘ਵਿਨਿਚ੍ਛਯਂ ਸਬ੍ਬਮਸੇਸਯਿਤ੍ਵਾ’’ਤਿ. ਸਙ੍ਖਿਪਨ੍ਤੋਪਿ ਪੁਨਪ੍ਪੁਨਂ ਵਚਨਾਦਿਮੇਵ ਸਙ੍ਖਿਪਨ੍ਤੋ, ਵਿਨਿਚ੍ਛਯਂ ਪਨ ਅਟ੍ਠਕਥਾਸੁ ਸਬ੍ਬਾਸੁਪਿ ਵੁਤ੍ਤਂ ਸਬ੍ਬਮ੍ਪਿ ਅਸੇਸਯਿਤ੍ਵਾ, ਕਿਞ੍ਚਿਮਤ੍ਤਮ੍ਪਿ ਅਪਰਿਹਾਪੇਤ੍ਵਾਤਿ ਵੁਤ੍ਤਂ ਹੋਤਿ. ਤਨ੍ਤਿਕ੍ਕਮਂ ਕਞ੍ਚਿ ਅਵੋਕ੍ਕਮਿਤ੍ਵਾਤਿ ਕਞ੍ਚਿ ਪਾਲ਼ਿਕ੍ਕਮਂ ਅਨਤਿਕ੍ਕਮਿਤ੍ਵਾ, ਅਨੁਕ੍ਕਮੇਨੇਵ ਪਾਲ਼ਿਂ ਵਣ੍ਣਯਿਸ੍ਸਾਮਾਤਿ ਅਤ੍ਥੋ.

ਸੁਤ੍ਤਨ੍ਤਿਕਾਨਂ ਵਚਨਾਨਮਤ੍ਥਨ੍ਤਿ ਵੇਰਞ੍ਜਕਣ੍ਡਾਦੀਸੁ ਆਗਤਾਨਂ ਝਾਨਕਥਾਦੀਨਂ ਸੁਤ੍ਤਨ੍ਤਵਚਨਾਨਂ ਸੀਹਲ਼ਟ੍ਠਕਥਾਸੁ ‘‘ਸੁਤ੍ਤਨ੍ਤਿਕਾਨਂ ਭਾਰੋ’’ਤਿ ਵਤ੍ਵਾ ਅਵਣ੍ਣਿਤਬ੍ਬਟ੍ਠਾਨਂ ਅਤ੍ਥਂ ਤਂਤਂਸੁਤ੍ਤਾਨੁਰੂਪਂ ਸਬ੍ਬਸੋ ਪਰਿਦੀਪਯਿਸ੍ਸਾਮਾਤਿ ਅਧਿਪ੍ਪਾਯੋ. ਹੇਸ੍ਸਤੀਤਿ ਭਵਿਸ੍ਸਤਿ, ਕਰੀਯਿਸ੍ਸਤੀਤਿ ਵਾ ਅਤ੍ਥੋ. ਏਤ੍ਥ ਚ ਪਠਮਸ੍ਮਿਂ ਅਤ੍ਥਵਿਕਪ੍ਪੇ ‘‘ਭਾਸਨ੍ਤਰਪਰਿਚ੍ਚਾਗਾਦਿਕਂ ਚਤੁਬ੍ਬਿਧਂ ਕਿਚ੍ਚਂ ਨਿਪ੍ਫਾਦੇਤ੍ਵਾ ਸੁਤ੍ਤਨ੍ਤਿਕਾਨਂ ਵਚਨਾਨਮਤ੍ਥਂ ਪਰਿਦੀਪਯਨ੍ਤੀ ਅਯਂ ਵਣ੍ਣਨਾ ਭਵਿਸ੍ਸਤੀ’’ਤਿ ਵਣ੍ਣਨਾਵਸੇਨ ਸਮਾਨਕਤ੍ਤੁਕਤਾ ਵੇਦਿਤਬ੍ਬਾ. ਪਚ੍ਛਿਮਸ੍ਮਿਂ ਅਤ੍ਥਵਿਕਪ੍ਪੇ ਪਨ ‘‘ਹੇਟ੍ਠਾ ਵੁਤ੍ਤਭਾਸਨ੍ਤਰਪਰਿਚ੍ਚਾਗਾਦਿਕਂ ਕਤ੍ਵਾ ਸੁਤ੍ਤਨ੍ਤਿਕਾਨਂ ਵਚਨਾਨਮਤ੍ਥਂ ਪਰਿਦੀਪਯਨ੍ਤੀ ਅਯਂ ਵਣ੍ਣਨਾ ਅਮ੍ਹੇਹਿ ਕਰੀਯਿਸ੍ਸਤੀ’’ਤਿ ਏਵਂ ਆਚਰਿਯਵਸੇਨ ਸਮਾਨਕਤ੍ਤੁਕਤਾ ਵੇਦਿਤਬ੍ਬਾ.

ਗਨ੍ਥਾਰਮ੍ਭਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਬਾਹਿਰਨਿਦਾਨਕਥਾ

ਇਦਾਨਿ ¶ ਸਂਵਰਵਿਨਯਪਹਾਨਵਿਨਯਾਦੀਸੁ ਬਹੂਸੁ ਵਿਨਯੇਸੁ ਅਤ੍ਤਨਾ ‘‘ਤਂ ਵਣ੍ਣਯਿਸ੍ਸਂ ਵਿਨਯ’’ਨ੍ਤਿ ਏਵਂ ਸਂਵਣ੍ਣੇਤਬ੍ਬਭਾਵੇਨ ਪਟਿਞ੍ਞਾਤਂ ਵਿਨਯਂ ਦਸ੍ਸੇਨ੍ਤੋ ਆਹ ਤਤ੍ਥਾਤਿਆਦਿ. ਤਤ੍ਥ ਤਤ੍ਥਾਤਿ ਯਥਾਵੁਤ੍ਤਾਸੁ ਗਾਥਾਸੁ. ਤਾਵ-ਸਦ੍ਦੋ ਪਠਮਨ੍ਤਿ ਇਮਸ੍ਮਿਂ ਅਤ੍ਥੇ ਦਟ੍ਠਬ੍ਬੋ, ਤੇਨ ਪਠਮਂ ਵਿਨਯਂ ਵਵਤ੍ਥਪੇਤ੍ਵਾ ¶ ਪਚ੍ਛਾ ਤਸ੍ਸ ਵਣ੍ਣਨਂ ਕਰਿਸ੍ਸਾਮਾਤਿ ਦੀਪੇਤਿ. ਵਵਤ੍ਥਪੇਤਬ੍ਬੋਤਿ ਨਿਯਮੇਤਬ੍ਬੋ. ਤੇਨੇਤਂ ਵੁਚ੍ਚਤੀਤਿ ਯਸ੍ਮਾ ਵਵਤ੍ਥਪੇਤਬ੍ਬੋ, ਤੇਨ ਹੇਤੁਨਾ ਏਤਂ ਵਿਨਯੋ ਨਾਮਾਤਿਆਦਿਕਂ ਨਿਯਾਮਕਵਚਨਂ ਵੁਚ੍ਚਤੀਤਿ ਅਤ੍ਥੋ. ਅਸ੍ਸਾਤਿ ਵਿਨਯਸ੍ਸ. ਮਾਤਿਕਾਤਿ ਉਦ੍ਦੇਸੋ. ਸੋ ਹਿ ਨਿਦ੍ਦੇਸਪਦਾਨਂ ਜਨਨੀਠਾਨੇ ਠਿਤਤ੍ਤਾ ਮਾਤਾ ਵਿਯਾਤਿ ‘‘ਮਾਤਿਕਾ’’ਤਿ ਵੁਚ੍ਚਤਿ.

ਇਦਾਨਿ ਸਂਵਣ੍ਣੇਤਬ੍ਬਮਤ੍ਥਂ ਮਾਤਿਕਂ ਪਟ੍ਠਪੇਤ੍ਵਾ ਦਸ੍ਸੇਨ੍ਤੋ ਆਹ ਵੁਤ੍ਤਂ ਯੇਨਾਤਿਆਦਿ. ਇਦਂ ਵੁਤ੍ਤਂ ਹੋਤਿ – ਏਤਂ ਤੇਨ ਸਮਯੇਨ ਬੁਦ੍ਧੋ ਭਗਵਾ ਵੇਰਞ੍ਜਾਯਂ ਵਿਹਰਤੀਤਿਆਦਿਨਿਦਾਨਵਚਨਪਟਿਮਣ੍ਡਿਤਂ ਵਿਨਯਪਿਟਕਂ ਯੇਨ ਪੁਗ੍ਗਲੇਨ ਵੁਤ੍ਤਂ, ਯਸ੍ਮਿਂ ਕਾਲੇ ਵੁਤ੍ਤਂ, ਯਸ੍ਮਾ ਕਾਰਣਾ ਵੁਤ੍ਤਂ, ਯੇਨ ਧਾਰਿਤਂ, ਯੇਨ ਚ ਆਭਤਂ, ਯੇਸੁ ਪਤਿਟ੍ਠਿਤਂ, ਏਤਂ ਯਥਾਵੁਤ੍ਤਵਿਧਾਨਂ ਵਤ੍ਵਾ ਤਤੋ ਤੇਨ ਸਮਯੇਨਾਤਿਆਦਿਪਾਠਸ੍ਸ ਅਤ੍ਥਂ ਅਨੇਕਪ੍ਪਕਾਰਤੋ ਦਸ੍ਸੇਨ੍ਤੋ ਵਿਨਯਸ੍ਸ ਅਤ੍ਥਵਣ੍ਣਨਂ ਕਰਿਸ੍ਸਾਮੀਤਿ.

ਏਤ੍ਥ ਚ ਵੁਤ੍ਤਂ ਯੇਨ ਯਦਾ ਯਸ੍ਮਾਤਿ ਇਦਂ ਵਚਨਂ ਤੇਨ ਸਮਯੇਨ ਬੁਦ੍ਧੋ ਭਗਵਾਤਿਆਦਿਨਿਦਾਨਵਚਨਮਤ੍ਤਂ ਅਪੇਕ੍ਖਿਤ੍ਵਾ ਵਤ੍ਤੁਕਾਮੋਪਿ ਵਿਸੁਂ ਅਵਤ੍ਵਾ ‘‘ਨਿਦਾਨੇਨ ਆਦਿਕਲ੍ਯਾਣਂ, ਇਦਮਵੋਚਾਤਿ ਨਿਗਮਨੇਨ ਪਰਿਯੋਸਾਨਕਲ੍ਯਾਣ’’ਨ੍ਤਿ ਵਚਨਤੋ ਨਿਦਾਨਨਿਗਮਨਾਨਿਪਿ ਸਤ੍ਥੁਦੇਸਨਾਯ ਅਨੁਵਿਧਾਨਤ੍ਤਾ ਤਦਨ੍ਤੋਗਧਾਨੇਵਾਤਿ ਨਿਦਾਨਸ੍ਸਾਪਿ ਵਿਨਯਪਾਲ਼ਿਯਂਯੇਵ ਅਨ੍ਤੋਗਧਤ੍ਤਾ ਵੁਤ੍ਤਂ ਯੇਨ ਯਦਾ ਯਸ੍ਮਾਤਿ ਇਦਮ੍ਪਿ ਵਿਨਯਪਿਟਕਸਮ੍ਬਨ੍ਧਂਯੇਵ ਕਤ੍ਵਾ ਮਾਤਿਕਂ ਠਪੇਤਿ. ਮਾਤਿਕਾਯ ਹਿ ਏਤਨ੍ਤਿ ਵੁਤ੍ਤਂ ਵਿਨਯਪਿਟਕਂਯੇਵ ਸਾਮਞ੍ਞਤੋ ਸਬ੍ਬਤ੍ਥ ਸਮ੍ਬਨ੍ਧਮੁਪਗਚ੍ਛਤਿ.

ਇਦਾਨਿ ਪਨ ਤਂ ਵਿਸੁਂ ਨੀਹਰਿਤ੍ਵਾ ਦਸ੍ਸੇਨ੍ਤੋ ਤਤ੍ਥ ਵੁਤ੍ਤਂ ਯੇਨਾਤਿਆਦਿਮਾਹ. ਤਤ੍ਥਾਤਿ ਤੇਸੁ ਮਾਤਿਕਾਪਦੇਸੁ. ਇਦਨ੍ਤਿ ਤੇਨ ਸਮਯੇਨਾਤਿਆਦਿਨਿਦਾਨਵਚਨਂ. ਹਿ-ਸਦ੍ਦੋ ਯਸ੍ਮਾਤਿ ਅਤ੍ਥੋ ਦਟ੍ਠਬ੍ਬੋ, ਯਸ੍ਮਾ ਬੁਦ੍ਧਸ੍ਸ ਭਗਵਤੋ ਅਤ੍ਤਪਚ੍ਚਕ੍ਖਵਚਨਂ ਨ ਹੋਤਿ, ਤਸ੍ਮਾਤਿ ਵੁਤ੍ਤਂ ਹੋਤਿ. ਅਤ੍ਤਪਚ੍ਚਕ੍ਖਵਚਨਂ ਨ ਹੋਤੀਤਿ ਅਤ੍ਤਨਾ ਪਚ੍ਚਕ੍ਖਂ ਕਤ੍ਵਾ ਵੁਤ੍ਤਵਚਨਂ ਨ ਹੋਤਿ. ਅਥ ¶ ਵਾ ਅਤ੍ਤਨੋ ਪਚ੍ਚਕ੍ਖਕਾਲੇ ਧਰਮਾਨਕਾਲੇ ਵੁਤ੍ਤਵਚਨਂ ਨ ਹੋਤਿ. ਤਦੁਭਯੇਨਾਪਿ ਭਗਵਤੋ ਵੁਤ੍ਤਵਚਨਂ ਨ ਹੋਤੀਤਿ ਅਤ੍ਥੋ.

ਪਠਮਮਹਾਸਙ੍ਗੀਤਿਕਥਾਵਣ੍ਣਨਾ

ਪਠਮਮਹਾਸਙ੍ਗੀਤਿ ਨਾਮ ਚੇਸਾਤਿ ਏਤ੍ਥ ਚ-ਸਦ੍ਦੋ ਵਤ੍ਤਬ੍ਬਸਮ੍ਪਿਣ੍ਡਨਤ੍ਥੋ, ਉਪਞ੍ਞਾਸਤ੍ਥੋ ਵਾ, ਉਪਞ੍ਞਾਸੋਤਿ ਚ ਵਾਕ੍ਯਾਰਮ੍ਭੋ ਵੁਚ੍ਚਤਿ. ਏਸਾ ਹਿ ਗਨ੍ਥਕਾਰਾਨਂ ਪਕਤਿ, ਯਦਿਦਂ ਕਿਞ੍ਚਿ ਵਤ੍ਵਾ ਪੁਨ ਅਪਰਂ ਵਤ੍ਤੁਮਾਰਭਨ੍ਤਾਨਂ ਚ-ਸਦ੍ਦਪ੍ਪਯੋਗੋ. ਯਥਾਪਚ੍ਚਯਂ ਤਤ੍ਥ ਤਤ੍ਥ ਦੇਸਿਤਤ੍ਤਾ ਵਿਪ੍ਪਕਿਣ੍ਣਾਨਂ ਧਮ੍ਮਵਿਨਯਾਨਂ ¶ ਸਭਾਗਤ੍ਥਵਸੇਨ ਸਙ੍ਗਹੇਤ੍ਵਾ ਗਾਯਨਂ ਕਥਨਂ ਸਙ੍ਗੀਤਿ, ਮਹਾਵਿਸਯਤ੍ਤਾ ਪੂਜਨੀਯਤ੍ਤਾ ਚ ਮਹਤੀ ਸਙ੍ਗੀਤਿ ਮਹਾਸਙ੍ਗੀਤਿ. ਦੁਤਿਯਾਦਿਂ ਉਪਾਦਾਯ ਚੇਸਾ ‘‘ਪਠਮਮਹਾਸਙ੍ਗੀਤੀ’’ਤਿ ਵੁਤ੍ਤਾ. ਨਿਦਦਾਤਿ ਦੇਸਨਂ ਦੇਸਕਾਲਾਦਿਵਸੇਨ ਅਵਿਦਿਤਂ ਵਿਦਿਤਂ ਕਤ੍ਵਾ ਨਿਦਸ੍ਸੇਤੀਤਿ ਨਿਦਾਨਂ, ਤਤ੍ਥ ਕੋਸਲ੍ਲਤ੍ਥਂ.

ਵੇਨੇਯ੍ਯਾਨਂ ਮਗ੍ਗਫਲੁਪ੍ਪਤ੍ਤਿਹੇਤੁਭੂਤਾਵ ਕਿਰਿਯਾ ਨਿਪ੍ਪਰਿਯਾਯੇਨ ਬੁਦ੍ਧਕਿਚ੍ਚਨ੍ਤਿ ਆਹ ‘‘ਧਮ੍ਮਚਕ੍ਕਪ੍ਪਵਤ੍ਤਨਞ੍ਹਿ ਆਦਿਂ ਕਤ੍ਵਾ’’ਤਿ. ਤਤ੍ਥ ਸਤਿਪਟ੍ਠਾਨਾਦਿਧਮ੍ਮੋ ਏਵ ਪਵਤ੍ਤਨਟ੍ਠੇਨ ਚਕ੍ਕਨ੍ਤਿ ਧਮ੍ਮਚਕ੍ਕਂ, ਚਕ੍ਕਨ੍ਤਿ ਵਾ ਆਣਾ, ਤਂ ਧਮ੍ਮਤੋ ਅਨਪੇਤਤ੍ਤਾ ਧਮ੍ਮਚਕ੍ਕਂ, ਧਮ੍ਮੇਨ ਞਾਯੇਨ ਚਕ੍ਕਨ੍ਤਿਪਿ ਧਮ੍ਮਚਕ੍ਕਂ. ਕਤਬੁਦ੍ਧਕਿਚ੍ਚੇਤਿ ਨਿਟ੍ਠਿਤਬੁਦ੍ਧਕਿਚ੍ਚੇ ਭਗਵਤਿ ਲੋਕਨਾਥੇਤਿ ਸਮ੍ਬਨ੍ਧੋ. ਕੁਸਿਨਾਰਾਯਨ੍ਤਿ ਸਮੀਪਤ੍ਥੇ ਏਤਂ ਭੁਮ੍ਮਵਚਨਂ. ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇਤਿ ਤਸ੍ਸ ਨਗਰਸ੍ਸ ਉਪਵਤ੍ਤਨਭੂਤਂ ਮਲ੍ਲਰਾਜੂਨਂ ਸਾਲਵਨੁਯ੍ਯਾਨਂ ਦਸ੍ਸੇਤਿ. ਤਤ੍ਥ ਨਗਰਂ ਪਵਿਸਨ੍ਤਾ ਉਯ੍ਯਾਨਤੋ ਉਪੇਚ੍ਚ ਵਤ੍ਤਨ੍ਤਿ ਗਚ੍ਛਨ੍ਤਿ ਏਤੇਨਾਤਿ ‘‘ਉਪਵਤ੍ਤਨ’’ਨ੍ਤਿ ਉਯ੍ਯਾਨਸ੍ਸ ਚ ਨਗਰਸ੍ਸ ਚ ਮਜ੍ਝੇ ਸਾਲਵਨਂ ਵੁਚ੍ਚਤਿ. ਕੁਸਿਨਾਰਾਯ ਹਿ ਦਕ੍ਖਿਣਪਚ੍ਛਿਮਦਿਸਾਯ ਤਂ ਉਯ੍ਯਾਨਂ ਹੋਤਿ, ਤਤੋ ਉਯ੍ਯਾਨਤੋ ਸਾਲਵਨਰਾਜਿਵਿਰਾਜਿਤੋ ਮਗ੍ਗੋ ਪਾਚੀਨਾਭਿਮੁਖੋ ਗਨ੍ਤ੍ਵਾ ਨਗਰਸ੍ਸ ਦਕ੍ਖਿਣਦ੍ਵਾਰਾਭਿਮੁਖੋ ਉਤ੍ਤਰੇਨ ਨਿਵਤ੍ਤੋ, ਤੇਨ ਮਗ੍ਗੇਨ ਮਨੁਸ੍ਸਾ ਨਗਰਂ ਪਵਿਸਨ੍ਤਿ, ਤਸ੍ਮਾ ਤਂ ‘‘ਉਪਵਤ੍ਤਨ’’ਨ੍ਤਿ ਵੁਚ੍ਚਤਿ. ਤਤ੍ਥ ਕਿਰ ਉਪਵਤ੍ਤਨੇ ਅਞ੍ਞਮਞ੍ਞਸਂਸਟ੍ਠਵਿਟਪਾਨਂ ਸਮ੍ਪਨ੍ਨਛਾਯਾਨਂ ਸਾਲਪਨ੍ਤੀਨਮਨ੍ਤਰੇ ਭਗਵਤੋ ਪਰਿਨਿਬ੍ਬਾਨਮਞ੍ਚੋ ਪਞ੍ਞਤ੍ਤੋ, ਤਂ ਸਨ੍ਧਾਯ ਵੁਤ੍ਤਂ ‘‘ਯਮਕਸਾਲਾਨਮਨ੍ਤਰੇ’’ਤਿ. ਉਪਾਦੀਯਤਿ ਕਮ੍ਮਕਿਲੇਸੇਹੀਤਿ ਉਪਾਦਿ, ਵਿਪਾਕਕ੍ਖਨ੍ਧਾ ਕਟਤ੍ਤਾ ਚ ਰੂਪਂ. ਤਦੇਵ ਕਮ੍ਮਕਿਲੇਸੇਹਿ ਸਮ੍ਮਾ ਅਪ੍ਪਹੀਨਤਾਯ ਸੇਸੋ, ਨਤ੍ਥਿ ਏਤ੍ਥ ਉਪਾਦਿਸੇਸੋਤਿ ਅਨੁਪਾਦਿਸੇਸਾ, ਨਿਬ੍ਬਾਨਧਾਤੁ, ਤਾਯ. ਇਤ੍ਥਮ੍ਭੂਤਲਕ੍ਖਣੇ ¶ ਚਾਯਂ ਕਰਣਨਿਦ੍ਦੇਸੋ. ਪਰਿਨਿਬ੍ਬਾਨੇਤਿ ਨਿਮਿਤ੍ਤਤ੍ਥੇ ਭੁਮ੍ਮਂ, ਪਰਿਨਿਬ੍ਬਾਨਹੇਤੁ ਤਸ੍ਮਿਂ ਠਾਨੇ ਸਨ੍ਨਿਪਤਿਤਾਨਨ੍ਤਿ ਅਤ੍ਥੋ. ਸਙ੍ਘਸ੍ਸ ਥੇਰੋ ਜੇਟ੍ਠੋ ਸਙ੍ਘਤ੍ਥੇਰੋ. ਏਤ੍ਥ ਚ ਸਙ੍ਘਸਦ੍ਦਸ੍ਸ ਭਿਕ੍ਖੁਸਤਸਹਸ੍ਸਸਦ੍ਦਸਾਪੇਕ੍ਖਤ੍ਤੇਪਿ ਗਮਕਤ੍ਤਾ ਥੇਰਸਦ੍ਦੇਨ ਸਮਾਸੋ ਯਥਾ ਦੇਵਦਤ੍ਤਸ੍ਸ ਗਰੁਕੁਲਨ੍ਤਿ. ਆਯਸ੍ਮਾ ਮਹਾਕਸ੍ਸਪੋ ਧਮ੍ਮਵਿਨਯਸਙ੍ਗਾਯਨਤ੍ਥਂ ਭਿਕ੍ਖੂਨਂ ਉਸ੍ਸਾਹਂ ਜਨੇਸੀਤਿ ਸਮ੍ਬਨ੍ਧੋ.

ਤਥਾ ਉਸ੍ਸਾਹਂ ਜਨਨਸ੍ਸ ਕਾਰਣਮਾਹ ਸਤ੍ਤਾਹਪਰਿਨਿਬ੍ਬੁਤੇਤਿਆਦਿ. ਸਤ੍ਤ ਅਹਾਨਿ ਸਮਾਹਟਾਨਿ ਸਤ੍ਤਾਹਂ, ਸਤ੍ਤਾਹਂ ਪਰਿਨਿਬ੍ਬੁਤਸ੍ਸ ਅਸ੍ਸਾਤਿ ਸਤ੍ਤਾਹਪਰਿਨਿਬ੍ਬੁਤੋ, ਸਤ੍ਤਾਹਪਰਿਨਿਬ੍ਬੁਤੇ ਸੁਭਦ੍ਦੇਨ ਵੁਡ੍ਢਪਬ੍ਬਜਿਤੇਨ ਵੁਤ੍ਤਵਚਨਮਨੁਸ੍ਸਰਨ੍ਤੋਤਿ ਸਮ੍ਬਨ੍ਧੋ. ਅਲਂ, ਆਵੁਸੋਤਿਆਦਿਨਾ ਤੇਨ ਵੁਤ੍ਤਵਚਨਂ ਦਸ੍ਸੇਤਿ. ਤਤ੍ਥ ਅਲਨ੍ਤਿ ਪਟਿਕ੍ਖੇਪਵਚਨਂ. ਤੇਨ ਮਹਾਸਮਣੇਨਾਤਿ ਨਿਸ੍ਸਕ੍ਕੇ ਕਰਣਵਚਨਂ, ਤਤੋ ਮਹਾਸਮਣਤੋ ਸੁਟ੍ਠੁ ਮੁਤ੍ਤਾ ਮਯਨ੍ਤਿ ਅਤ੍ਥੋ, ਉਪਦ੍ਦੁਤਾ ਚ ਹੋਮ ਤਦਾਤਿ ਅਧਿਪ੍ਪਾਯੋ, ਹੋਮਾਤਿ ਵਾ ਅਤੀਤਤ੍ਥੇ ਵਤ੍ਤਮਾਨਵਚਨਂ, ਅਹੁਮ੍ਹਾਤਿ ਅਤ੍ਥੋ. ਠਾਨਂ ਖੋ ਪਨੇਤਂ ਵਿਜ੍ਜਤੀਤਿ ਤਿਟ੍ਠਤਿ ਏਤ੍ਥ ਫਲਂ ਤਦਾਯਤ੍ਤਵੁਤ੍ਤਿਤਾਯਾਤਿ ¶ ਠਾਨਂ, ਹੇਤੁ. ਖੋਤਿ ਅਵਧਾਰਣੇ, ਏਤਂ ਕਾਰਣਂ ਵਿਜ੍ਜਤੇਵ, ਨੋ ਨ ਵਿਜ੍ਜਤੀਤਿ ਅਤ੍ਥੋ. ਕਿਂ ਤਂ ਕਾਰਣਨ੍ਤਿ? ਆਹ ਯਂ ਪਾਪਭਿਕ੍ਖੂਤਿਆਦਿ. ਏਤ੍ਥ ਯਨ੍ਤਿ ਨਿਪਾਤਮਤ੍ਤਂ, ਕਾਰਣਨਿਦ੍ਦੇਸੋ ਵਾ, ਯੇਨ ਕਾਰਣੇਨ ਅਨ੍ਤਰਧਾਪੇਯ੍ਯੁਂ, ਤਦੇਤਂ ਕਾਰਣਂ ਵਿਜ੍ਜਤੀਤਿ ਅਤ੍ਥੋ. ਅਤੀਤੋ ਅਤਿਕ੍ਕਨ੍ਤੋ ਸਤ੍ਥਾ ਏਤ੍ਥ, ਏਤਸ੍ਸਾਤਿ ਵਾ ਅਤੀਤਸਤ੍ਥੁਕਂ, ਪਾਵਚਨਂ. ਪਧਾਨਂ ਵਚਨਂ ਪਾਵਚਨਂ, ਧਮ੍ਮਵਿਨਯਨ੍ਤਿ ਵੁਤ੍ਤਂ ਹੋਤਿ. ਪਕ੍ਖਂ ਲਭਿਤ੍ਵਾਤਿ ਅਲਜ੍ਜੀਪਕ੍ਖਂ ਲਭਿਤ੍ਵਾ. ਨ ਚਿਰਸ੍ਸੇਵਾਤਿ ਨ ਚਿਰੇਨੇਵ. ਯਾਵ ਚ ਧਮ੍ਮਵਿਨਯੋ ਤਿਟ੍ਠਤੀਤਿ ਯਤ੍ਤਕਂ ਕਾਲਂ ਧਮ੍ਮੋ ਚ ਵਿਨਯੋ ਚ ਲਜ੍ਜੀਪੁਗ੍ਗਲੇਸੁ ਤਿਟ੍ਠਤਿ.

ਵੁਤ੍ਤਞ੍ਹੇਤਂ ਭਗਵਤਾਤਿ ਪਰਿਨਿਬ੍ਬਾਨਮਞ੍ਚੇ ਨਿਪਨ੍ਨੇਨ ਭਗਵਤਾ ਵੁਤ੍ਤਨ੍ਤਿ ਅਤ੍ਥੋ. ਦੇਸਿਤੋ ਪਞ੍ਞਤ੍ਤੋਤਿ ਸੁਤ੍ਤਾਭਿਧਮ੍ਮਪਿਟਕਸਙ੍ਗਹਿਤਸ੍ਸ ਧਮ੍ਮਸ੍ਸ ਚੇਵ ਵਿਨਯਪਿਟਕਸਙ੍ਗਹਿਤਸ੍ਸ ਵਿਨਯਸ੍ਸ ਚ ਅਤਿਸਜ੍ਜਨਂ ਪਬੋਧਨਂ ਦੇਸਨਾ. ਤਸ੍ਸੇਵ ਪਕਾਰਤੋ ਞਾਪਨਂ ਅਸਙ੍ਕਰਤੋ ਠਪਨਂ ਪਞ੍ਞਾਪਨਂ. ਸੋ ਵੋ ਮਮਚ੍ਚਯੇਨ ਸਤ੍ਥਾਤਿ ਸੋ ਧਮ੍ਮਵਿਨਯੋ ਤੁਮ੍ਹਾਕਂ ਮਮਚ੍ਚਯੇਨ ਸਤ੍ਥਾ ਮਯਿ ਪਰਿਨਿਬ੍ਬੁਤੇ ਸਤ੍ਥੁਕਿਚ੍ਚਂ ਸਾਧੇਸ੍ਸਤਿ. ਸਾਸਨਨ੍ਤਿ ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਵਸੇਨ ਤਿਵਿਧਂ ਸਾਸਨਂ, ਨਿਪ੍ਪਰਿਯਾਯਤੋ ਪਨ ਸਤ੍ਤਤ੍ਤਿਂਸ ਬੋਧਿਪਕ੍ਖਿਯਧਮ੍ਮਾ. ਅਦ੍ਧਨਿਯਨ੍ਤਿ ਅਦ੍ਧਾਨਕ੍ਖਮਂ, ਤਦੇਵ ਚਿਰਟ੍ਠਿਤਿਕਂ ਅਸ੍ਸ ਭਵੇਯ੍ਯਾਤਿ ਸਮ੍ਬਨ੍ਧੋ.

ਇਦਾਨਿ ¶ ਸਮ੍ਮਾਸਮ੍ਬੁਦ੍ਧੇਨ ਅਤ੍ਤਨੋ ਕਤਂ ਅਨੁਗ੍ਗਹਵਿਸੇਸਂ ਵਿਭਾਵੇਨ੍ਤੋ ਆਹ ਯਞ੍ਚਾਹਂ ਭਗਵਤਾਤਿਆਦਿ. ਤਤ੍ਥ ਯਞ੍ਚਾਹਨ੍ਤਿ ਏਤਸ੍ਸ ਅਨੁਗ੍ਗਹਿਤੋਤਿ ਏਤੇਨ ਸਮ੍ਬਨ੍ਧੋ. ਤਤ੍ਥ ਯਨ੍ਤਿ ਯਸ੍ਮਾ, ਯੇਨ ਕਾਰਣੇਨਾਤਿ ਵੁਤ੍ਤਂ ਹੋਤਿ. ਕਿਰਿਯਾਪਰਾਮਸਨਂ ਵਾ ਏਤਂ, ਤੇਨ ਅਨੁਗ੍ਗਹਿਤੋਤਿ ਏਤ੍ਥ ਅਨੁਗ੍ਗਹਣਂ ਪਰਾਮਸਤਿ. ਧਾਰੇਸ੍ਸਸੀਤਿਆਦਿਕਂ ਭਗਵਤਾ ਮਹਾਕਸ੍ਸਪਤ੍ਥੇਰੇਨ ਸਦ੍ਧਿਂ ਚੀਵਰਪਰਿਵਤ੍ਤਨਂ ਕਾਤੁਕਾਮੇਨ ਵੁਤ੍ਤਵਚਨਂ. ਧਾਰੇਸ੍ਸਸਿ ਪਨ ਮੇ ਤ੍ਵਂ ਕਸ੍ਸਪਾਤਿ ‘‘ਕਸ੍ਸਪ, ਤ੍ਵਂ ਇਮਾਨਿ ਪਰਿਭੋਗਜਿਣ੍ਣਾਨਿ ਪਂਸੁਕੂਲਾਨਿ ਪਾਰੁਪਿਤੁਂ ਸਕ੍ਖਿਸ੍ਸਸੀ’’ਤਿ ਵਦਤਿ, ਤਞ੍ਚ ਖੋ ਨ ਕਾਯਬਲਂ ਸਨ੍ਧਾਯ, ਪਟਿਪਤ੍ਤਿਪੂਰਣਂ ਪਨ ਸਨ੍ਧਾਯ ਏਵਮਾਹ. ਸਾਣਾਨਿ ਪਂਸੁਕੂਲਾਨੀਤਿ ਮਤਕਲ਼ੇਵਰਂ ਪਲਿਵੇਠੇਤ੍ਵਾ ਛਡ੍ਡਿਤਾਨਿ ਤੁਮ੍ਬਮਤ੍ਤੇ ਕਿਮਯੋ ਪਪ੍ਫੋਟੇਤ੍ਵਾ ਗਹਿਤਾਨਿ ਸਾਣਵਾਕਮਯਾਨਿ ਪਂਸੁਕੂਲਚੀਵਰਾਨਿ. ਰਥਿਕਾਦੀਨਂ ਯਤ੍ਥ ਕਤ੍ਥਚਿ ਪਂਸੂਨਂ ਉਪਰਿ ਠਿਤਤ੍ਤਾ ਅਬ੍ਭੁਗ੍ਗਤਟ੍ਠੇਨ ਤੇਸੁ ਕੂਲਮਿਵਾਤਿ ਪਂਸੁਕੂਲਂ. ਅਥ ਵਾ ਪਂਸੁ ਵਿਯ ਕੁਚ੍ਛਿਤਭਾਵਂ ਉਲਤਿ ਗਚ੍ਛਤੀਤਿ ਪਂਸੁਕੂਲਨ੍ਤਿ ਪਂਸੁਕੂਲਸਦ੍ਦਸ੍ਸ ਅਤ੍ਥੋ ਦਟ੍ਠਬ੍ਬੋ. ਨਿਬ੍ਬਸਨਾਨੀਤਿ ਨਿਟ੍ਠਿਤਵਸਨਕਿਚ੍ਚਾਨਿ, ਪਰਿਭੋਗਜਿਣ੍ਣਾਨੀਤਿ ਅਤ੍ਥੋ. ਏਕਮੇਵ ਤਂ ਚੀਵਰਂ ਅਨੇਕਾਵਯਵਤ੍ਤਾ ਬਹੁਵਚਨਂ ਕਤਂ. ਸਾਧਾਰਣਪਰਿਭੋਗੇਨਾਤਿ ਅਤ੍ਤਨਾ ਸਮਾਨਪਰਿਭੋਗੇਨ, ਸਾਧਾਰਣਪਰਿਭੋਗੇਨ ਚ ਸਮਸਮਟ੍ਠਪਨੇਨ ਚ ਅਨੁਗ੍ਗਹਿਤੋਤਿ ਸਮ੍ਬਨ੍ਧੋ.

ਇਦਾਨਿ ¶ ਨਵਾਨੁਪੁਬ੍ਬਵਿਹਾਰਛਲ਼ਭਿਞ੍ਞਾਪ੍ਪਭੇਦੇ ਉਤ੍ਤਰਿਮਨੁਸ੍ਸਧਮ੍ਮੇ ਅਤ੍ਤਨਾ ਸਮਸਮਟ੍ਠਪਨਤ੍ਥਾਯ ਭਗਵਤਾ ਵੁਤ੍ਤਂ ਕਸ੍ਸਪਸਂਯੁਤ੍ਤੇ (ਸਂ. ਨਿ. ੨.੧੫੨) ਆਗਤਂ ਪਾਲ਼ਿਂ ਪੇਯ੍ਯਾਲਮੁਖੇਨ ਆਦਿਗ੍ਗਹਣੇਨ ਚ ਸਙ੍ਖਿਪਿਤ੍ਵਾ ਦਸ੍ਸੇਨ੍ਤੋ ਆਹ ਅਹਂ, ਭਿਕ੍ਖਵੇਤਿਆਦਿ. ਤਤ੍ਥ ਯਾਵਦੇ ਆਕਙ੍ਖਾਮੀਤਿ ਯਾਵਦੇਵ ਆਕਙ੍ਖਾਮਿ, ਯਤ੍ਤਕਂ ਕਾਲਂ ਇਚ੍ਛਾਮੀਤਿ ਅਤ੍ਥੋ, ‘‘ਯਾਵਦੇਵਾ’’ਤਿਪਿ ਪਾਠੋ. ਨਵਾਨੁਪੁਬ੍ਬਵਿਹਾਰਛਲ਼ਭਿਞ੍ਞਾਪ੍ਪਭੇਦੇਤਿ ਏਤ੍ਥ ਨਵਾਨੁਪੁਬ੍ਬਵਿਹਾਰੋ ਨਾਮ ਅਨੁਪਟਿਪਾਟਿਯਾ ਸਮਾਪਜ੍ਜਿਤਬ੍ਬਭਾਵਤੋ ਏਵਂਸਞ੍ਞਿਤਾ ਨਿਰੋਧਸਮਾਪਤ੍ਤਿਯਾ ਸਹ ਅਟ੍ਠ ਰੂਪਾਰੂਪਸਮਾਪਤ੍ਤਿਯੋ. ਛਲ਼ਭਿਞ੍ਞਾ ਨਾਮ ਆਸਵਕ੍ਖਯਞਾਣੇਨ ਸਦ੍ਧਿਂ ਪਞ੍ਚਾਭਿਞ੍ਞਾਯੋ. ਅਤ੍ਤਨਾ ਸਮਸਮਟ੍ਠਪਨੇਨਾਤਿ ‘‘ਅਹਂ ਯਤ੍ਤਕਂ ਕਾਲਂ ਯਤ੍ਤਕੇ ਸਮਾਪਤ੍ਤਿਵਿਹਾਰੇ ਅਭਿਞ੍ਞਾਯੋ ਚ ਵਲ਼ਞ੍ਜੇਮਿ, ਤਥਾ ਕਸ੍ਸਪੋਪੀ’’ਤਿ ਏਵਂ ਯਥਾਵੁਤ੍ਤਉਤ੍ਤਰਿਮਨੁਸ੍ਸਧਮ੍ਮੇ ਅਤ੍ਤਨਾ ਸਮਸਮਂ ਕਤ੍ਵਾ ਠਪਨੇਨ, ਇਦਞ੍ਚ ਉਤ੍ਤਰਿਮਨੁਸ੍ਸਧਮ੍ਮਸਾਮਞ੍ਞੇਨ ਥੇਰਸ੍ਸ ਪਸਂਸਾਮਤ੍ਤੇਨ ਵੁਤ੍ਤਂ, ਨ ¶ ਭਗਵਤਾ ਸਦ੍ਧਿਂ ਸਬ੍ਬਥਾ ਸਮਤਾਯ. ਭਗਵਤੋ ਹਿ ਗੁਣਵਿਸੇਸਂ ਉਪਾਦਾਯ ਸਾਵਕਾ ਪਚ੍ਚੇਕਬੁਦ੍ਧਾ ਚ ਕਲਮ੍ਪਿ ਕਲਭਾਗਮ੍ਪਿ ਨ ਉਪੇਨ੍ਤਿ, ਤਸ੍ਸ ਕਿਮਞ੍ਞਂ ਆਣਣ੍ਯਂ ਭਵਿਸ੍ਸਤਿ ਅਞ੍ਞਤ੍ਰ ਧਮ੍ਮਵਿਨਯਸਙ੍ਗਾਯਨਾਤਿ ਅਧਿਪ੍ਪਾਯੋ. ਤਤ੍ਥ ਤਸ੍ਸਾਤਿ ਤਸ੍ਸ ਅਨੁਗ੍ਗਹਸ੍ਸ, ਤਸ੍ਸ ਮੇਤਿ ਵਾ ਅਤ੍ਥੋ ਗਹੇਤਬ੍ਬੋ. ਪੋਤ੍ਥਕੇਸੁ ਹਿ ਕੇਸੁਚਿ ‘‘ਤਸ੍ਸ ਮੇ’’ਤਿ ਪਾਠੋ ਦਿਸ੍ਸਤਿ. ਆਣਣ੍ਯਂ ਅਣਣਭਾਵੋ. ਸਕਕਵਚਇਸ੍ਸਰਿਯਾਨੁਪ੍ਪਦਾਨੇਨਾਤਿ ਏਤ੍ਥ ਚੀਵਰਸ੍ਸ ਨਿਦਸ੍ਸਨਵਸੇਨ ਕਵਚਸ੍ਸੇਵ ਗਹਣਂ ਕਤਂ, ਸਮਾਪਤ੍ਤਿਯਾ ਨਿਦਸ੍ਸਨਵਸੇਨ ਇਸ੍ਸਰਿਯਂ ਗਹਿਤਂ.

ਇਦਾਨਿ ਯਥਾਵੁਤ੍ਤਮਤ੍ਥਂ ਪਾਲ਼ਿਯਾ ਵਿਭਾਵੇਨ੍ਤੋ ਆਹ ਯਥਾਹਾਤਿਆਦਿ. ਤਤ੍ਥ ਏਕਮਿਦਾਹਨ੍ਤਿ ਏਤ੍ਥ ਇਦਨ੍ਤਿ ਨਿਪਾਤਮਤ੍ਤਂ. ਏਕਂ ਸਮਯਨ੍ਤਿ ਏਕਸ੍ਮਿਂ ਸਮਯੇਤਿ ਅਤ੍ਥੋ. ਪਾਵਾਯਾਤਿ ਪਾਵਾਨਗਰਤੋ. ਅਦ੍ਧਾਨਮਗ੍ਗਪ੍ਪਟਿਪਨ੍ਨੋਤਿ ਦੀਘਮਗ੍ਗਪ੍ਪਟਿਪਨ੍ਨੋ. ਦੀਘਪਰਿਯਾਯੋ ਹੇਤ੍ਥ ਅਦ੍ਧਾਨਸਦ੍ਦੋ. ਸਬ੍ਬਂ ਸੁਭਦ੍ਦਕਣ੍ਡਂ ਵਿਤ੍ਥਾਰਤੋ ਵੇਦਿਤਬ੍ਬਨ੍ਤਿ ਪਞ੍ਚਸਤਿਕਕ੍ਖਨ੍ਧਕੇ ਆਗਤਂ ਸੁਭਦ੍ਦਕਣ੍ਡਂ ਇਧ ਆਨੇਤ੍ਵਾ ਵਿਤ੍ਥਾਰੇਤਬ੍ਬਂ.

ਤਤੋ ਪਰਨ੍ਤਿ ਸੁਭਦ੍ਦਕਣ੍ਡਤੋ ਪਰਂ. ਸਬ੍ਬਂ ਸੁਭਦ੍ਦਕਣ੍ਡਂ ਵਿਤ੍ਥਾਰਤੋ ਵੇਦਿਤਬ੍ਬਨ੍ਤਿ ਇਮਿਨਾ ‘‘ਯਂ ਨ ਇਚ੍ਛਿਸ੍ਸਾਮ, ਨ ਤਂ ਕਰਿਸ੍ਸਾਮਾ’’ਤਿ ਏਤਂ ਪਰਿਯਨ੍ਤਂ ਸੁਭਦ੍ਦਕਣ੍ਡਪਾਲ਼ਿਂ ਦਸ੍ਸੇਤ੍ਵਾ ਇਦਾਨਿ ਅਵਸੇਸਂ ਉਸ੍ਸਾਹਜਨਨਪ੍ਪਕਾਰਪ੍ਪਵਤ੍ਤਂ ਪਾਲ਼ਿਮੇਵ ਦਸ੍ਸੇਨ੍ਤੋ ਹਨ੍ਦ ਮਯਂ ਆਵੁਸੋਤਿਆਦਿਮਾਹ. ਤਤ੍ਥ ਪੁਰੇ ਅਧਮ੍ਮੋ ਦਿਪ੍ਪਤੀਤਿ ਏਤ੍ਥ ‘‘ਅਧਮ੍ਮੋ ਨਾਮ ਦਸਕੁਸਲਕਮ੍ਮਪਥਪਟਿਪਕ੍ਖਭੂਤੋ ਅਧਮ੍ਮੋ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੧.ਪਠਮਮਹਾਸਙ੍ਗੀਤਿਕਥਾਵਣ੍ਣਨਾ) ਵੁਤ੍ਤਂ. ਧਮ੍ਮਸਙ੍ਗਹਣਤ੍ਥਂ ਉਸ੍ਸਾਹਜਨਨਪ੍ਪਸਙ੍ਗਤ੍ਤਾ ਪਨ ਧਮ੍ਮਵਿਨਯਾਨਂ ਅਸਙ੍ਗਾਯਨਹੇਤੁਦੋਸਗਣੋ ਸਮ੍ਭਵਤਿ, ਸੋ ਏਵ ਏਤ੍ਥ ਅਧਮ੍ਮੋ ਦਿਪ੍ਪਤਿ ਤਪ੍ਪਟਿਪਕ੍ਖੋ ਧਮ੍ਮੋ ਚ ਪਟਿਬਾਹੀਯਤੀਤਿ ਵਤ੍ਤਬ੍ਬਂ. ਅਪਿ ਚ ‘‘ਅਧਮ੍ਮਵਾਦਿਨੋ ਬਲਵਨ੍ਤੋ ਹੋਨ੍ਤਿ ਧਮ੍ਮਵਾਦਿਨੋ ਦੁਬ੍ਬਲਾ ਹੋਨ੍ਤੀ’’ਤਿ ਵੁਚ੍ਚਮਾਨਤ੍ਤਾ ਯੇਨ ਅਧਮ੍ਮੇਨ ਤੇ ਸੁਭਦ੍ਦਵਜ੍ਜਿਪੁਤ੍ਤਕਾਦਯੋ ਅਧਮ੍ਮਵਾਦਿਨੋ, ਯੇਨ ਚ ਧਮ੍ਮੇਨ ਇਤਰੇ ਧਮ੍ਮਵਾਦਿਨੋਵ ਹੋਨ੍ਤਿ. ਤੇਯੇਵ ਇਧ ‘‘ਅਧਮ੍ਮੋ’’ ¶ ‘‘ਧਮ੍ਮੋ’’ਤਿ ਚ ਵਤ੍ਤਬ੍ਬਾ. ਤਸ੍ਮਾ ਸੀਲਵਿਪਤ੍ਤਿਆਦਿਹੇਤੁਕੋ ਪਾਪਿਚ੍ਛਤਾਦਿਦੋਸਗਣੋ ਅਧਮ੍ਮੋ, ਤਪ੍ਪਟਿਪਕ੍ਖੋ ਸੀਲਸਮ੍ਪਦਾਦਿਹੇਤੁਕੋ ਅਪ੍ਪਿਚ੍ਛਤਾਦਿਗੁਣਸਮੂਹੋ ਧਮ੍ਮੋਤਿ ਚ ਗਹੇਤਬ੍ਬਂ. ਪੁਰੇ ਦਿਪ੍ਪਤੀਤਿ ਅਪਿ ਨਾਮ ਦਿਪ੍ਪਤਿ. ਅਥ ਵਾ ਯਾਵ ਅਧਮ੍ਮੋ ਧਮ੍ਮਂ ਪਟਿਬਾਹਿਤੁਂ ਸਮਤ੍ਥੋ ਹੋਤਿ, ਤਤੋ ਪੁਰੇਤਰਮੇਵਾਤਿ ¶ ਅਤ੍ਥੋ. ਦਿਪ੍ਪਤੀਤਿ ਦਿਪ੍ਪਿਸ੍ਸਤਿ. ਪੁਰੇਸਦ੍ਦਯੋਗੇਨ ਹਿ ਅਨਾਗਤਤ੍ਥੇ ਅਯਂ ਵਤ੍ਤਮਾਨਪ੍ਪਯੋਗੋ, ਯਥਾ ਪੁਰਾ ਵਸ੍ਸਤਿ ਦੇਵੋਤਿ. ਅਵਿਨਯੋਤਿ ਪਹਾਨਵਿਨਯਾਦੀਨਂ ਪਟਿਪਕ੍ਖਭੂਤੋ ਅਵਿਨਯੋ.

ਤੇਨ ਹੀਤਿ ਉਯ੍ਯੋਜਨਤ੍ਥੇ ਨਿਪਾਤੋ. ਸਕਲਨਵਙ੍ਗਸਤ੍ਥੁਸਾਸਨਪਰਿਯਤ੍ਤਿਧਰੇਤਿ ਸਕਲਂ ਸੁਤ੍ਤਗੇਯ੍ਯਾਦਿਨਵਙ੍ਗਂ ਏਤ੍ਥ, ਏਤਸ੍ਸ ਵਾ ਅਤ੍ਥੀਤਿ ਸਕਲਨਵਙ੍ਗਂ, ਸਤ੍ਥੁਸਾਸਨਂ. ਅਤ੍ਥਕਾਮੇਨ ਪਰਿਯਾਪੁਣਿਤਬ੍ਬਤੋ ਦਿਟ੍ਠਧਮ੍ਮਿਕਾਦਿਪੁਰਿਸਤ੍ਥਪਰਿਯਤ੍ਤਿਭਾਵਤੋ ਚ ‘‘ਪਰਿਯਤ੍ਤੀ’’ਤਿ ਤੀਣਿ ਪਿਟਕਾਨਿ ਵੁਚ੍ਚਨ੍ਤਿ, ਤਂ ਸਕਲਨਵਙ੍ਗਸਤ੍ਥੁਸਾਸਨਸਙ੍ਖਾਤਂ ਪਰਿਯਤ੍ਤਿਂ ਧਾਰੇਨ੍ਤੀਤਿ ਸਕਲਨਵਙ੍ਗਸਤ੍ਥੁਸਾਸਨਪਅਯਤ੍ਤਿਧਰਾ, ਤਾਦਿਸੇਤਿ ਅਤ੍ਥੋ. ਸਮਥਭਾਵਨਾਸਿਨੇਹਾਭਾਵੇਨ ਸੁਕ੍ਖਾ ਲੂਖਾ ਅਸਿਨਿਦ੍ਧਾ ਵਿਪਸ੍ਸਨਾ ਏਤੇਸਨ੍ਤਿ ਸੁਕ੍ਖਵਿਪਸ੍ਸਕਾ. ਤਿਪਿਟਕਸਬ੍ਬਪਰਿਯਤ੍ਤਿਪ੍ਪਭੇਦਧਰੇਤਿ ਤਿਣ੍ਣਂ ਪਿਟਕਾਨਂ ਸਮਾਹਾਰੋ ਤਿਪਿਟਕਂ, ਤਦੇਵ ਨਵਙ੍ਗਾਦਿਵਸੇਨ ਅਨੇਕਭੇਦਭਿਨ੍ਨਂ ਸਬ੍ਬਂ ਪਰਿਯਤ੍ਤਿਪ੍ਪਭੇਦਂ ਧਾਰੇਨ੍ਤੀਤਿ ਤਿਪਿਟਕਸਬ੍ਬਪਰਿਯਤ੍ਤਿਪ੍ਪਭੇਦਧਰਾ.

ਕਿਸ੍ਸ ਪਨਾਤਿ ਕਸ੍ਮਾ ਪਨ. ਸਿਕ੍ਖਤੀਤਿ ਸੇਕ੍ਖੋ. ਤਮੇਵਾਹ ‘‘ਸਕਰਣੀਯੋ’’ਤਿ. ਉਪਰਿਮਗ੍ਗਤ੍ਤਯਕਿਚ੍ਚਸ੍ਸ ਅਪਰਿਯੋਸਿਤਤ੍ਤਾ ਸਕਿਚ੍ਚੋਤਿ ਅਤ੍ਥੋ. ਅਸ੍ਸਾਤਿ ਅਨੇਨ. ਬਹੁਕਾਰਤ੍ਤਾਤਿ ਬਹੁਪਕਾਰਤ੍ਤਾ. ਅਸ੍ਸਾਤਿ ਭਵੇਯ੍ਯ. ਅਤਿਵਿਯ ਵਿਸ੍ਸਤ੍ਥੋਤਿ ਅਤਿਵਿਯ ਵਿਸ੍ਸਾਸਿਕੋ. ਨਨ੍ਤਿ ਆਨਨ੍ਦਤ੍ਥੇਰਂ ਓਵਦਤੀਤਿ ਸਮ੍ਬਨ੍ਧੋ. ਆਨਨ੍ਦਤ੍ਥੇਰਸ੍ਸ ਕਦਾਚਿ ਅਸਞ੍ਞਤਾਯ ਨਵਕਾਯ ਸਦ੍ਧਿਵਿਹਾਰਿਕਪਰਿਸਾਯ ਜਨਪਦਚਾਰਿਕਾਚਰਣਂ, ਤੇਸਞ੍ਚ ਸਦ੍ਧਿਵਿਹਾਰਿਕਾਨਂ ਏਕਕ੍ਖਣੇ ਉਪ੍ਪਬ੍ਬਜ੍ਜਨਞ੍ਚ ਪਟਿਚ੍ਚ ਮਹਾਕਸ੍ਸਪਤ੍ਥੇਰੋ ਤਂ ਨਿਗ੍ਗਣ੍ਹਨ੍ਤੋ ਏਵਮਾਹ ‘‘ਨ ਵਾਯਂ ਕੁਮਾਰਕੋ ਮਤ੍ਤਮਞ੍ਞਾਸੀ’’ਤਿ. ਏਤ੍ਥ ਚ ਵਾ-ਸਦ੍ਦੋ ਪਦਪੂਰਣੋ, ਅਯਂ ਕੁਮਾਰੋ ਅਤ੍ਤਨੋ ਪਮਾਣਂ ਨ ਪਟਿਜਾਨਾਤੀਤਿ ਥੇਰਂ ਤਜ੍ਜੇਨ੍ਤੋ ਆਹ. ਤਤ੍ਰਾਤਿ ਏਵਂ ਸਤਿ.

ਕਿਞ੍ਚਾਪਿ ਸੇਕ੍ਖੋਤਿ ਇਦਂ ਨ ਸੇਕ੍ਖਾਨਂ ਅਗਤਿਗਮਨਸਬ੍ਭਾਵੇਨ ਵੁਤ੍ਤਂ, ਅਸੇਕ੍ਖਾਨਞ੍ਞੇਵ ਪਨ ਉਚ੍ਚਿਨਿਤ੍ਵਾ ਗਹਿਤਤ੍ਤਾਤਿ ਦਟ੍ਠਬ੍ਬਂ. ਤਸ੍ਮਾ ‘‘ਕਿਞ੍ਚਾਪਿ ਸੇਕ੍ਖੋ, ਤਥਾਪਿ ਥੇਰੋ ਆਯਸ੍ਮਨ੍ਤਮ੍ਪਿ ਆਨਨ੍ਦਂ ਉਚ੍ਚਿਨਤੂ’’ਤਿ ਏਵਮੇਤ੍ਥ ਸਮ੍ਬਨ੍ਧੋ ਵੇਦਿਤਬ੍ਬੋ, ਨ ਪਨ ਕਿਞ੍ਚਾਪਿ ਸੇਕ੍ਖੋ, ਤਥਾਪਿ ਅਭਬ੍ਬੋ ਅਗਤਿਂ ਗਨ੍ਤੁਨ੍ਤਿ ਯੋਜੇਤਬ੍ਬਂ. ਅਭਬ੍ਬੋਤਿਆਦਿ ਪਨਸ੍ਸ ਸਭਾਵਕਥਨਂ. ਤਤ੍ਥ ¶ ਛਨ੍ਦਾਤਿ ਛਨ੍ਦੇਨ ਸਿਨੇਹੇਨ. ਅਗਤਿਂ ਗਨ੍ਤੁਨ੍ਤਿ ਅਕਤ੍ਤਬ੍ਬਂ ਕਾਤੁਂ. ਪਰਿਯਤ੍ਤੋਤਿ ਅਧੀਤੋ ਉਗ੍ਗਹਿਤੋ.

ਰਾਜਗਹਂ ¶ ਖੋ ਮਹਾਗੋਚਰਨ੍ਤਿ ਏਤ੍ਥ ਗਾਵੋ ਚਰਨ੍ਤਿ ਏਤ੍ਥਾਤਿ ਗੋਚਰੋ, ਗੁਨ੍ਨਂ ਗੋਚਰਟ੍ਠਾਨਂ. ਗੋਚਰੋ ਵਿਯਾਤਿ ਗੋਚਰੋ, ਭਿਕ੍ਖਾਚਰਣਟ੍ਠਾਨਂ. ਸੋ ਮਹਨ੍ਤੋ ਅਸ੍ਸਾਤਿ ਮਹਾਗੋਚਰਂ, ਰਾਜਗਹਂ. ਉਕ੍ਕੋਟੇਯ੍ਯਾਤਿ ਨਿਵਾਰੇਯ੍ਯ.

ਸਤ੍ਤਸੁ ਸਾਧੁਕੀਲ਼ਨਦਿਵਸੇਸੂਤਿ ਏਤ੍ਥ ਸਂਵੇਗਵਤ੍ਥੁਂ ਕਿਤ੍ਤੇਤ੍ਵਾ ਕਿਤ੍ਤੇਤ੍ਵਾ ਸਾਧੁਕਂ ਏਵ ਪੂਜਾਵਸੇਨ ਕੀਲ਼ਨਤੋ ਸਾਧੁਕੀਲ਼ਨਂ. ਉਪਕਟ੍ਠਾਤਿ ਆਸਨ੍ਨਾ. ਵਸ੍ਸਂ ਉਪਨੇਤਿ ਉਪਗਚ੍ਛਤਿ ਏਤ੍ਥਾਤਿ ਵਸ੍ਸੂਪਨਾਯਿਕਾ.

ਤਤ੍ਰ ਸੁਦਨ੍ਤਿ ਤਸ੍ਸਂ ਸਾਵਤ੍ਥਿਯਂ, ਸੁਦਨ੍ਤਿ ਨਿਪਾਤਮਤ੍ਤਂ. ਉਸ੍ਸਨ੍ਨਧਾਤੁਕਨ੍ਤਿ ਉਪਚਿਤਪਿਤ੍ਤਸੇਮ੍ਹਾਦਿਧਾਤੁਕਂ. ਸਮਸ੍ਸਾਸੇਤੁਨ੍ਤਿ ਸਨ੍ਤਪ੍ਪੇਤੁਂ. ਦੁਤਿਯਦਿਵਸੇਤਿ ਜੇਤਵਨਵਿਹਾਰਂ ਪਵਿਟ੍ਠਦਿਵਸਤੋ ਦੁਤਿਯਦਿਵਸੇਤਿ ਵਦਨ੍ਤਿ. ਵਿਰਿਚ੍ਚਤਿ ਏਤੇਨਾਤਿ ਵਿਰੇਚਨਂ. ਓਸਧਪਰਿਭਾਵਿਤਂ ਖੀਰਮੇਵ ਵਿਰੇਚਨਨ੍ਤਿ ਖੀਰਵਿਰੇਚਨਂ. ਯਂ ਸਨ੍ਧਾਯਾਤਿ ਯਂ ਭੇਸਜ੍ਜਪਾਨਂ ਸਨ੍ਧਾਯ ਵੁਤ੍ਤਂ. ਭੇਸਜ੍ਜਮਤ੍ਤਾਤਿ ਅਪ੍ਪਮਤ੍ਤਕਂ ਭੇਸਜ੍ਜਂ. ਅਪ੍ਪਤ੍ਥੋ ਹਿ ਅਯਂ ਮਤ੍ਤਾ-ਸਦ੍ਦੋ ਮਤ੍ਤਾ ਸੁਖਪਰਿਚ੍ਚਾਗਾਤਿਆਦੀਸੁ (ਧ. ਪ. ੨੯੦) ਵਿਯ.

ਖਣ੍ਡਫੁਲ੍ਲਪ੍ਪਟਿਸਙ੍ਖਰਣਨ੍ਤਿ ਏਤ੍ਥ ਖਣ੍ਡਨ੍ਤਿ ਛਿਨ੍ਨਂ, ਫੁਲ੍ਲਨ੍ਤਿ ਭਿਨ੍ਨਂ, ਤੇਸਂ ਪਟਿਸਙ੍ਖਰਣਂ ਅਭਿਨਵਕਰਣਂ.

ਪਰਿਚ੍ਛੇਦਵਸੇਨ ਵੇਦਿਯਤਿ ਦਿਸ੍ਸਤੀਤਿ ਪਰਿਵੇਣਂ. ਤਤ੍ਥਾਤਿ ਤੇਸੁ ਵਿਹਾਰੇਸੁ ਖਣ੍ਡਫੁਲ੍ਲਪ੍ਪਟਿਸਙ੍ਖਰਣਨ੍ਤਿ ਸਮ੍ਬਨ੍ਧੋ. ਪਠਮਂ ਮਾਸਨ੍ਤਿ ਵਸ੍ਸਾਨਸ੍ਸ ਪਠਮਂ ਮਾਸਂ, ਅਚ੍ਚਨ੍ਤਸਂਯੋਗੇ ਚੇਤਂ ਉਪਯੋਗਵਚਨਂ. ਸੇਨਾਸਨਵਤ੍ਤਾਨਂ ਬਹੂਨਂ ਪਞ੍ਞਤ੍ਤਤ੍ਤਾ, ਸੇਨਾਸਨਕ੍ਖਨ੍ਧਕੇ (ਚੂਲ਼ਵ. ੨੯੪ ਆਦਯੋ) ਸੇਨਾਸਨਪਟਿਬਦ੍ਧਾਨਂ ਬਹੂਨਂ ਕਮ੍ਮਾਨਂ ਵਿਹਿਤਤ੍ਤਾ ‘‘ਭਗਵਤਾ…ਪੇ… ਵਣ੍ਣਿਤ’’ਨ੍ਤਿ ਵੁਤ੍ਤਂ.

ਦੁਤਿਯਦਿਵਸੇਤਿ ‘‘ਖਣ੍ਡਫੁਲ੍ਲਪ੍ਪਟਿਸਙ੍ਖਰਣਂ ਕਰੋਮਾ’’ਤਿ ਚਿਨ੍ਤਿਤਦਿਵਸਤੋ ਦੁਤਿਯਦਿਵਸੇ. ਵਸ੍ਸੂਪਨਾਯਿਕਦਿਵਸੇਯੇਵ ਤੇ ਏਵਂ ਚਿਨ੍ਤੇਸੁਂ. ਸਿਰਿਯਾ ਨਿਕੇਤਨਮਿਵਾਤਿ ਸਿਰਿਯਾ ਨਿਵਾਸਨਟ੍ਠਾਨਂ ਵਿਯ. ਏਕਸ੍ਮਿਂ ਪਾਨੀਯਤਿਤ੍ਥੇ ਸਨ੍ਨਿਪਤਨ੍ਤਾ ਪਕ੍ਖਿਨੋ ਵਿਯ ਸਬ੍ਬੇਸਂ ਜਨਾਨਂ ਚਕ੍ਖੂਨਿ ਮਣ੍ਡਪੇਯੇਵ ਨਿਪਤਨ੍ਤੀਤਿ ਵੁਤ੍ਤਂ ‘ਏਕਨਿਪਾਤਤਿਤ੍ਥਮਿਵ ਚ ਦੇਵਮਨੁਸ੍ਸਨਯਨਵਿਹਙ੍ਗਾਨ’’ਨ੍ਤਿ. ਲੋਕਰਾਮਣੇਯ੍ਯਕਨ੍ਤਿ ਲੋਕੇ ਰਮਣੀਯਭਾਵਂ, ਰਮਣਂ ਅਰਹਤੀਤਿ ਵਾ ਲੋਕਰਾਮਣੇਯ੍ਯਕਂ ¶ . ਦਟ੍ਠਬ੍ਬਸਾਰਮਣ੍ਡਨ੍ਤਿ ਦਟ੍ਠਬ੍ਬੇਸੁ ਸਾਰਂ ਦਟ੍ਠਬ੍ਬਸਾਰਂ, ਤਤੋ ਵਿਪ੍ਪਸਨ੍ਨਨ੍ਤਿ ਦਟ੍ਠਬ੍ਬਸਾਰਮਣ੍ਡਂ. ਅਥ ਵਾ ਦਟ੍ਠਬ੍ਬੋ ਸਾਰਭੂਤੋ ਵਿਸਿਟ੍ਠਤਰੋ ਮਣ੍ਡੋ ¶ ਮਣ੍ਡਨਂ ਅਲਙ੍ਕਾਰੋ ਏਤਸ੍ਸਾਤਿ ਦਟ੍ਠਬ੍ਬਸਾਰਮਣ੍ਡੋ, ਮਣ੍ਡਪੋ. ਮਣ੍ਡਂ ਸੂਰਿਯਰਸ੍ਮਿਂ ਪਾਤਿ ਨਿਵਾਰੇਤੀਤਿ ਮਣ੍ਡਪੋ. ਵਿਵਿਧਾਨਿ ਕੁਸੁਮਦਾਮਾਨਿ ਚੇਵ ਮੁਤ੍ਤੋਲਮ੍ਬਕਾਨਿ ਚ ਵਿਨਿਗ੍ਗਲਨ੍ਤਂ ਵਮੇਨ੍ਤਂ ਨਿਕ੍ਖਾਮੇਨ੍ਤਮਿਵ ਚਾਰੁ ਸੋਭਨਂ ਵਿਤਾਨਂ ਏਤ੍ਥਾਤਿ ਵਿਵਿਧਕੁਸੁਮਦਾਮੋਲਮ੍ਬਕਵਿਨਿਗ੍ਗਲਨ੍ਤਚਾਰੁਵਿਤਾਨੋ. ਨਾਨਾਪੁਪ੍ਫੂਪਹਾਰਵਿਚਿਤ੍ਤਸੁਪਰਿਨਿਟ੍ਠਿਤਭੂਮਿਕਮ੍ਮਤ੍ਤਾ ਏਵ ‘‘ਰਤਨਵਿਚਿਤ੍ਤਮਣਿਕੋਟ੍ਟਿਮਤਲਮਿਵਾ’’ਤਿ ਵੁਤ੍ਤਂ. ਏਤ੍ਥ ਚ ਮਣਿਯੋ ਕੋਟ੍ਟੇਤ੍ਵਾ ਕਤਤਲਂ ਮਣਿਕੋਟ੍ਟਿਮਤਲਂ ਨਾਮ, ਤਮਿਵਾਤਿ ਵੁਤ੍ਤਂ ਹੋਤਿ. ਆਸਨਾਰਹਨ੍ਤਿ ਨਿਸੀਦਨਾਰਹਂ. ਦਨ੍ਤਖਚਿਤਨ੍ਤਿ ਦਨ੍ਤੇਹਿ ਖਚਿਤਂ.

ਆਵਜ੍ਜੇਸੀਤਿ ਉਪਨਾਮੇਸਿ. ਅਨੁਪਾਦਾਯਾਤਿ ਤਣ੍ਹਾਦਿਟ੍ਠਿਵਸੇਨ ਕਞ੍ਚਿ ਧਮ੍ਮਂ ਅਗ੍ਗਹੇਤ੍ਵਾ. ਕਥਾਦੋਸੋਤਿ ਕਥਾਯ ਅਸਚ੍ਚਂ ਨਾਮ ਨਤ੍ਥਿ.

ਯਥਾਵੁਡ੍ਢਨ੍ਤਿ ਵੁਡ੍ਢਪਟਿਪਾਟਿਂ ਅਨਤਿਕ੍ਕਮਿਤ੍ਵਾ. ਏਕੇਤਿ ਮਜ੍ਝਿਮਭਾਣਕਾਨਂਯੇਵ ਏਕੇ. ਪੁਬ੍ਬੇ ਵੁਤ੍ਤਮ੍ਪਿ ਹਿ ਸਬ੍ਬਂ ਮਜ੍ਝਿਮਭਾਣਕਾ ਵਦਨ੍ਤਿਯੇਵਾਤਿ ਵੇਦਿਤਬ੍ਬਂ. ਦੀਘਭਾਣਕਾ ਪਨ ‘‘ਪਦਸਾਵ ਥੇਰੋ ਸਨ੍ਨਿਪਾਤਮਾਗਤੋ’’ਤਿ ਵਦਨ੍ਤਿ. ਤੇਸੁ ਕੇਚਿ ‘‘ਆਕਾਸੇਨਾ’’ਤਿ, ‘‘ਤੇ ਸਬ੍ਬੇਪਿ ਤਥਾ ਤਥਾ ਆਗਤਦਿਵਸਾਨਮ੍ਪਿ ਅਤ੍ਥਿਤਾਯ ਏਕਮੇਕਂ ਗਹੇਤ੍ਵਾ ਤਥਾ ਤਥਾ ਵਦਿਂਸੂ’’ਤਿ ਵਦਨ੍ਤਿ.

ਕਂ ਧੁਰਂ ਕਤ੍ਵਾਤਿ ਕਂ ਜੇਟ੍ਠਕਂ ਕਤ੍ਵਾ. ਬੀਜਨਿਂ ਗਹੇਤ੍ਵਾਤਿ ਏਤ੍ਥ ਬੀਜਨੀਗਹਣਂ ਪਰਿਸਾਯ ਧਮ੍ਮਕਥਿਕਾਨਂ ਹਤ੍ਥਕੁਕ੍ਕੁਚ੍ਚਵਿਨੋਦਨਮੁਖਵਿਕਾਰਪਟਿਚ੍ਛਾਦਨਤ੍ਥਂ ਧਮ੍ਮਤਾਵਸੇਨ ਆਚਿਣ੍ਣਨ੍ਤਿ ਵੇਦਿਤਬ੍ਬਂ. ਤੇਨੇਵ ਹਿ ਅਚ੍ਚਨ੍ਤਸਞ੍ਞਤਪ੍ਪਤ੍ਤਾ ਬੁਦ੍ਧਾਪਿ ਸਾਵਕਾਪਿ ਧਮ੍ਮਕਥਿਕਾਨਂ ਧਮ੍ਮਤਾਦਸ੍ਸਨਤ੍ਥਮੇਵ ਚਿਤ੍ਤਬੀਜਨਿਂ ਗਣ੍ਹਨ੍ਤਿ. ਪਠਮਂ, ਆਵੁਸੋ ਉਪਾਲਿ, ਪਾਰਾਜਿਕਂ ਕਤ੍ਥ ਪਞ੍ਞਤ੍ਤਨ੍ਤਿ ਏਤ੍ਥ ਕਥਂ ਸਙ੍ਗੀਤਿਯਾ ਪੁਬ੍ਬੇ ਪਠਮਭਾਵੋ ਸਿਦ੍ਧੋਤਿ? ਪਾਤਿਮੋਕ੍ਖੁਦ੍ਦੇਸਾਨੁਕ੍ਕਮਾਦਿਨਾ ਪੁਬ੍ਬੇ ਪਠਮਭਾਵਸ੍ਸ ਸਿਦ੍ਧਤ੍ਤਾ. ਯੇਭੁਯ੍ਯੇਨ ਹਿ ਤੀਣਿ ਪਿਟਕਾਨਿ ਭਗਵਤੋ ਧਰਮਾਨਕਾਲੇਯੇਵ ਇਮਿਨਾ ਅਨੁਕ੍ਕਮੇਨ ਸਜ੍ਝਾਯਿਤਾਨਿ, ਤੇਨੇਵ ਕਮੇਨ ਪਚ੍ਛਾਪਿ ਸਙ੍ਗੀਤਾਨਿ ਵਿਸੇਸਤੋ ਵਿਨਯਾਭਿਧਮ੍ਮਪਿਟਕਾਨੀਤਿ ਦਟ੍ਠਬ੍ਬਂ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ ਨਿਮਿਤ੍ਤਤ੍ਥੇ ਭੁਮ੍ਮਂ. ਅਨ੍ਤਰਾ ਚ, ਭਨ੍ਤੇ, ਰਾਜਗਹਂ ਅਨ੍ਤਰਾ ਚ ਨਾਲ਼ਨ੍ਦਨ੍ਤਿ ਰਾਜਗਹਸ੍ਸ ਚ ਨਾਲ਼ਨ੍ਦਾਯ ਚ ਅਨ੍ਤਰਾ, ਵਿਵਰੇ ਮਜ੍ਝੇਤਿ ਅਤ੍ਥੋ. ਅਨ੍ਤਰਾ-ਸਦ੍ਦੇਨ ਪਨ ਯੁਤ੍ਤਤ੍ਤਾ ¶ ਉਪਯੋਗਵਚਨਂ ਕਤਂ. ਰਾਜਾਗਾਰਕੇਤਿ ਰਞ੍ਞੋ ਕੀਲ਼ਨਤ੍ਥਾਯ ਕਤੇ ਅਗਾਰਕੇ. ਅਮ੍ਬਲਟ੍ਠਿਕਾਯਨ੍ਤਿ ਰਞ੍ਞੋ ਏਵਂਨਾਮਕਂ ਉਯ੍ਯਾਨਂ. ਕੇਨ ਸਦ੍ਧਿਨ੍ਤਿ ਇਧ ਕਸ੍ਮਾ ਵੁਤ੍ਤਨ੍ਤਿ? ਯਸ੍ਮਾ ਪਨੇਤਂ ਨ ਭਗਵਤਾ ਏਵ ਵੁਤ੍ਤਂ, ਰਞ੍ਞਾਪਿ ਕਿਞ੍ਚਿ ਕਿਞ੍ਚਿ ਵੁਤ੍ਤਮਤ੍ਥਿ, ਤਸ੍ਮਾ ‘‘ਕਮਾਰਬ੍ਭਾ’’ਤਿ ਅਵਤ੍ਵਾ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਵੇਦੇਹਿਪੁਤ੍ਤੇਨਾਤਿ ਅਯਂ ਕੋਸਲਰਞ੍ਞੋ ਧੀਤਾਯ ਪੁਤ੍ਤੋ, ਨ ਵਿਦੇਹਰਞ੍ਞੋ ਧੀਤਾਯ. ਯਸ੍ਮਾ ਮਾਤਾ ਪਨਸ੍ਸ ਪਣ੍ਡਿਤਾ, ਤਸ੍ਮਾ ਸਾ ਵੇਦੇਨ ਞਾਣੇਨ ਈਹਤਿ ਘਟਤਿ ਵਾਯਮਤੀਤਿ ‘‘ਵੇਦੇਹੀ’’ਤਿ ਪਾਕਟਨਾਮਾ ਜਾਤਾਤਿ ਵੇਦਿਤਬ੍ਬਾ.

ਏਵਂ ¶ ਨਿਮਿਤ੍ਤਪਯੋਜਨਕਾਲਦੇਸਦੇਸਕਕਾਰਕਕਰਣਪ੍ਪਕਾਰੇਹਿ ਪਠਮਮਹਾਸਙ੍ਗੀਤਿਂ ਦਸ੍ਸੇਤ੍ਵਾ ਇਦਾਨਿ ਤਤ੍ਥ ਵਵਤ੍ਥਾਪਿਤੇਸੁ ਧਮ੍ਮਵਿਨਯੇਸੁ ਨਾਨਪ੍ਪਕਾਰਕੋਸਲ੍ਲਤ੍ਥਂ ਏਕਵਿਧਾਦਿਭੇਦੇ ਦਸ੍ਸੇਤੁਂ ਤਦੇਤਂ ਸਬ੍ਬਮ੍ਪੀਤਿਆਦਿਮਾਹ. ਤਤ੍ਥ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਨ੍ਤਿ ਏਤ੍ਥ ਅਨਾਵਰਣਞਾਣਪਦਟ੍ਠਾਨਂ ਮਗ੍ਗਞਾਣਂ, ਮਗ੍ਗਞਾਣਪਦਟ੍ਠਾਨਞ੍ਚ ਅਨਾਵਰਣਞਾਣਂ ‘‘ਸਮ੍ਮਾਸਮ੍ਬੋਧੀ’’ਤਿ ਵੁਚ੍ਚਤਿ. ਪਚ੍ਚਵੇਕ੍ਖਨ੍ਤੇਨ ਵਾਤਿ ਉਦਾਨਾਦਿਵਸੇਨ ਪਵਤ੍ਤਧਮ੍ਮਂ ਸਨ੍ਧਾਯਾਹ. ਵਿਮੁਤ੍ਤਿਰਸਨ੍ਤਿ ਅਰਹਤ੍ਤਫਲਸ੍ਸਾਦਂ, ਵਿਮੁਤ੍ਤਿਸਮ੍ਪਤ੍ਤਿਕਂ ਵਾ ਅਗ੍ਗਫਲਨਿਪ੍ਫਾਦਨਤੋ, ਵਿਮੁਤ੍ਤਿਕਿਚ੍ਚਂ ਵਾ ਕਿਲੇਸਾਨਂ ਅਚ੍ਚਨ੍ਤਵਿਮੁਤ੍ਤਿਸਮ੍ਪਾਦਨਤੋ. ਅਵਸੇਸਂ ਬੁਦ੍ਧਵਚਨਂ ਧਮ੍ਮੋਤਿ ਏਤ੍ਥ ਯਦਿਪਿ ਧਮ੍ਮੋ ਏਵ ਵਿਨਯੋਪਿ ਪਰਿਯਤ੍ਤਿਯਾਦਿਭਾਵਤੋ, ਤਥਾਪਿ ਵਿਨਯਸਦ੍ਦਸਨ੍ਨਿਧਾਨੇਨ ਭਿਨ੍ਨਾਧਿਕਰਣਭਾਵੇਨ ਪਯੁਤ੍ਤੋ ਧਮ੍ਮ-ਸਦ੍ਦੋ ਵਿਨਯਤਨ੍ਤਿਵਿਰਹਿਤਂ ਤਨ੍ਤਿਂ ਦੀਪੇਤਿ, ਯਥਾ ਪੁਞ੍ਞਞਾਣਸਮ੍ਭਾਰੋ ਗੋਬਲਿਬਦ੍ਦਨ੍ਤਿਆਦਿ.

ਅਨੇਕਜਾਤਿਸਂਸਾਰਨ੍ਤਿ ਇਮਿਸ੍ਸਾ ਗਾਥਾਯ ਅਯਂ ਸਙ੍ਖੇਪਤ੍ਥੋ – ਅਹਂ ਇਮਸ੍ਸ ਅਤ੍ਤਭਾਵਗੇਹਸ੍ਸ ਕਾਰਕਂ ਤਣ੍ਹਾਵਡ੍ਢਕਿਂ ਗਵੇਸਨ੍ਤੋ ਯੇਨ ਞਾਣੇਨ ਤਂ ਦਟ੍ਠੁਂ ਸਕ੍ਕਾ, ਤਂ ਬੋਧਿਞਾਣਂ ਅਨਿਬ੍ਬਿਸਂ ਅਲਭਨ੍ਤੋ ਏਵ ਅਭਿਨੀਹਾਰਤੋ ਪਭੁਤਿ ਏਤ੍ਤਕਂ ਕਾਲਂ ਅਨੇਕਜਾਤਿਸਤਸਹਸ੍ਸਸਙ੍ਖ੍ਯਂ ਇਮਂ ਸਂਸਾਰਵਟ੍ਟਂ ਸਨ੍ਧਾਵਿਸ੍ਸਂ ਸਂਸਰਿਂ, ਯਸ੍ਮਾ ਜਰਾਬ੍ਯਾਧਿਮਰਣਮਿਸ੍ਸਤਾਯ ਜਾਤਿ ਨਾਮੇਸਾ ਪੁਨਪ੍ਪੁਨਂ ਉਪਗਨ੍ਤੁਂ ਦੁਕ੍ਖਾ, ਨ ਚ ਸਾ ਤਸ੍ਮਿਂ ਅਦਿਟ੍ਠੇ ਨਿਵਤ੍ਤਤਿ, ਤਸ੍ਮਾ ਤਂ ਗਵੇਸਨ੍ਤੋ ਸਨ੍ਧਾਵਿਸ੍ਸਨ੍ਤਿ ਅਤ੍ਥੋ. ਦਿਟ੍ਠੋਸੀਤਿ ਇਦਾਨਿ ਮਯਾ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਨ੍ਤੇਨ ਦਿਟ੍ਠੋ ਅਸਿ. ਪੁਨ ਗੇਹਨ੍ਤਿ ਪੁਨ ਇਮਂ ਅਤ੍ਤਭਾਵਸਙ੍ਖਾਤਂ ਮਮ ਗੇਹਂ. ਨ ਕਾਹਸੀਤਿ ਨ ਕਰਿਸ੍ਸਸਿ. ਕਾਰਣਮਾਹ ਸਬ੍ਬਾ ਤੇਤਿਆਦਿ. ਤਵ ਸਬ੍ਬਾ ਅਵਸੇਸਕਿਲੇਸਫਾਸੁਕਾ ਮਯਾ ਭਗ੍ਗਾ. ਇਮਸ੍ਸ ਤਯਾ ਕਤਸ੍ਸ ਅਤ੍ਤਭਾਵਗੇਹਸ੍ਸ ਅਵਿਜ੍ਜਾਸਙ੍ਖਾਤਂ ਕੂਟਂ ਕਣ੍ਣਿਕਮਣ੍ਡਲਂ ¶ ਵਿਸਙ੍ਖਤਂ ਵਿਦ੍ਧਂਸਿਤਂ. ਵਿਸਙ੍ਖਾਰਂ ਨਿਬ੍ਬਾਨਂ ਆਰਮ੍ਮਣਕਰਣਵਸੇਨ ਗਤਂ ਮਮ ਚਿਤ੍ਤਂ. ਅਹਞ੍ਚ ਤਣ੍ਹਾਨਂ ਖਯਸਙ੍ਖਾਤਂ ਅਰਹਤ੍ਤਮਗ੍ਗਫਲਂ ਅਜ੍ਝਗਾ ਪਤ੍ਤੋਸ੍ਮੀਤਿ ਅਤ੍ਥੋ. ਕੇਚਿ ਪਨ ‘‘ਵਿਸਙ੍ਖਾਰਗਤਂ ਚਿਤ੍ਤਮੇਵ ਤਣ੍ਹਾਨਂ ਖਯਂ ਅਜ੍ਝਗਾ’’ਤਿ ਏਵਮ੍ਪਿ ਅਤ੍ਥਂ ਵਦਨ੍ਤਿ.

ਕੇਚੀਤਿ ਖਨ੍ਧਕਭਾਣਕਾ. ਪਾਟਿਪਦਦਿਵਸੇਤਿ ਇਦਂ ਪਚ੍ਚਵੇਕ੍ਖਨ੍ਤਸ੍ਸ ਉਪ੍ਪਨ੍ਨਾਤਿ ਏਤੇਨ ਸਮ੍ਬਨ੍ਧਿਤਬ੍ਬਂ, ਨ ਸਬ੍ਬਞ੍ਞੁਭਾਵਪ੍ਪਤ੍ਤਸ੍ਸਾਤਿ ਏਤੇਨ. ਸੋਮਨਸ੍ਸਮਯਞਾਣੇਨਾਤਿ ਸੋਮਨਸ੍ਸਸਮ੍ਪਯੁਤ੍ਤਞਾਣੇਨ. ਆਮਨ੍ਤਯਾਮੀਤਿ ਨਿਵੇਦਯਾਮਿ, ਬੋਧੇਮੀਤਿ ਅਤ੍ਥੋ. ਅਨ੍ਤਰੇਤਿ ਅਨ੍ਤਰਾਲ਼ੇ, ਵੇਮਜ੍ਝੇਤਿ ਅਤ੍ਥੋ.

ਸੁਤ੍ਤਨ੍ਤਪਿਟਕਨ੍ਤਿ ਯਥਾ ਕਮ੍ਮਮੇਵ ਕਮ੍ਮਨ੍ਤਂ, ਏਵਂ ਸੁਤ੍ਤਮੇਵ ਸੁਤ੍ਤਨ੍ਤਨ੍ਤਿ ਵੇਦਿਤਬ੍ਬਂ. ਅਸਙ੍ਗੀਤਨ੍ਤਿ ਸਙ੍ਗੀਤਿਕ੍ਖਨ੍ਧਕ (ਚੂਲ਼ਵ. ੪੩੭ ਆਦਯੋ) ਕਥਾਵਤ੍ਥੁਪ੍ਪਕਰਣਾਦਿਕਂ. ਸੋਲ਼ਸਹਿ ਵਾਰੇਹਿ ¶ ਉਪਲਕ੍ਖਿਤਤ੍ਤਾ ‘‘ਸੋਲ਼ਸ ਪਰਿਵਾਰਾ’’ਤਿ ਵੁਤ੍ਤਂ. ਤਥਾ ਹਿ ਪਰਿਵਾਰਪਾਲ਼ਿਯਂ (ਪਰਿ. ੧ ਆਦਯੋ) ਪਠਮਂ ਪਾਰਾਜਿਕਂ ਕਤ੍ਥ ਪਞ੍ਞਤ੍ਤਨ੍ਤਿਆਦਿਨਾ ਵੁਤ੍ਤਂ. ਪਞ੍ਞਤ੍ਤਿਵਾਰੋ ਕਥਾਪਤ੍ਤਿਵਾਰੋ ਵਿਪਤ੍ਤਿਵਾਰੋ ਸਙ੍ਗਹਵਾਰੋ ਸਮੁਟ੍ਠਾਨਵਾਰੋ ਅਧਿਕਰਣਵਾਰੋ ਸਮਥਵਾਰੋ ਸਮੁਚ੍ਚਯਵਾਰੋਤਿ ਇਮੇ ਅਟ੍ਠ ਵਾਰਾ, ਤਦਨਨ੍ਤਰਂ ‘‘ਮੇਥੁਨਂ ਧਮ੍ਮਂ ਪਟਿਸੇਵਨਪਚ੍ਚਯਾ ਪਾਰਾਜਿਕਂ ਕਤ੍ਥ ਪਞ੍ਞਤ੍ਤ’’ਨ੍ਤਿ (ਪਰਿ. ੧੮੮) ਏਵਂ ਪਚ੍ਚਯਮਤ੍ਤਵਿਸੇਸੇਨ ਪੁਨ ਵੁਤ੍ਤਾ ਤੇਯੇਵ ਅਟ੍ਠ ਵਾਰਾ ਚਾਤਿ ਇਮੇਸਂ ਸੋਲ਼ਸਨ੍ਨਂ ਵਾਰਾਨਂ ਵਸੇਨ ਭਿਕ੍ਖੁਵਿਭਙ੍ਗਸ੍ਸ ਚ ਭਿਕ੍ਖੁਨੀਵਿਭਙ੍ਗਸ੍ਸ ਚ ਪਕਾਸਿਤਤ੍ਤਾ ਸੋਲ਼ਸਹਿ ਵਾਰੇਹਿ ਉਪਲਕ੍ਖਿਤੋ ਪਰਿਵਾਰੋ ‘‘ਸੋਲ਼ਸਪਰਿਵਾਰੋ’’ਤਿ ਵੁਤ੍ਤੋਤਿ ਵੇਦਿਤਬ੍ਬੋ.

ਦਲ਼੍ਹੀਕਮ੍ਮਸਿਥਿਲਕਰਣਪ੍ਪਯੋਜਨਾਤਿ ਇਦਂ ਲੋਕਵਜ੍ਜਪਣ੍ਣਤ੍ਤਿਵਜ੍ਜੇਸੁ ਯਥਾਕ੍ਕਮਂ ਯੋਜੇਤਬ੍ਬਂ. ਸਞ੍ਞਮਵੇਲਂ ਅਭਿਭਵਿਤ੍ਵਾ ਪਵਤ੍ਤੋ ਆਚਾਰੋ ਅਜ੍ਝਾਚਾਰੋ, ਵੀਤਿਕ੍ਕਮੋ. ਤੇਨਾਤਿ ਵਿਵਿਧਨਯਤ੍ਤਾਦਿਹੇਤੁਨਾ. ਏਤਨ੍ਤਿ ਵਿਵਿਧਵਿਸੇਸਨਯਤ੍ਤਾਤਿਆਦਿਗਾਥਾਵਚਨਂ. ਏਤਸ੍ਸਾਤਿ ਵਿਨਯਸ੍ਸ.

ਇਤਰਂ ਪਨਾਤਿ ਸੁਤ੍ਤਂ. ਅਤ੍ਤਤ੍ਥਪਰਤ੍ਥਾਦਿਭੇਦੇਤਿ ਏਤ੍ਥ ਆਦਿ-ਸਦ੍ਦੇਨ ਦਿਟ੍ਠਧਮ੍ਮਿਕਸਮ੍ਪਰਾਯਿਕਤ੍ਥੇ ਲੋਕਿਯਲੋਕੁਤ੍ਤਰਾਦਿਅਤ੍ਥੇ ਚ ਸਙ੍ਗਣ੍ਹਾਤਿ. ਵੇਨੇਯਜ੍ਝਾਸਯਾਨੁਲੋਮੇਨ ਵੁਤ੍ਤਤ੍ਤਾਤਿ ਵਿਨਯਂ ਵਿਯ ਇਸ੍ਸਰਭਾਵਤੋ ਆਣਾਪਤਿਟ੍ਠਾਪਨਵਸੇਨ ਅਦੇਸੇਤ੍ਵਾ ਵੇਨੇਯ੍ਯਾਨਂ ਅਜ੍ਝਾਸਯਾਨੁਲੋਮੇਨ ਚਰਿਤਾਨੁਰੂਪਂ ਵੁਤ੍ਤਤ੍ਤਾ. ਅਨੁਪੁਬ੍ਬਸਿਕ੍ਖਾਦਿਵਸੇਨ ਅਦੇਸੇਤ੍ਵਾ ਵੇਨੇਯ੍ਯਾਨਂ ¶ ਕਾਲਨ੍ਤਰੇ ਅਭਿਨਿਬ੍ਬਤ੍ਤਿਂ ਦਸ੍ਸੇਨ੍ਤੋ ਆਹ ‘‘ਸਸ੍ਸਮਿਵ ਫਲ’’ਨ੍ਤਿ. ਉਪਾਯਸਮਙ੍ਗੀਨਂਯੇਵ ਨਿਪ੍ਪਜ੍ਜਨਭਾਵਂ ਦਸ੍ਸੇਨ੍ਤੋ ‘‘ਧੇਨੁ ਵਿਯ ਖੀਰ’’ਨ੍ਤਿ ਆਹ. ਨ ਹਿ ਧੇਨੁਂ ਵਿਸਾਣਾਦੀਸੁ, ਅਕਾਲੇ ਵਾ ਅਵਿਜਾਤਂ ਵਾ ਦੋਹਨ੍ਤੋ ਖੀਰਂ ਪਟਿਲਭਤਿ.

ਯਨ੍ਤਿ ਯਸ੍ਮਾ. ਏਤ੍ਥਾਤਿ ਅਭਿਧਮ੍ਮੇ. ਅਭਿਧਮ੍ਮੇਤਿ ਸੁਪਿਨਨ੍ਤੇਨ ਸੁਕ੍ਕਵਿਸ੍ਸਟ੍ਠਿਯਾ ਅਨਾਪਤ੍ਤਿਭਾਵੇਪਿ ਅਕੁਸਲਚੇਤਨਾ ਉਪਲਬ੍ਭਤੀਤਿਆਦਿਨਾ ਵਿਨਯਪਞ੍ਞਤ੍ਤਿਯਾ ਸਙ੍ਕਰਵਿਰਹਿਤੇ ਧਮ੍ਮੇ, ‘‘ਪੁਬ੍ਬਾਪਰਵਿਰੋਧਾਭਾਵਤੋ ਸਙ੍ਕਰਵਿਰਹਿਤੇ ਧਮ੍ਮੇ’’ਤਿਪਿ ਵਦਨ੍ਤਿ. ਆਰਮ੍ਮਣਾਦੀਹੀਤਿ ਆਰਮ੍ਮਣਸਮ੍ਪਯੁਤ੍ਤਕਮ੍ਮਦ੍ਵਾਰਪਟਿਪਦਾਦੀਹਿ. ਲਕ੍ਖਣੀਯਤ੍ਤਾਤਿ ਸਞ੍ਜਾਨਿਤਬ੍ਬਤ੍ਤਾ. ਯਂ ਪਨੇਤ੍ਥ ਅਵਿਸਿਟ੍ਠਨ੍ਤਿ ਏਤ੍ਥ ਵਿਨਯਪਿਟਕਨ੍ਤਿਆਦੀਸੁ ਤੀਸੁ ਸਦ੍ਦੇਸੁ ਯਂ ਅਵਿਸਿਟ੍ਠਂ ਸਮਾਨਂ, ਤਂ ਪਿਟਕਸਦ੍ਦਨ੍ਤਿ ਅਤ੍ਥੋ. ਮਾ ਪਿਟਕਸਮ੍ਪਦਾਨੇਨਾਤਿ ਪਾਲ਼ਿਸਮ੍ਪਦਾਨਵਸੇਨ ਮਾ ਗਣ੍ਹਿਤ੍ਥਾਤਿ ਵੁਤ੍ਤਂ ਹੋਤਿ. ਯਥਾਵੁਤ੍ਤੇਨਾਤਿ ਏਵਂ ਦੁਵਿਧਤ੍ਥੇਨਾਤਿਆਦਿਨਾ ਵੁਤ੍ਤਪ੍ਪਕਾਰੇਨ.

ਦੇਸਨਾਸਾਸਨਕਥਾਭੇਦਨ੍ਤਿ ਏਤ੍ਥ ਦੇਸਨਾਭੇਦਂ ਸਾਸਨਭੇਦਂ ਕਥਾਭੇਦਨ੍ਤਿ ਭੇਦਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਭੇਦਨ੍ਤਿ ਚ ਨਾਨਤ੍ਤਨ੍ਤਿ ਅਤ੍ਥੋ. ਤੇਸੂਤਿ ਪਿਟਕੇਸੁ. ਸਿਕ੍ਖਾ ਚ ਪਹਾਨਾਨਿ ਚ ਗਮ੍ਭੀਰਭਾਵੋ ¶ ਚ ਸਿਕ੍ਖਾਪਹਾਨਗਮ੍ਭੀਰਭਾਵੋ, ਤਞ੍ਚ ਯਥਾਰਹਂ ਪਰਿਦੀਪਯੇਤਿ ਅਤ੍ਥੋ. ਪਰਿਯਤ੍ਤਿਭੇਦਨ੍ਤਿ ਪਰਿਯਾਪੁਣਨਭੇਦਂ ਵਿਭਾਵਯੇਤਿ ਸਮ੍ਬਨ੍ਧੋ. ਯਹਿਂ ਯਸ੍ਮਿਂ ਵਿਨਯਾਦਿਕੇ ਯਂ ਸਮ੍ਪਤ੍ਤਿਞ੍ਚ ਵਿਪਤ੍ਤਿਞ੍ਚ ਯਥਾ ਪਾਪੁਣਾਤਿ, ਤਮ੍ਪਿ ਸਬ੍ਬਂ ਵਿਭਾਵਯੇਤਿ ਸਮ੍ਬਨ੍ਧੋ. ਅਥ ਵਾ ਯਂ ਪਰਿਯਤ੍ਤਿਭੇਦਂ ਸਮ੍ਪਤ੍ਤਿਂ ਵਿਪਤ੍ਤਿਞ੍ਚ ਯਹਿਂ ਯਥਾ ਪਾਪੁਣਾਤਿ, ਤਮ੍ਪਿ ਸਬ੍ਬਂ ਵਿਭਾਵਯੇਤਿ ਯੋਜੇਤਬ੍ਬਂ. ਪਰਿਦੀਪਨਾ ਵਿਭਾਵਨਾ ਚਾਤਿ ਹੇਟ੍ਠਾ ਗਾਥਾਸੁ ਵੁਤ੍ਤਸ੍ਸ ਅਨੁਰੂਪਤੋ ਵੁਤ੍ਤਂ, ਅਤ੍ਥਤੋ ਪਨ ਏਕਮੇਵ.

ਆਣਾਰਹੇਨਾਤਿ ਆਣਂ ਪਣੇਤੁਂ ਅਰਹਤੀਤਿ ਆਣਾਰਹੋ, ਭਗਵਾ ਸਮ੍ਮਾਸਮ੍ਬੁਦ੍ਧਤ੍ਤਾ. ਸੋ ਹਿ ਮਹਾਕਾਰੁਣਿਕਤਾਯ ਚ ਅਵਿਪਰੀਤਤੋ ਦੇਸਕਭਾਵੇਨ ਪਮਾਣਵਚਨਤ੍ਤਾ ਚ ਆਣਂ ਪਣੇਤੁਂ ਅਰਹਤਿ. ਵੋਹਾਰਪਰਮਤ੍ਥਾਨਮ੍ਪਿ ਸਮ੍ਭਵਤੋ ਆਹ ‘‘ਆਣਾਬਾਹੁਲ੍ਲਤੋ’’ਤਿ. ਇਤੋ ਪਰੇਸੁਪਿ ਏਸੇਵ ਨਯੋ. ਪਠਮਨ੍ਤਿ ਵਿਨਯਪਿਟਕਂ. ਪਚੁਰਾਪਰਾਧਾ ਸੇਯ੍ਯਸਕਤ੍ਥੇਰਾਦਯੋ. ਤੇ ਹਿ ਦੋਸਬਾਹੁਲ੍ਲਤੋ ‘‘ਪਚੁਰਾਪਰਾਧਾ’’ਤਿ ਵੁਤ੍ਤਾ ¶ . ਪਚੁਰੋ ਬਹੁਕੋ ਬਹੁਲੋ ਅਪਰਾਧੋ ਦੋਸੋ ਵੀਤਿਕ੍ਕਮੋ ਯੇਸਨ੍ਤੇ ਪਚੁਰਾਪਰਾਧਾ. ਅਨੇਕਜ੍ਝਾਸਯਾਤਿਆਦੀਸੁ ਆਸਯੋਵ ਅਜ੍ਝਾਸਯੋ, ਸੋ ਚ ਅਤ੍ਥਤੋ ਦਿਟ੍ਠਿ ਞਾਣਞ੍ਚ. ਚਰਿਯਾਤਿ ਰਾਗਚਰਿਯਾਦਿਕਾ ਛ ਮੂਲਚਰਿਯਾ. ਅਥ ਵਾ ਚਰਿਯਾਤਿ ਚਰਿਤਂ, ਤਂ ਸੁਚਰਿਤਦੁਚ੍ਚਰਿਤਵਸੇਨ ਦੁਵਿਧਂ. ਅਧਿਮੁਤ੍ਤਿ ਨਾਮ ਸਤ੍ਤਾਨਂ ਪੁਬ੍ਬਪਰਿਚਯਵਸੇਨ ਅਭਿਰੁਚਿ, ਸਾ ਦੁਵਿਧਾ ਹੀਨਪਣੀਤਭੇਦੇਨ. ਯਥਾਨੁਲੋਮਨ੍ਤਿ ਅਜ੍ਝਾਸਯਾਦੀਨਂ ਅਨੁਰੂਪਂ. ਯਥਾਧਮ੍ਮਨ੍ਤਿ ਧਮ੍ਮਸਭਾਵਾਨੁਰੂਪਂ.

ਸਂਵਰਾਸਂਵਰੋਤਿ ਏਤ੍ਥ ਖੁਦ੍ਦਕੋ ਮਹਨ੍ਤੋ ਚ ਸਂਵਰੋਤਿ ਅਤ੍ਥੋ. ਵੁਡ੍ਢਿਅਤ੍ਥੋ ਹੇਤ੍ਥ ਅ-ਕਾਰੋ. ਦਿਟ੍ਠਿਵਿਨਿਵੇਠਨਾਤਿ ਦਿਟ੍ਠਿਯਾ ਵਿਮੋਚਨਂ. ਸੁਤ੍ਤਨ੍ਤਪਾਲ਼ਿਯਂ ਵਿਵਿਚ੍ਚੇਵ ਕਾਮੇਹੀਤਿਆਦਿਨਾ (ਦੀ. ਨਿ. ੧.੨੨੬; ਸਂ. ਨਿ. ੨.੧੫੨) ਸਮਾਧਿਦੇਸਨਾਬਾਹੁਲ੍ਲਤੋ ਸੁਤ੍ਤਨ੍ਤਪਿਟਕੇ ‘‘ਅਧਿਚਿਤ੍ਤਸਿਕ੍ਖਾ’’ਤਿ ਵੁਤ੍ਤਂ. ਵੀਤਿਕ੍ਕਮਪ੍ਪਹਾਨਂ ਕਿਲੇਸਾਨਨ੍ਤਿ ਸਂਕਿਲੇਸਧਮ੍ਮਾਨਂ, ਕਮ੍ਮਕਿਲੇਸਾਨਂ ਵਾ ਯੋ ਕਾਯਵਚੀਦ੍ਵਾਰੇਹਿ ਵੀਤਿਕ੍ਕਮੋ, ਤਸ੍ਸ ਪਹਾਨਂ. ਅਨੁਸਯਵਸੇਨ ਸਨ੍ਤਾਨਮਨੁਵਤ੍ਤਨ੍ਤਾ ਕਿਲੇਸਾ ਪਰਿਯੁਟ੍ਠਿਤਾਪਿ ਸੀਲਭੇਦਵਸੇਨ ਵੀਤਿਕ੍ਕਮਿਤੁਂ ਨ ਲਭਨ੍ਤੀਤਿ ਆਹ ‘‘ਵੀਤਿਕ੍ਕਮਪਟਿਪਕ੍ਖਤ੍ਤਾ ਸੀਲਸ੍ਸਾ’’ਤਿ. ਪਰਿਯੁਟ੍ਠਾਨਪ੍ਪਹਾਨਨ੍ਤਿ ਓਕਾਸਦਾਨਵਸੇਨ ਚਿਤ੍ਤੇ ਕੁਸਲਪ੍ਪਵਤ੍ਤਿਂ ਪਰਿਯਾਦਿਯਿਤ੍ਵਾ ਸਮੁਪ੍ਪਤ੍ਤਿਵਸੇਨ ਠਾਨਂ ਪਰਿਯੁਟ੍ਠਾਨਂ, ਤਸ੍ਸ ਪਹਾਨਂ. ਅਨੁਸਯਪ੍ਪਹਾਨਨ੍ਤਿ ਅਰਿਯਮਗ੍ਗੇਨ ਅਪ੍ਪਹੀਨਭਾਵੇਨ ਸਨ੍ਤਾਨੇ ਕਾਰਣਲਾਭੇ ਉਪ੍ਪਜ੍ਜਨਾਰਹਾ ਥਾਮਗਤਾ ਕਾਮਰਾਗਾਦਯੋ ਸਤ੍ਤ ਕਿਲੇਸਾ ਸਨ੍ਤਾਨੇ ਅਨੁ ਅਨੁ ਸਯਨਤੋ ਅਨੁਸਯਾ ਨਾਮ, ਤੇਸਂ ਪਹਾਨਂ.

ਤਦਙ੍ਗਪ੍ਪਹਾਨਨ੍ਤਿ ਤੇਨ ਤੇਨ ਦਾਨਸੀਲਾਦਿਕੁਸਲਙ੍ਗੇਨ ਤਸ੍ਸ ਤਸ੍ਸ ਅਕੁਸਲਙ੍ਗਸ੍ਸ ਪਹਾਨਂ ਤਦਙ੍ਗਪ੍ਪਹਾਨਂ. ਦੁਚ੍ਚਰਿਤਸਂਕਿਲੇਸਸ੍ਸ ਪਹਾਨਨ੍ਤਿ ਕਾਯਵਚੀਦੁਚ੍ਚਰਿਤਮੇਵ ਯਤ੍ਥ ਉਪ੍ਪਜ੍ਜਤਿ, ਤਂ ਸਨ੍ਤਾਨਂ ਸਮ੍ਮਾ ¶ ਕਿਲੇਸੇਤਿ ਉਪਤਾਪੇਤੀਤਿ ਸਂਕਿਲੇਸੋ, ਤਸ੍ਸ ਤਦਙ੍ਗਵਸੇਨ ਪਹਾਨਂ. ਸਮਾਧਿਸ੍ਸ ਕਾਮਚ੍ਛਨ੍ਦਪਟਿਪਕ੍ਖਤ੍ਤਾ ਸੁਤ੍ਤਨ੍ਤਪਿਟਕੇ ਤਣ੍ਹਾਸਂਕਿਲੇਸਸ੍ਸ ਪਹਾਨਂ ਵੁਤ੍ਤਂ. ਅਤ੍ਤਾਦਿਸੁਞ੍ਞਸਭਾਵਧਮ੍ਮਪ੍ਪਕਾਸਨਤੋ ਅਭਿਧਮ੍ਮਪਿਟਕੇ ਦਿਟ੍ਠਿਸਂਕਿਲੇਸਸ੍ਸ ਪਹਾਨਂ ਵੁਤ੍ਤਂ.

ਏਕਮੇਕਸ੍ਮਿਞ੍ਚੇਤ੍ਥਾਤਿ ਏਤ੍ਥ ਏਤੇਸੁ ਤੀਸੁ ਪਿਟਕੇਸੁ ਏਕੇਕਸ੍ਮਿਂ ਪਿਟਕੇਤਿ ਅਤ੍ਥੋ. ਧਮ੍ਮੋਤਿ ਪਾਲ਼ੀਤਿ ਏਤ੍ਥ ਧਮ੍ਮਸ੍ਸ ਸੀਲਾਦਿਵਿਸਿਟ੍ਠਤ੍ਥਯੋਗਤੋ, ਬੁਦ੍ਧਾਨਂ ਸਭਾਵਨਿਰੁਤ੍ਤਿਭਾਵਤੋ ਚ ਪਕਟ੍ਠਾਨਂ ਉਕ੍ਕਟ੍ਠਾਨਂ ਵਚਨਪ੍ਪਬਨ੍ਧਾਨਂ ¶ ਆਲ਼ਿ ਪਨ੍ਤੀਤਿ ਪਾਲ਼ਿ, ਪਰਿਯਤ੍ਤਿਧਮ੍ਮੋ. ਸਮ੍ਮੁਤਿਪਰਮਤ੍ਥਭੇਦਸ੍ਸ ਅਤ੍ਥਸ੍ਸ ਅਨੁਰੂਪਵਾਚਕਭਾਵੇਨ ਪਰਮਤ੍ਥਸਦ੍ਦੇਸੁ ਏਕਨ੍ਤੇਨ ਭਗਵਤਾ ਮਨਸਾ ਵਵਤ੍ਥਾਪਿਤੋ ਨਾਮਪਞ੍ਞਤ੍ਤਿਪ੍ਪਬਨ੍ਧੋ ਪਾਲ਼ਿਧਮ੍ਮੋ ਨਾਮ. ਦੇਸਨਾਯ ਧਮ੍ਮਸ੍ਸ ਚ ਕੋ ਵਿਸੇਸੋਤਿ ਚੇ? ਯਥਾਵੁਤ੍ਤਨਯੇਨ ਮਨਸਾ ਵਵਤ੍ਥਾਪਿਤਧਮ੍ਮਸ੍ਸ ਪਰੇਸਂ ਬੋਧਨਭਾਵੇਨ ਅਤਿਸਜ੍ਜਨਾ ਵਾਚਾਯ ਪਕਾਸਨਾ ‘‘ਦੇਸਨਾ’’ਤਿ ਵੇਦਿਤਬ੍ਬਾ. ਤੇਨਾਹ – ‘‘ਦੇਸਨਾਤਿ ਤਸ੍ਸਾ ਮਨਸਾ ਵਵਤ੍ਥਾਪਿਤਾਯ ਪਾਲ਼ਿਯਾ ਦੇਸਨਾ’’ਤਿ. ਤਦੁਭਯਮ੍ਪਿ ਪਨ ਪਰਮਤ੍ਥਤੋ ਸਦ੍ਦੋ ਏਵ ਪਰਮਤ੍ਥਵਿਨਿਮੁਤ੍ਤਾਯ ਸਮ੍ਮੁਤਿਯਾ ਅਭਾਵਾ. ਇਮਮੇਵ ਨਯਂ ਗਹੇਤ੍ਵਾ ਕੇਚਿ ਆਚਰਿਯਾ ‘‘ਧਮ੍ਮੋ ਚ ਦੇਸਨਾ ਚ ਪਰਮਤ੍ਥਤੋ ਸਦ੍ਦੋ ਏਵਾ’’ਤਿ ਵੋਹਰਨ੍ਤਿ, ਤੇਪਿ ਅਨੁਪਵਜ੍ਜਾਯੇਵ. ਯਥਾ ‘‘ਕਾਮਾਵਚਰਪਟਿਸਨ੍ਧਿਵਿਪਾਕਾ ਪਰਿਤ੍ਤਾਰਮ੍ਮਣਾ’’ਤਿ ਵੁਚ੍ਚਨ੍ਤਿ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ. ਨ ਹਿ ‘‘ਕਾਮਾਵਚਰਪਟਿਸਨ੍ਧਿਵਿਪਾਕਾ ਨਿਬ੍ਬਤ੍ਤਿਤਪਰਮਤ੍ਥਵਿਸਯਾਯੇਵਾ’’ਤਿ ਸਕ੍ਕਾ ਵਤ੍ਤੁਂ ਇਤ੍ਥਿਪੁਰਿਸਾਦਿਆਕਾਰਪਰਿਵਿਤਕ੍ਕਪੁਬ੍ਬਕਾਨਂ ਰਾਗਾਦਿਅਕੁਸਲਾਨਂ ਮੇਤ੍ਤਾਦਿਕੁਸਲਾਨਞ੍ਚ ਆਰਮ੍ਮਣਂ ਗਹੇਤ੍ਵਾਪਿ ਸਮੁਪ੍ਪਜ੍ਜਨਤੋ. ਪਰਮਤ੍ਥਧਮ੍ਮਮੂਲਕਤ੍ਤਾ ਪਨਸ੍ਸ ਪਰਿਕਪ੍ਪਸ੍ਸ ਪਰਮਤ੍ਥਵਿਸਯਤਾ ਸਕ੍ਕਾ ਪਞ੍ਞਪੇਤੁਂ, ਏਵਮਿਧਾਪੀਤਿ ਦਟ੍ਠਬ੍ਬਂ. ਤੀਸੁਪਿ ਚੇਤੇਸੁ ਏਤੇ ਧਮ੍ਮਤ੍ਥਦੇਸਨਾਪਟਿਵੇਧਾ ਗਮ੍ਭੀਰਾਤਿ ਸਮ੍ਬਨ੍ਧੋ. ਏਤ੍ਥ ਚ ਪਿਟਕਾਵਯਵਾਨਂ ਧਮ੍ਮਾਦੀਨਂ ਵੁਚ੍ਚਮਾਨੋ ਗਮ੍ਭੀਰਭਾਵੋ ਤਂਸਮੁਦਾਯਸ੍ਸ ਪਿਟਕਸ੍ਸਾਪਿ ਵੁਤ੍ਤੋ ਯੇਵਾਤਿ ਦਟ੍ਠਬ੍ਬੋ. ਦੁਕ੍ਖੇਨ ਓਗਯ੍ਹਨ੍ਤਿ, ਦੁਕ੍ਖੋ ਵਾ ਓਗਾਹੋ ਓਗਾਹਨਂ ਅਨ੍ਤੋਪਵਿਸਨਮੇਤੇਸੂਤਿ ਦੁਕ੍ਖੋਗਾਹਾ. ਏਤ੍ਥਾਤਿ ਏਤੇਸੁ ਪਿਟਕੇਸੁ, ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ.

ਹੇਤੁਨੋ ਫਲਂ ਹੇਤੁਫਲਂ. ਧਮ੍ਮਾਭਿਲਾਪੋਤਿ ਅਤ੍ਥਬ੍ਯਞ੍ਜਨਕੋ ਅਵਿਪਰੀਤਾਭਿਲਾਪੋ. ਵਿਸਯਤੋ ਅਸਮ੍ਮੋਹਤੋ ਚਾਤਿ ਲੋਕਿਯਲੋਕੁਤ੍ਤਰਾਨਂ ਯਥਾਕ੍ਕਮਂ ਅਵਬੋਧਪ੍ਪਕਾਰਦਸ੍ਸਨਂ, ਏਤਸ੍ਸ ਅਵਬੋਧੋਤਿ ਇਮਿਨਾ ਸਮ੍ਬਨ੍ਧੋ. ਲੋਕਿਯੋ ਹਿ ਧਮ੍ਮਤ੍ਥਾਦਿਂ ਆਲਮ੍ਬਿਤ੍ਵਾਵ ਪਵਤ੍ਤਨਤੋ ਵਿਸਯਤੋ ਅਵਬੋਧੋਤਿ ਵੁਚ੍ਚਤਿ. ਲੋਕੁਤ੍ਤਰੋ ਪਨ ਨਿਬ੍ਬਾਨਾਰਮ੍ਮਣਤਾਯ ਤਂ ਅਨਾਲਮ੍ਬਮਾਨੋਪਿ ਤਬ੍ਬਿਸਯਮੋਹਵਿਦ੍ਧਂਸਨੇਨ ਧਮ੍ਮਾਦੀਸੁ ਪਵਤ੍ਤਨਤੋ ਅਸਮ੍ਮੋਹਤੋ ਅਵਬੋਧੋਤਿ ਵੁਚ੍ਚਤਿ. ਅਤ੍ਥਾਨੁਰੂਪਂ ਧਮ੍ਮੇਸੂਤਿ ਕਾਰਿਯਾਨੁਰੂਪਂ ਕਾਰਣੇਸੂਤਿ ਅਤ੍ਥੋ. ਪਞ੍ਞਤ੍ਤਿਪਥਾਨੁਰੂਪਂ ਪਞ੍ਞਤ੍ਤੀਸੂਤਿ ਛਬ੍ਬਿਧਨਾਮਪਞ੍ਞਤ੍ਤਿਯਾ ਪਥੋ ਪਞ੍ਞਤ੍ਤਿਪਥੋ, ਤਸ੍ਸ ਅਨੁਰੂਪਂ ਪਞ੍ਞਤ੍ਤੀਸੂਤਿ ਅਤ੍ਥੋ.

ਧਮ੍ਮਜਾਤਨ੍ਤਿ ¶ ¶ ਕਾਰਣਪ੍ਪਭੇਦੋ ਕਾਰਣਮੇਵ ਵਾ. ਅਤ੍ਥਜਾਤਨ੍ਤਿ ਕਾਰਿਯਪ੍ਪਭੇਦੋ, ਕਾਰਿਯਮੇਵ ਵਾ. ਯਾ ਚਾਯਂ ਦੇਸਨਾਤਿ ਸਮ੍ਬਨ੍ਧੋ. ਯੋ ਚੇਤ੍ਥਾਤਿ ਏਤਾਸੁ ਧਮ੍ਮਤ੍ਥਦੇਸਨਾਸੁ ਯੋ ਪਟਿਵੇਧੋਤਿ ਅਤ੍ਥੋ. ਏਤ੍ਥਾਤਿ ਏਤੇਸੁ ਤੀਸੁ ਪਿਟਕੇਸੁ.

ਅਲਗਦ੍ਦੂਪਮਾਤਿ ਏਤ੍ਥ ਅਲਗਦ੍ਦਸਦ੍ਦੇਨ ਅਲਗਦ੍ਦਗ੍ਗਹਣਂ ਵੁਚ੍ਚਤਿ ਵੀਣਾਵਾਦਨਂ ਵੀਣਾਤਿਆਦੀਸੁ ਵਿਯ, ਗਹਣਞ੍ਚੇਤ੍ਥ ਯਥਾ ਡਂਸਤਿ, ਤਥਾ ਦੁਗ੍ਗਹਣਂ ਦਟ੍ਠਬ੍ਬਂ, ਇਤਰਗ੍ਗਹਣੇ ਵਿਰੋਧਾਭਾਵਾ. ਤਸ੍ਮਾ ਅਲਗਦ੍ਦਸ੍ਸ ਗਹਣਂ ਉਪਮਾ ਏਤਿਸ੍ਸਾਤਿ ਅਲਗਦ੍ਦੂਪਮਾ. ਅਲਗਦ੍ਦੋਤਿ ਚੇਤ੍ਥ ਆਸਿਵਿਸੋ ਵੁਚ੍ਚਤਿ. ਸੋ ਹਿ ਅਲਂ ਪਰਿਯਤ੍ਤੋ, ਜੀਵਿਤਹਰਣਸਮਤ੍ਥੋ ਵਾ ਵਿਸਸਙ੍ਖਾਤੋ ਗਦੋ ਅਸ੍ਸਾਤਿ ‘‘ਅਲਂਗਦੋ’’ਤਿ ਵਤ੍ਤਬ੍ਬੇ ‘‘ਅਲਗਦ੍ਦੋ’’ਤਿ ਵੁਚ੍ਚਤਿ.

ਵਟ੍ਟਤੋ ਨਿਸ੍ਸਰਣਂ ਅਤ੍ਥੋ ਪਯੋਜਨਂ ਏਤਿਸ੍ਸਾਤਿ ਨਿਸ੍ਸਰਣਤ੍ਥਾ. ਭਣ੍ਡਾਗਾਰਿਕੋ ਵਿਯਾਤਿ ਭਣ੍ਡਾਗਾਰਿਕੋ, ਧਮ੍ਮਰਤਨਾਨੁਪਾਲਕੋ, ਤਸ੍ਸ ਅਤ੍ਥਨਿਰਪੇਕ੍ਖਸ੍ਸ ਪਰਿਯਤ੍ਤਿ ਭਣ੍ਡਾਗਾਰਿਕਪਰਿਯਤ੍ਤਿ. ਦੁਗ੍ਗਹਿਤਾਨੀਤਿ ਦੁਟ੍ਠੁ ਗਹਿਤਾਨਿ. ਤੇਨਾਹ ‘‘ਉਪਾਰਮ੍ਭਾਦਿਹੇਤੁ ਪਰਿਯਾਪੁਟਾ’’ਤਿ. ਏਤ੍ਥ ਚ ਉਪਾਰਮ੍ਭੋ ਨਾਮ ਪਰਿਯਤ੍ਤਿਂ ਨਿਸ੍ਸਾਯ ਪਰਵਮ੍ਭਨਂ. ਆਦਿ-ਸਦ੍ਦੇਨ ਇਤਿਵਾਦਪ੍ਪਮੋਕ੍ਖਲਾਭਸਕ੍ਕਾਰਾਦਿਂ ਸਙ੍ਗਣ੍ਹਾਤਿ. ਯਂ ਸਨ੍ਧਾਯਾਤਿ ਯਂ ਪਰਿਯਤ੍ਤਿਦੁਗ੍ਗਹਣਂ ਸਨ੍ਧਾਯ. ਵੁਤ੍ਤਨ੍ਤਿ ਅਲਗਦ੍ਦੂਪਮਸੁਤ੍ਤੇ (ਮ. ਨਿ. ੧.੨੩੮) ਵੁਤ੍ਤਂ. ਤਞ੍ਚਸ੍ਸ ਅਤ੍ਥਂ ਨਾਨੁਭੋਨ੍ਤੀਤਿ ਤਞ੍ਚ ਅਸ੍ਸ ਧਮ੍ਮਸ੍ਸ ਸੀਲਪਰਿਪੂਰਣਾਦਿਸਙ੍ਖਾਤਂ ਅਤ੍ਥਂ ਏਤੇ ਦੁਗ੍ਗਹਿਤਗਾਹਿਨੋ ਨਾਨੁਭੋਨ੍ਤਿ ਨ ਵਿਨ੍ਦਨ੍ਤਿ. ਪਟਿਵਿਦ੍ਧਾਕੁਪ੍ਪੋਤਿ ਪਟਿਵਿਦ੍ਧਅਰਹਤ੍ਤਫਲੋ.

ਇਦਾਨਿ ਤੀਸੁ ਪਿਟਕੇਸੁ ਯਥਾਰਹਂ ਸਮ੍ਪਤ੍ਤਿਵਿਪਤ੍ਤਿਯੋ ਨਿਦ੍ਧਾਰੇਤ੍ਵਾ ਦਸ੍ਸੇਨ੍ਤੋ ਆਹ ਵਿਨਯੇ ਪਨਾਤਿਆਦਿ. ਤਤ੍ਥ ਤਾਸਂਯੇਵਾਤਿ ਅਵਧਾਰਣਂ ਛਲ਼ਭਿਞ੍ਞਾਚਤੁਪਟਿਸਮ੍ਭਿਦਾਨਂ ਵਿਨਯੇ ਪਭੇਦਵਚਨਾਭਾਵਂ ਸਨ੍ਧਾਯ ਵੁਤ੍ਤਂ. ਵੇਰਞ੍ਜਕਣ੍ਡੇ (ਪਾਰਾ. ੧੨) ਹਿ ਤਿਸ੍ਸੋ ਵਿਜ੍ਜਾਵ ਵਿਭਤ੍ਤਾ. ਦੁਤਿਯੇ ਤਾਸਂਯੇਵਾਤਿ ਅਵਧਾਰਣਂ ਚਤਸ੍ਸੋ ਪਟਿਸਮ੍ਭਿਦਾ ਅਪੇਕ੍ਖਿਤ੍ਵਾ ਕਤਂ ਤਿਸ੍ਸਨ੍ਨਮ੍ਪਿ ਵਿਜ੍ਜਾਨਂ ਛਸੁ ਅਭਿਞ੍ਞਾਸੁ ਅਨ੍ਤੋਪਵਿਟ੍ਠਤ੍ਤਾ. ਤਾਸਞ੍ਚਾਤਿ ਏਤ੍ਥ ਚ-ਸਦ੍ਦੇਨ ਸੇਸਾਨਮ੍ਪਿ ਤਤ੍ਥ ਅਤ੍ਥਿਭਾਵਂ ਦੀਪੇਤਿ. ਅਭਿਧਮ੍ਮਪਿਟਕੇ ਹਿ ਤਿਸ੍ਸੋ ਵਿਜ੍ਜਾ ਛ ਅਭਿਞ੍ਞਾ ਚਤਸ੍ਸੋ ਪਟਿਸਮ੍ਭਿਦਾ ਚ ਵੁਤ੍ਤਾ ਏਵ. ਪਟਿਸਮ੍ਭਿਦਾਨਂ ਤਤ੍ਥੇਵ ਸਮ੍ਮਾ ਵਿਭਤ੍ਤਭਾਵਂ ਦੀਪੇਤੁਂ ਤਤ੍ਥੇਵਾਤਿ ਅਵਧਾਰਣਂ ਕਤਂ. ਉਪਾਦਿਨ੍ਨਫਸ੍ਸੋਤਿ ਮਗ੍ਗੇਨ ਮਗ੍ਗਪਟਿਪਾਦਨਫਸ੍ਸੋ. ਤੇਸਨ੍ਤਿ ਤੇਸਂ ਪਿਟਕਾਨਂ. ਏਤਨ੍ਤਿ ਏਤਂ ਬੁਦ੍ਧਵਚਨਂ.

ਚਤੁਤ੍ਤਿਂਸੇਵ ¶ ਸੁਤ੍ਤਨ੍ਤਾਤਿ ਗਾਥਾਯ ਅਯਮਤ੍ਥਯੋਜਨਾ – ਯਸ੍ਸ ਨਿਕਾਯਸ੍ਸ ਸੁਤ੍ਤਗਣਨਤੋ ਚਤੁਤ੍ਤਿਂਸੇਵ ਸੁਤ੍ਤਨ੍ਤਾ ਵਗ੍ਗਸਙ੍ਗਹਵਸੇਨ ਤਯੋ ਵਗ੍ਗਾ ਯਸ੍ਸ ਸਙ੍ਗਹਸ੍ਸਾਤਿ ਤਿਵਗ੍ਗੋ ਸਙ੍ਗਹੋ, ਏਸ ਪਠਮੋ ਨਿਕਾਯੋ ਇਧ ਦੀਘਨਿਕਾਯੋਤਿ. ਅਨੁਲੋਮਿਕੋਤਿ ਅਪਚ੍ਚਨੀਕੋ, ਅਤ੍ਥਾਨੁਲੋਮਨਤੋ ਅਨ੍ਵਤ੍ਥਨਾਮੋਤਿ ¶ ਵੁਤ੍ਤਂ ਹੋਤਿ. ਏਕਨਿਕਾਯਮ੍ਪੀਤਿ ਏਕਸਮੂਹਮ੍ਪਿ. ਏਵਂ ਚਿਤ੍ਤਨ੍ਤਿ ਏਵਂ ਵਿਚਿਤ੍ਤਂ. ਯਥਯਿਦਨ੍ਤਿ ਯਥਾ ਇਮੇ. ਪੋਣਿਕਚਿਕ੍ਖਲ੍ਲਿਕਾ ਖਤ੍ਤਿਯਾ, ਤੇਸਂ ਨਿਵਾਸੋ ‘‘ਪੋਣਿਕਨਿਕਾਯੋ ਚਿਕ੍ਖਲ੍ਲਿਕਨਿਕਾਯੋ’’ਤਿ ਵੁਚ੍ਚਤਿ. ਪਞ੍ਚਦਸਵਗ੍ਗਪਰਿਗ੍ਗਹੋਤਿ ਪਞ੍ਚਦਸਹਿ ਵਗ੍ਗੇਹਿ ਪਰਿਗ੍ਗਹਿਤੋ. ਸੁਤ੍ਤਨ੍ਤਾਨਂ ਸਹਸ੍ਸਾਨਿ ਸਤ੍ਤ ਸੁਤ੍ਤਸਤਾਨਿ ਚਾਤਿ ਪਾਠੇ ਸੁਤ੍ਤਨ੍ਤਾਨਂ ਸਤ੍ਤਸਹਸ੍ਸਾਨਿ ਸਤ੍ਤ ਸੁਤ੍ਤਸਤਾਨਿ ਚਾਤਿ ਯੋਜੇਤਬ੍ਬਂ. ਕਤ੍ਥਚਿ ਪਨ ‘‘ਸਤ੍ਤ ਸੁਤ੍ਤਸਹਸ੍ਸਾਨਿ, ਸਤ੍ਤ ਸੁਤ੍ਤਸਤਾਨਿ ਚਾ’’ਤਿ ਪਾਠੋ. ਪੁਬ੍ਬੇ ਨਿਦਸ੍ਸਿਤਾਤਿ ਸੁਤ੍ਤਨ੍ਤਪਿਟਕਨਿਦ੍ਦੇਸੇ ਨਿਦਸ੍ਸਿਤਾ.

ਵੇਦਨ੍ਤਿ ਞਾਣਂ. ਤੁਟ੍ਠਿਨ੍ਤਿ ਪੀਤਿਂ. ਧਮ੍ਮਕ੍ਖਨ੍ਧਵਸੇਨਾਤਿ ਧਮ੍ਮਰਾਸਿਵਸੇਨ. ਦ੍ਵਾਸੀਤਿਸਹਸ੍ਸਾਨਿ ਬੁਦ੍ਧਤੋ ਗਣ੍ਹਿਨ੍ਤਿ ਸਮ੍ਬਨ੍ਧੋ. ਦ੍ਵੇ ਸਹਸ੍ਸਾਨਿ ਭਿਕ੍ਖੁਤੋਤਿ ਧਮ੍ਮਸੇਨਾਪਤਿਆਦੀਨਂ ਭਿਕ੍ਖੂਨਂ ਸਨ੍ਤਿਕਾ ਤੇਹਿਯੇਵ ਦੇਸਿਤਾਨਿ ਦ੍ਵੇ ਸਹਸ੍ਸਾਨਿ ਗਣ੍ਹਿਂ. ਮੇਤਿ ਮਮ ਹਦਯੇ, ਇਤਿ ਆਨਨ੍ਦਤ੍ਥੇਰੋ ਅਤ੍ਤਾਨਂ ਨਿਦ੍ਦਿਸਤਿ. ਯੇ ਧਮ੍ਮਾ ਮਮ ਹਦਯੇ ਪਵਤ੍ਤਿਨੋ, ਤੇ ਚਤੁਰਾਸੀਤਿਸਹਸ੍ਸਾਨੀਤਿ ਯੋਜਨਾ. ਇਦਞ੍ਚ ਭਗਵਤੋ ਧਰਮਾਨਕਾਲੇ ਉਗ੍ਗਹਿਤਧਮ੍ਮਕ੍ਖਨ੍ਧਵਸੇਨ ਵੁਤ੍ਤਂ, ਪਰਿਨਿਬ੍ਬੁਤੇ ਪਨ ਭਗਵਤਿ ਆਨਨ੍ਦਤ੍ਥੇਰੇਨ ਦੇਸਿਤਾਨਂ ਸੁਭਸੁਤ੍ਤ(ਦਈ. ਨਿ. ੧.੪੪੪ ਆਦਯੋ) ਗੋਪਕਮੋਗ੍ਗਲ੍ਲਾਨਸੁਤ੍ਤਾਨਂ (ਮ. ਨਿ. ੩.੭੯ ਆਦਯੋ), ਤਤਿਯਸਙ੍ਗੀਤਿਯਂ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਕਥਿਤਕਥਾਵਤ੍ਥੁਪ੍ਪਕਰਣਸ੍ਸ ਚ ਵਸੇਨ ਧਮ੍ਮਕ੍ਖਨ੍ਧਾਨਂ ਚਤੁਰਾਸੀਤਿਸਹਸ੍ਸਤੋਪਿ ਅਧਿਕਤਾ ਵੇਦਿਤਬ੍ਬਾ.

ਏਕਾਨੁਸਨ੍ਧਿਕਂ ਸੁਤ੍ਤਨ੍ਤਿ ਸਤਿਪਟ੍ਠਾਨਾਦਿ (ਦੀ. ਨਿ. ੨.੩੭੨ ਆਦਯੋ; ਮ. ਨਿ. ੧.੧੦੫ ਆਦਯੋ). ਅਨੇਕਾਨੁਸਨ੍ਧਿਕਨ੍ਤਿ ਪਰਿਨਿਬ੍ਬਾਨਸੁਤ੍ਤਾਦਿ (ਦੀ. ਨਿ. ੨.੧੩੪ ਆਦਯੋ). ਤਞ੍ਹਿ ਨਾਨਾਠਾਨੇਸੁ ਨਾਨਾਧਮ੍ਮਦੇਸਨਾਨਂ ਵਸੇਨ ਪਵਤ੍ਤਂ. ਤਿਕਦੁਕਭਾਜਨਂ ਧਮ੍ਮਸਙ੍ਗਣਿਯਂ ਨਿਕ੍ਖੇਪਕਣ੍ਡ(ਧ. ਸ. ੯੮੫ ਆਦਯੋ) ਅਟ੍ਠਕਥਾਕਣ੍ਡਵਸੇਨ (ਧ. ਸ. ੧੩੮੪ ਆਦਯੋ) ਗਹੇਤਬ੍ਬਂ. ਚਿਤ੍ਤਵਾਰਭਾਜਨਨ੍ਤਿ ਇਦਂ ਚਿਤ੍ਤੁਪ੍ਪਾਦਕਣ੍ਡਵਸੇਨ (ਧ. ਸ. ੧ ਆਦਯੋ) ਵੁਤ੍ਤਂ. ਅਤ੍ਥਿ ਵਤ੍ਥੂਤਿਆਦੀਸੁ ਵਤ੍ਥੁ ਨਾਮ ਸੁਦਿਨ੍ਨਕਣ੍ਡਾਦਿ (ਪਾਰਾ. ੨੪ ਆਦਯੋ). ਮਾਤਿਕਾਤਿ ਸਿਕ੍ਖਾਪਦਂ. ਅਨ੍ਤਰਾਪਤ੍ਤੀਤਿ ਸਿਕ੍ਖਾਪਦਨ੍ਤਰੇਸੁ ਅਞ੍ਞਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਾ ਆਪਤ੍ਤਿ. ਤਿਕਚ੍ਛੇਦੋਤਿ ਤਿਕਪਾਚਿਤ੍ਤਿਯਾਦਿਤਿਕਪਰਿਚ੍ਛੇਦੋ ¶ . ਬੁਦ੍ਧਵਚਨਂ ਸਙ੍ਗਹਿਤਨ੍ਤਿ ਸਮ੍ਬਨ੍ਧੋ. ਅਸ੍ਸਾਤਿ ਬੁਦ੍ਧਵਚਨਸ੍ਸ. ਸਙ੍ਗੀਤਿਪਰਿਯੋਸਾਨੇ ਸਾਧੁਕਾਰਂ ਦਦਮਾਨਾ ਵਿਯਾਤਿ ਸਮ੍ਬਨ੍ਧੋ. ਅਚ੍ਛਰਂ ਪਹਰਿਤੁਂ ਯੁਤ੍ਤਾਨਿ ਅਚ੍ਛਰਿਯਾਨਿ, ਪੁਪ੍ਫਵਸ੍ਸਚੇਲੁਕ੍ਖੇਪਾਦੀਨਿ. ਯਾ ‘‘ਪਞ੍ਚਸਤਾ’’ਤਿ ਚ ‘‘ਥੇਰਿਕਾ’’ਤਿ ਚ ਪਵੁਚ੍ਚਤਿ, ਅਯਂ ਪਠਮਮਹਾਸਙ੍ਗੀਤਿ ਨਾਮਾਤਿ ਸਮ੍ਬਨ੍ਧੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਪਠਮਮਹਾਸਙ੍ਗੀਤਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਦੁਤਿਯਸਙ੍ਗੀਤਿਕਥਾਵਣ੍ਣਨਾ

ਏਵਂ ¶ ਪਠਮਮਹਾਸਙ੍ਗੀਤਿਂ ਦਸ੍ਸੇਤ੍ਵਾ ਯਦਤ੍ਥਂ ਸਾ ਇਧ ਦਸ੍ਸਿਤਾ, ਤਂ ਨਿਗਮਨਵਸੇਨ ਦਸ੍ਸੇਨ੍ਤੋ ਇਮਿਸ੍ਸਾਤਿਆਦਿਮਾਹ. ਤਤ੍ਰਾਯਂ ਆਚਰਿਯਪਰਮ੍ਪਰਾਤਿ ਤਸ੍ਮਿਂ ਜਮ੍ਬੁਦੀਪੇ ਅਯਂ ਆਚਰਿਯਾਨਂ ਪਵੇਣੀ ਪਟਿਪਾਟਿ. ਵਿਜਿਤਾਵਿਨੋਤਿ ਵਿਜਿਤਸਬ੍ਬਕਿਲੇਸਪਟਿਪਕ੍ਖਤ੍ਤਾ ਵਿਜਿਤਵਨ੍ਤੋ. ਜਮ੍ਬੁਸਿਰਿਵ੍ਹਯੇਤਿ ਜਮ੍ਬੁਸਦਿਸੋ ਸਿਰਿਮਨ੍ਤੋ ਅਵ੍ਹਯੋ ਨਾਮਂ ਯਸ੍ਸ ਦੀਪਸ੍ਸ, ਤਸ੍ਮਿਂ ਜਮ੍ਬੁਦੀਪੇਤਿ ਵੁਤ੍ਤਂ ਹੋਤਿ. ਮਹਨ੍ਤੇਨ ਹਿ ਜਮ੍ਬੁਰੁਕ੍ਖੇਨ ਅਭਿਲਕ੍ਖਿਤਤ੍ਤਾ ਦੀਪੋਪਿ ‘‘ਜਮ੍ਬੂ’’ਤਿ ਵੁਚ੍ਚਤਿ. ਅਚ੍ਛਿਜ੍ਜਮਾਨਂ ਅਵਿਨਸ੍ਸਮਾਨਂ ਕਤ੍ਵਾ. ਵਿਨਯਵਂਸਨ੍ਤਿਆਦੀਹਿ ਤੀਹਿ ਵਿਨਯਪਾਲ਼ਿਯੇਵ ਕਥਿਤਾ ਪਰਿਯਾਯਵਚਨਤ੍ਤਾ ਤੇਸਂ. ਪਕਤਞ੍ਞੁਤਨ੍ਤਿ ਵੇਯ੍ਯਤ੍ਤਿਯਂ, ਪਟੁਭਾਵਨ੍ਤਿ ਵੁਤ੍ਤਂ ਹੋਤਿ. ਧੁਰਗ੍ਗਾਹੋਤਿ ਪਧਾਨਗ੍ਗਾਹੀ, ਸਬ੍ਬੇਸਂ ਪਾਮੋਕ੍ਖੋ ਹੁਤ੍ਵਾ ਗਣ੍ਹੀਤਿ ਵੁਤ੍ਤਂ ਹੋਤਿ. ਭਿਕ੍ਖੂਨਂ ਸਮੁਦਾਯੋ ਸਮੂਹੋ ਭਿਕ੍ਖੁਸਮੁਦਾਯੋ.

ਯਦਾਤਿ ਨਿਬ੍ਬਾਯਿਂਸੂਤਿ ਸਮ੍ਬਨ੍ਧੋ. ਜੋਤਯਿਤ੍ਵਾ ਚ ਸਬ੍ਬਧੀਤਿ ਤਮੇਵ ਸਦ੍ਧਮ੍ਮਂ ਸਬ੍ਬਤ੍ਥ ਪਕਾਸਯਿਤ੍ਵਾ. ਜੁਤਿਮਨ੍ਤੋਤਿ ਪਞ੍ਞਾਜੁਤਿਯਾ ਯੁਤ੍ਤਾ, ਤੇਜਵਨ੍ਤੋ ਵਾ, ਮਹਾਨੁਭਾਵਾਤਿ ਅਤ੍ਥੋ. ਨਿਬ੍ਬਾਯਿਂਸੂਤਿ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਨਿਬ੍ਬਾਯਿਂਸੁ. ਅਨਾਲਯਾਤਿ ਅਸਙ੍ਗਾ.

ਅਥਾਤਿ ਪਚ੍ਛਾ, ਯਦਾ ਪਰਿਨਿਬ੍ਬਾਯਿਂਸੁ, ਤਤੋ ਪਰਨ੍ਤਿ ਅਤ੍ਥੋ. ਕਪ੍ਪਤਿ ਸਿਙ੍ਗੀਲੋਣਕਪ੍ਪੋਤਿ ਏਤ੍ਥ ਕਪ੍ਪ-ਸਦ੍ਦੋ ਵਿਕਪ੍ਪਤ੍ਥੋ, ਤੇਨ ਸਿਙ੍ਗੀਲੋਣਵਿਕਪ੍ਪੋਪਿ ਕਪ੍ਪਤਿ. ਇਦਮ੍ਪਿ ਪਕ੍ਖਨ੍ਤਰਂ ਕਪ੍ਪਤੀਤਿ ਅਤ੍ਥੋ, ਏਵਂ ਸਬ੍ਬਤ੍ਥ. ਤਤ੍ਥ ਸਿਙ੍ਗੇਨ ਲੋਣਂ ਪਰਿਹਰਿਤ੍ਵਾ ਅਲੋਣਕਪਿਣ੍ਡਪਾਤੇਨ ਸਦ੍ਧਿਂ ਭੁਞ੍ਜਿਤੁਂ ਕਪ੍ਪਤਿ ¶ , ਸਨ੍ਨਿਧਿਂ ਨ ਕਰੋਤੀਤਿ ਅਧਿਪ੍ਪਾਯੋ. ਕਪ੍ਪਤਿ ਦ੍ਵਙ੍ਗੁਲਕਪ੍ਪੋਤਿ ਦ੍ਵਙ੍ਗੁਲਂ ਅਤਿਕ੍ਕਨ੍ਤਾਯ ਛਾਯਾਯ ਵਿਕਾਲੇ ਭੋਜਨਂ ਭੁਞ੍ਜਿਤੁਂ ਕਪ੍ਪਤੀਤਿ ਅਤ੍ਥੋ. ਕਪ੍ਪਤਿ ਗਾਮਨ੍ਤਰਕਪ੍ਪੋਤਿ ‘‘ਗਾਮਨ੍ਤਰਂ ਗਮਿਸ੍ਸਾਮੀ’’ਤਿ ਪਵਾਰਿਤੇਨ ਅਨਤਿਰਿਤ੍ਤਭੋਜਨਂ ਭੁਞ੍ਜਿਤੁਂ ਕਪ੍ਪਤੀਤਿ ਅਤ੍ਥੋ. ਕਪ੍ਪਤਿ ਆਵਾਸਕਪ੍ਪੋਤਿ ਏਕਸੀਮਾਯ ਨਾਨਾਸੇਨਾਸਨੇਸੁ ਵਿਸੁਂ ਵਿਸੁਂ ਉਪੋਸਥਾਦੀਨਿ ਸਙ੍ਘਕਮ੍ਮਾਨਿ ਕਾਤੁਂ ਵਟ੍ਟਤੀਤਿ ਅਤ੍ਥੋ. ਕਪ੍ਪਤਿ ਅਨੁਮਤਿਕਪ੍ਪੋਤਿ ‘‘ਅਨਾਗਤਾਨਂ ਆਗਤਕਾਲੇ ਅਨੁਮਤਿਂ ਗਹੇਸ੍ਸਾਮਾ’’ਤਿ ਤੇਸੁ ਅਨਾਗਤੇਸੁਯੇਵ ਵਗ੍ਗੇਨ ਸਙ੍ਘੇਨ ਕਮ੍ਮਂ ਕਤ੍ਵਾ ਪਚ੍ਛਾ ਅਨੁਮਤਿਂ ਗਹੇਤੁਂ ਕਪ੍ਪਤਿ, ਵਗ੍ਗਕਮ੍ਮਂ ਨ ਹੋਤੀਤਿ ਅਧਿਪ੍ਪਾਯੋ. ਕਪ੍ਪਤਿ ਆਚਿਣ੍ਣਕਪ੍ਪੋਤਿ ਆਚਰਿਯੁਪਜ੍ਝਾਯੇਹਿ ਆਚਿਣ੍ਣੋ ਕਪ੍ਪਤੀਤਿ ਅਤ੍ਥੋ. ਸੋ ਪਨ ਏਕਚ੍ਚੋ ਕਪ੍ਪਤਿ ਧਮ੍ਮਿਕੋ, ਏਕਚ੍ਚੋ ਨ ਕਪ੍ਪਤਿ ਅਧਮ੍ਮਿਕੋਤਿ ਵੇਦਿਤਬ੍ਬੋ. ਕਪ੍ਪਤਿ ਅਮਥਿਤਕਪ੍ਪੋਤਿ ਯਂ ਖੀਰਂ ਖੀਰਭਾਵਂ ਵਿਜਹਿਤਂ ਦਧਿਭਾਵਂ ਅਸਮ੍ਪਤ੍ਤਂ, ਤਂ ਭੁਤ੍ਤਾਵਿਨਾ ਪਵਾਰਿਤੇਨ ਅਨਤਿਰਿਤ੍ਤਂ ਭੁਞ੍ਜਿਤੁਂ ਕਪ੍ਪਤੀਤਿ ਅਤ੍ਥੋ. ਕਪ੍ਪਤਿ ਜਲ਼ੋਗਿਂ ਪਾਤੁਨ੍ਤਿ ਏਤ੍ਥ ਜਲ਼ੋਗੀਤਿ ਤਰੁਣਸੁਰਾ, ਯਂ ਮਜ੍ਜਸਮ੍ਭਾਰਂ ਏਕਤੋ ਕਤਂ ਮਜ੍ਜਭਾਵਮਸਮ੍ਪਤ੍ਤਂ, ਤਂ ਪਾਤੁਂ ਵਟ੍ਟਤੀਤਿ ਅਧਿਪ੍ਪਾਯੋ. ਜਾਤਰੂਪਰਜਤਨ੍ਤਿ ਏਤ੍ਥ ਸਰਸਤੋ ਵਿਕਾਰਂ ਅਨਾਪਜ੍ਜਿਤ੍ਵਾ ਸਬ੍ਬਦਾ ਜਾਤਰੂਪਮੇਵ ਹੋਤੀਤਿ ਜਾਤਂ ਰੂਪਂ ¶ ਏਤਸ੍ਸਾਤਿ ਜਾਤਰੂਪਂ, ਸੁਵਣ੍ਣਂ. ਧਵਲਸਭਾਵਤਾਯ ਰਾਜਤੀਤਿ ਰਜਤਂ, ਰੂਪਿਯਂ. ਸੁਸੁਨਾਗਪੁਤ੍ਤੋਤਿ ਸੁਸੁਨਾਗਸ੍ਸ ਪੁਤ੍ਤੋ. ਕਾਕਣ੍ਡਕਪੁਤ੍ਤੋਤਿ ਕਾਕਣ੍ਡਕਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ. ਵਜ੍ਜੀਸੂਤਿ ਜਨਪਦਨਾਮਤ੍ਤਾ ਬਹੁਵਚਨਂ ਕਤਂ.

ਤਦਹੁਪੋਸਥੇਤਿ ਏਤ੍ਥ ਤਦਹੂਤਿ ਤਸ੍ਮਿਂ ਅਹਨਿ. ਉਪਵਸਨ੍ਤਿ ਏਤ੍ਥਾਤਿ ਉਪੋਸਥੋ, ਉਪਵਸਨ੍ਤੀਤਿ ਚ ਸੀਲਸਮਾਦਾਨੇਨ ਵਾ ਅਨਸਨਾਦਿਨਾ ਵਾ ਉਪੇਤਾ ਹੁਤ੍ਵਾ ਵਸਨ੍ਤੀਤਿ ਅਤ੍ਥੋ. ਕਂਸਪਾਤਿਨ੍ਤਿ ਸੁਵਣ੍ਣਪਾਤਿਂ. ਮਾਸਕਰੂਪਨ੍ਤਿ ਮਾਸਕੋ ਏਵ. ਸਬ੍ਬਂ ਤਾਵ ਵਤ੍ਤਬ੍ਬਨ੍ਤਿ ਇਮਿਨਾ ਸਤ੍ਤਸਤਿਕਕ੍ਖਨ੍ਧਕੇ (ਚੂਲ਼ਵ. ੪੪੬ ਆਦਯੋ) ਆਗਤਾ ਸਬ੍ਬਾਪਿ ਪਾਲ਼ਿ ਇਧ ਆਨੇਤ੍ਵਾ ਵਤ੍ਤਬ੍ਬਾਤਿ ਦਸ੍ਸੇਤਿ. ਸਙ੍ਗਾਯਿਤਸਦਿਸਮੇਵ ਸਙ੍ਗਾਯਿਂਸੂਤਿ ਸਮ੍ਬਨ੍ਧੋ.

ਸਾ ਪਨਾਯਂ ਸਙ੍ਗੀਤੀਤਿ ਸਮ੍ਬਨ੍ਧੋ. ਤੇਸੂਤਿ ਤੇਸੁ ਸਙ੍ਗੀਤਿਕਾਰਕੇਸੁ ਥੇਰੇਸੁ. ਵਿਸ੍ਸੁਤਾ ਏਤੇ ਸਦ੍ਧਿਵਿਹਾਰਿਕਾ ਞੇਯ੍ਯਾਤਿ ਸਮ੍ਬਨ੍ਧੋ. ਸਾਣਸਮ੍ਭੂਤੋਤਿ ਸਾਣਦੇਸਵਾਸੀ ਸਮ੍ਭੂਤਤ੍ਥੇਰੋ. ਦੁਤਿਯੋ ਸਙ੍ਗਹੋਤਿ ਸਮ੍ਬਨ੍ਧਿਤਬ੍ਬਂ. ਪਨ੍ਨਭਾਰਾਤਿ ਪਤਿਤਕ੍ਖਨ੍ਧਭਾਰਾ.

ਅਬ੍ਬੁਦਨ੍ਤਿ ¶ ਉਪਦ੍ਦਵਂ ਵਦਨ੍ਤਿ. ‘‘ਭਗਵਤੋ ਵਚਨਂ ਥੇਨੇਤ੍ਵਾ ਅਤ੍ਤਨੋ ਵਚਨਸ੍ਸ ਦੀਪਨਤੋ ਅਬ੍ਬੁਦਨ੍ਤਿ ਚੋਰਕਮ੍ਮ’’ਨ੍ਤਿ ਏਕੇ. ਇਦਨ੍ਤਿ ਵਕ੍ਖਮਾਨਨਿਦਸ੍ਸਨਂ. ਸਨ੍ਦਿਸ੍ਸਮਾਨਾ ਮੁਖਾ ਸਮ੍ਮੁਖਾ. ਭਾਵਿਤਮਗ੍ਗਨ੍ਤਿ ਉਪ੍ਪਾਦਿਤਜ੍ਝਾਨਂ. ਸਾਧੁ ਸਪ੍ਪੁਰਿਸਾਤਿ ਏਤ੍ਥ ਸਾਧੂਤਿ ਆਯਾਚਨਤ੍ਥੇ ਨਿਪਾਤੋ, ਤਂ ਯਾਚਾਮੀਤਿ ਅਤ੍ਥੋ. ਹਟ੍ਠਪਹਟ੍ਠੋਤਿ ਪੁਨਪ੍ਪੁਨਂ ਸਨ੍ਤੁਟ੍ਠੋ. ਉਦਗ੍ਗੁਦਗ੍ਗੋਤਿ ਸਰੀਰਵਿਕਾਰੁਪ੍ਪਾਦਨਪੀਤਿਵਸੇਨ ਉਦਗ੍ਗੁਦਗ੍ਗੋ, ਪੀਤਿਮਾ ਹਿ ਪੁਗ੍ਗਲੋ ਕਾਯਚਿਤ੍ਤਾਨਂ ਉਗ੍ਗਤਤ੍ਤਾ ‘‘ਉਦਗ੍ਗੁਦਗ੍ਗੋ’’ਤਿ ਵੁਚ੍ਚਤਿ.

ਤੇਨ ਖੋ ਪਨ ਸਮਯੇਨਾਤਿ ਯਸ੍ਮਿਂ ਸਮਯੇ ਦੁਤਿਯਂ ਸਙ੍ਗੀਤਿਂ ਅਕਰਿਂਸੁ, ਤਸ੍ਮਿਂ ਸਮਯੇਤਿ ਅਤ੍ਥੋ. ਤਂ ਅਧਿਕਰਣਂ ਨ ਸਮ੍ਪਾਪੁਣਿਂਸੂਤਿ ਤਂ ਵਜ੍ਜਿਪੁਤ੍ਤਕੇਹਿ ਉਪ੍ਪਾਦਿਤਂ ਅਧਿਕਰਣਂ ਵਿਨਿਚ੍ਛਿਨਿਤੁਂ ਨ ਸਮ੍ਪਾਪੁਣਿਂਸੁ ਨਾਗਮਿਂਸੁ. ਨੋ ਅਹੁਵਤ੍ਥਾਤਿ ਸਮ੍ਬਨ੍ਧੋ. ਯਾਵਤਾਯੁਕਂ ਠਤ੍ਵਾ ਪਰਿਨਿਬ੍ਬੁਤਾਤਿ ਸਮ੍ਬਨ੍ਧੋ. ਕਿਂ ਪਨ ਕਤ੍ਵਾ ਥੇਰਾ ਪਰਿਨਿਬ੍ਬੁਤਾਤਿ? ਆਹ ਦੁਤਿਯਂ ਸਙ੍ਗਹਂ ਕਤ੍ਵਾਤਿਆਦਿ. ਅਨਿਚ੍ਚਤਾਵਸਨ੍ਤਿ ਅਨਿਚ੍ਚਤਾਧੀਨਤਂ. ਜਮ੍ਮਿਨ੍ਤਿ ਲਾਮਕਂ. ਦੁਰਭਿਸਮ੍ਭਵਂ ਅਨਭਿਭਵਨੀਯਂ ਅਤਿਕ੍ਕਮਿਤੁਂ ਅਸਕ੍ਕੁਣੇਯ੍ਯਂ ਅਨਿਚ੍ਚਤਂ ਏਵਂ ਞਤ੍ਵਾਤਿ ਸਮ੍ਬਨ੍ਧੋ.

ਦੁਤਿਯਸਙ੍ਗੀਤਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਤਤਿਯਸਙ੍ਗੀਤਿਕਥਾਵਣ੍ਣਨਾ

ਸਤ੍ਤ ¶ ਵਸ੍ਸਾਨੀਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਅਤਿਚ੍ਛਥਾਤਿ ਅਤਿਕ੍ਕਮਿਤ੍ਵਾ ਇਚ੍ਛਥ, ਇਤੋ ਅਞ੍ਞਤ੍ਥ ਗਨ੍ਤ੍ਵਾ ਭਿਕ੍ਖਂ ਪਰਿਯੇਸਥਾਤਿ ਅਤ੍ਥੋ. ਭਤ੍ਤਵਿਸ੍ਸਗ੍ਗਕਰਣਤ੍ਥਾਯਾਤਿ ਭਤ੍ਤਸ੍ਸ ਅਜ੍ਝੋਹਰਣਕਿਚ੍ਚਤ੍ਥਾਯ, ਭੁਞ੍ਜਨਤ੍ਥਾਯਾਤਿ ਅਤ੍ਥੋ. ‘‘ਸੋਲ਼ਸਵਸ੍ਸੋ’’ਤਿ ਉਦ੍ਦੇਸੋ ਕਥਨਂ ਅਸ੍ਸ ਅਤ੍ਥੀਤਿ ਸੋਲ਼ਸਵਸ੍ਸੁਦ੍ਦੇਸਿਕੋ, ‘‘ਸੋਲ਼ਸਵਸ੍ਸਿਕੋ’’ਤਿ ਅਤ੍ਥੋ.

ਤੀਸੁ ਵੇਦੇਸੂਤਿਆਦੀਸੁ ਇਰੁਵੇਦਯਜੁਵੇਦਸਾਮਵੇਦਸਙ੍ਖਾਤੇਸੁ ਤੀਸੁ ਵੇਦੇਸੁ. ਤਯੋ ਏਵ ਕਿਰ ਵੇਦਾ ਅਟ੍ਠਕਾਦੀਹਿ ਧਮ੍ਮਿਕੇਹਿ ਇਸੀਹਿ ਲੋਕਸ੍ਸ ਸਗ੍ਗਮਗ੍ਗਵਿਭਾਵਨਤ੍ਥਾਯ ਕਤਾ. ਤੇਨੇਵ ਹਿ ਤੇ ਤੇਹਿ ਵੁਚ੍ਚਨ੍ਤਿ. ਆਥਬ੍ਬਣਵੇਦੋ ਪਨ ਪਚ੍ਛਾ ਅਧਮ੍ਮਿਕੇਹਿ ਬ੍ਰਾਹ੍ਮਣੇਹਿ ਪਾਣਵਧਾਦਿਅਤ੍ਥਾਯ ਕਤੋ. ਪੁਰਿਮੇਸੁ ਚ ਤੀਸੁ ਵੇਦੇਸੁ ਤੇਹੇਵ ਧਮ੍ਮਿਕਸਾਖਾਯੋ ਅਪਨੇਤ੍ਵਾ ਯਾਗਵਧਾਦਿਦੀਪਿਕਾ ਅਧਮ੍ਮਿਕਸਾਖਾ ਪਕ੍ਖਿਤ੍ਤਾਤਿ ਵੇਦਿਤਬ੍ਬਾ. ਨਿਘਣ੍ਡੂਤਿ ਰੁਕ੍ਖਾਦੀਨਂ ਵੇਵਚਨਪ੍ਪਕਾਸਕਂ ਪਰਿਯਾਯਨਾਮਾਨੁਰੂਪਂ ਸਤ੍ਥਂ. ਤਞ੍ਹਿ ਲੋਕੇ ‘‘ਨਿਘਣ੍ਡੂ’’ਤਿ ¶ ਵੁਚ੍ਚਤਿ. ਕੇਟੁਭਨ੍ਤਿ ਕਿਟਤਿ ਗਮੇਤਿ ਕਿਰਿਯਾਦਿਵਿਭਾਗਨ੍ਤਿ ਕੇਟੁਭਂ, ਕਿਰਿਯਾਕਪ੍ਪਵਿਕਪ੍ਪੋ ਕਵੀਨਂ ਉਪਕਾਰਸਤ੍ਥਂ. ਏਤ੍ਥ ਚ ਕਿਰਿਯਾਕਪ੍ਪਵਿਕਪ੍ਪੋਤਿ ਵਚੀਭੇਦਾਦਿਲਕ੍ਖਣਾ ਕਿਰਿਯਾ ਕਪ੍ਪੀਯਤਿ ਵਿਕਪ੍ਪੀਯਤਿ ਏਤੇਨਾਤਿ ਕਿਰਿਯਾਕਪ੍ਪੋ, ਸੋ ਪਨ ਵਣ੍ਣਪਦਬਨ੍ਧਪਦਤ੍ਥਾਦਿਵਿਭਾਗਤੋ ਬਹੁਵਿਕਪ੍ਪੋਤਿ ‘‘ਕਿਰਿਯਾਕਪ੍ਪਵਿਕਪ੍ਪੋ’’ਤਿ ਵੁਚ੍ਚਤਿ. ਇਦਞ੍ਚ ਮੂਲਕਿਰਿਯਾਕਪ੍ਪਗਨ੍ਥਂ ਸਨ੍ਧਾਯ ਵੁਤ੍ਤਂ. ਸਹ ਨਿਘਣ੍ਡੁਨਾ ਕੇਟੁਭੇਨ ਚ ਸਨਿਘਣ੍ਡੁਕੇਟੁਭਾ, ਤਯੋ ਵੇਦਾ, ਤੇਸੁ ਸਨਿਘਣ੍ਡੁਕੇਟੁਭੇਸੁ. ਠਾਨਕਰਣਾਦਿਵਿਭਾਗਤੋ ਚ ਨਿਬ੍ਬਚਨਵਿਭਾਗਤੋ ਚ ਅਕ੍ਖਰਾ ਪਭੇਦੀਯਨ੍ਤਿ ਏਤੇਨਾਤਿ ਅਕ੍ਖਰਪ੍ਪਭੇਦੋ, ਸਿਕ੍ਖਾ ਚ ਨਿਰੁਤ੍ਤਿ ਚ. ਸਹ ਅਕ੍ਖਰਪ੍ਪਭੇਦੇਨਾਤਿ ਸਾਕ੍ਖਰਪ੍ਪਭੇਦਾ, ਤੇਸੁ ਸਾਕ੍ਖਰਪ੍ਪਭੇਦੇਸੁ. ਆਥਬ੍ਬਣਵੇਦਂ ਚਤੁਤ੍ਥਂ ਕਤ੍ਵਾ ‘‘ਇਤਿਹ ਆਸ ਇਤਿਹ ਆਸਾ’’ਤਿ ਈਦਿਸਵਚਨਪਟਿਸਂਯੁਤ੍ਤੋ ਪੋਰਾਣਕਥਾਸਙ੍ਖਾਤੋ ਇਤਿਹਾਸੋ ਪਞ੍ਚਮੋ ਏਤੇਸਨ੍ਤਿ ਇਤਿਹਾਸਪਞ੍ਚਮਾ, ਤਯੋ ਵੇਦਾ, ਤੇਸੁ ਇਤਿਹਾਸਪਞ੍ਚਮੇਸੁ.

ਯਸ੍ਸ ਚਿਤ੍ਤਨ੍ਤਿਆਦਿ ਪਞ੍ਹਦ੍ਵਯਂ ਖੀਣਾਸਵਾਨਂ ਚੁਤਿਚਿਤ੍ਤਸ੍ਸ ਉਪ੍ਪਾਦਕ੍ਖਣਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਪਠਮਪਞ੍ਹੇ ਉਪ੍ਪਜ੍ਜਤੀਤਿ ਉਪ੍ਪਾਦਕ੍ਖਣਸਮਙ੍ਗਿਤਾਯ ਉਪ੍ਪਜ੍ਜਤਿ. ਨ ਨਿਰੁਜ੍ਝਤੀਤਿ ਨਿਰੋਧਕ੍ਖਣਂ ਅਪ੍ਪਤ੍ਤਤਾਯ ਨ ਨਿਰੁਜ੍ਝਤਿ. ਤਸ੍ਸ ਚਿਤ੍ਤਨ੍ਤਿ ਤਸ੍ਸ ਪੁਗ੍ਗਲਸ੍ਸ ਤਂ ਚਿਤ੍ਤਂ ਕਿਂ ਨਿਰੁਜ੍ਝਿਸ੍ਸਤਿ ਆਯਤਿਞ੍ਚ ਨੁਪ੍ਪਜ੍ਜਿਸ੍ਸਤੀਤਿ ਪੁਚ੍ਛਾ, ਤਸ੍ਸਾ ਚ ਵਿਭਜ੍ਜਬ੍ਯਾਕਰਣੀਯਤਾਯ ਏਵਮੇਤ੍ਥ ਵਿਸ੍ਸਜ੍ਜਨਂ ਵੇਦਿਤਬ੍ਬਂ. ਅਰਹਤੋ ਪਚ੍ਛਿਮਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤਸ੍ਸ ਚਿਤ੍ਤਂ ਉਪ੍ਪਜ੍ਜਤਿ, ਨ ਨਿਰੁਜ੍ਝਤਿ, ਆਯਤਿਞ੍ਚ ਨੁਪ੍ਪਜ੍ਜਿਸ੍ਸਤਿ, ਅਵਸ੍ਸਮੇਵ ਨਿਰੋਧਕ੍ਖਣਂ ਪਤ੍ਵਾ ਨਿਰੁਜ੍ਝਿਸ੍ਸਤਿ, ਤਤੋ ਅਪ੍ਪਟਿਸਨ੍ਧਿਕਤ੍ਤਾ ਅਞ੍ਞਂ ਨੁਪ੍ਪਜ੍ਜਿਸ੍ਸਤਿ. ਠਪੇਤ੍ਵਾ ਪਨ ਪਚ੍ਛਿਮਚਿਤ੍ਤਸਮਙ੍ਗਿਂ ਖੀਣਾਸਵਂ ਇਤਰੇਸਂ ਉਪ੍ਪਾਦਕ੍ਖਣਸਮਙ੍ਗਿਚਿਤ੍ਤਂ ¶ ਉਪ੍ਪਾਦਕ੍ਖਣਸਮਙ੍ਗਿਤਾਯ ਉਪ੍ਪਜ੍ਜਤਿ ਭਙ੍ਗਂ ਅਪ੍ਪਤ੍ਤਤਾਯ ਨ ਨਿਰੁਜ੍ਝਤਿ, ਭਙ੍ਗਂ ਪਨ ਪਤ੍ਵਾ ਨਿਰੁਜ੍ਝਿਸ੍ਸਤੇਵ, ਅਞ੍ਞਂ ਪਨ ਤਸ੍ਮਿਂ ਵਾ ਅਞ੍ਞਸ੍ਮਿਂ ਵਾ ਅਤ੍ਤਭਾਵੇ ਉਪ੍ਪਜ੍ਜਿਸ੍ਸਤਿ ਚੇਵ ਨਿਰੁਜ੍ਝਿਸ੍ਸਤਿ ਚਾਤਿ. ਯਸ੍ਸ ਵਾ ਪਨਾਤਿਆਦਿ ਦੁਤਿਯਪਞ੍ਹੇ ਪਨ ਨਿਰੁਜ੍ਝਿਸ੍ਸਤਿ ਨੁਪ੍ਪਜ੍ਜਿਸ੍ਸਤੀਤਿ ਯਸ੍ਸ ਚਿਤ੍ਤਂ ਉਪ੍ਪਾਦਕ੍ਖਣਸਮਙ੍ਗਿਤਾਯ ਭਙ੍ਗਕ੍ਖਣਂ ਪਤ੍ਵਾ ਨਿਰੁਜ੍ਝਿਸ੍ਸਤਿ ਅਪ੍ਪਟਿਸਨ੍ਧਿਕਤਾਯ ਨੁਪ੍ਪਜ੍ਜਿਸ੍ਸਤਿ, ਤਸ੍ਸ ਖੀਣਾਸਵਸ੍ਸ ਤਂ ਚਿਤ੍ਤਂ ਕਿਂ ਉਪ੍ਪਜ੍ਜਤਿ ਨ ਨਿਰੁਜ੍ਝਤੀਤਿ ਪੁਚ੍ਛਾ, ਤਸ੍ਸਾ ਏਕਂਸਬ੍ਯਾਕਰਣੀਯਤਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ ਵੇਦਿਤਬ੍ਬਂ. ਉਦ੍ਧਂ ਵਾ ਅਧੋ ਵਾ ਹਰਿਤੁਂ ਅਸਕ੍ਕੋਨ੍ਤੋਤਿ ਉਪਰਿਮਪਦੇ ਵਾ ਹੇਟ੍ਠਿਮਪਦਂ ਹੇਟ੍ਠਿਮਪਦੇ ਵਾ ਉਪਰਿਮਪਦਂ ਅਤ੍ਥਤੋ ਸਮਨ੍ਨਾਹਰਿਤੁਂ ਘਟੇਤੁਂ ਪੁਬ੍ਬੇਨਾਪਰਂ ਯੋਜੇਤ੍ਵਾ ਅਤ੍ਥਂ ਪਰਿਚ੍ਛਿਨ੍ਦਿਤੁਂ ਅਸਕ੍ਕੋਨ੍ਤੋਤਿ ਅਤ੍ਥੋ.

ਸੋਤਾਪਨ੍ਨਾਨਂ ¶ ਸੀਲੇਸੁ ਪਰਿਪੂਰਕਾਰਿਤਾਯ ਸਮਾਦਿਨ੍ਨਸੀਲਤੋ ਨਤ੍ਥਿ ਪਰਿਹਾਨੀਤਿ ਆਹ ‘‘ਅਭਬ੍ਬੋ ਦਾਨਿ ਸਾਸਨਤੋ ਨਿਵਤ੍ਤਿਤੁ’’ਨ੍ਤਿ. ਵਡ੍ਢੇਤ੍ਵਾਤਿ ਉਪਰਿਮਗ੍ਗਤ੍ਥਾਯ ਕਮ੍ਮਟ੍ਠਾਨਂ ਵਡ੍ਢੇਤ੍ਵਾ. ਦਨ੍ਤੇ ਪੁਨਨ੍ਤਿ ਵਿਸੋਧੇਨ੍ਤਿ ਏਤੇਨਾਤਿ ਦਨ੍ਤਪੋਨਂ ਵੁਚ੍ਚਤਿ ਦਨ੍ਤਕਟ੍ਠਂ. ਅਭਿਨਵਾਨਂ ਆਗਨ੍ਤੁਕਾਨਂ ਲਜ੍ਜੀਸਭਾਵਂ ਖਨ੍ਤਿਮੇਤ੍ਤਾਦਿਗੁਣਸਮਙ੍ਗਿਤਞ੍ਚ ਕਤਿਪਾਹਂ ਸੁਟ੍ਠੁ ਵੀਮਂਸਿਤ੍ਵਾਵ ਹਤ੍ਥਕਮ੍ਮਾਦਿਸਮ੍ਪਟਿਚ੍ਛਨਂ ਸਙ੍ਗਹਕਰਣਞ੍ਚ ਯੁਤ੍ਤਨ੍ਤਿ ਸਾਮਣੇਰਸ੍ਸ ਚੇਵ ਅਞ੍ਞੇਸਞ੍ਚ ਭਿਕ੍ਖੂਨਂ ਦਿਟ੍ਠਾਨੁਗਤਿਂ ਆਪਜ੍ਜਨ੍ਤਾਨਂ ਞਾਪਨਤ੍ਥਂ ਥੇਰੋ ਤਸ੍ਸ ਭਬ੍ਬਰੂਪਤਂ ਅਭਿਞ੍ਞਾਯ ਞਤ੍ਵਾਪਿ ਪੁਨ ਸਮ੍ਮਜ੍ਜਨਾਦਿਂ ਅਕਾਸਿ. ‘‘ਤਸ੍ਸ ਚਿਤ੍ਤਦਮਨਤ੍ਥ’’ਨ੍ਤਿਪਿ ਵਦਨ੍ਤਿ. ਬੁਦ੍ਧਵਚਨਂ ਪਟ੍ਠਪੇਸੀਤਿ ਬੁਦ੍ਧਵਚਨਂ ਉਗ੍ਗਣ੍ਹਾਪੇਤੁਂ ਆਰਭਿ. ਸਕਲਵਿਨਯਾਚਾਰਪਟਿਪਤ੍ਤਿ ਉਪਸਮ੍ਪਨ੍ਨਾਨਮੇਵ ਵਿਹਿਤਾਤਿ ਤਪ੍ਪਰਿਯਾਪੁਣਨਮਪਿ ਤੇਸਞ੍ਞੇਵ ਅਨੁਰੂਪਨ੍ਤਿ ਆਹ ‘‘ਠਪੇਤ੍ਵਾ ਵਿਨਯਪਿਟਕ’’ਨ੍ਤਿ. ਤਸ੍ਸ ਚਿਤ੍ਤੇ ਠਪਿਤਮ੍ਪਿ ਬੁਦ੍ਧਵਚਨਂ ਸਙ੍ਗੋਪਨਤ੍ਥਾਯ ਨਿਯ੍ਯਾਤਿਤਭਾਵਂ ਦਸ੍ਸੇਤੁਂ ‘‘ਹਤ੍ਥੇ ਪਤਿਟ੍ਠਾਪੇਤ੍ਵਾ’’ਤਿ ਵੁਤ੍ਤਂ.

ਏਕਰਜ੍ਜਾਭਿਸੇਕਨ੍ਤਿ ਸਕਲਜਮ੍ਬੁਦੀਪੇ ਏਕਾਧਿਪਚ੍ਚਵਸੇਨ ਕਰਿਯਮਾਨਂ ਅਭਿਸੇਕਂ. ਰਾਜਿਦ੍ਧਿਯੋਤਿ ਰਾਜਾਨੁਭਾਵਾਨੁਗਤਪ੍ਪਭਾਵਾ. ਯਤੋਤਿ ਯਤੋ ਸੋਲ਼ਸਘਟਤੋ. ਦੇਵਤਾ ਏਵ ਦਿਵਸੇ ਦਿਵਸੇ ਆਹਰਨ੍ਤੀਤਿ ਸਮ੍ਬਨ੍ਧੋ. ਦੇਵਸਿਕਨ੍ਤਿ ਦਿਵਸੇ ਦਿਵਸੇ. ਅਗਦਾਮਲਕਨ੍ਤਿ ਅਪ੍ਪਕੇਨੇਵ ਸਰੀਰਸੋਧਨਾਦਿਸਮਤ੍ਥਂ ਸਬ੍ਬਦੋਸਹਰਂ ਓਸਧਾਮਲਕਂ. ਛਦ੍ਦਨ੍ਤਦਹਤੋਤਿ ਛਦ੍ਦਨ੍ਤਦਹਸਮੀਪੇ ਠਿਤਦੇਵਵਿਮਾਨਤੋ, ਕਪ੍ਪਰੁਕ੍ਖਤੋ ਵਾ, ਤਤ੍ਥ ਤਾਦਿਸਾ ਕਪ੍ਪਰੁਕ੍ਖਵਿਸੇਸਾ ਸਨ੍ਤਿ, ਤਤੋ ਵਾ ਆਹਰਨ੍ਤੀਤਿ ਅਤ੍ਥੋ. ਅਸੁਤ੍ਤਮਯਿਕਨ੍ਤਿ ਸੁਤ੍ਤੇਹਿ ਅਬਦ੍ਧਂ ਦਿਬ੍ਬਸੁਮਨਪੁਪ੍ਫੇਹੇਵ ਕਤਂ ਸੁਮਨਪੁਪ੍ਫਪਟਂ. ਉਟ੍ਠਿਤਸ੍ਸ ਸਾਲਿਨੋਤਿ ਸਯਂਜਾਤਸਾਲਿਨੋ, ਸਮੁਦਾਯਾਪੇਕ੍ਖਞ੍ਚੇਤ੍ਥ ਏਕਵਚਨਂ, ਸਾਲੀਨਨ੍ਤਿ ਅਤ੍ਥੋ. ਨਵ ਵਾਹਸਹਸ੍ਸਾਨੀਤਿ ਏਤ੍ਥ ਚਤਸ੍ਸੋ ਮੁਟ੍ਠਿਯੋ ਏਕੋ ਕੁਡੁਵੋ, ਚਤ੍ਤਾਰੋ ਕੁਡੁਵਾ ਏਕੋ ਪਤ੍ਥੋ, ਚਤ੍ਤਾਰੋ ਪਤ੍ਥਾ ਏਕੋ ਆਲ਼੍ਹਕੋ, ਚਤ੍ਤਾਰੋ ਆਲ਼੍ਹਕਾ ਏਕਂ ਦੋਣਂ, ਚਤ੍ਤਾਰਿ ਦੋਣਾਨਿ ਏਕਾ ਮਾਨਿਕਾ ¶ , ਚਤਸ੍ਸੋ ਮਾਨਿਕਾ ਏਕਾ ਖਾਰੀ, ਵੀਸਤਿ ਖਾਰਿਕਾ ਏਕੋ ਵਾਹੋ, ਤਦੇਵ ‘‘ਏਕਂ ਸਕਟ’’ਨ੍ਤਿ ਸੁਤ੍ਤਨਿਪਾਤਟ੍ਠਕਥਾਦੀਸੁ (ਸੁ. ਨਿ. ਅਟ੍ਠ. ੨.ਕੋਕਾਲਿਕਸੁਤ੍ਤਵਣ੍ਣਨਾ) ਵੁਤ੍ਤਂ. ਨਿਤ੍ਥੁਸਕਣੇ ਕਰੋਨ੍ਤੀਤਿ ਥੁਸਕੁਣ੍ਡਕਰਹਿਤੇ ਕਰੋਨ੍ਤਿ. ਤੇਨ ਨਿਮ੍ਮਿਤਂ ਬੁਦ੍ਧਰੂਪਂ ਪਸ੍ਸਨ੍ਤੋਤਿ ਸਮ੍ਬਨ੍ਧੋ. ਪੁਞ੍ਞਪ੍ਪਭਾਵਨਿਬ੍ਬਤ੍ਤਗ੍ਗਹਣਂ ਨਾਗਰਾਜਨਿਮ੍ਮਿਤਾਨਂ ਪੁਞ੍ਞਪ੍ਪਭਾਵਨਿਬ੍ਬਤ੍ਤੇਹਿ ਸਦਿਸਤਾਯ ਕਤਂ. ਵਿਮਲਕੇਤੁਮਾਲਾਤਿ ਏਤ੍ਥ ਕੇਤੁਮਾਲਾ ਨਾਮ ਸੀਸਤੋ ਨਿਕ੍ਖਮਿਤ੍ਵਾ ਉਪਰਿਮੁਦ੍ਧਨਿ ਪੁਞ੍ਜੋ ਹੁਤ੍ਵਾ ਦਿਸ੍ਸਮਾਨਰਸ੍ਮਿਰਾਸੀਤਿ ਵਦਨ੍ਤਿ.

ਬਾਹਿਰਕਪਾਸਣ੍ਡਨ੍ਤਿ ¶ ਬਾਹਿਰਕਪ੍ਪਵੇਦਿਤਂ ਸਮਯਵਾਦਂ. ਪਰਿਗ੍ਗਣ੍ਹੀਤਿ ਵੀਮਂਸਮਾਨੋ ਪਰਿਗ੍ਗਹੇਸਿ. ਭਦ੍ਦਪੀਠਕੇਸੂਤਿ ਵੇਤ੍ਤਮਯਪੀਠੇਸੁ. ਸਾਰੋਤਿ ਗੁਣਸਾਰੋ. ਸੀਹਪਞ੍ਜਰੇਤਿ ਮਹਾਵਾਤਪਾਨਸਮੀਪੇ. ਕਿਲੇਸਵਿਪ੍ਫਨ੍ਦਰਹਿਤਚਿਤ੍ਤਤਾਯ ਦਨ੍ਤਂ. ਨਿਚ੍ਚਂ ਪਚ੍ਚੁਪਟ੍ਠਿਤਸਤਾਰਕ੍ਖਤਾਯ ਗੁਤ੍ਤਂ. ਖੁਰਗ੍ਗੇਯੇਵਾਤਿ ਕੇਸੋਰੋਪਨਾਵਸਾਨੇ. ਅਤਿਵਿਯ ਸੋਭਤੀਤਿ ਸਮ੍ਬਨ੍ਧੋ. ਵਾਣਿਜਕੋ ਅਹੋਸੀਤਿ ਮਧੁਵਾਣਿਜਕੋ ਅਹੋਸਿ.

ਪੁਬ੍ਬੇ ਵ ਸਨ੍ਨਿਵਾਸੇਨਾਤਿ ਪੁਬ੍ਬੇ ਵਾ ਪੁਬ੍ਬਜਾਤਿਯਂ ਵਾ ਸਹਵਾਸੇਨਾਤਿ ਅਤ੍ਥੋ. ਪਚ੍ਚੁਪ੍ਪਨ੍ਨਹਿਤੇਨ ਵਾਤਿ ਵਤ੍ਤਮਾਨਭਵੇ ਹਿਤਚਰਣੇਨ ਵਾ. ਏਵਂ ਇਮੇਹਿ ਦ੍ਵੀਹਿ ਕਾਰਣੇਹਿ ਤਂ ਸਿਨੇਹਸਙ੍ਖਾਤਂ ਪੇਮਂ ਜਾਯਤੇ. ਕਿਂ ਵਿਯਾਤਿ? ਆਹ ‘‘ਉਪ੍ਪਲਂ ਵ ਯਥੋਦਕੇ’’ਤਿ. ਉਪ੍ਪਲਂ ਵਾਤਿ ਰਸ੍ਸਕਤੋ ਵਾ-ਸਦ੍ਦੋ ਅਵੁਤ੍ਤਸਮ੍ਪਿਣ੍ਡਨਤ੍ਥੋ. ਯਥਾ-ਸਦ੍ਦੋ ਉਪਮਾਯਂ. ਇਦਂ ਵੁਤ੍ਤਂ ਹੋਤਿ – ਯਥਾ ਉਪ੍ਪਲਞ੍ਚ ਸੇਸਞ੍ਚ ਪਦੁਮਾਦਿ ਉਦਕੇ ਜਾਯਮਾਨਂ ਦ੍ਵੇ ਕਾਰਣਾਨਿ ਨਿਸ੍ਸਾਯ ਜਾਯਤਿ ਉਦਕਞ੍ਚੇਵ ਕਲਲਞ੍ਚ, ਏਵਂ ਪੇਮਮ੍ਪੀਤਿ (ਜਾ. ਅਟ੍ਠ. ੨.੨.੧੭੪).

ਧੁਵਭਤ੍ਤਾਨੀਤਿ ਨਿਚ੍ਚਭਤ੍ਤਾਨਿ. ਵਜ੍ਜਾਵਜ੍ਜਨ੍ਤਿ ਖੁਦ੍ਦਕਂ ਮਹਨ੍ਤਞ੍ਚ ਵਜ੍ਜਂ. ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਸ੍ਸ ਭਾਰਮਕਾਸੀਤਿ ਥੇਰਸ੍ਸ ਮਹਾਨੁਭਾਵਤਂ, ਤਦਾ ਸਾਸਨਕਿਚ੍ਚਸ੍ਸ ਨਾਯਕਭਾਵੇਨ ਸਙ੍ਘਪਰਿਣਾਯਕਤਞ੍ਚ ਰਞ੍ਞੋ ਞਾਪੇਤੁਂ ਸਙ੍ਘੋ ਤਸ੍ਸ ਭਾਰਮਕਾਸੀਤਿ ਵੇਦਿਤਬ੍ਬਂ, ਨ ਅਞ੍ਞੇਸਂ ਅਜਾਨਨਤਾਯ. ਸਾਸਨਸ੍ਸ ਦਾਯਾਦੋਤਿ ਸਾਸਨਸ੍ਸ ਅਬ੍ਭਨ੍ਤਰੋ ਞਾਤਕੋ ਹੋਮਿ ਨ ਹੋਮੀਤਿ ਅਤ੍ਥੋ. ਯੇ ਸਾਸਨੇ ਪਬ੍ਬਜਿਤੁਂ ਪੁਤ੍ਤਧੀਤਰੋ ਪਰਿਚ੍ਚਜਨ੍ਤਿ, ਤੇ ਬੁਦ੍ਧਸਾਸਨੇ ਸਾਲੋਹਿਤਞਾਤਕਾ ਨਾਮ ਹੋਨ੍ਤਿ, ਸਕਲਸਾਸਨਧਾਰਣੇ ਸਮਤ੍ਥਾਨਂ ਅਤ੍ਤਨੋ ਓਰਸਪੁਤ੍ਤਾਨਂ ਪਰਿਚ੍ਚਤ੍ਤਤ੍ਤਾ ਨ ਪਚ੍ਚਯਮਤ੍ਤਦਾਯਕਾਤਿ ਇਮਮਤ੍ਥਂ ਸਨ੍ਧਾਯ ਥੇਰੋ ‘‘ਨ ਖੋ, ਮਹਾਰਾਜ, ਏਤ੍ਤਾਵਤਾ ਸਾਸਨਸ੍ਸ ਦਾਯਾਦੋ ਹੋਤੀ’’ਤਿ ਆਹ. ਕਥਞ੍ਚਰਹੀਤਿ ਏਤ੍ਥ ਚਰਹੀਤਿ ਨਿਪਾਤੋ ਅਕ੍ਖਨ੍ਤਿਂ ਦੀਪੇਤਿ. ਤਿਸ੍ਸਕੁਮਾਰਸ੍ਸਾਤਿ ਰਞ੍ਞੋ ਏਕਮਾਤੁਕਸ੍ਸ ਕਨਿਟ੍ਠਸ੍ਸ. ਸਕ੍ਖਸੀਤਿ ਸਕ੍ਖਿਸ੍ਸਸਿ. ਸਿਕ੍ਖਾਯ ਪਤਿਟ੍ਠਾਪੇਸੁਨ੍ਤਿ ਪਾਣਾਤਿਪਾਤਾ ਵੇਰਮਣਿਆਦੀਸੁ ਵਿਕਾਲਭੋਜਨਾ ਵੇਰਮਣਿਪਰਿਯੋਸਾਨਾਸੁ ਛਸੁ ਸਿਕ੍ਖਾਸੁ ਪਾਣਾਤਿਪਾਤਾ ਵੇਰਮਣਿਂ ਦ੍ਵੇ ¶ ਵਸ੍ਸਾਨਿ ਅਵੀਤਿਕ੍ਕਮ੍ਮ ਸਮਾਦਾਨਂ ਸਮਾਦਿਯਾਮੀਤਿਆਦਿਨਾ (ਪਾਚਿ. ੧੦੭੯) ਸਮਾਦਾਨਵਸੇਨ ਸਿਕ੍ਖਾਸਮ੍ਮੁਤਿਦਾਨਾਨਨ੍ਤਰਂ ਸਿਕ੍ਖਾਯ ਪਤਿਟ੍ਠਾਪੇਸੁਂ. ਛ ਵਸ੍ਸਾਨਿ ਅਭਿਸੇਕਸ੍ਸ ਅਸ੍ਸਾਤਿ ਛਵਸ੍ਸਾਭਿਸੇਕੋ.

ਸਬ੍ਬਂ ¶ ਥੇਰਵਾਦਨ੍ਤਿ ਦ੍ਵੇ ਸਙ੍ਗੀਤਿਯੋ ਆਰੁਲ਼੍ਹਾ ਪਾਲ਼ਿ. ਸਾ ਹਿ ਮਹਾਸਙ੍ਘਿਕਾਦਿਭਿਨ੍ਨਲਦ੍ਧਿਕਾਹਿ ਵਿਵੇਚੇਤੁਂ ‘‘ਥੇਰਵਾਦੋ’’ਤਿ ਵੁਤ੍ਤਾ. ਅਯਞ੍ਹਿ ਵਿਭਜ੍ਜਵਾਦੋ ਮਹਾਕਸ੍ਸਪਤ੍ਥੇਰਾਦੀਹਿ ਅਸਙ੍ਕਰਤੋ ਰਕ੍ਖਿਤੋ ਆਨੀਤੋ ਚਾਤਿ ‘‘ਥੇਰਵਾਦੋ’’ਤਿ ਵੁਚ੍ਚਤਿ, ‘‘ਸਥੇਰਵਾਦ’’ਨ੍ਤਿਪਿ ਲਿਖਨ੍ਤਿ. ਤਤ੍ਥ ‘‘ਅਟ੍ਠਕਥਾਸੁ ਆਗਤਥੇਰਵਾਦਸਹਿਤਂ ਸਾਟ੍ਠਕਥਂ ਤਿਪਿਟਕਸਙ੍ਗਹਿਤਂ ਬੁਦ੍ਧਵਚਨ’’ਨ੍ਤਿ ਆਨੇਤ੍ਵਾ ਯੋਜੇਤਬ੍ਬਂ. ਤੇਜੋਧਾਤੁਂ ਸਮਾਪਜ੍ਜਿਤ੍ਵਾਤਿ ਤੇਜੋਕਸਿਣਾਰਮ੍ਮਣਂ ਝਾਨਂ ਸਮਾਪਜ੍ਜਿਤ੍ਵਾ.

ਸਭਾਯਨ੍ਤਿ ਨਗਰਮਜ੍ਝੇ ਵਿਨਿਚ੍ਛਯਸਾਲਾਯਂ. ਦਿਟ੍ਠਿਗਤਾਨੀਤਿ ਦਿਟ੍ਠਿਯੋਵ. ਨ ਖੋ ਪਨੇਤਂ ਸਕ੍ਕਾ ਇਮੇਸਂ ਮਜ੍ਝੇ ਵਸਨ੍ਤੇਨ ਵੂਪਸਮੇਤੁਨ੍ਤਿ ਤੇਸਞ੍ਹਿ ਮਜ੍ਝੇ ਵਸਨ੍ਤੋ ਤੇਸੁਯੇਵ ਅਨ੍ਤੋਗਧਤ੍ਤਾ ਆਦੇਯ੍ਯਵਚਨੋ ਨ ਹੋਤਿ, ਤਸ੍ਮਾ ਏਵਂ ਚਿਨ੍ਤੇਸਿ. ਅਹੋਗਙ੍ਗਪਬ੍ਬਤਨ੍ਤਿ ਏਵਂਨਾਮਕਂ ਪਬ੍ਬਤਂ. ‘‘ਅਧੋਗਙ੍ਗਾਪਬ੍ਬਤ’’ਨ੍ਤਿਪਿ ਲਿਖਨ੍ਤਿ, ਤਂ ਨ ਸੁਨ੍ਦਰਂ. ਪਞ੍ਚਾਤਪੇਨ ਤਪ੍ਪੇਨ੍ਤੀਤਿ ਚਤੂਸੁ ਠਾਨੇਸੁ ਅਗ੍ਗਿਂ ਜਾਲੇਤ੍ਵਾ ਮਜ੍ਝੇ ਠਤ੍ਵਾ ਸੂਰਿਯਮਣ੍ਡਲਂ ਉਲ੍ਲੋਕੇਨ੍ਤਾ ਸੂਰਿਯਾਤਪੇਨ ਤਪ੍ਪੇਨ੍ਤਿ. ਆਦਿਚ੍ਚਂ ਅਨੁਪਰਿਵਤ੍ਤਨ੍ਤੀਤਿ ਉਦਯਕਾਲਤੋ ਪਭੁਤਿ ਸੂਰਿਯਂ ਓਲੋਕਯਮਾਨਾ ਯਾਵ ਅਤ੍ਥਙ੍ਗਮਨਾ ਸੂਰਿਯਾਭਿਮੁਖਾਵ ਪਰਿਵਤ੍ਤਨ੍ਤਿ. ਵੋਭਿਨ੍ਦਿਸ੍ਸਾਮਾਤਿ ਪਗ੍ਗਣ੍ਹਿਂਸੂਤਿ ਵਿਨਾਸੇਸ੍ਸਾਮਾਤਿ ਉਸ੍ਸਾਹਮਕਂਸੁ.

ਵਿਸ੍ਸਟ੍ਠੋਤਿ ਮਰਣਸਙ੍ਕਾਰਹਿਤੋ, ਨਿਬ੍ਭਯੋਤਿ ਅਤ੍ਥੋ. ਮਿਗਵਂ ਨਿਕ੍ਖਮਿਤ੍ਵਾਤਿ ਅਰਞ੍ਞੇ ਵਿਚਰਿਤ੍ਵਾ ਮਿਗਮਾਰਣਕੀਲ਼ਾ ਮਿਗਵਂ, ਤਂ ਉਦ੍ਦਿਸ੍ਸ ਨਿਕ੍ਖਮਿਤ੍ਵਾ ਮਿਗਵਧਤ੍ਥਂ ਨਿਕ੍ਖਮਿਤ੍ਵਾਤਿ ਅਤ੍ਥੋ. ਅਹਿਨਾਗਾਦਿਤੋ ਵਿਸੇਸਨਤ੍ਥਂ ‘‘ਹਤ੍ਥਿਨਾਗੇਨਾ’’ਤਿ ਵੁਤ੍ਤਂ. ਤਸ੍ਸ ਪਸ੍ਸਨ੍ਤਸ੍ਸੇਵਾਤਿ ਅਨਾਦਰੇ ਸਾਮਿਵਚਨਂ, ਤਸ੍ਮਿਂ ਪਸ੍ਸਨ੍ਤੇਯੇਵਾਤਿ ਅਤ੍ਥੋ. ਆਕਾਸੇ ਉਪ੍ਪਤਿਤ੍ਵਾਤਿ ਏਤ੍ਥ ਅਯਂ ਵਿਕੁਬ੍ਬਨਿਦ੍ਧਿ ਨ ਹੋਤੀਤਿ ਗਿਹਿਸ੍ਸਾਪਿ ਇਮਂ ਇਦ੍ਧਿਂ ਦਸ੍ਸੇਸਿ ਅਧਿਟ੍ਠਾਨਿਦ੍ਧਿਯਾ ਅਪ੍ਪਟਿਕ੍ਖਿਤ੍ਤਤ੍ਤਾ. ਪਕਤਿਵਣ੍ਣਞ੍ਹਿ ਵਿਜਹਿਤ੍ਵਾ ਨਾਗਵਣ੍ਣਾਦਿਦਸ੍ਸਨਂ ਵਿਕੁਬ੍ਬਨਿਦ੍ਧਿ. ਛਣਵੇਸਨ੍ਤਿ ਉਸ੍ਸਵਵੇਸਂ. ਪਧਾਨਘਰਨ੍ਤਿ ਭਾਵਨਾਨੁਯੋਗਵਸੇਨ ਵੀਰਿਯਾਰਮ੍ਭਸ੍ਸ ਅਨੁਰੂਪਂ ਵਿਵਿਤ੍ਤਸੇਨਾਸਨਂ. ਸੋਪੀਤਿ ਰਞ੍ਞੋ ਭਾਗਿਨੇਯ੍ਯਂ ਸਨ੍ਧਾਯ ਵੁਤ੍ਤਂ.

ਕੁਸਲਾਧਿਪ੍ਪਾਯੋਤਿ ਮਨਾਪਜ੍ਝਾਸਯੋ. ਦ੍ਵੇਲ਼੍ਹਕਜਾਤੋਤਿ ਸਂਸਯਮਾਪਨ੍ਨੋ. ਏਕੇਕਂ ਭਿਕ੍ਖੁਸਹਸ੍ਸਪਰਿਵਾਰਨ੍ਤਿ ਏਤ੍ਥ ‘‘ਗਣ੍ਹਿਤ੍ਵਾ ਆਗਚ੍ਛਥਾ’’ਤਿ ਆਣਾਕਾਰੇਨ ਵੁਤ੍ਤੇਪਿ ਥੇਰਾ ਭਿਕ੍ਖੂ ਸਾਸਨਹਿਤਤ੍ਤਾ ਗਤਾ. ਕਪ੍ਪਿਯਸਾਸਨਞ੍ਹੇਤਂ, ਨ ਗਿਹੀਨਂ ਗਿਹਿਕਮ੍ਮਪਟਿਸਂਯੁਤ੍ਤਂ. ਥੇਰੋ ਨਾਗਚ੍ਛੀਤਿ ਕਿਞ੍ਚਾਪਿ ¶ ‘‘ਰਾਜਾ ¶ ਪਕ੍ਕੋਸਤੀ’’ਤਿ ਵੁਤ੍ਤੇਪਿ ਧਮ੍ਮਕਮ੍ਮਤ੍ਥਾਯ ਆਗਨ੍ਤੁਂ ਵਟ੍ਟਤਿ, ਦ੍ਵਿਕ੍ਖਤ੍ਤੁਂ ਪਨ ਪੇਸਿਤੇਪਿ ‘‘ਅਨਨੁਰੂਪਾ ਯਾਚਨਾ’’ਤਿ ਨਾਗਤੋ, ‘‘ਮਹਾਨੁਭਾਵੋ ਥੇਰੋ ਯਥਾਨੁਸਿਟ੍ਠਂ ਪਟਿਪਤ੍ਤਿਕੋ ਪਮਾਣਭੂਤੋ’’ਤਿ ਰਞ੍ਞੋ ਚੇਵ ਉਭਯਪਕ੍ਖਿਕਾਨਞ੍ਚ ਅਤ੍ਤਨਿ ਬਹੁਮਾਨੁਪ੍ਪਾਦਨਵਸੇਨ ਉਦ੍ਧਂ ਕਤ੍ਤਬ੍ਬਕਮ੍ਮਸਿਦ੍ਧਿਂ ਆਕਙ੍ਖਨ੍ਤੋ ਅਸਾਰੁਪ੍ਪਵਚਨਲੇਸੇਨ ਨਾਗਚ੍ਛਿ. ਏਕਤੋ ਸਙ੍ਘਟਿਤਾ ਨਾਵਾ ਨਾਵਾਸਙ੍ਘਾਟਂ. ਸਾਸਨਪਚ੍ਚਤ੍ਥਿਕਾਨਂ ਬਹੁਭਾਵਤੋ ਆਹ ‘‘ਆਰਕ੍ਖਂ ਸਂਵਿਧਾਯਾ’’ਤਿ. ਯਨ੍ਤਿ ਯਸ੍ਮਾ. ਅਬ੍ਬਾਹਿਂਸੂਤਿ ਆਕਡ੍ਢਿਂਸੁ. ਬਾਹਿਰਤੋਤਿ ਉਯ੍ਯਾਨਸ੍ਸ ਬਾਹਿਰਤੋ. ਪਸ੍ਸਨ੍ਤਾਨਂ ਅਤਿਦੁਕ੍ਕਰਭਾਵੇਨ ਉਪਟ੍ਠਾਨਂ ਸਨ੍ਧਾਯ ‘‘ਪਦੇਸਪਥਵੀਕਮ੍ਪਨਂ ਦੁਕ੍ਕਰ’’ਨ੍ਤਿ ਆਹ. ਅਧਿਟ੍ਠਾਨੇ ਪਨੇਤ੍ਥ ਵਿਸੁਂ ਦੁਕ੍ਕਰਤਾ ਨਾਮ ਨਤ੍ਥਿ.

ਦੀਪਕਤਿਤ੍ਤਿਰੋਤਿ ਸਾਕੁਣਿਕੇਹਿ ਸਮਜਾਤਿਕਾਨਂ ਗਹਣਤ੍ਥਾਯ ਪੋਸੇਤ੍ਵਾ ਸਿਕ੍ਖੇਤ੍ਵਾ ਪਾਸਟ੍ਠਾਨੇ ਠਪਨਕਤਿਤ੍ਤਿਰੋ. ਨ ਪਟਿਚ੍ਚ ਕਮ੍ਮਂ ਫੁਸਤੀਤਿ ਗਾਥਾਯ ਯਦਿ ਤਵ ਪਾਪਕਿਰਿਯਾਯ ਮਨੋ ਨਪ੍ਪਦੁਸ੍ਸਤਿ, ਲੁਦ੍ਦੇਨ ਤਂ ਨਿਸ੍ਸਾਯ ਕਤਮ੍ਪਿ ਪਾਪਕਮ੍ਮਂ ਤਂ ਨ ਫੁਸਤਿ. ਪਾਪਕਿਰਿਯਾਯ ਹਿ ਅਪ੍ਪੋਸ੍ਸੁਕ੍ਕਸ੍ਸ ਨਿਰਾਲਯਸ੍ਸ ਭਦ੍ਰਸ੍ਸ ਸਤੋ ਤਵ ਤਂ ਪਾਪਂ ਨ ਉਪਲਿਮ੍ਪਤਿ, ਤਵ ਚਿਤ੍ਤਂ ਨ ਅਲ੍ਲੀਯਤੀਤਿ ਅਤ੍ਥੋ.

ਕਿਂ ਵਦਤਿ ਸੀਲੇਨਾਤਿ ਕਿਂਵਾਦੀ. ਅਥ ਵਾ ਕੋ ਕਤਮੋ ਵਾਦੋ ਕਿਂਵਾਦੋ, ਸੋ ਏਤਸ੍ਸ ਅਤ੍ਥੀਤਿ ਕਿਂਵਾਦੀ. ਅਤ੍ਤਾਨਞ੍ਚ ਲੋਕਞ੍ਚ ਸਸ੍ਸਤੋਤਿ ਵਾਦੋ ਏਤੇਸਨ੍ਤਿ ਸਸ੍ਸਤਵਾਦਿਨੋ. ਸਤ੍ਤੇਸੁ ਸਙ੍ਖਾਰੇਸੁ ਵਾ ਏਕਚ੍ਚਂ ਸਸ੍ਸਤਨ੍ਤਿ ਪਵਤ੍ਤੋ ਵਾਦੋ ਏਕਚ੍ਚਸਸ੍ਸਤੋ, ਤਸ੍ਮਿਂ ਨਿਯੁਤ੍ਤਾ ਏਕਚ੍ਚਸਸ੍ਸਤਿਕਾ. ‘‘ਅਨ੍ਤੋ, ਅਨਨ੍ਤੋ, ਅਨ੍ਤਾਨਨ੍ਤੋ, ਨੇਵਨ੍ਤੋ ਨਾਨਨ੍ਤੋ’’ਤਿ ਏਵਂ ਅਨ੍ਤਾਨਨ੍ਤਂ ਆਰਬ੍ਭ ਪਵਤ੍ਤਾ ਚਤ੍ਤਾਰੋ ਵਾਦਾ ਅਨ੍ਤਾਨਨ੍ਤਾ, ਤੇਸੁ ਨਿਯੁਤ੍ਤਾ ਅਨ੍ਤਾਨਨ੍ਤਿਕਾ. ਨ ਮਰਤਿ ਨ ਉਪਚ੍ਛਿਜ੍ਜਤੀਤਿ ਅਮਰਾ, ਏਵਨ੍ਤਿਪਿ ਮੇ ਨੋ, ਤਥਾਤਿਪਿ ਮੇ ਨੋਤਿਆਦਿਨਾ (ਦੀ. ਨਿ. ੧.੬੨) ਪਵਤ੍ਤਾ ਦਿਟ੍ਠਿ ਚੇਵ ਵਾਚਾ ਚ, ਤਸ੍ਸਾ ਵਿਕ੍ਖੇਪੋ ਏਤੇਸਨ੍ਤਿ ਅਮਰਾਵਿਕ੍ਖੇਪਿਕਾ. ਅਥ ਵਾ ਅਮਰਾ ਨਾਮ ਮਚ੍ਛਜਾਤਿ ਦੁਗ੍ਗਹਾ ਹੋਤਿ, ਤਸ੍ਸਾ ਅਮਰਾਯ ਵਿਯ ਵਿਕ੍ਖੇਪੋ ਏਤੇਸਨ੍ਤਿ ਅਮਰਾਵਿਕ੍ਖੇਪਿਕਾ. ਅਧਿਚ੍ਚ ਯਦਿਚ੍ਛਕਂ ਯਂ ਕਿਞ੍ਚਿ ਕਾਰਣਂ ਅਨਪੇਕ੍ਖਿਤ੍ਵਾ ਸਮੁਪ੍ਪਨ੍ਨੋ ਅਤ੍ਤਾ ਚ ਲੋਕੋ ਚਾਤਿ ਵਾਦੇ ਨਿਯੁਤ੍ਤਾ ਅਧਿਚ੍ਚਸਮੁਪ੍ਪਨ੍ਨਿਕਾ. ਸਞ੍ਞੀ ਅਤ੍ਤਾਤਿ ਵਾਦੋ ਯੇਸਨ੍ਤੇ ਸਞ੍ਞੀਵਾਦਾ. ਏਵਂ ਅਸਞ੍ਞੀਵਾਦਾ ਨੇਵਸਞ੍ਞੀਨਾਸਞ੍ਞੀਵਾਦਾਤਿ ਏਤ੍ਥਾਪਿ. ‘‘ਕਾਯਸ੍ਸ ਭੇਦਾ ਸਤ੍ਤੋ ਉਚ੍ਛਿਜ੍ਜਤੀ’’ਤਿ (ਦੀ. ਨਿ. ੧.੮੫-੮੬) ਏਵਂ ¶ ਉਚ੍ਛੇਦਂ ਵਦਨ੍ਤੀਤਿ ਉਚ੍ਛੇਦਵਾਦਾ. ਦਿਟ੍ਠਧਮ੍ਮੋਤਿ ਪਚ੍ਚਕ੍ਖੋ ਯਥਾਸਕਂ ਅਤ੍ਤਭਾਵੋ, ਤਸ੍ਮਿਂਯੇਵ ਯਥਾਕਾਮਂ ਪਞ੍ਚਕਾਮਗੁਣਪਰਿਭੋਗੇਨ ਨਿਬ੍ਬਾਨਂ ਦੁਕ੍ਖੂਪਸਮਂ ਵਦਨ੍ਤੀਤਿ ਦਿਟ੍ਠਧਮ੍ਮਨਿਬ੍ਬਾਨਵਾਦਾ. ਵਿਭਜਿਤ੍ਵਾ ਵਾਦੋ ਏਤਸ੍ਸਾਤਿ ਵਿਭਜ੍ਜਵਾਦੀ, ਭਗਵਾ. ਸਬ੍ਬਂ ਏਕਰੂਪੇਨ ਅਵਤ੍ਵਾ ਯਥਾਧਮ੍ਮਂ ਵਿਭਜਿਤ੍ਵਾ ਨਿਜ੍ਜਟਂ ਨਿਗੁਮ੍ਬਂ ਕਤ੍ਵਾ ਯਥਾ ਦਿਟ੍ਠਿਸਨ੍ਦੇਹਾਦਯੋ ਵਿਗਚ੍ਛਨ੍ਤਿ, ਸਮ੍ਮੁਤਿਪਰਮਤ੍ਥਾ ¶ ਚ ਧਮ੍ਮਾ ਅਸਙ੍ਕਰਾ ਪਟਿਭਨ੍ਤਿ, ਏਵਂ ਏਕਨ੍ਤਵਿਭਜਨਸੀਲੋਤਿ ਵੁਤ੍ਤਂ ਹੋਤਿ. ਪਰਪ੍ਪਵਾਦਂ ਮਦ੍ਦਮਾਨੋਤਿ ਤਸ੍ਮਿਂ ਕਾਲੇ ਉਪ੍ਪਨ੍ਨਂ, ਆਯਤਿਂ ਉਪ੍ਪਜ੍ਜਨਕਞ੍ਚ ਸਬ੍ਬਂ ਪਰਵਾਦਂ ਕਥਾਵਤ੍ਥੁਮਾਤਿਕਾਵਿਵਰਣਮੁਖੇਨ ਨਿਮ੍ਮਦ੍ਦਨਂ ਕਰੋਨ੍ਤੋਤਿ ਅਤ੍ਥੋ.

ਤਤਿਯਸਙ੍ਗੀਤਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਆਚਰਿਯਪਰਮ੍ਪਰਕਥਾਵਣ੍ਣਨਾ

ਕੇਨਾਭਤਨ੍ਤਿ ਇਮਂ ਪਞ੍ਹਂ ਵਿਸ੍ਸਜ੍ਜੇਨ੍ਤੇਨ ਜਮ੍ਬੁਦੀਪੇ ਤਾਵ ਯਾਵ ਤਤਿਯਸਙ੍ਗੀਤਿ, ਤਾਵ ਦਸ੍ਸੇਤ੍ਵਾ ਇਦਾਨਿ ਸੀਹਲ਼ਦੀਪੇ ਆਚਰਿਯਪਰਮ੍ਪਰਂ ਦਸ੍ਸੇਤੁਂ ਤਤਿਯਸਙ੍ਗਹਤੋ ਪਨ ਉਦ੍ਧਨ੍ਤਿਆਦਿ ਆਰਦ੍ਧਂ. ਇਮਂ ਦੀਪਨ੍ਤਿ ਤਮ੍ਬਪਣ੍ਣਿਦੀਪਂ. ਤਸ੍ਮਿਂ ਦੀਪੇ ਨਿਸੀਦਿਤ੍ਵਾ ਆਚਰਿਯੇਨ ਅਟ੍ਠਕਥਾਯ ਕਤਤ੍ਤਾ ‘‘ਇਮਂ ਦੀਪ’’ਨ੍ਤਿ ਵੁਤ੍ਤਂ. ਕਞ੍ਚਿ ਕਾਲਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ, ਕਿਸ੍ਮਿਞ੍ਚਿ ਕਾਲੇਤਿ ਅਤ੍ਥੋ. ਪੋਰਾਣਾਤਿ ਸੀਹਲ਼ਦੀਪੇ ਸੀਹਲ਼ਟ੍ਠਕਥਾਕਾਰਕਾ. ਭਦ੍ਦਨਾਮੋਤਿ ਭਦ੍ਦਸਾਲਤ੍ਥੇਰੋ. ਆਗੁਂ ਪਾਪਂ ਨ ਕਰੋਨ੍ਤੀਤਿ ਨਾਗਾ. ਵਿਨਯਪਿਟਕਂ ਵਾਚਯਿਂਸੂਤਿ ਸਮ੍ਬਨ੍ਧੋ. ਤਮ੍ਬਪਣ੍ਣਿਯਾਤਿ ਭੁਮ੍ਮਵਚਨਂ. ਨਿਕਾਯੇ ਪਞ੍ਚਾਤਿ ਵਿਨਯਾਭਿਧਮ੍ਮਾਨਂ ਵਿਸੁਂ ਗਹਿਤਤ੍ਤਾ ਤਬ੍ਬਿਨਿਮੁਤ੍ਤਾ ਪਞ੍ਚ ਨਿਕਾਯਾ ਗਹੇਤਬ੍ਬਾ. ਪਕਰਣੇਤਿ ਅਭਿਧਮ੍ਮਪਕਰਣੇ ਵਾਚੇਸੁਨ੍ਤਿ ਯੋਜਨਾ. ਤੀਣਿ ਪਿਟਕਾਨਿ ਸ੍ਵਾਗਤਾਨਿ ਅਸ੍ਸਾਤਿ ‘‘ਤੇਪਿਟਕੋ’’ਤਿ ਵਤ੍ਤਬ੍ਬੇ ‘‘ਤਿਪੇਟਕੋ’’ਤਿ ਛਨ੍ਦਾਨੁਰਕ੍ਖਣਤ੍ਥਂ ਵੁਤ੍ਤਂ. ਤਾਰਕਰਾਜਾਤਿ ਚਨ੍ਦਿਮਾ. ਪੁਪ੍ਫਨਾਮੋਤਿ ਏਤ੍ਥ ਮਹਾਪਦੁਮਤ੍ਥੇਰੋ ਸੁਮਨਤ੍ਥੇਰੋ ਚ ਞਾਤਬ੍ਬੋਤਿ ਦ੍ਵਿਕ੍ਖਤ੍ਤੁਂ ‘‘ਪੁਪ੍ਫਨਾਮੋ’’ਤਿ ਵੁਤ੍ਤਂ.

ਵਨਵਾਸਿਨ੍ਤਿ ਵਨਵਾਸੀਰਟ੍ਠਂ. ਕਰਕਵਸ੍ਸਨ੍ਤਿ ਹਿਮਪਾਤਨਕਵਸ੍ਸਂ, ਕਰਕਧਾਰਾਸਦਿਸਂ ਵਾ ਵਸ੍ਸਂ. ਹਰਾਪੇਤ੍ਵਾਤਿ ਉਦਕੋਘੇਨ ਹਰਾਪੇਤ੍ਵਾ. ਛਿਨ੍ਨਭਿਨ੍ਨਪਟਧਰੋਤਿ ਸਤ੍ਥਕੇਨ ਛਿਨ੍ਨਂ ਰਙ੍ਗੇਨ ਭਿਨ੍ਨਂ ਪਟਂ ਧਾਰਣਕੋ. ਭਣ੍ਡੂਤਿ ਮੁਣ੍ਡਕੋ. ਮਕ੍ਖਂ ਅਸਹਮਾਨੋਤਿ ਥੇਰਸ੍ਸ ਆਨੁਭਾਵਂ ਪਟਿਚ੍ਚ ਅਤ੍ਤਨੋ ¶ ਉਪ੍ਪਨ੍ਨਂ ਪਰੇਸਂ ਗੁਣਮਕ੍ਖਨਲਕ੍ਖਣਂ ਮਕ੍ਖਂ ਤਥਾ ਪਵਤ੍ਤਂ ਕੋਧਂ ਅਸਹਮਾਨੋ. ਅਸਨਿਯੋ ਫਲਨ੍ਤੀਤਿ ਗਜ੍ਜਨ੍ਤਾ ਪਤਨ੍ਤਿ. ਮੇ ਮਮ ਭਯਭੇਰਵਂ ਜਨੇਤੁਂ ਪਟਿਬਲੋ ਨ ਅਸ੍ਸ ਨ ਭਵੇਯ੍ਯਾਤਿ ਯੋਜਨਾ. ਅਞ੍ਞਦਤ੍ਥੂਤਿ ਏਕਂਸੇਨ. ਕਸ੍ਮੀਰਗਨ੍ਧਾਰਾਤਿ ਕਸ੍ਮੀਰਗਨ੍ਧਾਰਰਟ੍ਠਵਾਸਿਨੋ. ਇਸਿਵਾਤਪਟਿਵਾਤਾਤਿ ਭਿਕ੍ਖੂਨਂ ਚੀਵਰਚਲਨਕਾਯਚਲਨੇਹਿ ਸਞ੍ਜਨਿਤਵਾਤੇਹਿ ਪਰਿਤੋ ਸਮਨ੍ਤਤੋ ਬੀਜਯਮਾਨਾ ਅਹੇਸੁਂ. ਧਮ੍ਮਚਕ੍ਖੁਨ੍ਤਿ ਹੇਟ੍ਠਾਮਗ੍ਗਤ੍ਤਯੇ ਞਾਣਂ. ਅਨਮਤਗ੍ਗਿਯਨ੍ਤਿ ਅਨਮਤਗ੍ਗਸਂਯੁਤ੍ਤਂ (ਸਂ. ਨਿ. ੨.੧੨੪ ਆਦਯੋ). ਸਮਧਿਕਾਨੀਤਿ ਸਾਧਿਕਾਨਿ. ਪਞ੍ਚ ਰਟ੍ਠਾਨੀਤਿ ਪਞ੍ਚ ਚਿਨਰਟ੍ਠਾਨਿ. ਵੇਗਸਾਤਿ ਵੇਗੇਨ. ਸਮਨ੍ਤਤੋ ਰਕ੍ਖਂ ਠਪੇਸੀਤਿ ਤੇਸਂ ਅਪ੍ਪਵੇਸਨਤ੍ਥਾਯ ਅਧਿਟ੍ਠਾਨਵਸੇਨ ਰਕ੍ਖਂ ਠਪੇਸਿ. ਅਡ੍ਢੁਡ੍ਢਾਨਿ ਸਹਸ੍ਸਾਨੀਤਿ ਅਡ੍ਢੇਨ ਚਤੁਤ੍ਥਾਨਿ ਅਡ੍ਢੁਡ੍ਢਾਨਿ, ਅਤਿਰੇਕਪਞ੍ਚਸਤਾਨਿ ਤੀਣਿ ਸਹਸ੍ਸਾਨੀਤਿ ਅਤ੍ਥੋ. ਦਿਯਡ੍ਢਸਹਸ੍ਸਨ੍ਤਿ ¶ ਅਡ੍ਢੇਨ ਦੁਤਿਯਂ ਦਿਯਡ੍ਢਂ, ਅਤਿਰੇਕਪਞ੍ਚਸਤਿਕਂ ਸਹਸ੍ਸਨ੍ਤਿ ਅਤ੍ਥੋ. ਨਿਦ੍ਧਮੇਤ੍ਵਾਨਾਤਿ ਪਲਾਪੇਤ੍ਵਾ.

ਰਾਜਗਹਨਗਰਪਰਿਵਤ੍ਤਕੇਨਾਤਿ ਰਾਜਗਹਨਗਰਂ ਪਰਿਵਤ੍ਤੇਤ੍ਵਾ ਤਤੋ ਬਹਿ ਤਂ ਪਦਕ੍ਖਿਣਂ ਕਤ੍ਵਾ ਗਤਮਗ੍ਗੇਨ, ਗਮਨੇਨ ਵਾ. ਆਰੋਪੇਸੀਤਿ ਪਟਿਪਾਦੇਸਿ. ਪਲ਼ਿਨਾਤਿ ਆਕਾਸਂ ਪਕ੍ਖਨ੍ਦਿਂਸੁ. ਨਗੁਤ੍ਤਮੇਤਿ ਚੇਤਿਯਗਿਰਿਮਾਹ. ਪੁਰਤੋਤਿ ਪਾਚੀਨਦਿਸਾਭਾਗੇ. ਪੁਰਸੇਟ੍ਠਸ੍ਸਾਤਿ ਸੇਟ੍ਠਸ੍ਸ ਅਨੁਰਾਧਪੁਰਸ੍ਸ. ਸਿਲਕੂਟਮ੍ਹੀਤਿ ਏਵਂਨਾਮਕੇ ਪਬ੍ਬਤਕੂਟੇ. ਸੀਹਕੁਮਾਰਸ੍ਸ ਪੁਤ੍ਤੋਤਿ ਏਤ੍ਥ ‘‘ਕਲਿਙ੍ਗਰਾਜਧੀਤੁ ਕੁਚ੍ਛਿਸ੍ਮਿਂ ਸੀਹਸ੍ਸ ਜਾਤੋ ਸੀਹਕੁਮਾਰੋ’’ਤਿ ਵਦਨ੍ਤਿ. ਜੇਟ੍ਠਮਾਸਸ੍ਸ ਪੁਣ੍ਣਮਿਯਂ ਜੇਟ੍ਠਨਕ੍ਖਤ੍ਤਂ ਵਾ ਮੂਲਨਕ੍ਖਤ੍ਤਂ ਵਾ ਹੋਤੀਤਿ ਆਹ ‘‘ਜੇਟ੍ਠਮੂਲਨਕ੍ਖਤ੍ਤਂ ਨਾਮ ਹੋਤੀ’’ਤਿ. ਮਿਗਾਨਂ ਵਾਨਤੋ ਹਿਂਸਨਤੋ ਬਾਧਨਤੋ ਮਿਗਵਂ, ਮਿਗਵਿਜ੍ਝਨਕੀਲ਼ਾ. ਰੋਹਿਤਮਿਗਰੂਪਨ੍ਤਿ ਗੋਕਣ੍ਣਮਿਗਵੇਸਂ. ਰਥਯਟ੍ਠਿਪ੍ਪਮਾਣਾਤਿ ਰਥਪਤੋਦਪ੍ਪਮਾਣਾ. ਏਕਾ ਲਤਾਯਟ੍ਠਿ ਨਾਮਾਤਿ ਏਕਾ ਰਜਤਮਯਾ ਕਞ੍ਚਨਲਤਾਯ ਪਟਿਮਣ੍ਡਿਤਤ੍ਤਾ ਏਵਂ ਲਦ੍ਧਨਾਮਾ. ਪੁਪ੍ਫਯਟ੍ਠਿਯਂ ਨੀਲਾਦੀਨਿ ਪੁਪ੍ਫਾਨਿ, ਸਕੁਣਯਟ੍ਠਿਯਂ ਨਾਨਪ੍ਪਕਾਰਾ ਮਿਗਪਕ੍ਖਿਨੋ ਵਿਚਿਤ੍ਤਕਮ੍ਮਕਤਾ ਵਿਯ ਖਾਯਨ੍ਤੀਤਿ ਦਟ੍ਠਬ੍ਬਂ. ਰਾਜਕਕੁਧਭਣ੍ਡਾਨੀਤਿ ਰਾਜਾਰਹਉਤ੍ਤਮਭਣ੍ਡਾਨਿ. ਸਙ੍ਖਨ੍ਤਿ ਦਕ੍ਖਿਣਾਵਟ੍ਟਂ ਅਭਿਸੇਕਸਙ੍ਖਂ. ਵਡ੍ਢਮਾਨਨ੍ਤਿ ਅਲਙ੍ਕਾਰਚੁਣ੍ਣਂ, ‘‘ਨਹਾਨਚੁਣ੍ਣ’’ਨ੍ਤਿ ਕੇਚਿ. ਵਟਂਸਕਨ੍ਤਿ ਕਣ੍ਣਪਿਲ਼ਨ੍ਧਨਂ ਵਟਂਸਕਨ੍ਤਿ ਵੁਤ੍ਤਂ ਹੋਤਿ. ਨਨ੍ਦਿਯਾਵਟ੍ਟਨ੍ਤਿ ਨਨ੍ਦਿਯਾਵਟ੍ਟਪੁਪ੍ਫਾਕਾਰੇਨ ਮਙ੍ਗਲਤ੍ਥਂ ਸੁਵਣ੍ਣੇਨ ਕਤਂ. ਕਞ੍ਞਨ੍ਤਿ ਖਤ੍ਤਿਯਕੁਮਾਰਿਂ. ਹਤ੍ਥਪੁਞ੍ਛਨਨ੍ਤਿ ਪੀਤਵਣ੍ਣਂ ਮਹਗ੍ਘਹਤ੍ਥਪੁਞ੍ਛਨਵਤ੍ਥਂ. ਅਰੁਣਵਣ੍ਣਮਤ੍ਤਿਕਨ੍ਤਿ ਨਾਗਭਵਨਸਮ੍ਭਵਂ. ਵਤ੍ਥਕੋਟਿਕਨ੍ਤਿ ਵਤ੍ਥਯੁਗਮੇਵ. ਨਾਗਮਾਹਟਨ੍ਤਿ ਨਾਗੇਹਿ ¶ ਆਹਟਂ. ਅਮਤੋਸਧਨ੍ਤਿ ਏਵਂਨਾਮਿਕਾ ਗੁਲ਼ਿਕਜਾਤਿ. ਅਮਤਸਦਿਸਕਿਚ੍ਚਤ੍ਤਾ ਏਵਂ ਵੁਚ੍ਚਤਿ. ਭੂਮਤ੍ਥਰਣਸਙ੍ਖੇਪੇਨਾਤਿ ਭੂਮਤ੍ਥਰਣਾਕਾਰੇਨ. ਉਪ੍ਪਾਤਪਾਠਕਾਤਿ ਨਿਮਿਤ੍ਤਪਾਠਕਾ. ਅਲਂ ਗਚ੍ਛਾਮਾਤਿ ‘‘ਪੁਰਸ੍ਸ ਅਚ੍ਚਾਸਨ੍ਨਤ੍ਤਾ ਸਾਰੁਪ੍ਪਂ ਨ ਹੋਤੀ’’ਤਿ ਪਟਿਕ੍ਖਿਪਨ੍ਤੋ ਆਹ. ਅਡ੍ਢਨਵਮਾਨਂ ਪਾਣਸਹਸ੍ਸਾਨਨ੍ਤਿ (ਅ. ਨਿ. ੬.੫੩) ਪਞ੍ਚਸਤਾਧਿਕਾਨਂ ਅਟ੍ਠਨ੍ਨਂ ਪਾਣਸਹਸ੍ਸਾਨਂ. ਅਪ੍ਪਮਾਦਸੁਤ੍ਤਨ੍ਤਿ ਅਙ੍ਗੁਤ੍ਤਰਨਿਕਾਯੇ ਮਹਾਅਪ੍ਪਮਾਦਸੁਤ੍ਤਂ, ਰਾਜੋਵਾਦਸੁਤ੍ਤਨ੍ਤਿ ਵੁਤ੍ਤਂ ਹੋਤਿ.

ਮਹਚ੍ਚਾਤਿ ਮਹਤਾ. ਉਪਸਙ੍ਕਮਨ੍ਤੋਤਿ ਅਤਿਵਿਯ ਕਿਲਨ੍ਤਰੂਪੋ ਹੁਤ੍ਵਾ ਉਪਸਙ੍ਕਮੀਤਿ ਅਤ੍ਥੋ. ਤੁਮ੍ਹੇ ਜਾਨਨਤ੍ਥਨ੍ਤਿ ਸਮ੍ਬਨ੍ਧੋ. ਪਞ੍ਚਪਣ੍ਣਾਸਾਯਾਤਿ ਏਤ੍ਥ ‘‘ਚਤੁਪਞ੍ਞਾਸਾਯਾਤਿ ਵਤ੍ਤਬ੍ਬਂ. ਏਵਞ੍ਹਿ ਸਤਿ ਉਪਰਿ ਵੁਚ੍ਚਮਾਨਂ ਦ੍ਵਾਸਟ੍ਠਿ ਅਰਹਨ੍ਤੋਤਿ ਵਚਨਂ ਸਮੇਤੀ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੧.ਆਚਰਿਯਪਰਮ੍ਪਰਕਥਾਵਣ੍ਣਨਾ) ਵੁਤ੍ਤਂ. ਦਸਭਾਤਿਕਸਮਾਕੁਲਨ੍ਤਿ ਮੁਟਸਿਵਸ੍ਸ ਪੁਤ੍ਤੇਹਿ ਦੇਵਾਨਂਪਿਯਤਿਸ੍ਸਾਦੀਹਿ ਦਸਹਿ ਭਾਤਿਕੇਹਿ ਸਮਾਕਿਣ੍ਣਂ. ਚਿਰਦਿਟ੍ਠੋ ਸਮ੍ਮਾਸਮ੍ਬੁਦ੍ਧੋਤਿ ਧਾਤੁਯੋ ਸਨ੍ਧਾਯਾਹ. ਸਬ੍ਬਤਾਲ਼ਾਵਚਰੇਤਿ ਸਬ੍ਬਾਨਿ ਤੁਰਿਯਭਣ੍ਡਾਨਿ, ਤਂਸਹਚਰਿਤੇ ਵਾ ਵਾਦਕੇ. ਉਪਟ੍ਠਾਪੇਤ੍ਵਾਤਿ ਉਪਹਾਰਕਾਰਾਪਨਵਸੇਨ ਸਨ੍ਨਿਪਾਤੇਤ੍ਵਾ. ਵਡ੍ਢਮਾਨਕਚ੍ਛਾਯਾਯਾਤਿ ਪਚ੍ਛਾਭਤ੍ਤਂ. ਪੋਕ੍ਖਰਵਸ੍ਸਨ੍ਤਿ ਪੋਕ੍ਖਰਪਤ੍ਤੇ ¶ ਵਿਯ ਅਤੇਮਿਤੁਕਾਮਾਨਂ ਉਪਰਿ ਅਤੇਮੇਤ੍ਵਾ ਪਵਤ੍ਤਨਕਵਸ੍ਸਂ. ਮਹਾਵੀਰੋਤਿ ਸਤ੍ਥੁਵੋਹਾਰੇਨ ਧਾਤੁ ਏਵ ਵੁਤ੍ਤਾ. ਪਚ੍ਛਿਮਦਿਸਾਭਿਮੁਖੋਵ ਹੁਤ੍ਵਾ ਅਪਸਕ੍ਕਨ੍ਤੋਤਿ ਏਤ੍ਥ ਪੁਰਤ੍ਥਾਭਿਮੁਖੋ ਠਿਤੋਵ ਪਿਟ੍ਠਿਤੋ ਅਪਸਕ੍ਕਨੇਨ ਪਚ੍ਛਿਮਦਿਸਾਯ ਗਚ੍ਛਨ੍ਤੋ ਤਾਦਿਸੋਪਸਙ੍ਕਮਨਂ ਸਨ੍ਧਾਯ ‘‘ਪਚ੍ਛਿਮਦਿਸਾਭਿਮੁਖੋ’’ਤਿ ਵੁਤ੍ਤੋ. ‘‘ਮਹੇਜਵਤ੍ਥੁ ਨਾਮ ਏਵਂਨਾਮਕਂ ਦੇਵਟ੍ਠਾਨ’’ਨ੍ਤਿ ਵਦਨ੍ਤਿ.

ਪਜ੍ਜਰਕੇਨਾਤਿ ਅਮਨੁਸ੍ਸਸਮੁਟ੍ਠਾਪਿਤੇਨ ਪਜ੍ਜਰਕਰੋਗੇਨ. ਦੇਵੋਤਿ ਮੇਘੋ. ਅਨੁਪ੍ਪਵੇਚ੍ਛੀਤਿ ਵਿਮੁਚ੍ਚਿ. ਵਿਵਾਦੋ ਹੋਤੀਤਿ ਏਤ੍ਥ ਕਿਰਿਯਾਕਾਲਮਪੇਕ੍ਖਿਤ੍ਵਾ ਵਤ੍ਤਮਾਨਪ੍ਪਯੋਗੋ ਦਟ੍ਠਬ੍ਬੋ. ਏਵਂ ਈਦਿਸੇਸੁ ਸਬ੍ਬਤ੍ਥ. ਤਦੇਤਨ੍ਤਿ ਠਾਨਂ ਤਿਟ੍ਠਤੀਤਿ ਸਮ੍ਬਨ੍ਧੋ. ‘‘ਛਨ੍ਨਂ ਵਣ੍ਣਾਨਂ ਸਮ੍ਬਨ੍ਧਭੂਤਾਨਂ ਰਂਸਿਯੋ ਚਾ’’ਤਿ ਅਜ੍ਝਾਹਰਿਤਬ੍ਬਂ, ‘‘ਛਨ੍ਨਂ ਵਣ੍ਣਾਨਂ ਉਦਕਧਾਰਾ ਚਾ’’ਤਿ ਏਵਮ੍ਪੇਤ੍ਥ ਸਮ੍ਬਨ੍ਧਂ ਵਦਨ੍ਤਿ. ਪਰਿਨਿਬ੍ਬੁਤੇਪਿ ਭਗਵਤਿ ਤਸ੍ਸਾਨੁਭਾਵੇਨ ਏਵਰੂਪਂ ਪਾਟਿਹਾਰਿਯਂ ਅਹੋਸਿ ਏਵਾਤਿ ਦਸ੍ਸੇਤੁਂ ਏਵਂ ਅਚਿਨ੍ਤਿਯਾਤਿਆਦਿਗਾਥਮਾਹ. ਰਕ੍ਖਂ ਕਰੋਨ੍ਤੋਤਿ ਅਤ੍ਤਨਾ ਉਪਾਯੇਨ ਪਲਾਪਿਤਾਨਂ ਯਕ੍ਖਾਨਂ ਪੁਨ ਅਪ੍ਪਵਿਸਨਤ੍ਥਾਯ ਪਰਿਤ੍ਤਾਨਂ ਕਰੋਨ੍ਤੋ. ਆਵਿਜ੍ਜੀਤਿ ਪਰਿਯਾਯਿ.

ਰਞ੍ਞੋ ¶ ਭਾਤਾਤਿ ਰਞ੍ਞੋ ਕਨਿਟ੍ਠਭਾਤਾ. ਅਨੁਲ਼ਾਦੇਵੀ ਨਾਮ ਰਞ੍ਞੋ ਜੇਟ੍ਠਭਾਤੁ ਜਾਯਾ. ਸਰਸਰਂਸਿਜਾਲਵਿਸ੍ਸਜ੍ਜਨਕੇਨਾਤਿ ਸਿਨਿਦ੍ਧਤਾਯ ਰਸਵਨ੍ਤਂ ਓਜਵਨ੍ਤਂ ਰਂਸਿਜਾਲਂ ਵਿਸ੍ਸਜ੍ਜੇਨ੍ਤੇਨ. ਏਕਦਿਵਸੇਨ ਅਗਮਾਸੀਤਿ ਸਮ੍ਬਨ੍ਧੋ. ਅਪ੍ਪੇਸੀਤਿ ਲੇਖਸਾਸਨਂ ਪਤਿਟ੍ਠਾਪੇਸਿ. ਉਦਿਕ੍ਖਤੀਤਿ ਅਪੇਕ੍ਖਤਿ ਪਤ੍ਥੇਤਿ. ਭਾਰਿਯਨ੍ਤਿ ਗਰੁਕਂ, ਅਨਤਿਕ੍ਕਮਨੀਯਨ੍ਤਿ ਅਤ੍ਥੋ. ਮਂ ਪਟਿਮਾਨੇਤੀਤਿ ਮਂ ਉਦਿਕ੍ਖਤਿ. ਕਮ੍ਮਾਰਵਣ੍ਣਨ੍ਤਿ ਰਞ੍ਞੋ ਪਕਤਿਸੁਵਣ੍ਣਕਾਰਵਣ੍ਣਂ. ਤਿਹਤ੍ਥਵਿਕ੍ਖਮ੍ਭਨ੍ਤਿ ਤਿਹਤ੍ਥਵਿਤ੍ਥਾਰਂ. ਸਕਲਜਮ੍ਬੁਦੀਪਰਜ੍ਜੇਨਾਤਿ ਏਤ੍ਥ ਰਞ੍ਞੋ ਇਦਨ੍ਤਿ ਰਜ੍ਜਂ, ਸਕਲਜਮ੍ਬੁਦੀਪਤੋ ਉਪ੍ਪਜ੍ਜਨਕਆਯੋ ਚੇਵ ਆਣਾਦਯੋ ਚ, ਤੇਨ ਪੂਜੇਮੀਤਿ ਅਤ੍ਥੋ, ਨ ਸਕਲਪਥਵੀਪਾਸਾਦਾਦਿਵਤ੍ਥੁਨਾ ਤਸ੍ਸ ਸਤ੍ਤਾਹਂ ਦੇਮੀਤਿਆਦਿਨਾ ਕਾਲਪਰਿਚ੍ਛੇਦਂ ਕਤ੍ਵਾ ਦਾਤੁਂ ਅਯੁਤ੍ਤਤ੍ਤਾ. ਏਵਞ੍ਹਿ ਦੇਨ੍ਤੋ ਤਾਵਕਾਲਿਕਂ ਦੇਤਿ ਨਾਮ ਵਤ੍ਥੁਪਰਿਚ੍ਚਾਗਲਕ੍ਖਣਤ੍ਤਾ ਦਾਨਸ੍ਸ, ਪਥਵਾਦਿਵਤ੍ਥੁਪਰਿਚ੍ਚਾਗੇਨ ਚ ਪੁਨ ਗਹਣਸ੍ਸ ਅਯੁਤ੍ਤਤ੍ਤਾ. ਨਿਯਮਿਤਕਾਲੇ ਪਨ ਆਯਾਦਯੋ ਪਰਿਚ੍ਚਤ੍ਤਾ ਏਵਾਤਿ ਤਤੋ ਪਰਂ ਅਪਰਿਚ੍ਚਤ੍ਤਤ੍ਤਾ ਗਹੇਤੁਂ ਵਟ੍ਟਤਿ. ਤਸ੍ਮਾ ਵੁਤ੍ਤਨਯੇਨੇਤ੍ਥ ਇਤੋ ਪਰਮ੍ਪਿ ਆਯਾਦਿਦਾਨਵਸੇਨੇਵ ਰਜ੍ਜਦਾਨਂ ਵੇਦਿਤਬ੍ਬਂ. ਪੁਪ੍ਫੁਲ਼ਕਾ ਹੁਤ੍ਵਾਤਿ ਕੇਤਕੀਪਾਰੋਹਙ੍ਕੁਰਾ ਵਿਯ ਉਦਕਪੁਪ੍ਫੁਲ਼ਕਾਕਾਰਾ ਹੁਤ੍ਵਾ. ਗਵਕ੍ਖਜਾਲਸਦਿਸਨ੍ਤਿ ਭਾਵਨਪੁਂਸਕਂ, ਵਾਤਪਾਨੇਸੁ ਜਾਲਾਕਾਰੇਨ ਠਪਿਤਦਾਰੁਪਟਸਦਿਸਨ੍ਤਿ ਅਤ੍ਥੋ, ਗਵਕ੍ਖੇਨ ਚ ਸੁਤ੍ਤਾਦਿਮਯਜਾਲੇਨ ਚ ਸਦਿਸਨ੍ਤਿ ਵਾ ਅਤ੍ਥੋ.

ਦੇਵਦੁਨ੍ਦੁਭਿਯੋਤਿ ਏਤ੍ਥ ਦੇਵੋਤਿ ਮੇਘੋ, ਤਸ੍ਸ ਅਚ੍ਛਸੁਕ੍ਖਤਾਯ ਆਕਾਸਮਿਵ ਖਾਯਮਾਨਸ੍ਸ ਅਨਿਮਿਤ੍ਤਗਜ੍ਜਿਤਂ ਦੇਵਦੁਨ੍ਦੁਭਿ ਨਾਮ, ਯਂ ‘‘ਆਕਾਸਦੁਨ੍ਦੁਭੀ’’ਤਿਪਿ ਵਦਨ੍ਤਿ. ਫਲਿਂਸੂਤਿ ਥਨਿਂਸੁ. ਪਬ੍ਬਤਾਨਂ ¶ ਨਚ੍ਚੇਹੀਤਿ ਪਥਵੀਕਮ੍ਪੇਨ ਇਤੋ ਚਿਤੋ ਚ ਭਮਨ੍ਤਾਨਂ ਪਬ੍ਬਤਾਨਂ ਨਚ੍ਚੇਹਿ. ਵਿਮ੍ਹਯਜਾਤਾ ਯਕ੍ਖਾ ‘‘ਹਿ’’ਨ੍ਤਿਸਦ੍ਦਂ ਨਿਚ੍ਛਾਰੇਨ੍ਤੀਤਿ ਆਹ ‘‘ਯਕ੍ਖਾਨਂ ਹਿਙ੍ਕਾਰੇਹੀ’’ਤਿ. ਸਕਸਕਪਟਿਭਾਨੇਹੀਤਿ ਅਤ੍ਤਨੋ ਅਤ੍ਤਨੋ ਸਿਪ੍ਪਕੋਸਲ੍ਲੇਹਿ. ਅਭਿਸੇਕਂ ਦਤ੍ਵਾਤਿ ਅਨੋਤਤ੍ਤਦਹੋਦਕੇਨ ਅਭਿਸੇਕਂ ਦਤ੍ਵਾ.

ਦੇਵਤਾਕੁਲਾਨੀਤਿ ਮਹਾਬੋਧਿਂ ਪਰਿਵਾਰੇਤ੍ਵਾ ਠਿਤਨਾਗਯਕ੍ਖਾਦਿਦੇਵਤਾਕੁਲਾਨਿ ਦਤ੍ਵਾਤਿ ਸਮ੍ਬਨ੍ਧੋ. ਗੋਪਕਰਾਜਕਮ੍ਮਿਨੋ ਤਥਾ ‘‘ਤਰਚ੍ਛਾ’’ਤਿ ਵਦਨ੍ਤਿ. ਇਮਿਨਾ ਪਰਿਵਾਰੇਨਾਤਿ ਸਹਤ੍ਥੇ ਕਰਣਵਚਨਂ, ਇਮਿਨਾ ਪਰਿਵਾਰੇਨ ਸਹਾਤਿ ਅਤ੍ਥੋ. ਤਾਮਲਿਤ੍ਤਿਨ੍ਤਿ ਏਵਂਨਾਮਕਂ ਸਮੁਦ੍ਦਤੀਰੇ ਪਟ੍ਟਨਂ. ਇਦਮਸ੍ਸ ਤਤਿਯਨ੍ਤਿ ਸੁਵਣ੍ਣਕਟਾਹੇ ਪਤਿਟ੍ਠਿਤਸਾਖਾਬੋਧਿਯਾ ਰਜ੍ਜਸਮ੍ਪਦਾਨਂ ਸਨ੍ਧਾਯ ਵੁਤ੍ਤਂ. ਤਤੋ ਪਨ ਪੁਬ੍ਬੇ ਏਕਵਾਰਂ ਰਜ੍ਜਸਮ੍ਪਦਾਨਂ ਅਚ੍ਛਿਨ੍ਨਾਯ ਸਾਖਾਯ ਮਹਾਬੋਧਿਯਾ ਏਵ ਕਤਂ, ਤੇਨ ¶ ਸਦ੍ਧਿਂ ਚਤੁਕ੍ਖਤ੍ਤੁਂ ਰਾਜਾ ਰਜ੍ਜੇਨ ਪੂਜੇਸਿ. ਰਜ੍ਜੇਨ ਪੂਜਿਤਦਿਵਸੇਸੁ ਕਿਰ ਸਕਲਦੀਪਤੋ ਉਪ੍ਪਨ੍ਨਂ ਆਯਂ ਗਹੇਤ੍ਵਾ ਮਹਾਬੋਧਿਮੇਵ ਪੂਜੇਸਿ.

ਪਠਮਪਾਟਿਪਦਦਿਵਸੇਤਿ ਸੁਕ੍ਕਪਕ੍ਖਪਾਟਿਪਦਦਿਵਸੇ. ਤਞ੍ਹਿ ਕਣ੍ਹਪਕ੍ਖਪਾਟਿਪਦਦਿਵਸਂ ਅਪੇਕ੍ਖਿਤ੍ਵਾ ‘‘ਪਠਮਪਾਟਿਪਦਦਿਵਸ’’ਨ੍ਤਿ ਵੁਤ੍ਤਂ, ਇਦਞ੍ਚ ਤਸ੍ਮਿਂ ਤਮ੍ਬਪਣ੍ਣਿਦੀਪੇ ਵੋਹਾਰਂ ਗਹੇਤ੍ਵਾ ਵੁਤ੍ਤਂ, ਇਧ ਪਨ ਪੁਣ੍ਣਮਿਤੋ ਪਟ੍ਠਾਯ ਯਾਵ ਅਪਰਾ ਪੁਣ੍ਣਮੀ, ਤਾਵ ਏਕੋ ਮਾਸੋਤਿ ਵੋਹਾਰੋ. ਤਸ੍ਮਾ ਇਮਿਨਾ ਵੋਹਾਰੇਨ ‘‘ਦੁਤਿਯਪਾਟਿਪਦਦਿਵਸੇ’’ਤਿ ਵਤ੍ਤਬ੍ਬਂ ਸਿਯਾ ਕਣ੍ਹਪਕ੍ਖਪਾਟਿਪਦਸ੍ਸ ਇਧ ਪਠਮਪਾਟਿਪਦਤ੍ਤਾ. ਗਚ੍ਛਤਿ ਵਤਰੇਤਿ ਏਤ੍ਥ ਅਰੇਤਿ ਖੇਦੇ. ਸਮਨ੍ਤਾਯੋਜਨਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ, ਯੋਜਨਪ੍ਪਮਾਣੇ ਪਦੇਸੇ ਸਬ੍ਬਤ੍ਥਾਤਿ ਅਤ੍ਥੋ. ਸੁਪਣ੍ਣਰੂਪੇਨਾਤਿ ਮਹਾਬੋਧਿਂ ਬਲਕ੍ਕਾਰੇਨ ਗਹੇਤ੍ਵਾ ਨਾਗਭਵਨਂ ਨੇਤੁਕਾਮਾਨਿ ਨਾਗਰਾਜਕੁਲਾਨਿ ਇਦ੍ਧਿਯਾ ਗਹਿਤੇਨ ਗਰੁਲ਼ਰੂਪੇਨ ਸਨ੍ਤਾਸੇਤਿ. ਤਂ ਵਿਭੂਤਿਂ ਪਸ੍ਸਿਤ੍ਵਾਤਿ ਦੇਵਤਾਦੀਹਿ ਕਰੀਯਮਾਨਂ ਪੂਜਾਮਹਤ੍ਤਂ, ਮਹਾਬੋਧਿਯਾ ਚ ਆਨੁਭਾਵਮਹਤ੍ਤਂ ਦਿਸ੍ਵਾ ਸਯਮ੍ਪਿ ਤਥਾ ਪੂਜੇਤੁਕਾਮਾ ਥੇਰਿਂ ਯਾਚਿਤ੍ਵਾਤਿ ਯੋਜਨਾ. ਸਮੁਦ੍ਦਸਾਲਵਤ੍ਥੁਸ੍ਮਿਨ੍ਤਿ ਯਸ੍ਮਿਂ ਪਦੇਸੇ ਠਤ੍ਵਾ ਰਾਜਾ ਸਮੁਦ੍ਦੇ ਆਗਚ੍ਛਨ੍ਤਂ ਬੋਧਿਂ ਥੇਰਾਨੁਭਾਵੇਨ ਅਦ੍ਦਸ, ਯਤ੍ਥ ਚ ਪਚ੍ਛਾ ਸਮੁਦ੍ਦਸ੍ਸ ਦਿਟ੍ਠਟ੍ਠਾਨਨ੍ਤਿ ਪਕਾਸੇਤੁਂ ਸਮੁਦ੍ਦਸਾਲਂ ਨਾਮ ਸਾਲਂ ਅਕਂਸੁ, ਤਸ੍ਮਿਂ ਸਮੁਦ੍ਦਸਾਲਾਯ ਵਤ੍ਥੁਭੂਤੇ ਪਦੇਸੇ. ਥੇਰਸ੍ਸਾਤਿ ਮਹਾਮਹਿਨ੍ਦਤ੍ਥੇਰਸ੍ਸ. ਪੁਪ੍ਫਅਗ੍ਘਿਯਾਨੀਤਿ ਕੂਟਾਗਾਰਸਦਿਸਾਨਿ ਪੁਪ੍ਫਚੇਤਿਯਾਨਿ. ਆਗਤੋ ਵਤਰੇਤਿ ਏਤ੍ਥ ਅਰੇਤਿ ਪਮੋਦੇ. ਅਟ੍ਠਹਿ ਅਮਚ੍ਚਕੁਲੇਹਿ ਅਟ੍ਠਹਿ ਬ੍ਰਾਹ੍ਮਣਕੁਲੇਹਿ ਚਾਤਿ ਸੋਲ਼ਸਹਿ ਜਾਤਿਸਮ੍ਪਨ੍ਨਕੁਲੇਹਿ. ਰਜ੍ਜਂ ਵਿਚਾਰੇਸੀਤਿ ਰਜ੍ਜਂ ਵਿਚਾਰੇਤੁਂ ਵਿਸ੍ਸਜ੍ਜੇਸਿ. ਰਾਜਵਤ੍ਥੁਦ੍ਵਾਰਕੋਟ੍ਠਕਟ੍ਠਾਨੇਤਿ ਰਾਜੁਯ੍ਯਾਨਸ੍ਸ ਦ੍ਵਾਰਕੋਟ੍ਠਕਟ੍ਠਾਨੇ. ਅਨੁਪੁਬ੍ਬਵਿਪਸ੍ਸਨਨ੍ਤਿ ਉਦਯਬ੍ਬਯਾਦਿਅਨੁਪੁਬ੍ਬਵਿਪਸ੍ਸਨਂ. ‘‘ਸਹ ਬੋਧਿਪਤਿਟ੍ਠਾਨੇਨਾ’’ਤਿ ਕਰਣਵਚਨੇਨ ਵਤ੍ਤਬ੍ਬੇ ਵਿਭਤ੍ਤਿਪਰਿਣਾਮੇਨ ‘‘ਸਹ ਬੋਧਿਪਤਿਟ੍ਠਾਨਾ’’ਤਿ ਨਿਸ੍ਸਕ੍ਕਵਚਨਂ ਕਤਂ. ਸਤਿ ਹਿ ਸਹਸਦ੍ਦਪ੍ਪਯੋਗੇ ਕਰਣਵਚਨੇਨੇਵ ਭਵਿਤਬ੍ਬਂ. ਦਸ੍ਸਿਂਸੂਤਿ ਪਞ੍ਞਾਯਿਂਸੁ. ਮਹਾਆਸਨਟ੍ਠਾਨੇਤਿ ਪੁਬ੍ਬਪਸ੍ਸੇ ਮਹਾਸਿਲਾਸਨੇਨ ਪਤਿਟ੍ਠਿਤਟ੍ਠਾਨੇ. ਪੂਜੇਤ੍ਵਾ ਵਨ੍ਦੀਤਿ ਆਗਾਮਿਨਂ ¶ ਮਹਾਚੇਤਿਯਂ ਵਨ੍ਦਿ. ਪੁਰਿਮੇ ਪਨ ਮਹਾਵਿਹਾਰਟ੍ਠਾਨੇ ਪੂਜਾਮਤ੍ਤਸ੍ਸੇਵ ਕਤਤ੍ਤਾ ਅਨਾਗਤੇ ਸਙ੍ਘਸ੍ਸਪਿ ਨਵਕਤਾ ਅਵਨ੍ਦਿਤਬ੍ਬਤਾ ਚ ਪਕਾਸਿਤਾਤਿ ਵੇਦਿਤਬ੍ਬਾ. ਅਨਾਗਤੇ ਪਨ ਮੇਤ੍ਤੇਯ੍ਯਾਦਿਬੁਦ੍ਧਾ ਪਚ੍ਚੇਕਬੁਦ੍ਧਾ ਚ ਬੁਦ੍ਧਭਾਵਕ੍ਖਣਂ ਉਦ੍ਦਿਸ੍ਸ ਵਨ੍ਦਿਤਬ੍ਬਾਵ ਸਭਾਵੇਨ ਵਿਸਿਟ੍ਠਪੁਗ੍ਗਲਤ੍ਤਾਤਿ ਗਹੇਤਬ੍ਬਂ.

ਮਹਾਅਰਿਟ੍ਠੋਤਿ ¶ ਪਞ੍ਚਪਞ੍ਞਾਸਾਯ ਭਾਤੁਕੇਹਿ ਸਦ੍ਧਿਂ ਚੇਤਿਯਗਿਰਿਮ੍ਹਿ ਪਬ੍ਬਜਿਤਂ ਸਨ੍ਧਾਯ ਵੁਤ੍ਤਂ. ਮੇਘਵਣ੍ਣਾਭਯਅਮਚ੍ਚਸ੍ਸ ਪਰਿਵੇਣਟ੍ਠਾਨੇਤਿ ਮੇਘਵਣ੍ਣਅਭਯਸ੍ਸ ਰਞ੍ਞੋ ਅਮਚ੍ਚੇਨ ਕਤ੍ਤਬ੍ਬਸ੍ਸ ਪਰਿਵੇਣਸ੍ਸ ਵਤ੍ਥੁਭੂਤੇ ਠਾਨੇ. ਮਙ੍ਗਲਨਿਮਿਤ੍ਤਭਾਵੇਨ ਆਕਾਸੇ ਸਮੁਪ੍ਪਨ੍ਨੋ ਮਨੋਹਰਸਦ੍ਦੋ ਆਕਾਸਸ੍ਸ ਰਵੋ ਵਿਯ ਹੋਤੀਤਿ ਵੁਤ੍ਤਂ ‘‘ਆਕਾਸਂ ਮਹਾਵਿਰਵਂ ਰਵੀ’’ਤਿ. ਨ ਹਿ ਆਕਾਸੋ ਨਾਮ ਕੋਚਿ ਧਮ੍ਮੋ ਅਤ੍ਥਿ, ਯੋ ਸਦ੍ਦਂ ਸਮੁਟ੍ਠਾਪੇਯ੍ਯ, ਆਕਾਸਗਤਉਤੁਵਿਸੇਸਸਮੁਟ੍ਠਿਤੋਵ ਸੋ ਸਦ੍ਦੋਤਿ ਗਹੇਤਬ੍ਬੋ. ਪਠਮਕਤ੍ਤਿਕਪਵਾਰਣਦਿਵਸੇ…ਪੇ… ਵਿਨਯਪਿਟਕਂ ਪਕਾਸੇਸੀਤਿ ਇਦਂ ਵਿਨਯਂ ਵਾਚੇਤੁਂ ਆਰਦ੍ਧਦਿਵਸਂ ਸਨ੍ਧਾਯ ਵੁਤ੍ਤਂ. ਅਨੁਸਿਟ੍ਠਿਕਰਾਨਨ੍ਤਿ ਅਨੁਸਾਸਨੀਕਰਾਨਂ. ਰਾਜਿਨੋਤਿ ਉਪਯੋਗਤ੍ਥੇ ਸਾਮਿਵਚਨਂ, ਦੇਵਾਨਂਪਿਯਤਿਸ੍ਸਰਾਜਾਨਨ੍ਤਿ ਅਤ੍ਥੋ. ਅਞ੍ਞੇਪੀਤਿ ਮਹਿਨ੍ਦਾਦੀਹਿ ਅਟ੍ਠਸਟ੍ਠਿਮਹਾਥੇਰੇਹਿ ਅਞ੍ਞੇਪਿ, ਤੇਸਂ ਸਰੂਪਂ ਦਸ੍ਸੇਨ੍ਤੋ ਆਹ ਤੇਸਂ ਥੇਰਾਨਨ੍ਤਿਆਦਿ. ਤਤ੍ਥ ਤੇਸਂ ਥੇਰਾਨਂ ਅਨ੍ਤੇਵਾਸਿਕਾਤਿ ਮਹਿਨ੍ਦਤ੍ਥੇਰਾਦੀਨਂ ਅਟ੍ਠਸਟ੍ਠਿਮਹਾਥੇਰਾਨਂ ਅਰਿਟ੍ਠਾਦਯੋ ਅਨ੍ਤੇਵਾਸਿਕਾ ਚ ਮਹਾਅਰਿਟ੍ਠਤ੍ਥੇਰਸ੍ਸ ਅਨ੍ਤੇਵਾਸਿਕਾ ਤਿਸ੍ਸਦਤ੍ਤਕਾਲ਼ਸੁਮਨਾਦਯੋ ਚਾਤਿ ਯੋਜੇਤਬ੍ਬਂ. ਅਨ੍ਤੇਵਾਸਿਕਾਨਂ ਅਨ੍ਤੇਵਾਸਿਕਾਤਿ ਉਭਯਤ੍ਥ ਵੁਤ੍ਤਅਨ੍ਤੇਵਾਸਿਕਾਨਂ ਅਨ੍ਤੇਵਾਸਿਕਪਰਮ੍ਪਰਾ ਚਾਤਿ ਅਤ੍ਥੋ. ਪੁਬ੍ਬੇ ਵੁਤ੍ਤਪ੍ਪਕਾਰਾਤਿ ਮਹਿਨ੍ਦੋ ਇਟ੍ਟਿਯੋ ਉਤ੍ਤਿਯੋਤਿਆਦਿਗਾਥਾਹਿ (ਪਾਰਾ. ਅਟ੍ਠ. ੧.ਤਤਿਯਸਙ੍ਗੀਤਿਕਥਾ) ਪਕਾਸਿਤਾ ਆਚਰਿਯਪਰਮ੍ਪਰਾ.

ਨ ਪਗ੍ਘਰਤੀਤਿ ਨ ਗਲ਼ਤਿ, ਨ ਪਮੁਸ੍ਸਤੀਤਿ ਅਤ੍ਥੋ. ਸਤਿਗਤਿਧਿਤਿਮਨ੍ਤੇਸੂਤਿ ਏਤ੍ਥ ਸਤੀਤਿ ਉਗ੍ਗਹਧਾਰਣੇ ਸਤਿ. ਗਤੀਤਿ ਸਦ੍ਦਤ੍ਥਵਿਭਾਗਗ੍ਗਹਣੇ ਞਾਣਂ. ਧਿਤੀਤਿ ਉਗ੍ਗਹਪਰਿਹਰਣਾਦੀਸੁ ਵੀਰਿਯਂ. ਕੁਕ੍ਕੁਚ੍ਚਕੇਸੂਤਿ ‘‘ਕਪ੍ਪਤਿ ਨ ਕਪ੍ਪਤੀ’’ਤਿ ਵੀਮਂਸਕੁਕ੍ਕੁਚ੍ਚਕਾਰੀਸੁ. ਮਾਤਾਪਿਤੁਟ੍ਠਾਨਿਯੋਤਿ ਵਤ੍ਵਾ ਤਮੇਵਤ੍ਥਂ ਸਮਤ੍ਥੇਤੁਂ ਆਹ ਤਦਾਯਤ੍ਤਾਹੀਤਿਆਦਿ. ਵਿਨਯਪਰਿਯਤ੍ਤਿਂ ਨਿਸ੍ਸਾਯਾਤਿ ਵਿਨਯਪਿਟਕਪਰਿਯਾਪੁਣਨਂ ਨਿਸ੍ਸਾਯ. ਅਤ੍ਤਨੋ ਸੀਲਕ੍ਖਨ੍ਧੋ ਸੁਗੁਤ੍ਤੋਤਿ ਲਜ੍ਜਿਨੋ ਵਿਨਯਧਾਰਣਸ੍ਸ ਅਲਜ੍ਜਿਅਞ੍ਞਾਣਤਾਦੀਹਿ ਛਹਿ ਆਕਾਰੇਹਿ ਆਪਤ੍ਤਿਯਾ ਅਨਾਪਜ੍ਜਨਤੋ ਅਤ੍ਤਨੋ ਸੀਲਕ੍ਖਨ੍ਧੋ ਖਣ੍ਡਾਦਿਦੋਸਵਿਰਹਿਤੋ ਸੁਗੁਤ੍ਤੋ ਸੁਰਕ੍ਖਿਤੋ ਹੋਤਿ. ਕੁਕ੍ਕੁਚ੍ਚਪਕਤਾਨਨ੍ਤਿ ਕਪ੍ਪਿਯਾਕਪ੍ਪਿਯਂ ਨਿਸ੍ਸਾਯ ਉਪ੍ਪਨ੍ਨੇਨ ਕੁਕ੍ਕੁਚ੍ਚੇਨ ਪਕਤਾਨਂ ਉਪਦ੍ਦੁਤਾਨਂ ਅਭਿਭੂਤਾਨਂ ਯਥਾਵਿਨਯਂ ਕੁਕ੍ਕੁਚ੍ਚਂ ਵਿਨੋਦੇਤ੍ਵਾ ਸੁਦ੍ਧਨ੍ਤੇ ਪਤਿਟ੍ਠਾਪਨੇਨ ਪਟਿਸਰਣਂ ਹੋਤਿ. ਵਿਗਤੋ ਸਾਰਦੋ ਭਯਮੇਤਸ੍ਸਾਤਿ ਵਿਸਾਰਦੋ. ‘‘ਏਵਂ ਕਥੇਨ੍ਤਸ੍ਸ ਦੋਸੋ ਏਵਂ ਨ ਦੋਸੋ’’ਤਿ ਞਤ੍ਵਾਵ ਕਥਨਤੋ ਨਿਬ੍ਭਯੋਵ ਸਙ੍ਘਮਜ੍ਝੇ ਵੋਹਰਤਿ ¶ . ਪਚ੍ਚਤ੍ਥਿਕੇਤਿ ਅਤ੍ਤਪਚ੍ਚਤ੍ਥਿਕੇ ਚੇਵ ਵਜ੍ਜਿਪੁਤ੍ਤਕਾਦਿਸਾਸਨਪਚ੍ਚਤ੍ਥਿਕੇ ਚ. ਸਹਧਮ੍ਮੇਨਾਤਿ ਸਕਾਰਣੇਨ ਵਚਨੇਨ ਸਿਕ੍ਖਾਪਦਂ ਦਸ੍ਸੇਤ੍ਵਾ ਯਥਾ ਤੇ ਅਸਦ੍ਧਮ੍ਮਂ ਪਤਿਟ੍ਠਾਪੇਤੁਂ ਨ ਸਕ੍ਕੋਨ੍ਤਿ, ਏਵਂ ਸੁਨਿਗ੍ਗਹਿਤਂ ਕਤ੍ਵਾ ਨਿਗ੍ਗਣ੍ਹਾਤਿ. ਸਦ੍ਧਮ੍ਮਟ੍ਠਿਤਿਯਾਤਿ ¶ ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਸਙ੍ਖਾਤਸ੍ਸ ਤਿਵਿਧਸ੍ਸਾਪਿ ਸਦ੍ਧਮ੍ਮਸ੍ਸ ਠਿਤਿਯਾ, ਪਵਤ੍ਤਿਯਾਤਿ ਅਤ੍ਥੋ.

ਵਿਨਯੋ ਸਂਵਰਤ੍ਥਾਯਾਤਿਆਦੀਸੁ ਵਿਨਯਪਰਿਯਾਪੁਣਨਂ ਵਿਨਯੋ, ਵਿਨਯਪਞ੍ਞਤ੍ਤਿ ਵਾ ਕਾਯਵਚੀਦ੍ਵਾਰਸਂਵਰਤ੍ਥਾਯ. ਅਵਿਪ੍ਪਟਿਸਾਰੋਤਿ ਕਤਾਕਤਂ ਨਿਸ੍ਸਾਯ ਵਿਪ੍ਪਟਿਸਾਰਾਭਾਵੋ ਸਨ੍ਤਾਪਾਭਾਵੋ. ਪਾਮੋਜ੍ਜਂ ਤਰੁਣਪੀਤਿ. ਪੀਤਿ ਨਾਮ ਬਲਵਪੀਤਿ. ਪਸ੍ਸਦ੍ਧੀਤਿ ਕਾਯਚਿਤ੍ਤਪਸ੍ਸਦ੍ਧਿ. ਯਥਾਭੂਤਞਾਣਦਸ੍ਸਨਨ੍ਤਿ ਸਪ੍ਪਚ੍ਚਯਨਾਮਰੂਪਪਰਿਗ੍ਗਹੋ. ਨਿਬ੍ਬਿਦਾਤਿ ਵਿਪਸ੍ਸਨਾ. ਵਿਰਾਗੋਤਿ ਅਰਿਯਮਗ੍ਗੋ. ਵਿਮੁਤ੍ਤੀਤਿ ਅਗ੍ਗਫਲਂ. ਵਿਮੁਤ੍ਤਿਞਾਣਦਸ੍ਸਨਨ੍ਤਿ ਪਚ੍ਚਵੇਕ੍ਖਣਞਾਣਂ. ਅਨੁਪਾਦਾਤਿ ਕਞ੍ਚਿ ਧਮ੍ਮਂ ਅਨੁਪਾਦਿਯਿਤ੍ਵਾ ਪਰਿਚ੍ਚਜਿਤ੍ਵਾ. ਪਰਿਨਿਬ੍ਬਾਨਤ੍ਥਾਯਾਤਿ ਪਚ੍ਚਵੇਕ੍ਖਣਞਾਣੇ ਅਨੁਪ੍ਪਨ੍ਨੇ ਅਨ੍ਤਰਾ ਪਰਿਨਿਬ੍ਬਾਨਾਭਾਵੇਨ ਤਂਪਰਿਨਿਬ੍ਬਾਨਤ੍ਥਾਯਾਤਿ ਪਚ੍ਚਯਤ੍ਤੇਨ ਵੁਤ੍ਤਂ ਅਨਨ੍ਤਰਾਦਿਪਚ੍ਚਯਤ੍ਤਾ. ਏਤਦਤ੍ਥਾ ਕਥਾਤਿ ਅਯਂ ਵਿਨਯਕਥਾ ਨਾਮ ਏਤਸ੍ਸ ਅਨੁਪਾਦਾਪਰਿਨਿਬ੍ਬਾਨਸ੍ਸ ਅਤ੍ਥਾਯਾਤਿ ਅਤ੍ਥੋ. ਮਨ੍ਤਨਾਤਿ ਵਿਨਯਮਨ੍ਤਨਾਯੇਵ, ਭਿਕ੍ਖੂਨਂ ‘‘ਏਵਂ ਕਰਿਸ੍ਸਾਮ, ਏਵਂ ਨ ਕਰਿਸ੍ਸਾਮਾ’’ਤਿ ਵਿਨਯਪਟਿਬਦ੍ਧਮਨ੍ਤਨਾ. ਉਪਨਿਸਾਤਿ ਉਪਨਿਸੀਦਤਿ ਏਤ੍ਥ ਫਲਨ੍ਤਿ ਉਪਨਿਸਾ, ਕਾਰਣਂ. ਵਿਨਯੋ ਸਂਵਰਤ੍ਥਾਯਾਤਿਆਦਿਕਾਰਣਪਰਮ੍ਪਰਾਪਿ ਏਤਦਤ੍ਥਾਤਿ ਅਤ੍ਥੋ. ਸੋਤਾਵਧਾਨਨ੍ਤਿ ਇਮਿਸ੍ਸਾ ਪਰਮ੍ਪਰਪਚ੍ਚਯਕਥਾਯ ਅਤ੍ਤਾਨਂ ਸਮਨਤ੍ਥਾਯ ਸੋਤਾਵਧਾਨਂ, ਤਮ੍ਪਿ ਏਤਮਤ੍ਥਂ. ਯਦਿਦਨ੍ਤਿ ਨਿਪਾਤੋ. ਯੋ ਅਯਂ ਚਤੂਹਿ ਉਪਾਦਾਨੇਹਿ ਅਨੁਪਾਦਿਯਿਤ੍ਵਾ ਚਿਤ੍ਤਸ੍ਸ ਅਰਹਤ੍ਤਮਗ੍ਗਸਙ੍ਖਾਤੋ, ਤਪ੍ਫਲਸਙ੍ਖਾਤੋ ਵਾ ਵਿਮੋਕ੍ਖੋ, ਸੋਪਿ ਏਤਦਤ੍ਥਾਯ ਅਨੁਪਾਦਾਪਰਿਨਿਬ੍ਬਾਨਤ੍ਥਾਯ. ਅਥ ਵਾ ਯੋ ਅਯਂ ਕਞ੍ਚਿ ਧਮ੍ਮਂ ਅਨੁਪਾਦਾਚਿਤ੍ਤਸ੍ਸ ਵਿਮੋਕ੍ਖੋ ਵਿਮੁਚ੍ਚਨਂ ਵਿਗਮੋ ਪਰਿਨਿਬ੍ਬਾਨਂ ਏਤਦਤ੍ਥਾ ਕਥਾਤਿ ਏਵਂ ਉਪਸਂਹਰਣਵਸੇਨ ਯੋਜੇਤੁਮ੍ਪਿ ਵਟ੍ਟਤਿ ਮਗ੍ਗਫਲਵਿਮੋਕ੍ਖਸ੍ਸ ਪੁਬ੍ਬੇ ਵੁਤ੍ਤਤ੍ਤਾ. ਆਯੋਗੋਤਿ ਉਗ੍ਗਹਣਾਦਿਵਸੇਨ ਪੁਨਪ੍ਪੁਨਂ ਅਭਿਯੋਗੋ.

ਆਚਰਿਯਪਰਮ੍ਪਰਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਬਾਹਿਰਨਿਦਾਨਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਵੇਰਞ੍ਜਕਣ੍ਡਵਣ੍ਣਨਾ

ਸੇਯ੍ਯਥਿਦਨ੍ਤਿ ¶ ¶ ਤਂ ਕਤਮਂ, ਤਂ ਕਥਨ੍ਤਿ ਵਾ ਅਤ੍ਥੋ. ਅਨਿਯਮਨਿਦ੍ਦੇਸਵਚਨਨ੍ਤਿ ਅਤ੍ਤਨੋ ਅਤ੍ਥਂ ਸਰੂਪੇਨ ਨਿਯਮੇਤ੍ਵਾ ਨਿਦ੍ਦਿਸਤੀਤਿ ਨਿਯਮਨਿਦ੍ਦੇਸੋ, ਨ ਨਿਯਮਨਿਦ੍ਦੇਸੋ ਅਨਿਯਮਨਿਦ੍ਦੇਸੋ. ਸੋਵ ਵੁਚ੍ਚਤੇ ਅਨੇਨਾਤਿ ਵਚਨਨ੍ਤਿ ਅਨਿਯਮਨਿਦ੍ਦੇਸਵਚਨਂ. ਤਸ੍ਸਾਤਿ ਤੇਨਾਤਿਪਦਸ੍ਸ. ਪਰਿਵਿਤਕ੍ਕੋਤਿ ‘‘ਕਤਮੇਸਾਨਂ ਖੋ ਬੁਦ੍ਧਾਨਂ ਭਗਵਨ੍ਤਾਨਂ ਬ੍ਰਹ੍ਮਚਰਿਯਂ ਨ ਚਿਰਟ੍ਠਿਤਿਕਂ ਅਹੋਸੀ’’ਤਿਆਦਿਨਾ (ਪਾਰਾ. ੧੮) ਪਵਤ੍ਤੋ. ਪੁਬ੍ਬੇ ਵਾ ਪਚ੍ਛਾ ਵਾਤਿ ਤੇਨਾਤਿਪਦਤੋ ਹੇਟ੍ਠਾ ਵੁਤ੍ਤਪਾਠੇ ਵਾ ਉਪਰਿ ਵਕ੍ਖਮਾਨਪਾਠੇ ਵਾਤਿ ਅਤ੍ਥੋ. ਅਤ੍ਥਤੋ ਸਿਦ੍ਧੇਨਾਤਿ ਸਾਮਤ੍ਥਿਯਤੋ ਸਿਦ੍ਧੇਨ. ਤਤ੍ਰਿਦਂ ਮੁਖਮਤ੍ਤਨਿਦਸ੍ਸਨਨ੍ਤਿ ਤਸ੍ਸਾ ਯਥਾਵੁਤ੍ਤਯੁਤ੍ਤਿਯਾ ਪਰਿਦੀਪਨੇ ਇਦਂ ਉਪਾਯਮਤ੍ਤਨਿਦਸ੍ਸਨਂ. ਮੁਖਂ ਦ੍ਵਾਰਂ ਉਪਾਯੋਤਿ ਹਿ ਅਤ੍ਥਤੋ ਏਕਂ.

ਸਮਯਸਦ੍ਦੋ ਦਿਸ੍ਸਤੀਤਿ ਸਮ੍ਬਨ੍ਧੋ. ਅਸ੍ਸਾਤਿ ਸਮਯਸਦ੍ਦਸ੍ਸ ਸਮਵਾਯੋ ਅਤ੍ਥੋਤਿ ਸਮ੍ਬਨ੍ਧੋ. ਕਾਲਞ੍ਚ ਸਮਯਞ੍ਚ ਉਪਾਦਾਯਾਤਿ ਏਤ੍ਥ ਕਾਲੋ ਨਾਮ ਉਪਸਙ੍ਕਮਨਸ੍ਸ ਯੁਤ੍ਤਕਾਲੋ, ਸਮਯੋ ਨਾਮ ਸਰੀਰਬਲਾਦਿਕਾਰਣਸਮਵਾਯੋ, ਤੇ ਉਪਾਦਾਯ ਪਟਿਚ੍ਚਾਤਿ ਅਤ੍ਥੋ. ਖਣੋਤਿ ਓਕਾਸੋ. ਬੁਦ੍ਧੁਪ੍ਪਾਦਾਦਯੋ ਹਿ ਮਗ੍ਗਬ੍ਰਹ੍ਮਚਰਿਯਸ੍ਸ ਓਕਾਸੋ. ਸੋ ਏਵ ਸਮਯੋ. ਤੇਨੇਵ ‘‘ਏਕੋਵਾ’’ਤਿ ਵੁਤ੍ਤਂ. ਮਹਾਸਮਯੋਤਿ ਮਹਾਸਮੂਹੋ. ਪਵਨਸ੍ਮਿਨ੍ਤਿ ਵਨਸਣ੍ਡੇ. ਸਮਯੋਪਿ ਖੋ ਤੇ ਭਦ੍ਦਾਲੀਤਿ ਏਤ੍ਥ ਸਮਯੋਤਿ ਸਿਕ੍ਖਾਪਦਾਵਿਲਙ੍ਘਨਸ੍ਸ ਹੇਤੁ, ਕੋ ਸੋ? ਅਤ੍ਤਨੋ ਵਿਪ੍ਪਟਿਪਤ੍ਤਿਯਾ ਭਗਵਤੋ ਜਾਨਨਂ, ਸੋ ਸਮਯਸਙ੍ਖਾਤੋ ਹੇਤੁ ਤਸ੍ਸਾ ਅਪ੍ਪਟਿਵਿਦ੍ਧੋਤਿ ਅਤ੍ਥੋ. ਭਗਵਾਤਿਆਦਿ ਤਸ੍ਸ ਪਟਿਵਿਜ੍ਝਨਾਕਾਰਦਸ੍ਸਨਂ. ਉਗ੍ਗਹਮਾਨੋਤਿ ਕਿਞ੍ਚਿ ਕਿਞ੍ਚਿ ਉਗ੍ਗਹੇਤੁਂ ਸਮਤ੍ਥਤਾਯ ਉਗ੍ਗਹਮਾਨੋ, ਸੁਮਨਪਰਿਬ੍ਬਾਜਕਸ੍ਸੇਵੇਤਂ ਨਾਮਂ. ਸਮਯਂ ਦਿਟ੍ਠਿਂ ਪਵਦਨ੍ਤਿ ਏਤ੍ਥਾਤਿ ਸਮਯਪ੍ਪਵਾਦਕੋ, ਮਲ੍ਲਿਕਾਯ ਆਰਾਮੋ. ਸ੍ਵੇਵ ਤਿਨ੍ਦੁਕਾਚੀਰਸਙ੍ਖਾਤਾਯ ਤਿਮ੍ਬਰੁਰੁਕ੍ਖਪਨ੍ਤਿਯਾ ਪਰਿਕ੍ਖਿਤ੍ਤਤ੍ਤਾ ‘‘ਤਿਨ੍ਦੁਕਾਚੀਰ’’ਨ੍ਤਿ ਚ, ਏਕਾਵ ਨਿਵਾਸਾ ਸਾਲਾ ਏਤ੍ਥਾਤਿ ‘‘ਏਕਸਾਲਕੋ’’ਤਿ ਚ ਵੁਚ੍ਚਤਿ. ਅਤ੍ਥਾਭਿਸਮਯਾਤਿ ਯਥਾਵੁਤ੍ਤਸ੍ਸ ਦਿਟ੍ਠਧਮ੍ਮਿਕਸਮ੍ਪਰਾਯਿਕਸ੍ਸ ਅਤ੍ਥਸ੍ਸ ਹਿਤਸ੍ਸ ਪਟਿਲਾਭਤੋ. ਮਾਨਾਭਿਸਮਯਾਤਿ ਮਾਨਪ੍ਪਹਾਨਾ. ਪੀਲ਼ਨਟ੍ਠੋਤਿ ਪੀਲ਼ਨਂ ਤਂਸਮਙ੍ਗਿਨੋ ਹਿਂਸਨਂ, ਅਵਿਪ੍ਫਾਰਿਕਤਾਕਰਣਂ, ਪੀਲ਼ਨਮੇਵ ਅਤ੍ਥੋ ਪੀਲ਼ਨਟ੍ਠੋ ¶ . ਸਨ੍ਤਾਪੋਤਿ ਦੁਕ੍ਖਦੁਕ੍ਖਤਾਦਿਵਸੇਨ ਸਨ੍ਤਾਪਨਂ. ਵਿਪਰਿਣਾਮੋਤਿ ਜਰਾਯ ਮਰਣੇਨ ਚਾਤਿ ਦ੍ਵਿਧਾ ¶ ਵਿਪਰਿਣਾਮੇਤਬ੍ਬਤਾ ਅਭਿਸਮੇਤਬ੍ਬੋ ਪਟਿਵਿਜ੍ਝਿਤਬ੍ਬੋਤਿ ਅਭਿਸਮਯੋ, ਸੋਵ ਅਭਿਸਮਯਟ੍ਠੋ, ਪੀਲ਼ਨਾਦੀਨਿ.

ਏਤ੍ਥ ਚ ਉਪਸਗ੍ਗਾਨਂ ਜੋਤਕਮਤ੍ਤਤ੍ਤਾ ਸਮਯਸਦ੍ਦਸ੍ਸ ਅਤ੍ਥੁਦ੍ਧਾਰੇਪਿ ਸਉਪਸਗ੍ਗੋ ਅਭਿਸਮਯਸਦ੍ਦੋ ਉਦ੍ਧਟੋ. ਤਤ੍ਥ ਸਙ੍ਗਮਵਸੇਨ ਪਚ੍ਚਯਾਨਂ ਫਲੁਪ੍ਪਾਦਨਂ ਪਟਿ ਅਯਨਂ ਏਕਤੋ ਪਵਤ੍ਤਿ ਏਤ੍ਥਾਤਿ ਸਮਯੋ, ਸਮਵਾਯੋ. ਵਿਵਟ੍ਟੂਪਨਿਸ੍ਸਯਸਙ੍ਗਮੇ ਸਤਿ ਏਨ੍ਤਿ ਏਤ੍ਥ ਸਤ੍ਤਾ ਪਵਤ੍ਤਨ੍ਤੀਤਿ ਸਮਯੋ, ਖਣੋ. ਸਮੇਤਿ ਏਤ੍ਥ ਸਙ੍ਖਤਧਮ੍ਮੋ, ਸਯਂ ਵਾ ਏਤਿ ਆਗਚ੍ਛਤਿ ਵਿਗਚ੍ਛਤਿ ਚਾਤਿ ਸਮਯੋ, ਕਾਲੋ. ਸਮੇਨ੍ਤਿ ਅਵਯਵਾ ਏਤਸ੍ਮਿਂ, ਸਯਂ ਵਾ ਤੇਸੂਤਿ ਸਮਯੋ, ਸਮੂਹੋ. ਪਚ੍ਚਯਨ੍ਤਰਸਙ੍ਗਮੇ ਏਤਿ ਆਗਚ੍ਛਤਿ ਏਤਸ੍ਮਾ ਫਲਨ੍ਤਿ ਸਮਯੋ, ਹੇਤੁ. ਸਞ੍ਞਾਵਸੇਨ ਵਿਪਲ੍ਲਾਸਤੋ ਧਮ੍ਮੇਸੁ ਏਤਿ ਅਭਿਨਿਵਿਸਤੀਤਿ ਸਮਯੋ, ਦਿਟ੍ਠਿ. ਸਮੀਪਂ ਅਯਨਂ ਉਪਗਮਨਂ ਸਮਯੋ, ਪਟਿਲਾਭੋ. ਸਮ੍ਮਦੇਵ ਸਹਿਤਾਨਂ ਵਾਚਾਨਂ ਅਯਨਂ ਵਿਗਮੋਤਿ ਸਮਯੋ, ਪਹਾਨਂ. ਸਮ੍ਮਦੇਵ, ਸਹਿਤਾਨਂ ਵਾ ਸਚ੍ਚਾਨਂ ਅਯਨਂ ਜਾਨਨਨ੍ਤਿ ਸਮਯੋ, ਪਟਿਵੇਧੋ. ਏਵਂ ਤਸ੍ਮਿਂ ਤਸ੍ਮਿਂ ਅਤ੍ਥੇ ਸਮਯਸਦ੍ਦਸ੍ਸ ਪਵਤ੍ਤਿ ਵੇਦਿਤਬ੍ਬਾ.

ਏਤ੍ਥ ਚ ਸਮਯਸਦ੍ਦਸ੍ਸ ਸਾਮਞ੍ਞੇਨ ਅਨੇਕਤ੍ਥਤਾ ਵੁਤ੍ਤਾ. ਨ ਹਿ ਏਕਸ੍ਮਿਂ ਅਤ੍ਥਵਿਸੇਸੇ ਵਤ੍ਤਮਾਨੋ ਸਦ੍ਦੋ ਤਦਞ੍ਞੇਪਿ ਵਤ੍ਤਤਿ. ਤਸ੍ਮਾ ਅਤ੍ਥਾ ਵਿਯ ਤਂਤਂਵਾਚਕਾ ਸਮਯਸਦ੍ਦਾਪਿ ਭਿਨ੍ਨਾ ਏਵਾਤਿ ਗਹੇਤਬ੍ਬਾ. ਏਵਂ ਸਬ੍ਬਤ੍ਥ ਅਤ੍ਥੁਦ੍ਧਾਰੇਸੁ.

ਤਤ੍ਥ ਤਥਾਤਿ ਤੇਸੁ ਸੁਤ੍ਤਾਭਿਧਮ੍ਮੇਸੁ ਉਪਯੋਗਭੁਮ੍ਮਵਚਨੇਹਿ. ਇਧਾਤਿ ਵਿਨਯੇ, ਅਞ੍ਞਥਾਤਿ ਕਰਣਵਚਨੇਨ. ਅਚ੍ਚਨ੍ਤਮੇਵਾਤਿ ਨਿਰਨ੍ਤਰਮੇਵ. ਭਾਵੋ ਨਾਮ ਕਿਰਿਯਾ, ਕਿਰਿਯਾਯ ਕਿਰਿਯਨ੍ਤਰੂਪਲਕ੍ਖਣਂ ਭਾਵੇਨਭਾਵਲਕ੍ਖਣਂ, ਯਥਾ ਉਦਯੇ ਸਤਿ ਚਨ੍ਦੇ ਜਾਤੋ ਰਾਜਪੁਤ੍ਤੋਤਿ. ਅਧਿਕਰਣਞ੍ਹੀਤਿਆਦਿ ਅਭਿਧਮ੍ਮੇ ਸਮਯਸਦ੍ਦੋ ਕਾਲਸਮੂਹਖਣਸਮਵਾਯਹੇਤੁਸਙ੍ਖਾਤੇਸੁ ਪਞ੍ਚਸੁ ਅਤ੍ਥੇਸੁ ਵਤ੍ਤਤਿ, ਨ ਵਿਨਯੇ ਵਿਯ ਕਾਲੇ ਏਵ, ਤੇਸੁ ਚ ਕਾਲਸਮੂਹਤ੍ਥਾ ਦ੍ਵੇ ਤਤ੍ਥ ਵੁਤ੍ਤਾਨਂ ਫਸ੍ਸਾਦਿਧਮ੍ਮਾਨਂ ਅਧਿਕਰਣਭਾਵੇਨ ਨਿਦ੍ਦਿਸਿਤੁਂ ਯੁਤ੍ਤਾ. ਖਣਸਮਵਾਯਹੇਤੁਅਤ੍ਥਾ ਪਨ ਤਯੋਪਿ ਅਤ੍ਤਨੋ ਭਾਵੇਨ ਫਸ੍ਸਾਦੀਨਂ ਭਾਵਸ੍ਸ ਉਪਲਕ੍ਖਣਭਾਵੇਨ ¶ ਨਿਦ੍ਦਿਸਿਤੁਂ ਯੁਤ੍ਤਾਤਿ ਵਿਭਾਵਨਮੁਖੇਨ ਯਥਾਵੁਤ੍ਤਮਤ੍ਥਂ ਸਮਤ੍ਥੇਤੁਂ ਵੁਤ੍ਤਂ. ਤਤ੍ਥ ਯਸ੍ਮਿਞ੍ਹਿ ਕਾਲੇ, ਧਮ੍ਮਸਮੂਹੇ ਵਾ ਸਮਯੇ ਅਧਿਕਰਣਭੂਤੇ ਕੁਸਲਂ ਉਪ੍ਪਨ੍ਨਂ, ਤਸ੍ਮਿਞ੍ਞੇਵ ਕਾਲੇ, ਧਮ੍ਮਸਮੂਹੇ ਵਾ ਸਮਯੇ ਫਸ੍ਸਾਦਯੋ ਹੋਨ੍ਤੀਤਿ ਏਵਂ ਅਧਿਕਰਣਤ੍ਥਯੋਜਨਾ, ਯਸ੍ਮਿਂ ਪਨ ਖਣੇ, ਸਮਵਾਯੇ ਹੇਤੁਮ੍ਹਿ ਵਾ ਸਮਯੇ ਸਤਿ ਵਿਜ੍ਜਮਾਨੇ ਕੁਸਲਂ ਉਪ੍ਪਨ੍ਨਂ, ਤਸ੍ਮਿਞ੍ਞੇਵ ਖਣਾਦਿਮ੍ਹਿ ਸਮਯੇਪਿ ਵਿਜ੍ਜਮਾਨੇ ਫਸ੍ਸਾਦਯੋ ਹੋਨ੍ਤੀਤਿ ਭਾਵੇਨਭਾਵਲਕ੍ਖਣਤ੍ਥਯੋਜਨਾ ਚ ਵੇਦਿਤਬ੍ਬਾ.

ਹੋਤਿ ¶ ਚੇਤ੍ਥਾਤਿ ਏਤ੍ਥ ਯਥਾਵੁਤ੍ਤਅਤ੍ਥਵਿਸਯੇ ਸਙ੍ਗਹਗਾਥਾ ਹੋਤਿ. ਅਞ੍ਞਤ੍ਰਾਤਿ ਸੁਤ੍ਤਾਭਿਧਮ੍ਮੇਸੁ. ਅਭਿਲਾਪਮਤ੍ਤਭੇਦੋਤਿ ਦੇਸਨਾਵਿਲਾਸਤੋ ਸਦ੍ਦਮਤ੍ਤੇਨੇਵ ਭੇਦੋ, ਨ ਅਤ੍ਥਤੋ.

ਅਵਿਸੇਸੇਨਾਤਿ ਸਾਮਞ੍ਞੇਨ. ਇਰਿਯਾਪਥੋਤਿਆਦੀਸੁ ਇਰਿਯਾਯ ਸਬ੍ਬਦ੍ਵਾਰਿਕਕਿਰਿਯਾਯ ਪਥੋ ਪਵਤ੍ਤਨਟ੍ਠਾਨਂ ਤਬ੍ਬਿਨਿਮੁਤ੍ਤਕਮ੍ਮਸ੍ਸ ਅਭਾਵਾਤਿ ਠਾਨਾਦਯੋ ਇਰਿਯਾਪਥੋ, ਸੋਵ ਵਿਹਾਰੋ. ਬ੍ਰਹ੍ਮਭੂਤਾ ਸੇਟ੍ਠਭੂਤਾ ਪਰਹਿਤਚਿਤ੍ਤਾਦਿਵਸਪ੍ਪਵਤ੍ਤਿਤੋ ਮੇਤ੍ਤਾਦਯੋ ਬ੍ਰਹ੍ਮਵਿਹਾਰੋ ਨਾਮ. ਤਦਵਸੇਸਾ ਪਨ ਮਹਗ੍ਗਤਾ ਸਬ੍ਬਨੀਵਰਣਵਿਗਮਨਾਦਿਸਿਦ੍ਧੇਨ ਜੋਤਨਾਦਿਅਤ੍ਥੇਨ ਦਿਬ੍ਬਵਿਹਾਰੋ ਨਾਮ. ਬ੍ਰਹ੍ਮਵਿਹਾਰਭਾਵੇਨ ਵਿਸੁਂ ਗਹਿਤਤ੍ਤਾ ਮੇਤ੍ਤਾਦਯੋ ਇਧ ਅਸਙ੍ਗਹਿਤਾ. ਅਰਿਯਾਨਮੇਵ ਵਿਹਾਰੋਤਿ ਫਲਸਮਾਪਤ੍ਤਿਯੋ ਅਰਿਯਵਿਹਾਰੋ ਨਾਮ.

ਰੁਕ੍ਖਾਦਿਮੂਲੇਯੇਵ ਮੂਲਸਦ੍ਦਸ੍ਸ ਨਿਰੁਲ਼੍ਹਭਾਵਂ ਦਸ੍ਸੇਤੁਂ ਅਪਰੇਨ ਮੂਲਸਦ੍ਦੇਨ ਵਿਸੇਸੇਤ੍ਵਾ ‘‘ਮੂਲਮੂਲੇ’’ਤਿ ਵੁਤ੍ਤਂ, ਯਥਾ ਦੁਕ੍ਖਦੁਕ੍ਖਨ੍ਤਿ (ਵਿਭ. ਅਟ੍ਠ. ੧੯੦). ਲੋਭਾਦੀਨਂ ਦੋਸਮੂਲਾਦਿਚਿਤ੍ਤਾਸਾਧਾਰਣਤ੍ਤਾ ‘‘ਅਸਾਧਾਰਣਹੇਤੁਮ੍ਹੀ’’ਤਿ ਵੁਤ੍ਤਂ.

ਤਤ੍ਥ ਸਿਯਾਤਿ ਤਤ੍ਥ ਵੇਰਞ੍ਜਾਯਨ੍ਤਿਆਦੀਸੁ ਪਦੇਸੁ ਕਸ੍ਸਚਿ ਚੋਦਨਾ ਸਿਯਾਤਿ ਅਤ੍ਥੋ. ਉਭਯਥਾ ਨਿਦਾਨਕਿਤ੍ਤਨਸ੍ਸ ਪਨ ਕਿਂ ਪਯੋਜਨਨ੍ਤਿ? ਆਹ ਗੋਚਰਗਾਮਨਿਦਸ੍ਸਨਤ੍ਥਨ੍ਤਿਆਦਿ. ਤਤ੍ਥ ਅਸ੍ਸਾਤਿ ਭਗਵਤੋ.

ਕਿਲਮੋਵ ਕਿਲਮਥੋ, ਅਤ੍ਤਨੋ ਅਤ੍ਤਭਾਵਸ੍ਸ ਕਿਲਮਥੋ ਅਤ੍ਤਕਿਲਮਥੋ, ਤਸ੍ਸ ਅਨੁ ਅਨੁ ਯੋਗੋ ਪੁਨਪ੍ਪੁਨਂ ਪਵਤ੍ਤਨਂ ਅਤ੍ਤਕਿਲਮਥਾਨੁਯੋਗੋ. ਵਤ੍ਥੁਕਾਮਾਰਮ੍ਮਣੇ ਸੁਖੇ ਸਮ੍ਪਯੋਗਵਸੇਨ ਲੀਨਾ ਯੁਤ੍ਤਾ, ਕਾਮਤਣ੍ਹਾ ¶ , ਤਂਸਹਚਰਿਤੇ ਕਾਮੇ ਸੁਖੇ ਵਾ ਆਰਮ੍ਮਣਭੂਤੇ ਅਲ੍ਲੀਨਾ ਪਵਤ੍ਤਤੀਤਿ ਕਾਮਸੁਖਲ੍ਲਿਕਾ ਤਣ੍ਹਾ, ਤਸ੍ਸਾ ਕਾਮਸੁਖਲ੍ਲਿਕਾਯ ਅਨੁ ਅਨੁ ਯੋਗੋ ਕਾਮਸੁਖਲ੍ਲਿਕਾਨੁਯੋਗੋ. ਲੋਕੇ ਸਂਵਡ੍ਢਭਾਵਨ੍ਤਿ ਆਮਿਸੋਪਭੋਗੇਨ ਸਂਵਡ੍ਢਿਤਭਾਵਂ. ਉਪ੍ਪਜ੍ਜਮਾਨੋ ਬਹੁਜਨਹਿਤਾਦਿਅਤ੍ਥਾਯੇਵ ਉਪ੍ਪਜ੍ਜਤੀਤਿ ਯੋਜਨਾ.

ਦਿਟ੍ਠਿਸੀਲਸਾਮਞ੍ਞੇਨ ਸਂਹਤਤ੍ਤਾ ਸਙ੍ਘੋਤਿ ਇਮਮਤ੍ਥਂ ਵਿਭਾਵੇਨ੍ਤੋ ਆਹ ਦਿਟ੍ਠੀਤਿਆਦਿ. ਏਤ੍ਥ ਚ ‘‘ਯਾਯਂ ਦਿਟ੍ਠਿ ਅਰਿਯਾ ਨਿਯ੍ਯਾਨਿਕਾ ਨਿਯ੍ਯਾਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯ, ਤਥਾਰੂਪਾਯ ਦਿਟ੍ਠਿਯਾ ਦਿਟ੍ਠਿਸਾਮਞ੍ਞਗਤੋ ਵਿਹਰਤੀ’’ਤਿ (ਦੀ. ਨਿ. ੩.੩੨੪, ੩੫੬; ਮ. ਨਿ. ੧.੪੯੨; ੩.੫੪; ਅ. ਨਿ. ੬.੧੨; ਪਰਿ. ੨੭੪) ਏਵਂ ਵੁਤ੍ਤਾਯ ਦਿਟ੍ਠਿਯਾ. ‘‘ਯਾਨਿ ਤਾਨਿ ਸੀਲਾਨਿ ਅਖਣ੍ਡਾਨਿ…ਪੇ… ਸਮਾਧਿਸਂਵਤ੍ਤਨਿਕਾਨਿ, ਤਥਾਰੂਪੇਸੁ ਸੀਲੇਸੁ ਸੀਲਸਾਮਞ੍ਞਗਤੋ ਵਿਹਰਤੀ’’ਤਿ ¶ (ਦੀ. ਨਿ. ੩.੩੨੪, ੩੫੬; ਮ. ਨਿ. ੧.੪੯੨; ੩.੫੪; ਅ. ਨਿ. ੬.੧੨; ਪਰਿ. ੨੭੪) ਏਵਂ ਵੁਤ੍ਤਾਨਞ੍ਚ ਸੀਲਾਨਂ ਸਾਮਞ੍ਞਸਙ੍ਖਾਤੇਨ ਸਙ੍ਘਾਤੋ ਸਙ੍ਘਟਿਤੋ ਸਮਣਗਣੋ, ਤੇਨਾਤਿ ਅਤ੍ਥੋ. ‘‘ਦਿਟ੍ਠਿਸੀਲਸਾਮਞ੍ਞਸਙ੍ਘਾਤਸਙ੍ਘਾਤੇਨਾ’’ਤਿ ਵਾ ਪਾਠੇਨੇਤ੍ਥ ਭਵਿਤਬ੍ਬਂ, ਤਸ੍ਸ ਦਿਟ੍ਠਿਸੀਲਸਾਮਞ੍ਞਭੂਤੇਨ ਸਂਹਨਨੇਨ ਸਙ੍ਘਾਤੋ ਸਮਣਗਣੋ, ਤੇਨਾਤਿ ਅਤ੍ਥੋ. ਏਵਞ੍ਹਿ ਪਾਠੇ ਸਦ੍ਦਤੋ ਅਤ੍ਥੋ ਯੁਤ੍ਤਤਰੋ ਹੋਤਿ. ਅਸ੍ਸਾਤਿ ਮਹਤੋ ਭਿਕ੍ਖੁਸਙ੍ਘਸ੍ਸ.

ਬ੍ਰਹ੍ਮਂ ਅਣਤੀਤਿ ਏਤ੍ਥ ਬ੍ਰਹ੍ਮ-ਸਦ੍ਦੇਨ ਵੇਦੋ ਵੁਚ੍ਚਤਿ, ਸੋ ਮਨ੍ਤਬ੍ਰਹ੍ਮਕਪ੍ਪਵਸੇਨ ਤਿਵਿਧੋ. ਤਤ੍ਥ ਇਰੁਵੇਦਾਦਯੋ ਤਯੋ ਵੇਦਾ ਮਨ੍ਤਾ, ਤੇ ਚ ਪਧਾਨਾ, ਇਤਰੇ ਪਨ ਸਨ੍ਨਿਸ੍ਸਿਤਾ, ਤੇਨ ਪਧਾਨਸ੍ਸੇਵ ਗਹਣਂ. ਮਨ੍ਤੇ ਸਜ੍ਝਾਯਤੀਤਿ ਇਰੁਵੇਦਾਦਿਕੇ ਮਨ੍ਤਸਤ੍ਥੇ ਸਜ੍ਝਾਯਤੀਤਿ ਅਤ੍ਥੋ. ਇਰੁਵੇਦਾਦਯੋ ਹਿ ਗੁਤ੍ਤਭਾਸਿਤਬ੍ਬਤਾਯ ‘‘ਮਨ੍ਤਾ’’ਤਿ ਵੁਚ੍ਚਨ੍ਤਿ. ‘‘ਬਾਹਿਤਪਾਪਤ੍ਤਾ ਬ੍ਰਾਹ੍ਮਣੋ, ਸਮਿਤਪਾਪਤ੍ਤਾ ਸਮਣੋ’’ਤਿ ਯਥਾਵੁਤ੍ਤਮਤ੍ਥਦ੍ਵਯਂ ਉਦਾਹਰਣਦ੍ਵਯੇਨ ਵਿਭਾਵੇਤੁਂ ਵੁਤ੍ਤਞ੍ਹੇਤਨ੍ਤਿਆਦਿ ਵੁਤ੍ਤਂ. ‘‘ਸਮਿਤਤ੍ਤਾ ਹਿ ਪਾਪਾਨਂ ‘ਸਮਣੋ’ਤਿ ਪਵੁਚ੍ਚਤੀ’’ਤਿ ਹਿ ਇਦਂ ਵਚਨਂ ਗਹੇਤ੍ਵਾ ‘‘ਸਮਿਤਪਾਪਤ੍ਤਾ ‘ਸਮਣੋ’ਤਿ ਵੁਚ੍ਚਤੀ’’ਤਿ ਵੁਤ੍ਤਂ, ਬਾਹਿਤਪਾਪੋਤਿ ਇਦਂ ਪਨ ਅਞ੍ਞਸ੍ਮਿਂ ਗਾਥਾਬਨ੍ਧੇ ਵੁਤ੍ਤਵਚਨਂ. ਯਥਾਭੁਚ੍ਚਗੁਣਾਧਿਗਤਨ੍ਤਿ ਯਥਾਭੂਤਗੁਣਾਧਿਗਤਂ. ਸਕਿਞ੍ਚਨੋਤਿ ਸਦੋਸੋ.

ਗੋਤ੍ਤਵਸੇਨਾਤਿ ਏਤ੍ਥ ਗਂ ਤਾਯਤੀਤਿ ਗੋਤ੍ਤਂ, ਗੋ-ਸਦ੍ਦੇਨ ਚੇਤ੍ਥ ਅਭਿਧਾਨਂ ਬੁਦ੍ਧਿ ਚ ਵੁਚ੍ਚਤਿ. ਕੇਨਚਿ ਪਾਰਿਜੁਞ੍ਞੇਨਾਤਿ ਞਾਤਿਪਾਰਿਜੁਞ੍ਞਾਦਿਨਾ ਕੇਨਚਿ ਪਾਰਿਜੁਞ੍ਞੇਨ ¶ , ਪਰਿਹਾਨਿਯਾਤਿ ਅਤ੍ਥੋ. ਤਤੋ ਪਰਨ੍ਤਿ ਵੇਰਞ੍ਜਾਯਨ੍ਤਿਆਦਿਵਚਨਂ. ਇਤ੍ਥਮ੍ਭੂਤਾਖ੍ਯਾਨਤ੍ਥੇ ਉਪਯੋਗਵਚਨਨ੍ਤਿ ਇਤ੍ਥਂ ਇਮਂ ਪਕਾਰਂ ਭੂਤੋ ਆਪਨ੍ਨੋਤਿ ਇਤ੍ਥਮ੍ਭੂਤੋ, ਤਸ੍ਸ ਆਖ੍ਯਾਨਂ ਇਤ੍ਥਮ੍ਭੂਤਾਖ੍ਯਾਨਂ, ਸੋਯੇਵਤ੍ਥੋ ਇਤ੍ਥਮ੍ਭੂਤਾਖ੍ਯਾਨਤ੍ਥੋ. ਅਥ ਵਾ ‘‘ਇਤ੍ਥਂ ਏਵਂਪਕਾਰੋ ਭੂਤੋ ਜਾਤੋ’’ਤਿ ਏਵਂ ਕਥਨਤ੍ਥੋ ਇਤ੍ਥਮ੍ਭੂਤਾਖ੍ਯਾਨਤ੍ਥੋ, ਤਸ੍ਮਿਂ ਉਪਯੋਗਵਚਨਨ੍ਤਿ ਅਤ੍ਥੋ. ਏਤ੍ਥ ਚ ਅਬ੍ਭੁਗ੍ਗਤੋਤਿ ਏਤ੍ਥ ਅਭਿ-ਸਦ੍ਦੋ ਇਤ੍ਥਮ੍ਭੂਤਾਖ੍ਯਾਨਤ੍ਥਜੋਤਕੋ ਅਭਿਭਵਿਤ੍ਵਾ ਉਗ੍ਗਮਨਪ੍ਪਕਾਰਸ੍ਸ ਦੀਪਨਤੋ, ਤੇਨ ਯੋਗਤੋ ਤਂ ਖੋ ਪਨ ਭਵਨ੍ਤਂ ਗੋਤਮਨ੍ਤਿ ਇਦਂ ਉਪਯੋਗਵਚਨਂ ਸਾਮਿਅਤ੍ਥੇਪਿ ਸਮਾਨੇ ਇਤ੍ਥਮ੍ਭੂਤਾਖ੍ਯਾਨਦੀਪਨਤੋ ‘‘ਇਤ੍ਥਮ੍ਭੂਤਾਖ੍ਯਾਨਤ੍ਥੇ’’ਤਿ ਵੁਤ੍ਤਂ, ਤੇਨੇਵਾਹ ‘‘ਤਸ੍ਸ ਖੋ ਪਨ ਭੋਤੋ ਗੋਤਮਸ੍ਸਾਤਿ ਅਤ੍ਥੋ’’ਤਿ.

ਇਦਂ ਵੁਤ੍ਤਂ ਹੋਤਿ – ਯਥਾ ਸਾਧੁ ਦੇਵਦਤ੍ਤੋ ਮਾਤਰਮਭੀਤਿ ਏਤ੍ਥ ਅਭਿਸਦ੍ਦਯੋਗਤੋ ਇਤ੍ਥਮ੍ਭੂਤਾਖ੍ਯਾਨੇ ਉਪਯੋਗਵਚਨਂ ਕਤਂ, ਏਵਮਿਧਾਪਿ ਤਂ ਖੋ ਪਨ ਭਵਨ੍ਤਂ ਗੋਤਮਂ ਅਭਿ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਉਗ੍ਗਤੋਤਿ ਅਭਿਸਦ੍ਦਯੋਗਤੋ ਇਤ੍ਥਮ੍ਭੂਤਾਖ੍ਯਾਨੇ ਉਪਯੋਗਵਚਨਨ੍ਤਿ. ਸਾਧੁ ਦੇਵਦਤ੍ਤੋ ਮਾਤਰਮਭੀਤਿ ਏਤ੍ਥ ਹਿ ‘‘ਦੇਵਦਤ੍ਤੋ ਮਾਤਰਮਭਿ ਮਾਤਰਿ ਵਿਸਯੇ ਮਾਤੁਯਾ ਵਾ ਸਾਧੂ’’ਤਿ ਏਵਂ ਅਧਿਕਰਣਤ੍ਥੇ ਵਾ ਸਾਮਿਅਤ੍ਥੇ ਵਾ ਭੁਮ੍ਮਵਚਨਸ੍ਸ ਸਾਮਿਵਚਨਸ੍ਸ ਵਾ ਪਸਙ੍ਗੇ ਇਤ੍ਥਮ੍ਭੂਤਾਖ੍ਯਾਨਤ੍ਥਜੋਤਕੇਨ ¶ ਅਭਿਸਦ੍ਦੇਨ ਯੋਗੇ ਉਪਯੋਗਵਚਨਂ ਕਤਂ, ਯਥਾ ਚੇਤ੍ਥ ਦੇਵਦਤ੍ਤੋ ਮਾਤੁਵਿਸਯੇ ਮਾਤੁਸਮ੍ਬਨ੍ਧੀ ਵਾ ਸੋ ਵੁਤ੍ਤਪ੍ਪਕਾਰਪ੍ਪਤ੍ਤੋਤਿ ਅਯਮਤ੍ਥੋ ਵਿਞ੍ਞਾਯਤਿ, ਏਵਮਿਧਾਪਿ ਭੋਤੋ ਗੋਤਮਸ੍ਸ ਸਮ੍ਬਨ੍ਧੀ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ ਅਭਿਭਵਿਤ੍ਵਾ ਉਗ੍ਗਮਨਪਕਾਰਪ੍ਪਤ੍ਤੋਤਿ ਅਯਮਤ੍ਥੋ ਵਿਞ੍ਞਾਯਤਿ. ਤਤ੍ਥ ਹਿ ਦੇਵਦਤ੍ਤਗ੍ਗਹਣਂ ਵਿਯ ਇਧ ਕਿਤ੍ਤਿਸਦ੍ਦਗ੍ਗਹਣਂ, ਤਤ੍ਥ ਮਾਤਰਨ੍ਤਿ ਵਚਨਂ ਵਿਯ ਇਧ ਤਂ ਖੋ ਪਨ ਭਵਨ੍ਤਂ ਗੋਤਮਨ੍ਤਿ ਵਚਨਂ, ਤਤ੍ਥ ਸਾਧੁਸਦ੍ਦਗ੍ਗਹਣਂ ਵਿਯ ਇਧ ਉਗ੍ਗਤਸਦ੍ਦਗ੍ਗਹਣਂ ਵੇਦਿਤਬ੍ਬਂ. ਕਿਤ੍ਤਿਸਦ੍ਦੋਤਿ ਕਿਤ੍ਤਿਭੂਤੋ ਸਦ੍ਦੋ, ਨ ਕੇਵਲੋਤਿ ਦਸ੍ਸਨਤ੍ਥਂ ਵਿਸੇਸਿਤਨ੍ਤਿ ਆਹ ‘‘ਕਿਤ੍ਤਿ ਏਵਾ’’ਤਿ. ਤਤੋ ਕਿਤ੍ਤੀਤਿ ਥੁਤਿ, ਤਸ੍ਸਾ ਪਕਾਸਕੋ ਸਦ੍ਦੋ ਕਿਤ੍ਤਿਸਦ੍ਦੋਤਿ ਦਸ੍ਸੇਤੁਂ ‘‘ਥੁਤਿਘੋਸੋ ਵਾ’’ਤਿ ਵੁਤ੍ਤਂ.

ਸੋ ਭਗਵਾਤਿ ਏਤ੍ਥ ਸੋਤਿ ਪਸਿਦ੍ਧਿਯਂ, ਯੋ ਸੋ ਸਮਤ੍ਤਿਂਸ ਪਾਰਮਿਯੋ ਪੂਰੇਤ੍ਵਾ ਸਬ੍ਬਕਿਲੇਸੇ ਭਞ੍ਜਿਤ੍ਵਾ ਦਸਸਹਸ੍ਸਿਲੋਕਧਾਤੁਂ ਕਮ੍ਪੇਨ੍ਤੋ ਅਨੁਤ੍ਤਰਂ ¶ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ, ਸੋ ਲੋਕੇ ਅਤਿਪਾਕਟੋਤਿ ‘‘ਸੋ ਭਗਵਾ’’ਤਿ ਵੁਤ੍ਤਂ. ਭਗਵਾਤਿ ਚ ਇਦਂ ਸਤ੍ਥੁ ਨਾਮਕਿਤ੍ਤਨਂ, ਨ ਗੁਣਕਿਤ੍ਤਨਂ. ਪਰਤੋ ਪਨ ਭਗਵਾਤਿ ਗੁਣਕਿਤ੍ਤਨਮੇਵ. ਇਮਿਨਾ ਚ ਇਮਿਨਾ ਚਾਤਿ ਏਤੇਨ ਅਰਹਨ੍ਤਿਆਦਿਪਦਾਨਂ ਪਚ੍ਚੇਕਂ ਅਨੇਕਗੁਣਗਣਂ ਪਟਿਚ੍ਚ ਪਵਤ੍ਤਭਾਵਂ ਦਸ੍ਸੇਤਿ.

ਸੁਵਿਦੂਰਵਿਦੂਰੇਤਿ ਦ੍ਵੀਹਿ ਸਦ੍ਦੇਹਿ ਅਤਿਵਿਯ ਦੂਰੇਤਿ ਦਸ੍ਸੇਤਿ, ਸੁਵਿਦੂਰਤਾ ਏਵ ਹਿ ਵਿਦੂਰਤਾ. ਸਵਾਸਨਾਨਂ ਕਿਲੇਸਾਨਂ ਵਿਦ੍ਧਂਸਿਤਤ੍ਤਾਤਿ ਇਮਿਨਾ ਪਚ੍ਚੇਕਬੁਦ੍ਧਾਦੀਹਿ ਅਸਾਧਾਰਣਂ ਭਗਵਤੋ ਅਰਹਤ੍ਤਨ੍ਤਿ ਦਸ੍ਸੇਤਿ ਤੇਸਂ ਵਾਸਨਾਯ ਅਪ੍ਪਹੀਨਤ੍ਤਾ, ਵਾਸਨਾ ਚ ਨਾਮ ਨਿਕ੍ਕਿਲੇਸਸ੍ਸਾਪਿ ਸਕਲਞੇਯ੍ਯਾਨਵਬੋਧਾਦਿਦ੍ਵਾਰਤ੍ਤਯਪ੍ਪਯੋਗਵਿਗੁਣਤਾਹੇਤੁਭੂਤੋ ਕਿਲੇਸਨਿਹਿਤੋ ਆਕਾਰੋ ਚਿਰਨਿਗਲ਼ਿਤਪਾਦਾਨਂ ਨਿਗਲ਼ਮੋਕ੍ਖੇਪਿ ਸਙ੍ਕੁਚਿਤਤਾਗਮਨਹੇਤੁਕੋ ਨਿਗਲ਼ਨਿਹਿਤੋ ਆਕਾਰੋ ਵਿਯ. ਯਾਯ ਪਿਲਿਨ੍ਦਵਚ੍ਛਾਦੀਨਂ ਵਸਲਵੋਹਾਰਾਦਿਵਿਗੁਣਤਾ ਹੋਤਿ, ਅਯਂ ਵਾਸਨਾਤਿ ਗਹੇਤਬ੍ਬਾ. ਆਰਕਾਤਿ ਏਤ੍ਥ ਆਕਾਰਸ੍ਸ ਰਸ੍ਸਤ੍ਤਂ ਕ-ਕਾਰਸ੍ਸ ਚ ਹ-ਕਾਰਂ ਸਾਨੁਸ੍ਸਰਂ ਕਤ੍ਵਾ ਨਿਰੁਤ੍ਤਿਨਯੇਨ ‘‘ਅਰਹ’’ਨ੍ਤਿ ਪਦਸਿਦ੍ਧਿ ਵੇਦਿਤਬ੍ਬਾ. ਏਵਂ ਉਪਰਿਪਿ ਯਥਾਰਹਂ ਨਿਰੁਤ੍ਤਿਨਯੇਨ ਪਦਸਿਦ੍ਧਿ ਵੇਦਿਤਬ੍ਬਾ. ਯਞ੍ਚੇਤਂ ਸਂਸਾਰਚਕ੍ਕਨ੍ਤਿ ਸਮ੍ਬਨ੍ਧੋ. ਪੁਞ੍ਞਾਦੀਤਿ ਆਦਿ-ਸਦ੍ਦੇਨ ਅਪੁਞ੍ਞਾਭਿਸਙ੍ਖਾਰਆਨੇਞ੍ਜਾਭਿਸਙ੍ਖਾਰੇ ਸਙ੍ਗਣ੍ਹਾਤਿ. ਆਸਵਾ ਏਵ ਅਵਿਜ੍ਜਾਦੀਨਂ ਕਾਰਣਤ੍ਤਾ ਸਮੁਦਯੋਤਿ ਆਹ ‘‘ਆਸਵਸਮੁਦਯਮਯੇਨਾ’’ਤਿ. ‘‘ਆਸਵਸਮੁਦਯਾ ਅਵਿਜ੍ਜਾਸਮੁਦਯੋ’’ਤਿ (ਮ. ਨਿ. ੧.੧੦੩) ਹਿ ਵੁਤ੍ਤਂ. ਵਿਪਾਕਕਟਤ੍ਤਾਰੂਪਪ੍ਪਭੇਦੋ ਤਿਭਵੋ ਏਵ ਰਥੋ, ਤਸ੍ਮਿਂ ਤਿਭਵਰਥੇ. ਸਂਸਾਰਚਕ੍ਕਨ੍ਤਿ ਯਥਾਵੁਤ੍ਤਕਿਲੇਸਕਮ੍ਮਵਿਪਾਕਸਮੁਦਯੋ.

‘‘ਖਨ੍ਧਾਨਞ੍ਚ ¶ ਪਟਿਪਾਟਿ, ਧਾਤੁਆਯਤਨਾਨ ਚ;

ਅਬ੍ਬੋਚ੍ਛਿਨ੍ਨਂ ਵਤ੍ਤਮਾਨਾ, ‘ਸਂਸਾਰੋ’ਤਿ ਪਵੁਚ੍ਚਤੀ’’ਤਿ. (ਵਿਸੁਦ੍ਧਿ. ੨.੬੧੮; ਦੀ. ਨਿ. ਅਟ੍ਠ. ੨.੯੫ ਅਪਸਾਦਨਾਵਣ੍ਣਨਾ; ਸਂ. ਨਿ. ਅਟ੍ਠ. ੨.੨.੬੦; ਅ. ਨਿ. ਅਟ੍ਠ. ੨.੪.੧੯੯; ਧ. ਸ. ਅਟ੍ਠ. ਨਿਦਾਨਕਥਾ; ਵਿਭ. ਅਟ੍ਠ. ੨੨੬ ਸਙ੍ਖਾਰਪਦਨਿਦ੍ਦੇਸ; ਸੁ. ਨਿ. ਅਟ੍ਠ. ੨.੫੨੩; ਉਦਾ. ਅਟ੍ਠ. ੩੯; ਇਤਿਵੁ. ਅਟ੍ਠ. ੧੪, ੫੮; ਥੇਰਗਾ. ਅਟ੍ਠ. ੧.੬੭, ੯੯; ਬੁ. ਵਂ. ਅਟ੍ਠ. ੫੮; ਪਟਿ. ਮ. ਅਟ੍ਠ. ੨.੧.੧੧੭; ਚੂਲ਼ਨਿ. ਅਟ੍ਠ. ੬) –

ਏਵਂ ਵੁਤ੍ਤੋ ਸਂਸਾਰੋਵ ਚਕ੍ਕਂ ਵਿਯ ਪਰਿਬ੍ਭਮਨਤੋ ਚਕ੍ਕਂ, ਤਸ੍ਸ ਚਕ੍ਕਸ੍ਸ ਸਬ੍ਬੇ ਅਰਾ ਹਤਾਤਿ ਸਮ੍ਬਨ੍ਧੋ. ਅਨੇਨਾਤਿ ਭਗਵਤਾ. ਬੋਧੀਤਿ ਞਾਣਂ, ਤਂ ¶ ਏਤ੍ਥ ਮਣ੍ਡਂ ਪਸਨ੍ਨਂ ਜਾਤਨ੍ਤਿ ਬੋਧਿਮਣ੍ਡੋ. ਕਮ੍ਮਕ੍ਖਯਕਰਂ ਞਾਣਫਰਸੁਨ੍ਤਿ ਅਰਹਤ੍ਤਮਗ੍ਗਞਾਣਂ ਵੁਤ੍ਤਂ, ਤਂ ਛਿਨ੍ਦਿਤਬ੍ਬਂ ਅਭਿਸਙ੍ਖਾਰਸਙ੍ਖਾਤਂ ਕਮ੍ਮਂ ਪਰਿਚ੍ਛਿਨ੍ਦਤੀਤਿ ਦਸ੍ਸੇਤੁਂ ਕਮ੍ਮਕ੍ਖਯਕਰਵਿਸੇਸਨਵਿਸਿਟ੍ਠਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਏਵਂ ਕਤਿਪਯਙ੍ਗੇਹਿ ਸਂਸਾਰਚਕ੍ਕਂ ਤਦਵਸੇਸਙ੍ਗੇਹਿ ਫਲਭੂਤਨਾਮਰੂਪਧਮ੍ਮੇਹਿ ਤਿਭਵਰਥਞ੍ਚ ਤਸ੍ਮਿਂ ਰਥੇ ਯੋਜਿਤਸਂਸਾਰਚਕ੍ਕਾਰਾਨਂ ਹਨਨਪ੍ਪਕਾਰਞ੍ਚ ਦਸ੍ਸੇਤ੍ਵਾ ਇਦਾਨਿ ਸਬ੍ਬੇਹਿਪਿ ਦ੍ਵਾਦਸਹਿ ਪਟਿਚ੍ਚਸਮੁਪ੍ਪਾਦਙ੍ਗੇਹਿ ਰਥਵਿਰਹਿਤਮੇਵ ਕੇਵਲਂ ਸਂਸਾਰਚਕ੍ਕਂ, ਤਸ੍ਸ ਅਰਘਾਤਨਪ੍ਪਕਾਰਭੇਦਞ੍ਚ ਦਸ੍ਸੇਤੁਂ ਅਥਵਾਤਿਆਦਿ ਵੁਤ੍ਤਂ. ਤਤ੍ਥ ਅਨਮਤਗ੍ਗਨ੍ਤਿ ਅਨੁ ਅਨੁ ਅਮਤਗ੍ਗਂ, ਸਬ੍ਬਥਾ ਅਨੁਗਚ੍ਛਨ੍ਤੇਹਿਪਿ ਅਵਿਞ੍ਞਾਤਕੋਟਿਕਨ੍ਤਿ ਅਤ੍ਥੋ. ਅਵਿਜ੍ਜਾਮੂਲਕਤ੍ਤਾ ਜਰਾਮਰਣਪਰਿਯੋਸਾਨਤ੍ਤਾਤਿ ਇਦਂ ਸਙ੍ਖਾਰਾਦੀਨਂ ਦਸਨ੍ਨਂ ਅਰਭਾਵੇਨ ਏਕਤ੍ਤਂ ਸਮਾਰੋਪੇਤ੍ਵਾਤਿ ਵੁਤ੍ਤਂ. ਨ ਹਿ ਤੇਸਂ ਪਚ੍ਚੇਕਂ ਅਵਿਜ੍ਜਾਮੂਲਕਤਾ ਜਰਾਮਰਣਪਰਿਯੋਸਾਨਤਾ ਚ ਅਤ੍ਥਿ ਤਥਾ ਪਟਿਚ੍ਚਸਮੁਪ੍ਪਾਦਪਾਲ਼ਿਯਂ ਅਵੁਤ੍ਤਤ੍ਤਾ. ਅਥ ਵਾ ਤੇਸਮ੍ਪਿ ਯਥਾਰਹਂ ਅਤ੍ਥਤੋ ਅਵਿਜ੍ਜਾਮੂਲਕਤ੍ਤਂ, ਅਤ੍ਤਨੋ ਅਤ੍ਤਨੋ ਲਕ੍ਖਣਭੂਤਖਣਿਕਜਰਾਮਰਣਵਸੇਨ ਤਪ੍ਪਰਿਯੋਸਾਨਤਞ੍ਚ ਸਨ੍ਧਾਯੇਤਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਏਵਞ੍ਚ ਤੇਸਂ ਪਚ੍ਚੇਕਂ ਅਰਭਾਵੋ ਸਿਦ੍ਧੋ ਹੋਤਿ.

ਏਵਂ ਸਬ੍ਬਾਕਾਰਂ ਸਂਸਾਰਚਕ੍ਕਮੇਵ ਦਸ੍ਸੇਤ੍ਵਾ ਇਦਾਨਿ ਯੇਨ ਞਾਣੇਨ ਇਮਸ੍ਸ ਸਂਸਾਰਚਕ੍ਕਸ੍ਸ ਅਰਾਨਂ ਛੇਦੋ ਭਗਵਤੋ ਸਿਦ੍ਧੋ, ਤਸ੍ਸ ਧਮ੍ਮਟ੍ਠਿਤਿਞਾਣਸ੍ਸ ‘‘ਪਚ੍ਚਯਪਰਿਗ੍ਗਹੇ ਪਞ੍ਞਾ ਧਮ੍ਮਟ੍ਠਿਤਿਞਾਣ’’ਨ੍ਤਿ (ਪਟਿ. ਮ. ੪; ੧.੪੫) ਮਾਤਿਕਾ ਵੁਤ੍ਤਤ੍ਤਾ ਭਵਚਕ੍ਕਾਵਯਵੇਸੁ ਅਵਿਜ੍ਜਾਦੀਸੁ ਪਚ੍ਚਯਪਚ੍ਚਯੁਪ੍ਪਨ੍ਨਤ੍ਤਾ ਪਰਿਗ੍ਗਹਵਸੇਨ ਪਵਤ੍ਤਿਆਕਾਰਂ ਦਸ੍ਸੇਤ੍ਵਾ ਪਰਤੋ ਤਸ੍ਸ ਅਤ੍ਥਸ੍ਸ ਨਿਗਮਨਵਸੇਨ ਵੁਤ੍ਤੇਨ ਏਵਮਯਂ ਅਵਿਜ੍ਜਾਹੇਤੂਤਿਆਦਿਕੇਨ ਪਟਿਸਮ੍ਭਿਦਾਪਾਲ਼ਿਸਹਿਤੇਨ (ਪਟਿ. ਮ. ੧.੪੫) ਪਾਠੇਨ ¶ ਸਰੂਪਤੋ ਧਮ੍ਮਟ੍ਠਿਤਿਞਾਣਂ, ਤਸ੍ਸ ਚ ਤੇਸੁਯੇਵ ਅਵਿਜ੍ਜਾਦੀਸੁ ਚਤੁਸਙ੍ਖੇਪਾਦਿਵਸੇਨ ਪਵਤ੍ਤਿਵਿਭਾਗਞ੍ਚ ਦਸ੍ਸੇਤ੍ਵਾ ਤਤੋ ਪਰਂ ਇਤਿ ਭਗਵਾਤਿਆਦਿਪਾਠੇਨ ਭਗਵਤੋ ਤੇਨ ਧਮ੍ਮਟ੍ਠਿਤਿਞਾਣੇਨ ਪਟਿਚ੍ਚਸਮੁਪ੍ਪਾਦਸ੍ਸ ਸਬ੍ਬਾਕਾਰਤੋ ਪਟਿਵਿਦ੍ਧਭਾਵਂ ਦਸ੍ਸੇਤ੍ਵਾ ਪੁਨ ਇਮਿਨਾ ਧਮ੍ਮਟ੍ਠਿਤਿਞਾਣੇਨਾਤਿਆਦਿਨਾ ਭਗਵਤੋ ਤੇਨ ਞਾਣੇਨ ਸਂਸਾਰਚਕ੍ਕਾਰਾਨਂ ਵਿਦ੍ਧਂਸਿਤਭਾਵਂ ਦਸ੍ਸੇਤੁਂ ਤਤ੍ਥ ਦੁਕ੍ਖਾਦੀਸੁ ਅਞ੍ਞਾਣਂ ਅਵਿਜ੍ਜਾਤਿਆਦਿ ਵੁਤ੍ਤਂ. ਤਤ੍ਥ ਤਿਣ੍ਣਂ ਆਯਤਨਾਨਨ੍ਤਿ ਚਕ੍ਖੁਸੋਤਮਨਾਯਤਨਾਨਂ ਤਿਣ੍ਣਂ. ਏਸ ਨਯੋ ਤਿਣ੍ਣਂ ਫਸ੍ਸਾਨਨ੍ਤਿਆਦੀਸੁਪਿ. ਰੂਪਤਣ੍ਹਾਦਿਵਸੇਨ ਛ ਤਣ੍ਹਾਕਾਯਾ ਏਵ ਵੇਦਿਤਬ੍ਬਾ.

ਸਗ੍ਗਸਮ੍ਪਤ੍ਤਿਨ੍ਤਿ ¶ ਕਾਮਸੁਗਤੀਸੁ ਸਮ੍ਪਤ੍ਤਿਂ. ਤਥੇਵਾਤਿ ਕਾਮੁਪਾਦਾਨਪਚ੍ਚਯਾ ਏਵ. ਬ੍ਰਹ੍ਮਲੋਕਸਮ੍ਪਤ੍ਤਿਨ੍ਤਿ ਰੂਪੀਬ੍ਰਹ੍ਮਲੋਕਸਮ੍ਪਤ੍ਤਿਂ. ਤੇਭੂਮਕਧਮ੍ਮਵਿਸਯਸ੍ਸ ਸਬ੍ਬਸ੍ਸਾਪਿ ਰਾਗਸ੍ਸ ਕਿਲੇਸਕਾਮਭਾਵਤੋ ਭਵਰਾਗੋਪਿ ਕਾਮੁਪਾਦਾਨਮੇਵਾਤਿ ਆਹ ‘‘ਕਾਮੁਪਾਦਾਨਪਚ੍ਚਯਾਯੇਵ ਮੇਤ੍ਤਂ ਭਾਵੇਤੀ’’ਤਿ. ਸੇਸੁਪਾਦਾਨਮੂਲਿਕਾਸੁਪੀਤਿ ਦਿਟ੍ਠੁਪਾਦਾਨਸੀਲਬ੍ਬਤੁਪਾਦਾਨਅਤ੍ਤਵਾਦੁਪਾਦਾਨਮੂਲਿਕਾਸੁਪਿ ਯੋਜਨਾਸੁ. ਤਤ੍ਰਾਯਂ ਯੋਜਨਾਨਯੋ – ਇਧੇਕਚ੍ਚੋ ‘‘ਨਤ੍ਥਿ ਪਰਲੋਕੋ ਉਚ੍ਛਿਜ੍ਜਤਿ ਅਤ੍ਤਾ’’ਤਿ (ਦੀ. ਨਿ. ੧.੮੫-੮੬ ਅਤ੍ਥਤੋ ਸਮਾਨਂ) ਦਿਟ੍ਠਿਂ ਗਣ੍ਹਾਤਿ, ਸੋ ਦਿਟ੍ਠੁਪਾਦਾਨਪਚ੍ਚਯਾ ਕਾਯੇਨ ਦੁਚ੍ਚਰਿਤਂ ਚਰਤੀਤਿਆਦਿਨਾ, ਅਪਰੋ ‘‘ਅਸੁਕਸ੍ਮਿਂ ਭਵੇ ਅਤ੍ਤਾ ਉਚ੍ਛਿਜ੍ਜਤੀ’’ਤਿ ਦਿਟ੍ਠਿਂ ਗਹੇਤ੍ਵਾ ਕਾਮਰੂਪਾਰੂਪਭਵੂਪਪਤ੍ਤਿਯਾ ਤਂ ਤਂ ਕੁਸਲਂ ਕਰੋਤੀਤਿਆਦਿਨਾ ਚ ਦਿਟ੍ਠੁਪਾਦਾਨਮੂਲਿਕਾ ਯੋਜਨਾ, ਇਮਿਨਾਵ ਨਯੇਨ ਅਤ੍ਤਵਾਦੁਪਾਦਾਨਮੂਲਿਕਾ ਯੋਜਨਾ ਵੇਦਿਤਬ੍ਬਾ. ਅਪਰੋ ‘‘ਸੀਲੇਨ ਸੁਦ੍ਧਿ ਵਤੇਨ ਸੁਦ੍ਧੀ’’ਤਿ ਅਸੁਦ੍ਧਿਮਗ੍ਗਂ ‘‘ਸੁਦ੍ਧਿਮਗ੍ਗੋ’’ਤਿ ਪਰਾਮਸਨ੍ਤੋ ਸੀਲਬ੍ਬਤੁਪਾਦਾਨਪਚ੍ਚਯਾ ਕਾਯੇਨ ਦੁਚ੍ਚਰਿਤਂ ਚਰਤੀਤਿਆਦਿਨਾ ਸਬ੍ਬਭਵੇਸੁ ਸੀਲਬ੍ਬਤੁਪਾਦਾਨਮੂਲਿਕਾ ਯੋਜਨਾ ਵੇਦਿਤਬ੍ਬਾ.

ਇਦਾਨਿ ਯਸ੍ਸ ਸਂਸਾਰਚਕ੍ਕਾਰਾਨਂ ਘਾਤਨਸਮਤ੍ਥਸ੍ਸ ਧਮ੍ਮਟ੍ਠਿਤਿਞਾਣਸ੍ਸ ਅਵਿਜ੍ਜਾਦਿਪਚ੍ਚਯਪਅਗ੍ਗਹਾਕਾਰਂ ਦਸ੍ਸੇਤੁਂ ਕਾਮਭਵੇ ਚ ਅਵਿਜ੍ਜਾ ਕਾਮਭਵੇ ਸਙ੍ਖਾਰਾਨਂ ਪਚ੍ਚਯੋ ਹੋਤੀਤਿਆਦਿਨਾ ਅਵਿਜ੍ਜਾਦੀਨਂ ਪਚ੍ਚਯਪਚ੍ਚਯੁਪ੍ਪਨ੍ਨਭਾਵੋ ਦਸ੍ਸਿਤੋ, ਤਮੇਵ ਞਾਣਂ ਅਵਿਜ੍ਜਾਦੀਸੁ ਪਵਤ੍ਤਿਆਕਾਰੇਨ ਸਦ੍ਧਿਂ ਪਟਿਸਮ੍ਭਿਦਾਮਗ੍ਗਪਾਲ਼ਿਂ ਆਨੇਤ੍ਵਾ ਨਿਗਮਨਵਸੇਨ ਦਸ੍ਸੇਨ੍ਤੋ ਏਵਮਯਨ੍ਤਿਆਦਿਮਾਹ. ਵਿਸੁਦ੍ਧਿਮਗ੍ਗਟੀਕਾਯਂ ਪਨ ‘‘ਇਦਾਨਿ ਯ੍ਵਾਯਂ ਸਂਸਾਰਚਕ੍ਕਂ ਦਸ੍ਸੇਨ੍ਤੇਨ ਕਾਮਭਵੇ ਅਵਿਜ੍ਜਾ ਕਾਮਭਵੇ ਸਙ੍ਖਾਰਾਨਂ ਪਚ੍ਚਯੋ ਹੋਤੀਤਿਆਦਿਨਾ ਅਵਿਜ੍ਜਾਦੀਨਂ ਪਚ੍ਚਯਭਾਵੋ ਸਙ੍ਖਾਰਾਦੀਨਂ ਪਚ੍ਚਯੁਪ੍ਪਨ੍ਨਭਾਵੋ ਦਸ੍ਸਿਤੋ, ਤਮੇਵ ਪਟਿਸਮ੍ਭਿਦਾਮਗ੍ਗਪਾਲ਼ਿਂ ਆਨੇਤ੍ਵਾ ਨਿਗਮਨਵਸੇਨ ਦਸ੍ਸੇਨ੍ਤੋ ਏਵਮਯਨ੍ਤਿਆਦਿਮਾਹਾ’’ਤਿ ਵੁਤ੍ਤਂ. ਸਾਰਤ੍ਥਦੀਪਨਿਯਾ ਵਿਨਯਟੀਕਾਯਪਿ ਅਯਮੇਵ ਪਾਠੋ ਲਿਖਿਤੋ. ਤਤ੍ਥ ਚ ਕਾਮਭਵੇ ਚ ਅਵਿਜ੍ਜਾਤਿਆਦਿਨਾ ਅਵਿਜ੍ਜਾਦੀਨਂ ਪਚ੍ਚਯਪਚ੍ਚਯੁਪ੍ਪਨ੍ਨਭਾਵੋ ਸਂਸਾਰਚਕ੍ਕਂ ਦਸ੍ਸੇਨ੍ਤੇਨ ਵੁਤ੍ਤੋ ਨ ਹੋਤਿ ਤਸ੍ਸ ਚ ਅਵਿਜ੍ਜਾ ਨਾਭਿ, ਮੂਲਤ੍ਤਾਤਿਆਦਿਨਾ ਪੁਬ੍ਬੇਵ ਦਸ੍ਸਿਤਤ੍ਤਾ ਉਪਰਿ ਚਕ੍ਕਰੂਪਤੋ ¶ ਪਯੋਗਤ੍ਤੇਨ ਉਪਸਂਹਾਰਾਭਾਵਾ ਚ. ‘‘ਅਪਿ ਚ ਤਮੇਵ ਪਚ੍ਚਯਪਚ੍ਚਯੁਪ੍ਪਨ੍ਨਭਾਵਂ ਨਿਗਮਨਵਸੇਨ ਦਸ੍ਸੇਨ੍ਤੋ’’ਤਿ ਚ ਵੁਤ੍ਤਂ, ਨ ਚੇਤ੍ਥ ਪਚ੍ਚਯਪਚ੍ਚਯੁਪ੍ਪਨ੍ਨਭਾਵੋ ਨਿਗਮਨਵਸੇਨ ਪਧਾਨਤ੍ਤੇਨ ਦਸ੍ਸਿਤੋ, ਅਥ ਖੋ ਪਚ੍ਚਯਪਰਿਗ੍ਗਹਵਸਪ੍ਪਵਤ੍ਤਂ ਧਮ੍ਮਟ੍ਠਿਤਿਞਾਣਮੇਵ ¶ ਯਥਾਵੁਤ੍ਤਪਚ੍ਚਯਪਰਿਗ੍ਗਹਾਕਾਰਸ੍ਸ ਨਿਗਮਨਵਸੇਨ ਦਸ੍ਸਿਤਂ. ਤਥਾ ਹਿ ‘‘ਏਵਮਯਂ ਅਵਿਜ੍ਜਾ ਹੇਤੁ, ਸਙ੍ਖਾਰਾ ਹੇਤੁਸਮੁਪ੍ਪਨ੍ਨਾ, ਉਭੋਪੇਤੇ ਧਮ੍ਮਾ ਹੇਤੁਸਮੁਪ੍ਪਨ੍ਨਾਤਿ ਪਚ੍ਚਯਪਰਿਗ੍ਗਹੇ ਪਞ੍ਞਾ ਧਮ੍ਮਟ੍ਠਿਤਿਞਾਣਂ. ਅਤੀਤਮ੍ਪਿ ਅਦ੍ਧਾਨਂ. ਅਨਾਗਤਮ੍ਪਿ ਅਦ੍ਧਾਨਂ ਅਵਿਜ੍ਜਾ ਹੇਤੁ…ਪੇ… ਧਮ੍ਮਟ੍ਠਿਤਿਞਾਣ’’ਨ੍ਤਿ (ਪਟਿ. ਮ. ੧.੪੬) ਧਮ੍ਮਟ੍ਠਿਤਿਞਾਣਮੇਵ ਪਧਾਨਤ੍ਤੇਨ ਦਸ੍ਸਿਤਂ. ‘‘ਅਵਿਜ੍ਜਾ ਹੇਤੁ, ਸਙ੍ਖਾਰਾ ਹੇਤੁਸਮੁਪ੍ਪਨ੍ਨਾ’’ਤਿਆਦਿ ਪਨ ਪਚ੍ਚਯਪਰਿਗ੍ਗਹੇ ਪਞ੍ਞਾ ਧਮ੍ਮਟ੍ਠਿਤਿਞਾਣਨ੍ਤਿ (ਪਟਿ. ਮ. ਮਾਤਿਕਾ ੪; ੧.੪੫) ਵੁਚ੍ਚਮਾਨਤ੍ਤਾ ਤਸ੍ਸ ਪਚ੍ਚਯਪਰਿਗ੍ਗਹਾਕਾਰਪਰਿਦੀਪਨਤ੍ਥਂ ਵਿਸਯਤ੍ਤੇਨ ਵੁਤ੍ਤਂ, ਨ ਪਧਾਨਤ੍ਤੇਨ.

ਅਯਞ੍ਹੇਤ੍ਥ ਅਤ੍ਥੋ – ਏਵਨ੍ਤਿ ਅਨਨ੍ਤਰੇ ਵੁਤ੍ਤਨਯੇਨ ਅਯਂ ਅਵਿਜ੍ਜਾ ਸਙ੍ਖਾਰਾਨਂ ਹੇਤੁ, ਸਙ੍ਖਾਰਾ ਚ ਤੇਨ ਹੇਤੁਨਾ ਸਮੁਪ੍ਪਨ੍ਨਾ. ਉਭੋਪੇਤੇਤਿ ਯਸ੍ਮਾ ਅਯਂ ਅਵਿਜ੍ਜਾ ਪਰਪਰਿਕਪ੍ਪਿਤਪਕਤਿਇਸ੍ਸਰਾਦਿ ਵਿਯ ਅਹੇਤੁਕਾ ਨਿਚ੍ਚਾ ਧੁਵਾ ਨ ਹੋਤਿ, ਅਥ ਖੋ ‘‘ਆਸਵਸਮੁਦਯਾ ਅਵਿਜ੍ਜਾਸਮੁਦਯੋ’’ਤਿ (ਮ. ਨਿ. ੧.੧੦੩) ਵਚਨਤੋ ਸਯਮ੍ਪਿ ਸਹੇਤੁਕਾ ਸਙ੍ਖਤਾ ਅਨਿਚ੍ਚਾਯੇਵ ਹੋਤਿ, ਤਸ੍ਮਾ ਉਭੋਪੇਤੇ ਅਵਿਜ੍ਜਾਸਙ੍ਖਾਰਾ ਹੇਤੁਸਮੁਪ੍ਪਨ੍ਨਾਯੇਵ. ਇਤੀਤਿ ਏਵਂ ਯਥਾਵੁਤ੍ਤਨਯੇਨ ਪਚ੍ਚਯਪਰਿਗ੍ਗਣ੍ਹਨੇ ਯਾ ਪਞ੍ਞਾ, ਤਂ ਧਮ੍ਮਾਨਂ ਠਿਤਿਸਙ੍ਖਾਤੇ ਕਾਰਣੇ ਯਾਥਾਵਤੋ ਪਵਤ੍ਤਤ੍ਤਾ ਧਮ੍ਮਟ੍ਠਿਤਿਞਾਣਂ ਨਾਮਾਤਿ.

ਏਤ੍ਥ ਹਿ ਞਾਣਸ੍ਸ ਵਿਸਯਵਿਭਾਵਨਵਸੇਨੇਵ ਅਵਿਜ੍ਜਾਦੀਨਂ ਪਚ੍ਚਯਾਦਿਭਾਵੋ ਵੁਤ੍ਤੋ, ਨ ਪਧਾਨਤ੍ਤੇਨ, ਞਾਣਮੇਵ ਪਨੇਤ੍ਥ ਪਧਾਨਤੋ ਵੁਤ੍ਤਂ, ਤਸ੍ਮਾ ਏਤਸ੍ਸ ਞਾਣਸ੍ਸ ਪਚ੍ਚਯਪਰਿਗ੍ਗਹਾਕਾਰਦਸ੍ਸਨਤ੍ਥਮੇਵ ਹੇਟ੍ਠਾਪਿ ਕਾਮਭਵੇ ਚ ਅਵਿਜ੍ਜਾਤਿਆਦਿਨਾ ਅਵਿਜ੍ਜਾਦੀਨਂ ਪਚ੍ਚਯਾਦਿਭਾਵੋ ਵੁਤ੍ਤੋ, ਇਧਾਪਿ ਨਿਗਮਨਵਸੇਨ ਉਪਸਂਹਟੋ, ਨ ਭਵਚਕ੍ਕਦਸ੍ਸਨਤ੍ਥਨ੍ਤਿ ਅਯਮੇਤ੍ਥ ਅਤ੍ਤਨੋ ਮਤਿ.

ਤਤ੍ਥ ਚ ਪਚ੍ਚਯੁਪ੍ਪਨ੍ਨਧਮ੍ਮੇਸੁ ਅਦਿਟ੍ਠੇਸੁ ਹੇਤੂਨਂ ਪਚ੍ਚਯਭਾਵੋਪਿ ਨ ਸਕ੍ਕਾ ਦਟ੍ਠੁਨ੍ਤਿ ‘‘ਸਙ੍ਖਾਰਾ ਹੇਤੁਸਮੁਪ੍ਪਨ੍ਨਾ’’ਤਿ ਪਚ੍ਚਯਪਰਿਗ੍ਗਹਞਾਣਨਿਦ੍ਦੇਸੇ (ਪਟਿ. ਮ. ੧.੪੫) ਪਚ੍ਚਯੁਪ੍ਪਨ੍ਨਧਮ੍ਮਾਨਮ੍ਪਿ ਗਹਣਂ ਕਤਨ੍ਤਿ ਵੇਦਿਤਬ੍ਬਂ. ਏਤੇਨ ਨਯੇਨਾਤਿ ਅਵਿਜ੍ਜਾਯਂ ਵੁਤ੍ਤਨਯੇਨ ਸਙ੍ਖਾਰਾ ਹੇਤੁ, ਵਿਞ੍ਞਾਣਂ ਹੇਤੁਸਮੁਪ੍ਪਨ੍ਨਨ੍ਤਿਆਦਿਨਾ ਸਬ੍ਬਾਨਿ ਜਾਤਿਪਰਿਯੋਸਾਨਾਨਿ ਪਦਾਨਿ ਵਿਤ੍ਥਾਰੇਤਬ੍ਬਾਨਿ.

ਏਵਂ ਪਟਿਸਮ੍ਭਿਦਾਮਗ੍ਗਪਾਲ਼ਿਯਾ ਧਮ੍ਮਟ੍ਠਿਤਿਞਾਣਸ੍ਸ ਅਵਿਜ੍ਜਾਦੀਸੁ ਪਵਤ੍ਤਿਆਕਾਰਂ ਦਸ੍ਸੇਤ੍ਵਾ ਇਦਾਨਿ ਤਸ੍ਸ ਤੇਸੁ ਪਚ੍ਚਯੇਸੁ ਅਞ੍ਞੇਹਿਪਿ ਆਕਾਰੇਹਿ ਪਵਤ੍ਤਿਆਕਾਰਂ ¶ ਦਸ੍ਸੇਤੁਂ ਤਤ੍ਥਾਤਿਆਦਿ ਵੁਤ੍ਤਂ. ਤਤ੍ਥ ਤਤ੍ਥਾਤਿ ਤੇਸੁ ਪਟਿਚ੍ਚਸਮੁਪ੍ਪਾਦਙ੍ਗੇਸੁ. ਸਙ੍ਖਿਪ੍ਪਨ੍ਤਿ ਏਤ੍ਥ ਅਵਿਜ੍ਜਾਦਯੋ ਹੇਤੁਸਾਮਞ੍ਞੇਨ ਫਲਸਾਮਞ੍ਞੇਨ ¶ ਵਾਤਿ ਸਙ੍ਖੇਪੋ, ਸਙ੍ਗਹੋ, ਕੋਟ੍ਠਾਸੋ ਰਾਸੀਤਿ ਅਤ੍ਥੋ. ਸੋ ਪਨ ਜਾਤਿਤੋ ਦੁਵਿਧੋਪਿ ਕਾਲਭੇਦਵਸੇਨ ਚਤੁਬ੍ਬਿਧੋ ਜਾਤੋ. ਪਚ੍ਚੁਪ੍ਪਨ੍ਨੋ ਅਦ੍ਧਾਤਿ ਅਨੁਵਤ੍ਤਤਿ. ਤਣ੍ਹੁਪਾਦਾਨਭਵਾ ਗਹਿਤਾ ਕਿਲੇਸਕਮ੍ਮਸਾਮਞ੍ਞਤੋ ਤਦਵਿਨਾਭਾਵਤੋ ਚ. ਅਵਿਜ੍ਜਾਦਿਕਿਲੇਸਵਟ੍ਟਮ੍ਪਿ ਵਿਪਾਕਧਮ੍ਮਧਮ੍ਮਤਾਸਰਿਕ੍ਖਤਾਯ ਇਧ ਕਮ੍ਮਵਟ੍ਟਮੇਵਾਤਿ ਆਹ ਇਮੇ ਪਞ੍ਚ ਧਮ੍ਮਾਤਿਆਦਿ. ਵਿਪਾਕਾ ਧਮ੍ਮਾਤਿਆਦੀਸੁ ਕਮ੍ਮਜਅਰੂਪਕ੍ਖਨ੍ਧਾਨਮੇਵ ਵਿਪਾਕਸਦ੍ਦਵਚਨੀਯਤ੍ਤੇਪਿ ਨਾਮਰੂਪਾਦਿਪਦੇਸੁ ਰੂਪਮਿਸ੍ਸਮ੍ਪਿ ਫਲਪਞ੍ਚਕਂ ਅਰੂਪਪ੍ਪਧਾਨਤਾਯ ਚ ਤਬ੍ਬਹੁਲਤਾਯ ਚ ‘‘ਵਿਪਾਕਵਟ੍ਟ’’ਨ੍ਤਿ ਵੁਤ੍ਤਂ. ਵਿਪਾਕਪ੍ਪਧਾਨਂ ਵਟ੍ਟਂ, ਵਿਪਾਕਬਹੁਲਂ ਵਾ ਵਟ੍ਟਨ੍ਤਿ ਅਤ੍ਥੋ. ਕਮ੍ਮਜਪਰਿਯਾਯੋ ਵਾ ਏਤ੍ਥ ਵਿਪਾਕ-ਸਦ੍ਦੋ ਦਟ੍ਠਬ੍ਬੋ. ਜਾਤਿਜਰਾਮਰਣਾਪਦੇਸੇਨਾਤਿ ਪਰਮਤ੍ਥਧਮ੍ਮਵਿਨਿਮੁਤ੍ਤਜਾਤਿਜਰਾਮਰਣਂ ਨਾਮ ਨਤ੍ਥੀਤਿ ਤਦਪਦੇਸੇਨ ਤੇਸਂ ਕਥਨੇਨ ਤਂਮੁਖੇਨਾਤਿ ਅਤ੍ਥੋ. ਆਕਿਰੀਯਨ੍ਤਿ ਪਕਾਸੀਯਨ੍ਤੀਤਿ ਆਕਾਰਾ, ਅਵਿਜ੍ਜਾਦਿਸਰੂਪਾ, ਤਤੋ ਪਚ੍ਚਯਾਕਾਰਤੋਤਿ ਅਤ੍ਥੋ. ਏਕੋ ਸਨ੍ਧੀਤਿ ਅਵਿਚ੍ਛੇਦਪ੍ਪਵਤ੍ਤਿਹੇਤੁਭੂਤੋ ਹੇਤੁਫਲਸਨ੍ਧਿ, ਦੁਤਿਯੋ ਫਲਹੇਤੁਸਨ੍ਧਿ, ਤਤਿਯੋ ਹੇਤੁਫਲਸਨ੍ਧੀਤਿ ਦਟ੍ਠਬ੍ਬਂ.

ਏਵਂ ਧਮ੍ਮਟ੍ਠਿਤਿਞਾਣਸ੍ਸ ਅਵਿਜ੍ਜਾਦੀਸੁ ਅਨੇਕੇਹਿ ਪਕਾਰੇਹਿ ਪਵਤ੍ਤਿਆਕਾਰਂ ਦਸ੍ਸੇਤ੍ਵਾ ਇਦਾਨਿ ਤੇਹਿ, ਅਵੁਤ੍ਤੇਹਿ ਚ ਸਬ੍ਬੇਹਿ ਆਕਾਰੇਹਿ ਭਗਵਤੋ ਪਟਿਚ੍ਚਸਮੁਪ੍ਪਾਦਸ੍ਸ ਪਟਿਵਿਦ੍ਧਭਾਵਂ, ਤਸ੍ਸ ਚ ਞਾਣਸ੍ਸ ਧਮ੍ਮਟ੍ਠਿਤਿਞਾਣਸਦ੍ਦਪ੍ਪਵਤ੍ਤਿਨਿਮਿਤ੍ਤਤਂ ਪਟਿਸਮ੍ਭਿਦਾਪਾਲ਼ਿਨਯੇਨ ਦਸ੍ਸੇਤੁਂ ਉਪਸਂਹਾਰਵਸੇਨ ਇਤਿ ਭਗਵਾਤਿਆਦਿ ਵੁਤ੍ਤਂ. ਤਤ੍ਥ ਇਤੀਤਿ ਵੁਤ੍ਤਪ੍ਪਕਾਰਪਰਾਮਸਨਂ, ਤੇਨਾਹ ਚਤੁਸਙ੍ਖੇਪਨ੍ਤਿਆਦਿ. ਸਬ੍ਬਾਕਾਰਤੋਤਿ ਇਧ ਕਾਮਭਵੇ ਚ ਅਵਿਜ੍ਜਾ ਕਾਮਭਵੇ ਸਙ੍ਖਾਰਾਨਂ ਪਚ੍ਚਯੋਤਿਆਦਿਨਾ ਇਧ ਵੁਤ੍ਤੇਹਿ ਚ ਅਵੁਤ੍ਤੇਹਿ ਚ ਪਟਿਚ੍ਚਸਮੁਪ੍ਪਾਦਵਿਭਙ੍ਗਾਦੀਸੁ (ਵਿਭ. ੨੨੫ ਆਦਯੋ) ਆਗਤੇਹਿ ਸਬ੍ਬੇਹਿ ਪਕਾਰੇਹਿ ਪਟਿਵਿਜ੍ਝਤਿ. ਤਨ੍ਤਿ ਯੇਨ ਞਾਣੇਨ ਭਗਵਾ ਏਵਂ ਜਾਨਾਤਿ, ਤਂ ਞਾਣਂ. ਞਾਤਟ੍ਠੇਨਾਤਿ ਜਾਨਨਟ੍ਠੇਨ. ਪਜਾਨਨਟ੍ਠੇਨਾਤਿ ਪਟਿਵਿਜ੍ਝਨਟ੍ਠੇਨ.

ਇਦਾਨਿ ਯਮਿਦਂ ਧਮ੍ਮਟ੍ਠਿਤਿਞਾਣਂ ਪਚ੍ਚਯਪਰਿਗ੍ਗਹਾਕਾਰਭੇਦੇਹਿ ਸਦ੍ਧਿਂ ਪਪਞ੍ਚਤੋ ਦਸ੍ਸਿਤਂ, ਤਸ੍ਮਿਂ ਅਰਘਾਤੇ ਏਤਸ੍ਸ ਉਪਯੋਗਿਤਂ ਦਸ੍ਸੇਤੁਂ ਇਮਿਨਾ ਧਮ੍ਮਟ੍ਠਿਤਿਞਾਣੇਨਾਤਿਆਦਿ ਵੁਤ੍ਤਂ. ਤਤ੍ਥ ਧਮ੍ਮਟ੍ਠਿਤਿਞਾਣੇਨ ਅਰੇ ਹਨੀਤਿ ਸਮ੍ਬਨ੍ਧੋ. ਕਥਨ੍ਤਿ? ਆਹ ‘‘ਤੇ ਧਮ੍ਮੇ’’ਤਿਆਦਿ. ਤੇ ਅਵਿਜ੍ਜਾਦਿਕੇ ਧਮ੍ਮੇ ਮਹਾਵਜਿਰਞਾਣਾਵੁਧੇਨ ¶ ਤੇਨ ਧਮ੍ਮਟ੍ਠਿਤਿਞਾਣੇਨ ਯਥਾਭੂਤਂ ਞਤ੍ਵਾ ਤੇਨ ਬਲਵਵਿਪਸ੍ਸਨਾਵੁਧੇਨ ਨਿਬ੍ਬਿਨ੍ਦਨ੍ਤੋ ਅਰਿਯਮਗ੍ਗਾਵੁਧੇਨ ਵਿਰਜ੍ਜਨ੍ਤੋ ਵਿਮੁਚ੍ਚਨ੍ਤੋ ਅਰੇ ਹਨੀਤਿ ਯੋਜਨਾ. ਅਰਿਯਮਗ੍ਗਞਾਣਮ੍ਪਿ ਹਿ ਕਿਚ੍ਚਤੋ ਸਮੁਦਯਸਚ੍ਚਾਦਿਬੋਧਤੋ ‘‘ਧਮ੍ਮਟ੍ਠਿਤਿਞਾਣ’’ਨ੍ਤਿ ਵੁਚ੍ਚਤਿ.

ਏਕੇਕਂ ਧਮ੍ਮਕ੍ਖਨ੍ਧਂ ਏਕੇਕਵਿਹਾਰੇਨ ਪੂਜੇਮੀਤਿ ਧਮ੍ਮਕ੍ਖਨ੍ਧਂ ਆਰਬ੍ਭ ਪਵਤ੍ਤਾਪਿ ਵਿਹਾਰਕਰਣਪੂਜਾ ਭਗਵਤਿ ਪੇਮੇਨੇਵ ਪਵਤ੍ਤਤ੍ਤਾ ਸਧਾਤੁਕਾਦਿਚੇਤਿਯਪਟਿਮਣ੍ਡਿਤਤ੍ਤਾ ਚ ਭਗਵਤੋਵ ਪੂਜਾਤਿ ¶ ਆਹ ਭਗਵਨ੍ਤਂ ਉਦ੍ਦਿਸ੍ਸਾਤਿਆਦਿ. ਕਿਲੇਸਾਰੀਨ ਸੋ ਮੁਨੀਤਿ ਏਤ੍ਥ ਨਿਗ੍ਗਹੀਤਲੋਪੋ, ਕਿਲੇਸਾਰੀਨਂ ਹਤਤ੍ਤਾਤਿ ਅਤ੍ਥੋ. ਪਚ੍ਚਯਾਦੀਨ ਚਾਰਹੋਤਿ ਏਤ੍ਥਾਪਿ ਨਿਗ੍ਗਹੀਤਲੋਪੋ ਦਟ੍ਠਬ੍ਬੋ.

ਸਮ੍ਮਾਸਮ੍ਬੁਦ੍ਧੋਤਿ ਏਤ੍ਥ ਸਂ-ਸਦ੍ਦੋ ਸਯਨ੍ਤਿ ਅਤ੍ਥੇ ਪਵਤ੍ਤਤੀਤਿ ਆਹ ‘‘ਸਾਮ’’ਨ੍ਤਿ, ਅਪਰਨੇਯ੍ਯੋ ਹੁਤ੍ਵਾਤਿ ਅਤ੍ਥੋ. ਸਬ੍ਬਧਮ੍ਮਾਨਨ੍ਤਿ ਇਦਂ ਕਸ੍ਸਚਿ ਵਿਸਯਵਿਸੇਸਸ੍ਸ ਅਗ੍ਗਹਿਤਤ੍ਤਾ ਸਿਦ੍ਧਂ. ਪਦੇਸਗ੍ਗਹਣੇ ਹਿ ਅਸਤਿ ਗਹੇਤਬ੍ਬਸ੍ਸ ਨਿਪ੍ਪਦੇਸਤਾਵ ਵਿਞ੍ਞਾਯਤਿ, ਯਥਾ ਦਿਕ੍ਖਿਤੋ ਨ ਦਦਾਤੀਤਿ. ਏਵਞ੍ਚ ਕਤ੍ਵਾ ਅਤ੍ਥਵਿਸੇਸਾਨਪੇਕ੍ਖਾ ਕਤ੍ਤਰਿਯੇਵ ਬੁਦ੍ਧ-ਸਦ੍ਦਸਿਦ੍ਧਿ ਵੇਦਿਤਬ੍ਬਾ ਕਮ੍ਮਵਚਨਿਚ੍ਛਾਯ ਅਭਾਵਤੋ. ‘‘ਸਮ੍ਮਾ ਸਾਮਂ ਬੁਦ੍ਧਤ੍ਤਾ ਸਮ੍ਮਾਸਮ੍ਬੁਦ੍ਧੋ’’ਤਿ ਏਤ੍ਤਕਮੇਵ ਹਿ ਇਧ ਸਦ੍ਦਤੋ ਲਬ੍ਭਤਿ. ਸਬ੍ਬਧਮ੍ਮਾਨਨ੍ਤਿ ਇਦਂ ਪਨ ਅਤ੍ਥਤੋ ਲਬ੍ਭਮਾਨਂ ਗਹੇਤ੍ਵਾ ਵੁਤ੍ਤਂ, ਨ ਹਿ ਬੁਜ੍ਝਨਕਿਰਿਯਾ ਅਵਿਸਯਾ ਯੁਜ੍ਜਤਿ. ਅਭਿਞ੍ਞੇਯ੍ਯੇਤਿ ਲਕ੍ਖਣਾਦਿਤੋ ਅਨਿਚ੍ਚਾਦਿਤੋ ਚ ਅਭਿਵਿਸਿਟ੍ਠੇਨ ਲੋਕਿਯਲੋਕੁਤ੍ਤਰਞਾਣੇਨ ਜਾਨਿਤਬ੍ਬੇ ਚਤੁਸਚ੍ਚਧਮ੍ਮੇ. ਪਰਿਞ੍ਞੇਯ੍ਯੇਤਿ ਅਨਿਚ੍ਚਾਦਿਵਸੇਨ ਪਰਿਚ੍ਛਿਨ੍ਦਿਤ੍ਵਾ ਜਾਨਿਤਬ੍ਬਂ ਦੁਕ੍ਖਂ ਅਰਿਯਸਚ੍ਚਮਾਹ. ਪਹਾਤਬ੍ਬੇਤਿ ਸਮੁਦਯਸਚ੍ਚਂ. ਸਚ੍ਛਿਕਾਤਬ੍ਬੇਤਿ ਨਿਰੋਧਸਚ੍ਚਂ. ਬਹੁਵਚਨਨਿਦ੍ਦੇਸੋ ਪਨੇਤ੍ਥ ਸੋਪਾਦਿਸੇਸਾਦਿਕਂ ਪਰਿਯਾਯਸਿਦ੍ਧਂ ਭੇਦਂ ਅਪੇਕ੍ਖਿਤ੍ਵਾ ਕਤੋ.

ਅਭਿਞ੍ਞੇਯ੍ਯਨ੍ਤਿ ਗਾਥਾਯ ਪਹਾਤਬ੍ਬਭਾਵੇਤਬ੍ਬਾਨਂ ਸਮੁਦਯਮਗ੍ਗਸਚ੍ਚਾਨਂ ਹੇਤੁਧਮ੍ਮਾਨਂ ਗਹਣੇਨੇਵ ਤਪ੍ਫਲਾਨਂ ਦੁਕ੍ਖਸਚ੍ਚਨਿਰੋਧਸਚ੍ਚਾਨਮ੍ਪਿ ਸਿਦ੍ਧਿਤੋ ਪਰਿਞ੍ਞਾਤਬ੍ਬਞ੍ਚ ਪਰਿਞ੍ਞਾਤਂ ਸਚ੍ਛਿਕਾਤਬ੍ਬਞ੍ਚ ਸਚ੍ਛਿਕਤਨ੍ਤਿ ਇਦਮ੍ਪੇਤ੍ਥ ਸਙ੍ਗਹਿਤਮੇਵਾਤਿ ਦਟ੍ਠਬ੍ਬਂ, ਤੇਨਾਹ ‘‘ਤਸ੍ਮਾ ਬੁਦ੍ਧੋਸ੍ਮੀ’’ਤਿ. ਯਸ੍ਮਾ ਚਤ੍ਤਾਰਿਪਿ ਸਚ੍ਚਾਨਿ ਮਯਾ ਬੁਦ੍ਧਾਨਿ, ਤਸ੍ਮਾ ਸਬ੍ਬਮ੍ਪਿ ਞੇਯ੍ਯਂ ਬੁਦ੍ਧੋਸ੍ਮਿ, ਅਬ੍ਭਞ੍ਞਾਸਿਨ੍ਤਿ ਅਤ੍ਥੋ.

ਵਿਚਿਤ੍ਤਵਿਸਯਪਤ੍ਥਨਾਕਾਰਪ੍ਪਵਤ੍ਤਿਯਾ ਤਣ੍ਹਾ ਦੁਕ੍ਖਵਿਚਿਤ੍ਤਤਾਯ ਪਧਾਨਕਾਰਣਨ੍ਤਿ ਆਹ ‘‘ਮੂਲਕਾਰਣਭਾਵੇਨਾ’’ਤਿ. ਉਭਿਨ੍ਨਨ੍ਤਿ ਚਕ੍ਖੁਸ੍ਸ ਤਂਸਮੁਦਯਸ੍ਸ ਚ. ਅਪ੍ਪਵਤ੍ਤੀਤਿ ਅਪ੍ਪਵਤ੍ਤਿਨਿਮਿਤ੍ਤਂ, ਨ ਅਭਾਵਮਤ੍ਤਂ. ਤਸ੍ਸ ਅਵਤ੍ਥੁਤ੍ਤਾ ¶ ਸਪ੍ਪਚ੍ਚਯਤ੍ਤਾਦਿਅਨੇਕਭੇਦਾ ਸਬ੍ਬਸਙ੍ਗਹਿਤਾ. ਨਿਰੋਧਪ੍ਪਜਾਨਨਾਤਿ ਸਚ੍ਛਿਕਿਰਿਯਾਭਿਸਮਯਵਸੇਨ ਨਿਰੋਧਸ੍ਸ ਪਟਿਵਿਜ੍ਝਨਾ. ਏਕੇਕਪਦੁਦ੍ਧਾਰੇਨਾਪੀਤਿ ਚਕ੍ਖੁ ਚਕ੍ਖੁਸਮੁਦਯੋਤਿਆਦਿਨਾ ਏਕੇਕਕੋਟ੍ਠਾਸਨਿਦ੍ਧਾਰਣੇਨਾਪਿ, ਨ ਦੁਕ੍ਖਸਚ੍ਚਾਦਿਸਾਮਞ੍ਞਤੋ ਏਵਾਤਿ ਅਧਿਪ੍ਪਾਯੋ. ਤਣ੍ਹਾਯਪਿ ਸਙ੍ਖਾਰਦੁਕ੍ਖਪਰਿਯਾਪਨ੍ਨਤਾਯ ਪਰਿਞ੍ਞੇਯ੍ਯਤ੍ਤਾ ਦੁਕ੍ਖਸਚ੍ਚਭਾਵਂ ਦਸ੍ਸੇਤੁਂ ‘‘ਛ ਤਣ੍ਹਾਕਾਯਾ’’ਤਿ ਵੁਤ੍ਤਂ. ਯਸ੍ਮਿਂ ਪਨ ਅਤ੍ਤਭਾਵੇ ਸਾ ਉਪ੍ਪਜ੍ਜਤਿ, ਤਸ੍ਸ ਮੂਲਕਾਰਣਭਾਵੇਨ ਸਮੁਟ੍ਠਾਪਿਕਾ ਪੁਰਿਮਭਵਸਿਦ੍ਧਾ ਤਣ੍ਹਾ ਸਮੁਦਯਸਚ੍ਚਨ੍ਤਿ ਗਹੇਤਬ੍ਬਾ. ਕਸਿਣਾਨੀਤਿ ਕਸਿਣਾਰਮ੍ਮਣਾਨਿ ਝਾਨਾਨਿ. ਦ੍ਵਤ੍ਤਿਂਸਾਕਾਰਾਤਿ ਕੇਸਾਦਯੋ ਤਦਾਰਮ੍ਮਣਜ੍ਝਾਨਾਨਿ ਚ. ਨਵ ਭਵਾਤਿ ਕਾਮਭਵਾਦਯੋ ਤਯੋ ਸਞ੍ਞੀਭਵਾਦਯੋ ਤਯੋ ਏਕਵੋਕਾਰਭਵਾਦਯੋ ਤਯੋ ਚਾਤਿ ਨਵ ਭਵਾ. ਚਤ੍ਤਾਰਿ ਝਾਨਾਨੀਤਿ ਆਰਮ੍ਮਣਵਿਸੇਸਂ ਅਨਪੇਕ੍ਖਿਤ੍ਵਾ ਸਾਮਞ੍ਞਤੋ ਚਤ੍ਤਾਰਿ ਝਾਨਾਨਿ ਵੁਤ੍ਤਾਨਿ. ਵਿਪਾਕਕਿਰਿਯਾਨਮ੍ਪਿ ਯਥਾਰਹਂ ¶ ਸਬ੍ਬਤ੍ਥ ਸਙ੍ਗਹੋ ਦਟ੍ਠਬ੍ਬੋ. ਏਤ੍ਥ ਚ ਕੁਸਲਧਮ੍ਮਾਨਂ ਉਪਨਿਸ੍ਸਯਭੂਤਾ ਤਣ੍ਹਾਸਮੁਟ੍ਠਾਪਿਕਾਤਿ ਵੇਦਿਤਬ੍ਬਾ, ਕਿਰਿਯਧਮ੍ਮਾਨਂ ਪਨ ਤਸ੍ਸ ਅਤ੍ਤਭਾਵਸ੍ਸ ਕਾਰਣਭੂਤਾ ਤਣ੍ਹਾ. ਅਨੁਲੋਮਤੋਤਿ ਏਤ੍ਥ ਅਵਿਜ੍ਜਾ ਦੁਕ੍ਖਸਚ੍ਚਂ, ਤਂਸਮੁਟ੍ਠਾਪਿਕਾ ਪੁਰਿਮਤਣ੍ਹਾ ਆਸਵਾ ਸਮੁਦਯਸਚ੍ਚਨ੍ਤਿ ਯੋਜੇਤਬ੍ਬਂ. ਸਙ੍ਖਾਰਾਦੀਸੁ ਪਨ ਅਵਿਜ੍ਜਾਦਯੋਵ ਸਮੁਦਯਸਚ੍ਚਭਾਵੇਨ ਯੋਜੇਤਬ੍ਬਾ. ਤੇਨਾਤਿ ਤਸ੍ਮਾ.

ਵਿਜ੍ਜਾਤਿ ਅਤ੍ਤਨੋ ਵਿਸਯਂ ਵਿਦਿਤਂ ਕਰੋਤੀਤਿ ਵਿਜ੍ਜਾ. ਸਮ੍ਪਨ੍ਨਤ੍ਤਾਤਿ ਸਮਨ੍ਨਾਗਤਤ੍ਤਾ, ਸਮ੍ਪੁਣ੍ਣਤ੍ਤਾ ਵਾ. ਤਤ੍ਰਾਤਿ ਅਮ੍ਬਟ੍ਠਸੁਤ੍ਤੇ. ਮਨੋਮਯਿਦ੍ਧਿਯਾਤਿ ਏਤ੍ਥ ‘‘ਇਧ ਭਿਕ੍ਖੁ ਇਮਮ੍ਹਾ ਕਾਯਾ ਅਞ੍ਞਂ ਕਾਯਂ ਅਭਿਨਿਮ੍ਮਿਨਾਤੀ’’ਤਿ (ਦੀ. ਨਿ. ੧.੨੩੬) ਵੁਤ੍ਤਤ੍ਤਾ ਸਰੀਰਬ੍ਭਨ੍ਤਰਝਾਨਮਨੇਨ ਅਞ੍ਞਸ੍ਸ ਸਰੀਰਸ੍ਸ ਨਿਬ੍ਬਤ੍ਤਿਵਸੇਨ ਪਵਤ੍ਤਾ ਮਨੋਮਯਿਦ੍ਧਿ ਨਾਮ, ਸਾ ਅਤ੍ਥਤੋ ਝਾਨਸਮ੍ਪਯੁਤ੍ਤਾ ਪਞ੍ਞਾਯੇਵ. ਸਤ੍ਤ ਸਦ੍ਧਮ੍ਮਾ ਨਾਮ ਸਦ੍ਧਾ ਹਿਰੀ ਓਤ੍ਤਪ੍ਪਂ ਬਾਹੁਸਚ੍ਚਂ ਵੀਰਿਯਂ ਸਤਿ ਪਞ੍ਞਾ ਚ. ਗਚ੍ਛਤਿ ਅਮਤਂ ਦਿਸਨ੍ਤਿ ਦੁਕ੍ਖਨਿਤ੍ਥਰਣਤ੍ਥਿਕੇਹਿ ਦਟ੍ਠਬ੍ਬਤੋ ਅਮਤਂ ਨਿਬ੍ਬਾਨਮੇਵ ਦਿਸਂ ਗਚ੍ਛਤਿ, ਇਮਿਨਾ ਚ ਚਰਣਾਨਂ ਸਿਕ੍ਖਤ੍ਤਯਸਙ੍ਗਹਿਤਅਰਿਯਮਗ੍ਗਭਾਵਤੋ ਨਿਬ੍ਬਾਨਤ੍ਥਿਕੇਹਿ ਏਕਂਸੇਨ ਇਚ੍ਛਿਤਬ੍ਬਤਂ ਦਸ੍ਸੇਤਿ. ਇਦਾਨਿਸ੍ਸਾ ਵਿਜ੍ਜਾਚਰਣਸਮ੍ਪਦਾਯ ਸਾਵਕਾਦਿਅਸਾਧਾਰਣਤਂ ਦਸ੍ਸੇਤੁਂ ਤਤ੍ਥ ਵਿਜ੍ਜਾਸਮ੍ਪਦਾਤਿਆਦਿ ਵੁਤ੍ਤਂ. ਤਤ੍ਥ ਆਸਵਕ੍ਖਯਵਿਜ੍ਜਾਵਸੇਨ ਸਬ੍ਬਞ੍ਞੁਤਾ ਸਿਜ੍ਝਤਿ, ਚਰਣਧਮ੍ਮਭੂਤੇਸੁ ਝਾਨੇਸੁ ¶ ਅਨ੍ਤੋਗਧਾਯ ਮਹਾਕਰੁਣਾਸਮਾਪਤ੍ਤਿਯਾ ਵਸੇਨ ਮਹਾਕਾਰੁਣਿਕਤਾ ਸਿਜ੍ਝਤੀਤਿ ਆਹ ‘‘ਵਿਜ੍ਜਾ…ਪੇ… ਮਹਾਕਾਰੁਣਿਕਤ’’ਨ੍ਤਿ. ਯਥਾ ਤਨ੍ਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ, ਯਥਾ ਅਞ੍ਞੋਪਿ ਵਿਜ੍ਜਾਚਰਣਸਮ੍ਪਨ੍ਨੋ ਬੁਦ੍ਧੋ ਨਿਯੋਜੇਤਿ, ਤਥਾ ਅਯਮ੍ਪੀਤਿ ਅਤ੍ਥੋ. ਤੇਨਾਤਿ ਅਨਤ੍ਥਪਰਿਵਜ੍ਜਨਅਤ੍ਥਨਿਯੋਜਨੇਨ. ਅਤ੍ਤਨ੍ਤਪਾਦਯੋਤਿ ਆਦਿ-ਸਦ੍ਦੇਨ ਪਰਨ੍ਤਪਉਭਯਨ੍ਤਪਾ ਗਹਿਤਾ. ਅਸਜ੍ਜਮਾਨੋ ਭਵੇਸੁ ਅਪਚ੍ਚਾਗਚ੍ਛਨ੍ਤੋਤਿ ਪਹੀਨਾਨਂ ਪੁਨਾਨੁਪ੍ਪਤ੍ਤਿਤੋ ਨ ਪੁਨ ਉਪਗਚ੍ਛਨ੍ਤੋ.

ਤਤ੍ਰਾਤਿ ਯੁਤ੍ਤਵਾਚਾਭਾਸਨੇ ਸਾਧੇਤਬ੍ਬੇ ਚੇਤਂ ਭੁਮ੍ਮਂ. ਅਭੂਤਨ੍ਤਿ ਅਭੂਤਤ੍ਥਂ. ਅਤਚ੍ਛਨ੍ਤਿ ਤਸ੍ਸੇਵ ਵੇਵਚਨਂ. ਅਨਤ੍ਥਸਂਹਿਤਨ੍ਤਿ ਪਿਸੁਣਾਦਿਦੋਸਯੁਤ੍ਤਂ. ਸਮ੍ਮਾਗਦਤ੍ਤਾਤਿ ਸੁਨ੍ਦਰਵਚਨਤ੍ਤਾ, ਗਦਨਂ ਗਦੋ, ਕਥਨਨ੍ਤਿ ਅਤ੍ਥੋ. ਸੁਨ੍ਦਰੋ ਗਦੋ ਵਚਨਮਸ੍ਸਾਤਿ ‘‘ਸੁਗਦੋ’’ਤਿ ਵਤ੍ਤਬ੍ਬੇ ਨਿਰੁਤ੍ਤਿਨਯੇਨ ਦ-ਕਾਰਸ੍ਸ ਤ-ਕਾਰਂ ਕਤ੍ਵਾ ‘‘ਸੁਗਤੋ’’ਤਿ ਵੁਤ੍ਤਂ.

ਸਭਾਵਤੋਤਿ ਦੁਕ੍ਖਸਭਾਵਤੋ. ਲੋਕਨ੍ਤਿ ਖਨ੍ਧਾਦਿਲੋਕਂ. ਯਥਾਵੁਤ੍ਤਮਤ੍ਥਂ ਸੁਤ੍ਤਤੋ ਆਹ ਯਤ੍ਥਾਤਿਆਦਿ. ਤਤ੍ਥ ਯਤ੍ਥਾਤਿ ਯਸ੍ਮਿਂ ਲੋਕਨ੍ਤਸਙ੍ਖਾਤੇ ਨਿਬ੍ਬਾਨੇ. ਤਨ੍ਤਿ ਲੋਕਸ੍ਸਨ੍ਤਂ, ਓਕਾਸਲੋਕੇ ਕਾਯਗਮਨੇਨ ਞਾਤਬ੍ਬਂ ਪਤ੍ਤਬ੍ਬਨ੍ਤਿ ਨਾਹਂ ਵਦਾਮੀਤਿ ਯੋਜਨਾ. ਇਦਞ੍ਚ ਰੋਹਿਤਦੇਵਪੁਤ੍ਤੇਨ ਲੋਕਸ੍ਸ ਕਾਯਗਤਿਵਸੇਨ ਅਨ੍ਤਗਮਨਸ੍ਸ ਪੁਚ੍ਛਿਤਤ੍ਤਾ ਵੁਤ੍ਤਂ. ਅਪ੍ਪਤ੍ਵਾ ਲੋਕਸ੍ਸਨ੍ਤਨ੍ਤਿ ਖਨ੍ਧਾਦਿਲੋਕਂ ਸਨ੍ਧਾਯ ਵੁਤ੍ਤਂ.

ਕਿਨ੍ਤੇ ¶ ਪਦਸਾ ਓਕਾਸਲੋਕਪਰਿਬ੍ਭਮਨੇਨ, ਪਰਿਮਿਤਟ੍ਠਾਨੇ ਏਵ ਤਂ ਞਾਣਗਮਨੇਨ ਗਚ੍ਛਨ੍ਤਾਨਂ ਦਸ੍ਸੇਮੀਤਿ ਦਸ੍ਸੇਨ੍ਤੋ ਅਪਿ ਚਾਤਿਆਦਿਮਾਹ. ਤਤ੍ਥ ਬ੍ਯਾਮਮਤ੍ਤੇ ਕਲ਼ੇਵਰੇਤਿ ਸਰੀਰੇ. ਤੇਨ ਰੂਪਕ੍ਖਨ੍ਧਂ ਦਸ੍ਸੇਤਿ. ਸਸਞ੍ਞਿਮ੍ਹੀਤਿ ਸਞ੍ਞਾਸੀਸੇਨ ਵੇਦਨਾਦਯੋ ਤਯੋ ਖਨ੍ਧੇ. ਸਮਨਕੇਤਿ ਵਿਞ੍ਞਾਣਕ੍ਖਨ੍ਧਂ. ਲੋਕਨ੍ਤਿ ਖਨ੍ਧਾਦਿਲੋਕਂ, ਦੁਕ੍ਖਨ੍ਤਿ ਅਤ੍ਥੋ. ਲੋਕਨਿਰੋਧਨ੍ਤਿ ਨਿਬ੍ਬਾਨੇਨ ਲੋਕਸ੍ਸ ਨਿਰੁਜ੍ਝਨਂ, ਨਿਬ੍ਬਾਨਮੇਵ ਵਾ. ਅਦੇਸਮ੍ਪਿ ਹਿ ਨਿਬ੍ਬਾਨਂ ਯੇਸਂ ਨਿਰੋਧਾਯ ਹੋਤਿ, ਉਪਚਾਰਤੋ ਤਨ੍ਨਿਸ੍ਸਿਤਂ ਵਿਯ ਹੋਤੀਤਿ ‘‘ਬ੍ਯਾਮਮਤ੍ਤੇ ਕਲ਼ੇਵਰੇ ਲੋਕਨਿਰੋਧਮ੍ਪਿ ਪਞ੍ਞਪੇਮੀ’’ਤਿ ਵੁਤ੍ਤਂ, ਚਕ੍ਖੁ ਲੋਕੇ ਪਿਯਰੂਪਂ, ਸਾਤਰੂਪਂ, ਏਤ੍ਥੇਸਾ ਤਣ੍ਹਾ ਨਿਰੁਜ੍ਝਮਾਨਾ ਨਿਰੁਜ੍ਝਤੀਤਿਆਦੀਸੁ (ਦੀ. ਨਿ. ੨.੪੦੧; ਵਿਭ. ੨੦੪) ਵਿਯ. ਕੁਦਾਚਨਨ੍ਤਿ ਕਦਾਚਿਪਿ. ਅਪ੍ਪਤ੍ਵਾਤਿ ਅਗ੍ਗਮਗ੍ਗੇਨ ਅਨਧਿਗਨ੍ਤ੍ਵਾ. ਤਸ੍ਮਾਤਿ ਯਸ੍ਮਾ ਤਂ ਗਮਨੇਨ ਪਤ੍ਤੁਂ ਨ ਸਕ੍ਕਾ, ਤਸ੍ਮਾ. ਹਵੇਤਿ ਨਿਪਾਤਮਤ੍ਤਂ, ਏਕਂਸਤ੍ਥੇ ਵਾ ¶ . ਲੋਕਵਿਦੂਤਿ ਸਭਾਵਾਦਿਤੋ ਖਨ੍ਧਾਦਿਜਾਨਨਕੋ. ਚਤੁਸਚ੍ਚਧਮ੍ਮਾਨਂ ਅਭਿਸਮਿਤਤ੍ਤਾ ਸਮਿਤਾਵੀ, ਸਮਿਤਕਿਲੇਸੋਤਿ ਵਾ ਅਤ੍ਥੋ. ਨਾਸੀਸਤਿ ਨ ਪਤ੍ਥੇਤਿ ਅਪ੍ਪਟਿਸਨ੍ਧਿਕਤ੍ਤਾ.

ਏਵਂ ਸਙ੍ਖੇਪਤੋ ਲੋਕਂ ਦਸ੍ਸੇਤ੍ਵਾ ਇਦਾਨਿ ਵਿਤ੍ਥਾਰਤੋ ਤਂ ਦਸ੍ਸੇਤੁਂ ਅਪਿ ਚ ਤਯੋ ਲੋਕਾਤਿਆਦਿ ਵੁਤ੍ਤਂ. ਤਤ੍ਥ ਇਨ੍ਦ੍ਰਿਯਬਦ੍ਧਾਨਂ ਖਨ੍ਧਾਨਂ ਸਮੂਹਸਨ੍ਤਾਨਭੂਤੋ ਸਤ੍ਤਲੋਕੋ. ਸੋ ਹਿ ਰੂਪਾਦੀਸੁ ਸਤ੍ਤਵਿਸਤ੍ਤਤਾਯ ‘‘ਸਤ੍ਤੋ’’ਤਿ ਚ, ਲੋਕਿਯਨ੍ਤਿ ਏਤ੍ਥ ਕਮ੍ਮਕਿਲੇਸਾ ਤਬ੍ਬਿਪਾਕਾ ਚਾਤਿ ‘‘ਲੋਕੋ’’ਤਿ ਚ ਵੁਚ੍ਚਤਿ. ਅਨਿਨ੍ਦ੍ਰਿਯਬਦ੍ਧਾਨਂ ਉਤੁਜਰੂਪਾਨਂ ਸਮੂਹਸਨ੍ਤਾਨਭੂਤੋ ਓਕਾਸਲੋਕੋ. ਸੋ ਹਿ ਸਤ੍ਤਸਙ੍ਖਾਰਾਨਂ ਆਧਾਰਤੋ ‘‘ਓਕਾਸੋ’’ਤਿ ਚ, ਲੋਕਿਯਨ੍ਤਿ ਏਤ੍ਥ ਤਸ੍ਸਾਧਾਰਾ ਚ ਆਧੇਯ੍ਯਭੂਤਾਤਿ ‘‘ਲੋਕੋ’’ਤਿ ਚ ਪਵੁਚ੍ਚਤਿ. ਇਨ੍ਦ੍ਰਿਯਾਨਿਨ੍ਦ੍ਰਿਯਬਦ੍ਧਾ ਪਨ ਸਬ੍ਬੇਵ ਉਪਾਦਾਨਕ੍ਖਨ੍ਧਾ ਪਚ੍ਚਯੇਹਿ ਸਙ੍ਖਤਟ੍ਠੇਨ ਲੁਜ੍ਜਨਪਲੁਜ੍ਜਨਟ੍ਠੇਨ ਚ ‘‘ਸਙ੍ਖਾਰਲੋਕੋ’’ਤਿ ਚ ਵੁਚ੍ਚਤਿ. ਆਹਰਤਿ ਅਤ੍ਤਨੋ ਫਲਨ੍ਤਿ ਆਹਾਰੋ, ਪਚ੍ਚਯੋ. ਤੇਨ ਤਿਟ੍ਠਨਸੀਲਾ ਉਪ੍ਪਜ੍ਜਿਤ੍ਵਾ ਯਾਵ ਭਙ੍ਗਾ ਪਵਤ੍ਤਨਸੀਲਾਤਿ ਆਹਾਰਟ੍ਠਿਤਿਕਾ, ਸਬ੍ਬੇ ਸਙ੍ਖਤਧਮ੍ਮਾ. ਸਬ੍ਬੇ ਸਤ੍ਤਾਤਿ ਚ ਇਮਿਨਾਪਿ ਵੇਨੇਯ੍ਯਾਨੁਰੂਪਤੋ ਪੁਗ੍ਗਲਾਧਿਟ੍ਠਾਨਤ੍ਤਾ ਦੇਸਨਾਯ ਸਙ੍ਖਾਰਾਵ ਗਹਿਤਾ.

ਯਾਵਤਾ ਚਨ੍ਦਿਮਸੂਰਿਯਾ ਪਰਿਹਰਨ੍ਤੀਤਿ ਯਤ੍ਤਕੇ ਠਾਨੇ ਚਨ੍ਦਿਮਸੂਰਿਯਾ ਪਰਿਵਤ੍ਤਨ੍ਤਿ ਪਵਤ੍ਤਨ੍ਤਿ. ਵਿਰੋਚਨਾਤਿ ਤੇਸਂ ਵਿਰੋਚਨਹੇਤੁ ਓਭਾਸਨਹੇਤੂਤਿ ਹੇਤੁਮ੍ਹਿ ਨਿਸ੍ਸਕ੍ਕਵਚਨਂ. ਦਿਸਾ ਭਨ੍ਤੀਤਿ ਸਬ੍ਬਾ ਦਿਸਾ ਯਾਵਤਾ ਵਿਗਤਨ੍ਧਕਾਰਾ ਪਞ੍ਞਾਯਨ੍ਤਿ. ਅਥ ਵਾ ਦਿਸਾਤਿ ਉਪਯੋਗਬਹੁਵਚਨਂ. ਤਸ੍ਮਾ ਵਿਰੋਚਮਾਨਾ ਚਨ੍ਦਿਮਸੂਰਿਯਾ ਯਤ੍ਤਕਾ ਦਿਸਾ ਭਨ੍ਤਿ ਓਭਾਸੇਨ੍ਤੀਤਿ ਅਤ੍ਥੋ. ਤਾਵ ਸਹਸ੍ਸਧਾ ਲੋਕੋਤਿ ਤਤ੍ਤਕੇਨ ਪਮਾਣੇਨ ਸਹਸ੍ਸਪ੍ਪਕਾਰੋ ਓਕਾਸਲੋਕੋ, ਸਹਸ੍ਸਚਕ੍ਕਵਾਲ਼ਾਨੀਤਿ ਅਤ੍ਥੋ. ਏਤ੍ਥਾਤਿ ਸਹਸ੍ਸਚਕ੍ਕਵਾਲ਼ੇ. ਵਸੋਤਿ ਇਦ੍ਧਿਸਙ੍ਖਾਤੋ ਵਸੋ ਵਤ੍ਤਤੀਤਿ ਅਤ੍ਥੋ.

ਤਮ੍ਪੀਤਿ ¶ ਤਿਵਿਧਮ੍ਪਿ ਲੋਕਂ. ਅਸ੍ਸਾਤਿ ਅਨੇਨ ਭਗਵਤਾ ਸਙ੍ਖਾਰਲੋਕੋਪਿ ਸਬ੍ਬਥਾ ਵਿਦਿਤੋਤਿ ਸਮ੍ਬਨ੍ਧੋ. ਏਕੋ ਲੋਕੋਤਿ ਯ੍ਵਾਯਂ ਹੇਟ੍ਠਾ ਵੁਤ੍ਤਨਯੇਨ ਸਬ੍ਬਸਙ੍ਖਤਾਨਂ ਪਚ੍ਚਯਾਯਤ੍ਤਵੁਤ੍ਤਿਤੋ ਤੇਨ ਸਾਮਞ੍ਞੇਨ ਸਙ੍ਖਾਰਲੋਕੋ ਏਕੋ ਏਕਵਿਧੋ, ਏਸ ਨਯੋ ਸੇਸੇਸੁਪਿ. ਸਬ੍ਬਤ੍ਥਾਪਿ ਲੋਕਿਯਧਮ੍ਮਾਵ ਲੋਕੋਤਿ ਅਧਿਪ੍ਪੇਤਾ ਲੋਕੁਤ੍ਤਰਾਨਂ ਪਰਿਞ੍ਞੇਯ੍ਯਤ੍ਤਾਭਾਵਾ. ਉਪਾਦਾਨਾਨਂ ਆਰਮ੍ਮਣਭੂਤਾ ਖਨ੍ਧਾ ਉਪਾਦਾਨਕ੍ਖਨ੍ਧਾ. ਸਤ੍ਤ ਵਿਞ੍ਞਾਣਟ੍ਠਿਤਿਯੋਤਿ ¶ ਤਥਾ ਤਥਾ ਸਮੁਪ੍ਪਨ੍ਨਾ ਪਜਾਯੇਵ ਵੁਚ੍ਚਨ੍ਤਿ. ਨਾਨਤ੍ਤਕਾਯਾ ਨਾਨਤ੍ਤਸਞ੍ਞਿਨੋ, ਨਾਨਤ੍ਤਕਾਯਾ ਏਕਤ੍ਤਸਞ੍ਞਿਨੋ, ਏਕਤ੍ਤਕਾਯਾ ਨਾਨਤ੍ਤਸਞ੍ਞਿਨੋ, ਏਕਤ੍ਤਕਾਯਾ ਏਕਤ੍ਤਸਞ੍ਞਿਨੋ, ਹੇਟ੍ਠਿਮਾ ਚ ਤਯੋ ਆਰੁਪ੍ਪਾਤਿ ਇਮਾ ਸਤ੍ਤਵਿਧਾ ਪਜਾਯੇਵ ਵਿਞ੍ਞਾਣਂ ਤਿਟ੍ਠਤਿ ਏਤ੍ਥਾਤਿ ਵਿਞ੍ਞਾਣਟ੍ਠਿਤਿਯੋ ਨਾਮ. ਤਤ੍ਥ ਨਾਨਤ੍ਤਂ ਕਾਯੋ ਏਤੇਸਮਤ੍ਥੀਤਿ ਨਾਨਤ੍ਤਕਾਯਾ. ਨਾਨਤ੍ਤਂ ਸਞ੍ਞਾ ਏਤੇਸਨ੍ਤਿ ਨਾਨਤ੍ਤਸਞ੍ਞਿਨੋ. ਸਞ੍ਞਾਸੀਸੇਨੇਤ੍ਥ ਪਟਿਸਨ੍ਧਿਵਿਞ੍ਞਾਣਂ ਗਹਿਤਂ, ਏਸ ਨਯੋ ਸੇਸੇਸੁਪਿ.

ਤਤ੍ਥ ਸਬ੍ਬਮਨੁਸ੍ਸਾ ਚ ਛ ਕਾਮਾਵਚਰਦੇਵਾ ਚ ਨਾਨਤ੍ਤਕਾਯਾ ਨਾਨਤ੍ਤਸਞ੍ਞਿਨੋ ਨਾਮ. ਤੇਸਞ੍ਹਿ ਅਞ੍ਞਮਞ੍ਞਂ ਵਿਸਦਿਸਤਾਯ ਨਾਨਾ ਕਾਯੋ, ਪਟਿਸਨ੍ਧਿਸਞ੍ਞਾ ਚ ਨਵਵਿਧਤਾਯ ਨਾਨਾ. ਤੀਸੁ ਪਠਮਜ੍ਝਾਨਭੂਮੀਸੁ ਬ੍ਰਹ੍ਮਕਾਯਿਕਾ ਚੇਵ ਚਤੂਸੁ ਅਪਾਯੇਸੁ ਸਤ੍ਤਾ ਚ ਨਾਨਤ੍ਤਕਾਯਾ ਏਕਤ੍ਤਸਞ੍ਞਿਨੋ ਨਾਮ. ਤੇਸੁ ਹਿ ਬ੍ਰਹ੍ਮਪਾਰਿਸਜ੍ਜਾਦੀਨਂ ਤਿਣ੍ਣਮ੍ਪਿ ਸਰੀਰਂ ਅਞ੍ਞਮਞ੍ਞਂ ਵਿਸਦਿਸਂ, ਪਟਿਸਨ੍ਧਿਸਞ੍ਞਾ ਪਨ ਪਠਮਜ੍ਝਾਨਵਿਪਾਕਵਸੇਨ ਏਕਾਵ, ਤਥਾ ਆਪਾਯਿਕਾਨਮ੍ਪਿ, ਤੇਸਂ ਪਨ ਸਬ੍ਬੇਸਂ ਅਕੁਸਲਵਿਪਾਕਾਹੇਤੁਕਾਵ ਪਟਿਸਨ੍ਧਿਸਞ੍ਞਾ. ਦੁਤਿਯਜ੍ਝਾਨਭੂਮਿਕਾ ਚ ਪਰਿਤ੍ਤਾਭ ਅਪ੍ਪਮਾਣਾਭ ਆਭਸ੍ਸਰਾ ਏਕਤ੍ਤਕਾਯਾ ਨਾਨਤ੍ਤਸਞ੍ਞਿਨੋ ਨਾਮ. ਤੇਸਞ੍ਹਿ ਸਬ੍ਬੇਸਂ ਏਕਪ੍ਪਮਾਣੋਵ ਕਾਯੋ, ਪਟਿਸਨ੍ਧਿਸਞ੍ਞਾ ਪਨ ਦੁਤਿਯਤਤਿਯਜ੍ਝਾਨਵਿਪਾਕਵਸੇਨ ਨਾਨਾ ਹੋਤਿ. ਤਤਿਯਜ੍ਝਾਨਭੂਮਿਯਂ ਪਰਿਤ੍ਤਸੁਭਾਦਯੋ ਤਯੋ, ਚਤੁਤ੍ਥਜ੍ਝਾਨਭੂਮਿਯਂ ਅਸਞ੍ਞਸਤ੍ਤਵਜ੍ਜਿਤਾ ਵੇਹਪ੍ਫਲਾ, ਪਞ੍ਚ ਚ ਸੁਦ੍ਧਾਵਾਸਾਤਿ ਨਵਸੁ ਭੂਮੀਸੁ ਸਤ੍ਤਾ ਏਕਤ੍ਤਕਾਯਾ ਏਕਤ੍ਤਸਞ੍ਞਿਨੋ ਨਾਮ. ਆਭਾਨਾਨਤ੍ਤੇਨ ਪਨ ਸਬ੍ਬਤ੍ਥ ਕਾਯਨਾਨਤ੍ਤਂ ਨ ਗਯ੍ਹਤਿ, ਸਣ੍ਠਾਨਨਾਨਤ੍ਤੇਨੇਵ ਗਯ੍ਹਤੀਤਿ. ਅਸਞ੍ਞਸਤ੍ਤਾ ਵਿਞ੍ਞਾਣਾਭਾਵੇਨ ਵਿਞ੍ਞਾਣਟ੍ਠਿਤਿਸਙ੍ਖ੍ਯਂ ਨ ਗਚ੍ਛਨ੍ਤਿ. ਨੇਵਸਞ੍ਞਾ ਨਾਸਞ੍ਞਾਯਤਨਂ ਪਨ ਯਥਾ ਸਞ੍ਞਾਯ, ਏਵਂ ਵਿਞ੍ਞਾਣਸ੍ਸਾਪਿ ਸੁਖੁਮਤ੍ਤਾ ਨੇਵਵਿਞ੍ਞਾਣਂ ਨਾਵਿਞ੍ਞਾਣਂ, ਤਸ੍ਮਾ ਪਰਿਬ੍ਯਤ੍ਤਵਿਞ੍ਞਾਣਕਿਚ੍ਚਵਨ੍ਤੇਸੁ ਵਿਞ੍ਞਾਣਟ੍ਠਿਤੀਸੁ ਨ ਗਯ੍ਹਤਿ. ਤਸ੍ਮਾ ਸੇਸਾਨਿ ਆਕਾਸਾਨਞ੍ਚਾਯਤਨਾਦੀਨਿ ਤੀਣਿਯੇਵ ਗਹਿਤਾਨਿ, ਤੇਹਿ ਸਦ੍ਧਿਂ ਇਮਾ ਸਤ੍ਤ ਵਿਞ੍ਞਾਣਟ੍ਠਿਤਿਯੋਤਿ ਵੇਦਿਤਬ੍ਬਾ.

ਅਟ੍ਠ ਲੋਕਧਮ੍ਮਾਤਿ ਲਾਭੋ ਅਲਾਭੋ ਯਸੋ ਅਯਸੋ ਨਿਨ੍ਦਾ ਪਸਂਸਾ ਸੁਖਂ ਦੁਕ੍ਖਨ੍ਤਿ ਇਮੇ ਅਟ੍ਠ ਲੋਕਸ੍ਸ ਸਭਾਵਤ੍ਤਾ ਲੋਕਧਮ੍ਮਾ. ਲਾਭਾਲਾਭਾਦਿਪਚ੍ਚਯਾ ਉਪ੍ਪਜ੍ਜਨਕਾ ਪਨੇਤ੍ਥ ਅਨੁਰੋਧਵਿਰੋਧਾ ਵਾ ਲਾਭਾਦਿਸਦ੍ਦੇਹਿ ਵੁਤ੍ਤਾਤਿ ਵੇਦਿਤਬ੍ਬਾ. ਨਵ ਸਤ੍ਤਾਵਾਸਾਤਿ ਹੇਟ੍ਠਾ ਵੁਤ੍ਤਾ ਸਤ੍ਤ ਵਿਞ੍ਞਾਣਟ੍ਠਿਤਿਯੋ ¶ ਏਵ ¶ ਅਸਞ੍ਞਸਤ੍ਤਚਤੁਤ੍ਥਾਰੁਪ੍ਪੇਹਿ ਸਦ੍ਧਿਂ ‘‘ਨਵ ਸਤ੍ਤਾਵਾਸਾ’’ਤਿ ਵੁਚ੍ਚਨ੍ਤਿ. ਸਤ੍ਤਾ ਆਵਸਨ੍ਤਿ ਏਤ੍ਥਾਤਿ ਸਤ੍ਤਾਵਾਸਾ, ਸਤ੍ਤਨਿਕਾਯੋ, ਅਤ੍ਥਤੋ ਤਥਾ ਪਵਤ੍ਤਾ ਪਜਾ ਏਵ ਇਧ ਸਙ੍ਖਾਰਲੋਕਭਾਵੇਨ ਗਯ੍ਹਨ੍ਤੀਤਿ ਵੇਦਿਤਬ੍ਬਾ. ਦਸਾਯਤਨਾਨੀਤਿ ਧਮ੍ਮਾਯਤਨਮਨਾਯਤਨਵਜ੍ਜਿਤਾਨਿ ਦਸ.

ਏਤ੍ਥ ਚ ਤੀਸੁ ਭਵੇਸੁ ਅਸ੍ਸਾਦਦਸ੍ਸਨਵਸੇਨ ਤਿਸ੍ਸੋ ਵੇਦਨਾਵ ਲੋਕਭਾਵੇਨ ਵੁਤ੍ਤਾ, ਤਥਾ ਪਚ੍ਚਯਦਸ੍ਸਨਵਸੇਨ ਚਤ੍ਤਾਰੋਵ ਆਹਾਰਾ. ਅਤ੍ਤਗ੍ਗਾਹਨਿਮਿਤ੍ਤਦਸ੍ਸਨਵਸੇਨ ਛ ਅਜ੍ਝਤ੍ਤਿਕਾਨੇਵ ਆਯਤਨਾਨਿ. ਥੂਲਸਞ੍ਞੀਭਵਦਸ੍ਸਨਵਸੇਨ ਸਤ੍ਤ ਵਿਞ੍ਞਾਣਟ੍ਠਿਤਿਯੋਵ, ਅਨੁਰੋਧਵਿਰੋਧਦਸ੍ਸਨਵਸੇਨ ਅਟ੍ਠ ਲੋਕਧਮ੍ਮਾ ਵਾ, ਥੂਲਾਯਤਨਦਸ੍ਸਨਵਸੇਨ ਦਸਾਯਤਨਾਨੇਵ ਲੋਕਭਾਵੇਨ ਵੁਤ੍ਤਾਨਿ. ਤੇਸਂ ਗਹਣੇਨੇਵ ਤਨ੍ਨਿਸ੍ਸਯਤਪ੍ਪਟਿਬਦ੍ਧਾ ਤਦਾਰਮ੍ਮਣਾ ਸਬ੍ਬੇ ਤੇਭੂਮਕਾ ਨਾਮਰੂਪਧਮ੍ਮਾ ਅਤ੍ਥਤੋ ਗਹਿਤਾ ਏਵ ਹੋਨ੍ਤਿ. ਸੇਸੇਹਿ ਪਨ ਏਕਵਿਧਾਦਿਕੋਟ੍ਠਾਸੇਹਿ ਸਰੂਪੇਨੇਵ ਤੇ ਗਹਿਤਾਤਿ ਵੇਦਿਤਬ੍ਬਂ.

ਆਸਯਂ ਜਾਨਾਤੀਤਿਆਦੀਸੁ ਆਹਚ੍ਚ ਚਿਤ੍ਤਂ ਏਤ੍ਥ ਸੇਤੀਤਿ ਆਸਯੋ, ਅਞ੍ਞਸ੍ਮਿਂ ਵਿਸਯੇ ਪਵਤ੍ਤਿਤ੍ਵਾਪਿ ਚਿਤ੍ਤਂ ਯਤ੍ਥ ਸਰਸੇਨ ਪਵਿਸਿਤ੍ਵਾ ਤਿਟ੍ਠਤਿ, ਸੋ ਵਟ੍ਟਾਸਯੋ ਵਿਵਟ੍ਟਾਸਯੋਤਿ ਦੁਵਿਧੋ. ਤਤ੍ਥ ਵਟ੍ਟਾਸਯੋਪਿ ਸਸ੍ਸਤੁਚ੍ਛੇਦਦਿਟ੍ਠਿਵਸੇਨ ਦੁਵਿਧੋ. ਵਿਵਟ੍ਟਾਸਯੋ ਪਨ ਵਿਪਸ੍ਸਨਾਸਙ੍ਖਾਤਾ ਅਨੁਲੋਮਿਕਾ ਖਨ੍ਤਿ, ਮਗ੍ਗਸਙ੍ਖਾਤਂ ਯਥਾਭੂਤਞਾਣਞ੍ਚਾਤਿ ਦੁਵਿਧੋ. ਯਥਾਹ –

‘‘ਸਸ੍ਸਤੁਚ੍ਛੇਦਦਿਟ੍ਠਿ ਚ, ਖਨ੍ਤਿ ਚੇਵਾਨੁਲੋਮਿਕਂ;

ਯਥਾਭੂਤਞ੍ਚ ਯਂ ਞਾਣਂ, ਏਤਂ ਆਸਯਸਦ੍ਦਿਤ’’ਨ੍ਤਿ. (ਸਾਰਤ੍ਥ. ਟੀ. ੧.ਵੇਰਞ੍ਜਕਣ੍ਡਵਣ੍ਣਨਾ);

ਏਤਂ ਦੁਵਿਧਮ੍ਪਿ ਆਸਯਂ ਸਤ੍ਤਾਨਂ ਅਪ੍ਪਵਤ੍ਤਿਕ੍ਖਣੇਯੇਵ ਭਗਵਾ ਸਬ੍ਬਥਾ ਜਾਨਾਤਿ. ਅਨੁਸਯਨ੍ਤਿ ਕਾਮਰਾਗਾਨੁਸਯਾਦਿਵਸੇਨ ਸਤ੍ਤਵਿਧਂ ਅਨੁਸਯਂ. ਚਰਿਤਨ੍ਤਿ ‘‘ਸੁਚਰਿਤਦੁਚ੍ਚਰਿਤ’’ਨ੍ਤਿ ਨਿਦ੍ਦੇਸੇ ਵੁਤ੍ਤਂ. ਅਥ ਵਾ ਚਰਿਤਨ੍ਤਿ ਚਰਿਯਾ, ਤੇ ਰਾਗਾਦਯੋ ਛ ਮੂਲਚਰਿਯਾ, ਸਂਸਗ੍ਗਸਨ੍ਨਿਪਾਤਵਸੇਨ ਅਨੇਕਵਿਧਾ ਹੋਨ੍ਤਿ. ਅਧਿਮੁਤ੍ਤਿਨ੍ਤਿ ਅਜ੍ਝਾਸਯਧਾਤੁਂ, ਤਤ੍ਥ ਤਤ੍ਥ ਚਿਤ੍ਤਸ੍ਸ ਅਭਿਰੁਚਿਵਸੇਨ ਨਿਨ੍ਨਤਾ, ਸਾ ਦੁਵਿਧਾ ਹੀਨਾਧਿਮੁਤ੍ਤਿ ਪਣੀਤਾਧਿਮੁਤ੍ਤੀਤਿ. ਯਾਯ ਦੁਸ੍ਸੀਲਾਦਿਕੇ ਹੀਨਾਧਿਮੁਤ੍ਤਿਕੇ ¶ ਸੇਵਨ੍ਤਿ, ਸਾ ਹੀਨਾਧਿਮੁਤ੍ਤਿ. ਯਾਯ ਪਣੀਤਾਧਿਮੁਤ੍ਤਿਕੇ ਸੇਵਨ੍ਤਿ, ਸਾ ਪਣੀਤਾਧਿਮੁਤ੍ਤਿ. ਤਂ ਦੁਵਿਧਮ੍ਪਿ ਅਧਿਮੁਤ੍ਤਿਂ ਭਗਵਾ ਸਬ੍ਬਾਕਾਰਤੋ ਜਾਨਾਤਿ. ਅਪ੍ਪਂ ਰਾਗਾਦਿਰਜਂ ਏਤੇਸਨ੍ਤਿ ਅਪ੍ਪਰਜਕ੍ਖਾ, ਅਨੁਸ੍ਸਦਰਾਗਾਦਿਦੋਸਾ. ਉਸ੍ਸਦਰਾਗਾਦਿਦੋਸਾ ਮਹਾਰਜਕ੍ਖਾ. ਉਪਨਿਸ੍ਸਯਭੂਤੇਹਿ ਤਿਕ੍ਖੇਹਿ ਸਦ੍ਧਾਦਿਇਨ੍ਦ੍ਰਿਯੇਹਿ ਮੁਦੁਕੇਹਿ ਚ ਸਮਨ੍ਨਾਗਤਾ ਤਿਕ੍ਖਿਨ੍ਦ੍ਰਿਯਾ ਮੁਦਿਨ੍ਦ੍ਰਿਯਾ ਚ. ਹੇਟ੍ਠਾ ਵੁਤ੍ਤੇਹਿ ਆਸਯਾਦੀਹਿ ਸੁਨ੍ਦਰੇਹਿ ਅਸੁਨ੍ਦਰੇਹਿ ਚ ਸਮਨ੍ਨਾਗਤਾ ਸ੍ਵਾਕਾਰਾ ਦ੍ਵਾਕਾਰਾ ਚ ਵੇਦਿਤਬ੍ਬਾ. ਸਮ੍ਮਤ੍ਤਨਿਯਾਮਂ ¶ ਵਿਞ੍ਞਾਪੇਤੁਂ ਸੁਕਰਾ ਸੁਵਿਞ੍ਞਾਪਯਾ, ਵਿਪਰੀਤਾ ਦੁਵਿਞ੍ਞਾਪਯਾ. ਮਗ੍ਗਫਲਪਟਿਵੇਧਾਯ ਉਪਨਿਸ੍ਸਯਸਮ੍ਪਨ੍ਨਾ ਭਬ੍ਬਾ, ਵਿਪਰੀਤਾ ਅਭਬ੍ਬਾ. ਏਵਂ ਸਤ੍ਤਸਨ੍ਤਾਨਗਤਧਮ੍ਮਵਿਸੇਸਜਾਨਨੇਨੇਵ ਸਤ੍ਤਲੋਕੋਪਿ ਵਿਦਿਤੋ ਧਮ੍ਮਵਿਨਿਮੁਤ੍ਤਸ੍ਸ ਸਤ੍ਤਸ੍ਸ ਅਭਾਵਾਤਿ ਵੇਦਿਤਬ੍ਬਂ.

ਏਕਂ ਚਕ੍ਕਵਾਲ਼ਂ…ਪੇ… ਪਞ੍ਞਾਸਞ੍ਚ ਯੋਜਨਾਨੀਤਿ ਏਤ੍ਥ ਹੋਤੀਤਿ ਸੇਸੋ. ਪਰਿਕ੍ਖੇਪਤੋ ਪਮਾਣਂ ਵੁਚ੍ਚਤੀਤਿ ਸੇਸੋ. ਚਕ੍ਕਵਾਲ਼ਸ੍ਸ ਸਬ੍ਬਂ ਪਰਿਮਣ੍ਡਲਂ ਛਤ੍ਤਿਂਸ ਸਤਸਹਸ੍ਸਾਨਿ…ਪੇ… ਸਤਾਨਿ ਚ ਹੋਨ੍ਤੀਤਿ ਯੋਜੇਤਬ੍ਬਂ. ਤਤ੍ਥਾਤਿ ਚਕ੍ਕਵਾਲ਼ੇ, ਦ੍ਵੇ ਸਤਸਹਸ੍ਸਾਨਿ ਚਤ੍ਤਾਰਿ ਨਹੁਤਾਨਿ ਚ ਯੋਜਨਾਨਿ ਯਾਨਿ ਏਤ੍ਤਕਂ ਏਤ੍ਤਕਪ੍ਪਮਾਣਂ ਬਹਲਤ੍ਤੇਨ ਅਯਂ ਵਸੁਨ੍ਧਰਾ ਸਙ੍ਖਾਤਾਤਿ ਯੋਜਨਾ. ਤਤ੍ਥ ਏਤ੍ਤਕਨ੍ਤਿ ਕਿਰਿਯਾਵਿਸੇਸਨਂ ਦਟ੍ਠਬ੍ਬਂ. ਸਨ੍ਧਾਰਕਂ ਜਲਂ ਏਤ੍ਤਕਂ ਏਤ੍ਤਕਪ੍ਪਮਾਣਂ ਹੁਤ੍ਵਾ ਪਤਿਟ੍ਠਿਤਨ੍ਤਿ ਯੋਜਨਾ. ਏਤ੍ਥਾਤਿ ਚਕ੍ਕਵਾਲ਼ੇ. ਅਜ੍ਝੋਗਾਲ਼੍ਹੁਗ੍ਗਤਾਤਿ ਅਜ੍ਝੋਗਾਲ਼੍ਹਾ ਚ ਉਗ੍ਗਤਾ ਚ. ਬ੍ਰਹਾਤਿ ਮਹਨ੍ਤਾ. ਯੋਜਨਾਨਂ ਸਤਾਨੁਚ੍ਚੋ, ਹਿਮਵਾ ਪਞ੍ਚਾਤਿ ਯੋਜਨਾਨਂ ਪਞ੍ਚਸਤਾਨਿ ਉਚ੍ਚੋ ਉਬ੍ਬੇਧੋ. ਤਿਪਞ੍ਚਯੋਜਨਕ੍ਖਨ੍ਧਪਰਿਕ੍ਖੇਪਾਤਿ ਪਨ੍ਨਰਸਯੋਜਨਪ੍ਪਮਾਣਕ੍ਖਨ੍ਧਪਰਿਣਾਹਾ. ਨਗਵ੍ਹਯਾਤਿ ਰੁਕ੍ਖਾਭਿਧਾਨਾ ਜਮ੍ਬੂਤਿ ਯੋਜਨਾ. ਸਮਨ੍ਤਤੋਤਿ ਸਬ੍ਬਸੋਭਾਗੇਨ, ਆਯਾਮਤੋ ਚ ਵਿਤ੍ਥਾਰਤੋ ਚ ਸਤਯੋਜਨਵਿਤ੍ਥਾਰਾਤਿ ਅਤ੍ਥੋ. ਯਸ੍ਸਾਨੁਭਾਵੇਨਾਤਿ ਯਸ੍ਸਾ ਮਹਨ੍ਤਤਾਕਪ੍ਪਟ੍ਠਾਯਿਕਾਦਿਪ੍ਪਕਾਰੇਨ ਪਭਾਵੇਨ. ਪਰਿਕ੍ਖਿਪਿਤ੍ਵਾ ਤਂ ਸਬ੍ਬਂ, ਲੋਕਧਾਤੁਮਯਂ ਠਿਤੋਤਿ ਹੇਟ੍ਠਾ ਵੁਤ੍ਤਂ ਸਬ੍ਬਮ੍ਪਿ ਤਂ ਪਰਿਕ੍ਖਿਪਿਤ੍ਵਾ ਚਕ੍ਕਵਾਲ਼ਸਿਲੁਚ੍ਚਯੋ ਠਿਤੋ, ਅਯਂ ਏਕਾ ਲੋਕਧਾਤੁ ਨਾਮਾਤਿ ਅਤ੍ਥੋ, ਮ-ਕਾਰੋ ਪਦਸਨ੍ਧਿਵਸੇਨ ਵੁਤ੍ਤੋ. ਅਥ ਵਾ ਤਂ ਸਬ੍ਬਂ ਲੋਕਧਾਤੁਂ ਪਰਿਕ੍ਖਿਪਿਤ੍ਵਾ ਅਯਂ ਚਕ੍ਕਵਾਲ਼ਸਿਲੁਚ੍ਚਯੋ ਠਿਤੋਤਿ ਯੋਜੇਤਬ੍ਬਂ.

ਤਤ੍ਥਾਤਿ ¶ ਤਸ੍ਸਂ ਲੋਕਧਾਤੁਯਂ. ਤਾਵਤਿਂਸਭਵਨਨ੍ਤਿ ਤਿਦਸਪੁਰਂ. ਅਸੁਰਭਵਨਨ੍ਤਿ ਅਸੁਰਪੁਰਂ. ਅਵੀਚਿਮਹਾਨਿਰਯੋ ਚ ਤਥਾ ਦਸਸਹਸ੍ਸਯੋਜਨੋ, ਸੋ ਪਨ ਚਤੁਨ੍ਨਂ ਲੋਹਭਿਤ੍ਤੀਨਮਨ੍ਤਰਾ ਯੋਜਨਸਤਾਯਾਮਵਿਤ੍ਥਾਰੋਪਿ ਸਮਨ੍ਤਾ ਸੋਲ਼ਸਹਿ ਉਸ੍ਸਦਨਿਰਯੇਹਿ ਸਦ੍ਧਿਂ ਦਸਸਹਸ੍ਸਯੋਜਨੋ ਵੁਤ੍ਤੋਤਿ ਵੇਦਿਤਬ੍ਬੋ. ਤਦਨਨ੍ਤਰੇਸੂਤਿ ਤੇਸਂ ਚਕ੍ਕਵਾਲ਼ਾਨਂ ਅਨ੍ਤਰੇਸੁ. ਲੋਕਾਨਂ ਚਕ੍ਕਵਾਲ਼ਾਨਂ ਅਨ੍ਤਰੇ ਵਿਵਰੇ ਭਵਤ੍ਤਾ ਲੋਕਨ੍ਤਰਿਕਾ. ਤਿਣ੍ਣਞ੍ਹਿ ਸਕਟਚਕ੍ਕਾਨਂ ਪਤ੍ਤਾਨਂ ਵਾ ਆਸਨ੍ਨਟ੍ਠਪਿਤਾਨਂ ਅਨ੍ਤਰਸਦਿਸੇ ਤਿਣ੍ਣਂ ਤਿਣ੍ਣਂ ਚਕ੍ਕਵਾਲ਼ਾਨਂ ਅਨ੍ਤਰੇਸੁ ਏਕੇਕੋ ਲੋਕਨ੍ਤਰਿਕਨਿਰਯੋ ਅਟ੍ਠਯੋਜਨਸਹਸ੍ਸਪ੍ਪਮਾਣੋ ਸੀਤਨਰਕੋ ਸਤ੍ਤਾਨਂ ਅਕੁਸਲਵਿਪਾਕੇਨ ਨਿਬ੍ਬਤ੍ਤਤਿ. ਅਨਨ੍ਤਾਨੀਤਿ ਤਿਰਿਯਂ ਅਟ੍ਠਸੁ ਦਿਸਾਸੁ ਚਕ੍ਕਵਾਲ਼ਾਨਿ ਆਕਾਸੋ ਵਿਯ ਅਨਨ੍ਤਾਨਿ. ਉਦ੍ਧਂ ਪਨ ਅਧੋ ਚ ਅਨ੍ਤਾਨੇਵ. ਅਨਨ੍ਤੇਨ ਬੁਦ੍ਧਞਾਣੇਨਾਤਿ ਏਤ੍ਥ ਅਨਨ੍ਤਞੇਯ੍ਯਪਟਿਵੇਧਸਾਮਤ੍ਥਿਯਯੋਗਤੋਵ ਞਾਣਂ ‘‘ਅਨਨ੍ਤ’’ਨ੍ਤਿ ਵੇਦਿਤਬ੍ਬਂ.

ਅਤ੍ਤਨੋਤਿ ਨਿਸ੍ਸਕ੍ਕੇ ਸਾਮਿਵਚਨਮੇਤਂ, ਅਤ੍ਤਤੋਤਿ ਅਤ੍ਥੋ. ਗੁਣੇਹਿ ਅਤ੍ਤਨੋ ਵਿਸਿਟ੍ਠਤਰਸ੍ਸਾਤਿ ¶ ਸਮ੍ਬਨ੍ਧੋ, ਤਰਗ੍ਗਹਣਞ੍ਚੇਤ੍ਥ ਅਨੁਤ੍ਤਰੋਤਿ ਪਦਸ੍ਸ ਅਤ੍ਥਨਿਦ੍ਦੇਸਵਸੇਨ ਕਤਂ, ਨ ਵਿਸਿਟ੍ਠਸ੍ਸ ਕਸ੍ਸਚਿ ਅਤ੍ਥਿਤਾਯ. ਸਦੇਵਕੇ ਹਿ ਲੋਕੇ ਸਦਿਸਕਪ੍ਪੋਪਿ ਨਾਮ ਕੋਚਿ ਤਥਾਗਤਸ੍ਸ ਨਤ੍ਥਿ, ਕੁਤੋ ਸਦਿਸੋ, ਤੇਨਾਹ ਸੀਲਗੁਣੇਨਾਪਿ ਅਸਮੋਤਿਆਦਿ. ਤਤ੍ਥ ਅਸਮੇਹਿ ਸਮ੍ਮਾਸਮ੍ਬੁਦ੍ਧੇਹਿ ਸਮੋ ਅਸਮਸਮੋ. ਨਤ੍ਥਿ ਪਟਿਮਾ ਏਤਸ੍ਸਾਤਿ ਅਪ੍ਪਟਿਮੋ. ਏਸ ਨਯੋ ਸੇਸੇਸੁਪਿ. ਤਤ੍ਥ ਉਪਮਾਮਤ੍ਤਂ ਪਟਿਮਾ, ਸਦਿਸੂਪਮਾ ਪਟਿਭਾਗੋ. ਯੁਗਗ੍ਗਾਹਵਸੇਨ ਠਿਤੋ ਪਟਿਮੋ ਪੁਗ੍ਗਲੋਤਿ ਵੇਦਿਤਬ੍ਬੋ. ਅਤ੍ਤਨਾਤਿ ਅਤ੍ਤਤੋ. ਪੁਰਿਸਦਮ੍ਮੇਤਿਆਦੀਸੁ ਦਮਿਤਬ੍ਬਾ ਦਮ੍ਮਾ, ‘‘ਦਮ੍ਮਪੁਰਿਸਾ’’ਤਿ ਵਤ੍ਤਬ੍ਬੇ ਵਿਸੇਸਨਸ੍ਸ ਪਰਨਿਪਾਤਂ ਕਤ੍ਵਾ ‘‘ਪੁਰਿਸਦਮ੍ਮਾ’’ਤਿ ਵੁਤ੍ਤਂ, ਪੁਰਿਸਗ੍ਗਹਣਞ੍ਚੇਤ੍ਥ ਉਕ੍ਕਟ੍ਠਵਸੇਨ ਇਤ੍ਥੀਨਮ੍ਪਿ ਦਮੇਤਬ੍ਬਤੋ. ਨਿਬ੍ਬਿਸਾ ਕਤਾ ਦੋਸਵਿਸਸ੍ਸ ਵਿਨੋਦਨੇਨ. ਅਤ੍ਥਪਦਨ੍ਤਿ ਅਤ੍ਥਾਭਿਬ੍ਯਞ੍ਜਨਕਂ ਪਦਂ, ਵਾਕ੍ਯਨ੍ਤਿ ਅਤ੍ਥੋ. ਏਕਪਦਭਾਵੇਨ ਚ ਅਨਞ੍ਞਸਾਧਾਰਣੋ ਸਤ੍ਥੁ ਪੁਰਿਸਦਮ੍ਮਸਾਰਥਿਭਾਵੋ ਦਸ੍ਸਿਤੋ ਹੋਤਿ, ਤੇਨਾਹ ਭਗਵਾ ਹੀਤਿਆਦਿ. ਅਟ੍ਠ ਦਿਸਾਤਿ ਅਟ੍ਠ ਸਮਾਪਤ੍ਤਿਯੋ. ਅਸਜ੍ਜਮਾਨਾਤਿ ਵਸੀਭਾਵਪ੍ਪਤ੍ਤਿਯਾ ਨਿਸ੍ਸਙ੍ਗਚਾਰਾ.

ਦਿਟ੍ਠਧਮ੍ਮੋ ਵੁਚ੍ਚਤਿ ਪਚ੍ਚਕ੍ਖੋ ਅਤ੍ਤਭਾਵੋ, ਤਤ੍ਥ ਨਿਯੁਤ੍ਤੋਤਿ ਦਿਟ੍ਠਧਮ੍ਮਿਕੋ, ਇਧਲੋਕਤ੍ਥੋ. ਕਮ੍ਮਕਿਲੇਸਵਸੇਨ ਸਮ੍ਪਰੇਤਬ੍ਬਤੋ ਸਮਾਗਨ੍ਤਬ੍ਬਤੋ ਸਮ੍ਪਰਾਯੋ ¶ , ਪਰਲੋਕੋ, ਤਤ੍ਥ ਨਿਯੁਤ੍ਤੋਤਿ ਸਮ੍ਪਰਾਯਿਕੋ, ਪਰਲੋਕਤ੍ਥੋ. ਪਰਮੋ ਉਤ੍ਤਮੋ ਅਤ੍ਥੋ ਪਰਮਤ੍ਥੋ, ਨਿਬ੍ਬਾਨਂ. ਸਹ ਅਤ੍ਥੇਨ ਵਤ੍ਤਤੀਤਿ ਸਤ੍ਥੋ, ਭਣ੍ਡਮੂਲੇਨ ਵਾਣਿਜ੍ਜਾਯ ਦੇਸਨ੍ਤਰਂ ਗਚ੍ਛਨ੍ਤੋ ਜਨਸਮੂਹੋ. ਸੋ ਅਸ੍ਸ ਅਤ੍ਥੀਤਿ ਸਤ੍ਥਾ, ਸਤ੍ਥਵਾਹੋਤਿ ਨਿਰੁਤ੍ਤਿਨਯੇਨ. ਸੋ ਵਿਯ ਭਗਵਾਤਿ ਆਹ ‘‘ਸਤ੍ਥਾ, ਭਗਵਾ ਸਤ੍ਥਵਾਹੋ’’ਤਿ. ਇਦਾਨਿ ਤਮਤ੍ਥਂ ਨਿਦ੍ਦੇਸਪਾਲ਼ਿਨਯੇਨ ਦਸ੍ਸੇਤੁਂ ਯਥਾ ਸਤ੍ਥਵਾਹੋਤਿਆਦਿ ਵੁਤ੍ਤਂ. ਤਤ੍ਥ ਸਤ੍ਥੇਤਿ ਸਤ੍ਥਿਕੇ ਜਨੇ. ਕਂ ਉਦਕਂ ਤਾਰੇਨ੍ਤਿ ਏਤ੍ਥਾਤਿ ਕਨ੍ਤਾਰੋ, ਨਿਰੁਦਕੋ ਅਰਞ੍ਞਪ੍ਪਦੇਸੋ. ਚੋਰਾਦੀਹਿ ਅਧਿਟ੍ਠਿਤਅਰਞ੍ਞਪ੍ਪਦੇਸਾਪਿ ਦੁਗ੍ਗਮਨਟ੍ਠੇਨ ਤਂਸਦਿਸਤਾਯ ਕਨ੍ਤਾਰਾਤ੍ਵੇਵ ਨਿਰੁਲ਼੍ਹਾਤਿ ਸਾਮਞ੍ਞਤੋ ‘‘ਕਨ੍ਤਾਰਂ ਤਾਰੇਤੀ’’ਤਿ ਵਤ੍ਵਾ ਤਂ ਵਿਵਰਨ੍ਤੋ ਚੋਰਕਨ੍ਤਾਰਨ੍ਤਿਆਦਿਮਾਹ.

ਭਗਵਤੋਤਿ ਨਿਸ੍ਸਕ੍ਕੇ ਸਾਮਿਵਚਨਂ, ਭਗਵਨ੍ਤਤੋ ਧਮ੍ਮਸ੍ਸਵਨੇਨਾਤਿ ਅਤ੍ਥੋ. ਯਥਾ ‘‘ਉਪਜ੍ਝਾਯਤੋ ਅਜ੍ਝੇਤੀ’’ਤਿ, ਭਗਵਤੋ ਸਨ੍ਤਿਕੇਤਿ ਵਾ ਅਤ੍ਥੋ. ਸਰੇ ਨਿਮਿਤ੍ਤਂ ਅਗ੍ਗਹੇਸੀਤਿ ਪੁਬ੍ਬਬੁਦ੍ਧੁਪ੍ਪਾਦੇਸੁ ਸਦ੍ਧਮ੍ਮਸ੍ਸਵਨਪਰਿਚਯੇਨ ‘‘ਧਮ੍ਮੋ ਏਸੋ ਵੁਚ੍ਚਤੀ’’ਤਿ ਸਰੇ ਆਕਾਰਂ ਗਣ੍ਹਿ. ਪੁਬ੍ਬਾਭਿਯੋਗਵਸੇਨੇਵ ਹਿ ਈਦਿਸਾਨਂ ਤਿਰਚ੍ਛਾਨਾਨਂ ਧਮ੍ਮਸ੍ਸਵਨਾਦੀਸੁ ਪਸਾਦੋ ਉਪ੍ਪਜ੍ਜਤਿ ਵਗ੍ਗੁਲਿਆਦੀਨਂ ਵਿਯ. ਇਤਰਥਾ ਸਬ੍ਬਤਿਰਚ੍ਛਾਨਾਨਮ੍ਪਿ ਤਥਾ ਪਸਾਦੁਪ੍ਪਤ੍ਤਿਪ੍ਪਸਙ੍ਗਤੋ. ਯਦਿ ਹਿ ਉਪ੍ਪਜ੍ਜੇਯ੍ਯ, ਭਗਵਾ ਅਨਨ੍ਤਚਕ੍ਕਵਾਲ਼ੇਸੁ ਸਬ੍ਬਸਤ੍ਤਾਨਮ੍ਪਿ ਏਕਕ੍ਖਣੇ ਸਪ੍ਪਾਟਿਹਾਰਿਯਧਮ੍ਮਂ ਸਾਵੇਤੁਂ ਸਕ੍ਕੋਤੀਤਿ ਸਬ੍ਬਸਤ੍ਤਾਨਮ੍ਪਿ ਇਤੋ ਪੁਬ੍ਬੇਵ ਵਿਮੁਤ੍ਤਿਪ੍ਪਸਙ੍ਗੋ ਸਿਯਾ. ਯੇ ਪਨ ਦੇਵਮਨੁਸ੍ਸਨਾਗਸੁਪਣ੍ਣਾਦਯੋ ਪਕਤਿਯਾਵ ਕਮ੍ਮਸ੍ਸਕਤਞ੍ਞਾਣਾਦਿਯੁਤ੍ਤਾ ਹੋਨ੍ਤਿ, ਤੇਯੇਵ ਪੁਬ੍ਬੇ ਅਨੁਪਨਿਸ੍ਸਯਾਪਿ ¶ ਭਗਵਤੋ ਸਦ੍ਧਮ੍ਮਸ੍ਸਵਨਾਦਿਨਾ ਪਠਮਂ ਵਿਵਟ੍ਟੂਪਨਿਸ੍ਸਯਂ ਪਸਾਦਂ ਉਪ੍ਪਾਦੇਤੁਂ ਸਕ੍ਕੋਨ੍ਤਿ, ਨ ਇਤਰੇਤਿ ਗਹੇਤਬ੍ਬਂ. ਅਰੇ ਅਹਮ੍ਪਿ ਨਾਮਾਤਿ ਏਤ੍ਥ ‘‘ਕੁਤੋਹਂ ਇਧ ਨਿਬ੍ਬਤ੍ਤੋਤਿ ਓਲੋਕੇਤ੍ਵਾ ਮਣ੍ਡੂਕਭਾਵਤੋਤਿ ਞਤ੍ਵਾ’’ਤਿ ਇਦਂ ਏਤ੍ਤਕਮ੍ਪਿ ਅਰੇ ਅਹਮ੍ਪਿ ਨਾਮਾਤਿ ਵਿਮ੍ਹਯਵਚਨੇਨੇਵ ਸਿਜ੍ਝਤੀਤਿ ਅਵੁਤ੍ਤਨ੍ਤਿ ਵੇਦਿਤਬ੍ਬਂ. ਜਲਨ੍ਤਿ ਜਲਨ੍ਤੋ ਵਿਜ੍ਜੋਤਮਾਨੋ. ਮਣ੍ਡੂਕੋਹਨ੍ਤਿ ਗਾਥਾਯ ਉਦਕੇਤਿ ਸਞ੍ਜਾਤਟ੍ਠਾਨਦਸ੍ਸਨਂ, ਤੇਨ ਥਲਮਣ੍ਡੂਕਤਾ ਨਿਵਤ੍ਤਨਂ ਕਤਂ ਹੋਤਿ. ਉਦਕੇ ਜਾਤਾਨਮ੍ਪਿ ਕਚ੍ਛਪਾਦੀਨਂ ਥਲਗੋਚਰਤਾਪਿ ਅਤ੍ਥੀਤਿ ਤਂ ਨਿਵਤ੍ਤਨਤ੍ਥਂ ‘‘ਵਾਰਿਗੋਚਰੋ’’ਤਿ ਵੁਤ੍ਤਂ, ਉਦਕਸਞ੍ਚਾਰੀਤਿ ਅਤ੍ਥੋ.

ਵਿਮੋਕ੍ਖਨ੍ਤਿਕਞਾਣਵਸੇਨਾਤਿ ਏਤ੍ਥ ਸਬ੍ਬਸੋ ਕਿਲੇਸੇਹਿ ਵਿਮੁਚ੍ਚਤੀਤਿ ਵਿਮੋਕ੍ਖੋ, ਅਗ੍ਗਮਗ੍ਗੋ, ਤਸ੍ਸ ਅਨ੍ਤੋ, ਅਗ੍ਗਫਲਂ, ਤਤ੍ਥ ਭਵਂ ਵਿਮੋਕ੍ਖਨ੍ਤਿਕਂ, ਸਬ੍ਬਞ੍ਞੁਤਞ੍ਞਾਣੇਨ ਸਦ੍ਧਿਂ ਸਬ੍ਬਮ੍ਪਿ ਬੁਦ੍ਧਞਾਣਂ. ਇਦਾਨਿ ਸਮ੍ਮਾਸਮ੍ਬੁਦ੍ਧਪਦਤੋ ਬੁਦ੍ਧਪਦਸ੍ਸ ¶ ਵਿਸੇਸਂ ਦਸ੍ਸੇਤੁਂ ਯਸ੍ਮਾ ਵਾਤਿਆਦਿ ਵੁਤ੍ਤਂ. ਸਮ੍ਮਾਸਮ੍ਬੁਦ੍ਧਪਦੇਨ ਹਿ ਸਤ੍ਥੁ ਪਟਿਵੇਧਞਾਣਾਨੁਭਾਵੋ ਵੁਤ੍ਤੋ, ਇਮਿਨਾ ਪਨ ਬੁਦ੍ਧਪਦੇਨ ਦੇਸਨਾਞਾਣਾਨੁਭਾਵੋਪਿ, ਤੇਨਾਹ ਅਞ੍ਞੇਪਿ ਸਤ੍ਤੇ ਬੋਧੇਸੀਤਿਆਦਿ.

ਗੁਣਵਿਸਿਟ੍ਠਸਤ੍ਤੁਤ੍ਤਮਗਰੁਗਾਰਵਾਧਿਵਚਨਨ੍ਤਿ ਸਬ੍ਬੇਹਿ ਸੀਲਾਦਿਗੁਣੇਹਿ ਵਿਸਿਟ੍ਠਸ੍ਸ ਤਤੋ ਏਵ ਸਬ੍ਬਸਤ੍ਤੇਹਿ ਉਤ੍ਤਮਸ੍ਸ ਗਰੁਨੋ ਗਾਰਵਵਸੇਨ ਵੁਚ੍ਚਮਾਨਵਚਨਮਿਦਂ ਭਗਵਾਤਿ. ਸੇਟ੍ਠਨ੍ਤਿ ਸੇਟ੍ਠਵਾਚਕਂ ਵਚਨਂ ਸੇਟ੍ਠਗੁਣਸਹਚਰਣਤੋ. ਅਥ ਵਾ ਵੁਚ੍ਚਤੀਤਿ ਵਚਨਂ, ਅਤ੍ਥੋ, ਸੋ ਸੇਟ੍ਠੋਤਿ ਅਤ੍ਥੋ. ਉਤ੍ਤਮਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਗਰੁਗਾਰਵਯੁਤ੍ਤੋਤਿ ਏਤ੍ਥ ਗਰੁਭਾਵੋ ਗਾਰਵਂ, ਗਰੁਗੁਣਯੋਗਤੋ ਗਰੁਕਰਣਂ ਵਾ ਗਾਰਵਂ, ਤੇਨ ਸਾਵਕਾਦੀਨਂ ਅਸਾਧਾਰਣਤਾਯ ਗਰੁਭੂਤੇਨ ਮਹਨ੍ਤੇਨ ਗਾਰਵੇਨ ਯੁਤ੍ਤੋਤਿ ਗਰੁਗਾਰਵਯੁਤ੍ਤੋ. ਅਥ ਵਾ ਗਰੁ ਚ ਸਬ੍ਬਲੋਕਸ੍ਸ ਸਿਕ੍ਖਕਤ੍ਤਾ ਤੇਨੇਵ ਗਾਰਵਯੁਤ੍ਤੋ ਚਾਤਿਪਿ ਯੋਜੇਤਬ੍ਬਂ.

ਅਵਤ੍ਥਾਯ ਵਿਦਿਤਂ ਆਵਤ੍ਥਿਕਂ. ਏਵਂ ਲਿਙ੍ਗਿਕਂ. ਨਿਮਿਤ੍ਤਤੋ ਆਗਤਂ ਨੇਮਿਤ੍ਤਿਕਂ. ਅਧਿਚ੍ਚ ਯਂਕਿਞ੍ਚਿ ਨਿਮਿਤ੍ਤਂ ਅਧਿਵਚਨਵਸੇਨ ਅਨਪੇਕ੍ਖਿਤ੍ਵਾ ਪਵਤ੍ਤਂ ਅਧਿਚ੍ਚਸਮੁਪ੍ਪਨ੍ਨਂ, ਤੇਨਾਹ ‘‘ਵਚਨਤ੍ਥਮਨਪੇਕ੍ਖਿਤ੍ਵਾ’’ਤਿ. ਯਦਿਚ੍ਛਾਯ ਆਗਤਂ ਯਾਦਿਚ੍ਛਕਂ. ਏਤ੍ਥ ਚ ਬਾਹਿਰਂ ਦਣ੍ਡਾਦਿ ਲਿਙ੍ਗਂ, ਅਬ੍ਭਨ੍ਤਰਂ ਤੇਵਿਜ੍ਜਾਦਿ ਨਿਮਿਤ੍ਤਂ. ਪਚੁਰਜਨਵਿਸਯਂ ਵਾ ਦਿਸ੍ਸਮਾਨਂ ਲਿਙ੍ਗਂ, ਤਬ੍ਬਿਪਰੀਤਂ ਨਿਮਿਤ੍ਤਨ੍ਤਿ ਵੇਦਿਤਬ੍ਬਂ. ਸਚ੍ਛਿਕਾਪਞ੍ਞਤ੍ਤੀਤਿ ਸਬ੍ਬਧਮ੍ਮਾਨਂ ਸਚ੍ਛਿਕਿਰਿਯਾਨਿਮਿਤ੍ਤਾ ਪਞ੍ਞਤ੍ਤਿ. ਅਥ ਵਾ ਸਚ੍ਛਿਕਾਪਞ੍ਞਤ੍ਤੀਤਿ ਪਚ੍ਚਕ੍ਖਸਿਦ੍ਧਾ ਪਞ੍ਞਤ੍ਤਿ. ਯਂਗੁਣਨਿਮਿਤ੍ਤਾ ਹਿ ਸਾ, ਤੇ ਗੁਣਾ ਸਤ੍ਥੁ ਪਚ੍ਚਕ੍ਖਭੂਤਾਤਿ ਗੁਣਾ ਵਿਯ ਸਾਪਿ ਸਚ੍ਛਿਕਤਾ ਏਵ ਨਾਮ ਹੋਤਿ, ਨ ਪਰੇਸਂ, ਵੋਹਾਰਮਤ੍ਤੇਨਾਤਿ ਅਧਿਪ੍ਪਾਯੋ. ਯਂਗੁਣਨੇਮਿਤ੍ਤਿਕਨ੍ਤਿ ਯੇਹਿ ਗੁਣੇਹਿ ਨਿਮਿਤ੍ਤਭੂਤੇਹਿ ਏਤਂ ਨਾਮਂ ਨੇਮਿਤ੍ਤਿਕਞ੍ਚ ਜਾਤਂ. ਵਦਨ੍ਤੀਤਿ ਧਮ੍ਮਸੇਨਾਪਤਿਸ੍ਸ ਗਰੁਭਾਵਤੋ ਬਹੁਵਚਨੇਨਾਹ, ਸਙ੍ਗੀਤਿਕਾਰੇਹਿ ਵਾ ਕਤਮਨੁਵਾਦਂ ਸਨ੍ਧਾਯ.

ਇਸ੍ਸਰਿਯਾਦਿਭੇਦੋ ¶ ਭਗੋ ਅਸ੍ਸ ਅਤ੍ਥੀਤਿ ਭਗੀ. ਮਗ੍ਗਫਲਾਦਿਅਰਿਯਗੁਣਂ ਅਰਞ੍ਞਾਦਿਵਿਵੇਕਟ੍ਠਾਨਞ੍ਚ ਭਜਿ ਸੇਵਿ ਸੀਲੇਨਾਤਿ ਭਜੀ. ਚੀਵਰਾਦਿਪਚ੍ਚਯਾਨਂ ਅਤ੍ਥਰਸਾਦੀਨਞ੍ਚ ਸੀਲਾਦਿਗੁਣਾਨਞ੍ਚ ਭਾਗੀ, ਦਾਯਾਦੋਤਿ ਅਤ੍ਥੋ. ਵਿਭਜਿ ਉਦ੍ਦੇਸਨਿਦ੍ਦੇਸਾਦਿਪ੍ਪਕਾਰੇਹਿ ਧਮ੍ਮਰਤਨਂ ਪਵਿਭਜੀਤਿ ਵਿਭਤ੍ਤਵਾ. ਰਾਗਾਦਿਪਾਪਧਮ੍ਮਂ ਭਗ੍ਗਂ ਅਕਾਸੀਤਿ ਭਗਵਾਤਿ ਵੁਚ੍ਚਤੀਤਿ ਸਬ੍ਬਤ੍ਥ ਸਮ੍ਬਨ੍ਧੋ. ਗਰੁਪਿ ਲੋਕੇ ਭਗਵਾਤਿ ਵੁਚ੍ਚਤੀਤਿ ਆਹ ‘‘ਗਰੂ’’ਤਿ, ਯਸ੍ਮਾ ਗਰੁ, ਤਸ੍ਮਾਪਿ ਭਗਵਾਤਿ ਅਤ੍ਥੋ. ਪਾਰਮਿਤਾਸਙ੍ਖਾਤਂ ¶ ਭਗ੍ਯਮਸ੍ਸ ਅਤ੍ਥੀਤਿ ਭਗ੍ਯਵਾ. ਬਹੂਹਿ ਞਾਯੇਹੀਤਿ ਕਾਯਭਾਵਨਾਦਿਕੇਹਿ ਅਨੇਕੇਹਿ ਭਾਵਨਾਕ੍ਕਮੇਹਿ. ਸੁਭਾਵਿਤਤ੍ਤਨੋਤਿ ਪਚ੍ਚਤ੍ਤੇ ਏਤਂ ਸਾਮਿਵਚਨਂ, ਤੇਨ ਸੁਭਾਵਿਤਸਭਾਵੋਤਿ ਅਤ੍ਥੋ. ਭਵਾਨਂ ਅਨ੍ਤਂ ਨਿਬ੍ਬਾਨਂ ਗਤੋਤਿ ਭਵਨ੍ਤਗੋ. ਤਤ੍ਥ ਤਤ੍ਥ ਭਗਵਾਤਿ ਸਦ੍ਦਸਿਦ੍ਧਿ ਨਿਰੁਤ੍ਤਿਨਯੇਨੇਵ ਵੇਦਿਤਬ੍ਬਾ.

ਇਦਾਨਿ ਭਗੀ ਭਜੀਤਿ ਨਿਦ੍ਦੇਸਗਾਥਾਯ ਨਵਹਿ ਪਦੇਹਿ ਦਸ੍ਸਿਤਮਤ੍ਥਂ ਭਗ੍ਯਵਾਤਿ ਗਾਥਾਯ ਛਹਿ ਪਦੇਹਿ ਸਙ੍ਗਹੇਤ੍ਵਾ ਪਦਸਿਦ੍ਧਿਂ ਅਤ੍ਥਯੋਜਨਾਨਯਭੇਦੇਹਿ ਸਦ੍ਧਿਂ ਦਸ੍ਸੇਤੁਂ ਅਯਂ ਪਨ ਅਪਰੋ ਨਯੋਤਿਆਦਿ ਵੁਤ੍ਤਂ. ਤਤ੍ਥ ਵਣ੍ਣਵਿਪਰਿਯਯੋਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ, ਤੇਨੇਵ ਵਣ੍ਣਵਿਕਾਰੋ ਵਣ੍ਣਲੋਪੋ ਧਾਤੁਅਤ੍ਥੇਨ ਨਿਯੋਜਨਞ੍ਚਾਤਿ ਇਮਂ ਤਿਵਿਧਂ ਲਕ੍ਖਣਂ ਸਙ੍ਗਣ੍ਹਾਤਿ. ਸਦ੍ਦਨਯੇਨਾਤਿ ਸਦ੍ਦਲਕ੍ਖਣਨਯੇਨ. ਪਿਸੋਦਰਾਦੀਨਂ ਸਦ੍ਦਾਨਂ ਆਕਤਿਗਣਭਾਵਤੋ ਵੁਤ੍ਤਂ ‘‘ਪਿਸੋਦਰਾਦਿਪਕ੍ਖੇਪਲਕ੍ਖਣਂ ਗਹੇਤ੍ਵਾ’’ਤਿ. ਪਕ੍ਖਿਪਨਮੇਵ ਲਕ੍ਖਣਂ. ਤਪ੍ਪਰਿਯਾਪਨ੍ਨਤਾਕਰਣਞ੍ਹਿ ਪਕ੍ਖਿਪਨਂ. ਭਗ੍ਯਨ੍ਤਿ ਕੁਸਲਂ.

ਲੋਭਾਦਯੋ ਚਤ੍ਤਾਰੋ ਦੋਸਾ ਏਕਕਵਸੇਨ ਗਹਿਤਾ. ਅਹਿਰਿਕਾਦਯੋ ਦੁਕਵਸੇਨ. ਅਕ੍ਕੋਚ੍ਛਿਮਨ੍ਤਿਆਦਿਨਾ (ਧ. ਪ. ੩-੪) ਪੁਨਪ੍ਪੁਨਂ ਕੁਜ੍ਝਨਵਸੇਨ ਚਿਤ੍ਤਪਰਿਯੋਨਨ੍ਧਨੋ ਕੋਧੋਵ ਉਪਨਾਹੋ. ਪਰੇਸਂ ਪੁਬ੍ਬਕਾਰਿਤਾਲਕ੍ਖਣਸ੍ਸ ਗੁਣਸ੍ਸ ਨਿਪੁਞ੍ਛਨੋ ਮਕ੍ਖੋ ਨਾਮ. ਬਹੁਸ੍ਸੁਤਾਦੀਹਿ ਸਦ੍ਧਿਂ ਯੁਗਗ੍ਗਾਹੋ ਅਤ੍ਤਨੋ ਸਮਕਰਣਂ ਪਲਾਸੋ. ਅਤ੍ਤਨੋ ਵਿਜ੍ਜਮਾਨਦੋਸਪਟਿਚ੍ਛਾਦਨਾ ਮਾਯਾ. ਅਵਿਜ੍ਜਮਾਨਗੁਣਪ੍ਪਕਾਸਨਂ ਸਾਠੇਯ੍ਯਂ. ਗਰੂਸੁਪਿ ਥਦ੍ਧਤਾ ਅਨੋਨਤਤਾ ਥਮ੍ਭੋ. ਤਦੁਤ੍ਤਰਿਕਰਣਲਕ੍ਖਣੋ ਸਾਰਮ੍ਭੋ. ਜਾਤਿਆਦਿਂ ਨਿਸ੍ਸਾਯ ਉਨ੍ਨਤਿਲਕ੍ਖਣੋ ਮਾਨੋ. ਅਬ੍ਭੁਨ੍ਨਤਿਲਕ੍ਖਣੋ ਅਤਿਮਾਨੋ. ਜਾਤਿਆਦਿਂ ਨਿਸ੍ਸਾਯ ਮਜ੍ਜਨਾਕਾਰਪ੍ਪਤ੍ਤੋ ਮਾਨੋਵ ਮਦੋ ਨਾਮ. ਸੋ ਸਤ੍ਤਵੀਸਤਿਵਿਧੋ. ਕਾਮਗੁਣੇਸੁ ਚਿਤ੍ਤਸ੍ਸ ਵੋਸ੍ਸਗ੍ਗੋ ਪਮਾਦੋ. ਕਾਯਦੁਚ੍ਚਰਿਤਾਦੀਨਿ ਤਿਵਿਧਦੁਚ੍ਚਰਿਤਾਨਿ. ਤਣ੍ਹਾਦਿਟ੍ਠਿਦੁਚ੍ਚਰਿਤਵਸੇਨ ਤਿਵਿਧਸਂਕਿਲੇਸਾ. ਰਾਗਦੋਸਮੋਹਾਵ ਮਲਾਨਿ. ਤੇਯੇਵ ਕਾਯਦੁਚ੍ਚਰਿਤਾਦਯੋ ਚ ਤਿਵਿਧਵਿਸਮਾਨਿ. ਕਾਮਬ੍ਯਾਪਾਦਵਿਹਿਂਸਾਸਞ੍ਞਾ ਤਿਵਿਧਸਞ੍ਞਾ ਨਾਮ. ਤੇਯੇਵ ਵਿਤਕ੍ਕਾ. ਤਣ੍ਹਾਦਿਟ੍ਠਿਮਾਨਾ ਪਪਞ੍ਚਾ. ਸੁਭਸੁਖਨਿਚ੍ਚਅਤ੍ਤਵਿਪਰਿਯੇਸਾ ਚਤੁਬ੍ਬਿਧਵਿਪਰਿਯੇਸਾ. ਛਨ੍ਦਾਦਯੋ ਅਗਤਿ. ਚੀਵਰਾਦੀਸੁ ਪਚ੍ਚਯੇਸੁ ਲੋਭਾ ਚਤ੍ਤਾਰੋ ਤਣ੍ਹੁਪਾਦਾ. ਬੁਦ੍ਧਧਮ੍ਮਸਙ੍ਘਸਿਕ੍ਖਾਸੁ ਕਙ੍ਖਾ, ਸਬ੍ਰਹ੍ਮਚਾਰੀਸੁ ਕੋਪੋ ਚ ¶ ਪਞ੍ਚ ਚੇਤੋਖੀਲਾ. ਕਾਮੇ ਕਾਯੇ ਰੂਪੇ ਚ ਅਵੀਤਰਾਗਤਾ, ਯਾਵਦਤ੍ਥਂ ਭੁਞ੍ਜਿਤ੍ਵਾ ਸੇਯ੍ਯਸੁਖਾਦਿਅਨੁਯੋਗੋ, ਅਞ੍ਞਤਰਂ ¶ ਦੇਵਨਿਕਾਯਂ ਪਣਿਧਾਯ ਬ੍ਰਹ੍ਮਚਰਿਯਚਰਣਞ੍ਚ ਪਞ੍ਚ ਚੇਤੋਵਿਨਿਬਨ੍ਧਾ. ਰੂਪਾਭਿਨਨ੍ਦਨਾਦਯੋ ਪਞ੍ਚ ਅਭਿਨਨ੍ਦਨਾ. ਕੋਧਮਕ੍ਖਇਸ੍ਸਾਸਾਠੇਯ੍ਯਪਾਪਿਚ੍ਛਤਾਸਨ੍ਦਿਟ੍ਠਿਪਰਾਮਾਸਾ ਛ ਵਿਵਾਦਮੂਲਾਨਿ. ਰੂਪਤਣ੍ਹਾਦਯੋ ਛ ਤਣ੍ਹਾਕਾਯਾ. ਮਿਚ੍ਛਾਦਿਟ੍ਠਿਆਦਯੋ ਅਟ੍ਠਮਗ੍ਗਙ੍ਗਪਟਿਪਕ੍ਖਾ ਮਿਚ੍ਛਤ੍ਤਾ. ਤਣ੍ਹਂ ਪਟਿਚ੍ਚ ਪਰਿਯੇਸਨਾ, ਪਰਿਯੇਸਨਂ ਪਟਿਚ੍ਚ ਲਾਭੋ, ਲਾਭਂ ਪਟਿਚ੍ਚ ਵਿਨਿਚ੍ਛਯੋ, ਤਂ ਪਟਿਚ੍ਚ ਛਨ੍ਦਰਾਗੋ, ਤਂ ਪਟਿਚ੍ਚ ਅਜ੍ਝੋਸਾਨਂ, ਤਂ ਪਟਿਚ੍ਚ ਪਰਿਗ੍ਗਹੋ, ਤਂ ਪਟਿਚ੍ਚ ਮਚ੍ਛਰਿਯਂ, ਤਂ ਪਟਿਚ੍ਚ ਆਰਕ੍ਖਾ, ਆਰਕ੍ਖਾਧਿਕਰਣਂ ਦਣ੍ਡਾਦਾਨਾਦਿਅਨੇਕਾਕੁਸਲਰਾਸੀਤਿ ਨਵ ਤਣ੍ਹਾਮੂਲਕਾ ਧਮ੍ਮਾ. ਪਾਣਾਤਿਪਾਤਾਦਯੋ ਦਸ ਅਕੁਸਲਕਮ੍ਮਪਥਾ. ਚਤ੍ਤਾਰੋ ਸਸ੍ਸਤਵਾਦਾ ਤਥਾ ਏਕਚ੍ਚਸਸ੍ਸਤਵਾਦਾ ਅਨ੍ਤਾਨਨ੍ਤਿਕਾ ਅਮਰਾਵਿਕ੍ਖੇਪਿਕਾ ਦ੍ਵੇ ਅਧਿਚ੍ਚਸਮੁਪ੍ਪਨ੍ਨਿਕਾ ਸੋਲ਼ਸ ਸਞ੍ਞੀਵਾਦਾ ਅਟ੍ਠ ਅਸਞ੍ਞੀਵਾਦਾ ਅਟ੍ਠ ਨੇਵਸਞ੍ਞੀਨਾਸਞ੍ਞੀਵਾਦਾ ਸਤ੍ਤ ਉਚ੍ਛੇਦਵਾਦਾ ਪਞ੍ਚ ਦਿਟ੍ਠਧਮ੍ਮਨਿਬ੍ਬਾਨਵਾਦਾਤਿ ਏਤਾਨਿ ਦ੍ਵਾਸਟ੍ਠਿ ਦਿਟ੍ਠਿਗਤਾਨਿ. ਰੂਪਤਣ੍ਹਾਦਿਛਤਣ੍ਹਾ ਏਵ ਪਚ੍ਚੇਕਂ ਕਾਮਤਣ੍ਹਾਭਵਤਣ੍ਹਾਵਿਭਵਤਣ੍ਹਾਵਸੇਨ ਅਟ੍ਠਾਰਸ ਹੋਨ੍ਤਿ, ਤਾ ਅਜ੍ਝਤ੍ਤਬਹਿਦ੍ਧਰੂਪਾਦੀਸੁ ਪਵਤ੍ਤਿਵਸੇਨ ਛਤ੍ਤਿਂਸ, ਪੁਨ ਕਾਲਤ੍ਤਯਵਸੇਨ ਅਟ੍ਠਸਤਤਣ੍ਹਾਵਿਚਰਿਤਾਨਿ ਹੋਨ੍ਤਿ. ਪਭੇਦ-ਸਦ੍ਦਂ ਪਚ੍ਚੇਕਂ ਸਮ੍ਬਨ੍ਧਿਤ੍ਵਾ ਲੋਭਪ੍ਪਭੇਦੋਤਿਆਦਿਨਾ ਯੋਜੇਤਬ੍ਬਂ. ਸਬ੍ਬਦਰਥਪਰਿਲ਼ਾਹਕਿਲੇਸਸਤਸਹਸ੍ਸਾਨੀਤਿ ਸਬ੍ਬਾਨਿ ਸਤ੍ਤਾਨਂ ਦਰਥਸਙ੍ਖਾਤਪਰਿਲ਼ਾਹਕਰਾਨਿ ਕਿਲੇਸਾਨਂ ਅਨੇਕਾਨਿ ਸਤਸਹਸ੍ਸਾਨਿ, ਆਰਮ੍ਮਣਾਦਿਵਿਭਾਗਤੋ ਪਵਤ੍ਤਿਆਕਾਰਵਿਭਾਗਤੋ ਚ ਨੇਸਂ ਏਵਂ ਪਭੇਦੋ ਵੇਦਿਤਬ੍ਬੋ. ਪਞ੍ਚ ਮਾਰੇ ਅਭਞ੍ਜੀਤਿ ਸਮ੍ਬਨ੍ਧੋ. ਪਰਿਸ੍ਸਯਾਨਨ੍ਤਿ ਉਪਦ੍ਦਵਾਨਂ.

ਏਵਂ ਭਗ੍ਯਵਾ ਭਗ੍ਗਵਾਤਿ ਦ੍ਵਿਨ੍ਨਂ ਪਦਾਨਂ ਅਤ੍ਥਂ ਵਿਭਜਿਤ੍ਵਾ ਇਦਾਨਿ ਤੇਹਿ ਦ੍ਵੀਹਿ ਗਹਿਤਮਤ੍ਥਂ ਦਸ੍ਸੇਤੁਂ ਭਗ੍ਯਵਨ੍ਤਤਾਯ ਚਸ੍ਸਾਤਿਆਦਿ ਵੁਤ੍ਤਂ. ਤਤ੍ਥ ਸਤਪੁਞ੍ਞਜਲਕ੍ਖਣਧਰਸ੍ਸਾਤਿ ਅਨੇਕਸਤਪੁਞ੍ਞਨਿਬ੍ਬਤ੍ਤਮਹਾਪੁਰਿਸਲਕ੍ਖਣਧਰਸ੍ਸ ਭਗਵਤੋ. ਸਕਚਿਤ੍ਤੇ ਇਸ੍ਸਰਿਯਂ ਨਾਮ ਪਟਿਕ੍ਕੂਲਾਦੀਸੁ ਅਪ੍ਪਟਿਕ੍ਕੂਲਸਞ੍ਞਿਤਾਦਿਵਸਪ੍ਪਵਤ੍ਤਿਯਾ ਚੇਵ ਚੇਤੋਸਮਾਧਿਵਸੇਨ ਚ ਅਤ੍ਤਨੋ ਚਿਤ੍ਤਸ੍ਸ ਵਸੀਭਾਵਾਪਾਦਨਮੇਵ. ਅਣਿਮਾ ਲਘਿਮਾਦਿਕਨ੍ਤਿ ਆਦਿ-ਸਦ੍ਦੇਨ ਮਹਿਮਾ ਪਤ੍ਤਿ ਪਾਕਮ੍ਮਂ ਈਸਿਤਾ ਵਸਿਤਾ ਯਤ੍ਥਕਾਮਾਵਸਾਯਿਤਾਤਿ ਇਮੇ ਛਪਿ ਸਙ੍ਗਹਿਤਾ. ਤਤ੍ਥ ਕਾਯਸ੍ਸ ਅਣੁਭਾਵਕਰਣਂ ਅਣਿਮਾ. ਆਕਾਸੇ ਪਦਸਾ ¶ ਗਮਨਾਦਿਅਰਹਭਾਵੇਨ ਲਹੁਭਾਵੋ ਲਘਿਮਾ. ਕਾਯਸ੍ਸ ਮਹਨ੍ਤਤਾਪਾਦਨਂ ਮਹਿਮਾ. ਇਟ੍ਠਦੇਸਸ੍ਸ ਪਾਪੁਣਨਂ ਪਤ੍ਤਿ. ਅਧਿਟ੍ਠਾਨਾਦਿਵਸੇਨ ਇਚ੍ਛਿਤਤ੍ਥਨਿਪ੍ਫਾਦਨਂ ਪਾਕਮ੍ਮਂ. ਸਯਂਵਸਿਤਾ ਇਸ੍ਸਰਭਾਵੋ ਈਸਿਤਾ. ਇਦ੍ਧਿਵਿਧੇ ਵਸੀਭਾਵੋ ਵਸਿਤਾ. ਆਕਾਸੇਨ ਵਾ ਗਚ੍ਛਤੋ, ਅਞ੍ਞਂ ਵਾ ਕਿਞ੍ਚਿ ਕਰੋਤੋ ਯਤ੍ਥ ਕਤ੍ਥਚਿ ਵੋਸਾਨਪ੍ਪਤ੍ਤਿ ਯਤ੍ਥਕਾਮਾਵਸਾਯਿਤਾ, ‘‘ਕੁਮਾਰਕਰੂਪਾਦਿਦਸ੍ਸਨ’’ਨ੍ਤਿਪਿ ਵਦਨ੍ਤਿ. ਸਬ੍ਬਙ੍ਗਪਚ੍ਚਙ੍ਗਸਿਰੀਤਿ ਸਬ੍ਬੇਸਂ ਅਙ੍ਗਪਚ੍ਚਙ੍ਗਾਨਂ ਸੋਭਾ. ਅਤ੍ਥੀਤਿ ਅਨੁਵਤ੍ਤਤਿ. ਲਹੁਸਾਧਨਂ ਤਂ ਤਂ ਕਾਲਿਕਂ ਇਚ੍ਛਿਤਂ, ਗਰੁਸਾਧਨਂ ਚਿਰਕਾਲਿਕਂ ਬੁਦ੍ਧਤ੍ਤਾਦਿਪਤ੍ਥਿਤਂ ¶ . ਭਗਾ ਅਸ੍ਸ ਸਨ੍ਤੀਤਿ ਭਗਵਾਤਿ ਇਦਂ ਸਦ੍ਦਸਤ੍ਥਨਯੇਨ ਸਿਦ੍ਧਂ, ਸੇਸਂ ਸਬ੍ਬਂ ਨਿਰੁਤ੍ਤਿਨਯੇਨ ਸਿਦ੍ਧਨ੍ਤਿ ਵੇਦਿਤਬ੍ਬਂ.

ਪੀਲ਼ਨਸਙ੍ਖਤਸਨ੍ਤਾਪਵਿਪਰਿਣਾਮਟ੍ਠੇਨਾਤਿਆਦੀਸੁ ਪੀਲ਼ਨਟ੍ਠੋ ਸਙ੍ਖਤਟ੍ਠੋਤਿਆਦਿਨਾ ਅਤ੍ਥ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਤਤ੍ਥ ਅਤ੍ਤਨੋ ਸਭਾਵੇਨ ਪੀਲ਼ਨਲਕ੍ਖਣਂ ਦੁਕ੍ਖਂ. ਤਸ੍ਸ ਯੋ ਪੀਲ਼ਨਮੇਵ ਅਤ੍ਥੋ ‘‘ਪੀਲ਼ਨਟ੍ਠੋ’’ਤਿ ਵੁਚ੍ਚਤਿ, ਸੋ ਸਭਾਵੋ. ਯਸ੍ਮਾ ਪਨ ਤਂਸਮੁਦਯੇਨ ਸਙ੍ਖਤਂ, ਤਸ੍ਮਾ ਸਙ੍ਖਤਟ੍ਠੋ ਸਮੁਦਯਦਸ੍ਸਨੇਨ ਆਵਿਭੂਤੋ. ਯਸ੍ਮਾ ਚ ਮਗ੍ਗੋ ਕਿਲੇਸਸਨ੍ਤਾਪਹਰਤ੍ਤਾ ਸੁਸੀਤਲੋ, ਤਸ੍ਮਾਸ੍ਸ ਮਗ੍ਗਦਸ੍ਸਨੇਨ ਸਨ੍ਤਾਪਟ੍ਠੋ ਆਵਿਭੂਤੋ ਤਪ੍ਪਟਿਯੋਗਤ੍ਤਾ. ਅਵਿਪਰਿਣਾਮਧਮ੍ਮਸ੍ਸ ਪਨ ਨਿਰੋਧਸ੍ਸ ਦਸ੍ਸਨੇਨ ਵਿਪਰਿਣਾਮਟ੍ਠੋ ਆਵਿਭੂਤੋਤਿ. ਏਕਸ੍ਸੇਵ ਸਭਾਵਧਮ੍ਮਸ੍ਸ ਸਕਭਾਵਤੋ ਇਤਰਸਚ੍ਚਤ੍ਤਯਨਿਵਤ੍ਤਿਤੋ ਚ ਪਰਿਕਪ੍ਪੇਤਬ੍ਬਤ੍ਤਾ ਚਤ੍ਤਾਰੋ ਅਤ੍ਥਾ ਵੁਤ੍ਤਾ. ਸਮੁਦਯਸ੍ਸ ਪਨ ਰਾਸਿਕਰਣਤੋ ਆਯੂਹਨਟ੍ਠੋ ਸਭਾਵੋ, ਤਸ੍ਸੇਵ ਦੁਕ੍ਖਦਸ੍ਸਨੇਨ ਨਿਦਾਨਟ੍ਠੋ ਆਵਿਭੂਤੋ. ਵਿਸਂਯੋਗਭੂਤਸ੍ਸ ਨਿਰੋਧਸ੍ਸ ਦਸ੍ਸਨੇਨ ਸਂਯੋਗਟ੍ਠੋ. ਨਿਯ੍ਯਾਨਭੂਤਸ੍ਸ ਮਗ੍ਗਸ੍ਸ ਦਸ੍ਸਨੇਨ ਪਲਿਬੋਧਟ੍ਠੋ ਆਵਿਭੂਤੋ.

ਨਿਰੋਧਸ੍ਸ ਪਨ ਨਿਸ੍ਸਰਣਟ੍ਠੋ ਸਭਾਵੋ, ਤਸ੍ਸੇਵ ਸਮੁਦਯਦਸ੍ਸਨੇਨ ਵਿਵੇਕਟ੍ਠੋ ਆਵਿਭੂਤੋ. ਸਙ੍ਖਤਸ੍ਸ ਮਗ੍ਗਸ੍ਸ ਦਸ੍ਸਨੇਨ ਅਸਙ੍ਖਤਟ੍ਠੋ, ਵਿਸਯਭੂਤਸ੍ਸ ਮਰਣਧਮ੍ਮਸ੍ਸ ਵਾ ਦੁਕ੍ਖਸ੍ਸ ਦਸ੍ਸਨੇਨ ਅਮਤਟ੍ਠੋ. ਮਗ੍ਗਸ੍ਸ ਪਨ ਨਿਯ੍ਯਾਨਟ੍ਠੋ ਸਭਾਵੋ, ਤਸ੍ਸੇਵ ਸਮੁਦਯਦਸ੍ਸਨੇਨ ਦੁਕ੍ਖਸ੍ਸੇਵਾਯਂ ਹੇਤੁ, ਨਿਬ੍ਬਾਨਪ੍ਪਤ੍ਤਿਯਾ ਪਨ ਅਯਮੇਵ ਹੇਤੂਤਿ ਹੇਤ੍ਵਟ੍ਠੋ, ਅਤਿਸੁਖੁਮਨਿਰੋਧਦਸ੍ਸਨੇਨ ਇਧਮੇਵ ਦਸ੍ਸਨਨ੍ਤਿ ਦਸ੍ਸਨਟ੍ਠੋ, ਅਧਿਕਪਣਸ੍ਸ ਦੁਕ੍ਖਸ੍ਸ ਦਸ੍ਸਨੇਨ ਅਧਿਪਤੇਯ੍ਯਟ੍ਠੋ ਆਵਿਭੂਤੋ. ਏਤੇ ਏਵ ਚ ਪੀਲ਼ਨਾਦਯੋ ਸੋਲ਼ਸ ਆਕਾਰਾਤਿ ਵੁਚ੍ਚਨ੍ਤਿ.

ਕਾਮੇਹਿ ¶ ਵਿਵੇਕਟ੍ਠਕਾਯਤਾ ਕਾਯਵਿਵੇਕੋ. ਨੀਵਰਣਾਦੀਹਿ ਵਿਵਿਤ੍ਤਾ ਅਟ੍ਠ ਸਮਾਪਤ੍ਤਿਯੋ ਚਿਤ੍ਤਵਿਵੇਕੋ. ਉਪਧੀਯਨ੍ਤਿ ਏਤ੍ਥ ਯਥਾਸਕਂ ਫਲਾਨੀਤਿ ਉਪਧਯੋ, ਪਞ੍ਚਕਾਮਗੁਣਸਙ੍ਖਾਤਕਾਮਖਨ੍ਧਕਿਲੇਸਅਭਿਸਙ੍ਖਾਰਾ, ਤੇਹਿ ਚਤੂਹਿ ਵਿਵਿਤ੍ਤਂ ਨਿਬ੍ਬਾਨਂ ਉਪਧਿਵਿਵੇਕੋ ਨਾਮ.

ਅਨਤ੍ਤਾਨੁਪਸ੍ਸਨਾਯ ਪਟਿਲਦ੍ਧੋ ਦੁਕ੍ਖਾਨਿਚ੍ਚਾਨੁਪਸ੍ਸਨਾਹਿ ਚ ਪਟਿਲਦ੍ਧੋ ਅਰਿਯਮਗ੍ਗੋ ਆਗਮਨਵਸੇਨ ਯਥਾਕ੍ਕਮਂ ਸੁਞ੍ਞਤਅਪ੍ਪਣਿਹਿਤਅਨਿਮਿਤ੍ਤਵਿਮੋਕ੍ਖਸਞ੍ਞਂ ਪਟਿਲਭਤਿ, ਕਿਲੇਸੇਹਿ ਵਿਮੁਤ੍ਤਤ੍ਤਾ ਹਿ ਏਸ ਵਿਮੋਕ੍ਖੋਤਿ.

ਯਥਾ ਲੋਕੇ ਏਕੇਕਪਦਤੋ ਏਕੇਕਮਕ੍ਖਰਂ ਗਹੇਤ੍ਵਾ ‘‘ਮੇਖਲਾ’’ਤਿ ਵੁਤ੍ਤਂ, ਏਵਮਿਧਾਪੀਤਿ ਅਤ੍ਥੋ. ਮੇਹਨਸ੍ਸਾਤਿ ਗੁਯ੍ਹਪ੍ਪਦੇਸਸ੍ਸ. ਖਸ੍ਸਾਤਿ ਓਕਾਸਸ੍ਸ.

ਸਹ ¶ ਦੇਵੇਹੀਤਿਆਦੀਸੁ ਸਹ ਦੇਵੇਹਿ ਵਤ੍ਤਤੀਤਿ ਸਦੇਵਕੋ ਲੋਕੋ. ਤਂ ਸਦੇਵਕਨ੍ਤਿਆਦਿਨਾ ਯੋਜਨਾ ਵੇਦਿਤਬ੍ਬਾ. ਸਦੇਵਕਵਚਨੇਨਾਤਿ ਸਦੇਵਕ-ਸਦ੍ਦੇ ਵਿਸੇਸਨਭਾਵੇਨ ਠਿਤਦੇਵਵਚਨੇਨ. ਤਸ੍ਸਾਪਿ ਸਦੇਵਕਪਦੇ ਅਨ੍ਤੋਭੂਤਤ੍ਤਾ ਅਵਯਵੇ ਸਮੁਦਾਯੋਪਚਾਰਵਸੇਨ ਵੋਹਾਰੋ ਕਤੋ. ਇਤਰਥਾ ਤੇਨ ਦੇਵਵਿਸਿਟ੍ਠਲੋਕਸ੍ਸੇਵ ਗਹਣਤੋ ਪਞ੍ਚਕਾਮਾਵਚਰਦੇਵਗ੍ਗਹਣਂ ਨ ਸਿਯਾ, ਏਵਂ ਉਪਰਿਪਿ. ਸਮਾਰਕਵਚਨੇਨ ਮਾਰਸਦ੍ਦੇਨ ਤੇਨ ਸਹਚਰਿਤਾ ਸਬ੍ਬੇ ਵਸਵਤ੍ਤਿਦੇਵਾ ਚ ਗਹਿਤਾਤਿ ਆਹ ‘‘ਛਟ੍ਠਕਾਮਾਵਚਰਦੇਵਗ੍ਗਹਣ’’ਨ੍ਤਿ. ਬ੍ਰਹ੍ਮਕਾਯਿਕਾ ਨਾਮ ਪਠਮਜ੍ਝਾਨਭੂਮਿਕਾ. ਤੇ ਆਦਿ ਯੇਸਂ ਆਰੁਪ੍ਪਪਰਿਯਨ੍ਤਾਨਂ ਬ੍ਰਹ੍ਮਾਨਂ ਤੇਸਂ ਬ੍ਰਹ੍ਮਾਨਂ ਗਹਣਂ ਬ੍ਰਹ੍ਮਕਾਯਿਕਾਦਿਬ੍ਰਹ੍ਮਗ੍ਗਹਣਂ. ਲੋਕ-ਸਦ੍ਦਸ੍ਸ ਓਕਾਸਲੋਕਾਦੀਨਮ੍ਪਿ ਸਾਧਾਰਣਤ੍ਤਾ ਸਤ੍ਤਲੋਕਾਵੇਣਿਕਮੇਵ ਪਜਾਗਹਣਂ ਕਤਨ੍ਤਿ ਆਹ ‘‘ਪਜਾਵਚਨੇਨ ਸਤ੍ਤਲੋਕਗ੍ਗਹਣ’’ਨ੍ਤਿ. ਸਦੇਵਕਾਦਿਵਚਨੇਨ ਉਪਪਤ੍ਤਿਦੇਵਾਨਂ, ਸਸ੍ਸਮਣਵਚਨੇਨ ਵਿਸੁਦ੍ਧਿਦੇਵਾਨਞ੍ਚ ਗਹਿਤਤ੍ਤਾ ਆਹ ‘‘ਸਦੇਵਮਨੁਸ੍ਸਵਚਨੇਨ ਸਮ੍ਮੁਤਿਦੇਵਅਵਸੇਸਮਨੁਸ੍ਸਗ੍ਗਹਣ’’ਨ੍ਤਿ. ਤਤ੍ਥ ਸਮ੍ਮੁਤਿਦੇਵਾ ਰਾਜਾਨੋ, ਅਵਸੇਸਮਨੁਸ੍ਸਾ ਸਮ੍ਮੁਤਿਦੇਵਸਮਣਬ੍ਰਾਹ੍ਮਣੇਹਿ ਅਵਸਿਟ੍ਠਾ. ਸਤ੍ਤਲੋਕਾਵੇਣਿਕਸ੍ਸ ਪਜਾਸਦ੍ਦਸ੍ਸ ਵਿਸੁਂ ਗਹਿਤਤ੍ਤਾ ਸਦੇਵਕਂ ਲੋਕਨ੍ਤਿ ਏਤ੍ਥ ਲੋਕਸਦ੍ਦਗ੍ਗਹਣਂ ਓਕਾਸਲੋਕਮੇਵ ਨਿਯਮੇਤੀਤਿ ਆਹ ‘‘ਤੀਹਿ ਪਦੇਹਿ ਓਕਾਸਲੋਕੋ’’ਤਿ. ਇਦਞ੍ਚ ਸਦੇਵਕਾਦਿਪਦਤ੍ਤਯਵਚਨੀਯਸ੍ਸ ਪਧਾਨਤ੍ਥਸ੍ਸ ਵਸੇਨ ਵੁਤ੍ਤਂ. ਓਕਾਸਲੋਕਵਿਸੇਸਨਸ੍ਸ ਪਨੇਤ੍ਥ ਦੇਵਮਾਰਾਦਿਸਤ੍ਤਲੋਕਸ੍ਸਾਪਿ ਗਹਣਂ ਵੇਦਿਤਬ੍ਬਂ ¶ ਸਾਮਤ੍ਥਿਯਤੋ ਗਮ੍ਯਮਾਨਤ੍ਤਾ ਸਪੁਤ੍ਤੋ ਆਗਤੋਤਿਆਦੀਸੁ ਪੁਤ੍ਤਾਦੀਨਂ ਵਿਯ. ਇਮਸ੍ਮਿਞ੍ਚ ਨਯੇ ਸਦੇਵਕਂ ਸਮਾਰਕਂ ਸਬ੍ਰਹ੍ਮਕਂ ਓਕਾਸਲੋਕਂ ਸਸ੍ਸਮਣਬ੍ਰਾਹ੍ਮਣਿਂ ਸਦੇਵਮਨੁਸ੍ਸਂ ਪਜਞ੍ਚਾਤਿ ਚ-ਕਾਰਂ ਆਨੇਤ੍ਵਾ ਯੋਜੇਤਬ੍ਬਂ, ਓਕਾਸਸਤ੍ਤਲੋਕਾਨਂ ਗਹਣੇਨ ਚੇਤ੍ਥ ਤਦੁਭਯਸਮ੍ਮੁਤਿਨਿਮਿਤ੍ਤਭੂਤੋ ਸਙ੍ਖਾਰਲੋਕੋਪਿ ਤਦਵਿਨਾਭਾਵਤੋ ਗਹਿਤੋ ਏਵਾਤਿ ਦਟ੍ਠਬ੍ਬੋ. ਅਪਰੇ ਪਨ ‘‘ਸਦੇਵਕਨ੍ਤਿਆਦੀਹਿ ਪਞ੍ਚਹਿ ਪਦੇਹਿ ਸਤ੍ਤਲੋਕੋਵ ਅਤ੍ਤਨੋ ਅਵਯਵਭੂਤਦੇਵਾਦਿਵਿਸੇਸਨੇਹਿ ਵਿਸੇਸੇਤ੍ਵਾ ਗਹਿਤੋ, ਤਗ੍ਗਹਣੇਨ ਤਦਾਧਾਰੋ ਓਕਾਸਲੋਕੋ, ਤਦੁਭਯਪਞ੍ਞਤ੍ਤਿਵਿਸਯੋ ਸਙ੍ਖਾਰਲੋਕੋ ਚ ਗਹਿਤਾ ਏਵ ਹੋਨ੍ਤੀ’’ਤਿ ਵਦਨ੍ਤਿ. ਤੇਸਞ੍ਚ ਪਜਨ੍ਤਿ ਇਦਂ ਲੋਕਸਦ੍ਦਸ੍ਸ ਵਿਸੇਸਨਂ ਕਤ੍ਵਾ ਸਦੇਵਕਂ ਪਜਂ ਲੋਕਂ…ਪੇ… ਸਦੇਵਮਨੁਸ੍ਸਂ ਪਜਂ ਲੋਕਨ੍ਤਿ ਯੋਜੇਤਬ੍ਬਂ.

ਅਰੂਪਾਵਚਰਲੋਕੋ ਗਹਿਤੋ ਪਾਰਿਸੇਸਞਾਯੇਨ ਇਤਰੇਸਂ ਪਦਨ੍ਤਰੇਹਿ ਗਹਿਤਤ੍ਤਾ. ਮਾਰਗ੍ਗਹਣੇਨ ਤਪ੍ਪਧਾਨਾ ਤਂਸਦਿਸਾ ਚ ਉਪਪਤ੍ਤਿਦੇਵਾ ਸਙ੍ਗਯ੍ਹਨ੍ਤੀਤਿ ਆਹ ‘‘ਛਕਾਮਾਵਚਰਦੇਵਲੋਕੋ’’ਤਿ. ਖਤ੍ਤਿਯਪਰਿਸਾ ਬ੍ਰਾਹ੍ਮਣਗਹਪਤਿਸਮਣਚਾਤੁਮਹਾਰਾਜਿਕਤਾਵਤਿਂਸਮਾਰਬ੍ਰਹ੍ਮਪਰਿਸਾਤਿ ਇਮਾਸੁ ਅਟ੍ਠਸੁ ਪਰਿਸਾਸੁ ਚਾਤੁਮਹਾਰਾਜਿਕਾਦੀਨਂ ਚਤੁਨ੍ਨਂ ਪਰਿਸਾਨਂ ਸਦੇਵਕਾਦਿਪਦੇਹਿ ਸਙ੍ਗਹਿਤਤ੍ਤਾ ਇਧ ਸਸ੍ਸਮਣਬ੍ਰਾਹ੍ਮਣਿਨ੍ਤਿ ਇਮਿਨਾ ਸਮਣਪਰਿਸਾ ਬ੍ਰਾਹ੍ਮਣਪਰਿਸਾ ਚ, ਸਦੇਵਮਨੁਸ੍ਸਨ੍ਤਿ ਇਮਿਨਾ ਖਤ੍ਤਿਯਪਰਿਸਾ ਗਹਪਤਿਪਰਿਸਾ ਚ ਵੁਤ੍ਤਾਤਿ ਆਹ ‘‘ਚਤੁਪਰਿਸਵਸੇਨਾ’’ਤਿ. ਤਸ੍ਸ ਮਨੁਸ੍ਸਲੋਕੋ ਗਹਿਤੋਤਿ ¶ ਇਮਿਨਾ ਸਮ੍ਬਨ੍ਧੋ. ਤਤ੍ਥ ਮਨੁਸ੍ਸਲੋਕੋਤਿ ਮਨੁਸ੍ਸਸਮੂਹੋ, ਤੇਨਾਹ ‘‘ਅਵਸੇਸਸਬ੍ਬਸਤ੍ਤਲੋਕੋ ਵਾ’’ਤਿ.

ਵਿਕਪ੍ਪਨ੍ਤਰਂ ਦਸ੍ਸੇਨ੍ਤੋ ਆਹ ‘‘ਸਮ੍ਮੁਤਿਦੇਵੇਹਿ ਵਾ ਸਹ ਮਨੁਸ੍ਸਲੋਕੋ’’ਤਿ. ਦੇਵਪਦੇਨ ਸਮ੍ਮੁਤਿਦੇਵਾ, ਸਮਣਬ੍ਰਾਹ੍ਮਣਮਨੁਸ੍ਸਪਦੇਹਿ ਸੇਸਮਨੁਸ੍ਸਾ ਚ ਗਹਿਤਾਤਿ ਏਵਂ ਵਿਕਪ੍ਪਦ੍ਵਯੇਪਿ ਮਨੁਸ੍ਸਂ ਪਜਂ ਮਨੁਸ੍ਸਿਂ ਪਜਨ੍ਤਿ ਪਜਾ-ਸਦ੍ਦਂ ਮਨੁਸ੍ਸ-ਸਦ੍ਦੇਨ ਵਿਸੇਸੇਤ੍ਵਾ ਤਂ ਪੁਨ ਸਹ ਦੇਵੇਹਿ ਵਤ੍ਤਤੀਤਿ ਸਦੇਵਾ, ਪਜਾ. ਸਦੇਵਾ ਚ ਸਾ ਮਨੁਸ੍ਸਾ ਚਾਤਿ ਸਦੇਵਮਨੁਸ੍ਸਾ, ਤਂ ਸਦੇਵਮਨੁਸ੍ਸਂ ਪਜਂ. ਪੁਨ ਕਿਂ ਭੂਤਂ ਸਸ੍ਸਮਣਬ੍ਰਾਹ੍ਮਣਿਨ੍ਤਿ ਏਵਂ ਯਥਾ ਪਜਾਸਦ੍ਦੇਨ ਮਨੁਸ੍ਸਾਨਞ੍ਞੇਵ ਗਹਣਂ ਸਿਯਾ, ਤਥਾ ਨਿਬ੍ਬਚਨਂ ਕਾਤਬ੍ਬਂ, ਇਤਰਥਾ ਮਨੁਸ੍ਸਾਨਞ੍ਞੇਵ ਗਹਣਂ ਨ ਸਮ੍ਪਜ੍ਜਤਿ ਸਬ੍ਬਮਨੁਸ੍ਸਾਨਂ ਵਿਸੇਸਨਭਾਵੇਨ ਗਹਿਤਤ੍ਤਾ ਅਞ੍ਞਪਦਤ੍ਥਭੂਤਸ੍ਸ ਕਸ੍ਸਚਿ ਮਨੁਸ੍ਸਸ੍ਸ ਅਭਾਵਾ. ਇਦਾਨਿ ਪਜਨ੍ਤਿ ਇਮਿਨਾ ¶ ਅਵਸੇਸਨਾਗਾਦਿਸਤ੍ਤੇਪਿ ਸਙ੍ਗਹੇਤ੍ਵਾ ਦਸ੍ਸੇਤੁਕਾਮੋ ਆਹ ‘‘ਅਵਸੇਸਸਬ੍ਬਸਤ੍ਤਲੋਕੋ ਵਾ’’ਤਿ. ਏਤ੍ਥਾਪਿ ਚਤੁਪਰਿਸਵਸੇਨ ਅਵਸੇਸਸਬ੍ਬਸਤ੍ਤਲੋਕੋ ਸਮ੍ਮੁਤਿਦੇਵਮਨੁਸ੍ਸੇਹਿ ਵਾ ਸਹ ਅਵਸੇਸਸਬ੍ਬਸਤ੍ਤਲੋਕੋਤਿ ਯੋਜੇਤਬ੍ਬਂ.

ਏਤ੍ਤਾਵਤਾ ਭਾਗਸੋ ਲੋਕਂ ਗਹੇਤ੍ਵਾ ਯੋਜਨਂ ਦਸ੍ਸੇਤ੍ਵਾ ਇਦਾਨਿ ਏਕੇਕਪਦੇਨ ਅਭਾਗਸੋ ਸਬ੍ਬਲੋਕਾਨਂ ਗਹਣਪਕ੍ਖੇਪਿ ਤਸ੍ਸ ਤਸ੍ਸ ਵਿਸੇਸਨਸ੍ਸ ਸਪ੍ਫਲਤਂ ਦਸ੍ਸੇਤੁਂ ਅਪਿ ਚੇਤ੍ਥਾਤਿਆਦਿ ਵੁਤ੍ਤਂ. ਉਕ੍ਕਟ੍ਠਪਰਿਚ੍ਛੇਦਤੋਤਿ ਉਕ੍ਕਟ੍ਠਾਨਂ ਦੇਵਗਤਿਪਰਿਯਾਪਨ੍ਨਾਨਂ ਪਰਿਚ੍ਛਿਨ੍ਨਵਸੇਨ ਜਾਨਨਵਸੇਨ ਕਿਤ੍ਤਿਸਦ੍ਦੋ ਸਯਂ ਅਤ੍ਤਨੋ ਅਵਯਵਭੂਤੇਨ ਸਦੇਵਕਵਚਨੇਨ ਤਂ ਸੁਣਨ੍ਤਾਨਂ ਸਾਵੇਨ੍ਤੋ ਅਬ੍ਭੁਗ੍ਗਤੋਤਿ ਯੋਜਨਾ. ਅਨੁਸਨ੍ਧਿਕ੍ਕਮੋਤਿ ਅਤ੍ਥਾਨਞ੍ਚੇਵ ਪਦਾਨਞ੍ਚ ਅਨੁਸਨ੍ਧਾਨਕ੍ਕਮੋ, ਜਾਨਨਕ੍ਕਮੋਤਿ ਅਤ੍ਥੋ.

ਅਭਿਞ੍ਞਾਤਿ ਯ-ਕਾਰਲੋਪੇਨ ਨਿਦ੍ਦੇਸੋਤਿ ਆਹ ‘‘ਅਭਿਞ੍ਞਾਯਾ’’ਤਿ. ਸਮਨ੍ਤਭਦ੍ਰਕਤ੍ਤਾਤਿ ਸਬ੍ਬਭਾਗੇਹਿ ਸੁਨ੍ਦਰਤ੍ਤਾ. ਸਾਸਨਧਮ੍ਮੋਤਿ ਪਟਿਪਤ੍ਤਿਪਟਿਵੇਧਸਾਸਨਸ੍ਸ ਪਕਾਸਕੋ ਪਰਿਯਤ੍ਤਿਧਮ੍ਮੋ. ਬੁਦ੍ਧਸੁਬੋਧਿਤਤਾਯਾਤਿ ਇਦਂ ਤਿਕਂ ਧਮ੍ਮਸ੍ਸ ਹੇਤੁਸਰੂਪਫਲਵਸੇਨ ਵੁਤ੍ਤਂ, ਤਥਾ ਨਾਥਪਭਵਤ੍ਤਿਕਮ੍ਪਿ. ਮਜ੍ਝੇ ਤਿਕਦ੍ਵਯਂ ਫਲਵਸੇਨੇਵ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਕਿਚ੍ਚਸੁਦ੍ਧਿਯਾਤਿ ਧਮ੍ਮਂ ਸੁਤ੍ਵਾ ਯਥਾਸੁਤਵਸੇਨ ਪਟਿਪਜ੍ਜਨ੍ਤਾਨਂ ਸੁਪ੍ਪਟਿਪਤ੍ਤਿਸਙ੍ਖਾਤਕਿਚ੍ਚਸੁਦ੍ਧਿਯਾ.

ਇਦਾਨਿ ਆਦਿਕਲ੍ਯਾਣਾਦਿਪ੍ਪਕਾਰਮੇਵ ਧਮ੍ਮਂ ਦੇਸੇਨ੍ਤੋ ਭਗਵਾ ਸੋਤੂਨਂ ਯਂ ਸਾਸਨਬ੍ਰਹ੍ਮਚਰਿਯਂ ਮਗ੍ਗਬ੍ਰਹ੍ਮਚਰਿਯਞ੍ਚ ਪਕਾਸੇਤਿ, ਤਪ੍ਪਕਾਸਕਸ੍ਸ ਬ੍ਰਹ੍ਮਚਰਿਯਪਦਸ੍ਸ ਸਾਤ੍ਥਨ੍ਤਿਆਦੀਨਿ ਪਦਾਨਿ ਵਿਸੇਸਨਭਾਵੇਨ ਵੁਤ੍ਤਾਨਿ, ਨ ਧਮ੍ਮਪਦਸ੍ਸਾਤਿ ਦਸ੍ਸਨਮੁਖੇਨ ਨਾਨਪ੍ਪਕਾਰਤੋ ਅਤ੍ਥਂ ਵਿਵਰਿਤੁਕਾਮੋ ਸਾਤ੍ਥਂ ਸਬ੍ਯਞ੍ਜਨਨ੍ਤਿ ਏਵਮਾਦੀਸੁ ਪਨਾਤਿਆਦਿਮਾਹ. ਤਤ੍ਥ ਤਿਸ੍ਸੋ ਸਿਕ੍ਖਾ ਸਕਲੋ ਚ ਤਨ੍ਤਿਧਮ੍ਮੋ ਸਾਸਨਬ੍ਰਹ੍ਮਚਰਿਯਂ ¶ ਨਾਮ. ਭਗਵਾ ਹਿ ਧਮ੍ਮਂ ਦੇਸੇਨ੍ਤੋ ਸੀਲਾਦਿਕੇ ਵਿਯ ਤਪ੍ਪਕਾਸਕਂ ਤਨ੍ਤਿਧਮ੍ਮਮ੍ਪਿ ਪਕਾਸੇਤਿ ਏਵ ਸਦ੍ਦਤ੍ਥਸਮੁਦਾਯਤ੍ਤਾ ਪਰਿਯਤ੍ਤਿਧਮ੍ਮਸ੍ਸ. ਯਥਾਨੁਰੂਪਨ੍ਤਿ ਯਥਾਰਹਂ. ਸਿਕ੍ਖਤ੍ਤਯਸਙ੍ਗਹਿਤਞ੍ਹਿ ਸਾਸਨਬ੍ਰਹ੍ਮਚਰਿਯਂ ਮਗ੍ਗਬ੍ਰਹ੍ਮਚਰਿਯਞ੍ਚ ਅਤ੍ਥਸਮ੍ਪਤ੍ਤਿਯਾ ਸਮ੍ਪਨ੍ਨਤ੍ਥਤਾਯ, ਉਪਰੂਪਰਿ ਅਧਿਗਨ੍ਤਬ੍ਬਵਿਸੇਸਸਙ੍ਖਾਤਅਤ੍ਥਸਮ੍ਪਤ੍ਤਿਯਾ ਚ ਸਹ ਅਤ੍ਥੇਨ ਪਯੋਜਨੇਨ ਵਤ੍ਤਤੀਤਿ ਸਾਤ੍ਥਮੇਵ, ਨ ਤੁ ਸਬ੍ਯਞ੍ਜਨਂ, ਤਨ੍ਤਿਧਮ੍ਮਸਙ੍ਖਾਤਂ ਸਾਸਨਬ੍ਰਹ੍ਮਚਰਿਯਂ ਯਥਾਵੁਤ੍ਤੇਨ ਅਤ੍ਥੇਨ ਸਾਤ੍ਥਂ ਸਬ੍ਯਞ੍ਜਨਞ੍ਚ. ਕਿਰਾਤਾਦਿਮਿਲਕ੍ਖਵਚਨਾਨਮ੍ਪਿ ਸਾਤ੍ਥਸਬ੍ਯਞ੍ਜਨਤ੍ਤੇ ਸਮਾਨੇਪਿ ਵਿਸਿਟ੍ਠਤ੍ਥਬ੍ਯਞ੍ਜਨਯੋਗਂ ਸਨ੍ਧਾਯ ਸਹਤ੍ਥੋ ¶ ਦੇਵਦਤ੍ਤੋ ਸਵਿਤ੍ਤੋਤਿਆਦਿ ਵਿਯ ‘‘ਸਾਤ੍ਥਂ ਸਬ੍ਯਞ੍ਜਨ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਅਤ੍ਥਸਮ੍ਪਤ੍ਤਿਯਾ ਸਾਤ੍ਥਂ, ਬ੍ਯਞ੍ਜਨਸਮ੍ਪਤ੍ਤਿਯਾ ਸਬ੍ਯਞ੍ਜਨ’’ਨ੍ਤਿ. ਤਤ੍ਥ ਯਂ ਅਤ੍ਥਂ ਸੁਤ੍ਵਾ ਤਥਾ ਪਟਿਪਜ੍ਜਨ੍ਤਾ ਸਬ੍ਬਦੁਕ੍ਖਕ੍ਖਯਂ ਪਾਪੁਣਨ੍ਤਿ, ਤਸ੍ਸ ਤਾਦਿਸਸਮ੍ਪਤ੍ਤਿ ਅਤ੍ਥਸਮ੍ਪਤ੍ਤਿ ਨਾਮ, ਸਮ੍ਪਨ੍ਨਤ੍ਥਤਾਤਿ ਅਤ੍ਥੋ. ਬ੍ਯਞ੍ਜਨਸਮ੍ਪਤ੍ਤਿ ਨਾਮ ਸਿਥਿਲਧਨਿਤਾਦਿਬ੍ਯਞ੍ਜਨਪਰਿਪੁਣ੍ਣਾਯ ਮਾਗਧਿਕਾਯ ਸਭਾਵਨਿਰੁਤ੍ਤਿਯਾ ਗਮ੍ਭੀਰਮ੍ਪਿ ਅਤ੍ਥਂ ਉਤ੍ਤਾਨਂ ਕਤ੍ਵਾ ਦਸ੍ਸਨਸਮਤ੍ਥਤਾ ਸਮ੍ਪਨ੍ਨਬ੍ਯਞ੍ਜਨਤਾਤਿ ਅਤ੍ਥੋ.

ਇਦਾਨਿ ਨੇਤ੍ਤਿਪ੍ਪਕਰਣਨਯੇਨਾਪਿ (ਨੇਤ੍ਤਿ ੪ ਦ੍ਵਾਦਸਪਦ) ਅਤ੍ਥਂ ਦਸ੍ਸੇਤੁਂ ਸਙ੍ਕਾਸਨਾਤਿਆਦਿ ਵੁਤ੍ਤਂ. ਤਤ੍ਥ ਸਙ੍ਖੇਪਤੋ ਕਾਸੀਯਤਿ ਦੀਪੀਯਤੀਤਿ ਸਙ੍ਕਾਸਨਨ੍ਤਿ ਕਮ੍ਮਸਾਧਨਵਸੇਨ ਅਤ੍ਥੋ ਦਟ੍ਠਬ੍ਬੋ, ਏਵਂ ਸੇਸੇਸੁਪਿ. ਪਠਮਂ ਕਾਸਨਂ ਪਕਾਸਨਂ. ਉਭਯਮ੍ਪੇਤਂ ਉਦ੍ਦੇਸਤ੍ਥਵਚਨਸਙ੍ਖਾਤਸ੍ਸ ਵਿਤ੍ਥਾਰਵਚਨਂ. ਸਕਿਂ ਵੁਤ੍ਤਸ੍ਸ ਪੁਨ ਵਚਨਞ੍ਚ ਵਿਵਰਣਵਿਭਜਨਾਨਿ. ਉਭਯਮ੍ਪੇਤਂ ਨਿਦ੍ਦੇਸਤ੍ਥਵਚਨਂ. ਵਿਵਟਸ੍ਸ ਵਿਤ੍ਥਾਰਤਰਾਭਿਧਾਨਂ ਵਿਭਤ੍ਤਸ੍ਸ ਚ ਪਕਾਰੇਹਿ ਞਾਪਨਂ ਉਤ੍ਤਾਨੀਕਰਣਪਞ੍ਞਤ੍ਤਿਯੋ. ਉਭਯਮ੍ਪੇਤਂ ਪਟਿਨਿਦ੍ਦੇਸਤ੍ਥਵਚਨਸਙ੍ਖਾਤਸ੍ਸ ਵਿਤ੍ਥਾਰਵਚਨਂ. ਅਤ੍ਥਪਦਸਮਾਯੋਗਤੋਤਿ ਯਥਾਵੁਤ੍ਤਾਨਿ ਏਵ ਛ ਪਦਾਨਿ ਪਰਿਯਤ੍ਤਿਯਾ ਅਤ੍ਥਵਿਭਾਗਤ੍ਤਾ ਅਤ੍ਥਪਦਾਨਿ, ਤੇਹਿ ਸਹਿਤਤਾਯ ਅਤ੍ਥਕੋਟ੍ਠਾਸਯੁਤ੍ਤਤ੍ਤਾਤਿ ਅਤ੍ਥੋ. ਅਪਰਿਯੋਸਿਤੇ ਪਦੇ ਆਦਿਮਜ੍ਝਗਤਵਣ੍ਣੋ ਅਕ੍ਖਰਂ, ਏਕਕ੍ਖਰਂ, ਪਦਂ ਵਾ ਅਕ੍ਖਰਂ. ਵਿਭਤ੍ਤਿਯਨ੍ਤਂ ਪਦਂ. ਪਦਾਭਿਹਿਤਂ ਅਤ੍ਥਂ ਬ੍ਯਞ੍ਜੇਤੀਤਿ ਬ੍ਯਞ੍ਜਨਂ, ਵਾਕ੍ਯਂ. ਕਥਿਤਸ੍ਸੇਵਤ੍ਥਸ੍ਸ ਅਨੇਕਵਿਧੇਨ ਵਿਭਾਗਕਰਣਂ ਆਕਾਰੋ ਨਾਮ. ਆਕਾਰਾਭਿਹਿਤਸ੍ਸ ਨਿਬ੍ਬਚਨਂ ਨਿਰੁਤ੍ਤਿ. ਨਿਬ੍ਬਚਨਤ੍ਥਵਿਤ੍ਥਾਰੋ ਨਿਦ੍ਦੇਸੋ. ਅਥ ਵਾ ‘‘ਅਕ੍ਖਰੇਹਿ ਸਙ੍ਕਾਸੇਤਿ, ਪਦੇਹਿ ਪਕਾਸੇਤਿ, ਬ੍ਯਞ੍ਜਨੇਹਿ ਵਿਵਰਤਿ, ਆਕਾਰੇਹਿ ਵਿਭਜਤਿ, ਨਿਰੁਤ੍ਤੀਹਿ ਉਤ੍ਤਾਨਿਂ ਕਰੋਤਿ, ਨਿਦ੍ਦੇਸੇਹਿ ਪਞ੍ਞਪੇਤੀ’’ਤਿ ਵਚਨਤੋ ਸਙ੍ਕਾਸਨਪਕਾਸਨਸਙ੍ਖਆਤਉਦ੍ਦੇਸਤ੍ਥਵਾਚਕਾਨਿ ਵਚਨਾਨਿ ਅਕ੍ਖਰਪਦਾਨਿ ਨਾਮ. ਵਿਵਰਣਵਿਭਜਨਸਙ੍ਖਾਤਨਿਦ੍ਦੇਸਤ੍ਥਵਾਚਕਾਨਿ ਵਚਨਾਨਿ ਬ੍ਯਞ੍ਜਨਾਕਾਰਾ ਨਾਮ. ਉਤ੍ਤਾਨੀਕਰਣਪਞ੍ਞਤ੍ਤਿਸਙ੍ਖਾਤਪਟਿਨਿਦ੍ਦੇਸਤ੍ਥਵਾਚਕਾਨਿ ਵਚਨਾਨਿ ਨਿਰੁਤ੍ਤਿਨਿਦ੍ਦੇਸਾ ਨਾਮ, ਤੇਸਂ ਸਮ੍ਪਤ੍ਤਿਯਾ ਸਬ੍ਯਞ੍ਜਨਨ੍ਤਿ ਅਤ੍ਥੋ.

ਅਤ੍ਥਗਮ੍ਭੀਰਤਾਤਿਆਦੀਸੁ ਅਤ੍ਥੋ ਨਾਮ ਤਨ੍ਤਿਅਤ੍ਥੋ, ਹੇਤੁਫਲਂ ਵਾ. ਧਮ੍ਮੋ ਨਾਮ ਤਨ੍ਤਿ, ਹੇਤੁ ਵਾ. ਦੇਸਨਾ ਨਾਮ ਯਥਾਧਮ੍ਮਂ ਧਮ੍ਮਾਭਿਲਾਪੋ. ਪਟਿਵੇਧੋ ਨਾਮ ਯਥਾਵੁਤ੍ਤਅਤ੍ਥਾਦੀਨਂ ਅਵਿਪਰੀਤਾਵਬੋਧੋ. ਤੇ ¶ ਪਨੇਤੇ ਅਤ੍ਥਾਦਯੋ ਯਸ੍ਮਾ ਸਸਾਦੀਹਿ ਵਿਯ ਮਹਾਸਮੁਦ੍ਦੋ ਮਨ੍ਦਬੁਦ੍ਧੀਹਿ ਦੁਕ੍ਖੋਗਾਹਾ ਅਲਬ੍ਭਨੇਯ੍ਯਪਤਿਟ੍ਠਾ ਚ, ਤਸ੍ਮਾ ਗਮ੍ਭੀਰਾ. ਤੇਸੁ ਪਟਿਵੇਧਸ੍ਸਾਪਿ ਅਤ੍ਥਸਨ੍ਨਿਸ੍ਸਿਤਤ੍ਤਾ ¶ ਅਤ੍ਥਸਭਾਗਤ੍ਤਾ ਚ ਵੁਤ੍ਤਂ ‘‘ਅਤ੍ਥਗਮ੍ਭੀਰਤਾਪਟਿਵੇਧਗਮ੍ਭੀਰਤਾਹਿ ਸਾਤ੍ਥ’’ਨ੍ਤਿ. ਧਮ੍ਮਦੇਸਨਾਨਂ ਅਤ੍ਥਸਨ੍ਨਿਸ੍ਸਿਤਤ੍ਤੇਪਿ ਸਯਂ ਬ੍ਯਞ੍ਜਨਰੂਪਤ੍ਤਾ ਵੁਤ੍ਤਂ ‘‘ਧਮ੍ਮਗਮ੍ਭੀਰਤਾਦੇਸਨਾਗਮ੍ਭੀਰਤਾਹਿ ਸਬ੍ਯਞ੍ਜਨ’’ਨ੍ਤਿ. ਯਥਾਵੁਤ੍ਤਅਤ੍ਥਾਦੀਸੁ ਪਭੇਦਗਤਾਨਿ ਞਾਣਾਨਿ ਅਤ੍ਥਪਟਿਸਮ੍ਭਿਦਾਦਯੋ. ਤਤ੍ਥ ਨਿਰੁਤ੍ਤੀਤਿ ਤਨ੍ਤਿਪਦਾਨਂ ਨਿਦ੍ਧਾਰੇਤ੍ਵਾ ਵਚਨਂ, ਨਿਬ੍ਬਚਨਨ੍ਤਿ ਅਤ੍ਥੋ. ਤੀਸੁ ਪਟਿਸਮ੍ਭਿਦਾਸੁ ਞਾਣਂ ਪਟਿਭਾਨਪਟਿਸਮ੍ਭਿਦਾ. ਲੋਕਿਯਾ ਸਦ੍ਧੇਯ੍ਯਵਚਨਮੁਖੇਨੇਵ ਅਤ੍ਥੇਸੁ ਪਸੀਦਨ੍ਤਿ, ਨ ਅਤ੍ਥਮੁਖੇਨਾਤਿ ਆਹ ਸਦ੍ਧੇਯ੍ਯਤੋਤਿਆਦਿ. ਕੇਵਲਸਦ੍ਦੋ ਸਕਲਾਧਿਵਚਨਨ੍ਤਿ ਆਹ ‘‘ਸਕਲਪਰਿਪੁਣ੍ਣਭਾਵੇਨਾ’’ਤਿ. ਬ੍ਰਹ੍ਮਚਰਿਯ-ਸਦ੍ਦੋ ਇਧ ਸਿਕ੍ਖਤ੍ਤਯਸਙ੍ਗਹਂ ਸਕਲਂ ਸਾਸਨਂ ਦੀਪੇਤੀਤਿ ਆਹ ਸਿਕ੍ਖਤ੍ਤਯਪਰਿਗ੍ਗਹਿਤਤ੍ਤਾਤਿਆਦਿ.

ਯਥਾਵੁਤ੍ਤਮੇਵਤ੍ਥਂ ਅਪਰੇਨਾਪਿ ਪਰਿਯਾਯੇਨ ਦਸ੍ਸੇਤੁਂ ਅਪਿ ਚਾਤਿਆਦਿ ਵੁਤ੍ਤਂ. ਤਤ੍ਥ ਸਨਿਦਾਨਨ੍ਤਿ ਦੇਸਕਾਲਾਦਿਦੀਪਕੇਨ ਨਿਦਾਨਵਚਨੇਨ ਸਨਿਦਾਨਂ. ਸਉਪ੍ਪਤ੍ਤਿਕਨ੍ਤਿ ਅਟ੍ਠੁਪ੍ਪਤ੍ਤਿਆਦਿਯੁਤ੍ਤਿਯੁਤ੍ਤਂ. ਤਤ੍ਰਾਯਂ ਪਾਲ਼ਿਯੋਜਨਾਕ੍ਕਮੋ – ‘‘ਵੇਰਞ੍ਜੋ ਬ੍ਰਾਹ੍ਮਣੋ ਸਮਣੋ ਖਲੁ ਭੋ…ਪੇ… ਵਿਹਰਤੀ’’ਤਿ ਚ, ‘‘ਤਂ ਖੋ ਪਨ ਭਵਨ੍ਤਂ ਗੋਤਮਂ ‘ਇਤਿਪਿ ਸੋ…ਪੇ… ਪਵੇਦੇਤੀ’ਤਿ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ’’ਤਿ ਚ, ‘‘ਸੋ ਧਮ੍ਮਂ ਦੇਸੇਤਿ…ਪੇ… ਪਰਿਯੋਸਾਨਕਲ੍ਯਾਣਂ, ਦੇਸੇਨ੍ਤੋ ਚ ਸਾਤ੍ਥਸਬ੍ਯਞ੍ਜਨਾਦਿਗੁਣਸਂਯੁਤ੍ਤਂ ਬ੍ਰਹ੍ਮਚਰਿਯਂ ਪਕਾਸੇਤੀ’’ਤਿ ਚ, ‘‘ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’ਤਿ ਚ ਅਸ੍ਸੋਸਿ, ਸੁਤ੍ਵਾ ਚ ਅਥ ਖੋ ਵੇਰਞ੍ਜੋ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮੀਤਿ.

ਅਟ੍ਠਕਥਾਯਂ ਪਨ ਕਿਞ੍ਚਾਪਿ ‘‘ਦਸ੍ਸਨਮਤ੍ਤਮ੍ਪਿ ਸਾਧੁ ਹੋਤੀਤਿ ਏਵਂ ਅਜ੍ਝਾਸਯਂ ਕਤ੍ਵਾ ਅਥ ਖੋ ਵੇਰਞ੍ਜੋ…ਪੇ… ਉਪਸਙ੍ਕਮੀ’’ਤਿ ਏਵਂ ਸਾਧੁ ਖੋ ਪਨਾਤਿਆਦਿਪਾਠਸ੍ਸ ਬ੍ਰਾਹ੍ਮਣਸ੍ਸ ਪਰਿਵਿਤਕ੍ਕਨਭਾਵੇਨ ਵੁਤ੍ਤਤ੍ਤਾ ਬ੍ਰਹ੍ਮਚਰਿਯਂ ਪਕਾਸੇਤੀਤਿ ਪਦਾਨਨ੍ਤਰਮੇਵ ਅਸ੍ਸੋਸੀਤਿ ਪਦਂ ਸਮ੍ਬਨ੍ਧਿਤਬ੍ਬਂ ਵਿਯ ਪਞ੍ਞਾਯਤਿ, ਤਥਾਪਿ ‘‘ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’ਤਿ ਏਵਂ ਯਥਾਵੁਤ੍ਤਨਿਦਸ੍ਸਨਤ੍ਥੇਨ ਇਤਿ-ਸਦ੍ਦੇਨ ਪਰਿਚ੍ਛਿਨ੍ਦਿਤ੍ਵਾ ਵੁਤ੍ਤਤ੍ਤਾ ਪਨ ਅਞ੍ਞਤ੍ਥ ਇਤਿ-ਸਦ੍ਦਸ੍ਸ ਅਦਸ੍ਸਨਤੋ ਚ ਅਥ ਖੋ ਵੇਰਞ੍ਜੋਤਿਆਦਿਨਾ ਕਤ੍ਤਬ੍ਬਨ੍ਤਰਦਸ੍ਸਨਮੁਖੇਨ ਪਾਲ਼ਿਯਾ ਪਕਾਰਨ੍ਤਰੇ ਪਵਤ੍ਤਿਤੋ ਚ ਯਥਾਵੁਤ੍ਤਵਸੇਨੇਵ ‘‘ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’ਤਿ ਵਚਨਾਨਨ੍ਤਰਮੇਵ ਅਸ੍ਸੋਸੀਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਨਂ ਯੁਤ੍ਤਂ. ਅਟ੍ਠਕਥਾਚਰਿਯੇਨ ਹਿ ਬ੍ਰਾਹ੍ਮਣਸ੍ਸ ਅਤ੍ਤਨਾ ਸੁਤਵਸੇਨੇਵ ਅਜ੍ਝਾਸਯੋ ਉਪ੍ਪਜ੍ਜਤੀਤਿ ¶ ਉਪਸਙ੍ਕਮਨਹੇਤੁਦਸ੍ਸਨਮੁਖੇਨ ਦਸ੍ਸਨਮਤ੍ਤਮ੍ਪਿ ਸਾਧੁ ਹੋਤੀਤਿ ਏਵਂ ਅਜ੍ਝਾਸਯਂ ਕਤ੍ਵਾਤਿਆਦਿ ਵੁਤ੍ਤਨ੍ਤਿ ਗਹੇਤਬ੍ਬਂ.

੨. ਸੀਤੋਦਕਂ ¶ ਵਿਯ ਉਣ੍ਹੋਦਕੇਨਾਤਿ ਇਦਂ ਉਕ੍ਕਮੇਨ ਮੁਖਾਰੁਲ਼੍ਹਵਸੇਨ ਵੁਤ੍ਤਂ, ਅਨੁਪਸਨ੍ਤਸਭਾਵਤਾਯ ਬ੍ਰਾਹ੍ਮਣਸ੍ਸੇਵ ਉਣ੍ਹੋਦਕਂ ਵਿਯ ਸੀਤੋਦਕੇਨਾਤਿ ਅਤ੍ਥੋ ਗਹੇਤਬ੍ਬੋ, ਞਾਣਤੇਜਯੁਤ੍ਤਤਾਯ ਵਾ ਭਗਵਾ ਉਣ੍ਹੋਦਕੋਪਮੋਤਿ ਕਤ੍ਵਾ ਤਬ੍ਬਿਰਹਿਤਂ ਬ੍ਰਾਹ੍ਮਣਂ ਸੀਤੋਦਕਂ ਵਿਯ ਕਤ੍ਵਾ ਤਥਾ ਵੁਤ੍ਤਨ੍ਤਿ ਗਹੇਤਬ੍ਬਂ. ਏਕੀਭਾਵਨ੍ਤਿ ਸਮ੍ਮੋਦਨਕਿਰਿਯਾਯ ਏਕਰੂਪਤਂ. ਯਾਯਾਤਿਆਦੀਸੁ ਯਾਯ ਕਥਾਯ ਸਮ੍ਮੋਦਿ ਬ੍ਰਾਹ੍ਮਣੋ, ਤਂ ਸਮ੍ਮੋਦਨੀਯਂ ਕਥਨ੍ਤਿ ਯੋਜਨਾ. ਤਤ੍ਥ ਖਮਨੀਯਨ੍ਤਿ ਦੁਕ੍ਖਬਹੁਲਂ ਇਦਂ ਸਰੀਰਂ, ਕਚ੍ਚਿ ਖਮਿਤੁਂ ਸਕ੍ਕੁਣੇਯ੍ਯਂ. ਯਾਪਨੀਯਨ੍ਤਿ ਚਿਰਪ੍ਪਬਨ੍ਧਸਙ੍ਖਾਤਾਯ ਯਾਪਨਾਯ ਯਾਪੇਤੁਂ ਸਕ੍ਕੁਣੇਯ੍ਯਂ. ਰੋਗਾਭਾਵੇਨ ਅਪ੍ਪਾਬਾਧਂ. ਦੁਕ੍ਖਜੀਵਿਤਾਭਾਵੇਨ ਅਪ੍ਪਾਤਙ੍ਕਂ. ਤਂਤਂਕਿਚ੍ਚਕਰਣਤ੍ਥਾਯ ਲਹੁਂ ਅਕਿਚ੍ਛੇਨ ਉਟ੍ਠਾਤੁਂ ਯੋਗ੍ਗਤਾਯ ਲਹੁਟ੍ਠਾਨਂ. ਬਲਨ੍ਤਿ ਸਰੀਰਸ੍ਸ ਸਬ੍ਬਕਿਚ੍ਚਕ੍ਖਮਂ ਬਲਂ ਕਚ੍ਚਿ ਅਤ੍ਥੀਤਿ ਪੁਚ੍ਛਤਿ. ਫਾਸੁਵਿਹਾਰੋਤਿ ਸੁਖਵਿਹਾਰੋ. ਸਰਣੀਯਮੇਵ ਦੀਘਂ ਕਤ੍ਵਾ ‘‘ਸਾਰਣੀਯ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਸਰਿਤਬ੍ਬਭਾਵਤੋ ਚ ਸਾਰਣੀਯ’’ਨ੍ਤਿ. ਪਰਿਯਾਯੇਹੀਤਿ ਕਾਰਣੇਹਿ.

ਭਾਵੋਤਿ ਕਿਰਿਯਾ, ਤਸ੍ਮਿਂ ਵਤ੍ਤਮਾਨੋ ਨਪੁਂਸਕ-ਸਦ੍ਦੋ ਭਾਵਨਪੁਂਸਕਨਿਦ੍ਦੇਸੋ ਨਾਮ, ਕਿਰਿਯਾਵਿਸੇਸਨਸਦ੍ਦੋਤਿ ਅਤ੍ਥੋ. ਏਕਮਨ੍ਤੇ ਏਕਸ੍ਮਿਂ ਅਨ੍ਤੇ ਯੁਤ੍ਤਪ੍ਪਦੇਸੇਤਿ ਅਤ੍ਥੋ. ਖਣ੍ਡਿਚ੍ਚਾਦਿਭਾਵਨ੍ਤਿ ਖਣ੍ਡਿਤਦਨ੍ਤਪਲਿਤਕੇਸਾਦਿਭਾਵਂ. ਰਾਜਪਰਿਵਟ੍ਟੇਤਿ ਰਾਜੂਨਂ ਪਰਿਵਤ੍ਤਨਂ, ਪਟਿਪਾਟਿਯੋਤਿ ਅਤ੍ਥੋ. ਪੁਰਾਤਨੁਚ੍ਚਕੁਲਪ੍ਪਸੁਤਤਾਯ ਜਿਣ੍ਣਤਾ, ਨ ਵਯਸਾਤਿ ਆਹ ‘‘ਚਿਰਕਾਲਪ੍ਪਵਤ੍ਤਕੁਲਨ੍ਵਯੇ’’ਤਿ. ਵਿਭਵਾਨਂ ਮਹਨ੍ਤਤ੍ਤਂ ਲਾਤਿ ਗਣ੍ਹਾਤੀਤਿ ਮਹਲ੍ਲਕੋਤਿ ਆਹ ‘‘ਵਿਭਵਮਹਤ੍ਤਤਾਯ ਸਮਨ੍ਨਾਗਤੇ’’ਤਿ. ਵਿਭਾਵਨੇ ਨਾਮ ਅਤ੍ਥੇਤਿ ਪਕਤਿਵਿਭਾਵਨਸਙ੍ਖਾਤੇ ਅਤ੍ਥੇ. ਨ ਅਭਿਵਾਦੇਤਿ ਵਾਤਿ ਅਭਿਵਾਦੇਤਬ੍ਬਨ੍ਤਿ ਨ ਸਲ੍ਲਕ੍ਖੇਤਿ, ਏਵਂ ਅਸਲ੍ਲਕ੍ਖਣਪਕਤਿਕੋਤਿ ਵੁਤ੍ਤਂ ਹੋਤਿ. ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾਤਿ ਏਤ੍ਥਾਪਿ ਨਿਚ੍ਚਪਕਤਿਕਂ ਅਨਿਚ੍ਚਪਕਤਿਕਂ ਵਾਤਿ ਅਤ੍ਥੋ. ਅਨਿਚ੍ਚਂ ਵਾਤਿ ਏਤ੍ਥ ਵਾ-ਸਦ੍ਦੋ ਅਵਧਾਰਣਤ੍ਥੋ.

ਸਮ੍ਪਤਿਜਾਤੋਤਿ ਮੁਹੁਤ੍ਤਜਾਤੋ, ਜਾਤਸਮਨਨ੍ਤਰਮੇਵਾਤਿ ਅਤ੍ਥੋ. ਸਤ੍ਤਪਦਵੀਤਿਹਾਰੇਨ ਗਨ੍ਤ੍ਵਾ…ਪੇ… ਓਲੋਕੇਸੀਤਿ ਏਤ੍ਥ ਦ੍ਵਾਰਂ ਪਿਧਾਯ ਨਿਕ੍ਖਨ੍ਤੋਤਿਆਦੀਸੁ ਵਿਯ ਗਮਨਤੋ ਪੁਰੇ ਕਤਮ੍ਪਿ ਓਲੋਕਨਂ ਪਚ੍ਛਾ ਕਤਂ ¶ ਵਿਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਓਲੋਕੇਸਿਨ੍ਤਿ ਚ ਲੋਕਵਿਵਰਣਪਾਟਿਹਾਰਿਯੇ ਜਾਤੇ ਮਂਸਚਕ੍ਖੁਨਾ ਵੋਲੋਕੇਸੀਤਿ ਅਤ੍ਥੋ. ਸੇਟ੍ਠੋਤਿ ਪਸਤ੍ਥਤਰੋ. ਪਤਿਮਾਨੇਸੀਤਿ ਪੂਜੇਸਿ. ਆਸਭਿਨ੍ਤਿ ਉਤ੍ਤਮਂ.

੩. ਤਂ ਵਚਨਨ੍ਤਿ ਨਾਹਂ ਤਂ ਬ੍ਰਾਹ੍ਮਣਾਤਿਆਦਿਵਚਨਂ. ਅਞ੍ਞਾਯ ਸਣ੍ਠਹੇਯ੍ਯਾਤਿ ਅਰਹਤ੍ਤੇ ਪਤਿਟ੍ਠਹੇਯ੍ਯ. ਜਾਤਿਵਸੇਨਾਤਿ ਖਤ੍ਤਿਯਾਦਿਜਾਤਿਵਸੇਨ. ਉਪਪਤ੍ਤਿਵਸੇਨਾਤਿ ਦੇਵੇਸੁ ਉਪਪਤ੍ਤਿਵਸੇਨ. ਆਵਿਞ੍ਛਨ੍ਤੀਤਿ ¶ ਆਕਡ੍ਢਨ੍ਤਿ. ਯਸ੍ਸ ਅਭਿਵਾਦਾਦਿਕਰਣਸਙ੍ਖਾਤਸ੍ਸ ਸਾਮਗ੍ਗਿਰਸਸ੍ਸ ਭਗਵਤਿ ਅਭਾਵਂ ਮਞ੍ਞਮਾਨੋ ਬ੍ਰਾਹ੍ਮਣੋ ‘‘ਅਰਸਰੂਪੋ’’ਤਿ ਆਹ, ਤਬ੍ਬਿਧੁਰਸ੍ਸ ਰੂਪਤਣ੍ਹਾਦਿਕਸ੍ਸੇਵ ਸਾਮਗ੍ਗਿਰਸਸ੍ਸ ਅਭਾਵੇਨ ਭਗਵਾ ‘‘ਅਰਸਰੂਪੋ’’ਤਿ ਦਸ੍ਸੇਤੁਂ ਸਾਮਗ੍ਗਿਰਸਸਦ੍ਦਸ੍ਸ ਰੂਪਰਸਾਦੀਸੁ ਵਤ੍ਤਨਪ੍ਪਕਾਰਂ ਦਸ੍ਸੇਨ੍ਤੋ ਆਹ ਵਤ੍ਥਾਰਮ੍ਮਣਾਦੀਤਿਆਦਿ.

ਤਾਲਾਵਤ੍ਥੁਕਤਾਤਿ ਉਚ੍ਛਿਨ੍ਨਮੂਲਾਨਂ ਤਾਲਾਨਂ ਵਤ੍ਥੁ ਵਿਯ ਨੇਸਂ ਰੂਪਰਸਾਦੀਨਂ ਵਤ੍ਥੁ ਚਿਤ੍ਤਸਨ੍ਤਾਨਂ ਕਤਨ੍ਤਿ ਇਮਸ੍ਮਿਂ ਅਤ੍ਥੇ ਮਜ੍ਝੇਪਦਲੋਪਂ ਦੀਘਞ੍ਚ ਕਤ੍ਵਾ ਨਿਦ੍ਦੇਸੋਤਿ ਆਹ ਤਾਲਵਤ੍ਥੁ ਵਿਯਾਤਿਆਦਿ. ਤਾਲਵਤ੍ਥੁ ਵਿਯ ਯੇਸਂ ਵਤ੍ਥੁ ਕਤਂ ਤੇ ਤਾਲਾਵਤ੍ਥੁਕਤਾਤਿ ਵਿਸੇਸਨਸ੍ਸ ਪਰਨਿਪਾਤੋ ਦਟ੍ਠਬ੍ਬੋ, ਕਤਤਾਲਵਤ੍ਥੁਕਾਤਿ ਅਤ੍ਥੋ. ਮਤ੍ਥਕਚ੍ਛਿਨ੍ਨਤਾਲੋਯੇਵ ਪਤ੍ਤਫਲਾਦੀਨਂ ਅਕਾਰਣਤਾਯ ਅਵਤ੍ਥੂਤਿ ਤਾਲਾਵਤ੍ਥੁ, ਤਂ ਵਿਯ ਯੇਸਂ ਵਤ੍ਥੁ ਕਤਂ ਤੇ ਰੂਪਰਸਾਦਯੋ ਤਾਲਾਵਤ੍ਥੁਕਤਾ, ਅਯਂ ਅਞ੍ਞਪਦਤ੍ਥਵਸੇਨ ਅਤ੍ਥਗ੍ਗਾਹੋ ਹੇਟ੍ਠਾ ਵੁਤ੍ਤਨਯੇਨ ਸੁਗਮੋਤਿ ਵਿਸੇਸਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਮਤ੍ਥਕਚ੍ਛਿਨ੍ਨਤਾਲੋ ਵਿਯ ਕਤਾ’’ਤਿ. ਏਵਞ੍ਚ ਮਤ੍ਥਕਸਦਿਸੇਸੁ ਰੂਪਰਸਾਦੀਸੁ ਰਾਗੇਸੁ ਛਿਨ੍ਨੇਸੁਪਿ ਤਬ੍ਬਤ੍ਥੁਭੂਤਸ੍ਸ ਤਾਲਾਵਤ੍ਥੁਸਦਿਸਸ੍ਸ ਚਿਤ੍ਤਸਨ੍ਤਾਨਸ੍ਸ ਯਾਵ ਪਰਿਨਿਬ੍ਬਾਨਟ੍ਠਾਨਂ ਉਪਪਨ੍ਨਮੇਵ ਹੋਤਿ. ਯਥਾਰੁਤਤੋ ਪਨ ਵਿਸੇਸਨਸਮਾਸਵਸੇਨ ਅਤ੍ਥੇ ਗਯ੍ਹਮਾਨੇ ਰੂਪਰਸਾਦੀਨਂ ਤਾਲਾਵਤ੍ਥੁਸਦਿਸਤਾਯ ਠਾਨਂ ਆਪਜ੍ਜਤਿ. ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੧.੩) ਏਤਂ ਦੋਸਂ ਪਰਿਹਰਿਤੁਂ ਰੂਪਰਸਾਦੀਨਂ ਕੁਸਲਾਕੁਸਲਤ੍ਤਂ ਵੁਤ੍ਤਂ, ਤਂ ਤੇ ਤਥਾਗਤਸ੍ਸ ਪਹੀਨਾਤਿਆਦਿਪਾਲ਼ਿਯਾ, ਕਾਮਸੁਖਸ੍ਸਾਦਸਙ੍ਖਾਤਾ ਰੂਪਰਸਾਤਿਆਦਿਅਟ੍ਠਕਥਾਯ ਚ ਨ ਸਮੇਤਿ, ਖੀਣਾਸਵਾਨਮ੍ਪਿ ਯਾਵ ਪਰਿਨਿਬ੍ਬਾਨਾ ਕੁਸਲਾਕੁਸਲਾਨਂ ਫਲੁਪ੍ਪਤ੍ਤਿਤੋ ਤੇਸਂ ਮਤ੍ਥਕਚ੍ਛਿਨ੍ਨਤਾਲਸਦਿਸਤਾਪਿ ਨ ਯੁਤ੍ਤਾਤਿ ਗਹੇਤਬ੍ਬਂ. ਅਥ ਵਾ ਮਤ੍ਥਕਚ੍ਛਿਨ੍ਨਤਾਲਸ੍ਸ ਠਿਤਂ ਅਟ੍ਠਿਤਞ੍ਚ ਅਮਨਸਿਕਤ੍ਵਾ ਪੁਨ ਅਨੁਪ੍ਪਤ੍ਤਿਧਮ੍ਮਤਾਸਦਿਸਮਤ੍ਤਂ ਉਪਮੇਤ੍ਵਾ ਤਾਲਾਵਤ੍ਥੁ ਵਿਯ ਕਤਾਤਿ ਵਿਸੇਸਨਸਮਾਸਵਸੇਨ ¶ ਅਤ੍ਥਗ੍ਗਹਣੇਪਿ ਨ ਕੋਚਿ ਦੋਸੋ. ਅਨੁ-ਸਦ੍ਦੋ ਪਚ੍ਛਾਤਿ ਅਤ੍ਥੇ ਵਤ੍ਤਤੀਤਿ ਆਹ ਪਚ੍ਛਾਭਾਵੋ ਨ ਹੋਤੀਤਿਆਦਿ. ਅਨੁ ਅਭਾਵਂ ਗਤਾਤਿ ਪਚ੍ਛਾ ਅਨੁਪ੍ਪਤ੍ਤਿਧਮ੍ਮਤਾਵਸੇਨ ਅਭਾਵਂ ਗਤਾ. ਅਨਚ੍ਛਰਿਯਾਤਿ ਅਨੁ ਅਨੁ ਉਪਰੂਪਰਿ ਵਿਮ੍ਹਯਕਤਾਤਿ ਅਤ੍ਥੋ. ਯਞ੍ਚ ਖੋ ਤ੍ਵਂ ਵਦੇਸੀਤਿ ਯਂ ਵਨ੍ਦਨਾਦਿਸਾਮਗ੍ਗੀਰਸਾਭਾਵਸਙ੍ਖਾਤਂ ਕਾਰਣਂ ਅਰਸਰੂਪਤਾਯ ਵਦੇਸਿ, ਤਂ ਕਾਰਣਂ ਨ ਵਿਜ੍ਜਤੀਤਿ ਅਤ੍ਥੋ.

੪. ਸਨ੍ਧਾਯ ਭਾਸਿਤਮਤ੍ਥਨ੍ਤਿ ਯਂ ਅਤ੍ਥਂ ਸਨ੍ਧਾਯ ਬ੍ਰਾਹ੍ਮਣੋ ਨਿਬ੍ਭੋਗੋ ਭਵਂ ਗੋਤਮੋਤਿਆਦਿਮਾਹ, ਭਗਵਾ ਚ ਯਂ ਸਨ੍ਧਾਯ ਨਿਬ੍ਭੋਗਤਾਦਿਂ ਅਤ੍ਤਨਿ ਅਨੁਜਾਨਾਤਿ, ਤਂ ਸਨ੍ਧਾਯ ਭਾਸਿਤਮਤ੍ਥਂ.

੫. ਕੁਲਸਮੁਦਾਚਾਰਕਮ੍ਮਨ੍ਤਿ ¶ ਕੁਲਾਚਾਰਕਮ੍ਮਂ. ਕਾਯਤੋ ਕਾਯਦ੍ਵਾਰਤੋ ਪਵਤ੍ਤਂ ਦੁਚ੍ਚਰਿਤਂ ਕਾਯਦੁਚ੍ਚਰਿਤਂ. ਅਨੇਕਵਿਹਿਤਾਤਿ ਅਨੇਕਪ੍ਪਕਾਰਾ.

੬. ਪਞ੍ਚਕਾਮਗੁਣਿਕਰਾਗਸ੍ਸਾਤਿ ਰੂਪਾਦੀਸੁ ਪਞ੍ਚਸੁ ਕਾਮਕੋਟ੍ਠਾਸੇਸੁ ਅਤਿਵਿਯ ਸਙ੍ਗਵਸੇਨ ਨਿਯੁਤ੍ਤਸ੍ਸ ਕਾਮਰਾਗਸ੍ਸ, ਏਤੇਨ ਅਨਾਗਾਮੀਨਂ ਵਤ੍ਥਾਭਰਣਾਦੀਸੁ ਸਙ੍ਗਨਿਕਨ੍ਤਿਵਸੇਨ ਉਪ੍ਪਜ੍ਜਨਕਾਮਰਾਗਸ੍ਸ ਕਾਮਰਾਗਤਾਭਾਵਂ ਦਸ੍ਸੇਤਿ ਤਸ੍ਸ ਰੂਪਰਾਗਾਦੀਸੁ ਸਙ੍ਗਹਤੋ. ਅਵਸੇਸਾਨਨ੍ਤਿ ਏਤ੍ਥ ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਨਂ ਪਠਮੇਨ ਮਗ੍ਗੇਨ, ਸੇਸਾਨਂ ਚਤੂਹਿਪਿ ਉਚ੍ਛੇਦਂ ਵਦਤਿ, ਤੇਨਾਹ ‘‘ਯਥਾਨੁਰੂਪ’’ਨ੍ਤਿ.

੭. ਜਿਗੁਚ੍ਛਤਿ ਮਞ੍ਞੇਤਿ ਜਿਗੁਚ੍ਛਤਿ ਵਿਯ, ‘‘ਜਿਗੁਚ੍ਛਤੀ’’ਤਿ ਵਾ ਸਲ੍ਲਕ੍ਖੇਮਿ. ਅਕੋਸਲ੍ਲਸਮ੍ਭੂਤਟ੍ਠੇਨਾਤਿ ਅਞ੍ਞਾਣਸਮ੍ਭੂਤਟ੍ਠੇਨ.

੮-੧੦. ਤਤ੍ਰਾਤਿ ਯਥਾਵੁਤ੍ਤੇਸੁ ਦ੍ਵੀਸੁ ਅਤ੍ਥਵਿਕਪ੍ਪੇਸੁ. ਪਟਿਸਨ੍ਧਿਪਰਿਯਾਯੋਪਿ ਇਧ ਗਬ੍ਭਸਦ੍ਦੋਤਿ ਆਹ ‘‘ਦੇਵਲੋਕਪਟਿਸਨ੍ਧਿਪਟਿਲਾਭਾਯਾ’’ਤਿ. ਅਪੁਨਬ੍ਭਵਭੂਤਾਤਿ ਖਣੇ ਖਣੇ ਉਪ੍ਪਜ੍ਜਮਾਨਾਨਂ ਧਮ੍ਮਾਨਂ ਅਭਿਨਿਬ੍ਬਤ੍ਤਿ.

੧੧. ਧਮ੍ਮਧਾਤੁਨ੍ਤਿ ਸਬ੍ਬਞ੍ਞੁਤਞ੍ਞਾਣਂ. ਤਞ੍ਹਿ ਧਮ੍ਮੇ ਯਾਥਾਵਤੋ ਧਾਰੇਤਿ ਉਪਧਾਰੇਤੀਤਿ ‘‘ਧਮ੍ਮਧਾਤੂ’’ਤਿ ਵੁਚ੍ਚਤਿ. ਦੇਸਨਾਵਿਲਾਸਪ੍ਪਤ੍ਤੋਤਿ ਅਭਿਰੁਚਿਵਸੇਨ ਪਰਿਵਤ੍ਤੇਤ੍ਵਾ ਦੇਸੇਤੁਂ ਸਮਤ੍ਥਤਾ ਦੇਸਨਾਵਿਲਾਸੋ, ਤਂ ਪਤ੍ਤੋ. ਕਰੁਣਾਵਿਪ੍ਫਾਰਨ੍ਤਿ ਸਬ੍ਬਸਤ੍ਤੇਸੁ ਮਹਾਕਰੁਣਾਯ ਫਰਣਂ. ਤਾਦਿਗੁਣਲਕ੍ਖਣਮੇਵ ਉਪਮਾਯ ਵਿਭਾਵੇਨ੍ਤੋ ਆਹ ‘‘ਪਥਵੀਸਮਚਿਤ੍ਤਤ’’ਨ੍ਤਿ. ਤਤੋਯੇਵ ¶ ਅਕੁਜ੍ਝਨਸਭਾਵਤੋ ਅਕੁਪ੍ਪਧਮ੍ਮਤਾ. ਜਾਤਿਯਾ ਅਨੁਗਤਨ੍ਤਿ ਜਾਤਿਯਾ ਅਨੁਬਦ੍ਧਂ. ਜਰਾਯ ਅਨੁਸਟਨ੍ਤਿ ਜਰਾਯ ਪਲਿਵੇਠਿਤਂ. ਵਟ੍ਟਖਾਣੁਭੂਤਨ੍ਤਿ ਵਟ੍ਟਤੋ ਉਦ੍ਧਰਿਤੁਂ ਅਸਕ੍ਕੁਣੇਯ੍ਯਤਾਯ ਵਟ੍ਟੇ ਨਿਚ੍ਚਲਭਾਵੇਨ ਠਿਤਂ ਖਾਣੁ ਵਿਯ ਭੂਤਂ. ਜਾਤਾਨਂ ਮਚ੍ਚਾਨਂ ਨਿਚ੍ਚਂ ਮਰਣਤੋ ਭਯਨ੍ਤਿ ਆਹ ਅਜ੍ਜ ਮਰਿਤ੍ਵਾਤਿਆਦਿ. ਅਪ੍ਪਟਿਸਮਂ ਪੁਰੇਜਾਤਭਾਵਨ੍ਤਿ ਅਸਦਿਸਂ ਅਰਿਯਾਯ ਜਾਤਿਯਾ ਪਠਮਜਾਤਭਾਵਂ, ਸਬ੍ਬਜੇਟ੍ਠਭਾਵਨ੍ਤਿ ਅਤ੍ਥੋ.

‘‘ਅਪੀ’’ਤਿ ਅਵਤ੍ਵਾ ‘‘ਪੀ’’ਤਿ ਵਦਨ੍ਤੋ ਪਿ-ਸਦ੍ਦੋ ਵਿਸੁਂ ਅਤ੍ਥਿ ਨਿਪਾਤੋਤਿ ਦਸ੍ਸੇਤਿ. ਸਮ੍ਮਾ ਅਧਿਸਯਿਤਾਨੀਤਿ ਪਾਦਾਦੀਹਿ ਉਪਘਾਤਂ ਅਕਰੋਨ੍ਤਿਯਾ ਸਮ੍ਮਦੇਵ ਉਪਰਿ ਸਯਿਤਾਨਿ, ਅਕਮ੍ਮਕਸ੍ਸਾਪਿ ਸਯਤਿਧਾਤੁਨੋ ਅਧਿਪੁਬ੍ਬਤਾਯ ਸਕਮ੍ਮਕਤਾ ਦਟ੍ਠਬ੍ਬਾ. ਨਖਸਿਖਾਤਿ ਨਖਗ੍ਗਾਨਿ. ਸਕੁਣਾਨਂ ¶ ਪਕ੍ਖਾ ਹਤ੍ਥਪਾਦਟ੍ਠਾਨਿਯਾਤਿ ਆਹ ‘‘ਸਙ੍ਕੁਟਿਤਹਤ੍ਥਪਾਦਾ’’ਤਿ. ਏਤ੍ਥਾਤਿ ਆਲੋਕਟ੍ਠਾਨੇ. ਨਿਕ੍ਖਮਨ੍ਤਾਨਨ੍ਤਿ ਨਿਕ੍ਖਮਨ੍ਤੇਸੁ, ਨਿਦ੍ਧਾਰਣੇ ਹੇਤਂ ਸਾਮਿਵਚਨਂ. ਅਣ੍ਡਕੋਸਨ੍ਤਿ ਅਣ੍ਡਕਪਾਲਂ.

ਲੋਕੋਯੇਵ ਲੋਕਸਨ੍ਨਿਵਾਸੋ. ਅਬੁਜ੍ਝਿ ਏਤ੍ਥਾਤਿ ਰੁਕ੍ਖੋ ਬੋਧਿ, ਸਯਂ ਬੁਜ੍ਝਤਿ, ਬੁਜ੍ਝਨ੍ਤਿ ਵਾ ਤੇਨਾਤਿ ਮਗ੍ਗੋਪਿ ਸਬ੍ਬਞ੍ਞੁਤਞ੍ਞਾਣਮ੍ਪਿ ਬੋਧਿ. ਬੁਜ੍ਝੀਯਤੀਤਿ ਨਿਬ੍ਬਾਨਂ ਬੋਧਿ. ਅਨ੍ਤਰਾ ਚ ਬੋਧਿਨ੍ਤਿ ਦੁਤਿਯਮੁਦਾਹਰਣਂ ਵਿਨਾਪਿ ਰੁਕ੍ਖ-ਸਦ੍ਦੇਨ ਬੋਧਿ-ਸਦ੍ਦਸ੍ਸ ਰੁਕ੍ਖਪ੍ਪਵਤ੍ਤਿਦਸ੍ਸਨਤ੍ਥਂ. ਵਰਭੂਰਿਮੇਧਸੋਤਿ ਮਹਾਪਥਵੀ ਵਿਯ ਪਤ੍ਥਟਪਞ੍ਞੋਤਿ ਅਤ੍ਥੋ. ਤਿਸ੍ਸੋ ਵਿਜ੍ਜਾਤਿ ਅਰਹਤ੍ਤਮਗ੍ਗੋ ਅਤ੍ਤਨਾ ਸਹ ਵਤ੍ਤਮਾਨਂ ਸਮ੍ਮਾਦਿਟ੍ਠਿਸਙ੍ਖਾਤਂ ਆਸਵਕ੍ਖਯਞਾਣਞ੍ਚੇਵ ਇਤਰਾ ਦ੍ਵੇ ਮਹਗ੍ਗਤਵਿਜ੍ਜਾ ਚ ਤਬ੍ਬਿਨਿਬਨ੍ਧਕਕਿਲੇਸਵਿਦ੍ਧਂਸਨਵਸੇਨ ਉਪ੍ਪਾਦਨਤੋ ‘‘ਤਿਸ੍ਸੋ ਵਿਜ੍ਜਾ’’ਤਿ ਵੁਚ੍ਚਤਿ. ਛ ਅਭਿਞ੍ਞਾਤਿ ਏਤ੍ਥਾਪਿ ਏਸੇਵ ਨਯੋ. ਸਾਵਕਪਾਰਮੀਞਾਣਨ੍ਤਿ ਅਗ੍ਗਸਾਵਕੇਹਿ ਪਟਿਲਭਿਤਬ੍ਬਂ ਸਬ੍ਬਮੇਵ ਲੋਕਿਯਲੋਕੁਤ੍ਤਰਞਾਣਂ. ਪਚ੍ਚੇਕਬੋਧਿਞਾਣਨ੍ਤਿ ਏਤ੍ਥਾਪਿ ਏਸੇਵ ਨਯੋ.

ਓਪਮ੍ਮਸਮ੍ਪਟਿਪਾਦਨਨ੍ਤਿ ਓਪਮ੍ਮਤ੍ਥਸ੍ਸ ਉਪਮੇਯ੍ਯੇਨ ਸਮਂ ਪਟਿਪਾਦਨਂ. ਅਤ੍ਥੇਨਾਤਿ ਉਪਮੇਯ੍ਯਤ੍ਥੇਨ. ਤਿਕ੍ਖਖਰਵਿਪ੍ਪਸਨ੍ਨਸੂਰਭਾਵੋਤਿ ਇਮਿਨਾ ਸਙ੍ਖਾਰੁਪੇਕ੍ਖਾਪਤ੍ਤਤਂ ਵਿਪਸ੍ਸਨਾਯ ਦਸ੍ਸੇਤਿ. ਪਰਿਣਾਮਕਾਲੋਤਿ ਇਮਿਨਾ ਵੁਟ੍ਠਾਨਗਾਮਿਨਿਭਾਵਾਪਤ੍ਤਿਂ. ਤਦਾ ਚ ਸਾ ਮਗ੍ਗਞਾਣਗਬ੍ਭਂ ਧਾਰੇਨ੍ਤੀ ਵਿਯ ਹੋਤੀਤਿ ਆਹ ‘‘ਗਬ੍ਭਗ੍ਗਹਣਕਾਲੋ’’ਤਿ. ਅਨੁਪੁਬ੍ਬਾਧਿਗਤੇਨਾਤਿ ਪਠਮਮਗ੍ਗਾਦਿਪਟਿਪਾਟਿਯਾ ਅਧਿਗਤੇਨ. ਚਤੁਰਙ੍ਗਸਮਨ੍ਨਾਗਤਨ੍ਤਿ ‘‘ਕਾਮਂ ਤਚੋ ਚ ਨ੍ਹਾਰੁ ਚ ਅਟ੍ਠਿ ਚ ਅਵਸਿਸ੍ਸਤੁ ¶ (ਮ. ਨਿ. ੨.੧੮੪; ਸਂ. ਨਿ. ੨.੨੨; ਅ. ਨਿ. ੨.੫; ਮਹਾਨਿ. ੧੯੬), ਸਰੀਰੇ ਉਪਸੁਸ੍ਸਤੁ ਮਂਸਲੋਹਿਤ’’ਨ੍ਤਿ ਏਵਂ ਵੁਤ੍ਤਚਤੁਰਙ੍ਗਸਮਨ੍ਨਾਗਤਂ ਵੀਰਿਯਂ.

ਛਨ੍ਦੋ ਕਾਮੋਤਿਆਦੀਸੁ ਪਤ੍ਥਨਾਕਾਰੇਨ ਪਵਤ੍ਤੋ ਦੁਬ੍ਬਲੋ ਲੋਭੋ ਇਚ੍ਛਨਟ੍ਠੇਨ ਛਨ੍ਦੋ. ਤਤੋ ਬਲਵਾ ਰਞ੍ਜਨਟ੍ਠੇਨ ਰਾਗੋ. ਤਤੋਪਿ ਬਲਵਤਰੋ ਛਨ੍ਦਰਾਗੋ. ਨਿਮਿਤ੍ਤਾਨੁਬ੍ਯਞ੍ਜਨਸਙ੍ਕਪ੍ਪਵਸੇਨ ਪਵਤ੍ਤੋ ਸਙ੍ਕਪ੍ਪੋ. ਤਤੋਪਿ ਬਲਵਸਙ੍ਕਪ੍ਪਵਸੇਨੇਵ ਪਵਤ੍ਤੋ ਰਾਗੋ. ਤਤੋਪਿ ਬਲਵਤਰੋ ਸਙ੍ਕਪ੍ਪਰਾਗੋ. ਸ੍ਵਾਯਂ ਪਭੇਦੋ ਏਕਸ੍ਸੇਵ ਲੋਭਸ੍ਸ ਪਵਤ੍ਤਿਆਕਾਰਭੇਦੇਨ ਅਵਤ੍ਥਾਭੇਦੇਨ ਚ ਵੁਤ੍ਤੋ.

ਪਠਮਜ੍ਝਾਨਕਥਾਵਣ੍ਣਨਾ

ਸੇਯ੍ਯਥਿਦਨ੍ਤਿ ਤਂ ਕਥਨ੍ਤਿ ਅਤ੍ਥੋ. ਏਤਨ੍ਤਿ ਪੁਬ੍ਬਪਦੇਯੇਵ ਅਵਧਾਰਣਕਰਣਂ, ਏਤਂ ਅਤ੍ਥਜਾਤਂ ਵਾ. ਤਨ੍ਨਿਸ੍ਸਰਣਤੋਤਿ ਤੇਸਂ ਕਾਮਾਨਂ ਨਿਸ੍ਸਰਣਤ੍ਤਾ. ਏਸਾਤਿ ਏਵ-ਕਾਰੋ. ਕਾਮਧਾਤੁ ਨਾਮ ਕਾਮਭਵੋ, ਨੇਕ੍ਖਮ੍ਮਨ੍ਤਿ ਪਠਮਜ੍ਝਾਨਂ. ਏਸਾਤਿ ਨਿਯਮੋ. ਤਦਙ੍ਗਵਿਕ੍ਖਮ੍ਭਨਸਮੁਚ੍ਛੇਦਪਟਿਪ੍ਪਸ੍ਸਦ੍ਧਿਨਿਸ੍ਸਰਣਵਿਵੇਕਾ ¶ ਤਦਙ੍ਗਵਿਵੇਕਾਦਯੋ. ਕਾਯਚਿਤ੍ਤਉਪਧਿਵਿਵੇਕਾ ਕਾਯਵਿਵੇਕਾਦਯੋ, ਤਯੋ ਏਵ ਇਧ ਝਾਨਕਥਾਯ, ਸਮੁਚ੍ਛੇਦਵਿਵੇਕਾਦੀਨਂ ਅਸਮ੍ਭਵਾ. ਨਿਦ੍ਦੇਸੇਤਿ ਮਹਾਨਿਦ੍ਦੇਸੇ. ਤਤ੍ਥੇਵਾਤਿ ਮਹਾਨਿਦ੍ਦੇਸੇ ਏਵ. ਵਿਭਙ੍ਗੇਤਿ ਝਾਨਵਿਭਙ੍ਗੇ. ਏਵਞ੍ਹਿ ਸਤੀਤਿ ਉਭਯੇਸਮ੍ਪਿ ਕਾਮਾਨਂ ਸਙ੍ਗਹੇ ਸਤਿ.

ਪੁਰਿਮੇਨਾਤਿ ਕਾਯਵਿਵੇਕੇਨ. ਏਤ੍ਥਾਤਿ ਏਤਸ੍ਮਿਂ ਕਾਯਚਿਤ੍ਤਵਿਵੇਕਦ੍ਵਯੇ. ਦੁਤਿਯੇਨਾਤਿ ਚਿਤ੍ਤਵਿਵੇਕੇਨ. ਏਤੇਸਨ੍ਤਿ ਯਥਾਵੁਤ੍ਤਨਯੇਨ ਵਤ੍ਥੁਕਾਮਕਿਲੇਸਕਾਮਵਿਵੇਕਦ੍ਵਯਸ੍ਸ ਵਾਚਕਭੂਤਾਨਂ ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹੀਤਿ ਇਮੇਸਂ ਪਦਾਨਂ, ਨਿਦ੍ਧਾਰਣੇ ਚੇਤਂ ਸਾਮਿਵਚਨਂ. ਬਾਲਭਾਵਸ੍ਸ ਹੇਤੁਪਰਿਚ੍ਚਾਗੋਤਿ ਅਨੁਵਤ੍ਤਤਿ. ਅਕੁਸਲਧਮ੍ਮੋ ਹਿ ਬਾਲਭਾਵਸ੍ਸ ਹੇਤੁ. ਆਸਯਪੋਸਨਨ੍ਤਿ ਆਸਯਸ੍ਸ ਵਿਸੋਧਨਂ ਵਡ੍ਢਨਞ੍ਚ. ਵਿਭਙ੍ਗੇ ਨੀਵਰਣਾਨੇਵ ਵੁਤ੍ਤਾਨੀਤਿ ਸਮ੍ਬਨ੍ਧੋ. ਤਤ੍ਥ ਕਾਰਣਮਾਹ ‘‘ਉਪਰਿਝਾਨਙ੍ਗਪਚ੍ਚਨੀਕਪਟਿਪਕ੍ਖਭਾਵਦਸ੍ਸਨਤੋ’’ਤਿ. ਤਤ੍ਥ ਉਪਰਿ ਸਵਿਤਕ੍ਕਨ੍ਤਿਆਦਿਨਾ ਵੁਚ੍ਚਮਾਨਾਨਿ ਝਾਨਙ੍ਗਾਨਿ, ਤੇਸਂ ਅਤ੍ਤਨੋ ਪਚ੍ਚਨੀਕਾਨਂ ਪਟਿਪਕ੍ਖਭਾਵਦਸ੍ਸਨਤੋਤਿ ਅਤ੍ਥੋ. ਉਪਰਿਝਾਨਙ੍ਗਾਨਂ ਪਚ੍ਚਨੀਕਪਟਿਪਕ੍ਖਭਾਵਸ੍ਸ ਦਸ੍ਸਨਤੋਤਿਪਿ ਪਾਠੋ. ਤਤ੍ਥ ‘‘ਉਪਰਿ ਵੁਚ੍ਚਮਾਨਝਾਨਙ੍ਗਾਨਂ ਉਜੁਵਿਪਚ੍ਚਨੀਕਵਸੇਨ ਪਟਿਪਕ੍ਖਭਾਵਦਸ੍ਸਨਤੋ’’ਤਿ ‘‘ਨੀਵਰਣਾਨਂ ਤਾਨੇਵ ਵਿਭਙ੍ਗੇ ਵੁਤ੍ਤਾਨੀ’’ਤਿਪਿ ਅਤ੍ਥਂ ਵਦਨ੍ਤਿ ¶ . ਪੇਟਕੇਤਿ ਮਹਾਕਚ੍ਚਾਯਨਤ੍ਥੇਰੇਨ ਕਤਂ ਨੇਤ੍ਤਿਪ੍ਪਕਰਣਨਯਾਨੁਸਾਰਿਪਕਰਣਂ, ਤਂ ਪਨ ਪਿਟਕਾਨਂ ਵਣ੍ਣਨਾਭੂਤਤ੍ਤਾ ‘‘ਪੇਟਕ’’ਨ੍ਤਿ ਵੁਤ੍ਤਂ, ਤਸ੍ਮਿਨ੍ਤਿ ਅਤ੍ਥੋ.

ਵਿਤਕ੍ਕਨਂ ਨਾਮ ਆਰਮ੍ਮਣਪਰਿਕਪ੍ਪਨਨ੍ਤਿ ਆਹ ‘‘ਊਹਨ’’ਨ੍ਤਿ. ਰੂਪਂ ਰੂਪਨ੍ਤਿਆਦਿਨਾ ਵਿਸਯੇ ਆਕੋਟੇਨ੍ਤਸ੍ਸ ਵਿਸਯਪ੍ਪਵਤ੍ਤਿਆਹਨਨਂ ਉਪਰਿ ਆਹਨਨਨ੍ਤਿ ਵੇਦਿਤਬ੍ਬਂ. ਆਰਮ੍ਮਣੇ ਚਿਤ੍ਤਸ੍ਸ ਆਨਯਨਂ ਨਾਮ ਆਰਮ੍ਮਣਾਭਿਮੁਖਕਰਣਂ. ਅਨੁਸਞ੍ਚਰਣਨ੍ਤਿ ਅਨੁਪਰਿਬ੍ਭਮਨਂ, ਤਞ੍ਚ ਖਣਨ੍ਤਰਸ੍ਸ ਤਥਾਕਾਰੇਨ ਉਪ੍ਪਾਦਨਮੇਵ, ਨ ਹਿ ਪਰਮਤ੍ਥਤੋ ਏਕਸ੍ਸ ਸਞ੍ਚਰਣਮਤ੍ਥਿ, ਏਵਮਞ੍ਞਤ੍ਥਾਪਿ ਈਦਿਸੇਸੁ. ਅਨੁਮਜ੍ਜਨਨ੍ਤਿ ਪਰਿਮਜ੍ਜਨਂ. ਤਤ੍ਥਾਤਿ ਆਰਮ੍ਮਣੇ. ਸਹਜਾਤਾਨੁਯੋਜਨਂ ਸਕਿਚ੍ਚਾਨੁਵਤ੍ਤਿਤਾਕਰਣੇਨ. ਕਤ੍ਥਚੀਤਿ ਦੁਤਿਯਜ੍ਝਾਨਵਿਰਹਿਤੇਸੁ ਸਵਿਚਾਰਚਿਤ੍ਤੇਸੁ ਸਬ੍ਬਤ੍ਥਾਤਿ ਅਤ੍ਥੋ. ਵਿਚਾਰੇਨ ਸਹ ਉਪ੍ਪਜ੍ਜਮਾਨੋਪਿ ਵਿਤਕ੍ਕੋ ਆਰਮ੍ਮਣੇ ਅਭਿਨਿਰੋਪਨਾਕਾਰੇਨ ਪਵਤ੍ਤਿਂ ਸਨ੍ਧਾਯ ‘‘ਪਠਮਾਭਿਨਿਪਾਤੋ’’ਤਿ ਵੁਤ੍ਤੋ. ਵਿਪ੍ਫਾਰਵਾਤਿ ਅਵੂਪਸਨ੍ਤਸਭਾਵਤਾਯ ਵੇਗਵਾ, ਤੇਨੇਵੇਸ ਦੁਤਿਯਜ੍ਝਾਨੇ ਪਹਾਨਙ੍ਗਂ ਜਾਤਂ. ਪਠਮਦੁਤਿਯਜ੍ਝਾਨੇਸੂਤਿ ਪਞ੍ਚਕਨਯਂ ਸਨ੍ਧਾਯ ਵੁਤ੍ਤਂ. ਅਙ੍ਗਵਿਨਿਮੁਤ੍ਤਸ੍ਸ ਝਾਨਸ੍ਸ ਅਭਾਵਂ ਦਸ੍ਸੇਨ੍ਤੋ ਰੁਕ੍ਖੋ ਵਿਯਾਤਿਆਦਿਮਾਹ.

ਵਿਵੇਕ-ਸਦ੍ਦਸ੍ਸ ਭਾਵਸਾਧਨਪਕ੍ਖੇ ‘‘ਤਸ੍ਮਾ ਵਿਵੇਕਾ’’ਤਿ ਵੁਤ੍ਤਂ, ਇਤਰਪਕ੍ਖੇ ‘‘ਤਸ੍ਮਿਂ ਵਿਵੇਕੇ’’ਤਿ. ਪਿਨਯਤੀਤਿ ਤਪ੍ਪੇਤਿ, ਵਡ੍ਢੇਤਿ ਵਾ. ਫਰਣਰਸਾਤਿ ਪਣੀਤਰੂਪੇਹਿ ਕਾਯੇ ਬ੍ਯਾਪਨਰਸਾ. ਸਾਤਲਕ੍ਖਣਨ੍ਤਿ ¶ ਇਟ੍ਠਸਭਾਵਂ, ਮਧੁਰਨ੍ਤਿ ਅਤ੍ਥੋ. ਸਮ੍ਪਯੁਤ੍ਤਾਨਂ ਪੀਲ਼ਨਜ੍ਝੁਪੇਕ੍ਖਨਂ ਅਕਤ੍ਵਾ ਅਨੁ ਅਨੁ ਗਣ੍ਹਨਂ ਉਪਕਾਰਿਤਾ ਵਾ ਅਨੁਗ੍ਗਹੋ. ਵਨਮੇਵ ਵਨਨ੍ਤਂ. ਉਦਕਮੇਵ ਉਦਕਨ੍ਤਂ. ਤਸ੍ਮਿਂ ਤਸ੍ਮਿਂ ਸਮਯੇ ਪਾਕਟਭਾਵਤੋਤਿ ਇਮਿਨਾ ਇਟ੍ਠਾਰਮ੍ਮਣਾਦਿਪਟਿਲਾਭਸਮਯੇਪਿ ਸੁਖਂ ਵਿਜ੍ਜਮਾਨਮ੍ਪਿ ਅਪਾਕਟਂ, ਪੀਤਿਯੇਵ ਤਤ੍ਥ ਪਾਕਟਾ, ਪਟਿਲਦ੍ਧਰਸਾਨੁਭਵਨਸਮਯੇ ਚ ਵਿਜ੍ਜਮਾਨਪੀਤਿਤੋਪਿ ਸੁਖਮੇਵ ਪਾਕਟਤਰਨ੍ਤਿ ਦਸ੍ਸੇਤਿ. ਏਤ੍ਥ ਚ ਚੇਤਸਿਕਸੁਖਵਸੇਨੇਵ ਪਟਿਲਦ੍ਧਰਸਾਨੁਭਵਨਂ ਵੇਦਿਤਬ੍ਬਂ, ਨ ਕਾਯਿਕਸੁਖਵਸੇਨ ਤਸ੍ਸ ਪੀਤਿਸਮ੍ਪਯੋਗਸ੍ਸੇਵ ਅਭਾਵੇਨ ਇਧਾਨਧਿਪ੍ਪੇਤਤ੍ਤਾ. ਅਯਞ੍ਚ ਪੀਤੀਤਿਆਦਿ ਅਞ੍ਞਪਦਤ੍ਥਸਮਆਸਦਸ੍ਸਨਂ, ਅਸ੍ਸਤ੍ਥਿਪਕ੍ਖੇ ਤਦ੍ਧਿਤਪਚ੍ਚਯਦਸ੍ਸਨਂ ਵਾ. ਦੁਤਿਯਵਿਕਪ੍ਪੇਨ ਅਞ੍ਞਪਦਤ੍ਥਸਮਾਸਵਸੇਨੇਵ ‘‘ਵਿਵੇਕਜਂ ਪੀਤਿਸੁਖ’’ਨ੍ਤਿ ਇਦਂ ਏਕਂ ਪਦਨ੍ਤਿ ਦਸ੍ਸੇਤਿ, ਵਿਭਤ੍ਤਿਯਾ ਚ ਅਲੋਪਂ.

ਗਣਨਾਨੁਪੁਬ੍ਬਤਾਤਿ ¶ ਦੇਸਨਾਕ੍ਕਮਂ ਸਨ੍ਧਾਯ ਵੁਤ੍ਤਂ. ਪਠਮਂ ਸਮਾਪਜ੍ਜਤੀਤਿ ਇਦਂ ਆਦਿਕਮ੍ਮਿਕਵਸੇਨ ਵੁਤ੍ਤਂ, ਚਿਣ੍ਣਵਸੀਨਂ ਪਨ ਯੋਗੀਨਂ ਉਪ੍ਪਟਿਪਾਟਿਯਾਪਿ ਝਾਨਂ ਉਪ੍ਪਜ੍ਜਤੇਵ. ਝਾਪੇਤੀਤਿ ਦਹਤਿ. ਅਨਿਚ੍ਚਾਦਿਲਕ੍ਖਣਵਿਸਯਾਯ ਵਿਪਸ੍ਸਨਾਯ ਉਪਨਿਜ੍ਝਾਯਨਂ ਕਥਂ ਨਿਬ੍ਬਾਨਾਲਮ੍ਬਨਸ੍ਸ ਮਗ੍ਗਸ੍ਸ ਹੋਤੀਤਿ ਆਹ ਵਿਪਸ੍ਸਨਾਯਾਤਿਆਦਿ. ਤਤ੍ਥ ਮਗ੍ਗੇਨ ਸਿਜ੍ਝਤੀਤਿ ਨਿਚ੍ਚਾਦਿਵਿਪਲ੍ਲਾਸਪ੍ਪਹਾਯਕੇਨ ਸਹ ਮਗ੍ਗੇਨੇਵ ਤਂ ਲਕ੍ਖਣੂਪਨਿਜ੍ਝਾਨਂ ਅਸਮ੍ਮੋਹਤੋ ਅਤ੍ਤਨੋ ਸਿਜ੍ਝਤਿ. ਅਥ ਵਾ ਮਗ੍ਗੇਨਾਤਿ ਮਗ੍ਗਕਿਚ੍ਚੇਨ, ਵਿਪਲ੍ਲਾਸਪ੍ਪਹਾਨੇਨਾਤਿ ਅਤ੍ਥੋ.

ਅਞ੍ਞੋਤਿ ਸਤ੍ਤੋ. ਅਵੁਤ੍ਤਤ੍ਤਾਤਿ ‘‘ਸਚਿਤ੍ਤੇਕਗ੍ਗਤ’’ਨ੍ਤਿ ਝਾਨਪਾਲ਼ਿਯਂ (ਵਿਭ. ੫੦੮ ਆਦਯੋ) ਅਵੁਤ੍ਤਤ੍ਤਾ. ਵੁਤ੍ਤਤ੍ਤਾਤਿ ਤਸ੍ਸਾ ਝਾਨਪਾਲ਼ਿਯਾ ਵਿਭਙ੍ਗੇ ਵੁਤ੍ਤਤ੍ਤਾ.

ਦੁਤਿਯਜ੍ਝਾਨਕਥਾਵਣ੍ਣਨਾ

ਅਜ੍ਝਤ੍ਤਨ੍ਤਿ ਝਾਨਵਿਸੇਸਨਤ੍ਤਾ ਵੁਤ੍ਤਂ ‘‘ਇਧ ਨਿਯਕਜ੍ਝਤ੍ਤਮਧਿਪ੍ਪੇਤ’’ਨ੍ਤਿ. ਝਾਨਞ੍ਹਿ ਅਜ੍ਝਤ੍ਤਜ੍ਝਤ੍ਤਂ ਨ ਹੋਤਿ ਛਲ਼ਿਨ੍ਦ੍ਰਿਯਾਨਮੇਵ ਤਬ੍ਭਾਵਤੋ. ਖੁਦ੍ਦਕਾ ਊਮਿਯੋ ਵੀਚਿਯੋ. ਮਹਤਿਯੋ ਤਰਙ੍ਗਾ. ਸਨ੍ਤਾ ਹੋਨ੍ਤਿ ਸਮਿਤਾਤਿਆਦੀਨਿ ਅਞ੍ਞਮਞ੍ਞਵੇਵਚਨਾਨਿ, ਝਾਨਬਲੇਨ ਸਮਤਿਕ੍ਕਨ੍ਤਾਤਿ ਅਧਿਪ੍ਪਾਯੋ. ਅਪ੍ਪਿਤਾਤਿ ਗਮਿਤਾ ਵਿਨਾਸਂ ਪਾਪਿਤਾ. ਪਰਿਯਾਯੋਤਿ ਝਾਨਪਰਿਕ੍ਖਾਰੇ ਝਾਨਵੋਹਾਰਤ੍ਤਾ ਅਪਰਮਤ੍ਥਤੋ.

ਤਤਿਯਜ੍ਝਾਨਕਥਾਵਣ੍ਣਨਾ

ਤਦਧਿਗਮਾਯਾਤਿ ਤਤਿਯਮਗ੍ਗਾਧਿਗਮਾਯ. ਉਪਪਤ੍ਤਿਤੋ ਇਕ੍ਖਤੀਤਿ ਪਞ੍ਞਾਯ ਸਹਚਰਣਪਰਿਚਯੇਨ ਯਥਾ ¶ ਸਮਵਾਹਿਭਾਵੋ ਹੋਤਿ, ਏਵਂ ਯੁਤ੍ਤਿਤੋ ਪਸ੍ਸਤਿ. ਵਿਪੁਲਾਯਾਤਿ ਮਹਗ੍ਗਤਭਾਵਪ੍ਪਤ੍ਤਾਯ. ਥਾਮਗਤਾਯਾਤਿ ਵਿਤਕ੍ਕਵਿਚਾਰਪੀਤਿਵਿਗਮੇਨ ਥਿਰਭਾਵਪ੍ਪਤ੍ਤਿਯਾ, ਤੇਨੇਵ ਵਕ੍ਖਤਿ ‘‘ਵਿਤਕ੍ਕਵਿਚਾਰਪੀਤੀਹਿ ਅਨਭਿਭੂਤਤ੍ਤਾ’’ਤਿਆਦਿ. (ਪਾਰਾ. ਅਟ੍ਠ. ੧.੧੧ ਤਤਿਯਜ੍ਝਾਨਕਥਾ). ਉਪੇਕ੍ਖਾਭੇਦਂ ਦਸ੍ਸੇਤ੍ਵਾ ਇਧਾਧਿਪ੍ਪੇਤਂ ਉਪੇਕ੍ਖਂ ਪਕਾਸੇਤੁਂ ਉਪੇਕ੍ਖਾ ਪਨਾਤਿਆਦਿ ਵੁਤ੍ਤਂ. ਤਤ੍ਥ ਤਤ੍ਰਮਜ੍ਝਤ੍ਤਤਾਵ ਖੀਣਾਸਵਾਨਂ ਇਟ੍ਠਾਨਿਟ੍ਠਛਲ਼ਾਰਮ੍ਮਣਾਪਾਥੇ ਪਰਿਸੁਦ੍ਧਪਕਤਿਭਾਵਾਵਿਜਹਨਾਕਾਰੇਨ ਅਜ੍ਝੁਪੇਕ੍ਖਨਤੋ ‘‘ਛਲ਼ਙ੍ਗੁਪੇਕ੍ਖਾ’’ਤਿ ਚ, ਸਤ੍ਤੇਸੁ ਮਜ੍ਝਤ੍ਤਾਕਾਰਪ੍ਪਵਤ੍ਤਤ੍ਤਾ ‘‘ਬ੍ਰਹ੍ਮਵਿਹਾਰੁਪੇਕ੍ਖਾ’’ਤਿ ਚ, ਸਹਜਾਤਧਮ੍ਮਾਨਂ ਮਜ੍ਝਤ੍ਤਾਕਾਰਭੂਤਾ ‘‘ਬੋਜ੍ਝਙ੍ਗੁਪੇਕ੍ਖਾ’’ਤਿ ਚ, ਕੇਵਲਾ ‘‘ਤਤ੍ਰਮਜ੍ਝਤ੍ਤੁਪੇਕ੍ਖਾ’’ਤਿ ¶ ਚ, ਤਤਿਯਜ੍ਝਾਨਸਹਗਤਾ ਅਗ੍ਗਸੁਖੇਪਿ ਤਸ੍ਮਿਂ ਅਪਕ੍ਖਪਾਤਭੂਤਾ ‘‘ਝਾਨੁਪੇਕ੍ਖਾ’’ਤਿ ਚ, ਚਤੁਤ੍ਥਜ੍ਝਾਨਸਹਗਤਾ ਸਬ੍ਬਪਚ੍ਚਨੀਕਪਰਿਸੁਦ੍ਧਿਤਾਯ ‘‘ਪਾਰਿਸੁਦ੍ਧੁਪੇਕ੍ਖਾ’’ਤਿ ਚ ਤੇਨ ਤੇਨ ਅਵਤ੍ਥਾਭੇਦੇਨ ਛਧਾ ਵੁਤ੍ਤਾ.

ਵੀਰਿਯਮੇਵ ਪਨ ਅਨਚ੍ਚਾਰਦ੍ਧਅਨਤਿਸਿਥਿਲੇਸੁ ਸਹਜਾਤੇਸੁ ਸਙ੍ਖਾਰੇਸੁ ਉਪੇਕ੍ਖਨਾਕਾਰੇਨ ਪਵਤ੍ਤਂ ‘‘ਵੀਰਿਯੁਪੇਕ੍ਖਾ’’ਤਿ ਵੁਤ੍ਤਂ. ਅਟ੍ਠਨ੍ਨਂ ਰੂਪਾਰੂਪਜ੍ਝਾਨਾਨਂ ਪਟਿਲਾਭਤੋ ਪੁਬ੍ਬਭਾਗੇ ਏਵ ਨੀਵਰਣਵਿਤਕ੍ਕਵਿਚਾਰਾਦੀਨਂ ਪਹਾਨਾਭਿਮੁਖੀਭੂਤਤ੍ਤਾ ਤੇਸਂ ਪਹਾਨੇਪਿ ਅਬ੍ਯਾਪਾਰਭਾਵੂਪਗਮਨੇਨ ਮਜ੍ਝਤ੍ਤਾਕਾਰਪ੍ਪਵਤ੍ਤਾ ਸਮਾਧਿਵਸੇਨ ਉਪ੍ਪਨ੍ਨਾ ਅਟ੍ਠ ਪਞ੍ਞਾ ਚੇਵ ਉਪਾਦਾਨਕ੍ਖਨ੍ਧਭੂਤੇਸੁ ਸਙ੍ਖਾਰੇਸੁ ਅਜ੍ਝੁਪੇਕ੍ਖਨਾਕਾਰਪ੍ਪਵਤ੍ਤਾ ਵਿਪਸ੍ਸਨਾਵਸੇਨ ਉਪ੍ਪਨ੍ਨਾ ਚਤੁਨ੍ਨਂ ਮਗ੍ਗਾਨਂ ਪੁਬ੍ਬਭਾਗੇ ਤਸ੍ਸ ਤਸ੍ਸ ਅਧਿਗਮਾਯ ਚਤਸ੍ਸੋ ਚਤੁਨ੍ਨਂ ਫਲਸਮਾਪਤ੍ਤੀਨਂ ਪੁਬ੍ਬਭਾਗੇ ਤਸ੍ਸ ਤਸ੍ਸ ਅਧਿਗਮਾਯ ਅਪ੍ਪਣਿਹਿਤਵਿਮੋਕ੍ਖਵਸੇਨ ਪਵਤ੍ਤਾ ਚਤਸ੍ਸੋ ਸੁਞ੍ਞਤਅਨਿਮਿਤ੍ਤਵਿਮੋਕ੍ਖਵਸੇਨ ਦ੍ਵੇਤਿ ਦਸ ਪਞ੍ਞਾ ਚਾਤਿ ਇਮੇ ਅਟ੍ਠਾਰਸ ਪਞ੍ਞਾ ਸਙ੍ਖਾਰੁਪੇਕ੍ਖਾ ਨਾਮ. ਯਥਾਵੁਤ੍ਤਵਿਪਸ੍ਸਨਾਪਞ੍ਞਾਵ ਲਕ੍ਖਣਵਿਚਿਨਨੇਪਿ ਮਜ੍ਝਤ੍ਤਭੂਤਾ ਵਿਪਸ੍ਸਨੁਪੇਕ੍ਖਾ ਨਾਮ. ਅਦੁਕ੍ਖਮਸੁਖਵੇਦਨਾ ਵੇਦਨੁਪੇਕ੍ਖਾ ਨਾਮ. ਇਮਾਸਂ ਪਨ ਦਸਨ੍ਨਮ੍ਪਿ ਉਪੇਕ੍ਖਾਨਂ ‘‘ਤਤ੍ਥ ਤਤ੍ਥ ਆਗਤਨਯਤੋ ਵਿਭਾਗੋ ਧਮ੍ਮਸਙ੍ਗਹਟ੍ਠਕਥਾਯਂ ਵੁਤ੍ਤਨਯੇਨ ਵੇਦਿਤਬ੍ਬੋ’’ਤਿ ਦਸ੍ਸੇਨ੍ਤੋ ਆਹ ਏਵਮਯਂ ਦਸਵਿਧਾਪੀਤਿਆਦਿ. ਤਤ੍ਥ ਤਤ੍ਥ ਆਗਤਨਯਤੋਤਿ ਇਦਮ੍ਪਿ ਹਿ ਤਾਸਂ ਵਿਭਾਗਦਸ੍ਸਨਸ੍ਸ ਭੂਮਿਪੁਗ੍ਗਲਾਦਿਪਦਂ ਵਿਯ ਵਿਸੁਂ ਮਾਤਿਕਾਪਦਵਸੇਨ ਵੁਤ੍ਤਂ, ਨ ਪਨ ਭੂਮਿਪੁਗ੍ਗਲਾਦਿਵਸੇਨ ਵਿਭਾਗਦਸ੍ਸਨਸ੍ਸ ਆਗਤਟ੍ਠਾਨਪਰਾਮਸਨਂ ਆਗਤਟ੍ਠਾਨਸ੍ਸ ਅਟ੍ਠਸਾਲਿਨਿਯਾਤਿਆਦਿਨਾ ਵੁਤ੍ਤਤ੍ਤਾ, ਤਸ੍ਮਾ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੧.੧੧ ਤਤਿਯਜ੍ਝਾਨਕਥਾ) ਯਂ ਵੁਤ੍ਤਂ ‘‘ਇਮਾਸਂ ਪਨ ਦਸਨ੍ਨਮ੍ਪਿ ਉਪੇਕ੍ਖਾਨਂ ਭੂਮਿਪੁਗ੍ਗਲਾਦਿਵਸੇਨ ਵਿਭਾਗੋ ਤਤ੍ਥ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ ਦਸ੍ਸੇਨ੍ਤੋ ਆਹ ਏਵਮਯਂ ਦਸਵਿਧਾਤਿਆਦੀ’’ਤਿ, ਤਂ ਅਮਨਸਿਕਤ੍ਵਾ ਵੁਤ੍ਤਨ੍ਤਿ ਗਹੇਤਬ੍ਬਂ. ਤਤ੍ਥ ਤਤ੍ਥ ਆਗਤਨਯਤੋਤਿ ‘‘ਇਧ (ਖੀਣਾਸਵੋ) ਭਿਕ੍ਖੁ ਚਕ੍ਖੁਨਾ ਰੂਪਂ ਦਿਸ੍ਵਾ ਨੇਵ ਸੁਮਨੋ ਹੋਤਿ, ਨ ਦੁਮ੍ਮਨੋ, ਉਪੇਕ੍ਖਕੋ ਵਿਹਰਤਿ ਸਤੋ ਸਮ੍ਪਜਾਨੋ’’ਤਿਆਦਿਨਾ (ਦੀ. ਨਿ. ੩.੩੪੮; ਅ. ਨਿ. ੬.੧) ਛਲ਼ਙ੍ਗੁਪੇਕ੍ਖਾ ਆਗਤਾ, ‘‘ਉਪੇਕ੍ਖਾਸਹਗਤੇਨ ¶ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤੀ’’ਤਿ (ਦੀ. ਨਿ. ੩.੩੦੮; ਮ. ਨਿ. ੧.੭੭; ੨.੩੦੯; ੩.੨੩੦) ਏਵਂ ਬ੍ਰਹ੍ਮਵਿਹਾਰੁਪੇਕ੍ਖਾ ਆਗਤਾਤਿ ਇਮਿਨਾ ਨਯੇਨ ¶ ਦਸਨ੍ਨਮ੍ਪਿ ਉਪੇਕ੍ਖਾਨਂ ਤਤ੍ਥ ਤਤ੍ਥ ਵੁਤ੍ਤਪਦੇਸੇਸੁ ਆਗਤਨਯਦਸ੍ਸਨਤੋ ਚ ਅਯਂ ਦਸਵਿਧਾਪਿ ਉਪੇਕ੍ਖਾ ਧਮ੍ਮਸਙ੍ਗਹਟ੍ਠਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਾਤਿ ਸਮ੍ਬਨ੍ਧੋ.

ਭੂਮੀਤਿਆਦੀਸੁ ਪਨ ਛਲ਼ਙ੍ਗੁਪੇਕ੍ਖਾ ਕਾਮਾਵਚਰਾ, ਬ੍ਰਹ੍ਮਵਿਹਾਰੁਪੇਕ੍ਖਾ ਰੂਪਾਵਚਰਾਤਿਆਦਿਨਾ ਭੂਮਿਤੋ ਚ, ਛਲ਼ਙ੍ਗੁਪੇਕ੍ਖਾ ਅਸੇਕ੍ਖਾਨਮੇਵ, ਬ੍ਰਹ੍ਮਵਿਹਾਰੁਪੇਕ੍ਖਾ ਪੁਥੁਜ੍ਜਨਾਦੀਨਂ ਤਿਣ੍ਣਮ੍ਪਿ ਪੁਗ੍ਗਲਾਨਨ੍ਤਿਆਦਿਨਾ ਪੁਗ੍ਗਲਤੋ ਚ, ਛਲ਼ਙ੍ਗੁਪੇਕ੍ਖਾ ਸੋਮਨਸ੍ਸੁਪੇਕ੍ਖਾਸਹਗਤਚਿਤ੍ਤਸਮ੍ਪਯੁਤ੍ਤਾਤਿਆਦਿਨਾ ਚਿਤ੍ਤਤੋ ਚ, ਛਲ਼ਙ੍ਗੁਪੇਕ੍ਖਾ ਛਲ਼ਾਰਮ੍ਮਣਾਤਿਆਦਿਨਾ ਆਰਮ੍ਮਣਤੋ ਚ, ‘‘ਵੇਦਨੁਪੇਕ੍ਖਾ ਵੇਦਨਾਕ੍ਖਨ੍ਧੇਨ ਸਙ੍ਗਹਿਤਾ, ਇਤਰਾ ਨਵ ਸਙ੍ਖਾਰਕ੍ਖਨ੍ਧੇਨਾ’’ਤਿ ਖਨ੍ਧਸਙ੍ਗਹਵਸੇਨ ਚ, ‘‘ਛਲ਼ਙ੍ਗੁਪੇਕ੍ਖਾ ਬ੍ਰਹ੍ਮਵਿਹਾਰਬੋਜ੍ਝਙ੍ਗਝਾਨ ਪਾਰਿਸੁਦ੍ਧਿਤਤ੍ਰਮਜ੍ਝਤ੍ਤੁਪੇਕ੍ਖਾ ਚ ਅਤ੍ਥਤੋ ਏਕਾ. ਤਸ੍ਮਾ ਏਕਕ੍ਖਣੇ ਚ ਤਾਸੁ ਏਕਾਯ ਸਤਿ ਇਤਰਾ ਨ ਉਪ੍ਪਜ੍ਜਨ੍ਤਿ, ਤਥਾ ਸਙ੍ਖਾਰੁਪੇਕ੍ਖਾ ਵਿਪਸ੍ਸਨੁਪੇਕ੍ਖਾਪਿ ਵੇਦਿਤਬ੍ਬਾ. ਵੇਦਨਾਵੀਰਿਯੁਪੇਕ੍ਖਾਨਮੇਕਕ੍ਖਣੇ ਸਿਯਾ ਉਪ੍ਪਤ੍ਤੀ’’ਤਿ ਏਕਕ੍ਖਣਵਸੇਨ ਚ, ‘‘ਛਲ਼ਙ੍ਗੁਪੇਕ੍ਖਾ ਅਬ੍ਯਾਕਤਾ ਬ੍ਰਹ੍ਮਵਿਹਾਰੁਪੇਕ੍ਖਾ ਕੁਸਲਾਬ੍ਯਾਕਤਾ, ਤਥਾ ਸੇਸਾ. ਵੇਦਨੁਪੇਕ੍ਖਾ ਪਨ ਸਿਯਾ ਅਕੁਸਲਾਪੀ’’ਤਿ ਏਵਂ ਕੁਸਲਤ੍ਤਿਕਵਸੇਨ ਚ, ‘‘ਸਙ੍ਖੇਪਤੋ ਚਤ੍ਤਾਰੋ ਚ ਧਮ੍ਮਾ ਵੀਰਿਯਵੇਦਨਾਤਤ੍ਰਮਜ੍ਝਤ੍ਤਤਾਞਾਣਵਸੇਨਾ’’ਤਿ ਏਵਂ ਸਙ੍ਖੇਪਵਸੇਨ ਚ ਅਯਂ ਦਸਵਿਧਾਪਿ ਉਪੇਕ੍ਖਾ ਧਮ੍ਮਸਙ੍ਗਹਟ੍ਠਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਾਤਿ ਯੋਜਨਾ.

ਏਤ੍ਥ ਚੇਤਾ ਕਿਞ੍ਚਾਪਿ ਅਟ੍ਠਸਾਲਿਨਿਯਂ ਭੂਮਿਪੁਗ੍ਗਲਾਦਿਵਸੇਨ ਸਰੂਪਤੋ ਉਦ੍ਧਰਿਤ੍ਵਾ ਨ ਵੁਤ੍ਤਾ, ਤਥਾਪਿ ਤਤ੍ਥ ਵੁਤ੍ਤਪ੍ਪਕਾਰੇਹੇਵ ਤਾਸਂ ਭੂਮਿਪੁਗ੍ਗਲਾਦਿਵਿਭਾਗੋ ਨਯਤੋ ਉਦ੍ਧਰਿਤ੍ਵਾ ਸਕ੍ਕਾ ਞਾਤੁਨ੍ਤਿ ਤਤ੍ਥ ਸਰੂਪਤੋ ਵੁਤ੍ਤਞ੍ਚ ਅਵੁਤ੍ਤਞ੍ਚ ਏਕਤੋ ਸਙ੍ਗਹੇਤ੍ਵਾ ਤਤ੍ਥ ਤਤ੍ਥ ਆਗਤਨਯਤੋਤਿਆਦੀਹਿ ਨਵਹਿ ਪਕਾਰੇਹਿ ਅਤਿਦੇਸੋ ਕਤੋ, ਤੇਨੇਵ ‘‘ਧਮ੍ਮਸਙ੍ਗਹਟ੍ਠਕਥਾਯਂ ਵੁਤ੍ਤਵਸੇਨਾ’’ਤਿ ਅਵਤ੍ਵਾ ‘‘ਵੁਤ੍ਤਨਯੇਨੇਵਾ’’ਤਿ ਵੁਤ੍ਤਂ. ਤਥਾਹਿ ਖੀਣਾਸਵੋ ਭਿਕ੍ਖੁ ਚਕ੍ਖੁਨਾ ਰੂਪਂ ਦਿਸ੍ਵਾਤਿ ਆਦਿਮ੍ਹਿ ਵੁਤ੍ਤੇ ਛਲ਼ਙ੍ਗੁਪੇਕ੍ਖਾ ਰੂਪਾਦਿਆਰਮ੍ਮਣਤਾਯ ਭੂਮਿਤੋ ਕਾਮਾਵਚਰਾ ਚ ਪੁਗ੍ਗਲਤੋ ਅਸੇਕ੍ਖਾਨਮੇਵ ਚ ਉਪ੍ਪਜ੍ਜਤਿ, ਚਿਤ੍ਤਤੋ ਸੋਮਨਸ੍ਸੁਪੇਕ੍ਖਾਚਿਤ੍ਤਸਮ੍ਪਯੁਤ੍ਤਾ, ਆਰਮ੍ਮਣਤੋ ਛਲ਼ਾਰਮ੍ਮਣਾ, ਕੁਸਲਤ੍ਤਿਕਤੋ ਅਬ੍ਯਾਕਤਾ ਚਾਤਿ ਪਣ੍ਡਿਤੇਹਿ ਸਕ੍ਕਾ ¶ ਞਾਤੁਂ, ਤਥਾ ਛਲ਼ਙ੍ਗੁਪੇਕ੍ਖਾ ਚ ਬ੍ਰਹ੍ਮਵਿਹਾਰੁਪੇਕ੍ਖਾ ਚ ਤਤ੍ਰਮਜ੍ਝਤ੍ਤੁਪੇਕ੍ਖਾ ਚ ਝਾਨੁਪੇਕ੍ਖਾ ਚ ਪਾਰਿਸੁਦ੍ਧੁਪੇਕ੍ਖਾ ਚ ਅਤ੍ਥਤੋ ਏਕਾਤਿਆਦਿਮ੍ਹਿ ਵੁਤ੍ਤੇ ਪਨਸ੍ਸ ਸਙ੍ਖਾਰਕ੍ਖਨ੍ਧਸਙ੍ਗਹਿਤਤ੍ਤਾ ਬ੍ਰਹ੍ਮਵਿਹਾਰੁਪੇਕ੍ਖਾਦੀਹਿ ਸਹ ਏਕਕ੍ਖਣੇ ਅਨੁਪ੍ਪਤ੍ਤਿਆਦਯੋ ਚ ਸਕ੍ਕਾ ਞਾਤੁਂ, ਯਥਾ ਚ ਛਲ਼ਙ੍ਗੁਪੇਕ੍ਖਾ, ਏਵਂ ਸੇਸਾਨਮ੍ਪਿ ਯਥਾਰਹਂ ਅਟ੍ਠਸਾਲਿਨਿਯਂ ਵੁਤ੍ਤਨਯਤੋ ਭੂਮਿਆਦਿਵਿਭਾਗੁਦ੍ਧਾਰਨਯੋ ¶ ਞਾਤਬ੍ਬੋ. ਅਨਾਭੋਗਰਸਾਤਿ ਪਣੀਤਸੁਖੇਪਿ ਤਸ੍ਮਿਂ ਅਵਨਤਿਪਟਿਪਕ੍ਖਕਿਚ੍ਚਾਤਿ ਅਤ੍ਥੋ.

ਪੁਗ੍ਗਲੇਨਾਤਿ ਪੁਗ੍ਗਲਾਧਿਟ੍ਠਾਨੇਨ. ਕਿਲੇਸੇਹਿ ਸਮ੍ਪਯੁਤ੍ਤਾਨਂ ਆਰਕ੍ਖਾ. ਤੀਰਣਂ ਕਿਚ੍ਚਸ੍ਸ ਪਾਰਗਮਨਂ. ਪਵਿਚਯੋ ਵੀਮਂਸਾ. ਇਦਨ੍ਤਿ ਸਤਿਸਮ੍ਪਜਞ੍ਞਂ. ਯਸ੍ਮਾ ਤਸ੍ਸ ਨਾਮਕਾਯੇਨ ਸਮ੍ਪਯੁਤ੍ਤਂ ਸੁਖਨ੍ਤਿ ਇਮਸ੍ਸ ਤਸ੍ਮਾ ਏਤਮਤ੍ਥਨ੍ਤਿਆਦਿਨਾ ਸਮ੍ਬਨ੍ਧੋ. ਤਸ੍ਸਾਤਿ ਝਾਨਸਮਙ੍ਗਿਨੋ. ਤਂਸਮੁਟ੍ਠਾਨੇਨਾਤਿ ਤਂ ਯਥਾਵੁਤ੍ਤਨਾਮਕਾਯਸਮ੍ਪਯੁਤ੍ਤਂ ਸੁਖਂ ਸਮੁਟ੍ਠਾਨਂ ਕਾਰਣਂ ਯਸ੍ਸ ਰੂਪਸ੍ਸ ਤੇਨ ਤਂਸਮੁਟ੍ਠਾਨੇਨ ਰੂਪੇਨ. ਅਸ੍ਸਾਤਿ ਯੋਗਿਨੋ. ਯਸ੍ਸਾਤਿ ਰੂਪਕਾਯਸ੍ਸ. ਫੁਟਤ੍ਤਾਤਿ ਅਤਿਪਣੀਤੇਨ ਰੂਪੇਨ ਫੁਟਤ੍ਤਾ. ਏਤਮਤ੍ਥਂ ਦਸ੍ਸੇਨ੍ਤੋਤਿ ਕਾਯਿਕਸੁਖਹੇਤੁਭੂਤਰੂਪਸਮੁਟ੍ਠਾਪਕਨਾਮਕਾਯਸੁਖਂ ਪਟਿਸਂਵੇਦਿਯਮਾਨੋ ਏਵ ਝਾਨਸਮਙ੍ਗਿਤਾਕਰਣੇ ਕਾਰਿਯੋਪਚਾਰਤੋ ‘‘ਸੁਖਞ੍ਚ ਕਾਯੇਨ ਪਟਿਸਂਵੇਦੇਤੀ’’ਤਿ ਵੁਚ੍ਚਤੀਤਿ ਇਮਮਤ੍ਥਂ ਦਸ੍ਸੇਨ੍ਤੋਤਿ ਅਤ੍ਥੋ. ਯਨ੍ਤਿ ਹੇਤੁਅਤ੍ਥੇ ਨਿਪਾਤੋਤਿ ਆਹ ‘‘ਯਂਝਾਨਹੇਤੂ’’ਤਿ. ਸੁਖਪਾਰਮਿਪ੍ਪਤ੍ਤੇਤਿ ਸੁਖਸ੍ਸ ਉਕ੍ਕਂਸਪਰਿਯਨ੍ਤਂ ਪਤ੍ਤੇ. ਏਵਮੇਤੇਸਂ ਪਹਾਨਂ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਅਥ ਕਸ੍ਮਾ ਝਾਨੇਸ੍ਵੇਵ ਨਿਰੋਧੋ ਵੁਤ੍ਤੋਤਿ ਸਮ੍ਬਨ੍ਧੋ.

ਚਤੁਤ੍ਥਜ੍ਝਾਨਕਥਾਵਣ੍ਣਨਾ

ਕਤ੍ਥ ਚੁਪ੍ਪਨ੍ਨਨ੍ਤਿ ਏਤ੍ਥ ਕਤ੍ਥਾਤਿ ਹੇਤੁਮ੍ਹਿ ਭੁਮ੍ਮਂ, ਕਸ੍ਮਿਂ ਹੇਤੁਮ੍ਹਿ ਸਤੀਤਿ ਅਤ੍ਥੋ. ਨਾਨਾਵਜ੍ਜਨੇਤਿ ਅਪ੍ਪਨਾਵੀਥਿਆਵਜ੍ਜਨਤੋ ਨਾਨਾ ਭਿਨ੍ਨਂ ਪੁਰਿਮਵੀਥੀਸੁ ਆਵਜ੍ਜਨਂ ਯਸ੍ਸ ਉਪਚਾਰਸ੍ਸ, ਤਸ੍ਮਿਂ ਨਾਨਾਵਜ੍ਜਨੇ. ਵਿਸਮਨਿਸਜ੍ਜਾਯ ਉਪ੍ਪਨ੍ਨਕਿਲਮਥੋ ਵਿਸਮਾਸਨੁਪਤਾਪੋ. ਉਪਚਾਰੇ ਵਾਤਿਆਦਿ ਪਕ੍ਖਨ੍ਤਰਦਸ੍ਸਨਂ ਏਕਾਵਜ੍ਜਨੂਪਚਾਰੇਪਿ ਵਾਤਿ ਅਤ੍ਥੋ. ਪੀਤਿਫਰਣੇਨਾਤਿ ਇਮਿਨਾ ਅਪ੍ਪਨਾਵੀਥਿਯਾ ਵਿਯ ਏਕਵੀਥਿਯਮ੍ਪਿ ਕਾਮਾਵਚਰਪੀਤਿਯਾ ਫਰਣਮਤ੍ਤਸ੍ਸ ਅਭਾਵਂ ਦਸ੍ਸੇਤਿ. ਦੋਮਨਸ੍ਸਿਨ੍ਦ੍ਰਿਯਸ੍ਸ ਅਸ੍ਸ ਸਿਯਾ ਉਪ੍ਪਤ੍ਤੀਤਿ ਸਮ੍ਬਨ੍ਧੋ. ਏਤਨ੍ਤਿ ਦੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿ ਸਮ੍ਬਨ੍ਧੋ. ਵਿਤਕ੍ਕਵਿਚਾਰਪ੍ਪਚ੍ਚਯੇਪੀਤਿ ਪਿ-ਸਦ੍ਦੋ ਅਟ੍ਠਾਨਪ੍ਪਯੁਤ੍ਤੋ. ਸੋ ‘‘ਪਹੀਨਸ੍ਸਾ’’ਤਿ ਹੇਟ੍ਠਾ ਵੁਤ੍ਤਪਦਾਨਨ੍ਤਰਂ ਯੋਜੇਤਬ੍ਬੋ ¶ ‘‘ਪਹੀਨਸ੍ਸਾਪਿ ਦੋਮਨਸ੍ਸਿਨ੍ਦ੍ਰਿਯਸ੍ਸਾ’’ਤਿ. ਵਿਤਕ੍ਕਵਿਚਾਰਭਾਵੇਤਿ ਏਤ੍ਥ ‘‘ਉਪ੍ਪਜ੍ਜਤਿ ਦੋਮਨਸ੍ਸਿਨ੍ਦ੍ਰਿਯ’’ਨ੍ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਨਿਮਿਤ੍ਤਤ੍ਥੇ ਚੇਤਂ ਭੁਮ੍ਮਂ, ਵਿਤਕ੍ਕਵਿਚਾਰਭਾਵਹੇਤੂਤਿ ਅਤ੍ਥੋ. ਵਿਤਕ੍ਕਵਿਚਾਰਾਤਿ ਏਤ੍ਥ ਇਤਿ-ਸਦ੍ਦੋ ਤਸ੍ਮਾਤਿ ਏਤਸ੍ਮਿਂ ਅਤ੍ਥੇ ਦਟ੍ਠਬ੍ਬੋ, ਤੇਨ ਯਸ੍ਮਾ ਏਤਂ ਦੋਮਨਸ੍ਸਿਨ੍ਦ੍ਰਿਯਂ ਵਿਤਕ੍ਕਵਿਚਾਰਪਚ੍ਚਯੇ…ਪੇ… ਨੇਵ ਉਪ੍ਪਜ੍ਜਤਿ, ਯਤ੍ਥ ਪਨ ਉਪ੍ਪਜ੍ਜਤਿ, ਤਤ੍ਥ ਵਿਤਕ੍ਕਵਿਚਾਰਭਾਵੇਯੇਵ ਉਪ੍ਪਜ੍ਜਤਿ. ਯਸ੍ਮਾ ਚ ਅਪ੍ਪਹੀਨਾਯੇਵ ਦੁਤਿਯਜ੍ਝਾਨੂਪਚਾਰੇ ਵਿਤਕ੍ਕਵਿਚਾਰਾ, ਤਸ੍ਮਾ ਤਤ੍ਥਸ੍ਸ ਸਿਯਾ ਉਪ੍ਪਤ੍ਤੀਤਿ ਏਵਮੇਤ੍ਥ ਯੋਜਨਾ ਵੇਦਿਤਬ੍ਬਾ.

ਤਤ੍ਥਾਤਿ ¶ ਦੁਤਿਯਜ੍ਝਾਨੂਪਚਾਰੇ. ਅਸ੍ਸਾਤਿ ਦੋਮਨਸ੍ਸਿਨ੍ਦ੍ਰਿਯਸ੍ਸ. ਸਿਯਾ ਉਪ੍ਪਤ੍ਤੀਤਿ ਇਦਞ੍ਚ ਪਚ੍ਚਯਮਤ੍ਤਦਸ੍ਸਨੇਨ ਸਮ੍ਭਾਵਨਮਤ੍ਤਤੋ ਵੁਤ੍ਤਂ. ਦੋਮਨਸ੍ਸੁਪ੍ਪਤ੍ਤਿਸਮ੍ਭਾਵਨਾਪਿ ਹਿ ਉਪਚਾਰਕ੍ਖਣੇਯੇਵ ਕਾਤੁਂ ਯੁਤ੍ਤਾ, ਵਿਤਕ੍ਕਵਿਚਾਰਰਹਿਤੇ ਪਨ ਦੁਤਿਯਜ੍ਝਾਨਕ੍ਖਣੇ ਤਦੁਪ੍ਪਤ੍ਤਿਸਮ੍ਭਾਵਨਾਪਿ ਨ ਯੁਤ੍ਤਾ ਕਾਤੁਨ੍ਤਿ. ਇਤਰਥਾ ਕੁਸਲਚਿਤ੍ਤਕ੍ਖਣੇ ਅਕੁਸਲਦੋਮਨਸ੍ਸੁਪ੍ਪਤ੍ਤਿਯਾ ਅਸਮ੍ਭਵਤੋ ‘‘ਤਤ੍ਥਸ੍ਸ ਸਿਯਾ ਉਪ੍ਪਤ੍ਤੀ’’ਤਿ ਨ ਵਤ੍ਤਬ੍ਬਂ ਸਿਯਾ. ਸਮੀਪਤ੍ਥੇ ਵਾ ਏਤਂ ਭੁਮ੍ਮਂ, ਉਪਚਾਰਜ੍ਝਾਨਾਨਨ੍ਤਰਵੀਥੀਸੂਤਿ ਅਤ੍ਥੋ. ਦੁਤਿਯਜ੍ਝਾਨੇਤਿ ਏਤ੍ਥਾਪਿ ਅਨਨ੍ਤਰਵੀਥੀਸੁਪਿ ਨ ਤ੍ਵੇਵ ਉਪ੍ਪਜ੍ਜਤੀਤਿ ਅਤ੍ਥੋ, ਏਵਂ ਉਪਰਿ ਸੁਖਿਨ੍ਦ੍ਰਿਯੇਪਿ. ਸੋਮਨਸ੍ਸਿਨ੍ਦ੍ਰਿਯਸ੍ਸ ਉਪ੍ਪਤ੍ਤੀਤਿ ਸਮ੍ਬਨ੍ਧੋ. ਪਹੀਨਾਤਿ ਵੁਤ੍ਤਾਤਿ ਇਦਂ ‘‘ਪਞ੍ਚਨ੍ਨਂ ਓਰਮ੍ਭਾਗਿਯਾਨਂ ਸਂਯੋਜਨਾਨਂ ਪਰਿਕ੍ਖਯਾ’’ਤਿ ਵੁਤ੍ਤਤ੍ਤਾ ਵੁਤ੍ਤਂ. ਦੁਕ੍ਖਾਭਾਵੇਨਾਤਿ ਦੁਕ੍ਖਤਾਭਾਵੇਨ. ਏਵਂ ਸੁਖਾਭਾਵੇਨਾਤਿ ਏਤ੍ਥਾਪਿ. ਏਤੇਨਾਤਿ ਦੁਕ੍ਖਸੁਖਪਟਿਕ੍ਖੇਪਵਚਨੇਨ. ਇਟ੍ਠਾਨਿਟ੍ਠਵਿਪਰੀਤਾਨੁਭਵਨਲਕ੍ਖਣਾਤਿ ਅਤਿਇਟ੍ਠਅਤਿਅਨਿਟ੍ਠਾਨਂ ਵਿਪਰੀਤਸ੍ਸ ਮਜ੍ਝਤ੍ਤਾਰਮ੍ਮਣਸ੍ਸ ਅਨੁਭਵਨਲਕ੍ਖਣਾ, ਮਜ੍ਝਤ੍ਤਾਰਮ੍ਮਣਮ੍ਪਿ ਹਿ ਇਟ੍ਠਾਨਿਟ੍ਠੇਸੁ ਏਵ ਪਵਿਟ੍ਠਂ ਤਬ੍ਬਿਨਿਮੁਤ੍ਤਸ੍ਸ ਅਭਾਵਾ.

ਝਾਨਚਤੁਕ੍ਕਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਪੁਬ੍ਬੇਨਿਵਾਸਕਥਾਵਣ੍ਣਨਾ

੧੨. ਅਰੂਪਜ੍ਝਾਨਾਨਮ੍ਪਿ ਅਙ੍ਗਸਮਤਾਯ ਚਤੁਤ੍ਥਜ੍ਝਾਨੇ ਸਙ੍ਗਹੋਤਿ ਆਹ ਕੇਸਞ੍ਚਿ ਅਭਿਞ੍ਞਾਪਾਦਕਾਨੀਤਿਆਦਿ, ਤੇਨੇਵ ਵਕ੍ਖਤਿ ‘‘ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ’’ਤਿਆਦਿ (ਪਾਰਾ. ਅਟ੍ਠ. ੧.੧੨). ਤੇਸੁ ਚ ਚਤੁਤ੍ਥਜ੍ਝਾਨਮੇਵ ਅਭਿਞ੍ਞਾਪਾਦਕਂ ਨਿਰੋਧਪਾਦਕਂ ¶ ਹੋਤਿ, ਨ ਇਤਰਾਨਿ. ਦੂਰਕਾਰਣਤਂ ਪਨ ਸਨ੍ਧਾਯ ‘‘ਚਤ੍ਤਾਰਿ ਝਾਨਾਨੀ’’ਤਿ ਨੇਸਮ੍ਪਿ ਏਕਤੋ ਗਹਣਂ ਕਤਨ੍ਤਿ ਦਟ੍ਠਬ੍ਬਂ. ਚਿਤ੍ਤੇਕਗ੍ਗਤਤ੍ਥਾਨੀਤਿ ਇਦਂ ਦਿਟ੍ਠਧਮ੍ਮਸੁਖਵਿਹਾਰਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ਖੀਣਾਸਵਾਨਨ੍ਤਿਆਦਿ. ਸਬ੍ਬਕਿਚ੍ਚਸਾਧਕਨ੍ਤਿ ਦਿਬ੍ਬਵਿਹਾਰਾਦਿਸਬ੍ਬਬੁਦ੍ਧਕਿਚ੍ਚਸਾਧਕਂ. ਸਬ੍ਬਲੋਕਿਯਲੋਕੁਤ੍ਤਰਗੁਣਦਾਯਕਨ੍ਤਿ ਇਮਿਨਾ ਯਥਾਵੁਤ੍ਤਂ ਵਿਪਸ੍ਸਨਾਪਾਦਕਤ੍ਤਾਦਿਸਬ੍ਬਂ ਸਮ੍ਪਿਣ੍ਡੇਤਿ. ਇਦਞ੍ਹਿ ਝਾਨਂ ਭਗਵਤੋ ਸਬ੍ਬਬੁਦ੍ਧਗੁਣਦਾਯਕਸ੍ਸ ਮਗ੍ਗਞਾਣਸ੍ਸ ਪਦਟ੍ਠਾਨਤ੍ਤਾ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਯਥਯਿਦਨ੍ਤਿ ਯਥਾ ਇਦਂ. ਅਭਿਨੀਹਾਰਕ੍ਖਮਨ੍ਤਿ ਇਦ੍ਧਿਵਿਧਾਦਿਅਤ੍ਥਂ ਤਦਭਿਮੁਖਂ ਨੀਹਰਣਯੋਗ੍ਗਂ.

ਝਾਨਪ੍ਪਟਿਲਾਭਪਚ੍ਚਯਾਨਨ੍ਤਿ ਝਾਨਪ੍ਪਟਿਲਾਭਹੇਤੁਕਾਨਂ ਝਾਨਪ੍ਪਟਿਲਾਭਂ ਨਿਸ੍ਸਾਯ ਉਪ੍ਪਜ੍ਜਨਕਾਨਂ. ਪਾਪਕਾਨਨ੍ਤਿ ਲਾਮਕਾਨਂ. ਇਚ੍ਛਾਵਚਰਾਨਨ੍ਤਿ ਇਚ੍ਛਾਯ ਵਸੇਨ ਓਤਿਣ੍ਣਾਨਂ ਨੀਵਰਣਭਾਵਂ ਤਦੇਕਟ੍ਠਤਞ੍ਚ ਅਪ੍ਪਤ੍ਤਾਨਂ ਅਤ੍ਤੁਕ੍ਕਂਸਨਾਦਿਵਸਪ੍ਪਵਤ੍ਤਾਨਂ ਅਹੋ ਵਤ ਮਮੇਵ ਸਤ੍ਥਾ ਪਟਿਪੁਚ੍ਛਿਤ੍ਵਾ ਭਿਕ੍ਖੂਨਂ ਏਵਰੂਪਂ ਧਮ੍ਮਂ ਦੇਸੇਯ੍ਯਾਤਿਆਦਿਨਯਪ੍ਪਵਤ੍ਤਾਨਂ ਮਾਨਾਦੀਨਂ. ਪੋਤ੍ਥਕੇਸੁ ਪਨ ‘‘ਝਾਨਪ੍ਪਟਿਲਾਭਪਚ੍ਚਨੀਕਾਨ’’ਨ੍ਤਿਪਿ ¶ ਪਾਠਂ ਲਿਖਨ੍ਤਿ, ਸੋ ਪਮਾਦਪਾਠੋਤਿ ਗਹੇਤਬ੍ਬੋ ‘‘ਝਾਨਪ੍ਪਟਿਲਾਭਪਚ੍ਚਨੀਕਾਨਂ ਨੀਵਰਣਾਨਂ ਅਭਾਵਸ੍ਸ ਨੀਵਰਣਦੂਰੀਭਾਵੇਨ ਪਰਿਸੁਦ੍ਧੋ’’ਤਿ ਏਵਂ ਪੁਬ੍ਬੇ ਪਰਿਸੁਦ੍ਧਪਦੇਯੇਵ ਵੁਤ੍ਤਤ੍ਤਾ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੧.੧੨) ਪਨ ‘‘ਇਚ੍ਛਾਵਚਰਾਨਨ੍ਤਿ ਇਚ੍ਛਾਯ ਅਵਚਰਾਨਂ ਇਚ੍ਛਾਵਸੇਨ ਓਤਿਣ੍ਣਾਨਂ ਪਵਤ੍ਤਾਨਂ ਨਾਨਪ੍ਪਕਾਰਾਨਂ ਕੋਪਅਪ੍ਪਚ੍ਚਯਾਨਨ੍ਤਿ ਅਤ੍ਥੋਤਿ ਅਯਮ੍ਪਿ ਪਾਠੋ ਅਯੁਤ੍ਤੋ ਏਵਾਤਿ ਗਹੇਤਬ੍ਬਂ. ਤਤੋ ਏਵ ਚ ਵਿਸੁਦ੍ਧਿਮਗ੍ਗੇ ਅਯਂ ਪਾਠੋ ਸਬ੍ਬੇਨ ਸਬ੍ਬਂ ਨ ਦਸ੍ਸਿਤੋ’’ਤਿ ਵੁਤ੍ਤਂ. ਤਤ੍ਥ ਚ ਨਾਨਪ੍ਪਕਾਰਾਨਂ ਕੋਪਅਪ੍ਪਚ੍ਚਯਾਨਨ੍ਤਿ ਏਵਂ ਨੀਵਰਣਭਾਵਪ੍ਪਤ੍ਤਦੋਸਾਨਂ ਪਰਾਮਟ੍ਠਤ੍ਤਾ ਅਯਂ ਪਾਠੋ ਪਟਿਕ੍ਖਿਤ੍ਤੋਤਿ ਵੇਦਿਤਬ੍ਬੋ.

ਅਭਿਜ੍ਝਾਦੀਨਨ੍ਤਿ ਏਤ੍ਥ ਅਭਿਜ੍ਝਾ-ਸਦ੍ਦੇਨ ਚ ਅਨੀਵਰਣਸਭਾਵਸ੍ਸੇਵ ਲੋਭਸ੍ਸ ਮਾਨਾਦੀਨਞ੍ਚ ਗਹਣਂ ਝਾਨਪ੍ਪਟਿਲਾਭਪਚ੍ਚਯਾਨਨ੍ਤਿ ਅਨੁਵਤ੍ਤਮਾਨਤ੍ਤਾ. ਉਭਯਮ੍ਪੀਤਿ ਅਨਙ੍ਗਣਤ੍ਤਂ ਵਿਗਤੂਪਕ੍ਕਿਲੇਸਤ੍ਤਞ੍ਚਾਤਿ ਏਤਂ ਉਭਯਮ੍ਪਿ ਯਥਾਕ੍ਕਮਂ ਅਨਙ੍ਗਣਸੁਤ੍ਤਵਤ੍ਥਸੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬਂ. ਤੇਸੁ ਚ ਸੁਤ੍ਤੇਸੁ ਕਿਞ੍ਚਾਪਿ ਨੀਵਰਣਸਭਾਵਪ੍ਪਤ੍ਤਾ ਥੂਲਦੋਸਾਪਿ ਵੁਤ੍ਤਾ, ਤਥਾਪਿ ਅਧਿਗਤਚਤਉਤ੍ਥਜ੍ਝਾਨਸ੍ਸ ਵਸੇਨ ਵੁਤ੍ਤਤ੍ਤਾ ਇਧ ਸੁਖੁਮਾ ਏਵ ਤੇ ਗਹਿਤਾ. ਅਙ੍ਗਣੁਪਕ੍ਕਿਲੇਸਸਾਮਞ੍ਞੇਨ ਪਨੇਤ੍ਥ ਸੁਤ੍ਤਾਨਂ ਅਪਦਿਸਨਂ. ਤਥਾ ਹਿ ‘‘ਸੁਤ੍ਤਾਨੁਸਾਰੇਨਾ’’ਤਿ ਵੁਤ੍ਤਂ, ਨ ਪਨ ਸੁਤ੍ਤਵਸੇਨਾਤਿ.

ਪੁਬ੍ਬੇਨਿਵਾਸਾਨੁਸ੍ਸਤਿਯਂ ¶ ਞਾਣਂ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਨ੍ਤਿ ਨਿਬ੍ਬਚਨਂ ਦਸ੍ਸੇਨ੍ਤੋ ਆਹ ਪੁਬ੍ਬੇਨਿਵਾਸਾਨੁਸ੍ਸਤਿਮ੍ਹੀਤਿਆਦਿ. ਇਦਾਨਿ ਪੁਬ੍ਬੇਨਿਵਾਸਂ ਪੁਬ੍ਬੇਨਿਵਾਸਾਨੁਸ੍ਸਤਿਂ ਤਤ੍ਥ ਞਾਣਞ੍ਚ ਵਿਭਾਗਤੋ ਦਸ੍ਸੇਤੁਂ ਤਤ੍ਥਾਤਿਆਦਿ ਵੁਤ੍ਤਂ. ਪੁਬ੍ਬ-ਸਦ੍ਦੋ ਅਤੀਤਭਵਵਿਸਯੋ, ਨਿਵਾਸ-ਸਦ੍ਦੋ ਚ ਕਮ੍ਮਸਾਧਨੋਤਿ ਆਹ ‘‘ਪੁਬ੍ਬੇ ਅਤੀਤਜਾਤੀਸੁ ਨਿਵੁਤ੍ਥਕ੍ਖਨ੍ਧਾ’’ਤਿ. ਨਿਵੁਤ੍ਥਤਾ ਚੇਤ੍ਥ ਸਕਸਨ੍ਤਾਨੇ ਪਵਤ੍ਤਤਾ, ਤੇਨਾਹ ਅਨੁਭੂਤਾਤਿਆਦਿ. ਇਦਾਨਿ ਸਪਰਸਨ੍ਤਾਨਸਾਧਨਵਸੇਨ ਨਿਵਾਸ-ਸਦ੍ਦਸ੍ਸ ਅਤ੍ਥਂ ਦਸ੍ਸੇਤੁਂ ‘‘ਨਿਵੁਤ੍ਥਧਮ੍ਮਾ ਵਾ ਨਿਵੁਤ੍ਥਾ’’ਤਿ ਵਤ੍ਵਾ ਤਂ ਵਿਵਰਿਤੁਂ ਗੋਚਰਨਿਵਾਸੇਨਾਤਿਆਦਿ ਵੁਤ੍ਤਂ. ਗੋਚਰਭੂਤਾਪਿ ਹਿ ਧਮ੍ਮਾ ਞਾਣੇਨ ਨਿਵੁਤ੍ਥਾ ਨਾਮ ਹੋਨ੍ਤਿ, ਤੇ ਪਨ ਸਪਰਵਿਞ੍ਞਾਣਗੋਚਰਤਾਯ ਦੁਵਿਧਾਤਿ ਦਸ੍ਸੇਤੁਂ ਅਤ੍ਤਨੋਤਿਆਦਿ ਵੁਤ੍ਤਂ. ਪਰਵਿਞ੍ਞਾਣਵਿਞ੍ਞਾਤਾਪਿ ਵਾ ਨਿਵੁਤ੍ਥਾਤਿ ਸਮ੍ਬਨ੍ਧੋ. ਇਧਾਪਿ ਪਰਿਚ੍ਛਿਨ੍ਨਾਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਅਨਮਤਗ੍ਗੇਪਿ ਹਿ ਸਂਸਾਰੇ ਅਤ੍ਤਨਾ ਅਵਿਞ੍ਞਾਤਪੁਬ੍ਬਾਨਂ ਸਤ੍ਤਾਨਂ ਖਨ੍ਧਾ ਪਰੇਹੇਵ ਕੇਹਿਚਿ ਵਿਞ੍ਞਾਤਤ੍ਤਾ ਪਰਵਿਞ੍ਞਾਣਵਿਞ੍ਞਾਤਾ ਨਾਮ ਵੁਤ੍ਤਾ, ਤੇਸਂ ਅਨੁਸ੍ਸਰਣਂ ਪੁਰਿਮਤੋ ਦੁਕ੍ਕਰਂ ਯੇਹਿ ਪਰੇਹਿ ਵਿਞ੍ਞਾਤਤਾਯ ਤੇ ਪਰਵਿਞ੍ਞਾਣਵਿਞ੍ਞਾਤਾ ਨਾਮ ਜਾਤਾ, ਤੇਸਂ ਵਤ੍ਤਮਾਨਸਨ੍ਤਾਨਾਨੁਸਾਰੇਨ ਵਿਞ੍ਞਾਤਬ੍ਬਤੋ. ਤੇ ਚ ਪਰਵਿਞ੍ਞਾਣਵਿਞ੍ਞਾਤਾ ਦੁਵਿਧਾ ਪਰਿਨਿਬ੍ਬੁਤਾ ਅਪਰਿਨਿਬ੍ਬੁਤਾਤਿ. ਤੇਸੁ ਚ ਪਰਿਨਿਬ੍ਬੁਤਾਨੁਸ੍ਸਰਣਂ ਦੁਕ੍ਕਰਂ ਸਬ੍ਬਸੋ ਸੁਸਮੁਚ੍ਛਿਨ੍ਨਸਨ੍ਤਾਨਤ੍ਤਾ. ਤਂ ਪਨ ਸਿਖਾਪ੍ਪਤ੍ਤਪਰਵਿਞ੍ਞਾਤਂ ਪੁਬ੍ਬੇਨਿਵਾਸਂ ਦਸ੍ਸੇਤੁਂ ‘‘ਛਿਨ੍ਨਵਟੁਮਕਾਨੁਸ੍ਸਰਣਾਦੀਸੂ’’ਤਿ ਵੁਤ੍ਤਂ. ਤਤ੍ਥ ਛਿਨ੍ਨਵਟੁਮਕਾ ਅਤੀਤੇ ਪਰਿਨਿਬ੍ਬੁਤਾ ਖੀਣਾਸਵਾ ਛਿਨ੍ਨਸਂਸਾਰਮਗ੍ਗਤ੍ਤਾ ¶ . ਆਦਿ-ਸਦ੍ਦੇਨ ਅਪਰਿਨਿਬ੍ਬੁਤਾਨਂ ਪਰਵਿਞ੍ਞਾਣਵਿਞ੍ਞਾਤਾਨਮ੍ਪਿ ਸੀਹੋਕ੍ਕਨ੍ਤਿਕਵਸਏਨ ਅਨੁਸ੍ਸਰਣਂ ਗਹਿਤਂ. ਯਾਯ ਸਤਿਯਾ ਪੁਬ੍ਬੇਨਿਵਾਸਂ ਅਨੁਸ੍ਸਰਤਿ, ਸਾ ਪੁਬ੍ਬੇਨਿਵਾਸਾਨੁਸ੍ਸਤੀਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ.

ਵਿਹਿਤ-ਸਦ੍ਦੋ ਵਿਧ-ਸਦ੍ਦਪਰਿਯਾਯੋਤਿ ਆਹ ‘‘ਅਨੇਕਵਿਧ’’ਨ੍ਤਿ, ਭਵਯੋਨਿਆਦਿਵਸੇਨ ਬਹੁਵਿਧਨ੍ਤਿ ਅਤ੍ਥੋ. ਵਿਹਿਤਨ੍ਤਿ ਵਾ ਪਯੁਤ੍ਤਂ ਵਣ੍ਣਿਤਨ੍ਤਿ ਅਤ੍ਥਂ ਗਹੇਤ੍ਵਾ ‘‘ਅਨੇਕੇਹਿ ਪਕਾਰੇਹਿ ਵਿਹਿਤ’’ਨ੍ਤਿ ਵਤ੍ਤਬ੍ਬੇ ਮਜ੍ਝੇਪਦਲੋਪਂ ਕਤ੍ਵਾ ਨਿਦ੍ਦਿਟ੍ਠਨ੍ਤਿ ਆਹ ‘‘ਅਨੇਕੇਹਿ…ਪੇ… ਸਂਵਣ੍ਣਿਤ’’ਨ੍ਤਿ. ਪਕਾਰੇਹੀਤਿ ਨਾਮਗੋਤ੍ਤਾਦਿਪਕਾਰੇਹਿ. ਸਂਵਣ੍ਣਿਤਨ੍ਤਿ ਬੁਦ੍ਧਾਦੀਹਿ ਕਥਿਤਂ. ਅਨੁ-ਸਦ੍ਦੋ ਅਨਨ੍ਤਰਤ੍ਥਦੀਪਕੋਤਿ ਆਹ ‘‘ਅਭਿਨਿਨ੍ਨਾਮਿਤਮਤ੍ਤੇ ਏਵਾ’’ਤਿ, ਏਤੇਨ ਚ ਪਰਿਕਮ੍ਮਸ੍ਸ ਆਰਦ੍ਧਤਂ ਦਸ੍ਸੇਤਿ. ਪੂਰਿਤਪਾਰਮੀਨਞ੍ਹੀਤਿਆਦਿਨਾ ਪਰਿਕਮ੍ਮਂ ਵਿਨਾਪਿ ਸਿਦ੍ਧਿਂ ਦਸ੍ਸੇਤਿ.

ਆਰਦ੍ਧਪ੍ਪਕਾਰਦਸ੍ਸਨਤ੍ਥੇਤਿ ¶ ਅਨੁਸ੍ਸਰਿਤੁਂ ਆਰਦ੍ਧਾਨਂ ਪੁਬ੍ਬੇ ਨਿਵੁਤ੍ਥਕ੍ਖਨ੍ਧਾਨਂ ਦਸ੍ਸਨਤ੍ਥੇ. ਜਾਯਤੀਤਿ ਜਾਤਿ, ਭਵੋ. ਸੋ ਏਕਕਮ੍ਮਮੂਲਕੋ ਆਦਾਨਨਿਕ੍ਖੇਪਪਰਿਚ੍ਛਿਨ੍ਨੋ ਖਨ੍ਧਪ੍ਪਬਨ੍ਧੋ ਇਧ ‘‘ਜਾਤੀ’’ਤਿ ਅਧਿਪ੍ਪੇਤੋਤਿ ਆਹ ਏਕਮ੍ਪੀਤਿਆਦਿ. ਕਪ੍ਪੋਤਿ ਅਸਙ੍ਖ੍ਯੇਯ੍ਯਕਪ੍ਪੋ, ਸੋ ਪਨ ਅਤ੍ਥਤੋ ਕਾਲੋ ਤਥਾਪਵਤ੍ਤਧਮ੍ਮਮੁਪਾਦਾਯ ਪਞ੍ਞਤ੍ਤੋ, ਤੇਸਂ ਵਸੇਨਸ੍ਸ ਪਰਿਹਾਨਿ ਚ ਵਡ੍ਢਿ ਚ ਵੇਦਿਤਬ੍ਬਾ. ਸਂਵਟ੍ਟੋ ਸਂਵਟ੍ਟਨਂ ਵਿਨਾਸੋ ਅਸ੍ਸ ਅਤ੍ਥੀਤਿ ਸਂਵਟ੍ਟੋ, ਅਸਙ੍ਖ੍ਯੇਯ੍ਯਕਪ੍ਪੋ. ਸਂਵਟ੍ਟੇਨ ਵਿਨਾਸੇਨ ਸਹ ਤਿਟ੍ਠਤਿ ਸੀਲੇਨਾਤਿ ਸਂਵਟ੍ਟਟ੍ਠਾਯੀ. ਏਵਂ ਵਿਵਟ੍ਟੋਤਿਆਦੀਸੁਪਿ. ਤਤ੍ਥ ਵਿਵਟ੍ਟਨਂ ਵਿਵਟ੍ਟੋ, ਉਪ੍ਪਤ੍ਤਿ, ਵਡ੍ਢਿ ਵਾ. ਤੇਜੇਨ ਵਿਨਾਸੋ ਤੇਜੋਸਂਵਟ੍ਟੋ. ਵਿਤ੍ਥਾਰਤੋ ਪਨਾਤਿ ਪੁਥੁਲਤੋ ਪਨ ਸਂਵਟ੍ਟਸੀਮਾਭੇਦੋ ਨਤ੍ਥਿ, ਤੇਨਾਹ ‘‘ਸਦਾਪੀ’’ਤਿ. ਏਕਨਗਰਿਯਾ ਵਿਯ ਅਸ੍ਸ ਜਾਤਕ੍ਖਣੇ ਵਿਕਾਰਾਪਜ੍ਜਨਤੋ ਜਾਤਿਕ੍ਖੇਤ੍ਤਵੋਹਾਰੋਤਿ ਦਸ੍ਸੇਤੁਂ ‘‘ਪਟਿਸਨ੍ਧਿਆਦੀਸੁ ਕਮ੍ਪਤੀ’’ਤਿ ਵੁਤ੍ਤਂ. ਆਨੁਭਾਵੋ ਪਵਤ੍ਤਤੀਤਿ ਤਦਨ੍ਤੋਗਧਾਨਂ ਸਬ੍ਬੇਸਂ ਸਤ੍ਤਾਨਂ ਰੋਗਾਦਿਉਪਦ੍ਦਵੋ ਵੂਪਸਮ੍ਮਤੀਤਿ ਅਧਿਪ੍ਪਾਯੋ. ਯਂ ਯਾਵਤਾ ਵਾ ਪਨ ਆਕਙ੍ਖੇਯ੍ਯਾਤਿ ਵੁਤ੍ਤਨ੍ਤਿ ਯਂ ਵਿਸਯਕ੍ਖੇਤ੍ਤਂ ਸਨ੍ਧਾਯ ਏਕਸ੍ਮਿਂ ਏਵ ਖਣੇ ਸਬ੍ਬਤ੍ਥ ਸਰੇਨ ਅਭਿਵਿਞ੍ਞਾਪਨਂ, ਅਤ੍ਤਨੋ ਰੂਪਕਾਯਦਸ੍ਸਨਞ੍ਚ ਪਟਿਜਾਨਨ੍ਤੇਨ ਭਗਵਤਾ ‘‘ਯਾਵਤਾ ਵਾ ਪਨ ਆਕਙ੍ਖੇਯ੍ਯਾ’’ਤਿ ਵੁਤ੍ਤਂ.

ਏਤੇਸੂਤਿ ਨਿਦ੍ਧਾਰਣੇ ਭੁਮ੍ਮਂ. ਪਵਤ੍ਤਫਲਭੋਜਨੋਤਿ ਸਯਂਪਤਿਤਫਲਾਹਾਰੋ, ਇਦਞ੍ਚ ਤਾਪਸਕਾਲਂ ਸਨ੍ਧਾਯ ਵੁਤ੍ਤਂ. ਇਧੂਪਪਤ੍ਤਿਯਾਤਿ ਇਧ ਚਰਿਮਭਵੇ ਉਪਪਤ੍ਤਿਯਾ. ਏਕਗੋਤ੍ਤੋਤਿ ਤੁਸਿਤਗੋਤ੍ਤੇਨ ਏਕਗੋਤ੍ਤੋ. ਇਤਰੇਤਿ ਵਣ੍ਣਾਦਯੋ. ਤਿਤ੍ਥਿਯਾਤਿ ਕਮ੍ਮਫਲਵਾਦਿਨੋ. ਅਭਿਨੀਹਾਰੋਤਿ ਅਭਿਨੀਹਾਰੋਪਲਕ੍ਖਿਤੋ ਪੁਞ੍ਞਞਾਣਸਮ੍ਭਰਣਕਾਲੋ ਵੁਤ੍ਤੋ. ਚੁਤਿਪਟਿਸਨ੍ਧਿਵਸੇਨਾਤਿ ਅਤ੍ਤਨੋ ਪਰਸ੍ਸ ਵਾ ਤਸ੍ਮਿਂ ਤਸ੍ਮਿਂ ਅਤ੍ਤਭਾਵੇ ਚੁਤਿਂ ਦਿਸ੍ਵਾ ਅਨ੍ਤਰਾ ਕਿਞ੍ਚਿ ਅਨਾਮਸਿਤ੍ਵਾ ਪਟਿਸਨ੍ਧਿਯਾ ਏਵ ਗਹਣਵਸੇਨ ਏਵਂ ਜਾਨਨਂ ਇਚ੍ਛਿਤਪ੍ਪਦੇਸੋਕ੍ਕਮਨਨ੍ਤਿ ਆਹ ਤੇਸਞ੍ਹੀਤਿਆਦਿ. ਉਭਯਥਾਪੀਤਿ ਖਨ੍ਧਪਟਿਪਾਟਿਯਾਪਿ ¶ ਚੁਤਿਪਟਿਸਨ੍ਧਿਵਸੇਨਪਿ. ਸੀਹੋਕ੍ਕਨ੍ਤਵਸੇਨਪੀਤਿ ਸੀਹਨਿਪਾਤਵਸੇਨਪਿ. ਕਿਲੇਸਾਨਂ ਆਤਾਪਨਪਰਿਤਾਪਨਟ੍ਠੇਨ ਵੀਰਿਯਂ ਆਤਾਪੋਤਿ ਆਹ ‘‘ਵੀਰਿਯਾਤਾਪੇਨਾ’’ਤਿ.

ਦਿਬ੍ਬਚਕ੍ਖੁਞਾਣਕਥਾਵਣ੍ਣਨਾ

੧੩. ਦਿਵਿ ¶ ਭਵਤ੍ਤਾ ਦਿਬ੍ਬਨ੍ਤਿ ਦੇਵਾਨਂ ਪਸਾਦਚਕ੍ਖੁ ਵੁਚ੍ਚਤੀਤਿ ਆਹ ‘‘ਦਿਬ੍ਬਸਦਿਸਤ੍ਤਾ’’ਤਿ. ਦੂਰੇਪੀਤਿ ਪਿ-ਸਦ੍ਦੇਨ ਸੁਖੁਮਸ੍ਸਾਪਿ ਆਰਮ੍ਮਣਸ੍ਸ ਗਹਣਂ. ਵੀਰਿਯਾਰਮ੍ਭਵਸੇਨ ਇਜ੍ਝਨਤੋ ਸਬ੍ਬਾਪਿ ਭਾਵਨਾ, ਪਧਾਨਸਙ੍ਖਾਰਸਮਨ੍ਨਾਗਤੋ ਵਾ ਇਦ੍ਧਿਪਾਦਭਾਵਨਾਵਿਸੇਸਤੋ ਵੀਰਿਯਭਾਵਨਾਤਿ ਆਹ ‘‘ਵੀਰਿਯਭਾਵਨਾਬਲਨਿਬ੍ਬਤ੍ਤ’’ਨ੍ਤਿ. ਦਿਬ੍ਬਵਿਹਾਰਵਸੇਨਾਤਿ ਕਸਿਣਾਦਿਜ੍ਝਾਨਚਤਉਕ੍ਕਵਸੇਨ. ਇਮਿਨਾ ਦੂਰਕਾਰਣਤ੍ਥੇ ਅਸ੍ਸ ਦਿਬ੍ਬਭਾਵਮਾਹ. ਦਿਬ੍ਬਵਿਹਾਰਸਨ੍ਨਿਸ੍ਸਿਤਤ੍ਤਾਤਿ ਇਮਿਨਾ ਆਸਨ੍ਨਕਾਰਣਭੂਤਪਾਦਕਜ੍ਝਾਨਤੋ ਨਿਬ੍ਬਤ੍ਤਨ੍ਤਿ ਦਿਬ੍ਬਵਿਹਾਰਸਨ੍ਨਿਸ੍ਸਿਤਤ੍ਤਾਤਿ ਇਮਸ੍ਸ ਦਿਬ੍ਬਵਿਹਾਰਪਅਯਾਪਨ੍ਨਂ ਅਤ੍ਤਨਾ ਸਮ੍ਪਯੁਤ੍ਤਂ ਰੂਪਾਵਚਰਚਤੁਤ੍ਥਜ੍ਝਾਨਂ ਨਿਸ੍ਸਯਪਚ੍ਚਯਭੂਤਂ ਨਿਸ੍ਸਾਯ ਦਿਬ੍ਬਚਕ੍ਖੁਞਾਣਸ੍ਸ ਪਵਤ੍ਤਤ੍ਤਾਤਿਪਿ ਅਤ੍ਥੋ. ਦਿਵੁਧਾਤੁਸ੍ਸ ਜੁਤਿਗਤਿਯੋਗਂ ਸਨ੍ਧਾਯ ਆਲੋਕਪਅਗ੍ਗਹੇਨਾਤਿਆਦਿ ਵੁਤ੍ਤਂ. ਤਤ੍ਥ ਆਲੋਕਪਰਿਗ੍ਗਹੇਨਾਤਿ ਕਸਿਣਾਲੋਕਪਰਿਗ੍ਗਹਵਸੇਨ. ਦਸ੍ਸਨਟ੍ਠੇਨਾਤਿ ਰੂਪਦਸ੍ਸਨਭਾਵੇਨ, ਇਮਿਨਾ ‘‘ਚਕ੍ਖਤਿ ਰੂਪਂ ਵਿਭਾਵੇਤੀ’’ਤਿ ਨਿਬ੍ਬਚਨਤੋ ਚਕ੍ਖੁਤ੍ਤਂ ਦਸ੍ਸੇਤਿ. ਚਕ੍ਖੁਕਿਚ੍ਚਕਰਣੇਨਾਤਿ ਇਦਂ ਚਕ੍ਖੁਮਿਵ ਚਕ੍ਖੂਤਿ ਉਪਮਾਯ ਸਦਿਸਨਿਮਿਤ੍ਤਦਸ੍ਸਨਂ, ਸਮਵਿਸਮਾਦਿਦਸ੍ਸਨਸਙ੍ਖਾਤਸ੍ਸ ਚਕ੍ਖੁਕਿਚ੍ਚਸ੍ਸ ਕਰਣਤੋਤਿ ਅਤ੍ਥੋ.

ਯਥਾਹਾਤਿ ਉਪਕ੍ਕਿਲੇਸਸੁਤ੍ਤਪ੍ਪਦੇਸਂ (ਮ. ਨਿ. ੩.੨੪੨) ਨਿਦਸ੍ਸੇਤਿ. ਤਤ੍ਥ ਵਿਚਿਕਿਚ੍ਛਾਤਿਆਦੀਸੁ ਭਗਵਤੋ ਬੋਧਿਮੂਲੇ ਅਨਭਿਸਮ੍ਬੁਦ੍ਧਸ੍ਸੇਵ ਦਿਬ੍ਬਚਕ੍ਖੁਨਾ ਨਾਨਾਵਿਧਾਨਿ ਰੂਪਾਨਿ ਪਸ੍ਸਨ੍ਤਸ੍ਸ ‘‘ਇਦਂ ਨੁ ਖੋ ਕਿਂ, ਇਦਂ ਨੁ ਖੋ ਕਿ’’ਨ੍ਤਿ ਵਿਚਿਕਿਚ੍ਛਾ ਉਪ੍ਪਨ੍ਨਾ, ਤਤੋ ਪਨ ਵਿਚਿਕਿਚ੍ਛਾਨਿਵਤ੍ਤਨਤ੍ਥਂ ਤਾਨਿ ਰੂਪਾਨਿ ਅਮਨਸਿਕਰੋਤੋ ਅਮਨਸਿਕਰੋਨ੍ਤਸ੍ਸ ਥਿਨਮਿਦ੍ਧਂ ਉਪ੍ਪਨ੍ਨਂ, ਤਤੋ ਨਿਵਤ੍ਤਨਤ੍ਥਂ ਪੁਨ ਸਬ੍ਬਰੂਪਾਨਿ ਮਨਸਿਕਰੋਤੋ ਰਕ੍ਖਸਾਦੀਸੁ ਛਮ੍ਭਿਤਤ੍ਤਂ ਉਪ੍ਪਨ੍ਨਂ, ‘‘ਕਿਮੇਤ੍ਥ ਭਾਯਿਤਬ੍ਬ’’ਨ੍ਤਿ ਭਯਵਿਨੋਦਨਵਸੇਨ ਮਨਸਿਕਰੋਤੋ ਅਤ੍ਤਨੋ ਮਨਸਿਕਾਰਕੋਸਲ੍ਲਂ ਪਟਿਚ੍ਚ ਉਪ੍ਪਿਲਸਙ੍ਖਾਤਾ ਸਮਾਧਿਦੂਸਿਕਾ ਗੇਹਸਿਤਪੀਤਿ ਉਪ੍ਪਨ੍ਨਾ, ਤਨ੍ਨਿਸੇਧਾਯ ਮਨਸਿਕਾਰਵੀਰਿਯਂ ਸਿਥਿਲਂ ਕਰੋਨ੍ਤਸ੍ਸ ਕਾਯਾਲਸਿਯਸਙ੍ਖਾਤਂ ਦੁਟ੍ਠੁਲ੍ਲਂ, ਤਨ੍ਨਿਸੇਧਾਯ ਪੁਨ ਵੀਰਿਯਂ ਪਗ੍ਗਣ੍ਹਤੋ ਅਚ੍ਚਾਰਦ੍ਧਵੀਰਿਯਂ, ਪੁਨ ਤਨ੍ਨਿਸੇਧਾਯ ਵੀਰਿਯਂ ਸਿਥਿਲਯਤੋ ਅਤਿਲੀਨਵੀਰਿਯਂ ਉਪ੍ਪਨ੍ਨਂ, ਤਨ੍ਨਿਸੇਧੇਤ੍ਵਾ ਦਿਬ੍ਬਰੂਪਾਨਿ ਪਸ੍ਸਤੋ ਅਭਿਜਪ੍ਪਾਸਙ੍ਖਾਤਾ ਤਣ੍ਹਾ ਉਪ੍ਪਨ੍ਨਾ, ਤਨ੍ਨਿਸੇਧਾਯ ਹੀਨਾਦਿਨਾਨਾਰੂਪਾਨਿ ਮਨਸਿਕਰੋਤੋ ਨਾਨਾਰਮ੍ਮਣਵਿਕ੍ਖੇਪਸਙ੍ਖਾਤਾ ਨਾਨਤ੍ਤਸਞ੍ਞਾ ਉਪ੍ਪਨ੍ਨਾ. ਪੁਨ ਤਂ ਵਿਹਾਯ ਏਕਮੇਵ ਮਨਸਿਕਰੋਤੋ ਅਤਿਨਿਜ੍ਝਾਯਿਤਤ੍ਤਂ ਰੂਪਾਨਂ ਅਤਿਵਿਯ ¶ ਚਿਨ੍ਤਨਂ ਉਪ੍ਪਨ੍ਨਂ. ਓਭਾਸਨ੍ਤਿ ਪਰਿਕਮ੍ਮਸਮੁਟ੍ਠਿਤਂ ਓਭਾਸਂ ¶ . ਨ ਚ ਰੂਪਾਨਿ ਪਸ੍ਸਾਮੀਤਿ ‘‘ਪਰਿਕਮ੍ਮੋਭਾਸਮਨਸਿਕਾਰਪਸੁਤਤਾਯ ਦਿਬ੍ਬਚਕ੍ਖੁਨਾ ਰੂਪਾਨਿ ਨ ਪਸ੍ਸਾਮੀ’’ਤਿ ਏਵਂ ਉਪ੍ਪਤ੍ਤਿਕ੍ਕਮਸਹਿਤੋ ਅਤ੍ਥੋ ਵੇਦਿਤਬ੍ਬੋ, ਮਨੁਸ੍ਸਾਨਂ ਇਦਨ੍ਤਿ ਮਾਨੁਸਕਂ ਮਾਨੁਸਕਚਕ੍ਖੁਗੋਚਰਂ ਥੂਲਰੂਪਂ ਵੁਚ੍ਚਤਿ. ਤਦੇਵ ਮਨੁਸ੍ਸਾਨਂ ਦਸ੍ਸਨੂਪਚਾਰਤ੍ਤਾ ਮਨੁਸ੍ਸੂਪਚਾਰੋਤਿ ਆਹ ‘‘ਮਨੁਸ੍ਸੂਪਚਾਰਂ ਅਤਿਕ੍ਕਮਿਤ੍ਵਾ’’ਤਿ. ਰੂਪਦਸ੍ਸਨੇਨਾਤਿ ਦੂਰਸੁਖੁਮਾਦਿਰੂਪਦਸ੍ਸਨੇਨ.

ਯਸ੍ਮਾ ਨਿਯਮੇਨ ਪੁਰੇਜਾਤਟ੍ਠਿਤਰੂਪਾਰਮ੍ਮਣਂ ਦਿਬ੍ਬਚਕ੍ਖੁਞਾਣਂ ਆਵਜ੍ਜਨਪਰਿਕਮ੍ਮੇਹਿ ਵਿਨਾ ਨ ਉਪ੍ਪਜ੍ਜਤਿ, ਨ ਚ ਉਪ੍ਪਜ੍ਜਮਾਨਂ ਭਿਜ੍ਜਮਾਨਂ ਰੂਪਮਸ੍ਸ ਆਰਮ੍ਮਣਂ ਹੋਤਿ ਦੁਬ੍ਬਲਤ੍ਤਾ, ਚੁਤਿਚਿਤ੍ਤਞ੍ਚ ਕਮ੍ਮਜਰੂਪਸ੍ਸ ਭਙ੍ਗਕ੍ਖਣੇ ਏਵ ਉਪ੍ਪਜ੍ਜਤਿ, ਪਟਿਸਨ੍ਧਿਚਿਤ੍ਤਞ੍ਚ ਉਪਪਤ੍ਤਿਕ੍ਖਣੇ, ਤਸ੍ਮਾ ਆਹ ਚੁਤਿਕ੍ਖਣੇਤਿਆਦਿ. ਰੂਪਦਸ੍ਸਨਮੇਵੇਤ੍ਥ ਸਤ੍ਤਦਸ੍ਸਨਨ੍ਤਿ ਚਵਮਾਨੇਤਿਆਦਿਨਾ ਪੁਗ੍ਗਲਾਧਿਟ੍ਠਾਨੇਨ ਵੁਤ੍ਤਂ. ਅਭਿਰੂਪੇ ਵਿਰੂਪੇਤਿਪੀਤਿ ਇਦਂ ਵਣ੍ਣ-ਸਦ੍ਦਸ੍ਸ ਸਣ੍ਠਾਨਵਾਚਕਤਂ ਸਨ੍ਧਾਯ ਵੁਤ੍ਤਂ ਮਹਨ੍ਤਂ ਹਤ੍ਥਿਰਾਜਵਣ੍ਣਂ ਅਭਿਨਿਮ੍ਮਿਨਿਤ੍ਵਾਤਿਆਦੀਸੁ (ਸਂ. ਨਿ. ੧.੧੩੮) ਵਿਯ. ਸੁਨ੍ਦਰਂ ਗਤਿਂ ਗਤਾ ਸੁਗਤਾਤਿ ਆਹ ‘‘ਸੁਗਤਿਗਤੇ’’ਤਿ. ਇਮਿਨਾ ਪਨ ਪਦੇਨਾਤਿ ਯਥਾਕਮ੍ਮੁਪਗੇਤਿ ਇਮਿਨਾ ਪਦੇਨ.

ਨੇਰਯਿਕਾਨਂ ਅਗ੍ਗਿਜਾਲਸਤ੍ਥਨਿਪਾਤਾਦੀਹਿ ਵਿਭਿਨ੍ਨਸਰੀਰਵਣ੍ਣਂ ਦਿਸ੍ਵਾ ਤਦਨਨ੍ਤਰੇਹਿ ਕਾਮਾਵਚਰਜਵਨੇਹੇਵ ਞਾਤਂ ਤੇਸਂ ਦੁਕ੍ਖਾਨੁਭਵਨਮ੍ਪਿ ਦਸ੍ਸਨਫਲਾਯਤ੍ਤਤਾਯ ‘‘ਦਿਬ੍ਬਚਕ੍ਖੁਕਿਚ੍ਚਮੇਵਾ’’ਤਿ ਵੁਤ੍ਤਂ. ਏਵਂ ਮਨਸਿਕਰੋਤੀਤਿ ਤੇਸਂ ਕਮ੍ਮਸ੍ਸ ਞਾਤੁਕਾਮਤਾਵਸੇਨ ਪਾਦਕਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਪਰਿਕਮ੍ਮਵਸੇਨ ਕਿਨ੍ਨੁ ਖੋਤਿਆਦਿਨਾ ਮਨਸਿਕਰੋਤਿ. ਅਥਸ੍ਸ ਤਂ ਕਮ੍ਮਂ ਆਰਮ੍ਮਣਂ ਕਤ੍ਵਾ ਆਵਜ੍ਜਨਪਰਿਕਮ੍ਮਾਦੀਨਂ ਉਪਰਿ ਉਪ੍ਪਨ੍ਨੇਨ ਰੂਪਾਵਚਰਚਤੁਤ੍ਥਜ੍ਝਾਨੇਨ ਸਮ੍ਪਯੁਤ੍ਤਂ ਯਂ ਞਾਣਂ ਉਪ੍ਪਜ੍ਜਤਿ, ਇਦਂ ਯਥਾਕਮ੍ਮੁਪਗਞਾਣਂ ਨਾਮਾਤਿ ਯੋਜਨਾ. ਦੇਵਾਨਂ ਦਸ੍ਸਨੇਪਿ ਏਸੇਵ ਨਯੋ. ਵਿਸੁਂ ਪਰਿਕਮ੍ਮਨ੍ਤਿ ਪੁਬ੍ਬੇਨਿਵਾਸਾਦੀਨਂ ਵਿਯ ਦਿਬ੍ਬਚਕ੍ਖੁਞਾਣਪਰਿਕਮ੍ਮਂ ਵਿਨਾ ਵਿਸੁਂ ਪਰਿਕਮ੍ਮਂ ਨਤ੍ਥਿ. ਕੇਚਿ ਪਨੇਤ੍ਥ ‘‘ਪਾਦਕਜ੍ਝਾਨਸਮਾਪਜ੍ਜਨਪਰਿਕਮ੍ਮੇਹਿ ਕਿਚ੍ਚਂ ਨਤ੍ਥਿ, ਕਿਨ੍ਨੁ ਖੋ ਕਮ੍ਮਨ੍ਤਿਆਦਿਮਨਸਿਕਾਰਾਨਨ੍ਤਰਮੇਵ ਕਮ੍ਮਂ. ਕਮ੍ਮਸੀਸੇਨ ਤਂਸਮ੍ਪਯੁਤ੍ਤੇ ਚ ਧਮ੍ਮੇ ਆਰਮ੍ਮਣਂ ਕਤ੍ਵਾ ਅਪ੍ਪਨਾਵੀਥਿ ਉਪ੍ਪਜ੍ਜਤਿ. ਏਵਮਨਾਗਤਂਸਞਾਣੇਪਿ, ਤੇਨੇਵ ਵਿਸੁਂ ਪਰਿਕਮ੍ਮਂ ਨਾਮ ਨਤ੍ਥਿ…ਪੇ… ਦਿਬ੍ਬਚਕ੍ਖੁਨਾ ਸਹੇਵ ਇਜ੍ਝਨ੍ਤੀਤਿ ਵੁਤ੍ਤ’’ਨ੍ਤਿ ਵਦਨ੍ਤਿ. ਤਂ ਨ ਗਹੇਤਬ੍ਬਂ ਵਸੀਭੂਤਾਨਮ੍ਪਿ ਅਭਿਞ੍ਞਾਨਂ ਪਾਦਕਜ੍ਝਾਨਾਦਿਪਰਿਕਮ੍ਮਂ ਵਿਨਾ ਅਨੁਪ੍ਪਤ੍ਤਿਤੋ. ਪਾਦਕਜ੍ਝਾਨਾਦਿਮਤ੍ਤੇਨ ਚ ਵਿਸੁਂ ਪਰਿਕਮ੍ਮਂ ਨਾਮ ਨ ਹੋਤੀਤਿ ਦਿਬ੍ਬਚਕ੍ਖੁਨਾਵ ਏਤਾਨਿ ਞਾਣਾਨਿ ¶ ਸਿਦ੍ਧਾਨੀਤਿ ਗਹੇਤਬ੍ਬਂ. ਏਵਂ ਅਨਾਗਤਂਸਞਾਣਸ੍ਸਾਪੀਤਿ ਦਿਬ੍ਬਚਕ੍ਖੁਨਾ ਦਿਟ੍ਠਸ੍ਸ ਸਤ੍ਤਸ੍ਸ ਅਨਾਗਤੇ ਪਵਤ੍ਤਿਂ ਞਾਤੁਕਾਮਤਾਯ ਪਾਦਕਜ੍ਝਾਨਾਦੀਨਮਨਨ੍ਤਰਂ ਞਾਣਬਲਾਨੁਰੂਪਂ ਅਨਾਗਤੇਸੁ ਅਨੇਕਕਪ੍ਪੇਸੁ ਉਪ੍ਪਜ੍ਜਨਾਰਹੇ ਪੁਬ੍ਬੇ ਅਤ੍ਤਭਾਵਪਰਿਯਾਪਨ੍ਨੇ ¶ ਪਞ੍ਚਕ੍ਖਨ੍ਧੇ ਤਪ੍ਪਟਿਬਦ੍ਧੇ ਤਦਾਰਮ੍ਮਣੇ ਚ ਸਬ੍ਬੇ ਲੋਕਿਯਲੋਕੁਤ੍ਤਰਧਮ੍ਮੇ ਸਮ੍ਮੁਤਿਞ੍ਚ ਏਕਕ੍ਖਣੇ ਆਲਮ੍ਬਿਤ੍ਵਾ ਉਪ੍ਪਜ੍ਜਨਕਸ੍ਸ ਚਤੁਤ੍ਥਜ੍ਝਾਨਸਮ੍ਪਯੁਤ੍ਤਸ੍ਸ ਅਨਾਗਤਂਸਞਆਣਸ੍ਸਾਪਿ ਵਿਸੁਂ ਪਰਿਕਮ੍ਮਂ ਨਾਮ ਨਤ੍ਥੀਤਿ ਯੋਜਨਾ.

ਕੇਚਿ ਪਨੇਤ੍ਥ ‘‘ਪੁਬ੍ਬੇਨਿਵਾਸਾਨੁਸ੍ਸਤਿਯਂ ਵਿਯ ਨਾਮਗੋਤ੍ਤਾਦਿਗਹਣਮ੍ਪਿ ਅਤ੍ਥੇਵ, ਤਞ੍ਚ ਨ ਅਭਿਞ੍ਞਾਕ੍ਖਣੇ, ਅਥ ਖੋ ਤਦਨਨ੍ਤਰੇਸੁ ਕਾਮਾਵਚਰਜਵਨਕ੍ਖਣੇਸੁ ਏਵ ਹੋਤਿ ਨਾਮਪਰਿਕਪ੍ਪਕਾਲੇ ਇਤਰਪਰਿਕਪ੍ਪਾਸਮ੍ਭਵਾ ਕਮ੍ਮੇਨੁਪ੍ਪਤ੍ਤਿਯਞ੍ਚ ਪਰਿਯਨ੍ਤਾਭਾਵਾ. ਸਬ੍ਬਪਰਿਕਮ੍ਮਨਿਮਿਤ੍ਤੇਸੁ ਪਨ ਧਮ੍ਮੇਸੁ ਅਤ੍ਥੇਸੁਪਿ ਏਕਕ੍ਖਣੇ ਅਭਿਞ੍ਞਾਯ ਦਿਟ੍ਠੇਸੁ ਯਥਾਰੁਚਿਵਸੇਨ ਪਚ੍ਛਾ ਏਵਂਨਾਮੋਤਿਆਦਿਨਾ ਕਾਮਾਵਚਰਚਿਤ੍ਤੇਨ ਵਿਕਪ੍ਪੋ ਉਪ੍ਪਜ੍ਜਤਿ ਚਕ੍ਖੁਨਾ ਦਿਟ੍ਠੇਸੁ ਬਹੂਸੁ ਰੂਪੇਸੁ ਥਮ੍ਭਕੁਮ੍ਭਾਦਿਵਿਕਪ੍ਪੋ ਵਿਯ. ਯਞ੍ਚ ਕਤ੍ਥ ਅਵਿਕਪ੍ਪਿਤਂ, ਤਮ੍ਪਿ ਵਿਕਪ੍ਪਨਾਰਹਨ੍ਤਿ ਸਬ੍ਬਂ ਨਾਮਗੋਤ੍ਤਾਦਿਤੋ ਵਿਕਪ੍ਪਿਤਮੇਵ ਹੋਤਿ. ਯਥਾ ਚੇਤ੍ਥ, ਏਵਂ ਪੁਬ੍ਬੇਨਿਵਾਸਾਨੁਸ੍ਸਤਿਯਮ੍ਪਿ ਪਰਿਕਪ੍ਪਾਰਹਤਮ੍ਪਿ ਸਨ੍ਧਾਯ ਪਾਲ਼ਿਯਂ ਏਵਂਨਾਮੋਤਿਆਦਿਨਾ ਅਪਦੇਸਸਹਿਤਮੇਵ ਵੁਤ੍ਤ’’ਨ੍ਤਿ ਵਦਨ੍ਤਿ. ਅਞ੍ਞੇ ਪਨ ‘‘ਨਾਮਗੋਤ੍ਤਾਦਿਕਂ ਸਬ੍ਬਮ੍ਪਿ ਏਕਕ੍ਖਣੇ ਪਞ੍ਞਾਯਤਿ, ਅਭਿਰੁਚਿਤਂ ਪਨ ਵਚਸਾ ਵੋਹਰਨ੍ਤੀ’’ਤਿ ਵਦਨ੍ਤਿ, ਤੇਪਿ ਅਤ੍ਥਤੋ ਪੁਰਿਮੇਹਿ ਸਦਿਸਾ ਏਵ, ਪੁਬ੍ਬੇ ਦਿਟ੍ਠਸ੍ਸ ਪੁਨ ਵੋਹਾਰਕਾਲੇਪਿ ਪਰਿਕਪ੍ਪੇਤਬ੍ਬਤੋ ਪਰਿਕਪ੍ਪਾਰਹਧਮ੍ਮਦਸ੍ਸਨਮੇਵ ਤੇਹਿਪਿ ਅਤ੍ਥਤੋ ਉਪਗਤਂ. ਏਕੇ ਪਨ ‘‘ਸੋ ਤਤੋ ਚੁਤੋ ਅਮੁਤ੍ਰ ਉਦਪਾਦਿਨ੍ਤਿਆਦਿਵਚਨਤੋ ਕਮੇਨੇਵ ਅਤੀਤਾਨਾਗਤਧਮ੍ਮਜਾਨਨੇਨ ਨਾਮਗੋਤ੍ਤਾਦੀਹਿ ਸਦ੍ਧਿਂ ਗਹਣਂ ਸੁਕਰ’’ਨ੍ਤਿ ਵਦਨ੍ਤਿ, ਤਂ ਅਯੁਤ੍ਤਮੇਵ ਬੁਦ੍ਧਾਨਮ੍ਪਿ ਸਬ੍ਬਂ ਞਾਤੁਂ ਅਸਕ੍ਕੁਣੇਯ੍ਯਤਾਯ ਸਬ੍ਬਞ੍ਞੁਤਾਹਾਨਿਪ੍ਪਸਙ੍ਗਤੋ. ਪਾਲ਼ਿਯਂ ਇਮੇ ਵਤ ਭੋਨ੍ਤੋਤਿਆਦਿ ਯਥਾਕਮ੍ਮੁਪਗਞਾਣਸ੍ਸ ਪਵਤ੍ਤਿਆਕਾਰਦਸ੍ਸਨਂ. ਕਾਯਵਾਚਾਦਿ ਚੇਤ੍ਥ ਕਾਯਵਚੀਵਿਞ੍ਞਤ੍ਤਿਯੋ.

ਭਾਰਿਯਨ੍ਤਿ ਆਨਨ੍ਤਰਿਯਸਦਿਸਤ੍ਤਾ ਵੁਤ੍ਤਂ. ਖਮਾਪਨੇ ਹਿ ਅਸਤਿ ਆਨਨ੍ਤਰਿਯਮੇਵ. ਤਸ੍ਸਾਤਿ ਭਾਰਿਯਸਭਾਵਸ੍ਸ ਉਪਵਾਦਸ੍ਸ. ਮਹਲ੍ਲਕੋਤਿ ਕੇਵਲਂ ਵਯਸਾਵ ਮਹਲ੍ਲਕੋ, ਨ ਞਾਣੇਨ, ‘‘ਨਾਯਂ ਕਿਞ੍ਚਿ ਲੋਕਵੋਹਾਰਮਤ੍ਤਮ੍ਪਿ ਜਾਨਾਤਿ, ਪਰਿਸਦੂਸਕੋ ਏਵ ਅਮ੍ਹਾਕਂ ਲਜ੍ਜਿਤਬ੍ਬਸ੍ਸ ਕਰਣਤੋ’’ਤਿ ਅਧਿਪ੍ਪਾਯੇਨ ਹੀਲ਼ੇਤ੍ਵਾ ਵੁਤ੍ਤਤ੍ਤਾ ਗੁਣਪਰਿਧਂਸਨੇਨ ਉਪਵਦਤੀਤਿ ਵੇਦਿਤਬ੍ਬਂ. ਆਵੁਸੋਤਿਆਦਿਨਾ ¶ ਥੇਰੋ ਉਪਰਿਮਗ੍ਗੁਪ੍ਪਤ੍ਤਿਮਸ੍ਸ ਆਕਙ੍ਖਨ੍ਤੋ ਕਰੁਣਾਯ ਅਤ੍ਤਾਨਮਾਵਿਕਾਸਿ. ਪਾਕਤਿਕਂ ਅਹੋਸੀਤਿ ਮਗ੍ਗਾਵਰਣਂ ਨਾਹੋਸੀਤਿ ਅਧਿਪ੍ਪਾਯੋ. ਅਤ੍ਤਨਾ ਵੁਡ੍ਢਤਰੋਤਿ ਸਯਮ੍ਪਿ ਵੁਡ੍ਢੋ. ਏਤ੍ਥਾਪਿ ‘‘ਉਕ੍ਕੁਟਿਕਂ ਨਿਸੀਦਿਤ੍ਵਾ’’ਤਿ ਵਿਸੁਦ੍ਧਿਮਗ੍ਗੇ ਵੁਤ੍ਤਂ. ਅਨਾਗਾਮੀ ਅਰਹਾ ਚ ਆਯਤਿਂ ਸਂਵਰਤ੍ਥਾਯ ਨ ਖਮੇਯ੍ਯੁਂ, ਸੇਸਾ ਦੋਸੇਨਪੀਤਿ ਆਹ ‘‘ਸਚੇ ਸੋ ਨ ਖਮਤੀ’’ਤਿ.

ਯੇ ਚ…ਪੇ… ਸਮਾਦਪੇਨ੍ਤਿ, ਤੇਪਿ ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਾਤਿ ਯੋਜੇਤਬ੍ਬਂ. ਸੀਲਸਮ੍ਪਨ੍ਨੋਤਿਆਦੀਸੁ ¶ ਨਿਪ੍ਪਰਿਯਾਯਤੋ ਅਗ੍ਗਮਗ੍ਗਟ੍ਠੋ ਅਧਿਪ੍ਪੇਤੋ ਤਸ੍ਸੇਵ ਅਞ੍ਞਾਰਾਧਨਾ ਨਿਯਮਤੋ, ਸੇਸਾਪਿ ਵਾ ਪਚ੍ਛਿਮਭਵਿਕਾ ਸੀਲਾਦੀਸੁ ਠਿਤਾ ਤੇਸਮ੍ਪਿ ਅਞ੍ਞੁਪ੍ਪਤ੍ਤਿਨਿਯਮਤੋ. ਅਞ੍ਞਨ੍ਤਿ ਅਰਹਤ੍ਤਫਲਂ. ਏਵਂ ਸਮ੍ਪਦਨ੍ਤਿ ਏਵਂ ਨਿਬ੍ਬਤ੍ਤਿਕਂ. ਯਥਾ ਤਂ ਅਵਿਰਜ੍ਝਨਕਨਿਬ੍ਬਤ੍ਤਿਕਂ, ਏਵਮਿਦਮ੍ਪਿ ਏਤਸ੍ਸ ਨਿਰਯੇ ਨਿਬ੍ਬਤ੍ਤਨਨ੍ਤਿ ਅਤ੍ਥੋ. ਯਂ ਸਨ੍ਧਾਯ ‘‘ਏਵਂਸਮ੍ਪਦਮਿਦ’’ਨ੍ਤਿ ਨਿਦ੍ਦਿਟ੍ਠਂ, ਤਂ ਦਸ੍ਸੇਤੁਂ ਤਂ ਵਾਚਨ੍ਤਿਆਦਿ ਵੁਤ੍ਤਂ. ਤਂ ਵਾਚਨ੍ਤਿ ਅਰਿਯੂਪਵਾਦਂ. ਚਿਤ੍ਤਨ੍ਤਿ ਅਰਿਯੂਪਵਾਦਕਚਿਤ੍ਤਂ. ਦਿਟ੍ਠਿਨ੍ਤਿ ਅਰਿਯੂਪਵਾਦੇ ਦੋਸਾਭਾਵਦਸ੍ਸਨਦਿਟ੍ਠਿਂ. ‘‘ਸਬ੍ਬਮੇਤਂ ਪਜਹਿਸ੍ਸਾਮੀ’’ਤਿ ਚਿਤ੍ਤੇਨ ਅਚ੍ਚਯਂ ਦੇਸੇਤ੍ਵਾ ਖਮਾਪਨਵਸੇਨ ਅਪ੍ਪਹਾਯ ਅਪ੍ਪਟਿਨਿਸ੍ਸਜ੍ਜਿਤ੍ਵਾ. ਯਥਾਭਤਂ ਨਿਕ੍ਖਿਤ੍ਤੋ ਏਵਂ ਨਿਰਯੇਤਿ ਯਥਾ ਨਿਰਯਪਾਲੇਹਿ ਆਹਰਿਤ੍ਵਾ ਨਿਰਯੇ ਠਪਿਤੋ, ਏਵਂ ਨਿਰਯੇ ਠਪਿਤੋ ਏਵ, ਅਰਿਯੂਪਵਾਦੇਨੇਵਸ੍ਸ ਇਦਂ ਨਿਯਮੇਨ ਨਿਰਯੇ ਨਿਬ੍ਬਤ੍ਤਨਂ ਯਥਾ ਮਗ੍ਗੇਨ ਫਲਂ ਸਮ੍ਪਜ੍ਜਤਿ, ਏਵਂ ਸਮ੍ਪਜ੍ਜਨਕਨ੍ਤਿ ਅਧਿਪ੍ਪਾਯੋ.

ਮਿਚ੍ਛਾਦਿਟ੍ਠਿ ਸਬ੍ਬਪਾਪਮੂਲਤ੍ਤਾ ਪਰਮਾ ਪਧਾਨਾ ਯੇਸਂ ਵਜ੍ਜਾਨਂ ਤਾਨਿ ਮਿਚ੍ਛਾਦਿਟ੍ਠਿਪਰਮਾਨਿ ਵਜ੍ਜਾਨਿ, ਸਬ੍ਬਵਜ੍ਜੇਹਿ ਮਿਚ੍ਛਾਦਿਟ੍ਠਿਯੇਵ ਪਰਮਂ ਵਜ੍ਜਨ੍ਤਿ ਅਤ੍ਥੋ. ਅਵੀਤਰਾਗਸ੍ਸ ਮਰਣਤੋ ਪਰਂ ਨਾਮ ਭਵਨ੍ਤਰੁਪਾਦਾਨਮੇਵਾਤਿ ਆਹ ‘‘ਪਰਂ ਮਰਣਾਤਿ ਤਦਨਨ੍ਤਰਂ ਅਭਿਨਿਬ੍ਬਤ੍ਤਕ੍ਖਨ੍ਧਗ੍ਗਹਣੇ’’ਤਿ. ਯੇਨ ਤਿਟ੍ਠਤਿ, ਤਸ੍ਸ ਉਪਚ੍ਛੇਦੇਨੇਵ ਕਾਯੋ ਭਿਜ੍ਜਤੀਤਿ ਆਹ ‘‘ਕਾਯਸ੍ਸ ਭੇਦਾਤਿ ਜੀਵਿਤਿਨ੍ਦ੍ਰਿਯਸ੍ਸੁਪਚ੍ਛੇਦਾ’’ਤਿ. ਏਤਿ ਏਤਸ੍ਮਾ ਸੁਖਨ੍ਤਿ ਅਯੋ, ਪੁਞ੍ਞਂ. ਆਯਸ੍ਸਾਤਿ ਆਗਮਨਸ੍ਸ, ਹੇਤੁਸ੍ਸ ਵਾ. ਅਯਤਿ ਇਟ੍ਠਾਰਮ੍ਮਣਾਦੀਹਿ ਪਵਤ੍ਤਤੀਤਿ ਆਯੋ, ਅਸ੍ਸਾਦੋ. ਅਸੁਰਸਦਿਸਨ੍ਤਿ ਪੇਤਾਸੁਰਸਦਿਸਂ.

ਆਸਵਕ੍ਖਯਞਾਣਕਥਾਵਣ੍ਣਨਾ

੧੪. ਸਰਸਲਕ੍ਖਣਪਟਿਵੇਧੇਨਾਤਿ ¶ ਸਭਾਵਸਙ੍ਖਾਤਸ੍ਸ ਲਕ੍ਖਣਸ੍ਸ ਅਸਮ੍ਮੋਹਤੋ ਪਟਿਵਿਜ੍ਝਨੇਨ. ਨਿਬ੍ਬਤ੍ਤਿਕਨ੍ਤਿ ਨਿਪ੍ਫਾਦਨਂ. ਯਂ ਠਾਨਂ ਪਤ੍ਵਾਤਿ ਯਂ ਨਿਬ੍ਬਾਨਂ ਮਗ੍ਗਸ੍ਸ ਆਰਮ੍ਮਣਪਚ੍ਚਯਟ੍ਠੇਨ ਠਾਨਂ ਕਾਰਣਭੂਤਂ ਆਗਮ੍ਮ. ਅਪ੍ਪਵਤ੍ਤਿਨ੍ਤਿ ਅਪ੍ਪਵਤ੍ਤਿਹੇਤੁਂ. ਕਿਲੇਸਵਸੇਨਾਤਿ ਯੇਸਂ ਆਸਵਾਨਂ ਖੇਪਨੇਨ ਇਦਂ ਞਾਣਂ ਆਸਵਕ੍ਖਯਞਾਣਂ ਜਾਤਂ, ਤੇਸਂ ਕਿਲੇਸਾਨਂ ਵਸੇਨ, ਤੇਸਂ ਆਸਵਾਨਂ ਵਸੇਨ ਸਬ੍ਬਕਿਲੇਸਾਨਂ ਸਙ੍ਗਹਣਤੋ ਪਰਿਯਾਯਤੋ ਪਕਾਰਨ੍ਤਰਤੋਤਿ ਅਤ੍ਥੋ. ਪਾਲ਼ਿਯਂ ਅਤੀਤਕਾਲਵਸੇਨ ‘‘ਅਬ੍ਭਞ੍ਞਾਸਿ’’ਨ੍ਤਿ ਵਤ੍ਵਾਪਿ ਅਭਿਸਮਯਕਾਲੇ ਤਸ੍ਸ ਤਸ੍ਸ ਜਾਨਨਸ੍ਸ ਪਚ੍ਚੁਪ੍ਪਨ੍ਨਤਂ ਉਪਾਦਾਯ ‘‘ਏਵਂ ਜਾਨਤੋ ਏਵਂ ਪਸ੍ਸਤੋ’’ਤਿ ਵਤ੍ਤਮਾਨਕਾਲੇਨ ਨਿਦ੍ਦੇਸੋ ਕਤੋ. ਕਾਮਾਸਵਾਦੀਨਂ ਵਿਮੁਚ੍ਚਨੇਨੇਵ ਤਦਵਿਨਾਭਾਵਤੋ ਦਿਟ੍ਠਾਸਵਸ੍ਸਾਪਿ ਵਿਮੁਤ੍ਤਿ ਵੇਦਿਤਬ੍ਬਾ.

‘‘ਖੀਣਾ ਜਾਤੀ’’ਤਿ ਜਾਨਨਂ ਕਿਲੇਸਕ੍ਖਯਪਚ੍ਚਵੇਕ੍ਖਣਵਸੇਨ, ਵੁਸਿਤਂ ਬ੍ਰਹ੍ਮਚਰਿਯਨ੍ਤਿਆਦਿਜਾਨਨਂ ¶ ਮਗ੍ਗਫਲਨਿਬ੍ਬਾਨਪਚ੍ਚਵੇਕ੍ਖਣਵਸੇਨ ਹੋਤੀਤਿ ਆਹ ‘‘ਖੀਣਾ ਜਾਤੀਤਿਆਦੀਹਿ ਤਸ੍ਸ ਭੂਮਿ’’ਨ੍ਤਿ. ਤਤ੍ਥ ਭੂਮਿਨ੍ਤਿ ਵਿਸਯਂ, ਤੀਸੁ ਕਾਲੇਸੁਪਿ ਜਾਤਿਕ੍ਖਯਂ ਪਤਿ ਉਜੁਕਮੇਵ ਵਾਯਾਮਾਸਮ੍ਭਵੇਪਿ ਤਂ ਪਤਿ ਵਾਯਾਮਕਰਣਸ੍ਸ ਸਾਤ੍ਥਕਤਂ, ਤਸ੍ਸ ਅਨਾਗਤਕ੍ਖਨ੍ਧਾਨੁਪ੍ਪਤ੍ਤਿਫਲਤਞ੍ਚ ਦਸ੍ਸੇਤੁਂ ਯਾ ਪਨਾਤਿਆਦਿ ਵੁਤ੍ਤਂ. ਯਾ ਪਨ ਮਗ੍ਗਸ੍ਸ ਅਭਾਵਿਤਤ੍ਤਾਤਿਆਦਿਨਾ ਹਿ ਮਗ੍ਗੇਨਾਵਿਹਤਕਿਲੇਸੇਹੇਵ ਆਯਤਿਂ ਖਨ੍ਧਾਨਂ ਜਾਤਿ ਹੇਸ੍ਸਤਿ, ਤੇਸਞ੍ਚ ਕਿਲੇਸਾਨਂ ਮਗ੍ਗੇਨ ਵਿਨਾਸੇ ਸਤਿ ਖਨ੍ਧਾ ਨ ਜਾਯਿਸ੍ਸਨ੍ਤਿ, ਕਿਲੇਸਾਨਞ੍ਚ ਤੇਕਾਲਿਕਤਾਯ ਜਾਤਿਯਂ ਵੁਤ੍ਤਨਯੇਨ ਕੇਨਚਿ ਪਚ੍ਚਯੇਨ ਵਿਨਾਸਯੋਗੇਪਿ ਚਿਤ੍ਤਸਨ੍ਤਾਨੇ ਕਿਲੇਸਵਿਰੁਦ੍ਧਅਰਿਯਮਗ੍ਗਕ੍ਖਣੁਪ੍ਪਾਦਨਮੇਵ ਤਬ੍ਬਿਨਾਸੋ ਵਿਰੁਦ੍ਧਪਚ੍ਚਯੋਪਨਿਪਾਤੇਨ ਆਯਤਿਂ ਅਨੁਪ੍ਪਜ੍ਜਨਤੋ ਬੀਜਸਨ੍ਤਾਨੇ ਅਗ੍ਗਿਕ੍ਖਨ੍ਧੋਪਨਿਪਾਤੇਨ ਆਯਤਿਂ ਬੀਜਤ੍ਤਾਨੁਪ੍ਪਤ੍ਤਿ ਵਿਯ, ਇਤਿ ਮਗ੍ਗਕ੍ਖਣੁਪ੍ਪਤ੍ਤਿਸਙ੍ਖਾਤਕਿਲੇਸਾਭਾਵੇਨ ਕਿਲੇਸਫਲਾਨਂ ਖਨ੍ਧਾਨਂ ਆਯਤਿਂ ਅਨੁਪ੍ਪਤ੍ਤਿਯੇਵ ਜਾਤਿਕ੍ਖਯੋਤਿ ਅਯਮਤ੍ਥੋ ਵਿਭਾਵੀਯਤਿ, ਤੇਨਾਹ ‘‘ਮਗ੍ਗਸ੍ਸ ਭਾਵਿਤਤ੍ਤਾ ਅਨੁਪ੍ਪਾਦਧਮ੍ਮਤਂ ਆਪਜ੍ਜਨੇਨ ਖੀਣਾ’’ਤਿ. ਏਤ੍ਥ ਚਾਯਮਤ੍ਥੋ ਕਿਲੇਸਾਭਾਵਸਙ੍ਖਾਤਸ੍ਸ ਮਗ੍ਗਸ੍ਸ ਭਾਵਿਤਤ੍ਤਾ ਉਪ੍ਪਾਦਿਤਤ੍ਤਾ ਪਚ੍ਚਯਾਭਾਵੇਨ ਅਨੁਪ੍ਪਜ੍ਜਨ੍ਤੀ ਖਨ੍ਧਾਨਂ ਜਾਤਿ ਤੇਨ ਆਯਤਿਂ ਅਨੁਪ੍ਪਜ੍ਜਨਸਙ੍ਖਾਤੇਨ ਅਨੁਪ੍ਪਾਦਧਮ੍ਮਤਂ ਆਪਜ੍ਜਨੇਨ ਵੋਹਾਰਤੋ ਖੀਣਾ ਮੇ ਜਾਤੀਤਿ. ਨ ਹਿ ਸਙ੍ਖਤਧਮ੍ਮਾਨਂ ਪਚ੍ਚਯਨ੍ਤਰੇਨ ਵਿਨਾਸੋ ਸਮ੍ਭਵਤਿ, ਸਮ੍ਭਵੇ ਚ ¶ ਤਸ੍ਸ ਪਚ੍ਚਯਨ੍ਤਰਤਾਦਿਪ੍ਪਸਙ੍ਗਤੋ. ਤਬ੍ਬਿਰੁਦ੍ਧਕ੍ਖਣੁਪ੍ਪਾਦਨਮੇਵ ਤਬ੍ਬਿਨਾਸੁਪ੍ਪਾਦਨਂ. ਤਨ੍ਤਿ ਖੀਣਜਾਤਿਂ ਅਬ੍ਭਞ੍ਞਾਸਿਨ੍ਤਿ ਸਮ੍ਬਨ੍ਧੋ. ਇਤ੍ਥਤ੍ਤਾਯਾਤਿ ਇਮੇ ਪਕਾਰਾ ਇਤ੍ਥਂ, ਤਬ੍ਭਾਵੋ ਇਤ੍ਥਤ੍ਤਂ, ਤਦਤ੍ਥਾਯ. ਦਸ੍ਸੇਨ੍ਤੋਤਿ ਨਿਗਮਨਵਸੇਨ ਦਸ੍ਸੇਨ੍ਤੋਤਿ.

ਵਿਜ੍ਜਾਤ੍ਤਯਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਉਪਾਸਕਤ੍ਤਪਟਿਵੇਦਨਾਕਥਾਵਣ੍ਣਨਾ

੧੫. ਅਞ੍ਞਾਣਨ੍ਤਿ ਧਿ-ਸਦ੍ਦਯੋਗੇਨ ਸਾਮਿਅਤ੍ਥੇ ਉਪਯੋਗਵਚਨਂ. ਪਾਦਾਨੀਤਿ ਪਾਦੇ. ਯਸਸਾਤਿ ਪਰਿਵਾਰੇਨ. ਕੋਤੂਹਲਚ੍ਛਰੇਤਿ ਕੋਤੂਹਲੇ ਅਚ੍ਛਰੇ ਚ. ਅਯਨ੍ਤਿ ਅਮਿਕ੍ਕਨ੍ਤ-ਸਦ੍ਦੋ. ਨਯਿਦਂ ਆਮੇਡਿਤਵਸੇਨ ਦ੍ਵਿਕ੍ਖਤ੍ਤੁਂ, ਅਥ ਖੋ ਅਤ੍ਥਦ੍ਵਯਵਸੇਨਾਤਿ ਦਸ੍ਸੇਨ੍ਤੋ ਅਥ ਵਾਤਿਆਦਿਮਾਹ. ਅਵਿਸੇਸੇਨ ਅਤ੍ਥਸਾਮਞ੍ਞੇਨ ਨਿਪ੍ਫਨ੍ਨੋ ਅਭਿਕ੍ਕਨ੍ਤਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਦੇਸਨਾਪਸਾਦਾਦਿਵਿਸੇਸਾਪੇਕ੍ਖਾਯਪਿ ਤਥੇਵ ਤਿਟ੍ਠਤਿ ਪੁਬ੍ਬੇ ਨਿਪ੍ਫਨ੍ਨਤ੍ਤਾਤਿ ਆਹ ‘‘ਅਭਿਕ੍ਕਨ੍ਤਂ…ਪੇ… ਪਸਾਦੋ’’ਤਿ. ਅਧੋਮੁਖਠਪਿਤਂ ਕੇਨਚਿ. ਹੇਟ੍ਠਾਮੁਖਜਾਤਂ ਸਯਮੇਵ. ਪਰਿਯਾਯੇਹੀਤਿ ਪਕਾਰੇਹਿ, ਅਰਸਰੂਪਤ੍ਤਾਦਿਪਟਿਪਾਦਕਕਾਰਣੇਹਿ ਵਾ.

ਗਮੁਧਾਤੁਸ੍ਸ ¶ ਦ੍ਵਿਕਮ੍ਮਕਤ੍ਤਾਭਾਵਾ ਗੋਤਮਂ ਸਰਣਨ੍ਤਿ ਇਦਂ ਪਦਦ੍ਵਯਮ੍ਪਿ ਨ ਉਪਯੋਗਵਚਨਂ. ਅਪਿ ਚ ਖੋ ਪੁਰਿਮਮੇਵ, ਪਚ੍ਛਿਮਂ ਪਨ ਪਚ੍ਚਤ੍ਤਵਚਨਨ੍ਤਿ ਦਸ੍ਸੇਤੁਂ ‘‘ਗੋਤਮਂ ਸਰਣਨ੍ਤਿ ਗਚ੍ਛਾਮੀ’’ਤਿ ਵੁਤ੍ਤਂ. ਤੇਨ ਚ ਇਤਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋਤਿ ਦਸ੍ਸੇਤਿ. ਅਘਸ੍ਸਾਤਿ ਅਘਤੋ ਪਾਪਤੋ. ਤਾਤਾਤਿ ਹਿ ਪਦਂ ਅਪੇਕ੍ਖਿਤ੍ਵਾ ਨਿਸ੍ਸਕ੍ਕਸ੍ਸੇਵ ਯੁਤ੍ਤਤ੍ਤਾ. ਅਧਿਗਤਮਗ੍ਗੇ ਸਚ੍ਛਿਕਤਨਿਰੋਧੇਤਿ ਪਦਦ੍ਵਯੇਨਾਪਿ ਫਲਟ੍ਠਾ ਏਵ ਦਸ੍ਸਿਤਾ, ਨ ਮਗ੍ਗਟ੍ਠਾਤਿ ਦਸ੍ਸੇਨ੍ਤੋ ‘‘ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੇ ਚਾ’’ਤਿ ਆਹ. ਵਿਤ੍ਥਾਰੋਤਿ ਇਮਿਨਾ ‘‘ਯਾਵਤਾ, ਭਿਕ੍ਖਵੇ, ਧਮ੍ਮਾ ਸਙ੍ਖਤਾ ਵਾ ਅਸਙ੍ਖਤਾ ਵਾ, ਵਿਰਾਗੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿ (ਇਤਿਵੁ. ੯੦; ਅ. ਨਿ. ੪.੩੪) ਵੁਤ੍ਤਪਦਂ ਸਙ੍ਗਣ੍ਹਾਤਿ. ਅਨੇਜਨ੍ਤਿ ਨਿਤ੍ਤਣ੍ਹਂ. ਅਪ੍ਪਟਿਕੂਲਨ੍ਤਿ ਅਵਿਰੋਧਤ੍ਥਦੀਪਨਤੋ ਅਵਿਰੁਦ੍ਧਸੁਚਿਂ ਪਣੀਤਂ ਵਾ. ਵਾਚਾਯ ਪਗੁਣੀਕਤ੍ਤਬ੍ਬਤੋ, ਪਕਟ੍ਠੇਹਿ ਸਦ੍ਦਤ੍ਥਗੁਣੇਹਿ ਯੋਗਤੋ ਵਾ ਪਗੁਣਂ. ਸਂਹਤੋਤਿ ਘਟਿਤੋ ਸਮੇਤੋ ¶ . ਯਤ੍ਥਾਤਿ ਯੇਸੁ ਪੁਰਿਸਯੁਗੇਸੂਤਿ ਸਮ੍ਬਨ੍ਧੋ. ਅਟ੍ਠ ਚ ਪੁਗ੍ਗਲਧਮ੍ਮਦਸਾ ਤੇਤਿ ਤੇ ਅਟ੍ਠ ਪੁਗ੍ਗਲਾ ਅਰਿਯਧਮ੍ਮਸ੍ਸ ਦਿਟ੍ਠਤ੍ਤਾ ਧਮ੍ਮਦਸਾ.

ਸਰਣਨ੍ਤਿਆਦੀਸੁ ਅਯਂ ਸਙ੍ਖੇਪਤ੍ਥੋ – ਭਯਹਿਂਸਨਾਦਿਅਤ੍ਥੇਨ ਰਤਨਤ੍ਤਯਂ ਸਰਣਂ ਨਾਮ, ਤਦੇਵ ਮੇ ਰਤਨਤ੍ਤਯਂ ਤਾਣਂ ਲੇਣਂ ਪਰਾਯਣਨ੍ਤਿ ਬੁਦ੍ਧਸੁਬੁਦ੍ਧਤਾਦਿਗੁਣਵਸੇਨ ਤਪ੍ਪਰਾਯਣਤਾਕਾਰਪ੍ਪਵਤ੍ਤੋ ਚਿਤ੍ਤੁਪ੍ਪਾਦੋ ਸਰਣਗਮਨਂ ਨਾਮ. ਯਥਾਵੁਤ੍ਤੇਨ ਇਮਿਨਾ ਚਿਤ੍ਤੁਪ੍ਪਾਦੇਨ ਸਮਨ੍ਨਾਗਤੋ ਸਰਣਂ ਗਚ੍ਛਤਿ ਨਾਮ. ਏਤਸ੍ਸ ਚ ਸਰਣਗਮਨਸ੍ਸ ਲੋਕਿਯਲੋਕੁਤ੍ਤਰਵਸੇਨ ਦੁਵਿਧੋ ਪਭੇਦੋ. ਤਤ੍ਥ ਲੋਕੁਤ੍ਤਰਂ ਸਰਣਗਮਨੂਪਕ੍ਕਿਲੇਸਸਮੁਚ੍ਛੇਦੇਨ ਮਗ੍ਗਕ੍ਖਣੇਯੇਵ ਸਿਜ੍ਝਤਿ. ਲੋਕਿਯਸਰਣਗਮਨਂ ਚਤੁਧਾ ਪਵਤ੍ਤਤਿ ਅਹਂ ਅਤ੍ਤਾਨਂ ਬੁਦ੍ਧਸ੍ਸ ਪਰਿਚ੍ਚਜਾਮੀਤਿਆਦਿਨਾ ਅਤ੍ਤਨਿਯ੍ਯਾਤਨੇਨ, ਯਥਾਵੁਤ੍ਤਤਪ੍ਪਰਾਯਣਤਾਯ, ਸਿਸ੍ਸਭਾਵੂਪਗਮਨੇਨ, ਪਣਿਪਾਤੇਨ ਚਾਤਿ. ਸਬ੍ਬਤ੍ਥਾਪਿ ਚੇਤ੍ਥ ਸੇਟ੍ਠਦਕ੍ਖਿਣੇਯ੍ਯਭਾਵਵਸੇਨੇਵ ਸਰਣਗਮਨਂ ਹੋਤਿ, ਨ ਞਾਤਿਭਯਾਚਰਿਯਾਦਿਵਸੇਨਾਤਿ ਵੇਦਿਤਬ੍ਬਂ. ਏਵਂ ਞਾਤਿਆਦਿਵਸੇਨ ਤਿਤ੍ਥਿਯਂ ਵਨ੍ਦਤੋ ਸਰਣਂ ਨ ਭਿਜ੍ਜਤਿ, ਦਕ੍ਖਿਣੇਯ੍ਯਭਾਵੇਨ ਅਞ੍ਞਂ ਵਨ੍ਦਤੋ ਸਰਣਂ ਭਿਜ੍ਜਤਿ. ਲੋਕਿਯਸ੍ਸ ਸਰਣਗਮਨਸ੍ਸ ਨਿਬ੍ਬਾਨਪ੍ਪਤ੍ਤਿਨਿਯਮਂ ਸਦਿਸਫਲਂ ਸਰਣਗਤਸ੍ਸ ਅਨਾਗਤੇ ਨਿਬ੍ਬਾਨਪ੍ਪਤ੍ਤਿਨਿਯਮਤੋ. ਸਬ੍ਬਲੋਕਿਯਸਮ੍ਪਤ੍ਤਿਸਮਧਿਗਮੋ ਪਨ ਅਪਾਯਦੁਕ੍ਖਾਦਿਸਮਤਿਕ੍ਕਮੋ ਚ ਆਨਿਸਂਸਫਲਂ. ਤੀਸੁ ਵਤ੍ਥੂਸੁ ਚਸ੍ਸ ਸਂਸਯਮਿਚ੍ਛਾਞਾਣਾਦਿ ਸਂਕਿਲੇਸੋ. ਭੇਦੋਪਿਸ੍ਸ ਸਾਵਜ੍ਜਾਨਵਜ੍ਜਵਸੇਨ ਦੁਵਿਧੋ. ਤਤ੍ਥ ਪਠਮੋ ਮਿਚ੍ਛਾਦਿਟ੍ਠਿਪੁਬ੍ਬਕੇਹਿ ਤਿਤ੍ਥਿਯਪਣਿਪਾਤਾਦੀਹਿ ਹੋਤਿ, ਸੋ ਚ ਅਨਿਟ੍ਠਫਲਤ੍ਤਾ ਸਾਵਜ੍ਜੋ. ਅਨਵਜ੍ਜੋ ਪਨ ਕਾਲਕਿਰਿਯਾਯ ਹੋਤਿ. ਲੋਕੁਤ੍ਤਰਸਰਣਗਮਨਸ੍ਸ ਸਬ੍ਬਥਾ ਸਂਕਿਲੇਸੋ ਵਾ ਭੇਦੋ ਵਾ ਨਤ੍ਥੀਤਿ ਵੇਦਿਤਬ੍ਬਂ.

ਕੋ ਉਪਾਸਕੋਤਿਆਦਿ ਉਪਾਸਕਤ੍ਤਸਰੂਪਕਾਰਣਾਦਿਪੁਚ੍ਛਾ. ਤਤ੍ਥ ਯੋ ਗਹਟ੍ਠੋ ਮਨੁਸ੍ਸੋ ਵਾ ਅਮਨੁਸ੍ਸੋ ਵਾ ਵੁਤ੍ਤਨਯੇਨ ਤਿਸਰਣਂ ਗਤੋ, ਅਯਂ ਉਪਾਸਕੋ. ਯੋ ਚ ਸਰਣਗਮਨਾਦਿਕਿਰਿਯਾਯ ਰਤਨਤ੍ਤਯਂ ¶ ਉਪਾਸਨਤੋ ‘‘ਉਪਾਸਕੋ’’ਤਿ ਵੁਚ੍ਚਤਿ. ਪਞ੍ਚ ਵੇਰਮਣਿਯੋ ਚਸ੍ਸ ਸੀਲਂ. ਪਞ੍ਚਮਿਚ੍ਛਾਵਾਣਿਜ੍ਜਾਦਿਪਾਪਾਜੀਵਂ ਪਹਾਯ ਧਮ੍ਮੇਨ ਸਮੇਨ ਜੀਵਿਤਕਪ੍ਪਨਮਸ੍ਸ ਆਜੀਵੋ. ਅਸ੍ਸਦ੍ਧਿਯਦੁਸ੍ਸੀਲਤਾਦਯੋ ਉਪਾਸਕਤ੍ਤਸ੍ਸ ਵਿਪਤ੍ਤਿ, ਤਦਭਾਵੋ ਸਮ੍ਪਤ੍ਤੀਤਿ ਵੇਦਿਤਬ੍ਬਾ.

ਵਿਹਾਰਗ੍ਗੇਨਾਤਿ ¶ ਓਵਰਕਾਦਿਵਸਨਟ੍ਠਾਨਕੋਟ੍ਠਾਸੇਨ. ਅਜ੍ਜਭਾਵਨ੍ਤਿ ਅਸ੍ਮਿਂ ਅਹਨਿ ਪਵਤ੍ਤਂ ਪਸਾਦਾਦਿਂ. ਕਾਯਵਿਞ੍ਞਤ੍ਤਿਹੇਤੁਕੋ ਸਰੀਰਾਵਯਵੋ ਕਾਯਙ੍ਗਂ. ਵਚੀਵਿਞ੍ਞਤ੍ਤਿਹੇਤੁਕਂ ਓਟ੍ਠਜਿਵ੍ਹਾਦਿ ਵਾਚਙ੍ਗਂ. ਅਚੋਪੇਤ੍ਵਾਤਿ ਅਚਾਲੇਤ੍ਵਾ. ਏਤੇਨ ਚ ਵਚੀਪਵਤ੍ਤਿਯਾ ਪੁਬ੍ਬਭਾਗੇ ਠਾਨਕਰਣਾਨਂ ਚਲਨਪਚ੍ਚਯੋ ਵਾਯੋਧਾਤੁਯਾ ਵਿਕਾਰਾਕਾਰੋ ਵਿਸੁਂ ਕਾਯਵਿਞ੍ਞਤ੍ਤਿ ਨ ਹੋਤਿ, ਤੇਨ ਵਿਸੁਂ ਵਿਞ੍ਞਾਪੇਤਬ੍ਬਸ੍ਸ ਅਧਿਪ੍ਪਾਯਸ੍ਸ ਅਭਾਵਾ ਵਚੀਵਿਞ੍ਞਤ੍ਤਿਯਮੇਵ ਸਙ੍ਗਯ੍ਹਤਿ ਤਦੁਪਕਾਰਤ੍ਤਾ. ਯਥਾ ਕਾਯੇਨ ਕਾਯਕਣ੍ਡੁਯਨਾਦੀਸੁ ਸਦ੍ਦੁਪ੍ਪਤ੍ਤਿਹੇਤੁਭੂਤੋ ਪਥਵੀਧਾਤੁਯਾ ਆਕਾਰਵਿਕਾਰੋ ਵਿਸੁਂ ਅਧਿਪ੍ਪਾਯਸ੍ਸ ਅਵਿਞ੍ਞਾਪਨਤੋ ਵਚੀਵਿਞ੍ਞਤ੍ਤਿ ਨ ਹੋਤਿ, ਏਵਮਯਮ੍ਪੀਤਿ ਦਸ੍ਸੇਤਿ. ਅਧਿਪ੍ਪਾਯਵਿਞ੍ਞਾਪਨਤੋ ਹੇਤਾ ਵਿਞ੍ਞਤ੍ਤਿਯੋ ਨਾਮ ਜਾਤਾ, ਨ ਕੇਵਲਂ ਵਾਯੁਪਥਵੀਨਂ ਚਲਨਸਦ੍ਦੁਪ੍ਪਤ੍ਤਿਪਚ੍ਚਯਭੂਤਵਿਕਾਰਾਕਾਰਮਤ੍ਤਤਾਯ. ਏਵਞ੍ਚ ਬਹਿਦ੍ਧਾ ਰੁਕ੍ਖਾਦੀਸੁ ਚਲਨਸਦ੍ਦੁਪ੍ਪਤ੍ਤਿਪਚ੍ਚਯਾਨਂ ਯਥਾਵੁਤ੍ਤਪ੍ਪਕਾਰਾਨਂ ਵਿਕਾਰਾਕਾਰਾਨਂ ਅਵਿਞ੍ਞਤ੍ਤਿਤਾ ਸਮਤ੍ਥਿਤਾ ਹੋਤੀਤਿ ਵੇਦਿਤਬ੍ਬਾ. ਕੇਚਿ ਵਾਚਙ੍ਗਨ੍ਤਿ ‘‘ਹੋਤੁ ਸਾਧੂ’’ਤਿ ਏਵਮਾਦਿਵਾਚਾਯ ਅਵਯਵਨ੍ਤਿਆਦਿਂ ਵਦਨ੍ਤਿ, ਤਂ ਅਚੋਪੇਤ੍ਵਾਤਿ ਇਮਿਨਾ ਨ ਸਮੇਤਿ. ਖਨ੍ਤਿਂ ਚਾਰੇਤ੍ਵਾਤਿ ਅਨੁਮਤਿਂ ਪਵਤ੍ਤੇਤ੍ਵਾ. ‘‘ਖਨ੍ਤਿਂ ਧਾਰੇਤ੍ਵਾ’’ਤਿਪਿ ਪਾਠੋ, ਬਹਿ ਅਨਿਕ੍ਖਮਨਵਸੇਨ ਗਣ੍ਹਿਤ੍ਵਾਤਿ ਅਤ੍ਥੋ. ਪਟਿਮੁਖੋਤਿ ਭਗਵਤਿ ਪਟਿਨਿਵਤ੍ਤਮੁਖੋ, ਤੇਨਾਹ ‘‘ਅਪਕ੍ਕਮਿਤ੍ਵਾ’’ਤਿ.

੧੬. ਯਾਚਧਾਤੁਸ੍ਸ ਦ੍ਵਿਕਮ੍ਮਕਤ੍ਤਾ ‘‘ਭਗਵਾ ਵਸ੍ਸਾਵਾਸਂ ਯਾਚਿਤੋ’’ਤਿ ਵੁਤ੍ਤਂ. ਸੁਸਸ੍ਸਕਾਲੇਪੀਤਿ ਵੁਤ੍ਤਮੇਵਤ੍ਥਂ ਪਾਕਟਂ ਕਾਤੁਂ ‘‘ਅਤਿਸਮਗ੍ਘੇਪੀ’’ਤਿ ਵੁਤ੍ਤਂ. ਅਤਿਵਿਯ ਅਪ੍ਪਗ੍ਘੇਪਿ ਯਦਾ ਕਿਞ੍ਚਿਦੇਵ ਦਤ੍ਵਾ ਬਹੁਂ ਪੁਬ੍ਬਣ੍ਣਾਪਰਣ੍ਣਂ ਗਣ੍ਹਨ੍ਤਿ, ਤਾਦਿਸੇ ਕਾਲੇਪੀਤਿ ਅਤ੍ਥੋ. ਭਿਕ੍ਖਮਾਨਾਤਿ ਯਾਚਮਾਨਾ. ਵੁਤ੍ਤਸਸ੍ਸਨ੍ਤਿ ਵਪਿਤਸਸ੍ਸਂ. ਤਤ੍ਥਾਤਿ ਵੇਰਞ੍ਜਾਯਂ, ਏਤੇਨ ‘‘ਵੁਤ੍ਤਂ ਸਲਾਕਾ ਏਵ ਹੋਤਿ ਏਤ੍ਥਾਤਿ ਸਲਾਕਾਵੁਤ੍ਤਾ’’ਤਿ ਵਿਸੇਸਨਸ੍ਸ ਪਰਨਿਪਾਤੇਨ ਨਿਬ੍ਬਚਨਂ ਦਸ੍ਸੇਤਿ. ਅਥ ਵਾ ‘‘ਸਬ੍ਬਂ ਸਸ੍ਸਂ ਸਲਾਕਾਮਤ੍ਤਮੇਵ ਵੁਤ੍ਤਂ ਨਿਬ੍ਬਤ੍ਤਂ ਸਮ੍ਪਨ੍ਨਂ ਏਤ੍ਥਾਤਿ ਸਲਾਕਾਵੁਤ੍ਤਾ’’ਤਿਪਿ ਨਿਬ੍ਬਚਨਂ ਦਟ੍ਠਬ੍ਬਂ, ਤੇਨਾਹ ‘‘ਸਲਾਕਾ ਏਵ ਸਮ੍ਪਜ੍ਜਤੀ’’ਤਿ. ‘‘ਸਲਾਕਾਯ ਵੁਤ੍ਤਂ ਜੀਵਿਕਾ ਏਤਿਸ੍ਸਨ੍ਤਿ ਸਲਾਕਾਵੁਤ੍ਤਾ’’ਤਿਪਿ ਨਿਬ੍ਬਚਨਂ ਦਸ੍ਸੇਤੁਂ ਸਲਾਕਾਯ ਵਾਤਿਆਦਿ ਵੁਤ੍ਤਂ. ਧਞ੍ਞਕਰਣਟ੍ਠਾਨੇਤਿ ਧਞ੍ਞਮਿਨਨਟ੍ਠਾਨੇ. ਵਣ੍ਣਜ੍ਝਕ੍ਖਨ੍ਤਿ ਕਹਾਪਣਪਰਿਕ੍ਖਕਂ.

ਉਞ੍ਛੇਨ ਪਗ੍ਗਹੇਨਾਤਿ ਏਤ੍ਥ ਪਗ੍ਗਹੇਨਾਤਿ ਪਤ੍ਤੇਨ, ਤਂ ਗਹੇਤ੍ਵਾਤਿ ਅਤ੍ਥੋ. ਪਗ੍ਗਯ੍ਹਤਿ ਏਤੇਨ ਭਿਕ੍ਖਾਤਿ ¶ ਹਿ ਪਗ੍ਗਹੋ, ਪਤ੍ਤੋ. ਤੇਨਾਹ ਪਗ੍ਗਹੇਨ ¶ ਯੋ ਉਞ੍ਛੋਤਿਆਦਿ. ਅਥ ਵਾ ਪਗ੍ਗਹੇਨਾਤਿ ਗਹਣੇਨ, ਉਞ੍ਛਤ੍ਥਾਯ ਗਹੇਤਬ੍ਬੋ ਪਤ੍ਤੋਤਿ ਸਿਜ੍ਝਤੀਤਿ ਆਹ ‘‘ਪਤ੍ਤਂ ਗਹੇਤ੍ਵਾ’’ਤਿ.

ਗਙ੍ਗਾਯ ਉਤ੍ਤਰਦਿਸਾਪਦੇਸੋ ਉਤ੍ਤਰਾਪਥੋ, ਸੋ ਨਿਵਾਸੋ ਏਤੇਸਂ, ਤਤੋ ਵਾ ਆਗਤਾਤਿ ਉਤ੍ਤਰਾਪਥਕਾ, ਤੇਨਾਹ ਉਤ੍ਤਰਾਪਥਵਾਸਿਕਾਤਿਆਦਿ. ‘‘ਉਤ੍ਤਰਾਹਕਾ’’ਤਿਪਿ ਪਾਠੋ, ਸੋ ਏਵ ਅਤ੍ਥੋ ਨਿਰੁਤ੍ਤਿਨਯੇਨ. ਮਨ੍ਦਿਰਨ੍ਤਿ ਅਸ੍ਸਸਾਲਂ. ‘‘ਮਨ੍ਦਰ’’ਨ੍ਤਿਪਿ ਲਿਖਨ੍ਤਿ, ਤਂ ਨ ਸੁਨ੍ਦਰਂ. ਸਾ ਚ ਮਨ੍ਦਿਰਾ ਯਸ੍ਮਾ ਪਰਿਮਣ੍ਡਲਾਕਾਰੇਨ ਬਹੁਵਿਧਾ ਚ ਕਤਾ, ਤਸ੍ਮਾ ‘‘ਅਸ੍ਸਮਣ੍ਡਲਿਕਾਯੋ’’ਤਿ ਵੁਤ੍ਤਾ.

ਗਙ੍ਗਾਯ ਦਕ੍ਖਿਣਾਯ ਦਿਸਾਯ ਦੇਸੋ ਦਕ੍ਖਿਣਾਪਥੋ, ਤਤ੍ਥ ਜਾਤਾ ਮਨੁਸ੍ਸਾ ਦਕ੍ਖਿਣਾਪਥਮਨੁਸ੍ਸਾ. ਬੁਦ੍ਧਂ ਮਮਾਯਨ੍ਤਿ ਮਮੇਵਾਯਨ੍ਤਿ ਗਣ੍ਹਨਸੀਲਾ ਬੁਦ੍ਧਮਾਮਕਾ, ਏਵਂ ਸੇਸੇਸੁਪਿ. ਏਵਨ੍ਤਿ ਪਚ੍ਛਾ ਵੁਤ੍ਤਨਯੇਨ ਅਤ੍ਥੇ ਗਯ੍ਹਮਾਨੇ. ਪਟਿਵੀਸਨ੍ਤਿ ਕੋਟ੍ਠਾਸਂ. ਤਦੁਪਿਯਨ੍ਤਿ ਤਦਨੁਰੂਪਂ ਤਪ੍ਪਹੋਨਕਂ. ਲਦ੍ਧਾਤਿ ਲਭਿਤ੍ਵਾ ਨੋ ਹੋਤੀਤਿ ਸਮ੍ਬਨ੍ਧੋ. ‘‘ਲਦ੍ਧੋ’’ਤਿ ਵਾ ਪਾਠੋ, ਉਪਟ੍ਠਾਕਟ੍ਠਾਨਂ ਨੇਵ ਲਭਿਨ੍ਤਿ ਅਤ੍ਥੋ. ਞਾਤਿ ਚ ਪਸਤ੍ਥਤਮਗੁਣਯੋਗਤੋ ਸੇਟ੍ਠੋ ਚਾਤਿ ਞਾਤਿਸੇਟ੍ਠੋ. ਏਵਰੂਪੇਸੁ ਠਾਨੇਸੁ ਅਯਮੇਵ ਪਤਿਰੂਪੋਤਿ ਆਮਿਸਸ੍ਸ ਦੁਲ੍ਲਭਕਾਲੇਸੁ ਪਰਿਕਥੋਭਾਸਾਦਿਂ ਅਕਤ੍ਵਾ ਪਰਮਸਲ੍ਲੇਖਵੁਤ੍ਤਿਯਾ ਆਜੀਵਸੁਦ੍ਧਿਯਂ ਠਤ੍ਵਾ ਭਗਵਤੋ ਅਧਿਪ੍ਪਾਯਾਨੁਗੁਣਂ ਆਮਿਸਂ ਵਿਚਾਰੇਨ੍ਤੇਨ ਨਾਮ ਞਾਤਿਸਿਨੇਹਯੁਤ੍ਤੇਨ ਅਰਿਯਸਾਵਕੇਨੇਵ ਕਾਤੁਂ ਯੁਤ੍ਤਨ੍ਤਿ ਅਧਿਪ੍ਪਾਯੋ.

ਮਾਰਾਵਟ੍ਟਨਾਯਾਤਿ ਮਾਰੇਨ ਕਤਚਿਤ੍ਤਪਰਿਵਟ੍ਟਨੇਨ, ਚਿਤ੍ਤਸਮ੍ਮੋਹਨੇਨਾਤਿ ਅਤ੍ਥੋ. ਤਮ੍ਪੀਤਿ ਉਤ੍ਤਰਕੁਰੁਂ ਵਾ ਤਿਦਸਪੁਰਂ ਵਾ ਆਵਟ੍ਟੇਯ੍ਯ.

‘‘ਫੁਸ੍ਸਸ੍ਸਾਹਂ ਪਾਵਚਨੇ, ਸਾਵਕੇ ਪਰਿਭਾਸਯਿਂ;

ਯਵਂ ਖਾਦਥ ਭੁਞ੍ਜਥ, ਮਾ ਚ ਭੁਞ੍ਜਥ ਸਾਲਯੋ’’ਤਿ. (ਅਪ. ਥੇਰ ੧.੩੯.੮੮) –

ਅਪਦਾਨੇ ਵੁਤ੍ਤਸ੍ਸ ਅਕੁਸਲਸ੍ਸ ਤਦਾ ਓਕਾਸਕਤਤ੍ਤਾ. ਨਿਬਦ੍ਧਦਾਨਸ੍ਸਾਤਿ ‘‘ਦਸ੍ਸਾਮਾ’’ਤਿ ਵਾਚਾਯ ਨਿਯਮਿਤਦਾਨਸ੍ਸ. ਅਪ੍ਪਿਤਵਤ੍ਤਸ੍ਸਾਤਿ ਕਾਯੇਨ ਅਤਿਹਰਿਤ੍ਵਾ ਦਿਨ੍ਨਵਤ੍ਥੁਨੋਪਿ. ਵਿਸਹਤੀਤਿ ਸਕ੍ਕੋਤਿ. ਸਙ੍ਖੇਪੇਨਾਤਿ ਨੀਹਾਰੇਨ. ਬ੍ਯਾਮਪ੍ਪਭਾਯਾਤਿ ਸਮਨ੍ਤਤੋ ਹੇਟ੍ਠਾ ਚ ਉਪਰਿ ਚ ਅਸੀਤਿਹਤ੍ਥਮਤ੍ਤੇ ਠਾਨੇ ਘਨੀਭੂਤਾਯ ਛਬ੍ਬਣ੍ਣਾਯ ਪਭਾਯ, ਯਤੋ ਛਬ੍ਬਣ੍ਣਰਂਸਿਯੋ ਤਲ਼ਾਕਤੋ ਮਾਤਿਕਾਯੋ ਵਿਯ ਨਿਕ੍ਖਮਿਤ੍ਵਾ ਦਸਸੁ ਦਿਸਾਸੁ ¶ ਧਾਵਨ੍ਤਿ, ਸਾ ਯਸ੍ਮਾ ਬ੍ਯਾਮਮਤ੍ਤਾ ਵਿਯ ਖਾਯਤਿ, ਤਸ੍ਮਾ ‘‘ਬ੍ਯਾਮਪ੍ਪਭਾ’’ਤਿ ਵੁਚ੍ਚਤਿ. ਯਸ੍ਮਾ ਅਨੁਬ੍ਯਞ੍ਜਨਾਨਿ ਚ ਪਚ੍ਚੇਕਂ ਭਗਵਤੋ ਸਰੀਰੇ ਪਭਾਸਮ੍ਪਤ੍ਤਿਯੁਤ੍ਤਾ ¶ ਆਕਾਸੇ ਚਨ੍ਦਸੂਰਿਯਾਦਯੋ ਵਿਯ ਵਿਭਾਤਾ ਵਿਰੋਚਨ੍ਤਿ, ਤਸ੍ਮਾ ਤਾਨਿ ਬ੍ਯਾਮਪ੍ਪਭਾਯ ਸਹ ਕੇਨਚਿ ਅਨਭਿਭਵਨੀਯਾਨਿ ਵੁਤ੍ਤਾਨਿ.

ਅਨਤ੍ਥਸਞ੍ਹਿਤੇਤਿ ਘਾਤਾਪੇਕ੍ਖਂ ਸਾਮਿਅਤ੍ਥੇ ਭੁਮ੍ਮਵਚਨਂ, ਤੇਨਾਹ ‘‘ਤਾਦਿਸਸ੍ਸ ਵਚਨਸ੍ਸ ਘਾਤੋ’’ਤਿ. ਅਤ੍ਥੋ ਧਮ੍ਮਦੇਸਨਾਯ ਹੇਤੁ ਉਪ੍ਪਜ੍ਜਤਿ ਏਤ੍ਥ, ਧਮ੍ਮਦੇਸਨਾਦਿਕੋ ਵਾ ਅਤ੍ਥੋ ਉਪ੍ਪਜ੍ਜਤਿ ਏਤਾਯਾਤਿ ਅਟ੍ਠੁਪ੍ਪਤ੍ਤਿ, ਪਚ੍ਚੁਪ੍ਪਨ੍ਨਵਤ੍ਥੁ.

ਏਕਂ ਗਹੇਤ੍ਵਾਤਿ ਧਮ੍ਮਦੇਸਨਾਸਿਕ੍ਖਾਪਦਪਞ੍ਞਤ੍ਤਿਸਙ੍ਖਾਤੇਸੁ ਦ੍ਵੀਸੁ ਧਮ੍ਮਦੇਸਨਾਕਾਰਣਂ ਗਹੇਤ੍ਵਾ. ਰਤ੍ਤਿਚ੍ਛੇਦੋ ਵਾਤਿ ਸਤ੍ਤਾਹਕਰਣੀਯਵਸੇਨ ਗਨ੍ਤ੍ਵਾ ਬਹਿ ਅਰੁਣੁਟ੍ਠਾਪਨਵਸੇਨ ਵੁਤ੍ਤੋ, ਨ ਵਸ੍ਸਚ੍ਛੇਦਵਸੇਨ ਤਸ੍ਸ ਵਿਸੁਂ ਵੁਚ੍ਚਮਾਨਤ੍ਤਾ. ਏਤੇਨ ਚ ਵਸ੍ਸਚ੍ਛੇਦਪਚ੍ਚਯੇ ਸਤ੍ਤਾਹਕਰਣੀਯੇਨ ਗਮਨਂ ਅਨੁਞ੍ਞਾਤਨ੍ਤਿ ਵੇਦਿਤਬ੍ਬਂ. ਨ ਕਿਸ੍ਮਿਞ੍ਚੀਤਿ ਕਿਸ੍ਮਿਞ੍ਚਿ ਗੁਣੇ ਸਮ੍ਭਾਵਨਾਵਸੇਨ ਨ ਮਞ੍ਞਨ੍ਤਿ. ਪਚ੍ਛਾ ਸੀਲਂ ਅਧਿਟ੍ਠਹੇਯ੍ਯਾਮਾਤਿ ਆਜੀਵਹੇਤੁ ਸਨ੍ਤਗੁਣਪ੍ਪਕਾਸਨੇਨ ਆਜੀਵਵਿਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਅਤਿਮਞ੍ਞਿਸ੍ਸਤੀਤਿ ਅਵਮਞ੍ਞਿਸ੍ਸਤਿ.

੧੭. ‘‘ਆਯਸ੍ਮਾਤਿ ਪਿਯਵਚਨਮੇਤ’’ਨ੍ਤਿ ਉਚ੍ਚਨੀਚਜਨਸਾਮਞ੍ਞਵਸੇਨ ਵਤ੍ਵਾ ਪੁਨ ਉਚ੍ਚਜਨਾਵੇਣਿਕਵਸੇਨੇਵ ਦਸ੍ਸੇਨ੍ਤੋ ‘‘ਗਰੁਗਾਰਵਸਪ੍ਪਤਿਸ੍ਸਾਧਿਵਚਨ’’ਨ੍ਤਿ ਆਹ. ਤਤ੍ਥ ਸਹ ਪਤਿਸ੍ਸਯੇਨ ਨਿਸ੍ਸਯੇਨਾਤਿ ਸਪ੍ਪਤਿਸ੍ਸੋ, ਸਨਿਸ੍ਸਯੋ, ਤਸ੍ਸ ਗਰੁਗੁਣਯੁਤ੍ਤੇਸੁ ਗਾਰਵਵਚਨਨ੍ਤਿ ਅਤ੍ਥੋ. ਇਧ ਪਨ ਵਚਨਮੇਵ ਅਧਿਵਚਨਂ. ਪਪ੍ਪਟਕੋਜਨ੍ਤਿ ਆਦਿਕਪ੍ਪੇ ਉਦਕੂਪਰਿ ਪਠਮਂ ਪਥਵੀਭਾਵੇਨ ਸਞ੍ਜਾਤਂ ਨਵਨੀਤਪਿਣ੍ਡਸਦਿਸਂ ਉਦਕੇਪਿ ਉਪ੍ਪਿਲਨਸਭਾਵਂ ਅਵਿਲੀਯਨਕਂ ਅਤਿਸਿਨਿਦ੍ਧਮਧੁਰਂ ਅਨੇਕਯੋਜਨਸਹਸ੍ਸਬਹਲਂ ਰਸਾਤਲਸਙ੍ਖਾਤਂ ਪਥਵੋਜਂ. ਯਂ ਆਦਿਕਪ੍ਪਿਕੇਹਿ ਮਨੁਸ੍ਸੇਹਿ ਰਸਤਣ੍ਹਾਯ ਗਹੇਤ੍ਵਾ ਭੁਞ੍ਜਮਾਨਂ ਤੇਸਂ ਕਮ੍ਮਬਲੇਨ ਉਪਰਿਭਾਗੇ ਕਕ੍ਖਲ਼ਭਾਵਂ ਆਪਜ੍ਜਿਤ੍ਵਾ ਹੇਟ੍ਠਾ ਪੁਰਿਮਾਕਾਰੇਨੇਵ ਠਿਤਂ, ਯਸ੍ਸ ਚ ਬਲੇਨ ਅਯਂ ਮਹਾਪਥਵੀ ਸਪਬ੍ਬਤਸਮੁਦ੍ਦਕਾਨਨਾ ਹੇਟ੍ਠਾਉਦਕੇ ਅਨਿਮੁਜ੍ਜਮਾਨਾ ਅਵਿਕਿਰਿਯਮਾਨਾ ਕੁਲ੍ਲੁਪਰਿ ਵਿਯ ਨਿਚ੍ਚਲਾ ਤਿਟ੍ਠਤਿ, ਤਂ ਪਥਵੀਸਾਰਮਣ੍ਡਨ੍ਤਿ ਅਤ੍ਥੋ, ਤੇਨਾਹ ਪਥਵੀਮਣ੍ਡੋਤਿਆਦਿ. ਸਮ੍ਪਨ੍ਨਨ੍ਤਿ ਮਧੁਰਰਸੇਨ ਉਪੇਤਂ, ਤੇਨਾਹ ‘‘ਸਾਦੁਰਸ’’ਨ੍ਤਿ. ਉਪਪਨ੍ਨਫਲੋਤਿ ¶ ਬਹੁਫਲੋ. ‘‘ਨਿਮ੍ਮਕ੍ਖਿਕ’’ਨ੍ਤਿ ਵਤ੍ਵਾ ਪੁਨ ‘‘ਨਿਮ੍ਮਕ੍ਖਿਕਣ੍ਡ’’ਨ੍ਤਿ ਮਕ੍ਖਿਕਣ੍ਡਾਨਮ੍ਪਿ ਅਭਾਵਂ ਦਸ੍ਸੇਤਿ. ਯੇ ਪਥਵੀਨਿਸ੍ਸਿਤਾ ਪਾਣਾ, ਤੇ ਤਤ੍ਥ ਸਙ੍ਕਾਮੇਸ੍ਸਾਮੀਤਿ ਏਤ੍ਥ ਮਨੁਸ੍ਸਾਮਨੁਸ੍ਸਤਿਰਚ੍ਛਾਨਗਤਿਤ੍ਥੀਨਮ੍ਪਿ ਹਤ੍ਥਸਙ੍ਕਾਮਨੇ ਕਿਂ ਅਨਾਮਾਸਦੋਸੋ ਨ ਹੋਤੀਤਿ? ਨ ਹੋਤਿ, ਕਸ੍ਮਾ? ‘‘ਅਨਾਪਤ੍ਤਿ, ਭਿਕ੍ਖਵੇ, ਇਦ੍ਧਿਮਸ੍ਸ ਇਦ੍ਧਿਵਿਸਯੇ’’ਤਿ (ਪਾਰਾ. ੧੫੯) ਵਚਨਤੋ, ਤੇਨੇਵ ਭਗਵਾਪਿ ਅਨਾਮਾਸਦੋਸਂ ਅਦਸ੍ਸੇਤ੍ਵਾ ‘‘ਵਿਪਲ੍ਲਾਸਮ੍ਪਿ ਸਤ੍ਤਾ ਪਟਿਲਭੇਯ੍ਯੁ’’ਨ੍ਤਿ ਆਹ, ਖੁਦ੍ਦਕੋ ਗਾਮੋ. ਮਹਨ੍ਤੋ ਸਾਪਣੋ ਨਿਗਮੋ. ਪਦਵੀਤਿਹਾਰੇਨਾਤਿ ਪਦਨਿਕ੍ਖੇਪੇਨ.

ਵਿਨਯਪਞ੍ਞਤ੍ਤਿਯਾਚਨਕਥਾਵਣ੍ਣਨਾ

੧੮. ਵਿਨਯਪਞ੍ਞਤ੍ਤਿਯਾ ¶ ਮੂਲਤੋ ਪਭੁਤੀਤਿ ਪਾਰਾਜਿਕਾਦਿਗਰੁਕਾਨਂ, ਤਦਞ੍ਞੇਸਞ੍ਚ ਸਿਕ੍ਖਾਪਦਾਨਂ ਪਾਤਿਮੋਕ੍ਖੁਦ੍ਦੇਸਕ੍ਕਮੇਨ ਯੇਭੁਯ੍ਯੇਨ ਅਪਞ੍ਞਤ੍ਤਤਂ ਸਨ੍ਧਾਯ ਵੁਤ੍ਤਂ, ਨ ਸਬ੍ਬੇਨ ਸਬ੍ਬਂ ਅਪਞ੍ਞਤ੍ਤਤਾਯ. ਤੇਨੇਵ ਥੇਰੋ ਭਗਵਨ੍ਤਂ ‘‘ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਪੇਯ੍ਯ ਉਦ੍ਦਿਸੇਯ੍ਯ ਪਾਤਿਮੋਕ੍ਖ’’ਨ੍ਤਿ ਪਾਤਿਮੋਕ੍ਖੁਦ੍ਦੇਸੇਨ ਸਹ ਸਿਕ੍ਖਾਪਦਪਞ੍ਞਤ੍ਤਿਂ ਯਾਚਿ. ਖਨ੍ਧਕੇ ਹਿ ਆਨਨ੍ਦਤ੍ਥੇਰਾਦੀਨਂ ਪਬ੍ਬਜ੍ਜਤੋ ਪੁਰੇਤਰਮੇਵ ਰਾਹੁਲਭਦ੍ਦਸ੍ਸ ਪਬ੍ਬਜ੍ਜਾਯ ‘‘ਨ, ਭਿਕ੍ਖਵੇ, ਅਨਨੁਞ੍ਞਾਤੋ ਮਾਤਾਪਿਤੂਹਿ ਪੁਤ੍ਤੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੦੫) ਪਞ੍ਞਤ੍ਤਸਿਕ੍ਖਾਪਦਂ ਦਿਸ੍ਸਤਿ. ਇਧੇਵ ਅਟ੍ਠਕਥਾਯਮ੍ਪਿ ‘‘ਸਾਮਮ੍ਪਿ ਪਚਨਂ…ਪੇ… ਨ ਵਟ੍ਟਤੀ’’ਤਿ ਚ, ‘‘ਰਤ੍ਤਿਚ੍ਛੇਦੋ ਵਸ੍ਸਚ੍ਛੇਦੋ ਵਾ ਨ ਕਤੋ’’ਤਿ ਚ ਵੁਤ੍ਤਤ੍ਤਾ ਪੁਬ੍ਬੇਵ ਸਾਮਪਾਕਾਦਿਪਟਿਕ੍ਖੇਪੋ ਅਤ੍ਥੀਤਿ ਪਞ੍ਞਾਯਤਿ. ਏਵਂ ਕਤਿਪਯਸਿਕ੍ਖਾਪਦਾਨਂ ਪਞ੍ਞਤ੍ਤਿਸਬ੍ਭਾਵੇਪਿ ਅਪਞ੍ਞਤ੍ਤਪਾਰਾਜਿਕਾਦਿਕੇ ਸਨ੍ਧਾਯ ‘‘ਨ ਤਾਵ, ਸਾਰਿਪੁਤ੍ਤ, ਸਤ੍ਥਾ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਪੇਤੀ’’ਤਿ ਵੁਤ੍ਤਨ੍ਤਿ ਗਹੇਤਬ੍ਬਂ. ਪੁਥੁਤ੍ਤਾਰਮ੍ਮਣਤੋ ਪਟਿਨਿਵਤ੍ਤਿਤ੍ਵਾ ਸਮ੍ਮਦੇਵ ਏਕਾਰਮ੍ਮਣੇ ਚਿਤ੍ਤੇਨ ਲੀਨੋ ਪਟਿਸਲ੍ਲੀਨੋ ਨਾਮਾਤਿ ਆਹ ‘‘ਏਕੀਭਾਵਂ ਗਤਸ੍ਸਾ’’ਤਿ, ਚਿਤ੍ਤਵਿਵੇਕਂ ਗਤਸ੍ਸਾਤਿ ਅਤ੍ਥੋ. ਚਿਰਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ.

ਸੋਲ਼ਸਵਿਧਾਯ ਪਞ੍ਞਾਯਾਤਿ ਮਜ੍ਝਿਮਨਿਕਾਯੇ ਅਨੁਪਦਸੁਤ੍ਤਨ੍ਤਦੇਸਨਾਯਂ ‘‘ਮਹਾਪਞ੍ਞੋ, ਭਿਕ੍ਖਵੇ, ਸਾਰਿਪੁਤ੍ਤੋ ਪੁਥੁਪਞ੍ਞੋ ਹਾਸਪਞ੍ਞੋ ਜਵਨਪਞ੍ਞੋ ਤਿਕ੍ਖਪਞ੍ਞੋ ਨਿਬ੍ਬੇਧਿਕਪਞ੍ਞੋ’’ਤਿ ਆਗਤਾ ਛ ਪਞ੍ਞਾ ਚ ਨਵਾਨੁਪੁਬ੍ਬਵਿਹਾਰਸਮਾਪਤ੍ਤਿਪਞ੍ਞਾ ਚ ਅਰਹਤ੍ਤਮਗ੍ਗਪਞ੍ਞਾ ਚਾਤਿ ਏਵਂ ਸੋਲ਼ਸਵਿਧੇਨ ਆਗਤਾਯ ਪਞ੍ਞਾਯ. ਯੇਸਂ ਬੁਦ੍ਧਾਨਂ ਸਾਵਕਾ ਸੁਦ੍ਧਾਵਾਸੇਸੁ ਸਨ੍ਦਿਸ੍ਸਨ੍ਤਿ, ਤੇਯੇਵ ¶ ਲੋਕੇ ਪਾਕਟਾਤਿ ਵਿਪਸ੍ਸੀਆਦਯੋਵ ਇਧ ਉਦ੍ਧਟਾ, ਨ ਇਤਰੇ ਪੁਬ੍ਬਬੁਦ੍ਧਾ. ਤੇਨੇਵ ਆਟਾਨਾਟਿਯਸੁਤ੍ਤੇ (ਦੀ. ਨਿ. ੩.੨੭੫ ਆਦਯੋ) ਦੇਵਾਪਿ ਅਤ੍ਤਨੋ ਪਾਕਟਾਨਂ ਤੇਸਞ੍ਞੇਵ ਗਹਣਂ ਅਕਂਸੁ, ਨਾਞ੍ਞੇਸਨ੍ਤਿ ਵੇਦਿਤਬ੍ਬਂ.

੧੯. ਕਿਲਾਸੁਨੋਤਿ ਅਪ੍ਪੋਸ੍ਸੁਕ੍ਕਾ ਪਯੋਜਨਾਭਾਵੇਨ ਨਿਰੁਸ੍ਸਾਹਾ ਅਹੇਸੁਂ, ਨ ਆਲਸਿਯੇਨ, ਤੇਨਾਹ ਨ ਆਲਸਿਯਕਿਲਾਸੁਨੋਤਿਆਦਿ. ਨਿਦ੍ਦੋਸਤਾਯਾਤਿ ਕਾਯਵਚੀਵੀਤਿਕ੍ਕਮਸਮੁਟ੍ਠਾਪਕਦੋਸਾਭਾਵਾ. ਪਾਣਂ ਨ ਹਨੇ ਨ ਚਾਦਿਨ੍ਨਮਾਦਿਯੇਤਿਆਦਿਨਾ (ਸੁ. ਨਿ. ੪੦੨) ਓਵਾਦਸਿਕ੍ਖਾਪਦਾਨਂ ਵਿਜ੍ਜਮਾਨਤ੍ਤਾ ਵੁਤ੍ਤਂ ਸਤ੍ਤਾਪਤ੍ਤਿਕ੍ਖਨ੍ਧਵਸੇਨਾਤਿਆਦਿ. ਛਨ੍ਨਂ ਛਨ੍ਨਂ ਵਸ੍ਸਾਨਂ ਓਸਾਨਦਿਵਸਂ ਅਪੇਕ੍ਖਿਤ੍ਵਾ ‘‘ਸਕਿਂ ਸਕਿ’’ਨ੍ਤਿ ਵੁਤ੍ਤਤ੍ਤਾ ਤਦਪੇਕ੍ਖਮੇਤ੍ਥ ਸਾਮਿਵਚਨਂ. ਸਕਲਜਮ੍ਬੁਦੀਪੇ ਸਬ੍ਬੋਪਿ ਭਿਕ੍ਖੁਸਙ੍ਘੋ ਉਪੋਸਥਂ ਅਕਾਸੀਤਿ ਸਮ੍ਬਨ੍ਧੋ.

ਖਨ੍ਤੀ ਪਰਮਨ੍ਤਿਆਦੀਸੁ ਤਿਤਿਕ੍ਖਾਸਙ੍ਖਾਤਾ ਖਨ੍ਤਿ ਸਤ੍ਤਸਙ੍ਖਾਰੇਹਿ ਨਿਬ੍ਬਤ੍ਤਾਨਿਟ੍ਠਾਖਮਨਕਿਲੇਸਤਪਨਤੋ ਪਰਮਂ ਤਪੋ ਨਾਮ. ਵਾਨਸਙ੍ਖਾਤਾਯ ਤਣ੍ਹਾਯ ਨਿਕ੍ਖਨ੍ਤਤ੍ਤਾ ਨਿਬ੍ਬਾਨਂ ਸਬ੍ਬਧਮ੍ਮੇਹਿ ਪਰਮਂ ਉਤ੍ਤਮਨ੍ਤਿ ਬੁਦ੍ਧਾ ਵਦਨ੍ਤਿ. ਯਥਾਵੁਤ੍ਤਖਨ੍ਤਿਯਾ ਅਭਾਵੇਨ ਪਾਣਵਧਂ ਵਾ ਛੇਦਨਤਾਲ਼ਨਾਦਿਂ ਵਾ ਕਰੋਨ੍ਤੋ ਪਰੂਪਘਾਤੀ ਪਰਸ੍ਸਹਰਣਪਰਦਾਰਾਤਿਕ੍ਕਮਨਾਦੀਹਿ ਮੁਸਾਪੇਸੁਞ੍ਞਫਰੁਸਾਦੀਹਿ ਚ ਪਰਂ ਵਿਹੇਠਯਨ੍ਤੋ ਚ ਬਾਹਿਤਪਾਪਤਾਯ ਅਭਾਵੇਨ ਪਬ੍ਬਜਿਤੋ ਵਾ ਸਮਿਤਪਾਪਤਾਯ ਅਭਾਵੇਨ ਸਮਣੋ ਵਾ ਨ ਹੋਤੀਤਿ ਅਤ੍ਥੋ. ਸੀਲਸਂਵਰੇਨ ਸਬ੍ਬਪਾਪਸ੍ਸ ਅਨੁਪ੍ਪਾਦਨਂ ਲੋਕਿਯਸਮਾਧਿਵਿਪਸ੍ਸਨਾਹਿ ਕੁਸਲਸ੍ਸ ਉਪਸਮ੍ਪਾਦਨਂ ਨਿਪ੍ਫਾਦਨਂ ਸਬ੍ਬੇਹਿ ਮਗ੍ਗਫਲੇਹਿ ਅਤ੍ਤਨੋ ਚਿਤ੍ਤਸ੍ਸ ਪਰਿਸੋਧਨਂ ਪਭਸ੍ਸਰਭਾਵਕਰਣਂ ਯਂ, ਤਮੇਤਂ ਬੁਦ੍ਧਾਨਂ ਸਾਸਨਂ ਅਨੁਸਿਟ੍ਠਿ. ਅਨੁਪਵਾਦੋਤਿ ਵਾਚਾਯ ਕਸ੍ਸਚਿ ਅਨੁਪਵਦਨਂ. ਅਨੁਪਘਾਤੋਤਿ ਕਾਯੇਨ ਕਸ੍ਸਚਿ ਉਪਘਾਤਾਕਰਣਂ ਵੁਤ੍ਤਾਵਸੇਸੇ ਚ ਪਾਤਿਮੋਕ੍ਖਸਙ੍ਖਾਤੇ ਸੀਲੇ ਅਤ੍ਤਾਨਂ ਸਂਵਰਣਂ. ਭਤ੍ਤਸ੍ਮਿਂ ਮਤ੍ਤਞ੍ਞੁਤਾਸਙ੍ਖਾਤਆਜੀਵਪਾਰਿਸੁਦ੍ਧਿਪਚ੍ਚਯਸਨ੍ਨਿਸ੍ਸਿਤਸੀਲਸਮਾਯੋਗੋ ਤਮ੍ਮੁਖੇਨ ਇਨ੍ਦ੍ਰਿਯਸਂਵਰੋ ਪਨ੍ਤਸੇਨਾਸਨਸਙ੍ਖਾਤਂ ਅਰਞ੍ਞਵਾਸਂ ਤਮ੍ਮੁਖੇਨ ਪਕਾਸਿਤੇ ਚਤੁਪਚ੍ਚਯਸਨ੍ਤੋਸਭਾਵਨਾਰਾਮਤਾਸਙ੍ਖਾਤਮਹਾਅਰਿਯਵਂਸੇ ਪਤਿਟ੍ਠਾਨਞ੍ਚ ਅਧਿਚਿਤ੍ਤਸਙ੍ਖਾਤੇ ਲੋਕਿਯਲੋਕੁਤ੍ਤਰਸਮਾਧਿਮ੍ਹਿ ਤਦੁਪ੍ਪਾਦਨਵਸੇਨ ਆਯੋਗੋ ਅਨੁਯੋਗੋ ਚ ਯਂ, ਤਮੇਤਂ ਬੁਦ੍ਧਾਨਂ ਅਨੁਸਿਟ੍ਠੀਤਿ ਯੋਜਨਾ.

‘‘ਯਾਵ ¶ ਸਾਸਨਪਰਿਯਨ੍ਤਾ’’ਤਿ ਆਣਾਪਾਤਿਮੋਕ੍ਖਸ੍ਸ ਅਭਾਵਤੋ ਵੁਤ੍ਤਂ. ਪਰਿਨਿਬ੍ਬਾਨਤੋ ਪਨ ਉਦ੍ਧਂ ਓਵਾਦਪਾਤਿਮੋਕ੍ਖੁਦ੍ਦੇਸੋਪਿ ਨਤ੍ਥੇਵ, ਬੁਦ੍ਧਾ ਏਵ ਹਿ ਤਂ ਉਦ੍ਦਿਸਨ੍ਤਿ, ਨ ਸਾਵਕਾ. ਪਠਮਬੋਧਿਯਨ੍ਤਿ ਬੋਧਿਤੋ ਵੀਸਤਿਵਸ੍ਸਪਰਿਚ੍ਛਿਨ੍ਨੇ ਕਾਲੇ, ਆਚਰਿਯਧਮ੍ਮਪਾਲਤ੍ਥੇਰੇਨ ਪਨ ‘‘ਪਞ੍ਚਚਤ੍ਤਾਲੀਸਾਯ ਵਸ੍ਸੇਸੁ ਆਦਿਤੋ ਪਨ੍ਨਰਸ ਵਸ੍ਸਾਨਿ ਪਠਮਬੋਧੀ’’ਤਿ ਵੁਤ੍ਤਂ, ਸਿਕ੍ਖਾਪਦਪਞ੍ਞਤ੍ਤਿਕਆਲਤੋ ਪਨ ਪਭੁਤਿ ਆਣਾਪਾਤਿਮੋਕ੍ਖਮੇਵ ਉਦ੍ਦਿਸਨ੍ਤੀਤਿ ਇਦਂ ਪਾਤਿਮੋਕ੍ਖੁਦ੍ਦੇਸਕ੍ਕਮੇਨੇਵ ਪਰਿਪੁਣ੍ਣਂ ਕਤ੍ਵਾ ਸਿਕ੍ਖਾਪਦਪਞ੍ਞਤ੍ਤਿਕਾਲਂ ਸਨ੍ਧਾਯ ਵੁਤ੍ਤਂ. ਅਟ੍ਠਾਨਂ ਅਨਵਕਾਸੋਤਿ ਯਥਾਕ੍ਕਮਂ ਹੇਤੁਪਚ੍ਚਯਪਟਿਕ੍ਖੇਪਵਸੇਨ ਕਾਰਣਪਟਿਕ੍ਖੇਪੋ. ਯਨ੍ਤਿ ਯੇਨ ਕਾਰਣੇਨ. ਅਪਰਿਸੁਦ੍ਧਾਯ ਪਰਿਸਾਯਾਤਿ ਅਲਜ੍ਜੀਪੁਗ੍ਗਲੇਹਿ ਵੋਮਿਸ੍ਸਤਾਯ ਅਸੁਦ੍ਧਾਯ ਪਰਿਸਾਯ, ਨ ਕੇਵਲਂ ਬੁਦ੍ਧਾਨਞ੍ਞੇਵ ਅਪਰਿਸੁਦ੍ਧਾਯ ਪਰਿਸਾਯ ਪਾਤਿਮੋਕ੍ਖੁਦ੍ਦੇਸੋ ਅਯੁਤ੍ਤੋ, ਅਥ ਖੋ ਸਾਵਕਾਨਮ੍ਪਿ. ਚੋਦਨਾਸਾਰਣਾਦਿਵਸੇਨ ਪਨ ਸੋਧੇਤ੍ਵਾ ਸਂਵਾਸਕਰਣਂ ਸਾਵਕਾਨਞ੍ਞੇਵ ਭਾਰੋ, ਬੁਦ੍ਧਾ ਪਨ ਸਿਕ੍ਖਾਪਦਾਨਿ ਪਞ੍ਞਪੇਤ੍ਵਾ ਉਪੋਸਥਾਦਿਕਰਣਵਿਧਾਨਂ ਸਿਕ੍ਖਾਪੇਤ੍ਵਾ ਵਿਸ੍ਸਜ੍ਜੇਨ੍ਤਿ, ਚੋਦਨਾਸਾਰਣਾਦੀਨਿ ਨ ਕਰੋਨ੍ਤਿ, ਤੇਨੇਵ ਭਗਵਾ ਅਸੁਦ੍ਧਾਯ ਪਰਿਸਾਯ ਪਾਤਿਮੋਕ੍ਖਂ ਅਨੁਦ੍ਦਿਸਿਤ੍ਵਾ ਸਕਲਰਤ੍ਤਿਂ ਤੁਣ੍ਹੀਭੂਤੋ ਨਿਸੀਦਿ. ਭਿਕ੍ਖੂ ਚ ਭਗਵਤੋ ਅਧਿਪ੍ਪਾਯਂ ਞਤ੍ਵਾ ਅਸੁਦ੍ਧਪੁਗ੍ਗਲਂ ਬਹਿ ਨੀਹਰਿਂਸੁ. ਤਸ੍ਮਾ ਸਾਵਕਾਨਮ੍ਪਿ ਅਸੁਦ੍ਧਾਯ ਪਰਿਸਾਯ ਞਤ੍ਵਾ ਉਪੋਸਥਾਦਿਸਙ੍ਘਕਮ੍ਮਕਰਣਂ ਬ੍ਰਹ੍ਮਚਰਿਯਨ੍ਤਰਾਯਕਰਣਂ ਵਿਨਾ ਨ ਵਟ੍ਟਤੀਤਿ ਵੇਦਿਤਬ੍ਬਂ.

ਸਮ੍ਮੁਖਸਾਵਕਾਨਨ੍ਤਿ ¶ ਬੁਦ੍ਧਾਨਂ ਸਮ੍ਮੁਖੇ ਧਰਮਾਨਕਾਲੇ ਪਬ੍ਬਜਿਤਾਨਂ ਸਬ੍ਬਨ੍ਤਿਮਾਨਂ ਸਾਵਕਾਨਂ. ਉਲ਼ਾਰਾਤਿਸਯਜੋਤਨਤ੍ਥਂ ‘‘ਉਲ਼ਾਰੁਲ਼ਾਰਭੋਗਾਦਿਕੁਲਵਸੇਨ ਵਾ’’ਤਿ ਪੁਨ ਉਲ਼ਾਰਸਦ੍ਦਗ੍ਗਹਣਂ ਕਤਂ. ਆਦਿ-ਸਦ੍ਦੇਨ ਉਲ਼ਾਰਮਜ੍ਝਤ੍ਤਅਨੁਲ਼ਾਰਾਦੀਨਂ ਗਹਣਂ ਵੇਦਿਤਬ੍ਬਂ. ਤੇ ਪਚ੍ਛਿਮਾ ਸਾਵਕਾ ਅਨ੍ਤਰਧਾਪੇਸੁਨ੍ਤਿ ਸਮ੍ਬਨ੍ਧੋ.

ਅਪਞ੍ਞਤ੍ਤੇਪਿ ਸਿਕ੍ਖਾਪਦੇ ਯਦਿ ਸਾਵਕਾ ਸਮਾਨਜਾਤਿਆਦਿਕਾ ਸਿਯੁਂ, ਅਤ੍ਤਨੋ ਕੁਲਾਨੁਗਤਗਨ੍ਥਂ ਵਿਯ ਭਗਵਤੋ ਵਚਨਂ ਨ ਨਾਸੇਯ੍ਯੁਂ. ਯਸ੍ਮਾ ਪਨ ਸਿਕ੍ਖਾਪਦਞ੍ਚ ਨ ਪਞ੍ਞਤ੍ਤਂ, ਇਮੇ ਚ ਭਿਕ੍ਖੂ ਨ ਸਮਾਨਜਾਤਿਆਦਿਕਾ, ਤਸ੍ਮਾ ਵਿਨਾਸੇਸੁਨ੍ਤਿ ਇਮਮਤ੍ਥਂ ਦਸ੍ਸੇਤੁਂ ਯਸ੍ਮਾ ਏਕਨਾਮਾ…ਪੇ… ਤਸ੍ਮਾ ਅਞ੍ਞਮਞ੍ਞਂ ਵਿਹੇਠੇਨ੍ਤਾਤਿਆਦਿ ਵੁਤ੍ਤਂ. ਚਿਰਟ੍ਠਿਤਿਕਵਾਰੇ ਪਨ ਸਾਵਕਾਨਂ ਨਾਨਾਜਚ੍ਚਾਦਿਭਾਵੇ ਸਮਾਨੇਪਿ ਸਿਕ੍ਖਾਪਦਪਞ੍ਞਤ੍ਤਿਯਾ ਪਰਿਪੁਣ੍ਣਤਾਯ ਸਾਸਨਸ੍ਸ ਚਿਰਪ੍ਪਵਤ੍ਤਿ ਵੇਦਿਤਬ੍ਬਾ. ਯਦਿ ਏਵਂ ਕਸ੍ਮਾ ਸਬ੍ਬੇਪਿ ਬੁਦ੍ਧਾ ਸਿਕ੍ਖਾਪਦਾਨਿ ਨ ਪਞ੍ਞਪੇਨ੍ਤੀਤਿ? ਯਸ੍ਮਾ ¶ ਚ ਸਾਸਨਸ੍ਸ ਚਿਰਪ੍ਪਵਤ੍ਤਿਯਾ ਨ ਕੇਵਲਂ ਸਿਕ੍ਖਾਪਦਪਞ੍ਞਤ੍ਤਿਯੇਵ ਹੇਤੁ, ਅਥ ਖੋ ਆਯਤਿਂ ਧਮ੍ਮਵਿਨਯਂ ਗਹੇਤ੍ਵਾ ਸਾਵਕੇਹਿ ਵਿਨੇਤਬ੍ਬਪੁਗ੍ਗਲਾਨਂ ਸਮ੍ਭਵੋਪਿ, ਤਸ੍ਮਾ ਤੇਸਂ ਸਮ੍ਭਵੇ ਸਤਿ ਬੁਦ੍ਧਾ ਸਿਕ੍ਖਾਪਦਂ ਪਞ੍ਞਪੇਨ੍ਤਿ, ਨਾਸਤੀਤਿ ਪਰਿਪੁਣ੍ਣਾਪਞ੍ਞਤ੍ਤਿਯੇਵ ਵੇਨੇਯ੍ਯਸਮ੍ਭਵਸ੍ਸਾਪਿ ਸੂਚਨਤੋ ਸਾਸਨਸ੍ਸ ਚਿਰਪ੍ਪਵਤ੍ਤਿਯਾ ਹੇਤੁ ਵੁਤ੍ਤਾਤਿ ਵੇਦਿਤਬ੍ਬਾ. ਪਾਲ਼ਿਯਂ ਸਹਸ੍ਸਂ ਭਿਕ੍ਖੁਸਙ੍ਘਂ…ਪੇ… ਓਵਦਤੀਤਿ ਏਤ੍ਥ ਸਹਸ੍ਸਸਙ੍ਖ੍ਯਾਪਰਿਚ੍ਛਿਨ੍ਨੋ ਸਙ੍ਘੋ ਸਹਸ੍ਸੋ ਸਹਸ੍ਸਿਲੋਕਧਾਤੂਤਿਆਦੀਸੁ (ਦੀ. ਨਿ. ੨.੧੮) ਵਿਯ. ਤਂ ਸਹਸ੍ਸਂ ਭਿਕ੍ਖੁਸਙ੍ਘਨ੍ਤਿ ਯੋਜਨਾ. ਸਹਸ੍ਸਸਦ੍ਦਸ੍ਸ ਏਕਵਚਨਨ੍ਤਤਾਯ ‘‘ਭਿਕ੍ਖੁਸਹਸ੍ਸਸ੍ਸਾ’’ਤਿ ਵਤ੍ਵਾ ਅਵਯਵਾਪੇਕ੍ਖਾਯ ‘‘ਓਵਦਿਯਮਾਨਾਨ’’ਨ੍ਤਿ ਬਹੁਵਚਨਨਿਦ੍ਦੇਸੋ ਕਤੋਤਿ ਦਟ੍ਠਬ੍ਬੋ.

ਅਨੁਪਾਦਾਯ ਆਸਵੇਹਿ ਚਿਤ੍ਤਾਨਿ ਵਿਮੁਚ੍ਚਿਂਸੂਤਿ ਏਤ੍ਥ ਆਸਵੇਹੀਤਿ ਕਤ੍ਤੁਅਤ੍ਥੇ ਕਰਣਵਚਨਂ. ਚਿਤ੍ਤਾਨੀਤਿ ਪਚ੍ਚਤ੍ਤਬਹੁਵਚਨਂ. ਵਿਮੁਚ੍ਚਿਂਸੂਤਿ ਕਮ੍ਮਸਾਧਨਂ. ਤਸ੍ਮਾ ਆਸਵੇਹਿ ਕਤ੍ਤੁਭੂਤੇਹਿ ਅਨੁਪਾਦਾਯ ਆਰਮ੍ਮਣਕਰਣਵਸੇਨ ਅਗ੍ਗਹੇਤ੍ਵਾ ਚਿਤ੍ਤਾਨਿ ਵਿਮੋਚਿਤਾਨੀਤਿ ਏਵਮੇਤ੍ਥ ਅਤ੍ਥੋ ਗਹੇਤਬ੍ਬੋਤਿ ਆਹ ਤੇਸਞ੍ਹਿ ਚਿਤ੍ਤਾਨੀਤਿਆਦਿ. ਯੇਹਿ ਆਸਵੇਹੀਤਿ ਏਤ੍ਥਾਪਿ ਕਤ੍ਤੁਅਤ੍ਥੇ ਏਵ ਕਰਣਵਚਨਂ. ਵਿਮੁਚ੍ਚਿਂਸੂਤਿ ਕਮ੍ਮਸਾਧਨਂ. ਤੇਤਿ ਆਸਵਾ. ਤਾਨੀਤਿ ਚਿਤ੍ਤਾਨਿ, ਉਪਯੋਗਬਹੁਵਚਨਞ੍ਚੇਤਂ. ਵਿਮੁਚ੍ਚਿਂਸੂਤਿ ਕਤ੍ਤੁਸਾਧਨਂ, ਵਿਮੋਚੇਸੁਨ੍ਤਿ ਅਤ੍ਥੋ. ਅਗ੍ਗਹੇਤ੍ਵਾ ਵਿਮੁਚ੍ਚਿਂਸੂਤਿ ਆਰਮ੍ਮਣਵਸੇਨ ਤਾਨਿ ਚਿਤ੍ਤਾਨਿ ਅਗ੍ਗਹੇਤ੍ਵਾ ਆਸਵਾ ਤੇਹਿ ਚਿਤ੍ਤੇਹਿ ਮੁਤ੍ਤਵਨ੍ਤੋ ਅਹੇਸੁਨ੍ਤਿ ਅਤ੍ਥੋ. ਅਥ ਵਾ ਆਸਵੇਹੀਤਿ ਨਿਸ੍ਸਕ੍ਕਵਚਨਂ, ਵਿਮੁਚ੍ਚਿਂਸੂਤਿ ਕਤ੍ਤੁਸਾਧਨਂ. ਤਸ੍ਮਾ ਕਞ੍ਚਿ ਸਙ੍ਖਤਧਮ੍ਮਂ ਤਣ੍ਹਾਦਿਵਸੇਨ ਅਨੁਪਾਦਿਯਿਤ੍ਵਾ ਚਿਤ੍ਤਾਨਿ ਵਿਮੁਤ੍ਤਵਨ੍ਤਾਨਿ ਅਹੇਸੁਨ੍ਤਿ ਅਤ੍ਥੋ ਗਹੇਤਬ੍ਬੋ. ਪੁਰਿਮਵਚਨਾਪੇਕ੍ਖਨ੍ਤਿ ਅਞ੍ਞਤਰਸ੍ਮਿਂ ਭਿਂਸਨਕੇ ਵਨਸਣ੍ਡੇਤਿ ਵੁਤ੍ਤਵਚਨਸ੍ਸ ਅਪੇਕ੍ਖਨਂ ਤਸ੍ਮਿਂ ਪੁਰਿਮਵਚਨੇਤਿ ਏਵਂ ਅਪੇਕ੍ਖਨਨ੍ਤਿ ਅਤ੍ਥੋ, ਤੇਨਾਹ ਯਂ ਵੁਤ੍ਤਨ੍ਤਿਆਦਿ. ਭਿਂਸਨਸ੍ਸ ਭਯਸ੍ਸ ਕਤਂ ਕਰਣਂ ¶ ਕਿਰਿਯਾ ਭਿਂਸਨਕਤਂ, ਤਸ੍ਮਿਂ ਭਿਂਸਨਕਿਰਿਯਾਯਾਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਭਿਂਸਨਕਿਰਿਯਾਯਾ’’ਤਿ. ਭਿਂਸਯਤੀਤਿ ਭਿਂਸਨੋ, ਸੋਵ ਭਿਂਸਨਕੋ, ਤਸ੍ਸ ਭਾਵੋ ‘‘ਭਿਂਸਨਕਤ੍ਤ’’ਨ੍ਤਿ ਵਤ੍ਤਬ੍ਬੇ ਤ-ਕਾਰਸ੍ਸ ਲੋਪਂ ਕਤ੍ਵਾ ਵੁਤ੍ਤਨ੍ਤਿ ਪਕਾਰਨ੍ਤਰੇਨ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਥ ਵਾ’’ਤਿਆਦਿ. ਬਹੁਤਰਾਨਂ ਸਤ੍ਤਾਨਂ ਵਾਤਿ ਯੇਭੁਯ੍ਯੇਨਾਤਿ ਪਦਸ੍ਸ ਅਤ੍ਥਦਸ੍ਸਨਂ. ਤੇਨ ਚ ਯੋ ਕੋਚੀਤਿ ਪਦਸ੍ਸਾਪਿ ਯੋ ਯੋ ¶ ਪਵਿਸਤੀਤਿ ਵਿਚ੍ਛਾਵਸੇਨ ਨਾਨਤ੍ਥੇਨ ਅਤ੍ਥੋ ਗਹੇਤਬ੍ਬੋਤਿ ਦਸ੍ਸੇਤਿ, ਯੋ ਯੋ ਪਵਿਸਤਿ, ਤੇਸੁ ਬਹੁਤਰਾਨਨ੍ਤਿ ਅਤ੍ਥਸਮ੍ਭਵਤੋ.

ਨਿਗਮਨਨ੍ਤਿ ਪਕਤੇ ਅਤ੍ਥੇ ਯਥਾਵੁਤ੍ਤਸ੍ਸ ਅਤ੍ਥਸ੍ਸ ਉਪਸਂਹਾਰੋ. ਅਯਞ੍ਹੇਤ੍ਥ ਨਿਗਮਨਕ੍ਕਮੋ – ਯਾ ਹਿ, ਸਾਰਿਪੁਤ੍ਤ, ਵਿਪਸ੍ਸੀਆਦੀਨਂ ਤਿਣ੍ਣਂ ਬੁਦ੍ਧਾਨਂ ਅਤ੍ਤਨੋ ਪਰਿਨਿਬ੍ਬਾਨਤੋ ਉਪਰਿ ਪਰਿਯਤ੍ਤਿਵਸੇਨ ਵਿਨੇਤਬ੍ਬਾਨਂ ਪੁਗ੍ਗਲਾਨਂ ਅਭਾਵੇਨ ਤੇਸਂ ਅਤ੍ਥਾਯ ਵਿਤ੍ਥਾਰਤੋ ਸਿਕ੍ਖਾਪਦਪਞ੍ਞਤ੍ਤਿਯਂ ਕਿਲਾਸੁਤਾ ਅਪ੍ਪੋਸ੍ਸੁਕ੍ਕਤਾ, ਯਾ ਚ ਉਪਨਿਸ੍ਸਯਸਮ੍ਪਨ੍ਨਾਨਂ ਵੇਨੇਯ੍ਯਾਨਂ ਚੇਤਸਾ ਚੇਤੋ ਪਰਿਚ੍ਚ ਭਿਂਸਨਕਵਨਸਣ੍ਡੇਪਿ ਗਨ੍ਤ੍ਵਾ ਓਵਦਨ੍ਤਾਨਂ ਤੇਸਂ ਮਗ੍ਗਫਲੁਪ੍ਪਾਦਨਤ੍ਥਾਯ ਧਮ੍ਮਦੇਸਨਾਯ ਏਵ ਅਕਿਲਾਸੁਤਾ ਸਉਸ੍ਸਾਹਤਾ, ਨ ਵਿਤ੍ਥਾਰਤੋ ਧਮ੍ਮਵਿਨਯਦੇਸਨਾਯ, ਅਯਂ ਖੋ, ਸਾਰਿਪੁਤ੍ਤ, ਹੇਤੁ, ਅਯਂ ਪਚ੍ਚਯੋ, ਯੇਨ ਵਿਪਸ੍ਸੀਆਦੀਨਂ ਤਿਣ੍ਣਂ ਬੁਦ੍ਧਾਨਂ ਬ੍ਰਹ੍ਮਚਰਿਯਂ ਨ ਚਿਰਟ੍ਠਿਤਿਕਂ ਅਹੋਸੀਤਿ. ਪੁਰਿਸਯੁਗਵਸੇਨਾਤਿ ਪੁਰਿਸਾਨਂ ਯੁਗਂ ਪਵਤ੍ਤਿਕਾਲੋ, ਤਸ੍ਸ ਵਸੇਨ, ਪੁਰਿਸਵਸੇਨਾਤਿ ਅਤ੍ਥੋ. ਸਬ੍ਬਪਚ੍ਛਿਮਕੋਤਿ ਪਰਿਨਿਬ੍ਬਾਨਦਿਵਸੇ ਪਬ੍ਬਜਿਤੋ ਸੁਭਦ੍ਦਸਦਿਸੋ. ਸਤਸਹਸ੍ਸਂ ਸਟ੍ਠਿਮਤ੍ਤਾਨਿ ਚ ਵਸ੍ਸਸਹਸ੍ਸਾਨੀਤਿ ਇਦਂ ਭਗਵਤੋ ਜਾਤਿਤੋ ਪਟ੍ਠਾਯ ਵੁਤ੍ਤਂ, ਬੋਧਿਤੋ ਪਟ੍ਠਾਯ ਪਨ ਗਣਿਯਮਾਨਂ ਊਨਂ ਹੋਤੀਤਿ ਦਟ੍ਠਬ੍ਬਂ. ਦ੍ਵੇਯੇਵਾਤਿ ਧਰਮਾਨੇ ਭਗਵਤਿ ਏਕਂ, ਪਰਿਨਿਬ੍ਬੁਤੇ ਏਕਨ੍ਤਿ ਦ੍ਵੇ ਏਵ ਪੁਰਿਸਯੁਗਾਨਿ.

੨੦-੧. ਅਸਮ੍ਭੁਣਨ੍ਤੇਨਾਤਿ ਅਪਾਪੁਣਨ੍ਤੇਨ. ਕੋ ਅਨੁਸਨ੍ਧੀਤਿ ਪੁਰਿਮਕਥਾਯ ਇਮਸ੍ਸ ਕੋ ਸਮ੍ਬਨ੍ਧੋਤਿ ਅਤ੍ਥੋ. ਯਂ ਵੁਤ੍ਤਨ੍ਤਿ ਯਂ ਯਾਚਿਤਨ੍ਤਿ ਅਤ੍ਥੋ. ਯੇਸੂਤਿ ਵੀਤਿਕ੍ਕਮਧਮ੍ਮੇਸੁ. ਨੇਸਨ੍ਤਿ ਦਿਟ੍ਠਧਮ੍ਮਿਕਾਦਿਆਸਵਾਨਂ. ਤੇਤਿ ਵੀਤਿਕ੍ਕਮਧਮ੍ਮਾ. ਞਾਤਿਯੇਵ ਪਿਤਾਮਹਪਿਤੁਪੁਤ੍ਤਾਦਿਵਸੇਨ ਪਰਿਵਟ੍ਟਨਤੋ ਪਰਿਵਟ੍ਟੋਤਿ ਞਾਤਿਪਰਿਵਟ੍ਟੋ. ਲੋਕਾਮਿਸਭੂਤਨ੍ਤਿ ਲੋਕਪਰਿਯਾਪਨ੍ਨਂ ਹੁਤ੍ਵਾ ਕਿਲੇਸੇਹਿ ਆਮਸਿਤਬ੍ਬਤੋ ਲੋਕਾਮਿਸਭੂਤਂ. ਪਬ੍ਬਜ੍ਜਾਸਙ੍ਖੇਪੇਨੇਵਾਤਿ ਦਸਸਿਕ੍ਖਾਪਦਦਾਨਾਦਿਪਬ੍ਬਜ੍ਜਾਮੁਖੇਨ. ਏਤਨ੍ਤਿ ਮੇਥੁਨਾਦੀਨਂ ਅਕਰਣਂ. ਥਾਮਨ੍ਤਿ ਸਿਕ੍ਖਾਪਦਪਞ੍ਞਾਪਨਸਾਮਤ੍ਥਿਯਂ. ਸਞ੍ਛਵਿਨ੍ਤਿ ਸੁਕ੍ਕਚ੍ਛਵਿਂ ਪਕਤਿਚ੍ਛਵਿਂ, ਸੁਨ੍ਦਰਚ੍ਛਵਿਂ ਵਾ. ਸੇਸਨ੍ਤਿ ਸੇਸਪਦਯੋਜਨਦਸ੍ਸਨਂ. ਇਦਾਨਿ ਅਤ੍ਥਯੋਜਨਂ ਦਸ੍ਸੇਨ੍ਤੋ ਆਹ ਅਯਂ ਵਾ ਹੇਤ੍ਥਾਤਿਆਦਿ. ਤਤ੍ਥ ਵਾ-ਸਦ੍ਦੋ ਅਵਧਾਰਣੇ. ਹਿ-ਸਦ੍ਦੋ ਪਸਿਦ੍ਧਿਯਂ, ਅਯਮੇਵ ਹੇਤ੍ਥਾਤਿ ਅਤ੍ਥੋ. ਅਥ ਸਤ੍ਥਾਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ ‘‘ਤਦਾ ਸਤ੍ਥਾ’’ਤਿ. ਰੋਪੇਤ੍ਵਾਤਿ ਫਾਲਿਤਟ੍ਠਾਨੇ ¶ ਨਿਨ੍ਨਂ ਮਂਸਂ ਸਮਂ ਵਡ੍ਢੇਤ੍ਵਾ. ਸਕੇ ਆਚਰਿਯਕੇਤਿ ਅਤ੍ਤਨੋ ਆਚਰਿਯਭਾਵੇ, ਆਚਰਿਯਕਮ੍ਮੇ ਵਾ.

ਵਿਪੁਲਭਾਵੇਨਾਤਿ ¶ ਬਹੁਭਾਵੇਨ. ਅਯੋਨਿਸੋ ਉਮ੍ਮੁਜ੍ਜਮਾਨਾਤਿ ਅਨੁਪਾਯੇਨ ਅਭਿਨਿਵਿਸਮਾਨਾ, ਵਿਪਰੀਤਤੋ ਜਾਨਮਾਨਾਤਿ ਅਤ੍ਥੋ. ਰਸੇਨ ਰਸਂ ਸਂਸਨ੍ਦਿਤ੍ਵਾਤਿ ਅਨਵਜ੍ਜਸਭਾਵੇਨ ਸਾਵਜ੍ਜਸਭਾਵਂ ਸਮ੍ਮਿਸ੍ਸੇਤ੍ਵਾ. ਉਦ੍ਧਮ੍ਮਂ ਉਬ੍ਬਿਨਯਨ੍ਤਿ ਉਗ੍ਗਤਧਮ੍ਮਂ ਉਗ੍ਗਤਵਿਨਯਞ੍ਚ, ਯਥਾ ਧਮ੍ਮੋ ਚ ਵਿਨਯੋ ਚ ਵਿਨਸ੍ਸਿਸ੍ਸਤਿ, ਏਵਂ ਕਤ੍ਵਾਤਿ ਅਤ੍ਥੋ. ਇਮਸ੍ਮਿਂ ਅਤ੍ਥੇਤਿ ਇਮਸ੍ਮਿਂ ਸਙ੍ਘਾਧਿਕਾਰੇ. ਪਭਸ੍ਸਰੋਤਿ ਪਭਾਸਨਸੀਲੋ. ਏਵਂਨਾਮੋ ਏਵਂਗੋਤ੍ਤੋਤਿ ਸੋਯਮਾਯਸ੍ਮਾ ਸੋਤਾਪਨ੍ਨੋਤਿਨਾਮਗੋਤ੍ਤੇਨ ਸਮਨ੍ਨਾਗਤੋ, ਅਯਂ ਵੁਚ੍ਚਤਿ ਸੋਤਾਪਨ੍ਨੋਤਿ ਪਕਤੇਨ ਸਮ੍ਬਨ੍ਧੋ. ਅਵਿਨਿਪਾਤਧਮ੍ਮੋਤਿ ਏਤ੍ਥ ਧਮ੍ਮ-ਸਦ੍ਦੋ ਸਭਾਵਵਾਚੀ, ਸੋ ਚ ਅਤ੍ਥਤੋ ਅਪਾਯੇਸੁ ਖਿਪਨਕੋ ਦਿਟ੍ਠਿਆਦਿਅਕੁਸਲਧਮ੍ਮੋ ਏਵਾਤਿ ਆਹ ‘‘ਯੇ ਧਮ੍ਮਾ’’ਤਿਆਦਿ. ਇਦਾਨਿ ਸਭਾਵਵਸੇਨੇਵ ਅਤ੍ਥਂ ਦਸ੍ਸੇਤੁਂ ਵਿਨਿਪਤਨਂ ਵਾਤਿਆਦਿ ਵੁਤ੍ਤਂ. ਨਿਯਤੋਤਿ ਸਤ੍ਤਭਵਬ੍ਭਨ੍ਤਰੇ ਨਿਯਤਕ੍ਖਨ੍ਧਪਰਿਨਿਬ੍ਬਾਨੋ. ਤਸ੍ਸ ਕਾਰਣਮਾਹ ‘‘ਸਮ੍ਬੋਧਿਪਰਾਯਣੋ’’ਤਿ.

੨੨. ਅਨੁਧਮ੍ਮਤਾਤਿ ਲੋਕੁਤ੍ਤਰਧਮ੍ਮਾਨੁਗਤੋ ਸਭਾਵੋ. ਪਵਾਰਣਾਸਙ੍ਗਹਂ ਦਤ੍ਵਾਤਿ ‘‘ਆਗਾਮਿਨਿਯਾ ਪੁਣ੍ਣਮਿਯਾ ਪਵਾਰੇਸ੍ਸਾਮਾ’’ਤਿ ਅਨੁਮਤਿਦਾਨਵਸੇਨ ਦਤ੍ਵਾ, ਪਵਾਰਣਂ ਉਕ੍ਕਡ੍ਢਿਤ੍ਵਾਤਿ ਅਤ੍ਥੋ, ਏਤੇਨ ਨਯੇਨ ਕੇਨਚਿ ਪਚ੍ਚਯੇਨ ਪਵਾਰਣੁਕ੍ਕਡ੍ਢਨਂ ਕਾਤੁਂ ਵਟ੍ਟਤੀਤਿ ਦੀਪਿਤਂ ਹੋਤਿ. ਮਾਗਸਿਰਸ੍ਸ ਪਠਮਦਿਵਸੇਤਿ ਚਨ੍ਦਮਾਸਵਸੇਨ ਵੁਤ੍ਤਂ, ਅਪਰਕਤ੍ਤਿਕਪੁਣ੍ਣਮਾਯ ਅਨਨ੍ਤਰੇ ਪਾਟਿਪਦਦਿਵਸੇਤਿ ਅਤ੍ਥੋ. ਫੁਸ੍ਸਮਾਸਸ੍ਸ ਪਠਮਦਿਵਸੇਤਿ ਏਤ੍ਥਾਪਿ ਏਸੇਵ ਨਯੋ. ਇਦਞ੍ਚ ਨਿਦਸ੍ਸਨਮਤ੍ਤਂ ਵੇਨੇਯ੍ਯਾਨਂ ਅਪਰਿਪਾਕਂ ਪਟਿਚ੍ਚ ਫੁਸ੍ਸਮਾਸਤੋ ਪਰਞ੍ਚ ਏਕਦ੍ਵਿਤਿਚਤੁਮਾਸਮ੍ਪਿ ਤਤ੍ਥੇਵ ਵਸਿਤ੍ਵਾ ਸੇਸਮਾਸੇਹਿ ਚਾਰਿਕਾਯ ਪਰਿਯੋਸਾਪਨਤੋ. ਦਸਸਹਸ੍ਸਚਕ੍ਕਵਾਲ਼ੇਤਿ ਇਦਂ ਦੇਵਬ੍ਰਹ੍ਮਾਨਂ ਵਸੇਨ ਵੁਤ੍ਤਂ. ਮਨੁਸ੍ਸਾ ਪਨ ਇਮਸ੍ਮਿਂਯੇਵ ਚਕ੍ਕਵਾਲ਼ੇ ਬੋਧਨੇਯ੍ਯਾ ਹੋਨ੍ਤਿ. ਇਤਰਚਕ੍ਕਵਾਲ਼ੇਸੁ ਪਨ ਮਨੁਸ੍ਸਾਨਂ ਇਮਸ੍ਮਿਂ ਚਕ੍ਕਵਾਲ਼ੇ ਉਪ੍ਪਤ੍ਤਿਯਾ ਛਨ੍ਦੁਪ੍ਪਾਦਨਤ੍ਥਂ ਅਨਨ੍ਤਮ੍ਪਿ ਚਕ੍ਕਵਾਲ਼ਂ ਓਲੋਕੇਤ੍ਵਾ ਤਦਨੁਗੁਣਾਨੁਸਾਸਨੀ ਪਾਟਿਹਾਰਿਯਂ ਕਰੋਨ੍ਤਿਯੇਵ.

ਆਯਾਮਾਤਿ ¶ ਏਤ੍ਥ ਆ-ਸਦ੍ਦੋ ਆਗਚ੍ਛਾਤਿ ਇਮਿਨਾ ਸਮਾਨਤ੍ਥੋਤਿ ਆਹ ‘‘ਆਗਚ੍ਛ ਯਾਮਾ’’ਤਿ, ਏਹਿ ਗਚ੍ਛਾਮਾਤਿ ਅਤ੍ਥੋ. ਸੁਵਣ੍ਣਰਸਪਿਞ੍ਜਰਾਹੀਤਿ ਵਿਲੀਨਸੁਵਣ੍ਣਜਲਂ ਵਿਯ ਪਿਞ੍ਜਰਾਹਿ ਸੁਵਣ੍ਣਵਣ੍ਣਾਹੀਤਿ ਅਤ੍ਥੋ. ਪਾਲ਼ਿਯਂ ਨਿਮਨ੍ਤਿਤਮ੍ਹਾਤਿਆਦੀਸੁ ‘‘ਨਿਮਨ੍ਤਿਤਾ ਵਸ੍ਸਂਵੁਤ੍ਥਾ ਅਮ੍ਹਾ’’ਤਿ ਚ, ‘‘ਨਿਮਨ੍ਤਿਤਾ ਵਸ੍ਸਂਵੁਤ੍ਥਾ ਅਤ੍ਥਾ’’ਤਿ ਚ ਸਮ੍ਬਨ੍ਧੋ.

ਯਨ੍ਤਿ ਦੇਯ੍ਯਧਮ੍ਮਜਾਤਂ, ਯਂ ਕਿਞ੍ਚੀਤਿ ਅਤ੍ਥੋ. ਨੋ ਨਤ੍ਥੀਤਿ ਅਮ੍ਹਾਕਂ ਨਤ੍ਥਿ, ਨੋਤਿ ਵਾ ਏਤਸ੍ਸ ਵਿਵਰਣਂ ਨਤ੍ਥੀਤਿ. ਏਤ੍ਥਾਤਿ ਘਰਾਵਾਸੇ. ਤਨ੍ਤਿ ਤਂ ਕਾਰਣਂ, ਕਿਚ੍ਚਂ ਵਾ. ਕੁਤੋਤਿ ਕਤਰਹੇਤੁਤੋ. ਯਨ੍ਤਿ ਯੇਨ ਕਾਰਣੇਨ, ਕਿਚ੍ਚੇਨ ਵਾ. ਦੁਤਿਯੇ ਅਤ੍ਥਵਿਕਪ੍ਪੇ ਏਤ੍ਥਾਤਿ ਇਮਸ੍ਸ ਵਿਵਰਣਂ ਇਮਸ੍ਮਿਂ ਤੇਮਾਸਬ੍ਭਨ੍ਤਰੇਤਿ. ਤਨ੍ਤਿ ਤਂ ਦੇਯ੍ਯਧਮ੍ਮਂ.

ਤਤ੍ਥ ¶ ਚਾਤਿ ਕੁਸਲੇ. ਤਿਕ੍ਖਵਿਸਦਭਾਵਾਪਾਦਨੇਨ ਸਮੁਤ੍ਤੇਜੇਤ੍ਵਾ. ਵਸ੍ਸੇਤ੍ਵਾਤਿ ਆਯਤਿਂ ਵਾਸਨਾਭਾਗਿਯਂ ਧਮ੍ਮਰਤਨਵਸ੍ਸਂ ਓਤਾਰੇਤ੍ਵਾ. ਯਂ ਦਿਵਸਨ੍ਤਿ ਯਸ੍ਮਿਂ ਦਿਵਸੇ.

੨੩. ਪਤ੍ਤੁਣ੍ਣਪਤ੍ਤਪਟੇ ਚਾਤਿ ਪਤ੍ਤੁਣ੍ਣਪਟੇ ਚੀਨਪਟੇ ਚ. ਤੁਮ੍ਬਾਨੀਤਿ ਚਮ੍ਮਮਯਤੇਲਭਾਜਨਾਨਿ. ਅਨੁਬਨ੍ਧਿਤ੍ਵਾਤਿ ਅਨੁਪਗਮਨਂ ਕਤ੍ਵਾ. ਅਭਿਰਨ੍ਤ-ਸਦ੍ਦੋ ਇਧ ਅਭਿਰੁਚਿਪਰਿਯਾਯੋਤਿ ਆਹ ‘‘ਯਥਾਜ੍ਝਾਸਯ’’ਨ੍ਤਿਆਦਿ. ਸੋਰੇਯ੍ਯਾਦੀਨਿ ਮਹਾਮਣ੍ਡਲਚਾਰਿਕਾਯ ਮਗ੍ਗਭੂਤਾਨਿ ਸੋਰੇਯ੍ਯਨਗਰਾਦੀਨਿ. ਪਯਾਗਪਤਿਟ੍ਠਾਨਨ੍ਤਿ ਗਙ੍ਗਾਯ ਏਕਸ੍ਸ ਤਿਤ੍ਥਵਿਸੇਸਸ੍ਸਾਪਿ, ਤਂਸਮੀਪੇ ਗਾਮਸ੍ਸਾਪਿ ਨਾਮਂ. ਸਮਨ੍ਤਪਾਸਾਦਿਕਾਯਾਤਿ ਸਮਨ੍ਤਤੋ ਸਬ੍ਬਸੋ ਪਸਾਦਂ ਜਨੇਤੀਤਿ ਸਮਨ੍ਤਪਾਸਾਦਿਕਾ, ਤਸ੍ਸਾ.

ਯੇ ਪਨ ਪਕਾਰੇ ਸਨ੍ਧਾਯ ‘‘ਸਮਨ੍ਤਤੋ’’ਤਿ ਵੁਚ੍ਚਤਿ, ਤੇ ਪਕਾਰੇ ਵਿਤ੍ਥਾਰੇਤ੍ਵਾ ਦਸ੍ਸੇਤੁਂ ਤਤ੍ਰਿਦਨ੍ਤਿਆਦਿ ਵੁਤ੍ਤਂ. ਤਤ੍ਥ ‘‘ਸਮਨ੍ਤਪਾਸਾਦਿਕਾ’’ਤਿ ਯਾ ਸਂਵਣ੍ਣਨਾ ਵੁਤ੍ਤਾ, ਤਤ੍ਰ ਤਸ੍ਸਂ ਸਮਨ੍ਤਪਾਸਾਦਿਕਾਯਂ ਸਮਨ੍ਤਪਸਾਦਿਕਭਾਵੇ ਇਦਂ ਵਕ੍ਖਮਾਨਗਾਥਾਵਚਨਂ ਹੋਤੀਤਿ ਯੋਜਨਾ. ਬਾਹਿਰਨਿਦਾਨਅਬ੍ਭਨ੍ਤਰਨਿਦਾਨਸਿਕ੍ਖਾਪਦਨਿਦਾਨਾਨਂ ਵਸੇਨ ਨਿਦਾਨਪ੍ਪਭੇਦਦੀਪਨਂ ਵੇਦਿਤਬ੍ਬਂ. ‘‘ਥੇਰਵਾਦਪ੍ਪਕਾਸਨਂ ਵਤ੍ਥੁਪ੍ਪਭੇਦਦੀਪਨ’’ਨ੍ਤਿਪਿ ਵਦਨ੍ਤਿ. ‘‘ਸਿਕ੍ਖਾਪਦਾਨਂ ਪਚ੍ਚੁਪ੍ਪਨ੍ਨਵਤ੍ਥੁਪ੍ਪਭੇਦਦੀਪਨ’’ਨ੍ਤਿਪਿ ਵਤ੍ਤੁਂ ਵਟ੍ਟਤਿ. ਸਿਕ੍ਖਾਪਦਨਿਦਾਨਨ੍ਤਿ ਪਨ ਵੇਸਾਲੀਆਦਿ ਸਿਕ੍ਖਾਪਦਪਞ੍ਞਤ੍ਤਿਯਾ ¶ ਕਾਰਣਭੂਤਦੇਸਵਿਸੇਸੋ ਵੇਦਿਤਬ੍ਬੋ. ਏਤ੍ਥਾਤਿ ਸਮਨ੍ਤਪਾਸਾਦਿਕਾਯ. ਸਮ੍ਪਸ੍ਸਤਂ ਵਿਞ੍ਞੂਨਨ੍ਤਿ ਸਮ੍ਬਨ੍ਧੋ, ਤਸ੍ਮਾ ਅਯਂ ਸਮਨ੍ਤਪਾਸਾਦਿਕਾਤ੍ਵੇਵ ਪਵਤ੍ਤਾਤਿ ਯੋਜੇਤਬ੍ਬਾ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਵੇਰਞ੍ਜਕਣ੍ਡਵਣ੍ਣਨਾਨਯੋ ਨਿਟ੍ਠਿਤੋ.

੧. ਪਾਰਾਜਿਕਕਣ੍ਡੋ

੧. ਪਠਮਪਾਰਾਜਿਕਂ

ਸੁਦਿਨ੍ਨਭਾਣਵਾਰਵਣ੍ਣਨਾ

੨੪. ਵਿਕ੍ਕਾਯਿਕਭਣ੍ਡਸ੍ਸ ¶ ¶ ਵਿਕ੍ਕਿਣਨਂ ਇਣਦਾਨਞ੍ਚ ਭਣ੍ਡਪ੍ਪਯੋਜਨਂ ਨਾਮ. ਏਵਂ ਪਯੋਜਿਤਸ੍ਸ ਮੂਲਸ੍ਸ ਸਹ ਵਡ੍ਢਿਯਾ ਗਹਣਵਾਯਾਮੋ ਉਦ੍ਧਾਰੋ ਨਾਮ. ਅਸੁਕਦਿਵਸੇ ਦਿਨ੍ਨਨ੍ਤਿਆਦਿਨਾ ਪਮੁਟ੍ਠਸ੍ਸ ਸਤੁਪ੍ਪਾਦਨਾਦਿ ਸਾਰਣਂ ਨਾਮ. ਚਤੁਬ੍ਬਿਧਾਯਾਤਿ ਖਤ੍ਤਿਯਬ੍ਰਾਹ੍ਮਣਗਹਪਤਿਸਮਣਾਨਂ ਵਸੇਨ, ਭਿਕ੍ਖੁਆਦੀਨਂ ਵਾ ਵਸੇਨ ਚਤੁਬ੍ਬਿਧਾਯ. ਦਿਸ੍ਵਾਨਸ੍ਸ ਏਤਦਹੋਸੀਤਿ ਹੇਤੁਅਤ੍ਥੇ ਅਯਂ ਦਿਸ੍ਵਾਨ-ਸਦ੍ਦੋ ਅਸਮਾਨਕਤ੍ਤੁਕਤ੍ਤਾ, ਯਥਾ ਘਤਂ ਪਿਵਿਤ੍ਵਾ ਬਲਂ ਹੋਤੀਤਿ, ਏਵਮਞ੍ਞਤ੍ਥਾਪਿ ਏਵਰੂਪੇਸੁ. ਭਬ੍ਬਕੁਲਪੁਤ੍ਤੋਤਿ ਉਪਨਿਸ੍ਸਯਮਤ੍ਤਸਭਾਵੇਨ ਵੁਤ੍ਤਂ, ਨ ਪਚ੍ਛਿਮਭਵਿਕਤਾਯ. ਤੇਨੇਵਸ੍ਸ ਮਾਤਾਦਿਅਕਲ੍ਯਾਣਮਿਤ੍ਤਸਮਾਯੋਗੇਨ ਕਤਵੀਤਿਕ੍ਕਮਨਂ ਨਿਸ੍ਸਾਯ ਉਪ੍ਪਨ੍ਨਵਿਪ੍ਪਟਿਸਾਰੇਨ ਅਧਿਗਮਨ੍ਤਰਾਯੋ ਜਾਤੋ. ਪਚ੍ਛਿਮਭਵਿਕਾਨਂ ਪੁਬ੍ਬਬੁਦ੍ਧੁਪ੍ਪਾਦੇਸੁ ਲਦ੍ਧਬ੍ਯਾਕਰਣਾਨਂ ਨ ਸਕ੍ਕਾ ਕੇਨਚਿ ਅਨ੍ਤਰਾਯਂ ਕਾਤੁਂ. ਤੇਨੇਵ ਅਙ੍ਗੁਲਿਮਾਲਤ੍ਥੇਰਾਦਯੋ ਅਕੁਸਲਂ ਕਤ੍ਵਾਪਿ ਅਧਿਗਮਸਮ੍ਪਨ੍ਨਾ ਏਵ ਅਹੇਸੁਨ੍ਤਿ. ਚਰਿਮਕਚਿਤ੍ਤਨ੍ਤਿ ਚੁਤਿਚਿਤ੍ਤਂ. ਸਙ੍ਖਂ ਵਿਯ ਲਿਖਿਤਂ ਘਂਸਿਤ੍ਵਾ ਧੋਵਿਤਂ ਸਙ੍ਖਲਿਖਿਤਨ੍ਤਿ ਆਹ ਧੋਤਇਚ੍ਚਾਦਿ. ਅਜ੍ਝਾਵਸਤਾਤਿ ਅਧਿ-ਸਦ੍ਦਯੋਗੇਨ ਅਗਾਰਨ੍ਤਿ ਭੁਮ੍ਮਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਅਗਾਰਮਜ੍ਝੇ’’ਤਿ. ਕਸਾਯਰਸਰਤ੍ਤਾਨਿ ਕਾਸਾਯਾਨੀਤਿ ਆਹ ‘‘ਕਸਾਯਰਸਪੀਤਤਾਯਾ’’ਤਿ. ਕਸਾਯਤੋ ਨਿਬ੍ਬਤ੍ਤਤਾਯ ਚ ਹਿ ਰਸੋਪਿ ‘‘ਕਸਾਯਰਸੋ’’ਤਿ ਵੁਚ੍ਚਤਿ.

੨੬. ਯਦਾ ਜਾਨਾਤਿ-ਸਦ੍ਦੋ ਬੋਧਨਤ੍ਥੋ ਨ ਹੋਤਿ, ਤਦਾ ਤਸ੍ਸ ਪਯੋਗੇ ਸਪ੍ਪਿਨੋ ਜਾਨਾਤਿ ਮਧੁਨੋ ਜਾਨਾਤੀਤਿਆਦੀਸੁ ਵਿਯ ਕਰਣਤ੍ਥੇ ਸਾਮਿਵਚਨਂ ਸਦ੍ਦਸਤ੍ਥਵਿਦੂ ਇਚ੍ਛਨ੍ਤੀਤਿ ਆਹ ‘‘ਕਿਞ੍ਚਿ ਦੁਕ੍ਖੇਨ ਨਾਨੁਭੋਸੀ’’ਤਿ. ਕੇਨਚਿ ਦੁਕ੍ਖੇਨ ਨਾਨੁਭੋਸੀਤਿ ਅਤ੍ਥੋ, ਕਿਞ੍ਚੀਤਿ ਏਤ੍ਥਾਪਿ ਹਿ ਕਰਣਤ੍ਥੇ ਸਾਮਿਵਚਨਸ੍ਸ ਲੋਪੋ ਕਤੋ, ਤੇਨੇਵ ਵਕ੍ਖਤਿ ‘‘ਵਿਕਪ੍ਪਦ੍ਵਯੇਪਿ ਪੁਰਿਮਪਦਸ੍ਸ ਉਤ੍ਤਰਪਦੇਨ ਸਮਾਨਵਿਭਤ੍ਤਿਲੋਪੋ ¶ ਦਟ੍ਠਬ੍ਬੋ’’ਤਿ. ਯਦਾ ਪਨ ਜਾਨਾਤਿ-ਸਦ੍ਦੋ ਸਰਣਤ੍ਥੋ ਹੋਤਿ, ਤਦਾ ਮਾਤੁ ਸਰਤੀਤਿਆਦੀਸੁ ਵਿਯ ਉਪਯੋਗਤ੍ਥੇ ਸਾਮਿਵਚਨਂ ¶ ਸਦ੍ਦਸਤ੍ਥਵਿਦੂ ਵਦਨ੍ਤੀਤਿ ਆਹ ‘‘ਅਥ ਵਾ ਕਿਞ੍ਚਿ ਦੁਕ੍ਖਂ ਨਸ੍ਸਰਤੀਤਿ ਅਤ੍ਥੋ’’ਤਿ, ਕਸ੍ਸਚਿ ਦੁਕ੍ਖਸ੍ਸ ਅਨਨੁਭੂਤਤਾਯ ਨਸ੍ਸਰਤੀਤਿ ਅਤ੍ਥੋ. ਵਿਕਪ੍ਪਦ੍ਵਯੇਪੀਤਿ ਅਨੁਭਵਨਸਰਣਤ੍ਥਵਸੇਨ ਵੁਤ੍ਤੇ ਦੁਤਿਯਤਤਿਯਵਿਕਪ੍ਪਦ੍ਵਯੇ. ਪੁਰਿਮਪਦਸ੍ਸਾਤਿ ਕਿਞ੍ਚੀਤਿ ਪਦਸ੍ਸ. ਉਤ੍ਤਰਪਦੇਨਾਤਿ ਦੁਕ੍ਖਸ੍ਸਾਤਿਪਦੇਨ. ਸਮਾਨਾਯ ਸਾਮਿਵਚਨਭੂਤਾਯ ਵਿਭਤ੍ਤਿਯਾ ‘‘ਕਸ੍ਸਚਿ ਦੁਕ੍ਖਸ੍ਸਾ’’ਤਿ ਵਤ੍ਤਬ੍ਬੇ ‘‘ਕਿਞ੍ਚਿ ਦੁਕ੍ਖਸ੍ਸਾ’’ਤਿ ਲੋਪੋਤਿ ਦਟ੍ਠਬ੍ਬੋ. ਮਰਣੇਨਪਿ ਮਯਂ ਤੇਤਿ ਏਤ੍ਥ ਤੇਤਿ ਪਦਸ੍ਸ ਸਹਤ੍ਥੇ ਕਰਣਵਸੇਨਪਿ ਅਤ੍ਥਂ ਦਸ੍ਸੇਤੁਂ ਤਯਾ ਵਿਯੋਗਂ ਵਾ ਪਾਪੁਣਿਸ੍ਸਾਮਾਤਿ ਅਤ੍ਥਨ੍ਤਰਂ ਵੁਤ੍ਤਂ.

੨੮. ਗਨ੍ਧਬ੍ਬਾ ਨਾਮ ਗਾਯਨਕਾ. ਨਟਾ ਨਾਮ ਰਙ੍ਗਨਟਾ. ਨਾਟਕਾ ਲਙ੍ਘਨਕਾਦਯੋ. ਸੁਖੂਪਕਰਣੇਹਿ ਅਤ੍ਤਨੋ ਪਰਿਚਰਣਂ ਕਰੋਨ੍ਤੋ ਯਸ੍ਮਾ ਲਲ਼ਨ੍ਤੋ ਕੀਲ਼ਨ੍ਤੋ ਨਾਮ ਹੋਤਿ, ਤਸ੍ਮਾ ਦੁਤਿਯੇ ਅਤ੍ਥਵਿਕਪ੍ਪੇ ਲਲ਼ਾਤਿਆਦਿ ਵੁਤ੍ਤਂ. ਦਾਨਪ੍ਪਦਾਨਾਦੀਨੀਤਿ ਏਤ੍ਥ ਨਿਚ੍ਚਦਾਨਂ ਦਾਨਂ ਨਾਮ, ਵਿਸੇਸਦਾਨਂ ਪਦਾਨਂ ਨਾਮ, ਆਦਿ-ਸਦ੍ਦੇਨ ਸੀਲਾਦੀਨਿ ਸਙ੍ਗਣ੍ਹਾਤਿ.

੩੦. ਚੁਦ੍ਦਸ ਭਤ੍ਤਾਨੀਤਿ ਸਙ੍ਘਭਤ੍ਤਂ ਉਦ੍ਦੇਸਭਤ੍ਤਂ ਨਿਮਨ੍ਤਨਂ ਸਲਾਕਂ ਪਕ੍ਖਿਕਂ ਉਪੋਸਥਿਕਂ ਪਾਟਿਪਦਿਕਂ ਆਗਨ੍ਤੁਕਂ ਗਮਿਕਂ ਗਿਲਾਨਂ ਗਿਲਾਨੁਪਟ੍ਠਾਕਂ ਵਿਹਾਰ-ਧੁਰ-ਵਾਰਭਤ੍ਤਨ੍ਤਿ ਇਮਾਨਿ ਚੁਦ੍ਦਸ ਭਤ੍ਤਾਨਿ. ਏਤ੍ਥ ਚ ਸੇਨਾਸਨਾਦਿਪਚ੍ਚਯਤ੍ਤਯਨਿਸ੍ਸਿਤੇਸੁ ਆਰਞ੍ਞਕਙ੍ਗਾਦਿਪਧਾਨਙ੍ਗਾਨਂ ਗਹਣਵਸੇਨ ਸੇਸਧੁਤਙ੍ਗਾਨਿਪਿ ਗਹਿਤਾਨੇਵ ਹੋਨ੍ਤੀਤਿ ਵੇਦਿਤਬ੍ਬਂ. ਵਜ੍ਜੀਨਨ੍ਤਿ ਵਜ੍ਜੀਰਾਜੂਨਂ. ਵਜ੍ਜੀਸੂਤਿ ਜਨਪਦਾਪੇਕ੍ਖਂ ਬਹੁਵਚਨਂ, ਵਜ੍ਜੀਨਾਮਕੇ ਜਨਪਦੇਤਿ ਅਤ੍ਥੋ. ਪਞ੍ਚਕਾਮਗੁਣਾਯੇਵ ਉਪਭੁਞ੍ਜਿਤਬ੍ਬਤੋ ਪਰਿਭੁਞ੍ਜਿਤਬ੍ਬਤੋ ਚ ਉਪਭੋਗਪਰਿਭੋਗਾ, ਇਤ੍ਥਿਵਤ੍ਥਾਦੀਨਿ ਚ ਤਦੁਪਕਰਣਾਨੀਤਿ ਆਹ ‘‘ਯੇਹਿ ਤੇਸ’’ਨ੍ਤਿਆਦਿ. ਉਕ੍ਕਟ੍ਠਪਿਣ੍ਡਪਾਤਿਕਤ੍ਤਾਤਿ ਸੇਸਧੁਤਙ੍ਗਪਰਿਵਾਰਿਤੇਨ ਉਕ੍ਕਟ੍ਠਪਿਣ੍ਡਪਾਤਿਕਧੁਤਙ੍ਗੇਨ ਸਮਨ੍ਨਾਗਤਤ੍ਤਾ, ਤੇਨਾਹ ‘‘ਸਪਦਾਨਚਾਰਂ ਚਰਿਤੁਕਾਮੋ’’ਤਿ.

੩੧. ਦੋਸਾਤਿ ਰਤ੍ਤਿ. ਤਤ੍ਥ ਅਭਿਵੁਤ੍ਥਂ ਪਰਿਵੁਸਿਤਂ ਆਭਿਦੋਸਿਕਂ, ਅਭਿਦੋਸਂ ਵਾ ਪਚ੍ਚੂਸਕਾਲਂ ਗਤੋ ਪਤ੍ਤੋ ਅਤਿਕ੍ਕਨ੍ਤੋ ਆਭਿਦੋਸਿਕੋ, ਤੇਨਾਹ ਏਕਰਤ੍ਤਾਤਿਕ੍ਕਨ੍ਤਸ੍ਸ ਵਾਤਿਆਦਿ.

੩੨. ਉਦਕਕਞ੍ਜਿਯਨ੍ਤਿ ਪਾਨੀਯਪਰਿਭੋਜਨੀਯਉਦਕਞ੍ਚ ਯਾਗੁ ਚ. ਤਥਾਤਿ ਸਮੁਚ੍ਚਯਤ੍ਥੇ.ਅਨੋਕਪ੍ਪਨਂ ਅਸਦ੍ਦਹਨਂ, ਅਮਰਿਸਨਂ ਅਸਹਨਂ.

੩੪. ਤਦ੍ਧਿਤਲੋਪਨ੍ਤਿ ¶ ਪਿਤਾਮਹਤੋ ਆਗਤਂ ‘‘ਪੇਤਾਮਹ’’ਨ੍ਤਿ ਵਤ੍ਤਬ੍ਬੇ ਤਦ੍ਧਿਤਪਚ੍ਚਯਨਿਮਿਤ੍ਤਸ੍ਸ ¶ ਏ-ਕਾਰਸ੍ਸ ਲੋਪਂ ਕਤ੍ਵਾਤਿ ਅਤ੍ਥੋ. ਯੇਸਂ ਸਨ੍ਤਕਂ ਧਨਂ ਗਹਿਤਂ, ਤੇ ਇਣਾਯਿਕਾ. ਪਲਿਬੁਦ੍ਧੋਤਿ ‘ਮਾ ਗਚ੍ਛ ਮਾ ਭੁਞ੍ਜਾ’ਤਿਆਦਿਨਾ ਕਤਾਵਰਣੋ, ਪੀਲ਼ਿਤੋਤਿ ਅਤ੍ਥੋ.

੩੫. ਅਤ੍ਤਨਾਤਿ ਸਯਂ. ਸਪਤਿਨੋ ਧਨਸਾਮਿਨੋ ਇਦਂ ਸਾਪਤੇਯ੍ਯਂ, ਧਨਂ. ਤਦੇਵ ਵਿਭਵੋ.

੩੬. ਭਿਜ੍ਜਨ੍ਤੀਤਿ ਅਗਹਿਤਪੁਬ੍ਬਾ ਏਵ ਭਿਜ੍ਜਨ੍ਤਿ. ਦਿਨ੍ਨਾਪਿ ਪਟਿਸਨ੍ਧੀਤਿ ਪਿਤਰਾ ਦਿਨ੍ਨਂ ਸੁਕ੍ਕਂ ਨਿਸ੍ਸਾਯ ਉਪ੍ਪਨ੍ਨਸ੍ਸ ਸਤ੍ਤਸ੍ਸ ਪਟਿਸਨ੍ਧਿਪਿ ਤੇਨ ਦਿਨ੍ਨਾ ਨਾਮ ਹੋਤੀਤਿ ਵੁਤ੍ਤਂ. ਸੁਕ੍ਕਮੇਵ ਵਾ ਇਧ ਪਟਿਸਨ੍ਧਿਨਿਸ੍ਸਯਤ੍ਤਾ ‘‘ਪਟਿਸਨ੍ਧੀ’’ਤਿ ਵੁਤ੍ਤਂ, ਤੇਨਾਹ ‘‘ਖਿਪ੍ਪਂ ਪਤਿਟ੍ਠਾਤੀ’’ਤਿ. ਨ ਹਿ ਪਿਤੁ ਸਂਯੋਗਕ੍ਖਣੇਯੇਵ ਸਤ੍ਤਸ੍ਸ ਉਪ੍ਪਤ੍ਤਿਨਿਯਮੋ ਅਤ੍ਥਿ ਸੁਕ੍ਕਮੇਵ ਤਥਾ ਪਤਿਟ੍ਠਾਨਨਿਯਮਤੋ. ਸੁਕ੍ਕੇ ਪਨ ਪਤਿਟ੍ਠਿਤੇ ਯਾਵ ਸਤ੍ਤ ਦਿਵਸਾਨਿ, ਅਡ੍ਢਮਾਸਮਤ੍ਤਂ ਵਾ, ਤਂ ਗਬ੍ਭਸਣ੍ਠਾਨਸ੍ਸ ਖੇਤ੍ਤਮੇਵ ਹੋਤਿ ਮਾਤੁ ਮਂਸਸ੍ਸ ਲੋਹਿਤਲੇਸਸ੍ਸ ਸਬ੍ਬਦਾਪਿ ਵਿਜ੍ਜਮਾਨਤ੍ਤਾ. ਪੁਬ੍ਬੇਪਿ ਪਞ੍ਞਤ੍ਤਸਿਕ੍ਖਾਪਦਾਨਂ ਸਬ੍ਭਾਵਤੋ ਅਪਞ੍ਞਤ੍ਤੇ ਸਿਕ੍ਖਾਪਦੇਤਿ ਇਮਸ੍ਸ ਪਠਮਪਾਰਾਜਿਕਸਿਕ੍ਖਾਪਦੇ ਅਟ੍ਠਪਿਤੇਤਿ ਅਤ੍ਥੋ ਵੁਤ੍ਤੋ. ਏਵਰੂਪਨ੍ਤਿ ਏਵਂ ਗਰੁਕਸਭਾਵਂ, ਪਾਰਾਜਿਕਸਙ੍ਘਾਦਿਸੇਸਵਤ੍ਥੁਭੂਤਨ੍ਤਿ ਅਤ੍ਥੋ, ਤੇਨਾਹ ‘‘ਅਵਸੇਸੇ ਪਞ੍ਚਖੁਦ੍ਦਕਾਪਤ੍ਤਿਕ੍ਖਨ੍ਧੇ ਏਵ ਪਞ੍ਞਪੇਸੀ’’ਤਿ. ਯਂ ਆਦੀਨਵਨ੍ਤਿ ਸਮ੍ਬਨ੍ਧੋ. ਕਾਯਵਿਞ੍ਞਤ੍ਤਿਚੋਪਨਤੋਤਿ ਕਾਯਵਿਞ੍ਞਤ੍ਤਿਯਾ ਨਿਬ੍ਬਤ੍ਤਚਲਨਤੋ.

ਤੇਨੇਵਾਤਿ ਅਵਧਾਰਣੇਨ ਯਾਨਿ ਗਬ੍ਭਗ੍ਗਹਣਕਾਰਣਾਨਿ ਨਿਵਤ੍ਤਿਤਾਨਿ, ਤਾਨਿਪਿ ਦਸ੍ਸੇਤੁਂ ਕਿਂ ਪਨਾਤਿਆਦਿ ਵੁਤ੍ਤਂ. ਤਤ੍ਥ ਉਭਯੇਸਂ ਛਨ੍ਦਰਾਗਵਸੇਨ ਕਾਯਸਂਸਗ੍ਗੋ ਵੁਤ੍ਤੋ. ਇਤ੍ਥਿਯਾ ਏਵ ਛਨ੍ਦਰਾਗਵਸੇਨ ਨਾਭਿਪਰਾਮਸਨਂ ਵਿਸੁਂ ਵੁਤ੍ਤਂ. ਸਾਮਪਣ੍ਡਿਤਸ੍ਸ ਹਿ ਮਾਤਾ ਪੁਤ੍ਤੁਪ੍ਪਤ੍ਤਿਯਾ ਸਞ੍ਜਾਤਾਦਰਾ ਨਾਭਿਪਰਾਮਸਨਕਾਲੇ ਕਾਮਰਾਗਸਮਾਕੁਲਚਿਤ੍ਤਾ ਅਹੋਸਿ, ਇਤਰਥਾ ਪੁਤ੍ਤੁਪ੍ਪਤ੍ਤਿਯਾ ਏਵ ਅਸਮ੍ਭਵਤੋ. ‘‘ਸਕ੍ਕੋ ਚਸ੍ਸਾ ਕਾਮਰਾਗਸਮੁਪ੍ਪਤ੍ਤਿਨਿਮਿਤ੍ਤਾਨਿ ਅਕਾਸੀ’’ਤਿਪਿ ਵਦਨ੍ਤਿ, ਵਤ੍ਥੁਵਸੇਨ ਵਾ ਏਤਂ ਨਾਭਿਪਰਾਮਸਨਂ ਕਾਯਸਂਸਗ੍ਗਤੋ ਵਿਸੁਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਮਾਤਙ੍ਗਪਣ੍ਡਿਤਸ੍ਸ ਦਿਟ੍ਠਮਙ੍ਗਲਿਕਾਯ ਨਾਭਿਪਰਾਮਸਨੇਨ ਮਣ੍ਡਬ੍ਯਸ੍ਸ ਨਿਬ੍ਬਤ੍ਤਿ ਅਹੋਸਿ. ਚਣ੍ਡਪਜ੍ਜੋਤਮਾਤੁ ਨਾਭਿਯਂ ਵਿਚ੍ਛਿਕਾ ਫਰਿਤ੍ਵਾ ¶ ਗਤਾ, ਤੇਨ ਚਣ੍ਡਪਜ੍ਜੋਤਸ੍ਸ ਨਿਬ੍ਬਤ੍ਤਿ ਅਹੋਸੀਤਿ ਆਹ ਏਤੇਨੇਵ ਨਯੇਨਾਤਿਆਦਿ.

ਅਯਨ੍ਤਿ ਸੁਦਿਨ੍ਨਸ੍ਸ ਪੁਰਾਣਦੁਤਿਯਿਕਾ. ਯਂ ਸਨ੍ਧਾਯਾਤਿ ਯਂ ਅਜ੍ਝਾਚਾਰਂ ਸਨ੍ਧਾਯ. ਮਾਤਾਪਿਤਰੋ ਚ ਸਨ੍ਨਿਪਤਿਤਾ ਹੋਨ੍ਤੀਤਿ ਇਮਿਨਾ ਸੁਕ੍ਕਸ੍ਸ ਸਮ੍ਭਵਂ ਦੀਪੇਤਿ, ਮਾਤਾ ਚ ਉਤੁਨੀ ਹੋਤੀਤਿ ਇਮਿਨਾ ਸੋਣਿਤਸ੍ਸ. ਗਨ੍ਧਬ੍ਬੋਤਿ ਤਤ੍ਰੁਪਗੋ ਸਤ੍ਤੋ ਅਧਿਪ੍ਪੇਤੋ, ਗਨ੍ਤਬ੍ਬੋਤਿ ਵੁਤ੍ਤਂ ਹੋਤਿ, ਤ-ਕਾਰਸ੍ਸ ਚੇਤ੍ਥ ਧ-ਕਾਰੋ ਕਤੋ. ਅਥ ਵਾ ਗਨ੍ਧਬ੍ਬਾ ਨਾਮ ਰਙ੍ਗਨਟਾ, ਤੇ ਵਿਯ ਤਤ੍ਰ ਤਤ੍ਰ ਭਵੇਸੁ ਨਾਨਾਵੇਸਗ੍ਗਹਣਤੋ ਅਯਮ੍ਪਿ ‘‘ਗਨ੍ਧਬ੍ਬੋ’’ਤਿ ਵੁਤ੍ਤੋ, ਸੋ ਮਾਤਾਪਿਤੂਨਂ ਸਨ੍ਨਿਪਾਤਕ੍ਖਣਤੋ ਪਚ੍ਛਾਪਿ ਸਤ੍ਤਾਹਬ੍ਭਨ੍ਤਰੇ ¶ ਤਤ੍ਰ ਉਪਪਨ੍ਨੋ ‘‘ਪਚ੍ਚੁਪਟ੍ਠਿਤੋ’’ਤਿ ਵੁਤ੍ਤੋ. ਗਬ੍ਭਸ੍ਸਾਤਿ ਕਲਲਰੂਪਸਹਿਤਸ੍ਸ ਪਟਿਸਨ੍ਧਿਵਿਞ੍ਞਾਣਸ੍ਸ. ਤਞ੍ਹਿ ਇਧ ‘‘ਗਬ੍ਭੋ’’ਤਿ ਅਧਿਪ੍ਪੇਤਂ ਸਾ ਤੇਨ ਗਬ੍ਭਂ ਗਣ੍ਹੀਤਿਆਦੀਸੁ (ਪਾਰਾ. ੩੬) ਵਿਯ. ਅਸ੍ਸ ਤਂ ਅਜ੍ਝਾਚਾਰਨ੍ਤਿ ਸਮ੍ਬਨ੍ਧੋ. ਪਾਲ਼ਿਯਂ ਨਿਰਬ੍ਬੁਦੋ ਵਤ ਭੋ ਭਿਕ੍ਖੁਸਙ੍ਘੋ ਨਿਰਾਦੀਨਵੋਤਿ ਇਮਸ੍ਸ ਅਨਨ੍ਤਰਂ ਤਸ੍ਮਿਂ ਭਿਕ੍ਖੁਸਙ੍ਘੇਤਿ ਅਜ੍ਝਾਹਰਿਤ੍ਵਾ ਸੁਦਿਨ੍ਨੇਨ…ਪੇ… ਆਦੀਨਵੋ ਉਪ੍ਪਾਦਿਤੋਤਿ ਯੋਜਨਾ ਵੇਦਿਤਬ੍ਬਾ. ਇਤਿਹਾਤਿ ਨਿਪਾਤਸਮੁਦਾਯਸ੍ਸ ਏਵਨ੍ਤਿ ਇਦਂ ਅਤ੍ਥਭਵਨਂ. ਮੁਹੁਤ੍ਤੇਨਾਤਿ ਇਦਂ ਖਣੇਨਾਤਿ ਪਦਸ੍ਸ ਵੇਵਚਨਂ. ਯਾਵ ਬ੍ਰਹ੍ਮਲੋਕਾ ਅਬ੍ਭੁਗ੍ਗਤੋਪਿ ਦੇਵਾਨਂ ਤਾਵਮਹਨ੍ਤੋ ਸਦ੍ਦੋ ਤੇਸਂ ਰੂਪਂ ਵਿਯ ਮਨੁਸ੍ਸਾਨਂ ਗੋਚਰੋ ਨ ਹੋਤਿ. ਤਸ੍ਮਾ ਪਚ੍ਛਾ ਸੁਦਿਨ੍ਨੇਨ ਵੁਤ੍ਤੇ ਏਵ ਜਾਨਿਂਸੂਤਿ ਦਟ੍ਠਬ੍ਬਂ.

੩੭. ਮਗ੍ਗਬ੍ਰਹ੍ਮਚਰਿਯਨ੍ਤਿ ਮਗ੍ਗਪਦਟ੍ਠਾਨਂ ਸਿਕ੍ਖਤ੍ਤਯਮੇਵ ਉਪਚਾਰਤੋ ਵੁਤ੍ਤਂ ਤਸ੍ਸੇਵ ਯਾਵਜੀਵਂ ਚਰਿਤਬ੍ਬਤ੍ਤਾ. ਅਵਿਪ੍ਫਾਰਿਕੋਤਿ ਉਦ੍ਦੇਸਾਦੀਸੁ ਅਬ੍ਯਾਵਟੋ. ਵਹਚ੍ਛਿਨ੍ਨੋਤਿ ਛਿਨ੍ਨਪਾਦੋ, ਛਿਨ੍ਨਖਨ੍ਧੋ ਵਾ. ਚਿਨ੍ਤਯੀਤਿ ਇਮਿਨਾ ਪਜ੍ਝਾਯੀਤਿ ਪਦਸ੍ਸ ਕਿਰਿਯਾਪਦਤ੍ਤਂ ਦਸ੍ਸੇਤਿ. ਤੇਨ ‘‘ਕਿਸੋ ਅਹੋਸਿ…ਪੇ… ਪਜ੍ਝਾਯਿ ਚਾ’’ਤਿ ਚ-ਕਾਰਂ ਆਨੇਤ੍ਵਾ ਪਾਲ਼ਿਯੋਜਨਾ ਕਾਤਬ੍ਬਾ.

੩੮. ਗਣੇ ਜਨਸਮਾਗਮੇ ਸਨ੍ਨਿਪਾਤਨਂ ਗਣਸਙ੍ਗਣਿਕਾ, ਸਾਵ ਪਪਞ੍ਚਾ, ਤੇਨ ਗਣਸਙ੍ਗਣਿਕਾਪਪਞ੍ਚੇਨ. ਯਸ੍ਸਾਤਿ ਯੇ ਅਸ੍ਸ. ਕਥਾਫਾਸੁਕਾਤਿ ਵਿਸ੍ਸਾਸਿਕਭਾਵੇਨ ਫਾਸੁਕਕਥਾ, ਸੁਖਸਮ੍ਭਾਸਾਤਿ ਅਤ੍ਥੋ. ਉਪਾਦਾਰੂਪਂ ਭੂਤਰੂਪਮੁਖੇਨੇਵ ਮਨ੍ਦਨਂ ਪੀਨਨਞ੍ਚ ਹੋਤੀਤਿ ਆਹ ਪਸਾਦਇਚ੍ਚਾਦਿ. ਦਾਨੀਤਿ ਨਿਪਾਤੋ ਇਧ ਪਨ-ਸਦ੍ਦਤ੍ਥੇ ਵਤ੍ਤਤਿ ਤਕ੍ਕਾਲਵਾਚਿਨੋ ਏਤਰਹਿ-ਪਦਸ੍ਸ ਵਿਸੁਂ ਵੁਚ੍ਚਮਾਨਤ੍ਤਾਤਿ ਆਹ ‘‘ਸੋ ਪਨ ਤ੍ਵ’’ਨ੍ਤਿ. ਨੋ-ਸਦ੍ਦੋਪਿ ਨੁ-ਸਦ੍ਦੋ ਵਿਯ ¶ ਪੁਚ੍ਛਨਤ੍ਥੋਤਿ ਆਹ ‘‘ਕਚ੍ਚਿ ਨੁ ਤ੍ਵ’’ਨ੍ਤਿ. ਤਮੇਵਾਤਿ ਗਿਹਿਭਾਵਪਤ੍ਥਨਾਲਕ੍ਖਣਮੇਵ. ਅਨਭਿਰਤਿਮੇਵਾਤਿ ਏਵ-ਕਾਰੇਨ ਨਿਵਤ੍ਤਿਤਾਯ ਪਨ ਤਦਞ੍ਞਾਯ ਅਨਭਿਰਤਿਯਾ ਵਿਜ੍ਜਮਾਨਤ੍ਤਂ ਦਸ੍ਸੇਤੁਂ ਅਧਿਕੁਸਲਾਨਨ੍ਤਿਆਦਿ ਵੁਤ੍ਤਂ, ਸਮਥਵਿਪਸ੍ਸਨਾ ਅਧਿਕੁਸਲਾ ਨਾਮ. ਇਦਂ ਪਨਾਤਿਆਦਿ ਉਪਰਿ ਵਤ੍ਤਬ੍ਬਵਿਸੇਸਦਸ੍ਸਨਂ. ਪਰਿਯਾਯਵਚਨਮਤ੍ਤਨ੍ਤਿ ਸਦ੍ਦਤ੍ਥਕਥਨਮਤ੍ਤਂ.

ਤਸ੍ਮਿਨ੍ਤਿ ਧਮ੍ਮੇ, ਏਵਂ ਵਿਰਾਗਾਯ ਦੇਸਿਤੇ ਸਤੀਤਿ ਅਤ੍ਥੋ. ਨਾਮਾਤਿ ਗਰਹਾਯਂ. ਲੋਕੁਤ੍ਤਰਨਿਬ੍ਬਾਨਨ੍ਤਿ ਵਿਰਾਗਾਯਾਤਿਆਦਿਨਾ ਵੁਤ੍ਤਕਿਲੇਸਕ੍ਖਯਨਿਬ੍ਬਾਨਤੋ ਵਿਸੇਸੇਤਿ. ਜਾਤਿਂ ਨਿਸ੍ਸਾਯ ਉਪ੍ਪਜ੍ਜਨਕਮਾਨੋ ਏਵ ਮਦਜਨਨਟ੍ਠੇਨ ਮਦੋਤਿ ਮਾਨਮਦੋ. ‘‘ਅਹਂ ਪੁਰਿਸੋ’’ਤਿ ਪਵਤ੍ਤੋ ਮਾਨੋ ਪੁਰਿਸਮਦੋ. ‘‘ਅਸਦ੍ਧਮ੍ਮਸੇਵਨਾਸਮਤ੍ਥਤਂ ਨਿਸ੍ਸਾਯ ਮਾਨੋ, ਰਾਗੋ ਏਵ ਵਾ ਪੁਰਿਸਮਦੋ’’ਤਿ ਕੇਚਿ. ਆਦਿ-ਸਦ੍ਦੇਨ ਬਲਮਦਾਦਿਂ ਸਙ੍ਗਣ੍ਹਾਤਿ. ਤੇਭੂਮਕਵਟ੍ਟਨ੍ਤਿ ਤੀਸੁ ਭੂਮੀਸੁ ਕਮ੍ਮਕਿਲੇਸਵਿਪਾਕਾ ਪਵਤ੍ਤਨਟ੍ਠੇਨ ¶ ਵਟ੍ਟਂ. ਵਿਰਜ੍ਜਤੀਤਿ ਵਿਗਚ੍ਛਤਿ. ਯੋਨਿਯੋਤਿ ਅਣ੍ਡਜਾਦਯੋ, ਤਾ ਪਨ ਯਵਨ੍ਤਿ ਤਾਹਿ ਸਤ੍ਤਾ ਅਮਿਸ੍ਸਿਤਾਪਿ ਸਮਾਨਜਾਤਿਤਾਯ ਮਿਸ੍ਸਿਤਾ ਹੋਨ੍ਤੀਤਿ ‘‘ਯੋਨਿਯੋ’’ਤਿ ਵੁਤ੍ਤਾ.

ਞਾਤਤੀਰਣਪਹਾਨਵਸੇਨਾਤਿ ਏਤ੍ਥ ਲਕ੍ਖਣਾਦਿਵਸੇਨ ਸਪ੍ਪਚ੍ਚਯਨਾਮਰੂਪਪਰਿਗ੍ਗਹੋ ਞਾਤਪਰਿਞ੍ਞਾ ਨਾਮ. ਕਲਾਪਸਮ੍ਮਸਨਾਦਿਵਸੇਨ ਪਵਤ੍ਤਾ ਲੋਕਿਯਵਿਪਸ੍ਸਨਾ ਤੀਰਣਪਰਿਞ੍ਞਾ ਨਾਮ. ਅਰਿਯਮਗ੍ਗੋ ਪਹਾਨਪਰਿਞ੍ਞਾ ਨਾਮ. ਇਧ ਪਨ ਞਾਤਤੀਰਣਕਿਚ੍ਚਾਨਮ੍ਪਿ ਅਸਮ੍ਮੋਹਤੋ ਮਗ੍ਗਕ੍ਖਣੇ ਸਿਜ੍ਝਨਤੋ ਅਰਿਯਮਗ੍ਗਮੇਵ ਸਨ੍ਧਾਯ ਤਿਵਿਧਾਪਿ ਪਰਿਞ੍ਞਾ ਵੁਤ੍ਤਾ, ਤੇਨੇਵ ‘‘ਲੋਕੁਤ੍ਤਰਮਗ੍ਗੋਵ ਕਥਿਤੋ’’ਤਿ ਵੁਤ੍ਤਂ. ਕਾਮੇਸੁ ਪਾਤਬ੍ਯਤਾਨਨ੍ਤਿ ਵਤ੍ਥੁਕਾਮੇਸੁ ਪਾਤਬ੍ਯਤਾਸਙ੍ਖਾਤਾਨਂ ਸੁਭਾਦਿਆਕਾਰਾਨਂ ਤਦਾਕਾਰਗਾਹਿਕਾਨਂ ਤਣ੍ਹਾਨਨ੍ਤਿ ਅਤ੍ਥੋ. ਵਿਸਯਮੁਖੇਨ ਹੇਤ੍ਥ ਵਿਸਯਿਨੋ ਗਹਿਤਾ. ਤੀਸੁ ਠਾਨੇਸੂਤਿ ‘‘ਵਿਰਾਗਾਯ ਧਮ੍ਮੋ ਦੇਸਿਤੋ…ਪੇ… ਨੋ ਸਉਪਾਦਾਨਾਯਾ’’ਤਿ ਏਵਂ ਵੁਤ੍ਤੇਸੁ.

੩੯. ਕਲਿਸਾਸਨਾਰੋਪਨਤ੍ਥਾਯਾਤਿ ਦੋਸਾਰੋਪਨਤ੍ਥਾਯ. ਕਲੀਤਿ ਕੋਧਸ੍ਸ ਨਾਮਂ, ਤਸ੍ਸ ਸਾਸਨਂ ਕਲਿਸਾਸਨਂ, ਕੋਧਵਸੇਨ ਵੁਚ੍ਚਮਾਨਾ ਗਰਹਾ. ਅਜ੍ਝਾਚਾਰੋਵ ਵੀਤਿਕ੍ਕਮੋ. ਸਮਣਕਰਣਾਨਂ ਧਮ੍ਮਾਨਨ੍ਤਿ ਸਮਣਭਾਵਕਰਾਨਂ ਹਿਰੋਤ੍ਤਪ੍ਪਾਦਿਧਮ੍ਮਾਨਂ. ਪਾਲ਼ਿਯਂ ਕਥਂ-ਸਦ੍ਦਯੋਗੇਨ ਨ ਸਕ੍ਖਿਸ੍ਸਸੀਤਿ ਅਨਾਗਤਵਚਨਂ ਕਤਂ, ‘‘ਨਾਮ-ਸਦ੍ਦਯੋਗੇਨਾ’’ਤਿਪਿ ਵਦਨ੍ਤਿ. ਅਤਿਵਿਯ ਦੁਕ੍ਖਵਿਪਾਕਨ੍ਤਿ ¶ ਗਹਟ੍ਠਾਨਂ ਨਾਤਿਸਾਵਜ੍ਜਮ੍ਪਿ ਕਮ੍ਮਂ ਪਬ੍ਬਜਿਤਾਨਂ ਭਗਵਤੋ ਆਣਾਵੀਤਿਕ੍ਕਮਤੋ ਚੇਵ ਸਮਾਦਿਨ੍ਨਸਿਕ੍ਖਤ੍ਤਯਵਿਨਾਸਨਤੋ ਚ ਮਹਾਸਾਵਜ੍ਜਂ ਹੋਤੀਤਿ ਵੁਤ੍ਤਂ. ਉਦਕੇ ਭਵਂ ਓਦਕਂ, ਧੋਵਨਕਿਚ੍ਚਨ੍ਤਿ ਆਹ ਉਦਕਕਿਚ੍ਚਨ੍ਤਿਆਦਿ. ਸਮਾਪਜ੍ਜਿਸ੍ਸਸੀਤਿ ਅਨਾਗਤਵਚਨਂ ਨਾਮ-ਸਦ੍ਦਯੋਗੇਨ ਕਤਨ੍ਤਿ ਆਹ ‘‘ਨਾਮ-ਸਦ੍ਦੇਨ ਯੋਜੇਤਬ੍ਬ’’ਨ੍ਤਿ. ਦੁਬ੍ਭਰਤਾਦੀਨਂ ਹੇਤੁਭੂਤੋ ਅਸਂਵਰੋ ਇਧ ਦੁਬ੍ਭਰਤਾਦਿ-ਸਦ੍ਦੇਨ ਵੁਤ੍ਤੋ ਕਾਰਣੇ ਕਾਰਿਯੋਪਚਾਰੇਨਾਤਿ ਆਹ ‘‘ਦੁਬ੍ਭਰਤਾਦੀਨਂ ਵਤ੍ਥੁਭੂਤਸ੍ਸ ਅਸਂਵਰਸ੍ਸਾ’’ਤਿ. ਅਤ੍ਤਾਤਿ ਅਤ੍ਤਭਾਵੋ. ਦੁਬ੍ਭਰਤਨ੍ਤਿ ਅਤ੍ਤਨਾ ਉਪਟ੍ਠਾਕੇਹਿ ਚ ਦੁਕ੍ਖੇਨ ਭਰਿਤਬ੍ਬਤਂ. ਸਤ੍ਤੇਹਿ ਕਿਲੇਸੇਹਿ ਚ ਸਙ੍ਗਣਨਂ ਸਮੋਧਾਨਂ ਸਙ੍ਗਣਿਕਾਤਿ ਆਹ ਗਣਸਙ੍ਗਣਿਕਾਯਾਤਿਆਦਿ. ਅਟ੍ਠਕੁਸੀਤਵਤ੍ਥੁਪਾਰਿਪੂਰਿਯਾਤਿ ਏਤ੍ਥ ਕਮ੍ਮਂ ਕਾਤਬ੍ਬਨ੍ਤਿ ਏਕਂ, ਤਥਾ ਅਕਾਸਿਨ੍ਤਿ, ਮਗ੍ਗੋ ਗਨ੍ਤਬ੍ਬੋਤਿ ਅਗਮਾਸਿਨ੍ਤਿ, ਨਾਲਤ੍ਥਂ ਭੋਜਨਸ੍ਸ ਪਾਰਿਪੂਰਿਨ੍ਤਿ, ਅਲਤ੍ਥਨ੍ਤਿ, ਉਪ੍ਪਨ੍ਨੋ ਮੇ ਆਬਾਧੋਤਿ, ਅਚਿਰਵੁਟ੍ਠਿਤੋ ਗੇਲਞ੍ਞਾਤਿ ਏਕਨ੍ਤਿ ਇਮਾਨਿ ਅਟ੍ਠ ਕੁਸੀਤਵਤ੍ਥੂਨਿ ਨਾਮ. ਏਤ੍ਥ ਚ ਕੋਸਜ੍ਜਂ ਕੁਸੀਤ-ਸਦ੍ਦੇਨ ਵੁਤ੍ਤਂ. ਵਿਨਾਪਿ ਹਿ ਭਾਵਜੋਤਨਪਚ੍ਚਯਂ ਭਾਵਤ੍ਥੋ ਵਿਞ੍ਞਾਯਤਿ ਯਥਾ ਪਟਸ੍ਸ ਸੁਕ੍ਕਨ੍ਤਿ. ਸਬ੍ਬਕਿਲੇਸਾਪਚਯਭੂਤਾਯ ਵਿਵਟ੍ਟਾਯਾਤਿ ਰਾਗਾਦਿਸਬ੍ਬਕਿਲੇਸਾਨਂ ਅਪਚਯਹੇਤੁਭੂਤਾਯ ਨਿਬ੍ਬਾਨਾਯ, ਨਿਬ੍ਬਾਨਤ੍ਥਨ੍ਤਿ ਅਤ੍ਥੋ. ਸਂਵਰਪ੍ਪਹਾਨਪਟਿਸਂਯੁਤ੍ਤਨ੍ਤਿ ਸੀਲਸਂਵਰਾਦੀਹਿ ਪਞ੍ਚਹਿ ਸਂਵਰੇਹਿ ਚੇਵ ਤਦਙ੍ਗਪ੍ਪਹਾਨਾਦੀਹਿ ਪਞ੍ਚਹਿ ਪਹਾਨੇਹਿ ਚ ਉਪੇਤਂ. ਅਸੁਤ੍ਤਨ੍ਤ ਵਿਨਿਬਦ੍ਧਨ੍ਤਿ ਤੀਸੁ ਪਿਟਕੇਸੁ ਪਾਲ਼ਿਸਙ੍ਖਾਤਸੁਤ੍ਤਨ੍ਤਵਸੇਨ ਅਰਚਿਤਂ, ਸਙ੍ਗੀਤਿਕਾਰੇਹਿ ਚ ਅਨਾਰੋਪਿਤਂ, ਤੇਨਾਹ ‘‘ਪਾਲ਼ਿਵਿਨਿਮੁਤ੍ਤ’’ਨ੍ਤਿ. ਤੇਨ ਚ ਅਟ੍ਠਕਥਾਸੁ ਯਥਾਨੁਰੂਪਂ ਸਙ੍ਗਹਿਤਨ੍ਤਿ ¶ ਦਸ੍ਸੇਤਿ. ਏਵਰੂਪਾ ਹਿ ਪਕਿਣ੍ਣਕਦੇਸਨਾ ਅਟ੍ਠਕਥਾਯ ਮੂਲਂ. ਓਕ੍ਕਨ੍ਤਿਕਧਮ੍ਮਦੇਸਨਾ ਨਾਮ ਤਸ੍ਮਿਂ ਤਸ੍ਮਿਂ ਪਸਙ੍ਗੇ ਓਤਾਰੇਤ੍ਵਾ ਓਤਾਰੇਤ੍ਵਾ ਨਾਨਾਨਯੇਹਿ ਕਥਿਯਮਾਨਾ ਧਮ੍ਮਦੇਸਨਾ, ਤੇਨਾਹ ਭਗਵਾ ਕਿਰਾਤਿਆਦਿ. ਪਟਿਕ੍ਖਿਪਨਾਧਿਪ੍ਪਾਯਾਤਿ ਪਞ੍ਞਤ੍ਤਮ੍ਪਿ ਸਿਕ੍ਖਾਪਦਂ ‘‘ਕਿਮੇਤੇਨਾ’’ਤਿ ਮਦ੍ਦਨਚਿਤ੍ਤਾ.

ਵੁਤ੍ਤਤ੍ਥਵਸੇਨਾਤਿ ਪਤਿਟ੍ਠਾਅਧਿਗਮੁਪਾਯਵਸੇਨ. ਸਿਕ੍ਖਾਪਦਵਿਭਙ੍ਗੇ ਯਾ ਤਸ੍ਮਿਂ ਸਮਯੇ ਕਾਮੇਸੁਮਿਚ੍ਛਾਚਾਰਾ ਆਰਤਿ ਵਿਰਤੀਤਿਆਦਿਨਾ (ਵਿਭ. ੭੦੬) ਨਿਦ੍ਦਿਟ੍ਠਵਿਰਤਿਯੋ ਚੇਵ, ਯਾ ਤਸ੍ਮਿਂ ਸਮਯੇ ਚੇਤਨਾ ਸਞ੍ਚੇਤਨਾਤਿਆਦਿਨਾ (ਵਿਭ. ੭੦੪) ਨਿਦ੍ਦਿਟ੍ਠਚੇਤਨਾ ਚ, ਕਾਮੇਸੁਮਿਚ੍ਛਾਚਾਰਾ ਵਿਰਮਨ੍ਤਸ੍ਸ ਫਸ੍ਸੋ…ਪੇ… ਅਵਿਕ੍ਖੇਪੋਤਿਆਦਿਨਾ (ਵਿਭ. ੭੦੫) ਨਿਦ੍ਦਿਟ੍ਠਫਸ੍ਸਾਦਿਧਮ੍ਮਾ ਚ ਸਿਕ੍ਖਾਪਦਨ੍ਤਿ ਦਸ੍ਸੇਤੁਂ ‘‘ਅਯਞ੍ਚ ਅਤ੍ਥੋ ¶ ਸਿਕ੍ਖਾਪਦਵਿਭਙ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ’’ਤਿ ਵੁਤ੍ਤਂ. ‘‘ਯੋ ਤਤ੍ਥ ਨਾਮਕਾਯੋ ਪਦਕਾਯੋਤਿ ਇਦਂ ਮਹਾਅਟ੍ਠਕਥਾਯਂ ਵੁਤ੍ਤ’’ਨ੍ਤਿ ਵਦਨ੍ਤਿ. ਨਾਮਕਾਯੋਤਿ ਨਾਮਸਮੂਹੋ ਨਾਮਪਞ੍ਞਤ੍ਤਿਯੇਵ, ਸੇਸਾਨਿਪਿ ਤਸ੍ਸੇਵ ਵੇਵਚਨਾਨਿ. ਸਿਕ੍ਖਾਕੋਟ੍ਠਾਸੋਤਿ ਵਿਰਤਿਆਦਯੋ ਵੁਤ੍ਤਾ ਤਪ੍ਪਕਾਸਕਞ੍ਚ ਵਚਨਂ.

ਅਤ੍ਥਵਸੇਤਿ ਹਿਤਵਿਸੇਸੇ ਆਨਿਸਂਸਵਿਸੇਸੇ, ਤੇ ਚ ਸਿਕ੍ਖਾਪਦਪਞ੍ਞਤ੍ਤਿਯਾ ਹੇਤੂਤਿ ਆਹ ‘‘ਕਾਰਣਵਸੇ’’ਤਿ. ਸੁਖਵਿਹਾਰਾਭਾਵੇ ਸਹਜੀਵਨਸ੍ਸ ਅਭਾਵਤੋ ਸਹਜੀਵਿਤਾਤਿ ਸੁਖਵਿਹਾਰੋਵ ਵੁਤ੍ਤੋ. ਦੁਸ੍ਸੀਲਪੁਗ੍ਗਲਾਤਿ ਨਿਸ੍ਸੀਲਾ ਦੂਸਿਤਸੀਲਾ ਚ. ਪਾਰਾਜਿਕਸਿਕ੍ਖਾਪਦਪ੍ਪਸਙ੍ਗੇ ਹਿ ਨਿਸ੍ਸੀਲਾ ਅਧਿਪ੍ਪੇਤਾ, ਸੇਸਸਿਕ੍ਖਾਪਦਪਸਙ੍ਗੇ ਤੇਹਿ ਤੇਹਿ ਵੀਤਿਕ੍ਕਮੇਹਿ ਖਣ੍ਡਛਿਦ੍ਦਾਦਿਭਾਵਪ੍ਪਤ੍ਤਿਯਾ ਦੂਸਿਤਸੀਲਾ ਅਧਿਪ੍ਪੇਤਾ. ਉਭਯੇਨਪਿ ਅਲਜ੍ਜਿਨੋਵ ਇਧ ‘‘ਦੁਸ੍ਸੀਲਾ’’ਤਿ ਵੁਤ੍ਤਾਤਿ ਵੇਦਿਤਬ੍ਬਾ. ਸਬ੍ਬਸਿਕ੍ਖਾਪਦਾਨਮ੍ਪਿ ਦਸ ਅਤ੍ਥਵਸੇ ਪਟਿਚ੍ਚੇਵ ਪਞ੍ਞਤ੍ਤਤ੍ਤਾ ਉਪਰਿ ਦੁਸ੍ਸੀਲਪੁਗ੍ਗਲੇ ਨਿਸ੍ਸਾਯਾਤਿ ਏਤ੍ਥਾਪਿ ਏਸੇਵ ਨਯੋ, ਤੇਨੇਵ ‘‘ਯੇ ਮਙ੍ਕੁਤਂ…ਪੇ… ਨਿਗ੍ਗਹੇਸ੍ਸਤੀ’’ਤਿ ਸਬ੍ਬਸਿਕ੍ਖਾਪਦਸਾਧਾਰਣਵਸੇਨ ਅਤ੍ਥੋ ਵੁਤ੍ਤੋ. ਤਤ੍ਥ ਮਙ੍ਕੁਤਨ੍ਤਿ ਨਿਤ੍ਤੇਜਤਂ ਅਧੋਮੁਖਤਂ. ਧਮ੍ਮੇਨਾਤਿਆਦੀਸੁ ਧਮ੍ਮੋਤਿ ਭੂਤਂ ਵਤ੍ਥੁ. ਵਿਨਯੋਤਿ ਚੋਦਨਾ ਚੇਵ ਸਾਰਣਾ ਚ. ਸਤ੍ਥੁਸਾਸਨਨ੍ਤਿ ਞਤ੍ਤਿਸਮ੍ਪਦਾ ਚੇਵ ਅਨੁਸਾਵਨਸਮ੍ਪਦਾ ਚ. ਸਨ੍ਦਿਟ੍ਠਮਾਨਾਤਿ ਸਂਸਯਂ ਆਪਜ੍ਜਮਾਨਾ. ਉਬ੍ਬਾਲ਼੍ਹਾਤਿ ਪੀਲ਼ਿਤਾ. ਦੁਸ੍ਸੀਲਪੁਗ੍ਗਲੇ ਨਿਸ੍ਸਾਯ ਹਿ ਉਪੋਸਥੋ ਨ ਤਿਟ੍ਠਤਿ, ਪਵਾਰਣਾ ਨ ਤਿਟ੍ਠਤਿ, ਸਙ੍ਘਕਮ੍ਮਾਨਿ ਨਪ੍ਪਵਤ੍ਤਨ੍ਤਿ, ਸਾਮਗ੍ਗੀ ਨ ਹੋਤੀਤਿ ਇਮਿਨਾ ਅਲਜ੍ਜੀਹਿ ਸਦ੍ਧਿਂ ਉਪੋਸਥਾਦਿਸਕਲਸਙ੍ਘਕਮ੍ਮਂ ਕਾਤੁਂ ਨ ਵਟ੍ਟਤਿ ਧਮ੍ਮਪਰਿਭੋਗਤ੍ਤਾਤਿ ਦਸ੍ਸੇਤਿ. ਉਪੋਸਥਪਵਾਰਣਾਨਂ ਨਿਯਤਕਾਲਿਕਤਾਯ ਚ ਅਵਸ੍ਸਂ ਕਤ੍ਤਬ੍ਬਤ੍ਤਾ ਸਙ੍ਘਕਮ੍ਮਤੋ ਵਿਸੁਂ ਗਹਣਂ ਵੇਦਿਤਬ੍ਬਂ. ਅਕਿਤ੍ਤਿ ਗਰਹਾ. ਅਯਸੋ ਪਰਿਵਾਰਹਾਨਿ.

ਚੁਦ੍ਦਸ ਖਨ੍ਧਕਵਤ੍ਤਾਨਿ ਨਾਮ ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੫੬ ਆਦਯੋ) ਵੁਤ੍ਤਾਨਿ ਆਗਨ੍ਤੁਕਵਤ੍ਤਂ ¶ ਆਵਾਸਿਕਗਮਿਕਅਨੁਮੋਦਨਭਤ੍ਤਗ੍ਗਪਿਣ੍ਡਚਾਰਿਕਆਰਞ੍ਞਕਸੇਨਾਸਨਜਨ੍ਤਾਘਰਵਚ੍ਚਕੁਟਿਉਪਜ੍ਝਾਯਸਦ੍ਧਿਵਿਹਾਰਿਕਆਚਰਿਯਅਨ੍ਤੇਵਾਸਿਕਵਤ੍ਤਨ੍ਤਿ ਇਮਾਨਿ ਚੁਦ੍ਦਸ ਵਤ੍ਤਾਨਿ, ਏਤਾਨਿ ਚ ਸਬ੍ਬੇਸਂ ਭਿਕ੍ਖੂਨਂ ਸਬ੍ਬਦਾ ਚ ਯਥਾਰਹਂ ਚਰਿਤਬ੍ਬਾਨਿ. ਦ੍ਵੇ ਅਸੀਤਿ ਮਹਾਵਤ੍ਤਾਨਿ ਪਨ ਤਜ੍ਜਨੀਯਕਮ੍ਮਕਤਾਦਿਕਾਲੇਯੇਵ ਚਰਿਤਬ੍ਬਾਨਿ, ਨ ਸਬ੍ਬਦਾ. ਤਸ੍ਮਾ ਵਿਸੁਂ ਗਣਿਤਾਨਿ. ਤਾਨਿ ਪਨ ‘‘ਪਾਰਿਵਾਸਿਕਾਨਂ ਭਿਕ੍ਖੂਨਂ ਵਤ੍ਤਂ ਪਞ੍ਞਪੇਸ੍ਸਾਮੀ’’ਤਿ (ਚੂਲ਼ਵ. ੭੫) ਆਰਭਿਤ੍ਵਾ ‘‘ਨ ਉਪਸਮ੍ਪਾਦੇਤਬ੍ਬਂ…ਪੇ… ਨ ਛਮਾਯ ਚਙ੍ਕਮਨ੍ਤੇ ¶ ਚਙ੍ਕਮੇ ਚਙ੍ਕਮਿਤਬ੍ਬ’’ਨ੍ਤਿ ਵੁਤ੍ਤਾਵਸਾਨਾਨਿ ਛਸਟ੍ਠਿ, ਤਤੋ ਪਰਂ ‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਪਾਰਿਵਾਸਿਕੇਨ ਵੁਡ੍ਢਤਰੇਨ ਭਿਕ੍ਖੁਨਾ ਸਦ੍ਧਿਂ, ਮੂਲਾਯਪਟਿਕਸ੍ਸਨਾਰਹੇਨ, ਮਾਨਤ੍ਤਚਾਰਿਕੇਨ, ਮਾਨਤ੍ਤਾਰਹੇਨ, ਅਬ੍ਭਾਨਾਰਹੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਆਵਾਸੇ ਵਤ੍ਥਬ੍ਬ’’ਨ੍ਤਿਆਦਿਨਾ (ਚੂਲ਼ਵ. ੮੨) ਵੁਤ੍ਤਵਤ੍ਤਾਨਿ ਪਕਤਤ੍ਤੇਨ ਚਰਿਤਬ੍ਬੇਹਿ ਅਨਞ੍ਞਤ੍ਤਾ ਵਿਸੁਂ ਅਗਣੇਤ੍ਵਾ ਪਾਰਿਵਾਸਿਕਵੁਡ੍ਢਤਰਾਦੀਸੁ ਪੁਗ੍ਗਲਨ੍ਤਰੇਸੁ ਚਰਿਤਬ੍ਬਤ੍ਤਾ ਤੇਸਂ ਵਸੇਨ ਸਮ੍ਪਿਣ੍ਡੇਤ੍ਵਾ ਏਕੇਕਂ ਕਤ੍ਵਾ ਗਣਿਤਾਨਿ ਪਞ੍ਚਾਤਿ ਏਕਸਤ੍ਤਤਿਵਤ੍ਤਾਨਿ ਚ ਉਕ੍ਖੇਪਨੀਯਕਮ੍ਮਕਤਵਤ੍ਤੇਸੁ ਚ ਵੁਤ੍ਤਂ ‘‘ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਅਭਿਵਾਦਨਂ ਪਚ੍ਚੁਟ੍ਠਾਨਂ…ਪੇ… ਨਹਾਨੇ ਪਿਟ੍ਠਿਪਰਿਕਮ੍ਮਂ ਸਾਦਿਤਬ੍ਬ’’ਨ੍ਤਿ (ਚੂਲ਼ਵ. ੮੬) ਇਦਂ ਅਭਿਵਾਦਨਾਦੀਨਂ ਅਸਾਦਿਯਨਂ ਏਕਂ, ‘‘ਨ ਪਕਤਤ੍ਤੋ ਭਿਕ੍ਖੁ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਤਬ੍ਬੋ’’ਤਿਆਦੀਨਿ (ਚੂਲ਼ਵ. ੫੧) ਚ ਦਸਾਤਿ ਏਵਂ ਦ੍ਵਾਸੀਤਿ ਵਤ੍ਤਾਨਿ ਹੋਨ੍ਤਿ, ਏਤੇਸ੍ਵੇਵ ਪਨ ਕਾਨਿਚਿ ਤਜ੍ਜਨੀਯਕਮ੍ਮਾਦਿਵਤ੍ਤਾਨਿ ਕਾਨਿਚਿ ਪਾਰਿਵਾਸਿਕਾਦਿਵਤ੍ਤਾਨੀਤਿ ਅਗ੍ਗਹਿਤਗ੍ਗਹਣੇਨ ਦ੍ਵਾਸੀਤਿਯੇਵ. ਅਞ੍ਞਤ੍ਥ ਪਨ ਅਟ੍ਠਕਥਾਪਦੇਸੇ ਅਪ੍ਪਕਂ ਊਨਮਧਿਕਂ ਵਾ ਗਣਨੂਪਗਂ ਨ ਹੋਤੀਤਿ ਅਸੀਤਿਖਨ੍ਧਕਵਤ੍ਤਾਨੀਤਿ ਆਗਤਂ. ਅਥ ਵਾ ਪੁਰਿਮੇਹਿ ਚੁਦ੍ਦਸਵਤ੍ਤੇਹਿ ਅਸਙ੍ਗਹਿਤਾਨਿ ਵਿਨਯਾਗਤਾਨਿ ਸਬ੍ਬਾਨਿ ਵਤ੍ਤਾਨਿ ਯਥਾ ਦ੍ਵਾਸੀਤਿ ਵਤ੍ਤਾਨਿ, ਅਸੀਤਿ ਵਤ੍ਤਾਨਿ ਏਵ ਵਾ ਹੋਨ੍ਤਿ, ਤਥਾ ਸਙ੍ਗਹੇਤ੍ਵਾ ਞਾਤਬ੍ਬਾਨਿ.

ਸਂਵਰਵਿਨਯੋਤਿ ਸੀਲਸਂਵਰੋ ਸਤਿਸਂਵਰੋ ਞਾਣਸਂਵਰੋ ਖਨ੍ਤਿਸਂਵਰੋ ਵੀਰਿਯਸਂਵਰੋਤਿ ਪਞ੍ਚਵਿਧੋਪਿ ਸਂਵਰੋ ਯਥਾਸਕਂ ਸਂਵਰਿਤਬ੍ਬਾਨਂ ਵਿਨੇਤਬ੍ਬਾਨਞ੍ਚ ਕਾਯਦੁਚ੍ਚਰਿਤਾਦੀਨਂ ਸਂਵਰਣਤੋ ਸਂਵਰੋ, ਵਿਨਯਨਤੋ ਵਿਨਯੋਤਿ ਵੁਚ੍ਚਤਿ. ਪਹਾਨਵਿਨਯੋਤਿ ਤਦਙ੍ਗਪ੍ਪਹਾਨਂ ਵਿਕ੍ਖਮ੍ਭਨਪ੍ਪਹਾਨਂ ਸਮੁਚ੍ਛੇਦਪ੍ਪਹਾਨਂ ਪਟਿਪ੍ਪਸ੍ਸਦ੍ਧਿਪ੍ਪਹਾਨਂ ਨਿਸ੍ਸਰਣਪ੍ਪਹਾਨਨ੍ਤਿ ਪਞ੍ਚਵਿਧਮ੍ਪਿ ਪਹਾਨਂ, ਯਸ੍ਮਾ ਚਾਗਟ੍ਠੇਨ ਪਹਾਨਂ, ਵਿਨਯਨਟ੍ਠੇਨ ਵਿਨਯੋ, ਤਸ੍ਮਾ ‘‘ਪਹਾਨਵਿਨਯੋ’’ਤਿ ਵੁਚ੍ਚਤਿ. ਸਮਥਵਿਨਯੋਤਿ ਸਤ੍ਤ ਅਧਿਕਰਣਸਮਥਾ. ਪਞ੍ਞਤ੍ਤਿਵਿਨਯੋਤਿ ਸਿਕ੍ਖਾਪਦਮੇਵ. ਤਮ੍ਪਿ ਹਿ ਭਗਵਤੋ ਸਿਕ੍ਖਾਪਦਪਞ੍ਞਤ੍ਤਿਯਾਵ ਅਨੁਗ੍ਗਹਿਤਂ ਹੋਤਿ ਤਬ੍ਭਾਵੇ ਏਵ ਭਾਵਤੋ. ਸਙ੍ਖਲਿਕਨਯਂ ਕਤ੍ਵਾ ਦਸਕ੍ਖਤ੍ਤੁਂ ਯੋਜਨਞ੍ਚ ਕਤ੍ਵਾ ਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤ੍ਥ ਪੁਰਿਮਪੁਰਿਮਪਦਸ੍ਸ ਅਨਨ੍ਤਰਪਦੇਨੇਵ ਯੋਜਿਤਤ੍ਤਾ ਅਯੋਸਙ੍ਖਲਿਕਸਦਿਸਨ੍ਤਿ ‘‘ਸਙ੍ਖਲਿਕਨਯ’’ਨ੍ਤਿ ਵੁਤ੍ਤਂ. ਦਸਸੁ ਪਦੇਸੁ ਏਕਮੇਕਂ ਪਦਂ ਤਦਵਸੇਸੇਹਿ ਨਵਨਵਪਦੇਹਿ ਯੋਜਿਤਤ੍ਤਾ ‘‘ਏਕੇਕਪਦਮੂਲਿਕ’’ਨ੍ਤਿ ਵੁਤ੍ਤਂ.

ਅਤ੍ਥਸਤਂ ¶ ¶ ਧਮ੍ਮਸਤਨ੍ਤਿ ਏਤ੍ਥ ਯੋ ਹਿ ਸੋ ਪਰਿਵਾਰੇ (ਪਰਿ. ੩੩੪) ਯਂ ਸਙ੍ਘਸੁਟ੍ਠੁ, ਤਂ ਸਙ੍ਘਫਾਸੂਤਿ ਆਦਿਂਕਤ੍ਵਾ ਯਂ ਸਦ੍ਧਮ੍ਮਟ੍ਠਿਤਿਯਾ, ਤਂ ਵਿਨਯਾਨੁਗ੍ਗਹਾਯਾਤਿ ਪਰਿਯੋਸਾਨਂ ਖਣ੍ਡਚਕ੍ਕਵਸੇਨੇਵ ਸਙ੍ਖਲਿਕਨਯੋ ਵੁਤ੍ਤੋ, ਤਸ੍ਮਿਂ ਏਕਮੂਲਕਨਯੇ ਆਗਤਬਦ੍ਧਚਕ੍ਕਨਯੇਨ ਯਂ ਵਿਨਯਾਨੁਗ੍ਗਹਾਯ, ਤਂ ਸਙ੍ਘਸੁਟ੍ਠੂਤਿ ਇਦਮ੍ਪਿ ਯੋਜੇਤ੍ਵਾ ਬਦ੍ਧਚਕ੍ਕੇ ਕਤੇ ਪੁਰਿਮਪੁਰਿਮਾਨਿ ਦਸ ਧਮ੍ਮਪਦਾਨਿ, ਪਚ੍ਛਿਮਪਚ੍ਛਿਮਾਨਿ ਦਸ ਅਤ੍ਥਪਦਾਨਿ ਚਾਤਿ ਵੀਸਤਿ ਪਦਾਨਿ ਹੋਨ੍ਤਿ. ਏਕਮੂਲਕਨਯੇ ਪਨ ਏਕਸ੍ਮਿਂ ਵਾਰੇ ਨਵੇਵ ਅਤ੍ਥਪਦਾਨਿ ਲਬ੍ਭਨ੍ਤਿ. ਏਵਂ ਦਸਹਿ ਵਾਰੇਹਿ ਨਵੁਤਿ ਅਤ੍ਥਪਦਾਨਿ ਨਵੁਤਿ ਧਮ੍ਮਪਦਾਨਿ ਚ ਹੋਨ੍ਤਿ, ਤਾਨਿ ਸਙ੍ਖਲਿਕਨਯੇ ਵੁਤ੍ਤੇਹਿ ਦਸਹਿ ਅਤ੍ਥਪਦੇਹਿ ਦਸਹਿ ਧਮ੍ਮਪਦੇਹਿ ਚ ਸਦ੍ਧਿਂ ਯੋਜਿਤਾਨਿ ਯਥਾਵੁਤ੍ਤਂ ਅਤ੍ਥਸਤਂ ਧਮ੍ਮਸਤਞ੍ਚ ਹੋਨ੍ਤੀਤਿ ਵੇਦਿਤਬ੍ਬਂ. ਯਂ ਪਨੇਤ੍ਥ ਸਾਰਤ੍ਥਦੀਪਨਿਯਂ (ਸਾਰਤ੍ਥ ਟੀ. ਪਾਰਾਜਿਕਕਣ੍ਡ ੨.੩੯) ਸਙ੍ਖਲਿਕਨਯੇਪਿ ਏਕਮੂਲਕਨਯੇਪਿ ਪਚ੍ਚੇਕਂ ਅਤ੍ਥਸਤਸ੍ਸ ਧਮ੍ਮਸਤਸ੍ਸ ਯੋਜਨਾਮੁਖਂ ਵੁਤ੍ਤਂ, ਤਂ ਤਥਾ ਸਿਦ੍ਧੇਪਿ ਅਤ੍ਥਸਤਂ ਧਮ੍ਮਸਤਨ੍ਤਿ (ਪਰਿ. ੩੩੪) ਗਾਥਾਯ ਨ ਸਮੇਤਿ ਦ੍ਵੇ ਅਤ੍ਥਸਤਾਨਿ ਦ੍ਵੇ ਧਮ੍ਮਸਤਾਨਿ ਚਤ੍ਤਾਰਿ ਨਿਰੁਤ੍ਤਿਸਤਾਨਿ ਅਟ੍ਠ ਞਾਣਸਤਾਨੀਤਿ ਵਤ੍ਤਬ੍ਬਤੋ. ਤਸ੍ਮਾ ਇਧ ਵੁਤ੍ਤਨਯੇਨੇਵ ਅਤ੍ਥਸਤਂ ਧਮ੍ਮਸਤਨ੍ਤਿ ਵੁਤ੍ਤਨ੍ਤਿ ਗਹੇਤਬ੍ਬਂ. ਦ੍ਵੇ ਚ ਨਿਰੁਤ੍ਤਿਸਤਾਨੀਤਿ ਅਤ੍ਥਜੋਤਿਕਾਨਂ ਨਿਰੁਤ੍ਤੀਨਂ ਵਸੇਨ ਨਿਰੁਤ੍ਤਿਸਤਂ, ਧਮ੍ਮਭੂਤਾਨਂ ਨਿਰੁਤ੍ਤੀਨਞ੍ਚ ਵਸੇਨ ਨਿਰੁਤ੍ਤਿਸਤਨ੍ਤਿ ਦ੍ਵੇ ਨਿਰੁਤ੍ਤਿਸਤਾਨਿ. ਚਤ੍ਤਾਰਿ ਚ ਞਾਣਸਤਾਨੀਤਿ ਅਤ੍ਥਸਤੇ ਞਾਣਸਤਂ, ਧਮ੍ਮਸਤੇ ਞਾਣਸਤਂ, ਦ੍ਵੀਸੁ ਨਿਰੁਤ੍ਤਿਸਤੇਸੁ ਦ੍ਵੇ ਞਾਣਸਤਾਨੀਤਿ ਚਤ੍ਤਾਰਿ ਞਾਣਸਤਾਨਿ. ਅਤਿਰੇਕਾਨਯਨਤ੍ਥੋਤਿ ਅਵੁਤ੍ਤਸਮੁਚ੍ਚਯਤ੍ਥੋ.

ਪਠਮਪਞ੍ਞਤ੍ਤਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਸੁਦਿਨ੍ਨਭਾਣਵਾਰਵਣ੍ਣਨਾ ਨਿਟ੍ਠਿਤਾ.

ਮਕ੍ਕਟੀਵਤ੍ਥੁਕਥਾਵਣ੍ਣਨਾ

੪੦. ਪਚੁਰਤ੍ਥੇ ਹਿ ਵਤ੍ਤਮਾਨਵਚਨਨ੍ਤਿ ਏਕਦਾ ਪਟਿਸੇਵਿਤ੍ਵਾ ਪਚ੍ਛਾ ਅਨੋਰਮਿਤ੍ਵਾ ਦਿਵਸੇ ਦਿਵਸੇ ਸੇਵਨਿਚ੍ਛਾਯ ਵਤ੍ਤਮਾਨਤ੍ਤਾ ਸੇਵਨਾਯ ਅਭਾਵਕ੍ਖਣੇਪਿ ਇਹ ਮਲ੍ਲਾ ਯੁਜ੍ਝਨ੍ਤੀਤਿਆਦੀਸੁ ਵਿਯ ਅਬ੍ਬੋਚ੍ਛਿਨ੍ਨਤਂ ਬਾਹੁਲ੍ਲਵੁਤ੍ਤਿਤਞ੍ਚ ਉਪਾਦਾਯ ਪਟਿਸੇਵਤੀਤਿ ਵਤ੍ਤਮਾਨਵਚਨਂ ਕਤਨ੍ਤਿ ਅਤ੍ਥੋ. ਆਹਿਣ੍ਡਨ੍ਤਾਤਿ ਵਿਚਰਨ੍ਤਾ.

੪੧. ਸਹੋਡ੍ਢਗ੍ਗਹਿਤੋਤਿ ¶ ਸਭਣ੍ਡਗ੍ਗਹਿਤੋ, ਅਯਮੇਵ ਵਾ ਪਾਠੋ. ਤਂ ਸਿਕ੍ਖਾਪਦਂ ਤਥੇਵ ਹੋਤੀਤਿ ਮਨੁਸ੍ਸਾਮਨੁਸ੍ਸਾਦਿਪੁਗ੍ਗਲਵਿਸੇਸਂ ਕਿਞ੍ਚਿ ਅਨੁਪਾਦਿਯਿਤ੍ਵਾ ਸਾਮਞ੍ਞਤੋ ‘‘ਯੋ ਪਨ ਭਿਕ੍ਖੁ ਮੇਥੁਨਂ ਧਮ੍ਮਂ ਪਟਿਸੇਵੇਯ੍ਯਾ’’ਤਿ (ਪਾਰਾ. ੩੯) ਵੁਤ੍ਤਤ੍ਤਾ ਮਨੁਸ੍ਸਾਮਨੁਸ੍ਸਤਿਰਚ੍ਛਾਨਗਤਾਨਂ ਇਤ੍ਥਿਪੁਰਿਸਪਣ੍ਡਕਉਭਤੋਬ੍ਯਞ੍ਜਨਾਨਂ ¶ ਤਿਂਸਵਿਧੇਪਿ ਮਗ੍ਗੇ ਮੇਥੁਨਂ ਸੇਵਨ੍ਤਸ੍ਸ ਤਂ ਸਿਕ੍ਖਾਪਦਂ ਮੂਲਚ੍ਛੇਜ੍ਜਕਰਂ ਹੋਤਿ ਏਵਾਤਿ ਅਧਿਪ੍ਪਾਯੋ. ਏਤੇਨ ਯਂ ਅਨੁਪਞ੍ਞਤ੍ਤਿਮੂਲਪਞ੍ਞਤ੍ਤਿਯਾ ਏਵ ਅਧਿਪ੍ਪਾਯਪ੍ਪਕਾਸਨਵਸੇਨ ਸੁਬੋਧਤ੍ਥਾਯ ਵਤ੍ਥੁਵਸੇਨ ਪਵਤ੍ਤਾਨਂ ਵਿਸੇਸਤ੍ਥਜੋਤਕਵਸੇਨਾਤਿ ਦਸ੍ਸਿਤਂ ਹੋਤਿ. ਆਮਸਨਂ ਆਮਟ੍ਠਮਤ੍ਤਂ. ਤਤੋ ਦਲ਼੍ਹਤਰਂ ਫੁਸਨਂ. ਘਟ੍ਟਨਂ ਪਨ ਤਤੋ ਦਲ਼੍ਹਤਰਂ ਕਤ੍ਵਾ ਸਰੀਰੇਨ ਸਰੀਰਸ੍ਸ ਸਙ੍ਘਟ੍ਟਨਂ. ਤਂ ਸਬ੍ਬਮ੍ਪੀਤਿ ਅਨੁਰਾਗੇਨ ਪਵਤ੍ਤਿਤਂ ਦਸ੍ਸਨਾਦਿਸਬ੍ਬਮ੍ਪਿ.

੪੨. ਪਾਣਾਤਿਪਾਤਾਦਿਸਚਿਤ੍ਤਕਸਿਕ੍ਖਾਪਦਾਨਂ ਸੁਰਾਪਾਨਾਦਿਅਚਿਤ੍ਤਕਸਿਕ੍ਖਾਪਦਾਨਞ੍ਚ (ਪਾਚਿ. ੩੨੬ ਆਦਯੋ) ਏਕੇਨੇਵ ਲਕ੍ਖਣਵਚਨੇਨ ਲੋਕਵਜ੍ਜਤਂ ਦਸ੍ਸੇਤੁਂ ‘‘ਯਸ੍ਸ ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵ ਹੋਤਿ, ਤਂ ਲੋਕਵਜ੍ਜਂ ਨਾਮਾ’’ਤਿ ਵੁਤ੍ਤਂ. ਤਤ੍ਥ ਸਚਿਤ੍ਤਕਪਕ੍ਖੇਤਿ ਇਦਂ ਕਿਞ੍ਚਾਪਿ ਅਚਿਤ੍ਤਕਸਿਕ੍ਖਾਪਦਂ ਸਨ੍ਧਾਯੇਵ ਵਤ੍ਤੁਂ ਯੁਤ੍ਤਂ ਤਸ੍ਸੇਵ ਸਚਿਤ੍ਤਕਪਕ੍ਖਸਮ੍ਭਵਤੋ, ਤਥਾਪਿ ਸਚਿਤ੍ਤਕਸਿਕ੍ਖਾਪਦਾਨਮ੍ਪਿ ਅਸਞ੍ਚਿਚ੍ਚ ਚਙ੍ਕਮਨਾਦੀਸੁ ਲੋਕੇ ਪਾਣਘਾਤਵੋਹਾਰਸਮ੍ਭਵੇਨ ਅਚਿਤ੍ਤਕਪਕ੍ਖਂ ਪਰਿਕਪ੍ਪੇਤ੍ਵਾ ਉਭਿਨ੍ਨਮ੍ਪਿ ਸਚਿਤ੍ਤਕਾਚਿਤ੍ਤਕਸਿਕ੍ਖਾਪਦਾਨਂ ਸਾਧਾਰਣਵਸੇਨ ‘‘ਸਚਿਤ੍ਤਕਪਕ੍ਖੇ’’ਤਿ ਵੁਤ੍ਤਂ. ਇਤਰਥਾ ਸਚਿਤ੍ਤਕਸਿਕ੍ਖਾਪਦਾਨਂ ਇਮਸ੍ਮਿਂ ਵਾਕ੍ਯੇ ਲੋਕਵਜ੍ਜਤਾਲਕ੍ਖਣਂ ਨ ਵੁਤ੍ਤਂ ਸਿਯਾ. ‘‘ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵਾ’’ਤਿ ਵੁਤ੍ਤੇ ਪਨ ਸਚਿਤ੍ਤਕਸਿਕ੍ਖਾਪਦਾਨਂ ਚਿਤ੍ਤਂ ਅਕੁਸਲਮੇਵ, ਇਤਰੇਸਂ ਸਚਿਤ੍ਤਕਪਕ੍ਖੇਯੇਵ ਅਕੁਸਲਨਿਯਮੋ, ਨ ਅਚਿਤ੍ਤਕਪਕ੍ਖੇ. ਤਤ੍ਥ ਪਨ ਯਥਾਸਮ੍ਭਵਂ ਕੁਸਲਂ ਵਾ ਸਿਯਾ, ਅਕੁਸਲਂ ਵਾ, ਅਬ੍ਯਾਕਤਂ ਵਾਤਿ ਅਯਮਤ੍ਥੋ ਸਾਮਤ੍ਥਿਯਤੋ ਸਿਜ੍ਝਤੀਤਿ ਵੇਦਿਤਬ੍ਬਂ. ਸਚਿਤ੍ਤਕਪਕ੍ਖੇਤਿ ਵਤ੍ਥੁਵੀਤਿਕ੍ਕਮਵਿਜਾਨਨਚਿਤ੍ਤੇਨ ਸਚਿਤ੍ਤਕਪਕ੍ਖੇਤਿ ਗਹੇਤਬ੍ਬਂ, ਨ ਪਣ੍ਣਤ੍ਤਿਵਿਜਾਨਨਚਿਤ੍ਤੇਨ ਤਥਾ ਸਤਿ ਸਬ੍ਬਸਿਕ੍ਖਾਪਦਾਨਮ੍ਪਿ ਲੋਕਵਜ੍ਜਤਾਪਸਙ੍ਗਤੋ. ‘‘ਪਟਿਕ੍ਖਿਤ੍ਤਮਿਦਂ ਕਾਤੁਂ ਨ ਵਟ੍ਟਤੀ’’ਤਿ ਜਾਨਨ੍ਤਸ੍ਸ ਹਿ ਪਣ੍ਣਤ੍ਤਿਵਜ੍ਜੇਪਿ ਅਨਾਦਰਿਯਵਸੇਨ ਪਟਿਘਚਿਤ੍ਤਮੇਵ ਉਪ੍ਪਜ੍ਜਤਿ, ਤਸ੍ਮਾ ਇਦਂ ਵਾਕ੍ਯਂ ਨਿਰਤ੍ਥਕਮੇਵ ਸਿਯਾ ਸਬ੍ਬਸਿਕ੍ਖਾਪਦਾਨਿਪਿ ਲੋਕਵਜ੍ਜਾਨੀਤਿ ਏਤ੍ਤਕਮਤ੍ਤਸ੍ਸੇਵ ਵਤ੍ਤਬ੍ਬਤਾਪਸਙ੍ਗਤੋ.

ਏਤ੍ਥ ¶ ਚ ਸਚਿਤ੍ਤਕਪਕ੍ਖੇਯੇਵ ਚਿਤ੍ਤਂ ਅਕੁਸਲਨ੍ਤਿ ਨਿਯਮਸ੍ਸ ਅਕਤਤ੍ਤਾ ਸੁਰਾਪਾਨਾਦੀਸੁ ਅਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਂ ਨ ਹੋਤੇਵਾਤਿ ਨ ਸਕ੍ਕਾ ਨਿਯਮੇਤੁਂ, ਕੇਵਲਂ ਪਨ ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵ, ਨ ਕੁਸਲਾਦੀਤਿ ਏਵਮੇਤ੍ਥ ਨਿਯਮੋ ਸਿਜ੍ਝਤਿ, ਏਵਞ੍ਚ ਸੁਰਾਤਿ ਅਜਾਨਿਤ੍ਵਾ ਪਿਵਨ੍ਤਾਨਮ੍ਪਿ ਅਕੁਸਲਚਿਤ੍ਤੇਨੇਵ ਪਾਨਂ ਗਨ੍ਧਵਣ੍ਣਕਾਦਿਭਾਵਂ ਅਜਾਨਿਤ੍ਵਾ ਲਿਮ੍ਪਨ੍ਤੀਨਂ ਭਿਕ੍ਖੁਨੀਨਂ ਵਿਨਾਪਿ ਅਕੁਸਲਚਿਤ੍ਤੇਨ ਲਿਮ੍ਪਨਞ੍ਚ, ਉਭਯਤ੍ਥਾਪਿ ਆਪਤ੍ਤਿਸਮ੍ਭਵੋ ਚ ਸਮਤ੍ਥਿਤੋ ਹੋਤਿ. ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੨.੪੨) ‘‘ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵਾਤਿ ਵਚਨਤੋ ਅਚਿਤ੍ਤਕਸ੍ਸ ਵਤ੍ਥੁਅਜਾਨਨਵਸੇਨ ਅਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵਾਤਿ ਅਯਂ ਨਿਯਮੋ ਨਤ੍ਥੀਤਿ ਵਿਞ੍ਞਾਯਤੀ’’ਤਿ ਵੁਤ੍ਤਂ, ਤਂ ਨ ਯੁਤ੍ਤਂ ¶ . ਅਚਿਤ੍ਤਕੇਸੁ ਹਿ ਤੇਰਸਸੁ ਲੋਕਵਜ੍ਜੇਸੁ ਸੁਰਾਪਾਨਸ੍ਸੇਵ ਅਚਿਤ੍ਤਕਪਕ੍ਖੇਪਿ ਅਕੁਸਲਚਿਤ੍ਤਨਿਯਮੋ, ਨ ਇਤਰੇਸਂ ਦ੍ਵਾਦਸਨ੍ਨਂ ਅਕੁਸਲਾਦਿਚਿਤ੍ਤੇਨਾਪਿ ਆਪਜ੍ਜਿਤਬ੍ਬਤੋ. ਯਂ ਪਨ ਏਵਂ ਕੇਨਚਿ ਅਨਿਚ੍ਛਮਾਨਂ ਸਦ੍ਦਤੋਪਿ ਅਪਤੀਯਮਾਨਮਿਮਂ ਨਿਯਮਂ ਪਰਾਧਿਪ੍ਪਾਯਂ ਕਤ੍ਵਾ ਦਸ੍ਸੇਤੁਂ ‘‘ਯਦਿ ਹਿ ਅਚਿਤ੍ਤਕਸ੍ਸ ਅਚਿਤ੍ਤਕਪਕ੍ਖੇਪਿ ਚਿਤ੍ਤਂ ਅਕੁਸਲਮੇਵ ਸਿਯਾ, ਸਚਿਤ੍ਤਕਪਕ੍ਖੇਤਿ ਇਦਂ ਵਿਸੇਸਨਂ ਨਿਰਤ੍ਥਕਂ ਸਿਯਾ’’ਤਿਆਦਿ ਵੁਤ੍ਤਂ, ਤਂ ਨਿਰਤ੍ਥਕਮੇਵ ਏਵਂ ਨਿਯਮਸ੍ਸ ਕੇਨਚਿ ਅਨਧਿਪ੍ਪੇਤਤ੍ਤਾ. ਨ ਹਿ ਕੋਚਿ ਸਦ੍ਦਸਤ੍ਥਵਿਦੂ ਨਿਯਮਂ ਇਚ੍ਛਤਿ, ਯੇਨ ਸਚਿਤ੍ਤਕਪਕ੍ਖੇਤਿ ਇਦਂ ਵਿਸੇਸਨਂ ਨਿਰਤ੍ਥਕਂ ਸਿਯਾਤਿਆਦਿ ਵੁਤ੍ਤਂ ਭਵੇਯ੍ਯ, ਕਿਨ੍ਤੁ ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵ, ਅਚਿਤ੍ਤਕਪਕ੍ਖੇ ਪਨ ਚਿਤ੍ਤਂ ਅਨਿਯਤਂ ਅਕੁਸਲਮੇਵ ਵਾ ਸਿਯਾ, ਕੁਸਲਾਦੀਸੁ ਵਾ ਅਞ੍ਞਤਰਨ੍ਤਿ ਏਵਮੇਵ ਇਚ੍ਛਤਿ. ਤੇਨ ਸਚਿਤ੍ਤਕਪਕ੍ਖੇਤਿ ਵਿਸੇਸਨਮ੍ਪਿ ਸਾਤ੍ਥਕਂ ਸਿਯਾ. ਅਚਿਤ੍ਤਕਸਿਕ੍ਖਾਪਦਾਨਂ ਸਚਿਤ੍ਤਕਪਕ੍ਖੇਸੁ ਅਕੁਸਲਨਿਯਮੇਨ ਲੋਕਵਜ੍ਜਤਾ ਚ ਸਿਜ੍ਝਤਿ. ਤੇਸੁ ਚ ਸੁਰਾਪਾਨਸ੍ਸੇਵ ਅਚਿਤ੍ਤਕਪਕ੍ਖੇਪਿ ਲੋਕਵਜ੍ਜਤਾ ਅਕੁਸਲਚਿਤ੍ਤਤਾ ਚ, ਇਤਰੇਸਂ ਪਨ ਸਚਿਤ੍ਤਕਪਕ੍ਖੇ ਏਵਾਤਿ ਵਾਦੋਪਿ ਨ ਵਿਰੁਜ੍ਝਤੀਤਿ ਨ ਕਿਞ੍ਚੇਤ੍ਥ ਅਨੁਪਪਨ੍ਨਂ ਨਾਮ.

ਯਂ ਪਨੇਤ੍ਥ ‘‘ਸੁਰਾਤਿ ਅਜਾਨਿਤ੍ਵਾ ਪਿਵਨ੍ਤਸ੍ਸ…ਪੇ… ਵਿਨਾਪਿ ਅਕੁਸਲਚਿਤ੍ਤੇਨ ਆਪਤ੍ਤਿਸਮ੍ਭਵਤੋ…ਪੇ… ਸੁਰਾਪਾਨਾਦਿਅਚਿਤ੍ਤਕਸਿਕ੍ਖਾਪਦਾਨਂ ਲੋਕਵਜ੍ਜਤਾ ਨ ਸਿਯਾ’’ਤਿਆਦਿ ਵੁਤ੍ਤਂ. ਯਞ੍ਚ ਤਮਤ੍ਥਂ ਸਾਧੇਤੁਂ ਗਣ੍ਠਿਪਦੇਸੁ ਆਗਤਵਚਨਂ ਦਸ੍ਸੇਤ੍ਵਾ ਬਹੁਂ ਪਪਞ੍ਚਿਤਂ, ਤਂ ਨ ਸਾਰਤੋ ਪਚ੍ਚੇਤਬ੍ਬਂ ਅਟ੍ਠਕਥਾਹਿ ਵਿਰੁਦ੍ਧਤ੍ਤਾ. ਤਥਾ ਹਿ ‘‘ਵਤ੍ਥੁਅਜਾਨਨਤਾਯ ਚੇਤ੍ਥ ਅਚਿਤ੍ਤਕਤਾ ਵੇਦਿਤਬ੍ਬਾ ਅਕੁਸਲੇਨੇਵ ਪਾਤਬ੍ਬਤਾਯ ਲੋਕਵਜ੍ਜਤਾ’’ਤਿ ਵੁਤ੍ਤਂ. ਯਞ੍ਚੇਤਸ੍ਸ ‘‘ਸਚਿਤ੍ਤਕਪਕ੍ਖੇ ¶ ਅਕੁਸਲੇਨੇਵ ਪਾਤਬ੍ਬਤੋ ਲੋਕਵਜ੍ਜਤਾ’’ਤਿ ਵੁਤ੍ਤਂ ਅਟ੍ਠਕਥਾਵਚਨਂ, ਤਂ ਨ ਸੁਨ੍ਦਰਂ. ‘‘ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵਾ’’ਤਿ ਸਬ੍ਬੇਸਂ ਲੋਕਵਜ੍ਜਾਨਂ ਇਧੇਵ ਪਾਰਾਜਿਕਟ੍ਠਕਥਾਯ ਸਾਮਞ੍ਞਤੋ ਵਤ੍ਵਾ ਸੁਰਾਪਾਨਸਿਕ੍ਖਾਪਦਟ੍ਠਕਥਾਯਂ ‘‘ਅਕੁਸਲੇਨੇਵ ਪਾਤਬ੍ਬਤਾਯਾ’’ਤਿ ਏਵਂ ਅਚਿਤ੍ਤਕਪਕ੍ਖੇਪਿ ਅਕੁਸਲਚਿਤ੍ਤਤਾਯ ਵਿਸੇਸੇਤ੍ਵਾ ਵੁਤ੍ਤਤ੍ਤਾ. ਨ ਹਿ ‘‘ਸਾਮਞ੍ਞਤੋ ਇਧ ਵੁਤ੍ਤੋਵ ਅਤ੍ਥੋ ਪੁਨ ਸੁਰਾਪਾਨਟ੍ਠਕਥਾਯਮ੍ਪਿ ਵੁਤ੍ਤੋ’’ਤਿ ਸਕ੍ਕਾ ਵਤ੍ਤੁਂ ਵੁਤ੍ਤਸ੍ਸੇਵ ਪੁਨ ਵਚਨੇ ਪਯੋਜਨਾਭਾਵਾ, ਤਦਞ੍ਞੇਸੁਪਿ ਅਚਿਤ੍ਤਕਲੋਕਵਜ੍ਜੇਸੁ ਵਤ੍ਤਬ੍ਬਤਾਪਸਙ੍ਗਤੋ ਚ, ਨਾਪਿ ਏਕਤ੍ਥ ਵੁਤ੍ਤੋ ਨਯੋ ਤਦਞ੍ਞੇਸੁਪਿ ਏਕਲਕ੍ਖਣਤਾਯ ਵੁਤ੍ਤੋ ਏਵ ਹੋਤੀਤਿ ‘‘ਸੁਰਾਪਾਨਸਿਕ੍ਖਾਪਦੇਯੇਵ (ਪਾਚਿ. ੩੨੬ ਆਦਯੋ) ਵੁਤ੍ਤੋ’’ਤਿ ਸਕ੍ਕਾ ਵਤ੍ਤੁਂ ਅਚਿਤ੍ਤਕਲੋਕਵਜ੍ਜਾਨਂ ਸਬ੍ਬਪਠਮੇ ਉਯ੍ਯੁਤ੍ਤਸਿਕ੍ਖਾਪਦੇਯੇਵ (ਪਾਚਿ. ੩੧੧ ਆਦਯੋ) ਵਤ੍ਤਬ੍ਬਤੋ, ਸੁਰਾਪਾਨਸਿਕ੍ਖਾਪਦੇਯੇਵ ਵਾ ਵਤ੍ਵਾ ਏਸੇਵ ਨਯੋ ਸੇਸੇਸੁ ਅਚਿਤ੍ਤਕਲੋਕਵਜ੍ਜੇਸੁਪੀਤਿ ਅਤਿਦਿਸਿਤਬ੍ਬਤੋ ਚ.

ਅਪਿਚ ਵੁਤ੍ਤਮੇਵਤ੍ਥਂ ਵਦਨ੍ਤੇਨ ‘‘ਸਚਿਤ੍ਤਕਪਕ੍ਖੇ ਅਕੁਸਲੇਨੇਵ ਪਾਤਬ੍ਬਤਾਯਾ’’ਤਿ ਪੁਬ੍ਬੇ ਵੁਤ੍ਤਕ੍ਕਮੇਨੇਵ ¶ ਵਤ੍ਤਬ੍ਬਂ ਸਨ੍ਦੇਹਾਦਿਵਿਗਮਤ੍ਥਤ੍ਤਾ ਪੁਨ ਵਚਨਸ੍ਸ. ਸਿਕ੍ਖਾਪਦਵਿਸਯੇ ਚ ਵਿਸੇਸਿਤਬ੍ਬਂ ਵਿਸੇਸੇਤ੍ਵਾਵ ਵੁਚ੍ਚਤਿ, ਇਤਰਥਾ ਆਪਤ੍ਤਾਨਾਪਤ੍ਤਾਦਿਭੇਦਸ੍ਸ ਦੁਵਿਞ੍ਞੇਯ੍ਯਤ੍ਤਾ. ਤਥਾ ਹਿ ਭਿਕ੍ਖੁਨੀਵਿਭਙ੍ਗਟ੍ਠਕਥਾਯਂ ‘‘ਵਿਨਾਪਿ ਚਿਤ੍ਤੇਨ ਆਪਜ੍ਜਿਤਬ੍ਬਤ੍ਤਾ ਅਚਿਤ੍ਤਕਾਨਿ, ਚਿਤ੍ਤੇ ਪਨ ਸਤਿ ਅਕੁਸਲੇਨੇਵ ਆਪਜ੍ਜਿਤਬ੍ਬਤ੍ਤਾ ਲੋਕਵਜ੍ਜਾਨਿ ਚੇਵ ਅਕੁਸਲਚਿਤ੍ਤਾਨਿ ਚਾ’’ਤਿ ਗਿਰਗ੍ਗਸਮਜ੍ਜਾਦੀਨਂ ਸਚਿਤ੍ਤਕਪਕ੍ਖੇ ਏਵ ਲੋਕਵਜ੍ਜਤਾ ਅਕੁਸਲਚਿਤ੍ਤਤਾ ਚ ਵਿਸੇਸੇਤ੍ਵਾ ਵੁਤ੍ਤਾ, ਨ ਏਵਂ ਸੁਰਾਪਾਨਸ੍ਸ. ਤਸ੍ਸ ਪਨ ਪਕ੍ਖਦ੍ਵਯਸ੍ਸਾਪਿ ਸਾਧਾਰਣਵਸੇਨ ‘‘ਅਕੁਸਲੇਨੇਵ ਪਾਤਬ੍ਬਤਾਯਾ’’ਤਿ ਵੁਤ੍ਤਂ, ਨ ਪਨ ‘‘ਸਚਿਤ੍ਤਕਪਕ੍ਖੇ’’ਤਿ ਵਿਸੇਸੇਤ੍ਵਾ. ਤਸ੍ਮਾ ਇਦਂ ਸੁਰਾਪਾਨਂ ਸਚਿਤ੍ਤਕਾਚਿਤ੍ਤਕਪਕ੍ਖਦ੍ਵਯੇਪਿ ਲੋਕਵਜ੍ਜਂ ਅਕੁਸਲਚਿਤ੍ਤਞ੍ਚਾਤਿ ਦਸ੍ਸੇਤੁਮੇਵ ‘‘ਅਕੁਸਲੇਨੇਵ ਪਾਤਬ੍ਬਤਾਯ ਲੋਕਵਜ੍ਜਤਾ’’ਤਿ ਵਿਸੁਂ ਵੁਤ੍ਤਨ੍ਤਿ ਸੁਟ੍ਠੁ ਸਿਜ੍ਝਤਿ. ਏਤੇਨੇਵ ਯਂ ਸਾਰਤ੍ਥਦੀਪਨਿਯਂ ‘‘ਸਚਿਤ੍ਤਕਪਕ੍ਖੇ ਅਕੁਸਲੇਨੇਵ ਪਾਤਬ੍ਬਤਾਯ ਲੋਕਵਜ੍ਜਤਾ’’ਤਿ ਵੁਤ੍ਤਸ੍ਸ ਇਮਸ੍ਸੇਵ ਅਧਿਪ੍ਪਾਯਸ੍ਸ ਪਟਿਪਾਦਕਮੇਤਨ੍ਤਿ ਸਞ੍ਞਾਯ ਇਮਿਨਾ ਏਵ ਹਿ ਅਧਿਪ੍ਪਾਯੇਨ ਅਞ੍ਞੇਸੁਪਿ ਲੋਕਵਜ੍ਜੇਸੁ ਅਚਿਤ੍ਤਕਸਿਕ੍ਖਾਪਦੇਸੁ ਅਕੁਸਲਚਿਤ੍ਤਤਾ ਏਵ ਵੁਤ੍ਤਾ, ਨ ਪਨ ਤਿਚਿਤ੍ਤਤਾ. ਤੇਨੇਵ ਭਿਕ੍ਖੁਨੀਵਿਭਙ੍ਗਟ੍ਠਕਥਾਯਂ ¶ ਵੁਤ੍ਤਂ ‘‘ਗਿਰਗ੍ਗਸਮਜ੍ਜਂ ਚਿਤ੍ਤਾਗਾਰਸਿਕ੍ਖਾਪਦਂ ਸਙ੍ਘਾਣਿ ਇਤ੍ਥਾਲਙ੍ਕਾਰੋ ਗਨ੍ਧਵਣ੍ਣਕੋ ਵਾਸਿਤਕਪਿਞ੍ਞਾਕੋ ਭਿਕ੍ਖੁਨੀਆਦੀਹਿ ਉਮ੍ਮਦ੍ਦਨਪਰਿਮਦ੍ਦਨਾਨੀਤਿ ਇਮਾਨਿ ਦਸ ਸਿਕ੍ਖਾਪਦਾਨਿ ਅਚਿਤ੍ਤਕਾਨਿ ਅਕੁਸਲਚਿਤ੍ਤਾਨਿ, ਅਯਂ ਪਨੇਤ੍ਥ ਅਧਿਪ੍ਪਾਯੋ ਵਿਨਾਪਿ ਚਿਤ੍ਤੇਨ ਆਪਜ੍ਜਿਤਬ੍ਬਤ੍ਤਾ ਅਚਿਤ੍ਤਕਾਨਿ, ਚਿਤ੍ਤੇ ਪਨ ਸਤਿ ਅਕੁਸਲੇਨੇਵ ਆਪਜ੍ਜਿਤਬ੍ਬਤ੍ਤਾ ਲੋਕਵਜ੍ਜਾਨਿ ਚੇਵ ਅਕੁਸਲਚਿਤ੍ਤਾਨਿ ਚਾ’’ਤਿ ਵੁਤ੍ਤਂ, ਤਮ੍ਪਿ ਪਟਿਸਿਦ੍ਧਂ ਹੋਤਿ ਤਬ੍ਬਿਪਰੀਤਸ੍ਸੇਵ ਅਤ੍ਥਸ੍ਸ ਯਥਾਵੁਤ੍ਤਨਯੇਨ ਸਾਧਨਤੋ. ਤਸ੍ਮਾ ਸੁਰਾਪਾਨਸ੍ਸ ਅਚਿਤ੍ਤਕਪਕ੍ਖੇਪਿ ਚਿਤ੍ਤਂ ਅਕੁਸਲਮੇਵਾਤਿ ਇਮਂ ਵਿਸੇਸਂ ਦਸ੍ਸੇਤੁਮੇਵ ਇਦਂ ਵਚਨਂ ਵੁਤ੍ਤਨ੍ਤਿ ਗਹੇਤਬ੍ਬਂ. ਅਯਞ੍ਹੇਤ੍ਥ ਅਤ੍ਥੋ ਵਤ੍ਥੁਅਜਾਨਨਤਾਯ ਚੇਤ੍ਥਾਤਿ ਏਤ੍ਥ ਚ-ਕਾਰੋ ਵਿਸੇਸਤ੍ਥਜੋਤਕੋ ਅਪਿਚਾਤਿ ਇਮਿਨਾ ਸਮਾਨਤ੍ਥੋ. ਤਸ੍ਮਾ ਯਦਿਦਂ ਅਞ੍ਞੇਸੁ ਅਚਿਤ੍ਤਕਲੋਕਵਜ੍ਜੇਸੁ ਵਿਨਾਪਿ ਚਿਤ੍ਤੇਨ ਆਪਜ੍ਜਿਤਬ੍ਬਤ੍ਤਾ ਅਚਿਤ੍ਤਕਾਨਿ, ਚਿਤ੍ਤੇ ਪਨ ਸਤਿ ਅਕੁਸਲੇਨੇਵ ਆਪਜ੍ਜਿਤਬ੍ਬਤ੍ਤਾ ਲੋਕਵਜ੍ਜਾਨਿ ਚੇਵ ਅਕੁਸਲਚਿਤ੍ਤਾਨਿ ਚਾਤਿ ਲੋਕਵਜ੍ਜਤਾਯ ਅਕੁਸਲਚਿਤ੍ਤਤਾਯ ਚ ਲਕ੍ਖਣਂ ਵੁਚ੍ਚਤਿ, ਤਂ ਏਤ੍ਥ ਸੁਰਾਪਾਨਸਿਕ੍ਖਾਪਦੇ ਨਾਗਚ੍ਛਤਿ, ਇਧ ਪਨ ਵਿਸੇਸੋ ਅਤ੍ਥੀਤਿ ਵੁਤ੍ਤਂ ਹੋਤਿ. ਸੋ ਕਤਰੋਤਿ ਚੇ? ਵਤ੍ਥੁਅਜਾਨਨਤਾਯ ਏਵ ਵਤ੍ਥੁਜਾਨਨਚਿਤ੍ਤੇਨ ਵਿਨਾਪਿ ਆਪਜ੍ਜਿਤਬ੍ਬਤਾਯ ਏਵ ਅਚਿਤ੍ਤਕਤਾ ਵੇਦਿਤਬ੍ਬਾ, ਨਤ੍ਥੇਤ੍ਥ ਅਚਿਤ੍ਤਕਤਾਯ ਵਿਸੇਸੋ. ਕਿਨ੍ਤੁ ਵਤ੍ਥੁਅਜਾਨਨਸਙ੍ਖਾਤਅਚਿਤ੍ਤਕਪਕ੍ਖੇਪਿ ਅਕੁਸਲਚਿਤ੍ਤੇਨੇਵ ਸੁਰਾਮੇਰਯਸ੍ਸ ਅਜ੍ਝੋਹਰਿਤਬ੍ਬਤਾਯਾਤਿ ਇਮਸ੍ਸ ਸਿਕ੍ਖਾਪਦਸ੍ਸ ਸਚਿਤ੍ਤਕਪਕ੍ਖੇਪਿ ਅਚਿਤ੍ਤਕਪਕ੍ਖੇਪਿ ਲੋਕਵਜ੍ਜਤਾ ਅਕੁਸਲਚਿਤ੍ਤਤਾ ਚ ਵੇਦਿਤਬ੍ਬਾਤਿ ਅਯਮੇਤ੍ਥ ਵਿਸੇਸੋ. ਇਧ ਹਿ ‘‘ਚਿਤ੍ਤੇ ਪਨ ਸਤੀ’’ਤਿ ਅਵਿਸੇਸੇਤ੍ਵਾ ‘‘ਅਕੁਸਲੇਨੇਵਾ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਉਭਯਪਕ੍ਖੇਪਿ ਲੋਕਵਜ੍ਜਤਾ ਅਕੁਸਲਚਿਤ੍ਤਤਾ ਚ ਸਿਦ੍ਧਾਤਿ ਵੇਦਿਤਬ੍ਬਾ. ਤੇਨੇਵ ਪਰਮਤ੍ਥਜੋਤਿਕਾਯ (ਖੁ. ਪਾ. ਅਟ੍ਠ. ੨.ਪਚ੍ਛਿਮਪਞ੍ਚਸਿਕ੍ਖਾਪਦਵਣ੍ਣਨਾ) ਖੁਦ੍ਦਕਟ੍ਠਕਥਾਯ ਸਿਕ੍ਖਾਪਦਵਣ੍ਣਨਾਯ ‘‘ਸੁਰਾਮੇਰਯਮਜ੍ਜਪਮਾਦਟ੍ਠਾਨਂ ¶ ਕਾਯਤੋ ਚ ਕਾਯਚਿਤ੍ਤਤੋ ਚਾਤਿ ਦ੍ਵਿਸਮੁਟ੍ਠਾਨ’’ਨ੍ਤਿ ਵੁਤ੍ਤਂ. ਸੁਰਾਤਿ ਜਾਨਨਚਿਤ੍ਤਾਭਾਵੇਨੇਵ ਹੇਤ੍ਥ ਚਿਤ੍ਤਙ੍ਗਵਿਰਹਿਤੋ ਕੇਵਲੋਪਿ ਕਾਯੋ ਏਕਸਮੁਟ੍ਠਾਨਂ ਵੁਤ੍ਤੋ, ਤਸ੍ਮਿਞ੍ਚ ਏਕਸਮੁਟ੍ਠਾਨਕ੍ਖਣੇਪਿ ਯਾਯ ਚੇਤਨਾਯ ਪਿਵਤਿ, ਸਾ ਏਕਨ੍ਤਅਕੁਸਲਾ ਏਵ ਹੋਤਿ. ਤੇਨੇਵ ਤਤ੍ਥੇਵ ਅਟ੍ਠਕਥਾਯਂ ‘‘ਪਠਮਾ ਚੇਤ੍ਥ ਪਞ੍ਚ ਏਕਨ੍ਤਅਕੁਸਲਚਿਤ੍ਤਸਮੁਟ੍ਠਾਨਤ੍ਤਾ ਪਾਣਾਤਿਪਾਤਾਦੀਨਂ ਪਕਤਿਵਜ੍ਜਤੋ ਵੇਰਮਣਿਯੋ, ਸੇਸਾ ਪਣ੍ਣਤ੍ਤਿਵਜ੍ਜਤੋ’’ਤਿ ਏਵਂ ਪਞ੍ਚਨ੍ਨਮ੍ਪਿ ਸਾਮਞ੍ਞਤੋ ਅਕੁਸਲਚਿਤ੍ਤਤਾ ਲੋਕਵਜ੍ਜਤਾਸਙ੍ਖਾਤਾ ਪਕਤਿਵਜ੍ਜਤਾ ਚ ਵੁਤ੍ਤਾ. ਅਙ੍ਗੇਸੁ ਚ ਜਾਨਨਙ੍ਗਂ ਨ ਵੁਤ੍ਤਂ. ਤਥਾ ਹਿ ‘‘ਸੁਰਾਮੇਰਯਮਜ੍ਜਪਮਾਦਟ੍ਠਾਨਸ੍ਸ ¶ ਪਨ ਸੁਰਾਦੀਨਂ ਅਞ੍ਞਤਰਂ ਹੋਤਿ ਮਦਨੀਯਂ, ਪਾਤੁਕਾਮਤਾਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ, ਤਜ੍ਜਞ੍ਚ ਵਾਯਾਮਂ ਆਪਜ੍ਜਤਿ, ਪੀਤੇ ਚ ਪਵਿਸਤੀਤਿ ਇਮਾਨਿ ਚਤ੍ਤਾਰਿ ਅਙ੍ਗਾਨੀ’’ਤਿ ਵੁਤ੍ਤਂ, ਨ ਪਨ ਸੁਰਾਤਿ ਜਾਨਨਙ੍ਗੇਨ ਸਦ੍ਧਿਂ ਪਞ੍ਚਾਤਿ. ਯਦਿ ਹਿ ਸੁਰਾਤਿ ਜਾਨਨਮ੍ਪਿ ਅਙ੍ਗਂ ਸਿਯਾ, ਅਵਸ੍ਸਮੇਵ ਤਂ ਵਤ੍ਤਬ੍ਬਂ ਸਿਯਾ, ਨ ਚ ਵੁਤ੍ਤਂ. ਯਥਾ ਚੇਤ੍ਥ, ਏਵਂ ਅਞ੍ਞਾਸੁਪਿ ਸੁਤ੍ਤਪਿਟਕਾਦਿਅਟ੍ਠਕਥਾਸੁ ਕਤ੍ਥਚਿ ਜਾਨਨਙ੍ਗਂ ਨ ਵੁਤ੍ਤਂ. ਤਸ੍ਮਾ ‘‘ਅਕੁਸਲੇਨੇਵ ਪਾਤਬ੍ਬਤਾਯ ਲੋਕਵਜ੍ਜਤਾ’’ਤਿ ਇਮਸ੍ਸ ਅਟ੍ਠਕਥਾਪਾਠਸ੍ਸ ਅਚਿਤ੍ਤਕਪਕ੍ਖੇਪਿ ‘‘ਅਕੁਸਲੇਨੇਵ ਪਾਤਬ੍ਬਤਾਯ ਲੋਕਵਜ੍ਜਤਾ’’ਤਿ ਏਵਮੇਵ ਅਤ੍ਥੋਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ.

ਅਪਿਚ ਯਂ ਗਣ੍ਠਿਪਦੇਸੁ ‘‘ਏਤਂ ਸਤ੍ਤਂ ਮਾਰੇਸ੍ਸਾਮੀਤਿ ਤਸ੍ਮਿਂਯੇਵ ਪਦੇਸੇ ਨਿਪਨ੍ਨਂ ਅਞ੍ਞਂ ਮਾਰੇਨ੍ਤਸ੍ਸ ਪਾਣਸਾਮਞ੍ਞਸ੍ਸ ਅਤ੍ਥਿਤਾਯ ਯਥਾ ਪਾਣਾਤਿਪਾਤੋ ਹੋਤਿ, ਏਵਂ ਏਤਂ ਮਜ੍ਜਂ ਪਿਵਿਸ੍ਸਾਮੀਤਿ ਅਞ੍ਞਂ ਮਜ੍ਜਂ ਪਿਵਨ੍ਤਸ੍ਸ ਮਜ੍ਜਸਾਮਞ੍ਞਸ੍ਸ ਅਤ੍ਥਿਤਾਯ ਅਕੁਸਲਮੇਵ ਹੋਤਿ, ਯਥਾ ਪਨ ਕਟ੍ਠਸਞ੍ਞਾਯ ਸਪ੍ਪਂ ਘਾਤੇਨ੍ਤਸ੍ਸ ਪਾਣਾਤਿਪਾਤੋ ਨ ਹੋਤਿ, ਏਵਂ ਨਾਲ਼ਿਕੇਰਪਾਨਸਞ੍ਞਾਯ ਮਜ੍ਜਂ ਪਿਵਨ੍ਤਸ੍ਸ ਅਕੁਸਲਂ ਨ ਹੋਤੀ’’ਤਿ ਪਾਣਾਤਿਪਾਤੇਨ ਸਦ੍ਧਿਂ ਸਬ੍ਬਥਾ ਸਮਾਨਤ੍ਤੇਨ ਉਪਮੇਤ੍ਵਾ ਵੁਤ੍ਤਂ, ਤਂ ਅਤਿਵਿਯ ਅਯੁਤ੍ਤਂ ਸਬ੍ਬੇਸਂ ਸਿਕ੍ਖਾਪਦਾਨਂ ਪਾਣਾਤਿਪਾਤਾਦਿਅਕੁਸਲਾਨਞ੍ਚ ਅਞ੍ਞਮਞ੍ਞਂ ਸਮਾਨਤਾਯ ਨਿਯਮਾਭਾਵਾ. ਪਾਣਾਤਿਪਾਤੋ ਹਿ ਪਰਿਯਾਯੇਨਾਪਿ ਸਿਜ੍ਝਤਿ, ਨ ਤਥਾ ਅਦਿਨ੍ਨਾਦਾਨਂ. ਤਂ ਪਨ ਆਣਤ੍ਤਿਯਾਪਿ ਸਿਜ੍ਝਤਿ, ਨ ਚ ਮੇਥੁਨਾਦੀਸੁ. ਤਸ੍ਮਾ ਪਯੋਗਙ੍ਗਾਦੀਹਿਪਿ ਭਿਨ੍ਨਾਨਮੇਵ ਸਂਸਟ੍ਠਂ ਸਬ੍ਬਥਾ ਸਮੀਕਰਣਂ ਅਯੁਤ੍ਤਮੇਵ. ‘‘ਪਾਣਾਤਿਪਾਤੋ ਵਿਯ ਅਦਿਨ੍ਨਾਦਾਨਮੇਥੁਨਾਦੀਨਿਪਿ ਪਰਿਯਾਯਕਥਾਦੀਹਿ ਸਿਜ੍ਝਨ੍ਤੀ’’ਤਿ ਕੇਨਚਿ ਵੁਤ੍ਤੇ ਤਂ ਕਿਨ੍ਤਿ ਨ ਗਯ੍ਹਤਿ ਤਥਾ ਵਚਨਾਭਾਵਾਤਿ ਚੇ? ਇਧਾਪਿ ‘‘ਤਥਾ ਪਾਣਾਤਿਪਾਤਸਦਿਸਂ ਸੁਰਾਪਾਨ’’ਨ੍ਤਿ ਵਚਨਾਭਾਵਾ ਇਦਮ੍ਪਿ ਨ ਗਹੇਤਬ੍ਬਮੇਵ. ਕਿਞ੍ਚਿ ਅਟ੍ਠਕਥਾਵਚਨੇਨੇਵ ਸਿਦ੍ਧਮੇਵਤ੍ਥਂ ਪਟਿਬਾਹਨ੍ਤੇਨ ਵਿਨਯਞ੍ਞੁਨਾ ਸੁਤ੍ਤਸੁਤ੍ਤਾਨੁਲੋਮਾਦੀਹਿ ਤਸ੍ਸ ਵਿਰੋਧਂ ਦਸ੍ਸੇਤ੍ਵਾ ਪਟਿਬਾਹੇਤਬ੍ਬਂ, ਨ ਪਨ ਪਯੋਗਙ੍ਗਾਦੀਹਿ ਅਚ੍ਚਨ੍ਤਵਿਭਿਨ੍ਨੇਨ ਸਿਕ੍ਖਾਪਦਨ੍ਤਰੇਨ ਸਹ ਸਮੀਕਰਣਮਤ੍ਤੇਨ. ਨ ਹਿ ‘‘ਸੁਰਾਤਿ ਅਜਾਨਿਤ੍ਵਾ ਪਿਵਨ੍ਤਸ੍ਸਾਪਿ ਅਕੁਸਲਮੇਵਾ’’ਤਿ ਏਤ੍ਥ ਸੁਤ੍ਤਾਦਿਵਿਰੋਧੋ ਅਤ੍ਥਿ, ਵਿਨਯਪਿਟਕੇ ਤਾਵ ਏਤਸ੍ਸ ਅਤ੍ਥਸ੍ਸ ਵਿਰੁਦ੍ਧਂ ਸੁਤ੍ਤਾਦਿਕਂ ਨ ਦਿਸ੍ਸਤਿ, ਨਾਪਿ ਸੁਤ੍ਤਪਿਟਕਾਦੀਸੁ.

ਯਂ ¶ ਪਨੇਤ੍ਥ ਕੇਚਿ ਵਦਨ੍ਤਿ ‘‘ਮਨੋਪੁਬ੍ਬਙ੍ਗਮਾ ਧਮ੍ਮਾਤਿ (ਧ. ਪ. ੧, ੨) ਵੁਤ੍ਤਤ੍ਤਾ ਸਬ੍ਬਾਨਿ ਅਕੁਸਲਾਨਿ ਪੁਬ੍ਬੇ ਵੀਤਿਕ੍ਕਮਵਤ੍ਥੁਂ ਜਾਨਨ੍ਤਸ੍ਸੇਵ ਹੋਨ੍ਤੀ’’ਤਿ. ਤਂ ਤੇਸਂ ਸੁਤ੍ਤਾਧਿਪ੍ਪਾਯਾਨਭਿਞ੍ਞਾਤਮੇਵ ¶ ਪਕਾਸੇਤਿ. ਨ ਹਿ ‘‘ਮਨੋਪੁਬ੍ਬਙ੍ਗਮਾ ਧਮ੍ਮਾ’’ਤਿ ਇਦਂ ਵਚਨਂ ਪੁਬ੍ਬੇ ਵੀਤਿਕ੍ਕਮਵਤ੍ਥੁਂ ਜਾਨਨ੍ਤਸ੍ਸੇਵ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤੀਤਿ ਇਮਮਤ੍ਥਂ ਦੀਪੇਤਿ, ਅਥ ਖੋ ਕੁਸਲਾਕੁਸਲਾ ਧਮ੍ਮਾ ਉਪ੍ਪਜ੍ਜਮਾਨਾ ਉਪ੍ਪਾਦਪਚ੍ਚਯਟ੍ਠੇਨ ਪੁਬ੍ਬਙ੍ਗਮਭੂਤਂ ਸਹਜਾਤਚਿਤ੍ਤਂ ਨਿਸ੍ਸਾਯੇਵ ਉਪ੍ਪਜ੍ਜਨ੍ਤਿ, ਨ ਵਿਨਾ ਚਿਤ੍ਤੇਨਾਤਿ ਇਮਮਤ੍ਥਂ ਦੀਪੇਤਿ. ਨ ਹੇਤ੍ਥ ‘‘ਸੁਰਾਤਿ ਅਜਾਨਿਤ੍ਵਾ ਪਿਵਨ੍ਤਸ੍ਸ ਅਕੁਸਲਮੇਵਾ’’ਤਿ ਵੁਤ੍ਤੇ ਸਹਜਾਤਚਿਤ੍ਤਂ ਵਿਨਾਪਿ ਲੋਭਾਦਿਅਕੁਸਲਚੇਤਸਿਕਾ ਧਮ੍ਮਾ ਉਪ੍ਪਜ੍ਜਨ੍ਤੀਤਿ ਅਯਮਤ੍ਥੋ ਆਪਜ੍ਜਤਿ. ਯੇਨ ਤਂ ਨਿਸੇਧਾਯ ਇਦਂ ਸੁਤ੍ਤਂ ਆਹਰਣੀਯਂ ਸਿਯਾ, ਅਭਿਧਮ੍ਮਵਿਰੋਧੋਪੇਤ੍ਥ ਨਤ੍ਥਿ ਪੁਬ੍ਬੇ ਨਾਮਜਾਤਿਆਦਿਵਸੇਨ ਅਜਾਨਨ੍ਤਸ੍ਸੇਵ ਪਞ੍ਚਵਿਞ੍ਞਾਣਵੀਥਿਯਂ ਕੁਸਲਾਕੁਸਲਜਵਨੁਪ੍ਪਤ੍ਤਿਵਚਨਤੋ.

ਅਪਿਚ ਬਾਲਪੁਥੁਜ੍ਜਨਾਨਂ ਛਸੁ ਦ੍ਵਾਰੇਸੁ ਉਪ੍ਪਜ੍ਜਮਾਨਾਨਿ ਜਵਨਾਨਿ ਯੇਭੁਯ੍ਯੇਨ ਅਕੁਸਲਾਨੇਵ ਉਪ੍ਪਜ੍ਜਨ੍ਤਿ. ਕੁਸਲਾਨਿ ਪਨ ਤੇਸਂ ਕਲ੍ਯਾਣਮਿਤ੍ਤਾਦਿਉਪਨਿਸ੍ਸਯਬਲੇਨ ਅਪ੍ਪਕਾਨੇਵ ਉਪ੍ਪਜ੍ਜਨ੍ਤਿ, ਤੁਣ੍ਹੀਭੂਤਾਨਮ੍ਪਿ ਨਿਦ੍ਦਾਯਿਤ੍ਵਾ ਸੁਪਿਨਂ ਪਸ੍ਸਨ੍ਤਾਨਮ੍ਪਿ ਉਦ੍ਧਚ੍ਚਾਦਿਅਕੁਸਲਜਵਨਸ੍ਸੇਵ ਯੇਭੁਯ੍ਯਪ੍ਪਵਤ੍ਤਿਤੋ ਕੁਸਲਾਕੁਸਲਵਿਰਹਿਤਸ੍ਸ ਜਵਨਸ੍ਸ ਤੇਸਂ ਅਭਾਵਾ. ਅਕੁਸਲਾ ਹਿ ਵਿਸਯਾਨੁਗੁਣਂ ਵਾਸਨਾਨੁਗੁਣਞ੍ਚ ਯਥਾਪਚ੍ਚਯਂ ਸਮੁਪ੍ਪਜ੍ਜਨ੍ਤਿ, ਤਤ੍ਥ ਕਿਂ ਪੁਬ੍ਬੇ ਜਾਨਨਾਜਾਨਨਨਿਬਦ੍ਧੇਨ. ਯੇ ਪਨ ਜਾਨਨਾਦਿਅਙ੍ਗਸਮ੍ਪਨ੍ਨਾ ਪਾਣਾਤਿਪਾਤਾਦਯੋ, ਯੇ ਚ ਜਾਨਨਾਦਿਂ ਵਿਨਾਪਿ ਸਿਜ੍ਝਮਾਨਾ ਸੁਰਾਪਾਨਮਿਚ੍ਛਾਦਿਟ੍ਠਿਆਦਯੋ, ਤੇ ਤੇ ਤਥਾ ਤਥਾ ਯਾਥਾਵਤੋ ਞਤ੍ਵਾ ਸਮ੍ਮਾਸਮ੍ਬੁਦ੍ਧੇਨ ਨਿਦ੍ਦਿਟ੍ਠਾ, ਤੇਸਞ੍ਚ ਯਥਾਨਿਦ੍ਦਿਟ੍ਠਵਸੇਨ ਗਹਣੇ ਕੋ ਨਾਮ ਅਭਿਧਮ੍ਮਵਿਰੋਧੋ. ਏਵਂ ਸੁਤ੍ਤਾਦਿਵਿਰੋਧਾਭਾਵਤੋ, ਅਟ੍ਠਕਥਾਯ ਚ ਵੁਤ੍ਤਤ੍ਤਾ ਯਥਾਵੁਤ੍ਤਵਸੇਨੇਵੇਤ੍ਥ ਅਤ੍ਥੋ ਗਹੇਤਬ੍ਬੋ. ਯਦਿ ਏਵਂ ਕਸ੍ਮਾ ‘‘ਸਾਮਣੇਰੋ ਜਾਨਿਤ੍ਵਾ ਪਿਵਨ੍ਤੋ ਸੀਲਭੇਦਂ ਆਪਜ੍ਜਤਿ, ਨ ਅਜਾਨਿਤ੍ਵਾ’’ਤਿ ਅਟ੍ਠਕਥਾਯਂ ਵੁਤ੍ਤਨ੍ਤਿ? ਨਾਯਂ ਦੋਸੋ ਸੀਲਭੇਦਸ੍ਸ ਭਗਵਤੋ ਆਣਾਯਤ੍ਤਤ੍ਤਾ ਉਕ੍ਖਿਤ੍ਤਾਨੁਵਤ੍ਤਿਕਾਦੀਨਂ ਸੀਲਭੇਦੋ ਵਿਯ. ਨ ਹਿ ਤਾਸਂ ਅਕੁਸਲੁਪ੍ਪਤ੍ਤਿਯਾ ਏਵ ਸੀਲਭੇਦੋ ਹੋਤਿ ਸਙ੍ਘਾਯਤ੍ਤਸਮਨੁਭਾਸਨਾਨਨ੍ਤਰੇਯੇਵ ਵਿਹਿਤਤ੍ਤਾ. ਏਵਮਿਧਾਪਿ ਜਾਨਿਤ੍ਵਾ ਪਿਵਨੇ ਏਵ ਵਿਹਿਤੋ, ਨ ਅਜਾਨਿਤ੍ਵਾ ਪਿਵਨੇ. ਅਞ੍ਞੋ ਹਿ ਸਿਕ੍ਖਾਪਦਵਿਸਯੋ, ਅਞ੍ਞੋ ਅਕੁਸਲਵਿਸਯੋ. ਤੇਨੇਵ ਸਾਮਣੇਰਾਨਂ ਪੁਰਿਮੇਸੁ ਪਞ੍ਚਸੁ ਸਿਕ੍ਖਾਪਦੇਸੁ ਏਕਸ੍ਮਿਂ ਭਿਨ੍ਨੇ ਸਬ੍ਬਾਨਿਪਿ ਸਿਕ੍ਖਾਪਦਾਨਿ ਭਿਜ੍ਜਨ੍ਤਿ. ਅਕੁਸਲਂ ਪਨ ਯਂ ਭਿਨ੍ਨਂ, ਤੇਨ ਏਕੇਨੇਵ ਹੋਤਿ, ਨਾਞ੍ਞੇਹਿ. ਤਸ੍ਮਾ ਸਾਮਣੇਰਸ੍ਸ ¶ ਅਜਾਨਿਤ੍ਵਾ ਪਿਵਨ੍ਤਸ੍ਸ ਸੀਲਭੇਦਾਭਾਵੇਪਿ ਕਮ੍ਮਪਥਪ੍ਪਤ੍ਤਂ ਅਕੁਸਲਮੇਵਾਤਿ ਗਹੇਤਬ੍ਬਂ.

ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੨.੪੨) ‘‘ਸਾਮਣੇਰਸ੍ਸ ਸੁਰਾਤਿ ਅਜਾਨਿਤ੍ਵਾ ¶ ਪਿਵਨ੍ਤਸ੍ਸ ਪਾਰਾਜਿਕਂ ਨਤ੍ਥਿ, ਅਕੁਸਲਂ ਪਨ ਹੋਤੀ’’ਤਿ ਕੇਹਿਚਿ ਵੁਤ੍ਤਵਚਨਂ ‘‘ਤਂ ਤੇਸਂ ਮਤਿਮਤ੍ਤ’’ਨ੍ਤਿ ਪਟਿਕ੍ਖਿਪਿਤ੍ਵਾ ‘‘ਭਿਕ੍ਖੁਨੋ ਅਜਾਨਿਤ੍ਵਾਪਿ ਬੀਜਤੋ ਪਟ੍ਠਾਯ ਮਜ੍ਜਂ ਪਿਵਨ੍ਤਸ੍ਸ ਪਾਚਿਤ੍ਤਿਯਂ. ਸਾਮਣੇਰੋ ਜਾਨਿਤ੍ਵਾ ਪਿਵਨ੍ਤੋ ਸੀਲਭੇਦਂ ਆਪਜ੍ਜਤਿ, ਨ ਅਜਾਨਿਤ੍ਵਾਤਿ ਏਤ੍ਤਕਮੇਵ ਹਿ ਅਟ੍ਠਕਥਾਯਂ ਵੁਤ੍ਤਂ, ਅਕੁਸਲਂ ਪਨ ਹੋਤੀਤਿ ਨ ਵੁਤ੍ਤ’’ਨ੍ਤਿ ਤਤ੍ਥ ਕਾਰਣਂ ਵੁਤ੍ਤਂ, ਤਂ ਅਕਾਰਣਂ. ਨ ਹਿ ਅਟ੍ਠਕਥਾਯਂ ਸਾਮਣੇਰਾਨਂ ਜਾਨਿਤ੍ਵਾ ਪਿਵਨੇ ਏਵ ਸੀਲਭੇਦੋ, ਨ ਅਜਾਨਿਤ੍ਵਾਤਿ ਸੀਲਭੇਦਕਥਨਟ੍ਠਾਨੇ ਅਕੁਸਲਂ ਪਨ ਹੋਤੀਤਿ ਅਵਚਨਂ ਅਜਾਨਨਪਕ੍ਖੇ ਅਕੁਸਲਾਭਾਵਸ੍ਸ ਕਾਰਣਂ ਹੋਤਿ, ਤਤ੍ਥ ਪਸਙ੍ਗਾਭਾਵਾ, ਵਤ੍ਤਬ੍ਬਟ੍ਠਾਨੇ ਏਵ ‘‘ਅਕੁਸਲੇਨੇਵ ਪਾਤਬ੍ਬਤਾਯ ਲੋਕਵਜ੍ਜਤਾ’’ਤਿ ਵੁਤ੍ਤਤ੍ਤਾ ਚ. ਨ ਚ ਤੇ ‘‘ਅਕੁਸਲਂ ਪਨ ਹੋਤੀ’’ਤਿ ਵਦਨ੍ਤਾ ਆਚਰਿਯਾ ਇਮਂ ਸਾਮਣੇਰਾਨਂ ਸੀਲਭੇਦਪ੍ਪਕਾਸਕਂ ਖਨ੍ਧਕਟ੍ਠਕਥਾਪਾਠਮੇਵ ਗਹੇਤ੍ਵਾ ਅਵੋਚੁਂ, ਯੇਨ ‘‘ਏਤ੍ਤਕਮੇਵ ਅਟ੍ਠਕਥਾਯਂ ਵੁਤ੍ਤ’’ਨ੍ਤਿ ਵਤ੍ਤਬ੍ਬਂ ਸਿਯਾ, ਅਥ ਖੋ ਸੁਰਾਪਾਨਟ੍ਠਕਥਾਗਤਂ ਸੁਤ੍ਤਪਿਟਕਟ੍ਠਕਥਾਗਤਞ੍ਚ ਅਨੇਕਵਿਧਂ ਵਚਨਂ, ਮਹਾਵਿਹਾਰਵਾਸੀਨਂ ਪਰਮ੍ਪਰੋਪਦੇਸਞ੍ਚ ਗਹੇਤ੍ਵਾ ਅਵੋਚੁਂ. ਭਿਨ੍ਨਲਦ੍ਧਿਕਾਨਂ ਅਭਯਗਿਰਿਕਾਦੀਨਂ ਮਤਞ੍ਹੇਤਂ, ਯਦਿਦਂ ਜਾਨਿਤ੍ਵਾ ਪਿਵਨ੍ਤਸ੍ਸੇਵ ਅਕੁਸਲਨ੍ਤਿ ਗਹਣਂ. ਤਸ੍ਮਾ ਯਂ ਵੁਤ੍ਤਂ ਕੇਹਿਚਿ ‘‘ਸਾਮਣੇਰਸ੍ਸ ਸੁਰਾਤਿ ਅਜਾਨਿਤ੍ਵਾ ਪਿਵਨ੍ਤਸ੍ਸ ਪਾਰਾਜਿਕਂ ਨਤ੍ਥਿ, ਅਕੁਸਲਂ ਪਨ ਹੋਤੀ’’ਤਿ, ਤਂ ਸੁਵੁਤ੍ਤਨ੍ਤਿ ਗਹੇਤਬ੍ਬਂ.

ਯਞ੍ਚ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੨.੪੨) ‘‘ਅਜਾਨਿਤ੍ਵਾ ਪਿਵਨ੍ਤਸ੍ਸਾਪਿ ਸੋਤਾਪਨ੍ਨਸ੍ਸ ਮੁਖਂ ਸੁਰਾ ਨ ਪਵਿਸਤਿ ਕਮ੍ਮਪਥਪ੍ਪਤ੍ਤਅਕੁਸਲਚਿਤ੍ਤੇਨੇਵ ਪਾਤਬ੍ਬਤੋ’’ਤਿ ਕੇਹਿਚਿ ਵੁਤ੍ਤਵਚਨਂ ‘‘ਨ ਸੁਨ੍ਦਰ’’ਨ੍ਤਿ ਪਟਿਕ੍ਖਿਪਿਤ੍ਵਾ ‘‘ਬੋਧਿਸਤ੍ਤੇ ਕੁਚ੍ਛਿਗਤੇ ਬੋਧਿਸਤ੍ਤਮਾਤੁ ਸੀਲਂ ਵਿਯ ਹਿ ਇਦਮ੍ਪਿ ਅਰਿਯਸਾਵਕਾਨਂ ਧਮ੍ਮਤਾਸਿਦ੍ਧਨ੍ਤਿ ਵੇਦਿਤਬ੍ਬ’’ਨ੍ਤਿ ਵਤ੍ਵਾ ਧਮ੍ਮਤਾਸਿਦ੍ਧਤ੍ਤਂਯੇਵ ਸਮਤ੍ਥੇਤੁਂ ‘‘ਭਵਨ੍ਤਰੇਪਿ ਹਿ ਅਰਿਯਸਾਵਕੋ ਜੀਵਿਤਹੇਤੁਪਿ ਨੇਵ ਪਾਣਂ ਹਨਤਿ, ਨ ਸੁਰਂ ਪਿਵਤਿ. ਸਚੇ ਪਿਸ੍ਸ ਸੁਰਞ੍ਚ ਖੀਰਞ੍ਚ ਮਿਸ੍ਸੇਤ੍ਵਾ ਮੁਖੇ ਪਕ੍ਖਿਪਨ੍ਤਿ, ਖੀਰਮੇਵ ਪਵਿਸਤਿ, ਨ ਸੁਰਾ. ਯਥਾ ਕਿਂ? ਯਥਾ ਕੋਞ੍ਚਸਕੁਣਾਨਂ ਖੀਰਮਿਸ੍ਸਕੇ ਉਦਕੇ ਖੀਰਮੇਵ ਪਵਿਸਤਿ, ਨ ਉਦਕਂ. ਇਦਂ ਯੋਨਿਸਿਦ੍ਧਨ੍ਤਿ ਚੇ, ਇਦਮ੍ਪਿ ਧਮ੍ਮਤਾਸਿਦ੍ਧਨ੍ਤਿ ਵੇਦਿਤਬ੍ਬ’’ਨ੍ਤਿ ਇਦਂ ਅਟ੍ਠਕਥਾਵਚਨਂ ਦਸ੍ਸਿਤਂ, ਤਮ੍ਪਿ ਨ ਯੁਤ੍ਤਮੇਵ. ਯਥਾ ਹਿ ਬੋਧਿਸਤ੍ਤਮਾਤੁ ਸੀਲਂ ਵਿਯ ਅਰਿਯਸਾਵਕਾਨਂ ਧਮ੍ਮਤਾਸਿਦ੍ਧਨ੍ਤਿ ਏਤ੍ਥ ¶ ਬੋਧਿਸਤ੍ਤਮਾਤੁ ਧਮ੍ਮਤਾ ਨਾਮ ਬੋਧਿਸਤ੍ਤਸ੍ਸ ਚ ਅਤ੍ਤਨੋ ਚ ਪਾਰਮਿਤਾਨੁਭਾਵੇਨ ਅਕੁਸਲਾਨੁਪ੍ਪਤ੍ਤਿਨਿਯਮੋ ਏਵ. ਤਥਾ ਅਰਿਯਸਾਵਕਾਨਮ੍ਪਿ ਭਵਨ੍ਤਰੇ ਪਾਣਾਤਿਪਾਤਾਦੀਨਂ ਦਸਨ੍ਨਂ ਕਮ੍ਮਪਥਾਨਂ ਅਞ੍ਞੇਸਞ੍ਚ ਅਪਾਯਹੇਤੁਕਾਨਂ ਅਕੁਸਲਾਨਂ ਅਚ੍ਚਨ੍ਤਪ੍ਪਹਾਯਕਸ੍ਸ ਮਗ੍ਗਸ੍ਸ ਆਨੁਭਾਵੇਨ ਤਂਤਂਸੀਲਵੀਤਿਕ੍ਕਮਹੇਤੁਕਸ੍ਸ ਅਕੁਸਲਸ੍ਸ ਅਨੁਪ੍ਪਤ੍ਤਿਨਿਯਮੋ ਏਵ ਧਮ੍ਮਤਾ. ਨ ਹਿ ਸਭਾਵਵਾਦੀਨਂ ਧਮ੍ਮਤਾ ਵਿਯ ਅਹੇਤੁਕਤਾ ਇਧ ਧਮ੍ਮਤਾ ਨਾਮ. ਯਥਾ ਵਾ ਏਵਂਧਮ੍ਮਤਾਨਯੇ ਕਾਰਣਸ੍ਸ ਭਾਵੇ ਅਭਾਵੇ ਚ ਕਾਰਿਯਸ੍ਸ ਭਾਵੋ ਅਭਾਵੋ ਚ ਧਮ੍ਮਤਾ, ਨ ਅਹੇਤੁਅਪ੍ਪਚ੍ਚਯਾਭਾਵਾਭਾਵੋ, ਏਵਮਿਧਾਪਿ ਪਾਣਾਤਿਪਾਤਾਦਿਕਮ੍ਮਪਥਾਨਂ ਹੇਤੁਭੂਤਸ੍ਸ ਕਿਲੇਸਸ੍ਸ ਅਚ੍ਚਨ੍ਤਾਭਾਵੇਨ ਤੇਸਂ ਅਭਾਵੋ, ਤਦਵਸੇਸਾਨਂ ਅਕੁਸਲਾਨਂ ਹੇਤੁਨੋ ਭਾਵੇਨ ਭਾਵੋ ਚ ਧਮ੍ਮਤਾ ¶ , ਨ ਅਹੇਤੁਕਤਾ. ਤਸ੍ਮਾ ਅਪਾਯਹੇਤੁਨੋ ਰਾਗਸ੍ਸ ਅਭਾਵੇਨੇਵ ਅਰਿਯਾਨਂ ਅਜਾਨਿਤ੍ਵਾਪਿ ਸੁਰਾਯ ਅਨਜ੍ਝੋਹਰਣਨ੍ਤਿ ਸੁਵੁਤ੍ਤਮੇਵਿਦਂ ਕੇਹਿਚਿ ‘‘ਅਜਾਨਿਤ੍ਵਾ ਪਿਵਨ੍ਤਸ੍ਸਾਪਿ ਸੋਤਾਪਨ੍ਨਸ੍ਸ ਮੁਖਂ ਸੁਰਾ ਨ ਪਵਿਸਤਿ ਕਮ੍ਮਪਥਪ੍ਪਤ੍ਤਅਕੁਸਲਚਿਤ੍ਤੇਨੇਵ ਪਾਤਬ੍ਬਤੋ’’ਤਿ, ਤਂ ਕੇਨ ਹੇਤੁਨਾ ਨ ਸੁਨ੍ਦਰਂ ਜਾਤਨ੍ਤਿ ਨ ਞਾਯਤਿ, ਧਮ੍ਮਤਾਸਿਦ੍ਧਨ੍ਤਿ ਵਾ ਕਥਨੇਨ ਕਥਂ ਤਂ ਪਟਿਕ੍ਖਿਤ੍ਤਨ੍ਤਿ.

ਯਮ੍ਪਿ ਦੀਘਨਿਕਾਯਟ੍ਠਕਥਾਯਂ (ਦੀ. ਨਿ. ਅਟ੍ਠ. ੧.੩੫੨) ‘‘ਸੁਰਞ੍ਚ ਖੀਰਞ੍ਚ ਮਿਸ੍ਸੇਤ੍ਵਾ…ਪੇ… ਇਦਂ ਧਮ੍ਮਤਾਸਿਦ੍ਧ’’ਨ੍ਤਿ ਵਚਨਂ, ਤਮ੍ਪਿ ਸੁਰਾਪਾਨਸ੍ਸ ਅਚਿਤ੍ਤਕਪਕ੍ਖੇਪਿ ਅਕੁਸਲਚਿਤ੍ਤਞ੍ਞੇਵ ਸਾਧੇਤਿ. ਤਥਾ ਹਿ ‘‘ਭਵਨ੍ਤਰੇਪਿ ਹਿ ਅਰਿਯਸਾਵਕੋ ਜੀਵਿਤਹੇਤੁਪਿ ਪਾਣਂ ਨ ਹਨਤਿ, ਨਾਦਿਨ੍ਨਂ ਆਦਿਯਤਿ…ਪੇ… ਨ ਸੁਰਂ ਪਿਵਤੀ’’ਤਿ ਵੁਤ੍ਤੇ ‘‘ਪੁਰਿਮਾਨਂ ਤਾਵ ਚਤੁਨ੍ਨਂ ਕਮ੍ਮਪਥਾਨਂ ਸਚਿਤ੍ਤਕਤ੍ਤਾ ਵਿਰਮਣਂ ਸੁਕਰਂ, ਪਚ੍ਛਿਮਸ੍ਸ ਪਨ ਸੁਰਾਪਾਨਸ੍ਸ ਅਚਿਤ੍ਤਕਤ੍ਤਾ ਕਥਂ ਵਿਰਮਣਂ ਭਵੇਯ੍ਯਾ’’ਤਿ ਚੋਦਨਾਸਮ੍ਭਵਂ ਮਨਸਿਕਤ੍ਵਾ ਵਤ੍ਥੁਅਜਾਨਨਵਸੇਨ ਅਚਿਤ੍ਤਕਤ੍ਤੇਪਿ ਯਸ੍ਮਾ ਕਮ੍ਮਪਥਪ੍ਪਤ੍ਤਅਕੁਸਲੇਨੇਵ ਸੁਰਾ ਅਜ੍ਝੋਹਰਿਤਬ੍ਬਾ, ਤਾਦਿਸੀ ਚ ਅਕੁਸਲਪ੍ਪਵਤ੍ਤਿ ਅਰਿਯਸਾਵਕਸ੍ਸ ਮਗ੍ਗੇਨੇਵ ਹਤਾ, ਤਸ੍ਮਾਸ੍ਸ ਪਰਗਲਂ ਸੁਰਾਯ ਪਵਿਸਨਂ ਨਤ੍ਥੀਤਿ ਅਤ੍ਥਤੋ ਗਮ੍ਯਮਾਨਤ੍ਥਂ ਪਰਿਹਾਰਵਚਨਂ ਵਦਤਾ ‘‘ਸਚੇ ਪਿਸ੍ਸ ਸੁਰਞ੍ਚ ਖੀਰਞ੍ਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਖੀਰਮੇਵ ਪਵਿਸਤਿ, ਨ ਸੁਰਾਤਿ ਇਦਂ ਸੁਰਾਯ ਸਬ੍ਬਥਾਪਿ ਪਰਗਲਪ੍ਪਵੇਸਾਭਾਵਦਸ੍ਸਨਪਰਂ, ਨ ਪਨ ਸੁਰਾਮਿਸ੍ਸਖੀਰਸ੍ਸ ਸੁਰਾਯ ਵਿਯੋਜਨਸਾਮਤ੍ਥਿਯਦਸ੍ਸਨਪਰਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਯਦਿ ਹਿ ਸੁਰਾਮਿਸ੍ਸੇ ਖੀਰੇ ਕਿਞ੍ਚਿ ਪਵਿਸੇਯ੍ਯ, ਖੀਰਮੇਵ ਪਵਿਸੇਯ੍ਯ, ਨ ਸੁਰਾ. ਖੀਰੇ ਪਨ ਸੁਰਾਯ ਅਵਿਯੁਤ੍ਤੇ ਨ ਕਿਞ੍ਚਿ ਪਵਿਸਤੀਤਿ ¶ . ਇਦਂ ਯੋਨਿਸਿਦ੍ਧਨ੍ਤਿ ਉਦਕਸ੍ਸ ਮੁਖੇ ਅਪ੍ਪਵਿਸਨਂ ਯੋਨਿਸਿਦ੍ਧਂ. ਯੋਨੀਤਿ ਚੇਤ੍ਥ ਜਾਤਿ ਅਧਿਪ੍ਪੇਤਾ. ਤਸ੍ਮਾ ਕੋਞ੍ਚਜਾਤਿਕਾਨਂ ਮੁਖਤੁਣ੍ਡਸਙ੍ਖਾਤਾਨਂ ਰੂਪਧਮ੍ਮਾਨਂ ਖੀਰਮਿਸ੍ਸਉਦਕਜ੍ਝੋਹਰਣਹੇਤੁਤ੍ਤਾਭਾਵੇਨ ਤਂ ਅਪ੍ਪਵਿਸਨਂ ਸਿਦ੍ਧਨ੍ਤਿ ਅਤ੍ਥੋ. ਇਦਮ੍ਪਿ ਹਿ ਖੀਰਮਿਸ੍ਸਾਯ ਸੁਰਾਯ ਖੀਰੇ ਪਵਿਸਨ੍ਤੇਪਿ ਪਰਗਲਾਪਵਿਸਨਨ੍ਤਿ. ਧਮ੍ਮਤਾਸਿਦ੍ਧਨ੍ਤਿ ਅਰਿਯਸਾਵਕਸ੍ਸ ਅਰੂਪਧਮ੍ਮਾਨਂ ਸੁਰਾਪਿਵਨਹੇਤੁਭੂਤਕਿਲੇਸਸਹਿਤਤ੍ਤਾਭਾਵਸਙ੍ਖਾਤਾਯ ਧਮ੍ਮਤਾਯ ਸਿਦ੍ਧਂ. ਏਵਮੇਤ੍ਥ ਅਚਿਤ੍ਤਕਪਕ੍ਖੇਪਿ ਸੁਰਾਯ ਅਕੁਸਲਚਿਤ੍ਤੇਨੇਵ ਪਾਤਬ੍ਬਤੋ ਅਰਿਯਸਾਵਕਾਨਂ ਅਪਿਵਨਂ ਸਮਤ੍ਥਿਤਨ੍ਤਿ ਵੇਦਿਤਬ੍ਬਂ. ਅਥਾਪਿ ਸਿਯਾ ਅਜਾਨਨਪਕ੍ਖੇ ਅਕੁਸਲਚਿਤ੍ਤੇਨ ਵਿਨਾਵ ਪਾਤਬ੍ਬਤ੍ਤੇਪਿ ਸੁਰਾਯ ਅਪਿਵਨਂ ਅਰਿਯਾਨਂ ਧਮ੍ਮਤਾਤਿ ¶ ਸਮਤ੍ਥਨਪਰਮੇਤਨ੍ਤਿ, ਤਂ ਨ, ਅਟ੍ਠਕਥਾਵਚਨਨ੍ਤਰੇਹਿ ਵਿਰੁਜ੍ਝਨਤੋ. ਯਥਾ ਹਿ ਵਚਨਨ੍ਤਰੇਹਿ ਨ ਵਿਰੁਜ੍ਝਤਿ, ਤਥਾਯੇਵ ਅਤ੍ਥੋ ਗਹੇਤਬ੍ਬੋ.

ਅਪਿਚ ਪਾਣਾਤਿਪਾਤਾਦੀਨਂ ਪਞ੍ਚਨ੍ਨਂ ਕਮ੍ਮਪਥਾਨਂ ਭਵਨ੍ਤਰੇਪਿ ਅਕਰਣਂ ਅਰਿਯਾਨਂ ਧਮ੍ਮਤਾਸੀਲਮੇਵ, ਤੇਸਞ੍ਚ ਯਦਿ ਸਚਿਤ੍ਤਕਤਂ ਸਮਾਨਂ. ਸੁਰਾਪਾਨਂ ਵਿਯ ਇਤਰਾਨਿਪਿ ਚਤ੍ਤਾਰਿ ਅਜਾਨਨ੍ਤੇਨਾਪਿ ਅਰਿਯਸਾਵਕੇਨ ਨ ਕਤ੍ਤਬ੍ਬਾਨਿ ਸਿਯੁਂ, ਤਥਾ ਚ ਅਜਾਨਨ੍ਤਾਨਂ ਅਰਿਯਾਨਂ ਕੁਸਲਾਬ੍ਯਾਕਤਚਿਤ੍ਤੇਹਿਪਿ ਵਿਰਮਣਪਰਮਾਰਣਪਰਸਨ੍ਤਕਗਹਣਾਦੀਸੁ ਕਾਯਵਚੀਪਵਤ੍ਤਿ ਨ ਸਮ੍ਪਜ੍ਜੇਯ੍ਯ, ਨੋ ਚੇ ਸਮ੍ਪਜ੍ਜਤਿ, ਚਕ੍ਖੁਪਾਲਤ੍ਥੇਰਸ੍ਸ ਚਙ੍ਕਮਨੇਨ ਪਾਣਵਿਯੋਗਸ੍ਸ, ਉਪ੍ਪਲਵਣ੍ਣਤ੍ਥੇਰਿਯਾ ਬਲਕ੍ਕਾਰੇਨ ਮਗ੍ਗੇਨਮਗ੍ਗਫੁਸਨਸ੍ਸ ਚ ਪਵਤ੍ਤਤ੍ਤਾ. ਤਸ੍ਮਾ ਸੁਰਾਪਾਨਸ੍ਸ ਅਚਿਤ੍ਤਕਪਕ੍ਖੇਪਿ ਅਕੁਸਲੇਨੇਵ ਪਾਤਬ੍ਬਤਾਯ ਸੁਰਾ ਅਰਿਯਾਨਂ ਪਰਗਲਂ ਨ ਪਵਿਸਤੀਤਿ ਵਿਸੇਸੇਤ੍ਵਾ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਨਨੁ ਵਤ੍ਥੁਂ ਜਾਨਨ੍ਤਸ੍ਸੇਵ ਸਬ੍ਬੇ ਕਮ੍ਮਪਥਾ ਵੁਤ੍ਤਾਤਿ? ਨ, ਮਿਚ੍ਛਾਦਿਟ੍ਠਿਯਾ ਵਿਪਰੀਤਗ੍ਗਹਣੇਨੇਵ ਪਵਤ੍ਤਤ੍ਤਾ. ਕਥਞ੍ਹਿ ਨਾਮ ਅਸਬ੍ਬਞ੍ਞੁਂ ਸਬ੍ਬਞ੍ਞੁਤੋ, ਅਨਿਚ੍ਚਾਦਿਂ ਨਿਚ੍ਚਾਦਿਤੋ ਚ ਗਹਣਨ੍ਤੀ ਦਿਟ੍ਠਿ ਵਤ੍ਥੁਂ ਵਿਜਾਨਾਤਿ. ਯਦਿ ਹਿ ਜਾਨੇਯ੍ਯ, ਮਿਚ੍ਛਾਦਿਟ੍ਠਿਯੇਵ ਨ ਸਿਯਾ. ਸਾ ਚ ਕਮ੍ਮਪਥੇਸੁ ਗਣਿਤਾਤਿ ਕੁਤੋ ਜਾਨਨ੍ਤਸ੍ਸੇਵ ਕਮ੍ਮਪਥਪ੍ਪਵਤ੍ਤਿਨਿਯਮੋ. ਅਥ ਸਬ੍ਬਞ੍ਞੁਂ ਸਬ੍ਬਞ੍ਞੂਤਿ ਗਣ੍ਹਨ੍ਤੀਪਿ ‘‘ਅਯਂ ਸਤ੍ਤੋ’’ਤਿ ਤਸ੍ਸ ਸਰੂਪਗ੍ਗਹਣਤੋ ਦਿਟ੍ਠਿਪਿ ਵਤ੍ਥੁਂ ਵਿਜਾਨਾਤੀਤਿ ਚੇ? ਨ, ਸੁਰਾਪਾਨਸ੍ਸਪਿ ‘‘ਅਯਂ ਨ ਸੁਰਾ’’ਤਿ ਸਰੂਪਗ੍ਗਹਣਸ੍ਸ ਸਮਾਨਤ੍ਤਾ. ‘‘ਅਯ’’ਨ੍ਤਿ ਚ ਵਤ੍ਥੁਪਰਾਮਸਨੇਪਿ ‘‘ਸੁਰਾ’’ਤਿ ਵਿਸੇਸਵਿਜਾਨਨਾਭਾਵਾ ਨ ਜਾਨਾਤੀਤਿ ਚੇ? ‘‘ਅਯ’’ਨ੍ਤਿ ਪੁਗ੍ਗਲਤ੍ਤਂ ਜਾਨਨ੍ਤੀਪਿ ‘‘ਅਸਬ੍ਬਞ੍ਞੂ’’ਤਿਪਿ ਵਿਸੇਸਜਾਨਨਾਭਾਵਾ ਦਿਟ੍ਠਿਪਿ ਵਤ੍ਥੁਂ ਨ ਜਾਨਾਤੀਤਿ ਸਮਾਨਮੇਵ. ਏਵਞ੍ਹਿ ਤੇਸਂ ¶ ਬੁਦ੍ਧਾਤਿ ਅਹਿਤੋਤਿ ਅਹਿਤਂ ਵਾ ਪੂਰਣਕਸ੍ਸਪਾਦਿਂ ਹਿਤੋ ਪਟਿਘਸ੍ਸ ਵਾ ਅਨੁਨਯਸ੍ਸ ਵਾ ਉਪ੍ਪਾਦਨੇਪਿ ਏਸੇਵ ਨਯੋ. ਵਿਪਲ੍ਲਾਸਪੁਬ੍ਬਕਞ੍ਹਿ ਸਬ੍ਬਂ ਅਕੁਸਲਂ.

ਅਪਿਚ ਸੁਰਾਯ ਪੀਯਮਾਨਾਯ ਨਿਯਮੇਨ ਅਕੁਸਲੁਪ੍ਪਾਦਨਂ ਸਭਾਵੋ ਪੀਤਾਯ ਵਿਯ. ਖੀਰਾਦਿਸਞ੍ਞਾਯ ਪੀਤਸੁਰਸ੍ਸ ਪੁਗ੍ਗਲਸ੍ਸ ਮਾਤੁਭਗਿਨਿਆਦੀਸੁਪਿ ਰਾਗਦੋਸਾਦਿਅਕੁਸਲਪ੍ਪਬਨ੍ਧੋ ਵਤ੍ਥੁਸਭਾਵੇਨੇਵ ਉਪ੍ਪਜ੍ਜਤਿ, ਏਵਂ ਪੀਯਮਾਨਕ੍ਖਣੇਪਿ ਤਿਖਿਣੋ ਰਾਗੋ ਉਪ੍ਪਜ੍ਜਤੇਵ, ਤੇਨੇਵ ਸਾਗਤਤ੍ਥੇਰਸ੍ਸ ਅਜਾਨਿਤ੍ਵਾ ਪਿਵਨਕਾਲੇ ਪਞ੍ਚਾਭਿਞ੍ਞਾਦਿਝਾਨਪਰਿਹਾਨਿ, ਪਚ੍ਛਾ ਚ ਬੁਦ੍ਧਾਦੀਸੁ ਅਗਾਰਵਾਦਿਅਕੁਸਲਪ੍ਪਬਨ੍ਧੋ ਯਾਵ ਸੁਰਾਵਿਗਮਾ ਪਵਤ੍ਤਿਤ੍ਥ. ਤੇਨੇਵ ਭਗਵਾਪਿ ਤਸ੍ਸ ਅਗਾਰਵਾਦਿਅਕਉਸਲਪ੍ਪਵਤ੍ਤਿਦਸ੍ਸਨਮੁਖੇਨ ਸੁਰਾਦੋਸਂ ਪਕਾਸੇਤ੍ਵਾ ਸਿਕ੍ਖਾਪਦਂ ਪਞ੍ਞਪੇਸਿ. ਨ ਹਿ ਪਞ੍ਚਨੀਵਰਣੁਪ੍ਪਤ੍ਤਿਂ ਵਿਨਾ ਝਾਨਪਰਿਹਾਨਿ ਹੋਤਿ. ਤਸ੍ਮਾ ਅਜਾਨਨ੍ਤਸ੍ਸਾਪਿ ਸੁਰਾ ਪੀਯਮਾਨਾ ਪੀਤਾ ਚ ਅਤ੍ਤਨੋ ਸਭਾਵੇਨੇਵ ਅਕੁਸਲੁਪ੍ਪਾਦਿਕਾਤਿ ਅਯਮਤ੍ਥੋ ਸਾਗਤਤ੍ਥੇਰਸ੍ਸ ਝਾਨਪਰਿਹਾਨਿਯਾ ਅਨ੍ਵਯਤੋਪਿ, ਅਰਿਯਾਨਂ ਕਿਲੇਸਾਭਾਵੇਨ ਮੁਖੇਨ ਸੁਰਾਯ ਅਪ੍ਪਵੇਸਸਙ੍ਖਾਤਬ੍ਯਤਿਰੇਕਤੋਪਿ ਸਿਜ੍ਝਤੀਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ, ਏਵਂ ਗਹਣਮੇਵ ਹਿ ਵਿਭਜ੍ਜਵਾਦੀਮਤਾਨੁਸਾਰਂ.

ਯਂ ਪਨ ‘‘ਜਾਨਿਤ੍ਵਾ ਪਿਵਨ੍ਤਸ੍ਸੇਵ ਅਕੁਸਲ’’ਨ੍ਤਿ ਗਹਣਂ, ਤਂ ਭਿਨ੍ਨਲਦ੍ਧਿਕਾਨਂ ਅਭਯਗਿਰਿਕਾਦੀਨਮੇਵ ¶ ਮਤਂ, ਤਂ ਪਨ ਗਣ੍ਠਿਪਦਕਾਰਕਾਦੀਹਿ ‘‘ਪਰਵਾਦੋ’’ਤਿ ਅਜਾਨਨ੍ਤੇਹਿ ਅਤ੍ਤਨੋ ਮਤਿਯਾ ਸਂਸਨ੍ਦਿਤ੍ਵਾ ਲਿਖਿਤਂ ਵਿਭਜ੍ਜਵਾਦੀਮਣ੍ਡਲਮ੍ਪਿ ਪਵਿਸਿਤ੍ਵਾ ਯਾਵਜ੍ਜਤਨਾ ਸਾਸਨਂ ਦੂਸੇਤਿ, ਪੁਰਾਪਿ ਕਿਰ ਇਮਸ੍ਮਿਮ੍ਪਿ ਦਮਿਲ਼ਰਟ੍ਠੇ ਕੋਚਿ ਭਿਨ੍ਨਲਦ੍ਧਿਕੋ ਨਾਗਸੇਨੋ ਨਾਮ ਥੇਰੋ ਕੁਣ੍ਡਲਕੇਸੀਵਤ੍ਥੁਂ ਪਰਵਾਦਮਥਨਨਯਦਸ੍ਸਨਤ੍ਥਂ ਦਮਿਲ਼ਕਬ੍ਬਰੂਪੇਨ ਕਾਰੇਨ੍ਤੋ ‘‘ਇਮਂ ਸੁਰਾਪਾਨਸ੍ਸ ਜਾਨਿਤ੍ਵਾਵ ਪਿਵਨੇ ਅਕੁਸਲਨਯਂ, ਅਞ੍ਞਞ੍ਚ ਦੇਸਕਾਲਾਦਿਭੇਦੇਨ ਅਨਨ੍ਤਮ੍ਪਿ ਞੇਯ੍ਯਂ ਸਬ੍ਬਞ੍ਞੁਤਞ੍ਞਾਣਂ ਸਲਕ੍ਖਣਵਸੇਨੇਵ ਞਾਤੁਂ ਨ ਸਕ੍ਕੋਤਿ ਞਾਣੇਨ ਪਰਿਚ੍ਛਿਨ੍ਨਤ੍ਤੇਨ ਞੇਯ੍ਯਸ੍ਸ ਅਨਨ੍ਤਤ੍ਤਹਾਨਿਪ੍ਪਸਙ੍ਗਤੋ. ਅਨਿਚ੍ਚਾਦਿਸਾਮਞ੍ਞਲਕ੍ਖਣਵਸੇਨੇਵ ਪਨ ਞਾਤੁਂ ਸਕ੍ਕੋਤੀ’’ਤਿ ਚ, ‘‘ਪਰਮਤ੍ਥਧਮ੍ਮੇਸੁ ਨਾਮਰੂਪਨ੍ਤਿਆਦਿਭੇਦੋ ਵਿਯ ਪੁਗ੍ਗਲਾਦਿਸਮ੍ਮੁਤਿਪਿ ਵਿਸੁਂ ਵਤ੍ਥੁਭੇਦੋ ਏਵਾ’’ਤਿ ਚ ਏਵਮਾਦਿਕਂ ਬਹੁਂ ਵਿਪਰੀਤਤ੍ਥਨਯਂ ਕਬ੍ਬਾਕਾਰਸ੍ਸ ਕਵਿਨੋ ਉਪਦਿਸਿਤ੍ਵਾ ਤਸ੍ਮਿਂ ਪਬਨ੍ਧੇ ਕਾਰਣਾਭਾਸੇਹਿ ਸਤਿਂ ਸਮ੍ਮੋਹੇਤ੍ਵਾ ਪਬਨ੍ਧਾਪੇਸਿ, ਤਞ੍ਚ ਕਬ੍ਬਂ ਨਿਸ੍ਸਾਯ ਇਮਂ ਭਿਨ੍ਨਲਦ੍ਧਿਕਮਤਂ ਇਧ ਵਿਭਜ੍ਜਵਾਦੀਮਤੇ ¶ ਸਮ੍ਮਿਸ੍ਸਂ ਚਿਰਂ ਪਵਤ੍ਤਿਤ੍ਥ. ਤਂ ਪਨ ਪਚ੍ਛਾ ਆਚਰਿਯਬੁਦ੍ਧਪ੍ਪਿਯਮਹਾਥੇਰੇਨ ਬਾਹਿਰਬ੍ਭਰਿਕਂ ਦਿਟ੍ਠਿਜਾਲਂ ਵਿਘਾਟੇਤ੍ਵਾ ਇਧ ਪਰਿਸੁਦ੍ਧਂ ਸਾਸਨਂ ਪਤਿਟ੍ਠਾਪੇਨ੍ਤੇਨ ਸੋਧਿਤਮ੍ਪਿ ਸਾਰਤ੍ਥਦੀਪਨਿਯਾ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੨.੪੨) ਵਿਨਯਟੀਕਾਯ ਸੁਰਾਪਾਨਸ੍ਸ ਸਚਿਤ੍ਤਕਪਕ੍ਖੇਯੇਵ ਚਿਤ੍ਤਂ ਅਕੁਸਲਨ੍ਤਿ ਸਮਤ੍ਥਨਵਚਨਂ ਨਿਸ੍ਸਾਯ ਕੇਹਿਚਿ ਵਿਪਲ੍ਲਤ੍ਤਚਿਤ੍ਤੇਹਿ ਪੁਨ ਉਕ੍ਖਿਤ੍ਤਸਿਰਂ ਜਾਤਂ, ਤਞ੍ਚ ਮਹਾਥੇਰੇਹਿ ਵਿਨਿਚ੍ਛਿਨਿਤ੍ਵਾ ਗਾਰਯ੍ਹਵਾਦਂ ਕਤ੍ਵਾ ਮਦ੍ਦਿਤ੍ਵਾ ਲਦ੍ਧਿਗਾਹਕੇ ਚ ਭਿਕ੍ਖੂ ਵਿਯੋਜੇਤ੍ਵਾ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਚਿਰੇਨੇਵ ਵੂਪਸਮਿਤਂ. ਤੇਨੇਵੇਤ੍ਥ ਮਯਂ ਏਵਂ ਵਿਤ੍ਥਾਰਤੋ ਇਦਂ ਪਟਿਕ੍ਖਿਪਿਮ੍ਹ ‘‘ਮਾ ਅਞ੍ਞੇਪਿ ਵਿਭਜ੍ਜਵਾਦਿਨੋ ਅਯਂ ਲਦ੍ਧਿ ਦੂਸੇਸੀ’’ਤਿ. ਤਸ੍ਮਾ ਇਧ ਵੁਤ੍ਤਾਨਿ ਅਵੁਤ੍ਤਾਨਿ ਚ ਕਾਰਣਾਨਿ ਸੁਟ੍ਠੁ ਸਲ੍ਲਕ੍ਖੇਤ੍ਵਾ ਯਥਾ ਆਗਮਵਿਰੋਧੋ ਨ ਹੋਤਿ, ਤਥਾ ਅਤ੍ਥੋ ਗਹੇਤਬ੍ਬੋ.

ਸੇਸਨ੍ਤਿ ਯਸ੍ਸ ਵਤ੍ਥੁਵਿਜਾਨਨਚਿਤ੍ਤੇਨ ਸਚਿਤ੍ਤਕਪਕ੍ਖੇਪਿ ਚਿਤ੍ਤਂ ਅਕੁਸਲਮੇਵਾਤਿ ਨਿਯਮੋ ਨਤ੍ਥਿ, ਤਂ ਸਬ੍ਬਨ੍ਤਿ ਅਤ੍ਥੋ. ਰੁਨ੍ਧਨ੍ਤੀਤਿ ‘‘ਤਿਰਚ੍ਛਾਨਗਤਿਤ੍ਥਿਯਾ ਦੋਸੋ ਨਤ੍ਥੀ’’ਤਿਆਦਿਨਾ ਅਨਾਪਤ੍ਤਿਯਾ ਲੇਸਗ੍ਗਹਣਂ ਨਿਵਾਰੇਨ੍ਤੀ. ਦ੍ਵਾਰਂ ਪਿਦਹਨ੍ਤੀਤਿ ‘‘ਤਞ੍ਚ ਖੋ ਮਨੁਸ੍ਸਿਤ੍ਥਿਯਾ’’ਤਿਆਦਿਨਾ (ਪਾਰਾ. ੪੧) ਲੇਸਗ੍ਗਹਣਸ੍ਸ ਕਾਰਣਸਙ੍ਖਾਤਂ ਦ੍ਵਾਰਂ ਪਿਦਹਨ੍ਤੀ. ਸੋਤਂ ਪਚ੍ਛਿਨ੍ਦਮਾਨਾਤਿ ਤਦੁਭਯਲੇਸਗ੍ਗਹਣਦ੍ਵਾਰਾਨਂ ਵਸੇਨ ਅਵਿਚ੍ਛਿਨ੍ਨਂ ਵੀਤਿਕ੍ਕਮਸੋਤਂ ਪਚ੍ਛਿਨ੍ਦਮਾਨਾ. ਗਾਲ਼੍ਹਤਰਂ ਕਰੋਨ੍ਤੀਤਿ ਯਥਾਵੁਤ੍ਤੇਹਿ ਕਾਰਣੇਹਿ ਪਠਮਪਞ੍ਞਤ੍ਤਿਸਿਦ੍ਧਂ ਆਪਤ੍ਤਿਞ੍ਞੇਵ ਦਲ਼੍ਹਂ ਕਰੋਨ੍ਤੀ, ਅਨਾਪਤ੍ਤਿਯਾ ਓਕਾਸਂ ਅਦਦਮਾਨਾਤਿ ਅਤ੍ਥੋ. ਸਾ ਚ ਯਸ੍ਮਾ ਵੀਤਿਕ੍ਕਮਾਭਾਵੇ, ਅਵਿਸਯਤਾਯ ਅਬ੍ਬੋਹਾਰਿਕੇ ਵੀਤਿਕ੍ਕਮੇ ਚ ਲੋਕਵਜ੍ਜੇਪਿ ਸਿਥਿਲਂ ਕਰੋਨ੍ਤੀ ਉਪ੍ਪਜ੍ਜਤਿ, ਤਸ੍ਮਾ ਤਥਾ ਉਪ੍ਪਤ੍ਤਿਂ ਉਪ੍ਪਤ੍ਤਿਕਾਰਣਞ੍ਚ ਦਸ੍ਸੇਨ੍ਤੋ ਆਹ ਅਞ੍ਞਤ੍ਰ ਅਧਿਮਾਨਾਤਿਆਦਿ. ਅਞ੍ਞਤ੍ਰ ਅਧਿਮਾਨਾਤਿ ਇਮਿਸ੍ਸਾ ਅਨੁਪਞ੍ਞਤ੍ਤਿਯਾ ‘‘ਵੀਤਿਕ੍ਕਮਾਭਾਵਾ’’ਤਿ ਕਾਰਣਂ ਵੁਤ੍ਤਂ. ਅਞ੍ਞਤ੍ਰ ਸੁਪਿਨਨ੍ਤਾਤਿ ਇਮਿਸ੍ਸਾ ‘‘ਅਬ੍ਬੋਹਾਰਿਕਤ੍ਤਾ’’ਤਿ ਕਾਰਣਂ ਵੁਤ੍ਤਂ. ਤਤ੍ਥ ਵੀਤਿਕ੍ਕਮਾਭਾਵਾਤਿ ਪਾਪਿਚ੍ਛਾਯ ਅਵਿਜ੍ਜਮਾਨਸ੍ਸ ਉਤ੍ਤਰਿਮਨੁਸ੍ਸਧਮ੍ਮਸ੍ਸ ਵਿਜ੍ਜਮਾਨਤੋ ¶ ਪਕਾਸਨਵਸਪ੍ਪਵਤ੍ਤਵਿਸਂਵਾਦਨਾਧਿਪ੍ਪਾਯਸਙ੍ਖਾਤਸ੍ਸ ਵੀਤਿਕ੍ਕਮਸ੍ਸ ਅਭਾਵਤੋ. ਅਧਿਮਾਨਿਕਸ੍ਸ ਹਿ ਅਨਧਿਗਤੇ ਅਧਿਗਤਸਞ੍ਞਿਤਾਯ ਯਥਾਵੁਤ੍ਤਵੀਤਿਕ੍ਕਮੋ ਨਤ੍ਥਿ. ਅਬ੍ਬੋਹਾਰਿਕਤ੍ਤਾਤਿ ‘‘ਅਤ੍ਥੇਸਾ, ਭਿਕ੍ਖਵੇ, ਚੇਤਨਾ, ਸਾ ਚ ਖੋ ਅਬ੍ਬੋਹਾਰਿਕਾ’’ਤਿ (ਪਾਰਾ. ੨੩੫) ਵਚਨਤੋ ਮੋਚਨਸ੍ਸਾਦਚੇਤਨਾਯ ਉਪਕ੍ਕਮਨਸ੍ਸ ਚ ਵਿਜ੍ਜਮਾਨਤ੍ਤੇਪਿ ਥਿਨਮਿਦ੍ਧੇਨ ਅਭਿਭੂਤਤਾਯ ¶ ਅਵਸਤ੍ਤੇਨ ਅਬ੍ਬੋਹਾਰਿਕਤ੍ਤਾ, ਆਪਤ੍ਤਿਕਾਰਣਵੋਹਾਰਾਭਾਵਾਤਿ ਅਤ੍ਥੋ. ਵਾ-ਸਦ੍ਦੋ ਚੇਤ੍ਥ ਸਮੁਚ੍ਚਯਤ੍ਥੋ ਦਟ੍ਠਬ੍ਬੋ, ‘‘ਅਬ੍ਬੋਹਾਰਿਕਤ੍ਤਾ ਚਾ’’ਤਿ ਵਾ ਪਾਠੋ. ਵੁਤ੍ਤਾਤਿ ਦੁਵਿਧਾਪਿ ਚੇਸਾ ਅਨੁਪਞ੍ਞਤ੍ਤਿ ਅਨਾਪਤ੍ਤਿਕਰਾ ਵੁਤ੍ਤਾਤਿ ਅਧਿਪ੍ਪਾਯੋ.

ਅਕਤੇ ਵੀਤਿਕ੍ਕਮੇਤਿ ਆਪਦਾਸੁਪਿ ਭਿਕ੍ਖੂਹਿ ਸਿਕ੍ਖਾਪਦਵੀਤਿਕ੍ਕਮੇ ਅਕਤੇ, ਕੁਕ੍ਕੁਚ੍ਚਾ ਨ ਭੁਞ੍ਜਿਂਸੂਤਿਆਦੀਸੁ ਵਿਯ ਵੀਤਿਕ੍ਕਮਂ ਅਕਤ੍ਵਾ ਭਿਕ੍ਖੂਹਿ ਅਤ੍ਤਨੋ ਦੁਕ੍ਖੁਪ੍ਪਤ੍ਤਿਯਾ ਆਰੋਚਿਤਾਯਾਤਿ ਅਤ੍ਥੋ. ਸਿਥਿਲਂ ਕਰੋਨ੍ਤੀਤਿ ਪਠਮਂ ਸਾਮਞ੍ਞਤੋ ਬਦ੍ਧਸਿਕ੍ਖਾਪਦਂ ਮੋਚੇਤ੍ਵਾ ਅਤ੍ਤਨੋ ਵਿਸਯੇ ਅਨਾਪਤ੍ਤਿਕਰਣਵਸੇਨ ਸਿਥਿਲਂ ਕਰੋਨ੍ਤੀ. ਦ੍ਵਾਰਂ ਦਦਮਾਨਾਤਿ ਅਨਾਪਤ੍ਤਿਯਾ ਦ੍ਵਾਰਂ ਦਦਮਾਨਾ. ਅਪਰਾਪਰਮ੍ਪਿ ਅਨਾਪਤ੍ਤਿਂ ਕੁਰੁਮਾਨਾਤਿ ਦਿਨ੍ਨੇਨ ਤੇਨ ਦ੍ਵਾਰੇਨ ਉਪਰੂਪਰਿ ਅਨਾਪਤ੍ਤਿਭਾਵਂ ਦੀਪੇਨ੍ਤੀ. ਪਞ੍ਞਤ੍ਤੇਪਿ ਸਿਕ੍ਖਾਪਦੇ ਉਦਾਯਿਨਾ ‘‘ਮੁਹੁਤ੍ਤਿਕਾਯ ਵੇਸਿਯਾ ਨ ਦੋਸੋ’’ਤਿ ਲੇਸੇਨ ਵੀਤਿਕ੍ਕਮਿਤ੍ਵਾ ਸਞ੍ਚਰਿਤ੍ਤਾਪਜ੍ਜਨਵਤ੍ਥੁਸ੍ਮਿਂ (ਪਾਰਾ. ੨੯੬ ਆਦਯੋ) ਪਞ੍ਞਤ੍ਤਤ੍ਤਾ ‘‘ਕਤੇ ਵੀਤਿਕ੍ਕਮੇ’’ਤਿ ਵੁਤ੍ਤਂ. ਪਞ੍ਞਤ੍ਤਿਗਤਿਕਾਤਿ ਅਤ੍ਥਤੋ ਮੂਲਪਞ੍ਞਤ੍ਤਿਯੇਵਾਤਿ ਅਧਿਪ੍ਪਾਯੋ.

ਮਕ੍ਕਟੀਵਤ੍ਥੁਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਸਨ੍ਥਤਭਾਣਵਾਰੋ

ਵਜ੍ਜਿਪੁਤ੍ਤਕਵਤ੍ਥੁਕਥਾਵਣ੍ਣਨਾ

੪੩-੪੪. ਵਜ੍ਜਿਪੁਤ੍ਤਕਵਤ੍ਥੁਕਥਾਯ ਪਾਲ਼ਿਯਂ ‘‘ਵੇਸਾਲਿਕਾ…ਪੇ… ਮੇਥੁਨਂ ਧਮ੍ਮਂ ਪਟਿਸੇਵਿਂਸੂ’’ਤਿ ਏਤ੍ਥ ਤੇ ਞਾਤਿਕੁਲਂ ਗਨ੍ਤ੍ਵਾ ਗਿਹਿਲਿਙ੍ਗਂ ਗਹੇਤ੍ਵਾ ‘‘ਗਿਹਿਭੂਤਾ ਮਯ’’ਨ੍ਤਿ ਸਞ੍ਞਾਯ ਮੇਥੁਨਂ ਪਟਿਸੇਵਿਂਸੂਤਿ ਗਹੇਤਬ੍ਬਂ, ਤੇਨਾਹ ਞਾਤਿਬ੍ਯਸਨੇਨਪਿ ਫੁਟ੍ਠਾਤਿਆਦਿ. ਞਾਤੀਨਂ ਵਿਨਾਸੋ ਰਾਜਦਣ੍ਡਾਦਿਕਾਰਣੇਨ ਹੋਤੀਤਿ ਆਹ ਰਾਜਦਣ੍ਡਇਚ੍ਚਾਦਿ. ਧਞ੍ਞਹਿਰਞ੍ਞਦਾਸਿਦਾਸਗੋਮਹਿਂਸਾਦਿਧਨਾਨਿ ਭੋਗਾ ਨਾਮ, ਤੇਸਮ੍ਪਿ ਰਾਜਦਣ੍ਡਾਦਿਨਾਵ ਵਿਨਾਸੋਤਿ ਆਹ ‘‘ਏਸ ਨਯੋ ਦੁਤਿਯਪਦੇਪੀ’’ਤਿ. ਨ ਸਬ੍ਬਞ੍ਞੁਬੁਦ੍ਧੋਤਿਆਦਿਨਾ ¶ ਤੀਸੁ ਵਤ੍ਥੂਸੁ ਅਪ੍ਪਸਨ੍ਨਾਵ ਸਾਸਨੇ ਅਭਬ੍ਬਾਤਿ ਸਞ੍ਞਾਯ ਅਤ੍ਤਨੋ ਭਬ੍ਬਤਂ ਪਕਾਸੇਨ੍ਤਾ ਨ ਮਯਨ੍ਤਿਆਦਿਮਾਹਂਸੂਤਿ ਵੇਦਿਤਬ੍ਬਂ. ‘‘ਅਟ੍ਠਤਿਂਸਾਰਮ੍ਮਣੇਸੂ’’ਤਿ ਪਾਲ਼ਿਯਂ ਅਨਾਗਤੇ ਆਲੋਕਾਕਾਸਕਸਿਣੇ ਵਜ੍ਜੇਤ੍ਵਾ ਵੁਤ੍ਤਂ, ਤੇਹਿ ਪਨ ¶ ਸਦ੍ਧਿਂ ਚਤ੍ਤਾਲੀਸ ਹੋਨ੍ਤਿ. ਵਿਭਤ੍ਤਾ ਕੁਸਲਾ ਧਮ੍ਮਾਤਿ ‘‘ਇਮਸ੍ਮਿਂ ਆਰਮ੍ਮਣੇ ਇਦਂ ਹੋਤੀ’’ਤਿ ਵਿਭਾਗਸੋ ਦਸ੍ਸਿਤਾ ਸਉਪਚਾਰਜ੍ਝਾਨਾ ਮਹਗ੍ਗਤਕੁਸਲਾ ਧਮ੍ਮਾ. ਗਿਹਿਪਲਿਬੋਧਨ੍ਤਿ ਸਹਸੋਕਿਤਾਦਿਵਸੇਨ ਗਿਹੀਸੁ ਬ੍ਯਾਵਟਤਂ. ਆਵਾਸਪਲਿਬੋਧਨ੍ਤਿ ਸੇਨਾਸਨੇਸੁ ਨਵਕਮ੍ਮਾਦਿਵਸੇਨ ਨਿਚ੍ਚਬ੍ਯਾਵਟਤਂ. ਦੁਪ੍ਪਰਿਚ੍ਚਾਗਾਨਂ ਇਮੇਸਂ ਦ੍ਵਿਨ੍ਨਂ ਪਲਿਬੋਧਾਨਂ ਵਸੇਨ ਸਬ੍ਬੇਪਿ ਪਲਿਬੋਧਾ ਸਙ੍ਗਹਿਤਾ ਏਵਾਤਿ ਵੇਦਿਤਬ੍ਬਂ.

ਯੇਨਾਤਿ ਕਾਰਣੇਨ. ਅਸਂਵਾਸੋਤਿ ਇਦਂ ਤਸ੍ਮਿਂ ਅਤ੍ਤਭਾਵੇ ਕੇਨਚਿਪਿ ਪਰਿਯਾਯੇਨ ਭਿਕ੍ਖੁ ਹੁਤ੍ਵਾ ਭਿਕ੍ਖੂਹਿ ਸਦ੍ਧਿਂ ਸਂਵਾਸਂ ਨਾਰਹਤੀਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ‘‘ਅਸਂਵਾਸੋ’’ਤਿ. ਪਞ੍ਞਤ੍ਤਂ ਸਮੂਹਨੇਯ੍ਯਾਤਿ ‘‘ਸੋ ਆਗਤੋ ਨ ਪਬ੍ਬਾਜੇਤਬ੍ਬੋ’’ਤਿ ਅਵਤ੍ਵਾ ‘‘ਨ ਉਪਸਮ੍ਪਾਦੇਤਬ੍ਬੋ’’ਤਿ ਏਤ੍ਤਕਸ੍ਸੇਵ ਵੁਤ੍ਤਤ੍ਤਾ ਪਾਰਾਜਿਕਸ੍ਸ ਸਾਮਣੇਰਭੂਮਿ ਅਨੁਞ੍ਞਾਤਾਤਿ ਵਿਞ੍ਞਾਯਤਿ, ਤੇਨਾਹ ਸਾਮਣੇਰਭੂਮਿਯਂ ਪਨ ਠਿਤੋਤਿਆਦਿ. ‘‘ਯੋ ਪਨ ਭਿਕ੍ਖੂ’’ਤਿ ਵੁਤ੍ਤਤ੍ਤਾ (ਪਾਰਾ. ੩੯) ਪਚ੍ਚਕ੍ਖਾਤਸਿਕ੍ਖੋ ਯਸ੍ਮਾ ਭਿਕ੍ਖੁ ਨ ਹੋਤਿ, ਮੇਥੁਨਸੇਵਨੇ ਚ ਪਾਰਾਜਿਕਂ ਨਾਪਜ੍ਜਤਿ, ਤਸ੍ਮਾਸ੍ਸ ‘‘ਆਗਤੋ ਉਪਸਮ੍ਪਾਦੇਤਬ੍ਬੋ’’ਤਿ ਉਪਸਮ੍ਪਦਂ ਅਨੁਜਾਨਨ੍ਤੋ ਪਾਰਾਜਿਕਂ ਨ ਸਮੂਹਨਤਿ ਨਾਮ, ਤੇਨਾਹ ‘‘ਭਿਕ੍ਖੁਭਾਵੇ ਠਤ੍ਵਾ ਅਵਿਪਨ੍ਨਸੀਲਤਾਯਾ’’ਤਿ. ਉਤ੍ਤਮਤ੍ਥਂ ਅਰਹਤ੍ਤਂ, ਨਿਬ੍ਬਾਨਮੇਵ ਵਾ.

ਚਤੁਬ੍ਬਿਧਵਿਨਯਾਦਿਕਥਾਵਣ੍ਣਨਾ

੪੫. ਨੀਹਰਿਤ੍ਵਾਤਿ ਪਾਲ਼ਿਤੋ ਉਦ੍ਧਰਿਤ੍ਵਾ, ਤਥਾ ਹਿ ‘‘ਪਞ੍ਚਹੁਪਾਲਿ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨਾਨੁਯੁਞ੍ਜਿਤਬ੍ਬਂ. ਕਤਮੇਹਿ ਪਞ੍ਚਹਿ? ਸੁਤ੍ਤਂ ਨ ਜਾਨਾਤਿ, ਸੁਤ੍ਤਾਨੁਲੋਮਂ ਨ ਜਾਨਾਤੀ’’ਤਿਆਦਿਪਾਲ਼ਿਤੋ ਸੁਤ੍ਤਂ ਸੁਤ੍ਤਾਨੁਲੋਮਞ੍ਚ ਨੀਹਰਿਂਸੁ. ‘‘ਅਨਾਪਤ੍ਤਿ ਏਵਂ ਅਮ੍ਹਾਕਂ ਆਚਰਿਯਾਨਂ ਉਗ੍ਗਹੋ ਪਰਿਪੁਚ੍ਛਾਤਿ ਭਣਤੀ’’ਤਿ ਏਵਮਾਦਿਤੋ ਆਚਰਿਯਵਾਦਂ. ‘‘ਆਯਸ੍ਮਾ ਉਪਾਲਿ ਏਵਮਾਹ – ‘ਅਨਾਪਤ੍ਤਿ, ਆਵੁਸੋ, ਸੁਪਿਨਨ੍ਤੇਨਾ’ਤਿ’’ ਏਵਮਾਦਿਤੋ ਅਤ੍ਤਨੋ ਮਤਿਂ ਨੀਹਰਿਂਸੁ, ਸਾ ਚ ਥੇਰਸ੍ਸ ਅਤ੍ਤਨੋਮਤਿ ਸੁਤ੍ਤੇਨ ਸਙ੍ਗਹਿਤਤ੍ਤਾ ਸੁਤ੍ਤਂ ਜਾਤਂ, ਏਵਮਞ੍ਞਾਪਿ ਸੁਤ੍ਤਾਦੀਹਿ ਸਙ੍ਗਹਿਤਾਵ ਗਹੇਤਬ੍ਬਾ, ਨੇਤਰਾਤਿ ਵੇਦਿਤਬ੍ਬਂ. ਅਥ ਵਾ ਨੀਹਰਿਤ੍ਵਾਤਿ ਵਿਭਜਿਤ੍ਵਾ ਸਾਟ੍ਠਕਥਂ ਸਕਲਂ ਵਿਨਯਪਿਟਕਂ ਸੁਤ੍ਤਾਦੀਸੁ ਚਤੂਸੁ ਪਦੇਸੇਸੁ ਪਕ੍ਖਿਪਿਤ੍ਵਾ ਚਤੁਧਾ ਵਿਭਜਿਤ੍ਵਾ ਵਿਨਯਂ ਪਕਾਸੇਸੁਂ ¶ ਤਬ੍ਬਿਨਿਮੁਤ੍ਤਸ੍ਸ ਅਭਾਵਾਤਿ ਅਧਿਪ੍ਪਾਯੋ. ਵੁਤ੍ਤਨ੍ਤਿ ਨਾਗਸੇਨਤ੍ਥੇਰੇਨ ਮਿਲਿਨ੍ਦਪਞ੍ਹੇ ਵੁਤ੍ਤਂ. ਕਣ੍ਠਾਦਿਵਣ੍ਣੁਪ੍ਪਤ੍ਤਿਟ੍ਠਾਨਕਰਣਾਦੀਹਿ ਆਹਰਿਤ੍ਵਾ ਅਤ੍ਤਨੋ ਵਚੀਵਿਞ੍ਞਤ੍ਤਿਯਾਵ ਭਾਸਿਤਵਚਨਂ ਆਹਚ੍ਚਪਦਂ. ਰਸੋਤਿ ਸਾਰੋ ‘‘ਪਤ੍ਤਰਸੋ’’ਤਿਆਦੀਸੁ (ਧ. ਸ. ੬੨੮-੬੩੦) ਵਿਯ, ਪਟਿਕ੍ਖਿਤ੍ਤਅਨੁਞ੍ਞਾਤਸੁਤ੍ਤਸਾਰੋਤਿ ¶ ਅਤ੍ਥੋ, ਰਸੋਤਿ ਵਾ ਲਕ੍ਖਣਂ ਪਟਿਵਤ੍ਥੁਕਂ ਅਨੁਦ੍ਧਰਿਤ੍ਵਾ ਲਕ੍ਖਣਾਨੁਲੋਮੇਨ ਵੁਤ੍ਤਤ੍ਤਾ. ਧਮ੍ਮਸਙ੍ਗਾਹਕਾਦਿਆਚਰਿਯਵਂਸੇਨ ਆਭਤਾ ਅਟ੍ਠਕਥਾ ਆਚਰਿਯਵਂਸੋਤਿ ਆਹ ‘‘ਆਚਰਿਯਵਂਸੋਤਿ ਆਚਰਿਯਵਾਦੋ’’ਤਿ.

ਵਿਨਯਪਿਟਕੇ ਪਾਲ਼ੀਤਿ ਇਧ ਅਧਿਕਾਰਵਸੇਨ ਵੁਤ੍ਤਂ. ਸੇਸਪਿਟਕੇਸੁਪਿ ਸੁਤ੍ਤਾਦਿਚਤੁਨਯਾ ਯਥਾਨੁਰੂਪਂ ਲਬ੍ਭਨ੍ਤੇਵ. ਮਹਾਪਦੇਸਾਤਿ ਮਹਾਓਕਾਸਾ ਮਹਾਵਿਸਯਾ, ਤੇ ਅਤ੍ਥਤੋ ‘‘ਯਂ, ਭਿਕ੍ਖਵੇ’’ਤਿਆਦਿਪਾਲ਼ਿਵਸੇਨ ਅਕਪ੍ਪਿਯਾਨੁਲੋਮਤੋ ਕਪ੍ਪਿਯਾਨੁਲੋਮਤੋ ਚ ਪੁਗ੍ਗਲੇਹਿ ਨਯਤੋ ਤਥਾ ਤਥਾ ਗਯ੍ਹਮਾਨਾ ਅਤ੍ਥਨਯਾ ਏਵ. ਤੇ ਹਿ ਭਗਵਤਾ ਸਰੂਪਤੋ ਅਵੁਤ੍ਤੇਸੁਪਿ ਪਟਿਕ੍ਖਿਤ੍ਤਾਨੁਲੋਮੇਸੁ, ਅਨੁਞ੍ਞਾਤਾਨੁਲੋਮੇਸੁ ਚ ਸੇਸੇਸੁ ਕਿਚ੍ਚੇਸੁ ਨਿਵਤ੍ਤਿਪਵਤ੍ਤਿਹੇਤੁਤਾਯ ਮਹਾਗੋਚਰਾਤਿ ‘‘ਮਹਾਪਦੇਸਾ’’ਤਿ ਵੁਤ੍ਤਾ, ਨ ਪਨ ‘‘ਯਂ, ਭਿਕ੍ਖਵੇ, ਮਯਾ ਇਦਂ ਨ ਕਪ੍ਪਤੀ’’ਤਿਆਦਿਨਾ ਵੁਤ੍ਤਾ ਸਾਧਿਪ੍ਪਾਯਾ ਪਾਲ਼ਿਯੇਵ ਤਸ੍ਸਾ ਸੁਤ੍ਤੇ ਪਵਿਟ੍ਠਤ੍ਤਾ. ‘‘ਸੁਤ੍ਤਾਨੁਲੋਮਮ੍ਪਿ ਸੁਤ੍ਤੇ ਓਤਾਰੇਤਬ੍ਬਂ…ਪੇ… ਸੁਤ੍ਤਮੇਵ ਬਲਵਤਰ’’ਨ੍ਤਿ (ਪਾਰਾ. ਅਟ੍ਠ. ੧.੪੫) ਹਿ ਵੁਤ੍ਤਂ, ਨ ਹੇਸਾ ਸਾਧਿਪ੍ਪਾਯਾ ਪਾਲ਼ਿ ਸੁਤ੍ਤੇ ਓਤਾਰੇਤਬ੍ਬਾ, ਨ ਗਹੇਤਬ੍ਬਾ ਵਾ ਹੋਤਿ, ਯੇਨਾਯਂ ਸੁਤ੍ਤਾਨੁਲੋਮਂ ਸਿਯਾ. ਤਸ੍ਮਾ ਇਮਂ ਪਾਲ਼ਿਅਧਿਪ੍ਪਾਯਂ ਨਿਸ੍ਸਾਯ ਪੁਗ੍ਗਲੇਹਿ ਗਹਿਤਾ ਯਥਾਵੁਤ੍ਤਅਤ੍ਥਾਵ ਸੁਤ੍ਤਾਨੁਲੋਮਂ. ਤਪ੍ਪਕਾਸਕਤ੍ਤਾ ਪਨ ਅਯਂ ਪਾਲ਼ਿਪਿ ਸੁਤ੍ਤਾਨੁਲੋਮਨ੍ਤਿ ਗਹੇਤਬ੍ਬਂ, ਤੇਨਾਹ ਯੇ ਭਗਵਤਾ ਏਵਂ ਵੁਤ੍ਤਾਤਿਆਦਿ. ਯਂ ਭਿਕ੍ਖਵੇਤਿਆਦਿਪਾਲ਼ਿਨਯੇਨ ਹਿ ਪੁਗ੍ਗਲੇਹਿ ਗਹੇਤਬ੍ਬਾ ਯੇ ਅਕਪ੍ਪਿਯਾਨੁਲੋਮਾਦਯੋ ਅਤ੍ਥਾ ਵੁਤ੍ਤਾ, ਤੇ ਮਹਾਪਦੇਸਾਤਿ ਅਤ੍ਥੋ.

ਭਗਵਤੋ ਪਕਿਣ੍ਣਕਦੇਸਨਾਭੂਤਾ ਚ ਸੁਤ੍ਤਾਨੁਲੋਮਭੂਤਾ ਚ ਅਟ੍ਠਕਥਾ. ਯਸ੍ਮਾ ਧਮ੍ਮਸਙ੍ਗਾਹਕਤ੍ਥੇਰੇਹਿ ਪਾਲ਼ਿਵਣ੍ਣਨਾਕ੍ਕਮੇਨ ਸਙ੍ਗਹੇਤ੍ਵਾ ਵੁਤ੍ਤਾ, ਤਸ੍ਮਾ ‘‘ਆਚਰਿਯਵਾਦੋ’’ਤਿ ਵੁਤ੍ਤਾ, ਏਤੇਨ ਚ ਅਟ੍ਠਕਥਾ ਸੁਤ੍ਤਸੁਤ੍ਤਾਨੁਲੋਮੇਸੁ ਅਤ੍ਥਤੋ ਸਙ੍ਗਯ੍ਹਤੀਤਿ ਵੇਦਿਤਬ੍ਬਾ. ਯਥਾ ਚ ਏਸਾ, ਏਵਂ ਅਤ੍ਤਨੋਮਤਿਪਿ ਪਮਾਣਭੂਤਾ. ਨ ਹਿ ਭਗਵਤੋ ਵਚਨਂ ਵਚਨਾਨੁਲੋਮਞ੍ਚ ਅਨਿਸ੍ਸਾਯ ਅਗ੍ਗਸਾਵਕਾਦਯੋਪਿ ਅਤ੍ਤਨੋ ਞਾਣਬਲੇਨ ਸੁਤ੍ਤਾਭਿਧਮ੍ਮਵਿਨਯੇਸੁ ¶ ਕਞ੍ਚਿ ਸਮ੍ਮੁਤਿਪਰਮਤ੍ਥਭੇਦਂ ਅਤ੍ਥਂ ਵਤ੍ਤੁਂ ਸਕ੍ਕੋਨ੍ਤਿ, ਤਸ੍ਮਾ ਸਬ੍ਬਮ੍ਪਿ ਵਚਨਂ ਸੁਤ੍ਤੇ ਸੁਤ੍ਤਾਨੁਲੋਮੇ ਚ ਸਙ੍ਗਯ੍ਹਤਿ. ਵਿਸੁਂ ਪਨ ਅਟ੍ਠਕਥਾਦੀਨਂ ਸਙ੍ਗਹਿਤਤ੍ਤਾ ਤਦਵਸੇਸਂ ਸੁਤ੍ਤਸੁਤ੍ਤਾਨੁਲੋਮਤੋ ਗਹੇਤ੍ਵਾ ਚਤੁਧਾ ਵਿਨਯੋ ਨਿਦ੍ਦਿਟ੍ਠੋ. ਸੁਤ੍ਤਾਦਯੋ ਨਿਸ੍ਸਾਯੇਵ ਪਵਤ੍ਤਾਪਿ ਅਤ੍ਤਨੋਮਤਿ ਤੇਸੁ ਸਰੂਪੇਨ ਅਨਾਗਤਤ੍ਤਾ ਵੁਤ੍ਤਂ ‘‘ਸੁਤ੍ਤਸੁਤ੍ਤਾਨੁਲੋਮਆਚਰਿਯਵਾਦੇ ਮੁਞ੍ਚਿਤ੍ਵਾ’’ਤਿ, ਤੇਨਾਹ ‘‘ਅਨੁਬੁਦ੍ਧਿਯਾ ਨਯਗ੍ਗਾਹੇਨਾ’’ਤਿ. ਤਤ੍ਥ ਸੁਤ੍ਤਾਦੀਨਿ ਅਨੁਗਤਾਯ ਏਵ ਬੁਦ੍ਧਿਯਾ ਤੇਹਿ ਲਦ੍ਧਨਯਗ੍ਗਾਹੇਨ ਚਾਤਿ ਅਤ੍ਥੋ.

ਥੇਰਵਾਦੋਤਿ ਮਹਾਸੁਮਤ੍ਥੇਰਾਦੀਨਂ ਗਾਹੋ. ਸੁਤ੍ਤਾਦਿਂ ਨਿਸ੍ਸਾਯੇਵ ਵਿਪਰੀਤਤੋਪਿ ਅਤ੍ਤਨੋਮਤਿ ਉਪ੍ਪਜ੍ਜਤੀਤਿ ¶ ਆਹ ਤਂ ਪਨਾਤਿਆਦਿ. ਅਤ੍ਥੇਨਾਤਿ ਅਤ੍ਤਨਾ ਨਯਗ੍ਗਹਿਤੇਨ ਅਤ੍ਥੇਨ. ਪਾਲ਼ਿਨ੍ਤਿ ਅਤ੍ਤਨੋ ਗਾਹਸ੍ਸ ਨਿਸ੍ਸਯਭੂਤਂ ਸਾਟ੍ਠਕਥਂ ਪਾਲ਼ਿਂ. ਪਾਲ਼ਿਯਾਤਿ ਤਪ੍ਪਟਿਕ੍ਖੇਪਤ੍ਥਂ ਪਰੇਨਾਹਟਾਯ ਸਾਟ੍ਠਕਥਾਯ ਪਾਲ਼ਿਯਾ, ਅਤ੍ਤਨਾ ਗਹਿਤਂ ਅਤ੍ਥਂ ਨਿਸ੍ਸਾਯ ਪਾਲ਼ਿਞ੍ਚ ਸਂਸਨ੍ਦਿਤ੍ਵਾਤਿ ਅਤ੍ਥੋ. ਆਚਰਿਯਵਾਦੇਤਿ ਅਤ੍ਤਨਾ ਪਰੇਨ ਚ ਸਮੁਦ੍ਧਟਅਟ੍ਠਕਥਾਯ. ਓਤਰਤਿ ਚੇਵ ਸਮੇਤਿ ਚਾਤਿ ਅਤ੍ਤਨਾ ਉਦ੍ਧਟੇਹਿ ਸਂਸਨ੍ਦਨਵਸੇਨ ਓਤਰਤਿ, ਪਰੇਨ ਉਦ੍ਧਟੇਨ ਸਮੇਤਿ. ਸਬ੍ਬਦੁਬ੍ਬਲਾਤਿ ਅਸਬ੍ਬਞ੍ਞੁਪੁਗ੍ਗਲਸ੍ਸ ਦੋਸਵਾਸਨਾਯ ਯਾਥਾਵਤੋ ਅਤ੍ਥਸਮ੍ਪਟਿਪਤ੍ਤਿਅਭਾਵਤੋ ਵੁਤ੍ਤਂ. ਪਮਾਦਪਾਠਵਸੇਨ ਆਚਰਿਯਵਾਦਸ੍ਸ ਸੁਤ੍ਤਾਨੁਲੋਮੇਨ ਅਸਂਸਨ੍ਦਨਾਪਿ ਸਿਯਾਤਿ ਆਹ ‘‘ਇਤਰੋ ਨ ਗਹੇਤਬ੍ਬੋ’’ਤਿ.

ਸਮੇਨ੍ਤਮੇਵ ਗਹੇਤਬ੍ਬਨ੍ਤਿ ਯੇ ਸੁਤ੍ਤੇਨ ਸਂਸਨ੍ਦਨ੍ਤਿ, ਏਵਰੂਪਾਵ ਅਤ੍ਥਾ ਮਹਾਪਦੇਸਤੋ ਉਦ੍ਧਰਿਤਬ੍ਬਾਤਿ ਦਸ੍ਸੇਤਿ ਤਥਾ ਤਥਾ ਉਦ੍ਧਟਅਤ੍ਥਾਨਮੇਵ ਸੁਤ੍ਤਾਨੁਲੋਮਤ੍ਤਾ, ਤੇਨਾਹ ‘‘ਸੁਤ੍ਤਾਨੁਲੋਮਤੋ ਹਿ ਸੁਤ੍ਤਮੇਵ ਬਲਵਤਰ’’ਨ੍ਤਿ. ਅਪ੍ਪਟਿਵਤ੍ਤਿਯਨ੍ਤਿ ਅਪ੍ਪਟਿਬਾਹਿਯਂ. ਕਾਰਕਸਙ੍ਘਸਦਿਸਨ੍ਤਿ ਪਮਾਣਤ੍ਤਾ ਸਙ੍ਗੀਤਿਕਾਰਕਸਙ੍ਘਸਦਿਸਂ. ਬੁਦ੍ਧਾਨਂ ਠਿਤਕਾਲਸਦਿਸਨ੍ਤਿ ਧਰਮਾਨਕਬੁਦ੍ਧਸਦਿਸਨ੍ਤਿ ਅਤ੍ਥੋ. ਸਕਵਾਦੀ ਸੁਤ੍ਤਂ ਗਹੇਤ੍ਵਾ ਕਥੇਤੀਤਿਆਦੀਸੁ ਯੋ ਯਥਾਭੂਤਮਤ੍ਥਂ ਗਹੇਤ੍ਵਾ ਕਥਨਸੀਲੋ, ਸੋ ਸਕਵਾਦੀ. ਸੁਤ੍ਤਨ੍ਤਿ ਸਙ੍ਗੀਤਿਤ੍ਤਯਾਰੁਲ਼੍ਹਂ ਪਾਲ਼ਿਵਚਨਂ. ਪਰਵਾਦੀਤਿ ਮਹਾਵਿਹਾਰਵਾਸੀ ਵਾ ਹੋਤੁ ਅਞ੍ਞਨਿਕਾਯਵਾਸੀ ਵਾ, ਯੋ ਵਿਪਰੀਤਤੋ ਅਤ੍ਥਂ ਗਹੇਤ੍ਵਾ ਕਥਨਸੀਲੋ, ਸੋਵ ਇਧ ‘‘ਪਰਵਾਦੀ’’ਤਿ ਵੁਤ੍ਤੋ. ਸੁਤ੍ਤਾਨੁਲੋਮਨ੍ਤਿ ਸਙ੍ਗੀਤਿਤ੍ਤਯਾਰੁਲ਼੍ਹਂ ਵਾ ਅਨਾਰੁਲ਼੍ਹਂ ਵਾ ਯਂਕਿਞ੍ਚਿ ਵਿਪਲ੍ਲਾਸਤੋ ਵਾ ਵਞ੍ਚਨਾਯ ਵਾ ‘‘ਸਙ੍ਗੀਤਿਤ੍ਤਯਾਗਤਮਿਦ’’ਨ੍ਤਿ ਦਸ੍ਸਿਯਮਾਨਂ ਸੁਤ੍ਤਾਨੁਲੋਮਂ. ਕੇਚਿ ‘‘ਅਞ੍ਞਨਿਕਾਯੇ ਸੁਤ੍ਤਾਨੁਲੋਮ’’ਨ੍ਤਿ ¶ ਵਦਨ੍ਤਿ, ਤਂ ਨ ਯੁਤ੍ਤਂ ਸਕਵਾਦੀਪਰਵਾਦੀਨਂ ਉਭਿਨ੍ਨਮ੍ਪਿ ਸਙ੍ਗੀਤਿਤ੍ਤਯਾਰੁਲ਼੍ਹਸੁਤ੍ਤਾਦੀਨਂ ਏਵ ਗਹੇਤਬ੍ਬਤੋ. ਤਥਾ ਹਿ ਵਕ੍ਖਤਿ ‘‘ਤਿਸ੍ਸੋ ਸਙ੍ਗੀਤਿਯੋ ਆਰੁਲ਼੍ਹਂ ਪਾਲ਼ਿਆਗਤਂ ਪਞ੍ਞਾਯਤਿ, ਗਹੇਤਬ੍ਬ’’ਨ੍ਤਿਆਦਿ. ਨ ਹਿ ਸਕਵਾਦੀ ਅਞ੍ਞਨਿਕਾਯਸੁਤ੍ਤਾਦਿਂ ਪਮਾਣਤੋ ਗਣ੍ਹਾਤਿ, ਯੇਨ ਤੇਸੁ ਸੁਤ੍ਤਾਦੀਸੁ ਦਸ੍ਸਿਤੇਸੁ ਤਤ੍ਥ ਠਾਤਬ੍ਬਂ ਭਵੇਯ੍ਯ, ਵਕ੍ਖਤਿ ਚ ‘‘ਪਰੋ ਤਸ੍ਸ ਅਕਪ੍ਪਿਯਭਾਵਸਾਧਕਂ ਸੁਤ੍ਤਤੋ ਬਹੁਂ ਕਾਰਣਞ੍ਚ ਵਿਨਿਚ੍ਛਯਞ੍ਚ ਦਸ੍ਸੇਤਿ…ਪੇ… ‘ਸਾਧੂ’ਤਿ ਸਮ੍ਪਟਿਚ੍ਛਿਤ੍ਵਾ ਅਕਪ੍ਪਿਯੇਯੇਵ ਠਾਤਬ੍ਬ’’ਨ੍ਤਿ (ਪਾਰਾ. ਅਟ੍ਠ. ੧.੪੫). ਤਸ੍ਮਾ ਪਰਵਾਦਿਨਾਪਿ ਸਙ੍ਗੀਤਿਤ੍ਤਯੇ ਅਨਾਰੁਲ਼੍ਹਮ੍ਪਿ ਅਨਾਰੁਲ਼੍ਹਮਿਚ੍ਚੇਵ ਦਸ੍ਸੀਯਤਿ, ਕੇਵਲਂ ਤਸ੍ਸ ਤਸ੍ਸ ਸੁਤ੍ਤਾਦਿਨੋ ਸਙ੍ਗੀਤਿਤ੍ਤਯੇ ਅਨਾਗਤਸ੍ਸ ਕੂਟਤਾ, ਆਗਤਸ੍ਸ ਚ ਬ੍ਯਞ੍ਜਨਚ੍ਛਾਯਾਯ ਅਞ੍ਞਥਾ ਅਧਿਪ੍ਪਾਯਯੋਜਨਾ ਚ ਵਿਸੇਸੋ. ਤਤ੍ਥ ਚ ਯਂ ਕੂਟਂ, ਤਂ ਅਪਨੀਯਤਿ. ਯਂ ਅਞ੍ਞਥਾ ਯੋਜਿਤਂ, ਤਸ੍ਸ ਵਿਪਰੀਤਤਾਸਨ੍ਦਸ੍ਸਨਤ੍ਥਂ ਤਦਞ੍ਞੇਨ ਸੁਤ੍ਤਾਦਿਨਾ ਸਂਸਨ੍ਦਨਾ ਕਰੀਯਤਿ. ਯੋ ਪਨ ਪਰਵਾਦਿਨਾ ਗਹਿਤੋ ਅਧਿਪ੍ਪਾਯੋ ਸੁਤ੍ਤਨ੍ਤਾਦਿਨਾ ਸਂਸਨ੍ਦਤਿ, ਸੋ ਸਕਵਾਦਿਨਾਪਿ ਅਤ੍ਤਨੋ ਗਾਹਂ ਵਿਸ੍ਸਜ੍ਜੇਤ੍ਵਾ ਗਹੇਤਬ੍ਬੋਤਿ ਉਭਿਨ੍ਨਮ੍ਪਿ ਸਙ੍ਗੀਤਿਤ੍ਤਯਾਗਤਮੇਵ ਸੁਤ੍ਤਾਦਿਪਮਾਣਨ੍ਤਿ ਵੇਦਿਤਬ੍ਬਂ. ਤੇਨੇਵ ਕਥਾਵਤ੍ਥੁਪ੍ਪਕਰਣੇ ਸਕਵਾਦੇ ਪਞ੍ਚ ਸੁਤ੍ਤਸਤਾਨਿ ਪਰਵਾਦੇ ਪਞ੍ਚਾਤਿ (ਧ. ਸ. ਅਟ੍ਠ. ਨਿਦਾਨਕਥਾ; ਕਥਾ. ਅਟ੍ਠ. ਨਿਦਾਨਕਥਾ) ¶ ਸੁਤ੍ਤਸਹਸ੍ਸਮ੍ਪਿ ਅਧਿਪ੍ਪਾਯਗ੍ਗਹਣਨਾਨਤ੍ਤੇਨ ਸਙ੍ਗੀਤਿਤ੍ਤਯਾਗਤਮੇਵ ਗਹਿਤਂ, ਨ ਨਿਕਾਯਨ੍ਤਰੇ ਕਿਞ੍ਚੀਤਿ.

ਖੇਪਨ੍ਤਿ ‘‘ਕਿਂ ਇਮਿਨਾ’’ਤਿ ਪਟਿਕ੍ਖੇਪਂ ਛਡ੍ਡਨਂ. ਗਰਹਨ੍ਤਿ ‘‘ਕਿਮੇਸ ਬਾਲੋ ਜਾਨਾਤੀ’’ਤਿ ਨਿਨ੍ਦਨਂ. ਸੁਤ੍ਤੇ ਓਤਾਰੇਤਬ੍ਬਨ੍ਤਿ ਯਸ੍ਸ ਸੁਤ੍ਤਸ੍ਸ ਅਨੁਲੋਮਨਤੋ ਇਦਂ ਸੁਤ੍ਤਾਨੁਲੋਮਂ ਅਕਾਸਿ, ਤਸ੍ਮਿਂ, ਤਦਨੁਰੂਪੇ ਵਾ ਅਞ੍ਞਤਰਸ੍ਮਿਂ ਸੁਤ੍ਤੇ ਅਤ੍ਤਨਾ ਗਹਿਤਂ ਸੁਤ੍ਤਾਨੁਲੋਮਂ ਅਤ੍ਥਤੋ ਸਂਸਨ੍ਦਨਵਸੇਨ ਓਤਾਰੇਤਬ੍ਬਂ, ‘‘ਇਮਿਨਾ ਚ ਇਮਿਨਾ ਚ ਕਾਰਣੇਨ ਇਮਸ੍ਮਿਂ ਸੁਤ੍ਤੇ ਸਂਸਨ੍ਦਤੀ’’ਤਿ ਸਂਸਨ੍ਦਿਤ੍ਵਾ ਦਸ੍ਸੇਤਬ੍ਬਨ੍ਤਿ ਅਤ੍ਥੋ. ਅਯਨ੍ਤਿ ਸਕਵਾਦੀ. ਪਰੋਤਿ ਪਰਵਾਦੀ. ਆਚਰਿਯਵਾਦੋ ਸੁਤ੍ਤੇ ਓਤਾਰੇਤਬ੍ਬੋਤਿ ਯਸ੍ਸ ਸੁਤ੍ਤਸ੍ਸ ਵਣ੍ਣਨਾਵਸੇਨ ਅਯਂ ਆਚਰਿਯਵਾਦੋ ਪਵਤ੍ਤੋ, ਤਸ੍ਮਿਂ, ਤਾਦਿਸੇ ਚ ਅਞ੍ਞਤਰਸ੍ਮਿਂ ਸੁਤ੍ਤੇ ਪੁਬ੍ਬਾਪਰਅਤ੍ਥਸਂਸਨ੍ਦਨਵਸੇਨ ਓਤਾਰੇਤਬ੍ਬਂ. ਗਾਰਯ੍ਹਾਚਰਿਯਵਾਦੋਤਿ ਪਮਾਦਲਿਖਿਤੋ, ਭਿਨ੍ਨਲਦ੍ਧਿਕੇਹਿ ਵਾ ਠਪਿਤੋ, ਏਸ ਨਯੋ ਸਬ੍ਬਤ੍ਥ.

ਯਂ ਕਿਞ੍ਚਿ ਕੂਟਸੁਤ੍ਤਂ ਬਾਹਿਰਕਸੁਤ੍ਤਾਦਿਵਚਨਂ ਨ ਗਹੇਤਬ੍ਬਨ੍ਤਿ ਦਸ੍ਸੇਤੁਂ ਸੁਤ੍ਤਂ ਸੁਤ੍ਤਾਨੁਲੋਮੇ ਓਤਾਰੇਤਬ੍ਬਨ੍ਤਿਆਦਿ ਵੁਤ੍ਤਂ. ਗੁਲ਼੍ਹਵੇਸ੍ਸਨ੍ਤਰਾਦੀਨਿ ਮਹਾਸਙ੍ਘਿਕਾਦਿਭਿਨ੍ਨਲਦ੍ਧਿਕਾਨਂ ਪਕਰਣਾਨਿ. ਆਦਿ-ਸਦ੍ਦੇਨ ਗੁਲ਼੍ਹਉਮ੍ਮਗ੍ਗਾਦੀਨਂ ਗਹਣਂ ¶ . ਸਕਵਾਦੀ ਸੁਤ੍ਤਂ ਗਹੇਤ੍ਵਾ ਕਥੇਤਿ, ਪਰਵਾਦੀਪਿ ਸੁਤ੍ਤਨ੍ਤਿਆਦਿਨਾ ਅਞ੍ਞੇਪਿ ਵਾਦਾਲਮ੍ਬਨਾ ਵੁਤ੍ਤਨਯੇਨ ਸਕ੍ਕਾ ਞਾਤੁਨ੍ਤਿ ਇਧ ਨ ਵੁਤ੍ਤਾ.

ਏਵਂ ਸੁਤ੍ਤਸੁਤ੍ਤਾਨੁਲੋਮਾਦਿਮੁਖੇਨ ਸਾਮਞ੍ਞਤੋ ਵਿਵਾਦਂ ਦਸ੍ਸੇਤ੍ਵਾ ਇਦਾਨਿ ਵਿਸੇਸਤੋ ਵਿਵਾਦਵਤ੍ਥੁਂ ਤਬ੍ਬਿਨਿਚ੍ਛਯਮੁਖੇਨ ਸੁਤ੍ਤਾਦੀਨਞ੍ਚ ਦਸ੍ਸੇਤੁਂ ਅਥ ਪਨਾਯਂ ਕਪ੍ਪਿਯਨ੍ਤਿਆਦਿ ਵੁਤ੍ਤਂ. ਸੁਤ੍ਤੇ ਚ ਸੁਤ੍ਤਾਨੁਲੋਮੇ ਚਾਤਿ ਏਤ੍ਥ ਚ-ਕਾਰੋ ਵਿਕਪ੍ਪਤ੍ਥੋ, ਤੇਨ ਆਚਰਿਯਵਾਦਾਦੀਨਮ੍ਪਿ ਸਙ੍ਗਹੋ, ਤੇਨਾਹ ‘‘ਕਾਰਣਞ੍ਚ ਵਿਨਿਚ੍ਛਯਞ੍ਚ ਦਸ੍ਸੇਤੀ’’ਤਿ. ਤਤ੍ਥ ਕਾਰਣਨ੍ਤਿ ਸੁਤ੍ਤਾਦਿਨਯਂ ਨਿਸ੍ਸਾਯ ਅਤ੍ਤਨੋਮਤਿਯਾ ਉਦ੍ਧਟਂ ਹੇਤੁਂ. ਵਿਨਿਚ੍ਛਯਨ੍ਤਿ ਅਟ੍ਠਕਥਾਵਿਨਿਚ੍ਛਯਂ. ਕਾਰਣਚ੍ਛਾਯਾਤਿ ਸੁਤ੍ਤਾਦੀਸੁ ‘‘ਕਪ੍ਪਿਯ’’ਨ੍ਤਿ ਗਾਹਸ੍ਸ, ‘‘ਅਕਪ੍ਪਿਯ’’ਨ੍ਤਿ ਗਾਹਸ੍ਸ ਚ ਨਿਮਿਤ੍ਤਭੂਤਂ ਕਿਚ੍ਛੇਨ ਪਟਿਪਾਦਨੀਯਂ ਅਵਿਭੂਤਕਾਰਣਂ ਕਾਰਣਚ੍ਛਾਯਾ, ਕਾਰਣਪਤਿਰੂਪਕਨ੍ਤਿ ਅਤ੍ਥੋ. ਵਿਨਯਞ੍ਹਿ ਪਤ੍ਵਾਤਿ ਇਮਸ੍ਸ ਵਿਵਰਣਂ ਕਪ੍ਪਿਯਾਕਪ੍ਪਿਯਵਿਚਾਰਣਮਾਗਮ੍ਮਾਤਿ. ਰੁਨ੍ਧਿਤਬ੍ਬਨ੍ਤਿ ਕਪ੍ਪਿਯਸਞ੍ਞਾਯ ਵੀਤਿਕ੍ਕਮਕਰਣਂ ਰੁਨ੍ਧਿਤਬ੍ਬਂ, ਤਂਨਿਵਾਰਣਚਿਤ੍ਤਂ ਦਲ਼੍ਹਤਰਂ ਕਾਤਬ੍ਬਂ. ਸੋਤਂ ਪਚ੍ਛਿਨ੍ਦਿਤਬ੍ਬਨ੍ਤਿ ਤਤ੍ਥ ਵੀਤਿਕ੍ਕਮਪ੍ਪਵਤ੍ਤਿ ਪਚ੍ਛਿਨ੍ਦਿਤਬ੍ਬਾ. ਗਰੁਕਭਾਵੇਤਿ ਅਕਪ੍ਪਿਯਭਾਵੇ. ਸੁਤ੍ਤਵਿਨਿਚ੍ਛਯਕਾਰਣੇਹੀਤਿ ਸੁਤ੍ਤੇਨ ਅਟ੍ਠਕਥਾਵਿਨਿਚ੍ਛਯੇਨ ਚ ਲਦ੍ਧਕਾਰਣੇਹਿ. ਏਵਨ੍ਤਿਆਦਿ ਯਥਾਵੁਤ੍ਤਸ੍ਸ ਅਤ੍ਥਸ੍ਸ ਨਿਗਮਨਵਚਨਂ. ਅਤਿਰੇਕਕਾਰਣਨ੍ਤਿ ਸੁਤ੍ਤਾਦੀਸੁ ਪੁਰਿਮਂ ਪੁਰਿਮਂ ਅਤਿਰੇਕਕਾਰਣਂ ਨਾਮ, ਬਹੁਕਾਰਣਂ ਵਾ.

ਵਾਚੁਗ੍ਗਤਨ੍ਤਿ ¶ ਵਾਚਾਯ ਉਗ੍ਗਤਂ, ਤਤ੍ਥ ਨਿਰਨ੍ਤਰਂ ਠਿਤਨ੍ਤਿ ਅਤ੍ਥੋ. ‘‘ਸੁਤ੍ਤਂ ਨਾਮ ਸਕਲਂ ਵਿਨਯਪਿਟਕ’’ਨ੍ਤਿ ਵੁਤ੍ਤਤ੍ਤਾ ਪੁਨ ਸੁਤ੍ਤਤੋਤਿ ਤਦਤ੍ਥਪਟਿਪਾਦਕਂ ਸੁਤ੍ਤਾਭਿਧਮ੍ਮਪਾਲ਼ਿਵਚਨਂ ਅਧਿਪ੍ਪੇਤਂ. ਅਨੁਬ੍ਯਞ੍ਜਨਤੋਤਿ ਇਮਸ੍ਸ ਵਿਵਰਣਂ ਪਰਿਪੁਚ੍ਛਤੋ ਚ ਅਟ੍ਠਕਥਾਤੋ ਚਾਤਿ. ਤਤ੍ਥ ਪਰਿਪੁਚ੍ਛਾਤਿ ਆਚਰਿਯਸ੍ਸ ਸਨ੍ਤਿਕਾ ਪਾਲ਼ਿਯਾ ਅਤ੍ਥਸਵਨਂ. ਅਟ੍ਠਕਥਾਤਿ ਪਾਲ਼ਿਮੁਤ੍ਤਕਵਿਨਿਚ੍ਛਯੋ. ਤਦੁਭਯਮ੍ਪਿ ਹਿ ਪਾਲ਼ਿਂ ਅਨੁਗਨ੍ਤ੍ਵਾ ਅਤ੍ਥਸ੍ਸ ਬ੍ਯਞ੍ਜਨਤੋ ‘‘ਅਨੁਬ੍ਯਞ੍ਜਨ’’ਨ੍ਤਿ ਵੁਤ੍ਤਂ. ਵਿਨਯੇਤਿ ਵਿਨਯਾਚਾਰੇ, ਤੇਨੇਵ ਵਕ੍ਖਤਿ ਵਿਨਯਂ ਅਵਿਜਹਨ੍ਤੋ ਅਵੋਕ੍ਕਮਨ੍ਤੋਤਿਆਦਿ. ਤਤ੍ਥ ਪਤਿਟ੍ਠਾਨਂ ਨਾਮ ਸਞ੍ਚਿਚ੍ਚ ਆਪਤ੍ਤਿਯਾ ਅਨਾਪਜ੍ਜਨਾਦਿ ਹੋਤੀਤਿ ਆਹ ‘‘ਲਜ੍ਜੀਭਾਵੇਨ ਪਤਿਟ੍ਠਿਤੋ’’ਤਿ, ਤੇਨ ਲਜ੍ਜੀ ਹੋਤੀਤਿ ਵੁਤ੍ਤਂ ਹੋਤਿ. ਵਿਨਯਧਰਸ੍ਸ ਲਕ੍ਖਣੇ ਵਤ੍ਤਬ੍ਬੇ ਕਿਂ ਇਮਿਨਾ ਲਜ੍ਜੀਭਾਵੇਨਾਤਿ ਆਹ ਅਲਜ੍ਜੀ ਹੀਤਿਆਦਿ. ਤਤ੍ਥ ਬਹੁਸ੍ਸੁਤੋਪੀਤਿ ਇਮਿਨਾ ਪਠਮਲਕ੍ਖਣਸਮਨ੍ਨਾਗਮਂ ਦਸ੍ਸੇਤਿ. ਲਾਭਗਰੁਤਾਯਾਤਿਆਦਿਨਾ ਵਿਨਯੇ ਠਿਤਤਾਯ ਅਭਾਵੇ ਪਠਮਲਕ੍ਖਣਯੋਗੋ ਕਿਚ੍ਚਕਰੋ ਨ ਹੋਤਿ, ਅਥ ¶ ਖੋ ਅਕਿਚ੍ਚਕਰੋ ਅਨਤ੍ਥਕਰੋ ਏਵਾਤਿ ਦਸ੍ਸੇਤਿ. ਸਙ੍ਘਭੇਦਸ੍ਸ ਪੁਬ੍ਬਭਾਗੋ ਕਲਹੋ ਸਙ੍ਘਰਾਜਿ.

ਵਿਤ੍ਥੁਨਤੀਤਿ ਵਿਤ੍ਥਮ੍ਭਤਿ, ਨਿਤ੍ਥੁਨਤਿ ਵਾ ਸਨ੍ਤਿਟ੍ਠਿਤੁਂ ਨ ਸਕ੍ਕੋਤਿ, ਤੇਨਾਹ ਯਂ ਯਨ੍ਤਿਆਦਿ. ਆਚਰਿਯਪਰਮ੍ਪਰਾਤਿ ਆਚਰਿਯਾਨਂ ਵਿਨਿਚ੍ਛਯਪਰਮ੍ਪਰਾ, ਤੇਨੇਵ ਵਕ੍ਖਤਿ ‘‘ਅਤ੍ਤਨੋ ਮਤਿਂ ਪਹਾਯ…ਪੇ… ਯਥਾ ਆਚਰਿਯੋ ਚ ਆਚਰਿਯਾਚਰਿਯੋ ਚ ਪਾਲ਼ਿਞ੍ਚ ਪਰਿਪੁਚ੍ਛਞ੍ਚ ਵਦਨ੍ਤਿ, ਤਥਾ ਞਾਤੁਂ ਵਟ੍ਟਤੀ’’ਤਿ. ਨ ਹਿ ਆਚਰਿਯਾਨਂ ਨਾਮਮਤ੍ਤਤੋ ਪਰਮ੍ਪਰਾਜਾਨਨੇ ਪਯੋਜਨਮਤ੍ਥਿ. ਪੁਬ੍ਬਾਪਰਾਨੁਸਨ੍ਧਿਤੋਤਿ ਪੁਬ੍ਬਵਚਨਸ੍ਸ ਅਪਰਵਚਨੇਨ ਸਹ ਅਤ੍ਥਸਮ੍ਬਨ੍ਧਜਾਨਨਤੋ. ਅਤ੍ਥਤੋਤਿ ਪਦਤ੍ਥਪਿਣ੍ਡਤ੍ਥਅਧਿਪ੍ਪੇਤਤ੍ਥਾਦਿਤੋ. ਕਾਰਣਤੋਤਿ ਤਦਤ੍ਥੁਪਪਤ੍ਤਿਤੋ. ਥੇਰਵਾਦਙ੍ਗਨ੍ਤਿ ਥੇਰਵਾਦਪਟਿਪਾਟਿਂ, ਤੇਸਂ ਵਿਨਿਚ੍ਛਯਪਟਿਪਾਟਿਨ੍ਤਿ ਅਤ੍ਥੋ.

ਇਮੇਹਿ ਚ ਪਨ ਤੀਹਿ ਲਕ੍ਖਣੇਹੀਤਿ ਏਤ੍ਥ ਪਠਮੇਨ ਲਕ੍ਖਣੇਨ ਵਿਨਯਸ੍ਸ ਸੁਟ੍ਠੁ ਉਗ੍ਗਹਿਤਭਾਵੋ ਵੁਤ੍ਤੋ. ਦੁਤਿਯੇਨਸ੍ਸ ਲਜ੍ਜੀਭਾਵੇਨ ਚੇਵ ਅਚਲਤਾਯ ਚ ਪਤਿਟ੍ਠਿਤਤਾ. ਤਤਿਯੇਨ ਪਾਲ਼ਿਅਟ੍ਠਕਥਾਸੁ ਅਨੁਰੂਪੇਨ ਅਨਾਗਤਮ੍ਪਿ ਤਦਨੁਲੋਮਤੋ ਆਚਰਿਯੇਹਿ ਦਿਨ੍ਨਨਯਤੋ ਵਿਨਿਚ੍ਛਿਨਿਤੁਂ ਸਮਤ੍ਥਤਾ. ਓਤਿਣ੍ਣੇ ਵਤ੍ਥੁਸ੍ਮਿਨ੍ਤਿ ਚੋਦਨਾਵਸੇਨ ਵੀਤਿਕ੍ਕਮਵਤ੍ਥੁਸ੍ਮਿਂ ਸਙ੍ਘਮਜ੍ਝੇ ਓਤਿਣ੍ਣੇ. ਚੋਦਕੇਨ ਚੁਦਿਤਕੇਨ ਚ ਵੁਤ੍ਤੇ ਵਤ੍ਤਬ੍ਬੇਤਿ ਏਵਂ ਓਤਿਣ੍ਣੇ ਵਤ੍ਥੁਂ ਨਿਸ੍ਸਾਯ ਚੋਦਕੇਨ ‘‘ਦਿਟ੍ਠਂ ਸੁਤ’’ਨ੍ਤਿਆਦਿਨਾ ਚੁਦਿਤਕੇਨ ‘‘ਅਤ੍ਥਿ ਨਤ੍ਥੀ’’ਤਿਆਦਿਨਾ ਚ ਯਂ ਵਤ੍ਤਬ੍ਬਂ, ਤਸ੍ਮਿਂ ਵਤ੍ਤਬ੍ਬੇ ਵੁਤ੍ਤੇਤਿ ਅਤ੍ਥੋ. ਥੁਲ੍ਲਚ੍ਚਯਦੁਬ੍ਭਾਸਿਤਾਨਂ ਮਾਤਿਕਾਯ ਅਨਾਗਤਤ੍ਤਾ ‘‘ਪਞ੍ਚਨ੍ਨਂ ਆਪਤ੍ਤੀਨ’’ਨ੍ਤਿ ਵੁਤ੍ਤਂ. ਤਿਕਦੁਕ੍ਕਟਨ੍ਤਿ ‘‘ਅਨੁਪਸਮ੍ਪਨ੍ਨੇ ਉਪਸਮ੍ਪਨ੍ਨਸਞ੍ਞੀ ਉਜ੍ਝਾਯਤਿ ਵਾ ਖੀਯਤਿ ਵਾ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਆਦਿਨਾ (ਪਾਚਿ. ੧੦੬ ਥੋਕਂ ਵਿਸਦਿਸਂ) ਆਗਤਂ ਤਿਕਦੁਕ੍ਕਟਂ. ਅਞ੍ਞਤਰਂ ਵਾ ਆਪਤ੍ਤਿਨ੍ਤਿ ‘‘ਕਾਲੇ ਵਿਕਾਲਸਞ੍ਞੀ ਆਪਤ੍ਤਿ ਦੁਕ੍ਕਟਸ੍ਸ, ਕਾਲੇ ਵੇਮਤਿਕੋ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਆਦਿਕਂ (ਪਾਚਿ. ੨੫੦) ਦੁਕਦੁਕ੍ਕਟਂ ¶ ਸਨ੍ਧਾਯ ਵੁਤ੍ਤਂ. ਅਨ੍ਤਰਾਪਤ੍ਤਿਨ੍ਤਿ ਤਸ੍ਮਿਂ ਤਸ੍ਮਿਂ ਸਿਕ੍ਖਾਪਦੇ ਆਗਤਵਤ੍ਥੁਵੀਤਿਕ੍ਕਮਂ ਵਿਨਾ ਅਞ੍ਞਸ੍ਮਿਂ ਵਤ੍ਥੁਵੀਤਿਕ੍ਕਮੇ ਨਿਦਾਨਤੋ ਪਭੁਤਿ ਵਿਨੀਤਵਤ੍ਥੁਪਰਿਯੋਸਾਨਾ ਅਨ੍ਤਰਨ੍ਤਰਾ ਵੁਤ੍ਤਂ ਆਪਤ੍ਤਿਂ. ਇਧ ਪਨ ‘‘ਵਤ੍ਥੁਂ ਓਲੋਕੇਤੀ’’ਤਿ ਵਿਸੁਂ ਗਹਿਤਤ੍ਤਾ ਤਦਵਸੇਸਾ ਅਨ੍ਤਰਾਪਤ੍ਤੀਤਿ ਗਹਿਤਾ. ਪਟਿਲਾਤਂ ਉਕ੍ਖਿਪਤੀਤਿ ਇਦਂ ਵਿਸਿਬ੍ਬਨਸਿਕ੍ਖਾਪਦੇ (ਪਾਚਿ. ੩੫੦-੩੫੧) ਆਗਤਂ. ਤਤ੍ਥ ਡਯ੍ਹਮਾਨਂ ਅਲਾਤਂ ਅਗ੍ਗਿਕਪਾਲਾਦਿਤੋ ਬਹਿ ਪਤਿਤਂ ਅਵਿਜ੍ਝਾਤਮੇਵ ਪਟਿਉਕ੍ਖਿਪਤਿ ¶ , ਪੁਨ ਯਥਾਠਾਨੇ ਠਪੇਤੀਤਿ ਅਤ੍ਥੋ. ਵਿਜ੍ਝਾਤਂ ਪਨ ਪਕ੍ਖਿਪਨ੍ਤਸ੍ਸ ਪਾਚਿਤ੍ਤਿਯਮੇਵ. ਅਨਾਪਤ੍ਤਿਨ੍ਤਿ ਏਤ੍ਥ ਅਨ੍ਤਰਨ੍ਤਰਾ ਵੁਤ੍ਤਾ ਅਨਾਪਤ੍ਤਿਪਿ ਅਤ੍ਥਿ, ‘‘ਅਨਾਪਤ੍ਤਿ, ਭਿਕ੍ਖਵੇ, ਇਦ੍ਧਿਮਸ੍ਸ ਇਦ੍ਧਿਵਿਸਯੇ’’ਤਿਆਦਿ (ਪਾਰਾ. ੧੫੯) ਵਿਯ ਸਾਪਿ ਸਙ੍ਗਯ੍ਹਤਿ.

ਪਾਰਾਜਿਕਾਪਤ੍ਤੀਤਿ ਨ ਤਾਵ ਵਤ੍ਤਬ੍ਬਨ੍ਤਿ ਇਦਂ ਆਪਨ੍ਨਪੁਗ੍ਗਲੇਨ ਲਜ੍ਜੀਧਮ੍ਮੇ ਠਤ੍ਵਾ ਯਥਾਭੂਤਂ ਆਵਿਕਰਣੇਪਿ ਦੁਬ੍ਬਿਨਿਚ੍ਛਯਂ ਅਦਿਨ੍ਨਾਦਾਨਾਦਿਂ ਸਨ੍ਧਾਯ ਵੁਤ੍ਤਂ. ਯਂ ਪਨ ਮੇਥੁਨਾਦੀਸੁ ਵਿਜਾਨਨਂ, ਤਂ ਵਤ੍ਤਬ੍ਬਮੇਵ, ਤੇਨਾਹ ਮੇਥੁਨਧਮ੍ਮਵੀਤਿਕ੍ਕਮੋ ਹੀਤਿਆਦਿ. ਯੋ ਪਨ ਅਲਜ੍ਜਿਤਾਯ ਪਟਿਞ੍ਞਂ ਅਦਤ੍ਵਾ ਵਿਕ੍ਖੇਪਂ ਕਰੋਤਿ, ਤਸ੍ਸ ਆਪਤ੍ਤਿ ਨ ਸਕ੍ਕਾ ਓਲ਼ਾਰਿਕਾਪਿ ਵਿਨਿਚ੍ਛਿਨਿਤੁਂ, ਯਾਵ ਸੋ ਯਥਾਭੂਤਂ ਨਾਵਿ ਕਰੋਤਿ, ਸਙ੍ਘਸ੍ਸ ਚ ਆਪਤ੍ਤਿਸਨ੍ਦੇਹੋ ਨ ਵਿਗਚ੍ਛਤਿ, ਤਾਵ ਨਾਸਿਤਕੋਵ ਭਵਿਸ੍ਸਤਿ. ਸੁਖੁਮਾਤਿ ਚਿਤ੍ਤਪਰਿਵਤ੍ਤਿਯਾ ਸੁਖੁਮਤਾਯ ਸੁਖੁਮਾ. ਤੇਨਾਹ ‘‘ਚਿਤ੍ਤਲਹੁਕਾ’’ਤਿ, ਚਿਤ੍ਤਂ ਤਸ੍ਸ ਲਹੁਕਨ੍ਤਿ ਅਤ੍ਥੋ. ਤੇਤਿ ਵੀਤਿਕ੍ਕਮੇ. ਤਂਵਤ੍ਥੁਕਨ੍ਤਿ ਅਦਿਨ੍ਨਾਦਾਨਾਦਿਮੂਲਕਂ. ਯਂ ਆਚਰਿਯੋ ਭਣਤਿ, ਤਂ ਕਰੋਹੀਤਿਆਦਿ ਸਬ੍ਬਂ ਲਜ੍ਜੀਪੇਸਲਂ ਕੁਕ੍ਕੁਚ੍ਚਕਮੇਵ ਸਨ੍ਧਾਯ ਵੁਤ੍ਤਂ. ਯੋ ਯਾਥਾਵਤੋ ਪਕਾਸੇਤ੍ਵਾ ਸੁਦ੍ਧਿਮੇਵ ਗਵੇਸਤਿ, ਤੇਨਾਪਿ, ਪਾਰਾਜਿਕੋਸੀਤਿ ਨ ਵਤ੍ਤਬ੍ਬੋਤਿ ਅਨਾਪਤ੍ਤਿਕੋਟਿਯਾਪਿ ਸਙ੍ਕਿਯਮਾਨਤ੍ਤਾ ਵੁਤ੍ਤਂ, ਤੇਨੇਵ ‘‘ਪਾਰਾਜਿਕਚ੍ਛਾਯਾ’’ਤਿ ਵੁਤ੍ਤਂ. ਸੀਲਾਨਿ ਸੋਧੇਤ੍ਵਾਤਿ ਯਸ੍ਮਿਂ ਵੀਤਿਕ੍ਕਮੇ ਪਾਰਾਜਿਕਾਸਙ੍ਕਾ ਵਤ੍ਤਤਿ, ਤਤ੍ਥ ਪਾਰਾਜਿਕਾਭਾਵਪਕ੍ਖਂ ਗਹੇਤ੍ਵਾ ਦੇਸਨਾਵੁਟ੍ਠਾਨਗਾਮਿਨੀਨਂ ਆਪਤ੍ਤੀਨਂ ਸੋਧਨਵਸੇਨ ਸੀਲਾਨਿ ਸੋਧੇਤ੍ਵਾ. ਦ੍ਵਤ੍ਤਿਂਸਾਕਾਰਨ੍ਤਿ ਪਾਕਟਭਾਵਤੋ ਉਪਲਕ੍ਖਣਵਸੇਨ ਵੁਤ੍ਤਂ, ਯਂ ਕਿਞ੍ਚਿ ਅਭਿਰੁਚਿਤਂ ਮਨਸਿਕਾਤੁਂ ਵਟ੍ਟਤੇਵ. ਕਮ੍ਮਟ੍ਠਾਨਂ ਘਟਿਯਤੀਤਿ ਵਿਪ੍ਪਟਿਸਾਰਮੂਲਕੇਨ ਵਿਕ੍ਖੇਪੇਨ ਅਨ੍ਤਰਨ੍ਤਰਾ ਖਣ੍ਡਂ ਅਦਸ੍ਸੇਤ੍ਵਾ ਪਬਨ੍ਧਵਸੇਨ ਚਿਤ੍ਤੇਨ ਸਙ੍ਘਟਿਯਤਿ. ਸਙ੍ਖਾਰਾਤਿ ਵਿਪਸ੍ਸਨਾਕਮ੍ਮਟ੍ਠਾਨਵਸੇਨ ਵੁਤ੍ਤਂ. ਸਾਪਤ੍ਤਿਕਸ੍ਸ ਹਿ ਪਗੁਣਮ੍ਪਿ ਕਮ੍ਮਟ੍ਠਾਨਂ ਨ ਸੁਟ੍ਠੁ ਉਪਟ੍ਠਾਤਿ, ਪਗੇਵ ਪਾਰਾਜਿਕਸ੍ਸ. ਤਸ੍ਸ ਹਿ ਵਿਪ੍ਪਟਿਸਾਰਨਿਨ੍ਨਤਾਯ ਚਿਤ੍ਤਂ ਏਕਗ੍ਗਂ ਨ ਹੋਤਿ. ਏਕਸ੍ਸ ਪਨ ਵਿਤਕ੍ਕਵਿਕ੍ਖੇਪਾਦਿਬਹੁਲਸ੍ਸ ਸੁਦ੍ਧਸੀਲਸ੍ਸਪਿ ਚਿਤ੍ਤਂ ਨ ਸਮਾਧਿਯਤਿ, ਤਂ ਇਧ ਪਾਰਾਜਿਕਮੂਲਕਨ੍ਤਿ ਨ ਗਹੇਤਬ੍ਬਂ. ਕਤਪਾਪਮੂਲਕੇਨ ਵਿਪ੍ਪਟਿਸਾਰੇਨੇਵੇਤ੍ਥ ਚਿਤ੍ਤਸ੍ਸ ਅਸਮਾਧਿਯਨਂ ਸਨ੍ਧਾਯ ‘‘ਕਮ੍ਮਟ੍ਠਾਨਂ ਨ ਘਟਿਯਤੀ’’ਤਿ ਵੁਤ੍ਤਂ, ਤੇਨਾਹ ਵਿਪ੍ਪਟਿਸਾਰਗ੍ਗਿਨਾਤਿਆਦਿ. ਅਤ੍ਤਨਾਤਿ ਚਿਤ੍ਤੇਨ ਕਰਣਭੂਤੇਨ ਪੁਗ੍ਗਲੋ ਕਤ੍ਤਾ ਜਾਨਾਤਿ, ਪਚ੍ਚਤ੍ਤੇ ਵਾ ਕਰਣਵਚਨਂ, ਅਤ੍ਤਾ ਸਯਂ ਪਜਾਨਾਤੀਤਿ ਅਤ੍ਥੋ.

ਚਤੁਬ੍ਬਿਧਵਿਨਯਾਦਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਪਦਭਾਜਨੀਯਵਣ੍ਣਨਾ

ਯੋ ¶ ¶ ਵਿਯ ਦਿਸ੍ਸਤੀਤਿ ਯਾਦਿਸੋ, ਯਂ-ਸਦ੍ਦਤ੍ਥੇ ਯਥਾ-ਸਦ੍ਦੋ ਵਤ੍ਤਤੀਤਿ ਆਹ ‘‘ਯੇਨ ਵਾ ਤੇਨ ਵਾ ਯੁਤ੍ਤੋ’’ਤਿ. ਯੇਨ ਤੇਨਾਤਿ ਹਿ ਪਦਦ੍ਵਯੇਨ ਅਨਿਯਮਤੋ ਯਂ-ਸਦ੍ਦਤ੍ਥੋਵ ਦਸ੍ਸਿਤੋ. ਵਾਸਧੁਰਯੁਤ੍ਤੋਤਿ ਵਿਪਸ੍ਸਨਾਧੁਰਯੁਤ੍ਤੋ. ਯਾ ਜਾਤਿ ਅਸ੍ਸਾਤਿ ਯਂਜਾਤਿ, ਪੁਗ੍ਗਲੋ, ਸੋਵ ਯਂਜਚ੍ਚੋ ਸਕਤ੍ਥੇ ਯਪਚ੍ਚਯਂ ਕਤ੍ਵਾ. ਗੋਤ੍ਤਵਸੇਨ ਯੇਨ ਵਾ ਤੇਨ ਵਾ ਗੋਤ੍ਤੇਨ ਯਥਾਗੋਤ੍ਤੋ ਵਾ ਤਥਾਗੋਤ੍ਤੋ ਵਾ ਹੋਤੂਤਿ ਸਮ੍ਬਨ੍ਧੋ. ਸੀਲੇਸੂਤਿ ਪਕਤੀਸੁ. ਅਥ ਖੋਤਿ ਇਦਂ ਕਿਨ੍ਤੂਤਿ ਇਮਸ੍ਮਿਂ ਅਤ੍ਥੇ. ਕਿਂ ਵੁਤ੍ਤਂ ਹੋਤੀਤਿ ਅਤ੍ਥੋ. ਇਮਸ੍ਮਿਂ ਅਤ੍ਥੇਤਿ ਇਮਸ੍ਮਿਂ ਪਾਰਾਜਿਕਵਿਸਯੇ. ਏਸੋਤਿ ਯਥਾਵੁਤ੍ਤੇਹਿ ਪਕਾਰੇਹਿ ਯੁਤ੍ਤੋ. ਅਰਿਯਾਯਾਤਿ ‘‘ਉਦ੍ਦਿਸ੍ਸ ਅਰਿਯਾ ਤਿਟ੍ਠਨ੍ਤਿ, ਏਸਾ ਅਰਿਯਾਨਂ ਯਾਚਨਾ’’ਤਿ ਏਵਂ ਵੁਤ੍ਤਾਯ, ਨ, ‘‘ਦੇਹਿ ਮੇ’’ਤਿ ਕਪਣਾਯ. ਲਿਙ੍ਗਸਮ੍ਪਟਿਚ੍ਛਨੇਨਾਤਿ ‘‘ਭਿਕ੍ਖਂ ਚਰਿਸ੍ਸਾਮੀ’’ਤਿ ਚਿਤ੍ਤਾਭਾਵੇਪਿ ਭਿਕ੍ਖਾਹਾਰਨਿਸ੍ਸਿਤਪਬ੍ਬਜ੍ਜਾਲਿਙ੍ਗਸ੍ਸ ਸਮ੍ਪਟਿਚ੍ਛਨੇਨ. ਕਾਜਭਤ੍ਤਨ੍ਤਿ ਕਾਜੇਹਿ ਆਨੀਤਭਤ੍ਤਂ. ਅਧਮ੍ਮਿਕਾਯਾਤਿ ਅਧਿਸੀਲਸਿਕ੍ਖਾਦਿਭਿਕ੍ਖੁਗੁਣਾਭਾਵਤੋ ਵੁਤ੍ਤਂ, ਤੇਨਾਹ ‘‘ਅਭੂਤਾਯਾ’’ਤਿ. ‘‘ਮਯਂ ਭਿਕ੍ਖੂ’’ਤਿ ਵਦਨ੍ਤਾ ਪਟਿਞ੍ਞਾਮਤ੍ਤੇਨੇਵ ਭਿਕ੍ਖੂ, ਨ ਅਤ੍ਥਤੋਤਿ ਅਤ੍ਥੋ. ਇਦਞ੍ਚ ‘‘ਮਯਂ ਭਿਕ੍ਖੂ’’ਤਿ ਪਟਿਜਾਨਨਸ੍ਸਾਪਿ ਸਮ੍ਭਵਤੋ ਵੁਤ੍ਤਂ. ‘‘ਮਯਂ ਭਿਕ੍ਖੂ’’ਤਿ ਅਪ੍ਪਟਿਜਾਨਨ੍ਤਾਪਿ ਹਿ ਭਿਕ੍ਖੁਵੋਹਾਰਨਿਮਿਤ੍ਤਸ੍ਸ ਲਿਙ੍ਗਸ੍ਸ ਗਹਣੇਨ ਚੇਵ ਭਿਕ੍ਖੂਨਂ ਦਿਨ੍ਨਪਚ੍ਚਯਭਾਗਗ੍ਗਹਣਾਦਿਨਾ ਚ ਭਿਕ੍ਖੁਪਟਿਞ੍ਞਾ ਏਵ ਨਾਮ ਹੋਨ੍ਤਿ. ਤਥਾ ਹਿ ਵੁਤ੍ਤਂ ਪੁਗ੍ਗਲਪਞ੍ਞਤ੍ਤਿਅਟ੍ਠਕਥਾਯਂ –

‘‘‘ਅਬ੍ਰਹ੍ਮਚਾਰੀ ਬ੍ਰਹ੍ਮਚਾਰਿਪਟਿਞ੍ਞੋ’ਤਿ ਅਞ੍ਞੇ ਬ੍ਰਹ੍ਮਚਾਰਿਨੋ ਸੁਨਿਵਤ੍ਥੇ ਸੁਪਾਰੁਤੇ ਸੁਮ੍ਭਕਪਤ੍ਤਧਰੇ ਗਾਮਨਿਗਮਜਨਪਦਰਾਜਧਾਨੀਸੁ ਪਿਣ੍ਡਾਯ ਚਰਿਤ੍ਵਾ ਜੀਵਿਕਂ ਕਪ੍ਪੇਨ੍ਤੇ ਦਿਸ੍ਵਾ ਸਯਮ੍ਪਿ ਤਾਦਿਸੇਨ ਆਕਾਰੇਨ ਤਥਾ ਪਟਿਪਜ੍ਜਨਤੋ ‘ਅਹਂ ਬ੍ਰਹ੍ਮਚਾਰੀ’ਤਿ ਪਟਿਞ੍ਞਂ ਦੇਨ੍ਤੋ ਵਿਯ ਹੋਤਿ. ‘ਅਹਂ ਭਿਕ੍ਖੂ’ਤਿ ਵਤ੍ਵਾ ਉਪੋਸਥਗ੍ਗਾਦੀਨਿ ਪਵਿਸਨ੍ਤੋ ਪਨ ਬ੍ਰਹ੍ਮਚਾਰਿਪਟਿਞ੍ਞੋ ਹੋਤਿਯੇਵ, ਤਥਾ ਸਙ੍ਘਿਕਂ ਲਾਭਂ ਗਣ੍ਹਨ੍ਤੋ’’ਤਿ (ਪੁ. ਪ. ਅਟ੍ਠ. ੯੧).

ਤਸ੍ਮਾ ਏਵਰੂਪੇਹਿ ਪਟਿਞ੍ਞਾਯ ਭਿਕ੍ਖੂਹਿ ਗੋਤ੍ਰਭੁਪਰਿਯੋਸਾਨੇਹਿ ਸਦ੍ਧਿਂ ਸਮ੍ਭੋਗਪਰਿਭੋਗੋ ਨ ਵਟ੍ਟਤਿ, ਅਲਜ੍ਜੀਪਰਿਭੋਗੋਵ ਹੋਤਿ. ਸਞ੍ਚਿਚ੍ਚ ਆਪਤ੍ਤਿਆਪਜ੍ਜਨਾਦਿਅਲਜ੍ਜੀਲਕ੍ਖਣਂ ਪਨ ਉਕ੍ਕਟ੍ਠਾਨਂ ਭਿਕ੍ਖੂਨਂ ਵਸੇਨ ਵੁਤ੍ਤਂ ਸਾਮਣੇਰਾਦੀਨਮ੍ਪਿ ¶ ਅਲਜ੍ਜੀਵੋਹਾਰਦਸ੍ਸਨਤੋ. ‘‘ਅਲਜ੍ਜੀਸਾਮਣੇਰੇਹਿ ਹਤ੍ਥਕਮ੍ਮਮ੍ਪਿ ਨ ਕਾਰੇਤਬ੍ਬ’’ਨ੍ਤਿ ਹਿ ਵੁਤ੍ਤਂ. ਯਥਾਵਿਹਿਤਪਟਿਪਤ੍ਤਿਯਂ ਅਤਿਟ੍ਠਨਞ੍ਹਿ ਸਬ੍ਬਸਾਧਾਰਣਂ ਅਲਜ੍ਜੀਲਕ੍ਖਣਂ. ਦੁਸ੍ਸੀਲਾ ਲਿਙ੍ਗਗ੍ਗਹਣਤੋ ਪਟ੍ਠਾਯ ਯਥਾਵਿਹਿਤਪਟਿਪਤ੍ਤਿਯਾ ਅਭਾਵਤੋ ਏਕਨ੍ਤਾ ਲਜ੍ਜਿਨੋਵ ਮਹਾਸਙ੍ਘਿਕਾਦਿਨਿਕਾਯਨ੍ਤਰਿਕਾ ਵਿਯ, ਲਿਙ੍ਗਤ੍ਥੇਨਕਾਦਯੋ ਵਿਯ, ਚ. ਯਾਵ ੧੧ ਚ ਤੇਸਂ ਭਿਕ੍ਖੁਪਟਿਞ੍ਞਾ ਅਨੁਵਤ੍ਤਤਿ, ਤਾਵ ਭਿਕ੍ਖੁ ਏਵ, ਤੇਹਿ ਚ ਪਰਿਭੋਗੋ ਅਲਜ੍ਜਿਪਅਭੋਗੋਵ, ਤੇਸਞ੍ਚ ਭਿਕ੍ਖੁਸਙ੍ਘਸਞ੍ਞਾਯ ਦਿਨ੍ਨਂ ਸਙ੍ਘੇ ਦਿਨ੍ਨਂ ਨਾਮ ਹੋਤਿ. ਵੁਤ੍ਤਞ੍ਹਿ ਭਗਵਤਾ –

‘‘ਭਵਿਸ੍ਸਨ੍ਤਿ ਖੋ ਪਨਾਨਨ੍ਦ, ਅਨਾਗਤਮਦ੍ਧਾਨਂ ਗੋਤ੍ਰਭੁਨੋ ਕਾਸਾਵਕਣ੍ਠਾ ਦੁਸ੍ਸੀਲਾ ਪਾਪਧਮ੍ਮਾ, ਤੇਸੁ ਦੁਸ੍ਸੀਲੇਸੁ ਸਙ੍ਘਂ ਉਦ੍ਦਿਸ੍ਸ ਦਾਨਂ ਦਸ੍ਸਨ੍ਤਿ, ਤਦਾਪਾਹਂ, ਆਨਨ੍ਦ, ਸਙ੍ਘਗਤਂ ਦਕ੍ਖਿਣਂ ਅਸਙ੍ਖ੍ਯੇਯ੍ਯਂ ਅਪ੍ਪਮੇਯ੍ਯਂ ਵਦਾਮੀ’’ਤਿ (ਮ. ਨਿ. ੩.੩੮੦).

ਭਗਵਤੋ ਸਙ੍ਘਂ ਉਦ੍ਦਿਸ੍ਸ ਦਿਨ੍ਨਤ੍ਤਾ ਦਕ੍ਖਿਣਾ ਅਸਙ੍ਖ੍ਯੇਯ੍ਯਾ ਅਪ੍ਪਮੇਯ੍ਯਾ ਜਾਤਾ. ਦੁਸ੍ਸੀਲਾਨਂ ਦਿਨ੍ਨਤ੍ਤਾ ਨਾਤਿ ਚੇ? ਨ, ਤੇਸੁ ਸਙ੍ਘਂ ਉਦ੍ਦਿਸ੍ਸਾਤਿ ਗੋਤ੍ਰਭੂਨਂ ਪਟਿਗ੍ਗਾਹਕਤ੍ਤੇਨ ਪਰਾਮਟ੍ਠਤ੍ਤਾ, ਇਤਰਥਾ ‘‘ਯੇਸੁ ਕੇਸੁਚਿ ਗਹਟ੍ਠੇਸੁ ਵਾ ਪਬ੍ਬਜਿਤੇਸੁ ਵਾ ਸਙ੍ਘਂ ਉਦ੍ਦਿਸ੍ਸਾ’’ਤਿ ਵਤ੍ਤਬ੍ਬਤਾਪਸਙ੍ਗਤੋ, ਤਥਾ ਚ ‘‘ਤਦਾਪਾਹਂ, ਆਨਨ੍ਦਾ’’ਤਿ ਹੇਟ੍ਠਿਮਕੋਟਿਦਸ੍ਸਨਸ੍ਸ ਪਯੋਜਨਂ ਨ ਸਿਯਾ. ਤਸ੍ਮਾ ਗੋਤ੍ਰਭੂਨਮ੍ਪਿ ਅਭਾਵੇ ਸਙ੍ਘਂ ਉਦ੍ਦਿਸ੍ਸ ਦਾਨਂ ਨਤ੍ਥਿ, ਹੇਟ੍ਠਿਮਕੋਟਿਯਾ ਤੇਸੁਪਿ ਦਿਨ੍ਨਾ ਸਙ੍ਘਗਤਾ ਦਕ੍ਖਿਣਾ ਅਸਙ੍ਖ੍ਯੇਯ੍ਯਾ, ਨ ਤਤੋ ਪਰਂ ਸਿਜ੍ਝਤੀਤਿ ਤੇਪਿ ਪਟਿਞ੍ਞਾਯ ਭਿਕ੍ਖੁ ਏਵਾਤਿ ਗਹੇਤਬ੍ਬਂ.

ਬ੍ਰਹ੍ਮਘੋਸਨ੍ਤਿ ਉਤ੍ਤਮਘੋਸਂ, ਬ੍ਰਹ੍ਮੁਨੋ ਘੋਸਸਦਿਸਂ ਵਾ ਘੋਸਂ. ਏਹਿ ਭਿਕ੍ਖੂਤਿ ‘‘ਭਿਕ੍ਖੂ’’ਤਿਸਮ੍ਬੋਧਨਂ. ਸਂਸਾਰੇ ਭਯਇਕ੍ਖਕ ਤਸ੍ਸ ਭਯਸ੍ਸ ਸਬ੍ਬਸੋ ਵਿਨਾਸਨਤ੍ਥਂ ਤਿਸਰਣਂ, ਸਾਸਨਂ ਵਾ ਏਹਿ ਮਨਸਾ ‘‘ਤਾਣਂ ਲੇਣ’’ਨ੍ਤਿ ਪਵਿਸ ਉਪਗਚ੍ਛ. ਉਪਗਨ੍ਤ੍ਵਾਪਿ ਚਰ ਬ੍ਰਹ੍ਮਚਰਿਯਨ੍ਤਿ ਸਾਸਨਬ੍ਰਹ੍ਮਚਰਿਯਂ ਮਗ੍ਗਬ੍ਰਹ੍ਮਚਰਿਯਞ੍ਚ ਚਰਸ੍ਸੁ. ਭਣ੍ਡੂਤਿ ਮੁਣ੍ਡਿਤਕੇਸੋ. ਵਾਸੀਤਿ ਦਨ੍ਤਕਟ੍ਠਾਦਿਚ੍ਛੇਦਨਵਾਸਿ. ਬਨ੍ਧਨਨ੍ਤਿ ਕਾਯਬਨ੍ਧਨਂ. ਯੁਤ੍ਤੋ ਯੋਗੋ ਸਮਾਧਿਪਞ੍ਞਾਵਸੇਨ ਸੋ ਯੁਤ੍ਤਯੋਗੋ, ਤਸ੍ਸ ਅਟ੍ਠੇਤੇ ਪਰਿਕ੍ਖਾਰਾਤਿ ਸੇਸੋ. ਸਰੀਰੇ ਪਟਿਮੁਕ੍ਕੇਹਿਯੇਵ ਉਪਲਕ੍ਖਿਤੋਤਿ ਸੇਸੋ. ‘‘ਤੀਣਿ ਸਤਾਨੀ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧਸੁਖਤ੍ਥਂ ‘‘ਤੀਣਿ ਸਤ’’ਨ੍ਤਿ ਵੁਤ੍ਤਂ.

ਤਸ੍ਮਾਤਿ ¶ ਭਗਵਾ ਹੇਟ੍ਠਾ ਵੁਤ੍ਤਂ ਪਰਾਮਸਤਿ. ਹੇਟ੍ਠਾ ਹਿ ‘‘ਅਹਂ ਖੋ ਪਨ, ਕਸ੍ਸਪ, ਜਾਨਞ੍ਞੇਵ ਵਦਾਮਿ ‘ਜਾਨਾਮੀ’ਤਿ, ਪਸ੍ਸਞ੍ਞੇਵ ਵਦਾਮਿ ‘ਪਸ੍ਸਾਮੀ’’’ਤਿ (ਸਂ. ਨਿ. ੨.੧੫੪) ਵੁਤ੍ਤਂ, ਤਂ ਪਰਾਮਸਤਿ, ਯਸ੍ਮਾ ਅਹਂ ਜਾਨਂ ਵਦਾਮਿ, ਤਸ੍ਮਾਤਿ ਅਤ੍ਥੋ. ਇਹਾਤਿ ਇਮਸ੍ਮਿਂ ਸਾਸਨੇ. ਤਿਬ੍ਬਨ੍ਤਿ ਮਹਨ੍ਤਂ. ਪਚ੍ਚੁਪਟ੍ਠਿਤਂ ਭਵਿਸ੍ਸਤੀਤਿ ਥੇਰਾਦਿਉਪਸਙ੍ਕਮਨਤੋ ਪੁਰੇਤਰਮੇਵ ਤੇਸੁ ਯਂਨੂਨ ਮੇ ਹਿਰੋਤ੍ਤਪ੍ਪਂ ਉਪਟ੍ਠਿਤਂ ਭਵਿਸ੍ਸਤੀਤਿ ਅਤ੍ਥੋ. ਕੁਸਲੂਪਸਂਹਿਤਨ੍ਤਿ ਅਨਵਜ੍ਜਧਮ੍ਮਨਿਸ੍ਸਿਤਂ. ਅਟ੍ਠਿਂ ਕਤ੍ਵਾਤਿ ਅਤ੍ਤਾਨਂ ਤੇਨ ਧਮ੍ਮੇਨ ਅਟ੍ਠਿਕਂ ਕਤ੍ਵਾ, ਤਂ ਵਾ ਧਮ੍ਮਂ ‘‘ਏਸ ਮੇ ਅਤ੍ਥੋ’’ਤਿ ਅਤ੍ਥਂ ਕਤ੍ਵਾ. ਓਹਿਤਸੋਤੋਤਿ ਧਮ੍ਮੇ ਨਿਹਿਤਸੋਤੋ. ਏਵਞ੍ਹਿ ਤੇ, ਕਸ੍ਸਪ, ਸਿਕ੍ਖਿਤਬ੍ਬਨ੍ਤਿ ਞਾਣਸੋਤਞ੍ਚ ਪਸਾਦਸੋਤਞ੍ਚ ਓਦਹਿਤ੍ਵਾ ‘‘ਧਮ੍ਮਂ ਸਕ੍ਕਚ੍ਚਮੇਵ ਸੁਣਿਸ੍ਸਾਮੀ’’ਤਿ ਏਵਮੇਵ ਤਯਾ ਸਿਕ੍ਖਿਤਬ੍ਬਂ. ਸਾਤਸਹਗਤਾ ਚ ਮੇ ਕਾਯਗਤਾਸਤੀਤਿ ¶ ਅਸੁਭੇਸੁ ਚੇਵ ਆਨਾਪਾਨੇ ਚ ਪਠਮਜ੍ਝਾਨਵਸੇਨ ਸੁਖਸਮ੍ਪਯੁਤ੍ਤਕਾਯਗਤਾਸਤਿ. ਯਂ ਪਨੇਤਸ੍ਸ ਓਵਾਦਸ੍ਸ ਸਕ੍ਕਚ੍ਚਪਟਿਗ੍ਗਹਣਂ, ਅਯਮੇਵ ਥੇਰਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਅਹੋਸਿ (ਸਂ. ਨਿ. ਅਟ੍ਠ. ੨.੨.੧੫੪).

ਉਦ੍ਧੁਮਾਤਕਪਟਿਭਾਗਾਰਮ੍ਮਣਂ ਝਾਨਂ ਉਦ੍ਧੁਮਾਤਕਸਞ੍ਞਾ. ਕਸਿਣਾਰਮ੍ਮਣਂ ਰੂਪਾਵਚਰਜ੍ਝਾਨਂ ਰੂਪਸਞ੍ਞਾ. ਇਮੇਤਿ ਸਞ੍ਞਾਸੀਸੇਨ ਨਿਦ੍ਦਿਟ੍ਠਾ ਇਮੇ ਦ੍ਵੇ ਝਾਨਧਮ੍ਮਾ. ਸੋਪਾਕੋ ਚ ਭਗਵਤਾ ਪੁਟ੍ਠੋ ‘‘ਰੂਪਾਵਚਰਭਾਵੇਨ ਏਕਤ੍ਥਾ, ਬ੍ਯਞ੍ਜਨਮੇਵ ਨਾਨ’’ਨ੍ਤਿ ਆਹ. ਆਰਦ੍ਧਚਿਤ੍ਤੋਤਿ ਆਰਾਧਿਤਚਿਤ੍ਤੋ. ਗਰੁਧਮ੍ਮਪਟਿਗ੍ਗਹਣਾਦਿਉਪਸਮ੍ਪਦਾ ਉਪਰਿ ਸਯਮੇਵ ਆਵਿ ਭਵਿਸ੍ਸਤਿ.

ਸਬ੍ਬਨ੍ਤਿਮੇਨ ਪਰਿਯਾਯੇਨਾਤਿ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ. ਞਤ੍ਤਿਚਤੁਤ੍ਥਾ ਕਮ੍ਮਵਾਚਾ ਉਪਸਮ੍ਪਦਾਕਮ੍ਮਸ੍ਸ ਕਾਰਣਤ੍ਤਾ ਠਾਨਂ, ਤਸ੍ਸ ਠਾਨਸ੍ਸ ਅਰਹਂ ਅਨੁਚ੍ਛਵਿਕਨ੍ਤਿ ਵਤ੍ਥੁਦੋਸਾਦਿਵਿਨਿਮੁਤ੍ਤਕਮ੍ਮਂ ‘‘ਠਾਨਾਰਹ’’ਨ੍ਤਿ ਵੁਤ੍ਤਂ ਵਤ੍ਥਾਦਿਦੋਸਯੁਤ੍ਤਸ੍ਸ ਕਮ੍ਮਸ੍ਸ ਸਭਾਵਤੋ ਕਮ੍ਮਵਾਚਾਰਹਤ੍ਤਾਭਾਵਾ. ਅਥ ਵਾ ਠਾਨਨ੍ਤਿ ਨਿਬ੍ਬਾਨਪ੍ਪਤ੍ਤਿਹੇਤੁਤੋ ਸਿਕ੍ਖਤ੍ਤਯਸਙ੍ਗਹਂ ਸਾਸਨਂ ਵੁਚ੍ਚਤਿ, ਤਸ੍ਸ ਅਨੁਚ੍ਛਵਿਕਂ ਕਮ੍ਮਂ ਠਾਨਾਰਹਂ. ਯਥਾਵਿਹਿਤਲਕ੍ਖਣੇਨ ਹਿ ਕਮ੍ਮੇਨ ਉਪਸਮ੍ਪਨ੍ਨੋਵ ਸਕਲਂ ਸਾਸਨਂ ਸਮਾਦਾਯ ਪਰਿਪੂਰੇਤੁਮਰਹਤਿ. ਤਸ੍ਮਾ ਪਰਿਸੁਦ੍ਧਕਮ੍ਮਵਾਚਾਪਰਿਯੋਸਾਨਂ ਸਬ੍ਬਂ ਸਙ੍ਘਕਿਚ੍ਚਂ ਠਾਨਾਰਹਂ ਨਾਮ, ਤੇਨਾਹ ‘‘ਸਤ੍ਥੁਸਾਸਨਾਰਹੇਨਾ’’ਤਿ, ਸੀਲਾਦਿਸਕਲਸਾਸਨਪਰਿਪੁਣ੍ਣਸ੍ਸ ਅਨੁਚ੍ਛਵਿਕੇਨਾਤਿ ਅਤ੍ਥੋ. ਅਯਂ ਇਮਸ੍ਮਿਂ ਅਤ੍ਥੇਤਿ ਞਤ੍ਤਿਚਤੁਤ੍ਥਕਮ੍ਮੇਨ ਉਪਸਮ੍ਪਨ੍ਨਸ੍ਸੇਵ ਸਬ੍ਬਸਿਕ੍ਖਾਪਦੇਸੁ ਵੁਤ੍ਤਤ੍ਤਾ ਕਿਞ੍ਚਾਪਿ ਏਹਿਭਿਕ੍ਖੂਪਸਮ੍ਪਦਾਦੀਹਿ ਉਪਸਮ੍ਪਨ੍ਨਾਨਂ ਸੁਦ੍ਧਸਤ੍ਤਾਨਂ ਪਣ੍ਣਤ੍ਤਿਵਜ੍ਜਸਿਕ੍ਖਾਪਦਵੀਤਿਕ੍ਕਮੇਪਿ ਅਭਬ੍ਬਤਾ ਵਾ ਦੋਸਾਭਾਵੋ ਵਾ ¶ ਸਦ੍ਦਤੋ ਪਞ੍ਞਾਯਤਿ, ਤਥਾਪਿ ਅਤ੍ਥਤੋ ਤੇਸਮ੍ਪਿ ਪਣ੍ਣਤ੍ਤਿਵਜ੍ਜੇਸੁ, ਲੋਕਵਜ੍ਜੇਸੁਪਿ ਵਾ ਸੁਰਾਪਾਨਾਦਿਲਹੁਕੇਸੁ ਮਗ੍ਗੁਪ੍ਪਤ੍ਤਿਤੋ ਪੁਬ੍ਬੇ ਅਸਞ੍ਚਿਚ੍ਚਾਦਿਨਾ ਆਪਤ੍ਤਿਆਪਜ੍ਜਨਂ ਸਿਜ੍ਝਤਿਯੇਵ. ਤਥਾ ਹਿ ‘‘ਦ੍ਵੇ ਪੁਗ੍ਗਲਾ ਅਭਬ੍ਬਾ ਆਪਤ੍ਤਿਂ ਆਪਜ੍ਜਿਤੁਂ ਬੁਦ੍ਧਾ ਚ ਪਚ੍ਚੇਕਬੁਦ੍ਧਾ ਚ. ਦ੍ਵੇ ਪੁਗ੍ਗਲਾ ਭਬ੍ਬਾ ਆਪਤ੍ਤਿਂ ਆਪਜ੍ਜਿਤੁਂ ਭਿਕ੍ਖੂ ਚ ਭਿਕ੍ਖੁਨਿਯੋ ਚਾ’’ਤਿ (ਪਰਿ. ੩੨੨) ਵੁਤ੍ਤਂ. ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਉਪਸਮ੍ਪਨ੍ਨੋਤਿ ਇਦਂ ਪਨ ਸਬ੍ਬਸਿਕ੍ਖਾਪਦਵੀਤਿਕ੍ਕਮਾਰਹੇ ਸਬ੍ਬਕਾਲਿਕੇ ਚ ਭਿਕ੍ਖੂ ਗਹੇਤ੍ਵਾ ਯੇਭੁਯ੍ਯਵਸੇਨ ਵੁਤ੍ਤਂ. ਨਿਰੁਤ੍ਤਿਵਸੇਨਾਤਿ ਨਿਬ੍ਬਚਨਵਸੇਨ. ਅਭਿਲਾਪਵਸੇਨਾਤਿ ਵੋਹਾਰਵਸੇਨ. ਗੁਣਵਸੇਨਾਤਿ ਭਿਕ੍ਖੁਵੋਹਾਰਨਿਮਿਤ੍ਤਾਨਂ ਗੁਣਾਨਂ ਵਸੇਨ.

ਸਾਜੀਵਪਦਭਾਜਨੀਯਵਣ੍ਣਨਾ

ਵਿਵਟ੍ਟੂਪਨਿਸ੍ਸਯਾ ਸੀਲਾਦਯੋ ਲੋਕਿਯੇਹਿ ਅਭਿਵਿਸਿਟ੍ਠਤ੍ਤਾ ਅਧਿਸੀਲਾਦਿਵੋਹਾਰੇਨ ਵੁਤ੍ਤਾਤਿ ਦਸ੍ਸੇਤੁਂ ¶ ਕਤਮਂ ਪਨਾਤਿਆਦਿ ਆਰਦ੍ਧਂ. ਤਤ੍ਥ ਪਞ੍ਚਙ੍ਗਦਸਙ੍ਗਸੀਲਨ੍ਤਿ ਅਬੁਦ੍ਧੁਪ੍ਪਾਦਕਾਲੇ ਸੀਲਂ ਸਨ੍ਧਾਯ ਵੁਤ੍ਤਂ ਤਸ੍ਸ ਵਿਵਟ੍ਟੂਪਨਿਸ੍ਸਯਤ੍ਤਾਭਾਵਾ. ਯਂ ਪਨ ਬੁਦ੍ਧੁਪ੍ਪਾਦੇ ਰਤਨਤ੍ਤਯਗੁਣਂ ਤਥਤੋ ਞਤ੍ਵਾ ਸਾਸਨੇ ਸੁਨਿਵਿਟ੍ਠਸਦ੍ਧਾਹਿ ਉਪਾਸਕੋਪਾਸਿਕਾਹਿ ਚੇਵ ਸਾਮਣੇਰਸਿਕ੍ਖਮਾਨਾਹਿ ਚ ਰਕ੍ਖਿਯਮਾਨਂ ਪਞ੍ਚਙ੍ਗਅਟ੍ਠਙ੍ਗਦਸਙ੍ਗਸੀਲਂ, ਤਮ੍ਪਿ ਅਧਿਸੀਲਮੇਵ ਮਗ੍ਗੁਪ੍ਪਤ੍ਤਿਹੇਤੁਤੋ. ਵਿਪਸ੍ਸਨਾਮਗ੍ਗੁਪ੍ਪਤ੍ਤਿਨਿਮਿਤ੍ਤਤਾਯ ਹਿ ਪਾਤਿਮੋਕ੍ਖਸਂਵਰਸੀਲਂ ਲੋਕਿਯਾਨਂ ਸੀਲੇਹਿ ਅਧਿਸੀਲਂ ਜਾਤਂ ਅਧਿਚਿਤ੍ਤਂ ਵਿਯ. ਨ ਹਿ ਵਿਪਸ੍ਸਨਾਮਗ੍ਗਨਿਮਿਤ੍ਤਤਂ ਮੁਞ੍ਚਿਤ੍ਵਾ ਲੋਕਿਯਚਿਤ੍ਤਤੋ ਅਧਿਚਿਤ੍ਤਸ੍ਸ ਅਞ੍ਞੋ ਕੋਚਿ ਵਿਸੇਸੋ ਉਪਲਬ੍ਭਤਿ, ਤਦੁਭਯਞ੍ਚ ਅਨਾਦਿਮਤੋ ਸਂਸਾਰਵਟ੍ਟਸ੍ਸ ਅਤ੍ਤਾਦਿਸਾਰਵਿਰਹਿਤਤਾਯ ਤਿਲਕ੍ਖਣਬ੍ਭਾਹਤਤ੍ਤਂ, ‘‘ਅਹਂ ਮਮਾ’’ਤਿ ਆਕਾਰੇਨ ਪਵਤ੍ਤਅਵਿਜ੍ਜਾਤਣ੍ਹਾਦਿਦੋਸਮੂਲਕਤ੍ਤਞ੍ਚ, ਤਂਦੋਸਮੂਲਵਿਦ੍ਧਂਸਨਸਮਤ੍ਥਾਯ ਸੀਲਚਿਤ੍ਤਬਲੋਪਤ੍ਥਦ੍ਧਾਯ ਵਿਪਸ੍ਸਨਾਯ ਉਕ੍ਕਂਸੇਨੇਵ ਤਸ੍ਸ ਸਂਸਾਰਵਟ੍ਟਸ੍ਸ ਵਿਗਮਞ੍ਚ, ਤਦੁਪਦੇਸਕਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਬ੍ਬਞ੍ਞੁਤਾਦਿਅਪਰਿਮਿਤਗੁਣਗਣਯੋਗੇਨ ਅਵਿਪਰੀਤਸਦ੍ਧਮ੍ਮਦੇਸਕਤ੍ਤਞ੍ਚ ਯਾਥਾਵਤੋ ਞਤ੍ਵਾ ਪਟਿਪਨ੍ਨੇਨ ਸਮਾਦਾਯ ਸਿਕ੍ਖਿਤਬ੍ਬਤਾਯ ਵਿਵਟ੍ਟੂਪਨਿਸ੍ਸਯਂ ਜਾਤਂ, ਨ ਅਞ੍ਞੇਨ ਕਾਰਣੇਨ, ਤਞ੍ਚ ਵਿਵਟ੍ਟੂਪਨਿਸ੍ਸਯਤ੍ਤਂ ਯਦਿ ਸਾਸਨੇ ਪਞ੍ਚਸੀਲਾਦਿਸ੍ਸਾਪਿ ਸਮਾਨਂ, ਕਿਮਿਦਂ ਅਧਿਸੀਲਂ ਨ ਸਿਯਾ. ਪਞ੍ਚਸੀਲਾਦਿਮਤ੍ਤੇ ਠਿਤਾਨਞ੍ਹਿ ਅਨਾਥਪਿਣ੍ਡਿਕਾਦੀਨਂ ਗਹਟ੍ਠਾਨਮ੍ਪਿ ਮਗ੍ਗੋ ਉਪ੍ਪਜ੍ਜਤਿ. ਨ ਹਿ ਅਧਿਸੀਲਾਧਿਚਿਤ੍ਤਂ ਵਿਨਾ ਮਗ੍ਗੁਪ੍ਪਤ੍ਤਿ ਹੋਤਿ, ਤਞ੍ਚ ਕਿਞ੍ਚਾਪਿ ਕੇਸਞ੍ਚਿ ¶ ਅਨੁਪਨਿਸ੍ਸਯਤਾਯ ਤਸ੍ਮਿਂ ਅਤ੍ਤਭਾਵੇ ਮਗ੍ਗੁਪ੍ਪਤ੍ਤਿਯਾ ਹੇਤੁ ਨ ਹੋਤਿ, ਤਥਾਪਿ ਭਵਨ੍ਤਰੇ ਅਵਸ੍ਸਂ ਹੋਤੇਵਾਤਿ ਅਧਿਸੀਲਮੇਵ ਕਾਲਂ ਕਰੋਨ੍ਤਾਨਂ ਕਲ੍ਯਾਣਪੁਥੁਜ੍ਜਨਾਨਂ ਪਾਤਿਮੋਕ੍ਖਸਂਵਰਸੀਲਂ ਵਿਯ, ਤੇਨਾਹ ਬੁਦ੍ਧੁਪ੍ਪਾਦੇਯੇਵ ਚ ਪਵਤ੍ਤਤੀਤਿਆਦਿ. ਵਿਵਟ੍ਟਂ ਪਤ੍ਥੇਤ੍ਵਾ ਰਕ੍ਖਿਯਮਾਨਮ੍ਪਿ ਪਞ੍ਚਸੀਲਾਦਿ ਬੁਦ੍ਧੁਪ੍ਪਾਦੇਯੇਵ ਪਵਤ੍ਤਤਿ. ਨ ਹਿ ਤਂ ਪਞ੍ਞਤ੍ਤਿਨ੍ਤਿਆਦਿ ਪਨ ਉਕ੍ਕਟ੍ਠਵਸੇਨ ਸਬ੍ਬਂ ਪਾਤਿਮੋਕ੍ਖਂ ਸਨ੍ਧਾਯ ਵੁਤ੍ਤਂ. ਤਦੇਕਦੇਸਭੂਤਮ੍ਪਿ ਹਿ ਪਾਣਾਤਿਪਾਤਾਦਿਨ੍ਨਾਦਾਨਾਦਿਗਹਟ੍ਠਸੀਲਮ੍ਪਿ. ਬੁਦ੍ਧਾਯੇਵ ਵਿਨਯੇ ਪਾਰਾਜਿਕਸੁਤ੍ਤਵਿਭਙ੍ਗਾਦੀਸੁ ਆਗਤਵਸੇਨ ਸਬ੍ਬਸੋ ਕਾਯਵਚੀਦ੍ਵਾਰੇਸੁ ਮਗ੍ਗੁਪ੍ਪਤ੍ਤਿਯਾ ਵਿਬਨ੍ਧਕਅਜ੍ਝਾਚਾਰਸੋਤਂ ਵਿਚ੍ਛਿਨ੍ਦਿਤ੍ਵਾ ਮਗ੍ਗੁਪ੍ਪਤ੍ਤਿਯਾ ਪਦਟ੍ਠਾਨਭਾਵੇਨ ਪਞ੍ਞਪੇਤੁਂ ਸਕ੍ਕੋਨ੍ਤਿ, ਨ ਅਞ੍ਞੇ. ਮਗ੍ਗੁਪ੍ਪਤ੍ਤਿਂ ਸਨ੍ਧਾਯ ਹਿਸ੍ਸ ਅਧਿਸੀਲਤਾ ਵੁਤ੍ਤਾ. ਤੇਨਾਹ ‘‘ਪਾਤਿਮੋਕ੍ਖਸਂਵਰਤੋਪਿ ਚ ਮਗ੍ਗਫਲਸਮ੍ਪਯੁਤ੍ਤਮੇਵ ਸੀਲਂ ਅਧਿਸੀਲ’’ਨ੍ਤਿ. ਤਸ੍ਸੇਵ ਹਿ ਅਧਿਸੀਲਨ੍ਤਿ ਅਬ੍ਯਵਧਾਨੇਨ ਮਗ੍ਗਾਧਿਟ੍ਠਾਨਾਤਿ. ਇਧ ਅਨਧਿਪ੍ਪੇਤਨ੍ਤਿ ਇਮਸ੍ਮਿਂ ਪਠਮਪਾਰਾਜਿਕਵਿਸਯੇ ‘‘ਸਿਕ੍ਖਾ’’ਤਿ ਅਨਧਿਪ੍ਪੇਤਂ.

ਲੋਕਿਯਅਟ੍ਠਸਮਾਪਤ੍ਤਿਚਿਤ੍ਤਾਨੀਤਿ ਸਾਸਨਸਭਾਵਂ ਅਜਾਨਨ੍ਤੇਹਿ ਲੋਕਿਯਜਨੇਹਿ ਸਮਾਪਜ੍ਜਿਤਬ੍ਬਾਨਿ ਅਟ੍ਠ ਰੂਪਾਰੂਪਜ੍ਝਾਨਸਮ੍ਪਯੁਤ੍ਤਚਿਤ੍ਤਾਨਿ ਸਨ੍ਧਾਯ ਵੁਤ੍ਤਂ. ਨ ਹਿ ਮਹਗ੍ਗਤੇਸੁ ਲੋਕਿਯਲੋਕੁਤ੍ਤਰਭੇਦੋ ਅਤ੍ਥਿ, ਯੇਨ ਲੋਕਿਯਵਿਸੇਸਨਂ ਲੋਕੁਤ੍ਤਰਨਿਵਤ੍ਤਨਂ ਸਿਯਾ. ਤਸ੍ਮਾ ਸਾਸਨਿਕੇਹਿ ਸਮਾਪਜ੍ਜਿਤਬ੍ਬਮਹਗ੍ਗਤਜ੍ਝਾਨਨਿਵਤ੍ਤਨਮੇਵ ਲੋਕਿਯਵਿਸੇਸਨਂ ਕਤਂ. ਯਥਾ ਚੇਤ੍ਥ, ਏਵਂ ਕਾਮਾਵਚਰਾਨਿ ਪਨ ਅਟ੍ਠ ਕੁਸਲਚਿਤ੍ਤਾਨੀਤਿ ਏਤ੍ਥਾਪਿ ਲੋਕਿਯਵਿਸੇਸਨਂ ਕਾਤਬ੍ਬਮੇਵ. ਅਯਮੇਵ ਹਿ ਅਧਿਚਿਤ੍ਤਤੋ ¶ ਚਿਤ੍ਤਸ੍ਸ ਭੇਦੋ, ਯਂ ਸਾਸਨਂ ਅਜਾਨਨ੍ਤਸ੍ਸ ਪੁਗ੍ਗਲਸ੍ਸ ਸਮੁਪ੍ਪਜ੍ਜਨਂ. ਏਵਞ੍ਚ ਅਬੁਦ੍ਧੁਪ੍ਪਾਦੇਪਿ ਸਾਸਨਸਭਾਵਂ ਜਾਨਨ੍ਤਾਨਂ ਪਚ੍ਚੇਕਬੁਦ੍ਧਾਦੀਨਮ੍ਪਿ ਸੀਲਚਿਤ੍ਤਾਨਂ ਅਧਿਸੀਲਾਧਿਚਿਤ੍ਤਤਾ ਸਮਤ੍ਥਿਤਾ ਹੋਤਿ. ਨ ਵਿਨਾ ਬੁਦ੍ਧੁਪ੍ਪਾਦਾਤਿ ਇਦਂ ਪਨ ਅਞ੍ਞੇਸਂ ਅਭਿਸਮਯਹੇਤੁਭਾਵੇਨ ਪਚ੍ਚੇਕਬੁਦ੍ਧਬੋਧਿਸਤ੍ਤਾਦੀਨਂ ਦੇਸਨਾਸਾਮਤ੍ਥਿਯਾਭਾਵਤੋ ਵੁਤ੍ਤਂ. ਆਯਤਿਂ ਵਾਸਨਾਹੇਤੁਂ ਪਨ ਸੀਲਚਿਤ੍ਤਂ ਤੇਪਿ ਦੇਸੇਨ੍ਤਿਯੇਵ, ਤਞ੍ਚ ਮਗ੍ਗਹੇਤੁਤਾਯ ਅਧਿਸੀਲਾਧਿਚਿਤ੍ਤਮ੍ਪਿ ਹੋਨ੍ਤਂ ਅਪ੍ਪਕਤਾਯ ਵਿਪ੍ਫਾਰਿਕਤਾਬਾਹੁਜਞ੍ਞਤ੍ਤਾਭਾਵੇਨ ਅਬ੍ਬੋਹਾਰਿਕਨ੍ਤਿ ‘‘ਬੁਦ੍ਧੁਪ੍ਪਾਦੇਯੇਵਾ’’ਤਿ ਅਵਧਾਰਣਂ ਕਤਨ੍ਤਿ ਵੇਦਿਤਬ੍ਬਂ. ਨ ਹਿ ਤਂਸਮਾਪਨ੍ਨੋਤਿਆਦਿਅਟ੍ਠਕਥਾਵਚਨੇਹਿ ਇਧ ਅਧਿਚਿਤ੍ਤਨਿਦ੍ਦੇਸੇ, ਉਪਰਿ ਅਧਿਪਞ੍ਞਾਨਿਦ੍ਦੇਸੇ ਚ ਮਗ੍ਗਫਲਸਮ੍ਪਯੁਤ੍ਤਅਧਿਚਿਤ੍ਤਅਧਿਪਞ੍ਞਾਨਮੇਵ ਪਟਿਕ੍ਖੇਪਤੋ ਲੋਕਿਯਾਧਿਚਿਤ੍ਤਾਧਿਪਞ੍ਞਾਨਂ ¶ ਇਧ ਅਧਿਪ੍ਪੇਤਤਾ, ਤਂ ਦ੍ਵਯਂ ਸਮਾਪਨ੍ਨਸ੍ਸਾਪਿ ਮੇਥੁਨਧਮ੍ਮਸਮਾਪਜ੍ਜਨਸਭਾਵੋ ਚ ਵਿਞ੍ਞਾਯਤਿ, ਪਾਲ਼ਿਯਂ ਪਨ ‘‘ਯਾਯਂ ਅਧਿਸੀਲਸਿਕ੍ਖਾ, ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਸਿਕ੍ਖਾ’’ਤਿ ਵੁਤ੍ਤਤ੍ਤਾ ਲੋਕਿਯਾਪਿ ਅਧਿਚਿਤ੍ਤਾਧਿਪਞ੍ਞਾ ਅਨਧਿਪ੍ਪੇਤਾਤਿ ਵਿਞ੍ਞਾਯਤਿ. ਤਸ੍ਮਾ ਪਾਲ਼ਿਯਂ ਅਟ੍ਠਕਥਾਯਞ੍ਚ ਏਵਮਧਿਪ੍ਪਾਯੋ ਵੇਦਿਤਬ੍ਬੋ – ‘‘ਮੇਥੁਨਂ ਧਮ੍ਮਂ ਪਟਿਸੇਵਿਸ੍ਸਾਮੀ’’ਤਿ ਚਿਤ੍ਤੇ ਉਪ੍ਪਨ੍ਨਮਤ੍ਤੇ ਲੋਕਿਯਂ ਅਧਿਚਿਤ੍ਤਂ ਅਧਿਪਞ੍ਞਾ ਚ ਪਰਿਹਾਯਤਿ, ਅਧਿਸੀਲਂ ਪਨ ਚਿਤ੍ਤੁਪ੍ਪਾਦਮਤ੍ਤੇਨ ਨ ਪਰਿਹਾਯਤੀਤਿ ਪਾਲ਼ਿਯਂ ਅਧਿਸੀਲਸਿਕ੍ਖਾਵ ਵੁਤ੍ਤਾ. ਅਟ੍ਠਕਥਾਯਂ ਪਨ ਪਟਿਲਦ੍ਧਲੋਕੁਤ੍ਤਰਮਗ੍ਗਸ੍ਸ ਭਿਕ੍ਖੁਨੋ ‘‘ਮੇਥੁਨਂ ਪਟਿਸੇਵਿਸ੍ਸਾਮੀ’’ਤਿ ਚਿਤ੍ਤਮ੍ਪਿ ਨ ਉਪ੍ਪਜ੍ਜਤਿ ਸਬ੍ਬਸੋ ਅਕੁਪ੍ਪਧਮ੍ਮਤ੍ਤਾ, ਪੁਥੁਜ੍ਜਨਾਨਂ ਸਮਾਪਤ੍ਤਿਲਾਭੀਨਮ੍ਪਿ ਕੇਨਚਿ ਕਾਰਣੇਨ ਉਪ੍ਪਜ੍ਜਤਿ ਕੁਪ੍ਪਧਮ੍ਮਤ੍ਤਾਤਿ ਇਮਂ ਵਿਸੇਸਂ ਦਸ੍ਸੇਤੁਂ ‘‘ਨ ਹਿ ਤਂਸਮਾਪਨ੍ਨੋ’’ਤਿ ਲੋਕੁਤ੍ਤਰਾਵ ਪਟਿਕ੍ਖਿਤ੍ਤਾਤਿ ਵੇਦਿਤਬ੍ਬਂ.

ਅਤ੍ਥਿ ਦਿਨ੍ਨਨ੍ਤਿ ਏਤ੍ਥ ਦਿਨ੍ਨਨ੍ਤਿ ਦਾਨਚੇਤਨਾ ਅਧਿਪ੍ਪੇਤਾ, ਤਸ੍ਸ ਦਿਨ੍ਨਸ੍ਸ ਫਲਂ ਅਤ੍ਥੀਤਿ ਅਤ੍ਥੋ. ਏਸ ਨਯੋ ਅਤ੍ਥਿ ਯਿਟ੍ਠਨ੍ਤਿ ਏਤ੍ਥਾਪਿ. ਆਦਿ-ਸਦ੍ਦੇਨ ਹੁਤਾਦੀਨਂ ਸਙ੍ਗਹੋ. ਤਤ੍ਥ ਯਿਟ੍ਠਨ੍ਤਿ ਮਹਾਯਾਗੋ ਸਬ੍ਬਸਾਧਾਰਣਂ ਮਹਾਦਾਨਮੇਵ. ਹੁਤਨ੍ਤਿ ਪਹੋਨਕਸਕ੍ਕਾਰੋ, ਅਤ੍ਤਨੋ ਵਾ ਹੋਤੁ, ਪਰੇਸਂ ਵਾ ਦਸ ਅਕੁਸਲਕਮ੍ਮਪਥਾ, ਸਬ੍ਬੇਪਿ ਵਾ ਅਕੁਸਲਾ ਧਮ੍ਮਾ ਅਨਤ੍ਥੁਪ੍ਪਾਦਨਤੋ ਨ ਸਕਂ ਕਮ੍ਮਂ ਨਾਮ, ਤਬ੍ਬਿਪਰੀਤਾ ਕੁਸਲਾ ਧਮ੍ਮਾ ਸਕਂ ਨਾਮ, ਤਦੁਭਯਮ੍ਪਿ ਵਾ ਕੁਸਲਾਕੁਸਲਂ ਕਮ੍ਮਸ੍ਸਕੋਮ੍ਹੀਤਿਆਦਿਵਚਨਤੋ ਸਤਿ ਸਂਸਾਰਪ੍ਪਵਤ੍ਤਿਯਂ ਅਧਿਮੁਚ੍ਚਨਟ੍ਠੇਨ ਸਤ੍ਤਾਨਂ ਸਕਨ੍ਤਿ ਏਵਂ ਕਮ੍ਮਸ੍ਸਕਤਾਯ ਸਕਭਾਵੇ ਅਤ੍ਤਨੋ ਸਨ੍ਤਕਤਾਯ ਉਪ੍ਪਜ੍ਜਨਕਞਾਣਂ ਕਮ੍ਮਸ੍ਸਕਤਞ੍ਞਾਣਂ, ਉਪਲਕ੍ਖਣਮਤ੍ਤਞ੍ਚੇਤਂ. ਸਾਸਨਨਿਸ੍ਸਿਤਾ ਪਨ ਸਬ੍ਬਾਪਿ ਵਟ੍ਟਗਾਮਿਨਿਕੁਸਲਪਞ੍ਞਾ ਕਮ੍ਮਸ੍ਸਕਤਞ੍ਞਾਣੇ ਪਵਿਟ੍ਠਾ. ਸਾਸਨਨਿਸ੍ਸਿਤਾ ਹਿ ਵਿਵਟ੍ਟਗਾਮਿਨੀ ਸਬ੍ਬਾਪਿ ਪਞ੍ਞਾ ‘‘ਸਚ੍ਚਾਨੁਲੋਮਿਕਞਾਣ’’ਨ੍ਤਿ ਵੁਚ੍ਚਤਿ. ਸਾ ਏਵ ਚ ਅਧਿਪਞ੍ਞਾ ਤਦਵਸੇਸਂ ਸਬ੍ਬਂ ਕਮ੍ਮਸ੍ਸਕਤਞ੍ਞਾਣਨ੍ਤਿ ਵੇਦਿਤਬ੍ਬਂ, ਤੇਨੇਵ ਭਗਵਾ ‘‘ਕਮ੍ਮਸ੍ਸਕਤਞ੍ਞਾਣਂ ਸਚ੍ਚਾਨੁਲੋਮਿਕਞਾਣਂ ਮਗ੍ਗਸਮਙ੍ਗਿਸ੍ਸ ਞਾਣਂ ਫਲਸਮਙ੍ਗਿਸ੍ਸ ਞਾਣ’’ਨ੍ਤਿ ਸਬ੍ਬਮ੍ਪਿ ਞਾਣਚਤੁਕ੍ਕੇਯੇਵ ਸਙ੍ਗਹੇਸਿ. ਤਿਲਕ੍ਖਣਾਕਾਰਪਰਿਚ੍ਛੇਦਕਂ ਪਨ ਵਿਪਸ੍ਸਨਾਞਾਣਨ੍ਤਿ ਇਦਂ ਪਨ ਮਗ੍ਗਸ੍ਸ ¶ ਆਸਨ੍ਨਪਚ੍ਚਯਤਾਯ ਉਕ੍ਕਟ੍ਠਵਸੇਨ ਵੁਤ੍ਤਂ. ਤਦਿਤਰਾਸਞ੍ਹਿ ਰਤਨਤ੍ਤਯਾਨੁਸ੍ਸਰਣਾਦਿਪਞ੍ਞਾਨਮ੍ਪਿ ਮਗ੍ਗਹੇਤੁਤਾਯ ਅਧਿਪਞ੍ਞਤਾ ਸਮਾਨਾਵਾਤਿ ਗਹੇਤਬ੍ਬਂ.

ਸਾਜੀਵਪਦਭਾਜਨੀਯਵਣ੍ਣਨਾਨਯੋ ਨਿਟ੍ਠਿਤੋ.

ਪਚ੍ਚਕ੍ਖਾਨਵਿਭਙ੍ਗਵਣ੍ਣਨਾ

ਦੁਬ੍ਬਲ੍ਯੇ ¶ ਆਵਿਕਤੇਤਿ ਯਂਨੂਨਾਹਂ ਬੁਦ੍ਧਂ ਪਚ੍ਚਕ੍ਖੇਯ੍ਯਨ੍ਤਿਆਦਿਨਾ ਦੁਬ੍ਬਲਭਾਵੇ ਪਕਾਸਿਤੇ. ਮੁਖਾਰੁਲ਼੍ਹਤਾਤਿ ਲੋਕਜਨਾਨਂ ਸਤ੍ਤਟ੍ਠਾਤਿਆਦੀਸੁ ਮੁਖਾਰੁਲ਼੍ਹਞਾਯੇਨਾਤਿ ਅਧਿਪ੍ਪਾਯੋ. ਦਿਰਤ੍ਤਤਿਰਤ੍ਤਨ੍ਤਿ (ਪਾਚਿ. ੫੨) ਏਤ੍ਥ ਯਥਾ ਅਨ੍ਤਰਨ੍ਤਰਾ ਸਹਸੇਯ੍ਯਾਵਸੇਨ ਤਿਰਤ੍ਤਂ ਅਗ੍ਗਹੇਤ੍ਵਾ ਨਿਰਨ੍ਤਰਮੇਵ ਤਿਸ੍ਸੋ ਰਤ੍ਤਿਯੋ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਸਹਸੇਯ੍ਯਾਯ ਅਰੁਣੁਟ੍ਠਾਪਨਵਸੇਨ ਤਿਰਤ੍ਤਗ੍ਗਹਣਤ੍ਥਂ ‘‘ਦਿਰਤ੍ਤਤਿਰਤ੍ਤ’’ਨ੍ਤਿ ਅਬ੍ਯਵਧਾਨੇਨ ਵੁਤ੍ਤਨ੍ਤਿ ਦਿਰਤ੍ਤਗ੍ਗਹਣਸ੍ਸ ਪਯੋਜਨਮ੍ਪਿ ਸਕ੍ਕਾ ਗਹੇਤੁਂ, ਏਵਮਿਧਾਪਿ ਦੁਬ੍ਬਲ੍ਯਂ ਅਨਾਵਿਕਤ੍ਵਾਤਿ ਇਮਸ੍ਸਾਪਿ ਗਹਣਸ੍ਸ ਪਯੋਜਨਮਤ੍ਥੇਵਾਤਿ ਦਸ੍ਸੇਤੁਂ ਯਸ੍ਮਾ ਵਾ ਸਿਕ੍ਖਾਪਚ੍ਚਕ੍ਖਾਨਸ੍ਸਾਤਿਆਦਿ ਵੁਤ੍ਤਂ.

ਇਦਾਨਿ ਦੁਬ੍ਬਲ੍ਯਂ ਅਨਾਵਿਕਤ੍ਵਾਤਿ ਇਮਸ੍ਸ ਪੁਰਿਮਪਦਸ੍ਸੇਵ ਵਿਵਰਣਭਾਵਂ ਵਿਨਾਪਿ ਵਿਸੁਂ ਅਤ੍ਥਸਬ੍ਭਾਵਂ ਦਸ੍ਸੇਤੁਂ ਅਪਿਚਾਤਿਆਦਿ ਵੁਤ੍ਤਂ. ਵਿਸੇਸਾਵਿਸੇਸਨ੍ਤਿ ਏਤ੍ਥ ਯੇਨ ਵਾਕ੍ਯੇਨ ਦੁਬ੍ਬਲ੍ਯਾਵਿਕਮ੍ਮਮੇਵ ਹੋਤਿ, ਨ ਸਿਕ੍ਖਾਪਚ੍ਚਕ੍ਖਾਨਂ, ਤਤ੍ਥ ਸਿਕ੍ਖਾਪਚ੍ਚਕ੍ਖਾਨਦੁਬ੍ਬਲ੍ਯਾਵਿਕਮ੍ਮਾਨਂ ਅਞ੍ਞਮਞ੍ਞਂ ਵਿਸੇਸੋ ਹੋਤਿ. ਯੇਨ ਪਨ ਵਚਨੇਨ ਤਦੁਭਯਮ੍ਪਿ ਹੋਤਿ, ਤਤ੍ਥ ਨੇਵਤ੍ਥਿ ਵਿਸੇਸੋ ਅਵਿਸੇਸੋਪਿ, ਤਂ ਵਿਸੇਸਾਵਿਸੇਸਂ. ‘‘ਕਠ ਕਿਚ੍ਛਜੀਵਨੇ’’ਤਿ ਧਾਤੂਸੁ ਪਠਿਤਤ੍ਤਾ ਵੁਤ੍ਤਂ ‘‘ਕਿਚ੍ਛਜੀਵਿਕਪ੍ਪਤ੍ਤੋ’’ਤਿ. ਉਕ੍ਕਣ੍ਠਨਞ੍ਹਿ ਉਕ੍ਕਣ੍ਠਾ, ਤਂ ਇਤੋ ਗਤੋਤਿ ਉਕ੍ਕਣ੍ਠਿਤੋ, ਕਿਚ੍ਛਜੀਵਿਕਂ ਪਤ੍ਤੋਤਿ ਅਤ੍ਥੋ. ਉਦ੍ਧਂ ਗਤੋ ਕਣ੍ਠੋ ਏਤਿਸ੍ਸਾਤਿ ਉਕ੍ਕਣ੍ਠਾ, ਅਨਭਿਰਤਿਯਾ ਵਜੇ ਨਿਰੁਦ੍ਧਗੋਗਣੋ ਵਿਯ ਗਮਨਮਗ੍ਗਂ ਗਵੇਸਨ੍ਤੋ ਪੁਗ੍ਗਲੋ ਉਕ੍ਕਣ੍ਠੋ ਹੋਤਿ, ਤਂ ਉਕ੍ਕਣ੍ਠਂ. ਅਨਭਿਰਤਿਂ ਇਤੋਤਿਪਿ ਉਕ੍ਕਣ੍ਠਿਤੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ – ‘‘ਉਦ੍ਧਂ ਕਣ੍ਠਂ ਕਤ੍ਵਾ ਵਿਹਰਮਾਨੋ’’ਤਿ. ਸਾ ਚ ਉਕ੍ਕਣ੍ਠਤਾ ਵਿਕ੍ਖੇਪੇਨੇਵਾਤਿ ਵਿਕ੍ਖਿਤ੍ਤੋਤਿਆਦਿ ਵੁਤ੍ਤਂ.

ਸਮਣਭਾਵਤੋਤਿ ਉਪਸਮ੍ਪਦਤੋ. ਭਾਵਵਿਕਪ੍ਪਾਕਾਰੇਨਾਤਿ ਭਿਕ੍ਖੁਭਾਵਤੋ ਚਵਿਤ੍ਵਾ ਯਂ ਯਂ ਗਿਹਿਆਦਿਭਾਵਂ ਪਤ੍ਤੁਕਾਮੋ ‘‘ਅਹਂ ਅਸ੍ਸ’’ਨ੍ਤਿ ਅਤ੍ਤਨੋ ਭਵਨਂ ਵਿਕਪ੍ਪੇਤਿ, ਤੇਨ ਤੇਨ ਗਿਹਿਆਦਿਆਕਾਰੇਨ, ਅਤ੍ਤਨੋ ਭਵਨਸ੍ਸ ਵਿਕਪ੍ਪਨਾਕਾਰੇਨਾਤਿ ਅਧਿਪ੍ਪਾਯੋ.

੪੬. ਪਾਲ਼ਿਯਂ ¶ ਯਦਿ ਪਨਾਹਨ੍ਤਿ ਅਹਂ ਯਦਿ ਬੁਦ੍ਧਂ ਪਚ੍ਚਕ੍ਖੇਯ੍ਯਂ, ਸਾਧੁ ਵਤਸ੍ਸਾਤਿ ਅਤ੍ਥੋ. ਅਪਾਹਂ, ਹਨ੍ਦਾਹਨ੍ਤਿ ਏਤ੍ਥਾਪਿ ਵੁਤ੍ਤਨਯੇਨੇਵ ਅਤ੍ਥੋ ਗਹੇਤਬ੍ਬੋ. ‘‘ਹੋਤਿ ਮੇ ਬੁਦ੍ਧਂ ਪਚ੍ਚਕ੍ਖੇਯ੍ਯ’’ਨ੍ਤਿ ਮਮ ਚਿਤ੍ਤਂ ਉਪ੍ਪਜ੍ਜਤੀਤਿ ਵਦਤਿ.

੫੦. ਨ ¶ ਰਮਾਮੀਤਿ ਪਬ੍ਬਜ੍ਜਾਯ ਦੁਕ੍ਖਬਹੁਲਤਾਯ ਸੁਖਾਭਾਵਂ ਦਸ੍ਸੇਤਿ. ਨਾਭਿਰਮਾਮੀਤਿ ਪਬ੍ਬਜ੍ਜਾਯ ਵਿਜ੍ਜਮਾਨੇਪਿ ਅਨਵਜ੍ਜਸੁਖੇ ਅਤ੍ਤਨੋ ਅਭਿਰਤਿਅਭਾਵਂ ਦਸ੍ਸੇਤਿ.

੫੧. ਤੇਨੇਵ ਵਚੀਭੇਦੇਨਾਤਿ ਵਚੀਭੇਦਂ ਕਤ੍ਵਾਪਿ ਅਞ੍ਞੇਨ ਕਾਯਪ੍ਪਯੋਗੇਨ ਵਿਞ੍ਞਾਪਨਂ ਨਿਵਤ੍ਤੇਤਿ. ਅਯਂ ਸਾਸਨਂ ਜਹਿਤੁਕਾਮੋਤਿਆਦਿਨਾ ਭਾਸਾਕੋਸਲ੍ਲਾਭਾਵੇਨ ਸਬ੍ਬਸੋ ਪਦਤ੍ਥਾਵਬੋਧਾਭਾਵੇਪਿ ‘‘ਅਯਂ ਅਤ੍ਤਨੋ ਪਬ੍ਬਜਿਤਭਾਵਂ ਜਹਿਤੁਕਾਮੋ ਇਮਂ ਵਾਕ੍ਯਭੇਦਂ ਕਰੋਤੀ’’ਤਿ ਏਤ੍ਤਕਂ ਅਧਿਪ੍ਪੇਤਤ੍ਥਮਤ੍ਤਂ ਚੇਪਿ ਸੋ ਤਾਵ ਜਾਨਾਤਿ, ਪਚ੍ਚਕ੍ਖਾਨਮੇਵ ਹੋਤੀਤਿ ਦਸ੍ਸੇਤਿ. ਤੇਨਾਹ ‘‘ਏਤ੍ਤਕਮਤ੍ਤਮ੍ਪਿ ਜਾਨਾਤੀ’’ਤਿ. ਪਦਪਚ੍ਛਾਭਟ੍ਠਨ੍ਤਿ ਪਦਪਰਾਵਤ੍ਤਿ, ਮਾਗਧਭਾਸਤੋ ਅਵਸਿਟ੍ਠਾ ਸਬ੍ਬਾਪਿ ਭਾਸਾ ‘‘ਮਿਲਕ੍ਖਭਾਸਾ’’ਤਿ ਵੇਦਿਤਬ੍ਬਾ. ਖੇਤ੍ਤਮੇਵ ਓਤਿਣ੍ਣਨ੍ਤਿ ਸਿਕ੍ਖਾਪਚ੍ਚਕ੍ਖਾਨਸ੍ਸ ਰੁਹਨਟ੍ਠਾਨਭੂਤਂ ਖੇਤ੍ਤਮੇਵ ਓਤਿਣ੍ਣਂ.

ਦੂਤਨ੍ਤਿ ਮੁਖਸਾਸਨਂ. ਸਾਸਨਨ੍ਤਿ ਪਣ੍ਣਸਾਸਨਂ, ਭਿਤ੍ਤਿਥਮ੍ਭਾਦੀਸੁ ਅਕ੍ਖਰਂ ਵਾ ਛਿਨ੍ਦਿਤ੍ਵਾ ਦਸ੍ਸੇਤਿ. ਪਚ੍ਚਕ੍ਖਾਤੁਕਾਮਤਾਚਿਤ੍ਤੇ ਧਰਨ੍ਤੇਯੇਵ ਵਚੀਭੇਦਸਮੁਪ੍ਪਤ੍ਤਿਂ ਸਨ੍ਧਾਯ ‘‘ਚਿਤ੍ਤਸਮ੍ਪਯੁਤ੍ਤ’’ਨ੍ਤਿ ਵੁਤ੍ਤਂ, ਚਿਤ੍ਤਸਮੁਟ੍ਠਾਨਨ੍ਤਿ ਅਤ੍ਥੋ. ਨਿਯਮਿਤਾਨਿਯਮਿਤਵਸੇਨ ਵਿਜਾਨਨਭੇਦਂ ਦਸ੍ਸੇਤੁਮਾਹ ਯਦਿ ਅਯਮੇਵ ਜਾਨਾਤੂਤਿਆਦਿ. ਅਯਞ੍ਚ ਵਿਭਾਗੋ ਵਦਤਿ ਵਿਞ੍ਞਾਪੇਤੀਤਿ ਏਤ੍ਥ ਯਸ੍ਸ ਵਦਤਿ, ਤਸ੍ਸੇਵ ਵਿਜਾਨਨਂ ਅਧਿਪ੍ਪੇਤਨ੍ਤਿ ਇਮਿਨਾ ਵੁਤ੍ਤਨਯੇਨ ਲਦ੍ਧੋਤਿ ਦਟ੍ਠਬ੍ਬਂ, ਨ ਹੇਤ੍ਥ ਏਕਸ੍ਸ ਵਦਤਿ ਅਞ੍ਞਸ੍ਸ ਵਿਞ੍ਞਾਪੇਤੀਤਿ ਅਯਮਤ੍ਥੋ ਸਮ੍ਭਵਤਿ. ‘‘ਤੇਸੁ ਏਕਸ੍ਮਿਂ ਜਾਨਨ੍ਤੇਪੀ’’ਤਿ ਵੁਤ੍ਤਤ੍ਤਾ ‘‘ਦ੍ਵੇਯੇਵ ਜਾਨਨ੍ਤੁ ਏਕੋ ਮਾ ਜਾਨਾਤੂ’’ਤਿ ਏਵਂ ਦ੍ਵਿਨ੍ਨਮ੍ਪਿ ਜਨਾਨਂ ਨਿਯਮੇਤ੍ਵਾ ਆਰੋਚਿਤੇਪਿ ਤੇਸੁ ਏਕਸ੍ਮਿਮ੍ਪਿ ਜਾਨਨ੍ਤੇ ਪਚ੍ਚਕ੍ਖਾਨਂ ਹੋਤਿਯੇਵਾਤਿ ਗਹੇਤਬ੍ਬਂ. ਪਰਿਸਙ੍ਕਮਾਨੋਤਿ ‘‘ਵਾਰੇਸ੍ਸਨ੍ਤੀ’’ਤਿ ਆਸਙ੍ਕਮਾਨੋ. ਸਮਯਞ੍ਞੂਤਿ ਸਾਸਨਸਙ੍ਕੇਤਞ੍ਞੂ, ਇਧ ਪਨ ਅਧਿਪ੍ਪਾਯਮਤ੍ਤਜਾਨਨੇਨਾਪਿ ਸਮਯਞ੍ਞੂ ਨਾਮ ਹੋਤਿ, ਤੇਨਾਹ ਉਕ੍ਕਣ੍ਠਿਤੋਤਿਆਦਿ. ਤਸ੍ਮਾ ਬੁਦ੍ਧਂ ਪਚ੍ਚਕ੍ਖਾਮੀਤਿਆਦਿਖੇਤ੍ਤਪਦਾਨਂ ਸਬ੍ਬਸੋ ਅਤ੍ਥਂ ਞਤ੍ਵਾਪਿ ਸਚੇ ‘‘ਭਿਕ੍ਖੁਭਾਵਤੋ ਚਵਿਤੁਕਾਮਤਾਯ ਏਸ ਵਦਤੀ’’ਤਿ ਅਧਿਪ੍ਪਾਯਂ ਨ ਜਾਨਾਤਿ, ਅਪ੍ਪਚ੍ਚਕ੍ਖਾਤਾਵ ਹੋਤਿ ਸਿਕ੍ਖਾ. ਅਤ੍ਥਂ ਪਨ ਅਜਾਨਿਤ੍ਵਾਪਿ ‘‘ਉਕ੍ਕਣ੍ਠਿਤੋ ਵਦਤੀ’’ਤਿ ਤਂ ਜਾਨਾਤਿ, ਪਚ੍ਚਕ੍ਖਾਤਾਵ ਹੋਤਿ ਸਿਕ੍ਖਾ. ਸੋਤਵਿਞ੍ਞਾਣਵੀਥਿਯਾ ਸਦ੍ਦਮਤ੍ਤਗ੍ਗਹਣਮੇਵ, ਅਤ੍ਥਗ੍ਗਹਣਂ ਪਨ ਮਨੋਵਿਞ੍ਞਾਣਵੀਥਿਪਰਮ੍ਪਰਾਯਾਤਿ ਆਹ ਤਙ੍ਖਣਞ੍ਞੇਵਾਤਿਆਦਿ.

੫੩. ਵਣ੍ਣਪਟ੍ਠਾਨਨ੍ਤਿ ¶ ¶ ਸਤ੍ਥੁਗੁਣਵਣ੍ਣਪ੍ਪਕਾਸਕਂ ਪਕਰਣਂ. ਉਪਾਲਿਗਾਥਾਸੂਤਿ ਉਪਾਲਿਸੁਤ੍ਤੇ ਉਪਾਲਿਗਹਪਤਿਨਾ ਧੀਰਸ੍ਸ ਵਿਗਤਮੋਹਸ੍ਸਾਤਿਆਦਿਨਾ ਵੁਤ੍ਤਗਾਥਾਸੁ. ਯਥਾਰੁਤਨ੍ਤਿ ਪਾਲ਼ਿਯਂ ਵੁਤ੍ਤਮੇਵਾਤਿ ਅਤ੍ਥੋ. ਅਨਨ੍ਤਬੁਦ੍ਧੀਤਿਆਦੀਨਿ ਵਣ੍ਣਪਟ੍ਠਾਨੇ ਆਗਤਨਾਮਾਨਿ. ਧੀਰਨ੍ਤਿਆਦੀਨਿ (ਮ. ਨਿ. ੨.੭੬) ਪਨ ਉਪਾਲਿਗਾਥਾਸੁ. ਤਤ੍ਥ ਬੋਧਿ ਵੁਚ੍ਚਤਿ ਸਬ੍ਬਞ੍ਞੁਤਞ੍ਞਾਣਂ, ਸਾ ਜਾਨਨਹੇਤੁਤ੍ਤਾ ਪਞ੍ਞਾਣਂ ਏਤਸ੍ਸਾਤਿ ਬੋਧਿਪਞ੍ਞਾਣੋ. ਸ੍ਵਾਕ੍ਖਾਤਂ ਧਮ੍ਮਨ੍ਤਿਆਦੀਸੁ ਧਮ੍ਮ-ਸਦ੍ਦੋ ਸ੍ਵਾਕ੍ਖਾਤਾਦਿਪਦਾਨਂ ਧਮ੍ਮਵੇਵਚਨਭਾਵਂ ਦਸ੍ਸੇਤੁਂ ਵੁਤ੍ਤੋ. ਤਸ੍ਮਾ ਸ੍ਵਾਕ੍ਖਾਤਂ ਪਚ੍ਚਕ੍ਖਾਮੀਤਿਆਦਿਨਾ ਵੁਤ੍ਤੇਯੇਵ ਵੇਵਚਨੇਨ ਪਚ੍ਚਕ੍ਖਾਨਂ ਨਾਮ ਹੋਤਿ. ਧਮ੍ਮ-ਸਦ੍ਦੇਨ ਸਹ ਯੋਜੇਤ੍ਵਾ ਵੁਤ੍ਤੇ ਪਨ ਯਥਾਰੁਤਵਸੇਨ ਪਚ੍ਚਕ੍ਖਾਨਨ੍ਤਿ ਵੇਦਿਤਬ੍ਬਂ. ਸੁਪ੍ਪਟਿਪਨ੍ਨਂ ਸਙ੍ਘਨ੍ਤਿਆਦੀਸੁਪਿ ਏਸੇਵ ਨਯੋ. ਕੁਸਲਂ ਧਮ੍ਮਨ੍ਤਿਆਦੀਨਿਪਿ ਕੁਸਲਾ ਧਮ੍ਮਾ ਅਕੁਸਲਾ ਧਮ੍ਮਾਤਿਆਦਿਧਮ੍ਮਮੇਵ (ਧ. ਸ. ਤਿਕਮਾਤਿਕਾ ੧) ਸਨ੍ਧਾਯ ਵੁਤ੍ਤਨਾਮਾਨਿ, ਇਤਰਥਾ ਅਕੁਸਲਧਮ੍ਮਪਚ੍ਚਕ੍ਖਾਨੇ ਦੋਸਾਭਾਵਪ੍ਪਸਙ੍ਗਤੋਤਿ, ਤੇਨਾਹ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸੇਸੂਤਿਆਦਿ. ਪਠਮਪਾਰਾਜਿਕਨ੍ਤਿਆਦਿਨਾ ਸਿਕ੍ਖਾਪਦਾਨਂਯੇਵ ਗਹਣਂ ਵੇਦਿਤਬ੍ਬਂ, ਨ ਆਪਤ੍ਤੀਨਂ.

ਯਸ੍ਸ ਮੂਲੇਨਾਤਿ ਯਸ੍ਸ ਸਨ੍ਤਿਕੇ. ਆਚਰਿਯਵੇਵਚਨੇਸੁ ਯੋ ਉਪਜ੍ਝਂ ਅਦਤ੍ਵਾ ਆਚਰਿਯੋਵ ਹੁਤ੍ਵਾ ਪਬ੍ਬਾਜੇਸਿ, ਤਂ ਸਨ੍ਧਾਯ ‘‘ਯੋ ਮਂ ਪਬ੍ਬਾਜੇਸੀ’’ਤਿ ਵੁਤ੍ਤਂ. ਤਸ੍ਸ ਮੂਲੇਨਾਤਿ ਤਸ੍ਸ ਸਨ੍ਤਿਕੇ. ਓਕਲ੍ਲਕੋਤਿ ਖੁਪ੍ਪਿਪਾਸਾਦਿਦੁਕ੍ਖਾਤੁਰਾਨਂ ਕਿਸਲੂਖਸਰੀਰਵੇਸਾਨਂ ਗਹਟ੍ਠਮਨੁਸ੍ਸਾਨਂ ਅਧਿਵਚਨਂ. ਮੋਲ਼ਿਬਦ੍ਧੋਤਿ ਬਦ੍ਧਕੇਸਕਲਾਪੋ ਗਹਟ੍ਠੋ. ਕੁਮਾਰਕੋਤਿ ਕੁਮਾਰਾਵਤ੍ਥੋ ਅਤਿਵਿਯ ਦਹਰੋ ਸਾਮਣੇਰੋ. ਚੇਲ੍ਲਕੋਤਿ ਤਤੋ ਕਿਞ੍ਚਿ ਮਹਨ੍ਤੋ. ਚੇਟਕੋਤਿ ਮਜ੍ਝਿਮੋ. ਮੋਲ਼ਿਗਲ੍ਲੋਤਿ ਮਹਾਸਾਮਣੇਰੋ. ਸਮਣੁਦ੍ਦੇਸੋਤਿ ਅਵਿਸੇਸਤੋ ਸਾਮਣੇਰਾਧਿਵਚਨਂ. ਅਸੁਚਿਸਙ੍ਕਸ੍ਸਰਸਮਾਚਾਰੋਤਿ ਅਸੁਚਿ ਹੁਤ੍ਵਾ ‘‘ਮਯਾ ਕਤਂ ਪਰੇ ਜਾਨਨ੍ਤਿ ਨੁ ਖੋ, ਨ ਨੁ ਖੋ’’ਤਿ ਅਤ੍ਤਨਾ, ‘‘ਅਸੁਕੇਨ ਨੁ ਖੋ ਇਦਂ ਕਤ’’ਨ੍ਤਿ ਪਰੇਹਿ ਚ ਸਙ੍ਕਾਯ ਸਰਿਤਬ੍ਬੇਨ ਅਨੁਸ੍ਸਰਿਤਬ੍ਬੇਨ ਸਮਾਚਾਰੇਨ ਯੁਤ੍ਤੋ. ਸਞ੍ਜਾਤਰਾਗਾਦਿਕਚਵਰਤ੍ਤਾ ਕਸਮ੍ਬੁਜਾਤੋ. ਕੋਣ੍ਠੋਤਿ ਦੁਸ੍ਸੀਲਾਧਿਵਚਨਮੇਤਂ.

੫੪. ਤਿਹੇਤੁਕਪਟਿਸਨ੍ਧਿਕਾਤਿ ਅਤਿਖਿਪ੍ਪਂ ਜਾਨਨਸਮਤ੍ਥੇ ਸਨ੍ਧਾਯ ਵੁਤ੍ਤਂ, ਨ ਦੁਹੇਤੁਕਾਨਂ ਤਤ੍ਥ ਅਸਮ੍ਭਵਤੋ. ਸਭਾਗਸ੍ਸਾਤਿ ਪੁਰਿਸਸ੍ਸ. ਵਿਸਭਾਗਸ੍ਸਾਤਿ ਮਾਤੁਗਾਮਸ੍ਸ. ਪੋਤ੍ਥਕਰੂਪਸਦਿਸਸ੍ਸਾਤਿ ਮਤ੍ਤਿਕਾਦੀਹਿ ਕਤਰੂਪਸਦਿਸਸ੍ਸ ¶ . ਗਰੁਮੇਧਸ੍ਸਾਤਿ ਆਰਮ੍ਮਣੇਸੁ ਲਹੁਪ੍ਪਵਤ੍ਤਿਯਾ ਅਭਾਵਤੋ ਦਨ੍ਧਗਤਿਕਤਾਯ ਗਰੁਪਞ੍ਞਸ੍ਸ, ਮਨ੍ਦਪਞ੍ਞਸ੍ਸਾਤਿ ਵੁਤ੍ਤਂ ਹੋਤਿ.

ਇਦਾਨੇਤ੍ਥ ਸਿਕ੍ਖਾਪਚ੍ਚਕ੍ਖਾਨਵਾਰਸ੍ਸ ਪਾਲ਼ਿਯਂ ਅਟ੍ਠਕਥਾਯਞ੍ਚ ਵੁਤ੍ਤਨਯਾਨਂ ਸਮ੍ਪਿਣ੍ਡਨਤ੍ਥਵਸੇਨ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋ – ਤਤ੍ਥ ਹਿ ਸਾਮਞ੍ਞਾ ਚਵਿਤੁਕਾਮੋਤਿਆਦੀਹਿ ਪਦੇਹਿ ਚਿਤ੍ਤਨਿਯਮਂ ਦਸ੍ਸੇਤਿ. ਬੁਦ੍ਧਨ੍ਤਿਆਦੀਹਿ ਪਦੇਹਿ ਖੇਤ੍ਤਨਿਯਮਂ, ਪਚ੍ਚਕ੍ਖਾਮਿ ਧਾਰੇਤੀਤਿ ਏਤੇਨ ਕਾਲਨਿਯਮਂ, ਵਦਤੀਤਿ ¶ ਇਮਿਨਾ ਪਯੋਗਨਿਯਮਂ, ਅਲਂ ਮੇ ਬੁਦ੍ਧੇਨ, ਕਿਂ ਨੁ ਮੇ, ਨ ਮਮਤ੍ਥੋ, ਸੁਮੁਤ੍ਤਾਹਨ੍ਤਿਆਦੀਹਿ ਅਨਾਮਟ੍ਠਕਾਲਵਸੇਨਪਿ ਪਚ੍ਚਕ੍ਖਾਨਂ ਹੋਤੀਤਿ ਦਸ੍ਸੇਤਿ, ਵਿਞ੍ਞਾਪੇਤੀਤਿ ਇਮਿਨਾ ਵਿਜਾਨਨਨਿਯਮਂ, ਉਮ੍ਮਤ੍ਤਕੋ ਸਿਕ੍ਖਂ ਪਚ੍ਚਕ੍ਖਾਤਿ ਉਮ੍ਮਤ੍ਤਕਸ੍ਸ ਸਨ੍ਤਿਕੇਤਿਆਦੀਹਿ ਪੁਗ੍ਗਲਨਿਯਮਂ, ਸੋ ਚ ਨਪ੍ਪਟਿਵਿਜਾਨਾਤੀਤਿਆਦੀਹਿ ਵਿਜਾਨਨਨਿਯਮਾਭਾਵੇਨ ਪਚ੍ਚਕ੍ਖਾਨਾਭਾਵਂ ਦਸ੍ਸੇਤਿ, ਦਵਾਯਾਤਿਆਦੀਹਿ ਚਿਤ੍ਤਨਿਯਮਾਭਾਵੇਨ, ਸਾਵੇਤੁਕਾਮੋ ਨ ਸਾਵੇਤੀਤਿ ਇਮਿਨਾ ਪਯੋਗਨਿਯਮਾਭਾਵੇਨ, ਅਵਿਞ੍ਞੁਸ੍ਸ ਸਾਵੇਤਿ ਵਿਞ੍ਞੁਸ੍ਸ ਨ ਸਾਵੇਤੀਤਿ ਏਤੇਹਿ ਯਂ ਪੁਗ੍ਗਲਂ ਉਦ੍ਦਿਸ੍ਸ ਸਾਵੇਤਿ, ਤਸ੍ਸੇਵ ਸਵਨੇ ਸੀਸਂ ਏਤਿ, ਨਾਞ੍ਞਸ੍ਸਾਤਿ. ਸਬ੍ਬਸੋ ਵਾ ਪਨ ਨ ਸਾਵੇਤਿ ਅਪ੍ਪਚ੍ਚਕ੍ਖਾਤਾ ਹੋਤਿ ਸਿਕ੍ਖਾਤਿ ਇਦਂ ਪਨ ਚਿਤ੍ਤਾਦਿਨਿਯਮੇਨੇਵ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ, ਨ ਅਞ੍ਞਥਾਤਿ ਦਸ੍ਸਨਤ੍ਥਂ ਵੁਤ੍ਤਂ. ਤਸ੍ਮਾ ਚਿਤ੍ਤਖੇਤ੍ਤਕਾਲਪਯੋਗਪੁਗ੍ਗਲਵਿਜਾਨਨਵਸੇਨ ਸਿਕ੍ਖਾਯ ਪਚ੍ਚਕ੍ਖਾਨਂ ਞਤ੍ਵਾ ਤਦਭਾਵੇਨ ਅਪ੍ਪਚ੍ਚਕ੍ਖਾਨਂ ਵੇਦਿਤਬ੍ਬਂ.

ਕਥਂ? ਉਪਸਮ੍ਪਨ੍ਨਭਾਵਤੋ ਚਵਿਤੁਕਾਮਤਾਚਿਤ੍ਤੇਨੇਵ ਹਿ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ, ਨ ਦਵਾ ਵਾ ਰਵਾ ਵਾ ਭਣਨ੍ਤਸ੍ਸ. ਏਵਂ ਚਿਤ੍ਤਵਸੇਨ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ. ਤਥਾ ਬੁਦ੍ਧਂ ਪਚ੍ਚਕ੍ਖਾਮੀਤਿਆਦਿਨਾ ਵੁਤ੍ਤਾਨਂ ਬੁਦ੍ਧਾਦੀਨਂ ਸਬ੍ਰਹ੍ਮਚਾਰਿਪਰਿਯੋਸਾਨਾਨਂ ਚਤੁਦ੍ਦਸਨ੍ਨਞ੍ਚੇਵ ਗਿਹੀਤਿ ਮਂ ਧਾਰੇਹੀਤਿਆਦਿਨਾ ਵੁਤ੍ਤਾਨਂ ਗਿਹਿਆਦੀਨਂ ਅਸਕ੍ਯਪੁਤ੍ਤਿਯਪਰਿਯੋਸਾਨਾਨਂ ਅਟ੍ਠਨ੍ਨਞ੍ਚਾਤਿ ਇਮੇਸਂ ਦ੍ਵਾਵੀਸਤਿਯਾ ਖੇਤ੍ਤਪਦਾਨਂ ਯਸ੍ਸ ਕਸ੍ਸਚਿ ਸਵੇਵਚਨਸ੍ਸ ਵਸੇਨ ਤੇਸੁ ਯਂ ਕਿਞ੍ਚਿ ਵਤ੍ਤੁਕਾਮਸ੍ਸ ਯਂ ਕਿਞ੍ਚਿ ਵਦਤੋਪਿ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ. ਏਵਂ ਖੇਤ੍ਤਵਸੇਨ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ. ਤਤ੍ਥ ਯਦੇਤਂ ‘‘ਪਚ੍ਚਕ੍ਖਾਮੀਤਿ ਚ ਮਂ ਧਾਰੇਹੀਤਿ ਚਾ’’ਤਿ ਵੁਤ੍ਤਂ ਵਤ੍ਤਮਾਨਕਾਲਵਚਨਂ, ਯਾਨਿ ਚ ‘‘ਅਲਂ ਮੇ ਬੁਦ੍ਧੇਨ, ਕਿਂ ਨੁ ਮੇ ਬੁਦ੍ਧੇਨ, ਨ ਮਮਤ੍ਥੋ ਬੁਦ੍ਧੇਨ, ਸੁਮੁਤ੍ਤਾਹਂ ਬੁਦ੍ਧੇਨਾ’’ਤਿਆਦਿਨਾ ਨਯੇਨ ਆਖ੍ਯਾਤਵਸੇਨ ਕਾਲਂ ਅਨਾਮਸਿਤ੍ਵਾ ਪੁਰਿਮੇਹਿ ਚੁਦ੍ਦਸਹਿ ਪਦੇਹਿ ਸਦ੍ਧਿਂ ਯੋਜੇਤ੍ਵਾ ਵੁਤ੍ਤਾਨਿ ਅਲਂ ਮੇਤਿਆਦੀਨਿ ਚਤ੍ਤਾਰਿ ਪਦਾਨਿ, ਤੇਸਂਯੇਵ ਚ ਸਵੇਵਚਨਾਨਂ ਵਸੇਨ ¶ ਪਚ੍ਚਕ੍ਖਾਨਂ ਹੋਤਿ, ਨ ਪਨ ‘‘ਪਚ੍ਚਕ੍ਖਾਸਿ’’ਨ੍ਤਿ ਵਾ, ‘‘ਪਚ੍ਚਕ੍ਖਿਸ੍ਸ’’ਨ੍ਤਿ ਵਾ, ‘‘ਮਂ ਧਾਰੇਸੀ’’ਤਿ ਵਾ, ‘‘ਮਂ ਧਾਰੇਸ੍ਸਸੀ’’ਤਿ ਵਾ, ‘‘ਯਂਨੂਨ ਪਚ੍ਚਕ੍ਖੇਯ੍ਯ’’ਨ੍ਤਿ ਵਾਤਿਆਦੀਨਿ ਅਤੀਤਾਨਾਗਤਪਰਿਕਪ੍ਪਵਚਨਾਨਿ ਭਣਨ੍ਤਸ੍ਸ. ਏਵਂ ਵਤ੍ਤਮਾਨਕਾਲਵਸੇਨ ਚੇਵ ਅਨਾਮਟ੍ਠਕਾਲਵਸੇਨ ਚ ਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ. ਪਯੋਗੋ ਪਨ ਦੁਵਿਧੋ ਕਾਯਿਕੋ ਵਾਚਸਿਕੋ, ਤਤ੍ਥ ਬੁਦ੍ਧਂ ਪਚ੍ਚਕ੍ਖਾਮੀਤਿਆਦਿਨਾ ਨਯੇਨ ਯਾਯ ਕਾਯਚਿ ਭਾਸਾਯ ਵਚੀਭੇਦਂ ਕਤ੍ਵਾ ਵਾਚਸਿਕਪਯੋਗੇਨੇਵ ਪਚ੍ਚਕ੍ਖਾਨਂ ਹੋਤਿ, ਨ ਅਕ੍ਖਰਲਿਖਨਂ ਵਾ ਹਤ੍ਥਮੁਦ੍ਦਾਦਿਦਸ੍ਸਨਂ ਵਾ ਕਾਯਪਯੋਗਂ ਕਰੋਨ੍ਤਸ੍ਸ. ਏਵਂ ਵਾਚਸਿਕਪਯੋਗੇਨੇਵ ਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ.

ਪੁਗ੍ਗਲੋ ¶ ਪਨ ਦੁਵਿਧੋ ਯੋ ਚ ਪਚ੍ਚਕ੍ਖਾਤਿ, ਯਸ੍ਸ ਚ ਪਚ੍ਚਕ੍ਖਾਤਿ, ਤਤ੍ਥ ਯੋ ਪਚ੍ਚਕ੍ਖਾਤਿ, ਸੋ ਸਚੇ ਉਮ੍ਮਤ੍ਤਕਖਿਤ੍ਤਚਿਤ੍ਤਵੇਦਨਟ੍ਟਾਨਂ ਅਞ੍ਞਤਰੋ ਨ ਹੋਤਿ, ਯਸ੍ਸ ਪਨ ਪਚ੍ਚਕ੍ਖਾਤਿ, ਸੋ ਸਚੇ ਮਨੁਸ੍ਸਜਾਤਿਕੋ ਹੋਤਿ, ਨ ਚ ਉਮ੍ਮਤ੍ਤਕਾਦੀਨਂ ਅਞ੍ਞਤਰੋ ਸਮ੍ਮੁਖੀਭੂਤੋ ਚ, ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ. ਨ ਹਿ ਅਸਮ੍ਮੁਖੀਭੂਤਸ੍ਸ ਦੂਤੇਨ ਵਾ ਪਣ੍ਣੇਨ ਵਾ ਆਰੋਚਨਂ ਰੁਹਤਿ. ਏਵਂ ਯਥਾਵੁਤ੍ਤਪੁਗ੍ਗਲਵਸੇਨ ਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ. ਵਿਜਾਨਨਮ੍ਪਿ ਨਿਯਮਿਤਾਨਿਯਮਿਤਵਸੇਨ ਦੁਵਿਧਂ. ਤਤ੍ਥ ਯਸ੍ਸ ਯੇਸਂ ਵਾ ਨਿਯਮੇਤ੍ਵਾ ਇਮਸ੍ਸ ਇਮੇਸਂ ਵਾ ਆਰੋਚੇਮੀਤਿ ਵਦਤਿ, ਸਚੇ ਤੇ ਯਥਾ ਪਕਤਿਯਾ ਲੋਕੇ ਮਨੁਸ੍ਸਾ ਵਚਨਂ ਸੁਤ੍ਵਾ ਆਵਜ੍ਜਨਸਮਯੇ ਜਾਨਨ੍ਤਿ, ਏਵਂ ਤਸ੍ਸ ਵਚਨਾਨਨ੍ਤਰਮੇਵ ‘‘ਅਯਂ ਉਕ੍ਕਣ੍ਠਿਤੋ’’ਤਿ ਵਾ, ‘‘ਗਿਹਿਭਾਵਂ ਪਤ੍ਥਯਤੀ’’ਤਿ ਵਾ ਯੇਨ ਕੇਨਚਿ ਆਕਾਰੇਨ ਮਨੁਸ੍ਸਜਾਤਿਕੋ ਵਚਨਤ੍ਥਂ ਜਾਨਾਤਿ, ਪਚ੍ਚਕ੍ਖਾਤਾਵ ਹੋਤਿ ਸਿਕ੍ਖਾ. ਅਥ ਅਪਰਭਾਗੇ ‘‘ਕਿਂ ਇਮਿਨਾ ਵੁਤ੍ਤ’’ਨ੍ਤਿ ਚਿਨ੍ਤੇਤ੍ਵਾ ਜਾਨਨ੍ਤਿ, ਅਞ੍ਞੇ ਵਾ ਜਾਨਨ੍ਤਿ, ਅਪ੍ਪਚ੍ਚਕ੍ਖਾਤਾਵ ਹੋਤਿ. ਅਨਿਯਮੇਤ੍ਵਾ ਆਰੋਚੇਨ੍ਤਸ੍ਸ ਪਨ ਸਚੇ ਵੁਤ੍ਤਨਯੇਨ ਯੋ ਕੋਚਿ ਮਨੁਸ੍ਸਜਾਤਿਕੋ ਵਚਨਤ੍ਥਂ ਜਾਨਾਤਿ, ਪਚ੍ਚਕ੍ਖਾਤਾ ਹੋਤਿ ਸਿਕ੍ਖਾ, ਏਵਂ ਜਾਨਨਵਸੇਨ ਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ. ਇਤਿ ਇਮੇਸਂ ਵੁਤ੍ਤਪ੍ਪਕਾਰਾਨਂ ਚਿਤ੍ਤਾਦੀਨਂ ਵਸੇਨੇਵ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ, ਨ ਅਞ੍ਞਥਾਤਿ ਦਟ੍ਠਬ੍ਬਂ.

ਸਿਕ੍ਖਾਪਚ੍ਚਕ੍ਖਾਨਵਣ੍ਣਨਾਨਯੋ ਨਿਟ੍ਠਿਤੋ.

ਮੂਲਪਞ੍ਞਤ੍ਤਿਵਣ੍ਣਨਾ

੫੫. ਇਤੋ ¶ ਪਟ੍ਠਾਯਾਤਿ ਦੁਟ੍ਠੁਲ੍ਲਪਦਤੋ ਪਟ੍ਠਾਯ. ਮੇਥੁਨਧਮ੍ਮੋ ਯਥਾ ਸਰੂਪੇਨੇਵ ਦੁਟ੍ਠੁਲ੍ਲਂ, ਏਵਂ ਦਸ੍ਸਨਾਦਿਦੁਟ੍ਠੁਲ੍ਲਧਮ੍ਮਪਰਿਵਾਰਤ੍ਤਾਪਿ ਦੁਟ੍ਠੁਲ੍ਲਨ੍ਤਿ ਦਸ੍ਸੇਤੁਂ ਯਸ੍ਮਾਤਿਆਦਿ ਵੁਤ੍ਤਂ. ਅਵਸ੍ਸੁਤਾਨਨ੍ਤਿ ਮੇਥੁਨਰਾਗੇਨ ਤਿਨ੍ਤਾਨਂ. ਪਰਿਯੁਟ੍ਠਿਤਾਨਨ੍ਤਿ ਮੇਥੁਨਰਾਗੇਨ ਅਭਿਭੂਤਚਿਤ੍ਤਾਨਂ. ਮੇਥੁਨ-ਸਦ੍ਦਸ੍ਸ ਸਦਿਸਸਦ੍ਦਪਅਯਾਯਤ੍ਤਾ ਵੁਤ੍ਤਂ ‘‘ਸਦਿਸਾਨ’’ਨ੍ਤਿ, ਰਤ੍ਤਤਾਦੀਹਿ ਸਦਿਸਾਨਨ੍ਤਿ ਅਤ੍ਥੋ. ਇਦਞ੍ਚ ਯੇਭੁਯ੍ਯਤੋ ਵੁਤ੍ਤਂ ਉਭੋਸੁ ਅਞ੍ਞਤਰਸ੍ਸ ਰਾਗਾਭਾਵੇਪਿ ਇਤਰਸ੍ਸ ਮੇਥੁਨਸੇਵਨਸਂਸਿਦ੍ਧਿਤੋ. ਮੇਥੁਨ-ਸਦ੍ਦੋ ਵਾ ਉਭਯਸਦ੍ਦਪਅਯਾਯੋ, ਮੇਥੁਨਂ ਯੁਗਲ਼ਂ ਯਮਕਂ ਉਭਯਨ੍ਤਿ ਹਿ ਅਤ੍ਥਤੋ ਏਕਂ, ਤੇਨਾਹ ‘‘ਉਭਿਨ੍ਨਂ ਰਤ੍ਤਾਨ’’ਨ੍ਤਿ. ‘‘ਦ੍ਵਯਂਦ੍ਵਯਸਮਾਪਤ੍ਤੀ’’ਤਿ ਹਿ ਪਾਲ਼ਿਯਮ੍ਪਿ ਵੁਤ੍ਤਂ. ਨਿਮਿਤ੍ਤੇਨਾਤਿ ਭੁਮ੍ਮਤ੍ਥੇ ਕਰਣਵਚਨਂ, ਇਤ੍ਥਿਨਿਮਿਤ੍ਤੇ ਅਤ੍ਤਨੋ ਨਿਮਿਤ੍ਤਂ ਪਵੇਸੇਤੀਤਿ ਅਤ੍ਥੋ. ਨਿਮਿਤ੍ਤਂ ਅਙ੍ਗਜਾਤਨ੍ਤਿ ਅਤ੍ਥਤੋ ਏਕਂ. ਤਿਲਫਲਨ੍ਤਿ ਸਾਸਪਮਤ੍ਤਂ ਤਿਲਬੀਜਂ ਅਧਿਪ੍ਪੇਤਂ, ਨ ਕੋਸਸਹਿਤਂ ਫਲਨ੍ਤਿ ਆਹ ‘‘ਤਿਲਬੀਜਮਤ੍ਤਮ੍ਪੀ’’ਤਿ. ਅਲ੍ਲੋਕਾਸੇਤਿ ਸਭਾਵੇਨ ਪਿਹਿਤਸ੍ਸ ਨਿਮਿਤ੍ਤਸ੍ਸ ਪਕਤਿਵਾਤੇਨ ਅਸਮ੍ਫੁਟ੍ਠੇ ਤਿਨ੍ਤਪ੍ਪਦੇਸੇ. ਤਾਦਿਸੋ ਪਦੇਸੋ ¶ ਸਚੇਪਿ ਕੇਨਚਿ ਵਾਤਾਦਿਵਿਕਾਰੇਨ ਸੁਕ੍ਖਤਿ, ਤਥਾਪਿ ਅਨਲ੍ਲੋਕਾਸੋਤਿ ਉਪਕ੍ਕਮਤੋ ਪਾਰਾਜਿਕਮੇਵ.

ਵੇਮਜ੍ਝਨ੍ਤਿ ਯਥਾ ਚਤ੍ਤਾਰਿ ਪਸ੍ਸਾਨਿ ਅਫੁਸਨ੍ਤੋ ਪਵੇਸੇਤਿ, ਏਵਂ ਕਤਵਿਵਰਸ੍ਸ ਇਤ੍ਥਿਨਿਮਿਤ੍ਤਸ੍ਸ ਅਬ੍ਭਨ੍ਤਰਤਲਂ ਵੁਚ੍ਚਤਿ. ਪੁਰਿਸਨਿਮਿਤ੍ਤੇ ਪਨ ਮਜ੍ਝਨ੍ਤਿ ਅਗ੍ਗਕੋਟਿਂ ਸਨ੍ਧਾਯ ਵਦਤਿ. ਉਪਰੀਤਿ ਮਜ੍ਝਿਮਪਬ੍ਬੇਨ ਸਮਿਞ੍ਜਿਤ੍ਵਾ ਪਵੇਸਿਯਮਾਨਸ੍ਸ ਅਙ੍ਗਜਾਤਸ੍ਸ ਸਮਿਞ੍ਜਿਤਙ੍ਗੁਲਿਯਾ ਮਜ੍ਝਿਮਪਬ੍ਬਪਿਟ੍ਠਿਸਦਿਸਅਗ੍ਗਕੋਟਿਯੇਵ. ਹੇਟ੍ਠਾ ਪਵੇਸੇਨ੍ਤੋਤਿ ਇਤ੍ਥਿਨਿਮਿਤ੍ਤਸ੍ਸ ਹੇਟ੍ਠਾਭਾਗੇਨ ਛੁਪਿਯਮਾਨਂ ਪਵੇਸੇਨ੍ਤੋ, ਯਥਾ ਇਤ੍ਥਿਨਿਮਿਤ੍ਤਸ੍ਸ ਅਲ੍ਲੋਕਾਸਂ ਹੇਟ੍ਠਿਮਤਲਂ ਤਿਲਬੀਜਮਤ੍ਤਮ੍ਪਿ ਅਤ੍ਤਨੋ ਨਿਮਿਤ੍ਤੇਨ ਛੁਪਤਿ, ਏਵਂ ਪਵੇਸੇਨ੍ਤੋਤਿ ਅਤ੍ਥੋ. ਛੁਪਨਮੇਵ ਹੇਤ੍ਥ ਪਵੇਸਨਂ, ਏਵਂ ਸੇਸੇਸੁਪਿ. ਮਜ੍ਝੇਨ ਪਵੇਸੇਨ੍ਤੋਤਿ ਅਬ੍ਭਨ੍ਤਰਤਲੇਨ ਛੁਪਿਯਮਾਨਂ ਪਵੇਸੇਨ੍ਤੋ, ਯਥਾ ਅਬ੍ਭਨ੍ਤਰਤਲਂ ਛੁਪਤਿ, ਏਵਂ ਪਵੇਸੇਨ੍ਤੋਤਿ ਅਤ੍ਥੋ. ਕਤ੍ਥਚਿ ਅਚ੍ਛੁਪਨ੍ਤਂ ਪਵੇਸੇਤ੍ਵਾ ਆਕਾਸਗਤਮੇਵ ਨੀਹਰਨ੍ਤਸ੍ਸ ਨਤ੍ਥਿ ਪਾਰਾਜਿਕਂ, ਦੁਕ੍ਕਟਂ ਪਨ ਹੋਤਿ ਛਿਨ੍ਨਸੀਸਵਤ੍ਥੁਸ੍ਮਿਂ (ਪਾਰਾ. ੭੩) ਵਿਯ. ਮਜ੍ਝੇਨੇਵ ਛੁਪਨ੍ਤਂ ਪਵੇਸੇਨ੍ਤੋਤਿ ਅਗ੍ਗਕੋਟਿਯਾ ਛੁਪਨ੍ਤਂ ਪਵੇਸੇਨ੍ਤੋ. ਮਜ੍ਝਿਮਪਬ੍ਬਪਿਟ੍ਠਿਯਾ ਸਙ੍ਕੋਚੇਤ੍ਵਾਤਿ ਨਿਮਿਤ੍ਤਂ ਅਤ੍ਤਨੋ ਮਜ੍ਝਿਮਪਬ੍ਬਪਿਟ੍ਠਿਯਾ ¶ ਸਮਿਞ੍ਜਿਤ੍ਵਾ ਉਪਰਿਭਾਗੇਨ ਛੁਪਨ੍ਤਂ ਪਵੇਸੇਨ੍ਤੋਪਿ. ਕਿਂ ਵਿਯ? ਸਮਿਞ੍ਜਿਤਙ੍ਗੁਲਿ ਵਿਯਾਤਿ ਯੋਜਨਾ. ਅਥ ਵਾ ਮਜ੍ਝਿਮਪਬ੍ਬਪਿਟ੍ਠਿਯਾ ਸਮਿਞ੍ਜਿਤਙ੍ਗੁਲਿ ਵਿਯਾਤਿ ਸਮ੍ਬਨ੍ਧੋ, ਸਮਿਞ੍ਜਿਤਙ੍ਗੁਲਿਂ ਵਾ ਮਜ੍ਝਿਮਪਬ੍ਬਪਿਟ੍ਠਿਯਾ ਪਵੇਸੇਨ੍ਤੋ ਵਿਯਾਤਿਪਿ ਯੋਜੇਤਬ੍ਬਂ. ਉਪਰਿਭਾਗੇਨਾਤਿ ਸਙ੍ਕੋਚਿਤਸ੍ਸ ਨਿਮਿਤ੍ਤਸ੍ਸ ਉਪਰਿਕੋਟਿਯਾ.

ਇਦਾਨਿ ਪੁਰਿਸਨਿਮਿਤ੍ਤਸ੍ਸ ਹੇਟ੍ਠਾ ਵੁਤ੍ਤੇਸੁ ਛਸੁ ‘‘ਉਪਰੀ’’ਤਿ ਵੁਤ੍ਤਸ੍ਸ ਛਟ੍ਠਸ੍ਸ ਠਾਨਸ੍ਸ ਵਸੇਨ ਵਿਸੁਂ ਚਤ੍ਤਾਰਿ ਪਸ੍ਸਾਨਿ ਗਹੇਤ੍ਵਾ ਪੁਰਿਸਨਿਮਿਤ੍ਤੇ ਦਸਟ੍ਠਾਨਭੇਦਂ ਦਸ੍ਸੇਨ੍ਤੋ ਤਤ੍ਥਾਤਿਆਦਿਮਾਹ. ਹੇਟ੍ਠਾ ਪਨ ਅਗਹਿਤਗ੍ਗਹਣਵਸੇਨ ਛ ਠਾਨਾਨਿ ਵੁਤ੍ਤਾਨਿ. ਤੁਲਾਦਣ੍ਡਸਦਿਸਂ ਪਵੇਸੇਨ੍ਤਸ੍ਸਾਪੀਤਿ ਅਸਮਿਞ੍ਜਿਤ੍ਵਾ ਉਜੁਕਂ ਪਵੇਸੇਨ੍ਤਸ੍ਸ. ਚਮ੍ਮਖੀਲਨ੍ਤਿ ਏਲ਼ਕਾਦੀਨਂ ਗੀਵਾਯ ਵਿਯ ਨਿਮਿਤ੍ਤੇ ਜਾਤਂ ਚਮ੍ਮਙ੍ਕੁਰਂ, ‘‘ਉਣ੍ਣਿਗਣ੍ਡੋ’’ਤਿਪਿ ਵਦਨ੍ਤਿ. ‘‘ਉਪਹਤਕਾਯਪ੍ਪਸਾਦ’’ਨ੍ਤਿ ਅਵਤ੍ਵਾ ਨਟ੍ਠਕਾਯਪ੍ਪਸਾਦਨ੍ਤਿ ਵਚਨੇਨ ਉਪਾਦਿਨ੍ਨਭਾਵੇ ਸਤਿ ਕੇਨਚਿ ਪਚ੍ਚਯੇਨ ਉਪਹਤੇਪਿ ਕਾਯਪ੍ਪਸਾਦੇ ਉਪਹਤਿਨ੍ਦ੍ਰਿਯਵਤ੍ਥੁਸ੍ਮਿਂ (ਪਾਰਾ. ੭੩) ਵਿਯ ਪਾਰਾਜਿਕਮੇਵਾਤਿ ਦਸ੍ਸੇਤਿ. ਇਤ੍ਥਿਨਿਮਿਤ੍ਤਸ੍ਸ ਪਨ ਨਟ੍ਠੇਪਿ ਉਪਾਦਿਨ੍ਨਭਾਵੇ ਸਤਿ ਮਤਸਰੀਰੇ ਵਿਯ ਪਾਰਾਜਿਕਕ੍ਖੇਤ੍ਤਤਾ ਨ ਵਿਜਹਤੀਤਿ ਵੇਦਿਤਬ੍ਬਾ. ਮੇਥੁਨਸ੍ਸਾਦੇਨਾਤਿ ਇਦਂ ਕਾਯਸਂਸਗ੍ਗਰਾਗੇ ਸਤਿ ਸਙ੍ਘਾਦਿਸੇਸੋ ਹੋਤੀਤਿ ਵੁਤ੍ਤਂ. ਬੀਜਾਨੀਤਿ ਅਣ੍ਡਾਨਿ.

ਮੁਖਂ ਅਪਿਧਾਯਾਤਿ ਪਮਾਦੇਨ ਸਮੁਪ੍ਪਨ੍ਨਮ੍ਪਿ ਹਾਸਂ ਬੀਜਨਿਯਾ ਪਟਿਚ੍ਛਾਦਨਮ੍ਪਿ ਅਕਤ੍ਵਾ ਨਿਸੀਦਨਂ ਅਗਾਰਵਨ੍ਤਿ ਵੁਤ੍ਤਂ. ਅਥ ਵਾ ਅਪਿਧਾਯਾਤਿ ਪਿਦਹਿਤ੍ਵਾ, ਬੀਜਨਿਯਾ ਮੁਖਂ ਪਟਿਚ੍ਛਾਦੇਤ੍ਵਾ ਹਸਮਾਨੇਨ ¶ ਨ ਨਿਸੀਦਿਤਬ੍ਬਨ੍ਤਿ ਅਤ੍ਥੋ. ਦਨ੍ਤਵਿਦਂਸਕਨ੍ਤਿ ਦਨ੍ਤੇ ਦਸ੍ਸੇਤ੍ਵਾ. ਗਬ੍ਭਿਤੇਨਾਤਿ ‘‘ਅਯੁਤ੍ਤਕਥਾ’’ਤਿ ਸਙ੍ਕੋਚਂ ਅਨਾਪਜ੍ਜਨ੍ਤੇਨ, ਨਿਰਵਸੇਸਾਧਿਪ੍ਪਾਯਕਥਨੇ ਸਞ੍ਜਾਤੁਸ੍ਸਾਹੇਨਾਤਿ ਅਤ੍ਥੋ.

ਅਨੁਪਞ੍ਞਤ੍ਤਿਵਣ੍ਣਨਾ

ਪਾਰਾਜਿਕਵਤ੍ਥੁਭੂਤਾਤਿ ਯੇਸਂ ਤੀਸੁ ਮਗ੍ਗੇਸੁ ਤਿਲਬੀਜਮਤ੍ਤਮ੍ਪਿ ਨਿਮਿਤ੍ਤਸ੍ਸ ਪਵੇਸੋਕਾਸੋ ਹੋਤਿ, ਤੇ ਇਤ੍ਥਿਪੁਰਿਸਾਦਿਭੇਦਾ ਸਬ੍ਬੇ ਸਙ੍ਗਯ੍ਹਨ੍ਤਿ, ਨ ਇਤਰੇ. ਇਧ ਪਨ ਤਿਰਚ੍ਛਾਨਗਤਾਯਾਤਿ-ਪਾਲ਼ਿਪਦਾਨੁਰੂਪਤੋ ਨ ਸਬ੍ਬਾਤਿਆਦਿਨਾ ਇਤ੍ਥਿਲਿਙ੍ਗਵਸੇਨ ਵੁਤ੍ਤਂ. ਗੋਨਸਾਤਿ ਸਪ੍ਪਵਿਸੇਸਾ, ਯੇਸਂ ਪਿਟ੍ਠੀਸੁ ਮਹਨ੍ਤਮਹਨ੍ਤਾਨਿ ਮਣ੍ਡਲਾਨਿ ਹੋਨ੍ਤਿ. ਕਚ੍ਛਪਮਣ੍ਡੂਕਾਨਂ ਚਤੁਪ੍ਪਦਤ੍ਤੇਪਿ ਓਦਕਤਾਸਾਮਞ੍ਞੇਨ ¶ ਅਪਦੇਹਿ ਸਹ ਗਹਣਂ. ਮੁਖਸਣ੍ਠਾਨਨ੍ਤਿ ਓਟ੍ਠਚਮ੍ਮਸਣ੍ਠਾਨਂ. ਵਣਸਙ੍ਖੇਪਨ੍ਤਿ ਵਣਸਙ੍ਗਹਂ. ਵਣੇ ਥੁਲ੍ਲਚ੍ਚਯਞ੍ਚ ‘‘ਅਮਗ੍ਗੇਨ ਅਮਗ੍ਗਂ ਪਵੇਸੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਰਾ. ੬੬) ਇਮਸ੍ਸ ਸੁਤ੍ਤਸ੍ਸ ਵਸੇਨ ਵੇਦਿਤਬ੍ਬਂ. ਮਙ੍ਗੁਸਾਤਿ ਨਕੁਲਾ. ਏਤਮੇਵ ਹਿ ਅਤ੍ਥਨ੍ਤਿ ਯੋ ਨਂ ਅਜ੍ਝਾਪਜ੍ਜਤਿ, ਤਂ ਪਰਾਜੇਤੀਤਿ ਇਮਮਤ੍ਥਂ ਵੁਤ੍ਤਾਨਂਯੇਵ ਪਾਰਾਜਿਕਾਦਿਸਦ੍ਦਾਨਂ ਨਿਬ੍ਬਚਨਪ੍ਪਸਙ੍ਗੇ ਇਮਿਸ੍ਸਾ ਪਰਿਵਾਰਗਾਥਾਯ ਪਵਤ੍ਤਤ੍ਤਾ. ਭਟ੍ਠੋਤਿ ਸਾਸਨਤੋ ਪਰਿਹੀਨੋ. ਨਿਰਙ੍ਕਤੋਤਿ ਨਿਰਾਕਤੋ. ਏਤਨ੍ਤਿ ਆਪਤ੍ਤਿਰੂਪਂ ਪਾਰਾਜਿਕਂ. ਛਿਨ੍ਨੋਤਿ ਅਨ੍ਤਰਾਖਣ੍ਡਿਤੋ.

ਪਕਤਤ੍ਤੇਹਿ ਭਿਕ੍ਖੂਹੀਤਿ ਏਤ੍ਥ ਪਕਤਤ੍ਤਾ ਨਾਮ ਪਾਰਾਜਿਕਂ ਅਨਾਪਨ੍ਨਾ ਅਨੁਕ੍ਖਿਤ੍ਤਾ ਚ. ਕੇਚਿ ਪਨ ‘‘ਪਕਤਤ੍ਤੇਹਿ ਭਿਕ੍ਖੂਹਿ ਏਕਤੋ ਕਤ੍ਤਬ੍ਬਤ੍ਤਾਤਿ ਅਟ੍ਠਕਥਾਯਂ ਵੁਤ੍ਤਤ੍ਤਾ ਪਕਤਤ੍ਤਭੂਤੇਹਿ ਅਲਜ੍ਜੀਹਿਪਿ ਸਦ੍ਧਿਂ ਉਪੋਸਥਾਦਿਸਙ੍ਘਕਮ੍ਮਕਰਣੇ ਦੋਸੋ ਨਤ੍ਥੀ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ, ਇਮਿਨਾ ਵਚਨੇਨ ਤਸ੍ਸ ਅਤ੍ਥਸ੍ਸ ਅਸਿਜ੍ਝਨਤੋ. ਯਦਿ ਹਿ ਸਙ੍ਘਕਮ੍ਮਂ ਕਰੀਯਤਿ, ਪਕਤਤ੍ਤੇਹੇਵ ਕਰੀਯਤਿ, ਨ ਅਪਕਤਤ੍ਤੇਹੀਤਿ ਏਵਂ ਅਪਕਤਤ੍ਤੇਹਿ ਸਹਸਂਵਾਸਪਟਿਕ੍ਖੇਪਪਰਂ ਇਦਂ ਵਚਨਂ, ਨ ਪਨ ਪਕਤਤ੍ਤੇਹਿ ਸਬ੍ਬੇਹਿ ਅਲਜ੍ਜੀਆਦੀਹਿ ਏਕਤੋ ਸਙ੍ਘਕਮ੍ਮਂ ਕਤ੍ਤਬ੍ਬਮੇਵਾਤਿ. ਏਵਂ ਸਂਵਾਸਵਿਧਾਨਪਰਂ ਪਕਤਤ੍ਤੇਸੁਪਿ ਸਭਾਗਾਪਤ੍ਤਿਂ ਆਪਨ੍ਨੇਹਿ ਅਞ੍ਞਮਞ੍ਞਞ੍ਚ ਅਲਜ੍ਜੀਹਿ ਚ ਸਦ੍ਧਿਂ ਏਕਤੋ ਕਮ੍ਮਕਰਣਸ੍ਸ ਪਟਿਕ੍ਖਿਤ੍ਤਤ੍ਤਾ. ਵੁਤ੍ਤਞ੍ਹਿ ‘‘ਸਚੇ ਸਬ੍ਬੋ ਸਙ੍ਘੋ ਸਭਾਗਾਪਤ੍ਤਿਯਾ ਸਤਿ ਵੁਤ੍ਤਵਿਧਿਂ ਅਕਤ੍ਵਾ ਉਪੋਸਥਂ ਕਰੋਤਿ, ਵੁਤ੍ਤਨਯੇਨੇਵ ਸਬ੍ਬੋ ਸਙ੍ਘੋ ਆਪਤ੍ਤਿਂ ਆਪਜ੍ਜਤੀ’’ਤਿਆਦਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ). ‘‘ਯਤ੍ਥ ਆਮਿਸਪਰਿਭੋਗੋ ਵਟ੍ਟਤਿ, ਧਮ੍ਮਪਰਿਭੋਗੋਪਿ ਤਤ੍ਥ ਵਟ੍ਟਤੀ’’ਤਿ ਅਲਜ੍ਜੀਹਿ ਸਹ ਪਰਿਭੋਗੋ ਚ ਅਟ੍ਠਕਥਾਯਂ ਪਟਿਕ੍ਖਿਤ੍ਤੋ ਏਕਤੋ ਕਮ੍ਮਕਰਣਸ੍ਸਾਪਿ ਧਮ੍ਮਪਰਿਭੋਗਤ੍ਤਾ. ਤਸ੍ਮਾ ਯਥਾ ਹਿ ਪਾਲ਼ਿਯਂ ਪਾਰਾਜਿਕਾਪਤ੍ਤਿਆਪਜ੍ਜਨਕਪੁਗ੍ਗਲਨਿਯਮਤ੍ਥਂ ਯ੍ਵਾਯਂ ਞਤ੍ਤਿਚਤੁਤ੍ਥੇਨ ਕਮ੍ਮੇਨ…ਪੇ… ਉਪਸਮ੍ਪਨ੍ਨੋ, ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ ਇਮਸ੍ਮਿਂ ਵਚਨੇ ਸਬ੍ਬੇਪਿ ਞਤ੍ਤਿਚਤੁਤ੍ਥਕਮ੍ਮੇਨ ਉਪਸਮ੍ਪਨ੍ਨਾ ਪਾਰਾਜਿਕਾਪਜ੍ਜਨਕਪੁਗ੍ਗਲਾਯੇਵਾਤਿ ਨਿਯਮੋ ਨ ਸਿਜ੍ਝਤਿ ¶ ਪਾਰਾਜਿਕਾਨਾਪਜ੍ਜਨਕਾਨਮ੍ਪਿ ਸੇਕ੍ਖਾਦੀਨਂ ਸਮ੍ਭਵਾ, ਅਥ ਖੋ ਞਤ੍ਤਿਚਤੁਤ੍ਥਕਮ੍ਮੇਨ ਉਪਸਮ੍ਪਨ੍ਨੇਸੁਯੇਵ ਪਾਰਾਜਿਕਾਪਤ੍ਤਿਆਪਜ੍ਜਨਕਾ ਅਲਜ੍ਜੀ ਬਾਲਪੁਥੁਜ੍ਜਨਾ ਲਬ੍ਭਨ੍ਤਿ, ਨ ਪਨ ਏਹਿਭਿਕ੍ਖੁਆਦੀਸੂਤਿ ਏਵਂ ਨਿਯਮੋ ਸਿਜ੍ਝਤਿ, ਏਵਮਿਧਾਪਿ ਪਕਤਤ੍ਤੇਸੁਯੇਵ ਏਕਤੋ ਕਮ੍ਮਕਰਣਾਰਹਾ ਅਨਾਪਤ੍ਤਿਕਾ ਲਜ੍ਜੀ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ ਉਪਲਬ੍ਭਨ੍ਤਿ ¶ , ਨ ਅਪਕਤਤ੍ਤੇਸੂਤਿ ਏਵਮੇਵ ਨਿਯਮੋ ਸਿਜ੍ਝਤਿ ਅਪਕਤਤ੍ਤਾਨਂ ਗਣਪੂਰਣਤ੍ਤਾਭਾਵੇਨ ਅਸਂਵਾਸਿਕਤ੍ਤਨਿਯਮਤੋ. ਅਲਜ੍ਜਿਨੋ ਪਨ ਗਣਪੂਰਕਾ ਹੁਤ੍ਵਾ ਕਮ੍ਮਸ੍ਸ ਸਾਧਨਤੋ ਅਸਂਵਾਸਿਕੇਸੁ ਨ ਗਹਿਤਾ ਕਤ੍ਤਬ੍ਬਵਿਧਿਂ ਅਕਤ੍ਵਾ ਤੇਹਿ ਸਹ ਮਦ੍ਦਿਤ੍ਵਾ ਕਮ੍ਮਂ ਕਰੋਨ੍ਤਾਨਂ ਆਪਤ੍ਤਿ ਅਲਜ੍ਜਿਤਾ ਚ ਨ ਵਿਗਚ੍ਛਤੀਤਿ ਵੇਦਿਤਬ੍ਬਂ. ‘‘ਏਕੋ ਅਲਜ੍ਜੀ ਅਲਜ੍ਜੀਸਤਮ੍ਪਿ ਕਰੋਤੀ’’ਤਿ (ਪਾਰਾ. ਅਟ੍ਠ. ੨.੫੮੫) ਹਿ ਵੁਤ੍ਤਂ, ਤੇਨੇਵ ਵਕ੍ਖਤਿ ‘‘ਸਬ੍ਬੇਪਿ ਲਜ੍ਜਿਨੋ ਏਤੇਸੁ ਕਮ੍ਮਾਦੀਸੁ ਸਹ ਵਸਨ੍ਤੀ’’ਤਿਆਦਿ. ਅਯਞ੍ਚਤ੍ਥੋ ਉਪਰਿ ਵਿਤ੍ਥਾਰਤੋ ਆਵਿ ਭਵਿਸ੍ਸਤਿ.

ਤਥਾਤਿ ਸੀਮਾਪਰਿਚ੍ਛਿਨ੍ਨੇਹੀਤਿਆਦਿਂ ਪਰਾਮਸਤਿ. ਏਕਤੋ ਵਨ੍ਦਨਭੁਞ੍ਜਨਗਾਮਪ੍ਪਵੇਸਨਵਤ੍ਤਾਪਟਿਵਤ੍ਤਕਰਣਉਗ੍ਗਹਪਰਿਪੁਚ੍ਛਾਸਜ੍ਝਾਯਕਰਣਾਦਿਸਾਮਗ੍ਗਿਕਿਰਿਯਾਵਸੇਨ ਭਗਵਤਾ ਪਞ੍ਞਤ੍ਤਸਿਕ੍ਖਾਪਦਸਿਕ੍ਖਨਂ ਸਮਸਿਕ੍ਖਤਾ ਨਾਮ, ਤਞ੍ਚ ਲਜ੍ਜੀਹੇਵ ਸਮਂ ਸਿਕ੍ਖਿਤਬ੍ਬਂ, ਨ ਅਲਜ੍ਜੀਹੀਤਿ ਦਸ੍ਸੇਤੁਂ ‘‘ਪਞ੍ਞਤ੍ਤਂ ਪਨ…ਪੇ… ਸਮਸਿਕ੍ਖਤਾ ਨਾਮਾ’’ਤਿ ਵੁਤ੍ਤਂ. ਤਤ੍ਥ ਅਨਤਿਕ੍ਕਮਨਵਸੇਨ ਉਗ੍ਗਹਪਰਿਪੁਚ੍ਛਾਦਿਵਸੇਨ ਚ ਲਜ੍ਜੀਪੁਗ੍ਗਲੇਹਿ ਸਮਂ ਏਕਤੋ ਸਿਕ੍ਖਿਤਬ੍ਬਾ ਸਮਸਿਕ੍ਖਾਤਿ ਸਿਕ੍ਖਾਪਦਾਨਿ ਵੁਤ੍ਤਾਨਿ, ਤਾਸਂ ਸਮਸਿਕ੍ਖਨਂ ਯਥਾਵੁਤ੍ਤਨਯੇਨ ਲਜ੍ਜੀਹਿ ਸਿਕ੍ਖਿਤਬ੍ਬਭਾਵੋ ਸਮਸਿਕ੍ਖਤਾ ਨਾਮਾਤਿ ਅਧਿਪ੍ਪਾਯੋ. ਯਥਾਵੁਤ੍ਤੇਸੁ ਏਕਕਮ੍ਮਾਦੀਸੁ ਅਲਜ੍ਜੀਨਂ ਲਜ੍ਜਿਧਮ੍ਮੇ ਅਨੋਕ੍ਕਨ੍ਤੇ ਲਜ੍ਜੀਹਿ ਸਹ ਸਂਵਾਸੋ ਨਤ੍ਥਿ, ਤਤੋ ਬਹਿਯੇਵ ਤੇ ਸਨ੍ਦਿਸ੍ਸਨ੍ਤੀਤਿ ਆਹ ਸਬ੍ਬੇਪਿ ਲਜ੍ਜਿਨੋਤਿਆਦਿ.

੫੬. ਯਂ ਤਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਵਤ੍ਥੁਮੇਵ ਨ ਹੋਤੀਤਿ ਸੁਵਣ੍ਣਾਦੀਹਿ ਕਤਇਤ੍ਥਿਰੂਪਾਨਂ ਅਙ੍ਗਜਾਤੇਸੁਪਿ ਨਿਮਿਤ੍ਤਵੋਹਾਰਦਸ੍ਸਨਤੋ ਤਤ੍ਥ ਪਾਰਾਜਿਕਾਸਙ੍ਕਾਨਿਵਤ੍ਤਨਤ੍ਥਂ ਵੁਤ੍ਤਂ. ਤੇਨੇਵ ਵਿਨੀਤਵਤ੍ਥੂਸੁ ਲੇਪਚਿਤ੍ਤਾਦਿਵਤ੍ਥੂਸੁ ਸਞ੍ਜਾਤਕੁਕ੍ਕੁਚ੍ਚਸ੍ਸ ਪਾਰਾਜਿਕੇਨ ਅਨਾਪਤ੍ਤਿ ਵੁਤ੍ਤਾ.

ਪਠਮਚਤੁਕ੍ਕਵਣ੍ਣਨਾ

੫੭. ਅਸ੍ਸਾਤਿ ਆਖ੍ਯਾਤਪਦਨ੍ਤਿ ਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ‘‘ਹੋਤੀ’’ਤਿ ਆਹ, ਭਵੇਯ੍ਯਾਤਿ ਅਤ੍ਥੋ, ਹੋਤੀਤਿ ਵੁਤ੍ਤਂ ਹੋਤਿ. ਦੁਤਿਯੇ ਅਤ੍ਥਵਿਕਪ੍ਪੇ ‘‘ਹੋਤੀ’’ਤਿ ਇਦਂ ਵਚਨਸੇਸੋ.

੫੮. ਸਾਦਿਯਨ੍ਤਸ੍ਸੇਵਾਤਿ ¶ ਏਤ੍ਥ ਸਾਦਿਯਨਂ ਨਾਮ ਸੇਵੇਤੁਕਾਮਤਾਚਿਤ੍ਤਸ੍ਸ ਉਪ੍ਪਾਦਨਮੇਵਾਤਿ ਆਹ ‘‘ਪਟਿਸੇਵਨਚਿਤ੍ਤਸਮਙ੍ਗਿਸ੍ਸਾ’’ਤਿ. ਪਟਿਪਕ੍ਖਨ੍ਤਿ ਅਨਿਟ੍ਠਂ ¶ ਅਹਿਤਂ. ‘‘ਭਿਕ੍ਖੂਨਂ ਪਚ੍ਚਤ੍ਥਿਕਾ ਭਿਕ੍ਖੁਪਚ੍ਚਤ੍ਥਿਕਾ’’ਤਿ ਵੁਤ੍ਤੇ ਉਪਰਿ ਵੁਚ੍ਚਮਾਨਾ ਰਾਜਪਚ੍ਚਤ੍ਥਿਕਾਦਯੋਪਿ ਇਧੇਵ ਪਵਿਸਨ੍ਤੀਤਿ ਤਂ ਨਿਵਤ੍ਤਨਤ੍ਥਂ ਭਿਕ੍ਖੂ ਏਵ ਪਚ੍ਚਤ੍ਥਿਕਾਤਿ ਰਾਜਪਚ੍ਚਤ੍ਥਿਕਾਨੁਰੂਪੇਨ ਅਤ੍ਥੋ ਦਸ੍ਸਿਤੋ. ਤਸ੍ਮਿਂ ਖਣੇਤਿ ਪਵੇਸਨਕ੍ਖਣੇ. ਅਗ੍ਗਤੋ ਹਿ ਯਾਵ ਮੂਲਾ ਪਵੇਸਨਕਿਰਿਯਾਯ ਵਤ੍ਤਮਾਨਕਾਲੋ ਪਵੇਸਨਕ੍ਖਣੋ ਨਾਮ. ਪਵਿਟ੍ਠਕਾਲੇਤਿ ਅਙ੍ਗਜਾਤਸ੍ਸ ਯਤ੍ਤਕਂ ਠਾਨਂ ਪਵੇਸਨਾਰਹਂ, ਤਤ੍ਤਕਂ ਅਨਵਸੇਸਤੋ ਪਵਿਟ੍ਠਕਾਲੇ, ਪਵੇਸਨਕਿਰਿਯਾਯ ਨਿਟ੍ਠਿਤਕ੍ਖਣੇਤਿ ਅਤ੍ਥੋ. ਏਵਂ ਪਵਿਟ੍ਠਸ੍ਸ ਉਦ੍ਧਰਣਾਰਮ੍ਭਤੋ ਅਨ੍ਤਰਾ ਠਿਤਕਾਲੇ ਠਿਤਂ ਅਙ੍ਗਜਾਤਂ, ਤਸ੍ਸ ਠਿਤਿ ਵਾ ਠਿਤਂ ਨਾਮ, ਅਟ੍ਠਕਥਾਯਂ ਪਨ ਮਾਤੁਗਾਮਸ੍ਸ ਸੁਕ੍ਕਵਿਸ੍ਸਟ੍ਠਿਂ ਪਤ੍ਵਾ ਸਬ੍ਬਥਾ ਵਾਯਾਮਤੋ ਓਰਮਿਤ੍ਵਾ ਠਿਤਕਾਲਂ ਸਨ੍ਧਾਯ ‘‘ਸੁਕ੍ਕਵਿਸ੍ਸਟ੍ਠਿਸਮਯੇ’’ਤਿ ਵੁਤ੍ਤਂ, ਤਦੁਭਯਮ੍ਪਿ ਠਿਤਮੇਵਾਤਿ ਗਹੇਤਬ੍ਬਂ. ਉਦ੍ਧਰਣਂ ਨਾਮ ਯਾਵ ਅਗ੍ਗਾ ਨੀਹਰਣਕਿਰਿਯਾਯ ਵਤ੍ਤਮਾਨਕਾਲੋਤਿ ਆਹ ‘‘ਨੀਹਰਣਕਾਲੇ ਪਟਿਸੇਵਨਚਿਤ੍ਤਂ ਉਪਟ੍ਠਾਪੇਤੀ’’ਤਿ.

ਏਤ੍ਥ ਚ ਯਸ੍ਮਾ ਪਰੇਹਿ ਉਪਕ੍ਕਮਿਯਮਾਨਸ੍ਸ ਅਙ੍ਗਜਾਤਾਦਿਕਾਯਚਲਨਸ੍ਸ ਵਿਜ੍ਜਮਾਨਤ੍ਤਾ ਸੇਵਨਚਿਤ੍ਤੇ ਉਪਟ੍ਠਿਤਮਤ੍ਤੇ ਤਸ੍ਮਿਂ ਖਣੇ ਚਿਤ੍ਤਜਰੂਪੇਨ ਸਞ੍ਜਾਯਮਾਨਂ ਅਙ੍ਗਜਾਤਾਦਿਚਲਨਂ ਇਮਿਨਾ ਸੇਵਨਚਿਤ੍ਤੇਨ ਉਪ੍ਪਾਦਿਤਮੇਵ ਹੋਤਿ. ਅਪਿਚ ਸੇਵਨਚਿਤ੍ਤੇ ਉਪ੍ਪਨ੍ਨੇ ਪਰੇਹਿ ਅਨੁਪਕ੍ਕਮਿਯਮਾਨਸ੍ਸਾਪਿ ਅਙ੍ਗਜਾਤੇ ਚਲਨਂ ਹੋਤੇਵ, ਤਞ੍ਚ ਤੇਨ ਕਤਂ ਨਾਮ ਹੋਤਿ, ਤਸ੍ਮਾ ਕਾਯਚਿਤ੍ਤਤੋ ਸਮੁਟ੍ਠਿਤਂ ਪਾਰਾਜਿਕਾਪਤ੍ਤਿਂ ਸੋ ਆਪਜ੍ਜਤਿਯੇਵ ਉਬ੍ਭਜਾਣੁਮਣ੍ਡਲਿਕਾ (ਪਾਚਿ. ੬੫੭-੬੫੮) ਵਿਯ. ਤਤ੍ਥਾਪਿ ਹਿ ‘‘ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਆਮਸਨਂ ਵਾ…ਪੇ… ਪਟਿਪੀਲ਼ਨਂ ਵਾ ਸਾਦਿਯੇਯ੍ਯਾ’’ਤਿ (ਪਾਚਿ. ੬੫੭) ਸਾਦਿਯਨਮਤ੍ਤੇਯੇਵ ਆਪਤ੍ਤਿ ਵੁਤ੍ਤਾ, ਭਿਕ੍ਖੁਨੋ ਕਾਯਸਂਸਗ੍ਗੇ ਪਨ ‘‘ਕਾਯਸਂਸਗ੍ਗਂ ਸਮਾਪਜ੍ਜੇਯ੍ਯਾ’’ਤਿ (ਪਾਰਾ. ੨੭੦) ਅਤ੍ਤਨੋ ਉਪਕ੍ਕਮਸ੍ਸ ਆਪਤ੍ਤਿਨਿਮਿਤ੍ਤਭਾਵੇਨ ਵੁਤ੍ਤਤ੍ਤਾ ਇਤ੍ਥਿਯਾ ਫੁਸਿਯਮਾਨਸ੍ਸ ਕਾਯਸਂਸਗ੍ਗਰਾਗੇ ਚ ਇਤ੍ਥਿਯਾ ਸਞ੍ਜਨਿਤਕਾਯਚਲਨੇ ਚ ਵਿਜ੍ਜਮਾਨੇਪਿ ਅਤ੍ਤਨੋ ਪਯੋਗਾਭਾਵੇਨ ਅਨਾਪਤ੍ਤਿਯੇਵ ਵੁਤ੍ਤਾਤਿ ਗਹੇਤਬ੍ਬਂ. ਕੇਚਿ ਪਨ ‘‘ਪਠਮਸਙ੍ਘਾਦਿਸੇਸਵਿਸਯੇਪਿ ਪਰੇਹਿ ਬਲਕ੍ਕਾਰੇਨ ਹਤ੍ਥਾਦੀਹਿ ਉਪਕ੍ਕਮਿਯਮਾਨਸ੍ਸ ਮੋਚਨਸ੍ਸਾਦੋ ਚ ਉਪ੍ਪਜ੍ਜਤਿ, ਤੇਨ ਚ ਅਸੁਚਿਮ੍ਹਿ ਮੁਤ੍ਤੇ ਸਙ੍ਘਾਦਿਸੇਸੋ, ਅਮੁਤ੍ਤੇ ਥੁਲ੍ਲਚ੍ਚਯਂ ਏਵਾ’’ਤਿ ਵਦਨ੍ਤਿ. ਅਙ੍ਗਾਰਕਾਸੁਨ੍ਤਿ ਅਙ੍ਗਾਰਰਾਸਿਂ, ਅਙ੍ਗਾਰਪੁਣ੍ਣਾਵਾਟਂ ਵਾ. ਇਤ੍ਥਿਯਾ ਉਪਕ੍ਕਮਿਯਮਾਨੇ ਅਸਾਦਿਯਨਂ ਨਾਮ ਨ ਸਬ੍ਬੇਸਂ ਵਿਸਯੋਤਿ ¶ ਆਹ ਇਮਞ੍ਹੀਤਿਆਦਿ. ਏਕਾਦਸਹਿ ਅਗ੍ਗੀਹੀਤਿ ਰਾਗਦੋਸਮੋਹਜਾਤਿਜਰਾਮਰਣਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਸਙ੍ਖਾਤੇਹਿ ਏਕਾਦਸਗ੍ਗੀਹਿ. ਅਸ੍ਸਾਤਿ ਅਸਾਦਿਯਨ੍ਤਸ੍ਸ. ਚਤੁਕ੍ਕਂ ਨੀਹਰਿਤ੍ਵਾ ਠਪੇਸੀਤਿ ਏਤ੍ਥ ਏਕਪੁਗ੍ਗਲਵਿਸਯਤਾਯ ਏਕੋਪਿ ਅਨਾਪਤ੍ਤਿਵਾਰੋ ਪਵੇਸਨਪਵਿਟ੍ਠਠਿਤਉਦ੍ਧਰਣਸਙ੍ਖਆਤਾਨਂ ਚਤੁਨ੍ਨਂ ਪਦਾਨਂ ਵਸੇਨ ‘‘ਚਤੁਕ੍ਕ’’ਨ੍ਤਿ ਵੁਤ੍ਤੋ. ਪਠਮਚਤੁਕ੍ਕਕਥਾਤਿ ਏਤ੍ਥ ਪਨ ਅਨਾਪਤ੍ਤਿਵਾਰੇਨ ਸਦ੍ਧਿਂ ਪਞ੍ਚਨ੍ਨਂ ਵਾਰਾਨਂ ਵੁਤ੍ਤਨਯੇਨ ‘‘ਪਞ੍ਚ ਚਤੁਕ੍ਕਾ’’ਤਿ ਵਤ੍ਤਬ੍ਬੇਪਿ ਏਕਮਗ੍ਗਵਿਸਯਤਾਯ ¶ ਤੇਸਂ ਏਕਤ੍ਤਂ ਆਰੋਪੇਤ੍ਵਾ ਪਠਮਚਤੁਕ੍ਕਤਾ ਵੁਤ੍ਤਾ. ਤੇਨੇਵ ਵਕ੍ਖਤਿ ਤਿਣ੍ਣਂ ਮਗ੍ਗਾਨਂ ਵਸੇਨ ਤੀਣਿ ਸੁਦ੍ਧਿਕਚਤੁਕ੍ਕਾਨੀਤਿਆਦਿ.

ਏਕੂਨਸਤ੍ਤਤਿਦ੍ਵਿਸਤਚਤੁਕ੍ਕਕਥਾਵਣ੍ਣਨਾ

੫੯-੬੦. ਮਤ੍ਤਨ੍ਤਿ ਸੁਰਾਦੀਹਿ ਮਤ੍ਤਂ. ਅਕ੍ਖਾਯਿਤਨਿਮਿਤ੍ਤਾ ਇਧ ਉਤ੍ਤਰਪਦਲੋਪੇਨ ਅਕ੍ਖਾਯਿਤਸਦ੍ਦੇਨ ਵੁਤ੍ਤਾਤਿ ਆਹ ‘‘ਅਕ੍ਖਾਯਿਤਨਿਮਿਤ੍ਤ’’ਨ੍ਤਿ. ਜਾਗਰਨ੍ਤਿਨ੍ਤਿਆਦਿ ਵਿਸੇਸਨਰਹਿਤਤ੍ਤਾ ‘‘ਸੁਦ੍ਧਿਕਚਤੁਕ੍ਕਾਨੀ’’ਤਿ ਵੁਤ੍ਤਂ. ਸਮਾਨਾਚਰਿਯਕਾਥੇਰਾਤਿ ਏਕਾਚਰਿਯਸ੍ਸ ਉਦ੍ਦੇਸਨ੍ਤੇਵਾਸਿਕਾ. ਗਙ੍ਗਾਯ ਅਪਰਭਾਗੋ ਅਪਰਗਙ੍ਗਂ. ਵਤਰੇਤਿ ਗਰਹਤ੍ਥੇ ਨਿਪਾਤੋ. ਏਵਂ ਵਿਨਯਗਰੁਕਾਨਨ੍ਤਿ ਇਮਿਨਾ ਉਪਰਿ ਉਪਤਿਸ੍ਸਤ੍ਥੇਰੇਨ ਵੁਚ੍ਚਮਾਨਵਿਨਿਚ੍ਛਯਸ੍ਸ ਗਰੁਕਰਣੀਯਤਾਯ ਕਾਰਣਂ ਵੁਤ੍ਤਂ. ਸਬ੍ਬਂ ਪਰਿਯਾਦਿਯਿਤ੍ਵਾਤਿ ਸਬ੍ਬਂ ਪਾਰਾਜਿਕਖੇਤ੍ਤਂ ਅਨਵਸੇਸਤੋ ਗਹੇਤ੍ਵਾ. ਯਦਿ ਹਿ ਸਾਵਸੇਸਂ ਕਤ੍ਵਾ ਪਞ੍ਞਪੇਯ੍ਯ, ਅਲਜ੍ਜੀਨਂ ਤਤ੍ਥ ਲੇਸੇਨ ਅਜ੍ਝਾਚਾਰਸੋਤੋ ਪਵਤ੍ਤਤੀਤਿ ਆਹ ‘‘ਸੋਤਂ ਛਿਨ੍ਦਿਤ੍ਵਾ’’ਤਿ. ਸਹਸੇਯ੍ਯਾਦਿਪਣ੍ਣਤ੍ਤਿਵਜ੍ਜਸਿਕ੍ਖਾਪਦੇਸੁਯੇਵ (ਪਾਚਿ. ੪੯-੫੧) ਸਾਵਸੇਸਂ ਕਤ੍ਵਾਪਿ ਪਞ੍ਞਾਪਨਂ ਸਮ੍ਭਵਤਿ, ਨ ਲੋਕਵਜ੍ਜੇਸੂਤਿ ਆਹ ਇਦਞ੍ਹੀਤਿਆਦਿ. ਸਹਸੇਯ੍ਯਸਿਕ੍ਖਾਪਦੇ ਹਿ (ਪਾਚਿ. ੪੯ ਆਦਯੋ) ਕਿਞ੍ਚਾਪਿ ਯੇਭੁਯ੍ਯਚ੍ਛਨ੍ਨੇ ਯੇਭੁਯ੍ਯਪਰਿਚ੍ਛਨ੍ਨੇ ਹੇਟ੍ਠਿਮਪਰਿਚ੍ਛੇਦਤੋ ਪਾਚਿਤ੍ਤਿਯਂ ਦਸ੍ਸਿਤਂ, ਉਪਡ੍ਢਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਦੁਕ੍ਕਟਂ, ਤਥਾਪਿ ਸਾਵਸੇਸਤ੍ਤਾ ਪਞ੍ਞਤ੍ਤਿਯਾ ਯੇਭੁਯ੍ਯਚ੍ਛਨ੍ਨਉਪਡ੍ਢਪਰਿਚ੍ਛਨ੍ਨਾਦੀਸੁਪਿ ਅਟ੍ਠਕਥਾਯਂ ਪਾਚਿਤ੍ਤਿਯਮੇਵ ਦਸ੍ਸਿਤਂ. ਇਧ ਪਨ ਨਿਰਵਸੇਸਤ੍ਤਾ ਪਞ੍ਞਤ੍ਤਿਯਾ ਭਗਵਤਾ ਦਸ੍ਸਿਤਂ ਯੇਭੁਯ੍ਯੇਨ ਅਕ੍ਖਾਯਿਤਨਿਮਿਤ੍ਤਤੋ ਹੇਟ੍ਠਾ ਪਾਰਾਜਿਕਕ੍ਖੇਤ੍ਤਂ ਨਤ੍ਥਿ, ਥੁਲ੍ਲਚ੍ਚਯਾਦਿਮੇਵ ਤਤ੍ਥ ਲਬ੍ਭਤਿ.

ਉਪਤਿਸ੍ਸਤ੍ਥੇਰੇਨ ਵੁਤ੍ਤਸ੍ਸੇਵ ਵਿਨਿਚ੍ਛਯਸ੍ਸ ਅਞ੍ਞਮ੍ਪਿ ਉਪਤ੍ਥਮ੍ਭਕਾਰਣਂ ਦਸ੍ਸੇਨ੍ਤੋ ਅਪਿਚਾਤਿਆਦਿਮਾਹ. ਨਿਮਿਤ੍ਤੇ ਅਪ੍ਪਮਤ੍ਤਿਕਾਪਿ ਮਂਸਰਾਜਿ ਸਚੇ ਅਵਸਿਟ੍ਠਾ ¶ ਹੋਤਿ, ਤਂ ਯੇਭੁਯ੍ਯਕ੍ਖਾਯਿਤਮੇਵ ਹੋਤਿ, ਤਤੋ ਪਰਂ ਪਨ ਸਬ੍ਬਸੋ ਖਾਯਿਤੇ ਨਿਮਿਤ੍ਤੇ ਦੁਕ੍ਕਟਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਤਤੋ ਪਰਂ ਥੁਲ੍ਲਚ੍ਚਯਂ ਨਤ੍ਥੀ’’ਤਿ. ਕੇਚਿ ਪਨੇਤ੍ਥ ਵਚ੍ਚਮਗ੍ਗਾਦਿਂ ਚਤ੍ਤਾਰੋ ਕੋਟ੍ਠਾਸੇ ਕਤ੍ਵਾ ‘‘ਤੇਸੁ ਦ੍ਵੇ ਕੋਟ੍ਠਾਸੇ ਅਤਿਕ੍ਕਮ੍ਮ ਯਾਵ ਤਤਿਯਕੋਟ੍ਠਾਸਸ੍ਸ ਪਰਿਯੋਸਾਨਾ ਖਾਯਿਤਂ ਯੇਭੁਯ੍ਯਕ੍ਖਾਯਿਤਂ ਨਾਮ, ਤਤੋ ਪਰਂ ਥੁਲ੍ਲਚ੍ਚਯਂ ਨਤ੍ਥਿ, ਯਾਵ ਚਤੁਤ੍ਥਕੋਟ੍ਠਾਸਸ੍ਸ ਪਰਿਯੋਸਾਨਾ ਖਾਯਿਤਂ, ਤਮ੍ਪਿ ਦੁਕ੍ਕਟਵਤ੍ਥੁਯੇਵਾ’’ਤਿ ਚ ਵਦਨ੍ਤਿ, ਤਂ ਨ ਯੁਤ੍ਤਂ. ਮਤਸਰੀਰਸ੍ਮਿਂਯੇਵ ਵੇਦਿਤਬ੍ਬਨ੍ਤਿ ਮਤਂ ਯੇਭੁਯ੍ਯੇਨ ਅਕ੍ਖਾਯਿਤਨ੍ਤਿਆਦਿਵਚਨਤੋ ਵੁਤ੍ਤਂ. ਯਦਿਪਿ ਨਿਮਿਤ੍ਤਨ੍ਤਿਆਦਿ ਜੀਵਮਾਨਕਸਰੀਰਮੇਵ ਸਨ੍ਧਾਯ ਵੁਤ੍ਤਂ ਤਸ੍ਸੇਵ ਅਧਿਕਤਤ੍ਤਾ. ਤੇਨੇਵ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ‘‘ਜੀਵਮਾਨਕਸਰੀਰਸ੍ਸ ਵੁਤ੍ਤਪ੍ਪਕਾਰੇ ਮਗ੍ਗੇ ਸਚੇਪਿ ਤਚਾਦੀਨਿ ਅਨਵਸੇਸੇਤ੍ਵਾ ਸਬ੍ਬਸੋ ਛਿਨ੍ਨੇ’’ਤਿਆਦਿ ¶ ਵੁਤ੍ਤਂ. ਸਬ੍ਬਸੋ ਖਾਯਿਤਨ੍ਤਿ ਨਿਮਿਤ੍ਤਮਂਸਂ ਸਬ੍ਬਂ ਛਿਨ੍ਨਨ੍ਤਿ ਅਤ੍ਥੋ. ਨਿਮਿਤ੍ਤਸਣ੍ਠਾਨਨ੍ਤਿ ਛਿਨ੍ਨਮਂਸਸ੍ਸ ਅਨ੍ਤੋ ਯਾਵ ਮੁਤ੍ਤਵਤ੍ਥਿਕੋਸਾ ਛਿਦ੍ਦਾਕਾਰੋ ਅਬ੍ਭਨ੍ਤਰਛਵਿਚਮ੍ਮਮਤ੍ਤੋ ਇਤ੍ਥਿਨਿਮਿਤ੍ਤਾਕਾਰੋ, ਤੇਨਾਹ ‘‘ਪਵੇਸਨਂ ਜਾਯਤੀ’’ਤਿ. ਨਿਮਿਤ੍ਤਸਣ੍ਠਾਨਂ ਪਨ ਅਨਵਸੇਸੇਤ੍ਵਾਤਿ ਪਵੇਸਨਾਰਹਛਿਦ੍ਦਾਕਾਰੇਨ ਠਿਤਅਬ੍ਭਨ੍ਤਰਮਂਸਾਦਿਂ ਅਨਵਸੇਸੇਤ੍ਵਾ. ਏਤੇਨ ਯਾਵ ਪਵੇਸੋ ਲਬ੍ਭਤਿ, ਤਾਵ ਮਗ੍ਗੋਯੇਵਾਤਿ ਦਸ੍ਸੇਤਿ. ਨਿਮਿਤ੍ਤਤੋ ਪਤਿਤਾਯ ਮਂਸਪੇਸਿਯਾਤਿ ਇਦਂ ਨਿਮਿਤ੍ਤਸਣ੍ਠਾਨਵਿਰਹਿਤਂ ਅਬ੍ਭਨ੍ਤਰਮਂਸਖਣ੍ਡਂ ਸਨ੍ਧਾਯ ਵੁਤ੍ਤਂ. ਨਿਮਿਤ੍ਤਸਣ੍ਠਾਨਂ ਅਕੋਪੇਤ੍ਵਾ ਸਮਨ੍ਤਤੋ ਛਿਨ੍ਦਿਤ੍ਵਾ ਉਦ੍ਧਟਮਂਸਪੇਸਿਯਾ ਪਨ ਮਤਸਰੀਰੇ ਯੇਭੁਯ੍ਯੇਨ ਅਕ੍ਖਾਯਿਤਨਿਮਿਤ੍ਤੇ ਵਿਯ ਉਪਕ੍ਕਮਨ੍ਤਸ੍ਸ ਪਾਰਾਜਿਕਮੇਵ.

ਏਵਂ ਜੀਵਮਾਨਕਮਨੁਸ੍ਸਸਰੀਰੇ ਲਬ੍ਭਮਾਨਵਿਸੇਸਂ ਦਸ੍ਸੇਤ੍ਵਾ ਇਦਾਨਿ ਮਤਸਰੀਰੇ ਦਸ੍ਸੇਤੁਂ ਮਤਸਰੀਰੇ ਪਨਾਤਿਆਦਿਮਾਹ. ਵਤ੍ਥਿਕੋਸੇਸੂਤਿ ਪੁਰਿਸਾਨਂ ਅਙ੍ਗਜਾਤਕੋਸਚਮ੍ਮੇਸੁ. ‘‘ਨਵਦ੍ਵਾਰੋ ਮਹਾਵਣੋ’’ਤਿਆਦਿ (ਮਿ. ਪ. ੨.੬.੧) ਵਚਨਤੋ ਮਨੁਸ੍ਸਾਨਂ ਅਕ੍ਖਿਨਾਸਾਦੀਨਿ ਵਣਸਙ੍ਖੇਪੇਨ ਥੁਲ੍ਲਚ੍ਚਯਕ੍ਖੇਤ੍ਤਾਨੀਤਿ ਤੇਸੁਪਿ ਥੁਲ੍ਲਚ੍ਚਯਂ ਵੁਤ੍ਤਂ, ਏਵਂ ਮਨੁਸ੍ਸਾਨਂ ਮਤਸਰੀਰੇਪਿ, ਤੇਨਾਹ ਮਤੇ ਅਲ੍ਲਸਰੀਰੇਤਿਆਦਿ. ਤਤ੍ਥ ਅਲ੍ਲਸਰੀਰੇਤਿ ਅਕੁਥਿਤਂ ਸਨ੍ਧਾਯ ਵੁਤ੍ਤਂ. ਪਾਰਾਜਿਕਕ੍ਖੇਤ੍ਤੇਤਿ ਯੇਭੁਯ੍ਯੇਨ ਅਕ੍ਖਾਯਿਤਮ੍ਪਿ ਸਨ੍ਧਾਯ ਵੁਤ੍ਤਂ. ਥੁਲ੍ਲਚ੍ਚਯਕ੍ਖੇਤ੍ਤੇਤਿ ਉਪਡ੍ਢਕ੍ਖਾਯਿਤਾਦਿਮ੍ਪਿ ਸਨ੍ਧਾਯ ਵੁਤ੍ਤਂ. ਏਤ੍ਥ ਚ ਅਕ੍ਖਿਨਾਸਾਦਿਥੁਲ੍ਲਚ੍ਚਯਕ੍ਖੇਤ੍ਤੇਸੁ ਯੇਭੁਯ੍ਯੇਨ ਅਕ੍ਖਾਯਿਤੇਸੁਪਿ ਥੁਲ੍ਲਚ੍ਚਯਂ, ਉਪਡ੍ਢਕ੍ਖਾਯਿਤਾਦੀਸੁ ਦੁਕ੍ਕਟਨ੍ਤਿ ਵੇਦਿਤਬ੍ਬਂ. ਸਬ੍ਬੇਸਮ੍ਪੀਤਿ ਯਥਾਵੁਤ੍ਤਹਤ੍ਥਿਆਦੀਹਿ ਅਞ੍ਞੇਸਂ ਤਿਰਚ੍ਛਾਨਾਨਂ ¶ ਸਙ੍ਗਣ੍ਹਨਤ੍ਥਂ ਵੁਤ੍ਤਂ. ਤਿਰਚ੍ਛਾਨਗਤਾਨਂ ਅਕ੍ਖਿਕਣ੍ਣਵਣੇਸੁ ਦੁਕ੍ਕਟਂ ਪਨ ਅਟ੍ਠਕਥਾਪ੍ਪਮਾਣੇਨ ਗਹੇਤਬ੍ਬਂ, ‘‘ਅਮਗ੍ਗੇਨ ਅਮਗ੍ਗਂ ਪਵੇਸੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਰਾ. ੬੬) ਹਿ ਸਾਮਞ੍ਞਤੋ ਵੁਤ੍ਤਂ, ਨ ਪਨ ਮਨੁਸ੍ਸਾਨਨ੍ਤਿ ਵਿਸੇਸੇਤ੍ਵਾ. ਯਦਿ ਹਿ ਮਨੁਸ੍ਸਾਨਞ੍ਞੇਵ ਵਣੇਸੁ ਥੁਲ੍ਲਚ੍ਚਯਂ ਸਿਯਾ, ਹਤ੍ਥਿਅਸ੍ਸਾਦੀਨਂ ਨਾਸਵਤ੍ਥਿਕੋਸੇਸੁਪਿ ਪਟਙ੍ਗਮੁਖਮਣ੍ਡੂਕਸ੍ਸ ਮੁਖਸਣ੍ਠਾਨੇਪਿ ਚ ਵਣਸਙ੍ਖੇਪਤੋ ਥੁਲ੍ਲਚ੍ਚਯਂ ਨ ਵਤ੍ਤਬ੍ਬਂ ਸਿਯਾ, ਵੁਤ੍ਤਞ੍ਚ. ਤਸ੍ਮਾ ਅਟ੍ਠਕਥਾਚਰਿਯਾ ਏਵੇਤ੍ਥ ਪਮਾਣਂ. ਮਤਾਨਂ ਤਿਰਚ੍ਛਾਨਗਤਾਨਨ੍ਤਿ ਮਤਕੇਨ ਸਮ੍ਬਨ੍ਧੋ.

ਮੇਥੁਨਰਾਗੇਨ ਵਤ੍ਥਿਕੋਸਂ ਪਵੇਸੇਨ੍ਤਸ੍ਸ ਥੁਲ੍ਲਚ੍ਚਯਂ ਵੁਤ੍ਤਨ੍ਤਿ ਆਹ ‘‘ਵਤ੍ਥਿਕੋਸਂ ਅਪ੍ਪਵੇਸੇਨ੍ਤੋ’’ਤਿ. ਮੇਥੁਨਰਾਗੋ ਚ ਨਾਮ ਕਾਯਸਂਸਗ੍ਗਰਾਗਂ ਮੋਚਨਸ੍ਸਾਦਞ੍ਚ ਮੁਞ੍ਚਿਤ੍ਵਾ ਵਿਸੁਂ ਦ੍ਵਯਂਦ੍ਵਯਸਮਾਪਤ੍ਤਿਯਾ ਰਾਗੋ, ਸੋ ਚ ਪੁਰਿਸਾਦੀਸੁਪਿ ਉਪ੍ਪਜ੍ਜਤਿ, ਤੇਨ ਚ ਅਪਾਰਾਜਿਕਕ੍ਖੇਤ੍ਤੇ ਇਤ੍ਥਿਸਰੀਰੇਪਿ ਉਪਕ੍ਕਮਨ੍ਤਸ੍ਸ ਅਸੁਚਿਮ੍ਹਿ ਮੁਤ੍ਤੇਪਿ ਸਙ੍ਘਾਦਿਸੇਸੋ ਨ ਹੋਤਿ, ਖੇਤ੍ਤਾਨੁਰੂਪਂ ਥੁਲ੍ਲਚ੍ਚਯਦੁਕ੍ਕਟਮੇਵ ਹੋਤੀਤਿ ਵੇਦਿਤਬ੍ਬਂ. ਅਪ੍ਪਵੇਸੇਨ੍ਤੋਤਿ ਇਮਿਨਾ ਤੀਸੁ ਮਗ੍ਗੇਸੁ ਪਵੇਸਨਾਧਿਪ੍ਪਾਯੇ ਅਸਤਿਪਿ ਮੇਥੁਨਰਾਗੇਨ ਬਹਿ ਘਟ੍ਟਨਂ ਸਮ੍ਭਵਤੀਤਿ ਦਸ੍ਸੇਤਿ, ਤੇਨੇਵ ਥੁਲ੍ਲਚ੍ਚਯਂ ਵੁਤ੍ਤਂ, ਇਤਰਥਾ ਪਵੇਸਨਾਧਿਪ੍ਪਾਯੇਨ ¶ ਬਹਿ ਛੁਪਨ੍ਤਸ੍ਸ ਮੇਥੁਨਸ੍ਸ ਪੁਬ੍ਬਪਯੋਗਤ੍ਤਾ ਦੁਕ੍ਕਟਮੇਵ ਵਤ੍ਤਬ੍ਬਂ ਸਿਯਾ. ਨਿਮਿਤ੍ਤੇਨ ਨਿਮਿਤ੍ਤਂ ਛੁਪਤਿ ਥੁਲ੍ਲਚ੍ਚਯਨ੍ਤਿ ਇਦਞ੍ਚ ‘‘ਨ ਚ, ਭਿਕ੍ਖਵੇ, ਰਤ੍ਤਚਿਤ੍ਤੇਨ ਅਙ੍ਗਜਾਤਂ ਛੁਪਿਤਬ੍ਬਂ, ਯੋ ਛੁਪੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਮਹਾਵ. ੨੫੨) ਇਮਸ੍ਸ ਚਮ੍ਮਕ੍ਖਨ੍ਧਕੇ ਆਗਤਸ੍ਸ ਸੁਤ੍ਤਸ੍ਸ ਵਸੇਨ ਵੁਤ੍ਤਂ. ਤਤ੍ਥ ਚ ਕੇਸਞ੍ਚਿ ਅਞ੍ਞਥਾਪਿ ਅਤ੍ਥਵਿਕਪ੍ਪਸ੍ਸ ਬੀਜਂ ਦਸ੍ਸੇਨ੍ਤੋ ਮਹਾਅਟ੍ਠਕਥਾਯਂ ਪਨਾਤਿਆਦਿਮਾਹ. ਮੁਖੇਨੇਵ ਛੁਪਨਂ ਸਨ੍ਧਾਯਾਤਿ ਓਟ੍ਠਜਿਵ੍ਹਾਦਿਮੁਖਾਵਯਵੇਨ ਛੁਪਨਂ ਸਨ੍ਧਾਯ. ਓਲ਼ਾਰਿਕਤ੍ਤਾਤਿ ਅਜ੍ਝਾਚਾਰਸ੍ਸ ਥੁਲ੍ਲਤ੍ਤਾ. ਤਂ ਸਨ੍ਧਾਯਭਾਸਿਤਨ੍ਤਿ ਤਂ ਯਥਾਵੁਤ੍ਤਸੁਤ੍ਤਂ. ਸੁਤ੍ਤਞ੍ਹਿ ਅਜ੍ਝਾਚਾਰਂ ਸਨ੍ਧਾਯ ਪਟਿਚ੍ਚ ਵੁਤ੍ਤਤ੍ਤਾ ‘‘ਸਨ੍ਧਾਯਭਾਸਿਤ’’ਨ੍ਤਿ ਵੁਚ੍ਚਤਿ. ਸੁਟ੍ਠੁਸਲ੍ਲਕ੍ਖੇਤ੍ਵਾਤਿ ਪਿਟ੍ਠਿਂ ਅਭਿਰੁਹਨ੍ਤਾਨਂ ਅਙ੍ਗਜਾਤਮੁਖੇਨੇਵ ਨਿਮਿਤ੍ਤਛੁਪਨਸ੍ਸ ਸਮ੍ਭਵਂ ਮੇਥੁਨਰਾਗੀਨਞ੍ਚ ਅਙ੍ਗਜਾਤੇਨ ਛੁਪਨਸ੍ਸੇਵ ਅਨੁਰੂਪਤਞ੍ਚ ਸੁਤ੍ਤੇ ਚ ‘‘ਮੁਖੇਨਾ’’ਤਿ ਅਵੁਤ੍ਤਤਞ੍ਚ ਅਞ੍ਞਞ੍ਚ ਨਯਂ ਯਥਾਬਲਂ ਸੁਟ੍ਠੁ ਸਲ੍ਲਕ੍ਖੇਤ੍ਵਾਤਿ ਅਤ੍ਥੋ. ਸਙ੍ਘਾਦਿਸੇਸੋਤਿ ਮਨੁਸ੍ਸਿਤ੍ਥਿਂ ਸਨ੍ਧਾਯ ਵੁਤ੍ਤਂ. ਪਸ੍ਸਾਵਮਗ੍ਗਨ੍ਤਿ ਇਦਂ ਚਮ੍ਮਕ੍ਖਨ੍ਧਕੇ ਨਿਦਾਨਵਸੇਨ ਵੁਤ੍ਤਂ. ਇਤਰਮਗ੍ਗਦ੍ਵਯਂ ਪਨ ਨਿਮਿਤ੍ਤਮੁਖੇਨ ਛੁਪਨ੍ਤਸ੍ਸ ਵਣਸਙ੍ਖੇਪੇਨ ਥੁਲ੍ਲਚ੍ਚਯਮੇਵ. ਵੁਤ੍ਤਨਯੇਨੇਵਾਤਿ ਮੇਥੁਨਰਾਗੇਨੇਵ. ਨਿਮਿਤ੍ਤਮੁਖੇਨ ਪਨ ਵਿਨਾ ਮੇਥੁਨਰਾਗੇਨ ਮਨੁਸ੍ਸਿਤ੍ਥਿਯਾ ਵਾ ਤਿਰਚ੍ਛਾਨਗਤਿਤ੍ਥਿਯਾ ਵਾ ਪਸ੍ਸਾਵਮਗ੍ਗਂ ¶ ਪਕਤਿਮੁਖੇਨ ਛੁਪਨ੍ਤਸ੍ਸ ਦੁਕ੍ਕਟਮੇਵ ਪਕਤਿਮੁਖੇਨ ਪਕਤਿਮੁਖਛੁਪਨੇ ਵਿਯ, ਇਤਰਥਾ ਤਤ੍ਥਾਪਿ ਥੁਲ੍ਲਚ੍ਚਯੇਨ ਭਵਿਤਬ੍ਬਂ, ਤਞ੍ਚ ਨ ਯੁਤ੍ਤਂ ਖਨ੍ਧਕਸੁਤ੍ਤੇਪਿ ਤਥਾ ਅਵੁਤ੍ਤਤ੍ਤਾ. ਕਾਯਸਂਸਗ੍ਗਰਾਗੇਨ ਦੁਕ੍ਕਟਨ੍ਤਿ ਨਿਮਿਤ੍ਤਮੁਖੇਨ ਵਾ ਪਕਤਿਮੁਖਾਦਿਂ ਇਤਰਕਾਯੇਨ ਵਾ ਕਾਯਸਂਸਗ੍ਗਰਾਗੇਨ ਛੁਪਨ੍ਤਸ੍ਸ ਦੁਕ੍ਕਟਮੇਵ.

ਏਤ੍ਥ ਚ ਕਾਯਸਂਸਗ੍ਗਰਾਗੇਨ ਬਹਿਨਿਮਿਤ੍ਤੇ ਉਪਕ੍ਕਮਤੋ ਅਜਾਨਨ੍ਤਸ੍ਸੇਵ ਅਙ੍ਗਜਾਤਂ ਯਦਿ ਪਾਰਾਜਿਕਕ੍ਖੇਤ੍ਤਂ ਛੁਪਤਿ, ਤਤ੍ਥ ਕਿਂ ਹੋਤੀਤਿ? ਕੇਚਿ ਤਾਵ ‘‘ਮੇਥੁਨਰਾਗਸ੍ਸ ਅਭਾਵਾ ਮਨੁਸ੍ਸਿਤ੍ਥਿਯਾ ਸਙ੍ਘਾਦਿਸੇਸੋ, ਸੇਸੇਸੁ ਵਤ੍ਥੁਵਸੇਨ ਥੁਲ੍ਲਚ੍ਚਯਦੁਕ੍ਕਟਾਨੀ’’ਤਿ ਵਦਨ੍ਤਿ. ਅਞ੍ਞੇ ਪਨ ‘‘ਪਵੇਸਨਕ੍ਖਣੇ ਫਸ੍ਸਸ੍ਸ ਸਾਦਿਯਨਸਮ੍ਭਵਤੋ ਬਲਕ੍ਕਾਰੇਨ ਉਪਕ੍ਕਮਨਕ੍ਖਣੇ ਵਿਯ ਪਾਰਾਜਿਕਮੇਵਾ’’ਤਿ ਵਦਨ੍ਤਿ, ਇਦਮੇਵ ਯੁਤ੍ਤਤਰਂ. ਮਗ੍ਗਤ੍ਤਯਤੋ ਹਿ ਅਞ੍ਞਸ੍ਮਿਂ ਪਦੇਸੇਯੇਵ ਕਾਯਸਂਸਗ੍ਗਾਦਿਰਾਗਭੇਦਤੋ ਆਪਤ੍ਤਿਭੇਦੋ ਲਬ੍ਭਤਿ, ਨ ਮਗ੍ਗਤ੍ਤਯੇ. ਤਤ੍ਥ ਪਨ ਯੇਨ ਕੇਨਚਿ ਆਕਾਰੇਨ ਫਸ੍ਸਸ੍ਸ ਸਾਦਿਯਨਕ੍ਖਣੇ ਪਾਰਾਜਿਕਮੇਵ, ਤੇਨੇਵ ਪਰੋਪਕ੍ਕਮੇਨ ਪਵੇਸਨਾਦੀਸੁ ਰਾਗਭੇਦਂ ਅਨੁਦ੍ਧਰਿਤ੍ਵਾ ਸਾਦਿਯਨਮਤ੍ਤੇਨ ਪਾਰਾਜਿਕਂ ਵੁਤ੍ਤਂ.

ਸਨ੍ਥਤਚਤੁਕ੍ਕਭੇਦਕਥਾਵਣ੍ਣਨਾ

੬੧-੨. ਪਟਿਪਨ੍ਨਕਸ੍ਸਾਤਿ ਆਰਦ੍ਧਵਿਪਸ੍ਸਕਸ੍ਸ. ਉਪਾਦਿਨ੍ਨਕਨ੍ਤਿ ਕਾਯਿਨ੍ਦ੍ਰਿਯਂ ਸਨ੍ਧਾਯ ਵੁਤ੍ਤਂ. ਉਪਾਦਿਨ੍ਨਕੇਨ ਫੁਸਤੀਤਿ ਉਪਾਦਿਨ੍ਨਕਸਰੀਰੇਨ ਫੁਸੀਯਤੀਤਿ ਕਮ੍ਮਸਾਧਨੇਨ ਅਤ੍ਥੋ ਦਟ੍ਠਬ੍ਬੋ. ਅਥ ਵਾ ਏਵਂ ¶ ਕਰੋਨ੍ਤੋ ਭਿਕ੍ਖੁ ਕਿਞ੍ਚਿ ਉਪਾਦਿਨ੍ਨਕਂ ਉਪਾਦਿਨ੍ਨਕੇਨ ਨ ਫੁਸਤੀਤਿ ਅਤ੍ਥੋ. ਲੇਸਂ ਓਡ੍ਡੇਸ੍ਸਨ੍ਤੀਤਿ ਲੇਸਂ ਠਪੇਸ੍ਸਨ੍ਤਿ, ਪਰਿਕਪ੍ਪੇਸ੍ਸਨ੍ਤੀਤਿ ਅਤ੍ਥੋ. ਸਨ੍ਥਤਾਦਿਭੇਦੇਹਿ ਭਿਨ੍ਦਿਤ੍ਵਾਤਿ ਸਨ੍ਥਤਾਦਿਵਿਸੇਸਨੇਹਿ ਵਿਸੇਸੇਤ੍ਵਾ. ਸਨ੍ਥਤਾਯਾਤਿ ਸਮੁਦਾਯੇ ਏਕਦੇਸਵੋਹਾਰੋ ਦਡ੍ਢਸ੍ਸ ਪਟਸ੍ਸ ਛਿਦ੍ਦਨ੍ਤਿਆਦੀਸੁ ਵਿਯ. ਯਥਾ ਹਿ ਪਟਸ੍ਸ ਏਕਦੇਸੋਵ ਵਤ੍ਥਤੋ ਦਡ੍ਢੋਤਿ ਵੁਚ੍ਚਤਿ, ਤਂ ਏਕਦੇਸਵੋਹਾਰਂ ਸਮੁਦਾਯੇ ਪਟੇ ਉਪਚਾਰਤੋ ਆਰੋਪੇਤ੍ਵਾ ਪੁਨ ਤਂ ਸਮੁਦਾਯਂ ਦਡ੍ਢਪ੍ਪਦੇਸਸਙ੍ਖਾਤਛਿਦ੍ਦਸਮ੍ਬਨ੍ਧੀਭਾਵੇਨ ‘‘ਦਡ੍ਢਸ੍ਸ ਪਟਸ੍ਸ ਛਿਦ੍ਦ’’ਨ੍ਤਿ ਵੋਹਰਨ੍ਤਿ, ਏਵਮਿਧਾਪਿ ਇਤ੍ਥਿਯਾ ਮਗ੍ਗਪ੍ਪਦੇਸਵੋਹਾਰਂ ਸਮੁਦਾਯਭੂਤਾਯ ਇਤ੍ਥਿਯਾ ਆਰੋਪੇਤ੍ਵਾ ਪੁਨ ਤਂ ਇਤ੍ਥਿਂ ਸਨ੍ਥਤਮਗ੍ਗਸਮ੍ਬਨ੍ਧਿਨਿਂ ਕਤ੍ਵਾ ਸਨ੍ਥਤਾਯ ਇਤ੍ਥਿਯਾ ਵਚ੍ਚਮਗ੍ਗੇਨਾਤਿਆਦਿ ਵੁਤ੍ਤਂ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੨.੬੧-੬੨) ਪਨੇਤ੍ਥ ‘‘ਏਕਦੇਸੇ ਸਮੁਦਾਯਵੋਹਾਰੋ’’ਤਿ ਵੁਤ੍ਤਂ, ਤਂ ਨ ¶ ਯੁਤ੍ਤਂ ਅਵਯਵਵੋਹਾਰੇਨ ਸਮੁਦਾਯਸ੍ਸੇਵ ਪਤੀਯਮਾਨਤ੍ਤਾ. ਇਤਰਥਾ ਹਿ ਸਨ੍ਥਤਾਯ ਵਚ੍ਚਮਗ੍ਗੇਨਾਤਿ ਇਤ੍ਥਿਲਿਙ੍ਗਤਾ ਮਗ੍ਗਸਮ੍ਬਨ੍ਧਿਤਾ ਚ ਨ ਸਿਯਾ, ਏਕਦੇਸੇ ਸਮੁਦਾਯੋਪਚਾਰਸ੍ਸ ਪਨ ਏਕਦੇਸੋਵ ਅਤ੍ਥੋ ਸਾਖਾਯ ਛਿਜ੍ਜਮਾਨਾਯ ਰੁਕ੍ਖੋ ਛਿਜ੍ਜਤੀਤਿਆਦੀਸੁ ਵਿਯ.

ਵਤ੍ਥਾਦੀਨਿ ਮਗ੍ਗਸ੍ਸ ਅਨ੍ਤੋ ਅਪ੍ਪਵੇਸੇਤ੍ਵਾ ਬਹਿਯੇਵ ਵੇਠਨਂ ਸਨ੍ਧਾਯ ‘‘ਪਲਿਵੇਠੇਤ੍ਵਾ’’ਤਿ ਵੁਤ੍ਤਂ. ਸਮੁਦਾਯੇ ਅਵਯਵੂਪਚਾਰੇਨੇਵ ਭਿਕ੍ਖੁਪਿ ਸਨ੍ਥਤੋ ਨਾਮਾਤਿਆਦਿ ਵੁਤ੍ਤਂ. ਯਤ੍ਤਕੇ ਪਵਿਟ੍ਠੇਤਿ ਤਿਲਬੀਜਮਤ੍ਤੇ ਪਵਿਟ੍ਠੇ. ਅਕ੍ਖਿਨਾਸਾਦੀਨਂ ਸਨ੍ਥਤਤ੍ਤੇਪਿ ਯਥਾਵਤ੍ਥੁਕਮੇਵਾਤਿ ਆਹ ਥੁਲ੍ਲਚ੍ਚਯਕ੍ਖੇਤ੍ਤੇ ਥੁਲ੍ਲਚ੍ਚਯਨ੍ਤਿਆਦਿ. ਖਾਣੁਂ ਘਟ੍ਟੇਨ੍ਤਸ੍ਸ ਦੁਕ੍ਕਟਨ੍ਤਿ ਇਤ੍ਥਿਨਿਮਿਤ੍ਤਸ੍ਸ ਅਨ੍ਤੋ ਖਾਣੁਂ ਪਵੇਸੇਤ੍ਵਾ ਸਮਤਲਂ, ਅਤਿਰਿਤ੍ਤਂ ਵਾ ਠਿਤਂ ਖਾਣੁਂ ਸਚੇ ਘਟ੍ਟੇਤਿ, ਘਟ੍ਟੇਨ੍ਤਸ੍ਸ ਦੁਕ੍ਕਟਂ ਪਵੇਸਾਭਾਵਤੋ. ਸਚੇ ਪਨ ਈਸਕਂ ਅਨ੍ਤੋ ਅਲ੍ਲੋਕਾਸੇ ਪਵੇਸੇਤ੍ਵਾ ਠਿਤਂ ਅਨੁਪਾਦਿਨ੍ਨਮੇਵ ਖਾਣੁਸੀਸਂ ਅਙ੍ਗਜਾਤੇਨ ਛੁਪਤਿ, ਪਾਰਾਜਿਕਮੇਵ. ਤਸ੍ਸ ਤਲਨ੍ਤਿ ਵੇਲ਼ੁਨਲ਼ਾਦਿਕਸ੍ਸ ਅਨ੍ਤੋਤਲਂ. ਬਹਿਦ੍ਧਾ ਖਾਣੁਕੇਤਿ ਅਨ੍ਤੋ ਪਵੇਸਿਤਵੇਲ਼ੁਪਬ੍ਬਾਦਿਕਸ੍ਸ ਬਹਿ ਨਿਕ੍ਖਨ੍ਤਸੀਸਂ ਸਨ੍ਧਾਯ ਵੁਤ੍ਤਂ. ਯਥਾ ਚ ਇਤ੍ਥਿਨਿਮਿਤ੍ਤੇਤਿਆਦੀਸੁ ਯਥਾ ਇਤ੍ਥਿਯਾ ਪਸ੍ਸਾਵਮਗ੍ਗੇ ਖਾਣੁਂ ਕਤ੍ਵਾ ਘਟ੍ਟਨਾਦਿਕਂ ਵੁਤ੍ਤਂ, ਏਵਂ ਸਬ੍ਬਤ੍ਥ ਵਚ੍ਚਮਗ੍ਗਾਦੀਸੁਪਿ ਲਕ੍ਖਣਂ ਵੇਦਿਤਬ੍ਬਨ੍ਤਿ ਅਤ੍ਥੋ.

ਰਾਜਪਚ੍ਚਤ੍ਥਿਕਾਦਿਚਤੁਕ੍ਕਭੇਦਕਥਾਵਣ੍ਣਨਾ

੬੫. ਕੇਰਾਟਿਕਾਤਿ ਵਞ੍ਚਕਾ. ਪਠਮਂ ਇਤ੍ਥਿਧੁਤ੍ਤਮੇਵ ਦਸ੍ਸੇਤ੍ਵਾ ਇਦਾਨਿ ਇਤਰਧੁਤ੍ਤੇਪਿ ਸਙ੍ਗਹੇਤ੍ਵਾ ਦਸ੍ਸੇਤੁਂ ‘‘ਇਤ੍ਥਿਧੁਤ੍ਤਸੁਰਾਧੁਤ੍ਤਾਦਯੋ ਵਾ’’ਤਿ ਵੁਤ੍ਤਂ.

ਆਪਤ੍ਤਾਨਾਪਤ੍ਤਿਵਾਰਵਣ੍ਣਨਾ

੬੬. ਪਟਿਞ੍ਞਾਤਕਰਣਂ ¶ ਨਤ੍ਥਿ ਸੇਵੇਤੁਕਾਮਤਾ ਮਗ੍ਗੇਨ ਮਗ੍ਗਪ੍ਪਟਿਪਤ੍ਤੀਤਿ ਦ੍ਵਿਨ੍ਨਂ ਅਙ੍ਗਾਨਂ ਸਿਦ੍ਧਤ੍ਤਾ. ਦੂਸਿਤਸ੍ਸ ਪਨ ਮਗ੍ਗੇਨ ਮਗ੍ਗਪ੍ਪਟਿਪਤ੍ਤਿ ਏਵਮੇਕਂ ਅਙ੍ਗਂ ਸਿਦ੍ਧਂ, ਸੇਵੇਤੁਕਾਮਤਾਸਙ੍ਖਾਤਂ ਸਾਦਿਯਨਂ ਅਸਿਦ੍ਧਂ. ਤਸ੍ਮਾ ਸੋ ਪੁਚ੍ਛਿਤ੍ਵਾ ‘‘ਸਾਦਿਯਿ’’ਨ੍ਤਿ ਵੁਤ੍ਤਪਟਿਞ੍ਞਾਯ ਨਾਸੇਤਬ੍ਬੋ. ਤਤ੍ਥੇਵਾਤਿ ਵੇਸਾਲਿਯਂ ਮਹਾਵਨੇ ਏਵ. ਸਬ੍ਬਙ੍ਗਗਤਨ੍ਤਿ ਸਬ੍ਬਕਾਯਗਤਂ. ‘‘ਲੋਹਿਤਂ ਵਿਯਾ’’ਤਿ ਵੁਤ੍ਤਤ੍ਤਾ ਕੇਸਾਦੀਨਂ ਵਿਨਿਮੁਤ੍ਤਟ੍ਠਾਨੇ ਸਬ੍ਬਤ੍ਥਾਤਿ ਗਹੇਤਬ੍ਬਂ. ਨਿਚ੍ਚਮੇਵ ਉਮ੍ਮਤ੍ਤਕੋ ਹੋਤੀਤਿ ¶ ਯਸ੍ਸ ਪਿਤ੍ਤਕੋਸਤੋ ਪਿਤ੍ਤਂ ਚਲਿਤ੍ਵਾ ਸਬ੍ਬਦਾ ਬਹਿ ਨਿਕ੍ਖਨ੍ਤਂ ਹੋਤਿ, ਤਂ ਸਨ੍ਧਾਯ ਵੁਤ੍ਤਂ. ਯਸ੍ਸ ਪਨ ਪਿਤ੍ਤਂ ਚਲਿਤ੍ਵਾ ਪਿਤ੍ਤਕੋਸੇਯੇਵ ਠਿਤਂ ਹੋਤਿ, ਕਦਾਚਿ ਵਾ ਨਿਕ੍ਖਨ੍ਤਂ ਪੁਨ ਨਿਕ੍ਖਮਤਿ, ਸੋਪਿ ਅਨ੍ਤਰਨ੍ਤਰਾ ਸਞ੍ਞਂ ਪਟਿਲਭਤਿ ਭੇਸਜ੍ਜੇਨ ਚ ਪਕਤਿਆਰੋਗ੍ਯਂ ਪਟਿਲਭਤੀਤਿ ਵੇਦਿਤਬ੍ਬਂ.

ਪਦਭਾਜਨੀਯਵਣ੍ਣਨਾਨਯੋ ਨਿਟ੍ਠਿਤੋ.

ਪਕਿਣ੍ਣਕਕਥਾਵਣ੍ਣਨਾ

ਪਕਿਣ੍ਣਕਨ੍ਤਿ ਵੋਮਿਸ੍ਸਕਨਯਂ. ਸਮੁਟ੍ਠਾਨਨ੍ਤਿ ਉਪ੍ਪਤ੍ਤਿਕਾਰਣਂ. ਕਿਰਿਯਾਤਿਆਦਿ ਨਿਦਸ੍ਸਨਮਤ੍ਤਂ ਅਕਿਰਿਯਾਦੀਨਮ੍ਪਿ ਸਙ੍ਗਹਤੋ. ਵੇਦਨਾਯ ਸਹ ਕੁਸਲਞ੍ਚ ਵੇਦਿਤਬ੍ਬਨ੍ਤਿ ਯੋਜੇਤਬ੍ਬਂ. ਸਬ੍ਬਸਙ੍ਗਾਹਕਵਸੇਨਾਤਿ ਸਬ੍ਬੇਸਂ ਸਿਕ੍ਖਾਪਦਾਨਂ ਸਙ੍ਗਾਹਕਵਸੇਨ ‘‘ਕਾਯੋ ਵਾਚਾ ਕਾਯਵਾਚਾ ਕਾਯਚਿਤ੍ਤਂ ਵਾਚਾਚਿਤ੍ਤਂ ਕਾਯਵਾਚਾਚਿਤ੍ਤ’’ਨ੍ਤਿ ਏਵਂ ਵੁਤ੍ਤਾਨਿ ਛ ਆਪਤ੍ਤਿਸਮੁਟ੍ਠਾਨਾਨਿ. ਸਮੁਟ੍ਠਾਨਾਦਯੋ ਹਿ ਆਪਤ੍ਤਿਯਾ ਏਵ ਹੋਨ੍ਤਿ, ਨ ਸਿਕ੍ਖਾਪਦਸ੍ਸ. ਤਂਤਂਸਿਕ੍ਖਾਪਦਸ੍ਸ ਨਿਯਤਆਪਤ੍ਤਿਯਾ ਏਵ ਗਹਣਤ੍ਥਂ ਪਨ ਸਿਕ੍ਖਾਪਦਸੀਸੇਨ ਸਮੁਟ੍ਠਾਨਾਦੀਨਂ ਕਥਨਂ. ਏਵਞ੍ਹਿ ਆਪਤ੍ਤਿਵਿਸੇਸੋ ਪਞ੍ਞਾਯਤਿ ਆਪਤ੍ਤਿ-ਸਦ੍ਦਸ੍ਸ ਸਬ੍ਬਾਪਤ੍ਤਿਸਾਧਾਰਣਤ੍ਤਾ, ਇਮੇਸੁ ਪਨ ਛਸੁ ਸਮੁਟ੍ਠਾਨੇਸੁ ਪੁਰਿਮਾਨਿ ਤੀਣਿ ਅਚਿਤ੍ਤਕਾਨਿ, ਪਚ੍ਛਿਮਾਨਿ ਸਚਿਤ੍ਤਕਾਨਿ. ਸਮਾਸਤੋ ਤਂ ਇਮਂ ਪਕਿਣ੍ਣਕਂ ਵਿਦਿਤ੍ਵਾ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਛ ਸਮੁਟ੍ਠਾਨਾਨਿ ਏਤਸ੍ਸਾਤਿ ਛਸਮੁਟ੍ਠਾਨਂ. ਏਵਂ ਸੇਸੇਸੁਪਿ.

ਅਤ੍ਥਿ ਕਥਿਨਸਮੁਟ੍ਠਾਨਨ੍ਤਿਆਦਿ ਸਮੁਟ੍ਠਾਨਸੀਸਵਸੇਨ ਦ੍ਵਿਸਮੁਟ੍ਠਾਨਏਕਸਮੁਟ੍ਠਾਨਾਨਂ ਦਸ੍ਸਨਂ. ਤੇਰਸ ਹਿ ਸਮੁਟ੍ਠਾਨਸੀਸਾਨਿ ਪਠਮਪਾਰਾਜਿਕਸਮੁਟ੍ਠਾਨਂ ਅਦਿਨ੍ਨਾਦਾਨਸਮੁਟ੍ਠਾਨਂ ਸਞ੍ਚਰਿਤ੍ਤਸਮੁਟ੍ਠਾਨਂ ਸਮਨੁਭਾਸਨਸਮੁਟ੍ਠਾਨਂ ਕਥਿਨਸਮੁਟ੍ਠਾਨਂ ਏਲ਼ਕਲੋਮਸਮੁਟ੍ਠਾਨਂ ਪਦਸੋਧਮ੍ਮਸਮੁਟ੍ਠਾਨਂ ਅਦ੍ਧਾਨਸਮੁਟ੍ਠਾਨਂ ਥੇਯ੍ਯਸਤ੍ਥਸਮੁਟ੍ਠਾਨਂ ਧਮ੍ਮਦੇਸਨਾਸਮੁਟ੍ਠਾਨਂ ਭੂਤਾਰੋਚਨਸਮੁਟ੍ਠਾਨਂ ਚੋਰੀਵੁਟ੍ਠਾਪਨਸਮੁਟ੍ਠਾਨਂ ਅਨਨੁਞ੍ਞਾਤਸਮਉਟ੍ਠਾਨਨ੍ਤਿ. ਤਤ੍ਥ ਅਤ੍ਥਿ ਛਸਮੁਟ੍ਠਾਨਨ੍ਤਿ ਇਮਿਨਾ ਸਞ੍ਚਰਿਤ੍ਤਸਮੁਟ੍ਠਾਨਂ ਵੁਤ੍ਤਂ, ਪਞ੍ਚਸਮੁਟ੍ਠਾਨਸ੍ਸ ਅਭਾਵਤੋ ¶ ‘‘ਅਤ੍ਥਿ ਪਞ੍ਚਸਮੁਟ੍ਠਾਨ’’ਨ੍ਤਿ ਅਵਤ੍ਵਾ ‘‘ਅਤ੍ਥਿ ਚਤੁਸਮੁਟ੍ਠਾਨ’’ਨ੍ਤਿ ਵੁਤ੍ਤਂ, ਇਮਿਨਾ ਚ ਅਦ੍ਧਾਨਸਮੁਟ੍ਠਾਨਂ ਅਨਨੁਞ੍ਞਾਤਸਮੁਟ੍ਠਾਨਞ੍ਚ ਸਙ੍ਗਹਿਤਂ. ਯਞ੍ਹਿ ਪਠਮਤਤਿਯਚਤੁਤ੍ਥਛਟ੍ਠੇਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ ¶ , ਇਦਂ ਅਦ੍ਧਾਨਸਮੁਟ੍ਠਾਨਂ. ਯਂ ਪਨ ਦੁਤਿਯਤਤਿਯਪਞ੍ਚਮਛਟ੍ਠੇਹਿ ਸਮੁਟ੍ਠਾਤਿ, ਇਦਂ ਅਨਨੁਞ੍ਞਾਤਸਮੁਟ੍ਠਾਨਂ. ਅਤ੍ਥਿ ਤਿਸਮੁਟ੍ਠਾਨਨ੍ਤਿ ਇਮਿਨਾ ਅਦਿਨ੍ਨਾਦਾਨਸਮੁਟ੍ਠਾਨਂ ਭੂਤਾਰੋਚਨਸਮੁਟ੍ਠਾਨਞ੍ਚ ਸਙ੍ਗਹਿਤਂ. ਯਞ੍ਹਿ ਸਚਿਤ੍ਤਕੇਹਿ ਤੀਹਿ ਸਮੁਟ੍ਠਾਤਿ, ਇਦਂ ਅਦਿਨ੍ਨਾਦਾਨਸਮੁਟ੍ਠਾਨਂ. ਯਂ ਪਨ ਅਚਿਤ੍ਤਕੇਹਿ ਤੀਹਿ ਸਮੁਟ੍ਠਾਤਿ, ਇਦਂ ਭੂਤਾਰੋਚਨਸਮੁਟ੍ਠਾਨਂ. ਅਤ੍ਥਿ ਕਥਿਨਸਮੁਟ੍ਠਾਨਨ੍ਤਿਆਦਿਨਾ ਪਨ ਅਵਸੇਸਸਮਉਟ੍ਠਾਨਸੀਸਵਸੇਨ ਦ੍ਵਿਸਮੁਟ੍ਠਾਨਂ ਏਕਸਮੁਟ੍ਠਾਨਞ੍ਚ ਸਙ੍ਗਣ੍ਹਾਤਿ. ਤਤ੍ਥ ਹਿ ਯਂ ਤਤਿਯਛਟ੍ਠੇਹਿ ਸਮੁਟ੍ਠਾਤਿ, ਇਦਂ ਕਥਿਨਸਮੁਟ੍ਠਾਨਂ ਨਾਮ. ਯਂ ਪਨ ਪਠਮਚਤੁਤ੍ਥੇਹਿ ਸਮੁਟ੍ਠਾਤਿ, ਇਦਂ ਏਲ਼ਕਲੋਮਸਮੁਟ੍ਠਾਨਂ. ਯਂ ਛਟ੍ਠੇਨੇਵ ਸਮੁਟ੍ਠਾਤਿ, ਇਦਂ ਧੁਰਨਿਕ੍ਖੇਪਸਮੁਟ੍ਠਾਨਂ, ‘‘ਸਮਨੁਭਾਸਨਸਮਉਟ੍ਠਾਨ’’ਨ੍ਤਿਪਿ ਤਸ੍ਸੇਵ ਨਾਮਂ. ਇਤਿ ਸਰੂਪੇਨ ਅਟ੍ਠ ਆਪਤ੍ਤਿਸੀਸਾਨਿ ਦਸ੍ਸਿਤਾਨਿ. ਆਦਿਸਦ੍ਦੇਨ ਪਨੇਤ੍ਥ ਅਵਸੇਸਾਨਿ ਪਠਮਪਾਰਾਜਿਕਸਮੁਟ੍ਠਾਨਪਦਸੋਧਮ੍ਮਥੇਯ੍ਯਸਤ੍ਥਧਮ੍ਮਦੇਸਨਾਚੋਰੀਵੁਟ੍ਠਾਪਨਸਮੁਟ੍ਠਾਨਾਨਿ ਪਞ੍ਚਪਿ ਸਮੁਟ੍ਠਾਨਸੀਸਾਨਿ ਸਙ੍ਗਹਿਤਾਨਿ. ਤਤ੍ਥ ਯਂ ਕਾਯਚਿਤ੍ਤਤੋ ਸਮੁਟ੍ਠਾਤਿ, ਇਦਂ ਪਠਮਪਾਰਾਜਿਕਸਮੁਟ੍ਠਾਨਂ. ਯਂ ਦੁਤਿਯਪਞ੍ਚਮੇਹਿ ਸਮੁਟ੍ਠਾਤਿ, ਇਦਂ ਪਦਸੋਧਮ੍ਮਸਮੁਟ੍ਠਾਨਂ. ਯਂ ਚਤੁਤ੍ਥਛਟ੍ਠੇਹਿ ਸਮੁਟ੍ਠਾਤਿ, ਇਦਂ ਥੇਯ੍ਯਸਤ੍ਥਸਮੁਟ੍ਠਾਨਂ. ਯਂ ਪਞ੍ਚਮੇਨੇਵ ਸਮੁਟ੍ਠਾਤਿ, ਇਦਂ ਧਮ੍ਮਦੇਸਨਾਸਮਉਟ੍ਠਾਨਂ. ਯਂ ਪਞ੍ਚਮਛਟ੍ਠੇਹਿ ਸਮੁਟ੍ਠਾਤਿ, ਇਦਂ ਚੋਰੀਵੁਟ੍ਠਾਪਨਸਮੁਟ੍ਠਾਨਂ. ਏਤ੍ਥ ਚ ਪਚ੍ਛਿਮੇਸੁ ਤੀਸੁ ਸਚਿਤ੍ਤਕਸਮੁਟ੍ਠਾਨੇਸੁ ਏਕੇਕਸਮੁਟ੍ਠਾਨਵਸੇਨ ਏਕਸਮੁਟ੍ਠਾਨਾਨਿ ਤਿਵਿਧਾਨਿ. ਦ੍ਵਿਸਮੁਟ੍ਠਾਨਾਨਿ ਪਨ ਪਠਮਚਤੁਤ੍ਥੇਹਿ ਵਾ ਦੁਤਿਯਪਞ੍ਚਮੇਹਿ ਵਾ ਤਤਿਯਛਟ੍ਠੇਹਿ ਵਾ ਚਤੁਤ੍ਥਛਟ੍ਠੇਹਿ ਵਾ ਪਞ੍ਚਮਛਟ੍ਠੇਹਿ ਵਾ ਸਮੁਟ੍ਠਾਨਵਸੇਨ ਪਞ੍ਚਵਿਧਾਨੀਤਿ ਵੇਦਿਤਬ੍ਬਾਨਿ.

ਏਵਂ ਸਮੁਟ੍ਠਾਨਵਸੇਨ ਸਬ੍ਬਸਿਕ੍ਖਾਪਦਾਨਿ ਤੇਰਸਧਾ ਦਸ੍ਸੇਤ੍ਵਾ ਇਦਾਨਿ ਕਿਰਿਯਾਵਸੇਨ ਪਞ੍ਚਧਾ ਦਸ੍ਸੇਤੁਂ ਤਤ੍ਰਾਪੀਤਿਆਦਿ ਵੁਤ੍ਤਂ. ਕਿਞ੍ਚੀਤਿ ਸਿਕ੍ਖਾਪਦਂ. ਕਿਰਿਯਤੋਤਿ ਪਥਵੀਖਣਨਾਦਿ (ਪਾਚਿ. ੮੪-੮੫) ਵਿਯ ਕਾਯਵਚੀਵਿਞ੍ਞਤ੍ਤਿਜਨਿਤਕਮ੍ਮਤੋ. ਅਕਿਰਿਯਤੋਤਿ ਪਠਮਕਥਿਨਾਦਿ (ਪਾਰਾ. ੪੫੯ ਆਦਯੋ) ਵਿਯ ਕਤ੍ਤਬ੍ਬਸ੍ਸ ਅਕਰਣੇਨੇਵ. ਕਿਰਿਯਾਕਿਰਿਯਤੋਤਿ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਹਤ੍ਥਤੋ ਚੀਵਰਪਟਿਗ੍ਗਹਣਾਦਿ (ਪਾਰਾ. ੫੦੮ ਆਦਯੋ) ਵਿਯ. ਸਿਯਾ ਕਿਰਿਯਤੋ, ਸਿਯਾ ਅਕਿਰਿਯਤੋ ਰੂਪਿਯਪਟਿਗ੍ਗਹਣਾਦਿ (ਪਾਰਾ. ੫੮੨ ਆਦਯੋ) ਵਿਯ, ਸਿਯਾ ਕਿਰਿਯਤੋ, ਸਿਯਾ ਕਿਰਿਯਾਕਿਰਿਯਤੋ ਕੁਟਿਕਾਰਾਦਿ (ਪਾਰਾ. ੩੪੨) ਵਿਯ. ਵੀਤਿਕ੍ਕਮਸਞ੍ਞਾਯ ਅਭਾਵੇਨ ਵਿਮੋਕ੍ਖੋ ਅਸ੍ਸਾਤਿ ਸਞ੍ਞਾਵਿਮੋਕ੍ਖਨ੍ਤਿ ਮਜ੍ਝੇਪਦਲੋਪੀਸਮਾਸੋ ਦਟ੍ਠਬ੍ਬੋ. ਚਿਤ੍ਤਙ੍ਗਂ ਲਭਤਿ ਸਚਿਤ੍ਤਕਸਮੁਟ੍ਠਾਨੇਹੇਵ ¶ ਸਮੁਟ੍ਠਹਨਤੋ. ਇਤਰਨ੍ਤਿ ਯਸ੍ਸ ਚਿਤ੍ਤਙ੍ਗਨਿਯਮੋ ਨਤ੍ਥਿ, ਤਂ, ਅਨਾਪਤ੍ਤਿਮੁਖੇਨ ਚੇਤਂ ਸਞ੍ਞਾਦੁਕਂ ਵੁਤ੍ਤਂ, ਆਪਤ੍ਤਿਮੁਖੇਨ ਸਚਿਤ੍ਤਕਦੁਕਨ੍ਤਿ ਏਤ੍ਤਕਮੇਵ ਵਿਸੇਸੋ, ਅਤ੍ਥਤੋ ਸਮਾਨਾਵ.

ਕਾਯਵਚੀਦ੍ਵਾਰੇਹਿ ¶ ਆਪਜ੍ਜਿਤਬ੍ਬਮ੍ਪਿ ਕਾਯਕਮ੍ਮੇ ਵਾ ਵਚੀਕਮ੍ਮੇ ਵਾ ਸਙ੍ਗਯ੍ਹਤਿ. ਤਤ੍ਥ ਬਾਹੁਲ੍ਲਵੁਤ੍ਤਿਤੋ ਅਦਿਨ੍ਨਾਦਾਨਮੁਸਾਵਾਦਾਦਯੋ ਵਿਯਾਤਿ ਅਤ੍ਥਿ ਸਿਕ੍ਖਾਪਦਂ ਕਾਯਕਮ੍ਮਨ੍ਤਿਆਦਿਨਾ ਕਾਯਕਮ੍ਮਂ ਵਚੀਕਮ੍ਮਞ੍ਚਾਤਿ ਦੁਕਮੇਵ ਵੁਤ੍ਤਂ, ਵਿਭਾਗਤੋ ਪਨ ਕਾਯਵਚੀਕਮ੍ਮੇਨ ਸਦ੍ਧਿਂ ਤਿਕਮੇਵ ਹੋਤਿ. ਤੇਨੇਵ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਵੁਤ੍ਤਂ ‘‘ਸਬ੍ਬਾ ਚ ਕਾਯਕਮ੍ਮਵਚੀਕਮ੍ਮਤਦੁਭਯਵਸੇਨ ਤਿਵਿਧਾ ਹੋਨ੍ਤੀ’’ਤਿ. ਤਤੋਯੇਵ ਇਧਾਪਿ ਅਦਿਨ੍ਨਾਦਾਨਾਦੀਸੁ (ਪਾਰਾ. ੮੯) ਕਾਯਕਮ੍ਮਵਚੀਕਮ੍ਮਨ੍ਤਿ ਤਦੁਭਯਵਸੇਨ ਦਸ੍ਸਿਤਂ. ਅਤ੍ਥਿ ਪਨ ਸਿਕ੍ਖਾਪਦਂ ਕੁਸਲਨ੍ਤਿਆਦਿ ਆਪਤ੍ਤਿਸਮੁਟ੍ਠਾਪਕਚਿਤ੍ਤਵਸੇਨ ਕਾਰਿਯੇ ਕਾਰਣੋਪਚਾਰੇਨ ਵੁਤ੍ਤਂ, ਨ ਪਨ ਆਪਤ੍ਤਿਯਾ ਕੁਸਲਾਦਿਪਰਮਤ੍ਥਧਮ੍ਮਤਾਵਸੇਨ ਆਪਤ੍ਤਿਯਾ ਸਮ੍ਮੁਤਿਸਭਾਵਤ੍ਤਾ. ਕੁਸਲਾਕੁਸਲਾਦਿਪਰਮਤ੍ਥਧਮ੍ਮੇ ਉਪਾਦਾਯ ਹਿ ਭਗਵਤਾ ਆਪਤ੍ਤਿਸਮ੍ਮੁਤਿ ਪਞ੍ਞਤ੍ਤਾ. ਵਕ੍ਖਤਿ ਹਿ ‘‘ਯਂ ਕੁਸਲਚਿਤ੍ਤੇਨ ਆਪਜ੍ਜਤਿ, ਤਂ ਕੁਸਲ’’ਨ੍ਤਿਆਦਿ (ਪਾਰਾ. ਅਟ੍ਠ. ੧.੬੬ ਪਕਣ੍ਣਕਕਥਾ). ਨ ਹਿ ਭਗਵਤੋ ਆਣਾਯਤ੍ਤਾ ਆਪਤ੍ਤਿ ਕੁਸਲਾਦਿਪਰਮਤ੍ਥਸਭਾਵਾ ਹੋਤਿ ਅਨੁਪਸਮ੍ਪਨ੍ਨਾਨਂ ਆਦਿਕਮ੍ਮਿਕਾਨਞ੍ਚ ਆਪਤ੍ਤਿਪ੍ਪਸਙ੍ਗਤੋ, ਤਸ੍ਸਾ ਦੇਸਨਾਦੀਹਿ ਵਿਸੁਦ੍ਧਿਅਭਾਵਪ੍ਪਸਙ੍ਗਤੋ ਚ. ਨ ਹਿ ਕਾਰਣਬਲੇਨ ਉਪ੍ਪਜ੍ਜਮਾਨਾ ਕੁਸਲਾਦਿਸਭਾਵਾ ਆਪਤ੍ਤਿ ਅਨੁਪਸਮ੍ਪਨ੍ਨਾਦੀਸੁ ਨਿਵਤ੍ਤਤਿ, ਉਪ੍ਪਨ੍ਨਾਯ ਚ ਤਸ੍ਸਾ ਕੇਨਚਿ ਵਿਨਾਸੋ ਨ ਸਮ੍ਭਵਤਿ. ਸਰਸਵਿਨਾਸਤੋ ਦੇਸਨਾਦਿਨਾ ਚ ਆਪਤ੍ਤਿ ਵਿਗਚ੍ਛਤੀਤਿ ਵਚਨਮਤ੍ਥਿ, ਨ ਪਨ ਤੇਨ ਅਕੁਸਲਾਦਿ ਵਿਗਚ੍ਛਤਿ. ਪਿਤੁਘਾਤਾਦਿਕਮ੍ਮੇਨ ਹਿ ਪਾਰਾਜਿਕਂ ਆਪਨ੍ਨਸ੍ਸ ਭਿਕ੍ਖੁਨੋ ਗਿਹਿਲਿਙ੍ਗਂ ਗਹੇਤ੍ਵਾ ਭਿਕ੍ਖੁਭਾਵਪਰਿਚ੍ਚਾਗੇਨ ਪਾਰਾਜਿਕਾਪਤ੍ਤਿ ਵਿਗਚ੍ਛਤਿ, ਨ ਪਾਣਾਤਿਪਾਤਾਦਿਅਕੁਸਲਂ ਆਨਨ੍ਤਰਿਯਾਦਿਭਾਵਤੋ. ਤਸ੍ਮਾ ਦੁਮ੍ਮਙ੍ਕੂਨਂ ਨਿਗ੍ਗਹਾਦਿਦਸਅਤ੍ਥਵਸੇ (ਪਾਰਾ. ੩੯; ਪਰਿ. ੨) ਪਟਿਚ੍ਚ ਭਗਵਤਾ ਯਥਾਪਚ੍ਚਯਂ ਸਮੁਪ੍ਪਜ੍ਜਮਾਨੇ ਕੁਸਲਾਕੁਸਲਾਦਿਨਾਮਰੂਪਧਮ੍ਮੇ ਉਪਾਦਾਯ ਪਞ੍ਞਤ੍ਤਾ ਸਮ੍ਮੁਤਿਯੇਵ ਆਪਤ੍ਤਿ, ਸਾ ਚ ਯਥਾਵਿਧਿਪਟਿਕਮ੍ਮਕਰਣੇਨ ਵਿਗਤਾ ਨਾਮ ਹੋਤੀਤਿ ਵੇਦਿਤਬ੍ਬਂ, ਤੇਨਾਹ ਦ੍ਵਤ੍ਤਿਂਸੇਵ ਹਿ ਆਪਤ੍ਤਿਸਮੁਟ੍ਠਾਪਕਚਿਤ੍ਤਾਨੀਤਿਆਦਿ. ਆਪਤ੍ਤਿਸਮੁਟ੍ਠਾਪਕਤ੍ਤੇਨੇਵ ਹੇਤ੍ਥ ਕੁਸਲਾਦੀਨਂ ਆਪਤ੍ਤਿਤੋ ਭੇਦੋ ਸਿਦ੍ਧੋ. ਨ ¶ ਹਿ ਤਂਸਮੁਟ੍ਠਿਤਸ੍ਸ ਤਤੋ ਅਭੇਦੋ ਯੁਤ੍ਤੋ ਸਮੁਟ੍ਠਾਨਸਮੁਟ੍ਠਿਤਭੇਦਬ੍ਯਵਹਾਰੁਪਚ੍ਛੇਦਪ੍ਪਸਙ੍ਗਤੋ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੨.੬੬ ਪਕਿਣ੍ਣਕਕਥਾਵਣ੍ਣਨਾ) ਪਨ ਆਪਤ੍ਤਿਯਾ ਪਰਮਤ੍ਥਤੋ ਕੁਸਲਤ੍ਤਮੇਵ ਨ ਸਮ੍ਭਵਤਿ ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ, ਸਿਯਾ ਅਬ੍ਯਾਕਤਂ, ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਵਚਨਤੋ, ‘‘ਅਕੁਸਲਤ੍ਤਂ ਪਨ ਅਬ੍ਯਾਕਤਤ੍ਤਞ੍ਚ ਆਪਤ੍ਤਿਯਾ ਸਮ੍ਭਵਤੀ’’ਤਿ ਸਞ੍ਞਾਯ ਕੁਸਲਚਿਤ੍ਤਸਮੁਟ੍ਠਾਨਕ੍ਖਣੇਪਿ ਰੂਪਾਬ੍ਯਾਕਤਤ੍ਤਂ ਆਪਤ੍ਤਿਯਾ ਸਮਤ੍ਥੇਤੁਂ ਯਂ ਕੁਸਲਚਿਤ੍ਤੇਨ ਆਪਜ੍ਜਤਿ, ਤਂ ਕੁਸਲਂ, ਇਤਰੇਹਿ ਇਤਰਨ੍ਤਿ (ਪਾਰਾ. ਅਟ੍ਠ. ੧.੬੬ ਪਕਿਣ੍ਣਕਕਥਾ) ਇਮਂ ਅਟ੍ਠਕਥਾਵਚਨਂ ਨਿਸ੍ਸਾਯ ਵੁਤ੍ਤਂ ‘‘ਯਂ ਕੁਸਲਚਿਤ੍ਤੇਨ ਆਪਜ੍ਜਤੀਤਿ ਯਂ ਸਿਕ੍ਖਾਪਦਸੀਸੇ ਗਹਿਤਂ ਆਪਤ੍ਤਿਂ ਕੁਸਲਚਿਤ੍ਤਸਮਙ੍ਗੀ ਆਪਜ੍ਜਤਿ, ਇਮਿਨਾ ਪਨ ਵਚਨੇਨ ਤਂ ਕੁਸਲਨ੍ਤਿ ਆਪਤ੍ਤਿਯਾ ਵੁਚ੍ਚਮਾਨੋ ਕੁਸਲਭਾਵੋ ਪਰਿਯਾਯਤੋ, ਨ ਪਰਮਤ੍ਥਤੋਤਿ ਦਸ੍ਸੇਤਿ. ਕੁਸਲਚਿਤ੍ਤੇਨ ਹਿ ਆਪਤ੍ਤਿਂ ਆਪਜ੍ਜਨ੍ਤੋ ਸਵਿਞ੍ਞਤ੍ਤਿਕਂ ¶ ਅਵਿਞ੍ਞਤ੍ਤਿਕਂ ਵਾ ਸਿਕ੍ਖਾਪਦਵੀਤਿਕ੍ਕਮਾਕਾਰਪ੍ਪਵਤ੍ਤਂ ਰੂਪਕ੍ਖਨ੍ਧਸਙ੍ਖਾਤਂ ਅਬ੍ਯਾਕਤਾਪਤ੍ਤਿਂ ਆਪਜ੍ਜਤੀ’’ਤਿ. ਤਤ੍ਥ ਯਂ ਕੁਸਲਚਿਤ੍ਤੇਨ ਆਪਜ੍ਜਤੀਤਿ ਇਮਂ ਵਚਨਂ ਉਦ੍ਦਿਸ੍ਸ ‘‘ਇਮਿਨਾ ਪਨ ਵਚਨੇਨ ਤਂ ਕੁਸਲਨ੍ਤਿ ਆਪਤ੍ਤਿਯਾ ਵੁਚ੍ਚਮਾਨੋ ਕੁਸਲਭਾਵੋ ਪਰਿਯਾਯਤੋ, ਨ ਪਰਮਤ੍ਥਤੋਤਿ ਦਸ੍ਸੇਤੀ’’ਤਿ ਵੁਤ੍ਤਂ, ਏਵਂ ਇਤਰੇਹਿ ਇਤਰਨ੍ਤਿ ਵਚਨੇਨ ‘‘ਯਂ ਅਕੁਸਲਚਿਤ੍ਤੇਨ ਆਪਜ੍ਜਹਿ, ਤਂ ਅਕੁਸਲਂ, ਯਂ ਅਬ੍ਯਾਕਤਚਿਤ੍ਤੇਨ ਆਪਜ੍ਜਤਿ, ਤਂ ਅਬ੍ਯਾਕਤ’’ਨ੍ਤਿ ਇਮਸ੍ਸ ਅਤ੍ਥਸ੍ਸ ਵੁਤ੍ਤਤ੍ਤਾ ਇਤਰੇਹੀਤਿ ਵਚਨਂ ਉਦ੍ਦਿਸ੍ਸ ‘‘ਇਮਿਨਾਪਿ ਵਚਨੇਨ ਇਤਰਨ੍ਤਿ ਆਪਤ੍ਤਿਯਾ ਵੁਚ੍ਚਮਾਨੋ ਅਕੁਸਲਭਾਵੋ ਅਬ੍ਯਾਕਤਭਾਵੋ ਚ ਪਰਿਯਾਯਤੋ ਦਸ੍ਸੇਤੀ’’ਤਿ ਵਤ੍ਤਬ੍ਬਂ. ਏਵਂ ਅਵਤ੍ਵਾ ਕੁਸਲਪਕ੍ਖੇ ਏਵ ਕਥਨਸ੍ਸ ਕਾਰਣਂ ਨ ਪਸ੍ਸਾਮ. ਯਂ ਪਨ ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਨ੍ਤਿਆਦਿਵਚਨਂ ਕਾਰਣਤ੍ਤੇਨ ਵੁਤ੍ਤਂ, ਤਮ੍ਪਿ ਅਕਾਰਣਂ ਯਂ ਅਕੁਸਲਚਿਤ੍ਤੇਨ ਆਪਜ੍ਜਤਿ, ਤਂ ਅਕੁਸਲਨ੍ਤਿਆਦਿਨਾ ਹੇਟ੍ਠਾ ਵੁਤ੍ਤਨਯੇਨ ਅਕੁਸਲਾਦਿਭਾਵਸ੍ਸ ਪਰਿਯਾਯਦੇਸਿਤਤ੍ਤਾ, ਆਪਤ੍ਤਿਯਾ ਕੁਸਲਵੋਹਾਰਸ੍ਸ ਅਯੁਤ੍ਤਤਾਯ ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲਨ੍ਤਿ ਵੁਤ੍ਤਤ੍ਤਾ ਚ. ਆਪਤ੍ਤਿਯਾ ਹਿ ਕੁਸਲਚਿਤ੍ਤਸਮੁਟ੍ਠਿਤਤ੍ਤੇਪਿ ਭਗਵਤਾ ਪਟਿਕ੍ਖਿਤ੍ਤਭਾਵੇਨ ਸਾਵਜ੍ਜਧਮ੍ਮਤ੍ਤਾ ਕਾਰਣੂਪਚਾਰੇਨਾਪਿ ਅਨਵਜ੍ਜਕੁਸਲਵੋਹਾਰੋ ਨ ਯੁਤ੍ਤੋ ਸਾਵਜ੍ਜਾਨਵਜ੍ਜਾਨਂ ਅਞ੍ਞਮਞ੍ਞਵਿਰੁਦ੍ਧਤ੍ਤਾ. ਯਥਾ ਆਕਾਸਾਦਿਸਮ੍ਮੁਤਿਸਚ੍ਚਾਨਂ ਉਪ੍ਪਨ੍ਨਤਾਦਿਵੋਹਾਰੋ ਵਿਯ ਜਾਤਿਜਰਾਭਙ੍ਗਾਨਂ ਉਪ੍ਪਨ੍ਨਤਾਦਿਵੋਹਾਰੋ ਅਨਵਟ੍ਠਾਨਾਦਿਦੇਸਤੋ ਅਯੁਤ੍ਤੋ, ਏਵਮਿਧਾਪਿ ਕੁਸਲਵੋਹਾਰੋ ਅਯੁਤ੍ਤੋ ਵਿਰੁਦ੍ਧਤ੍ਤਾ. ਅਕੁਸਲਾਦਿਵੋਹਾਰੋ ਪਨ ਯੁਤ੍ਤੋ ¶ , ਕਾਰਣੂਪਚਾਰੇਨ ਪਨ ਅਕੁਸਲਾਦਿਸਭਾਵਤਾ ਯਥਾਵੁਤ੍ਤਦੋਸਾਨਤਿਵਤ੍ਤਨਤੋ. ਸੁਤ੍ਤਸ੍ਸਾਪਿ ਹਿ ਯਥਾ ਸੁਤ੍ਤਸੁਤ੍ਤਾਨੁਲੋਮਾਦੀਹਿ ਵਿਰੋਧੋ ਨ ਹੋਤਿ, ਤਥੇਵ ਅਤ੍ਥੋ ਗਹੇਤਬ੍ਬੋ.

ਯਂ ਪਨ ਵੁਤ੍ਤਂ ‘‘ਕੁਸਲਚਿਤ੍ਤੇਨ ਹਿ ਆਪਤ੍ਤਿਂ ਆਪਜ੍ਜਨ੍ਤੋ…ਪੇ… ਰੂਪਕ੍ਖਨ੍ਧਸਙ੍ਖਾਤਂ ਅਬ੍ਯਾਕਤਾਪਤ੍ਤਿਂ ਆਪਜ੍ਜਤੀ’’ਤਿ, ਤਂ ਅਯੁਤ੍ਤਮੇਵ ਰੂਪਕ੍ਖਨ੍ਧਸ੍ਸ ਖਣਿਕਤਾਯ ਆਪਤ੍ਤਿਯਾਪਿ ਦੇਸਨਾਦਿਪਟਿਕਮ੍ਮਂ ਵਿਨਾਵ ਪਟਿਪਸ੍ਸਦ੍ਧਿਪ੍ਪਸਙ੍ਗਤੋ. ਰੂਪਪਰਮ੍ਪਰਾ ਆਪਤ੍ਤੀਤਿ ਚੇ? ਤਨ੍ਨ, ਪਟਿਕਮ੍ਮੇਨਾਪਿ ਅਵਿਗਮਪ੍ਪਸਙ੍ਗਤੋ. ਨ ਹਿ ਰੂਪਸਨ੍ਤਤਿਦੇਸਨਾਦੀਹਿ ਵਿਗਚ੍ਛਤਿ ਸਕਾਰਣਾਯਤ੍ਤਤ੍ਤਾ, ਇਤਿ ਸਬ੍ਬਥਾ ਆਪਤ੍ਤਿਯਾ ਪਰਮਤ੍ਥਤਾ ਅਯੁਤ੍ਤਾ, ਏਤੇਨੇਵ ਯਂ ਵੁਤ੍ਤਂ ‘‘ਨਿਪਜ੍ਜਿਤ੍ਵਾ ਨਿਰੋਧਸਮਾਪਨ੍ਨਸ੍ਸ ਸਹਸੇਯ੍ਯਵਸੇਨ ਤਥਾਕਾਰਪ੍ਪਵਤ੍ਤਰੂਪਧਮ੍ਮਸ੍ਸੇਵ ਆਪਤ੍ਤਿਭਾਵਤੋ’’ਤਿਆਦਿ, ਤਮ੍ਪਿ ਪਟਿਸਿਦ੍ਧਨ੍ਤਿ ਵੇਦਿਤਬ੍ਬਂ. ਇਧ ਪਨ ਨਿਰੋਧਸਮਾਪਨ੍ਨਾਨਂ ਰੂਪਧਮ੍ਮਮੇਵ ਪਟਿਚ੍ਚ ਉਪ੍ਪਨ੍ਨਤ੍ਤਾ ਆਪਤ੍ਤਿ ਅਚਿਤ੍ਤਾ ਅਵੇਦਨਾ, ਅਞ੍ਞਤ੍ਥ ਪਨ ਸਚਿਤ੍ਤਾ ਸਵੇਦਨਾਵ, ਸਬ੍ਬਤ੍ਥਾਪਿ ਪਞ੍ਞਤ੍ਤਿਸਭਾਵਾਤਿ ਵੇਦਿਤਬ੍ਬਾ. ਤੇਨੇਵ ਦੁਟ੍ਠਦੋਸਸਿਕ੍ਖਾਪਦਟ੍ਠਕਥਾਯਂ ਆਪਤ੍ਤਿਯਾ ਅਕੁਸਲਾਦਿਸਭਾਵਂ ਪਰਪਰਿਕਪ੍ਪਿਤਂ ਨਿਸੇਧੇਤੁਂ ‘‘ਆਦਿਕਮ੍ਮਿਕਸ੍ਸ ਅਨਾਪਤ੍ਤਿਵਚਨਤੋ…ਪੇ… ਪਣ੍ਣਤ੍ਤਿਮਤ੍ਤਮੇਵ ਆਪਤ੍ਤਾਧਿਕਰਣਨ੍ਤਿ ਵੇਦਿਤਬ੍ਬ’’ਨ੍ਤਿ ਸਯਮੇਵ ਵਕ੍ਖਤਿ, ਤਸ੍ਮਾ ‘‘ਤਂਤਂਕੁਸਲਾਦਿਧਮ੍ਮਸਮੁਪ੍ਪਤ੍ਤਿਯਾ ਭਗਵਤਾ ਪਞ੍ਞਤ੍ਤਾ ਆਪਤ੍ਤਿਸਮ੍ਮੁਤਿ ਸਮੁਟ੍ਠਿਤਾ’’ਤਿ ਚ, ‘‘ਯਾਵ ਪਟਿਪ੍ਪਸ੍ਸਦ੍ਧਿਕਾਰਣਾ ਤਿਟ੍ਠਤੀ’’ਤਿ ਚ, ‘‘ਪਟਿਪ੍ਪਸ੍ਸਦ੍ਧਿਕਾਰਣੇਹਿ ¶ ਵਿਨਸ੍ਸਤੀ’’ਤਿ ਚ ਵੋਹਰੀਯਤਿ. ਆਪਤ੍ਤਿਯਾ ਚ ਸਮ੍ਮੁਤਿਸਭਾਵਤ੍ਤੇਪਿ ਹਿ ਸਞ੍ਚਿਚ੍ਚ ਤਂ ਆਪਜ੍ਜਨ੍ਤਸ੍ਸ, ਪਟਿਕਿਰਿਯਂ ਅਕਰੋਨ੍ਤਸ੍ਸ ਚ ਅਨਾਦਰੇ ਅਕੁਸਲਰਾਸਿ ਚੇਵ ਸਗ੍ਗਮਗ੍ਗਨ੍ਤਰਾਯੋ ਚ ਹੋਤੀਤਿ ਲਜ੍ਜਿਨੋ ਯਥਾਵਿਧਿਂ ਨਾਤਿਕ੍ਕਮਨ੍ਤਿ, ਅਨਤਿਕ੍ਕਮਨਪ੍ਪਚ੍ਚਯਾ ਚ ਤੇਸਂ ਅਨਨ੍ਤਪ੍ਪਭੇਦਾ ਸੀਲਾਦਯੋ ਧਮ੍ਮਾ ਪਰਿਵਡ੍ਢਨ੍ਤੀਤਿ ਗਹੇਤਬ੍ਬਂ. ਦ੍ਵਤ੍ਤਿਂਸੇਵਾਤਿ ਨਿਯਮੋ ਆਪਤ੍ਤਿਨਿਮਿਤ੍ਤਾਨਂ ਕਾਯਵਚੀਵਿਞ੍ਞਤ੍ਤੀਨਂ ਏਤੇਹੇਵ ਸਮੁਪ੍ਪਜ੍ਜਨਤੋ ਕਤੋ, ਨ ਪਨ ਸਬ੍ਬਾਪਤ੍ਤੀਨਮ੍ਪਿ ਏਤੇਹੇਵ ਸਮੁਪ੍ਪਜ੍ਜਨਤੋ. ਨਿਪਜ੍ਜਿਤ੍ਵਾ ਨਿਦ੍ਦਾਯਨ੍ਤਾਨਞ੍ਹਿ ਝਾਨਨਿਰੋਧਸਮਾਪਨ੍ਨਾਨਞ੍ਚ ਅਵਿਞ੍ਞਤ੍ਤਿਜਨਕੇਹਿ ਵਿਪਾਕਅਪ੍ਪਨਾਚਿਤ੍ਤੇਹਿ ਚੇਵ ਰੂਪਧਮ੍ਮੇਹਿ ਚ ਸਹਸੇਯ੍ਯਾਦਿਆਪਤ੍ਤਿ ਸਮ੍ਭਵਤਿ.

ਦਸਾਤਿ ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁਦ੍ਵਯੇਨ ਸਹ ਅਟ੍ਠ ਮਹਾਕਿਰਿਯਚਿਤ੍ਤਾਨਿ. ਪਞ੍ਞਤ੍ਤਿਂ ਅਜਾਨਿਤ੍ਵਾ ਇਦ੍ਧਿਵਿਕੁਬ੍ਬਨਾਦੀਸੁ ਅਭਿਞ੍ਞਾਨਂ ਆਪਤ੍ਤਿਸਮੁਟ੍ਠਾਪਕਤ੍ਤਂ ਵੇਦਿਤਬ੍ਬਂ. ਏਤ੍ਥ ਚ ਕਿਞ੍ਚਿ ਸਿਕ੍ਖਾਪਦਂ ਅਕੁਸਲਚਿਤ੍ਤਮੇਵ, ਕਿਞ੍ਚਿ ¶ ਕੁਸਲਾਬ੍ਯਾਕਤਵਸੇਨ ਦ੍ਵਿਚਿਤ੍ਤਂ, ਕਿਞ੍ਚਿ ਤਿਚਿਤ੍ਤਨ੍ਤਿ ਅਯਮੇਵ ਭੇਦੋ ਲਬ੍ਭਤਿ, ਨਾਞ੍ਞੋਤਿ ਵੇਦਿਤਬ੍ਬਂ. ਕਿਰਿਯਾਸਮੁਟ੍ਠਾਨਨ੍ਤਿ ਪਰੂਪਕ੍ਕਮੇਨ ਜਾਯਮਾਨਂ ਅਙ੍ਗਜਾਤਾਦਿਚਲਨਂ ਸਾਦਿਯਨਚਿਤ੍ਤਸਙ੍ਖਾਤੇ ਸੇਵਨਚਿਤ੍ਤੇ ਉਪ੍ਪਨ੍ਨੇ ਤੇਨ ਚਿਤ੍ਤੇਨ ਸਮੁਪ੍ਪਾਦਿਤਮੇਵ ਹੋਤੀਤਿ ਵੁਤ੍ਤਂ ਇਤਰਥਾ ‘‘ਸਿਯਾ ਕਿਰਿਯਸਮੁਟ੍ਠਾਨਂ, ਸਿਯਾ ਅਕਿਰਿਯਸਮੁਟ੍ਠਾਨ’’ਨ੍ਤਿ ਵਤ੍ਤਬ੍ਬਤੋ.

ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੨.੬੬ ਪਕਿਣ੍ਣਕਕਥਾਵਣ੍ਣਨਾ) ਵੁਤ੍ਤਂ ‘‘ਕਿਰਿਯਸਮੁਟ੍ਠਾਨਨ੍ਤਿ ਇਦਂ ਯੇਭੁਯ੍ਯਵਸੇਨ ਵੁਤ੍ਤਂ ਪਰੂਪਕ੍ਕਮੇ ਸਤਿ ਸਾਦਿਯਨ੍ਤਸ੍ਸ ਅਕਿਰਿਯਸਮੁਟ੍ਠਾਨਭਾਵਤੋ’’ਤਿਆਦਿ, ਤਂ ਨ ਗਹੇਤਬ੍ਬਂ ਪਠਮਪਾਰਾਜਿਕਸ੍ਸ ਅਕਿਰਿਯਸਮੁਟ੍ਠਾਨਤਾਯ ਪਾਲ਼ਿਅਟ੍ਠਕਥਾਸੁ ਅਵੁਤ੍ਤਤ੍ਤਾ. ‘‘ਮਨੋਦ੍ਵਾਰੇ ਆਪਤ੍ਤਿ ਨਾਮ ਨਤ੍ਥੀ’’ਤਿ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ; ਪਾਰਾ. ਅਟ੍ਠ. ੨.੫੮੩-੪) ਹਿ ਵੁਤ੍ਤਂ. ਕਥਞ੍ਹਿ ਨਾਮ ਪਰੂਪਕ੍ਕਮੇਨ ਮੇਥੁਨਂ ਸਾਦਿਯਨ੍ਤੋ ਅਤ੍ਤਨੋ ਅਙ੍ਗਜਾਤਾਦਿਕਾਯਚਲਨਂ ਨ ਸਾਦਿਯੇਯ੍ਯ, ਸਾਦਿਯਨਚਿਤ੍ਤਾਨੁਗੁਣਮੇਵ ਪਨ ਸਕਲਸਰੀਰੇ ਚਿਤ੍ਤਜਰੂਪਸਮੁਪ੍ਪਤ੍ਤਿਯਾ ਵਿਞ੍ਞਤ੍ਤਿਪਿ ਸੁਖੁਮਾ ਸਮੁਪ੍ਪਨ੍ਨਾ ਏਵ ਹੋਤੀਤਿ ਦਟ੍ਠਬ੍ਬਂ, ਤੇਨਾਹ ਕਾਯਦ੍ਵਾਰੇਨੇਵ ਸਮੁਟ੍ਠਾਨਤੋ ਕਾਯਕਮ੍ਮਨ੍ਤਿਆਦਿ. ਚਿਤ੍ਤਂ ਪਨੇਤ੍ਥ ਅਙ੍ਗਮਤ੍ਤਂ ਹੋਤੀਤਿ ਕਾਯਵਿਞ੍ਞਤ੍ਤਿ ਏਵ ਕਾਯਕਮ੍ਮਭਾਵੇ ਕਾਰਣਂ, ਨ ਚਿਤ੍ਤਂ. ਤਂ ਪਨੇਤ੍ਥ ਕਾਯਸਙ੍ਖਾਤਾਯ ਵਿਞ੍ਞਤ੍ਤਿਯਾਯੇਵ ਅਙ੍ਗਮਤ੍ਤਂ, ਨ ਕਾਯਕਮ੍ਮਭਾਵਸ੍ਸ, ਇਤਰਥਾ ਮੇਥੁਨਸ੍ਸ ‘‘ਮਨੋਕਮ੍ਮ’’ਨ੍ਤਿ ਵਤ੍ਤਬ੍ਬਤੋ, ਤੇਨਾਹ ‘‘ਨ ਤਸ੍ਸ ਵਸੇਨ ਕਮ੍ਮਭਾਵੋ ਲਬ੍ਭਤੀ’’ਤਿ. ਕਮ੍ਮਭਾਵੋਤਿ ਕਾਯਕਮ੍ਮਭਾਵੋ. ਸਬ੍ਬਞ੍ਚੇਤਨ੍ਤਿ ਏਤਂ ਸਮੁਟ੍ਠਾਨਾਦਿਕਂ. ਸਿਕ੍ਖਾਪਦਸੀਸੇਨਾਤਿ ਤਂਤਂਸਿਕ੍ਖਾਪਦਨਿਯਤਆਪਤ੍ਤਿਯਾ ਏਵ ਗਹਣਤ੍ਥਂ ਸਿਕ੍ਖਾਪਦਮੁਖੇਨ.

ਪਕਿਣ੍ਣਕਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਵਿਨੀਤਵਤ੍ਥੁਵਣ੍ਣਨਾ

ਇਦਂ ¶ ਕਿਨ੍ਤਿ ਕਥੇਤੁਕਾਮਤਾਪੁਚ੍ਛਾ. ਇਮਾਤਿਆਦਿ ਵਿਸ੍ਸਜ੍ਜਨਂ. ਵਿਨੀਤਾਨਿ ਆਪਤ੍ਤਿਂ ਤ੍ਵਂ ਭਿਕ੍ਖੁ ਆਪਨ੍ਨੋਤਿਆਦਿਨਾ (ਪਾਰਾ. ੬੭) ਭਗਵਤਾ ਵਿਨਿਚ੍ਛਿਨਿਤਾਨਿ ਵਤ੍ਥੂਨਿ ਵਿਨੀਤਵਤ੍ਥੂਨਿ. ਤਂ ਤਂ ਵਤ੍ਥੁਂ ਉਦ੍ਧਰਿਤ੍ਵਾ ਦਾਨਤੋ ਦਸ੍ਸਨਤੋ ਉਦ੍ਦਾਨਭੂਤਾ ਗਾਥਾ ਉਦ੍ਦਾਨਗਾਥਾ, ਸਙ੍ਗਹਗਾਥਾ, ਉਦ੍ਦੇਸਗਾਥਾਤਿ ਵੁਤ੍ਤਂ ਹੋਤਿ. ਵਤ੍ਥੁ ਗਾਥਾਤਿ ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੂਤਿਆਦਿਕਾ ਵਿਨੀਤਵਤ੍ਥੁਪਾਲ਼ਿਯੇਵ ਤੇਸਂ ਤੇਸਂ ਵਿਨੀਤਵਤ੍ਥੂਨਂ ਗਨ੍ਥਨਤੋ ‘‘ਵਤ੍ਥੁਗਾਥਾ’’ਤਿ ਵੁਤ੍ਤਾ ¶ , ਨ ਛਨ੍ਦੋਵਿਚਿਤਿਲਕ੍ਖਣੇਨ. ਉਦ੍ਦਾਨਗਾਥਾਨਂ ਵਤ੍ਥੁ ਵਤ੍ਥੁਗਾਥਾਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਏਤ੍ਥਾਤਿ ਵਿਨੀਤਵਤ੍ਥੂਸੁ. ਦੁਤਿਯਾਦੀਨਨ੍ਤਿ ਦੁਤਿਯਪਾਰਾਜਿਕਾਦੀਨਂ. ਯਂ ਪਸ੍ਸਿਤ੍ਵਾ ਚਿਤ੍ਤਕਾਰਾਦਯੋ ਸਿਪ੍ਪਿਕਾ ਚਿਤ੍ਤਕਮ੍ਮਾਦੀਨਿ ਸਿਕ੍ਖਨ੍ਤਿ, ਤਂ ਪਟਿਚ੍ਛਨ੍ਨਕਰੂਪਂ, ਪਟਿਮਾਰੂਪਨ੍ਤਿ ਅਤ੍ਥੋ.

੬੭. ਪੁਰਿਮਾਨਿ ਦ੍ਵੇਤਿ ਮਕ੍ਕਟੀਵਜ੍ਜਿਪੁਤ੍ਤਕਵਤ੍ਥੂਨਿ ਦ੍ਵੇ. ਤਾਨਿਪਿ ਭਗਵਤਾ ਵਿਨੀਤਭਾਵੇਨ ਪੁਨ ਵਿਨੀਤਵਤ੍ਥੂਸੁ ਪਕ੍ਖਿਤ੍ਤਾਨਿ. ਤਤ੍ਥ ਤਸ੍ਸ ਕੁਕ੍ਕੁਚ੍ਚਂ ਅਹੋਸੀਤਿਆਦਿ ਪਨ ਕਿਞ੍ਚਾਪਿ ਤੇਸਂ ਪਠਮਂ ਕੁਕ੍ਕੁਚ੍ਚਂ ਨ ਉਪ੍ਪਨ੍ਨਂ, ਭਿਕ੍ਖੂਹਿ ਪਨ ਭਗਵਤਾ ਚ ਗਰਹਿਤ੍ਵਾ ਵੁਤ੍ਤਵਚਨਂ ਸਨ੍ਧਾਯ ਪਚ੍ਛਾ ਉਪ੍ਪਨ੍ਨਤ੍ਤਂ ਸਨ੍ਧਾਯ ਵੁਤ੍ਤਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਨ੍ਤਿਆਦਿ ਚ ਭਿਕ੍ਖੂਹਿ ਆਨਨ੍ਦਤ੍ਥੇਰੇਨ ਚ ਪਠਮਂ ਭਗਵਤੋ ਆਰੋਚਿਤੇ, ਭਗਵਤਾ ਚ ਤੇਸਂ ਪਾਰਾਜਿਕਤ੍ਤੇ ਪਕਾਸਿਤੇ ਭੀਤਾ ਤੇ ਸਯਮ੍ਪਿ ਗਨ੍ਤ੍ਵਾ ਅਤ੍ਤਨੋ ਕੁਕ੍ਕੁਚ੍ਚਂ ਪਚ੍ਛਾ ਆਰੋਚੇਨ੍ਤਿ ਏਵ. ‘‘ਸਚ੍ਚਂ ਕਿਰ ਤ੍ਵ’’ਨ੍ਤਿਆਦਿਨਾ ਭਗਵਤਾ ਪੁਟ੍ਠਾ ਪਨ ‘‘ਸਚ੍ਚਂ ਭਗਵਾ’’ਤਿ ਪਟਿਜਾਨਨਵਸੇਨਾਪਿ ਆਰੋਚੇਨ੍ਤਿ. ਭਗਵਾਪਿ ਆਪਤ੍ਤਿਂ ਤ੍ਵਨ੍ਤਿਆਦਿਨਾ ਤੇਸਂ ਪਾਰਾਜਿਕਤ੍ਤਂ ਵਿਨਿਚ੍ਛਿਨੋਤਿ ਏਵ. ਅਨੁਪਞ੍ਞਤ੍ਤਿਕਥਾਯਂ ਪਨ ਤਂ ਸਬ੍ਬਂ ਅਵਤ੍ਵਾ ਅਨੁਪਞ੍ਞਤ੍ਤਿਯਾ ਅਨੁਗੁਣਮੇਵ ਕਿਞ੍ਚਿਮਤ੍ਤਂ ਵੁਤ੍ਤਂ, ਇਧਾਪਿ ਤੇਸਂ ਵਤ੍ਥੂਨਂ ਭਗਵਤਾ ਵਿਨੀਤਭਾਵਦਸ੍ਸਨਤ੍ਥਂ ਏਵਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਕੇਚਿ ਇਮਂ ਅਧਿਪ੍ਪਾਯਂ ਅਮਨਸਿਕਤ੍ਵਾ ‘‘ਅਞ੍ਞਾਨੇਵੇਤਾਨਿ ਵਤ੍ਥੂਨੀ’’ਤਿ ਵਦਨ੍ਤਿ. ਕੁਸੇਤਿ ਕੁਸਤਿਣਾਨਿ. ਕੇਸੇਹੀਤਿ ਮਨੁਸ੍ਸਕੇਸੇਹਿ.

੬੮. ਵਣ੍ਣਪੋਕ੍ਖਰਤਾਯਾਤਿ ਏਤ੍ਥ ਪੋਕ੍ਖਲਂ ਨਾਮ ਸਮਿਦ੍ਧਂ ਸੁਨ੍ਦਰਞ੍ਚ, ਤਸ੍ਸ ਭਾਵੋ ‘‘ਪੋਕ੍ਖਰਤਾ’’ਤਿ ਰ-ਕਾਰਂ ਕਤ੍ਵਾ ਵੁਤ੍ਤੋ, ਸਮਿਦ੍ਧਤਾ ਸੁਨ੍ਦਰਤਾਤਿ ਅਤ੍ਥੋ. ਪਧਂਸੇਸੀਤਿ ਅਭਿਭਵਿ. ਨ ਲਿਮ੍ਪਤੀਤਿ ਨ ਅਲ੍ਲੀਯਤਿ.

੬੯. ਏਵਰੂਪਾ ਪਰਿਵਤ੍ਤਲਿਙ੍ਗਾ ਭਿਕ੍ਖੁਨਿਯੋ ਅਤ੍ਥਤੋ ਏਕਤੋ ਉਪਸਮ੍ਪਨ੍ਨਾਪਿ ਉਭਤੋਸਙ੍ਘੇ ਉਪਸਮ੍ਪਨ੍ਨਾਸੁਯੇਵ ਸਙ੍ਗਯ੍ਹਨ੍ਤਿ ਭਿਕ੍ਖੂਪਸਮ੍ਪਦਾਯ ਭਿਕ੍ਖੁਨੀਉਪਸਮ੍ਪਦਤੋਪਿ ਉਕ੍ਕਟ੍ਠਤ੍ਤਾ. ਪਾਲ਼ਿਯਂ ‘‘ਤਾਹਿ ਆਪਤ੍ਤੀਹਿ ਅਨਾਪਤ੍ਤਿ’’ਨ੍ਤਿ ਉਪਯੋਗਵਚਨਂ ਕਤ੍ਵਾ ਅਨੁਜਾਨਾਮੀਤਿ ਪਦੇਨ ਸਮ੍ਬਨ੍ਧਿਤਬ੍ਬਂ. ਇਤ੍ਥਿਲਿਙ੍ਗਨ੍ਤਿ ¶ ਥਨਾਦਿਕਂ ਇਤ੍ਥਿਸਣ੍ਠਾਨਂ ਵੁਤ੍ਤਨ੍ਤਿ ਆਹ – ‘‘ਪੁਰਿਸ…ਪੇ… ਇਤ੍ਥਿਸਣ੍ਠਾਨਂ ਉਪ੍ਪਨ੍ਨ’’ਨ੍ਤਿ. ਤਂ ਨਾਨਨ੍ਤਰਿਕਤੋ ਪਨ ‘‘ਪੁਰਿਸਿਨ੍ਦ੍ਰਿਯਮ੍ਪਿ ਅਨ੍ਤਰਹਿਤਂ, ਇਤ੍ਥਿਨ੍ਦ੍ਰਿਯਞ੍ਚ ਉਪ੍ਪਨ੍ਨ’’ਨ੍ਤਿ ਵੁਤ੍ਤਮੇਵ ਹੋਤਿ, ਏਵਂ ਉਪਰਿਪਿ ਲਿਙ੍ਗਗ੍ਗਹਣੇਨੇਵ ਇਤ੍ਥਿਨ੍ਦ੍ਰਿਯਾਦਿਗ੍ਗਹਣਂ ਵੇਦਿਤਬ੍ਬਂ. ਤਾਤਿ ਆਪਤ੍ਤਿਯੋ, ਤਸ੍ਸ ਵੁਟ੍ਠਾਤੁਨ੍ਤਿ ਇਮਿਨਾ ਸਮ੍ਬਨ੍ਧੋ, ਤਾਹਿ ਆਪਤ੍ਤੀਹਿ ਵੁਟ੍ਠਾਪੇਤੁਨ੍ਤਿ ¶ ਅਤ੍ਥੋ. ਕਥਨ੍ਤਿ ਆਹ ਤਾ ਸਬ੍ਬਾਪਿ ਭਿਕ੍ਖੁਨੀਹਿ ਕਾਤਬ੍ਬਨ੍ਤਿਆਦਿ. ਤੇਨ ਪਟਿਚ੍ਛਨ੍ਨਾਯਪਿ ਅਪ੍ਪਟਿਚ੍ਛਨ੍ਨਾਯਪਿ ਗਰੁਕਾਪਤ੍ਤਿਯਾ ਪਕ੍ਖਮਾਨਤ੍ਤਚਰਣਾਦਿਕਂ ਵਿਧਿਂ ਦਸ੍ਸੇਤਿ.

ਓਕ੍ਕਨ੍ਤਿਕਵਿਨਿਚ੍ਛਯੋਤਿ ਪਸਙ੍ਗਾਨੁਗੁਣਂ ਓਤਰਣਕਵਿਨਿਚ੍ਛਯੋ. ਬਲਵਅਕੁਸਲੇਨਾਤਿ ਪਰਦਾਰਿਕਕਮ੍ਮਾਦਿਨਾ. ਦੁਬ੍ਬਲਕੁਸਲੇਨਾਤਿ ਯਥਾਵੁਤ੍ਤਬਲਵਾਕੁਸਲੋਪਹਤਸਤ੍ਤਿਨਾ ਤਤੋ ਏਵ ਦੁਬ੍ਬਲਭੂਤੇਨ ਕੁਸਲੇਨ. ਦੁਬ੍ਬਲਅਕੁਸਲੇਨਾਤਿ ਪੁਰਿਸਭਾਵੁਪ੍ਪਾਦਕਬ੍ਰਹ੍ਮਚਰਿਯਾਦਿਬਲਵਕੁਸਲੋਪਹਤਸਤ੍ਤਿਨਾ ਤਤੋ ਏਵ ਦੁਬ੍ਬਲਭੂਤੇਨ ਪਰਦਾਰਿਕਾਦਿਅਕੁਸਲੇਨ. ਸੁਗਤਿਯਂ ਭਾਵਦ੍ਵਯਸ੍ਸ ਕੁਸਲਕਮ੍ਮਜਤ੍ਤਾ ਅਕੁਸਲੇਨੇਵ ਵਿਨਾਸੋ ਕੁਸਲੇਨੇਵ ਉਪ੍ਪਤ੍ਤੀਤਿ ਆਹ ਉਭਯਮ੍ਪੀਤਿਆਦਿ. ਦੁਗ੍ਗਤਿਯਂ ਪਨ ਅਕੁਸਲੇਨੇਵ ਉਭਿਨ੍ਨਮ੍ਪਿ ਉਪ੍ਪਤ੍ਤਿ ਚ ਵਿਨਾਸੋ ਚ, ਤਤ੍ਥ ਦੁਬ੍ਬਲਬਲਵਭਾਵੋਵ ਵਿਸੇਸੋ.

‘‘ਏਹਿ ਮਯਂ ਗਮਿਸ੍ਸਾਮਾ’’ਤਿ ਭਿਕ੍ਖੁਨਿਯਾ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਗਮਨੇ ਪਾਚਿਤ੍ਤਿਯਾਪਤ੍ਤਿਪਰਿਹਾਰਤ੍ਥਂ ਵੁਤ੍ਤਂ ‘‘ਸਂਵਿਦਹਨਂ ਪਰਿਮੋਚੇਤ੍ਵਾ’’ਤਿ. ਤੇਨ ਏਕਗਾਮਕ੍ਖੇਤ੍ਤੇਪਿ ਬਹਿਗਾਮਤੋ ਅਨ੍ਤਰਘਰਂ ਸਂਵਿਧਾਯ ਗਮਨਮ੍ਪਿ ਆਪਤ੍ਤਿਕਰਮੇਵਾਤਿ ਦਸ੍ਸੇਤਿ. ਪਰਿਮੋਚਨਵਿਧਿਂ ਦਸ੍ਸੇਨ੍ਤੋ ਆਹ ਮਯਨ੍ਤਿਆਦਿ. ਬਹਿਗਾਮੇਤਿ ਗਾਮਨ੍ਤਰੇ. ਦੁਤਿਯਿਕਾ ਭਿਕ੍ਖੁਨੀ ਪਕ੍ਕਨ੍ਤਾ ਵਾ ਹੋਤੀਤਿਆਦਿਨਾ (ਪਾਚਿ. ੬੯੩) ਵੁਤ੍ਤਅਨਾਪਤ੍ਤਿਲਕ੍ਖਣਂ ਅਨੁਲੋਮੇਤੀਤਿ ਵੁਤ੍ਤਂ ‘‘ਗਾਮਨ੍ਤਰ…ਪੇ… ਅਨਾਪਤ੍ਤੀ’’ਤਿ. ਕੋਪੇਤ੍ਵਾਤਿ ਪਰਿਚ੍ਚਜਿਤ੍ਵਾ. ਲਜ੍ਜਿਨਿਯੋ…ਪੇ… ਲਬ੍ਭਤੀਤਿ ਲਿਙ੍ਗਪਰਿਵਤ੍ਤਨਦੁਕ੍ਖਪੀਲ਼ਿਤਸ੍ਸ ਸਙ੍ਗਹੇਪਿ ਅਸਤਿ ਹੀਨਾਯਾਵਤ੍ਤਨਮ੍ਪਿ ਭਵੇਯ੍ਯਾਤਿ ‘‘ਆਪਦਾਸੂ’’ਤਿ ਵੁਤ੍ਤਅਨਾਪਤ੍ਤਿਅਨੁਲੋਮੇਨ ਵੁਤ੍ਤਂ. ਤਾਯ ਦੁਤਿਯਿਕਂ ਗਹੇਤ੍ਵਾਵ ਗਨ੍ਤਬ੍ਬਂ. ਅਲਜ੍ਜਿਨਿਯੋ…ਪੇ… ਲਬ੍ਭਤੀਤਿ ਅਲਜ੍ਜਿਨੀਹਿ ਸਦ੍ਧਿਂ ਏਕਕਮ੍ਮਾਦਿਸਂਵਾਸੇ ਆਪਤ੍ਤਿਸਮ੍ਭਵਤੋ ਤਾ ਅਸਨ੍ਤਪਕ੍ਖਂ ਭਜਨ੍ਤੀਤਿ ਵੁਤ੍ਤਂ, ਇਮਿਨਾਪੇਤਂ ਵੇਦਿਤਬ੍ਬਂ ‘‘ਅਲਜ੍ਜਿਨੀਹਿ ਸਦ੍ਧਿਂ ਪਰਿਭੋਗੋ ਨ ਵਟ੍ਟਤੀ’’ਤਿ. ਯਦਿ ਹਿ ਵਟ੍ਟੇਯ੍ਯ, ਤਤੋਪਿ ਦੁਤਿਯਿਕਂ ਵਿਨਾ ਗਾਮਨ੍ਤਰਗਮਨਾਦੀਸੁ ਆਪਤ੍ਤਿ ਏਵ ਸਿਯਾ ਸਙ੍ਗਾਹਿਕਤ੍ਤਾ ਤਾਸਂ ਸਙ੍ਗਾਹਿਕਲਜ੍ਜਿਨਿਗਣਤੋ ਵਿਯ. ਞਾਤਿਕਾ ਨ ਹੋਨ੍ਤਿ…ਪੇ… ਵਟ੍ਟਤੀਤਿ ਵਦਨ੍ਤੀਤਿ ਇਮਿਨਾ ਅਟ੍ਠਕਥਾਸੁ ਅਨਾਗਤਭਾਵਂ ਦੀਪੇਤਿ. ਤਤ੍ਥਾਪਿ ਵਿਸ੍ਸਾਸਿਕਞਾਤਿਕਭਿਕ੍ਖੁਨਿਯੋ ਵਿਨਾ ਭਿਕ੍ਖੁਨਿਭਾਵੇ ਅਰਮਨ੍ਤਸ੍ਸ ਮਾਨਪਕਤਿਕਸ੍ਸ ਆਪਦਾਟ੍ਠਾਨਸਮ੍ਭਵੇਨ ਤਂ ਵਚਨਂ ਅਪ੍ਪਟਿਕ੍ਖਿਤ੍ਤਮ੍ਪਿ ਤਦਞ੍ਞੇਸਂ ਨ ਵਟ੍ਟਤਿਯੇਵਾਤਿ ਗਹੇਤਬ੍ਬਂ. ਭਿਕ੍ਖੁਭਾਵੇਪੀਤਿ ਭਿਕ੍ਖੁਕਾਲੇਪਿ ¶ . ਤਂ ਨਿਸ੍ਸਾਯਾਤਿ ਤਂ ਨਿਸ੍ਸਯਾਚਰਿਯਂ ਕਤ੍ਵਾ. ਉਪਜ੍ਝਾ ਗਹੇਤਬ੍ਬਾਤਿ ਉਪਸਮ੍ਪਦਾਗਹਣਤ੍ਥਂ ਉਪਜ੍ਝਾ ਗਹੇਤਬ੍ਬਾ.

ਵਿਨਯਕਮ੍ਮਨ੍ਤਿ ¶ ਵਿਕਪ੍ਪਨਂ ਸਨ੍ਧਾਯ ਵੁਤ੍ਤਂ. ਪੁਨ ਕਾਤਬ੍ਬਨ੍ਤਿ ਪੁਨ ਵਿਕਪ੍ਪੇਤਬ੍ਬਂ. ਪੁਨ ਪਟਿਗ੍ਗਹੇਤ੍ਵਾ ਸਤ੍ਤਾਹਂ ਵਟ੍ਟਤੀਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨੀਨਂ ਸਨ੍ਨਿਧਿਂ ਭਿਕ੍ਖੂਹਿ, ਭਿਕ੍ਖੂਨਂ ਸਨ੍ਨਿਧਿਂ ਭਿਕ੍ਖੁਨੀਹਿ ਚ ਪਟਿਗ੍ਗਾਹਾਪੇਤ੍ਵਾ ਪਰਿਭੁਞ੍ਜਿਤੁ’’ਨ੍ਤਿ (ਚੂਲ਼ਵ. ੪੨੧) ਵਚਨਤੋ ਪੁਨ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਸਤ੍ਤਮੇ ਦਿਵਸੇਤਿ ਇਦਞ੍ਚ ਨਿਸ੍ਸਗ੍ਗਿਯਂ ਅਨਾਪਜ੍ਜਿਤ੍ਵਾਵ ਪੁਨਪਿ ਸਤ੍ਤਾਹਂ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਪਕਤਤ੍ਤੋਤਿ ਅਪਰਿਵਤ੍ਤਲਿਙ੍ਗੋ. ਰਕ੍ਖਤੀਤਿ ਤਂ ਪਟਿਗ੍ਗਹਣਵਿਜਹਨਤੋ ਰਕ੍ਖਤਿ, ਅਵਿਭਤ੍ਤਤਾਯ ਪਟਿਗ੍ਗਹਣਂ ਨ ਵਿਜਹਤੀਤਿ ਅਧਿਪ੍ਪਾਯੋ.

ਸਾਮਂ ਗਹੇਤ੍ਵਾਨ ਨਿਕ੍ਖਿਪੇਯ੍ਯਾਤਿ ਸਹਤ੍ਥੇਨ ਪਟਿਗ੍ਗਹੇਤ੍ਵਾਨ ਨਿਕ੍ਖਿਪੇਯ੍ਯ. ਪਰਿਭੁਞ੍ਜਨ੍ਤਸ੍ਸ ਆਪਤ੍ਤੀਤਿ ਲਿਙ੍ਗਪਰਿਵਤ੍ਤੇ ਜਾਤੇ ਪੁਨ ਅਪ੍ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ.

ਹੀਨਾਯਾਵਤ੍ਤਨੇਨਾਤਿ ਏਤ੍ਥ ਕੇਚਿ ‘‘ਪਕਤਤ੍ਤਸ੍ਸ ਭਿਕ੍ਖੁਨੋ ਸਿਕ੍ਖਂ ਅਪ੍ਪਚ੍ਚਕ੍ਖਾਯ ‘ਗਿਹੀ ਭਵਿਸ੍ਸਾਮੀ’ਤਿ ਗਿਹਿਲਿਙ੍ਗਗ੍ਗਹਣਂ ਹੀਨਾਯਾਵਤ੍ਤਨ’’ਨ੍ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਤਤ੍ਤਕੇਨ ਭਿਕ੍ਖੁਭਾਵਸ੍ਸ ਅਵਿਜਹਨਤੋ. ਅਞ੍ਞੇ ਪਨ ‘‘ਪਾਰਾਜਿਕਂ ਆਪਨ੍ਨਸ੍ਸ ਭਿਕ੍ਖੁਪਟਿਞ੍ਞਂ ਪਹਾਯ ਗਿਹਿਲਿਙ੍ਗਭਾਵੂਪਗਮਨਮ੍ਪਿ ਹੀਨਾਯਾਵਤ੍ਤਨ’’ਨ੍ਤਿ ਵਦਨ੍ਤਿ, ਤਂ ਯੁਤ੍ਤਮੇਵ. ਪਾਰਾਜਿਕਂ ਆਪਨ੍ਨੋ ਹਿ ਤਂ ਪਟਿਚ੍ਛਾਦੇਤ੍ਵਾ ਯਾਵ ਭਿਕ੍ਖੁਪਟਿਞ੍ਞੋ ਹੋਤਿ, ਤਾਵ ਭਿਕ੍ਖੁ ਏਵ ਹੋਤਿ ਭਿਕ੍ਖੂਨਮੇਵ ਪਾਰਾਜਿਕਸ੍ਸ ਪਞ੍ਞਤ੍ਤਤ੍ਤਾ. ‘‘ਯੋ ਪਨ ਭਿਕ੍ਖੂ’’ਤਿ ਹਿ ਵੁਤ੍ਤਂ. ਤਥਾ ਹਿ ਸੋ ਸਂਵਾਸਂ ਸਾਦਿਯਨ੍ਤੋਪਿ ਥੇਯ੍ਯਸਂਵਾਸਕੋ ਨ ਹੋਤਿ, ਸਹਸੇਯ੍ਯਾਦਿਆਪਤ੍ਤਿਞ੍ਚ ਨ ਜਨੇਤਿ, ਅਤ੍ਤਾਨਂ ਓਮਸਨ੍ਤਸ੍ਸ ਪਾਚਿਤ੍ਤਿਯਞ੍ਚ ਜਨੇਤਿ. ਵੁਤ੍ਤਞ੍ਹਿ –

‘‘ਅਸੁਦ੍ਧੋ ਹੋਤਿ ਪੁਗ੍ਗਲੋ ਅਞ੍ਞਤਰਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋ, ਤਞ੍ਚੇ ਸੁਦ੍ਧਦਿਟ੍ਠਿ ਸਮਾਨੋ ਓਕਾਸਂ ਕਾਰਾਪੇਤ੍ਵਾ ਅਕ੍ਕੋਸਾਧਿਪ੍ਪਾਯੋ ਵਦੇਤਿ, ਆਪਤ੍ਤਿ ਓਮਸਵਾਦਸ੍ਸਾ’’ਤਿ (ਪਾਰਾ. ੩੮੯).

ਏਕੇ ਪਨ ‘‘ਪਾਰਾਜਿਕਂ ਆਪਨ੍ਨਾਨਂ ਦੋਸਂ ਪਟਿਜਾਨਿਤ੍ਵਾ ਗਿਹਿਲਿਙ੍ਗਗ੍ਗਹਣਂ ਨਾਮ ਸਿਕ੍ਖਾਪਚ੍ਚਕ੍ਖਾਨੇ ਸਮੋਧਾਨਂ ਗਚ੍ਛਤਿ ਤੇਨਾਪਿ ਪਟਿਞ੍ਞਾਯ ਭਿਕ੍ਖੁਭਾਵਸ੍ਸ ਵਿਜਹਨਤੋ. ਤੇਨੇਵ ਵਿਨਯਵਿਨਿਚ੍ਛਯਾਦੀਸੁ ਹੀਨਾਯਾਵਤ੍ਤਨਂ ਸਿਕ੍ਖਾਪਚ੍ਚਕ੍ਖਾਨੇ ਸਮੋਧਾਨੇਤ੍ਵਾ ¶ ਵਿਸੁਂ ਤਂ ਨ ਵੁਤ੍ਤਂ. ਤਸ੍ਮਾ ਭਿਕ੍ਖੁਨੀਨਂ ਵਿਬ੍ਭਮਿਤੁਕਾਮਤਾਯ ਗਿਹਿਲਿਙ੍ਗਗ੍ਗਹਣਂ ਇਧ ਹੀਨਾਯਾਵਤ੍ਤਨਂ ਤਾਸਂ ਸਿਕ੍ਖਾਪਚ੍ਚਕ੍ਖਾਨਸ੍ਸ ਅਭਾਵਤੋ. ਤਾਸਂ ਪਟਿਗ੍ਗਹਣਵਿਜਹਨਸ੍ਸਾਪਿ ਸਬ੍ਬਸੋ ਵਤ੍ਤਬ੍ਬਤ੍ਤਾ’’ਤਿ ਵਦਨ੍ਤਿ, ਤਮ੍ਪਿ ਅਪ੍ਪਟਿਬਾਹਿਯਮੇਵ. ਤਸ੍ਮਾ ਪਾਰਾਜਿਕਾਨਂ ਭਿਕ੍ਖੁਨੀਨਞ੍ਚ ‘‘ਉਪ੍ਪਬ੍ਬਜਿਸ੍ਸਾਮੀ’’ਤਿ ਗਿਹਿਲਿਙ੍ਗਗ੍ਗਹਣਂ ¶ ਹੀਨਾਯਾਵਤ੍ਤਨਨ੍ਤਿ ਗਹੇਤਬ੍ਬਂ. ਵਿਬ੍ਭਮੋਤਿਪਿ ਏਤਸ੍ਸੇਵ ਨਾਮਂ, ਤੇਨੇਵ ਤਂ ਖੁਦ੍ਦਸਿਕ੍ਖਾਯਂ ‘‘ਅਚ੍ਛੇਦਵਿਸ੍ਸਜ੍ਜਨਗਾਹਵਿਬ੍ਭਮਾ’’ਤਿ ਅਧਿਟ੍ਠਾਨਵਿਜਹਨੇ ਵਿਬ੍ਭਮਨਾਮੇਨ ਵੁਤ੍ਤਂ.

ਅਨਪੇਕ੍ਖਵਿਸ੍ਸਜ੍ਜਨੇਨਾਤਿ ਅਞ੍ਞਸ੍ਸ ਅਦਤ੍ਵਾਵ ਅਨਤ੍ਥਿਕਸ੍ਸੇਵ ਪਟਿਗ੍ਗਹਿਤਵਤ੍ਥੂਨਂ ਬਹਿ ਛਡ੍ਡਨੇਨ. ਕੇਚਿ ‘‘ਪਟਿਗ੍ਗਹਿਤਵਤ੍ਥੂਸੁ ਸਾਪੇਕ੍ਖਸ੍ਸ ਪੁਰੇ ਪਟਿਗ੍ਗਹਿਤਭਾਵਤੋ ਪਰਿਮੋਚਨਤ੍ਥਂ ਤਤ੍ਥ ਪਟਿਗ੍ਗਹਮਤ੍ਤਸ੍ਸ ਵਿਸ੍ਸਜ੍ਜਨਮ੍ਪਿ ਅਨਪੇਕ੍ਖਵਿਸ੍ਸਜ੍ਜਨਮੇਵ ਚੀਵਰਾਦਿਅਧਿਟ੍ਠਾਨਪਚ੍ਚੁਦ੍ਧਾਰੋ ਵਿਯਾ’’ਤਿ ਵਦਨ੍ਤਿ, ਤਂ ਨ ਸੁਨ੍ਦਰਂ ਤਥਾਵਚਨਾਭਾਵਾ. ਯਥੇਵ ਹਿ ਚੀਵਰਾਦੀਸੁ ਅਨਪੇਕ੍ਖਵਿਸ੍ਸਜ੍ਜਨੇਨ ਅਧਿਟ੍ਠਾਨਵਿਜਹਨਂ ਵਤ੍ਵਾਪਿ ਵਿਸੁਂ ਪਚ੍ਚੁਦ੍ਧਾਰੋ ਚ ਵੁਤ੍ਤੋ, ਏਵਮਿਧਾਪਿ ਵਤ੍ਤਬ੍ਬਂ, ਯਥਾ ਚ ਚੀਵਰਾਦੀਸੁ ਕਾਯਪਟਿਬਦ੍ਧੇਸੁਪਿ ਪਚ੍ਚੁਦ੍ਧਾਰੇਨ ਅਧਿਟ੍ਠਾਨਂ ਵਿਗਚ੍ਛਤਿ, ਨ ਏਵਮਿਧ. ਇਧ ਪਨ ਪਟਿਗ੍ਗਹਿਤਵਤ੍ਥੁਸ੍ਮਿਂ ਅਨਪੇਕ੍ਖਸ੍ਸਾਪਿ ਕਾਯਤੋ ਮੁਤ੍ਤੇਯੇਵ ਤਸ੍ਮਿਂ ਪਟਿਗ੍ਗਹਣਂ ਵਿਜਹਤਿ. ਤਥਾ ਹਿ ਵੁਤ੍ਤਂ ‘‘ਸਤਕ੍ਖਤ੍ਤੁਮ੍ਪਿ ਪਰਿਚ੍ਚਜਤੁ, ਯਾਵ ਅਤ੍ਤਨੋ ਹਤ੍ਥਗਤਂ ਪਟਿਗ੍ਗਹਿਤਮੇਵਾ’’ਤਿ. ਅਨਪੇਕ੍ਖਵਿਸ੍ਸਜ੍ਜਨੇਨਾਤਿ ਏਤ੍ਥ ਚ ‘‘ਅਨਪੇਕ੍ਖਾਯਾ’’ਤਿ ਏਤ੍ਤਕਮੇਵ ਵਤ੍ਤਬ੍ਬਂ ਅਨਪੇਕ੍ਖਤਂ ਮੁਞ੍ਚਿਤ੍ਵਾ ਇਧ ਵਿਸੁਂ ਵਿਸ੍ਸਜ੍ਜਨਸ੍ਸ ਅਭਾਵਾ. ਨ ਹੇਤ੍ਥ ਪਚ੍ਚੁਦ੍ਧਾਰੇ ਵਿਯ ਵਿਸ੍ਸਜ੍ਜਨਵਿਧਾਨਮਤ੍ਥਿ. ਅਪਿਚ ਪਟਿਗ੍ਗਹਣਮਤ੍ਤਵਿਸ੍ਸਜ੍ਜਨੇ ਸਤਿ ਪੁਰੇ ਪਟਿਗ੍ਗਹਿਤੋਪਿ ਆਹਾਰੋ ਭੁਞ੍ਜਿਤੁਕਮ੍ਯਤਾਯ ਉਪ੍ਪਨ੍ਨਾਯ ਪਟਿਗ੍ਗਹਣਮਤ੍ਤਂ ਵਿਸ੍ਸਜ੍ਜੇਤ੍ਵਾ ਪੁਨ ਪਟਿਗ੍ਗਹੇਤ੍ਵਾ ਯਥਾਸੁਖਂ ਭੁਞ੍ਜਿਤਬ੍ਬੋ ਸਿਯਾਤਿ, ਤਥਾ ਚ ਸਨ੍ਨਿਧਿਕਾਰਕਸਿਕ੍ਖਾਪਦੇ ਵੁਤ੍ਤਾ ਸਬ੍ਬਾਪਿ ਵਿਨਿਚ੍ਛਯਭੇਦਾ ਨਿਰਤ੍ਥਕਾ ਏਵ ਸਿਯੁਂ. ਵੁਤ੍ਤਞ੍ਹਿ ਤਤ੍ਥ –

‘‘ਗਣ੍ਠਿਕਪਤ੍ਤਸ੍ਸ ਵਾ ਗਣ੍ਠਿਕਨ੍ਤਰੇ ਸ੍ਨੇਹੋ ਪਵਿਟ੍ਠੋ ਹੋਤਿ…ਪੇ… ਤਾਦਿਸੇ ਪਤ੍ਤੇਪਿ ਪੁਨਦਿਵਸੇ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯ’’ਨ੍ਤਿਆਦਿ (ਪਾਚਿ. ਅਟ੍ਠ. ੨੫੩).

ਤਤ੍ਥ ਪਨ ‘‘ਪਟਿਗ੍ਗਹਣਂ ਅਨਪੇਕ੍ਖਚਿਤ੍ਤੇਨ ਵਿਸ੍ਸਜ੍ਜੇਤ੍ਵਾ ਭੁਞ੍ਜਿਤਬ੍ਬ’’ਨ੍ਤਿ ਏਤ੍ਤਕਮੇਵ ਵਤ੍ਤਬ੍ਬਂ, ਨ ਚ ਵੁਤ੍ਤਂ. ਕਤ੍ਥਚਿ ਈਦਿਸੇਸੁ ਚ ਗਣ੍ਠਿਕਪਤ੍ਤਾਦੀਸੁ ਪਟਿਗ੍ਗਹਣੇ ਅਪੇਕ੍ਖਾ ਕਸ੍ਸਚਿਪਿ ਨਤ੍ਥੇਵ ਤਪ੍ਪਹਾਨਾਯ ਵਾਯਾਮਤੋ, ਤਥਾਪਿ ਤਤ੍ਥਗਤਆਮਿਸੇ ਪਟਿਗ੍ਗਹਣਂ ਨ ਵਿਗਚ੍ਛਤਿ. ਕਸ੍ਮਾ? ਭਿਕ੍ਖੁਸ੍ਸ ਪਤ੍ਤੇ ਪੁਨ ਭੁਞ੍ਜਿਤੁਕਾਮਤਾਪੇਕ੍ਖਾਯ ¶ ਵਿਜ੍ਜਮਾਨਤ੍ਤਾ ਪਤ੍ਤਗਤਿਕੇ ਆਹਾਰੇਪਿ ਤਸ੍ਸਾ ਵਤ੍ਤਨਤੋ. ਨ ਹਿ ਪਤ੍ਤਂ ਅਵਿਸ੍ਸਜ੍ਜੇਤ੍ਵਾ ਤਗ੍ਗਤਿਕਂ ਆਹਾਰਂ ਵਿਸ੍ਸਜ੍ਜੇਤੁਂ ਸਕ੍ਕਾ, ਨਾਪਿ ਆਹਾਰਂ ਅਵਿਸ੍ਸਜ੍ਜੇਤ੍ਵਾ ਤਗ੍ਗਤਿਕਂ ਪਟਿਗ੍ਗਹਣਂ ਵਿਸ੍ਸਜ੍ਜੇਤੁਂ. ਤਸ੍ਮਾ ਵਤ੍ਥੁਨੋ ਵਿਸ੍ਸਜ੍ਜਨਮੇਵ ਅਨਪੇਕ੍ਖਵਿਸ੍ਸਜ੍ਜਨਂ, ਨ ਪਟਿਗ੍ਗਹਣਸ੍ਸਾਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ. ਤੇਨੇਵ ਸਨ੍ਨਿਧਿਸਿਕ੍ਖਾਪਦਸ੍ਸ ਅਨਾਪਤ੍ਤਿਵਾਰੇ –

‘‘ਅਨ੍ਤੋਸਤ੍ਤਾਹਂ ¶ ਅਧਿਟ੍ਠੇਤਿ, ਵਿਸ੍ਸਜ੍ਜੇਤਿ, ਨਸ੍ਸਤਿ, ਵਿਨਸ੍ਸਤਿ, ਡਯ੍ਹਤਿ, ਅਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤਿ, ਵਿਸ੍ਸਾਸਂ ਗਣ੍ਹਨ੍ਤਿ, ਅਨੁਪਸਮ੍ਪਨ੍ਨਸ੍ਸ ਚਤ੍ਤੇਨ ਵਨ੍ਤੇਨ ਮੁਤ੍ਤੇਨ ਅਨਪੇਕ੍ਖੋ ਦਤ੍ਵਾ ਪਟਿਲਭਿਤ੍ਵਾ ਪਰਿਭੁਞ੍ਜਤੀ’’ਤਿ –

ਏਵਂ ਸਬ੍ਬਤ੍ਥ ਵਤ੍ਥੁਵਿਸ੍ਸਜ੍ਜਨਮੇਵ ਵੁਤ੍ਤਂ. ਏਤ੍ਥ ਚ ‘‘ਅਨ੍ਤੋਸਤ੍ਤਾਹਂ ਅਧਿਟ੍ਠੇਤੀ’’ਤਿ ਬਾਹਿਰਪਰਿਭੋਗਾਯ ਅਧਿਟ੍ਠਾਨਵਚਨਤੋ ਵਤ੍ਥੁਂ ਅਵਿਸ੍ਸਜ੍ਜੇਤ੍ਵਾਪਿ ਕੇਵਲਂ ਅਨਜ੍ਝੋਹਰਿਤੁਕਾਮਤਾਯ ਸੁਦ੍ਧਚਿਤ੍ਤੇਨ ਬਾਹਿਰਪਰਿਭੋਗਤ੍ਥਾਯ ਨਿਯਮਨਮ੍ਪਿ ਵਿਸੁਂ ਏਕਂ ਪਟਿਗ੍ਗਹਣਵਿਜਹਨਕਾਰਣਮੇਵ, ਇਦਞ੍ਚ ਸਨ੍ਧਾਯ ਪਟਿਗ੍ਗਹਣਮਤ੍ਤਵਿਸ੍ਸਜ੍ਜਨਂ ਵੁਤ੍ਤਂ ਸਿਯਾ, ਸੁਵੁਤ੍ਤਮੇਵ ਸਿਯਾ, ਤਥਾ ਚ ‘‘ਪੁਨ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਸ੍ਸਾਮੀ’’ਤਿ ਪਟਿਗ੍ਗਹਣਵਿਸ੍ਸਜ੍ਜਨਂ ਨ ਵਤ੍ਤਬ੍ਬਂ ਸਿਯਾ ਬਾਹਿਰਪਰਿਭੋਗਾਧਿਟ੍ਠਾਨਸ੍ਸ ਇਧਾਧਿਪ੍ਪੇਤਤ੍ਤਾ.

ਸਾਰਤ੍ਥਦੀਪਨਿਯਞ੍ਹਿ (ਸਾਰਤ੍ਥ. ਦੀ. ਪਾਰਾਜਿਕਕਣ੍ਡ ੨.੬੯) ‘‘ਅਨਪੇਕ੍ਖਵਿਸ੍ਸਜ੍ਜਨੇਨਾਤਿ ਏਤ੍ਥ ਅਞ੍ਞਸ੍ਸ ਅਦਤ੍ਵਾਵ ਅਨਤ੍ਥਿਕਤਾਯ ‘ਨਤ੍ਥਿ ਇਮਿਨਾ ਕਮ੍ਮਂ ਨ ਦਾਨਿ ਨਂ ਪਰਿਭੁਞ੍ਜਿਸ੍ਸਾਮੀ’ਤਿ ਵਤ੍ਥੂਸੁ ਵਾ, ‘ਪੁਨ ਪਟਿਗ੍ਗਹੇਤ੍ਵਾ ਪਟਿਭੁਞ੍ਜਿਸ੍ਸਾਮੀ’ਤਿ ਪਟਿਗ੍ਗਹਣੇ ਵਾ ਅਨਪੇਕ੍ਖਵਿਸ੍ਸਜ੍ਜਨੇਨਾ’’ਤਿ ਏਵਂ ਪਰਿਭੁਞ੍ਜਿਤੁਕਾਮਸ੍ਸੇਵ ਪਟਿਗ੍ਗਹਣਮਤ੍ਤਵਿਸ੍ਸਜ੍ਜਨਮ੍ਪਿ ਪਟਿਗ੍ਗਹਣਵਿਜਹਨਕਾਰਣਂ ਵੁਤ੍ਤਂ, ਤਂ ਨ ਗਹੇਤਬ੍ਬਂ. ਪੁਰਿਮਮੇਵ ਪਨ ਬਾਹਿਰਪਰਿਭੋਗਾਧਿਟ੍ਠਾਨਂ ਗਹੇਤਬ੍ਬਂ. ਇਦਂ ਪਨ ਅਟ੍ਠਕਥਾਸੁ ‘‘ਅਨਪੇਕ੍ਖਵਿਸ੍ਸਜ੍ਜਨਸਙ੍ਖਾਤੇ ਵਿਸ੍ਸਜ੍ਜੇਤੀ’’ਤਿ ਵੁਤ੍ਤਪਾਲ਼ਿਪਦਤ੍ਥੇ ਸਙ੍ਗਹੇਤ੍ਵਾ ਵਿਸੁਂ ਨ ਵੁਤ੍ਤਂ. ਨਸ੍ਸਤਿ, ਵਿਨਸ੍ਸਤਿ, ਡਯ੍ਹਤਿ, ਵਿਸ੍ਸਾਸਂ ਵਾ ਗਣ੍ਹਨ੍ਤੀਤਿ ਇਮਾਨਿ ਪਨ ਪਦਾਨਿ ਅਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤੀਤਿ ਇਮਸ੍ਮਿਂ ਪਦੇ ਸਙ੍ਗਹਿਤਾਨੀਤਿ ਵੇਦਿਤਬ੍ਬਂ.

ਅਚ੍ਛਿਨ੍ਦਿਤ੍ਵਾ ਗਹਣੇਨਾਤਿ ਅਨੁਪਸਮ੍ਪਨ੍ਨਾਨਂ ਬਲਕ੍ਕਾਰਾਦਿਨਾ ਅਚ੍ਛਿਨ੍ਦਿਤ੍ਵਾ ਗਹਣੇਨ. ਉਪਸਮ੍ਪਨ੍ਨਾਨਞ੍ਹਿ ਅਚ੍ਛਿਨ੍ਦਨਵਿਸ੍ਸਾਸਗ੍ਗਾਹੇਸੁ ਪਟਿਗ੍ਗਹਣਂ ਨ ਵਿਜਹਤਿ. ਏਤ੍ਥਾਤਿ ਭਿਕ੍ਖੁਵਿਹਾਰੇ. ਉਪਰੋਪਕਾਤਿ ਤੇਨ ਰੋਪਿਤਾ ਰੁਕ੍ਖਗਚ੍ਛਾ. ਤੇਰਸਸੁ ¶ ਸਮ੍ਮੁਤੀਸੂਤਿ ਭਤ੍ਤੁਦ੍ਦੇਸਕਸੇਨਾਸਨਪਞ੍ਞਾਪਕਭਣ੍ਡਾਗਾਰਿਕਚੀਵਰਪਟਿਗ੍ਗਾਹਕਚੀਵਰਭਾਜਕਯਾਗੁਭਾਜਕਫਲਭਾਜਕਖਜ੍ਜਭਾਜਕਅਪ੍ਪਮਤ੍ਤਕਵਿਸ੍ਸਜ੍ਜਕਸਾਦਿਯਗਾਹਾਪਕਪਤ੍ਤਗਾਹਾਪਕਆਰਾਮਿਕਪੇਸਕਸਾਮਣੇਰਪੇਸਕਸਮ੍ਮੁਤਿਸਙ੍ਖਾਤਾਸੁ ਤੇਰਸਸੁ ਸਮ੍ਮੁਤੀਸੁ.

ਪਚ੍ਛਿਮਿਕਾਯ ਸੇਨਾਸਨਗ੍ਗਾਹੇ ਪਟਿਪ੍ਪਸ੍ਸਦ੍ਧੇਪਿ ਅਪ੍ਪਟਿਪ੍ਪਸ੍ਸਦ੍ਧੇਪਿ ਕਥਿਨਤ੍ਥਾਰਸ੍ਸ, ਤਮ੍ਮੂਲਕਾਨਂ ਪਞ੍ਚਾਨਿਸਂਸਾਨਞ੍ਚ ਅਭਾਵਸ੍ਸ ਸਮਾਨਤ੍ਤਾ ਤਤ੍ਥ ਵਿਜ੍ਜਮਾਨਮ੍ਪਿ ਸੇਨਾਸਨਗ੍ਗਾਹਪਟਿਪ੍ਪਸ੍ਸਦ੍ਧਿਂ ਅਦਸ੍ਸੇਤ੍ਵਾ ਤਤ੍ਥ ਭਿਕ੍ਖੂਹਿ ਕਤ੍ਤਬ੍ਬਂ ਸਙ੍ਗਹਮੇਵ ਦਸ੍ਸੇਤੁਂ ਸਚੇ ਪਚ੍ਛਿਮਿਕਾਯਾਤਿਆਦਿ ਵੁਤ੍ਤਂ. ਸਚੇ ਅਕੁਸਲਵਿਪਾਕੇ ¶ …ਪੇ… ਛਾਰਤ੍ਤਂ ਮਾਨਤ੍ਤਮੇਵ ਦਾਤਬ੍ਬਨ੍ਤਿ ਇਦਂ ਪਟਿਚ੍ਛਨ੍ਨਾਯ ਸਾਧਾਰਣਾਪਤ੍ਤਿਯਾ ਪਰਿਵਸਨ੍ਤਸ੍ਸ ਅਸਮਾਦਿਨ੍ਨਪਰਿਵਾਸਸ੍ਸ ਵਾ ਲਿਙ੍ਗੇ ਪਰਿਵਤ੍ਤੇ ਪਕ੍ਖਮਾਨਤ੍ਤਂ ਚਰਨ੍ਤਸ੍ਸ ਵਸੇਨ ਵੁਤ੍ਤਂ. ਸਚੇ ਪਨਸ੍ਸ ਪਕ੍ਖਮਾਨਤ੍ਤੇ ਅਸਮਾਦਿਨ੍ਨੇ ਏਵ ਪੁਨ ਲਿਙ੍ਗਂ ਪਰਿਵਤ੍ਤਤਿ, ਪਰਿਵਾਸਂ ਦਤ੍ਵਾ ਪਰਿਵੁਤ੍ਥਪਰਿਵਾਸਸ੍ਸੇਵ ਛਾਰਤ੍ਤਂ ਮਾਨਤ੍ਤਂ ਦਾਤਬ੍ਬਂ. ਪਰਿਵਾਸਦਾਨਂ ਨਤ੍ਥਿ ਭਿਕ੍ਖੁਕਾਲੇ ਅਪ੍ਪਟਿਚ੍ਛਨ੍ਨਭਾਵਤੋ. ਸਚੇ ਪਨ ਭਿਕ੍ਖੁਕਾਲੇਪਿ ਸਞ੍ਚਿਚ੍ਚ ਨਾਰੋਚੇਤਿ, ਆਪਤ੍ਤਿ ਪਟਿਚ੍ਛਨ੍ਨਾਵ ਹੋਤਿ, ਆਪਤ੍ਤਿਪਟਿਚ੍ਛਨ੍ਨਭਾਵਤੋ ਪਰਿਵਾਸੋ ਚ ਦਾਤਬ੍ਬੋਤਿ ਵਦਨ੍ਤਿ. ਪਾਰਾਜਿਕਂ ਆਪਨ੍ਨਾਨਂ ਇਤ੍ਥਿਪੁਰਿਸਾਨਂ ਲਿਙ੍ਗੇ ਪਰਿਵਤ੍ਤੇਪਿ ਪਾਰਾਜਿਕਤ੍ਤਸ੍ਸ ਏਕਸ੍ਮਿਂ ਅਤ੍ਤਭਾਵੇ ਅਵਿਜਹਨਤੋ ਪੁਨ ਉਪਸਮ੍ਪਦਾ ਨ ਦਾਤਬ੍ਬਾਤਿ ਗਹੇਤਬ੍ਬਂ. ਤੇਨੇਵ ਤੇਸਂ ਸੀਸਚ੍ਛਿਨ੍ਨਪੁਰਿਸਾਦਯੋ ਨਿਦਸ੍ਸਿਤਾ.

੭੧. ਤਥੇਵਾਤਿ ਮੁਚ੍ਚਤੁ ਵਾ ਮਾ ਵਾਤਿ ਇਮਮਤ੍ਥਂ ਅਤਿਦਿਸਤਿ. ਅਞ੍ਞੇਸਨ੍ਤਿ ਪੁਥੁਜ੍ਜਨੇ ਸਨ੍ਧਾਯ ਵੁਤ੍ਤਂ. ਤੇਸਞ੍ਹਿ ਈਦਿਸੇ ਠਾਨੇ ਅਸਾਦਿਯਨਂ ਦੁਕ੍ਕਰਂ ਸੋਤਾਪਨ੍ਨਾਦਿਅਰਿਯਾਨਂ ਤਤ੍ਥ ਦੁਕ੍ਕਰਤ੍ਤਾਭਾਵਾ. ਨ ਹਿ ਅਰਿਯਾ ਪਾਰਾਜਿਕਾਦਿਲੋਕਵਜ੍ਜਾਪਤ੍ਤਿਂ ਆਪਜ੍ਜਨ੍ਤਿ.

੭੩. ਸੁਫੁਸਿਤਾਤਿ ਉਪਰਿਮਾਯ ਦਨ੍ਤਪਨ੍ਤਿਯਾ ਹੇਟ੍ਠਿਮਾ ਦਨ੍ਤਪਨ੍ਤਿ ਆਹਚ੍ਚ ਠਿਤਾ, ਅਵਿਵਟਾਤਿ ਅਤ੍ਥੋ. ਤੇਨਾਹ ‘‘ਅਨ੍ਤੋਮੁਖੇ ਓਕਾਸੋ ਨਤ੍ਥੀ’’ਤਿ. ਉਪ੍ਪਾਟਿਤੇ ਪਨ ਓਟ੍ਠਮਂਸੇ ਦਨ੍ਤੇ ਸੁਯੇਵ ਉਪਕ੍ਕਮਨ੍ਤਸ੍ਸ ਥੁਲ੍ਲਚ੍ਚਯਨ੍ਤਿ ਨਿਮਿਤ੍ਤੇਨ ਬਹਿਨਿਮਿਤ੍ਤੇ ਛੁਪਨਤ੍ਤਾ ਵੁਤ੍ਤਂ. ਬਹਿਨਿਕ੍ਖਨ੍ਤਦਨ੍ਤਜਿਵ੍ਹਾਸੁਪਿ ਏਸੇਵ ਨਯੋ. ਨਿਜ੍ਝਾਮਤਣ੍ਹਿਕਾ ਨਾਮ ਲੋਮਕੂਪੇਹਿ ਸਮੁਟ੍ਠਿਤਅਗ੍ਗਿਜਾਲਾਹਿ ਦਡ੍ਢਸਰੀਰਤਾਯ ਅਤਿਵਿਯ ਤਸਿਤਰੂਪਾ. ਆਦਿ-ਸਦ੍ਦੇਨ ਖੁਪ੍ਪਿਪਾਸਾਸੁਰਾ ਅਟ੍ਠਿਚਮ੍ਮਾਵਸਿਟ੍ਠਾ ਭਯਾਨਕਸਰੀਰਾ ਪੇਤਿਯੋ ਸਙ੍ਗਹਿਤਾ. ਵਿਸਞ੍ਞਂ ਕਤ੍ਵਾਤਿ ਯਥਾ ਸੋ ਕਤਮ੍ਪਿ ¶ ਉਪਕ੍ਕਮਂ ਨ ਜਾਨਾਤਿ, ਏਵਂ ਕਤ੍ਵਾ. ਤੇਨ ਚ ਵਿਸਞ੍ਞੀ ਅਹੁਤ੍ਵਾ ਸਾਦਿਯਨ੍ਤਸ੍ਸ ਪਾਰਾਜਿਕਮੇਵਾਤਿ ਦਸ੍ਸੇਤਿ. ਉਪਹਤਕਾਯਪ੍ਪਸਾਦੋਤਿ ਵਾਤਪਿਤ੍ਤਾਦਿਦੋਸੇਹਿ ਕਾਯਵਿਞ੍ਞਾਣਾਨੁਪ੍ਪਾਦਕਭਾਵੇਨ ਦੂਸਿਤਕਾਯਪ੍ਪਸਾਦੋ, ਨ ਪਨ ਵਿਨਟ੍ਠਕਾਯਪ੍ਪਸਾਦੋ. ਸੀਸੇ ਪਤ੍ਤੇਤਿ ਮਗ੍ਗੇਨ ਮਗ੍ਗਪ੍ਪਟਿਪਾਦਨੇ ਜਾਤੇ. ਅਪ੍ਪਵੇਸੇਤੁਕਾਮਤਾਯ ਏਵ ਨਿਮਿਤ੍ਤੇਨ ਨਿਮਿਤ੍ਤਛੁਪਨੇ ਥੁਲ੍ਲਚ੍ਚਯਂ ਵੁਤ੍ਤਂ, ਸੇਵੇਤੁਕਾਮਸ੍ਸ ਪਨ ਤਤ੍ਥਾਪਿ ਦੁਕ੍ਕਟਮੇਵਾਤਿ ਆਹ ‘‘ਦੁਕ੍ਖਟਮੇਵ ਸਾਮਨ੍ਤ’’ਨ੍ਤਿ.

੭੪. ਜਾਤਿ-ਸਦ੍ਦੇਨ ਸੁਮਨਪੁਪ੍ਫਪਰਿਯਾਯੇਨ ਤਨ੍ਨਿਸ੍ਸਯੋ ਗੁਮ੍ਬੋ ਅਧਿਪ੍ਪੇਤੋਤਿ ਆਹ ‘‘ਜਾਤਿਪੁਪ੍ਫਗੁਮ੍ਬਾਨ’’ਨ੍ਤਿ. ਤੇਨ ਚ ਜਾਤਿਯਾ ਉਪਲਕ੍ਖਿਤਂ ਵਨਂ ਜਾਤਿਯਾਵਨਨ੍ਤਿ ਅਲੁਤ੍ਤਸਮਾਸੋਤਿ ਦਸ੍ਸੇਤਿ. ਏਕਰਸਨ੍ਤਿ ਵੀਥਿਚਿਤ੍ਤੇਹਿ ਅਸਮ੍ਮਿਸ੍ਸਂ.

੭੭. ਉਪ੍ਪਨ੍ਨੇ ਵਤ੍ਥੁਮ੍ਹੀਤਿ ਇਤ੍ਥੀਹਿ ਕਤਅਜ੍ਝਾਚਾਰਵਤ੍ਥੁਸ੍ਮਿਂ. ਰੁਕ੍ਖਸੂਚਿਕਣ੍ਟਕਦ੍ਵਾਰਨ੍ਤਿ ਰੁਕ੍ਖਸੂਚਿਦ੍ਵਾਰਂ ¶ ਕਣ੍ਟਕਦ੍ਵਾਰਂ, ਏਵਮੇਵ ਵਾ ਪਾਠੋ. ਤਤ੍ਥ ਯਂ ਉਭੋਸੁ ਪਸ੍ਸੇਸੁ ਰੁਕ੍ਖਥਮ੍ਭੇ ਨਿਖਨਿਤ੍ਵਾ ਤਤ੍ਥ ਮਜ੍ਝੇ ਵਿਜ੍ਝਿਤ੍ਵਾ ਦ੍ਵੇ ਤਿਸ੍ਸੋ ਰੁਕ੍ਖਸੂਚਿਯੋ ਪਵੇਸੇਤ੍ਵਾ ਕਰੋਨ੍ਤਿ, ਤਂ ਰੁਕ੍ਖਸੂਚਿਦ੍ਵਾਰਂ ਨਾਮ. ਪਵੇਸਨਨਿਕ੍ਖਮਨਕਾਲੇ ਪਨ ਅਪਨੇਤ੍ਵਾ ਥਕਨਕਯੋਗ੍ਗੇਨ ਕਣ੍ਟਕਸਾਖਾਪਟਲੇਨ ਯੁਤ੍ਤਂ ਦ੍ਵਾਰਂ ਕਣ੍ਟਕਦ੍ਵਾਰਂ ਨਾਮ. ਗਾਮਦ੍ਵਾਰਸ੍ਸ ਪਿਧਾਨਤ੍ਥਂ ਪਦਰੇਨ ਕਣ੍ਟਕਸਾਖਾਦੀਹਿ ਵਾ ਕਤਸ੍ਸ ਕਵਾਟਸ੍ਸ ਉਦੁਕ੍ਖਲਪਾਸਰਹਿਤਤਾਯ ਏਕੇਨ ਸਂਵਰਿਤੁਂ ਵਿਵਰਿਤੁਞ੍ਚ ਅਸਕ੍ਕੁਣੇਯ੍ਯਸ੍ਸ ਹੇਟ੍ਠਾ ਏਕਂ ਚਕ੍ਕਂ ਯੋਜੇਨ੍ਤਿ, ਯੇਨ ਪਰਿਵਤ੍ਤਮਾਨੇਨ ਤਂ ਕਵਾਟਂ ਸੁਖਥਕਨਂ ਹੋਤਿ, ਤਂ ਸਨ੍ਧਾਯ ਵੁਤ੍ਤਂ ‘‘ਚਕ੍ਕਲਕਯੁਤ੍ਤਦ੍ਵਾਰ’’ਨ੍ਤਿ. ਚਕ੍ਕਮੇਵ ਹਿ ਲਾਤਬ੍ਬਟ੍ਠੇਨ ਸਂਵਰਣਵਿਵਰਣਤ੍ਥਾਯ ਗਹੇਤਬ੍ਬਟ੍ਠੇਨ ਚਕ੍ਕਲਕਂ, ਤੇਨ ਯੁਤ੍ਤਮ੍ਪਿ ਕਵਾਟਂ ਚਕ੍ਕਲਕਂ ਨਾਮ, ਤੇਨ ਯੁਤ੍ਤਂ ਦ੍ਵਾਰਂ ਚਕ੍ਕਲਕਯੁਤ੍ਤਦ੍ਵਾਰਂ. ਮਹਾਦ੍ਵਾਰੇਸੁ ਪਨ ਦ੍ਵੇ ਤੀਣਿਪਿ ਚਕ੍ਕਲਕਾਨਿ ਯੋਜੇਨ੍ਤੀਤਿ ਆਹ ਫਲਕੇਸੂਤਿਆਦਿ. ਕਿਟਿਕਾਸੂਤਿ ਵੇਲ਼ੁਪੇਸਿਕਾਹਿ ਕਣ੍ਟਕਸਾਖਾਦੀਹਿ ਚ ਕਤਥਕਨਕੇਸੁ. ਸਂਸਰਣਕਿਟਿਕਦ੍ਵਾਰਨ੍ਤਿ ਚਕ੍ਕਲਕਯਨ੍ਤੇਨ ਸਂਸਰਣਕਿਟਿਕਾਯੁਤ੍ਤਮਹਾਦ੍ਵਾਰਂ. ਗੋਪ੍ਫੇਤ੍ਵਾਤਿ ਆਵੁਣਿਤ੍ਵਾ, ਰਜ੍ਜੂਹਿ ਗਨ੍ਥੇਤ੍ਵਾ ਵਾ. ਏਕਂ ਦੁਸ੍ਸਸਾਣਿਦ੍ਵਾਰਮੇਵਾਤਿ ਏਤ੍ਥ ਕਿਲਞ੍ਜਸਾਣਿਦ੍ਵਾਰਮ੍ਪਿ ਸਙ੍ਗਹਂ ਗਚ੍ਛਤਿ ਤਗ੍ਗਤਿਕਤ੍ਤਾ. ਅਥ ਭਿਕ੍ਖੂ…ਪੇ… ਨਿਸਿਨ੍ਨਾ ਹੋਨ੍ਤੀਤਿ ਇਦਂ ਭਿਕ੍ਖੂਨਂ ਸਨ੍ਨਿਹਿਤਭਾਵਦਸ੍ਸਨਤ੍ਥਂ ਵੁਤ੍ਤਂ. ਨਿਪਨ੍ਨੇਪਿ ਆਭੋਗਂ ਕਾਤੁਂ ਵਟ੍ਟਤਿ, ਨਿਪਜ੍ਜਿਤ੍ਵਾ ਨਿਦ੍ਦਾਯਨ੍ਤੇ ਪਨ ਆਭੋਗਂ ਕਾਤੁਂ ਨ ਵਟ੍ਟਤਿ ਅਸਨ੍ਤਪਕ੍ਖੇ ਠਿਤਤ੍ਤਾ. ਰਹੋ ¶ ਨਿਸਜ੍ਜਾਯ ਵਿਯ ਦ੍ਵਾਰਸਂਵਰਣਂ ਨਾਮ ਮਾਤੁਗਾਮਾਨਂ ਪਵੇਸਨਨਿਵਾਰਣਤ੍ਥਂ ਅਨੁਞ੍ਞਾਤਨ੍ਤਿ ਆਹ ਭਿਕ੍ਖੁਨਿਂ ਵਾਤਿਆਦਿ. ਨਿਸ੍ਸੇਣਿਂ ਆਰੋਪੇਤ੍ਵਾਤਿ ਇਦਂ ਹੇਟ੍ਠਿਮਤਲਸ੍ਸ ਸਦ੍ਵਾਰਬਨ੍ਧਤਾਯ ਵੁਤ੍ਤਂ. ਚਤੂਸੁ ਦਿਸਾਸੁ ਪਰਿਕ੍ਖਿਤ੍ਤਸ੍ਸ ਕੁਟ੍ਟਸ੍ਸ ਏਕਾਬਦ੍ਧਤਾਯ ‘‘ਏਕਕੁਟ੍ਟਕੇ’’ਤਿ ਵੁਤ੍ਤਂ. ਪਚ੍ਛਿਮਾਨਂ ਭਾਰੋਤਿ ਪਾਲ਼ਿਯਾ ਆਗਚ੍ਛਨ੍ਤੇ ਸਨ੍ਧਾਯ ਵੁਤ੍ਤਂ. ਯੇਨ ਕੇਨਚਿ ਪਰਿਕ੍ਖਿਤ੍ਤੇਤਿ ਏਤ੍ਥ ਪਰਿਕ੍ਖੇਪਸ੍ਸ ਉਬ੍ਬੇਧਤੋ ਪਮਾਣਂ ਸਹਸੇਯ੍ਯਪ੍ਪਹੋਨਕੇ ਵੁਤ੍ਤਸਦਿਸਮੇਵ.

ਮਹਾਪਰਿਵੇਣਨ੍ਤਿ ਮਹਨ੍ਤਂ ਅਙ੍ਗਣਂ, ਤੇਨ ਚ ਬਹੁਜਨਸਞ੍ਚਾਰਂ ਦਸ੍ਸੇਤਿ, ਤੇਨਾਹ ਮਹਾਬੋਧੀਤਿਆਦਿ. ਅਰੁਣੇ ਉਗ੍ਗਤੇ ਵੁਟ੍ਠਹਤਿ, ਅਨਾਪਤ੍ਤਿ ਅਨਾਪਤ੍ਤਿਖੇਤ੍ਤਭੂਤਾਯ ਰਤ੍ਤਿਯਾ ਸੁਦ੍ਧਚਿਤ੍ਤੇਨ ਨਿਪਨ੍ਨਤ੍ਤਾ. ਪਬੁਜ੍ਝਿਤ੍ਵਾ ਪੁਨ ਸੁਪਤਿ ਆਪਤ੍ਤੀਤਿ ਅਰੁਣੇ ਉਗ੍ਗਤੇ ਪਬੁਜ੍ਝਿਤ੍ਵਾ ਅਰੁਣੁਗ੍ਗਮਨਂ ਞਤ੍ਵਾ ਵਾ ਅਞਤ੍ਵਾ ਵਾ ਅਨੁਟ੍ਠਹਿਤ੍ਵਾ ਸਯਿਤਸਨ੍ਤਾਨੇਨ ਸੁਪਤਿ ਉਟ੍ਠਹਿਤ੍ਵਾ ਕਤ੍ਤਬ੍ਬਸ੍ਸ ਦ੍ਵਾਰਸਂਵਰਣਾਦਿਨੋ ਅਕਤਤ੍ਤਾ ਅਕਿਰਿਯਸਮੁਟ੍ਠਾਨਾ ਆਪਤ੍ਤਿ ਹੋਤਿ ਅਨਾਪਤ੍ਤਿਖੇਤ੍ਤੇ ਕਤਨਿਪਜ੍ਜਨਕਿਰਿਯਾਯ ਅਨਙ੍ਗਤ੍ਤਾ. ਅਯਞ੍ਹਿ ਆਪਤ੍ਤਿ ਈਦਿਸੇ ਠਾਨੇ ਅਕਿਰਿਯਾ, ਦਿਵਾ ਅਸਂਵਰਿਤ੍ਵਾ ਨਿਪਜ੍ਜਨਕ੍ਖਣੇ ਕਿਰਿਯਾ ਚ ਅਚਿਤ੍ਤਕਾ ਚਾਤਿ ਵੇਦਿਤਬ੍ਬਾ. ਪੁਰਾਰੁਣਾ ਪਬੁਜ੍ਝਿਤ੍ਵਾਪਿ ਯਾਵ ਅਰੁਣੁਗ੍ਗਮਨਾ ਸਯਨ੍ਤਸ੍ਸਾਪਿ ਪੁਰਿਮਨਯੇਨ ਆਪਤ੍ਤਿਯੇਵ. ਅਰੁਣੇ ਉਗ੍ਗਤੇ ਵੁਟ੍ਠਹਿਸ੍ਸਾਮੀਤਿ…ਪੇ… ਆਪਤ੍ਤਿਯੇਵਾਤਿ ਏਤ੍ਥ ਕਦਾ ਤਸ੍ਸ ਆਪਤ੍ਤੀਤਿ? ਵੁਚ੍ਚਤੇ – ਨ ਤਾਵ ਰਤ੍ਤਿਯਂ ‘‘ਦਿਵਾ ਆਪਜ੍ਜਤਿ ਨੋ ਰਤ੍ਤਿ’’ਨ੍ਤਿ (ਪਰਿ. ੩੨੩) ਵੁਤ੍ਤਤ੍ਤਾ. ‘‘ਅਨਾਦਰਿਯਦੁਕ੍ਕਟਾ ਨ ਮੁਚ੍ਚਤੀ’’ਤਿ ਵੁਤ੍ਤਦੁਕ੍ਕਟਂ ਪਨ ਦਿਵਾਸਯਨਦੁਕ੍ਕਟਮੇਵ ਨ ¶ ਹੋਤਿ ਅਨਾਦਰਿਯਦੁਕ੍ਕਟਤ੍ਤਾ. ਏਵਂ ਅਰੁਣੁਗ੍ਗਮਨੇ ਪਨ ਅਚਿਤ੍ਤਕਂ ਅਕਿਰਿਯਸਮੁਟ੍ਠਾਨਂ ਆਪਤ੍ਤਿਂ ਆਪਜ੍ਜਤੀਤਿ ਵੇਦਿਤਬ੍ਬਂ. ਸੋ ਸਚੇ ਦ੍ਵਾਰਂ ਸਂਵਰਿਤ੍ਵਾ ‘‘ਅਰੁਣੇ ਉਗ੍ਗਤੇ ਵੁਟ੍ਠਹਿਸ੍ਸਾਮੀ’’ਤਿ ਨਿਪਜ੍ਜਤਿ, ਦ੍ਵਾਰੇ ਚ ਅਞ੍ਞੇਹਿ ਅਰੁਣੁਗ੍ਗਮਨਕਾਲੇ ਵਿਵਟੇਪਿ ਤਸ੍ਸ ਅਨਾਪਤ੍ਤਿਯੇਵ ਦ੍ਵਾਰਪਿਦਹਨਸ੍ਸ ਰਤ੍ਤਿਦਿਵਾਭਾਗੇਸੁ ਵਿਸੇਸਾਭਾਵਾ. ਆਪਤ੍ਤਿਆਪਜ੍ਜਨਸ੍ਸੇਵ ਕਾਲਵਿਸੇਸੋ ਇਚ੍ਛਿਤਬ੍ਬੋ, ਨ ਤਪ੍ਪਰਿਹਾਰਸ੍ਸਾਤਿ ਗਹੇਤਬ੍ਬਂ, ‘‘ਦ੍ਵਾਰਂ ਅਸਂਵਰਿਤ੍ਵਾ ਰਤ੍ਤਿਂ ਨਿਪਜ੍ਜਤੀ’’ਤਿ (ਪਾਰਾ. ਅਟ੍ਠ. ੧.੭੭) ਹਿ ਵੁਤ੍ਤਂ. ਦਿਵਾ ਸਂਵਰਿਤ੍ਵਾ ਨਿਪਨ੍ਨਸ੍ਸ ਕੇਨਚਿ ਵਿਵਟੇਪਿ ਦ੍ਵਾਰੇ ਅਨਾਪਤ੍ਤਿਯੇਵ. ਅਤ੍ਤਨਾਪਿ ਅਨੁਟ੍ਠਹਿਤ੍ਵਾਵ ਸਤਿ ਪਚ੍ਚਯੇ ਵਿਵਟੇਪਿ ਅਨਾਪਤ੍ਤੀਤਿ ਵਦਨ੍ਤਿ. ਯਥਾਪਰਿਚ੍ਛੇਦਮੇਵ ਚ ਨ ਵੁਟ੍ਠਾਤੀਤਿ ਅਰੁਣੇ ਉਗ੍ਗਤੇਯੇਵ ਉਟ੍ਠਾਤਿ. ਆਪਤ੍ਤਿਯੇਵਾਤਿ ਮੂਲਾਪਤ੍ਤਿਂਯੇਵ ਸਨ੍ਧਾਯ ਵੁਤ੍ਤਂ, ਅਨਾਦਰਿਯਆਪਤ੍ਤਿ ਪਨ ਪੁਰਾਰੁਣਾ ਉਟ੍ਠਿਤਸ੍ਸਾਪਿ ਤਸ੍ਸ ਹੋਤੇਵ ‘‘ਦੁਕ੍ਕਟਾ ¶ ਨ ਮੁਚ੍ਚਤੀ’’ਤਿ ਵੁਤ੍ਤਤ੍ਤਾ, ਦੁਕ੍ਕਟਾ ਨ ਮੁਚ੍ਚਤੀਤਿ ਚ ਪੁਰਾਰੁਣਾ ਉਟ੍ਠਹਿਤ੍ਵਾ ਮੂਲਾਪਤ੍ਤਿਯਾ ਮੁਤ੍ਤੋਪਿ ਅਨਾਦਰਿਯਦੁਕ੍ਕਟਾ ਨ ਮੁਚ੍ਚਤੀਤਿ ਅਧਿਪ੍ਪਾਯੋ.

ਨਿਦ੍ਦਾਵਸੇਨ ਨਿਪਜ੍ਜਤੀਤਿ ਵੋਹਾਰਵਸੇਨ ਵੁਤ੍ਤਂ, ਪਾਦਾਨਂ ਪਨ ਭੂਮਿਤੋ ਅਮੋਚਿਤਤ੍ਤਾ ਅਯਂ ਨਿਪਨ੍ਨੋ ਨਾਮ ਨ ਹੋਤਿ, ਤੇਨੇਵ ਅਨਾਪਤ੍ਤਿ ਵੁਤ੍ਤਾ. ਅਪਸ੍ਸਾਯ ਸੁਪਨ੍ਤਸ੍ਸਾਤਿ ਕਟਿਟ੍ਠਿਤੋ ਉਦ੍ਧਂ ਪਿਟ੍ਠਿਕਣ੍ਟਕੇ ਅਪ੍ਪਮਤ੍ਤਕਮ੍ਪਿ ਪਦੇਸਂ ਭੂਮਿਂ ਅਫੁਸਾਪੇਤ੍ਵਾ ਥਮ੍ਭਾਦਿਂ ਅਪਸ੍ਸਾਯ ਸੁਪਨ੍ਤਸ੍ਸ. ਕਟਿਟ੍ਠਿਂ ਪਨ ਭੂਮਿਂ ਫੁਸਾਪੇਨ੍ਤਸ੍ਸ ਸਯਨਂ ਨਾਮ ਹੋਤਿ. ਪਿਟ੍ਠਿਪਸਾਰਣਲਕ੍ਖਣਾ ਹਿ ਸੇਯ੍ਯਾ. ਦੀਘਵਨ੍ਦਨਾਦੀਸੁਪਿ ਤਿਰਿਯਂ ਪਿਟ੍ਠਿਕਣ੍ਟਕਾਨਂ ਪਸਾਰਿਤਤ੍ਤਾ ਨਿਪਜ੍ਜਨਮੇਵਾਤਿ ਆਪਤ੍ਤਿ ਪਰਿਹਰਿਤਬ੍ਬਾਵ ‘‘ਵਨ੍ਦਾਮੀਤਿ ਪਾਦਮੂਲੇ ਨਿਪਜ੍ਜੀ’’ਤਿਆਦੀਸੁ ਨਿਪਜ੍ਜਨਸ੍ਸੇਵ ਵੁਤ੍ਤਤ੍ਤਾ. ਤਸ੍ਸਾਪਿ ਅਨਾਪਤ੍ਤਿ ਪਤਨਕ੍ਖਣੇ ਅਵਿਸਯਤ੍ਤਾ, ਵਿਸਯੇ ਜਾਤੇ ਸਹਸਾ ਵੁਟ੍ਠਿਤਤ੍ਤਾ ਚ. ਯਸ੍ਸ ਪਨ ਵਿਸਞ੍ਞਿਤਾਯ ਪਚ੍ਛਾਪਿ ਅਵਿਸਯੋ, ਏਤਸ੍ਸ ਅਨਾਪਤ੍ਤਿਯੇਵ ਪਤਿਤਕ੍ਖਣੇ ਵਿਯ. ਤਤ੍ਥੇਵ ਸਯਤਿ ਨ ਵੁਟ੍ਠਾਤੀਤਿ ਇਮਿਨਾ ਵਿਸਯੇਪਿ ਅਕਰਣਂ ਦਸ੍ਸੇਤਿ, ਤੇਨੇਵ ‘‘ਤਸ੍ਸ ਆਪਤ੍ਤੀ’’ਤਿ ਵੁਤ੍ਤਂ.

ਏਕਭਙ੍ਗੇਨਾਤਿ ਉਭੋ ਪਾਦੇ ਭੂਮਿਤੋ ਅਮੋਚੇਤ੍ਵਾਵ ਏਕਪਸ੍ਸੇਨ ਸਰੀਰਂ ਭਞ੍ਜਿਤ੍ਵਾ ਨਿਪਨ੍ਨੋ. ਮਹਾਅਟ੍ਠਕਥਾਯਂ ਪਨ ਮਹਾਪਦੁਮਤ੍ਥੇਰੇਨ ਵੁਤ੍ਤਨ੍ਤਿ ਸਮ੍ਬਨ੍ਧੋ, ਤੇਨ ‘‘ਮਹਾਅਟ੍ਠਕਥਾਯ ਲਿਖਿਤਮਹਾਪਦੁਮਤ੍ਥੇਰਵਾਦੋ ਅਯ’’ਨ੍ਤਿ ਦਸ੍ਸੇਤਿ. ਤਤ੍ਥ ਸੁਪਨ੍ਤਸ੍ਸਾਪਿ ਅਵਿਸਯਤ੍ਤਮਤ੍ਥੀਤਿ ਮਹਾਪਦੁਮਤ੍ਥੇਰੇਨ ‘‘ਅਵਿਸਯਤ੍ਤਾ ਪਨ ਆਪਤ੍ਤਿ ਨ ਦਿਸ੍ਸਤੀ’’ਤਿ ਵੁਤ੍ਤਂ. ਆਚਰਿਯਾ ਪਨ ਸੁਪਨ੍ਤਸ੍ਸ ਵਿਸਞ੍ਞਤ੍ਤਾਭਾਵੇਨ ਵਿਸਯਤ੍ਤਾ ਅਨਾਪਤ੍ਤਿਂ ਨ ਕਥਯਨ੍ਤਿ. ਵਿਸਞ੍ਞਤ੍ਤੇ ਸਤਿ ਅਨਾਪਤ੍ਤਿਯੇਵ. ਦ੍ਵੇ ਪਨ ਜਨਾਤਿਆਦਿਪਿ ਮਹਾਅਟ੍ਠਕਥਾਯਮੇਵ ਵਚਨਂ, ਤਦੇਵ ਪਚ੍ਛਾ ਵੁਤ੍ਤਤ੍ਤਾ ਪਮਾਣਂ. ਯਕ੍ਖਗਹਿਤਗ੍ਗਹਣੇਨੇਵ ਚੇਤ੍ਥ ਵਿਸਞ੍ਞੀਭੂਤੋਪਿ ਸਙ੍ਗਹਿਤੋ. ਏਕਭਙ੍ਗੇਨ ਨਿਪਨ੍ਨੋ ਪਨ ਅਨਿਪਨ੍ਨਤ੍ਤਾ ਆਪਤ੍ਤਿਤੋ ਮੁਚ੍ਚਤਿਯੇਵਾਤਿ ਗਹੇਤਬ੍ਬਂ.

੭੮. ਅਪਦੇਤਿ ¶ ਆਕਾਸੇ. ਪਦਨ੍ਤਿ ਪਦਵਲ਼ਞ੍ਜਂ, ਤੇਨਾਹ ‘‘ਆਕਾਸੇ ਪਦ’’ਨ੍ਤਿ. ਏਤਦਗ੍ਗਨ੍ਤਿ ਏਸੋ ਅਗ੍ਗੋ. ਯਦਿਦਨ੍ਤਿ ਯੋ ਅਯਂ. ਸੇਸਂ ਉਤ੍ਤਾਨਮੇਵ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਪਠਮਪਾਰਾਜਿਕਵਣ੍ਣਨਾਨਯੋ ਨਿਟ੍ਠਿਤੋ.

੨. ਦੁਤਿਯਪਾਰਾਜਿਕਂ

ਅਦੁਤਿਯੇਨਾਤਿ ¶ ¶ ਅਸਦਿਸੇਨ ਜਿਨੇਨ ਯਂ ਦੁਤਿਯਂ ਪਾਰਾਜਿਕਂ ਪਕਾਸਿਤਂ, ਤਸ੍ਸ ਇਦਾਨਿ ਯਸ੍ਮਾ ਸਂਵਣ੍ਣਨਾਕ੍ਕਮੋ ਪਤ੍ਤੋ, ਤਸ੍ਮਾ ਅਸ੍ਸ ਦੁਤਿਯਸ੍ਸ ਅਯਂ ਸਂਵਣ੍ਣਨਾ ਹੋਤੀਤਿ ਯੋਜਨਾ.

ਧਨਿਯਵਤ੍ਥੁਵਣ੍ਣਨਾ

੮੪. ਰਾਜੂਹਿ ਗਹਿਤਨ੍ਤਿ ਰਾਜਗਹਨ੍ਤਿ ਆਹ ‘‘ਮਨ੍ਧਾਤੂ’’ਤਿ. ਰਾਜਪੁਰੋਹਿਤੇਨ ਪਰਿਗ੍ਗਹਿਤਮ੍ਪਿ ਰਾਜਪਰਿਗ੍ਗਹਿਤਮੇਵਾਤਿ ਮਹਾਗੋਵਿਨ੍ਦਗ੍ਗਹਣਂ, ਨਗਰਸਦ੍ਦਾਪੇਕ੍ਖਾਯ ਚੇਤ੍ਥ ‘‘ਰਾਜਗਹ’’ਨ੍ਤਿ ਨਪੁਂਸਕਨਿਦ੍ਦੇਸੋ. ਅਞ੍ਞੇਪੇਤ੍ਥ ਪਕਾਰੇਤਿ ਸੁਸਂਵਿਹਿਤਾਰਕ੍ਖਤ੍ਤਾ ਰਾਜੂਨਂ ਗਹਂ ਗੇਹਭੂਤਨ੍ਤਿ ਰਾਜਗਹਨ੍ਤਿਆਦਿਕੇ ਪਕਾਰੇ. ਵਸਨ੍ਤਵਨਨ੍ਤਿ ਕੀਲ਼ਾਵਨਂ, ਵਸਨ੍ਤਕਾਲੇ ਕੀਲ਼ਾਯ ਯੇਭੁਯ੍ਯਤ੍ਤਾ ਪਨ ਵਸਨ੍ਤਵਨਨ੍ਤਿ ਵੁਤ੍ਤਂ.

ਸਦ੍ਵਾਰਬਨ੍ਧਾਤਿ ਵਸ੍ਸੂਪਗਮਨਯੋਗ੍ਗਤਾਦਸ੍ਸਨਂ. ਨਾਲਕਪਟਿਪਦਨ੍ਤਿ ਸੁਤ੍ਤਨਿਪਾਤੇ (ਸੁ. ਨਿ. ੬੮੪ ਆਦਯੋ) ਨਾਲਕਤ੍ਥੇਰਸ੍ਸ ਦੇਸਿਤਂ ਮੋਨੇਯ੍ਯਪਟਿਪਦਂ. ਪਞ੍ਚਨ੍ਨਂ ਛਦਨਾਨਨ੍ਤਿ ਤਿਣਪਣ੍ਣਇਟ੍ਠਕਸਿਲਾਸੁਧਾਸਙ੍ਖਾਤਾਨਂ ਪਞ੍ਚਨ੍ਨਂ. ਨੋ ਚੇ ਲਭਤਿ…ਪੇ… ਸਾਮਮ੍ਪਿ ਕਾਤਬ੍ਬਨ੍ਤਿ ਇਮਿਨਾ ਨਾਵਾਸਤ੍ਥਵਜੇ ਠਪੇਤ੍ਵਾ ਅਞ੍ਞਤ੍ਥ ‘‘ਅਸੇਨਾਸਨਿਕੋ ਅਹ’’ਨ੍ਤਿ ਆਲਯਕਰਣਮਤ੍ਤੇਨ ਉਪਗਮਨਂ ਨ ਵਟ੍ਟਤਿ. ਸੇਨਾਸਨਂ ਪਰਿਯੇਸਿਤ੍ਵਾ ਵਚੀਭੇਦਂ ਕਤ੍ਵਾ ਵਸ੍ਸਂ ਉਪਗਨ੍ਤਬ੍ਬਮੇਵਾਤਿ ਦਸ੍ਸੇਤਿ. ‘‘ਨ, ਭਿਕ੍ਖਵੇ, ਅਸੇਨਾਸਨਿਕੇਨਾ’’ਤਿਆਦਿਨਾ (ਮਹਾਵ. ੨੦੪) ਹਿ ਪਾਲ਼ਿਯਂ ‘‘ਨਾਲਕਪਟਿਪਦਂ ਪਟਿਪਨ੍ਨੇਨਾਪੀ’’ਤਿ ਅਟ੍ਠਕਥਾਯਞ੍ਚ ਅਵਿਸੇਸੇਨ ਦਲ਼੍ਹਂ ਕਤ੍ਵਾ ਵੁਤ੍ਤਂ, ਨਾਵਾਸਤ੍ਥਵਜੇਸੁਯੇਵ ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਨਾਵਾਯ ਵਸ੍ਸਂ ਉਪਗਨ੍ਤੁ’’ਨ੍ਤਿਆਦਿਨਾ (ਮਹਾਵ. ੨੦੩) ਅਸਤਿਪਿ ਸੇਨਾਸਨੇ ਆਲਯਕਰਣਵਸੇਨ ਵਸ੍ਸੂਪਗਮਨਂ ਅਨੁਞ੍ਞਾਤਂ, ਨਾਞ੍ਞਤ੍ਥਾਤਿ ਗਹੇਤਬ੍ਬਂ. ਅਯਮਨੁਧਮ੍ਮਤਾਤਿ ਸਾਮੀਚਿਵਤ੍ਤਂ. ਕਤਿਕਵਤ੍ਤਾਨੀਤਿ ਭਸ੍ਸਾਰਾਮਤਾਦਿਂ ਵਿਹਾਯ ਸਬ੍ਬਦਾ ਅਪ੍ਪਮਤ੍ਤੇਹਿ ਭਵਿਤਬ੍ਬਨ੍ਤਿਆਦਿਕਤਿਕਵਤ੍ਤਾਨਿ. ਖਨ੍ਧਕਵਤ੍ਤਾਨੀਤਿ ‘‘ਆਗਨ੍ਤੁਕਾਦਿਖਨ੍ਧਕਵਤ੍ਤਂ ਪੂਰੇਤਬ੍ਬ’’ਨ੍ਤਿ ਏਵਂ ਖਨ੍ਧਕਵਤ੍ਤਾਨਿ ਚ ਅਧਿਟ੍ਠਹਿਤ੍ਵਾ.

ਵਸ੍ਸਂਵੁਤ੍ਥਾਤਿ ਪਦਸ੍ਸ ਅਟ੍ਠਕਥਾਯਂ ‘‘ਪੁਰਿਮਿਕਾਯ ਉਪਗਤਾ ਮਹਾਪਵਾਰਣਾਯ ਪਵਾਰਿਤਾ ਪਾਟਿਪਦਦਿਵਸਤੋ ¶ ਪਟ੍ਠਾਯ ‘ਵੁਤ੍ਥਵਸ੍ਸਾ’ਤਿ ਵੁਚ੍ਚਨ੍ਤੀ’’ਤਿ ਵੁਤ੍ਤਤ੍ਤਾ ਮਹਾਪਵਾਰਣਾਦਿਵਸੇ ਪਵਾਰੇਤ੍ਵਾ ਵਾ ਅਪ੍ਪਵਾਰੇਤ੍ਵਾ ਵਾ ਅਞ੍ਞਤ੍ਥ ਗਚ੍ਛਨ੍ਤੇਹਿ ¶ ਸਤ੍ਤਾਹਕਰਣੀਯਨਿਮਿਤ੍ਤੇ ਸਤਿ ਏਵ ਗਨ੍ਤਬ੍ਬਂ, ਨਾਸਤਿ, ਇਤਰਥਾ ਵਸ੍ਸਚ੍ਛੇਦੋ ਦੁਕ੍ਕਟਞ੍ਚ ਹੋਤੀਤਿ ਵੇਦਿਤਬ੍ਬਂ. ‘‘ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ ਹਿ ‘‘ਨ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤ੍ਵਾ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ’’ਤਿ (ਮਹਾਵ. ੧੮੫) ਚ ਵੁਤ੍ਤਂ. ਇਧੇਵ ਚ ਵਸ੍ਸਂਵੁਤ੍ਥਾ ਤੇਮਾਸਚ੍ਚਯੇਨ…ਪੇ… ਪਕ੍ਕਮਿਂਸੂਤਿ ਵੁਤ੍ਤਂ. ਪਵਾਰਣਾਦਿਵਸੋਪਿ ਤੇਮਾਸਪਰਿਯਾਪਨ੍ਨੋਵ. ਕੇਚਿ ਪਨ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂਵੁਤ੍ਥਾਨਂ ਭਿਕ੍ਖੂਨਂ ਤੀਹਿ ਠਾਨੇਹਿ ਪਵਾਰੇਤੁਨ੍ਤਿ (ਮਹਾਵ. ੨੦੯) ਪਵਾਰਣਾਕਮ੍ਮਸ੍ਸ ਪੁਬ੍ਬੇਯੇਵ ਵਸ੍ਸਂਵੁਤ੍ਥਾਨਨ੍ਤਿ ਵੁਤ੍ਥਵਸ੍ਸਤਾਯ ਵੁਤ੍ਤਤ੍ਤਾ ਮਹਾਪਵਾਰਣਾਦਿਵਸੇ ਸਤ੍ਤਾਹਕਰਣੀਯਨਿਮਿਤ੍ਤਂ ਵਿਨਾਪਿ ਯਥਾਸੁਖਂ ਗਨ੍ਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ, ਵੁਤ੍ਥਵਸ੍ਸਾਨਞ੍ਹਿ ਪਵਾਰਣਾਨੁਜਾਨਨਂ ਅਨੁਪਗਤਛਿਨ੍ਨਵਸ੍ਸਾਦੀਨਂ ਨਿਵਤ੍ਤਨਤ੍ਥਂ ਕਤਂ, ਨ ਪਨ ਪਵਾਰਣਾਦਿਵਸੇ ਅਵਸਿਤ੍ਵਾ ਪਕ੍ਕਮਿਤਬ੍ਬਨ੍ਤਿ ਦਸ੍ਸਨਤ੍ਥਂ ਤਦਤ੍ਥਸ੍ਸ ਇਧ ਪਸਙ੍ਗਾਭਾਵਾ, ਪਵਾਰਣਂ ਕਾਤੁਂ ਅਨੁਚ੍ਛਵਿਕਾਨਂ ਪਵਾਰਣਾ ਇਧ ਵਿਧੀਯਤਿ, ਯੇ ਚ ਵਸ੍ਸਂ ਉਪਗਨ੍ਤ੍ਵਾ ਵਸ੍ਸਚ੍ਛੇਦਞ੍ਚ ਅਕਤ੍ਵਾ ਯਾਵ ਪਵਾਰਣਾਦਿਵਸਾ ਵਸਿਂਸੁ, ਤੇ ਤਤ੍ਤਕੇਨ ਪਵਾਰਣਾਕਮ੍ਮਂ ਪਤਿ ਪਰਿਯਾਯਤੋ ਵੁਤ੍ਥਵਸ੍ਸਾਤਿ ਵੁਚ੍ਚਨ੍ਤਿ, ਅਪ੍ਪਕਂ ਊਨਮਧਿਕਂ ਵਾ ਗਣਨੂਪਗਂ ਨ ਹੋਤੀਤਿ ਞਾਯਤੋ, ਨ ਕਥਿਨਕਮ੍ਮਂ ਪਤਿ ਤੇਮਾਸਸ੍ਸ ਅਪਰਿਪੁਣ੍ਣਤ੍ਤਾ, ਇਤਰਥਾ ਤਸ੍ਮਿਂ ਮਹਾਪਵਾਰਣਾਦਿਵਸੇਪਿ ਕਥਿਨਤ੍ਥਾਰਪ੍ਪਸਙ੍ਗਤੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂਵੁਤ੍ਥਾਨਂ ਭਿਕ੍ਖੂਨਂ ਕਥਿਨਂ ਅਤ੍ਥਰਿਤੁ’’ਨ੍ਤਿ (ਮਹਾਵ. ੩੦੬) ਇਦਂ ਪਨ ‘‘ਨ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤ੍ਵਾ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ’’ਤਿਆਦਿ (ਮਹਾਵ. ੧੮੫) ਚ ਨਿਪ੍ਪਰਿਯਾਯਤੋ ਮਹਾਪਵਾਰਣਾਯ ਅਨਨ੍ਤਰਪਾਟਿਪਦਦਿਵਸਤੋ ਪਟ੍ਠਾਯ ਕਥਿਨਤ੍ਥਾਰਂ ਪਕ੍ਕਮਨਞ੍ਚ ਸਨ੍ਧਾਯ ਵੁਤ੍ਤਂ, ਪਰਿਵਾਰੇ ਚ ‘‘ਕਥਿਨਸ੍ਸ ਅਤ੍ਥਾਰਮਾਸੋ ਜਾਨਿਤਬ੍ਬੋ’’ਤਿ (ਪਰਿ. ੪੧੨) ਵਤ੍ਵਾ ‘‘ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ ਜਾਨਿਤਬ੍ਬੋ’’ਤਿ (ਪਰਿ. ੪੧੨) ਵੁਤ੍ਤਂ. ਯੋ ਹਿ ਕਥਿਨਤ੍ਥਾਰਸ੍ਸ ਕਾਲੋ, ਤਤੋ ਪਟ੍ਠਾਯੇਵ ਚਾਰਿਕਾਪਕ੍ਕਮਨਸ੍ਸਾਪਿ ਕਾਲੋ, ਨ ਤਤੋ ਪੁਰੇ ਵਸ੍ਸਂਵੁਤ੍ਥਾਨਂਯੇਵ ਕਥਿਨਤ੍ਥਾਰਾਰਹਤ੍ਤਾ. ਯਦਗ੍ਗੇਨ ਹਿ ਪਵਾਰਣਾਦਿਵਸੇ ਕਥਿਨਤ੍ਥਾਰੋ ਨ ਵਟ੍ਟਤਿ, ਤਦਗ੍ਗੇਨ ਭਿਕ੍ਖੂਪਿ ਵੁਤ੍ਥਵਸ੍ਸਾ ਨ ਹੋਨ੍ਤਿ ਪਵਾਰਣਾਦਿਵਸਸ੍ਸ ਅਵੁਤ੍ਥਤ੍ਤਾ.

ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੨.੮੪) ‘‘ਏਕਦੇਸੇਨ ਅਵੁਤ੍ਥਮ੍ਪਿ ਤਂ ਦਿਵਸਂ ਵੁਤ੍ਥਭਾਗਾਪੇਕ੍ਖਾਯ ਵੁਤ੍ਥਮੇਵ ਹੋਤੀ’’ਤਿਆਦਿ ਵੁਤ੍ਤਂ, ਤਂ ਨ ਯੁਤ੍ਤਂ, ਤਂਦਿਵਸਪਰਿਯੋਸਾਨੇ ਅਰੁਣੁਗ੍ਗਮਨਕਾਲੇ ਵਸਨ੍ਤੋਵ ਹਿ ਤਂ ਦਿਵਸਂ ਵੁਤ੍ਥੋ ਨਾਮ ਹੋਤਿ ¶ ਪਰਿਵਾਸਅਰਞ੍ਞਵਾਸਾਦੀਸੁ ਵਿਯ, ਅਯਞ੍ਚ ਵਿਚਾਰਣਾ ਉਪਰਿ ਵਸ੍ਸੂਪਨਾਯਿਕਕ੍ਖਨ੍ਧਕੇ ਆਵਿ ਭਵਿਸ੍ਸਤੀਤਿ ਤਤ੍ਥੇਵ ਤਂ ਪਾਕਟਂ ਕਰਿਸ੍ਸਾਮ.

ਮਹਾਪਵਾਰਣਾਯ ¶ ਪਵਾਰਿਤਾਤਿ ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਅਚ੍ਛਿਨ੍ਨਵਸ੍ਸਤਾਦਸ੍ਸਨਪਰਂ ਏਤਂ ਕੇਨਚਿ ਅਨ੍ਤਰਾਯੇਨ ਅਪ੍ਪਵਾਰਿਤਾਨਮ੍ਪਿ ਵੁਤ੍ਥਵਸ੍ਸਤ੍ਤਾ. ਨ ਓਵਸ੍ਸਿਯਤੀਤਿ ਅਨੋਵਸ੍ਸਕਨ੍ਤਿ ਕਮ੍ਮਸਾਧਨਂ ਦਟ੍ਠਬ੍ਬਂ, ਯਥਾ ਨ ਤੇਮਿਯਤਿ, ਤਥਾ ਕਤ੍ਵਾਤਿ ਅਤ੍ਥੋ. ਅਨਵਯੋਤਿ ਏਤ੍ਥ ਅਨੁਸਦ੍ਦੋ ਵਿਚ੍ਛਾਯਂ ਵਤ੍ਤਤੀਤਿ ਆਹ ਅਨੁ ਅਨੁ ਅਵਯੋਤਿਆਦਿ. ਆਚਰਿਯਸ੍ਸ ਕਮ੍ਮਂ ਆਚਰਿਯਕਨ੍ਤਿ ਆਹ ‘‘ਆਚਰਿਯਕਮ੍ਮੇ’’ਤਿ. ਕਟ੍ਠਕਮ੍ਮਂ ਥਮ੍ਭਾਦਿ. ਤੇਲਤਮ੍ਬਮਤ੍ਤਿਕਾਯਾਤਿ ਤੇਲਮਿਸ੍ਸਾਯ ਤਮ੍ਬਮਤ੍ਤਿਕਾਯ.

੮੫. ਕੁਟਿਕਾਯ ਕਰਣਭਾਵਨ੍ਤਿ ਕੁਟਿਯਾ ਕਤਭਾਵਂ. ਕਿਂ-ਸਦ੍ਦਪ੍ਪਯੋਗੇ ਅਨਾਗਤਪ੍ਪਚ੍ਚਯਵਿਧਾਨਂ ਸਨ੍ਧਾਯ ਤਸ੍ਸ ਲਕ੍ਖਣਨ੍ਤਿਆਦਿ ਵੁਤ੍ਤਂ. ਕਿਞ੍ਚਾਪਿ ਥੇਰਸ੍ਸ ਪਾਣਘਾਤਾਧਿਪ੍ਪਾਯੋ ਨਤ੍ਥਿ, ਅਨੁਪਪਰਿਕ੍ਖਿਤ੍ਵਾ ਕਰਣੇਨ ਪਨ ਬਹੂਨਂ ਪਾਣਾਨਂ ਮਰਣਤ੍ਤਾ ਪਾਣੇ ਬ੍ਯਾਬਾਧੇਨ੍ਤਸ੍ਸਾਤਿਆਦਿ ਵੁਤ੍ਤਂ. ਪਾਤਬ੍ਯਭਾਵਨ੍ਤਿ ਵਿਨਾਸੇਤਬ੍ਬਤਂ. ਪਾਣਾਤਿਪਾਤਂ ਕਰੋਨ੍ਤਾਨਨ੍ਤਿ ਥੇਰੇਨ ਅਕਤੇਪਿ ਪਾਣਾਤਿਪਾਤੇ ਪਾਣਕਾਨਂ ਮਰਣਮਤ੍ਤੇਨ ਪਚ੍ਛਿਮਾਨਂ ਲੇਸੇਨ ਗਹਣਾਕਾਰਂ ਦਸ੍ਸੇਤਿ, ਤੇਨ ਚ ‘‘ਮਮ ਤਾਦਿਸਂ ਅਕੁਸਲਂ ਨਤ੍ਥੀ’’ਤਿ ਪਚ੍ਛਿਮਾਨਂ ਵਿਪਲ੍ਲਾਸਲੇਸਗ੍ਗਹਣਨਿਮਿਤ੍ਤਕਿਚ੍ਚਂ ਨ ਕਤ੍ਤਬ੍ਬਨ੍ਤਿ ਦੀਪਿਤਂ ਹੋਤਿ. ਦਿਟ੍ਠਾਨੁਗਤਿਨ੍ਤਿ ਦਿਟ੍ਠਸ੍ਸ ਕਮ੍ਮਸ੍ਸ ਅਨੁਪਗਮਨਂ ਅਨੁਕਿਰਿਯਂ, ਦਿਟ੍ਠਿਯਾ ਵਾ ਲਦ੍ਧਿਯਾ ਅਨੁਗਮਨਂ ਗਾਹਂ. ਘਂਸਿਤਬ੍ਬੇਤਿ ਮਦ੍ਦਿਤਬ੍ਬੇ, ਵਿਨਾਸਿਤਬ੍ਬੇਤਿ ਅਤ੍ਥੋ. ਕਤਂ ਲਭਿਤ੍ਵਾ ਤਤ੍ਥ ਵਸਨ੍ਤਾਨਮ੍ਪਿ ਦੁਕ੍ਕਟਮੇਵਾਤਿ ਇਦਂ ਭਗਵਤਾ ਕੁਟਿਯਾ ਭੇਦਾਪਨਵਚਨੇਨ ਸਿਦ੍ਧਂ, ਸਾਪਿ ਤਿਣਦਬ੍ਬਸਮ੍ਭਾਰੇਹਿ ਤੁਲਾਥਮ੍ਭਾਦੀਹਿ ਅਮਿਸ੍ਸਾ ਸੁਦ੍ਧਮਤ੍ਤਿਕਾਮਯਾਪਿ ਇਟ੍ਠਕਾਹਿ ਕਤਾ ਵਟ੍ਟਤਿ. ਕੇਚਿ ਹਿ ਇਟ੍ਠਕਾਹਿਯੇਵ ਥਮ੍ਭੇ ਚਿਨਿਤ੍ਵਾ ਤਦੁਪਰਿ ਇਟ੍ਠਕਾਹਿਯੇਵ ਵਿਤਾਨਾਦਿਸਣ੍ਠਾਨੇਨ ਤੁਲਾਦਿਦਾਰੁਸਮ੍ਭਾਰਵਿਰਹਿਤਂ ਛਦਨਮ੍ਪਿ ਬਨ੍ਧਿਤ੍ਵਾ ਇਟ੍ਠਕਾਮਯਮੇਵ ਆਵਸਥਂ ਕਰੋਨ੍ਤਿ, ਤਾਦਿਸਂ ਵਟ੍ਟਤਿ. ਗਿਞ੍ਜਕਾਵਸਥਸਙ੍ਖੇਪੇਨ ਕਤਾਤਿ ਏਤ੍ਥ ਗਿਞ੍ਜਕਾ ਵੁਚ੍ਚਨ੍ਤਿ ਇਟ੍ਠਕਾ, ਤਾਹਿਯੇਵ ਕਤੋ ਆਵਸਥੋ ਗਿਞ੍ਜਕਾਵਸਥੋ. ਵਯਕਮ੍ਮਮ੍ਪੀਤਿ ਮਤ੍ਤਿਕੁਦ੍ਧਾਰਣਇਟ੍ਠਕਦਾਰੁਚ੍ਛੇਦਨਾਦਿਕਾਰਕਾਨਂ ਦਿਨ੍ਨਭਤ੍ਤਵੇਤ੍ਤਨਾਦਿਵਤ੍ਥੁਬ੍ਬਯੇਨ ਨਿਪ੍ਫਨ੍ਨਕਮ੍ਮਮ੍ਪਿ ਅਤ੍ਥਿ, ਏਤੇਨ ਕੁਟਿਭੇਦਕਾਨਂ ਗੀਵਾਦਿਭਾਵਂ ਪਰਿਸਙ੍ਕਤਿ. ਤਿਤ੍ਥਿਯਧਜੋਤਿ ਤਿਤ੍ਥਿਯਾਨਮੇਵ ਸਞ੍ਞਾਣਭੂਤਤ੍ਤਾ ਵੁਤ੍ਤਂ. ਤੇ ਹਿ ਈਦਿਸੇਸੁ ਚਾਟਿਆਦੀਸੁ ਵਸਨ੍ਤਿ. ਅਞ੍ਞਾਨਿਪੀਤਿ ਪਿ-ਸਦ੍ਦੇਨ ਅਤ੍ਤਨਾ ਵੁਤ੍ਤਕਾਰਣਦ੍ਵਯਮ੍ਪਿ ਮਹਾਅਟ੍ਠਕਥਾਯਮੇਵ ਵੁਤ੍ਤਨ੍ਤਿ ਦਸ੍ਸੇਤਿ. ਯਸ੍ਮਾ ਸਬ੍ਬਮਤ੍ਤਿਕਾਮਯਾ ¶ ਕੁਟਿ ਸੀਤਕਾਲੇ ਅਤਿਸੀਤਾ ਉਣ੍ਹਕਾਲੇ ਚ ਉਣ੍ਹਾ ਸੁਕਰਾ ਚ ਹੋਤਿ ਚੋਰੇਹਿ ਭਿਨ੍ਦਿਤੁਂ, ਤਸ੍ਮਾ ਤਤ੍ਥ ਠਪਿਤਪਤ੍ਤਚੀਵਰਾਦਿਕਂ ਸੀਤੁਣ੍ਹਚੋਰਾਦੀਹਿ ਵਿਨਸ੍ਸਤੀਤਿ ਵੁਤ੍ਤਂ ‘‘ਪਤ੍ਤਚੀਵਰਗੁਤ੍ਤਤ੍ਥਾਯਾ’’ਤਿ. ਛਿਨ੍ਦਾਪੇਯ੍ਯ ਵਾ ਭਿਨ੍ਦਾਪੇਯ੍ਯ ਵਾ ਅਨੁਪਵਜ੍ਜੋਤਿ ਇਦਂ ਅਯਂ ਕੁਟਿ ਵਿਯ ਸਬ੍ਬਥਾ ਅਨੁਪਯੋਗਾਰਹਂ ਸਨ੍ਧਾਯ ਵੁਤ੍ਤਂ. ਯਂ ਪਨ ਪਞ੍ਚਵਣ੍ਣਸੁਤ੍ਤੇਹਿ ਵਿਨਦ੍ਧਛਤ੍ਤਾਦਿਕਂ, ਤਤ੍ਥ ਅਕਪ੍ਪਿਯਭਾਗੋਵ ਛਿਨ੍ਦਿਤਬ੍ਬੋ, ਨ ਤਦਵਸੇਸੋ ਤਸ੍ਸ ਕਪ੍ਪਿਯਤ੍ਤਾ, ਤਂ ਛਿਨ੍ਦਨ੍ਤੋ ਉਪਵਜ੍ਜੋਵ ਹੋਤਿ. ਤੇਨੇਵ ਵਕ੍ਖਤਿ ‘‘ਘਟਕਮ੍ਪਿ ਵਾਲ਼ਰੂਪਮ੍ਪਿ ਭਿਨ੍ਦਿਤ੍ਵਾ ਧਾਰੇਤਬ੍ਬ’’ਨ੍ਤਿਆਦਿ.

ਪਾਲ਼ਿਮੁਤ੍ਤਕਵਿਨਿਚ੍ਛਯਵਣ੍ਣਨਾ

ਛਤ੍ਤਦਣ੍ਡਗ੍ਗਾਹਕਂ ¶ ਸਲਾਕਪਞ੍ਜਰਨ੍ਤਿ ਏਤ੍ਥ ਯੋ ਪਞ੍ਜਰਸਲਾਕਾਨਂ ਮਜ੍ਝਟ੍ਠੋ ਬੁਨ੍ਦੇ ਪੁਥੁਲੋ ਅਹਿਚ੍ਛਤ੍ਤਕਸਦਿਸੋ ਅਗ੍ਗੇ ਸਛਿਦ੍ਦੋ ਯਤ੍ਥ ਦਣ੍ਡਨ੍ਤਰਂ ਪਵੇਸੇਤ੍ਵਾ ਛਤ੍ਤਂ ਗਣ੍ਹਨ੍ਤਿ, ਯੋ ਵਾ ਸਯਮੇਵ ਦੀਘਤਾਯ ਗਹਣਦਣ੍ਡੋ ਹੋਤਿ, ਅਯਂ ਛਤ੍ਤਦਣ੍ਡੋ ਨਾਮ, ਤਸ੍ਸ ਅਪਰਿਗਲ਼ਨਤ੍ਥਾਯ ਛਤ੍ਤਸਲਾਕਾਨਂ ਮੂਲਪ੍ਪਦੇਸਦਣ੍ਡਸ੍ਸ ਸਮਨ੍ਤਤੋ ਦਲ਼੍ਹਪਞ੍ਜਰਂ ਕਤ੍ਵਾ ਸੁਤ੍ਤੇਹਿ ਵਿਨਨ੍ਧਨ੍ਤਿ, ਸੋ ਪਦੇਸੋ ਛਤ੍ਤਦਣ੍ਡਗਾਹਕਸਲਾਕਪਞ੍ਜਰਂ ਨਾਮ, ਤਂ ਵਿਨਨ੍ਧਿਤੁਂ ਵਟ੍ਟਤਿ. ਨ ਵਣ੍ਣਮਟ੍ਠਤ੍ਥਾਯਾਤਿ ਇਮਿਨਾ ਥਿਰਕਰਣਤ੍ਥਮੇਵ ਏਕਵਣ੍ਣਸੁਤ੍ਤੇਨ ਵਿਨਨ੍ਧਿਯਮਾਨਂ ਯਦਿ ਵਣ੍ਣਮਟ੍ਠਂ ਹੋਤਿ, ਨ ਤਤ੍ਥ ਦੋਸੋਤਿ ਦਸ੍ਸੇਤਿ. ਆਰਗ੍ਗੇਨਾਤਿ ਨਿਖਾਦਨਮੁਖੇਨ. ਦਣ੍ਡਬੁਨ੍ਦੇਤਿ ਦਣ੍ਡਮੂਲੇ ਕੋਟਿਯਂ. ਛਤ੍ਤਮਣ੍ਡਲਿਕਨ੍ਤਿ ਛਤ੍ਤਪਞ੍ਜਰੇ ਮਣ੍ਡਲਾਕਾਰੇਨ ਬਦ੍ਧਦਣ੍ਡਵਲਯਂ. ਉਕ੍ਕਿਰਿਤ੍ਵਾਤਿ ਨਿਨ੍ਨਂ, ਉਨ੍ਨਤਂ ਵਾ ਕਤ੍ਵਾ.

ਨਾਨਾਸੁਤ੍ਤਕੇਹੀਤਿ ਨਾਨਾਵਣ੍ਣੇਹਿ ਸੁਤ੍ਤੇਹਿ. ਇਦਞ੍ਚ ਤਥਾ ਕਰੋਨ੍ਤਾਨਂ ਵਸੇਨ ਵੁਤ੍ਤਂ, ਏਕਵਣ੍ਣਸੁਤ੍ਤਕੇਨਾਪਿ ਨ ਵਟ੍ਟਤਿਯੇਵ, ‘‘ਪਕਤਿਸੂਚਿਕਮ੍ਮਮੇਵ ਵਟ੍ਟਤੀ’’ਤਿ ਹਿ ਵੁਤ੍ਤਂ. ਪਟ੍ਟਮੁਖੇਤਿ ਦ੍ਵਿਨ੍ਨਂ ਪਟ੍ਟਾਨਂ ਸਙ੍ਘਟਿਤਟ੍ਠਾਨਂ ਸਨ੍ਧਾਯੇਤਂ ਵੁਤ੍ਤਂ. ਪਰਿਯਨ੍ਤੇਤਿ ਚੀਵਰਪਰਿਯਨ੍ਤੇ, ਅਨੁਵਾਤਂ ਸਨ੍ਧਾਯੇਤਂ ਵੁਤ੍ਤਂ. ਵੇਣਿਨ੍ਤਿ ਵਰਕਸੀਸਾਕਾਰੇਨ ਸਿਬ੍ਬਨਂ. ਸਙ੍ਖਲਿਕਨ੍ਤਿ ਦਿਗੁਣਸਙ੍ਖਲਿਕਾਕਾਰੇਨ ਸਿਬ੍ਬਨਂ, ਵੇਣਿਂ ਵਾ ਸਙ੍ਖਲਿਕਂ ਵਾ ਕਰੋਨ੍ਤੀਤਿ ਪਕਤੇਨ ਸਮ੍ਬਨ੍ਧੋ. ਅਗ੍ਘਿਯਂ ਨਾਮ ਚੇਤਿਯਸਣ੍ਠਾਨਂ, ਯਂ ਅਗ੍ਘਿਯਤ੍ਥਮ੍ਭੋਤਿ ਵਦਨ੍ਤਿ. ਉਕ੍ਕਿਰਨ੍ਤੀਤਿ ਉਟ੍ਠਪੇਨ੍ਤਿ. ਚਤੁਕੋਣਮੇਵ ਵਟ੍ਟਤੀਤਿ ਗਣ੍ਠਿਕਪਾਸਕਪਟ੍ਟਾਨਿ ਸਨ੍ਧਾਯ ਵੁਤ੍ਤਂ. ਕੋਣਸੁਤ੍ਤਪਿਲ਼ਕਾਤਿ ਗਣ੍ਠਿਕਪਾਸਕਪਟ੍ਟਾਨਂ ਕੋਣੇਹਿ ਬਹਿ ਨਿਗ੍ਗਤਸੁਤ੍ਤਾਨਂ ¶ ਪਿਲ਼ਕਾਕਾਰੇਨ ਠਪਿਤਕੋਟਿਯੋਤਿ ਕੇਚਿ ਵਦਨ੍ਤਿ, ਤੇ ਪਿਲ਼ਕੇ ਛਿਨ੍ਦਿਤ੍ਵਾ ਦੁਵਿਞ੍ਞੇਯ੍ਯਾ ਕਾਤਬ੍ਬਾਤਿ ਤੇਸਂ ਅਧਿਪ੍ਪਾਯੋ. ਕੇਚਿ ਪਨ ‘‘ਕੋਣਸੁਤ੍ਤਾ ਚ ਪਿਲ਼ਕਾਤਿ ਦ੍ਵੇਯੇਵਾ’’ਤਿ ਵਦਨ੍ਤਿ, ਤੇਸਂ ਮਤੇਨ ਗਣ੍ਠਿਕਪਾਸਕਪਟ੍ਟਾਨਂ ਕੋਣਤੋ ਕੋਣੇਹਿ ਨੀਹਤਸੁਤ੍ਤਾ ਕੋਣਸੁਤ੍ਤਾ ਨਾਮ. ਸਮਨ੍ਤਤੋ ਪਨ ਪਰਿਯਨ੍ਤੇਨ ਕਤਾ ਚਤੁਰਸ੍ਸਸੁਤ੍ਤਾ ਪਿਲ਼ਕਾ ਨਾਮ. ਤਂ ਦੁਵਿਧਮ੍ਪਿ ਕੇਚਿ ਚੀਵਰਤੋ ਵਿਸੁਂ ਪਞ੍ਞਾਯਨਤ੍ਥਾਯ ਵਿਕਾਰਯੁਤ੍ਤਂ ਕਰੋਨ੍ਤਿ, ਤਂ ਨਿਸੇਧਾਯ ‘‘ਦੁਵਿਞ੍ਞੇਯ੍ਯਰੂਪਾ ਵਟ੍ਟਨ੍ਤੀ’’ਤਿ ਵੁਤ੍ਤਂ, ਨ ਪਨ ਸਬ੍ਬਥਾ ਅਚਕ੍ਖੁਗੋਚਰਭਾਵੇਨ ਸਿਬ੍ਬਨਤ੍ਥਾਯ ਤਥਾਸਿਬ੍ਬਨਸ੍ਸ ਅਸਕ੍ਕੁਣੇਯ੍ਯਤ੍ਤਾ. ਯਥਾ ਪਕਤਿਚੀਵਰਤੋ ਵਿਕਾਰੋ ਨ ਪਞ੍ਞਾਯਤਿ, ਏਵਂ ਸਿਬ੍ਬਿਤਬ੍ਬਨ੍ਤਿ ਅਧਿਪ੍ਪਾਯੋ. ਰਜਨਕਮ੍ਮਤੋ ਪੁਬ੍ਬੇ ਪਞ੍ਞਾਯਮਾਨੋਪਿ ਵਿਸੇਸੋ ਚੀਵਰੇ ਰਤ੍ਤੇ ਏਕਵਣ੍ਣਤਾਯ ਨ ਪਞ੍ਞਾਯਤੀਤਿ ਆਹ ‘‘ਚੀਵਰੇ ਰਤ੍ਤੇ’’ਤਿ. ਮਣਿਨਾਤਿ ਨੀਲਮਣਿਆਦਿਮਟ੍ਠਪਾਸਾਣੇਨ, ਅਂਸਵਦ੍ਧਕਕਾਯਬਨ੍ਧਨਾਦਿਕਂ ਪਨ ਅਚੀਵਰਤ੍ਤਾ ਸਙ੍ਖਾਦੀਹਿ ਘਂਸਿਤੁਂ ਵਟ੍ਟਤੀਤਿ ਵਦਨ੍ਤਿ. ਕਣ੍ਣਸੁਤ੍ਤਕਨ੍ਤਿ ਚੀਵਰਸ੍ਸ ਦੀਘਤੋ ਤਿਰਿਯਞ੍ਚ ਸਿਬ੍ਬਿਤਾਨਂ ਚਤੂਸੁ ਕਣ੍ਣੇਸੁ ਕੋਣੇਸੁ ਚ ਨਿਕ੍ਖਨ੍ਤਾਨਂ ਸੁਤ੍ਤਸੀਸਾਨਮੇਤਂ ਨਾਮਂ, ਤਂ ਛਿਨ੍ਦਿਤ੍ਵਾਵ ਪਾਰੁਪਿਤਬ੍ਬਂ, ਤੇਨਾਹ ‘‘ਰਜਿਤਕਾਲੇ ਛਿਨ੍ਦਿਤਬ੍ਬ’’ਨ੍ਤਿ. ਭਗਵਤਾ ਅਨੁਞ੍ਞਾਤਂ ਏਕਂ ਕਣ੍ਣਸੁਤ੍ਤਮ੍ਪਿ ਅਤ੍ਥਿ, ਤਂ ਪਨ ਨਾਮੇਨ ¶ ਸਦਿਸਮ੍ਪਿ ਇਤੋ ਅਞ੍ਞਮੇਵਾਤਿ ਦਸ੍ਸੇਤੁਂ ਯਂ ਪਨਾਤਿਆਦਿ ਵੁਤ੍ਤਂ. ਲਗ੍ਗਨਤ੍ਥਾਯਾਤਿ ਚੀਵਰਰਜ੍ਜੁਯਂ ਚੀਵਰਬਨ੍ਧਨਤ੍ਥਾਯ. ਗਣ੍ਠਿਕੇਤਿ ਦਨ੍ਤਾਦਿਮਯੇ. ਪੀਲ਼ਕਾਤਿ ਬਿਨ੍ਦੁਂ ਬਿਨ੍ਦੁਂ ਕਤ੍ਵਾ ਉਟ੍ਠਾਪੇਤਬ੍ਬਪੀਲ਼ਕਾ.

ਥਾਲਕੇ ਵਾਤਿ ਤਮ੍ਬਾਦਿਮਯੇ ਪੁਗ੍ਗਲਿਕੇ ਤਿਵਿਧੇਪਿ ਕਪ੍ਪਿਯਥਾਲਕੇ. ਨ ਵਟ੍ਟਤੀਤਿ ਮਣਿਵਣ੍ਣਕਰਣਪ੍ਪਯੋਗੋ ਨ ਵਟ੍ਟਤਿ, ਤੇਲਵਣ੍ਣਕਰਣਤ੍ਥਂ ਪਨ ਵਟ੍ਟਤਿ. ਪਤ੍ਤਮਣ੍ਡਲੇਤਿ ਤਿਪੁਸੀਸਾਦਿਮਯੇ. ‘‘ਨ, ਭਿਕ੍ਖਵੇ, ਚਿਤ੍ਤਾਨਿ ਪਤ੍ਤਮਣ੍ਡਲਾਨਿ ਧਾਰੇਤਬ੍ਬਾਨਿ ਰੂਪਕਾਕਿਣ੍ਣਾਨਿ ਭਿਤ੍ਤਿਕਮ੍ਮਕਤਾਨੀ’’ਤਿ (ਚੂਲ਼ਵ. ੨੫੩) ਵੁਤ੍ਤਤ੍ਤਾ ‘‘ਭਿਤ੍ਤਿਕਮ੍ਮਂ ਨ ਵਟ੍ਟਤੀ’’ਤਿ ਵੁਤ੍ਤਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਕਰਦਨ੍ਤਕਂ ਛਿਨ੍ਦਿਤੁ’’ਨ੍ਤਿ (ਚੂਲ਼ਵ. ੨੫੩) ਵੁਤ੍ਤਤ੍ਤਾ ‘‘ਮਕਰਦਨ੍ਤਕਂ ਪਨ ਵਟ੍ਟਤੀ’’ਤਿ ਵੁਤ੍ਤਂ, ਇਦਂ ਪਨ ਪਾਲ਼ਿਯਾ ਲਦ੍ਧਮ੍ਪਿ ਇਧ ਪਾਲ਼ਿਯਾ ਮੁਤ੍ਤਤ੍ਤਾ ਪਾਲ਼ਿਮੁਤ੍ਤਕਨਯੇ ਵੁਤ੍ਤਂ. ਏਵਮਞ੍ਞਮ੍ਪਿ ਈਦਿਸਂ.

ਲੇਖਾ ਨ ਵਟ੍ਟਤੀਤਿ ਆਰਗ੍ਗੇਨ ਦਿਨ੍ਨਲੇਖਾਵ ਨ ਵਟ੍ਟਤਿ, ਜਾਤਿਹਿਙ੍ਗੁਲਿਕਾਦਿਵਣ੍ਣੇਹਿ ਕਤਲੇਖਾ ਵਟ੍ਟਤਿ. ਛਤ੍ਤਮੁਖਵਟ੍ਟਿਯਨ੍ਤਿ ਧਮਕਰਣਸ੍ਸ ਹਤ੍ਥੇਨ ਗਹਣਛਤ੍ਤਾਕਾਰਸ੍ਸ ¶ ਮੁਖਵਟ੍ਟਿਯਂ, ‘‘ਪਰਿਸ੍ਸਾਵਨਚੋਲ਼ਬਨ੍ਧਨਟ੍ਠਾਨੇ’’ਤਿ ਕੇਚਿ.

ਦੇਡ੍ਡੁਭਸੀਸਨ੍ਤਿ ਉਦਕਸਪ੍ਪਸੀਸਂ. ਅਚ੍ਛੀਨੀਤਿ ਕੁਞ੍ਜਰਚ੍ਛਿਸਣ੍ਠਾਨਾਨਿ. ਏਕਮੇਵ ਵਟ੍ਟਤੀਤਿ ਏਤ੍ਥ ਏਕਰਜ੍ਜੁਕਂ ਦਿਗੁਣਂ ਤਿਗੁਣਂ ਕਤ੍ਵਾਪਿ ਬਨ੍ਧਿਤੁਂ ਨ ਵਟ੍ਟਤਿ, ਏਕਮੇਵ ਪਨ ਸਤਵਾਰਮ੍ਪਿ ਸਰੀਰਂ ਪਰਿਕ੍ਖਿਪਿਤ੍ਵਾ ਬਨ੍ਧਿਤੁਂ ਵਟ੍ਟਤਿ, ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ‘‘ਬਹੁਰਜ੍ਜੁਕ’’ਨ੍ਤਿ ਨ ਵਤ੍ਤਬ੍ਬਂ ‘‘ਵਟ੍ਟਤੀ’’ਤਿ ਵੁਤ੍ਤਤ੍ਤਾ, ਤਂ ਮੁਰਜਸਙ੍ਖਂ ਨ ਗਚ੍ਛਤੀਤਿ ਵੇਦਿਤਬ੍ਬਂ. ਮੁਰਜਞ੍ਹਿ ਨਾਨਾਵਣ੍ਣੇਹਿ ਸੁਤ੍ਤੇਹਿ ਮੁਰਜਵਟ੍ਟਿਸਣ੍ਠਾਨਂ ਵੇਠੇਤ੍ਵਾ ਕਤਂ, ਇਦਂ ਪਨ ਮੁਰਜਂ ਮਦ੍ਦਵੀਣਸਙ੍ਖਾਤਂ ਪਾਮਙ੍ਗਸਣ੍ਠਾਨਞ੍ਚ ਦਸਾਸੁ ਵਟ੍ਟਤਿ ‘‘ਕਾਯਬਨ੍ਧਨਸ੍ਸ ਦਸਾ ਜੀਰਨ੍ਤਿ; ਅਨੁਜਾਨਾਮਿ, ਭਿਕ੍ਖਵੇ, ਮੁਰਜਂ ਮਦ੍ਦਵੀਣ’’ਨ੍ਤਿ (ਚੂਲ਼ਵ. ੨੭੮) ਵੁਤ੍ਤਤ੍ਤਾ.

ਵਿਧੇਤਿ ਦਸਾਪਰਿਯੋਸਾਨੇ ਥਿਰਭਾਵਾਯ ਦਨ੍ਤਵਿਸਾਣਸੁਤ੍ਤਾਦੀਹਿ ਕਤ੍ਤਬ੍ਬੇ ਵਿਧੇ. ਅਟ੍ਠ ਮਙ੍ਗਲਾਨਿ ਨਾਮ ਸਙ੍ਖੋ ਚਕ੍ਕਂ ਪੁਣ੍ਣਕੁਮ੍ਭੋ ਗਯਾ ਸਿਰੀਵਚ੍ਛੋ ਅਙ੍ਕੁਸੋ ਧਜਂ ਸੋਵਤ੍ਤਿਕਨ੍ਤਿ ਵਦਨ੍ਤਿ. ਮਚ੍ਛਯੁਗਲ਼ਛਤ੍ਤਨਨ੍ਦਿਯਾਵਟ੍ਟਾਦਿਵਸੇਨਪਿ ਵਦਨ੍ਤਿ. ਪਰਿਚ੍ਛੇਦਲੇਖਾਮਤ੍ਤਨ੍ਤਿ ਦਨ੍ਤਾਦੀਹਿ ਕਤਵਿਧਸ੍ਸ ਉਭੋਸੁ ਕੋਟੀਸੁ ਕਤਪਰਿਚ੍ਛੇਦਰਾਜਿਮਤ੍ਤਂ.

‘‘ਉਜੁਕਮੇਵਾ’’ਤਿ ਵੁਤ੍ਤਤ੍ਤਾ ਚਤੁਰਸ੍ਸਾਦਿਸਣ੍ਠਾਨਾਪਿ ਅਞ੍ਜਨੀ ਵਙ੍ਕਗਤਿਕਾ ਨ ਵਟ੍ਟਤਿ. ਸਿਪਾਟਿਕਾਯਾਤਿ ¶ ਵਾਸਿਆਦਿਭਣ੍ਡਨਿਕ੍ਖਿਪਨਪਸਿਬ੍ਬਕੇ. ਆਰਕਣ੍ਟਕਂ ਨਾਮ ਪੋਤ੍ਥਕਾਦਿਅਅਸਙ੍ਖਾਰਣਤ੍ਥਂ ਕਤਦੀਘਮੁਖਸਤ੍ਥਕਨ੍ਤਿ ਵਦਨ੍ਤਿ. ‘‘ਭਮਕਾਰਾਨਂ ਦਾਰੁਆਦਿਲਿਖਨਸਤ੍ਥਕ’’ਨ੍ਤਿ ਕੇਚਿ. ਵਟ੍ਟਮਣਿਕਨ੍ਤਿ ਵਟ੍ਟਂ ਕਤ੍ਵਾ ਉਟ੍ਠਪੇਤਬ੍ਬਂ ਪੁਪ੍ਫੁਲ਼ਕਂ. ਅਞ੍ਞਨ੍ਤਿ ਇਮਿਨਾ ਪਿਲ਼ਕਾਦਿਂ ਸਙ੍ਗਣ੍ਹਾਤਿ. ਪਿਪ੍ਫਲਿਕੇਤਿ ਯਂ ਕਿਞ੍ਚਿ ਛੇਦਨਕੇ ਖੁਦ੍ਦਕਸਤ੍ਥੇ. ਵਲਿਤਕਨ੍ਤਿ ਨਖਚ੍ਛੇਦਨਕਾਲੇ ਦਲ਼੍ਹਗ੍ਗਹਣਤ੍ਥਂ ਵਲੀਹਿ ਯੁਤ੍ਤਮੇਵ ਕਰੋਨ੍ਤਿ. ਤਸ੍ਮਾ ਤਂ ਵਟ੍ਟਤੀਤਿ ਇਮਿਨਾ ਯਂ ਅਞ੍ਞਮ੍ਪਿ ਵਿਕਾਰਂ ਦਲ਼੍ਹੀਕਮ੍ਮਾਦਿਅਤ੍ਥਾਯ ਕਰੋਨ੍ਤਿ, ਨ ਵਣ੍ਣਮਟ੍ਠਤ੍ਥਾਯ, ਤਂ ਵਟ੍ਟਤੀਤਿ ਦੀਪਿਤਂ, ਤੇਨ ਚ ਕਤ੍ਤਰਦਣ੍ਡਕੋਟਿਯਂ ਅਞ੍ਞਮਞ੍ਞਮ੍ਪਿ ਘਟ੍ਟਨੇਨ ਸਦ੍ਦਨਿਚ੍ਛਰਣਤ੍ਥਾਯ ਕਤਂ ਅਯੋਵਲਯਾਦਿਕਂ ਸਂਯੁਤ੍ਤਮ੍ਪਿ ਕਪ੍ਪਿਯਤੋ ਉਪਪਨ੍ਨਂ ਹੋਤਿ. ਮਣ੍ਡਲਨ੍ਤਿ ਉਤ੍ਤਰਾਰਣਿਯਾ ਪਵੇਸਨਤ੍ਥਂ ਆਵਾਟਮਣ੍ਡਲਂ ਹੋਤਿ. ਉਜੁਕਮੇਵ ਬਨ੍ਧਿਤੁਨ੍ਤਿ ਸਮ੍ਬਨ੍ਧੋ, ਉਭੋਸੁ ਵਾ ਪਸ੍ਸੇਸੁ ਏਕਪਸ੍ਸੇ ਵਾਤਿ ਵਚਨਸੇਸੋ. ਵਾਸਿਦਣ੍ਡਸ੍ਸ ਉਭੋਸੁ ਪਸ੍ਸੇਸੁ ਦਣ੍ਡਕੋਟੀਨਂ ਅਚਲਨਤ੍ਥਂ ਬਨ੍ਧਿਤੁਨ੍ਤਿ ਅਤ੍ਥੋ.

ਆਮਣ੍ਡਸਾਰਕੇਤਿ ¶ ਆਮਲਕਫਲਾਨਿ ਪਿਸਿਤ੍ਵਾ ਤੇਨ ਕਕ੍ਕੇਨ ਕਤਤੇਲਭਾਜਨੇ. ਤਤ੍ਥ ਕਿਰ ਪਕ੍ਖਿਤ੍ਤਂ ਤੇਲਂ ਸੀਤਲਂ ਹੋਤਿ. ਭੂਮਤ੍ਥਰਣੇਤਿ ਕਟਸਾਰਾਦਿਮਯੇ ਪਰਿਕਮ੍ਮਕਤਾਯ ਭੂਮਿਯਾ ਅਤ੍ਥਰਿਤਬ੍ਬਅਤ੍ਥਰਣੇ. ਪਾਨੀਯਘਟੇਤਿ ਸਬ੍ਬਂ ਭਾਜਨਵਿਕਤਿਂ ਸਙ੍ਗਣ੍ਹਾਤਿ. ਸਬ੍ਬਂ…ਪੇ… ਵਟ੍ਟਤੀਤਿ ਯਥਾਵੁਤ੍ਤੇਸੁ ਮਞ੍ਚਾਦੀਸੁ ਇਤ੍ਥਿਪੁਰਿਸਰੂਪਮ੍ਪਿ ਵਟ੍ਟਤਿ ਤੇਲਭਾਜਨੇਸੁਯੇਵ ਇਤ੍ਥਿਪੁਰਿਸਰੂਪਾਨਂ ਪਟਿਕ੍ਖਿਤ੍ਤਤ੍ਤਾ, ਤੇਲਭਾਜਨੇਨ ਸਹ ਅਗਣੇਤ੍ਵਾ ਵਿਸੁਂ ਮਞ੍ਚਾਦੀਨਂ ਗਹਿਤਤ੍ਤਾ ਚਾਤਿ ਵਦਨ੍ਤਿ, ਕਿਞ੍ਚਾਪਿ ਵਦਨ੍ਤਿ, ਏਤੇਸਂ ਪਨ ਮਞ੍ਚਾਦੀਨਂ ਹਤ੍ਥੇਨ ਆਮਸਿਤਬ੍ਬਭਣ੍ਡਤ੍ਤਾ ਇਤ੍ਥਿਰੂਪਮੇਵੇਤ੍ਥ ਨ ਵਟ੍ਟਤੀਤਿ ਗਹੇਤਬ੍ਬਂ. ਅਞ੍ਞੇਸਨ੍ਤਿ ਸੀਮਸਾਮਿਕਾਨਂ. ਰਾਜਵਲ੍ਲਭੇਹੀਤਿ ਲਜ੍ਜੀਪੇਸਲਾਦੀਨਂ ਉਪੋਸਥਾਦਿਅਨ੍ਤਰਾਯਕਰਾ ਅਲਜ੍ਜਿਨੋ ਭਿਨ੍ਨਲਦ੍ਧਿਕਾ ਚ ਭਿਕ੍ਖੂ ਅਧਿਪ੍ਪੇਤਾ ਤੇਹਿ ਸਹ ਉਪੋਸਥਾਦਿਕਰਣਾਯੋਗਾ, ਤੇਨੇਵ ‘‘ਸੀਮਾਯਾ’’ਤਿ ਵੁਤ੍ਤਂ. ਤੇਸਂ ਲਜ੍ਜੀਪਰਿਸਾਤਿ ਤੇਸਂ ਸੀਮਾਸਾਮਿਕਾਨਂ ਅਨੁਬਲਂ ਦਾਤੁਂ ਸਮਤ੍ਥਾ ਲਜ੍ਜੀਪਰਿਸਾ. ਭਿਕ੍ਖੂਹਿ ਕਤਨ੍ਤਿ ਯਂ ਅਲਜ੍ਜੀਨਂ ਸੇਨਾਸਨਭੇਦਨਾਦਿਕਂ ਲਜ੍ਜੀਭਿਕ੍ਖੂਹਿ ਕਤਂ, ਸਬ੍ਬਞ੍ਚੇਤਂ ਸੁਕਤਮੇਵ ਅਲਜ੍ਜੀਨਿਗ੍ਗਹਤ੍ਥਾਯ ਪਵਤ੍ਤਿਤਬ੍ਬਤੋ.

੮੮. ਅਵਜ੍ਝਾਯਨ੍ਤੀਤਿ ਨੀਚਤੋ ਚਿਨ੍ਤੇਨ੍ਤਿ. ਉਜ੍ਝਾਯਨਤ੍ਥੋਤਿ ਭਿਕ੍ਖੁਨੋ ਥੇਯ੍ਯਕਮ੍ਮਨਿਨ੍ਦਨਤ੍ਥੋ ‘‘ਕਥਞ੍ਹਿ ਨਾਮ ਅਦਿਨ੍ਨਂ ਆਦਿਯਿਸ੍ਸਤੀ’’ਤਿ, ਨ ਪਨ ਦਾਰੁ-ਸਦ੍ਦਵਿਸੇਸਨਤ੍ਥੋ ਤਸ੍ਸ ਬਹੁਵਚਨਤ੍ਤਾ. ਵਚਨਭੇਦੇਤਿ ਏਕਵਚਨਬਹੁਵਚਨਾਨਂ ਭੇਦੇ. ਸਬ੍ਬਾਵਨ੍ਤਨ੍ਤਿ ਭਿਕ੍ਖੁਭਿਕ੍ਖੁਨੀਆਦਿਸਬ੍ਬਾਵਯਵਵਨ੍ਤਂ. ਬਿਮ੍ਬਿਸਾਰੋਤਿ ਤਸ੍ਸ ਨਾਮਨ੍ਤਿ ਏਤ੍ਥ ਬਿਮ੍ਬੀਤਿ ਸੁਵਣ੍ਣਂ. ਤਸ੍ਮਾ ਸਾਰਸੁਵਣ੍ਣਸਦਿਸਵਣ੍ਣਤਾਯ ‘‘ਬਿਮ੍ਬਿਸਾਰੋ’’ਤਿ ਵੁਚ੍ਚਤੀਤਿ ਵੇਦਿਤਬ੍ਬਂ. ਪੋਰਾਣਸਤ੍ਥਾਨੁਰੂਪਂ ਉਪ੍ਪਾਦਿਤੋ ਵੀਸਤਿਮਾਸਪ੍ਪਮਾਣਉਤ੍ਤਮਸੁਵਣ੍ਣਗ੍ਘਨਕੋ ਲਕ੍ਖਣਸਮ੍ਪਨ੍ਨੋ ਨੀਲਕਹਾਪਣੋਤਿ ਵੇਦਿਤਬ੍ਬੋ. ਰੁਦ੍ਰਦਾਮੇਨ ਨਾਮ ਕੇਨਚਿ ਉਪ੍ਪਾਦਿਤੋ ਰੁਦ੍ਰਦਾਮਕੋ. ਸੋ ਕਿਰ ਨੀਲਕਹਾਪਣਸ੍ਸ ਤਿਭਾਗਂ ਅਗ੍ਘਤਿ. ਯਸ੍ਮਿਂ ਪਨ ਦੇਸੇ ਨੀਲਕਹਾਪਣਾ ¶ ਨ ਸਨ੍ਤਿ, ਤਤ੍ਥਾਪਿ ਕਾਲ਼ਕਵਿਰਹਿਤਸ੍ਸ ਨਿਦ੍ਧਨ੍ਤਸੁਵਣ੍ਣਸ੍ਸ ਪਞ੍ਚਮਾਸਗ੍ਘਨਕੇਨ ਭਣ੍ਡੇਨ ਪਾਦਪਰਿਚ੍ਛੇਦੋ ਕਾਤਬ੍ਬੋ. ਤੇਨਾਤਿ ਨੀਲਕਹਾਪਣਸ੍ਸ ਚਤੁਤ੍ਥਭਾਗਭੂਤੇਨ. ਪਾਰਾਜਿਕਵਤ੍ਥੁਮ੍ਹਿ ਵਾਤਿਆਦਿ ਪਾਰਾਜਿਕਾਨਂ ਸਬ੍ਬਬੁਦ੍ਧੇਹਿ ਪਞ੍ਞਤ੍ਤਭਾਵੇਨ ਵੁਤ੍ਤਂ, ਸਙ੍ਘਾਦਿਸੇਸਾਦੀਸੁ ਪਨ ਇਤਰਾਪਤ੍ਤੀਸੁਪਿ ਤਬ੍ਬਤ੍ਥੂਸੁ ਚ ਨਾਨਤ੍ਤਂ ਨਤ੍ਥੇਵ, ਕੇਵਲਂ ਕੇਚਿ ਸਬ੍ਬਾਕਾਰੇਨ ਪਞ੍ਞਪੇਨ੍ਤਿ, ਕੇਚਿ ਏਕਦੇਸੇਨਾਤਿ ਏਤ੍ਤਕਮੇਵ ਵਿਸੇਸੋ. ਨ ਹਿ ਕਦਾਚਿਪਿ ਸਮ੍ਮਾਸਮ੍ਬੁਦ੍ਧਾ ਯਥਾਪਰਾਧਂ ਅਤਿਕ੍ਕਮ੍ਮ ਊਨਮਧਿਕਂ ਵਾ ਸਿਕ੍ਖਾਪਦਂ ਪਞ੍ਞਪੇਨ੍ਤਿ.

ਪਦਭਾਜਨੀਯਵਣ੍ਣਨਾ

੯੨. ਪੁਨਪਿ ¶ ‘‘ਆਗਨ੍ਤੁਕਾਮਾ’’ਤਿ ਵੁਤ੍ਤਤ੍ਤਾ ਚ ਸਬ੍ਬਥਾ ਮਨੁਸ੍ਸੇਹਿ ਅਨਿਵੁਤ੍ਥਪੁਬ੍ਬੇ ਅਭਿਨਵਮਾਪਿਤੇ, ‘‘ਪੁਨ ਨ ਪਵਿਸਿਸ੍ਸਾਮਾ’’ਤਿ ਨਿਰਾਲਯੇਹਿ ਪਰਿਚ੍ਚਤ੍ਤੇ ਚ ਗਾਮੇ ਗਾਮਵੋਹਾਰਾਭਾਵਾ ਗਾਮਪ੍ਪਵੇਸਨਾਪੁਚ੍ਛਨਾਦਿਕਿਚ੍ਚਂ ਨਤ੍ਥੀਤਿ ਵੇਦਿਤਬ੍ਬਂ. ਅਰਞ੍ਞਪਰਿਚ੍ਛੇਦਦਸ੍ਸਨਤ੍ਥਨ੍ਤਿ ਗਾਮਗਾਮੂਪਚਾਰੇਸੁ ਦਸ੍ਸਿਤੇਸੁ ਤਦਞ੍ਞਂ ਅਰਞ੍ਞਨ੍ਤਿ ਅਰਞ੍ਞਪਰਿਚ੍ਛੇਦੋ ਸਕ੍ਕਾ ਞਾਤੁਨ੍ਤਿ ਵੁਤ੍ਤਂ. ਮਾਤਿਕਾਯਂ ਪਨ ਗਾਮਗ੍ਗਹਣੇਨੇਵ ਗਾਮੂਪਚਾਰੋਪਿ ਗਹਿਤੋਤਿ ਦਟ੍ਠਬ੍ਬੋ. ਇਨ੍ਦਖੀਲੇਤਿ ਉਮ੍ਮਾਰੇ. ਅਰਞ੍ਞਸਙ੍ਖੇਪਂ ਗਚ੍ਛਤਿ ਤਥਾ ਅਭਿਧਮ੍ਮੇ ਵੁਤ੍ਤਤ੍ਤਾ. ਅਸਤਿਪਿ ਇਨ੍ਦਖੀਲੇ ਇਨ੍ਦਖੀਲਟ੍ਠਾਨਿਯਤ੍ਤਾ ‘‘ਵੇਮਜ੍ਝਮੇਵ ਇਨ੍ਦਖੀਲੋਤਿ ਵੁਚ੍ਚਤੀ’’ਤਿ ਵੁਤ੍ਤਂ. ਯਤ੍ਥ ਪਨ ਦ੍ਵਾਰਬਾਹਾਪਿ ਨਤ੍ਥਿ, ਤਤ੍ਥ ਪਾਕਾਰਵੇਮਜ੍ਝਮੇਵ ਇਨ੍ਦਖੀਲੋਤਿ ਗਹੇਤਬ੍ਬਂ. ਲੁਠਿਤ੍ਵਾਤਿ ਪਵਟ੍ਟਿਤ੍ਵਾ.

ਮਜ੍ਝਿਮਸ੍ਸ ਪੁਰਿਸਸ੍ਸ ਸੁਪ੍ਪਪਾਤੋ ਵਾਤਿਆਦਿ ਮਾਤੁਗਾਮਸ੍ਸ ਕਾਕੁਟ੍ਠਾਪਨਵਸੇਨ ਗਹੇਤਬ੍ਬਂ, ਨ ਬਲਦਸ੍ਸਨਵਸੇਨ ‘‘ਮਾਤੁਗਾਮੋ ਭਾਜਨਧੋਵਨਉਦਕਂ ਛਡ੍ਡੇਤੀ’’ਤਿ (ਪਾਰਾ. ਅਟ੍ਠ. ੧.੯੨) ਉਪਰਿ ਵੁਚ੍ਚਮਾਨਤ੍ਤਾ, ਤੇਨੇਵ ‘‘ਲੇਡ੍ਡੁਪਾਤੋ’’ਤਿ ਅਵਤ੍ਵਾ ਸੁਪ੍ਪਪਾਤੋਤਿਆਦਿ ਵੁਤ੍ਤਂ. ਕੁਰੁਨ੍ਦਟ੍ਠਕਥਾਯਂ ਮਹਾਪਚ੍ਚਰਿਯਞ੍ਚ ਘਰੂਪਚਾਰੋਵ ਗਾਮੋਤਿ ਅਧਿਪ੍ਪਾਯੇਨ ‘‘ਘਰੂਪਚਾਰੇ ਠਿਤਸ੍ਸ ਲੇਡ੍ਡੁਪਾਤੋ ਗਾਮੂਪਚਾਰੋ’’ਤਿ ਵੁਤ੍ਤਂ. ਕਤਪਰਿਕ੍ਖੇਪੋਤਿ ਇਮਿਨਾ ਪਰਿਕ੍ਖੇਪਤੋ ਬਹਿ ਉਪਚਾਰੋ ਨ ਗਹੇਤਬ੍ਬੋਤਿ ਦਸ੍ਸੇਤਿ. ਸੁਪ੍ਪਮੁਸਲਪਾਤੋਪਿ ਅਪਰਿਕ੍ਖਿਤ੍ਤਗੇਹਸ੍ਸੇਵ, ਸੋ ਚ ਯਤੋ ਪਹੋਤਿ, ਤਤ੍ਥੇਵ ਗਹੇਤਬ੍ਬੋ, ਅਪ੍ਪਹੋਨਟ੍ਠਾਨੇ ਪਨ ਵਿਜ੍ਜਮਾਨਟ੍ਠਾਨਮੇਵ ਗਹੇਤਬ੍ਬਂ. ਯਸ੍ਸ ਪਨ ਘਰਸ੍ਸ ਸਮਨ੍ਤਤੋ ਪਾਕਾਰਾਦੀਹਿ ਪਰਿਕ੍ਖੇਪੋ ਕਤੋ ਹੋਤਿ, ਤਤ੍ਥ ਸੋਵ ਪਰਿਕ੍ਖੇਪੋ ਘਰੂਪਚਾਰੋਤਿ ਗਹੇਤਬ੍ਬਂ.

ਪੁਬ੍ਬੇ ਵੁਤ੍ਤਨਯੇਨਾਤਿ ਪਰਿਕ੍ਖਿਤ੍ਤਗਾਮੇ ਵੁਤ੍ਤਨਯੇਨ. ਸਙ੍ਕਰੀਯਤੀਤਿ ਮਿਸ੍ਸੀਯਤਿ. ਵਿਕਾਲੇ ਗਾਮਪ੍ਪਵੇਸਨੇ ‘‘ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਮਨ੍ਤਸ੍ਸ ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਂ ਓਕ੍ਕਮਨ੍ਤਸ੍ਸ ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ (ਪਾਚਿ. ੫੧੩) ਵੁਤ੍ਤਤ੍ਤਾ ¶ ਗਾਮਗਾਮੂਪਚਾਰਾਨਂ ਅਸਙ੍ਕਰਤਾ ਇਚ੍ਛਿਤਬ੍ਬਾਤਿ ਆਹ ਅਸਙ੍ਕਰਤੋ ਚਾਤਿਆਦਿ. ਕੇਚਿ ਪਨੇਤ੍ਥ ਪਾਲ਼ਿਯਂ ‘‘ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਂ ਓਕ੍ਕਮਨ੍ਤਸ੍ਸਾਤਿ ਇਦਂ ਪਰਿਕ੍ਖੇਪਾਰਹਟ੍ਠਾਨਂ ਸਨ੍ਧਾਯ ਵੁਤ੍ਤਂ, ਨ ਤਤੋ ਪਰਂ ਏਕਲੇਡ੍ਡੁਪਾਤਪਰਿਚ੍ਛਿਨ੍ਨਂ ਉਪਚਾਰਂ ¶ . ਤਸ੍ਮਾ ਪਰਿਕ੍ਖੇਪਾਰਹਟ੍ਠਾਨਸਙ੍ਖਾਤਂ ਗਾਮਂ ਓਕ੍ਕਮਨ੍ਤਸ੍ਸੇਵ ਆਪਤ੍ਤਿ, ਨ ਉਪਚਾਰ’’ਨ੍ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ‘‘ਘਰੂਪਚਾਰੇ ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤਬ੍ਭਨ੍ਤਰਂ ਗਾਮੋ ਨਾਮ. ਤਤੋ ਅਞ੍ਞਸ੍ਸ ਲੇਡ੍ਡੁਪਾਤਸ੍ਸ ਅਬ੍ਭਨ੍ਤਰਂ ਗਾਮੂਪਚਾਰੋ ਨਾਮਾ’’ਤਿ (ਪਾਰਾ. ਅਟ੍ਠ. ੧.੯੨) ਇਧੇਵ ਅਟ੍ਠਕਥਾਯਂ ਵੁਤ੍ਤਤ੍ਤਾ. ਵਿਕਾਲੇ ਗਾਮਪ੍ਪਵੇਸਨਸਿਕ੍ਖਾਪਦਟ੍ਠਕਥਾਯਞ੍ਹਿ ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰੋ ਅਦਿਨ੍ਨਾਦਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ (ਪਾਚਿ. ਅਟ੍ਠ. ੫੧੨) ਅਯਮੇਵ ਨਯੋ ਅਤਿਦਿਸਿਤੋ. ਤੇਨੇਵ ਮਾਤਿਕਾਟ੍ਠਕਥਾਯਮ੍ਪਿ ‘‘ਯ੍ਵਾਯਂ ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰੋ ਦਸ੍ਸਿਤੋ, ਤਸ੍ਸ ਵਸੇਨ ਵਿਕਾਲੇ ਗਾਮਪ੍ਪਵੇਸਨਾਦੀਸੁ ਆਪਤ੍ਤਿ ਪਰਿਚ੍ਛਿਨ੍ਦਿਤਬ੍ਬਾ’’ਤਿ (ਕਙ੍ਖਾ. ਅਟ੍ਠ. ਦੁਤਿਯਪਾਰਾਜਿਕਵਣ੍ਣਨਾ) ਵੁਤ੍ਤਂ, ਤਸ੍ਮਾ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਮਨ੍ਤਸ੍ਸ, ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਘਰੂਪਚਾਰਤੋ ਪਟ੍ਠਾਯ ਦੁਤਿਯਲੇਡ੍ਡੁਪਾਤਸਙ੍ਖਾਤਂ ਗਾਮੂਪਚਾਰਂ ਓਕ੍ਕਮਨ੍ਤਸ੍ਸ ਵਿਕਾਲੇ ਗਾਮਪ੍ਪਵੇਸਨਾਪਤ੍ਤਿ ਹੋਤਿ, ਮਾਤਿਕਾਯਞ੍ਚ ਵਿਕਾਲੇ ਗਾਮਂ ਪਵਿਸੇਯ੍ਯਾਤਿ ਗਾਮਗ੍ਗਹਣੇਨੇਵ ਗਾਮੂਪਚਾਰੋਪਿ ਗਹਿਤੋਤਿ ਵੇਦਿਤਬ੍ਬਂ. ਵਿਕਾਲੇ ਗਾਮਪ੍ਪਵੇਸਨਾਦੀਸੂਤਿ ਆਦਿ-ਸਦ੍ਦੇਨ ਘਰਘਰੂਪਚਾਰਾਦੀਸੁ ਠਿਤਾਨਂ ਉਪ੍ਪਨ੍ਨਲਾਭਭਾਜਨਾਦਿਂ ਸਙ੍ਗਣ੍ਹਾਤਿ.

ਨਿਕ੍ਖਮਿਤ੍ਵਾ ਬਹਿ ਇਨ੍ਦਖੀਲਾਤਿ ਇਨ੍ਦਖੀਲਤੋ ਬਹਿ ਨਿਕ੍ਖਮਿਤ੍ਵਾ ਠਿਤਂ ਯਂ ਠਾਨਂ ਸਬ੍ਬਮੇਤਂ ਅਰਞ੍ਞਨ੍ਤਿ ਯੋਜਨਾ. ਆਚਰਿਯਧਨੁ ਨਾਮ ਪਕਤਿਹਤ੍ਥੇਨ ਨਵਵਿਦਤ੍ਥਿਪਮਾਣਂ, ਜਿਯਾਯ ਪਨ ਆਰੋਪਿਤਾਯ ਸਤ੍ਤਟ੍ਠਵਿਦਤ੍ਥਿਮਤ੍ਤਨ੍ਤਿ ਵਦਨ੍ਤਿ.

ਕਪ੍ਪਿਯਨ੍ਤਿ ਅਨੁਰੂਪਵਸੇਨ ਵੁਤ੍ਤਂ ਅਕਪ੍ਪਿਯਸ੍ਸਾਪਿ ਅਪ੍ਪਟਿਗ੍ਗਹਿਤਸ੍ਸ ਪਰਿਭੋਗੇ ਪਾਚਿਤ੍ਤਿਯਤ੍ਤਾ. ਪਰਿਚ੍ਚਾਗਾਦਿਮ੍ਹਿ ਅਕਤੇ ‘‘ਇਦਂ ਮਯ੍ਹਂ ਸਨ੍ਤਕ’’ਨ੍ਤਿ ਵਤ੍ਥੁਸਾਮਿਨਾ ਅਵਿਦਿਤਮ੍ਪਿ ਪਰਿਗ੍ਗਹਿਤਮੇਵ ਬਾਲੁਮ੍ਮਤ੍ਤਾਦੀਨਂ ਸਨ੍ਤਕਂ ਵਿਯ, ਤਾਦਿਸਂ ਅਵਹਰਨ੍ਤੋਪਿ ਞਾਤਕਾਦੀਹਿ ਪਚ੍ਛਾ ਞਤ੍ਵਾ ਵਤ੍ਥੁਸਾਮਿਨਾ ਚ ਅਨੁਬਨ੍ਧਿਤਬ੍ਬਤੋ ਪਾਰਾਜਿਕੋਵ ਹੋਤਿ. ਯਸ੍ਸ ਵਸੇਨ ਪੁਰਿਸੋ ਥੇਨੋ ਹੋਤਿ, ਤਂ ਥੇਯ੍ਯਨ੍ਤਿ ਆਹ ‘‘ਅਵਹਰਣਚਿਤ੍ਤਸ੍ਸੇਤਂ ਅਧਿਵਚਨ’’ਨ੍ਤਿ. ਪਪਞ੍ਚਸਙ੍ਖਾਤਿ ਤਣ੍ਹਾਮਾਨਦਿਟ੍ਠਿਸਙ੍ਖਾਤਾ ਪਪਞ੍ਚਕੋਟ੍ਠਾਸਾ. ਏਕੋ ਚਿਤ੍ਤਕੋਟ੍ਠਾਸੋਤਿ ਠਾਨਾਚਾਵਨਪਯੋਗਸਮੁਟ੍ਠਾਪਕੋ ਏਕੋ ਚਿਤ੍ਤਕੋਟ੍ਠਾਸੋਤਿ ਅਤ੍ਥੋ.

ਅਭਿਯੋਗਵਸੇਨਾਤਿ ਅਟ੍ਟਕਰਣਵਸੇਨ. ਸਵਿਞ੍ਞਾਣਕੇਨੇਵਾਤਿ ਇਦਂ ਸਵਿਞ੍ਞਾਣਕਾਨਞ੍ਞੇਵ ਆਵੇਣਿਕਵਿਨਿਚ੍ਛਯਂ ਸਨ੍ਧਾਯ ਵੁਤ੍ਤਂ. ਪਾਣੋ ਅਪਦਨ੍ਤਿਆਦੀਸੁ ਹਿ ‘‘ਪਦਸਾ ਨੇਸ੍ਸਾਮੀ’’ਤਿ ਪਠਮਂ ਪਾਦਂ ¶ ਸਙ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾਤਿਆਦਿਨਾ ਪਾਲ਼ਿਯਂ (ਪਾਰਾ. ੧੧੧), ਭਿਕ੍ਖੁ ਦਾਸਂ ਦਿਸ੍ਵਾ ਸੁਖਦੁਕ੍ਖਂ ਪੁਚ੍ਛਿਤ੍ਵਾ ¶ ਵਾ ਅਪੁਚ੍ਛਿਤ੍ਵਾ ਵਾ ‘‘ਗਚ੍ਛ, ਪਲਾਯਿਤ੍ਵਾ ਸੁਖਂ ਜੀਵਾ’’ਤਿ ਵਦਤਿ, ਸੋ ਚੇ ਪਲਾਯਤਿ, ਦੁਤਿਯਪਦਵਾਰੇ ਪਾਰਾਜਿਕਨ੍ਤਿਆਦਿਨਾ (ਪਾਰਾ. ਅਟ੍ਠ. ੧.੧੧੪) ਅਟ੍ਠਕਥਾਯਞ੍ਚ ਯੋ ਸਵਿਞ੍ਞਾਣਕਾਨਞ੍ਞੇਵ ਆਵੇਣਿਕੋ ਵਿਨਿਚ੍ਛਯੋ ਵੁਤ੍ਤੋ, ਸੋ ਆਰਾਮਾਦਿਅਵਿਞ੍ਞਾਣਕੇਸੁ ਨ ਲਬ੍ਭਤੀਤਿ ਤਾਦਿਸਂ ਸਨ੍ਧਾਯ ‘‘ਸਵਿਞ੍ਞਾਣਕੇਨੇਵਾ’’ਤਿ ਵੁਤ੍ਤਂ. ਯੋ ਪਨ ਵਿਨਿਚ੍ਛਯੋ ਆਰਾਮਾਦਿਅਵਿਞ੍ਞਾਣਕੇਸੁ ਲਬ੍ਭਤਿ, ਸੋ ਯਸ੍ਮਾ ਸਵਿਞ੍ਞਾਣਕੇਸੁ ਅਲਬ੍ਭਨਕੋ ਨਾਮ ਨਤ੍ਥਿ, ਤਸ੍ਮਾ ਵੁਤ੍ਤਂ ‘‘ਨਾਨਾਭਣ੍ਡਵਸੇਨ ਸਵਿਞ੍ਞਾਣਕਾਵਿਞ੍ਞਾਣਕਮਿਸ੍ਸਕੇਨਾ’’ਤਿ. ਸਵਿਞ੍ਞਾਣਕੇਨ ਚ ਅਵਿਞ੍ਞਾਣਕੇਨ ਚਾਤਿ ਅਤ੍ਥੋ. ਯਸ੍ਮਾ ਚੇਤ੍ਥ ਅਵਿਞ੍ਞਾਣਕੇਨੇਵ ਆਦਿਯਨਾਦੀਨਿ ਛਪਿ ਪਦਾਨਿ ਨ ਸਕ੍ਕਾ ਯੋਜੇਤੁਂ ਇਰਿਯਾਪਥਵਿਕੋਪਨਸ੍ਸ ਸਵਿਞ੍ਞਾਣਕਵਸੇਨੇਵ ਯੋਜੇਤਬ੍ਬਤੋ, ਤਸ੍ਮਾ ‘‘ਅਵਿਞ੍ਞਾਣਕੇਨੇਵਾ’’ਤਿ ਤਤਿਯਂ ਪਕਾਰਂ ਨ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਆਰਾਮਨ੍ਤਿ ਇਦਂ ਉਪਲਕ੍ਖਣਮਤ੍ਤਂ ਦਾਸਾਦਿਸਵਿਞ੍ਞਾਣਕਸ੍ਸਾਪਿ ਇਧ ਸਙ੍ਗਹੇਤਬ੍ਬਤੋ, ਨਾਨਾਭਣ੍ਡਵਸੇਨ ਹੇਤ੍ਥ ਯੋਜਨਾ ਦਸ੍ਸਿਯਤਿ. ਪਰਿਕਪ੍ਪਿਤਟ੍ਠਾਨਨ੍ਤਿ ਪਰਿਕਪ੍ਪਿਤੋਕਾਸਂ. ਸੁਙ੍ਕਘਾਤਨ੍ਤਿ ਏਤ੍ਥ ਮਗ੍ਗਂ ਗਚ੍ਛਨ੍ਤੇਹਿ ਸਤ੍ਥਿਕੇਹਿ ਅਤ੍ਤਨਾ ਨੀਯਮਾਨਭਣ੍ਡਤੋ ਰਞ੍ਞੋ ਦਾਤਬ੍ਬਭਾਗੋ ਸੁਙ੍ਕੋ ਨਾਮ, ਸੋ ਏਤ੍ਥ ਹਞ੍ਞਤਿ ਅਦਤ੍ਵਾ ਗਚ੍ਛਨ੍ਤੇਹਿ ਅਵਹਰੀਯਤਿ, ਤਂ ਵਾ ਹਨ੍ਤਿ ਏਤ੍ਥ ਰਾਜਪੁਰਿਸਾ ਅਦਦਨ੍ਤਾਨਂ ਸਨ੍ਤਕਂ ਬਲਕ੍ਕਾਰੇਨਾਤਿ ਸੁਙ੍ਕਘਾਤੋ, ‘‘ਏਤ੍ਥ ਪਵਿਟ੍ਠੇਹਿ ਸੁਙ੍ਕੋ ਦਾਤਬ੍ਬੋ’’ਤਿ ਰੁਕ੍ਖਪਬ੍ਬਤਾਦਿਸਞ੍ਞਾਣੇਨ ਨਿਯਮਿਤਪ੍ਪਦੇਸਸ੍ਸੇਤਂ ਅਧਿਵਚਨਂ.

ਪਞ੍ਚਵੀਸਤਿਅਵਹਾਰਕਥਾਵਣ੍ਣਨਾ

ਕਤ੍ਥਚੀਤਿ ਏਕਿਸ੍ਸਾ ਅਟ੍ਠਕਥਾਯਂ. ਏਕਂ ਪਞ੍ਚਕਂ ਦਸ੍ਸਿਤਨ੍ਤਿ ‘‘ਪਰਪਰਿਗ੍ਗਹਿਤਞ੍ਚ ਹੋਤਿ, ਪਰਪਰਿਗ੍ਗਹਿਤਸਞ੍ਞੀ ਚ, ਗਰੁਕੋ ਚ ਹੋਤਿ ਪਰਿਕ੍ਖਾਰੋ ਪਞ੍ਚਮਾਸਕੋ ਵਾ ਅਤਿਰੇਕਪਞ੍ਚਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ, ਠਾਨਾ ਚਾਵੇਤੀ’’ਤਿ (ਪਾਰਾ. ੧੨੨) ਵੁਤ੍ਤਪਞ੍ਚਅਵਹਾਰਙ੍ਗਾਨਿ ਏਕਂ ਪਞ੍ਚਕਨ੍ਤਿ ਦਸ੍ਸਿਤਂ. ਦ੍ਵੇ ਪਞ੍ਚਕਾਨਿ ਦਸ੍ਸਿਤਾਨੀਤਿ ‘‘ਛਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਪਾਰਾਜਿਕਸ੍ਸ. ਨ ਚ ਸਕਸਞ੍ਞੀ, ਨ ਚ ਵਿਸ੍ਸਾਸਗ੍ਗਾਹੀ, ਨ ਚ ਤਾਵਕਾਲਿਕਂ, ਗਰੁਕੋ ਚ ਹੋਤਿ ਪਰਿਕ੍ਖਾਰੋ ਪਞ੍ਚਮਾਸਕੋ ਵਾ ਅਤਿਰੇਕਪਞ੍ਚਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ, ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸਾ’’ਤਿ (ਪਾਰਾ. ੧੨੫) ਏਵਂ ਵੁਤ੍ਤੇਸੁ ਛਸੁ ਪਦੇਸੁ ਏਕਂ ਅਪਨੇਤ੍ਵਾ ਸੇਸਾਨਿ ¶ ਪਞ੍ਚ ਪਦਾਨਿ ਏਕਂ ਪਞ੍ਚਕਂ ਕਤ੍ਵਾ ਹੇਟ੍ਠਾ ਵੁਤ੍ਤਪਞ੍ਚਕਞ੍ਚ ਗਹੇਤ੍ਵਾ ਦ੍ਵੇ ਪਞ੍ਚਕਾਨਿ ਦਸ੍ਸਿਤਾਨਿ. ਏਤ੍ਥ ਪਨਾਤਿ ਪਞ੍ਚਹਾਕਾਰੇਹੀਤਿਆਦੀਸੁ. ਸਬ੍ਬੇਹਿਪਿ ਪਦੇਹੀਤਿ ਪਰਪਰਿਗ੍ਗਹਿਤਞ੍ਚ ਹੋਤੀਤਿਆਦੀਹਿ ਸਬ੍ਬੇਹਿ ਪਞ੍ਚਹਿ ਪਦੇਹਿ.

ਪਞ੍ਚਨ੍ਨਂ ¶ ਅਵਹਾਰਾਨਂ ਸਮੂਹੋ ਪਞ੍ਚਕਂ. ਸਕੋ ਹਤ੍ਥੋ ਸਹਤ੍ਥੋ, ਤੇਨ ਨਿਬ੍ਬਤ੍ਤੋ, ਤਸ੍ਸ ਵਾ ਸਮ੍ਬਨ੍ਧੀਤਿ ਸਾਹਤ੍ਥਿਕੋ, ਅਵਹਾਰੋ. ਸਾਹਤ੍ਥਿਕਾਦਿ ਪਞ੍ਚਕਂ ਸਾਹਤ੍ਥਿਕਪਞ੍ਚਕਨ੍ਤਿਆਦਿਪਦਵਸੇਨ ਨਾਮਲਾਭੋ ਦਟ੍ਠਬ੍ਬੋ. ਏਵਂ ਸੇਸੇਸੁਪਿ. ਤਤਿਯਪਞ੍ਚਮੇਸੁ ਪਞ੍ਚਕੇਸੂਤਿ ਸਾਹਤ੍ਥਿਕਪਞ੍ਚਕਥੇਯ੍ਯਾਵਹਾਰਪਞ੍ਚਕੇਸੁ. ਲਬ੍ਭਮਾਨਪਦਵਸੇਨਾਤਿ ਸਾਹਤ੍ਥਿਕਪਞ੍ਚਕੇ ਲਬ੍ਭਮਾਨਸ੍ਸ ਨਿਸ੍ਸਗ੍ਗਿਯਾਵਹਾਰਪਦਸ੍ਸ ਵਸੇਨ, ਥੇਯ੍ਯਾਵਹਾਰਪਞ੍ਚਕੇ ਲਬ੍ਭਮਾਨਸ੍ਸ ਪਰਿਕਪ੍ਪਾਵਹਾਰਪਦਸ੍ਸ ਚ ਵਸੇਨ ਯੋਜੇਤਬ੍ਬਨ੍ਤਿ ਅਤ੍ਥੋ.

ਨਿਸ੍ਸਗ੍ਗਿਯੋ ਨਾਮ…ਪੇ… ਪਾਰਾਜਿਕਸ੍ਸਾਤਿ ਇਮਿਨਾ ਬਹਿਸੁਙ੍ਕਘਾਤਪਾਤਨਂ ਨਿਸ੍ਸਗ੍ਗਿਯਪਯੋਗੋਤਿ ਦਸ੍ਸੇਤਿ. ‘‘ਹਤ੍ਥੇ ਭਾਰਂ ਥੇਯ੍ਯਚਿਤ੍ਤੋ ਭੂਮਿਯਂ ਨਿਕ੍ਖਿਪਤਿ, ਆਪਤ੍ਤਿ ਪਾਰਾਜਿਕਸ੍ਸਾ’’ਤਿ (ਪਾਰਾ. ੧੦੧) ਵੁਤ੍ਤਤ੍ਤਾ ਪਨ ਸੁਦ੍ਧਚਿਤ੍ਤੇਨ ਗਹਿਤਪਰਭਣ੍ਡਸ੍ਸ ਥੇਯ੍ਯਚਿਤ੍ਤੇਨ ਗੁਮ੍ਬਾਦਿਪਟਿਚ੍ਛਨ੍ਨਟ੍ਠਾਨੇ ਖਿਪਨਮ੍ਪਿ ਇਮਸ੍ਮਿਂ ਨਿਸ੍ਸਗ੍ਗਿਯਪਯੋਗੇ ਸਙ੍ਗਯ੍ਹਤੀਤਿ ਦਟ੍ਠਬ੍ਬਂ. ਕਿਰਿਯਾਸਿਦ੍ਧਿਤੋ ਪੁਰੇਤਰਮੇਵ ਪਾਰਾਜਿਕਾਪਤ੍ਤਿਸਙ੍ਖਾਤਂ ਅਤ੍ਥਂ ਸਾਧੇਤੀਤਿ ਅਤ੍ਥਸਾਧਕੋ. ਅਥ ਵਾ ਅਤ੍ਤਨੋ ਵਤ੍ਤਮਾਨਕ੍ਖਣੇ ਅਵਿਜ੍ਜਮਾਨਮ੍ਪਿ ਕਿਰਿਯਾਸਿਦ੍ਧਿਸਙ੍ਖਾਤਂ ਅਤ੍ਥਂ ਅਵਸ੍ਸਂ ਆਪਤ੍ਤਿਂ ਸਾਧੇਤੀਤਿਪਿ ਅਤ੍ਥਸਾਧਕੋ. ਅਸੁਕਂ ਨਾਮ ਭਣ੍ਡਂ ਯਦਾ ਸਕ੍ਕੋਸੀਤਿ ਇਦਂ ਨਿਦਸ੍ਸਨਮਤ੍ਤਂ ਪਰਸ੍ਸ ਤੇਲਕੁਮ੍ਭਿਯਾ ਉਪਾਹਨਾਦੀਨਂ ਨਿਕ੍ਖੇਪਪਯੋਗਸ੍ਸਾਪਿ ਅਤ੍ਥਸਾਧਕਤ੍ਤਾ. ਤਥਾ ਹਿ ਵੁਤ੍ਤਂ ਮਾਤਿਕਾਟ੍ਠਕਥਾਯਂ –

‘‘ਅਤ੍ਥਸਾਧਕੋ ਨਾਮ ‘ਅਸੁਕਸ੍ਸ ਭਣ੍ਡਂ ਯਦਾ ਸਕ੍ਕੋਤਿ, ਤਦਾ ਤਂ ਅਵਹਰਾ’ਤਿ ਅਞ੍ਞਂ ਆਣਾਪੇਤਿ. ਤਤ੍ਥ ਸਚੇ ਪਰੋ ਅਨਨ੍ਤਰਾਯਿਕੋ ਹੁਤ੍ਵਾ ਤਂ ਅਵਹਰਤਿ, ਆਣਾਪਕਸ੍ਸ ਆਣਤ੍ਤਿਕ੍ਖਣੇਯੇਵ ਪਾਰਾਜਿਕਂ. ਪਰਸ੍ਸ ਵਾ ਪਨ ਤੇਲਕੁਮ੍ਭਿਯਾ ਪਾਦਗ੍ਘਨਕਤੇਲਂ ਅਵਸ੍ਸਂ ਪਿਵਨਕਾਨਿ ਉਪਾਹਨਾਦੀਨਿ ਪਕ੍ਖਿਪਤਿ, ਹਤ੍ਥਤੋ ਮੁਤ੍ਤਮਤ੍ਤੇਯੇਵ ਪਾਰਾਜਿਕ’’ਨ੍ਤਿ (ਕਙ੍ਖਾ. ਅਟ੍ਠ. ਦੁਤਿਯਪਾਰਾਜਿਕਵਣ੍ਣਨਾ).

ਇਮਸ੍ਸ ¶ ਅਤ੍ਥਸਾਧਕਸ੍ਸ ਆਣਤ੍ਤਿਯਾ ਚ ਕੋ ਵਿਸੇਸੋਤਿ? ਤਙ੍ਖਣਞ੍ਞੇਵ ਗਹਣੇ ਨਿਯੁਞ੍ਜਨਂ ਆਣਤ੍ਤਿਕਪਯੋਗੋ, ਕਾਲਨ੍ਤਰੇਨ ਗਹਣਤ੍ਥਂ ਨਿਯੋਗੋ ਅਤ੍ਥਸਾਧਕੋਤਿ ਅਯਂ ਨੇਸਂ ਵਿਸੇਸੋ. ਤੇਨੇਵਾਹ ‘‘ਅਸੁਕਂ ਨਾਮ ਭਣ੍ਡਂ ਯਦਾ ਸਕ੍ਕੋਸੀ’’ਤਿਆਦਿ. ਧੁਰਨਿਕ੍ਖੇਪੋ ਪਨ ਉਪਨਿਕ੍ਖਿਤ੍ਤਭਣ੍ਡਵਸੇਨ ਵੇਦਿਤਬ੍ਬੋਤਿ ਇਦਂ ਨਿਦਸ੍ਸਨਮਤ੍ਤਂ, ਆਰਾਮਾਭਿਯੁਞ੍ਜਨਾਦੀਸੁਪਿ ਤਾਵਕਾਲਿਕਭਣ੍ਡਦੇਯ੍ਯਾਨਂ ਅਦਾਨੇਪਿ ਏਸੇਵ ਨਯੋ. ਭਣ੍ਡਗ੍ਗਹਣਪ੍ਪਯੋਗਤੋ ਆਣਤ੍ਤਿਯਾ ਪੁਬ੍ਬਤ੍ਤਾ ਆਹ ‘‘ਆਣਤ੍ਤਿਵਸੇਨ ਪੁਬ੍ਬਪਯੋਗੋ ਵੇਦਿਤਬ੍ਬੋ’’ਤਿ. ਪਯੋਗੇਨ ਸਹ ਵਤ੍ਤਮਾਨੋ ਅਵਹਾਰੋ ਸਹਪਯੋਗੋਤਿ ਆਹ ‘‘ਠਾਨਾਚਾਵਨਵਸੇਨਾ’’ਤਿ, ਇਦਞ੍ਚ ਨਿਦਸ੍ਸਨਮਤ੍ਤਂ ਖੀਲਸਙ੍ਕਮਨਾਦੀਸੁਪਿ ਅਸਤਿ ਠਾਨਾਚਾਵਨੇ ਸਹਪਯੋਗਤ੍ਤਾ. ਵੁਤ੍ਤਞ੍ਹਿ ¶ ਮਾਤਿਕਾਟ੍ਠਕਥਾਯਂ ‘‘ਠਾਨਾਚਾਵਨਵਸੇਨ ਖੀਲਾਦੀਨਿ ਸਙ੍ਕਾਮੇਤ੍ਵਾ ਖੇਤ੍ਤਾਦਿਗ੍ਗਹਣਵਸੇਨ ਚ ਸਹਪਯੋਗੋ ਵੇਦਿਤਬ੍ਬੋ’’ਤਿ (ਕਙ੍ਖਾ. ਅਟ੍ਠ. ਦੁਤਿਯਪਾਰਾਜਿਕਵਣ੍ਣਨਾ).

ਤੁਲਯਿਤ੍ਵਾਤਿ ਉਪਪਰਿਕ੍ਖਿਤ੍ਵਾ. ਸਾਮੀਚੀਤਿ ਵਤ੍ਤਂ. ਸਕਸਞ੍ਞਾਯ ਅਦੇਨ੍ਤਸ੍ਸ ਆਪਤ੍ਤਿ ਨਤ੍ਥੀਤਿ ਵਦਨ੍ਤਿ. ਸਮ੍ਮਦ੍ਦੋਤਿ ਨਿਵਿਦ੍ਧਤਾਸਙ੍ਖੋਭੋ. ਭਟ੍ਠੇ ਜਨਕਾਯੇਤਿ ਅਪਗਤੇ ਜਨਸਮੂਹੇ. ਅਤ੍ਤਨੋ ਸਨ੍ਤਕਂ ਕਤ੍ਵਾ ਏਤਸ੍ਸੇਵ ਭਿਕ੍ਖੁਨੋ ਦੇਹੀਤਿ ਇਦਂ ਉਭਿਨ੍ਨਮ੍ਪਿ ਕੁਕ੍ਕੁਚ੍ਚਵਿਨੋਦਨਤ੍ਥਂ ਵੁਤ੍ਤਂ. ਅਵਹਾਰਕਸ੍ਸ ਹਿ ‘‘ਮਯਾ ਸਹਤ੍ਥੇਨ ਨ ਦਿਨ੍ਨਂ, ਭਣ੍ਡਦੇਯ੍ਯਂ ਏਤ’’ਨ੍ਤਿ ਕੁਕ੍ਕੁਚ੍ਚਂ ਉਪ੍ਪਜ੍ਜੇਯ੍ਯ, ਇਤਰਸ੍ਸ ਚ ‘‘ਮਯਾ ਪਠਮਂ ਧੁਰਨਿਕ੍ਖੇਪਂ ਕਤ੍ਵਾ ਪਚ੍ਛਾ ਅਦਿਨ੍ਨਂ ਗਹਿਤ’’ਨ੍ਤਿ ਕੁਕ੍ਕੁਚ੍ਚਂ ਉਪ੍ਪਜ੍ਜੇਯ੍ਯਾਤਿ.

ਸਮਗ੍ਘਨ੍ਤਿ ਅਪ੍ਪਗ੍ਘਂ. ਦਾਰੁਅਤ੍ਥਂ ਫਰਤੀਤਿ ਦਾਰੂਹਿ ਕਤ੍ਤਬ੍ਬਕਿਚ੍ਚਂ ਸਾਧੇਤਿ. ਏਕਦਿਵਸਂ ਦਨ੍ਤਕਟ੍ਠਚ੍ਛੇਦਨਾਦਿਨਾ ਯਾ ਅਯਂ ਅਗ੍ਘਹਾਨਿ ਵੁਤ੍ਤਾ, ਸਾ ਸਬ੍ਬਾ ਭਣ੍ਡਸਾਮਿਨਾ ਕਿਣਿਤ੍ਵਾ ਗਹਿਤਮੇਵ ਸਨ੍ਧਾਯ ਵੁਤ੍ਤਾ. ਸਬ੍ਬਂ ਪਨੇਤਂ ਅਟ੍ਠਕਥਾਚਰਿਯਪ੍ਪਮਾਣੇਨ ਵੇਦਿਤਬ੍ਬਂ. ਪਾਸਾਣਞ੍ਚ ਸਕ੍ਖਰਞ੍ਚ ਪਾਸਾਣਸਕ੍ਖਰਂ.

ਅਕ੍ਖਦਸ੍ਸਾਤਿ ਏਤ੍ਥ ਅਕ੍ਖ-ਸਦ੍ਦੇਨ ਕਿਰ ਵਿਨਿਚ੍ਛਯਸਾਲਾ ਵੁਚ੍ਚਤਿ, ਤਤ੍ਥ ਨਿਸੀਦਿਤ੍ਵਾ ਵਜ੍ਜਾਵਜ੍ਜਂ ਨਿਰੂਪਯਨ੍ਤੀਤਿ ‘‘ਅਕ੍ਖਦਸ੍ਸਾ’’ਤਿ ਵੁਚ੍ਚਨ੍ਤਿ ਧਮ੍ਮਵਿਨਿਚ੍ਛਨਕਾ. ਹਨਨਂ ਨਾਮ ਹਤ੍ਥਪਾਦਾਦੀਹਿ ਪੋਥਨਞ੍ਚੇਵ ਹਤ੍ਥਨਾਸਾਦਿਚ੍ਛੇਦਨਞ੍ਚ ਹੋਤੀਤਿ ਆਹ ‘‘ਹਨੇਯ੍ਯੁਨ੍ਤਿ ਪੋਥੇਯ੍ਯੁਞ੍ਚੇਵ ਛਿਨ੍ਦੇਯ੍ਯੁਞ੍ਚਾ’’ਤਿ.

ਪਦਭਾਜਨੀਯਞ੍ਚ ‘‘ਹਤ੍ਥੇਨ ਵਾ ਪਾਦੇਨ ਵਾ ਕਸਾਯ ਵਾ ਵੇਤ੍ਤੇਨ ਵਾ ਅਡ੍ਢਦਣ੍ਡਕੇਨ ਵਾ ਛਜ੍ਜਾਯ ਵਾ ਹਨੇਯ੍ਯੁ’’ਨ੍ਤਿ (ਪਾਰਾ. ੯੨) ਵੁਤ੍ਤਂ. ਤਤ੍ਥ ਅਡ੍ਢਦਣ੍ਡਕੇਨਾਤਿ ਦ੍ਵਿਹਤ੍ਥਪ੍ਪਮਾਣੇਨ ¶ ਰਸ੍ਸਮੁਗ੍ਗਰੇਨ, ਵੇਲ਼ੁਪੇਸਿਕਾਯ ਵਾ. ਛੇਜ੍ਜਾਯ ਵਾਤਿ ਹਤ੍ਥਾਦੀਨਂ ਛੇਦਨੇਨ. ਛਿਨ੍ਦਨ੍ਤਿ ਏਤਾਯ ਹਤ੍ਥਪਾਦਾਦੀਨੀਤਿ ਛੇਜ੍ਜਾ, ਸਤ੍ਥਂ, ਤੇਨ ਸਤ੍ਥੇਨਾਤਿਪਿ ਅਤ੍ਥੋ. ਨੀਹਰੇਯ੍ਯੁਨ੍ਤਿ ਰਟ੍ਠਤੋ ਨੀਹਰੇਯ੍ਯੁਂ. ‘‘ਚੋਰੋਸਿ…ਪੇ… ਥੇਨੋਸੀ’’ਤਿ ਏਤ੍ਥ ਪਰਿਭਾਸੇਯ੍ਯੁਨ੍ਤਿ ਪਦਂ ਅਜ੍ਝਾਹਰਿਤ੍ਵਾ ਅਤ੍ਥੋ ਵੇਦਿਤਬ੍ਬੋਤਿ ਆਹ ‘‘ਚੋਰੋਸਿ…ਪੇ… ਪਰਿਭਾਸੇਯ੍ਯੁ’’ਨ੍ਤਿ. ਯਂ ਤਂ ਭਣ੍ਡਂ ਦਸ੍ਸਿਤਨ੍ਤਿ ਸਮ੍ਬਨ੍ਧੋ.

੯੩. ਯਤ੍ਥ ਯਤ੍ਥ ਠਿਤਨ੍ਤਿ ਭੂਮਿਯਾਦੀਸੁ ਯਤ੍ਥ ਯਤ੍ਥ ਠਿਤਂ. ਯਥਾ ਯਥਾ ਆਦਾਨਂ ਗਚ੍ਛਤੀਤਿ ਯੇਨ ਯੇਨ ਆਕਾਰੇਨ ਗਹਣਂ ਉਪਗਚ੍ਛਤਿ.

ਭੂਮਟ੍ਠਕਥਾਵਣ੍ਣਨਾ

੯੪. ਵਾਚਾਯ ¶ ਵਾਚਾਯਾਤਿ ਏਕੇਕਤ੍ਥਦੀਪਿਕਾਯ ਵਾਚਾਯ ਵਾਚਾਯ. ਉਪਲਦ੍ਧੋਤਿ ਞਾਤੋ. ਪਾਲ਼ਿਯਂ ਸੇਸਅਟ੍ਠਕਥਾਸੁ ਚ ਕੁਦਾਲਂ ਵਾ ਪਿਟਕਂ ਵਾਤਿ ਇਦਮੇਵ ਦ੍ਵਯਂ ਵਤ੍ਵਾ ਵਾਸਿਫਰਸੂਨਂ ਅਵੁਤ੍ਤਤ੍ਤਾ ਤੇਸਮ੍ਪਿ ਸਙ੍ਖੇਪਟ੍ਠਕਥਾਦੀਸੁ ਆਗਤਭਾਵਂ ਦਸ੍ਸੇਤੁਂ ਸਙ੍ਖੇਪਟ੍ਠਕਥਾਯਨ੍ਤਿਆਦਿ ਵੁਤ੍ਤਂ. ਥੇਯ੍ਯਚਿਤ੍ਤੇਨ ਕਤਤ੍ਤਾ ‘‘ਦੁਕ੍ਕਟੇਹਿ ਸਦ੍ਧਿਂ ਪਾਚਿਤ੍ਤਿਯਾਨੀ’’ਤਿ ਵੁਤ੍ਤਂ.

ਅਟ੍ਠਵਿਧਂ ਹੇਤਨ੍ਤਿਆਦੀਸੁ ਏਤਂ ਦੁਕ੍ਕਟਂ ਨਾਮ ਥੇਰੇਹਿ ਧਮ੍ਮਸਙ੍ਗਾਹਕੇਹਿ ਇਮਸ੍ਮਿਂ ਠਾਨੇ ਸਮੋਧਾਨੇਤ੍ਵਾ ਅਟ੍ਠਵਿਧਨ੍ਤਿ ਦਸ੍ਸਿਤਨ੍ਤਿ ਯੋਜਨਾ. ਸਬ੍ਬੇਸਮ੍ਪਿ ਦੁਕ੍ਕਟਾਨਂ ਇਮੇਸੁਯੇਵ ਅਟ੍ਠਸੁ ਸਙ੍ਗਹੇਤਬ੍ਬਭਾਵਤੋ ਪਨ ਇਤਰੇਹਿ ਸਤ੍ਤਹਿ ਦੁਕ੍ਕਟੇਹਿ ਵਿਨਿਮੁਤ੍ਤਂ ਵਿਨਯਦੁਕ੍ਕਟੇਯੇਵ ਸਙ੍ਗਹੇਤਬ੍ਬਂ. ਦਸਵਿਧਂ ਰਤਨਨ੍ਤਿ ‘‘ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋ ਸਿਲਾ ਪਵਾਲ਼ਂ ਰਜਤਂ ਜਾਤਰੂਪਂ ਲੋਹਿਤਕੋ ਮਸਾਰਗਲ੍ਲ’’ਨ੍ਤਿ ਏਵਮਾਗਤਂ ਦਸਵਿਧਂ ਰਤਨਂ.

‘‘ਮੁਤ੍ਤਾ ਮਣਿ ਵੇਲ਼ੁਰਿਯੋ ਚ ਸਙ੍ਖੋ,

ਸਿਲਾ ਪਵਾਲ਼ਂ ਰਜਤਞ੍ਚ ਹੇਮਂ;

ਲੋਹਿਤਕਞ੍ਚ ਮਸਾਰਗਲ੍ਲਂ,

ਦਸੇਤੇ ਧੀਰੋ ਰਤਨਾਨਿ ਜਞ੍ਞਾ’’ਤਿ. –

ਹਿ ਵੁਤ੍ਤਂ. ਸਤ੍ਤਵਿਧਂ ਧਞ੍ਞਨ੍ਤਿ ਸਾਲਿ ਵੀਹਿ ਯਵੋ ਕਙ੍ਗੁ ਕੁਦ੍ਰੂਸਂ ਵਰਕੋ ਗੋਧੁਮੋਤਿ ਇਮਂ ਸਤ੍ਤਵਿਧਂ ਧਞ੍ਞਂ. ਆਵੁਧਭਣ੍ਡਾਦਿਨ੍ਤਿ ਆਦਿ-ਸਦ੍ਦੇਨ ਤੁਰਿਯਭਣ੍ਡਇਤ੍ਥਿਰੂਪਾਦਿਂ ਸਙ੍ਗਣ੍ਹਾਤਿ. ਅਨਾਮਸਿਤਬ੍ਬੇ ਵਤ੍ਥੁਮ੍ਹਿ ਦੁਕ੍ਕਟਂ ਅਨਾਮਾਸਦੁਕ੍ਕਟਂ. ਦੁਰੂਪਚਿਣ੍ਣਦੁਕ੍ਕਟਨ੍ਤਿ ‘‘ਅਕਤ੍ਤਬ੍ਬ’’ਨ੍ਤਿ ਵਾਰਿਤਸ੍ਸ ਕਤਤ੍ਤਾ ਦੁਟ੍ਠੁ ¶ ਉਪਚਿਣ੍ਣਂ ਚਰਿਤਨ੍ਤਿ ਦੁਰੂਪਚਿਣ੍ਣਂ, ਤਸ੍ਮਿਂ ਦੁਕ੍ਕਟਂ ਦੁਰੂਪਚਿਣ੍ਣਦੁਕ੍ਕਟਂ. ਵਿਨਯੇ ਪਞ੍ਞਤ੍ਤਂ ਅਵਸੇਸਂ ਦੁਕ੍ਕਟਂ ਵਿਨਯਦੁਕ੍ਕਟਂ. ਏਕਾਦਸ ਸਮਨੁਭਾਸਨਾ ਨਾਮ ਭਿਕ੍ਖੁਪਾਤਿਮੋਕ੍ਖੇ ਚਤ੍ਤਾਰੋ ਯਾਵਤਤਿਯਕਾ ਸਙ੍ਘਾਦਿਸੇਸਾ ਅਰਿਟ੍ਠਸਿਕ੍ਖਾਪਦਨ੍ਤਿ ਪਞ੍ਚ, ਭਿਕ੍ਖੁਨੀਪਾਤਿਮੋਕ੍ਖੇ ਏਕਂ ਯਾਵਤਤਿਯਕਪਾਰਾਜਿਕਂ ਚਤ੍ਤਾਰੋ ਸਙ੍ਘਾਦਿਸੇਸਾ ਚਣ੍ਡਕਾਲ਼ੀਸਿਕ੍ਖਾਪਦਨ੍ਤਿ ਛ.

ਸਹਪਯੋਗਤੋ ਪਟ੍ਠਾਯ ਚੇਤ੍ਥ ਪੁਰਿਮਪੁਰਿਮਾ ਆਪਤ੍ਤਿਯੋ ਪਟਿਪ੍ਪਸ੍ਸਮ੍ਭਨ੍ਤੀਤਿ ਆਹ ਅਥ ਧੁਰਨਿਕ੍ਖੇਪਂ ਅਕਤ੍ਵਾਤਿਆਦਿ. ‘‘ਧੁਰਨਿਕ੍ਖੇਪਂ ਅਕਤ੍ਵਾ’’ਤਿ ਵੁਤ੍ਤਤ੍ਤਾ ਧੁਰਨਿਕ੍ਖੇਪਂ ਕਤ੍ਵਾ ਪੁਨ ਖਣਨ੍ਤਸ੍ਸ ਪੁਰਿਮਾਪਤ੍ਤਿਯੋ ਨ ਪਟਿਪ੍ਪਸ੍ਸਮ੍ਭਨ੍ਤੀਤਿ ਵਦਨ੍ਤਿ. ‘‘ਛੇਦਨਪਚ੍ਚਯਾ ਦੁਕ੍ਕਟਂ ਦੇਸੇਤ੍ਵਾ ਮੁਚ੍ਚਤੀ’’ਤਿ ¶ ਵਤ੍ਵਾ ਪੁਬ੍ਬਪਯੋਗੇ ਆਪਤ੍ਤੀਨਂ ਦੇਸੇਤਬ੍ਬਤਾਯ ਅਵੁਤ੍ਤਤ੍ਤਾ ਸਹਪਯੋਗੇ ਪਤ੍ਤੇ ਪੁਬ੍ਬਪਯੋਗੇ ਆਪਤ੍ਤਿਯੋ ਪਟਿਪ੍ਪਸ੍ਸਮ੍ਭਨ੍ਤੀਤਿ ਵੇਦਿਤਬ੍ਬਂ.

ਅਪਰਦ੍ਧਂ ਵਿਰਦ੍ਧਂ ਖਲਿਤਨ੍ਤਿ ਸਬ੍ਬਮੇਤਂ ਯਞ੍ਚ ਦੁਕ੍ਕਟਨ੍ਤਿ ਏਤ੍ਥ ਵੁਤ੍ਤਸ੍ਸ ਦੁਕ੍ਕਟਸ੍ਸ ਪਰਿਯਾਯਵਚਨਂ, ਯਂ ਮਨੁਸ੍ਸੋ ਕਰੇਤਿਆਦਿ ਪਨੇਤ੍ਥ ਓਪਮ੍ਮਨਿਦਸ੍ਸਨਂ. ਸਂਯੋਗਭਾਵੋਤਿ ਦ੍ਵਿਤ੍ਤਂ ਸਨ੍ਧਾਯ ਵੁਤ੍ਤਂ, ਤੇਨ ਰਸ੍ਸਤ੍ਤਸ੍ਸਾਪਿ ਨਿਮਿਤ੍ਤਂ ਦਸ੍ਸਿਤਨ੍ਤਿ ਵੇਦਿਤਬ੍ਬਂ. ਏਕਸ੍ਸ ਮੂਲੇਤਿ ਏਕਸ੍ਸ ਸਨ੍ਤਿਕੇ. ਸਬ੍ਬਤ੍ਥਾਪਿ ਆਮਸਨੇ ਦੁਕ੍ਕਟਂ, ਫਨ੍ਦਾਪਨੇ ਥੁਲ੍ਲਚ੍ਚਯਞ੍ਚ ਵਿਸੁਂ ਵਿਸੁਂ ਆਮਸਨਫਨ੍ਦਾਪਨਪਯੋਗਂ ਕਰੋਨ੍ਤਸ੍ਸੇਵ ਹੋਤਿ, ਏਕਪਯੋਗੇਨ ਗਣ੍ਹਨ੍ਤਸ੍ਸ ਪਨ ਉਦ੍ਧਾਰੇ ਪਾਰਾਜਿਕਮੇਵ, ਨ ਦੁਕ੍ਕਟਥੁਲ੍ਲਚ੍ਚਯਾਨੀਤਿ ਵਦਨ੍ਤਿ, ਏਕਪਯੋਗੇਨ ਗਣ੍ਹਨ੍ਤਸ੍ਸਾਪਿ ਆਮਸਨਫਨ੍ਦਾਪਨਾਨਮ੍ਪਿ ਲਬ੍ਭਮਾਨਤ੍ਤਾ ਤਂ ਨ ਗਹੇਤਬ੍ਬਂ. ਨ ਹਿ ਸਕ੍ਕਾ ਅਨਾਮਸਿਤ੍ਵਾ ਅਫਨ੍ਦਾਪੇਤ੍ਵਾ ਚ ਕਿਞ੍ਚਿ ਗਹੇਤੁਂ. ‘‘ਏਕਮੇਵ ਦੇਸੇਤ੍ਵਾ ਮੁਚ੍ਚਤੀ’’ਤਿ ਪਂਸੁਖਣਨਾਦਿਸਮਾਨਪਯੋਗੇਪਿ ਪੁਰਿਮਾ ਆਪਤ੍ਤਿ ਉਤ੍ਤਰਮੁਤ੍ਤਰਂ ਆਪਤ੍ਤਿਂ ਪਤ੍ਵਾ ਪਟਿਪ੍ਪਸ੍ਸਮ੍ਭਨ੍ਤੀਤਿ ਸਞ੍ਞਾਯ ਕੁਰੁਨ੍ਦਟ੍ਠਕਥਾਯਂ ਵੁਤ੍ਤਂ, ਇਤਰਟ੍ਠਕਥਾਸੁ ਪਨ ਖਣਨਪਯੋਗਭੇਦੇਹਿ ਪਯੋਗੇ ਪਯੋਗੇ ਆਪਨ੍ਨਾ ਆਪਤ੍ਤਿਯੋ ਉਤ੍ਤਰਮੁਤ੍ਤਰਂ ਪਤ੍ਵਾ ਨ ਪਟਿਪ੍ਪਸ੍ਸਮ੍ਭਨ੍ਤਿ ਅਞ੍ਞਮਞ੍ਞਂ ਸਦਿਸਤ੍ਤਾ ਵਿਯੂਹਨਂ ਪਤ੍ਵਾ ਤਾ ਸਬ੍ਬਾਪਿ ਪਟਿਪ੍ਪਸ੍ਸਮ੍ਭਨ੍ਤਿ ਵਿਸਦਿਸਪਯੋਗਤ੍ਤਾਤਿ ਇਮਿਨਾ ਅਧਿਪ੍ਪਾਯੇਨ ਪਟਿਪ੍ਪਸ੍ਸਦ੍ਧਿਵਿਧਾਨਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਇਮਿਨਾ ਹਿ ਅਵਹਾਰਕਸ੍ਸ ਆਸਨ੍ਨਂ ਓਰਿਮਨ੍ਤਂ ਪਰਾਮਸਤਿ.

ਤਤ੍ਥੇਵਾਤਿ ਮੁਖਵਟ੍ਟਿਯਮੇਵ. ਬੁਨ੍ਦੇਨਾਤਿ ਕੁਮ੍ਭਿਯਾ ਹੇਟ੍ਠਿਮਤਲੇਨ. ਏਕਟ੍ਠਾਨੇ ਠਿਤਾਯ ਕੁਮ੍ਭਿਯਾ ਠਾਨਾ ਚਾਵਨਂ ਛਹਿ ਆਕਾਰੇਹਿ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਏਕਟ੍ਠਾਨੇਤਿ ਚ ਸਙ੍ਖਲਿਕਬਦ੍ਧਭਾਵੇਨ ਏਕਸ੍ਮਿਂ ਪਤਿਟ੍ਠਿਤੋਕਾਸਟ੍ਠਾਨੇਤਿ ¶ ਅਤ੍ਥੋ. ਖਾਣੁਕਂ ਕੇਸਗ੍ਗਮਤ੍ਤਮ੍ਪਿ ਠਾਨਾ ਚਾਵੇਤੀਤਿ ਖਾਣੁਕਂ ਅਤ੍ਤਨੋ ਪਤਿਟ੍ਠਿਤਟ੍ਠਾਨਤੋ ਪਞ੍ਚਹਿ ਆਕਾਰੇਹਿ ਠਾਨਾ ਚਾਵੇਤਿ. ਛਿਨ੍ਨਮਤ੍ਤੇ ਪਾਰਾਜਿਕਨ੍ਤਿ ਅਵਸ੍ਸਂ ਚੇ ਪਤਤਿ, ਛਿਨ੍ਨਮਤ੍ਤੇ ਪਾਰਾਜਿਕਂ. ਪਰਿਚ੍ਛੇਦੋਤਿ ਪਞ੍ਚਮਾਸਕਾਦਿਗਰੁਭਾਵਪਰਿਚ੍ਛੇਦੋ. ਅਪਬ੍ਯੂਹਨ੍ਤੋਤਿ ਠਿਤਟ੍ਠਾਨਤੋ ਅਪਨਯਨਵਸੇਨ ਵਿਯੂਹਨ੍ਤੋ ਰਾਸਿਂ ਕਰੋਨ੍ਤੋ. ਏਵਂ ਕਤ੍ਵਾਤਿ ਭਾਜਨਮੁਖਵਟ੍ਟਿਯਾ ਕੁਮ੍ਭਿਗਤੇਨ ਭਾਜਨਗਤਸ੍ਸ ਏਕਾਬਦ੍ਧਭਾਵਂ ਵਿਯੋਜੇਤ੍ਵਾਤਿ ਅਤ੍ਥੋ. ਉਪਡ੍ਢਕੁਮ੍ਭੀਯਨ੍ਤਿ ਉਪਡ੍ਢਪੁਣ੍ਣਾਯ ਕੁਮ੍ਭਿਯਾ. ਵਿਨਯਧਮ੍ਮਤਾਤਿ ਅਧਿਕਕਾਰਣਾਲਾਭੇ ਵਿਨਯਵਿਨਿਚ੍ਛਯਧਮ੍ਮਤਾਤਿ ਅਧਿਪ੍ਪਾਯੋ. ਨ ਕੇਵਲਞ੍ਚੇਤ੍ਥ ਗਰੁਕਤਾਵ, ਸੁਤ੍ਤਾਨੁਗਮਨਮ੍ਪਿ ਅਤ੍ਥੀਤਿ ਦਸ੍ਸੇਨ੍ਤੋ ਅਪਿਚਾਤਿਆਦਿਮਾਹ. ਕਣ੍ਠੇਨ ਪਨ ਪਰਿਚ੍ਛਿਨ੍ਨਕਾਲੇਤਿ ਮੁਖਗਤਂ ਅਜ੍ਝੋਹਟਕਾਲੇਤਿ ਅਤ੍ਥੋ. ਅਜ੍ਝੋਹਰਣਮੇਵ ਹੇਤ੍ਥ ਪਰਿਚ੍ਛਿਨ੍ਦਨਂ, ਨ ਕਣ੍ਠਪਿਦਹਨਂ. ਚਿਕ੍ਕਨਨ੍ਤਿ ਥਦ੍ਧਂ, ਬਹਲਂ ਘਨਨ੍ਤਿ ਅਤ੍ਥੋ.

ਯੋਪਿ ਥੇਯ੍ਯਚਿਤ੍ਤੇਨ ਪਰਸ੍ਸ ਕੁਮ੍ਭਿਯਾ ਪਾਦਗ੍ਘਨਕਂ ਸਪ੍ਪਿਂ ਵਾ ਤੇਲਂ ਵਾ ਅਵਸ੍ਸਂ ਪਿਵਨਕਂ ਯਂ ਕਿਞ੍ਚਿ ¶ ਦੁਕੂਲਸਾਟਕਂ ਵਾ ਚਮ੍ਮਖਣ੍ਡਾਦੀਨਂ ਵਾ ਅਞ੍ਞਤਰਂ ਪਕ੍ਖਿਪਤਿ, ਹਤ੍ਥਤੋ ਮੁਤ੍ਤਮਤ੍ਤੇ ਪਾਰਾਜਿਕਨ੍ਤਿ ਏਤ੍ਥ ਅਵਹਾਰੋ ਵੀਮਂਸਿਤਬ੍ਬੋ. ਯਦਿ ਚ ਦੁਕੂਲਾਦੀਸੁ ਸਪ੍ਪਿਤੇਲਾਨਂ ਪਵਿਸਨਂ ਸਨ੍ਧਾਯ ਪਾਰਾਜਿਕਂ ਭਵੇਯ੍ਯ, ਤਤ੍ਥ ਪਵਿਟ੍ਠਤੇਲਾਦਿਨੋ ਕੁਮ੍ਭਿਗਤੇਨ ਏਕਾਬਦ੍ਧਤਾਯ ਨ ਤਾਵ ਅਵਹਾਰੋ ਭਾਜਨਨ੍ਤਰਂ ਪਵੇਸੇਤ੍ਵਾ ਗਹਣਕਾਲੇ ਵਿਯ. ਤਥਾ ਹਿ ਵੁਤ੍ਤਂ – ‘‘ਭਾਜਨਂ ਪਨ ਨਿਮੁਜ੍ਜਾਪੇਤ੍ਵਾ ਗਣ੍ਹਨ੍ਤਸ੍ਸ ਯਾਵ ਏਕਾਬਦ੍ਧਂ ਹੋਤਿ, ਤਾਵ ਰਕ੍ਖਤੀ’’ਤਿਆਦਿ. ਅਥ ਤੇਲਾਦਿਵਿਨਾਸੇਨ ਪਾਰਾਜਿਕਂ ਭਵੇਯ੍ਯ, ਤਦਾਪਿ ਤਿਣਜ੍ਝਾਪਨਾਦੀਸੁ ਵਿਯ ਅਵਹਾਰੋ ਨਤ੍ਥਿ, ਦੁਕ੍ਕਟੇਨ ਸਦ੍ਧਿਂ ਭਣ੍ਡਦੇਯ੍ਯਮੇਵ ਹੋਤਿ, ਤਥਾ ਚ ਪਾਦਗ੍ਘਨਕਂ ਤੇਲਾਦਿਂ ਪੀਤਂ ਦੁਕੂਲਾਦਿਂ ਉਦ੍ਧਰਨ੍ਤਸ੍ਸਾਪਿ ਪਾਰਾਜਿਕਂ ਨ ਸਿਯਾ ਤਤ੍ਥ ਪਵਿਟ੍ਠਸ੍ਸ ਤੇਲਾਦਿਨੋ ਵਿਨਟ੍ਠਟ੍ਠੇਨ ਗਹਣਕ੍ਖਣੇ ਅਵਿਜ੍ਜਮਾਨਤ੍ਤਾ, ਵਿਜ੍ਜਮਾਨਤ੍ਤੇਨ ਚ ਉਦ੍ਧਾਰੇਯੇਵ ਪਾਰਾਜਿਕਂ ਵਤ੍ਤਬ੍ਬਂ, ਨ ਹਤ੍ਥਤੋ ਮੁਤ੍ਤਮਤ੍ਤੇਤਿ. ਸਬ੍ਬਅਟ੍ਠਕਥਾਸੁ ਚ ਦੁਕੂਲਾਦੀਨਂ ਪਕ੍ਖਿਪਨੇ ਹਤ੍ਥਤੋ ਮੁਤ੍ਤਮਤ੍ਤੇ ਪਾਰਾਜਿਕਸ੍ਸ ਵੁਤ੍ਤਤ੍ਤਾ ਨ ਤਂ ਪਟਿਕ੍ਖਿਪਿਤੁਂ ਸਕ੍ਕਾ. ਅਟ੍ਠਕਥਾਪ੍ਪਮਾਣੇਨ ਪਨੇਤਂ ਗਹੇਤਬ੍ਬਂ, ਯੁਤ੍ਤਿ ਪਨੇਤ੍ਥ ਪਣ੍ਡਿਤੇਹਿ ਪੁਬ੍ਬਾਪਰਂ ਸਂਸਨ੍ਦਿਤ੍ਵਾ ਉਦ੍ਧਾਰੇਤਬ੍ਬਾ.

ਪਲਿਬੁਜ੍ਝਿਸ੍ਸਤੀਤਿ ਨਿਵਾਰੇਸ੍ਸਤਿ. ਵੁਤ੍ਤਨਯੇਨ ਪਾਰਾਜਿਕਨ੍ਤਿ ਹਤ੍ਥਤੋ ਮੁਤ੍ਤਮਤ੍ਤੇਯੇਵ ਪਾਰਾਜਿਕਂ. ਨੇਵ ਅਵਹਾਰੋ, ਨ ਗੀਵਾਤਿ ਅਤ੍ਤਨੋ ਭਾਜਨਤ੍ਤਾ ¶ ਵੁਤ੍ਤਂ, ਅਨਾਪਤ੍ਤਿਮਤ੍ਤਮੇਵ ਵੁਤ੍ਤਂ, ਨ ਪਨ ਏਵਂ ਵਿਚਾਰਿਤਨ੍ਤਿ ਅਧਿਪ੍ਪਾਯੋ. ਬਹਿਗਤਂ ਨਾਮ ਹੋਤੀਤਿ ਤਤੋ ਪਟ੍ਠਾਯ ਤੇਲਸ੍ਸ ਅਟ੍ਠਾਨਤੋ ਅਧੋਮੁਖਭਾਵਤੋ ਚ ਬਹਿਗਤਂ ਨਾਮ ਹੋਤਿ. ਅਨ੍ਤੋ ਪਟ੍ਠਾਯ ਛਿਦ੍ਦੇ ਕਰਿਯਮਾਨੇ ਤੇਲਸ੍ਸ ਨਿਕ੍ਖਮਿਤ੍ਵਾ ਗਤਗਤਟ੍ਠਾਨਂ ਭਾਜਨਸਙ੍ਖ੍ਯਮੇਵ ਗਚ੍ਛਤੀਤਿ ਆਹ ‘‘ਬਾਹਿਰਨ੍ਤਤੋ ਪਾਦਗ੍ਘਨਕੇ ਗਲ਼ਿਤੇ ਪਾਰਾਜਿਕ’’ਨ੍ਤਿ. ਯਥਾ ਤਥਾ ਵਾ ਕਤਸ੍ਸਾਤਿ ਬਾਹਿਰਨ੍ਤਤੋ ਵਾ ਅਬ੍ਭਨ੍ਤਰਨ੍ਤਤੋ ਵਾ ਪਟ੍ਠਾਯ ਕਤਸ੍ਸ. ਮਜ੍ਝੇ ਠਪੇਤ੍ਵਾ ਕਤਛਿਦ੍ਦੇਤਿ ਮਜ੍ਝੇ ਥੋਕਂ ਕਪਾਲਂ ਠਪੇਤ੍ਵਾ ਪਚ੍ਛਾ ਤਂ ਛਿਨ੍ਦਨ੍ਤੇਨ ਕਤਛਿਦ੍ਦੇ.

ਪਤ੍ਥੀਨਸ੍ਸ ਖਾਦਨਂ ਇਤਰਸ੍ਸ ਪਾਨਞ੍ਚ ਸਪ੍ਪਿਆਦੀਨਂ ਪਰਿਭੋਗੋਤਿ ਆਹ ‘‘ਅਖਾਦਿਤਬ੍ਬਂ ਵਾ ਅਪਾਤਬ੍ਬਂ ਵਾ ਕਰੋਤੀ’’ਤਿ. ਕਸ੍ਮਾ ਪਨੇਤ੍ਥ ਦੁਕ੍ਕਟਂ ਵੁਤ੍ਤਨ੍ਤਿ ਆਹ ‘‘ਠਾਨਾਚਾਵਨਸ੍ਸ ਨਤ੍ਥਿਤਾਯ ਦੁਕ੍ਕਟ’’ਨ੍ਤਿ. ਪੁਰਿਮਦ੍ਵਯਨ੍ਤਿ ਭੇਦਨਂ ਛਡ੍ਡਨਞ੍ਚ. ਕੁਮ੍ਭਿਜਜ੍ਜਰਕਰਣੇਨਾਤਿ ਪੁਣ੍ਣਕੁਮ੍ਭਿਯਾ ਜਜ੍ਜਰਕਰਣੇਨ. ਮਾਤਿਕਾਉਜੁਕਰਣੇਨਾਤਿ ਉਦਕਪੁਣ੍ਣਾਯ ਮਾਤਿਕਾਯ ਉਜੁਕਰਣੇਨ. ਏਕਲਕ੍ਖਣਨ੍ਤਿ ਭੇਦਨਂ ਕੁਮ੍ਭਿਯਾ ਜਜ੍ਜਰਕਰਣੇਨ, ਛਡ੍ਡਨਂ ਮਾਤਿਕਾਯ ਉਜੁਕਰਣੇਨ ਚ ਸਦ੍ਧਿਂ ਏਕਸਭਾਵਂ. ਪਚ੍ਛਿਮਂ ਪਨ ਦ੍ਵਯਨ੍ਤਿ ਝਾਪਨਂ ਅਪਰਿਭੋਗਕਰਣਞ੍ਚ. ਏਤ੍ਥ ਏਵਂ ਵਿਨਿਚ੍ਛਯਂ ਵਦਨ੍ਤੀਤਿ ਏਤਸ੍ਮਿਂ ਮਹਾਅਟ੍ਠਕਥਾਯਂ ਵੁਤ੍ਤੇ ਅਤ੍ਥੇ ਏਕੇ ਆਚਰਿਯਾ ਏਵਂ ਵਿਨਿਚ੍ਛਯਂ ਵਦਨ੍ਤਿ. ਪਚ੍ਛਿਮਦ੍ਵਯਂ ਸਨ੍ਧਾਯ ਵੁਤ੍ਤਨ੍ਤਿ ਏਤ੍ਥ ਪੁਰਿਮਪਦਦ੍ਵਯੇ ਵਿਨਿਚ੍ਛਯੋ ਹੇਟ੍ਠਾ ਵੁਤ੍ਤਾਨੁਸਾਰੇਨ ਸਕ੍ਕਾ ਵਿਞ੍ਞਾਤੁਨ੍ਤਿ ਤਤ੍ਥ ਕਿਞ੍ਚਿ ਅਵਤ੍ਵਾ ਪਚ੍ਛਿਮਪਦਦ੍ਵਯਂ ਸਨ੍ਧਾਯ ‘‘ਠਾਨਾਚਾਵਨਸ੍ਸ ਨਤ੍ਥਿਤਾਯ ਦੁਕ੍ਕਟ’’ਨ੍ਤਿ ਇਦਂ ਵੁਤ੍ਤਨ੍ਤਿ ਅਧਿਪ੍ਪਾਯੋ ¶ . ਥੇਯ੍ਯਚਿਤ੍ਤੇਨਾਤਿ ਅਤ੍ਤਨੋ ਵਾ ਪਰਸ੍ਸ ਵਾ ਕਾਤੁਕਾਮਤਾਵਸੇਨ ਉਪ੍ਪਨ੍ਨਥੇਯ੍ਯਚਿਤ੍ਤੇਨ. ਵਿਨਾਸੇਤੁਕਾਮਤਾਯਾਤਿ ਹਤ੍ਥਪਾਦਾਦੀਨਿ ਛਿਨ੍ਦਨ੍ਤੋ ਵਿਯ ਕੇਵਲਂ ਵਿਨਾਸੇਤੁਕਾਮਤਾਯ. ਵੁਤ੍ਤਨਯੇਨ ਭਿਨ੍ਦਨ੍ਤਸ੍ਸ ਵਾ ਛਡ੍ਡੇਨ੍ਤਸ੍ਸ ਵਾਤਿ ਮੁਗ੍ਗਰੇਨ ਪੋਥੇਤ੍ਵਾ ਭਿਨ੍ਦਨ੍ਤਸ੍ਸ ਵਾ ਉਦਕਂ ਵਾ ਵਾਲਿਕਂ ਵਾ ਆਕਿਰਿਤ੍ਵਾ ਉਤ੍ਤਰਾਪੇਨ੍ਤਸ੍ਸ ਵਾਤਿ ਅਤ੍ਥੋ. ਅਯੁਤ੍ਤਨ੍ਤਿ ਚੇਤਿ ਪਾਲ਼ਿਯਂ ਪੁਰਿਮਦ੍ਵਯੇਪਿ ਦੁਕ੍ਕਟਸ੍ਸੇਵ ਵੁਤ੍ਤਤ੍ਤਾ ‘‘ਪੁਰਿਮਦ੍ਵਯੇ ਪਾਰਾਜਿਕ’’ਨ੍ਤਿ ਇਦਂ ਅਯੁਤ੍ਤਨ੍ਤਿ ਯਦਿ ਤੁਮ੍ਹਾਕਂ ਸਿਯਾਤਿ ਅਤ੍ਥੋ. ਨਾਤਿ ਅਯੁਤ੍ਤਭਾਵਂ ਨਿਸੇਧੇਤ੍ਵਾ ਤਤ੍ਥ ਕਾਰਣਮਾਹ ‘‘ਅਞ੍ਞਥਾ ਗਹੇਤਬ੍ਬਤ੍ਥਤੋ’’ਤਿ.

ਏਵਮੇਕੇ ਵਦਨ੍ਤੀਤਿ ਹੇਟ੍ਠਾ ਵੁਤ੍ਤਸ੍ਸ ਅਤ੍ਥਨਯਸ੍ਸ ਅਤ੍ਤਨਾ ਅਨਭਿਮਤਭਾਵਂ ਦਸ੍ਸੇਤ੍ਵਾ ਸਯਂ ਅਞ੍ਞਥਾਪਿ ਪਾਲ਼ਿਂ ਅਟ੍ਠਕਥਞ੍ਚ ਸਂਸਨ੍ਦਿਤ੍ਵਾ ਅਤ੍ਥਂ ਦਸ੍ਸੇਤੁਕਾਮੋ ¶ ਅਯਂ ਪਨੇਤ੍ਥ ਸਾਰੋਤਿਆਦਿਮਾਹ. ਅਚਾਵੇਤੁਕਾਮੋਵਾਤਿ ਥੇਯ੍ਯਚਿਤ੍ਤੇਨ ਠਾਨਾ ਅਚਾਵੇਤੁਕਾਮੋਵ. ਅਛਡ੍ਡੇਤੁਕਾਮੋਯੇਵਾਤਿ ਏਤ੍ਥਾਪਿ ਥੇਯ੍ਯਚਿਤ੍ਤੇਨਾਤਿ ਸਮ੍ਬਨ੍ਧਿਤਬ੍ਬਂ. ਇਦਞ੍ਹਿ ਥੇਯ੍ਯਚਿਤ੍ਤਪਕ੍ਖਂ ਸਨ੍ਧਾਯ ਵੁਤ੍ਤਂ ਨਾਸੇਤੁਕਾਮਤਾਪਕ੍ਖਸ੍ਸ ਵਕ੍ਖਮਾਨਤ੍ਤਾ. ਤੇਨੇਵਾਹ ਨਾਸੇਤੁਕਾਮਤਾਪਕ੍ਖੇ ਪਨਾਤਿਆਦਿ. ਇਤਰਥਾਪਿ ਯੁਜ੍ਜਤੀਤਿ ਥੇਯ੍ਯਚਿਤ੍ਤਾਭਾਵਾ ਠਾਨਾ ਚਾਵੇਤੁਕਾਮਸ੍ਸਾਪਿ ਦੁਕ੍ਕਟਂ ਯੁਜ੍ਜਤੀਤਿ ਵੁਤ੍ਤਂ ਹੋਤਿ.

ਭੂਮਟ੍ਠਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਆਕਾਸਟ੍ਠਕਥਾਵਣ੍ਣਨਾ

੯੬. ਆਕਾਸਟ੍ਠਕਥਾਯਂ ਅਨ੍ਤੋਵਤ੍ਥੁਮ੍ਹੀਤਿ ਪਰਿਕ੍ਖਿਤ੍ਤਸ੍ਸ ਵਤ੍ਥੁਸ੍ਸ ਅਨ੍ਤੋ. ਅਨ੍ਤੋਗਾਮੇਤਿ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਅਨ੍ਤੋ. ਅਪਰਿਕ੍ਖਿਤ੍ਤੇ ਪਨ ਵਤ੍ਥੁਮ੍ਹਿ ਗਾਮੇ ਵਾ ਠਿਤਟ੍ਠਾਨਮੇਵ ਠਾਨਂ. ਅਟਵਿਮੁਖਂ ਕਰੋਤਿ…ਪੇ… ਰਕ੍ਖਤੀਤਿ ਤੇਨ ਪਯੋਗੇਨ ਤਸ੍ਸ ਇਚ੍ਛਿਤਟ੍ਠਾਨਂ ਆਗਤਤ੍ਤਾ ਰਕ੍ਖਤਿ. ਗਾਮਤੋ ਨਿਕ੍ਖਨ੍ਤਸ੍ਸਾਤਿ ਪਰਿਕ੍ਖਿਤ੍ਤਗਾਮਤੋ ਨਿਕ੍ਖਨ੍ਤਸ੍ਸ. ਕਪਿਞ੍ਜਰੋ ਨਾਮ ਅਞ੍ਞਮਞ੍ਞਂ ਯੁਜ੍ਝਾਪਨਤ੍ਥਾਯ ਬਾਲਜਨੇਹਿ ਪੋਸਾਵਨਿਯਪਕ੍ਖਿਜਾਤਿ.

ਵੇਹਾਸਟ੍ਠਕਥਾਵਣ੍ਣਨਾ

੯੭. ਵੇਹਾਸਟ੍ਠਕਥਾਯਂ ਛਿਨ੍ਨਮਤ੍ਤੇ ਮੁਤ੍ਤਮਤ੍ਤੇਤਿ ਯਥਾ ਛਿਨ੍ਨਂ ਮੁਤ੍ਤਞ੍ਚ ਪਕਤਿਟ੍ਠਾਨੇ ਨ ਤਿਟ੍ਠਤਿ, ਤਥਾ ਛੇਦਨਂ ਮੋਚਨਞ੍ਚ ਸਨ੍ਧਾਯ ਵੁਤ੍ਤਂ.

ਉਦਕਟ੍ਠਕਥਾਵਣ੍ਣਨਾ

੯੮. ਉਦਕਟ੍ਠਕਥਾਯਂ ¶ ਸਨ੍ਦਮਾਨਉਦਕੇ ਨਿਕ੍ਖਿਤ੍ਤਂ ਨ ਤਿਟ੍ਠਤੀਤਿ ਆਹ ‘‘ਅਸਨ੍ਦਨਕੇ ਉਦਕੇ’’ਤਿ. ਅਨਾਪਤ੍ਤੀਤਿ ਹਤ੍ਥਵਾਰਪਦਵਾਰੇਸੁ ਦੁਕ੍ਕਟਾਪਤ੍ਤਿਯਾ ਅਭਾਵਂ ਸਨ੍ਧਾਯ ਵੁਤ੍ਤਂ. ਕਡ੍ਢਤੀਤਿ ਹੇਟ੍ਠਤੋ ਓਸਾਰੇਤਿ. ਸਕਲਮੁਦਕਨ੍ਤਿ ਦਣ੍ਡੇਨ ਫੁਟ੍ਠੋਕਾਸਗਤਂ ਸਕਲਮੁਦਕਂ. ਨ ਉਦਕਂ ਠਾਨਨ੍ਤਿ ਅਤ੍ਤਨਾ ਕਤਟ੍ਠਾਨਸ੍ਸ ਅਟ੍ਠਾਨਤ੍ਤਾ. ਪਦੁਮਿਨਿਯਨ੍ਤਿ ਪਦੁਮਗਚ੍ਛੇ. ਕਲਾਪਬਨ੍ਧਨ੍ਤਿ ਹਤ੍ਥਕਵਸੇਨ ਖੁਦ੍ਦਕਂ ਕਤ੍ਵਾ ਬਦ੍ਧਂ ਕਲਾਪਬਦ੍ਧਂ. ਭਾਰਬਦ੍ਧਂ ਨਾਮ ਸੀਸਭਾਰਾਦਿਵਸੇਨ ਬਦ੍ਧਂ. ਮੁਲ਼ਾਲਨ੍ਤਿ ਕਨ੍ਦਂ. ਪਤ੍ਤਂ ਵਾ ਪੁਪ੍ਫਂ ਵਾਤਿ ਇਦਂ ਕਦ੍ਦਮਸ੍ਸ ਅਨ੍ਤੋ ¶ ਪਵਿਸਿਤ੍ਵਾ ਠਿਤਂ ਸਨ੍ਧਾਯ ਵੁਤ੍ਤਂ. ਨਿਦ੍ਧਮਨਤੁਮ੍ਬਨ੍ਤਿ ਵਾਪਿਯਾ ਉਦਕਸ੍ਸ ਨਿਕ੍ਖਮਨਨਾਲ਼ਂ. ਉਦਕਵਾਹਕਨ੍ਤਿ ਮਹਾਮਾਤਿਕਂ. ਅਵਹਾਰੇਨ ਸੋ ਨ ਕਾਰੇਤਬ੍ਬੋਤਿ ਇਮਿਨਾ ਪਾਣਂ ਜੀਵਿਤਾ ਵੋਰੋਪਨੇ ਆਪਤ੍ਤਿਯਾ ਸਬ੍ਬਤ੍ਥ ਨ ਮੁਚ੍ਚਤੀਤਿ ਦੀਪੇਤਿ. ਮਾਤਿਕਂ ਆਰੋਪੇਤ੍ਵਾਤਿ ਖੁਦ੍ਦਕਮਾਤਿਕਂ ਆਰੋਪੇਤ੍ਵਾ. ਮਰਿਤ੍ਵਾ…ਪੇ… ਤਿਟ੍ਠਨ੍ਤੀਤਿ ਏਤ੍ਥ ਮਤਮਚ੍ਛਾਨਂਯੇਵ ਤੇਸਂ ਸਨ੍ਤਕਤ੍ਤਾ ਅਮਤੇ ਗਣ੍ਹਨ੍ਤਸ੍ਸ ਨਤ੍ਥਿ ਅਵਹਾਰੋ.

ਨਾਵਟ੍ਠਕਥਾਵਣ੍ਣਨਾ

੯੯. ਨਾਵਟ੍ਠਕਥਾਯਂ ਥੁਲ੍ਲਚ੍ਚਯਮ੍ਪਿ ਪਾਰਾਜਿਕਮ੍ਪਿ ਹੋਤੀਤਿ ਏਤ੍ਥ ਪਠਮਂ ਠਾਨਾ ਅਚਾਵੇਤ੍ਵਾ ਮੁਤ੍ਤੇ ਥੁਲ੍ਲਚ੍ਚਯਂ, ਪਠਮਂ ਪਨ ਠਾਨਾ ਚਾਵੇਤ੍ਵਾ ਮੁਤ੍ਤੇ ਪਾਰਾਜਿਕਨ੍ਤਿ ਵੇਦਿਤਬ੍ਬਂ. ਪਾਸੇ ਬਦ੍ਧਸੂਕਰੋ ਵਿਯਾਤਿਆਦਿਨਾ ਵੁਤ੍ਤਂ ਸਨ੍ਧਾਯਾਹ ‘‘ਤਤ੍ਥ ਯੁਤ੍ਤਿ ਪੁਬ੍ਬੇ ਵੁਤ੍ਤਾਏਵਾ’’ਤਿ. ਵਿਪਨ੍ਨਟ੍ਠਨਾਵਾਤਿ ਵਿਸਮਵਾਤੇਹਿ ਦੇਸਨ੍ਤਰਂ ਪਲਾਤਾ, ਭਿਜ੍ਜਿਤ੍ਵਾ ਵਾ ਵਿਨਾਸਂ ਪਤ੍ਵਾ ਉਦਕੇ ਨਿਮੁਜ੍ਜਿਤ੍ਵਾ ਹੇਟ੍ਠਾ ਭੂਮਿਤਲਂ ਅਪ੍ਪਤ੍ਵਾ ਸਾਮਿਕੇਹਿ ਚ ਅਪਰਿਚ੍ਚਤ੍ਤਾਲਯਾ ਵੁਚ੍ਚਤਿ. ਬਲਵਾ ਚ ਵਾਤੋ ਆਗਮ੍ਮਾਤਿ ਇਮਿਨਾ ਅਸਤਿ ਵਾਤੇ ਅਯਂ ਪਯੋਗੋ ਕਤੋਤਿ ਦਸ੍ਸੇਤਿ. ਪੁਗ੍ਗਲਸ੍ਸ ਨਤ੍ਥਿ ਅਵਹਾਰੋਤਿ ਸੁਕ੍ਖਮਾਤਿਕਾਯਂ ਉਜੁਕਰਣਨਯੇਨ ਵੁਤ੍ਤਂ. ਤਂ ਅਤ੍ਤਨੋ ਪਾਦੇਨ ਅਨਕ੍ਕਮਿਤ੍ਵਾ ਹਤ੍ਥੇਨ ਚ ਅਨੁਕ੍ਖਿਪਿਤ੍ਵਾ ਅਞ੍ਞਸ੍ਮਿਂ ਦਣ੍ਡਾਦੀਸੁ ਬਨ੍ਧਿਤ੍ਵਾ ਠਪਿਤੇ ਯੁਜ੍ਜਤਿ, ਅਤ੍ਤਨੋ ਪਾਦੇਨ ਅਕ੍ਕਮਿਤ੍ਵਾ ਹਤ੍ਥੇਨ ਚ ਉਕ੍ਖਿਪਿਤ੍ਵਾ ਠਿਤਸ੍ਸ ਪਨ ਬਲਵਵਾਤੇਨ ਛਤ੍ਤਚੀਵਰਾਦੀਸੁ ਪਹਟੇਸੁ ਪਕਤਿਂ ਵਿਜਹਿਤ੍ਵਾ ਦਲ਼੍ਹਤਰਂ ਅਕ੍ਕਮਨਗਹਣਾਦਿਪਯੋਗੋ ਅਭਿਨਵੋ ਕਾਤਬ੍ਬੋ ਸਿਯਾ. ਇਤਰਥਾ ਛਤ੍ਤਚੀਵਰਾਦੀਨਿ ਵਾ ਵਿਗਚ੍ਛਨ੍ਤਿ, ਅਵਹਾਰਕੋ ਵਾ ਸਯਂ ਪਤਿਸ੍ਸਤਿ, ਨਾਵਾ ਚ ਤਦਾ ਨ ਗਮਿਸ੍ਸਤਿ. ਤਸ੍ਮਾ ਈਦਿਸੇ ਅਭਿਨਵਪ੍ਪਯੋਗੇ ਸਤਿ ਅਵਹਾਰੇਨ ਭਵਿਤਬ੍ਬਂ. ਸੁਕ੍ਖਮਾਤਿਕਾਯਂ ਉਜੁਕਤਾਯ ਉਦਕਾਗਮਨਕਾਲੇ ਕਾਤਬ੍ਬਕਿਚ੍ਚਂ ਨਤ੍ਥੀਤਿ ਤਂ ਇਧ ਨਿਦਸ੍ਸਨਂ ਨ ਹੋਤਿ. ਦਾਸਂ ਪਨ ਪਕਤਿਯਾ ਪਲਾਯਨ੍ਤਂ ‘‘ਸੀਘਂ ਯਾਹੀ’’ਤਿ ਵਤ੍ਵਾ ਪਕਤਿਗਮਨਤੋ ਤੁਰਿਤਗਮਨੁਪ੍ਪਾਦਨਾਦਿਨਾ ਇਧ ਨਿਦਸ੍ਸਨੇਨ ਭਵਿਤਬ੍ਬਨ੍ਤਿ ਅਮ੍ਹਾਕਂ ਖਨ੍ਤਿ ¶ , ਵੀਮਂਸਿਤ੍ਵਾ ਗਹੇਤਬ੍ਬਂ. ਵਾਤੇ ਆਗਤੇਪਿ ਯਤ੍ਥ ਅਤਿਲਹੁਕਤ੍ਤਾ ਨਾਵਾਯ ਕਞ੍ਚਿ ਪਯੋਗਂ ਅਕਤ੍ਵਾ ਪਕਤਿਯਾ ਅਵਹਾਰਕੋ ਤਿਟ੍ਠਤਿ, ਤਤ੍ਥਿਦਂ ਅਟ੍ਠਕਥਾਯਂ ਵੁਤ੍ਤਨ੍ਤਿ ਗਹੇਤਬ੍ਬਂ.

ਯਾਨਟ੍ਠਕਥਾਵਣ੍ਣਨਾ

੧੦੦. ਯਾਨਟ੍ਠਕਥਾਯਂ ¶ ਉਭੋਸੁ ਪਸ੍ਸੇਸੂਤਿ ਚਤੁਨ੍ਨਂ ਥਮ੍ਭਾਨਂ ਉਪਰਿ ਚਤੁਰਸ੍ਸਂ ਦਾਰੁਸਙ੍ਘਾਟਂ ਆਰੋਪੇਤ੍ਵਾ ਤਸ੍ਸ ਵਾਮਦਕ੍ਖਿਣਪਸ੍ਸੇਸੁ ਉਭੋਸੁ ਵਾਤਾਤਪਾਦਿਪਰਿਸ੍ਸਯਵਿਨੋਦਨਤ੍ਥਂ ਗਰੁਲ਼ਪਕ੍ਖਿਨੋ ਉਭੋ ਪਕ੍ਖਾ ਵਿਯ ਕਤਾ ਸਨ੍ਦਮਾਨਿਕਾ. ਦੁਕਯੁਤ੍ਤਸ੍ਸਾਤਿ ਦ੍ਵੀਹਿ ਗੋਣੇਹਿ ਯੁਤ੍ਤਸ੍ਸ. ਅਯੁਤ੍ਤਕਨ੍ਤਿ ਗੋਣੇਹਿ ਅਯੁਤ੍ਤਂ. ਕਪ੍ਪਕਤਾਤਿ ਦ੍ਵਿਨ੍ਨਂ ਸਿਖਾਨਂ ਸਨ੍ਧਿਟ੍ਠਾਨੇ ਗੋਸਿਙ੍ਗਾਨਿ ਵਿਯ ਦ੍ਵੇ ਕੋਟਿਯੋ ਠਪੇਤ੍ਵਾ ਉਪਤ੍ਥਮ੍ਭਨੀ ਕਪ੍ਪਕਤਾ ਨਾਮ, ਸਾ ਦ੍ਵੀਹਿਪਿ ਕੋਟੀਹਿ ਭੂਮਿਯਂ ਪਤਿਟ੍ਠਾਤਿ, ਤੇਨਾਹ ‘‘ਛ ਠਾਨਾਨੀ’’ਤਿ. ਤੀਣਿ ਵਾ ਚਤ੍ਤਾਰਿ ਵਾ ਠਾਨਾਨੀਤਿ ਅਕਪ੍ਪਕਤਾਯ ਉਪਤ੍ਥਮ੍ਭਨਿਯਾ ਚ ਦ੍ਵਿਨ੍ਨਂ ਚਕ੍ਕਾਨਞ੍ਚ ਵਸੇਨ ਤੀਣਿ ਠਾਨਾਨਿ, ਕਪ੍ਪਕਤਾਯ ਵਸੇਨ ਚਤ੍ਤਾਰਿ ਠਾਨਾਨਿ, ਤਥਾ ਪਥਵਿਯਂ ਠਪਿਤਸ੍ਸ ਤੀਣਿ ਠਾਨਾਨੀਤਿ ਸਮ੍ਬਨ੍ਧੋ. ਅਕ੍ਖਸੀਸੇਹੀਤਿ ਅਕ੍ਖਦਾਰੁਨੋ ਦ੍ਵੀਹਿ ਕੋਟੀਹਿ. ਅਕ੍ਖੁਦ੍ਧੀਹੀਤਿ ਅਕ੍ਖਦਾਰੁਨਾ ਸਮ੍ਪਟਿਚ੍ਛਕਾ ਹੇਟ੍ਠਿਮਭਾਗੇ ਕਪ੍ਪਕਤਾ ਦ੍ਵੇ ਦਾਰੁਖਣ੍ਡਾ ਅਕ੍ਖੁਦ੍ਧਿਯੋ ਨਾਮ, ਤਾਸਂ ਕਪ੍ਪਕਤਾਨਂ ਦ੍ਵਿਨ੍ਨਂ ਕਪ੍ਪਸੀਸਾਨਿ ਚਤ੍ਤਾਰਿ ਇਧ ‘‘ਅਕ੍ਖੁਦ੍ਧਿਯੋ’’ਤਿ ਵੁਚ੍ਚਨ੍ਤਿ, ਤੇਨਾਹ ‘‘ਚਤੂਹਿ ਚ ਅਕ੍ਖੁਦ੍ਧੀਹੀ’’ਤਿ. ਤਾਹਿ ਪਤਿਟ੍ਠਿਤਾਹਿ ਪਤਿਟ੍ਠਿਤਟ੍ਠਾਨਾਨਿ ਚਤ੍ਤਾਰਿ ਧੁਰੇਨ ਪਤਿਟ੍ਠਿਤਟ੍ਠਾਨਂ ਏਕਨ੍ਤਿ ਪਞ੍ਚ ਠਾਨਾਨਿ ਹੋਨ੍ਤਿ. ਉਦ੍ਧਿਯੋਵ ‘‘ਉਦ੍ਧਿਖਾਣੁਕਾ’’ਤਿ ਵੁਤ੍ਤਾ, ਉਦ੍ਧਿਖਾਣੁਕਾਨਂ ਅਭਾਵੇ ਅਕ੍ਖਸੀਸਾਨਂ ਪਤਿਟ੍ਠਾਨੋਕਾਸਂ ਦਸ੍ਸੇਨ੍ਤੋ ਆਹ ਸਮਮੇਵ ਬਾਹਂ ਕਤ੍ਵਾਤਿਆਦਿ. ਤਤ੍ਥ ਸਮਮੇਵਾਤਿ ਉਦ੍ਧਿਯੋ ਹੇਟ੍ਠਾ ਅਨੋਲਮ੍ਬੇਤ੍ਵਾ ਬਾਹੁਨੋ ਹੇਟ੍ਠਿਮਭਾਗਂ ਸਮਂ ਕਤ੍ਵਾ ਦ੍ਵਿਨ੍ਨਂ ਬਾਹੁਦਾਰੂਨਂ ਮਜ੍ਝੇ ਅਕ੍ਖਸੀਸਪ੍ਪਮਾਣੇਨ ਛਿਦ੍ਦਂ ਕਤ੍ਵਾ ਤਤ੍ਥ ਅਕ੍ਖਸੀਸਾਨਿ ਪਵੇਸਿਤਾਨਿ ਹੋਨ੍ਤਿ, ਤੇਨ ਬਾਹਾਨਂ ਹੇਟ੍ਠਾਭਾਗਂ ਸਬ੍ਬਂ ਭੂਮਿਂ ਫੁਸਿਤ੍ਵਾ ਤਿਟ੍ਠਤਿ, ਤੇਨਾਹ ‘‘ਸਬ੍ਬਂ ਪਥਵਿਂ ਫੁਸਿਤ੍ਵਾ ਤਿਟ੍ਠਤੀ’’ਤਿ. ਸੇਸਂ ਨਾਵਾਯਂ ਵੁਤ੍ਤਸਦਿਸਨ੍ਤਿ ਇਮਿਨਾ ਯਦਿ ਪਨ ਤਂ ਏਵਂ ਗਚ੍ਛਨ੍ਤਂ ਪਕਤਿਗਮਨਂ ਪਚ੍ਛਿਨ੍ਦਿਤ੍ਵਾ ਅਞ੍ਞਂ ਦਿਸਾਭਾਗਂ ਨੇਤਿ, ਪਾਰਾਜਿਕਂ. ਸਯਮੇਵ ਯਂ ਕਿਞ੍ਚਿ ਠਾਨਂ ਸਮ੍ਪਤ੍ਤਂ ਠਾਨਾ ਅਚਾਲੇਨ੍ਤੋਵ ਵਿਕ੍ਕਿਣਿਤ੍ਵਾ ਗਚ੍ਛਤਿ, ਨੇਵਤ੍ਥਿ ਅਵਹਾਰੋ, ਭਣ੍ਡਦੇਯ੍ਯਂ ਪਨ ਹੋਤੀਤਿ ਇਮਂ ਨਯਂ ਅਤਿਦਿਸਤਿ.

ਭਾਰਟ੍ਠਕਥਾਵਣ੍ਣਨਾ

੧੦੧. ਭਾਰਟ੍ਠਕਥਾਯਂ ਭਾਰਟ੍ਠਨ੍ਤਿ ਮਾਤਿਕਾਪਦਸ੍ਸ ਭਾਰੋ ਨਾਮਾਤਿ ਇਦਂ ਅਤ੍ਥਦਸ੍ਸਨਨ੍ਤਿ ਆਹ ‘‘ਭਾਰੋਯੇਵ ਭਾਰਟ੍ਠ’’ਨ੍ਤਿ. ਪੁਰਿਮਗਲੇਤਿ ਗਲਸ੍ਸ ਪੁਰਿਮਭਾਗੇ. ਗਲਵਾਟਕੋਤਿ ਗੀਵਾਯ ਉਪਰਿਮਗਲਵਾਟਕੋ. ਉਰਪਰਿਚ੍ਛੇਦਮਜ੍ਝੇਤਿ ¶ ਉਰਪਰਿਯਨ੍ਤਸ੍ਸ ਮਜ੍ਝੇ. ਸਾਮਿਕੇਹਿ ਅਨਾਣਤ੍ਤੋਤਿ ਇਦਂ ਯਦਿ ¶ ਸਾਮਿਕੇਹਿ ‘‘ਇਮਂ ਭਾਰਂ ਨੇਤ੍ਵਾ ਅਸੁਕਟ੍ਠਾਨੇ ਦੇਹੀ’’ਤਿ ਆਣਤ੍ਤੋ ਭਵੇਯ੍ਯ, ਤਦਾ ਤੇਨ ਗਹਿਤਭਣ੍ਡਂ ਉਪਨਿਕ੍ਖਿਤ੍ਤਂ ਸਿਯਾ, ਤਞ੍ਚ ਥੇਯ੍ਯਚਿਤ੍ਤੇਨ ਸੀਸਾਦਿਤੋ ਓਰੋਪੇਨ੍ਤਸ੍ਸਾਪਿ ਅਵਹਾਰੋ ਨ ਸਿਯਾ, ਸਾਮਿਕਾਨਂ ਪਨ ਧੁਰਨਿਕ੍ਖੇਪੇ ਏਵ ਸਿਯਾਤਿ ਤਤੋ ਉਪਨਿਕ੍ਖਿਤ੍ਤਭਣ੍ਡਭਾਵਤੋ ਵਿਯੋਜੇਤੁਂ ਵੁਤ੍ਤਂ, ਤੇਨੇਵ ਵਕ੍ਖਤਿ ‘‘ਤੇਹਿ ਪਨ ਅਨਾਣਤ੍ਤਤ੍ਤਾ ਪਾਰਾਜਿਕ’’ਨ੍ਤਿ. ਘਂਸਨ੍ਤੋਤਿ ਸੀਸਤੋ ਅਨੁਕ੍ਖਿਪਨ੍ਤੋ, ਯਦਿ ਉਕ੍ਖਿਪੇਯ੍ਯ, ਉਕ੍ਖਿਤ੍ਤਮਤ੍ਤੇ ਪਾਰਾਜਿਕਂ, ਤੇਨਾਹ ਸੀਸਤੋ ਕੇਸਗ੍ਗਮਤ੍ਤਮ੍ਪੀਤਿਆਦਿ. ਯੋ ਚਾਯਨ੍ਤਿ ਯੋ ਅਯਂ ਵਿਨਿਚ੍ਛਯੋ.

ਆਰਾਮਟ੍ਠਕਥਾਵਣ੍ਣਨਾ

੧੦੨. ਆਰਾਮਟ੍ਠਕਥਾਯਂ ਆਰਾਮਂ ਅਭਿਯੁਞ੍ਜਤੀਤਿ ਇਦਂ ਅਭਿਯੋਗਕਰਣਂ ਪਰੇਸਂ ਭੂਮਟ੍ਠਭਣ੍ਡਾਦੀਸੁਪਿ ਕਾਤੁਂ ਵਟ੍ਟਤਿਯੇਵ. ਆਰਾਮਾਦਿਥਾਵਰੇਸੁ ਪਨ ਯੇਭੁਯ੍ਯੇਨ ਅਭਿਯੋਗਵਸੇਨੇਵ ਗਹਣਸਮ੍ਭਵਤੋ ਏਤ੍ਥੇਵ ਪਾਲ਼ਿਯਂ ਅਭਿਯੋਗੋ ਵੁਤ੍ਤੋ, ਇਤਿ ਇਮਿਨਾ ਨਯੇਨ ਸਬ੍ਬਤ੍ਥਾਪਿ ਸਕ੍ਕਾ ਞਾਤੁਨ੍ਤਿ ਗਹੇਤਬ੍ਬਂ. ਅਦਿਨ੍ਨਾਦਾਨਸ੍ਸ ਪਯੋਗਤ੍ਤਾਤਿ ਸਹਪਯੋਗਮਾਹ. ਵਤ੍ਥੁਮ੍ਹਿਯੇਵ ਕਤਪਯੋਗਤ੍ਤਾ ਸਹਪਯੋਗਵਸੇਨ ਹੇਤਂ ਦੁਕ੍ਕਟਂ. ਸਯਮ੍ਪੀਤਿ ਅਭਿਯੁਞ੍ਜਕੋਪਿ. ‘‘ਕਿਂ ਕਰੋਮਿ ਕਿਂ ਕਰੋਮੀ’’ਤਿ ਏਵਂ ਕਿਙ੍ਕਾਰਮੇਵ ਪਟਿਸ੍ਸੁਣਨ੍ਤੋ ਵਿਯ ਚਰਤੀਤਿ ਕਿਙ੍ਕਾਰਪਟਿਸ੍ਸਾਵੀ, ਤਸ੍ਸ ਭਾਵੋ ਕਿਙ੍ਕਾਰਪਟਿਸ੍ਸਾਵਿਭਾਵੋ, ਤਸ੍ਮਿਂ, ਅਤ੍ਤਨੋ ਵਸਵਤ੍ਤਿਭਾਵੇਤਿ ਵੁਤ੍ਤਂ ਹੋਤਿ. ਉਕ੍ਕੋਚਨ੍ਤਿ ਲਞ੍ਜਂ. ਸਬ੍ਬੇਸਂ ਪਾਰਾਜਿਕਨ੍ਤਿ ਕੂਟਵਿਨਿਚ੍ਛਯਿਕਾਦੀਨਂ. ਅਯਂ ਵਤ੍ਥੁਸਾਮੀਤਿਆਦਿਕਸ੍ਸ ਉਭਿਨ੍ਨਂ ਧੁਰਨਿਕ੍ਖੇਪਕਰਣਹੇਤੁਨੋ ਪਯੋਗਸ੍ਸ ਕਰਣਕ੍ਖਣੇਵ ਪਾਰਾਜਿਕਂ ਹੋਤੀਤਿ ਵੇਦਿਤਬ੍ਬਂ. ਸਚੇ ਪਨ ਸਾਮਿਕਸ੍ਸ ਵਿਮਤਿ ਚ ਧੁਰਨਿਕ੍ਖੇਪੋ ਚ ਕਮੇਨ ਉਪ੍ਪਜ੍ਜਨ੍ਤਿ, ਪਯੋਗਸਮੁਟ੍ਠਾਪਕਚਿਤ੍ਤਕ੍ਖਣੇ ਪਾਰਾਜਿਕਮੇਵ ਹੋਤਿ, ਨ ਥੁਲ੍ਲਚ੍ਚਯਂ. ਯਦਿ ਵਿਮਤਿਯੇਵ ਉਪ੍ਪਜ੍ਜਤਿ, ਤਦਾ ਥੁਲ੍ਲਚ੍ਚਯਮੇਵਾਤਿ ਵੇਦਿਤਬ੍ਬਂ, ਅਯਂ ਨਯੋ ਸਬ੍ਬਤ੍ਥ ਯਥਾਨੁਰੂਪਂ ਗਹੇਤਬ੍ਬੋ. ਧੁਰਨਿਕ੍ਖੇਪਵਸੇਨੇਵ ਪਰਾਜਯੋਤਿ ਸਾਮਿਕੋ ‘‘ਅਹਂ ਨ ਮੁਚ੍ਚਾਮੀ’’ਤਿ ਧੁਰਂ ਅਨਿਕ੍ਖਿਪਨ੍ਤੋ ਅਟ੍ਟੋ ਪਰਾਜਿਤੋ ਨਾਮ ਨ ਹੋਤੀਤਿ ਦਸ੍ਸੇਤਿ.

ਵਿਹਾਰਟ੍ਠਕਥਾਵਣ੍ਣਨਾ

੧੦੩. ਵਿਹਾਰਟ੍ਠਕਥਾਯਂ ¶ ਵਿਹਾਰਨ੍ਤਿ ਉਪਚਾਰਸੀਮਾਸਙ੍ਖਾਤਂ ਸਕਲਂ ਵਿਹਾਰਂ. ਪਰਿਵੇਣਨ੍ਤਿ ਤਸ੍ਸ ਵਿਹਾਰਸ੍ਸ ਅਬ੍ਭਨ੍ਤਰੇ ਵਿਸੁਂ ਵਿਸੁਂ ਪਾਕਾਰਾਦਿਪਰਿਚ੍ਛਿਨ੍ਨਟ੍ਠਾਨਂ. ਆਵਾਸਨ੍ਤਿ ਏਕਂ ਆਵਸਥਮਤ੍ਤਂ. ਗਣਸਨ੍ਤਕੇ ਪਰਿਚ੍ਛਿਨ੍ਨਸਾਮਿਕਤ੍ਤਾ ਸਕ੍ਕਾ ਧੁਰਂ ਨਿਕ੍ਖਿਪਾਪੇਤੁਨ੍ਤਿ ਆਹ ‘‘ਦੀਘਭਾਣਕਾਦਿਭੇਦਸ੍ਸ ਪਨ ਗਣਸ੍ਸਾ’’ਤਿ. ਇਧਾਪਿ ਸਚੇ ਏਕੋਪਿ ਧੁਰਂ ਨ ਨਿਕ੍ਖਿਪਤਿ, ਰਕ੍ਖਤਿਯੇਵ. ਏਸ ਨਯੋ ਬਹੂਨਂ ਸਨ੍ਤਕੇ ਸਬ੍ਬਤ੍ਥ.

ਖੇਤ੍ਤਟ੍ਠਕਥਾਵਣ੍ਣਨਾ

੧੦੪. ਖੇਤ੍ਤਟ੍ਠਕਥਾਯਂ ¶ ਨਿਰੁਮ੍ਭਿਤ੍ਵਾ ਵਾਤਿਆਦੀਸੁ ਗਣ੍ਹਨ੍ਤਸ੍ਸਾਤਿ ਪਚ੍ਚੇਕਂ ਯੋਜੇਤਬ੍ਬਂ, ਤਤ੍ਥ ਨਿਰੁਮ੍ਭਿਤ੍ਵਾ ਗਹਣਂ ਨਾਮ ਵੀਹਿਸੀਸਂ ਅਚ੍ਛਿਨ੍ਦਿਤ੍ਵਾ ਯਥਾਠਿਤਮੇਵ ਹਤ੍ਥੇਨ ਗਹੇਤ੍ਵਾ ਆਕਡ੍ਢਿਤ੍ਵਾ ਬੀਜਮਤ੍ਤਸ੍ਸੇਵ ਗਹਣਂ. ਏਕਮੇਕਨ੍ਤਿ ਏਕਂ ਵੀਹਿਸੀਸਂ. ਯਸ੍ਮਿਂ ਬੀਜੇ ਵਾਤਿਆਦਿ ਨਿਰੁਮ੍ਭਿਤ੍ਵਾ ਗਹਣਾਦੀਸੁ ਯਥਾਕ੍ਕਮਂ ਯੋਜੇਤਬ੍ਬਂ. ‘‘ਤਸ੍ਮਿਂ ਬਨ੍ਧਨਾ ਮੋਚਿਤਮਤ੍ਤੇ’’ਤਿ ਵਚਨਤੋ ਤਸ੍ਮਿਂ ਬੀਜਾਦਿਮ੍ਹਿ ਬਨ੍ਧਨਾ ਮੁਤ੍ਤੇ ਸਤਿ ਤਤੋ ਅਨਪਨੀਤੇਪਿ ਠਾਨਨ੍ਤਰਸ੍ਸ ਅਭਾਵਾ ਪਾਰਾਜਿਕਮੇਵ. ਯਸ੍ਸ ਪਨ ਸੀਸਾਦਿਕਸ੍ਸ ਸਨ੍ਤਰਾਦਿਨਾ ਸਹ ਸਂਸਿਬ੍ਬਨਂ ਵਾ ਏਕਾਬਦ੍ਧਤਾ ਵਾ ਹੋਤਿ, ਤਸ੍ਸ ਬਨ੍ਧਨਾ ਮੋਚਿਤੇ ਥੁਲ੍ਲਚ੍ਚਯਂ, ਇਤਰਟ੍ਠਾਨਤੋ ਮੋਚਿਤੇ ਪਾਰਾਜਿਕਨ੍ਤਿ ਗਹੇਤਬ੍ਬਂ, ਤੇਨਾਹ ਵੀਹਿਨਾਲ਼ਨ੍ਤਿਆਦਿ. ਸਭੁਸਨ੍ਤਿ ਪਲਾਲਸਹਿਤਂ. ਖੀਲੇਨਾਤਿ ਖਾਣੁਕੇਨ. ਏਤ੍ਥ ਚ ਖੀਲਸਙ੍ਕਮਨਾਦੀਸੁ ਸਹਪਯੋਗੋ ਧੁਰਨਿਕ੍ਖੇਪੋ ਚਾਤਿ ਉਭਯਂ ਸਮ੍ਭਵਤਿ. ਖੀਲਸਙ੍ਕਮਨਾਦਿ ਏਤ੍ਥ ਸਹਪਯੋਗੋ. ਤਸ੍ਮਿਞ੍ਚ ਕਤੇ ਯਦਿ ਸਾਮਿਕਾ ਧੁਰਂ ਨ ਨਿਕ੍ਖਿਪਨ੍ਤਿ ਪੁਨ ਗਣ੍ਹਿਤੁਕਾਮਾਵ ਹੋਨ੍ਤਿ, ਨ ਤਾਵ ਅਵਹਾਰੋ, ‘‘ਖੀਲਂ ਸਙ੍ਕਾਮੇਤ੍ਵਾ ਖੇਤ੍ਤਾਦਿਂ ਅਸੁਕੋ ਰਾਜਵਲ੍ਲਭੋ ਭਿਕ੍ਖੁ ਗਣ੍ਹਿਤੁਕਾਮੋ’’ਤਿ ਞਤ੍ਵਾ ਤਸ੍ਸ ਬਲਂ ਕਕ੍ਖਲ਼ਾਦਿਭਾਵਞ੍ਚ ਨਿਸ੍ਸਾਯ ਖੀਲਸਙ੍ਕਮਨਾਦਿਕਿਰਿਯਾਨਿਟ੍ਠਾਨਤੋ ਪਠਮਮੇਵ ਸਾਮਿਕਾ ਧੁਰਂ ਨਿਕ੍ਖਿਪਨ੍ਤਿ, ਨ ਅਵਹਾਰੋ ਏਤਸ੍ਸ ਪਯੋਗਨਿਟ੍ਠਾਨਤੋ ਪੁਰੇਤਰਮੇਵ ਧੁਰਸ੍ਸ ਨਿਕ੍ਖਿਤ੍ਤਤ੍ਤਾ. ਯਦਾ ਪਨ ਖੀਲਸਙ੍ਕਮਨਾਦਿਪਯੋਗੇਨੇਵ ਧੁਰਨਿਕ੍ਖੇਪੋ ਹੋਤਿ, ਤਦਾਯੇਵ ਅਵਹਾਰੋ, ਤੇਨੇਵੇਤ੍ਥ ‘‘ਤਞ੍ਚ ਖੋ ਸਾਮਿਕਾਨਂ ਧੁਰਨਿਕ੍ਖੇਪੇਨਾ’’ਤਿ ਵੁਤ੍ਤਂ. ਖੀਲਾਦੀਨਂ ਸਙ੍ਕਮਿਤਭਾਵਂ ਅਜਾਨਿਤ੍ਵਾ ਸਾਮਿਕਾਨਂ ਸਮ੍ਪਟਿਚ੍ਛਨਮ੍ਪੇਤ੍ਥ ਧੁਰਨਿਕ੍ਖੇਪੋਤਿ ਵੇਦਿਤਬ੍ਬੋ. ਏਵਂ ਸਬ੍ਬਤ੍ਥਾਤਿ ਯਥਾਵੁਤ੍ਤਮਤ੍ਥਂ ਰਜ੍ਜੁਸਙ੍ਕਮਨਾਦੀਸੁਪਿ ਅਤਿਦਿਸਤਿ. ਯਟ੍ਠਿਨ੍ਤਿ ਮਾਨਦਣ੍ਡਂ. ਏਕਸ੍ਮਿਂ ਅਨਾਗਤੇ ਥੁਲ੍ਲਚ੍ਚਯਂ, ਤਸ੍ਮਿਂ ਆਗਤੇ ਪਾਰਾਜਿਕਨ੍ਤਿ ¶ ਸਚੇ ਦਾਰੂਨਿ ਨਿਖਣਿਤ੍ਵਾ ਤਤ੍ਤਕੇਨੇਵ ਗਣ੍ਹਿਤੁਕਾਮੋ ਹੋਤਿ, ਅਵਸਾਨੇ ਦਾਰੁਮ੍ਹਿ ਪਾਰਾਜਿਕਂ. ਸਚੇ ਤਤ੍ਥ ਕਣ੍ਟਕਸਾਖਾਦੀਹਿ ਪਾਦਾਨਂ ਅਨ੍ਤਰਂ ਪਟਿਚ੍ਛਾਦੇਤ੍ਵਾ ਕਸ੍ਸਚਿ ਅਪ੍ਪਵੇਸਾਰਹਂ ਕਤ੍ਵਾ ਗਹੇਤੁਕਾਮੋ ਹੋਤਿ, ਅਵਸਾਨਸਾਖਾਯ ਪਾਰਾਜਿਕਂ, ਤੇਨਾਹ ‘‘ਸਾਖਾਪਰਿਵਾਰੇਨੇਵ ਅਤ੍ਤਨੋ ਕਾਤੁਂ ਸਕ੍ਕੋਤੀ’’ਤਿ, ਦਾਰੂਨਿ ਚ ਨਿਖਣਿਤ੍ਵਾ ਸਾਖਾਪਰਿਵਾਰਞ੍ਚ ਕਤ੍ਵਾ ਏਵ ਅਤ੍ਤਨੋ ਸਨ੍ਤਕਂ ਕਾਤੁਂ ਸਕ੍ਕੋਤੀਤਿ ਅਤ੍ਥੋ. ਖੇਤ੍ਤਮਰਿਯਾਦਨ੍ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘‘ਕੇਦਾਰਪਾਲ਼ਿ’’ਨ੍ਤਿ ਵੁਤ੍ਤਂ. ਇਦਞ੍ਚ ਖੀਲਸਙ੍ਕਮਨਾਦਿਨਾ ਗਹਣਂ ਆਰਾਮਾਦੀਸੁਪਿ ਲਬ੍ਭਤੇਵ.

ਵਤ੍ਥੁਟ੍ਠਕਥਾਵਣ੍ਣਨਾ

੧੦੫. ਵਤ੍ਥੁਟ੍ਠਕਥਾਯਂ ਤਿਣ੍ਣਂ ਪਾਕਾਰਾਨਨ੍ਤਿ ਇਟ੍ਠਕਸਿਲਾਦਾਰੂਨਂ ਵਸੇਨ ਤਿਣ੍ਣਂ ਪਾਕਾਰਾਨਂ.

੧੦੬. ਗਾਮਟ੍ਠਕਥਾਯਂ ¶ ‘‘ਗਾਮੋ ਨਾਮਾ’’ਤਿ ਪਾਲ਼ਿਯਂ ਨ ਵੁਤ੍ਤਂ ਸਬ੍ਬਸੋ ਗਾਮਲਕ੍ਖਣਸ੍ਸ ਪੁਬ੍ਬੇ ਵੁਤ੍ਤਤ੍ਤਾ.

ਅਰਞ੍ਞਟ੍ਠਕਥਾਵਣ੍ਣਨਾ

੧੦੭. ਅਰਞ੍ਞਟ੍ਠਕਥਾਯਂ ਵਿਨਿਵਿਜ੍ਝਿਤ੍ਵਾਤਿ ਉਜੁਕਮੇਵ ਵਿਨਿਵਿਜ੍ਝਿਤ੍ਵਾ. ਲਕ੍ਖਣਚ੍ਛਿਨ੍ਨਸ੍ਸਾਤਿ ਅਰਞ੍ਞਸਾਮਿਕਾਨਂ ਹਤ੍ਥਤੋ ਕਿਣਿਤ੍ਵਾ ਗਣ੍ਹਨ੍ਤੇਹਿ ਕਤਅਕ੍ਖਰਾਦਿਸਞ੍ਞਾਣਸ੍ਸ. ਛਲ੍ਲਿਯਾ ਪਰਿਯੋਨਦ੍ਧਨ੍ਤਿ ਇਮਿਨਾ ਸਾਮਿਕਾਨਂ ਨਿਰਾਪੇਕ੍ਖਤਾਯ ਚਿਰਛਡ੍ਡਿਤਭਾਵਂ ਦੀਪੇਤਿ, ਤੇਨਾਹ ‘‘ਗਹੇਤੁਂ ਵਟ੍ਟਤੀ’’ਤਿ. ਯਦਿ ਸਾਮਿਕਾਨਂ ਸਾਪੇਕ੍ਖਤਾ ਅਤ੍ਥਿ, ਨ ਵਟ੍ਟਤਿ. ਤਾਨਿ ਕਤਾਨਿ ਅਜ੍ਝਾਵੁਤ੍ਥਾਨਿ ਚ ਹੋਨ੍ਤੀਤਿ ਤਾਨਿ ਗੇਹਾਦੀਨਿ ਕਤਾਨਿ ਪਰਿਨਿਟ੍ਠਿਤਾਨਿ ਮਨੁਸ੍ਸੇਹਿ ਚ ਅਜ੍ਝਾਵੁਤ੍ਥਾਨਿ ਚ ਹੋਨ੍ਤਿ. ਦਾਰੂਨੀਤਿ ਗੇਹਾਦੀਨਂ ਕਤਤ੍ਤਾ ਅਵਸਿਟ੍ਠਦਾਰੂਨਿ. ਗਹੇਤੁਂ ਵਟ੍ਟਤੀਤਿ ਸਾਮਿਕਾਨਂ ਅਨਾਲਯਤ੍ਤਾ ਵੁਤ੍ਤਂ, ਤੇ ਚ ਯਦਿ ਗਹਣਕਾਲੇ ਦਿਸ੍ਵਾ ਸਾਲਯਾ ਹੁਤ੍ਵਾ ਵਾਰੇਨ੍ਤਿ, ਗਹੇਤੁਂ ਨ ਵਟ੍ਟਤਿਯੇਵ. ‘‘ਦੇਹੀ’’ਤਿ ਵੁਤ੍ਤੇ ਦਾਤਬ੍ਬਮੇਵਾਤਿ ‘‘ਦੇਹੀ’’ਤਿ ਵੁਤ੍ਤੇ ‘‘ਦਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਗਚ੍ਛਨ੍ਤਸ੍ਸ ‘‘ਦੇਹੀ’’ਤਿ ਅਵੁਤ੍ਤੇ ਅਦਤ੍ਵਾ ਗਮਨੇ ਆਪਤ੍ਤਿ ਨਤ੍ਥਿ. ਪਚ੍ਛਾਪਿ ਤੇਹਿ ਚੋਦਿਤੇ ਦਾਤਬ੍ਬਮੇਵ.

ਅਦਿਸ੍ਵਾ ਗਚ੍ਛਤਿ, ਭਣ੍ਡਦੇਯ੍ਯਨ੍ਤਿ ਸੁਦ੍ਧਚਿਤ੍ਤੇਨ ਗਤਸ੍ਸ ਭਣ੍ਡਦੇਯ੍ਯਂ. ਆਰਕ੍ਖਟ੍ਠਾਨਮ੍ਪਿ ਸੁਦ੍ਧਚਿਤ੍ਤੇਨ ਅਤਿਕ੍ਕਮਿਤ੍ਵਾ ਥੇਯ੍ਯਚਿਤ੍ਤੇ ਉਪ੍ਪਨ੍ਨੇਪਿ ਅਵਹਾਰੋ ਨਤ੍ਥਿ ¶ ਆਰਕ੍ਖਟ੍ਠਾਨਸ੍ਸ ਅਤਿਕ੍ਕਨ੍ਤਤ੍ਤਾ. ਕੇਚਿ ਪਨ ‘‘ਯਤ੍ਥ ਕਤ੍ਥਚਿ ਨੀਤਾਨਮ੍ਪਿ ਦਾਰੂਨਂ ਅਰਞ੍ਞਸਾਮਿਕਾਨਞ੍ਞੇਵ ਸਨ੍ਤਕਤ੍ਤਾ ਪੁਨ ਥੇਯ੍ਯਚਿਤ੍ਤਂ ਉਪ੍ਪਾਦੇਤ੍ਵਾ ਗਚ੍ਛਤਿ, ਪਾਰਾਜਿਕਮੇਵਾ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ‘‘ਆਰਕ੍ਖਟ੍ਠਾਨਂ ਪਤ੍ਵਾ…ਪੇ… ਅਸ੍ਸਤਿਯਾ ਅਤਿਕ੍ਕਮਤੀ’’ਤਿ, ਸਹਸਾ ਤਂ ਠਾਨਂ ਅਤਿਕ੍ਕਮਤੀਤਿਆਦਿਨਾ (ਪਾਰਾ. ਅਟ੍ਠ. ੧.੧੦੭) ਚ ਆਰਕ੍ਖਟ੍ਠਾਨਾਤਿਕ੍ਕਮੇਯੇਵ ਆਪਤ੍ਤਿਯਾ ਵੁਚ੍ਚਮਾਨਤ੍ਤਾ, ਆਰਕ੍ਖਟ੍ਠਾਨਾਤਿਕ੍ਕਮਮੇਵ ਸਨ੍ਧਾਯ ‘‘ਇਦਂ ਪਨ ਥੇਯ੍ਯਚਿਤ੍ਤੇਨ ਪਰਿਹਰਨ੍ਤਸ੍ਸ ਆਕਾਸੇਨ ਗਚ੍ਛਤੋਪਿ ਪਾਰਾਜਿਕਮੇਵਾ’’ਤਿ ਵੁਤ੍ਤਂ. ਯਞ੍ਚ ‘‘ਯਤ੍ਥ ਕਤ੍ਥਚਿ ਨੀਤਾਨਮ੍ਪਿ ਦਾਰੂਨਂ ਅਰਞ੍ਞਸਾਮਿਕਾਨਞ੍ਞੇਵ ਸਨ੍ਤਕਤ੍ਤਾ’’ਤਿ ਕਾਰਣਂ ਵੁਤ੍ਤਂ, ਤਮ੍ਪਿ ਆਰਕ੍ਖਟ੍ਠਾਨਤੋ ਬਹਿ ਪਾਰਾਜਿਕਾਪਜ੍ਜਨਸ੍ਸ ਕਾਰਣਂ ਨ ਹੋਤਿ ਭਣ੍ਡਦੇਯ੍ਯਭਾਵਸ੍ਸੇਵ ਕਾਰਣਤ੍ਤਾ. ਤੇਸਂ ਸਨ੍ਤਕਤ੍ਤੇਨੇਵ ਹਿ ਬਹਿ ਕਤਸ੍ਸਾਪਿ ਭਣ੍ਡਦੇਯ੍ਯਂ ਜਾਤਂ, ਇਤਰਥਾ ਚ ਭਣ੍ਡਦੇਯ੍ਯਮ੍ਪਿ ਨ ਸਿਯਾ ਸੁਙ੍ਕਘਾਤਾਤਿਕ੍ਕਮੇ ਵਿਯ. ਅਦ੍ਧਿਕੇਹਿ ਦਿਨ੍ਨਮੇਵ ਸੁਙ੍ਕਿਕਾਨਂ ਸਨ੍ਤਕਂ ਹੋਤਿ, ਨਾਦਿਨ੍ਨਂ, ਤੇਨ ਤਂ ਠਾਨਂ ਯਤੋ ਕੁਤੋਚਿ ਪਚ੍ਚਯਤੋ ਸੁਦ੍ਧਚਿਤ੍ਤੇਨ ਅਤਿਕ੍ਕਨ੍ਤਸ੍ਸ ਭਣ੍ਡਦੇਯ੍ਯਮ੍ਪਿ ਨ ਹੋਤਿ. ਇਧ ਪਨ ਅਰਞ੍ਞਸਾਮਿਕਾਨਂ ਸਨ੍ਤਕਤ੍ਤਾ ਸਬ੍ਬਤ੍ਥਾਪਿ ਭਣ੍ਡਦੇਯ੍ਯਮੇਵ ਹੋਤਿ, ਤੇਨੇਵੇਤਂ ਅਰਞ੍ਞੇ ਆਰਕ੍ਖਟ੍ਠਾਨਂ ਸੁਙ੍ਕਘਾਤਤੋਪਿ ਗਰੁਤਰਂ ¶ ਜਾਤਂ. ਯਦਿ ਹਿ ਆਰਕ੍ਖਟ੍ਠਾਨਤੋ ਬਹਿਪਿ ਥੇਯ੍ਯਚਿਤ੍ਤੇ ਸਤਿ ਅਵਹਾਰੋ ਭਵੇਯ੍ਯ, ਆਰਕ੍ਖਟ੍ਠਾਨਂ ਪਤ੍ਵਾਤਿਆਦਿਨਾ ਠਾਨਨਿਯਮੋ ਨਿਰਤ੍ਥਕੋ ਸਿਯਾ ਯਤ੍ਥ ਕਤ੍ਥਚਿ ਥੇਯ੍ਯਚਿਤ੍ਤੇ ਉਪ੍ਪਨ੍ਨੇ ਪਾਰਾਜਿਕਨ੍ਤਿ ਵਤ੍ਤਬ੍ਬਤੋ. ਤਸ੍ਮਾ ਆਰਕ੍ਖਟ੍ਠਾਨਤੋ ਬਹਿ ਥੇਯ੍ਯਚਿਤ੍ਤੇਨ ਗਚ੍ਛਨ੍ਤਸ੍ਸ ਅਵਹਾਰੋ ਨ ਭਵਤਿ ਏਵਾਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ. ਇਦਂ ਪਨ ਥੇਯ੍ਯਚਿਤ੍ਤੇਨ ਪਰਿਹਰਨ੍ਤਸ੍ਸਾਤਿ ਯਸ੍ਮਿਂ ਪਦੇਸੇ ਅਤਿਕ੍ਕਨ੍ਤੇ ਤੇਸਂ ਅਰਞ੍ਞਂ ਆਰਕ੍ਖਟ੍ਠਾਨਞ੍ਚ ਅਤਿਕ੍ਕਨ੍ਤੋ ਨਾਮ ਹੋਤਿ, ਤਂ ਪਦੇਸਂ ਆਕਾਸੇਨਾਪਿ ਅਤਿਕ੍ਕਮਨਵਸੇਨ ਗਚ੍ਛਨ੍ਤਸ੍ਸਾਪੀਤਿ ਅਤ੍ਥੋ.

ਉਦਕਕਥਾਵਣ੍ਣਨਾ

੧੦੮. ਉਦਕਕਥਾਯਂ ਮਹਾਕੁਚ੍ਛਿਕਾ ਉਦਕਚਾਟਿ ਉਦਕਮਣਿਕੋ, ‘‘ਸਮੇਖਲਾ ਚਾਟਿ ਉਦਕਮਣਿਕੋ’’ਤਿਪਿ ਵਦਨ੍ਤਿ. ਤਤ੍ਥਾਤਿ ਤੇਸੁ ਭਾਜਨੇਸੁ. ਭੂਤਗਾਮੇਨ ਸਦ੍ਧਿਮ੍ਪੀਤਿ ਪਿ-ਸਦ੍ਦੇਨ ਅਕਪ੍ਪਿਯਪਥਵਿਮ੍ਪਿ ਸਙ੍ਗਣ੍ਹਾਤਿ. ਤਲ਼ਾਕਰਕ੍ਖਣਤ੍ਥਾਯਾਤਿ ‘‘ਮਹੋਦਕਂ ਆਗਨ੍ਤ੍ਵਾ ਤਲ਼ਾਕਮਰਿਯਾਦਂ ਮਾ ਛਿਨ੍ਦੀ’’ਤਿ ਤਲ਼ਾਕਰਕ੍ਖਣਤ੍ਥਂ. ਨਿਬ੍ਬਹਨਉਦਕਨ੍ਤਿ ਏਤ੍ਥ ਤਲ਼ਾਕਸ੍ਸ ਏਕੇਨ ਉਨ੍ਨਤੇਨ ਪਸ੍ਸੇਨ ਅਧਿਕਜਲਂ ਨਿਬ੍ਬਹਤਿ ਨਿਗਚ੍ਛਤਿ ਏਤੇਨਾਤਿ ‘‘ਨਿਬ੍ਬਹਨ’’ਨ੍ਤਿ ਅਧਿਕਜਲਨਿਕ੍ਖਮਨਮਾਤਿਕਾ ¶ ਵੁਚ੍ਚਤਿ. ਤਤ੍ਥ ਗਚ੍ਛਮਾਨਂ ਉਦਕਂ ਨਿਬ੍ਬਹਨਉਦਕਂ ਨਾਮ. ਨਿਦ੍ਧਮਨਤੁਮ੍ਬਨ੍ਤਿ ਸਸ੍ਸਾਦੀਨਂ ਅਤ੍ਥਾਯ ਇਟ੍ਠਕਾਦੀਹਿ ਕਤਂ ਉਦਕਨਿਕ੍ਖਮਨਪਨਾਲ਼ਿ. ਮਰਿਯਾਦਂ ਦੁਬ੍ਬਲਂ ਕਤ੍ਵਾਤਿ ਏਤ੍ਥ ਦੁਬ੍ਬਲਂ ਅਕਤ੍ਵਾਪਿ ਯਥਾਵੁਤ੍ਤਪ੍ਪਯੋਗੇ ਕਤੇ ਮਰਿਯਾਦਂ ਛਿਨ੍ਦਿਤ੍ਵਾ ਨਿਕ੍ਖਨ੍ਤਉਦਕਗ੍ਘਾਨੁਰੂਪੇਨ ਅਵਹਾਰੇਨ ਕਤ੍ਤਬ੍ਬਮੇਵ. ਯਤ੍ਤਕਂ ਤਪ੍ਪਚ੍ਚਯਾ ਸਸ੍ਸਂ ਉਪ੍ਪਜ੍ਜਤੀਤਿ ਬੀਜਕਸਿਕਮ੍ਮਾਦਿਬ੍ਬਯਂ ਠਪੇਤ੍ਵਾ ਯਂ ਅਧਿਕਲਾਭਂ ਉਪ੍ਪਜ੍ਜਤਿ, ਤਂ ਸਨ੍ਧਾਯ ਵੁਤ੍ਤਂ. ਨ ਹਿ ਤੇਹਿ ਕਾਤਬ੍ਬਂ ਵਯਕਰਣਮ੍ਪਿ ਏਤਸ੍ਸ ਦਾਤਬ੍ਬਂ. ਇਦਞ੍ਚ ਤਰੁਣਸਸ੍ਸੇ ਜਾਤੇ ਉਦਕਂ ਵਿਨਾਸੇਨ੍ਤਸ੍ਸ ਯੁਜ੍ਜਤਿ, ਸਸ੍ਸੇ ਪਨ ਸਬ੍ਬਥਾ ਅਕਤੇਯੇਵ ਉਦਕਂ ਵਿਨਾਸੇਨ੍ਤੇਨ ਚ ਉਦਕਗ੍ਘਮੇਵ ਦਾਤਬ੍ਬਂ, ਨ ਤਪ੍ਪਚ੍ਚਯਾ ਸਕਲਂ ਸਸ੍ਸਂ ਤੇਨ ਵਿਨਾਸਿਤਭਣ੍ਡਸ੍ਸੇਵ ਭਣ੍ਡਦੇਯ੍ਯਤ੍ਤਾ, ਇਤਰਥਾ ਵਾਣਿਜ੍ਜਾਦਿਅਤ੍ਥਾਯ ਪਰੇਹਿ ਠਪਿਤਭਣ੍ਡਂ ਅਵਹਰਨ੍ਤਸ੍ਸ ਤਦੁਭਯਮ੍ਪਿ ਗਹੇਤ੍ਵਾ ਭਣ੍ਡਗ੍ਘਂ ਕਾਤਬ੍ਬਂ ਸਿਯਾ, ਤਞ੍ਚ ਨ ਯੁਤ੍ਤਨ੍ਤਿ ਅਮ੍ਹਾਕਂ ਖਨ੍ਤਿ. ਸਾਮਿਕਾਨਂ ਧੁਰਨਿਕ੍ਖੇਪੇਨਾਤਿ ਏਤ੍ਥ ਏਕਸ੍ਸ ਸਨ੍ਤਕੇ ਤਲ਼ਾਕੇ ਖੇਤ੍ਤੇ ਚ ਜਾਤੇ ਤਸ੍ਸੇਵ ਧੁਰਨਿਕ੍ਖੇਪੇਨ ਪਾਰਾਜਿਕਂ, ਯਦਿ ਪਨ ਤਂ ਤਲ਼ਾਕਂ ਸਬ੍ਬਸਾਧਾਰਣਂ, ਖੇਤ੍ਤਾਨਿ ਪਾਟਿਪੁਗ੍ਗਲਿਕਾਨਿ, ਤਸ੍ਸ ਤਸ੍ਸ ਪੁਗ੍ਗਲਸ੍ਸੇਵ ਧੁਰਨਿਕ੍ਖੇਪੇ ਅਵਹਾਰੋ, ਅਥ ਖੇਤ੍ਤਾਨਿਪਿ ਸਬ੍ਬਸਾਧਾਰਣਾਨਿ, ਸਬ੍ਬੇਸਂ ਧੁਰਨਿਕ੍ਖੇਪੇਯੇਵ ਪਾਰਾਜਿਕਂ, ਨਾਸਤੀਤਿ ਦਟ੍ਠਬ੍ਬਂ.

ਅਨਿਗ੍ਗਤੇਤਿ ਅਨਿਕ੍ਖਨ੍ਤੇ, ਤਲ਼ਾਕੇਯੇਵ ਠਿਤੇਤਿ ਅਤ੍ਥੋ. ਪਰੇਸਂ ਮਾਤਿਕਾਮੁਖਨ੍ਤਿ ਖੁਦ੍ਦਕਮਾਤਿਕਾਮੁਖਂ. ਅਸਮ੍ਪਤ੍ਤੇਵਾਤਿ ਤਲ਼ਾਕਤੋ ਨਿਕ੍ਖਮਿਤ੍ਵਾ ਮਹਾਮਾਤਿਕਾਯਂ ਏਵ ਠਿਤੇ. ਅਨਿਕ੍ਖਨ੍ਤੇ ਬਦ੍ਧਾ ਸੁਬਦ੍ਧਾਤਿ ਤਲ਼ਾਕਤੋ ਅਨਿਕ੍ਖਨ੍ਤੇ ਭਣ੍ਡਦੇਯ੍ਯਮ੍ਪਿ ਨ ਹੋਤਿ ਸਬ੍ਬਸਾਧਾਰਣਤ੍ਤਾ ਉਦਕਸ੍ਸਾਤਿ ¶ ਅਧਿਪ੍ਪਾਯੋ. ਨਿਕ੍ਖਨ੍ਤੇ ਪਨ ਪਾਟਿਪੁਗ੍ਗਲਿਕਂ ਹੋਤੀਤਿ ਆਹ ‘‘ਨਿਕ੍ਖਨ੍ਤੇ ਬਦ੍ਧਾ ਭਣ੍ਡਦੇਯ੍ਯ’’ਨ੍ਤਿ. ਇਧ ਪਨ ਖੁਦ੍ਦਕਮਾਤਿਕਾਯਂ ਅਪ੍ਪਵਿਟ੍ਠਤ੍ਤਾ ਅਵਹਾਰੋ ਨ ਜਾਤੋ, ‘‘ਤਲ਼ਾਕਤੋ ਅਨਿਗ੍ਗਤੇ ਪਰੇਸਂ ਮਾਤਿਕਾਮੁਖਂ ਅਸਮ੍ਪਤ੍ਤੇਵਾ’’ਤਿ ਹੇਟ੍ਠਾ ਵੁਤ੍ਤਸ੍ਸ ਵਿਕਪ੍ਪਦ੍ਵਯਸ੍ਸ ‘‘ਅਨਿਕ੍ਖਨ੍ਤੇ ਬਦ੍ਧਾ ਸੁਬਦ੍ਧਾ, ਨਿਕ੍ਖਨ੍ਤੇ ਬਦ੍ਧਾ ਭਣ੍ਡਦੇਯ੍ਯ’’ਨ੍ਤਿ ਇਦਂ ਦ੍ਵਯਂ ਯਥਾਕ੍ਕਮੇਨ ਯੋਜਨਤ੍ਥਂ ਵੁਤ੍ਤਂ. ਨਤ੍ਥਿ ਅਵਹਾਰੋਤਿ ਏਤ੍ਥ ‘‘ਅਵਹਾਰੋ ਨਤ੍ਥਿ, ਭਣ੍ਡਦੇਯ੍ਯਂ ਪਨ ਹੋਤੀ’’ਤਿ ਕੇਚਿ ਵਦਨ੍ਤਿ, ਤਂ ਨ ਯੁਤ੍ਤਂ. ਵਤ੍ਥੁਂ…ਪੇ… ਨ ਸਮੇਤੀਤਿ ਏਤ੍ਥ ਤਲ਼ਾਕਗਤਉਦਕਸ੍ਸ ਸਬ੍ਬਸਾਧਾਰਣਤ੍ਤਾ ਪਰਸਨ੍ਤਕਵਤ੍ਥੁ ਨ ਹੋਤੀਤਿ ਅਧਿਪ੍ਪਾਯੋ.

ਦਨ੍ਤਪੋਨਕਥਾਵਣ੍ਣਨਾ

੧੦੯. ਦਨ੍ਤਕਟ੍ਠਕਥਾਯਂ ¶ ਤਤੋ ਪਟ੍ਠਾਯ ਅਵਹਾਰੋ ਨਤ੍ਥੀਤਿ ‘‘ਯਥਾਸੁਖਂ ਭਿਕ੍ਖੁਸਙ੍ਘੋ ਪਰਿਭੁਞ੍ਜਤੂ’’ਤਿ ਅਭਾਜੇਤ੍ਵਾਵ ਯਾਵਦਿਚ੍ਛਕਂ ਗਹਣਤ੍ਥਮੇਵ ਠਪਿਤਤ੍ਤਾ ਅਰਕ੍ਖਿਤਤ੍ਤਾ ਸਬ੍ਬਸਾਧਾਰਣਤ੍ਤਾ ਚ ਅਞ੍ਞਂ ਸਙ੍ਘਿਕਂ ਵਿਯ ਨ ਹੋਤੀਤਿ ਥੇਯ੍ਯਚਿਤ੍ਤੇਨ ਗਣ੍ਹਨ੍ਤਸ੍ਸਾਪਿ ਨਤ੍ਥਿ ਅਵਹਾਰੋ. ਖਾਦਨ੍ਤੁ, ਪੁਨ ਸਾਮਣੇਰਾ ਆਹਰਿਸ੍ਸਨ੍ਤੀਤਿ ਕੇਚਿ ਥੇਰਾ ਵਦੇਯ੍ਯੁਨ੍ਤਿ ਯੋਜੇਤਬ੍ਬਂ.

ਵਨਪ੍ਪਤਿਕਥਾਵਣ੍ਣਨਾ

੧੧੦. ਵਨਪ੍ਪਤਿਕਥਾਯਂ ਸਨ੍ਧਾਰਿਤਤ੍ਤਾਤਿ ਛਿਨ੍ਨਸ੍ਸ ਰੁਕ੍ਖਸ੍ਸ ਪਤਿਤੁਂ ਆਰਦ੍ਧਸ੍ਸ ਸਨ੍ਧਾਰਣਮਤ੍ਤੇਨ ਵੁਤ੍ਤਂ, ਨ ਪਨ ਮਰਿਚਵਲ੍ਲਿਆਦੀਹਿ ਪੁਬ੍ਬੇ ਵੇਠੇਤ੍ਵਾ ਠਿਤਭਾਵੇਨ. ਤਾਦਿਸੇ ਹਿ ਛਿਨ੍ਨੇਪਿ ਅਵਹਾਰੋ ਨਤ੍ਥਿ ਅਰਞ੍ਞਟ੍ਠਕਥਾਯਂ ਵੇਠਿਤਵਲ੍ਲਿਯਂ ਵਿਯ. ਉਜੁਕਮੇਵ ਤਿਟ੍ਠਤੀਤਿ ਇਮਿਨਾ ਸਬ੍ਬਸੋ ਛਿਨ੍ਦਨਮੇਵ ਵਲ੍ਲਿਆਦੀਹਿ ਅਸਮ੍ਬਦ੍ਧਸ੍ਸ ਰੁਕ੍ਖਸ੍ਸ ਠਾਨਾਚਾਵਨਂ ਪੁਬ੍ਬੇ ਵਿਯ ਆਕਾਸਾਦੀਸੁ ਫੁਟ੍ਠਸਕਲਪਦੇਸਤੋ ਮੋਚਨਨ੍ਤਿ ਆਵੇਣਿਕਮਿਧ ਠਾਨਾਚਾਵਨਂ ਦਸ੍ਸੇਤਿ. ਕੇਚਿ ਪਨ ‘‘ਰੁਕ੍ਖਭਾਰੇਨ ਕਿਞ੍ਚਿਦੇਵ ਭਸ੍ਸਿਤ੍ਵਾ ਠਿਤਤ੍ਤਾ ਹੋਤਿਯੇਵ ਠਾਨਾਚਾਵਨ’’ਨ੍ਤਿ ਵਦਨ੍ਤਿ, ਤਨ੍ਨ, ਰੁਕ੍ਖੇਨ ਫੁਟ੍ਠਸ੍ਸ ਸਕਲਸ੍ਸ ਆਕਾਸਪਦੇਸਸ੍ਸ ਪਞ੍ਚਹਿ ਛਹਿ ਵਾ ਆਕਾਰੇਹਿ ਅਨਤਿਕ੍ਕਮਿਤਤ੍ਤਾ. ਵਾਤਮੁਖਂ ਸੋਧੇਤੀਤਿ ਯਥਾ ਵਾਤੋ ਆਗਨ੍ਤ੍ਵਾ ਰੁਕ੍ਖਂ ਪਾਤੇਤਿ, ਏਵਂ ਵਾਤਸ੍ਸ ਆਗਮਨਮਗ੍ਗਂ ਰੁਨ੍ਧਿਤ੍ਵਾ ਠਿਤਾਨਿ ਸਾਖਾਗੁਮ੍ਬਾਦੀਨਿ ਛਿਨ੍ਦਿਤ੍ਵਾ ਅਪਨੇਨ੍ਤੋ ਸੋਧੇਤਿ. ਮਣ੍ਡੂਕਕਣ੍ਟਕਂ ਵਾਤਿ ਮਣ੍ਡੂਕਾਨਂ ਨਙ੍ਗੁਟ੍ਠੇ ਅਗ੍ਗਕੋਟਿਯਂ ਠਿਤਕਣ੍ਟਕਨ੍ਤਿ ਵਦਨ੍ਤਿ, ਏਕੇ ‘‘ਵਿਸਮਚ੍ਛਕਣ੍ਟਕ’’ਨ੍ਤਿਪਿ ਵਦਨ੍ਤਿ.

ਹਰਣਕਕਥਾਵਣ੍ਣਨਾ

੧੧੧. ਹਰਣਕਕਥਾਯਂ ¶ ਹਰਣਕਨ੍ਤਿ ਵਤ੍ਥੁਸਾਮਿਨਾ ਹਰਿਯਮਾਨਂ. ਸੋ ਚ ਪਾਦਂ ਅਗ੍ਘਤਿ, ਪਾਰਾਜਿਕਮੇਵਾਤਿ ‘‘ਅਨ੍ਤਂ ਨ ਗਣ੍ਹਿਸ੍ਸਾਮੀ’’ਤਿ ਅਸਲ੍ਲਕ੍ਖਿਤਤ੍ਤਾ ਸਾਮਞ੍ਞਤੋ ‘‘ਗਣ੍ਹਿਸ੍ਸਾਮਿ ਏਤ’’ਨ੍ਤਿ ਸਲ੍ਲਕ੍ਖਿਤਸ੍ਸੇਵ ਪਟਸ੍ਸ ਏਕਦੇਸਤਾਯ ਤਮ੍ਪਿ ਗਣ੍ਹਿਤੁਕਾਮੋਵਾਤਿ ਪਾਰਾਜਿਕਂ ਵੁਤ੍ਤਂ. ਸਭਣ੍ਡਹਾਰਕਨ੍ਤਿ ਸਹਭਣ੍ਡਹਾਰਕਂ, ਸਕਾਰਾਦੇਸਸ੍ਸ ਵਿਕਪ੍ਪਤ੍ਤਾ ਸਹ ਸਦ੍ਦੋਵ ਠਿਤੋ, ਭਣ੍ਡਹਾਰਕੇਨ ਸਹ ਤਂ ਭਣ੍ਡਨ੍ਤਿ ਅਤ੍ਥੋ. ਸਾਸਙ੍ਕੋਤਿ ‘‘ਯਦਿ ਉਪਸਙ੍ਕਮਿਤ੍ਵਾ ¶ ਭਣ੍ਡਂ ਗਣ੍ਹਿਸ੍ਸਾਮਿ, ਆਵੁਧੇਨ ਮਂ ਪਹਰੇਯ੍ਯਾ’’ਤਿ ਭਯੇਨ ਸਞ੍ਜਾਤਾਸਙ੍ਕੋ. ਏਕਮਨ੍ਤਂ ਪਟਿਕ੍ਕਮ੍ਮਾਤਿ ਭਯੇਨੇਵ ਅਨੁਪਗਨ੍ਤ੍ਵਾ ਮਗ੍ਗਤੋ ਸਯਂ ਪਟਿਕ੍ਕਮ੍ਮ. ਸਨ੍ਤਜ੍ਜੇਤ੍ਵਾਤਿ ਫਰੁਸਵਾਚਾਯ ਚੇਵ ਆਵੁਧਪਰਿਵਤ੍ਤਨਾਦਿਕਾਯਵਿਕਾਰੇਨ ਚ ਸਨ੍ਤਜ੍ਜੇਤ੍ਵਾ. ਅਨਜ੍ਝਾਵੁਤ੍ਥਕਨ੍ਤਿ ਅਪਰਿਗ੍ਗਹਿਤਕਂ. ਆਲਯੇਨ ਅਨਧਿਮੁਤ੍ਤਮ੍ਪਿ ਭਣ੍ਡਂ ਅਨਜ੍ਝਾਵੁਤ੍ਥਕਂ ਨਾਮ ਹੋਤੀਤਿ ਆਹ ‘‘ਆਹਰਾਪੇਨ੍ਤੇ ਦਾਤਬ੍ਬ’’ਨ੍ਤਿ, ਇਮਿਨਾ ਪਠਮਂ ਪਰਿਚ੍ਚਤ੍ਤਾਲਯਾਨਮ੍ਪਿ ਯਦਿ ਪਚ੍ਛਾਪਿ ਸਕਸਞ੍ਞਾ ਉਪ੍ਪਜ੍ਜਤਿ, ਤੇਸਞ੍ਞੇਵ ਤਂ ਭਣ੍ਡਂ ਹੋਤਿ, ਬਲਕ੍ਕਾਰੇਨਾਪਿ ਸਕਸਞ੍ਞਾਯ ਤਸ੍ਸ ਗਹਣੇ ਦੋਸੋ ਨਤ੍ਥਿ, ਅਦਦਨ੍ਤਸ੍ਸੇਵ ਅਵਹਾਰੋਤਿ ਦਸ੍ਸੇਤਿ. ਯਦਿ ਪਨ ਸਾਮਿਨੋ ‘‘ਪਰਿਚ੍ਚਤ੍ਤਂ ਮਯਾ ਪਠਮਂ, ਇਦਾਨਿ ਮਮ ਸਨ੍ਤਕਂ ਵਾ ਏਤਂ, ਨੋ’’ਤਿ ਆਸਙ੍ਕਾ ਹੋਤਿ, ਬਲਕ੍ਕਾਰੇਨ ਗਹੇਤੁਂ ਨ ਵਟ੍ਟਤਿ ਸਕਸਞ੍ਞਾਬਲੇਨੇਵ ਪੁਨ ਗਹੇਤਬ੍ਬਭਾਵਸ੍ਸ ਆਪਨ੍ਨਤ੍ਤਾ. ‘‘ਅਦੇਨ੍ਤਸ੍ਸ ਪਾਰਾਜਿਕ’’ਨ੍ਤਿ ਵਚਨਤੋ ਚੋਰਸ੍ਸ ਸਕਸਞ੍ਞਾਯ ਵਿਜ੍ਜਮਾਨਾਯਪਿ ਸਾਮਿਕੇਸੁ ਸਾਲਯੇਸੁ ਅਦਾਤੁਂ ਨ ਵਟ੍ਟਤੀਤਿ ਦੀਪਿਤਂ ਹੋਤਿ. ਅਞ੍ਞੇਸੂਤਿ ਮਹਾਪਚ੍ਚਰਿਯਾਦੀਸੁ. ਵਿਚਾਰਣਾਯੇਵ ਨਤ੍ਥੀਤਿ ਇਮਿਨਾ ਤਤ੍ਥਾਪਿ ਪਟਿਕ੍ਖੇਪਾਭਾਵਤੋ ਅਯਮੇਵ ਅਤ੍ਥੋਤਿ ਦਸ੍ਸੇਤਿ.

ਉਪਨਿਧਿਕਥਾਵਣ੍ਣਨਾ

੧੧੨. ਉਪਨਿਧਿਕਥਾਯਂ ਸਙ੍ਗੋਪਨਤ੍ਥਾਯ ਅਤ੍ਤਨੋ ਹਤ੍ਥੇ ਨਿਕ੍ਖਿਤ੍ਤਸ੍ਸ ਭਣ੍ਡਸ੍ਸ ਗੁਤ੍ਤਟ੍ਠਾਨੇ ਪਟਿਸਾਮਨਪ੍ਪਯੋਗਂ ਵਿਨਾ ਨਾਹਂ ਗਣ੍ਹਾਮੀਤਿਆਦਿਨਾ ਅਞ੍ਞਸ੍ਮਿਂ ਪਯੋਗੇ ਅਕਤੇ ਰਜ੍ਜਸਙ੍ਖੋਭਾਦਿਕਾਲੇ ‘‘ਨ ਦਾਨਿ ਤਸ੍ਸ ਦਸ੍ਸਾਮਿ, ਨ ਮਯ੍ਹਂ ਦਾਨਿ ਦਸ੍ਸਤੀ’’ਤਿ ਉਭੋਹਿਪਿ ਸਕਸਕਟ੍ਠਾਨੇ ਨਿਸੀਦਿਤ੍ਵਾ ਧੁਰਨਿਕ੍ਖੇਪੇ ਕਤੇਪਿ ਅਵਹਾਰੋ ਨਤ੍ਥਿ. ਕੇਚਿ ਪਨੇਤ੍ਥ ‘‘ਪਾਰਾਜਿਕਮੇਵ ਪਟਿਸਾਮਨਪ੍ਪਯੋਗਸ੍ਸ ਕਤਤ੍ਤਾ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ, ਨ ਸਾਰਤੋ ਪਚ੍ਚੇਤਬ੍ਬਂ. ਪਟਿਸਾਮਨਕਾਲੇ ਹਿਸ੍ਸ ਥੇਯ੍ਯਚਿਤ੍ਤਂ ਨਤ੍ਥਿ, ‘‘ਨ ਦਾਨਿ ਤਸ੍ਸ ਦਸ੍ਸਾਮੀ’’ਤਿ ਥੇਯ੍ਯਚਿਤ੍ਤੁਪ੍ਪਤ੍ਤਿਕ੍ਖਣੇ ਪਨ ਸਾਮਿਨੋ ਧੁਰਨਿਕ੍ਖੇਪਚਿਤ੍ਤੁਪ੍ਪਤ੍ਤਿਯਾ ਹੇਤੁਭੂਤੋ ਕਾਯਵਚੀਪਯੋਗੋ ਨਤ੍ਥਿ, ਯੇਨ ਸੋ ਆਪਤ੍ਤਿਂ ਆਪਜ੍ਜੇਯ੍ਯ. ਨ ਹਿ ਅਕਿਰਿਯਸਮੁਟ੍ਠਾਨਾਯਂ ਆਪਤ੍ਤੀਤਿ. ਦਾਨੇ ਸਉਸ੍ਸਾਹੋ, ਰਕ੍ਖਤਿ ਤਾਵਾਤਿ ਅਵਹਾਰਂ ਸਨ੍ਧਾਯ ਅਵੁਤ੍ਤਤ੍ਤਾ ਨਾਹਂ ਗਣ੍ਹਾਮੀਤਿਆਦਿਨਾ ਮੁਸਾਵਾਦਕਰਣੇ ਪਾਚਿਤ੍ਤਿਯਮੇਵ ਹੋਤਿ, ਨ ਦੁਕ੍ਕਟਂ ¶ ਥੇਯ੍ਯਚਿਤ੍ਤਾਭਾਵੇਨ ਸਹਪਯੋਗਸ੍ਸਾਪਿ ਅਭਾਵਤੋਤਿ ਗਹੇਤਬ੍ਬਂ. ਯਦਿਪਿ ਮੁਖੇਨ ਦਸ੍ਸਾਮੀਤਿ ਵਦਤਿ…ਪੇ… ਪਾਰਾਜਿਕਨ੍ਤਿ ਏਤ੍ਥ ਕਤਰਪਯੋਗੇਨ ਆਪਤ੍ਤਿ, ਨ ਤਾਵ ਪਠਮੇਨ ਭਣ੍ਡਪਟਿਸਾਮਨਪ੍ਪਯੋਗੇਨ ਤਦਾ ਥੇਯ੍ਯਚਿਤ੍ਤਾਭਾਵਾ, ਨਾਪਿ ‘‘ਦਸ੍ਸਾਮੀ’’ਤਿ ¶ ਕਥਨਪ੍ਪਯੋਗੇਨ ਤਦਾ ਥੇਯ੍ਯਚਿਤ੍ਤੇ ਵਿਜ੍ਜਮਾਨੇਪਿ ਪਯੋਗਸ੍ਸ ਕਪ੍ਪਿਯਤ੍ਤਾਤਿ? ਵੁਚ੍ਚਤੇ – ਸਾਮਿਨਾ ‘‘ਦੇਹੀ’’ਤਿ ਬਹੁਸੋ ਯਾਚਿਯਮਾਨੋਪਿ ਅਦਤ੍ਵਾ ਯੇਨ ਪਯੋਗੇਨ ਅਤ੍ਤਨੋ ਅਦਾਤੁਕਾਮਤਂ ਸਾਮਿਕਸ੍ਸ ਞਾਪੇਤਿ, ਯੇਨ ਚ ਸੋ ‘‘ਅਦਾਤੁਕਾਮੋ ਅਯਂ ਵਿਕ੍ਖਿਪਤੀ’’ਤਿ ਞਤ੍ਵਾ ਧੁਰਂ ਨਿਕ੍ਖਿਪਤਿ, ਤੇਨੇਵ ਪਯੋਗੇਨਸ੍ਸ ਆਪਤ੍ਤਿ. ਨ ਹੇਤ੍ਥ ਉਪਨਿਕ੍ਖਿਤ੍ਤਭਣ੍ਡੇ ਪਰਿਯਾਯੇਨ ਮੁਤ੍ਤਿ ਅਤ੍ਥਿ. ਅਦਾਤੁਕਾਮਤਾਯ ਹਿ ਕਦਾ ਤੇ ਦਿਨ੍ਨਂ, ਕਤ੍ਥ ਤੇ ਦਿਨ੍ਨਨ੍ਤਿਆਦਿਪਰਿਯਾਯਵਚਨੇਨਾਪਿ ਸਾਮਿਕਸ੍ਸ ਧੁਰੇ ਨਿਕ੍ਖਿਪਾਪਿਤੇ ਆਪਤ੍ਤਿਯੇਵ. ਤੇਨੇਵ ਅਟ੍ਠਕਥਾਯਂ ਵੁਤ੍ਤਂ – ‘‘ਕਿਂ ਤੁਮ੍ਹੇ ਭਣਥ…ਪੇ… ਏਵਂ ਉਭਿਨ੍ਨਂ ਧੁਰਨਿਕ੍ਖੇਪੇਨ ਭਿਕ੍ਖੁਨੋ ਪਾਰਾਜਿਕ’’ਨ੍ਤਿ (ਪਾਰਾ. ਅਟ੍ਠ. ੧.੧੧੧). ਪਰਸਨ੍ਤਕਸ੍ਸ ਪਰੇਹਿ ਗਣ੍ਹਾਪਨੇ ਏਵ ਪਰਿਯਾਯਤੋ ਮੁਤ੍ਤਿ, ਨ ਸਬ੍ਬਤ੍ਥਾਤਿ ਗਹੇਤਬ੍ਬਂ. ਅਤ੍ਤਨੋ ਹਤ੍ਥੇ ਨਿਕ੍ਖਿਤ੍ਤਤ੍ਤਾਤਿ ਏਤ੍ਥ ਅਤ੍ਤਨੋ ਹਤ੍ਥੇ ਸਾਮਿਨਾ ਦਿਨ੍ਨਤਾਯ ਭਣ੍ਡਾਗਾਰਿਕਟ੍ਠਾਨੇ ਠਿਤਤ੍ਤਾ ਚ ਠਾਨਾਚਾਵਨੇਪਿ ਨਤ੍ਥਿ ਅਵਹਾਰੋ, ਥੇਯ੍ਯਚਿਤ੍ਤੇਨ ਪਨ ਗਹਣੇ ਦੁਕ੍ਕਟਤੋ ਨ ਮੁਚ੍ਚਤੀਤਿ ਵੇਦਿਤਬ੍ਬਂ.

ਏਸੇਵ ਨਯੋਤਿ ਉਦ੍ਧਾਰੇਯੇਵ ਚੋਰਸ੍ਸ ਪਾਰਾਜਿਕਂ, ਕਸ੍ਮਾ? ਅਞ੍ਞੇਹਿ ਸਾਧਾਰਣਸ੍ਸ ਅਭਿਞ੍ਞਾਣਸ੍ਸ ਵੁਤ੍ਤਤ੍ਤਾ. ਅਞ੍ਞਂ ਤਾਦਿਸਮੇਵ ਗਣ੍ਹਨ੍ਤੇ ਯੁਜ੍ਜਤੀਤਿ ਸਞ੍ਞਾਣਤੋ ਓਕਾਸਤੋ ਚ ਤੇਨ ਸਦਿਸਮੇਵ ਅਞ੍ਞਂ ਗਣ੍ਹਨ੍ਤੇ ਯੁਜ੍ਜਤਿ, ਚੋਰੇਨ ਸਲ੍ਲਕ੍ਖਿਤਪ੍ਪਦੇਸਤੋ ਤਂ ਅਪਨੇਤ੍ਵਾ ਕੇਹਿਚਿ ਤਤ੍ਥ ਤਾਦਿਸੇ ਅਞ੍ਞਸ੍ਮਿਂ ਪਤ੍ਤੇ ਠਪਿਤੇ ਤਂ ਗਣ੍ਹਨ੍ਤੇਯੇਵ ਯੁਜ੍ਜਤੀਤਿ ਅਧਿਪ੍ਪਾਯੋ, ਤੇਨ ਚੋਰੇਨ ਦਿਵਾ ਸਲ੍ਲਕ੍ਖਿਤਪਤ੍ਤਂ ਅਞ੍ਞਤ੍ਥ ਅਪਨੇਤ੍ਵਾ ਤਦਞ੍ਞੇ ਤਾਦਿਸੇ ਪਤ੍ਤੇ ਤਤ੍ਥ ਠਪਿਤੇਪਿ ਚੋਰਸ੍ਸ ਪਚ੍ਛਾ ਰਤ੍ਤਿਭਾਗੇ ਉਪ੍ਪਜ੍ਜਮਾਨਂ ਥੇਯ੍ਯਚਿਤ੍ਤਂ ਦਿਵਾ ਸਲ੍ਲਕ੍ਖਿਤਪ੍ਪਦੇਸੇ ਠਪਿਤਂ ਅਞ੍ਞਂ ਤਾਦਿਸਂ ਪਤ੍ਤਮੇਵ ਆਲਮ੍ਬਿਤ੍ਵਾ ਉਪ੍ਪਜ੍ਜਤੀਤਿ ਦਸ੍ਸਿਤਂ ਹੋਤਿ. ਪਦਵਾਰੇਨਾਤਿ ਥੇਰੇਨ ਨੀਹਰਿਤ੍ਵਾ ਦਿਨ੍ਨਂ ਪਤ੍ਤਂ ਗਹੇਤ੍ਵਾ ਗਚ੍ਛਤੋ ਚੋਰਸ੍ਸ ਪਦਵਾਰੇਨ. ਅਤਾਦਿਸਮੇਵ ਗਣ੍ਹਨ੍ਤੇ ਯੁਜ੍ਜਤੀਤਿ ਅਤਾਦਿਸਸ੍ਸ ਥੇਰੇਨ ਗਹਣਕ੍ਖਣੇ ਅਵਹਾਰਾਭਾਵਤੋ ਪਚ੍ਛਾ ਹਤ੍ਥਪਤ੍ਤਂ ‘‘ਤ’’ਨ੍ਤਿ ਵਾ ‘‘ਅਞ੍ਞ’’ਨ੍ਤਿ ਵਾ ਸਞ੍ਞਾਯ ‘‘ਇਦਂ ਗਹੇਤ੍ਵਾ ਗਚ੍ਛਾਮੀ’’ਤਿ ਗਮਨੇ ਪਦਵਾਰੇਨੇਵ ਅਵਹਾਰੋ ਯੁਜ੍ਜਤੀਤਿ ਅਧਿਪ੍ਪਾਯੋ.

ਪਾਰਾਜਿਕਂ ਨਤ੍ਥੀਤਿ ਪਦਵਾਰੇਪਿ ਪਾਰਾਜਿਕਂ ਨਤ੍ਥਿ ਉਪਨਿਧਿਭਣ੍ਡੇ ਵਿਯਾਤਿ ਗਹੇਤਬ੍ਬਂ. ਗਾਮਦ੍ਵਾਰਨ੍ਤਿ ਬਹਿਗਾਮੇ ਵਿਹਾਰਸ੍ਸ ਪਤਿਟ੍ਠਿਤਤ੍ਤਾ ਗਾਮਪ੍ਪਵੇਸਸ੍ਸ ਆਰਮ੍ਭਪ੍ਪਦੇਸਦਸ੍ਸਨਵਸੇਨ ਵੁਤ੍ਤਂ, ਅਨ੍ਤੋਗਾਮਨ੍ਤਿ ਅਤ੍ਥੋ. ਦ੍ਵਿਨ੍ਨਮ੍ਪਿ ਉਦ੍ਧਾਰੇਯੇਵ ¶ ਪਾਰਾਜਿਕਨ੍ਤਿ ਥੇਰਸ੍ਸ ਅਭਣ੍ਡਾਗਾਰਿਕਤ੍ਤਾ ਵੁਤ੍ਤਂ. ਯਦਿ ਹਿ ਸੋ ਭਣ੍ਡਾਗਾਰਿਕੋ ਭਵੇਯ੍ਯ, ਸਬ੍ਬਮ੍ਪਿ ਉਪਨਿਕ੍ਖਿਤ੍ਤਮੇਵ ਸਿਯਾ, ਉਪਨਿਕ੍ਖਿਤ੍ਤਭਣ੍ਡੇ ਚ ਥੇਯ੍ਯਚਿਤ੍ਤੇਨ ਗਣ੍ਹਤੋਪਿ ਨ ਤਾਵ ਥੇਰਸ੍ਸ ਅਵਹਾਰੋ ਹੋਤਿ, ਚੋਰਸ੍ਸੇਵ ਅਵਹਾਰੋ. ਉਭਿਨ੍ਨਮ੍ਪਿ ਦੁਕ੍ਕਟਨ੍ਤਿ ¶ ਥੇਰਸ੍ਸ ਅਤ੍ਤਨੋ ਸਨ੍ਤਕਤਾਯ ਚੋਰਸ੍ਸ ਸਾਮਿਕੇਨ ਦਿਨ੍ਨਤ੍ਤਾ ਅਵਹਾਰੋ ਨ ਜਾਤੋ, ਉਭਿਨ੍ਨਮ੍ਪਿ ਅਸੁਦ੍ਧਚਿਤ੍ਤੇਨ ਗਹਿਤਤ੍ਤਾ ਦੁਕ੍ਕਟਨ੍ਤਿ ਅਤ੍ਥੋ.

ਆਣਤ੍ਤਿਯਾ ਗਹਿਤਤ੍ਤਾਤਿ ‘‘ਪਤ੍ਤਚੀਵਰਂ ਗਣ੍ਹਾ’’ਤਿ ਏਵਂ ਥੇਰੇਨ ਕਤਆਣਤ੍ਤਿਯਾ ਗਹਿਤਤ੍ਤਾ. ਅਟਵਿਂ ਪਵਿਸਤਿ, ਪਦਵਾਰੇਨ ਕਾਰੇਤਬ੍ਬੋਤਿ ‘‘ਪਤ੍ਤਚੀਵਰਂ ਗਣ੍ਹ, ਅਸੁਕਂ ਨਾਮ ਗਾਮਂ ਗਨ੍ਤ੍ਵਾ ਪਿਣ੍ਡਾਯ ਚਰਿਸ੍ਸਾਮਾ’’ਤਿ ਥੇਰੇਨ ਵਿਹਾਰਤੋ ਪਟ੍ਠਾਯ ਗਾਮਮਗ੍ਗੇਪਿ ਸਕਲੇਪਿ ਗਾਮੇ ਵਿਚਰਣਸ੍ਸ ਨਿਯਮਿਤਤ੍ਤਾ ਮਗ੍ਗਤੋ ਓਕ੍ਕਮ੍ਮ ਗਚ੍ਛਨ੍ਤਸ੍ਸੇਵ ਪਦਵਾਰੇਨ ਆਪਤ੍ਤਿ ਵੁਤ੍ਤਾ. ਵਿਹਾਰਸ੍ਸ ਹਿ ਪਰਭਾਗੇ ਉਪਚਾਰਤੋ ਪਟ੍ਠਾਯ ਯਾਵ ਤਸ੍ਸ ਗਾਮਸ੍ਸ ਪਰਤੋ ਉਪਚਾਰੋ, ਤਾਵ ਸਬ੍ਬਂ ਦਹਰਸ੍ਸ ਥੇਰਾਣਤ੍ਤਿਯਾ ਸਞ੍ਚਰਣੂਪਚਾਰੋਵ ਹੋਤਿ, ਨ ਪਨ ਤਤੋ ਪਰਂ. ਤੇਨੇਵ ‘‘ਉਪਚਾਰਾਤਿਕ੍ਕਮੇ ਪਾਰਾਜਿਕਂ. ਗਾਮੂਪਚਾਰਾਤਿਕ੍ਕਮੇ ਪਾਰਾਜਿਕ’’ਨ੍ਤਿ ਚ ਵੁਤ੍ਤਂ. ਪਟਿਨਿਵਤ੍ਤਨੇ ਚੀਵਰਧੋਵਨਾਦਿਅਤ੍ਥਾਯ ਪੇਸਨੇਪਿ ਏਸੇਵ ਨਯੋ. ਅਟ੍ਠਤ੍ਵਾ ਅਨਿਸੀਦਿਤ੍ਵਾਤਿ ਏਤ੍ਥ ਵਿਹਾਰਂ ਪਵਿਸਿਤ੍ਵਾ ਸੀਸਾਦੀਸੁ ਭਾਰਂ ਭੂਮਿਯਂ ਅਨਿਕ੍ਖਿਪਿਤ੍ਵਾ ਤਿਟ੍ਠਨ੍ਤੋ ਵਾ ਨਿਸੀਦਨ੍ਤੋ ਵਾ ਵਿਸ੍ਸਮਿਤ੍ਵਾ ਥੇਯ੍ਯਚਿਤ੍ਤੇ ਵੂਪਸਨ੍ਤੇ ਪੁਨ ਥੇਯ੍ਯਚਿਤ੍ਤਂ ਉਪ੍ਪਾਦੇਤ੍ਵਾ ਗਚ੍ਛਤਿ ਚੇ, ਪਾਦੁਦ੍ਧਾਰੇਨ ਕਾਰੇਤਬ੍ਬੋ. ਸਚੇ ਭੂਮਿਯਂ ਨਿਕ੍ਖਿਪਿਤ੍ਵਾ ਪੁਨ ਤਂ ਗਹੇਤ੍ਵਾ ਗਚ੍ਛਤਿ, ਉਦ੍ਧਾਰੇਨ ਕਾਰੇਤਬ੍ਬੋ. ਕਸ੍ਮਾ? ਆਣਾਪਕਸ੍ਸ ਆਣਤ੍ਤਿਯਾ ਯਂ ਕਤ੍ਤਬ੍ਬਂ, ਤਸ੍ਸ ਤਾਵਤਾ ਪਰਿਨਿਟ੍ਠਿਤਤ੍ਤਾ. ‘‘ਅਸੁਕਂ ਨਾਮ ਗਾਮ’’ਨ੍ਤਿ ਅਨਿਯਮੇਤ੍ਵਾ ‘‘ਅਨ੍ਤੋਗਾਮਂ ਗਮਿਸ੍ਸਾਮਾ’’ਤਿ ਅਵਿਸੇਸੇਨ ਵੁਤ੍ਤੇ ਵਿਹਾਰਸਾਮਨ੍ਤਾ ਪੁਬ੍ਬੇ ਪਿਣ੍ਡਾਯ ਪਵਿਟ੍ਠਪੁਬ੍ਬਾ ਸਬ੍ਬੇ ਗੋਚਰਗਾਮਾਪਿ ਖੇਤ੍ਤਮੇਵਾਤਿ ਵਦਨ੍ਤਿ. ਸੇਸਨ੍ਤਿ ਮਗ੍ਗੁਕ੍ਕਮਨਵਿਹਾਰਾਭਿਮੁਖਗਮਨਾਦਿ ਸਬ੍ਬਂ. ਪੁਰਿਮਸਦਿਸਮੇਵਾਤਿ ਅਨਾਣਤ੍ਤਿਯਾ ਗਹਿਤੇਪਿ ਸਾਮਿਕਸ੍ਸ ਕਥੇਤ੍ਵਾ ਗਹਿਤਤ੍ਤਾ ਹੇਟ੍ਠਾ ਵੁਤ੍ਤਵਿਹਾਰੂਪਚਾਰਾਦਿ ਸਬ੍ਬਂ ਖੇਤ੍ਤਮੇਵਾਤਿ ਕਤ੍ਵਾ ਵੁਤ੍ਤਂ. ਏਸੇਵ ਨਯੋਤਿ ਅਨ੍ਤਰਾਮਗ੍ਗੇ ਥੇਯ੍ਯਚਿਤ੍ਤਂ ਉਪ੍ਪਾਦੇਤ੍ਵਾਤਿਆਦਿਨਾ (ਪਾਰਾ. ਅਟ੍ਠ. ੧.੧੧੨) ਵੁਤ੍ਤਂ ਨਯਂ ਅਤਿਦਿਸਤਿ.

ਨਿਮਿਤ੍ਤੇ ਵਾ ਕਤੇਤਿ ਚੀਵਰਂ ਮੇ ਕਿਲਿਟ੍ਠਂ, ਕੋ ਨੁ ਖੋ ਰਜਿਤ੍ਵਾ ਦਸ੍ਸਤੀਤਿਆਦਿਨਾ ਨਿਮਿਤ੍ਤੇ ਕਤੇ. ਵੁਤ੍ਤਨਯੇਨੇਵਾਤਿ ਅਨਾਣਤ੍ਤਸ੍ਸ ਥੇਰੇਨ ¶ ਸਦ੍ਧਿਂ ਪਤ੍ਤਚੀਵਰਂ ਗਹੇਤ੍ਵਾ ਗਮਨਵਾਰੇ ਵੁਤ੍ਤਨਯੇਨੇਵ. ਏਕਪਸ੍ਸੇਤਿ ਵਿਹਾਰਸ੍ਸ ਮਹਨ੍ਤਤਾਯ ਅਤ੍ਤਾਨਂ ਅਦਸ੍ਸੇਤ੍ਵਾ ਏਕਸ੍ਮਿਂ ਪਸ੍ਸੇ. ਥੇਯ੍ਯਚਿਤ੍ਤੇਨ ਪਰਿਭੁਞ੍ਜਨ੍ਤੋ ਜੀਰਾਪੇਤੀਤਿ ਥੇਯ੍ਯਚਿਤ੍ਤੇ ਉਪ੍ਪਨ੍ਨੇ ਠਾਨਾਚਾਵਨਂ ਅਕਤ੍ਵਾ ਨਿਵਤ੍ਥਪਾਰੁਤਨੀਹਾਰੇਨੇਵ ਪਰਿਭੁਞ੍ਜਨ੍ਤੋ ਜੀਰਾਪੇਤਿ, ਠਾਨਾ ਚਾਵੇਨ੍ਤਸ੍ਸ ਪਨ ਥੇਯ੍ਯਚਿਤ੍ਤੇ ਸਤਿ ਪਾਰਾਜਿਕਮੇਵ ਸੀਸੇ ਭਾਰਂ ਖਨ੍ਧੇ ਕਰਣਾਦੀਸੁ ਵਿਯ (ਪਾਰਾ. ੧੦੧). ਯਥਾ ਵਾ ਤਥਾ ਵਾ ਨਸ੍ਸਤੀਤਿ ਅਗ੍ਗਿਆਦਿਨਾ ਨਸ੍ਸਤਿ, ਅਞ੍ਞੋ ਵਾ ਕੋਚੀਤਿ ਇਮਿਨਾ ਯੇਨ ਠਪਿਤਂ, ਸੋਪਿ ਸਙ੍ਗਹਿਤੋਤਿ ਵੇਦਿਤਬ੍ਬਂ.

ਇਤਰਸ੍ਸਾਤਿ ¶ ਚੋਰਸ੍ਸ. ਇਤਰਂ ਗਣ੍ਹਤੋ ਉਦ੍ਧਾਰੇ ਪਾਰਾਜਿਕਨ੍ਤਿ ਏਤ੍ਥ ‘‘ਪਵਿਸਿਤ੍ਵਾ ਤਵ ਸਾਟਕਂ ਗਣ੍ਹਾਹੀ’’ਤਿ ਇਮਿਨਾਵ ਉਪਨਿਧਿਭਾਵਤੋ ਮੋਚਿਤਤ੍ਤਾ, ਸਾਮਿਕਸ੍ਸ ਇਤਰਂ ਗਣ੍ਹਤੋ ਅਤ੍ਤਨੋ ਸਾਟਕੇ ਆਲਯਸ੍ਸ ਸਬ੍ਭਾਵਤੋ ਚ ‘‘ਉਦ੍ਧਾਰੇ ਪਾਰਾਜਿਕ’’ਨ੍ਤਿ ਵੁਤ੍ਤਂ. ਸਾਮਿਕੋ ਚੇ ‘‘ਮਮ ਸਨ੍ਤਕਂ ਇਦਂ ਵਾ ਹੋਤੁ, ਅਞ੍ਞਂ ਵਾ, ਕਿਂ ਤੇਨ, ਅਲਂ ਮਯ੍ਹਂ ਇਮਿਨਾ’’ਤਿ ਏਵਂ ਸੁਟ੍ਠੁ ਨਿਰਾਲਯੋ ਹੋਤਿ, ਚੋਰਸ੍ਸ ਪਾਰਾਜਿਕਂ ਨਤ੍ਥੀਤਿ ਗਹੇਤਬ੍ਬਂ. ਨ ਜਾਨਨ੍ਤੀਤਿ ਤੇਨ ਵੁਤ੍ਤਵਚਨਂ ਅਸੁਣਨ੍ਤਾ ਨ ਜਾਨਨ੍ਤਿ. ਏਸੇਵ ਨਯੋਤਿ ਏਤ੍ਥ ਸਚੇ ਜਾਨਿਤ੍ਵਾਪਿ ਚਿਤ੍ਤੇਨ ਨ ਸਮ੍ਪਟਿਚ੍ਛਨ੍ਤਿ, ਏਸੇਵ ਨਯੋਤਿ ਦਟ੍ਠਬ੍ਬਂ. ਪਟਿਕ੍ਖਿਪਨ੍ਤੀਤਿ ਏਤ੍ਥ ਚਿਤ੍ਤੇਨ ਪਟਿਕ੍ਖੇਪੋਪਿ ਸਙ੍ਗਹਿਤੋਵਾਤਿ ਵੇਦਿਤਬ੍ਬਂ. ਉਪਚਾਰੇ ਵਿਜ੍ਜਮਾਨੇਤਿ ਭਣ੍ਡਾਗਾਰਸ੍ਸ ਸਮੀਪੇ ਉਚ੍ਚਾਰਪਸ੍ਸਾਵਟ੍ਠਾਨੇ ਵਿਜ੍ਜਮਾਨੇ. ਮਯਿ ਚ ਮਤੇ ਸਙ੍ਘਸ੍ਸ ਚ ਸੇਨਾਸਨੇ ਵਿਨਟ੍ਠੇਤਿ ਏਤ੍ਥ ‘‘ਤਂ ਮਾਰੇਸ੍ਸਾਮਾ’’ਤਿ ਏਤ੍ਤਕੇ ਵੁਤ੍ਤੇਪਿ ਵਿਵਰਿਤੁਂ ਵਟ੍ਟਤਿ ਗਿਲਾਨਪਕ੍ਖੇ ਠਿਤਤ੍ਤਾ ਅਵਿਸਯੋਤਿ ਵੁਤ੍ਤਤ੍ਤਾ. ਮਰਣਤੋ ਹਿ ਪਰਂ ਗੇਲਞ੍ਞਂ ਅਵਿਸਯਤ੍ਤਞ੍ਚ ਨਤ੍ਥਿ. ‘‘ਦ੍ਵਾਰਂ ਛਿਨ੍ਦਿਤ੍ਵਾ ਪਰਿਕ੍ਖਾਰਂ ਹਰਿਸ੍ਸਾਮਾ’’ਤਿ ਏਤ੍ਤਕੇ ਵੁਤ੍ਤੇਪਿ ਵਿਵਰਿਤੁਂ ਵਟ੍ਟਤਿਯੇਵ. ਸਹਾਯੇਹਿ ਭਵਿਤਬ੍ਬਨ੍ਤਿ ਤੇਹਿਪਿ ਭਿਕ੍ਖਾਚਾਰਾਦੀਹਿ ਪਰਿਯੇਸਿਤ੍ਵਾ ਅਤ੍ਤਨੋ ਸਨ੍ਤਕੇਪਿ ਕਿਞ੍ਚਿ ਕਿਞ੍ਚਿ ਦਾਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਅਯਂ ਸਾਮੀਚੀਤਿ ਭਣ੍ਡਾਗਾਰੇ ਵਸਨ੍ਤਾਨਂ ਇਦਂ ਵਤ੍ਤਂ.

ਲੋਲਮਹਾਥੇਰੋਤਿ ਮਨ੍ਦੋ ਮੋਮੂਹੋ ਆਕਿਣ੍ਣਵਿਹਾਰੀ. ਇਤਰੇਹੀਤਿ ਤਸ੍ਮਿਂਯੇਵ ਗਬ੍ਭੇ ਵਸਨ੍ਤੇਹਿ ਇਤਰਭਿਕ੍ਖੂਹਿ. ਵਿਹਾਰਰਕ੍ਖਣਵਾਰੇ ਨਿਯੁਤ੍ਤੋ ਵਿਹਾਰਵਾਰਿਕੋ, ਵੁਡ੍ਢਪਟਿਪਾਟਿਯਾ ਅਤ੍ਤਨੋ ਵਾਰੇ ਵਿਹਾਰਰਕ੍ਖਣਕੋ. ਨਿਵਾਪਨ੍ਤਿ ਭਤ੍ਤਵੇਤਨਂ. ਚੋਰਾਨਂ ਪਟਿਪਥਂ ਗਤੇਸੂਤਿ ਚੋਰਾਨਂ ਆਗਮਨਂ ਞਤ੍ਵਾ ‘‘ਪਠਮਤਰਞ੍ਞੇਵ ਗਨ੍ਤ੍ਵਾ ਸਦ੍ਦਂ ਕਰਿਸ੍ਸਾਮਾ’’ਤਿ ਚੋਰਾਨਂ ਅਭਿਮੁਖਂ ¶ ਗਤੇਸੁ, ‘‘ਚੋਰੇਹਿ ਹਟਭਣ੍ਡਂ ਆਹਰਿਸ੍ਸਾਮਾ’’ਤਿ ਤਦਨੁਪਥਂ ਗਤੇਸੁਪਿ ਏਸੇਵ ਨਯੋ. ਨਿਬਦ੍ਧਂ ਕਤ੍ਵਾਤਿ ‘‘ਅਸੁਕਕੁਲੇ ਯਾਗੁਭਤ੍ਤਂ ਵਿਹਾਰਵਾਰਿਕਾਨਞ੍ਞੇਵਾ’’ਤਿ ਏਵਂ ਨਿਯਮਨਂ ਕਤ੍ਵਾ. ਦ੍ਵੇ ਤਿਸ੍ਸੋ ਯਾਗੁਸਲਾਕਾ ਚਤ੍ਤਾਰਿ ਪਞ੍ਚ ਸਲਾਕਭਤ੍ਤਾਨਿ ਚ ਲਭਮਾਨੋਵਾਤਿ ਇਦਂ ਨਿਦਸ੍ਸਨਮਤ੍ਤਂ, ਤਤੋ ਊਨਂ ਵਾ ਹੋਤੁ ਅਧਿਕਂ ਵਾ ਅਤ੍ਤਨੋ ਵੇਯ੍ਯਾਵਚ੍ਚਕਰਸ੍ਸ ਚ ਯਾਪਨਮਤ੍ਤਂ ਲਭਨਮੇਵ ਪਮਾਣਨ੍ਤਿ ਗਹੇਤਬ੍ਬਂ. ਨਿਸ੍ਸਿਤਕੇ ਜਗ੍ਗੇਨ੍ਤੀਤਿ ਤੇਹਿ ਵਿਹਾਰਂ ਜਗ੍ਗਾਪੇਨ੍ਤੀਤਿ ਅਤ੍ਥੋ. ਅਸਹਾਯਕਸ੍ਸਾਤਿ ਸਹਾਯਰਹਿਤਸ੍ਸ. ਅਤ੍ਤਦੁਤਿਯਸ੍ਸਾਤਿ ਅਪ੍ਪਿਚ੍ਛਸ੍ਸ ਅਤ੍ਤਾ ਸਰੀਰਮੇਵ ਦੁਤਿਯੋ ਅਸ੍ਸ ਨਾਞ੍ਞੋਤਿ ਅਤ੍ਤਦੁਤਿਯੋ. ਤਦੁਭਯਸ੍ਸਾਪਿ ਅਤ੍ਥਸ੍ਸ ਵਿਭਾਵਨਂ ਯਸ੍ਸਾਤਿਆਦਿ, ਏਤੇਨ ਸਬ੍ਬੇਨ ਏਕੇਕਸ੍ਸ ਵਾਰੋ ਨ ਪਾਪੇਤਬ੍ਬੋਤਿ ਦਸ੍ਸਿਤਨ੍ਤਿ ਵੇਦਿਤਬ੍ਬਂ. ਪਾਕਵਤ੍ਤਤ੍ਥਾਯਾਤਿ ਨਿਚ੍ਚਂ ਪਚਿਤਬ੍ਬਯਾਗੁਭਤ੍ਤਸਙ੍ਖਾਤਵਤ੍ਤਤ੍ਥਾਯ. ਠਪੇਨ੍ਤੀਤਿ ਦਾਯਕਾ ਠਪੇਨ੍ਤਿ. ਤਂ ਗਹੇਤ੍ਵਾਤਿ ਤਂ ਆਰਾਮਿਕਾਦੀਹਿ ਦਿਯ੍ਯਮਾਨਂ ਭਾਗਂ ਗਹੇਤ੍ਵਾ. ਨ ਗਾਹਾਪੇਤਬ੍ਬੋਤਿ ਏਤ੍ਥ ਅਬ੍ਭੋਕਾਸਿਕਸ੍ਸਾਪਿ ਅਤ੍ਤਨੋ ਅਧਿਕਪਰਿਕ੍ਖਾਰੋ ਵਾ ਠਪਿਤੋ ਅਤ੍ਥਿ, ਚੀਵਰਾਦਿਸਙ੍ਘਿਕਭਾਗੇਪਿ ਆਲਯੋ ਵਾ ਅਤ੍ਥਿ, ਸੋਪਿ ਗਾਹਾਪੇਤਬ੍ਬੋਵ. ਦਿਗੁਣਨ੍ਤਿ ਅਞ੍ਞੇਹਿ ਲਬ੍ਭਮਾਨਤੋ ਦਿਗੁਣਂ. ਪਕ੍ਖਵਾਰੇਨਾਤਿ ਅਡ੍ਢਮਾਸਵਾਰੇਨ.

ਸੁਙ੍ਕਘਾਤਕਥਾਵਣ੍ਣਨਾ

੧੧੩. ਸੁਙ੍ਕਘਾਤਕਥਾਯਂ ¶ ਸੁਙ੍ਕਂ ਯਤ੍ਥ ਰਾਜਪੁਰਿਸਾ ਹਨਨ੍ਤਿ ਅਦਦਨ੍ਤਾਨਂ ਸਨ੍ਤਕਂ ਅਚ੍ਛਿਨ੍ਦਿਤ੍ਵਾਪਿ ਗਣ੍ਹਨ੍ਤਿ, ਤਂ ਠਾਨਂ ਸੁਙ੍ਕਘਾਤਨ੍ਤਿ ਏਵਮ੍ਪਿ ਅਤ੍ਥੋ ਦਟ੍ਠਬ੍ਬੋ. ਵੁਤ੍ਤਮੇਵਤ੍ਥਂ ਪਾਕਟਂ ਕਾਤੁਂ ਤਞ੍ਹੀਤਿਆਦਿ ਵੁਤ੍ਤਂ. ਦੁਤਿਯਂ ਪਾਦਂ ਅਤਿਕ੍ਕਾਮੇਤੀਤਿ ਏਤ੍ਥ ਪਠਮਪਾਦਂ ਪਰਿਚ੍ਛੇਦਤੋ ਬਹਿ ਠਪੇਤ੍ਵਾ ਦੁਤਿਯਪਾਦੇ ਉਦ੍ਧਟਮਤ੍ਤੇ ਪਾਰਾਜਿਕਂ. ਉਦ੍ਧਰਿਤ੍ਵਾ ਬਹਿ ਅਟ੍ਠਪਿਤੇਪਿ ਬਹਿ ਠਿਤੋ ਏਵ ਨਾਮ ਹੋਤੀਤਿ ਕਤ੍ਵਾ ਏਵਂ ਸਬ੍ਬਤ੍ਥ ਪਦਵਾਰੇਸੁਪੀਤਿ ਦਟ੍ਠਬ੍ਬਂ. ਪਰਿਵਤ੍ਤਿਤ੍ਵਾ ਅਬ੍ਭਨ੍ਤਰਿਮਂ ਬਹਿ ਠਪੇਤਿ, ਪਾਰਾਜਿਕਨ੍ਤਿ ਇਦਂ ਸਯਂ ਬਹਿ ਠਤ੍ਵਾ ਪਠਮਂ ਅਬ੍ਭਨ੍ਤਰਿਮਂ ਉਕ੍ਖਿਪਿਤ੍ਵਾ ਵਾ ਸਮਕਂ ਉਕ੍ਖਿਪਿਤ੍ਵਾ ਵਾ ਪਰਿਵਤ੍ਤਨਂ ਸਨ੍ਧਾਯ ਵੁਤ੍ਤਂ. ਬਹਿ ਠਤ੍ਵਾ ਉਕ੍ਖਿਤ੍ਤਮਤ੍ਤੇ ਹਿ ਸਬ੍ਬਂ ਬਹਿਗਤਮੇਵ ਹੋਤੀਤਿ. ਸਚੇ ਪਨ ਸੋ ਬਹਿ ਠਤ੍ਵਾਪਿ ਬਾਹਿਰਪੁਟਕਂ ਪਠਮਂ ਅਨ੍ਤੋ ਠਪੇਤ੍ਵਾ ਪਚ੍ਛਾ ਅਬ੍ਭਨ੍ਤਰਿਮਂ ਉਕ੍ਖਿਪਿਤ੍ਵਾ ਬਹਿ ਠਪੇਤਿ, ਤਦਾਪਿ ਏਕਾਬਦ੍ਧਤਾਯ ਅਵਿਜਹਿਤਤ੍ਤਾ ਅਵਹਾਰੋ ਨ ਦਿਸ੍ਸਤਿ. ਕੇਚਿ ਪਨ ‘‘ਭੂਮਿਯਂ ਪਤਿਤ੍ਵਾ ਵਤ੍ਤਨ੍ਤਂ ਪੁਨ ਅਨ੍ਤੋ ਪਵਿਸਤਿ, ਪਾਰਾਜਿਕਮੇਵਾਤਿ (ਪਾਰਾ. ਅਟ੍ਠ. ੧.੧੧੩) ਵੁਤ੍ਤਤ੍ਤਾ ਬਾਹਿਰਪੁਟਕੇ ¶ ਅਨ੍ਤੋਪਵਿਟ੍ਠੇਪਿ ਬਹਿਗਤਭਾਵਤੋ ਨ ਮੁਚ੍ਚਤਿ, ਅਨ੍ਤੋਗਤਂ ਪਨ ਪੁਟਕਂ ਪਠਮਂ, ਪਚ੍ਛਾ ਏਵ ਵਾ ਬਹਿ ਠਪਿਤਮਤ੍ਤੇ ਵਾ ਪਾਰਾਜਿਕਮੇਵਾ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ. ਬਹਿ ਭੂਮਿਯਂ ਪਾਤਿਤਸ੍ਸ ਕੇਨਚਿ ਸਦ੍ਧਿਂ ਏਕਾਬਦ੍ਧਤਾਯ ਅਭਾਵੇਨ ਅਨ੍ਤੋਪਵਿਟ੍ਠੇਪਿ ਪਾਰਾਜਿਕਮੇਵਾਤਿ ਵਤ੍ਤੁਂ ਯੁਤ੍ਤਂ, ਇਦਂ ਪਨ ਏਕਾਬਦ੍ਧਤ੍ਤਾ ਤੇਨ ਸਦ੍ਧਿਂ ਨ ਸਮੇਤਿ. ਤਸ੍ਮਾ ਯਥਾ ਅਨ੍ਤੋਭੂਮਿਗਤੇਨ ਏਕਾਬਦ੍ਧਤਾ ਨ ਹੋਤਿ, ਏਵਂ ਉਭਯਸ੍ਸਾਪਿ ਬਹਿਗਤਭਾਵੇ ਸਾਧਿਤੇਯੇਵ ਅਵਹਾਰੋਤਿ ਵਿਞ੍ਞਾਯਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ਯੇ ਪਨ ਪਰਿਵਤ੍ਤਿਤ੍ਵਾਤਿ ਇਮਸ੍ਸ ਨਿਵਤ੍ਤਿਤ੍ਵਾਤਿ ਅਤ੍ਥਂ ਵਦਨ੍ਤਿ, ਤੇਹਿ ਪਨ ਅਬ੍ਭਨ੍ਤਰਿਮਂ ਬਹਿ ਠਪੇਤੀਤਿ ਅਯਮਤ੍ਥੋ ਗਹਿਤੋ ਹੋਤੀਤਿ ਤਤ੍ਥ ਸਙ੍ਕਾਯੇਵ ਨਤ੍ਥਿ. ਏਕਾਬਦ੍ਧਨ੍ਤਿ ਕਾਜਕੋਟਿਯਂ ਰਜ੍ਜੁਯਾ ਬਨ੍ਧਨਂ ਸਨ੍ਧਾਯ ਵੁਤ੍ਤਂ. ਅਬਨ੍ਧਿਤ੍ਵਾ ਕਾਜਕੋਟਿਯਂ ਠਪਿਤਮਤ੍ਤਮੇਵ ਹੋਤਿ, ਪਾਰਾਜਿਕਨ੍ਤਿ ਬਹਿ ਗਹਿਤਕਾਜਕੋਟਿਯਂ ਠਪਿਤਂ ਯਦਿ ਪਾਦਂ ਅਗ੍ਘਤਿ, ਪਾਰਾਜਿਕਮੇਵ, ਅਨ੍ਤੋਠਪਿਤੇਨ ਏਕਾਬਦ੍ਧਤਾਯ ਅਭਾਵਾਤਿ ਅਧਿਪ੍ਪਾਯੋ. ਗਚ੍ਛਨ੍ਤੇ ਯਾਨੇ ਵਾ…ਪੇ… ਠਪੇਤੀਤਿ ਸੁਙ੍ਕਘਾਤਂ ਪਵਿਸਿਤ੍ਵਾ ਅਪ੍ਪਵਿਸਿਤ੍ਵਾ ਵਾ ਠਪੇਤਿ. ਸੁਙ੍ਕਟ੍ਠਾਨਸ੍ਸ ਬਹਿ ਠਿਤਨ੍ਤਿ ਯਾਨਾਦੀਹਿ ਨੀਹਟਤ੍ਤਾ ਬਹਿ ਠਿਤਂ. ਕੇਚਿ ਪਨ ‘‘ਬਹਿ ਠਪਿਤ’’ਨ੍ਤਿ ਪਾਠਂ ਵਿਕਪ੍ਪੇਤ੍ਵਾ ਸੁਙ੍ਕਟ੍ਠਾਨਤੋ ਪੁਬ੍ਬੇਵ ਬਹਿ ਠਪਿਤਨ੍ਤਿ ਅਤ੍ਥਂ ਵਦਨ੍ਤਿ, ਤਂ ਨ ਸੁਨ੍ਦਰਂ; ਸੁਙ੍ਕਟ੍ਠਾਨੇ ਪਵਿਸਿਤ੍ਵਾ ਯਾਨੇ ਠਪਿਤੇਪਿ ਪਵਤ੍ਤਿਤ੍ਵਾ ਗਤੇ ਵਿਯ ਦੋਸਾਭਾਵਤੋ. ਯੋ ਪਨ ਸੁਙ੍ਕਟ੍ਠਾਨਸ੍ਸ ਅਨ੍ਤੋਵ ਪਵਿਸਿਤ੍ਵਾ ‘‘ਸੁਙ੍ਕਟ੍ਠਾਨ’’ਨ੍ਤਿ ਞਤ੍ਵਾ ਥੇਯ੍ਯਚਿਤ੍ਤੇਨ ਆਗਤਮਗ੍ਗੇਨ ਪਟਿਨਿਵਤ੍ਤਿਤ੍ਵਾ ਗਚ੍ਛਤਿ, ਤਸ੍ਸਾਪਿ ਯਦਿ ਤੇਨ ਦਿਸਾਭਾਗੇਨ ਗਚ੍ਛਨ੍ਤਾਨਮ੍ਪਿ ਹਤ੍ਥਤੋ ਸੁਙ੍ਕਂ ਗਣ੍ਹਨ੍ਤਿ, ਪਾਰਾਜਿਕਮੇਵ. ਇਮਸ੍ਮਿਂ ਠਾਨੇਤਿ ਯਾਨਾਦੀਹਿ ਨੀਹਰਣੇ. ਤਤ੍ਰਾਤਿ ਤਸ੍ਮਿਂ ਏਲ਼ਕਲੋਮਸਿਕ੍ਖਾਪਦੇ (ਪਾਰਾ. ੫੭੧ ਆਦਯੋ).

ਪਾਣਕਥਾਵਣ੍ਣਨਾ

੧੧੪. ਪਾਣਕਥਾਯਂ ¶ ਆਠਪਿਤੋਤਿ ਮਾਤਾਪਿਤੂਹਿ ਇਣਂ ਗਣ੍ਹਨ੍ਤੇਹਿ ‘‘ਯਾਵ ਇਣਦਾਨਾ ਅਯਂ ਤੁਮ੍ਹਾਕਂ ਸਨ੍ਤਿਕੇ ਹੋਤੂ’’ਤਿ ਇਣਦਾਯਕਾਨਂ ਨਿਯ੍ਯਾਤਿਤੋ. ਅਵਹਾਰੋ ਨਤ੍ਥੀਤਿ ਮਾਤਾਪਿਤੂਹਿ ਪੁਤ੍ਤਸ੍ਸ ਅਪਰਿਚ੍ਚਤ੍ਤਤ੍ਤਾ ਮਾਤਾਪਿਤੂਨਞ੍ਚ ਅਸਨ੍ਤਕਤ੍ਤਾ ਅਵਹਾਰੋ ਨਤ੍ਥਿ. ਧਨਂ ਪਨ ਗਤਟ੍ਠਾਨੇ ਵਡ੍ਢਤੀਤਿ ਇਮਿਨਾ ਆਠਪੇਤ੍ਵਾ ਗਹਿਤਧਨਂ ਵਡ੍ਢਿਯਾ ਸਹ ਆਠਪਿਤਪੁਤ੍ਤਹਾਰਕਸ੍ਸ ਗੀਵਾਤਿ ਦਸ੍ਸਿਤਨ੍ਤਿ ਵਦਨ੍ਤਿ. ਦਾਸਸ੍ਸ ਜਾਤੋਤਿ ਉਕ੍ਕਟ੍ਠਲਕ੍ਖਣਂ ਦਸ੍ਸੇਤੁਂ ਵੁਤ੍ਤਂ. ਦਾਸਿਕੁਚ੍ਛਿਯਂ ਪਨ ਅਦਾਸਸ੍ਸ ਜਾਤੋਪਿ ਏਤ੍ਥੇਵ ਸਙ੍ਗਹਿਤੋ ¶ . ਪਰਦੇਸਤੋ ਪਹਰਿਤ੍ਵਾਤਿ ਪਰਦੇਸਵਿਲੁਮ੍ਪਕੇਹਿ ਰਾਜਚੋਰਾਦੀਹਿ ਪਹਰਿਤ੍ਵਾ. ਸੁਖਂ ਜੀਵਾਤਿ ਵਦਤੀਤਿ ਥੇਯ੍ਯਚਿਤ੍ਤੇਨ ਸਾਮਿਕਾਨਂ ਸਨ੍ਤਿਕਤੋ ਪਲਾਪੇਤੁਕਾਮਤਾਯ ਵਦਤਿ, ਤਥਾ ਪਨ ਅਚਿਨ੍ਤੇਤ੍ਵਾ ਕਾਰੁਞ੍ਞੇਨ ‘‘ਸੁਖਂ ਗਨ੍ਤ੍ਵਾ ਜੀਵਾ’’ਤਿ ਵਦਨ੍ਤਸ੍ਸ ਨਤ੍ਥਿ ਅਵਹਾਰੋ, ਗੀਵਾ ਪਨ ਹੋਤਿ. ਦੁਤਿਯਪਦਵਾਰੇਤਿ ਯਦਿ ਦੁਤਿਯਪਦਂ ਅਵਸ੍ਸਂ ਉਦ੍ਧਰਿਸ੍ਸਤਿ, ਭਿਕ੍ਖੁਸ੍ਸ ‘‘ਪਲਾਯਿਤ੍ਵਾ ਸੁਖਂ ਜੀਵਾ’’ਤਿ ਵਚਨਕ੍ਖਣੇਯੇਵ ਪਾਰਾਜਿਕਂ. ਅਨਾਪਤ੍ਤਿ ਪਾਰਾਜਿਕਸ੍ਸਾਤਿ ਤਸ੍ਸ ਵਚਨੇਨ ਵੇਗਵਡ੍ਢਨੇ ਅਕਤੇਪਿ ਦੁਕ੍ਕਟਾ ਨ ਮੁਚ੍ਚਤੀਤਿ ਦਸ੍ਸੇਤਿ. ‘‘ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯੇਯ੍ਯਾ’’ਤਿ (ਪਾਰਾ. ੮੯, ੯੧) ਆਦਾਨਸ੍ਸੇਵ ਵੁਤ੍ਤਤ੍ਤਾ ਵੁਤ੍ਤਪਰਿਯਾਯੇਨ ਮੁਚ੍ਚਤੀਤਿ.

ਚਤੁਪ੍ਪਦਕਥਾਵਣ੍ਣਨਾ

੧੧੭. ਚਤੁਪ੍ਪਦਕਥਾਯਂ ਪਾਲ਼ਿਯਂ ਆਗਤਾਵਸੇਸਾਤਿ ਪਾਲ਼ਿਯਂ ਆਗਤੇਹਿ ਹਤ੍ਥਿ ਆਦੀਹਿ ਅਞ੍ਞੇ ਪਸੁ-ਸਦ੍ਦਸ੍ਸ ਸਬ੍ਬਸਾਧਾਰਣਤ੍ਤਾ. ਭਿਙ੍ਕਚ੍ਛਾਪਨ੍ਤਿ ‘‘ਭਿਙ੍ਕਾ ਭਿਙ੍ਕਾ’’ਤਿ ਸਦ੍ਦਾਯਨਤੋ ਏਵਂ ਲਦ੍ਧਨਾਮਂ ਹਤ੍ਥਿਪੋਤਕਂ. ਅਨ੍ਤੋਵਤ੍ਥੁਮ੍ਹੀਤਿ ਪਰਿਕ੍ਖਿਤ੍ਤੇ. ਬਹਿਨਗਰੇ ਠਿਤਸ੍ਸਾਤਿ ਪਰਿਕ੍ਖਿਤ੍ਤਨਗਰਂ ਸਨ੍ਧਾਯ ਵੁਤ੍ਤਂ, ਅਪਰਿਕ੍ਖਿਤ੍ਤਨਗਰੇ ਪਨ ਅਨ੍ਤੋਨਗਰੇ ਠਿਤਸ੍ਸਾਪਿ ਠਿਤਟ੍ਠਾਨਮੇਵ ਠਾਨਂ. ਖਣ੍ਡਦ੍ਵਾਰਨ੍ਤਿ ਅਤ੍ਤਨਾ ਖਣ੍ਡਿਤਦ੍ਵਾਰਂ. ਏਕੋ ਨਿਪਨ੍ਨੋਤਿ ਏਤ੍ਥਾਪਿ ਬਨ੍ਧੋਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ, ਤੇਨਾਹ ‘‘ਨਿਪਨ੍ਨਸ੍ਸ ਦ੍ਵੇ’’ਤਿ. ਘਾਤੇਤੀਤਿ ਏਤ੍ਥ ਥੇਯ੍ਯਚਿਤ੍ਤੇਨ ਵਿਨਾਸੇਨ੍ਤਸ੍ਸ ਸਹਪਯੋਗਤ੍ਤਾ ਦੁਕ੍ਕਟਮੇਵਾਤਿ ਵਦਨ੍ਤਿ.

ਓਚਰਕਕਥਾਵਣ੍ਣਨਾ

੧੧੮. ਓਚਰਕਕਥਾਯਂ ਪਰਿਯਾਯੇਨ ਹਿ ਅਦਿਨ੍ਨਾਦਾਨਤੋ ਮੁਚ੍ਚਤੀਤਿ ਇਦਂ ਆਣਤ੍ਤਿਕਪਯੋਗਂ ਸਨ੍ਧਾਯ ਵੁਤ੍ਤਂ, ਸਯਮੇਵ ਪਨ ਅਭਿਯੁਞ੍ਜਨਾਦੀਸੁ ਪਰਿਯਾਯੇਨਪਿ ਮੋਕ੍ਖੋ ਨਤ੍ਥਿ.

ਓਣਿਰਕ੍ਖਕਥਾਵਣ੍ਣਨਾ

ਓਣਿਰਕ੍ਖਕਥਾਯਂ ¶ ਓਣਿਨ੍ਤਿ ਓਣੀਤਂ, ਆਨੀਤਨ੍ਤਿ ਅਤ੍ਥੋ. ਓਣਿਰਕ੍ਖਸ੍ਸ ਸਨ੍ਤਿਕੇ ਠਪਿਤਭਣ੍ਡਂ ਉਪਨਿਧਿ (ਪਾਰਾ. ੧੧੨) ਵਿਯ ਗੁਤ੍ਤਟ੍ਠਾਨੇ ਠਪੇਤ੍ਵਾ ਸਙ੍ਗੋਪਨਤ੍ਥਾਯ ਅਨਿਕ੍ਖਿਪਿਤ੍ਵਾ ਯਥਾਠਪਿਤਟ੍ਠਾਨੇ ਏਵ ਮੁਹੁਤ੍ਤਮਤ੍ਤਂ ਓਲੋਕਨਤ੍ਥਾਯ ਠਪਿਤਤ੍ਤਾ ਤਸ੍ਸ ਭਣ੍ਡਸ੍ਸ ਠਾਨਾਚਾਵਨਮਤ੍ਤੇਨ ਓਣਿਰਕ੍ਖਕਸ੍ਸ ਪਾਰਾਜਿਕਂ ਹੋਤਿ.

ਸਂਵਿਦਾਵਹਾਰਕਥਾਵਣ੍ਣਨਾ

ਸਂਵਿਦਾਵਹਾਰਕਥਾਯਂ ¶ ਸਂਵਿਧਾਯਾਤਿ ਸਂਵਿਦਹਿਤ੍ਵਾ. ਤੇਨ ਨੇਸਂ ਦੁਕ੍ਕਟਾਪਤ੍ਤਿਯੋਤਿ ਆਣਤ੍ਤਿਵਸੇਨ ਪਾਰਾਜਿਕਾਪਤ੍ਤਿਯਾ ਅਸਮ੍ਭਵੇ ਸਤੀਤਿ ਵੁਤ੍ਤਂ. ਯਦਿ ਹਿ ਤੇਨ ਆਣਤ੍ਤਾ ਯਥਾਣਤ੍ਤਿਵਸੇਨ ਹਰਨ੍ਤਿ, ਆਣਤ੍ਤਿਕ੍ਖਣੇ ਏਵ ਪਾਰਾਜਿਕਾਪਤ੍ਤਿਂ ਆਪਜ੍ਜਨ੍ਤਿ. ਪਾਲ਼ਿਯਂ ‘‘ਸਮ੍ਬਹੁਲਾ ਸਂਵਿਦਹਿਤ੍ਵਾ ਏਕੋ ਭਣ੍ਡਂ ਅਵਹਰਤਿ, ਆਪਤ੍ਤਿ ਸਬ੍ਬੇਸਂ ਪਾਰਾਜਿਕਸ੍ਸਾ’’ਤਿ (ਪਾਰਾ. ੧੧੮) ਏਤ੍ਥਾਪਿ ਆਣਾਪਕਾਨਂ ਆਣਤ੍ਤਿਕ੍ਖਣੇਯੇਵ ਆਪਤ੍ਤਿ, ਅਵਹਾਰਕਸ੍ਸ ਉਦ੍ਧਾਰੇਤਿ ਗਹੇਤਬ੍ਬੋ. ਸਮ੍ਬਹੁਲਾ ਭਿਕ੍ਖੂ ਏਕਂ ਆਣਾਪੇਨ੍ਤਿ ‘ਗਚ੍ਛੇਤਂ ਆਹਰਾ’ਤਿ, ਤਸ੍ਸੁਦ੍ਧਾਰੇ ਸਬ੍ਬੇਸਂ ਪਾਰਾਜਿਕਨ੍ਤਿਆਦੀਸੁਪਿ ਏਵਮੇਵ ਅਤ੍ਥੋ ਗਹੇਤਬ੍ਬੋ. ਸਾਹਤ੍ਥਿਕਂ ਵਾ ਆਣਤ੍ਤਿਕਸ੍ਸ ਆਣਤ੍ਤਿਕਂ ਵਾ ਸਾਹਤ੍ਥਿਕਸ੍ਸ ਅਙ੍ਗਂ ਨ ਹੋਤੀਤਿ ਭਿਨ੍ਨਕਾਲਿਕਤ੍ਤਾ ਅਞ੍ਞਮਞ੍ਞਸ੍ਸ ਅਙ੍ਗਂ ਨ ਹੋਤਿ. ਤਥਾ ਹਿ ਸਹਤ੍ਥਾ ਅਵਹਰਨ੍ਤਸ੍ਸ ਠਾਨਾਚਾਵਨਕ੍ਖਣੇ ਆਪਤ੍ਤਿ, ਆਣਤ੍ਤਿਯਾ ਪਨ ਆਣਤ੍ਤਿਕ੍ਖਣੇਯੇਵਾਤਿ ਭਿਨ੍ਨਕਾਲਿਕਤ੍ਤਾ ਆਪਤ੍ਤਿਯੋਤਿ.

ਸਙ੍ਕੇਤਕਮ੍ਮਕਥਾਵਣ੍ਣਨਾ

੧੧੯. ਸਙ੍ਕੇਤਕਮ੍ਮਕਥਾਯਂ ਓਚਰਕੇ ਵੁਤ੍ਤਨਯੇਨੇਵਾਤਿ ਏਤ੍ਥ ਅਵਸ੍ਸਂ ਹਾਰਿਯੇ ਭਣ੍ਡੇਤਿਆਦਿਨਾ (ਪਾਰਾ. ਅਟ੍ਠ. ੧.੧੧੮) ਵੁਤ੍ਤਨਯੇਨੇਵ. ਪਾਲ਼ਿਯਂ ‘‘ਤਂ ਸਙ੍ਕੇਤਂ ਪੁਰੇ ਵਾ ਪਚ੍ਛਾ ਵਾ’’ਤਿ ਤਸ੍ਸ ਸਙ੍ਕੇਤਸ੍ਸ ਪੁਰੇ ਵਾ ਪਚ੍ਛਾ ਵਾਤਿ ਅਤ੍ਥੋ. ‘‘ਤਂ ਨਿਮਿਤ੍ਤਂ ਪੁਰੇ ਵਾ ਪਚ੍ਛਾ ਵਾ’’ਤਿ ਏਤ੍ਥਾਪਿ ਏਸੇਵ ਨਯੋ.

ਨਿਮਿਤ੍ਤਕਮ੍ਮਕਥਾਵਣ੍ਣਨਾ

੧੨੦. ਨਿਮਿਤ੍ਤਕਮ੍ਮਕਥਾਯਂ ਅਕ੍ਖਿਨਿਖਣਨਾਦਿਨਿਮਿਤ੍ਤਕਮ੍ਮਂ ਪਨ ਲਹੁਕਂ ਇਤ੍ਤਰਕਾਲਂ, ਤਸ੍ਮਾ ਤਙ੍ਖਣੇਯੇਵ ਤਂ ਭਣ੍ਡਂ ਅਵਹਰਿਤੁਂ ਨ ਸਕ੍ਕਾ. ਨਿਮਿਤ੍ਤਕਮ੍ਮਾਨਨ੍ਤਰਮੇਵ ਗਣ੍ਹਿਤੁਂ ਆਰਦ੍ਧਤ੍ਤਾ ਤੇਨੇਵ ¶ ਨਿਮਿਤ੍ਤੇਨ ਅਵਹਰਤੀਤਿ ਵੁਚ੍ਚਤਿ. ਯਦਿ ਏਵਂ ਪੁਰੇਭਤ੍ਤਪ੍ਪਯੋਗੋਵ ਏਸੋਤਿ ਵਾਦੋ ਪਮਾਣਭਾਵਂ ਆਪਜ੍ਜਤੀਤਿ? ਨਾਪਜ੍ਜਤਿ. ਨ ਹਿ ਸਙ੍ਕੇਤਕਮ੍ਮਂ (ਪਾਰਾ. ੧੧੯) ਵਿਯ ਨਿਮਿਤ੍ਤਕਮ੍ਮਂ ਕਾਲਪਰਿਚ੍ਛੇਦਯੁਤ੍ਤਂ. ਕਾਲਵਸੇਨ ਹਿ ਸਙ੍ਕੇਤਕਮ੍ਮਂ ਵੁਤ੍ਤਂ, ਕਿਰਿਯਾਵਸੇਨ ਨਿਮਿਤ੍ਤਕਮ੍ਮਨ੍ਤਿ ਅਯਮੇਵ ਤੇਸਂ ਵਿਸੇਸੋ. ‘‘ਤਂ ਨਿਮਿਤ੍ਤਂ ਪੁਰੇ ਵਾ ਪਚ੍ਛਾ ਵਾ ਤਂ ਭਣ੍ਡਂ ਅਵਹਰਤਿ, ਮੂਲਟ੍ਠਸ੍ਸ ਅਨਾਪਤ੍ਤੀ’’ਤਿ ਇਦਂ ਪਨ ਨਿਮਿਤ੍ਤਕਰਣਤੋ ਪੁਰੇ ¶ ਗਣ੍ਹਨ੍ਤਸ੍ਸ ਚੇਵ ਨਿਮਿਤ੍ਤਕਮ੍ਮੇ ਚ ਕਤੇਪਿ ਗਣ੍ਹਿਤੁਂ ਅਨਾਰਭਿਤ੍ਵਾ ਪਚ੍ਛਾ ਸਯਮੇਵ ਗਣ੍ਹਨ੍ਤਸ੍ਸ ਚ ਵਸੇਨ ਵੁਤ੍ਤਂ.

ਆਣਤ੍ਤਿਕਥਾਵਣ੍ਣਨਾ

੧੨੧. ਆਣਤ੍ਤਿਕਥਾਯਂ ਅਸਮ੍ਮੋਹਤ੍ਥਨ੍ਤਿ ਯਸ੍ਮਾ ਸਙ੍ਕੇਤਕਮ੍ਮਨਿਮਿਤ੍ਤਕਮ੍ਮਾਨਿ ਕਰੋਨ੍ਤੋ ਨ ਕੇਵਲਂ ਪੁਰੇਭਤ੍ਤਾਦਿਕਾਲਸਙ੍ਕੇਤਕਮ੍ਮਂ ਅਕ੍ਖਿਨਿਖਣਨਾਦਿਨਿਮਿਤ੍ਤਕਮ੍ਮਮੇਵ ਵਾ ਕਰੋਤਿ, ਅਥ ਖੋ ਏਵਂਵਣ੍ਣਸਣ੍ਠਾਨਭਣ੍ਡਂ ਗਣ੍ਹਾਤਿ, ਭਣ੍ਡਨਿਯਮਮ੍ਪਿ ਕਰੋਤਿ, ਤ੍ਵਂ ਇਤ੍ਥਨ੍ਨਾਮਸ੍ਸ ਪਾਵਦ, ਸੋ ਅਞ੍ਞਸ੍ਸ ਪਾਵਦਤੂਤਿਆਦਿਨਾ ਪੁਗ੍ਗਲਪਟਿਪਾਟਿਯਾ ਚ ਆਣਾਪੇਤਿ, ਤਸ੍ਮਾ ਪੁਬ੍ਬਣ੍ਹਾਦਿਕਾਲਵਸੇਨ ਅਕ੍ਖਿਨਿਖਣਨਾਦਿਕਿਰਿਯਾਵਸੇਨ ਭਣ੍ਡਪੁਗ੍ਗਲਪਟਿਪਾਟਿਵਸੇਨ ਚ ਆਣਤ੍ਤੇ ਏਤੇਸੁ ਸਙ੍ਕੇਤਕਮ੍ਮਨਿਮਿਤ੍ਤਕਮ੍ਮੇਸੁ ਵਿਸਙ੍ਕੇਤਾ ਵਿਸਙ੍ਕੇਤਭਾਵੇ ਸਮ੍ਮੋਹੋ ਜਾਯਤਿ, ਤਦਪਗਮੇਨ ਅਸਮ੍ਮੋਹਤ੍ਥਂ. ਯਂ ਆਣਾਪਕੇਨ ਨਿਮਿਤ੍ਤਸਞ੍ਞਂ ਕਤ੍ਵਾ ਵੁਤ੍ਤਨ੍ਤਿ ਪੁਬ੍ਬਣ੍ਹਾਦੀਸੁ ਅਕ੍ਖਿਨਿਖਣਨਾਦੀਸੁ ਵਾ ਗਹਣਤ੍ਥਂ ਆਣਾਪੇਨ੍ਤੇਨ ਈਦਿਸਵਣ੍ਣਸਣ੍ਠਾਨਾਦਿਯੁਤ੍ਤਂ ਗਣ੍ਹਾਤਿ ਏਵਂ ਗਹਣਸ੍ਸ ਨਿਮਿਤ੍ਤਭੂਤਸਞ੍ਞਾਣਂ ਕਤ੍ਵਾ ਯਂ ਭਣ੍ਡਂ ਵੁਤ੍ਤਂ. ਅਯਂ ਯੁਤ੍ਤਿ ਸਬ੍ਬਤ੍ਥਾਤਿ ਹੇਟ੍ਠਾ ਵੁਤ੍ਤੇਸੁ ਉਪਰਿ ਵਕ੍ਖਮਾਨੇਸੁ ਚ ਸਬ੍ਬਤ੍ਥ ਆਣਤ੍ਤਿਪ੍ਪਸਙ੍ਗੇਸੁ ਆਣਤ੍ਤਿਕ੍ਖਣੇਯੇਵ ਪਾਰਾਜਿਕਾਦੀਨਂ ਭਾਵਸਙ੍ਖਾਤਾ ਵਿਨਯਯੁਤ੍ਤਿ, ਸਾ ਚ ਆਣਤ੍ਤਸ੍ਸ ਕਿਰਿਯਾਨਿਟ੍ਠਾਪਨਕ੍ਖਣੇ ਆਣਾਪਕਸ੍ਸ ਪਯੋਗੇ ਥੇਯ੍ਯਚਿਤ੍ਤਾਨਂ ਅਭਾਵਾ ਆਣਤ੍ਤਿਕ੍ਖਣੇ ਏਕਾ ਏਵ ਆਪਤ੍ਤਿ ਹੋਤੀਤਿ ਏਵਂ ਉਪਪਤ੍ਤਿਯਾ ਪਵਤ੍ਤਤ੍ਤਾ ਯੁਤ੍ਤੀਤਿ ਵੁਤ੍ਤਾ. ‘‘ਮੂਲਟ੍ਠਸ੍ਸ ਥੁਲ੍ਲਚ੍ਚਯ’’ਨ੍ਤਿ ਵੁਤ੍ਤਤ੍ਤਾ ਸਙ੍ਘਰਕ੍ਖਿਤੇਨ ਪਟਿਗ੍ਗਹਿਤੇਪਿ ਬੁਦ੍ਧਰਕ੍ਖਿਤਧਮ੍ਮਰਕ੍ਖਿਤਾਨਂ ਦੁਕ੍ਕਟਮੇਵ, ਕਸ੍ਮਾ ਪਨੇਤ੍ਥ ਆਚਰਿਯਸ੍ਸ ਥੁਲ੍ਲਚ੍ਚਯਨ੍ਤਿ ਆਹ ‘‘ਮਹਾਜਨੋ ਹੀ’’ਤਿਆਦਿ. ਮਹਾਜਨੋਤਿ ਚ ਬੁਦ੍ਧਰਕ੍ਖਿਤਧਮ੍ਮਰਕ੍ਖਿਤਸਙ੍ਘਰਕ੍ਖਿਤੇ ਸਨ੍ਧਾਯ ਵੁਤ੍ਤਂ. ਮੂਲਟ੍ਠਸ੍ਸੇਵ ਦੁਕ੍ਕਟਨ੍ਤਿ ਬੁਦ੍ਧਰਕ੍ਖਿਤਸ੍ਸ ਦੁਕ੍ਕਟਂ. ਇਦਞ੍ਚ ਮੂਲਟ੍ਠਸ੍ਸ ਥੁਲ੍ਲਚ੍ਚਯਾਭਾਵਦਸ੍ਸਨਤ੍ਥਂ ਪਠਮਂ ਆਣਤ੍ਤਿਕ੍ਖਣੇ ਦੁਕ੍ਕਟਂ ਸਨ੍ਧਾਯ ਵੁਤ੍ਤਂ, ਨ ਪਨ ਸਙ੍ਘਰਕ੍ਖਿਤਸ੍ਸ ਪਟਿਗ੍ਗਹਣਪਚ੍ਚਯਾ ਪੁਨ ਦੁਕ੍ਕਟਸਮ੍ਭਵਂ ਸਨ੍ਧਾਯ. ਨ ਹਿ ਸੋ ਏਕਪਯੋਗੇਨ ਦੁਕ੍ਕਟਦ੍ਵਯਂ ਆਪਜ੍ਜਤਿ. ਕੇਚਿ ਪਨ ‘‘ਵਿਸਙ੍ਕੇਤਤ੍ਤਾ ਪਾਲ਼ਿਯਂ ‘ਮੂਲਟ੍ਠਸ੍ਸਾ’ਤਿ ਅਵਤ੍ਵਾ ‘ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾ’ਤਿ ਸਾਮਞ੍ਞੇਨ ਵੁਤ੍ਤਤ੍ਤਾ ਇਦਂ ਸਙ੍ਘਰਕ੍ਖਿਤਸ੍ਸ ਦੁਕ੍ਕਟਂ ਸਨ੍ਧਾਯ ਵੁਤ੍ਤ’’ਨ੍ਤਿ ਵਦਨ੍ਤਿ, ਤਂ ਕਿਞ੍ਚਾਪਿ ਅਟ੍ਠਕਥਾਯ ਨ ਸਮੇਤਿ, ਪਾਲ਼ਿਤੋ ਪਨ ਯੁਤ੍ਤਂ ਵਿਯ ਦਿਸ੍ਸਤਿ. ਨ ਹਿ ਤਸ੍ਸ ਪਟਿਗ੍ਗਹਣਪ੍ਪਯੋਗੇ ਅਨਾਪਤ੍ਤਿ ਹੋਤੀਤਿ. ਇਮਿਨਾਵ ਹੇਟ੍ਠਾ ਆਗਤਵਾਰੇਸੁਪਿ ਪਟਿਗ੍ਗਣ੍ਹਨ੍ਤਾਨਂ ¶ ¶ ਦੁਕ੍ਕਟਂ ਵੇਦਿਤਬ੍ਬਂ. ‘‘ਪਣ੍ਣੇ ਵਾ ਸਿਲਾਦੀਸੁ ਵਾ ‘ਚੋਰਿਯਂ ਕਾਤਬ੍ਬ’ਨ੍ਤਿ ਲਿਖਿਤ੍ਵਾ ਠਪਿਤੇ ਪਾਰਾਜਿਕਮੇਵਾ’’ਤਿ ਕੇਚਿ ਵਦਨ੍ਤਿ, ਤਂ ਪਨ ‘‘ਅਸੁਕਸ੍ਸ ਗੇਹੇ ਭਣ੍ਡ’’ਨ੍ਤਿ ਏਵਂ ਨਿਯਮੇਤ੍ਵਾ ਲਿਖਿਤੇ ਯੁਜ੍ਜਤਿ, ਨ ਅਨਿਯਮੇਤ੍ਵਾ ਲਿਖਿਤੇਤਿ ਵੀਮਂਸਿਤਬ੍ਬਂ. ਮਗ੍ਗਾਨਨ੍ਤਰਫਲਸਦਿਸਾਤਿ ਇਮਿਨਾ ਯਥਾ ਅਰਿਯਪੁਗ੍ਗਲਾਨਂ ਮਗ੍ਗਾਨਨ੍ਤਰੇ ਫਲੇ ਉਪ੍ਪਨ੍ਨੇ ਕਿਲੇਸਪਟਿਪ੍ਪਸ੍ਸਦ੍ਧਿਪਰਿਯੋਸਾਨਂ ਭਾਵਨਾਕਿਚ੍ਚਂ ਨਿਪ੍ਫਨ੍ਨਂ ਨਾਮ ਹੋਤਿ, ਏਵਮੇਤਿਸ੍ਸਾ ਅਤ੍ਥਸਾਧਕਚੇਤਨਾਯ ਉਪ੍ਪਨ੍ਨਾਯ ਆਣਤ੍ਤਿਕਿਚ੍ਚਂ ਨਿਪ੍ਫਨ੍ਨਮੇਵਾਤਿ ਦਸ੍ਸੇਤਿ, ਤੇਨਾਹ ‘‘ਤਸ੍ਮਾ ਅਯਂ ਆਣਤ੍ਤਿਕ੍ਖਣੇਯੇਵ ਪਾਰਾਜਿਕੋ’’ਤਿ, ਆਣਤ੍ਤਿਵਚੀਪਯੋਗਸਮੁਟ੍ਠਾਪਕਚੇਤਨਾਕ੍ਖਣੇਯੇਵ ਪਾਰਾਜਿਕੋ ਹੋਤੀਤਿ ਅਤ੍ਥੋ.

ਆਣਤ੍ਤਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਆਪਤ੍ਤਿਭੇਦਵਣ੍ਣਨਾ

੧੨੨. ਤਤ੍ਥ ਤਤ੍ਥਾਤਿ ਭੂਮਟ੍ਠਥਲਟ੍ਠਾਦੀਸੁ. ਪਾਲ਼ਿਯਂ ਮਨੁਸ੍ਸਪਰਿਗ੍ਗਹਿਤਂ ਸਨ੍ਧਾਯ ‘‘ਪਰਪਰਿਗ੍ਗਹਿਤ’’ਨ੍ਤਿ ਵੁਤ੍ਤਂ. ਆਮਸਤਿ ਫਨ੍ਦਾਪੇਤਿ ਠਾਨਾ ਚਾਵੇਤੀਤਿ ਇਮੇਹਿ ਤੀਹਿ ਪਦੇਹਿ ਪੁਬ੍ਬਪਯੋਗਸਹਿਤਂ ਪਞ੍ਚਮਂ ਅਵਹਾਰਙ੍ਗਂ ਵੁਤ੍ਤਂ, ਠਾਨਾ ਚਾਵੇਤੀਤਿ ਚ ਇਦਂ ਉਪਲਕ੍ਖਣਮਤ੍ਤਂ. ਆਣਤ੍ਤਿਕਾਦਯੋ ਸਬ੍ਬੇਪਿ ਪਯੋਗਾ ਧੁਰਨਿਕ੍ਖੇਪੋ ਚ ਇਧ ਸਙ੍ਗਹੇਤਬ੍ਬਾਵਾਤਿ ਦਟ੍ਠਬ੍ਬਂ.

੧੨੫. ਠਾਨਾਚਾਵਨਨ੍ਤਿ ਇਦਂ ਪਾਲ਼ਿਅਨੁਸਾਰਤੋ ਵੁਤ੍ਤਂ ਧੁਰਨਿਕ੍ਖੇਪਸ੍ਸਾਪਿ ਸਙ੍ਗਹੇਤਬ੍ਬਤੋ. ਏਸ ਨਯੋ ਉਪਰਿਪਿ ਸਬ੍ਬਤ੍ਥ. ਤਤ੍ਥ ਹਿ ਨ ਚ ਸਕਸਞ੍ਞੀਤਿ ਇਮਿਨਾ ਪਰਪਰਿਗ੍ਗਹਿਤਤਾ ਵੁਤ੍ਤਾ, ਨ ਚ ਵਿਸ੍ਸਾਸਗ੍ਗਾਹੀ ਨ ਚ ਤਾਵਕਾਲਿਕਨ੍ਤਿ ਇਮੇਹਿ ਪਰਪਰਿਗ੍ਗਹਿਤਸਞ੍ਞਿਤਾ, ਤੀਹਿ ਵਾ ਏਤੇਹਿ ਪਰਪਰਿਗ੍ਗਹਿਤਤਾ ਪਰਪਰਿਗ੍ਗਹਿਤਸਞ੍ਞਿਤਾ ਚ ਵੁਤ੍ਤਾਤਿ ਵੇਦਿਤਬ੍ਬਾ. ਅਨਜ੍ਝਾਵੁਤ੍ਥਕਨ੍ਤਿ ‘‘ਮਮੇਦ’’ਨ੍ਤਿ ਪਰਿਗ੍ਗਹਵਸੇਨ ਅਨਜ੍ਝਾਵੁਤ੍ਥਕਂ ਅਰਞ੍ਞੇ ਦਾਰੁਤਿਣਪਣ੍ਣਾਦਿ. ਛਡ੍ਡਿਤਨ੍ਤਿ ਪਠਮਂ ਪਰਿਗ੍ਗਹੇਤ੍ਵਾ ਪਚ੍ਛਾ ਅਨਤ੍ਥਿਕਤਾਯ ਛਡ੍ਡਿਤਂ ਯਂ ਕਿਞ੍ਚਿ. ਛਿਨ੍ਨਮੂਲਕਨ੍ਤਿ ਨਟ੍ਠਂ ਪਰਿਯੇਸਿਤ੍ਵਾ ਆਲਯਸਙ੍ਖਾਤਸ੍ਸ ਮੂਲਸ੍ਸ ਛਿਨ੍ਨਤ੍ਤਾ ਛਿਨ੍ਨਮੂਲਕਂ. ਅਸ੍ਸਾਮਿਕਨ੍ਤਿ ਅਨਜ੍ਝਾਵੁਤ੍ਥਕਾਦੀਹਿ ਤੀਹਿ ਆਕਾਰੇਹਿ ਦਸ੍ਸਿਤਂ ਅਸ੍ਸਾਮਿਕਵਤ੍ਥੁ. ਉਭਯਮ੍ਪੀਤਿ ਅਸ੍ਸਾਮਿਕਂ ਅਤ੍ਤਨੋ ਸਨ੍ਤਕਞ੍ਚ.

ਅਨਾਪਤ੍ਤਿਭੇਦਵਣ੍ਣਨਾ

੧੩੧. ਤਸ੍ਮਿਂਯੇਵ ¶ ਅਤ੍ਤਭਾਵੇ ਨਿਬ੍ਬਤ੍ਤਾਤਿ ਤਸ੍ਮਿਂਯੇਵ ਮਤਸਰੀਰੇ ਪੇਤਤ੍ਤਭਾਵੇਨ ਨਿਬ੍ਬਤ੍ਤਾ. ਰੁਕ੍ਖਾਦੀਸੁ ਲਗ੍ਗਿਤਸਾਟਕੇ ਵਤ੍ਤਬ੍ਬਮੇਵ ਨਤ੍ਥੀਤਿ ਮਨੁਸ੍ਸੇਹਿ ਅਗੋਪਿਤਂ ਸਨ੍ਧਾਯ ਵੁਤ੍ਤਂ, ਸਚੇ ਪਨੇਤਂ ਦੇਵਾਲਯਚੇਤਿਯਰੁਕ੍ਖਾਦੀਸੁ ¶ ਨਿਯੁਤ੍ਤੇਹਿ ਪੁਰਿਸੇਹਿ ਰਕ੍ਖਿਤਗੋਪਿਤਂ ਹੋਤਿ, ਗਹੇਤੁਂ ਨ ਵਟ੍ਟਤਿ. ਥੋਕੇ ਖਾਯਿਤੇ…ਪੇ… ਗਹੇਤੁਂ ਵਟ੍ਟਤੀਤਿ ਇਦਂ ਅਦਿਨ੍ਨਾਦਾਨਾਭਾਵਂ ਸਨ੍ਧਾਯ ਵੁਤ੍ਤਂ. ਜਿਘਚ੍ਛਿਤਪਾਣਿਨਾ ਖਾਦਿਯਮਾਨਮਂਸਸ੍ਸ ਅਚ੍ਛਿਨ੍ਦਿਤ੍ਵਾ ਖਾਦਨਂ ਨਾਮ ਕਾਰੁਞ੍ਞਹਾਨਿਤੋ ਲੋਲਭਾਵਤੋ ਚ ਅਸਾਰੁਪ੍ਪਮੇਵ. ਤੇਨੇਵ ਹਿ ਅਰਿਯਵਂਸਿਕਾ ਅਤ੍ਤਨੋ ਪਤ੍ਤੇ ਭਤ੍ਤਂ ਖਾਦਨ੍ਤਮ੍ਪਿ ਸੁਨਖਾਦਿਂ ਤਜ੍ਜੇਤ੍ਵਾ ਨ ਵਾਰੇਨ੍ਤਿ, ਤਿਰਚ੍ਛਾਨਾਨਂ ਆਮਿਸਦਾਨੇ ਕੁਸਲਂ ਵਿਯ ਤੇਸਂ ਆਮਿਸਸ੍ਸ ਅਚ੍ਛਿਨ੍ਦਨੇਪਿ ਅਕੁਸਲਮੇਵਾਤਿ ਗਹੇਤਬ੍ਬਂ, ਤੇਨੇਵ ਵਕ੍ਖਤਿ ‘‘ਪਰਾਨੁਦ੍ਦਯਤਾਯ ਚ ਨ ਗਹੇਤਬ੍ਬ’’ਨ੍ਤਿ (ਪਾਰਾ. ਅਟ੍ਠ. ੧.੧੪੦).

ਪਕਿਣ੍ਣਕਕਥਾਵਣ੍ਣਨਾ

ਬਹੁ ਏਕਤੋ ਦਾਰੁਆਦਿਭਾਰਿਯਸ੍ਸ ਏਕਸ੍ਸ ਭਣ੍ਡਸ੍ਸ ਉਕ੍ਖਿਪਨਕਾਲੇ ‘‘ਗਣ੍ਹਥ ਉਕ੍ਖਿਪਥਾ’’ਤਿ ਵਚੀਪਯੋਗੇਨ ਸਦ੍ਧਿਂ ਕਾਯਪਯੋਗਸਬ੍ਭਾਵਟ੍ਠਾਨਂ ਸਨ੍ਧਾਯ ‘‘ਸਾਹਤ੍ਥਿਕਾਣਤ੍ਤਿਕ’’ਨ੍ਤਿ ਵੁਤ੍ਤਂ. ‘‘ਤ੍ਵਂ ਏਤਂ ਵਤ੍ਥੁਂ ਗਣ੍ਹ, ਅਹਂ ਅਞ੍ਞ’’ਨ੍ਤਿ ਏਵਂ ਪਵਤ੍ਤੇ ਪਨ ਅਵਹਾਰੇ ਅਤ੍ਤਨਾ ਗਹਿਤਂ ਸਾਹਤ੍ਥਿਕਮੇਵ, ਪਰੇਨ ਗਾਹਾਪਿਤਂ ਆਣਤ੍ਤਿਕਮੇਵ, ਤੇਨੇਵ ਤਦੁਭਯਗ੍ਘੇਨ ਪਞ੍ਚਮਾਸੇਪਿ ਪਾਰਾਜਿਕਂ ਨ ਹੋਤਿ, ਏਕੇਕਭਣ੍ਡਗ੍ਘਵਸੇਨ ਥੁਲ੍ਲਚ੍ਚਯਾਦਿਮੇਵ ਹੋਤਿ. ਵੁਤ੍ਤਞ੍ਹਿ ‘‘ਸਾਹਤ੍ਥਿਕਂ ਵਾ ਆਣਤ੍ਤਿਕਸ੍ਸ ਅਙ੍ਗਂ ਨ ਹੋਤੀ’’ਤਿਆਦਿ. ਉਪਨਿਕ੍ਖਿਤ੍ਤਭਣ੍ਡਂ ਭਣ੍ਡਦੇਯ੍ਯਞ੍ਚ ਅਦਾਤੁਕਾਮਤਾਯ ‘‘ਦੇਮਿ ਦਮ੍ਮੀ’’ਤਿ ਵਿਕ੍ਖਿਪਨ੍ਤੋ ਤੁਣ੍ਹੀਭਾਵੇਨ ਵਿਹੇਠੇਨ੍ਤੋਪਿ ਤੇਨ ਤੇਨ ਕਾਯਵਿਕਾਰਾਦਿਕਿਰਿਯਾਯ ਪਰਸ੍ਸ ਧੁਰਂ ਨਿਕ੍ਖਿਪਾਪੇਸੀਤਿ ‘‘ਕਿਰਿਯਾਸਮੁਟ੍ਠਾਨਞ੍ਚਾ’’ਤਿ ਵੁਤ੍ਤਂ.

ਪਦਭਾਜਨੀਯਵਣ੍ਣਨਾਨਯੋ ਨਿਟ੍ਠਿਤੋ.

ਵਿਨੀਤਵਤ੍ਥੁਵਣ੍ਣਨਾ

੧੩੫. ਵਿਨੀਤਵਤ੍ਥੂਸੁ ¶ ਨਿਰੁਤ੍ਤਿਯੇਵ ਤਂਤਂਅਤ੍ਥਗ੍ਗਹਣਸ੍ਸ ਉਪਾਯਤਾਯ ਪਥੋਤਿ ਨਿਰੁਤ੍ਤਿਪਥੋ, ਤੇਨੇਵਾਹ ‘‘ਵੋਹਾਰਵਚਨਮਤ੍ਤੇ’’ਤਿ. ਯਥਾਕਮ੍ਮਂ ਗਤੋਤਿ ਤਤੋ ਪੇਤਤ੍ਤਭਾਵਤੋ ਮਤਭਾਵਂ ਦਸ੍ਸੇਤਿ. ਅਬ੍ਭੁਣ੍ਹੇਤਿ ਆਸਨ੍ਨਮਰਣਤਾਯ ਸਰੀਰਸ੍ਸ ਉਣ੍ਹਸਮਙ੍ਗਿਤਂ ਦਸ੍ਸੇਤਿ, ਤੇਨੇਵਾਹ ‘‘ਅਲ੍ਲਸਰੀਰੇ’’ਤਿ. ਕੁਣਪਭਾਵਂ ਉਪਗਤਮ੍ਪਿ ਭਿਨ੍ਨਮੇਵ ਅਲ੍ਲਭਾਵਤੋ ਭਿਨ੍ਨਤ੍ਤਾ. ਵਿਸਭਾਗਸਰੀਰੇਤਿ ਇਤ੍ਥਿਸਰੀਰੇ. ਸੀਸੇ ਵਾਤਿਆਦਿ ਅਧਕ੍ਖਕੇ ਉਬ੍ਭਜਾਣੁਮਣ੍ਡਲੇ ਪਦੇਸੇ ਚਿਤ੍ਤਵਿਕਾਰਪ੍ਪਤ੍ਤਿਂ ਸਨ੍ਧਾਯ ਵੁਤ੍ਤਂ, ਯਤ੍ਥ ਕਤ੍ਥਚਿ ਅਨਾਮਸਨ੍ਤੇਨ ਕਤਂ ਸੁਕਤਮੇਵ. ਮਤਸਰੀਰਮ੍ਪਿ ਹਿ ਯੇਨ ਕੇਨਚਿ ਆਕਾਰੇਨ ਸਞ੍ਚਿਚ੍ਚ ਫੁਸਨ੍ਤਸ੍ਸ ਅਨਾਮਾਸਦੁਕ੍ਕਟਮੇਵਾਤਿ ਵਦਨ੍ਤਿ, ਤਂ ਯੁਤ੍ਤਮੇਵ. ਨ ਹਿ ਅਪਾਰਾਜਿਕਵਤ੍ਥੁਕੇਪਿ ਚਿਤ੍ਤਾਦਿਇਤ੍ਥਿਰੂਪੇ ਭਵਨ੍ਤਂ ਦੁਕ੍ਕਟਂ ਪਾਰਾਜਿਕਵਤ੍ਥੁਭੂਤੇ ਮਤਿਤ੍ਥਿਸਰੀਰੇ ਨਿਵਤ੍ਤਤਿ.

ਕੁਸਸਙ੍ਕਾਮਨਵਤ੍ਥੁਕਥਾਵਣ੍ਣਨਾ

੧੩੮. ਬਲਸਾਤਿ ¶ ਬਲੇਨ. ਸਾਟਕੋ ਭਵਿਸ੍ਸਤਿ, ਗਣ੍ਹਿਸ੍ਸਾਮੀਤਿ ਅਨਾਗਤਵਚਨਂ ਪਸਿਬ੍ਬਕਗ੍ਗਹਣਤੋ ਪੁਰੇਤਰਂ ਸਮੁਪ੍ਪਨ੍ਨਪਰਿਕਪ੍ਪਦਸ੍ਸਨਵਸੇਨ ਵੁਤ੍ਤਂ. ਗਹਣਕ੍ਖਣੇ ਪਨ ‘‘ਸਾਟਕੋ ਚੇ, ਗਣ੍ਹਾਮੀ’’ਤਿ ਪਸਿਬ੍ਬਕਂ ਗਣ੍ਹਾਤੀਤਿ ਏਵਮੇਤ੍ਥ ਅਧਿਪ੍ਪਾਯੋ ਗਹੇਤਬ੍ਬੋ, ਨ ਪਨ ਬਹਿ ਨੀਹਰਿਤ੍ਵਾ ਸਾਟਕਭਾਵਂ ਞਤ੍ਵਾ ਗਹੇਸ੍ਸਾਮੀਤਿ, ਤੇਨਾਹ ‘‘ਉਦ੍ਧਾਰੇਯੇਵ ਪਾਰਾਜਿਕ’’ਨ੍ਤਿ. ਇਤਰਥਾ ‘‘ਇਦਾਨਿ ਨ ਗਣ੍ਹਾਮਿ, ਪਚ੍ਛਾ ਅਨ੍ਧਕਾਰੇ ਜਾਤੇ ਵਿਜਾਨਨਕਾਲੇ ਵਾ ਗਣ੍ਹਿਸ੍ਸਾਮਿ, ਇਦਾਨਿ ਓਲੋਕੇਨ੍ਤੋ ਵਿਯ ਹਤ੍ਥਗਤਂ ਕਰੋਮੀ’’ਤਿ ਗਣ੍ਹਨ੍ਤਸ੍ਸਾਪਿ ਗਹਣਕ੍ਖਣੇ ਅਵਹਾਰੋ ਭਵੇਯ੍ਯ, ਨ ਚ ਤਂ ਯੁਤ੍ਤਂ ਤਦਾ ਗਹਣੇ ਸਨ੍ਨਿਟ੍ਠਾਨਾਭਾਵਾ. ਸਨ੍ਨਿਟ੍ਠਾਪਕਚੇਤਨਾਯ ਏਵ ਹਿ ਪਾਣਾਤਿਪਾਤਾਦਿਅਕੁਸਲਂ ਵਿਯ. ਨ ਹਿ ‘‘ਪਚ੍ਛਾ ਵਧਿਸ੍ਸਾਮੀ’’ਤਿ ਪਾਣਂ ਗਣ੍ਹਨ੍ਤਸ੍ਸ ਤਦੇਵ ਤਸ੍ਮਿਂ ਮਤੇਪਿ ਪਾਣਾਤਿਪਾਤੋ ਹੋਤਿ ਵਧਕਚੇਤਨਾਯ ਪਯੋਗਸ੍ਸ ਅਕਤਤ੍ਤਾ, ਏਵਮਿਧਾਪਿ ਅਤ੍ਥਙ੍ਗਤੇ ਸੂਰਿਯੇ ਅਵਹਰਿਸ੍ਸਾਮੀਤਿਆਦਿਨਾ ਕਾਲਪਰਿਕਪ੍ਪਨਵਸੇਨ ਠਾਨਾ ਚਾਵਿਤੇਪਿ ਤਦਾਪਿ ਅਵਹਾਰੋ ਨ ਹੋਤਿ ਓਕਾਸਪਰਿਕਪ੍ਪੇ (ਪਾਰਾ. ਅਟ੍ਠ. ੧.੧੩੮) ਵਿਯ, ਤਸ੍ਮਿਂ ਪਨ ਯਥਾਪਰਿਕਪ੍ਪਿਤਟ੍ਠਾਨੇ ਕਾਲੇ ਆਗਤੇ ਭਣ੍ਡਂ ਭੂਮਿਯਂ ਅਨਿਕ੍ਖਿਪਿਤ੍ਵਾਪਿ ਥੇਯ੍ਯਚਿਤ੍ਤੇਨ ਗਚ੍ਛਤੋ ਪਦਵਾਰੇਨ ਅਵਹਾਰੋਤਿ ਖਾਯਤਿ. ਤਸ੍ਮਾ ਭਣ੍ਡਪਰਿਕਪ੍ਪੋ ਓਕਾਸਪਰਿਕਪ੍ਪੋ ਕਾਲਪਰਿਕਪ੍ਪੋਤਿ ਤਿਵਿਧੋਪਿ ਪਰਿਕਪ੍ਪੋ ¶ ਗਹੇਤਬ੍ਬੋ. ਅਟ੍ਠਕਥਾਯਂ ਪਨ ਓਕਾਸਪਰਿਕਪ੍ਪੇ ਸਮੋਧਾਨੇਤ੍ਵਾ ਕਾਲਪਰਿਕਪ੍ਪੋ ਵਿਸੁਂ ਨ ਵੁਤ੍ਤੋਤਿ ਅਮ੍ਹਾਕਂ ਖਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ਪਦਵਾਰੇਨ ਕਾਰੇਤਬ੍ਬੋਤਿ ਭੂਮਿਯਂ ਅਨਿਕ੍ਖਿਪਿਤ੍ਵਾ ਵੀਮਂਸਿਤਤ੍ਤਾ ਵੁਤ੍ਤਂ. ਪਰਿਯੁਟ੍ਠਿਤੋਤਿ ਅਨੁਬਦ੍ਧੋ.

ਪਰਿਕਪ੍ਪੋ ਦਿਸ੍ਸਤੀਤਿ ਗਹਣਕ੍ਖਣੇ ਪਰਿਕਪ੍ਪੋ ਦਿਸ੍ਸਤਿ, ਨ ਤਦਾ ਤੇਸਂ ਮਤੇਨ ਅਵਹਾਰੋਤਿ ਦਸ੍ਸੇਤਿ. ਦਿਸ੍ਵਾ ਹਟਤ੍ਤਾ ਪਰਿਕਪ੍ਪਾਵਹਾਰੋ ਨ ਦਿਸ੍ਸਤੀਤਿ ਪਚ੍ਛਾ ਪਨ ਬਹਿ ਵੀਮਂਸਿਤ੍ਵਾ ਸਾਟਕਭਾਵਂ ਞਤ੍ਵਾ ਤਤੋ ਪਚ੍ਛਾ ਥੇਯ੍ਯਚਿਤ੍ਤੇਨ ਹਟਤ੍ਤਾ ਪੁਬ੍ਬੇ ਕਤਸ੍ਸ ਪਰਿਕਪ੍ਪਸ੍ਸ ਅਵਹਾਰਾਨਙ੍ਗਤ੍ਤਾ ‘‘ਸੁਤ੍ਤ’’ਨ੍ਤਿ ਞਤ੍ਵਾ ਹਰਣੇ ਵਿਯ ਥੇਯ੍ਯਾਵਹਾਰੋ ਏਵ ਸਿਯਾ. ਤਸ੍ਮਾ ਪਰਿਕਪ੍ਪਾਵਹਾਰੋ ਨ ਦਿਸ੍ਸਤਿ. ਸਾਟਕੋ ਚੇ ਭਵਿਸ੍ਸਤੀਤਿਆਦਿਕਸ੍ਸ ਪਰਿਕਪ੍ਪਸ੍ਸ ਤਦਾ ਅਵਿਜ੍ਜਮਾਨਤ੍ਤਾ ਕੇਵਲਂ ਅਵਹਾਰੋ ਏਵ, ਨ ਪਰਿਕਪ੍ਪਾਵਹਾਰੋਤਿ ਅਧਿਪ੍ਪਾਯੋ, ਤੇਨ ਭਣ੍ਡਪਰਿਕਪ੍ਪਾਵਹਾਰਸ੍ਸ ‘‘ਸਾਟਕੋ ਚੇ ਭਵਿਸ੍ਸਤਿ, ਗਹੇਸ੍ਸਾਮੀ’’ਤਿ ਏਵਂ ਭਣ੍ਡਸਨ੍ਨਿਟ੍ਠਾਨਾਭਾਵਕ੍ਖਣੇਯੇਵ ਪਵਤ੍ਤਿਂ ਦਸ੍ਸੇਤਿ, ਤੇਨਾਹ ‘‘ਯਂ ਪਰਿਕਪ੍ਪਿਤਂ, ਤਂ ਅਦਿਟ੍ਠਂ ਪਰਿਕਪ੍ਪਿਤਭਾਵੇ ਠਿਤਂਯੇਵ ਉਦ੍ਧਰਨ੍ਤਸ੍ਸ ਅਵਹਾਰੋ’’ਤਿ. ਯਦਿ ਏਵਂ ਕਸ੍ਮਾ ਓਕਾਸਪਅਪ੍ਪਾਵਹਾਰੋ ਭਣ੍ਡਂ ਦਿਸ੍ਵਾ ਅਵਹਰਨ੍ਤਸ੍ਸ ਪਰਿਕਪ੍ਪਾਵਹਾਰੋ ਸਿਯਾਤਿ? ਨਾਯਂ ਦੋਸੋ ਅਭਣ੍ਡਵਿਸਯਤ੍ਤਾ ਤਸ੍ਸ ਪਰਿਕਪ੍ਪਸ੍ਸ, ਪੁਬ੍ਬੇਵ ਦਿਸ੍ਵਾ ਞਾਤਭਣ੍ਡਸ੍ਸੇਵ ਹਿ ਓਕਾਸਪਰਿਕਪ੍ਪੋ ਵੁਤ੍ਤੋ. ਤਂ ਮਞ੍ਞਮਾਨੋ ਤਂ ਅਵਹਰੀਤਿ ਇਦਂ ਸੁਤ੍ਤਂ ਕਿਞ੍ਚਾਪਿ ‘‘ਤਞ੍ਞੇਵੇਤ’’ਨ੍ਤਿ ਨਿਯਮੇਤ੍ਵਾ ਗਣ੍ਹਨ੍ਤਸ੍ਸ ¶ ਵਸੇਨ ਵੁਤ੍ਤਂ, ਤਥਾਪਿ ‘‘ਤਞ੍ਚੇ ਗਣ੍ਹਿਸ੍ਸਾਮੀ’’ਤਿ ਏਵਂ ਪਵਤ੍ਤੇ ਇਮਸ੍ਮਿਂ ਪਰਿਕਪ੍ਪੇਪਿ ‘‘ਗਣ੍ਹਿਸ੍ਸਾਮੀ’’ਤਿ ਗਹਣੇ ਨਿਯਮਸਬ੍ਭਾਵਾ ਅਵਹਾਰਤ੍ਥਸਾਧਕਂ ਹੋਤੀਤਿ ਉਦ੍ਧਟਂ, ਤੇਨੇਵ ‘‘ਸਮੇਤੀ’’ਤਿ ਵੁਤ੍ਤਂ.

ਕੇਚੀਤਿ ਮਹਾਅਟ੍ਠਕਥਾਯਮੇਵ ਏਕਚ੍ਚੇ ਆਚਰਿਯਾ. ਮਹਾਪਚ੍ਚਰਿਯਂ ਪਨਾਤਿਆਦਿਨਾਪਿ ਕੇਚਿਵਾਦੋ ਗਾਰਯ੍ਹੋ, ਮਹਾਅਟ੍ਠਕਥਾਵਾਦੋਵ ਯੁਤ੍ਤਤਰੋਤਿ ਦਸ੍ਸੇਤਿ.

ਅਲਙ੍ਕਾਰਭਣ੍ਡਨ੍ਤਿ ਅਙ੍ਗੁਲਿਮੁਦ੍ਦਿਕਾਦਿ. ਕੁਸਂ ਪਾਤੇਤ੍ਵਾਤਿ ਵਿਲੀਵਮਯਂ ਵਾ ਤਾਲਪਣ੍ਣਾਦਿਮਯਂ ਵਾ ਕਤਸਞ੍ਞਾਣਂ ਪਾਤੇਤ੍ਵਾ. ਪਰਕੋਟ੍ਠਾਸਤੋ ਕੁਸੇ ਉਦ੍ਧਟੇਪਿ ਨ ਤਾਵ ਕੁਸਸ੍ਸ ਪਰਿਵਤ੍ਤਨਂ ਜਾਤਨ੍ਤਿ ਵੁਤ੍ਤਂ ‘‘ਉਦ੍ਧਾਰੇ ਰਕ੍ਖਤੀ’’ਤਿ. ਹਤ੍ਥਤੋ ਮੁਤ੍ਤਮਤ੍ਤੇ ਪਾਰਾਜਿਕਨ੍ਤਿ ਇਮਿਨਾ ਠਾਨਾਚਾਵਨਂ ਧੁਰਨਿਕ੍ਖੇਪਞ੍ਚ ਵਿਨਾ ਕੁਸਸਙ੍ਕਾਮਨਂ ਨਾਮ ਵਿਸੁਂ ਏਕੋਯਂ ਅਵਹਾਰੋਤਿ ਦਸ੍ਸੇਤਿ. ਸਬ੍ਬੇਪਿ ਹਿ ਅਵਹਾਰਾ ¶ ਸਾਹਤ੍ਥਿਕਾਣਤ੍ਤਿਕਾਧਿਪ੍ਪਾਯਯੋਗੇਹਿ ਨਿਪ੍ਫਾਦਿਯਮਾਨਾ ਅਤ੍ਥਤੋ ਠਾਨਾਚਾਵਨਧੁਰਨਿਕ੍ਖੇਪਕੁਸਸਙ੍ਕਾਮਨੇਸੁ ਤੀਸੁ ਸਮੋਸਰਨ੍ਤੀਤਿ ਦਟ੍ਠਬ੍ਬਂ. ਇਤਰੋ ਤਸ੍ਸ ਭਾਗਂ ਉਦ੍ਧਰਤਿ, ਉਦ੍ਧਾਰੇ ਪਾਰਾਜਿਕਨ੍ਤਿ ਪੁਰਿਮਸ੍ਸ ਅਤ੍ਤਨੋ ਕੋਟ੍ਠਾਸੇ ਆਲਯਸ੍ਸ ਅਵਿਗਤਤ੍ਤਾ ਵੁਤ੍ਤਂ, ਆਲਯੇ ਪਨ ਸਬ੍ਬਥਾ ਅਸਤਿ ਅਵਹਾਰੋ ਨ ਹੋਤਿ, ਤੇਨਾਹ ‘‘ਵਿਚਿਨਿਤਾਵਸੇਸਂ ਗਣ੍ਹਨ੍ਤਸ੍ਸਾਪਿ ਅਵਹਾਰੋ ਨਤ੍ਥੇਵਾ’’ਤਿ.

ਨਾਯਂ ਮਮਾਤਿ ਜਾਨਨ੍ਤੋਪੀਤਿ ਏਤ੍ਥ ਪਿ-ਸਦ੍ਦੇਨ ਤਤ੍ਥ ਵੇਮਤਿਕੋਪਿ ਹੁਤ੍ਵਾ ਥੇਯ੍ਯਚਿਤ੍ਤੇਨ ਗਣ੍ਹਨ੍ਤੋਪਿ ਸਙ੍ਗਯ੍ਹਤਿ. ਸਿਵੇਯ੍ਯਕਨ੍ਤਿ ਸਿਵਿਰਟ੍ਠੇ ਜਾਤਂ.

੧੪੦-੧. ਕਪ੍ਪਿਯਂ ਕਾਰਾਪੇਤ੍ਵਾਤਿ ਪਚਾਪੇਤ੍ਵਾ. ਤਸ੍ਮਿਂ ਪਾਚਿਤ੍ਤਿਯਨ੍ਤਿ ਅਦਿਨ੍ਨਾਦਾਨਭਾਵੇਨ ਸਹਪਯੋਗਸ੍ਸਾਪਿ ਅਭਾਵਾ ਦੁਕ੍ਕਟਂ ਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਆਣਤ੍ਤੇਹੀਤਿ ਸਮ੍ਮਤੇਨ ਆਣਤ੍ਤੇਹਿ. ਆਣਤ੍ਤੇਨਾਤਿ ਸਾਮਿਕੇਹਿ ਆਣਤ੍ਤੇਨ. ਭਣ੍ਡਦੇਯ੍ਯਨ੍ਤਿ ਸਮ੍ਮਤਾਦੀਹਿ ਦਿਨ੍ਨਤ੍ਤਾ ਨ ਪਰਾਜਿਕਂ ਜਾਤਂ, ਅਸਨ੍ਤਂ ਪੁਗ੍ਗਲਂ ਵਤ੍ਵਾ ਗਹਿਤਤ੍ਤਾ ਪਨ ਭਣ੍ਡਦੇਯ੍ਯਂ ਵੁਤ੍ਤਂ. ਅਞ੍ਞੇਨ ਦਿਯ੍ਯਮਾਨਨ੍ਤਿ ਸਮ੍ਮਤਾਦੀਹਿ ਚਤੂਹਿ ਅਞ੍ਞੇਨ ਦਿਯ੍ਯਮਾਨਂ. ਗਣ੍ਹਨ੍ਤੋਤਿ ‘‘ਅਪਰਸ੍ਸ ਭਾਗਂ ਦੇਹੀ’’ਤਿ ਵਤ੍ਵਾ ਗਣ੍ਹਨ੍ਤੋ. ਅਪਰਸ੍ਸਾਤਿ ਅਸਨ੍ਤਂ ਪੁਗ੍ਗਲਂ ਅਦਸ੍ਸੇਤ੍ਵਾ ਪਨ ‘‘ਅਪਰਂ ਭਾਗਂ ਦੇਹੀ’’ਤਿ ਵਾ ਕੂਟਵਸ੍ਸਾਨਿ ਗਣੇਤ੍ਵਾ ਵਾ ਗਣ੍ਹਤੋ ਗਿਹਿਸਨ੍ਤਕੇ ਸਾਮਿਨਾ ਚ ‘‘ਇਮਸ੍ਸ ਦੇਹੀ’’ਤਿ ਏਵਂ ਆਣਤ੍ਤੇਨ ਚ ਦਿਨ੍ਨੇ ਭਣ੍ਡਦੇਯ੍ਯਮ੍ਪਿ ਨ ਹੋਤਿ, ਸਙ੍ਘਸਨ੍ਤਕੇ ਪਨ ਹੋਤੀਤਿ ਇਮਂ ਵਿਸੇਸਂ ਦਸ੍ਸੇਤੁਂ ਅਸਮ੍ਮਤੇਨ ਵਾ ਅਨਾਣਤ੍ਤੇਨ ਵਾਤਿਆਦਿ ਪੁਨ ਵੁਤ੍ਤਂ. ਇਤਰੇਹਿ ਦਿਯ੍ਯਮਾਨਨ੍ਤਿ ਸਮ੍ਮਤੇਨ ਆਣਤ੍ਤੇਨ ਵਾ ਦਿਯ੍ਯਮਾਨਂ. ਏਵਂ ਗਣ੍ਹਤੋਤਿ ‘‘ਅਪਰਮ੍ਪਿ ਭਾਗਂ ਦੇਹੀ’’ਤਿ ਵਤ੍ਵਾ ਕੂਟਵਸ੍ਸਾਨਿ ਗਣੇਤ੍ਵਾ ਵਾ ਗਣ੍ਹਤੋ. ਸਾਮਿਕੇਨ ਪਨਾਤਿ ਏਤ੍ਥ ਪਨ-ਸਦ੍ਦੋ ਵਿਸੇਸਤ੍ਥਜੋਤਕੋ, ਤੇਨ ‘‘ਅਪਰਮ੍ਪਿ ਭਾਗਂ ਦੇਹੀ’’ਤਿ ਵਾ ਕੂਟਵਸ੍ਸਾਨਿ ਗਣੇਤ੍ਵਾ ਵਾ ਗਣ੍ਹਨ੍ਤੇ ਸਾਮਿਕੇਨ ਸਯਂ ਦੇਨ੍ਤੇ ਵਾ ਦਾਪੇਨ੍ਤੇ ਵਾ ਵਿਸੇਸੋ ਅਤ੍ਥੀਤਿ ਵੁਤ੍ਤਂ ਹੋਤਿ. ਸੁਦਿਨ੍ਨਨ੍ਤਿ ਭਣ੍ਡਦੇਯ੍ਯਂ ਨ ਹੋਤੀਤਿ ਅਧਿਪ੍ਪਾਯੋ. ਹੇਟ੍ਠਾ ਪਨ ਸਾਮਿਕੇਨ ਤੇਨ ਆਣਤ੍ਤੇਨ ਵਾ ਦਿਯ੍ਯਮਾਨਂ ਗਿਹਿਸਨ੍ਤਕਂ ‘‘ਅਪਰਸ੍ਸ ਭਾਗਂ ਦੇਹੀ’’ਤਿ ਵਤ੍ਵਾ ਗਣ੍ਹਤੋ ਅਪਰਸ੍ਸ ਅਭਾਵਤੋ ਸਾਮਿਸਨ੍ਤਕਮੇਵ ਹੋਤੀਤਿ ਭਣ੍ਡਦੇਯ੍ਯਂ ਜਾਤਂ, ਇਧ ਪਨ ਤੇਹਿਯੇਵ ਦਿਯ੍ਯਮਾਨਂ ‘‘ਅਪਰਮ੍ਪਿ ਭਾਗਂ ਦੇਹੀ’’ਤਿ ਵਤ੍ਵਾ ਵਾ ਕੂਟਵਸ੍ਸਾਨਿ ਗਣੇਤ੍ਵਾ ¶ ਵਾ ਗਣ੍ਹਤੋ ‘‘ਦੇਹੀ’’ਤਿ ਵੁਤ੍ਤਤ੍ਤਾ ¶ ਅਞ੍ਞਾਤਕਵਿਞ੍ਞਤ੍ਤਿਮਤ੍ਤਂ ਠਪੇਤ੍ਵਾ ਭਣ੍ਡਦੇਯ੍ਯਂ ਨ ਹੋਤੀਤਿ ਸੁਦਿਨ੍ਨਮੇਵਾਤਿ ਵੁਤ੍ਤਂ. ਅਸ੍ਸਾਮਿਕੇਨ ਪਨ ਆਣਤ੍ਤੇਨ ਦਿਨ੍ਨਂ ਭਣ੍ਡਂ ਗਣ੍ਹਤੋ ਭਣ੍ਡਦੇਯ੍ਯਮੇਵਾਤਿ ਵਦਨ੍ਤਿ, ਪਤ੍ਤਚਤੁਕ੍ਕੇ ਵਿਯ ਅਵਹਾਰਤਾਵੇਤ੍ਥ ਯੁਤ੍ਤਾ, ਸਙ੍ਘਸਨ੍ਤਕੇ ਪਨ ‘‘ਦੇਹੀ’’ਤਿ ਵੁਤ੍ਤੇਪਿ ਸਾਮਿਕਸ੍ਸ ਕਸ੍ਸਚਿ ਅਭਾਵਾ ਸਮ੍ਮਤੇਨ ਦਿਨ੍ਨੇਪਿ ਭਣ੍ਡਦੇਯ੍ਯਂ ਵੁਤ੍ਤਨ੍ਤਿ ਗਹੇਤਬ੍ਬਂ.

੧੪੬-੯. ਆਹਰਾਪੇਨ੍ਤੇਸੁ ਭਣ੍ਡਦੇਯ੍ਯਨ੍ਤਿ ‘‘ਗਹਿਤੇ ਅਤ੍ਤਮਨੋ ਹੋਤੀ’’ਤਿ ਵਚਨਤੋ ਅਨਤ੍ਤਮਨਸ੍ਸ ਸਨ੍ਤਕਂ ਗਹਿਤਮ੍ਪਿ ਪੁਨ ਦਾਤਬ੍ਬਮੇਵਾਤਿ ਵੁਤ੍ਤਂ. ‘‘ਸਮ੍ਮੁਖੀਭੂਤੇਹਿ ਭਾਜੇਤਬ੍ਬ’’ਨ੍ਤਿ ਵਚਨਤੋ ਭਾਜਨੀਯਭਣ੍ਡਂ ਉਪਚਾਰਸੀਮਟ੍ਠਾਨਮੇਵ ਪਾਪੁਣਾਤੀਤਿ ਆਹ ‘‘ਅਨ੍ਤੋਉਪਚਾਰਸੀਮਾਯਂ ਠਿਤਸ੍ਸੇਵ ਗਹੇਤੁਂ ਵਟ੍ਟਤੀ’’ਤਿ. ਭਣ੍ਡਦੇਯ੍ਯਨ੍ਤਿ ਉਭਿਨ੍ਨਂ ਸਾਲਯਭਾਵੇਪਿ ਚੋਰਸ੍ਸ ਅਦਤ੍ਵਾ ਸਾਮਿਕਸ੍ਸੇਵ ਦਾਤਬ੍ਬਂ ਚੋਰੇਨਾਪਿ ਸਾਮਿਕਸ੍ਸੇਵ ਦਾਤਬ੍ਬਤੋ. ਏਸੇਵ ਨਯੋਤਿ ਪਂਸੁਕੂਲਸਞ੍ਞਾਯ ਗਹਿਤੇ ਭਣ੍ਡਦੇਯ੍ਯਂ, ਥੇਯ੍ਯਚਿਤ੍ਤੇਨ ਪਾਰਾਜਿਕਨ੍ਤਿ ਅਤ੍ਥੋ.

ਵੁਟ੍ਠਹਨ੍ਤੇਸੂਤਿ ਗਾਮਂ ਛਡ੍ਡੇਤ੍ਵਾ ਪਲਾਯਨ੍ਤੇਸੁ. ਅਵਿਸੇਸੇਨਾਤਿ ਸਉਸ੍ਸਾਹਤਾਦਿਵਿਸੇਸਂ ਅਪਰਾਮਸਿਤ੍ਵਾ ਸਾਮਞ੍ਞਤੋ. ਸਉਸ੍ਸਾਹਮਤ੍ਤਮੇਵ ਆਪਤ੍ਤਿਭਾਵਸ੍ਸ ਪਮਾਣਂ ਸਾਮਿਕਾਨਂ ਪਰਿਚ੍ਛਿਨ੍ਨਭਾਵਤੋ. ਤਤੋਤਿ ਗਣਸਨ੍ਤ�