ਤੀਕਾ > ਵਿਨਯਪਿਟਕ (ਟੀਕਾ) > ਵਿਮਤਿਵਿਨੋਦਨੀ ਟੀਕਾ-੨

੧. ਮੁਸਾਵਾਦਵਗ੍ਗਸ੍ਸ ¶ ¶ ਪਠਮਸਿਕ੍ਖਾਪਦੇ ਖੁਦ੍ਦਕਾਨਨ੍ਤਿ ਏਤ੍ਥ ‘‘ਖੁਦ੍ਦਕ-ਸਦ੍ਦੋ ਬਹੁ-ਸਦ੍ਦਪਰਿਯਾਯੋ’’ਤਿ ਵਦਨ੍ਤਿ. ਤਤ੍ਥਾਤਿ ਤੇਸੁ ਵਗ੍ਗੇਸੁ, ਖੁਦ੍ਦਕੇਸੁ ਵਾ. ‘‘ਜਾਨਿਤਬ੍ਬਤੋ’’ਤਿ ਹੇਤੁਨੋ ਵਿਪਕ੍ਖੇਪਿ ਨਿਬ੍ਬਾਨੇ ਵਤ੍ਤਨਤੋ ਅਨੇਕਨ੍ਤਿਕਤ੍ਤੇ ਪਰੇਹਿ ਵੁਤ੍ਤੇ ‘‘ਨ ਮਯਾ ਅਯਂ ਹੇਤੁ ਵੁਤ੍ਤੋ’’ਤਿ ¶ ਤਂ ਕਾਰਣਂ ਪਟਿਚ੍ਛਾਦੇਤੁਂ ਪੁਨ ‘‘ਜਾਤਿਧਮ੍ਮਤੋਤਿ ਮਯਾ ਵੁਤ੍ਤ’’ਨ੍ਤਿਆਦੀਨਿ ਵਦਤਿ. ‘‘ਸਮ੍ਪਜਾਨ’’ਨ੍ਤਿ ਵਤ੍ਤਬ੍ਬੇ ਅਨੁਨਾਸਿਕਲੋਪੇਨ ਨਿਦ੍ਦੇਸੋਤਿ ਆਹ ‘‘ਜਾਨਨ੍ਤੋ’’ਤਿ.

੨. ਸਮ੍ਪਜਾਨਮੁਸਾਵਾਦੇਤਿ ਅਤ੍ਤਨਾ ਵੁਚ੍ਚਮਾਨਸ੍ਸ ਅਤ੍ਥਸ੍ਸ ਵਿਤਥਭਾਵਂ ਪੁਬ੍ਬੇਪਿ ਜਾਨਿਤ੍ਵਾ, ਵਚਨਕ੍ਖਣੇ ਚ ਜਾਨਨ੍ਤਸ੍ਸ ਮੁਸਾਵਾਦਭਣਨੇ. ਤੇਨਾਹ ‘‘ਜਾਨਿਤ੍ਵਾ’’ਤਿਆਦਿ. ਮੁਸਾਵਾਦੇਤਿ ਚ ਨਿਮਿਤ੍ਤਤ੍ਥੇ ਭੁਮ੍ਮਂ, ਤਸ੍ਮਾ ਮੁਸਾਭਣਨਨਿਮਿਤ੍ਤਂ ਪਾਚਿਤ੍ਤਿਯਨ੍ਤਿ ਏਵਮੇਤ੍ਥ, ਇਤੋ ਪਰੇਸੁਪਿ ਈਦਿਸੇਸੁ ਅਤ੍ਥੋ ਵੇਦਿਤਬ੍ਬੋ.

੩. ਵਦਨ੍ਤਿ ¶ ਏਤਾਯਾਤਿ ਵਾਚਾਤਿ ਆਹ ‘‘ਮਿਚ੍ਛਾ’’ਤਿਆਦਿ. ‘‘ਧਨੁਨਾ ਵਿਜ੍ਝਤੀ’’ਤਿਆਦੀਸੁ ਵਿਯ ‘‘ਚਕ੍ਖੁਨਾ ਦਿਟ੍ਠ’’ਨ੍ਤਿ ਪਾਕਟਵਸੇਨ ਵੁਤ੍ਤਨ੍ਤਿ ਆਹ ‘‘ਓਲ਼ਾਰਿਕੇਨਾ’’ਤਿ.

੧੧. ਗਤੋ ਭਵਿਸ੍ਸਤੀਤਿ ਏਤ੍ਥਾਪਿ ਸਨ੍ਨਿਟ੍ਠਾਨਤੋ ਵੁਤ੍ਤਤ੍ਤਾ ਮੁਸਾਵਾਦੋ ਜਾਤੋ. ਆਪਤ੍ਤਿਨ੍ਤਿ ਪਾਚਿਤ੍ਤਿਯਾਪਤ੍ਤਿਂ, ਨ ਦੁਬ੍ਭਾਸਿਤਂ. ਜਾਤਿਆਦੀਹਿ ਦਸਹਿ ਅਕ੍ਕੋਸਵਤ੍ਥੂਹਿ ਪਰਂ ਦਵਾ ਵਦਨ੍ਤਸ੍ਸ ਹਿ ਤਂ ਹੋਤਿ. ਚਾਰੇਸੁਨ੍ਤਿ ਉਪਨੇਸੁਂ. ਵਤ੍ਥੁਵਿਪਰੀਤਤਾ, ਵਿਸਂਵਾਦਨਪੁਰੇਕ੍ਖਾਰਤਾ, ਯਮਤ੍ਥਂ ਵਤ੍ਥੁਕਾਮੋ, ਤਸ੍ਸ ਪੁਗ੍ਗਲਸ੍ਸ ਵਿਞ੍ਞਾਪਨਪਯੋਗੋ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਵਤ੍ਥੁਵਿਪਰੀਤਤਾਯ ਹਿ ਅਸਤਿ ਵਿਸਂਵਾਦਨਪੁਰੇਕ੍ਖਾਰਤਾਯ ਵਿਞ੍ਞਾਪਿਤੇਪਿ ਮੁਸਾਵਾਦੋ ਨ ਹੋਤਿ, ਦੁਕ੍ਕਟਮਤ੍ਤਮੇਵ ਹੋਤਿ. ਤਸ੍ਮਾ ਸਾਪਿ ਅਙ੍ਗਮੇਵਾਤਿ ਗਹੇਤਬ੍ਬਂ. ਉਤ੍ਤਰਿਮਨੁਸ੍ਸਧਮ੍ਮਾਰੋਚਨਤ੍ਥਂ ਮੁਸਾ ਭਣਨ੍ਤਸ੍ਸ ਪਾਰਾਜਿਕਂ, ਪਰਿਯਾਯੇਨ ਥੁਲ੍ਲਚ੍ਚਯਂ, ਅਮੂਲਕੇਨ ਪਾਰਾਜਿਕੇਨ ਅਨੁਦ੍ਧਂਸਨਤ੍ਥਂ ਸਙ੍ਘਾਦਿਸੇਸੋ, ਸਙ੍ਘਾਦਿਸੇਸੇਨਾਨੁਦ੍ਧਂਸਨਓਮਸਵਾਦਾਦੀਸੁ ਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇਸੁ ਦੁਕ੍ਕਟਂ, ਉਕ੍ਕਟ੍ਠਹੀਨਜਾਤਿਆਦੀਹਿ ਦਵਾ ਅਕ੍ਕੋਸਨ੍ਤਸ੍ਸ ਦੁਬ੍ਭਾਸਿਤਂ, ਕੇਵਲਂ ਮੁਸਾ ਭਣਨ੍ਤਸ੍ਸ ਇਧ ਪਾਚਿਤ੍ਤਿਯਂ ਵੁਤ੍ਤਂ.

ਮੁਸਾਵਾਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੩. ਦੁਤਿਯੇ ਪੁਬ੍ਬੇ ਪਤਿਟ੍ਠਿਤਾਰਪ੍ਪਦੇਸਂ ਪੁਨ ਅਰੇ ਪਤ੍ਤੇਤਿ ਪਠਮਂ ਭੂਮਿਯਂ ਪਤਿਟ੍ਠਿਤਨੇਮਿਪ੍ਪਦੇਸੇ ਪਰਿਵਤ੍ਤੇਤ੍ਵਾ ਪੁਨ ਭੂਮਿਯਂ ਪਤਿਟ੍ਠਿਤੇਤਿ ਅਤ੍ਥੋ.

੧੫. ਪੁਬ੍ਬੇਤਿ ਅਟ੍ਠੁਪ੍ਪਤ੍ਤਿਯਂ. ਪੁਪ੍ਫਛਡ੍ਡਕਾ ਨਾਮ ਗਬ੍ਭਮਲਾਦਿਹਾਰਕਾ. ਤਚ੍ਛਕਕਮ੍ਮਨ੍ਤਿ ਪਾਸਾਣਕੋਟ੍ਟਨਾਦਿਵਡ੍ਢਕੀਕਮ੍ਮਂ ¶ . ਹਤ੍ਥਮੁਦ੍ਦਾਗਣਨਾਤਿ ਅਙ੍ਗੁਲਿਸਙ੍ਕੋਚਨੇਨੇਵ ਗਣਨਾ. ਅਚ੍ਛਿਦ੍ਦਕਗਣਨਾ ਨਾਮ ਏਕਟ੍ਠਾਨਦਸਟ੍ਠਾਨਾਦੀਸੁ ਸਾਰਿਯੋ ਠਪੇਤ੍ਵਾ ਅਨੁਕ੍ਕਮੇਨ ਗਣਨਾ. ਆਦਿ-ਸਦ੍ਦੇਨ ਸਙ੍ਕਲਨਪਟਉਪ੍ਪਾਦਨਵੋਕ੍ਲਨਭਾਗਹਾਰਾਦਿਵਸੇਨ ਪਵਤ੍ਤਾ ਪਿਣ੍ਡਗਣਨਾ ਗਹਿਤਾ. ਯਸ੍ਸ ਸਾ ਪਗੁਣਾ, ਸੋ ਰੁਕ੍ਖਮ੍ਪਿ ਦਿਸ੍ਵਾ ‘‘ਏਤ੍ਤਕਾਨਿ ਏਤ੍ਥ ਪਣ੍ਣਾਨੀ’’ਤਿ ¶ ਜਾਨਾਤਿ. ਯਭ-ਮੇਥੁਨੇਤਿ ਵਚਨਤੋ ਆਹ ‘‘ਯ-ਕਾਰ-ਭ-ਕਾਰੇ’’ਤਿਆਦਿ.

੧੬. ਨ ਪੁਰਿਮੇਨਾਤਿ ਮੁਸਾਵਾਦਸਿਕ੍ਖਾਪਦੇਨ. ਸੋਪਿ ਆਪਤ੍ਤਿਯਾਤਿ ਉਪਸਗ੍ਗਾਦਿਵਿਸਿਟ੍ਠੇਹਿਪਿ ਵਦਨ੍ਤੋ ਪਾਚਿਤ੍ਤਿਯਾਪਤ੍ਤਿਯਾਵ ਕਾਰੇਤਬ੍ਬੋ.

੨੬. ਦੁਬ੍ਭਾਸਿਤਨ੍ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਪਾਲ਼ਿਯਂ ਅਨਾਗਤੇਹਿਪਿ ਪਰਮ੍ਮੁਖਾ ਵਦਨ੍ਤਸ੍ਸਪਿ ਦੁਬ੍ਭਾਸਿਤਮੇਵਾਤਿ ਆਚਰਿਯਾ ਵਦਨ੍ਤਿ ਤਤੋ ਲਾਮਕਾਪਤ੍ਤਿਯਾ ਅਭਾਵਾ, ਅਨਾਪਤ੍ਤਿਯਾਪੇਤ੍ਥ ਭਵਿਤੁਂ ਅਯੁਤ੍ਤਤ੍ਤਾ. ਸਬ੍ਬਸਤ੍ਤਾਤਿ ਏਤ੍ਥ ਵਚਨਤ੍ਥਵਿਦੂਹਿ ਤਿਰਚ੍ਛਾਨਾਦਯੋਪਿ ਗਹਿਤਾ.

੩੫. ਅਨੁਸਾਸਨੀਪੁਰੇਕ੍ਖਾਰਤਾਯ ਵਾ ਪਾਪਗਰਹਿਤਾਯ ਵਾ ਵਦਨ੍ਤਾਨਂ ਚਿਤ੍ਤਸ੍ਸ ਲਹੁਪਰਿਵਤ੍ਤਿਭਾਵਤੋ ਅਨ੍ਤਰਨ੍ਤਰਾ ਕੋਪੇ ਉਪ੍ਪਨ੍ਨੇਪਿ ਅਨਾਪਤ੍ਤਿ. ਕਾਯਵਿਕਾਰਮਤ੍ਤੇਨਪਿ ਓਮਸਨਸਮ੍ਭਵਤੋ ‘‘ਤਿਸਮੁਟ੍ਠਾਨਂ, ਕਾਯਕਮ੍ਮ’’ਨ੍ਤਿ ਚ ਵੁਤ੍ਤਂ. ਪਰਿਵਾਰੇ ਪਨ ‘‘ਚਤੁਤ੍ਥੇਨ ਆਪਤ੍ਤਿਸਮੁਟ੍ਠਾਨੇਨ…ਪੇ… ਦੁਬ੍ਭਾਸਿਤਂ ਆਪਜ੍ਜੇਯ੍ਯਾਤਿ. ਨ ਹੀਤਿ ਵਤ੍ਤਬ੍ਬ’’ਨ੍ਤਿਆਦਿਨਾ (ਪਰਿ. ੨੭੬) ਇਤਰਾਨਿ ਸਮੁਟ੍ਠਾਨਾਨਿ ਪਟਿਕ੍ਖਿਪਿਤ੍ਵਾ ਪਞ੍ਚਮਸ੍ਸੇਵ ਵੁਤ੍ਤਤ੍ਤਾ ਆਹ ‘‘ਦੁਬ੍ਭਾਸਿਤਾਪਤ੍ਤਿ ਪਨੇਤ੍ਥ ਵਾਚਾਚਿਤ੍ਤਤੋ ਸਮੁਟ੍ਠਾਤੀ’’ਤਿ. ਦਵਕਮ੍ਯਤਾਯ ਹਿ ਕਾਯਵਾਚਾਚਿਤ੍ਤੇਹਿ ਓਮਸਨ੍ਤਸ੍ਸਪਿ ਵਾਚਾਚਿਤ੍ਤਮੇਵ ਆਪਤ੍ਤਿਯਾ ਅਙ੍ਗਂ ਹੋਤਿ, ਨ ਪਨ ਕਾਯੋ ਵਿਜ੍ਜਮਾਨੋਪਿ ਧਮ੍ਮਦੇਸਨਾਪਤ੍ਤਿ ਵਿਯ ਕੇਵਲਂ ਕਾਯਵਿਕਾਰੇਨੇਵ. ਓਮਸਨ੍ਤਸ੍ਸ ਪਨ ਕਿਞ੍ਚਾਪਿ ਇਧ ਦੁਬ੍ਭਾਸਿਤਾਪਤ੍ਤਿਯਾ ਅਨਾਪਤ੍ਤਿ, ਅਥ ਖੋ ਕਾਯਕੀਲ਼ਾਪਟਿਕ੍ਖੇਪਸਿਕ੍ਖਾਪਦੇਨ ਦੁਕ੍ਕਟਮੇਵਾਤਿ ਦਟ੍ਠਬ੍ਬਂ. ਉਪਸਮ੍ਪਨ੍ਨਂ ਜਾਤਿਆਦੀਹਿ ਅਨਞ੍ਞਾਪਦੇਸੇਨ ਅਕ੍ਕੋਸਨਂ, ਤਸ੍ਸ ਜਾਨਨਂ, ਅਤ੍ਥਪੁਰੇਕ੍ਖਾਰਤਾਦੀਨਂ ਅਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਓਮਸਵਾਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੬. ਤਤਿਯੇ ਭਣ੍ਡਨਂ ਜਾਤਂ ਏਤੇਸਨ੍ਤਿ ਭਣ੍ਡਨਜਾਤਾ. ਪਿਸਤੀਤਿ ਪਿਸੁਣਾ, ਵਾਚਾ, ਸਮਗ੍ਗੇ ਭਿਨ੍ਨੇ ¶ ਕਰੋਤੀਤਿ ਅਤ੍ਥੋ. ਤਾਯ ਵਾਚਾਯ ਸਮਨ੍ਨਾਗਤੋ ਪਿਸੁਣੋ, ਤਸ੍ਸ ਕਮ੍ਮਂ ਪੇਸੁਞ੍ਞਨ੍ਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਇਧਾਪਿ ¶ ਜਾਤਿਆਦੀਹਿ ਦਸਹਿ ਵਤ੍ਥੂਹਿ ਪੇਸੁਞ੍ਞਂ ਉਪਸਂਹਰਨ੍ਤਸ੍ਸੇਵ ਪਾਚਿਤ੍ਤਿਯਂ, ਇਤਰੇਹਿ ਅਕ੍ਕੋਸਵਤ੍ਥੂਹਿ ਦੁਕ੍ਕਟਂ. ਅਨਕ੍ਕੋਸਵਤ੍ਥੂਹਿ ਪਨ ਉਪਸਂਹਰਨ੍ਤਸ੍ਸ ਦੁਕ੍ਕਟਮੇਵਾਤਿ ਵਦਨ੍ਤਿ. ਜਾਤਿਆਦੀਹਿ ਅਨਞ੍ਞਾਪਦੇਸੇਨ ਅਕ੍ਕੋਸਨ੍ਤਸ੍ਸ ਭਿਕ੍ਖੁਨੋ ਸੁਤ੍ਵਾ ਭਿਕ੍ਖੁਸ੍ਸ ਉਪਸਂਹਰਣਂ, ਪਿਯਕਮ੍ਯਤਾਭੇਦਾਧਿਪ੍ਪਾਯੇਸੁ ਅਞ੍ਞਤਰਤਾ, ਤਸ੍ਸ ਵਿਜਾਨਨਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪੇਸੁਞ੍ਞਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੫. ਚਤੁਤ੍ਥੇ ਪੁਰਿਮਬ੍ਯਞ੍ਜਨੇਨ ਸਦਿਸਨ੍ਤਿ ‘‘ਰੂਪਂ ਅਨਿਚ੍ਚ’’ਨ੍ਤਿ ਏਤ੍ਥ ਅਨਿਚ੍ਚ-ਸਦ੍ਦੇਨ ਸਦਿਸਂ ‘‘ਵੇਦਨਾ ਅਨਿਚ੍ਚਾ’’ਤਿ ਏਤ੍ਥ ਅਨਿਚ੍ਚ-ਸਦ੍ਦਂ ਵਦਤਿ. ਅਕ੍ਖਰਸਮੂਹੋਤਿ ਅਵਿਭਤ੍ਤਿਕੋ ਵੁਤ੍ਤੋ. ਪਦਨ੍ਤਿ ਵਿਭਤ੍ਤਿਅਨ੍ਤਂ ਵੁਤ੍ਤਂ.

ਏਕਂ ਪਦਨ੍ਤਿ ਗਾਥਾਪਦਮੇਵ ਸਨ੍ਧਾਯ ਵਦਤਿ. ਪਦਗਣਨਾਯਾਤਿ ਗਾਥਾਪਦਗਣਨਾਯ. ਅਪਾਪੁਣਿਤ੍ਵਾਤਿ ਸਦ੍ਧਿਂ ਅਕਥੇਤ੍ਵਾ. ਏਤੇਨ ਗਾਥਾਯ ਪਚ੍ਛਿਮਪਾਦੇ ਵੁਚ੍ਚਮਾਨੇ ਸਾਮਣੇਰੋ ਪਠਮਪਾਦਾਦਿਂ ਵਦਤਿ, ਆਪਤ੍ਤਿਯੇਵ, ਤਸ੍ਮਿਂ ਨਿਸ੍ਸਦ੍ਦੇ ਏਵ ਇਤਰੇਨ ਵਤ੍ਤਬ੍ਬਨ੍ਤਿ ਦਸ੍ਸੇਤਿ.

ਅਟ੍ਠਕਥਾਨਿਸ੍ਸਿਤੋਤਿ ਸਙ੍ਗੀਤਿਤ੍ਤਯਾਰੁਲ਼੍ਹਂ ਪੋਰਾਣਟ੍ਠਕਥਂ ਸਨ੍ਧਾਯ ਵਦਤਿ. ਇਦਾਨਿਪਿ ‘‘ਯਥਾਪਿ ਦੀਪਿਕੋ ਨਾਮ, ਨਿਲੀਯਿਤ੍ਵਾ ਗਣ੍ਹਤੇ ਮਿਗੇ’’ਤਿ (ਮਿ. ਪ. ੬.੧.੫; ਵਿਸੁਦ੍ਧਿ. ੧.੨੧੭; ਦੀ. ਨਿ. ਅਟ੍ਠ. ੨.੩੭੪; ਮ. ਨਿ. ਅਟ੍ਠ. ੧.੧੦੭; ਪਾਰਾ. ਅਟ੍ਠ. ੨.੧੬੫; ਪਟਿ. ਮ. ਅਟ੍ਠ. ੨.੧.੧੬੩) ਏਵਮਾਦਿਕਂ ਅਟ੍ਠਕਥਾਵਚਨਂ ਅਤ੍ਥੇਵ, ਬੁਦ੍ਧਘੋਸਾਚਰਿਯਾਦੀਹਿ ਪੋਰਾਣਟ੍ਠਕਥਾਨਯੇਨ ਵੁਤ੍ਤਮ੍ਪਿ ਇਧ ਸਙ੍ਗਹੇਤਬ੍ਬਨ੍ਤਿ ਵਦਨ੍ਤਿ. ਪਾਲ਼ਿਨਿਸ੍ਸਿਤੋਤਿ ਉਦਾਨਵਗ੍ਗਸਙ੍ਗਹਾਦਿਕੋ. ਵਿਵਟ੍ਟੂਪਨਿਸ੍ਸਿਤਨ੍ਤਿ ਨਿਬ੍ਬਾਨਨਿਸ੍ਸਿਤਂ. ਥੇਰਸ੍ਸਾਤਿ ਨਾਗਸੇਨਤ੍ਥੇਰਸ੍ਸ. ਮਗ੍ਗਕਥਾਦੀਨਿ ਪਕਰਣਾਨਿ.

੪੬. ਪਾਲ਼ਿਯਂ ਅਕ੍ਖਰਾਯਾਤਿਆਦਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਅਕ੍ਖਰੇਨਾਤਿਆਦਿਨਾ ਅਤ੍ਥੋ ਗਹੇਤਬ੍ਬੋ.

੪੮. ਉਪਚਾਰਂ ¶ ਮੁਞ੍ਚਿਤ੍ਵਾਤਿ ਪਰਿਸਾਯ ਦ੍ਵਾਦਸਹਤ੍ਥਂ ਮੁਞ੍ਚਿਤ੍ਵਾ ਏਕਤੋ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ ਅਨੁਪਸਮ੍ਪਨ੍ਨਸ੍ਸ ਅਕਥੇਤ੍ਵਾ ਅਞ੍ਞੇ ਉਦ੍ਦਿਸ੍ਸ ਭਣਨ੍ਤਸ੍ਸਾਪਿ ¶ ਅਨਾਪਤ੍ਤਿ. ਸਚੇ ਪਨ ਦੂਰੇ ਨਿਸਿਨ੍ਨਮ੍ਪਿ ਉਦ੍ਦਿਸ੍ਸ ਭਣਤਿ, ਆਪਤ੍ਤਿ ਏਵ. ਓਪਾਤੇਤੀਤਿ ਸਦ੍ਧਿਂ ਕਥੇਤਿ. ਅਨੁਪਸਮ੍ਪਨ੍ਨਤਾ, ਵੁਤ੍ਤਲਕ੍ਖਣਧਮ੍ਮਂ ਪਦਸੋ ਵਾਚਨਤਾ, ਏਕਤੋ ਭਣਨਞ੍ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪਦਸੋਧਮ੍ਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੦-੫੧. ਪਞ੍ਚਮੇ ਤਤ੍ਰਿਦਂ ਨਿਦਸ੍ਸਨਨ੍ਤਿ ਸੇਸੋ. ਦਿਰਤ੍ਤਤਿਰਤ੍ਤਨ੍ਤਿ ਏਤ੍ਥ ਦਿਰਤ੍ਤਗ੍ਗਹਣਂ ਵਚਨਾਲਙ੍ਕਾਰਤ੍ਥਂ, ਨਿਰਨ੍ਤਰਂ ਤਿਸ੍ਸੋਵ ਰਤ੍ਤਿਯੋ ਵਸਿਤ੍ਵਾ ਚਤੁਤ੍ਥਦਿਵਸਾਦੀਸੁ ਸਯਨ੍ਤਸ੍ਸੇਵ ਆਪਤ੍ਤਿ, ਨ ਏਕਨ੍ਤਰਿਕਾਦਿਵਸੇਨ ਸਯਨ੍ਤਸ੍ਸਾਤਿ ਦਸ੍ਸਨਤ੍ਥਮ੍ਪੀਤਿ ਦਟ੍ਠਬ੍ਬਂ. ਦਿਰਤ੍ਤਵਿਸਿਟ੍ਠਞ੍ਹਿ ਤਿਰਤ੍ਤਂ ਵੁਚ੍ਚਮਾਨਂ, ਤੇਨ ਅਨਨ੍ਤਰਿਕਮੇਵ ਤਿਰਤ੍ਤਂ ਦੀਪੇਤੀਤਿ. ਪਞ੍ਚਹਿ ਛਦਨੇਹੀਤਿ ਇਟ੍ਠਕਸਿਲਾਸੁਧਾਤਿਣਪਣ੍ਣੇਹਿ. ਵਾਚੁਗ੍ਗਤਵਸੇਨਾਤਿ ਪਗੁਣਵਸੇਨ. ਦਿਯਡ੍ਢਹਤ੍ਥੁਬ੍ਬੇਧੋ ਵਡ੍ਢਕੀਹਤ੍ਥੇਨ ਗਹੇਤਬ੍ਬੋ. ਏਕੂਪਚਾਰੋ ਏਕੇਨ ਮਗ੍ਗੇਨ ਪਵਿਸਿਤ੍ਵਾ ਅਬ੍ਭੋਕਾਸਂ ਅਨੁਕ੍ਕਮਿਤ੍ਵਾ ਸਬ੍ਬਤ੍ਥ ਅਨੁਪਰਿਗਮਨਯੋਗ੍ਗੋ, ਏਤਂ ਬਹੁਦ੍ਵਾਰਮ੍ਪਿ ਏਕੂਪਚਾਰੋਵ. ਤਤ੍ਥ ਪਨ ਕੁਟ੍ਟਾਦੀਹਿ ਰੁਨ੍ਧਿਤ੍ਵਾ ਵਿਸੁਂ ਦ੍ਵਾਰਂ ਯੋਜੇਨ੍ਤਿ, ਨਾਨੂਪਚਾਰੋ ਹੋਤਿ. ਸਚੇ ਪਨ ਰੁਨ੍ਧਤਿ ਏਵ, ਵਿਸੁਂ ਦ੍ਵਾਰਂ ਨ ਯੋਜੇਨ੍ਤਿ, ‘‘ਏਤਮ੍ਪਿ ਏਕੂਪਚਾਰਮੇਵ ਮਤ੍ਤਿਕਾਦੀਹਿ ਪਿਹਿਤਦ੍ਵਾਰੋ ਵਿਯ ਗਬ੍ਭੋ’’ਤਿ ਗਹੇਤਬ੍ਬਂ. ਅਞ੍ਞਥਾ ਗਬ੍ਭੇ ਪਵਿਸਿਤ੍ਵਾ ਪਮੁਖਾਦੀਸੁ ਨਿਪਨ੍ਨਾਨੁਪਸਮ੍ਪਨ੍ਨੇਹਿ ਸਹਸੇਯ੍ਯਾਪਰਿਮੁਤ੍ਤਿਯਾ ਗਬ੍ਭਦ੍ਵਾਰਂ ਮਤ੍ਤਿਕਾਦੀਹਿ ਪਿਦਹਾਪੇਤ੍ਵਾ ਉਟ੍ਠਿਤੇ ਅਰੁਣੇ ਵਿਵਰਾਪੇਨ੍ਤਸ੍ਸਪਿ ਅਨਾਪਤ੍ਤਿ ਭਵੇਯ੍ਯਾਤਿ.

ਤੇਸਂ ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਆਪਤ੍ਤੀਤਿ ਏਤ੍ਥ ਕੇਚਿ ‘‘ਅਨੁਟ੍ਠਹਨੇਨ ਅਕਿਰਿਯਸਮੁਟ੍ਠਾਨਾ ਆਪਤ੍ਤਿ ਵੁਤ੍ਤਾ ਤਸ੍ਮਿਂ ਖਣੇ ਸਯਨ੍ਤਸ੍ਸ ਕਿਰਿਯਾਭਾਵਾ. ਇਦਞ੍ਹਿ ਸਿਕ੍ਖਾਪਦਂ ਸਿਯਾ ਕਿਰਿਯਾਯ ਸਮੁਟ੍ਠਾਤਿ, ਸਿਯਾ ਅਕਿਰਿਯਾਯ ਸਮੁਟ੍ਠਾਤਿ. ਕਿਰਿਯਾਸਮੁਟ੍ਠਾਨਤਾ ਚਸ੍ਸ ਤਬ੍ਬਹੁਲਵਸੇਨ ਵੁਤ੍ਤਾਤਿ ਵਦਤਿ. ਯਥਾ ਚੇਤਂ, ਏਵਂ ਦਿਵਾਸਯਨਮ੍ਪਿ. ਅਨੁਟ੍ਠਹਨੇਨ, ਹਿ ਦ੍ਵਾਰਾਸਂਵਰਣੇਨ ਚੇਤਂ ਅਕਿਰਿਯਸਮਉਟ੍ਠਾਨਮ੍ਪਿ ਹੋਤੀ’’ਤਿ ਵਦਨ੍ਤਿ. ਇਦਞ੍ਚ ਯੁਤ੍ਤਂ ਵਿਯ ਦਿਸ੍ਸਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ.

‘‘ਉਪਰਿਮਤਲੇਨ ¶ ਸਦ੍ਧਿਂ ਅਸਮ੍ਬਦ੍ਧਭਿਤ੍ਤਿਕਸ੍ਸਾ’’ਤਿ ਇਦਂ ਸਮ੍ਬਦ੍ਧਭਿਤ੍ਤਿਕੇ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਉਪਰਿਮਤਲੇ ਸਯਿਤਸ੍ਸ ਸਙ੍ਕਾ ਏਵ ਨਤ੍ਥੀਤਿ ‘‘ਹੇਟ੍ਠਾਪਾਸਾਦੇ’’ਤਿਆਦਿ ਵੁਤ੍ਤਂ. ਨਾਨੂਪਚਾਰੇਤਿ ਬਹਿ ਨਿਸ੍ਸੇਣਿਯਾ ਆਰੋਹਣੀਯੇ.

ਸਭਾਸਙ੍ਖੇਪੇਨਾਤਿ ¶ ਸਭਾਕਾਰੇਨ. ‘‘ਅਡ੍ਢਕੁਟ੍ਟਕੇ’’ਤਿ ਇਮਿਨਾ ਸਣ੍ਠਾਨਂ ਦਸ੍ਸੇਤਿ. ਯਤ੍ਥ ਤੀਸੁ ਦ੍ਵੀਸੁ ਵਾ ਪਸ੍ਸੇਸੁ ਭਿਤ੍ਤਿਯੋ ਬਦ੍ਧਾ, ਛਦਨਂ ਵਾ ਅਸਮ੍ਪਤ੍ਤਾ ਅਡ੍ਢਭਿਤ੍ਤਿ, ਇਦਂ ਅਡ੍ਢਕੁਟ੍ਟਕਂ ਨਾਮ. ਵਾਲ਼ਸਙ੍ਘਾਟੋ ਨਾਮ ਪਰਿਕ੍ਖੇਪਸ੍ਸ ਅਨ੍ਤੋ ਥਮ੍ਭਾਦੀਨਂ ਉਪਰਿ ਵਾਲ਼ਰੂਪੇਹਿ ਕਤਸਙ੍ਘਾਟੋ. ਪਰਿਕ੍ਖੇਪਸ੍ਸ ਬਹਿਗਤੇਤਿ ਏਤ੍ਥ ਯਸ੍ਮਿਂ ਪਸ੍ਸੇ ਪਰਿਕ੍ਖੇਪੋ ਨਤ੍ਥਿ, ਤਤ੍ਥ ਸਚੇ ਭੂਮਿਤੋ ਵਤ੍ਥੁ ਉਚ੍ਚਂ ਹੋਤਿ, ਉਭਤੋ ਉਚ੍ਚਵਤ੍ਥੁਤੋ ਹੇਟ੍ਠਾ ਭੂਮਿਯਂ ਨਿਬ੍ਬਕੋਸਬ੍ਭਨ੍ਤਰੇਪਿ ਅਨਾਪਤ੍ਤਿ ਏਵ ਤਤ੍ਥ ਸੇਨਾਸਨਵੋਹਾਰਾਭਾਵਤੋ. ਅਥ ਵਤ੍ਥੁ ਨੀਚਂ ਭੂਮਿਸਮਮੇਵ ਸੇਨਾਸਨਸ੍ਸ ਹੇਟ੍ਠਿਮਤਲੇ ਤਿਟ੍ਠਤਿ, ਤਤ੍ਥ ਪਰਿਕ੍ਖੇਪਰਹਿਤਦਿਸਾਯ ਨਿਬ੍ਬਕੋਸਬ੍ਭਨ੍ਤਰੇ ਸਬ੍ਬਤ੍ਥ ਆਪਤ੍ਤਿ ਹੋਤਿ, ਪਰਿਚ੍ਛੇਦਾਭਾਵਤੋ ਪਰਿਕ੍ਖੇਪਸ੍ਸ ਬਹਿ ਏਵ ਅਨਾਪਤ੍ਤੀਤਿ ਦਟ੍ਠਬ੍ਬਂ. ਪਰਿਮਣ੍ਡਲਂ ਵਾਤਿਆਦਿ ਮਜ੍ਝੇ ਉਦਕਪਤਨਤ੍ਥਾਯ ਆਕਾਸਙ੍ਗਣਵਨ੍ਤਂ ਸੇਨਾਸਨਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਅਪਰਿਚ੍ਛਿਨ੍ਨਗਬ੍ਭੂਪਚਾਰੇਤਿ ਏਕੇਕਗਬ੍ਭਸ੍ਸ ਦ੍ਵੀਸੁ ਪਸ੍ਸੇਸੁ ਪਮੁਖੇਨ ਗਮਨਂ ਪਰਿਚ੍ਛਿਨ੍ਦਿਤ੍ਵਾ ਦਿਯਡ੍ਢਹਤ੍ਥੁਬ੍ਬੇਧਤੋ ਅਨੂਨਂ ਕੁਟ੍ਟਂ ਕਤ੍ਵਾ ਆਕਾਸਙ੍ਗਣੇਨ ਪਵੇਸਂ ਕਰੋਨ੍ਤਿ, ਏਵਂ ਅਕਤੋਤਿ ਅਤ੍ਥੋ. ਗਬ੍ਭਪਰਿਕ੍ਖੇਪੋਤਿ ਚਤੁਰਸ੍ਸਪਾਸਾਦਾਦੀਸੁ ਸਮਨ੍ਤਾ ਠਿਤਗਬ੍ਭਭਿਤ੍ਤਿਯੋ ਸਨ੍ਧਾਯ ਵੁਤ੍ਤਂ.

ਪਾਟੇਕ੍ਕਸਨ੍ਨਿਵੇਸਾਤਿ ਏਕੇਕਦਿਸਾਯ ਗਬ੍ਭਪਾਲ਼ਿਯੋ ਇਤਰਦਿਸਾਸੁ ਗਬ੍ਭਪਾਲ਼ੀਨਂ ਅਭਾਵੇਨ, ਭਾਵੇਪਿ ਵਾ ਅਞ੍ਞਮਞ੍ਞਭਿਤ੍ਤਿਚ੍ਛਦਨੇਹਿ ਅਸਮ੍ਬਨ੍ਧਤਾਯ ਪਾਟੇਕ੍ਕਸਨ੍ਨਿਵੇਸਾ ਨਾਮ ਵੁਚ੍ਚਤਿ. ਤਂ…ਪੇ… ਸਨ੍ਧਾਯ ਵੁਤ੍ਤਨ੍ਤਿ ਤਤ੍ਥ ਪਾਚਿਤ੍ਤਿਯੇਨ ਅਨਾਪਤ੍ਤੀਤਿ ਵੁਤ੍ਤਂ, ਨ ਦੁਕ੍ਕਟੇਨ. ਤਾਦਿਸਾਯ ਹਿ ਗਬ੍ਭਪਾਲ਼ਿਯਾ ਪਮੁਖਂ ਤੀਸੁ ਦਿਸਾਸੁ ਭਿਤ੍ਤੀਨਂ ਅਭਾਵੇਨ ਏਕਦਿਸਾਯ ਗਬ੍ਭਭਿਤ੍ਤਿਮਤ੍ਤੇਨ ਸਬ੍ਬਚ੍ਛਨ੍ਨਂ ਚੂਲ਼ਪਰਿਚ੍ਛਨ੍ਨਂ ਨਾਮ ਹੋਤਿ. ਤਸ੍ਮਾ ਦੁਕ੍ਕਟਮੇਵ. ਯਦਿ ਪਨ ਤਸ੍ਸ ਪਮੁਖਸ੍ਸ ਇਤਰਦਿਸਾਸੁਪਿ ਏਕਿਸ੍ਸਂ, ਸਬ੍ਬਾਸੁ ਵਾ ਭਿਤ੍ਤਿਂ ਕਰੋਨ੍ਤਿ, ਤਦਾ ਸਬ੍ਬਚ੍ਛਨ੍ਨਉਪਡ੍ਢਪਰਿਚ੍ਛਨ੍ਨਾਦਿਭਾਵਤੋ ਪਾਚਿਤ੍ਤਿਯਮੇਵ ਹੋਤੀਤਿ ਦਟ੍ਠਬ੍ਬਂ. ਭੂਮਿਯਂ ਵਿਨਾ ਜਗਤਿਯਾ ਪਮੁਖਂ ਸਨ੍ਧਾਯਾਤਿ ਏਤ੍ਥ ਉਚ੍ਚਵਤ੍ਥੁਂ ਅਕਤ੍ਵਾ ਭੂਮਿਯਂ ਕਤਗੇਹਸ੍ਸ ਪਮੁਖਂ ਸਨ੍ਧਾਯ ਅਪਰਿਕ੍ਖਿਤ੍ਤੇ ਪਾਚਿਤ੍ਤਿਯੇਨ ਅਨਾਪਤ੍ਤੀਤਿ ਇਦਂ ਕਥਿਤਂ ¶ . ਉਚ੍ਚਵਤ੍ਥੁਕਂ ਚੇ ਪਮੁਖਂ ਹੋਤਿ, ਤੇਨ ਵਤ੍ਥੁਨਾ ਪਰਿਕ੍ਖਿਤ੍ਤਸਙ੍ਖ੍ਯਮੇਵ ਪਮੁਖਂ ਗਚ੍ਛਤੀਤਿ ਅਧਿਪ੍ਪਾਯੋ. ਤਤ੍ਥਾਤਿ ਅਨ੍ਧਕਟ੍ਠਕਥਾਯਂ. ਜਗਤਿਯਾ ਪਮਾਣਂ ਵਤ੍ਵਾਤਿ ਪਕਤਿਭੂਮਿਯਾ ਨਿਪਨ੍ਨੋ ਯਥਾ ਜਗਤਿਯਾ ਉਪਰਿ ਸਯਿਤਂ ਨ ਪਸ੍ਸਤਿ, ਏਵਂ ਉਚ੍ਚਾਤਿਉਚ੍ਚਵਤ੍ਥੁਸ੍ਸ ਉਬ੍ਬੇਧਪ੍ਪਮਾਣਂ ਵਤ੍ਵਾ. ਏਕਦਿਸਾਯ ਉਜੁਕਮੇਵ ਦੀਘਂ ਕਤ੍ਵਾ ਸਨ੍ਨਿਵੇਸਿਤੋ ਪਾਸਾਦੋ ਏਕਸਾਲਸਨ੍ਨਿਵੇਸੋ. ਦ੍ਵੀਸੁ, ਤੀਸੁ ਵਾ ਚਤੂਸੁਪਿ ਵਾ ਦਿਸਾਸੁ ਸਿਙ੍ਘਾਟਕਸਣ੍ਠਾਨਾਦਿਵਸੇਨ ਕਤਾ ਦ੍ਵਿਸਾਲਾਦਿਸਨ੍ਨਿਵੇਸਾ ਵੇਦਿਤਬ੍ਬਾ. ਸਾਲਪ੍ਪਭੇਦਦੀਪਨਮੇਵ ਚੇਤ੍ਥ ਪੁਰਿਮਤੋ ਵਿਸੇਸੋਤਿ. ਪਰਿਕ੍ਖੇਪੋ ਵਿਦ੍ਧਸ੍ਤੋਤਿ ਪਮੁਖਸ੍ਸ ਪਰਿਕ੍ਖੇਪਂ ਸਨ੍ਧਾਯ ਵਦਤਿ.

੫੩. ਉਪਡ੍ਢਚ੍ਛਨ੍ਨਉਪਡ੍ਢਪਰਿਚ੍ਛਨ੍ਨਂ ਸੇਨਾਸਨਂ ਦੁਕ੍ਕਟਸ੍ਸ ਆਦਿਂ ਵਤ੍ਵਾ ਪਾਲ਼ਿਯਂ ਦਸ੍ਸਿਤਤ੍ਤਾ ਤਤੋ ¶ ਅਧਿਕਂ ਸਬ੍ਬਚ੍ਛਨ੍ਨਉਪਡ੍ਢਪਰਿਚ੍ਛਨ੍ਨਾਦਿਕਮ੍ਪਿ ਸਬ੍ਬਂ ਪਾਲ਼ਿਯਂ ਅਵੁਤ੍ਤਮ੍ਪਿ ਪਾਚਿਤ੍ਤਿਯਸ੍ਸੇਵ ਵਤ੍ਥੁਭਾਵੇਨ ਦਸ੍ਸਿਤਂ ਸਿਕ੍ਖਾਪਦਸ੍ਸ ਪਣ੍ਣਤ੍ਤਿਵਜ੍ਜਤ੍ਤਾ, ਗਰੁਕੇ ਠਾਤਬ੍ਬਤੋ ਚਾਤਿ ਵੇਦਿਤਬ੍ਬਂ. ਸਤ੍ਤ ਪਾਚਿਤ੍ਤਿਯਾਨੀਤਿ ਪਾਲ਼ਿਯਂ ਵੁਤ੍ਤਪਾਚਿਤ੍ਤਿਯਦ੍ਵਯਂ ਸਾਮਞ੍ਞਤੋ ਏਕਤ੍ਤੇਨ ਗਹੇਤ੍ਵਾ ਵੁਤ੍ਤਂ.

੫੪. ਪਾਲ਼ਿਯਂ ‘‘ਤਤਿਯਾਯ ਰਤ੍ਤਿਯਾ ਪੁਰਾਰੁਣਾ ਨਿਕ੍ਖਮਿਤ੍ਵਾ ਪੁਨ ਵਸਤੀ’’ਤਿ ਇਦਂ ਉਕ੍ਕਟ੍ਠਵਸੇਨ ਵੁਤ੍ਤਂ, ਅਨਿਕ੍ਖਮਿਤ੍ਵਾ ਪਨ ਪੁਰਾਰੁਣਾ ਉਟ੍ਠਹਿਤ੍ਵਾ ਅਨ੍ਤੋਛਦਨੇ ਨਿਸਿਨ੍ਨਸ੍ਸਾਪਿ ਪੁਨਦਿਵਸੇ ਸਹਸੇਯ੍ਯੇਨ ਅਨਾਪਤ੍ਤਿ ਏਵ. ਸੇਨਮ੍ਬਮਣ੍ਡਪਵਣ੍ਣਂ ਹੋਤੀਤਿ ਸੀਹਲ਼ਦੀਪੇ ਕਿਰ ਉਚ੍ਚਵਤ੍ਥੁਕੋ ਸਬ੍ਬਚ੍ਛਨ੍ਨੋ ਸਬ੍ਬਅਪਰਿਚ੍ਛਨ੍ਨੋ ਏਵਂਨਾਮਕੋ ਸਨ੍ਨਿਪਾਤਮਣ੍ਡਪੋ ਅਤ੍ਥਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਏਤ੍ਥ ਚਤੁਤ੍ਥਭਾਗੋ ਚੂਲ਼ਕਂ, ਦ੍ਵੇ ਭਾਗਾ ਉਪਡ੍ਢਂ, ਤੀਸੁ ਭਾਗੇਸੁ ਦ੍ਵੇ ਭਾਗਾ ਯੇਭੁਯ੍ਯਨ੍ਤਿ ਇਮਿਨਾ ਨਯੇਨ ਚੂਲ਼ਕਚ੍ਛਨ੍ਨਪਰਿਚ੍ਛਨ੍ਨਤਾਦੀਨਿ ਵੇਦਿਤਬ੍ਬਾਨਿ. ਪਾਚਿਤ੍ਤਿਯਵਤ੍ਥੁਕਸੇਨਾਸਨਂ, ਤਤ੍ਥ ਅਨੁਪਸਮ੍ਪਨ੍ਨੇਨ ਸਹ ਨਿਪਜ੍ਜਨਂ, ਚਤੁਤ੍ਥਦਿਵਸੇ ਸੂਰਿਯਤ੍ਥਙ੍ਗਮਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਸਹਸੇਯ੍ਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਦੁਤਿਯਸਹਸੇਯ੍ਯਸਿਕ੍ਖਾਪਦਵਣ੍ਣਨਾ

੫੫. ਛਟ੍ਠੇ ਮਾਤੁਗਾਮੇਨ ਸਦ੍ਧਿਂ ਚਤੁਤ੍ਥਦਿਵਸੇ ਸਯਨ੍ਤਸ੍ਸਾਪਿ ਇਮਿਨਾ ਸਿਕ੍ਖਾਪਦੇਨ ਏਕਾਵ ਆਪਤ੍ਤਿ. ਕੇਚਿ ਪਨ ਪੁਰਿਮਸਿਕ੍ਖਾਪਦੇਨਾਪੀਤਿ ਦ੍ਵੇ ਆਪਤ੍ਤਿਯੋ ਵਦਨ੍ਤਿ, ਤਂ ਨ ਯੁਤ੍ਤਂ ‘‘ਅਨੁਪਸਮ੍ਪਨ੍ਨੇਨਾ’’ਤਿ ਅਨਿਤ੍ਥਿਲਿਙ੍ਗੇਨ ਵੁਤ੍ਤਤ੍ਤਾ ਨਪੁਂਸਕੇਨ ¶ ਪਨ ਚਤੁਤ੍ਥਦਿਵਸੇ ਸਯਨ੍ਤਸ੍ਸ ਸਦੁਕ੍ਕਟਪਾਚਿਤ੍ਤਿਯਂ ਵਤ੍ਤੁਂ ਯੁਤ੍ਤਂ. ਕਿਞ੍ਚਾਪੇਤ੍ਥ ਪਾਲ਼ਿਯਂ ਪਣ੍ਡਕਵਸੇਨੇਵ ਦੁਕ੍ਕਟਂ ਵੁਤ੍ਤਂ, ਤਦਨੁਲੋਮਿਕਾ ਪਨ ਪੁਰਿਸਉਭਤੋਬ੍ਯਞ੍ਜਨਕੇਨ ਸਹ ਸਯਨ੍ਤਸ੍ਸ ਇਮਿਨਾ ਦੁਕ੍ਕਟਂ, ਪੁਰਿਮੇਨ ਚਤੁਤ੍ਥਦਿਵਸੇ ਸਦੁਕ੍ਕਟਪਾਚਿਤ੍ਤਿਯਂ. ਇਤ੍ਥਿਉਭਤੋਬ੍ਯਞ੍ਜਨਕੋ ਇਤ੍ਥਿਗਤਿਕੋਵਾਤਿ ਅਯਂ ਅਮ੍ਹਾਕਂ ਖਨ੍ਤਿ. ਮਤਿਤ੍ਥਿਯਾ ਅਨਾਪਤ੍ਤੀਤਿ ਵਦਨ੍ਤਿ. ਪਾਚਿਤ੍ਤਿਯਵਤ੍ਥੁਕਸੇਨਾਸਨਂ, ਤਤ੍ਥ ਮਾਤੁਗਾਮੇਨ ਸਦ੍ਧਿਂ ਨਿਪਜ੍ਜਨਂ, ਸੂਰਿਯਤ੍ਥਙ੍ਗਮਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਦੁਤਿਯਸਹਸੇਯ੍ਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬੦. ਸਤ੍ਤਮੇ ਨ ਯਕ੍ਖੇਨਾਤਿਆਦੀਨਂ ‘‘ਅਞ੍ਞਤ੍ਰ ਵਿਞ੍ਞੁਨਾ’’ਤਿ ਇਮਿਨਾ ਸਮ੍ਬਨ੍ਧੋ. ਅਞ੍ਞਤ੍ਰ ਵਿਞ੍ਞੁਨਾ ¶ ਪੁਰਿਸਵਿਗ੍ਗਹੇਨ, ਨ ਯਕ੍ਖਾਦਿਨਾਪੀਤਿ ਏਵਮਤ੍ਥੋ ਗਹੇਤਬ੍ਬੋਤਿ ਅਧਿਪ੍ਪਾਯੋ. ਤਾਦਿਸੇਨਪਿ ਹਿ ਸਹ ਠਿਤਾਯ ਦੇਸੇਤੁਂ ਨ ਵਟ੍ਟਤਿ. ਤਂਤਂਦੇਸਭਾਸਾਯ ਅਤ੍ਥਂ ਯਥਾਰੁਚਿ ਵਟ੍ਟਤਿ ਏਵ.

ਇਰਿਯਾਪਥਾਪਰਿਵਤ੍ਤਨਂ, ਪੁਰਿਸਂ ਵਾ ਦ੍ਵਾਦਸਹਤ੍ਥੂਪਚਾਰੇ ਅਪਕ੍ਕੋਸਾਪਨਂ ਏਤ੍ਥ ਅਕਿਰਿਯਾ. ਵੁਤ੍ਤਲਕ੍ਖਣਸ੍ਸ ਧਮ੍ਮਸ੍ਸ ਛਨ੍ਨਂ ਵਾਚਾਨਂ ਉਪਰਿ ਦੇਸਨਾ, ਵੁਤ੍ਤਲਕ੍ਖਣੋ ਮਾਤੁਗਾਮੋ, ਇਰਿਯਾਪਥਪਅਵਤ੍ਤਨਾਭਾਵੋ, ਵਿਞ੍ਞੂਪੁਰਿਸਾਭਾਵੋ, ਅਪਞ੍ਹਵਿਸ੍ਸਜ੍ਜਨਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਧਮ੍ਮਦੇਸਨਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭੭. ਅਟ੍ਠਮੇ ਅਨ੍ਤਰਾਤਿ ਪਰਿਨਿਬ੍ਬਾਨਕਾਲਤੋ ਪੁਬ੍ਬੇਪਿ. ਅਤਿਕਡ੍ਢਿਯਮਾਨੇਨਾਤਿ ‘‘ਵਦਥ, ਭਨ੍ਤੇ, ਕਿਂ ਤੁਮ੍ਹੇਹਿ ਅਧਿਗਤ’’ਨ੍ਤਿ ਏਵਂ ਨਿਪ੍ਪੀਲ਼ਿਯਮਾਨੇਨ ਅਤਿਬਦ੍ਧਿਯਮਾਨੇਨ. ਤਥਾਰੂਪੇ ਪਚ੍ਚਯੇ ਸਤਿ ਵਤ੍ਤਬ੍ਬਮੇਵ. ਸੁਤਪਰਿਯਤ੍ਤਿਸੀਲਗੁਣਨ੍ਤਿ ਏਤ੍ਥ ਅਤ੍ਥਕੁਸਲਤਾ ਸੁਤਗੁਣੋ, ਪਾਲ਼ਿਪਾਠਕੁਸਲਤਾ ਪਰਿਯਤ੍ਤਿਗੁਣੋਤਿ ਦਟ੍ਠਬ੍ਬਂ. ‘‘ਚਿਤ੍ਤਕ੍ਖੇਪਸ੍ਸ ਵਾ ਅਭਾਵਾ’’ਤਿ ਇਮਿਨਾ ਖਿਤ੍ਤਚਿਤ੍ਤਵੇਦਨਾਟ੍ਟਤਾਪਿ ਅਰਿਯਾਨਂ ਨਤ੍ਥੀਤਿ ਦਸ੍ਸੇਤਿ.

ਪੁਬ੍ਬੇ ¶ ਅਵੁਤ੍ਤੇਹੀਤਿ ਚਤੁਤ੍ਥਪਾਰਾਜਿਕੇ ਅਵੁਤ੍ਤੇਹਿ. ਇਦਞ੍ਚ ਸਿਕ੍ਖਾਪਦਂ ਪਣ੍ਣਤ੍ਤਿਅਜਆਨਨਵਸੇਨ ਏਕਨ੍ਤਤੋ ਅਚਿਤ੍ਤਕਸਮੁਟ੍ਠਾਨਮੇਵ ਹੋਤਿ ਅਰਿਯਾਨਂ ਪਣ੍ਣਤ੍ਤਿਵੀਤਿਕ੍ਕਮਾਭਾਵਾ. ਝਾਨਲਾਭੀਨਞ੍ਚ ਸਤ੍ਥੁ ਆਣਾਵੀਤਿਕ੍ਕਮਪਟਿਘਚਿਤ੍ਤਸ੍ਸ ਝਾਨਪਰਿਹਾਨਤੋ ਭੂਤਾਰੋਚਨਂ ਨ ਸਮ੍ਭਵਤਿ. ਉਤ੍ਤਰਿਮਨੁਸ੍ਸਧਮ੍ਮਸ੍ਸ ਭੂਤਤਾ, ਅਨੁਪਸਮ੍ਪਨ੍ਨਸ੍ਸ ਆਰੋਚਨਂ, ਤਙ੍ਖਣਵਿਜਾਨਨਾ, ਅਨਞ੍ਞਾਪਦੇਸੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਭੂਤਾਰੋਚਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਵਣ੍ਣਨਾ

੭੮. ਨਵਮੇ ਤਤ੍ਥ ਭਵੇਯ੍ਯਾਤਿ ਤਤ੍ਥ ਕਸ੍ਸਚਿ ਮਤਿ ਏਵਂ ਭਵੇਯ੍ਯ. ਅਟ੍ਠਕਥਾਵਚਨਮੇਵ ਉਪਪਤ੍ਤਿਤੋ ਦਲ਼੍ਹਂ ਕਤ੍ਵਾ ਪਤਿਟ੍ਠਪੇਨ੍ਤੋ ‘‘ਇਮਿਨਾਪਿ ਚੇਤ’’ਨ੍ਤਿਆਦਿਮਾਹ.

੮੨. ਆਦਿਤੋ ਪਞ੍ਚ ਸਿਕ੍ਖਾਪਦਾਨੀਤਿ ਪਾਣਾਤਿਪਾਤਾਦੀਨਿ ਪਞ੍ਚ. ਸੇਸਾਨੀਤਿ ਵਿਕਾਲਭੋਜਨਾਦੀਨਿ ¶ . ਸੁਕ੍ਕਵਿਸ੍ਸਟ੍ਠਿਆਦਿ ਅਜ੍ਝਾਚਾਰੋਵ. ਅਨ੍ਤਿਮਵਤ੍ਥੁਂ ਅਨਜ੍ਝਾਪਨ੍ਨਸ੍ਸ ਭਿਕ੍ਖੁਨੋ ਸਵਤ੍ਥੁਕੋ ਸਙ੍ਘਾਦਿਸੇਸੋ, ਅਨੁਪਸਮ੍ਪਨ੍ਨਸ੍ਸ ਆਰੋਚਨਂ, ਭਿਕ੍ਖੁਸਮ੍ਮੁਤਿਯਾ ਅਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮੬. ਦਸਮੇ ਅਪ੍ਪਪਂਸੁਮਤ੍ਤਿਕਾਯ ਪਥਵਿਯਾ ਅਨਾਪਤ੍ਤਿਵਤ੍ਥੁਭਾਵੇਨ ਵੁਤ੍ਤਤ੍ਤਾ ਉਪਡ੍ਢਪਂਸੁਮਤ੍ਤਿਕਾਯਪਿ ਪਾਚਿਤ੍ਤਿਯਮੇਵਾਤਿ ਗਹੇਤਬ੍ਬਂ. ਨ ਹੇਤਂ ਦੁਕ੍ਕਟਵਤ੍ਥੂਤਿ ਸਕ੍ਕਾ ਵਤ੍ਤੁਂ ਜਾਤਾਜਾਤਵਿਨਿਮੁਤ੍ਤਾਯ ਤਤਿਯਪਥਵਿਯਾ ਅਭਾਵਤੋ.

ਵਟ੍ਟਤੀਤਿ ਇਮਸ੍ਮਿਂ ਠਾਨੇ ਪੋਕ੍ਖਰਣਿਂ ਖਣਾਤਿ ਓਕਾਸਸ੍ਸ ਅਨਿਯਮਿਤਤ੍ਤਾ ਵਟ੍ਟਤਿ. ਇਮਂ ਵਲ੍ਲਿਂ ਖਣਾਤਿ ਪਥਵੀਖਣਨਂ ਸਨ੍ਧਾਯ ਵੁਤ੍ਤਤ੍ਤਾ ਇਮਿਨਾਵ ਸਿਕ੍ਖਾਪਦੇਨ ਆਪਤ੍ਤਿ, ਨ ਭੂਤਗਾਮਸਿਕ੍ਖਾਪਦੇਨ. ਉਭਯਮ੍ਪਿ ¶ ਸਨ੍ਧਾਯ ਵੁਤ੍ਤੇ ਪਨ ਦ੍ਵੇਪਿ ਪਾਚਿਤ੍ਤਿਯਾ ਹੋਨ੍ਤਿ. ਉਦਕਪਪ੍ਪਟਕੋਤਿ ਉਦਕੇ ਅਨ੍ਤੋਭੂਮਿਯਂ ਪਵਿਟ੍ਠੇ ਤਸ੍ਸ ਉਪਰਿਭਾਗਂ ਛਾਦੇਤ੍ਵਾ ਤਨੁਕਪਂਸੁ ਵਾ ਮਤ੍ਤਿਕਾ ਵਾ ਪਟਲਂ ਹੁਤ੍ਵਾ ਪਤਮਾਨਾ ਤਿਟ੍ਠਤਿ, ਤਸ੍ਮਿਂ ਉਦਕੇ ਸੁਕ੍ਖੇਪਿ ਤਂ ਪਟਲਂ ਵਾਤੇਨ ਚਲਮਾਨਾ ਤਿਟ੍ਠਤਿ, ਤਂ ਉਦਕਪਪ੍ਪਟਕੋ ਨਾਮ.

ਅਕਤਪਬ੍ਭਾਰੇਤਿ ਅਵਲ਼ਞ੍ਜਨਟ੍ਠਾਨਦਸ੍ਸਨਤ੍ਥਂ ਵੁਤ੍ਤਂ. ਤਾਦਿਸੇ ਏਵ ਹਿ ਵਮ੍ਮਿਕਸ੍ਸ ਸਮ੍ਭਵੋਤਿ. ਮੂਸਿਕੁਕ੍ਕਰਂ ਨਾਮ ਮੂਸਿਕਾਹਿ ਖਨਿਤ੍ਵਾ ਬਹਿ ਕਤਪਂਸੁਰਾਸਿ. ਅਚ੍ਛਦਨਨ੍ਤਿਆਦਿਵੁਤ੍ਤਤ੍ਤਾ ਉਜੁਕਂ ਆਕਾਸਤੋ ਪਤਿਤਵਸ੍ਸੋਦਕੇਨ ਓਵਟ੍ਠਮੇਵ ਜਾਤਪਥਵੀ ਹੋਤਿ, ਨ ਛਦਨਾਦੀਸੁ ਪਤਿਤ੍ਵਾ ਤਤੋ ਪਵਤ੍ਤਉਦਕੇਨ ਤਿਨ੍ਤਨ੍ਤਿ ਵੇਦਿਤਬ੍ਬਂ. ਮਣ੍ਡਪਤ੍ਥਮ੍ਭਨ੍ਤਿ ਸਾਖਾਮਣ੍ਡਪਤ੍ਥਮ੍ਭਂ. ਉਚ੍ਚਾਲੇਤ੍ਵਾਤਿ ਉਕ੍ਖਿਪਿਤ੍ਵਾ. ਤਤੋਤਿ ਪੁਰਾਣਸੇਨਾਸਨਤੋ.

੮੮. ਮਹਾਮਤ੍ਤਿਕਨ੍ਤਿ ਭਿਤ੍ਤਿਲੇਪਨਂ. ਜਾਤਪਥਵਿਤਾ, ਤਥਾਸਞ੍ਞਿਤਾ, ਖਣਨਖਣਾਪਨਾਨਂ ਅਞ੍ਞਤਰਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪਥਵੀਖਣਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮੯. ਦੁਤਿਯਵਗ੍ਗਸ੍ਸ ¶ ਪਠਮੇ ਨਿਗ੍ਗਹੇਤੁਂ ਅਸਕ੍ਕੋਨ੍ਤੋਤਿ ਸਾਖਟ੍ਠਕਵਿਮਾਨੇ ਸਾਖਾਯ ਛਿਜ੍ਜਮਾਨਾਯ ਛਿਜ੍ਜਨ੍ਤੇ ਤਤ੍ਥ ਅਛੇਦਨਤ੍ਥਾਯ ਦੇਵਤਾਯ ਉਪਨੀਤਂ ਪੁਤ੍ਤਂ ਦਿਸ੍ਵਾਪਿ ਕੁਠਾਰਿਨਿਕ੍ਖੇਪਵੇਗਂ ਨਿਵਤ੍ਤੇਤੁਂ ਅਸਕ੍ਕੋਨ੍ਤੋਤਿ ਅਤ੍ਥੋ. ਰੁਕ੍ਖਧਮ੍ਮੇਤਿ ਰੁਕ੍ਖਸ੍ਸ ਪਵਤ੍ਤਿਯਂ. ਰੁਕ੍ਖਾਨਂ ਵਿਯ ਛੇਦਨਾਦੀਸੁ ਅਕੁਪ੍ਪਨਞ੍ਹਿ ਰੁਕ੍ਖਧਮ੍ਮੋ ਨਾਮ.

ਉਪ੍ਪਤਿਤਨ੍ਤਿ ਉਪ੍ਪਨ੍ਨਂ. ਭਨ੍ਤਨ੍ਤਿ ਧਾਵਨ੍ਤਂ. ਵਾਰਯੇਤਿ ਨਿਗ੍ਗਣ੍ਹੇਯ੍ਯ. ਇਤਰੋਤਿ ਉਪ੍ਪਨ੍ਨਂ ਕੋਧਂ ਅਨਿਗ੍ਗਣ੍ਹਨ੍ਤੋ ਰਾਜਉਪਰਾਜਾਦੀਨਂ ਰਸ੍ਮਿਮਤ੍ਤਗ੍ਗਾਹਕਜਨੋ ਵਿਯ ਨ ਉਤ੍ਤਮਸਾਰਥੀਤਿ ਅਤ੍ਥੋ. ਵਿਸਟਂ ਸਪ੍ਪਵਿਸਨ੍ਤਿ ਸਰੀਰੇ ਦਾਠਾਵਣਾਨੁਸਾਰੇਨ ਵਿਤ੍ਥਿਣ੍ਣਂ ਬ੍ਯਾਪੇਤ੍ਵਾ ਠਿਤਂ ਕਣ੍ਹਸਪ੍ਪਵਿਸਂ ਵਿਯ. ਜਹਾਤਿ ਓਰਪਾਰਨ੍ਤਿ ਪਞ੍ਚੋਰਮ੍ਭਾਗਿਯਸਞ੍ਞੋਜਨਾਨਿ ਤਤਿਯਮਗ੍ਗੇਨ ਜਹਾਤਿ. ‘‘ਓਰਪਾਰ’’ਨ੍ਤਿ ਹਿ ਓਰਿਮਤੀਰਂ ਵੁਚ੍ਚਤਿ ¶ . ਅਥ ਵਾ ਸੋਤਿ ਤਤਿਯਮਗ੍ਗੇਨ ਕੋਧਂ ਵਿਨੇਤ੍ਵਾ ਠਿਤੋ ਭਿਕ੍ਖੁ ਅਰਹਤ੍ਤਮਗ੍ਗੇਨ ਓਰਪਾਰਂ ਜਹਾਤੀਤਿ ਅਤ੍ਥੋ. ਤਤ੍ਥ ਓਰਂ ਨਾਮ ਸਕਤ੍ਤਭਾਵੋ, ਅਜ੍ਝਤ੍ਤਿਕਾਨਿ ਵਾ ਆਯਤਨਾਨਿ. ਪਾਰਂ ਨਾਮ ਪਰਅਤ੍ਤਭਾਵੋ, ਬਾਹਿਰਾਨਿ ਵਾ ਆਯਤਨਾਨਿ. ਤਦੁਭਯੇ ਪਨ ਛਨ੍ਦਰਾਗਂ ਜਹਨ੍ਤੋ ‘‘ਜਹਾਤਿ ਓਰਿਮਪਾਰ’’ਨ੍ਤਿ ਵੁਚ੍ਚਤਿ.

੯੦. ਭਵਨ੍ਤੀਤਿ ਵਡ੍ਢਨ੍ਤਿ. ਅਹੁਵੁਨ੍ਤੀਤਿ ਬਭੂਵੁ. ਤੇਨਾਹ ‘‘ਜਾਤਾ ਵਡ੍ਢਿਤਾ’’ਤਿ. ਭੂਤਾਨਂ ਗਾਮੋਤਿ ਮਹਾਭੂਤਾਨਂ ਹਰਿਤਤਿਣਾਦਿਭਾਵੇਨ ਸਮਗ੍ਗਾਨਂ ਸਮੂਹੋ. ਤਬ੍ਬਿਨਿਮੁਤ੍ਤਸ੍ਸ ਗਾਮਸ੍ਸ ਅਭਾਵਂ ਦਸ੍ਸੇਤੁਂ ‘‘ਭੂਤਾ ਏਵ ਵਾ ਗਾਮੋ’’ਤਿ ਵੁਤ੍ਤਂ. ਪਾਤਬ੍ਯ-ਸਦ੍ਦਸ੍ਸ ਪਾ ਪਾਨੇਤਿ ਧਾਤ੍ਵਤ੍ਥਂ ਸਨ੍ਧਾਯਾਹ ‘‘ਪਰਿਭੁਞ੍ਜਿਤਬ੍ਬਤਾ’’ਤਿ. ਸਾ ਚ ਪਾਤਬ੍ਯਤਾ ਛੇਦਨਾਦਿ ਏਵ ਹੋਤੀਤਿ ਆਹ ‘‘ਤਸ੍ਸਾ…ਪੇ… ਭੂਤਗਾਮਸ੍ਸ ਜਾਤਾ ਛੇਦਨਾਦਿਪਚ੍ਚਯਾ’’ਤਿ.

੯੧. ਜਾਤ-ਸਦ੍ਦੋ ਏਤ੍ਥ ਵਿਜਾਤਪਰਿਯਾਯੋਤਿ ‘‘ਪੁਤ੍ਤਂ ਵਿਜਾਤਾ ਇਤ੍ਥੀ’’ਤਿਆਦੀਸੁ ਵਿਯ ਪਸੂਤਵਚਨੋਤਿ ਆਹ ‘‘ਪਸੂਤਾਨੀ’’ਤਿ, ਨਿਬ੍ਬਤ੍ਤਪਣ੍ਣਮੂਲਾਨੀਤਿ ਅਤ੍ਥੋ.

ਤਾਨਿ ¶ ਦਸ੍ਸੇਨ੍ਤੋਤਿ ਤਾਨਿ ਬੀਜਾਨਿ ਦਸ੍ਸੇਨ੍ਤੋ. ਕਾਰਿਯਦਸ੍ਸਨਮੁਖੇਨੇਵ ਕਾਰਣਞ੍ਚ ਗਹਿਤਨ੍ਤਿ ਆਹ ‘‘ਬੀਜਤੋ ਨਿਬ੍ਬਤ੍ਤੇਨ ਬੀਜਂ ਦਸ੍ਸਿਤ’’ਨ੍ਤਿ.

੯੨. ‘‘ਬੀਜਤੋ ਸਮ੍ਭੂਤੋ ਭੂਤਗਾਮੋ ਬੀਜ’’ਨ੍ਤਿ ਇਮਿਨਾ ਉਤ੍ਤਰਪਦਲੋਪੇਨ ‘‘ਪਦੁਮਗਚ੍ਛਤੋ ਨਿਬ੍ਬਤ੍ਤਂ ਪੁਪ੍ਫਂ ਪਦੁਮ’’ਨ੍ਤਿਆਦੀਸੁ ਵਿਯਾਯਂ ਵੋਹਾਰੋਤਿ ਦਸ੍ਸੇਤਿ. ਯਂ ਬੀਜਂ ਭੂਤਗਾਮੋ ਨਾਮ ਹੋਤੀਤਿ ਨਿਬ੍ਬਤ੍ਤਪਣ੍ਣਮੂਲਂ ਸਨ੍ਧਾਯ ਵਦਤਿ. ਯਥਾਰੁਤਨ੍ਤਿ ਯਥਾਪਾਠਂ.

‘‘ਸਞ੍ਚਿਚ੍ਚਾ’’ਤਿ ਵੁਤ੍ਤਤ੍ਤਾ ਸਰੀਰੇ ਲਗ੍ਗਭਾਵਂ ਞਤ੍ਵਾਪਿ ਉਟ੍ਠਹਤਿ, ‘‘ਤਂ ਉਦ੍ਧਰਿਸ੍ਸਾਮੀ’’ਤਿਸਞ੍ਞਾਯ ਅਭਾਵਤੋ ਵਟ੍ਟਤਿ. ਅਨਨ੍ਤਕ-ਗ੍ਗਹਣੇਨ ਸਾਸਪਮਤ੍ਤਿਕਾ ਗਹਿਤਾ, ਨਾਮਞ੍ਹੇਤਂ ਤਸ੍ਸਾ ਸੇਵਾਲਜਾਤਿਯਾ. ਮੂਲਪਣ੍ਣਾਨਂ ਅਭਾਵੇਨ ‘‘ਅਸਮ੍ਪੁਣ੍ਣਭੂਤਗਾਮੋ ਨਾਮਾ’’ਤਿ ਵੁਤ੍ਤਂ. ਸੋ ਬੀਜਗਾਮੇਨ ਸਙ੍ਗਹਿਤੋਤਿ. ਅਵਡ੍ਢਮਾਨੇਪਿ ਭੂਤਗਾਮਮੂਲਕਤ੍ਤਾ ਵੁਤ੍ਤਂ ‘‘ਅਮੂਲਕਭੂਤਗਾਮੇ ਸਙ੍ਗਹਂ ਗਚ੍ਛਤੀ’’ਤਿ. ਨਾਲ਼ਿਕੇਰਸ੍ਸ ਆਵੇਣਿਕਂ ਕਤ੍ਵਾ ਵਦਤਿ.

ਸੇਲੇਯ੍ਯਕਂ ¶ ਨਾਮ ਸਿਲਾਯ ਸਮ੍ਭੂਤਾ ਏਕਾ ਗਨ੍ਧਜਾਤਿ. ਪੁਪ੍ਫਿਤਕਾਲਤੋ ਪਟ੍ਠਾਯਾਤਿ ਵਿਕਸਿਤਕਾਲਤੋ ਪਭੁਤਿ. ਛਤ੍ਤਕਂ ਗਣ੍ਹਨ੍ਤੋਤਿ ਵਿਕਸਿਤਂ ਗਣ੍ਹਨ੍ਤੋ. ਮਕੁਲ਼ਂ ਪਨ ਰੁਕ੍ਖਤ੍ਤਚਂ ਅਕੋਪੇਨ੍ਤੇਨਪਿ ਗਹੇਤੁਂ ਨ ਵਟ੍ਟਤਿ, ਫੁਲ੍ਲਂ ਵਟ੍ਟਤਿ. ਹਤ੍ਥਕੁਕ੍ਕੁਚ੍ਚੇਨਾਤਿ ਹਤ੍ਥਚਾਪਲ੍ਲੇਨ.

‘‘ਪਾਨੀਯਂ ਨ ਵਾਸੇਤਬ੍ਬ’’ਨ੍ਤਿ ਇਦਂ ਅਤ੍ਤਨੋ ਪਿਵਨਪਾਨੀਯਂ ਸਨ੍ਧਾਯ ਵੁਤ੍ਤਂ, ਅਞ੍ਞੇਸਂ ਪਨ ਵਟ੍ਟਤਿ ਅਨੁਗ੍ਗਹਿਤਤ੍ਤਾ. ਤੇਨਾਹ ‘‘ਅਤ੍ਤਨਾ ਖਾਦਿਤੁਕਾਮੇਨਾ’’ਤਿ. ਯੇਸਂ ਰੁਕ੍ਖਾਨਂ ਸਾਖਾ ਰੁਹਤੀਤਿ ਮੂਲਂ ਅਨੋਤਾਰੇਤ੍ਵਾ ਪਣ੍ਣਮਤ੍ਤਨਿਗ੍ਗਮਨਮਤ੍ਤੇਨਪਿ ਵਡ੍ਢਤਿ. ਤਤ੍ਥ ਕਪ੍ਪਿਯਮ੍ਪਿ ਅਕਰੋਨ੍ਤੋ ਛਿਨ੍ਨਨਾਲ਼ਿਕੇਰਵੇਲ਼ੁਦਣ੍ਡਾਦਯੋ ਕੋਪੇਤੁਂ ਵਟ੍ਟਤਿ.

‘‘ਚਙ੍ਕਮਿਤਟ੍ਠਾਨਂ ਦਸ੍ਸੇਸ੍ਸਾਮੀ’’ਤਿ ਵੁਤ੍ਤਤ੍ਤਾ ਕੇਵਲਂ ਚਙ੍ਕਮਨਾਧਿਪ੍ਪਾਯੇਨ ਵਾ ਮਗ੍ਗਗਮਨਾਧਿਪ੍ਪਾਯੇਨ ਵਾ ਅਕ੍ਕਮਨ੍ਤਸ੍ਸ, ਤਿਣਾਨਂ ਉਪਰਿ ਨਿਸੀਦਨਾਧਿਪ੍ਪਾਯੇਨ ਨਿਸੀਦਨ੍ਤਸ੍ਸ ਚ ਦੋਸੋ ਨਤ੍ਥਿ.

ਸਮਣਕਪ੍ਪੇਹੀਤਿ ਸਮਣਾਨਂ ਕਪ੍ਪਿਯਵੋਹਾਰੇਹਿ, ਅਬੀਜਨਿਬ੍ਬਟ੍ਟਬੀਜਾਨਿਪਿ ਕਪ੍ਪਿਯਭਾਵਤੋ ‘‘ਸਮਣਕਪ੍ਪਾਨੀ’’ਤਿ ਵੁਤ੍ਤਾਨਿ. ਅਬੀਜਂ ਨਾਮ ਤਰੁਣਅਮ੍ਬਫਲਾਦੀਨਿ. ਨਿਬ੍ਬਟ੍ਟੇਤਬ੍ਬਂ ਵਿਯੋਜੇਤਬ੍ਬਂ ਬੀਜਂ ਯਸ੍ਮਿਂ, ਤਂ ਪਨਸਾਦਿ ਨਿਬ੍ਬਟ੍ਟਬੀਜਂ ਨਾਮ. ਕਪ੍ਪਿਯਨ੍ਤਿ ਵਤ੍ਵਾਵਾਤਿ ਪੁਬ੍ਬਕਾਲਕਿਰਿਯਾਵਸੇਨ ਵੁਤ੍ਤੇਪਿ ਵਚਨਕ੍ਖਣੇਵ ਅਗ੍ਗਿਸਤ੍ਥਾਦਿਨਾ ਬੀਜਗਾਮੇ ਵਣਂ ਕਾਤਬ੍ਬਨ੍ਤਿ ਵਚਨਤੋ ਪਨ ਪੁਬ੍ਬੇ ਕਾਤੁਂ ਨ ਵਟ੍ਟਤਿ, ਤਞ੍ਚ ਦ੍ਵਿਧਾ ਅਕਤ੍ਵਾ ਛੇਦਨਭੇਦਨਮੇਵ ਦਸ੍ਸੇਤਬ੍ਬਂ. ਕਰੋਨ੍ਤੇਨ ਚ ਭਿਕ੍ਖੁਨਾ ‘‘ਕਪ੍ਪਿਯਂ ਕਰੋਹੀ’’ਤਿ ¶ ਯਾਯ ਕਾਯਚਿ ਭਾਸਾਯ ਵੁਤ੍ਤੇਯੇਵ ਕਾਤਬ੍ਬਂ. ਬੀਜਗਾਮਪਰਿਮੋਚਨਤ੍ਥਂ ਪੁਨ ਕਪ੍ਪਿਯਂ ਕਾਰੇਤਬ੍ਬਨ੍ਤਿ ਕਾਰਾਪਨਸ੍ਸ ਪਠਮਮੇਵ ਅਧਿਕਤਤ੍ਤਾ. ‘‘ਕਟਾਹੇਪਿ ਕਾਤੁਂ ਵਟ੍ਟਤੀ’’ਤਿ ਵੁਤ੍ਤਤ੍ਤਾ ਕਟਾਹਤੋ ਨੀਹਤਾਯ ਮਿਞ੍ਜਾਯ ਵਾ ਬੀਜੇ ਵਾ ਯਤ੍ਥ ਕਤ੍ਥਚਿ ਵਿਜ੍ਝਿਤੁਂ ਵਟ੍ਟਤਿ ਏਵ. ਭੂਤਗਾਮੋ, ਭੂਤਗਾਮਸਞ੍ਞਿਤਾ, ਵਿਕੋਪਨਂ ਵਾ ਵਿਕੋਪਾਪਨਂ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਭੂਤਗਾਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯੪. ਦੁਤਿਯੇ ਅਞ੍ਞਂ ਵਚਨਨ੍ਤਿ ਯਂ ਦੋਸਵਿਭਾਵਨਤ੍ਥਂ ਪਰੇਹਿ ਵੁਤ੍ਤਵਚਨਂ ਤਂ ਤਸ੍ਸ ਅਨਨੁਚ੍ਛਵਿਕੇਨ ਅਞ੍ਞੇਨ ਵਚਨੇਨ ਪਟਿਚਰਤਿ.

੯੮. ਯਦੇਤਂ ¶ ਅਞ੍ਞੇਨਞ੍ਞਂ ਪਟਿਚਰਣਵਸੇਨ ਪਵਤ੍ਤਵਚਨਂ, ਤਦੇਵ ਪੁਚ੍ਛਿਤਮਤ੍ਥਂ ਠਪੇਤ੍ਵਾ ਅਞ੍ਞਂ ਵਦਤਿ ਪਕਾਸੇਤੀਤਿ ਅਞ੍ਞਵਾਦਕਨ੍ਤਿ ਆਹ ‘‘ਅਞ੍ਞੇਨਞ੍ਞਂ ਪਟਿਚਰਣਸ੍ਸੇਤਂ ਨਾਮ’’ਨ੍ਤਿ. ਤੁਣ੍ਹੀਭੂਤਸ੍ਸੇਤਂ ਨਾਮਨ੍ਤਿ ਤੁਣ੍ਹੀਭਾਵਸ੍ਸੇਤਂ ਨਾਮਂ, ਅਯਮੇਵ ਵਾ ਪਾਠੋ. ਅਞ੍ਞਵਾਦਕਂ ਆਰੋਪੇਤੁਨ੍ਤਿ ਅਞ੍ਞਵਾਦੇ ਆਰੋਪੇਤੁਂ. ਵਿਹੇਸਕਨ੍ਤਿ ਵਿਹੇਸਕਤ੍ਤਂ.

੯੯. ਪਾਲ਼ਿਯਂ ਨ ਉਗ੍ਘਾਟੇਤੁਕਾਮੋਤਿ ਪਟਿਚ੍ਛਾਦੇਤੁਕਾਮੋ.

੧੦੦. ਅਨਾਰੋਪਿਤੇ ਅਞ੍ਞਵਾਦਕੇਤਿ ਵੁਤ੍ਤਦੁਕ੍ਕਟਂ ਪਾਲ਼ਿਯਂ ਆਗਤਅਞ੍ਞੇਨਞ੍ਞਪਟਿਚਰਣਵਸੇਨ ਯੁਜ੍ਜਤਿ, ਅਟ੍ਠਕਥਾਯਂ ਆਗਤਨਯੇਨ ਪਨ ਮੁਸਾਵਾਦੇਨ ਅਞ੍ਞੇਨਞ੍ਞਂ ਪਟਿਚਰਨ੍ਤਸ੍ਸ ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਂ, ਆਰੋਪਿਤੇ ਇਮਿਨਾਵ ਪਾਚਿਤ੍ਤਿਯਂ. ਕੇਚਿ ਪਨ ‘‘ਮੁਸਾਵਾਦਪਾਚਿਤ੍ਤਿਯੇਨ ਸਦ੍ਧਿਂ ਪਾਚਿਤ੍ਤਿਯਦ੍ਵਯ’’ਨ੍ਤਿ ਵਦਨ੍ਤਿ, ਵੀਮਂਸਿਤਬ੍ਬਂ. ਆਦਿਕਮ੍ਮਿਕਸ੍ਸਪਿ ਮੁਸਾਵਾਦੇ ਇਮਿਨਾਵ ਅਨਾਪਤ੍ਤੀਤਿ ਦਟ੍ਠਬ੍ਬਂ. ਧਮ੍ਮਕਮ੍ਮੇਨ ਆਰੋਪਿਤਤਾ, ਆਪਤ੍ਤਿਯਾ ਵਾ ਵਤ੍ਥੁਨਾ ਵਾ ਅਨੁਯੁਞ੍ਜਿਯਮਾਨਤਾ, ਛਾਦੇਤੁਕਾਮਤਾਯ ਅਞ੍ਞੇਨਞ੍ਞਂ ਪਟਿਚਰਣਂ, ਤੁਣ੍ਹੀਭਾਵੋ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਅਞ੍ਞਵਾਦਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦੩. ਤਤਿਯੇ ¶ ਚਿਨ੍ਤਾਯਨਤ੍ਥਸ੍ਸ ਝੇ-ਧਾਤੁਸ੍ਸ ਅਨੇਕਤ੍ਥਤਾਯ ਓਲੋਕਨਤ੍ਥਸਮ੍ਭਵਤੋ ਵੁਤ੍ਤਂ ‘‘ਓਲੋਕਾਪੇਨ੍ਤੀ’’ਤਿ. ਛਨ੍ਦਾਯਾਤਿ ਲਿਙ੍ਗਵਿਪਲ੍ਲਾਸੋਤਿ ਆਹ ‘‘ਛਨ੍ਦੇਨਾ’’ਤਿ.

੧੦੫. ਭਿਕ੍ਖੁਂ ਲਾਮਕਤੋ ਚਿਨ੍ਤਾਪਨਤ੍ਥਂ ਅਞ੍ਞੇਸਂ ਤਂ ਅਵਣ੍ਣਕਥਨਂ ਉਜ੍ਝਾਪਨਂ ਨਾਮ. ਅਞ੍ਞੇਸਂ ਪਨ ਅਵਤ੍ਵਾ ਅਞ੍ਞਮਞ੍ਞਂ ਸਮੁਲ੍ਲਪਨਵਸੇਨ ਭਿਕ੍ਖੁਨੋ ਦੋਸਪ੍ਪਕਾਸਨਂ ਖਿਯ੍ਯਨਂ ਨਾਮਾਤਿ ਅਯਮੇਤੇਸਂ ਭੇਦੋ.

੧੦੬. ਅਞ੍ਞਂ ਅਨੁਪਸਮ੍ਪਨ੍ਨਂ ਉਜ੍ਝਾਪੇਤੀਤਿ ਅਞ੍ਞੇਨ ਅਨੁਪਸਮ੍ਪਨ੍ਨੇਨ ਉਜ੍ਝਾਪੇਤਿ. ਤਸ੍ਸ ਵਾ ਤਂ ਸਨ੍ਤਿਕੇਤਿ ਤਸ੍ਸ ਅਨੁਪਸਮ੍ਪਨ੍ਨਸ੍ਸ ਸਨ੍ਤਿਕੇ ਤਂ ਸਙ੍ਘੇਨ ਸਮ੍ਮਤਂ ਉਪਸਮ੍ਪਨ੍ਨਂ ਖਿਯ੍ਯਤਿ. ਇਧਾਪਿ ਮੁਸਾਵਾਦੇਨ ਉਜ੍ਝਾਪਨਾਦੀਨਂ ਸਮ੍ਭਵਤੋ ਦੁਕ੍ਕਟਟ੍ਠਾਨਾਨਿ ਚ ਆਦਿਕਮ੍ਮਿਕਸ੍ਸ ਅਨਾਪਤ੍ਤਿ ਚ ਇਮਿਨਾ ਏਵ ਸਿਕ੍ਖਾਪਦੇਨ ਵੁਤ੍ਤਾਤਿ ¶ ਵੇਦਿਤਬ੍ਬਂ ਸਬ੍ਬਤ੍ਥ ਮੁਸਾਵਾਦਪਾਚਿਤ੍ਤਿਯਸ੍ਸ ਅਨਿਵਤ੍ਤਿਤੋ. ਧਮ੍ਮਕਮ੍ਮੇਨ ਸਮ੍ਮਤਤਾ, ਉਪਸਮ੍ਪਨ੍ਨਤਾ, ਅਗਤਿਗਮਨਾਭਾਵੋ, ਤਸ੍ਸ ਅਵਣ੍ਣਕਾਮਤਾ, ਯਸ੍ਸ ਸਨ੍ਤਿਕੇ ਵਦਤਿ. ਤਸ੍ਸ ਉਪਸਮ੍ਪਨ੍ਨਤਾ, ਉਜ੍ਝਾਪਨਂ ਵਾ ਖਿਯ੍ਯਨਂ ਵਾਤਿ ਇਮਾਨੇਤ੍ਥ ਛ ਅਙ੍ਗਾਨਿ.

ਉਜ੍ਝਾਪਨਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੧੦. ਚਤੁਤ੍ਥੇ ਅਪਞ੍ਞਾਤੇਤਿ ਅਪ੍ਪਸਿਦ੍ਧੇ. ਇਮਂ ਪਨ ਅਟ੍ਠ ਮਾਸੇ ਮਣ੍ਡਪਾਦੀਸੁ ਠਪਨਸਙ੍ਖਾਤਂ ਅਤ੍ਥਵਿਸੇਸਂ ਗਹੇਤ੍ਵਾ ਭਗਵਤਾ ਪਠਮਮੇਵ ਸਿਕ੍ਖਾਪਦਂ ਪਞ੍ਞਤ੍ਤਨ੍ਤਿ ਅਧਿਪ੍ਪਾਯਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਮਾਸੇ’’ਤਿਆਦਿਵਚਨੇਨ ਅਨੁਪਞ੍ਞਤ੍ਤਿਸਦਿਸੇਨ ਪਕਾਸੇਤ੍ਵਾ ਵਿਸੁਂ ਅਨੁਪਞ੍ਞਤ੍ਤਿ ਨ ਵੁਤ੍ਤਾ. ਪਰਿਵਾਰੇ ਪਨੇਤਂ ਅਨੁਜਾਨਨਵਚਨਂ ਅਨੁਪਞ੍ਞਤ੍ਤਿਟ੍ਠਾਨਨ੍ਤਿ ‘‘ਏਕਾ ਅਨੁਪਞ੍ਞਤ੍ਤੀ’’ਤਿ (ਪਰਿ. ੬੫-੬੭) ਵੁਤ੍ਤਂ.

ਨਵਵਾਯਿਮੋਤਿ ਅਧੁਨਾ ਸੁਤ੍ਤੇਨ ਵੀਤਕਚ੍ਛੇਨ ਪਲਿਵੇਠਿਤਮਞ੍ਚੋ. ਓਨਦ੍ਧੋਤਿ ਕਪ੍ਪਿਯਚਮ੍ਮੇਨ ਓਨਦ੍ਧੋ. ਤੇ ਹਿ ਵਸ੍ਸੇਨ ਸੀਘਂ ਨ ਨਸ੍ਸਨ੍ਤਿ. ‘‘ਉਕ੍ਕਟ੍ਠਅਬ੍ਭੋਕਾਸਿਕੋ’’ਤਿ ਇਦਂ ਤਸ੍ਸ ਸੁਖਪਟਿਪਤ੍ਤਿਦਸ੍ਸਨਮਤ੍ਤਂ, ਉਕ੍ਕਟ੍ਠਸ੍ਸਾਪਿ ਪਨ ਚੀਵਰਕੁਟਿ ਵਟ੍ਟਤੇਵ. ਕਾਯਾਨੁਗਤਿਕਤ੍ਤਾਤਿ ਭਿਕ੍ਖੁਨੋ ਤਤ੍ਥੇਵ ਨਿਸੀਦਨਭਾਵਂ ਦੀਪੇਤਿ, ਤੇਨ ਚ ਵਸ੍ਸਭਯੇਨ ਸਯਂ ਅਞ੍ਞਤ੍ਥ ਗਚ੍ਛਨ੍ਤਸ੍ਸ ਆਪਤ੍ਤੀਤਿ ਦਸ੍ਸੇਤਿ ¶ . ਅਬ੍ਭੋਕਾਸਿਕਾਨਂ ਤੇਮਨਤ੍ਥਾਯ ਨਿਯਮੇਤ੍ਵਾ ਦਾਯਕੇਹਿ ਦਿਨ੍ਨਮ੍ਪਿ ਅਤ੍ਤਾਨਂ ਰਕ੍ਖਨ੍ਤੇਨ ਰਕ੍ਖਿਤਬ੍ਬਮੇਵ.

‘‘ਵਲਾਹਕਾਨਂ ਅਨੁਟ੍ਠਿਤਭਾਵਂ ਸਲ੍ਲਕ੍ਖੇਤ੍ਵਾ’’ਤਿ ਇਮਿਨਾ ਗਿਮ੍ਹਾਨੇਪਿ ਮੇਘੇ ਉਟ੍ਠਿਤੇ ਅਬ੍ਭੋਕਾਸੇ ਨਿਕ੍ਖਿਪਿਤੁਂ ਨ ਵਟ੍ਟਤੀਤਿ ਦੀਪੇਤਿ. ਤਤ੍ਰ ਤਤ੍ਰਾਤਿ ਚੇਤਿਯਙ੍ਗਣਾਦਿਕੇ ਤਸ੍ਮਿਂ ਤਸ੍ਮਿਂ ਅਬ੍ਭੋਕਾਸੇ ਨਿਯਮੇਤ੍ਵਾ ਨਿਕ੍ਖਿਤ੍ਤਾ. ਮਜ੍ਝਤੋ ਪਟ੍ਠਾਯ ਪਾਦਟ੍ਠਾਨਾਭਿਮੁਖਾਤਿ ਯਤ੍ਥ ਸਮਨ੍ਤਤੋ ਸਮ੍ਮਜ੍ਜਿਤ੍ਵਾ ਅਙ੍ਗਣਮਜ੍ਝੇ ਸਬ੍ਬਦਾ ਕਚਵਰਸ੍ਸ ਸਙ੍ਕਡ੍ਢਨੇਨ ਮਜ੍ਝੇ ਵਾਲਿਕਾ ਸਞ੍ਚਿਤਾ ਹੋਤਿ. ਤਤ੍ਥ ਕਤ੍ਤਬ੍ਬਵਿਧਿਦਸ੍ਸਨਤ੍ਥਂ ਵੁਤ੍ਤਂ. ਉਚ੍ਚਵਤ੍ਥੁਪਾਦਟ੍ਠਾਨਾਭਿਮੁਖਂ ਵਾ ਵਾਲਿਕਾ ਹਰਿਤਬ੍ਬਾ. ਯਤ੍ਥ ਵਾ ਪਨ ਕੋਣੇਸੁ ਵਾਲਿਕਾ ਸਞ੍ਚਿਤਾ, ਤਤ੍ਥ ਤਤੋ ਪਟ੍ਠਾਯ ਅਪਰਦਿਸਾਭਿਮੁਖਾ ਹਰਿਤਬ੍ਬਾਤਿ ਕੇਚਿ ਅਤ੍ਥਂ ਵਦਨ੍ਤਿ. ਕੇਚਿ ਪਨ ‘‘ਸਮ੍ਮਟ੍ਠਟ੍ਠਾਨਸ੍ਸ ¶ ਪਦਵਲ਼ਞ੍ਜੇਨ ਅਵਿਕੋਪਨਤ੍ਥਾਯ ਸਯਂ ਅਸਮ੍ਮਟ੍ਠਟ੍ਠਾਨੇ ਠਤ੍ਵਾ ਅਤ੍ਤਨੋ ਪਾਦਾਭਿਮੁਖਂ ਵਾਲਿਕਾ ਹਰਿਤਬ੍ਬਾਤਿ ਵੁਤ੍ਤ’’ਨ੍ਤਿ ਵਦਨ੍ਤਿ, ਤਤ੍ਥ ‘‘ਮਜ੍ਝਤੋ ਪਟ੍ਠਾਯਾ’’ਤਿ ਵਚਨਸ੍ਸ ਪਯੋਜਨਂ ਨ ਦਿਸ੍ਸਤਿ.

੧੧੧. ਵਙ੍ਕਪਾਦਤਾਮਤ੍ਤੇਨ ਕੁਲ਼ੀਰਪਾਦਕਸ੍ਸ ਸੇਸੇਹਿ ਵਿਸੇਸੋ, ਨ ਅਟਨੀਸੁ ਪਾਦਪ੍ਪਵੇਸਨਵਿਸੇਸੇਨਾਤਿ ਦਸ੍ਸੇਤੁਂ ‘‘ਯੋ ਵਾ ਪਨ ਕੋਚੀ’’ਤਿਆਦਿ ਵੁਤ੍ਤਂ. ਤਸ੍ਸਾਤਿ ਉਪਸਮ੍ਪਨ੍ਨਸ੍ਸੇਵ.

ਨਿਸੀਦਿਤ੍ਵਾ…ਪੇ… ਪਾਚਿਤ੍ਤਿਯਨ੍ਤਿ ਏਤ੍ਥ ਮੇਘੁਟ੍ਠਾਨਾਭਾਵਂ ਞਤ੍ਵਾ ‘‘ਪਚ੍ਛਾ ਆਗਨ੍ਤ੍ਵਾ ਉਦ੍ਧਰਿਸ੍ਸਾਮੀ’’ਤਿ ਆਭੋਗੇਨ ਗਚ੍ਛਨ੍ਤਸ੍ਸ ਅਨਾਪਤ੍ਤਿ, ਤੇਨ ਪੁਨਾਗਨ੍ਤਬ੍ਬਮੇਵ. ਕਪ੍ਪਂ ਲਭਿਤ੍ਵਾਤਿ ‘‘ਗਚ੍ਛ, ਮਾ ਇਧ ਤਿਟ੍ਠਾ’’ਤਿ ਵੁਤ੍ਤਵਚਨਂ ਲਭਿਤ੍ਵਾ.

ਆਵਾਸਿਕਾਨਂਯੇਵ ਪਲਿਬੋਧੋਤਿ ਆਗਨ੍ਤੁਕੇਸੁ ਕਿਞ੍ਚਿ ਅਵਤ੍ਵਾ ਨਿਸੀਦਿਤ੍ਵਾ ‘‘ਆਵਾਸਿਕਾ ਏਵ ਉਦ੍ਧਰਿਸ੍ਸਨ੍ਤੀ’’ਤਿ ਗਤੇਸੁਪਿ ਆਵਾਸਿਕਾਨਮੇਵ ਪਲਿਬੋਧੋ. ਮਹਾਪਚ੍ਚਰਿਵਾਦੇ ਪਨ ‘‘ਇਦਂ ਅਮ੍ਹਾਕ’’ਨ੍ਤਿ ਅਵਤ੍ਵਾਪਿ ਨਿਸਿਨ੍ਨਾਨਮੇਵਾਤਿ ਅਧਿਪ੍ਪਾਯੋ. ‘‘ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ’’ਤਿ ਵੁਤ੍ਤਤ੍ਤਾ ਅਨਾਣਤ੍ਤਿਯਾ ਪਞ੍ਞਾਪਿਤਤ੍ਤਾਪਿ ਦੁਕ੍ਕਟੇ ਕਾਰਣਂ ਵੁਤ੍ਤਂ. ਉਸ੍ਸਾਰਕੋਤਿ ਸਰਭਾਣਕੋ. ਸੋ ਹਿ ਉਦ੍ਧਂ ਉਦ੍ਧਂ ਪਾਲ਼ਿਪਾਠਂ ਸਾਰੇਤਿ ਪਵਤ੍ਤੇਤੀਤਿ ਉਸ੍ਸਾਰਕੋਤਿ ਵੁਚ੍ਚਤਿ.

੧੧੨. ਵਣ੍ਣਾਨੁਰਕ੍ਖਣਤ੍ਥਂ ਕਤਾਤਿ ਪਟਖਣ੍ਡਾਦੀਹਿ ਸਿਬ੍ਬਿਤ੍ਵਾ ਕਤਾ. ਭੂਮਿਯਂ ਅਤ੍ਥਰਿਤਬ੍ਬਾਤਿ ਚਿਮਿਲਿਕਾਯ ਸਤਿ ਤਸ੍ਸਾ ਉਪਰਿ, ਅਸਤਿ ਸੁਦ੍ਧਭੂਮਿਯਂ ਅਤ੍ਥਰਿਤਬ੍ਬਾ. ‘‘ਸੀਹਚਮ੍ਮਾਦੀਨਂ ਪਰਿਹਰਣੇਯੇਵ ਪਟਿਕ੍ਖੇਪੋ’’ਤਿ ਇਮਿਨਾ ਮਞ੍ਚਪੀਠਾਦੀਸੁ ਅਤ੍ਥਰਿਤ੍ਵਾ ਪੁਨ ਸਂਹਰਿਤ੍ਵਾ ਠਪਨਾਦਿਵਸੇਨ ¶ ਅਤ੍ਤਨੋ ਅਤ੍ਥਾਯ ਪਰਿਹਰਣਮੇਵ ਨ ਵਟ੍ਟਤਿ, ਭੂਮਤ੍ਥਰਣਾਦਿਵਸੇਨ ਪਰਿਭੋਗੋ ਪਨ ਅਤ੍ਤਨੋ ਪਰਿਹਰਣਂ ਨ ਹੋਤੀਤਿ ਦਸ੍ਸੇਤਿ. ਖਨ੍ਧਕੇ ਹਿ ‘‘ਅਨ੍ਤੋਪਿ ਮਞ੍ਚੇ ਪਞ੍ਞਤ੍ਤਾਨਿ ਹੋਨ੍ਤਿ, ਬਹਿਪਿ ਮਞ੍ਚੇ ਪਞ੍ਞਤ੍ਤਾਨਿ ਹੋਨ੍ਤੀ’’ਤਿ ਏਵਂ ਅਤ੍ਤਨੋ ਅਤ੍ਤਨੋ ਅਤ੍ਥਾਯ ਮਞ੍ਚਾਦੀਸੁ ਪਞ੍ਞਪੇਤ੍ਵਾ ਪਰਿਹਰਣਵਤ੍ਥੁਸ੍ਮਿਂ –

‘‘ਨ, ਭਿਕ੍ਖਵੇ, ਮਹਾਚਮ੍ਮਾਨਿ ਧਾਰੇਤਬ੍ਬਾਨਿ ਸੀਹਚਮ੍ਮਂ ਬ੍ਯਗ੍ਘਚਮ੍ਮਂ ਦੀਪਿਚਮ੍ਮਂ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੫੫) –

ਪਟਿਕ੍ਖੇਪੋ ¶ ਕਤੋ. ਤਸ੍ਮਾ ਵੁਤ੍ਤਨਯੇਨੇਵੇਤ੍ਥ ਅਧਿਪ੍ਪਾਯੋ ਦਟ੍ਠਬ੍ਬੋ. ਦਾਰੁਮਯਪੀਠਨ੍ਤਿ ਫਲਕਮਯਪੀਠਮੇਵ. ਪਾਦਕਥਲਿਕਨ੍ਤਿ ਅਧੋਤਪਾਦਂ ਯਸ੍ਮਿਂ ਘਂਸਨ੍ਤਾ ਧੋਵਨ੍ਤਿ, ਤਂ ਦਾਰੁਫਲਕਾਦਿ.

੧੧੩. ‘‘ਆਗਨ੍ਤ੍ਵਾ ਉਦ੍ਧਰਿਸ੍ਸਾਮੀਤਿ ਗਚ੍ਛਤੀ’’ਤਿ ਵੁਤ੍ਤਤ੍ਤਾ ਅਞ੍ਞੇਨਪਿ ਕਾਰਣੇਨ ਅਨੋਤਾਪੇਨ੍ਤਸ੍ਸਪਿ ਆਗਮਨੇ ਸਾਪੇਕ੍ਖਸ੍ਸ ਅਨਾਪਤ੍ਤਿ. ਤੇਨੇਵ ਮਾਤਿਕਾਟ੍ਠਕਥਾਯਂ ‘‘ਮਞ੍ਚਾਦੀਨਂ ਸਙ੍ਘਿਕਤਾ, ਵੁਤ੍ਤਲਕ੍ਖਣੇ ਦੇਸੇ ਸਨ੍ਥਰਣਂ ਵਾ ਸਨ੍ਥਰਾਪਨਂ ਵਾ, ਅਪਲਿਬੁਦ੍ਧਤਾ, ਆਪਦਾਯ ਅਭਾਵੋ, ਨਿਰਪੇਕ੍ਖਤਾ, ਲੇਡ੍ਡੁਪਾਤਾਤਿਕ੍ਕਮੋ’’ਤਿ (ਕਙ੍ਖਾ. ਅਟ੍ਠ. ਪਠਮਸੇਨਾਸਨਸਿਕ੍ਖਾਪਦਵਣ੍ਣਨਾ) ਏਵਮੇਤ੍ਥ ਨਿਰਪੇਕ੍ਖਤਾਯ ਸਦ੍ਧਿਂ ਛ ਅਙ੍ਗਾਨਿ ਵੁਤ੍ਤਾਨਿ.

ਪਠਮਸੇਨਾਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਦੁਤਿਯਸੇਨਾਸਨਸਿਕ੍ਖਾਪਦਵਣ੍ਣਨਾ

੧੧੬. ਪਞ੍ਚਮੇ ਪਾਵਾਰੋ ਕੋਜਵੋਤਿ ਪਚ੍ਚਤ੍ਥਰਣਤ੍ਥਾਯੇਵ ਠਪਿਤਾ ਉਗ੍ਗਤਲੋਮਾ ਅਤ੍ਥਰਣਵਿਸੇਸਾ. ਏਤ੍ਤਕਮੇਵ ਵੁਤ੍ਤਨ੍ਤਿ ਅਟ੍ਠਕਥਾਸੁ ਵੁਤ੍ਤਂ. ਸੇਨਾਸਨਤੋਤਿ ਸਬ੍ਬਪਚ੍ਛਿਮਸੇਨਾਸਨਤੋ.

੧੧੭. ਕੁਰੁਨ੍ਦਟ੍ਠਕਥਾਯਂ ਵੁਤ੍ਤਮੇਵਤ੍ਥਂ ਸਵਿਸੇਸਂ ਕਤ੍ਵਾ ਦਸ੍ਸੇਤੁਂ ‘‘ਕਿਞ੍ਚਾਪਿ ਵੁਤ੍ਤੋ’’ਤਿਆਦਿ ਆਰਦ੍ਧਂ. ਵਤ੍ਤਬ੍ਬਂ ਨਤ੍ਥੀਤਿ ਰੁਕ੍ਖਮੂਲਸ੍ਸ ਪਾਕਟਤ੍ਤਾ ਵੁਤ੍ਤਂ. ਪਲੁਜ੍ਜਤੀਤਿ ਵਿਨਸ੍ਸਤਿ.

੧੧੮. ਯੇਨ ਮਞ੍ਚਂ ਵਾ ਪੀਠਂ ਵਾ ਵੀਨਨ੍ਤਿ, ਤਂ ਮਞ੍ਚਪੀਠਕਵਾਨਂ. ਸਿਲੁਚ੍ਚਯਲੇਣਨ੍ਤਿ ਪਬ੍ਬਤਗੁਹਾ. ‘‘ਆਪੁਚ੍ਛਨਂ ਪਨ ਵਤ੍ਤ’’ਨ੍ਤਿ ਇਮਿਨਾ ਆਪਤ੍ਤਿ ਨਤ੍ਥੀਤਿ ਦਸ੍ਸੇਤਿ. ਵੁਤ੍ਤਲਕ੍ਖਣਸੇਯ੍ਯਾ, ਤਸ੍ਸਾ ¶ ਸਙ੍ਘਿਕਤਾ, ਵੁਤ੍ਤਲਕ੍ਖਣੇ ਵਿਹਾਰੇ ਸਨ੍ਥਰਣਂ ਵਾ ਸਨ੍ਥਰਾਪਨਂ ਵਾ, ਅਪਲਿਬੁਦ੍ਧਤਾ, ਆਪਦਾਯ ਅਭਾਵੋ, ਅਨਪੇਕ੍ਖਸ੍ਸ ਦਿਸਾਪਕ੍ਕਮਨਂ, ਉਪਚਾਰਸੀਮਾਤਿਕ੍ਕਮੋਤਿ ਇਮਾਨੇਤ੍ਥ ਸਤ੍ਤ ਅਙ੍ਗਾਨਿ.

ਦੁਤਿਯਸੇਨਾਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੧੯. ਛਟ੍ਠੇ ¶ ਅਨੁਪਵਿਸਿਤ੍ਵਾਤਿ ਸਮੀਪਂ ਪਵਿਸਿਤ੍ਵਾ.

੧੨੨. ਉਪਚਾਰਂ ਠਪੇਤ੍ਵਾਤਿ ਦਿਯਡ੍ਢਹਤ੍ਥੂਪਚਾਰਂ ਠਪੇਤ੍ਵਾ. ਸਙ੍ਘਿਕਵਿਹਾਰਤਾ, ਅਨੁਟ੍ਠਾਪਨੀਯਭਾਵਜਾਨਨਂ, ਸਮ੍ਬਾਧੇਤੁਕਾਮਤਾ, ਉਪਚਾਰੇ ਨਿਸੀਦਨਂ ਵਾ ਨਿਪਜ੍ਜਨਂ ਵਾਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਅਨੁਪਖਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੨੬. ਸਤ੍ਤਮੇ ਕੋਟ੍ਠਕਾਨੀਤਿ ਦ੍ਵਾਰਕੋਟ੍ਠਕਾਨਿ.

੧੨੮. ‘‘ਸਕਲਸਙ੍ਘਾਰਾਮਤੋ ਨਿਕ੍ਕਡ੍ਢਿਤੁਂ ਨ ਵਟ੍ਟਤੀ’’ਤਿ ਇਦਂ ਅਨਨੁਰੂਪਤੋ ਵੁਤ੍ਤਂ. ਪਾਪਗਰਹਿਤਾਯ ਹਿ ਅਕੁਪਿਤਚਿਤ੍ਤੇਨ ਨਿਕ੍ਕਡ੍ਢਾਪੇਨ੍ਤਸ੍ਸ ਇਮਿਨਾ ਸਿਕ੍ਖਾਪਦੇਨ ਆਪਤ੍ਤਿ ਨਤ੍ਥਿ ‘‘ਕੁਪਿਤੋ ਅਨਤ੍ਤਮਨੋ’’ਤਿ ਵੁਤ੍ਤਤ੍ਤਾ. ਅਞ੍ਞਾਪੇਕ੍ਖਾ ਆਪਤ੍ਤਿ ਨ ਦਿਸ੍ਸਤਿ. ਪਾਲ਼ਿਯਂ ‘‘ਅਲਜ੍ਜਿਂ ਨਿਕ੍ਕਡ੍ਢਤੀ’’ਤਿਆਦੀਸੁ ਚਿਤ੍ਤਸ੍ਸ ਲਹੁਪਰਿਵਤ੍ਤਿਤਾਯ ਅਨ੍ਤਰਨ੍ਤਰਾ ਕੋਪੇ ਉਪ੍ਪਨ੍ਨੇਪਿ ਅਨਾਪਤ੍ਤਿ ਅਲਜ੍ਜਿਤਾਦਿਪਚ੍ਚਯੇਨੇਵ ਨਿਕ੍ਕਡ੍ਢਨਸ੍ਸ ਆਰਦ੍ਧਤ੍ਤਾ. ਸਙ੍ਘਿਕਵਿਹਾਰੋ, ਉਪਸਮ੍ਪਨ੍ਨਸ੍ਸ ਭਣ੍ਡਨਕਾਰਕਭਾਵਾਦਿਵਿਨਿਮੁਤ੍ਤਤਾ, ਕੋਪੇਨ ਨਿਕ੍ਕਡ੍ਢਨਂ ਵਾ ਨਿਕ੍ਕਡ੍ਢਾਪਨਂ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਨਿਕ੍ਕਡ੍ਢਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੨੯. ਅਟ੍ਠਮਂ ¶ ਉਤ੍ਤਾਨਮੇਵ. ਸਙ੍ਘਿਕੋ ਵਿਹਾਰੋ, ਅਸੀਸਘਟ੍ਟਵੇਹਾਸਕੁਟਿ, ਹੇਟ੍ਠਾਪਰਿਭੋਗਤਾ, ਅਪਟਾਣਿਦਿਨ੍ਨੇ ਆਹਚ੍ਚਪਾਦਕੇ ਨਿਸੀਦਨਂ ਵਾ ਨਿਪਜ੍ਜਨਂ ਵਾਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਵੇਹਾਸਕੁਟਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਮਹਲ੍ਲਕਵਿਹਾਰਸਿਕ੍ਖਾਪਦਵਣ੍ਣਨਾ

੧੩੫. ਨਵਮੇ ¶ ‘‘ਮਹਲ੍ਲਕੋ ਨਾਮ ਵਿਹਾਰੋ ਸਸ੍ਸਾਮਿਕੋ’’ਤਿ ਵੁਤ੍ਤਤ੍ਤਾ ਸਞ੍ਞਾਚਿਕਾਯ ਕੁਟਿਯਾ ਅਨਾਪਤ੍ਤੀਤਿ ਵਦਨ੍ਤਿ. ਯਸ੍ਸਾਤਿ ਵਿਹਾਰਸ੍ਸ. ਸਾ ਅਪਰਿਪੂਰੂਪਚਾਰਾਪਿ ਹੋਤੀਤਿ ਵਿਵਰਿਯਮਾਨਂ ਕਵਾਟਂ ਯਂ ਭਿਤ੍ਤਿਂ ਆਹਨਤਿ, ਸਾ ਸਾਮਨ੍ਤਾ ਕਵਾਟਵਿਤ੍ਥਾਰਪ੍ਪਮਾਣਾ ਉਪਚਾਰਰਹਿਤਾਪਿ ਹੋਤੀਤਿ ਅਤ੍ਥੋ. ਆਲੋਕਂ ਵਾਤਪਾਨਂ ਸਨ੍ਧੇਤਿ ਘਟਯਤੀਤਿ ਆਲੋਕਸਨ੍ਧੀਤਿ ਕਵਾਟਂ ਵੁਚ੍ਚਤਿ. ਦ੍ਵਾਰਵਾਤਪਾਨੂਪਚਾਰਤੋ ਅਞ੍ਞਤ੍ਥ ਪੁਨਪ੍ਪੁਨਂ ਲਿਮ੍ਪਨਾਦਿਂ ਕਰੋਨ੍ਤਸ੍ਸ ਪਿਣ੍ਡਗਣਨਾਯ ਪਾਚਿਤ੍ਤਿਯਂ.

ਕੇਚਿ ਪਨ ‘‘ਪਾਲ਼ਿਯਂ ਪਾਚਿਤ੍ਤਿਯਸ੍ਸ ਅਵੁਤ੍ਤਤ੍ਤਾ ਦੁਕ੍ਕਟ’’ਨ੍ਤਿ ਵਦਨ੍ਤਿ. ਅਧਿਟ੍ਠਾਤਬ੍ਬਨ੍ਤਿ ਸਂਵਿਧਾਤਬ੍ਬਂ. ਹਰਿਤੇ ਠਿਤੋ ਅਧਿਟ੍ਠਾਤਿ. ਆਪਤ੍ਤਿ ਦੁਕ੍ਕਟਸ੍ਸਾਤਿ ਹਰਿਤਯੁਤ੍ਤੇ ਖੇਤ੍ਤੇ ਠਤ੍ਵਾ ਛਾਦੇਨ੍ਤਸ੍ਸ ਦੁਕ੍ਕਟਨ੍ਤਿ ਅਤ੍ਥੋ. ਕੇਚਿ ਪਨ ‘‘ਤਾਦਿਸੇ ਖੇਤ੍ਤੇ ਵਿਹਾਰਂ ਕਰੋਨ੍ਤਸ੍ਸ ਦੁਕ੍ਕਟ’’ਨ੍ਤਿ ਵਦਨ੍ਤਿ, ਤਂ ਪਾਲ਼ਿਯਾ ਨ ਸਮੇਤਿ.

੧੩੬. ਉਜੁਕਮੇਵ ਛਾਦਨਨ੍ਤਿ ਛਾਦਨਮੁਖਵਟ੍ਟਿਤੋ ਪਟ੍ਠਾਯ ਯਾਵ ਪਿਟ੍ਠਿਵਂਸਕੂਟਾਗਾਰਕਣ੍ਣਿਕਾਦਿ, ਤਾਵ ਇਟ੍ਠਕਾਦੀਹਿ ਉਜੁਕਂ ਛਾਦਨਂ. ਇਮਿਨਾ ਪਨ ਯੇਨ ਸਬ੍ਬਸ੍ਮਿਂ ਵਿਹਾਰੇ ਏਕਵਾਰਂ ਛਾਦਿਤੇ ਤਂ ਛਾਦਨਂ ਏਕਮਗ੍ਗਨ੍ਤਿ ਗਹੇਤ੍ਵਾ ਪਾਲ਼ਿਯਂ ‘‘ਦ੍ਵੇ ਮਗ੍ਗੇ’’ਤਿਆਦਿ ਵੁਤ੍ਤਂ. ਪਰਿਯਾਯੇਨ ਛਾਦਨਮ੍ਪਿ ਇਮਿਨਾਵ ਨਯੇਨ ਯੋਜੇਤਬ੍ਬਨ੍ਤਿ ਵਦਨ੍ਤਿ, ਤਂ ‘‘ਪੁਨਪ੍ਪੁਨਂ ਛਾਦਾਪੇਸੀ’’ਤਿ ਇਮਾਯ ਪਾਲ਼ਿਯਾ ਚ ‘‘ਸਬ੍ਬਮ੍ਪਿ ਚੇਤਂ ਛਦਨਂ ਛਦਨੂਪਰਿ ਵੇਦਿਤਬ੍ਬ’’ਨ੍ਤਿ ਇਮਿਨਾ ਅਟ੍ਠਕਥਾਵਚਨੇਨ ਚ ਸਮੇਤਿ.

ਪਾਲ਼ਿਯਂ ‘‘ਮਗ੍ਗੇਨ ਛਾਦੇਨ੍ਤਸ੍ਸ ਪਰਿਯਾਯੇਨ ਛਾਦੇਨ੍ਤਸ੍ਸਾ’’ਤਿ ਇਦਞ੍ਚ ਇਟ੍ਠਕਾਦੀਹਿ, ਤਿਣਪਣ੍ਣੇਹਿ ਚ ਛਾਦਨਪ੍ਪਕਾਰਭੇਦਦਸ੍ਸਨਤ੍ਥਂ ਵੁਤ੍ਤਂ. ਕੇਚਿ ਪਨ ‘‘ਪਨ੍ਤਿਯਾ ਛਾਦਿਤਸ੍ਸ ਛਦਨਸ੍ਸ ਉਪਰਿ ਛਦਨਮੁਖਵਟ੍ਟਿਤੋ ਪਟ੍ਠਾਯ ਉਦ੍ਧਂ ਉਜੁਕਮੇਵ ਏਕਵਾਰਂ ਛਾਦਨਂ ਏਕਮਗ੍ਗਨ੍ਤਿ ਗਹੇਤ੍ਵਾ ‘ਦ੍ਵੇ ਮਗ੍ਗੇ’ਤਿਆਦਿ ¶ ਵੁਤ੍ਤਂ, ਨ ਪਨ ਸਕਲਵਿਹਾਰਛਾਦਨਂ. ਏਸ ਨਯੋ ਪਰਿਯਾਯੇਨ ਛਾਦਨੇਪੀ’’ਤਿ ਵਦਨ੍ਤਿ, ਤਂ ਪਾਲ਼ਿਅਟ੍ਠਕਥਾਹਿ ਨ ਸਮੇਤਿ.

ਤਤਿਯਾਯ ਮਗ੍ਗਨ੍ਤਿ ਏਤ੍ਥ ਤਤਿਯਾਯਾਤਿ ਉਪਯੋਗਤ੍ਥੇ ਸਮ੍ਪਦਾਨਵਚਨਂ, ਤਤਿਯਂ ਮਗ੍ਗਨ੍ਤਿ ਅਤ੍ਥੋ. ਅਯਮੇਵ ਵਾ ਪਾਠੋ. ਤਿਣਪਣ੍ਣੇਹਿ ਲਬ੍ਭਤੀਤਿ ਤਿਣਪਣ੍ਣੇਹਿ ਛਾਦੇਤ੍ਵਾ ਉਪਰਿ ਉਲ੍ਲਿਤ੍ਤਾਵਲਿਤ੍ਤਕਰਣਂ ਸਨ੍ਧਾਯ ਵੁਤ੍ਤਂ. ਕੇਵਲਂ ¶ ਤਿਣਕੁਟਿਯਾ ਹਿ ਅਨਾਪਤ੍ਤਿ ਵੁਤ੍ਤਾ. ਤਿਣ੍ਣਂ ਮਗ੍ਗਾਨਨ੍ਤਿ ਮਗ੍ਗਵਸੇਨ ਛਾਦਿਤਾਨਂ ਤਿਣ੍ਣਂ ਛਦਨਾਨਂ. ਤਿਣ੍ਣਂ ਪਰਿਯਾਯਾਨਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਮਹਲ੍ਲਕਵਿਹਾਰਤਾ, ਅਤ੍ਤਨੋ ਵਾਸਾਗਾਰਤਾ, ਉਤ੍ਤਰਿ ਅਧਿਟ੍ਠਾਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਮਹਲ੍ਲਕਵਿਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੪੦. ਦਸਮੇ ਮਾਤਿਕਾਯਂ ਸਪ੍ਪਾਣਕਉਦਕਂ ਤਿਣੇਨ ਵਾ ਮਤ੍ਤਿਕਾਯ ਵਾ ਸਿਞ੍ਚੇਯ੍ਯ, ਛਡ੍ਡੇਯ੍ਯਾਤਿ ਅਤ੍ਥੋ. ਅਥ ਵਾ ਉਦਕਂ ਗਹੇਤ੍ਵਾ ਬਹਿ ਸਿਞ੍ਚੇਯ੍ਯ, ਤਸ੍ਮਿਞ੍ਚ ਉਦਕੇ ਤਿਣਂ ਵਾ ਮਤ੍ਤਿਕਂ ਵਾ ਆਹਰਿਤ੍ਵਾ ਪਕ੍ਖਿਪੇਯ੍ਯਾਤਿ ਅਜ੍ਝਾਹਰਿਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਤੇਨਾਹ ‘‘ਸਕਟਭਾਰਮਤ੍ਤਞ੍ਚੇਪੀ’’ਤਿਆਦਿ. ਇਦਨ੍ਤਿ ਤਿਣਮਤ੍ਤਿਕਪਕ੍ਖਿਪਨਵਿਧਾਨਂ. ਵੁਤ੍ਤਨ੍ਤਿ ਮਾਤਿਕਾਯਂ ‘‘ਤਿਣਂ ਵਾ ਮਤ੍ਤਿਕਂ ਵਾ’’ਤਿ ਏਵਂ ਵੁਤ੍ਤਂ, ਅਟ੍ਠਕਥਾਸੁ ਵਾ ਵੁਤ੍ਤਂ.

ਇਦਞ੍ਚ ਸਿਕ੍ਖਾਪਦਂ ਬਾਹਿਰਪਰਿਭੋਗਂ ਸਨ੍ਧਾਯ ਵਤ੍ਥੁਵਸੇਨ ਵੁਤ੍ਤਂ ਅਬ੍ਭਨ੍ਤਰਪਰਿਭੋਗਸ੍ਸ ਵਿਸੁਂ ਵਕ੍ਖਮਾਨਤ੍ਤਾ. ਤਦੁਭਯਮ੍ਪਿ ‘‘ਸਪ੍ਪਾਣਕ’’ਨ੍ਤਿ ਕਤ੍ਵਾ ਵਧਕਚਿਤ੍ਤਂ ਵਿਨਾਵ ਸਿਞ੍ਚਨੇ ਪਞ੍ਞਤ੍ਤਤ੍ਤਾ ‘‘ਪਣ੍ਣਤ੍ਤਿਵਜ੍ਜ’’ਨ੍ਤਿ ਵੁਤ੍ਤਂ. ਵਧਕਚਿਤ੍ਤੇ ਪਨ ਸਤਿ ਸਿਕ੍ਖਾਪਦਨ੍ਤਰੇਨੇਵ ਪਾਚਿਤ੍ਤਿਯਂ, ਨ ਇਮਿਨਾਤਿ ਦਟ੍ਠਬ੍ਬਂ. ਉਦਕਸ੍ਸ ਸਪ੍ਪਾਣਕਤਾ, ‘‘ਸਿਞ੍ਚਨੇਨ ਪਾਣਕਾ ਮਰਿਸ੍ਸਨ੍ਤੀ’’ਤਿ ਜਾਨਨਂ, ਤਾਦਿਸਮੇਵ ਚ ਉਦਕਂ ਵਿਨਾ ਵਧਕਚੇਤਨਾਯ ਕੇਨਚਿਦੇਵ ਕਰਣੀਯੇਨ ਤਿਣਾਦੀਨਂ ਸਿਞ੍ਚਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

‘‘ਭੂਤਗਾਮਵਗ੍ਗੋ’’ਤਿਪਿ ਏਤਸ੍ਸੇਵ ਨਾਮਂ.

੧੪੪. ਤਤਿਯਵਗ੍ਗਸ੍ਸ ¶ ¶ ਪਠਮੇ ਤਿਰਚ੍ਛਾਨਭੂਤਨ੍ਤਿ ਤਿਰੋਕਰਣਭੂਤਂ, ਬਾਹਿਰਭੂਤਨ੍ਤਿ ਅਤ੍ਥੋ. ਸਮਿਦ੍ਧੋਤਿ ਪਰਿਪੁਣ੍ਣੋ. ਸਹਿਤਤ੍ਥੋ ਅਤ੍ਥਯੁਤ੍ਤੋ. ਅਤ੍ਥਗਮ੍ਭੀਰਤਾਦਿਨਾ ਗਮ੍ਭੀਰੋ.

੧੪੫-੧੪੭. ਪਰਤੋਤਿ ਉਤ੍ਤਰਿ. ਕਰੋਨ੍ਤੋਵਾਤਿ ਪਰਿਬਾਹਿਰੇ ਕਰੋਨ੍ਤੋ. ਵਿਭਙ੍ਗੇਤਿ ਝਾਨਵਿਭਙ੍ਗੇ. ਚਰਣਨ੍ਤਿ ਨਿਬ੍ਬਾਨਗਮਨਾਯ ਪਾਦਂ.

ਯਦਸ੍ਸਾਤਿ ਯਂ ਅਸ੍ਸ. ਧਾਰੇਤੀਤਿ ਅਵਿਨਸ੍ਸਮਾਨਂ ਧਾਰੇਤਿ. ਪਰਿਕਥਨਤ੍ਥਨ੍ਤਿ ਪਕਿਣ੍ਣਕਕਥਾਵਸੇਨ ਪਰਿਚ੍ਛਿਨ੍ਨਧਮ੍ਮਕਥਨਤ੍ਥਂ. ਤਿਸ੍ਸੋ ਅਨੁਮੋਦਨਾਤਿ ਸਙ੍ਘਭਤ੍ਤਾਦੀਸੁ ਦਾਨਾਨਿਸਂਸਪ੍ਪਟਿਸਂਯੁਤ੍ਤਾ ਨਿਧਿਕੁਣ੍ਡਸੁਤ੍ਤਾਦਿ (ਖੁ. ਪਾ. ੮.੧ ਆਦਯੋ) -ਅਨੁਮੋਦਨਾ, ਗੇਹਪ੍ਪਵੇਸਮਙ੍ਗਲਾਦੀਸੁ ਮਙ੍ਗਲਸੁਤ੍ਤਾਦਿ (ਖੁ. ਪਾ. ੫.੧ ਆਦਯੋ; ਸੁ. ਨਿ. ਮਙ੍ਗਲਸੁਤ੍ਤ) -ਅਨੁਮੋਦਨਾ, ਮਤਕਭਤ੍ਤਾਦਿਅਮਙ੍ਗਲੇਸੁ ਤਿਰੋਕੁਟ੍ਟਾਦਿ (ਖੁ. ਪਾ. ੭.੧ ਆਦਯੋ; ਪੇ. ਵ. ੧੪ ਆਦਯੋ) -ਅਨੁਮੋਦਨਾਤਿ ਇਮਾ ਤਿਸ੍ਸੋ ਅਨੁਮੋਦਨਾ. ਕਮ੍ਮਾਕਮ੍ਮਵਿਨਿਚ੍ਛਯੋਤਿ ਪਰਿਵਾਰਾਵਸਾਨੇ ਕਮ੍ਮਵਗ੍ਗੇ (ਪਰਿ. ੪੮੨ ਆਦਯੋ) ਵੁਤ੍ਤਵਿਨਿਚ੍ਛਯੋ. ਸਮਾਧਿਵਸੇਨਾਤਿ ਸਮਥਪੁਬ੍ਬਕਵਸੇਨ. ਵਿਪਸ੍ਸਨਾਵਸੇਨ ਵਾਤਿ ਦਿਟ੍ਠਿਵਿਸੁਦ੍ਧਿਆਦਿਕਾਯ ਸੁਕ੍ਖਵਿਪਸ੍ਸਨਾਯ ਵਸੇਨ. ਅਤ੍ਤਨੋ ਸੀਲਰਕ੍ਖਣਤ੍ਥਂ ਅਪਰਾਨਪੇਕ੍ਖਤਾਯ ਯੇਨ ਕਾਮਂ ਗਨ੍ਤੁਂ ਚਤਸ੍ਸੋ ਦਿਸਾ ਅਰਹਤਿ, ਅਸ੍ਸ ਵਾ ਸਨ੍ਤਿ, ਤਾਸੁ ਵਾ ਸਾਧੂਤਿ ਚਾਤੁਦ੍ਦਿਸੋ.

ਅਭਿਵਿਨਯੇਤਿ ਪਾਤਿਮੋਕ੍ਖਸਂਵਰਸਙ੍ਖਾਤੇ ਸਂਵਰਵਿਨਯੇ, ਤਪ੍ਪਕਾਸਕੇ ਵਾ ਵਿਨਯਪਿਟਕੇ. ਵਿਨੇਤੁਨ੍ਤਿ ਸਿਕ੍ਖਾਪੇਤੁਂ ਪਕਾਸੇਤੁਂ. ਪਗੁਣਾ ਵਾਚੁਗ੍ਗਤਾਤਿ ਪਾਠਤੋ ਚ ਅਤ੍ਥਤੋ ਚ ਪਗੁਣਾ ਮੁਖੇ ਸਨ੍ਨਿਧਾਪਨਵਸੇਨ ਵਾਚੁਗ੍ਗਤਾ ਕਾਤਬ੍ਬਾ. ਅਤ੍ਥਮਤ੍ਤਵਸੇਨਪੇਤ੍ਥ ਯੋਜਨਂ ਕਰੋਨ੍ਤਿ. ਅਭਿਧਮ੍ਮੇਤਿ ਲਕ੍ਖਣਰਸਾਦਿਵਸੇਨ ਪਰਿਚ੍ਛਿਨ੍ਨੇ ਨਾਮਰੂਪਧਮ੍ਮੇ. ਪੁਬ੍ਬੇ ਕਿਰ ਮਹਾਥੇਰਾ ਪਰਿਯਤ੍ਤਿਅਨਨ੍ਤਰਧਾਨਾਯ ਏਕੇਕਸ੍ਸ ਗਣਸ੍ਸ ਦੀਘਨਿਕਾਯਾਦਿਏਕੇਕਧਮ੍ਮਕੋਟ੍ਠਾਸਂ ਨਿਯ੍ਯਾਤੇਨ੍ਤਾ ‘‘ਤੁਮ੍ਹੇ ਏਤਂ ਪਾਲ਼ਿਤੋ ਚ ਅਟ੍ਠਕਥਾਤੋ ਚ ਪਰਿਹਰਥ, ਸਕ੍ਕੋਨ੍ਤਾ ਉਤ੍ਤਰਿਪਿ ਉਗ੍ਗਣ੍ਹਥਾ’’ਤਿ ਏਵਂ ਸਕਲਧਮ੍ਮਂ ਗਨ੍ਥਵਸੇਨ ਨਿਯ੍ਯਾਤੇਨ੍ਤਿ, ਤਤ੍ਥ ਤੇ ਚ ਭਿਕ੍ਖੂ ਗਨ੍ਥਨਾਮੇਨ ਦੀਘਭਾਣਕਾ ਮਜ੍ਝਿਮਭਾਣਕਾਤਿ ਵੋਹਰੀਯਨ੍ਤਿ, ਤੇ ਚ ¶ ਅਤ੍ਤਨੋ ਭਾਰਭੂਤਂ ਕੋਟ੍ਠਾਸਂ ਪਰਿਚ੍ਚਜਿਤ੍ਵਾ ਅਞ੍ਞਂ ¶ ਉਗ੍ਗਹੇਤੁਂ ਨ ਲਭਨ੍ਤਿ. ਤਂ ਸਨ੍ਧਾਯਾਹ ‘‘ਸਚੇ ਮਜ੍ਝਿਮਭਾਣਕੋ ਹੋਤੀ’’ਤਿਆਦਿ.

ਤਤ੍ਥ ਹੇਟ੍ਠਿਮਾ ਵਾ ਤਯੋ ਵਗ੍ਗਾਤਿ ਮਹਾਵਗ੍ਗਤੋ ਹੇਟ੍ਠਿਮਾ ਸਗਾਥਕਵਗ੍ਗੋ (ਸਂ. ਨਿ. ੧.੧ ਆਦਯੋ), ਨਿਦਾਨਵਗ੍ਗੋ (ਸਂ. ਨਿ. ੨.੧ ਆਦਯੋ), ਖਨ੍ਧਵਗ੍ਗੋਤਿ (ਸਂ. ਨਿ. ੩.੧ ਆਦਿਯੋ) ਇਮੇ ਤਯੋ ਵਗ੍ਗਾ. ਤਿਕਨਿਪਾਤਤੋ ਪਟ੍ਠਾਯ ਹੇਟ੍ਠਾਤਿ ਏਕਕਨਿਪਾਤਦੁਕਨਿਪਾਤੇ ਸਨ੍ਧਾਯ ਵੁਤ੍ਤਂ. ਧਮ੍ਮਪਦਮ੍ਪਿ ਸਹ ਵਤ੍ਥੁਨਾ ਜਾਤਕਭਾਣਕੇਨ ਅਤ੍ਤਨੋ ਜਾਤਕੇਨ ਸਦ੍ਧਿਂ ਉਗ੍ਗਹੇਤਬ੍ਬਂ. ਤਤੋ ਓਰਂ ਨ ਵਟ੍ਟਤੀਤਿ ਮਹਾਪਚ੍ਚਰਿਵਾਦਸ੍ਸ ਅਧਿਪ੍ਪਾਯੋ. ਤਤੋ ਤਤੋਤਿ ਦੀਘਨਿਕਾਯਾਦਿਤੋ. ਉਚ੍ਚਿਨਿਤ੍ਵਾ ਉਗ੍ਗਹਿਤਂ ਸਦ੍ਧਮ੍ਮਸ੍ਸ ਠਿਤਿਯਾ, ਭਿਕ੍ਖੁਨੋਪਿ ਪੁਬ੍ਬਾਪਰਾਨੁਸਨ੍ਧਿਆਦਿਕੁਸਲਤਾਯ ਚ ਨ ਹੋਤੀਤਿ ‘‘ਤਂ ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤਂ. ਅਭਿਧਮ੍ਮੇ ਕਿਞ੍ਚਿ ਉਗ੍ਗਹੇਤਬ੍ਬਨ੍ਤਿ ਨ ਵੁਤ੍ਤਨ੍ਤਿ ਏਤ੍ਥ ਯਸ੍ਮਾ ਵਿਨਯੇ ਕੁਸਲਤ੍ਤਿਕਾਦਿਵਿਭਾਗੋ, ਸੁਤ੍ਤਨ੍ਤੇਸੁ ਸਮਥਵਿਪਸ੍ਸਨਾਮਗ੍ਗੋ ਚ ਅਭਿਧਮ੍ਮਪਾਠਂ ਵਿਨਾ ਨ ਵਿਞ੍ਞਾਯਤਿ, ਅਨ੍ਧਕਾਰੇ ਪਵਿਟ੍ਠਕਾਲੋ ਵਿਯ ਹੋਤਿ, ਤਸ੍ਮਾ ਸੁਤ੍ਤਵਿਨਯਾਨਂ ਗਹਣਵਸੇਨ ਅਭਿਧਮ੍ਮਗ੍ਗਹਣਂ ਵੁਤ੍ਤਮੇਵਾਤਿ ਵਿਸੁਂ ਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਯਥਾ ‘‘ਭੋਜਨਂ ਭੁਞ੍ਜਿਤਬ੍ਬ’’ਨ੍ਤਿ ਵੁਤ੍ਤੇ ‘‘ਬ੍ਯਞ੍ਜਨਂ ਖਾਦਿਤਬ੍ਬ’’ਨ੍ਤਿ ਅਵੁਤ੍ਤਮ੍ਪਿ ਵੁਤ੍ਤਮੇਵ ਹੋਤਿ ਤਦਵਿਨਾਭਾਵਤੋ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ.

ਪਰਿਮਣ੍ਡਲਪਦਬ੍ਯਞ੍ਜਨਾਯਾਤਿ ਪਰਿਮਣ੍ਡਲਾਨਿ ਪਰਿਪੁਣ੍ਣਾਨਿ ਪਦੇਸੁ ਸਿਥਿਲਧਨਿਤਾਦਿਬ੍ਯਞ੍ਜਨਾਨਿ ਯਸ੍ਸਂ, ਤਾਯ. ਪੁਰਸ੍ਸ ਏਸਾਤਿ ਪੋਰੀ, ਨਗਰਵਾਸੀਨਂ ਕਥਾਤਿ ਅਤ੍ਥੋ. ਅਨੇਲਗਲ਼ਾਯਾਤਿ ਏਤ੍ਥ ਏਲਾਤਿ ਖੇਲ਼ਂ ਤਗ੍ਗਲ਼ਨਵਿਰਹਿਤਾਯ. ਕਲ੍ਯਾਣਵਾਕ੍ਕਰਣੋਤਿ ਏਤ੍ਥ ਵਾਚਾ ਏਵ ਵਾਕ੍ਕਰਣਂ, ਉਦਾਹਰਣਘੋਸੋ. ਕਲ੍ਯਾਣਂ ਮਧੁਰਂ ਵਾਕ੍ਕਰਣਮਸ੍ਸਾਤਿ ਕਲ੍ਯਾਣਵਾਕ੍ਕਰਣੋ. ਉਪਸਮ੍ਪਨ੍ਨਾਯ ਮੇਥੁਨੇਨੇਵ ਅਭਬ੍ਬੋ ਹੋਤਿ, ਨ ਸਿਕ੍ਖਮਾਨਾਸਾਮਣੇਰੀਸੂਤਿ ਆਹ ‘‘ਭਿਕ੍ਖੁਨਿਯਾ ਕਾਯਸਂਸਗ੍ਗਂ ਵਾ’’ਤਿਆਦਿ.

੧੪੮. ਗਰੁਕੇਹੀਤਿ ਗਰੁਕਭਣ੍ਡੇਹਿ. ਏਕਤੋਉਪਸਮ੍ਪਨ੍ਨਾਯਾਤਿ ਉਪਯੋਗਤ੍ਥੇ ਭੁਮ੍ਮਵਚਨਂ. ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾ ਨਾਮ ਪਰਿਵਤ੍ਤਲਿਙ੍ਗਾ ਵਾ ਪਞ੍ਚਸਤਸਾਕਿਯਾਨਿਯੋ ਵਾ. ਏਤਾ ਪਨ ਏਕਤੋਉਪਸਮ੍ਪਨ੍ਨਾ ਓਵਦਨ੍ਤਸ੍ਸ ਪਾਚਿਤ੍ਤਿਯਮੇਵ.

੧੪੯. ਨ ਨਿਮਨ੍ਤਿਤਾ ਹੁਤ੍ਵਾ ਗਨ੍ਤੁਕਾਮਾਤਿ ਨਿਮਨ੍ਤਿਤਾ ਹੁਤ੍ਵਾ ਭੋਜਨਪਰਿਯੋਸਾਨੇ ਗਨ੍ਤੁਕਾਮਾ ਨ ਹੋਨ੍ਤਿ, ਤਤ੍ਥੇਵ ਵਸਿਤੁਕਾਮਾ ਹੋਨ੍ਤੀਤਿ ¶ ਅਤ੍ਥੋ. ਯਤੋਤਿ ਭਿਕ੍ਖੁਨੁਪਸ੍ਸਯਤੋ. ਯਾਚਿਤ੍ਵਾਤਿ ‘‘ਤੁਮ੍ਹੇਹਿ ਆਨੀਤਓਵਾਦੇਨੇਵ ਮਯਮ੍ਪਿ ਵਸਿਸ੍ਸਾਮਾ’’ਤਿ ਯਾਚਿਤ੍ਵਾ. ਤਤ੍ਥਾਤਿ ਤਸ੍ਮਿਂ ਭਿਕ੍ਖੁਨੁਪਸ੍ਸਯੇ. ਅਭਿਕ੍ਖੁਕਾਵਾਸੇ ਵਸ੍ਸਂ ਵਸਨ੍ਤਿਯਾ ਪਾਚਿਤ੍ਤਿਯਂ, ਅਪਗਚ੍ਛਨ੍ਤਿਯਾ ਦੁਕ੍ਕਟਂ.

ਇਮਾਸੁ ¶ ਕਤਰਾਪਤ੍ਤਿ ਪਰਿਹਰਿਤਬ੍ਬਾਤਿ ਚੋਦਨਂ ਪਰਿਹਰਨ੍ਤੋ ਆਹ ‘‘ਸਾ ਰਕ੍ਖਿਤਬ੍ਬਾ’’ਤਿ. ਸਾ ਵਸ੍ਸਾਨੁਗਮਨਮੂਲਿਕਾ ਆਪਤ੍ਤਿ ਰਕ੍ਖਿਤਬ੍ਬਾ, ਇਤਰਾਯ ਅਨਾਪਤ੍ਤਿਕਾਰਣਂ ਅਤ੍ਥੀਤਿ ਅਧਿਪ੍ਪਾਯੋ. ਤੇਨਾਹ ‘‘ਆਪਦਾਸੁ ਹੀ’’ਤਿਆਦਿ.

ਓਵਾਦਤ੍ਥਾਯਾਤਿ ਓਵਾਦੇ ਯਾਚਨਤ੍ਥਾਯ. ਦ੍ਵੇ ਤਿਸ੍ਸੋਤਿ ਦ੍ਵੀਹਿ ਤੀਹਿ, ਕਰਣਤ੍ਥੇ ਚੇਤਂ ਪਚ੍ਚਤ੍ਤਵਚਨਂ. ਪਾਸਾਦਿਕੇਨਾਤਿ ਪਸਾਦਜਨਕੇਨ ਕਾਯਕਮ੍ਮਾਦਿਨਾ. ਸਮ੍ਪਾਦੇਤੂਤਿ ਤਿਵਿਧਂ ਸਿਕ੍ਖਂ ਸਮ੍ਪਾਦੇਤੁ. ਅਸਮ੍ਮਤਤਾ, ਭਿਕ੍ਖੁਨਿਯਾ ਪਰਿਪੁਣ੍ਣੂਪਸਮ੍ਪਨ੍ਨਤਾ, ਓਵਾਦਵਸੇਨ ਅਟ੍ਠਗਰੁਧਮ੍ਮਦਾਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਓਵਾਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੫੩. ਦੁਤਿਯੇ ਕੋਕਨਦਨ੍ਤਿ ਪਦੁਮਵਿਸੇਸਂ, ਤਂ ਕਿਰ ਬਹੁਪਤ੍ਤਂ ਵਣ੍ਣਸਮ੍ਪਨ੍ਨਂ. ਅਯਞ੍ਹੇਤ੍ਥ ਅਤ੍ਥੋ – ਯਥਾ ਕੋਕਨਦਸਙ੍ਖਾਤਂ ਪਦੁਮਂ, ਏਵਂ ਫੁਲ੍ਲਮੁਖਪਦੁਮਂ ਅਵੀਤਗੁਣਗਨ੍ਧਂ ਨਿਮ੍ਮਲੇ ਅਨ੍ਤਲਿਕ੍ਖੇ ਆਦਿਚ੍ਚਂ ਵਿਯ ਚ ਅਤ੍ਤਨੋ ਤੇਜਸਾ ਤਪਨ੍ਤਂ ਤਤੋ ਏਵ ਵਿਰੋਚਮਾਨਂ ਅਙ੍ਗੇਹਿ ਨਿਚ੍ਛਰਣਕਜੁਤਿਯਾ ਅਙ੍ਗੀਰਸਂ ਸਮ੍ਮਾਸਮ੍ਬੁਦ੍ਧਂ ਪਸ੍ਸਾਤਿ. ਰਜੋਹਰਣਨ੍ਤਿ ਸਰੀਰੇ ਰਜਂ ਪੁਞ੍ਛਤੀਤਿ ਰਜੋਹਰਣਨ੍ਤਿ ਪੁਞ੍ਛਨਚੋਲ਼ਸ੍ਸ ਨਾਮਂ. ਓਭਾਸਵਿਸ੍ਸਜ੍ਜਨਪੁਬ੍ਬਕਾ ਭਾਸਿਤਗਾਥਾ ਓਭਾਸਗਾਥਾ ਨਾਮ. ਵਿਸੁਦ੍ਧਿਮਗ੍ਗਾਦੀਸੁ (ਵਿਸੁਦ੍ਧਿ. ੨.੩੮੬) ਪਨ ‘‘ਰਾਗੋ ਰਜੋ ਨ ਚ ਪਨ ਰੇਣੁ ਵੁਚ੍ਚਤੀ’’ਤਿਆਦਿ ਓਭਾਸਗਾਥਾ ਵੁਤ੍ਤਾ, ਨ ਪਨੇਸਾ ‘‘ਅਧਿਚੇਤਸੋ’’ਤਿ ਗਾਥਾ. ਅਯਞ੍ਚ ਚੂਲ਼ਪਨ੍ਥਕਤ੍ਥੇਰਸ੍ਸ ਉਦਾਨਗਾਥਾਤਿ ਉਦਾਨਪਾਲ਼ਿਯਂ ਨਤ੍ਥਿ, ਏਕੁਦਾਨਿਯਤ੍ਥੇਰਸ੍ਸ (ਥੇਰਗਾ. ੧.੬੭ ਏਕੁਦਾਨਿਯਤ੍ਥੇਰਗਾਥਾਵਣ੍ਣਨਾ) ਨਾਯਂ ਉਦਾਨਗਾਥਾਤਿ ਤਤ੍ਥ ਵੁਤ੍ਤਂ. ਇਧ ਪਨ ਪਾਲ਼ਿਯਾ ਏਵ ਵੁਤ੍ਤਤ੍ਤਾ ਥੇਰਸ੍ਸਾਪਿ ਉਦਾਨਗਾਥਾਤਿ ਗਹੇਤਬ੍ਬਂ. ਇਧ ਚ ਅਗਰੁਧਮ੍ਮੇਨਾਪਿ ਓਵਦਤੋ ¶ ਪਾਚਿਤ੍ਤਿਯਮੇਵ. ਅਤ੍ਥਙ੍ਗਤਸੂਰਿਯਤਾ, ਪਰਿਪੁਣ੍ਣੂਪਸਮ੍ਪਨ੍ਨਤਾ, ਓਵਦਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਅਤ੍ਥਙ੍ਗਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਭਿਕ੍ਖੁਨੁਪਸ੍ਸਯਸਿਕ੍ਖਾਪਦਵਣ੍ਣਨਾ

੧੬੨. ਤਤਿਯਂ ¶ ਉਤ੍ਤਾਨਮੇਵ. ਉਪਸ੍ਸਯੂਪਗਮਨਂ, ਪਰਿਪੁਣ੍ਣੂਪਸਮ੍ਪਨ੍ਨਤਾ, ਸਮਯਾਭਾਵੋ, ਗਰੁਧਮ੍ਮੇਹਿ ਓਵਦਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਭਿਕ੍ਖੁਨੁਪਸ੍ਸਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੬੪. ਚਤੁਤ੍ਥੇ ਆਮਿਸਨਿਰਪੇਕ੍ਖਮ੍ਪਿ ਆਮਿਸਹੇਤੁ ਓਵਦਤੀਤਿਸਞ੍ਞਾਯ ਭਣਨ੍ਤਸ੍ਸਪਿ ਅਨਾਪਤ੍ਤਿ ਸਚਿਤ੍ਤਕਤ੍ਤਾ ਸਿਕ੍ਖਾਪਦਸ੍ਸ. ਸੇਸਮੇਤ੍ਥ ਉਤ੍ਤਾਨਮੇਵ. ਉਪਸਮ੍ਪਨ੍ਨਤਾ, ਧਮ੍ਮੇਨ ਲਦ੍ਧਸਮ੍ਮੁਤਿਤਾ, ਅਨਾਮਿਸਨ੍ਤਰਤਾ, ਅਵਣ੍ਣਕਾਮਤਾਯ ਏਵਂ ਭਣਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਆਮਿਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੬੯. ਪਞ੍ਚਮਂ ਚੀਵਰਦਾਨਸਿਕ੍ਖਾਪਦਂ ਉਤ੍ਤਾਨਮੇਵ.

੧੭੬. ਛਟ੍ਠੇ ਕਥਿਨਵਤ੍ਤਨ੍ਤਿ ਕਥਿਨਮਾਸੇ ਚੀਵਰਂ ਕਰੋਨ੍ਤਾਨਂ ਸਬ੍ਰਹ੍ਮਚਾਰੀਨਂ ਸਹਾਯਭਾਵੂਪਗਮਨਂ ਸਨ੍ਧਾਯ ਵੁਤ੍ਤਂ. ਵਞ੍ਚੇਤ੍ਵਾਤਿ ‘‘ਤਵ ਞਾਤਿਕਾਯਾ’’ਤਿ ਅਵਤ੍ਵਾ ‘‘ਏਕਿਸ੍ਸਾ ਭਿਕ੍ਖੁਨਿਯਾ’’ਤਿ ਏਤ੍ਤਕਮੇਵ ਵਤ੍ਵਾ ‘‘ਏਕਿਸ੍ਸਾ ਭਿਕ੍ਖੁਨਿਯਾ’’ਤਿ ਸੁਤ੍ਵਾ ਤੇ ਅਞ੍ਞਾਤਿਕਸਞ੍ਞਿਨੋ ਅਹੇਸੁਨ੍ਤਿ ਆਹ ‘‘ਅਕਪ੍ਪਿਯੇ ਨਿਯੋਜਿਤਤ੍ਤਾ’’ਤਿ. ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਸਨ੍ਤਕਤਾ, ਨਿਵਾਸਨਪਾਰੁਪਨੂਪਗਤਾ, ਵੁਤ੍ਤਨਯੇਨ ਸਿਬ੍ਬਨਂ ਵਾ ਸਿਬ੍ਬਾਪਨਂ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਚੀਵਰਸਿਬ੍ਬਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੮੩. ਸਤ੍ਤਮੇ ¶ ਪਾਲ਼ਿਯਂ ਗਚ੍ਛਾਮ ਭਗਿਨਿ ਗਚ੍ਛਾਮਾਯ੍ਯਾਤਿ ਭਿਕ੍ਖੁਪੁਬ੍ਬਕਂ ਸਂਵਿਧਾਨਂ, ਇਤਰਂ ਭਿਕ੍ਖੁਨਿਪੁਬ੍ਬਕਂ ¶ . ਏਕਦ੍ਧਾਨਮਗ੍ਗਨ੍ਤਿ ਏਕਤੋ ਅਦ੍ਧਾਨਸਙ੍ਖਾਤਂ ਮਗ੍ਗਂ. ਹਿਯ੍ਯੋਤਿ ਸੁਵੇ. ਪਰੇਤਿ ਤਤਿਯੇ ਦਿਵਸੇ.

ਦ੍ਵਿਧਾ ਵੁਤ੍ਤਪ੍ਪਕਾਰੋਤਿ ਪਾਦਗਮਨੇ ਪਕ੍ਖਗਮਨੇਤਿ ਦ੍ਵਿਧਾ ਵੁਤ੍ਤਪ੍ਪਕਾਰੋ. ਉਪਚਾਰੋ ਨ ਲਬ੍ਭਤੀਤਿ ਯੋ ਪਰਿਕ੍ਖਿਤ੍ਤਾਦਿਗਾਮਸ੍ਸ ਏਕਲੇਡ੍ਡੁਪਾਤਾਦਿਉਪਚਾਰੋ ਵੁਤ੍ਤੋ, ਸੋ ਇਧ ਨ ਲਬ੍ਭਤਿ ਆਸਨ੍ਨਤ੍ਤਾ. ਏਤੇਨ ਚ ਅਨ੍ਤਰਘਰੇਯੇਵੇਤ੍ਥ ਗਾਮੋਤਿ ਅਧਿਪ੍ਪੇਤੋ, ਨ ਸਕਲਂ ਗਾਮਖੇਤ੍ਤਂ. ਤਤ੍ਥਾਪਿ ਯਤ੍ਥ ਉਪਚਾਰੋ ਲਬ੍ਭਤਿ, ਤਤ੍ਥ ਉਪਚਾਰੋਕ੍ਕਮਨੇ ਏਵ ਆਪਤ੍ਤੀਤਿ ਦਸ੍ਸੇਤਿ. ਤੇਨਾਹ ‘‘ਰਤਨਮਤ੍ਤਨ੍ਤਰੋ’’ਤਿਆਦਿ. ਉਪਚਾਰੋਕ੍ਕਮਨਞ੍ਚੇਤ੍ਥ ਉਪਚਾਰਬ੍ਭਨ੍ਤਰੇ ਪਵਿਸਨਮੇਵ ਹੋਤਿ. ਤਤ੍ਥ ਅਪ੍ਪਵਿਸਿਤ੍ਵਾਪਿ ਉਪਚਾਰਤੋ ਬਹਿ ਅਦ੍ਧਯੋਜਨਬ੍ਭਨ੍ਤਰਗਤੇਨ ਮਗ੍ਗੇਨ ਗਚ੍ਛਨ੍ਤੋਪਿ ਮਗ੍ਗਸ੍ਸ ਦ੍ਵੀਸੁ ਪਸ੍ਸੇਸੁ ਅਦ੍ਧਯੋਜਨਬ੍ਭਨ੍ਤਰਗਤਂ ਗਾਮੂਪਚਾਰਂ ਸਬ੍ਬਂ ਓਕ੍ਕਮਿਤ੍ਵਾ ਗਚ੍ਛਤਿਚ੍ਚੇਵ ਵੁਚ੍ਚਤਿ. ਅਦ੍ਧਯੋਜਨਤੋ ਬਹਿ ਗਤੇਨ ਮਗ੍ਗੇਨ ਗਚ੍ਛਨ੍ਤੋ ਨ ਗਾਮੂਪਚਾਰਗਣਨਾਯ ਕਾਰੇਤਬ੍ਬੋ, ਅਦ੍ਧਯੋਜਨਗਣਨਾਯੇਵ ਕਾਰੇਤਬ੍ਬੋ. ਏਵਞ੍ਚ ਸਤਿ ਅਨਨ੍ਤਰਸਿਕ੍ਖਾਪਦੇ ਨਾਵਾਯੇਵ ਗਾਮਤੀਰਪਸ੍ਸੇਨ ਗਚ੍ਛਨ੍ਤਸ੍ਸ ਗਾਮੂਪਚਾਰਗਣਨਾਯ ਆਪਤ੍ਤਿ ਸਮਤ੍ਥਿਤਾ ਹੋਤਿ. ਨ ਹਿ ਸਕ੍ਕਾ ਨਾਵਾਯ ਗਾਮੂਪਚਾਰਬ੍ਭਨ੍ਤਰੇ ਪਵਿਸਿਤੁਂ. ਤਿਣ੍ਣਂ ਮਗ੍ਗਾਨਂ ਸਮ੍ਬਨ੍ਧਟ੍ਠਾਨਂ ਸਿਙ੍ਘਾਟਕਂ. ਏਤ੍ਥਨ੍ਤਰੇ ਸਂਵਿਦਹਿਤੇਤਿ ਏਤ੍ਥ ਨ ਕੇਵਲਂ ਯਥਾਵੁਤ੍ਤਰਥਿਕਾਦੀਸੁ ਏਵ ਸਂਵਿਦਹਨੇ ਦੁਕ੍ਕਟਂ, ਅਨ੍ਤਰਾਮਗ੍ਗੇਪੀਤਿ ਅਧਿਪ੍ਪਾਯੋ.

ਅਦ੍ਧਯੋਜਨਂ ਅਤਿਕ੍ਕਮਨ੍ਤਸ੍ਸਾਤਿ ਅਸਤਿ ਗਾਮੇ ਅਦ੍ਧਯੋਜਨਂ ਅਤਿਕ੍ਕਮਨ੍ਤਸ੍ਸ. ਯਸ੍ਮਿਞ੍ਹਿ ਗਾਮਖੇਤ੍ਤਭੂਤੇਪਿ ਅਰਞ੍ਞੇ ਅਦ੍ਧਯੋਜਨਬ੍ਭਨ੍ਤਰੇ ਗਾਮੋ ਨ ਹੋਤਿ, ਤਮ੍ਪਿ ਇਧ ਅਗਾਮਕਂ ਅਰਞ੍ਞਨ੍ਤਿ ਅਧਿਪ੍ਪੇਤਂ, ਨ ਵਿਞ੍ਝਾਟਵਾਦਯੋ.

੧੮੫. ਰਟ੍ਠਭੇਦੇਤਿ ਰਟ੍ਠਵਿਲੋਪੇ. ਚਕ੍ਕਸਮਾਰੁਲ਼੍ਹਾਤਿ ਇਰਿਯਾਪਥਚਕ੍ਕਂ, ਸਕਟਚਕ੍ਕਂ ਵਾ ਸਮਾਰੁਲ਼੍ਹਾ. ਦ੍ਵਿਨ੍ਨਮ੍ਪਿ ਸਂਵਿਦਹਿਤ੍ਵਾ ਮਗ੍ਗਪ੍ਪਟਿਪਤ੍ਤਿ, ਅਵਿਸਙ੍ਕੇਤਂ, ਸਮਯਾਭਾਵੋ, ਅਨਾਪਦਾ, ਗਾਮਨ੍ਤਰੋਕ੍ਕਮਨਂ ਵਾ ਅਦ੍ਧਯੋਜਨਾਤਿਕ੍ਕਮੋ ਵਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਏਕਤੋਉਪਸਮ੍ਪਨ੍ਨਾਦੀਹਿ ਸਦ੍ਧਿਂ ਸਂਵਿਧਾਯ ਗਚ੍ਛਨ੍ਤਸ੍ਸ ਪਨ ਮਾਤੁਗਾਮਸਿਕ੍ਖਾਪਦੇਨ ਆਪਤ੍ਤਿ.

ਸਂਵਿਧਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੮੯. ਅਟ੍ਠਮੇ ¶ ਏਕਂ ਤੀਰਂ…ਪੇ… ਨਿਰਨ੍ਤਰਨ੍ਤਿ ਨਦਿਤੋ ਅਦ੍ਧਯੋਜਨਬ੍ਭਨ੍ਤਰੇ ਪਦੇਸੇ ਨਿਵਿਟ੍ਠਗਾਮੇਹਿ ¶ ਨਿਰਨ੍ਤਰਤਾ ਵੁਤ੍ਤਾ. ਏਕਂ ਅਗਾਮਕਂ ਅਰਞ੍ਞਨ੍ਤਿ ਤਥਾ ਨਿਵਿਟ੍ਠਗਾਮਾਭਾਵੇਨ ਵੁਤ੍ਤਂ. ਅਗਾਮਕਤੀਰਪਸ੍ਸੇਨਾਤਿਆਦਿ ਪਨ ਅਤਿਰੇਕਅਦ੍ਧਯੋਜਨਵਿਤ੍ਥਤਂ ਨਦਿਂ ਸਨ੍ਧਾਯ ਵੁਤ੍ਤਂ. ਤਤੋ ਊਨਵਿਤ੍ਥਾਰਾਯ ਹਿ ਨਦਿਯਾ ਮਜ੍ਝੇਨਾਪਿ ਗਮਨੇ ਤੀਰਦ੍ਵਯਸ੍ਸਾਪਿ ਅਦ੍ਧਯੋਜਨਬ੍ਭਨ੍ਤਰੇ ਗਤਤ੍ਤਾ ਗਾਮਨ੍ਤਰਗਣਨਾਯ, ਅਦ੍ਧਯੋਜਨਗਣਨਾਯ ਚ ਆਪਤ੍ਤਿਯੋ ਪਰਿਚ੍ਛਿਨ੍ਦਿਤਬ੍ਬਾ. ਤੇਨੇਵ ‘‘ਯੋਜਨਵਿਤ੍ਥਤਾ…ਪੇ… ਅਦ੍ਧਯੋਜਨਗਣਨਾਯ ਪਾਚਿਤ੍ਤਿਯਾਨੀ’’ਤਿ ਵੁਤ੍ਤਂ. ਤੇਨੇਵ ਹਿ ਯੋਜਨਤੋ ਊਨਾਯ ਨਦਿਯਾ ਅਦ੍ਧਯੋਜਨਬ੍ਭਨ੍ਤਰਗਤਤੀਰਵਸੇਨੇਵ ਆਪਤ੍ਤਿਗਣਨਂ ਵੁਤ੍ਤਮੇਵ ਹੋਤਿ. ‘‘ਸਬ੍ਬਅਟ੍ਠਕਥਾਸੂ’’ਤਿਆਦਿਨਾ ਵੁਤ੍ਤਮੇਵਤ੍ਥਂ ਸਮਤ੍ਥੇਤਿ. ਤਤ੍ਥ ਕਿਞ੍ਚਾਪਿ ਸਮੁਦ੍ਦਤਲ਼ਾਕਾਦੀਸੁ ਪਾਚਿਤ੍ਤਿਯਂ ਨ ਵੁਤ੍ਤਂ, ਤਥਾਪਿ ਕੀਲ਼ਾਪੁਰੇਕ੍ਖਾਰਸ੍ਸ ਤਤ੍ਥ ਦੁਕ੍ਕਟਮੇਵਾਤਿ ਗਹੇਤਬ੍ਬਂ, ਪਠਮਂ ਕੀਲ਼ਾਪੁਰੇਕ੍ਖਾਰਸ੍ਸਾਪਿ ਪਚ੍ਛਾ ਨਾਵਾਯ ਨਿਦ੍ਦੁਪਗਤਸ੍ਸ, ਯੋਨਿਸੋ ਵਾ ਮਨਸਿ ਕਰੋਨ੍ਤਸ੍ਸ ਗਾਮਨ੍ਤਰੋਕ੍ਕਮਨਾਦੀਸੁਪਿ ਆਪਤ੍ਤਿਸਮ੍ਭਵਤੋ ਪਣ੍ਣਤ੍ਤਿਵਜ੍ਜਤਾ, ਤਿਚਿਤ੍ਤਤਾ ਚਸ੍ਸ ਸਿਕ੍ਖਾਪਦਸ੍ਸ ਵੁਤ੍ਤਾਤਿ ਵੇਦਿਤਬ੍ਬਂ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਨਾਵਾਭਿਰੁਹਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੯੭. ਨਵਮੇ ਪਾਲ਼ਿਯਂ ‘‘ਸਿਕ੍ਖਮਾਨਾ…ਪੇ… ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ ਅਨਾਪਤ੍ਤੀ’’ਤਿ ਇਦਂ ਇਮਿਨਾ ਸਿਕ੍ਖਾਪਦੇਨ ਅਨਾਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਪਞ੍ਚਹਿ ਸਹਧਮ੍ਮਿਕੇਹਿ ਕਤਵਿਞ੍ਞਤ੍ਤਿਪਰਿਕਥਾਦੀਹਿ ਉਪ੍ਪਨ੍ਨਂ ਪਰਿਭੁਞ੍ਜਨ੍ਤਸ੍ਸ ਦੁਕ੍ਕਟਮੇਵ. ਭਿਕ੍ਖੁਨਿਯਾ ਪਰਿਪਾਚਿਤਤਾ, ਤਥਾ ਜਾਨਨਂ, ਗਿਹਿਸਮਾਰਮ੍ਭਾਭਾਵੋ, ਭੋਜਨਤਾ, ਤਸ੍ਸ ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਪਰਿਪਾਚਿਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੯੮. ਦਸਮੇ ¶ ਉਪਨਨ੍ਦਸ੍ਸ ਚਤੁਤ੍ਥਸਿਕ੍ਖਾਪਦੇਨਾਤਿ ਮਾਤੁਗਾਮੇਨ ਰਹੋਨਿਸਜ੍ਜਸਿਕ੍ਖਾਪਦਂ ਸਨ੍ਧਾਯ ਵੁਤ੍ਤਂ, ਤਂ ਪਨ ਅਚੇਲਕਵਗ੍ਗੇ ਪਞ੍ਚਮਮ੍ਪਿ ਉਪਨਨ੍ਦਂ ਆਰਬ੍ਭ ਪਞ੍ਞਤ੍ਤੇਸੁ ਚਤੁਤ੍ਥਤ੍ਤਾ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਰਹੋਨਿਸਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੦੬. ਚਤੁਤ੍ਥਵਗ੍ਗਸ੍ਸ ¶ ਪਠਮੇ ਇਮੇਸਂਯੇਵਾਤਿ ਇਮੇਸਂ ਪਾਸਣ੍ਡਾਨਂਯੇਵ. ਏਤ੍ਤਕਾਨਨ੍ਤਿ ਇਮਸ੍ਮਿਂ ਪਾਸਣ੍ਡੇ ਏਤ੍ਤਕਾਨਂ.

੨੦੮. ‘‘ਗਚ੍ਛਨ੍ਤੋ ਵਾ ਆਗਚ੍ਛਨ੍ਤੋ ਵਾ’’ਤਿ ਇਦਂ ਅਦ੍ਧਯੋਜਨਵਸੇਨ ਗਹੇਤਬ੍ਬਂ. ਅਞ੍ਞੇ ਉਦ੍ਦਿਸ੍ਸ ਪਞ੍ਞਤ੍ਤਞ੍ਚ ਭਿਕ੍ਖੂਸੁ ਅਪ੍ਪਸਨ੍ਨੇਹਿ ਤਿਤ੍ਥਿਯੇਹਿ ਸਾਮਞ੍ਞਤੋਪਿ ਪਞ੍ਞਤ੍ਤਮ੍ਪਿ ਭਿਕ੍ਖੂਨਂ ਨ ਵਟ੍ਟਤਿ ਏਵ. ਆਵਸਥਪਿਣ੍ਡਤਾ, ਅਗਿਲਾਨਤਾ, ਅਨੁਵਸਿਤ੍ਵਾ ਭੋਜਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਆਵਸਥਪਿਣ੍ਡਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੦੯. ਦੁਤਿਯੇ ਅਭਿਮਾਰੇਤਿ ਅਭਿਭਵਿਤ੍ਵਾ ਭਗਵਨ੍ਤਂ ਮਾਰਣਤ੍ਥਾਯ ਪਯੋਜਿਤੇ ਧਨੁਧਰੇ. ਨਨੁ ‘‘ਰਾਜਾਨਮ੍ਪਿ ਮਾਰਾਪੇਸੀ’’ਤਿ ਵਚਨਤੋ ਇਦਂ ਸਿਕ੍ਖਾਪਦਂ ਅਜਾਤਸਤ੍ਤੁਨੋ ਕਾਲੇ ਪਞ੍ਞਤ੍ਤਨ੍ਤਿ ਸਿਦ੍ਧਂ, ਏਵਞ੍ਚ ਸਤਿ ਪਾਲ਼ਿਯਂ ‘‘ਤੇਨ ਖੋ ਪਨ ਸਮਯੇਨ ਰਞ੍ਞੋ ਮਾਗਧਸ੍ਸ…ਪੇ… ਞਾਤਿਸਾਲੋਹਿਤੋ ਆਜੀਵਕੇਸੁ ਪਬ੍ਬਜਿਤੋ ਹੋਤਿ…ਪੇ… ਬਿਮ੍ਬਿਸਾਰਂ ਏਤਦਵੋਚਾ’’ਤਿਆਦਿ ਵਿਰੁਜ੍ਝਤੀਤਿ? ਨ ਵਿਰੁਜ੍ਝਤਿ. ਸੋ ਕਿਰ ਆਜੀਵਕੋ ਬਿਮ੍ਬਿਸਾਰਕਾਲਤੋ ਪਭੁਤਿ ਅਨ੍ਤਰਨ੍ਤਰਾ ਭਿਕ੍ਖੂ ਨਿਮਨ੍ਤੇਤ੍ਵਾ ਦਾਨਂ ਦੇਨ੍ਤੋ ਅਜਾਤਸਤ੍ਤੁਕਾਲੇਪਿ ਸਿਕ੍ਖਾਪਦੇ ਪਞ੍ਞਤ੍ਤੇਪਿ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ, ਭਿਕ੍ਖੂ ਚ ਕੁਕ੍ਕੁਚ੍ਚਾਯਨ੍ਤਾ ਨਿਵਾਰੇਸੁਂ. ਤਸ੍ਮਾ ਆਦਿਤੋ ਪਟ੍ਠਾਯ ਤਂ ਵਤ੍ਥੁ ਦਸ੍ਸਿਤਨ੍ਤਿ ਵੇਦਿਤਬ੍ਬਂ.

੨੧੫. ਅਞ੍ਞਮਞ੍ਞਂ ¶ ਵਿਸਦਿਸਂ ਰਜ੍ਜਂ ਵਿਰਜ੍ਜਂ, ਵਿਰਜ੍ਜਤੋ ਆਗਤਾ ਵੇਰਜ੍ਜਕਾ. ਤੇ ਚ ਯਸ੍ਮਾ ਜਾਤਿਗੋਤ੍ਤਾਦਿਤੋ ਨਾਨਾਵਿਧਾ, ਤਸ੍ਮਾ ਨਾਨਾਵੇਰਜ੍ਜਕੇਤਿਪਿ ਅਤ੍ਥੋ.

੨੧੭-੮. ਇਮਸ੍ਸ ਸਿਕ੍ਖਾਪਦਸ੍ਸ ਵਤ੍ਥੁਵਸੇਨੇਵ ਵਿਞ੍ਞਤ੍ਤਿਤੋ ਗਣਭੋਜਨਤ੍ਥਤਾ ਸਿਦ੍ਧਾਤਿ ਤਂ ਅਵਤ੍ਵਾ ਪਦਭਾਜਨੇ ਅਸਿਦ੍ਧਮੇਵ ਨਿਮਨ੍ਤਨਤੋ ਗਣਭੋਜਨਂ ਦਸ੍ਸਿਤਨ੍ਤਿ ਵੇਦਿਤਬ੍ਬਂ. ਤੇਨਾਹ ‘‘ਦ੍ਵੀਹਾਕਾਰੇਹੀ’’ਤਿਆਦਿ. ¶ ‘‘ਯੇਨ ਕੇਨਚਿ ਵੇਵਚਨੇਨਾ’’ਤਿ ਵੁਤ੍ਤਤ੍ਤਾ ‘‘ਭੋਜਨਂ ਗਣ੍ਹਥਾ’’ਤਿਆਦਿਸਾਮਞ੍ਞਨਾਮੇਨਾਪਿ ਗਣਭੋਜਨਂ ਹੋਤਿ. ਯਂ ਪਨ ਪਾਲ਼ਿਯਂ ਅਦ੍ਧਾਨਗਮਨਾਦਿਵਤ੍ਥੂਸੁ ‘‘ਇਧੇਵ ਭੁਞ੍ਜਥਾ’’ਤਿ ਵੁਤ੍ਤਵਚਨਸ੍ਸ ਕੁਕ੍ਕੁਚ੍ਚਾਯਨਂ, ਤਮ੍ਪਿ ਓਦਨਾਦਿਨਾਮਂ ਗਹੇਤ੍ਵਾ ਵੁਤ੍ਤਤ੍ਤਾ ਏਵ ਕਤਨ੍ਤਿ ਵੇਦਿਤਬ੍ਬਂ. ਏਕਤੋ ਗਣ੍ਹਨ੍ਤੀਤਿ ਅਞ੍ਞਮਞ੍ਞਸ੍ਸ ਦ੍ਵਾਦਸਹਤ੍ਥਂ ਅਮੁਞ੍ਚਿਤ੍ਵਾ ਏਕਤੋ ਠਤ੍ਵਾ ਗਣ੍ਹਨ੍ਤਿ.

‘‘ਅਮ੍ਹਾਕਂ ਚਤੁਨ੍ਨਮ੍ਪਿ ਭਤ੍ਤਂ ਦੇਹੀ’’ਤਿ ਵੁਤ੍ਤਤ੍ਤਾ ਪਾਲ਼ਿ (ਵਣ੍ਣਨਾ) ਯਂ ‘‘ਤ੍ਵਂ ਏਕਸ੍ਸ ਭਿਕ੍ਖੁਨੋ ਭਤ੍ਤਂ ਦੇਹੀ’’ਤਿਆਦਿਨੋ ਵੁਤ੍ਤਤ੍ਤਾ ਚ ਭੋਜਨਨਾਮੇਨ ਵਿਞ੍ਞਤ੍ਤਮੇਵ ਗਣਭੋਜਨਂ ਹੋਤਿ, ਤਞ੍ਚ ਅਞ੍ਞੇਨ ਵਿਞ੍ਞਤ੍ਤਮ੍ਪਿ ਏਕਤੋ ਗਣ੍ਹਨ੍ਤਾਨਂ ਸਬ੍ਬੇਸਮ੍ਪਿ ਹੋਤੀਤਿ ਦਟ੍ਠਬ੍ਬਂ. ਵਿਸੁਂ ਗਹਿਤਂ ਪਨ ਵਿਞ੍ਞਤ੍ਤਂ ਭੁਞ੍ਜਤੋ ਪਣੀਤਭੋਜਨਾਦਿਸਿਕ੍ਖਾਪਦੇਹਿ ਆਪਤ੍ਤਿ ਏਵ.

ਆਗਨ੍ਤੁਕਪਟ੍ਟਨ੍ਤਿ ਅਚ੍ਛਿਨ੍ਦਿਤ੍ਵਾ ਅਨ੍ਵਾਧਿਂ ਆਰੋਪੇਤ੍ਵਾ ਕਰਣਚੀਵਰਂ ਸਨ੍ਧਾਯ ਵੁਤ੍ਤਂ. ਠਪੇਤੀਤਿ ਏਕਂ ਅਨ੍ਤਂ ਚੀਵਰੇ ਬਨ੍ਧਨਵਸੇਨ ਠਪੇਤਿ. ਪਚ੍ਚਾਗਤਂ ਸਿਬ੍ਬਤੀਤਿ ਤਸ੍ਸੇਵ ਦੁਤਿਯਅਨ੍ਤਂ ਪਰਿਵਤ੍ਤਿਤ੍ਵਾ ਆਹਤਂ ਸਿਬ੍ਬਤਿ. ਆਗਨ੍ਤੁਕਪਟ੍ਟਂ ਬਨ੍ਧਤੀਤਿ ਚੀਵਰੇਨ ਲਗ੍ਗਂ ਕਰੋਨ੍ਤੋ ਪੁਨਪ੍ਪੁਨਂ ਤਤ੍ਥ ਤਤ੍ਥ ਸੁਤ੍ਤੇਨ ਬਨ੍ਧਤਿ. ਘਟ੍ਟੇਤੀਤਿ ਪਮਾਣੇਨ ਗਹੇਤ੍ਵਾ ਦਣ੍ਡਾਦੀਹਿ ਘਟ੍ਟੇਤਿ. ਸੁਤ੍ਤਂ ਕਰੋਤੀਤਿ ਗੁਣਾਦਿਭਾਵੇਨ ਵਟ੍ਟੇਤਿ. ਵਲੇਤੀਤਿ ਅਨੇਕਗੁਣਸੁਤ੍ਤਂ ਹਤ੍ਥੇਨ ਵਾ ਚਕ੍ਕਦਣ੍ਡੇਨ ਵਾ ਵਟ੍ਟੇਤਿ ਏਕਤ੍ਤਂ ਕਰੋਤਿ. ਪਰਿਵਤ੍ਤਨਂ ਕਰੋਤੀਤਿ ਪਰਿਵਤ੍ਤਨਦਣ੍ਡਯਨ੍ਤਕਂ ਕਰੋਤਿ, ਯਸ੍ਮਿਂ ਸੁਤ੍ਤਗੁਲ਼ਂ ਪਵੇਸੇਤ੍ਵਾ ਵੇਲ਼ੁਨਾਲ਼ਿਕਾਦੀਸੁ ਠਪੇਤ੍ਵਾ ਪਰਿਬ੍ਭਮਾਪੇਤ੍ਵਾ ਸੁਤ੍ਤਕੋਟਿਤੋ ਪਟ੍ਠਾਯ ਆਕਡ੍ਢਨ੍ਤਿ.

੨੨੦. ਅਨਿਮਨ੍ਤਿਤਚਤੁਤ੍ਥਨ੍ਤਿ ਅਨਿਮਨ੍ਤਿਤੋ ਚਤੁਤ੍ਥੋ ਯਸ੍ਸ ਭਿਕ੍ਖੁਚਤੁਕ੍ਕਸ੍ਸ, ਤਂ ਅਨਿਮਨ੍ਤਿਤਚਤੁਤ੍ਥਂ. ਏਵਂ ਸੇਸੇਸੁਪਿ. ਤੇਨਾਹ ‘‘ਪਞ੍ਚਨ੍ਨਂ ਚਤੁਕ੍ਕਾਨ’’ਨ੍ਤਿ. ਸਮ੍ਪਵੇਸੇਤ੍ਵਾਤਿ ਤੇਹਿ ਯੋਜੇਤ੍ਵਾ. ਗਣੋ ਭਿਜ੍ਜਤੀਤਿ ਨਿਮਨ੍ਤਿਤਸਙ੍ਘੋ ਨ ਹੋਤੀਤਿ ਅਤ੍ਥੋ.

ਅਧਿਵਾਸੇਤ੍ਵਾ ¶ ਗਤੇਸੂਤਿ ਏਤ੍ਥ ਅਕਪ੍ਪਿਯਨਿਮਨ੍ਤਨਾਧਿਵਾਸਨਕ੍ਖਣੇ ਪੁਬ੍ਬਪਯੋਗੇ ਦੁਕ੍ਕਟਮ੍ਪਿ ਨਤ੍ਥਿ, ਵਿਞ੍ਞਤ੍ਤਿਤੋ ਪਸਵਨੇ ਪਨ ਵਿਞ੍ਞਤ੍ਤਿਕ੍ਖਣੇ ਇਤਰਸਿਕ੍ਖਾਪਦੇਹਿ ਦੁਕ੍ਕਟਂ ਹੋਤੀਤਿ ਗਹੇਤਬ੍ਬਂ. ਨਿਮਨ੍ਤਨਂ ਸਾਦਿਯਥਾਤਿ ਨਿਮਨ੍ਤਨਭਤ੍ਤਂ ਪਟਿਗ੍ਗਣ੍ਹਥ. ਤਾਨਿ ਚਾਤਿ ਕੁਮ੍ਮਾਸਾਦੀਨਿ ਚ ਤੇਹਿ ਭਿਕ੍ਖੂਹਿ ਏਕੇਨ ਪਚ੍ਛਾ ਗਹਿਤਤ੍ਤਾ ਏਕਤੋ ਨ ਗਹਿਤਾਨਿ.

‘‘ਭਤ੍ਤੁਦ੍ਦੇਸਕੇਨ ਪਣ੍ਡਿਤੇਨ ਭਵਿਤਬ੍ਬਂ…ਪੇ… ਮੋਚੇਤਬ੍ਬਾ’’ਤਿ ਏਤੇਨ ਭਤ੍ਤੁਦ੍ਦੇਸਕੇਨ ਅਕਪ੍ਪਿਯਨਿਮਨ੍ਤਨੇ ਸਾਦਿਤੇ ਸਬ੍ਬੇਸਮ੍ਪਿ ਸਾਦਿਤਂ ਹੋਤਿ. ਏਕਤੋ ਗਣ੍ਹਨ੍ਤਾਨਂ ਗਣਭੋਜਨਾਪਤ੍ਤਿ ਚ ਹੋਤੀਤਿ ¶ ਦਸ੍ਸੇਤਿ. ਦੂਤਸ੍ਸ ਦ੍ਵਾਰੇ ਆਗਨ੍ਤ੍ਵਾ ਪੁਨ ‘‘ਭਤ੍ਤਂ ਗਣ੍ਹਥਾ’’ਤਿ ਵਚਨਭਯੇਨ ‘‘ਗਾਮਦ੍ਵਾਰੇ ਅਟ੍ਠਤ੍ਵਾ’’ਤਿ ਵੁਤ੍ਤਂ. ਗਣਭੋਜਨਤਾ, ਸਮਯਾਭਾਵੋ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਗਣਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੨੧. ਤਤਿਯੇ ਪਾਲ਼ਿਯਂ ਭਤ੍ਤਪਟਿਪਾਟਿ ਅਟ੍ਠਿਤਾਤਿ ਕੁਲਪਟਿਪਾਟਿਯਾ ਦਾਤਬ੍ਬਾ ਭਤ੍ਤਪਟਿਪਾਟਿ ਅਟ੍ਠਿਤਾ ਨ ਠਿਤਾ, ਅਬ੍ਬੋਚ੍ਛਿਨ੍ਨਾ ਨਿਰਨ੍ਤਰਪ੍ਪਵਤ੍ਤਾਤਿ ਅਤ੍ਥੋ. ਬਦਰਫਲਾਨਿ ਪਕ੍ਖਿਪਿਤ੍ਵਾ ਪਕ੍ਕਯਾਗੁਆਦਿਕਂ ‘‘ਬਦਰਸਾਲ਼ਵ’’ਨ੍ਤਿ ਵੁਚ੍ਚਤਿ.

ਪਾਲ਼ਿਯਂ ਪਰਮ੍ਪਰਭੋਜਨੇਤਿ ਯੇਨ ਪਠਮਂ ਨਿਮਨ੍ਤਿਤੋ, ਤਸ੍ਸ ਭੋਜਨਤੋ ਪਰਸ੍ਸ ਭੋਜਨਸ੍ਸ ਭੁਞ੍ਜਨੇ. ਵਿਕਪ੍ਪਨਾਵ ਇਧ ਅਨੁਪਞ੍ਞਤ੍ਤਿਵਸੇਨ ਮਾਤਿਕਾਯਂ ਅਨਾਰੋਪਿਤਾਪਿ ਪਰਿਵਾਰੇ ‘‘ਚਤਸ੍ਸੋ ਅਨੁਪਞ੍ਞਤ੍ਤਿਯੋ’’ਤਿ (ਪਰਿ. ੮੬) ਅਨੁਪਞ੍ਞਤ੍ਤਿਯਂ ਗਣਿਤਾ. ਤਤ੍ਥ ਕਿਞ੍ਚਾਪਿ ਅਟ੍ਠਕਥਾਯਂ ਮਹਾਪਚ੍ਚਰਿਵਾਦਸ੍ਸ ਪਚ੍ਛਾ ਕਥਨੇਨ ਪਰਮ੍ਮੁਖਾਵਿਕਪ੍ਪਨਾ ਪਤਿਟ੍ਠਪਿਤਾ, ਤਥਾਪਿ ਸਮ੍ਮੁਖਾਵਿਕਪ੍ਪਨਾਪਿ ਗਹੇਤਬ੍ਬਾਵ. ਤੇਨੇਵ ਮਾਤਿਕਾਟ੍ਠਕਥਾਯਮ੍ਪਿ ‘‘ਯੋ ਭਿਕ੍ਖੁ ਪਞ੍ਚਸੁ ਸਹਧਮ੍ਮਿਕੇਸੁ ਅਞ੍ਞਤਰਸ੍ਸ ‘ਮਯ੍ਹਂ ਭਤ੍ਤਪਚ੍ਚਾਸਂ ਤੁਯ੍ਹਂ ਦਮ੍ਮੀ’ਤਿ ਵਾ ‘ਵਿਕਪ੍ਪੇਮੀ’ਤਿ ਵਾ ਏਵਂ ਸਮ੍ਮੁਖਾ’’ਤਿਆਦਿ (ਕਙ੍ਖਾ. ਅਟ੍ਠ. ਪਰਮ੍ਪਰਭੋਜਨਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ.

੨੨੯. ਖੀਰਂ ਵਾ ਰਸਂ ਵਾਤਿ ਪਞ੍ਚਭੋਜਨਾਮਿਸਂ ਭਤ੍ਤਤੋ ਉਪਰਿ ਠਿਤਂ ਸਨ੍ਧਾਯ ਵੁਤ੍ਤਂ. ਤਞ੍ਹਿ ਅਭੋਜਨਤ੍ਤਾ ਉਪ੍ਪਟਿਪਾਟਿਯਾ ਪਿਵਤੋਪਿ ਅਨਾਪਤ੍ਤਿ. ਤੇਨਾਹ ‘‘ਭੁਞ੍ਜਨ੍ਤੇਨਾ’’ਤਿਆਦਿ.

ਵਿਕਪ੍ਪਨਾਯ ¶ ਅਕਰਣਤੋ ਅਕਿਰਿਯਾਵਸੇਨ ਇਦਂ ਵਾਚਾਯਪਿ ਸਮੁਟ੍ਠਿਤਨ੍ਤਿ ਆਹ ‘‘ਵਚੀਕਮ੍ਮ’’ਨ੍ਤਿ. ਪਰਮ੍ਪਰਭੋਜਨਤਾ, ਸਮਯਾਭਾਵੋ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪਰਮ੍ਪਰਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੩੧. ਚਤੁਤ੍ਥੇ ਪਾਲ਼ਿਯਂ ਪਟਿਯਾਲੋਕਨ੍ਤਿ ਪਚ੍ਛਿਮਦਿਸਂ, ਪਚ੍ਛਾਦਿਸਨ੍ਤਿ ਅਤ੍ਥੋ. ਅਪਾਥੇਯ੍ਯਾਦਿਅਤ੍ਥਾਯ ¶ ਪਟਿਯਾਦਿਤਨ੍ਤਿਸਞ੍ਞਾਯ ਗਣ੍ਹਨ੍ਤਸ੍ਸਾਪਿ ਆਪਤ੍ਤਿ ਏਵ ਅਚਿਤ੍ਤਕਤ੍ਤਾ ਸਿਕ੍ਖਾਪਦਸ੍ਸ. ਅਤ੍ਤਨੋ ਅਤ੍ਥਾਯ ‘‘ਇਮਸ੍ਸ ਹਤ੍ਥੇ ਦੇਹੀ’’ਤਿ ਵਚਨੇਨਾਪਿ ਆਪਜ੍ਜਨਤੋ ‘‘ਵਚੀਕਮ੍ਮ’’ਨ੍ਤਿ ਵੁਤ੍ਤਂ. ਵੁਤ੍ਤਲਕ੍ਖਣਪੂਵਮਨ੍ਥਤਾ, ਅਸੇਸਕਤਾ, ਅਪ੍ਪਟਿਪ੍ਪਸ੍ਸਦ੍ਧਗਮਨਤਾ, ਅਞ੍ਞਾਤਕਾਦਿਤਾ, ਅਤਿਰੇਕਪਟਿਗ੍ਗਹਣਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਕਾਣਮਾਤਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੩੭. ਪਞ੍ਚਮੇ ‘‘ਤਿ-ਕਾਰਂ ਅਵਤ੍ਵਾ’’ਤਿ ਇਮਿਨਾ ਕਾਤਬ੍ਬਸਦ੍ਦਸਾਮਤ੍ਥਿਯਾ ਲਦ੍ਧਂ ਇਤਿ-ਪਦਂ ਕਤਕਾਲੇ ਨ ਵਤ੍ਤਬ੍ਬਨ੍ਤਿ ਦਸ੍ਸੇਤਿ. ਇਧ ਪਨ ਅਜਾਨਨ੍ਤੇਹਿ ਇਤਿ-ਸਦ੍ਦੇ ਪਯੁਤ੍ਤੇਪਿ ਅਤਿਰਿਤ੍ਤਂ ਕਤਮੇਵ ਹੋਤੀਤਿ ਦਟ੍ਠਬ੍ਬਂ.

੨੩੮-੯. ‘‘ਪਵਾਰਿਤੋ’’ਤਿ ਇਦਞ੍ਚ ਕਤ੍ਤੁਅਤ੍ਥੇ ਨਿਪ੍ਫਨ੍ਨਨ੍ਤਿ ਦਸ੍ਸੇਤੁਂ ‘‘ਕਤਪਵਾਰਣੋ’’ਤਿਆਦਿ ਵੁਤ੍ਤਂ. ਭੁਤ੍ਤਾਵੀ-ਪਦਸ੍ਸ ਨਿਰਤ੍ਥਕਭਾਵਮੇਵ ਸਾਧੇਤੁਂ ‘‘ਵੁਤ੍ਤਮ੍ਪਿ ਚੇਤ’’ਨ੍ਤਿਆਦਿ ਵੁਤ੍ਤਂ. ਤਾਹੀਤਿ ਪੁਥੁਕਾਹਿ. ਸਤ੍ਤੁਮੋਦਕੋਤਿ ਸਤ੍ਤੁਂ ਤੇਮੇਤ੍ਵਾ ਕਤੋ ਅਪਕ੍ਕੋ. ਸਤ੍ਤੁਂ ਪਨ ਪਿਸਿਤ੍ਵਾ ਪਿਟ੍ਠਂ ਕਤ੍ਵਾ ਤੇਮੇਤ੍ਵਾ ਪੂਵਂ ਕਤ੍ਵਾ ਪਚਨ੍ਤਿ, ਤਂ ਨ ਪਵਾਰੇਤਿ. ‘‘ਪਟਿਕ੍ਖਿਪਿਤਬ੍ਬਟ੍ਠਾਨੇ ਠਿਤਮੇਵ ਪਟਿਕ੍ਖਿਪਤਿ ਨਾਮਾ’’ਤਿ ਵੁਤ੍ਤਤ੍ਤਾ ਯਂ ਯਂ ਅਲਜ੍ਜਿਸਨ੍ਤਕਂ ਵਾ ਅਤ੍ਤਨੋ ਅਪਾਪੁਣਕਸਙ੍ਘਿਕਾਦਿਂ ਵਾ ਪਟਿਕ੍ਖੇਪਤੋ ਪਵਾਰਣਾ ਨ ਹੋਤੀਤਿ ਦਟ੍ਠਬ੍ਬਂ.

ਆਸਨ੍ਨਤਰਂ ਅਙ੍ਗਨ੍ਤਿ ਹਤ੍ਥਪਾਸਤੋ ਬਹਿ ਠਤ੍ਵਾ ਓਨਮਿਤ੍ਵਾ ਦੇਨ੍ਤਸ੍ਸ ਸੀਸਂ ਆਸਨ੍ਨਤਰਂ ਹੋਤਿ, ਤਸ੍ਸ ਓਰਿਮਨ੍ਤੇਨ ਪਰਿਚ੍ਛਿਨ੍ਦਿਤਬ੍ਬਂ.

ਅਪਨਾਮੇਤ੍ਵਾਤਿ ¶ ਅਭਿਮੁਖਂ ਹਰਿਤ੍ਵਾ. ‘‘ਇਮਂ ਭਤ੍ਤਂ ਗਣ੍ਹਾ’’ਤਿ ਵਦਤੀਤਿ ਕਿਞ੍ਚਿ ਅਨਾਮੇਤ੍ਵਾ ਵਦਤਿ. ਕੇਵਲਂ ਵਾਚਾਭਿਹਾਰਸ੍ਸ ਅਨਧਿਪ੍ਪੇਤਤ੍ਤਾ ਗਣ੍ਹਥਾਤਿ ਗਹੇਤੁਂ ਆਰਦ੍ਧਂ ਕਟਚ੍ਛੁਨਾ ਅਨੁਕ੍ਖਿਤ੍ਤਮ੍ਪਿ ਪੁਬ੍ਬੇਪਿ ਏਵਂ ਅਭਿਹਟਤ੍ਤਾ ਪਵਾਰਣਾ ਹੋਤੀਤਿ ‘‘ਅਭਿਹਟਾਵ ਹੋਤੀ’’ਤਿ ਵੁਤ੍ਤਂ. ਉਦ੍ਧਟਮਤ੍ਤੇਤਿ ਭਾਜਨਤੋ ਵਿਯੋਜਿਤਮਤ੍ਤੇ. ਦ੍ਵਿਨ੍ਨਂ ਸਮਭਾਰੇਪੀਤਿ ਪਰਿਵੇਸਕਸ੍ਸ ਚ ਅਞ੍ਞਸ੍ਸ ਚ ਭਤ੍ਤਪਚ੍ਛਿਭਾਜਨਵਹਨੇ ਸਮਕੇਪੀਤਿ ਅਤ੍ਥੋ.

ਰਸਂ ਗਣ੍ਹਥਾਤਿ ਏਤ੍ਥ ਕੇਵਲਂ ਮਂਸਰਸਸ੍ਸ ਅਪਵਾਰਣਾਜਨਕਸ੍ਸ ਨਾਮੇਨ ਵੁਤ੍ਤਤ੍ਤਾ ਪਟਿਕ੍ਖਿਪਤੋ ¶ ਪਵਾਰਣਾ ਨ ਹੋਤਿ. ਮਚ੍ਛਰਸਨ੍ਤਿਆਦੀਸੁ ਮਚ੍ਛੋ ਚ ਰਸਞ੍ਚਾਤਿ ਅਤ੍ਥਸ੍ਸ ਸਮ੍ਭਵਤੋ ਵਤ੍ਥੁਨੋਪਿ ਤਾਦਿਸਤ੍ਤਾ ਪਵਾਰਣਾ ਹੋਤਿ, ‘‘ਇਦਂ ਗਣ੍ਹਥਾ’’ਤਿਪਿ ਅਵਤ੍ਵਾ ਤੁਣ੍ਹੀਭਾਵੇਨ ਅਭਿਹਟਂ ਪਟਿਕ੍ਖਿਪਤੋਪਿ ਹੋਤਿ ਏਵ. ਕਰਮ੍ਬਕੋਤਿ ਮਿਸ੍ਸਕਾਧਿਵਚਨਮੇਤਂ. ਯਞ੍ਹਿ ਬਹੂਹਿ ਮਿਸ੍ਸੇਤ੍ਵਾ ਕਰੋਨ੍ਤਿ, ਸੋ ‘‘ਕਰਮ੍ਬਕੋ’’ਤਿ ਵੁਚ੍ਚਤਿ.

‘‘ਉਦ੍ਦਿਸ੍ਸ ਕਤ’’ਨ੍ਤਿ ਮਞ੍ਞਮਾਨੋਤਿ ਏਤ੍ਥ ਵਤ੍ਥੁਨੋ ਕਪ੍ਪਿਯਤ੍ਤਾ ‘‘ਪਵਾਰਿਤੋਵ ਹੋਤੀ’’ਤਿ ਵੁਤ੍ਤਂ. ਤਞ੍ਚੇ ਉਦ੍ਦਿਸ੍ਸ ਕਤਮੇਵ ਹੋਤਿ, ਪਟਿਕ੍ਖੇਪੋ ਨਤ੍ਥਿ. ਅਯਮੇਤ੍ਥ ਅਧਿਪ੍ਪਾਯੋਤਿ ‘‘ਯੇਨਾਪੁਚ੍ਛਿਤੋ’’ਤਿਆਦਿਨਾ ਵੁਤ੍ਤਮੇਵਤ੍ਥਂ ਸਨ੍ਧਾਯ ਵਦਤਿ. ਕਾਰਣਂ ਪਨੇਤ੍ਥ ਦੁਦ੍ਦਸਨ੍ਤਿ ਭਤ੍ਤਸ੍ਸ ਬਹੁਤਰਭਾਵੇਨ ਪਵਾਰਣਾਸਮ੍ਭਵਕਾਰਣਂ ਦੁਦ੍ਦਸਂ, ਅਞ੍ਞਥਾ ਕਰਮ੍ਬਕੇਪਿ ਮਚ੍ਛਾਦਿਬਹੁਭਾਵੇ ਪਵਾਰਣਾ ਭਵੇਯ੍ਯਾਤਿ ਅਧਿਪ੍ਪਾਯੋ. ਯਥਾ ਚੇਤ੍ਥ ਕਾਰਣਂ ਦੁਦ੍ਦਸਂ, ਏਵਂ ਪਰਤੋ ‘‘ਮਿਸ੍ਸਕਂ ਗਣ੍ਹਥਾ’’ਤਿ ਏਤ੍ਥਾਪਿ ਕਾਰਣਂ ਦੁਦ੍ਦਸਮੇਵਾਤਿ ਦਟ੍ਠਬ੍ਬਂ. ਯਞ੍ਚ ‘‘ਇਦਂ ਪਨ ਭਤ੍ਤਮਿਸ੍ਸਕਮੇਵਾ’’ਤਿਆਦਿ ਕਾਰਣਂ ਵੁਤ੍ਤਂ, ਤਮ੍ਪਿ ‘‘ਅਪ੍ਪਤਰਂ ਨ ਪਵਾਰੇਤੀ’’ਤਿ ਵਚਨੇਨ ਨ ਸਮੇਤਿ. ਵਿਸੁਂ ਕਤ੍ਵਾ ਦੇਤੀਤਿ ‘‘ਰਸਂ ਗਣ੍ਹਥਾ’’ਤਿਆਦਿਨਾ ਵਾਚਾਯ ਵਿਸੁਂ ਕਤ੍ਵਾ ਦੇਤੀਤਿ ਅਤ੍ਥੋ ਗਹੇਤਬ੍ਬੋ. ਨ ਪਨ ਕਾਯੇਨ ਰਸਾਦਿਂ ਵਿਯੋਜੇਤ੍ਵਾਤਿ. ਤਥਾ ਅਵਿਯੋਜਿਤੇਪਿ ਪਟਿਕ੍ਖਿਪਤੋ ਪਵਾਰਣਾਯ ਅਸਮ੍ਭਵਤੋ ਅਪ੍ਪਵਾਰਣਾਪਹੋਣਕਸ੍ਸ ਨਾਮੇਨ ਵੁਤ੍ਤਤ੍ਤਾ ਭਤ੍ਤਮਿਸ੍ਸਕਯਾਗੁਂ ਆਹਰਿਤ੍ਵਾ ‘‘ਯਾਗੁਂ ਗਣ੍ਹਥਾ’’ਤਿ ਵੁਤ੍ਤਟ੍ਠਾਨਾਦੀਸੁ ਵਿਯ, ਅਞ੍ਞਥਾ ਵਾ ਏਤ੍ਥ ਯਥਾ ਪੁਬ੍ਬਾਪਰਂ ਨ ਵਿਰੁਜ੍ਝਤਿ, ਤਥਾ ਅਧਿਪ੍ਪਾਯੋ ਗਹੇਤਬ੍ਬੋ.

ਨਾਵਾ ਵਾ ਸੇਤੁ ਵਾਤਿਆਦਿਮ੍ਹਿ ਨਾਵਾਦਿਅਭਿਰੁਹਨਾਦਿਕ੍ਖਣੇ ਕਿਞ੍ਚਿ ਠਤ੍ਵਾਪਿ ਅਭਿਰੁਹਨਾਦਿਕਾਤਬ੍ਬਤ੍ਤੇਪਿ ਗਮਨਤਪ੍ਪਰਤਾਯ ਠਾਨਂ ਨਾਮ ਨ ਹੋਤਿ, ਜਨਸਮ੍ਮਦ੍ਦੇਨ ਪਨ ਅਨੋਕਾਸਾਦਿਭਾਵੇਨ ਕਾਤੁਂ ਨ ਵਟ੍ਟਤਿ. ਅਚਾਲੇਤ੍ਵਾਤਿ ਵੁਤ੍ਤਟ੍ਠਾਨਤੋ ¶ ਅਞ੍ਞਸ੍ਮਿਮ੍ਪਿ ਪਦੇਸੇ ਵਾ ਉਦ੍ਧਂ ਵਾ ਅਪੇਸੇਤ੍ਵਾ ਤਸ੍ਮਿਂ ਏਵ ਪਨ ਠਾਨੇ ਪਰਿਵਤ੍ਤੇਤੁਂ ਲਭਤਿ. ਤੇਨਾਹ ‘‘ਯੇਨ ਪਸ੍ਸੇਨਾ’’ਤਿਆਦਿ.

ਅਕਪ੍ਪਿਯਭੋਜਨਂ ਵਾਤਿ ਕੁਲਦੂਸਨਾਦਿਨਾ ਉਪ੍ਪਨ੍ਨਂ, ਤਂ ‘‘ਅਕਪ੍ਪਿਯ’’ਨ੍ਤਿ ਇਮਿਨਾ ਤੇਨ ਮਿਸ੍ਸਂ ਓਦਨਾਦਿ ਅਤਿਰਿਤ੍ਤਂ ਹੋਤਿ ਏਵਾਤਿ ਦਸ੍ਸੇਤਿ. ਤਸ੍ਮਾ ਯਂ ਤਤ੍ਥ ਅਕਪ੍ਪਕਤਂ ਕਨ੍ਦਫਲਾਦਿ, ਤਂ ਅਪਨੇਤ੍ਵਾ ਸੇਸਂ ਭੁਞ੍ਜਿਤਬ੍ਬਮੇਵ.

ਸੋ ਪੁਨ ਕਾਤੁਂ ਨ ਲਭਤੀਤਿ ਤਸ੍ਮਿਞ੍ਞੇਵ ਭਾਜਨੇ ਕਰਿਯਮਾਨਂ ਪਠਮਕਤੇਨ ਸਦ੍ਧਿਂ ਕਤਂ ਹੋਤੀਤਿ ਪੁਨ ਸੋ ਏਵ ਕਾਤੁਂ ਨ ਲਭਤਿ, ਅਞ੍ਞੋ ਲਭਤਿ. ਅਞ੍ਞੇਨ ਹਿ ਕਤਤੋ ਅਞ੍ਞੋ ਪੁਨ ਕਾਤੁਂ ¶ ਲਭਤਿ. ਅਞ੍ਞਸ੍ਮਿਂ ਪਨ ਭਾਜਨੇ ਤੇਨ ਵਾ ਅਞ੍ਞੇਨ ਵਾ ਕਾਤੁਂ ਵਟ੍ਟਤਿ. ਤੇਨਾਹ ‘‘ਯੇਨ ਅਕਤਂ, ਤੇਨ ਕਾਤਬ੍ਬਂ, ਯਞ੍ਚ ਅਕਤਂ, ਤਂ ਕਾਤਬ੍ਬ’’ਨ੍ਤਿ. ਏਵਂ ਕਤਨ੍ਤਿ ਅਞ੍ਞਸ੍ਮਿਂ ਭਾਜਨੇ ਕਤਂ. ਸਚੇ ਪਨ ਆਮਿਸਸਂਸਟ੍ਠਾਨੀਤਿ ਏਤ੍ਥ ਮੁਖਾਦੀਸੁ ਲਗ੍ਗਮ੍ਪਿ ਆਮਿਸਂ ਸੋਧੇਤ੍ਵਾਵ ਅਤਿਰਿਤ੍ਤਂ ਭੁਞ੍ਜਿਤਬ੍ਬਨ੍ਤਿ ਵੇਦਿਤਬ੍ਬਂ.

੨੪੧. ਵਾਚਾਯ ਆਣਾਪੇਤ੍ਵਾ ਅਤਿਰਿਤ੍ਤਂ ਅਕਾਰਾਪਨਤੋ ਅਕਿਰਿਯਸਮੁਟ੍ਠਾਨਨ੍ਤਿ ਦਟ੍ਠਬ੍ਬਂ. ਪਵਾਰਿਤਭਾਵੋ, ਆਮਿਸਸ੍ਸ ਅਨਤਿਰਿਤ੍ਤਤਾ, ਕਾਲੇ ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪਠਮਪਵਾਰਣਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਦੁਤਿਯਪਵਾਰਣਾਸਿਕ੍ਖਾਪਦਵਣ੍ਣਨਾ

੨੪੩. ਛਟ੍ਠੇ ‘‘ਭੁਤ੍ਤਸ੍ਮਿ’’ਨ੍ਤਿ ਮਾਤਿਕਾਯਂ ਵੁਤ੍ਤਤ੍ਤਾ ਭੋਜਨਪਰਿਯੋਸਾਨੇ ਪਾਚਿਤ੍ਤਿਯਂ. ਪਵਾਰਿਤਤਾ, ਤਥਾਸਞ੍ਞਿਤਾ, ਆਸਾਦਨਾਪੇਕ੍ਖਤਾ, ਅਨਤਿਰਿਤ੍ਤੇਨ ਅਭਿਹਟਪਵਾਰਣਾ, ਭੋਜਨਪਅਯੋਸਾਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਦੁਤਿਯਪਵਾਰਣਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੪੭. ਸਤ੍ਤਮੇ ਨਟਾਨਂ ਨਾਟਕਾਤਿ ਨਟਨਾਟਕਾ, ਸੀਤਾਹਰਣਾਦੀਨਿ.

੨੪੮-੯. ਖਾਦਨੀਯੇ ਖਾਦਨੀਯਤ੍ਥਨ੍ਤਿ ਪੂਵਾਦਿਖਾਦਨੀਯੇ ਵਿਜ੍ਜਮਾਨਖਾਦਨੀਯਕਿਚ੍ਚਂ ਖਾਦਨੀਯੇਹਿ ਕਾਤਬ੍ਬਂ ਜਿਘਚ੍ਛਾਹਰਣਸਙ੍ਖਾਤਂ ਅਤ੍ਥਂ ਪਯੋਜਨਂ ਨੇਵ ਫਰਨ੍ਤਿ ¶ ਨ ਨਿਪ੍ਫਾਦੇਨ੍ਤਿ. ਏਕਸ੍ਮਿਂ ਦੇਸੇ ਆਹਾਰਕਿਚ੍ਚਂ ਸਾਧੇਨ੍ਤਂ ਵਾ ਅਞ੍ਞਸ੍ਮਿਂ ਦੇਸੇ ਉਟ੍ਠਿਤਭੂਮਿਰਸਾਦਿਭੇਦੇਨ ਆਹਾਰਕਿਚ੍ਚਂ ਅਸਾਧੇਨ੍ਤਮ੍ਪਿ ਵਾ ਸਮ੍ਭਵੇਯ੍ਯਾਤਿ ਆਹ ‘‘ਤੇਸੁ ਤੇਸੁ ਜਨਪਦੇਸੂ’’ਤਿਆਦਿ. ਕੇਚਿ ਪਨ ‘‘ਏਕਸ੍ਮਿਂ ਜਨਪਦੇ ਆਹਾਰਕਿਚ੍ਚਂ ਸਾਧੇਨ੍ਤਂ ਸੇਸਜਨਪਦੇਸੁਪਿ ਵਿਕਾਲੇ ਨ ਕਪ੍ਪਤਿ ਏਵਾਤਿ ਦਸ੍ਸਨਤ੍ਥਂ ਇਦਂ ਵੁਤ੍ਤ’’ਨ੍ਤਿਪਿ (ਸਾਰਤ੍ਥ. ਟੀ. ਪਾਚਿਤ੍ਤਿਯਕਣ੍ਡ ੩.੨੪੮-੨੪੯) ਵਦਨ੍ਤਿ. ਪਕਤਿਆਹਾਰਵਸੇਨਾਤਿ ਅਞ੍ਞੇਹਿ ਯਾਵਕਾਲਿਕੇਹਿ ਅਯੋਜਿਤਂ ਅਤ੍ਤਨੋ ਪਕਤਿਯਾਵ ਆਹਾਰਕਿਚ੍ਚਕਰਣਵਸੇਨ. ਸਮ੍ਮੋਹੋਯੇਵ ਹੋਤੀਤਿ ¶ ਅਨੇਕਤ੍ਥਾਨਂ ਨਾਮਾਨਂ, ਅਪ੍ਪਸਿਦ੍ਧਾਨਞ੍ਚ ਸਮ੍ਭਵਤੋ ਸਮ੍ਮੋਹੋ ਏਵ ਸਿਯਾ. ਤੇਨੇਵੇਤ੍ਥ ਮਯਮ੍ਪਿ ਮੂਲਕਮੂਲਾਦੀਨਂ ਪਰਿਯਾਯਨ੍ਤਰਦਸ੍ਸਨੇਨ ਅਦਸ੍ਸਨਂ ਕਰਿਮ੍ਹ ਉਪਦੇਸਤੋਵ ਗਹੇਤਬ੍ਬਤੋ.

ਯਨ੍ਤਿ ਵਟ੍ਟਕਨ੍ਦਂ. ਮੁਲ਼ਾਲਨ੍ਤਿ ਥੂਲਤਰੁਣਮੂਲਮੇਵ, ਰੁਕ੍ਖਵਲ੍ਲਿਆਦੀਨਂ ਮਤ੍ਥਕੋਤਿ ਹੇਟ੍ਠਾ ਵੁਤ੍ਤਮੇਵ ਸਮ੍ਪਿਣ੍ਡੇਤ੍ਵਾ ਵੁਤ੍ਤਂ. ਅਚ੍ਛਿਵਾਦੀਨਂ ਅਪਰਿਪਕ੍ਕਾਨੇਵ ਫਲਾਨਿ ਯਾਵਜੀਵਿਕਾਨੀਤਿ ਦਸ੍ਸੇਤੁਂ ‘‘ਅਪਰਿਪਕ੍ਕਾਨੀ’’ਤਿ ਵੁਤ੍ਤਂ. ਹਰੀਤਕਾਦੀਨਂ ਅਟ੍ਠੀਨੀਤਿ ਏਤ੍ਥ ਮਿਞ੍ਜਂ ਯਾਵਕਾਲਿਕਨ੍ਤਿ ਕੇਚਿ ਵਦਨ੍ਤਿ, ਤਂ ਨ ਯੁਤ੍ਤਂ ਅਟ੍ਠਕਥਾਯਂ ਅਵੁਤ੍ਤਤ੍ਤਾ.

ਹਿਙ੍ਗੁਰੁਕ੍ਖਤੋ ਪਗ੍ਘਰਿਤਨਿਯ੍ਯਾਸੋ ਹਿਙ੍ਗੁ ਨਾਮ. ਹਿਙ੍ਗੁਜਤੁਆਦਯੋ ਚ ਹਿਙ੍ਗੁਵਿਕਤਿਯੋਵ. ਤਤ੍ਥ ਹਿਙ੍ਗੁਜਤੁ ਨਾਮ ਹਿਙ੍ਗੁਰੁਕ੍ਖਸ੍ਸ ਦਣ੍ਡਪਤ੍ਤਾਨਿ ਪਚਿਤ੍ਵਾ ਕਤਨਿਯ੍ਯਾਸੋ. ਹਿਙ੍ਗੁਸਿਪਾਟਿਕਾ ਨਾਮ ਹਿਙ੍ਗੁਪਤ੍ਤਾਨਿ ਪਚਿਤ੍ਵਾ ਕਤਨਿਯ੍ਯਾਸੋ. ਅਞ੍ਞੇਨ ਮਿਸ੍ਸੇਤ੍ਵਾ ਕਤੋਤਿਪਿ ਵਦਨ੍ਤਿ. ਤਕਨ੍ਤਿ ਅਗ੍ਗਕੋਟਿਯਾ ਨਿਕ੍ਖਨ੍ਤਸਿਲੇਸੋ. ਤਕਪਤ੍ਤਿਨ੍ਤਿ ਪਤ੍ਤਤੋ ਨਿਕ੍ਖਨ੍ਤਸਿਲੇਸੋ. ਤਕਪਣ੍ਣਿਨ੍ਤਿ ਪਲਾਸੇ ਭਜ੍ਜਿਤ੍ਵਾ ਕਤਸਿਲੇਸੋ. ਦਣ੍ਡਤੋ ਨਿਕ੍ਖਨ੍ਤਸਿਲੇਸੋਤਿਪਿ ਵਦਨ੍ਤਿ. ਵਿਕਾਲਤਾ, ਯਾਵਕਾਲਿਕਤਾ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਵਿਕਾਲਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ

੨੫੨-੩. ਅਟ੍ਠਮੇ ਤਾਦਿਸਨ੍ਤਿ ਅਸੂਪਬ੍ਯਞ੍ਜਨਂ. ਯਾਵਕਾਲਿਕਂ ਵਾ ਯਾਮਕਾਲਿਕਂ ਵਾ…ਪੇ… ਪਾਚਿਤ੍ਤਿਯਨ੍ਤਿ ਏਤ੍ਥ ਕਿਞ੍ਚਾਪਿ ਪਾਲ਼ਿਯਂ ਖਾਦਨੀਯਭੋਜਨੀਯਪਦੇਹਿ ਯਾਵਕਾਲਿਕਮੇਵ ਸਙ੍ਗਹਿਤਂ, ਨ ਯਾਮਕਾਲਿਕਂ. ਤਥਾਪਿ ‘‘ਅਨਾਪਤ੍ਤਿ ਯਾਮਕਾਲਿਕਂ ਯਾਮੇ ਨਿਦਹਿਤ੍ਵਾ ਭੁਞ੍ਜਤੀ’’ਤਿ ਇਧ ਚੇਵ –

‘‘ਯਾਮਕਾਲਿਕੇਨ ¶ , ਭਿਕ੍ਖਵੇ, ਸਤ੍ਤਾਹਕਾਲਿਕਂ…ਪੇ… ਯਾਵਜੀਵਿਕਂ ਤਦਹੁਪਟਿਗ੍ਗਹਿਤਂ ਯਾਮੇ ਕਪ੍ਪਤਿ, ਯਾਮਾਤਿਕ੍ਕਨ੍ਤੇ ਨ ਕਪ੍ਪਤੀ’’ਤਿ (ਮਹਾਵ. ੩੦੫) –

ਅਞ੍ਞਤ੍ਥ ਚ ਵੁਤ੍ਤਤ੍ਤਾ, ‘‘ਯਾਮਕਾਲਿਕ’’ਨ੍ਤਿ ਵਚਨਸਾਮਤ੍ਥਿਯਤੋ ਚ ਭਗਵਤੋ ਅਧਿਪ੍ਪਾਯਞ੍ਞੂਹਿ ਅਟ੍ਠਕਥਾਚਰਿਯੇਹਿ ਯਾਮਕਾਲਿਕਂ ਸਨ੍ਨਿਧਿਕਾਰਕਕਤਂ ਪਾਚਿਤ੍ਤਿਯਵਤ੍ਥੁਮੇਵ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਯਨ੍ਤਿ ਪਤ੍ਤਂ, ਘਂਸਨਕਿਰਿਯਾਪੇਕ੍ਖਾਯ ਚੇਤਂ ਉਪਯੋਗਵਚਨਂ. ਅਙ੍ਗੁਲਿਲੇਖਾ ਪਞ੍ਞਾਯਤੀਤਿ ਸਿਨੇਹਾਭਾਵੇਪਿ ਪਤ੍ਤਸ੍ਸ ਸੁਚ੍ਛਵਿਤਾਯ ਪਞ੍ਞਾਯਤਿ. ਯਨ੍ਤਿ ਯਾਵਕਾਲਿਕਂ, ਯਾਮਕਾਲਿਕਞ੍ਚ. ਅਪਰਿਚ੍ਚਤ੍ਤਮੇਵਾਤਿ ਨਿਰਪੇਕ੍ਖਤਾਯ ¶ ਅਨੁਪਸਮ੍ਪਨ੍ਨਸ੍ਸ ਅਦਿਨ੍ਨਂ, ਅਪਰਿਚ੍ਚਤ੍ਤਞ੍ਚ ਯਾਵਕਾਲਿਕਾਦਿਵਤ੍ਥੁਮੇਵ ਸਨ੍ਧਾਯ ਵਦਤਿ, ਨ ਪਨ ਤਗ੍ਗਤਪਟਿਗ੍ਗਹਣਂ. ਨ ਹਿ ਵਤ੍ਥੁਂ ਅਪਰਿਚ੍ਚਜਿਤ੍ਵਾ ਤਤ੍ਥਗਤਪਟਿਗ੍ਗਹਣਂ ਪਰਿਚ੍ਚਜਿਤੁਂ ਸਕ੍ਕਾ, ਨ ਚ ਤਾਦਿਸਂ ਵਚਨਮਤ੍ਥਿ. ਯਦਿ ਭਵੇਯ੍ਯ, ‘‘ਸਚੇ ਪਤ੍ਤੋ ਦੁਦ੍ਧੋਤੋ ਹੋਤਿ…ਪੇ… ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯ’’ਨ੍ਤਿ ਵਚਨਂ ਵਿਰੁਜ੍ਝੇਯ੍ਯ. ਨ ਹਿ ਧੋਵਨੇਨ ਆਮਿਸਂ ਅਪਨੇਤੁਂ ਵਾਯਮਨ੍ਤਸ੍ਸ ਪਟਿਗ੍ਗਹਣੇ ਅਪੇਕ੍ਖਾ ਵਤ੍ਤਤਿ. ਯੇਨ ਪੁਨਦਿਵਸੇ ਭੁਞ੍ਜਤੋ ਪਾਚਿਤ੍ਤਿਯਂ ਜਨੇਯ੍ਯ, ਪਤ੍ਤੇ ਪਨ ਵਤ੍ਤਮਾਨਾ ਅਪੇਕ੍ਖਾ ਤਗ੍ਗਤਿਕੇ ਆਮਿਸੇਪਿ ਵਤ੍ਤਤਿ ਏਵਨਾਮਾਤਿ ਆਮਿਸੇ ਅਨਪੇਕ੍ਖਤਾ ਏਤ੍ਥ ਨ ਲਬ੍ਭਤਿ, ਤਤੋ ਆਮਿਸੇ ਅਵਿਜਹਿਤਪਟਿਗ੍ਗਹਣਂ ਪੁਨਦਿਵਸੇ ਪਾਚਿਤ੍ਤਿਯਂ ਜਨੇਤੀਤਿ ਇਦਂ ਵੁਤ੍ਤਂ. ਅਥ ਮਤਂ ‘‘ਯਦਗ੍ਗੇਨੇਤ੍ਥ ਆਮਿਸਾਨਪੇਕ੍ਖਤਾ ਨ ਲਬ੍ਭਤਿ. ਤਦਗ੍ਗੇਨ ਪਟਿਗ੍ਗਹਣਾਨਪੇਕ੍ਖਾਪਿ ਨ ਲਬ੍ਭਤੀ’’ਤਿ. ਤਥਾ ਸਤਿ ਯਤ੍ਥ ਆਮਿਸਾਪੇਕ੍ਖਾ ਅਤ੍ਥਿ, ਤਤ੍ਥ ਪਟਿਗ੍ਗਹਣਾਪੇਕ੍ਖਾਪਿ ਨ ਵਿਗਚ੍ਛਤੀਤਿ ਆਪਨ੍ਨਂ, ਏਵਞ੍ਚ ਪਟਿਗ੍ਗਹਣੇ ਅਨਪੇਕ੍ਖਵਿਸ੍ਸਜ੍ਜਨਂ ਵਿਸੁਂ ਨ ਵਤ੍ਤਬ੍ਬਂ ਸਿਯਾ. ਅਟ੍ਠਕਥਾਯਞ੍ਚੇਤਮ੍ਪਿ ਪਟਿਗ੍ਗਹਣਵਿਜਹਨਕਾਰਣਤ੍ਤੇਨ ਅਭਿਮਤਂ ਸਿਯਾ, ਇਦਂ ਸੁਟ੍ਠੁਤਰਂ ਕਤ੍ਵਾ ਵਿਸੁਂ ਵਤ੍ਤਬ੍ਬਂ ਚੀਵਰਾਪੇਕ੍ਖਾਯ ਵਤ੍ਤਮਾਨਾਯਪਿ ਪਚ੍ਚੁਦ੍ਧਾਰੇਨ ਅਧਿਟ੍ਠਾਨਵਿਜਹਨਂ ਵਿਯ. ਏਤਸ੍ਮਿਞ੍ਚ ਉਪਾਯੇ ਸਤਿ ਗਣ੍ਠਿਕਾਹਤਪਤ੍ਤੇਸੁ ਅਵਟ੍ਟਨਤਾ ਨਾਮ ਨ ਸਿਯਾਤਿ ਵੁਤ੍ਤੋਵਾਯਮਤ੍ਥੋ. ਤਸ੍ਮਾ ਯਂ ਵੁਤ੍ਤਂ ਸਾਰਤ੍ਥਦੀਪਨਿਯਂ ‘‘ਯਂ ਪਰਸ੍ਸ ਪਰਿਚ੍ਚਜਿਤ੍ਵਾ ਅਦਿਨ੍ਨਮ੍ਪਿ ਸਚੇ ਪਟਿਗ੍ਗਹਣੇ ਨਿਰਪੇਕ੍ਖਨਿਸ੍ਸਜ੍ਜਨੇਨ ਵਿਜਹਿਤਪਟਿਗ੍ਗਹਣਂ ਹੋਤਿ, ਤਮ੍ਪਿ ਦੁਤਿਯਦਿਵਸੇ ਵਟ੍ਟਤੀ’’ਤਿਆਦਿ (ਸਾਰਤ੍ਥ. ਟੀ. ਪਾਚਿਤ੍ਤਿਯਕਣ੍ਡ ੩.੨੫੨-੨੫੩), ਤਂ ਨ ਸਾਰਤੋ ਪਚ੍ਚੇਤਬ੍ਬਂ.

ਪਕਤਿਆਮਿਸੇਤਿ ਓਦਨਾਦਿਕਪ੍ਪਿਯਯਾਵਕਾਲਿਕੇ. ਦ੍ਵੇਤਿ ਪੁਰੇਭਤ੍ਤਂ ਪਟਿਗ੍ਗਹਿਤਂ ਯਾਮਕਾਲਿਕਂ ਪੁਰੇਭਤ੍ਤਂ ਸਾਮਿਸੇਨ ਮੁਖੇਨ ਭੁਞ੍ਜਤੋ ਸਨ੍ਨਿਧਿਪਚ੍ਚਯਾ ਏਕਂ, ਯਾਮਕਾਲਿਕਸਂਸਟ੍ਠਤਾਯ ਯਾਵਕਾਲਿਕਤ੍ਤਭਜਨੇਨ ਅਨਤਿਰਿਤ੍ਤਪਚ੍ਚਯਾ ¶ ਏਕਨ੍ਤਿ ਦ੍ਵੇ ਪਾਚਿਤ੍ਤਿਯਾਨਿ. ਵਿਕਪ੍ਪਦ੍ਵਯੇਤਿ ਸਾਮਿਸਨਿਰਾਮਿਸਪਕ੍ਖਦ੍ਵਯੇ. ਥੁਲ੍ਲਚ੍ਚਯਞ੍ਚ ਦੁਕ੍ਕਟਞ੍ਚਾਤਿ ਮਨੁਸ੍ਸਮਂਸੇ ਥੁਲ੍ਲਚ੍ਚਯਂ, ਸੇਸੇਸੁ ਦੁਕ੍ਕਟਂ. ਯਾਵਕਾਲਿਕਯਾਮਕਾਲਿਕਤਾ, ਸਨ੍ਨਿਧਿਭਾਵੋ, ਤਸ੍ਸ ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੫੯. ਨਵਮੇ ਪਣੀਤਸਂਸਟ੍ਠਾਨਿ ਭੋਜਨਾਨਿ ਪਣੀਤਭੋਜਨਾਨੀਤਿ ਪਾਲ਼ਿਯਂ ਪਨ ਭੋਜਨਾਨਿ ਪੁਬ੍ਬੇ ਵੁਤ੍ਤਤ੍ਤਾ ਪਾਕਟਾਨੀਤਿ ਅਦਸ੍ਸਿਤਾਨਿ, ਤਾਦਿਸੇਹਿ ਪਣੀਤੇਹਿ ਮਿਸ੍ਸਤ੍ਤਾ ਪਣੀਤਭੋਜਨਾਨਿ ਨਾਮ ਹੋਨ੍ਤਿ. ਤੇਸਂ ਪਭੇਦਦਸ੍ਸਨਤ੍ਥਂ ‘‘ਸੇਯ੍ਯਥਿਦਂ ਸਪ੍ਪਿ ਨਵਨੀਤ’’ਨ੍ਤਿਆਦਿ ਵੁਤ੍ਤਂ. ਸਪ੍ਪਿਭਤ੍ਤਨ੍ਤਿ ਏਤ੍ਥ ਕਿਞ੍ਚਾਪਿ ¶ ਸਪ੍ਪਿਨਾ ਸਂਸਟ੍ਠਂ ਭਤ੍ਤਂ, ਸਪ੍ਪਿ ਚ ਭਤ੍ਤਞ੍ਚਾਤਿਪਿ ਅਤ੍ਥੋ ਵਿਞ੍ਞਾਯਤਿ, ਅਟ੍ਠਕਥਾਯਂ ਪਨ ‘‘ਸਾਲਿਭਤ੍ਤਂ ਵਿਯ ਸਪ੍ਪਿਭਤ੍ਤਂ ਨਾਮ ਨਤ੍ਥੀ’’ਤਿਆਦਿਨਾ ਵੁਤ੍ਤਤ੍ਤਾ ਨ ਸਕ੍ਕਾ ਅਞ੍ਞਂ ਵਤ੍ਥੁਂ. ਅਟ੍ਠਕਥਾਚਰਿਯਾ ਏਵ ਹਿ ਈਦਿਸੇਸੁ ਠਾਨੇਸੁ ਪਮਾਣਂ.

ਮੂਲਨ੍ਤਿ ਕਪ੍ਪਿਯਭਣ੍ਡਂ ਵੁਤ੍ਤਂ. ਤਸ੍ਮਾ ਅਨਾਪਤ੍ਤੀਤਿ ਏਤ੍ਥ ਵਿਸਙ੍ਕੇਤੇਨ ਪਾਚਿਤ੍ਤਿਯਾਭਾਵੇਪਿ ਸੂਪੋਦਨਦੁਕ੍ਕਟਾ ਨ ਮੁਚ੍ਚਤੀਤਿ ਵਦਨ੍ਤਿ. ‘‘ਕਪ੍ਪਿਯਸਪ੍ਪਿਨਾ, ਅਕਪ੍ਪਿਯਸਪ੍ਪਿਨਾ’’ਤਿ ਚ ਇਦਂ ਕਪ੍ਪਿਯਾਕਪ੍ਪਿਯਮਂਸਸਤ੍ਤਾਨਂ ਵਸੇਨ ਵੁਤ੍ਤਂ.

੨੬੧. ਮਹਾਨਾਮਸਿਕ੍ਖਾਪਦਂ ਨਾਮ ਉਪਰਿ ਚਾਤੁਮਾਸਪਚ੍ਚਯਪਵਾਰਣਾਸਿਕ੍ਖਾਪਦਂ (ਪਾਚਿ. ੩੦੩ ਆਦਯੋ). ਅਗਿਲਾਨੋ ਹਿ ਅਪ੍ਪਵਾਰਿਤਟ੍ਠਾਨੇ ਵਿਞ੍ਞਾਪੇਨ੍ਤੋਪਿ ਕਾਲਪਰਿਚ੍ਛੇਦਂ, ਭੇਸਜ੍ਜਪਰਿਚ੍ਛੇਦਂ ਵਾ ਕਤ੍ਵਾ ਸਙ੍ਘਵਸੇਨ ਪਵਾਰਿਤਟ੍ਠਾਨਤੋ ਤਦੁਤ੍ਤਰਿ ਵਿਞ੍ਞਾਪੇਨ੍ਤੇਨ, ਪਰਿਚ੍ਛੇਦਬ੍ਭਨ੍ਤਰੇਪਿ ਨ ਭੇਸਜ੍ਜਕਰਣੀਯੇਨ ਰੋਗੇਨ ਭੇਸਜ੍ਜਂ ਵਿਞ੍ਞਾਪੇਨ੍ਤੇਨ ਚ ਸਮੋ ਹੋਤੀਤਿ ‘‘ਮਹਾਨਾਮਸਿਕ੍ਖਾਪਦੇਨ ਕਾਰੇਤਬ੍ਬੋ’’ਤਿ ਵੁਤ੍ਤਂ. ਪਣੀਤਭੋਜਨਤਾ, ਅਗਿਲਾਨਤਾ, ਅਕਤਵਿਞ੍ਞਤ੍ਤਿਯਾ ਪਟਿਲਾਭੋ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਪਣੀਤਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੬੩. ਦਸਮੇ ¶ ਘਨਬਦ੍ਧੋਤਿ ਘਨਮਂਸੇਨ ਸਮ੍ਬਦ੍ਧੋ, ਕਥਿਨਸਂਹਤਸਰੀਰੋਤਿ ਅਤ੍ਥੋ.

੨੬੪. ਮੁਖਦ੍ਵਾਰਨ੍ਤਿ ਮੁਖਤੋ ਹੇਟ੍ਠਾ ਦ੍ਵਾਰਂ ਮੁਖਦ੍ਵਾਰਂ, ਗਲਨਾਲ਼ਿਕਨ੍ਤਿ ਅਤ੍ਥੋ. ਏਵਞ੍ਚ ਨਾਸਿਕਾਯ ਪਵਿਟ੍ਠਮ੍ਪਿ ਮੁਖਦ੍ਵਾਰਂ ਪਵਿਟ੍ਠਮੇਵ ਹੋਤਿ, ਮੁਖੇ ਪਕ੍ਖਿਤ੍ਤਮਤ੍ਤਞ੍ਚ ਅਪ੍ਪਵਿਟ੍ਠਂ. ਆਹਾਰਨ੍ਤਿ ਅਜ੍ਝੋਹਰਿਤਬ੍ਬਂ ਕਾਲਿਕਂ ਅਧਿਪ੍ਪੇਤਂ, ਨ ਉਦਕਂ. ਤਞ੍ਹਿ ਭੇਸਜ੍ਜਸਙ੍ਗਹਿਤਮ੍ਪਿ ਅਕਾਲਿਕਮੇਵ ਪਟਿਗ੍ਗਹਿਤਸ੍ਸੇਵ ਕਾਲਿਕਤ੍ਤਾ. ਉਦਕੇ ਹਿ ਪਟਿਗ੍ਗਹਣਂ ਨ ਰੁਹਤਿ. ਤੇਨੇਵ ਭਿਕ੍ਖੁਨਾ ਤਾਪਿਤੇਨ ਉਦਕੇਨ ਚਿਰਪਟਿਗ੍ਗਹਿਤੇਨ ਚ ਅਕਪ੍ਪਿਯਕੁਟਿਯਂ ਵੁਤ੍ਥੇਨ ਚ ਸਹ ਆਮਿਸਂ ਭੁਞ੍ਜਨ੍ਤਸ੍ਸਾਪਿ ਸਾਮਪਾਕਾਦਿਦੋਸੋ ਨ ਹੋਤਿ. ਵਕ੍ਖਤਿ ਹਿ ‘‘ਭਿਕ੍ਖੁ ਯਾਗੁਅਤ੍ਥਾਯ…ਪੇ… ਉਦਕਂ ਤਾਪੇਤਿ, ਵਟ੍ਟਤੀ’’ਤਿਆਦਿ (ਪਾਚਿ. ਅਟ੍ਠ. ੨੬੫). ਭਿਕ੍ਖੂ ਪਨ ਏਤਂ ਅਧਿਪ੍ਪਾਯਂ ਤਦਾ ਨ ਜਾਨਿਂਸੁ. ਤੇਨਾਹ ‘‘ਸਮ੍ਮਾ ਅਤ੍ਥਂ ਅਸਲ੍ਲਕ੍ਖੇਤ੍ਵਾ’’ਤਿਆਦਿ.

੨੬੫. ਰਥਰੇਣੁਮ੍ਪੀਤਿ ¶ ਰਥੇ ਗਚ੍ਛਨ੍ਤੇ ਉਟ੍ਠਹਨਰੇਣੁਸਦਿਸਰੇਣੁਂ. ਤੇਨ ਤਤੋ ਸੁਖੁਮਂ ਆਕਾਸੇ ਪਰਿਬ੍ਭਮਨਕਂ ਦਿਸ੍ਸਮਾਨਮ੍ਪਿ ਅਬ੍ਬੋਹਾਰਿਕਨ੍ਤਿ ਦਸ੍ਸੇਤਿ. ਅਕਲ੍ਲਕੋਤਿ ਗਿਲਾਨੋ.

‘‘ਗਹੇਤੁਂ ਵਾ…ਪੇ… ਤਸ੍ਸ ਓਰਿਮਨ੍ਤੇਨਾ’’ਤਿ ਇਮਿਨਾ ਆਕਾਸੇ ਉਜੁਂ ਠਤ੍ਵਾ ਪਰੇਨ ਉਕ੍ਖਿਤ੍ਤਂ ਗਣ੍ਹਨ੍ਤਸ੍ਸਾਪਿ ਆਸਨ੍ਨਙ੍ਗਭੂਤਪਾਦਤਲਤੋ ਪਟ੍ਠਾਯ ਹਤ੍ਥਪਾਸੋ ਪਰਿਚ੍ਛਿਨ੍ਦਿਤਬ੍ਬੋ, ਨ ਪਨ ਸੀਸਨ੍ਤਤੋ ਪਟ੍ਠਾਯਾਤਿ ਦਸ੍ਸੇਤਿ. ਤਤ੍ਥ ‘‘ਓਰਿਮਨ੍ਤੇਨਾ’’ਤਿ ਇਮਸ੍ਸ ਹੇਟ੍ਠਿਮਨ੍ਤੇਨਾਤਿ ਅਤ੍ਥੋ ਗਹੇਤਬ੍ਬੋ.

ਏਤ੍ਥ ਚ ਪਵਾਰਣਾਸਿਕ੍ਖਾਪਦਟ੍ਠਕਥਾਯਂ ‘‘ਸਚੇ ਭਿਕ੍ਖੁ ਨਿਸਿਨ੍ਨੋ ਹੋਤਿ, ਆਸਨਸ੍ਸ ਪਚ੍ਛਿਮਨ੍ਤਤੋ ਪਟ੍ਠਾਯਾ’’ਤਿਆਦਿਨਾ (ਪਾਚਿ. ਅਟ੍ਠ. ੨੩੮-੨੩੯) ਪਟਿਗ੍ਗਾਹਕਾਨਂ ਆਸਨ੍ਨਙ੍ਗਸ੍ਸ ਪਾਰਿਮਨ੍ਤਤੋ ਪਟ੍ਠਾਯ ਪਰਿਚ੍ਛੇਦਸ੍ਸ ਦਸ੍ਸਿਤਤ੍ਤਾ ਇਧਾਪਿ ਆਕਾਸੇ ਠਿਤਸ੍ਸ ਪਟਿਗ੍ਗਾਹਕਸ੍ਸ ਆਸਨ੍ਨਙ੍ਗਭੂਤਪਾਦਙ੍ਗੁਲਸ੍ਸ ਪਾਰਿਮਨ੍ਤਭੂਤਤੋ ਪਣ੍ਹਿਪਰਿਯਨ੍ਤਸ੍ਸ ਹੇਟ੍ਠਿਮਤਲਤੋ ਪਟ੍ਠਾਯ, ਦਾਯਕਸ੍ਸ ਪਨ ਓਰਿਮਨ੍ਤਭੂਤਤੋ ਪਾਦਙ੍ਗੁਲਸ੍ਸ ਹੇਟ੍ਠਿਮਤਲਤੋ ਪਟ੍ਠਾਯ ਹਤ੍ਥਪਾਸੋ ਪਰਿਚ੍ਛਿਨ੍ਦਿਤਬ੍ਬੋਤਿ ਦਟ੍ਠਬ੍ਬਂ. ਇਮਿਨਾਵ ਨਯੇਨ ਭੂਮਿਯਂ ਨਿਪਜ੍ਜਿਤ੍ਵਾ ਉਸ੍ਸੀਸੇ ਨਿਸਿਨ੍ਨਸ੍ਸ ਹਤ੍ਥਤੋ ਪਟਿਗ੍ਗਣ੍ਹਨ੍ਤਸ੍ਸਪਿ ਆਸਨ੍ਨਸੀਸਙ੍ਗਸ੍ਸ ਪਾਰਿਮਨ੍ਤਭੂਤਤੋ ਗੀਵਨ੍ਤਤੋ ਪਟ੍ਠਾਯੇਵ ¶ ਹਤ੍ਥਪਾਸੋ ਮਿਨਿਤਬ੍ਬੋ, ਨ ਪਾਦਤਲਤੋ ਪਟ੍ਠਾਯ. ਏਵਂ ਨਿਪਜ੍ਜਿਤ੍ਵਾ ਦਾਨੇਪਿ ਯਥਾਨੁਰੂਪਂ ਵੇਦਿਤਬ੍ਬਂ. ‘‘ਯਂ ਆਸਨ੍ਨਤਰਂ ਅਙ੍ਗ’’ਨ੍ਤਿ ਹਿ ਵੁਤ੍ਤਂ.

ਪਟਿਗ੍ਗਹਣਸਞ੍ਞਾਯਾਤਿ ‘‘ਮਞ੍ਚਾਦਿਨਾ ਪਟਿਗ੍ਗਹੇਸ੍ਸਾਮੀ’’ਤਿ ਉਪ੍ਪਾਦਿਤਸਞ੍ਞਾਯ. ਇਮਿਨਾ ‘‘ਪਟਿਗ੍ਗਣ੍ਹਾਮੀ’’ਤਿ ਵਾਚਾਯ ਵਤ੍ਤਬ੍ਬਕਿਚ੍ਚਂ ਨਤ੍ਥੀਤਿ ਦਸ੍ਸੇਤਿ. ਕਤ੍ਥਚਿ ਅਟ੍ਠਕਥਾਸੁ, ਪਦੇਸੇਸੁ ਵਾ. ਅਸਂਹਾਰਿਮੇ ਫਲਕੇਤਿ ਥਾਮਮਜ੍ਝਿਮੇਨ ਪੁਰਿਸੇਨ ਅਸਂਹਾਰਿਯੇ. ਪੁਞ੍ਛਿਤ੍ਵਾ ਪਟਿਗ੍ਗਹੇਤ੍ਵਾਤਿ ਪੁਞ੍ਛਿਤੇਪਿ ਰਜਨਚੁਣ੍ਣਸਙ੍ਕਾਯ ਸਤਿ ਪਟਿਗ੍ਗਹਣਤ੍ਥਾਯ ਵੁਤ੍ਤਂ, ਨਾਸਤਿ. ਤਂ ਪਨਾਤਿ ਪਤਿਤਰਜਂ ਅਪ੍ਪਟਿਗ੍ਗਹੇਤ੍ਵਾ ਉਪਰਿ ਗਹਿਤਪਿਣ੍ਡਪਾਤਂ. ਅਨਾਪਤ੍ਤੀਤਿ ਦੁਰੁਪਚਿਣ੍ਣਾਦਿਦੋਸੋ ਨਤ੍ਥਿ. ‘‘ਅਨੁਪਸਮ੍ਪਨ੍ਨਸ੍ਸ ਦਸ੍ਸਾਮੀ’’ਤਿਆਦਿਪਿ ਵਿਨਯਦੁਕ੍ਕਟਪਰਿਹਾਰਾਯ ਵੁਤ੍ਤਂ. ਤਥਾ ਅਕਤ੍ਵਾ ਗਹਿਤੇਪਿ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਤੋ ਅਨਾਪਤ੍ਤਿ ਏਵ. ‘‘ਅਨੁਪਸਮ੍ਪਨ੍ਨਸ੍ਸ ਦਤ੍ਵਾ’’ਤਿ ਇਦਮ੍ਪਿ ਪੁਰਿਮਾਭੋਗਾਨੁਗੁਣਤਾਯ ਵੁਤ੍ਤਂ.

ਚਰੁਕੇਨਾਤਿ ਖੁਦ੍ਦਕਭਾਜਨੇਨ. ਅਭਿਹਟਤ੍ਤਾਤਿ ਦਿਯ੍ਯਮਾਨਕ੍ਖਣਂ ਸਨ੍ਧਾਯ ਵੁਤ੍ਤਂ. ਦਤ੍ਵਾ ਅਪਨਯਨਕਾਲੇ ਪਨ ਛਾਰਿਕਾ ਵਾ ਬਿਨ੍ਦੂਨਿ ਵਾ ਪਤਨ੍ਤਿ, ਪੁਨ ਪਟਿਗ੍ਗਹੇਤਬ੍ਬਂ ਅਭਿਹਾਰਸ੍ਸ ਵਿਗਤਤ੍ਤਾਤਿ ਵਦਨ੍ਤਿ. ਤਂ ਯਥਾ ਨ ਪਤਤਿ, ਤਥਾ ਅਪਨੇਸ੍ਸਾਮੀਤਿ ਪਰਿਹਰਨ੍ਤੇ ਯੁਜ੍ਜਤਿ. ਪਕਤਿਸਞ੍ਞਾਯ ਅਪਨੇਨ੍ਤੇ ਅਭਿਹਾਰੋ ਨ ਛਿਜ੍ਜਤਿ, ਤਂ ਪਟਿਗ੍ਗਹਿਤਮੇਵ ਹੋਤਿ. ਮੁਖਵਟ੍ਟਿਯਾਪਿ ਗਹੇਤੁਂ ¶ ਵਟ੍ਟਤੀਤਿ ਅਭਿਹਰਿਯਮਾਨਸ੍ਸ ਪਤ੍ਤਸ੍ਸ ਮੁਖਵਟ੍ਟਿਯਾ ਉਪਰਿਭਾਗੇ ਹਤ੍ਥਂ ਪਸਾਰੇਤ੍ਵਾ ਫੁਸਿਤੁਂ ਵਟ੍ਟਤਿ.

ਪਾਦੇਨ ਪੇਲ੍ਲੇਤ੍ਵਾਤਿ ‘‘ਪਾਦੇਨ ਪਟਿਗ੍ਗਹੇਸ੍ਸਾਮੀ’’ਤਿਸਞ੍ਞਾਯ ਅਕ੍ਕਮਿਤ੍ਵਾ. ਕੇਚੀਤਿ ਅਭਯਗਿਰਿਵਾਸਿਨੋ. ਵਚਨਮਤ੍ਤਮੇਵਾਤਿ ਪਟਿਬਦ੍ਧਪ੍ਪਟਿਬਦ੍ਧਨ੍ਤਿ ਸਦ੍ਦਮਤ੍ਤਮੇਵ ਨਾਨਂ, ਕਾਯਪਟਿਬਦ੍ਧਮੇਵ ਹੋਤਿ. ਤਸ੍ਮਾ ਤੇਸਂ ਵਚਨਂ ਨ ਗਹੇਤਬ੍ਬਨ੍ਤਿ ਅਧਿਪ੍ਪਾਯੋ.

ਤੇਨ ਆਹਰਾਪੇਤੁਨ੍ਤਿ ਯਸ੍ਸ ਭਿਕ੍ਖੁਨੋ ਸਨ੍ਤਿਕਂ ਗਤਂ, ਤਂ ਇਧ ਆਨੇਹੀਤਿ ਆਣਾਪੇਤ੍ਵਾ ਤੇਨ ਆਹਰਾਪੇਤੁਂ ਇਤਰਸ੍ਸ ਵਟ੍ਟਤੀਤਿ ਅਤ੍ਥੋ. ਨ ਤਤੋ ਪਰਨ੍ਤਿ ਤਦਹੇਵ ਸਾਮਂ ਅਪ੍ਪਟਿਗ੍ਗਹਿਤਂ ਸਨ੍ਧਾਯ ਵੁਤ੍ਤਂ. ਤਦਹੇਵ ਪਟਿਗ੍ਗਹਿਤਂ ਪਨ ਪੁਨਦਿਵਸਾਦੀਸੁ ਅਪ੍ਪਟਿਗ੍ਗਹੇਤ੍ਵਾਪਿ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਵਦਨ੍ਤਿ.

ਖਿਯ੍ਯਨ੍ਤੀਤਿ ਖਯਂ ਗਚ੍ਛਨ੍ਤਿ, ਤੇਸਂ ਚੁਣ੍ਣੇਹਿ ਥੁਲ੍ਲਚ੍ਚਯਅਪ੍ਪਟਿਗ੍ਗਹਣਾਪਤ੍ਤਿਯੋ ਨ ਹੋਨ੍ਤੀਤਿ ਅਧਿਪ੍ਪਾਯੋ. ‘‘ਨਵਸਮੁਟ੍ਠਿਤ’’ਨ੍ਤਿ ਏਤੇਨੇਵ ਉਚ੍ਛੁਆਦੀਸੁ ¶ ਅਭਿਨਵਲਗ੍ਗਤ੍ਤਾ ਅਬ੍ਬੋਹਾਰਿਕਂ ਨ ਹੋਤੀਤਿ ਦਸ੍ਸੇਤਿ. ਏਸੇਵ ਨਯੋਤਿ ਸਨ੍ਨਿਧਿਦੋਸਾਦਿਂ ਸਨ੍ਧਾਯ ਵਦਤਿ. ਤੇਨਾਹ ‘‘ਨ ਹੀ’’ਤਿਆਦਿ. ਤੇਨ ਚ ਪਟਿਗ੍ਗਹਣਙ੍ਗੇਸੁ ਪਞ੍ਚਸੁਪਿ ਸਮਿਦ੍ਧੇਸੁ ਅਜ੍ਝੋਹਰਿਤੁਕਾਮਤਾਯ ਗਹਿਤਮੇਵ ਪਟਿਗ੍ਗਹਿਤਂ ਨਾਮ ਹੋਤਿ ਅਜ੍ਝੋਹਰਿਤਬ੍ਬੇਸੁ ਏਵ ਪਟਿਗ੍ਗਹਣਸ੍ਸ ਅਨੁਞ੍ਞਾਤਤ੍ਤਾਤਿ ਦਸ੍ਸੇਤਿ. ਤਥਾ ਬਾਹਿਰਪਰਿਭੋਗਤ੍ਥਾਯ ਗਹੇਤ੍ਵਾ ਠਪਿਤਤੇਲਾਦਿਂ ਅਜ੍ਝੋਹਰਿਤੁਕਾਮਤਾਯ ਸਤਿ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ.

ਕੇਸਞ੍ਚੀਤਿਆਦੀਸੁ ਅਨੁਪਸਮ੍ਪਨ੍ਨਾਨਂ ਅਤ੍ਥਾਯ ਕਤ੍ਥਚਿ ਠਪਿਯਮਾਨਮ੍ਪਿ ਹਤ੍ਥਤੋ ਮੁਤ੍ਤਮਤ੍ਤੇ ਏਵ ਪਟਿਗ੍ਗਹਣਂ ਨ ਵਿਜਹਤਿ, ਅਥ ਖੋ ਭਾਜਨੇ ਪਤਿਤਮੇਵ ਪਟਿਗ੍ਗਹਣਂ ਵਿਜਹਤਿ. ਭਾਜਨਞ੍ਚ ਭਿਕ੍ਖੁਨਾ ਪੁਨਦਿਵਸਤ੍ਥਾਯ ਅਪੇਕ੍ਖਿਤਮੇਵਾਤਿ ਤਗ੍ਗਤਮ੍ਪਿ ਆਮਿਸਂ ਦੁਦ੍ਧੋਤਪਤ੍ਤਗਤਂ ਵਿਯ ਪਟਿਗ੍ਗਹਣਂ ਨ ਵਿਜਹਤੀਤਿ ਆਸਙ੍ਕਾਯ ‘‘ਸਾਮਣੇਰਸ੍ਸ ਹਤ੍ਥੇ ਪਕ੍ਖਿਪਿਤਬ੍ਬ’’ਨ੍ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਈਦਿਸੇਸੁ ਹਿ ਯੁਤ੍ਤਿ ਨ ਗਵੇਸਿਤਬ੍ਬਾ, ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ. ‘‘ਪਤ੍ਤਗਤਾ ਯਾਗੂ’’ਤਿ ਇਮਿਨਾ ਪਤ੍ਤਮੁਖਵਟ੍ਟਿਯਾ ਫੁਟ੍ਠੇਪਿ ਕੂਟੇ ਯਾਗੁ ਪਟਿਗ੍ਗਹਿਤਾ, ਉਗ੍ਗਹਿਤਾ ਵਾ ਨ ਹੋਤਿ ਭਿਕ੍ਖੁਨੋ ਅਨਿਚ੍ਛਾਯ ਫੁਟ੍ਠਤ੍ਤਾਤਿ ਦਸ੍ਸੇਤਿ. ਆਰੋਪੇਤੀਤਿ ਹਤ੍ਥਂ ਫੁਸਾਪੇਤਿ. ਪਟਿਗ੍ਗਹਣੂਪਗਂ ਭਾਰਂ ਨਾਮ ਮਜ੍ਝਿਮਸ੍ਸ ਪੁਰਿਸਸ੍ਸ ਉਕ੍ਖੇਪਾਰਹਂ. ਨ ਪਿਦਹਿਤਬ੍ਬਨ੍ਤਿ ਹਤ੍ਥਤੋ ਮੁਤ੍ਤਂ ਸਨ੍ਧਾਯ ਵੁਤ੍ਤਂ, ਹਤ੍ਥਗਤਂ ਪਨ ਇਤਰੇਨ ਹਤ੍ਥੇਨ ਪਿਦਹਤੋ, ਹਤ੍ਥਤੋ ਮੁਤ੍ਤਮ੍ਪਿ ਵਾ ਅਫੁਸਿਤ੍ਵਾ ਉਪਰਿਪਿਧਾਨਂ ਪਾਤੇਨ੍ਤਸ੍ਸ ਨ ਦੋਸੋ.

ਪਟਿਗ੍ਗਣ੍ਹਾਤੀਤਿ ¶ ਛਾਯਤ੍ਥਾਯ ਉਪਰਿ ਧਾਰਯਮਾਨਾ ਮਹਾਸਾਖਾ ਯੇਨ ਕੇਨਚਿ ਛਿਜ੍ਜੇਯ੍ਯ, ਤਤ੍ਥ ਲਗ੍ਗਰਜਂ ਮੁਖੇ ਪਾਤੇਯ੍ਯ ਚਾਤਿ ਕਪ੍ਪਿਯਂ ਕਾਰਾਪੇਤ੍ਵਾ ਪਟਿਗ੍ਗਣ੍ਹਾਤਿ. ਕੁਣ੍ਡਕੇਤਿ ਮਹਾਘਟੇ. ਤਸ੍ਮਿਮ੍ਪੀਤਿ ਚਾਟਿਘਟੇਪਿ. ਗਾਹਾਪੇਤ੍ਵਾਤਿ ਅਪ੍ਪਟਿਗ੍ਗਹਿਤਂ ਕਾਲਿਕਂ ਗਾਹਾਪੇਤ੍ਵਾ.

ਦੁਤਿਯਤ੍ਥੇਰਸ੍ਸਾਤਿ ‘‘ਥੇਰਸ੍ਸ ਪਤ੍ਤਂ ਮਯ੍ਹਂ ਦੇਥਾ’’ਤਿ ਤੇਨ ਅਤ੍ਤਨੋ ਪਰਿਚ੍ਚਜਾਪੇਤ੍ਵਾ ਦੁਤਿਯਤ੍ਥੇਰਸ੍ਸ ਦੇਤਿ. ਏਤ੍ਥ ਪਨਾਤਿ ਪਤ੍ਤਪਰਿਵਤ੍ਤਨੇ. ਕਾਰਣਨ੍ਤਿ ਏਤ੍ਥ ਯਥਾ ‘‘ਸਾਮਣੇਰਾ ਇਤੋ ਅਮ੍ਹਾਕਮ੍ਪਿ ਦੇਨ੍ਤੀ’’ਤਿ ਵਿਤਕ੍ਕੋ ਉਪ੍ਪਜ੍ਜਤਿ, ਨ ਤਥਾਤਿ ਕਾਰਣਂ ਵਦਨ੍ਤਿ, ਤਞ੍ਚ ਯੁਤ੍ਤਂ. ਯਸ੍ਸ ਪਨ ਤਾਦਿਸੋ ਵਿਤਕ੍ਕੋ ਨਤ੍ਥਿ, ਤੇਨ ਅਪਰਿਵਤ੍ਤੇਤ੍ਵਾਪਿ ਭੁਞ੍ਜਿਤੁਂ ਵਟ੍ਟਤਿ.

ਨਿਚ੍ਚਾਲੇਤੁਨ੍ਤਿ ¶ ਚਾਲੇਤ੍ਵਾ ਪਾਸਾਣਸਕ੍ਖਰਾਦਿਅਪਨਯਂ ਕਾਤੁਂ. ਉਦ੍ਧਨਂ ਆਰੋਪੇਤਬ੍ਬਨ੍ਤਿ ਅਨਗ੍ਗਿਕਂ ਉਦ੍ਧਨਂ ਸਨ੍ਧਾਯ ਵੁਤ੍ਤਂ. ਉਦ੍ਧਨੇ ਪਚ੍ਚਮਾਨਸ੍ਸ ਆਲੁਲ਼ਨੇ ਉਪਰਿ ਅਪਕ੍ਕਤਣ੍ਡੁਲਾ ਹੇਟ੍ਠਾ ਪਵਿਸਿਤ੍ਵਾ ਪਚ੍ਚਤੀਤਿ ਆਹ ‘‘ਸਾਮਂਪਾਕਞ੍ਚੇਵ ਹੋਤੀ’’ਤਿ.

ਆਧਾਰਕੇ ਪਤ੍ਤੋ ਠਪਿਤੋਤਿ ਅਪ੍ਪਟਿਗ੍ਗਹਿਤਾਮਿਸੋ ਪਤ੍ਤੋ ਪੁਨ ਪਟਿਗ੍ਗਹਣਤ੍ਥਾਯ ਠਪਿਤੋ. ਏਕਗ੍ਗਹਣੇਨੇਵਾਤਿ ਸਾਮਣੇਰਾਨਂ ਗਹਿਤਸ੍ਸ ਪੁਨ ਅਚ੍ਛਡ੍ਡਨਵਸੇਨ ਗਹਣੇਨ. ਭੁਞ੍ਜਿਤੁਂ ਵਟ੍ਟਤੀਤਿ ਧੂਮਵਟ੍ਟਿਯਾ ਤਦਹੁਪਟਿਗ੍ਗਹਿਤਤ੍ਤਾ ਵੁਤ੍ਤਂ. ਭਤ੍ਤੁਗ੍ਗਾਰੋਤਿਆਦਿ ਅਬ੍ਬੋਹਾਰਿਕਪ੍ਪਸਙ੍ਗੇਨ ਵਿਕਾਲਭੋਜਨਵਿਨਿਚ੍ਛਯਦਸ੍ਸਨਂ. ਸਮੁਦ੍ਦੋਦਕੇਨਾਤਿ ਅਪ੍ਪਟਿਗ੍ਗਹਿਤੇਨ. ਹਿਮਕਰਕਾ ਨਾਮ ਕਦਾਚਿ ਵਸ੍ਸੋਦਕੇਨ ਸਹ ਪਤਨਕਾ ਪਾਸਾਣਲੇਖਾ ਵਿਯ ਘਨੀਭੂਤਉਦਕਵਿਸੇਸਾ, ਤੇਸੁ ਪਟਿਗ੍ਗਹਣਕਿਚ੍ਚਂ ਨਤ੍ਥਿ. ਤੇਨਾਹ ‘‘ਉਦਕਗਤਿਕਾ ਏਵਾ’’ਤਿ. ਪੁਰੇਭਤ੍ਤਮੇਵ ਵਟ੍ਟਤੀਤਿ ਅਪ੍ਪਟਿਗ੍ਗਹਿਤਾਪਤ੍ਤੀਹਿ ਅਬ੍ਬੋਹਾਰਿਕਮ੍ਪਿ ਵਿਕਾਲਭੋਜਨਾਪਤ੍ਤੀਹਿ ਸਬ੍ਬੋਹਾਰਿਕਨ੍ਤਿ ਦਸ੍ਸੇਤਿ.

ਲਗ੍ਗਤੀਤਿ ਮੁਖੇ ਚ ਹਤ੍ਥੇ ਚ ਮਤ੍ਤਿਕਾਵਣ੍ਣਂ ਦਸ੍ਸੇਤਿ. ਬਹਲਨ੍ਤਿ ਹਤ੍ਥਮੁਖੇਸੁ ਅਲਗ੍ਗਨਕਮ੍ਪਿ ਪਟਿਗ੍ਗਹੇਤਬ੍ਬਂ. ਵਾਸਮਤ੍ਤਨ੍ਤਿ ਰੇਣੁਖੀਰਾਭਾਵਂ ਦਸ੍ਸੇਤਿ. ਆਕਿਰਤਿ ਪਟਿਗ੍ਗਹੇਤਬ੍ਬਨ੍ਤਿ ਪੁਪ੍ਫਰਸਸ੍ਸ ਪਞ੍ਞਾਯਨਤੋ ਵੁਤ੍ਤਂ.

ਮਹਾਭੂਤੇਸੂਤਿ ਪਾਣਸਰੀਰਸਨ੍ਨਿਸ੍ਸਿਤੇਸੁ ਪਥਵੀਆਦਿਮਹਾਭੂਤੇਸੁ. ਸਬ੍ਬਂ ਵਟ੍ਟਤੀਤਿ ਅਤ੍ਤਨੋ, ਪਰੇਸਞ੍ਚ ਸਰੀਰਨਿਸ੍ਸਿਤਂ ਸਬ੍ਬਂ ਵਟ੍ਟਤਿ. ਅਕਪ੍ਪਿਯਮਂਸਾਨੁਲੋਮਤਾਯ ਥੁਲ੍ਲਚ੍ਚਯਾਦਿਂ ਨ ਜਨੇਤੀਤਿ ਅਧਿਪ੍ਪਾਯੋ. ਪਤਤੀਤਿ ਅਤ੍ਤਨੋ ਸਰੀਰਤੋ ਵਿਚ੍ਛਿਨ੍ਦਿਤ੍ਵਾ ਪਤਤਿ. ‘‘ਰੁਕ੍ਖਤੋ ਛਿਨ੍ਦਿਤ੍ਵਾ’’ਤਿ ਵੁਤ੍ਤਤ੍ਤਾ ਮਤ੍ਤਿਕਤ੍ਥਾਯ ਪਥਵਿਂ ਖਣਿਤੁਂ, ਅਞ੍ਞਮ੍ਪਿ ਯਂਕਿਞ੍ਚਿ ਮੂਲਪਣ੍ਣਾਦਿਵਿਸਭੇਸਜ੍ਜਂ ਛਿਨ੍ਦਿਤ੍ਵਾ ਛਾਰਿਕਂ ¶ ਅਕਤ੍ਵਾਪਿ ਅਪ੍ਪਟਿਗ੍ਗਹਿਤਮ੍ਪਿ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਦਟ੍ਠਬ੍ਬਂ. ਅਪ੍ਪਟਿਗ੍ਗਹਿਤਤਾ, ਅਨਨੁਞ੍ਞਾਤਤਾ, ਧੂਮਾਦਿਅਬ੍ਬੋਹਾਰਿਕਤਾਭਾਵੋ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਦਨ੍ਤਪੋਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੭੩. ਪਞ੍ਚਮਵਗ੍ਗਸ੍ਸ ¶ ਪਠਮੇ ਮਯ੍ਹਂ ਨਾਮਾਤਿ ਭਿਕ੍ਖੁਨਾ ਭੂਮਿਯਂ ਠਪੇਤ੍ਵਾ ਦਿਨ੍ਨਮ੍ਪਿ ਸਨ੍ਧਾਯ ਵਦਤਿ. ਅਞ੍ਞਤਿਤ੍ਥਿਯਤਾ, ਅਨਨੁਞ੍ਞਾਤਤਾ, ਅਜ੍ਝੋਹਰਣੀਯਤਾ, ਅਜ੍ਝੋਹਰਣਤ੍ਥਾਯ ਸਹਤ੍ਥਾ ਅਨਿਕ੍ਖਿਤ੍ਤਭਾਜਨੇ ਦਾਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਅਚੇਲਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੭੪. ਦੁਤਿਯੇ ਅਨਾਚਾਰਂ ਆਚਰਿਤੁਕਾਮਤਾ, ਤਦਤ੍ਥਮੇਵ ਉਪਸਮ੍ਪਨ੍ਨਸ੍ਸ ਉਯ੍ਯੋਜਨਾ, ਤਸ੍ਸ ਉਪਚਾਰਾਤਿਕ੍ਕਮੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਉਯ੍ਯੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੮੧. ਤਤਿਯੇ ਪਾਲ਼ਿਯਂ ਖੁਦ੍ਦਕੇ ਘਰੇਤਿ ਏਤ੍ਥ ਖੁਦ੍ਦਕਂ ਘਰਂ ਨਾਮ ਪਞ੍ਚਹਤ੍ਥਤੋ ਊਨਕਵਿਤ੍ਥਾਰਂ ਅਧਿਪ੍ਪੇਤਂ. ਤਤ੍ਥ ਚ ਪਿਟ੍ਠਸਙ੍ਘਾਟਤੋ ਹਤ੍ਥਪਾਸੇ ਅਵਿਜਹਿਤੇਪਿ ਪਿਟ੍ਠਿਵਂਸਾਤਿਕ੍ਕਮੋ ਹੋਤੀਤਿ ਆਹ ‘‘ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ’’ਤਿ. ਯਥਾ ਤਥਾ ਵਾ ਕਤਸ੍ਸਾਤਿ ਪਿਟ੍ਠਿਵਂਸਂ ਆਰੋਪੇਤ੍ਵਾ ਵਾ ਅਨਾਰੋਪੇਤ੍ਵਾ ਵਾ ਕਤਸ੍ਸ.

੨੮੩. ਪਾਲ਼ਿਯਂ ¶ ਵੀਤਰਾਗਾਤਿ ਅਪਰਿਯੁਟ੍ਠਿਤਰਾਗਾਨਂ, ਅਨਾਗਾਮੀਨਞ੍ਚ ਸਙ੍ਗਹੋ. ਸਚਿਤ੍ਤਕਨ੍ਤਿ ਅਨੁਪਵਿਸਿਤ੍ਵਾ ਨਿਸੀਦਨਚਿਤ੍ਤੇਨ ਸਚਿਤ੍ਤਕਂ. ਪਰਿਯੁਟ੍ਠਿਤਰਾਗਜਾਯਮ੍ਪਤਿਕਾਨਂ ਸਨ੍ਨਿਹਿਤਤਾ, ਸਯਨਿਘਰਤਾ, ਦੁਤਿਯਸ੍ਸ ਭਿਕ੍ਖੁਨੋ ਅਭਾਵੋ, ਅਨੁਪਖਜ੍ਜ ਨਿਸੀਦਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਸਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੮੪-੨੮੯. ਚਤੁਤ੍ਥਪਞ੍ਚਮਾਨਿ ਵੁਤ੍ਤਤ੍ਥਾਨਿ.

੨੯੮. ਛਟ੍ਠੇ ¶ ‘‘ਪਰਿਯੇਸਿਤ੍ਵਾ ਆਰੋਚਨਕਿਚ੍ਚਂ ਨਾਮ ਨਤ੍ਥੀ’’ਤਿ ਵੁਤ੍ਤਤ੍ਤਾ ਯੋ ਅਪਰਿਯੇਸਿਤਬ੍ਬੋ ਉਪਸਙ੍ਕਮਿਤੁਂ ਯੁਤ੍ਤਟ੍ਠਾਨੇ ਦਿਸ੍ਸਤਿ, ਸੋ ਸਚੇਪਿ ਪਕਤਿਵਚਨਸ੍ਸ ਸਵਨੂਪਚਾਰਂ ਅਤਿਕ੍ਕਮ੍ਮ ਠਿਤੋ ਉਪਗਨ੍ਤ੍ਵਾ ਆਪੁਚ੍ਛਿਤਬ੍ਬੋ. ਤੇਨਾਹ ‘‘ਅਪਿ ਚ…ਪੇ… ਯਂ ਪਸ੍ਸਤਿ, ਸੋ ਆਪੁਚ੍ਛਿਤਬ੍ਬੋ’’ਤਿਆਦਿ.

੩੦੨. ਅਨਾਪਤ੍ਤਿਵਾਰੇ ਚੇਤ੍ਥ ਅਨ੍ਤਰਾਰਾਮਾਦੀਨਞ੍ਞੇਵ ਵੁਤ੍ਤਤ੍ਤਾ ਵਿਹਾਰਤੋ ਗਾਮਵੀਥਿਂ ਅਨੁਞ੍ਞਾਤਕਾਰਣਂ ਵਿਨਾ ਅਤਿਕ੍ਕਮਨ੍ਤਸ੍ਸਾਪਿ ਆਪਤ੍ਤਿ ਹੋਤਿ, ਨ ਪਨ ਘਰੂਪਚਾਰਂ ਅਤਿਕ੍ਕਮਨ੍ਤਸ੍ਸੇਵ.

ਯਂ ਪਨ ਪਾਲ਼ਿਯਂ ‘‘ਅਞ੍ਞਸ੍ਸ ਘਰੂਪਚਾਰਂ ਓਕ੍ਕਮਨ੍ਤਸ੍ਸ…ਪੇ… ਪਠਮਂ ਪਾਦਂ ਉਮ੍ਮਾਰਂ ਅਤਿਕ੍ਕਾਮੇਤੀ’’ਤਿਆਦਿ ਵੁਤ੍ਤਂ. ਤਂ ਗਾਮੇ ਪਵਿਟ੍ਠਂ ਸਨ੍ਧਾਯ ਵੁਤ੍ਤਂ, ਤਥਾਪਿ ਅਞ੍ਞਸ੍ਸ ਘਰੂਪਚਾਰਂ ਅਨੋਕ੍ਕਮਿਤ੍ਵਾ ਵੀਥਿਮਜ੍ਝੇਨੇਵ ਗਨ੍ਤ੍ਵਾ ਇਚ੍ਛਿਤਿਚ੍ਛਿਤਘਰਦ੍ਵਾਰਾਭਿਮੁਖੇ ਠਤ੍ਵਾ ਮਨੁਸ੍ਸੇ ਓਲੋਕੇਤ੍ਵਾ ਗਚ੍ਛਨ੍ਤਸ੍ਸਾਪਿ ਪਾਚਿਤ੍ਤਿਯਮੇਵ. ਤਤ੍ਥ ਕੇਚਿ ‘‘ਵੀਥਿਯਂ ਅਤਿਕ੍ਕਮਨ੍ਤਸ੍ਸ ਘਰੂਪਚਾਰਗਣਨਾਯ ਆਪਤ੍ਤਿਯੋ’’ਤਿ ਵਦਨ੍ਤਿ. ਅਞ੍ਞੇ ਪਨ ‘‘ਯਾਨਿ ਕੁਲਾਨਿ ਉਦ੍ਦਿਸ੍ਸ ਗਤੋ, ਤੇਸਂ ਗਣਨਾਯਾ’’ਤਿ. ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਨਿਮਨ੍ਤਨਸਾਦਿਯਨਂ, ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਨਾ, ਭਤ੍ਤਿਯਘਰਤੋ ਅਞ੍ਞਘਰੂਪਸਙ੍ਕਮਨਂ, ਮਜ੍ਝਨ੍ਹਿਕਾਨਤਿਕ੍ਕਮੋ, ਸਮਯਾਪਦਾਨਂ ਅਭਾਵੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਚਾਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੦੩. ਸਤ੍ਤਮੇ ¶ ਮਹਾਨਾਮੋਤਿ ਸੁਕ੍ਕੋਦਨਸ੍ਸ ਪੁਤ੍ਤੋ ਅਨੁਰੁਦ੍ਧਤ੍ਥੇਰਸ੍ਸ, ਸਤ੍ਥੁ ਚ ਜੇਟ੍ਠਭਾਤਾ. ਆਨਨ੍ਦਤ੍ਥੇਰੋ ਅਮਿਤੋਦਨਸ੍ਸ ਪੁਤ੍ਤੋ, ਨਨ੍ਦਤ੍ਥੇਰੋ ਪਨ ਸੁਦ੍ਧੋਦਨਸ੍ਸੇਵ.

੩੦੫. ਪਾਲ਼ਿਯਂ ਕਾਲਂ ਆਹਰਿਸ੍ਸਥਾਤਿ ਅਜ੍ਜਤਨਂ ਕਾਲਂ ਵੀਤਿਨਾਮੇਸ੍ਸਥ, ਸ੍ਵੇ ਭੇਸਜ੍ਜਂ ਹਰਿਸ੍ਸਥਾਤਿ ਵਾ ਅਤ੍ਥੋ. ‘‘ਅਤ੍ਥਿ ਪਵਾਰਣਾ ਭੇਸਜ੍ਜਪਰਿਯਨ੍ਤਾ ਚ ਰਤ੍ਤਿਪਰਿਯਨ੍ਤਾ ਚਾ’’ਤਿ ਤਤਿਯਕੋਟ੍ਠਾਸੇ ਨਿਯਮਿਤਮੇਵ ਭੇਸਜ੍ਜਂ ਨਿਯਮਿਤਕਾਲਨ੍ਤਰੇਯੇਵ ਗਹੇਤਬ੍ਬਂ, ਨ ਤਤੋ ਬਹਿ. ਇਤਰਥਾ ¶ ਵਿਸੁਂ ਪਯੋਜਨਂ ਨਤ੍ਥੀਤਿ ਦਟ੍ਠਬ੍ਬਂ. ਸਪਰਿਯਨ੍ਤਾ ਸਙ੍ਘਪਵਾਰਣਾ, ਤਦੁਤ੍ਤਰਿ ਭੇਸਜ੍ਜਵਿਞ੍ਞਤ੍ਤਿ, ਅਗਿਲਾਨਤਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਮਹਾਨਾਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਉਯ੍ਯੁਤ੍ਤਸੇਨਾਸਿਕ੍ਖਾਪਦਵਣ੍ਣਨਾ

੩੧੫. ਅਟ੍ਠਮੇ ਏਕਮੇਕਨ੍ਤਿ ਏਤ੍ਥ ਦੁਵਙ੍ਗਿਨੀਪਿ ਤਿਵਙ੍ਗਿਨੀਪਿ ਸੇਨਾ ਸਙ੍ਗਯ੍ਹਤਿ. ਉਯ੍ਯੁਤ੍ਤਚਤੁਰਙ੍ਗਸੇਨਾਦਸ੍ਸਨਾਯ ਤਥਾਰੂਪਪਚ੍ਚਯਾਦਿਂ ਵਿਨਾ ਗਮਨਂ, ਅਨਨੁਞ੍ਞਾਤੋਕਾਸੇ ਦਸ੍ਸਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ.

ਉਯ੍ਯੁਤ੍ਤਸੇਨਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੧੯. ਨਵਮੇ ਸੇਨਾਯ ਚਤੁਤ੍ਥੋ ਸੂਰਿਯਤ੍ਥਙ੍ਗਮੋ, ਅਗਿਲਾਨਤਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ.

ਸੇਨਾਵਾਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੨੨. ਦਸਮੇ ਪਾਲ਼ਿਯਂ ਕਤਿ ਤੇ ਲਕ੍ਖਾਨਿ ਲਦ੍ਧਾਨੀਤਿ ਕਿਤ੍ਤਕਾ ਤਯਾ ਲਦ੍ਧਾਤਿ ਅਤ੍ਥੋ. ਉਯ੍ਯੋਧਿਕਾਦਿਦਸ੍ਸਨਾਯ ¶ ਤਥਾਰੂਪਪਚ੍ਚਯਂ ਵਿਨਾ ਗਮਨਂ, ਅਨਨੁਞ੍ਞਾਤੋਕਾਸੇ ਦਸ੍ਸਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ.

ਉਯ੍ਯੋਧਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੨੮. ਛਟ੍ਠਵਗ੍ਗਸ੍ਸ ¶ ਪਠਮੇ ਪਾਲ਼ਿਯਂ ਕਿਣ੍ਣਪਕ੍ਖਿਤ੍ਤਾਤਿ ਪਿਟ੍ਠਪੂਵਾਦਿਂ ਅਪਕ੍ਖਿਪਿਤ੍ਵਾ ਕਿਣ੍ਣਸਙ੍ਖਾਤਂ ਧਞ੍ਞਙ੍ਕੁਰਾਦਿਸੁਰਾਬੀਜਂ ਪਕ੍ਖਿਪਿਤ੍ਵਾ ਕਤਾ. ਸਮ੍ਭਾਰਸਂਯੁਤ੍ਤਾਤਿ ਸਾਸਪਾਦਿਅਨੇਕਸਮ੍ਭਾਰੇਹਿ ਸਞ੍ਞੁਤ੍ਤਾ.

ਮਧੁਕਤਾਲਨਾਲ਼ਿਕੇਰਾਦਿਪੁਪ੍ਫਾਦਿਰਸੋ ਚਿਰਪਰਿਵਾਸਿਤੋ ਪੁਪ੍ਫਾਸਵੋ ਨਾਮ. ਤਥਾ ਪਨਸਾਦਿ ਫਲਾਸਵੋ. ਮੁਦ੍ਦਿਕਰਸੋ ਮਧ੍ਵਾਸਵੋ. ਉਚ੍ਛੁਰਸੋ ਗੁਲ਼ਾਸਵੋ. ਤਿਫਲਤਿਕਟੁਕਾਦਿਨਾਨਾਸਮ੍ਭਾਰਾਨਂ ਰਸੋ ਚਿਰਪਰਿਵਾਸਿਤੋ ਸਮ੍ਭਾਰਸਂਯੁਤ੍ਤੋ. ਬੀਜਤੋ ਪਟ੍ਠਾਯਾਤਿ ਯਥਾਵੁਤ੍ਤਾਨਂ ਪਿਟ੍ਠਾਦੀਨਂ ਮਜ੍ਜਤ੍ਥਾਯ ਭਾਜਨੇ ਪਕ੍ਖਿਤ੍ਤਕਾਲਤੋ ਪਟ੍ਠਾਯ.

੩੨੯. ਲੋਣਸੋਵੀਰਕਂ ਸੁਤ੍ਤਞ੍ਚ ਅਨੇਕੇਹਿ ਦਬ੍ਬਸਮ੍ਭਾਰੇਹਿ ਅਭਿਸਙ੍ਖਤੋ ਭੇਸਜ੍ਜਵਿਸੇਸੋ. ਉਯ੍ਯੁਤ੍ਤਸਿਕ੍ਖਾਪਦਾਨਂ ਅਚਿਤ੍ਤਕਲੋਕਵਜ੍ਜੇਸੁ ਲੋਕਵਜ੍ਜਤਾ ਪੁਬ੍ਬੇ ਵੁਤ੍ਤਨਯਾਵਾਤਿ ਤਤ੍ਥ ਕਿਞ੍ਚਿਪਿ ਅਵਤ੍ਵਾ ਇਧ ਤੇਹਿ ਅਸਾਧਾਰਣਵਤ੍ਥੁਵਿਸੇਸਸਿਦ੍ਧਾਯ ਅਚਿਤ੍ਤਕਪਕ੍ਖੇਪਿ ਅਕੁਸਲਚਿਤ੍ਤਤਾਯ ਤਂ ਲੋਕਵਜ੍ਜਤਾਦਿਵਿਸੇਸਂ ਦਸ੍ਸੇਤੁਮੇਵ ‘‘ਵਤ੍ਥੁਅਜਾਨਨਤਾਯ ਚੇਤ੍ਥਾ’’ਤਿਆਦਿਨਾ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਪਠਮਪਾਰਾਜਿਕਵਣ੍ਣਨਾਯਂ ਵਿਤ੍ਥਾਰਤੋ ਸਾਰਤ੍ਥਦੀਪਨਿਯਂ ਵਿਰਦ੍ਧਟ੍ਠਾਨਵਿਸੋਧਨਵਸੇਨ ਵੁਤ੍ਤਨ੍ਤਿ ਤਤ੍ਥੇਵ ਗਹੇਤਬ੍ਬਂ. ਮਜ੍ਜਭਾਵੋ, ਤਸ੍ਸ ਪਾਨਞ੍ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ.

ਸੁਰਾਪਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਅਙ੍ਗੁਲਿਪਤੋਦਕਸਿਕ੍ਖਾਪਦਵਣ੍ਣਨਾ

੩੩੦. ਦੁਤਿਯੇ ¶ ਹਸਾਧਿਪ੍ਪਾਯਤਾ, ਉਪਸਮ੍ਪਨ੍ਨਸ੍ਸ ਕਾਯੇਨ ਕਾਯਾਮਸਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ.

ਅਙ੍ਗੁਲਿਪਤੋਦਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੩੮. ਤਤਿਯੇ ¶ ਪਾਲ਼ਿਯਂ ਹਸਧਮ੍ਮੇ ਹਸਧਮ੍ਮਸਞ੍ਞੀਤਿਆਦੀਸੁ ਉਪ੍ਲਵਾਦਿਮਤ੍ਤਂ ਕਿਂ ਹਸਧਮ੍ਮੋ ਹੋਤੀਤਿ ਗਹਣਵਸੇਨ ਸਤਿ ਕਰਣੀਯੇ ਕਰਿਯਮਾਨਂ ਹਸਧਮ੍ਮਂ ਹਸਧਮ੍ਮੋਤਿ ਗਹਣਵਸੇਨ ਅਤ੍ਥੋ ਵੇਦਿਤਬ੍ਬੋ. ਉਸ੍ਸਾਰੇਨ੍ਤੋਤਿ ਉਦਕੇ ਠਿਤਂ ਨਾਵਂ ਤੀਰੇ ਆਰੋਪੇਨ੍ਤੋ.

ਪਤਨੁਪ੍ਪਤਨਵਾਰੇਸੂਤਿ ਉਦਕਸ੍ਸ ਉਪਰਿਤਲੇ ਮਣ੍ਡੂਕਗਤਿਯਾ ਪਤਨੁਪ੍ਪਤਨਵਸੇਨ ਗਮਨਤ੍ਥਂ ਖਿਤ੍ਤਾਯ ਏਕਿਸ੍ਸਾ ਕਥਲਾਯ ਵਸੇਨ ਵੁਤ੍ਤਂ. ਉਦਕਸ੍ਸ ਉਪਰਿਗੋਪ੍ਫਕਤਾ, ਹਸਾਧਿਪ੍ਪਾਯੇਨ ਕੀਲ਼ਨਨ੍ਤਿ ਦ੍ਵੇ ਅਙ੍ਗਾਨਿ.

ਹਸਧਮ੍ਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੪੪. ਚਤੁਤ੍ਥੇ ਸੁਤ੍ਤਾਨੁਲੋਮਨ੍ਤਿ ਮਹਾਪਦੇਸਾ. ਅਟ੍ਠਕਥਾਤਿਪਿ ਵਦਨ੍ਤਿ. ਉਪਸਮ੍ਪਨ੍ਨਸ੍ਸ ਪਞ੍ਞਤ੍ਤੇਨ ਵਚਨਂ, ਅਨਾਦਰਿਯਕਰਣਨ੍ਤਿ ਦ੍ਵੇ ਅਙ੍ਗਾਨਿ.

ਅਨਾਦਰਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੪੫. ਪਞ੍ਚਮੇ ਉਪਸਮ੍ਪਨ੍ਨਤਾ, ਤਸ੍ਸ ਦਸ੍ਸਨਸਵਨਵਿਸਯੇ ਭਿਂਸਾਪੇਤੁਕਾਮਤਾਯ ਵਾਯਮਨਨ੍ਤਿ ਦ੍ਵੇ ਅਙ੍ਗਾਨਿ.

ਭਿਂਸਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੫੪. ਛਟ੍ਠੇ ¶ ਅਲਾਤਂ ਪਤਿਤਨ੍ਤਿ ਅਗ੍ਗਿਕਪਾਲਤੋ ਬਹਿ ਪਤਿਤਂ. ਵਿਜ੍ਝਾਤਨ੍ਤਿ ਵਿਜ੍ਝਾਤਂ ਅਲਾਤਂ ਕਪਾਲਗ੍ਗਿਮ੍ਹਿ ਪਕ੍ਖਿਪਿਤ੍ਵਾ ਜਾਲੇਨ੍ਤਸ੍ਸ ਪਾਚਿਤ੍ਤਿਯਂ, ਤਥਾ ਕੇਵਲਂ ਇਨ੍ਧਨਂ ਪਾਤੇਨ੍ਤਸ੍ਸਪਿ ਵਿਜ੍ਝਾਤਂ ਕਪਾਲਗ੍ਗਿਂ ਮੁਖਵਾਤਾਦਿਨਾ ਉਜ੍ਜਾਲੇਨ੍ਤਸ੍ਸਪਿ. ਗਿਲਾਨਤਾਦਿਕਾਰਣਾਭਾਵੋ, ਵਿਸਿਬ੍ਬੇਤੁਕਾਮਤਾ, ਸਮਾਦਹਨਨ੍ਤਿ ਤੀਣਿ ਅਙ੍ਗਾਨਿ.

ਜੋਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੫੭. ਸਤ੍ਤਮੇ ¶ ਪਾਲ਼ਿਯਂ ਨਗਰੇ ਥਕਿਤੇਤਿ ਏਤ੍ਥ ਰਞ੍ਞਾ ਚਿਰਂ ਨਹਾਯਿਤੁਕਾਮੇਨ ‘‘ਅਹਂ ਬਹਿ ਉਯ੍ਯਾਨੇ ਕਤਾਰਕ੍ਖੋ ਵਸਿਸ੍ਸਾਮਿ, ਨਗਰਂ ਥਕੇਤ੍ਵਾ ਗੋਪੇਥਾ’’ਤਿ ਅਨੁਞ੍ਞਾਤਾ, ਤੇ ਥਕਿਂਸੂਤਿ ਦਟ੍ਠਬ੍ਬਂ. ਅਸਮ੍ਭਿਨ੍ਨੇਨਾਤਿ ਅਨਟ੍ਠੇਨ, ਤਂ ਦਿਵਸਂ ਪੁਨ ਅਗ੍ਗਹਿਤਾਲਙ੍ਕਾਰੇਨ ਪਬੁਦ੍ਧਮਤ੍ਤੇਨਾਤਿ ਅਧਿਪ੍ਪਾਯੋ. ਮਜ੍ਝਿਮਦੇਸੇ ਊਨਕਦ੍ਧਮਾਸਨਹਾਨਂ, ਸਮਯਾਦੀਨਂ ਅਭਾਵੋਤਿ ਦ੍ਵੇ ਅਙ੍ਗਾਨਿ.

ਨਹਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ

੩੬੮. ਅਟ੍ਠਮੇ ਪਟਿਲਦ੍ਧਨਵਚੀਵਰੇਨਾਤਿ ਏਤ੍ਥ ਪੁਬ੍ਬੇ ਅਕਤਕਪ੍ਪਂ ਕਤਿਪਾਹਂ ਨਿਵਾਸਨਤ੍ਥਾਯ ਤਾਵਕਾਲਿਕਵਸੇਨ ਲਦ੍ਧਮ੍ਪਿ ਸਙ੍ਗਯ੍ਹਤੀਤਿ ਵਦਨ੍ਤਿ.

੩੬੯. ‘‘ਨਵਂ ਨਾਮ ਅਕਤਕਪ੍ਪ’’ਨ੍ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਅਞ੍ਞੇਨ ਭਿਕ੍ਖੁਨਾ ਕਪ੍ਪਬਿਨ੍ਦੁਂ ਦਤ੍ਵਾ ਪਰਿਭੁਤ੍ਤਂ ਚੀਵਰਂ, ਤੇਨ ਵਾ, ਤਤੋ ਲਭਿਤ੍ਵਾ ਅਞ੍ਞੇਨ ਵਾ ਕੇਨਚਿ ਦਿਨ੍ਨਮ੍ਪਿ ਕਤਕਪ੍ਪਮੇਵ ਨਵਂ ਨਾਮ ਨ ਹੋਤੀਤਿ ਦਟ੍ਠਬ੍ਬਂ. ‘‘ਨਿਵਾਸੇਤੁਂ ਵਾ ਪਾਰੁਪਿਤੁਂ ਵਾ’’ਤਿ ਵੁਤ੍ਤਤ੍ਤਾ ਅਂਸਬਦ੍ਧਕਾਸਾਵਮ੍ਪਿ ਪਾਰੁਪਿਤਬ੍ਬਤੋ ਕਪ੍ਪਂ ਕਾਤਬ੍ਬਨ੍ਤਿ ਵਦਨ੍ਤਿ. ਚਮ੍ਮਕਾਰਨੀਲਂ ਨਾਮ ਚਮ੍ਮਂ ਨੀਲਵਣ੍ਣਂ ਕਾਤੁਂ ਯੋਜਿਯਮਾਨਂ ਨੀਲਂ. ਪਕਤਿਨੀਲਮੇਵਾਤਿ ਕੇਚਿ. ਯਥਾਵੁਤ੍ਤਚੀਵਰਸ੍ਸ ਅਕਤਕਪ੍ਪਤਾ, ਅਨਟ੍ਠਚੀਵਰਾਦਿਤਾ, ਨਿਵਾਸਨਾਦਿਤਾਤਿ ਤੀਣਿ ਅਙ੍ਗਾਨਿ.

ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੭੪. ਨਵਮੇ ¶ ਯੇਨਾਤਿ ਯੇਨ ਸਦ੍ਧਿਂ, ਯਸ੍ਸ ਸਨ੍ਤਿਕੇਤਿ ਅਤ੍ਥੋ. ਸਾਮਂ ਵਿਕਪ੍ਪਿਤਸ੍ਸ ਅਪਚ੍ਚੁਦ੍ਧਾਰੋ, ਵਿਕਪ੍ਪਨੁਪਗਚੀਵਰਤਾ, ਅਵਿਸ੍ਸਾਸੇਨ ਪਰਿਭੋਗੋਤਿ ਤੀਣਿ ਅਙ੍ਗਾਨਿ.

ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਚੀਵਰਅਪਨਿਧਾਨਸਿਕ੍ਖਾਪਦਵਣ੍ਣਨਾ

੩੭੮. ਦਸਮੇ ¶ ਪਾਲ਼ਿਯਂ ਅਨ੍ਤਮਸੋ ਹਸਾਪੇਕ੍ਖੋਪੀਤਿ ਅਪਿ-ਸਦ੍ਦੇਨ ਅਥੇਯ੍ਯਚਿਤ੍ਤਂ ਕੋਧੇਨ ਦੁਕ੍ਖਾਪੇਤੁਕਾਮਂ, ਅਵਣ੍ਣਂ ਪਕਾਸੇਤੁਕਾਮਞ੍ਚ ਸਙ੍ਗਯ੍ਹਤਿ. ਤੇਨੇਵ ‘‘ਤਿਵੇਦਨ’’ਨ੍ਤਿ ਵੁਤ੍ਤਂ. ਉਪਸਮ੍ਪਨ੍ਨਸ੍ਸ ਪਤ੍ਤਾਦੀਨਂ ਅਪਨਿਧਾਨਂ, ਵਿਹੇਸੇਤੁਕਾਮਤਾਦੀਤਿ ਦ੍ਵੇ ਅਙ੍ਗਾਨਿ.

ਚੀਵਰਅਪਨਿਧਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧. ਸਞ੍ਚਿਚ੍ਚਪਾਣਸਿਕ੍ਖਾਪਦਵਣ੍ਣਨਾ

੩੮੨. ਸਤ੍ਤਮਸ੍ਸ ਪਠਮੇ ਉਸੁਂ ਸਰਂ ਅਸਤਿ ਖਿਪਤੀਤਿ ਇਸ੍ਸਾਸੋ. ਨ ਹੇਤ੍ਥ ਕਿਞ੍ਚਿ ਜੀਵਿਤਂ ਨਾਮ ਵਿਸੁਂ ਤਿਟ੍ਠਤੀਤਿ ਸਮ੍ਬਨ੍ਧੋ. ਤਤ੍ਥ ਪਾਣੇਤਿ ਸਤ੍ਤੇ. ਅਪ੍ਪਮਤ੍ਤੇਨ ਵਤ੍ਤਂ ਕਾਤਬ੍ਬਨ੍ਤਿ ਯਥਾ ਪਾਣਕਾਨਂ ਵਿਹੇਸਾਪਿ ਨ ਹੋਤਿ, ਏਵਂ ਸਲ੍ਲਕ੍ਖੇਤ੍ਵਾ ਓਤਾਪਨਸਮ੍ਮਜ੍ਜਨਾਦਿਵਤ੍ਤਂ ਕਾਤਬ੍ਬਂ. ਸੇਸਂ ਵੁਤ੍ਤਨਯਮੇਵ.

ਸਞ੍ਚਿਚ੍ਚਪਾਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੮੭. ਦੁਤਿਯੇ ¶ ਉਦਕਸਣ੍ਠਾਨਕਪ੍ਪਦੇਸੇਤਿ ਕਦ੍ਦਮਪਾਸਾਣਾਦਿਭੂਮਿਯਂ. ਤਤ੍ਥਾਤਿ ਆਸਿਤ੍ਤੇ ਕਪ੍ਪਿਯਉਦਕੇ. ਸੇਸਂ ਵੁਤ੍ਤਨਯਮੇਵ.

ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੯੨. ਤਤਿਯੇ ‘‘ਤਸ੍ਸ ਭਿਕ੍ਖੁਨੋ ਸਨ੍ਤਿਕਂ ਗਨ੍ਤ੍ਵਾ’’ਤਿ ਵੁਤ੍ਤਤ੍ਤਾ ਯਸ੍ਸ ਅਧਿਕਰਣਂ ਸਙ੍ਘਕਮ੍ਮੇਨ ਨਿਹਤਂ, ਤਸ੍ਸ ਸਮ੍ਮੁਖੇ ਏਵ ਉਕ੍ਕੋਟੇਨ੍ਤਸ੍ਸ ਪਾਚਿਤ੍ਤਿਯਂ. ਪਰਮ੍ਮੁਖੇ ਪਨ ਦੁਕ੍ਕਟਮੇਵ.

੩੯੫. ‘‘ਧਮ੍ਮਕਮ੍ਮੇ ¶ ਅਧਮ੍ਮਕਮ੍ਮਸਞ੍ਞੀ ਉਕ੍ਕੋਟੇਤਿ, ਅਨਾਪਤ੍ਤੀ’’ਤਿ ਵੁਤ੍ਤਤ੍ਤਾ ਅਨਾਦਰਿਯਤਾਦਿ ਵਿਯ ਉਕ੍ਕੋਟਨਂ ਸਯਂ ਅਕੁਸਲਂ ਨ ਹੋਤਿ, ਧਮ੍ਮਕਮ੍ਮਸਞ੍ਞਾਯ, ਪਨ ਵਿਮਤਿਯਾ ਚ ਉਕ੍ਕੋਟਨੇਨੇਵ ਅਕੁਸਲਂ ਹੋਤਿ. ਯਥਾਧਮ੍ਮਂ ਨਿਹਤਤਾ, ਜਾਨਨਾ, ਉਕ੍ਕੋਟਨਾਤਿ ਤੀਣਿ ਅਙ੍ਗਾਨਿ.

ਉਕ੍ਕੋਟਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੯੯. ਚਤੁਤ੍ਥੇ ਆਪਤ੍ਤਿਂ ਆਪਜ੍ਜਤਿਯੇਵਾਤਿ ਧੁਰਨਿਕ੍ਖੇਪਪਕ੍ਖੇ ਵੁਤ੍ਤਂ. ਵਤ੍ਥੁਪੁਗ੍ਗਲੋਤਿ ਆਪਨ੍ਨਪੁਗ੍ਗਲੋ. ਛਾਦੇਤੁਕਾਮਤਾਯ ਹਿ ਸਤਿ ਏਵ ਅਵਸ੍ਸਂ ਅਞ੍ਞਸ੍ਸ ਆਰੋਚਨਂ ਵੁਤ੍ਤਂ, ਵਤ੍ਥੁਪੁਗ੍ਗਲਸ੍ਸ ਚ ਆਰੋਚਨਾ ਨਾਮ ਨ ਹੋਤੀਤਿ ਪਟਿਚ੍ਛਾਦਨਮੇਵਾਤਿ ਅਧਿਪ੍ਪਾਯੋ. ਕੋਟਿ ਛਿਨ੍ਨਾ ਹੋਤੀਤਿ ਛਾਦੇਸ੍ਸਾਮੀਤਿ ਧੁਰਨਿਕ੍ਖੇਪੇ ਸਤਿਪਿ ਪੁਗ੍ਗਲਪਰਮ੍ਪਰਾਯ ਗਚ੍ਛਨ੍ਤੀ ਆਪਤ੍ਤਿਕੋਟਿ ਛਿਜ੍ਜਤਿ.

੪੦੦. ‘‘ਅਨੁਪਸਮ੍ਪਨ੍ਨਸ੍ਸ ਸੁਕ੍ਕਵਿਸ੍ਸਟ੍ਠਿ ਚ ਕਾਯਸਂਸਗ੍ਗੋ ਚਾਤਿ ਅਯਂ ਦੁਟ੍ਠੁਲ੍ਲਅਜ੍ਝਾਚਾਰੋ ਨਾਮਾ’’ਤਿ ਇਦਂ ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਟ੍ਠਕਥਾਯਂ ‘‘ਅਨੁਪਸਮ੍ਪਨ੍ਨਸ੍ਸ…ਪੇ… ਆਦਿਤੋ ਪਞ੍ਚ ਸਿਕ੍ਖਾਪਦਾਨਿ ਦੁਟ੍ਠੁਲ੍ਲੋ ਨਾਮ ਅਜ੍ਝਾਚਾਰੋ, ਸੇਸਾਨਿ ਅਦੁਟ੍ਠੁਲ੍ਲੋ. ਸੁਕ੍ਕਵਿਸ੍ਸਟ੍ਠਿਕਾਯਸਂਸਗ੍ਗਦੁਟ੍ਠੁਲ੍ਲਅਤ੍ਤਕਾਮਾ ਪਨਸ੍ਸ ਅਜ੍ਝਾਚਾਰੋ ਨਾਮਾ’’ਤਿ (ਪਾਚਿ. ਅਟ੍ਠ. ੮੨) ਇਮਿਨਾ ਵਚਨੇਨ ਵਿਰੁਜ੍ਝਤੀਤਿ ਵੀਮਂਸਿਤਬ੍ਬਂ. ਪੁਗ੍ਗਲਪੇਮੇਨ ਛਾਦਯਤੋ ਚੇਤ੍ਥ ‘‘ਅਞ੍ਞੇ ਗਰਹਿਸ੍ਸਨ੍ਤੀ’’ਤਿ ਭਯਵਸੇਨ ਛਾਦਨਕ੍ਖਣੇ ¶ ਪਟਿਘੋਵ ਉਪ੍ਪਜ੍ਜਤੀਤਿ ‘‘ਦੁਕ੍ਖਵੇਦਨ’’ਨ੍ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਉਪਸਮ੍ਪਨ੍ਨਸ੍ਸ ਦੁਟ੍ਠੁਲ੍ਲਾਪਤ੍ਤਿਜਾਨਨਂ, ਪਟਿਚ੍ਛਾਦੇਤੁਕਾਮਤਾਯ ਧੁਰਨਿਕ੍ਖੇਪੋਤਿ ਦ੍ਵੇ ਅਙ੍ਗਾਨਿ.

ਦੁਟ੍ਠੁਲ੍ਲਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਊਨਵੀਸਤਿਵਸ੍ਸਸਿਕ੍ਖਾਪਦਵਣ੍ਣਨਾ

੪੦੨. ਪਞ੍ਚਮੇ ਰੂਪਸਿਪ੍ਪਨ੍ਤਿ ਹੇਰਞ੍ਞਿਕਸਿਪ੍ਪਂ. ਗਬ੍ਭੇ ਸਯਿਤਕਾਲੇਨ ਸਦ੍ਧਿਂ ਵੀਸਤਿਮਂ ਵਸ੍ਸਂ ਪਰਿਪੁਣ੍ਣਮਸ੍ਸਾਤਿ ਗਬ੍ਭਵੀਸੋ.

੪੦੪. ਨਿਕ੍ਖਮਨੀਯਪੁਣ੍ਣਮਾਸੀਤਿ ¶ ਸਾਵਣਮਾਸਸ੍ਸ ਪੁਣ੍ਣਮਿਯਾ ਆਸਾਲ਼੍ਹੀਪੁਣ੍ਣਮਿਯਾ ਅਨਨ੍ਤਰਪੁਣ੍ਣਮੀ. ਪਾਟਿਪਦਦਿਵਸੇਤਿ ਪਚ੍ਛਿਮਿਕਾਯ ਵਸ੍ਸੂਪਨਾਯਿਕਾਯ. ਦ੍ਵਾਦਸ ਮਾਸੇ ਮਾਤੁ ਕੁਚ੍ਛਿਸ੍ਮਿਂ ਵਸਿਤ੍ਵਾ ਮਹਾਪਵਾਰਣਾਯ ਜਾਤਂ ਉਪਸਮ੍ਪਾਦੇਨ੍ਤੀਤਿ ਅਤ੍ਥੋ. ‘‘ਤਿਂਸ ਰਤ੍ਤਿਨ੍ਦਿਵੋ ਮਾਸੋ, ਦ੍ਵਾਦਸਮਾਸਿਕੋ ਸਂਵਚ੍ਛਰੋ’’ਤਿ (ਅ. ਨਿ. ੩.੭੧; ੮.੪੩; ਵਿਭ. ੧੦੨੩) ਵਚਨਤੋ ‘‘ਚਤ੍ਤਾਰੋ ਮਾਸਾ ਪਰਿਹਾਯਨ੍ਤੀ’’ਤਿ ਵੁਤ੍ਤਂ. ਵਸ੍ਸਂ ਉਕ੍ਕਡ੍ਢਨ੍ਤੀਤਿ ਵਸ੍ਸਂ ਉਦ੍ਧਂ ਕਡ੍ਢਨ੍ਤਿ, ‘‘ਏਕਮਾਸਂ ਅਧਿਕਮਾਸੋ’’ਤਿ ਛਡ੍ਡੇਤ੍ਵਾ ਵਸ੍ਸਂ ਉਪਗਚ੍ਛਨ੍ਤੀਤਿ ਅਤ੍ਥੋ. ਤਸ੍ਮਾ ਤਤਿਯੋ ਤਤਿਯੋ ਸਂਵਚ੍ਛਰੋ ਤੇਰਸਮਾਸਿਕੋ ਹੋਤਿ. ਤੇ ਦ੍ਵੇ ਮਾਸੇ ਗਹੇਤ੍ਵਾਤਿ ਨਿਕ੍ਖਮਨੀਯਪੁਣ੍ਣਮਾਸਤੋ ਯਾਵ ਜਾਤਦਿਵਸਭੂਤਾ ਮਹਾਪਵਾਰਣਾ. ਤਾਵ ਯੇ ਦ੍ਵੇ ਮਾਸਾ ਅਨਾਗਤਾ, ਤੇਸਂ ਅਤ੍ਥਾਯ ਅਧਿਕਮਾਸਤੋ ਲਦ੍ਧੇ ਦ੍ਵੇ ਮਾਸੇ ਗਹੇਤ੍ਵਾ. ਤੇਨਾਹ ‘‘ਯੋ ਪਵਾਰੇਤ੍ਵਾ ਵੀਸਤਿਵਸ੍ਸੋ ਭਵਿਸ੍ਸਤੀ’’ਤਿਆਦਿ. ‘‘ਨਿਕ੍ਕਙ੍ਖਾ ਹੁਤ੍ਵਾ’’ਤਿ ਇਦਂ ਅਟ੍ਠਾਰਸਨ੍ਨਂ ਵਸ੍ਸਾਨਂ ਏਕਅਧਿਕਮਾਸੇ ਗਹੇਤ੍ਵਾ ਤਤੋ ਵੀਸਤਿਯਾ ਵਸ੍ਸੇਸੁਪਿ ਚਾਤੁਦ੍ਦਸੀਅਤ੍ਥਾਯ ਚਤੁਨ੍ਨਂ ਮਾਸਾਨਂ ਪਰਿਹਾਪਨੇਨ ਸਬ੍ਬਦਾ ਪਰਿਪੁਣ੍ਣਵੀਸਤਿਵਸ੍ਸਤਂ ਸਨ੍ਧਾਯ ਵੁਤ੍ਤਂ. ਪਵਾਰੇਤ੍ਵਾ ਵੀਸਤਿਵਸ੍ਸੋ ਭਵਿਸ੍ਸਤੀਤਿ ਮਹਾਪਵਾਰਣਾਦਿਵਸੇ ਅਤਿਕ੍ਕਨ੍ਤੇ ਗਬ੍ਭਵਸ੍ਸੇਨ ਸਹ ਵੀਸਤਿਵਸ੍ਸੋ ਭਵਿਸ੍ਸਤੀਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ਗਬ੍ਭਮਾਸਾਪਿ ਗਣਨੂਪਗਾ ਹੋਨ੍ਤਿ, ਤਸ੍ਮਾ. ਏਕਵੀਸਤਿਵਸ੍ਸੋਤਿ ਜਾਤਿਯਾ ਵੀਸਤਿਵਸ੍ਸਂ ਸਨ੍ਧਾਯ ਵੁਤ੍ਤਂ.

੪੦੬. ਅਞ੍ਞਂ ਉਪਸਮ੍ਪਾਦੇਤੀਤਿ ਉਪਜ੍ਝਾਯੋ, ਆਚਰਿਯੋ ਵਾ ਹੁਤ੍ਵਾ ਉਪਸਮ੍ਪਾਦੇਤਿ. ਸੋਪੀਤਿ ਉਪਸਮ੍ਪਾਦੇਨ੍ਤੋਪਿ ਅਨੁਪਸਮ੍ਪਨ੍ਨੋ. ਊਨਵੀਸਤਿਵਸ੍ਸਤਾ, ਤਂ ਞਤ੍ਵਾ ਉਪਜ੍ਝਾਯੇਨ ਹੁਤ੍ਵਾ ਉਪਸਮ੍ਪਾਦਨਨ੍ਤਿ ਦ੍ਵੇ ਅਙ੍ਗਾਨਿ.

ਊਨਵੀਸਤਿਵਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੦੯. ਛਟ੍ਠੇ ¶ ਥੇਯ੍ਯਸਤ੍ਥਭਾਵੋ, ਞਤ੍ਵਾ ਸਂਵਿਧਾਨਂ, ਅਵਿਸਙ੍ਕੇਤੇਨ ਗਮਨਨ੍ਤਿ ਤੀਣਿ ਅਙ੍ਗਾਨਿ.

ਥੇਯ੍ਯਸਤ੍ਥਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੧੭. ਅਟ੍ਠਮੇ ¶ ਅਨ੍ਤਰਾਯਨ੍ਤਿ ਅਨ੍ਤਰਾ ਵੇਮਜ੍ਝੇ ਏਤਿ ਆਗਚ੍ਛਤੀਤਿ ਅਨ੍ਤਰਾਯੋ, ਦਿਟ੍ਠਧਮ੍ਮਿਕਾਦਿਅਨਤ੍ਥੋ. ਆਨਨ੍ਤਰਿਯਧਮ੍ਮਾਤਿ ਅਨਨ੍ਤਰੇ ਭਵੇ ਫਲਨਿਬ੍ਬਤ੍ਤਨੇ ਨਿਯੁਤ੍ਤਾ ਚੇਤਨਾਦਿਧਮ੍ਮਾਤਿ ਅਤ੍ਥੋ. ‘‘ਨ ਸਗ੍ਗਸ੍ਸਾ’’ਤਿ ਇਦਂ ਭਿਕ੍ਖੁਨਿਦੂਸਨਕਮ੍ਮਸ੍ਸ ਆਨਨ੍ਤਰਿਯਤ੍ਤਾਭਾਵਤੋ ਵੁਤ੍ਤਂ. ਅਰਿਯਸਾਵਿਕਾਸੁ, ਪਨ ਕਲ੍ਯਾਣਪੁਥੁਜ੍ਜਨਭੂਤਾਯ ਚ ਬਲਕ੍ਕਾਰੇਨ ਦੂਸੇਨ੍ਤਸ੍ਸ ਆਨਨ੍ਤਰਿਯਸਅਸਮੇਵ. ਮੋਕ੍ਖਨ੍ਤਰਾਯਿਕਤਾ ਪਨ ਲੋਲਾਯਪਿ ਪਕਤਤ੍ਤਭਿਕ੍ਖੁਨਿਯਾ ਦੂਸਕਸ੍ਸ ਤਸ੍ਮਿਂ ਅਤ੍ਤਭਾਵੇ ਮਗ੍ਗੁਪ੍ਪਤ੍ਤਿਯਾ ਅਭਾਵਤੋ ਵੁਤ੍ਤਾ.

ਤਸ੍ਮਿਂ ਅਤ੍ਤਭਾਵੇ ਅਨਿਵਤ੍ਤਨਕਾ ਅਹੇਤੁਕਅਕਿਰਿਯਨਤ੍ਥਿਕਦਿਟ੍ਠਿਯੋਵ ਨਿਯਤਮਿਚ੍ਛਾਦਿਟ੍ਠਿਧਮ੍ਮਾ. ਪਣ੍ਡਕਾਦੀਨਂ ਗਹਣਂ ਨਿਦਸ੍ਸਨਮਤ੍ਤਂ. ਸਬ੍ਬਾਪਿ ਦੁਹੇਤੁਕਾਹੇਤੁਕਪਟਿਸਨ੍ਧਿਯੋ ਵਿਪਾਕਨ੍ਤਰਾਯਿਕਾਵ ਦੁਹੇਤੁਕਾਨਮ੍ਪਿ ਮਗ੍ਗਾਨੁਪ੍ਪਤ੍ਤਿਤੋ.

ਅਯਨ੍ਤਿ ਅਰਿਟ੍ਠੋ. ਰਸੇਨ ਰਸਨ੍ਤਿ ਅਨਵਜ੍ਜੇਨ ਪਚ੍ਚਯਪਰਿਭੁਞ੍ਜਨਰਸੇਨ ਪਞ੍ਚਕਾਮਗੁਣਪਅਭੋਗਰਸਂ ਸਮਾਨੇਤ੍ਵਾ. ਉਪਨੇਨ੍ਤੋ ਵਿਯਾਤਿ ਘਟੇਨ੍ਤੋ ਵਿਯ, ਸੋ ਏਵ ਵਾ ਪਾਠੋ.

ਅਟ੍ਠਿਕਙ੍ਕਲੂਪਮਾਤਿ ਏਤ੍ਥ ਅਟ੍ਠਿ ਏਵ ਨਿਮ੍ਮਂਸਤਾਯ ਕਙ੍ਕਲਨ੍ਤਿ ਚ ਵੁਚ੍ਚਤਿ. ਪਲਿਭਞ੍ਜਨਟ੍ਠੇਨਾਤਿ ਅਵਸ੍ਸਂ ਪਤਨਟ੍ਠੇਨ. ਅਧਿਕੁਟ੍ਟਨਟ੍ਠੇਨਾਤਿ ਅਤਿ ਵਿਯ ਕੁਟ੍ਟਨਟ੍ਠੇਨ. ਪਾਲ਼ਿਯਂ ‘‘ਤਥਾਹਂ ਭਗਵਤਾ…ਪੇ… ਨਾਲਂ ਅਨ੍ਤਰਾਯਾਯਾ’’ਤਿ ਇਦਂ ਵਤ੍ਥੁਅਨੁਰੂਪਤੋ ਵੁਤ੍ਤਂ. ਏਵਂ ਪਨ ਅਗ੍ਗਹੇਤ੍ਵਾ ਅਞ੍ਞੇਨਪਿ ਆਕਾਰੇਨ ਯਂ ਕਿਞ੍ਚਿ ਭਗਵਤਾ ਵੁਤ੍ਤਂ ਵਿਪਰੀਤਤੋ ਗਹੇਤ੍ਵਾ ਪਰੇਹਿ ਵੁਤ੍ਤੇਪਿ ਅਮੁਞ੍ਚਿਤ੍ਵਾ ਵੋਹਰਨ੍ਤਸ੍ਸਾਪਿ ਵੁਤ੍ਤਨਯਾਨੁਸਾਰੇਨ ਤਦਨੁਗੁਣਂ ਸਮਨੁਭਾਸਨਕਮ੍ਮਵਾਚਂ ਯੋਜੇਤ੍ਵਾ ਆਪਤ੍ਤਿਯਾ ਆਰੋਪੇਤੁਂ, ਆਪਤ੍ਤਿਯਾ ਅਦਸ੍ਸਨਾਦੀਸੁ ਤੀਸੁ ਯਂ ਕਿਞ੍ਚਿ ਅਭਿਰੁਚਿਤਂ ਨਿਮਿਤ੍ਤਂ ਕਤ੍ਵਾ ਉਕ੍ਖੇਪਨੀਯਕਮ੍ਮਂ ¶ ਕਾਤੁਞ੍ਚ ਲਬ੍ਭਤਿ. ਸਮਨੁਭਾਸਨਂ ਅਕਤ੍ਵਾਪਿ ‘‘ਮਾਯਸ੍ਮਾ ਏਵਂ ਅਵਚਾ’’ਤਿ ਭਿਕ੍ਖੂਹਿ ਵੁਤ੍ਤਮਤ੍ਤੇ ਲਦ੍ਧਿਯਾ ਅਪ੍ਪਟਿਨਿਸ੍ਸਜ੍ਜਨਪਚ੍ਚਯਾਯ ਦੁਕ੍ਕਟਾਪਤ੍ਤਿਯਾਪਿ ਉਕ੍ਖੇਪਨੀਯਕਮ੍ਮਂ ਕਾਤੁਮ੍ਪਿ ਵਟ੍ਟਤੇਵਾਤਿ ਦਟ੍ਠਬ੍ਬਂ. ਧਮ੍ਮਕਮ੍ਮਤਾ, ਸਮਨੁਭਾਸਨਾਯ ਅਪ੍ਪਟਿਨਿਸ੍ਸਜ੍ਜਨਨ੍ਤਿ ਦ੍ਵੇ ਅਙ੍ਗਾਨਿ.

ਅਰਿਟ੍ਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਉਕ੍ਖਿਤ੍ਤਸਮ੍ਭੋਗਸਿਕ੍ਖਾਪਦਵਣ੍ਣਨਾ

੪੨੪. ਨਵਮੇ ¶ ‘‘ਉਕ੍ਖਿਤ੍ਤੋ ਅਨੋਸਾਰਿਤੋ’’ਤਿ ਵੁਤ੍ਤਤ੍ਤਾ ਅਰਿਟ੍ਠਸ੍ਸ ਉਕ੍ਖੇਪਨੀਯਕਮ੍ਮਂ ਕਤਨ੍ਤਿ ਦਟ੍ਠਬ੍ਬਂ.

੪੨੫. ਪਾਲ਼ਿਯਂ ‘‘ਏਕਚ੍ਛਨ੍ਨੇ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਨਾਨੂਪਚਾਰੇਪਿ ਏਕਚ੍ਛਨ੍ਨੇ ਨਿਪਜ੍ਜਨੇ ਪਣ੍ਣਤ੍ਤਿਂ ਅਜਾਨਨ੍ਤਸ੍ਸ ਅਰਹਤੋਪਿ ਉਕ੍ਖਿਤ੍ਤਾਨੁਵਤ੍ਤਕਾਨਮ੍ਪਿ ਪਾਚਿਤ੍ਤਿਯਮੇਵ. ਅਕਤਾਨੁਧਮ੍ਮਤਾ, ਞਤ੍ਵਾ ਸਮ੍ਭੋਗਾਦਿਕਰਣਨ੍ਤਿ ਦ੍ਵੇ ਅਙ੍ਗਾਨਿ.

ਉਕ੍ਖਿਤ੍ਤਸਮ੍ਭੋਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੨੮. ਦਸਮੇ ਪਿਰੇਤਿ ਸਮ੍ਬੋਧਨਤ੍ਥੇ ਨਿਪਾਤਪਦਂ. ਸੇਸਂ ਅਨਨ੍ਤਰਸਿਕ੍ਖਾਪਦਦ੍ਵਯੇ ਵੁਤ੍ਤਨਯਮੇਵ.

ਕਣ੍ਟਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਸਪ੍ਪਾਣਕਵਗ੍ਗੋ ਸਤ੍ਤਮੋ.

੪੩੪. ਅਟ੍ਠਮਵਗ੍ਗਸ੍ਸ ¶ ਪਠਮੇ ਉਪਸਮ੍ਪਨ੍ਨਸ੍ਸ ਪਞ੍ਞਤ੍ਤੇਨ ਵਚਨਂ, ਅਸਿਕ੍ਖਿਤੁਕਾਮਸ੍ਸ ਲੇਸੇਨ ਏਵਂ ਵਚਨਨ੍ਤਿ ਦ੍ਵੇ ਅਙ੍ਗਾਨਿ.

ਸਹਧਮ੍ਮਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੩੮. ਦੁਤਿਯੇ ਅਲਜ੍ਜਿਤਾਤਿ ਅਲਜ੍ਜਿਤਾਯ. ਏਵਂ ਸੇਸੇਸੁਪਿ. ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤੀਤਿਆਦਿ ਭਿਕ੍ਖੁਭਿਕ੍ਖੁਨੀਨਞ੍ਞੇਵ ਵੁਤ੍ਤਂ ਅਲਜ੍ਜਿਲਕ੍ਖਣਂ, ਸਾਮਣੇਰਾਦੀਨਂ, ਪਨ ਗਹਟ੍ਠਾਨਞ੍ਚ ਸਾਧਾਰਣਵਸੇਨ ਯਥਾਸਕਂ ਸਿਕ੍ਖਾਪਦਵੀਤਿਕ੍ਕਮਨਪਟਿਗੂਹਨਾਦਿਤੋ ਵੇਦਿਤਬ੍ਬਂ. ਲਜ੍ਜਿਲਕ੍ਖਣੇਪਿ ਏਸੇਵ ਨਯੋ. ਕਿਞ੍ਚਾਪਿ ¶ ਕੁਕ੍ਕੁਚ੍ਚੇ ਉਪ੍ਪਨ੍ਨੇਪਿ ਮਦ੍ਦਿਤ੍ਵਾ ਕਰੋਨ੍ਤੋ, ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਯ ਕਰੋਨ੍ਤੋਪਿ ਤਙ੍ਖਣਿਕਾਯ ਅਲਜ੍ਜਿਤਾਯ ਏਵਂ ਕਰੋਨ੍ਤਿ. ਤਥਾਪਿ ਕੁਕ੍ਕੁਚ੍ਚਾਦਿਭੇਦੇ ਵਿਸੁਂ ਗਹਿਤਾਤਿ ਦਟ੍ਠਬ੍ਬਂ.

ਵਜ੍ਜਿਪੁਤ੍ਤਕਾ ਦਸਵਤ੍ਥੁਦੀਪਕਾ. ਪਰੂਪਹਾਰਅਞ੍ਞਾਣਕਙ੍ਖਾਪਰਵਿਤਾਰਣਾਦਿਵਾਦਾਤਿ ਏਤ੍ਥ ਅਰਹਤ੍ਤਂ ਪਟਿਜਾਨਨ੍ਤਾਨਂ ਕੁਹਕਾਨਂ ਸੁਕ੍ਕਵਿਸ੍ਸਟ੍ਠਿਂ ਦਿਸ੍ਵਾ ‘‘ਮਾਰਕਾਯਿਕਾ ਦੇਵਤਾ ਅਸੁਚਿਂ ਉਪਸਂਹਰਨ੍ਤੀ’’ਤਿਗਾਹਿਨੋ ਪਰੂਪਹਾਰਵਾਦਾ ਨਾਮ. ਅਰਹਤੋ ਸਬ੍ਬੇਸਂ ਇਤ੍ਥਿਪੁਰਿਸਾਦੀਨਂ ਨਾਮਾਦਿਅਜਾਨਨੇ ਅਞ੍ਞਾਣਂ, ਤਤ੍ਥ ਸਨ੍ਨਿਟ੍ਠਾਨਭਾਵੇਨ ਕਙ੍ਖਾ, ਪਰਤੋ ਸੁਤ੍ਵਾ ਨਾਮਾਦਿਜਾਨਨੇਨ ਪਰਵਿਤਾਰਣੋ ਅਤ੍ਥੀਤਿਵਾਦਿਨੋ ਅਞ੍ਞਾਣਵਾਦਾ, ਕਙ੍ਖਾਵਾਦਾ, ਪਰਵਿਤਾਰਣਵਾਦਾ ਚ ਤੇਸਂ, ਮਹਾਸਙ੍ਘਿਕਾਦੀਨਞ੍ਚ ਵਿਭਾਗੋ ਕਥਾਵਤ੍ਥੁਪ੍ਪਕਰਣੇ ਵੁਤ੍ਤੋ.

ਚਤ੍ਤਾਰੋ ਮਗ੍ਗਾ ਚ ਫਲਾਨਿ ਚਾਤਿ ਏਤ੍ਥ ਚ-ਕਾਰੇਨ ਅਭਿਞ੍ਞਾਪਟਿਸਮ੍ਭਿਦਾਪਿ ਸਙ੍ਗਹਿਤਾਤਿ ਦਟ੍ਠਬ੍ਬਂ. ਕੇਚੀਤਿ ਪਰਿਯਤ੍ਤਿਧਰਾ ਧਮ੍ਮਕਥਿਕਾ. ਪੁਨ ਕੇਚੀਤਿ ਪਟਿਪਤ੍ਤਿਧਰਾ ਪਂਸੁਕੂਲਿਕਤ੍ਥੇਰਾ. ਇਤਰੇ ਪਨਾਤਿਆਦੀਸੁ ਅਯਂ ਅਧਿਪ੍ਪਾਯੋ – ਧਮ੍ਮਕਥਿਕਤ੍ਥੇਰਾ ਪਨ ਪਂਸੁਕੂਲਿਕਤ੍ਥੇਰੇਹਿ ਆਭਤਂ ਸੁਤ੍ਤਂ ਸੁਤ੍ਵਾ –

‘‘ਯਾਵ ¶ ਤਿਟ੍ਠਨ੍ਤਿ ਸੁਤ੍ਤਨ੍ਤਾ, ਵਿਨਯੋ ਯਾਵ ਦਿਪ੍ਪਤਿ;

ਤਾਵ ਦਕ੍ਖਨ੍ਤਿ ਆਲੋਕਂ, ਸੂਰਿਯੇ ਅਬ੍ਭੁਟ੍ਠਿਤੇ ਯਥਾ.

‘‘ਸੁਤ੍ਤਨ੍ਤੇਸੁ ਅਸਨ੍ਤੇਸੁ, ਪਮੁਟ੍ਠੇ ਵਿਨਯਮ੍ਹਿ ਚ;

ਤਮੋ ਭਵਿਸ੍ਸਤਿ ਲੋਕੇ, ਸੂਰਿਯੇ ਅਤ੍ਥਙ੍ਗਤੇ ਯਥਾ.

‘‘ਸੁਤ੍ਤਨ੍ਤੇ ਰਕ੍ਖਿਤੇ ਸਨ੍ਤੇ, ਪਟਿਪਤ੍ਤਿ ਹੋਤਿ ਰਕ੍ਖਿਤਾ;

ਪਟਿਪਤ੍ਤਿਯਂ ਠਿਤੋ ਧੀਰੋ, ਯੋਗਕ੍ਖੇਮਾ ਨ ਧਂਸਤੀ’’ਤਿ. (ਅ. ਨਿ. ਅਟ੍ਠ. ੧.੧.੧੩੦) –

ਇਦਂ ਸੁਤ੍ਤਂ ਆਹਰਿਤ੍ਵਾ ਅਤ੍ਤਨੋਵ ਵਾਦਂ ਪਤਿਟ੍ਠਪੇਨ੍ਤਾ ਪਾਰਾਜਿਕਾਨਾਪਜ੍ਜਨਵਸੇਨ ਠਿਤਾ ਪਟਿਪਤ੍ਤਿਸਙ੍ਗਹਿਤਾ ਪਰਿਯਤ੍ਤਿਯੇਵ ਮੂਲਨ੍ਤਿ ਆਹਂਸੂਤਿ. ਤੇਨਾਹ ‘‘ਸਚੇ ਪਞ੍ਚ ਭਿਕ੍ਖੂ ਚਤ੍ਤਾਰਿ ਪਾਰਾਜਿਕਾਨਿ ਰਕ੍ਖਣਕਾ…ਪੇ… ਸਾਸਨਂ ਵੁਡ੍ਢਿਂ ਵਿਰੁਲ਼੍ਹਿਂ ਗਮਯਿਸ੍ਸਨ੍ਤੀ’’ਤਿ. ਏਤੇਨ ਚ ਪਰਿਕ੍ਖੀਣੇ ਕਾਲੇ ਲਜ੍ਜਿਗਣਂ ਅਲਭਨ੍ਤੇਨ ਵਿਨਯਧਰੇਨ ਅਲਜ੍ਜਿਨੋਪਿ ਪਕਤਤ੍ਤੇ ਸਙ੍ਗਹੇਤ੍ਵਾ ਤੇਹਿ ਸਹ ਧਮ੍ਮਾਮਿਸਸਮ੍ਭੋਗਂ ਸਂਵਾਸਂ ਕਰੋਨ੍ਤੇਨ ਬਹੂ ਕੁਲਪੁਤ੍ਤੇ ਉਪਸਮ੍ਪਾਦੇਤ੍ਵਾ ਸਾਸਨਂ ¶ ਪਗ੍ਗਹੇਤੁਂ ਵਟ੍ਟਤੀਤਿ ਇਦਂ ਸਿਜ੍ਝਤੀਤਿ ਦਟ੍ਠਬ੍ਬਂ. ਗਰਹਿਤੁਕਾਮਤਾ, ਉਪਸਮ੍ਪਨ੍ਨਸ੍ਸ ਸਨ੍ਤਿਕੇ ਸਿਕ੍ਖਾਪਦਵਿਵਣ੍ਣਨਨ੍ਤਿ ਦ੍ਵੇ ਅਙ੍ਗਾਨਿ.

ਵਿਲੇਖਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੪੪. ਤਤਿਯੇ ਪਾਲ਼ਿਯਂ ਕੋ ਪਨ ਵਾਦੋ ਭਿਯ੍ਯੋਤਿ ਤੇਹਿ ਅਞ੍ਞੇਹਿ ਭਿਕ੍ਖੂਹਿ ਦਿਟ੍ਠਦ੍ਵਤ੍ਤਿਵਾਰਤੋ ਭਿਯ੍ਯੋ ਪਨ ਵਿਤ੍ਥਾਰੇਨ ਉਦ੍ਦਿਸਿਯਮਾਨੇ ਪਾਤਿਮੋਕ੍ਖੇ ਨਿਸਿਨ੍ਨਪੁਬ੍ਬਤਾ ਅਤ੍ਥਿ ਚੇ, ਤਤ੍ਥ ਕਿਮੇਵ ਵਤ੍ਤਬ੍ਬਂ, ਆਪਤ੍ਤਿਮੋਕ੍ਖੋ ਨਤ੍ਥਿ ਏਵਾਤਿ ਅਧਿਪ੍ਪਾਯੋ. ਤਞ੍ਚ ਯਥਾਧਮ੍ਮੋ ਕਾਰੇਤਬ੍ਬੋਤਿ ਤਨ੍ਤਿ ਕਾਰਣਤ੍ਥੇ ਉਪਯੋਗਵਚਨਂ, ਤਾਯਾਤਿ ਅਤ੍ਥੋ. ਯਥਾ ਧਮ੍ਮੋ ਚ ਵਿਨਯੋ ਚ ਠਿਤੋ, ਤਥਾ ਤਾਯ ਆਪਤ੍ਤਿਯਾ ਕਾਰੇਤਬ੍ਬੋਤਿ ਵੁਤ੍ਤਂ ਹੋਤਿ. ਮੋਹਾਰੋਪਨਂ, ਤਿਕ੍ਖਤ੍ਤੁਂ ਸੁਤਭਾਵੋ, ਮੋਹੇਤੁਕਾਮਸ੍ਸ ਮੋਹਨਨ੍ਤਿ ਤੀਣਿ ਅਙ੍ਗਾਨਿ.

ਮੋਹਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੫੧. ਚਤੁਤ੍ਥੇ ¶ ਪਾਲ਼ਿਯਂ ਕਾਯਪਟਿਬਦ੍ਧੇਨ ਵਾਤਿ ਏਤ੍ਥ ਪਾਸਾਣਾਦਿਨਿਸ੍ਸਗ੍ਗਿਯਪਹਾਰੋਪਿ ਸਙ੍ਗਹਿਤੋ.

੪੫੨. ਰਤ੍ਤਚਿਤ੍ਤੋਤਿ ਕਾਯਸਂਸਗ੍ਗਰਾਗੇਨ ਵੁਤ੍ਤਂ. ਮੇਥੁਨਰਾਗੇਨ ਪਨ ਪਹਾਰਤੋ ਪੁਰਿਸਾਦੀਸੁ ਦੁਕ੍ਕਟਮੇਵ. ਮੋਕ੍ਖਾਧਿਪ੍ਪਾਯੇਨ ਦਣ੍ਡਕੋਟਿਯਾ ਸਪ੍ਪਾਦਿਂ ਘਟ੍ਟੇਤ੍ਵਾ ਮਣ੍ਡੂਕਾਦਿਂ ਮੋਚੇਨ੍ਤਸ੍ਸਪਿ ਅਨਾਪਤ੍ਤਿ ਏਵ. ਕੁਪਿਤਤਾ, ਉਪਸਮ੍ਪਨ੍ਨਸ੍ਸ ਨ ਮੋਕ੍ਖਾਧਿਪ੍ਪਾਯੇਨ ਪਹਾਰੋਤਿ ਦ੍ਵੇ ਅਙ੍ਗਾਨਿ.

ਪਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੫੭. ਪਞ੍ਚਮੇ ¶ ਨ ਪਹਰਿਤੁਕਾਮਤਾਯ ਦਿਨ੍ਨਤ੍ਤਾ ਦੁਕ੍ਕਟਨ੍ਤਿ ਏਤ੍ਥ ਕਿਮਿਦਂ ਦੁਕ੍ਕਟਂ, ਪਹਾਰਪਚ੍ਚਯਾ, ਉਦਾਹੁ ਉਗ੍ਗਿਰਣਪਚ੍ਚਯਾਤਿ? ਉਗ੍ਗਿਰਣਪਚ੍ਚਯਾਵ, ਨ ਪਹਾਰਪਚ੍ਚਯਾ. ਨ ਹਿ ਪਹਰਿਤੁਕਾਮਤਾਯ ਅਸਤਿ ਤਪ੍ਪਚ੍ਚਯਾ ਕਾਚਿ ਆਪਤ੍ਤਿ ਯੁਤ੍ਤਾ, ਉਗ੍ਗਿਰਣਸ੍ਸ ਪਨ ਅਤ੍ਤਨੋ ਸਭਾਵੇਨ ਅਸਣ੍ਠਿਤਤ੍ਤਾ ਤਪ੍ਪਚ੍ਚਯਾ ਪਾਚਿਤ੍ਤਿਯਂ ਨ ਜਾਤਂ, ਅਸੁਦ੍ਧਚਿਤ੍ਤੇਨ ਕਤਪਯੋਗਤ੍ਤਾ ਚ ਏਤ੍ਥ ਅਨਾਪਤ੍ਤਿ ਨ ਯੁਤ੍ਤਾਤਿ ਦੁਕ੍ਕਟਂ ਵੁਤ੍ਤਨ੍ਤਿ ਗਹੇਤਬ੍ਬਂ.

੪੫੮. ਪੁਬ੍ਬੇਤਿ ਅਨਨ੍ਤਰਸਿਕ੍ਖਾਪਦੇ. ਸੇਸਂ ਅਨਨ੍ਤਰਸਦਿਸਮੇਵ.

ਤਲਸਤ੍ਤਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੫੯. ਛਟ੍ਠੇ ‘‘ਅਤ੍ਤਪਰਿਤ੍ਤਾਣਂ ਕਰੋਨ੍ਤਾ’’ਤਿ ਇਦਂ ਨ ਚ ਵੇਰਮੂਲਿਕਾ ਅਨੁਦ੍ਧਂਸਨਾਤਿ ਦਸ੍ਸਨਤ੍ਥਂ ਵੁਤ੍ਤਂ. ਅਨੁਦ੍ਧਂਸਨਕ੍ਖਣੇ ਪਨ ਕੋਪਚਿਤ੍ਤਮੇਵ ਉਪ੍ਪਜ੍ਜਤਿ. ਤੇਨੇਵ ‘‘ਦੁਕ੍ਖਵੇਦਨ’’ਨ੍ਤਿ ਵੁਤ੍ਤਂ. ਸੇਸਂ ਵੁਤ੍ਤਨਯਮੇਵ.

ਅਮੂਲਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਕੁਕ੍ਕੁਚ੍ਚੁਪ੍ਪਾਦਨਸਿਕ੍ਖਾਪਦਵਣ੍ਣਨਾ

੪੬੪. ਸਤ੍ਤਮੇ ¶ ਉਪਸਮ੍ਪਨ੍ਨਸ੍ਸ ਅਫਾਸੁਕਾਮਤਾ, ਕੁਕ੍ਕੁਚ੍ਚੁਪ੍ਪਾਦਨਨ੍ਤਿ ਦ੍ਵੇ ਅਙ੍ਗਾਨਿ.

ਕੁਕ੍ਕੁਚ੍ਚੁਪ੍ਪਾਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੭੧. ਅਟ੍ਠਮੇ ਸੁਯ੍ਯਤੀਤਿ ਸੁਤਿ, ਵਚਨਂ. ਤਸ੍ਸਾ ਸਮੀਪਂ ਉਪਸ੍ਸੁਤਿ. ਸੁਯ੍ਯਤਿ ਏਤ੍ਥਾਤਿ ਸੁਤੀਤਿ ਏਵਞ੍ਹਿ ਅਤ੍ਥੇ ਗਯ੍ਹਮਾਨੇ ਸਵਨਟ੍ਠਾਨਸਮੀਪੇ ਅਞ੍ਞਸ੍ਮਿਂ ਅਸ੍ਸਵਨਟ੍ਠਾਨੇ ਤਿਟ੍ਠਤੀਤਿ ਆਪਜ੍ਜਤਿ. ਅਟ੍ਠਕਥਾਯਞ੍ਚ ਉਪਸ੍ਸੁਤਿ-ਸਦ੍ਦਸ੍ਸੇਵ ਅਤ੍ਥਂ ਦਸ੍ਸੇਤੁਂ ‘‘ਯਤ੍ਥ ਠਤ੍ਵਾ’’ਤਿਆਦਿ ਵੁਤ੍ਤਂ, ਨ ਸੁਤਿ-ਸਦ੍ਦਮਤ੍ਤਸ੍ਸ.

੪੭੩. ਏਕਪਰਿਚ੍ਛੇਦਾਨੀਤਿ ¶ ਕਦਾਚਿ ਅਕਿਰਿਯਤੋ, ਕਦਾਚਿ ਕਿਰਿਯਤੋ ਸਮੁਟ੍ਠਾਨਸਾਮਞ੍ਞੇਨ ਵੁਤ੍ਤਂ. ਉਪਸਮ੍ਪਨ੍ਨੇਨ ਚੋਦਨਾਧਿਪ੍ਪਾਯੋ, ਸਵਨਨ੍ਤਿ ਦ੍ਵੇ ਅਙ੍ਗਾਨਿ.

ਉਪਸ੍ਸੁਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੭੪. ਨਵਮੇ ਧਮ੍ਮਕਮ੍ਮਤਾ, ਜਾਨਨਂ, ਛਨ੍ਦਂ ਦਤ੍ਵਾ ਖਿਯ੍ਯਨਨ੍ਤਿ ਤੀਣਿ ਅਙ੍ਗਾਨਿ.

ਖਿਯ੍ਯਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੮੧. ਦਸਮੇ ਵਿਨਿਚ੍ਛਯਕਥਾਯ ਧਮ੍ਮਿਕਤਾ, ਤਂ ਞਤ੍ਵਾ ਕਮ੍ਮਤੋ ਪਟ੍ਠਾਯ ਏਕਸੀਮਟ੍ਠਸ੍ਸ ਸਮਾਨਸਂਵਾਸਿਕਸ੍ਸ ਹਤ੍ਥਪਾਸਵਿਜਹਨਨ੍ਤਿ ਦ੍ਵੇ ਅਙ੍ਗਾਨਿ.

ਪਕ੍ਕਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪੮੪. ਏਕਾਦਸਮੇ ¶ ਉਪਸਮ੍ਪਨ੍ਨਸ੍ਸ ਧਮ੍ਮੇਨ ਲਦ੍ਧਸਮ੍ਮੁਤਿਤਾ, ਸਙ੍ਘੇਨ ਸਦ੍ਧਿਂ ਚੀਵਰਂ ਦਤ੍ਵਾ ਖਿਯ੍ਯਿਤੁਕਾਮਤਾਯ ਖਿਯ੍ਯਨਨ੍ਤਿ ਦ੍ਵੇ ਅਙ੍ਗਾਨਿ.

ਦੁਬ੍ਬਲਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਸਹਧਮ੍ਮਿਕਵਗ੍ਗੋ ਅਟ੍ਠਮੋ.

੪੯੯. ਨਵਮਵਗ੍ਗਸ੍ਸ ¶ ਪਠਮੇ ਪਾਲ਼ਿਯਂ ਸਂਸੁਦ੍ਧਗਹਣਿਕੋਤਿ ਏਤ੍ਥ ਗਹਣੀਤਿ ਗਬ੍ਭਾਸਯਸਞ੍ਞਿਤੋ ਮਾਤੁ ਕੁਚ੍ਛਿਪ੍ਪਦੇਸੋ, ਪੁਰਿਸਨ੍ਤਰਸੁਕ੍ਕਾਸਮ੍ਫੁਟ੍ਠਤਾਯ ਸਂਸੁਦ੍ਧਗਹਣਿਕੋ. ਅਭਿਸਿਤ੍ਤਖਤ੍ਤਿਯਤਾ, ਉਭਿਨ੍ਨਮ੍ਪਿ ਸਯਨਿਘਰਤੋ ਅਨਿਕ੍ਖਨ੍ਤਤਾ, ਅਪ੍ਪਟਿਸਂਵਿਦਿਤਸ੍ਸ ਇਨ੍ਦਖੀਲਾਤਿਕ੍ਕਮੋਤਿ ਤੀਣਿ ਅਙ੍ਗਾਨਿ.

ਅਨ੍ਤੇਪੁਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੦੬. ਦੁਤਿਯੇ ਆਵਸਥਸ੍ਸਾਤਿ ਏਤ੍ਥ ਅਨ੍ਤੋਆਰਾਮੇ ਵਾ ਹੋਤੁ ਅਞ੍ਞਤ੍ਥ ਵਾ, ਯਤ੍ਥ ਕਤ੍ਥਚਿ ਅਤ੍ਤਨੋ ਵਸਨਟ੍ਠਾਨਂ ਆਵਸਥੋ ਨਾਮ. ਛਨ੍ਦੇਨਪਿ ਭਯੇਨਪੀਤਿ ਵਡ੍ਢਕਿਆਦੀਸੁ ਛਨ੍ਦੇਨ, ਰਾਜਵਲ੍ਲਭੇਸੁ ਭਯੇਨ. ਆਕਿਣ੍ਣਮਨੁਸ੍ਸੇਪਿ ਜਾਤੇ…ਪੇ… ਆਸਙ੍ਕਨ੍ਤੀਤਿ ਤਸ੍ਮਿਂ ਨਿਮ੍ਮਨੁਸ੍ਸਟ੍ਠਾਨੇ ਪਚ੍ਛਾ ਆਕਿਣ੍ਣਮਨੁਸ੍ਸੇ ਜਾਤੇਪਿ ਵਿਸਰਿਤ੍ਵਾ ਗਮਨਕਾਲੇ ਅਞ੍ਞਸ੍ਸ ਅਦਿਟ੍ਠਤ੍ਤਾ ਤਮੇਵ ਭਿਕ੍ਖੁਂ ਆਸਙ੍ਕਨ੍ਤਿ. ਪਤਿਰੂਪਂ ਨਾਮ ਕਪ੍ਪਿਯਭਣ੍ਡੇ ਸਯਂ ਪਂਸੁਕੂਲਂ ਗਹੇਤ੍ਵਾ ਅਕਪ੍ਪਿਯਭਣ੍ਡੇ ਪਤਿਰੂਪਾਨਂ ਉਪਾਸਕਾਦੀਨਂ ¶ ਦਸ੍ਸੇਤ੍ਵਾ ਚੇਤਿਯਾਦਿਪੁਞ੍ਞੇ ਨਿਯੋਜਨਂ ਵਾ ਦਾਪੇਤ੍ਵਾ ਨਿਰਪੇਕ੍ਖਗਮਨਂ ਵਾ. ਸਮਾਦਪੇਤ੍ਵਾਤਿ ਯਾਚਿਤ੍ਵਾ. ਪਰਸਨ੍ਤਕਤਾ, ਵਿਸ੍ਸਾਸਗ੍ਗਾਹਪਂਸੁਕੂਲਸਞ੍ਞਾਨਂ ਅਭਾਵੋ, ਅਨਨੁਞ੍ਞਾਤਕਾਰਣਾ ਉਗ੍ਗਹਣਾਦਿ ਚਾਤਿ ਤੀਣਿ ਅਙ੍ਗਾਨਿ.

੩. ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦਵਣ੍ਣਨਾ

੫੦੮. ਤਤਿਯੇ ਪਾਲ਼ਿਯਂ ਭਯਕਥਨ੍ਤਿ ਰਾਜਚੋਰਾਦਿਭਯਂ ਵਾ ਰੋਗਾਮਨੁਸ੍ਸਦੁਬ੍ਭਿਕ੍ਖਕਨ੍ਤਾਰਾਦਿਭਯਂ ਵਾ ਆਰਬ੍ਭ ਪਵਤ੍ਤਂ. ਵਿਸਿਖਾਕਥਨ੍ਤਿ ਸੁਨਿਵਿਟ੍ਠਾਦਿਵੀਥਿਕਥਂ. ਕੁਮ੍ਭਟ੍ਠਾਨਕਥਨ੍ਤਿ ਉਦਕਤਿਤ੍ਥਕਥਂ, ਕੁਮ੍ਭਦਾਸੀਕਥਂ ਵਾ. ਪੁਬ੍ਬਪੇਤਕਥਨ੍ਤਿ ਅਤੀਤਞਾਤਿਕਥਂ. ਨਾਨਤ੍ਤਕਥਨ੍ਤਿ ਵੁਤ੍ਤਾਹਿ, ਵਕ੍ਖਮਾਨਾਹਿ ਚ ਵਿਮੁਤ੍ਤਂ ਨਾਨਾਸਭਾਵਂ ¶ ਨਿਰਤ੍ਥਕਕਥਂ. ਲੋਕਕ੍ਖਾਯਿਕਨ੍ਤਿ ‘‘ਅਯਂ ਲੋਕੋ ਕੇਨ ਨਿਮ੍ਮਿਤੋ’’ਤਿਆਦਿਨਾ ਲੋਕਸਭਾਵਕ੍ਖਾਨਵਸੇਨ ਪਵਤ੍ਤਨਕਥਾ. ਏਵਂ ਸਮੁਦ੍ਦਕ੍ਖਾਯਿਕਾ ਵੇਦਿਤਬ੍ਬਾ. ਇਤਿ ਭਵੋ ਇਤਿ ਅਭਵੋਤਿ ਯਂ ਵਾ ਤਂ ਵਾ ਨਿਰਤ੍ਥਕਕਾਰਣਂ ਵਤ੍ਵਾ ਪਵਤ੍ਤਿਤਕਥਾ ਇਤਿਭਵਾਭਵਕਥਾ. ਏਤ੍ਥ ਚ ਭਵੋ ਸਸ੍ਸਤਂ, ਵੁਡ੍ਢਿ, ਕਾਮਸੁਖਞ੍ਚਾਤਿ ਤਿਵਿਧੋ, ਅਭਵੋ ਤਬ੍ਬਿਪਰੀਤਵਸੇਨ. ਇਤਿ ਇਮਾਯ ਛਬ੍ਬਿਧਾਯ ਇਤਿਭਵਾਭਵਕਥਾਯ ਸਦ੍ਧਿਂ ਦ੍ਵਤ੍ਤਿਂਸਤਿਰਚ੍ਛਾਨਕਥਾ ਨਾਮ ਹੋਨ੍ਤਿ. ਅਥ ਵਾ ਪਾਲ਼ਿਯਂ ਸਰੂਪਤੋ ਅਨਾਗਤਾਪਿ ਅਰਞ੍ਞਪਬ੍ਬਤਨਦੀਦੀਪਕਥਾ ਇਤਿ-ਸਦ੍ਦੇਨ ਸਙ੍ਗਹੇਤ੍ਵਾ ਦ੍ਵਤ੍ਤਿਂਸਤਿਰਚ੍ਛਾਨਕਥਾਤਿ ਵੁਚ੍ਚਨ੍ਤਿ. ਇਤਿ ਵਾਤਿ ਏਤ੍ਥ ਇਤਿ-ਸਦ੍ਦੋ ਪਕਾਰਤ੍ਥੇ. ਵਾ-ਸਦ੍ਦੋ ਵਿਕਪ੍ਪਤ੍ਥੇ. ਤਸ੍ਮਾ ਏਵਂ ਪਕਾਰਂ ਇਤੋ ਅਞ੍ਞਂ ਵਾ ਤਾਦਿਸਂ ਨਿਰਤ੍ਥਕਕਥਂ ਕਥੇਤੀਤਿ ਅਤ੍ਥੋ ਗਹੇਤਬ੍ਬੋ.

੫੧੨. ਉਸ੍ਸਾਹਂ ਪਟਿਪ੍ਪਸ੍ਸਮ੍ਭੇਤ੍ਵਾ ਵਿਹਾਰਂ ਗਚ੍ਛਨ੍ਤਾਤਿ ਏਤ੍ਥ ਗਾਮੂਪਚਾਰਤੋ ਬਹਿ ਨਿਕ੍ਖਨ੍ਤੇ ਅਨ੍ਤਰਾਰਾਮਾਦੀਨਮੁਪਚਾਰਂ ਪਵਿਟ੍ਠੇ ਸਨ੍ਧਾਯ ਵੁਤ੍ਤਂ. ਗਾਮੂਪਚਾਰਬ੍ਭਨ੍ਤਰੇ ਪਨ ਪਟਿਪਸ੍ਸਦ੍ਧੁਸ੍ਸਾਹਾਨਮ੍ਪਿ ਪੁਨ ਤਮੇਵ ਵਾ ਅਞ੍ਞਂ ਵਾ ਗਾਮਂ ਪਵਿਸਿਤੁਕਾਮਤਾਯ ਸਤਿ ਆਪੁਚ੍ਛਨਕਿਚ੍ਚਂ ਨਤ੍ਥਿ. ‘‘ਕੁਲਘਰੇ ਵਾ…ਪੇ… ਗਨ੍ਤਬ੍ਬ’’ਨ੍ਤਿ ਇਦਂ ਪਨ ਪੁਰੇਭਤ੍ਤਂ ਪਵਿਟ੍ਠਾਨਂ ਵਿਕਾਲੇ ਸਞ੍ਜਾਤੇ ਵਿਕਾਲੇ ਗਾਮਪ੍ਪਵੇਸਸ੍ਸ ਆਪੁਚ੍ਛਿਤਬ੍ਬਤਾਯ ਵੁਤ੍ਤਂ. ਅਦਿਨ੍ਨਾਦਾਨੇ ਵੁਤ੍ਤਨਯੇਨਾਤਿ ਦੁਤਿਯਲੇਡ੍ਡੁਪਾਤਂ ਸਨ੍ਧਾਯ ਵੁਤ੍ਤਂ.

੫੧੫. ਅਨ੍ਤਰਾਰਾਮਨ੍ਤਿਆਦੀਸੂਤਿ ਏਤ੍ਥ ਉਸ੍ਸਵਦਿਵਸਾਦੀਸੁ ਮਨੁਸ੍ਸੇਹਿ ਗਾਮੇ ਪਦਕ੍ਖਿਣਂ ਕਾਰੇਨ੍ਤਂ ਜਿਨਬਿਮ੍ਬਾਦਿਂ ਪੂਜੇਤੁਕਾਮੇਹਿ ਵਾ ਰੋਗਵੂਪਸਮਾਦਿਯਤ੍ਥਂ ਮਨੁਸ੍ਸੇਹਿ ਯਾਚਿਤੇਹਿ ਵਾ ਭਿਕ੍ਖੂਹਿ ਸੁਪ੍ਪਟਿਚ੍ਛਨ੍ਨਾਦਿਵਿਧਿਂ ਅਕਤ੍ਵਾਪਿ ਵੀਥਿਮਜ੍ਝੇਨੇਵ ਗਾਮਂ ਪਦਕ੍ਖਿਣਂ ਕਾਤੁਂ ਵਟ੍ਟਤੀਤਿ ਵਦਨ੍ਤਿ, ਤਂ ਨ ¶ ਗਹੇਤਬ੍ਬਂ ਅਨਾਪਤ੍ਤਿਵਾਰੇ ਅਵੁਤ੍ਤਤ੍ਤਾ, ‘‘ਮਗ੍ਗਾ ਅਨੋਕ੍ਕਮਿਤ੍ਵਾ…ਪੇ… ਪਾਚਿਤ੍ਤਿਯ’’ਨ੍ਤਿ (ਕਙ੍ਖਾ. ਅਟ੍ਠ. ਵਿਕਾਲਗਾਮਪ੍ਪਵੇਸਨਸਿਕ੍ਖਾਪਦਵਣ੍ਣਨਾ) ਪਟਿਕ੍ਖਿਤ੍ਤਤ੍ਤਾ ਚ. ਵੇਸਾਲਿਂ ਅਨੁਪਰਿਯਾਯਿਤ੍ਵਾ ਪਰਿਤ੍ਤਂ ਕਰੋਨ੍ਤੇਨਾਪਿ ਆਨਨ੍ਦਤ੍ਥੇਰੇਨ ਸੁਪ੍ਪਟਿਚ੍ਛਨ੍ਨਤਾਦਿਂ ਅਕੋਪੇਨ੍ਤੇਨੇਵ, ਅਪਞ੍ਞਤ੍ਤੇ ਵਾ ਸਿਕ੍ਖਾਪਦੇ ਕਤਨ੍ਤਿ ਦਟ੍ਠਬ੍ਬਂ. ਕੇਚਿ ਪਨ ‘‘ਅਨ੍ਤਰਾਰਾਮਾਦਿਗਾਮਨ੍ਤਰੇ ਠਿਤੇਹਿ ਗਰੁਟ੍ਠਾਨੀਯਾਨਂ ਪਚ੍ਚੁਗ੍ਗਮਨਾਨੁਗ੍ਗਮਨਾਦਿਵਸੇਨ ਗਾਮਵੀਥਿਂ ਓਤਰਿਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਮ੍ਪਿ ਅਨ੍ਤਰਘਰਂ ਪਵਿਸਨ੍ਤਂ ਪਤਿ ਕਾਤੁਂ ਨ ਵਟ੍ਟਤਿ ਏਵ. ਅਨ੍ਤਰਾਰਾਮਾਦਿਕਪ੍ਪਿਯਭੂਮਿਂ ਪਨ ਉਦ੍ਦਿਸ੍ਸ ਗਚ੍ਛਨ੍ਤਂ ਪਤਿ ਕਾਤੁਂ ਵਟ੍ਟਤੀਤਿ ਖਾਯਤਿ, ਵੀਮਂਸਿਤਬ੍ਬਂ. ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਨਾ ¶ , ਅਨਨੁਞ੍ਞਾਤਕਾਰਣਾ ਵਿਕਾਲੇ ਗਾਮਪ੍ਪਵੇਸੋਤਿ ਦ੍ਵੇ ਅਙ੍ਗਾਨਿ.

ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੨੦. ਚਤੁਤ੍ਥੇ ਪਾਲ਼ਿਯਂ ਵਾਸਿਜਟੇਤਿ ਵਾਸਿਦਣ੍ਡਕੇ. ਅਟ੍ਠਿਮਯਾਦਿਸੂਚਿਘਰਤਾ, ਕਰਣਕਾਰਾਪਨਾਦਿਵਸੇਨ ਅਤ੍ਤਨੋ ਪਟਿਲਾਭੋਤਿ ਦ੍ਵੇ ਅਙ੍ਗਾਨਿ.

ਸੂਚਿਘਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੨੧. ਪਞ੍ਚਮੇ ਪਾਲ਼ਿਯਂ ਆਸਯਤੋ, ਭਿਕ੍ਖਵੇ, ਮੋਘਪੁਰਿਸੋ ਵੇਦਿਤਬ੍ਬੋਤਿ ਹੀਨਜ੍ਝਾਸਯਵਸੇਨ ਅਯਂ ਤੁਚ੍ਛਪੁਰਿਸੋਤਿ ਞਾਤਬ੍ਬੋ, ਹੀਨਾਯ ਪਚ੍ਚਯੇ ਲੋਲਤਾਯ ਪੁਗ੍ਗਲਸ੍ਸ ਤੁਚ੍ਛਤਾ ਞਾਤਬ੍ਬਾਤਿ ਅਧਿਪ੍ਪਾਯੋ. ਇਮਸ੍ਮਿਂ ਸਿਕ੍ਖਾਪਦੇ, ਇਤੋ ਪਰੇਸੁ ਚ ਪਞ੍ਚਸੁ ਅਤ੍ਤਨਾ ਕਾਰਾਪਿਤਸ੍ਸ ਪਟਿਲਾਭੇ ਏਵ ਪਾਚਿਤ੍ਤਿਯਂ. ਪਰਿਭੋਗੇ ਪਨਸ੍ਸ, ਅਞ੍ਞੇਸਞ੍ਚ ਦੁਕ੍ਕਟਮੇਵ. ਪਮਾਣਾਤਿਕ੍ਕਨ੍ਤਮਞ੍ਚਪੀਠਤਾ, ਅਤ੍ਤਨੋ ਕਰਣਕਾਰਾਪਨਵਸੇਨ ਪਟਿਲਾਭੋਤਿ ਦ੍ਵੇ ਅਙ੍ਗਾਨਿ.

ਮਞ੍ਚਪੀਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੨੬. ਛਟ੍ਠੇ ¶ ਪੋਟਕਿਤੂਲਨ੍ਤਿ ਤਿਣਗਚ੍ਛਜਾਤਿਕਾਨਂ ਤੂਲਂ. ਸੇਸਂ ਵੁਤ੍ਤਨਯਮੇਵ.

ਤੂਲੋਨਦ੍ਧਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੩੧-੫੩੬. ਸਤ੍ਤਮੇ ¶ ਨਿਸੀਦਨਸ੍ਸ ਪਮਾਣਾਤਿਕ੍ਕਨ੍ਤਤਾ, ਅਤ੍ਤਨੋ ਕਰਣਾਦਿਨਾ ਪਟਿਲਾਭੋਤਿ ਦ੍ਵੇ ਅਙ੍ਗਾਨਿ.

ਨਿਸੀਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੩੭-੫੪੭. ਇਮਿਨਾ ਨਯੇਨ ਅਟ੍ਠਮਨਵਮਦਸਮੇਸੁਪਿ ਅਙ੍ਗਾਨਿ ਵੇਦਿਤਬ੍ਬਾਨਿ. ਸੇਸਂ ਸਬ੍ਬਤ੍ਥ ਸੁਵਿਞ੍ਞੇਯ੍ਯਮੇਵਾਤਿ.

੧. ਪਠਮਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ

੫੫੩. ਪਾਟਿਦੇਸਨੀਯੇਸੁ ¶ ¶ ਪਠਮੇ ਪਟਿਦੇਸੇਤਬ੍ਬਾਕਾਰਦਸ੍ਸਨਨ੍ਤਿ ਏਵਂ ਆਪਤ੍ਤਿਂ ਨਵਕਸ੍ਸ ਸਨ੍ਤਿਕੇ ਦੇਸੇਤਬ੍ਬਾਕਾਰਦਸ੍ਸਨਂ. ਇਮਿਨਾ ਲਕ੍ਖਣੇਨ ਸਮ੍ਬਹੁਲਾਨਂ ਆਪਤ੍ਤੀਨਮ੍ਪਿ ਵੁਡ੍ਢਸ੍ਸ ਸਨ੍ਤਿਕੇ ਚ ਦੇਸੇਤਬ੍ਬਾਕਾਰੋ ਸਕ੍ਕਾ ਵਿਞ੍ਞਾਤੁਨ੍ਤਿ. ਤਤ੍ਰਾਯਂ ਨਯੋ – ‘‘ਗਾਰਯ੍ਹੇ, ਆਵੁਸੋ, ਧਮ੍ਮੇ ਆਪਜ੍ਜਿਂ ਅਸਪ੍ਪਾਯੇ ਪਾਟਿਦੇਸਨੀਯੇ’’ਤਿ ਏਵਂ ਸਮ੍ਬਹੁਲਾਸੁ. ਵੁਡ੍ਢਸ੍ਸ ਪਨ ਸਨ੍ਤਿਕੇ ‘‘ਗਾਰਯ੍ਹਂ, ਭਨ੍ਤੇ, ਧਮ੍ਮਂ…ਪੇ… ਗਾਰਯ੍ਹੇ, ਭਨ੍ਤੇ, ਧਮ੍ਮੇ’’ਤਿ ਯੋਜਨਾ ਵੇਦਿਤਬ੍ਬਾ. ਤਤ੍ਥ ਅਸਪ੍ਪਾਯਨ੍ਤਿ ਸਗ੍ਗਮੋਕ੍ਖਨ੍ਤਰਾਯਕਰਨ੍ਤਿ ਅਤ੍ਥੋ. ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਅਨ੍ਤਰਘਰੇ ਠਿਤਾਯ ਹਤ੍ਥਤੋ ਸਹਤ੍ਥਾ ਯਾਵਕਾਲਿਕਗ੍ਗਹਣਂ, ਅਜ੍ਝੋਹਰਣਨ੍ਤਿ ਦ੍ਵੇ ਅਙ੍ਗਾਨਿ.

ਪਠਮਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੫੮. ਦੁਤਿਯੇ ਪਰਿਪੁਣ੍ਣੂਪਸਮ੍ਪਨ੍ਨਾਯ ਅਨਨੁਞ੍ਞਾਤਾਕਾਰੇਨ ਵੋਸਾਸਨਾ, ਅਨਿਵਾਰੇਤ੍ਵਾ ਭੋਜਨਜ੍ਝੋਹਾਰੋਤਿ ਦ੍ਵੇ ਅਙ੍ਗਾਨਿ.

੫੬੩. ਤਤਿਯੇ ਸੇਕ੍ਖਸਮ੍ਮਤਤਾ, ਘਰੂਪਚਾਰੇ ਅਨਿਮਨ੍ਤਿਤਤਾ, ਗਿਲਾਨਸ੍ਸ ਅਨਿਚ੍ਚਭਤ੍ਤਾਦਿਂ ਗਹੇਤ੍ਵਾ ਭੁਞ੍ਜਨਨ੍ਤਿ ਤੀਣਿ ਅਙ੍ਗਾਨਿ.

੫੭੦. ਚਤੁਤ੍ਥੇ ਸਾਸਙ੍ਕਾਰਞ੍ਞਸੇਨਾਸਨਤਾ, ਅਨਨੁਞ੍ਞਾਤਂ ਯਾਵਕਾਲਿਕਂ ਅਪ੍ਪਟਿਸਂਵਿਦਿਤਂ ਅਜ੍ਝਾਰਾਮੇ ਪਟਿਗ੍ਗਹੇਤ੍ਵਾ ਅਗਿਲਾਨਸ੍ਸ ਅਜ੍ਝੋਹਰਣਨ੍ਤਿ ਦ੍ਵੇ ਅਙ੍ਗਾਨਿ. ਸੇਸਂ ਉਤ੍ਤਾਨਮੇਵ.

ਪਾਟਿਦੇਸਨੀਯਵਣ੍ਣਨਾਨਯੋ ਨਿਟ੍ਠਿਤੋ.

੫੭੬. ਸੇਖਿਯੇਸੁ ¶ ¶ ਯਸ੍ਮਾ ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੫੬ ਆਦਯੋ) ਵੁਤ੍ਤਵਤ੍ਤਾਨਿਪਿ ਸਿਕ੍ਖਿਤਬ੍ਬਤ੍ਤਾ ਸੇਖਿਯਾਨੇਵ, ਤਸ੍ਮਾ ਪਾਰਾਜਿਕਾਦੀਸੁ ਵਿਯੇਤ੍ਥ ਪਾਲ਼ਿਯਂ ਪਰਿਚ੍ਛੇਦੋ ਨ ਕਤੋ. ਚਾਰਿਤ੍ਤਨਯਦਸ੍ਸਨਤ੍ਥਞ੍ਚ ‘‘ਯੋ ਪਨ ਭਿਕ੍ਖੁ ਓਲਮ੍ਬੇਨ੍ਤੋ ਨਿਵਾਸੇਯ੍ਯ, ਦੁਕ੍ਕਟ’’ਨ੍ਤਿ ਅਵਤ੍ਵਾ ‘‘ਸਿਕ੍ਖਾ ਕਰਣੀਯਾ’’ਤਿ ਸਬ੍ਬਤ੍ਥ ਪਾਲ਼ਿ ਆਰੋਪਿਤਾ. ਪਦਭਾਜਨੇ ਪਨ ‘‘ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਤ੍ਤਾ ਸਬ੍ਬਤ੍ਥ ਅਨਾਦਰਿਯਕਰਣੇ ਦੁਕ੍ਕਟਂ ਵੇਦਿਤਬ੍ਬਂ.

ਅਟ੍ਠਙ੍ਗੁਲਮਤ੍ਤਨ੍ਤਿ ਮਤ੍ਤ-ਸਦ੍ਦੇਨ ਤਤੋ ਕਿਞ੍ਚਿ ਅਧਿਕਂ, ਊਨਮ੍ਪਿ ਸਙ੍ਗਣ੍ਹਾਤਿ. ਤੇਨੇਵ ਨਿਸਿਨ੍ਨਸ੍ਸ ਚਤੁਰਙ੍ਗੁਲਮਤ੍ਤਮ੍ਪਿ ਵੁਤ੍ਤਂ. ਨ ਹਿ ਨਿਸਿਨ੍ਨਸ੍ਸ ਚਤੁਰਙ੍ਗੁਲਪ੍ਪਮਾਣਂ, ਠਿਤਸ੍ਸ ਅਟ੍ਠਙ੍ਗੁਲਮੇਵਾਤਿ ਸਕ੍ਕਾ ਨਿਯਮੇਤੁਂ ਊਨਾਧਿਕਤ੍ਤਸਮ੍ਭਵਤੋ. ਤਸ੍ਮਾ ਯਥਾ ਸਾਰੁਪ੍ਪਂ ਹੋਤਿ ਏਵਂ ਅਟ੍ਠਙ੍ਗੁਲਾਨੁਸਾਰੇਨ ਨਿਵਾਸਨਞ੍ਞੇਵ ਅਧਿਪ੍ਪੇਤਨ੍ਤਿ ਗਹੇਤਬ੍ਬਂ. ਤੇਨੇਵ ਵਕ੍ਖਤਿ ‘‘ਯੋ ਪਨ ਭਿਕ੍ਖੁ ਸੁਕ੍ਖਜਙ੍ਘੋ ਵਾ’’ਤਿਆਦਿ. ਕੁਰੁਨ੍ਦਿਯਂ ‘‘ਅਜਾਨਨ੍ਤਸ੍ਸ ਅਨਾਪਤ੍ਤੀ’’ਤਿ ਆਦਰਂ ਕਤ੍ਵਾ ਉਗ੍ਗਣ੍ਹਨ੍ਤਸ੍ਸਾਪਿ ਅਜਾਨਨਂ ਸਨ੍ਧਾਯ ਵੁਤ੍ਤਂ. ਤੇਨਾਪਿ ਨਿਰਨ੍ਤਰਂ ਨਿਵਾਸਨਪਾਰੁਪਨਵਤ੍ਤਂ ਸਿਕ੍ਖਿਤਬ੍ਬਂ, ਅਸਿਕ੍ਖਿਤੋ ਅਨਾਦਰਿਯਮੇਵ. ਪਰਿਮਣ੍ਡਲਗ੍ਗਹਣੇਨ ਉਕ੍ਖਿਪਿਤ੍ਵਾ ਨਿਵਾਸਨਮ੍ਪਿ ਪਟਿਕ੍ਖਿਤ੍ਤਨ੍ਤਿ ਆਹ ‘‘ਉਕ੍ਖਿਪਿਤ੍ਵਾ ਵਾ ਓਤਾਰੇਤ੍ਵਾ ਵਾ’’ਤਿ.

ਸਚਿਤ੍ਤਕਨ੍ਤਿ ਵਤ੍ਥੁਵਿਜਾਨਨਚਿਤ੍ਤੇਨ ਸਚਿਤ੍ਤਕਂ. ਸਾਰਤ੍ਥਦੀਪਨਿਯਂ ਪਨ ਉਪਤਿਸ੍ਸਤ੍ਥੇਰਵਾਦਨਯੇਨ ਲੋਕਵਜ੍ਜਤ੍ਤਂ ਗਹੇਤ੍ਵਾ ‘‘ਵਤ੍ਥੁਵਿਜਾਨਨਚਿਤ੍ਤੇਨ, ਪਣ੍ਣਤ੍ਤਿਵਿਜਾਨਨਚਿਤ੍ਤੇਨ ਚ ਸਚਿਤ੍ਤਕ’’ਨ੍ਤਿ (ਸਾਰਤ੍ਥ. ਟੀ. ਸੇਖਿਯਕਣ੍ਡ ੩.੫੭੬) ਵੁਤ੍ਤਂ. ਤਤ੍ਥ ਚ ਵਤ੍ਥੁਵਿਜਾਨਨਂ ਵਿਸੁਂ ਨ ਵਤ੍ਤਬ੍ਬਂ. ਪਣ੍ਣਤ੍ਤਿਵਿਜਾਨਨੇਨ ਤਸ੍ਸਾਪਿ ਅਨ੍ਤੋਗਧਭਾਵਤੋ ਇਦਂ ਵਤ੍ਥੁਂ ਏਵਂ ਵੀਤਿਕ੍ਕਮਨ੍ਤਸ੍ਸ ਆਪਤ੍ਤੀਤਿ ਵਿਜਾਨਨ੍ਤੋ ਹਿ ਪਣ੍ਣਤ੍ਤਿਂ ਵਿਜਾਨਾਤੀਤਿ ਵੁਚ੍ਚਤਿ. ਉਪਤਿਸ੍ਸਤ੍ਥੇਰਵਾਦੇ ਚੇਤ੍ਥ ਪਣ੍ਣਤ੍ਤਿਂ ਅਜਾਨਿਤ੍ਵਾ ਅਪਰਿਮਣ੍ਡਲਨਿਵਾਸਨਾਦਿਵਤ੍ਥੁਮੇਵ ¶ ਜਾਨਨ੍ਤਸ੍ਸ ਪਣ੍ਣਤ੍ਤਿਵੀਤਿਕ੍ਕਮਾਨਾਦਰਿਯਾਭਾਵਾ ਸਬ੍ਬਸੇਖਿਯੇਸੁ ਅਨਾਪਤ੍ਤਿ ਏਵ ਅਭਿਮਤਾ, ਤਞ੍ਚ ਨ ਯੁਤ੍ਤਂ ਕੋਸਮ੍ਬਕ੍ਖਨ੍ਧਕੇ (ਮਹਾਵ. ੪੫੧ ਆਦਯੋ) ਵਚ੍ਚਕੁਟਿਯਂ ਉਦਕਾਵਸੇਸਂ ਠਪੇਨ੍ਤਸ੍ਸ ਪਣ੍ਣਤ੍ਤਿਵਿਜਾਨਨਾਭਾਵੇਪਿ ਆਪਤ੍ਤਿਯਾ ਵੁਤ੍ਤਤ੍ਤਾ. ਵੁਤ੍ਤਞ੍ਹਿ ਤਤ੍ਥ ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ ¶ …ਪੇ… ਸੋ ਅਪਰੇਨ ਸਮਯੇਨ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤੀ’’ਤਿਆਦਿ (ਮਹਾਵ. ੪੫੧). ਅਟ੍ਠਕਥਾਯਞ੍ਚਸ੍ਸ ‘‘ਤ੍ਵਂ ਏਤ੍ਥ ਆਪਤ੍ਤਿਭਾਵਂ ਨ ਜਾਨਾਸੀਤਿ, ਆਮ ਨ ਜਾਨਾਮੀਤਿ. ਹੋਤੁ ਆਵੁਸੋ, ਏਤ੍ਥ ਆਪਤ੍ਤੀਤਿ, ਸਚੇ ਹੋਤਿ, ਦੇਸੇਸ੍ਸਾਮੀਤਿ. ਸਚੇ ਪਨ ਤੇ, ਆਵੁਸੋ, ਅਸਞ੍ਚਿਚ੍ਚ ਅਸਤਿਯਾ ਕਤਂ, ਨਤ੍ਥਿ ਆਪਤ੍ਤੀਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਅਹੋਸੀ’’ਤਿ (ਮਹਾਵ. ਅਟ੍ਠ. ੪੫੧) ਵੁਤ੍ਤਂ, ਤਥਾ ‘‘ਅਧਮ੍ਮਵਾਦੀਤਿ ਉਕ੍ਖਿਤ੍ਤਾਨੁਵਤ੍ਤਕੇਸੁ ਅਞ੍ਞਤਰੋ’’ਤਿ (ਮਹਾਵ. ਅਟ੍ਠ. ੪੫੭-੪੫੮) ਚ ਵੁਤ੍ਤਂ. ਖਨ੍ਧਕਵਤ੍ਤਾਨਞ੍ਹਿ ਸੇਖਿਯਤ੍ਤਾ ਤਤ੍ਥ ਵੁਤ੍ਤੋ ਨਯੋ ਇਮੇਸਂ, ਇਧ ਵੁਤ੍ਤੋ ਚ ਤੇਸਂ ਸਾਧਾਰਣੋਵ ਹੋਤੀਤਿ. ਤੇਨੇਵ ‘‘ਅਸਞ੍ਚਿਚ੍ਚ ਅਸਤਿਯਾ ਕਤਂ, ਨਤ੍ਥਿ ਆਪਤ੍ਤੀ’’ਤਿ ਏਵਂ ਇਧ ਵੁਤ੍ਤੋ ਆਪਤ੍ਤਿਨਯੋ ਤਤ੍ਥਾਪਿ ਦਸ੍ਸਿਤੋ. ਤਸ੍ਮਾ ਫੁਸ੍ਸਦੇਵਤ੍ਥੇਰਵਾਦੇ ਏਵ ਠਤ੍ਵਾ ਵਤ੍ਥੁਵਿਜਾਨਨਚਿਤ੍ਤੇਨੇਵ ਸਬ੍ਬਸੇਖਿਯਾਨਿ ਸਚਿਤ੍ਤਕਾਨਿ, ਨ ਪਣ੍ਣਤ੍ਤਿਵਿਜਾਨਨਚਿਤ੍ਤੇਨ. ਭਿਯ੍ਯੋਕਮ੍ਯਤਾਯਸੂਪਬ੍ਯਞ੍ਜਨਪਟਿਚ੍ਛਾਦਨਉਜ੍ਝਾਨਸਞ੍ਞੀਤਿ ਦ੍ਵੇ ਸਿਕ੍ਖਾਪਦਾਨਿ ਲੋਕਵਜ੍ਜਾਨਿ ਅਕੁਸਲਚਿਤ੍ਤਾਨਿ, ਸੇਸਾਨਿ ਪਣ੍ਣਤ੍ਤਿਵਜ੍ਜਾਨਿ, ਤਿਚਿਤ੍ਤਾਨਿ, ਤਿਵੇਦਨਾਨਿ ਚਾਤਿ ਗਹਣਮੇਵ ਯੁਤ੍ਤਤਰਂ ਦਿਸ੍ਸਤਿ. ਤੇਨੇਵੇਤ੍ਥ ‘‘ਅਸਞ੍ਚਿਚ੍ਚਾਤਿ ਪੁਰਤੋ ਵਾ ਪਚ੍ਛਤੋ ਵਾ ਓਲਮ੍ਬੇਤ੍ਵਾ ਨਿਵਾਸੇਸ੍ਸਾਮੀਤਿ ਏਵਂ ਅਸਞ੍ਚਿਚ੍ਚਾ’’ਤਿਆਦਿਨਾ ਵਤ੍ਥੁਅਜਾਨਨਵਸੇਨੇਵ ਅਨਾਪਤ੍ਤਿਵਣ੍ਣਨਾ ਕਤਾ, ਨ ਪਣ੍ਣਤ੍ਤਿਵਿਜਾਨਨਚਿਤ੍ਤਵਸੇਨ.

ਅਪਿਚ ‘‘ਯਸ੍ਸ ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵ ਹੋਤਿ, ਤਂ ਲੋਕਵਜ੍ਜ’’ਨ੍ਤਿ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਇਮਿਨਾ ਲਕ੍ਖਣਵਚਨੇਨਾਪਿ ਚੇਤਂ ਸਿਜ੍ਝਤਿ. ਵਤ੍ਥੁਵਿਜਾਨਨਚਿਤ੍ਤਵਸੇਨੇਵ ਹੇਤ੍ਥ ‘‘ਸਚਿਤ੍ਤਕਪਕ੍ਖੇ’’ਤਿ ਵੁਤ੍ਤਂ. ਇਤਰਥਾ ਪਣ੍ਣਤ੍ਤਿਵਿਜਾਨਨਚਿਤ੍ਤਵਸੇਨ ਸਬ੍ਬਸਿਕ੍ਖਾਪਦਾਨਮ੍ਪਿ ਸਚਿਤ੍ਤਕਪਕ੍ਖੇ ਚਿਤ੍ਤਸ੍ਸ ਅਕੁਸਲਤ੍ਤਨਿਯਮੇਨ ਲੋਕਵਜ੍ਜਤ੍ਤਪ੍ਪਸਙ੍ਗਤੋ ਪਣ੍ਣਤ੍ਤਿਵਜ੍ਜਮੇਵ ਨ ਸਿਯਾ, ਇਦਞ੍ਚ ਵਚਨਂ ਨਿਰਤ੍ਥਕਂ ਸਿਯਾ ਇਮਿਨਾ ਵਚਨੇਨ ਨਿਵਤ੍ਤੇਤਬ੍ਬਸ੍ਸ ਸਿਕ੍ਖਾਪਦਸ੍ਸ ਅਭਾਵਾ. ਨ ਚ ਸੇਖਿਯੇਸੁ ਵਤ੍ਥੁਵਿਜਾਨਨਚਿਤ੍ਤੇਨ ਸਚਿਤ੍ਤਕਪਕ੍ਖੇ ਚਿਤ੍ਤਂ ਪਾਣਾਤਿਪਾਤਾਦੀਸੁ ਵਿਯ ਅਕੁਸਲਮੇਵਾਤਿ ਨਿਯਮੋ ਅਤ੍ਥਿ, ਯੇਨੇਤ੍ਥ ਲੋਕਵਜ੍ਜਤਾ ਪਸਜ੍ਜੇਯ੍ਯ, ‘‘ਅਨਾਦਰਿਯਂ ਪਟਿਚ੍ਚਾ’’ਤਿ ਚੇਤਂ ਪਾਲ਼ਿਵਚਨਂ ਵਤ੍ਥੁਂ ਜਾਨਿਤ੍ਵਾ ਤੀਹਿ ਚਿਤ੍ਤੇਹਿ ਵੀਤਿਕ੍ਕਮਮੇਵ ਅਨਾਦਰਿਯਂ ਕਤ੍ਵਾ ਵੁਤ੍ਤਂ, ਨ ਪਣ੍ਣਤ੍ਤਿਂ ਜਾਨਿਤ੍ਵਾ ਅਕੁਸਲਚਿਤ੍ਤੇਨੇਵ ਵੀਤਿਕ੍ਕਮਨ੍ਤਿ ਗਹੇਤਬ੍ਬਂ. ਅਞ੍ਞਥਾ ਖਨ੍ਧਕਪਾਲ਼ਿਯਾ, ਅਟ੍ਠਕਥਾਯਞ੍ਚ ਪੁਬ੍ਬਾਪਰਞ੍ਚ ਵਿਰੁਜ੍ਝਨਤੋਤਿ ਅਮ੍ਹਾਕਂ ਖਨ੍ਤਿ. ਯਥਾ ਵਾ ਨ ਵਿਰੁਜ੍ਝਤਿ, ਤਥਾ ਏਤ੍ਥ ਅਧਿਪ੍ਪਾਯੋ ਗਵੇਸਿਤਬ੍ਬੋ. ਅਨਾਦਰਿਯਂ, ਅਨਾਪਤ੍ਤਿਕਾਰਣਾਭਾਵੋ ¶ , ਅਪਰਿਮਣ੍ਡਲਨਿਵਾਸਨਨ੍ਤਿ ¶ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਯਥਾ ਚੇਤ੍ਥ, ਏਵਂ ਸਬ੍ਬਤ੍ਥ. ਕੇਵਲਂ ਤਤ੍ਥ ਤਤ੍ਥ ਵੁਤ੍ਤਪਟਿਪਕ੍ਖਕਰਣਵਸੇਨ ਤਤਿਯਙ੍ਗਯੋਜਨਮੇਵ ਵਿਸੇਸੋ.

੫੭੭. ਦੁਤਿਯਾਦੀਸੁ ਗਿਹਿਪਾਰੁਤਨ੍ਤਿ ਸੇਤਪਟਪਾਰੁਤਾਦਿ. ਵਿਹਾਰੇਪੀਤਿ ਸਙ੍ਘਸਨ੍ਨਿਪਾਤਬੁਦ੍ਧੁਪਟ੍ਠਾਨਾਦਿਕਾਲਂ ਸਨ੍ਧਾਯ ਵੁਤ੍ਤਂ.

੫੭੮. ਗਣ੍ਠਿਕਂ ਪਟਿਮੁਞ੍ਚਿਤ੍ਵਾਤਿਆਦਿ ਪਟਿਚ੍ਛਾਦਨਵਿਧਿਦਸ੍ਸਨਂ. ਗੀਵਂ ਪਟਿਚ੍ਛਾਦੇਤ੍ਵਾਤਿਆਦਿਨਾ ਵੁਤ੍ਤਤ੍ਤਾ ਸਞ੍ਚਿਚ੍ਚ ਗੀਵਂ, ਮਣਿਬਨ੍ਧਨਞ੍ਚ ਅਪ੍ਪਟਿਚ੍ਛਾਦੇਨ੍ਤਸ੍ਸ ਆਪਤ੍ਤਿ. ਏਤ੍ਥਾਪਿ ਪਰਿਮਣ੍ਡਲਸਿਕ੍ਖਾਪਦਸ੍ਸ ਸਾਧਾਰਣਤ੍ਤਾ ਜਾਣੁਮਣ੍ਡਲਤੋ ਹੇਟ੍ਠਾ ਚਤੁਰਙ੍ਗੁਲਮਤ੍ਤਂ ਓਤਾਰੇਤ੍ਵਾ ਅਨੋਲਮ੍ਬੇਤ੍ਵਾ ਪਰਿਮਣ੍ਡਲਮੇਵ ਪਾਰੁਪਿਤਬ੍ਬਂ.

੫੭੯. ਵਿਵਰਿਤ੍ਵਾ ਨਿਸੀਦਤੋਤਿ ਵਿਹਾਰੇ ਵਿਯ ਏਕਂਸਪਾਰੁਪਨਂ ਸਨ੍ਧਾਯ ਵੁਤ੍ਤਂ. ‘‘ਵਾਸਤ੍ਥਾਯ ਉਪਗਤਸ੍ਸਾ’’ਤਿ ਵੁਤ੍ਤਤ੍ਤਾ ਵਾਸਾਧਿਪ੍ਪਾਯਂ ਵਿਨਾ ਧਮ੍ਮਦੇਸਨਪਰਿਤ੍ਤਭਣਨਾਦਿਅਤ੍ਥਾਯ ਸੁਚਿਰਮ੍ਪਿ ਨਿਸੀਦਨ੍ਤੇਨ ਸਬ੍ਬਂ ਅਨ੍ਤਰਘਰਵਤ੍ਤਂ ਪੂਰੇਨ੍ਤੇਨੇਵ ਨਿਸੀਦਿਤਬ੍ਬਂ. ਨਿਸੀਦਨਪਟਿਸਂਯੁਤ੍ਤੇਸੁ ਏਵ ਚ ਸਿਕ੍ਖਾਪਦੇਸੁ ‘‘ਵਾਸੂਪਗਤਸ੍ਸਾ’’ਤਿ ਅਨਾਪਤ੍ਤਿਯਾ ਵੁਤ੍ਤਤ੍ਤਾ ਵਾਸਤ੍ਥਾਯ ਅਨ੍ਤਰਘਰਂ ਉਪਗਚ੍ਛਨ੍ਤੇਨਾਪਿ ਸੁਪ੍ਪਟਿਚ੍ਛਨ੍ਨਤਾਦਿਸਬ੍ਬਂ ਅਕੋਪੇਨ੍ਤੇਨੇਵ ਗਨ੍ਤਬ੍ਬਂ. ‘‘ਵਾਸੂਪਗਤਸ੍ਸਾ’’ਤਿ ਹਿ ਵੁਤ੍ਤਂ, ਨ ਪਨ ਉਪਗਚ੍ਛਮਾਨਸ੍ਸਾਤਿ. ਕੇਚਿ ਪਨ ‘‘ਏਕੇਕਸ੍ਮਿਂ ਪਠਮਂ ਗਨ੍ਤ੍ਵਾ ਵਾਸਪਰਿਗ੍ਗਹੇ ਕਤੇ ਤਤੋ ਅਞ੍ਞੇਹਿ ਯਥਾਸੁਖਂ ਗਨ੍ਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਅਪਰੇ ਪਨ ‘‘ਗੇਹਸ੍ਸਾਮਿਕੇਹਿ ‘ਯਾਵ ਤੁਮ੍ਹੇ ਨਿਵਸਿਸ੍ਸਥ, ਤਾਵ ਤੁਮ੍ਹਾਕਂ ਇਮਂ ਗੇਹਂ ਦੇਮੀ’ਤਿ ਦਿਨ੍ਨੇ ਅਞ੍ਞੇਹਿ ਅਵਾਸਾਧਿਪ੍ਪਾਯੇਹਿ ਅਨ੍ਤਰਾਰਾਮੇ ਵਿਯ ਯਥਾਸੁਖਂ ਗਨ੍ਤੁਂ, ਨਿਸੀਦਿਤੁਞ੍ਚ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਸਬ੍ਬਂ ਨ ਗਹੇਤਬ੍ਬਂ ਤਥਾਵਚਨਾਭਾਵਾ, ਦਾਨਲਕ੍ਖਣਾਭਾਵਾ, ਤਾਵਤ੍ਤਕੇਨ ਵਿਹਾਰਸਙ੍ਖ੍ਯਾਨੁਪਗਮਨਤੋ ਚ. ‘‘ਯਾਵ ਨਿਸੀਦਿਸ੍ਸਥ, ਤਾਵ ਤੁਮ੍ਹਾਕਂ ਇਮਂ ਗੇਹਂ ਦੇਮੀ’’ਤਿ ਦੇਨ੍ਤੋਪਿ ਹਿ ਤਾਵਕਾਲਿਕਮੇਵ ਦੇਤਿ ਵਤ੍ਥੁਪਰਿਚ੍ਚਾਗਲਕ੍ਖਣਤ੍ਤਾ ਦਾਨਸ੍ਸ.

੫੮੨. ਚਤੁਹਤ੍ਥਪ੍ਪਮਾਣਨ੍ਤਿ ਵਡ੍ਢਕੀਹਤ੍ਥਂ ਸਨ੍ਧਾਯ ਵੁਤ੍ਤਨ੍ਤਿ ਵਦਨ੍ਤਿ.

੫੮੪. ਉਕ੍ਖਿਤ੍ਤਚੀਵਰੋ ¶ ਹੁਤ੍ਵਾਤਿ ਕਟਿਤੋ ਉਦ੍ਧਂ ਕਾਯਬਨ੍ਧਨਾਦਿਦਸ੍ਸਨਵਸੇਨੇਵੁਕ੍ਖਿਪਨਂ ਸਨ੍ਧਾਯ ਵੁਤ੍ਤਂ ਪਿਣ੍ਡਾਯ ਚਰਤੋ ਪਤ੍ਤਗ੍ਗਹਣਾਦਿਮਤ੍ਤਸ੍ਸ ਅਨੁਞ੍ਞਾਤਤ੍ਤਾ. ਤੇਨੇਵ ‘‘ਨਿਸਿਨ੍ਨਕਾਲੇ ਪਨ ਧਮਕਰਣ’’ਨ੍ਤਿਆਦਿ ਵੁਤ੍ਤਂ. ਨਿਸਿਨ੍ਨਕਾਲੇ ਹਿ ਖਨ੍ਧੇ ਲਗ੍ਗਪਤ੍ਤਤ੍ਥਵਿਕਾਦਿਤੋ ਧਮਕਰਣਂ ਨੀਹਰਨ੍ਤਸ੍ਸ ਕਟਿਤੋ ਉਦ੍ਧਮ੍ਪਿ ਦਿਸ੍ਸਤਿ, ਤਥਾ ਅਦਸ੍ਸੇਤ੍ਵਾ ਨੀਹਰਿਤਬ੍ਬਨ੍ਤਿ ਅਧਿਪ੍ਪਾਯੋ. ਆਸਨੇ ਨਿਸੀਦਨ੍ਤਸ੍ਸਾਪਿ ¶ ਚ ਪਾਰੁਪਿਤਚੀਵਰਂ ਕਿਞ੍ਚਿ ਉਕ੍ਖਿਪਿਤ੍ਵਾ ਸਙ੍ਘਾਟਿਂ ਜਙ੍ਘਪਿਣ੍ਡੇਹਿ ਅਨੁਕ੍ਖਿਪਿਤ੍ਵਾਵ ਨਿਸੀਦਿਤਬ੍ਬਂ. ਇਮਸ੍ਮਿਞ੍ਞੇਵ ਪਨ ਸਿਕ੍ਖਾਪਦੇ ‘‘ਵਾਸੂਪਗਤਸ੍ਸਾ’’ਤਿ ਵੁਤ੍ਤਤ੍ਤਾ ਨਿਸੀਦਨਪਟਿਸਂਯੁਤ੍ਤੇਸੁ ਛਟ੍ਠਅਟ੍ਠਮੇਸੁ ਅਵੁਤ੍ਤਤ੍ਤਾ ਵਾਸੂਪਗਤੇਨਾਪਿ ਸੁਸਂਵੁਤੇਨ ਓਕ੍ਖਿਤ੍ਤਚਕ੍ਖੁਨਾਵ ਨਿਸੀਦਿਤਬ੍ਬਂ. ਤੇਨੇਵ ਮਾਤਿਕਾਟ੍ਠਕਥਾਯਮ੍ਪਿ ਤੇਸਂ ਵਿਸੇਸਂ ਅਵਤ੍ਵਾ ਇਧੇਵ ‘‘ਵਾਸੂਪਗਤਸ੍ਸ ਪਨ ਅਨਾਪਤ੍ਤੀ’’ਤਿ (ਕਙ੍ਖਾ. ਅਟ੍ਠ. ਉਕ੍ਖਿਤ੍ਤਕਸਿਕ੍ਖਾਪਦਵਣ੍ਣਨਾ) ਵੁਤ੍ਤਾ.

ਪਰਿਮਣ੍ਡਲਵਗ੍ਗਵਣ੍ਣਨਾ ਨਿਟ੍ਠਿਤਾ.

੫੮੬. ਦੁਤਿਯਵਗ੍ਗਾਦਿਉਜ੍ਜਗ੍ਘਿਕਅਪ੍ਪਸਦ੍ਦੇਸੁ ਨਿਸੀਦਨਪਟਿਸਂਯੁਤ੍ਤੇਸੁਪਿ ਵਾਸੂਪਗਤਸ੍ਸ ਅਨਾਪਤ੍ਤਿ ਨ ਵੁਤ੍ਤਾ, ਕਾਯਪ੍ਪਚਾਲਕਾਦੀਸੁ ਏਵ ਪਨ ਵੁਤ੍ਤਾ. ਪਾਲ਼ਿਪੋਤ੍ਥਕੇਸੁ ਪਨੇਤਂ ਕੇਸੁਚਿ ਪੇਯ੍ਯਾਲੇਨ ਬ੍ਯਾਮੋਹਿਤਤ੍ਤਾ ਨ ਸੁਟ੍ਠੁ ਵਿਞ੍ਞਾਯਤਿ. ਯਤ੍ਥ ਚ ਅਨ੍ਤਰਘਰੇ ਧਮ੍ਮਂ ਵਾ ਦੇਸੇਨ੍ਤਸ੍ਸ, ਪਾਤਿਮੋਕ੍ਖਂ ਵਾ ਉਦ੍ਦਿਸਨ੍ਤਸ੍ਸ ਮਹਾਸਦ੍ਦੇਨ ਯਾਵਪਰਿਸਸਾਵਨੇਪਿ ਅਨਾਪਤ੍ਤਿ ਏਵਾਤਿ ਦਟ੍ਠਬ੍ਬਂ ਤਥਾ ਆਨਨ੍ਦਤ੍ਥੇਰਮਹਿਨ੍ਦਤ੍ਥੇਰਾਦੀਹਿ ਆਚਰਿਤਤ੍ਤਾ.

ਉਜ੍ਜਗ੍ਘਿਕਵਗ੍ਗਵਣ੍ਣਨਾ ਨਿਟ੍ਠਿਤਾ.

੬੦੩. ਪਤ੍ਤੇ ਗਹਣਸਞ੍ਞਾ ਅਸ੍ਸ ਅਤ੍ਥੀਤਿ ਪਤ੍ਤਸਞ੍ਞੀਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਪਤ੍ਤੇ ਸਞ੍ਞਂ ਕਤ੍ਵਾ’’ਤਿ ਵੁਤ੍ਤਂ.

੬੦੪. ਓਲੋਣੀਤਿ ਏਕਾ ਬ੍ਯਞ੍ਜਨਵਿਕਤਿ. ਕਞ੍ਜਿਕਤਕ੍ਕਾਦਿਰਸੋਤਿ ਕੇਚਿ. ਮਂਸਰਸਾਦੀਨੀਤਿ ਆਦਿ-ਸਦ੍ਦੇਨ ਅਵਸੇਸਾ ਸਬ੍ਬਾਪਿ ਬ੍ਯਞ੍ਜਨਵਿਕਤਿ ਸਙ੍ਗਹਿਤਾ.

੬੦੫. ਸਮਭਰਿਤਨ੍ਤਿ ¶ ਰਚਿਤਂ. ਹੇਟ੍ਠਾ ਓਰੋਹਤੀਤਿ ਸਮਨ੍ਤਾ ਓਕਾਸਸਮ੍ਭਵਤੋ ਹਤ੍ਥੇਨ ਸਮਂ ਕਰਿਯਮਾਨਂ ਹੇਟ੍ਠਾ ਭਸ੍ਸਤਿ. ਪਤ੍ਤਮਤ੍ਥਕੇ ਠਪਿਤਾਨਿ ਪੂਵਾਨਿ ਏਵ ਵਟਂਸਕਾਕਾਰੇਨ ਠਪਿਤਤ੍ਤਾ ‘‘ਪੂਵਵਟਂਸਕ’’ਨ੍ਤਿ ਵੁਤ੍ਤਾਨਿ. ਕੇਚਿ ਪਨ ‘‘ਪਤ੍ਤਂ ਗਹੇਤ੍ਵਾ ਥੂਪੀਕਤਂ ਪਿਣ੍ਡਪਾਤਂ ਰਚਿਤ੍ਵਾ ਦਿਯ੍ਯਮਾਨਮੇਵ ਗਣ੍ਹਤੋ ਆਪਤ੍ਤਿ, ਹਤ੍ਥਗਤੇ ਏਵ ਪਨ ਪਤ੍ਤੇ ਦਿਯ੍ਯਮਾਨੇ ਥੂਪੀਕਤਮ੍ਪਿ ਗਹੇਤੁਂ ਵਟ੍ਟਤੀ’’ਤਿ ¶ ਵਦਨ੍ਤਿ, ਤਂ ਨ ਗਹੇਤਬ੍ਬਮੇਵ ‘‘ਸਮਤਿਤ੍ਤਿਕ’’ਨ੍ਤਿ ਭਾਵਨਪੁਂਸਕਵਸੇਨ ਸਾਮਞ੍ਞਤੋ ਵੁਤ੍ਤਤ੍ਤਾ.

੬੦੮. ਚਤੁਤ੍ਥਵਗ੍ਗਾਦੀਸੁ ਸਪਦਾਨਨ੍ਤਿ ਏਤ੍ਥ ਦਾਨਂ ਵੁਚ੍ਚਤਿ ਅਵਖਣ੍ਡਨਂ, ਅਪੇਤਂ ਦਾਨਤੋ ਅਪਦਾਨਂ, ਸਹ ਅਪਦਾਨੇਨ ਸਪਦਾਨਂ, ਅਵਖਣ੍ਡਨਵਿਰਹਿਤਂ ਅਨੁਪਟਿਪਾਟਿਯਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਤਤ੍ਥ ਤਤ੍ਥ ਓਧਿਂ ਅਕਤ੍ਵਾ’’ਤਿਆਦਿ.

੬੧੧. ਵਿਞ੍ਞਤ੍ਤਿਯਨ੍ਤਿ ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਂ ਸਨ੍ਧਾਯ ਵਦਤਿ. ‘‘ਵਤ੍ਤਬ੍ਬਂ ਨਤ੍ਥੀ’’ਤਿ ਇਮਿਨਾ ਪਾਲ਼ਿਯਾਵ ਸਬ੍ਬਂ ਵਿਞ੍ਞਾਯਤੀਤਿ ਦਸ੍ਸੇਤਿ. ਤਤ੍ਥ ਪਾਲ਼ਿਯਂ ਅਸਞ੍ਚਿਚ੍ਚਾਤਿਆਦੀਸੁ ਵਤ੍ਥੁਮਤ੍ਤਂ ਞਤ੍ਵਾ ਭੁਞ੍ਜਨੇਨ ਆਪਤ੍ਤਿਂ ਆਪਜ੍ਜਨ੍ਤਸ੍ਸੇਵ ਪੁਨ ਪਣ੍ਣਤ੍ਤਿਂ ਞਤ੍ਵਾ ਮੁਖਗਤਂ ਛਡ੍ਡੇਤੁਕਾਮਸ੍ਸ ਯਂ ਅਰੁਚਿਯਾ ਪਵਿਟ੍ਠਂ, ਤਂ ਅਸਞ੍ਚਿਚ੍ਚ ਪਵਿਟ੍ਠਂ ਨਾਮ, ਤਤ੍ਥ ਅਨਾਪਤ੍ਤਿ. ਤਦੇਵ ਪੁਨ ਅਞ੍ਞਵਿਹਿਤਤਾਯ ਵਾ ਅਵਿਞ੍ਞਤ੍ਤਮਿਦਨ੍ਤਿਸਞ੍ਞਾਯ ਵਾ ਭੁਞ੍ਜਨੇ ‘‘ਅਸਤਿਯਾ’’ਤਿ ਵੁਚ੍ਚਤਿ.

੬੧੩. ‘‘ਅਞ੍ਞਸ੍ਸਤ੍ਥਾਯਾ’’ਤਿ ਇਦਮਸ੍ਸ ਸਿਕ੍ਖਾਪਦਸ੍ਸ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਸਯਂ ਭੁਞ੍ਜਨੇ ਏਵ ਪਞ੍ਞਤ੍ਤਤ੍ਤਾ ਇਮਿਨਾ ਸਿਕ੍ਖਾਪਦੇਨ ਅਨਾਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਪਞ੍ਚਸਹਧਮ੍ਮਿਕਾਨਂ ਪਨ ਅਤ੍ਥਾਯ ਅਞ੍ਞਾਤਕਅਪ੍ਪਵਾਰਿਤਟ੍ਠਾਨੇ ਵਿਞ੍ਞਾਪੇਨ੍ਤੋ ਵਿਞ੍ਞਤ੍ਤਿਕ੍ਖਣੇ ਅਟ੍ਠਕਥਾਸੁ ਸੁਤ੍ਤਾਨੁਲੋਮਤੋ ਵੁਤ੍ਤਅਕਤਵਿਞ੍ਞਤ੍ਤਿਦੁਕ੍ਕਟਤੋ ਨ ਮੁਚ੍ਚਤਿ. ਸਞ੍ਚਿਚ੍ਚ ਭੁਞ੍ਜਨਕ੍ਖਣੇ ਸਯਞ੍ਚ ਅਞ੍ਞੇ ਚ ਮਿਚ੍ਛਾਜੀਵਤੋ ਨ ਮੁਚ੍ਚਨ੍ਤੀਤਿ ਗਹੇਤਬ੍ਬਂ.

੬੧੫. ‘‘ਕੁਕ੍ਕੁਟਣ੍ਡਂ ਅਤਿਖੁਦ੍ਦਕ’’ਨ੍ਤਿ ਇਦਂ ਅਸਾਰੁਪ੍ਪਵਸੇਨ ਵੁਤ੍ਤਂ, ਅਤਿਮਹਨ੍ਤੇ ਏਵ ਆਪਤ੍ਤੀਤਿ ਦਟ੍ਠਬ੍ਬਂ. ਭੁਞ੍ਜਨ੍ਤੇਨ ਪਨ ਚੋਰਾਦਿਭਯਂ ਪਟਿਚ੍ਚ ਮਹਨ੍ਤਮ੍ਪਿ ਅਪਰਿਮਣ੍ਡਲਮ੍ਪਿ ¶ ਕਤ੍ਵਾ ਸੀਘਂ ਭੁਞ੍ਜਨਵਸੇਨੇਤ੍ਥ ਆਪਦਾ. ਏਵਮਞ੍ਞੇਸੁਪਿ ਯਥਾਨੁਰੂਪਂ ਦਟ੍ਠਬ੍ਬਂ.

੬੧੭. ਅਨਾਹਟੇ ¶ ਕਬਲ਼ੇ ਮੁਖਦ੍ਵਾਰਵਿਵਰਣੇ ਪਨ ਪਯੋਜਨਾਭਾਵਾ ‘‘ਆਪਦਾਸੂ’’ਤਿ ਨ ਵੁਤ੍ਤਂ. ਏਵਮਞ੍ਞੇਸੁਪਿ ਈਦਿਸੇਸੁ.

੬੧੮. ਸਬ੍ਬਂ ਹਤ੍ਥਨ੍ਤਿ ਹਤ੍ਥੇਕਦੇਸਾ ਅਙ੍ਗੁਲਿਯੋ ਵੁਤ੍ਤਾ ‘‘ਹਤ੍ਥਮੁਦ੍ਦਾ’’ਤਿਆਦੀਸੁ ਵਿਯ, ਤਸ੍ਮਾ ਏਕਙ੍ਗੁਲਿਮ੍ਪਿ ਮੁਖੇ ਪਕ੍ਖਿਪਿਤੁਂ ਨ ਵਟ੍ਟਤਿ.

੬੨੭. ਪਾਲ਼ਿਯਂ ਸੀਤੀਕਤੋਤਿ ਸੀਤਪੀਲ਼ਿਤੋ. ਸਿਲਕਬੁਦ੍ਧੋਤਿ ਪਰਿਹਾਸਵਚਨਮੇਤਂ. ਸਿਲਕਞ੍ਹਿ ਕਿਞ੍ਚਿ ਦਿਸ੍ਵਾ ‘‘ਬੁਦ੍ਧੋ ਅਯ’’ਨ੍ਤਿ ਵੋਹਰਨ੍ਤਿ.

੬੨੮. ‘‘ਅਙ੍ਗੁਲਿਯੋ ਮੁਖੇ ਪਵੇਸੇਤ੍ਵਾ ਭੁਞ੍ਜਿਤੁਂ ਵਟ੍ਟਤੀ’’ਤਿ ਇਮਿਨਾ ਸਬ੍ਬਂ ਹਤ੍ਥਂ ਅਨ੍ਤੋਮੁਖੇ ਪਕ੍ਖਿਪਨਸਿਕ੍ਖਾਪਦਸ੍ਸਪਿ ਪਵਿਟ੍ਠਙ੍ਗੁਲਿਨਿਲ੍ਲੇਹਨੇਨ ਇਮਸ੍ਸਪਿ ਸਿਕ੍ਖਾਪਦਸ੍ਸ ਅਨਾਪਤ੍ਤਿਂ ਦਸ੍ਸੇਤਿ. ਏਸੇਵ ਨਯੋਤਿ ਘਨਯਾਗੁਆਦੀਸੁ ਪਤ੍ਤਂ ਹਤ੍ਥੇਨ, ਓਟ੍ਠਞ੍ਚ ਜਿਵ੍ਹਾਯ ਨਿਲ੍ਲੇਹਿਤੁਂ ਵਟ੍ਟਤੀਤਿ ਅਤਿਦਿਸਤਿ. ਤਸ੍ਮਾਤਿ ਯਸ੍ਮਾ ਘਨਯਾਗੁਆਦਿਵਿਰਹਿਤਂ ਨਿਲ੍ਲੇਹਿਤੁਂ ਨ ਵਟ੍ਟਤਿ.

੬੩੪. ਵਿਲੀਵਚ੍ਛਤ੍ਤਨ੍ਤਿ ਵੇਣੁਪੇਸਿਕਾਹਿ ਕਤਂ. ਮਣ੍ਡਲਬਦ੍ਧਾਨੀਤਿ ਦੀਘਸਲਾਕਾਸੁ ਤਿਰਿਯਂ ਵਲਯਾਕਾਰੇਨ ਸਲਾਕਂ ਠਪੇਤ੍ਵਾ ਸੁਤ੍ਤੇਹਿ ਬਦ੍ਧਾਨਿ ਦੀਘਞ੍ਚ ਤਿਰਿਯਞ੍ਚ ਉਜੁਕਮੇਵ ਸਲਾਕਾਯੋ ਠਪੇਤ੍ਵਾ ਦਲ਼੍ਹਬਦ੍ਧਾਨਿ ਚੇਵ ਤਿਰਿਯਂ ਠਪੇਤ੍ਵਾ ਦੀਘਦਣ੍ਡਕੇਹੇਵ ਸਙ੍ਕੋਚਾਰਹਂ ਕਤ੍ਵਾ ਸੁਤ੍ਤੇਹੇਵ ਤਿਰਿਯਂ ਬਦ੍ਧਾਨਿ. ਤਤ੍ਥਜਾਤਕਦਣ੍ਡਕੇਨ ਕਤਨ੍ਤਿ ਸਹ ਦਣ੍ਡਕੇਨ ਛਿਨ੍ਨਤਾਲਪਣ੍ਣਾਦੀਹਿ ਕਤਂ. ਛਤ੍ਤਪਾਦੁਕਾਯਾਤਿ ਯਸ੍ਮਿਂ ਛਤ੍ਤਦਣ੍ਡਕੋਟਿਂ ਪਵੇਸੇਤ੍ਵਾ ਛਤ੍ਤਂ ਉਜੁਕਂ ਠਪੇਤ੍ਵਾ ਹੇਟ੍ਠਾ ਛਾਯਾਯ ਨਿਸੀਦਨ੍ਤਿ, ਤਿਟ੍ਠਨ੍ਤਿ ਵਾ, ਤਾਦਿਸੇ ਛਤ੍ਤਾਧਾਰੇ.

੬੩੭. ਚਾਪੋਤਿ ¶ ਮਜ੍ਝੇ ਵਙ੍ਕਕਾਜਦਣ੍ਡਸਦਿਸਾ ਧਨੁਵਿਕਤਿ. ਕੋਦਣ੍ਡੋਤਿ ਵਿਦ੍ਧਦਣ੍ਡਾ ਧਨੁਵਿਕਤਿ.

ਸੁਰੁਸੁਰੁਵਗ੍ਗਵਣ੍ਣਨਾ ਨਿਟ੍ਠਿਤਾ.

੬੪੭. ਸਤ੍ਤਮਵਗ੍ਗੇ ¶ ਰੁਕ੍ਖਤੋ ਪਤਿਤੋਤਿ ਏਕਂ ਓਲਮ੍ਬਨਸਾਖਂ ਗਹੇਤ੍ਵਾ ਪਤਿਤੋ. ਪਾਲ਼ਿਯਾਤਿ ਅਤ੍ਤਨੋ ਆਚਾਰਪ੍ਪਕਾਸਕਗਨ੍ਥਸ੍ਸ. ਧੀਰਤ੍ਥੂਤਿ ਧੀ ਅਤ੍ਥੁ, ਨਿਨ੍ਦਾ ਹੋਤੂਤਿ ਅਤ੍ਥੋ. ਵਿਨਿਪਾਤਨਹੇਤੁਨਾਤਿ ਵਿਨਿਪਾਤਨਸ੍ਸ ਹੇਤੁਭਾਵੇਨ. ਤ੍ਵਨ੍ਤਿ ਉਪਯੋਗਤ੍ਥੇ ਪਚ੍ਚਤ੍ਤਵਚਨਂ, ਤਂ ਇਚ੍ਚੇਵ ਵਾ ਪਾਠੋ. ਅਸ੍ਮਾਤਿ ਪਾਸਾਣੋ.

੬੪੯. ਨ ਕਥੇਤਬ੍ਬਨ੍ਤਿ ਥੇਰੇਨ ਅਤ੍ਤਨੋ ਕਙ੍ਖਾਟ੍ਠਾਨਸ੍ਸ ਪੁਚ੍ਛਿਤਤ੍ਤਾ ਵੁਤ੍ਤਂ. ਦਹਰਸ੍ਸ ਅਤ੍ਥਕੋਸਲ੍ਲਂ ਞਾਤੁਂ ਪੁਚ੍ਛਿਤੇਨ ਉਚ੍ਚਾਸਨੇ ਨਿਸਿਨ੍ਨਸ੍ਸ ਆਚਰਿਯਸ੍ਸ ਅਨੁਯੋਗਦਾਨਨਯੇਨ ਵਤ੍ਤੁਂ ਵਟ੍ਟਤਿ.

੬੫੨. ਖੇਲ਼ੇਨ ਚੇਤ੍ਥ ਸਿਙ੍ਘਾਣਿਕਾਪਿ ਸਙ੍ਗਹਿਤਾਤਿ ਏਤ੍ਥ ਉਦਕਗਣ੍ਡੁਸਕਂ ਕਤ੍ਵਾ ਉਚ੍ਛੁਕਚਵਰਾਦਿਞ੍ਚ ਮੁਖੇਨੇਵ ਹਰਿਤੁਂ ਉਦਕੇਸੁ ਛਡ੍ਡੇਤੁਂ ਵਟ੍ਟਤੀਤਿ ਦਟ੍ਠਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ.

੬੫੫. ਅਧਿਕਰਣਸਮਥੇਸੁ ਚ ਇਧ ਵਤ੍ਤਬ੍ਬਂ ਨਤ੍ਥਿ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਭਿਕ੍ਖੁਵਿਭਙ੍ਗਵਣ੍ਣਨਾਨਯੋ ਨਿਟ੍ਠਿਤੋ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧. ਉਬ੍ਭਜਾਣੁਮਣ੍ਡਲਿਕਸਿਕ੍ਖਾਪਦਵਣ੍ਣਨਾ

੬੫੬. ਭਿਕ੍ਖੁਨੀਵਿਭਙ੍ਗੇ ¶ ¶ ਮਿਗਾਰਮਾਤੁਯਾਤਿ ਮਿਗਾਰਮਾਤੁ, ਵਿਸਾਖਾਯਾਤਿ ਅਤ੍ਥੋ. ਪਾਲ਼ਿਯਂ ‘‘ਏਹਿ ਭਿਕ੍ਖੁਨੀਤਿ ਭਿਕ੍ਖੁਨੀ, ਤੀਹਿ ਸਰਣਗਮਨੇਹਿ ਉਪਸਮ੍ਪਨ੍ਨਾਤਿ ਭਿਕ੍ਖੁਨੀ’’ਤਿ ਇਦਂ ਭਿਕ੍ਖੁਵਿਭਙ੍ਗਪਾਲ਼ਿਯਾ ਸਮਦਸ੍ਸਨਤ੍ਥਂ ਅਟ੍ਠਗਰੁਧਮ੍ਮਪ੍ਪਟਿਗ੍ਗਹਣੇਨ ਲਦ੍ਧੂਪਸਮ੍ਪਦਂ ਮਹਾਪਜਾਪਤਿਗੋਤਮਿਞ੍ਚੇਵ ਤਾਯ ਸਹ ਨਿਕ੍ਖਨ੍ਤਾ ਭਗਵਤੋ ਆਣਾਯ ਭਿਕ੍ਖੂਨਞ੍ਞੇਵ ਸਨ੍ਤਿਕੇ ਏਕਤੋਉਪਸਮ੍ਪਨ੍ਨਾ ਪਞ੍ਚਸਤਸਾਕਿਯਾਨਿਯੋ ਚ ਸਨ੍ਧਾਯ ਵੁਤ੍ਤਂ. ਤਾ ਹਿ ਭਗਵਤਾ ਆਨਨ੍ਦਤ੍ਥੇਰਸ੍ਸ ਯਾਚਨਾਯ ਪਬ੍ਬਜ੍ਜਂ ਅਨੁਜਾਨਨ੍ਤੇਨ ‘‘ਏਥ ਭਿਕ੍ਖੁਨਿਯੋ, ਮਮ ਸਾਸਨੇ ਤੁਮ੍ਹੇਪਿ ਪਵਿਸਥਾ’’ਤਿ ਵੁਤ੍ਤਾ ਵਿਯ ਜਾਤਾ. ਸਾਕਿਯਾਨਿਯੋ ਏਵ ਸਰਣਸੀਲਾਨਿ ਦਤ੍ਵਾ ਕਮ੍ਮਵਾਚਾਯ ਉਪਸਮ੍ਪਾਦਿਤਤ੍ਤਾ ‘‘ਤੀਹਿ ਸਰਣਗਮਨੇਹਿ ਉਪਸਮ੍ਪਨ੍ਨਾ’’ਤਿ ਵੁਤ੍ਤਾ. ਨ ਹਿ ਏਤਾਹਿ ਅਞ੍ਞਾ ਏਹਿਭਿਕ੍ਖੁਨਿਭਾਵਾਦਿਨਾ ਉਪਸਮ੍ਪਨ੍ਨਾ ਨਾਮ ਸਨ੍ਤਿ. ਯਂ ਪਨ ਥੇਰੀਗਾਥਾਸੁ ਭਦ੍ਦਾਯ ਕੁਣ੍ਡਲਕੇਸਿਯਾ –

‘‘ਨਿਹਚ੍ਚ ¶ ਜਾਣੁਂ ਵਨ੍ਦਿਤ੍ਵਾ, ਸਮ੍ਮੁਖਾ ਅਞ੍ਜਲਿਂ ਅਕਂ;

‘ਏਹਿ ਭਦ੍ਦੇ’ਤਿ ਮਂ ਅਵੋਚ, ਸਾ ਮੇ ਆਸੂਪਸਮ੍ਪਦਾ’’ਤਿ. (ਥੇਰੀਗਾ. ੧੦੯) –

‘‘ਆਯਾਚਿਤੋ ਤਦਾ ਆਹ, ‘ਏਹਿ ਭਦ੍ਦੇ’ਤਿ ਨਾਯਕੋ;

ਤਦਾਹਂ ਉਪਸਮ੍ਪਨ੍ਨਾ, ਪਰਿਤ੍ਤਂ ਤੋਯਮਦ੍ਦਸ’’ਨ੍ਤਿ. (ਅਪ. ਥੇਰੀ ੨.੩.੪੪) –

ਵੁਤ੍ਤਂ. ਤਮ੍ਪਿ ‘‘ਏਹਿ ਤ੍ਵਂ ਭਿਕ੍ਖੁਨੀਨਂ ਸਨ੍ਤਿਕੇ ਪਬ੍ਬਜ੍ਜਂ, ਉਪਸਮ੍ਪਦਞ੍ਚ ਗਣ੍ਹਾਹੀ’’ਤਿ ਭਗਵਤੋ ਆਣਾ ਉਪਸਮ੍ਪਦਾਯ ਕਾਰਣਤ੍ਤਾ ਉਪਸਮ੍ਪਦਾ ਅਹੋਸੀਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਂ. ਤਥਾ ਹਿ ਵੁਤ੍ਤਂ ਥੇਰੀਗਾਥਾਟ੍ਠਕਥਾਯਂ ‘‘ਏਹਿ ਭਦ੍ਦੇ, ਭਿਕ੍ਖੁਨੁਪਸ੍ਸਯਂ ¶ ਗਨ੍ਤ੍ਵਾ ਭਿਕ੍ਖੁਨੀਨਂ ਸਨ੍ਤਿਕੇ ਪਬ੍ਬਜ੍ਜ ਉਪਸਮ੍ਪਜ੍ਜਸ੍ਸੂਤਿ ਮਂ ਅਵਚ ਆਣਾਪੇਸਿ, ਸਾ ਸਤ੍ਥੁ ਆਣਾ ਮਯ੍ਹਂ ਉਪਸਮ੍ਪਦਾਯ ਕਾਰਣਤ੍ਤਾ ਉਪਸਮ੍ਪਦਾ ਆਸਿ ਅਹੋਸੀ’’ਤਿ (ਥੇਰੀਗਾ. ਅਟ੍ਠ. ੧੧੧).

੬੫੭. ਸਾਧਾਰਣਪਾਰਾਜਿਕੇਹੀਤਿ ਮੇਥੁਨਾਦੀਹਿ ਚਤੂਹਿ. ਤਾਨਿ, ਪਨ ਅਞ੍ਞਾਨਿ ਚ ਸਾਧਾਰਣਸਿਕ੍ਖਾਪਦਾਨਿ ਯਸ੍ਮਾ ਭਿਕ੍ਖੁਵਿਭਙ੍ਗੇ ਵੁਤ੍ਤਨਿਦਾਨਵਤ੍ਥਾਦੀਸੁ ਏਵ ਸਾਧਾਰਣਵਸੇਨ ਪਞ੍ਞਤ੍ਤਾਨਿ, ਪਚ੍ਛਾ ਪਨ ਤਾਨਿ ਭਿਕ੍ਖੁਨੀਨਂ ਪਾਤਿਮੋਕ੍ਖੁਦ੍ਦੇਸਂ ਅਨੁਜਾਨਨ੍ਤੇਨ ਭਗਵਤਾ ਤਾਸਂ ਸਿਕ੍ਖਾਪਚ੍ਚਕ੍ਖਾਨਾਭਾਵੇਨ ‘‘ਯਾ ਪਨ ਭਿਕ੍ਖੁਨੀ ਛਨ੍ਦਸੋ ਮੇਥੁਨਂ ਧਮ੍ਮਂ ਪਟਿਸੇਵੇਯ੍ਯਾ’’ਤਿਆਦਿਨਾ ਤਦਨੁਰੂਪਵਸੇਨ ਪਰਿਵਤ੍ਤੇਤ੍ਵਾ ਅਸਾਧਾਰਣਸਿਕ੍ਖਾਪਦੇਹਿ ਸਦ੍ਧਿਂ ਸਂਸਨ੍ਦੇਤ੍ਵਾ ਭਿਕ੍ਖੁਨਿਪਾਤਿਮੋਕ੍ਖੁਦ੍ਦੇਸਵਸੇਨ ਏਕਤੋ ਸਙ੍ਗਹਿਤਾਨਿ. ਯਸ੍ਮਾ ਚ ਨੇਸਂ ਭਿਕ੍ਖੁਵਿਭਙ੍ਗੇ (ਪਾਰਾ. ੪੪ ਆਦਯੋ) ਵੁਤ੍ਤਨਯੇਨੇਵ ਸਬ੍ਬੋਪਿ ਵਿਨਿਚ੍ਛਯੋ ਸਕ੍ਕਾ ਞਾਤੁਂ, ਤਸ੍ਮਾ ਤਾਨਿ ਵਜ੍ਜੇਤ੍ਵਾ ਅਸਾਧਾਰਣਾਨਂ ਏਵ ਇਧ ਵਿਭਙ੍ਗੋ ਵੁਤ੍ਤੋਤਿ ਵੇਦਿਤਬ੍ਬਂ.

੬੫੯. ਭਿਕ੍ਖੂਨਂ ‘‘ਕਾਯਸਂਸਗ੍ਗਂ ਸਾਦਿਯੇਯ੍ਯਾ’’ਤਿ ਅਵਤ੍ਵਾ ‘‘ਸਮਾਪਜ੍ਜੇਯ੍ਯਾ’’ਤਿ ਵੁਤ੍ਤਤ੍ਤਾ ‘‘ਭਿਕ੍ਖੁ ਆਪਤ੍ਤਿਯਾ ਨ ਕਾਰੇਤਬ੍ਬੋ’’ਤਿ ਵੁਤ੍ਤਂ. ਤਬ੍ਬਹੁਲਨਯੇਨਾਤਿ ਕਿਰਿਯਾਸਮੁਟ੍ਠਾਨਸ੍ਸੇਵ ਬਹੁਲਭਾਵਤੋ, ਏਤੇਨ ਅਕਿਰਿਯਾਸਮੁਟ੍ਠਾਨਾਪਿ ਅਯਂ ਆਪਤ੍ਤਿ ਹੋਤੀਤਿ ਦਸ੍ਸੇਤਿ. ਕਿਞ੍ਚਾਪਿ ਦਸ੍ਸੇਤਿ, ਮਯਂ ਪਨੇਤ੍ਥ ਏਵਂ ਤਕ੍ਕਯਾਮ ‘‘ਕਾਯਸਂਸਗ੍ਗਕ੍ਖਣੇ ਸਾਦਿਯਨ੍ਤਿਯਾ ਕਿਰਿਯਾਯ ਅਭਾਵੇਪਿ ਤਤੋ ਪੁਬ੍ਬੇ ਪਵਤ੍ਤਿਤਾਨਂ ਪਟਿਚ੍ਛਨ੍ਨਟ੍ਠਾਨਗਮਨਇਙ੍ਗਿਤਾਕਾਰਦਸ੍ਸਨਾਦਿਕਿਰਿਯਾਨਂ ਵਸੇਨੇਵ ਕਿਰਿਯਾਸਮਉਟ੍ਠਾਨਮੇਵ, ਪਰੇਹਿ ਮਗ੍ਗੇ ਕਰਿਯਮਾਨੁਪਕ੍ਕਮੇਨ ਨਿਚ੍ਚਲਸ੍ਸ ਸਾਦਿਯਤੋ ਸੁਕ੍ਕਵਿਸ੍ਸਟ੍ਠਿ ਵਿਯ ਪੁਬ੍ਬਪਯੋਗਾਭਾਵੇਪਿ ¶ ਵਾ ਤਸ੍ਮਿਞ੍ਞੇਵ ਖਣੇ ਪਰੂਪਕ੍ਕਮੇਨ ਜਨਿਯਮਾਨਾਯ ਅਤ੍ਤਨੋ ਕਾਯਚਲਨਾਦਿਸਙ੍ਖਾਤਾਯ ਕਿਰਿਯਾਯ, ਸਾ ਹਿ ਸਾਦਿਯਮਾਨੇਨ ਤਸ੍ਸਾ ਚਿਤ੍ਤੇਨਾਪਿ ਸਮੁਟ੍ਠਿਤਾ ਕਿਰਿਯਾ ਨਾਮ ਹੋਤਿ ਅਵਾਯਮਿਤ੍ਵਾ ਪਰੂਪਕ੍ਕਮੇਨ ਮੇਥੁਨਸਾਦਿਯਨੇ ਵਿਯ, ਭਿਕ੍ਖੂਨਂ ਪਨ ਪਰੂਪਕ੍ਕਮਜਨਿਤਂ ਕਿਰਿਯਂ ਅਬ੍ਬੋਹਾਰਿਕਂ ਕਤ੍ਵਾ ਅਤ੍ਤਨਾ ਕਰਿਯਮਾਨਪਯੋਗਵਸੇਨੇਵ ‘ਕਾਯਸਂਸਗ੍ਗਂ ਸਮਾਪਜ੍ਜੇਯ੍ਯਾ’ਤਿ ਏਵਂ ਵਿਸੇਸੇਤ੍ਵਾਵ ਸਿਕ੍ਖਾਪਦਸ੍ਸ ਪਞ੍ਞਤ੍ਤਤ੍ਤਾ ਸਾਦਿਯਮਾਨੇਪਿ ਨ ਦੋਸੋ. ਇਤਰਥਾ ਹਿ ਤਬ੍ਬਹੁਲਨਯੇਨੇਤ੍ਥ ਕਿਰਿਯਤ੍ਤੇ ਗਯ੍ਹਮਾਨੇ ਅਞ੍ਞੇਸਮ੍ਪਿ ਕਿਰਿਯਾਕਿਰਿਯਸਿਕ੍ਖਾਪਦਾਨਂ ਕਿਰਿਯਤ੍ਤਗ੍ਗਹਣਪ੍ਪਸਙ੍ਗੋ ਸਿਯਾ’’ਤਿ. ਤਸ੍ਮਾ ¶ ਵੀਮਂਸਿਤ੍ਵਾ ਗਹੇਤਬ੍ਬਂ. ਸਾਤਿ ਕਿਰਿਯਾਸਮੁਟ੍ਠਾਨਤਾ. ਤਥੇਵਾਤਿ ਕਾਯਸਂਸਗ੍ਗਰਾਗੀ ਏਵ.

ਉਬ੍ਭਜਾਣੁਮਣ੍ਡਲਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਵਜ੍ਜਪਟਿਚ੍ਛਾਦਿਕਸਿਕ੍ਖਾਪਦਵਣ੍ਣਨਾ

੬੬੬. ਦੁਤਿਯੇ ਪੁਰਿਮੇਨਾਤਿਆਦਿ ਸੁਨ੍ਦਰੀਨਨ੍ਦਾਯ ਵਜ੍ਜਪਟਿਚ੍ਛਾਦਨੇ ਪਞ੍ਞਤ੍ਤਤਂ ਸਨ੍ਧਾਯ ਵੁਤ੍ਤਂ. ‘‘ਅਟ੍ਠਨ੍ਨ’’ਨ੍ਤਿ ਵੁਤ੍ਤਤ੍ਤਾ ਵਜ੍ਜਪਟਿਚ੍ਛਾਦਨਸ੍ਸਾਪਿ ਪਟਿਚ੍ਛਾਦਨੇ ਪਾਰਾਜਿਕਮੇਵਾਤਿ ਦਟ੍ਠਬ੍ਬਂ. ‘‘ਧੁਰਂ ਨਿਕ੍ਖਿਤ੍ਤਮਤ੍ਤੇ’’ਤਿ ਵੁਤ੍ਤਤ੍ਤਾ ਪਣ੍ਣਤ੍ਤਿਂ ਅਜਾਨਨ੍ਤਿਯਾਪਿ ‘‘ਇਦਂ ਵਜ੍ਜਂ ਨ ਪਕਾਸੇਸ੍ਸਾਮੀ’’ਤਿ ਛਨ੍ਦੇਨ ਧੁਰਂ ਨਿਕ੍ਖੇਪਕ੍ਖਣੇ ਪਾਰਾਜਿਕਨ੍ਤਿ ਦਟ੍ਠਬ੍ਬਂ. ਤਂ ਪਨ ਪਟਿਚ੍ਛਾਦਨਂ ਯਸ੍ਮਾ ‘‘ਪੇਸਲਾ ਞਤ੍ਵਾ ਗਰਹਿਸ੍ਸਨ੍ਤੀ’’ਤਿ ਭਯੇਨੇਵ ਹੋਤਿ, ਭਯਞ੍ਚ ਕੋਧਚਿਤ੍ਤਸਮ੍ਪਯੁਤ੍ਤਂ, ਤਸ੍ਮਾ ਇਦਂ ‘‘ਦੁਕ੍ਖਵੇਦਨ’’ਨ੍ਤਿ ਵੁਤ੍ਤਂ. ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੩.੬੬੬) ‘‘ਕਿਞ੍ਚਾਪਿ ਵਜ੍ਜਪਟਿਚ੍ਛਾਦਨਂ ਪੇਮਵਸੇਨ ਹੋਤਿ, ਤਥਾਪਿ ਸਿਕ੍ਖਾਪਦਵੀਤਿਕ੍ਕਮਚਿਤ੍ਤਂ ਦੋਮਨਸ੍ਸਿਤਮੇਵ ਹੋਤੀ’’ਤਿ ਏਵਂ ਪਣ੍ਣਤ੍ਤਿਵੀਤਿਕ੍ਕਮਚਿਤ੍ਤੇਨੇਵ ਛਾਦਨਂ ਦੋਮਨਸ੍ਸਤ੍ਤੇ ਕਾਰਣਂ ਵੁਤ੍ਤਂ, ਤਂ ਅਕਾਰਣਂ ਪਣ੍ਣਤ੍ਤਿਵਿਜਾਨਨਂ ਵਿਨਾਪਿ ਆਪਜ੍ਜਿਤਬ੍ਬਤੋਵ.

ਵਜ੍ਜਪਟਿਚ੍ਛਾਦਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬੭੫. ਚਤੁਤ੍ਥੇ ¶ ਲੋਕਸ੍ਸਾਦਸਙ੍ਖਾਤਂ ਮਿਤ੍ਤੇਹਿ ਅਞ੍ਞਮਞ੍ਞਂ ਕਾਤਬ੍ਬਂ ਸਨ੍ਥਵਂ. ਵੁਤ੍ਤਮੇਵਤ੍ਥਂ ਪਰਿਯਾਯਨ੍ਤਰੇਨ ਦਸ੍ਸੇਤੁਂ ‘‘ਕਾਯਸਂਸਗ੍ਗਰਾਗੇਨਾ’’ਤਿ ਵੁਤ੍ਤਂ.

ਤਿਸ੍ਸਿਤ੍ਥਿਯੋ ਮੇਥੁਨਂ ਤਂ ਨ ਸੇਵੇਤਿ ਯਾ ਤਿਸ੍ਸੋ ਇਤ੍ਥਿਯੋ, ਤਾਸੁ ਵੁਤ੍ਤਂ ਤਂ ਮੇਥੁਨਂ ਨ ਸੇਵੇਯ੍ਯ. ਅਨਰਿਯਪਣ੍ਡਕੇਤਿ ਤਯੋ ਅਨਰਿਯੇ, ਤਯੋ ਪਣ੍ਡਕੇ ਚ ਉਪਸਙ੍ਕਮਿਤ੍ਵਾ ਮੇਥੁਨਂ ਨ ਸੇਵੇਤਿ ਅਤ੍ਥੋ. ਅਨਰਿਯਾਤਿ ¶ ਚੇਤ੍ਥ ਉਭਤੋਬ੍ਯਞ੍ਜਨਕਾ ਅਧਿਪ੍ਪੇਤਾ. ਬ੍ਯਞ੍ਜਨਸ੍ਮਿਨ੍ਤਿ ਅਤ੍ਤਨੋ ਵਚ੍ਚਮੁਖਮਗ੍ਗੇਪਿ. ਛੇਦੋ ਏਵ ਛੇਜ੍ਜਂ, ਪਾਰਾਜਿਕਂ.

ਵਣ੍ਣਾਵਣ੍ਣੋਤਿ ਦ੍ਵੀਹਿ ਸੁਕ੍ਕਵਿਸ੍ਸਟ੍ਠਿ ਵੁਤ੍ਤਾ. ਗਮਨੁਪ੍ਪਾਦਨਨ੍ਤਿ ਸਞ੍ਚਰਿਤ੍ਤਂ. ‘‘ਮੇਥੁਨਧਮ੍ਮਸ੍ਸ ਪੁਬ੍ਬਭਾਗਤ੍ਤਾ ਪਚ੍ਚਯੋ ਹੋਤੀ’’ਤਿ ਇਮਿਨਾ ਕਾਰਿਯੋਪਚਾਰੇਨ ਕਾਯਸਂਸਗ੍ਗੋ ਮੇਥੁਨਧਮ੍ਮੋਤਿ ਵੁਤ੍ਤੋਤਿ ਦਸ੍ਸੇਤਿ. ਸਬ੍ਬਪਦੇਸੂਤਿ ਸਙ੍ਘਾਟਿਕਣ੍ਣਗ੍ਗਹਣਾਦਿਪਦੇਸੁ. ਕਾਯਸਂਸਗ੍ਗਰਾਗੋ, ਸਉਸ੍ਸਾਹਤਾ, ਅਟ੍ਠਮਵਤ੍ਥੁਸ੍ਸ ਪੂਰਣਨ੍ਤਿ ਤੀਣੇਤ੍ਥ ਅਙ੍ਗਾਨਿ.

ਅਟ੍ਠਵਤ੍ਥੁਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੭੯. ਸਙ੍ਘਾਦਿਸੇਸਕਣ੍ਡੇ ¶ ¶ ‘‘ਦੁਤਿਯਸ੍ਸ ਆਰੋਚੇਤੀ’’ਤਿ ਏਤ੍ਥਾਪਿ ਦ੍ਵੀਸੁਪਿ ਅਡ੍ਡਕਾਰਕੇਸੁ ਯਸ੍ਸ ਕਸ੍ਸਚਿ ਦੁਤਿਯਸ੍ਸ ਕਥਂ ਯੋ ਕੋਚਿ ਆਰੋਚੇਤੀਤਿ ਏਵਮਤ੍ਥੋ ਗਹੇਤਬ੍ਬੋਤਿ ਆਹ ‘‘ਏਸੇਵ ਨਯੋ’’ਤਿ.

ਗਤਿਗਤਨ੍ਤਿ ਚਿਰਕਾਲਪ੍ਪਵਤ੍ਤਂ. ਆਪਤ੍ਤੀਤਿ ਆਪਜ੍ਜਨਂ. ‘‘ਨਿਸ੍ਸਾਰਣੀਯ’’ਨ੍ਤਿ ਇਦਂ ਕਤ੍ਤੁਅਤ੍ਥੇ ਸਿਦ੍ਧਨ੍ਤਿ ਆਹ ‘‘ਨਿਸ੍ਸਾਰੇਤੀ’’ਤਿ. ਆਪਨ੍ਨਂ ਭਿਕ੍ਖੁਨਿਂ ਸਙ੍ਘਤੋ ਵਿਯੋਜੇਤਿ, ਵਿਯੋਜਨਹੇਤੁ ਹੋਤੀਤਿ ਅਤ੍ਥੋ.

ਗੀਵਾਯੇਵਾਤਿ ਆਣਤ੍ਤਿਯਾ ਅਭਾਵਤੋ. ਤੇਸਂ ਅਨਤ੍ਥਕਾਮਤਾਯਾਤਿ ‘‘ਚੋਰੋ’’ਤਿ ਵੁਤ੍ਤਂ ਮਮ ਵਚਨਂ ਸੁਤ੍ਵਾ ਕੇਚਿ ਦਣ੍ਡਿਸ੍ਸਨ੍ਤਿ ਜੀਵਿਤਾ ਵੋਰੋਪੇਸ੍ਸਨ੍ਤੀਤਿ ਏਵਂ ਸਞ੍ਞਾਯ. ਏਤੇਨ ਕੇਵਲਂ ਭਯੇਨ ਵਾ ਪਰਿਕ੍ਖਾਰਗ੍ਗਹਣਤ੍ਥਂ ਵਾ ਸਹਸਾ ‘‘ਚੋਰੋ’’ਤਿ ਵੁਤ੍ਤੇ ਦਣ੍ਡਿਤੇਪਿ ਨ ਦੋਸੋਤਿ ਦਸ੍ਸੇਤਿ. ਰਾਜਪੁਰਿਸਾਨਞ੍ਹਿ ‘‘ਚੋਰੋ ਅਯ’’ਨ੍ਤਿ ਉਦ੍ਦਿਸ੍ਸ ਕਥਨੇ ਏਵ ਗੀਵਾ, ਭਿਕ੍ਖੂਨਂ, ਪਨ ਆਰਾਮਿਕਾਦੀਨਂ ਵਾ ਸਮ੍ਮੁਖਾ ‘‘ਅਸੁਕੋ ਚੋਰੋ ਏਵਮਕਾਸੀ’’ਤਿ ਕੇਨਚਿ ਵੁਤ੍ਤਵਚਨਂ ਨਿਸ੍ਸਾਯ ਆਰਾਮਿਕਾਦੀਸੁ ਰਾਜਪੁਰਿਸਾਨਂ ਵਤ੍ਵਾ ਦਣ੍ਡਾਪੇਨ੍ਤੇਸੁਪਿ ਭਿਕ੍ਖੁਸ੍ਸ ਨ ਗੀਵਾ ਰਾਜਪੁਰਿਸਾਨਂ ਅਵੁਤ੍ਤਤ੍ਤਾ. ਯੇਸਞ੍ਚ ਵੁਤ੍ਤਂ, ਤੇਹਿ ਸਯਂ ਚੋਰਸ੍ਸ ਅਦਣ੍ਡਿਤਤ੍ਤਾਤਿ ਗਹੇਤਬ੍ਬਂ. ‘‘ਤ੍ਵਂ ਏਤਸ੍ਸ ਸਨ੍ਤਕਂ ਅਚ੍ਛਿਨ੍ਦਾ’’ਤਿ ਆਣਤ੍ਤੋਪਿ ਹਿ ਸਚੇ ਅਞ੍ਞੇਨ ਅਚ੍ਛਿਨ੍ਦਾਪੇਤਿ, ਆਣਾਪਕਸ੍ਸ ਅਨਾਪਤ੍ਤਿ ਵਿਸਙ੍ਕੇਤਤ੍ਤਾ. ‘‘ਅਤ੍ਤਨੋ ਵਚਨਕਰ’’ਨ੍ਤਿ ਇਦਂ ਸਾਮੀਚਿਵਸੇਨ ਵੁਤ੍ਤਂ. ਵਚਨਂ ਅਕਰੋਨ੍ਤਾਨਂ ਰਾਜਪੁਰਿਸਾਨਮ੍ਪਿ ‘‘ਇਮਿਨਾ ਗਹਿਤਪਰਿਕ੍ਖਾਰਂ ਆਹਰਾਪੇਹਿ, ਮਾ ਚਸ੍ਸ ਦਣ੍ਡਂ ਕਰੋਹੀ’’ਤਿ ਉਦ੍ਦਿਸ੍ਸ ਵਦਨ੍ਤਸ੍ਸਾਪਿ ਦਣ੍ਡੇ ਗਹਿਤੇਪਿ ਨ ਗੀਵਾ ਏਵ ਦਣ੍ਡਗ੍ਗਹਣਸ੍ਸ ਪਟਿਕ੍ਖਿਤ੍ਤਤ੍ਤਾ, ‘‘ਅਸੁਕਭਣ੍ਡਂ ਅਵਹਰਾ’’ਤਿ ਆਣਾਪੇਤ੍ਵਾ ਵਿਪ੍ਪਟਿਸਾਰੇ ਉਪ੍ਪਨ੍ਨੇ ਪੁਨ ਪਟਿਕ੍ਖਿਪਨੇ (ਪਾਰਾ. ੧੨੧) ਵਿਯ.

ਦਾਸਾਦੀਨਂ ¶ ਸਮ੍ਪਟਿਚ੍ਛਨੇ ਵਿਯ ਤਦਤ੍ਥਾਯ ਅਡ੍ਡਕਰਣੇ ਭਿਕ੍ਖੂਨਮ੍ਪਿ ਦੁਕ੍ਕਟਨ੍ਤਿ ਆਹ ‘‘ਅਕਪ੍ਪਿਯਅਡ੍ਡੋ ਨਾਮ ਨ ਵਟ੍ਟਤੀ’’ਤਿ. ਕੇਨਚਿ ਪਨ ਭਿਕ੍ਖੁਨਾ ਖੇਤ੍ਤਾਦਿਅਤ੍ਥਾਯ ਵੋਹਾਰਿਕਾਨਂ ਸਨ੍ਤਿਕਂ ਗਨ੍ਤ੍ਵਾ ਅਡ੍ਡੇ ਕਤੇਪਿ ਤਂ ਖੇਤ੍ਤਾਦਿਸਮ੍ਪਟਿਚ੍ਛਨੇ ਵਿਯ ਸਬ੍ਬੇਸਂ ਅਕਪ੍ਪਿਯਂ ਨ ਹੋਤਿ ਪੁਬ੍ਬੇ ਏਵ ਸਙ੍ਘਸ੍ਸ ਸਨ੍ਤਕਤ੍ਤਾ ¶ , ਭਿਕ੍ਖੁਸ੍ਸੇਵ ਪਨ ਪਯੋਗਵਸੇਨ ਆਪਤ੍ਤਿਯੋ ਹੋਨ੍ਤਿ. ਦਾਸਾਦੀਨਮ੍ਪਿ ਪਨ ਅਤ੍ਥਾਯ ਰਕ੍ਖਂ ਯਾਚਿਤੁਂ ਵੋਹਾਰਿਕੇਨ ਪੁਟ੍ਠੇਨ ਸਙ੍ਘਸ੍ਸ ਉਪ੍ਪਨ੍ਨਂ ਕਪ੍ਪਿਯਕ੍ਕਮਂ ਵਤ੍ਤੁਂ, ਆਰਾਮਿਕਾਦੀਹਿ ਚ ਅਡ੍ਡਂ ਕਾਰਾਪੇਤੁਞ੍ਚ ਵਟ੍ਟਤਿ ਏਵ. ਵਿਹਾਰਵਤ੍ਥਾਦਿਕਪ੍ਪਿਯਅਡ੍ਡਂ ਪਨ ਭਿਕ੍ਖੁਨੋ ਸਯਮ੍ਪਿ ਕਾਤੁਂ ਵਟ੍ਟਤਿ.

ਭਿਕ੍ਖੁਨੀਨਂ ਵੁਤ੍ਤੋਤਿ ਰਕ੍ਖਂ ਯਾਚਨ੍ਤੀਨਂ ਭਿਕ੍ਖੁਨੀਨਂ ਵੁਤ੍ਤੋ ਉਦ੍ਦਿਸ੍ਸਅਨੁਦ੍ਦਿਸ੍ਸਵਸੇਨ ਰਕ੍ਖਾਯਾਚਨਵਿਨਿਚ੍ਛਯੋ, ਨ ਸਬ੍ਬੋ ਸਿਕ੍ਖਾਪਦਵਿਨਿਚ੍ਛਯੋ ਅਸਾਧਾਰਣਤ੍ਤਾ ਸਿਕ੍ਖਾਪਦਸ੍ਸ. ਤੇਨਾਹ ‘‘ਭਿਕ੍ਖੁਨੋਪੀ’’ਤਿਆਦਿ. ਅਨਾਕਡ੍ਢਿਤਾਯ ਅਡ੍ਡਕਰਣਂ, ਅਡ੍ਡਪਰਿਯੋਸਾਨਨ੍ਤਿ ਦ੍ਵੇ ਅਙ੍ਗਾਨਿ.

ਪਠਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੮੩. ਪਾਲ਼ਿਯਂ ਦੁਤਿਯੇ ਮਲ੍ਲਗਣਭਟਿਪੁਤ੍ਤਗਣਾਦਿਕਨ੍ਤਿਆਦੀਸੁ ਮਲ੍ਲਰਾਜੂਨਂ ਗਣੋ ਮਲ੍ਲਗਣੋ. ਭਟਿਪੁਤ੍ਤਾ ਨਾਮ ਕੇਚਿ ਗਣਰਾਜਾਨੋ, ਤੇਸਂ ਗਣੋ. ਕੇਚਿ ਪਨ ‘‘ਨਾਰਾਯਨਭਤ੍ਤਿਕੋ ਪੁਞ੍ਞਕਾਰਗਣੋ ਮਲ੍ਲਗਣੋ. ਤਥਾ ਕੁਮਾਰਭਤ੍ਤਿਕੋ ਚ ਗਣੋ ਭਟਿਪੁਤ੍ਤਗਣੋ’’ਤਿਪਿ (ਸਾਰਤ੍ਥ. ਟੀ. ਸਂਘਾਦਿਸੇਸਕਣ੍ਡ ੩.੬੮੩) ਵਦਨ੍ਤਿ. ਧਮ੍ਮਗਣੋਤਿ ਸਾਸਨੇ, ਲੋਕੇ ਵਾ ਅਨੇਕਪ੍ਪਕਾਰਪੁਞ੍ਞਕਾਰਕੋ ਗਣੋ. ਗਨ੍ਧਵਿਕਤਿਕਾਰਕੋ ਗਣੋ ਗਨ੍ਧਿਕਸੇਣੀ. ਪੇਸਕਾਰਾਦਿਗਣੋ ਦੁਸ੍ਸਿਕਸੇਣੀ. ਕਪ੍ਪਗਤਿਕਨ੍ਤਿ ਕਪ੍ਪਿਯਭਾਵਗਤਂ, ਪਬ੍ਬਜਿਤਪੁਬ੍ਬਨ੍ਤਿ ਅਤ੍ਥੋ.

੬੮੫. ਪਾਲ਼ਿਯਂ ਵੁਟ੍ਠਾਪੇਤੀਤਿ ਉਪਸਮ੍ਪਾਦੇਤਿ. ਅਕਪ੍ਪਗਤਮ੍ਪਿ ਪਬ੍ਬਾਜੇਨ੍ਤਿਯਾ ਦੁਕ੍ਕਟਨ੍ਤਿ ਵਦਨ੍ਤਿ. ਖੀਣਾਸਵਾਯਪਿ ਆਪਜ੍ਜਿਤਬ੍ਬਤੋ ‘‘ਤਿਚਿਤ੍ਤ’’ਨ੍ਤਿ ਵੁਤ੍ਤਂ. ਚੋਰਿਤਾ, ਤਂ ਞਤ੍ਵਾ ਅਨਨੁਞ੍ਞਾਤਕਾਰਣਾ ਵੁਟ੍ਠਾਪਨਨ੍ਤਿ ਦ੍ਵੇ ਅਙ੍ਗਾਨਿ.

ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੯੨. ਤਤਿਯੇ ¶ ¶ ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾਤਿ ਗਾਮਨ੍ਤਰਸ੍ਸ ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾ. ‘‘ਗਾਮਨ੍ਤਰਂ ਗਚ੍ਛੇਯ੍ਯਾ’’ਤਿ ਹਿ ਵੁਤ੍ਤਂ. ਵਿਕਾਲਗਾਮਪ੍ਪਵੇਸਨਸਿਕ੍ਖਾਪਦੇ ਵਿਯ ‘‘ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਓਕ੍ਕਮਨ੍ਤਿਯਾ’’ਤਿ ਅਵਤ੍ਵਾ ‘‘ਅਤਿਕ੍ਕਾਮੇਨ੍ਤਿਯਾ’’ਤਿ ਪਾਲ਼ਿਯਂ ਵੁਤ੍ਤਤ੍ਤਾ ਗਾਮਂ ਪਵਿਸਨ੍ਤਿਯਾ ਘਰੂਪਚਾਰੇ ਠਿਤਸ੍ਸ ਦੁਤਿਯਲੇਡ੍ਡੁਪਾਤਸਙ੍ਖਾਤਸ੍ਸ ਉਪਚਾਰਸ੍ਸ ਅਤਿਕ੍ਕਮੋ ਨਾਮ ਪਠਮਲੇਡ੍ਡੁਪਾਤਟ੍ਠਾਨਸਙ੍ਖਾਤਸ੍ਸ ਪਰਿਕ੍ਖੇਪਾਰਹਟ੍ਠਾਨਸ੍ਸ ਅਤਿਕ੍ਕਮੋ ਏਵਾਤਿ ਆਹ ‘‘ਪਰਿਕ੍ਖੇਪਾਰਹਟ੍ਠਾਨਂ ਏਕੇਨ ਪਾਦੇਨ ਅਤਿਕ੍ਕਮਤੀ’’ਤਿ.

ਮਜ੍ਝੇਤਿ ਗਾਮਮਜ੍ਝੇ. ਪਚ੍ਛਾਤਿ ਅਪਰਕਾਲੇ. ‘‘ਚਤੁਗਾਮਸਾਧਾਰਣਤ੍ਤਾ’’ਤਿ ਇਮਿਨਾ ਵਿਹਾਰਤੋ ਚਤੂਸੁ ਗਾਮੇਸੁ ਯਤ੍ਥ ਕਤ੍ਥਚਿ ਪਵਿਸਿਤੁਂ ਵਟ੍ਟਤੀਤਿ ਏਤ੍ਥ ਕਾਰਣਮਾਹ.

ਪਰਤੀਰਮੇਵ ਅਕ੍ਕਮਨ੍ਤਿਯਾਤਿ ਨਦਿਂ ਅਨੋਤਰਿਤ੍ਵਾ ਓਰਿਮਤੀਰਤੋ ਲਙ੍ਘਿਤ੍ਵਾ ਵਾ ਆਕਾਸਾਦਿਨਾ ਵਾ ਪਰਤੀਰਮੇਵ ਅਤਿਕ੍ਕਾਮੇਨ੍ਤਿਯਾ. ਓਰਿਮਤੀਰਮੇਵ ਆਗਚ੍ਛਤਿ, ਆਪਤ੍ਤੀਤਿ ਪਾਰਗਮਨਾਯ ਓਤਿਣ੍ਣਤ੍ਤਾ ਵੁਤ੍ਤਂ.

ਤਾਦਿਸੇ ਅਰਞ੍ਞੇਤਿ ਇਨ੍ਦਖੀਲਤੋ ਬਹਿਭਾਵਲਕ੍ਖਣੇ ਅਰਞ੍ਞੇ. ‘‘ਤੇਨੇਵਾ’’ਤਿਆਦਿਨਾ ਦਸ੍ਸਨੂਪਚਾਰੇ ਵਿਰਹਿਤੇ ਸਵਨੂਪਚਾਰਸ੍ਸ ਵਿਜ੍ਜਮਾਨਤ੍ਤੇਪਿ ਆਪਤ੍ਤਿ ਹੋਤੀਤਿ ਦਸ੍ਸੇਤਿ. ਅਞ੍ਞਂ ਮਗ੍ਗਂ ਗਣ੍ਹਾਤੀਤਿ ਮਗ੍ਗਮੂਲ਼੍ਹਤ੍ਤਾ ਗਣ੍ਹਾਤਿ, ਨ ਦੁਤਿਯਿਕਂ ਓਹਿਯਿਤੁਂ. ਤਸ੍ਮਾ ਅਨਾਪਤ੍ਤਿ. ਅਨਨ੍ਤਰਾਯੇਨ ਏਕਭਾਵੋ, ਅਨਾਪਦਾਯ ਗਾਮਨ੍ਤਰਗਮਨਾਦੀਸੁ ਏਕਨ੍ਤਿ ਦ੍ਵੇ ਅਙ੍ਗਾਨਿ.

ਤਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਚਤੁਤ੍ਥਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੯੪. ਚਤੁਤ੍ਥੇ ਕਾਰਕਗਣਸ੍ਸਾਤਿ ਇਮਸ੍ਸ ਕਮ੍ਮਂ ਕਾਤਬ੍ਬਨ੍ਤਿ ਯੇਹਿ ਸਨ੍ਨਿਟ੍ਠਾਨਂ ਕਤਂ, ਤੇ ਸਨ੍ਧਾਯ ਵੁਤ੍ਤਂ. ਕਮ੍ਮਵਾਚਕ੍ਖਣੇ ਸਹਠਿਤੇਤਿ ਕੇਚਿ. ਨੇਤ੍ਥਾਰਵਤ੍ਤੇਤਿ ਨਿਤ੍ਥਰਣਹੇਤੁਮ੍ਹਿ ਵਤ੍ਤੇ.

੬੯੮. ਪਾਲ਼ਿਯਂ ¶ ਅਸਨ੍ਤੇ ਕਾਰਕਸਙ੍ਘੇਤਿ ਏਤ੍ਥ ਵਿਜ੍ਜਮਾਨਂ ਸੁਦੂਰਮ੍ਪਿ ਗਨ੍ਤ੍ਵਾ ਆਪੁਚ੍ਛਿਤਬ੍ਬਂ ¶ . ਅਨ੍ਤਰਾਯੇ ਪਨ ਸਤਿ ਸਮ੍ਮਾ ਵਤ੍ਤਨ੍ਤਂ ਓਸਾਰੇਤੁਂ ਵਟ੍ਟਤੀਤਿ. ਧਮ੍ਮਕਮ੍ਮੇਨ ਉਕ੍ਖਿਤ੍ਤਤਾ, ਅਨਨੁਞ੍ਞਾਤਕਾਰਣਾ ਓਸਾਰਣਨ੍ਤਿ ਦ੍ਵੇ ਅਙ੍ਗਾਨਿ.

ਚਤੁਤ੍ਥਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਪਞ੍ਚਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੧. ਪਞ੍ਚਮੇ ਤਨ੍ਤਿ ਮਹਾਅਟ੍ਠਕਥਾਯਂ ਅਵਚਨਂ ‘‘ਅਨਵਸ੍ਸੁਤੋਤਿ ਜਾਨਨ੍ਤੀ ਪਟਿਗ੍ਗਣ੍ਹਾਤੀ’’ਤਿਆਦਿ ਪਾਲ਼ਿਯਾ ਸਮੇਤਿ. ਉਭਤੋ ਅਵਸ੍ਸੁਤਭਾਵੋ, ਉਦਕਦਨ੍ਤਪੋਨਤੋ ਅਞ੍ਞਂ ਸਹਤ੍ਥਾ ਗਹੇਤ੍ਵਾ ਅਜ੍ਝੋਹਰਣਨ੍ਤਿ ਦ੍ਵੇ ਅਙ੍ਗਾਨਿ.

ਪਞ੍ਚਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੫. ਛਟ੍ਠੇ ਪਟਿਗ੍ਗਹੋ ਤੇਨ ਨ ਵਿਜ੍ਜਤੀਤਿ ਤੇਨੇਵ ‘‘ਨ ਦੇਤੀ’’ਤਿ ਵੁਤ੍ਤਕਾਰਣੇਨ ਉਯ੍ਯੋਜਿਤਾਯ ਹਤ੍ਥਤੋ ਇਤਰਾਯ ਪਟਿਗ੍ਗਹੋਪਿ ਨਤ੍ਥਿ. ਪਰਿਭੋਗਪਚ੍ਚਯਾਤਿ ਉਯ੍ਯੋਜਿਤਾਯ ਭੋਜਨਪਰਿਯੋਸਾਨਪਚ੍ਚਯਾਤਿ ਅਤ੍ਥੋ. ਮਨੁਸ੍ਸਪੁਰਿਸਸ੍ਸ ਅਵਸ੍ਸੁਤਤਾ, ਤਂ ਞਤ੍ਵਾ ਅਨਨੁਞ੍ਞਾਤਕਾਰਣਾ ਉਯ੍ਯੋਜਨਾ, ਤੇਨ ਇਤਰਿਸ੍ਸਾ ਗਹੇਤ੍ਵਾ ਭੋਜਨਪਰਿਯੋਸਾਨਨ੍ਤਿ ਤੀਣਿ ਅਙ੍ਗਾਨਿ.

ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭੦੯-੭੨੭. ਸਤ੍ਤਮਤੋ ਯਾਵਦਸਮਪਰਿਯੋਸਾਨਾਨਿ ਉਤ੍ਤਾਨਾਨੇਵ.

ਸਙ੍ਘਾਦਿਸੇਸਵਣ੍ਣਨਾਨਯੋ ਨਿਟ੍ਠਿਤੋ.

੨. ਦੁਤਿਯਨਿਸ੍ਸਗ੍ਗਿਯਾਦਿਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੩੩. ਨਿਸ੍ਸਗ੍ਗਿਯੇਸੁਪਿ ¶ ¶ ਪਠਮਂ ਉਤ੍ਤਾਨਮੇਵ.

੭੪੦. ਦੁਤਿਯੇ ਅਯ੍ਯਾਯ ਦਮ੍ਮੀਤਿ ਏਵਂ ਪਟਿਲਦ੍ਧਨ੍ਤਿ ਨਿਸ੍ਸਟ੍ਠਪਟਿਲਦ੍ਧਂ, ਨਿਸ੍ਸਟ੍ਠਂ ਪਟਿਲਭਿਤ੍ਵਾਪਿ ਯਂ ਉਦ੍ਦਿਸ੍ਸ ਦਾਯਕੇਹਿ ਦਿਨ੍ਨਂ, ਤਤ੍ਥੇਵ ਦਾਤਬ੍ਬਂ. ਤੇਨਾਹ ‘‘ਯਥਾਦਾਨੇਯੇਵ ਉਪਨੇਤਬ੍ਬ’’ਨ੍ਤਿ. ਅਕਾਲਚੀਵਰਤਾ, ਤਂ ਞਤ੍ਵਾ ਕਾਲਚੀਵਰਨ੍ਤਿ ਲੇਸੇਨ ਭਾਜਾਪਨਂ, ਪਟਿਲਾਭੋਤਿ ਤੀਣਿ ਅਙ੍ਗਾਨਿ.

੭੪੩. ਤਤਿਯੇ ਮੇਤਨ੍ਤਿ ਮਮੇਵੇਤਂ ਚੀਵਰਂ. ਉਪਸਮ੍ਪਨ੍ਨਤਾ, ਪਰਿਵਤ੍ਤਿਤਵਿਕਪ੍ਪਨੁਪਗਚੀਵਰਸ੍ਸ ਸਕਸਞ੍ਞਾਯ ਅਚ੍ਛਿਨ੍ਦਨਾਦੀਤਿ ਦ੍ਵੇ ਅਙ੍ਗਾਨਿ.

੭੪੮-੭੫੨. ਚਤੁਤ੍ਥੇ ਆਹਟਸਪ੍ਪਿਂ ਦਤ੍ਵਾਤਿ ਅਤ੍ਤਨੋ ਦਤ੍ਵਾ. ਯਮਕਂ ਪਚਿਤਬ੍ਬਨ੍ਤਿ ਸਪ੍ਪਿਞ੍ਚ ਤੇਲਞ੍ਚ ਏਕਤੋ ਪਚਿਤਬ੍ਬਂ. ਲੇਸੇਨ ਗਹੇਤੁਕਾਮਤਾ, ਅਞ੍ਞਸ੍ਸ ਵਿਞ੍ਞਤ੍ਤਿ, ਪਟਿਲਾਭੋਤਿ ਤੀਣਿ ਅਙ੍ਗਾਨਿ.

੭੫੩. ਪਞ੍ਚਮੇ ਸਾਤਿ ਥੁਲ੍ਲਨਨ੍ਦਾ. ਅਯਨ੍ਤਿ ਸਿਕ੍ਖਮਾਨਾ. ਚੇਤਾਪੇਤ੍ਵਾਤਿ ਜਾਨਾਪੇਤ੍ਵਾਤਿ ਇਧ ਵੁਤ੍ਤਂ, ਮਾਤਿਕਾਟ੍ਠਕਥਾਯਂ ਪਨ ‘‘ਅਤ੍ਤਨੋ ਕਪ੍ਪਿਯਭਣ੍ਡੇਨ ‘ਇਦਂ ਨਾਮ ਆਹਰਾ’ਤਿ ਅਞ੍ਞਂ ਪਰਿਵਤ੍ਤਾਪੇਤ੍ਵਾ’’ਤਿ (ਕਙ੍ਖਾ. ਅਟ੍ਠ. ਅਞ੍ਞਚੇਤਾਪਨਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ.

੭੫੮. ਛਟ੍ਠੇ ਪਾਵਾਰਿਕਸ੍ਸਾਤਿ ਦੁਸ੍ਸਵਾਣਿਜਕਸ੍ਸ.

੭੬੪. ਸਤ੍ਤਮੇ ¶ ਸਞ੍ਞਾਚਿਤਕੇਨਾਤਿ ਸਯਂ ਯਾਚਿਤਕੇਨਪੀਤਿ ਅਤ੍ਥੋ.

੭੬੯-੭੮੯. ਅਟ੍ਠਮਤੋ ਯਾਵਦ੍ਵਾਦਸਮਾ ਉਤ੍ਤਾਨਮੇਵ.

ਨਿਸ੍ਸਗ੍ਗਿਯਵਣ੍ਣਨਾਨਯੋ ਨਿਟ੍ਠਿਤੋ.

੭੯੭. ਪਾਚਿਤ੍ਤਿਯੇਸੁ ¶ ¶ ਲਸੁਣਵਗ੍ਗਸ੍ਸ ਪਠਮੇ ਬਦਰਸਾਲ਼ਵਂ ਨਾਮ ਬਦਰਫਲਾਨਿ ਸੁਕ੍ਖਾਪੇਤ੍ਵਾ ਤੇਹਿ ਕਤ੍ਤਬ੍ਬਬ੍ਯਞ੍ਜਨਵਿਕਤਿ. ਆਮਕਮਾਗਧਲਸੁਣਞ੍ਚੇਵ, ਅਜ੍ਝੋਹਰਣਞ੍ਚਾਤਿ ਦ੍ਵੇ ਅਙ੍ਗਾਨਿ.

੭੯੯-੮੧੨. ਦੁਤਿਯਾਦੀਨਿ ਉਤ੍ਤਾਨਤ੍ਥਾਨਿ.

੮੧੫. ਛਟ੍ਠੇ ਪਾਲ਼ਿਯਂ ਆਸੁਮ੍ਭਿਤ੍ਵਾਤਿ ਪਾਤੇਤ੍ਵਾ.

੮੧੭. ਦਧਿਮਤ੍ਥੂਤਿ ਦਧਿਮ੍ਹਿ ਪਸਨ੍ਨੋਦਕਂ. ਰਸਖੀਰਾਦੀਨਨ੍ਤਿ ਮਂਸਰਸਖੀਰਾਦੀਨਂ. ਭੁਞ੍ਜਨ੍ਤਸ੍ਸ ਭਿਕ੍ਖੁਨੋ ਹਤ੍ਥਪਾਸੇ ਠਾਨਂ, ਪਾਨੀਯਸ੍ਸ ਵਾ ਵਿਧੂਪਨਸ੍ਸ ਵਾ ਗਹਣਨ੍ਤਿ ਦ੍ਵੇ ਅਙ੍ਗਾਨਿ.

੮੨੨. ਸਤ੍ਤਮੇ ਅਵਿਞ੍ਞਤ੍ਤਿਯਾ ਲਦ੍ਧਨ੍ਤਿ ਅਤ੍ਤਨੋ ਵਿਞ੍ਞਤ੍ਤਿਂ ਵਿਨਾ ਲਦ੍ਧਂ. ਪੁਬ੍ਬਾਪਰਵਿਰੁਦ੍ਧਨ੍ਤਿ ਸਯਂ ਕਰਣੇ ਪਾਚਿਤ੍ਤਿਯਨ੍ਤਿ ਇਦਂ ਕਾਰਾਪਨੇ ਦੁਕ੍ਕਟਵਚਨੇਨ ਵਿਰੁਜ੍ਝਨਂ ਸਨ੍ਧਾਯ ਵੁਤ੍ਤਂ. ਤੇਨਾਹ ‘‘ਨ ਹੀ’’ਤਿਆਦਿ, ‘‘ਅਵਿਞ੍ਞਤ੍ਤਿਯਾ ਲਦ੍ਧ’’ਨ੍ਤਿਆਦਿਵਚਨੇਨ ਵਾ ਵਿਰੁਜ੍ਝਨਂ ਸਨ੍ਧਾਯ ਵੁਤ੍ਤਂ. ਅਞ੍ਞਾਯ ਵਿਞ੍ਞਤ੍ਤਿਪਿ ਹਿ ਇਮਿਸ੍ਸਾ ਅਵਿਞ੍ਞਤ੍ਤਿਯਾ ਲਦ੍ਧਮੇਵਾਤਿ. ਆਮਕਧਞ੍ਞਵਿਞ੍ਞਾਪਨਾਦਿ, ਤਂ ਭਜ੍ਜਨਾਦਿਨਾ ਅਜ੍ਝੋਹਰਣਨ੍ਤਿ ਦ੍ਵੇ ਅਙ੍ਗਾਨਿ.

੮੨੪. ਅਟ੍ਠਮੇ ਨਿਬ੍ਬਿਟ੍ਠੋਤਿ ਲਦ੍ਧੋ. ਕੇਣੀਤਿ ਰਞ੍ਞੋ ਦਾਤਬ੍ਬੋ ਆਯੋ, ਆਯੁਪ੍ਪਤ੍ਤਿਟ੍ਠਾਨਨ੍ਤਿ ਅਤ੍ਥੋ ¶ . ਤੇਨਾਹ ‘‘ਏਕਂ ਠਾਨਨ੍ਤਰ’’ਨ੍ਤਿਆਦਿ. ਠਾਨਨ੍ਤਰਨ੍ਤਿ ਚ ਗਾਮਜਨਪਦਾਣਾਯਤ੍ਤਂ. ਵਲ਼ਞ੍ਜਿਯਮਾਨਤਿਰੋਕੁਟ੍ਟਾਦਿਤਾ, ਅਨਪਲੋਕੇਤ੍ਵਾ ਉਚ੍ਚਾਰਾਦੀਨਂ ਛਡ੍ਡਨਾਦੀਤਿ ਦ੍ਵੇ ਅਙ੍ਗਾਨਿ.

੮੩੦. ਨਵਮੇ ‘‘ਮਤ੍ਥਕਚ੍ਛਿਨ੍ਨਨਾਲ਼ਿਕੇਰਮ੍ਪੀ’’ਤਿ ਵੁਤ੍ਤਤ੍ਤਾ ਹਰਿਤੂਪਰਿ ਛਡ੍ਡਨਮੇਵ ਪਟਿਕ੍ਖਿਤ੍ਤਂ. ਤੇਨਾਹ ‘‘ਅਨਿਕ੍ਖਿਤ੍ਤਬੀਜੇਸੂ’’ਤਿਆਦਿ. ਯਤ੍ਥ ਚ ਛਡ੍ਡੇਤੁਂ ਵਟ੍ਟਤਿ, ਤਤ੍ਥ ਹਰਿਤੇ ਵਚ੍ਚਾਦਿਂ ਕਾਤੁਮ੍ਪਿ ਵਟ੍ਟਤਿ ਏਵ. ਸਬ੍ਬੇਸਨ੍ਤਿ ਭਿਕ੍ਖੁਭਿਕ੍ਖੁਨੀਨਂ.

੮੩੬-੭. ਦਸਮੇ ¶ ਤੇਸਂਯੇਵਾਤਿ ਯੇਸਂ ਨਿਚ੍ਚਂ ਪਸ੍ਸਤਿ. ਆਰਾਮੇ ਠਤ੍ਵਾਤਿ ਠਿਤਨਿਸਨ੍ਨਟ੍ਠਾਨੇ ਏਵ ਠਤ੍ਵਾ ਸਮਨ੍ਤਤੋ ਗੀਵਂ ਪਰਿਵਤ੍ਤੇਤ੍ਵਾਪਿ ਪਸ੍ਸਤਿ, ਅਨਾਪਤ੍ਤਿ. ਠਿਤਟ੍ਠਾਨਤੋ ਗਨ੍ਤ੍ਵਾ ਪਸ੍ਸਿਤੁਂ ਨ ਵਟ੍ਟਤਿ. ਕੇਚਿ ਪਨ ‘‘ਵਟ੍ਟਤੀ’’ਤਿ ਵਦਨ੍ਤਿ. ਤਂ ਪਨ ‘‘ਦਸ੍ਸਨਾਯ ਗਚ੍ਛੇਯ੍ਯ, ਪਾਚਿਤ੍ਤਿਯ’’ਨ੍ਤਿ ਸਾਮਞ੍ਞਤੋ ਗਮਨਸ੍ਸ ਪਟਿਕ੍ਖਿਤ੍ਤਤ੍ਤਾ, ਅਨਾਪਤ੍ਤਿਯਮ੍ਪਿ ਗਮਨਾਯ ਅਵੁਤ੍ਤਤ੍ਤਾ ਚ ਨ ਗਹੇਤਬ੍ਬਂ. ਨਚ੍ਚਾਦਿਤਾ, ਅਨਨੁਞ੍ਞਾਤਕਾਰਣਾ ਗਮਨਂ, ਦਸ੍ਸਨਾਦਿ ਚਾਤਿ ਤੀਣਿ ਅਙ੍ਗਾਨਿ.

੮੪੧. ਦੁਤਿਯਵਗ੍ਗਸ੍ਸ ਪਠਮੇ ਦਾਨੇ ਵਾਤਿ ਦਾਨਨਿਮਿਤ੍ਤਂ. ਰਤ੍ਤਨ੍ਧਕਾਰੇ ਪੁਰਿਸਸ੍ਸ ਹਤ੍ਥਪਾਸੇ ਠਾਨਾਦਿ, ਰਹੋਪੇਕ੍ਖਾ, ਸਹਾਯਾਭਾਵੋਤਿ ਤੀਣਿ ਅਙ੍ਗਾਨਿ.

੮੪੨-੮੫੦. ਦੁਤਿਯਾਦੀਨਿ ਉਤ੍ਤਾਨਾਨਿ.

੮੫੪. ਪਞ੍ਚਮੇ ਪਲ੍ਲਙ੍ਕਸ੍ਸ ਅਨੋਕਾਸੇਤਿ ਊਰੁਬਦ੍ਧਾਸਨਸ੍ਸ ਅਪ੍ਪਹੋਨਕੇ. ਪੁਰੇਭਤ੍ਤਂ ਅਨ੍ਤਰਘਰੇ ਪਲ੍ਲਙ੍ਕਪ੍ਪਹੋਨਕਾਸਨੇ ਨਿਸਜ੍ਜਾ, ਅਨਨੁਞ੍ਞਾਤਕਾਰਣਾ ਅਨਾਪੁਚ੍ਛਾ ਵੁਤ੍ਤਪਰਿਚ੍ਛੇਦਾਤਿਕ੍ਕਮੋਤਿ ਦ੍ਵੇ ਅਙ੍ਗਾਨਿ.

੮੬੦-੮੭੯. ਛਟ੍ਠਾਦੀਨਿ ¶ ਉਤ੍ਤਾਨਾਨਿ.

ਨਿਟ੍ਠਿਤੋ ਅਨ੍ਧਕਾਰਵਗ੍ਗੋ ਦੁਤਿਯੋ.

੮੮੩-੮੮੭. ਤਤਿਯਵਗ੍ਗਸ੍ਸ ਪਠਮਦੁਤਿਯਾਨਿ ਉਤ੍ਤਾਨਾਨਿ.

੮੯੩. ਤਤਿਯੇ ਵਿਸਿਬ੍ਬੇਤ੍ਵਾਤਿ ਵਿਜਟੇਤ੍ਵਾ. ਧੁਰਂ ਨਿਕ੍ਖਿਤ੍ਤਮਤ੍ਤੇਤਿ ਵਿਸਿਬ੍ਬਨਦਿਵਸਤੋ ਪਞ੍ਚ ਦਿਵਸੇ ਅਤਿਕ੍ਕਾਮੇਤ੍ਵਾ ਧੁਰਂ ਨਿਕ੍ਖਿਤ੍ਤਮਤ੍ਤੇ. ਅਨ੍ਤੋਪਞ੍ਚਾਹੇ ਪਨ ਧੁਰਨਿਕ੍ਖੇਪੇਪਿ ਅਨਾਪਤ੍ਤਿ ਏਵ ‘‘ਅਞ੍ਞਤ੍ਰ ਚਤੂਹਪਞ੍ਚਾਹਾ’’ਤਿ ਵੁਤ੍ਤਤ੍ਤਾ ¶ . ਉਪਸਮ੍ਪਨ੍ਨਾਯ ਚੀਵਰਂ ਸਿਬ੍ਬਨਤ੍ਥਾਯ ਵਿਸਿਬ੍ਬੇਤ੍ਵਾ ਪਞ੍ਚਹਾਤਿਕ੍ਕਮੋ, ਅਨਨੁਞ੍ਞਾਤਕਾਰਣਾ ਧੁਰਨਿਕ੍ਖੇਪੋਤਿ ਦ੍ਵੇ ਅਙ੍ਗਾਨਿ.

੯੦੦. ਚਤੁਤ੍ਥੇ ਪਞ੍ਚਨ੍ਨਂ ਚੀਵਰਾਨਂ ਅਪਰਿਵਤ੍ਤਨਂ, ਅਨਨੁਞ੍ਞਾਤਕਾਰਣਾ ਪਞ੍ਚਾਹਾਤਿਕ੍ਕਮੋਤਿ ਦ੍ਵੇ ਅਙ੍ਗਾਨਿ.

੯੦੯. ਛਟ੍ਠੇ ਵਿਕਪ੍ਪਨੁਪਗਸ੍ਸ ਸਙ੍ਘੇ ਪਰਿਣਤਤਾ, ਵਿਨਾ ਆਨਿਸਂਸਦਸ੍ਸਨੇਨ ਅਨ੍ਤਰਾਯਕਰਣਨ੍ਤਿ ਦ੍ਵੇ ਅਙ੍ਗਾਨਿ.

੯੧੬. ਅਟ੍ਠਮੇ ਕੁਮ੍ਭਥੂਣਂ ਨਾਮ ਕੁਮ੍ਭਸਦ੍ਦੋ, ਤੇਨ ਕੀਲ਼ਨ੍ਤੀਤਿ ਕੁਮ੍ਭਥੂਣਿਕਾ. ਤੇਨਾਹ ‘‘ਘਟਕੇਨ ਕੀਲ਼ਨਕਾ’’ਤਿ. ਦੀਘਨਿਕਾਯਟ੍ਠਕਥਾਯਂ ਪਨ ‘‘ਚਤੁਰਸ੍ਸਅਮ੍ਬਣਕਤਾਲ਼’’ਨ੍ਤਿ ਵੁਤ੍ਤਂ. ਤਞ੍ਹਿ ਰੁਕ੍ਖਸਾਰਾਦਿਮਯਂ ਅਨ੍ਤੋਛਿਦ੍ਦਂ ਚਤੂਸੁ ਪਸ੍ਸੇਸੁ ਚਮ੍ਮੋਨਦ੍ਧਂ ਵਾਦਿਤਭਣ੍ਡਂ, ਯਂ ‘‘ਬਿਮ੍ਬਿਸਕ’’ਨ੍ਤਿਪਿ ਵੁਚ੍ਚਤਿ, ਤਂ ਵਾਦੇਨ੍ਤਾਪਿ ਕੁਮ੍ਭਥੂਣਿਕਾ. ਤੇਨਾਹ ‘‘ਬਿਮ੍ਬਿਸਕਵਾਦਿਤਕਾਤਿਪਿ ਵਦਨ੍ਤੀ’’ਤਿ.

੯੧੮. ਪਾਲ਼ਿਯਂ ¶ ਕਪ੍ਪਕਤਨ੍ਤਿ ਕਪ੍ਪਕਤਂ ਨਿਵਾਸਨਪਾਰੁਪਨੂਪਗਂ. ਸਮਣਚੀਵਰਤਾ, ਅਨਨੁਞ੍ਞਾਤਾਨਂ ਦਾਨਨ੍ਤਿ ਦ੍ਵੇ ਅਙ੍ਗਾਨਿ.

੯੨੧-੯੩੧. ਨਵਮਦਸਮਾਨਿ ਉਤ੍ਤਾਨਾਨੇਵ.

੯੭੬. ਤੁਵਟ੍ਟਵਗ੍ਗਸ੍ਸ ਦਸਮੇ ਚਾਰਿਕਾਯ ਅਪਕ੍ਕਮਨਂ ਪਣ੍ਣਤ੍ਤਿਵਜ੍ਜਮੇਵ. ਪਣ੍ਣਤ੍ਤਿਵਿਜਾਨਨਚਿਤ੍ਤੇਨ ਸਚਿਤ੍ਤਕਤਂ ਸਨ੍ਧਾਯ ਪਨੇਤ੍ਥ ‘‘ਲੋਕਵਜ੍ਜ’’ਨ੍ਤਿ ਦਟ੍ਠਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ.

ਨਿਟ੍ਠਿਤੋ ਤੁਵਟ੍ਟਵਗ੍ਗੋ ਚਤੁਤ੍ਥੋ.

੯੭੮. ਚਿਤ੍ਤਾਗਾਰਵਗ੍ਗਸ੍ਸ ¶ ਪਠਮੇ ਪਾਟੇਕ੍ਕਾ ਆਪਤ੍ਤਿਯੋਤਿ ਗੀਵਾਯ ਪਰਿਵਤ੍ਤਨਪ੍ਪਯੋਗਗਣਨਾਯ.

੧੦੧੫. ਨਵਮੇ ਹਤ੍ਥਿਆਦੀਸੁ ਸਿਪ੍ਪ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ, ਤਥਾ ਆਥਬ੍ਬਣਾਦੀਸੁ ਮਨ੍ਤ-ਸਦ੍ਦੋ. ਤਤ੍ਥ ਆਥਬ੍ਬਣਮਨ੍ਤੋ ਨਾਮ ਆਥਬ੍ਬਣਵੇਦਵਿਹਿਤੋ ਪਰੂਪਘਾਤਕਰੋ ਮਨ੍ਤੋ. ਖੀਲਨਮਨ੍ਤੋ ਨਾਮ ਵੇਰਿਮਾਰਣਤ੍ਥਾਯ ਸਾਰਦਾਰੁਮਯਂ ਖੀਲਂ ਮਨ੍ਤੇਤ੍ਵਾ ਪਥਵਿਯਂ ਆਕੋਟਨਮਨ੍ਤੋ. ਅਗਦਪ੍ਪਯੋਗੋ ਵਿਸਪ੍ਪਯੋਜਨਂ. ਨਾਗਮਣ੍ਡਲਨ੍ਤਿ ਸਪ੍ਪਾਨਂ ਪਵੇਸਨਿਵਾਰਣਤ੍ਥਂ ਮਣ੍ਡਲਬਨ੍ਧਮਨ੍ਤੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ.

ਨਿਟ੍ਠਿਤੋ ਚਿਤ੍ਤਾਗਾਰਵਗ੍ਗੋ ਪਞ੍ਚਮੋ.

੧੦੨੫-੧੧੧੬. ਆਰਾਮਵਗ੍ਗੇ ¶ , ਗਬ੍ਭਿਨਿਵਗ੍ਗੇ ਚ ਸਬ੍ਬਂ ਉਤ੍ਤਾਨਮੇਵ.

੧੧੧੯. ਅਟ੍ਠਮਵਗ੍ਗਸ੍ਸ ਪਠਮੇ ਸਬ੍ਬਪਠਮਾ ਦ੍ਵੇ ਮਹਾਸਿਕ੍ਖਮਾਨਾਤਿ ਗਬ੍ਭਿਨਿਵਗ੍ਗੇ (ਪਾਚਿ. ੧੦੬੭ ਆਦਯੋ) ਸਬ੍ਬਪਠਮਂ ਵੁਤ੍ਤਾ ਦ੍ਵੇ. ਸਿਕ੍ਖਮਾਨਾ ਇਚ੍ਚੇਵ ਵਤ੍ਤਬ੍ਬਾਤਿ ਸਮ੍ਮੁਤਿਕਮ੍ਮਾਦੀਸੁ ਅਞ੍ਞਥਾ ਵੁਤ੍ਤੇ ਕਮ੍ਮਂ ਕੁਪ੍ਪਤੀਤਿ ਅਧਿਪ੍ਪਾਯੋ.

੧੧੬੭. ਏਕਾਦਸਮੇ ਪਾਰਿਵਾਸਿਯੇਨ ਛਨ੍ਦਦਾਨੇਨਾਤਿ ਪਰਿਵੁਤ੍ਥੇਨ ਨਵਿਕਪ੍ਪਵੁਤ੍ਥੇਨ ਵਿਗਤੇਨ ਛਨ੍ਦਦਾਨੇਨਾਤਿ ਅਤ੍ਥੋ, ਛਨ੍ਦਵਿਸ੍ਸਜ੍ਜਨਮਤ੍ਤੇਨ ਵਾ.

੧੧੬੮. ‘‘ਵੁਟ੍ਠਿਤਾਯਾ’’ਤਿ ਏਤੇਨ ‘‘ਇਦਾਨਿ ਕਮ੍ਮਂ ਨ ਕਰਿਸ੍ਸਾਮਾ’’ਤਿ ਧੁਰਂ ਨਿਕ੍ਖਿਪਿਤ੍ਵਾ ਕਾਯੇਨ ਅਵੁਟ੍ਠਹਿਤ੍ਵਾ ਨਿਸਿਨ੍ਨਾਯਪਿ ਪਰਿਸਾਯ ਕਮ੍ਮਂ ਕਾਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਤੇਨਾਹ ‘‘ਛਨ੍ਦਂ ਅਵਿਸ੍ਸਜ੍ਜੇਤ੍ਵਾ ਅਵੁਟ੍ਠਿਤਾਯਾ’’ਤਿ. ਪਾਲ਼ਿਯਂ ਪਨ ‘‘ਅਨਾਪਤ੍ਤਿ ਅਵੁਟ੍ਠਿਤਾਯ ਪਰਿਸਾਯਾ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ¶ , ਉਪੋਸਥਕ੍ਖਨ੍ਧਕੇ ਚ ‘‘ਨ, ਭਿਕ੍ਖਵੇ, ਪਾਰਿਵਾਸਿਕਪਾਰਿਸੁਦ੍ਧਿਦਾਨੇਨ ਉਪੋਸਥੋ ਕਾਤਬ੍ਬੋ ਅਞ੍ਞਤ੍ਰ ਅਵੁਟ੍ਠਿਤਾਯ ਪਰਿਸਾਯਾ’’ਤਿ (ਮਹਾਵ. ੧੮੩) ਵੁਤ੍ਤਤ੍ਤਾ, ਤਦਟ੍ਠਕਥਾਯਮ੍ਪਿ ‘‘ਪਾਰਿਵਾਸਿਯਪਾਰਿਸੁਦ੍ਧਿਦਾਨਂ ਨਾਮ ਪਰਿਸਾਯ ਵੁਟ੍ਠਿਤਕਾਲਤੋ ਪਟ੍ਠਾਯ ਨ ਵਟ੍ਟਤਿ, ਅਵੁਟ੍ਠਿਤਾਯ ਪਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੮੩) ਵੁਤ੍ਤਤ੍ਤਾ ਚ ‘‘ਕਮ੍ਮਂ ਨ ਕਰਿਸ੍ਸਾਮੀ’’ਤਿ ਧੁਰਂ ਨਿਕ੍ਖਿਪਿਤ੍ਵਾ ਨਿਸਿਨ੍ਨਾਯਪਿ ਕਮ੍ਮਂ ਕਾਤੁਂ ਵਟ੍ਟਤੀਤਿ ਗਹੇਤਬ੍ਬਂ. ਸੇਸਂ ਉਤ੍ਤਾਨਮੇਵ.

ਨਿਟ੍ਠਿਤੋ ਕੁਮਾਰਿਭੂਤਵਗ੍ਗੋ ਅਟ੍ਠਮੋ.

੧੨੨੮. ਪਾਟਿਦੇਸਨੀਯਾਦੀਸੁ ¶ ¶ ਪਾਲ਼ਿਵਿਨਿਮੁਤ੍ਤਕੇਸੂਤਿ ਪਾਲ਼ਿਯਂ ਅਨਾਗਤੇਸੁ ਸਪ੍ਪਿਆਦੀਸੁ.

ਸਤ੍ਤਾਧਿਕਰਣਵ੍ਹਯਾਤਿ ਸਤ੍ਤਾਧਿਕਰਣਸਮਥਨਾਮਕਾ. ਤਂ ਅਤ੍ਥਵਿਨਿਚ੍ਛਯਂ ਤਾਦਿਸਂਯੇਵ ਯਸ੍ਮਾ ਵਿਦੂ ਵਦਨ੍ਤੀਤਿ ਅਤ੍ਥੋ. ਯਥਾ ਨਿਟ੍ਠਿਤਾਤਿ ਸਮ੍ਬਨ੍ਧੋ. ਸਬ੍ਬਾਸਵਪਹਨ੍ਤਿ ਸਬ੍ਬਾਸਵਵਿਘਾਤਕਂ ਅਰਹਤ੍ਤਮਗ੍ਗਂ. ਪਸ੍ਸਨ੍ਤੁ ਨਿਬ੍ਬੁਤਿਨ੍ਤਿ ਮਗ੍ਗਞਾਣੇਨ ਨਿਬ੍ਬਾਨਂ ਸਚ੍ਛਿਕਰੋਨ੍ਤੁ, ਪਪ੍ਪੋਨ੍ਤੂਤਿ ਵਾ ਪਾਠੋ. ਤਤ੍ਥ ਨਿਬ੍ਬੁਤਿਨ੍ਤਿ ਖਨ੍ਧਪਰਿਨਿਬ੍ਬਾਨਂ ਗਹੇਤਬ੍ਬਂ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਭਿਕ੍ਖੁਨੀਵਿਭਙ੍ਗਵਣ੍ਣਨਾਨਯੋ ਨਿਟ੍ਠਿਤੋ.

ਉਭਤੋਵਿਭਙ੍ਗਟ੍ਠਕਥਾਵਣ੍ਣਨਾ ਨਿਟ੍ਠਿਤਾ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਮਹਾਵਗ੍ਗੇ ¶ ¶ ਉਭਿਨ੍ਨਂ ਪਾਤਿਮੋਕ੍ਖਾਨਨ੍ਤਿ ਉਭਿਨ੍ਨਂ ਪਾਤਿਮੋਕ੍ਖਵਿਭਙ੍ਗਾਨਂ. ਯਂ ਖਨ੍ਧਕਂ ਸਙ੍ਗਾਯਿਂਸੂਤਿ ਸਮ੍ਬਨ੍ਧੋ. ਖਨ੍ਧਾਨਂ ਸਮੂਹੋ, ਖਨ੍ਧਾਨਂ ਵਾ ਪਕਾਸਨਤੋ ਖਨ੍ਧਕੋ. ਖਨ੍ਧਾਤਿ ਚੇਤ੍ਥ ਪਬ੍ਬਜ੍ਜਾਦਿਚਾਰਿਤ੍ਤਵਾਰਿਤ੍ਤਸਿਕ੍ਖਾਪਦਪਞ੍ਞਤ੍ਤਿਸਮੂਹੋ ਅਧਿਪ੍ਪੇਤੋ. ਪਦਭਾਜਨੀਯੇ ਯੇਸਂ ਪਦਾਨਂ ਅਤ੍ਥਾ ਯੇਹਿ ਅਟ੍ਠਕਥਾਨਯੇਹਿ ਪਕਾਸਿਤਾਤਿ ਯੋਜਨਾ. ਅਥ ਵਾ ਯੇ ਅਤ੍ਥਾਤਿ ਯੋਜੇਤਬ੍ਬਂ. ਹਿ-ਸਦ੍ਦੋ ਚੇਤ੍ਥ ਪਦਪੂਰਣੇ ਦਟ੍ਠਬ੍ਬੋ.

੧. ਵਿਸੇਸਕਾਰਣਨ੍ਤਿ ‘‘ਯੇਨ ਸਮਯੇਨ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਸਿਕ੍ਖਾਪਦਪਞ੍ਞਤ੍ਤਿਯਾਚਨਹੇਤੁਭੂਤੋ ¶ ਪਰਿਵਿਤਕ੍ਕੋ ਉਦਪਾਦਿ, ਤੇਨ ਸਮਯੇਨਾ’’ਤਿਆਦਿਨਾ ਵੁਤ੍ਤਕਾਰਣਂ ਵਿਯ ਵਿਸੇਸਕਾਰਣਂ ਭੁਮ੍ਮਵਚਨਨਿਵਤ੍ਤਨਕਕਾਰਣਨ੍ਤਿ ਅਤ੍ਥੋ. ਏਤਸ੍ਸਾਤਿ ਅਭਿਸਮ੍ਬੋਧਿਤੋ ਪਟ੍ਠਾਯ ਸਤ੍ਥੁ ਚਰਿਯਾਵਿਭਾਵਨਸ੍ਸ ਵਿਨਯਪਞ੍ਞਤ੍ਤਿਯਂ ਕਿਂ ਪਯੋਜਨਂ? ਯਦਿ ਵਿਸੇਸਕਾਰਣਂ ਨਤ੍ਥੀਤਿ ਅਧਿਪ੍ਪਾਯੋ. ਨਿਦਾਨਦਸ੍ਸਨਂ ਪਯੋਜਨਨ੍ਤਿ ਯੋਜਨਾ. ਨਿਦਾਨਨ੍ਤਿਚੇਤ੍ਥ ਸਿਕ੍ਖਾਪਦਪਞ੍ਞਤ੍ਤਿਹੇਤੁਭੂਤਂ ਵਤ੍ਥੁਪੁਗ੍ਗਲਾਦਿਕਾਰਣਂ ਅਧਿਪ੍ਪੇਤਂ, ਨ ਪਞ੍ਞਤ੍ਤਿਟ੍ਠਾਨਮੇਵ. ਤੇਨਾਹ ‘‘ਯਾ ਹੀ’’ਤਿਆਦਿ.

ਉਰੁਵੇਲਾਯਨ੍ਤਿ ਏਤ੍ਥ ਉਰੁ-ਸਦ੍ਦੋ ਮਹਨ੍ਤਵਾਚੀ. ਵੇਲਾ-ਸਦ੍ਦੋ ਤੀਰਪਰਿਯਾਯੋ. ਉਨ੍ਨਤਤ੍ਤਾਦਿਨਾ ਵੇਲਾ ਵਿਯ ਵੇਲਾ. ਉਰੁ ਮਹਨ੍ਤੀ ਵੇਲਾ ਉਰੁਵੇਲਾ, ਤਸ੍ਸਂ. ਤੇਨਾਹ ‘‘ਮਹਾਵੇਲਾਯ’’ਨ੍ਤਿਆਦਿ. ਮਰਿਯਾਦਾਤਿ ਸੀਲਾਦਿਗੁਣਸੀਮਾ. ਪਤ੍ਤਪੁਟੇਨਾਤਿ ਤਾਲਾਦੀਨਂ ਪਣ੍ਣਪੁਟੇਨ.

‘‘ਪਠਮਾਭਿਸਮ੍ਬੁਦ੍ਧੋ’’ਤਿ ਅਨੁਨਾਸਿਕਲੋਪੇਨਾਯਂ ਨਿਦ੍ਦੇਸੋਤਿ ਆਹ ‘‘ਪਠਮਂ ਅਭਿਸਮ੍ਬੁਦ੍ਧੋ’’ਤਿ. ਪਠਮਨ੍ਤਿ ਚ ਭਾਵਨਪੁਂਸਕਨਿਦ੍ਦੇਸੋ. ਤਸ੍ਮਾ ਅਭਿਸਮ੍ਬੁਦ੍ਧੋ ¶ ਹੁਤ੍ਵਾ ਸਬ੍ਬਪਠਮਂ ਬੋਧਿਰੁਕ੍ਖਮੂਲੇ ਵਿਹਰਤੀਤਿ ਯੋਜਨਾ ਦਟ੍ਠਬ੍ਬਾ.

ਪਾਲ਼ਿਯਂ ਅਥ ਖੋਤਿ ਏਤ੍ਥ ਅਥਾਤਿ ਏਤਸ੍ਮਿਂ ਸਮਯੇਤਿ ਅਤ੍ਥੋ ਅਨੇਕਤ੍ਥਤ੍ਤਾ ਨਿਪਾਤਾਨਂ. ਸਤ੍ਤਾਹਨ੍ਤਿ ਅਚ੍ਚਨ੍ਤਸਂਯੋਗੇ ਏਤਂ ਉਪਯੋਗਵਚਨਂ. ਅਥ ਖੋਤਿ ਅਧਿਕਾਰਨ੍ਤਰਦਸ੍ਸਨੇ ਨਿਪਾਤੋ. ਤੇਨ ਵਿਮੁਤ੍ਤਿਸੁਖਪਟਿਸਂਵੇਦਨਂ ਪਹਾਯ ਪਟਿਚ੍ਚਸਮੁਪ੍ਪਾਦਮਨਸਿਕਾਰੇ ਅਧਿਕਤਭਾਵਂ ਦਸ੍ਸੇਤਿ. ਪਟਿਚ੍ਚਾਤਿ ਪਟਿਮੁਖਂ ਗਨ੍ਤ੍ਵਾ, ਅਞ੍ਞਮਞ੍ਞਂ ਅਪੇਕ੍ਖਿਤ੍ਵਾਤਿ ਅਤ੍ਥੋ. ਏਤੇਨ ਕਾਰਣਬਹੁਤਾ ਦਸ੍ਸਿਤਾ. ਸਹਿਤੇਤਿ ਕਾਰਿਯਬਹੁਤਾ. ਅਨੁਲੋਮਨ੍ਤਿ ਭਾਵਨਪੁਂਸਕਨਿਦ੍ਦੇਸੋ. ਸ੍ਵੇਵਾਤਿ ਸੋ ਏਵ ਪਚ੍ਚਯਾਕਾਰੋ. ਪੁਰਿਮਨਯੇਨ ਵਾ ਵੁਤ੍ਤੋਤਿ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿਆਦਿਨਾ ਨਯੇਨ ਵੁਤ੍ਤੋ ਪਚ੍ਚਯਾਕਾਰੋ. ਪਵਤ੍ਤਿਯਾਤਿ ਸਂਸਾਰਪ੍ਪਵਤ੍ਤਿਯਾ.

ਪਾਲ਼ਿਯਂ ‘‘ਅਵਿਜ੍ਜਾਪਚ੍ਚਯਾ’’ਤਿਆਦੀਸੁ ਦੁਕ੍ਖਾਦੀਸੁ ਅਞ੍ਞਾਣਂ ਅਵਿਜ੍ਜਾ. ਲੋਕਿਯਕੁਸਲਾਕੁਸਲਚੇਤਨਾ ਸਙ੍ਖਾਰਾ. ਲੋਕਿਯਵਿਪਾਕਮੇਵ ਵਿਞ੍ਞਾਣਂ. ਲੋਕਿਯਵੇਦਨਾਦਿਕ੍ਖਨ੍ਧਤ੍ਤਯਂ ਨਾਮਂ, ਭੂਤੁਪਾਦਾਯਭੇਦਂ ਰੂਪਂ. ਪਸਾਦਵਿਞ੍ਞਾਣਭੇਦਂ ਸਲ਼ਾਯਤਨਂ. ਵਿਪਾਕਭੂਤੋ ਸਬ੍ਬੋ ਫਸ੍ਸੋ, ਵੇਦਨਾ ਚ. ਰਾਗੋ ਤਣ੍ਹਾ. ਬਲਵਰਾਗੋ, ਤਿਵਿਧਾ ਚ ਦਿਟ੍ਠਿ ਉਪਾਦਾਨਂ. ਭਵੋ ਪਨ ਦੁਵਿਧੋ ਕਮ੍ਮਭਵੋ, ਉਪਪਤ੍ਤਿਭਵੋ ਚ. ਤਤ੍ਥ ਕਮ੍ਮਭਵੋ ਸਾਸਵਕੁਸਲਾਕੁਸਲਚੇਤਨਾਵ, ਉਪਪਤ੍ਤਿਭਵੋ ਉਪਾਦਿਨ੍ਨਕਕ੍ਖਨ੍ਧਾ. ਤੇਸਂ ਉਪਪਤ੍ਤਿ ਜਾਤਿ. ਪਾਕੋ ਜਰਾ. ਭੇਦੋ ਮਰਣਂ. ਤੇ ਏਵ ਨਿਸ੍ਸਾਯ ਸੋਚਨਂ ਸੋਕੋ. ਕਨ੍ਦਨਂ ਪਰਿਦੇਵੋ. ਦੁਕ੍ਖਂ ਕਾਯਿਕਂ. ਦੋਮਨਸ੍ਸਂ ਚੇਤਸਿਕਂ. ਅਤਿਵਿਯ ਸੋਕੋ ਉਪਾਯਾਸੋ.

ਪਚ੍ਚੇਕਞ੍ਚ ¶ ਸਮ੍ਭਵਤਿ-ਸਦ੍ਦੋ ਯੋਜੇਤਬ੍ਬੋ. ਤੇਨਾਹ ‘‘ਇਮਿਨਾ ਨਯੇਨਾ’’ਤਿਆਦਿ. ‘‘ਦੁਕ੍ਖਰਾਸਿਸ੍ਸਾ’’ਤਿ ਇਮਿਨਾ ਨ ਸਤ੍ਤਸ੍ਸ. ਨਾਪਿ ਸੁਭਸੁਖਾਦੀਨਨ੍ਤਿ ਦਸ੍ਸੇਤਿ.

ਹਵੇਤਿ ਬ੍ਯਤ੍ਤਨ੍ਤਿ ਇਮਸ੍ਮਿਂ ਅਤ੍ਥੇ ਨਿਪਾਤੋ. ‘‘ਅਨੁਲੋਮਪਚ੍ਚਯਾਕਾਰਪਟਿਵੇਧਸਾਧਕਾ ਬੋਧਿਪਕ੍ਖਿਯਧਮ੍ਮਾ’’ਤਿ ਇਦਂ ਪਠਮਵਾਰੇ ਕਿਞ੍ਚਾਪਿ ‘‘ਅਵਿਜ੍ਜਾਯਤ੍ਵੇਵ ਅਸੇਸਵਿਰਾਗਨਿਰੋਧਾ’’ਤਿਆਦਿਨਾ ਪਟਿਲੋਮਪਚ੍ਚਯਾਕਾਰੋਪਿ ਆਗਤੋ, ਤਥਾਪਿ ‘‘ਯਤੋ ਪਜਾਨਾਤਿ ਸਹੇਤੁਧਮ੍ਮ’’ਨ੍ਤਿ ਅਨੁਲੋਮਪਚ੍ਚਯਾਕਾਰਪਟਿਵੇਧਸ੍ਸੇਵ ਕਾਰਣਤ੍ਤੇਨ ਵੁਤ੍ਤਨ੍ਤਿ. ਯਥਾ ਚੇਤ੍ਥ, ਏਵਂ ਦੁਤਿਯਵਾਰੇਪਿ ‘‘ਯਤੋ ਖਯਂ ਪਚ੍ਚਯਾਨਂ ਅਵੇਦੀ’’ਤਿ ਗਾਥਾਯ ਵੁਤ੍ਤਤ੍ਤਾ ‘‘ਪਚ੍ਚਯਾਨਂ ਖਯਸਙ੍ਖਾਤ’’ਨ੍ਤਿਆਦਿ ¶ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਨੋ ਕਲ੍ਲੋ ਪਞ੍ਹੋਤਿ ਅਯੁਤ੍ਤੋ ਨ ਬ੍ਯਾਕਾਤਬ੍ਬੋ, ਅਵਿਜ੍ਜਮਾਨਂ ਅਤ੍ਤਾਨਂ ਸਿਦ੍ਧਂ ਕਤ੍ਵਾ ‘‘ਕੋ ਫੁਸਤੀ’’ਤਿ ਤਸ੍ਸ ਕਿਰਿਯਾਯ ਪੁਟ੍ਠਤ੍ਤਾ ‘‘ਕੋ ਵਞ੍ਝਾਪੁਤ੍ਤੋ ਫੁਸਤੀ’’ਤਿਆਦਿ ਵਿਯਾਤਿ ਅਧਿਪ੍ਪਾਯੋ. ਸੋਲ਼ਸ ਕਙ੍ਖਾਤਿ ‘‘ਅਹੋਸਿਂ ਨੁ ਖੋ ਅਹਮਤੀਤਮਦ੍ਧਾਨਂ, ਨਨੁ ਖੋ ਅਹੋਸਿਂ, ਕਿਂ ਨੁ ਖੋ ਅਹੋਸਿਂ, ਕਥਂ ਨੁ ਖੋ ਅਹੋਸਿਂ, ਕਿਂ ਹੁਤ੍ਵਾ ਕਿਂ ਅਹੋਸਿਂ ਨੁ ਖੋ ਅਹਮਤੀਤਮਦ੍ਧਾਨਂ, ਭਵਿਸ੍ਸਾਮਿ ਨੁ ਖੋ ਅਹਂ ਅਨਾਗਤਮਦ੍ਧਾਨਂ, ਨਨੁ ਖੋ ਭਵਿਸ੍ਸਾਮਿ, ਕਿਂ ਨੁ ਖੋ ਭਵਿਸ੍ਸਾਮਿ, ਕਥਂ ਨੁ ਖੋ ਭਵਿਸ੍ਸਾਮਿ, ਕਿਂ ਹੁਤ੍ਵਾ ਕਿਂ ਭਵਿਸ੍ਸਾਮਿ ਨੁ ਖੋ ਅਹਂ ਅਨਾਗਤਮਦ੍ਧਾਨਂ, ਅਹਂ ਨੁ ਖੋਸ੍ਮਿ, ਨੋ ਨੁ ਖੋਸ੍ਮਿ, ਕਿਂ ਨੁ ਖੋਸ੍ਮਿ, ਕਥਂ ਨੁ ਖੋਸ੍ਮਿ, ਅਯਂ ਨੁ ਖੋ ਸਤ੍ਤੋ ਕੁਤੋ ਆਗਤੋ, ਸੋ ਕੁਹਿਂ ਗਾਮੀ ਭਵਿਸ੍ਸਤੀ’’ਤਿ (ਮ. ਨਿ. ੧.੧੮; ਸਂ. ਨਿ. ੨.੨੦) ਏਵਂ ਆਗਤਾ ਅਤੀਤੇ ਪਞ੍ਚ, ਅਨਾਗਤੇ ਪਞ੍ਚ, ਪਚ੍ਚੁਪ੍ਪਨ੍ਨੇ ਛਾਤਿ ਸੋਲ਼ਸਵਿਧਾ ਕਙ੍ਖਾ.

ਤਤ੍ਥ ਕਿਂ ਨੁ ਖੋਤਿ ਮਨੁਸ੍ਸਦੇਵਾਦੀਸੁ, ਖਤ੍ਤਿਯਾਦੀਸੁ ਵਾ ਅਞ੍ਞਤਰਂ ਨਿਸ੍ਸਾਯ ਕਙ੍ਖਤਿ. ਕਥਂ ਨੁ ਖੋਤਿ ਪਨ ਸਣ੍ਠਾਨਾਕਾਰਾਦੀਸੁ ਇਸ੍ਸਰਾਦਿਜਨਕਂ, ਕਾਰਣਂ ਵਾ ਨਿਸ੍ਸਾਯ. ਕਿਂ ਹੁਤ੍ਵਾ ਕਿਂ ਅਹੋਸਿਨ੍ਤਿ ਚ ਮਨੁਸ੍ਸਾਦੀਸੁ ਪਠਮਂ ਕਿਂ ਹੁਤ੍ਵਾ ਪਚ੍ਛਾ ਕਿਂ ਅਹੋਸਿਨ੍ਤਿ ਕਙ੍ਖਤਿ. ਅਹਂ ਨੁ ਖੋਸ੍ਮੀਤਿਆਦਿ ਇਦਾਨਿ ਅਤ੍ਤਨੋ ਵਿਜ੍ਜਮਾਨਾਵਿਜ੍ਜਮਾਨਤਂ, ਸਰੂਪਪਕਾਰਾਦਿਕਞ੍ਚ ਕਙ੍ਖਤਿ. ਵਪਯਨ੍ਤੀਤਿ ਵਿਅਪਯਨ੍ਤਿ ਬ੍ਯਪਗਚ੍ਛਨ੍ਤਿ. ਤੇਨਾਹ ‘‘ਅਪਗਚ੍ਛਨ੍ਤਿ ਨਿਰੁਜ੍ਝਨ੍ਤੀ’’ਤਿ.

੩. ਤਸ੍ਸ ਵਸੇਨਾਤਿ ਤਸ੍ਸ ਪਚ੍ਚਯਾਕਾਰਪਜਾਨਨਸ੍ਸ, ਪਚ੍ਚਯਕ੍ਖਯਾਧਿਗਮਸ੍ਸ ਚ ਵਸੇਨ. ਏਕੇਕਮੇਵ ਕੋਟ੍ਠਾਸਨ੍ਤਿ ਅਨੁਲੋਮਪਟਿਲੋਮਤੋ ਏਕੇਕਮੇਵ ਕੋਟ੍ਠਾਸਂ. ਪਾਟਿਪਦਰਤ੍ਤਿਯਾ ਏਵਂ ਮਨਸਾਕਾਸੀਤਿ ਰਤ੍ਤਿਯਾ ਤੀਸੁਪਿ ਯਾਮੇਸੁ ਏਵਂ ਇਧ ਖਨ੍ਧਕਪਾਲ਼ਿਯਾ ਆਗਤਨਯੇਨ ਅਨੁਲੋਮਪਟਿਲੋਮਂਯੇਵ ਮਨਸਾਕਾਸਿ.

੪. ਤਸ੍ਸ ¶ ਸਤ੍ਤਾਹਸ੍ਸ ਅਚ੍ਚਯੇਨਾਤਿ ਪਲ੍ਲਙ੍ਕਸਤ੍ਤਾਹਸ੍ਸ ਅਪਗਮਨੇਨ. ਤਮ੍ਹਾ ਸਮਾਧਿਮ੍ਹਾਤਿ ਅਰਹਤ੍ਤਫਲਸਮਾਪਤ੍ਤਿਸਮਾਧਿਮ੍ਹਾ. ਅਨ੍ਤਰਨ੍ਤਰਾ ਏਵ ਹਿ ਪਚ੍ਚਯਾਕਾਰਮਨਸਿਕਾਰੋ. ਅਵਸੇਸਕਾਲਂ ਪਨ ਸਬ੍ਬਂ ਭਗਵਾ ਫਲਸਮਾਪਤ੍ਤਿਯਾਪਿ ਵੀਤਿਨਾਮੇਸਿ. ਤਂ ਸਨ੍ਧਾਯ ‘‘ਤਮ੍ਹਾ ਸਮਾਧਿਮ੍ਹਾ’’ਤਿ ਵੁਤ੍ਤਂ. ਰਤਨਚਙ੍ਕਮੇਤਿ ¶ ਭਗਵਤੋ ਚਿਰਂ ਠਿਤਸ੍ਸ ਚਙ੍ਕਮਨਾਧਿਪ੍ਪਾਯਂ ਞਤ੍ਵਾ ਦੇਵਤਾਹਿ ਮਾਪਿਤੇ ਰਤਨਚਙ੍ਕਮੇ. ਰਤਨਘਰਨ੍ਤਿ ਭਗਵਤੋ ਨਿਸੀਦਨਾਧਿਪ੍ਪਾਯਂ ਞਤ੍ਵਾ ਦੇਵਤਾਹਿ ਮਾਪਿਤਂ ਰਤਨਮਯਂ ਗੇਹਂ.

ਤਤ੍ਰਾਪੀਤਿ ਨ ਕੇਵਲਂ ਰਤਨਘਰੇਯੇਵ. ਤਤ੍ਰਾਪਿ ਅਜਪਾਲਨਿਗ੍ਰੋਧਮੂਲੇਪਿ ਅਭਿਧਮ੍ਮਂ ਵਿਚਿਨਨ੍ਤੋ ਏਵ ਅਨ੍ਤਰਨ੍ਤਰਾ ਵਿਮੁਤ੍ਤਿਸੁਖਂ ਪਟਿਸਂਵੇਦੇਨ੍ਤੋਤਿ ਅਤ੍ਥੋ. ਤਤ੍ਥਾਪਿ ਹਿ ਅਨਨ੍ਤਨਯਸਮਨ੍ਤਪਟ੍ਠਾਨਂ ਸਮ੍ਮਸਤੋ ਸਮ੍ਮਾਸਮ੍ਬੁਦ੍ਧਸ੍ਸ ਪੀਤਿਸਮੁਟ੍ਠਿਤਾ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਰਤਨਘਰੇ ਵਿਯ ਨਿਚ੍ਛਰਿਂਸੁ ਏਵ. ‘‘ਹੁਂਹੁ’’ਨ੍ਤਿ ਕਰੋਨ੍ਤੋਤਿ ‘‘ਸਬ੍ਬੇ ਹੀਨਜਾਤਿਕਾ ਮਂ ਮਾ ਉਪਗਚ੍ਛਨ੍ਤੂ’’ਤਿ ਮਾਨਵਸੇਨ, ਸਮੀਪਂ ਉਪਗਤੇਸੁ ਕੋਧਵਸੇਨ ਚ ‘‘ਅਪੇਥਾ’’ਤਿ ਅਧਿਪ੍ਪਾਯਨਿਚ੍ਛਾਰਿਤਂ ਹੁਂਹੁਂਕਾਰਂ ਕਰੋਨ੍ਤੋ.

ਬ੍ਰਹ੍ਮਞ੍ਞਨ੍ਤਿ ਬ੍ਰਾਹ੍ਮਣਤ੍ਤਂ. ਅਨ੍ਤਨ੍ਤਿ ਨਿਬ੍ਬਾਨਂ. ਦੇਵਾਨਂ ਵਾ ਅਨ੍ਤਨ੍ਤਿ ਮਗ੍ਗਞਾਣਾਨਂ ਵਾ ਅਨ੍ਤਭੂਤਂ ਅਰਹਤ੍ਤਫਲਂ.

੫. ਮੁਚਲਿਨ੍ਦਮੂਲੇਤਿ ਏਤ੍ਥ ਚ ਮੁਚਲਿਨ੍ਦੋ ਵੁਚ੍ਚਤਿ ਨੀਪਰੁਕ੍ਖੋ, ਯੋ ‘‘ਨਿਚੁਲੋ’’ਤਿਪਿ ਵੁਚ੍ਚਤਿ. ਉਪ੍ਪਨ੍ਨਮੇਘੋਤਿ ਸਕਲਚਕ੍ਕਵਾਲ਼ਗਬ੍ਭਂ ਪੂਰੇਤ੍ਵਾ ਉਪ੍ਪਨ੍ਨੋ ਮਹਾਮੇਘੋ. ਵਦ੍ਦਲਿਕਾਤਿ ਵੁਟ੍ਠਿਯਾ ਏਵ ਇਤ੍ਥਿਲਿਙ੍ਗਵਸੇਨ ਨਾਮਂ. ਯਾ ਚ ਸਤ੍ਤਾਹਂ ਪਵਤ੍ਤਤ੍ਤਾ ਸਤ੍ਤਾਹਵਦ੍ਦਲਿਕਾਤਿ ਵੁਤ੍ਤਾਤਿ ਆਹ ‘‘ਸਤ੍ਤਾਹਂ ਅਵਿਚ੍ਛਿਨ੍ਨਵੁਟ੍ਠਿਕਾ ਅਹੋਸੀ’’ਤਿ. ਸੀਤਵਾਤੇਨ ਦੂਸਿਤਂ ਦਿਨਮੇਤਿਸ੍ਸਾ ਵਦ੍ਦਲਿਕਾਯਾਤਿ ਸੀਤਵਾਤਦੁਦ੍ਦਿਨੀਤਿ ਆਹ ‘‘ਉਦਕਫੁਸਿਤਸਮ੍ਮਿਸ੍ਸੇਨਾ’’ਤਿਆਦਿ. ਉਬ੍ਬਿਦ੍ਧਤਾ ਨਾਮ ਦੂਰਭਾਵੇਨ ਉਪਟ੍ਠਾਨਨ੍ਤਿ ਆਹ ‘‘ਮੇਘਵਿਗਮੇਨ ਦੂਰੀਭੂਤ’’ਨ੍ਤਿ. ਇਨ੍ਦਨੀਲਮਣਿ ਵਿਯ ਦਿਬ੍ਬਤਿ ਜੋਤੇਤੀਤਿ ਦੇਵੋ, ਆਕਾਸੋ.

ਏਤਮਤ੍ਥਂ ਵਿਦਿਤ੍ਵਾਤਿ ਵਿਵੇਕਸ੍ਸ ਸੁਖਭਾਵਂ ਵਿਦਿਤ੍ਵਾ. ਸਬ੍ਬਸੋ ਅਸਨ੍ਤੁਟ੍ਠਿਸਮੁਚ੍ਛੇਦਕਤ੍ਤਾ ਮਗ੍ਗਞਾਣਾਨਂ ‘‘ਚਤੁਮਗ੍ਗਞਾਣਸਨ੍ਤੋਸੇਨਾ’’ਤਿ ਵੁਤ੍ਤਂ. ਅਕੁਪ੍ਪਨਭਾਵੋਤਿ ਅਕੁਜ੍ਝਨਸਭਾਵੋ.

੬. ਪਚ੍ਚਗ੍ਘੇਤਿ ¶ ਅਭਿਨਵੇ. ਅਯਮੇਵ ਅਤ੍ਥੋ ਪਸਤ੍ਥੋ, ਨ ਪੁਰਿਮੋ. ਨ ਹਿ ਬੁਦ੍ਧਾ ਮਹਗ੍ਘਂ ਪਤ੍ਤਂ ਪਰਿਭੁਞ੍ਜਨ੍ਤਿ.

੭. ਆਲੀਯਨ੍ਤਿ ¶ ਸੇਵੀਯਨ੍ਤੀਤਿ ਆਲਯਾ. ਪਞ੍ਚ ਕਾਮਗੁਣਾਤਿ ਆਹ ‘‘ਸਤ੍ਤਾ…ਪੇ… ਵੁਚ੍ਚਨ੍ਤੀ’’ਤਿ. ਸੁਟ੍ਠੁ ਮੁਦਿਤਾਤਿ ਅਤਿਵਿਯ ਪਮੁਦਿਤਾ. ਠਾਨਂ ਸਨ੍ਧਾਯਾਤਿ ਠਾਨ-ਸਦ੍ਦਂ ਅਪੇਕ੍ਖਿਤ੍ਵਾ. ਇਮੇਸਨ੍ਤਿ ਸਙ੍ਖਾਰਾਦੀਨਂ ਫਲਾਨਂ. ਪਾਲ਼ਿਯਂ ਸਬ੍ਬਸਙ੍ਖਾਰਸਮਥੋਤਿਆਦੀਨਿ ਨਿਬ੍ਬਾਨਵੇਵਚਨਾਨਿ. ਅਪਿਸ੍ਸੂਤਿ ਸਮ੍ਪਿਣ੍ਡਨਤ੍ਥੇ ਨਿਪਾਤੋ. ਨ ਕੇਵਲਂ ਏਤਦਹੋਸਿ, ਇਮਾਪਿ ਗਾਥਾ ਪਟਿਭਂਸੂਤਿ ਅਤ੍ਥੋ.

ਕਿਚ੍ਛੇਨ ਮੇ ਅਧਿਗਤਨ੍ਤਿ ਪਾਰਮਿਪੂਰਣਂ ਸਨ੍ਧਾਯ ਵੁਤ੍ਤਂ, ਨ ਦੁਕ੍ਖਾਪਟਿਪਦਂ. ਬੁਦ੍ਧਾਨਞ੍ਹਿ ਚਤ੍ਤਾਰੋ ਮਗ੍ਗਾ ਸੁਖਾਪਟਿਪਦਾਵ ਹੋਨ੍ਤਿ. ਹ-ਇਤਿ ਬ੍ਯਤ੍ਤਂ, ਏਕਂਸਨ੍ਤਿ ਦ੍ਵੀਸੁ ਅਤ੍ਥੇਸੁ ਨਿਪਾਤੋ, ਬ੍ਯਤ੍ਤਂ, ਏਕਂਸੇਨ ਵਾ ਅਲਨ੍ਤਿ ਵਿਯੋਜੇਨ੍ਤਿ. ਹਲਨ੍ਤਿ ਵਾ ਏਕੋ ਨਿਪਾਤੋ.

੮. ਪਾਲ਼ਿਯਂ ਸਹਮ੍ਪਤਿਸ੍ਸਾਤਿ ਸੋ ਕਿਰ ਕਸ੍ਸਪਸ੍ਸ ਭਗਵਤੋ ਸਾਸਨੇ ਸਹਕੋ ਨਾਮ ਥੇਰੋ ਪਠਮਜ੍ਝਾਨਭੂਮਿਯਂ ਬ੍ਰਹ੍ਮਪਤਿ ਹੁਤ੍ਵਾ ਨਿਬ੍ਬਤ੍ਤੋ, ਤੇਨ ਨਂ ‘‘ਸਹਮ੍ਪਤੀ’’ਤਿ ਸਞ੍ਜਾਨਿਂਸੁ. ਅਸ੍ਸਵਨਤਾਤਿ ਅਸ੍ਸਵਨਤਾਯ, ਅਸ੍ਸਵਨੇਨਾਤਿ ਅਤ੍ਥੋ. ਸਵਨਮੇਵ ਹਿ ਸਵਨਤਾ ਯਥਾ ਦੇਵਤਾਤਿ.

ਧਮ੍ਮੋ ਅਸੁਦ੍ਧੋਤਿ ਮਿਚ੍ਛਾਦਿਟ੍ਠਿਧਮ੍ਮੋ. ਸਮਲੇਹੀਤਿ ਪੂਰਣਕਸ੍ਸਪਾਦੀਹਿ ਛਹਿ ਸਤ੍ਥਾਰੇਹਿ. ਅਪਾਪੁਰਾਤਿ ਦੇਸਨਾਹਤ੍ਥੇਨ ਵਿਵਰ. ਦ੍ਵਾਰਨ੍ਤਿ ਅਰਿਯਮਗ੍ਗਂ ਸਨ੍ਧਾਯ ਵਦਤਿ.

ਸੇਲੇਤਿ ਘਨਸਿਲਾਮਯੇ. ਤਥੂਪਮਨ੍ਤਿ ਏਤ੍ਥ ਤਥਾ-ਸਦ੍ਦੋ ਤਂ-ਸਦ੍ਦਤ੍ਥੇ ਦਟ੍ਠਬ੍ਬੋ. ਤੇਨ ਸੋ ਸੇਲਪਬ੍ਬਤੋ ਉਪਮਾ ਯਸ੍ਸ. ਤਂ ਤਥੂਪਮਨ੍ਤਿ ਅਤ੍ਥੋ. ਤੇਨ ਵਾ ਪਬ੍ਬਤਾਦਿਨਾ ਪਕਾਰੇਨ ਉਪਮਾ ਅਸ੍ਸਾਤਿਪਿ ਅਤ੍ਥੋ. ਧਮ੍ਮਮਯਨ੍ਤਿ ਲੋਕੁਤ੍ਤਰਧਮ੍ਮਭੂਤਂ. ਉਟ੍ਠਾਹੀਤਿ ਧਮ੍ਮਦੇਸਨਤ੍ਥਾਯ ਚਾਰਿਕਚਰਣਤ੍ਥਂ ਇਮਮ੍ਹਾ ਆਸਨਾ ਕਾਯੇਨ, ਅਪ੍ਪੋਸ੍ਸੁਕ੍ਕਭਾਵਤੋ ਵਾ ਚਿਤ੍ਤੇਨ ਉਟ੍ਠੇਹਿ, ਅਯਮੇਵ ਵਾ ਪਾਠੋ. ਤੇਨੇਵ ‘‘ਵਿਚਰ, ਦੇਸਸ੍ਸੂ’’ਤਿ ਦੁਵਿਧੇਪਿ ਕਾਯਚਿਤ੍ਤਪਯੋਗੇ ਨਿਯੋਜੇਸਿ. ਵੀਰਾਤਿਆਦਿ ਚਤ੍ਤਾਰਿ ਥੁਤਿਵਸੇਨ ਸਮ੍ਬੋਧਨਾਨਿ.

੯. ਬੁਦ੍ਧਚਕ੍ਖੁਨਾਤਿ ¶ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣੇਨ, ਆਸਯਾਨੁਸਯਞਾਣੇਨ ਚ. ਇਮੇਸਞ੍ਹਿ ਦ੍ਵਿਨ੍ਨਂ ‘‘ਬੁਦ੍ਧਚਕ੍ਖੂ’’ਤਿ ਨਾਮਂ. ਸ੍ਵਾਕਾਰਾਤਿ ਸਦ੍ਧਿਨ੍ਦ੍ਰਿਯਾਦਯੋਵ ਆਕਾਰਾ ¶ ਸੁਨ੍ਦਰਾ ਯੇਸਂ, ਤੇ ਸ੍ਵਾਕਾਰਾ, ਸੁਵਿਞ੍ਞਾਪਯਾ, ਪਰਲੋਕਞ੍ਚ ਵਜ੍ਜਞ੍ਚ ਭਯਤੋ ਦਸ੍ਸਨਸੀਲਾ ਚਾਤਿ ਦਟ੍ਠਬ੍ਬਂ. ਉਪ੍ਪਲਾਨਿ ਏਤ੍ਥ ਸਨ੍ਤੀਤਿ ਉਪ੍ਪਲਿਨੀਤਿ ਗਚ੍ਛਲਤਾਪਿ ਪੋਕ੍ਖਰਣੀਪਿ ਵੁਚ੍ਚਤਿ. ਇਧ ਪਨ ਪੋਕ੍ਖਰਣੀ. ਏਵਮਿਤਰੇਸੁਪਿ. ਉਦਕਾਨੁਗ੍ਗਤਾਨੀਤਿ ਉਦਕਤੋ ਅਨੁਗ੍ਗਤਾਨਿ. ਅਨ੍ਤੋ ਨਿਮੁਗ੍ਗਾਨੇਵ ਹੁਤ੍ਵਾ ਪੁਸਨ੍ਤਿ ਵਡ੍ਢਨ੍ਤਿ, ਤਾਨਿ ਅਨ੍ਤੋਨਿਮੁਗ੍ਗਪੋਸੀਨਿ. ਅਚ੍ਚੁਗ੍ਗਮ੍ਮਾਤਿ ਉਦਕਂ ਅਤਿਕ੍ਕਮਨਵਸੇਨ ਉਗ੍ਗਨ੍ਤ੍ਵਾ.

ਅਪਾਰੁਤਾਤਿ ਵਿਵਟਾ. ਤੇਸਨ੍ਤਿ ਸਉਪਨਿਸ੍ਸਯਾਨਂ ਸਤ੍ਤਾਨਂ. ਦ੍ਵਾਰਾਤਿ ਅਰਿਯਮਗ੍ਗਦ੍ਵਾਰਾਨਿ. ਇਦਞ੍ਚ ਅਤ੍ਤਨੋ ਸਯਮ੍ਭੁਞਾਣੇਨ ਸਉਪਨਿਸ੍ਸਯਾਨਂ ਤੇਸਂ ਮਗ੍ਗੁਪ੍ਪਤ੍ਤਿਦਿਟ੍ਠਤਂ ਸਨ੍ਧਾਯ ਵਦਤਿ. ਵਿਹਿਂਸਸਞ੍ਞੀਤਿਆਦੀਸੁ ਏਵਮਤ੍ਥੋ ਦਟ੍ਠਬ੍ਬੋ – ‘‘ਅਹਞ੍ਹਿ ਅਤ੍ਤਨੋ ਪਗੁਣਂ ਸੁਪ੍ਪਵਤ੍ਤਿਤਮ੍ਪਿ ਇਮਂ ਪਣੀਤਂ ਧਮ੍ਮਂ ਅਜਾਨਨ੍ਤੇਸੁ ਮਨੁਜੇਸੁ ਦੇਸਨਾਯ ਵਿਹਿਂਸਾ ਕਾਯਵਾਚਾਕਿਲਮਥੋ ਹੋਤੀ’’ਤਿ ਏਵਂ ਵਿਹਿਂਸਸਞ੍ਞੀ ਹੁਤ੍ਵਾ ਨ ਭਾਸਿਂ ਭਾਸਿਤੁਂ ਨ ਇਚ੍ਛਿਂ. ਇਦਾਨਿ ਪਨ ਹੇਤੁਸਮ੍ਪਨ੍ਨਾ ਅਤ੍ਤਨੋ ਸਦ੍ਧਾਭਾਜਨਂ ਵਿਵਰਨ੍ਤੁ, ਪੂਰੇਸ੍ਸਾਮਿ ਨੇਸਂ ਸਙ੍ਕਪ੍ਪਨ੍ਤਿ.

੧੦. ਆਲ਼ਾਰੋਤਿ ਨਾਮਂ. ਕਾਲਾਮੋਤਿ ਗੋਤ੍ਤਂ. ਭਗਵਤੋਪਿ ਖੋ ਞਾਣਂ ਉਦਪਾਦੀਤਿ ਕਿਂ ਇਦਾਨੇਵ ਉਦਪਾਦਿ, ਨਨੁ ਬੋਧਿਮੂਲੇ ਤੇਕਾਲਿਕਾ, ਕਾਲਵਿਨਿਮੁਤ੍ਤਾ ਚ ਸਬ੍ਬੇ ਧਮ੍ਮਾ ਸਬ੍ਬਾਕਾਰਤੋ ਦਿਟ੍ਠਾਤਿ? ਸਚ੍ਚਂ ਦਿਟ੍ਠਾ, ਤਥਾਪਿ ਨਾਮਾਦਿਵਸੇਨ ਅਵਿਕਪ੍ਪਿਤਾ ਏਕਚਿਤ੍ਤਕ੍ਖਣਿਕਤ੍ਤਾ ਸਬ੍ਬਞ੍ਞੁਤਞ੍ਞਾਣਸ੍ਸ. ਨ ਹਿ ਏਕੇਨ ਚਿਤ੍ਤੇਨ ਸਬ੍ਬਧਮ੍ਮਾਨਂ ਨਾਮਜਾਤਿਆਦਿਕਂ ਪਚ੍ਚੇਕਂ ਅਨਨ੍ਤਂ ਵਿਭਾਗਂ ਵਿਕਪ੍ਪੇਤੁਂ ਸਕ੍ਕਾ ਵਿਕਪ੍ਪਾਨਂ ਵਿਰੁਦ੍ਧਾਨਂ ਸਹਾਨੁਪ੍ਪਤ੍ਤਿਤੋ, ਸਬ੍ਬਵਿਕਪ੍ਪਾਰਹਧਮ੍ਮਦਸ੍ਸਨਮੇਵ ਪਨਾਨੇਨ ਸਕ੍ਕਾ ਕਾਤੁਂ. ਯਥਾ ਦਿਟ੍ਠੇਸੁ ਪਨ ਯਥਿਚ੍ਛਿਤਾਕਾਰਂ ਆਰਬ੍ਭ ਵਿਕਪ੍ਪੋ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣੇਨ ਦਿਟ੍ਠੇ ਚਿਤ੍ਤਪਟੇ ਵਿਯ. ਇਧਾਪਿ ਆਲ਼ਾਰਂ ਨਿਸ੍ਸਾਯ ਆਵਜ੍ਜਨਾਨਨ੍ਤਰਮੇਵ ਸਬ੍ਬਾਕਾਰਞਾਣਂ ਉਦਪਾਦਿ. ਨ ਕੇਵਲਞ੍ਚ ਤਂ, ਅਥ ਖੋ ਪਞ੍ਚਵਗ੍ਗਿਯਾ ਏਵ ਪਠਮਂ ਧਮ੍ਮਂ ਜਾਨਿਸ੍ਸਨ੍ਤਿ, ਤਪ੍ਪਮੁਖਾ ਚ ਦੇਵਤਾ, ਆਲ਼ਾਰੋ ਕਾਲਂ ਕਤ੍ਵਾ ਆਕਿਞ੍ਚਞ੍ਞਾਯਤਨੇ, ਉਦਕੋ ਚ ਨੇਵਸਞ੍ਞਾਨਾਸਞ੍ਞਾਯਤਨੇ ਨਿਬ੍ਬਤ੍ਤੋਤਿ ਏਵਮਾਦਿਕਂ ਸਬ੍ਬਮ੍ਪਿ ਨਿਸ੍ਸਾਯ ਞਾਣਂ ਉਪ੍ਪਜ੍ਜਤਿ ਏਵ. ਤਂ ਪਨ ਖਣਸਮ੍ਪਤ੍ਤਿਯਾ ਦੁਲ੍ਲਭਭਾਵਂ ਦਸ੍ਸੇਤੁਂ ਕਮੇਨ ਓਲੋਕੇਤ੍ਵਾ ਦੇਵਤਾਯ ਵੁਤ੍ਤੇ ਞਾਣਂ ਵਿਯ ਕਤ੍ਵਾ ¶ ਵੁਤ੍ਤਂ. ਸਦ੍ਦਗਤਿਯਾ ਹਿ ਬਨ੍ਧਤ੍ਤਾ ਏਕੇਨ ਞਾਣੇਨ ਞਾਤਮ੍ਪਿ ਵੁਚ੍ਚਮਾਨਂ ਕਮੇਨ ਞਾਤਂ ਵਿਯ ਪਟਿਭਾਤਿ, ਦੇਵਤਾਪਿ ਚ ਭਗਵਤਾ ਞਾਤਮੇਵਤ੍ਥਂ ਆਰੋਚੇਸਿ. ਤੇਨੇਵ ‘‘ਭਗਵਤੋਪਿ ਖੋ ਞਾਣਂ ਉਦਪਾਦੀ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਵਮਞ੍ਞਤ੍ਥਾਪਿ ਈਦਿਸੇਸੁ ‘‘ਲੋਕਂ ਵੋਲੋਕੇਨ੍ਤੋ ਅਸੁਕਂ ਅਦ੍ਦਸ, ਤਤ੍ਥ ¶ ਮਯਿ ਗਤੇ ਕਿਂ ਭਵਿਸ੍ਸਤੀ’’ਤਿ ਏਵਮਾਦਿਨਾ ਸਤ੍ਥੁ ਹਿਤੇਸਿਤਾਸਨ੍ਦਸ੍ਸਨਵਸਪ੍ਪਵਤ੍ਤੇਸੁ. ਸਬ੍ਬਤ੍ਥ ਵਚਨਗਤਿਯਂ ਕਮਵੁਤ੍ਤਿਤੇ ਪਞ੍ਞਾਯਮਾਨੇਪਿ ਏਕੇਨੇਵ ਞਾਣੇਨ ਸਕਲਾਵਬੋਧੋ ਵੇਦਿਤਬ੍ਬੋ. ਬਹੁਕਾਰਾ ਖੋ ਮੇ ਪਞ੍ਚਵਗ੍ਗਿਯਾਤਿ ਉਪਕਾਰਸ੍ਸਾਪਿ ਵਿਜ੍ਜਮਾਨਤਂ ਸਨ੍ਧਾਯ ਵੁਤ੍ਤਂ, ਨ ਪਨ ਧਮ੍ਮਦੇਸਨਾਯ ਕਾਰਣਤ੍ਤੇਨ ਅਨੁਪਕਾਰਾਨਮ੍ਪਿ ਦੇਸਨਤੋ.

੧੧. ਅਨ੍ਤਰਾ ਚ ਗਯਂ ਅਨ੍ਤਰਾ ਚ ਬੋਧਿਨ੍ਤਿ ਗਯਾਯ, ਬੋਧਿਸ੍ਸ ਚ ਅਨ੍ਤਰੇ ਤਿਗਾਵੁਤੇ ਠਾਨੇ.

ਸਬ੍ਬਾਭਿਭੂਤਿ ਸਬ੍ਬਂ ਤੇਭੂਮਕਧਮ੍ਮਂ ਅਭਿਭਵਿਤ੍ਵਾ ਠਿਤੋ. ਅਨੂਪਲਿਤ੍ਤੋਤਿ ਕਿਲੇਸਲੇਪੇਨ ਅਲਿਤ੍ਤੋ. ਤਤੋ ਏਵ ਸਬ੍ਬਞ੍ਜਹੋ. ਤਣ੍ਹਕ੍ਖਯੇ ਵਿਮੁਤ੍ਤੋਤਿ ਤਣ੍ਹਕ੍ਖਯੇ ਨਿਬ੍ਬਾਨੇ ਆਰਮ੍ਮਣਕਰਣਵਸਏਨ ਵਿਮੁਤ੍ਤੋ. ਏਵਂ ਸਯਂ ਸਬ੍ਬਧਮ੍ਮੇ ਅਤ੍ਤਨਾਵ ਜਾਨਿਤ੍ਵਾ. ਕਮੁਦ੍ਦਿਸੇਯ੍ਯਨ੍ਤਿ ਕਂ ਅਞ੍ਞਂ ‘‘ਅਯਂ ਮੇ ਆਚਰਿਯੋ’’ਤਿ ਉਦ੍ਦਿਸੇਯ੍ਯਂ.

ਕਾਸਿਨਂ ਪੁਰਨ੍ਤਿ ਬਾਰਾਣਸਿਂ. ਆਹਞ੍ਛਨ੍ਤਿ ਆਹਨਿਸ੍ਸਾਮਿ. ਅਮਤਾਧਿਗਮਾਯ ਉਗ੍ਘੋਸਨਤੋ ਅਮਤਦੁਨ੍ਦੁਭਿਨ੍ਤਿ ਸਤ੍ਥੁ ਧਮ੍ਮਦੇਸਨਾ ਵੁਤ੍ਤਾ, ‘‘ਅਮਤਭੇਰਿਂ ਪਹਰਿਸ੍ਸਾਮੀ’’ਤਿ ਗਚ੍ਛਾਮੀਤਿ ਅਤ੍ਥੋ.

ਅਰਹਸਿ ਅਨਨ੍ਤਜਿਨੋਤਿ ਅਨਨ੍ਤਜਿਨੋਪਿ ਭਵਿਤੁਂ ਯੁਤ੍ਤੋਤਿ ਅਤ੍ਥੋ. ਅਨਨ੍ਤਞਾਣਤਾਯ ਅਨਨ੍ਤੋ ਜਿਨੋ ਚ, ਅਨਨ੍ਤੇਨ ਵਾ ਞਾਣੇਨ, ਅਨਨ੍ਤਂ ਵਾ ਦੋਸਂ ਜਿਤਵਾ, ਉਪ੍ਪਾਦਵਯਨ੍ਤਰਹਿਤਤਾਯ ਵਾ ਅਨਨ੍ਤਂ ਨਿਬ੍ਬਾਨਂ ਅਜਿਨਿ ਕਿਲੇਸਾਰਯੋ ਮਦ੍ਦਿਤ੍ਵਾ ਗਣ੍ਹੀਤਿਪਿ ਅਨਨ੍ਤਜਿਨੋ.

ਹੁਪੇਯ੍ਯਾਪੀਤਿ ਏਵਮ੍ਪਿ ਭਵੇਯ੍ਯ, ਏਵਂਵਿਧੇ ਰੂਪਕਾਯਰਤਨੇ ਈਦਿਸੇਨ ਞਾਣੇਨ ਭਵਿਤਬ੍ਬਨ੍ਤਿ ਅਧਿਪ੍ਪਾਯੋ. ਏਵਂ ਨਾਮ ਕਥਨਞ੍ਹਿਸ੍ਸ ਉਪਨਿਸ੍ਸਯਸਮ੍ਪਨ੍ਨਸ੍ਸ ਅਪਰਕਾਲੇ ਦੁਕ੍ਖਪ੍ਪਤ੍ਤਸ੍ਸ ਭਗਵਨ੍ਤਂ ਉਪਗਮ੍ਮ ਪਬ੍ਬਜਿਤ੍ਵਾ ਮਗ੍ਗਫਲਪਟਿਵੇਧਾਯ ਪਚ੍ਚਯੋ ਜਾਤੋ. ਤਥਾਹੇਸ ਭਗਵਾ ਤੇਨ ਸਮਾਗਮਤ੍ਥਂ ਪਦਸਾਵ ਮਗ੍ਗਂ ਪਟਿਪਜ੍ਜਿ.

੧੨. ਬਾਹੁਲ੍ਲਿਕੋਤਿ ¶ ਪਚ੍ਚਯਬਾਹੁਲ੍ਲਿਕੋ. ਪਧਾਨਵਿਬ੍ਭਨ੍ਤੋਤਿ ਪਧਾਨਤੋ ਦੁਕ੍ਕਰਚਰਣਤੋ ਪਰਿਹੀਨੋ. ਨਤ੍ਥਿ ਏਤ੍ਥ ਅਗਾਰਿਯਂ, ਅਗਾਰਸ੍ਸ ਹਿਤਂ ਕਸਿਗੋਰਕ੍ਖਾਦਿਕਮ੍ਮਨ੍ਤਿ ਅਨਗਾਰਿਯਾ, ਪਬ੍ਬਜ੍ਜਾ, ਤਂ ਅਨਗਾਰਿਯਂ. ਪਬ੍ਬਜਨ੍ਤੀਤਿ ਉਪਗਚ੍ਛਨ੍ਤਿ. ਤਦਨੁਤ੍ਤਰਨ੍ਤਿ ਤਂ ਅਨੁਤ੍ਤਰਂ. ਬ੍ਰਹ੍ਮਚਰਿਯਪਰਿਯੋਸਾਨਨ੍ਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਪਰਿਯੋਸਾਨਂ, ਅਰਹਤ੍ਤਫਲਨ੍ਤਿ ਅਤ੍ਥੋ. ਤਸ੍ਸ ਹਿ ਅਤ੍ਥਾਯ ਕੁਲਪੁਤ੍ਤਾ ਪਬ੍ਬਜਨ੍ਤਿ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂ ਪਚ੍ਚਕ੍ਖੇ ਅਤ੍ਤਭਾਵੇ. ਸਯਨ੍ਤਿ ਅਪਰਪ੍ਪਚ੍ਚਯਾ ¶ . ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਅਤ੍ਤਨੋਵ ਞਾਣੇਨ ਪਚ੍ਚਕ੍ਖਂ ਕਤ੍ਵਾ. ਉਪਸਮ੍ਪਜ੍ਜਾਤਿ ਪਾਪੁਣਿਤ੍ਵਾ.

ਇਰਿਯਾਯਾਤਿ ਦੁਕ੍ਕਰਇਰਿਯਾਯ. ਉਤ੍ਤਰਿਮਨੁਸ੍ਸਧਮ੍ਮਾਤਿਆਦੀਸੁ ਮਨੁਸ੍ਸਧਮ੍ਮਤੋ ਲੋਕਿਯਞਾਣਤੋ ਉਪਰਿ ਅਰਿਯਂ ਕਾਤੁਂ ਅਲਂ ਸਮਤ੍ਥੋ ਅਲਮਰਿਯੋ. ਞਾਣਦਸ੍ਸਨਵਿਸੇਸੋਤਿ ਸਬ੍ਬਞ੍ਞੁਤਞ੍ਞਾਣਸ੍ਸ ਪੁਬ੍ਬਭਾਗਂ ਅਧਿਪ੍ਪੇਤਂ. ਨੋਤਿ ਨੁ. ਭਾਸਿਤਮੇਤਨ੍ਤਿ ਏਵਰੂਪਮੇਤਂ ਵਾਕ੍ਯਭੇਦਨ੍ਤਿ ਅਤ੍ਥੋ. ਤੇ ਚ ‘‘ਯਦਿ ਏਸ ਪਧਾਨਕਾਲੇ ‘ਅਹਂ ਅਰਹਾ’ਤਿ ਵਦੇਯ੍ਯ, ਮਯਞ੍ਚ ਸਦ੍ਦਹਾਮ, ਨ ਚਾਨੇਨ ਤਦਾ ਵੁਤ੍ਤਂ. ਇਦਾਨਿ ਪਨ ਵਿਜ੍ਜਮਾਨਮੇਵ ਗੁਣਂ ਵਦਤੀ’’ਤਿ ਏਕਪਦੇਨ ਸਤਿਂ ਲਭਿਤ੍ਵਾ ‘‘ਬੁਦ੍ਧੋ ਜਾਤੋ’’ਤਿ ਉਪ੍ਪਨ੍ਨਗਾਰਵਾ ਆਵੁਸੋਵਾਦਂ ਪਹਾਯ ‘‘ਨੋ ਹੇਤਂ, ਭਨ੍ਤੇ’’ਤਿ ਆਹਂਸੁ. ਅਞ੍ਞਾ ਚਿਤ੍ਤਨ੍ਤਿ ਅਞ੍ਞਾਯ ਅਰਹਤ੍ਤਪ੍ਪਤ੍ਤਿਯਾ ਚਿਤ੍ਤਂ.

੧੩. ਅਨ੍ਤਾਤਿ ਕੋਟ੍ਠਾਸਾ ਦ੍ਵੇ ਭਾਗਾ. ਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗੋਤਿ ਵਤ੍ਥੁਕਾਮੇਸੁ ਕਿਲੇਸਕਾਮਸੁਖਸ੍ਸ ਅਨੁਭਵੋ. ਕਿਲੇਸਕਾਮਾ ਏਵ ਵਾ ਆਮਿਸਸੁਖੇਨ ਅਲ੍ਲੀਯਨਤੋ ਕਾਮਸੁਖਲ੍ਲਿਕਾਤਿ ਵੁਤ੍ਤਾਤਿ ਦਟ੍ਠਬ੍ਬਾ. ਗਮ੍ਮੋਤਿ ਗਾਮਵਾਸੀਨਂ ਸਨ੍ਤਕੋ. ਅਤ੍ਤਕਿਲਮਥਾਨੁਯੋਗੋਤਿ ਅਤ੍ਤਨੋ ਕਿਲਮਥਸ੍ਸ ਕਣ੍ਟਕਸੇਯ੍ਯਾਦਿਦੁਕ੍ਖਸ੍ਸ ਅਨੁਯੋਗੋ. ਉਭੋ ਅਨ੍ਤੇਤਿ ਯਥਾਵੁਤ੍ਤੇ ਲੋਭੋ ਵਾ ਸਸ੍ਸਤੋ ਵਾ ਏਕੋ ਅਨ੍ਤੋ, ਦੋਸੋ ਵਾ ਉਚ੍ਛੇਦੋ ਵਾ ਏਕੋਤਿ ਵੇਦਿਤਬ੍ਬੋ.

ਚਕ੍ਖੁਕਰਣੀਤਿਆਦੀਸੁ ਅਤ੍ਤਨਾ ਸਮ੍ਪਯੁਤ੍ਤਞਾਣਚਕ੍ਖੁਂ ਕਰੋਤੀਤਿ ਚਕ੍ਖੁਕਰਣੀ. ਦੁਤਿਯਂ ਤਸ੍ਸੇਵ ਵੇਵਚਨਂ. ਉਪਸਮੋਤਿ ਕਿਲੇਸੁਪਸਮੋ. ਅਭਿਞ੍ਞਾ, ਸਮ੍ਬੋਧੋ ਚ ਚਤੁਸਚ੍ਚਪਟਿਵੇਧੋਵ. ਨਿਬ੍ਬਾਨਂ ਅਸਙ੍ਖਤਧਾਤੁ. ਏਤੇਸਮ੍ਪਿ ਅਤ੍ਥਾਯ ਸਂਵਤ੍ਤਤੀਤਿ ਪਟਿਪਦਂ ਥੋਮੇਤਿ. ਸਮ੍ਮਾਦਿਟ੍ਠੀਤਿ ਞਾਣਂ. ਸਮ੍ਮਾਸਙ੍ਕਪ੍ਪੋਤਿ ਵਿਤਕ੍ਕੋ. ਸੇਸਂ ਧਮ੍ਮਤੋ ਸੁਵਿਞ੍ਞੇਯ੍ਯਮੇਵ.

੧੪. ਏਵਂ ¶ ਚਤ੍ਤਾਰੋਪਿ ਮਗ੍ਗੇ ਏਕਤੋ ਦਸ੍ਸੇਤ੍ਵਾ ਇਦਾਨਿ ਤੇਹਿ ਮਗ੍ਗੇਹਿ ਪਟਿਵਿਜ੍ਝਿਤਬ੍ਬਾਨਿ ਚਤ੍ਤਾਰਿ ਅਰਿਯਸਚ੍ਚਾਨਿ ਦਸ੍ਸੇਤੁਂ ‘‘ਇਦਂ ਖੋ ਪਨ, ਭਿਕ੍ਖਵੇ’’ਤਿਆਦਿਮਾਹ. ਜਾਤਿਪਿ ਦੁਕ੍ਖਾਤਿਆਦੀਸੁ ਤਤ੍ਥ ਤਤ੍ਥ ਭਵੇ ਨਿਬ੍ਬਤ੍ਤਮਾਨਾਨਂ ਸਤ੍ਤਾਨਂ ਸਬ੍ਬਪਠਮਂ ਰੂਪਾਰੂਪਧਮ੍ਮਪ੍ਪਵਤ੍ਤਿ ਇਧ ਜਾਤਿ ਨਾਮ, ਸਾ ਚ ਤਤ੍ਥ ਤਤ੍ਥ ਭਵੇਸੁ ਉਪਲਬ੍ਭਮਾਨਾਨਂ ਦੁਕ੍ਖਾਦੀਨਂ ਵਤ੍ਥੁਭਾਵਤੋ ਦੁਕ੍ਖਾ, ਏਵਂ ਜਰਾਦੀਸੁ ਦੁਕ੍ਖਵਤ੍ਥੁਕਤਾਯ ਦੁਕ੍ਖਤਾ ਵੇਦਿਤਬ੍ਬਾ. ਪਞ੍ਚੁਪਾਦਾਨਕ੍ਖਨ੍ਧਾ ਪਨ ਦੁਕ੍ਖਦੁਕ੍ਖਵਿਪਰਿਣਾਮਦੁਕ੍ਖਸਙ੍ਖਾਰਦੁਕ੍ਖਵਸੇਨ ਦੁਕ੍ਖਾ ਏਵ. ਪੋਨੋਭਵਿਕਾਤਿ ਪੁਨਬ੍ਭਵਕਰਣਂ ਪੁਨਬ੍ਭਵੋ ਉਤ੍ਤਰਪਦਲੋਪੇਨ, ਪੁਨਬ੍ਭਵੋ ਸੀਲਮੇਤਿਸ੍ਸਾਤਿ ਪੋਨੋਭਵਿਕਾ. ਨਨ੍ਦਿਰਾਗਸਹਗਤਾਤਿ ਏਤ੍ਥ ਰੂਪਾਦੀਸੁ ਨਨ੍ਦਤਿ ਪਿਯਾਯਤੀਤਿ ਨਨ੍ਦੀ, ਸਾ ਏਵ ਰਾਗੋਤਿ ਨਨ੍ਦਿਰਾਗੋਤਿ ਭਾਵਪ੍ਪਧਾਨੋਯਂ ਨਿਦ੍ਦੇਸੋ, ਨਨ੍ਦਿਰਾਗਤ੍ਤਨ੍ਤਿ ¶ ਅਤ੍ਥੋ. ਤੇਨ ਸਹਗਤਾਨਿ ਨਨ੍ਦਿਰਾਗਸਹਗਤਾ. ਤਤ੍ਰ ਤਤ੍ਰਾਤਿ ਤਸ੍ਮਿਂ ਤਸ੍ਮਿਂ ਭਵੇ. ਰੂਪਾਦੀਸੁ ਛਸੁ ਆਰਮ੍ਮਣੇਸੁ ਕਾਮਸ੍ਸਾਦਨਵਸੇਨ ਪਵਤ੍ਤਾ ਕਾਮਤਣ੍ਹਾ ਨਾਮ. ਸਸ੍ਸਤਦਿਟ੍ਠਿਯਾ ਸਹ ਪਵਤ੍ਤਾ ਭਵਤਣ੍ਹਾ. ਉਚ੍ਛੇਦਦਿਟ੍ਠਿਯਾ ਸਹ ਪਵਤ੍ਤਾ ਵਿਭਵਤਣ੍ਹਾ. ਅਸੇਸਵਿਰਾਗਨਿਰੋਧੋਤਿਆਦਿਨਾ ਨਿਬ੍ਬਾਨਮੇਵ ਵੁਚ੍ਚਤਿ. ਤਤ੍ਥ ਵਿਰਜ੍ਜਨਂ ਵਿਗਮਨਂ ਵਿਰਾਗੋ. ਨਿਰੁਜ੍ਝਨਂ ਨਿਰੋਧੋ. ਉਭਯੇਨਾਪਿ ਸੁਟ੍ਠੁ ਵਿਗਮੋਵ ਵੁਚ੍ਚਤਿ. ਅਸੇਸਾਯਪਿ ਤਣ੍ਹਾਯ ਵਿਰਾਗੋ, ਨਿਰੋਧੋ ਚ ਯੇਨ ਹੋਤਿ, ਸੋ ਅਸੇਸਵਿਰਾਗਨਿਰੋਧੋ, ਨਿਬ੍ਬਾਨਮੇਵ. ਯਸ੍ਮਾ ਚ ਤਂ ਆਗਮ੍ਮ ਤਣ੍ਹਂ, ਵਟ੍ਟਞ੍ਚ ਚਜਨ੍ਤਿ ਪਟਿਨਿਸ੍ਸਜ੍ਜਨ੍ਤਿ ਵਿਮੁਚ੍ਚਨ੍ਤਿ ਨ ਅਲ੍ਲੀਯਨ੍ਤਿ, ਤਸ੍ਮਾ ਚਾਗੋ ਪਟਿਨਿਸ੍ਸਗ੍ਗੋ ਮੁਤ੍ਤਿ ਅਨਾਲਯੋਤਿ ਵੁਚ੍ਚਤਿ.

੧੫. ਚਕ੍ਖੁਨ੍ਤਿਆਦੀਨਿ ਞਾਣਵੇਵਚਨਾਨੇਵ.

੧੬. ਯਾਵਕੀਵਞ੍ਚਾਤਿ ਯਤ੍ਤਕਂ ਕਾਲਂ. ਤਿਪਰਿਵਟ੍ਟਨ੍ਤਿ ਸਚ੍ਚਞਾਣ, ਕਿਚ੍ਚਞਾਣ, ਕਤਞਾਣਸਙ੍ਖਾਤਾਨਂ ਤਿਣ੍ਣਂ ਪਰਿਵਟ੍ਟਾਨਂ ਵਸੇਨ ਤਿਪਰਿਵਟ੍ਟਂ ਞਾਣਦਸ੍ਸਨਂ. ਏਤ੍ਥ ਚ ‘‘ਇਦਂ ਦੁਕ੍ਖਂ ਅਰਿਯਸਚ੍ਚਂ, ਇਦਂ ਦੁਕ੍ਖਸਮੁਦਯ’’ਨ੍ਤਿ ਏਵਂ ਚਤੂਸੁ ਸਚ੍ਚੇਸੁ ਯਥਾਭੂਤਞਾਣਂ ਸਚ੍ਚਞਾਣਂ ਨਾਮ. ਤੇਸੁ ਏਵ ‘‘ਪਰਿਞ੍ਞੇਯ੍ਯਂ ਪਹਾਤਬ੍ਬਂ ਸਚ੍ਛਿਕਾਤਬ੍ਬਂ ਭਾਵੇਤਬ੍ਬ’’ਨ੍ਤਿ ਏਵਂ ਕਤ੍ਤਬ੍ਬਕਿਚ੍ਚਜਾਨਨਞਾਣਂ ਕਿਚ੍ਚਞਾਣਂ ਨਾਮ. ‘‘ਪਰਿਞ੍ਞਾਤਂ ਪਹੀਨਂ ਸਚ੍ਛਿਕਤਂ ਭਾਵਿਤ’’ਨ੍ਤਿ ਤਸ੍ਸ ਕਿਚ੍ਚਸ੍ਸ ਕਤਭਾਵਜਾਨਨਞਾਣਂ ਕਤਞਾਣਂ ਨਾਮ. ਦ੍ਵਾਦਸਾਕਾਰਨ੍ਤਿ ਤੇਸਮੇਵ ਏਕੇਕਸ੍ਮਿਂ ਸਚ੍ਚੇ ਤਿਣ੍ਣਂ ਤਿਣ੍ਣਂ ਆਕਾਰਾਨਂ ਵਸੇਨ ਦ੍ਵਾਦਸਾਕਾਰਂ.

ਅਭਿਸਮ੍ਬੁਦ੍ਧੋਤਿ ਪਚ੍ਚਞ੍ਞਾਸਿਨ੍ਤਿ ਅਭਿਸਮ੍ਬੁਦ੍ਧੋ ਅਰਹਤ੍ਤਂ ਪਤ੍ਤੋਤਿ ਏਵਂ ਨ ਪਟਿਜਾਨਿਂ. ਯਤੋ ਚ ਖੋਤਿ ਯਤੋ ਬੋਧਿਮੂਲੇ ਨਿਸਿਨ੍ਨਕਾਲਤੋ ਪਟ੍ਠਾਯ ¶ . ਅਥਾਹਨ੍ਤਿ ਤਤੋ ਪਰਂ ਅਹਂ. ਞਾਣਞ੍ਚ ਪਨ ਮੇਤਿ ਪਚ੍ਚਵੇਕ੍ਖਣਞਾਣਂ ਸਨ੍ਧਾਯ ਵਦਤਿ. ਅਕੁਪ੍ਪਾ ਮੇਤਿਆਦਿ ਤਸ੍ਸ ਪਵਤ੍ਤਿਆਕਾਰਦਸ੍ਸਨਂ. ਤਤ੍ਥ ਅਕੁਪ੍ਪਾ ਮੇ ਵਿਮੁਤ੍ਤੀਤਿ ਅਰਹਤ੍ਤਫਲਂ ਤਸ੍ਸ ਮਗ੍ਗਸਙ੍ਖਾਤਕਾਰਣਤੋ ਚ ਆਰਮ੍ਮਣਤੋ ਚ ਅਕੁਪ੍ਪਤਾ ਵੇਦਿਤਬ੍ਬਾ.

ਇਮਸ੍ਮਿਂ ਪਨ ਵੇਯ੍ਯਾਕਰਣਸ੍ਮਿਨ੍ਤਿ ਨਿਗ੍ਗਾਥਸੁਤ੍ਤੇ. ਭਞ੍ਞਮਾਨੇਤਿ ਭਣਿਯਮਾਨੇ. ਧਮ੍ਮਚਕ੍ਖੁਨ੍ਤਿ ਇਧ ਚਤੁਸਚ੍ਚਧਮ੍ਮੇਸੁ ਚਕ੍ਖੁਕਿਚ੍ਚਕਰਣਤੋ ਸੋਤਾਪਤ੍ਤਿਮਗ੍ਗੋ ਅਧਿਪ੍ਪੇਤੋ. ਯਂ ਕਿਞ੍ਚੀਤਿਆਦਿ ਨਿਬ੍ਬਾਨਾਰਮ੍ਮਣਤ੍ਤੇਪਿ ਕਿਚ੍ਚਵਸੇਨ ਅਸਮ੍ਮੋਹਤੋ ਪਵਤ੍ਤਿਦਸ੍ਸਨਤ੍ਥਂ ਵੁਤ੍ਤਂ.

੧੭. ਧਮ੍ਮਚਕ੍ਕਨ੍ਤਿ ਪਟਿਵੇਧਞਾਣਧਮ੍ਮਞ੍ਚੇਵ ਦੇਸਨਾਞਾਣਧਮ੍ਮਞ੍ਚ ਪਵਤ੍ਤਨਟ੍ਠੇਨ ਚਕ੍ਕਨ੍ਤਿ ਧਮ੍ਮਚਕ੍ਕਂ ¶ . ਓਭਾਸੋਤਿ ਸਬ੍ਬਞ੍ਞੁਤਞ੍ਞਾਣਾਨੁਭਾਵੇਨ ਪਵਤ੍ਤੋ ਚਿਤ੍ਤਪਚ੍ਚਯਉਤੁਸਮੁਟ੍ਠਾਨੋ ਦਸਸਹਸ੍ਸਿਲੋਕਧਾਤੁਂ ਫਰਿਤ੍ਵਾ ਠਿਤੋ ਓਭਾਸੋ.

੧੮. ਦਿਟ੍ਠੋ ਅਰਿਯਸਚ੍ਚਧਮ੍ਮੋ ਏਤੇਨਾਤਿ ਦਿਟ੍ਠਧਮ੍ਮੋ. ਏਸ ਨਯੋ ਸੇਸੇਸੁਪਿ. ਅਤ੍ਤਨੋ ਪਚ੍ਚਕ੍ਖਤੋ ਅਧਿਗਤਤ੍ਤਾ ਨ ਪਰਂ ਪਚ੍ਚੇਤਿ, ਪਰਸ੍ਸ ਸਦ੍ਧਾਯ ਏਤ੍ਥ ਨ ਪਵਤ੍ਤਤੀਤਿ ਅਪਰਪ੍ਪਚ੍ਚਯੋ. ਏਹਿ ਭਿਕ੍ਖੂਤਿ ਏਤ੍ਤਕੇ ਵੁਤ੍ਤਮਤ੍ਤੇ ਪਬ੍ਬਜ੍ਜਾ, ਉਪਸਮ੍ਪਦਾ ਚ ਸਿਜ੍ਝਤਿ, ਤੇਨੇਵ ਤਤ੍ਥ ਇਤਿ-ਸਦ੍ਦੇਨ ਪਰਿਚ੍ਛੇਦੋ ਦਸ੍ਸਿਤੋਤਿ ਵਦਨ੍ਤਿ. ਕੇਚਿ ਪਨ ‘‘ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾਤਿ ਵਚਨਪਰਿਯੋਸਾਨੇ ਏਵ ਉਪਸਮ੍ਪਦਾ ਸਿਜ੍ਝਤਿ, ਅਟ੍ਠਕਥਾਯਂ ਪਨ ‘ਏਹਿ ਭਿਕ੍ਖੂਤਿ ਭਗਵਤੋ ਵਚਨੇਨਾ’ਤਿ ਇਦਂ ਏਹਿਭਿਕ੍ਖੁਸਦ੍ਦੋਪਲਕ੍ਖਿਤਵਚਨਂ ਏਹਿਭਿਕ੍ਖੁਵਚਨਨ੍ਤਿਆਦਿਪਦਵਸੇਨ ਵੁਤ੍ਤਂ ਮੁਸਾਵਾਦਵਗ੍ਗੋਤਿਆਦੀਸੁ ਵਿਯਾ’’ਤਿ ਵਦਨ੍ਤਿ, ਤਦੇਤਂ ਪਠਮਪਾਰਾਜਿਕਟ੍ਠਕਥਾਯਂ ‘‘ਭਗਵਾ ਹਿ…ਪੇ… ਏਹਿ ਭਿਕ੍ਖੁ, ਚਰ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ (ਪਾਰਾ. ਅਟ੍ਠ. ੧.੪੫ ਭਿਕ੍ਖੂਪਦਭਾਜਨੀਯਵਣ੍ਣਨਾ) ਇਮਿਨਾ ਵਚਨੇਨ ਸਮੇਤਿ. ਯਤ੍ਤਕਞ੍ਹਿ ਭਗਵਤਾ ਨਿਯਮੇਨ ਵੁਚ੍ਚਤਿ, ਤਤ੍ਤਕਂ ਸਬ੍ਬਮ੍ਪਿ ਅਙ੍ਗਮੇਵ. ਸੇਕ੍ਖਪੁਥੁਜ੍ਜਨਾਨਞ੍ਹਿ ਏਤਂ ਪਰਿਪੁਣ੍ਣਂ ਵੁਚ੍ਚਤਿ, ਅਸੇਕ੍ਖਾਨਂ ਪਨ ‘‘ਚਰ ਬ੍ਰਹ੍ਮਚਰਿਯ’’ਨ੍ਤਿ ਪਰਿਯੋਸਾਨਨ੍ਤਿ ਦਟ੍ਠਬ੍ਬਂ ਸਿਕ੍ਖਤ੍ਤਯਸਮਿਦ੍ਧਿਤੋ. ਲੋਕਿਯਸਮ੍ਪਦਾਹਿ ਉਪਰਿਭੂਤਾ ਸੇਟ੍ਠਭੂਤਾ ਸਮ੍ਪਦਾਤਿ ਉਪਸਮ੍ਪਦਾ.

੧੯-੨੧. ਨੀਹਾਰਭਤ੍ਤੋਤਿ ਭਿਕ੍ਖੂਹਿ ਗਾਮਤੋ ਨੀਹਰਿਤ੍ਵਾ ਦਿਨ੍ਨਭਤ੍ਤੋ. ਕਲ੍ਲਂ ਨੂਤਿ ਯੁਤ੍ਤਂ ਨੁ. ਏਤਂ ਮਮਾਤਿਆਦਿ ਯਥਾਕ੍ਕਮਂ ਤਣ੍ਹਾਮਾਨਦਿਟ੍ਠਿਗਾਹਾਨਂ ਦਸ੍ਸਨਂ.

੨੨-੨੩. ਤਸ੍ਮਾ ¶ ਤਿਹਾਤਿ ਏਤ੍ਥ ਤਿਹਾਤਿ ਨਿਪਾਤਮਤ੍ਤਂ, ਤਸ੍ਮਾਤਿ ਅਤ੍ਥੋ. ਨਿਬ੍ਬਿਨ੍ਦਤੀਤਿ ਵੁਟ੍ਠਾਨਗਾਮਿਨਿਵਿਪਸ੍ਸਨਾਵਸੇਨ ਉਕ੍ਕਣ੍ਠਤਿ. ਵਿਰਜ੍ਜਤੀਤਿ ਚਤੁਨ੍ਨਂ ਮਗ੍ਗਾਨਂ ਵਸੇਨ ਨ ਰਜ੍ਜਤਿ. ਵਿਮੁਚ੍ਚਤੀਤਿ ਫਲਵਸੇਨ ਵਿਮੁਚ੍ਚਤਿ. ਵਿਮੁਤ੍ਤਸ੍ਮਿਨ੍ਤਿਆਦਿ ਪਚ੍ਚਵੇਕ੍ਖਣਞਾਣਦਸ੍ਸਨਂ. ਬ੍ਰਹ੍ਮਚਰਿਯਨ੍ਤਿ ਮਗ੍ਗਬ੍ਰਹ੍ਮਚਰਿਯਂ. ਕਰਣੀਯਂ ਚਤੂਸੁ ਸਚ੍ਚੇਸੁ ਚਤੂਹਿ ਮਗ੍ਗੇਹਿ ਪਚ੍ਚੇਕਂ ਕਤ੍ਤਬ੍ਬਂ ਪਰਿਞ੍ਞਾਦਿਵਸੇਨ ਸੋਲ਼ਸਵਿਧਂ ਕਿਚ੍ਚਂ. ਨਾਪਰਂ ਇਤ੍ਥਤ੍ਤਾਯਾਤਿ ਇਤ੍ਥਭਾਵਾਯ ਸੋਲ਼ਸਕਿਚ੍ਚਭਾਵਾਯ, ਕਿਲੇਸਕ੍ਖਯਾਯ ਵਾ ਅਪਰਂ ਪੁਨ ਮਗ੍ਗਭਾਵਨਾਕਿਚ੍ਚਂ ਮੇ ਨਤ੍ਥੀਤਿ ਪਜਾਨਾਤਿ. ਅਥ ਵਾ ਇਤ੍ਥਤ੍ਤਾਯਾਤਿ ਇਤ੍ਥਭਾਵਤੋ ਵਤ੍ਤਮਾਨਕ੍ਖਨ੍ਧਸਨ੍ਤਾਨਤੋ ਅਪਰਂ ਖਨ੍ਧਸਨ੍ਤਾਨਂ ਮਯ੍ਹਂ ਨ ਭਵਿਸ੍ਸਤੀਤਿ ਅਤ੍ਥੋ.

੧੫. ਆਲ਼ਮ੍ਬਰਨ੍ਤਿ ਪਣਵਂ. ਵਿਕੇਸਿਕਨ੍ਤਿ ਵਿਪ੍ਪਕਿਣ੍ਣਕੇਸਂ. ਵਿਕ੍ਖੇਲ਼ਿਕਨ੍ਤਿ ਵਿਸ੍ਸਨ੍ਦਮਾਨਲਾਲਂ ¶ . ਸੁਸਾਨਂ ਮਞ੍ਞੇਤਿ ਸੁਸਾਨਂ ਵਿਯ ਅਦ੍ਦਸ ਸਕਂ ਪਰਿਜਨਨ੍ਤਿ ਸਮ੍ਬਨ੍ਧੋ. ਉਦਾਨਂ ਉਦਾਨੇਸੀਤਿ ਸਂਵੇਗਵਸਪ੍ਪਵਤ੍ਤਂ ਵਚਨਂ ਨਿਚ੍ਛਾਰੇਸਿ. ਉਪਸ੍ਸਟ੍ਠਨ੍ਤਿ ਦੁਕ੍ਖੇਨ ਸਮ੍ਮਿਸ੍ਸਂ, ਦੁਕ੍ਖੋਤਿਣ੍ਣਂ ਸਬ੍ਬਸਤ੍ਤਕਾਯਜਾਤਨ੍ਤਿ ਅਤ੍ਥੋ.

੨੬. ਇਦਂ ਖੋ ਯਸਾਤਿ ਭਗਵਾ ਨਿਬ੍ਬਾਨਂ ਸਨ੍ਧਾਯਾਹ. ਅਨੁਪੁਬ੍ਬਿਂ ਕਥਨ੍ਤਿ ਅਨੁਪਟਿਪਾਟਿਕਥਂ. ਆਦੀਨਵਨ੍ਤਿ ਦੋਸਂ. ਓਕਾਰਨ੍ਤਿ ਨਿਹੀਨਤਾ ਨਿਹੀਨਜਨਸੇਵਿਤਤ੍ਤਾ. ਸਂਕਿਲੇਸਨ੍ਤਿ ਤੇਹਿ ਸਤ੍ਤਾਨਂ ਸਂਕਿਲੇਸਨਂ, ਸਂਕਿਲੇਸਵਿਸਯਨ੍ਤਿ ਵਾ ਅਤ੍ਥੋ. ਕਲ੍ਲਚਿਤ੍ਤਨ੍ਤਿ ਅਰੋਗਚਿਤ੍ਤਂ. ਸਾਮਂ ਅਤ੍ਤਨਾਵ ਉਕ੍ਕਂਸੋ ਉਕ੍ਖਿਪਨਂ ਏਤਿਸ੍ਸਨ੍ਤਿ ਸਾਮੁਕ੍ਕਂਸਿਕਾ, ਸਚ੍ਚਦੇਸਨਾ. ਤਸ੍ਸਾ ਸਰੂਪਦਸ੍ਸਨਂ ‘‘ਦੁਕ੍ਖ’’ਨ੍ਤਿਆਦਿ.

੨੭. ਅਸ੍ਸਦੂਤੇਤਿ ਅਸ੍ਸਆਰੁਲ਼੍ਹੇ ਦੂਤੇ. ਇਦ੍ਧਾਭਿਸਙ੍ਖਾਰਨ੍ਤਿ ਇਦ੍ਧਿਕਿਰਿਯਂ. ਅਭਿਸਙ੍ਖਰੇਸਿ ਅਕਾਸਿ.

੨੮. ਯਥਾਦਿਟ੍ਠਨ੍ਤਿ ਪਠਮਮਗ੍ਗੇਨ ਦਿਟ੍ਠਂ ਚਤੁਸ੍ਸਚ੍ਚਭੂਮਿਂ ਸੇਸਮਗ੍ਗਤ੍ਤਯੇਨ ਪਚ੍ਚਵੇਕ੍ਖਨ੍ਤਸ੍ਸ, ਪਸ੍ਸਨ੍ਤਸ੍ਸਾਤਿ ਅਤ੍ਥੋ. ਮਾਤੁ ਨੋ ਜੀਵਿਤਨ੍ਤਿ ਏਤ੍ਥ ਨੋਤਿ ਨਿਪਾਤਮਤ੍ਤਂ, ਮਾਤੁ ਜੀਵਿਤਨ੍ਤਿ ਅਤ੍ਥੋ. ਯਸਸ੍ਸ ਖੀਣਾਸਵਤ੍ਤਾ ‘‘ਏਹਿ ਭਿਕ੍ਖੁ, ਸ੍ਵਾਕ੍ਖਾਤੋ ਧਮ੍ਮੋ, ਚਰ ਬ੍ਰਹ੍ਮਚਰਿਯ’’ਨ੍ਤਿ ਏਤ੍ਤਕੇਨੇਵ ਭਗਵਾ ਉਪਸਮ੍ਪਦਂ ਅਦਾਸਿ. ਖੀਣਾਸਵਾਨਞ੍ਹਿ ਏਤ੍ਤਕੇਨੇਵ ਉਪਸਮ੍ਪਦਾ ਅਨੁਞ੍ਞਾਤਾ ਪੁਬ੍ਬੇਵ ਦੁਕ੍ਖਸ੍ਸ ਪਰਿਕ੍ਖੀਣਤ੍ਤਾ. ਚਰ ਬ੍ਰਹ੍ਮਚਰਿਯਨ੍ਤਿ ਸਾਸਨਬ੍ਰਹ੍ਮਚਰਿਯਸਙ੍ਖਾਤਂ ਸਿਕ੍ਖਾਪਦਪੂਰਣਂ ਸਨ੍ਧਾਯ ਵੁਤ੍ਤਂ, ਨ ਮਗ੍ਗਬ੍ਰਹ੍ਮਚਰਿਯਂ.

੩੦. ਸੇਟ੍ਠਾਨੁਸੇਟ੍ਠੀਨਨ੍ਤਿ ¶ ਸੇਟ੍ਠਿਨੋ ਚ ਅਨੁਸੇਟ੍ਠਿਨੋ ਚ ਪਵੇਣੀਵਸੇਨ ਆਗਤਾ ਯੇਸਂ ਕੁਲਾਨਂ ਸਨ੍ਤਿ, ਤੇਸਂ ਸੇਟ੍ਠਾਨੁਸੇਟ੍ਠੀਨਂ ਕੁਲਾਨਂ. ਓਰਕੋਤਿ ਲਾਮਕੋ.

੩੨-੩੩. ਮਾ ਏਕੇਨ ਦ੍ਵੇਤਿ ਏਕੇਨ ਮਗ੍ਗੇਨ ਦ੍ਵੇ ਭਿਕ੍ਖੂ ਮਾ ਅਗਮਿਤ੍ਥ. ਵਿਸੁਦ੍ਧੇ ਸਤ੍ਤੇ, ਗੁਣੇ ਵਾ ਮਾਰੇਤੀਤਿ ਮਾਰੋ. ਪਾਪੇ ਨਿਯੁਤ੍ਤੋ ਪਾਪਿਮਾ.

ਸਬ੍ਬਪਾਸੇਹੀਤਿ ਸਬ੍ਬਕਿਲੇਸਪਾਸੇਹਿ. ਯੇ ਦਿਬ੍ਬਾ ਯੇ ਚ ਮਾਨੁਸਾਤਿ ਯੇ ਦਿਬ੍ਬਕਾਮਗੁਣਨਿਸ੍ਸਿਤਾ, ਮਾਨੁਸਕਕਾਮਗੁਣਨਿਸ੍ਸਿਤਾ ਚ ਕਿਲੇਸਪਾਸਾ ਨਾਮ ਅਤ੍ਥਿ, ਸਬ੍ਬੇਹਿ ਤੇਹਿ. ‘‘ਤ੍ਵਂ ਬੁਦ੍ਧੋ’’ਤਿ ਦੇਵਮਨੁਸ੍ਸੇਹਿ ਕਰਿਯਮਾਨਸਕ੍ਕਾਰਸਮ੍ਪਟਿਚ੍ਛਨਂ ਸਨ੍ਧਾਯ ਵਦਤਿ.

ਅਨ੍ਤਲਿਕ੍ਖੇ ¶ ਚਰਨ੍ਤੇ ਪਞ੍ਚਾਭਿਞ੍ਞੇਪਿ ਬਨ੍ਧਤੀਤਿ ਅਨ੍ਤਲਿਕ੍ਖਚਰੋ, ਰਾਗਪਾਸੋ. ਮਾਰੋ ਪਨ ਪਾਸਮ੍ਪਿ ਅਨ੍ਤਲਿਕ੍ਖਚਰਂ ਮਞ੍ਞਤਿ. ਮਾਨਸੋਤਿ ਮਨੋਸਮ੍ਪਯੁਤ੍ਤੋ.

ਜਾਨਾਤਿ ਮਨ੍ਤਿ ਸੋ ਕਿਰ ‘‘ਮਹਾਨੁਭਾਵੋ ਅਞ੍ਞੋ ਦੇਵਪੁਤ੍ਤੋ ਨਿਵਾਰੇਤੀਤਿ ਭੀਤੋ ਨਿਵਤ੍ਤਿਸ੍ਸਤਿ ਨੁ ਖੋ’’ਤਿਸਞ੍ਞਾਯ ਵਤ੍ਵਾ ‘‘ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ ਵੁਤ੍ਤੇ ‘‘ਜਾਨਾਤਿ ਮ’’ਨ੍ਤਿ ਦੁਮ੍ਮਨੋ ਪਲਾਯਿ.

੩੪. ਪਰਿਵਿਤਕ੍ਕੋ ਉਦਪਾਦੀਤਿ ਯਸ੍ਮਾ ਏਹਿਭਿਕ੍ਖੁਭਾਵਾਯ ਉਪਨਿਸ੍ਸਯਰਹਿਤਾਨਮ੍ਪਿ ਪਬ੍ਬਜਿਤੁਕਾਮਤਾ ਉਪ੍ਪਜ੍ਜਿਸ੍ਸਤਿ, ਬੁਦ੍ਧਾ ਚ ਤੇ ਨ ਪਬ੍ਬਾਜੇਨ੍ਤਿ, ਤਸ੍ਮਾ ਤੇਸਮ੍ਪਿ ਪਬ੍ਬਜ੍ਜਾਵਿਧਿਂ ਦਸ੍ਸੇਨ੍ਤੋ ਏਵਂ ਪਰਿਵਿਤਕ੍ਕੇਸੀਤਿ ਦਟ੍ਠਬ੍ਬਂ. ਉਪਨਿਸ੍ਸਯਸਮ੍ਪਨ੍ਨਾ ਪਨ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਹਿਭਿਕ੍ਖੁਭਾਵੇਨੇਵ ਪਬ੍ਬਜਨ੍ਤਿ. ਯੇ ਪਟਿਕ੍ਖਿਤ੍ਤਪੁਗ੍ਗਲਾਤਿ ਸਮ੍ਬਨ੍ਧੋ. ਸਯਂ ਪਬ੍ਬਾਜੇਤਬ੍ਬੋਤਿ ਏਤ੍ਥ ‘‘ਕੇਸਮਸ੍ਸੁਂ ਓਹਾਰੇਤ੍ਵਾ’’ਤਿਆਦਿਵਚਨਤੋ ਕੇਸਚ੍ਛੇਦਨਕਾਸਾਯਚ੍ਛਾਦਨਸਰਣਦਾਨਾਨਿ ਪਬ੍ਬਜ੍ਜਾ ਨਾਮ, ਤੇਸੁ ਪਚ੍ਛਿਮਦ੍ਵਯਂ ਭਿਕ੍ਖੂਹਿ ਏਵ ਕਾਤਬ੍ਬਂ, ਕਾਰੇਤਬ੍ਬਂ ਵਾ. ‘‘ਪਬ੍ਬਾਜੇਹੀ’’ਤਿ ਇਦਂ ਤਿਵਿਧਮ੍ਪਿ ਸਨ੍ਧਾਯ ਵੁਤ੍ਤਂ. ਖਣ੍ਡਸੀਮਂ ਨੇਤ੍ਵਾਤਿ ਭਣ੍ਡੁਕਮ੍ਮਾਰੋਚਨਪਰਿਹਰਣਤ੍ਥਂ. ਭਿਕ੍ਖੂਨਞ੍ਹਿ ਅਨਾਰੋਚੇਤ੍ਵਾ ਏਕਸੀਮਾਯ ‘‘ਏਤਸ੍ਸ ਕੇਸੇ ਛਿਨ੍ਦਾ’’ਤਿ ਅਞ੍ਞਂ ਆਣਾਪੇਤੁਮ੍ਪਿ ਨ ਵਟ੍ਟਤਿ. ਪਬ੍ਬਾਜੇਤ੍ਵਾਤਿ ਕੇਸਾਦਿਚ੍ਛੇਦਨਮੇਵ ਸਨ੍ਧਾਯ ਵੁਤ੍ਤਂ ‘‘ਕਾਸਾਯਾਨਿ ਅਚ੍ਛਾਦੇਤ੍ਵਾ’’ਤਿ ਵਿਸੁਂ ਵੁਤ੍ਤਤ੍ਤਾ. ਪਬ੍ਬਾਜੇਤੁਂ ਨ ਲਭਤੀਤਿ ਸਰਣਦਾਨਂ ਸਨ੍ਧਾਯ ਵੁਤ੍ਤਂ, ਅਨੁਪਸਮ੍ਪਨ੍ਨੇਨ ਭਿਕ੍ਖੁਆਣਤ੍ਤਿਯਾ ਦਿਨ੍ਨਮ੍ਪਿ ਸਰਣਂ ਨ ਰੁਹਤਿ.

ਯਸਸ੍ਸੀਤਿ ਪਰਿਵਾਰਸਮ੍ਪਨ੍ਨੋ. ਨਿਜ੍ਜੀਵਨਿਸ੍ਸਤ੍ਤਭਾਵਨ੍ਤਿ ‘‘ਕੇਸਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ¶ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂ’’ਤਿਆਦਿਨਯਂ ਸਙ੍ਗਣ੍ਹਾਤਿ, ਸਬ੍ਬਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੩੧੧) ਆਗਤਨਯੇਨ ਗਹੇਤਬ੍ਬਂ. ਪੁਬ੍ਬੇਤਿ ਪੁਬ੍ਬਬੁਦ੍ਧੁਪ੍ਪਾਦੇਸੁ. ਮਦ੍ਦਿਤਸਙ੍ਖਾਰੋਤਿ ਵਿਪਸ੍ਸਨਾਵਸੇਨ ਵੁਤ੍ਤਂ. ਭਾਵਿਤਭਾਵਨੋਤਿ ਸਮਥਵਸੇਨਾਪਿ.

ਕਾਸਾਯਾਨਿ ਤਿਕ੍ਖਤ੍ਤੁਂ ਵਾ…ਪੇ… ਪਟਿਗ੍ਗਾਹਾਪੇਤਬ੍ਬੋਤਿ ਏਤ੍ਥ ‘‘ਸਬ੍ਬਦੁਕ੍ਖਨਿਸ੍ਸਰਣਤ੍ਥਾਯ ਇਮਂ ਕਾਸਾਵਂ ਗਹੇਤ੍ਵਾ’’ਤਿ ਵਾ ‘‘ਤਂ ਕਾਸਾਵਂ ਦਤ੍ਵਾ’’ਤਿ ਵਾ ਵਤ੍ਵਾ ‘‘ਪਬ੍ਬਾਜੇਥ ਮਂ, ਭਨ੍ਤੇ, ਅਨੁਕਮ੍ਪਂ ਉਪਾਦਾਯਾ’’ਤਿ ਏਵਂ ਯਾਚਨਪੁਬ੍ਬਕਂ ਚੀਵਰਂ ਪਟਿਚ੍ਛਾਪੇਤਿ. ਅਥਾਪੀਤਿਆਦਿ ਤਿਕ੍ਖਤ੍ਤੁਂ ਪਟਿਗ੍ਗਾਹਾਪਨਤੋ ਪਰਂ ਕਤ੍ਤਬ੍ਬਵਿਧਿਦਸ੍ਸਨਂ. ਅਥਾਪੀਤਿ ਤਤੋ ਪਰਮ੍ਪੀਤਿ ਅਤ੍ਥੋ. ਕੇਚਿ ਪਨ ‘‘ਚੀਵਰਂ ਅਪ੍ਪਟਿਗ੍ਗਾਹਾਪੇਤ੍ਵਾ ਪਬ੍ਬਜਨਪ੍ਪਕਾਰਭੇਦਦਸ੍ਸਨਤ੍ਥਂ ‘‘ਅਥਾਪੀ’’ਤਿ ਵੁਤ੍ਤਂ, ਅਥਾਪੀਤਿ ਚ ਅਥ ਵਾਤਿ ਅਤ੍ਥੋ’’ਤਿ ਵਦਨ੍ਤਿ. ‘‘ਅਦਿਨ੍ਨਂ ਨ ਵਟ੍ਟਤੀ’’ਤਿ ਇਮਿਨਾ ਪਬ੍ਬਜ੍ਜਾ ਨ ਰੁਹਤੀਤਿ ਦਸ੍ਸੇਤਿ.

ਪਾਦੇ ¶ ਵਨ੍ਦਾਪੇਤ੍ਵਾਤਿ ਪਾਦਾਭਿਮੁਖਂ ਨਮਾਪੇਤ੍ਵਾ. ਦੂਰੇ ਵਨ੍ਦਨ੍ਤੋਪਿ ਹਿ ਪਾਦੇ ਵਨ੍ਦਤੀਤਿ ਵੁਚ੍ਚਤਿ. ਉਪਜ੍ਝਾਯੇਨ ਵਾਤਿ ਏਤ੍ਥ ਯਸ੍ਸ ਸਨ੍ਤਿਕੇ ਉਪਜ੍ਝਂ ਗਣ੍ਹਾਤਿ, ਅਯਂ ਉਪਜ੍ਝਾਯੋ. ਆਭਿਸਮਾਚਾਰਿਕੇਸੁ ਵਿਨਯਨਤ੍ਥਂ ਯਂ ਆਚਰਿਯਂ ਕਤ੍ਵਾ ਨਿਯ੍ਯਾਤੇਨ੍ਤਿ, ਅਯਂ ਆਚਰਿਯੋ. ਸਚੇ ਪਨ ਉਪਜ੍ਝਾਯੋ ਸਯਮੇਵ ਸਬ੍ਬਂ ਸਿਕ੍ਖਾਪੇਤਿ, ਅਞ੍ਞਸ੍ਮਿਂ ਨ ਨਿਯ੍ਯਾਤੇਤਿ, ਉਪਜ੍ਝਾਯੋਵਸ੍ਸ ਆਚਰਿਯੋਪਿ ਹੋਤਿ, ਯਥਾ ਉਪਸਮ੍ਪਦਾਕਾਲੇ ਸਯਮੇਵ ਕਮ੍ਮਵਾਚਂ ਵਾਚੇਨ੍ਤੋ ਉਪਜ੍ਝਾਯੋਵ ਕਮ੍ਮਵਾਚਾਚਰਿਯੋਪਿ ਹੋਤਿ.

ਅਨੁਨਾਸਿਕਨ੍ਤਂ ਕਤ੍ਵਾ ਦਾਨਕਾਲੇ ਅਨ੍ਤਰਾ ਵਿਚ੍ਛੇਦੋ ਨ ਕਾਤਬ੍ਬੋਤਿ ਆਹ ‘‘ਏਕਸਮ੍ਬਨ੍ਧਾਨੀ’’ਤਿ.

‘‘ਆਭਿਸਮਾਚਾਰਿਕੇਸੁ ਵਿਨੇਤਬ੍ਬੋ’’ਤਿ ਇਮਿਨਾ ਸੇਖਿਯਵਤ੍ਤਖਨ੍ਧਕਵਤ੍ਤੇਸੁ, ਅਞ੍ਞੇਸੁ

ਚ ਸੁਕ੍ਕਵਿਸ੍ਸਟ੍ਠਿਆਦਿਲੋਕਵਜ੍ਜਸਿਕ੍ਖਾਪਦੇਸੁ ਸਾਮਣੇਰੇਹਿ ਵਤ੍ਤਿਤਬ੍ਬਂ, ਤਤ੍ਥ ਅਵਤ੍ਤਮਾਨੋ ਅਲਜ੍ਜੀ, ਦਣ੍ਡਕਮ੍ਮਾਰਹੋ ਚ ਹੋਤੀਤਿ ਦਸ੍ਸੇਤਿ.

੩੫. ਪਾਲ਼ਿਯਂ ¶ ਅਨੁਤ੍ਤਰਂ ਵਿਮੁਤ੍ਤਿਂ ਅਨੁਪਾਪੁਣਾਥਾਤਿ ‘‘ਖੀਣਾਸਵਾ ਮਯਂ, ਕਿਂ ਅਮ੍ਹਾਕਂ ਪਧਾਨੇਨਾ’’ਤਿ ਵਾਸਨਾਦੋਸੇਨ ਵੋਸਾਨਂ ਅਨਾਪਜ੍ਜਿਤ੍ਵਾ ਪਨ੍ਤੇਸੁ ਸੇਨਾਸਨੇਸੁ ਫਲਸਮਾਪਤ੍ਤਿਯਾਵ ਵੀਤਿਨਾਮਨਤ੍ਥਂ, ਤਂ ਦਿਸ੍ਵਾ ਅਞ੍ਞੇਸਮ੍ਪਿ ਦਿਟ੍ਠਾਨੁਗਤਿਸਮਾਪਜ੍ਜਨਤ੍ਥਞ੍ਚ ਓਵਦਤੀਤਿ ਵੇਦਿਤਬ੍ਬਂ.

੩੬. ਇਦਂ ਨੇਸਂ ਪੁਬ੍ਬਕਮ੍ਮਨ੍ਤਿ ਤੇਸਂ ਤਿਂਸਜਨਾਨਂ ਏਕਤੋ ਅਭਿਸਮਯਸ੍ਸ ਪੁਬ੍ਬਕਮ੍ਮਂ. ਅਞ੍ਞਮ੍ਪਿ ਤੇਸਂ ਪਚ੍ਚੇਕਂ ਪੁਬ੍ਬਬੁਦ੍ਧੁਪ੍ਪਾਦੇਸੁ ਸਦ੍ਧਮ੍ਮਸ੍ਸਵਨਸਰਣਗਮਨਦਾਨਸੀਲਸਮਾਧਿਵਿਪਸ੍ਸਨਾਸਮਾਯੋਗਵਸੇਨ ਬਹੁਂ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਅਤ੍ਥੇਵਾਤਿ ਗਹੇਤਬ੍ਬਂ. ਇਤਰਥਾ ਹਿ ਤਦਹੇਵ ਪਟਿਵੇਧੋ, ਏਹਿਭਿਕ੍ਖੁਭਾਵਾਦਿਵਿਸੇਸੋ ਚ ਨ ਸਮ੍ਪਜ੍ਜੇਯ੍ਯ.

ਭਦ੍ਦਵਗ੍ਗਿਯਕਥਾਵਣ੍ਣਨਾ ਨਿਟ੍ਠਿਤਾ.

੩੭-੩੮. ਪਾਲ਼ਿਯਂ ¶ ਅਗਰੂਤਿ ਭਾਰਿਯਂ ਨ ਸਿਯਾਤਿ ਅਤ੍ਥੋ. ਉਭਿਨ੍ਨਂ ਸਜੋਤਿਭੂਤਾਨਨ੍ਤਿ ਉਭੋਸੁ ਸਜੋਤਿਭੂਤੇਸੁ. ਪਤ੍ਤੇ ਪਕ੍ਖਿਪੀਤਿ ਤਂ ਨਾਗਂ ਨਿਹਤਤੇਜਂ ਧਮ੍ਮਦੇਸਨਾਯ ਸਨ੍ਤਪ੍ਪੇਤ੍ਵਾ ਸਰਣਸੀਲਾਨਿ ਦਤ੍ਵਾ ਸਕਲਰਤ੍ਤਿਂ ਭਗਵਨ੍ਤਂ ਪਯਿਰੁਪਾਸਿਤ੍ਵਾ ਠਿਤਂ ਜਟਿਲਾਨਂ ਦਸ੍ਸਨਤ੍ਥਂ ਪਤ੍ਤੇ ਪਕ੍ਖਿਪਿ, ਨ ਅਹਿਤੁਣ੍ਡਿਕੋ ਵਿਯ ਬਲਕ੍ਕਾਰੇਨਾਤਿ ਵੇਦਿਤਬ੍ਬਂ. ਯਤ੍ਰ ਹਿ ਨਾਮਾਤਿ ਯੋ ਨਾਮ.

੩੯. ਅਜ੍ਜਣ੍ਹੋਤਿ ਅਜ੍ਜ ਏਕਦਿਵਸਂ. ਅਗ੍ਗਿਸਾਲਮ੍ਹੀਤਿ ਅਗ੍ਯਾਗਾਰੇ. ਸੁਮਨਾਨਂ ਬੁਦ੍ਧਾਨਂ ਮਨਸਾ ਸਦਿਸੋ ਮਨੋ ਅਸ੍ਸਾਤਿ ਸੁਮਨਮਨਸੋ. ਅਧਿਚਿਤ੍ਤੋਤਿ ਮਹਾਕਰੁਣਾਦੀਹਿ ਅਧਿਚਿਤ੍ਤੋ. ਉਦਿਚ੍ਛਰੇਤਿ ਉਲ੍ਲੋਕੇਸੁਂ, ਪਰਿਵਾਰੇਸੁਨ੍ਤਿ ਅਤ੍ਥੋ. ਅਨੇਕਵਣ੍ਣਾ ਅਚ੍ਚਿਯੋਤਿ ਛਬ੍ਬਣ੍ਣਰਂਸਿਯੋ ਵੁਤ੍ਤਾ. ਅਹਂ ਤੇ ਧੁਵਭਤ੍ਤੇਨ ਪਟਿਮਾਨਨਂ ਕਰਿਸ੍ਸਾਮੀਤਿ ਸੇਸੋ.

੪੦. ਅਭਿਕ੍ਕਨ੍ਤਾਯ ¶ ਰਤ੍ਤਿਯਾਤਿ ਪਰਿਕ੍ਖੀਣਾਯ ਰਤ੍ਤਿਯਾ, ਮਜ੍ਝਰਤ੍ਤਿਸਮਯੇਤਿ ਅਤ੍ਥੋ. ਅਭਿਕ੍ਕਨ੍ਤਵਣ੍ਣਾਤਿ ਅਭਿਰੂਪਚ੍ਛਵਿਵਣ੍ਣਾ. ਕੇਵਲਕਪ੍ਪਨ੍ਤਿ ਏਤ੍ਥ ਕੇਵਲ-ਸਦ੍ਦਸ੍ਸ ਅਨਵਸੇਸਤ੍ਥੋ, ਕਪ੍ਪ-ਸਦ੍ਦਸ੍ਸ ਸਮਨ੍ਤਭਾਵੋ, ਤਸ੍ਮਾ ਅਨਵਸੇਸਂ ਸਮਨ੍ਤਤੋ ਵਨਸਣ੍ਡਨ੍ਤਿ ਅਤ੍ਥੋ. ਚਤੁਦ੍ਦਿਸਾਤਿ ਚਤੂਸੁ ਦਿਸਾਸੁ. ਯਤ੍ਰ ਹਿ ਨਾਮਾਤਿ ਯਂ ਨਾਮ.

੪੩. ਅਙ੍ਗਮਗਧਾਤਿ ਅਙ੍ਗਮਗਧਰਟ੍ਠਵਾਸਿਨੋ. ਇਦ੍ਧਿਪਾਟਿਹਾਰਿਯਨ੍ਤਿ ਅਭਿਞ੍ਞਿਦ੍ਧਿਯੇਵ ਪਟਿਪਕ੍ਖਾਨਂ ਤਿਤ੍ਥਿਯਾਨਂ, ਵੇਨੇਯ੍ਯਸਤ੍ਤਗਤਦੋਸਾਨਞ੍ਚ ਹਰਣਤੋ ਅਪਨਯਨਤੋ ਪਾਟਿਹਾਰਿਯਂ, ਤਂ ਤਂ ਵਾ ਸਤ੍ਤਹਿਤਂ ਪਟਿਚ੍ਚ ਹਰਿਤਬ੍ਬਂ ਪਵਤ੍ਤੇਤਬ੍ਬਨ੍ਤਿ ਪਟਿਹਾਰਿਯਂ, ਤਦੇਵ ਪਾਟਿਹਾਰਿਯਂ. ਇਦ੍ਧਿ ਏਵ ਪਾਟਿਹਾਰਿਯਂ ਇਦ੍ਧਿਪਾਟਿਹਾਰਿਯਂ.

੪੪. ਪਂਸੁਕੂਲਂ ਉਪ੍ਪਨ੍ਨਂ ਹੋਤੀਤਿ ਪੁਣ੍ਣਾਯ ਦਾਸਿਯਾ ਸਰੀਰਂ ਪਰਿਕ੍ਖਿਪਿਤ੍ਵਾ ਛਡ੍ਡਿਤਂ ਸਾਣਮਯਂ ਕਿਮਿਕੁਲਾਕੁਲਂ ਪਰਿਯੇਸਨਵਸੇਨ ਉਪ੍ਪਨ੍ਨਂ ਹੋਤਿ, ਯਂ ਭਗਵਾ ਭੂਮਿਂ ਕਮ੍ਪੇਨ੍ਤੋ ਪਾਰੁਪਿਤ੍ਵਾ ਪਚ੍ਛਾ ਮਹਾਕਸ੍ਸਪਤ੍ਥੇਰਸ੍ਸ ਅਦਾਸਿ, ਤਂ ਸਨ੍ਧਾਯੇਤਂ ਵੁਤ੍ਤਨ੍ਤਿ ਵਦਨ੍ਤਿ. ਕਤ੍ਥ ਨੁ ਖੋਤਿਆਦਿਪਰਿਵਿਤਕ੍ਕੋ ਜਟਿਲਾਨਂ ਵਿਵਿਧਪਾਟਿਹਾਰਿਯਦਸ੍ਸਨਤ੍ਥਂ ਕਤੋ. ਪਾਣਿਨਾ ਖਣਨ੍ਤੋ ਵਿਯ ਇਦ੍ਧਿਯਾ ਮਤ੍ਤਿਕਂ ਅਪਨੇਤ੍ਵਾ ਦਿਨ੍ਨਤ੍ਤਾ ਵੁਤ੍ਤਂ ‘‘ਪਾਣਿਨਾ ਪੋਕ੍ਖਰਣਿਂ ਖਣਿਤ੍ਵਾ’’ਤਿ.

੪੬. ਫਾਲਿਯਨ੍ਤੁ, ਕਸ੍ਸਪ, ਕਟ੍ਠਾਨੀਤਿ ਉਰੁਵੇਲਕਸ੍ਸਪੇਨ ਨਿਵੇਦਿਤੇ ਏਵਮਵੋਚਾਤਿ ਦਟ੍ਠਬ੍ਬਂ. ਏਵਂ ਸੇਸੇਸੁਪਿ.

੪੯. ਅਨ੍ਤਰਟ੍ਠਕਾਸੁ ¶ ਹਿਮਪਾਤਸਮਯੇਤਿ ਏਤ੍ਥ ਮਾਘਮਾਸਸ੍ਸ ਅਵਸਾਨੇ ਚਤਸ੍ਸੋ, ਫਗ੍ਗੁਣਮਾਸਸ੍ਸ ਆਦਿਮ੍ਹਿ ਚਤਸ੍ਸੋਤਿ ਏਵਂ ਉਭਿਨ੍ਨਂ ਮਾਸਾਨਂ ਅਨ੍ਤਰੇ ਅਟ੍ਠਰਤ੍ਤਿਯੋ ਅਨ੍ਤਰਟ੍ਠਕਾ ਨਾਮ. ਤਾਸੁ ਅਨ੍ਤਰਟ੍ਠਕਾਸੁ ਰਤ੍ਤੀਸੁ ਹਿਮਪਾਤਕਾਲੇ. ਉਮ੍ਮੁਜ੍ਜਨਨਿਮੁਜ੍ਜਨਮ੍ਪਿ ਸਹਸਾ ਤਦੁਭਯਕਰਣਵਸੇਨ ਵੁਤ੍ਤਂ.

੫੦. ਉਦਕਵਾਹਕੋਤਿ ਉਦਕੋਘੋ. ਰੇਣੁਹਤਾਯਾਤਿ ਰਜੋਕਿਣ੍ਣਾਯ, ਅਤਿਨ੍ਤਾਯਾਤਿ ਅਤ੍ਥੋ. ਨਾਵਾਯਾਤਿ ਕੁਲ੍ਲੇਨ. ਇਦਂ ਨੁ ਤ੍ਵਂ ਮਹਾਸਮਣਾਤਿ ਇਧ ਨੁ ਤ੍ਵਂ. ਧ-ਕਾਰਸ੍ਸ ਦ-ਕਾਰਂ, ਅਨੁਸਾਰਞ੍ਚ ਕਤ੍ਵਾ ‘‘ਇਦਂ ਨੂ’’ਤਿ ਵੁਤ੍ਤਂ ‘‘ਏਕਮਿਦਾਹ’’ਨ੍ਤਿਆਦੀਸੁ (ਦੀ. ਨਿ. ੧.੧੬੫, ੨੬੫) ਵਿਯ. ‘‘ਇਮਸ੍ਮਿਂ ਪਦੇਸੇ ਤ੍ਵਂ ਨੁ ਖੋ ਠਿਤੋਸੀ’’ਤਿ ਪੁਚ੍ਛਿ. ਅਯਮਹਮਸ੍ਮੀਤਿ ਅਯਮਹਂ ਇਧ ਠਿਤੋਸ੍ਮੀਤਿ ਅਤ੍ਥੋ.

੫੧. ਚਿਰਪਟਿਕਾਤਿ ¶ ਚਿਰਕਾਲਤੋ ਪਟ੍ਠਾਯ. ਕੇਸਮਿਸ੍ਸਂ ਸਬ੍ਬਂ ਪਰਿਕ੍ਖਾਰਂ ਉਦਕੇ ਪਵਾਹੇਤ੍ਵਾਤਿਪਿ ਯੋਜੇਤਬ੍ਬਂ. ਅਰਣਿਕਮਣ੍ਡਲੁਆਦਿਕਾ ਤਾਪਸਪਰਿਕ੍ਖਾਰਾ ਖਾਰੀ ਨਾਮ, ਤਂਹਰਣਕਕਾਜਂ ਖਾਰਿਕਾਜਂ ਨਾਮ. ਅਗ੍ਗਿਹੁਤਮਿਸ੍ਸਨ੍ਤਿ ਅਗ੍ਗਿਪੂਜੋਪਕਰਣਸਹਿਤਂ.

੫੨-੩. ਉਪਸਗ੍ਗੋਤਿ ਉਪਦ੍ਦਵੋ. ‘‘ਅਡ੍ਢੁਡ੍ਢਾਨਿ ਪਾਟਿਹਾਰਿਯਸਹਸ੍ਸਾਨੀ’’ਤਿ ਇਦਂ ਨਾਗਦਮਨਾਦੀਨਿ ਪਨ੍ਨਰਸ ਪਾਟਿਹਾਰਿਯਾਨਿ ਵਜ੍ਜੇਤ੍ਵਾ ਵੁਤ੍ਤਂ ਅਪ੍ਪਕਮਧਿਕਂ ਗਣਨੂਪਗਂ ਨ ਹੋਤੀਤਿ.

੫੪. ਗਯਾਯਨ੍ਤਿ ਗਯਾਨਾਮਿਕਾਯ ਨਦਿਯਾ ਅਦੂਰਭਵਤ੍ਤਾ ਗਾਮੋ ਇਤ੍ਥਿਲਿਙ੍ਗਵਸੇਨ ਗਯਾ ਨਾਮ ਜਾਤੋ, ਤਸ੍ਸਂ. ਗਯਾਸੀਸੇਤਿ ਏਵਂਨਾਮਕੇ ਪਿਟ੍ਠਿਪਾਸਾਣੇ.

‘‘ਯਮਿਦਂ ਚਕ੍ਖੁਸਮ੍ਫਸ੍ਸਪਚ੍ਚਯਾ…ਪੇ… ਸੁਖਂ ਵਾ’’ਤਿਆਦਿਨਾ ਚਕ੍ਖੁਵਿਞ੍ਞਾਣਵੀਥਿਚਿਤ੍ਤੇਸੁ ਸੋਮਨਸ੍ਸਦੋਮਨਸ੍ਸਉਪੇਕ੍ਖਾਵੇਦਨਾਮੁਖੇਨ ਸੇਸਾਰੂਪਕ੍ਖਨ੍ਧਾਨਮ੍ਪਿ ਆਦਿਤ੍ਤਤਂ ਦਸ੍ਸੇਤਿ. ਏਸ ਨਯੋ ਸੇਸੇਸੁਪਿ. ਮਨੋਤਿ ਭਵਙ੍ਗਚਿਤ੍ਤਂ ਮਨੋਦ੍ਵਾਰਸ੍ਸ ਅਧਿਪ੍ਪੇਤਤ੍ਤਾ. ਮਨੋਵਿਞ੍ਞਾਣਨ੍ਤਿ ਮਨੋਦ੍ਵਾਰਵੀਥਿਪਅਯਾਪਨ੍ਨਮੇਵ ਗਹਿਤਂ.

ਉਰੁਵੇਲਪਾਟਿਹਾਰਿਯਕਥਾਵਣ੍ਣਨਾ ਨਿਟ੍ਠਿਤਾ.

੫੫. ਯਞ੍ਞਾ ¶ ਅਭਿਵਦਨ੍ਤੀਤਿ ਯਾਗਹੇਤੁ ਇਜ੍ਝਨ੍ਤੀਤਿ ਵਦਨ੍ਤਿ. ਉਪਧੀਸੂਤਿ ਏਤ੍ਥ ਦੁਕ੍ਖਸੁਖਾਦੀਨਂ ਅਧਿਟ੍ਠਾਨਟ੍ਠੇਨ ਚਤ੍ਤਾਰੋ ਉਪਧੀ ਕਾਮਖਨ੍ਧਕਿਲੇਸਅਭਿਸਙ੍ਖਾਰੂਪਧੀਨਂ ਵਸੇਨ. ਤੇਸੁ ਖਨ੍ਧੂਪਧਿ ਇਧਾਧਿਪ੍ਪੇਤੋਤਿ ਆਹ ‘‘ਖਨ੍ਧੂਪਧੀਸੁ ਮਲਨ੍ਤਿ ਞਤ੍ਵਾ’’ਤਿ. ਯਞ੍ਞਾਤਿ ਯਞ੍ਞਹੇਤੁ. ਯਿਟ੍ਠੇਤਿ ਮਹਾਯਾਗੇ. ਹੁਤੇਤਿ ਦਿਵਸੇ ਦਿਵਸੇ ਕਤ੍ਤਬ੍ਬੇ ਅਗ੍ਗਿਪਰਿਚਰਣੇ. ਕਿਂ ਵਕ੍ਖਾਮੀਤਿ ਕਥਂ ਵਕ੍ਖਾਮਿ.

੫੭-੮. ਆਸੀਸਨਾਤਿ ਮਨੋਰਥਾ. ਸਿਙ੍ਗੀਸੁਵਣ੍ਣਨਿਕ੍ਖੇਨਾਤਿ ਸਿਙ੍ਗੀਸੁਵਣ੍ਣਸ੍ਸ ਰਾਸਿਨਾ. ਸੁਵਣ੍ਣੇਸੁ ਹਿ ਯੁਤ੍ਤਿਕਤਂ ਹੀਨਂ. ਤਤੋ ਰਸਵਿਦ੍ਧਂ ਸੇਟ੍ਠਂ, ਤਤੋ ਆਕਰੁਪ੍ਪਨ੍ਨਂ ਸੇਟ੍ਠਂ, ਤਤੋ ਯਂਕਿਞ੍ਚਿ ਦਿਬ੍ਬਸੁਵਣ੍ਣਂ ਸੇਟ੍ਠਂ ¶ , ਤਤ੍ਰਾਪਿ ਚਾਮੀਕਰਂ, ਤਤੋ ਸਾਤਕੁਮ੍ਭਂ, ਤਤੋ ਜਮ੍ਬੁਨਦਂ, ਤਤੋਪਿ ਸਿਙ੍ਗੀਸੁਵਣ੍ਣਂ ਸੇਟ੍ਠਂ. ਤਸ੍ਸ ਨਿਕ੍ਖਂ ਨਾਮ ਪਞ੍ਚਸੁਵਣ੍ਣਪਰਿਮਾਣਂ. ਅਟ੍ਠਸੁਵਣ੍ਣਾਦਿਭੇਦਂ ਅਨੇਕਵਿਧਮ੍ਪਿ ਵਦਨ੍ਤਿ. ਦਸਸੁ ਅਰਿਯਵਾਸੇਸੂਤਿ –

‘‘ਇਧ, ਭਿਕ੍ਖਵੇ, ਭਿਕ੍ਖੁ ਪਞ੍ਚਙ੍ਗਵਿਪ੍ਪਹੀਨੋ ਹੋਤਿ ਛਲ਼ਙ੍ਗਸਮਨ੍ਨਾਗਤੋ ਏਕਾਰਕ੍ਖੋ ਚਤੁਰਾਪਸ੍ਸੇਨੋ ਪਣੁਨ੍ਨਪਚ੍ਚੇਕਸਚ੍ਚੋ ਸਮਵਯਸਟ੍ਠੇਸਨੋ ਅਨਾਵਿਲਸਙ੍ਕਪ੍ਪੋ ਪਸ੍ਸਦ੍ਧਕਾਯਸਙ੍ਖਾਰੋ ਸੁਵਿਮੁਤ੍ਤਚਿਤ੍ਤੋ ਸੁਵਿਮੁਤ੍ਤਪਞ੍ਞੋ’’ਤਿ (ਦੀ. ਨਿ. ੩.੩੪੮, ੩੬੦; ਅ. ਨਿ. ੧੦.੧੯) –

ਏਵਮਾਗਤੇਸੁ ਦਸਸੁ ਅਰਿਯਵਾਸੇਸੁ. ਤਤ੍ਥ ਪਞ੍ਚਙ੍ਗਵਿਪ੍ਪਹੀਨੋਤਿ ਪਞ੍ਚਨੀਵਰਣੇਹਿ ਵਿਪ੍ਪਯੁਤ੍ਤਤਾ ਵੁਤ੍ਤਾ. ਛਲ਼ਙ੍ਗਸਮਨ੍ਨਾਗਤੋਤਿ ਇਟ੍ਠਾਦੀਸੁ ਛਸੁ ਆਰਮ੍ਮਣੇਸੁ ਸੋਮਨਸ੍ਸਿਤਾਦਿਪਟਿਪਕ੍ਖਾ ਛਲ਼ਙ੍ਗੁਪੇਕ੍ਖਾ ਵੁਤ੍ਤਾ. ਏਕਾਰਕ੍ਖੋਤਿ ਉਪਟ੍ਠਿਤਸਤਿਤਾ. ਸਙ੍ਖਾਯਸੇਵਨਾ ਅਧਿਵਾਸਨਾ ਪਰਿਵਜ੍ਜਨਾ ਵਿਨੋਦਨਾਸਙ੍ਖਾਤਾਨਿ ਚਤ੍ਤਾਰਿ ਅਪਸ੍ਸੇਨਾ ਨਿਸ੍ਸਯਾ ਏਤਸ੍ਸਾਤਿ ਚਤੁਰਾਪਸ੍ਸੇਨੋ, ਏਤੇਨ ਚ ਤੇ ਨਿਸ੍ਸਯਾ ਦਸ੍ਸਿਤਾ. ਪਣੁਨ੍ਨਾਨਿ ਅਪਨੀਤਾਨਿ ਦਿਟ੍ਠਿਗਤਿਕੇਹਿ ਪਚ੍ਚੇਕਂ ਗਹਿਤਾਨਿ ਦਿਟ੍ਠਿਸਚ੍ਚਾਨਿ ਯਸ੍ਸ, ਸੋ ਪਣੁਨ੍ਨਪਚ੍ਚੇਕਸਚ੍ਚੋ, ਤੇਨ ਲੋਕਿਯਞਾਣੇਨ ਦਿਟ੍ਠਿਪ੍ਪਹਾਨਂ ਵੁਤ੍ਤਂ. ਕਾਮੇਸਨਾ ਭਵੇਸਨਾਬ੍ਰਹ੍ਮਚਰਿਯੇਸਨਾਸਙ੍ਖਾਤਾ ਏਸਨਾ ਸਮ੍ਮਦੇਵ ਅਵਯਾ ਅਨੂਨਾ ਸਟ੍ਠਾ ਨਿਸਟ੍ਠਾ ਅਨੇਨਾਤਿ ਸਮਵਯਸਟ੍ਠੇਸਨੋ. ਏਤੇਨ ਤਿਣ੍ਣਂ ਏਸਨਾਨਂ ਅਭਾਵੋ ਵੁਤ੍ਤੋ. ‘‘ਅਨਾਵਿਲਸਙ੍ਕਪ੍ਪੋ’’ਤਿ ਇਮਿਨਾ ਕਾਮਵਿਤਕ੍ਕਾਦੀਹਿ ਅਨਾਵਿਲਚਿਤ੍ਤਤਾ. ‘‘ਪਸ੍ਸਦ੍ਧਕਾਯਸਙ੍ਖਾਰੋ’’ਤਿ ਇਮਿਨਾ ਚਤੁਤ੍ਥਜ੍ਝਾਨਸਮਾਯੋਗੇਨ ਵਿਗਤਦਰਥਤਾ ਵੁਤ੍ਤਾ. ‘‘ਸੁਵਿਮੁਤ੍ਤਚਿਤ੍ਤੋ’’ਤਿ ਇਮਿਨਾ ਮਗ੍ਗੋ. ‘‘ਸੁਵਿਮੁਤ੍ਤਪਞ੍ਞੋ’’ਤਿ ਇਮਿਨਾ ਪਚ੍ਚਵੇਕ੍ਖਣਞਾਣਮੁਖੇਨ ਫਲਞਾਣਂ ਵੁਤ੍ਤਂ. ਏਤੇ ਹਿ ਅਰਿਯਾ ਵਸਨ੍ਤਿ ਏਤ੍ਥਾਤਿ ਅਰਿਯਵਾਸਾਤਿ ਵੁਚ੍ਚਨ੍ਤਿ ¶ . ਤੇ ਪਨ ਵਾਸਾ ਵੁਤ੍ਥਾ ਵਸਿਤਾ ਸਮ੍ਪਾਦਿਤਾ ਯੇਨ, ਸੋ ਵੁਤ੍ਥਵਾਸੋ, ਭਗਵਾ. ਦਸਬਲੋਤਿ ਦਸਹਿ ਕਾਯਬਲੇਹਿ, ਞਾਣਬਲੇਹਿ ਚ ਉਪੇਤੋ. ਯਾਨਿ ਹੇਤਾਨਿ –

‘‘ਕਾਲ਼ਾਵਕਞ੍ਚ ਗਙ੍ਗੇਯ੍ਯਂ, ਪਣ੍ਡਰਂ ਤਮ੍ਬਪਿਙ੍ਗਲਂ;

ਗਨ੍ਧਮਙ੍ਗਲਹੇਮਞ੍ਚ, ਉਪੋਸਥਛਦ੍ਦਨ੍ਤਿਮੇ ਦਸਾ’’ਤਿ. (ਮ. ਨਿ. ਅਟ੍ਠ. ੧.੧੪੮; ਸਂ. ਨਿ. ਅਟ੍ਠ. ੨.੨.੨੨; ਅ. ਨਿ. ਅਟ੍ਠ. ੩.੧੦.੨੧; ਵਿਭ. ਅਟ੍ਠ. ੭੬੦; ਉਦਾ. ਅਟ੍ਠ. ੭੫; ਬੁ. ਵ. ਅਟ੍ਠ. ੧.੩੯; ਚੂਲ਼ਨਿ. ਅਟ੍ਠ. ੮੧; ਪਟਿ. ਮ. ਅਟ੍ਠ. ੨.੨.੪੪) –

ਏਵਂ ¶ ਵੁਤ੍ਤਾਨਿ ਦਸਹਤ੍ਥਿਕੁਲਾਨਿ ਪੁਰਿਮਪੁਰਿਮਤੋ ਦਸਬਲਗੁਣੋਪੇਤਾਨਿ, ਤੇਸੁ ਸਬ੍ਬਜੇਟ੍ਠਾਨਂ ਦਸਨ੍ਨਂ ਛਦ੍ਦਨ੍ਤਾਨਂ ਬਲਾਨਿ ਭਗਵਤੋ ਕਾਯਸ੍ਸ ਦਸਬਲਾਨਿ ਨਾਮ. ਤਞ੍ਚ ਕਾਲ਼ਾਵਕਸਙ੍ਖਾਤਾਨਂ ਪਕਤਿਹਤ੍ਥੀਨਂ ਕੋਟਿਸਹਸ੍ਸਸ੍ਸ, ਮਜ੍ਝਿਮਪੁਰਿਸਾਨਂ ਪਨ ਦਸਨ੍ਨਂ ਕੋਟਿਸਹਸ੍ਸਾਨਞ੍ਚ ਬਲਂ ਹੋਤਿ, ਤਂ ‘‘ਨਾਰਾਯਨਸਙ੍ਘਾਤਬਲ’’ਨ੍ਤਿਪਿ ਵੁਚ੍ਚਤਿ.

ਯਾਨਿ ਪਨੇਤਾਨਿ ਪਾਲ਼ਿਯਂ ‘‘ਇਧ, ਸਾਰਿਪੁਤ੍ਤ, ਤਥਾਗਤੋ ਠਾਨਞ੍ਚ ਠਾਨਤੋ ਅਟ੍ਠਾਨਞ੍ਚ ਅਟ੍ਠਾਨਤੋ ਯਥਾਭੂਤਂ ਪਜਾਨਾਤੀ’’ਤਿਆਦਿਨਾ (ਮ. ਨਿ. ੧.੧੪੮; ਅ. ਨਿ. ੧੦.੨੧; ਵਿਭ. ੭੬੦; ਪਟਿ. ਮ. ੨.੪੪) ਵੁਤ੍ਤਾਨਿ ਠਾਨਾਠਾਨਞਾਣਬਲਂ, ਕਮ੍ਮਵਿਪਾਕਞਾਣਬਲਂ, ਸਬ੍ਬਤ੍ਥਗਾਮਿਨਿਪਟਿਪਦਾਞਾਣਬਲਂ, ਅਨੇਕਧਾਤੁਨਾਨਾਧਾਤੁਲੋਕਞਾਣਬਲਂ, ਸਤ੍ਤਾਨਂ ਨਾਨਾਧਿਮੁਤ੍ਤਿਕਤਾਞਾਣਬਲਂ, ਇਨ੍ਦ੍ਰਿਯਪਰੋਪਰਿਯਤ੍ਤਞਾਣਬਲਂ, ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਵੋਦਾਨਵੁਟ੍ਠਾਨਞਾਣਬਲਂ, ਪੁਬ੍ਬੇਨਿਵਾਸਞਾਣਬਲਂ, ਦਿਬ੍ਬਚਕ੍ਖੁਞਾਣਬਲਂ, ਆਸਵਕ੍ਖਯਞਾਣਬਲਨ੍ਤਿ ਦਸਬਲਞਾਣਾਨਿ, ਇਮਾਨਿ ਭਗਵਤੋ ਦਸਬਲਾਨਿ ਨਾਮ. ਦਸਹਿ ਅਸੇਕ੍ਖੇਹਿ ਅਙ੍ਗੇਹੀਤਿ ਅਰਹਤ੍ਤਫਲਸਮ੍ਪਯੁਤ੍ਤੇਹਿ ਪਾਲ਼ਿਯਂ ‘‘ਅਸੇਕ੍ਖਾ ਸਮ੍ਮਾਦਿਟ੍ਠਿ…ਪੇ… ਅਸੇਕ੍ਖੋ ਸਮ੍ਮਾਸਮਾਧਿ, ਅਸੇਕ੍ਖਂ ਸਮ੍ਮਾਞਾਣਂ, ਅਸੇਕ੍ਖਾ ਸਮ੍ਮਾਵਿਮੁਤ੍ਤੀ’’ਤਿ (ਦੀ. ਨਿ. ੩.੩੪੮, ੩੬੦) ਏਵਂ ਵੁਤ੍ਤੇਹਿ ਦਸਹਿ ਅਸੇਕ੍ਖਧਮ੍ਮੇਹਿ ਸਮਨ੍ਨਾਗਤੋ. ਏਤ੍ਥ ਚ ਦਸ੍ਸਨਟ੍ਠੇਨ ਵੁਤ੍ਤਾ ਸਮ੍ਮਾਦਿਟ੍ਠਿ ਏਵ ਜਾਨਨਟ੍ਠੇਨ ਸਮ੍ਮਾਞਾਣਨ੍ਤਿਪਿ ਵੁਤ੍ਤਾ, ਵੁਤ੍ਤਾਵਸੇਸਾ ਪਨ ਫਲਚਿਤ੍ਤਸਮ੍ਪਯੁਤ੍ਤਾ ਸਬ੍ਬੇ ਫਸ੍ਸਾਦਿਧਮ੍ਮਾ ਸਮ੍ਮਾਵਿਮੁਤ੍ਤੀਤਿ ਵੁਤ੍ਤਾਤਿ ਦਟ੍ਠਬ੍ਬਂ.

ਬਿਮ੍ਬਿਸਾਰਸਮਾਗਮਕਥਾਵਣ੍ਣਨਾ ਨਿਟ੍ਠਿਤਾ.

ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾਵਣ੍ਣਨਾ

੬੦. ਸਾਰੀਬ੍ਰਾਹ੍ਮਣਿਯਾ ¶ ਪੁਤ੍ਤੋ ਸਾਰਿਪੁਤ੍ਤੋ. ਮੋਗ੍ਗਲੀਬ੍ਰਾਹ੍ਮਣਿਯਾ ਪੁਤ੍ਤੋ ਮੋਗ੍ਗਲ੍ਲਾਨੋ. ਛਨ੍ਨਪਰਿਬ੍ਬਾਜਕਸ੍ਸਾਤਿ ਸੇਤਵਤ੍ਥੇਨ ਹਿਰਿਕੋਪੀਨਂ ਛਾਦੇਤ੍ਵਾ ਵਿਚਰਣਕਪਰਿਬ੍ਬਾਜਕਸ੍ਸ, ਤੇਨ ‘‘ਨਾਯਂ ਨਗ੍ਗਪਰਿਬ੍ਬਾਜਕੋ’’ਤਿ ਦਸ੍ਸੇਤਿ. ‘‘ਉਪਞ੍ਞਾਤ’’ਨ੍ਤਿ ਇਮਸ੍ਸ ਵਿਵਰਣਂ ਞਾਤੋ ਚੇਵਾਤਿ. ‘‘ਮਗ੍ਗ’’ਨ੍ਤਿ ਇਮਸ੍ਸ ਵਿਵਰਣਂ ਉਪਗਤੋ ਚ ਮਗ੍ਗੋਤਿ. ਤੇਨ ਚ ਉਪਞ੍ਞਾਤਨ੍ਤਿ ਏਤ੍ਥ ਞਾਤ-ਸਦ੍ਦੋ ਞਾਣਪਰਿਯਾਯੋ. ਮਗ੍ਗਨ੍ਤਿ ਲਿਙ੍ਗਵਿਪਲ੍ਲਾਸੇਨ ਮਗ੍ਗੋਵ ਵੁਤ੍ਤੋ. ਉਪਸਦ੍ਦੋ ਚ ਉਪਗਮਨਤ੍ਥੋ ਮਗ੍ਗਸਦ੍ਦੇਨਪਿ ਸਮ੍ਬਨ੍ਧਿਤਬ੍ਬੋਤਿ ਦਸ੍ਸੇਤਿ. ਇਦਂ ਵੁਤ੍ਤਂ ਹੋਤਿ – ਯਸ੍ਮਾ ¶ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਨਂ ਨਾਮ ਅਤ੍ਥਿਕੇਹਿ ਉਪਞ੍ਞਾਤਂ ਉਪਗਤਞਾਣਞ੍ਚੇਵ ਹੋਤਿ, ਤੇਹਿ ਉਪਗਤੋ ਪਟਿਪਨ੍ਨੋ ਮਗ੍ਗੋ ਚ, ਤਸ੍ਮਾ ਯਂਨੂਨਾਹਂ ਅਨੁਬਨ੍ਧੇਯ੍ਯਨ੍ਤਿ. ਉਪਞ੍ਞਾਤਂ ਨਿਬ੍ਬਾਨਨ੍ਤਿ ਉਪਪਤ੍ਤਿਯਾ ਅਨੁਮਾਨੇਨ ਞਾਤਂ ਨਿਬ੍ਬਾਨਂ. ‘‘ਮਗ੍ਗ’’ਨ੍ਤਿ ਇਮਸ੍ਸ ਵਿਵਰਣਂ ਮਗ੍ਗਨ੍ਤੋਤਿ, ਅਨੁਮਾਨੇਨ ਞਾਤਂ ਪਚ੍ਚਕ੍ਖਤੋ ਦਸ੍ਸਨਤ੍ਥਾਯ ਗਵੇਸਨ੍ਤੋਤਿ ਅਤ੍ਥੋ.

ਨਿਰੋਧੋ ਚ ਨਿਰੋਧੂਪਾਯੋ ਚ ਏਕਸੇਸੇਨ ਨਿਰੋਧੋਤਿ ਵੁਤ੍ਤੋਤਿ ਦਸ੍ਸੇਨ੍ਤੋ ‘‘ਅਥ ਵਾ’’ਤਿਆਦਿਮਾਹ. ਪਟਿਪਾਦੇਨ੍ਤੋਤਿ ਨਿਗਮੇਨ੍ਤੋ.

ਇਤੋ ਉਤ੍ਤਰੀਤਿ ਇਤੋ ਮਯਾ ਲਦ੍ਧਸੋਤਾਪਤ੍ਤਿਤੋ ਉਤ੍ਤਰਿ ਇਤਰਮਗ੍ਗਤ੍ਤਯਂ ਯਦਿਪਿ ਨਤ੍ਥਿ, ਤਥਾਪਿ ਏਸੋ ਏਵ ਮਯਾ ਗਵੇਸਿਤੋ ਨਿਬ੍ਬਾਨਧਮ੍ਮੋਤਿ ਅਤ੍ਥੋ.

੬੨-੩. ਤਦਾਰਮ੍ਮਣਾਯਾਤਿ ਨਿਬ੍ਬਾਨਾਰਮ੍ਮਣਾਯ ਸੋਤਾਪਤ੍ਤਿਫਲਵਿਮੁਤ੍ਤਿਯਾ. ਤੇਸਂ ਆਯਸ੍ਮਨ੍ਤਾਨਨ੍ਤਿ ਸਪਰਿਸਾਨਂ ਤੇਸਂ ਦ੍ਵਿਨ੍ਨਂ ਪਰਿਸਾਨਂ ਤਸ੍ਮਿਂਯੇਵ ਖਣੇ ਭਗਵਤੋ ਧਮ੍ਮਂ ਸੁਤ੍ਵਾ ਅਰਹਤ੍ਤਂ ਪਾਪੁਣਿ, ਅਗ੍ਗਸਾਵਕਾ ਪਨ ਅਤ੍ਤਨੋ ਞਾਣਕਿਚ੍ਚਸ੍ਸ ਮਹਨ੍ਤਤਾਯ ਕਤਿਪਾਹਚ੍ਚਯੇਨ. ਤੇਨਾਹ ‘‘ਏਵ’’ਨ੍ਤਿਆਦਿ. ਉਸੂਯਨਕਿਰਿਯਾਯ ਕਮ੍ਮਭਾਵਂ ਸਨ੍ਧਾਯ ‘‘ਉਪਯੋਗਤ੍ਥੇਵਾ’’ਤਿ ਵੁਤ੍ਤਂ.

ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾਵਣ੍ਣਨਾ ਨਿਟ੍ਠਿਤਾ.

੬੪. ਵਜ੍ਜਾਵਜ੍ਜਨ੍ਤਿ ਖੁਦ੍ਦਕਂ, ਮਹਨ੍ਤਞ੍ਚ ਵਜ੍ਜਂ. ਉਤ੍ਤਿਟ੍ਠਪਤ੍ਤਨ੍ਤਿ ਏਤ੍ਥ ਉਤ੍ਤਿਟ੍ਠਂ ਨਾਮ ਪਿਣ੍ਡਾਯ ਚਰਣਂ ਵੁਚ੍ਚਤਿ ‘‘ਉਤ੍ਤਿਟ੍ਠੇ ਨਪ੍ਪਮਜ੍ਜੇਯ੍ਯਾ’’ਤਿਆਦੀਸੁ (ਧ. ਪ. ੧੬੮) ਵਿਯ. ਉਤ੍ਤਿਟ੍ਠਤ੍ਥਾਯ ¶ ਗਹਿਤਂ ਪਤ੍ਤਂ ਉਤ੍ਤਿਟ੍ਠਪਤ੍ਤਂ, ਤੇਨਾਹ ‘‘ਪਿਣ੍ਡਾਯ ਚਰਣਕਪਤ੍ਤ’’ਨ੍ਤਿ. ਤਸ੍ਸ ਉਪਨਾਮੇ ਕੋ ਦੋਸੋਤਿ ਆਹ ‘‘ਤਸ੍ਮਿਂ ਹੀ’’ਤਿਆਦਿ. ਤਸ੍ਮਾਤਿ ਯਸ੍ਮਾ ਮਨੁਸ੍ਸਾ ਏਤਸ੍ਮਿਂਯੇਵ ਏਤੇ ਭੁਞ੍ਜਨ੍ਤੀਤਿ ਉਤ੍ਤਿਟ੍ਠਪਤ੍ਤੇ ਉਚ੍ਛਿਟ੍ਠਸਞ੍ਞਿਨੋ, ਤਸ੍ਮਾ ਉਤ੍ਤਿਟ੍ਠਪਤ੍ਤਨ੍ਤਿ ਵੁਤ੍ਤਂ ਉਤ੍ਤਿਟ੍ਠ-ਸਦ੍ਦੇਨੇਵ ਮਨੁਸ੍ਸਾਨਂ ਸਞ੍ਞਾਯ ਉਚ੍ਛਿਟ੍ਠਤਾਪਿ ਗਮ੍ਮਤੀਤਿ. ਕੇਚਿ ਪਨ ‘‘ਉਚ੍ਛਿਟ੍ਠਸਦ੍ਦੇਨ ਸਮਾਨਤ੍ਥੋ ਉਤ੍ਤਿਟ੍ਠਸਦ੍ਦੋ’’ਤਿ ਵਦਨ੍ਤਿ. ‘‘ਉਤ੍ਤਿਟ੍ਠਾ’’ਤਿ ਤ੍ਵਾਪਚ੍ਚਯਨ੍ਤੋਪਿ ਹੋਤੀਤਿ ਆਹ ‘‘ਉਟ੍ਠਹਿਤ੍ਵਾ’’ਤਿ. ਉਪਜ੍ਝਾਯਂ ਗਹੇਤੁਨ੍ਤਿ ਉਪਜ੍ਝਾਯਤ੍ਤਂ ¶ ਮਨਸਾ ਗਹੇਤੁਂ, ਯਾਚਨਵਚਨੇਨ ਤਸ੍ਸ ਅਨੁਮਤਿਂ ਗਹੇਤੁਨ੍ਤਿ ਵਾ ਅਤ੍ਥੋ.

੬੫. ਪਤਿਸ੍ਸਯਨਂ ਪਤਿਸ੍ਸੋ, ਗਰੁਂ ਨਿਸ੍ਸਾਯ ਵਤ੍ਤਨਭਾਵੋ, ਯਂਕਿਞ੍ਚਿ ਗਾਰਵਨ੍ਤਿ ਅਤ੍ਥੋ. ਸਹ ਪਤਿਸ੍ਸੇਨ ਸਪ੍ਪਤਿਸ੍ਸੋ, ਪਰਂ ਜੇਟ੍ਠਂ ਕਤ੍ਵਾ ਤਸ੍ਸੋਵਾਦੇ ਵਤ੍ਤਨਤਾਤਿ ਅਤ੍ਥੋ. ਤੇਨਾਹ ‘‘ਜੇਟ੍ਠਕਭਾਵਞ੍ਚ ਉਪਟ੍ਠਪੇਤ੍ਵਾ’’ਤਿ. ਸਾਹੂਤਿ ਸਾਧੁ ਸੁਨ੍ਦਰਂ. ਲਹੂਤਿ ਅਗਰੁ, ਸੁਭਰਤਾਤਿ ਅਤ੍ਥੋ. ਓਪਾਯਿਕਨ੍ਤਿ ਉਪਾਯਪਟਿਸਂਯੁਤ੍ਤਂ, ਏਵਂ ਪਟਿਪਜ੍ਜਨਂ ਨਿਤ੍ਥਰਣੂਪਾਯੋਤਿ ਅਤ੍ਥੋ. ਪਤਿਰੂਪਨ੍ਤਿ ਸਾਮੀਚਿਕਮ੍ਮਮਿਦਨ੍ਤਿ ਅਤ੍ਥੋ. ਪਾਸਾਦਿਕੇਨਾਤਿ ਪਸਾਦਾਵਹੇਨ ਕਾਯਵਚੀਪਯੋਗੇਨ ਸਮ੍ਪਾਦੇਹੀਤਿ ਅਤ੍ਥੋ. ਕਾਯੇਨਾਤਿ ਏਤਦਤ੍ਥਵਿਞ੍ਞਾਪਕਂ ਹਤ੍ਥਮੁਦ੍ਦਾਦਿਂ ਦਸ੍ਸੇਨ੍ਤੋ ਕਾਯੇਨ ਵਿਞ੍ਞਾਪੇਤਿ. ਸਾਧੂਤਿ ਸਮ੍ਪਟਿਚ੍ਛਨਂ ਸਨ੍ਧਾਯਾਤਿ ਉਪਜ੍ਝਾਯੇਨ ‘‘ਸਾਹੂ’’ਤਿਆਦੀਸੁ ਵੁਤ੍ਤੇਸੁ ਸਦ੍ਧਿਵਿਹਾਰਿਕਸ੍ਸ ‘‘ਸਾਧੂ’’ਤਿ ਸਮ੍ਪਟਿਚ੍ਛਨਂ ਵਚਨਂ ਸਨ੍ਧਾਯ ‘‘ਕਾਯੇਨ ਵਿਞ੍ਞਾਪੇਤੀ’’ਤਿਆਦਿ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਆਯਾਚਨਦਾਨਮਤ੍ਤੇਨਾਤਿ ਸਦ੍ਧਿਵਿਹਾਰਿਕਸ੍ਸ ਪਠਮਂ ਆਯਾਚਨਮਤ੍ਤੇਨ, ਤਤੋ ਉਪਜ੍ਝਾਯਸ੍ਸ ਚ ‘‘ਸਾਹੂ’’ਤਿਆਦਿਨਾ ਵਚਨਮਤ੍ਤੇਨਾਤਿ ਅਤ੍ਥੋ.

੬੬. ਅਸ੍ਸਾਤਿ ਸਦ੍ਧਿਵਿਹਾਰਿਕਸ੍ਸ. ਦ੍ਵੇ ਚੀਵਰਾਨੀਤਿ ਉਤ੍ਤਰਾਸਙ੍ਗਂ, ਸਙ੍ਘਾਟਿਞ੍ਚ ਸਨ੍ਧਾਯ ਵਦਤਿ. ਇਤੋ ਪਟ੍ਠਾਯਾਤਿ ‘‘ਨ ਉਪਜ੍ਝਾਯਸ੍ਸ ਭਣਮਾਨਸ੍ਸਾ’’ਤਿ ਏਤ੍ਥ ਨ-ਕਾਰਤੋ ਪਟ੍ਠਾਯ, ਤੇਨ ‘‘ਨਾਤਿਦੂਰੇ’’ਤਿਆਦੀਸੁ ਨ-ਕਾਰਪਟਿਸਿਦ੍ਧੇਸੁ ਆਪਤ੍ਤਿ ਨਤ੍ਥੀਤਿ ਦਸ੍ਸੇਤਿ. ਸਬ੍ਬਤ੍ਥ ਦੁਕ੍ਕਟਾਪਤ੍ਤੀਤਿ ਆਪਦਾਉਮ੍ਮਤ੍ਤਖਿਤ੍ਤਚਿਤ੍ਤਵੇਦਨਟ੍ਟਤਾਦੀਹਿ ਵਿਨਾ ਪਣ੍ਣਤ੍ਤਿਂ ਅਜਾਨਿਤ੍ਵਾਪਿ ਵਦਨ੍ਤਸ੍ਸ ਗਿਲਾਨਸ੍ਸਪਿ ਦੁਕ੍ਕਟਮੇਵ. ਆਪਦਾਸੁ ਹਿ ਅਨ੍ਤਰਨ੍ਤਰਾ ਕਥਾ ਵਤ੍ਤੁਂ ਵਟ੍ਟਤਿ. ਏਵਮਞ੍ਞੇਸੁਪਿ ਨ-ਕਾਰਪਟਿਸਿਦ੍ਧੇਸੁ ਈਦਿਸੇਸੁ, ਇਤਰੇਸੁ ਪਨ ਗਿਲਾਨੋਪਿ ਨ ਮੁਚ੍ਚਤਿ. ਪਾਲ਼ਿਯਂ ‘‘ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ’’ਤਿ ਇਦਂ ਪੁਬ੍ਬੇ ਤਤ੍ਥ ਠਪਿਤਪਤ੍ਤਾਦਿਨਾ ਅਸਙ੍ਘਟ੍ਟਨਤ੍ਥਾਯ ਵੁਤ੍ਤਂ, ਚਕ੍ਖੁਨਾ ਓਲੋਕੇਤ੍ਵਾਪਿ ਅਞ੍ਞੇਸਂ ਅਭਾਵਂ ਞਤ੍ਵਾਪਿ ਠਪੇਤੁਂ ਵਟ੍ਟਤਿ ਏਵ. ਆਪਤ੍ਤਿਯਾ ਆਸਨ੍ਨਨ੍ਤਿ ਆਪਤ੍ਤਿਕਰਣਮੇਵ.

ਗਾਮੇਤਿ ਅਨ੍ਤੋਗਾਮੇ ਤਾਦਿਸੇ ਮਣ੍ਡਪਾਦਿਮ੍ਹਿ. ਅਨ੍ਤਰਘਰੇਤਿ ਅਨ੍ਤੋਗੇਹੇ. ਪਟਿਕ੍ਕਮਨੇਤਿ ਆਸਨਸਾਲਾਯਂ. ਧੋਤਵਾਲਿਕਾਯਾਤਿ ਉਦਕੇਨ ਗਤਟ੍ਠਾਨੇ ਨਿਰਜਾਯ ਪਰਿਸੁਦ੍ਧਵਾਲਿਕਾਯ. ਨਿਦ੍ਧੂਮੇਤਿ ਜਨ੍ਤਾਘਰੇ ਜਲਿਯਮਾਨਅਗ੍ਗਿਧੂਮਰਹਿਤੇ. ਜਨ੍ਤਾਘਰਞ੍ਹਿ ਨਾਮ ਹਿਮਪਾਤਬਹੁਲੇਸੁ ਦੇਸੇਸੁ ਤਪ੍ਪਚ੍ਚਯਰੋਗਪੀਲ਼ਾਦਿਨਿਵਾਰਣਤ੍ਥਂ ¶ ¶ ਸਰੀਰਸੇਦਾਪਨਟ੍ਠਾਨਂ. ਤਤ੍ਥ ਕਿਰ ਅਨ੍ਧਕਾਰਪਟਿਚ੍ਛਨ੍ਨਤਾਯ ਬਹੂਪਿ ਏਕਤੋ ਪਵਿਸਿਤ੍ਵਾ ਚੀਵਰਂ ਨਿਕ੍ਖਿਪਿਤ੍ਵਾ ਅਗ੍ਗਿਤਾਪਪਰਿਹਾਰਾਯ ਮਤ੍ਤਿਕਾਯ ਮੁਖਂ ਲਿਮ੍ਪਿਤ੍ਵਾ ਸਰੀਰਂ ਯਾਵਦਤ੍ਥਂ ਸੇਦੇਤ੍ਵਾ ਚੁਣ੍ਣਾਦੀਹਿ ਉਬ੍ਬਟ੍ਟੇਤ੍ਵਾ ਨਹਾਯਨ੍ਤਿ. ਤੇਨੇਵ ਪਾਲ਼ਿਯਂ ‘‘ਚੁਣ੍ਣਂ ਸਨ੍ਨੇਤਬ੍ਬ’’ਨ੍ਤਿਆਦਿ ਵੁਤ੍ਤਂ. ਉਲ੍ਲੋਕਨ੍ਤਿ ਉਦ੍ਧਂ ਓਲੋਕਨਟ੍ਠਾਨਂ. ਉਪਰਿਭਾਗਨ੍ਤਿ ਅਤ੍ਥੋ.

ਅਞ੍ਞਤ੍ਥ ਨੇਤਬ੍ਬੋਤਿ ਯਤ੍ਥ ਵਿਹਰਤੋ ਸਾਸਨੇ ਅਨਭਿਰਤਿ ਉਪ੍ਪਨ੍ਨਾ, ਤਤੋ ਅਞ੍ਞਤ੍ਥ ਕਲ੍ਯਾਣਮਿਤ੍ਤਾਦਿਸਮ੍ਪਤ੍ਤਿਯੁਤ੍ਤਟ੍ਠਾਨੇ ਨੇਤਬ੍ਬੋ. ਵਿਸਭਾਗਪੁਗ੍ਗਲਾਨਨ੍ਤਿ ਲਜ੍ਜਿਨੋ ਵਾ ਅਲਜ੍ਜਿਨੋ ਵਾ ਉਪਜ੍ਝਾਯਸ੍ਸ ਅਵਡ੍ਢਿਕਾਮੇ ਸਨ੍ਧਾਯ ਵੁਤ੍ਤਂ. ਸਚੇ ਪਨ ਉਪਜ੍ਝਾਯੋ ਅਲਜ੍ਜੀ ਓਵਾਦਮ੍ਪਿ ਨ ਗਣ੍ਹਾਤਿ, ਲਜ੍ਜਿਨੋ ਚ ਏਤਸ੍ਸ ਵਿਸਭਾਗਾ ਹੋਨ੍ਤਿ, ਤਤ੍ਥ ਉਪਜ੍ਝਾਯਂ ਵਿਹਾਯ ਲਜ੍ਜੀਹੇਵ ਸਦ੍ਧਿਂ ਆਮਿਸਾਦਿਪਰਿਭੋਗੋ ਕਾਤਬ੍ਬੋ. ਉਪਜ੍ਝਾਯਾਦਿਭਾਵੋ ਹੇਤ੍ਥ ਨ ਪਮਾਣਨ੍ਤਿ ਦਟ੍ਠਬ੍ਬਂ. ਪਰਿਵੇਣਂ ਗਨ੍ਤ੍ਵਾਤਿ ਉਪਜ੍ਝਾਯਸ੍ਸ ਪਰਿਵੇਣਂ ਗਨ੍ਤ੍ਵਾ. ‘‘ਨ ਸੁਸਾਨ’’ਨ੍ਤਿ ਇਦਂ ਉਪਲਕ੍ਖਣਂ, ਉਪਚਾਰਸੀਮਤੋ ਬਹਿ ਗਨ੍ਤੁਕਾਮੇਨ ਅਨਾਪੁਚ੍ਛਾ ਗਨ੍ਤੁਂ ਨ ਵਟ੍ਟਤਿ.

ਉਪਜ੍ਝਾਯਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

੬੭. ਸਦ੍ਧਿਵਿਹਾਰਿਕਵਤ੍ਤਕਥਾਯਂ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋਤਿਆਦੀਸੁ ਅਨਾਦਰਿਯਂ ਪਟਿਚ੍ਚ ਧਮ੍ਮਾਮਿਸੇਹਿ ਅਸਙ੍ਗਣ੍ਹਨ੍ਤਾਨਂ ਆਚਰਿਯੁਪਜ੍ਝਾਯਾਨਂ ਦੁਕ੍ਕਟਂ ਵਤ੍ਤਭੇਦਤ੍ਤਾ. ਤੇਨੇਵ ਪਰਿਵਾਰੇਪਿ ‘‘ਨਦੇਨ੍ਤੋ ਆਪਜ੍ਜਤੀ’’ਤਿ (ਪਰਿ. ੩੨੨) ਵੁਤ੍ਤਂ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸਦ੍ਧਿਵਿਹਾਰਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

੬੮. ਨਸਮ੍ਮਾਵਤ੍ਤਨਾਦਿਕਥਾਯਂ ਵਤ੍ਤਂ ਨ ਪੂਰੇਯ੍ਯਾਤਿ ‘‘ਵਤ੍ਤਕਰਣਕਾਲੋ’’ਤਿ ਵਤ੍ਥੁਵਿਜਾਨਨਵਸੇਨ ਞਤ੍ਵਾ ਮਾਨਕੋਸਜ੍ਜਾਦਿਵਸੇਨ ਵਾ ਉਪਜ੍ਝਾਯਾਦੀਸੁ ¶ ਅਨਾਦਰੇਨ ਵਾ ‘‘ਅਕਾਤੁਂ ਨ ਵਟ੍ਟਤੀ’’ਤਿ ਅਜਾਨਨਤਾਯ ਵਾ ਨ ਕਰੇਯ੍ਯ, ਦੁਕ੍ਕਟਮੇਵ. ਅਸਞ੍ਚਿਚ੍ਚ ਅਸਤਿਯਾਤਿਆਦੀਹਿ ਚ ਅਕਰੋਨ੍ਤਸ੍ਸ ਪਨ ਅਨਾਪਤ੍ਤਿ. ਸਬ੍ਬਾਨਿ ਹਿ ਵਤ੍ਤਾਨਿ ਸੇਖਿਯਾਨੇਵ, ਤਸ੍ਮਾ ਸੇਖਿਯੇਸੁ ਵੁਤ੍ਤਨਯੇਨੇਵੇਤ੍ਥ ਸਬ੍ਬੋਪਿ ਵਿਨਿਚ੍ਛਯੋ ਵੇਦਿਤਬ੍ਬੋ. ਗੇਹਸ੍ਸਿਤਪੇਮਨ੍ਤਿ ਮੇਤ੍ਤਾਪੇਮਂ.

ਸਾਦਿਯਨਂ ¶ ਵਾ ਅਸਾਦਿਯਨਂ ਵਾ ਨ ਜਾਨਾਤੀਤਿ ‘‘ਮਯਿ ਸਾਦਿਯਨ੍ਤੇ ਅਕਰੋਨ੍ਤਾਨਂ ਆਪਤ੍ਤਿ ਹੋਤਿ, ਪਟਿਕ੍ਖਿਪਿਤ੍ਵਾ ਅਸਾਦਿਯਨ੍ਤੇ ਆਪਤ੍ਤਿ ਨ ਹੋਤੀ’’ਤਿ ਏਵਂ ਨ ਜਾਨਾਤੀਤਿ ਅਤ੍ਥੋ. ‘‘ਤੇਸੁ ਏਕੋ ਵਤ੍ਤਸਮ੍ਪਨ੍ਨੋ ਭਿਕ੍ਖੁ…ਪੇ… ਤੇਸਂ ਅਨਾਪਤ੍ਤੀ’’ਤਿ ਵਚਨਤੋ ਸਚੇ ਕੋਚਿ ‘‘ਤੁਮ੍ਹਾਕਂ ਸਦ੍ਧਿਵਿਹਾਰਿਕੇ, ਅਨ੍ਤੇਵਾਸਿਕੇ ਵਾ ਗਿਲਾਨੇ ਉਪਟ੍ਠਹਿਸ੍ਸਾਮਿ, ਓਵਾਦਾਨੁਸਾਸਨਿਆਦਿਕਂ ਸਬ੍ਬਂ ਕਤ੍ਤਬ੍ਬਂ ਕਰਿਸ੍ਸਾਮੀ’’ਤਿ ਵਦਤਿ, ਤੇ ਵਾ ਸਦ੍ਧਿਵਿਹਾਰਿਕਾਦਯੋ ‘‘ਅਪ੍ਪੋਸ੍ਸੁਕ੍ਕਾ ਹੋਥਾ’’ਤਿ ਵਦਨ੍ਤਿ, ਵਤ੍ਤਂ ਵਾ ਨ ਸਾਦਿਯਨ੍ਤਿ, ਆਚਰਿਯੁਪਜ੍ਝਾਯਾਨਮ੍ਪਿ ਅਨਾਪਤ੍ਤਿ.

ਨਸਮ੍ਮਾਵਤ੍ਤਨਾਦਿਕਥਾਵਣ੍ਣਨਾ ਨਿਟ੍ਠਿਤਾ.

੬੯. ਰਾਧਬ੍ਰਾਹ੍ਮਣਵਤ੍ਥੁਸ੍ਮਿਂ ਪਾਲ਼ਿਯਂ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋਤਿ ਸਕਲਸਰੀਰੇ ਸਞ੍ਜਾਤਪਣ੍ਡੁਵਣ੍ਣੋ. ਪਣ੍ਡੁਵਣ੍ਣਸ੍ਸ ਸਕਲਸਰੀਰੇ ਬ੍ਯਾਪਿਤਭਾਵਦਸ੍ਸਨਤ੍ਥਞ੍ਹਿ ਵਿਚ੍ਛਾਵਚਨਂ ਕਤਂ. ਅਧਿਕਾਰਨ੍ਤਿ ਉਪਕਾਰਂ. ਕਤਵੇਦਿਨੋਤਿ ਅਤ੍ਤਨੋ ਕਤਂ ਉਪਕਾਰਂ ਪਟਿਕਿਰਿਯਾਯ ਞਾਪਕਾ. ਉਪਸਮ੍ਪਦਾਕਮ੍ਮਵਾਚਾਯ ਯਂ ਵਤ੍ਤਬ੍ਬਂ, ਤਂ ਪਰਿਯੋਸਾਨੇ ਵਕ੍ਖਾਮ. ਪਰਿਮਣ੍ਡਲੇਹੀਤਿ ਪਰਿਪੁਣ੍ਣੇਹਿ.

੭੧-੭੩. ਪਣ੍ਣਤ੍ਤਿਵੀਤਿਕ੍ਕਮਨ੍ਤਿ ਸਿਕ੍ਖਾਪਦਵੀਤਿਕ੍ਕਮਂ. ਪਾਲ਼ਿਯਂ ਪਿਣ੍ਡਿਯਾਲੋਪਭੋਜਨਨ੍ਤਿ ਜਙ੍ਘਪਿਣ੍ਡਿਮਂਸਬਲੇਨ ਚਰਿਤ੍ਵਾ ਆਲੋਪਾਲੋਪਵਸੇਨ ਪਰਿਯਿਟ੍ਠਭੋਜਨਂ. ਅਤਿਰੇਕਲਾਭੋਤਿ ਭਿਕ੍ਖਾਹਾਰਤੋ ਅਧਿਕਲਾਭੋ. ਸਙ੍ਘਭਤ੍ਤਾਦੀਨਂ ਵਿਭਾਗੋ ਸੇਨਾਸਨਕ੍ਖਨ੍ਧਕੇ ਆਵਿ ਭਵਿਸ੍ਸਤਿ. ਵਿਹਾਰੋਤਿ ਤਿਣਕੁਟਿਕਾਦਿਸਹਿਤੋ ਪਾਕਾਰਪਰਿਚ੍ਛਿਨ੍ਨੋ ਸਕਲੋ ਸਙ੍ਘਾਰਾਮੋ. ਅਡ੍ਢਯੋਗੋਤਿ ਏਕਸਾਲੋ ਦੀਘਪਾਸਾਦੋ. ਹਤ੍ਥਿਪਿਟ੍ਠਿਗਰੁਲ਼ਸਣ੍ਠਾਨੋ ਦੀਘਪਾਸਾਦੋਤਿਪਿ ਵਦਨ੍ਤਿ. ਪਾਸਾਦੋਤਿ ਚਤੁਰਸ੍ਸੋ ਉਚ੍ਚੋ ¶ ਅਨੇਕਭੂਮਕਪਾਸਾਦੋ. ਹਮ੍ਮਿਯਨ੍ਤਿ ਮੁਣ੍ਡਚ੍ਛਦਨੋ ਚਨ੍ਦਿਕਙ੍ਗਣਯੁਤ੍ਤੋ ਨਾਤਿਉਚ੍ਚੋ ਪਾਸਾਦੋ. ਗੁਹਾਤਿ ਪਬ੍ਬਤਗੁਹਾ. ਪੂਤਿਮੁਤ੍ਤਨ੍ਤਿ ਗੋਮੁਤ੍ਤਂ.

ਰਾਧਬ੍ਰਾਹ੍ਮਣਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੭੬. ਸਹਧਮ੍ਮਿਕਂ ਵੁਚ੍ਚਮਾਨੋਤਿ ‘‘ਏਵਂ ਨਿਵਾਸੇਤਬ੍ਬ’’ਨ੍ਤਿਆਦਿਨਾ ਸਿਕ੍ਖਾਪਦੇਨ ਓਵਦਿਯਮਾਨੋ. ਵਾਦਂ ਆਰੋਪੇਤ੍ਵਾਤਿ ‘‘ਓਲਮ੍ਬਿਤ੍ਵਾ ਨਿਵਾਸਨਾਦੀਸੁ ਕੋ ਦੋਸੋ? ਯਦਿ ਦੋਸੋ ਭਵੇਯ੍ਯ ¶ , ਪਰਿਮਣ੍ਡਲਨਿਵਾਸਨਾਦੀਸੁਪਿ ਦੋਸੋ ਸਿਯਾ’’ਤਿਆਦਿਨਾ ਨਿਗ੍ਗਹਂ ਆਰੋਪੇਤ੍ਵਾ. ਤਂਯੇਵ ਤਿਤ੍ਥਾਯਤਨਨ੍ਤਿ ਦਿਟ੍ਠਿਸਙ੍ਖਾਤਤਿਤ੍ਥਮੇਵ ਆਯਤਨਂ ਦੁਕ੍ਖੁਪ੍ਪਤ੍ਤਿਟ੍ਠਾਨਨ੍ਤਿ ਤਿਤ੍ਥਾਯਤਨਂ. ਆਯਸ੍ਮਤੋ ਨਿਸ੍ਸਾਯ ਵਚ੍ਛਾਮੀਤਿ ਆਯਸ੍ਮਨ੍ਤਂ ਨਿਸ੍ਸਾਯ ਵਸਿਸ੍ਸਾਮੀਤਿ ਅਤ੍ਥੋ.

ਆਚਰਿਯਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

੮੦. ਯਂ ਪੁਬ੍ਬੇ ਲਕ੍ਖਣਂ ਵੁਤ੍ਤਂ, ਤੇਨੇਵ ਲਕ੍ਖਣੇਨ ਨਿਸ੍ਸਯਨ੍ਤੇਵਾਸਿਕਸ੍ਸ ਆਪਤ੍ਤਿ ਨ ਵੇਦਿਤਬ੍ਬਾਤਿ ਸਮ੍ਬਨ੍ਧਯੋਜਨਾ ਦਟ੍ਠਬ੍ਬਾ. ਪੋਤ੍ਥਕੇਸੁ ਪਨ ‘‘ਨ ਤੇਨੇਵ ਲਕ੍ਖਣੇਨਾ’’ਤਿ ਏਤ੍ਥ ਨ-ਕਾਰਂ ਛਡ੍ਡੇਤ੍ਵਾ ‘‘ਤੇਨੇਵ ਲਕ੍ਖਣੇਨ ਨਿਸ੍ਸਯਨ੍ਤੇਵਾਸਿਕਸ੍ਸ ਆਪਤ੍ਤਿ ਵੇਦਿਤਬ੍ਬਾ’’ਤਿ ਲਿਖਨ੍ਤਿ, ਤਂ ਪਮਾਦਲਿਖਿਤਂ. ਤਥਾ ਹਿ ਤੇਨੇਵ ਲਕ੍ਖਣੇਨ ਆਪਤ੍ਤਿਭਾਵੇ ਗਯ੍ਹਮਾਨੇ ਨਿਸ੍ਸਯਮੁਤ੍ਤਕਸ੍ਸਾਪਿ ਅਮੁਤ੍ਤਕਸ੍ਸਾਪਿ ਆਪਤ੍ਤਿ ਏਵਾਤਿ ਵੁਤ੍ਤਲਕ੍ਖਣੇਨ ਆਪਤ੍ਤਿਂ ਆਪਜ੍ਜੇਯ੍ਯ. ਤਥਾ ਚ ‘‘ਨਿਸ੍ਸਯਨ੍ਤੇਵਾਸਿਕੇਨ ਹਿ ਯਾਵ ਆਚਰਿਯਂ ਨਿਸ੍ਸਾਯ ਵਸਤਿ, ਤਾਵ ਸਬ੍ਬਂ ਆਚਰਿਯਵਤ੍ਤਂ ਕਾਤਬ੍ਬ’’ਨ੍ਤਿ ਇਮਿਨਾ ਅਨਨ੍ਤਰਵਚਨੇਨ ਵਿਰੋਧੋ ਸਿਯਾ. ਵਿਸੁਦ੍ਧਿਮਗ੍ਗੇਪਿ ਚ –

‘‘ਨਿਸ੍ਸਯਾਚਰਿਯ, ਉਦ੍ਦੇਸਾਚਰਿਯ, ਨਿਸ੍ਸਯਨ੍ਤੇਵਾਸਿਕ, ਉਦ੍ਦੇਸਨ੍ਤੇਵਾਸਿਕ, ਸਮਾਨਾਚਰਿਯਕਾ ਪਨ ਯਾਵ ਨਿਸ੍ਸਯਉਦ੍ਦੇਸਾ ਅਨੁਪਚ੍ਛਿਨ੍ਨਾ. ਤਾਵ ਪਟਿਜਗ੍ਗਿਤਬ੍ਬਾ’’ਤਿ (ਵਿਸੁਦ੍ਧਿ. ੧.੪੧) –

ਵੁਤ੍ਤਂ ¶ . ਤਸ੍ਮਾ ਵੁਤ੍ਤਨਯੇਨ ਇਧ ਪਰਿਗਲ਼ਿਤਂ ਨ-ਕਾਰਂ ਆਨੇਤ੍ਵਾ ਤੇਨੇਵ ਸਦ੍ਧਿਵਿਹਾਰਿਕਸ੍ਸ ਵੁਤ੍ਤੇਨੇਵ ਲਕ੍ਖਣੇਨ ਨਿਸ੍ਸਯਨ੍ਤੇਵਾਸਿਕਸ੍ਸ ਆਪਤ੍ਤਿ ਨ ਵੇਦਿਤਬ੍ਬਾਤਿ ਏਵਮਤ੍ਥੋ ਗਹੇਤਬ੍ਬੋ.

ਪਣਾਮਨਾਖਮਾਪਨਾਕਥਾਵਣ੍ਣਨਾ ਨਿਟ੍ਠਿਤਾ.

ਨਿਸ੍ਸਯਪਟਿਪ੍ਪਸ੍ਸਦ੍ਧਿਕਥਾਵਣ੍ਣਨਾ

੮੩. ਨਿਸ੍ਸਯਪਟਿਪ੍ਪਸ੍ਸਦ੍ਧਿਕਥਾਯਂ ‘‘ਯੋ ਵਾ ਏਕਸਮ੍ਭੋਗਪਰਿਭੋਗੋ, ਤਸ੍ਸ ਸਨ੍ਤਿਕੇ ਨਿਸ੍ਸਯੋ ਗਹੇਤਬ੍ਬੋ’’ਤਿ ਇਮਿਨਾ ਲਜ੍ਜੀਸੁ ਏਵ ਨਿਸ੍ਸਯਗ੍ਗਹਣਂ ਨਿਯੋਜੇਤਿ ਅਲਜ੍ਜੀਸੁ ਪਟਿਕ੍ਖਿਤ੍ਤਤ੍ਤਾ. ਏਤ੍ਥ ਚ ਪਰਿਭੋਗਸਦ੍ਦੇਨ ਏਕਕਮ੍ਮਾਦਿਕੋ ਸਂਵਾਸੋ ਗਹਿਤੋ ਪਚ੍ਚਯਪਰਿਭੋਗਸ੍ਸ ਸਮ੍ਭੋਗ-ਸਦ੍ਦੇਨ ਗਹਿਤਤ੍ਤਾ, ਏਤੇਨ ¶ ਚ ਸਮ੍ਭੋਗਸਂਵਾਸਾਨਂ ਅਲਜ੍ਜੀਹਿ ਸਦ੍ਧਿਂ ਨ ਕਤ੍ਤਬ੍ਬਤਂ ਦਸ੍ਸੇਤਿ. ਪਰਿਹਾਰੋ ਨਤ੍ਥੀਤਿ ਆਪਤ੍ਤਿਪਰਿਹਾਰੋ ਨਤ੍ਥਿ. ਤਾਦਿਸੋਤਿ ਯਤ੍ਥ ਨਿਸ੍ਸਯੋ ਗਹਿਤਪੁਬ੍ਬੋ, ਯੋ ਚ ਏਕਸਮ੍ਭੋਗਪਰਿਭੋਗੋ, ਤਾਦਿਸੋ. ਤਥਾ ਵੁਤ੍ਤਨ੍ਤਿ ‘‘ਲਹੁਂ ਆਗਮਿਸ੍ਸਾਮੀ’’ਤਿ ਵੁਤ੍ਤਞ੍ਚੇਤਿ ਅਤ੍ਥੋ. ‘‘ਚਤ੍ਤਾਰਿ ਪਞ੍ਚ ਦਿਵਸਾਨੀ’’ਤਿ ਇਦਂ ਉਪਲਕ੍ਖਣਮਤ੍ਤਂ. ਯਦਿ ਏਕਾਹਦ੍ਵੀਹੇਨ ਸਭਾਗਤਾ ਪਞ੍ਞਾਯਤਿ, ਞਾਤਦਿਵਸੇਨ ਗਹੇਤਬ੍ਬੋਵ. ਅਥਾਪਿ ਚਤੁਪਞ੍ਚਾਹੇਨਾਪਿ ਨ ਪਞ੍ਞਾਯਤਿ, ਯਤ੍ਤਕੇਹਿ ਦਿਵਸੇਹਿ ਪਞ੍ਞਾਯਤਿ, ਤਤ੍ਤਕਾਨਿ ਅਤਿਕ੍ਕਮੇਤਬ੍ਬਾਨਿ. ਸਭਾਗਤਂ ਓਲੋਕੇਮੀਤਿ ਪਨ ਲੇਸੋ ਨ ਕਾਤਬ੍ਬੋ.

ਦਹਰਾ ਸੁਣਨ੍ਤੀਤਿ ਏਤ੍ਥ ਅਸੁਤ੍ਵਾਪਿ ਆਗਮਿਸ੍ਸਤਿ, ਕੇਨਚਿ ਅਨ੍ਤਰਾਯੇਨ ਚਿਰਾਯਤੀਤਿ ਸਞ੍ਞਾਯ ਸਤਿ ਲਬ੍ਭਤੇਵ ਪਰਿਹਾਰੋ. ਤੇਨਾਹ ‘‘ਇਧੇਵਾਹਂ ਵਸਿਸ੍ਸਾਮੀਤਿ ਪਹਿਣਤਿ, ਪਰਿਹਾਰੋ ਨਤ੍ਥੀ’’ਤਿ.

ਏਕਦਿਵਸਮ੍ਪਿ ਪਰਿਹਾਰੋ ਨਤ੍ਥੀਤਿ ਗਮਨੇ ਨਿਰੁਸ੍ਸਾਹਂ ਸਨ੍ਧਾਯ ਵੁਤ੍ਤਂ. ਸਉਸ੍ਸਾਹਸ੍ਸ ਪਨ ਸੇਨਾਸਨਪਟਿਸਾਮਨਾਦਿਵਸੇਨ ਕਤਿਪਾਹੇ ਗਤੇਪਿ ਨ ਦੋਸੋ.

ਤਤ੍ਰੇਵ ਵਸਿਤਬ੍ਬਨ੍ਤਿ ਤਤ੍ਰ ਸਭਾਗਟ੍ਠਾਨੇ ਏਵ ਨਿਸ੍ਸਯਂ ਗਹੇਤ੍ਵਾ ਵਸਿਤਬ੍ਬਂ. ‘‘ਤਂਯੇਵ ਵਿਹਾਰਂ…ਪੇ… ਵਸਿਤੁਂ ਵਟ੍ਟਤੀ’’ਤਿ ਇਮਿਨਾ ਉਪਜ੍ਝਾਯੇ ਸਙ੍ਗਣ੍ਹਨ੍ਤੇਯੇਵ ਤਂਸਮੋਧਾਨੇ ਨਿਸ੍ਸਯਪਟਿਪ੍ਪਸ੍ਸਦ੍ਧਿ ਵੁਤ੍ਤਾ, ਤਸ੍ਮਿਂ ਪਨ ਕੋਧੇਨ ¶ ਵਾ ਗਣਨਿਰਪੇਕ੍ਖਤਾਯ ਵਾ ਅਸਙ੍ਗਣ੍ਹਨ੍ਤੇ ਅਞ੍ਞੇਸੁ ਗਹਿਤੋ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤੀਤਿ ਦਸ੍ਸੇਤਿ.

ਆਚਰਿਯਮ੍ਹਾ ਨਿਸ੍ਸਯਪਟਿਪ੍ਪਸ੍ਸਦ੍ਧਿਯਂ ਵੁਤ੍ਤੋ ‘‘ਕੋਚਿ ਆਚਰਿਯੋ’’ਤਿਆਦਿਕੋ ਨਯੋ ਉਪਜ੍ਝਾਯਪਕ੍ਕਮਨਾਦੀਸੁਪਿ ਨੇਤ੍ਵਾ ਤਤ੍ਥ ਚ ਵੁਤ੍ਤੋ ਇਧਾਪਿ ਨੇਤ੍ਵਾ ਯਥਾਰਹਂ ਯੋਜੇਤਬ੍ਬੋ.

ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮ੍ਮ ਅਞ੍ਞਸ੍ਮਿਂ ਵਿਹਾਰੇ ਵਸਨ੍ਤੀਤਿ ਉਪਚਾਰਸੀਮਤੋ ਬਹਿ ਅਞ੍ਞਸ੍ਮਿਂ ਵਿਹਾਰੇ ਅਨ੍ਤੇਵਾਸਿਕਾਨਂ ਵਸਨਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮ੍ਮ ਵਸਨ੍ਤਿ. ਤੇਨ ਬਹਿਉਪਚਾਰੇਪਿ ਅਨ੍ਤੇਵਾਸਿਕਾਦੀਨਂ ਵਸਨਟ੍ਠਾਨਤੋ ਦ੍ਵਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤਰੇ ਆਸਨ੍ਨਪਦੇਸੇ ਵਸਤਿ, ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤੀਤਿ ਦਸ੍ਸੇਤਿ. ਅਨ੍ਤੋਉਪਚਾਰਸੀਮਾਯਂ ਪਨ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਵਸਤੋ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤੇਵ.

ਨਿਸ੍ਸਯਪਟਿਪ੍ਪਸ੍ਸਦ੍ਧਿਕਥਾਵਣ੍ਣਨਾ ਨਿਟ੍ਠਿਤਾ.

ਉਪਸਮ੍ਪਾਦੇਤਬ੍ਬਪਞ੍ਚਕਕਥਾਵਣ੍ਣਨਾ

੮੪. ਉਪਜ੍ਝਾਚਰਿਯਲਕ੍ਖਣਕਥਾਯਂ ¶ ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋਤਿ ਉਪਜ੍ਝਾਯੇਨ ਹੁਤ੍ਵਾ ਨ ਪਬ੍ਬਾਜੇਤਬ੍ਬੋ. ਅਸੇਕ੍ਖਸ੍ਸ ਅਯਨ੍ਤਿ ਅਸੇਕ੍ਖੋ, ਲੋਕਿਯਲੋਕੁਤ੍ਤਰੋ ਸੀਲਕ੍ਖਨ੍ਧੋ.

ਅਨ੍ਤਗ੍ਗਾਹਿਕਾਯਾਤਿ ਸਸ੍ਸਤੁਚ੍ਛੇਦਕੋਟ੍ਠਾਸਗ੍ਗਾਹਿਕਾਯ. ਪਚ੍ਛਿਮਾਨਿ ਦ੍ਵੇਤਿ ਅਪ੍ਪਸ੍ਸੁਤੋ ਹੋਤਿ, ਦੁਪ੍ਪਞ੍ਞੋ ਹੋਤੀਤਿ ਇਮਾਨਿ ਦ੍ਵੇ ਅਙ੍ਗਾਨਿ. ਪਚ੍ਛਿਮਾਨਿ ਤੀਣੀਤਿ ਨ ਪਟਿਬਲੋ ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਧਮ੍ਮਤੋ ਵਿਨੋਦੇਤੁਂ, ਆਪਤ੍ਤਿਂ ਨ ਜਾਨਾਤਿ, ਆਪਤ੍ਤਿਯਾ ਵੁਟ੍ਠਾਨਂ ਨ ਜਾਨਾਤੀਤਿ ਇਮਾਨਿ ਤੀਣਿ. ਕੁਕ੍ਕੁਚ੍ਚਸ੍ਸ ਹਿ ਪਾਲ਼ਿਅਟ੍ਠਕਥਾਨਯਸਙ੍ਖਾਤਧਮ੍ਮਤੋ ਵਿਨੋਦੇਤੁਂ ਅਪਟਿਬਲਤਾ ਨਾਮ ਅਬ੍ਯਤ੍ਤਤਾ ਏਵ ਹੋਤੀਤਿ ਸਾਪਿ ਆਪਤ੍ਤਿਅਙ੍ਗਮੇਵ ਵੁਤ੍ਤਾ.

ਅਭਿਵਿਸਿਟ੍ਠੋ ਉਤ੍ਤਮੋ ਸਮਾਚਾਰੋ ਆਭਿਸਮਾਚਾਰੋ, ਵਤ੍ਤਪਟਿਵਤ੍ਤਸੀਲਂ. ਤਂ ਆਰਬ੍ਭ ਪਞ੍ਞਤ੍ਤਾ ਖਨ੍ਧਕਸਿਕ੍ਖਾਪਦਸਙ੍ਖਾਤਾ ਸਿਕ੍ਖਾ ਆਭਿਸਮਾਚਾਰਿਕਾ. ਸਿਕ੍ਖਾਪਦਮ੍ਪਿ ਹਿ ਤਂ ਤਤ੍ਥ ਪਟਿਪੂਰਣਤ੍ਥਿਕੇਹਿ ਉਗ੍ਗਹਣਾਦਿਵਸੇਨ ਸਿਕ੍ਖਿਤਬ੍ਬਤੋ ‘‘ਸਿਕ੍ਖਾ’’ਤਿ ਵੁਚ੍ਚਤਿ. ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾ ਕਾਰਣਭੂਤਾਤਿ ਆਦਿਬ੍ਰਹ੍ਮਚਰਿਯਕਾ ਸਿਕ੍ਖਾ, ਉਭਤੋਵਿਭਙ੍ਗਪਰਿਯਾਪਨ੍ਨਸਿਕ੍ਖਾਪਦਂ. ਤੇਨੇਵ ¶ ਵਿਸੁਦ੍ਧਿਮਗ੍ਗੇਪਿ ‘‘ਉਭਤੋਵਿਭਙ੍ਗਪਰਿਯਾਪਨ੍ਨਸਿਕ੍ਖਾਪਦਂ ਆਦਿਬ੍ਰਹ੍ਮਚਰਿਯਕਂ, ਖਨ੍ਧਕਵਤ੍ਤਪਅਯਾਪਨ੍ਨਂ ਆਭਿਸਮਾਚਾਰਿਕ’’ਨ੍ਤਿ (ਵਿਸੁਦ੍ਧਿ. ੧.੧੧) ਵੁਤ੍ਤਂ. ਤਸ੍ਮਾ ਸੇਕ੍ਖਪਣ੍ਣਤ੍ਤਿਯ’’ਨ੍ਤਿ ਏਤ੍ਥ ਸਿਕ੍ਖਿਤਬ੍ਬਤੋ ਸੇਕ੍ਖਾ, ਭਗਵਤਾ ਪਞ੍ਞਤ੍ਤਤ੍ਤਾ ਪਣ੍ਣਤ੍ਤਿ. ਸਬ੍ਬਾਪਿ ਉਭਤੋਵਿਭਙ੍ਗਪਰਿਯਾਪਨ੍ਨਾ ਸਿਕ੍ਖਾਪਦਪਣ੍ਣਤ੍ਤਿ ‘‘ਸੇਕ੍ਖਪਣ੍ਣਤ੍ਤੀ’’ਤਿ ਵੁਤ੍ਤਾਤਿ ਗਹੇਤਬ੍ਬਾ. ਨਾਮਰੂਪਪਰਿਚ੍ਛੇਦੇਤਿ ਏਤ੍ਥ ਕੁਸਲਤ੍ਤਿਕਾਦੀਹਿ ਵੁਤ੍ਤਂ ਜਾਤਿਭੂਮਿਪੁਗ੍ਗਲਸਮ੍ਪਯੋਗਵਤ੍ਥਾਰਮ੍ਮਣਕਮ੍ਮਦ੍ਵਾਰਲਕ੍ਖਣਰਸਾਦਿਭੇਦੇਹਿ ਵੇਦਨਾਕ੍ਖਨ੍ਧਾਦਿਚਤੁਬ੍ਬਿਧਂ ਸਨਿਬ੍ਬਾਨਂ ਨਾਮਂ, ਭੂਤੁਪਾਦਾਯਭੇਦਂ ਰੂਪਞ੍ਚ ਪਰਿਚ੍ਛਿਨ੍ਦਿਤ੍ਵਾ ਜਾਨਨਪਞ੍ਞਾ, ਤਪ੍ਪਕਾਸਕੋ ਚ ਗਨ੍ਥੋ ਨਾਮਰੂਪਪਰਿਚ੍ਛੇਦੋ ਨਾਮ. ਇਮਿਨਾ ਅਭਿਧਮ੍ਮਤ੍ਥਕੁਸਲੇਨ ਭਵਿਤਬ੍ਬਨ੍ਤਿ ਦਸ੍ਸੇਤਿ. ਸਿਕ੍ਖਾਪੇਤੁਨ੍ਤਿ ਉਗ੍ਗਣ੍ਹਾਪੇਤੁਂ.

ਉਪਸਮ੍ਪਾਦੇਤਬ੍ਬਪਞ੍ਚਕਕਥਾਵਣ੍ਣਨਾ ਨਿਟ੍ਠਿਤਾ.

ਅਞ੍ਞਤਿਤ੍ਥਿਯਪੁਬ੍ਬਵਤ੍ਥੁਕਥਾਵਣ੍ਣਨਾ

੮੬. ਤਿਤ੍ਥਿਯਪਰਿਵਾਸਕਥਾਯਂ ਆਜੀਵਕਸ੍ਸ ਵਾਤਿਆਦੀਸੁ ਅਕਿਰਿਯਵਾਦੀ ਆਜੀਵਕੋ ਨਾਮ, ਕਿਰਿਯਵਾਦਿਨੋ ਪਨ ਨਿਗਣ੍ਠਾਪਿ ਅਞ੍ਞੇਪਿ ਨਗ੍ਗਤਿਤ੍ਥਿਕਾ ਅਚੇਲਕਪਦੇ ਸਙ੍ਗਹਿਤਾ. ਸਬ੍ਬਥਾ ਨਗ੍ਗਸ੍ਸੇਵ ¶ ਤਿਤ੍ਥਿਯਪਰਿਵਾਸੋ ਵਿਹਿਤੋ. ਸੋ ਚ ਤੇਨੇਵ ਨਗ੍ਗਵੇਸੇਨ ਭਿਕ੍ਖੂਨਂ ਸਨ੍ਤਿਕਂ ਆਗਤਸ੍ਸ, ਨ ਪਟਿਚ੍ਛਾਦੇਤ੍ਵਾ ਆਗਤਸ੍ਸਾਤਿ ਦਸ੍ਸੇਤੁਂ ‘‘ਸਚੇ ਸੋਪੀ’’ਤਿਆਦਿ ਵੁਤ੍ਤਂ. ਤਤ੍ਥ ਸੋਪੀਤਿ ਆਜੀਵਕੋ.

ਆਮਿਸਕਿਞ੍ਚਿਕ੍ਖਸਮ੍ਪਦਾਨਂ ਨਾਮ ਅਪ੍ਪਮਤ੍ਤਕਸ੍ਸ ਦੇਯ੍ਯਧਮ੍ਮਸ੍ਸ ਅਨੁਪ੍ਪਦਾਨਂ. ਰੂਪੂਪਜੀਵਿਕਾਤਿ ਅਤ੍ਤਨੋ ਰੂਪਮੇਵ ਨਿਸ੍ਸਾਯ ਜੀਵਨ੍ਤਿਯੋ. ਵੇਸਿਯਾ ਗੋਚਰੋ ਬਹੁਲਂ ਪਵਤ੍ਤਿਟ੍ਠਾਨਂ ਅਸ੍ਸਾਤਿ ਵੇਸਿਯਾਗੋਚਰੋ. ਏਸ ਨਯੋ ਸਬ੍ਬਤ੍ਥ. ਯੋਬ੍ਬਨ੍ਨਾਤੀਤਾਤਿ ਅਨਿਵਿਦ੍ਧਾ ਏਵ ਮਹਲ੍ਲਿਕਭਾਵਂ ਪਤ੍ਤਾ ਥੁਲ੍ਲਕੁਮਾਰੀ ਏਵਾਤਿ ਵੁਤ੍ਤਂ. ਆਦਾਯਸ੍ਸਾਤਿ ਆਦਾਨਸ੍ਸ ਗਹਣਸ੍ਸ.

ਅਞ੍ਞਤਿਤ੍ਥਿਯਪੁਬ੍ਬਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੮੮-੯. ਪਞ੍ਚਾਬਾਧਾਦਿਵਤ੍ਥੂਸੁ ¶ ਪਾਲ਼ਿਯਂ ਸੋਮ੍ਹਿ ਅਰੋਗੋ, ਵਿਬ੍ਭਮਿਸ੍ਸਾਮੀਤਿ ਸੋ ਅਹਂ ਅਰੋਗੋ, ਵਿਬ੍ਭਮਿਸ੍ਸਾਮੀਤਿ ਅਤ੍ਥੋ. ਨਖਪਿਟ੍ਠਿਪ੍ਪਮਾਣਨ੍ਤਿ ਕਨਿਟ੍ਠਙ੍ਗੁਲਿਨਖਪਿਟ੍ਠਿ ਅਧਿਪ੍ਪੇਤਾ. ‘‘ਪਟਿਚ੍ਛਨ੍ਨੇ ਠਾਨੇ ਨਖਪਿਟ੍ਠਿਪ੍ਪਮਾਣਂ ਅਵਡ੍ਢਨਕਪਕ੍ਖੇ ਠਿਤਂ ਹੋਤਿ, ਵਟ੍ਟਤੀ’’ਤਿ ਵੁਤ੍ਤਤ੍ਤਾ ਅਪ੍ਪਟਿਚ੍ਛਨ੍ਨਟ੍ਠਾਨੇ ਤਾਦਿਸਮ੍ਪਿ ਨ ਵਟ੍ਟਤਿ, ਪਟਿਚ੍ਛਨ੍ਨਟ੍ਠਾਨੇਪਿ ਚ ਵਡ੍ਢਨਕਪਕ੍ਖੇ ਠਿਤੋਪਿ ਨ ਵਟ੍ਟਤੀਤਿ ਸਿਦ੍ਧਮੇਵ ਹੋਤਿ. ਪਾਕਟਟ੍ਠਾਨੇਪਿ ਪਨ ਨਖਪਿਟ੍ਠਿਪ੍ਪਮਾਣਤੋ ਊਨਤਰਂ ਅਵਡ੍ਢਨਕਂ ਵਟ੍ਟਤੀਤਿ ਯੇ ਗਣ੍ਹੇਯ੍ਯੁਂ, ਤੇਸਂ ਤਂ ਗਹਣਂ ਪਟਿਸੇਧੇਤੁਂ ‘‘ਮੁਖੇ ਪਨਾ’’ਤਿਆਦਿ ਵੁਤ੍ਤਂ.

ਕੋਲਟ੍ਠਿਮਤ੍ਤਕੋਪੀਤਿ ਬਦਰਟ੍ਠਿਪ੍ਪਮਾਣੋਪਿ. ਅਵਡ੍ਢਨਕਪਕ੍ਖੇ ਠਿਤੋਪਿ ਨ ਵਟ੍ਟਤੀਤਿ ਏਤ੍ਥ ਪਿ-ਸਦ੍ਦੇਨ ਕੋਲਟ੍ਠਿਮਤ੍ਤਤੋ ਖੁਦ੍ਦਕਤਰੋਪਿ ਗਣ੍ਡੋ ਨ ਵਟ੍ਟਤੀਤਿ ਦਸ੍ਸੇਤਿ. ਤੇਨਾਹ ‘‘ਸਚ੍ਛਵਿਂ ਕਾਰੇਤ੍ਵਾ’’ਤਿ, ਵਿਜ੍ਜਮਾਨਚ੍ਛਵਿਂ ਕਤ੍ਵਾਤਿ ਅਤ੍ਥੋ. ‘‘ਸਞ੍ਛਵਿ’’ਨ੍ਤਿ ਵਾ ਪਾਠੋ, ਸਞ੍ਜਾਤਚ੍ਛਵਿਨ੍ਤਿ ਅਤ੍ਥੋ. ਗਣ੍ਡਾਦੀਸੁ ਵੂਪਸਨ੍ਤੇਸੁਪਿ ਗਣ੍ਡਾਨਂ ਵਿਵਣ੍ਣਮ੍ਪਿ ਹੋਤਿ, ਤਂ ਵਟ੍ਟਤਿ.

ਪਦੁਮਪੁਣ੍ਡਰੀਕਪਤ੍ਤਵਣ੍ਣਨ੍ਤਿ ਰਤ੍ਤਪਦੁਮਸੇਤਪਦੁਮਪੁਪ੍ਫਦਲਵਣ੍ਣਂ. ਕੁਟ੍ਠੇ ਵੁਤ੍ਤਨਯੇਨੇਵਾਤਿ ਪਟਿਚ੍ਛਨ੍ਨਟ੍ਠਾਨੇ ਅਵਡ੍ਢਨਕਂ ਵਟ੍ਟਤਿ, ਅਞ੍ਞਤ੍ਥ ਨ ਕਿਞ੍ਚਿਪਿ ਵਟ੍ਟਤੀਤਿ ਵੁਤ੍ਤਨਯਂ ਦਸ੍ਸੇਤਿ. ਸੋਸਬ੍ਯਾਧੀਤਿ ਖਯਰੋਗੋ. ਯਕ੍ਖੁਮ੍ਮਾਰੋਤਿ ਕਦਾਚਿ ਕਦਾਚਿ ਆਗਨ੍ਤ੍ਵਾ ਭੂਮਿਯਂ ਪਾਤੇਤ੍ਵਾ ਹਤ੍ਥਮੁਖਾਦਿਕਂ ਅਵਯਵਂ ਭੂਮਿਯਂ ਘਂਸਨਕੋ ਯਕ੍ਖੋਵ ਰੋਗੋ.

ਪਞ੍ਚਾਬਾਧਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੯੦. ਨ ¶ ਦਾਨਾਹਂ ਦੇਵਸ੍ਸ ਭਟੋਤਿ ਆਪੁਚ੍ਛਤੀਤਿ ਰਞ੍ਞਾ ਏਵ ਦਿਨ੍ਨਟ੍ਠਾਨਨ੍ਤਰਂ ਸਨ੍ਧਾਯ ਵੁਤ੍ਤਂ. ਯੋ ਪਨ ਰਾਜਕਮ੍ਮਿਕੇਹਿ ਅਮਚ੍ਚਾਦੀਹਿ ਠਪਿਤੋ, ਅਮਚ੍ਚਾਦੀਨਂ ਏਵ ਵਾ ਭਟੋ ਹੋਤਿ, ਤੇਨ ਤਂ ਤਂ ਅਮਚ੍ਚਾਦਿਮ੍ਪਿ ਆਪੁਚ੍ਛਿਤੁਂ ਵਟ੍ਟਤਿ.

ਰਾਜਭਟਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੯੧. ਤਸ੍ਮਾਤਿ ¶ ਭਗਵਾ ਸਯਂ ਯਸ੍ਮਾ ਧਮ੍ਮਸ੍ਸਾਮੀ, ਤਸ੍ਮਾ ਅਙ੍ਗੁਲਿਮਾਲਂ ਏਹਿਭਿਕ੍ਖੁਭਾਵੇਨ ਪਬ੍ਬਾਜੇਸਿ, ਭਿਕ੍ਖੂਨਂ ਪਨ ਸਿਕ੍ਖਾਪਦਂ ਪਞ੍ਞਪੇਨ੍ਤੋ ਏਵਮਾਹਾਤਿ ਅਧਿਪ੍ਪਾਯੋ. ਏਵਂ ਜਾਨਨ੍ਤੀਤਿ ਸੀਲਵਾ ਜਾਤੋਤਿ ਜਾਨਨ੍ਤਿ.

੯੨. ਉਪਰਮਨ੍ਤਿ ਵਿਰਮਨ੍ਤਿ. ਭਿਨ੍ਦਿਤ੍ਵਾਤਿ ਅਨ੍ਦੁਬਨ੍ਧਨਂ ਭਿਨ੍ਦਿਤ੍ਵਾ. ਛਿਨ੍ਦਿਤ੍ਵਾਤਿ ਸਙ੍ਖਲਿਕਂ ਛਿਨ੍ਦਿਤ੍ਵਾ. ਮੁਞ੍ਚਿਤ੍ਵਾਤਿ ਰਜ੍ਜੁਬਨ੍ਧਨਂ ਮੁਞ੍ਚਿਤ੍ਵਾ. ਵਿਵਰਿਤ੍ਵਾਤਿ ਗਾਮਬਨ੍ਧਨਾਦੀਸੁ ਗਾਮਦ੍ਵਾਰਾਦੀਨਂ ਵਿਵਰਿਤ੍ਵਾ. ਅਪਸ੍ਸਮਾਨਾਨਨ੍ਤਿ ਪੁਰਿਸਗੁਤ੍ਤਿਯਂ ਗੋਪਕਾਨਂ ਅਪਸ੍ਸਨ੍ਤਾਨਂ.

੯੫. ਪੁਰਿਮਨਯੇਨੇਵਾਤਿ ‘‘ਕਸਾਹਤੋ ਕਤਦਣ੍ਡਕਮ੍ਮੋ’’ਤਿ ਏਤ੍ਥ ਵੁਤ੍ਤਨਯੇਨੇਵ.

੯੬. ਪਲਾਤੋਪੀਤਿ ਇਣਸਾਮਿਕਾਨਂ ਆਗਮਨਂ ਞਤ੍ਵਾ ਭਯੇਨ ਪਲਾਤੋ. ਗੀਵਾ ਹੋਤੀਤਿ ਇਣਾਯਿਕਭਾਵਂ ਞਤ੍ਵਾ ਅਨਾਦਰੇਨ ਇਣਮੁਤ੍ਤਕੇ ਭਿਕ੍ਖੁਭਾਵੇ ਪਵੇਸਿਤਤ੍ਤਾ. ਉਪਡ੍ਢੁਪਡ੍ਢਨ੍ਤਿ ਥੋਕਥੋਕਂ. ਦਾਤਬ੍ਬਮੇਵਾਤਿ ਇਣਾਯਿਕੇਨ ਧਨਂ ਸਮ੍ਪਟਿਚ੍ਛਤੁ ਵਾ ਮਾ ਵਾ, ਦਾਨੇ ਸਉਸ੍ਸਾਹੇਨੇਵ ਭਵਿਤਬ੍ਬਂ. ਅਞ੍ਞੇਹਿ ਚ ਭਿਕ੍ਖੂਹਿ ‘‘ਮਾ ਧੁਰਂ ਨਿਕ੍ਖਿਪਾਹੀ’’ਤਿ ਵਤ੍ਵਾ ਸਹਾਯਕੇਹਿ ਭਵਿਤਬ੍ਬਨ੍ਤਿ ਦਸ੍ਸੇਤਿ. ਧੁਰਨਿਕ੍ਖੇਪੇਨ ਹਿਸ੍ਸ ਭਣ੍ਡਗ੍ਘੇਨ ਕਾਰੇਤਬ੍ਬਤਾ ਸਿਯਾਤਿ.

ਇਣਾਯਿਕਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੯੭. ‘‘ਦਾਸਚਾਰਿਤ੍ਤਂ ¶ ਆਰੋਪੇਤ੍ਵਾ ਕੀਤੋ’’ਤਿ ਇਮਿਨਾ ਦਾਸਭਾਵਪਰਿਮੋਚਨਤ੍ਥਾਯ ਕੀਤਕਂ ਨਿਵਤ੍ਤੇਤਿ. ਤਾਦਿਸੋ ਹਿ ਧਨਕ੍ਕੀਤੋਪਿ ਅਦਾਸੋ ਏਵ. ਤਤ੍ਥ ਤਤ੍ਥ ਚਾਰਿਤ੍ਤਵਸੇਨਾਤਿ ਤਸ੍ਮਿਂ ਤਸ੍ਮਿਂ ਜਨਪਦੇ ਦਾਸਪਣ੍ਣਜ੍ਝਾਪਨਾਦਿਨਾ ¶ ਅਦਾਸਕਰਣਨਿਯਾਮੇਨ. ਅਭਿਸੇਕਾਦੀਸੁ ਸਬ੍ਬਬਨ੍ਧਨਾਨਿ ਮੋਚਾਪੇਨ੍ਤਿ, ਤਂ ਸਨ੍ਧਾਯ ‘‘ਸਬ੍ਬਸਾਧਾਰਣੇਨਾ’’ਤਿ ਵੁਤ੍ਤਂ.

ਸਯਮੇਵ ਪਣ੍ਣਂ ਆਰੋਪੇਨ੍ਤਿ, ਨ ਵਟ੍ਟਤੀਤਿ ਤਾ ਭੁਜਿਸ੍ਸਿਤ੍ਥਿਯੋ ‘‘ਮਯਮ੍ਪਿ ਵਣ੍ਣਦਾਸਿਯੋ ਹੋਮਾ’’ਤਿ ਅਤ੍ਤਨੋ ਰਕ੍ਖਣਤ੍ਥਾਯ ਸਯਮੇਵ ਰਾਜੂਨਂ ਦਾਸਿਪਣ੍ਣੇ ਅਤ੍ਤਨੋ ਨਾਮਂ ਲਿਖਾਪੇਨ੍ਤਿ, ਤਾਸਂ ਪੁਤ੍ਤਾਪਿ ਰਾਜਦਾਸਾਵ ਹੋਨ੍ਤਿ, ਤਸ੍ਮਾ ਤੇ ਪਬ੍ਬਾਜੇਤੁਂ ਨ ਵਟ੍ਟਤਿ. ਤੇਹਿ ਅਦਿਨ੍ਨਾ ਨ ਪਬ੍ਬਾਜੇਤਬ੍ਬਾਤਿ ਯਤ੍ਤਕਾ ਤੇਸਂ ਸਾਮਿਨੋ, ਤੇਸੁ ਏਕੇਨ ਅਦਿਨ੍ਨੇਪਿ ਨ ਪਬ੍ਬਾਜੇਤਬ੍ਬਾ.

ਭੁਜਿਸ੍ਸੇ ਪਨ ਕਤ੍ਵਾ ਪਬ੍ਬਾਜੇਤੁਂ ਵਟ੍ਟਤੀਤਿ ਯਸ੍ਸ ਵਿਹਾਰਸ੍ਸ ਤੇ ਆਰਾਮਿਕਾ ਦਿਨ੍ਨਾ, ਤਸ੍ਮਿਂ ਵਿਹਾਰੇ ਸਙ੍ਘਂ ਞਾਪੇਤ੍ਵਾ ਫਾਤਿਕਮ੍ਮੇਨ ਧਨਾਨਿ ਦਤ੍ਵਾ ਭੁਜਿਸ੍ਸੇ ਕਤ੍ਵਾ ਪਬ੍ਬਾਜੇਤੁਂ ਵਟ੍ਟਤਿ. ਤਕ੍ਕਂ ਸੀਸੇ ਆਸਿਤ੍ਤਕਸਦਿਸਾਵ ਹੋਨ੍ਤੀਤਿ ਕੇਸੁਚਿ ਜਨਪਦੇਸੁ ਅਦਾਸੇ ਕਰੋਨ੍ਤਾ ਤਕ੍ਕਂ ਸੀਸੇ ਆਸਿਞ੍ਚਨ੍ਤਿ, ਤੇਨ ਕਿਰ ਤੇ ਅਦਾਸਾ ਹੋਨ੍ਤਿ, ਏਵਮਿਦਮ੍ਪਿ ਆਰਾਮਿਕਵਚਨੇਨ ਦਾਨਮ੍ਪੀਤਿ ਅਧਿਪ੍ਪਾਯੋ. ਤਥਾ ਦਿਨ੍ਨੇਪਿ ਸਙ੍ਘਸ੍ਸ ਆਰਾਮਿਕਦਾਸੋ ਏਵਾਤਿ ‘‘ਨੇਵ ਪਬ੍ਬਾਜੇਤਬ੍ਬੋ’’ਤਿ ਵੁਤ੍ਤਂ. ‘‘ਤਾਵਕਾਲਿਕੋ ਨਾਮਾ’’ਤਿ ਵੁਤ੍ਤਤ੍ਤਾ ਕਾਲਪਰਿਚ੍ਛੇਦਂ ਕਤ੍ਵਾ ਵਾ ਪਚ੍ਛਾਪਿ ਗਹੇਤੁਕਾਮਤਾਯ ਵਾ ਦਿਨ੍ਨਂ ਸਬ੍ਬਂ ਤਾਵਕਾਲਿਕਮੇਵਾਤਿ ਗਹੇਤਬ੍ਬਂ. ਨਿਸ੍ਸਾਮਿਕਦਾਸੋ ਨਾਮ ਯਸ੍ਸ ਸਾਮਿਕੁਲਂ ਅਞ੍ਞਾਤਿਕਂ ਮਰਣੇਨ ਪਰਿਕ੍ਖੀਣਂ, ਨ ਕੋਚਿ ਤਸ੍ਸ ਦਾਯਾਦੋ, ਸੋ ਪਨ ਸਮਾਨਜਾਤਿਕੇਹਿ ਵਾ ਨਿਵਾਸਗਾਮਵਾਸੀਹਿ ਵਾ ਇਸ੍ਸਰੇਹਿ ਵਾ ਭੁਜਿਸ੍ਸੋ ਕਤੋਵ ਪਬ੍ਬਾਜੇਤਬ੍ਬੋ. ਦੇਵਦਾਸਾਪਿ ਦਾਸਾ ਏਵ. ਤੇ ਹਿ ਕਤ੍ਥਚਿ ਦੇਸੇ ਰਾਜਦਾਸਾ ਹੋਨ੍ਤਿ, ਕਤ੍ਥਚਿ ਵਿਹਾਰਦਾਸਾ, ਤਸ੍ਮਾ ਪਬ੍ਬਾਜੇਤੁਂ ਨ ਵਟ੍ਟਤਿ. ਦਾਸਮ੍ਪਿ ਪਬ੍ਬਾਜੇਤ੍ਵਾ ਸਾਮਿਕੇ ਦਿਸ੍ਵਾ ਪਟਿਚ੍ਛਾਦਨਤ੍ਥਂ ਅਪਨੇਨ੍ਤੋ ਪਦਵਾਰੇਨ ਅਦਿਨ੍ਨਾਦਾਨਾਪਤ੍ਤਿਯਾ ਕਾਰੇਤਬ੍ਬੋ, ਦਾਸਸ੍ਸ ਪਨ ਪਲਾਯਤੋ ਅਨਾਪਤ੍ਤਿ.

ਕਮ੍ਮਾਰਭਣ੍ਡੁਵਤ੍ਥਾਦਿਕਥਾਵਣ੍ਣਨਾ

੯੮. ਭਣ੍ਡੁਕਮ੍ਮਾਪੁਚ੍ਛਾਨਾਦਿਕਥਾਯਂ ਕਮ੍ਮਾਰਭਣ੍ਡੂਤਿ ਦਹਰਤਾਯ ਅਮੋਲ਼ਿਬਨ੍ਧੋ ਮੁਣ੍ਡਿਕਸੀਸੋ ਕਮ੍ਮਾਰਦਾਰਕੋ ¶ ਏਵ ਵੁਤ੍ਤੋ. ਤੁਲਾਧਾਰਮੁਣ੍ਡਕੋਤਿ ਏਤ੍ਥ ਤੁਲਾਧਾਰਾਤਿ ਤਮ੍ਬਸੁਵਣ੍ਣਾਦੀਨਂ ਤੁਲਂ ਹਤ੍ਥੇਨ ਧਾਰੇਤੀਤਿ ¶ ਕਮ੍ਮਾਰਾ ‘‘ਤੁਲਾਧਾਰਾ’’ਤਿ ਵੁਤ੍ਤਾ, ਤੇਸੁ ਏਕੋ ਮੁਣ੍ਡਿਕਸੀਸੋ ਦਹਰੋਤਿ ਅਤ੍ਥੋ. ਤੇਨਾਹ ‘‘ਪਞ੍ਚਸਿਖੋ ਤਰੁਣਦਾਰਕੋ’’ਤਿ. ਏਕਾਵ ਸਿਖਾ ਪਞ੍ਚ ਵੇਣਿਯੋ ਕਤ੍ਵਾ ਬਨ੍ਧਨੇਨ ਪਞ੍ਚਸਿਖਾਤਿ ਵੁਚ੍ਚਤਿ, ਸਾ ਏਤਸ੍ਸ ਅਤ੍ਥੀਤਿ ਪਞ੍ਚਸਿਖੋ, ਤਸ੍ਸ ਸਿਖਂ ਛਿਨ੍ਦਨ੍ਤਾ ਕਞ੍ਚਿ ਭਿਕ੍ਖੁਂ ਅਜਾਨਾਪੇਤ੍ਵਾਵ ਪਬ੍ਬਾਜੇਸੁਂ. ਤੇਨ ਭਣ੍ਡੁਕਮ੍ਮਾਪਲੋਕਨਂ ਅਨੁਞ੍ਞਾਤਂ. ਸੀਮਾਪਰਿਯਾਪਨ੍ਨੇਤਿ ਬਦ੍ਧਸੀਮਾਯ ਸਤਿ ਤਦਨ੍ਤੋਗਧੇ, ਅਸਤਿ ਉਪਚਾਰਸੀਮਨ੍ਤੋਗਧੇਤਿ ਅਤ੍ਥੋ. ਏਤ੍ਥ ਚ ਕਿਞ੍ਚਾਪਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਂ ਅਪਲੋਕੇਤੁਂ ਭਣ੍ਡੁਕਮ੍ਮਾਯਾ’’ਤਿ ਏਤ੍ਤਕਮੇਵ ਵੁਤ੍ਤਂ, ਨ ਪਨ ਅਨਪਲੋਕੇਨ੍ਤਸ੍ਸ ਆਪਤ੍ਤਿ ਵੁਤ੍ਤਾ, ਤਥਾਪਿ ਅਟ੍ਠਕਥਾਯਂ ‘‘ਸਬ੍ਬੇ ਆਪੁਚ੍ਛਿਤਾ ਅਮ੍ਹੇਹੀਤਿਸਞ੍ਞਿਨੋ…ਪੇ… ਪਬ੍ਬਾਜੇਨ੍ਤਸ੍ਸਪਿ ਅਨਾਪਤ੍ਤੀ’’ਤਿ ਵੁਤ੍ਤਤ੍ਤਾ ਸਞ੍ਚਿਚ੍ਚ ਅਨਾਪੁਚ੍ਛਾ ਕੇਸੇ ਓਹਾਰੇਨ੍ਤਸ੍ਸ ਦੁਕ੍ਕਟਮੇਵਾਤਿ ਦਟ੍ਠਬ੍ਬਂ. ਕੇਸੋਰੋਪਨਮ੍ਪਿ ਸਮਣਪਬ੍ਬਜਨਵੋਹਾਰਂ ਲਭਤੀਤਿ ਆਹ ‘‘ਇਮਸ੍ਸ ਸਮਣਕਰਣ’’ਨ੍ਤਿਆਦਿ. ਏਕਸਿਖਾਮਤ੍ਤਧਰੋਤਿ ਏਤ੍ਥ ਏਕੇਨ ਕੇਸੇਨ ਸਿਖਾ ਏਕਸਿਖਾਤਿ ਵਦਨ੍ਤਿ, ਅਪ੍ਪਕੇਸਾਵ ਸਿਖਾ ਏਵਂ ਵੁਤ੍ਤਾਤਿ ਗਹੇਤਬ੍ਬਾ. ਏਕਕੇਸਮ੍ਪਿ ਪਨ ਅਨਾਪੁਚ੍ਛਾ ਛਿਨ੍ਦਿਤੁਂ ਨ ਵਟ੍ਟਤਿਯੇਵ.

੧੦੦. ਵਾਮਹਤ੍ਥੇਨਾਤਿ ਦਕ੍ਖਿਣਹਤ੍ਥੇਨ ਭੁਞ੍ਜਨਤੋ ਵੁਤ੍ਤਂ.

੧੦੩-੪. ਨਿਸ੍ਸਯਮੁਚ੍ਚਨਕਸ੍ਸ ਵਤ੍ਤੇਸੁ ਪਞ੍ਚਕਛਕ੍ਕੇਸੁ ਪਨ ‘‘ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ…ਪੇ… ਅਨੁਬ੍ਯਞ੍ਜਨਸੋ’’ਤਿ ਏਤ੍ਥ ਸਬ੍ਬੋਪਿ ਚਾਯਂ ਪਭੇਦੋ ਮਾਤਿਕਾਟ੍ਠਕਥਾਯਂ ਞਾਤਾਯਂ ਞਾਤੋ ਹੋਤਿ. ‘‘ਆਪਤ੍ਤਿਂ ਜਾਨਾਤਿ, ਅਨਾਪਤ੍ਤਿਂ ਜਾਨਾਤੀ’’ਤਿ ਇਦਞ੍ਚ ਅਤ੍ਤਨਾ ਞਾਤਟ੍ਠਾਨੇਸੁ ਆਪਤ੍ਤਾਦਿਂ ਸਨ੍ਧਾਯ ਵੁਤ੍ਤਨ੍ਤਿ ਨ ਗਹੇਤਬ੍ਬਂ.

ਕਮ੍ਮਾਰਭਣ੍ਡੁਵਤ੍ਥਾਦਿਕਥਾਵਣ੍ਣਨਾ ਨਿਟ੍ਠਿਤਾ.

੧੦੫. ਪੋਕ੍ਖਰਵਸ੍ਸਨ੍ਤਿ ਪੋਕ੍ਖਰੇ ਪਦੁਮਗਚ੍ਛੇ ਵਿਯ ਅਤੇਮਿਤੁਕਾਮਾਨਂ ਸਰੀਰਤੋ ਪਵਟ੍ਟਨਕਵਸ੍ਸਂ. ਤਸ੍ਮਿਂ ਕਿਰ ਵਸ੍ਸਨ੍ਤੇ ਤੇਮਿਤੁਕਾਮਾਵ ਤੇਮੇਨ੍ਤਿ, ਨ ਇਤਰੇ. ‘‘ਭਿਕ੍ਖਂ ਗਣ੍ਹਥਾ’’ਤਿ ਵਤ੍ਵਾ ਗਤੋ ਨਾਮ ਨਤ੍ਥੀਤਿ ਅਤ੍ਤਨੋ ਸਨ੍ਤਕੇ ਰਜ੍ਜੇ ਸਬ੍ਬਮ੍ਪਿ ਸਾਪਤੇਯ੍ਯਂ ਸਯਮੇਵ ਪਰਿਭੁਞ੍ਜਿਸ੍ਸਤੀਤਿ ਗਾਰਵੇਨ ¶ ਸੁਦ੍ਧੋਦਨਮਹਾਰਾਜਾਪਿ ਨ ਨਿਮਨ੍ਤੇਸਿ, ਗਨ੍ਤ੍ਵਾ ਪਨ ਗੇਹੇ ਸਕਲਰਤ੍ਤਿਂ ਮਹਾਦਾਨਞ੍ਚੇਵ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਆਸਨਪਞ੍ਞਤ੍ਤਿਟ੍ਠਾਨਾਲਙ੍ਕਾਰਞ੍ਚ ਸਂਵਿਦਹਨ੍ਤੋਵ ਵੀਤਿਨਾਮੇਸਿ.

ਨ ¶ ਕੋਚਿ…ਪੇ… ਪਤ੍ਤਂ ਵਾ ਅਗ੍ਗਹੇਸੀਤਿ ਭਗਵਾ ਅਤ੍ਤਨੋ ਪਿਤੁ ਨਿਵੇਸਨਮੇਵ ਗਮਿਸ੍ਸਤੀਤਿਸਞ੍ਞਾਯ ਨਗ੍ਗਹੇਸਿ. ਕੁਲਨਗਰੇਤਿ ਞਾਤਿਕੁਲਨ੍ਤਕੇ ਨਗਰੇ. ਪਿਣ੍ਡਚਾਰਿਯਵਤ੍ਤਨ੍ਤਿ ਅਤ੍ਤਨੋ ਞਾਤਿਗਾਮੇਸੁਪਿ ਸਪਦਾਨਚਾਰਿਕਵਤ੍ਤਂ. ਭਿਕ੍ਖਾਯ ਚਾਰੋ ਚਰਣਂ ਏਤਸ੍ਸਾਤਿ ਭਿਕ੍ਖਾਚਾਰੋ, ਖਤ੍ਤਿਯੋ.

ਉਤ੍ਤਿਟ੍ਠੇਤਿ ਉਤ੍ਤਿਟ੍ਠਿਤ੍ਵਾ ਪਰੇਸਂ ਘਰਦ੍ਵਾਰੇ ਉਦ੍ਦਿਸ੍ਸ ਠਤ੍ਵਾ ਗਹੇਤਬ੍ਬਪਿਣ੍ਡੇ. ਨਪ੍ਪਮਜ੍ਜੇਯ੍ਯਾਤਿ ਨਿਮਨ੍ਤਨਾਦਿਵਸੇਨ ਲਬ੍ਭਮਾਨਪਣੀਤਭੋਜਨਂ ਪਟਿਕ੍ਖਿਪਿਤ੍ਵਾ ਪਿਣ੍ਡਾਯ ਚਰਣਵਸੇਨ ਤਤ੍ਥ ਨਪ੍ਪਮਜ੍ਜੇਯ੍ਯ. ਧਮ੍ਮਨ੍ਤਿ ਅਨੇਸਨਂ ਪਹਾਯ ਸਪਦਾਨਂ ਚਰਨ੍ਤੋ ਤਮੇਵ ਭਿਕ੍ਖਾਚਰਿਯਧਮ੍ਮਂ ਸੁਚਰਿਤਂ ਚਰੇਯ੍ਯ. ਸੁਖਂ ਸੇਤੀਤਿ ਚਤੂਹਿ ਇਰਿਯਾਪਥੇਹਿ ਸੁਖਂ ਵਿਹਰਤੀਤਿ ਅਤ੍ਥੋ.

ਦੁਤਿਯਗਾਥਾਯਂ ਨ ਨਂ ਦੁਚ੍ਚਰਿਤਨ੍ਤਿ ਵੇਸਿਯਾਦਿਭੇਦੇ ਅਗੋਚਰੇ ਚਰਣਵਸੇਨ ਤਂ ਯਥਾਵੁਤ੍ਤਂ ਧਮ੍ਮਂ ਦੁਚ੍ਚਰਿਤਂ ਨ ਚ ਚਰੇ. ਸੇਸਂ ਵੁਤ੍ਤਨਯਮੇਵ. ਇਮਂ ਪਨ ਗਾਥਂ ਸੁਤ੍ਵਾਤਿ ਨਿਵੇਸਨੇ ਨਿਸਿਨ੍ਨੇਨ ਭਗਵਤਾ ਞਾਤਿਸਮਾਗਮੇ ਅਤ੍ਤਨੋ ਪਿਣ੍ਡਾਯ ਚਰਣਂ ਨਿਸ੍ਸਾਯ ਪਵਤ੍ਤਾਯ ਗਾਥਾਯ ਵੁਤ੍ਤਂ ਇਮਂ ਦੁਤਿਯਗਾਥਂ ਸੁਤ੍ਵਾ.

ਧਮ੍ਮਪਾਲਜਾਤਕਨ੍ਤਿਆਦੀਸੁ ਪਨ ਤਤੋ ਪਰਕਾਲੇਸੁਪਿ ਰਞ੍ਞੋ ਪਵਤ੍ਤਿ ਪਰਿਨਿਬ੍ਬਾਨਂ ਪਾਪੇਤ੍ਵਾ ਯਥਾਪਸਙ੍ਗਵਸੇਨ ਦਸ੍ਸੇਤੁਂ ਵੁਤ੍ਤਾ. ਤੇਨਾਹ ‘‘ਸੋਤਾਪਤ੍ਤਿਫਲਂ ਸਚ੍ਛਿਕਤ੍ਵਾ’’ਤਿਆਦਿ. ਸਿਰਿਗਬ੍ਭਂ ਗਨ੍ਤ੍ਵਾਤਿ ਏਤ੍ਥ ਯਦਿ ਹਿ ਭਗਵਾ ਤਦਹੇਵ ਗਨ੍ਤ੍ਵਾ ਨ ਪਸ੍ਸੇਯ੍ਯ, ਸਾ ਹਦਯੇਨ ਫਲਿਤੇਨ ਮਰੇਯ੍ਯਾਤਿ ਅਗਮਾਸੀਤਿ ਦਟ੍ਠਬ੍ਬਂ.

ਤਂ ਦਿਵਸਮੇਵਾਤਿ ਤਸ੍ਮਿਂ ਰਾਹੁਲਮਾਤੁਦਸ੍ਸਨਦਿਵਸੇਯੇਵ. ਧਮ੍ਮਪਦਟ੍ਠਕਥਾਯਂ ਪਨ ‘‘ਸਤ੍ਥਾ ਕਪਿਲਪੁਰਂ ਗਨ੍ਤ੍ਵਾ ਤਤਿਯਦਿਵਸੇ ਨਨ੍ਦਂ ਪਬ੍ਬਾਜੇਸੀ’’ਤਿ (ਧ. ਪ. ਅਟ੍ਠ. ੧.੧੨ ਨਨ੍ਦਤ੍ਥੇਰਵਤ੍ਥੁ) ਵੁਤ੍ਤਂ. ਕੇਸਵਿਸ੍ਸਜ੍ਜਨਨ੍ਤਿ ਰਾਜਮੋਲ਼ਿਬਨ੍ਧਨਤ੍ਥਂ ਕੁਮਾਰਕਾਲੇ ਬਨ੍ਧਿਤਸਿਖਾਵੇਣਿਮੋਚਨਂ, ਤਂ ਕਿਰ ਕਰੋਨ੍ਤਾ ਮਙ੍ਗਲਂ ਕਰੋਨ੍ਤਿ. ਸਾਰਤ੍ਥਦੀਪਨਿਯਂ ਪਨ ‘‘ਕੇਸਵਿਸ੍ਸਜ੍ਜਨਨ੍ਤਿ ਕੁਲਮਰਿਯਾਦਵਸੇਨ ਕੇਸੋਰੋਪਨ’’ਨ੍ਤਿ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੦੫) ਵੁਤ੍ਤਂ. ਪਟ੍ਟਬਨ੍ਧੋਤਿ ‘‘ਅਸੁਕਰਾਜਾ’’ਤਿ ਨਲ਼ਾਟੇ ਸੁਵਣ੍ਣਪਟ੍ਟਬਨ੍ਧਨਂ. ਅਭਿਨਵਪਾਸਾਦਪ੍ਪਵੇਸਮਙ੍ਗਲਂ ਘਰਮਙ੍ਗਲਂ. ਛਤ੍ਤੁਸ੍ਸਾਪਨੇ ਮਙ੍ਗਲਂ ਛਤ੍ਤਮਙ੍ਗਲਂ. ਜਨਪਦਕਲ੍ਯਾਣੀਤਿ ¶ ਜਨਪਦਮ੍ਹਿ ਕਲ੍ਯਾਣੀ ਪਰੇਹਿ ਅਸਾਧਾਰਣੇਹਿ ਪਞ੍ਚਕਲ੍ਯਾਣਾਦੀਹਿ ਸਹਿਤਤ੍ਤਾ ਸਾ ਏਵਂ ਵੁਤ੍ਤਾ. ਤੁਵਟਨ੍ਤਿ ਸੀਘਂ. ਅਨਿਚ੍ਛਮਾਨਨ੍ਤਿ ਮਨਸਾ ਅਰੋਚੇਨ੍ਤਂ, ਵਾਚਾਯ ਪਨ ਭਗਵਤਾ ‘‘ਪਬ੍ਬਜਿਸ੍ਸਸਿ ਨਨ੍ਦਾ’’ਤਿ ਵੁਤ੍ਤੇ ਗਾਰਵੇਨ ਪਟਿਕ੍ਖਿਪਿਤੁਂ ਅਵਿਸਹਨ੍ਤੋ ‘‘ਆਮਾ’’ਤਿ ਅਵੋਚ. ਭਗਵਾ ਚ ਏਤੇਨ ਲੇਸੇਨ ਪਬ੍ਬਾਜੇਸਿ.

ਬ੍ਰਹ੍ਮਰੂਪਵਣ੍ਣਨ੍ਤਿ ¶ ਬ੍ਰਹ੍ਮਰੂਪਸਮਾਨਰੂਪਂ. ਤ੍ਯਸ੍ਸਾਤਿ ਤੇ ਅਸ੍ਸ. ਨਿਵਤ੍ਤੇਤੁਂ ਨ ਵਿਸਹੀਤਿ ‘‘ਮਾ ਨਂ ਨਿਵਤ੍ਤਯਿਤ੍ਥਾ’’ਤਿ ਭਗਵਤਾ ਵੁਤ੍ਤਤ੍ਤਾ ਨਾਸਕ੍ਖਿ. ਸਤ੍ਤਵਿਧਂ ਅਰਿਯਧਨਨ੍ਤਿ –

‘‘ਸਦ੍ਧਾਧਨਂ ਸੀਲਧਨਂ, ਹਿਰਿਓਤ੍ਤਪ੍ਪਿਯਂ ਧਨਂ;

ਸੁਤਧਨਞ੍ਚ ਚਾਗੋ ਚ, ਪਞ੍ਞਾ ਵੇ ਸਤ੍ਤਮਂ ਧਨ’’ਨ੍ਤਿ. (ਅ. ਨਿ. ੭.੫, ੬) –

ਏਵਂ ਵੁਤ੍ਤਂ ਸਤ੍ਤਵਿਧਂ ਅਰਿਯਧਨਂ. ਅਧਿਮਤ੍ਤਂ ਰਾਹੁਲੇਤਿ ਰਾਹੁਲੇ ਪਬ੍ਬਜਿਤੇ ਨਨ੍ਦਪਬ੍ਬਜ੍ਜਾਯ ਉਪ੍ਪਨ੍ਨਦੁਕ੍ਖਤੋਪਿ ਅਧਿਕਤਰਂ ਦੁਕ੍ਖਂ ਅਹੋਸੀਤਿ ਅਤ੍ਥੋ. ਇਤੋ ਪਚ੍ਛਾਤਿ ਇਤੋ ਵੁਤ੍ਤਸੋਕੁਪ੍ਪਤ੍ਤਿਤੋ ਅਪਰਦਿਵਸੇਸੁ ਅਨਾਗਾਮੀਨਂ ਞਾਤਿਸਿਨੇਹਪਟਿਘਚਿਤ੍ਤੁਪ੍ਪਾਦਾਭਾਵਾ. ਪਾਲ਼ਿਯਂ ਪੁਤ੍ਤਪੇਮਨ੍ਤਿਆਦਿ ਰਞ੍ਞਾ ਪੁਤ੍ਤਸਿਨੇਹਸ੍ਸ ਤਿਬ੍ਬਭਾਵਂ ਦਸ੍ਸੇਤੁਂ ਵੁਤ੍ਤਂ. ਪੁਤ੍ਤਸਿਨੇਹੋ ਹਿ ਅਤ੍ਤਨਾ ਸਹਜਾਤਪੀਤਿਵੇਗਸਮੁਟ੍ਠਿਤਾਨਂ ਰੂਪਧਮ੍ਮਾਨਂ ਸਕਲਸਰੀਰਂ ਖੋਭੇਤ੍ਵਾ ਪਵਤ੍ਤਨਵਸੇਨ ‘‘ਛਵਿਂ…ਪੇ… ਅਟ੍ਠਿਮਿਞ੍ਜਂ ਆਹਚ੍ਚ ਤਿਟ੍ਠਤੀ’’ਤਿ ਵੁਤ੍ਤੋ. ਅਤ੍ਤਨੋ ਪਿਯਤਰਾਤਿ ਭਗਵਨ੍ਤਂ ਸਨ੍ਧਾਯ ਵਦਤਿ. ਪੁਤ੍ਤੇਤਿ ਰਾਹੁਲਂ. ਸਦ੍ਦਹਨ੍ਤੇਨਾਤਿ ਤਸ੍ਸ ਵਚਨੇਨ ਅਵੇਮਤਿਕੇਨਾਤਿ ਅਤ੍ਥੋ. ਵਿਮਤਿਯਾ ਸਤਿ ਆਪਤ੍ਤਿ ਏਵ.

ਰਾਹੁਲਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਸਿਕ੍ਖਾਪਦਦਣ੍ਡਕਮ੍ਮਵਤ੍ਥੁਕਥਾਵਣ੍ਣਨਾ

੧੦੬. ਸਾਮਣੇਰਸਿਕ੍ਖਾਪਦਾਦੀਸੁ ਪਾਲ਼ਿਯਂ ਸਿਕ੍ਖਾਪਦਾਨੀਤਿ ਸਿਕ੍ਖਾਕੋਟ੍ਠਾਸਾ. ਅਧਿਸੀਲਸਿਕ੍ਖਾਨਂ ਵਾ ਅਧਿਗਮੂਪਾਯਾ. ਪਾਣੋਤਿ ਪਰਮਤ੍ਥਤੋ ਜੀਵਿਤਿਨ੍ਦ੍ਰਿਯਂ. ਤਸ੍ਸ ਅਤਿਪਾਤਨਂ ਪਬਨ੍ਧਵਸੇਨ ਪਵਤ੍ਤਿਤੁਂ ਅਦਤ੍ਵਾ ਸਤ੍ਥਾਦੀਹਿ ਅਤਿਕ੍ਕਮ੍ਮ ਅਭਿਭਵਿਤ੍ਵਾ ਪਾਤਨਂ ਪਾਣਾਤਿਪਾਤੋ. ਪਾਣਵਧੋਤਿ ਅਤ੍ਥੋ. ਸੋ ¶ ਪਨ ਅਤ੍ਥਤੋ ਪਾਣੇ ਪਾਣਸਞ੍ਞਿਨੋ ਜੀਵਿਤਿਨ੍ਦ੍ਰਿਯੁਪਚ੍ਛੇਦਕਉਪਕ੍ਕਮਸਮੁਟ੍ਠਾਪਿਕਾ ਵਧਕਚੇਤਨਾਵ. ਤਸ੍ਮਾ ਪਾਣਾਤਿਪਾਤਾ ਵੇਰਮਣਿ, ਵੇਰਹੇਤੁਤਾਯ ਵੇਰਸਙ੍ਖਾਤਂ ਪਾਣਾਤਿਪਾਤਾਦਿਪਾਪਧਮ੍ਮਂ ਮਣਤਿ ਨੀਹਰਤੀਤਿ ਵਿਰਤਿ ‘‘ਵੇਰਮਣੀ’’ਤਿ ਵੁਚ੍ਚਤਿ, ਵਿਰਮਤਿ ਏਤਾਯਾਤਿ ਵਾ ‘‘ਵਿਰਮਣੀ’’ਤਿ ਵਤ੍ਤਬ੍ਬੇ ਨਿਰੁਤ੍ਤਿਨਯੇਨ ‘‘ਵੇਰਮਣੀ’’ਤਿ ਸਮਾਦਾਨਵਿਰਤਿ ਵੁਤ੍ਤਾ. ਏਸ ਨਯੋ ਸੇਸੇਸੁਪਿ.

ਅਦਿਨ੍ਨਸ੍ਸ ਆਦਾਨਂ ਅਦਿਨ੍ਨਾਦਾਨਂ, ਥੇਯ੍ਯਚੇਤਨਾਵ. ਅਬ੍ਰਹ੍ਮਚਰਿਯਨ੍ਤਿ ਅਸੇਟ੍ਠਚਰਿਯਂ, ਮਗ੍ਗੇਨ ਮਗ੍ਗਪਟਿਪਤ੍ਤਿਸਮੁਟ੍ਠਾਪਿਕਾ ਮੇਥੁਨਚੇਤਨਾ. ਮੁਸਾਤਿ ਅਭੂਤਵਤ੍ਥੁ, ਤਸ੍ਸ ਵਾਦੋ ਅਭੂਤਤਂ ਞਤ੍ਵਾਵ ਭੂਤਤੋ ¶ ਵਿਞ੍ਞਾਪਨਚੇਤਨਾ ਮੁਸਾਵਾਦੋ. ਪਿਟ੍ਠਪੂਵਾਦਿਨਿਬ੍ਬਤ੍ਤਸੁਰਾ ਚੇਵ ਪੁਪ੍ਫਾਸਵਾਦਿਭੇਦਂ ਮੇਰਯਞ੍ਚ ਸੁਰਾਮੇਰਯਂ. ਤਦੇਵ ਮਦਨੀਯਟ੍ਠੇਨ ਮਜ੍ਜਞ੍ਚੇਵ ਪਮਾਦਕਾਰਣਟ੍ਠੇਨ ਪਮਾਦਟ੍ਠਾਨਞ੍ਚ, ਤਂ ਯਾਯ ਚੇਤਨਾਯ ਪਿਵਤਿ, ਤਸ੍ਸ ਏਤਂ ਅਧਿਵਚਨਂ.

ਅਰੁਣੁਗ੍ਗਮਨਤੋ ਪਟ੍ਠਾਯ ਯਾਵ ਮਜ੍ਝਨ੍ਹਿਕਾ ਅਯਂ ਅਰਿਯਾਨਂ ਭੋਜਨਸ੍ਸ ਕਾਲੋ ਨਾਮ, ਤਦਞ੍ਞੋ ਵਿਕਾਲੋ. ਭੁਞ੍ਜਿਤਬ੍ਬਟ੍ਠੇਨ ਭੋਜਨਨ੍ਤਿ ਇਧ ਸਬ੍ਬਂ ਯਾਵਕਾਲਿਕਂ ਵੁਚ੍ਚਤਿ, ਤਸ੍ਸ ਅਜ੍ਝੋਹਰਣਂ ਇਧ ਉਤ੍ਤਰਪਦਲੋਪੇਨ ‘‘ਭੋਜਨ’’ਨ੍ਤਿ ਅਧਿਪ੍ਪੇਤਂ. ਵਿਕਾਲੇ ਭੋਜਨਂ ਅਜ੍ਝੋਹਰਣਂ ਵਿਕਾਲਭੋਜਨਂ, ਵਿਕਾਲੇ ਵਾ ਯਾਵਕਾਲਿਕਸ੍ਸ ਭੋਜਨਂ ਅਜ੍ਝੋਹਰਣਂ ਵਿਕਾਲਭੋਜਨਨ੍ਤਿਪਿ ਅਤ੍ਥੋ ਗਹੇਤਬ੍ਬੋ, ਅਤ੍ਥਤੋ ਵਿਕਾਲੇ ਯਾਵਕਾਲਿਕਅਜ੍ਝੋਹਰਣਚੇਤਨਾਵ.

ਸਾਸਨਸ੍ਸ ਅਨਨੁਲੋਮਤ੍ਤਾ ਵਿਸੂਕਂ ਪਟਾਣੀਭੂਤਂ ਦਸ੍ਸਨਂ ਵਿਸੂਕਦਸ੍ਸਨਂ, ਨਚ੍ਚਗੀਤਾਦਿਦਸ੍ਸਨਸਵਨਾਨਞ੍ਚੇਵ ਵਟ੍ਟਕਯੁਦ੍ਧਜੂਤਕੀਲ਼ਾਦਿਸਬ੍ਬਕੀਲ਼ਾਨਞ੍ਚ ਨਾਮਂ. ਦਸ੍ਸਨਨ੍ਤਿ ਚੇਤ੍ਥ ਪਞ੍ਚਨ੍ਨਮ੍ਪਿ ਵਿਞ੍ਞਾਣਾਨਂ ਯਥਾਸਕਂ ਵਿਸਯਸ੍ਸ ਆਲੋਚਨਸਭਾਵਤਾਯ ਦਸ੍ਸਨ-ਸਦ੍ਦੇਨ ਸਙ੍ਗਹੇਤਬ੍ਬਤ੍ਤਾ ਸਵਨਮ੍ਪਿ ਸਙ੍ਗਹਿਤਂ. ਨਚ੍ਚਗੀਤਵਾਦਿਤ-ਸਦ੍ਦੇਹਿ ਚੇਤ੍ਥ ਅਤ੍ਤਨੋ ਨਚ੍ਚਨਗਾਯਨਾਦੀਨਿਪਿ ਸਙ੍ਗਹਿਤਾਨੀਤਿ ਦਟ੍ਠਬ੍ਬਂ.

ਮਾਲਾਤਿ ਬਦ੍ਧਮਬਦ੍ਧਂ ਵਾ ਅਨ੍ਤਮਸੋ ਸੁਤ੍ਤਾਦਿਮਯਮ੍ਪਿ ਅਲਙ੍ਕਾਰਤ੍ਥਾਯ ਪਿਲ਼ਨ੍ਧਿਯਮਾਨਂ ‘‘ਮਾਲਾ’’ਤ੍ਵੇਵ ਵੁਚ੍ਚਤਿ. ਗਨ੍ਧਨ੍ਤਿ ਵਾਸਚੁਣ੍ਣਾਦਿਵਿਲੇਪਨਤੋ ਅਞ੍ਞਂ ਯਂ ਕਿਞ੍ਚਿ ਗਨ੍ਧਜਾਤਂ. ਵਿਲੇਪਨਨ੍ਤਿ ਪਿਸਿਤ੍ਵਾ ਗਹਿਤਂ ਛਵਿਰਾਗਕਰਣਞ੍ਚੇਵ ਗਨ੍ਧਜਾਤਞ੍ਚ. ਧਾਰਣਂ ਨਾਮ ਪਿਲ਼ਨ੍ਧਨਂ. ਮਣ੍ਡਨਂ ਨਾਮ ਊਨਟ੍ਠਾਨਪੂਰਣਂ. ਗਨ੍ਧਵਸੇਨ, ਛਵਿਰਾਗਵਸੇਨ ਚ ਸਾਦਿਯਨਂ ਵਿਭੂਸਨਂ ਨਾਮ. ਮਾਲਾਦੀਸੁ ਵਾ ਧਾਰਣਾਦੀਨਿ ਯਥਾਕ੍ਕਮਂ ¶ ਯੋਜੇਤਬ੍ਬਾਨਿ. ਤੇਸਂ ਧਾਰਣਾਦੀਨਂ ਠਾਨਂ ਕਾਰਣਂ ਵੀਤਿਕ੍ਕਮਚੇਤਨਾ.

ਉਚ੍ਚਾਤਿ ਉਚ੍ਚ-ਸਦ੍ਦੇਨ ਸਮਾਨਤ੍ਥੋ ਨਿਪਾਤੋ, ਉਚ੍ਚਾਸਯਨਂ ਵੁਚ੍ਚਤਿ ਪਮਾਣਾਤਿਕ੍ਕਨ੍ਤਂ ਆਸਨ੍ਦਾਦਿ. ਮਹਾਸਯਨਂ ਅਕਪ੍ਪਿਯਤ੍ਥਰਣੇਹਿ ਅਤ੍ਥਤਂ, ਸਲੋਹਿਤਵਿਤਾਨਞ੍ਚ. ਏਤੇਸੁ ਹਿ ਆਸਨਂ, ਸਯਨਞ੍ਚ ਉਚ੍ਚਾਸਯਨਮਹਾਸਯਨ-ਸਦ੍ਦੇਹਿ ਗਹਿਤਾਨਿ ਉਤ੍ਤਰਪਦਲੋਪੇਨ. ਜਾਤਰੂਪਰਜਤਪਟਿਗ੍ਗਹਣਾਤਿ ਏਤ੍ਥ ਰਜਤ-ਸਦ੍ਦੇਨ ਦਾਰੁਮਾਸਕਾਦਿ ਸਬ੍ਬਂ ਰੂਪਿਯਂ ਸਙ੍ਗਹਿਤਂ, ਮੁਤ੍ਤਾਮਣਿਆਦਯੋਪੇਤ੍ਥ ਧਞ੍ਞਖੇਤ੍ਤਵਤ੍ਥਾਦਯੋ ਚ ਸਙ੍ਗਹਿਤਾਤਿ ਦਟ੍ਠਬ੍ਬਾ. ਪਟਿਗ੍ਗਹਣ-ਸਦ੍ਦੇਨ ਪਟਿਗ੍ਗਾਹਾਪਨਸਾਦਿਯਨਾਨਿ ਸਙ੍ਗਹਿਤਾਨਿ. ਨਾਸਨਵਤ੍ਥੂਤਿ ਪਾਰਾਜਿਕਟ੍ਠਾਨਤਾਯ ਲਿਙ੍ਗਨਾਸਨਾਯ ਕਾਰਣਂ.

੧੦੭. ਪਾਲ਼ਿਯਂ ਸਬ੍ਬਂ ਸਙ੍ਘਾਰਾਮਂ ਆਵਰਣਂ ਕਰੋਨ੍ਤੀਤਿ ਸਬ੍ਬਸਙ੍ਘਾਰਾਮੇ ਪਵੇਸਨਿਵਾਰਣਂ ਕਰੋਨ੍ਤਿ. ਸਙ੍ਘਾਰਾਮੋ ਆਵਰਣਂ ਕਾਤਬ੍ਬੋਤਿ ਸਙ੍ਘਾਰਾਮੋ ਆਵਰਣੋ ਕਾਤਬ੍ਬੋ, ਸਙ੍ਘਾਰਾਮੇ ਵਾ ਆਵਰਣਂ ¶ ਕਾਤਬ੍ਬਨ੍ਤਿ ਅਤ੍ਥੋ. ਤੇਨੇਵ ‘‘ਤਤ੍ਥ ਆਵਰਣਂ ਕਾਤੁ’’ਨ੍ਤਿ ਭੁਮ੍ਮਵਸੇਨ ਵੁਤ੍ਤਂ. ਆਹਾਰਂ ਆਵਰਣਨ੍ਤਿਆਦੀਸੁਪਿ ਏਸੇਵ ਨਯੋ. ‘‘ਯਤ੍ਥ ਵਾ ਵਸਤੀ’’ਤਿ ਇਮਿਨਾ ਸਾਮਣੇਰਸ੍ਸ ਵਸ੍ਸਗ੍ਗੇਨ ਲਦ੍ਧਂ ਵਾ ਸਕਸਨ੍ਤਕਮੇਵ ਵਾ ਨਿਬਦ੍ਧਵਸਨਕਸੇਨਾਸਨਂ ਵੁਤ੍ਤਂ. ਯਤ੍ਥ ਵਾ ਪਟਿਕ੍ਕਮਤੀਤਿ ਆਚਰਿਯੁਪਜ੍ਝਾਯਾਨਂ ਵਸਨਟ੍ਠਾਨਂ ਵੁਤ੍ਤਂ. ਤੇਨਾਹ ‘‘ਅਤ੍ਤਨੋ’’ਤਿਆਦਿ. ਅਤ੍ਤਨੋਤਿ ਹਿ ਸਯਂ, ਆਚਰਿਯਸ੍ਸ, ਉਪਜ੍ਝਾਯਸ੍ਸ ਵਾਤਿ ਅਤ੍ਥੋ. ਦਣ੍ਡੇਨ੍ਤਿ ਵਿਨੇਨ੍ਤਿ ਏਤੇਨਾਤਿ ਦਣ੍ਡੋ, ਸੋ ਏਵ ਕਤ੍ਤਬ੍ਬਤ੍ਤਾ ਕਮ੍ਮਨ੍ਤਿ ਦਣ੍ਡਕਮ੍ਮਂ, ਆਵਰਣਾਦਿ. ਉਦਕਂ ਵਾ ਪਵੇਸੇਤੁਨ੍ਤਿ ਪੋਕ੍ਖਰਣੀਆਦਿਉਦਕੇ ਪਵੇਸੇਤੁਂ.

ਸਿਕ੍ਖਾਪਦਦਣ੍ਡਕਮ੍ਮਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਅਨਾਪੁਚ੍ਛਾਵਰਣਵਤ੍ਥੁਆਦਿਕਥਾਵਣ੍ਣਨਾ

੧੦੮. ਸਦ੍ਧਿਵਿਹਾਰਿਕਅਨ੍ਤੇਵਾਸਿਕਾਨਮ੍ਪੀਤਿ ਉਪਸਮ੍ਪਨ੍ਨੇ ਸਨ੍ਧਾਯ ਵੁਤ੍ਤਂ. ਤੇਸੁਪਿ ਹਿ ਆਚਰਿਯੁਪਜ੍ਝਾਯੇਸੁ ਯਥਾ ਓਰਮਨ੍ਤਿ, ਤਥਾ ਤੇਸਂ ਨਿਗ੍ਗਹਂ ਅਕਰੋਨ੍ਤੇਸੁ ਅਞ੍ਞੇਹਿ ਆਵਰਣਾਦਿਨਿਗ੍ਗਹਕਮ੍ਮਂ ਕਾਤਬ੍ਬਮੇਵ. ਸਙ੍ਗਣ੍ਹਨ੍ਤੀਤਿ ‘‘ਪਰਪਰਿਸਤੋ ਭਿਨ੍ਦਿਤ੍ਵਾ ਗਣ੍ਹਿਸ੍ਸਾਮੀ’’ਤਿ ਦਾਨਾਦਿਚਤੂਹਿ ਸਙ੍ਗਹਵਤ੍ਥੂਹਿ (ਦੀ. ਨਿ. ੩.੨੧੦; ਅ. ਨਿ. ੪.੩੨, ੨੫੬) ਉਪਲਾਲ਼ਨਵਸੇਨ ¶ ਸਙ੍ਗਣ੍ਹਨ੍ਤਿ. ਸੋ ਭਿਜ੍ਜਤੁ ਵਾ ਮਾ ਵਾ, ਸਙ੍ਗਣ੍ਹਨ੍ਤਸ੍ਸ ਪਯੋਗੇ ਆਪਤ੍ਤਿ ਏਵ. ਭਿਨ੍ਦਿਤ੍ਵਾ ਗਣ੍ਹਿਤੁਂ ਨ ਵਟ੍ਟਤੀਤਿ ਭਿਨ੍ਦਿਤੁਮ੍ਪਿ ਨ ਵਟ੍ਟਤਿ, ਗਣ੍ਹਿਤੁਮ੍ਪਿ ਨ ਵਟ੍ਟਤੀਤਿ ਅਤ੍ਥੋ. ਆਦੀਨਵਂ ਪਨ ਵਤ੍ਤੁਂ ਵਟ੍ਟਤੀਤਿ ਸਾਸਨਗਾਰਵੇਨ ਵਾ ਪਰਾਨੁਦ੍ਦਯਤਾਯ ਵਾ ਵਤ੍ਤੁਂ ਵਟ੍ਟਤਿ, ਨ ਪਰਿਸਲੋਲਤਾਯ.

‘‘ਸੇਨਾਸਨਗ੍ਗਾਹੋ ਚ ਪਟਿਪ੍ਪਸ੍ਸਮ੍ਭਤੀ’’ਤਿ ਇਮਿਨਾ ਵਸ੍ਸਚ੍ਛੇਦਂ ਦਸ੍ਸੇਤਿ. ਉਪਸਮ੍ਪਨ੍ਨਾਨਮ੍ਪਿ ਪਾਰਾਜਿਕਸਮਾਪਤ੍ਤਿਯਾ ਸਰਣਗਮਨਾਦਿਸਾਮਣੇਰਭਾਵਸ੍ਸਾਪਿ ਵਿਨਸ੍ਸਨਤੋ ਸੇਨਾਸਨਗ੍ਗਾਹੋ ਚ ਪਟਿਪ੍ਪਸ੍ਸਮ੍ਭਤਿ, ਸਙ੍ਘਲਾਭਮ੍ਪਿ ਤੇ ਨ ਲਭਨ੍ਤੀਤਿ ਵੇਦਿਤਬ੍ਬਂ. ਪੁਰਿਮਿਕਾਯ ਪੁਨ ਸਰਣਾਨਿ ਗਹਿਤਾਨੀਤਿ ਸਰਣਗ੍ਗਹਣੇਨ ਸਹ ਤਦਹੇਵਸ੍ਸ ਵਸ੍ਸੂਪਗਮਨਮ੍ਪਿ ਦਸ੍ਸੇਤਿ. ਪਚ੍ਛਿਮਿਕਾਯ ਵਸ੍ਸਾਵਾਸਿਕਨ੍ਤਿ ਵਸ੍ਸਾਵਾਸਿਕਲਾਭਗ੍ਗਹਣਦਸ੍ਸਨਮਤ੍ਤਮੇਵੇਤਂ, ਤਤੋ ਪੁਰੇਪਿ, ਪਚ੍ਛਾਪਿ ਵਾ ਵਸ੍ਸਾਵਾਸਿਕਞ੍ਚ ਚੀਵਰਮਾਸੇਸੁ ਸਙ੍ਘੇ ਉਪ੍ਪਨ੍ਨਂ ਕਾਲਚੀਵਰਞ੍ਚ ਪੁਰਿਮਿਕਾਯ ਉਪਗਨ੍ਤ੍ਵਾ ਅਵਿਪਨ੍ਨਸੀਲੋ ਸਾਮਣੇਰੋ ਲਭਤਿ ਏਵ. ਸਚੇ ਪਚ੍ਛਿਮਿਕਾਯ ਗਹਿਤਾਨੀਤਿ ਪਚ੍ਛਿਮਿਕਾਯ ਵਸ੍ਸੂਪਗਮਨਞ੍ਚ ਛਿਨ੍ਨਵਸ੍ਸਤਞ੍ਚ ਦਸ੍ਸੇਤਿ. ਤਸ੍ਸ ਹਿ ਕਾਲਚੀਵਰੇ ਭਾਗੋ ਨ ਪਾਪੁਣਾਤਿ. ਤਸ੍ਮਾ ‘‘ਅਪਲੋਕੇਤ੍ਵਾ ਲਾਭੋ ਦਾਤਬ੍ਬੋ’’ਤਿ ਵੁਤ੍ਤਂ.

ਵਸ੍ਸਾਵਾਸਿਕਲਾਭੋ ¶ ਪਨ ਯਦਿ ਸੇਨਾਸਨਸਾਮਿਕਾ ਦਾਯਕਾ ਸੇਨਾਸਨਗੁਤ੍ਤਤ੍ਥਾਯ ਪਚ੍ਛਿਮਿਕਾਯ ਉਪਗਨ੍ਤ੍ਵਾ ਵਤ੍ਤਂ ਕਤ੍ਵਾ ਅਤ੍ਤਨੋ ਸੇਨਾਸਨੇ ਵਸਨ੍ਤਸ੍ਸਪਿ ਵਸ੍ਸਾਵਾਸਿਕਂ ਦਾਤਬ੍ਬਨ੍ਤਿ ਵਦਨ੍ਤਿ, ਅਨਪਲੋਕੇਤ੍ਵਾਪਿ ਦਾਤਬ੍ਬੋਵ. ਯਂ ਪਨ ਸਾਰਤ੍ਥਦੀਪਨਿਯਂ ‘‘ਪਚ੍ਛਿਮਿਕਾਯ ਵਸ੍ਸਾਵਾਸਿਕਂ ਲਚ੍ਛਤੀਤਿ ਪਚ੍ਛਿਮਿਕਾਯ ਪੁਨ ਵਸ੍ਸਂ ਉਪਗਤਤ੍ਤਾ ਲਚ੍ਛਤੀ’’ਤਿ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੦੮) ਵੁਤ੍ਤਂ, ਤਮ੍ਪਿ ਵਸ੍ਸਾਵਾਸਿਕੇ ਦਾਯਕਾਨਂ ਇਮਂ ਅਧਿਪ੍ਪਾਯਂ ਨਿਸ੍ਸਾਯ ਵੁਤ੍ਤਞ੍ਚੇ, ਸੁਨ੍ਦਰਂ. ਸਙ੍ਘਿਕਂ, ਕਾਲਚੀਵਰਮ੍ਪਿ ਸਨ੍ਧਾਯ ਵੁਤ੍ਤਞ੍ਚੇ, ਨ ਯੁਜ੍ਜਤੀਤਿ ਵੇਦਿਤਬ੍ਬਂ.

ਨ ਅਜਾਨਿਤ੍ਵਾਤਿ ‘‘ਸੁਰਾ’’ਤਿ ਅਜਾਨਿਤ੍ਵਾ ਪਿਵਤੋ ਪਾਣਾਤਿਪਾਤਵੇਰਮਣਿਆਦਿਸਬ੍ਬਸੀਲਭੇਦਂ, ਸਰਣਭੇਦਞ੍ਚ ਨ ਆਪਜ੍ਜਤਿ, ਅਕੁਸਲਂ ਪਨ ਸੁਰਾਪਾਨਵੇਰਮਣਿਸੀਲਭੇਦੋ ਚ ਹੋਤਿ ਮਾਲਾਦਿਧਾਰਣਾਦੀਸੁ ਵਿਯਾਤਿ ਦਟ੍ਠਬ੍ਬਂ. ਇਤਰਾਨੀਤਿ ਵਿਕਾਲਭੋਜਨਵੇਰਮਣਿਆਦੀਨਿ. ਤਾਨਿਪਿ ਹਿ ਸਞ੍ਚਿਚ੍ਚ ਵੀਤਿਕ੍ਕਮਨ੍ਤਸ੍ਸ ਤਂ ਤਂ ਭਿਜ੍ਜਤਿ ਏਵ, ਇਤਰੀਤਰੇਸਂ ਪਨ ਅਭਿਜ੍ਜਮਾਨੇਨ ਨਾਸਨਙ੍ਗਾਨਿ ਨ ਹੋਨ੍ਤਿ. ਤੇਨੇਵ ‘‘ਤੇਸੁ ਭਿਨ੍ਨੇਸੂ’’ਤਿ ਭੇਦਵਚਨਂ ਵੁਤ੍ਤਂ.

ਅਚ੍ਚਯਂ ¶ ਦੇਸਾਪੇਤਬ੍ਬੋਤਿ ‘‘ਅਚ੍ਚਯੋ ਮਂ, ਭਨ੍ਤੇ, ਅਚ੍ਚਗਮਾ’’ਤਿਆਦਿਨਾ ਸਙ੍ਘਮਜ੍ਝੇ ਦੇਸਾਪੇਤ੍ਵਾ ਸਰਣਸੀਲਂ ਦਾਤਬ੍ਬਨ੍ਤਿ ਅਧਿਪ੍ਪਾਯੋ ਪਾਰਾਜਿਕਤ੍ਤਾ ਤੇਸਂ. ਤੇਨਾਹ ‘‘ਲਿਙ੍ਗਨਾਸਨਾਯ ਨਾਸੇਤਬ੍ਬੋ’’ਤਿ. ਅਯਮੇਵ ਹਿ ਨਾਸਨਾ ਇਧ ਅਧਿਪ੍ਪੇਤਾਤਿ ਲਿਙ੍ਗਨਾਸਨਾਕਾਰਣੇਹਿ ਪਾਣਾਤਿਪਾਤਾਦੀਹਿ ਅਵਣ੍ਣਭਾਸਨਾਦੀਨਂ ਸਹ ਪਤਿਤਤ੍ਤਾ ਵੁਤ੍ਤਂ.

ਨਨੁ ਚ ਕਣ੍ਟਕਸਾਮਣੇਰੋਪਿ ਮਿਚ੍ਛਾਦਿਟ੍ਠਿਕੋ ਏਵ, ਤਸ੍ਸ ਚ ਹੇਟ੍ਠਾ ਦਣ੍ਡਕਮ੍ਮਨਾਸਨਾਵ ਵੁਤ੍ਤਾ. ਇਧ ਪਨ ਮਿਚ੍ਛਾਦਿਟ੍ਠਿਕਸ੍ਸ ਲਿਙ੍ਗਨਾਸਨਾ ਵੁਚ੍ਚਤਿ, ਕੋ ਇਮੇਸਂ ਭੇਦੋਤਿ ਚੋਦਨਂ ਮਨਸਿ ਨਿਧਾਯਾਹ ‘‘ਸਸ੍ਸਤੁਚ੍ਛੇਦਾਨਞ੍ਹਿ ਅਞ੍ਞਤਰਦਿਟ੍ਠਿਕੋ’’ਤਿ. ਏਤ੍ਥ ਚਾਯਮਧਿਪ੍ਪਾਯੋ – ਯੋ ਹਿ ‘‘ਅਤ੍ਤਾ ਇਸ੍ਸਰੋ ਵਾ ਨਿਚ੍ਚੋ ਧੁਵੋ’’ਤਿਆਦਿਨਾ ਵਾ ‘‘ਅਤ੍ਤਾ ਉਚ੍ਛਿਜ੍ਜਿਸ੍ਸਤਿ ਵਿਨਸ੍ਸਿਸ੍ਸਤੀ’’ਤਿਆਦਿਨਾ ਵਾ ਤਿਤ੍ਥਿਯਪਰਿਕਪ੍ਪਿਤਂ ਯਂ ਕਿਞ੍ਚਿ ਸਸ੍ਸਤੁਚ੍ਛੇਦਦਿਟ੍ਠਿਂ ਦਲ਼੍ਹਂ ਗਹੇਤ੍ਵਾ ਵੋਹਰਤਿ, ਤਸ੍ਸ ਸਾ ਪਾਰਾਜਿਕਟ੍ਠਾਨਂ ਹੋਤਿ. ਸੋ ਚ ਲਿਙ੍ਗਨਾਸਨਾਯ ਨਾਸੇਤਬ੍ਬੋ. ਯੋ ਪਨ ਈਦਿਸਂ ਦਿਟ੍ਠਿਂ ਅਗ੍ਗਹੇਤ੍ਵਾ ਸਾਸਨਿਕੋਵ ਹੁਤ੍ਵਾ ਕੇਵਲਂ ਬੁਦ੍ਧਵਚਨਾਧਿਪ੍ਪਾਯਂ ਵਿਪਰੀਤਤੋ ਗਹੇਤ੍ਵਾ ਭਿਕ੍ਖੂਹਿ ਓਵਦਿਯਮਾਨੋਪਿ ਅਪ੍ਪਟਿਨਿਸ੍ਸਜ੍ਜਿਤ੍ਵਾ ਵੋਹਰਤਿ, ਤਸ੍ਸ ਸਾ ਦਿਟ੍ਠਿ ਪਾਰਾਜਿਕਂ ਨ ਹੋਤਿ, ਸੋ ਪਨ ਕਣ੍ਟਕਨਾਸਨਾਯ ਏਵ ਨਾਸੇਤਬ੍ਬੋਤਿ.

ਅਨਾਪੁਚ੍ਛਾਵਰਣਵਤ੍ਥੁਆਦਿਕਥਾਵਣ੍ਣਨਾ ਨਿਟ੍ਠਿਤਾ.

੧੦੯. ਪਣ੍ਡਕਵਤ੍ਥੁਸ੍ਮਿਂ ¶ ਆਸਿਤ੍ਤਉਸੂਯਪਕ੍ਖਪਣ੍ਡਕਾ ਤਯੋਪਿ ਪੁਰਿਸਭਾਵਲਿਙ੍ਗਾਦਿਯੁਤ੍ਤਾ ਅਹੇਤੁਕਪਟਿਸਨ੍ਧਿਕਾ, ਤੇ ਚ ਕਿਲੇਸਪਰਿਯੁਟ੍ਠਾਨਸ੍ਸ ਬਲਵਤਾਯ ਨਪੁਂਸਕਪਣ੍ਡਕਸਦਿਸਤ੍ਤਾ ‘‘ਪਣ੍ਡਕਾ’’ਤਿ ਵੁਤ੍ਤਾ. ਤੇਸੁ ਆਸਿਤ੍ਤਉਸੂਯਪਣ੍ਡਕਾਨਂ ਦ੍ਵਿਨ੍ਨਂ ਕਿਲੇਸਪਰਿਯੁਟ੍ਠਾਨਂ ਯੋਨਿਸੋਮਨਸਿਕਾਰਾਦੀਹਿ ਵੀਤਿਕ੍ਕਮਤੋ ਨਿਵਾਰੇਤੁਮ੍ਪਿ ਸਕ੍ਕਾ, ਤੇਨ ਤੇ ਪਬ੍ਬਾਜੇਤਬ੍ਬਾ ਵੁਤ੍ਤਾ. ਪਕ੍ਖਪਣ੍ਡਕਸ੍ਸ ਪਨ ਕਾਲ਼ਪਕ੍ਖੇਸੁ ਉਮ੍ਮਾਦੋ ਵਿਯ ਕਿਲੇਸਪਰਿਲ਼ਾਹੋ ਅਵਤ੍ਥਰਨ੍ਤੋ ਆਗਚ੍ਛਤਿ, ਵੀਤਿਕ੍ਕਮਂ ਪਤ੍ਵਾ ਏਵ ਚ ਨਿਵਤ੍ਤਤਿ. ਤਸ੍ਮਾ ਸੋ ਤਸ੍ਮਿਂ ਪਕ੍ਖੇ ਨ ਪਬ੍ਬਾਜੇਤਬ੍ਬੋਤਿ ਵੁਤ੍ਤੋ. ਤਦੇਤਂ ਵਿਭਾਗਂ ਦਸ੍ਸੇਤੁਂ ‘‘ਯਸ੍ਸ ਪਰੇਸ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਆਸਿਤ੍ਤਸ੍ਸਾਤਿ ਮੁਖੇ ਆਸਿਤ੍ਤਸ੍ਸ ਅਤ੍ਤਨੋਪਿ ਅਸੁਚਿਮੁਚ੍ਚਨੇਨ ¶ ਪਰਿਲ਼ਾਹੋ ਵੂਪਸਮ੍ਮਤਿ. ਉਸੂਯਾਯ ਉਪ੍ਪਨ੍ਨਾਯਾਤਿ ਉਸੂਯਾਯ ਵਸੇਨ ਅਤ੍ਤਨੋ ਸੇਵੇਤੁਕਾਮਤਾਰਾਗੇ ਉਪ੍ਪਨ੍ਨੇ ਅਸੁਚਿਮੁਤ੍ਤਿਯਾ ਪਰਿਲ਼ਾਹੋ ਵੂਪਸਮ੍ਮਤਿ.

‘‘ਬੀਜਾਨਿ ਅਪਨੀਤਾਨੀ’’ਤਿ ਵੁਤ੍ਤਤ੍ਤਾ ਬੀਜੇਸੁ ਠਿਤੇਸੁ ਨਿਮਿਤ੍ਤਮਤ੍ਤੇ ਅਪਨੀਤੇ ਪਣ੍ਡਕੋ ਨ ਹੋਤਿ. ਭਿਕ੍ਖੁਨੋਪਿ ਅਨਾਬਾਧਪਚ੍ਚਯਾ ਤਦਪਨਯਨੇ ਥੁਲ੍ਲਚ੍ਚਯਮੇਵ, ਨ ਪਨ ਪਣ੍ਡਕਤ੍ਤਂ, ਬੀਜੇਸੁ ਪਨ ਅਪਨੀਤੇਸੁ ਅਙ੍ਗਜਾਤਮ੍ਪਿ ਰਾਗੇਨ ਕਮ੍ਮਨਿਯਂ ਨ ਹੋਤਿ, ਪੁਮਭਾਵੋ ਵਿਗਚ੍ਛਤਿ, ਮਸ੍ਸੁਆਦਿਪੁਰਿਸਲਿਙ੍ਗਮ੍ਪਿ ਉਪਸਮ੍ਪਦਾਪਿ ਵਿਗਚ੍ਛਤਿ, ਕਿਲੇਸਪਰਿਲ਼ਾਹੋਪਿ ਦੁਨ੍ਨਿਵਾਰਵੀਤਿਕ੍ਕਮੋ ਹੋਤਿ ਨਪੁਂਸਕਪਣ੍ਡਕਸ੍ਸ ਵਿਯ. ਤਸ੍ਮਾ ਈਦਿਸੋ ਉਪਸਮ੍ਪਨ੍ਨੋਪਿ ਨਾਸੇਤਬ੍ਬੋਤਿ ਵਦਨ੍ਤਿ. ਯਦਿ ਏਵਂ ਕਸ੍ਮਾ ਬੀਜੁਦ੍ਧਰਣੇ ਪਾਰਾਜਿਕਂ ਨ ਪਞ੍ਞਤ੍ਤਨ੍ਤਿ? ਏਤ੍ਥ ਤਾਵ ਕੇਚਿ ਵਦਨ੍ਤਿ ‘‘ਪਞ੍ਞਤ੍ਤਮੇਵੇਤਂ ਭਗਵਤਾ ‘ਪਣ੍ਡਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ’ਤਿ ਵੁਤ੍ਤਤ੍ਤਾ’’ਤਿ. ਕੇਚਿ ਪਨ ‘‘ਯਸ੍ਮਾ ਬੀਜੁਦ੍ਧਰਣਕ੍ਖਣੇ ਪਣ੍ਡਕੋ ਨ ਹੋਤਿ, ਤਸ੍ਮਾ ਤਸ੍ਮਿਂ ਖਣੇ ਪਾਰਾਜਿਕਂ ਨ ਪਞ੍ਞਤ੍ਤਂ. ਯਸ੍ਮਾ ਪਨ ਸੋ ਉਦ੍ਧਟਬੀਜੋ ਭਿਕ੍ਖੁ ਅਪਰੇਨ ਸਮਯੇਨ ਵੁਤ੍ਤਨਯੇਨ ਪਣ੍ਡਕਤ੍ਤਂ ਆਪਜ੍ਜਤਿ, ਅਭਾਵਕੋ ਹੋਤਿ, ਉਪਸਮ੍ਪਦਾਯ ਅਵਤ੍ਥੁ, ਤਤੋ ਏਵ ਚਸ੍ਸ ਉਪਸਮ੍ਪਦਾ ਵਿਗਚ੍ਛਤਿ, ਤਸ੍ਮਾ ਏਸ ਪਣ੍ਡਕਤ੍ਤੁਪਗਮਨਕਾਲਤੋ ਪਟ੍ਠਾਯ ਜਾਤਿਯਾ ਨਪੁਂਸਕਪਣ੍ਡਕੇਨ ਸਦ੍ਧਿਂ ਯੋਜੇਤ੍ਵਾ ‘ਉਪਸਮ੍ਪਨ੍ਨੋ ਨਾਸੇਤਬ੍ਬੋ’ਤਿ ਅਭਬ੍ਬੋਤਿ ਵੁਤ੍ਤੋ, ਨ ਤਤੋ ਪੁਬ੍ਬੇ. ਅਯਞ੍ਚ ਕਿਞ੍ਚਾਪਿ ਸਹੇਤੁਕੋ, ਭਾਵਕ੍ਖਯੇਨ ਪਨਸ੍ਸ ਅਹੇਤੁਕਸਦਿਸਤਾਯ ਮਗ੍ਗੋਪਿ ਨ ਉਪ੍ਪਜ੍ਜਤੀ’’ਤਿ ਵਦਨ੍ਤਿ. ਅਪਰੇ ਪਨ ‘‘ਪਬ੍ਬਜ੍ਜਤੋ ਪੁਬ੍ਬੇ ਉਪਕ੍ਕਮੇਨ ਪਣ੍ਡਕਭਾਵਮਾਪਨ੍ਨਂ ਸਨ੍ਧਾਯ ‘ਉਪਸਮ੍ਪਨ੍ਨੋ ਨਾਸੇਤਬ੍ਬੋ’ਤਿ ਵੁਤ੍ਤਂ, ਉਪਸਮ੍ਪਨ੍ਨਸ੍ਸ ਪਨ ਪਚ੍ਛਾ ਉਪਕ੍ਕਮੇਨ ਉਪਸਮ੍ਪਦਾਪਿ ਨ ਵਿਗਚ੍ਛਤੀ’’ਤਿ, ਤਂ ਨ ਯੁਤ੍ਤਂ. ਯਦਗ੍ਗੇਨ ਹਿ ਪਬ੍ਬਜ੍ਜਤੋ ਪੁਬ੍ਬੇ ਉਪਕ੍ਕਮੇਨ ਅਭਬ੍ਬੋ ਹੋਤਿ, ਤਦਗ੍ਗੇਨ ਪਚ੍ਛਾਪਿ ਹੋਤੀਤਿ ਵੀਮਂਸਿਤ੍ਵਾ ਗਹੇਤਬ੍ਬਂ.

ਇਤ੍ਥਤ੍ਤਾਦਿ ¶ ਭਾਵੋ ਨਤ੍ਥਿ ਏਤਸ੍ਸਾਤਿ ਅਭਾਵਕੋ. ਪਬ੍ਬਜ੍ਜਾ ਨ ਵਾਰਿਤਾਤਿ ਏਤ੍ਥ ਪਬ੍ਬਜ੍ਜਾਗਹਣੇਨੇਵ ਉਪਸਮ੍ਪਦਾਪਿ ਗਹਿਤਾ. ਤੇਨਾਹ ‘‘ਯਸ੍ਸ ਚੇਤ੍ਥ ਪਬ੍ਬਜ੍ਜਾ ਵਾਰਿਤਾ’’ਤਿਆਦਿ. ਤਸ੍ਮਿਂਯੇਵਸ੍ਸ ਪਕ੍ਖੇ ਪਬ੍ਬਜ੍ਜਾ ਵਾਰਿਤਾਤਿ ਏਤ੍ਥ ਪਨ ਅਪਣ੍ਡਕਪਕ੍ਖੇਪਿ ਪਬ੍ਬਜ੍ਜਾਮਤ੍ਤਮੇਵ ਲਭਤਿ, ਉਪਸਮ੍ਪਦਾ ਪਨ ਤਦਾਪਿ ਨ ਵਟ੍ਟਤਿ, ਪਣ੍ਡਕਪਕ੍ਖੇ ਪਨ ਆਗਤੇ ਲਿਙ੍ਗਨਾਸਨਾਯ ਨਾਸੇਤਬ੍ਬੋਤਿ ਵੇਦਿਤਬ੍ਬਂ.

ਪਣ੍ਡਕਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੧੧੦. ਥੇਯ੍ਯਸਂਵਾਸਕਵਤ੍ਥੁਮ੍ਹਿ ¶ ਕੋਲਞ੍ਞਾਤਿ ਕੁਲੇ ਜਾਤਾ, ਤਤ੍ਥ ਵਾ ਵਿਦਿਤਾ ਞਾਤਾ ਪਸਿਦ੍ਧਾ, ਤਂ ਵਾ ਜਾਨਨ੍ਤਿ ਕੋਲਞ੍ਞਾਤਿ ਞਾਤਕਾਨਂ ਨਾਮਂ. ਥੇਯ੍ਯਾਯ ਲਿਙ੍ਗਗ੍ਗਹਣਮਤ੍ਤਮ੍ਪਿ ਇਧ ਸਂਵਾਸੋ ਏਵਾਤਿ ਆਹ ‘‘ਤਯੋ ਥੇਯ੍ਯਸਂਵਾਸਕਾ’’ਤਿ. ਨ ਯਥਾਵੁਡ੍ਢਂ ਵਨ੍ਦਨਨ੍ਤਿ ਭਿਕ੍ਖੂਨਂ, ਸਾਮਣੇਰਾਨਂ ਵਾ ਵਨ੍ਦਨਂ ਨ ਸਾਦਿਯਤਿ.

ਯਥਾਵੁਡ੍ਢਂ ਵਨ੍ਦਨਨ੍ਤਿ ਅਤ੍ਤਨਾ ਮੁਸਾਵਾਦੇਨ ਦਸ੍ਸਿਤਵਸ੍ਸਕ੍ਕਮੇਨ ਭਿਕ੍ਖੂਨਂ ਵਨ੍ਦਨਂ ਸਾਦਿਯਤਿ, ਦਹਰਸਾਮਣੇਰੋ ਪਨ ਵੁਡ੍ਢਸਾਮਣੇਰਾਨਂ, ਦਹਰਭਿਕ੍ਖੁ ਚ ਵੁਡ੍ਢਾਨਂ ਵਨ੍ਦਨਂ ਸਾਦਿਯਨ੍ਤੋਪਿ ਥੇਯ੍ਯਸਂਵਾਸਕੋ ਨ ਹੋਤਿ. ਇਮਸ੍ਮਿਂ ਅਤ੍ਥੇਤਿ ਸਂਵਾਸਤ੍ਥੇਨਕਤ੍ਥੇ.

‘‘ਭਿਕ੍ਖੁਵਸ੍ਸਾਨੀ’’ਤਿ ਇਦਂ ਸਂਵਾਸਤ੍ਥੇਨਕੇ ਵੁਤ੍ਤਪਾਠਵਸੇਨ ਵੁਤ੍ਤਂ, ਸਯਮੇਵ ਪਨ ਪਬ੍ਬਜਿਤ੍ਵਾ ਸਾਮਣੇਰਵਸ੍ਸਾਨਿ ਗਣੇਨ੍ਤੋਪਿ ਉਭਯਤ੍ਥੇਨਕੋ ਏਵ. ਨ ਕੇਵਲਞ੍ਚ ਪੁਰਿਸੋਵ, ਇਤ੍ਥੀਪਿ ਭਿਕ੍ਖੁਨੀਸੁ ਏਵਂ ਪਟਿਪਜ੍ਜਤਿ, ਥੇਯ੍ਯਸਂਵਾਸਿਕਾਵ. ਆਦਿਕਮ੍ਮਿਕਾਪਿ ਚੇਤ੍ਥ ਨ ਮੁਚ੍ਚਨ੍ਤਿ, ਉਪਸਮ੍ਪਨ੍ਨੇਸੁ ਏਵ ਪਞ੍ਞਤ੍ਤਾਪਤ੍ਤਿਂ ਪਟਿਚ੍ਚ ਆਦਿਕਮ੍ਮਿਕਾ ਵੁਤ੍ਤਾ, ਤੇਨੇਵੇਤ੍ਥ ਆਦਿਕਮ੍ਮਿਕੋਪਿ ਨ ਮੁਤ੍ਤੋ.

ਰਾਜ…ਪੇ… ਭਯੇਨਾਤਿ ਏਤ੍ਥ ਭਯ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਯਾਵ ਸੋ ਸੁਦ੍ਧਮਾਨਸੋਤਿ ‘‘ਇਮਿਨਾ ਲਿਙ੍ਗੇਨ ਭਿਕ੍ਖੂ ਵਞ੍ਚੇਤ੍ਵਾ ਤੇਹਿ ਸਂਵਸਿਸ੍ਸਾਮੀ’’ਤਿ ਅਸੁਦ੍ਧਚਿਤ੍ਤਾਭਾਵੇਨ ਸੁਦ੍ਧਚਿਤ੍ਤੋ. ਤੇਨ ਹਿ ਅਸੁਦ੍ਧਚਿਤ੍ਤੇਨ ਲਿਙ੍ਗੇ ਗਹਿਤਮਤ੍ਤੇ ਪਚ੍ਛਾ ਭਿਕ੍ਖੂਹਿ ਸਹ ਸਂਵਸਤੁ ਵਾ ਮਾ ਵਾ, ਲਿਙ੍ਗਤ੍ਥੇਨਕੋ ਹੋਤਿ. ਪਚ੍ਛਾ ਸਂਵਸਨ੍ਤੋਪਿ ਅਭਬ੍ਬੋ ਹੁਤ੍ਵਾ ਸਂਵਸਤਿ. ਤਸ੍ਮਾ ਉਭਯਤ੍ਥੇਨਕੋਪਿ ਲਿਙ੍ਗਤ੍ਥੇਨਕੇ ਏਵ ਪਵਿਸਤੀਤਿ ਵੇਦਿਤਬ੍ਬਂ. ਯੋ ਪਨ ਰਾਜਾਦਿਭਯੇਨ ਸੁਦ੍ਧਚਿਤ੍ਤੋਵ ਲਿਙ੍ਗਂ ਗਹੇਤ੍ਵਾ ਵਿਚਰਨ੍ਤੋ ਪਚ੍ਛਾ ‘‘ਭਿਕ੍ਖੁਵਸ੍ਸਾਨਿ ਗਣੇਤ੍ਵਾ ਜੀਵਿਸ੍ਸਾਮੀ’’ਤਿ ਅਸੁਦ੍ਧਚਿਤ੍ਤਂ ਉਪ੍ਪਾਦੇਤਿ, ਸੋ ਚਿਤ੍ਤੁਪ੍ਪਾਦਮਤ੍ਤੇਨ ਥੇਯ੍ਯਸਂਵਾਸਕੋਪਿ ਨ ਹੋਤਿ ਸੁਦ੍ਧਚਿਤ੍ਤੇਨ ਗਹਿਤਲਿਙ੍ਗਤ੍ਤਾ. ਸਚੇ ਪਨ ਸੋ ਭਿਕ੍ਖੂਨਂ ਸਨ੍ਤਿਕਂ ¶ ਗਨ੍ਤ੍ਵਾ ਸਾਮਣੇਰਵਸ੍ਸਗਣਨਾਦਿਂ ਕਰੋਤਿ, ਤਦਾ ਸਂਵਾਸਤ੍ਥੇਨਕੋ, ਉਭਯਤ੍ਥੇਨਕੋ ਵਾ ਹੋਤੀਤਿ ਦਟ੍ਠਬ੍ਬਂ. ਯਂ ਪਨ ਪਰਤੋ ਸਹ ਧੁਰਨਿਕ੍ਖੇਪੇਨ ‘‘ਅਯਮ੍ਪਿ ਥੇਯ੍ਯਸਂਵਾਸਕੋ, ਵਾ’’ਤਿ ਵੁਤ੍ਤਂ, ਤਂ ਭਿਕ੍ਖੂਹਿ ਸਙ੍ਗਮ੍ਮ ਸਂਵਾਸਾਧਿਵਾਸਨਵਸੇਨ ਧੁਰਨਿਕ੍ਖੇਪਂ ਸਨ੍ਧਾਯ ਵੁਤ੍ਤਂ. ਤੇਨ ਵੁਤ੍ਤਂ ‘‘ਸਂਵਾਸਂ ਨਾਧਿਵਾਸੇਤਿ ਯਾਵਾ’’ਤਿ. ਤਸ੍ਸ ਤਾਵ ਥੇਯ੍ਯਸਂਵਾਸਕੋ ਨਾਮ ਨ ਵੁਚ੍ਚਤੀਤਿ ਸਮ੍ਬਨ੍ਧੋ ਦਟ੍ਠਬ੍ਬੋ. ਏਤ੍ਥ ਚ ਚੋਰਾਦਿਭਯਂ ¶ ਵਿਨਾਪਿ ਕੀਲ਼ਾਧਿਪ੍ਪਾਯੇਨ ਲਿਙ੍ਗਂ ਗਹੇਤ੍ਵਾ ਭਿਕ੍ਖੂਨਂ ਸਨ੍ਤਿਕੇ ਪਬ੍ਬਜਿਤਾਲਯਂ ਦਸ੍ਸੇਤ੍ਵਾ ਵਨ੍ਦਨਾਦਿਂ ਅਸਾਦਿਯਨ੍ਤੋਪਿ ‘‘ਸੋਭਤਿ ਨੁ ਖੋ ਮੇ ਪਬ੍ਬਜਿਤਲਿਙ੍ਗ’’ਨ੍ਤਿਆਦਿਨਾ ਸੁਦ੍ਧਚਿਤ੍ਤੇਨ ਗਣ੍ਹਨ੍ਤੋਪਿ ਥੇਯ੍ਯਸਂਵਾਸਕੋ ਨ ਹੋਤੀਤਿ ਦਟ੍ਠਬ੍ਬਂ.

ਸਬ੍ਬਪਾਸਣ੍ਡਿਯਭਤ੍ਤਾਨੀਤਿ ਸਬ੍ਬਸਾਮਯਿਕਾਨਂ ਸਾਧਾਰਣਂ ਕਤ੍ਵਾ ਪਞ੍ਞਤ੍ਤਭਤ੍ਤਾਨਿ, ਇਦਞ੍ਚ ਭਿਕ੍ਖੂਨਞ੍ਞੇਵ ਨਿਯਮਿਤਭਤ੍ਤਗਹਣੇ ਸਂਵਾਸੋਪਿ ਸਮ੍ਭਵੇਯ੍ਯਾਤਿ ਸਬ੍ਬਸਾਧਾਰਣਭਤ੍ਤਂ ਵੁਤ੍ਤਂ. ਸਂਵਾਸਂ ਪਨ ਅਸਾਦਿਯਿਤ੍ਵਾ ਅਭਿਕ੍ਖੁਕਵਿਹਾਰਾਦੀਸੁ ਵਿਹਾਰਭਤ੍ਤਾਦੀਨਿ ਭੁਞ੍ਜਨ੍ਤੋਪਿ ਥੇਯ੍ਯਸਂਵਾਸਕੋ ਨ ਹੋਤਿ ਏਵ. ਕਮ੍ਮਨ੍ਤਾਨੁਟ੍ਠਾਨੇਨਾਤਿ ਕਸਿਆਦਿਕਮ੍ਮਕਰਣੇਨ. ਪਤ੍ਤਚੀਵਰਂ ਆਦਾਯਾਤਿ ਭਿਕ੍ਖੁਲਿਙ੍ਗਵੇਸੇਨ ਸਰੀਰੇਨ ਧਾਰੇਤ੍ਵਾ.

‘‘ਯੋ ਏਵਂ ਪਬ੍ਬਜਤਿ, ਸੋ ਥੇਯ੍ਯਸਂਵਾਸਕੋ ਨਾਮ ਹੋਤੀ’’ਤਿ ਇਦਂ ਨਿਦਸ੍ਸਨਮਤ੍ਤਂ, ‘‘ਥੇਯ੍ਯਸਂਵਾਸਕੋ’’ਤਿ ਪਨ ਨਾਮਂ ਅਜਾਨਨ੍ਤੋਪਿ ‘‘ਏਵਂ ਕਾਤੁਂ ਨ ਵਟ੍ਟਤੀ’’ਤਿ ਵਾ ‘‘ਏਵਂ ਕਰੋਨ੍ਤੋ ਸਮਣੋ ਨਾਮ ਨ ਹੋਤੀ’’ਤਿ ਵਾ ‘‘ਯਦਿ ਆਰੋਚੇਸ੍ਸਾਮਿ, ਛਡ੍ਡੇਸ੍ਸਨ੍ਤਿ ਮ’’ਨ੍ਤਿ ਵਾ ‘‘ਯੇਨ ਕੇਨਚਿ ਪਬ੍ਬਜ੍ਜਾ ਮੇ ਨ ਰੁਹਤੀ’’ਤਿ ਜਾਨਾਤਿ, ਥੇਯ੍ਯਸਂਵਾਸਕੋ ਹੋਤਿ. ਯੋ ਪਨ ਪਠਮਂ ‘‘ਪਬ੍ਬਜ੍ਜਾ ਏਵਂ ਮੇ ਗਹਿਤਾ’’ਤਿਸਞ੍ਞੀ ਕੇਵਲਂ ਅਨ੍ਤਰਾ ਅਤ੍ਤਨੋ ਸੇਤਵਤ੍ਥਨਿਵਾਸਨਾਦਿਵਿਪ੍ਪਕਾਰਂ ਪਕਾਸੇਤੁਂ ਲਜ੍ਜਨ੍ਤੋ ਨ ਕਥੇਤਿ, ਸੋ ਥੇਯ੍ਯਸਂਵਾਸਕੋ ਨ ਹੋਤਿ. ਅਨੁਪਸਮ੍ਪਨ੍ਨਕਾਲੇਯੇਵਾਤਿ ਏਤ੍ਥ ਅਵਧਾਰਣੇਨ ਉਪਸਮ੍ਪਨ੍ਨਕਾਲੇ ਥੇਯ੍ਯਸਂਵਾਸਕਲਕ੍ਖਣਂ ਞਤ੍ਵਾ ਵਞ੍ਚਨਾਯਪਿ ਨਾਰੋਚੇਤਿ, ਥੇਯ੍ਯਸਂਵਾਸਕੋ ਨ ਹੋਤੀਤਿ ਦੀਪੇਤਿ. ਸੋ ਪਰਿਸੁਦ੍ਧਚਿਤ੍ਤੇਨ ਗਹਿਤਲਿਙ੍ਗਤ੍ਤਾ ਲਿਙ੍ਗਤ੍ਥੇਨਕੋ ਨ ਹੋਤਿ, ਲਦ੍ਧੂਪਸਮ੍ਪਦਤ੍ਤਾ ਤਦਨੁਗੁਣਸ੍ਸੇਵ ਸਂਵਾਸਸ੍ਸ ਸਾਦਿਤਤ੍ਤਾ ਸਂਵਾਸਤ੍ਥੇਨਕੋਪਿ ਨ ਹੋਤਿ. ਅਨੁਪਸਮ੍ਪਨ੍ਨੋ ਪਨ ਲਿਙ੍ਗਤ੍ਥੇਨਕੋ ਹੋਤਿ, ਸਂਵਾਸਾਰਹਸ੍ਸ ਲਿਙ੍ਗਸ੍ਸ ਗਹਿਤਤ੍ਤਾ ਸਂਵਾਸਸਾਦਿਯਨਮਤ੍ਤੇਨ ਸਂਵਾਸਤ੍ਥੇਨਕੋ ਹੋਤਿ.

ਸਲਿਙ੍ਗੇ ਠਿਤੋਤਿ ਸਲਿਙ੍ਗਭਾਵੇ ਠਿਤੋ. ਥੇਯ੍ਯਸਂਵਾਸਕੋ ਨ ਹੋਤੀਤਿ ਭਿਕ੍ਖੂਹਿ ਦਿਨ੍ਨਲਿਙ੍ਗਸ੍ਸ ਅਪਰਿਚ੍ਚਤ੍ਤਤ੍ਤਾ ਲਿਙ੍ਗਤ੍ਥੇਨਕੋ ਨ ਹੋਤਿ, ਭਿਕ੍ਖੁਪਟਿਞ੍ਞਾਯ ਅਪਰਿਚ੍ਚਤ੍ਤਤ੍ਤਾ ਸਂਵਾਸਤ੍ਥੇਨਕੋ ਨ ਹੋਤੀਤਿ. ਯਂ ਪਨ ਮਾਤਿਕਾਟ੍ਠਕਥਾਯਂ ‘‘ਲਿਙ੍ਗਾਨੁਰੂਪਸ੍ਸ ਸਂਵਾਸਸ੍ਸ ਸਾਦਿਤਤ੍ਤਾ ਨ ਸਂਵਾਸਤ੍ਥੇਨਕੋ’’ਤਿ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਕਾਰਣਂ ਵੁਤ੍ਤਂ, ਤਮ੍ਪਿ ਇਦਮੇਵ ਕਾਰਣਂ ਸਨ੍ਧਾਯ ਵੁਤ੍ਤਂ. ਇਤਰਥਾ ¶ ¶ ਸਾਮਣੇਰਸ੍ਸਪਿ ਭਿਕ੍ਖੁਵਸ੍ਸਗਣਨਾਦੀਸੁ ਲਿਙ੍ਗਾਨੁਰੂਪਸਂਵਾਸੋ ਏਵ ਸਾਦਿਤੋਤਿ ਸਂਵਾਸਤ੍ਥੇਨਕਤਾ ਨ ਸਿਯਾ ਭਿਕ੍ਖੂਹਿ ਦਿਨ੍ਨਲਿਙ੍ਗਸ੍ਸ ਉਭਿਨ੍ਨਮ੍ਪਿ ਸਾਧਾਰਣਤ੍ਤਾ. ਯਥਾ ਚੇਤ੍ਥ ਭਿਕ੍ਖੁ, ਏਵਂ ਸਾਮਣੇਰੋਪਿ ਪਾਰਾਜਿਕਂ ਸਮਾਪਨ੍ਨੋ ਸਾਮਣੇਰਪਟਿਞ੍ਞਾਯ ਅਪਰਿਚ੍ਚਤ੍ਤਤ੍ਤਾ ਸਂਵਾਸਤ੍ਥੇਨਕੋ ਨ ਹੋਤੀਤਿ ਵੇਦਿਤਬ੍ਬੋ. ਸੋਭਤੀਤਿ ਸਮ੍ਪਟਿਚ੍ਛਿਤ੍ਵਾਤਿ ਕਾਸਾਵਧਾਰਣੇ ਧੁਰਂ ਨਿਕ੍ਖਿਪਿਤ੍ਵਾ ਗਿਹਿਭਾਵਂ ਸਮ੍ਪਟਿਚ੍ਛਿਤ੍ਵਾ.

ਯੋ ਕੋਚਿ ਵੁਡ੍ਢਪਬ੍ਬਜਿਤੋਤਿ ਸਾਮਣੇਰਂ ਸਨ੍ਧਾਯ ਵੁਤ੍ਤਂ. ਮਹਾਪੇਲ਼ਾਦੀਸੂਤਿ ਵਿਲੀਵਾਦਿਮਯੇਸੁ ਘਰਦ੍ਵਾਰੇਸੁ ਠਪਿਤਭਤ੍ਤਭਾਜਨਵਿਸੇਸੇਸੁ, ਏਤੇਨ ਵਿਹਾਰੇ ਭਿਕ੍ਖੂਹਿ ਸਦ੍ਧਿਂ ਵਸ੍ਸਗਣਨਾਦੀਨਂ ਅਕਰਣਂ ਦਸ੍ਸੇਤਿ.

ਥੇਯ੍ਯਸਂਵਾਸਕਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਤਿਤ੍ਥਿਯਪਕ੍ਕਨ੍ਤਕਾਦਿਕਥਾਸੁ ਤੇਸਂ ਲਿਙ੍ਗੇ ਆਦਿਨ੍ਨਮਤ੍ਤੇਤਿ ਵੀਮਂਸਾਦਿਅਧਿਪ੍ਪਾਯਂ ਵਿਨਾ ‘‘ਤਿਤ੍ਥਿਯੋ ਭਵਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਵਸੇਨ ਲਿਙ੍ਗੇ ਕਾਯੇਨ ਧਾਰਿਤਮਤ੍ਤੇ. ਸਯਮੇਵਾਤਿ ਤਿਤ੍ਥਿਯਾਨਂ ਸਨ੍ਤਿਕਂ ਅਗਨ੍ਤ੍ਵਾ ਸਯਮੇਵ ਸਙ੍ਘਾਰਾਮੇਪਿ ਕੁਸਚੀਰਾਦੀਨਿ ਨਿਵਾਸੇਤਿ. ਆਜੀਵਕੋ ਭਵਿਸ੍ਸਾਮਿ…ਪੇ… ਗਚ੍ਛਤੀਤਿ ਆਜੀਵਕਾਨਂ ਸਨ੍ਤਿਕੇ ਤੇਸਂ ਪਬ੍ਬਜਨਵਿਧਿਨਾ ‘‘ਆਜੀਵਕੋ ਭਵਿਸ੍ਸਾਮੀ’’ਤਿ ਗਚ੍ਛਤਿ. ਤਸ੍ਸ ਹਿ ਤਿਤ੍ਥਿਯਭਾਵੂਪਗਮਨਂ ਪਤਿ ਸਨ੍ਨਿਟ੍ਠਾਨੇ ਵਿਜ੍ਜਮਾਨੇਪਿ ‘‘ਗਨ੍ਤ੍ਵਾ ਭਵਿਸ੍ਸਾਮੀ’’ਤਿ ਪਰਿਕਪ੍ਪਿਤਤ੍ਤਾ ਪਦਵਾਰੇ ਦੁਕ੍ਕਟਮੇਵ ਵੁਤ੍ਤਂ. ਦੁਕ੍ਕਟਨ੍ਤਿ ਪਾਲ਼ਿਯਾ ਅਵੁਤ੍ਤੇਪਿ ਮੇਥੁਨਾਦੀਸੁ ਵੁਤ੍ਤਪੁਬ੍ਬਪਯੋਗਦੁਕ੍ਕਟਾਨੁਲੋਮਤੋ ਵੁਤ੍ਤਂ. ਏਤੇਨ ਚ ਸਨ੍ਨਿਟ੍ਠਾਨਵਸੇਨ ਲਿਙ੍ਗੇ ਸਮ੍ਪਟਿਚ੍ਛਿਤੇ ਪਾਰਾਜਿਕਂ, ਤਤੋ ਪੁਰਿਮਪਯੋਗੇ ਥੁਲ੍ਲਚ੍ਚਯਞ੍ਚ ਵਤ੍ਤਬ੍ਬਮੇਵ, ਥੁਲ੍ਲਚ੍ਚਯਕ੍ਖਣੇ ਨਿਵਤ੍ਤਨ੍ਤੋਪਿ ਆਪਤ੍ਤਿਂ ਦੇਸਾਪੇਤ੍ਵਾ ਮੁਚ੍ਚਤਿ ਏਵਾਤਿ ਦਟ੍ਠਬ੍ਬਂ. ਯਥਾ ਚੇਤ੍ਥ, ਏਵਂ ਸਙ੍ਘਭੇਦੇਪਿ ਲੋਹਿਤੁਪ੍ਪਾਦੇਪਿ ਭਿਕ੍ਖੂਨਂ ਪੁਬ੍ਬਪਯੋਗਾਦੀਸੁ ਦੁਕ੍ਕਟਥੁਲ੍ਲਚ੍ਚਯਪਾਰਾਜਿਕਾਹਿ ਮੁਚ੍ਚਨਸੀਮਾ ਚ ਵੇਦਿਤਬ੍ਬਾ. ਸਾਸਨਵਿਰੁਦ੍ਧਤਾਯੇਤ੍ਥ ਆਦਿਕਮ੍ਮਿਕਾਨਮ੍ਪਿ ਅਨਾਪਤ੍ਤਿ ਨ ਵੁਤ੍ਤਾ. ਪਬ੍ਬਜ੍ਜਾਯਪਿ ਅਭਬ੍ਬਤਾਦਸ੍ਸਨਤ੍ਥਂ ਪਨੇਤੇ, ਅਞ੍ਞੇ ਚ ਪਾਰਾਜਿਕਕਣ੍ਡੇ ਵਿਸੁਂ ਸਿਕ੍ਖਾਪਦੇਨ ਪਾਰਾਜਿਕਾਦਿਂ ਅਦਸ੍ਸੇਤ੍ਵਾ ਇਧ ਅਭਬ੍ਬੇਸੁ ਏਵ ਵੁਤ੍ਤਾਤਿ ਵੇਦਿਤਬ੍ਬਂ.

ਤਂ ¶ ਲਦ੍ਧਿਨ੍ਤਿ ਤਿਤ੍ਥਿਯਵੇਸੇ ਸੇਟ੍ਠਭਾਵਗ੍ਗਹਣਮੇਵ ਸਨ੍ਧਾਯ ਵੁਤ੍ਤਂ. ਤੇਸਞ੍ਹਿ ਤਿਤ੍ਥਿਯਾਨਂ ਸਸ੍ਸਤਾਦਿਗ੍ਗਾਹਂ ਗਣ੍ਹਨ੍ਤੋਪਿ ਲਿਙ੍ਗੇ ਅਸਮ੍ਪਟਿਚ੍ਛਿਤੇ ਤਿਤ੍ਥਿਯਪਕ੍ਕਨ੍ਤਕੋ ਨ ਹੋਤਿ, ਤਂ ਲਦ੍ਧਿਂ ਅਗ੍ਗਹੇਤ੍ਵਾਪਿ ‘‘ਏਤੇਸਂ ਵਤਚਰਿਯਾ ਸੁਨ੍ਦਰਾ’’ਤਿ ਲਿਙ੍ਗਂ ਸਮ੍ਪਟਿਚ੍ਛਨ੍ਤੋ ਤਿਤ੍ਥਿਯਪਕ੍ਕਨ੍ਤਕੋ ਹੋਤਿ ਏਵ ¶ . ਲਦ੍ਧਿਯਾ ਅਭਾਵੇਨਾਤਿ ਭਿਕ੍ਖੁਭਾਵੇ ਸਾਲਯਤਾਯ ਤਿਤ੍ਥਿਯਭਾਵੂਪਗਮਨਲਦ੍ਧਿਯਾ ਅਭਾਵੇਨ, ਏਤੇਨ ਚ ਆਪਦਾਸੁ ਕੁਸਚੀਰਾਦਿਂ ਪਾਰੁਪਨ੍ਤਸ੍ਸਾਪਿ ਨਗ੍ਗਸ੍ਸ ਵਿਯ ਅਨਾਪਤ੍ਤਿਂ ਦਸ੍ਸੇਤਿ.

ਉਪਸਮ੍ਪਨ੍ਨਭਿਕ੍ਖੁਨਾ ਕਥਿਤੋਤਿ ਏਤ੍ਥ ਸਙ੍ਘਭੇਦਕੋਪਿ ਉਪਸਮ੍ਪਨ੍ਨਭਿਕ੍ਖੁਨਾਵ ਕਥਿਤੋ, ਮਾਤੁਘਾਤਕਾਦਯੋ ਪਨ ਅਨੁਪਸਮ੍ਪਨ੍ਨੇਨਾਪੀਤਿ ਦਟ੍ਠਬ੍ਬਂ.

ਤਿਤ੍ਥਿਯਪਕ੍ਕਨ੍ਤਕਕਥਾਵਣ੍ਣਨਾ ਨਿਟ੍ਠਿਤਾ.

੧੧੧. ਉਦਕਸਞ੍ਚਾਰਿਕਂ ਮਣ੍ਡੂਕਭਕ੍ਖਂ ਨਾਗਸਰੀਰਨ੍ਤਿ ਸਮ੍ਬਨ੍ਧਿਤਬ੍ਬਂ. ਵਿਸ੍ਸਰਭਯੇਨਾਤਿ ਨਾਗਸ੍ਸ ਸਰੀਰਂ ਦਿਸ੍ਵਾ ਭਿਕ੍ਖੁਨੋ ਵਿਰਵਨਭਯੇਨ. ਕਪਿਮਿਦ੍ਧਾਦੀਸੁ ਨਾਗਸਰੀਰਂ ਨੁਪ੍ਪਜ੍ਜਤੀਤਿ ਤਦੁਪ੍ਪਤ੍ਤਿਸੀਮਂ ਦਸ੍ਸੇਨ੍ਤੋ ਆਹ ‘‘ਵਿਸ੍ਸਟ੍ਠੋ’’ਤਿਆਦਿ.

ਤਿਰਚ੍ਛਾਨਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੧੧੨. ਅਪਵਾਹਨਨ੍ਤਿ ਸੋਧਨਂ. ਤਿਰਚ੍ਛਾਨਾਦਿਅਮਨੁਸ੍ਸਜਾਤਿਤੋ ਮਨੁਸ੍ਸਜਾਤਿਕਾਨਞ੍ਞੇਵ ਪੁਤ੍ਤੇਸੁ ਮੇਤ੍ਤਾਦਯੋਪਿ ਤਿਕ੍ਖਵਿਸਦਾ ਹੋਨ੍ਤਿ ਲੋਕੁਤ੍ਤਰਗੁਣਾ ਵਿਯਾਤਿ ਆਹ ‘‘ਮਨੁਸ੍ਸਿਤ੍ਥਿਭੂਤਾ ਜਨਿਕਾ ਮਾਤਾ’’ਤਿ. ਯਥਾ ਮਨੁਸ੍ਸਾਨਞ੍ਞੇਵ ਕੁਸਲਪ੍ਪਵਤ੍ਤਿ ਤਿਕ੍ਖਵਿਸਦਾ, ਏਵਂ ਅਕੁਸਲਪ੍ਪਵਤ੍ਤਿਪੀਤਿ ਆਹ ‘‘ਸਯਮ੍ਪਿ ਮਨੁਸ੍ਸਜਾਤਿਕੇਨੇਵਾ’’ਤਿਆਦਿ. ਆਨਨ੍ਤਰਿਯੇਨਾਤਿ ਏਤ੍ਥ ਚੁਤਿਅਨਨ੍ਤਰਂ ਨਿਰਯੇ ਪਟਿਸਨ੍ਧਿਫਲਂ ਅਨਨ੍ਤਰਂ ਨਾਮ, ਤਸ੍ਮਿਂ ਅਨਨ੍ਤਰੇ ਜਨਕਤ੍ਤੇਨ ਨਿਯੁਤ੍ਤਂ ਆਨਨ੍ਤਰਿਯਂ, ਤੇਨ. ਵੇਸਿਯਾ ਪੁਤ੍ਤੋਤਿ ਉਪਲਕ੍ਖਣਮਤ੍ਤਂ, ਕੁਲਿਤ੍ਥਿਯਾ ਅਤਿਚਾਰਿਨਿਯਾ ਪੁਤ੍ਤੋਪਿ ਅਤ੍ਤਨੋ ਪਿਤਰਂ ਅਜਾਨਿਤ੍ਵਾ ਘਾਤੇਨ੍ਤੋ ਪਿਤੁਘਾਤਕੋਵ ਹੋਤਿ.

੧੧੪. ਅਵਸੇਸਨ੍ਤਿ ¶ ਅਨਾਗਾਮਿਆਦਿਕਂ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਮਨੁਸ੍ਸਵਿਗ੍ਗਹਪਾਰਾਜਿਕੇ ਵੁਤ੍ਤਮੇਵ.

੧੧੫. ਅਯਂ ਸਙ੍ਘਭੇਦਕੋਤਿ ਪਕਤਤ੍ਤਂ ਭਿਕ੍ਖੁਂ ਸਨ੍ਧਾਯ ਵੁਤ੍ਤਂ. ਪੁਬ੍ਬੇ ਏਵ ਪਾਰਾਜਿਕਂ ਸਮਾਪਨ੍ਨੋ ¶ ਵਾ ਵਤ੍ਥਾਦਿਦੋਸੇਨ ਵਿਪਨ੍ਨੋਪਸਮ੍ਪਦੋ ਵਾ ਸਙ੍ਘਂ ਭਿਨ੍ਦਨ੍ਤੋਪਿ ਅਨਨ੍ਤਰਿਯਂ ਨ ਫੁਸਤਿ, ਸਙ੍ਘੋ ਪਨ ਭਿਨ੍ਨੋਵ ਹੋਤਿ, ਪਬ੍ਬਜ੍ਜਾ ਚਸ੍ਸ ਨ ਵਾਰਿਤਾਤਿ ਦਟ੍ਠਬ੍ਬਂ.

‘‘ਦੁਟ੍ਠਚਿਤ੍ਤੇਨਾ’’ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤਿ ‘‘ਵਧਕਚਿਤ੍ਤੇਨਾ’’ਤਿ. ਲੋਹਿਤਂ ਉਪ੍ਪਾਦੇਤੀਤਿ ਤਥਾਗਤਸ੍ਸ ਵੇਰੀਹਿ ਅਭੇਜ੍ਜਕਾਯਤਾਯ ਕੇਨਚਿ ਬਲਕ੍ਕਾਰੇਨ ਚਮ੍ਮਾਦਿਛੇਦਂ ਕਤ੍ਵਾ ਬਹਿ ਲੋਹਿਤਂ ਪਗ੍ਘਰਾਪੇਤੁਂ ਨ ਸਕ੍ਕਾ, ਆਵੁਧਾਦਿਪਹਾਰੇਨ ਪਨ ਲੋਹਿਤਂ ਠਾਨਤੋ ਚਲਿਤ੍ਵਾ ਕੁਪ੍ਪਮਾਨਂ ਏਕਤ੍ਥ ਸਞ੍ਚਿਤਂ ਹੋਤਿ, ਏਤ੍ਤਕੇਨ ਪਨ ਪਹਾਰਦਾਯਕੋ ਲੋਹਿਤੁਪ੍ਪਾਦਕੋ ਨਾਮ ਹੋਤਿ ਦੇਵਦਤ੍ਤੋ ਵਿਯ. ਚੇਤਿਯਂ ਪਨ ਬੋਧਿਂ ਵਾ ਪਟਿਮਾਦਿਂ ਵਾ ਭਿਨ੍ਦਤੋ ਆਨਨ੍ਤਰਿਯਂ ਨ ਹੋਤਿ, ਆਨਨ੍ਤਰਿਯਸਦਿਸਂ ਮਹਾਸਾਵਜ੍ਜਂ ਹੋਤਿ. ਬੋਧਿਰੁਕ੍ਖਸ੍ਸ ਪਨ ਓਜੋਹਰਣਸਾਖਾ ਚੇਵ ਸਧਾਤੁਕਂ ਚੇਤਿਯਂ ਬਾਧਯਮਾਨਾ ਚ ਛਿਨ੍ਦਿਤਬ੍ਬਾ, ਪੁਞ੍ਞਮੇਵੇਤ੍ਥ ਹੋਤਿ.

ਮਾਤੁਘਾਤਕਾਦਿਕਥਾਵਣ੍ਣਨਾ ਨਿਟ੍ਠਿਤਾ.

੧੧੬. ਇਤ੍ਥਿਉਭਤੋਬ੍ਯਞ੍ਜਨਕੋਤਿ ਇਤ੍ਥਿਨ੍ਦ੍ਰਿਯਯੁਤ੍ਤੋ, ਇਤਰੋ ਪਨ ਪੁਰਿਸਿਨ੍ਦ੍ਰਿਯਯੁਤ੍ਤੋ. ਏਕਸ੍ਸ ਹਿ ਭਾਵਦ੍ਵਯਂ ਸਹ ਨੁਪ੍ਪਜ੍ਜਤਿ ਯਮਕੇ (ਯਮ. ੩.ਇਨ੍ਦ੍ਰਿਯਯਮਕ.੧੮੮) ਪਟਿਕ੍ਖਿਤ੍ਤਤ੍ਤਾ. ਦੁਤਿਯਬ੍ਯਞ੍ਜਨਂ ਪਨ ਕਮ੍ਮਸਹਾਯੇਨ ਅਕੁਸਲਚਿਤ੍ਤੇਨੇਵ ਭਾਵਵਿਰਹਿਤਂ ਉਪ੍ਪਜ੍ਜਤਿ. ਪਕਤਿਤ੍ਥਿਪੁਰਿਸਾਨਮ੍ਪਿ ਕਮ੍ਮਮੇਵ ਬ੍ਯਞ੍ਜਨਲਿਙ੍ਗਾਨਂ ਕਾਰਣਂ, ਨ ਭਾਵੋ ਤਸ੍ਸ ਕੇਨਚਿ ਪਚ੍ਚਯੇਨ ਪਚ੍ਚਯਤ੍ਤਸ੍ਸ ਪਟ੍ਠਾਨੇ ਅਵੁਤ੍ਤਤ੍ਤਾ. ਕੇਵਲਂ ਭਾਵਸਹਿਤਾਨਂਯੇਵ ਬ੍ਯਞ੍ਜਨਲਿਙ੍ਗਾਨਂ ਪਵਤ੍ਤਿਦਸ੍ਸਨਤ੍ਥਂ ਅਟ੍ਠਕਥਾਸੁ ‘‘ਇਤ੍ਥਿਨ੍ਦ੍ਰਿਯਂ ਪਟਿਚ੍ਚ ਇਤ੍ਥਿਲਿਙ੍ਗਾਦੀਨੀ’’ਤਿਆਦਿਨਾ (ਧ. ਸ. ਅਟ੍ਠ. ੬੩੨) ਇਨ੍ਦ੍ਰਿਯਂ ਬ੍ਯਞ੍ਜਨਕਆਰਣਤ੍ਤੇਨ ਵੁਤ੍ਤਂ, ਇਧ ਪਨ ਅਕੁਸਲਬਲੇਨ ਇਨ੍ਦ੍ਰਿਯਂ ਵਿਨਾਪਿ ਬ੍ਯਞ੍ਜਨਂ ਉਪ੍ਪਜ੍ਜਤੀਤਿ ਵੁਤ੍ਤਂ. ਉਭਿਨ੍ਨਮ੍ਪਿ ਚੇਸਂ ਉਭਤੋਬ੍ਯਞ੍ਜਨਕਾਨਂ ਯਦਾ ਇਤ੍ਥਿਯਾ ਰਾਗੋ ਉਪ੍ਪਜ੍ਜਤਿ, ਤਦਾ ਪੁਰਿਸਬ੍ਯਞ੍ਜਨਂ ਪਾਕਟਂ ਹੋਤਿ, ਇਤਰਂ ਪਟਿਚ੍ਛਨ੍ਨਂ. ਯਦਾ ਪੁਰਿਸੇ ਰਾਗੋ ਉਪ੍ਪਜ੍ਜਤਿ, ਤਦਾ ਇਤ੍ਥਿਬ੍ਯਞ੍ਜਨਂ ¶ ਪਾਕਟਂ ਹੋਤਿ, ਇਤਰਂ ਪਟਿਚ੍ਛਨ੍ਨਂ. ਤਤ੍ਥ ਵਿਚਾਰਣਕ੍ਕਮੋਤਿ ਪਟਿਸਨ੍ਧਿਕ੍ਖਣੇ ਏਵ ਇਤ੍ਥਿਪੁਰਿਸਲਿਙ੍ਗਾਨਮ੍ਪਿ ਪਾਤੁਭਾਵਪ੍ਪਕਾਸਕੇ ਕੁਰੁਨ੍ਦਿਵਚਨੇ ਅਯੁਤ੍ਤਤਾਪਕਾਸਨਤ੍ਥਂ ਅਤ੍ਥਵਿਚਾਰਣਕ੍ਕਮੋ. ਅਟ੍ਠਸਾਲਿਨਿਯਞ੍ਹਿ ‘‘ਇਤ੍ਥਿਲਿਙ੍ਗਾਦੀਨਿ ਪਨ ਇਤ੍ਥਿਨ੍ਦ੍ਰਿਯਂ ਪਟਿਚ੍ਚ ਪਵਤ੍ਤੇ ਸਮੁਟ੍ਠਿਤਾਨੀ’’ਤਿਆਦਿ (ਧ. ਸ. ਅਟ੍ਠ. ੬੩੨) ਵੁਤ੍ਤਂ. ਨੇਵਸ੍ਸ ਪਬ੍ਬਜ੍ਜਾ ਅਤ੍ਥੀਤਿ ਯੋਜਨਾ. ਯੋ ਚ ਪਟਿਕ੍ਖਿਤ੍ਤੇ ਅਭਬ੍ਬੇ, ਭਬ੍ਬੇ ਚ ਪੁਗ੍ਗਲੇ ਞਤ੍ਵਾ ਪਬ੍ਬਾਜੇਤਿ, ਉਪਸਮ੍ਪਾਦੇਤਿ ਵਾ, ਦੁਕ੍ਕਟਂ. ਅਜਾਨਨ੍ਤਸ੍ਸ ਸਬ੍ਬਤ੍ਥ ਅਨਾਪਤ੍ਤੀਤਿ ਵੇਦਿਤਬ੍ਬਂ.

ਉਭਤੋਬ੍ਯਞ੍ਜਨਕਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਅਨੁਪਜ੍ਝਾਯਕਾਦਿਵਤ੍ਥੁਕਥਾਵਣ੍ਣਨਾ

੧੧੭. ਅਨੁਪਜ੍ਝਾਯਾਦਿਵਤ੍ਥੂਸੁ ¶ ਸਿਕ੍ਖਾਪਦਂ ਅਪਞ੍ਞਤ੍ਤਨ੍ਤਿ ‘‘ਨ, ਭਿਕ੍ਖਵੇ, ਅਨੁਪਜ੍ਝਾਯਕੋ ਉਪਸਮ੍ਪਾਦੇਤਬ੍ਬੋ’’ਤਿ ਇਧੇਵ ਪਞ੍ਞਾਪਿਯਮਾਨਸਿਕ੍ਖਾਪਦਂ ਸਨ੍ਧਾਯ ਵੁਤ੍ਤਂ. ‘‘ਕਮ੍ਮਂ ਪਨ ਨ ਕੁਪ੍ਪਤੀ’’ਤਿ ਇਦਂ ਉਪਜ੍ਝਾਯਾਭਾਵੇਪਿ ‘‘ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾਪੇਕ੍ਖੋ, ਇਤ੍ਥਨ੍ਨਾਮੇਨ ਉਪਜ੍ਝਾਯੇਨਾ’’ਤਿ ਮਤਸ੍ਸ ਵਾ ਵਿਬ੍ਭਮਨ੍ਤਸ੍ਸ ਵਾ ਪੁਰਾਣਉਪਜ੍ਝਾਯਸ੍ਸ, ਅਞ੍ਞਸ੍ਸ ਵਾ ਯਸ੍ਸ ਕਸ੍ਸਚਿ ਅਵਿਜ੍ਜਮਾਨਸ੍ਸਾਪਿ ਨਾਮੇਨ ਸਬ੍ਬਤ੍ਥ ਉਪਜ੍ਝਾਯਕਿਤ੍ਤਨਸ੍ਸ ਕਤਤ੍ਤਾ ਵੁਤ੍ਤਂ. ਯਦਿ ਹਿ ਉਪਜ੍ਝਾਯਕਿਤ੍ਤਨਂ ਨ ਕਰੇਯ੍ਯ, ‘‘ਪੁਗ੍ਗਲਂ ਨ ਪਰਾਮਸਤੀ’’ਤਿ ਵੁਤ੍ਤਕਮ੍ਮਵਿਪਤ੍ਤਿ ਏਵ ਸਿਯਾ. ਤੇਨੇਵ ਪਾਲ਼ਿਯਂ ‘‘ਅਨੁਪਜ੍ਝਾਯਕ’’ਨ੍ਤਿ ਵੁਤ੍ਤਂ. ਅਟ੍ਠਕਥਾਯਮ੍ਪਿਸ੍ਸ ‘‘ਉਪਜ੍ਝਾਯਂ ਅਕਿਤ੍ਤੇਤ੍ਵਾ’’ਤਿ ਅਵਤ੍ਵਾ ‘‘ਉਪਜ੍ਝਾਯਂ ਅਗਾਹਾਪੇਤ੍ਵਾ ਸਬ੍ਬੇਨ ਸਬ੍ਬਂ ਉਪਜ੍ਝਾਯਵਿਰਹਿਤਂ’’ਇਚ੍ਚੇਵ ਅਤ੍ਥੋਤਿ ਵੁਤ੍ਤੋ. ਪਾਲ਼ਿਯਂ ਸਙ੍ਘੇਨ ਉਪਜ੍ਝਾਯੇਨਾਤਿ ‘‘ਅਯਂ ਇਤ੍ਥਨ੍ਨਾਮੋ ਸਙ੍ਘਸ੍ਸ ਉਪਸਮ੍ਪਦਾਪੇਕ੍ਖੋ, ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤਿ ਸਙ੍ਘੇਨ ਉਪਜ੍ਝਾਯੇਨਾ’’ਤਿ ਏਵਂ ਕਮ੍ਮਵਾਚਾਯ ਸਙ੍ਘਮੇਵ ਉਪਜ੍ਝਾਯਂ ਕਿਤ੍ਤੇਤ੍ਵਾਤਿ ਅਤ੍ਥੋ. ਏਵਂ ਗਣੇਨ ਉਪਜ੍ਝਾਯੇਨਾਤਿ ਏਤ੍ਥਾਪਿ ‘‘ਅਯਂ ਇਤ੍ਥਨ੍ਨਾਮੋ ਗਣਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿਆਦਿਨਾ ਯੋਜਨਾ ਵੇਦਿਤਬ੍ਬਾ, ਏਵਂ ਵੁਤ੍ਤੇਪਿ ਕਮ੍ਮਂ ਨ ਕੁਪ੍ਪਤਿ ਏਵ ਦੁਕ੍ਕਟਸ੍ਸੇਵ ਵੁਤ੍ਤਤ੍ਤਾ. ਅਞ੍ਞਥਾ ‘‘ਸੋ ਚ ਪੁਗ੍ਗਲੋ ਅਨੁਪਸਮ੍ਪਨ੍ਨੋ’’ਤਿ ਵਦੇਯ੍ਯ. ਤੇਨਾਹ ‘‘ਸਙ੍ਘੇਨਾ’’ਤਿਆਦਿ. ਤਤ੍ਥ ਪਣ੍ਡਕਾਦੀਹਿ ਉਪਜ੍ਝਾਯੇਹਿ ਕਰਿਯਮਾਨੇਸੁ ਕਮ੍ਮੇਸੁ ਪਣ੍ਡਕਾਦਿਕੇ ਵਿਨਾਵ ਯਦਿ ਪਞ੍ਚਵਗ੍ਗਾਦਿਗਣੋ ਪੂਰਤਿ, ਕਮ੍ਮਂ ਨ ਕੁਪ੍ਪਤਿ, ਇਤਰਥਾ ਕੁਪ੍ਪਤੀਤਿ ਵੇਦਿਤਬ੍ਬਂ.

ਅਨੁਪਜ੍ਝਾਯਕਾਦਿਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੧੧੮. ਅਪਤ੍ਤਚੀਵਰਵਤ੍ਥੂਸੁਪਿ ¶ ਪਤ੍ਤਚੀਵਰਾਨਂ ਅਭਾਵੇਪਿ ‘‘ਪਰਿਪੁਣ੍ਣਸ੍ਸ ਪਤ੍ਤਚੀਵਰ’’ਨ੍ਤਿ ਕਮ੍ਮਵਾਚਾਯ ਸਾਵਿਤਤ੍ਤਾ ਕਮ੍ਮਕੋਪਂ ਅਵਤ੍ਵਾ ਦੁਕ੍ਕਟਮੇਵ ਵੁਤ੍ਤਂ. ਇਤਰਥਾ ਸਾਵਨਾਯ ਹਾਪਨਤੋ ਕਮ੍ਮਕੋਪੋ ਏਵ ਸਿਯਾ. ਕੇਚਿ ਪਨ ‘‘ਪਠਮਂ ਅਨੁਞ੍ਞਾਤਕਮ੍ਮਵਾਚਾਯ ਉਪਸਮ੍ਪਨ੍ਨਾ ਵਿਯ ਇਦਾਨਿਪਿ ‘ਪਰਿਪੁਣ੍ਣਸ੍ਸ ਪਤ੍ਤਚੀਵਰ’ਨ੍ਤਿ ਅਵਤ੍ਵਾ ਕਮ੍ਮਵਾਚਾਯ ਉਪਸਮ੍ਪਨ੍ਨਾਪਿ ਸੂਪਸਮ੍ਪਨ੍ਨਾਏਵਾ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ. ਅਨੁਞ੍ਞਾਤਕਾਲਤੋ ਪਟ੍ਠਾਯ ਹਿ ਅਪਰਾਮਸਨਂ ਸਾਵਨਾਯ ਹਾਪਨਵਿਪਤ੍ਤਿ ਏਵ ਹੋਤਿ ‘‘ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤੀ’’ਤਿ ਪਦਸ੍ਸ ਹਾਪਨੇ ਵਿਯ. ਤਮ੍ਪਿ ਹਿ ਪਚ੍ਛਾ ਅਨੁਞ੍ਞਾਤਂ, ‘‘ਸਙ੍ਘਂ, ਭਨ੍ਤੇ, ਉਪਸਮ੍ਪਦਂ ਯਾਚਾਮੀ’’ਤਿਆਦਿਵਾਕ੍ਯੇਨ ਅਯਾਚੇਤ੍ਵਾ ਤਮ੍ਪਿ ਉਪਸਮ੍ਪਾਦੇਨ੍ਤੋ ‘‘ਅਯਂ ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤੀ’’ਤਿ ਵਤ੍ਵਾਵ ਯਦਿ ਕਮ੍ਮਵਾਚਂ ਕਰੋਤਿ, ਕਮ੍ਮਂ ਸੁਕਤਮੇਵ ਹੋਤਿ ¶ , ਨੋ ਚੇ ਵਿਪਨ੍ਨਂ. ਸਬ੍ਬਪਚ੍ਛਾ ਹਿ ਅਨੁਞ੍ਞਾਤਕਮ੍ਮਵਾਚਤੋ ਕਿਞ੍ਚਿਪਿ ਪਰਿਹਾਪੇਤੁਂ ਨ ਵਟ੍ਟਤਿ, ਸਾਵਨਾਯ ਹਾਪਨਮੇਵ ਹੋਤਿ. ਅਞ੍ਞੇ ਵਾ ਭਿਕ੍ਖੂ ਦਾਤੁਕਾਮਾ ਹੋਨ੍ਤੀਤਿ ਸਮ੍ਬਨ੍ਧੋ.

ਅਨਾਮਟ੍ਠਪਿਣ੍ਡਪਾਤਨ੍ਤਿ ਭਿਕ੍ਖੂਹਿ ਲਦ੍ਧਭਿਕ੍ਖਤੋ ਅਗ੍ਗਹਿਤਗ੍ਗਂ ਪਿਣ੍ਡਪਾਤਂ. ਸਾਮਣੇਰਭਾਗਸਮਕੋਤਿ ਏਤ੍ਥ ਕਿਞ੍ਚਾਪਿ ਸਾਮਣੇਰਾਨਮ੍ਪਿ ਆਮਿਸਭਾਗਸ੍ਸ ਸਮਕਮੇਵ ਦਿਯ੍ਯਮਾਨਤ੍ਤਾ ਵਿਸੁਂ ਸਾਮਣੇਰਭਾਗੋ ਨਾਮ ਨਤ੍ਥਿ, ਪਤ੍ਤਚੀਵਰਪਰਿਕਮ੍ਮਮਤ੍ਤਪਟਿਬਦ੍ਧਪਬ੍ਬਜ੍ਜਤਾਯ ਪਨ ਸਾਮਣੇਰਸਦਿਸਾ ਏਤੇ ਪਣ੍ਡੁਪਲਾਸਾਤਿ ਦਸ੍ਸਨਤ੍ਥਂ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਨਿਯਤਾਸਨ੍ਨਪਬ੍ਬਜ੍ਜਸ੍ਸੇਵ ਚਾਯਂ ਭਾਗੋ ਦੀਯਤਿ. ਤੇਨੇਵ ‘‘ਯਾਵ ਪਤ੍ਤੋ ਪਚ੍ਚਤੀ’’ਤਿਆਦਿ ਵੁਤ੍ਤਂ. ਆਮਿਸਭਾਗੋਤਿ ਵਿਹਾਰੇ ਦਿਨ੍ਨਂ ਸਙ੍ਘਭਤ੍ਤਂ, ਤਤ੍ਰੁਪ੍ਪਾਦਞ੍ਚ ਸਨ੍ਧਾਯ ਵੁਤ੍ਤਂ, ਨ ਦਾਯਕਾਨਂ ਗੇਹੇਸੁ ਤੇਹਿ ਦਿਯ੍ਯਮਾਨਂ. ਤੇਨੇਵ ਸਲਾਕਭਤ੍ਤਾਦਿ ਪਟਿਕ੍ਖਿਤ੍ਤਂ, ਦਾਯਕਾ ਵਿਪ੍ਪਟਿਸਾਰਿਨੋ ਹੋਨ੍ਤੀਤਿ. ਭੇਸਜ੍ਜਨ੍ਤਿਆਦਿਨਾ ਪਨ ਗਿਹੀਨਂ ਭੇਸਜ੍ਜਕਰਣਾਦਿਦੋਸੋ ਏਤ੍ਥ ਨ ਹੋਤੀਤਿ ਦਸ੍ਸੇਤਿ.

ਅਪਤ੍ਤਕਾਦਿਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਹਤ੍ਥਚ੍ਛਿਨ੍ਨਾਦਿਵਤ੍ਥੁਕਥਾਵਣ੍ਣਨਾ

੧੧੯. ਹਤ੍ਥਚ੍ਛਿਨ੍ਨਾਦਿਵਤ੍ਥੂਸੁ ¶ ਕਣ੍ਣਮੂਲੇਤਿ ਸਕਲਸ੍ਸ ਕਣ੍ਣਸ੍ਸ ਛੇਦਂ ਸਨ੍ਧਾਯ ਵੁਤ੍ਤਂ. ਕਣ੍ਣਸਕ੍ਖਲਿਕਾਯਾਤਿ ਕਣ੍ਣਚੂਲ਼ਿਕਾਯ. ਯਸ੍ਸ ਪਨ ਕਣ੍ਣਾਵਿਦ੍ਧੇਤਿ ਹੇਟ੍ਠਾ ਕੁਣ੍ਡਲਾਦਿਠਪਨਚ੍ਛਿਦ੍ਦਂ ਸਨ੍ਧਾਯ ਵੁਤ੍ਤਂ. ਤਞ੍ਹਿ ਸਙ੍ਘਟਨਕ੍ਖਮਂ. ਅਜਪਦਕੇਤਿ ਅਜਪਦਨਾਸਿਕਟ੍ਠਿਕੋਟਿਯਂ. ਤਤੋ ਹਿ ਉਦ੍ਧਂ ਨ ਵਿਚ੍ਛਿਨ੍ਦਤਿ. ਸਕ੍ਕਾ ਹੋਤਿ ਸਨ੍ਧੇਤੁਨ੍ਤਿ ਅਵਿਰੂਪਸਣ੍ਠਾਨਂ ਸਨ੍ਧਾਯ ਵੁਤ੍ਤਂ, ਵਿਰੂਪਂ ਪਨ ਪਰਿਸਦੂਸਕਤਂ ਆਪਾਦੇਤਿ.

ਖੁਜ੍ਜਸਰੀਰੋਤਿ ਵਙ੍ਕਸਰੀਰੋ. ਬ੍ਰਹ੍ਮੁਨੋ ਵਿਯ ਉਜੁਕਂ ਗਤ੍ਤਂ ਸਰੀਰਂ ਯਸ੍ਸ, ਸੋ ਬ੍ਰਹ੍ਮੁਜ੍ਜੁਗਤ੍ਤੋ, ਭਗਵਾ.

ਪਰਿਵਟੁਮੋਤਿ ਸਮਨ੍ਤਤੋ ਵਟ੍ਟਕਾਯੋ, ਏਤੇਨ ਏਵਰੂਪਾ ਏਵ ਵਾਮਨਕਾ ਨ ਵਟ੍ਟਨ੍ਤੀਤਿ ਦਸ੍ਸੇਤਿ.

ਕੂਟਕੂਟਸੀਸੋਤਿ ਅਨੇਕੇਸੁ ਠਾਨੇਸੁ ਪਿਣ੍ਡਿਕਮਂਸਤਂ ਦਸ੍ਸੇਤੁਂ ਆਮੇਡਿਤਂ ਕਤਂ. ਤੇਨਾਹ ‘‘ਤਾਲਫਲਪਿਣ੍ਡਿਸਦਿਸੇਨਾ’’ਤਿ, ਤਾਲਫਲਾਨਂ ਮਞ੍ਜਰੀ ਪਿਣ੍ਡਿ ਨਾਮ. ਅਨੁਪੁਬ੍ਬਤਨੁਕੇਨ ਸੀਸੇਨਾਤਿ ਚੇਤਿਯਥੂਪਿਕਾ ¶ ਵਿਯ ਕਮੇਨ ਕਿਸੇਨ ਸੀਸੇਨ, ਥੂਲਵੇਲ਼ੁਪਬ੍ਬਂ ਵਿਯ ਆਦਿਤੋ ਪਟ੍ਠਾਯ ਯਾਵਪਰਿਯੋਸਾਨਂ ਸਮਥੂਲੇਨ ਉਚ੍ਚੇਨ ਸੀਸੇਨ ਸਮਨ੍ਨਾਗਤੋ ਨਾਲ਼ਿਸੀਸੋ ਨਾਮ. ਕਪ੍ਪਸੀਸੋਤਿ ਗਜਮਤ੍ਥਕਂ ਵਿਯ ਦ੍ਵਿਧਾ ਭਿਨ੍ਨਸੀਸੋ. ‘‘ਕਣ੍ਣਿਕਕੇਸੋ ਵਾ’’ਤਿ ਇਮਸ੍ਸ ਵਿਵਰਣਂ ‘‘ਪਾਣਕੇਹੀ’’ਤਿਆਦਿ. ਮਕ੍ਕਟਸ੍ਸੇਵ ਨਲ਼ਾਟੇਪਿ ਕੇਸਾਨਂ ਉਟ੍ਠਿਤਭਾਵਂ ਸਨ੍ਧਾਯਾਹ ‘‘ਸੀਸਲੋਮੇਹੀ’’ਤਿਆਦਿ.

ਮਕ੍ਕਟਭਮੁਕੋਤਿ ਨਲ਼ਾਟਲੋਮੇਹਿ ਅਵਿਭਤ੍ਤਲੋਮਭਮੁਕੋ. ਅਕ੍ਖਿਚਕ੍ਕਲੇਹੀਤਿ ਕਣ੍ਹਮਣ੍ਡਲੇਹਿ. ਕੇਕਰੋਤਿ ਤਿਰਿਯਂ ਪਸ੍ਸਨਕੋ. ਉਦਕਤਾਰਕਾਤਿ ਓਲੋਕੇਨ੍ਤਾਨਂ ਉਦਕੇ ਪਟਿਬਿਮ੍ਬਿਕਚ੍ਛਾਯਾ, ਉਦਕਪੁਬ੍ਬੁਲ਼ਨ੍ਤਿ ਕੇਚਿ. ਅਕ੍ਖਿਤਾਰਕਾਤਿ ਅਭਿਮੁਖੇ ਠਿਤਾਨਂ ਛਾਯਾ, ਅਕ੍ਖਿਗਣ੍ਡਕਾਤਿਪਿ ਵਦਨ੍ਤਿ. ਅਤਿਪਿਙ੍ਗਲਕ੍ਖੀਤਿ ਮਜ੍ਜਾਰਕ੍ਖਿ. ਮਧੁਪਿਙ੍ਗਲਨ੍ਤਿ ਮਧੁਵਣ੍ਣਪਿਙ੍ਗਲਂ. ਨਿਪ੍ਪਖੁਮਕ੍ਖੀਤਿ ਏਤ੍ਥ ਪਖੁਮ-ਸਦ੍ਦੋ ਅਕ੍ਖਿਦਲਲੋਮੇਸੁ ਨਿਰੂਲ਼੍ਹੋ, ਤਦਭਾਵਾ ਨਿਪ੍ਪਖੁਮਕ੍ਖਿ. ਅਕ੍ਖਿਪਾਕੇਨਾਤਿ ਅਕ੍ਖਿਦਲ ਪਰਿਯਨ੍ਤੇਸੁ ਪੂਤਿਭਾਵਾਪਜ੍ਜਨਰੋਗੇਨ.

ਚਿਪਿਟਨਾਸਿਕੋਤਿ ¶ ਅਨੁਨ੍ਨਤਨਾਸਿਕੋ. ਪਟਙ੍ਗਮਣ੍ਡੂਕੋ ਨਾਮ ਮਹਾਮੁਖਮਣ੍ਡੂਕੋ. ਭਿਨ੍ਨਮੁਖੋਤਿ ਉਪਕ੍ਕਮੁਖਪਰਿਯੋਸਾਨੋ, ਸਬ੍ਬਦਾ ਵਿਵਟਮੁਖੋ ਵਾ. ਵਙ੍ਕਮੁਖੋਤਿ ਏਕਪਸ੍ਸੇ ਅਪਕ੍ਕਮ੍ਮ ਠਿਤਹੇਟ੍ਠਿਮਹਨੁਕਟ੍ਠਿਕੋ. ਓਟ੍ਠਚ੍ਛਿਨ੍ਨਕੋਤਿ ਉਭੋਸੁ ਓਟ੍ਠੇਸੁ ਯਤ੍ਥ ਕਤ੍ਥਚਿ ਜਾਤਿਯਾ ਵਾ ਪਚ੍ਛਾ ਵਾ ਸਤ੍ਥਾਦਿਨਾ ਅਪਨੀਤਮਂਸੇਨ ਓਟ੍ਠੇਨ ਸਮਨ੍ਨਾਗਤੋ. ਏਲ਼ਮੁਖੋਤਿ ਨਿਚ੍ਚਪਗ੍ਘਰਿਤਲਾਲਾਮੁਖੋ.

ਭਿਨ੍ਨਗਲੋਤਿ ਅਵਨਤਗਤੋ. ਭਿਨ੍ਨਉਰੋਤਿ ਅਤਿਨਿਨ੍ਨਉਰਮਜ੍ਝੋ. ਏਵਂ ਭਿਨ੍ਨਪਿਟ੍ਠਿਪਿ. ਸਬ੍ਬਞ੍ਚੇਤਨ੍ਤਿ ‘‘ਕਚ੍ਛੁਗਤ੍ਤੋ’’ਤਿਆਦਿਂ ਸਨ੍ਧਾਯ ਵੁਤ੍ਤਂ. ਏਤ੍ਥ ਚ ਵਿਨਿਚ੍ਛਯੋ ਕੁਟ੍ਠਾਦੀਸੁ ਵੁਤ੍ਤੋ ਏਵਾਤਿ ਆਹ ‘‘ਵਿਨਿਚ੍ਛਯੋ’’ਤਿਆਦਿ.

ਵਾਤਣ੍ਡਿਕੋਤਿ ਅਣ੍ਡਵਾਤਰੋਗੇਨ ਉਦ੍ਧੁਤਬੀਜਣ੍ਡਕੋਸੇਨ ਸਮਨ੍ਨਾਗਤੋ, ਯਸ੍ਸ ਨਿਵਾਸਨੇਨ ਪਟਿਚ੍ਛਨ੍ਨਮ੍ਪਿ ਉਨ੍ਨਤਂ ਪਕਾਸਤਿ, ਸੋਵ ਨ ਪਬ੍ਬਾਜੇਤਬ੍ਬੋ. ਵਿਕਟੋਤਿ ਤਿਰਿਯਂਗਮਨਪਾਦੋ, ਯਸ੍ਸ ਚਙ੍ਕਮਤੋ ਜਾਣੁਕਾ ਬਹਿ ਨਿਗਚ੍ਛਨ੍ਤਿ. ਪਣ੍ਹੋਤਿ ਪਚ੍ਛਤੋ ਪਰਿਵਤ੍ਤਨਕਪਾਦੋ, ਯਸ੍ਸ ਚਙ੍ਕਮਤੋ ਜਾਣੁਕਾ ਅਨ੍ਤੋ ਪਵਿਸਨ੍ਤਿ. ਮਹਾਜਙ੍ਘੋਤਿ ਥੂਲਜਙ੍ਘੋ. ਮਹਾਪਾਦੋਤਿ ਮਹਨ੍ਤੇਨ ਪਾਦਤਲੇਨ ਯੁਤ੍ਤੋ. ਪਾਦਵੇਮਜ੍ਝੇਤਿ ਪਿਟ੍ਠਿਪਾਦਵੇਮਜ੍ਝੇ, ਏਤੇਨ ਅਗ੍ਗਪਾਦੋ ਚ ਪਣ੍ਹਿ ਚ ਸਦਿਸੋਤਿ ਦਸ੍ਸੇਤਿ.

ਮਜ੍ਝੇ ਸਙ੍ਕੁਟਿਤਪਾਦਤ੍ਤਾਤਿ ਕੁਣ੍ਡਪਾਦਤਾਯ ਕਾਰਣਵਿਭਾਵਨਂ. ਅਗ੍ਗੇ ਸਙ੍ਕੁਟਿਤਪਾਦਤ੍ਤਾਤਿ ਕੁਣ੍ਡਪਾਦਤਾਯ ਸਕੁਣਪਾਦਸ੍ਸੇਵ ਗਮਨਵਿਭਾਵਨਂ. ਪਿਟ੍ਠਿਪਾਦਗ੍ਗੇਨ ਚਙ੍ਕਮਨ੍ਤੋਤਿ ‘‘ਪਾਦਸ੍ਸ ਬਾਹਿਰਨ੍ਤੇਨਾਤਿ ¶ ਚ ਅਬ੍ਭਨ੍ਤਰਨ੍ਤੇਨਾ’’ਤਿ ਚ ਇਦਂ ਪਾਦਤਲਸ੍ਸ ਉਭੋਹਿ ਪਰਿਯਨ੍ਤੇਹਿ ਚਙ੍ਕਮਨਂ ਸਨ੍ਧਾਯ ਵੁਤ੍ਤਂ.

ਮਮ੍ਮਨਨ੍ਤਿ ਠਾਨਕਰਣਵਿਸੁਦ੍ਧਿਯਾ ਅਭਾਵੇਨ ਅਯੁਤ੍ਤਕ੍ਖਰਵਚਨਂ. ਵਚਨਾਨੁਕਰਣੇਨ ਹਿ ਸੋ ਮਮ੍ਮਨੋ ਵੁਤ੍ਤੋ. ਯੋ ਚ ਕਰਣਸਮ੍ਪਨ੍ਨੋਪਿ ਏਕਮੇਵਕ੍ਖਰਂ ਹਿਕ੍ਕਾਰਬਹੁਸੋ ਵਦਤਿ, ਸੋਪਿ ਇਧੇਵ ਸਙ੍ਗਯ੍ਹਤਿ. ਯੋ ਵਾ ਪਨ ਹਿਕ੍ਕਂ ਨਿਗ੍ਗਹੇਤ੍ਵਾਪਿ ਅਨਾਮੇਡਿਤਕ੍ਖਰਮੇਵ ਸਿਲਿਟ੍ਠਵਚਨਂ ਵਤ੍ਤੁਂ ਸਮਤ੍ਥੋ, ਸੋ ਪਬ੍ਬਾਜੇਤਬ੍ਬੋ.

ਆਪਤ੍ਤਿਤੋ ਨ ਮੁਚ੍ਚਤੀਤਿ ਞਤ੍ਵਾ ਕਰੋਨ੍ਤੋਵ ਨ ਮੁਚ੍ਚਤਿ. ਜੀਵਿਤਨ੍ਤਰਾਯਾਦਿਆਪਦਾਸੁ ਅਰੁਚਿਯਾ ਕਾਯਸਾਮਗ੍ਗਿਂ ਦੇਨ੍ਤਸ੍ਸ ਅਨਾਪਤ੍ਤਿ. ਅਪ੍ਪਤ੍ਤੋ ਓਸਾਰਣਨ੍ਤਿ ਓਸਾਰਣਾਯ ਅਨਰਹੋਤਿ ਅਤ੍ਥੋ.

ਹਤ੍ਥਚ੍ਛਿਨ੍ਨਾਦਿਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੧੨੦. ਨਿਸ੍ਸਯਪਟਿਸਂਯੁਤ੍ਤਵਤ੍ਥੂਸੁ ¶ ਭਿਕ੍ਖੂਹਿ ਸਮਾਨੋ ਭਾਗੋ ਦਿਟ੍ਠਿਸੀਲਾਦਿਗੁਣਕੋਟ੍ਠਾਸੋ ਅਸ੍ਸਾਤਿ ਭਿਕ੍ਖੁਸਭਾਗੋ, ਤਸ੍ਸ ਭਾਵੋ ਭਿਕ੍ਖੁਸਭਾਗਤਾ.

ਅਲਜ੍ਜਿਨਿਸ੍ਸਯਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਗਮਿਕਾਦਿਨਿਸ੍ਸਯਵਤ੍ਥੁਕਥਾਵਣ੍ਣਨਾ

੧੨੧. ਨਿਸ੍ਸਯਕਰਣੀਯੋਤਿ ਏਤ੍ਥ ਨਿਸ੍ਸਯਗ੍ਗਹਣਂ ਨਿਸ੍ਸਯੋ, ਸੋ ਕਰਣੀਯੋ ਯਸ੍ਸਾਤਿ ਵਿਸੇਸਨਸ੍ਸ ਪਰਨਿਪਾਤੋ ਦਟ੍ਠਬ੍ਬੋ. ਵਿਸ੍ਸਮੇਨ੍ਤੋ ਵਾ…ਪੇ… ਅਨਾਪਤ੍ਤੀਤਿ ਗਮਨਸਉਸ੍ਸਾਹਤਾਯ ਤਥਾ ਵਸਨ੍ਤੋਪਿ ਅਦ੍ਧਿਕੋ ਏਵ, ਤਤ੍ਥ ਨਿਸ੍ਸਯਦਾਯਕੇ ਅਸਤਿ ਅਨਾਪਤ੍ਤੀਤਿ ਅਧਿਪ੍ਪਾਯੋ. ਏਤੇਨ ਚ ਪਰਿਸ੍ਸਮਾਦਿਅਭਾਵੇ ਸੇਨਾਸਨਾਦਿਸਮ੍ਪਦਂ ਪਟਿਚ੍ਚ ਵਸਤੋ ਆਪਤ੍ਤੀਤਿ ਦਸ੍ਸੇਤਿ. ਤਞ੍ਚ ਅਗਮਨਪਚ੍ਚਯਾ ਦਿਵਸੇ ਦਿਵਸੇ ਆਪਜ੍ਜਤੀਤਿ ਵਦਨ੍ਤਿ. ਚੀਵਰਰਜਨਾਦਿਕਿਚ੍ਚਤ੍ਥਾਯ ਗਰੂਹਿ ਪੇਸਿਤਸ੍ਸਾਪਿ ਕਿਚ੍ਚਪਰਿਯੋਸਾਨਮੇਵ ਵਸਿਤਬ੍ਬਂ, ਨ ਤਤੋ ਪਰਂ. ਗਰੂਹਿਪਿ ਤਾਵਕਾਲਿਕਕਿਚ੍ਚਤ੍ਥਮੇਵ ਪੇਸਲਦਹਰਾ ਪੇਸਿਤਬ੍ਬਾ, ਨ ਨਿਚ੍ਚਕਾਲਕਿਚ੍ਚਤ੍ਥਨ੍ਤਿ ਦਟ੍ਠਬ੍ਬਂ. ‘‘ਨਾਵਾਯ ਗਚ੍ਛਨ੍ਤਸ੍ਸ…ਪੇ… ਅਨਾਪਤ੍ਤੀ’’ਤਿ ¶ ਵੁਤ੍ਤਤ੍ਤਾ ਏਵਰੂਪਂ ਅਵਿਧੇਯ੍ਯਤਂ ਵਿਨਾ ਨਿਸ੍ਸਯਦਾਯਕਰਹਿਤਟ੍ਠਾਨੇ ਵਸ੍ਸਂ ਉਪਗਨ੍ਤੁਂ ਨ ਵਟ੍ਟਤੀਤਿ ਦਟ੍ਠਬ੍ਬਂ.

ਤਸ੍ਸ ਨਿਸ੍ਸਾਯਾਤਿ ਤਂ ਨਿਸ੍ਸਾਯ. ਆਸਾਲ਼੍ਹੀਮਾਸੇ…ਪੇ… ਤਤ੍ਥ ਗਨ੍ਤਬ੍ਬਨ੍ਤਿ ਏਤ੍ਥ ਪਨ ਸਚੇਪਿ ‘‘ਅਸੁਕੋ ਥੇਰੋ ਏਤ੍ਥ ਆਗਮਿਸ੍ਸਤਿ ਆਗਮਿਸ੍ਸਤੀ’’ਤਿ ਆਗਮੇਨ੍ਤਸ੍ਸੇਵ ਵਸ੍ਸੂਪਨਾਯਿਕਦਿਵਸੋ ਹੋਤਿ. ਹੋਤੁ, ਵਸਿਤਟ੍ਠਾਨੇ ਵਸ੍ਸਂ ਅਨੁਪਗਮ੍ਮ ਯਤ੍ਥ ਨਿਸ੍ਸਯੋ ਲਬ੍ਭਤਿ, ਦੂਰੇਪਿ ਤਤ੍ਥ ਗਨ੍ਤ੍ਵਾ ਪਚ੍ਛਿਮਿਕਾਯ ਉਪਗਨ੍ਤਬ੍ਬਂ.

੧੨੨. ਗੋਤ੍ਤੇਨਪੀਤਿ ‘‘ਆਯਸ੍ਮਤੋ ਪਿਪ੍ਪਲਿਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਏਵਂ ਨਾਮਂ ਅਵਤ੍ਵਾ ਗੋਤ੍ਤਨਾਮੇਨਪੀਤਿ ਅਤ੍ਥੋ, ਤੇਨ ‘‘ਕੋਨਾਮੋ ਤੇ ਉਪਜ੍ਝਾਯੋ’’ਤਿ ਪੁਟ੍ਠੇਨ ਗੋਤ੍ਤਨਾਮੇਨ ‘‘ਆਯਸ੍ਮਾ ਕਸ੍ਸਪੋ’’ਤਿ ਵਤ੍ਤਬ੍ਬਨ੍ਤਿ ਸਿਦ੍ਧਂ ਹੋਤਿ. ਤਸ੍ਮਾ ਅਞ੍ਞਮ੍ਪਿ ਕਿਞ੍ਚਿ ਤਸ੍ਸ ਨਾਮਂ ਪਸਿਦ੍ਧਂ, ਤਸ੍ਮਿਂ ਵਾ ਖਣੇ ਸੁਖਗ੍ਗਹਣਤ੍ਥਂ ਨਾਮਂ ਪਞ੍ਞਾਪਿਤਂ, ਤਂ ਸਬ੍ਬਂ ਗਹੇਤ੍ਵਾਪਿ ਅਨੁਸ੍ਸਾਵਨਾ ਕਾਤਬ੍ਬਾ. ਯਥਾ ¶ ਉਪਜ੍ਝਾਯਸ੍ਸ, ਏਵਂ ਉਪਸਮ੍ਪਦਾਪੇਕ੍ਖਸ੍ਸਪਿ ਗੋਤ੍ਤਾਦਿਨਾਮੇਨ, ਤਙ੍ਖਣਿਕਨਾਮੇਨ ਚ ਅਨੁਸ੍ਸਾਵਨਂ ਕਾਤੁਂ ਵਟ੍ਟਤਿ. ਤਸ੍ਮਿਮ੍ਪਿ ਖਣੇ ‘‘ਅਯਂ ਤਿਸ੍ਸੋ’’ਤਿ ਵਾ ‘‘ਨਾਗੋ’’ਤਿ ਵਾ ਨਾਮਂ ਕਰੋਨ੍ਤੇਹਿ ਅਨੁਸਾਸਕਸਮ੍ਮੁਤਿਤੋ ਪਠਮਮੇਵ ਕਾਤਬ੍ਬਂ, ਏਵਂ ਕਤ੍ਵਾਪਿ ਅਨ੍ਤਰਾਯਿਕਧਮ੍ਮਾਨੁਸਾਸਨਪੁਚ੍ਛਨਕਾਲੇਸੁ ‘‘ਕਿਨ੍ਨਾਮੋਸਿ, ਅਹਂ ਭਨ੍ਤੇ ਨਾਗੋ ਨਾਮ, ਕੋਨਾਮੋ ਤੇ ਉਪਜ੍ਝਾਯੋ, ਉਪਜ੍ਝਾਯੋ ਮੇ ਭਨ੍ਤੇ ਤਿਸ੍ਸੋ ਨਾਮਾ’’ਤਿਆਦਿਨਾ ਵਿਞ੍ਞਾਪੇਨ੍ਤੇਨ ਉਭਿਨ੍ਨਮ੍ਪਿ ਚਿਤ੍ਤੇ ‘‘ਮਮੇਦਂ ਨਾਮ’’ਨ੍ਤਿ ਯਥਾ ਸਞ੍ਞਾ ਉਪ੍ਪਜ੍ਜਤਿ, ਏਵਂ ਵਿਞ੍ਞਾਪੇਤਬ੍ਬਂ. ਸਚੇ ਪਨ ਤਸ੍ਮਿਂ ਖਣੇ ਪਕਤਿਨਾਮੇਨ ਵਤ੍ਵਾ ਪਚ੍ਛਾ ਤਿਸ੍ਸ-ਨਾਮਾਦਿਅਪੁਬ੍ਬਨਾਮੇਨ ਅਨੁਸ੍ਸਾਵੇਤਿ, ਨ ਵਟ੍ਟਤਿ.

ਤਤ੍ਥ ਚ ਕਿਞ੍ਚਾਪਿ ਉਪਜ੍ਝਾਯਸ੍ਸੇਵ ਨਾਮਂ ਅਗ੍ਗਹੇਤ੍ਵਾ ਯੇਨ ਕੇਨਚਿ ਨਾਮੇਨ ‘‘ਤਿਸ੍ਸਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿਆਦਿਨਾਪਿ ਪੁਗ੍ਗਲੇ ਪਰਾਮਟ੍ਠੇ ਕਮ੍ਮਂ ਸੁਕਤਮੇਵ ਹੋਤਿ ਅਨੁਪਜ੍ਝਾਯਕਾਦੀਨਂ ਉਪਸਮ੍ਪਦਾਕਮ੍ਮਂ ਵਿਯ ਉਪਜ੍ਝਾਯਸ੍ਸ ਅਭਾਵੇਪਿ ਅਭਬ੍ਬਤ੍ਤੇਪਿ ਕਮ੍ਮਵਾਚਾਯ ਪੁਗ੍ਗਲੇ ਪਰਾਮਟ੍ਠੇ ਕਮ੍ਮਸ੍ਸ ਸਿਜ੍ਝਨਤੋ. ਉਪਸਮ੍ਪਦਾਪੇਕ੍ਖਸ੍ਸ ਪਨ ਯਥਾਸਕਂ ਨਾਮਂ ਵਿਨਾ ਅਞ੍ਞੇਨ ਨਾਮੇਨ ਅਨੁਸ੍ਸਾਵਿਤੇ ਕਮ੍ਮਂ ਕੁਪ੍ਪਤਿ, ਸੋ ਅਨੁਪਸਮ੍ਪਨ੍ਨੋਵ ਹੋਤਿ. ਤਤ੍ਥ ਠਿਤੋ ਅਞ੍ਞੋ ਅਨੁਪਸਮ੍ਪਨ੍ਨੋ ਵਿਯ ਗਹਿਤਨਾਮਸ੍ਸ ਵਤ੍ਥੁਪੁਗ੍ਗਲਸ੍ਸ ਤਤ੍ਥ ਅਭਾਵਾ, ਏਤਸ੍ਸ ਚ ਨਾਮਸ੍ਸ ਅਨੁਸ੍ਸਾਵਨਾਯ ਅਵੁਤ੍ਤਤ੍ਤਾ. ਤਸ੍ਮਾ ਉਪਸਮ੍ਪਦਾਪੇਕ੍ਖਸ੍ਸ ਪਕਤਿਨਾਮਂ ਪਰਿਵਤ੍ਤੇਤ੍ਵਾ ਅਨੁਪੁਬ੍ਬੇਨ ਨਾਗਾਦਿਨਾਮੇਨ ਅਨੁਸ੍ਸਾਵੇਤੁਕਾਮੇਨ ਪਟਿਕਚ੍ਚੇਵ ‘‘ਤ੍ਵਂ ਨਾਗੋ’’ਤਿਆਦਿਨਾ ਵਿਞ੍ਞਾਪੇਤ੍ਵਾ ਅਨੁਸਾਸਨਅਨ੍ਤਰਾਯਿਕਧਮ੍ਮਪੁਚ੍ਛਨਕ੍ਖਣੇਸੁਪਿ ਤਸ੍ਸ ਚ ਸਙ੍ਘਸ੍ਸ ਚ ਯਥਾ ਪਾਕਟਂ ਹੋਤਿ, ਤਥਾ ਪਕਾਸੇਤ੍ਵਾਵ ਨਾਗਾਦਿਨਾਮੇਨ ਅਨੁਸ੍ਸਾਵੇਤਬ੍ਬਂ. ਏਕਸ੍ਸ ਬਹੂਨਿ ਨਾਮਾਨਿ ਹੋਨ੍ਤਿ, ਤੇਸੁ ਏਕਂ ਗਹੇਤੁਂ ਵਟ੍ਟਤਿ.

ਯਂ ¶ ਪਨ ਉਪਸਮ੍ਪਦਾਪੇਕ੍ਖਉਪਜ੍ਝਾਯਾਨਂ ਏਕਤ੍ਥ ਗਹਿਤਂ ਨਾਮਂ, ਤਦੇਵ ਞਤ੍ਤਿਯਾ, ਸਬ੍ਬਤ੍ਥ ਅਨੁਸ੍ਸਾਵਨਾਸੁ ਚ ਗਹੇਤਬ੍ਬਂ. ਗਹਿਤਤੋ ਹਿ ਅਞ੍ਞਸ੍ਮਿਂ ਗਹਿਤੇ ਬ੍ਯਞ੍ਜਨਂ ਭਿਨ੍ਨਂ ਨਾਮ ਹੋਤਿ, ਕਮ੍ਮਂ ਵਿਪਜ੍ਜਤਿ. ਅਤ੍ਥਤੋ, ਹਿ ਬ੍ਯਞ੍ਜਨਤੋ ਚ ਅਭਿਨ੍ਨਾ ਏਵ ਞਤ੍ਤਿ, ਅਨੁਸ੍ਸਾਵਨਾ ਚ ਵਟ੍ਟਨ੍ਤਿ, ਉਪਜ੍ਝਾਯਨਾਮਸ੍ਸ ਪਨ ਪੁਰਤੋ ‘‘ਆਯਸ੍ਮਤੋ ਤਿਸ੍ਸਸ੍ਸਾ’’ਤਿਆਦਿਨਾ ਆਯਸ੍ਮਨ੍ਤ-ਪਦਂ ਸਬ੍ਬਤ੍ਥ ਯੋਜੇਤ੍ਵਾਪਿ ਅਨੁਸ੍ਸਾਵੇਤਿ, ਤਥਾ ਅਯੋਜਿਤੇਪਿ ਦੋਸੋ ਨਤ੍ਥਿ.

ਪਾਲ਼ਿਯਂ ਪਨ ਕਿਞ੍ਚਾਪਿ ‘‘ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ’’ਤਿ ਪਚ੍ਛਤੋ ‘‘ਆਯਸ੍ਮਤੋ’’ਤਿ ਪਦਂ ਵੁਤ੍ਤਂ, ਤਥਾਪਿ ‘‘ਆਯਸ੍ਮਾ ਸਾਰਿਪੁਤ੍ਤੋ ਅਤ੍ਥਕੁਸਲੋ’’ਤਿਆਦਿਨਾ ¶ ਨਾਮਸ੍ਸ ਪੁਰਤੋ ਆਯਸ੍ਮਨ੍ਤ-ਪਦਯੋਗਸ੍ਸ ਦਸ੍ਸਨਤੋ ਪੁਰਤੋਵ ਪਯੋਗੋ ਯੁਤ੍ਤਤਰੋ. ਤਞ੍ਚ ਏਕਤ੍ਥ ਯੋਜੇਤ੍ਵਾ ਅਞ੍ਞਤ੍ਥ ਅਯੋਜਿਤੇਪਿ ਏਕਤ੍ਥ ਪੁਰਤੋ ਯੋਜੇਤ੍ਵਾ ਅਞ੍ਞਤ੍ਥ ਪਚ੍ਛਤੋ ਯੋਜਨੇਪਿ ਸਾਵਨਾਯ ਹਾਪਨਂ ਨਾਮ ਨ ਹੋਤਿ ਨਾਮਸ੍ਸ ਅਹਾਪਿਤਤ੍ਤਾ. ਤੇਨੇਵ ਪਾਲ਼ਿਯਮ੍ਪਿ ‘‘ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ’’ਤਿ ਏਕਤ੍ਥ ਯੋਜੇਤ੍ਵਾ ‘‘ਇਤ੍ਥਨ੍ਨਾਮੇਨ ਉਪਜ੍ਝਾਯੇਨਾ’’ਤਿਆਦੀਸੁ ‘‘ਆਯਸ੍ਮਤੋ’’ਤਿ ਨ ਯੋਜਿਤਨ੍ਤਿ ਵਦਨ੍ਤਿ. ਤਞ੍ਚ ਕਿਞ੍ਚਾਪਿ ਏਵਂ, ਤਥਾਪਿ ਸਬ੍ਬਟ੍ਠਾਨੇਪਿ ਏਕੇਨੇਵ ਪਕਾਰੇਨ ਯੋਜੇਤ੍ਵਾ ਏਵ ਵਾ ਅਯੋਜੇਤ੍ਵਾ ਵਾ ਅਨੁਸ੍ਸਾਵਨਂ ਪਸਤ੍ਥਤਰਨ੍ਤਿ ਗਹੇਤਬ੍ਬਂ.

ਗਮਿਕਾਦਿਨਿਸ੍ਸਯਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਦ੍ਵੇਉਪਸਮ੍ਪਦਾਪੇਕ੍ਖਾਦਿਵਤ੍ਥੁਕਥਾਵਣ੍ਣਨਾ

੧੨੩. ਏਕਤੋ ਸਹੇਵ ਏਕਸ੍ਮਿਂ ਖਣੇ ਅਨੁਸ੍ਸਾਵਨਂ ਏਤੇਸਨ੍ਤਿ ਏਕਾਨੁਸ੍ਸਾਵਨਾ, ਉਪਸਮ੍ਪਦਾਪੇਕ੍ਖਾ, ਏਤੇ ਏਕਾਨੁਸ੍ਸਾਵਨੇ ਕਾਤੁਂ. ਤੇਨਾਹ ‘‘ਏਕਾਨੁਸ੍ਸਾਵਨੇ ਕਾਤੁ’’ਨ੍ਤਿ, ਇਦਞ੍ਚ ਏਕਂ ਪਦਂ ਵਿਭਤ੍ਤਿਅਲੋਪੇਨ ਦਟ੍ਠਬ੍ਬਂ. ਏਕੇਨ ਵਾਤਿ ਦ੍ਵਿਨ੍ਨਮ੍ਪਿ ਏਕਸ੍ਮਿਂ ਖਣੇ ਏਕਾਯ ਏਵ ਕਮ੍ਮਵਾਚਾਯ ਅਨੁਸ੍ਸਾਵਨੇ ਏਕੇਨਾਚਰਿਯੇਨਾਤਿ ਅਤ੍ਥੋ. ‘‘ਅਯਂ ਬੁਦ੍ਧਰਕ੍ਖਿਤੋ ਚ ਅਯਂ ਧਮ੍ਮਰਕ੍ਖਿਤੋ ਚ ਆਯਸ੍ਮਤੋ ਸਙ੍ਘਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿਆਦਿਨਾ ਨਯੇਨ ਏਕੇਨ ਆਚਰਿਯੇਨ ਦ੍ਵਿਨ੍ਨਂ ਏਕਸ੍ਮਿਂ ਖਣੇ ਅਨੁਸ੍ਸਾਵਨਨਯੋ ਦਟ੍ਠਬ੍ਬੋ. ਇਮਿਨਾਵ ਨਯੇਨ ਤਿਣ੍ਣਮ੍ਪਿ ਏਕੇਨ ਆਚਰਿਯੇਨ ਏਕਕ੍ਖਣੇ ਅਨੁਸ੍ਸਾਵਨਂ ਦਟ੍ਠਬ੍ਬਂ.

ਪੁਰਿਮਨਯੇਨੇਵ ਏਕਤੋ ਅਨੁਸ੍ਸਾਵਨੇ ਕਾਤੁਨ੍ਤਿ ‘‘ਏਕੇਨ ਏਕਸ੍ਸ, ਅਞ੍ਞੇਨ ਇਤਰਸ੍ਸਾ’’ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨ ਦ੍ਵਿਨ੍ਨਂ ਦ੍ਵੀਹਿ ਵਾ, ਤਿਣ੍ਣਂ ਤੀਹਿ ਵਾ ਆਚਰਿਯੇਹਿ, ਏਕਕੇਨ ਵਾ ਆਚਰਿਯੇਨ ਤਯੋਪਿ ਏਕਤੋ ਅਨੁਸ੍ਸਾਵਨੇ ਕਾਤੁਨ੍ਤਿ ਅਤ੍ਥੋ, ਤਞ੍ਚ ਖੋ ਏਕੇਨ ਉਪਜ੍ਝਾਯੇਨ. ‘‘ਨ ਤ੍ਵੇਵ ਨਾਨੁਪਜ੍ਝਾਯੇਨਾ’’ਤਿ ਇਦਂ ਏਕੇਨ ਆਚਰਿਯੇਨ ਦ੍ਵੀਹਿ ਵਾ ਤੀਹਿ ਵਾ ਉਪਜ੍ਝਾਯੇਹਿ ¶ ਦ੍ਵੇ ਵਾ ਤਯੋ ਵਾ ਉਪਸਮ੍ਪਦਾਪੇਕ੍ਖੇ ਏਕਕ੍ਖਣੇ ਏਕਾਯ ਅਨੁਸ੍ਸਾਵਨਾਯ ਏਕਾਨੁਸ੍ਸਾਵਨੇ ਕਾਤੁਂ ਨ ਵਟ੍ਟਤੀਤਿ ਪਟਿਕ੍ਖੇਪਪਦਂ. ਨ ਪਨ ਨਾਨਾਚਰਿਯੇਹਿ ਨਾਨੁਪਜ੍ਝਾਯੇਹਿ ਤਯੋ ਏਕਾਨੁਸ੍ਸਾਵਨੇ ਕਾਤੁਂ ਨ ਵਟ੍ਟਤੀਤਿ ਆਹ ‘‘ਸਚੇ ਪਨ ਨਾਨਾਚਰਿਯਾ ਨਾਨੁਪਜ੍ਝਾਯਾ…ਪੇ… ਵਟ੍ਟਤੀ’’ਤਿ. ਯਞ੍ਚੇਤ੍ਥ ¶ ‘‘ਤਿਸ੍ਸਤ੍ਥੇਰੋ ਸੁਮਨਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ, ਸੁਮਨਤ੍ਥੇਰੋ ਤਿਸ੍ਸਤ੍ਥੇਰਸ੍ਸ ਸਦ੍ਧਿਵਿਹਾਰਿਕ’’ਨ੍ਤਿ ਏਵਂ ਉਪਜ੍ਝਾਯੇਹਿ ਅਞ੍ਞਮਞ੍ਞਂ ਸਦ੍ਧਿਵਿਹਾਰਿਕਾਨਂ ਅਨੁਸ੍ਸਾਵਨਕਰਣਂ ਵੁਤ੍ਤਂ, ਤਂ ਉਪਲਕ੍ਖਣਮਤ੍ਤਂ. ਤਸ੍ਮਾ ਸਚੇ ਤਿਸ੍ਸਤ੍ਥੇਰੋ ਸੁਮਨਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ, ਸੁਮਨਤ੍ਥੇਰੋ ਨਨ੍ਦਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ ਅਨੁਸ੍ਸਾਵੇਤਿ, ਅਞ੍ਞਮਞ੍ਞਞ੍ਚ ਗਣਪੂਰਕਾ ਹੋਨ੍ਤਿ, ਵਟ੍ਟਤਿ ਏਵ. ਸਚੇ ਪਨ ਉਪਜ੍ਝਾਯੋ ਸਯਮੇਵ ਅਤ੍ਤਨੋ ਸਦ੍ਧਿਵਿਹਾਰਿਕਂ ਅਨੁਸ੍ਸਾਵੇਤੀਤਿ ਏਤ੍ਥ ਵਤ੍ਤਬ੍ਬਮੇਵ ਨਤ੍ਥਿ, ਕਮ੍ਮਂ ਸੁਕਤਮੇਵ ਹੋਤਿ. ਅਨੁਪਜ੍ਝਾਯਕਸ੍ਸਪਿ ਯੇਨ ਕੇਨਚਿ ਅਨੁਸ੍ਸਾਵਿਤੇ ਉਪਸਮ੍ਪਦਾ ਹੋਤਿ, ਕਿਮਙ੍ਗਂ ਪਨ ਸਉਪਜ੍ਝਾਯਕਸ੍ਸ ਉਪਜ੍ਝਾਯੇਨੇਵ ਅਨੁਸ੍ਸਾਵਨੇਤਿ ਦਟ੍ਠਬ੍ਬਂ. ਤੇਨੇਵ ਨਵਟ੍ਟਨਪਕ੍ਖਂ ਦਸ੍ਸੇਤੁਂ ‘‘ਸਚੇ ਪਨਾ’’ਤਿਆਦਿਮਾਹ.

ਦ੍ਵੇਉਪਸਮ੍ਪਦਾਪੇਕ੍ਖਾਦਿਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੧੨੬. ਉਪਜ੍ਝਾਤਿ ਉਪਜ੍ਝਾਯ-ਸਦ੍ਦਸਮਾਨਤ੍ਥੋ ਆਕਾਰਨ੍ਤੋ ਉਪਜ੍ਝਾਸਦ੍ਦੋਤਿ ਦਸ੍ਸੇਤਿ. ਉਪਜ੍ਝਾਯ-ਸਦ੍ਦੋ ਏਵ ਵਾ ਉਪਜ੍ਝਾ ਉਪਯੋਗਪਚ੍ਚਤ੍ਤਵਚਨੇਸੁ ਯ-ਕਾਰਲੋਪਂ ਕਤ੍ਵਾ ਏਵਂ ਵੁਤ੍ਤੋ ਕਰਣਵਚਨਾਦੀਸੁ ਉਪਜ੍ਝਾ-ਸਦ੍ਦਸ੍ਸ ਪਯੋਗਾਭਾਵਾਤਿ ਦਟ੍ਠਬ੍ਬਂ. ਪਾਲ਼ਿਯਂ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਨ੍ਤਿ ਅਤ੍ਤਨਾਵ ਕਤ੍ਤੁਭੂਤੇਨ ਕਰਣਭੂਤੇਨ ਅਤ੍ਤਾਨਮੇਵ ਕਮ੍ਮਭੂਤਂ ਪਤਿ ਸਮ੍ਮਨਨਕਿਚ੍ਚਂ ਕਾਤਬ੍ਬਂ. ਅਤ੍ਤਾਨਨ੍ਤਿ ਵਾ ਪਚ੍ਚਤ੍ਤੇ ਉਪਯੋਗਵਚਨਂ, ਅਤ੍ਤਨਾਵ ਅਤ੍ਤਾ ਸਮ੍ਮਨ੍ਨਿਤਬ੍ਬੋਤਿ ਅਤ੍ਥੋ. ਨ ਕੇਵਲਞ੍ਚ ਏਤ੍ਥੇਵ, ਅਞ੍ਞਤ੍ਰਾਪਿ ਤੇਰਸਸਮ੍ਮੁਤਿਆਦੀਸੁ ਇਮਿਨਾਵ ਲਕ੍ਖਣੇਨ ਅਤ੍ਤਨਾਵ ਅਤ੍ਤਾ ਸਮ੍ਮਨ੍ਨਿਤਬ੍ਬੋਵ. ਅਪਿਚ ਸਯਂ ਕਮ੍ਮਾਰਹਤ੍ਤਾ ਅਤ੍ਤਾਨਂ ਮੁਞ੍ਚਿਤ੍ਵਾ ਚਤੁਵਗ੍ਗਾਦਿਕੋ ਗਣੋ ਸਬ੍ਬਤ੍ਥ ਇਚ੍ਛਿਤਬ੍ਬੋ.

ਸਚ੍ਚਕਾਲੋਤਿ ‘‘ਨਿਗੂਹਿਸ੍ਸਾਮੀ’’ਤਿ ਵਞ੍ਚਨਂ ਪਹਾਯ ਸਚ੍ਚਸ੍ਸੇਵ ਤੇ ਇਚ੍ਛਿਤਬ੍ਬਕਾਲੋ. ਭੂਤਕਾਲੋਤਿ ਵਞ੍ਚਨਾਯ ਅਭਾਵੇਪਿ ਮਨੁਸ੍ਸਤ੍ਤਾਦਿਵਤ੍ਥੁਨੋ ਭੂਤਤਾਯ ਅਵਸ੍ਸਂ ਇਚ੍ਛਿਤਬ੍ਬਕਾਲੋ, ਇਤਰਥਾ ਕਮ੍ਮਕੋਪਾਦਿਅਨ੍ਤਰਾਯੋ ਹੋਤੀਤਿ ਅਧਿਪ੍ਪਾਯੋ. ਮਙ੍ਕੂਤਿ ਅਧੋਮੁਖੋ. ਉਦ੍ਧਰਤੂਤਿ ਅਨੁਪਸਮ੍ਪਨ੍ਨਭਾਵਤੋ ਉਪਸਮ੍ਪਤ੍ਤਿਯਂ ਪਤਿਟ੍ਠਪੇਤੂਤਿ ਅਤ੍ਥੋ.

ਸਬ੍ਬਕਮ੍ਮਵਾਚਾਸੁ ¶ ਅਤ੍ਥਕੋਸਲ੍ਲਤ੍ਥਂ ਪਨੇਤ੍ਥ ਉਪਸਮ੍ਪਦਾਕਮ੍ਮਵਾਚਾਯ ਏਵਮਤ੍ਥੋ ਦਟ੍ਠਬ੍ਬੋ – ਸੁਣਾਤੂਤਿ ਸਵਨਾਣਤ੍ਤਿਯਂ ਪਠਮਪੁਰਿਸੇਕਵਚਨਂ. ਤਞ੍ਚ ¶ ਕਿਞ੍ਚਾਪਿ ਯੋ ਸਙ੍ਘੋ ਸਵਨਕਿਰਿਯਾਯ ਨਿਯੋਜੀਯਤਿ, ਤਸ੍ਸ ਸਮ੍ਮੁਖਤ੍ਤਾ ‘‘ਸੁਣਾਹੀ’’ਤਿ ਮਜ੍ਝਿਮਪੁਰਿਸੇਕਵਚਨੇਨ ਵਤ੍ਤਬ੍ਬਂ, ਤਥਾਪਿ ਯਸ੍ਮਾ ਸਙ੍ਘ-ਸਦ੍ਦਸਨ੍ਨਿਧਾਨੇ ਪਠਮਪੁਰਿਸਪਯੋਗੋਵ ਸਦ੍ਦਵਿਧੂਹਿ ਸਮਾਚਿਣ੍ਣੋ ਭਗਵਨ੍ਤਆਯਸ੍ਮਨ੍ਤਾਦਿਸਦ੍ਦਸਨ੍ਨਿਧਾਨੇਸੁ ਵਿਯ ‘‘ਅਧਿਵਾਸੇਤੁ ਮੇ ਭਵਂ ਗੋਤਮੋ (ਪਾਰਾ. ੨੨). ਏਤਸ੍ਸ ਸੁਗਤ ਕਾਲੋ, ਯਂ ਭਗਵਾ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਪੇਯ੍ਯ (ਪਾਰਾ. ੨੧). ਪਕ੍ਕਮਤਾਯਸ੍ਮਾ (ਪਾਰਾ. ੪੩੬). ਸੁਣਨ੍ਤੁ ਮੇ ਆਯਸ੍ਮਨ੍ਤੋ’’ਤਿਆਦੀਸੁ ਵਿਯ. ਤਸ੍ਮਾ ਇਧ ਪਠਮਪੁਰਿਸਪਯੋਗੋ ਕਤੋ. ਅਥ ਵਾ ਗਾਰਵਵਸੇਨੇਵੇਤਂ ਵੁਤ੍ਤਂ. ਗਰੁਟ੍ਠਾਨੀਯੇਸੁ ਹਿ ਗਾਰਵਵਸੇਨ ਮਜ੍ਝਿਮਪੁਰਿਸਪਯੋਗੁਪ੍ਪਤ੍ਤਿਯਮ੍ਪਿ ਪਠਮਪੁਰਿਸਪਯੋਗਂ ਪਯੁਜ੍ਜਨ੍ਤਿ ‘‘ਦੇਸੇਤੁ ਸੁਗਤੋ ਧਮ੍ਮ’’ਨ੍ਤਿਆਦੀਸੁ (ਦੀ. ਨਿ. ੨.੬੬; ਮ. ਨਿ. ੨.੩੩੮; ਸਂ. ਨਿ. ੧.੧੭੨; ਮਹਾਵ. ੮) ਵਿਯਾਤਿ ਦਟ੍ਠਬ੍ਬਂ. ਕੇਚਿ ਪਨ ‘‘ਭਨ੍ਤੇ, ਆਵੁਸੋਤਿ ਸਦ੍ਦੇ ਅਪੇਕ੍ਖਿਤ੍ਵਾ ਇਧ ਪਠਮਪੁਰਿਸਪਯੋਗੋ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ‘‘ਆਚਰਿਯੋ ਮੇ ਭਨ੍ਤੇ ਹੋਹਿ, (ਮਹਾਵ. ੭੭) ਇਙ੍ਘਾਵੁਸੋ ਉਪਾਲਿ, ਇਮਂ ਪਬ੍ਬਜਿਤਂ ਅਨੁਯੁਞ੍ਜਾਹੀ’’ਤਿਆਦੀਸੁ (ਪਾਰਾ. ੫੧੭) ਤਪ੍ਪਯੋਗੇਪਿ ਮਜ੍ਝਿਮਪੁਰਿਸਪਯੋਗਸ੍ਸੇਵ ਦਸ੍ਸਨਤੋ.

ਮੇਤਿ ਯੋ ਸਾਵੇਤਿ, ਤਸ੍ਸ ਅਤ੍ਤਨਿਦ੍ਦੇਸੇ ਸਾਮਿਵਚਨਂ. ਭਨ੍ਤੇਤਿ ਆਲਪਨਤ੍ਥੇ ਵੁਡ੍ਢੇਸੁ ਸਗਾਰਵਵਚਨਂ. ‘‘ਆਵੁਸੋ’’ਤਿ ਪਦਂ ਪਨ ਨਵਕੇਸੁ. ਤਦੁਭਯਮ੍ਪਿ ਨਿਪਾਤੋ ‘‘ਤੁਮ੍ਹੇ ਭਨ੍ਤੇ, ਤੁਮ੍ਹੇ ਆਵੁਸੋ’’ਤਿ ਬਹੂਸੁਪਿ ਸਮਾਨਰੂਪਤ੍ਤਾ. ਸਙ੍ਘੋਤਿ ਅਵਿਸੇਸਤੋ ਚਤੁਵਗ੍ਗਾਦਿਕੇ ਪਕਤਤ੍ਤਪੁਗ੍ਗਲਸਮੂਹੇ ਵਤ੍ਤਤਿ. ਇਧ ਪਨ ਪਚ੍ਚਨ੍ਤਿਮੇਸੁ ਜਨਪਦੇਸੁ ਪਞ੍ਚਵਗ੍ਗਤੋ ਪਟ੍ਠਾਯ, ਮਜ੍ਝਿਮੇਸੁ ਜਨਪਦੇਸੁ ਦਸਵਗ੍ਗਤੋ ਪਟ੍ਠਾਯ ਸਙ੍ਘੋਤਿ ਗਹੇਤਬ੍ਬੋ. ਤਤ੍ਰਾਯਂ ਪਿਣ੍ਡਤ੍ਥੋ – ਭਨ੍ਤੇ, ਸਙ੍ਘੋ ਮਮ ਵਚਨਂ ਸੁਣਾਤੂਤਿ. ਇਦਞ੍ਚ ਨਵਕਤਰੇਨ ਵਤ੍ਤਬ੍ਬਵਚਨਂ. ਸਚੇ ਪਨ ਅਨੁਸ੍ਸਾਵਕੋ ਸਬ੍ਬੇਹਿ ਭਿਕ੍ਖੂਹਿ ਵੁਡ੍ਢਤਰੋ ਹੋਤਿ, ‘‘ਸੁਣਾਤੁ ਮੇ, ਆਵੁਸੋ, ਸਙ੍ਘੋ’’ਤਿ ਵਤ੍ਤਬ੍ਬਂ. ਸੋਪਿ ਚੇ ‘‘ਭਨ੍ਤੇ’’ਤਿ ਵਦੇਯ੍ਯ, ਨਵਕਤਰੋ ਵਾ ‘‘ਆਵੁਸੋ’’ਤਿ, ਕਮ੍ਮਕੋਪੋ ਨਤ੍ਥਿ. ਕੇਚਿ ਪਨ ‘‘ਏਕਤ੍ਥ ‘ਆਵੁਸੋ’ਤਿ ਵਤ੍ਵਾ ਅਞ੍ਞਤ੍ਥ ‘ਭਨ੍ਤੇ’ਤਿ ਵੁਤ੍ਤੇਪਿ ਨਤ੍ਥਿ ਦੋਸੋ ਉਭਯੇਨਾਪਿ ਆਲਪਨਸ੍ਸ ਸਿਜ੍ਝਨਤੋ’’ਤਿ ਵਦਨ੍ਤਿ.

ਇਦਾਨਿ ਯਮਤ੍ਥਂ ਞਾਪੇਤੁਕਾਮੋ ‘‘ਸੁਣਾਤੂ’’ਤਿ ਸਙ੍ਘਂ ਸਵਨੇ ਨਿਯੋਜੇਤਿ, ਤਂ ਞਾਪੇਨ੍ਤੋ ‘‘ਅਯਂ ਇਤ੍ਥਨ੍ਨਾਮੋ’’ਤਿਆਦਿਮਾਹ. ਤਤ੍ਥ ਅਯਨ੍ਤਿ ¶ ਉਪਸਮ੍ਪਦਾਪੇਕ੍ਖਸ੍ਸ ਹਤ੍ਥਪਾਸੇ ਸਨ੍ਨਿਹਿਤਭਾਵਦਸ੍ਸਨਂ. ਤੇਨ ਚ ਹਤ੍ਥਪਾਸੇ ਠਿਤਸ੍ਸੇਵ ਉਪਸਮ੍ਪਦਾ ਰੁਹਤੀਤਿ ਸਿਜ੍ਝਤਿ ਹਤ੍ਥਪਾਸਤੋ ਬਹਿ ਠਿਤਸ੍ਸ ‘‘ਅਯ’’ਨ੍ਤਿ ਨ ਵਤ੍ਤਬ੍ਬਤੋ. ਤੇਨੇਵ ਅਨੁਸਾਸਕਸਮ੍ਮੁਤਿਯਂ ਸੋ ਹਤ੍ਥਪਾਸਤੋ ਬਹਿ ਠਿਤਤ੍ਤਾ ‘‘ਅਯ’’ਨ੍ਤਿ ਨ ਵੁਤ੍ਤੋ. ਤਸ੍ਮਾ ਉਪਸਮ੍ਪਦਾਪੇਕ੍ਖੋ ਅਨੁਪਸਮ੍ਪਨ੍ਨੋ ਹਤ੍ਥਪਾਸੇ ਠਪੇਤਬ੍ਬੋ. ਅਯਂ ਇਤ੍ਥਨ੍ਨਾਮੋਤਿ ਅਯਂ-ਸਦ੍ਦੋ ਚ ਅਵਸ੍ਸਂ ਪਯੁਜ੍ਜਿਤਬ੍ਬੋ. ਸੋ ਚ ਇਮਸ੍ਮਿਂ ਪਠਮਨਾਮਪਯੋਗੇ ਏਵਾਤਿ ਗਹੇਤਬ੍ਬਂ ¶ . ‘‘ਇਤ੍ਥਨ੍ਨਾਮੋ’’ਤਿ ਇਦਂ ਅਨਿਯਮਤੋ ਤਸ੍ਸ ਨਾਮਦਸ੍ਸਨਂ. ਉਭਯੇਨਪਿ ਅਯਂ ਬੁਦ੍ਧਰਕ੍ਖਿਤੋਤਿਆਦਿਨਾਮਂ ਦਸ੍ਸੇਤਿ. ‘‘ਉਪਸਮ੍ਪਦਾਪੇਕ੍ਖੋ’’ਤਿ ਭਿਨ੍ਨਾਧਿਕਰਣਵਿਸਯੇ ਬਹੁਬ੍ਬੀਹਿਸਮਆਸੋ, ਉਪਸਮ੍ਪਦਂ ਮੇ ਸਙ੍ਘੋ ਅਪੇਕ੍ਖਮਾਨੋਤਿ ਅਤ੍ਥੋ. ਤਸ੍ਸ ਚ ਉਪਜ੍ਝਾਯਤਂ ਸਮਙ੍ਗਿਭਾਵੇਨ ਦਸ੍ਸੇਤੁਂ ‘‘ਇਤ੍ਥਨ੍ਨਮਸ੍ਸ ਆਯਸ੍ਮਤੋ’’ਤਿ ਵੁਤ੍ਤਂ. ਏਤੇਨ ‘‘ਅਯਂ ਬੁਦ੍ਧਰਕ੍ਖਿਤੋ ਆਯਸ੍ਮਤੋ ਧਮ੍ਮਰਕ੍ਖਿਤਸ੍ਸ ਸਦ੍ਧਿਵਿਹਾਰਿਕਭੂਤੋ ਉਪਸਮ੍ਪਦਾਪੇਕ੍ਖੋ’’ਤਿ ਏਵਮਾਦਿਨਾ ਨਯੇਨ ਨਾਮਯੋਜਨਾਯ ਸਹ ਅਤ੍ਥੋ ਦਸ੍ਸਿਤੋਤਿ. ਏਤ੍ਥ ਚ ‘‘ਆਯਸ੍ਮਤੋ’’ਤਿ ਪਦਂ ਅਵਤ੍ਵਾਪਿ ‘‘ਅਯਂ ਬੁਦ੍ਧਰਕ੍ਖਿਤੋ ਧਮ੍ਮਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਵਤ੍ਤੁਂ ਵਟ੍ਟਤਿ. ਤੇਨੇਵ ਪਾਲ਼ਿਯਂ ‘‘ਇਤ੍ਥਨ੍ਨਾਮੇਨ ਉਪਜ੍ਝਾਯੇਨਾ’’ਤਿ ਏਤ੍ਥ ‘‘ਆਯਸ੍ਮਤੋ’’ਤਿ ਪਦਂ ਨ ਵੁਤ੍ਤਂ. ਯਞ੍ਚੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ.

ਨਨੁ ਚੇਤ੍ਥ ਉਪਜ੍ਝਾਯੋਪਿ ਉਪਸਮ੍ਪਦਾਪੇਕ੍ਖੋ ਵਿਯ ਹਤ੍ਥਪਾਸੇ ਠਿਤੋ ਏਵ ਇਚ੍ਛਿਤਬ੍ਬੋ, ਅਥ ਕਸ੍ਮਾ ‘‘ਅਯਂ ਇਤ੍ਥਨ੍ਨਾਮੋ ਇਮਸ੍ਸ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਏਵਂ ਉਪਜ੍ਝਾਯਪਰਾਮਸਨੇਪਿ ਇਮ-ਸਦ੍ਦਸ੍ਸ ਪਯੋਗੋ ਨ ਕਤੋਤਿ? ਨਾਯਂ ਵਿਰੋਧੋ ਉਪਜ੍ਝਾਯਸ੍ਸ ਅਭਾਵੇਪਿ ਕਮ੍ਮਕੋਪਾਭਾਵਤੋ. ਕੇਵਲਞ੍ਹਿ ਕਮ੍ਮਨਿਪ੍ਫਤ੍ਤਿਯਾ ਸਨ੍ਤਪਦਵਸੇਨ ਅਵਿਜ੍ਜਮਾਨਸ੍ਸਪਿ ਉਪਜ੍ਝਾਯਸ੍ਸ ਨਾਮਕਿਤ੍ਤਨਂ ਅਨੁਪਜ੍ਝਾਯਸ੍ਸ ਉਪਸਮ੍ਪਦਾਦੀਸੁਪਿ ਕਰੀਯਤਿ. ਤਸ੍ਮਾ ਉਪਜ੍ਝਾਯਸ੍ਸ ਅਸਨ੍ਨਿਹਿਤਤਾਯਪਿ ਤਪ੍ਪਰਾਮਸਨਮਤ੍ਤੇਨੇਵ ਕਮ੍ਮਸਿਦ੍ਧਿਤੋ ‘‘ਇਮਸ੍ਸਾ’’ਤਿ ਨਿਦ੍ਦਿਸਿਤੁਂ ਨ ਵਟ੍ਟਤਿ.

ਪਰਿਸੁਦ੍ਧੋ ਅਨ੍ਤਰਾਯਿਕੇਹਿ ਧਮ੍ਮੇਹੀਤਿ ਅਭਬ੍ਬਤਾਦਿਕੇਹਿ ਉਪਸਮ੍ਪਦਾਯ ਅਵਤ੍ਥੁਕਰੇਹਿ ਚੇਵ ਪਞ੍ਚਾਬਾਧਹਤ੍ਥਚ੍ਛਿਨ੍ਨਾਦੀਹਿ ਚ ਆਪਤ੍ਤਿਮਤ੍ਤਕਰੇਹਿ ਅਨ੍ਤਰਾਯਿਕੇਹਿ ਸਭਾਵੇਹਿ ਪਰਿਮੁਤ੍ਤੋ. ਏਵਂ ਵੁਤ੍ਤੋ ਏਵ ਚ ਆਪਤ੍ਤਿਮਤ੍ਤਕਰੇਹਿ ਪਞ੍ਚਾਬਾਧਾਦੀਹਿ ਅਪਰਿਮੁਤ੍ਤਸ੍ਸਪਿ ਉਪਸਮ੍ਪਦਾ ਰੁਹਤਿ, ਨਾਞ੍ਞਥਾ. ਪਰਿਪੁਣ੍ਣਸ੍ਸ ਪਤ੍ਤਚੀਵਰਨ੍ਤਿ ਪਰਿਪੁਣ੍ਣਮਸ੍ਸ ਉਪਸਮ੍ਪਦਾਪੇਕ੍ਖਸ੍ਸ ਪਤ੍ਤਚੀਵਰਂ. ਏਵਂ ਵੁਤ੍ਤੇ ਏਵ ਅਪਤ੍ਤਚੀਵਰਸ੍ਸਾਪਿ ਉਪਸਮ੍ਪਦਾ ਰੁਹਤਿ, ਨਾਞ੍ਞਥਾ. ਉਪਸਮ੍ਪਦਂ ਯਾਚਤੀਤਿ ¶ ‘‘ਸਙ੍ਘਂ, ਭਨ੍ਤੇ, ਉਪਸਮ੍ਪਦਂ ਯਾਚਾਮੀ’’ਤਿਆਦਿਨਾ (ਮਹਾਵ. ੭੧, ੧੨੬) ਯਾਚਿਤਭਾਵਂ ਸਨ੍ਧਾਯ ਵੁਤ੍ਤਂ. ਏਵਂ ਤੇਨ ਸਙ੍ਘੇ ਅਯਾਚਿਤੇਪਿ ‘‘ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤੀ’’ਤਿ ਵੁਤ੍ਤੇ ਏਵ ਕਮ੍ਮਂ ਅਵਿਪਨ੍ਨਂ ਹੋਤਿ, ਨਾਞ੍ਞਥਾ. ਉਪਜ੍ਝਾਯੇਨਾਤਿ ਉਪਜ੍ਝਾਯੇਨ ਕਰਣਭੂਤੇਨ ਇਤ੍ਥਨ੍ਨਾਮਂ ਉਪਜ੍ਝਾਯਂ ਕਤ੍ਵਾ ਕਮ੍ਮਭੂਤਂ ਉਪਸਮ੍ਪਦਂ ਦਾਤੁਂ ਨਿਪ੍ਫਾਦੇਤੁਂ ਕਤ੍ਤੁਭੂਤਂ ਸਙ੍ਘਂ ਯਾਚਤੀਤਿ ਅਤ੍ਥੋ. ਯਾਚਧਾਤੁਨੋ ਪਨ ਦ੍ਵਿਕਮ੍ਮਕਤ੍ਤਾ ‘‘ਸਙ੍ਘਂ, ਉਪਸਮ੍ਪਦ’’ਨ੍ਤਿ ਦ੍ਵੇ ਕਮ੍ਮਪਦਾਨਿ ਵੁਤ੍ਤਾਨਿ.

ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਨ੍ਤਿ ਏਤ੍ਥ ਪਤ੍ਤੋ ਕਾਲੋ ਇਮਸ੍ਸਾਤਿ ਪਤ੍ਤਕਾਲਂ, ਅਪਲੋਕਨਾਦਿਚਤੁਬ੍ਬਿਧਸਙ੍ਘਕਮ੍ਮਂ, ਤਦੇਵ ਸਕਤ੍ਥੇ ਯ-ਪਚ੍ਚਯੇਨ ‘‘ਪਤ੍ਤਕਲ੍ਲ’’ਨ੍ਤਿ ਵੁਚ੍ਚਤਿ. ਇਧ ਪਨ ਞਤ੍ਤਿਚਤੁਤ੍ਥਉਪਸਮ੍ਪਦਾਕਮ੍ਮਂ ਅਧਿਪ੍ਪੇਤਂ, ਤਂ ਕਾਤੁਂ ਸਙ੍ਘਸ੍ਸ ਪਤ੍ਤਕਲ੍ਲਂ ਜਾਤਂ. ਯਦੀਤਿ ਅਨੁਮਤਿਗਹਣਵਸੇਨ ਕਮ੍ਮਸ੍ਸ ¶ ਪਤ੍ਤਕਲ੍ਲਤਂ ਞਾਪੇਤਿ. ਯੋ ਹਿ ਕੋਚਿ ਤਤ੍ਥ ਅਪਤ੍ਤਕਲ੍ਲਤਂ ਮਞ੍ਞਿਸ੍ਸਤਿ, ਸੋ ਵਕ੍ਖਤਿ. ਇਮਮੇਵ ਹਿ ਅਤ੍ਥਂ ਸਨ੍ਧਾਯ ਅਨੁਸ੍ਸਾਵਨਾਸੁ ‘‘ਯਸ੍ਸਾਯਸ੍ਮਤੋ ਖਮਤਿ…ਪੇ… ਸੋ ਭਾਸੇਯ੍ਯਾ’’ਤਿ (ਮਹਾਵ. ੧੨੭) ਵੁਤ੍ਤਂ. ਤਂ ਪਨੇਤਂ ਪਤ੍ਤਕਲ੍ਲਂ ਵਤ੍ਥੁਸਮ੍ਪਦਾ, ਅਨ੍ਤਰਾਯਿਕੇਹਿ ਧਮ੍ਮੇਹਿ ਚਸ੍ਸ ਪਰਿਸੁਦ੍ਧਤਾ, ਸੀਮਾਸਮ੍ਪਦਾ, ਪਰਿਸਸਮ੍ਪਦਾ, ਪੁਬ੍ਬਕਿਚ੍ਚਨਿਟ੍ਠਾਪਨਨ੍ਤਿ ਇਮੇਹਿ ਪਞ੍ਚਹਿ ਅਙ੍ਗੇਹਿ ਸਙ੍ਗਹਿਤਂ.

ਤਤ੍ਥ ਵਤ੍ਥੁਸਮ੍ਪਦਾ ਨਾਮ ਯਥਾਵੁਤ੍ਤੇਹਿ ਏਕਾਦਸਹਿ ਅਭਬ੍ਬਪੁਗ੍ਗਲੇਹਿ ਚੇਵ ਅਨ੍ਤਿਮਵਤ੍ਥੁਅਜ੍ਝਾਪਨ੍ਨੇਹਿ ਚ ਅਞ੍ਞੋ ਪਰਿਪੁਣ੍ਣਵੀਸਤਿਵਸ੍ਸੋ ਅਨੁਪਸਮ੍ਪਨ੍ਨਭੂਤੋ ਮਨੁਸ੍ਸਪੁਰਿਸੋ, ਏਤਸ੍ਮਿਂ ਪੁਗ੍ਗਲੇ ਸਤਿ ਏਵ ਇਦਂ ਸਙ੍ਘਸ੍ਸ ਉਪਸਮ੍ਪਦਾਕਮ੍ਮਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ. ਕਤਞ੍ਚ ਕੁਪ੍ਪਮੇਵ ਹੋਤਿ.

ਅਨ੍ਤਰਾਯਿਕੇਹਿ ਧਮ੍ਮੇਹਿ ਚਸ੍ਸ ਪਰਿਸੁਦ੍ਧਤਾ ਨਾਮ ਯਥਾਵੁਤ੍ਤਸ੍ਸੇਵ ਉਪਸਮ੍ਪਦਾਵਤ੍ਥੁਭੂਤਸ੍ਸ ਪੁਗ੍ਗਲਸ੍ਸ ਯੇ ਇਮੇ ਭਗਵਤਾ ਪਟਿਕ੍ਖਿਤ੍ਤਾ ਪਞ੍ਚਾਬਾਧਫੁਟ੍ਠਤਾਦਯੋ ਮਾਤਾਪਿਤੂਹਿ ਅਨਨੁਞ੍ਞਾਤਤਾਪਰਿਯੋਸਾਨਾ ਚੇਵ ਹਤ੍ਥਚ੍ਛਿਨ੍ਨਤਾਦਯੋ ਚ ਦੋਸਧਮ੍ਮਾ ਕਾਰਕਸਙ੍ਘਸ੍ਸ ਆਪਤ੍ਤਾਦਿਅਨ੍ਤਰਾਯਹੇਤੁਤਾਯ ‘‘ਅਨ੍ਤਰਾਯਿਕਾ’’ਤਿ ਵੁਚ੍ਚਨ੍ਤਿ ਤੇਹਿ ਅਨ੍ਤਰਾਯਿਕੇਹਿ ਦੋਸਧਮ੍ਮੇਹਿ ਪਰਿਮੁਤ੍ਤਤ੍ਤਾ, ਇਮਿਸ੍ਸਾ ਚ ਸਤਿ ਏਵ ਇਦਂ ਕਮ੍ਮਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ. ਕਤਂ ਪਨ ਕਮ੍ਮਂ ਸੁਕਤਮੇਵ ਹੋਤਿ ਠਪੇਤ੍ਵਾ ਊਨਵੀਸਤਿਵਸ੍ਸਪੁਗ੍ਗਲਂ.

ਸੀਮਾਸਮ੍ਪਦਾ ¶ ਪਨ ਉਪੋਸਥਕ੍ਖਨ੍ਧਕੇ (ਮਹਾਵ. ੧੪੭-੧੪੮) ਵਕ੍ਖਮਾਨਨਯੇਨ ਸਬ੍ਬਦੋਸਵਿਰਹਿਤਾਯ ਬਦ੍ਧਾਬਦ੍ਧਵਸੇਨ ਦੁਵਿਧਾਯ ਸੀਮਾਯ ਵਸੇਨੇਵ ਵੇਦਿਤਬ੍ਬਾ. ਤਾਦਿਸਾਯ ਹਿ ਸੀਮਾਯ ਸਤਿ ਏਵ ਇਦਂ ਕਮ੍ਮਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ. ਕਤਞ੍ਚ ਕਮ੍ਮਂ ਵਿਪਜ੍ਜਤਿ.

ਪਰਿਸਸਮ੍ਪਦਾ ਪਨ ਯੇ ਇਮੇ ਉਪਸਮ੍ਪਦਾਕਮ੍ਮਸ੍ਸ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਕਮ੍ਮਪ੍ਪਤ੍ਤਾ ਦਸਹਿ ਵਾ ਪਞ੍ਚਹਿ ਵਾ ਅਨੂਨਾ ਪਾਰਾਜਿਕਂ ਅਨਾਪਨ੍ਨਾ, ਅਨੁਕ੍ਖਿਤ੍ਤਾ ਚ ਸਮਾਨਸਂਵਾਸਕਾ ਭਿਕ੍ਖੂ, ਤੇਸਂ ਏਕਸੀਮਾਯਂ ਹਤ੍ਥਪਾਸਂ ਅਵਿਜਹਿਤ੍ਵਾ ਠਾਨਂ, ਛਨ੍ਦਾਰਹਾਨਞ੍ਚ ਛਨ੍ਦਸ੍ਸ ਆਨਯਨਂ, ਸਮ੍ਮੁਖੀਭੂਤਾਨਞ੍ਚ ਅਪ੍ਪਟਿਕ੍ਕੋਸਨਂ, ਉਪਸਮ੍ਪਦਾਪੇਕ੍ਖਰਹਿਤਾਨਂ ਉਪੋਸਥਕ੍ਖਨ੍ਧਕੇ ਪਟਿਕ੍ਖਿਤ੍ਤਾਨਂ ਗਹਟ੍ਠਾਦਿਅਨਉਪਸਮ੍ਪਨ੍ਨਾਨਞ੍ਚੇਵ ਪਾਰਾਜਿਕੁਕ੍ਖਿਤ੍ਤਕਨਾਨਾਸਂਵਾਸਕਭਿਕ੍ਖੁਨੀਨਞ੍ਚ ਵਜ੍ਜਨੀਯਪੁਗ੍ਗਲਾਨਂ ਸਙ੍ਘਸ੍ਸ ਹਤ੍ਥਪਾਸੇ ਅਭਾਵੋ ਚਾਤਿ ਇਮੇਹਿ ਚਤੂਹਿ ਅਙ੍ਗੇਹਿ ਸਙ੍ਗਹਿਤਾ. ਏਵਰੂਪਾਯ ਚ ਪਰਿਸਸਮ੍ਪਦਾਯ ਸਤਿ ਏਵ ਇਦਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ. ਤਤ੍ਥ ਪੁਰਿਮਾਨਂ ਤਿਣ੍ਣਂ ਅਙ੍ਗਾਨਂ ਅਞ੍ਞਤਰਸ੍ਸਪਿ ਅਭਾਵੇ ਕਤਂ ਕਮ੍ਮਂ ਵਿਪਜ੍ਜਤਿ, ਨ ਪਚ੍ਛਿਮਸ੍ਸ.

ਪੁਬ੍ਬਕਿਚ੍ਚਨਿਟ੍ਠਾਪਨਂ ¶ ਨਾਮ ਯਾਨਿਮਾਨਿ ‘‘ਪਠਮਂ ਉਪਜ੍ਝਂ ਗਾਹਾਪੇਤਬ੍ਬੋ’’ਤਿਆਦਿਨਾ ਪਾਲ਼ਿਯਂ ਵੁਤ੍ਤਾਨਿ ‘‘ਉਪਜ੍ਝਂ ਗਾਹਾਪਨਂ, ਪਤ੍ਤਚੀਵਰਾਚਿਕ੍ਖਨਂ, ਤਤੋ ਤਂ ਹਤ੍ਥਪਾਸਤੋ ਬਹਿ ਠਪੇਤ੍ਵਾ ਅਨੁਸਾਸਕਸਮ੍ਮੁਤਿਕਮ੍ਮਕਰਣਂ, ਸਮ੍ਮਤੇਨ ਚ ਗਨ੍ਤ੍ਵਾ ਅਨੁਸਾਸਨਂ, ਤੇਨ ਚ ਪਠਮਤਰਂ ਆਗਨ੍ਤ੍ਵਾ ਸਙ੍ਘਸ੍ਸ ਞਾਪੇਤ੍ਵਾ ਉਪਸਮ੍ਪਦਾਪੇਕ੍ਖਂ ‘ਆਗਚ੍ਛਾਹੀ’ਤਿ ਹਤ੍ਥਪਾਸੇ ਏਵ ਅਬ੍ਭਾਨਂ, ਤੇਨ ਚ ਭਿਕ੍ਖੂਨਂ ਪਾਦੇ ਵਨ੍ਦਾਪੇਤ੍ਵਾ ਉਪਸਮ੍ਪਦਾਯਾਚਾਪਨਂ, ਤਤੋ ਅਨ੍ਤਰਾਯਿਕਧਮ੍ਮਪੁਚ੍ਛਕਸਮ੍ਮੁਤਿਕਰਣਂ, ਸਮ੍ਮਤੇਨ ਚ ਪੁਚ੍ਛਨ’’ਨ੍ਤਿ ਇਮਾਨਿ ਅਟ੍ਠ ਪੁਬ੍ਬਕਿਚ੍ਚਾਨਿ, ਤੇਸਂ ਸਬ੍ਬੇਸਂ ਯਾਥਾਵਤੋ ਕਰਣੇਨ ਨਿਟ੍ਠਾਪਨਂ. ਏਤਸ੍ਮਿਞ੍ਚ ਪੁਬ੍ਬਕਮ੍ਮਨਿਟ੍ਠਾਪਨੇ ਸਤਿ ਏਵ ਇਦਂ ਸਙ੍ਘਸ੍ਸ ਉਪਸਮ੍ਪਦਾਕਮ੍ਮਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ. ਏਤੇਸੁ ਪਨ ਪੁਬ੍ਬਕਮ੍ਮੇਸੁ ਅਕਤੇਸੁਪਿ ਕਤਂ ਕਮ੍ਮਂ ਯਥਾਵੁਤ੍ਤਵਤ੍ਥੁਸਮ੍ਪਤ੍ਤਿਆਦੀਸੁ ਵਿਜ੍ਜਮਾਨੇਸੁ ਅਕੁਪ੍ਪਮੇਵ ਹੋਤਿ. ਤਦੇਵਮੇਤ੍ਥ ਪਤ੍ਤਕਲ੍ਲਂ ਇਮੇਹਿ ਪਞ੍ਚਹਿ ਅਙ੍ਗੇਹਿ ਸਙ੍ਗਹਿਤਨ੍ਤਿ ਵੇਦਿਤਬ੍ਬਂ. ਇਮਿਨਾਵ ਨਯੇਨ ਹੇਟ੍ਠਾ ਵੁਤ੍ਤੇਸੁ, ਵਕ੍ਖਮਾਨੇਸੁ ਚ ਸਬ੍ਬੇਸੁ ਕਮ੍ਮੇਸੁ ਪਤ੍ਤਕਲ੍ਲਤਾ ਯਥਾਰਹਂ ਯੋਜੇਤ੍ਵਾ ਞਾਤਬ੍ਬਾ.

ਇਤ੍ਥਨ੍ਨਾਮਂ ¶ ਉਪਸਮ੍ਪਾਦੇਯ੍ਯਾਤਿ ਉਪਸਮ੍ਪਦਾਨਿਪ੍ਫਾਦਨੇਨ ਤਂਸਮਙ੍ਗਿਂ ਕਰੇਯ੍ਯ ਕਰੋਤੂਤਿ ਪਤ੍ਥਨਾਯਂ, ਵਿਧਿਮ੍ਹਿ ਵਾ ਇਦਂ ਦਟ੍ਠਬ੍ਬਂ. ਯਥਾ ਹਿ ‘‘ਦੇਵਦਤ੍ਤਂ ਸੁਖਾਪੇਯ੍ਯਾ’’ਤਿ ਵੁਤ੍ਤੇ ਸੁਖਮਸ੍ਸ ਨਿਪ੍ਫਾਦੇਤ੍ਵਾ ਤਂ ਸੁਖਸਮਙ੍ਗਿਨਂ ਕਰੇਯ੍ਯਾਤਿ ਅਤ੍ਥੋ ਹੋਤਿ, ਏਵਮਿਧਾਪਿ ਉਪਸਮ੍ਪਦਮਸ੍ਸ ਨਿਪ੍ਫਾਦੇਤ੍ਵਾ ਤਂ ਉਪਸਮ੍ਪਦਾਸਮਙ੍ਗਿਨਂ ਕਰੇਯ੍ਯਾਤਿ ਅਤ੍ਥੋ. ਪਯੋਜਕਬ੍ਯਾਪਾਰੇ ਚੇਤਂ ਯਥਾ ਸੁਖਯਨ੍ਤਂ ਕਞ੍ਚਿ ਸੁਦ੍ਧਕਤ੍ਤਾਰਂ ਕੋਚਿ ਹੇਤੁਕਤ੍ਤਾ ਸੁਖਹੇਤੁਨਿਪ੍ਫਾਦਨੇਨ ਸੁਖਾਪੇਯ੍ਯਾਤਿ ਵੁਚ੍ਚਤਿ, ਏਵਮਿਧਾਪਿ ਉਪਸਮ੍ਪਜ੍ਜਨ੍ਤਂ ਸੁਦ੍ਧਕਤ੍ਤਾਰਂ ਪੁਗ੍ਗਲਂ ਹੇਤੁਕਤ੍ਤੁਭੂਤੋ ਸਙ੍ਘੋ ਉਪਸਮ੍ਪਦਾਹੇਤੁਨਿਪ੍ਫਾਦਨੇਨ ਉਪਸਮ੍ਪਾਦੇਯ੍ਯਾਤਿ ਵੁਤ੍ਤੋ. ਏਤੇਨ ਚ ਸੁਖਂ ਵਿਯ ਸੁਖਦਾਯਕੇਨ ਸਙ੍ਘੇਨ ਪੁਗ੍ਗਲਸ੍ਸ ਦਿਯ੍ਯਮਾਨਾ ਤਥਾਪਵਤ੍ਤਪਰਮਤ੍ਥਧਮ੍ਮੇ ਉਪਾਦਾਯ ਅਰਿਯਜਨਪਞ੍ਞਤ੍ਤਾ ਉਪਸਮ੍ਪਦਾ ਨਾਮ ਸਮ੍ਮੁਤਿਸਚ੍ਚਤਾ ਅਤ੍ਥੀਤਿ ਸਮਤ੍ਥਿਤਂ ਹੋਤਿ. ਏਤ੍ਥ ਚ ‘‘ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤੀ’’ਤਿ ਵੁਤ੍ਤਤ੍ਤਾ ਪਰਿਵਾਸਾਦੀਸੁ ਵਿਯ ਯਾਚਨਾਨੁਗੁਣਂ ‘‘ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਂ ਦਦੇਯ੍ਯਾ’’ਤਿ ਅਵਤ੍ਵਾ ‘‘ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯਾ’’ਤਿ ਵੁਤ੍ਤਤ੍ਤਾ ਇਦਂ ਉਪਸਮ੍ਪਦਾਕਮ੍ਮਂ ਦਾਨੇ ਅਸਙ੍ਗਹੇਤ੍ਵਾ ਕਮ੍ਮਲਕ੍ਖਣੇ ਏਵ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਇਮਿਨਾ ਨਯੇਨ ‘‘ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ, ਉਪਸਮ੍ਪਨ੍ਨੋ ਸਙ੍ਘੇਨਾ’’ਤਿ ਏਤ੍ਥਾਪਿ ਅਤ੍ਥੋ ਵੇਦਿਤਬ੍ਬੋ. ਕੇਵਲਞ੍ਹਿ ਤਤ੍ਥ ਵਤ੍ਤਮਾਨਕਾਲਅਤੀਤਕਾਲਵਸੇਨ, ਇਧ ਪਨ ਅਨਾਮਟ੍ਠਕਾਲਵਸੇਨਾਤਿ ਏਤ੍ਤਕਮੇਵ ਵਿਸੇਸੋ.

ਏਸਾ ਞਤ੍ਤੀਤਿ ‘‘ਸਙ੍ਘੋ ਞਾਪੇਤਬ੍ਬੋ’’ਤਿ ਵੁਤ੍ਤਞਾਪਨਾ ਏਸਾ. ਇਦਞ੍ਚ ਅਨੁਸ੍ਸਾਵਨਾਨਮ੍ਪਿ ਸਬ੍ਭਾਵਸੂਚਨਤ੍ਥਂ ਵੁਚ੍ਚਤਿ. ਅਵਸ੍ਸਞ੍ਚੇਤਂ ਵਤ੍ਤਬ੍ਬਮੇਵ, ਞਤ੍ਤਿਕਮ੍ਮੇ ਏਵ ਤਂ ਨ ਵਤ੍ਤਬ੍ਬਂ. ਤਤ੍ਥ ਪਨ ਯ੍ਯ-ਕਾਰੇ ਵੁਤ੍ਤਮਤ੍ਤੇ ਏਵ ਞਤ੍ਤਿਕਮ੍ਮਂ ਨਿਟ੍ਠਿਤਂ ਹੋਤੀਤਿ ਦਟ੍ਠਬ੍ਬਂ. ਖਮਤੀਤਿ ਰੁਚ੍ਚਤਿ. ਉਪਸਮ੍ਪਦਾਤਿ ਸਙ੍ਘੇਨ ਦਿਯ੍ਯਮਾਨਾ ਨਿਪ੍ਫਾਦਿਯਮਾਨਾ ਉਪਸਮ੍ਪਦਾ ਯਸ੍ਸ ਖਮਤਿ. ਸੋ ਤੁਣ੍ਹਸ੍ਸਾਤਿ ਯੋਜਨਾ. ਤੁਣ੍ਹੀਤਿ ¶ ਚ ਅਕਥਨਤ੍ਥੇ ਨਿਪਾਤੋ, ਅਕਥਨਕੋ ਅਸ੍ਸ ਭਵੇਯ੍ਯਾਤਿ ਅਤ੍ਥੋ. ਖਮਤਿ ਸਙ੍ਘਸ੍ਸ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾਤਿ ਪਕਤੇਨ ਸਮ੍ਬਨ੍ਧੋ. ਤਤ੍ਥ ਕਾਰਣਮਾਹ ‘‘ਤਸ੍ਮਾ ਤੁਣ੍ਹੀ’’ਤਿ. ਤਤ੍ਥ ‘‘ਆਸੀ’’ਤਿ ਸੇਸੋ. ਯਸ੍ਮਾ ‘‘ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯਾ’’ਤਿ ਤਿਕ੍ਖਤ੍ਤੁਂ ਵੁਚ੍ਚਮਾਨੋਪਿ ਸਙ੍ਘੋ ਤੁਣ੍ਹੀ ਨਿਰਵੋ ਅਹੋਸਿ, ਤਸ੍ਮਾ ਖਮਤਿ ਸਙ੍ਘਸ੍ਸਾਤਿ ਅਤ੍ਥੋ. ਏਵਨ੍ਤਿ ਇਮਿਨਾ ਪਕਾਰੇਨ. ਤੁਣ੍ਹੀਭਾਵੇਨੇਵੇਤਂ ਸਙ੍ਘਸ੍ਸ ਰੁਚ੍ਚਨਭਾਵਂ ਧਾਰਯਾਮਿ ਬੁਜ੍ਝਾਮਿ ਪਜਾਨਾਮੀਤਿ ਅਤ੍ਥੋ. ਇਤਿ-ਸਦ੍ਦੋ ਪਰਿਸਮਾਪਨਤ੍ਥੇ ਕਤੋ, ਸੋ ਚ ਕਮ੍ਮਵਾਚਾਯ ਅਨਙ੍ਗਂ. ਤਸ੍ਮਾ ਅਨੁਸ੍ਸਾਵਕੇਨ ‘‘ਧਾਰਯਾਮੀ’’ਤਿ ਏਤ੍ਥ ਮਿ-ਕਾਰਪਰਿਯੋਸਾਨਮੇਵ ¶ ਵਤ੍ਵਾ ਨਿਟ੍ਠਾਪੇਤਬ੍ਬਂ, ਇਤਿ-ਸਦ੍ਦੋ ਨ ਪਯੁਜ੍ਜਿਤਬ੍ਬੋਤਿ ਦਟ੍ਠਬ੍ਬਂ. ਇਮਿਨਾ ਨਯੇਨ ਸਬ੍ਬਤ੍ਥ ਕਮ੍ਮਵਾਚਾਨਮਤ੍ਥੋ ਵੇਦਿਤਬ੍ਬੋ.

ਉਪਸਮ੍ਪਦਾਵਿਧਿਕਥਾਵਣ੍ਣਨਾ ਨਿਟ੍ਠਿਤਾ.

੧੨੮. ਏਕਪੋਰਿਸਾ ਵਾਤਿਆਦਿ ਸਤ੍ਤਾਨਂ ਸਰੀਰਚ੍ਛਾਯਂ ਪਾਦੇਹਿ ਮਿਨਿਤ੍ਵਾ ਜਾਨਨਪ੍ਪਕਾਰਦਸ੍ਸਨਂ. ਛਸਤ੍ਤਪਦਪਰਮਤਾ ਹਿ ਛਾਯਾ ‘‘ਪੋਰਿਸਾ’’ਤਿ ਵੁਚ੍ਚਤਿ. ਇਦਞ੍ਚ ਉਤੁਪ੍ਪਮਾਣਾਚਿਕ੍ਖਨਾਦਿ ਚ ਆਗਨ੍ਤੁਕੇਹਿ ਸਦ੍ਧਿਂ ਵੀਮਂਸਿਤ੍ਵਾ ਵੁਡ੍ਢਨਵਭਾਵਂ ਞਤ੍ਵਾ ਵਨ੍ਦਨਵਨ੍ਦਾਪਨਾਦਿਕਰਣਤ੍ਥਂ ਵੁਤ੍ਤਂ. ਏਤਿ ਆਗਚ੍ਛਤਿ, ਗਚ੍ਛਤਿ ਚਾਤਿ ਉਤੁ, ਸੋਵ ਪਮਿਯਤੇ ਅਨੇਨ ਸਂਵਚ੍ਛਰਨ੍ਤਿ ਪਮਾਣਨ੍ਤਿ ਆਹ ‘‘ਉਤੁਯੇਵ ਉਤੁਪ੍ਪਮਾਣ’’ਨ੍ਤਿ. ਅਪਰਿਪੁਣ੍ਣਾਤਿ ਉਪਸਮ੍ਪਦਾਦਿਵਸੇਨ ਅਪਰਿਪੁਣ੍ਣਾ. ਯਦਿ ਉਤੁਵੇਮਜ੍ਝੇ ਉਪਸਮ੍ਪਾਦਿਤੋ, ਤਦਾ ਤਸ੍ਮਿਂ ਉਤੁਮ੍ਹਿ ਅਵਸਿਟ੍ਠਦਿਵਸਾਚਿਕ੍ਖਨਂ ‘‘ਦਿਵਸਭਾਗਾਚਿਕ੍ਖਨ’’ਨ੍ਤਿ ਦਸ੍ਸੇਤਿ. ਤੇਨਾਹ ‘‘ਯਤ੍ਤਕੇਹਿ ਦਿਵਸੇਹਿ ਯਸ੍ਸ ਯੋ ਉਤੁ ਅਪਰਿਪੁਣ੍ਣੋ, ਤੇ ਦਿਵਸੇ’’ਤਿ. ਤਤ੍ਥ ਯਸ੍ਸ ਤਂ ਖਣਂ ਲਦ੍ਧੂਪਸਮ੍ਪਦਸ੍ਸ ਪੁਗ੍ਗਲਸ੍ਸ ਸਮ੍ਬਨ੍ਧੀ ਯੋ ਉਤੁ ਯਤ੍ਤਕੇਹਿ ਦਿਵਸੇਹਿ ਅਪਰਿਪੁਣ੍ਣੋ, ਤੇ ਦਿਵਸੇਤਿ ਯੋਜਨਾ.

ਛਾਯਾਦਿਕਮੇਵ ਸਬ੍ਬਂ ਸਙ੍ਗਹੇਤ੍ਵਾ ਗਾਯਿਤਬ੍ਬਤੋ ਕਥੇਤਬ੍ਬਤੋ ਸਙ੍ਗੀਤੀਤਿ ਆਹ ‘‘ਇਦਮੇਵਾ’’ਤਿਆਦਿ. ਤਤ੍ਥ ਏਕਤੋ ਕਤ੍ਵਾ ਆਚਿਕ੍ਖਿਤਬ੍ਬਂ. ਤ੍ਵਂ ਕਿਂ ਲਭਸੀਤਿ ਤ੍ਵਂ ਉਪਸਮ੍ਪਾਦਨਕਾਲੇ ਕਤਰਵਸ੍ਸਂ, ਕਤਰਉਤੁਞ੍ਚ ਲਭਸਿ, ਕਤਰਸ੍ਮਿਂ ਤੇ ਉਪਸਮ੍ਪਦਾ ਲਦ੍ਧਾਤਿ ਅਤ੍ਥੋ. ਵਸ੍ਸਨ੍ਤਿ ਵਸ੍ਸਾਨਉਤੁ. ਇਦਞ੍ਚ ਸਂਵਚ੍ਛਰਾਚਿਕ੍ਖਨਂ ਵਿਨਾ ਵੁਤ੍ਤਮ੍ਪਿ ਨ ਞਾਯਤੀਤਿ ਇਮਿਨਾ ਉਤੁਆਚਿਕ੍ਖਨੇਨੇਵ ਸਾਸਨਵਸ੍ਸੇਸੁ ਵਾ ਕਲਿਯੁਗਵਸ੍ਸਾਦੀਸੁ ਵਾ ਸਹਸ੍ਸਿਮੇ ਵਾ ਸਤਿਮੇ ਵਾ ਅਸੁਕਂ ਉਤੁਂ ਲਭਾਮੀਤਿ ਦਸ੍ਸਿਤਨ੍ਤਿ ਦਟ੍ਠਬ੍ਬਂ. ‘‘ਛਾਯਾ’’ਤਿ ਇਦਂ ਪਾਲ਼ਿਯਂ ਆਗਤਪਟਿਪਾਟਿਂ ਸਨ੍ਧਾਯ ਵੁਤ੍ਤਂ. ਵਤ੍ਤਬ੍ਬਕਮਤੋ ਪਨ ਕਲਿਯੁਗਵਸ੍ਸਾਦੀਸੁ ਸਬ੍ਬਦੇਸਪਸਿਦ੍ਧੇਸੁ ਅਸੁਕਵਸ੍ਸੇ ਅਸੁਕਉਤੁਮ੍ਹਿ ਅਸੁਕਮਾਸੇ ¶ ਅਸੁਕੇ ਕਣ੍ਹੇ ਵਾ ਸੁਕ੍ਕੇ ਵਾ ਪਕ੍ਖੇ ਅਸੁਕਤਿਥਿਵਾਰਵਿਸੇਸਯੁਤ੍ਤੇ ਨਕ੍ਖਤ੍ਤੇ ਪੁਬ੍ਬਣ੍ਹਾਦਿਦਿਵਸਭਾਗੇ ਏਤ੍ਤਕੇ ਛਾਯਾਪਮਾਣੇ, ਨਾਡਿਕਾਪਮਾਣੇ ਵਾ ਮਯਾ ਉਪਸਮ੍ਪਦਾ ਲਦ੍ਧਾਤਿ ਵਦੇਯ੍ਯਾਸੀਤਿ ਏਵਂ ਆਚਿਕ੍ਖਿਤਬ੍ਬਂ. ‘‘ਇਦਂ ਸੁਟ੍ਠੁ ਉਗ੍ਗਹੇਤ੍ਵਾ ਆਗਨ੍ਤੁਕੇਹਿ ¶ ਵੁਡ੍ਢਪਟਿਪਾਟਿਂ ਞਤ੍ਵਾ ਪਟਿਪਜ੍ਜਾਹੀ’’ਤਿ ਵਤ੍ਤਬ੍ਬਂ. ਪਾਲ਼ਿਯਂ ਕਿਸ੍ਸ ਤ੍ਵਨ੍ਤਿ ਕਿਂ ਤ੍ਵਂ ਏਤ੍ਤਕਂ ਕਾਲਂ ਅਕਾਸੀਤਿ ਅਤ੍ਥੋ.

੧੩੦. ਉਪਸਮ੍ਪਦਂ ਯਾਚੀਤਿ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਯਾਚੀਤਿ ਅਤ੍ਥੋ. ਪਸ੍ਸਿਸ੍ਸਾਮੀਤਿ ਏਤ੍ਥ ਵਦਤੀਤਿ ਸੇਸੋ, ਏਵਂ ਉਪਰਿਪਿ. ‘‘ਓਸਾਰੇਤਬ੍ਬੋ’’ਤਿ ਇਮਿਨਾ ਪੁਰਿਮੋ ਉਕ੍ਖਿਤ੍ਤਭਾਵੋ ਵਿਬ੍ਭਮਿਤ੍ਵਾ ਪੁਨ ਲਦ੍ਧੂਪਸਮ੍ਪਦਮ੍ਪਿ ਨ ਮੁਞ੍ਚਤਿ. ਤੇਨ ਚ ਸਮ੍ਭੁਞ੍ਜਨਾਦੀਸੁਪਿ ਭਿਕ੍ਖੂਨਂ ਪਾਚਿਤ੍ਤਿਯਮੇਵਾਤਿ ਦਸ੍ਸੇਤਿ. ਅਨਾਪਤ੍ਤਿ ਸਮ੍ਭੋਗੇ ਸਂਵਾਸੇਤਿ ਏਤ੍ਥ ਸਹਸੇਯ੍ਯਾਪਿ ਸਙ੍ਗਹਿਤਾਤਿ ਦਟ੍ਠਬ੍ਬਂ. ਏਤ੍ਥ ਚਾਯਮਧਿਪ੍ਪਾਯੋ – ਯਸ੍ਮਾ ਅਯਂ ਓਸਾਰਿਤਤ੍ਤਾ ਪਕਤਤ੍ਤੋ, ਤਸ੍ਮਾ ਉਕ੍ਖਿਤ੍ਤਸਮ੍ਭੋਗਾਦਿਪਚ੍ਚਯੇਨ ਪਾਚਿਤ੍ਤਿਯੇਨੇਤ੍ਥ ਅਨਾਪਤ੍ਤੀਤਿ. ਯੋ ਪਨ ਆਪਤ੍ਤਿਟ੍ਠਾਨੇ ਅਨਾਪਤ੍ਤਿਦਿਟ੍ਠਿਤਾਯ ਆਪਤ੍ਤਿਂ ਨ ਪਸ੍ਸਤਿ, ਤੇਨੇਵ ਪਟਿਕਮ੍ਮਮ੍ਪਿ ਨ ਕਰੋਤਿ, ਸੋ ਯਸ੍ਮਾ ਏਤ੍ਤਾਵਤਾ ਅਲਜ੍ਜੀ ਨਾਮ ਨ ਹੋਤਿ. ਪਣ੍ਣਤ੍ਤਿਂ ਞਤ੍ਵਾ ਵੀਤਿਕ੍ਕਮਂ ਕਰੋਨ੍ਤੋ ਏਵ ਹਿ ਅਲਜ੍ਜੀ ਨਾਮ ਹੋਤਿ. ‘‘ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤੀ’’ਤਿਆਦਿ (ਪਰਿ. ੩੫੯) ਹਿ ਵੁਤ੍ਤਂ. ਤਸ੍ਮਾ ਏਤ੍ਥ ਅਲਜ੍ਜਿਸਮ੍ਭੋਗਾਦਿਪਚ੍ਚਯਾ ਦੁਕ੍ਕਟਾਪਤ੍ਤਿਨਿਯਮੋ ਨਤ੍ਥਿ. ਤੇਨ ਸਾਪੇਤ੍ਥ ਆਪਤ੍ਤਿ ਨ ਵੁਤ੍ਤਾਤਿ ਦਟ੍ਠਬ੍ਬਂ. ਯੋ ਪਨੇਤ੍ਥ ਇਮਂ ਅਧਿਪ੍ਪਾਯਂ ਅਸਲ੍ਲਕ੍ਖੇਨ੍ਤੇਨ ਕੇਨਚਿ ‘‘ਅਨਾਪਤ੍ਤਿ ਸਮ੍ਭੋਗੇ ਸਂਵਾਸੇ’’ਤਿ ਇਮਿਨਾ ਪਾਚਿਤ੍ਤਿਯੇਨ ਅਨਾਪਤ੍ਤਿ ਵੁਤ੍ਤਾ, ਅਲਜ੍ਜਿਸਮ੍ਭੋਗਪਚ੍ਚਯਾ ਦੁਕ੍ਕਟਂ ਪਨ ਆਪਜ੍ਜਤਿ ਏਵਾਤਿ ਆਪਤ੍ਤਿਨਿਯਮੋ ਵੁਤ੍ਤੋ, ਸੋ ਅਲਜ੍ਜਿਤ੍ਤੇ ਸਤਿ ਏਵ ਵੁਤ੍ਤੋ, ਨਾਸਤੀਤਿ ਦਟ੍ਠਬ੍ਬਂ.

੧੩੧. ਵਿਨਯਮ੍ਹੀਤਿਆਦਿਗਾਥਾਸੁ ਨਿਗ੍ਗਹਾਨਨ੍ਤਿ ਨਿਗ੍ਗਹਕਰਣੇਸੁ. ਪਾਪਿਚ੍ਛੇਤਿ ਪਾਪਪੁਗ੍ਗਲਾਨਂ ਨਿਗ੍ਗਹਕਰਣੇਸੁ, ਲਜ੍ਜੀਨਂ ਪਗ੍ਗਹੇਸੁ ਚ ਪੇਸਲਾਨਂ ਸੁਖਾਵਹੇ ਮਹਨ੍ਤੇ ਵਿਨਯਮ੍ਹਿ ਯਥਾ ਅਤ੍ਥਕਾਰੀ ਅਤ੍ਥਾਨੁਗੁਣਂ ਕਰੋਨ੍ਤੋਵ ਯਸ੍ਮਾ ਯੋਨਿਸੋ ਪਟਿਪਜ੍ਜਤਿ ਨਾਮ ਹੋਤਿ, ਤਸ੍ਮਾ ਉਦ੍ਦਾਨਂ ਪਵਕ੍ਖਾਮੀਤਿ ਸਮ੍ਬਨ੍ਧਯੋਜਨਾ ਦਟ੍ਠਬ੍ਬਾ. ਸੇਸਂ ਸਬ੍ਬਤ੍ਥ ਸੁਵਿਞ੍ਞੇਯ੍ਯਮੇਵ.

ਚਤ੍ਤਾਰੋਨਿਸ੍ਸਯਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਸਨ੍ਨਿਪਾਤਾਨੁਜਾਨਨਾਦਿਕਥਾਵਣ੍ਣਨਾ

੧੩੨. ਉਪੋਸਥਕ੍ਖਨ੍ਧਕੇ ¶ ¶ ਤਰਨ੍ਤਿ ਓਤਰਨ੍ਤਿ ਏਤ੍ਥਾਤਿ ਤਿਤ੍ਥਂ, ਲਦ੍ਧਿ. ਇਤੋਤਿ ਸਾਸਨਲਦ੍ਧਿਤੋ.

੧੩੫. ਆਪਜ੍ਜਿਤ੍ਵਾ ਵਾ ਵੁਟ੍ਠਿਤੋਤਿ ਏਤ੍ਥ ਦੇਸਨਾਰੋਚਨਾਨਮ੍ਪਿ ਸਙ੍ਗਹੋ. ਤੇਨੇਵ ਮਾਤਿਕਾਟ੍ਠਕਥਾਯਂ ‘‘ਵੁਟ੍ਠਿਤਾ ਵਾ ਦੇਸਿਤਾ ਵਾ ਆਰੋਚਿਤਾ ਵਾ ਆਪਤ੍ਤਿ…ਪੇ… ਅਸਨ੍ਤੀ ਨਾਮ ਹੋਤੀ’’ਤਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਵੁਤ੍ਤਂ.

ਮਨੁਜੇਨਾਤਿ ਆਸਨ੍ਨੇਨ ਸਹ. ਪਰੇਤਿ ਦੂਰਟ੍ਠੇਪਿ ਪਰਪੁਗ੍ਗਲੇ ਸਨ੍ਧਾਯ ਗਿਰਂ ਨੋ ਚ ਭਣੇਯ੍ਯਾਤਿ ਯੋਜਨਾ.

‘‘ਆਵਿਕਤਾ ਹਿਸ੍ਸ ਫਾਸੁ ਹੋਤੀ’’ਤਿ (ਮਹਾਵ. ੧੩੪) ਵੁਤ੍ਤਤ੍ਤਾ ਗਰੁਕਾਪਤ੍ਤਿਪਿ ਆਵਿਕਰਣਮਤ੍ਤੇਨ ਵੁਟ੍ਠਾਤੀਤਿ ਕੇਚਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ ਪਰਿਵਾਸਾਦਿਵਿਧਾਨਸੁਤ੍ਤੇਹਿ ਵਿਰੁਜ੍ਝਨਤੋ. ਅਯਂ ਪਨੇਤ੍ਥ ਅਧਿਪ੍ਪਾਯੋ – ਯਥਾਭੂਤਞ੍ਹਿ ਅਤ੍ਤਾਨਮਾਵਿਕਰੋਨ੍ਤਂ ਪੇਸਲਾ ਭਿਕ੍ਖੂ ‘‘ਅਕਾਮਾ ਪਰਿਵਤ੍ਥਬ੍ਬ’’ਨ੍ਤਿਆਦਿਵਚਨਂ ਨਿਸ੍ਸਾਯ ਅਨਿਚ੍ਛਮਾਨਮ੍ਪਿ ਨਂ ਉਪਾਯੇਨ ਪਰਿਵਾਸਾਦੀਨਿ ਦਤ੍ਵਾ ਅਵਸ੍ਸਂ ਸੁਦ੍ਧਨ੍ਤੇ ਪਤਿਟ੍ਠਾਪੇਸ੍ਸਨ੍ਤਿ, ਤਤੋ ਤਸ੍ਸ ਅਵਿਪ੍ਪਟਿਸਾਰਾਦੀਨਂ ਵਸੇਨ ਫਾਸੁ ਹੋਤਿ. ਪਠਮਂ ਪਾਤਿਮੋਕ੍ਖੁਦ੍ਦੇਸਨ੍ਤਿ ਨਿਦਾਨੁਦ੍ਦੇਸਂ ਦਸ੍ਸੇਤਿ. ਪੁਬ੍ਬੇ ਅਵਿਜ੍ਜਮਾਨਂ ਪਞ੍ਞਾਪੇਸੀਤਿ. ਨ ਕੇਵਲਞ੍ਚ ਏਤਂ, ਪੁਬ੍ਬੇ ਪਞ੍ਞਤ੍ਤਮ੍ਪਿ ਪਨ ਪਾਰਾਜਿਕਾਦਿਸਿਕ੍ਖਾਪਦਂ ਸਬ੍ਬਂ ਭਗਵਾ ‘‘ਤਤ੍ਰਿਮੇ ਚਤ੍ਤਾਰੋ ਪਾਰਾਜਿਕਾ ਧਮ੍ਮਾ ਉਦ੍ਦੇਸਂ ਆਗਚ੍ਛਨ੍ਤੀ’’ਤਿਆਦਿਨਾ ਪਾਰਾਜਿਕੁਦ੍ਦੇਸਾਦਿਵਸੇਨ ਵਿਨਯਮਾਤਿਕਂ ਕਤ੍ਵਾ ਨਿਦਾਨੁਦ੍ਦੇਸੇਨ ਸਹ ਸਯਮੇਵ ਸਙ੍ਗਹੇਤ੍ਵਾ ‘‘ਪਾਤਿਮੋਕ੍ਖ’’ਨ੍ਤਿ ਪਞ੍ਞਾਪੇਸੀਤਿ ਦਟ੍ਠਬ੍ਬਂ. ਤਦੇਤਂ ਸਬ੍ਬਮ੍ਪਿ ਸਨ੍ਧਾਯ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਾਤਿਮੋਕ੍ਖਂ ਉਦ੍ਦਿਸਿਤੁ’’ਨ੍ਤਿ (ਮਹਾਵ. ੧੩੩) ਵੁਤ੍ਤਂ.

੧੩੬. ਏਤਂ ੩੪ ਵੇਦਿਤਬ੍ਬਨ੍ਤਿ ਯਸ੍ਮਿਂ ਤਸ੍ਮਿਂ ਚਾਤੁਦ੍ਦਸੇ ਵਾ ਪਨ੍ਨਰਸੇ ਵਾਤਿ ਏਵਂ ਅਤ੍ਥਜਾਤਂ.

ਸਨ੍ਨਿਪਾਤਾਨੁਜਾਨਨਾਦਿਕਥਾਵਣ੍ਣਨਾ ਨਿਟ੍ਠਿਤਾ.

੧੩੮. ‘‘ਪੁਰਤ੍ਥਿਮਾਯ ¶ ਦਿਸਾਯਾ’’ਤਿ ਇਦਂ ਨਿਦਸ੍ਸਨਮਤ੍ਤਂ. ਤਸ੍ਸਂ ਪਨ ਦਿਸਾਯਂ ਨਿਮਿਤ੍ਤੇ ਅਸਤਿ ਯਤ੍ਥ ਅਤ੍ਥਿ, ਤਤੋ ਪਟ੍ਠਾਯ ਪਠਮਂ ‘‘ਪੁਰਤ੍ਥਿਮਾਯ ਅਨੁਦਿਸਾਯ, ਦਕ੍ਖਿਣਾਯ ਦਿਸਾਯਾ’’ਤਿਆਦਿਨਾ ਸਮਨ੍ਤਾ ਵਿਜ੍ਜਮਾਨਟ੍ਠਾਨੇਸੁ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਪੁਨ ‘‘ਪੁਰਤ੍ਥਿਮਾਯ ਅਨੁਦਿਸਾਯਾ’’ਤਿ ਪਠਮਕਿਤ੍ਤਿਤਂ ਕਿਤ੍ਤੇਤੁਂ ਵਟ੍ਟਤਿ, ਤੀਹਿ ਨਿਮਿਤ੍ਤੇਹਿ ਸਿਙ੍ਘਾਟਕਸਣ੍ਠਾਨਾਯਪਿ ਸੀਮਾਯ ਸਮ੍ਮਨ੍ਨਿਤਬ੍ਬਤੋ. ਤਿਕ੍ਖਤ੍ਤੁਂ ਸੀਮਾਮਣ੍ਡਲਂ ਸਮ੍ਬਨ੍ਧਨ੍ਤੇਨਾਤਿ ਵਿਨਯਧਰੇਨ ਸਯਂ ਏਕਸ੍ਮਿਂਯੇਵ ਠਾਨੇ ਠਤ੍ਵਾ ਕੇਵਲਂ ਨਿਮਿਤ੍ਤਕਿਤ੍ਤਨਵਚਨੇਨੇਵ ਸੀਮਾਮਣ੍ਡਲਂ ਸਮਨ੍ਤਾ ਨਿਮਿਤ੍ਤੇਨ ਨਿਮਿਤ੍ਤਂ ਬਨ੍ਧਨ੍ਤੇਨਾਤਿ ਅਤ੍ਥੋ. ਤਂ ਤਂ ਨਿਮਿਤ੍ਤਟ੍ਠਾਨਂ ਅਗਨ੍ਤ੍ਵਾਪਿ ਹਿ ਕਿਤ੍ਤੇਤੁਂ ਵਟ੍ਟਤਿ. ਤਿਯੋਜਨਪਰਮਾਯ ਸੀਮਾਯ ਸਮਨ੍ਤਤੋ ਤਿਕ੍ਖਤ੍ਤੁਂ ਅਨੁਪਰਿਗਮਨਸ੍ਸ ਏਕਦਿਵਸੇਨ ਦੁਕ੍ਕਰਤ੍ਤਾ ਵਿਨਯਧਰੇਨ ਸਯਂ ਅਦਿਟ੍ਠਮ੍ਪਿ ਪੁਬ੍ਬੇ ਭਿਕ੍ਖੂਹਿ ਯਥਾਵਵਤ੍ਥਿਤਂ ਨਿਮਿਤ੍ਤਂ ‘‘ਪਾਸਾਣੋ ਭਨ੍ਤੇ’’ਤਿਆਦਿਨਾ ਕੇਨਚਿ ਵੁਤ੍ਤਾਨੁਸਾਰੇਨ ਸਲ੍ਲਕ੍ਖੇਤ੍ਵਾ ‘‘ਏਸੋ ਪਾਸਾਣੋ ਨਿਮਿਤ੍ਤ’’ਨ੍ਤਿਆਦਿਨਾ ਕਿਤ੍ਤੇਤੁਮ੍ਪਿ ਵਟ੍ਟਤਿ ਏਵ.

ਸੁਦ੍ਧਪਂਸੁਪਬ੍ਬਤੋਤਿ ਨ ਕੇਨਚਿ ਕਤੋ ਸਯਂਜਾਤੋਵ ਵੁਤ੍ਤੋ. ਤਥਾ ਸੇਸਾਪਿ. ਇਤਰੋਪੀਤਿ ਸੁਦ੍ਧਪਂਸੁਪਬ੍ਬਤਾਦਿਕੋਪਿ ਪਬ੍ਬਤੋ. ਹਤ੍ਥਿਪ੍ਪਮਾਣਤੋਤਿ ਏਤ੍ਥ ਭੂਮਿਤੋ ਉਗ੍ਗਤਪ੍ਪਦੇਸੇਨ ਹਤ੍ਥਿਪ੍ਪਮਾਣਂ ਗਹੇਤਬ੍ਬਂ. ਚਤੂਹਿ ਵਾ ਤੀਹਿ ਵਾਤਿ ਸੀਮਾਭੂਮਿਯਂ ਚਤੂਸੁ, ਤੀਸੁ ਵਾ ਦਿਸਾਸੁ ਠਿਤੇਹਿ. ਏਕਿਸ੍ਸਾ ਏਵ ਪਨ ਦਿਸਾਯ ਠਿਤੇਹਿ ਤਤੋ ਬਹੂਹਿਪਿ ਸਮ੍ਮਨ੍ਨਿਤੁਂ ਨ ਵਟ੍ਟਤਿ. ਦ੍ਵੀਹਿ ਪਨ ਦ੍ਵੀਸੁ ਦਿਸਾਸੁ ਠਿਤੇਹਿਪਿ ਨ ਵਟ੍ਟਤਿ. ਤਸ੍ਮਾਤਿ ਯਸ੍ਮਾ ਏਕੇਨ ਨ ਵਟ੍ਟਤਿ, ਤਸ੍ਮਾ. ਤਂ ਬਹਿਦ੍ਧਾ ਕਤ੍ਵਾਤਿ ਕਿਤ੍ਤਿਤਨਿਮਿਤ੍ਤਸ੍ਸ ਅਸੀਮਤ੍ਤਾ ਅਨ੍ਤੋਸੀਮਾਯ ਕਰਣਂ ਅਯੁਤ੍ਤਨ੍ਤਿ ਵੁਤ੍ਤਂ. ਤੇਨਾਹ ‘‘ਸਚੇ’’ਤਿਆਦਿ.

ਦ੍ਵਤ੍ਤਿਂਸਪਲਗੁਲ਼ਪਿਣ੍ਡਪ੍ਪਮਾਣਤਾ ਸਣ੍ਠਾਨਤੋ ਗਹੇਤਬ੍ਬਾ, ਨ ਤੁਲਗਣਨਾਵਸੇਨ, ਭਾਰਤੋ ਪਲਪਰਿਮਾਣਞ੍ਚ ਮਗਧਤੁਲਾਯ ਗਹੇਤਬ੍ਬਂ. ਸਾ ਚ ਲੋਕਿਯਤੁਲਾਯ ਦ੍ਵਿਗੁਣਾਤਿ ਵਦਨ੍ਤਿ. ਅਤਿਮਹਨ੍ਤੋਪੀਤਿ ਭੂਮਿਤੋ ਹਤ੍ਥਿਪ੍ਪਮਾਣਂ ਅਨੁਗ੍ਗਨ੍ਤ੍ਵਾ ਹੇਟ੍ਠਾਭੂਮਿਯਂ ਓਤਿਣ੍ਣਘਨਤੋ ਅਨੇਕਯੋਜਨਪ੍ਪਮਾਣੋਪਿ. ਸਚੇ ਹਿ ਤਤੋ ਹਤ੍ਥਿਪ੍ਪਮਾਣਂ ਕੂਟਂ ਉਗ੍ਗਚ੍ਛਤਿ, ਪਬ੍ਬਤਸਙ੍ਖ੍ਯਮੇਵ ਗਚ੍ਛਤਿ.

ਅਨ੍ਤੋਸਾਰਾਨਨ੍ਤਿ ¶ ਤਸ੍ਮਿਂ ਖਣੇ ਤਰੁਣਤਾਯ ਸਾਰੇ ਅਵਿਜ੍ਜਮਾਨੇਪਿ ਪਰਿਣਾਮੇਨ ਭਵਿਸ੍ਸਮਾਨਸਾਰੇਪਿ ਸਨ੍ਧਾਯ ਵੁਤ੍ਤਂ. ਤਾਦਿਸਾਨਞ੍ਹਿ ਸੂਚਿਦਣ੍ਡਕਪ੍ਪਮਾਣਪਰਿਣਾਹਾਨਂ ਚਤੁਪਞ੍ਚਮਤ੍ਤਮ੍ਪਿ ਵਨਂ ਵਟ੍ਟਤਿ. ਅਨ੍ਤੋਸਾਰਮਿਸ੍ਸਕਾਨਨ੍ਤਿ ਅਨ੍ਤੋਸਾਰੇਹਿ ¶ ਰੁਕ੍ਖੇਹਿ ਸਮ੍ਮਿਸ੍ਸਾਨਂ. ਏਤੇਨ ਚ ਸਾਰਰੁਕ੍ਖਮਿਸ੍ਸਮ੍ਪਿ ਵਨਂ ਵਟ੍ਟਤੀਤਿ ਦਸ੍ਸੇਤਿ. ਚਤੁਪਞ੍ਚਰੁਕ੍ਖਮਤ੍ਤਮ੍ਪੀਤਿ ਸਾਰਰੁਕ੍ਖੇ ਸਨ੍ਧਾਯ ਵੁਤ੍ਤਂ. ਵਨਮਜ੍ਝੇ ਵਿਹਾਰਂ ਕਰੋਨ੍ਤੀਤਿ ਰੁਕ੍ਖਘਟਾਯ ਅਨ੍ਤਰੇ ਰੁਕ੍ਖੇ ਅਚ੍ਛਿਨ੍ਦਿਤ੍ਵਾ ਵਤਿਆਦੀਹਿ ਵਿਹਾਰਪਰਿਚ੍ਛੇਦਂ ਕਤ੍ਵਾਵ ਅਨ੍ਤੋਰੁਕ੍ਖਨ੍ਤਰੇਸੁ ਏਵ ਪਰਿਵੇਣਪਣ੍ਣਸਾਲਾਦੀਨਂ ਕਰਣਵਸੇਨ ਯਥਾ ਅਨ੍ਤੋਵਿਹਾਰਮ੍ਪਿ ਵਨਮੇਵ ਹੋਤਿ, ਏਵਂ ਵਿਹਾਰਂ ਕਰੋਨ੍ਤੀਤਿ ਅਤ੍ਥੋ. ਯਦਿ ਹਿ ਸਬ੍ਬਂ ਰੁਕ੍ਖਂ ਛਿਨ੍ਦਿਤ੍ਵਾ ਵਿਹਾਰਂ ਕਰੇਯ੍ਯੁਂ, ਵਿਹਾਰਸ੍ਸ ਅਵਨਤ੍ਤਾ ਤਂ ਪਰਿਕ੍ਖਿਪਿਤ੍ਵਾ ਠਿਤਂ ਵਨਂ ਏਕਤ੍ਥ ਕਿਤ੍ਤੇਤਬ੍ਬਂ ਸਿਯਾ. ਇਧ ਪਨ ਅਨ੍ਤੋਪਿ ਵਨਤ੍ਤਾ ‘‘ਵਨਂ ਨ ਕਿਤ੍ਤੇਤਬ੍ਬ’’ਨ੍ਤਿ ਵੁਤ੍ਤਂ. ਸਚੇ ਹਿ ਤਂ ਕਿਤ੍ਤੇਨ੍ਤਿ, ‘‘ਨਿਮਿਤ੍ਤਸ੍ਸ ਉਪਰਿ ਵਿਹਾਰੋ ਹੋਤੀ’’ਤਿਆਦਿਨਾ ਅਨਨ੍ਤਰੇ ਵੁਤ੍ਤਦੋਸਂ ਆਪਜ੍ਜਤਿ. ਏਕਦੇਸਨ੍ਤਿ ਵਨੇਕਦੇਸਂ, ਰੁਕ੍ਖਵਿਰਹਿਤਟ੍ਠਾਨੇ ਕਤਵਿਹਾਰਸ੍ਸ ਏਕਪਸ੍ਸੇ ਠਿਤਵਨਸ੍ਸ ਏਕਦੇਸਨ੍ਤਿ ਅਤ੍ਥੋ.

ਸੂਚਿਦਣ੍ਡਕਪ੍ਪਮਾਣੋਤਿ ਵਂਸਦਣ੍ਡਪ੍ਪਮਾਣੋ. ਲੇਖਨਿਦਣ੍ਡਪ੍ਪਮਾਣੋਤਿ ਕੇਚਿ. ਮਾਤਿਕਾਟ੍ਠਕਥਾਯਂ ਪਨ ਅਵੇਭਙ੍ਗਿਯਵਿਨਿਚ੍ਛਯੇ ‘‘ਯੋ ਕੋਚਿ ਅਟ੍ਠਙ੍ਗੁਲਸੂਚਿਦਣ੍ਡਕਮਤ੍ਤੋਪਿ ਵੇਲ਼ੁ…ਪੇ… ਗਰੁਭਣ੍ਡ’’ਨ੍ਤਿ (ਕਙ੍ਖਾ. ਅਟ੍ਠ. ਦੁਬ੍ਬਤ੍ਤਸਿਕ੍ਖਾਪਦਵਣ੍ਣਨਾ) ਵੁਤ੍ਤਤ੍ਤਾ ਤਨੁਤਰੋ ਵੇਲ਼ੁਦਣ੍ਡੋਤਿ ਚ ਸੂਚਿਦਣ੍ਡੋਤਿ ਚ ਗਹੇਤਬ੍ਬਂ. ਵਂਸਨਲ਼ਕਸਰਾਵਾਦੀਸੂਤਿ ਵੇਲ਼ੁਪਬ੍ਬੇ ਵਾ ਨਲ਼ਪਬ੍ਬੇ ਵਾ ਕਪਲ੍ਲਕਾਦਿਮਤ੍ਤਿਕਭਾਜਨੇਸੁ ਵਾਤਿ ਅਤ੍ਥੋ. ਤਙ੍ਖਣਮ੍ਪੀਤਿ ਤਰੁਣਪੋਤਕੇ ਅਮਿਲਾਯਿਤ੍ਵਾ ਵਿਰੁਹਨਜਾਤਿਕੇ ਸਨ੍ਧਾਯ ਵੁਤ੍ਤਂ. ਯੇ ਪਨ ਪਰਿਣਤਾ ਸਮੂਲਂ ਉਦ੍ਧਰਿਤ੍ਵਾ ਰੋਪਿਤਾਪਿ ਛਿਨ੍ਨਸਾਖਾ ਵਿਯ ਮਿਲਾਯਿਤ੍ਵਾ ਚਿਰੇਨ ਨਵਮੂਲਙ੍ਕੁਰੁਪ੍ਪਤ੍ਤਿਯਾ ਜੀਵਨ੍ਤਿ, ਮੀਯਨ੍ਤਿਯੇਵ ਵਾ, ਤਾਦਿਸੇ ਕਿਤ੍ਤੇਤੁਂ ਨ ਵਟ੍ਟਤਿ. ਏਤਨ੍ਤਿ ਨਵਮੂਲਸਾਖਾਨਿਗ੍ਗਮਨਂ.

ਮਜ੍ਝੇਤਿ ਸੀਮਾਯ ਮਹਾਦਿਸਾਨਂ ਅਨ੍ਤੋ. ਕੋਣਨ੍ਤਿ ਸੀਮਾਯ ਚਤੂਸੁ ਕੋਣੇਸੁ ਦ੍ਵਿਨ੍ਨਂ ਦ੍ਵਿਨ੍ਨਂ ਮਗ੍ਗਾਨਂ ਸਮ੍ਬਨ੍ਧਟ੍ਠਾਨਂ. ਪਰਭਾਗੇ ਕਿਤ੍ਤੇਤੁਂ ਵਟ੍ਟਤੀਤਿ ਤੇਸਂ ਚਤੁਨ੍ਨਂ ਕੋਣਾਨਂ ਬਹਿ ਨਿਕ੍ਖਮਿਤ੍ਵਾ ਠਿਤੇਸੁ ਮਗ੍ਗੇਸੁ ਏਕਿਸ੍ਸਾ ਦਿਸਾਯ ਏਕਂ, ਅਞ੍ਞਿਸ੍ਸਾ ਦਿਸਾਯ ਚਾਪਰਨ੍ਤਿ ਏਵਂ ਚਤ੍ਤਾਰੋਪਿ ਮਗ੍ਗਾ ਚਤੂਸੁ ਦਿਸਾਸੁ ਕਿਤ੍ਤੇਤੁਂ ਵਟ੍ਟਤੀਤਿ ਅਧਿਪ੍ਪਾਯੋ. ਏਵਂ ਪਨ ਕਿਤ੍ਤਿਤਮਤ੍ਤੇਨ ਕਥਂ ਏਕਾਬਦ੍ਧਤਾ ਵਿਗਚ੍ਛਤੀਤਿ ਵਿਞ੍ਞਾਯਤੀਤਿ. ਪਰਤੋ ਗਤਟ੍ਠਾਨੇਪਿ ਏਤੇ ਏਵ ਤੇ ਚਤ੍ਤਾਰੋ ਮਗ੍ਗਾ. ‘‘ਚਤੂਸੁ ਦਿਸਾਸੁ ਗਚ੍ਛਨ੍ਤੀ’’ਤਿ ਹਿ ਵੁਤ੍ਤਂ. ਤਸ੍ਮਾ ਏਤ੍ਥ ਕਾਰਣਂ ਵਿਚਿਨਿਤਬ੍ਬਂ.

‘‘ਉਤ੍ਤਰਨ੍ਤਿਯਾ ਭਿਕ੍ਖੁਨਿਯਾ’’ਤਿ ਇਦਞ੍ਚ ਪਾਲ਼ਿਯਂ (ਪਾਚਿ. ੬੯੨) ਭਿਕ੍ਖੁਨੀਨਂ ਨਦੀਪਾਰਗਮਨੇ ਨਦਿਲਕ੍ਖਣਸ੍ਸ ਆਗਤਤ੍ਤਾ ਵੁਤ੍ਤਂ. ਭਿਕ੍ਖੂਨਂ ਅਨ੍ਤਰਵਾਸਕਤੇਮਨਮਤ੍ਤਮ੍ਪਿ ਵਟ੍ਟਤਿ ਏਵ ¶ . ‘‘ਨਦਿਚਤੁਕ੍ਕੇਪਿ ਏਸੇਵ ਨਯੋ’’ਤਿ ਇਮਿਨਾ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਪਰਤੋ ਗਤਟ੍ਠਾਨੇਪਿ ਕਿਤ੍ਤੇਤੁਂ ¶ ਨ ਵਟ੍ਟਤੀਤਿ ਦਸ੍ਸੇਤਿ. ਤੇਨੇਵ ਚ ‘‘ਅਸ੍ਸਮ੍ਮਿਸ੍ਸਨਦਿਯੋ ਚਤਸ੍ਸੋਪਿ ਕਿਤ੍ਤੇਤੁਂ ਵਟ੍ਟਤੀ’’ਤਿ ਅਸਮ੍ਮਿਸ੍ਸ-ਗ੍ਗਹਣਂ ਕਤਂ. ਮੂਲੇਤਿ ਆਦਿਕਾਲੇ. ਨਦਿਂ ਭਿਨ੍ਦਿਤ੍ਵਾਤਿ ਯਥਾ ਉਦਕਂ ਅਨਿਚ੍ਛਨ੍ਤੇਹਿ ਕਸ੍ਸਕੇਹਿ ਮਹੋਘੇ ਨਿਵਤ੍ਤੇਤੁਂ ਨ ਸਕ੍ਕਾ, ਏਵਂ ਨਦਿਕੂਲਂ ਭਿਨ੍ਦਿਤ੍ਵਾ.

ਉਕ੍ਖੇਪਿਮਨ੍ਤਿ ਦੀਘਰਜ੍ਜੁਨਾ ਕੁਟੇਨ ਉਸ੍ਸਿਞ੍ਚਨੀਯਂ.

ਅਸਮ੍ਮਿਸ੍ਸੇਹੀਤਿ ਸਬ੍ਬਦਿਸਾਸੁ ਠਿਤਪਬ੍ਬਤੇਹਿ ਏਵ, ਪਾਸਾਣਾਦੀਸੁ ਅਞ੍ਞਤਰੇਹਿ ਵਾ ਨਿਮਿਤ੍ਤਨ੍ਤਰਾਬ੍ਯਵਹਿਤੇਹਿ. ਸਮ੍ਮਿਸ੍ਸੇਹੀਤਿ ਏਕਤ੍ਥ ਪਬ੍ਬਤੋ, ਅਞ੍ਞਤ੍ਥ ਪਾਸਾਣੋਤਿ ਏਵਂ ਠਿਤੇਹਿ ਅਟ੍ਠਹਿਪਿ. ‘‘ਨਿਮਿਤ੍ਤਾਨਂ ਸਤੇਨਾਪੀ’’ਤਿ ਇਮਿਨਾ ਏਕਿਸ੍ਸਾਯ ਏਵ ਦਿਸਾਯ ਬਹੁਨਿਮਿਤ੍ਤਾਨਿ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤਂ? ਪਬ੍ਬਤੋ ਭਨ੍ਤੇ. ਪੁਨ ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤਂ? ਪਾਸਾਣੋ ਭਨ੍ਤੇ’’ਤਿਆਦਿਨਾ ਕਿਤ੍ਤੇਤੁਂ ਵਟ੍ਟਤੀਤਿ ਦਸ੍ਸੇਤਿ. ਸਿਙ੍ਘਾਟਕਸਣ੍ਠਾਨਾਤਿ ਤਿਕੋਣਾ. ਚਤੁਰਸ੍ਸਾਤਿ ਸਮਚਤੁਰਸ੍ਸਾ, ਮੁਦਿਙ੍ਗਸਣ੍ਠਾਨਾ ਪਨ ਆਯਤਚਤੁਰਸ੍ਸਾ. ਏਕਕੋਟਿਯਂ ਸਙ੍ਕੋਚਿਤਾ, ਤਦਞ੍ਞਾਯ ਵਿਤ੍ਥਿਣ੍ਣਾ ਵਾ ਹੋਤੀਤਿ. ਸੀਮਾਯ ਉਪਚਾਰਂ ਠਪੇਤ੍ਵਾਤਿ ਆਯਤਿਂ ਬਨ੍ਧਿਤਬ੍ਬਾਯ ਸੀਮਾਯ ਨੇਸਂ ਵਿਹਾਰਾਨਂ ਪਰਿਚ੍ਛੇਦਤੋ ਬਹਿ ਸੀਮਨ੍ਤਰਿਕਪ੍ਪਹੋਨਕਂ ਉਪਚਾਰਂ ਠਪੇਤ੍ਵਾ. ਬਦ੍ਧਾ ਸੀਮਾ ਯੇਸੁ ਵਿਹਾਰੇਸੁ, ਤੇ ਬਦ੍ਧਸੀਮਾ. ਪਾਟੇਕ੍ਕਨ੍ਤਿ ਪਚ੍ਚੇਕਂ. ਬਦ੍ਧਸੀਮਾਸਦਿਸਾਨੀਤਿ ਯਥਾ ਬਦ੍ਧਸੀਮਾਸੁ ਠਿਤਾ ਅਞ੍ਞਮਞ੍ਞਂ ਛਨ੍ਦਾਦਿਂ ਅਨਪੇਕ੍ਖਿਤ੍ਵਾ ਪਚ੍ਚੇਕਂ ਕਮ੍ਮਂ ਕਾਤੁਂ ਲਭਨ੍ਤਿ, ਏਵਂ ਗਾਮਸੀਮਾਸੁ ਠਿਤਾਪੀਤਿ ਦਸ੍ਸੇਤਿ. ਆਗਨ੍ਤਬ੍ਬਨ੍ਤਿ ਸਾਮੀਚਿਮਤ੍ਤਵਸੇਨ ਵੁਤ੍ਤਂ. ਤੇਨਾਹ ‘‘ਆਗਮਨਮ੍ਪੀ’’ਤਿਆਦਿ.

ਪਬ੍ਬਜ੍ਜੂਪਸਮ੍ਪਦਾਦੀਨਨ੍ਤਿ ਏਤ੍ਥ ਭਣ੍ਡੁਕਮ੍ਮਾਪੁਚ੍ਛਨਂ ਸਨ੍ਧਾਯ ਪਬ੍ਬਜ੍ਜਾਗਹਣਂ. ਏਕਵੀਸਤਿ ਭਿਕ੍ਖੂਤਿ ਨਿਸਿਨ੍ਨੇ ਸਨ੍ਧਾਯ ਵੁਤ੍ਤਂ. ਇਦਞ੍ਚ ਕਮ੍ਮਾਰਹੇਨ ਸਹ ਅਬ੍ਭਾਨਕਾਰਕਾਨਮ੍ਪਿ ਪਹੋਨਕਤ੍ਥਂ ਵੁਤ੍ਤਂ. ‘‘ਨਿਮਿਤ੍ਤੁਪਗਾ ਪਾਸਾਣਾ ਠਪੇਤਬ੍ਬਾ’’ਤਿ ਇਦਂ ਯਥਾਰੁਚਿਤਟ੍ਠਾਨੇ ਰੁਕ੍ਖਨਿਮਿਤ੍ਤਾਦੀਨਂ ਦੁਲ੍ਲਭਤਾਯ ਵਡ੍ਢਿਤ੍ਵਾ ਉਭਿਨ੍ਨਂ ਬਦ੍ਧਸੀਮਾਨਂ ਸਙ੍ਕਰਕਰਣਤੋ ਚ ਪਾਸਾਣਨਿਮਿਤ੍ਤਸ੍ਸ ਚ ਤਦਭਾਵਤੋ ਯਤ੍ਥ ਕਤ੍ਥਚਿ ਆਨੇਤ੍ਵਾ ਠਪੇਤੁਂ ਸੁਕਰਤਾਯ ਚ ਵੁਤ੍ਤਂ. ਤਥਾ ਸੀਮਨ੍ਤਰਿਕਪਾਸਾਣਾ ਠਪੇਤਬ੍ਬਾਤਿ ਏਤ੍ਥਾਪਿ. ਚਤੁਰਙ੍ਗੁਲਪ੍ਪਮਾਣਾਪੀਤਿ ਯਥਾ ਖਨ੍ਧਸੀਮਾਪਰਿਚ੍ਛੇਦਤੋ ਬਹਿ ਨਿਮਿਤ੍ਤਪਾਸਾਣਾਨਂ ਚਤੁਰਙ੍ਗੁਲਮਤ੍ਤਟ੍ਠਾਨਂ ਸਮਨ੍ਤਾ ਨਿਗਚ੍ਛਤਿ, ਅਵਸੇਸਂ ਠਾਨਂ ਅਨ੍ਤੋਖਨ੍ਧਸੀਮਾਯ ਹੋਤਿਯੇਵ, ਏਵਂ ਤੇਸੁਪਿ ਠਪਿਤੇਸੁ ਚਤੁਰਙ੍ਗੁਲਮਤ੍ਤਾ ਸੀਮਨ੍ਤਰਿਕਾ ਹੋਤੀਤਿ ਦਟ੍ਠਬ੍ਬਂ.

ਸੀਮਨ੍ਤਰਿਕਪਾਸਾਣਾਤਿ ¶ ਸੀਮਨ੍ਤਰਿਕਾਯ ਠਪਿਤਨਿਮਿਤ੍ਤਪਾਸਾਣਾ. ਤੇ ਪਨ ਕਿਤ੍ਤੇਨ੍ਤੇਨ ਪਦਕ੍ਖਿਣਤੋ ਅਨੁਪਰਿਯਾਯਨ੍ਤੇਨੇਵ ਕਿਤ੍ਤੇਤਬ੍ਬਾ. ਕਥਂ? ਖਣ੍ਡਸੀਮਤੋ ਹਿ ਪਚ੍ਛਿਮਾਯ ਦਿਸਾਯ ਪੁਰਤ੍ਥਾਭਿਮੁਖੇਨ ਠਤ੍ਵਾ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤ’’ਨ੍ਤਿ ਤਤ੍ਥ ਸਬ੍ਬਾਨਿ ਨਿਮਿਤ੍ਤਾਨਿ ਅਨੁਕ੍ਕਮੇਨ ¶ ਕਿਤ੍ਤੇਤ੍ਵਾ ਤਥਾ ਉਤ੍ਤਰਾਯ ਦਿਸਾਯ ਦਕ੍ਖਿਣਾਭਿਮੁਖੇਨ ਠਤ੍ਵਾ ‘‘ਦਕ੍ਖਿਣਾਯ ਦਿਸਾਯ ਕਿਂ ਨਿਮਿਤ੍ਤ’’ਨ੍ਤਿ ਅਨੁਕ੍ਕਮੇਨ ਕਿਤ੍ਤੇਤ੍ਵਾ ਤਥਾ ਪੁਰਤ੍ਥਿਮਾਯ ਦਿਸਾਯ ਪਚ੍ਛਿਮਾਭਿਮੁਖੇਨ ਠਤ੍ਵਾ ‘‘ਪਚ੍ਛਿਮਾਯ ਦਿਸਾਯ ਕਿਂ ਨਿਮਿਤ੍ਤ’’ਨ੍ਤਿ ਅਨੁਕ੍ਕਮੇਨ ਕਿਤ੍ਤੇਤ੍ਵਾ ਤਥਾ ਦਕ੍ਖਿਣਾਯ ਦਿਸਾਯ ਉਤ੍ਤਰਾਭਿਮੁਖੇਨ ਠਤ੍ਵਾ ‘‘ਉਤ੍ਤਰਾਯ ਦਿਸਾਯ ਕਿਂ ਨਿਮਿਤ੍ਤ’’ਨ੍ਤਿ ਤਤ੍ਥ ਸਬ੍ਬਾਨਿ ਨਿਮਿਤ੍ਤਾਨਿ ਅਨੁਕ੍ਕਮੇਨ ਕਿਤ੍ਤੇਤ੍ਵਾ ਪੁਨ ਪਚ੍ਛਿਮਾਯ ਦਿਸਾਯ ਪੁਰਤ੍ਥਾਭਿਮੁਖੇਨ ਠਤ੍ਵਾ ਪੁਰਿਮਕਿਤ੍ਤਿਤਂ ਵੁਤ੍ਤਨਯੇਨ ਪੁਨ ਕਿਤ੍ਤੇਤਬ੍ਬਂ. ਏਵਂ ਬਹੂਨਮ੍ਪਿ ਖਣ੍ਡਸੀਮਾਨਂ ਸੀਮਨ੍ਤਰਿਕਪਾਸਾਣਾ ਪਚ੍ਚੇਕਂ ਕਿਤ੍ਤੇਤਬ੍ਬਾ. ਤਤੋਤਿ ਪਚ੍ਛਾ. ਅਵਸੇਸਨਿਮਿਤ੍ਤਾਨੀਤਿ ਮਹਾਸੀਮਾਯ ਬਾਹਿਰਨ੍ਤਰੇਸੁ ਅਵਸੇਸਨਿਮਿਤ੍ਤਾਨਿ. ਉਭਿਨ੍ਨਮ੍ਪਿ ਨ ਕੋਪੇਨ੍ਤੀਤਿ ਉਭਿਨ੍ਨਮ੍ਪਿ ਕਮ੍ਮਂ ਨ ਕੋਪੇਨ੍ਤਿ.

ਕੁਟਿਗੇਹੇਤਿ ਭੂਮਿਯਂ ਕਤਤਿਣਕੁਟਿਯਂ. ਉਦੁਕ੍ਖਲਨ੍ਤਿ ਉਦੁਕ੍ਖਲਾਵਾਟਸਦਿਸਖੁਦ੍ਦਕਾਵਾਟਂ. ਨਿਮਿਤ੍ਤਂ ਨ ਕਾਤਬ੍ਬਨ੍ਤਿ ਤਂ ਰਾਜਿਂ ਵਾ ਉਦੁਕ੍ਖਲਂ ਵਾ ਨਿਮਿਤ੍ਤਂ ਨ ਕਾਤਬ੍ਬਂ. ਇਦਞ੍ਚ ਯਥਾਵੁਤ੍ਤੇਸੁ ਨਿਮਿਤ੍ਤੇਸੁ ਅਨਾਗਤਤ੍ਤੇਨ ਨ ਵਟ੍ਟਤੀਤਿ ਸਿਦ੍ਧਮ੍ਪਿ ਅਵਿਨਸ੍ਸਕਸਞ੍ਞਾਯ ਕੋਚਿ ਮੋਹੇਨ ਨਿਮਿਤ੍ਤਂ ਕਰੇਯ੍ਯਾਤਿ ਦੂਰਤੋਪਿ ਵਿਪਤ੍ਤਿਪਰਿਹਾਰਤ੍ਥਂ ਵੁਤ੍ਤਂ. ਏਵਂ ਉਪਰਿ ‘‘ਭਿਤ੍ਤਿਂ ਅਕਿਤ੍ਤੇਤ੍ਵਾ’’ਤਿਆਦੀਸੁਪਿ ਸਿਦ੍ਧਮੇਵਤ੍ਥਂ ਪੁਨਪ੍ਪੁਨਂ ਕਥਨੇ ਕਾਰਣਂ ਵੇਦਿਤਬ੍ਬਂ. ਸੀਮਾਵਿਪਤ੍ਤਿ ਹਿ ਉਪਸਮ੍ਪਦਾਦਿਸਬ੍ਬਕਮ੍ਮਵਿਪਤ੍ਤਿਮੂਲਨ੍ਤਿ ਤਸ੍ਸਾ ਸਬ੍ਬਂ ਦ੍ਵਾਰਂ ਸਬ੍ਬਥਾ ਪਿਦਹਨਵਸੇਨ ਵਤ੍ਤਬ੍ਬਂ. ਸਬ੍ਬਂ ਵਤ੍ਵਾਵ ਇਧ ਆਚਰਿਯਾ ਵਿਨਿਚ੍ਛਯਂ ਠਪੇਸੁਨ੍ਤਿ ਦਟ੍ਠਬ੍ਬਂ.

ਭਿਤ੍ਤਿਨ੍ਤਿ ਇਟ੍ਠਕਦਾਰੁਮਤ੍ਤਿਕਾਮਯਂ. ਸਿਲਾਮਯਾਯ ਪਨ ਭਿਤ੍ਤਿਯਾ ਨਿਮਿਤ੍ਤੁਪਗਂ ਏਕਂ ਪਾਸਾਣਂ ਤਂਤਂਦਿਸਾਯ ਕਿਤ੍ਤੇਤੁਂ ਵਟ੍ਟਤਿ. ਅਨੇਕਸਿਲਾਹਿ ਚਿਨਿਤਂ ਸਕਲਭਿਤ੍ਤਿਂ ਕਿਤ੍ਤੇਤੁਂ ਨ ਵਟ੍ਟਤਿ ‘‘ਏਸੋ ਪਾਸਾਣੋ ਨਿਮਿਤ੍ਤ’’ਨ੍ਤਿ ਏਕਵਚਨੇਨ ਵਤ੍ਤਬ੍ਬਤੋ. ਅਨ੍ਤੋਕੁਟ੍ਟਮੇਵਾਤਿ ਏਤ੍ਥ ਅਨ੍ਤੋਕੁਟ੍ਟੇਪਿ ਨਿਮਿਤ੍ਤਾਨਂ ਠਿਤੋਕਾਸਤੋ ਅਨ੍ਤੋ ਏਵ ਸੀਮਾਤਿ ਗਹੇਤਬ੍ਬਂ. ਪਮੁਖੇ ਨਿਮਿਤ੍ਤਪਾਸਾਣੇ ਠਪੇਤ੍ਵਾਤਿ ਗਬ੍ਭਾਭਿਮੁਖੇਪਿ ਬਹਿਪਮੁਖੇ ਗਬ੍ਭਵਿਤ੍ਥਾਰਪ੍ਪਮਾਣੇ ਠਾਨੇ ਪਾਸਾਣੇ ਠਪੇਤ੍ਵਾ ਸਮ੍ਮਨ੍ਨਿਤਬ੍ਬਾ. ਏਵਞ੍ਹਿ ਗਬ੍ਭਪਮੁਖਾਨਂ ਅਨ੍ਤਰੇ ਠਿਤਕੁਟ੍ਟਮ੍ਪਿ ਉਪਾਦਾਯ ਅਨ੍ਤੋ ਚ ਬਹਿ ਚ ਚਤੁਰਸ੍ਸਸਣ੍ਠਾਨਾਵ ਸੀਮਾ ਹੋਤਿ. ਬਹੀਤਿ ਸਕਲਸ੍ਸ ਕੁਟਿਗੇਹਸ੍ਸ ਸਮਨ੍ਤਤੋ ਬਹਿ.

ਅਨ੍ਤੋ ¶ ਚ ਬਹਿ ਚ ਸੀਮਾ ਹੋਤੀਤਿ ਮਜ੍ਝੇ ਠਿਤਭਿਤ੍ਤਿਯਾ ਸਹ ਚਤੁਰਸ੍ਸਸੀਮਾ ਹੋਤਿ.

‘‘ਉਪਰਿਪਾਸਾਦੇਯੇਵ ਹੋਤੀ’’ਤਿ ਇਮਿਨਾ ਗਬ੍ਭਸ੍ਸ ਚ ਪਮੁਖਸ੍ਸ ਚ ਅਨ੍ਤਰਾ ਠਿਤਭਿਤ੍ਤਿਯਾ ਏਕਤ੍ਤਾ ਤਤ੍ਥ ਚ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸਾਭਾਵੇਨ ਹੇਟ੍ਠਾ ਨ ਓਤਰਤਿ, ਉਪਰਿਭਿਤ੍ਤਿ ਪਨ ਸੀਮਟ੍ਠਾਵ ਹੋਤੀਤਿ ਦਸ੍ਸੇਤਿ. ਹੇਟ੍ਠਿਮਤਲੇ ਕੁਟ੍ਟੋਤਿ ਹੇਟ੍ਠਿਮਤਲੇ ਚਤੂਸੁ ਦਿਸਾਸੁ ਠਿਤਕੁਟ੍ਟੋ. ਸਚੇ ਹਿ ¶ ਦ੍ਵੀਸੁ, ਤੀਸੁ ਵਾ ਦਿਸਾਸੁ ਏਵ ਕੁਟ੍ਟੋ ਤਿਟ੍ਠੇਯ੍ਯ, ਹੇਟ੍ਠਾ ਨ ਓਤਰਤਿ. ਹੇਟ੍ਠਾਪਿ ਓਤਰਤੀਤਿ ਚਤੁਨ੍ਨਮ੍ਪਿ ਭਿਤ੍ਤੀਨਂ ਅਨ੍ਤੋ ਭਿਤ੍ਤੀਹਿ ਸਹ ਏਕਵੀਸਤਿਯਾ ਭਿਕ੍ਖੂਨਂ ਪਹੋਨਕਤ੍ਤਾ ਵੁਤ੍ਤਂ. ਓਤਰਮਾਨਾ ਚ ਉਪਰਿਸੀਮਪ੍ਪਮਾਣੇਨ ਓਤਰਤਿ, ਚਤੁਨ੍ਨਂ ਪਨ ਭਿਤ੍ਤੀਨਂ ਬਾਹਿਰਨ੍ਤਰਪਰਿਚ੍ਛੇਦੇ ਹੇਟ੍ਠਾਭੂਮਿਭਾਗੇ ਉਦਕਪਰਿਯਨ੍ਤਂ ਕਤ੍ਵਾ ਓਤਰਤਿ. ਨ ਪਨ ਭਿਤ੍ਤੀਨਂ ਬਹਿ ਕੇਸਗ੍ਗਮਤ੍ਤਮ੍ਪਿ ਠਾਨਂ. ਪਾਸਾਦਭਿਤ੍ਤਿਤੋਤਿ ਉਪਰਿਤਲੇ ਭਿਤ੍ਤਿਤੋ. ਓਤਰਣਾਨੋਤਰਣਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ ਉਪਰਿਸੀਮਪ੍ਪਮਾਣਸ੍ਸ ਅਨ੍ਤੋਗਧਾਨਂ ਹੇਟ੍ਠਿਮਤਲੇ ਚਤੂਸੁ ਦਿਸਾਸੁ ਕੁਟ੍ਟਾਨਂ ਤੁਲਾਰੁਕ੍ਖੇਹਿ ਏਕਸਮ੍ਬਨ੍ਧਤਂ ਤਦਨ੍ਤੋ ਪਚ੍ਛਿਮਸੀਮਪ੍ਪਮਾਣਤਾਦਿਞ੍ਚ ਸਨ੍ਧਾਯ ਵੁਤ੍ਤਂ. ਕਿਞ੍ਚਾਪੇਤ੍ਥ ਨਿਯ੍ਯੂਹਕਾਦਯੋ ਨਿਮਿਤ੍ਤਾਨਂ ਠਿਤੋਕਾਸਤਾਯ ਬਜ੍ਝਮਾਨਕ੍ਖਣੇ ਸੀਮਾ ਨ ਹੋਨ੍ਤਿ, ਬਦ੍ਧਾਯ ਪਨ ਸੀਮਾਯ ਸੀਮਟ੍ਠਾਵ ਹੋਨ੍ਤੀਤਿ ਦਟ੍ਠਬ੍ਬਾ. ਪਰਿਯਨ੍ਤਥਮ੍ਭਾਨਨ੍ਤਿ ਨਿਮਿਤ੍ਤਗਤਪਾਸਾਣਤ੍ਥਮ੍ਭੇ ਸਨ੍ਧਾਯ ਵੁਤ੍ਤਂ. ‘‘ਉਪਰਿਮਤਲੇਨ ਸਮ੍ਬਦ੍ਧੋ ਹੋਤੀ’’ਤਿ ਇਦਂ ਕੁਟ੍ਟਾਨਂ ਅਨ੍ਤਰਾ ਸੀਮਟ੍ਠਾਨਂ ਥਮ੍ਭਾਨਂ ਅਭਾਵਤੋ ਵੁਤ੍ਤਂ. ਯਦਿ ਹਿ ਭਵੇਯ੍ਯੁਂ, ਕੁਟ੍ਟੇ ਉਪਰਿਮਤਲੇਨ ਅਸਮ੍ਬਨ੍ਧੇਪਿ ਸੀਮਟ੍ਠਤ੍ਥਮ੍ਭਾਨਂ ਉਪਰਿ ਠਿਤੋ ਪਾਸਾਦੋ ਸੀਮਟ੍ਠੋਵ ਹੋਤਿ.

ਸਚੇ ਪਨ ਬਹੂਨਂ ਥਮ੍ਭਪਨ੍ਤੀਨਂ ਉਪਰਿ ਕਤਪਾਸਾਦਸ੍ਸ ਹੇਟ੍ਠਾ ਪਥਵਿਯਂ ਸਬ੍ਬਬਾਹਿਰਾਯ ਥਮ੍ਭਪਨ੍ਤਿਯਾ ਅਨ੍ਤੋ ਨਿਮਿਤ੍ਤਪਾਸਾਣੇ ਠਪੇਤ੍ਵਾ ਸੀਮਾ ਬਦ੍ਧਾ ਹੋਤਿ, ਏਤ੍ਥ ਕਥਨ੍ਤਿ? ਏਤ੍ਥਾਪਿ ਯਂ ਤਾਵ ਸੀਮਟ੍ਠਤ੍ਥਮ੍ਭੇਹੇਵ ਧਾਰਿਯਮਾਨਾਨਂ ਤੁਲਾਨਂ ਉਪਰਿਮਤਲਂ, ਸਬ੍ਬਂ ਤਂ ਸੀਮਟ੍ਠਮੇਵ, ਏਤ੍ਥ ਵਿਵਾਦੋ ਨਤ੍ਥਿ. ਯਂ ਪਨ ਸੀਮਟ੍ਠਤ੍ਥਮ੍ਭਪਨ੍ਤਿਯਾ, ਅਸੀਮਟ੍ਠਾਯ ਬਾਹਿਰਤ੍ਥਮ੍ਭਪਨ੍ਤਿਯਾ ਚ ਸਮਧੁਰਂ ਧਾਰਿਯਮਾਨਾਨਂ ਤੁਲਾਨਂ ਉਪਰਿਮਤਲਂ, ਤਤ੍ਥ ਉਪਡ੍ਢਂ ਸੀਮਾਤਿ ਕੇਚਿ ਵਦਨ੍ਤਿ. ਸਕਲਮ੍ਪਿ ਗਾਮਸੀਮਾਤਿ ਅਪਰੇ. ਬਦ੍ਧਸੀਮਾ ਏਵਾਤਿ ਅਞ੍ਞੇ. ਤਸ੍ਮਾ ਕਮ੍ਮਂ ਕਰੋਨ੍ਤੇਹਿ ਗਰੁਕੇ ਨਿਰਾਸਙ੍ਕਟ੍ਠਾਨੇ ਠਤ੍ਵਾ ਸਬ੍ਬਂ ਤਂ ਆਸਙ੍ਕਟ੍ਠਾਨਂ ਸੋਧੇਤ੍ਵਾਵ ਕਮ੍ਮਂ ਕਾਤਬ੍ਬਂ, ਸਨ੍ਨਿਟ੍ਠਾਨਕਾਰਣਂ ਵਾ ਗਵੇਸਿਤ੍ਵਾ ਤਦਨੁਗੁਣਂ ਕਾਤਬ੍ਬਂ.

ਤਾਲਮੂਲਕਪਬ੍ਬਤੇਤਿ ¶ ਤਾਲਕ੍ਖਨ੍ਧਮੂਲਸਦਿਸੇ ਹੇਟ੍ਠਾ ਥੂਲੋ ਹੁਤ੍ਵਾ ਕਮੇਨ ਕਿਸੋ ਹੁਤ੍ਵਾ ਉਗ੍ਗਤੋ ਹਿ ਤਾਲਸਦਿਸੋ ਨਾਮ ਹੋਤਿ. ਵਿਤਾਨਸਣ੍ਠਾਨੋਤਿ ਅਹਿਚ੍ਛਤ੍ਤਕਸਣ੍ਠਾਨੋ. ਪਣਵਸਣ੍ਠਾਨੋਤਿ ਮਜ੍ਝੇ ਤਨੁਕੋ ਹੇਟ੍ਠਾ ਚ ਉਪਰਿ ਚ ਵਿਤ੍ਥਿਣ੍ਣੋ. ਹੇਟ੍ਠਾ ਵਾ ਮਜ੍ਝੇ ਵਾਤਿ ਮੁਦਿਙ੍ਗਸਣ੍ਠਾਨਸ੍ਸ ਹੇਟ੍ਠਾ, ਪਣਵਸਣ੍ਠਾਨਸ੍ਸ ਮਜ੍ਝੇ.

ਸਪ੍ਪਫਣਸਦਿਸੋ ਪਬ੍ਬਤੋਤਿ ਸਪ੍ਪਫਣੋ ਵਿਯ ਖੁਜ੍ਜੋ, ਮੂਲਟ੍ਠਾਨਤੋ ਅਞ੍ਞਤ੍ਥ ਅਵਨਤਸੀਸੋਤਿ ਅਤ੍ਥੋ. ਆਕਾਸਪਬ੍ਭਾਰਨ੍ਤਿ ਭਿਤ੍ਤਿਯਾ ਅਪਰਿਕ੍ਖਿਤ੍ਤਪਬ੍ਭਾਰਂ. ਸੀਮਪ੍ਪਮਾਣੋਤਿ ਅਨ੍ਤੋਆਕਾਸੇਨ ਸਦ੍ਧਿਂ ਪਚ੍ਛਿਮਸੀਮਪ੍ਪਮਾਣੋ. ‘‘ਸੋ ਚ ਪਾਸਾਣੋ ਸੀਮਟ੍ਠੋ’’ਤਿ ਇਮਿਨਾ ਈਦਿਸੇਹਿ ਸੁਸਿਰਪਾਸਾਣਲੇਣਕੁਟ੍ਟਾਦੀਹਿ ਪਰਿਚ੍ਛਿਨ੍ਨੇ ਭੂਮਿਭਾਗੇ ਏਵ ਸੀਮਾ ਪਤਿਟ੍ਠਾਤਿ, ਨ ਅਪਰਿਚ੍ਛਿਨ੍ਨੇ. ਤੇ ਪਨ ਸੀਮਟ੍ਠਤ੍ਤਾ ਸੀਮਾ ਹੋਨ੍ਤਿ, ਨ ਸਰੂਪੇਨ ਸੀਮਟ੍ਠਮਞ੍ਚਾਦਿ ਵਿਯਾਤਿ ਦਸ੍ਸੇਤਿ. ਸਚੇ ਪਨ ਸੋ ਸੁਸਿਰਪਾਸਾਣੋ ¶ ਭੂਮਿਂ ਅਨਾਹਚ੍ਚ ਆਕਾਸਗਤੋਵ ਓਲਮ੍ਬਤਿ, ਸੀਮਾ ਨ ਓਤਰਤਿ. ਸੁਸਿਰਪਾਸਾਣਾ ਪਨ ਸਯਂ ਸੀਮਾਪਟਿਬਦ੍ਧਤ੍ਤਾ ਸੀਮਾ ਹੋਨ੍ਤਿ. ਕਥਂ ਪਨ ਪਚ੍ਛਿਮਪ੍ਪਮਾਣਰਹਿਤੇਹਿ ਏਤੇਹਿ ਸੁਸਿਰਪਾਸਾਣਾਦੀਹਿ ਸੀਮਾ ਨ ਓਤਰਤੀਤਿ ਇਦਂ ਸਦ੍ਧਾਤਬ੍ਬਨ੍ਤਿ? ਅਟ੍ਠਕਥਾਪਮਾਣਤੋ.

ਅਪਿਚੇਤ੍ਥ ਸੁਸਿਰਪਾਸਾਣਭਿਤ੍ਤਿਅਨੁਸਾਰੇਨ ਮੂਸਿਕਾਦੀਨਂ ਵਿਯ ਸੀਮਾਯ ਹੇਟ੍ਠਿਮਤਲੇ ਓਤਰਣਕਿਚ੍ਚਂ ਨਤ੍ਥਿ. ਹੇਟ੍ਠਾ ਪਨ ਪਚ੍ਛਿਮਸੀਮਪ੍ਪਮਾਣੇ ਆਕਾਸੇ ਦ੍ਵਙ੍ਗੁਲਮਤ੍ਤਬਹਲੇਹਿ ਪਾਸਾਣਭਿਤ੍ਤਿਆਦੀਹਿਪਿ ਉਪਰਿਮਤਲਂ ਆਹਚ੍ਚ ਠਿਤੇਹਿ ਸਬ੍ਬਸੋ, ਯੇਭੁਯ੍ਯੇਨ ਵਾ ਪਰਿਚ੍ਛਿਨ੍ਨੇ ਸਤਿ ਉਪਰਿ ਬਜ੍ਝਮਾਨਾ ਸੀਮਾ ਤੇਹਿ ਪਾਸਾਣਾਦੀਹਿ ਅਨ੍ਤਰਿਤਾਯ ਤਪ੍ਪਰਿਚ੍ਛਿਨ੍ਨਾਯ ਹੇਟ੍ਠਾਭੂਮਿਯਾਪਿ ਉਪਰਿਮਤਲੇਨ ਸਦ੍ਧਿਂ ਏਕਕ੍ਖਣੇ ਪਤਿਟ੍ਠਾਤਿ ਨਦਿਪਾਰਸੀਮਾ ਵਿਯ ਨਦਿਅਨ੍ਤਰਿਤੇਸੁ ਉਭੋਸੁ ਤੀਰੇਸੁ, ਲੇਣਾਦੀਸੁ ਅਪਨੀਤੇਸੁਪਿ ਹੇਟ੍ਠਾ ਓਤਿਣ੍ਣਾ ਸੀਮਾ ਯਾਵ ਸਾਸਨਨ੍ਤਰਧਾਨਾ ਨ ਵਿਗਚ੍ਛਤਿ. ਪਠਮਂ ਪਨ ਉਪਰਿ ਸੀਮਾਯ ਬਦ੍ਧਾਯ ਪਚ੍ਛਾ ਲੇਣਾਦੀਸੁ ਕਤੇਸੁਪਿ ਹੇਟ੍ਠਾਭੂਮਿਯਂ ਸੀਮਾ ਓਤਰਤਿ ਏਵ. ਕੇਚਿ ਤਂ ਨ ਇਚ੍ਛਨ੍ਤਿ. ਏਵਂ ਉਭਯਤ੍ਥ ਪਤਿਟ੍ਠਿਤਾ ਚ ਸਾ ਸੀਮਾ ਏਕਾਵ ਹੋਤਿ ਗੋਤ੍ਤਾਦਿਜਾਤਿ ਵਿਯ ਬ੍ਯਤ੍ਤਿਭੇਦੇਸੂਤਿ ਗਹੇਤਬ੍ਬਂ. ਸਬ੍ਬਾ ਏਵ ਹਿ ਬਦ੍ਧਸੀਮਾ, ਅਬਦ੍ਧਸੀਮਾ ਚ ਅਤ੍ਤਨੋ ਅਤ੍ਤਨੋ ਪਕਤਿਨਿਸ੍ਸਯਭੂਤੇ ਗਾਮਾਰਞ੍ਞਨਦਿਆਦਿਕੇ ਖੇਤ੍ਤੇ ਯਥਾਪਰਿਚ੍ਛੇਦਂ ਸਬ੍ਬਤ੍ਥ ਸਾਕਲ੍ਯੇਨ ਏਕਸ੍ਮਿਂ ਖਣੇ ਬ੍ਯਾਪਿਨੀ ਪਰਮਤ੍ਥਤੋ ਅਵਿਜ੍ਜਮਾਨਾਪਿ ਤੇ ਤੇ ਨਿਸ੍ਸਯਭੂਤੇ ਪਰਮਤ੍ਥਧਮ੍ਮੇ, ਤਂ ਤਂ ਕਿਰਿਯਾਵਿਸੇਸਮ੍ਪਿ ਵਾ ਉਪਾਦਾਯ ਲੋਕਿਯੇਹਿ, ਸਾਸਨਿਕੇਹਿ ¶ ਚ ਯਥਾਰਹਂ ਏਕਤ੍ਤੇਨ ਪਞ੍ਞਤ੍ਤਤਾਯ ਨਿਸ੍ਸਯੇਕਰੂਪਾ ਏਵ. ਤਥਾ ਹਿ ਏਕੋ ਗਾਮੋ ਅਰਞ੍ਞਂ ਨਦੀ ਜਾਤਸ੍ਸਰੋ ਸਮੁਦ੍ਦੋਤਿ ਏਵਂ ਲੋਕੇ,

‘‘ਸਮ੍ਮਤਾ ਸਾ ਸੀਮਾ ਸਙ੍ਘੇਨ (ਮਹਾਵ. ੧੪੩). ਅਗਾਮਕੇ ਚੇ, ਭਿਕ੍ਖਵੇ, ਅਰਞ੍ਞੇ ਸਮਨ੍ਤਾ ਸਤ੍ਤਬ੍ਭਨ੍ਤਰਾ, ਅਯਂ ਤਤ੍ਥ ਸਮਾਨਸਂਵਾਸਾ ਏਕੂਪੋਸਥਾ. ਸਮਨ੍ਤਾ ਉਦਕੁਕ੍ਖੇਪਾ, ਅਯਂ ਤਤ੍ਥ ਸਮਾਨਸਂਵਾਸਾ ਏਕੂਪੋਸਥਾ’’ਤਿ (ਮਹਾਵ. ੧੪੭) –

ਆਦਿਨਾ ਸਾਸਨੇ ਚ ਏਕਵੋਹਾਰੋ ਦਿਸ੍ਸਤਿ. ਨ ਹਿ ਪਰਮਤ੍ਥਤੋ ਏਕਸ੍ਸ ਅਨੇਕਧਮ੍ਮੇਸੁ ਬ੍ਯਾਪਨਮਤ੍ਥਿ. ਕਸਿਣੇਕਦੇਸਾਦਿਵਿਕਪ੍ਪਾਸਮਾਨਤਾਯ ਏਕਤ੍ਤਹਾਨਿਤੋਤਿ ਅਯਂ ਨੋ ਮਤਿ.

ਅਸ੍ਸ ਹੇਟ੍ਠਾਤਿ ਸਪ੍ਪਫਣਪਬ੍ਬਤਸ੍ਸ ਹੇਟ੍ਠਾ ਆਕਾਸਪਬ੍ਭਾਰੇ. ਲੇਣਸ੍ਸਾਤਿ ਲੇਣਞ੍ਚੇ ਕਤਂ, ਤਸ੍ਸ ਲੇਣਸ੍ਸਾਤਿ ਅਤ੍ਥੋ. ਤਮੇਵ ਪੁਨ ਲੇਣਂ ਪਞ੍ਚਹਿ ਪਕਾਰੇਹਿ ਵਿਕਪ੍ਪੇਤ੍ਵਾ ਓਤਰਣਾਨੋਤਰਣਵਿਨਿਚ੍ਛਯਂ ਦਸ੍ਸੇਤੁਂ ਆਹ ‘‘ਸਚੇ ਪਨ ਹੇਟ੍ਠਾ’’ਤਿਆਦਿ. ਤਤ੍ਥ ‘‘ਹੇਟ੍ਠਾ’’ਤਿ ਇਮਸ੍ਸ ‘‘ਲੇਣਂ ਹੋਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਹੇਟ੍ਠਾ ਲੇਣਞ੍ਚ ਏਕਸ੍ਮਿਂ ਪਦੇਸੇਤਿ ਆਹ ‘‘ਅਨ੍ਤੋ’’ਤਿ, ਪਬ੍ਬਤਸ੍ਸ ਅਨ੍ਤੋ, ਪਬ੍ਬਤਮੂਲੇਤਿ ਅਤ੍ਥੋ. ਤਮੇਵ ਅਨ੍ਤੋ-ਸਦ੍ਦਂ ਸੀਮਾਪਰਿਚ੍ਛੇਦੇਨ ਵਿਸੇਸੇਤੁਂ ‘‘ਉਪਰਿਮਸ੍ਸ ਸੀਮਾਪਰਿਚ੍ਛੇਦਸ੍ਸ ਪਾਰਤੋ’’ਤਿ ਵੁਤ੍ਤਂ ¶ . ਪਬ੍ਬਤਪਾਦਂ ਪਨ ਅਪੇਕ੍ਖਿਤ੍ਵਾ ‘‘ਓਰਤੋ’’ਤਿ ਵਤ੍ਤਬ੍ਬੇਪਿ ਸੀਮਾਨਿਸ੍ਸਯਂ ਪਬ੍ਬਤਗ੍ਗਂ ਸਨ੍ਧਾਯ ‘‘ਪਾਰਤੋ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤੇਨੇਵ ‘‘ਬਹਿਲੇਣ’’ਨ੍ਤਿ ਏਤ੍ਥ ਬਹਿ-ਸਦ੍ਦਂ ਵਿਸੇਸੇਨ੍ਤੋ ‘‘ਉਪਰਿਮਸ੍ਸ ਸੀਮਾਪਰਿਚ੍ਛੇਦਸ੍ਸ ਓਰਤੋ’’ਤਿ ਆਹ. ਬਹਿ ਸੀਮਾ ਨ ਓਤਰਤੀਤਿ ਏਤ੍ਥ ਬਹੀਤਿ ਪਬ੍ਬਤਪਾਦੇ ਲੇਣਂ ਸਨ੍ਧਾਯ ਵੁਤ੍ਤਂ, ਲੇਣਸ੍ਸ ਬਹਿਭੂਤੇ ਉਪਰਿਸੀਮਾਪਰਿਚ੍ਛੇਦਸ੍ਸ ਹੇਟ੍ਠਾਭਾਗੇ ਸੀਮਾ ਨ ਓਤਰਤੀਤਿ ਅਤ੍ਥੋ. ਅਨ੍ਤੋ ਸੀਮਾਤਿ ਲੇਣਸ੍ਸ ਚ ਪਬ੍ਬਤਪਾਦਸ੍ਸ ਚ ਅਨ੍ਤੋ ਅਤ੍ਤਨੋ ਓਤਰਣਾਰਹਟ੍ਠਾਨੇ ਨ ਓਤਰਤੀਤਿ ਅਤ੍ਥੋ. ‘‘ਬਹਿ ਸੀਮਾ ਨ ਓਤਰਤਿ, ਅਨ੍ਤੋ ਸੀਮਾ ਨ ਓਤਰਤੀ’’ਤਿ ਚੇਤ੍ਥ ਅਤ੍ਤਨੋ ਓਤਰਣਾਰਹਟ੍ਠਾਨੇ ਲੇਣਾਭਾਵੇਨ ਸੀਮਾਯ ਸਬ੍ਬਥਾ ਅਨੋਤਰਣਮੇਵ ਦਸ੍ਸਿਤਨ੍ਤਿ ਗਹੇਤਬ੍ਬਂ. ਤਤ੍ਥਾਪਿ ਅਨੋਤਰਨ੍ਤੀ ਉਪਰਿ ਏਵ ਹੋਤੀਤਿ. ‘‘ਬਹਿ ਪਤਿਤਂ ਅਸੀਮਾ’’ਤਿਆਦਿਨਾ ਉਪਰਿਪਾਸਾਦਾਦੀਸੁ ਅਥਿਰਨਿਸ੍ਸਯੇਸੁ ਠਿਤਾ ਸੀਮਾਪਿ ਤੇਸਂ ਵਿਨਾਸੇਨ ਵਿਨਸ੍ਸਤੀਤਿ ਦਸ੍ਸਿਤਨ੍ਤਿ ਦਟ੍ਠਬ੍ਬਂ.

ਪੋਕ੍ਖਰਣਿਂ ¶ ਖਣਨ੍ਤਿ, ਸੀਮਾਯੇਵਾਤਿ ਏਤ੍ਥ ਸਚੇ ਹੇਟ੍ਠਾ ਉਮਙ੍ਗਨਦਿਸੀਮਪ੍ਪਮਾਣਤੋ ਅਨੂਨਾ ਪਠਮਮੇਵ ਚ ਪਵਤ੍ਤਾ ਹੋਤਿ. ਸੀਮਾ ਚ ਪਚ੍ਛਾ ਬਦ੍ਧਾ ਨਦਿਤੋ ਉਪਰਿ ਏਵ ਹੋਤਿ, ਨਦਿਂ ਆਹਚ੍ਚ ਪੋਕ੍ਖਰਣਿਯਾ ਚ ਖਤਾਯ ਸੀਮਾ ਵਿਨਸ੍ਸਤੀਤਿ ਦਟ੍ਠਬ੍ਬਂ. ਹੇਟ੍ਠਾਪਥਵਿਤਲੇਤਿ ਅਨ੍ਤਰਾ ਭੂਮਿਵਿਵਰੇ.

ਸੀਮਾਮਾਲ਼ਕੇਤਿ ਖਣ੍ਡਸੀਮਙ੍ਗਣੇ. ‘‘ਵਟਰੁਕ੍ਖੋ’’ਤਿ ਇਦਂ ਪਾਰੋਹੋਪਤ੍ਥਮ੍ਭੇਨ ਅਤਿਦੂਰਮ੍ਪਿ ਗਨ੍ਤੁਂ ਸਮਤ੍ਥਸਾਖਾਸਮਙ੍ਗਿਤਾਯ ਵੁਤ੍ਤਂ. ਸਬ੍ਬਰੁਕ੍ਖਲਤਾਦੀਨਮ੍ਪਿ ਸਮ੍ਬਨ੍ਧੋ ਨ ਵਟ੍ਟਤਿ ਏਵ. ਤੇਨੇਵ ਨਾਵਾਰਜ੍ਜੁਸੇਤੁਸਮ੍ਬਨ੍ਧੋਪਿ ਪਟਿਕ੍ਖਿਤ੍ਤੋ. ਤਤੋਤਿ ਸਾਖਤੋ. ਮਹਾਸੀਮਾਯ ਪਥਵਿਤਲਨ੍ਤਿ ਏਤ੍ਥ ਆਸਨ੍ਨਤਰਮ੍ਪਿ ਗਾਮਸੀਮਂ ਅਗ੍ਗਹੇਤ੍ਵਾ ਬਦ੍ਧਸੀਮਾਯ ਏਵ ਗਹਿਤਤ੍ਤਾ ਗਾਮਸੀਮਾਬਦ੍ਧਸੀਮਾਨਂ ਅਞ੍ਞਮਞ੍ਞਂ ਰੁਕ੍ਖਾਦਿਸਮ੍ਬਨ੍ਧੇਪਿ ਸਮ੍ਭੇਦਦੋਸੋ ਨਤ੍ਥਿ, ਅਞ੍ਞਮਞ੍ਞਂ ਨਿਸ੍ਸਯਨਿਸ੍ਸਿਤਭਾਵੇਨ ਪਵਤ੍ਤਿਤੋਤਿ ਗਹੇਤਬ੍ਬਂ. ਯਦਿ ਹਿ ਤਾਸਮ੍ਪਿ ਸਮ੍ਬਨ੍ਧਦੋਸੋ ਭਵੇਯ੍ਯ, ਕਥਂ ਗਾਮਸੀਮਾਯ ਬਦ੍ਧਸੀਮਾ ਸਮ੍ਮਨ੍ਨਿਤਬ੍ਬਾ ਸਿਯਾ? ਯਸ੍ਸਾ ਹਿ ਸੀਮਾਯ ਸਦ੍ਧਿਂ ਸਮ੍ਬਨ੍ਧੇ ਦੋਸੋ ਭਵੇਯ੍ਯ, ਸਾ ਤਤ੍ਥ ਬਨ੍ਧਿਤੁਮੇਵ ਨ ਵਟ੍ਟਤਿ, ਬਦ੍ਧਸੀਮਾਉਦਕੁਕ੍ਖੇਪਸੀਮਾਸੁ ਬਦ੍ਧਸੀਮਾ ਵਿਯ, ਅਤ੍ਤਨੋ ਨਿਸ੍ਸਯਭੂਤਗਾਮਸੀਮਾਦੀਸੁ ਉਦਕੁਕ੍ਖੇਪਸੀਮਾ ਵਿਯ ਚ. ਤੇਨੇਵ ‘‘ਸਚੇ ਪਨ ਰੁਕ੍ਖਸ੍ਸ ਸਾਖਾ ਵਾ ਤਤੋ ਨਿਕ੍ਖਨ੍ਤਪਾਰੋਹੋ ਵਾ ਬਹਿਨਦਿਤੀਰੇ ਵਿਹਾਰਸੀਮਾਯ ਵਾ ਗਾਮਸੀਮਾਯ ਵਾ ਪਤਿਟ੍ਠਿਤੋ’’ਤਿਆਦਿਨਾ (ਮਹਾਵ. ਅਟ੍ਠ. ੧੪੭) ਉਦਕੁਕ੍ਖੇਪਸੀਮਾਯ ਅਤ੍ਤਨੋ ਅਨਿਸ੍ਸਯਭੂਤਗਾਮਸੀਮਾਦੀਹਿ ਏਵ ਸਮ੍ਬਨ੍ਧਦੋਸੋ ਦਸ੍ਸਿਤੋ, ਨ ਨਦਿਸੀਮਾਯਂ. ਏਵਮਿਧਾਪੀਤਿ ਦਟ੍ਠਬ੍ਬਂ. ਅਯਞ੍ਚਤ੍ਥੋ ਉਪਰਿ ਪਾਕਟੋ ਭਵਿਸ੍ਸਤਿ. ਆਹਚ੍ਚਾਤਿ ਫੁਸਿਤ੍ਵਾ.

ਮਹਾਸੀਮਂ ਵਾ ਸੋਧੇਤ੍ਵਾਤਿ ਮਹਾਸੀਮਾਗਤਾਨਂ ਸਬ੍ਬੇਸਂ ਭਿਕ੍ਖੂਨਂ ਹਤ੍ਥਪਾਸਾਨਯਨਬਹਿਕਰਣਾਦਿਵਸੇਨ ¶ ਸਕਲਂ ਮਹਾਸੀਮਂ ਸੋਧੇਤ੍ਵਾ. ਏਤੇਨ ਸਬ੍ਬਵਿਪਤ੍ਤਿਯੋ ਮੋਚੇਤ੍ਵਾ ਪੁਬ੍ਬੇ ਸੁਟ੍ਠੁ ਬਦ੍ਧਾਨਮ੍ਪਿ ਦ੍ਵਿਨ੍ਨਂ ਬਦ੍ਧਸੀਮਾਨਂ ਪਚ੍ਛਾ ਰੁਕ੍ਖਾਦਿਸਮ੍ਬਨ੍ਧੇਨ ਉਪ੍ਪਜ੍ਜਨਕੋ ਈਦਿਸੋ ਪਾਲ਼ਿਮੁਤ੍ਤਕੋ ਸਮ੍ਭੇਦਦੋਸੋ ਅਤ੍ਥੀਤਿ ਦਸ੍ਸੇਤਿ. ਸੋ ਚ ‘‘ਨ, ਭਿਕ੍ਖਵੇ, ਸੀਮਾਯ ਸੀਮਾ ਸਮ੍ਭਿਨ੍ਦਿਤਬ੍ਬਾ’’ਤਿਆਦਿਨਾ ਬਦ੍ਧਸੀਮਾਨਂ ਅਞ੍ਞਮਞ੍ਞਂ ਸਮ੍ਭੇਦਜ੍ਝੋਤ੍ਥਰਣਂ ਪਟਿਕ੍ਖਿਪਿਤ੍ਵਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਸੀਮਂ ਸਮ੍ਮਨ੍ਨਨ੍ਤੇਨ ਸੀਮਨ੍ਤਰਿਕਂ ਠਪੇਤ੍ਵਾ ਸੀਮਂ ਸਮ੍ਮਨ੍ਨਿਤੁ’’ਨ੍ਤਿ ਉਭਿਨ੍ਨਂ (ਮਹਾਵ. ੧੪੮) ਬਦ੍ਧਸੀਮਾਨਮਨ੍ਤਰਾ ਸੀਮਨ੍ਤਰਿਕਂ ਠਪੇਤ੍ਵਾਵ ਬਨ੍ਧਿਤੁਂ ਅਨੁਜਾਨਨ੍ਤੇਨ ਸਮ੍ਭੇਦਜ੍ਝੋਤ੍ਥਰਣਂ ਵਿਯ ਤਾਸਂ ਅਞ੍ਞਮਞ੍ਞਂ ਫੁਸਿਤ੍ਵਾ ਤਿਟ੍ਠਨਵਸੇਨ ਬਨ੍ਧਨਮ੍ਪਿ ਨ ਵਟ੍ਟਤੀਤਿ ਸਿਦ੍ਧਤ੍ਤਾ ਬਦ੍ਧਾਨਮ੍ਪਿ ਤਾਸਂ ਪਚ੍ਛਾ ਅਞ੍ਞਮਞ੍ਞਂ ਏਕਰੁਕ੍ਖਾਦੀਹਿ ¶ ਫੁਸਿਤ੍ਵਾ ਠਾਨਮ੍ਪਿ ਨ ਵਟ੍ਟਤੀਤਿ ਭਗਵਤੋ ਅਧਿਪ੍ਪਾਯਞ੍ਞੂਹਿ ਸਙ੍ਗੀਤਿਕਾਰਕੇਹਿ ਨਿਦ੍ਧਾਰਿਤੋ. ਬਨ੍ਧਨਕਾਲੇ ਪਟਿਕ੍ਖਿਤ੍ਤਸ੍ਸ ਸਮ੍ਬਨ੍ਧਦੋਸਸ੍ਸ ਅਨੁਲੋਮੇਨ ਅਕਪ੍ਪਿਯਾਨੁਲੋਮਤ੍ਤਾ.

ਅਯਂ ਪਨ ਸਮ੍ਬਨ੍ਧਦੋਸੋ – ਪੁਬ੍ਬੇ ਸੁਟ੍ਠੁ ਬਦ੍ਧਾਨਂ ਪਚ੍ਛਾ ਸਞ੍ਜਾਤਤ੍ਤਾ ਬਜ੍ਝਮਾਨਕ੍ਖਣੇ ਵਿਯ ਅਸੀਮਤ੍ਤਂ ਕਾਤੁਂ ਨ ਸਕ੍ਕੋਤਿ. ਤਸ੍ਮਾ ਰੁਕ੍ਖਾਦਿਸਮ੍ਬਨ੍ਧੇ ਅਪਨੀਤਮਤ੍ਤੇ ਤਾ ਸੀਮਾ ਪਾਕਤਿਕਾ ਹੋਨ੍ਤਿ. ਯਥਾ ਚਾਯਂ ਪਚ੍ਛਾ ਨ ਵਟ੍ਟਤਿ, ਏਵਂ ਬਜ੍ਝਮਾਨਕ੍ਖਣੇਪਿ ਤਾਸਂ ਰੁਕ੍ਖਾਦਿਸਮ੍ਬਨ੍ਧੇ ਸਤਿ ਤਾ ਬਨ੍ਧਿਤੁਂ ਨ ਵਟ੍ਟਤੀਤਿ ਦਟ੍ਠਬ੍ਬਂ.

ਕੇਚਿ ਪਨ ‘‘ਮਹਾਸੀਮਂ ਵਾ ਸੋਧੇਤ੍ਵਾਤਿ ਏਤ੍ਥ ਮਹਾਸੀਮਾਗਤਾ ਭਿਕ੍ਖੂ ਯਥਾ ਤਂ ਸਾਖਂ ਵਾ ਪਾਰੋਹਂ ਵਾ ਕਾਯਪਟਿਬਦ੍ਧੇਹਿ ਨ ਫੁਸਨ੍ਤਿ, ਏਵਂ ਸੋਧਨਮੇਵ ਇਧਾਧਿਪ੍ਪੇਤਂ, ਨ ਸਕਲਸੀਮਾਸੋਧਨ’’ਨ੍ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਅਟ੍ਠਕਥਾਯ ਵਿਰੁਜ੍ਝਨਤੋ. ਤਥਾ ਹਿ ‘‘ਮਹਾਸੀਮਾਯ ਪਥਵਿਤਲਂ ਵਾ ਤਤ੍ਥਜਾਤਰੁਕ੍ਖਾਦੀਨਿ ਵਾ ਆਹਚ੍ਚ ਤਿਟ੍ਠਤੀ’’ਤਿ ਏਵਂ ਸਾਖਾਪਾਰੋਹਾਨਂ ਮਹਾਸੀਮਂ ਫੁਸਿਤ੍ਵਾ ਠਾਨਮੇਵ ਸਮ੍ਬਨ੍ਧਦੋਸੇ ਕਾਰਣਤ੍ਤੇਨ ਵੁਤ੍ਤਂ, ਨ ਪਨ ਤਤ੍ਥ ਠਿਤਭਿਕ੍ਖੂਹਿ ਸਾਖਾਦੀਨਂ ਫੁਸਨਂ. ਯਦਿ ਹਿ ਭਿਕ੍ਖੂਨਂ ਸਾਖਾਦਿ ਫੁਸਿਤ੍ਵਾ ਠਾਨਮੇਵ ਕਾਰਣਂ ਸਿਯਾ, ਤਸ੍ਸ ਸਾਖਂ ਵਾ ਤਤੋ ਨਿਗ੍ਗਤਪਾਰੋਹਂ ਵਾ ਮਹਾਸੀਮਾਯ ਪਵਿਟ੍ਠਂ ਤਤ੍ਰਟ੍ਠੋ ਕੋਚਿ ਭਿਕ੍ਖੁ ਫੁਸਿਤ੍ਵਾ ਤਿਟ੍ਠਤੀਤਿ ਭਿਕ੍ਖੁਫੁਸਨਮੇਵ ਵਤ੍ਤਬ੍ਬਂ ਸਿਯਾ. ਯਞ੍ਹਿ ਤਤ੍ਥ ਮਹਾਸੀਮਾਸੋਧਨੇ ਕਾਰਣਂ, ਤਦੇਵ ਤਸ੍ਮਿਂ ਵਾਕ੍ਯੇ ਪਧਾਨਤੋ ਦਸ੍ਸੇਤਬ੍ਬਂ. ਨ ਹਿ ਆਹਚ੍ਚ ਠਿਤਮੇਵ ਸਾਖਾਦਿਂ ਫੁਸਿਤ੍ਵਾ ਠਿਤੋ ਭਿਕ੍ਖੁ ਸੋਧੇਤਬ੍ਬੋ ਆਕਾਸਟ੍ਠਸਾਖਾਦਿਂ ਫੁਸਿਤ੍ਵਾ ਠਿਤਸ੍ਸਾਪਿ ਸੋਧੇਤਬ੍ਬਤੋ, ਕਿਂ ਨਿਰਤ੍ਥਕੇਨ ਆਹਚ੍ਚਟ੍ਠਾਨਵਚਨੇਨ. ਆਕਾਸਟ੍ਠਸਾਖਾਸੁ ਚ ਭਿਕ੍ਖੁਨੋ ਫੁਸਨਮੇਵ ਕਾਰਣਤ੍ਤੇਨ ਵੁਤ੍ਤਂ, ਸੋਧਨਞ੍ਚ ਤਸ੍ਸੇਵ ਭਿਕ੍ਖੁਸ੍ਸ ਹਤ੍ਥਪਾਸਾਨਯਨਾਦਿਵਸੇਨ ਸੋਧਨਂ ਵੁਤ੍ਤਂ. ਇਧ ਪਨ ‘‘ਮਹਾਸੀਮਂ ਸੋਧੇਤ੍ਵਾ’’ਤਿ ਸਕਲਸੀਮਾਸਾਧਾਰਣਵਚਨੇਨ ਸੋਧਨਂ ਵੁਤ੍ਤਂ.

ਅਪਿਚ ਸਾਖਾਦਿਂ ਫੁਸਿਤ੍ਵਾ ਠਿਤਭਿਕ੍ਖੁਮਤ੍ਤਸੋਧਨੇ ਅਭਿਮਤੇ ‘‘ਮਹਾਸੀਮਾਯ ਪਥਵਿਤਲ’’ਨ੍ਤਿ ਵਿਸੇਸਸੀਮੋਪਾਦਾਨਂ ¶ ਨਿਰਤ੍ਥਕਂ ਸਿਯਾ ਯਤ੍ਥ ਕਤ੍ਥਚਿ ਅਨ੍ਤਮਸੋ ਆਕਾਸੇਪਿ ਠਤ੍ਵਾ ਸਾਖਾਦਿਂ ਫੁਸਿਤ੍ਵਾ ਠਿਤਸ੍ਸ ਵਿਸੋਧੇਤਬ੍ਬਤੋ. ਛਿਨ੍ਦਿਤ੍ਵਾ ¶ ਬਹਿਟ੍ਠਕਾ ਕਾਤਬ੍ਬਾਤਿ ਤਤ੍ਥ ਪਤਿਟ੍ਠਿਤਭਾਵਵਿਯੋਜਨਵਚਨਤੋ ਚ ਵਿਸਭਾਗਸੀਮਾਨਂ ਫੁਸਨੇਨੇਵ ਸਕਲਸੀਮਾਸੋਧਨਹੇਤੁਕੋ ਅਟ੍ਠਕਥਾਸਿਦ੍ਧੋਯਂ ਏਕੋ ਸਮ੍ਬਨ੍ਧਦੋਸੋ ਅਤ੍ਥੇਵਾਤਿ ਗਹੇਤਬ੍ਬੋ. ਤੇਨੇਵ ਉਦਕੁਕ੍ਖੇਪਸੀਮਾਕਥਾਯਮ੍ਪਿ (ਮਹਾਵ. ਅਟ੍ਠ. ੧੪੭) ‘‘ਵਿਹਾਰਸੀਮਾਯ ਵਾ ਗਾਮਸੀਮਾਯ ਵਾ ਪਤਿਟ੍ਠਿਤੋ’’ਤਿ ਚ ‘‘ਨਦਿਤੀਰੇ ਪਨ ਖਾਣੁਕਂ ਕੋਟ੍ਟੇਤ੍ਵਾ ਤਤ੍ਥ ਬਦ੍ਧਨਾਵਾਯ ਨ ਵਟ੍ਟਤੀ’’ਤਿ ਚ ‘‘ਸਚੇ ਪਨ ਸੇਤੁ ਵਾ ਸੇਤੁਪਾਦਾ ਵਾ ਬਹਿਤੀਰੇ ਪਤਿਟ੍ਠਿਤਾ, ਕਮ੍ਮਂ ਕਾਤੁਂ ਨ ਵਟ੍ਟਤੀ’’ਤਿ ਚ ਏਵਂ ਵਿਸਭਾਗਾਸੁ ਗਾਮਸੀਮਾਸੁ ਸਾਖਾਦੀਨਂ ਫੁਸਨਮੇਵ ਸਙ੍ਕਰਦੋਸਕਾਰਣਤ੍ਤੇਨ ਵੁਤ੍ਤਂ, ਨ ਭਿਕ੍ਖੁਫੁਸਨਂ. ਤਥਾ ਹਿ ‘‘ਅਨ੍ਤੋਨਦਿਯਂ ਜਾਤਰੁਕ੍ਖੇ ਬਨ੍ਧਿਤ੍ਵਾ ਕਮ੍ਮਂ ਕਾਤਬ੍ਬ’’ਨ੍ਤਿ ਨਦਿਯਂ ਨਾਵਾਬਨ੍ਧਨਂ ਅਨੁਞ੍ਞਾਤਂ ਉਦਕੁਕ੍ਖੇਪਨਿਸ੍ਸਯਤ੍ਤੇਨ ਨਦਿਸੀਮਾਯ ਸਭਾਗਤ੍ਤਾ. ਯਦਿ ਹਿ ਭਿਕ੍ਖੂਨਂ ਫੁਸਨਮੇਵ ਪਟਿਚ੍ਚ ਸਬ੍ਬਤ੍ਥ ਸਮ੍ਬਨ੍ਧਦੋਸੋ ਵੁਤ੍ਤੋ ਸਿਯਾ, ਨਦਿਯਮ੍ਪਿ ਬਨ੍ਧਨਂ ਪਟਿਕ੍ਖਿਪਿਤਬ੍ਬਂ ਭਵੇਯ੍ਯ. ਤਤ੍ਥਾਪਿ ਹਿ ਭਿਕ੍ਖੁਫੁਸਨਂ ਕਮ੍ਮਕੋਪਕਾਰਣਂ ਹੋਤਿ, ਤਸ੍ਮਾ ਸਭਾਗਸੀਮਾਸੁ ਪਵਿਸਿਤ੍ਵਾ ਭੂਮਿਆਦਿਂ ਫੁਸਿਤ੍ਵਾ ਵਾ ਅਫੁਸਿਤ੍ਵਾ ਵਾ ਸਾਖਾਦਿਮ੍ਹਿ ਠਿਤੇ ਤਂ ਸਾਖਾਦਿਂ ਫੁਸਨ੍ਤੋਵ ਭਿਕ੍ਖੁ ਸੋਧੇਤਬ੍ਬੋ. ਵਿਸਭਾਗਸੀਮਾਸੁ ਪਨ ਸਾਖਾਦਿਮ੍ਹਿ ਫੁਸਿਤ੍ਵਾ ਠਿਤੇ ਤਂ ਸਾਖਾਦਿਂ ਅਫੁਸਨ੍ਤਾਪਿ ਸਬ੍ਬੇ ਭਿਕ੍ਖੂ ਸੋਧੇਤਬ੍ਬਾ. ਅਫੁਸਿਤ੍ਵਾ ਠਿਤੇ ਪਨ ਤਂ ਸਾਖਾਦਿਂ ਫੁਸਨ੍ਤੋਵ ਭਿਕ੍ਖੁ ਸੋਧੇਤਬ੍ਬੋਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ.

ਯਂ ਪਨੇਤ੍ਥ ਕੇਚਿ ‘‘ਬਦ੍ਧਸੀਮਾਨਂ ਦ੍ਵਿਨ੍ਨਂ ਅਞ੍ਞਮਞ੍ਞਂ ਵਿਯ ਬਦ੍ਧਸੀਮਾਗਾਮਸੀਮਾਨਮ੍ਪਿ ਤਦਞ੍ਞਾਸਮ੍ਪਿ ਸਬ੍ਬਾਸਂ ਸਮਾਨਸਂਵਾਸਕਸੀਮਾਨਂ ਅਞ੍ਞਮਞ੍ਞਂ ਰੁਕ੍ਖਾਦਿਸਮ੍ਬਨ੍ਧੇ ਸਤਿ ਤਦੁਭਯਮ੍ਪਿ ਏਕਸੀਮਂ ਵਿਯ ਸੋਧੇਤ੍ਵਾ ਏਕਤ੍ਥੇਵ ਕਮ੍ਮਂ ਕਾਤਬ੍ਬਂ, ਅਞ੍ਞਤ੍ਥ ਕਤਂ ਕਮ੍ਮਂ ਵਿਪਜ੍ਜਤਿ, ਨਤ੍ਥੇਤ੍ਥ ਸਭਾਗਵਿਸਭਾਗਭੇਦੋ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ, ਸਭਾਗਸੀਮਾਨਂ ਅਞ੍ਞਮਞ੍ਞਂ ਸਮ੍ਭੇਦਦੋਸਾਭਾਵਸ੍ਸ ਵਿਸਭਾਗਸੀਮਾਨਮੇਵ ਤਬ੍ਭਾਵਸ੍ਸ ਸੁਤ੍ਤਸੁਤ੍ਤਾਨੁਲੋਮਾਦਿਵਿਨਯਨਯੇਹਿ ਸਿਦ੍ਧਤ੍ਤਾ. ਤਥਾ ਹਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਸੀਮਂ ਸਮ੍ਮਨ੍ਨਿਤੁ’’ਨ੍ਤਿ ਗਾਮਸੀਮਾਯਮੇਵ ਬਦ੍ਧਸੀਮਂ ਸਮ੍ਮਨ੍ਨਿਤੁਂ ਅਨੁਞ੍ਞਾਤਂ. ਤਾਸਂ ਨਿਸ੍ਸਯਨਿਸ੍ਸਿਤਭਾਵੇਨ ਸਭਾਗਤਾ, ਸਮ੍ਭੇਦਜ੍ਝੋਤ੍ਥਰਣਾਦਿਦੋਸਾਭਾਵੋ ਚ ਸੁਤ੍ਤਤੋਵ ਸਿਦ੍ਧੋ. ਬਨ੍ਧਨਕਾਲੇ ਪਨ ਅਨੁਞ੍ਞਾਤਸ੍ਸ ਸਮ੍ਬਨ੍ਧਸ੍ਸ ਅਨੁਲੋਮਤੋ ਪਚ੍ਛਾ ਸਞ੍ਜਾਤਰੁਕ੍ਖਾਦਿਸਮ੍ਬਨ੍ਧੋਪਿ ਤਾਸਂ ਵਟ੍ਟਤਿ ਏਵ. ‘‘ਯਂ, ਭਿਕ੍ਖਵੇ…ਪੇ… ਕਪ੍ਪਿਯਂ ਅਨੁਲੋਮੇਤਿ ਅਕਪ੍ਪਿਯਂ ਪਟਿਬਾਹਤਿ. ਤਂ ਵੋ ਕਪ੍ਪਤੀ’’ਤਿ (ਮਹਾਵ. ੩੦੫) ਵੁਤ੍ਤਤ੍ਤਾ. ਏਵਂ ਤਾਵ ਬਦ੍ਧਸੀਮਾਗਾਮਸੀਮਾਨਂ ਅਞ੍ਞਮਞ੍ਞਂ ਸਭਾਗਤਾ, ਸਮ੍ਭੇਦਾਦਿਦੋਸਾਭਾਵੋ ਚ ¶ ਸੁਤ੍ਤਸੁਤ੍ਤਾਨੁਲੋਮਤੋ ਸਿਦ੍ਧੋ. ਇਮਿਨਾ ਏਵ ਨਯੇਨ ਅਰਞ੍ਞਸੀਮਾਸਤ੍ਤਬ੍ਭਨ੍ਤਰਸੀਮਾਨਂ, ਨਦਿਆਦਿਉਦਕੁਕ੍ਖੇਪਸੀਮਾਨਞ੍ਚ ਸੁਤ੍ਤਸੁਤ੍ਤਾਨੁਲੋਮਤੋ ਅਞ੍ਞਮਞ੍ਞਂ ਸਭਾਗਤਾ, ਸਮ੍ਭੇਦਾਦਿਦੋਸਾਭਾਵੋ ਚ ਸਿਦ੍ਧੋਤਿ ਵੇਦਿਤਬ੍ਬੋ.

ਬਦ੍ਧਸੀਮਾਯ ¶ ਪਨ ਅਞ੍ਞਾਯ ਬਦ੍ਧਸੀਮਾਯ, ਨਦਿਆਦਿਸੀਮਾਸੁ ਚ ਬਨ੍ਧਿਤੁਂ ਪਟਿਕ੍ਖੇਪਸਿਦ੍ਧਿਤੋ ਚੇਵ ਉਦਕੁਕ੍ਖੇਪਸਤ੍ਤਬ੍ਭਨ੍ਤਰਸੀਮਾਨਂ ਨਦਿਆਦੀਸੁ ਏਵ ਕਾਤੁਂ ਨਿਯਮਨਸੁਤ੍ਤਸਾਮਤ੍ਥਿਯੇਨ ਬਦ੍ਧਸੀਮਾਗਾਮਸੀਮਾਦੀਸੁ ਕਰਣਪਟਿਕ੍ਖੇਪਸਿਦ੍ਧਿਤੋ ਚ ਤਾਸਂ ਅਞ੍ਞਮਞ੍ਞਂ ਵਿਸਭਾਗਤਾ, ਉਪ੍ਪਤ੍ਤਿਕ੍ਖਣੇ, ਪਚ੍ਛਾ ਚ ਰੁਕ੍ਖਾਦੀਹਿ ਸਮ੍ਭੇਦਾਦਿਦੋਸਸਮ੍ਭਵੋ ਚ ਵੁਤ੍ਤਨਯੇਨ ਸੁਤ੍ਤਸੁਤ੍ਤਾਨੁਲੋਮਤੋ ਚ ਸਿਜ੍ਝਨ੍ਤਿ. ਤੇਨੇਵ ਅਟ੍ਠਕਥਾਯਂ (ਮਹਾਵ. ਅਟ੍ਠ. ੧੪੮) ਵਿਸਭਾਗਸੀਮਾਨਮੇਵ ਵਟਰੁਕ੍ਖਾਦਿਵਚਨੇਹਿ ਸਮ੍ਬਨ੍ਧਦੋਸਂ ਦਸ੍ਸੇਤ੍ਵਾ ਸਭਾਗਾਨਂ ਬਦ੍ਧਸੀਮਾਗਾਮਸੀਮਾਦੀਨਂ ਸਮ੍ਬਨ੍ਧਦੋਸੋ ਨ ਦਸ੍ਸਿਤੋ, ਨ ਕੇਵਲਞ੍ਚ ਨ ਦਸ੍ਸਿਤੋ, ਅਥ ਖੋ ਤਾਸਂ ਸਭਾਗਸੀਮਾਨਂ ਰੁਕ੍ਖਾਦਿਸਮ੍ਬਨ੍ਧੇਪਿ ਦੋਸਾਭਾਵੋ ਪਾਲ਼ਿਅਟ੍ਠਕਥਾਸੁ ਞਾਪਿਤੋ ਏਵ. ਤਥਾ ਹਿ ਪਾਲ਼ਿਯਂ ‘‘ਪਬ੍ਬਤਨਿਮਿਤ੍ਤਂ ਪਾਸਾਣਨਿਮਿਤ੍ਤਂ ਵਨਨਿਮਿਤ੍ਤਂ ਰੁਕ੍ਖਨਿਮਿਤ੍ਤ’’ਨ੍ਤਿਆਦਿਨਾ ਵਡ੍ਢਨਕਨਿਮਿਤ੍ਤਾਨਿ ਅਨੁਞ੍ਞਾਤਾਨਿ. ਤੇਨ ਨੇਸਂ ਰੁਕ੍ਖਾਦੀਨਂ ਨਿਮਿਤ੍ਤਾਨਂ ਵਡ੍ਢਨੇਪਿ ਬਦ੍ਧਸੀਮਾਗਾਮਸੀਮਾਨਂ ਸਙ੍ਕਰਦੋਸਾਭਾਵੋ ਞਾਪਿਤੋਵ ਹੋਤਿ. ਦ੍ਵਿਨ੍ਨਂ ਪਨ ਬਦ੍ਧਸੀਮਾਨਂ ਈਦਿਸੋ ਸਮ੍ਬਨ੍ਧੋ ਨ ਵਟ੍ਟਤਿ. ਵੁਤ੍ਤਞ੍ਹਿ ‘‘ਏਕਰੁਕ੍ਖੋਪਿ ਚ ਦ੍ਵਿਨ੍ਨਂ ਸੀਮਾਨਂ ਨਿਮਿਤ੍ਤਂ ਹੋਤਿ, ਸੋ ਪਨ ਵਡ੍ਢਨ੍ਤੋ ਸੀਮਾਸਙ੍ਕਰਂ ਕਰੋਤਿ, ਤਸ੍ਮਾ ਨ ਕਾਤਬ੍ਬੋ’’ਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਯੋਜਨਪਰਮਂ ਸੀਮਂ ਸਮ੍ਮਨ੍ਨਿਤੁ’’ਨ੍ਤਿ ਵਚਨਤੋਪਿ ਚਾਯਂ ਞਾਪਿਤੋ. ਤਿਯੋਜਨਪਰਮਾਯ ਹਿ ਸੀਮਾਯ ਸਮਨ੍ਤਾ ਪਰਿਯਨ੍ਤੇਸੁ ਰੁਕ੍ਖਲਤਾਗੁਮ੍ਬਾਦੀਹਿ ਬਦ੍ਧਸੀਮਾਗਾਮਸੀਮਾਨਂ ਨਿਯਮੇਨ ਅਞ੍ਞਮਞ੍ਞਂ ਸਮ੍ਬਨ੍ਧਸ੍ਸ ਸਮ੍ਭਵਤੋ ‘‘ਈਦਿਸਂ ਸਮ੍ਬਨ੍ਧਨਂ ਵਿਨਾਸੇਤ੍ਵਾਵ ਸੀਮਾ ਸਮ੍ਮਨ੍ਨਿਤਬ੍ਬਾ’’ਤਿ ਅਟ੍ਠਕਥਾਯਮ੍ਪਿ ਨ ਵੁਤ੍ਤਂ.

ਯਦਿ ਚੇਤ੍ਥ ਰੁਕ੍ਖਾਦਿਸਮ੍ਬਨ੍ਧੇਨ ਕਮ੍ਮਵਿਪਤ੍ਤਿ ਭਵੇਯ੍ਯ, ਅਵਸ੍ਸਮੇਵ ਵਤ੍ਤਬ੍ਬਂ ਸਿਯਾ. ਵਿਪਤ੍ਤਿਪਰਿਹਾਰਤ੍ਥਞ੍ਹਿ ਆਚਰਿਯਾ ਨਿਰਾਸਙ੍ਕਟ੍ਠਾਨੇਸੁਪਿ ‘‘ਭਿਤ੍ਤਿਂ ਅਕਿਤ੍ਤੇਤ੍ਵਾ’’ਤਿਆਦਿਨਾ ਸਿਦ੍ਧਮੇਵਤ੍ਥਂ ਪੁਨਪ੍ਪੁਨਂ ਅਵੋਚੁਂ. ਇਧ ਪਨ ‘‘ਵਨਮਜ੍ਝੇ ਵਿਹਾਰਂ ਕਰੋਨ੍ਤਿ, ਵਨਂ ਨ ਕਿਤ੍ਤੇਤਬ੍ਬ’’ਨ੍ਤਿਆਦਿਰੁਕ੍ਖਲਤਾਦੀਹਿ ਨਿਰਨ੍ਤਰੇ ਵਨਮਜ੍ਝੇਪਿ ਸੀਮਾਬਨ੍ਧਨਮੇਵ ਅਵੋਚੁਂ. ਤਥਾ ਥਮ੍ਭਾਨਂ ਉਪਰਿ ਕਤਪਾਸਾਦਾਦੀਸੁ ਹੇਟ੍ਠਾ ਥਮ੍ਭਾਦੀਹਿ ਏਕਾਬਦ੍ਧੇਸੁ ਉਪਰਿਮਤਲਾਦੀਸੁ ਸੀਮਾਬਨ੍ਧਨਂ ਬਹੁਧਾ ਵੁਤ੍ਤਂ. ਤਸ੍ਮਾ ਬਦ੍ਧਸੀਮਾਗਾਮਸੀਮਾਨਂ ਰੁਕ੍ਖਾਦਿਸਮ੍ਬਨ੍ਧੋ ਤੇਹਿ ਮੁਖਤੋਵ ਵਿਹਿਤੋ. ਅਪਿਚ ਗਾਮਸੀਮਾਨਮ੍ਪਿ ਪਾਟੇਕ੍ਕਂ ਬਦ੍ਧਸੀਮਾਸਦਿਸਤਾਯ ਏਕਿਸ੍ਸਾ ਗਾਮਸੀਮਾਯ ਕਮ੍ਮਂ ¶ ਕਰੋਨ੍ਤੇਹਿ ਦਬ੍ਬਤਿਣਮਤ੍ਤੇਨਾਪਿ ਸਮ੍ਬਨ੍ਧਾ ਗਾਮਨ੍ਤਰਪਰਮ੍ਪਰਾ ਅਰਞ੍ਞਨਦਿਸਮੁਦ੍ਦਾ ਚ ਸੋਧੇਤਬ੍ਬਾਤਿ ਸਕਲਦੀਪਂ ਸੋਧੇਤ੍ਵਾਵ ਕਾਤਬ੍ਬਂ ਸਿਯਾ. ਏਵਂ ਪਨ ਅਸੋਧੇਤ੍ਵਾ ਪਠਮਮਹਾਸਙ੍ਗੀਤਿਕਾਲਤੋ ਪਭੁਤਿ ਕਤਾਨਂ ਉਪਸਮ੍ਪਦਾਦਿਕਮ੍ਮਾਨਂ, ਸੀਮਾਸਮ੍ਮੁਤੀਨਞ੍ਚ ਵਿਪਜ੍ਜਨਤੋ ਸਬ੍ਬੇਸਮ੍ਪਿ ਭਿਕ੍ਖੂਨਂ ਅਨੁਪਸਮ੍ਪਨ੍ਨਸਙ੍ਕਾਪਸਙ੍ਗੋ ਚ ਦੁਨ੍ਨਿਵਾਰੋ ਹੋਤਿ. ਨ ਚੇਤਂ ਯੁਤ੍ਤਂ. ਤਸ੍ਮਾ ਵੁਤ੍ਤਨਯੇਨੇਵ ਵਿਸਭਾਗਸੀਮਾਨਮੇਵ ਰੁਕ੍ਖਾਦੀਹਿ ਸਮ੍ਬਨ੍ਧਦੋਸੋ, ਨ ਬਦ੍ਧਸੀਮਾਗਾਮਸੀਮਾਦੀਨਂ ਸਭਾਗਸੀਮਾਨਨ੍ਤਿ ਗਹੇਤਬ੍ਬਂ.

ਮਹਾਸੀਮਾਸੋਧਨਸ੍ਸ ਦੁਕ੍ਕਰਤਾਯ ਖਣ੍ਡਸੀਮਾਯਮੇਵ ਯੇਭੁਯ੍ਯੇਨ ਸਙ੍ਘਕਮ੍ਮਕਰਣਨ੍ਤਿ ਆਹ ‘‘ਸੀਮਾਮਾਲ਼ਕੇ’’ਤਿਆਦਿ ¶ . ਮਹਾਸਙ੍ਘਸਨ੍ਨਿਪਾਤੇ ਪਨ ਖਣ੍ਡਸੀਮਾਯ ਅਪ੍ਪਹੋਨਕਤਾਯ ਮਹਾਸੀਮਾਯ ਕਮ੍ਮੇ ਕਰਿਯਮਾਨੇਪਿ ਅਯਂ ਨਯੋ ਗਹੇਤਬ੍ਬੋਵ.

‘‘ਉਕ੍ਖਿਪਾਪੇਤ੍ਵਾ’’ਤਿ ਇਮਿਨਾ ਕਾਯਪਟਿਬਦ੍ਧੇਨਪਿ ਸੀਮਂ ਫੁਸਨ੍ਤੋ ਸੀਮਟ੍ਠੋਵ ਹੋਤੀਤਿ ਦਸ੍ਸੇਤਿ. ਪੁਰਿਮਨਯੇਪੀਤਿ ਖਣ੍ਡਸੀਮਤੋ ਮਹਾਸੀਮਂ ਪਵਿਟ੍ਠਸਾਖਾਨਯੇਪਿ. ਸੀਮਟ੍ਠਰੁਕ੍ਖਸਾਖਾਯ ਨਿਸਿਨ੍ਨੋ ਸੀਮਟ੍ਠੋਵ ਹੋਤੀਤਿ ਆਹ ‘‘ਹਤ੍ਥਪਾਸਮੇਵ ਆਨੇਤਬ੍ਬੋ’’ਤਿ. ਏਤ੍ਥ ਚ ਰੁਕ੍ਖਸਾਖਾਦੀਹਿ ਅਞ੍ਞਮਞ੍ਞਂ ਸਮ੍ਬਨ੍ਧਾਸੁ ਏਤਾਸੁ ਖਨ੍ਧਸੀਮਾਯਂ ਤਯੋ ਭਿਕ੍ਖੂ, ਮਹਾਸੀਮਾਯਂ ਦ੍ਵੇਤਿ ਏਵਂ ਦ੍ਵੀਸੁ ਸੀਮਾਸੁ ਸੀਮਨ੍ਤਰਿਕਂ ਅਫੁਸਿਤ੍ਵਾ, ਹਤ੍ਥਪਾਸਞ੍ਚ ਅਵਿਜਹਿਤ੍ਵਾ ਠਿਤੇਹਿ ਪਞ੍ਚਹਿ ਭਿਕ੍ਖੂਹਿ ਉਪਸਮ੍ਪਦਾਦਿਕਮ੍ਮਂ ਕਾਤੁਂ ਵਟ੍ਟਤੀਤਿ ਕੇਚਿ ਵਦਨ੍ਤਿ. ਤਂ ਨ ਯੁਤ੍ਤਂ ‘‘ਨਾਨਾਸੀਮਾਯ ਠਿਤਚਤੁਤ੍ਥੋ ਕਮ੍ਮਂ ਕਰੇਯ੍ਯ, ਅਕਮ੍ਮਂ, ਨ ਚ ਕਰਣੀਯ’’ਨ੍ਤਿਆਦਿ (ਮਹਾਵ. ੩੮੯) ਵਚਨਤੋ. ਤੇਨੇਵੇਤ੍ਥਾਪਿ ਮਹਾਸੀਮਂ ਸੋਧੇਤ੍ਵਾ ਮਾਲ਼ਕਸੀਮਾਯਮੇਵ ਕਮ੍ਮਕਰਣਂ ਵਿਹਿਤਂ. ਅਞ੍ਞਥਾ ਭਿਨ੍ਨਸੀਮਟ੍ਠਤਾਯ ਤਤ੍ਰਟ੍ਠਸ੍ਸ ਗਣਪੂਰਕਤ੍ਤਾਭਾਵਾ ਕਮ੍ਮਕੋਪੋਵ ਹੋਤੀਤਿ.

ਯਦਿ ਏਵਂ ਕਥਂ ਛਨ੍ਦਪਾਰਿਸੁਦ੍ਧਿਆਹਰਣਵਸੇਨ ਮਹਾਸੀਮਾਸੋਧਨਨ੍ਤਿ? ਤਮ੍ਪਿ ਵਿਨਯਞ੍ਞੂ ਨ ਇਚ੍ਛਨ੍ਤਿ, ਹਤ੍ਥਪਾਸਾਨਯਨਬਹਿਸੀਮਾਕਰਣਵਸੇਨੇਵ ਪਨੇਤ੍ਥ ਸੋਧਨਂ ਇਚ੍ਛਨ੍ਤਿ, ਦਿਨ੍ਨਸ੍ਸਾਪਿ ਛਨ੍ਦਸ੍ਸ ਅਨਾਗਮਨੇਨ ਮਹਾਸੀਮਟ੍ਠੋ ਕਮ੍ਮਂ ਕੋਪੇਤੀਤਿ. ਯਦਿ ਚਸ੍ਸ ਛਨ੍ਦਾਦਿ ਨਾਗਚ੍ਛਤਿ, ਕਥਂ ਸੋ ਕਮ੍ਮਂ ਕੋਪੇਸ੍ਸਤੀਤਿ? ਦ੍ਵਿਨ੍ਨਂ ਵਿਸਭਾਗਸੀਮਾਨਂ ਸਮ੍ਬਨ੍ਧਦੋਸਤੋ. ਸੋ ਚ ਸਮ੍ਬਨ੍ਧਦੋਸੋ ਅਟ੍ਠਕਥਾਵਚਨਪ੍ਪਮਾਣਤੋ. ਨ ਹਿ ਵਿਨਯੇ ਸਬ੍ਬਤ੍ਥ ਯੁਤ੍ਤਿ ਸਕ੍ਕਾ ਞਾਤੁਂ ਬੁਦ੍ਧਗੋਚਰਤ੍ਤਾਤਿ ਵੇਦਿਤਬ੍ਬਂ. ਕੇਚਿ ਪਨ ‘‘ਸਚੇ ਦ੍ਵੇਪਿ ਸੀਮਾਯੋ ਪੂਰੇਤ੍ਵਾ ਨਿਰਨ੍ਤਰਂ ¶ ਠਿਤੇਸੁ ਭਿਕ੍ਖੂਸੁ ਕਮ੍ਮਂ ਕਰੋਨ੍ਤੇਸੁ ਏਕਿਸ੍ਸਾ ਏਵ ਸੀਮਾਯ ਗਣੋ ਚ ਉਪਸਮ੍ਪਦਾਪੇਕ੍ਖੋ ਚ ਅਨੁਸ੍ਸਾਵਕੋ ਚ ਏਕਤੋ ਤਿਟ੍ਠਤਿ, ਕਮ੍ਮਂ ਸੁਕਤਮੇਵ ਹੋਤਿ. ਸਚੇ ਪਨ ਕਮ੍ਮਾਰਹੋ ਵਾ ਅਨੁਸ੍ਸਾਵਕੋ ਵਾ ਸੀਮਨ੍ਤਰਟ੍ਠੋ ਹੋਤਿ, ਕਮ੍ਮਂ ਵਿਪਜ੍ਜਤੀ’’ਤਿ ਵਦਨ੍ਤਿ, ਤਞ੍ਚ ਬਦ੍ਧਸੀਮਾਗਾਮਸੀਮਾਦਿਸਭਾਗਸੀਮਾਸੁ ਏਵ ਯੁਜ੍ਜਤਿ, ਯਾਸੁ ਅਞ੍ਞਮਞ੍ਞਂ ਰੁਕ੍ਖਾਦਿਸਮ੍ਬਨ੍ਧੇਸੁਪਿ ਦੋਸੋ ਨਤ੍ਥਿ. ਯਾਸੁ ਪਨ ਅਤ੍ਥਿ, ਨ ਤਾਸੁ ਵਿਸਭਾਗਸੀਮਾਸੁ ਰੁਕ੍ਖਾਦਿਸਮ੍ਬਨ੍ਧੇ ਸਤਿ ਏਕਤ੍ਥ ਠਿਤੋ ਇਤਰਟ੍ਠਾਨਂ ਕਮ੍ਮਂ ਕੋਪੇਤਿ ਏਵ ਅਟ੍ਠਕਥਾਯਂ ਸਾਮਞ੍ਞਤੋ ਸੋਧਨਸ੍ਸ ਵੁਤ੍ਤਤ੍ਤਾਤਿ ਅਮ੍ਹਾਕਂ ਖਨ੍ਤਿ. ਵੀਮਂਸਿਤ੍ਵਾ ਗਹੇਤਬ੍ਬਂ.

ਨ ਓਤਰਤੀਤਿ ਪਣਵਸਣ੍ਠਾਨਪਬ੍ਬਤਾਦੀਸੁ ਹੇਟ੍ਠਾ ਪਮਾਣਰਹਿਤਟ੍ਠਾਨਂ ਨ ਓਤਰਤਿ. ਕਿਞ੍ਚਾਪਿ ਪਨੇਤ੍ਥ ਬਜ੍ਝਮਾਨਕ੍ਖਣੇ ਉਦ੍ਧਮ੍ਪਿ ਪਮਾਣਰਹਿਤਂ ਪਬ੍ਬਤਾਦੀਨਿ ਨਾਰੋਹਤਿ, ਤਥਾਪਿ ਤਂ ਪਚ੍ਛਾ ਸੀਮਟ੍ਠਤਾਯ ਸੀਮਾ ਹੋਤਿ. ਹੇਟ੍ਠਾ ਪਣਵਸਣ੍ਠਾਨਾਦਿ ਪਨ ਉਪਰਿ ਬਦ੍ਧਾਯਪਿ ਸੀਮਾਯ ਸੀਮਾਸਙ੍ਖ੍ਯਂ ਨ ਗਚ੍ਛਤਿ, ਤਸ੍ਸ ਵਸੇਨ ਨ ਓਤਰਤੀਤਿ ਵੁਤ੍ਤਂ, ਇਤਰਥਾ ਓਰੋਹਣਾਰੋਹਣਾਨਂ ਸਾਧਾਰਣਵਸੇਨ ‘‘ਨ ਓਤਰਤੀ’’ਤਿਆਦਿਨਾ ¶ ਵਤ੍ਤਬ੍ਬਤੋ. ਯਂ ਕਿਞ੍ਚੀਤਿ ਨਿਟ੍ਠਿਤਸੀਮਾਯ ਉਪਰਿ ਜਾਤਂ ਵਿਜ੍ਜਮਾਨਂ ਪੁਬ੍ਬੇ ਠਿਤਂ, ਪਚ੍ਛਾ ਸਞ੍ਜਾਤਂ, ਪਵਿਟ੍ਠਞ੍ਚ ਯਂਕਿਞ੍ਚਿ ਸਵਿਞ੍ਞਾਣਕਾਵਿਞ੍ਞਾਣਕਂ ਸਬ੍ਬਮ੍ਪੀਤਿ ਅਤ੍ਥੋ. ਅਨ੍ਤੋਸੀਮਾਯ ਹਿ ਹਤ੍ਥਿਕ੍ਖਨ੍ਧਾਦਿਸਵਿਞ੍ਞਾਣਕੇਸੁ ਨਿਸਿਨ੍ਨੋਪਿ ਭਿਕ੍ਖੁ ਸੀਮਟ੍ਠੋਵ ਹੋਤਿ. ‘‘ਬਦ੍ਧਸੀਮਾਯਾ’’ਤਿ ਇਦਞ੍ਚ ਪਕਰਣਵਸੇਨ ਉਪਲਕ੍ਖਣਤੋ ਵੁਤ੍ਤਂ. ਅਬਦ੍ਧਸੀਮਾਸੁਪਿ ਸਬ੍ਬਾਸੁ ਠਿਤਂ ਤਂ ਸੀਮਾਸਙ੍ਖ੍ਯਮੇਵ ਗਚ੍ਛਤਿ.

ਏਕਸਮ੍ਬਦ੍ਧੇਨ ਗਤਨ੍ਤਿ ਰੁਕ੍ਖਲਤਾਦਿਤਤ੍ਰਜਾਤਮੇਵ ਸਨ੍ਧਾਯ ਵੁਤ੍ਤਂ. ਤਾਦਿਸਮ੍ਪਿ ‘‘ਇਤੋ ਗਤ’’ਨ੍ਤਿ ਵਤ੍ਤਬ੍ਬਤਂ ਅਰਹਤਿ. ਯਂ ਪਨ ‘‘ਇਤੋ ਗਤ’’ਨ੍ਤਿ ਵਾ ‘‘ਤਤੋ ਆਗਤ’’ਨ੍ਤਿ ਵਾ ਵਤ੍ਤੁਂ ਅਸਕ੍ਕੁਣੇਯ੍ਯਂ ਉਭੋਸੁ ਬਦ੍ਧਸੀਮਾਗਾਮਸੀਮਾਸੁ, ਉਦਕੁਕ੍ਖੇਪਨਦਿਆਦੀਸੁ ਚ ਤਿਰਿਯਂ ਪਤਿਤਰਜ੍ਜੁਦਣ੍ਡਾਦਿ, ਤਤ੍ਥ ਕਿਂ ਕਾਤਬ੍ਬਨ੍ਤਿ? ਏਤ੍ਥ ਪਨ ਬਦ੍ਧਸੀਮਾਯ ਪਤਿਟ੍ਠਿਤਭਾਗੋ ਬਦ੍ਧਸੀਮਾ, ਅਬਦ੍ਧਗਾਮਸੀਮਾਯ ਪਤਿਟ੍ਠਿਤਭਾਗੋ ਗਾਮਸੀਮਾ ਤਦੁਭਯਸੀਮਟ੍ਠਪਬ੍ਬਤਾਦਿ ਵਿਯ. ਬਦ੍ਧਸੀਮਤੋ ਉਟ੍ਠਿਤਵਟਰੁਕ੍ਖਸ੍ਸ ਪਾਰੋਹੇ, ਗਾਮਸੀਮਾਯ ਗਾਮਸੀਮਤੋ ਉਟ੍ਠਿਤਵਟਰੁਕ੍ਖਸ੍ਸ ਪਾਰੋਹੇ ਚ ਬਦ੍ਧਸੀਮਾਯ ਪਤਿਟ੍ਠਿਤੇਪਿ ਏਸੇਵ ਨਯੋ. ਮੂਲਪਤਿਟ੍ਠਿਤਕਾਲਤੋ ਹਿ ਪਟ੍ਠਾਯ ‘‘ਇਤੋ ਗਤਂ, ਤਤੋ ਆਗਤ’’ਨ੍ਤਿ ਵਤ੍ਤੁਂ ਅਸਕ੍ਕੁਣੇਯ੍ਯਤੋ ਸੋ ਭਾਗੋ ਯਥਾਪਵਿਟ੍ਠਸੀਮਾਸਙ੍ਖ੍ਯਮੇਵ ਗਚ੍ਛਤਿ, ਤੇਸਂ ਰੁਕ੍ਖਪਾਰੋਹਾਨਂ ਅਨ੍ਤਰਾ ਪਨ ਆਕਾਸਟ੍ਠਸਾਖਾ ਭੂਮਿਯਂ ਸੀਮਾਪਰਿਚ੍ਛੇਦਪ੍ਪਮਾਣੇਨ ¶ ਤਦੁਭਯਸੀਮਾ ਹੋਤੀਤਿ ਕੇਚਿ ਵਦਨ੍ਤਿ. ਯਸ੍ਮਾ ਪਨਸ੍ਸ ਸਾਖਾਯ ਪਾਰੋਹੋ ਪਵਿਟ੍ਠਸੀਮਾਯ ਪਥਵਿਯਂ ਮੂਲੇਹਿ ਪਤਿਟ੍ਠਹਿਤ੍ਵਾਪਿ ਯਾਵ ਸਾਖਂ ਵਿਨਾ ਠਾਤੁਂ ਨ ਸਕ੍ਕੋਤਿ, ਤਾਵ ਮੂਲਸੀਮਟ੍ਠਤਂ ਨ ਵਿਜਹਤਿ. ਯਦਾ ਪਨ ਵਿਨਾ ਠਾਤੁਂ ਸਕ੍ਕੋਤਿ, ਤਦਾਪਿ ਪਾਰੋਹਮਤ੍ਤਮੇਵ ਪਵਿਟ੍ਠਸੀਮਟ੍ਠਤਂ ਸਮੁਪੇਤਿ. ਤਸ੍ਮਾ ਸਬ੍ਬੋਪਿ ਆਕਾਸਟ੍ਠਸਾਖਾਭਾਗੋ ਪੁਰਿਮਸੀਮਟ੍ਠਤਂ ਨ ਵਿਜਹਤਿ, ਤਤੋ ਆਗਤਭਾਗਸ੍ਸ ਅਵਿਜਹਿਤਤ੍ਤਾਤਿ ਅਮ੍ਹਾਕਂ ਖਨ੍ਤਿ. ਉਦਕੁਕ੍ਖੇਪਨਦਿਆਦੀਸੁਪਿ ਏਸੇਵ ਨਯੋ. ਤਤ੍ਥ ਚ ਵਿਸਭਾਗਸੀਮਾਯ ਏਵਂ ਪਵਿਟ੍ਠੇ ਸਕਲਸੀਮਾਸੋਧਨਂ, ਸਭਾਗਾਯ ਪਵਿਟ੍ਠੇ ਫੁਸਿਤ੍ਵਾ ਠਿਤਮਤ੍ਤਭਿਕ੍ਖੁਸੋਧਨਞ੍ਚ ਸਬ੍ਬਂ ਪੁਬ੍ਬੇ ਵੁਤ੍ਤਨਯਮੇਵ.

੧੪੦. ਪਾਰਯਤੀਤਿ ਅਜ੍ਝੋਤ੍ਥਰਤਿ, ਨਦਿਯਾ ਉਭੋਸੁ ਤੀਰੇਸੁ ਪਤਿਟ੍ਠਮਾਨਾ ਸੀਮਾ ਨਦਿਅਜ੍ਝੋਤ੍ਥਰਾ ਨਾਮ ਹੋਤੀਤਿ ਆਹ ‘‘ਨਦਿਂਅਜ੍ਝੋਤ੍ਥਰਮਾਨ’’ਨ੍ਤਿ. ਅਨ੍ਤੋਨਦਿਯਞ੍ਹਿ ਸੀਮਾ ਨ ਓਤਰਤਿ. ਨਦਿਲਕ੍ਖਣੇ ਪਨ ਅਸਤਿ ਓਤਰਤਿ, ਸਾ ਚ ਤਦਾ ਨਦਿਪਾਰਸੀਮਾ ਨ ਹੋਤੀਤਿ ਆਹ ‘‘ਨਦਿਯਾ ਲਕ੍ਖਣਂ ਨਦਿਨਿਮਿਤ੍ਤੇ ਵੁਤ੍ਤਨਯਮੇਵਾ’’ਤਿ. ਅਸ੍ਸਾਤਿ ਭਵੇਯ੍ਯ. ਅਵਸ੍ਸਂ ਲਬ੍ਭਨੇਯ੍ਯਾ ਪਨ ਧੁਵਨਾਵਾਵ ਹੋਤੀਤਿ ਸਮ੍ਬਨ੍ਧੋ. ‘‘ਨ ਨਾਵਾਯਾ’’ਤਿ ਇਮਿਨਾ ਨਾਵਂ ਵਿਨਾਪਿ ਸੀਮਾ ਬਦ੍ਧਾ ਸੁਬਦ੍ਧਾ ਏਵ ਹੋਤਿ, ਆਪਤ੍ਤਿਪਰਿਹਾਰਤ੍ਥਾ ਨਾਵਾਤਿ ਦਸ੍ਸੇਤਿ.

ਰੁਕ੍ਖਸਙ੍ਘਾਟਮਯੋਤਿ ¶ ਅਨੇਕਰੁਕ੍ਖੇ ਏਕਤੋ ਘਟੇਤ੍ਵਾ ਕਤਸੇਤੁ. ਰੁਕ੍ਖਂ ਛਿਨ੍ਦਿਤ੍ਵਾ ਕਤੋਤਿ ਪਾਠਸੇਸੋ. ‘‘ਸਬ੍ਬਨਿਮਿਤ੍ਤਾਨਂ ਅਨ੍ਤੋ ਠਿਤੇ ਭਿਕ੍ਖੂ ਹਤ੍ਥਪਾਸਗਤੇ ਕਤ੍ਵਾ’’ਤਿ ਇਦਂ ਉਭਿਨ੍ਨਂ ਤੀਰਾਨਂ ਏਕਗਾਮਖੇਤ੍ਤਭਾਵਂ ਸਨ੍ਧਾਯ ਵੁਤ੍ਤਂ. ਪਬ੍ਬਤਸਣ੍ਠਾਨਾਤਿ ਏਕਤੋ ਉਗ੍ਗਤਦੀਪਸਿਖਰਤ੍ਤਾ ਵੁਤ੍ਤਂ.

ਸੀਮਾਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

੧੪੧. ਸਮੂਹਨਿਤ੍ਵਾਤਿ ਵਿਨਾਸੇਤ੍ਵਾ, ਉਦ੍ਧਰਿਤ੍ਵਾਤਿ ਅਤ੍ਥੋ. ਇਦਞ੍ਚ ਆਪਤ੍ਤਿਪਰਿਹਾਰਤ੍ਥਂ ਵੁਤ੍ਤਂ.

੧੪੨. ਯਾਨਿ ਕਾਨਿਚੀਤਿ ਇਧ ਨਿਮਿਤ੍ਤਾਨਂ ਸੀਮਾਯ ਪਾਲ਼ਿਯਂ ਸਰੂਪਤੋ ਅਵੁਤ੍ਤਤ੍ਤਾ ਵੁਤ੍ਤਂ.

ਉਪੋਸਥਾਗਾਰਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਅਵਿਪ੍ਪਵਾਸਸੀਮਾਨੁਜਾਨਨਕਥਾਵਣ੍ਣਨਾ

੧੪੩. ਅਟ੍ਠਾਰਸਾਤਿ ¶ ਅਨ੍ਧਕਵਿਨ੍ਦਵਿਹਾਰਮ੍ਪਿ ਉਪਾਦਾਯ ਵੁਚ੍ਚਤਿ. ਨੇਸਂ ਸੀਮਾਤਿ ਤੇਸੁ ਮਹਾਵਿਹਾਰੇਸੁ. ‘‘ਮਨ’’ਨ੍ਤਿ ਇਮਸ੍ਸ ਵਿਵਰਣਂ ਈਸਕਨ੍ਤਿ, ਈਸਕਂ ਵੁਲ਼੍ਹੋਤਿ ਅਤ੍ਥੋ. ਇਮਮੇਵਤ੍ਥਂ ਦਸ੍ਸੇਤੁਂ ‘‘ਅਪ੍ਪਤ੍ਤਵੁਲ਼੍ਹਭਾਵੋ ਅਹੋਸੀ’’ਤਿ ਵੁਤ੍ਤਂ. ਅਮਨਸਿਕਰੋਨ੍ਤੋਤਿ ਇਦ੍ਧਿਯਾ ਅਨਤਿਕ੍ਕਮਸ੍ਸ ਕਾਰਣਂ ਵੁਤ੍ਤਂ.

੧੪੪. ਸੋਤਿ ਭਿਕ੍ਖੁਨਿਸਙ੍ਘੋ. ਦ੍ਵੇਪੀਤਿ ਦ੍ਵੇ ਸਮਾਨਸਂਵਾਸਅਵਿਪ੍ਪਵਾਸਾਯੋ. ਅਵਿਪ੍ਪਵਾਸਸੀਮਾਤਿ ਮਹਾਸੀਮਂ ਸਨ੍ਧਾਯ ਵਦਤਿ. ਤਤ੍ਥੇਵ ਯੇਭੁਯ੍ਯੇਨ ਅਵਿਪ੍ਪਵਾਸਾਤਿ.

‘‘ਅਵਿਪ੍ਪਵਾਸਂ ਅਜਾਨਨ੍ਤਾਪੀ’’ਤਿ ਇਦਂ ਮਹਾਸੀਮਾਯ ਵਿਜ੍ਜਮਾਨਾਵਿਜ੍ਜਮਾਨਤ੍ਤਂ, ਤਸ੍ਸਾ ਬਾਹਿਰਪਰਿਚ੍ਛੇਦਞ੍ਚ ਅਜਾਨਨ੍ਤਾਨਂ ਵਸੇਨ ਵੁਤ੍ਤਂ. ਏਵਂ ਅਜਾਨਨ੍ਤੇਹਿਪਿ ਅਨ੍ਤੋਸੀਮਾਯ ਠਤ੍ਵਾ ਕਮ੍ਮਵਾਚਾਯ ਕਤਾਯ ਸਾ ਸੀਮਾ ਸਮੂਹਤਾਵ ਹੋਤੀਤਿ ਆਹ ‘‘ਸਮੂਹਨਿਤੁਞ੍ਚੇਵ ਬਨ੍ਧਿਤੁਞ੍ਚ ਸਕ੍ਖਿਸ੍ਸਨ੍ਤੀ’’ਤਿ. ਨਿਰਾਸਙ੍ਕਟ੍ਠਾਨੇਤਿ ਖਣ੍ਡਸੀਮਾਰਹਿਤਟ੍ਠਾਨੇ. ਇਦਞ੍ਚ ਮਹਾਸੀਮਾਯ ਵਿਜ੍ਜਮਾਨਾਯਪਿ ਕਮ੍ਮਕਰਣਸੁਖਤ੍ਥਂ ਖਣ੍ਡਸੀਮਾ ਇਚ੍ਛਿਤਾਤਿ ਤਂ ਚੇਤਿਯਙ੍ਗਣਾਦਿਬਹੁਸਨ੍ਨਿਪਾਤਟ੍ਠਾਨੇ ਨ ਬਨ੍ਧਤੀਤਿ ਵੁਤ੍ਤਂ. ਤਤ੍ਥਾਪਿ ¶ ਸਾ ਬਦ੍ਧਾ ਸੁਬਦ੍ਧਾ ਏਵ ਮਹਾਸੀਮਾ ਵਿਯ. ‘‘ਪਟਿਬਨ੍ਧਿਤੁਂ ਪਨ ਨ ਸਕ੍ਖਿਸ੍ਸਨ੍ਤੇਵਾ’’ਤਿ ਇਦਂ ਖਣ੍ਡਸੀਮਾਯ ਅਸਮੂਹਤਤ੍ਤਾ, ਤਸ੍ਸਾ ਅਵਿਜ੍ਜਮਾਨਤ੍ਤਸ੍ਸ ਅਜਾਨਨਤੋ ਚ ਮਹਾਸੀਮਾਬਨ੍ਧਨਂ ਸਨ੍ਧਾਯ ਵੁਤ੍ਤਂ. ਖਣ੍ਡਸੀਮਂ ਪਨ ਨਿਰਾਸਙ੍ਕਟ੍ਠਾਨੇ ਬਨ੍ਧਿਤੁਂ ਸਕ੍ਖਿਸ੍ਸਨ੍ਤੇਵ. ਸੀਮਾਸਮ੍ਭੇਦਂ ਕਤ੍ਵਾਤਿ ਖਣ੍ਡਸੀਮਾਯ ਵਿਜ੍ਜਮਾਨਪਕ੍ਖੇ ਸੀਮਾਯ ਸੀਮਂ ਅਜ੍ਝੋਤ੍ਥਰਣਸਮ੍ਭੇਦਂ ਕਤ੍ਵਾ ਅਵਿਜ੍ਜਮਾਨਪਕ੍ਖੇਪਿ ਸਮ੍ਭੇਦਸਙ੍ਕਾਯ ਅਨਿਵਤ੍ਤਨੇਨ ਸਮ੍ਭੇਦਸਙ੍ਕਂ ਕਤ੍ਵਾ. ਅਵਿਹਾਰਂ ਕਰੇਯ੍ਯੁਨ੍ਤਿ ਸਙ੍ਘਕਮ੍ਮਾਨਾਰਹਂ ਕਰੇਯ੍ਯੁਂ. ਪੁਬ੍ਬੇ ਹਿ ਚੇਤਿਯਙ੍ਗਣਾਦਿਨਿਰਾਸਙ੍ਕਟ੍ਠਾਨੇ ਕਮ੍ਮਂ ਕਾਤੁਂ ਸਕ੍ਕਾ, ਇਦਾਨਿ ਤਮ੍ਪਿ ਵਿਨਾਸਿਤਨ੍ਤਿ ਅਧਿਪ੍ਪਾਯੋ. ਨ ਸਮੂਹਨਿਤਬ੍ਬਾਤਿ ਖਣ੍ਡਸੀਮਂ ਅਜਾਨਨ੍ਤੇਹਿ ਨ ਸਮੂਹਨਿਤਬ੍ਬਾ. ਉਭੋਪਿ ਨ ਜਾਨਨ੍ਤੀਤਿ ਉਭਿਨ੍ਨਂ ਪਦੇਸਨਿਯਮਂ ਵਾ ਤਾਸਂ ਦ੍ਵਿਨ੍ਨਮ੍ਪਿ ਵਾ ਅਞ੍ਞਤਰਾਯ ਵਾ ਵਿਜ੍ਜਮਾਨਤਂ ਵਾ ਅਵਿਜ੍ਜਮਾਨਤਂ ਵਾ ਨ ਜਾਨਨ੍ਤਿ, ਸਬ੍ਬਤ੍ਥ ਸਙ੍ਕਾ ਏਵ ਹੋਤਿ. ‘‘ਨੇਵ ਸਮੂਹਨਿਤੁਂ, ਨ ਬਨ੍ਧਿਤੁਂ ਸਕ੍ਖਿਸ੍ਸਨ੍ਤੀ’’ਤਿ ਇਦਂ ਨਿਰਾਸਙ੍ਕਟ੍ਠਾਨੇ ਠਤ੍ਵਾ ਸਮੂਹਨਿਤੁਂ ਸਕ੍ਕੋਨ੍ਤੋਪਿ ਮਹਾਸੀਮਂ ਪਟਿਬਨ੍ਧਿਤੁਂ ਨ ਸਕ੍ਕੋਨ੍ਤੀਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਂ. ‘‘ਨ ਚ ਸਕ੍ਕਾ…ਪੇ… ਕਮ੍ਮਵਾਚਂ ਕਾਤੁ’’ਨ੍ਤਿ ਇਦਂ ਸੀਮਾਬਨ੍ਧਨਕਮ੍ਮਵਾਚਂ ਸਨ੍ਧਾਯ ਵੁਤ੍ਤਂ. ਤਸ੍ਮਾਤਿ ਯਸ੍ਮਾ ਬਨ੍ਧਿਤੁਂ ਨ ਸਕ੍ਕਾ, ਤਸ੍ਮਾ ਨ ਸਮੂਹਨਿਤਬ੍ਬਾਤਿ ਅਤ੍ਥੋ.

ਕੇਚਿ ¶ ਪਨ ‘‘ਈਦਿਸੇਸੁ ਵਿਹਾਰੇਸੁ ਛਪਞ੍ਚਮਤ੍ਤੇ ਭਿਕ੍ਖੂ ਗਹੇਤ੍ਵਾ ਵਿਹਾਰਕੋਟਿਤੋ ਪਟ੍ਠਾਯ ਵਿਹਾਰਪਰਿਕ੍ਖੇਪਸ੍ਸ ਅਨ੍ਤੋ ਚ ਬਹਿ ਚ ਸਮਨ੍ਤਾ ਲੇਡ੍ਡੁਪਾਤੇ ਸਬ੍ਬਤ੍ਥ ਮਞ੍ਚਪ੍ਪਮਾਣੇ ਓਕਾਸੇ ਨਿਰਨ੍ਤਰਂ ਠਤ੍ਵਾ ਪਠਮਂ ਅਵਿਪ੍ਪਵਾਸਸੀਮਂ, ਤਤੋ ਸਮਾਨਸਂਵਾਸਕਸੀਮਞ੍ਚ ਸਮੂਹਨਨਵਸੇਨ ਸੀਮਾਯ ਸਮੁਗ੍ਘਾਤੇ ਕਤੇ ਤਸ੍ਮਿਂ ਵਿਹਾਰੇ ਖਣ੍ਡਸੀਮਾਯ, ਮਹਾਸੀਮਾਯਪਿ ਵਾ ਵਿਜ੍ਜਮਾਨਤ੍ਤੇ ਸਤਿ ਅਵਸ੍ਸਂ ਏਕਸ੍ਮਿਂ ਮਞ੍ਚਟ੍ਠਾਨੇ ਤਾਸਂ ਮਜ੍ਝਗਤਾ ਤੇ ਭਿਕ੍ਖੂ ਤਾ ਸਮੂਹਨੇਯ੍ਯੁਂ, ਤਤੋ ਗਾਮਸੀਮਾ ਏਵ ਅਵਸਿਸ੍ਸੇਯ੍ਯ. ਨ ਹੇਤ੍ਥ ਸੀਮਾਯ, ਤਪ੍ਪਰਿਚ੍ਛੇਦਸ੍ਸ ਵਾ ਜਾਨਨਂ ਅਙ੍ਗਂ. ਸੀਮਾਯ ਪਨ ਅਨ੍ਤੋਠਾਨਂ, ‘‘ਸਮੂਹਨਿਸ੍ਸਾਮਾ’’ਤਿ ਕਮ੍ਮਵਾਚਾਯ ਕਰਣਞ੍ਚੇਤ੍ਥ ਅਙ੍ਗਂ. ਅਟ੍ਠਕਥਾਯਂ ‘ਖਣ੍ਡਸੀਮਂ ਪਨ ਜਾਨਨ੍ਤਾ ਅਵਿਪ੍ਪਵਾਸਂ ਅਜਾਨਨ੍ਤਾਪਿ ਸਮੂਹਨਿਤੁਞ੍ਚੇਵ ਬਨ੍ਧਿਤੁਞ੍ਚ ਸਕ੍ਖਿਸ੍ਸਨ੍ਤੀ’ਤਿ ਏਵਂ ਮਹਾਸੀਮਾਯ ਪਰਿਚ੍ਛੇਦਸ੍ਸ ਅਜਾਨਨੇਪਿ ਸਮੂਹਨਸ੍ਸ ਵੁਤ੍ਤਤ੍ਤਾ. ਗਾਮਸੀਮਾਯ ਏਵ ਚ ਅਵਸਿਟ੍ਠਾਯ ਤਤ੍ਥ ਯਥਾਰੁਚਿ ਦੁਵਿਧਮ੍ਪਿ ਸੀਮਂ ਬਨ੍ਧਿਤੁਞ੍ਚੇਵ ਉਪਸਮ੍ਪਦਾਦਿਕਮ੍ਮਂ ਕਾਤੁਞ੍ਚ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਯੁਤ੍ਤਂ ਵਿਯ ਦਿਸ੍ਸਤਿ. ਵੀਮਂਸਿਤ੍ਵਾ ਗਹੇਤਬ੍ਬਂ.

ਅਵਿਪ੍ਪਵਾਸਸੀਮਾਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

੧੪੭. ਪਾਲ਼ਿਯਂ ¶ ‘‘ਅਸਮ੍ਮਤਾਯ, ਭਿਕ੍ਖਵੇ, ਸੀਮਾਯਾ’’ਤਿਆਦਿਨਾ ਗਾਮਸੀਮਾ ਏਵ ਬਦ੍ਧਸੀਮਾਯ ਖੇਤ੍ਤਂ, ਅਰਞ੍ਞਨਦਿਆਦਯੋ ਵਿਯ ਸਤ੍ਤਬ੍ਭਨ੍ਤਰਉਦਕੁਕ੍ਖੇਪਾਦੀਨਂ. ਸਾ ਚ ਗਾਮਸੀਮਾ ਬਦ੍ਧਸੀਮਾਵਿਰਹਿਤਟ੍ਠਾਨੇ ਸਯਮੇਵ ਸਮਾਨਸਂਵਾਸਾ ਹੋਤੀਤਿ ਦਸ੍ਸੇਤਿ. ਯਾ ਤਸ੍ਸ ਵਾ ਗਾਮਸ੍ਸ ਗਾਮਸੀਮਾਤਿ ਏਤ੍ਥ ਗਾਮਸੀਮਾਪਰਿਚ੍ਛੇਦਸ੍ਸ ਅਨ੍ਤੋ ਚ ਬਹਿ ਚ ਖੇਤ੍ਤਵਤ੍ਥੁਅਰਞ੍ਞਪਬ੍ਬਤਾਦਿਕਂ ਸਬ੍ਬਂ ਗਾਮਖੇਤ੍ਤਂ ਸਨ੍ਧਾਯ ‘‘ਗਾਮਸ੍ਸਾ’’ਤਿ ਵੁਤ੍ਤਂ, ਨ ਅਨ੍ਤਰਘਰਮੇਵ. ਤਸ੍ਮਾ ਤਸ੍ਸ ਸਕਲਸ੍ਸ ਗਾਮਖੇਤ੍ਤਸ੍ਸ ਸਮ੍ਬਨ੍ਧਨੀਯਾ ਗਾਮਸੀਮਾਤਿ ਏਵਮਤ੍ਥੋ ਵੇਦਿਤਬ੍ਬੋ. ਯੋ ਹਿ ਸੋ ਅਨ੍ਤਰਘਰਖੇਤ੍ਤਾਦੀਸੁ ਅਨੇਕੇਸੁ ਭੂਮਿਭਾਗੇਸੁ ‘‘ਗਾਮੋ’’ਤਿ ਏਕਤ੍ਤੇਨ ਲੋਕਜਨੇਹਿ ਪਞ੍ਞਤ੍ਤੋ ਗਾਮਵੋਹਾਰੋ, ਸੋਵ ਇਧ ‘‘ਗਾਮਸੀਮਾ’’ਤਿਪਿ ਵੁਚ੍ਚਤੀਤਿ ਅਧਿਪ੍ਪਾਯੋ, ਗਾਮੋ ਏਵ ਹਿ ਗਾਮਸੀਮਾ. ਇਮਿਨਾਵ ਨਯੇਨ ਉਪਰਿ ਅਰਞ੍ਞਂ ਨਦੀ ਸਮੁਦ੍ਦੋ ਜਾਤਸ੍ਸਰੋਤਿ ਏਵਂ ਤੇਸੁ ਭੂਮਿਪ੍ਪਦੇਸੇਸੁ ਏਕਤ੍ਤੇਨ ਲੋਕਜਨਪਞ੍ਞਤ੍ਤਾਨਮੇਵ ਅਰਞ੍ਞਾਦੀਨਂ ਅਰਞ੍ਞਸੀਮਾਦਿਭਾਵੋ ਵੇਦਿਤਬ੍ਬੋ. ਲੋਕੇ ਪਨ ਗਾਮਸੀਮਾਦਿਵੋਹਾਰੋ ਗਾਮਾਦੀਨਂ ¶ ਮਰਿਯਾਦਾਯਮੇਵ ਵਤ੍ਤੁਂ ਵਟ੍ਟਤਿ, ਨ ਗਾਮਖੇਤ੍ਤਾਦੀਸੁ ਸਬ੍ਬਤ੍ਥ. ਸਾਸਨੇ ਪਨ ਤੇ ਗਾਮਾਦਯੋ ਇਤਰਨਿਵਤ੍ਤਿਅਤ੍ਥੇਨ ਸਯਮੇਵ ਅਤ੍ਤਨੋ ਮਰਿਯਾਦਾਤਿ ਕਤ੍ਵਾ ਗਾਮੋ ਏਵ ਗਾਮਸੀਮਾ, ਅਰਞ੍ਞਮੇਵ ਅਰਞ੍ਞਸੀਮਾ…ਪੇ… ਸਮੁਦ੍ਦੋ ਏਵ ਸਮੁਦ੍ਦਸੀਮਾਤਿ ਸੀਮਾਵੋਹਾਰੇਨ ਵੁਤ੍ਤਾਤਿ ਵੇਦਿਤਬ੍ਬਾ.

‘‘ਨਿਗਮਸ੍ਸ ਵਾ’’ਤਿ ਇਦਂ ਗਾਮਸੀਮਪ੍ਪਭੇਦਂ ਸਬ੍ਬਂ ਉਪਲਕ੍ਖਣਵਸੇਨ ਦਸ੍ਸੇਤੁਂ ਵੁਤ੍ਤਂ. ਤੇਨਾਹ ‘‘ਨਗਰਮ੍ਪਿ ਗਹਿਤਮੇਵਾ’’ਤਿ. ‘‘ਬਲਿਂ ਲਭਨ੍ਤੀ’’ਤਿ ਇਦਂ ਯੇਭੁਯ੍ਯਵਸੇਨ ਵੁਤ੍ਤਂ, ‘‘ਅਯਂ ਗਾਮੋ ਏਤ੍ਤਕੋ ਕਰੀਸਭਾਗੋ’’ਤਿਆਦਿਨਾ ਪਨ ਰਾਜਪਣ੍ਣੇਸੁ ਆਰੋਪਿਤੇਸੁ ਭੂਮਿਭਾਗੇਸੁ ਯਸ੍ਮਿਂ ਯਸ੍ਮਿਂ ਤਲ਼ਾਕਮਾਤਿਕਾਸੁਸਾਨਪਬ੍ਬਤਾਦਿਕੇ ਪਦੇਸੇ ਬਲਿਂ ਨ ਗਣ੍ਹਨ੍ਤਿ, ਸੋਪਿ ਗਾਮਸੀਮਾ ਏਵ. ਰਾਜਾਦੀਹਿ ਪਰਿਚ੍ਛਿਨ੍ਨਭੂਮਿਭਾਗੋ ਹਿ ਸਬ੍ਬੋਵ ਠਪੇਤ੍ਵਾ ਨਦਿਲੋਣਿਜਾਤਸ੍ਸਰੇ ਗਾਮਸੀਮਾਤਿ ਵੇਦਿਤਬ੍ਬੋ. ਤੇਨਾਹ ‘‘ਪਰਿਚ੍ਛਿਨ੍ਦਿਤ੍ਵਾ ਰਾਜਾ ਕਸ੍ਸਚਿ ਦੇਤੀ’’ਤਿ. ਸਚੇ ਪਨ ਤਤ੍ਥ ਰਾਜਾ ਕਞ੍ਚਿ ਪਦੇਸਂ ਗਾਮਨ੍ਤਰੇਨ ਯੋਜੇਤਿ, ਸੋ ਪਵਿਟ੍ਠਗਾਮਸੀਮਤਂ ਏਵ ਭਜਤਿ, ਨਦਿਜਾਤਸ੍ਸਰੇਸੁ ਵਿਨਾਸੇਤ੍ਵਾ ਤਲ਼ਾਕਾਦਿਭਾਵਂ ਵਾ ਪੂਰੇਤ੍ਵਾ ਖੇਤ੍ਤਾਦਿਭਾਵਂ ਵਾ ਪਾਪਿਤੇਸੁਪਿ ਏਸੇਵ ਨਯੋ.

ਯੇ ਪਨ ਗਾਮਾ ਰਾਜਚੋਰਾਦਿਭਯਪੀਲ਼ਿਤੇਹਿ ਮਨੁਸ੍ਸੇਹਿ ਛਡ੍ਡਿਤਾ ਚਿਰਮ੍ਪਿ ਨਿਮ੍ਮਨੁਸ੍ਸਾ ਤਿਟ੍ਠਨ੍ਤਿ, ਸਮਨ੍ਤਾ ਪਨ ਗਾਮਾ ਸਨ੍ਤਿ, ਤੇਪਿ ਪਾਟੇਕ੍ਕਂ ਗਾਮਸੀਮਾਵ. ਤੇਸੁ ਹਿ ਰਾਜਾਨੋ ਸਮਨ੍ਤਗਾਮਵਾਸੀਹਿ ਕਸਾਪੇਤ੍ਵਾ ਵਾ ਯੇਹਿ ਕੇਹਿਚਿ ਕਸਿਤਟ੍ਠਾਨਂ ਲਿਖਿਤ੍ਵਾ ਵਾ ਬਲਿਂ ਗਣ੍ਹਨ੍ਤਿ, ਅਞ੍ਞੇਨ ਵਾ ਗਾਮੇਨ ਏਕੀਭਾਵਂ ਵਾ ਉਪਨੇਨ੍ਤਿ. ਯੇ ਪਨ ਗਾਮਾ ਰਾਜੂਹਿਪਿ ਪਰਿਚ੍ਚਤ੍ਤਾ ਗਾਮਖੇਤ੍ਤਾਨਨ੍ਤਰਿਕਾ ਮਹਾਰਞ੍ਞੇਨ ਏਕੀਭੂਤਾ, ਤੇ ਅਗਾਮਕਾਰਞ੍ਞਸੀਮਤਂ ਪਾਪੁਣਨ੍ਤਿ, ਪੁਰਿਮਾ ਗਾਮਸੀਮਾ ¶ ਵਿਨਸ੍ਸਤਿ. ਰਾਜਾਨੋ ਪਨ ਏਕਸ੍ਮਿਂ ਅਰਞ੍ਞਾਦਿਪ੍ਪਦੇਸੇ ਮਹਨ੍ਤਂ ਗਾਮਂ ਕਤ੍ਵਾ ਅਨੇਕਸਹਸ੍ਸਾਨਿ ਕੁਲਾਨਿ ਵਾਸਾਪੇਤ੍ਵਾ ਤਤ੍ਥ ਵਾਸੀਨਂ ਭੋਗਗਾਮਾਤਿ ਸਮਨ੍ਤਾ ਭੂਤਗਾਮੇ ਪਰਿਚ੍ਛਿਨ੍ਦਿਤ੍ਵਾ ਦੇਨ੍ਤਿ. ਪੁਰਾਣਨਾਮਂ, ਪਨ ਪਰਿਚ੍ਛੇਦਞ੍ਚ ਨ ਵਿਨਾਸੇਨ੍ਤਿ, ਤੇਪਿ ਪਚ੍ਚੇਕਂ ਗਾਮਸੀਮਾ ਏਵ. ਏਤ੍ਤਾਵਤਾ ਪੁਰਿਮਗਾਮਸੀਮਤ੍ਤਂ ਨ ਵਿਜਹਨ੍ਤਿ. ਸਾ ਚ ਇਤਰਾ ਚਾਤਿਆਦਿ ‘‘ਸਮਾਨਸਂਵਾਸਾ ਏਕੂਪੋਸਥਾ’’ਤਿ ਪਾਲ਼ਿਪਦਸ੍ਸ ਅਧਿਪ੍ਪਾਯਵਿਵਰਣਂ. ਤਤ੍ਥ ਹਿ ਸਾ ਚ ਰਾਜਿਚ੍ਛਾਵਸੇਨ ਪਰਿਵਤ੍ਤਿਤ੍ਵਾ ਸਮੁਪ੍ਪਨ੍ਨਾ ਅਭਿਨਵਾ, ਇਤਰਾ ਚ ਅਪਰਿਵਤ੍ਤਾ ਪਕਤਿਗਾਮਸੀਮਾ, ਯਥਾ ਬਦ੍ਧਸੀਮਾਯ ਸਬ੍ਬਂ ਸਙ੍ਘਕਮ੍ਮਂ ਕਾਤੁਂ ਵਟ੍ਟਤਿ, ਏਵਮੇਤਾਪਿ ਸਬ੍ਬਕਮ੍ਮਾਰਹਤਾਸਦਿਸੇਨ ਬਦ੍ਧਸੀਮਾਸਦਿਸਾ, ਸਾ ਸਮਾਨਸਂਵਾਸਾ ਏਕੂਪੋਸਥਾਤਿ ¶ ਅਧਿਪ੍ਪਾਯੋ. ਸਾਮਞ੍ਞਤੋ ‘‘ਬਦ੍ਧਸੀਮਾਸਦਿਸਾ’’ਤਿ ਵੁਤ੍ਤੇ ਤਿਚੀਵਰਾਵਿਪ੍ਪਵਾਸਸੀਮਂ ਬਦ੍ਧਸੀਮਂ ਏਵ ਮਞ੍ਞਨ੍ਤੀਤਿ ਤਂਸਦਿਸਤਾਨਿਵਤ੍ਤਨਮੁਖੇਨ ਉਪਰਿ ਸਤ੍ਤਬ੍ਭਨ੍ਤਰਸੀਮਾਯ ਤਂਸਦਿਸਤਾਪਿ ਅਤ੍ਥੀਤਿ ਦਸ੍ਸਨਨਯਸ੍ਸ ਇਧੇਵ ਪਸਙ੍ਗਂ ਦਸ੍ਸੇਤੁਂ ‘‘ਕੇਵਲ’’ਨ੍ਤਿਆਦਿ ਵੁਤ੍ਤਂ.

ਵਿਞ੍ਝਾਟਵਿਸਦਿਸੇ ਅਰਞ੍ਞੇਤਿ ਯਤ੍ਥ ‘‘ਅਸੁਕਗਾਮਸ੍ਸ ਇਦਂ ਖੇਤ੍ਤ’’ਨ੍ਤਿ ਗਾਮਵੋਹਾਰੋ ਨਤ੍ਥਿ, ਯਤ੍ਥ ਚ ਨ ਕਸਨ੍ਤਿ ਨ ਵਪਨ੍ਤਿ, ਤਾਦਿਸੇ ਅਰਞ੍ਞੇ. ਮਚ੍ਛਬਨ੍ਧਾਨਂ ਅਗਮਨਪਥਾ ਨਿਮ੍ਮਨੁਸ੍ਸਾਵਾਸਾ ਸਮੁਦ੍ਦਨ੍ਤਰਦੀਪਕਾਪਿ ਏਤ੍ਥੇਵ ਸਙ੍ਗਯ੍ਹਨ੍ਤਿ. ਯਂ ਯਞ੍ਹਿ ਅਗਾਮਖੇਤ੍ਤਭੂਤਂ ਨਦਿਸਮੁਦ੍ਦਜਾਤਸ੍ਸਰਵਿਰਹਿਤਂ ਪਦੇਸਂ, ਤਂ ਸਬ੍ਬਂ ਅਰਞ੍ਞਸੀਮਾਤਿ ਵੇਦਿਤਬ੍ਬਂ. ਸਾ ਚ ਸਤ੍ਤਬ੍ਭਨ੍ਤਰਸੀਮਂ ਵਿਨਾਵ ਸਯਮੇਵ ਸਮਾਨਸਂਵਾਸਾ ਬਦ੍ਧਸੀਮਾਸਦਿਸਾ. ਨਦਿਆਦਿਸੀਮਾਸੁ ਵਿਯ ਸਬ੍ਬਮੇਤ੍ਥ ਸਙ੍ਘਕਮ੍ਮਂ ਕਾਤੁਂ ਵਟ੍ਟਤਿ. ਨਦਿਸਮੁਦ੍ਦਜਾਤਸ੍ਸਰਾਨਂ ਤਾਵ ਅਟ੍ਠਕਥਾਯਂ ‘‘ਅਤ੍ਤਨੋ ਸਭਾਵੇਨੇਵ ਬਦ੍ਧਸੀਮਾਸਦਿਸਾ’’ਤਿਆਦਿਨਾ ਵੁਤ੍ਤਤ੍ਤਾ ਸੀਮਤਾ ਸਿਦ੍ਧਾ. ਅਰਞ੍ਞਸ੍ਸ ਪਨ ਸੀਮਤਾ ਕਥਨ੍ਤਿ? ਸਤ੍ਤਬ੍ਭਨ੍ਤਰਸੀਮਾਨੁਜਾਨਨਸੁਤ੍ਤਾਦਿਸਾਮਤ੍ਥਿਯਤੋ. ਯਥਾ ਹਿ ਗਾਮਸੀਮਾਯ ਵਗ੍ਗਕਮ੍ਮਪਰਿਹਾਰਤ੍ਥਂ ਬਹੂ ਬਦ੍ਧਸੀਮਾਯੋ ਅਨੁਞ੍ਞਾਤਾ, ਤਾਸਞ੍ਚ ਦ੍ਵਿਨ੍ਨਮਨ੍ਤਰਾ ਅਞ੍ਞਮਞ੍ਞਂ ਅਸਮ੍ਭੇਦਤ੍ਥਂ ਸੀਮਨ੍ਤਰਿਕਾ ਅਨੁਞ੍ਞਾਤਾ, ਏਵਮਿਧਾਰਞ੍ਞੇਪਿ ਸਤ੍ਤਬ੍ਭਨ੍ਤਰਸੀਮਾ. ਤਾਸਞ੍ਚ ਦ੍ਵਿਨ੍ਨਂ ਅਨ੍ਤਰਾ ਸੀਮਨ੍ਤਰਿਕਾਯ ਪਾਲ਼ਿਅਟ੍ਠਕਥਾਸੁਪਿ ਵਿਧਾਨਸਾਮਤ੍ਥਿਯਤੋ ਅਰਞ੍ਞਸ੍ਸਪਿ ਸਭਾਵੇਨੇਵ ਨਦਿਆਦੀਨਂ ਵਿਯ ਸੀਮਾਭਾਵੋ ਤਤ੍ਥ ਵਗ੍ਗਕਮ੍ਮਪਰਿਹਾਰਤ੍ਥਮੇਵ ਸਤ੍ਤਬ੍ਭਨ੍ਤਰਸੀਮਾਯ ਅਨੁਞ੍ਞਾਤਤ੍ਤਾਵ ਸਿਦ੍ਧੋਤਿ ਵੇਦਿਤਬ੍ਬੋ. ਤਤ੍ਥ ਸੀਮਾਯਮੇਵ ਹਿ ਠਿਤਾ ਸੀਮਟ੍ਠਾਨਂ ਵਗ੍ਗਕਮ੍ਮਂ ਕਰੋਨ੍ਤਿ, ਨ ਅਸੀਮਾਯਂ ਆਕਾਸੇ ਠਿਤਾ ਵਿਯ ਆਕਾਸਟ੍ਠਾਨਂ. ਏਵਮੇਵ ਹਿ ਸਾਮਤ੍ਥਿਯਂ ਗਹੇਤ੍ਵਾ ‘‘ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ’’ਤਿਆਦਿਨਾ ਪਟਿਕ੍ਖਿਤ੍ਤਬਦ੍ਧਸੀਮਾਨਮ੍ਪਿ ਨਦਿਸਮੁਦ੍ਦਜਾਤਸ੍ਸਰਾਨਂ ਅਤ੍ਤਨੋ ਸਭਾਵੇਨੇਵ ਸੀਮਾਭਾਵੋ ਅਟ੍ਠਕਥਾਯਂ ਵੁਤ੍ਤੋਤਿ ਗਹੇਤਬ੍ਬੋ.

ਅਥਸ੍ਸ ਠਿਤੋਕਾਸਤੋਤਿ ਅਸ੍ਸ ਭਿਕ੍ਖੁਸ੍ਸ ਠਿਤੋਕਾਸਤੋ. ਸਚੇਪਿ ਹਿ ਭਿਕ੍ਖੁਸਹਸ੍ਸਂ ਤਿਟ੍ਠਤਿ, ਤਸ੍ਸ ਠਿਤੋਕਾਸਸ੍ਸ ਬਾਹਿਰਨ੍ਤਤੋ ਪਟ੍ਠਾਯ ਭਿਕ੍ਖੂਨਂ ਵਗ੍ਗਕਮ੍ਮਪਰਿਹਾਰਤ੍ਥਂ ਸੀਮਾਪੇਕ੍ਖਾਯ ਉਪ੍ਪਨ੍ਨਾਯ ¶ ਤਾਯ ਸਹ ਸਯਮੇਵ ਸਞ੍ਜਾਤਾ ਸਤ੍ਤਬ੍ਭਨ੍ਤਰਸੀਮਾ ਸਮਾਨਸਂਵਾਸਾਤਿ ਅਧਿਪ੍ਪਾਯੋ. ਯਤ੍ਥ ਪਨ ਖੁਦ੍ਦਕੇ ਅਰਞ੍ਞੇ ਮਹਨ੍ਤੇਹਿ ਭਿਕ੍ਖੂਹਿ ਪਰਿਪੁਣ੍ਣਤਾਯ ਵਗ੍ਗਕਮ੍ਮਸਙ੍ਕਾਭਾਵੇਨ ਸਤ੍ਤਬ੍ਭਨ੍ਤਰਸੀਮਾਪੇਕ੍ਖਾ ਨਤ੍ਥਿ, ਤਤ੍ਥ ਸਤ੍ਤਬ੍ਭਨ੍ਤਰਸੀਮਾ ਨ ਉਪ੍ਪਜ੍ਜਤਿ, ਕੇਵਲਾਰਞ੍ਞਸੀਮਾਯਮੇਵ, ਤਤ੍ਥ ਸਙ੍ਘੇਨ ਕਮ੍ਮਂ ਕਾਤਬ੍ਬਂ. ਨਦਿਆਦੀਸੁਪਿ ਏਸੇਵ ਨਯੋ. ਵਕ੍ਖਤਿ ਹਿ ‘‘ਸਚੇ ਨਦੀ ਨਾਤਿਦੀਘਾ ਹੋਤਿ, ਪਭਵਤੋ ¶ ਪਟ੍ਠਾਯ ਯਾਵ ਮੁਖਦ੍ਵਾਰਾ ਸਬ੍ਬਤ੍ਥ ਸਙ੍ਘੋ ਨਿਸੀਦਤਿ, ਉਦਕੁਕ੍ਖੇਪਸੀਮਾਕਮ੍ਮਂ ਨਤ੍ਥੀ’’ਤਿਆਦਿ (ਮਹਾਵ. ਅਟ੍ਠ. ੧੪੭). ਇਮਿਨਾ ਏਵ ਚ ਵਚਨੇਨ ਵਗ੍ਗਕਮ੍ਮਪਰਿਹਾਰਤ੍ਥਂ ਸੀਮਾਪੇਕ੍ਖਾਯ ਸਤਿ ਏਵ ਉਦਕੁਕ੍ਖੇਪਸਤ੍ਤਬ੍ਭਨ੍ਤਰਸੀਮਾ ਉਪ੍ਪਜ੍ਜਨ੍ਤਿ, ਨਾਸਤੀਤਿ ਦਟ੍ਠਬ੍ਬਂ.

ਕੇਚਿ ਪਨ ‘‘ਸਮਨ੍ਤਾ ਅਬ੍ਭਨ੍ਤਰਂ ਮਿਨਿਤ੍ਵਾ ਪਰਿਚ੍ਛੇਦਕਰਣੇਨੇਵ ਸੀਮਾ ਸਞ੍ਜਾਯਤਿ, ਨ ਸਯਮੇਵਾ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਯਦਿ ਹਿ ਅਬ੍ਭਨ੍ਤਰਪਰਿਚ੍ਛੇਦਕਰਣਪ੍ਪਕਾਰੇਨ ਸੀਮਾ ਉਪ੍ਪਜ੍ਜੇਯ੍ਯ, ਅਬਦ੍ਧਸੀਮਾ ਚ ਨ ਸਿਯਾ ਭਿਕ੍ਖੂਨਂ ਕਿਰਿਯਾਪਕਾਰਸਿਦ੍ਧਿਤੋ. ਅਪਿਚ ਵਡ੍ਢਕੀਹਤ੍ਥਾਨਂ, ਪਕਤਿਹਤ੍ਥਾਨਞ੍ਚ ਲੋਕੇ ਅਨੇਕਵਿਧਤ੍ਤਾ, ਵਿਨਯੇ ਈਦਿਸਂ ਹਤ੍ਥਪ੍ਪਮਾਣਨ੍ਤਿ ਅਵੁਤ੍ਤਤ੍ਤਾ ਚ ਯੇਨ ਕੇਨਚਿ ਮਿਨਿਤੇ ਚ ਭਗਵਤਾ ਅਨੁਞ੍ਞਾਤੇਨ ਨੁ ਖੋ ਹਤ੍ਥੇਨ ਮਿਨਿਤਂ, ਨ ਨੁ ਖੋਤਿ ਸੀਮਾਯ ਵਿਪਤ੍ਤਿਸਙ੍ਕਾ ਭਵੇਯ੍ਯ. ਮਿਨਨ੍ਤੇਹਿ ਚ ਅਣੁਮਤ੍ਤਮ੍ਪਿ ਊਨਮਧਿਕਂ ਅਕਤ੍ਵਾ ਮਿਨਿਤੁਂ ਅਸਕ੍ਕੁਣੇਯ੍ਯਤਾਯ ਵਿਪਤ੍ਤਿ ਏਵ ਸਿਯਾ. ਪਰਿਸਵਸੇਨ ਚਾਯਂ ਵਡ੍ਢਮਾਨਾ ਤੇਸਂ ਮਿਨਨੇਨ ਵਡ੍ਢਤਿ ਵਾ ਹਾਯਤਿ ਵਾ. ਸਙ੍ਘੇ ਚ ਕਮ੍ਮਂ ਕਤ੍ਵਾ ਗਤੇ ਅਯਂ ਭਿਕ੍ਖੂਨਂ ਪਯੋਗੇਨ ਸਮੁਪ੍ਪਨ੍ਨਸੀਮਾ ਤੇਸਂ ਪਯੋਗੇਨ ਵਿਗਚ੍ਛਤਿ ਨ ਵਿਗਚ੍ਛਤਿ ਚ. ਕਥਂ ਬਦ੍ਧਸੀਮਾ ਵਿਯ ਯਾਵ ਸਾਸਨਨ੍ਤਰਧਾਨਾ ਨ ਤਿਟ੍ਠੇਯ੍ਯ, ਠਿਤਿਯਾ ਚ ਪੁਰਾਣਵਿਹਾਰੇਸੁ ਵਿਯ ਸਕਲੇਪਿ ਅਰਞ੍ਞੇ ਕਥਂ ਸੀਮਾਸਮ੍ਭੇਦਸਙ੍ਕਾ ਨ ਭਵੇਯ੍ਯ. ਤਸ੍ਮਾ ਸੀਮਾਪੇਕ੍ਖਾਯ ਏਵ ਸਮੁਪ੍ਪਜ੍ਜਤਿ, ਤਬ੍ਬਿਗਮੇਨ ਵਿਗਚ੍ਛਤੀਤਿ ਗਹੇਤਬ੍ਬਂ. ਯਥਾ ਚੇਤ੍ਥ, ਏਵਂ ਉਦਕੁਕ੍ਖੇਪਸੀਮਾਯਮ੍ਪਿ ਨਦਿਆਦੀਸੁਪਿ.

ਤਤ੍ਥਾਪਿ ਹਿ ਮਜ੍ਝਿਮਪੁਰਿਸੋ ਨ ਞਾਯਤਿ. ਤਥਾ ਸਬ੍ਬਥਾਮੇਨ ਖਿਪਨਂ ਉਭਯਤ੍ਥਾਪਿ ਚ ਯਸ੍ਸਂ ਦਿਸਾਯਂ ਸਤ੍ਤਬ੍ਭਨ੍ਤਰਸ੍ਸ, ਉਦਕੁਕ੍ਖੇਪਸ੍ਸ ਵਾ ਓਕਾਸੋ ਨ ਪਹੋਤਿ, ਤਤ੍ਥ ਕਥਂ ਮਿਨਨਂ, ਖਿਪਨਂ ਵਾ ਭਵੇਯ੍ਯ? ਗਾਮਖੇਤ੍ਤਾਦੀਸੁ ਪਵਿਸਨਤੋ ਅਖੇਤ੍ਤੇ ਸੀਮਾ ਪਵਿਟ੍ਠਾ ਨਾਮਾਤਿ ਸੀਮਾ ਵਿਪਜ੍ਜੇਯ੍ਯ. ਅਪੇਕ੍ਖਾਯ ਸੀਮੁਪ੍ਪਤ੍ਤਿਯਂ ਪਨ ਯਤੋ ਪਹੋਤਿ, ਤਤ੍ਥ ਸਤ੍ਤਬ੍ਭਨ੍ਤਰਉਦਕੁਕ੍ਖੇਪਸੀਮਾ ਸਯਮੇਵ ਪਰਿਪੁਣ੍ਣਾ ਜਾਯਨ੍ਤਿ. ਯਤੋ ਪਨ ਨ ਪਹੋਤਿ, ਤਤ੍ਥ ਅਤ੍ਤਨੋ ਖੇਤ੍ਤਪ੍ਪਮਾਣੇਨੇਵ ਜਾਯਨ੍ਤਿ, ਨ ਬਹਿ. ਯਂ ਪਨੇਤ੍ਥ ਅਬ੍ਭਨ੍ਤਰਮਿਨਨਪਮਾਣਸ੍ਸ, ਵਾਲੁਕਾਦਿਖਿਪਨਕਮ੍ਮਸ੍ਸ ਚ ਦਸ੍ਸਨਂ, ਤਂ ਸਞ੍ਜਾਤਸੀਮਾਨਂ ਠਿਤਟ੍ਠਾਨਸ੍ਸ ਪਰਿਚ੍ਛੇਦਨਤ੍ਥਂ ਕਤਂ ਗਾਮੂਪਚਾਰਘਰੂਪਚਾਰਜਾਨਨਤ੍ਥਂ ਲੇਡ੍ਡੁਸੁਪ੍ਪਾਦਿਖਿਪਨਵਿਧਾਨਦਸ੍ਸਨਂ ਵਿਯ. ਤੇਨੇਵ ਮਾਤਿਕਾਟ੍ਠਕਥਾਯਂ ‘‘ਸੀਮਂ ਵਾ ਸਮ੍ਮਨ੍ਨਤਿ ਉਦਕੁਕ੍ਖੇਪਂ ਵਾ ਪਰਿਚ੍ਛਿਨ੍ਦਤੀ’’ਤਿ ਵੁਤ੍ਤਂ (ਕਙ੍ਖਾ. ਅਟ੍ਠ. ਊਨਵੀਸਤਿਵਸ੍ਸਸਿਕ੍ਖਾਪਦਵਣ੍ਣਨਾ). ਏਵਂ ਕਤੇਪਿ ਤਸ੍ਸ ¶ ਪਰਿਚ੍ਛੇਦਸ੍ਸ ਯਾਥਾਵਤੋ ਞਾਤੁਂ ¶ ਅਸਕ੍ਕੁਣੇਯ੍ਯਤ੍ਤੇਨ ਪੁਥੁਲਤੋ ਞਤ੍ਵਾ ਅਨ੍ਤੋ ਤਿਟ੍ਠਨ੍ਤੇਹਿ ਨਿਰਾਸਙ੍ਕਟ੍ਠਾਨੇ ਠਾਤਬ੍ਬਂ, ਅਞ੍ਞਂ ਬਹਿ ਕਰੋਨ੍ਤੇਹਿ ਅਤਿਦੂਰੇ ਨਿਰਾਸਙ੍ਕਟ੍ਠਾਨੇ ਪੇਸੇਤਬ੍ਬਂ.

ਅਪਰੇ ਪਨ ‘‘ਸੀਮਾਪੇਕ੍ਖਾਯ ਕਿਚ੍ਚਂ ਨਤ੍ਥਿ, ਮਗ੍ਗਗਮਨਨਹਾਨਾਦਿਅਤ੍ਥੇਹਿ ਏਕਭਿਕ੍ਖੁਸ੍ਮਿਮ੍ਪਿ ਅਰਞ੍ਞੇ ਵਾ ਨਦਿਆਦੀਸੁ ਵਾ ਪਵਿਟ੍ਠੇ ਤਂ ਪਰਿਕ੍ਖਿਪਿਤ੍ਵਾ ਸਤ੍ਤਬ੍ਭਨ੍ਤਰਉਦਕੁਕ੍ਖੇਪਸੀਮਾ ਸਯਮੇਵ ਪਭਾ ਵਿਯ ਪਦੀਪਸ੍ਸ ਸਮੁਪ੍ਪਜ੍ਜਤਿ, ਗਾਮਖੇਤ੍ਤਾਦੀਸੁ ਤਸ੍ਮਿਂ ਓਤਿਣ੍ਣਮਤ੍ਤੇ ਵਿਗਚ੍ਛਤਿ. ਤੇਨੇਵ ਚੇਤ੍ਥ ਦ੍ਵਿਨ੍ਨਂ ਸਙ੍ਘਾਨਂ ਵਿਸੁਂ ਕਮ੍ਮਂ ਕਰੋਨ੍ਤਾਨਂ ਸੀਮਾਦ੍ਵਯਸ੍ਸ ਅਨ੍ਤਰਾ ਸੀਮਨ੍ਤਰਿਕਾ ਅਞ੍ਞਂ ਸਤ੍ਤਬ੍ਭਨ੍ਤਰਂ, ਉਦਕੁਕ੍ਖੇਪਞ੍ਚ ਠਪੇਤੁਂ ਅਨੁਞ੍ਞਾਤਂ, ਸੀਮਾਪਰਿਯਨ੍ਤੇ ਹਿ ਕੇਨਚਿ ਕਮ੍ਮੇਨ ਪੇਸਿਤਸ੍ਸ ਭਿਕ੍ਖੁਨੋ ਸਮਨ੍ਤਾ ਸਞ੍ਜਾਤਸੀਮਾ ਇਤਰੇਸਂ ਸੀਮਾਯ ਫੁਸਿਤ੍ਵਾ ਸੀਮਾਸਮ੍ਭੇਦਂ ਕਰੇਯ੍ਯ, ਸੋ ਮਾ ਹੋਤੂਤਿ, ਇਤਰਥਾ ਹਤ੍ਥਚਤੁਰਙ੍ਗੁਲਮਤ੍ਤਾਯਪੇਤ੍ਥ ਸੀਮਨ੍ਤਰਿਕਾਯ ਅਨੁਜਾਨਿਤਬ੍ਬਤੋ. ਅਪਿਚ ਸੀਮਨ੍ਤਰਿਕਾਯ ਠਿਤਸ੍ਸਾਪਿ ਉਭਯਤ੍ਥ ਕਮ੍ਮਕੋਪਵਚਨਤੋਪਿ ਚੇਤਂ ਸਿਜ੍ਝਤਿ. ਤਮ੍ਪਿ ਪਰਿਕ੍ਖਿਪਿਤ੍ਵਾ ਸਯਮੇਵ ਸਞ੍ਜਾਤਾਯ ਸੀਮਾਯ ਉਭਿਨ੍ਨਮ੍ਪਿ ਸੀਮਾਨਂ, ਏਕਾਯ ਏਵ ਵਾ ਸਙ੍ਕਰਤੋ. ਇਤਰਥਾ ਤਸ੍ਸ ਕਮ੍ਮਕੋਪਵਚਨਂ ਨ ਯੁਜ੍ਜੇਯ੍ਯ. ਵੁਤ੍ਤਞ੍ਹਿ ਮਾਤਿਕਾਟ੍ਠਕਥਾਯਂ ‘ਪਰਿਚ੍ਛੇਦਬ੍ਭਨ੍ਤਰੇ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੋਪਿ ਪਰਿਚ੍ਛੇਦਤੋ ਬਹਿ ਅਞ੍ਞਂ ਤਤ੍ਤਕਂਯੇਵ ਪਰਿਚ੍ਛੇਦਂ ਅਨਤਿਕ੍ਕਮਿਤ੍ਵਾ ਠਿਤੋਪਿ ਕਮ੍ਮਂ ਕੋਪੇਤੀ’ਤਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ). ਕਿਞ੍ਚ ਅਗਾਮਕਾਰਞ੍ਞੇ ਠਿਤਸ੍ਸ ਕਮ੍ਮਕਰਣਿਚ੍ਛਾਵਿਰਹਿਤਸ੍ਸਾਪਿ ਭਿਕ੍ਖੁਨੋ ਸਤ੍ਤਬ੍ਭਨ੍ਤਰਪਰਿਚ੍ਛਿਨ੍ਨੇ ਅਜ੍ਝੋਕਾਸੇ ਚੀਵਰਵਿਪ੍ਪਵਾਸੋ ਭਗਵਤਾ ਅਨੁਞ੍ਞਾਤੋ, ਸੋ ਚ ਪਰਿਚ੍ਛੇਦੋ ਸੀਮਾ. ਏਵਂ ਅਪੇਕ੍ਖਂ ਵਿਨਾ ਸਮੁਪ੍ਪਨ੍ਨਾ. ਤੇਨੇਵੇਤ੍ਥ ‘ਅਯਂ ਸੀਮਾ ਤਿਚੀਵਰਵਿਪ੍ਪਵਾਸਪਰਿਹਾਰਮ੍ਪਿ ਲਭਤੀ’ਤਿ (ਮਹਾਵ. ਅਟ੍ਠ. ੧੪੭) ਵੁਤ੍ਤਂ. ਤਸ੍ਮਾ ਕਮ੍ਮਕਰਣਿਚ੍ਛਂ ਵਿਨਾਪਿ ਵੁਤ੍ਤਨਯੇਨ ਸਮੁਪ੍ਪਤ੍ਤਿ ਗਹੇਤਬ੍ਬਾ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਪਦੀਪਸ੍ਸ ਪਭਾ ਵਿਯ ਸਬ੍ਬਪੁਗ੍ਗਲਾਨਮ੍ਪਿ ਪਚ੍ਚੇਕਂ ਸੀਮਾਸਮ੍ਭਵੇਨ ਸਙ੍ਘੇ, ਗਣੇ ਵਾ ਕਮ੍ਮਂ ਕਰੋਨ੍ਤੇ ਤਤ੍ਰਟ੍ਠਾਨਂ ਭਿਕ੍ਖੂਨਂ ਸਮਨ੍ਤਾ ਪਚ੍ਚੇਕਂ ਸਮੁਪ੍ਪਨ੍ਨਾਨਂ ਅਨੇਕਸੀਮਾਨਂ ਅਞ੍ਞਮਞ੍ਞਂ ਸਙ੍ਕਰਦੋਸਪ੍ਪਸਙ੍ਗਤੋ. ਪਰਿਸਵਸੇਨ ਚਸ੍ਸਾ ਵਡ੍ਢਿ, ਹਾਨਿ ਚ ਸਮ੍ਭਵਤਿ. ਪਚ੍ਛਾ ਆਗਤਾਨਂ ਅਭਿਨਵਸੀਮਨ੍ਤਰੁਪ੍ਪਤ੍ਤਿ ਏਵ, ਗਤਾਨਂ ਸਮਨ੍ਤਾ ਠਿਤਸੀਮਾਪਿ ਵਿਨਾਸੋ ਚ ਭਵੇਯ੍ਯ.

ਪਾਲ਼ਿਯਂ ਪਨ ‘‘ਸਮਨ੍ਤਾ ਸਤ੍ਤਬ੍ਭਨ੍ਤਰਾ, ਅਯਂ ਤਤ੍ਥ ਸਮਾਨਸਂਵਾਸਾ’’ਤਿਆਦਿਨਾ (ਮਹਾਵ. ੧੪੭) ਏਕਾ ਏਵ ਸਤ੍ਤਬ੍ਭਨ੍ਤਰਾ, ਉਦਕੁਕ੍ਖੇਪਾ ਚ ਅਨੁਞ੍ਞਾਤਾ, ਨ ਚੇਸਾ ਸੀਮਾ ਸਭਾਵੇਨ, ਕਾਰਣਸਾਮਤ੍ਥਿਯੇਨ ਵਾ ਪਭਾ ਵਿਯ ਪਦੀਪਸ੍ਸ ਉਪ੍ਪਜ੍ਜਤਿ. ਕਿਨ੍ਤੁ ¶ ਭਗਵਤੋ ਅਨੁਜਾਨਨੇਨੇਵ, ਭਗਵਾ ਚ ਇਮਾਯੋ ਅਨੁਜਾਨਨ੍ਤੋ ਭਿਕ੍ਖੂਨਂ ਵਗ੍ਗਕਮ੍ਮਪਰਿਹਾਰੇਨ ਕਮ੍ਮਕਰਣਸੁਖਤ੍ਥਮੇਵ ਅਨੁਞ੍ਞਾਸੀਤਿ ਕਥਂ ਨਹਾਨਾਦਿਕਿਚ੍ਚੇਨ ਪਵਿਟ੍ਠਾਨਮ੍ਪਿ ਸਮਨ੍ਤਾ ਤਾਸਂ ਸੀਮਾਨਂ ਸਮੁਪ੍ਪਤ੍ਤਿ ਪਯੋਜਨਾਭਾਵਾ? ਪਯੋਜਨੇ ਚ ਏਕਂ ਏਵ ਪਯੋਜਨਨ੍ਤਿ ਕਥਂ ਪਚ੍ਚੇਕਂ ਭਿਕ੍ਖੁਗਣਨਾਯ ਅਨੇਕਸੀਮਾਸਮੁਪ੍ਪਤ੍ਤਿ ¶ ? ‘‘ਏਕਸੀਮਾਯਂ ਹਤ੍ਥਪਾਸਂ ਅਵਿਜਹਿਤ੍ਵਾ ਠਿਤਾ’’ਤਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਵੁਤ੍ਤਂ. ਯਂ ਪਨ ਦ੍ਵਿਨ੍ਨਂ ਸੀਮਾਨਂ ਅਨ੍ਤਰਾ ਤਤ੍ਤਕਪਰਿਚ੍ਛੇਦੇਨੇਵ ਸੀਮਨ੍ਤਰਿਕਟ੍ਠਪਨਵਚਨਂ, ਤਤ੍ਥ ਠਿਤਾਨਂ ਕਮ੍ਮਕੋਪਵਚਨਞ੍ਚ, ਤਮ੍ਪਿ ਇਮਾਸਂ ਸੀਮਾਨਂ ਪਰਿਚ੍ਛੇਦਸ੍ਸ ਦੁਬ੍ਬੋਧਤਾਯ ਸੀਮਾਯ ਸਮ੍ਭੇਦਸਙ੍ਕਂ, ਕਮ੍ਮਕੋਪਸਙ੍ਕਞ੍ਚ ਦੂਰਤੋ ਪਰਿਹਰਿਤੁਂ ਵੁਤ੍ਤਂ.

ਯੋ ਚ ਚੀਵਰਾਵਿਪ੍ਪਵਾਸਤ੍ਥਂ ਭਗਵਤਾ ਅਬ੍ਭੋਕਾਸੇ ਦਸ੍ਸਿਤੋ ਸਤ੍ਤਬ੍ਭਨ੍ਤਰਪਰਿਚ੍ਛੇਦੋ, ਸੋ ਸੀਮਾ ਏਵ ਨ ਹੋਤਿ, ਖੇਤ੍ਤਤਲ਼ਾਕਾਦਿਪਰਿਚ੍ਛੇਦੋ ਵਿਯ ਅਯਮੇਤ੍ਥ ਏਕੋ ਪਰਿਚ੍ਛੇਦੋਵ. ਤਤ੍ਥ ਚ ਬਹੂਸੁ ਭਿਕ੍ਖੂਸੁ ਏਕਤੋ ਠਿਤੇਸੁ ਤੇਸਂ ਵਿਸੁਂ ਵਿਸੁਂ ਅਤ੍ਤਨੋ ਠਿਤਟ੍ਠਾਨਤੋ ਪਟ੍ਠਾਯ ਸਮਨ੍ਤਾ ਸਤ੍ਤਬ੍ਭਨ੍ਤਰਪਰਿਚ੍ਛੇਦਬ੍ਭਨ੍ਤਰੇ ਏਵ ਚੀਵਰਂ ਠਪੇਤਬ੍ਬਂ. ਨ ਪਰਿਸਪਰਿਯਨ੍ਤਤੋ ਪਟ੍ਠਾਯ. ਪਰਿਸਪਰਿਯਨ੍ਤਤੋ ਪਟ੍ਠਾਯ ਹਿ ਅਬ੍ਭਨ੍ਤਰੇ ਗਯ੍ਹਮਾਨੇ ਅਬ੍ਭਨ੍ਤਰਪਰਿਯੋਸਾਨੇ ਠਪਿਤਚੀਵਰਂ ਮਜ੍ਝੇ ਠਿਤਸ੍ਸ ਅਬ੍ਭਨ੍ਤਰਤੋ ਬਹਿ ਹੋਤੀਤਿ ਤਂ ਅਰੁਣੁਗ੍ਗਮਨੇ ਨਿਸ੍ਸਗ੍ਗਿਯਂ ਸਿਯਾ. ਸੀਮਾ ਪਨ ਪਰਿਸਪਰਿਯਨ੍ਤਤੋਵ ਗਹੇਤਬ੍ਬਾ. ਚੀਵਰਵਿਪ੍ਪਵਾਸਪਰਿਹਾਰੋਪੇਤ੍ਥ ਅਬ੍ਭੋਕਾਸਪਰਿਚ੍ਛੇਦਸ੍ਸ ਵਿਜ੍ਜਮਾਨਤ੍ਤਾ ਵੁਤ੍ਤੋ, ਨ ਪਨ ਯਾਵ ਸੀਮਾਪਰਿਚ੍ਛੇਦਂ ਲਬ੍ਭਮਾਨਤ੍ਤਾ ਮਹਾਸੀਮਾਯ ਅਵਿਪ੍ਪਵਾਸਸੀਮਾਵੋਹਾਰੋ ਵਿਯ. ਮਹਾਸੀਮਾਯਮ੍ਪਿ ਹਿ ਗਾਮਗਾਮੂਪਚਾਰੇਸੁ ਚੀਵਰਂ ਨਿਸ੍ਸਗ੍ਗਿਯਂ ਹੋਤਿ. ਇਧਾਪਿ ਮਜ੍ਝੇ ਠਿਤਸ੍ਸ ਸੀਮਾਪਰਿਯਨ੍ਤੇ ਨਿਸ੍ਸਗ੍ਗਿਯਂ ਹੋਤਿ. ਤਸ੍ਮਾ ਯਥਾਵੁਤ੍ਤਸੀਮਾਪੇਕ੍ਖਵਸੇਨੇਵੇਤਾਸਂ ਸਤ੍ਤਬ੍ਭਨ੍ਤਰਉਦਕੁਕ੍ਖੇਪਸੀਮਾਨਂ ਉਪ੍ਪਤ੍ਤਿ, ਤਬ੍ਬਿਗਮੇਨ ਵਿਨਾਸੋ ਚ ਗਹੇਤਬ੍ਬਾਤਿ ਅਮ੍ਹਾਕਂ ਖਨ੍ਤਿ. ਵੀਮਂਸਿਤ੍ਵਾ ਗਹੇਤਬ੍ਬਂ. ਅਞ੍ਞੋ ਵਾ ਪਕਾਰੋ ਇਤੋ ਯੁਤ੍ਤਤਰੋ ਗਵੇਸਿਤਬ੍ਬੋ.

ਇਧ ਪਨ ‘‘ਅਰਞ੍ਞੇ ਸਮਨ੍ਤਾ ਸਤ੍ਤਬ੍ਭਨ੍ਤਰਾ’’ਤਿ ਏਵਂ ਪਾਲ਼ਿਯਂ ਵਿਞ੍ਝਾਟਵਿਸਦਿਸੇ ਅਰਞ੍ਞੇ ਸਮਨ੍ਤਾ ਸਤ੍ਤਬ੍ਭਨ੍ਤਰਾਤਿ ਅਟ੍ਠਕਥਾਯਞ੍ਚ ਰੁਕ੍ਖਾਦਿਨਿਰਨ੍ਤਰੇਪਿ ਅਰਞ੍ਞੇ ਸਤ੍ਤਬ੍ਭਨ੍ਤਰਸੀਮਾਯ ਵਿਹਿਤਤ੍ਤਾ ਅਤ੍ਤਨੋ ਨਿਸ੍ਸਯਭੂਤਾਯ ਅਰਞ੍ਞਸੀਮਾਯ ਸਹ ਏਤਸ੍ਸਾ ਰੁਕ੍ਖਾਦਿਸਮ੍ਬਨ੍ਧੇ ਦੋਸਾਭਾਵੋ ਪਗੇਵ ਅਗਾਮਕੇ ਰੁਕ੍ਖੇਤਿ ਨਿਸ੍ਸਿਤੇਪਿ ਪਦੇਸੇ ਚੀਵਰਵਿਪ੍ਪਵਾਸਸ੍ਸ ਰੁਕ੍ਖਪਰਿਹਾਰਂ ਵਿਨਾਵ ਅਬ੍ਭੋਕਾਸਪਰਿਹਾਰੋਵ ਅਨੁਮਤੋਤਿ ਸਿਦ੍ਧੋਤਿ ਵੇਦਿਤਬ੍ਬੋ.

ਉਪਚਾਰਤ੍ਥਾਯਾਤਿ ¶ ਸੀਮਨ੍ਤਰਿਕਤ੍ਥਾਯ ਸਤ੍ਤਬ੍ਭਨ੍ਤਰਤੋ ਅਧਿਕਂ ਵਟ੍ਟਤਿ. ਊਨਕਂ ਪਨ ਨ ਵਟ੍ਟਤਿ ਏਵ ਸਤ੍ਤਬ੍ਭਨ੍ਤਰਪਰਿਚ੍ਛੇਦਸ੍ਸ ਦੁਬ੍ਬਿਜਾਨਤ੍ਤਾ. ਤਸ੍ਮਾ ਸਙ੍ਘਂ ਵਿਨਾ ਏਕੇਨਾਪਿ ਭਿਕ੍ਖੁਨਾ ਬਹਿ ਤਿਟ੍ਠਨ੍ਤੇਨ ਅਞ੍ਞਂ ਸਤ੍ਤਬ੍ਭਨ੍ਤਰਂ ਅਤਿਕ੍ਕਮਿਤ੍ਵਾ ਅਤਿਦੂਰੇ ਏਵ ਠਾਤਬ੍ਬਂ, ਇਤਰਥਾ ਕਮ੍ਮਕੋਪਸਙ੍ਕਤੋ. ਉਦਕੁਕ੍ਖੇਪੇਪਿ ਏਸੇਵ ਨਯੋ. ਤੇਨੇਵ ਵਕ੍ਖਤਿ ‘‘ਊਨਕਂ ਪਨ ਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੪੭). ਇਦਞ੍ਚੇਤ੍ਥ ਸੀਮਨ੍ਤਰਿਕਵਿਧਾਨਂ ਦ੍ਵਿਨ੍ਨਂ ਬਦ੍ਧਸੀਮਾਨਂ ਸੀਮਨ੍ਤਰਿਕਾਨੁਜਾਨਨਸੁਤ੍ਤਾਨੁਲੋਮਤੋ ਸਿਦ੍ਧਨ੍ਤਿ ਦਟ੍ਠਬ੍ਬਂ. ਕਿਞ੍ਚਾਪਿ ਹਿ ਭਗਵਤਾ ਨਿਦਾਨਵਸੇਨ ਏਕਗਾਮਸੀਮਾਨਿਸ੍ਸਿਤਾਨਂ ¶ , ਏਕਸਭਾਗਾਨਞ੍ਚ ਦ੍ਵਿਨ੍ਨਂ ਬਦ੍ਧਸੀਮਾਨਮੇਵ ਅਞ੍ਞਮਞ੍ਞਂ ਸਮ੍ਭੇਦਜ੍ਝੋਤ੍ਥਰਣਦੋਸਪਰਿਹਾਰਾਯ ਸੀਮਨ੍ਤਰਿਕਾ ਅਨੁਞ੍ਞਾਤਾ, ਤਥਾਪਿ ਤਦਨੁਲੋਮਤੋ ਏਕਅਰਞ੍ਞਸੀਮਾਨਦਿਆਦਿਸੀਮਞ੍ਚ ਨਿਸ੍ਸਿਤਾਨਂ ਏਕਸਭਾਗਾਨਂ ਦ੍ਵਿਨ੍ਨਂ ਸਤ੍ਤਬ੍ਭਨ੍ਤਰਸੀਮਾਨਮ੍ਪਿ ਉਦਕੁਕ੍ਖੇਪਸੀਮਾਨਮ੍ਪਿ ਅਞ੍ਞਮਞ੍ਞਂ ਸਮ੍ਭੇਦਜ੍ਝੋਤ੍ਥਰਣਂ, ਸੀਮਨ੍ਤਰਿਕਂ ਵਿਨਾ ਅਬ੍ਯਵਧਾਨੇਨ ਠਾਨਞ੍ਚ ਭਗਵਤਾ ਅਨਭਿਮਤਮੇਵਾਤਿ ਞਤ੍ਵਾ ਅਟ੍ਠਕਥਾਚਰਿਯਾ ਇਧਾਪਿ ਸੀਮਨ੍ਤਰਿਕਵਿਧਾਨਮਕਂਸੁ. ਵਿਸਭਾਗਸੀਮਾਨਮ੍ਪਿ ਹਿ ਏਕਸੀਮਾਨਿਸ੍ਸਿਤਤ੍ਤਂ, ਏਕਸਭਾਗਤ੍ਤਞ੍ਚਾਤਿ ਦ੍ਵੀਹਙ੍ਗੇਹਿ ਸਮਨ੍ਨਾਗਤੇ ਸਤਿ ਏਕਂ ਸੀਮਨ੍ਤਰਿਕਂ ਵਿਨਾ ਠਾਨਂ ਸਮ੍ਭੇਦਾਯ ਹੋਤਿ, ਨਾਸਤੀਤਿ ਦਟ੍ਠਬ੍ਬਂ. ਸੀਮਨ੍ਤਰਿਕਵਿਧਾਨਸਾਮਤ੍ਥਿਯੇਨੇਵ ਚੇਤਾਸਂ ਰੁਕ੍ਖਾਦਿਸਮ੍ਬਨ੍ਧੋਪਿ ਬਦ੍ਧਸੀਮਾਨਂ ਵਿਯ ਅਞ੍ਞਮਞ੍ਞਂ ਨ ਵਟ੍ਟਤੀਤਿ ਅਯਮ੍ਪਿ ਨਯਤੋ ਦਸ੍ਸਿਤੋ ਏਵਾਤਿ ਗਹੇਤਬ੍ਬਂ.

‘‘ਸਭਾਵੇਨੇਵਾ’’ਤਿ ਇਮਿਨਾ ਗਾਮਸੀਮਾ ਵਿਯ ਅਬਦ੍ਧਸੀਮਾਤਿ ਦਸ੍ਸੇਤਿ. ਸਬ੍ਬਮੇਤ੍ਥ ਸਙ੍ਘਕਮ੍ਮਂ ਕਾਤੁਂ ਵਟ੍ਟਤੀਤਿ ਸਮਾਨਸਂਵਾਸਾ ਏਕੂਪੋਸਥਾਤਿ ਦਸ੍ਸੇਤਿ. ਯੇਨ ਕੇਨਚੀਤਿ ਅਨ੍ਤਮਸੋ ਸੂਕਰਾਦਿਨਾ ਸਤ੍ਤੇਨ. ਮਹੋਘੇਨ ਪਨ ਉਨ੍ਨਤਟ੍ਠਾਨਤੋ ਨਿਨ੍ਨਟ੍ਠਾਨੇ ਪਤਨ੍ਤੇਨ ਖਤੋ ਖੁਦ੍ਦਕੋ ਵਾ ਮਹਨ੍ਤੋ ਵਾ ਲਕ੍ਖਣਯੁਤ੍ਤੋ ਜਾਤਸ੍ਸਰੋਵ. ਏਤ੍ਥਾਪਿ ਖੁਦ੍ਦਕੇ ਉਦਕੁਕ੍ਖੇਪਕਿਚ੍ਚਂ ਨਤ੍ਥਿ, ਸਮੁਦ੍ਦੇ ਪਨ ਸਬ੍ਬਥਾ ਉਦਕੁਕ੍ਖੇਪਸੀਮਾਯਮੇਵ ਕਮ੍ਮਂ ਕਾਤਬ੍ਬਂ ਸੋਧੇਤੁਂ ਦੁਕ੍ਕਰਤ੍ਤਾ.

ਪੁਨ ਤਤ੍ਥਾਤਿ ਲੋਕਵੋਹਾਰਸਿਦ੍ਧਾਸੁ ਏਤਾਸੁ ਨਦਿਆਦੀਸੁ ਤੀਸੁ ਅਬਦ੍ਧਸੀਮਾਸੁ ਪੁਨ ਵਗ੍ਗਕਮ੍ਮਪਰਿਹਾਰਤ੍ਥਂ ਸਾਸਨਵੋਹਾਰਸਿਦ੍ਧਾਯ ਅਬਦ੍ਧਸੀਮਾਯ ਪਰਿਚ੍ਛੇਦਂ ਦਸ੍ਸੇਨ੍ਤੋਤਿ ਅਧਿਪ੍ਪਾਯੋ. ਪਾਲ਼ਿਯਂ ਯਂ ਮਜ੍ਝਿਮਸ੍ਸ ਪੁਰਿਸਸ੍ਸਾਤਿਆਦੀਸੁ ਉਦਕਂ ਉਕ੍ਖਿਪਿਤ੍ਵਾ ਖਿਪੀਯਤਿ ਏਤ੍ਥਾਤਿ ਉਦਕੁਕ੍ਖੇਪੋ, ਉਦਕਸ੍ਸ ਪਤਨੋਕਾਸੋ, ਤਸ੍ਮਾ ਉਦਕੁਕ੍ਖੇਪਾ. ਅਯਞ੍ਹੇਤ੍ਥ ਪਦਸਮ੍ਬਨ੍ਧਵਸੇਨ ਅਤ੍ਥੋ – ਪਰਿਸਪਰਿਯਨ੍ਤਤੋ ਪਟ੍ਠਾਯ ਸਮਨ੍ਤਾ ਯਾਵ ਮਜ੍ਝਿਮਸ੍ਸ ਪੁਰਿਸਸ੍ਸ ¶ ਉਦਕੁਕ੍ਖੇਪੋ ਉਦਕਪਤਨਟ੍ਠਾਨਂ, ਤਾਵ ਯਂ ਤਂ ਪਰਿਚ੍ਛਿਨ੍ਨਟ੍ਠਾਨਂ, ਅਯਂ ਤਤ੍ਥ ਨਦਿਆਦੀਸੁ ਅਪਰਾ ਸਮਾਨਸਂਵਾਸਾ ਉਦਕੁਕ੍ਖੇਪਸੀਮਾਤਿ.

ਤਸ੍ਸ ਅਨ੍ਤੋਤਿ ਤਸ੍ਸ ਉਦਕੁਕ੍ਖੇਪਪਰਿਚ੍ਛਿਨ੍ਨਸ੍ਸ ਠਾਨਸ੍ਸ ਅਨ੍ਤੋ. ਨ ਕੇਵਲਞ੍ਚ ਤਸ੍ਸੇਵ ਅਨ੍ਤੋ, ਤਤੋ ਬਹਿਪਿ, ਏਕਸ੍ਸ ਉਦਕੁਕ੍ਖੇਪਸ੍ਸ ਅਨ੍ਤੋ ਠਾਤੁਂ ਨ ਵਟ੍ਟਤੀਤਿ ਵਚਨਂ ਉਦਕੁਕ੍ਖੇਪਪਰਿਚ੍ਛੇਦਸ੍ਸ ਦੁਬ੍ਬਿਜਾਨਤੋ ਕਮ੍ਮਕੋਪਸਙ੍ਕਾ ਹੋਤੀਤਿ. ਤੇਨੇਵ ਮਾਤਿਕਾਟ੍ਠਕਥਾਯਂ ‘‘ਪਰਿਚ੍ਛੇਦਬ੍ਭਨ੍ਤਰੇ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੋਪਿ ਪਰਿਚ੍ਛੇਦਤੋ ਬਹਿ ਅਞ੍ਞਂ ਤਤ੍ਤਕਂਯੇਵ ਪਰਿਚ੍ਛੇਦਂ ਅਨਤਿਕ੍ਕਮਿਤ੍ਵਾ ਠਿਤੋਪਿ ਕਮ੍ਮਂ ਕੋਪੇਤਿ ਇਦਂ ਸਬ੍ਬਅਟ੍ਠਕਥਾਸੁ ਸਨ੍ਨਿਟ੍ਠਾਨ’’ਨ੍ਤਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਵੁਤ੍ਤਂ. ਯਂ ਪਨੇਤ੍ਥ ਸਾਰਤ੍ਥਦੀਪਨਿਯਂ ‘‘ਤਸ੍ਸ ਅਨ੍ਤੋ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੋ ਕਮ੍ਮਂ ¶ ਕੋਪੇਤੀਤਿ ਇਮਿਨਾ ਬਹਿਪਰਿਚ੍ਛੇਦਤੋ ਯਤ੍ਥ ਕਤ੍ਥਚਿ ਠਿਤੋ ਕਮ੍ਮਂ ਨ ਕੋਪੇਤੀ’’ਤਿ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੪੭) ਵਤ੍ਵਾ ਮਾਤਿਕਾਟ੍ਠਕਥਾਵਚਨਮ੍ਪਿ ਪਟਿਕ੍ਖਿਪਿਤ੍ਵਾ ‘‘ਨੇਵ ਪਾਲ਼ਿਯਂ ਨ ਅਟ੍ਠਕਥਾਯਂ ਉਪਲਬ੍ਭਤੀ’’ਤਿਆਦਿ ਬਹੁ ਪਪਞ੍ਚਿਤਂ, ਤਂ ਨ ਸੁਨ੍ਦਰਂ ਇਧ ਅਟ੍ਠਕਥਾਵਚਨੇਨ ਮਾਤਿਕਾਟ੍ਠਕਥਾਵਚਨਸ੍ਸ ਨਯਤੋ ਸਂਸਨ੍ਦਨਤੋ ਸਙ੍ਘਟਨਤੋ. ਤਥਾ ਹਿ ਦ੍ਵਿਨ੍ਨਂ ਉਦਕੁਕ੍ਖੇਪਪਰਿਚ੍ਛੇਦਾਨਮਨ੍ਤਰਾ ਵਿਦਤ੍ਥਿਚਤੁਰਙ੍ਗੁਲਮਤ੍ਤਮ੍ਪਿ ਸੀਮਨ੍ਤਰਿਕਂ ਅਟ੍ਠਪੇਤ੍ਵਾ ‘‘ਅਞ੍ਞੋ ਉਦਕੁਕ੍ਖੇਪੋ ਸੀਮਨ੍ਤਰਿਕਾਯ ਠਪੇਤਬ੍ਬੋ, ਤਤੋ ਅਧਿਕਂ ਵਟ੍ਟਤਿ ਏਵ, ਊਨਕਂ ਪਨ ਨ ਵਟ੍ਟਤੀ’’ਤਿ ਏਵਂ ਇਧੇਵ ਵੁਤ੍ਤੇਨ ਇਮਿਨਾ ਅਟ੍ਠਕਥਾਵਚਨੇਨ ਸੀਮਨ੍ਤਰਿਕੋਪਚਾਰੇਨ ਉਦਕੁਕ੍ਖੇਪਤੋ ਊਨਕੇ ਠਪਿਤੇ ਸੀਮਾਯ ਸੀਮਾਸਮ੍ਭੇਦਤੋ ਕਮ੍ਮਕੋਪੋਪਿ ਵੁਤ੍ਤੋ ਏਵ. ਯਦਗ੍ਗੇਨ ਚ ਏਵਂ ਵੁਤ੍ਤੋ, ਤਦਗ੍ਗੇਨ ਤਤ੍ਥ ਏਕਭਿਕ੍ਖੁਨੋ ਪਵੇਸੇਪਿ ਸਤਿ ਤਸ੍ਸ ਸੀਮਟ੍ਠਭਾਵਤੋ ਕਮ੍ਮਕੋਪੋ ਵੁਤ੍ਤੋ ਏਵ ਹੋਤਿ. ਅਟ੍ਠਕਥਾਯਂ ‘‘ਊਨਕਂ ਪਨ ਨ ਵਟ੍ਟਤੀ’’ਤਿ ਕਥਨਞ੍ਚੇਤਂ ਉਦਕੁਕ੍ਖੇਪਪਰਿਚ੍ਛੇਦਸ੍ਸ ਦੁਬ੍ਬਿਜਾਨਨ੍ਤੇਨਪਿ ਸੀਮਾਸਮ੍ਭੇਦਸਙ੍ਕਆਪਰਿਹਾਰਤ੍ਥਂ ਵੁਤ੍ਤਂ. ਸਤ੍ਤਬ੍ਭਨ੍ਤਰਸੀਮਾਨਮਨ੍ਤਰਾ ਤਤ੍ਤਕਪਰਿਚ੍ਛੇਦੇਨੇਵ ਸੀਮਨ੍ਤਰਿਕਵਿਧਾਨਵਚਨਤੋਪਿ ਏਤਾਸਂ ਦੁਬ੍ਬਿਜਾਨਪਰਿਚ੍ਛੇਦਤਾ, ਤਤ੍ਥ ਚ ਠਿਤਾਨਂ ਕਮ੍ਮਕੋਪਸਙ੍ਕਾ ਸਿਜ੍ਝਤਿ. ਕਮ੍ਮਕੋਪਸਙ੍ਕਟ੍ਠਾਨਮ੍ਪਿ ਆਚਰਿਯਾ ਦੂਰਤੋ ਪਰਿਹਾਰਤ੍ਥਂ ਕਮ੍ਮਕੋਪਟ੍ਠਾਨਨ੍ਤਿ ਵਤ੍ਵਾਵ ਠਪੇਸੁਨ੍ਤਿ ਗਹੇਤਬ੍ਬਂ.

ਤਨ੍ਤਿ ਸੀਮਂ. ‘‘ਸੀਘਮੇਵ ਅਤਿਕ੍ਕਾਮੇਤੀ’’ਤਿ ਇਮਿਨਾ ਤਂ ਅਨਤਿਕ੍ਕਮਿਤ੍ਵਾ ਅਨ੍ਤੋ ਏਵ ਪਰਿਵਤ੍ਤਮਾਨਾਯ ਕਾਤੁਂ ਵਟ੍ਟਤੀਤਿ ਦਸ੍ਸੇਤਿ. ਏਤਦਤ੍ਥਮੇਵ ਹਿ ਵਾਲੁਕਾਦੀਹਿ ਸੀਮਾਪਰਿਚ੍ਛਿਨ੍ਦਨਂ, ਇਤਰਥਾ ਬਹਿ ਪਰਿਵਤ੍ਤਾ ਨੁ ਖੋ, ਨੋ ਵਾਤਿ ਕਮ੍ਮਕੋਪਸਙ੍ਕਾ ਭਵੇਯ੍ਯਾਤਿ. ਅਞ੍ਞਿਸ੍ਸਾ ਅਨੁਸ੍ਸਾਵਨਾਤਿ ਕੇਵਲਾਯ ਨਦਿਸੀਮਾਯ ਅਨੁਸ੍ਸਾਵਨਾ ¶ . ਅਨ੍ਤੋਨਦਿਯਂ ਜਾਤਰੁਕ੍ਖੇ ਵਾਤਿ ਉਦਕੁਕ੍ਖੇਪਪਰਿਚ੍ਛੇਦਸ੍ਸ ਬਹਿ ਠਿਤੇ ਰੁਕ੍ਖੇਪਿ ਵਾ. ਬਹਿਨਦਿਤੀਰਮੇਵ ਹਿ ਵਿਸਭਾਗਸੀਮਤ੍ਤਾ ਅਬਨ੍ਧਿਤਬ੍ਬਟ੍ਠਾਨਂ, ਨ ਅਨ੍ਤੋਨਦੀ ਨਿਸ੍ਸਯਤ੍ਤੇਨ ਸਭਾਗਤ੍ਤਾ. ਤੇਨੇਵ ‘‘ਬਹਿਨਦਿਤੀਰੇ ਵਿਹਾਰਸੀਮਾਯ ਵਾ’’ਤਿਆਦਿਨਾ ਤੀਰਮੇਵ ਅਬਨ੍ਧਿਤਬ੍ਬਟ੍ਠਾਨਤ੍ਤੇਨ ਦਸ੍ਸਿਤਂ, ਨ ਪਨ ਨਦੀ. ‘‘ਰੁਕ੍ਖੇਪਿ ਠਿਤੇਹੀ’’ਤਿ ਇਦਂ ਅਨ੍ਤੋਉਦਕੁਕ੍ਖੇਪਟ੍ਠਂ ਸਨ੍ਧਾਯ ਵੁਤ੍ਤਂ. ਨ ਹਿ ਬਹਿਉਦਕੁਕ੍ਖੇਪੇ ਭਿਕ੍ਖੂਨਂ ਠਾਤੁਂ ਵਟ੍ਟਤਿ.

ਰੁਕ੍ਖਸ੍ਸਾਤਿ ਤਸ੍ਸੇਵ ਅਨ੍ਤੋਉਦਕੁਕ੍ਖੇਪਟ੍ਠਸ੍ਸ ਰੁਕ੍ਖਸ੍ਸ. ਸੀਮਂ ਵਾ ਸੋਧੇਤ੍ਵਾਤਿ ਯਥਾਵੁਤ੍ਤਂ ਵਿਹਾਰੇ ਬਦ੍ਧਸੀਮਂ, ਗਾਮਸੀਮਞ੍ਚ ਤਤ੍ਥ ਠਿਤਭਿਕ੍ਖੂਨਂ ਹਤ੍ਥਪਾਸਾਨਯਨਬਹਿਸੀਮਾਕਰਣਵਸੇਨੇਵ ਸੋਧੇਤ੍ਵਾ. ਯਥਾ ਚ ਉਦਕੁਕ੍ਖੇਪਸੀਮਾਯਂ ਕਮ੍ਮਂ ਕਰੋਨ੍ਤੇਹਿ, ਏਵਂ ਬਦ੍ਧਸੀਮਾਯਂ, ਗਾਮਸੀਮਾਯਂ ਵਾ ਕਮ੍ਮਂ ਕਰੋਨ੍ਤੇਹਿਪਿ ਉਦਕੁਕ੍ਖੇਪਸੀਮਟ੍ਠੇ ਸੋਧੇਤ੍ਵਾਵ ਕਾਤਬ੍ਬਂ. ਏਤੇਨੇਵ ਸਤ੍ਤਬ੍ਭਨ੍ਤਰਅਰਞ੍ਞਸੀਮਾਹਿਪਿ ਉਦਕੁਕ੍ਖੇਪਸੀਮਾਯ, ਇਮਾਯ ਚ ਸਦ੍ਧਿਂ ਤਾਸਂ ਰੁਕ੍ਖਾਦਿਸਮ੍ਬਨ੍ਧਦੋਸੋਪਿ ਨਯਤੋ ਦਸ੍ਸਿਤੋਵ ਹੋਤਿ. ਇਮਿਨਾਵ ਨਯੇਨ ਸਤ੍ਤਬ੍ਭਨ੍ਤਰਸੀਮਾਯ ਬਦ੍ਧਸੀਮਾਗਾਮਸੀਮਾਹਿਪਿ ਸਦ੍ਧਿਂ, ਏਤਾਸਞ੍ਚ ਸਤ੍ਤਬ੍ਭਨ੍ਤਰਸੀਮਾਯ ¶ ਸਦ੍ਧਿਂ ਸਮ੍ਬਨ੍ਧਦੋਸੋ ਞਾਤਬ੍ਬੋ. ਅਟ੍ਠਕਥਾਯਂ ਪਨੇਤਂ ਸਬ੍ਬਂ ਵੁਤ੍ਤਨਯਤੋ ਸਕ੍ਕਾ ਞਾਤੁਨ੍ਤਿ ਅਞ੍ਞਮਞ੍ਞਸਮਾਸਨ੍ਨਾਨਮੇਵੇਤ੍ਥ ਦਸ੍ਸਿਤਂ.

ਤਤ੍ਰਿਦਂ ਸੁਤ੍ਤਾਨੁਲੋਮਤੋ ਨਯਗ੍ਗਹਣਮੁਖਂ – ਯਥਾ ਹਿ ਬਦ੍ਧਸੀਮਾਯਂ ਸਮ੍ਮਤਾ ਵਿਪਤ੍ਤਿਸੀਮਾ ਹੋਤੀਤਿ ਤਾਸਂ ਅਞ੍ਞਮਞ੍ਞਂ ਰੁਕ੍ਖਾਦਿਸਮ੍ਬਨ੍ਧੋ ਨ ਵਟ੍ਟਤਿ, ਏਵਂ ਨਦਿਆਦੀਸੁ ਸਮ੍ਮਤਾਪਿ ਬਦ੍ਧਸੀਮਾ ਵਿਪਤ੍ਤਿਸੀਮਾਵ ਹੋਤੀਤਿ ਤਾਹਿਪਿ ਸਦ੍ਧਿਂ ਤਸ੍ਸਾ ਰੁਕ੍ਖਾਦਿਸਮ੍ਬਨ੍ਧੋ ਨ ਵਟ੍ਟਤੀਤਿ ਸਿਜ੍ਝਤਿ. ਇਮਿਨਾ ਨਯੇਨ ਸਤ੍ਤਬ੍ਭਨ੍ਤਰਸੀਮਾਯ ਗਾਮਨਦਿਆਦੀਹਿ ਸਦ੍ਧਿਂ, ਉਦਕੁਕ੍ਖੇਪਸੀਮਾਯ ਚ ਅਰਞ੍ਞਾਦੀਹਿ ਸਦ੍ਧਿਂ ਰੁਕ੍ਖਾਦਿਸਮ੍ਬਨ੍ਧਸ੍ਸ ਨ ਵਟ੍ਟਨਕਭਾਵੋ ਞਾਤਬ੍ਬੋ, ਏਵਮੇਤਾ ਭਗਵਤਾ ਅਨੁਞ੍ਞਾਤਾ ਬਦ੍ਧਸੀਮਾ ਸਤ੍ਤਬ੍ਭਨ੍ਤਰਉਦਕੁਕ੍ਖੇਪਸੀਮਾ ਅਞ੍ਞਮਞ੍ਞਞ੍ਚੇਵ ਅਤ੍ਤਨੋ ਨਿਸ੍ਸਯਵਿਰਹਿਤਾਹਿ ਇਤਰੀਤਰਾਸਂ ਨਿਸ੍ਸਯਸੀਮਾਹਿ ਚ ਰੁਕ੍ਖਾਦਿਸਮ੍ਬਨ੍ਧੇ ਸਤਿ ਸਮ੍ਭੇਦਦੋਸਮਾਪਜ੍ਜਤੀਤਿ ਸੁਤ੍ਤਾਨੁਲੋਮਨਯੋ ਞਾਤਬ੍ਬੋਵ.

ਅਤ੍ਤਨੋ ਅਤ੍ਤਨੋ ਪਨ ਨਿਸ੍ਸਯਭੂਤਗਾਮਾਦੀਹਿ ਸਦ੍ਧਿਂ ਬਦ੍ਧਸੀਮਾਦੀਨਂ ਤਿਸ੍ਸਨ੍ਨਂ ਉਪ੍ਪਤ੍ਤਿਕਾਲੇ ਭਗਵਤਾ ਅਨੁਞ੍ਞਾਤਸ੍ਸ ਸਮ੍ਭੇਦਜ੍ਝੋਤ੍ਥਰਣਸ੍ਸ ਅਨੁਲੋਮਤੋ ਰੁਕ੍ਖਾਦਿਸਮ੍ਬਨ੍ਧੋਪਿ ਅਨੁਞ੍ਞਾਤੋਵ ਹੋਤੀਤਿ ਦਟ੍ਠਬ੍ਬਂ. ਯਦਿ ਏਵਂ ਉਦਕੁਕ੍ਖੇਪਬਦ੍ਧਸੀਮਾਦੀਨਂ ਅਨ੍ਤਰਾ ਕਸ੍ਮਾ ਸੀਮਨ੍ਤਰਿਕਾ ਨ ਵਿਹਿਤਾਤਿ? ਨਿਸ੍ਸਯਭੇਦਸਭਾਵਭੇਦੇਹਿ ¶ ਸਯਮੇਵ ਭਿਨ੍ਨਤ੍ਤਾ. ਏਕਨਿਸ੍ਸਯਏਕਸਭਾਵਾਨਮੇਵ ਹਿ ਸੀਮਨ੍ਤਰਿਕਾਯ ਵਿਨਾਸਂ ਕਰੋਤੀਤਿ ਵੁਤ੍ਤੋਵਾਯਮਤ੍ਥੋ. ਏਤੇਨੇਵ ਨਦਿਨਿਮਿਤ੍ਤਂ ਕਤ੍ਵਾ ਬਦ੍ਧਾਯ ਸੀਮਾਯ ਸਙ੍ਘੇ ਕਮ੍ਮਂ ਕਰੋਨ੍ਤੇ ਨਦਿਯਮ੍ਪਿ ਯਾਵ ਗਾਮਖੇਤ੍ਤਂ ਆਹਚ੍ਚ ਠਿਤਾਯ ਉਦਕੁਕ੍ਖੇਪਸੀਮਾਯ ਅਞ੍ਞੇਸਂ ਕਮ੍ਮਂ ਕਾਤੁਂ ਵਟ੍ਟਤੀਤਿ ਸਿਦ੍ਧਂ ਹੋਤਿ. ਯਾ ਪਨੇਤਾ ਲੋਕਵੋਹਾਰਸਿਦ੍ਧਾ ਗਾਮਾਰਞ੍ਞਨਦਿਸਮੁਦ੍ਦਜਾਤਸ੍ਸਰਸੀਮਾ ਪਞ੍ਚ, ਤਾ ਅਞ੍ਞਮਞ੍ਞਰੁਕ੍ਖਾਦਿਸਮ੍ਬਨ੍ਧੇਪਿ ਸਮ੍ਭੇਦਦੋਸਂ ਨਾਪਜ੍ਜਤਿ, ਤਥਾ ਲੋਕਵੋਹਾਰਾਭਾਵਤੋ. ਨ ਹਿ ਗਾਮਾਦਯੋ ਗਾਮਨ੍ਤਰਾਦੀਹਿ, ਨਦਿਆਦੀਹਿ ਚ ਰੁਕ੍ਖਾਦਿਸਮ੍ਬਨ੍ਧਮਤ੍ਤੇਨ ਸਮ੍ਭਿਨ੍ਨਾਤਿ ਲੋਕੇ ਵੋਹਰਨ੍ਤਿ. ਲੋਕਵੋਹਾਰਸਿਦ੍ਧਾਨਞ੍ਚ ਲੋਕਵੋਹਾਰਤੋਵ ਸਮ੍ਭੇਦੋ ਵਾ ਅਸਮ੍ਭੇਦੋ ਵਾ ਗਹੇਤਬ੍ਬੋ, ਨਾਞ੍ਞਤੋ. ਤੇਨੇਵ ਅਟ੍ਠਕਥਾਯਂ ਤਾਸਂ ਅਞ੍ਞਮਞ੍ਞਂ ਕਤ੍ਥਚਿਪਿ ਸਮ੍ਭੇਦਨਯੋ ਨ ਦਸ੍ਸਿਤੋ, ਸਾਸਨਵੋਹਾਰਸਿਦ੍ਧੋਯੇਵ ਦਸ੍ਸਿਤੋਤਿ.

ਏਤ੍ਥ ਪਨ ਬਦ੍ਧਸੀਮਾਯ ਤਾਵ ‘‘ਹੇਟ੍ਠਾ ਪਥਵੀਸਨ੍ਧਾਰਕਂ ਉਦਕਪਰਿਯਨ੍ਤਂ ਕਤ੍ਵਾ ਸੀਮਾਗਤਾ ਹੋਤੀ’’ਤਿਆਦਿਨਾ (ਮਹਾਵ. ਅਟ੍ਠ. ੧੩੮) ਅਧੋਭਾਗਪਰਿਚ੍ਛੇਦੋ ਅਟ੍ਠਕਥਾਯਂ ਸਬ੍ਬਥਾ ਦਸ੍ਸਿਤੋ. ਗਾਮਸੀਮਾਦੀਨਂ ਪਨ ਨ ਦਸ੍ਸਿਤੋ. ਕਥਮਯਂ ਜਾਨਿਤਬ੍ਬੋਤਿ? ਕੇਚਿ ਤਾਵੇਤ੍ਥ ‘‘ਗਾਮਸੀਮਾਦਯੋਪਿ ਬਦ੍ਧਸੀਮਾ ਵਿਯ ਪਥਵੀਸਨ੍ਧਾਰਕਂ ਉਦਕਂ ਆਹਚ੍ਚ ਤਿਟ੍ਠਤੀ’’ਤਿ ਵਦਨ੍ਤਿ.

ਕੇਚਿ ¶ ਪਨ ਤਂ ਪਟਿਕ੍ਖਿਪਿਤ੍ਵਾ ‘‘ਨਦਿਸਮੁਦ੍ਦਜਾਤਸ੍ਸਰਸੀਮਾ, ਤਾਵ ਤਨ੍ਨਿਸ੍ਸਿਤਉਦਕੁਕ੍ਖੇਪਸੀਮਾ ਚ ਪਥਵਿਯਾ ਉਪਰਿਤਲੇ, ਹੇਟ੍ਠਾ ਚ ਉਦਕਜ੍ਝੋਤ੍ਥਰਣਪ੍ਪਦੇਸੇ ਏਵ ਤਿਟ੍ਠਨ੍ਤਿ, ਨ ਤਤੋ ਹੇਟ੍ਠਾ ਉਦਕਸ੍ਸ ਅਜ੍ਝੋਤ੍ਥਰਣਾਭਾਵਾ. ਸਚੇ ਪਨ ਉਦਕੋਘਾਦਿਨਾ ਯੋਜਨਪ੍ਪਮਾਣਮ੍ਪਿ ਨਿਨ੍ਨਟ੍ਠਾਨਂ ਹੋਤਿ, ਨਦਿਸੀਮਾਦਯੋਵ ਹੋਨ੍ਤਿ, ਨ ਤਤੋ ਹੇਟ੍ਠਾ. ਤਸ੍ਮਾ ਨਦਿਆਦੀਨਂ ਹੇਟ੍ਠਾ ਬਹਿਤੀਰਮੁਖੇਨ ਉਮਙ੍ਗੇਨ, ਇਦ੍ਧਿਯਾ ਵਾ ਪਵਿਟ੍ਠੋ ਭਿਕ੍ਖੁ ਨਦਿਯਂ ਠਿਤਾਨਂ ਕਮ੍ਮਂ ਨ ਕੋਪੇਤਿ. ਸੋ ਪਨ ਆਸਨ੍ਨਗਾਮੇ ਭਿਕ੍ਖੂਨਂ ਕਮ੍ਮਂ ਕੋਪੇਤਿ. ਸਚੇ ਪਨ ਸੋ ਉਭਿਨ੍ਨਂ ਤੀਰਗਾਮਾਨਂ ਮਜ੍ਝੇ ਨਿਸਿਨ੍ਨੋ ਹੋਤਿ, ਉਭਯਗਾਮਟ੍ਠਾਨਂ ਕਮ੍ਮਂ ਕੋਪੇਤਿ. ਸਚੇ ਪਨ ਤੀਰਂ ਗਾਮਖੇਤ੍ਤਂ ਨ ਹੋਤਿ, ਅਗਾਮਕਾਰਞ੍ਞਮੇਵ. ਤਤ੍ਥ ਪਨ ਤੀਰਦ੍ਵਯੇਪਿ ਸਤ੍ਤਬ੍ਭਨ੍ਤਰਸੀਮਂ ਵਿਨਾ ਕੇਵਲਾਯ ਖੁਦ੍ਦਕਾਰਞ੍ਞਸੀਮਾਯ ਕਮ੍ਮਂ ਕਰੋਨ੍ਤਾਨਂ ਕਮ੍ਮਂ ਕੋਪੇਤਿ. ਸਚੇ ਸਤ੍ਤਬ੍ਭਨ੍ਤਰਸੀਮਾਯਂ ਕਰੋਨ੍ਤਿ, ਤਦਾ ਯਦਿ ਤੇਸਂ ਸਤ੍ਤਬ੍ਭਨ੍ਤਰਸੀਮਾਯ ਪਰਿਚ੍ਛੇਦੋ ਏਤਸ੍ਸ ਨਿਸਿਨ੍ਨੋਕਾਸਸ੍ਸ ਪਰਤੋ ਏਕਂ ਸਤ੍ਤਬ੍ਭਨ੍ਤਰਂ ਅਤਿਕ੍ਕਮਿਤ੍ਵਾ ਠਿਤੋ ਨ ਕਮ੍ਮਕੋਪੋ ¶ . ਨੋ ਚੇ, ਕਮ੍ਮਕੋਪੋ. ਗਾਮਸੀਮਾਯਂ ਪਨ ਅਨ੍ਤੋਉਮਙ੍ਗੇ ਵਾ ਬਿਲੇ ਵਾ ਯਤ੍ਥ ਪਵਿਸਿਤੁਂ ਸਕ੍ਕਾ, ਯਤ੍ਥ ਵਾ ਸੁਵਣ੍ਣਮਣਿਆਦਿਂ ਖਣਿਤ੍ਵਾ ਗਣ੍ਹਨ੍ਤਿ, ਗਹੇਤੁਂ ਸਕ੍ਕਾਤਿ ਵਾ ਸਮ੍ਭਾਵਨਾ ਹੋਤਿ, ਤਤ੍ਤਕਂ ਹੇਟ੍ਠਾਪਿ ਗਾਮਸੀਮਾ, ਤਤ੍ਥ ਇਦ੍ਧਿਯਾ ਅਨ੍ਤੋ ਨਿਸਿਨ੍ਨੋਪਿ ਕਮ੍ਮਂ ਕੋਪੇਤਿ. ਯਤ੍ਥ ਪਨ ਪਕਤਿਮਨੁਸ੍ਸਾਨਂ ਪਵੇਸਸਮ੍ਭਾਵਨਾਪਿ ਨਤ੍ਥਿ, ਤਂ ਸਬ੍ਬਂ ਯਾਵ ਪਥਵਿਸਨ੍ਧਾਰਕਉਦਕਾ ਅਰਞ੍ਞਸੀਮਾਵ, ਨ ਗਾਮਸੀਮਾ. ਅਰਞ੍ਞਸੀਮਾਯਮ੍ਪਿ ਏਸੇਵ ਨਯੋ. ਤਤ੍ਥਪਿ ਹਿ ਯਤ੍ਤਕੇ ਪਦੇਸੇ ਪਵੇਸਸਮ੍ਭਾਵਨਾ, ਤਤ੍ਤਕਮੇਵ ਉਪਰਿਤਲੇ ਅਰਞ੍ਞਸੀਮਾ ਪਵਤ੍ਤਤਿ. ਤਤੋ ਪਨ ਹੇਟ੍ਠਾ ਨ ਅਰਞ੍ਞਸੀਮਾ, ਤਤ੍ਥ ਉਪਰਿਤਲੇਨ ਸਹ ਏਕਾਰਞ੍ਞਵੋਹਾਰਾਭਾਵਤੋ. ਨ ਹਿ ਤਤ੍ਥ ਪਵਿਟ੍ਠਂ ਅਰਞ੍ਞਂ ਪਵਿਟ੍ਠੋ ਤਿ ਵੋਹਰਨ੍ਤਿ. ਤਸ੍ਮਾ ਤਤ੍ਰਟ੍ਠੋ ਉਪਰਿ ਅਰਞ੍ਞਟ੍ਠਾਨਂ ਕਮ੍ਮਂ ਨ ਕੋਪੇਤਿ ਉਮਙ੍ਗਨਦਿਯਂ ਠਿਤੋ ਵਿਯ ਉਪਰਿਨਦਿਯਂ ਠਿਤਾਨਂ. ਏਕਸ੍ਮਿਞ੍ਹਿ ਚਕ੍ਕਵਾਲ਼ੇ ਗਾਮਨਦਿਸਮੁਦ੍ਦਜਾਤਸ੍ਸਰੇ ਮੁਞ੍ਚਿਤ੍ਵਾ ਤਦਵਸੇਸਂ ਅਮਨੁਸ੍ਸਾਵਾਸਂ ਦੇਵਬ੍ਰਹ੍ਮਲੋਕਂ ਉਪਾਦਾਯ ਸਬ੍ਬਂ ਅਰਞ੍ਞਮੇਵ. ‘ਗਾਮਾ ਵਾ ਅਰਞ੍ਞਾ ਵਾ’ਤਿ ਵੁਤ੍ਤਤ੍ਤਾ ਹਿ ਨਦਿਸਮੁਦ੍ਦਜਾਤਸ੍ਸਰਾਦਿਪਿ ਅਰਞ੍ਞਮੇਵ. ਇਧ ਪਨ ਨਦਿਆਦੀਨਂ ਵਿਸੁਂ ਸੀਮਾਭਾਵੇਨ ਗਹਿਤਤ੍ਤਾ ਤਦਵਸੇਸਮੇਵ ਅਰਞ੍ਞਂ ਗਹੇਤਬ੍ਬਂ. ਤਤ੍ਥ ਚ ਯਤ੍ਤਕੇ ਪਦੇਸੇ ਏਕਂ ‘ਅਰਞ੍ਞ’ਨ੍ਤਿ ਵੋਹਰਨ੍ਤਿ, ਅਯਮੇਕਾਰਞ੍ਞਸੀਮਾ. ਇਨ੍ਦਪੁਰਞ੍ਹਿ ਸਬ੍ਬਂ ਏਕਾਰਞ੍ਞਸੀਮਾ. ਤਥਾ ਅਸੁਰਯਕ੍ਖਪੁਰਾਦਿ. ਆਕਾਸਟ੍ਠਦੇਵਬ੍ਰਹ੍ਮਵਿਮਾਨਾਨਿ ਪਨ ਸਮਨ੍ਤਾ ਆਕਾਸਪਰਿਚ੍ਛਿਨ੍ਨਾਨਿ ਪਚ੍ਚੇਕਂ ਅਰਞ੍ਞਸੀਮਾ ਸਮੁਦ੍ਦਮਜ੍ਝੇ ਪਬ੍ਬਤਦੀਪਕਾ ਵਿਯ. ਤਤ੍ਥ ਸਬ੍ਬਤ੍ਥ ਸਤ੍ਤਬ੍ਭਨ੍ਤਰਸੀਮਾਯਂ, ਅਰਞ੍ਞਸੀਮਾਯਮੇਵ ਵਾਤਿ ਕਮ੍ਮਂ ਕਾਤਬ੍ਬਂ. ਤਸ੍ਮਾ ਇਧਾਪਿ ਉਪਰਿਅਰਞ੍ਞਤਲੇਨ ਸਦ੍ਧਿਂ ਹੇਟ੍ਠਾਪਥਵਿਯਾ ਅਰਞ੍ਞਵੋਹਾਰਾਭਾਵਾ ਵਿਸੁਂ ਅਰਞ੍ਞਸੀਮਾਤਿ ਗਹੇਤਬ੍ਬਂ. ਤੇਨੇਵੇਤ੍ਥ ਗਾਮਨਦਿਆਦਿਸੀਮਾਕਥਾਯ ਅਟ੍ਠਕਥਾਯਂ ‘ਇਦ੍ਧਿਮਾ ਭਿਕ੍ਖੁ ਹੇਟ੍ਠਾਪਥਵਿਤਲੇ ਠਿਤੋ ਕਮ੍ਮਂ ਕੋਪੇਤੀ’ਤਿ (ਮਹਾਵ. ਅਟ੍ਠ. ੧੩੮) ਬਦ੍ਧਸੀਮਾਯਂ ਦਸ੍ਸਿਤਨਯੋ ਨ ਦਸ੍ਸਿਤੋ’’ਤਿ ਵਦਨ੍ਤਿ.

ਇਦਞ੍ਚੇਤਾਸਂ ¶ ਗਾਮਸੀਮਾਦੀਨਂ ਹੇਟ੍ਠਾਪਮਾਣਦਸ੍ਸਨਂ ਸੁਤ੍ਤਾਦਿਵਿਰੋਧਾਭਾਵਾ ਯੁਤ੍ਤਂ ਵਿਯ ਦਿਸ੍ਸਤਿ. ਵੀਮਂਸਿਤ੍ਵਾ ਗਹੇਤਬ੍ਬਂ. ਏਵਂ ਗਹਣੇ ਚ ਗਾਮਸੀਮਾਯਂ ਸਮ੍ਮਤਾ ਬਦ੍ਧਸੀਮਾ ਉਪਰਿ ਗਾਮਸੀਮਂ, ਹੇਟ੍ਠਾ ਉਦਕਪਰਿਯਨ੍ਤਂ ਅਰਞ੍ਞਸੀਮਞ੍ਚ ਅਵਤ੍ਥਰਤੀਤਿ ਤਸ੍ਸਾ ਅਰਞ੍ਞਸੀਮਾਪਿ ਖੇਤ੍ਤਨ੍ਤਿ ਸਿਜ੍ਝਤਿ. ਭਗਵਤਾ ਚ ‘‘ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ’’ਤਿਆਦਿਨਾ (ਮਹਾਵ. ਅਟ੍ਠ. ੧੪੭) ਨਦਿਸਮੁਦ੍ਦਜਾਤਸ੍ਸਰਾ ਬਦ੍ਧਸੀਮਾਯ ਅਖੇਤ੍ਤਭਾਵੇਨ ਵੁਤ੍ਤਾ, ਨ ਪਨ ਅਰਞ੍ਞਂ. ਤਸ੍ਮਾ ਅਰਞ੍ਞਮ੍ਪਿ ¶ ਬਦ੍ਧਸੀਮਾਯ ਖੇਤ੍ਤਮੇਵਾਤਿ ਗਹੇਤਬ੍ਬਂ. ਯਦਿ ਏਵਂ ਕਸ੍ਮਾ ਤਤ੍ਥ ਸਾ ਨ ਬਜ੍ਝਤੀਤਿ? ਪਯੋਜਨਾਭਾਵਾ. ਸੀਮਾਪੇਕ੍ਖਾਨਨ੍ਤਰਮੇਵ ਸਤ੍ਤਬ੍ਭਨ੍ਤਰਸੀਮਾਯ ਸਮ੍ਭਵਤੋ. ਤਸ੍ਸਾ ਚ ਉਪਰਿ ਸਮ੍ਮਤਾਯ ਬਦ੍ਧਸੀਮਾਯ ਸਮ੍ਭੇਦਜ੍ਝੋਤ੍ਥਰਣਾਨੁਲੋਮਤੋ ਵਿਪਤ੍ਤਿਸੀਮਾ ਏਵ ਸਿਯਾ. ਗਾਮਖੇਤ੍ਤੇ ਪਨ ਠਤ੍ਵਾ ਅਗਾਮਕਾਰਞ੍ਞੇਕਦੇਸਮ੍ਪਿ ਅਨ੍ਤੋਕਰਿਤ੍ਵਾ ਸਮ੍ਮਤਾ ਕਿਞ੍ਚਾਪਿ ਸੁਸਮ੍ਮਤਾ, ਅਗਾਮਕਾਰਞ੍ਞੇ ਭਗਵਤਾ ਵਿਹਿਤਾਯ ਸਤ੍ਤਬ੍ਭਨ੍ਤਰਸੀਮਾਯਪਿ ਅਨਿਵਤ੍ਤਿਤੋ. ਤਤ੍ਥ ਪਨ ਕਮ੍ਮਂ ਕਾਤੁਂ ਪਵਿਟ੍ਠਾਨਮ੍ਪਿ ਤਤੋ ਬਹਿ ਕੇਵਲਾਰਞ੍ਞੇ ਕਰੋਨ੍ਤਾਨਮ੍ਪਿ ਅਨ੍ਤਰਾ ਤੀਣਿ ਸਤ੍ਤਬ੍ਭਨ੍ਤਰਾਨਿ ਠਪੇਤਬ੍ਬਾਨਿ, ਅਞ੍ਞਥਾ ਵਿਪਤ੍ਤਿ ਏਵ ਸਿਯਾਤਿ ਸਬ੍ਬਥਾ ਨਿਰਤ੍ਥਕਮੇਵ ਅਗਾਮਕਾਰਞ੍ਞੇ ਬਦ੍ਧਸੀਮਾਕਰਣਨ੍ਤਿ ਵੇਦਿਤਬ੍ਬਂ.

ਅਨ੍ਤੋਨਦਿਯਂ ਪਵਿਟ੍ਠਸਾਖਾਯਾਤਿ ਨਦਿਯਾ ਪਥਵਿਤਲਂ ਆਹਚ੍ਚ ਠਿਤਾਯ ਸਾਖਾਯਪਿ, ਪਗੇਵ ਅਨਾਹਚ੍ਚ ਠਿਤਾਯ. ਪਾਰੋਹੇਪਿ ਏਸੇਵ ਨਯੋ. ਏਤੇਨ ਸਭਾਗਂ ਨਦਿਸੀਮਂ ਫੁਸਿਤ੍ਵਾ ਠਿਤੇਨਪਿ ਵਿਸਭਾਗਸੀਮਾਸਮ੍ਬਨ੍ਧਸਾਖਾਦਿਨਾ ਉਦਕੁਕ੍ਖੇਪਸੀਮਾਯ ਸਮ੍ਬਨ੍ਧੋ ਨ ਵਟ੍ਟਤੀਤਿ ਦਸ੍ਸੇਤਿ. ਏਤੇਨੇਵ ਮਹਾਸੀਮਂ, ਗਾਮਸੀਮਞ੍ਚ ਫੁਸਿਤ੍ਵਾ ਠਿਤੇਨ ਸਾਖਾਦਿਨਾ ਮਾਲ਼ਕਸੀਮਾਯ ਸਮ੍ਬਨ੍ਧੋ ਨ ਵਟ੍ਟਤੀਤਿ ਞਾਪਿਤੋਤਿ ਦਟ੍ਠਬ੍ਬੋ.

ਅਨ੍ਤੋਨਦਿਯਂਯੇਵਾਤਿ ਸੇਤੁਪਾਦਾਨਂ ਤੀਰਟ੍ਠਤਂ ਨਿਵਤ੍ਤੇਤਿ. ਤੇਨ ਉਦਕੁਕ੍ਖੇਪਪਰਿਚ੍ਛੇਦਤੋ ਬਹਿ ਨਦਿਯਂ ਪਤਿਟ੍ਠਿਤਤ੍ਤੇਪਿ ਸਮ੍ਭੇਦਾਭਾਵਂ ਦਸ੍ਸੇਤਿ. ਤੇਨਾਹ ‘‘ਬਹਿਤੀਰੇ ਪਤਿਟ੍ਠਿਤਾ’’ਤਿਆਦਿ. ਯਦਿ ਹਿ ਉਦਕੁਕ੍ਖੇਪਤੋ ਬਹਿ ਅਨ੍ਤੋਨਦਿਯਮ੍ਪਿ ਪਤਿਟ੍ਠਿਤਤ੍ਤੇ ਸਮ੍ਭੇਦੋ ਭਵੇਯ੍ਯ, ਤਮ੍ਪਿ ਪਟਿਕ੍ਖਿਪਿਤਬ੍ਬਂ ਭਵੇਯ੍ਯ ਕਮ੍ਮਕੋਪਸ੍ਸ ਸਮਾਨਤ੍ਤਾ, ਨ ਚ ਪਟਿਕ੍ਖਿਤ੍ਤਂ. ਤਸ੍ਮਾ ਸਬ੍ਬਤ੍ਥ ਅਤ੍ਤਨੋ ਨਿਸ੍ਸਯਸੀਮਾਯ ਸਮ੍ਭੇਦਦੋਸੋ ਨਤ੍ਥੇਵਾਤਿ ਗਹੇਤਬ੍ਬਂ.

ਆਵਰਣੇਨ ਵਾਤਿ ਦਾਰੁਆਦਿਂ ਨਿਖਣਿਤ੍ਵਾ ਉਦਕਨਿਵਾਰਣੇਨ. ਕੋਟ੍ਟਕਬਨ੍ਧਨੇਨ ਵਾਤਿ ਮਤ੍ਤਿਕਾਦੀਹਿ ਪੂਰੇਤ੍ਵਾ ਕਤਸੇਤੁਬਨ੍ਧੇਨ. ਉਭਯੇਨਾਪਿ ਆਵਰਣਮੇਵ ਦਸ੍ਸੇਤਿ. ‘‘ਨਦਿਂ ਵਿਨਾਸੇਤ੍ਵਾ’’ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤਿ ‘‘ਹੇਟ੍ਠਾ ਪਾਲ਼ਿ ਬਦ੍ਧਾ’’ਤਿ, ਹੇਟ੍ਠਾ ਨਦਿਂ ਆਵਰਿਤ੍ਵਾ ਪਾਲ਼ਿ ਬਦ੍ਧਾਤਿ ਅਤ੍ਥੋ. ਛਡ੍ਡਿਤਮੋਦਕਨ੍ਤਿ ਅਤਿਰਿਤ੍ਤੋਦਕਂ. ‘‘ਨਦਿਂ ਓਤ੍ਥਰਿਤ੍ਵਾ ਸਨ੍ਦਨਟ੍ਠਾਨਤੋ’’ਤਿ ਇਮਿਨਾ ਤਲ਼ਾਕਨਦੀਨਂ ਅਨ੍ਤਰਾ ¶ ਪਵਤ੍ਤਨਟ੍ਠਾਨੇ ਨ ਵਟ੍ਟਤੀਤਿ ਦਸ੍ਸੇਤਿ. ਉਪ੍ਪਤਿਤ੍ਵਾਤਿ ਤੀਰਾਦਿਭਿਨ੍ਦਨਵਸੇਨ ਵਿਪੁਲਾ ਹੁਤ੍ਵਾ. ਵਿਹਾਰਸੀਮਨ੍ਤਿ ਬਦ੍ਧਸੀਮਂ.

ਅਗਮਨਪਥੇਤਿ ¶ ਤਦਹੇਵ ਗਨ੍ਤ੍ਵਾ ਨਿਵਤ੍ਤਿਤੁਂ ਅਸਕ੍ਕੁਣੇਯ੍ਯੇ. ਅਰਞ੍ਞਸੀਮਾਸਙ੍ਖ੍ਯਮੇਵ ਗਚ੍ਛਤੀਤਿ ਲੋਕਵੋਹਾਰਸਿਦ੍ਧਂ ਅਗਾਮਕਾਰਞ੍ਞਸੀਮਂ ਸਨ੍ਧਾਯ ਵਦਤਿ. ਤਤ੍ਥਾਤਿ ਪਕਤਿਯਾ ਮਚ੍ਛਬਨ੍ਧਾਨਂ ਗਮਨਪਥੇਸੁ ਦੀਪਕੇਸੁ.

ਤਂ ਠਾਨਨ੍ਤਿ ਆਵਾਟਾਦੀਨਂ ਕਤਟ੍ਠਾਨਮੇਵ, ਨ ਅਕਤਨ੍ਤਿ ਅਤ੍ਥੋ. ਲੋਣੀਤਿ ਸਮੁਦ੍ਦੋਦਕਸ੍ਸ ਉਪ੍ਪਤ੍ਤਿਵੇਗਨਿਨ੍ਨੋ ਮਾਤਿਕਾਕਾਰੇਨ ਪਵਤ੍ਤਨਕੋ.

੧੪੮. ਸਮ੍ਭਿਨ੍ਦਨ੍ਤੀਤਿ ਯਤ੍ਥ ਚਤੂਹਿ ਭਿਕ੍ਖੂਹਿ ਨਿਸੀਦਿਤੁਂ ਨ ਸਕ੍ਕਾ, ਤਤ੍ਤਕਤੋ ਪਟ੍ਠਾਯ ਯਾਵ ਕੇਸਗ੍ਗਮਤ੍ਤਮ੍ਪਿ ਅਨ੍ਤੋਸੀਮਾਯ ਕਰੋਨ੍ਤੋ ਸਮ੍ਭਿਨ੍ਦਤਿ. ਚਤੁਨ੍ਨਂ ਭਿਕ੍ਖੂਨਂ ਪਹੋਨਕਤੋ ਪਟ੍ਠਾਯ ਯਾਵ ਸਕਲਮ੍ਪਿ ਅਨ੍ਤੋ ਕਰੋਨ੍ਤੋ ਅਜ੍ਝੋਤ੍ਥਰਨ੍ਤੀਤਿ ਵੇਦਿਤਬ੍ਬਂ. ਸਂਸਟ੍ਠਵਿਟਪਾਤਿ ਅਞ੍ਞਮਞ੍ਞਂ ਸਿਬ੍ਬਿਤ੍ਵਾ ਠਿਤਮਹਾਸਾਖਮੂਲਾ, ਏਤੇਨ ਅਞ੍ਞਮਞ੍ਞਸ੍ਸ ਅਚ੍ਚਾਸਨ੍ਨਤਂ ਦੀਪੇਤਿ. ਸਾਖਾਯ ਸਾਖਂ ਫੁਸਨ੍ਤਾ ਹਿ ਦੂਰਟ੍ਠਾਪਿ ਸਿਯ੍ਯੁਂ, ਤਤੋ ਏਕਂਸਤੋ ਸਮ੍ਭੇਦਲਕ੍ਖਣਂ ਦਸ੍ਸਿਤਂ ਨ ਸਿਯਾਤਿ ਤਂ ਦਸ੍ਸੇਤੁਂ ਵਿਟਪਗ੍ਗਹਣਂ ਕਤਂ. ਏਵਞ੍ਹਿ ਭਿਕ੍ਖੂਨਂ ਨਿਸੀਦਿਤੁਂ ਅਪ੍ਪਹੋਨਕਟ੍ਠਾਨਂ ਅਤ੍ਤਨੋ ਸੀਮਾਯ ਅਨ੍ਤੋਸੀਮਟ੍ਠਂ ਕਰਿਤ੍ਵਾ ਪੁਰਾਣਵਿਹਾਰਂ ਕਰੋਨ੍ਤੋ ਸੀਮਾਯ ਸੀਮਂ ਸਮ੍ਭਿਨ੍ਦਤਿ ਨਾਮ, ਨ ਤਤੋ ਪਰਨ੍ਤਿ ਦਸ੍ਸਿਤਮੇਵ ਹੋਤਿ. ਬਦ੍ਧਾ ਹੋਤੀਤਿ ਪੋਰਾਣਕਵਿਹਾਰਸੀਮਂ ਸਨ੍ਧਾਯ ਵੁਤ੍ਤਂ. ਅਮ੍ਬਨ੍ਤਿ ਅਪਰੇਨ ਸਮਯੇਨ ਪੁਰਾਣਵਿਹਾਰਪਰਿਕ੍ਖੇਪਾਦੀਨਂ ਵਿਨਟ੍ਠਤ੍ਤਾ ਅਜਾਨਨ੍ਤਾਨਂ ਤਂ ਪੁਰਾਣਸੀਮਾਯ ਨਿਮਿਤ੍ਤਭੂਤਂ ਅਮ੍ਬਂ. ਅਤ੍ਤਨੋ ਸੀਮਾਯ ਅਨ੍ਤੋਸੀਮਟ੍ਠਂ ਕਰਿਤ੍ਵਾ ਪੁਰਾਣਵਿਹਾਰਸੀਮਟ੍ਠਂ ਜਮ੍ਬੁਂ ਕਿਤ੍ਤੇਤ੍ਵਾ ਅਮ੍ਬਜਮ੍ਬੂਨਂ ਅਨ੍ਤਰੇ ਯਂ ਠਾਨਂ, ਤਂ ਅਤ੍ਤਨੋ ਸੀਮਾਯ ਪਵੇਸੇਤ੍ਵਾ ਬਨ੍ਧਨ੍ਤੀਤਿ ਅਤ੍ਥੋ. ਏਤ੍ਥ ਚ ਪੁਰਾਣਸੀਮਾਯ ਨਿਮਿਤ੍ਤਭੂਤਸ੍ਸ ਗਾਮਟ੍ਠਸ੍ਸ ਅਮ੍ਬਰੁਕ੍ਖਸ੍ਸ ਅਨ੍ਤੋਸੀਮਟ੍ਠਾਯ ਜਮ੍ਬੁਯਾ ਸਹ ਸਂਸਟ੍ਠਵਿਟਪਤ੍ਤੇਪਿ ਸੀਮਾਯ ਬਨ੍ਧਨਕਾਲੇ ਵਿਪਤ੍ਤਿ ਵਾ ਪਚ੍ਛਾ ਗਾਮਸੀਮਾਯ ਸਹ ਸਮ੍ਭੇਦੋ ਵਾ ਕਮ੍ਮਵਿਪਤ੍ਤਿ ਵਾ ਨ ਹੋਤੀਤਿ ਮੁਖਤੋਵ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਪਦੇਸਨ੍ਤਿ ਸਙ੍ਘਸ੍ਸ ਨਿਸੀਦਨਪ੍ਪਹੋਨਕਪ੍ਪਦੇਸਂ. ‘‘ਸੀਮਨ੍ਤਰਿਕਂ ਠਪੇਤ੍ਵਾ’’ਤਿਆਦਿਨਾ ਸਮ੍ਭੇਦਜ੍ਝੋਤ੍ਥਰਣਂ ਅਕਤ੍ਵਾ ਬਦ੍ਧਸੀਮਾਹਿ ਅਞ੍ਞਮਞ੍ਞਂ ਫੁਸਾਪੇਤ੍ਵਾ ਅਬ੍ਯਵਧਾਨੇਨ ਬਦ੍ਧਾਪਿ ਸੀਮਾ ਅਸੀਮਾ ਏਵਾਤਿ ਦਸ੍ਸੇਤਿ. ਤਸ੍ਮਾ ਏਕਦ੍ਵਙ੍ਗੁਲਮਤ੍ਤਾਪਿ ਸੀਮਨ੍ਤਰਿਕਾ ਵਟ੍ਟਤਿ ਏਵ. ਸਾ ਪਨ ਦੁਬ੍ਬੋਧਾਤਿ ਅਟ੍ਠਕਥਾਸੁ ਚਤੁਰਙ੍ਗੁਲਾਦਿਕਾ ਵੁਤ੍ਤਾਤਿ ਦਟ੍ਠਬ੍ਬਂ. ਦ੍ਵਿਨ੍ਨਂ ਸੀਮਾਨਨ੍ਤਿ ਦ੍ਵਿਨ੍ਨਂ ਬਦ੍ਧਸੀਮਾਨਂ. ਨਿਮਿਤ੍ਤਂ ਹੋਤੀਤਿ ਨਿਮਿਤ੍ਤਸ੍ਸ ਸੀਮਤੋ ਬਾਹਿਰਤ੍ਤਾ ਬਨ੍ਧਨਕਾਲੇ ਤਾਵ ਸਮ੍ਭੇਦਦੋਸੋ ਨਤ੍ਥੀਤਿ ਅਧਿਪ੍ਪਾਯੋ ¶ . ਨ ਕੇਵਲਞ੍ਚ ਨਿਮਿਤ੍ਤਕਤ੍ਤਾ ਏਵ ਸਙ੍ਕਰਂ ਕਰੋਤਿ ¶ , ਅਥ ਖੋ ਸੀਮਨ੍ਤਰਿਕਾਯ ਠਿਤੋ ਅਞ੍ਞੋਪਿ ਰੁਕ੍ਖੋ ਕਰੋਤਿ ਏਵ. ਤਸ੍ਮਾ ਅਪ੍ਪਮਤ੍ਤਿਕਾਯ ਸੀਮਨ੍ਤਰਿਕਾਯ ਵਡ੍ਢਨਕਾ ਰੁਕ੍ਖਾਦਯੋ ਨ ਵਟ੍ਟਨ੍ਤਿ ਏਵ. ਏਤ੍ਥ ਚ ਉਪਰਿ ਦਿਸ੍ਸਮਾਨਖਨ੍ਧਸਾਖਾਦਿਪਵੇਸੇ ਏਵ ਸਙ੍ਕਰਦੋਸਸ੍ਸ ਸਬ੍ਬਤ੍ਥ ਦਸ੍ਸਿਤਤ੍ਤਾ ਅਦਿਸ੍ਸਮਾਨਾਨਂ ਮੂਲਾਨਂ ਪਵੇਸੇਪਿ ਭੂਮਿਗਤਿਕਤ੍ਤਾ ਦੋਸੋ ਨਤ੍ਥੀਤਿ ਸਿਜ੍ਝਤਿ. ਸਚੇ ਪਨ ਮੂਲਾਨਿਪਿ ਦਿਸ੍ਸਮਾਨਾਨੇਵ ਪਵਿਸਨ੍ਤਿ, ਸਙ੍ਕਰੋਵ. ਪਬ੍ਬਤਪਾਸਾਣਾ ਪਨ ਦਿਸ੍ਸਮਾਨਾਪਿ ਭੂਮਿਗਤਿਕਾ ਏਵ. ਯਦਿ ਪਨ ਬਨ੍ਧਨਕਾਲੇ ਏਵ ਏਕੋ ਥੂਲਰੁਕ੍ਖੋ ਉਭਯਮ੍ਪਿ ਸੀਮਂ ਆਹਚ੍ਚ ਤਿਟ੍ਠਤਿ, ਪਚ੍ਛਾ ਬਦ੍ਧਾ ਅਸੀਮਾ ਹੋਤੀਤਿ ਦਟ੍ਠਬ੍ਬਂ.

ਸੀਮਾਸਙ੍ਕਰਨ੍ਤਿ ਸੀਮਾਸਮ੍ਭੇਦਂ. ਯਂ ਪਨ ਸਾਰਤ੍ਥਦੀਪਨਿਯਂ ਵੁਤ੍ਤਂ ‘‘ਸੀਮਾਸਙ੍ਕਰਂ ਕਰੋਤੀਤਿ ਵਡ੍ਢਿਤ੍ਵਾ ਸੀਮਪ੍ਪਦੇਸਂ ਪਵਿਟ੍ਠੇ ਦ੍ਵਿਨ੍ਨਂ ਸੀਮਾਨਂ ਗਤਟ੍ਠਾਨਸ੍ਸ ਦੁਵਿਞ੍ਞੇਯ੍ਯਤ੍ਤਾ ਵੁਤ੍ਤ’’ਨ੍ਤਿ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੪੮), ਤਂ ਨ ਯੁਤ੍ਤਂ ਗਾਮਸੀਮਾਯਪਿ ਸਹ ਸਙ੍ਕਰਂ ਕਰੋਤੀਤਿ ਵਤ੍ਤਬ੍ਬਤੋ. ਤਤ੍ਥਾਪਿ ਹਿ ਨਿਮਿਤ੍ਤੇ ਵਡ੍ਢਿਤੇ ਗਾਮਸੀਮਾਬਦ੍ਧਸੀਮਾਨਂ ਗਤਟ੍ਠਾਨਂ ਦੁਬ੍ਬਿਞ੍ਞੇਯ੍ਯਮੇਵ ਹੋਤਿ, ਤਤ੍ਥ ਪਨ ਅਵਤ੍ਵਾ ਦ੍ਵਿਨ੍ਨਂ ਬਦ੍ਧਸੀਮਾਨਮੇਵ ਸਙ੍ਕਰਸ੍ਸ ਵੁਤ੍ਤਤ੍ਤਾ ਯਥਾਵੁਤ੍ਤਸਮ੍ਬਦ੍ਧਦੋਸੋਵ ਸਙ੍ਕਰ-ਸਦ੍ਦੇਨ ਵੁਤ੍ਤੋਤਿ ਗਹੇਤਬ੍ਬਂ. ਪਾਲ਼ਿਯਂ ਪਨ ਨਿਦਾਨਵਸੇਨ ‘‘ਯੇਸਂ, ਭਿਕ੍ਖਵੇ, ਸੀਮਾ ਪਚ੍ਛਾ ਸਮ੍ਮਤਾ, ਤੇਸਂ ਤਂ ਕਮ੍ਮਂ ਅਧਮ੍ਮਿਕ’’ਨ੍ਤਿਆਦਿਨਾ (ਮਹਾਵ. ੧੪੮) ਪਚ੍ਛਾ ਸਮ੍ਮਤਾਯ ਅਸੀਮਤ੍ਤੇ ਵੁਤ੍ਤੇਪਿ ਦ੍ਵੀਸੁ ਗਾਮਸੀਮਾਸੁ ਠਤ੍ਵਾ ਦ੍ਵੀਹਿ ਸਙ੍ਘੇਹਿ ਸਮ੍ਭੇਦਂ ਵਾ ਅਜ੍ਝੋਤ੍ਥਰਣਂ ਵਾ ਕਤ੍ਵਾ ਸੀਮਨ੍ਤਰਿਕਂ ਅਟ੍ਠਪੇਤ੍ਵਾ ਵਾ ਰੁਕ੍ਖਪਾਰੋਹਾਦਿਸਮ੍ਬਨ੍ਧਂ ਅਵਿਯੋਜੇਤ੍ਵਾ ਵਾ ਏਕਸ੍ਮਿਂ ਖਣੇ ਕਮ੍ਮਵਾਚਾਨਿਟ੍ਠਾਪਨਵਸੇਨ ਏਕਤੋ ਸਮ੍ਮਤਾਨਂ ਦ੍ਵਿਨ੍ਨਂ ਸੀਮਾਨਮ੍ਪਿ ਅਸੀਮਤਾ ਪਕਾਸਿਤਾਤਿ ਵੇਦਿਤਬ੍ਬਂ.

ਗਾਮਸੀਮਾਦਿਕਥਾਵਣ੍ਣਨਾ ਨਿਟ੍ਠਿਤਾ.

੧੪੯. ਅਧਮ੍ਮੇਨ ਵਗ੍ਗਨ੍ਤਿ ਏਤ੍ਥ ਏਕਸੀਮਾਯ ਚਤੂਸੁ ਭਿਕ੍ਖੂਸੁ ਵਿਜ੍ਜਮਾਨੇਸੁ ਪਾਤਿਮੋਕ੍ਖੁਦ੍ਦੇਸੋਵ ਅਨੁਞ੍ਞਾਤੋ, ਤੀਸੁ, ਦ੍ਵੀਸੁ ਚ ਪਾਰਿਸੁਦ੍ਧਿਉਪੋਸਥੋਵ. ਇਧ ਪਨ ਤਥਾ ਅਕਤਤ੍ਤਾ ‘‘ਅਧਮ੍ਮੇਨਾ’’ਤਿ ਵੁਤ੍ਤਂ. ਯਸ੍ਮਾ ਪਨ ਛਨ੍ਦਪਾਰਿਸੁਦ੍ਧਿ ਸਙ੍ਘੇ ਏਵ ਆਗਚ੍ਛਤਿ, ਨ ਗਣੇ, ਨ ਪੁਗ੍ਗਲੇ, ਤਸ੍ਮਾ ‘‘ਵਗ੍ਗ’’ਨ੍ਤਿ ਵੁਤ੍ਤਨ੍ਤਿ.

ਸਚੇ ¶ ਪਨ ਦ੍ਵੇ ਸਙ੍ਘਾ ਏਕਸੀਮਾਯ ਅਞ੍ਞਮਞ੍ਞਂ ਛਨ੍ਦਂ ਆਹਰਿਤ੍ਵਾ ਏਕਸ੍ਮਿਂ ਖਣੇ ਵਿਸੁਂ ਸਙ੍ਘਕਮ੍ਮਂ ਕਰੋਨ੍ਤਿ, ਏਤ੍ਥ ਕਥਨ੍ਤਿ? ਕੇਚਿ ਪਨੇਤਂ ਵਟ੍ਟਤੀਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ਵਗ੍ਗਕਮ੍ਮਤ੍ਤਾ ¶ . ਕਮ੍ਮਂ ਕਰੋਨ੍ਤਾਨਞ੍ਹਿ ਛਨ੍ਦਪਾਰਿਸੁਦ੍ਧਿ ਅਞ੍ਞਤ੍ਥ ਨ ਗਚ੍ਛਤਿ ਤਥਾ ਵਚਨਾਭਾਵਾ, ਵਿਸੁਂ ਵਿਸੁਂ ਕਮ੍ਮਕਰਣਤ੍ਥਮੇਵ ਸੀਮਾਯ ਅਨੁਞ੍ਞਾਤਤ੍ਤਾ ਚਾਤਿ ਗਹੇਤਬ੍ਬਂ. ਵਿਹਾਰਸੀਮਾਯਂ ਪਨ ਸਙ੍ਘੇ ਵਿਜ੍ਜਮਾਨੇਪਿ ਕੇਨਚਿ ਪਚ੍ਚਯੇਨ ਖਨ੍ਧਸੀਮਾਯਂ ਤੀਸੁ, ਦ੍ਵੀਸੁ ਵਾ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤੇਸੁ ਕਮ੍ਮਂ ਧਮ੍ਮੇਨ ਸਮਗ੍ਗਮੇਵ ਭਿਨ੍ਨਸੀਮਟ੍ਠਤ੍ਤਾਤਿ ਦਟ੍ਠਬ੍ਬਂ.

ਉਪੋਸਥਭੇਦਾਦਿਕਥਾਵਣ੍ਣਨਾ ਨਿਟ੍ਠਿਤਾ.

੧੫੦. ਏਵਮੇਤਂ ਧਾਰਯਾਮੀਤਿ. ਸੁਤਾ ਖੋ ਪਨਾਯਸ੍ਮਨ੍ਤੇਹੀਤਿ ਏਤ੍ਥ ‘‘ਏਵਮੇਤਂ ਧਾਰਯਾਮੀ’’ਤਿ ਵਤ੍ਵਾ ‘‘ਉਦ੍ਦਿਟ੍ਠਂ ਖੋ ਆਯਸ੍ਮਨ੍ਤੋ ਨਿਦਾਨਂ, ਸੁਤਾ ਖੋ ਪਨਾਯਸ੍ਮਨ੍ਤੇਹਿ ਚਤ੍ਤਾਰੋ ਪਾਰਾਜਿਕਾ ਧਮ੍ਮਾ’’ਤਿਆਦਿਨਾ ਵਤ੍ਤਬ੍ਬਂ. ਮਾਤਿਕਾਟ੍ਠਕਥਾਯਮ੍ਪਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਏਵਮੇਵ ਵੁਤ੍ਤਂ. ਸੁਤੇਨਾਤਿ ਸੁਤਪਦੇਨ.

ਸਵਰਭਯਨ੍ਤਿ ਵਨਚਰਕਭਯਂ. ਤੇਨਾਹ ‘‘ਅਟਵਿਮਨੁਸ੍ਸਭਯ’’ਨ੍ਤਿ. ਨਿਦਾਨੁਦ੍ਦੇਸੇ ਅਨਿਟ੍ਠਿਤੇ ਪਾਤਿਮੋਕ੍ਖਂ ਨਿਦ੍ਦਿਟ੍ਠਂ ਨਾਮ ਨ ਹੋਤੀਤਿ ਆਹ ‘‘ਦੁਤਿਯਾਦੀਸੁ ਉਦ੍ਦੇਸੇਸੂ’’ਤਿਆਦਿ. ਤੀਹਿਪਿ ਵਿਧੀਹੀਤਿ ਓਸਾਰਣਕਥਨਸਰਭਞ੍ਞੇਹਿ. ਏਤ੍ਥ ਚ ਅਤ੍ਥਂ ਭਣਿਤੁਕਾਮਤਾਯ ਵਾ ਭਣਾਪੇਤੁਕਾਮਤਾਯ ਵਾ ਸੁਤ੍ਤਸ੍ਸ ਓਸਾਰਣਂ ਓਸਾਰਣਂ ਨਾਮ. ਤਸ੍ਸੇਵ ਅਤ੍ਥਪ੍ਪਕਾਸਨਾ ਕਥਨਂ ਨਾਮ. ਕੇਵਲਂ ਪਾਠਸ੍ਸੇਵ ਸਰੇਨ ਭਣਨਂ ਸਰਭਞ੍ਞਂ ਨਾਮ. ਸਜ੍ਝਾਯਂ ਅਧਿਟ੍ਠਹਿਤ੍ਵਾਤਿ ‘‘ਸਜ੍ਝਾਯਂ ਕਰੋਮੀ’’ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ. ਓਸਾਰੇਤ੍ਵਾ ਪਨ ਕਥੇਨ੍ਤੇਨਾਤਿ ਸਯਮੇਵ ਪਾਠਂ ਵਤ੍ਵਾ ਪਚ੍ਛਾ ਅਤ੍ਥਂ ਕਥੇਨ੍ਤੇਨ.

ਪਾਤਿਮੋਕ੍ਖੁਦ੍ਦੇਸਕਥਾਵਣ੍ਣਨਾ ਨਿਟ੍ਠਿਤਾ.

ਅਧਮ੍ਮਕਮ੍ਮਪਟਿਕ੍ਕੋਸਨਾਦਿਕਥਾਵਣ੍ਣਨਾ

੧੫੫. ਨਵਵਿਧਨ੍ਤਿ ਸਙ੍ਘਗਣਪੁਗ੍ਗਲੇਸੁ ਤਯੋ, ਸੁਤ੍ਤੁਦ੍ਦੇਸਪਾਰਿਸੁਦ੍ਧਿਅਧਿਟ੍ਠਾਨਵਸੇਨ ਤਯੋ, ਚਾਤੁਦ੍ਦਸੀਪਨ੍ਨਰਸੀਸਾਮਗ੍ਗੀਵਸੇਨ ਤਯੋਤਿ ਨਵਵਿਧਂ. ਚਤੁਬ੍ਬਿਧਨ੍ਤਿ ¶ ਅਧਮ੍ਮੇਨਵਗ੍ਗਾਦਿ ਚਤੁਬ੍ਬਿਧਂ. ਦੁਵਿਧਨ੍ਤਿ ਭਿਕ੍ਖੁਭਿਕ੍ਖੁਨਿਪਾਤਿਮੋਕ੍ਖਵਸੇਨ ਦੁਵਿਧਂ ਪਾਤਿਮੋਕ੍ਖਂ. ਨਵਵਿਧਨ੍ਤਿ ਭਿਕ੍ਖੂਨਂ ਪਞ੍ਚ, ਭਿਕ੍ਖੁਨੀਨਂ ਚਤ੍ਤਾਰੋਤਿ ਨਵਵਿਧਂ ਪਾਤਿਮੋਕ੍ਖੁਦ੍ਦੇਸਂ.

ਅਧਮ੍ਮਕਮ੍ਮਪਟਿਕ੍ਕੋਸਨਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਪਕ੍ਖਗਣਨਾਦਿਉਗ੍ਗਹਣਾਨੁਜਾਨਨਕਥਾਦਿਵਣ੍ਣਨਾ

੧੫੬. ਕਤਿਮੀਤਿ ¶ ਤਿਥਿ-ਸਦ੍ਦਾਪੇਕ੍ਖਂ ਇਤ੍ਥਿਲਿਙ੍ਗਂ ਦਟ੍ਠਬ੍ਬਂ.

੧੬੩. ਉਤੁਵਸ੍ਸੇਯੇਵਾਤਿ ਹੇਮਨ੍ਤਗਿਮ੍ਹੇਸੁਯੇਵ.

੧੬੪. ਵਿਞ੍ਞਾਪੇਤੀਤਿ ਏਤ੍ਥ ਮਨਸਾ ਚਿਨ੍ਤੇਤ੍ਵਾ ਕਾਯਵਿਕਾਰਕਰਣਮੇਵ ਵਿਞ੍ਞਾਪਨਨ੍ਤਿ ਦਟ੍ਠਬ੍ਬਂ. ਪਾਲ਼ਿਯਂ ਅਞ੍ਞਸ੍ਸ ਦਾਤਬ੍ਬਾ ਪਾਰਿਸੁਦ੍ਧੀਤਿ ਪਾਰਿਸੁਦ੍ਧਿਦਾਯਕੇਨ ਪੁਨ ਅਞ੍ਞਸ੍ਸ ਭਿਕ੍ਖੁਨੋ ਸਨ੍ਤਿਕੇ ਦਾਤਬ੍ਬਾ. ‘‘ਭੂਤਂਯੇਵ ਵਾ ਸਾਮਣੇਰਭਾਵਂ ਆਰੋਚੇਤੀ’’ਤਿ ਵੁਤ੍ਤਤ੍ਤਾ ਊਨਵੀਸਤਿਵਸ੍ਸਕਾਲੇ ਉਪਸਮ੍ਪਨ੍ਨਸ੍ਸ, ਅਨ੍ਤਿਮਵਤ੍ਥੁਅਜ੍ਝਾਪਨ੍ਨਸਿਕ੍ਖਾਪਚ੍ਚਕ੍ਖਾਤਾਦੀਨਂ ਵਾ ਯਾਵ ਭਿਕ੍ਖੁਪਟਿਞ੍ਞਾ ਵਤ੍ਤਤਿ, ਤਾਵ ਤੇਹਿ ਆਹਟਾਪਿ ਛਨ੍ਦਪਾਰਿਸੁਦ੍ਧਿ ਆਗਚ੍ਛਤਿ. ਯਦਾ ਪਨ ਤੇ ਅਤ੍ਤਨੋ ਸਾਮਣੇਰਾਦਿਭਾਵਂ ਪਟਿਜਾਨਨ੍ਤਿ, ਤਤੋ ਪਟ੍ਠਾਯੇਵ ਨਾਗਚ੍ਛਤੀਤਿ ਦਸ੍ਸਿਤਨ੍ਤਿ ਦਟ੍ਠਬ੍ਬਂ. ਪਾਲ਼ਿਯਮ੍ਪਿ ਹਿ ‘‘ਦਿਨ੍ਨਾਯ ਪਾਰਿਸੁਦ੍ਧਿਯਾ ਸਙ੍ਘਪ੍ਪਤ੍ਤੋ ਵਿਬ੍ਭਮਤਿ…ਪੇ… ਪਣ੍ਡਕੋ ਪਟਿਜਾਨਾਤਿ. ਤਿਰਚ੍ਛਾਨਗਤੋ ਪਟਿਜਾਨਾਤਿ. ਉਭਤੋਬ੍ਯਞ੍ਜਨਕੋ ਪਟਿਜਾਨਾਤਿ, ਆਹਟਾ ਹੋਤਿ ਪਾਰਿਸੁਦ੍ਧੀ’’ਤਿ ਵੁਤ੍ਤਤ੍ਤਾ ਪਣ੍ਡਕਾਦੀਨਮ੍ਪਿ ਭਿਕ੍ਖੁਪਟਿਞ੍ਞਾਯ ਵਤ੍ਤਮਾਨਕਾਲੇਸੁ ਛਨ੍ਦਪਾਰਿਸੁਦ੍ਧਿਯਾ ਆਗਮਨਂ ਸਿਦ੍ਧਮੇਵ. ਤੇਨਾਹ ‘‘ਏਸ ਨਯੋ ਸਬ੍ਬਤ੍ਥਾ’’ਤਿ. ਉਮ੍ਮਤ੍ਤਕਖਿਤ੍ਤਚਿਤ੍ਤਵੇਦਨਾਟ੍ਟਾਨਂ ਪਨ ਪਕਤਤ੍ਤਾ ਅਨ੍ਤਰਾਮਗ੍ਗੇ ਉਮ੍ਮਤ੍ਤਕਾਦਿਭਾਵੇ ਪਟਿਞ੍ਞਾਤੇਪਿ ਤੇਸਂ ਸਙ੍ਘਪ੍ਪਤ੍ਤਮਤ੍ਤੇਨੇਵ ਛਨ੍ਦਾਦਿ ਆਗਚ੍ਛਤੀਤਿ ਦਟ੍ਠਬ੍ਬਂ.

‘‘ਭਿਕ੍ਖੂਨਂ ਹਤ੍ਥਪਾਸ’’ਨ੍ਤਿ ਇਮਿਨਾ ਗਣਪੁਗ੍ਗਲੇਸੁ ਛਨ੍ਦਪਾਰਿਸੁਦ੍ਧਿਯਾ ਅਨਾਗਮਨਂ ਦਸ੍ਸੇਤਿ. ‘‘ਸਙ੍ਘਪ੍ਪਤ੍ਤੋ’’ਤਿ ਹਿ ਪਾਲ਼ਿਯਂ ਵੁਤ੍ਤਂ. ਬਿਲ਼ਾਲਸਙ੍ਖਲਿਕਪਾਰਿਸੁਦ੍ਧੀਤਿ ਬਿਲ਼ਾਲਗੀਵਾਯ ਬਨ੍ਧਨਸਙ੍ਖਲਿਕਸਦਿਸਾ ਪਾਰਿਸੁਦ੍ਧਿ ਨਾਮ, ਯਥਾ ਸਙ੍ਖਲਿਕਾ ਬਿਲ਼ਾਲੇ ਆਗਚ੍ਛਨ੍ਤੇ ਏਵ ਆਗਚ੍ਛਤਿ, ਨ ਅਨਾਗਚ੍ਛਨ੍ਤੇ ਤਪ੍ਪਟਿਬਦ੍ਧਤ੍ਤਾ, ਏਵਮਯਂ ਪਾਰਿਸੁਦ੍ਧਿਪੀਤਿ ਅਤ੍ਥੋ. ਅਥ ਵਾ ਯਥਾ ਸਙ੍ਖਲਿਕਾਯ ਪਠਮਵਲਯਂ ਦੁਤਿਯਵਲਯਂ ¶ ਪਾਪੁਣਾਤਿ, ਨ ਤਤਿਯਵਲਯਂ, ਏਵਮਯਮ੍ਪੀਤਿ ਅਧਿਪ੍ਪਾਯੋ. ਉਪਲਕ੍ਖਣਮਤ੍ਤਞ੍ਚੇਤ੍ਥ ਬਿਲ਼ਾਲ-ਗ੍ਗਹਣਂ ਦਟ੍ਠਬ੍ਬਂ.

ਪਕ੍ਖਗਣਨਾਦਿਉਗ੍ਗਹਣਾਨੁਜਾਨਨਕਥਾਦਿਵਣ੍ਣਨਾ ਨਿਟ੍ਠਿਤਾ.

੧੬੫. ਪਾਲ਼ਿਯਂ ¶ ‘‘ਸਨ੍ਤਿ ਸਙ੍ਘਸ੍ਸ ਕਰਣੀਯਾਨੀ’’ਤਿ ਵਤ੍ਤਬ੍ਬੇ ਵਚਨਵਿਪਲ੍ਲਾਸੇਨ ‘‘ਕਰਣੀਯ’’ਨ੍ਤਿ ਵੁਤ੍ਤਂ.

੧੬੭. ‘‘ਤਸ੍ਸ ਸਮ੍ਮੁਤਿਦਾਨਕਿਚ੍ਚਂ ਨਤ੍ਥੀ’’ਤਿ ਇਦਂ ਪਾਲ਼ਿਯਂ ਏਕਦਾ ਸਰਨ੍ਤਸ੍ਸੇਵ ਸਮ੍ਮੁਤਿਦਾਨਸ੍ਸ ਵੁਤ੍ਤਤ੍ਤਾ ਏਕਦਾ ਅਸਰਨ੍ਤਸ੍ਸ ਸਮ੍ਮੁਤਿਅਭਾਵੇਪਿ ਤਸ੍ਸ ਅਨਾਗਮਨਂ ਵਗ੍ਗਕਮ੍ਮਾਯ ਨ ਹੋਤੀਤਿ ਵੁਤ੍ਤਂ. ਕੇਚਿ ਪਨ ‘‘ਸੋਪਿ ਹਤ੍ਥਪਾਸੇਵ ਆਨੇਤਬ੍ਬੋ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ.

੧੬੮. ਸਙ੍ਘਸਨ੍ਨਿਪਾਤਤੋ ਪਠਮਂ ਕਾਤਬ੍ਬਂ ਪੁਬ੍ਬਕਰਣਂ. ਸਙ੍ਘਸਨ੍ਨਿਪਾਤੇ ਕਾਤਬ੍ਬਂ ਪੁਬ੍ਬਕਿਚ੍ਚਨ੍ਤਿ ਦਟ੍ਠਬ੍ਬਂ. ਪਾਲ਼ਿਯਂ ਨੋ ਚੇ ਅਧਿਟ੍ਠਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਅਸਞ੍ਚਿਚ੍ਚ ਅਸਤਿਯਾ ਅਨਾਪਤ੍ਤਿ. ਯਥਾ ਚੇਤ੍ਥ, ਏਵਂ ਉਪਰਿਪਿ. ਯਤ੍ਥ ਪਨ ਅਚਿਤ੍ਤਕਾਪਤ੍ਤਿ ਅਤ੍ਥਿ, ਤਤ੍ਥ ਵਕ੍ਖਾਮ.

੧੬੯. ‘‘ਪਞ੍ਞਤ੍ਤਂ ਹੋਤੀ’’ਤਿ ਇਮਿਨਾ ‘‘ਨ ਸਾਪਤ੍ਤਿਕੇਨ ਉਪੋਸਥੋ ਕਾਤਬ੍ਬੋ’’ਤਿ ਵਿਸੁਂ ਪਟਿਕ੍ਖੇਪਾਭਾਵੇਪਿ ਯਥਾਵੁਤ੍ਤਸੁਤ੍ਤਸਾਮਤ੍ਥਿਯਤੋ ਪਞ੍ਞਤ੍ਤਮੇਵਾਤਿ ਦਸ੍ਸੇਤਿ. ਇਮਿਨਾ ਏਵ ਨਯੇਨ –

‘‘ਅਟ੍ਠਾਨਮੇਤਂ, ਭਿਕ੍ਖਵੇ, ਅਨਵਕਾਸੋ ਯਂ ਤਥਾਗਤੋ ਅਪਰਿਸੁਦ੍ਧਾਯ ਪਰਿਸਾਯ ਉਪੋਸਥਂ ਕਰੇਯ੍ਯ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾ’’ਤਿ (ਚੂਲ਼ਵ. ੩੮੬; ਅ. ਨਿ. ੮.੨੦; ਉਦਾ. ੪੫) –

ਆਦਿਸੁਤ੍ਤਨਯਤੋ ਚ ਅਲਜ੍ਜੀਹਿਪਿ ਸਦ੍ਧਿਂ ਉਪੋਸਥਕਰਣਮ੍ਪਿ ਪਟਿਕ੍ਖਿਤ੍ਤਮੇਵ ਅਲਜ੍ਜਿਨਿਗ੍ਗਹਤ੍ਥਤ੍ਤਾ ਸਬ੍ਬਸਿਕ੍ਖਾਪਦਾਨਨ੍ਤਿ ਦਟ੍ਠਬ੍ਬਂ. ‘‘ਪਾਰਿਸੁਦ੍ਧਿਦਾਨਪਞ੍ਞਾਪਨੇਨਾ’’ਤਿ ਇਮਿਨਾ ਸਾਪਤ੍ਤਿਕੇਨ ਪਾਰਿਸੁਦ੍ਧਿਪਿ ਨ ਦਾਤਬ੍ਬਾਤਿ ਦੀਪਿਤਂ ਹੋਤਿ. ਉਭੋਪਿ ਦੁਕ੍ਕਟਨ੍ਤਿ ਏਤ੍ਥ ਸਭਾਗਾਪਤ੍ਤਿਭਾਵਂ ਅਜਾਨਿਤ੍ਵਾ ਕੇਵਲਂ ਆਪਤ੍ਤਿਨਾਮੇਨੇਵ ਦੇਸੇਨ੍ਤਸ੍ਸ ਪਟਿਗ੍ਗਣ੍ਹਨ੍ਤਸ੍ਸ ਅਚਿਤ੍ਤਕਮੇਵ ਦੁਕ੍ਕਟਂ ਹੋਤੀਤਿ ਵਦਨ੍ਤਿ ¶ . ਯਥਾ ਸਙ੍ਘੋ ਸਭਾਗਾਪਤ੍ਤਿਂ ਆਪਨ੍ਨੋ ਞਤ੍ਤਿਂ ਠਪੇਤ੍ਵਾ ਉਪੋਸਥਂ ਕਾਤੁਂ ਲਭਤਿ, ਏਵਂ ਤਯੋਪਿ ‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤਾ, ਇਮੇ ਭਿਕ੍ਖੂ ਸਭਾਗਂ ਆਪਤ੍ਤਿਂ ਆਪਨ੍ਨਾ’’ਤਿਆਦਿਨਾ ਵੁਤ੍ਤਨਯਾਨੁਸਾਰੇਨੇਵ ਗਣਞਤ੍ਤਿਂ ਠਪੇਤ੍ਵਾ ਦ੍ਵੀਹਿ ਅਞ੍ਞਮਞ੍ਞਂ ਆਰੋਚੇਤ੍ਵਾ ਉਪੋਸਥਂ ਕਾਤੁਂ ਵਟ੍ਟਤਿ. ਏਕੇਨ ਪਨ ਸਾਪਤ੍ਤਿਕੇਨ ਦੂਰਂ ਗਨ੍ਤ੍ਵਾਪਿ ਪਟਿਕਾਤੁਮੇਵ ਵਟ੍ਟਤਿ, ਅਸਮ੍ਪਾਪੁਣਨ੍ਤੇਨ ‘‘ਭਿਕ੍ਖੁਂ ਲਭਿਤ੍ਵਾ ਪਟਿਕਰਿਸ੍ਸਾਮੀ’’ਤਿ ਉਪੋਸਥੋ ਕਾਤਬ੍ਬੋ, ਪਟਿਕਰਿਤ੍ਵਾ ਚ ਪੁਨ ਉਪੋਸਥੋ ਕਤ੍ਤਬ੍ਬੋ.

ਛਨ੍ਦਦਾਨਕਥਾਦਿਵਣ੍ਣਨਾ ਨਿਟ੍ਠਿਤਾ.

ਅਨਾਪਤ੍ਤਿਪਨ੍ਨਰਸਕਾਦਿਕਥਾਵਣ੍ਣਨਾ

੧੭੨. ਕੇਨਚਿ ੬੩ ਕਰਣੀਯੇਨ ਗਨ੍ਤ੍ਵਾਤਿ ਸੀਮਾਪਰਿਚ੍ਛੇਦਤੋ ਬਹਿਭੂਤਂ ਗਾਮਂ ਵਾ ਅਰਞ੍ਞਂ ਵਾ ਗਨ੍ਤ੍ਵਾਤਿ ਅਤ੍ਥੋ. ਏਤੇਨੇਵ ਉਪੋਸਥਞਤ੍ਤਿਯਾ ਠਪਨਕਾਲੇ ਸਮਗ੍ਗਾ ਏਵ ਤੇ ਞਤ੍ਤਿਂ ਠਪੇਸੁਨ੍ਤਿ ਸਿਦ੍ਧਂ. ਤੇਨੇਵ ਪਾਲ਼ਿਯਂ ‘‘ਉਦ੍ਦਿਟ੍ਠਂ ਸੁਉਦ੍ਦਿਟ੍ਠ’’ਨ੍ਤਿ ਸਬ੍ਬਪਨ੍ਨਰਸਕੇਸੁਪਿ ਵੁਤ੍ਤਂ. ਵਗ੍ਗਾ ਸਮਗ੍ਗਸਞ੍ਞਿਨੋਤਿਆਦਿ ਪਨ ਞਤ੍ਤਿਯਾ ਨਿਟ੍ਠਿਤਾਯ ‘‘ਕਿਂ ਸਙ੍ਘਸ੍ਸ ਪੁਬ੍ਬਕਿਚ੍ਚ’’ਨ੍ਤਿਆਦੀਨਂ (ਮਹਾਵ. ੧੩੪) ਵਚਨਕ੍ਖਣੇ ਬਹਿਗਤਾਨਂ ਭਿਕ੍ਖੂਨਂ ਸੀਮਾਯ ਪਵਿਟ੍ਠਤ੍ਤਾ ਭਿਕ੍ਖੂ ਤਸ੍ਮਿਂ ਖਣੇ ਵਗ੍ਗਾ ਹੋਨ੍ਤੀਤਿ ਵੁਤ੍ਤਂ. ਤੇਨਾਹ ‘‘ਤੇਸਂ ਸੀਮਂ ਓਕ੍ਕਨ੍ਤਤ੍ਤਾ ਵਗ੍ਗਾ’’ਤਿਆਦਿ, ਏਤੇਨ ਪਾਰਾਜਿਕੁਦ੍ਦੇਸਾਦਿਕ੍ਖਣੇਪਿ ਵਗ੍ਗਸਞ੍ਞੀਨਂ ਉਦ੍ਦਿਸਨ੍ਤਾਨਂ ਆਪਤ੍ਤਿ ਏਵ, ਞਤ੍ਤਿਯਾ ਪਨ ਪੁਬ੍ਬੇ ਨਿਟ੍ਠਿਤਤ੍ਤਾ ਕਮ੍ਮਕੋਪੋ ਨਤ੍ਥੀਤਿ ਦਸ੍ਸਿਤਮੇਵ ਹੋਤਿ. ਏਵਂ ਉਪਰਿਪਿ ਸਬ੍ਬਵਾਰੇਸੁ ਅਧਿਪ੍ਪਾਯੋ ਵੇਦਿਤਬ੍ਬੋ.

ਏਤ੍ਥ ਚ ਪਾਲ਼ਿਯਂ ‘‘ਸਬ੍ਬਾਯ ਵੁਟ੍ਠਿਤਾਯ…ਪੇ… ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿ ਆਰੋਚੇਤਬ੍ਬਾ’’ਤਿ (ਮਹਾਵ. ੧੭੪) ਵੁਤ੍ਤਤ੍ਤਾ ਬਹਿਸੀਮਾਗਤਾਯ ਪਰਿਸਾਯ ਤੇਸੁ ਯਸ੍ਸ ਕਸ੍ਸਚਿ ਸਨ੍ਤਿਕੇ ਅਨਧਿਟ੍ਠਿਤੇਹਿ ਪਾਰਿਸੁਦ੍ਧਿਂ ਆਰੋਚੇਤੁਂ ਵਟ੍ਟਤੀਤਿ ਵਦਨ੍ਤਿ.

ਅਨਾਪਤ੍ਤਿਪਨ੍ਨਰਸਕਾਦਿਕਥਾਵਣ੍ਣਨਾ ਨਿਟ੍ਠਿਤਾ.

੧੭੯. ਅਞ੍ਞਾਤਕਂ ¶ ਨਾਮ ਅਦਿਟ੍ਠਪੁਬ੍ਬਨ੍ਤਿ ਆਹ ‘‘ਅਞ੍ਞੇਸਂ ਸਨ੍ਤਕ’’ਨ੍ਤਿ. ਅਞ੍ਞੇਸਨ੍ਤਿ ਅਤ੍ਤਨਾ ਅਦਿਟ੍ਠਪੁਬ੍ਬਾਨਂ. ਨਾਨਾਸਂਵਾਸਕਭਾਵਨ੍ਤਿ ਲਦ੍ਧਿਨਾਨਾਸਂਵਾਸਕਭਾਵਂ.

੧੮੦. ਪਾਲ਼ਿਯਂ ਅਭਿਵਿਤਰਨ੍ਤਿ ਸਮਾਨਸਂਵਾਸਕਾਭਾਵਂ ਨਿਚ੍ਛਿਨਨ੍ਤਿ.

੧੮੧. ਉਪੋਸਥਕਾਰਕਾਤਿ ਸਙ੍ਘੁਪੋਸਥਕਾਰਕਾ. ਤੇਨੇਵ ‘‘ਅਞ੍ਞਤ੍ਰ ਸਙ੍ਘੇਨਾ’’ਤਿ ਵੁਤ੍ਤਂ. ਸਙ੍ਘੁਪੋਸਥਟ੍ਠਾਨਤੋ ਹਿ ਗਚ੍ਛਨ੍ਤੇਨ ਅਤ੍ਤਚਤੁਤ੍ਥੇਨੇਵ ਗਨ੍ਤਬ੍ਬਂ, ਤਿਣ੍ਣਂ ਭਿਕ੍ਖੂਨਂ ਨਿਸਿਨ੍ਨਟ੍ਠਾਨਤੋ ਪਨ ਗਚ੍ਛਨ੍ਤੇਨ ਏਕੇਨ ਭਿਕ੍ਖੁਨਾਪਿ ਸਹ ਗਨ੍ਤੁਮ੍ਪਿ ਵਟ੍ਟਤਿ. ਪਾਲ਼ਿਯਂ ‘‘ਅਭਿਕ੍ਖੁਕੋ ਆਵਾਸੋ’’ਤਿ ਇਦਂ ਨਿਦਸ੍ਸਨਮਤ੍ਤਂ, ਸਙ੍ਘੁਪੋਸਥਟ੍ਠਾਨਤੋ ਗਣਪੁਗ੍ਗਲੇਹਿ ਸਭਿਕ੍ਖੁਕੋਪਿ ਆਵਾਸੋ ਨ ਗਨ੍ਤਬ੍ਬੋ ‘‘ਅਞ੍ਞਤ੍ਰ ਸਙ੍ਘੇਨਾ’’ਤਿ ਵੁਤ੍ਤਤ੍ਤਾਤਿ ਵਦਨ੍ਤਿ. ਉਪੋਸਥਂ ਕਰੋਨ੍ਤੀਤਿ ਸਙ੍ਘੁਪੋਸਥਂ ਵਾ ਗਣੁਪੋਸਥਂ ਵਾ. ‘‘ਤਸ੍ਸ ਸਨ੍ਤਿਕ’’ਨ੍ਤਿ ਇਦਂ ਗਣੁਪੋਸਥਟ੍ਠਾਨਤੋ ਗਚ੍ਛਨ੍ਤਂ ਸਨ੍ਧਾਯ ਵੁਤ੍ਤਂ, ਅਞ੍ਞਥਾ ‘‘ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਅਤ੍ਤਚਤੁਤ੍ਥੇਨ ¶ ਵਾ’’ਤਿ ਵਚਨੇਨ ਵਿਰੁਜ੍ਝਨਤੋ. ਆਰਞ੍ਞਕੇਨਾਤਿ ਏਕਚਾਰਿਨਾ. ਉਪੋਸਥਨ੍ਤਰਾਯੋਤਿ ਅਤ੍ਤਨੋ ਉਪੋਸਥਨ੍ਤਰਾਯੋ.

੧੮੩. ਪਾਲ਼ਿਯਂ ਭਿਕ੍ਖੁਨਿਯਾ ਨਿਸਿਨ੍ਨਪਰਿਸਾਯਾਤਿਆਦੀਸੁ ਭਿਕ੍ਖੁਨਿਯਾਤਿਆਦਿ ਕਰਣਤ੍ਥੇ ਸਾਮਿਵਚਨਂ.

ਲਿਙ੍ਗਾਦਿਦਸ੍ਸਨਕਥਾਦਿਵਣ੍ਣਨਾ ਨਿਟ੍ਠਿਤਾ.

ਉਪੋਸਥਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

ਵਸ੍ਸੂਪਨਾਯਿਕਅਨੁਜਾਨਨਕਥਾਦਿਵਣ੍ਣਨਾ

੧੮੪. ਵਸ੍ਸੂਪਨਾਯਿਕਕ੍ਖਨ੍ਧਕੇ ¶ ¶ ਅਪਰਸ੍ਮਿਂ ਦਿਵਸੇਤਿ ਦੁਤਿਯੇ ਪਾਟਿਪਦਦਿਵਸੇ.

੧੮੫. ਅਞ੍ਞਤ੍ਥ ਅਰੁਣਂ ਉਟ੍ਠਾਪਨੇਨ ਵਾਤਿ ਸਾਪੇਕ੍ਖਸ੍ਸ ਅਕਰਣੀਯੇਨ ਗਨ੍ਤ੍ਵਾ ਅਞ੍ਞਤ੍ਥ ਅਰੁਣਂ ਉਟ੍ਠਾਪਨੇਨ ਵਾ. ਪਰਿਹਾਨੀਤਿ ਗੁਣਪਰਿਹਾਨਿ.

੧੮੭. ਪਾਲ਼ਿਯਂ ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋਤਿ ਸਕਲਂ ਸਤ੍ਤਾਹਂ ਬਹਿ ਏਵ ਅਵੀਤਿਨਾਮੇਤ੍ਵਾ ਸਤ੍ਤਾਹਪਰਿਯੋਸਾਨਭੂਤਂ ਅਰੁਣੁਟ੍ਠਾਨਕਾਲਂ ਪੁਨ ਵਿਹਾਰੇਵ ਸਮ੍ਬਨ੍ਧਵਸੇਨ ਸਤ੍ਤਾਹਂ ਵਿਹਾਰੇ ਸਨ੍ਨਿਵਤ੍ਤਂ ਕਾਤਬ੍ਬਂ. ਸਤ੍ਤਾਹਪਰਿਯੋਸਾਨਕਾਲੋ ਹਿ ਇਧ ਸਤ੍ਤਾਹ-ਸਦ੍ਦੇਨ ਵੁਤ੍ਤੋ, ਤਦਪੇਕ੍ਖਾਯ ਚ ‘‘ਸਨ੍ਨਿਵਤ੍ਤੋ’’ਤਿ ਪੁਲ੍ਲਿਙ੍ਗੇਨ ਵੁਤ੍ਤਂ. ਤੀਣਿ ਪਰਿਹੀਨਾਨੀਤਿ ਭਿਕ੍ਖੁਨੀਨਂ ਵਚ੍ਚਕੁਟਿਆਦੀਨਂ ਪਟਿਕ੍ਖਿਤ੍ਤਤ੍ਤਾ ਪਰਿਹੀਨਾਨਿ.

੧੮੯. ਨ ਪਲੁਜ੍ਜਤੀਤਿ ਅਞ੍ਞੇਸਂ ਅਪ੍ਪਗੁਣਤ੍ਤਾ, ਮਮ ਚ ਮਰਣੇਨ ਨ ਵਿਨਸ੍ਸਤਿ.

ਵਸ੍ਸੂਪਨਾਯਿਕਅਨੁਜਾਨਨਕਥਾਦਿਵਣ੍ਣਨਾ ਨਿਟ੍ਠਿਤਾ.

੧੯੯. ਭਿਕ੍ਖੂਹਿ ਸਦ੍ਧਿਂ ਵਸਨਕਪੁਰਿਸੋਤਿ ਅਨਞ੍ਞਗਤਿਕੋਤਿ ਦਸ੍ਸੇਤਿ. ਗਨ੍ਤਬ੍ਬਨ੍ਤਿ ਸਙ੍ਘਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤਬ੍ਬਂ. ਏਤ੍ਥ ਚ ਅਨੁਪਾਸਕੇਹਿਪਿ ਸਾਸਨਭਾਵਂ ਞਾਤੁਕਾਮੇਹਿ ਪਹਿਤੇ ਤੇਸਂ ਪਸਾਦਵਡ੍ਢਿਂ ਸਮ੍ਪਸ੍ਸਨ੍ਤੇਹਿਪਿ ਸਤ੍ਤਾਹਕਰਣੀਯੇਨ ਗਨ੍ਤੁਂ ਵਟ੍ਟਤੀਤਿ ਗਹੇਤਬ੍ਬਂ.

ਰਤ੍ਤਿਚ੍ਛੇਦਵਿਨਿਚ੍ਛਯੋਤਿ ¶ ਸਤ੍ਤਾਹਕਰਣੀਯੇਨ ਗਨ੍ਤ੍ਵਾ ਬਹਿਦ੍ਧਾ ਅਰੁਣੁਟ੍ਠਾਪਨਸਙ੍ਖਾਤਸ੍ਸ ਰਤ੍ਤਿਚ੍ਛੇਦਸ੍ਸ ਵਿਨਿਚ੍ਛਯੋ. ਗਨ੍ਤੁਂ ਵਟ੍ਟਤੀਤਿ ਅਨ੍ਤੋਉਪਚਾਰਸੀਮਾਯਂ ਠਿਤੇਨੇਵ ਸਤ੍ਤਾਹਕਰਣੀਯਨਿਮਿਤ੍ਤਂ ਸਲ੍ਲਕ੍ਖੇਤ੍ਵਾ ਇਮਿਨਾ ਨਿਮਿਤ੍ਤੇਨ ਗਨ੍ਤ੍ਵਾ ‘‘ਅਨ੍ਤੋਸਤ੍ਤਾਹੇ ਆਗਚ੍ਛਿਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਗਨ੍ਤੁਂ ਵਟ੍ਟਤਿ. ਪੁਰਿਮਕ੍ਖਣੇ ਆਭੋਗਂ ਕਤ੍ਵਾ ਗਮਨਕ੍ਖਣੇ ਵਿਸ੍ਸਰਿਤ੍ਵਾ ਗਤੇਪਿ ਦੋਸੋ ¶ ਨਤ੍ਥਿ ‘‘ਸਕਰਣੀਯੋ ਪਕ੍ਕਮਤੀ’’ਤਿ (ਮਹਾਵ. ੨੦੭) ਵੁਤ੍ਤਤ੍ਤਾ. ਸਬ੍ਬਥਾ ਪਨ ਆਭੋਗਂ ਅਕਤ੍ਵਾ ਗਤਸ੍ਸ ਵਸ੍ਸਚ੍ਛੇਦੋਤਿ ਵਦਨ੍ਤਿ. ਯੋ ਪਨ ਸਤ੍ਤਾਹਕਰਣੀਯਨਿਮਿਤ੍ਤਾਭਾਵੇਪਿ ‘‘ਸਤ੍ਤਾਹਬ੍ਭਨ੍ਤਰੇ ਆਗਮਿਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਗਨ੍ਤ੍ਵਾ ਸਤ੍ਤਾਹਬ੍ਭਨ੍ਤਰੇ ਆਗਚ੍ਛਤਿ, ਤਸ੍ਸ ਆਪਤ੍ਤਿਯੇਵ, ਵਸ੍ਸਚ੍ਛੇਦੋ ਨਤ੍ਥਿ ਸਤ੍ਤਾਹਸ੍ਸ ਸਨ੍ਨਿਵਤ੍ਤਤ੍ਤਾਤਿ ਵਦਨ੍ਤਿ. ਵੀਮਂਸਿਤ੍ਵਾ ਗਹੇਤਬ੍ਬਂ. ਭਣ੍ਡਕਨ੍ਤਿ ਚੀਵਰਭਣ੍ਡਂ. ਸਮ੍ਪਾਪੁਣਿਤੁਂ ਨ ਸਕ੍ਕੋਤਿ, ਵਟ੍ਟਤੀਤਿ ਤਦਹੇਵ ਆਗਮਨੇ ਸਉਸ੍ਸਾਹਤ੍ਤਾ ਵਸ੍ਸਚ੍ਛੇਦੋ ਵਾ ਆਪਤ੍ਤਿ ਵਾ ਨ ਹੋਤੀਤਿ ਅਧਿਪ੍ਪਾਯੋ. ਆਚਰਿਯਨ੍ਤਿ ਅਗਿਲਾਨਮ੍ਪਿ ਨਿਸ੍ਸਯਾਚਰਿਯਞ੍ਚ ਧਮ੍ਮਾਚਰਿਯਞ੍ਚ, ਪਗੇਵ ਉਪਸਮ੍ਪਦਾਚਰਿਯਉਪਜ੍ਝਾਯੇਸੁ. ਵਦਤਿ, ਵਟ੍ਟਤੀਤਿ ਸਤ੍ਤਾਹਾਤਿਕ੍ਕਮੇ ਆਪਤ੍ਤਿਅਭਾਵਂ ਸਨ੍ਧਾਯ ਵੁਤ੍ਤਂ, ਵਸ੍ਸਚ੍ਛੇਦੋ ਪਨ ਹੋਤਿ ਏਵ.

ਪਹਿਤੇਯੇਵਅਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

ਅਨ੍ਤਰਾਯੇਅਨਾਪਤ੍ਤਿਵਸ੍ਸਚ੍ਛੇਦਕਥਾਵਣ੍ਣਨਾ

੨੦੦. ਪਾਲ਼ਿਯਂ ਗਣ੍ਹਿਂਸੂਤਿ ਗਹੇਤ੍ਵਾ ਖਾਦਿਂਸੁ. ਪਰਿਪਾਤਿਂਸੂਤਿ ਪਲਾਪੇਸੁਂ, ਅਨੁਬਨ੍ਧਿਂਸੂਤਿ ਅਤ੍ਥੋ.

੨੦੧. ਸਤ੍ਤਾਹਵਾਰੇਨ ਅਰੁਣੋ ਉਟ੍ਠਾਪੇਤਬ੍ਬੋਤਿ ਏਤ੍ਥ ਛਦਿਵਸਾਨਿ ਬਹਿਦ੍ਧਾ ਵੀਤਿਨਾਮੇਤ੍ਵਾ ਸਤ੍ਤਮੇ ਦਿਵਸੇ ਪੁਰਾਰੁਣਾ ਏਵ ਅਨ੍ਤੋਉਪਚਾਰਸੀਮਾਯ ਪਵਿਸਿਤ੍ਵਾ ਅਰੁਣਂ ਉਟ੍ਠਾਪੇਤ੍ਵਾ ਪੁਨਦਿਵਸੇ ਸਤ੍ਤਾਹਂ ਅਧਿਟ੍ਠਾਯ ਗਨ੍ਤਬ੍ਬਨ੍ਤਿ ਅਧਿਪ੍ਪਾਯੋ. ਕੇਚਿ ਪਨ ‘‘ਸਤ੍ਤਮੇ ਦਿਵਸੇ ਆਗਨ੍ਤ੍ਵਾ ਅਰੁਣਂ ਅਨੁਟ੍ਠਾਪੇਤ੍ਵਾ ਤਦਹੇਵ ਦਿਵਸਭਾਗੇਪਿ ਗਨ੍ਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ‘‘ਅਰੁਣੋ ਉਟ੍ਠਾਪੇਤਬ੍ਬੋ’’ਤਿ ਵੁਤ੍ਤਤ੍ਤਾ. ਸਤ੍ਤਮੇ ਦਿਵਸੇ ਤਤ੍ਥ ਅਰੁਣੁਟ੍ਠਾਪਨਮੇਵ ਹਿ ਸਨ੍ਧਾਯ ਪਾਲ਼ਿਯਮ੍ਪਿ ‘‘ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ’’ਤਿ ਵੁਤ੍ਤਂ. ਅਰੁਣਂ ਅਨੁਟ੍ਠਾਪੇਤ੍ਵਾ ਗਚ੍ਛਨ੍ਤੋ ਅਨ੍ਤੋ ਅਪ੍ਪਵਿਸਿਤ੍ਵਾ ਬਹਿਦ੍ਧਾਵ ਸਤ੍ਤਾਹਂ ਵੀਤਿਨਾਮੇਨ੍ਤੇਨ ਸਮੁਚ੍ਛਿਨ੍ਨਵਸ੍ਸੋ ਏਵ ਭਵਿਸ੍ਸਤਿ ਅਰੁਣਸ੍ਸ ਬਹਿ ਏਵ ਉਟ੍ਠਾਪਿਤਤ੍ਤਾ. ਇਤਰਥਾ ‘‘ਅਰੁਣੋ ਉਟ੍ਠਾਪੇਤਬ੍ਬੋ’’ਤਿ ਵਚਨਂ ਨਿਰਤ੍ਥਕਂ ਸਿਯਾ ‘‘ਸਤ੍ਤਾਹਵਾਰੇਨ ਅਨ੍ਤੋਵਿਹਾਰੇ ਪਵਿਸਿਤ੍ਵਾ ਅਰੁਣਂ ਅਨੁਟ੍ਠਾਪੇਤ੍ਵਾਪਿ ਗਨ੍ਤਬ੍ਬ’’ਨ੍ਤਿ ਵਤ੍ਤਬ੍ਬਤੋ. ਅਞ੍ਞੇਸੁ ਚ ਠਾਨੇਸੁ ਅਰੁਣੁਟ੍ਠਾਪਨਮੇਵ ¶ ਵੁਚ੍ਚਤਿ. ਵਕ੍ਖਤਿ ਹਿ ਚੀਵਰਕ੍ਖਨ੍ਧਕੇ ‘‘ਏਕਸ੍ਮਿਂ ਵਿਹਾਰੇ ਵਸਨ੍ਤੋ ਇਤਰਸ੍ਮਿਂ ਸਤ੍ਤਾਹਵਾਰੇਨ ਅਰੁਣਮੇਵ ਉਟ੍ਠਾਪੇਤੀ’’ਤਿ (ਮਹਾਵ. ਅਟ੍ਠ. ੩੬੪).

ਅਥਾਪਿ ¶ ਯਂ ਤੇ ਵਦੇਯ੍ਯੁਂ ‘‘ਸਤ੍ਤਮੇ ਦਿਵਸੇ ਯਦਾ ਕਦਾਚਿ ਪਵਿਟ੍ਠੇਨ ਤਂਦਿਵਸਨਿਸ੍ਸਿਤੋ ਅਤੀਤਅਰੁਣੋ ਉਟ੍ਠਾਪਿਤੋ ਨਾਮ ਹੋਤੀਤਿ ਇਮਮਤ੍ਥਂ ਸਨ੍ਧਾਯ ਅਟ੍ਠਕਥਾਯਂ ਵੁਤ੍ਤ’’ਨ੍ਤਿ, ਤਂ ਸਦ੍ਦਗਤਿਯਾਪਿ ਨ ਸਮੇਤਿ. ਨ ਹਿ ਉਟ੍ਠਿਤੇ ਅਰੁਣੇ ਪਚ੍ਛਾ ਪਵਿਟ੍ਠੋ ਤਸ੍ਸ ਪਯੋਜਕੋ ਉਟ੍ਠਾਪਕੋ ਭਵਿਤੁਮਰਹਤਿ. ਯਦਿ ਭਵੇਯ੍ਯ, ਵਸ੍ਸਂ ਉਪਗਨ੍ਤ੍ਵਾ ਪਨਸ੍ਸ ਅਰੁਣਂ ਅਨੁਟ੍ਠਾਪੇਤ੍ਵਾ ਤਦਹੇਵ ਸਤ੍ਤਾਹਕਰਣੀਯੇਨ ਪਕ੍ਕਨ੍ਤਸ੍ਸਾਪੀਤਿ ਏਤ੍ਥ ‘‘ਅਰੁਣਂ ਅਨੁਟ੍ਠਾਪੇਤ੍ਵਾ’’ਤਿ ਵਚਨਂ ਵਿਰੁਜ੍ਝੇਯ੍ਯ, ਤੇਨਪਿ ਤਂਦਿਵਸਸਨ੍ਨਿਸ੍ਸਿਤਸ੍ਸ ਅਰੁਣਸ੍ਸ ਉਟ੍ਠਾਪਿਤਤ੍ਤਾ. ਆਰਞ੍ਞਕਸ੍ਸਾਪਿ ਹਿ ਭਿਕ੍ਖੁਨੋ ਸਾਯਨ੍ਹਸਮਯੇ ਅਙ੍ਗਯੁਤ੍ਤਂ ਅਰਞ੍ਞਟ੍ਠਾਨਂ ਗਨ੍ਤ੍ਵਾ ਤਦਾ ਏਵ ਨਿਵਤ੍ਤਨ੍ਤਸ੍ਸ ਅਰੁਣੋ ਉਟ੍ਠਾਪਿਤੋ ਧੁਤਙ੍ਗਞ੍ਚ ਵਿਸੋਧਿਤਂ ਸਿਯਾ, ਨ ਚੇਤਂ ਯੁਤ੍ਤਂ ਅਰੁਣੁਗ੍ਗਮਨਕਾਲੇ ਏਵ ਅਰੁਣੁਟ੍ਠਾਪਨਸ੍ਸ ਵੁਤ੍ਤਤ੍ਤਾ. ਵੁਤ੍ਤਞ੍ਹਿ ‘‘ਕਾਲਸ੍ਸੇਵ ਪਨ ਨਿਕ੍ਖਮਿਤ੍ਵਾ ਅਙ੍ਗਯੁਤ੍ਤੇ ਠਾਨੇ ਅਰੁਣਂ ਉਟ੍ਠਾਪੇਤਬ੍ਬਂ. ਸਚੇ ਅਰੁਣੁਟ੍ਠਾਨਵੇਲਾਯਂ ਤੇਸਂ ਆਬਾਧੋ ਵਡ੍ਢਤਿ, ਤੇਸਂ ਏਵ ਕਿਚ੍ਚਂ ਕਾਤਬ੍ਬਂ, ਨ ਧੁਤਙ੍ਗਵਿਸੁਦ੍ਧਿਕੇਨ ਭਵਿਤਬ੍ਬ’’ਨ੍ਤਿ (ਵਿਸੁਦ੍ਧਿ. ੧.੩੧). ਤਥਾ ਪਾਰਿਵਾਸਿਕਾਦੀਨਮ੍ਪਿ ਅਰੁਣਂ ਅਨੁਟ੍ਠਾਪੇਤ੍ਵਾ ਵਤ੍ਤਂ ਨਿਕ੍ਖਿਪਨ੍ਤਾਨਂ ਰਤ੍ਤਿਚ੍ਛੇਦੋ ਵੁਤ੍ਤੋ. ‘‘ਉਗ੍ਗਤੇ ਅਰੁਣੇ ਨਿਕ੍ਖਿਪਿਤਬ੍ਬ’’ਨ੍ਤਿ (ਚੂਲ਼ਵ. ੯੭) ਹਿ ਵੁਤ੍ਤਂ. ਸਹਸੇਯ੍ਯਸਿਕ੍ਖਾਪਦੇਪਿ ਅਨੁਪਸਮ੍ਪਨ੍ਨੇਹਿ ਸਹ ਨਿਵੁਤ੍ਥਭਾਵਪਰਿਮੋਚਨਤ੍ਥਂ ‘‘ਪੁਰਾਰੁਣਾ ਨਿਕ੍ਖਮਿਤ੍ਵਾ’’ਤਿਆਦਿ ਵੁਤ੍ਤਂ. ਏਵਂ ਚੀਵਰਵਿਪ੍ਪਵਾਸਾਦੀਸੁ ਚ ਸਬ੍ਬਤ੍ਥ ਰਤ੍ਤਿਪਰਿਯੋਸਾਨੇ ਆਗਾਮਿਅਰੁਣਵਸੇਨੇਵ ਅਰੁਣੁਟ੍ਠਾਪਨਂ ਦਸ੍ਸਿਤਂ, ਨ ਅਤੀਤਾਰੁਣਵਸੇਨ. ਤਸ੍ਮਾ ਵੁਤ੍ਤਨਯੇਨੇਵੇਤ੍ਥ ਅਰੁਣੁਟ੍ਠਾਪਨਂ ਵੇਦਿਤਬ੍ਬਂ ਅਞ੍ਞਥਾ ਵਸ੍ਸਚ੍ਛੇਦਤ੍ਤਾ.

ਯਂ ਪਨ ਵਸ੍ਸਂ ਉਪਗਤਸ੍ਸ ਤਦਹੇਵ ਅਰੁਣਂ ਅਨੁਟ੍ਠਾਪੇਤ੍ਵਾ ਸਕਰਣੀਯਸ੍ਸ ਪਕ੍ਕਮਨਵਚਨਂ, ਤਂ ਵਸ੍ਸਂ ਉਪਗਤਕਾਲਤੋ ਪਟ੍ਠਾਯ ਯਦਾ ਕਦਾਚਿ ਨਿਮਿਤ੍ਤੇ ਸਤਿ ਗਮਨਸ੍ਸ ਅਨੁਞ੍ਞਾਤਤ੍ਤਾ ਯੁਤ੍ਤਂ, ਨ ਪਨ ਸਤ੍ਤਾਹਵਾਰੇਨ ਗਤਸ੍ਸ ਅਰੁਣਂ ਅਨੁਟ੍ਠਾਪੇਤ੍ਵਾ ਤਦਹੇਵ ਗਮਨਂ ‘‘ਅਰੁਣੋ ਉਟ੍ਠਾਪੇਤਬ੍ਬੋ’’ਤਿ ਵੁਤ੍ਤਤ੍ਤਾ ਏਵ. ਯਥਾ ਵਾ ‘‘ਸਤ੍ਤਾਹਂ ਅਨਾਗਤਾਯ ਪਵਾਰਣਾਯ ਸਕਰਣੀਯੋ ਪਕ੍ਕਮਤਿ, ਆਗਚ੍ਛੇਯ੍ਯ ਵਾ ਸੋ, ਭਿਕ੍ਖਵੇ, ਭਿਕ੍ਖੁ ਤਂ ਆਵਾਸਂ, ਨ ਵਾ ਆਗਚ੍ਛੇਯ੍ਯਾ’’ਤਿਆਦਿਨਾ (ਮਹਾਵ. ੨੦੭) ਪਚ੍ਛਿਮਸਤ੍ਤਾਹੇ ਅਨਾਗਮਨੇ ਅਨੁਞ੍ਞਾਤੇਪਿ ਅਞ੍ਞਸਤ੍ਤਾਹੇਸੁ ਨ ਵਟ੍ਟਤਿ. ਏਵਂ ਪਠਮਸਤ੍ਤਾਹੇ ਅਰੁਣਂ ਅਨੁਟ੍ਠਾਪੇਤ੍ਵਾ ਗਮਨੇ ਅਨੁਞ੍ਞਾਤੇਪਿ ਤਤੋ ਪਰੇਸੁ ਸਤ੍ਤਾਹੇਸੁ ਆਗਤਸ੍ਸ ਅਰੁਣਂ ਅਨੁਟ੍ਠਾਪੇਤ੍ਵਾ ¶ ਗਮਨਂ ਨ ਵਟ੍ਟਤੀਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ. ਇਧ ਆਹਟਨ੍ਤਿ ਵਿਹਾਰਤੋ ਬਹਿ ਆਗਤਟ੍ਠਾਨੇ ਆਨੀਤਂ.

ਅਨ੍ਤਰਾਯੇਅਨਾਪਤ੍ਤਿਵਸ੍ਸਚ੍ਛੇਦਕਥਾਵਣ੍ਣਨਾ ਨਿਟ੍ਠਿਤਾ.

੨੦੩. ਉਪਗਨ੍ਤੁਂ ੬੮ ਨ ਵਟ੍ਟਤੀਤਿ ਕੁਟਿਕਾਦੀਨਂ ਅਭਾਵੇਨ ‘‘ਇਧ ਵਸ੍ਸਂ ਉਪੇਮੀ’’ਤਿ ਏਵਂ ਵਚੀਭੇਦਂ ਕਤ੍ਵਾ ਉਪਗਨ੍ਤੁਂ ਨ ਵਟ੍ਟਤਿ.

੨੦੪. ਪਾਲ਼ਿਯਂ ਪਿਸਾਚਿਲ੍ਲਿਕਾਤਿ ਪਿਸਾਚਦਾਰਕਾ. ਪਵਿਸਨਦ੍ਵਾਰਂ ਯੋਜੇਤ੍ਵਾਤਿ ਸਕਵਾਟਦ੍ਵਾਰਂ ਕਤ੍ਵਾ. ਰੁਕ੍ਖਂ ਛਿਨ੍ਦਿਤ੍ਵਾਤਿ ਸੁਸਿਰਟ੍ਠਾਨਸ੍ਸ ਉਪਰਿਭਾਗਂ ਛਿਨ੍ਦਿਤ੍ਵਾ. ਖਾਣੁਮਤ੍ਥਕੇਤਿ ਸੁਸਿਰਖਾਣੁਮਤ੍ਥਕੇ. ਟਙ੍ਕਿਤਮਞ੍ਚੋ ਨਾਮ ਦੀਘੇ ਮਞ੍ਚਪਾਦੇ ਵਿਜ੍ਝਿਤ੍ਵਾ ਅਟਨਿਯੋ ਪਵੇਸੇਤ੍ਵਾ ਕਤੋ, ਸੋ ਹੇਟ੍ਠੁਪਰਿਯਵਸੇਨ ਪਞ੍ਞਤ੍ਤੋਪਿ ਪੁਰਿਮਸਦਿਸੋਵ ਹੋਤਿ, ਤਂ ਸੁਸਾਨੇ, ਦੇਵਤਾਠਾਨੇ ਚ ਠਪੇਨ੍ਤਿ. ਚਤੁਨ੍ਨਂ ਪਾਸਾਣਾਨਂ ਉਪਰਿ ਪਾਸਾਣਫਲਕੇ ਅਤ੍ਥਰਿਤ੍ਵਾ ਕਤਗੇਹਮ੍ਪਿ ‘‘ਟਙ੍ਕਿਤਮਞ੍ਚੋ’’ਤਿ ਵੁਚ੍ਚਤਿ.

ਵਜਾਦੀਸੁਵਸ੍ਸੂਪਗਮਨਕਥਾਵਣ੍ਣਨਾ ਨਿਟ੍ਠਿਤਾ.

੨੦੫. ਮਹਾਵਿਭਙ੍ਗੇਤਿ ਚਤੁਤ੍ਥਪਾਰਾਜਿਕਵਣ੍ਣਨਾਯਂ. ਪਰਤੋ ਸੇਨਾਸਨਕ੍ਖਨ੍ਧਕੇਪਿ ਅਧਮ੍ਮਿਕਂ ਕਤਿਕਵਤ੍ਤਂ ਆਵਿ ਭਵਿਸ੍ਸਤਿ ਏਵ.

੨੦੭. ਯਸ੍ਮਾ ਨਾਨਾਸੀਮਾਯਂ ਦ੍ਵੀਸੁ ਆਵਾਸੇਸੁ ਵਸ੍ਸਂ ਉਪਗਚ੍ਛਨ੍ਤਸ੍ਸ ‘‘ਦੁਤਿਯੇ ਵਸਿਸ੍ਸਾਮੀ’’ਤਿ ਉਪਚਾਰਤੋ ਨਿਕ੍ਖਨ੍ਤਮਤ੍ਤੇ ਪਠਮੋ ਸੇਨਾਸਨਗ੍ਗਾਹੋ ਪਟਿਪ੍ਪਸ੍ਸਮ੍ਭਤਿ. ਤਸ੍ਮਾ ਪਾਲ਼ਿਯਂ ‘‘ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤੀ’’ਤਿ ਪਠਮਂ ਸੇਨਾਸਨਗ੍ਗਾਹਂ ਸਨ੍ਧਾਯ ਵੁਤ੍ਤਂ. ਦੁਤਿਯੇ ਸੇਨਾਸਨਗ੍ਗਾਹੇ ਪਨ ਪੁਰਿਮਿਕਾ ਪਞ੍ਞਾਯਤੇਵ, ਤਤ੍ਥੇਵ ਤੇਮਾਸਂ ਵਸਨ੍ਤੋ ਪੁਰਿਮਵਸ੍ਸਂਵੁਤ੍ਥੋ ¶ ਏਵ ਹੋਤਿ, ਤਤੋ ਵਾ ਪਨ ਦੁਤਿਯਦਿਵਸਾਦੀਸੁ ‘‘ਪਠਮਸੇਨਾਸਨੇ ਵਸਿਸ੍ਸਾਮੀ’’ਤਿ ਉਪਚਾਰਾਤਿਕ੍ਕਮੇ ਪੁਰਿਮਿਕਾਪਿ ਨ ਪਞ੍ਞਾਯਤੀਤਿ ਦਟ੍ਠਬ੍ਬਂ.

੨੦੮. ਪਾਲ਼ਿਯਂ ‘‘ਸੋ ਸਤ੍ਤਾਹਂ ਅਨਾਗਤਾਯ ਪਵਾਰਣਾਯ ਸਕਰਣੀਯੋ ਪਕ੍ਕਮਤੀ’’ਤਿ ਵੁਤ੍ਤਤ੍ਤਾ ਪਵਾਰਣਾਦਿਵਸੇਪਿ ਸਤ੍ਤਾਹਕਰਣੀਯਂ ਵਿਨਾ ਗਨ੍ਤੁਂ ਨ ਵਟ੍ਟਤੀਤਿ ਵੇਦਿਤਬ੍ਬਂ. ਕੋਮੁਦਿਯਾ ਚਾਤੁਮਾਸਿਨਿਯਾਤਿ ¶ ਪਚ੍ਛਿਮ-ਕਤ੍ਤਿਕਪੁਣ੍ਣਮਾਯ. ਸਾ ਹਿ ਤਸ੍ਮਿਂ ਕਾਲੇ ਕੁਮੁਦਾਨਂ ਅਤ੍ਥਿਤਾਯ ਕੋਮੁਦੀ, ਚਤੁਨ੍ਨਂ ਵਸ੍ਸਿਕਮਾਸਾਨਂ ਪਰਿਯੋਸਾਨਤ੍ਤਾ ਚਾਤੁਮਾਸਿਨੀਤਿ ਚ ਵੁਚ੍ਚਤਿ.

ਅਧਮ੍ਮਿਕਕਤਿਕਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਵਸ੍ਸੂਪਨਾਯਿਕਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੨੦੯. ਪਵਾਰਣਾਕ੍ਖਨ੍ਧਕੇ ¶ ¶ ਪਾਲ਼ਿਯਂ ਪਿਣ੍ਡਾਯ ਪਟਿਕ੍ਕਮੇਯ੍ਯਾਤਿ ਪਿਣ੍ਡਾਯ ਚਰਿਤ੍ਵਾ ਪਟਿਕ੍ਕਮੇਯ੍ਯ. ਅਵਕ੍ਕਾਰਪਾਤਿਨ੍ਤਿ ਅਤਿਰੇਕਪਿਣ੍ਡਪਾਤਠਪਨਕਂ ਏਕਂ ਭਾਜਨਂ. ਅਵਿਸਯ੍ਹਨ੍ਤਿ ਉਕ੍ਖਿਪਿਤੁਂ ਅਸਕ੍ਕੁਣੇਯ੍ਯਂ. ਵਿਲਙ੍ਘਨਂ ਉਕ੍ਖਿਪਨਂ ਵਿਲਙ੍ਘੋ, ਸੋ ਏਵ ਵਿਲਙ੍ਘਕੋ, ਹਤ੍ਥੇਹਿ ਵਿਲਙ੍ਘਕੋ ਹਤ੍ਥਵਿਲਙ੍ਘਕੋਤਿ ਆਹ ‘‘ਹਤ੍ਥੁਕ੍ਖੇਪਕੇਨਾ’’ਤਿ. ਅਥ ਵਾ ਵਿਲਙ੍ਘਕੇਨ ਉਕ੍ਖੇਪਕੇਨ ਹਤ੍ਥੇਨਾਤਿਪਿ ਅਤ੍ਥੋ, ਅਞ੍ਞਮਞ੍ਞਂ ਸਂਸਿਬ੍ਬਿਤਹਤ੍ਥੇਹੀਤਿ ਵੁਤ੍ਤਂ ਹੋਤਿ.

੨੧੩. ਸਚੇ ਪਨ ਵੁਡ੍ਢਤਰੋ ਹੋਤੀਤਿ ਪਵਾਰਣਾਦਾਯਕੋ ਭਿਕ੍ਖੁ ਵੁਡ੍ਢਤਰੋ ਹੋਤਿ. ਏਵਞ੍ਹਿ ਤੇਨ ਤਸ੍ਸਤ੍ਥਾਯ ਪਵਾਰਿਤਂ ਹੋਤੀਤਿ ਏਤ੍ਥ ਏਵਂ ਤੇਨ ਅਪ੍ਪਵਾਰਿਤੋਪਿ ਤਸ੍ਸ ਸਙ੍ਘਪ੍ਪਤ੍ਤਿਮਤ੍ਤੇਨ ਸਙ੍ਘਪਵਾਰਣਾਕਮ੍ਮਂ ਸਮਗ੍ਗਕਮ੍ਮਮੇਵ ਹੋਤੀਤਿ ਦਟ੍ਠਬ੍ਬਂ. ਤੇਨ ਚ ਭਿਕ੍ਖੁਨਾਤਿ ਪਵਾਰਣਾਦਾਯਕੇਨ ਭਿਕ੍ਖੁਨਾ.

੨੩੪. ਬਹੂਪਿ ਸਮਾਨਵਸ੍ਸਾ ਏਕਤੋ ਪਵਾਰੇਤੁਂ ਲਭਨ੍ਤੀਤਿ ਏਕਸ੍ਮਿਂ ਸਂਵਚ੍ਛਰੇ ਲਦ੍ਧੂਪਸਮ੍ਪਦਤਾਯ ਸਮਾਨੁਪਸਮ੍ਪਨ੍ਨਵਸ੍ਸਾ ਸਬ੍ਬੇ ਏਕਤੋ ਪਵਾਰੇਤੁਂ ਲਭਨ੍ਤੀਤਿ ਅਤ੍ਥੋ.

੨੩੭. ਪਾਲ਼ਿਯਂ ਮਿਚ੍ਛਾਦਿਟ੍ਠੀਤਿ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿ (ਦੀ. ਨਿ. ੧.੧੭੧; ਮ. ਨਿ. ੧.੪੪੫; ੨.੯੪, ੯੫, ੨੨੫; ੩.੯੧, ੧੧੬, ੧੩੬; ਸਂ. ਨਿ. ੩.੨੧੦; ਧ. ਸ. ੧੨੨੧) ਨਯਪ੍ਪਵਤ੍ਤਾ. ਅਨ੍ਤਗ੍ਗਾਹਿਕਾਤਿ ਸਸ੍ਸਤੁਚ੍ਛੇਦਸਙ੍ਖਾਤਸ੍ਸ ਅਨ੍ਤਸ੍ਸ ਗਾਹਿਕਾ. ਯਂ ਖੋ ਤ੍ਵਨ੍ਤਿਆਦੀਸੁ ਯਂ ਪਵਾਰਣਂ ਠਪੇਸਿ, ਤਂ ਦਿਟ੍ਠੇਨ ਠਪੇਸੀਤਿ ਤਂ-ਸਦ੍ਦਂ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਂ.

੨੩੯. ਵਤ੍ਥੁਂ ਪਕਾਸੇਨ੍ਤੋਤਿ ਪੁਗ੍ਗਲੇ ਪਰਿਸਙ੍ਕੁਪ੍ਪਤ੍ਤਿਯਾ ਨਿਮਿਤ੍ਤਭੂਤਂ ਵਤ੍ਥੁਮਤ੍ਤਂਯੇਵ ਸਨ੍ਧਾਯ ਵੁਤ੍ਤਂ ¶ . ਯਂ ਪਨ ਵਤ੍ਥੁਂ ਸਨ੍ਧਾਯ ‘‘ਪੁਗ੍ਗਲੋ ਪਞ੍ਞਾਯਤਿ, ਨ ਵਤ੍ਥੂ’’ਤਿ ਆਹ, ਨ ਤਂ ਸਨ੍ਧਾਯੇਤਂ ਵੁਤ੍ਤਂ. ਯਦਿ ਪਨ ਤਸ੍ਸ ਭਿਕ੍ਖੁਨੋ ਵਸਨਟ੍ਠਾਨੇ ਪੋਕ੍ਖਰਣਿਤੋ ਮਚ੍ਛਗ੍ਗਹਣਾਦਿ ਦਿਸ੍ਸੇਯ੍ਯ, ਤਦਾ ‘‘ਵਤ੍ਥੁ ਚ ਪੁਗ੍ਗਲੋ ਚ ਪਞ੍ਞਾਯਤੀ’’ਤਿ ਵਤ੍ਤਬ੍ਬਂ ਭਵੇਯ੍ਯ. ਤੇਨਾਹ ‘‘ਪੁਰਿਮਨਯੇਨੇਵ ਚੋਰੇਹੀ’’ਤਿਆਦਿ. ਭਿਕ੍ਖੁਨੋ ਸਰੀਰੇ ਮਾਲਾਗਨ੍ਧਞ੍ਚ ਅਰਿਟ੍ਠਗਨ੍ਧਞ੍ਚ ਦਿਸ੍ਵਾ ਏਵਂ ‘‘ਵਤ੍ਥੁ ਚ ਪੁਗ੍ਗਲੋ ਚ ਪਞ੍ਞਾਯਤੀ’’ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਅਫਾਸੁਵਿਹਾਰਕਥਾਦਿਵਣ੍ਣਨਾ ਨਿਟ੍ਠਿਤਾ.

੨੪੦. ਦ੍ਵੇ ¶ ਚਾਤੁਦ੍ਦਸਿਕਾ ਹੋਨ੍ਤੀਤਿ ਤਤਿਯਪਕ੍ਖੇ ਚਾਤੁਦ੍ਦਸਿਯਾ ਸਦ੍ਧਿਂ ਦ੍ਵੇ ਚਾਤੁਦ੍ਦਸਿਕਾ ਹੋਨ੍ਤਿ. ‘‘ਭਣ੍ਡਨਕਾਰਕਾਨਂ ਤੇਰਸੇ ਵਾ ਚਾਤੁਦ੍ਦਸੇ ਵਾ ਇਮੇ ਪਨ੍ਨਰਸੀਪਵਾਰਣਂ ਪਵਾਰੇਸ੍ਸਨ੍ਤੀ’’ਤਿ ਇਮਿਨਾ ਯਥਾਸਕਂ ਉਪੋਸਥਕਰਣਦਿਵਸਤੋ ਪਟ੍ਠਾਯ ਭਿਕ੍ਖੂਨਂ ਚਾਤੁਦ੍ਦਸੀਪਨ੍ਨਰਸੀਵੋਹਾਰੋ, ਨ ਚਨ੍ਦਗਤਿਸਿਦ੍ਧਿਯਾ ਤਿਥਿਯਾ ਵਸੇਨਾਤਿ ਦਸ੍ਸੇਤਿ. ਕਿਞ੍ਚਾਪਿ ਏਵਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਰਾਜੂਨਂ ਅਨੁਵਤ੍ਤਿਤੁ’’ਨ੍ਤਿ (ਮਹਾਵ. ੧੮੬) ਵਚਨਤੋ ਪਨੇਤ੍ਥ ਲੋਕਿਯਾਨਂ ਤਿਥਿਂ ਅਨੁਵਤ੍ਤਨ੍ਤੇਹਿਪਿ ਅਤ੍ਤਨੋ ਉਪੋਸਥਕ੍ਕਮੇਨ ਚਾਤੁਦ੍ਦਸਿਂ ਪਨ੍ਨਰਸਿਂ ਵਾ, ਪਨ੍ਨਰਸਿਂ ਚਾਤੁਦ੍ਦਸਿਂ ਵਾ ਕਰੋਨ੍ਤੇਹੇਵ ਅਨੁਵਤ੍ਤਿਤਬ੍ਬਂ, ਨ ਪਨ ਸੋਲ਼ਸਮਦਿਵਸਂ ਵਾ ਤੇਰਸਮਦਿਵਸਂ ਵਾ ਉਪੋਸਥਦਿਵਸਂ ਕਰੋਨ੍ਤੇਹਿ. ਤੇਨੇਵ ਪਾਲ਼ਿਯਮ੍ਪਿ ‘‘ਦ੍ਵੇ ਤਯੋ ਉਪੋਸਥੇ ਚਾਤੁਦ੍ਦਸਿਕੇ ਕਾਤੁ’’ਨ੍ਤਿ ਵੁਤ੍ਤਂ. ਅਞ੍ਞਥਾ ਦ੍ਵਾਦਸਿਯਂ, ਤੇਰਸਿਯਂ ਵਾ ਉਪੋਸਥੋ ਕਾਤਬ੍ਬੋਤਿ ਵਤ੍ਤਬ੍ਬਤੋ. ‘‘ਸਕਿਂ ਪਕ੍ਖਸ੍ਸ ਚਾਤੁਦ੍ਦਸੇ, ਪਨ੍ਨਰਸੇ ਵਾ’’ਤਿਆਦਿਵਚਨਮ੍ਪਿ ਉਪਵੁਤ੍ਥਕ੍ਕਮੇਨੇਵ ਵੁਤ੍ਤਂ, ਨ ਤਿਥਿਕ੍ਕਮੇਨਾਤਿ ਗਹੇਤਬ੍ਬਂ.

ਭਣ੍ਡਨਕਾਰਕਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੨੪੧. ‘‘ਪਵਾਰੇਤ੍ਵਾ ਪਨ ਅਨ੍ਤਰਾਪਿ ਚਾਰਿਕਂ ਪਕ੍ਕਮਿਤੁਂ ਲਭਨ੍ਤੀ’’ਤਿ ਇਮਿਨਾ ਪਵਾਰਣਾਸਙ੍ਗਹੇ ਕਤੇ ਅਨ੍ਤਰਾ ਪਕ੍ਕਮਿਤੁਕਾਮਾ ਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਪਵਾਰੇਤੁਂ ਲਭਨ੍ਤੀਤਿ ਦਸ੍ਸੇਤਿ.

ਪਵਾਰਣਾਸਙ੍ਗਹਕਥਾਵਣ੍ਣਨਾ ਨਿਟ੍ਠਿਤਾ.

ਪਵਾਰਣਾਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੨੪੨. ਚਮ੍ਮਕ੍ਖਨ੍ਧਕੇ ¶ ¶ ਉਣ੍ਣਪਾਵਾਰਣਨ੍ਤਿ ਉਭਤੋ ਲੋਮਾਨਿ ਉਟ੍ਠਾਪੇਤ੍ਵਾ ਕਤਂ ਉਣ੍ਣਮਯਂ ਪਾਵਾਰਣਂ, ਉਭਤੋ ਕਪ੍ਪਾਸਪਿਚੁਂ ਉਟ੍ਠਾਪੇਤ੍ਵਾ ਵੀਤਪਾਵਾਰੋਪਿ ਅਤ੍ਥਿ, ਤਤੋ ਨਿਵਤ੍ਤਨਤ੍ਥਂ ‘‘ਉਣ੍ਣਪਾਵਾਰਣ’’ਨ੍ਤਿ ਵੁਤ੍ਤਂ.

ਅਡ੍ਢਚਨ੍ਦਪਾਸਾਣੇਤਿ ਸੋਪਾਨਮੂਲੇ ਉਪਡ੍ਢਂ ਅਨ੍ਤੋ ਪਵੇਸੇਤ੍ਵਾ ਠਪਿਤੇ ਅਡ੍ਢਪਾਸਾਣੇ. ਪਾਲ਼ਿਯਂ ਵਿਹਾਰਪਚ੍ਛਾਯਾਯਨ੍ਤਿ ਵਿਹਾਰਪਚ੍ਚਨ੍ਤੇ ਛਾਯਾਯ, ਵਿਹਾਰਸ੍ਸ ਵਡ੍ਢਮਾਨਚ੍ਛਾਯਾਯਨ੍ਤਿਪਿ ਵਦਨ੍ਤਿ.

੨੪੩. ਭੋਗਾਤਿ ਉਪਯੋਗਤ੍ਥੇ ਪਚ੍ਚਤ੍ਤਵਚਨਂ. ਅਚ੍ਚਾਯਤਾਤਿ ਅਤਿਆਯਤਾ ਖਰਮੁਚ੍ਛਨਾ. ਸਰਵਤੀਤਿ ਮਧੁਰਸਰਸਂਯੁਤ੍ਤਾ. ਅਤਿਸਿਥਿਲਾ ਮਨ੍ਦਮੁਚ੍ਛਨਾ. ਵੀਰਿਯਸਮਥਨ੍ਤਿ ਵੀਰਿਯਸਮ੍ਪਯੁਤ੍ਤਸਮਥਂ. ਤਤ੍ਥ ਚ ਨਿਮਿਤ੍ਤਂ ਗਣ੍ਹਾਹੀਤਿ ਤਸ੍ਮਿਞ੍ਚ ਸਮਭਾਵੇ ਸਤਿ ਯਂ ਆਦਾਸੇ ਮੁਖਨਿਮਿਤ੍ਤਂ ਵਿਯ ਨਿਮਿਤ੍ਤਂ ਉਪ੍ਪਜ੍ਜਤਿ, ਤਂ ਸਮਥਨਿਮਿਤ੍ਤਂ, ਵਿਪਸ੍ਸਨਾਨਿਮਿਤ੍ਤਂ, ਮਗ੍ਗਨਿਮਿਤ੍ਤਂ, ਫਲਨਿਮਿਤ੍ਤਞ੍ਚ ਗਣ੍ਹਾਹਿ ਨਿਬ੍ਬਤ੍ਤੇਹੀਤਿ, ਏਵਮਸ੍ਸ ਅਰਹਤ੍ਤਪਰਿਯੋਸਾਨਂ ਕਮ੍ਮਟ੍ਠਾਨਂ ਕਥਿਤਂ.

੨੪੪. ਛਠਾਨਾਨੀਤਿ ਛ ਕਾਰਣਾਨਿ. ਅਧਿਮੁਤ੍ਤੋਤਿ ਪਟਿਵਿਜ੍ਝਿਤ੍ਵਾ ਠਿਤੋ. ਨੇਕ੍ਖਮ੍ਮਾਧਿਮੁਤ੍ਤੋਤਿਆਦਿ ਸਬ੍ਬਂ ਅਰਹਤ੍ਤਵਸੇਨ ਵੁਤ੍ਤਂ. ਅਰਹਤ੍ਤਞ੍ਹਿ ਸਬ੍ਬਕਿਲੇਸੇਹਿ ਨਿਕ੍ਖਨ੍ਤਤ੍ਤਾ ਨੇਕ੍ਖਮ੍ਮਂ, ਤੇਹੇਵ ਚ ਪਵਿਵਿਤ੍ਤਤ੍ਤਾ ਪਵਿਵੇਕੋ, ਬ੍ਯਾਪਜ੍ਜਾਭਾਵਤੋ ਅਬ੍ਯਾਪਜ੍ਜਂ, ਉਪਾਦਾਨਸ੍ਸ ਖਯਨ੍ਤੇ ਉਪ੍ਪਨ੍ਨਤ੍ਤਾ ਉਪਾਦਾਨਕ੍ਖਯੋ, ਤਣ੍ਹਕ੍ਖਯਨ੍ਤੇ ਉਪ੍ਪਨ੍ਨਤ੍ਤਾ ਤਣ੍ਹਕ੍ਖਯੋ, ਸਮ੍ਮੋਹਾਭਾਵਤੋ ਅਸਮ੍ਮੋਹੋਤਿ ਚ ਵੁਚ੍ਚਤਿ.

ਕੇਵਲਂ ਸਦ੍ਧਾਮਤ੍ਤਕਨ੍ਤਿ ਕੇਵਲਂ ਪਟਿਵੇਧਪਞ੍ਞਾਯ ਅਸਮ੍ਮਿਸ੍ਸਂ ਸਦ੍ਧਾਮਤ੍ਤਕਂ. ਪਟਿਚਯਨ੍ਤਿ ਪੁਨਪ੍ਪੁਨਂ ¶ ਕਰਣੇਨ ਵਡ੍ਢਿਂ. ਵੀਤਰਾਗਤ੍ਤਾਤਿ ਮਗ੍ਗਪਟਿਵੇਧੇਨ ਰਾਗਸ੍ਸ ਵਿਗਤਤ੍ਤਾ ਏਵ ਨੇਕ੍ਖਮ੍ਮਸਙ੍ਖਾਤਂ ਅਰਹਤ੍ਤਂ ਪਟਿਵਿਜ੍ਝਿਤ੍ਵਾ ਸਚ੍ਛਿਕਤ੍ਵਾ ਠਿਤੋ ਹੋਤਿ. ਸੇਸਪਦੇਸੁਪਿ ਏਸੇਵ ਨਯੋ. ਪਵਿਵੇਕਾਧਿਮੁਤ੍ਤੋਤਿ ‘‘ਪਵਿਵੇਕੇ ਅਧਿਮੁਤ੍ਤੋ ਅਹ’’ਨ੍ਤਿ ਏਵਂ ਅਰਹਤ੍ਤਂ ਬ੍ਯਾਕਰੋਤੀਤਿ ਅਤ੍ਥੋ.

ਸੀਲਬ੍ਬਤਪਰਾਮਾਸਨ੍ਤਿ ਸੀਲਞ੍ਚ ਵਤਞ੍ਚ ਪਰਾਮਸਿਤ੍ਵਾ ਗਹਿਤਗ੍ਗਹਣਮਤ੍ਤਂ. ਸਾਰਤੋ ਪਚ੍ਚਾਗਚ੍ਛਨ੍ਤੋਤਿ ਸਾਰਭਾਵੇਨ ਜਾਨਨ੍ਤੋ. ਅਬ੍ਯਾਪਜ੍ਜਾਧਿਮੁਤ੍ਤੋਤਿ ਅਬ੍ਯਾਪਜ੍ਜਂ ਅਰਹਤ੍ਤਂ ਬ੍ਯਾਕਰੋਤਿ.

ਅਮਿਸ੍ਸੀਕਤਨ੍ਤਿ ¶ ਅਮਿਸ੍ਸਕਤਂ. ਕਿਲੇਸਾ ਹਿ ਆਰਮ੍ਮਣੇਨ ਸਦ੍ਧਿਂ ਚਿਤ੍ਤਂ ਮਿਸ੍ਸਂ ਕਰੋਨ੍ਤਿ, ਤੇਸਂ ਅਭਾਵਾ ਅਮਿਸ੍ਸੀਕਤਂ. ਭੁਸਾ ਵਾਤਵੁਟ੍ਠੀਤਿ ਬਲਵਵਾਤਕ੍ਖਨ੍ਧੋ.

ਉਪਾਦਾਨਕ੍ਖਯਸ੍ਸ ਚਾਤਿ ਉਪਯੋਗਤ੍ਥੇ ਸਾਮਿਵਚਨਂ. ਦਿਸ੍ਵਾ ਆਯਤਨੁਪ੍ਪਾਦਨ੍ਤਿ ਚਕ੍ਖਾਦਿਆਯਤਨਾਨਂ ਉਪ੍ਪਾਦਞ੍ਚ ਵਯਞ੍ਚ ਦਿਸ੍ਵਾ. ਚਿਤ੍ਤਂ ਵਿਮੁਚ੍ਚਤੀਤਿ ਇਮਾਯ ਵਿਪਸ੍ਸਨਾਪਟਿਪਤ੍ਤਿਯਾ ਫਲਸਮਾਪਤ੍ਤਿਵਸੇਨ ਚਿਤ੍ਤਂ ਵਿਮੁਚ੍ਚਤਿ.

ਸੋਣਕੋਲ਼ਿਵਿਸਕਥਾਦਿਵਣ੍ਣਨਾ ਨਿਟ੍ਠਿਤਾ.

ਦਿਗੁਣਾਦਿਉਪਾਹਨਪਟਿਕ੍ਖੇਪਕਥਾਵਣ੍ਣਨਾ

੨੪੫. ਸਕਟਵਾਹੇਤਿ ਦ੍ਵੀਹਿ ਸਕਟੇਹਿ ਪਰਿਚ੍ਛਿਨ੍ਨੇ ਵਾਹੇ. ‘‘ਵਾਹੇ’’ਤਿ ਬਹੁਵਚਨਸ੍ਸ ਹਿਰਞ੍ਞਵਿਸੇਸਨਤ੍ਤੇਪਿ ਸਾਮਞ੍ਞਾਪੇਕ੍ਖਾਯ ‘‘ਹਿਰਞ੍ਞ’’ਨ੍ਤਿ ਏਕਵਚਨਂ ਕਤਂ.

੨੪੬. ਅਦ੍ਦਾਰਿਟ੍ਠਕਵਣ੍ਣਾਤਿ ਅਲ੍ਲਾਰਿਟ੍ਠਫਲਵਣ੍ਣਾ, ਤਿਨ੍ਤਕਾਕਪਕ੍ਖਵਣ੍ਣਾਤਿਪਿ ਵਦਨ੍ਤਿ. ਰਜਨਨ੍ਤਿ ਉਪਲਿਤ੍ਤਂ ਨੀਲਾਦਿਵਣ੍ਣਂ ਸਨ੍ਧਾਯ ਵੁਤ੍ਤਂ. ਤੇਨਾਹ ‘‘ਚੋਲ਼ਕੇਨ ਪੁਞ੍ਛਿਤ੍ਵਾ’’ਤਿ. ਤਞ੍ਹਿ ਤਥਾ ਪੁਞ੍ਛਿਤੇ ਵਿਗਚ੍ਛਤਿ. ਯਂ ਪਨ ਚਮ੍ਮਸ੍ਸ ਦੁਗ੍ਗਨ੍ਧਾਪਨਯਨਤ੍ਥਂ ਕਾਲ਼ਰਤ੍ਤਾਦਿਰਜਨੇਹਿ ਰਞ੍ਜਿਤਤ੍ਤਾ ਕਾਲ਼ਰਤ੍ਤਾਦਿਵਣ੍ਣਂ ਹੋਤਿ, ਤਂ ਚੋਲ਼ਾਦੀਹਿ ਅਪਨੇਤੁਂ ਨ ਸਕ੍ਕਾ ਚਮ੍ਮਗਤਿਕਮੇਵ, ਤਸ੍ਮਾ ਤਂ ਵਟ੍ਟਤੀਤਿ ਦਟ੍ਠਬ੍ਬਂ.

ਖਲ੍ਲਕਨ੍ਤਿ ਸਬ੍ਬਪਣ੍ਹਿਪਿਧਾਨਚਮ੍ਮਂ, ਅਪਰਿਗਲ਼ਨਤ੍ਥਂ ਪਣ੍ਹਿਉਪਰਿਭਾਗੇ ਅਪਿਧਾਯ ਆਰੋਪਨਬਨ੍ਧਨਮਤ੍ਤਂ ਵਟ੍ਟਤਿ. ਵਿਚਿਤ੍ਰਾਤਿ ਸਣ੍ਠਾਨਤੋ ਵਿਚਿਤ੍ਰਪਟਾ ਅਧਿਪ੍ਪੇਤਾ, ਨ ਵਣ੍ਣਤੋ ਸਬ੍ਬਸੋ ਅਪਨੇਤਬ੍ਬੇਸੁ ¶ ਖਲ੍ਲਕਾਦੀਸੁ ਪਵਿਟ੍ਠਤ੍ਤਾ. ਬਿਲ਼ਾਲਸਦਿਸਮੁਖਤ੍ਤਾ ਮਹਾਉਲੂਕਾ ‘‘ਪਕ੍ਖਿਬਿਲ਼ਾਲਾ’’ਤਿ ਵੁਚ੍ਚਤਿ, ਤੇਸਂ ਚਮ੍ਮਂ ਨਾਮ ਪਕ੍ਖਲੋਮਮੇਵ.

ਦਿਗੁਣਾਦਿਉਪਾਹਨਪਟਿਕ੍ਖੇਪਕਥਾਵਣ੍ਣਨਾ ਨਿਟ੍ਠਿਤਾ.

ਅਜ੍ਝਾਰਾਮੇਉਪਾਹਨਪਟਿਕ੍ਖੇਪਕਥਾਦਿਵਣ੍ਣਨਾ

੨੫੧. ਉਣ੍ਣਾਹਿ ¶ ਕਤਪਾਦੁਕਾਤਿ ਏਤ੍ਥ ਉਣ੍ਣਾਮਯਕਮ੍ਬਲੇਹਿ ਕਤਾ ਪਾਦੁਕਾ ਸਙ੍ਗਯ੍ਹਨ੍ਤਿ.

੨੫੩. ਗਙ੍ਗਾਮਹਕੀਲ਼ਿਕਾਯਾਤਿ ਗਙ੍ਗਾਮਹੇ ਕੀਲ਼ਿਕਾਯ. ਤਤ੍ਥ ਹਿ ਇਤ੍ਥਿਪੁਰਿਸਾ ਯਾਨੇਹਿ ਉਦਕਕੀਲ਼ਂ ਗਚ੍ਛਨ੍ਤਿ. ਪੀਠਕਸਿਵਿਕਨ੍ਤਿ ਫਲਕਾਦਿਨਾ ਕਤਂ ਪੀਠਕਯਾਨਂ. ਪਟਪੋਤਲਿਕਂ ਅਨ੍ਦੋਲਿਕਾ. ਸਬ੍ਬਮ੍ਪਿ ਯਾਨਂ ਉਪਾਹਨੇਨਪਿ ਗਨ੍ਤੁਂ ਅਸਮਤ੍ਥਸ੍ਸ ਗਿਲਾਨਸ੍ਸ ਅਨੁਞ੍ਞਾਤਂ.

੨੫੪. ਵਾਲ਼ਰੂਪਾਨੀਤਿ ਆਹਰਿਮਾਨਿ ਵਾਲ਼ਰੂਪਾਨਿ. ਚਤੁਰਙ੍ਗੁਲਾਧਿਕਾਨੀਤਿ ਉਦ੍ਦਲੋਮੀਏਕਨ੍ਤਲੋਮੀਹਿ ਵਿਸੇਸਦਸ੍ਸਨਂ. ਚਤੁਰਙ੍ਗੁਲਤੋ ਹਿ ਊਨਾਨਿ ਕਿਰ ਉਦ੍ਦਲੋਮੀਆਦੀਸੁ ਪਵਿਸਨ੍ਤਿ. ਵਾਨਚਿਤ੍ਰੋ ਉਣ੍ਣਾਮਯਤ੍ਥਰਣੋਤਿ ਨਾਨਾਵਣ੍ਣੇਹਿ ਉਣ੍ਣਾਮਯਸੁਤ੍ਤੇਹਿ ਭਿਤ੍ਤਿਚ੍ਛੇਦਾਦਿਵਸੇਨ ਵਾਯਿਤ੍ਵਾ ਕਤਚਿਤ੍ਤਤ੍ਥਰਣੋ. ਘਨਪੁਪ੍ਫਕੋਤਿ ਬਹਲਰਾਗੋ. ਪਕਤਿਤੂਲਿਕਾਤਿ ਤੂਲਪੁਣ੍ਣਾ ਭਿਸਿ. ਵਿਕਤਿਕਾਤਿ ਸੀਹਰੂਪਾਦਿਵਸੇਨ ਵਾਨਚਿਤ੍ਰਾਵ ਗਯ੍ਹਤਿ. ਉਦ੍ਦਲੋਮੀਤਿ ‘‘ਉਭਤੋਦਸਂ ਉਣ੍ਣਾਮਯਤ੍ਥਰਣ’’ਨ੍ਤਿ ਦੀਘਨਿਕਾਯਟ੍ਠਕਥਾਯਂ ਵੁਤ੍ਤਂ. ਕੋਸੇਯ੍ਯਕਟ੍ਟਿਸ੍ਸਮਯਨ੍ਤਿ ਕੋਸਿਯਸੁਤ੍ਤਾਨਂ ਅਨ੍ਤਰਾ ਸੁਵਣ੍ਣਮਯਸੁਤ੍ਤਾਨਿ ਪਵੇਸੇਤ੍ਵਾ ਵੀਤਂ. ਸੁਵਣ੍ਣਸੁਤ੍ਤਂ ਕਿਰ ‘‘ਕਟ੍ਟਿਸ੍ਸਂ, ਕਸਟ’’ਨ੍ਤਿ ਚ ਵੁਚ੍ਚਤਿ. ਤੇਨੇਵ ‘‘ਕੋਸੇਯ੍ਯਕਸਟਮਯ’’ਨ੍ਤਿ ਆਚਰਿਯ-ਧਮ੍ਮਪਾਲਤ੍ਥੇਰੇਨ ਵੁਤ੍ਤਨ੍ਤਿ ਵਦਨ੍ਤਿ. ਰਤਨਪਰਿਸਿਬ੍ਬਿਤਨ੍ਤਿ ਸੁਵਣ੍ਣਲਿਤ੍ਤਂ. ਸੁਦ੍ਧਕੋਸੇਯ੍ਯਨ੍ਤਿ ਰਤਨਪਰਿਸਿਬ੍ਬਨਰਹਿਤਂ.

ਅਜਿਨਮਿਗਚਮ੍ਮਾਨਂ ਅਤਿਸੁਖੁਮਤ੍ਤਾ ਦੁਪਟ੍ਟਤਿਪਟ੍ਟਾਨਿ ਕਤ੍ਵਾ ਸਿਬ੍ਬਨ੍ਤੀਤਿ ਵੁਤ੍ਤਂ ‘‘ਅਜਿਨਪ੍ਪਵੇਣੀ’’ਤਿ. ਰਤ੍ਤਵਿਤਾਨੇਨਾਤਿ ਸਬ੍ਬਰਤ੍ਤੇਨ ਵਿਤਾਨੇਨ. ਯਂ ਪਨ ਨਾਨਾਵਣ੍ਣਂ ਵਾਨਚਿਤ੍ਤਂ ਵਾ ਲੇਪਚਿਤ੍ਤਂ ਵਾ, ਤਂ ਵਟ੍ਟਤਿ. ਉਭਤੋਲੋਹਿਤਕੂਪਧਾਨੇਪਿ ਏਸੇਵ ਨਯੋ. ‘‘ਚਿਤ੍ਰਂ ਵਾ’’ਤਿ ਇਦਂ ਪਨ ਸਬ੍ਬਥਾ ਕਪ੍ਪਿਯਤ੍ਤਾ ਵੁਤ੍ਤਂ, ਨ ਪਨ ਉਭਤੋਉਪਧਾਨੇਸੁ ਅਕਪ੍ਪਿਯਤ੍ਤਾ. ਨ ਹਿ ਲੋਹਿਤਕ-ਸਦ੍ਦੋ ਚਿਤ੍ਤੇ ਵਤ੍ਤਤਿ, ਪਟਲਿਗ੍ਗਹਣੇਨੇਵ ਚਿਤ੍ਤਕਸ੍ਸਪਿ ਅਤ੍ਥਰਣਸ੍ਸ ਸਙ੍ਗਹੇਤਬ੍ਬਪ੍ਪਸਙ੍ਗਤੋ, ਕਾਸਾਵਂ ਪਨ ਲੋਹਿਤਕਵੋਹਾਰਂ ਨ ਗਚ੍ਛਤਿ. ਤਸ੍ਮਾ ਵਿਤਾਨੇਪਿ ਉਭਤੋਉਪਧਾਨੇਪਿ ਵਟ੍ਟਤਿ. ਸਚੇ ਪਮਾਣਯੁਤ੍ਤਨ੍ਤਿਆਦਿ ਅਞ੍ਞਪ੍ਪਮਾਣਾਤਿਕ੍ਕਨ੍ਤਸ੍ਸ ਬਿਬ੍ਬੋਹਨਸ੍ਸ ਪਟਿਕ੍ਖਿਤ੍ਤਭਾਵਦਸ੍ਸਨਤ੍ਥਂ ਵੁਤ੍ਤਂ, ਨ ਪਨ ¶ ਉਚ੍ਚਾਸਯਨਮਹਾਸਯਨਭਾਵਦਸ੍ਸਨਤ੍ਥਂ ਤਥਾ ਅਵੁਤ੍ਤਤ੍ਤਾ. ਤਂ ਪਨ ਉਪਧਾਨਂ ਉਪੋਸਥਿਕਾਨਂ ¶ ਗਹਟ੍ਠਾਨਂ ਵਟ੍ਟਤਿ. ਉਚ੍ਚਾਸਯਨਮਹਾਸਯਨਮੇਵ ਹਿ ਤਦਾ ਤੇਸਂ ਨ ਵਟ੍ਟਤਿ. ਦੀਘਨਿਕਾਯਟ੍ਠਕਥਾਦੀਸੁ ਕਿਞ੍ਚਾਪਿ ‘‘ਠਪੇਤ੍ਵਾ ਤੂਲਿਕਂ ਸਬ੍ਬਾਨੇਵ ਗੋਨਕਾਦੀਨਿ ਰਤਨਪਰਿਸਿਬ੍ਬਿਤਾਨਿ ਵਟ੍ਟਨ੍ਤੀ’’ਤਿਆਦਿ ਵੁਤ੍ਤਂ, ਵਿਨਯਟ੍ਠਕਥਾਯੇਵ ਕਪ੍ਪਿਯਾਕਪ੍ਪਿਯਭਾਵੇ ਪਮਾਣਨ੍ਤਿ ਗਹੇਤਬ੍ਬਂ.

ਅਜ੍ਝਾਰਾਮੇਉਪਾਹਨਪਟਿਕ੍ਖੇਪਕਥਾਦਿਵਣ੍ਣਨਾ ਨਿਟ੍ਠਿਤਾ.

ਗਿਹਿਵਿਕਤਾਨੁਞ੍ਞਾਤਾਦਿਕਥਾਵਣ੍ਣਨਾ

੨੫੬. ਅਭਿਨਿਸ੍ਸਾਯਾਤਿ ਅਪਸ੍ਸਾਯ. ਵਿਸੁਕਾਯਿਕਵਿਪ੍ਫਨ੍ਦਿਤਾਨਨ੍ਤਿ ਪਟਿਪਕ੍ਖਭੂਤਾਨਂ ਦਿਟ੍ਠਿਚਿਤ੍ਤਵਿਪ੍ਫਨ੍ਦਿਤਾਨਨ੍ਤਿ ਅਤ੍ਥੋ.

੨੫੭. ਯਤਿਨ੍ਦ੍ਰਿਯਨ੍ਤਿ ਮਨਿਨ੍ਦ੍ਰਿਯਵਸੇਨ ਸਞ੍ਞਤਿਨ੍ਦ੍ਰਿਯਂ.

੨੫੮. ਪਾਲ਼ਿਯਂ ਅਟ੍ਠਕਵਗ੍ਗਿਕਾਨੀਤਿ ਸੁਤ੍ਤਨਿਪਾਤੇ (ਸੁ. ਨਿ. ੭੭੨ ਆਦਯੋ) ਅਟ੍ਠਕਵਗ੍ਗਭੂਤਾਨਿ ਸੋਲ਼ਸ ਸੁਤ੍ਤਾਨਿ. ਏਵਂ ਚਿਰਂ ਅਕਾਸੀਤਿ ਏਵਂ ਚਿਰਕਾਲਂ ਪਬ੍ਬਜ੍ਜਂ ਅਨੁਪਗਨ੍ਤ੍ਵਾ ਅਗਾਰਮਜ੍ਝੇ ਕੇਨ ਕਾਰਣੇਨ ਵਾਸਮਕਾਸੀਤਿ ਅਤ੍ਥੋ. ਸੋ ਕਿਰ ਮਜ੍ਝਿਮਵਯੇ ਪਬ੍ਬਜਿਤੋ, ਤੇਨ ਭਗਵਾ ਏਵਮਾਹ. ਏਤਮਤ੍ਥਂ ਵਿਦਿਤ੍ਵਾਤਿ ਕਾਮੇਸੁ ਦਿਟ੍ਠਾਦੀਨਵਾ ਚਿਰਾਯਿਤ੍ਵਾਪਿ ਘਰਾਵਾਸੇਨ ਪਕ੍ਖਨ੍ਦਨ੍ਤੀਤਿ ਏਤਮਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ.

ਆਦੀਨਵਂ ਲੋਕੇਤਿ ਸਙ੍ਖਾਰਲੋਕੇ ਅਨਿਚ੍ਚਤਾਦਿਆਦੀਨਵਂ. ਨਿਰੁਪਧਿਨ੍ਤਿ ਨਿਬ੍ਬਾਨਂ. ‘‘ਅਰਿਯੋ ਨ ਰਮਤੀ ਪਾਪੇ’’ਤਿ ਇਮਸ੍ਸ ਹੇਤੁਮਾਹ ‘‘ਪਾਪੇ ਨ ਰਮਤੀ ਸੁਚੀ’’ਤਿ. ਤਤ੍ਥ ਸੁਚੀਤਿ ਵਿਸੁਦ੍ਧਪੁਗ੍ਗਲੋ.

੨੫੯. ਕਾਲ਼ਸੀਹੋਤਿ ਕਾਲ਼ਮੁਖਵਾਨਰਜਾਤਿ. ਚਮ੍ਮਂ ਨ ਵਟ੍ਟਤੀਤਿ ਨਿਸੀਦਨਤ੍ਥਰਣਂ ਕਾਤੁਂ ਨ ਵਟ੍ਟਤਿ, ਭੂਮਤ੍ਥਰਣਾਦਿਵਸੇਨ ਸੇਨਾਸਨਪਰਿਭੋਗੋ ਵਟ੍ਟਤੇਵ.

ਗਿਹਿਵਿਕਤਾਨੁਞ੍ਞਾਤਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਚਮ੍ਮਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੨੬੦. ਭੇਸਜ੍ਜਕ੍ਖਨ੍ਧਕੇ ¶ ¶ ਪਿਤ੍ਤਂ ਕੋਟ੍ਠਬ੍ਭਨ੍ਤਰਗਤਂ ਹੋਤੀਤਿ ਬਹਿਸਰੀਰੇ ਬ੍ਯਾਪੇਤ੍ਵਾ ਠਿਤਂ ਅਬਦ੍ਧਪਿਤ੍ਤਂ ਕੋਟ੍ਠਬ੍ਭਨ੍ਤਰਗਤਂ ਹੋਤਿ, ਤੇਨ ਪਿਤ੍ਤਂ ਕੁਪਿਤਂ ਹੋਤੀਤਿ ਅਧਿਪ੍ਪਾਯੋ.

੨੬੧-੨. ਪਾਲ਼ਿਯਂ ਨਚ੍ਛਾਦੇਨ੍ਤੀਤਿ ਰੁਚਿਂ ਨ ਉਪ੍ਪਾਦੇਨ੍ਤਿ. ਸੁਸੁਕਾਤਿ ਸਮੁਦ੍ਦੇ ਏਕਾ ਮਚ੍ਛਜਾਤਿ, ਕੁਮ੍ਭਿਲਾਤਿਪਿ ਵਦਨ੍ਤਿ. ਸਂਸਟ੍ਠਨ੍ਤਿ ਪਰਿਸ੍ਸਾਵਿਤਂ.

੨੬੩. ਪਿਟ੍ਠੇਹੀਤਿ ਪਿਸਿਤੇਹਿ. ਕਸਾਵੇਹੀਤਿ ਤਚਾਦੀਨਿ ਉਦਕੇ ਤਾਪੇਤ੍ਵਾ ਗਹਿਤਊਸਰੇਹਿ. ਉਬ੍ਭਿਦਨ੍ਤਿ ਊਸਰਪਂਸੁਮਯਂ. ਲੋਣਬਿਲਨ੍ਤਿ ਲੋਣਵਿਸੇਸੋ.

੨੬੪-੫. ਛਕਣਨ੍ਤਿ ਗੋਮਯਂ. ਪਾਕਤਿਕਚੁਣ੍ਣਨ੍ਤਿ ਅਪਕ੍ਕਕਸਾਵਚੁਣ੍ਣਂ, ਗਨ੍ਧਚੁਣ੍ਣਂ ਪਨ ਨ ਵਟ੍ਟਤਿ. ਪਾਲ਼ਿਯਂ ਚੁਣ੍ਣਚਾਲਿਨਿਨ੍ਤਿ ਉਦੁਕ੍ਖਲੇ ਕੋਟ੍ਟਿਤਚੁਣ੍ਣਪਰਿਸ੍ਸਾਵਨਿਂ. ਸੁਵਣ੍ਣਗੇਰੁਕੋਤਿ ਸੁਵਣ੍ਣਤੁਤ੍ਥਾਦਿ. ਪਾਲ਼ਿਯਂ ਅਞ੍ਜਨੂਪਪਿਸਨਨ੍ਤਿ ਅਞ੍ਜਨੇ ਉਪਨੇਤੁਂ ਪਿਸਿਤਬ੍ਬਭੇਸਜ੍ਜਂ.

੨੬੭-੯. ਕਬਲ਼ਿਕਾਤਿ ਉਪਨਾਹਭੇਸਜ੍ਜਂ. ਘਰਦਿਨ੍ਨਕਾਬਾਧੋ ਨਾਮ ਘਰਣਿਯਾ ਦਿਨ੍ਨਵਸੀਕਰਣਭੇਸਜ੍ਜਸਮੁਟ੍ਠਿਤਆਬਾਧੋ. ਤਾਯ ਛਾਰਿਕਾਯ ਪਗ੍ਘਰਿਤਂ ਖਾਰੋਦਕਨ੍ਤਿ ਪਰਿਸ੍ਸਾਵਨੇ ਤਚ੍ਛਾਰਿਕਂ ਪਕ੍ਖਿਪਿਤ੍ਵਾ ਉਦਕੇ ਅਭਿਸਿਞ੍ਚਿਤੇ ਤਤੋ ਛਾਰਿਕਤੋ ਹੇਟ੍ਠਾ ਪਗ੍ਘਰਿਤਂ ਖਾਰੋਦਕਂ. ਪਾਲ਼ਿਯਂ ਅਕਟਯੂਸੇਨਾਤਿ ਅਨਭਿਸਙ੍ਖਤੇਨ ਮੁਗ੍ਗਯੂਸੇਨ. ਕਟਾਕਟੇਨਾਤਿ ਮੁਗ੍ਗੇ ਪਚਿਤ੍ਵਾ ਅਚਾਲੇਤ੍ਵਾ ਪਰਿਸ੍ਸਾਵਿਤੇਨ ਮੁਗ੍ਗਯੂਸੇਨਾਤਿ ਵਦਨ੍ਤਿ.

ਪਞ੍ਚਭੇਸਜ੍ਜਾਦਿਕਥਾਵਣ੍ਣਨਾ ਨਿਟ੍ਠਿਤਾ.

੨੭੨-੪. ਗੁਲ਼ਕਰਣਨ੍ਤਿ ¶ ¶ ਉਚ੍ਛੁਸਾਲਂ. ਅਵਿਸ੍ਸਤ੍ਥਾਤਿ ਸਾਸਙ੍ਕਾ.

੨੭੬. ਅਪ੍ਪਮਤ੍ਤਕੇਪਿ ਵਾਰੇਨ੍ਤੀਤਿ ਅਪ੍ਪਮਤ੍ਤਕੇ ਦਿਨ੍ਨੇ ਦਾਯਕਾਨਂ ਪੀਲ਼ਾਤਿ ਪਟਿਕ੍ਖਿਪਨ੍ਤਿ. ਪਟਿਸਙ੍ਖਾਪੀਤਿ ਏਤ੍ਤਕੇਨਪਿ ਯਾਪੇਤੁਂ ਸਕ੍ਕਾ, ‘‘ਅਵਸੇਸਂ ਅਞ੍ਞੇਸਂ ਹੋਤੂ’’ਤਿ ਸਲ੍ਲਕ੍ਖੇਤ੍ਵਾਪਿ ਪਟਿਕ੍ਖਿਪਨ੍ਤਿ.

੨੭੯. ਵਤ੍ਥਿਪੀਲ਼ਨਨ੍ਤਿ ਯਥਾ ਵਤ੍ਥਿਗਤਤੇਲਾਦਿ ਅਨ੍ਤੋਸਰੀਰੇ ਆਰੋਹਨ੍ਤਿ, ਏਵਂ ਹਤ੍ਥੇਨ ਵਤ੍ਥਿਮਦ੍ਦਨਂ. ਸਮ੍ਬਾਧੇ ਸਤ੍ਥਕਮ੍ਮਵਤ੍ਥਿਕਮ੍ਮਾਨਮੇਵ ਪਟਿਕ੍ਖਿਤ੍ਤਤ੍ਤਾ ਦਹਨਕਮ੍ਮਂ ਵਟ੍ਟਤਿ ਏਵ.

ਗੁਲ਼ਾਦਿਅਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

੨੮੨-੩. ਪਾਲ਼ਿਯਂ ਦਸਸ੍ਸ ਠਾਨਾਨੀਤਿ ਅਸ੍ਸ ਪਟਿਗ੍ਗਾਹਕਸ੍ਸ ਦਸ ਠਾਨਾਨਿ ਕਾਰਣਾਨਿ ਧਮ੍ਮੇਨਾਤਿ ਅਤ੍ਥੋ. ਅਨੁਪ੍ਪਵੇਚ੍ਛਤੀਤਿ ਦੇਤਿ. ਵਾਤਞ੍ਚ ਬ੍ਯਪਨੇਤੀਤਿ ਸਮ੍ਬਨ੍ਧੋ, ਵਾਤਞ੍ਚ ਅਨੁਲੋਮੇਤੀਤਿ ਅਤ੍ਥੋ. ਸਗ੍ਗਾ ਤੇ ਆਰਦ੍ਧਾਤਿ ਤਯਾ ਦੇਵਲੋਕਾ ਆਰਾਧਿਤਾ.

ਯਾਗੁਮਧੁਗੋਲ਼ਕਾਦਿਕਥਾਵਣ੍ਣਨਾ ਨਿਟ੍ਠਿਤਾ.

੨੮੬. ਪਾਟਲਿਗਾਮੇ ਨਗਰਂ ਮਾਪੇਨ੍ਤੀਤਿ ਪਾਟਲਿਗਾਮਸ੍ਸ ਸਮੀਪੇ ਤਸ੍ਸੇਵ ਗਾਮਖੇਤ੍ਤਭੂਤੇ ਮਹਨ੍ਤੇ ਅਰਞ੍ਞਪ੍ਪਦੇਸੇ ਪਾਟਲਿਪੁਤ੍ਤਂ ਨਾਮ ਨਗਰਂ ਮਾਪੇਨ੍ਤਿ. ਯਾਵਤਾ ਅਰਿਯਂ ਆਯਤਨਨ੍ਤਿ ਯਤ੍ਤਕਂ ਅਰਿਯਮਨੁਸ੍ਸਾਨਂ ਓਸਰਣਟ੍ਠਾਨਂ. ਯਾਵਤਾ ਵਣਿਪ੍ਪਥੋਤਿ ਯਤ੍ਤਕਂ ਵਾਣਿਜਾਨਂ ਭਣ੍ਡਵਿਕ੍ਕੀਣਨਟ੍ਠਾਨਂ, ਵਸਨਟ੍ਠਾਨਂ ਵਾ, ਇਦਂ ਤੇਸਂ ਸਬ੍ਬੇਸਂ ਅਗ੍ਗਨਗਰਂ ਭਵਿਸ੍ਸਤੀਤਿ ਅਤ੍ਥੋ. ਪੁਟਭੇਦਨਨ੍ਤਿ ਸਕਟਾਦੀਹਿ ਨਾਨਾਦੇਸਤੋ ਆਹਟਾਨਂ ਭਣ੍ਡਪੁਟਾਨਂ ਵਿਕ੍ਕੀਣਨਤ੍ਥਾਯ ਮੋਚਨਟ੍ਠਾਨਂ. ਸਰਨ੍ਤਿ ਤਲ਼ਾਕਾਦੀਸੁਪਿ ਵਤ੍ਤਤਿ ¶ , ਤਨ੍ਨਿਵਤ੍ਤਨਤ੍ਥਂ ¶ ‘‘ਸਰਨ੍ਤਿ ਇਧ ਨਦੀ ਅਧਿਪ੍ਪੇਤਾ’’ਤਿ ਵੁਤ੍ਤਂ ਸਰਤਿ ਸਨ੍ਦਤੀਤਿ ਕਤ੍ਵਾ. ਵਿਨਾ ਏਵ ਕੁਲ੍ਲੇਨ ਤਿਣ੍ਣਾਤਿ ਇਦਂ ਅਪ੍ਪਮਤ੍ਤਕਉਦਕਮ੍ਪਿ ਅਫੁਸਿਤ੍ਵਾ ਵਿਨਾ ਕੁਲ੍ਲੇਨ ਪਾਰਪ੍ਪਤ੍ਤਾ.

ਪਾਟਲਿਗਾਮਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੨੮੭. ਪਾਲ਼ਿਯਂ ਸਨ੍ਧਾਵਿਤਨ੍ਤਿ ਭਵਤੋ ਭਵਂ ਪਟਿਸਨ੍ਧਿਗ੍ਗਹਣਵਸੇਨ ਸਨ੍ਧਾਵਨਂ ਕਤਂ. ਸਂਸਰਿਤਨ੍ਤਿ ਤਸ੍ਸੇਵ ਵੇਵਚਨਂ. ਮਮਞ੍ਚੇਵ ਤੁਮ੍ਹਾਕਞ੍ਚਾਤਿ ਮਯਾ ਚ ਤੁਮ੍ਹੇਹਿ ਚ, ਸਾਮਿਵਸੇਨੇਵ ਵਾ ਮਮ ਚ ਤੁਮ੍ਹਾਕਞ੍ਚ ਸਨ੍ਧਾਵਨਂ ਅਹੋਸੀਤਿ ਅਤ੍ਥੋ ਗਹੇਤਬ੍ਬੋ. ਸਂਸਰਿਤਨ੍ਤਿ ਸਂਸਰਿ. ਭਵਤਣ੍ਹਾ ਏਵ ਭਵਤੋ ਭਵਂ ਨੇਤੀਤਿ ਭਵਨੇਤ੍ਤੀਤਿ ਵੁਤ੍ਤਾ.

੨੮੯. ‘‘ਨੀਲਾ ਹੋਨ੍ਤੀ’’ਤਿ ਵੁਤ੍ਤਮੇਵਤ੍ਥਂ ਵਿਵਰਿਤੁਂ ‘‘ਨੀਲਵਣ੍ਣਾ’’ਤਿਆਦਿ ਵੁਤ੍ਤਂ. ਨੀਲਵਣ੍ਣਾਤਿ ਨੀਲਵਿਲੇਪਨਾ. ਏਸ ਨਯੋ ਸਬ੍ਬਤ੍ਥ. ਪਟਿਵਟ੍ਟੇਸੀਤਿ ਪਹਰਿ. ਅਮ੍ਬਕਾਯਾਤਿ ਅਮ੍ਬਾਯ. ਉਪਚਾਰਵਚਨਞ੍ਹੇਤਂ, ਮਾਤੁਗਾਮੇਨਾਤਿ ਅਤ੍ਥੋ. ਉਪਸਂਹਰਥਾਤਿ ਉਪਨੇਥ, ‘‘ਈਦਿਸਾ ਤਾਵਤਿਂਸਾ’’ਤਿ ਪਰਿਕਪ੍ਪੇਥਾਤਿ ਅਤ੍ਥੋ. ਇਦਞ੍ਚ ਭਿਕ੍ਖੂਨਂ ਸਂਵੇਗਜਨਨਤ੍ਥਂ ਵੁਤ੍ਤਂ, ਨ ਨਿਮਿਤ੍ਤਗ੍ਗਾਹਤ੍ਥਂ. ਲਿਚ੍ਛਵਿਰਾਜਾਨੋ ਹਿ ਸਬ੍ਬੇ ਨ ਚਿਰਸ੍ਸੇਵ ਅਜਾਤਸਤ੍ਤੁਨਾ ਵਿਨਾਸਂ ਪਾਪੁਣਿਸ੍ਸਨ੍ਤਿ.

ਕੋਟਿਗਾਮੇਸਚ੍ਚਕਥਾਵਣ੍ਣਨਾ ਨਿਟ੍ਠਿਤਾ.

ਸੀਹਸੇਨਾਪਤਿਵਤ੍ਥੁਆਦਿਕਥਾਵਣ੍ਣਨਾ

੨੯੦. ਸਨ੍ਧਾਗਾਰੇਤਿ ਰਾਜਕਿਚ੍ਚਸ੍ਸ ਸਨ੍ਧਾਰਣਤ੍ਥਾਯ ਨਿਚ੍ਛਿਦ੍ਦਂ ਕਤ੍ਵਾ ਵਿਚਾਰਣਤ੍ਥਾਯ ਕਤਮਹਾਸਭਾਯ. ਗਮਿਕਾਭਿਸਙ੍ਖਾਰੋਤਿ ਗਮਨੇ ਵਾਯਾਮੋ. ਧਮ੍ਮਸ੍ਸ ਚ ਅਨੁਧਮ੍ਮਨ੍ਤਿ ਤੁਮ੍ਹੇਹਿ ਵੁਤ੍ਤਸ੍ਸ ਕਾਰਣਸ੍ਸ ਅਨੁਕਾਰਣਂ, ਤੁਮ੍ਹੇਹਿ ਵੁਤ੍ਤਸ੍ਸ ਅਤ੍ਥਸ੍ਸ ਅਨੁਰੂਪਮੇਵਾਤਿ ਅਧਿਪ੍ਪਾਯੋ. ਸਹਧਮ੍ਮਿਕੋ ਵਾਦਾਨੁਵਾਦੋਤਿ ਪਰੇਹਿ ਵੁਤ੍ਤਕਾਰਣੇਨ ਸਕਾਰਣੋ ਹੁਤ੍ਵਾ ਤੁਮ੍ਹਾਕਂ ਵਾਦੋ ਵਾ ¶ ਇਤੋ ਪਰਂ ਤਸ੍ਸ ਅਨੁਵਾਦੋ ਵਾ. ਕੋਚਿ ਅਪ੍ਪਮਤ੍ਤਕੋਪਿ ਗਾਰਯ੍ਹਂ ਠਾਨਂ ਨ ਆਗਚ੍ਛਤੀਤਿ ਕਿਂ ਤਵ ਵਾਦੇ ਗਾਰਯ੍ਹਕਾਰਣਂ ਨਤ੍ਥੀਤਿ ਵੁਤ੍ਤਂ ਹੋਤਿ.

੨੯੩. ਅਨੁਵਿਚ੍ਚਕਾਰਨ੍ਤਿ ਅਨੁਵਿਦਿਤਾਕਾਰਂ. ਰਤਨਤ੍ਤਯਸ੍ਸ ਸਰਣਗਮਨਾਦਿਕਿਰਿਯਂ ਕਰੋਤਿ. ਸਹਸਾ ¶ ਕਤ੍ਵਾ ਮਾ ਪਚ੍ਛਾ ਵਿਪ੍ਪਟਿਸਾਰੀ ਅਹੋਸੀਤਿ ਅਤ੍ਥੋ. ਪਟਾਕਂ ਪਰਿਹਰੇਯ੍ਯੁਨ੍ਤਿ ਧਜਪਟਾਕਂ ਉਕ੍ਖਿਪਿਤ੍ਵਾ ‘‘ਈਦਿਸੋ ਅਮ੍ਹਾਕਂ ਸਰਣਂ ਗਤੋ ਸਾਵਕੋ ਜਾਤੋ’’ਤਿ ਨਗਰੇ ਘੋਸੇਨ੍ਤਾ ਆਹਿਣ੍ਡਨ੍ਤਿ.

੨੯੪. ਨਿਮਿਤ੍ਤਕਮ੍ਮਸ੍ਸਾਤਿ ਮਂਸਖਾਦਨਨਿਮਿਤ੍ਤੇਨ ਉਪ੍ਪਨ੍ਨਪਾਣਾਤਿਪਾਤਕਮ੍ਮਸ੍ਸ.

ਸੀਹਸੇਨਾਪਤਿਵਤ੍ਥੁਆਦਿਕਥਾਵਣ੍ਣਨਾ ਨਿਟ੍ਠਿਤਾ.

੨੯੫. ਅਨੁਪ੍ਪਗੇ ਏਵਾਤਿ ਪਾਤੋਵ. ਓਰਵਸਦ੍ਦਨ੍ਤਿ ਮਹਾਸਦ੍ਦਂ. ਤਂ ਪਨ ਅਵਤ੍ਵਾਪੀਤਿ ਪਿ-ਸਦ੍ਦੇਨ ਤਥਾਵਚਨਮ੍ਪਿ ਅਨੁਜਾਨਾਤਿ. ਅਟ੍ਠਕਥਾਸੂਤਿ ਅਨ੍ਧਕਟ੍ਠਕਥਾਵਿਰਹਿਤਾਸੁ ਸੇਸਟ੍ਠਕਥਾਸੁ. ਸਾਧਾਰਣਲਕ੍ਖਣਨ੍ਤਿ ਅਨ੍ਧਕਟ੍ਠਕਥਾਯ ਸਹ ਸਬ੍ਬਟ੍ਠਕਥਾਨਂ ਸਮਾਨਂ.

ਚਯਨ੍ਤਿ ਅਧਿਟ੍ਠਾਨਉਚ੍ਚਵਤ੍ਥੁਂ. ਯਤੋ ਪਟ੍ਠਾਯਾਤਿ ਯਤੋ ਇਟ੍ਠਕਾਦਿਤੋ ਪਟ੍ਠਾਯ, ਯਂ ਆਦਿਂ ਕਤ੍ਵਾ ਭਿਤ੍ਤਿਂ ਉਟ੍ਠਾਪੇਤੁਕਾਮਾਤਿ ਅਤ੍ਥੋ. ‘‘ਥਮ੍ਭਾ ਪਨ ਉਪਰਿ ਉਗ੍ਗਚ੍ਛਨ੍ਤਿ, ਤਸ੍ਮਾ ਵਟ੍ਟਨ੍ਤੀ’’ਤਿ ਏਤੇਨ ਇਟ੍ਠਕਪਾਸਾਣਾ ਹੇਟ੍ਠਾ ਪਤਿਟ੍ਠਾਪਿਤਾਪਿ ਯਦਿ ਚਯਤੋ, ਭੂਮਿਤੋ ਵਾ ਏਕਙ੍ਗੁਲਮਤ੍ਤਮ੍ਪਿ ਉਗ੍ਗਤਾ ਤਿਟ੍ਠਨ੍ਤਿ, ਵਟ੍ਟਨ੍ਤੀਤਿ ਸਿਦ੍ਧਂ ਹੋਤਿ.

ਆਰਾਮੋਤਿ ਉਪਚਾਰਸੀਮਾਪਰਿਚ੍ਛਿਨ੍ਨੋ ਸਕਲੋ ਵਿਹਾਰੋ. ਸੇਨਾਸਨਾਨੀਤਿ ਵਿਹਾਰਸ੍ਸ ਅਨ੍ਤੋ ਤਿਣਕੁਟਿਆਦਿਕਾਨਿ ਸਙ੍ਘਸ੍ਸ ਨਿਵਾਸਗੇਹਾਨਿ. ਵਿਹਾਰਗੋਨਿਸਾਦਿਕਾ ਨਾਮਾਤਿ ਸੇਨਾਸਨਗੋਨਿਸਾਦਿਕਾ. ਸੇਨਾਸਨਾਨਿ ਹਿ ਸਯਂ ਪਰਿਕ੍ਖਿਤ੍ਤਾਨਿਪਿ ਆਰਾਮਪਰਿਕ੍ਖੇਪਾਭਾਵੇਨ ‘‘ਗੋਨਿਸਾਦਿਕਾਨੀ’’ਤਿ ਵੁਤ੍ਤਾਨਿ. ‘‘ਉਪਡ੍ਢਪਰਿਕ੍ਖਿਤ੍ਤੋਪੀ’’ਤਿ ਇਮਿਨਾ ਤਤੋ ਊਨਪਰਿਕ੍ਖਿਤ੍ਤੋ ਯੇਭੁਯ੍ਯੇਨ ਅਪਰਿਕ੍ਖਿਤ੍ਤੋ ਨਾਮ, ਤਸ੍ਮਾ ਅਪਰਿਕ੍ਖਿਤ੍ਤਸਙ੍ਖ੍ਯਮੇਵ ਗਚ੍ਛਤੀਤਿ ਦਸ੍ਸੇਤਿ. ਏਤ੍ਥਾਤਿ ਉਪਡ੍ਢਾਦਿਪਰਿਕ੍ਖਿਤ੍ਤੇ. ਕਪ੍ਪਿਯਕੁਟਿਂ ਲਦ੍ਧੁਂ ਵਟ੍ਟਤੀਤਿ ਗੋਨਿਸਾਦਿਯਾ ¶ ਅਭਾਵੇਨ ਸੇਸਕਪ੍ਪਿਯਕੁਟੀਸੁ ਤੀਸੁ ਯਾ ਕਾਚਿ ਕਪ੍ਪਿਯਕੁਟਿ ਕਾਤਬ੍ਬਾਤਿ ਅਤ੍ਥੋ.

ਤੇਸਂ ਗੇਹਾਨੀਤਿ ਏਤ੍ਥ ਭਿਕ੍ਖੂਨਂ ਵਾਸਤ੍ਥਾਯ ਕਤਮ੍ਪਿ ਯਾਵ ਨ ਦੇਨ੍ਤਿ, ਤਾਵ ਤੇਸਂ ਸਨ੍ਤਕਂਯੇਵ ਭਵਿਸ੍ਸਤੀਤਿ ਦਟ੍ਠਬ੍ਬਂ. ਵਿਹਾਰਂ ਠਪੇਤ੍ਵਾਤਿ ਉਪਸਮ੍ਪਨ੍ਨਾਨਂ ਵਾਸਤ੍ਥਾਯ ਕਤਗੇਹਂ ਠਪੇਤ੍ਵਾਤਿ ਅਤ੍ਥੋ. ਗੇਹਨ੍ਤਿ ਨਿਵਾਸਗੇਹਂ, ਤਦਞ੍ਞਂ ਪਨ ਉਪੋਸਥਾਗਾਰਾਦਿ ਸਬ੍ਬਂ ਅਨਿਵਾਸਗੇਹਂ ਚਤੁਕਪ੍ਪਿਯਭੂਮਿਵਿਮੁਤ੍ਤਾ ਪਞ੍ਚਮੀ ਕਪ੍ਪਿਯਭੂਮਿ. ਸਙ੍ਘਸਨ੍ਤਕੇਪਿ ਹਿ ਏਤਾਦਿਸੇ ਗੇਹੇ ਸੁਟ੍ਠੁ ਪਰਿਕ੍ਖਿਤ੍ਤਾਰਾਮਤ੍ਤੇਪਿ ¶ ਅਬ੍ਭੋਕਾਸੇ ਵਿਯ ਅਨ੍ਤੋਵੁਤ੍ਥਾਦਿਦੋਸੋ ਨਤ੍ਥਿ. ਯੇਨ ਕੇਨਚਿ ਛਨ੍ਨੇ, ਪਰਿਚ੍ਛਨ੍ਨੇ ਚ ਸਹਸੇਯ੍ਯਪ੍ਪਹੋਨਕੇ ਭਿਕ੍ਖੁਸਙ੍ਘਸ੍ਸ ਨਿਵਾਸਗੇਹੇ ਅਨ੍ਤੋਵੁਤ੍ਥਾਦਿਦੋਸੋ, ਨ ਅਞ੍ਞਤ੍ਥ. ਤੇਨਾਹ ‘‘ਯਂ ਪਨਾ’’ਤਿਆਦਿ. ਤਤ੍ਥ ‘‘ਸਙ੍ਘਿਕਂ ਵਾ ਪੁਗ੍ਗਲਿਕਂ ਵਾ’’ਤਿ ਇਦਂ ਕਿਞ੍ਚਾਪਿ ਭਿਕ੍ਖੁਨੀਨਂ ਸਾਮਞ੍ਞਤੋ ਵੁਤ੍ਤਂ, ਭਿਕ੍ਖੂਨਂ ਪਨ ਸਙ੍ਘਿਕਂ ਪੁਗ੍ਗਲਿਕਞ੍ਚ ਭਿਕ੍ਖੁਨੀਨਂ, ਤਾਸਂ ਸਙ੍ਘਿਕਂ ਪੁਗ੍ਗਲਿਕਞ੍ਚ ਭਿਕ੍ਖੂਨਂ ਗਿਹਿਸਨ੍ਤਕਟ੍ਠਾਨੇ ਤਿਟ੍ਠਤੀਤਿ ਵੇਦਿਤਬ੍ਬਂ.

ਮੁਖਸਨ੍ਨਿਧੀਤਿ ਅਨ੍ਤੋਸਨ੍ਨਿਹਿਤਦੋਸੋ ਹਿ ਮੁਖਪ੍ਪਵੇਸਨਨਿਮਿਤ੍ਤਂ ਆਪਤ੍ਤਿਂ ਕਰੋਤਿ, ਨਾਞ੍ਞਥਾ. ਤਸ੍ਮਾ ‘‘ਮੁਖਸਨ੍ਨਿਧੀ’’ਤਿ ਵੁਤ੍ਤੋ.

ਤਤ੍ਥ ਤਤ੍ਥ ਖਣ੍ਡਾ ਹੋਨ੍ਤੀਤਿ ਉਪਡ੍ਢਤੋ ਅਧਿਕਂ ਖਣ੍ਡਾ ਹੋਨ੍ਤਿ. ਸਬ੍ਬਸ੍ਮਿਂ ਛਦਨੇ ਵਿਨਟ੍ਠੇਤਿ ਤਿਣਪਣ੍ਣਾਦਿਵਸ੍ਸਪਰਿਤ੍ਤਾਯਕੇ ਛਦਨੇ ਵਿਨਟ੍ਠੇ. ਗੋਪਾਨਸੀਨਂ ਪਨ ਉਪਰਿ ਵਲ੍ਲੀਹਿ ਬਦ੍ਧਦਣ੍ਡੇਸੁ ਠਿਤੇਸੁਪਿ ਜਹਿਤਵਤ੍ਥੁਕਾ ਹੋਨ੍ਤਿ ਏਵ. ਪਕ੍ਖਪਾਸਕਮਣ੍ਡਲਨ੍ਤਿ ਏਕਸ੍ਮਿਂ ਪਸ੍ਸੇ ਤਿਣ੍ਣਂ ਗੋਪਾਨਸੀਨਂ ਉਪਰਿ ਠਿਤਤਿਣਪਣ੍ਣਾਦਿਚ੍ਛਦਨਂ ਵੁਚ੍ਚਤਿ.

ਅਨੁਪਸਮ੍ਪਨ੍ਨਸ੍ਸ ਦਾਤਬ੍ਬੋ ਅਸ੍ਸਾਤਿਆਦਿਨਾ ਅਕਪ੍ਪਿਯਕੁਟਿਯਂ ਵੁਤ੍ਥਮ੍ਪਿ ਅਨੁਪਸਮ੍ਪਨ੍ਨਸ੍ਸ ਦਿਨ੍ਨੇ ਕਪ੍ਪਿਯਂ ਹੋਤਿ, ਸਾਪੇਕ੍ਖਦਾਨਞ੍ਚੇਤ੍ਥ ਵਟ੍ਟਤਿ, ਪਟਿਗ੍ਗਹਣਂ ਵਿਯ ਨ ਹੋਤੀਤਿ ਦਸ੍ਸੇਤਿ.

੨੯੯. ਪਾਲ਼ਿਯਂ ਕਨ੍ਤਾਰੇ ਸਮ੍ਭਾਵੇਸੀਤਿ ਅਪ੍ਪਭਕ੍ਖਕਨ੍ਤਾਰੇ ਸਮ੍ਪਾਪੁਣਿ.

ਕਪ੍ਪਿਯਭੂਮਿਅਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

੩੦੦. ਜਟਿਲੋਤਿ ¶ ਆਹਰਿਮਜਟਾਧਰੋ ਤਾਪਸਵੇਸਧਾਰਕੋ ਯਞ੍ਞਯੁਤ੍ਤੋ ਲੋਕਪੂਜਿਤੋ ਬ੍ਰਾਹ੍ਮਣੋ. ਪਵਤ੍ਤਾਰੋ ਪਾਵਚਨਵਸੇਨ ਵਤ੍ਤਾਰੋ. ਯੇਸਂ ਸਨ੍ਤਕਮਿਦਂ, ਯੇਹਿ ਵਾ ਇਦਂ ਗੀਤਨ੍ਤਿ ਅਤ੍ਥੋ. ਗੀਤਂ ਪਵੁਤ੍ਤਂ ਸਮਿਹਿਤਨ੍ਤਿ ਅਞ੍ਞਮਞ੍ਞਸ੍ਸ ਪਰਿਯਾਯਵਚਨਂ ਵੁਤ੍ਤਨ੍ਤਿ ਅਤ੍ਥੋ. ਤਦਨੁਗਾਯਨ੍ਤੀਤਿ ਤਂ ਤੇਹਿ ਪੁਬ੍ਬੇ ਗੀਤਂ ਅਨੁਗਾਯਨ੍ਤਿ. ਏਵਂ ਸੇਸੇਸੁ ਚ.

ਯਾਵਕਾਲਿਕਪਕ੍ਕਾਨਨ੍ਤਿ ਪਕ੍ਕੇ ਸਨ੍ਧਾਯ ਵੁਤ੍ਤਂ, ਆਮਾਨਿ ਪਨ ਅਨੁਪਸਮ੍ਪਨ੍ਨੇਹਿ ਸੀਤੁਦਕੇ ਮਦ੍ਦਿਤ੍ਵਾ ਪਰਿਸ੍ਸਾਵੇਤ੍ਵਾ ਦਿਨ੍ਨਪਾਨਂ ਪਚ੍ਛਾਭਤ੍ਤਮ੍ਪਿ ਕਪ੍ਪਤਿ ਏਵ. ਅਯਞ੍ਚ ਅਤ੍ਥੋ ਮਹਾਅਟ੍ਠਕਥਾਯਂ ਸਰੂਪਤੋ ¶ ਅਵੁਤ੍ਤੋਤਿ ਆਹ ‘‘ਕੁਰੁਨ੍ਦਿਯਂ ਪਨਾ’’ਤਿਆਦਿ. ‘‘ਉਚ੍ਛੁਰਸੋ ਨਿਕਸਟੋ’’ਤਿ ਇਦਂ ਪਾਤਬ੍ਬਸਾਮਞ੍ਞੇਨ ਯਾਮਕਾਲਿਕਕਥਾਯਂ ਵੁਤ੍ਤਂ, ਤਂ ਪਨ ਸਤ੍ਤਾਹਕਾਲਿਕਮੇਵਾਤਿ ਗਹੇਤਬ੍ਬਂ. ਇਮੇ ਚਤ੍ਤਾਰੋ ਰਸਾਤਿ ਫਲਪਤ੍ਤਪੁਪ੍ਫਉਚ੍ਛੁਰਸਾ ਚਤ੍ਤਾਰੋ.

ਪਾਲ਼ਿਯਂ ਅਗ੍ਗਿਹੁਤ੍ਤਮੁਖਾਤਿ ਅਗ੍ਗਿਜੁਹਨਪੁਬ੍ਬਕਾ. ਛਨ੍ਦਸੋਤਿ ਵੇਦਸ੍ਸ. ਸਾਵਿਤ੍ਤੀ ਮੁਖਂ ਪਠਮਂ ਸਜ੍ਝਾਯਿਤਬ੍ਬਾਤਿ ਅਤ੍ਥੋ. ਤਪਤਨ੍ਤਿ ਵਿਜੋਤਨ੍ਤਾਨਂ.

ਕੇਣਿਯਜਟਿਲਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੩੦੧. ਬਹੁਕਤੋ ਬੁਦ੍ਧੇ ਵਾਤਿ ਬੁਦ੍ਧੇ ਕਤਬਹੁਮਾਨੋਤਿ ਅਤ੍ਥੋ. ਸੋ ਖੋ ਅਹਂ, ਭਨ੍ਤੇ ਆਨਨ੍ਦ, ਞਾਤੀਨਂ ਦਣ੍ਡਭਯਤਜ੍ਜਿਤੋ ਅਹੋਸਿਨ੍ਤਿ ਸੇਸੋ. ਏਵਞ੍ਹਿ ਸਤਿ ‘‘ਏਵਾਹ’’ਨ੍ਤਿ ਪੁਨ ਅਹਂ-ਗਹਣਂ ਯੁਜ੍ਜਤਿ. ਵਿਵਰੀਤਿ ‘‘ਵਿਵਰਤੂ’’ਤਿ ਚਿਨ੍ਤਾਮਤ੍ਤੇਨ ਵਿਵਰਿ, ਨ ਉਟ੍ਠਾਯ ਹਤ੍ਥੇਨ.

੩੦੩. ਅਞ੍ਞਤਰੋਤਿ ਸੁਭਦ੍ਦੋ ਵੁਡ੍ਢਪਬ੍ਬਜਿਤੋ. ਦ੍ਵੇ ਦਾਰਕਾਤਿ ਸਾਮਣੇਰਭੂਮਿਯਂ ਠਿਤਾ ਦ੍ਵੇ ਪੁਤ੍ਤਾ. ਨਾਲ਼ਿਯਾਵਾਪਕੇਨਾਤਿ ਨਾਲ਼ਿਯਾ ਚੇਵ ਥਵਿਕਾਯ ਚ. ਸਂਹਰਥ ਇਮੇਹਿ ਭਾਜਨੇਹਿ ਤਣ੍ਡੁਲਾਦੀਨਿ ਸਙ੍ਕਡ੍ਢਥਾਤਿ ਅਤ੍ਥੋ. ਭੁਸਾਗਾਰੇਤਿ ਪਲਾਲਮਯੇ ਅਗਾਰੇ, ਪਲਾਲਪੁਞ੍ਜਂ ਅਬ੍ਭਨ੍ਤਰਤੋ ਪਲਾਲਂ ਸਙ੍ਕਡ੍ਢਿਤ੍ਵਾ ਅਗਾਰਂ ਕਤਂ ਹੋਤਿ, ਤਤ੍ਥਾਤਿ ਅਤ੍ਥੋ.

ਰੋਜਮਲ੍ਲਾਦਿਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੩੦੫. ਪਰਿਮਦ੍ਦਨ੍ਤਾਤਿ ¶ ਉਪਪਰਿਕ੍ਖਨ੍ਤਾ. ਦ੍ਵੇ ਪਟਾ ਦੇਸਨਾਮੇਨੇਵ ਵੁਤ੍ਤਾਤਿ ਤੇਸਂ ਸਰੂਪਦਸ੍ਸਨਪਦਮੇਤਂ. ਨਾਞ੍ਞਨਿਵਤ੍ਤਨਪਦਂ ਪਤ੍ਤੁਣ੍ਣਪਟਸ੍ਸਾਪਿ ਦੇਸਨਾਮੇਨ ਵੁਤ੍ਤਤ੍ਤਾ.

ਤੁਮ੍ਬਾਤਿ ਭਾਜਨਾਨਿ. ਫਲਤੁਮ੍ਬੋ ਨਾਮ ਲਾਬੁਆਦਿ. ਉਦਕਤੁਮ੍ਬੋ ਉਦਕਘਟੋ. ਕਿਲਞ੍ਜਚ੍ਛਤ੍ਤਨ੍ਤਿ ਵੇਲ਼ੁਵਿਲੀਵੇਹਿ ਵਾਯਿਤ੍ਵਾ ਕਤਛਤ੍ਤਂ. ਸਮ੍ਭਿਨ੍ਨਰਸਨ੍ਤਿ ਮਿਸ੍ਸੀਭੂਤਰਸਂ.

ਚਤੁਮਹਾਪਦੇਸਕਥਾਵਣ੍ਣਨਾ ਨਿਟ੍ਠਿਤਾ.

ਭੇਸਜ੍ਜਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੩੦੬. ਕਥਿਨਕ੍ਖਨ੍ਧਕੇ ¶ ¶ ਸੀਸਵਸੇਨਾਤਿ ਪਧਾਨਵਸੇਨ. ਕਥਿਨਨ੍ਤਿ ਪਞ੍ਚਾਨਿਸਂਸੇ ਅਨ੍ਤੋਕਰਣਸਮਤ੍ਥਤਾਯ ਥਿਰਨ੍ਤਿ ਅਤ੍ਥੋ. ਸੋ ਨੇਸਂ ਭਵਿਸ੍ਸਤੀਤਿ ਯੁਜ੍ਜਤੀਤਿ ‘‘ਸੋ ਤੁਮ੍ਹਾਕ’’ਨ੍ਤਿ ਅਵਤ੍ਵਾ ‘‘ਨੇਸ’’ਨ੍ਤਿ ਵਚਨਂ ਯੁਜ੍ਜਤਿ. ਯੇ ਅਤ੍ਥਤਕਥਿਨਾਤਿ ਨ ਕੇਵਲਂ ਤੁਮ੍ਹਾਕਮੇਵ, ਯੇ ਅਞ੍ਞੇਪਿ ਅਤ੍ਥਤਕਥਿਨਾ, ਤੇਸਂ ਭਵਿਸ੍ਸਤੀਤਿ ਅਤ੍ਥੋ. ਅਥ ਵਾ ਵੋਤਿ ਤਦਾ ਸਮ੍ਮੁਖੀਭੂਤੇਹਿ ਸਦ੍ਧਿਂ ਅਸਮ੍ਮੁਖੀਭੂਤੇ ਚ ਅਨਾਗਤੇ ਚ ਭਿਕ੍ਖੂ ਸਬ੍ਬੇ ਏਕਤੋ ਸਮ੍ਪਿਣ੍ਡੇਤ੍ਵਾ ਵੁਤ੍ਤਂ, ਤੁਮ੍ਹਾਕਨ੍ਤਿ ਅਤ੍ਥੋ. ਸੋ ਨੇਸਨ੍ਤਿ ਏਤ੍ਥ ਸੋ ਤੇਸਨ੍ਤਿ ਯੋਜੇਤਬ੍ਬਂ. ਤੇਨਾਹ ‘‘ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਇਮਾਨਿ ਪਞ੍ਚ ਕਪ੍ਪਿਸ੍ਸਨ੍ਤੀ’’ਤਿ. ਮਤਕਚੀਵਰਨ੍ਤਿ ਮਤਸ੍ਸ ਚੀਵਰਂ. ‘‘ਵੁਤ੍ਥਵਸ੍ਸਵਸੇਨਾ’’ਤਿ ਇਦਂ ਪਚ੍ਛਿਮਵਸ੍ਸਂਵੁਤ੍ਥਾਨਮ੍ਪਿ ਸਾਧਾਰਣਨ੍ਤਿ ਆਹ ‘‘ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਪਠਮਪਵਾਰਣਾਯ ਪਵਾਰਿਤਾ ਲਭਨ੍ਤੀ’’ਤਿ. ਉਪਗਤਾ ਵਾ ਨ ਲਭਨ੍ਤੀਤਿ ਪਚ੍ਛਿਮਿਕਾਯ ਵੁਤ੍ਥਵਸ੍ਸੇਪਿ ਸਨ੍ਧਾਯ ਵੁਤ੍ਤਂ.

ਖਲਿਮਕ੍ਖਿਤਸਾਟਕੋਤਿ ਅਹਤਵਤ੍ਥਂ ਸਨ੍ਧਾਯ ਵੁਤ੍ਤਂ. ‘‘ਅਕਾਤੁਂ ਨ ਲਬ੍ਭਤੀ’’ਤਿ ਇਮਿਨਾ ਅਨਾਦਰਿਯੇ ਸਤਿ ਦੁਕ੍ਕਟਨ੍ਤਿ ਦੀਪੇਤਿ.

‘‘ਅਪਲੋਕੇਤ੍ਵਾ’’ਤਿ ਇਦਂ ਅਞ੍ਞੇਸਂ ਵਸ੍ਸਂਵੁਤ੍ਥਭਿਕ੍ਖੂਨਂ ਅਦਤ੍ਵਾ ਦਾਤੁਕਾਮੇਹਿ ਕਤ੍ਤਬ੍ਬਵਿਧਿਦਸ੍ਸਨਂ. ਯਦਿ ਏਵਂ ਕਮ੍ਮਵਾਚਾਯ ਏਵ ਦਾਨਂ ਅਵੁਤ੍ਤਨ੍ਤਿ ਆਹ ‘‘ਕਮ੍ਮਵਾਚਾ ਪਨਾ’’ਤਿਆਦਿ. ਕਥਿਨਚੀਵਰਂ ਵਿਯ ਕਮ੍ਮਵਾਚਾਯ ਦਾਤੁਂ ਨ ਵਟ੍ਟਤੀਤਿ ਅਪਲੋਕੇਤ੍ਵਾਵ ਦਾਤਬ੍ਬਨ੍ਤਿ ਅਧਿਪ੍ਪਾਯੋ.

੩੦੮. ਮਹਾਭੂਮਿਕਨ੍ਤਿ ਮਹਾਵਿਸਯਂ, ਚਤੁਵੀਸਤਿਆਕਾਰਵਨ੍ਤਤਾਯ ਮਹਾਵਿਤ੍ਥਾਰਿਕਨ੍ਤਿ ਵੁਤ੍ਤਂ ਹੋਤਿ. ਪਞ੍ਚਕਨ੍ਤਿ ਪਞ੍ਚਖਣ੍ਡਂ. ਏਸੇਵ ਨਯੋ ਸੇਸੇਸੁਪਿ. ਪਠਮਚਿਮਿਲਿਕਾਤਿ ਕਥਿਨਵਤ੍ਥਤੋ ਅਞ੍ਞਾ ¶ ਅਤ੍ਤਨੋ ਪਕਤਿਚਿਮਿਲਿਕਾ. ਕੁਚ੍ਛਿਚਿਮਿਲਿਕਂ ਕਤ੍ਵਾ ਸਿਬ੍ਬਿਤਮਤ੍ਤੇਨਾਤਿ ਥਿਰਜਿਣ੍ਣਾਨਂ ਚਿਮਿਲਿਕਾਨਂ ਏਕਤੋ ਕਤ੍ਵਾ ਸਿਬ੍ਬਨਸ੍ਸੇਤਂ ਅਧਿਵਚਨਨ੍ਤਿ ਵਦਨ੍ਤਿ. ਮਹਾਪਚ੍ਚਰਿਯਂ, ਕੁਰੁਨ੍ਦਿਯਞ੍ਚ ਵੁਤ੍ਤਵਚਨਨ੍ਤਿ ਦਸ੍ਸਨਂ, ਬ੍ਯਞ੍ਜਨਤੋ ਏਵ ਭੇਦੋ, ਨ ਅਤ੍ਥਤੋਤਿ ਦਸ੍ਸਨਤ੍ਥਂ ਕਤਨ੍ਤਿਪਿ ਵਦਨ੍ਤਿ. ਪਿਟ੍ਠਿਅਨੁਵਾਤਾਰੋਪਨਮਤ੍ਤੇਨਾਤਿ ਦੀਘਤੋ ਅਨੁਵਾਤਸ੍ਸ ਆਰੋਪਨਮਤ੍ਤੇਨ. ਕੁਚ੍ਛਿਅਨੁਵਾਤਾਰੋਪਨਮਤ੍ਤੇਨਾਤਿ ਪੁਥੁਲਤੋ ਅਨੁਵਾਤਸ੍ਸ ਆਰੋਪਨਮਤ੍ਤੇਨ. ਰਤ੍ਤਿਨਿਸ੍ਸਗ੍ਗਿਯੇਨਾਤਿ ਰਤ੍ਤਿਅਤਿਕ੍ਕਨ੍ਤੇਨ.

੩੦੯. ਹਤਵਤ੍ਥਕਸਾਟਕੇਨਾਤਿ ¶ ਅਤਿਜਿਣ੍ਣਸਾਟਕੋ. ਨ ਹਿ ਤੇਨਾਤਿਆਦੀਸੁ ਤੇਨ ਪਰਿਵਾਰਾਗਤਪਾਠੇਨ ਇਧ ਆਨੇਤ੍ਵਾ ਅਵੁਚ੍ਚਮਾਨੇਨ ਕਥਿਨਤ੍ਥਾਰਕਸ੍ਸ ਜਾਨਿਤਬ੍ਬੇਸੁ ਨ ਕਿਞ੍ਚਿ ਪਰਿਹਾਯਤਿ, ਤਸ੍ਸ ਸਬ੍ਬਸ੍ਸ ਇਧੇਵ ਵੁਤ੍ਤਤ੍ਤਾਤਿ ਅਧਿਪ੍ਪਾਯੋ.

੩੧੦. ਮਾਤਾ ਵਿਯਾਤਿ ਮਾਤਿਕਾ, ਇਵਤ੍ਥੇ ਕ-ਪਚ੍ਚਯੋ ਦਟ੍ਠਬ੍ਬੋ. ਤੇਨ ਸਿਦ੍ਧਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਮਾਤਿਕਾਤਿ ਮਾਤਰੋ’’ਤਿਆਦਿ. ਅਸ੍ਸਾਤਿ ਏਤਿਸ੍ਸਾ ਮਾਤਿਕਾਯ. ਪਕ੍ਕਮਨਨ੍ਤਿਕੋ ਕਥਿਨੁਬ੍ਭਾਰੋ ਏਵ ਹਿ ਸਯਂ ਅਤ੍ਤਨੋ ਉਪ੍ਪਜ੍ਜਤੀਤਿ ਏਵਮਭੇਦੂਪਚਾਰੇਨ ‘‘ਮਾਤਿਕਾ’’ਤਿ ਵੁਤ੍ਤੋ ਉਬ੍ਭਾਰਸ੍ਸੇਵ ਪਕ੍ਕਮਨਨ੍ਤੇ ਸਮੁਪ੍ਪਤ੍ਤਿਤੋ, ਤਬ੍ਬਿਨਿਮੁਤ੍ਤਾਯ ਚ ਮਾਤਿਕਾਯ ਅਭਾਵਾ, ਤਪ੍ਪਕਾਸਿਕਾਪਿ ਚੇਤ੍ਥ ਪਾਲ਼ਿ ‘‘ਮਾਤਿਕਾ’’ਤਿ ਵਤ੍ਤੁਂ ਯੁਜ੍ਜਤਿ. ਸਾਪਿ ਹਿ ਪਕ੍ਕਮਨਨ੍ਤਿਕੁਬ੍ਭਾਰਪ੍ਪਕਾਸਨੇਨ ‘‘ਪਕ੍ਕਮਨਨ੍ਤਿਕਾ’’ਤਿ ਵੁਤ੍ਤਾ. ਏਸੇਵ ਨਯੋ ਸੇਸੁਬ੍ਭਾਰੇਸੁਪਿ. ਪਕ੍ਕਮਨਨ੍ਤਿ ਚੇਤ੍ਥ ਉਪਚਾਰਸੀਮਾਤਿਕ੍ਕਮਨਂ ਦਟ੍ਠਬ੍ਬਂ.

ਕਥਿਨਾਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

੩੧੧. ‘‘ਨ ਪੁਨ ਆਗਮਿਸ੍ਸ’’ਨ੍ਤਿ ਇਦਂ ਆਵਾਸਪਲਿਬੋਧੁਪਚ੍ਛੇਦਕਾਰਣਦਸ੍ਸਨਂ. ਪਞ੍ਚਸੁ ਹਿ ਚੀਵਰਮਾਸੇਸੁ ਯਦਾ ਕਦਾਚਿ ਨ ਪਚ੍ਚੇਸ੍ਸਨ੍ਤਿ ਚਿਤ੍ਤੇਨ ਉਪਚਾਰਸੀਮਾਤਿਕ੍ਕਮੇਨ ਆਵਾਸਪਲਿਬੋਧੋ ਛਿਜ੍ਜਤਿ. ਪਚ੍ਚੇਸ੍ਸਨ੍ਤਿ ਬਹਿਉਪਚਾਰਗਤਸ੍ਸ ਪਨ ਯਤ੍ਥ ਕਤ੍ਥਚਿ ਨ ਪਚ੍ਚੇਸ੍ਸਨ੍ਤਿ ਚਿਤ੍ਤੇ ਉਪ੍ਪਨ੍ਨਮਤ੍ਤੇ ਛਿਜ੍ਜਤਿ. ਪਠਮਂ ਚੀਵਰਪਲਿਬੋਧੋ ਛਿਜ੍ਜਤੀਤਿ ਨ ਪਚ੍ਚੇਸ੍ਸਨ੍ਤਿ ਪਕ੍ਕਮਨਤੋ ਪੁਰੇਤਰਮੇਵ ਚੀਵਰਸ੍ਸ ਨਿਟ੍ਠਿਤਤ੍ਤਾ ਵੁਤ੍ਤਂ. ‘‘ਕਤਚੀਵਰਮਾਦਾਯਾ’’ਤਿ ਹਿ ਵੁਤ੍ਤਂ. ਅਤ੍ਥਤਕਥਿਨਸ੍ਸ ਹਿ ਭਿਕ੍ਖੁਨੋ ਯਾਵ ‘‘ਸਙ੍ਘਤੋ ਵਾ ਦਾਯਕਕੁਲਾਦਿਤੋ ਵਾ ਚੀਵਰਂ ਲਭਿਸ੍ਸਾਮੀ’’ਤਿ ਚੀਵਰਾਸਾ ਵਾ ਲਦ੍ਧਵਤ੍ਥਾਨਂ ਸਹਾਯਸਮ੍ਪਦਾਦਿਯੋਗਂ ਲਭਿਤ੍ਵਾ ਸਙ੍ਘਾਟਿਆਦਿਭਾਵੇਨ ‘‘ਛਿਨ੍ਦਿਤ੍ਵਾ ਕਰਿਸ੍ਸਾਮੀ’’ਤਿ ਕਰਣਿਚ੍ਛਾ ਵਾ ਪਵਤ੍ਤਤਿ, ਤਾਵ ਚੀਵਰਪਲਿਬੋਧੋ ਅਨੁਪਚ੍ਛਿਨ੍ਨੋ ਏਵ. ਯਦਾ ਪਨ ਯਥਾਪਤ੍ਥਿਤਟ੍ਠਾਨਤੋ ਚੀਵਰਾਦੀਨਂ ਸਬ੍ਬਥਾ ¶ ਅਲਾਭੇਨ ਵਾ ਚੀਵਰਾਸਾ ਚੇਵ ਲਦ੍ਧਾਨਂ ਕਤ੍ਵਾ ਨਿਟ੍ਠਾਨੇਨ ਵਾ ਨਟ੍ਠਵਿਨਟ੍ਠਾਦਿਭਾਵੇਨ ਵਾ ਚੀਵਰੇ ਨਿਰਪੇਕ੍ਖਤਾਯ ਵਾ ਕਰਣਿਚ੍ਛਾ ਚ ਵਿਗਚ੍ਛਤਿ, ਤਦਾ ਚੀਵਰਪਲਿਬੋਧੋ ਉਪਚ੍ਛਿਨ੍ਨੋ ਹੋਤਿ.

ਸੋ ¶ ਚ ਇਧ ‘‘ਕਤਚੀਵਰਂ ਆਦਾਯਾ’’ਤਿ ਵਚਨੇਨ ਪਕਾਸਿਤੋ. ਏਵਂ ਉਪਰਿ ਸਬ੍ਬਤ੍ਥ ਪਾਲ਼ਿਵਚਨਕ੍ਕਮਂ ਨਿਸ੍ਸਾਯ ਨੇਸਂ ਪਠਮਂ, ਪਚ੍ਛਾ ਚ ਉਪਚ੍ਛਿਜ੍ਜਨਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਸਬ੍ਬਥਾਪਿ ਚ ਇਮੇਸਂ ਉਭਿਨ੍ਨਂ ਪਲਿਬੋਧਾਨਂ ਉਪਚ੍ਛੇਦੇਨੇਵ ਕਥਿਨੁਬ੍ਭਾਰੋ, ਨ ਏਕਸ੍ਸ. ਤੇਸਞ੍ਚ ਪੁਬ੍ਬਾਪਰਿਯੇਨ, ਏਕਕ੍ਖਣੇ ਚ ਉਪਚ੍ਛਿਜ੍ਜਨਂ ਦਸ੍ਸੇਤੁਂ ਇਮਾ ਅਟ੍ਠ ਮਾਤਿਕਾ ਠਪਿਤਾਤਿ ਵੇਦਿਤਬ੍ਬਾ. ਅਨ੍ਤੋਸੀਮਾਯਨ੍ਤਿ ਚੀਵਰਨਿਟ੍ਠਾਨਕ੍ਖਣੇਯੇਵ ਛਿਨ੍ਨਤ੍ਤਾ ਵੁਤ੍ਤਂ. ਨੇਵਿਮਂ ਚੀਵਰਂ ਕਾਰੇਸ੍ਸਨ੍ਤਿ ਚੀਵਰੇ ਅਪੇਕ੍ਖਾਯ ਵਿਗਤਤ੍ਤਾ ਕਰਣਪਲਿਬੋਧਸ੍ਸਾਪਿ ਉਪਚ੍ਛਿਨ੍ਨਤਂ ਦਸ੍ਸੇਤਿ. ਯੋ ਪਨ ਅਪ੍ਪਿਚ੍ਛਤਾਯ ਵਾ ਅਨਤ੍ਥਿਕਤਾਯ ਵਾ ਸਬ੍ਬਥਾ ਚੀਵਰਂ ਨ ਸਮ੍ਪਟਿਚ੍ਛਤਿ, ਤਸ੍ਸ ਬਹਿਸੀਮਾਗਤਸ੍ਸ ਸਬ੍ਬਥਾਪਿ ਚੀਵਰਪਲਿਬੋਧਾਭਾਵੇਨ ਨ ਪਚ੍ਚੇਸ੍ਸਨ੍ਤਿ ਸਨ੍ਨਿਟ੍ਠਾਨਮਤ੍ਤੇਨ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਬ੍ਭਾਰੋ ਵੇਦਿਤਬ੍ਬੋ. ਸੋ ਪਨਾਤਿ ਪਲਿਬੋਧੁਪਚ੍ਛੇਦੋ. ਅਯਂ ਪਨਾਤਿ ਆਸਾਵਚ੍ਛੇਦਕੋ ਕਥਿਨੁਬ੍ਭਾਰੋ ਵਿਸੁਂ ਵਿਤ੍ਥਾਰੇਤ੍ਵਾ ਵੁਤ੍ਤੋ, ਇਧ ਨ ਵੁਤ੍ਤੋਤਿ ਸਮ੍ਬਨ੍ਧੋ.

ਅਨਾਸਾਯ ਲਭਤੀਤਿ ‘‘ਯਸ੍ਮਿਂ ਕੁਲੇ ਚੀਵਰਂ ਲਭਿਸ੍ਸਾਮਾ’’ਤਿ ਆਸਾ ਅਨੁਪ੍ਪਨ੍ਨਪੁਬ੍ਬਾ, ਤਤ੍ਥ ਚੀਵਰਾਸਾਯ ਅਨੁਪ੍ਪਨ੍ਨਟ੍ਠਾਨੇ ਯਤ੍ਥ ਕਤ੍ਥਚਿ ਲਭਤੀਤਿ ਅਤ੍ਥੋ. ਆਸਾਯ ਨ ਲਭਤੀਤਿ ਆਸੀਸਿਤਟ੍ਠਾਨੇ ਨ ਲਭਤੀਤਿ ਅਤ੍ਥੋ. ਇਧ ਨ ਵੁਤ੍ਤੋਤਿ ਇਧ ਸਵਨਨ੍ਤਿਕਾਨਨ੍ਤਰੇ ਨ ਵੁਤ੍ਤੋ. ਤਤ੍ਥਾਤਿ ਤਸ੍ਮਿਂ ਸੀਮਾਤਿਕ੍ਕਨ੍ਤਿਕੇ. ਸੀਮਾਤਿਕ੍ਕਨ੍ਤਿਕੋ ਨਾਮ ਚੀਵਰਮਾਸਾਨਂ ਪਰਿਯਨ੍ਤਦਿਵਸਸਙ੍ਖਾਤਾਯ ਸੀਮਾਯ ਅਤਿਕ੍ਕਮਨਤੋ ਸਞ੍ਜਾਤੋ. ਕੇਚਿ ‘‘ਬਹਿਸੀਮਾਯ ਕਾਲਾਤਿਕ੍ਕਮੋ ਸੀਮਾਤਿਕ੍ਕਮੋ’’ਤਿ ਮਞ੍ਞਨ੍ਤਿ, ਤੇਸਂ ਅਨ੍ਤੋਉਪਚਾਰੇ ਚੀਵਰਕਾਲਾਤਿਕ੍ਕਮੇਪਿ ਕਥਿਨੁਬ੍ਭਾਰੋ ਅਸਮ੍ਮਤੋ ਨਾਮ ਸਿਯਾਤਿ ਨ ਚੇਤਂ ਯੁਤ੍ਤਂ. ਤਸ੍ਮਾ ਯਤ੍ਥ ਕਤ੍ਥਚਿ ਕਾਲਾਤਿਕ੍ਕਮੋ ਸੀਮਾਤਿਕ੍ਕਮੋਤਿ ਵੇਦਿਤਬ੍ਬੋ. ਏਤ੍ਥ ਚ ਪਾਲ਼ਿਯਂ ‘‘ਕਤਚੀਵਰੋ’’ਤਿ ਇਦਂ ਉਪਲਕ੍ਖਣਮਤ੍ਤਂ, ਅਕਤਚੀਵਰਸ੍ਸਪਿ ਕਾਲਾਤਿਕ੍ਕਮੇਨ ਸੀਮਾਤਿਕ੍ਕਨ੍ਤਿਕੋ ਹੋਤਿ, ਦ੍ਵੇ ਚ ਪਲਿਬੋਧਾ ਏਕਤੋ ਛਿਜ੍ਜਨ੍ਤਿ. ਏਵਂ ਅਞ੍ਞਤ੍ਥਾਪਿ ਯਥਾਸਮ੍ਭਵਂ ਤਂਤਂ ਵਿਸੇਸਨਾਭਾਵੇਪਿ ਕਥਿਨੁਬ੍ਭਾਰਤਾ, ਪਲਿਬੋਧੁਪਚ੍ਛੇਦਪ੍ਪਕਾਰੋ ਚ ਵੇਦਿਤਬ੍ਬੋ. ‘‘ਸਹੁਬ੍ਭਾਰੇ ਦ੍ਵੇਪਿ ਪਲਿਬੋਧਾ ਅਪੁਬ੍ਬਂ ਅਚਰਿਮਂ ਛਿਜ੍ਜਨ੍ਤੀ’’ਤਿ ਇਦਂ ਅਕਤਚੀਵਰਸ੍ਸ ਪਚ੍ਚੇਸ੍ਸਨ੍ਤਿ ਅਧਿਟ੍ਠਾਨਸਮ੍ਭਵਪਕ੍ਖਂ ਸਨ੍ਧਾਯ ਵੁਤ੍ਤਂ, ਤੇਸੁ ਅਞ੍ਞਤਰਾਭਾਵੇਪਿ ਸਹੁਬ੍ਭਾਰੋਵ ਹੋਤਿ.

੩੧੨-੩੨੫. ਸਮਾਦਾਯਵਾਰੋ ਆਦਾਯਵਾਰਸਦਿਸੋਵ. ਉਪਸਗ੍ਗਮੇਵੇਤ੍ਥ ਵਿਸੇਸੋ. ਤੇਨਾਹ ‘‘ਪੁਨ ਸਮਾਦਾਯਵਾਰੇਪਿ…ਪੇ… ਤੇਯੇਵ ਦਸ੍ਸਿਤਾ’’ਤਿ ¶ . ਵਿਪ੍ਪਕਤਚੀਵਰੇ ਪਕ੍ਕਮਨਨ੍ਤਿਕਸ੍ਸ ਅਭਾਵਤੋ ‘‘ਯਥਾਸਮ੍ਭਵ’’ਨ੍ਤਿ ਵੁਤ੍ਤਂ. ਤੇਨੇਵ ਵਿਪ੍ਪਕਤਚੀਵਰਵਾਰੇ ਛਲ਼ੇਵ ਉਬ੍ਭਾਰਾ ਵੁਤ੍ਤਾ, ਚੀਵਰੇ ਹਤ੍ਥਗਤੇ ¶ ਚ ਆਸਾਵਚ੍ਛੇਦਿਕਸ੍ਸ ਅਸਮ੍ਭਵਾ, ਸੋ ਏਤੇਸੁ ਵਾਰੇਸੁ ਯਤ੍ਥ ਕਤ੍ਥਚਿ ਨ ਵੁਤ੍ਤੋ, ਵਿਸੁਞ੍ਞੇਵ ਵੁਤ੍ਤੋ. ਵਿਪ੍ਪਕਤਵਾਰੇ ਚੇਤ੍ਥ ਆਦਾਯਵਾਰਸਮਾਦਾਯਵਾਰਵਸੇਨ ਦ੍ਵੇ ਛਕ੍ਕਵਾਰਾ ਵੁਤ੍ਤਾ.

ਤਤੋ ਪਰਂ ਨਿਟ੍ਠਾਨਸਨ੍ਨਿਟ੍ਠਾਨਨਾਸਨਨ੍ਤਿਕਾਨਂ ਵਸੇਨ ਤੀਣਿ ਤਿਕਾਨਿ ਦਸ੍ਸਿਤਾਨਿ. ਤਤ੍ਥ ਤਤਿਯਤ੍ਤਿਕੇ ਅਨਧਿਟ੍ਠਿਤੇਨਾਤਿ ‘‘ਪਚ੍ਚੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ ਏਵਂ ਅਨਧਿਟ੍ਠਿਤੇਨ, ਨ ਏਵਂ ਮਨਸਿਕਤ੍ਵਾਤਿ ਅਤ੍ਥੋ. ਤਤਿਯਤ੍ਤਿਕਤੋ ਪਨ ਪਰਂ ਏਕਂ ਛਕ੍ਕਂ ਦਸ੍ਸਿਤਂ. ਏਵਂ ਤੀਣਿ ਤਿਕਾਨਿ, ਏਕਂ ਛਕ੍ਕਞ੍ਚਾਤਿ ਪਠਮਂ ਪਨ੍ਨਰਸਕਂ ਵੁਤ੍ਤਂ, ਇਮਿਨਾ ਨਯੇਨ ਦੁਤਿਯਪਨ੍ਨਰਸਕਾਦੀਨਿ ਵੇਦਿਤਬ੍ਬਾਨਿ.

ਪਾਲ਼ਿਯਂ ਆਸਾਦ੍ਵਾਦਸਕੇ ਬਹਿਸੀਮਾਗਤਸ੍ਸ ਕਥਿਨੁਦ੍ਧਾਰੇਸੁ ਤੇਸਮ੍ਪਿ ਚੀਵਰਾਸਾਦਿਵਸੇਨ ਚੀਵਰਪਲਿਬੋਧੋ ਯਾਵ ਚੀਵਰਨਿਟ੍ਠਾਨਾ ਤਿਟ੍ਠਤੀਤਿ ਆਹ ‘‘ਸੋ ਬਹਿਸੀਮਾਗਤੋ ਸੁਣਾਤਿ ‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨਨ੍ਤਿ…ਪੇ… ਸਵਨਨ੍ਤਿਕੋ ਕਥਿਨੁਦ੍ਧਾਰੋ’’’ਤਿ. ਏਤ੍ਥ ਚ ਸਵਨਕ੍ਖਣੇ ਆਵਾਸਪਲਿਬੋਧੋ ਪਠਮਂ ਛਿਜ੍ਜਤਿ, ਨਿਟ੍ਠਿਤੇ ਚੀਵਰਪਲਿਬੋਧੋਤਿ ਵੇਦਿਤਬ੍ਬੋ.

ਦਿਸਂਗਮਿਕਨਵਕੇ ਦਿਸਂਗਮਿਕੋ ਪਕ੍ਕਮਤੀਤਿ ਨ ਪਚ੍ਚੇਸ੍ਸਨ੍ਤਿ ਪਕ੍ਕਮਤਿ, ਇਮਿਨਾ ਆਵਾਸਪਲਿਬੋਧਾਭਾਵੋ ਦਸ੍ਸਿਤੋ ਹੋਤਿ. ਤੇਨੇਵ ਵਸ੍ਸਂਵੁਤ੍ਥਾਵਾਸੇ ਪੁਨ ਗਨ੍ਤ੍ਵਾ ਚੀਵਰਨਿਟ੍ਠਾਪਿਤਮਤ੍ਤੇ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ ਵੁਤ੍ਤੋ. ‘‘ਚੀਵਰਪਟਿਵਿਸਂ ਅਪਵਿਲਾਯਮਾਨੋ’’ਤਿ ਇਮਿਨਾ ਚੀਵਰਪਲਿਬੋਧਸਮਙ੍ਗਿਕਤ੍ਤਮਸ੍ਸ ਦਸ੍ਸੇਤਿ, ਅਪਵਿਲਾਯਮਾਨੋਤਿ ਆਕਙ੍ਖਮਾਨੋ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਆਦਾਯਸਤ੍ਤਕਕਥਾਵਣ੍ਣਨਾ ਨਿਟ੍ਠਿਤਾ.

ਕਥਿਨਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੩੨੯. ਚੀਵਰਕ੍ਖਨ੍ਧਕੇ ¶ ¶ ਕਮ੍ਮਵਿਪਾਕਨ੍ਤਿ ਕਮ੍ਮਪਚ੍ਚਯਉਤੁਚਿਤ੍ਤਾਹਾਰਸਮੁਟ੍ਠਿਤਂ ਅਪ੍ਪਟਿਬਾਹਿਯਰੋਗਂ ਸਨ੍ਧਾਯ ਵੁਤ੍ਤਂ ਕਮ੍ਮਜਸ੍ਸ ਰੋਗਸ੍ਸ ਅਭਾਵਾ.

੩੩੦. ਪਾਲ਼ਿਯਂ ਸਂਯਮਸ੍ਸਾਤਿ ਸਙ੍ਗਹਣਸ੍ਸ. ਅਵਿਸਜ੍ਜਨਸ੍ਸਾਤਿ ਅਤ੍ਥੋ ‘‘ਯੋ ਸਂਯਮੋ ਸੋ ਵਿਨਾਸੋ’’ਤਿਆਦੀਸੁ (ਪੇ. ਵ. ੨੩੭) ਵਿਯ. ਏਤਸ੍ਸ ਸਂਯਮਸ੍ਸ ਫਲਂ ਉਪਜਾਨਾਮਾਤਿ ਯੋਜਨਾ. ਤਮੇਵ ਫਲਂ ਦਸ੍ਸੇਨ੍ਤੀ ਆਹ ‘‘ਵਰਮੇਤਂ…ਪੇ… ਆਸਿਤ੍ਤ’’ਨ੍ਤਿ. ਕੇਚਿ ਪਨ ‘‘ਸਂਯਮਸ੍ਸਾਤਿ ਆਨਿਸਂਸਸ੍ਸ, ਉਪਯੋਗਤ੍ਥੇ ਚੇਤਂ ਸਾਮਿਵਚਨ’’ਨ੍ਤਿ (ਸਾਰਤ੍ਥ. ਟੀ. ਮਹਾਵਗ੍ਗ ੩.੩੨੯-੩੩੦) ਅਤ੍ਥਂ ਵਦਨ੍ਤਿ.

੩੩੬. ਉਸ੍ਸਨ੍ਨਦੋਸੋਤਿ ਸਞ੍ਜਾਤਪਿਤ੍ਤਾਦਿਦੋਸੋ. ਸਬ੍ਬਤ੍ਥਾਤਿ ਸਕਲਸਰੀਰੇ.

੩੩੭. ਮਹਾਪਿਟ੍ਠਿਯਕੋਜਵਨ੍ਤਿ ਹਤ੍ਥਿਪਿਟ੍ਠਿਯਂ ਅਤ੍ਥਰਿਤਬ੍ਬਤਾਯ ‘‘ਮਹਾਪਿਟ੍ਠਿਯ’’ਨ੍ਤਿ ਲਦ੍ਧਸਮਞ੍ਞਂ ਉਣ੍ਣਾਮਯਤ੍ਥਰਣਂ.

੩੩੮-੯. ਉਪਡ੍ਢਕਾਸਿਨਂ ਖਮਮਾਨਨ੍ਤਿ ਅਡ੍ਢਕਾਸਿਅਗ੍ਘਨਕਂ. ਪਾਲ਼ਿਯਂ ਕਿਂ ਨੁ ਖੋਤਿ ਕਤਮਂ ਨੁ ਖੋ.

੩੪੦-੩੪੨. ਉਪਚਾਰੇਤਿ ਸੁਸਾਨਸ੍ਸ ਆਸਨ੍ਨੇ ਪਦੇਸੇ. ਛਡ੍ਡੇਤ੍ਵਾ ਗਤਾਤਿ ਕਿਞ੍ਚਿ ਅਵਤ੍ਵਾ ਏਵ ਛਡ੍ਡੇਤ੍ਵਾ ਗਤਾ, ਏਤੇਨ ‘‘ਭਿਕ੍ਖੂ ਗਣ੍ਹਨ੍ਤੂ’’ਤਿ ਛਡ੍ਡਿਤੇ ਏਵ ਅਕਾਮਾ ਭਾਗਦਾਨਂ ਵਿਹਿਤਂ, ਕੇਵਲਂ ਛਡ੍ਡਿਤੇ ਪਨ ਕਤਿਕਾਯ ਅਸਤਿ ਏਕਤੋ ਬਹੂਸੁ ਪਵਿਟ੍ਠੇਸੁ ਯੇਨ ਗਹਿਤਂ, ਤੇਨ ਅਕਾਮਭਾਗੋ ਨ ¶ ਦਾਤਬ੍ਬੋਤਿ ਦਸ੍ਸੇਤਿ. ਸਮਾਨਾ ਦਿਸਾ ਪੁਰਤ੍ਥਿਮਾਦਿਭੇਦਾ ਏਤੇਸਨ੍ਤਿ ਸਦਿਸਾਤਿ ਆਹ ‘‘ਏਕਦਿਸਾਯ ਵਾ ਓਕ੍ਕਮਿਂਸੂ’’ਤਿ. ਧੁਰਵਿਹਾਰਟ੍ਠਾਨੇਤਿ ਵਿਹਾਰਸ੍ਸ ਸਮ੍ਮੁਖਟ੍ਠਾਨੇ.

ਜੀਵਕਵਤ੍ਥੁਕਥਾਦਿਵਣ੍ਣਨਾ ਨਿਟ੍ਠਿਤਾ.

ਭਣ੍ਡਾਗਾਰਸਮ੍ਮੁਤਿਆਦਿਕਥਾਵਣ੍ਣਨਾ

੩੪੩. ਵਿਹਾਰਮਜ੍ਝੇਤਿ ¶ ਸਬ੍ਬੇਸਂ ਜਾਨਨਤ੍ਥਾਯ ਵੁਤ੍ਤਂ. ਵਣ੍ਣਾਵਣ੍ਣਂ ਕਤ੍ਵਾਤਿ ਪਟਿਵੀਸਪ੍ਪਹੋਨਕਤਾਜਾਨਨਤ੍ਥਂ ਹਲਿਦ੍ਦਿਯਾਦੀਹਿ ਖੁਦ੍ਦਕਮਹਨ੍ਤਵਣ੍ਣੇਹਿ ਯੁਤ੍ਤੇ ਸਮੇ ਕੋਟ੍ਠਾਸੇ ਕਤ੍ਵਾ. ਤੇਨਾਹ ‘‘ਸਮੇ ਪਟਿਵੀਸੇ ਠਪੇਤ੍ਵਾ’’ਤਿ. ਇਦਨ੍ਤਿ ਸਾਮਣੇਰਾਨਂ ਉਪਡ੍ਢਪਟਿਵੀਸਦਾਨਂ. ਫਾਤਿਕਮ੍ਮਨ੍ਤਿ ਪਹੋਨਕਕਮ੍ਮਂ. ਯਤ੍ਤਕੇਨ ਵਿਨਯਾਗਤੇਨ ਸਮ੍ਮੁਞ੍ਜਨੀਬਨ੍ਧਨਾਦਿਹਤ੍ਥਕਮ੍ਮੇਨ ਵਿਹਾਰਸ੍ਸ ਊਨਕਤਾ ਨ ਹੋਤਿ, ਤਤ੍ਤਕਂ ਕਤ੍ਵਾਤਿ ਅਤ੍ਥੋ. ਸਬ੍ਬੇਸਨ੍ਤਿ ਤਤ੍ਰੁਪ੍ਪਾਦਵਸ੍ਸਾਵਾਸਿਕਂ ਗਣ੍ਹਨ੍ਤਾਨਂ ਸਬ੍ਬੇਸਂ ਭਿਕ੍ਖੂਨਂ, ਸਾਮਣੇਰਾਨਞ੍ਚ. ਭਣ੍ਡਾਗਾਰਿਕਚੀਵਰੇਪੀਤਿ ਅਕਾਲਚੀਵਰਂ ਸਨ੍ਧਾਯ ਵੁਤ੍ਤਂ. ਏਤਨ੍ਤਿ ਉਕ੍ਕੁਟ੍ਠਿਯਾ ਕਤਾਯ ਸਮਭਾਗਦਾਨਂ. ਵਿਰਜ੍ਝਿਤ੍ਵਾ ਕਰੋਨ੍ਤੀਤਿ ਕਤ੍ਤਬ੍ਬਕਾਲੇਸੁ ਅਕਤ੍ਵਾ ਯਥਾਰੁਚਿਤਕ੍ਖਣੇ ਕਰੋਨ੍ਤਿ.

ਏਤ੍ਤਕੇਨ ਮਮ ਚੀਵਰਂ ਪਹੋਤੀਤਿ ਦ੍ਵਾਦਸਗ੍ਘਨਕੇਨੇਵ ਮਮ ਚੀਵਰਂ ਪਰਿਪੁਣ੍ਣਂ ਹੋਤਿ, ਨ ਤਤੋ ਊਨੇਨਾਤਿ ਸਬ੍ਬਂ ਗਹੇਤੁਕਾਮੋਤਿ ਅਤ੍ਥੋ.

ਭਣ੍ਡਾਗਾਰਸਮ੍ਮੁਤਿਆਦਿਕਥਾਵਣ੍ਣਨਾ ਨਿਟ੍ਠਿਤਾ.

੩੪੪. ਏਵਞ੍ਹਿ ਕਤੇਤਿ ਵਟ੍ਟਾਧਾਰਸ੍ਸ ਅਨ੍ਤੋ ਰਜਨੋਦਕਂ, ਬਹਿ ਛਲ੍ਲਿਕਞ੍ਚ ਕਤ੍ਵਾ ਵਿਯੋਜਨੇ ਕਤੇ. ਨ ਉਤ੍ਤਰਤੀਤਿ ਕੇਵਲਂ ਉਦਕਤੋ ਫੇਣੁਟ੍ਠਾਨਾਭਾਵਾ ਨ ਉਤ੍ਤਰਤਿ. ਰਜਨਕੁਣ੍ਡਨ੍ਤਿ ਪਕ੍ਕਰਜਨਟ੍ਠਪਨਕਂ ਮਹਾਘਟਂ.

੩੪੫. ਅਨੁਵਾਤਾਦੀਨਂ ਦੀਘਪਤ੍ਤਾਨਨ੍ਤਿ ਆਯਾਮਤੋ, ਵਿਤ੍ਥਾਰਤੋ ਚ ਅਨੁਵਾਤਂ. ਆਦਿ-ਸਦ੍ਦੇਨ ਦ੍ਵਿਨ੍ਨਂ ਖਨ੍ਧਾਨਂ ਅਨ੍ਤਰਾ ਮਾਤਿਕਾਕਾਰੇਨ ਠਪਿਤਪਤ੍ਤਞ੍ਚ ‘‘ਦੀਘਪਤ੍ਤ’’ਨ੍ਤਿ ਦਟ੍ਠਬ੍ਬਂ. ਆਗਨ੍ਤੁਕਪਤ੍ਤਨ੍ਤਿ ਦਿਗੁਣਚੀਵਰਸ੍ਸ ਉਪਰਿ ਅਞ੍ਞਂ ਪਟ੍ਟਂ ਅਪ੍ਪੇਨ੍ਤਿ, ਤਂ ਸਨ੍ਧਾਯ ਵੁਤ੍ਤਂ. ਤਂ ਕਿਰ ਇਦਾਨਿ ਨ ਕਰੋਨ੍ਤਿ.

੩੪੬. ਪਾਲ਼ਿਯਂ ¶ ਨਨ੍ਦਿਮੁਖਿਯਾਤਿ ਤੁਟ੍ਠਿਮੁਖਿਯਾ, ਪਸਨ੍ਨਦਿਸਾਮੁਖਾਯਾਤਿ ਅਤ੍ਥੋ.

੩੪੮. ਅਚ੍ਛੁਪੇਯ੍ਯਨ੍ਤਿ ਪਤਿਟ੍ਠਪੇਯ੍ਯਂ. ਹਤਵਤ੍ਥਕਾਨਨ੍ਤਿ ਪੁਰਾਣਵਤ੍ਥਾਨਂ. ਅਨੁਦ੍ਧਰਿਤ੍ਵਾਵਾਤਿ ਅਗ੍ਗਲ਼ੇ ਵਿਯ ਦੁਬ੍ਬਲਟ੍ਠਾਨਂ ਅਨਪਨੇਤ੍ਵਾਵ.

੩੪੯-੩੫੧. ਵਿਸਾਖਵਤ੍ਥੁਮ੍ਹਿ ¶ ਕਲ੍ਲਕਾਯਾਤਿ ਅਕਿਲਨ੍ਤਕਾਯਾ. ਗਤੀਤਿ ਞਾਣਗਤਿ ਅਧਿਗਮੋ. ਅਭਿਸਮ੍ਪਰਾਯੋਤਿ ‘‘ਸਕਿਦੇਵ ਇਮਂ ਲੋਕਂ ਆਗਨ੍ਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤੀ’’ਤਿਆਦਿਨਾ (ਸਂ. ਨਿ. ੫.੧੦੪੮) ਵੁਤ੍ਤੋ ਞਾਣਾਭਿਸਮ੍ਪਰਾਯੋ, ਮਗ੍ਗਞਾਣਯੁਤ੍ਤੇਹਿ ਗਨ੍ਤਬ੍ਬਗਤਿਵਿਸੇਸੋਤਿ ਅਤ੍ਥੋ. ਤਂ ਭਗਵਾ ਬ੍ਯਾਕਰਿਸ੍ਸਤਿ. ‘‘ਦਦਾਤਿ ਦਾਨ’’ਨ੍ਤਿ ਇਦਂ ਅਨ੍ਨਪਾਨਵਿਰਹਿਤਾਨਂ ਸੇਸਪਚ੍ਚਯਾਨਂ ਦਾਨਵਸੇਨ ਵੁਤ੍ਤਂ. ਸੋਵਗ੍ਗਿਕਨ੍ਤਿ ਸਗ੍ਗਸਂਵਤ੍ਤਨਿਕਂ.

੩੫੯. ਅਟ੍ਠਪਦਕਚ੍ਛਨ੍ਨੇਨਾਤਿ ਅਟ੍ਠਪਦਕਸਙ੍ਖਾਤਜੂਤਫਲਕਲੇਖਾਸਣ੍ਠਾਨੇਨ.

੩੬੨. ਪਾਲ਼ਿਯਂ ਨਦੀਪਾਰਂ ਗਨ੍ਤੁਨ੍ਤਿ ਭਿਕ੍ਖੁਨੋ ਨਦੀਪਾਰਗਮਨਂ ਹੋਤੀਤਿ ਅਤ੍ਥੋ. ਅਗ੍ਗਲ਼ਗੁਤ੍ਤਿਯੇਵ ਪਮਾਣਨ੍ਤਿ ਇਮੇਹਿ ਚਤੂਹਿ ਨਿਕ੍ਖੇਪਕਾਰਣੇਹਿ ਠਪੇਨ੍ਤੇਨਪਿ ਅਗ੍ਗਲ਼ਗੁਤ੍ਤਿਵਿਹਾਰੇ ਏਵ ਠਪੇਤੁਂ ਵਟ੍ਟਤੀਤਿ ਅਧਿਪ੍ਪਾਯੋ. ਨਿਸ੍ਸੀਮਾਗਤਨ੍ਤਿ ਵਸ੍ਸਾਨਸਙ੍ਖਾਤਂ ਕਾਲਸੀਮਂ ਅਤਿਕ੍ਕਨ੍ਤਂ, ਤਂ ਵਸ੍ਸਿਕਸਾਟਿਕਚੀਵਰਂ ਨ ਹੋਤੀਤਿ ਅਤ੍ਥੋ.

ਚੀਵਰਰਜਨਕਥਾਦਿਵਣ੍ਣਨਾ ਨਿਟ੍ਠਿਤਾ.

੩੬੩. ਪਞ੍ਚ ਮਾਸੇਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਵਡ੍ਢਿਂ ਪਯੋਜੇਤ੍ਵਾ ਠਪਿਤਉਪਨਿਕ੍ਖੇਪਤੋਤਿ ਵਸ੍ਸਾਵਾਸਿਕਸ੍ਸਤ੍ਥਾਯ ਦਾਯਕੇਹਿ ਵਡ੍ਢਿਂ ਪਯੋਜੇਤ੍ਵਾ ਠਪਿਤਉਪਨਿਕ੍ਖੇਪਤੋ. ‘‘ਇਧ ਵਸ੍ਸਂਵੁਤ੍ਥਸਙ੍ਘਸ੍ਸਾ’’ਤਿ ਇਦਂ ਅਭਿਲਾਪਮਤ੍ਤਂ. ਇਧ-ਸਦ੍ਦਂ ਪਨ ਵਿਨਾ ‘‘ਵਸ੍ਸਂਵੁਤ੍ਥਸਙ੍ਘਸ੍ਸ ਦੇਮਾ’’ਤਿ ਵੁਤ੍ਤੇਪਿ ਸੋ ਏਵ ਨਯੋ. ਅਨਤ੍ਥਤਕਥਿਨਸ੍ਸਾਪਿ ਪਞ੍ਚ ਮਾਸੇ ਪਾਪੁਣਾਤੀਤਿ ਵਸ੍ਸਾਵਾਸਿਕਲਾਭਵਸੇਨ ਉਪ੍ਪਨ੍ਨਤ੍ਤਾ ਅਨਤ੍ਥਤਕਥਿਨਸ੍ਸਾਪਿ ਵੁਤ੍ਥਵਸ੍ਸਸ੍ਸ ਪਞ੍ਚ ਮਾਸੇ ਪਾਪੁਣਾਤਿ. ਵਕ੍ਖਤਿ ਹਿ ‘‘ਚੀਵਰਮਾਸਤੋ ਪਟ੍ਠਾਯ ਯਾਵ ਹੇਮਨ੍ਤਸ੍ਸ ਪਚ੍ਛਿਮੋ ਦਿਵਸੋ, ਤਾਵ ਵਸ੍ਸਾਵਾਸਿਕਂ ਦੇਮਾਤਿ ਵੁਤ੍ਤੇ ਕਥਿਨਂ ਅਤ੍ਥਤਂ ਵਾ ਹੋਤੁ ਅਨਤ੍ਥਤਂ ਵਾ, ਅਤੀਤਵਸ੍ਸਂਵੁਤ੍ਥਾਨਮੇਵ ਪਾਪੁਣਾਤੀ’’ਤਿ (ਮਹਾਵ. ਅਟ੍ਠ. ੩੭੯). ਤਤੋ ਪਰਨ੍ਤਿ ਪਞ੍ਚਮਾਸਤੋ ਪਰਂ, ਗਿਮ੍ਹਾਨਸ੍ਸ ਪਠਮਦਿਵਸਤੋ ਪਟ੍ਠਾਯਾਤਿ ¶ ਅਤ੍ਥੋ. ‘‘ਕਸ੍ਮਾ? ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ’’ਤਿ ਇਦਂ ‘‘ਉਦਾਹੁ ਅਨਾਗਤਵਸ੍ਸੇ’’ਤਿ ¶ ਇਮਸ੍ਸਾਨਨ੍ਤਰਂ ਦਟ੍ਠਬ੍ਬਂ. ਪੋਤ੍ਥਕੇਸੁ ਪਨ ‘‘ਅਨਤ੍ਥਤਕਥਿਨਸ੍ਸਾਪਿ ਪਞ੍ਚ ਮਾਸੇ ਪਾਪੁਣਾਤੀ’’ਤਿ ਇਮਸ੍ਸਾਨਨ੍ਤਰਂ ‘‘ਕਸ੍ਮਾ ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ’’ਤਿ ਇਦਂ ਲਿਖਨ੍ਤਿ, ਤਂ ਪਮਾਦਲਿਖਿਤਂ ਪਿਟ੍ਠਿਸਮਯੇ ਉਪ੍ਪਨ੍ਨਂ ਸਨ੍ਧਾਯ ‘‘ਅਨਤ੍ਥਤਕਥਿਨਸ੍ਸਾਪੀ’’ਤਿ ਵਤ੍ਤਬ੍ਬਤੋ. ਵੁਤ੍ਥਵਸ੍ਸੇ ਹਿ ਸਨ੍ਧਾਯ ‘‘ਅਨਤ੍ਥਤਕਥਿਨਸ੍ਸਾਪੀ’’ਤਿ ਵੁਤ੍ਤਂ, ਨ ਚ ਪਿਟ੍ਠਿਸਮਯੇ ਉਪ੍ਪਨ੍ਨਂ ਵੁਤ੍ਥਵਸ੍ਸਸ੍ਸੇਵ ਪਾਪੁਣਾਤੀਤਿ ਸਮ੍ਮੁਖੀਭੂਤਾਨਂ ਸਬ੍ਬੇਸਮ੍ਪਿ ਪਾਪੁਣਨਤੋ. ਤੇਨੇਵ ਵਕ੍ਖਤਿ ‘‘ਸਚੇ ਪਨ ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਏਵਂ ਵਦਤਿ, ਤਤ੍ਰ ਸਮ੍ਮੁਖੀਭੂਤਾਨਂ ਸਬ੍ਬੇਸਂ ਪਾਪੁਣਾਤਿ. ਕਸ੍ਮਾ? ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ’’ਤਿ (ਮਹਾਵ. ਅਟ੍ਠ. ੧੭੯).

ਦੁਗ੍ਗਹਿਤਾਨੀਤਿ ਅਗ੍ਗਹਿਤਾਨਿ. ਸਙ੍ਘਿਕਾਨੇਵਾਤਿ ਅਤ੍ਥੋ. ਇਤੋਵਾਤਿ ਥੇਰਾਨਂ ਦਾਤਬ੍ਬਤੋਵ, ਇਦਾਨੇਵਾਤਿ ਵਾ ਅਤ੍ਥੋ.

ਸਙ੍ਘਿਕਚੀਵਰੁਪ੍ਪਾਦਕਥਾਵਣ੍ਣਨਾ ਨਿਟ੍ਠਿਤਾ.

ਉਪਨਨ੍ਦਸਕ੍ਯਪੁਤ੍ਤਵਤ੍ਥੁਕਥਾਵਣ੍ਣਨਾ

੩੬੪. ‘‘ਸਤ੍ਤਾਹਵਾਰੇਨ ਅਰੁਣਮੇਵ ਉਟ੍ਠਾਪੇਤੀ’’ਤਿ ਇਦਂ ਨਾਨਾਸੀਮਾਵਿਹਾਰੇਸੁ ਕਤ੍ਤਬ੍ਬਨਯੇਨ ਏਕਸ੍ਮਿਮ੍ਪਿ ਵਿਹਾਰੇ ਦ੍ਵੀਸੁ ਸੇਨਾਸਨੇਸੁ ਨਿਵੁਤ੍ਥਭਾਵਦਸ੍ਸਨਤ੍ਥਂ ਵੁਤ੍ਤਂ, ਅਰੁਣੁਟ੍ਠਾਪਨੇਨੇਵ ਤਤ੍ਥ ਵੁਤ੍ਥੋ ਹੋਤਿ, ਨ ਪਨ ਵਸ੍ਸਚ੍ਛੇਦਪਰਿਹਾਰਾਯ. ਅਨ੍ਤੋਉਪਚਾਰਸੀਮਾਯਪਿ ਯਤ੍ਥ ਕਤ੍ਥਚਿ ਅਰੁਣਂ ਉਟ੍ਠਾਪੇਨ੍ਤੋ ਅਤ੍ਤਨਾ ਗਹਿਤਸੇਨਾਸਨਂ ਅਪ੍ਪਵਿਟ੍ਠੋਪਿ ਵੁਤ੍ਥਵਸ੍ਸੋ ਏਵ ਹੋਤਿ, ਗਹਿਤਸੇਨਾਸਨੇ ਪਨ ਨਿਵੁਤ੍ਥੋ ਨਾਮ ਨ ਹੋਤਿ, ਤਤ੍ਥ ਚ ਅਰੁਣੁਟ੍ਠਾਪਨੇ ਪਨ ਸਤਿ ਹੋਤਿ. ਤੇਨਾਹ ‘‘ਪੁਰਿਮਸ੍ਮਿਂ ਬਹੁਤਰਂ ਨਿਵਸਤਿ ਨਾਮਾ’’ਤਿ, ਏਤੇਨ ਚ ਇਤਰਸ੍ਮਿਂ ਸਤ੍ਤਾਹਵਾਰੇਨਾਪਿ ਅਰੁਣੁਟ੍ਠਾਪਨੇ ਸਤਿ ਏਵ ਅਪ੍ਪਕਤਰਂ ਨਿਵਸਤਿ ਨਾਮ ਹੋਤਿ, ਨਾਸਤੀਤਿ ਦੀਪਿਤਂ ਹੋਤਿ. ਨਾਨਾਲਾਭੇਹੀਤਿ ਵਿਸੁਂ ਵਿਸੁਂ ਨਿਬਦ੍ਧਵਸ੍ਸਾਵਾਸਿਕਲਾਭੇਹਿ. ਨਾਨੂਪਚਾਰੇਹੀਤਿ ਨਾਨਾਪਰਿਕ੍ਖੇਪਨਾਨਾਦ੍ਵਾਰੇਹਿ. ਏਕਸੀਮਾਵਿਹਾਰੇਹੀਤਿ ਦ੍ਵਿਨ੍ਨਂ ਵਿਹਾਰਾਨਂ ਏਕੇਨ ਪਾਕਾਰੇਨ ਪਰਿਕ੍ਖਿਤ੍ਤਤ੍ਤਾ ਏਕਾਯ ਉਪਚਾਰਸੀਮਾਯ ਅਨ੍ਤੋਗਤੇਹਿ ਦ੍ਵੀਹਿ ਵਿਹਾਰੇਹਿ. ਸੇਨਾਸਨਗ੍ਗਾਹੋ ਪਟਿਪ੍ਪਸ੍ਸਮ੍ਭਤੀਤਿ ਪਠਮਂ ਗਹਿਤੋ ਪਟਿਪ੍ਪਸ੍ਸਮ੍ਭਤਿ. ਤਤ੍ਥਾਤਿ ਯਤ੍ਥ ਸੇਨਾਸਨਗ੍ਗਾਹੋ ਪਟਿਪ੍ਪਸ੍ਸਦ੍ਧੋ, ਤਤ੍ਥ.

ਉਪਨਨ੍ਦਸਕ੍ਯਪੁਤ੍ਤਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੩੬੫-੬. ਭੂਮਿਯਂ ¶ ¶ ਪਰਿਭਣ੍ਡਂ ਅਕਾਸੀਤਿ ਗਿਲਾਨੇਨ ਨਿਪਨ੍ਨਭੂਮਿਯਂ ਕਿਲਿਟ੍ਠਟ੍ਠਾਨਂ ਧੋਵਿਤ੍ਵਾ ਹਰਿਤੂਪਲਿਤ੍ਤਂ ਕਾਰੇਸੀਤਿ ਅਤ੍ਥੋ. ਭੇਸਜ੍ਜਂ ਯੋਜੇਤੁਂ ਅਸਮਤ੍ਥੋਤਿ ਪਰੇਹਿ ਵੁਤ੍ਤਵਿਧਿਮ੍ਪਿ ਕਾਤੁਂ ਅਸਮਤ੍ਥੋ. ਪਾਲ਼ਿਯਂ ਗਿਲਾਨੁਪਟ੍ਠਾਕਾਨਂ ਚੀਵਰਦਾਨੇ ਸਾਮਣੇਰਾਨਂ ਤਿਚੀਵਰਾਧਿਟ੍ਠਾਨਾਭਾਵਾ ‘‘ਚੀਵਰਞ੍ਚ ਪਤ੍ਤਞ੍ਚਾ’’ਤਿਆਦਿ ਸਬ੍ਬਤ੍ਥ ਵੁਤ੍ਤਂ. ਸਚੇਪਿ ਸਹਸ੍ਸਂ ਅਗ੍ਘਤਿ, ਗਿਲਾਨੁਪਟ੍ਠਾਕਾਨਞ੍ਞੇਵ ਦਾਤਬ੍ਬਨ੍ਤਿ ਸਮ੍ਬਨ੍ਧੋ.

ਗਿਲਾਨਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੩੬੯. ਅਞ੍ਞਨ੍ਤਿ ਚੀਵਰਪਤ੍ਤਤੋ ਅਞ੍ਞਂ. ਅਪ੍ਪਗ੍ਘਨ੍ਤਿ ਅਤਿਜਿਣ੍ਣਾਦਿਭਾਵੇਨ ਨਿਹੀਨਂ. ਤਤੋਤਿ ਅਵਸੇਸਪਰਿਕ੍ਖਾਰਤੋ. ਸਬ੍ਬਨ੍ਤਿ ਪਤ੍ਤਂ, ਤਿਚੀਵਰਞ੍ਚ.

ਤਤ੍ਥ ਤਤ੍ਥ ਸਙ੍ਘਸ੍ਸੇਵਾਤਿ ਤਸ੍ਮਿਂ ਤਸ੍ਮਿਂ ਵਿਹਾਰੇ ਸਙ੍ਘਸ੍ਸੇਵ. ਪਾਲ਼ਿਯਂ ਅਵਿਸ੍ਸਜ੍ਜਿਕਂ ਅਵੇਭਙ੍ਗਿਕਨ੍ਤਿ ਆਗਤਾਨਾਗਤਸ੍ਸ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸੇਵ ਸਨ੍ਤਕਂ ਹੁਤ੍ਵਾ ਕਸ੍ਸਚਿ ਅਵਿਸ੍ਸਜ੍ਜਿਕਂ ਅਵੇਭਙ੍ਗਿਕਂ ਭਵਿਤੁਂ ਅਨੁਜਾਨਾਮੀਤਿ ਅਤ੍ਥੋ.

੩੭੧-੨. ਅਕ੍ਕਨਾਲ਼ਮਯਨ੍ਤਿ ਅਕ੍ਕਦਣ੍ਡਮਯਂ. ਅਕ੍ਕਦੁਸ੍ਸਾਨੀਤਿ ਅਕ੍ਕਵਾਕੇਨ ਕਤਦੁਸ੍ਸਾਨਿ, ਪੋਤ੍ਥਕਗਤਿਕਾਨਿ ਦੁਕ੍ਕਟਵਤ੍ਥੁਕਾਨੀਤਿ ਅਤ੍ਥੋ. ਦੁਪਟ੍ਟਚੀਵਰਸ੍ਸ ਵਾ ਮਜ੍ਝੇਤਿ ਯਂ ਨਿਟ੍ਠਿਤੇ ਤਿਪਟ੍ਟਚੀਵਰਂ ਹੋਤਿ, ਤਸ੍ਸ ਮਜ੍ਝੇ ਪਟਲਂ ਕਤ੍ਵਾ ਦਾਤਬ੍ਬਾਨੀਤਿ ਅਤ੍ਥੋ.

੩੭੪. ‘‘ਸਨ੍ਤੇ ਪਤਿਰੂਪੇ ਗਾਹਕੇ’’ਤਿ ਵੁਤ੍ਤਤ੍ਤਾ ਗਾਹਕੇ ਅਸਤਿ ਅਦਤ੍ਵਾ ਭਾਜਿਤੇਪਿ ਸੁਭਾਜਿਤਮੇਵਾਤਿ ਦਟ੍ਠਬ੍ਬਂ.

੩੭੬. ਦਕ੍ਖਿਣੋਦਕਂ ਪਮਾਣਨ੍ਤਿ ‘‘ਏਤ੍ਤਕਾਨਿ ਚੀਵਰਾਨਿ ਦਸ੍ਸਾਮੀ’’ਤਿ ਪਠਮਂ ਉਦਕਂ ਪਾਤੇਤ੍ਵਾ ਪਚ੍ਛਾ ਦੇਨ੍ਤਿ. ਤਂ ਯੇਹਿ ਗਹਿਤਂ, ਤੇ ਭਾਗਿਨੋਵ ਹੋਨ੍ਤੀਤਿ ¶ ਅਧਿਪ੍ਪਾਯੋ. ਪਰਸਮੁਦ੍ਦੇਤਿ ਜਮ੍ਬੁਦੀਪੇ. ਤਮ੍ਬਪਣ੍ਣਿਦੀਪਞ੍ਹਿ ਉਪਾਦਾਯੇਸ ਏਵਂ ਵੁਤ੍ਤੋ.

ਮਤਸਨ੍ਤਕਕਥਾਦਿਵਣ੍ਣਨਾ ਨਿਟ੍ਠਿਤਾ.

੩੭੯. ਪੁਗ੍ਗਲਾਧਿਟ੍ਠਾਨਨਯੇਨ ¶ ਵੁਤ੍ਤਨ੍ਤਿ ‘‘ਸੀਮਾਯ ਦਾਨ’’ਨ੍ਤਿਆਦਿਨਾ ਵਤ੍ਤਬ੍ਬੇ ‘‘ਸੀਮਾਯ ਦੇਤੀ’’ਤਿਆਦਿ ਪੁਗ੍ਗਲਾਧਿਟ੍ਠਾਨੇਨ ਵੁਤ੍ਤਂ. ‘‘ਅਪਿਚਾ’’ਤਿਆਦਿਨਾ ਪਠਮਲੇਡ੍ਡੁਪਾਤਭੂਤਪਰਿਕ੍ਖੇਪਾਰਹਟ੍ਠਾਨਤੋ ਬਹਿ ਦੁਤਿਯਲੇਡ੍ਡੁਪਾਤੋਪਿ ਉਪਚਾਰਸੀਮਾ ਏਵਾਤਿ ਦਸ੍ਸੇਤਿ. ਧੁਵਸਨ੍ਨਿਪਾਤਟ੍ਠਾਨਾਦਿਕਮ੍ਪਿ ਪਰਿਯਨ੍ਤੇ ਠਿਤਮੇਵ ਗਹੇਤਬ੍ਬਂ. ਲੋਕੇ ਗਾਮਸੀਮਾਦਯੋ ਵਿਯ ਲਾਭਸੀਮਾ ਨਾਮ ਵਿਸੁਂ ਪਸਿਦ੍ਧਾ ਨਾਮ ਨਤ੍ਥਿ, ਕੇਨਾਯਂ ਅਨੁਞ੍ਞਾਤਾਤਿ ਆਹ ‘‘ਨੇਵ ਸਮ੍ਮਾਸਮ੍ਬੁਦ੍ਧੇਨਾ’’ਤਿਆਦਿ. ਏਤੇਨ ਨਾਯਂ ਸਾਸਨਵੋਹਾਰਸਿਦ੍ਧਾ, ਲੋਕਵੋਹਾਰਸਿਦ੍ਧਾ ਏਵਾਤਿ ਦਸ੍ਸੇਤਿ. ‘‘ਜਨਪਦਪਰਿਚ੍ਛੇਦੋ’’ਤਿ ਇਦਂ ਲੋਕਪਸਿਦ੍ਧਸੀਮਾਸਦ੍ਦਤ੍ਥਵਸੇਨ ਵੁਤ੍ਤਂ. ਪਰਿਚ੍ਛੇਦਬ੍ਭਨ੍ਤਰਂ ਪਨ ਸਬ੍ਬਂ ਜਨਪਦਸੀਮਾਤਿ ਗਹੇਤਬ੍ਬਂ, ਜਨਪਦੋ ਏਵ ਜਨਪਦਸੀਮਾ. ਏਵਂ ਰਟ੍ਠਸੀਮਾਦੀਸੁਪਿ. ਤੇਨਾਹ ‘‘ਆਣਾਪਵਤ੍ਤਿਟ੍ਠਾਨ’’ਨ੍ਤਿਆਦਿ.

ਪਥਵੀਵੇਮਜ੍ਝੇ ਗਤਸ੍ਸਾਤਿ ਯਾਵ ਉਦਕਪਰਿਯਨ੍ਤਾ ਖਣ੍ਡਸੀਮਤ੍ਤਾ ਵੁਤ੍ਤਂ, ਉਪਚਾਰਸੀਮਾਦੀਸੁ ਪਨ ਅਬਦ੍ਧਸੀਮਾਸੁ ਹੇਟ੍ਠਾਪਥਵਿਯਂ ਸਬ੍ਬਤ੍ਥ ਠਿਤਾਨਂ ਨ ਪਾਪੁਣਾਤਿ, ਕੂਪਾਦਿਪਵੇਸਾਰਹਟ੍ਠਾਨੇ ਠਿਤਾਨਞ੍ਞੇਵ ਪਾਪੁਣਾਤੀਤਿ ਹੇਟ੍ਠਾ ਸੀਮਾਕਥਾਯਂ ਵੁਤ੍ਤਨਯੇਨ ਤਂਤਂਸੀਮਟ੍ਠਭਾਵੋ ਵੇਦਿਤਬ੍ਬੋ. ਚਕ੍ਕਵਾਲ਼ਸੀਮਾਯ ਪਨ ਦਿਨ੍ਨਂ ਪਥਵੀਸਨ੍ਧਾਰਕਉਦਕਟ੍ਠਾਨੇਪਿ ਠਿਤਾਨਂ ਪਾਪੁਣਾਤਿ ਸਬ੍ਬਤ੍ਥ ਚਕ੍ਕਵਾਲ਼ਵੋਹਾਰਤ੍ਤਾ.

ਬੁਦ੍ਧਾਧਿਵੁਤ੍ਥੋਤਿ ਬੁਦ੍ਧੇਨ ਭਗਵਤਾ ਨਿਵੁਤ੍ਥੋ. ਪਾਕਵਟ੍ਟਨ੍ਤਿ ਨਿਬਦ੍ਧਦਾਨਂ. ਵਤ੍ਤਤੀਤਿ ਪਵਤ੍ਤਤਿ. ਤੇਹੀਤਿ ਯੇਸਂ ਸਮ੍ਮੁਖੇ ਏਸ ਦੇਤਿ, ਤੇਹਿ ਭਿਕ੍ਖੂਹਿ. ਦੁਤਿਯਭਾਗੇ ਪਨ ਥੇਰਾਸਨਂ ਆਰੁਲ਼੍ਹੇਤਿ ਯਾਵ ਸਙ੍ਘਨਵਕਾ ਏਕਵਾਰਂ ਸਬ੍ਬੇਸਂ ਭਾਗਂ ਦਤ੍ਵਾ ਚੀਵਰੇ ਅਪਰਿਕ੍ਖੀਣੇ ਪੁਨ ਸਬ੍ਬੇਸਂ ਦਾਤੁਂ ਦੁਤਿਯਭਾਗੇ ਥੇਰਸ੍ਸ ਦਿਨ੍ਨੇਤਿ ਅਤ੍ਥੋ. ਪਂਸੁਕੂਲਿਕਾਨਮ੍ਪਿ ਵਟ੍ਟਤੀਤਿ ਏਤ੍ਥ ‘‘ਤੁਯ੍ਹਂ ਦੇਮਾ’’ਤਿ ਅਵੁਤ੍ਤਤ੍ਤਾਤਿ ਕਾਰਣਂ ਵਦਨ੍ਤਿ. ਯਦਿ ਏਵਂ ‘‘ਸਙ੍ਘਸ੍ਸ ਦੇਮਾ’’ਤਿ ਵੁਤ੍ਤੇਪਿ ¶ ਵਟ੍ਟੇਯ੍ਯ, ‘‘ਭਿਕ੍ਖੂਨਂ ਦੇਮ, ਥੇਰਾਨਂ ਦੇਮ, ਸਙ੍ਘਸ੍ਸ ਦੇਮਾ’’ਤਿ (ਮਹਾਵ. ਅਟ੍ਠ. ੩੭੯) ਵਚਨਤੋ ਭੇਦੋ ਨ ਦਿਸ੍ਸਤਿ. ਵੀਮਂਸਿਤਬ੍ਬਮੇਤ੍ਥ ਕਾਰਣਂ.

ਪਾਰੁਪਿਤੁਂ ਵਟ੍ਟਤੀਤਿ ਪਂਸੁਕੂਲਿਕਾਨਂ ਵਟ੍ਟਤਿ. ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਦਮ੍ਮੀਤਿ ਵੁਤ੍ਤੇ ਪਨ ਨ ਮਜ੍ਝੇ ਭਿਨ੍ਦਿਤ੍ਵਾ ਦਾਤਬ੍ਬਨ੍ਤਿ ਏਤ੍ਥ ਯਸ੍ਮਾ ਭਿਕ੍ਖੁਨਿਪਕ੍ਖੇ ਸਙ੍ਘਸ੍ਸ ਪਚ੍ਚੇਕਂ ਅਪਰਾਮਟ੍ਠਤ੍ਤਾ ਭਿਕ੍ਖੁਨੀਨਂ ਗਣਨਾਯ ਭਾਗੋ ਦਾਤਬ੍ਬੋਤਿ ਦਾਯਕਸ੍ਸ ਅਧਿਪ੍ਪਾਯੋਤਿ ਸਿਜ੍ਝਤਿ, ਤਥਾ ਦਾਨਞ੍ਚ ਭਿਕ੍ਖੂਪਿ ਗਣੇਤ੍ਵਾ ਦਿਨ੍ਨੇ ਏਵ ਯੁਜ੍ਜਤਿ. ਇਤਰਥਾ ਹਿ ਕਿਤ੍ਤਕਂ ਭਿਕ੍ਖੂਨਂ ਦਾਤਬ੍ਬਂ, ਕਿਤ੍ਤਕਂ ਭਿਕ੍ਖੁਨੀਨਨ੍ਤਿ ਨ ਵਿਞ੍ਞਾਯਤਿ, ਤਸ੍ਮਾ ‘‘ਭਿਕ੍ਖੁਸਙ੍ਘਸ੍ਸਾ’’ਤਿ ਵੁਤ੍ਤਵਚਨਮ੍ਪਿ ‘‘ਭਿਕ੍ਖੂਨ’’ਨ੍ਤਿ ਵੁਤ੍ਤਵਚਨਸਦਿਸਮੇਵਾਤਿ ਆਹ ‘‘ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਦਾਤਬ੍ਬ’’ਨ੍ਤਿ. ਤੇਨਾਹ ‘‘ਪੁਗ੍ਗਲੋ ¶ …ਪੇ… ਭਿਕ੍ਖੁਸਙ੍ਘਗ੍ਗਹਣੇਨ ਅਗ੍ਗਹਿਤਤ੍ਤਾ’’ਤਿ. ਭਿਕ੍ਖੁਸਙ੍ਘ-ਸਦ੍ਦੇਨ ਭਿਕ੍ਖੂਨਞ੍ਞੇਵ ਗਹਿਤਤ੍ਤਾ, ਪੁਗ੍ਗਲਸ੍ਸ ਪਨ ‘‘ਤੁਯ੍ਹਞ੍ਚਾ’’ਤਿ ਵਿਸੁਂ ਗਹਿਤਤ੍ਤਾ ਚ ਤਤ੍ਥਸ੍ਸ ਅਗ੍ਗਹਿਤਤਾ ਦਟ੍ਠਬ੍ਬਾ, ‘‘ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚਾ’’ਤਿ ਵੁਤ੍ਤਟ੍ਠਾਨਸਦਿਸਤ੍ਤਾਤਿ ਅਧਿਪ੍ਪਾਯੋ. ਪੁਗ੍ਗਲਪ੍ਪਧਾਨੋ ਹੇਤ੍ਥ ਸਙ੍ਘ-ਸਦ੍ਦੋ ਦਟ੍ਠਬ੍ਬੋ. ਕੇਚਿ ਪਨ ‘‘ਭਿਕ੍ਖੁਸਙ੍ਘਗ੍ਗਹਣੇਨ ਗਹਿਤਤ੍ਤਾ’’ਤਿ (ਸਾਰਤ੍ਥ. ਟੀ. ਮਹਾਵਗ੍ਗ ੩.੩੭੯) ਪਾਠਂ ਲਿਖਨ੍ਤਿ, ਤਂ ਨ ਸੁਨ੍ਦਰਂ ਤਸ੍ਸ ਵਿਸੁਂ ਲਾਭਗ੍ਗਹਣੇ ਕਾਰਣਵਚਨਤ੍ਤਾ. ਤਥਾ ਹਿ ਵਿਸੁਂ ਸਙ੍ਘਗ੍ਗਹਣੇਨ ਗਹਿਤਤ੍ਤਾਤਿ ਵਿਸੁਂ ਪੁਗ੍ਗਲਸ੍ਸਪਿ ਭਾਗਗ੍ਗਹਣੇ ਕਾਰਣਂ ਵੁਤ੍ਤਂ. ਯਥਾ ਚੇਤ੍ਥ ਪੁਗ੍ਗਲਸ੍ਸ ਅਗ੍ਗਹਣਂ, ਏਵਂ ਉਪਰਿ ‘‘ਭਿਕ੍ਖੁਸਙ੍ਘਸ੍ਸ ਚ ਤੁਯ੍ਹਞ੍ਚਾ’’ਤਿਆਦੀਸੁਪਿ ਸਙ੍ਘਾਦਿ-ਸਦ੍ਦੇਹਿ ਪੁਗ੍ਗਲਸ੍ਸ ਅਗ੍ਗਹਣਂ ਦਟ੍ਠਬ੍ਬਂ. ਯਦਿ ਹਿ ਗਹਣਂ ਸਿਯਾ, ਸਙ੍ਘਤੋਪਿ, ਵਿਸੁਮ੍ਪੀਤਿ ਭਾਗਦ੍ਵਯਂ ਲਭੇਯ੍ਯ ਉਭਯਤ੍ਥ ਗਹਿਤਤ੍ਤਾ.

ਪੂਜੇਤਬ੍ਬਨ੍ਤਿਆਦਿ ਗਿਹਿਕਮ੍ਮਂ ਨ ਹੋਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ‘‘ਭਿਕ੍ਖੁਸਙ੍ਘਸ੍ਸ ਹਰਾ’’ਤਿ ਇਦਂ ਪਿਣ੍ਡਪਾਤਹਰਣਂ ਸਨ੍ਧਾਯ ਵੁਤ੍ਤਂ. ਤੇਨਾਹ ‘‘ਭੁਞ੍ਜਿਤੁਂ ਵਟ੍ਟਤੀ’’ਤਿ. ‘‘ਅਨ੍ਤੋਹੇਮਨ੍ਤੇ’’ਤਿ ਇਮਿਨਾ ਅਨਤ੍ਥਤੇ ਕਥਿਨੇ ਵਸ੍ਸਾਨਂ ਪਚ੍ਛਿਮੇ ਮਾਸੇ ਦਿਨ੍ਨਂ ਪੁਰਿਮਵਸ੍ਸਂਵੁਤ੍ਥਾਨਞ੍ਞੇਵ ਪਾਪੁਣਾਤਿ, ਤਤੋ ਪਰਂ ਹੇਮਨ੍ਤੇ ਦਿਨ੍ਨਂ ਪਚ੍ਛਿਮਵਸ੍ਸਂਵੁਤ੍ਥਾਨਮ੍ਪਿ ਵੁਤ੍ਥਵਸ੍ਸਤ੍ਤਾ ਪਾਪੁਣਾਤਿ. ਹੇਮਨ੍ਤਤੋ ਪਨ ਪਰਂ ਪਿਟ੍ਠਿਸਮਯੇ ‘‘ਵਸ੍ਸਂਵੁਤ੍ਥਸਙ੍ਘਸ੍ਸਾ’’ਤਿ ਏਵਂ ਵਤ੍ਵਾ ਦਿਨ੍ਨਂ ਅਨਨ੍ਤਰੇ ਵਸ੍ਸੇ ਵਾ ਤਤੋ ਪਰੇਸੁ ਵਾ ਯਤ੍ਥ ਕਤ੍ਥਚਿ ਤਸ੍ਮਿਂ ਵੁਤ੍ਥਵਸ੍ਸਾਨਂ ਸਬ੍ਬੇਸਂ ਪਾਪੁਣਾਤਿ. ਯੇ ਪਨ ਸਬ੍ਬਥਾ ਅਵੁਤ੍ਥਵਸ੍ਸਾ, ਤੇਸਂ ਨ ਪਾਪੁਣਾਤੀਤਿ ਦਸ੍ਸੇਤਿ. ਸਬ੍ਬੇਸਮ੍ਪੀਤਿ ਹਿ ਤਸ੍ਮਿਂ ਭਿਕ੍ਖੁਭਾਵੇ ਵੁਤ੍ਥਵਸ੍ਸਾਨਂ ਸਬ੍ਬੇਸਮ੍ਪੀਤਿ ਅਤ੍ਥੋ ¶ ਦਟ੍ਠਬ੍ਬੋ. ‘‘ਵਸ੍ਸਂਵੁਤ੍ਥਸਙ੍ਘਸ੍ਸਾ’’ਤਿ ਵੁਤ੍ਤਤ੍ਤਾ ਸਮ੍ਮੁਖੀਭੂਤਾਨਂ ਸਬ੍ਬੇਸਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਅਤੀਤਵਸ੍ਸਨ੍ਤਿ ਅਨਨ੍ਤਰਾਤੀਤਵਸ੍ਸਂ.

ਉਦ੍ਦੇਸਂ ਗਹੇਤੁਂ ਆਗਤੋਤਿ ਉਦ੍ਦੇਸੇ ਅਗ੍ਗਹਿਤੇਪਿ ਅਨ੍ਤੇਵਾਸਿਕੋਵਾਤਿ ਵੁਤ੍ਤਂ. ਗਹੇਤ੍ਵਾ ਗਚ੍ਛਨ੍ਤੋਤਿ ਪਰਿਨਿਟ੍ਠਿਤਉਦ੍ਦੇਸੋ ਹੁਤ੍ਵਾ ਗਚ੍ਛਨ੍ਤੋ. ‘‘ਵਤ੍ਤਂ ਕਤ੍ਵਾ ਉਦ੍ਦੇਸਪਰਿਪੁਚ੍ਛਾਦੀਨਿ ਗਹੇਤ੍ਵਾ ਵਿਚਰਨ੍ਤਾਨ’’ਨ੍ਤਿ ਇਦਂ ‘‘ਉਦ੍ਦੇਸਨ੍ਤੇਵਾਸਿਕਾਨ’’ਨ੍ਤਿ ਇਮਸ੍ਸੇਵ ਵਿਸੇਸਨਂ, ਤੇਨ ਉਦ੍ਦੇਸਕਾਲੇ ਆਗਨ੍ਤ੍ਵਾ ਉਦ੍ਦੇਸਂ ਗਹੇਤ੍ਵਾ ਗਨ੍ਤ੍ਵਾ ਅਞ੍ਞਤ੍ਥ ਨਿਵਸਨ੍ਤੇ ਅਨਿਬਦ੍ਧਚਾਰਿਕੇ ਨਿਵਤ੍ਤੇਤਿ.

ਅਟ੍ਠਚੀਵਰਮਾਤਿਕਾਕਥਾਵਣ੍ਣਨਾ ਨਿਟ੍ਠਿਤਾ.

ਚੀਵਰਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

ਕਸ੍ਸਪਗੋਤ੍ਤਭਿਕ੍ਖੁਵਤ੍ਥੁਕਥਾਦਿਵਣ੍ਣਨਾ

੩੮੦. ਚਮ੍ਪੇਯ੍ਯਕ੍ਖਨ੍ਧਕੇ ¶ ¶ ਤਨ੍ਤਿਬਦ੍ਧੋਤਿ ਤਨ੍ਤਿ ਵੁਚ੍ਚਤਿ ਬ੍ਯਾਪਾਰੋ, ਤਤ੍ਥ ਬਦ੍ਧੋ, ਉਸ੍ਸੁਕ੍ਕਂ ਆਪਨ੍ਨੋਤਿ ਅਤ੍ਥੋ. ਤੇਨਾਹ ‘‘ਤਸ੍ਮਿਂ ਆਵਾਸੇ’’ਤਿਆਦਿ.

੩੮੭-੮. ਹਾਪਨਂ ਵਾ ਅਞ੍ਞਥਾ ਕਰਣਂ ਵਾ ਨਤ੍ਥੀਤਿ ਞਤ੍ਤਿਕਮ੍ਮਸ੍ਸ ਞਤ੍ਤਿਯਾ ਏਕਤ੍ਤਾ ਹਾਪਨਂ ਨ ਸਮ੍ਭਵਤਿ, ਤਸ੍ਸਾ ਏਕਤ੍ਤਾ ਏਵ ਪਚ੍ਛਾ ਞਤ੍ਤਿਠਪਨਵਸੇਨ, ਦ੍ਵਿਕ੍ਖਤ੍ਤੁਂ ਠਪਨਵਸੇਨ ਚ ਅਞ੍ਞਥਾ ਕਰਣਂ ਨਤ੍ਥਿ. ਪਰਤੋਤਿ ਪਰਿਵਾਰੇ. ਤਨ੍ਤਿ ਪਬ੍ਬਾਜਨੀਯਕਮ੍ਮਂ, ਤਸ੍ਸਾਤਿ ਅਤ੍ਥੋ.

ਕਸ੍ਸਪਗੋਤ੍ਤਭਿਕ੍ਖੁਵਤ੍ਥੁਕਥਾਦਿਵਣ੍ਣਨਾ ਨਿਟ੍ਠਿਤਾ.

੩੯੫. ਏਸਾਤਿ ‘‘ਬਾਲੋ’’ਤਿਆਦਿਨਾ ਨਿਦ੍ਦਿਟ੍ਠਪੁਗ੍ਗਲੋ, ਅਪ੍ਪਤ੍ਤੋਤਿ ਸਮ੍ਬਨ੍ਧੋ. ਤਤ੍ਥ ਕਾਰਣਮਾਹ ‘‘ਯਸ੍ਮਾ’’ਤਿਆਦਿ. ਤਤ੍ਥ ਆਵੇਣਿਕੇਨ ਲਕ੍ਖਣੇਨਾਤਿ ਪਬ੍ਬਾਜਨੀਯਕਮ੍ਮਸ੍ਸ ਨਿਮਿਤ੍ਤਭਾਵੇਨ ਪਾਲ਼ਿਯਂ ਵੁਤ੍ਤਤ੍ਤਾ ਅਸਾਧਾਰਣਭੂਤੇਨ ਕੁਲਦੂਸਕਭਾਵੇਨ. ਯਦਿ ਹੇਸ ਤਂ ਕਮ੍ਮਂ ਅਪ੍ਪਤ੍ਤੋ, ਕਥਂ ਪਨ ਸੁਨਿਸ੍ਸਾਰਿਤੋਤਿ ਆਹ ‘‘ਯਸ੍ਮਾ ਪਨਸ੍ਸ ਆਕਙ੍ਖਮਾਨੋ ਸਙ੍ਘੋ ਪਬ੍ਬਾਜਨੀਯਕਮ੍ਮਂ ਕਰੇਯ੍ਯਾਤਿ ਵੁਤ੍ਤਂ, ਤਸ੍ਮਾ ਸੁਨਿਸ੍ਸਾਰਿਤੋ’’ਤਿ. ਤਤ੍ਥ ਵੁਤ੍ਤਨ੍ਤਿ ਕਮ੍ਮਕ੍ਖਨ੍ਧਕੇ (ਚੂਲ਼ਵ. ੨੭) ਵੁਤ੍ਤਂ.

ਏਤ੍ਥ ਪਨ ਕੁਲਦੂਸਕਕਮ੍ਮਂ ਕਤ੍ਵਾ ਪਬ੍ਬਾਜਨੀਯਕਮ੍ਮਕਤਸ੍ਸ ਤੇਰਸਕਕਣ੍ਡਕਟ੍ਠਕਥਾਯਂ ‘‘ਯਸ੍ਮਿਂ ਵਿਹਾਰੇ ਵਸਨ੍ਤੇਨ ਯਸ੍ਮਿਂ ਗਾਮੇ ਕੁਲਦੂਸਕਕਮ੍ਮਂ ਕਤਂ ਹੋਤਿ, ਤਸ੍ਮਿਂ ਵਿਹਾਰੇ ਵਾ ਤਸ੍ਮਿਂ ਗਾਮੇ ਵਾ ਨ ਵਸਿਤਬ੍ਬ’’ਨ੍ਤਿਆਦਿਨਾ (ਪਾਰਾ. ਅਟ੍ਠ. ੨.੪੩੩) ਯਾ ਸਮ੍ਮਾਵਤ੍ਤਨਾ ਵੁਤ੍ਤਾ, ਸਾ ਇਤਰੇਨਾਪਿ ¶ ਪੂਰੇਤਬ੍ਬਾ. ਯਂ ਪਨ ਪਟਿਪ੍ਪਸ੍ਸਦ੍ਧਕਮ੍ਮਸ੍ਸ ਕੁਲਦੂਸਕਸ੍ਸ ਤਤ੍ਥੇਵ ਅਟ੍ਠਕਥਾਯਂ ‘‘ਯੇਸੁ ਕੁਲੇਸੁ ਕੁਲਦੂਸਕਕਮ੍ਮਂ ਕਤਂ, ਤਤੋ ਪਚ੍ਚਯਾ ਨ ਗਹੇਤਬ੍ਬਾ’’ਤਿਆਦਿ ਵੁਤ੍ਤਂ, ਤਂ ਨ ਪੂਰੇਤਬ੍ਬਂ ਕੁਲਸਙ੍ਗਹਸ੍ਸ ਅਕਤਤ੍ਤਾ. ਏਵਂ ਸੇਸਕਮ੍ਮੇਸੁਪਿ. ਯਦਿ ਏਵਂ ‘‘ਤਜ੍ਜਨੀਯਕਮ੍ਮਾਰਹਸ੍ਸ ¶ ਨਿਯਸਕਮ੍ਮਂ ਕਰੋਤਿ…ਪੇ… ਏਵਂ ਖੋ, ਉਪਾਲਿ, ਅਧਮ੍ਮਕਮ੍ਮਂ ਹੋਤੀ’’ਤਿਆਦਿਵਚਨਂ (ਮਹਾਵ. ੪੦੨) ਵਿਰੁਜ੍ਝਤੀਤਿ? ਨ ਵਿਰੁਜ੍ਝਤਿ ਸਙ੍ਘਸਨ੍ਨਿਟ੍ਠਾਨਵਸੇਨ ਤਜ੍ਜਨੀਯਾਦਿਕਮ੍ਮਾਰਹਤ੍ਤਸ੍ਸ ਸਿਜ੍ਝਨਤੋ. ਯਸ੍ਸ ਹਿ ਸਙ੍ਘੋ ‘‘ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਕਮ੍ਮਵਾਚਂ ਸਾਵੇਨ੍ਤੋ ਪਬ੍ਬਾਜਨੀਯਕਮ੍ਮਵਾਚਂ ਸਾਵੇਤਿ, ਤਸ੍ਸ ਕਮ੍ਮਂ ਅਧਮ੍ਮਕਮ੍ਮਂ ਹੋਤਿ. ਸਚੇ ਪਨ ‘‘ਤਸ੍ਸੇਵ ਪਬ੍ਬਾਜਨੀਯਕਮ੍ਮਮੇਵ ਕਰੋਮਾ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਤਦੇਵ ਕਰੋਤਿ, ਤਸ੍ਸ ਤਂ ਕਮ੍ਮਂ ਧਮ੍ਮਕਮ੍ਮਨ੍ਤਿ ਵੇਦਿਤਬ੍ਬਂ.

ਏਵਮਿਧ ‘‘ਨਿਸ੍ਸਾਰਣ’’ਨ੍ਤਿ ਅਧਿਪ੍ਪੇਤਸ੍ਸ ਪਬ੍ਬਾਜਨੀਯਕਮ੍ਮਸ੍ਸ ਵਸੇਨ ਅਤ੍ਥਂ ਦਸ੍ਸੇਤ੍ਵਾ ਇਦਾਨਿ ਤਦਞ੍ਞੇਸਂ ਤਜ੍ਜਨੀਯਾਦੀਨਂ ਵਸੇਨ ਨਿਸ੍ਸਾਰਣੇ ਅਧਿਪ੍ਪੇਤੇ ‘‘ਅਪ੍ਪਤ੍ਤੋ ਨਿਸ੍ਸਾਰਣ’’ਨ੍ਤਿ ਇਮਸ੍ਸ ਪਟਿਪਕ੍ਖਵਸੇਨ ਸਮ੍ਪਤ੍ਤੋ ਨਿਸ੍ਸਾਰਣਂ, ‘‘ਤਞ੍ਚੇ ਸਙ੍ਘੋ ਨਿਸ੍ਸਾਰੇਤਿ. ਸੁਨਿਸ੍ਸਾਰਿਤੋ’’ਤਿ ਅਤ੍ਥਸਮ੍ਭਵਂ ਦਸ੍ਸੇਤੁਂ ਪੁਨ ‘‘ਤਞ੍ਚੇ ਸਙ੍ਘੋ ਨਿਸ੍ਸਾਰੇਤੀਤਿ ਸਚੇ ਸਙ੍ਘੋ’’ਤਿਆਦਿ ਵੁਤ੍ਤਂ. ਤਤ੍ਥ ਤਤ੍ਥਾਤਿ ਤਜ੍ਜਨੀਯਾਦਿਕਮ੍ਮਵਿਸਯੇ, ਏਕੇਨਾਪਿ ਅਙ੍ਗੇਨ ਨਿਸ੍ਸਾਰਣਾ ਅਨੁਞ੍ਞਾਤਾਤਿ ਯੋਜਨਾ. ਪਾਲ਼ਿਯਂ ਅਪ੍ਪਤ੍ਤੋ ਨਿਸ੍ਸਾਰਣਨ੍ਤਿ ਏਤ੍ਥ ਆਪਨ੍ਨੋ ਆਵੇਣਿਕਵਸੇਨ ਤਜ੍ਜਨੀਯਾਦਿਸਙ੍ਖਾਤਂ ਨਿਸ੍ਸਾਰਣਂ ਪਤ੍ਤੋਤਿ ਅਤ੍ਥੋ ਗਹੇਤਬ੍ਬੋ.

ਦ੍ਵੇਨਿਸ੍ਸਰਣਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਚਮ੍ਪੇਯ੍ਯਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੪੫੧. ਕੋਸਮ੍ਬਕਕ੍ਖਨ੍ਧਕੇ ¶ ¶ ਸਚੇ ਹੋਤਿ, ਦੇਸੇਸ੍ਸਾਮੀਤਿ ਵਿਨਯਧਰਸ੍ਸ ਵਚਨੇਨ ਆਪਤ੍ਤਿਦਿਟ੍ਠਿਂ ਪਟਿਲਭਿਤ੍ਵਾ ਏਵਮਾਹ. ਤੇਨੇਵ ਪਾਲ਼ਿਯਂ ‘‘ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤੀ’’ਤਿ ਵੁਤ੍ਤਂ. ਨਤ੍ਥਿ ਆਪਤ੍ਤੀਤਿ ਉਦਕਸ੍ਸ ਠਪਨਭਾਵਂ ਅਜਾਨਿਤ੍ਵਾ ਵਾ ਠਪਿਤਂ ਛਡ੍ਡੇਤ੍ਵਾ ਵਿਸ੍ਸਰਿਤ੍ਵਾ ਵਾ ਗਮਨੇ ਅਸਞ੍ਚਿਚ੍ਚ ਅਸਤਿਯਾ ਅਨਾਪਤ੍ਤਿਪਕ੍ਖੋਪਿ ਸਮ੍ਭਵਤੀਤਿ ਵਿਨਯਧਰੋ ਤਤ੍ਥ ਅਨਾਪਤ੍ਤਿਦਿਟ੍ਠਿਂ ਪਟਿਲਭਿਤ੍ਵਾ ਏਵਮਾਹ. ਤੇਨੇਵ ਪਾਲ਼ਿਯਂ ‘‘ਅਞ੍ਞੇ ਭਿਕ੍ਖੂ ਤਸ੍ਸ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿਨੋ ਹੋਨ੍ਤੀ’’ਤਿ ਵੁਤ੍ਤਂ. ਪਰਿਸਾਯਪਿਸ੍ਸ ਅਨਾਪਤ੍ਤਿਦਿਟ੍ਠਿਯਾ ਉਪ੍ਪਨ੍ਨਤ੍ਤਾ ‘‘ਅਞ੍ਞੇ’’ਤਿ ਬਹੁਵਚਨਂ ਕਤਂ. ਅਨਾਪਤ੍ਤਿਦਿਟ੍ਠਿ ਅਹੋਸੀਤਿ ਸੁਤ੍ਤਨ੍ਤਿਕਤ੍ਥੇਰਸ੍ਸ ਵਿਨਯੇ ਅਪਕਤਞ੍ਞੁਤਾਯ ਵਿਨਯਧਰਸ੍ਸ ਵਚਨਮਤ੍ਤੇਨ ਸੋ ਏਵਮਹੋਸਿ, ਸਾ ਪਨਸ੍ਸ ਆਪਤ੍ਤਿ ਏਵ ਉਦਕਾਵਸੇਸਸ੍ਸ ਠਪਨਭਾਵਂ ਞਤ੍ਵਾ ਠਪਿਤਤ੍ਤਾ. ਵਤ੍ਥੁਮਤ੍ਤਜਾਨਨੇ ਏਵ ਹਿ ਸੇਖਿਯਾ ਸਚਿਤ੍ਤਕਾ, ਨ ਪਣ੍ਣਤ੍ਤਿਵਿਜਾਨਨੇ. ਤੇਨੇਵ ਪਾਲ਼ਿਯਂ ‘‘ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤੀ’’ਤਿ ਸਬ੍ਬਤ੍ਥ ਆਪਤ੍ਤਿ ਇਚ੍ਚੇਵ ਵੁਤ੍ਤਂ. ‘‘ਆਪਤ੍ਤਿਂ ਆਪਜ੍ਜਮਾਨੋ’’ਤਿ ਇਦਂ ਵਿਨਯਧਰਤ੍ਥੇਰੋ ‘‘ਤਯਾ ਇਦਂ ਉਦਕਂ ਠਪਿਤ’’ਨ੍ਤਿ ਅਤ੍ਤਨਾ ਪੁਟ੍ਠੇਨ ਸੁਤ੍ਤਨ੍ਤਿਕਤ੍ਥੇਰੇਨ ‘‘ਆਮਾਵੁਸੋ’’ਤਿ ਵੁਤ੍ਤਵਚਨਂ ਸਰਿਤ੍ਵਾ ਪਣ੍ਣਤ੍ਤਿਅਕੋਵਿਦਤਾਯ ਸਞ੍ਚਿਚ੍ਚੇਵ ਅਕਾਸੀਤਿ ਆਪਤ੍ਤਿਦਿਟ੍ਠਿ ਹੁਤ੍ਵਾਵ ਅਵੋਚ. ਤੇਨੇਵ ਪਾਲ਼ਿਯਂ ‘‘ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤੀ’’ਤਿ ਵੁਤ੍ਤਂ.

੪੫੩. ‘‘ਨ ਤਾਵ ਭਿਨ੍ਨੋ’’ਤਿ ਇਦਂ ਉਕ੍ਖਿਪਨਤਦਨੁਵਤ੍ਤਨਮਤ੍ਤੇਨ ਸਙ੍ਘੋ ਭਿਨ੍ਨੋ ਨਾਮ ਨ ਹੋਤਿ, ਤਂ ਨਿਸ੍ਸਾਯ ਪਨ ਉਭਯਪਕ੍ਖਿਕਾਨਂ ਪਕ੍ਖਂ ਪਰਿਯੇਸਿਤ੍ਵਾ ਅਞ੍ਞਮਞ੍ਞਂ ਕੋਧਵਸੇਨ ਕਾਯਵਚੀਕਲਹਵਡ੍ਢਨੇਨੇਵ ਹੋਤੀਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਂ. ਤੇਨਾਹ ‘‘ਸੋ ਚ ਖੋ ਕਲਹਵਸੇਨਾ’’ਤਿ. ਸਮ੍ਭਮਅਤ੍ਥਵਸੇਨਾਤਿ ਤੁਰਿਤਤ੍ਥਵਸੇਨ.

੪੫੪. ਅਕਾਰਣੇਤਿਆਦਿ ¶ ਅਨੁਕ੍ਖਿਪਿਤ੍ਵਾਵ ਉਪਾਯੇਨ ਸਞ੍ਞਾਪੇਤ੍ਵਾ ਹਿਤੇਸਿਤਾਯ ਆਪਤ੍ਤਿਤੋ ਮੋਚੇਤੁਂ ਯੁਤ੍ਤਟ੍ਠਾਨੇ ਕੋਧਚਿਤ੍ਤਵਸੇਨ ਵਿਹੇਠਨਤ੍ਥਾਯ ਕਤਭਾਵਂ ਸਨ੍ਧਾਯ ਵੁਤ੍ਤਂ, ਨ ਪਨ ਕਮ੍ਮਙ੍ਗਸ੍ਸ ਅਭਾਵਂ ਸਨ੍ਧਾਯ. ਤੇਨੇਵ ¶ ਪਾਲ਼ਿਯਂ ‘‘ਆਪਤ੍ਤਿ ਏਸਾ, ਭਿਕ੍ਖਵੇ, ਨੇਸਾ ਅਨਾਪਤ੍ਤਿ…ਪੇ… ਉਕ੍ਖਿਤ੍ਤੋ ਏਸੋ ਭਿਕ੍ਖੂ’’ਤਿਆਦਿ ਵੁਤ੍ਤਂ.

੪੫੫. ‘‘ਅਧਮ੍ਮਵਾਦੀਨਂ ਪਕ੍ਖੇ ਨਿਸਿਨ੍ਨੋ’’ਤਿ ਇਦਂ ਉਪਲਕ੍ਖਣਮਤ੍ਤਂ, ਧਮ੍ਮਵਾਦੀਨਂ ਪਕ੍ਖੇ ਨਿਸੀਦਿਤ੍ਵਾ ਅਧਮ੍ਮਵਾਦੀਨਂ ਲਦ੍ਧਿਂ ਗਣ੍ਹਨ੍ਤੋਪਿ ਧਮ੍ਮਵਾਦੀਨਂ ਨਾਨਾਸਂਵਾਸਕੋ ਹੋਤਿ ਏਵ. ਕਮ੍ਮਂ ਕੋਪੇਤੀਤਿ ਤਂ ਵਿਨਾ ਗਣਸ੍ਸ ਅਪੂਰਣਪਕ੍ਖਂ ਸਨ੍ਧਾਯ ਵੁਤ੍ਤਂ. ਯਤ੍ਥ ਵਾ ਤਤ੍ਥ ਵਾਤਿ ਧਮ੍ਮਵਾਦੀਨਂ ਪਕ੍ਖੇ ਵਾ ਅਧਮ੍ਮਵਾਦੀਨਂ ਪਕ੍ਖੇ ਵਾਤਿ ਅਤ੍ਥੋ. ਇਮੇ ਧਮ੍ਮਵਾਦਿਨੋਤਿ ਗਣ੍ਹਾਤੀਤਿ ਤਂਤਂਪਕ੍ਖਗਤੇ ਭਿਕ੍ਖੂ ਯਾਥਾਵਤੋ ਵਾ ਅਯਾਥਾਵਤੋ ਵਾ ‘‘ਇਮੇ ਧਮ੍ਮਵਾਦਿਨੋ’’ਤਿ ਗਣ੍ਹਾਤਿ, ਅਯਂ ਤਂਤਂਪਕ੍ਖਗਤਾਨਂ ਅਤ੍ਤਾਨਂ ਸਮਾਨਸਂਵਾਸਕਂ ਕਰੋਤਿ.

੪੫੬. ਉਪਦਂਸੇਨ੍ਤੀਤਿ ਪਵਤ੍ਤੇਨ੍ਤਿ. ਪਾਲ਼ਿਯਂ ਏਤ੍ਤਾਵਤਾਤਿ ‘‘ਏਤ੍ਤਕਪਦੇਸਂ ਮੁਞ੍ਚਿਤ੍ਵਾ ਨਿਸਿਨ੍ਨਾ ਮਯਂ ਕੋਧਚਿਤ੍ਤੇ ਉਪ੍ਪਨ੍ਨੇਪਿ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਾਦਿਂ ਪਵਤ੍ਤੇਤੁਂ ਨ ਸਕ੍ਖਿਸ੍ਸਾਮਾ’’ਤਿ ਸਲ੍ਲੇਕ੍ਖੇਤ੍ਵਾ ਦੂਰੇ ਨਿਸੀਦਿਤਬ੍ਬਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਉਪਚਾਰਂ ਮੁਞ੍ਚਿਤ੍ਵਾ’’ਤਿ.

੪੫੭. ਪਾਲ਼ਿਯਂ ਭਣ੍ਡਨਜਾਤਾਤਿਆਦੀਸੁ ਕਲਹਸ੍ਸ ਪੁਬ੍ਬਭਾਗੋ ਭਣ੍ਡਨਂ ਨਾਮ. ਹਤ੍ਥਪਰਾਮਾਸਾਦਿ ਕਲਹੋ ਨਾਮ. ਵਿਰੁਦ੍ਧਵਾਦੋ ਵਿਵਾਦੋ ਨਾਮ.

੪੫੮. ਪਰਿਪੁਣ੍ਣਕੋਸਕੋਟ੍ਠਾਗਾਰੋਤਿ ਏਤ੍ਥ ਕੋਸੋ ਨਾਮ ਸੁਵਣ੍ਣਮਣਿਆਦਿਭਣ੍ਡਾਗਾਰਸਾਰਗਬ੍ਭੋ. ਕੋਟ੍ਠਂ ਵੁਚ੍ਚਤਿ ਧਞ੍ਞਸ੍ਸ ਆਵਸਨਟ੍ਠਾਨਂ, ਕੋਟ੍ਠਭੂਤਂ ਅਗਾਰਂ ਕੋਟ੍ਠਾਗਾਰਂ, ਧਞ੍ਞਸਙ੍ਗਹਟ੍ਠਾਨਂ. ਅਬ੍ਭੁਯ੍ਯਾਸੀਤਿ ਯੁਦ੍ਧਾਯ ਅਭਿਮੁਖੋ ਨਿਕ੍ਖਮੀਤਿ ਅਤ੍ਥੋ. ਏਕਸਙ੍ਘਾਤਮ੍ਪੀਤਿ ਏਕਯੁਦ੍ਧਮ੍ਪਿ. ਧੋਵਨਨ੍ਤਿ ਧੋਵਨੁਦਕਂ.

੪੬੩. ਪਰਿਯਾਦਿਨ੍ਨਰੂਪਾਤਿ ਕੋਧਚਿਤ੍ਤੇਨ ਪਰਿਗ੍ਗਹਿਤਸਭਾਵਾ.

੪੬੪. ਤਂ ਨ ਜਾਨਨ੍ਤੀਤਿ ਤਂ ਕਲਹਂ ਨ ਜਾਨਨ੍ਤਿ. ਯੇ ਉਪਨਯ੍ਹਨ੍ਤੀਤਿ ਯਥਾਵੁਤ੍ਤਂ ਕੋਧਾਕਾਰਂ ਚਿਤ੍ਤੇ ਬਨ੍ਧਨ੍ਤਿ. ਪਾਕਟਪਰਿਸ੍ਸਯੇਤਿ ਸੀਹਾਦਿਕੇ. ਪਟਿਚ੍ਛਨ੍ਨਪਰਿਸ੍ਸਯੇਤਿ ਰਾਗਾਦਿਕੇ. ਪਾਲ਼ਿਯਂ ਨਤ੍ਥਿ ਬਾਲੇ ੯੭ ਸਹਾਯਤਾਤਿ ਬਾਲਂ ਨਿਸ੍ਸਾਯ ਸੀਲਾਦਿਗੁਣਸਙ੍ਖਾਤਾ ਸਹਾਯਤਾ ਨਤ੍ਥਿ, ਨ ਸਕ੍ਕਾ ਲਦ੍ਧੁਨ੍ਤਿ ਅਤ੍ਥੋ.

੪੬੬. ਅਤ੍ਤਕਾਮਰੂਪਾਤਿ ¶ ਅਤ੍ਤਨੋ ਹਿਤਕਾਮਯਮਾਨਸਭਾਵਾ. ਅਨੁਰੁਦ੍ਧਾਤਿ ਏਕਸੇਸਨਯੇਨ ਤਿਣ੍ਣਮ੍ਪਿ ਕੁਲਪੁਤ੍ਤਾਨਂ ਆਲਪਨਂ, ਤੇਨੇਵ ਬਹੁਵਚਨਨਿਦ੍ਦੇਸੋ ਕਤੋ. ਖਮਨੀਯਂ ਸਰੀਰਂ ਯਾਪਨੀਯਂ ਜੀਵਿਤਂ ‘‘ਕਚ੍ਚਿ ਵੋ ਸਰੀਰਞ੍ਚ ਧਾਰੇਤੁਂ, ਜੀਵਿਤਞ੍ਚ ਯਾਪੇਤੁਂ ਸਕ੍ਕਾ’’ਤਿ ਪੁਚ੍ਛਤਿ. ਤਗ੍ਘਾਤਿ ਏਕਂਸਤ੍ਥੇ ਨਿਪਾਤੋ, ਏਕਂਸੇਨ ਮਯਂ ਭਨ੍ਤੇਤਿ ਅਤ੍ਥੋ. ਯਥਾ ਕਥਨ੍ਤਿ ਏਤ੍ਥ ਯਥਾਤਿ ਨਿਪਾਤਮਤ੍ਤਂ, ਯਥਾਕਥਨ੍ਤਿ ਵਾ ਏਕੋ ਨਿਪਾਤੋ ਕਾਰਣਪੁਚ੍ਛਨਤ੍ਥੋ, ਕੇਨ ਪਕਾਰੇਨਾਤਿ ਅਤ੍ਥੋ. ਏਕਞ੍ਚ ਪਨ ਮਞ੍ਞੇ ਚਿਤ੍ਤਨ੍ਤਿ ਏਕਸ੍ਸ ਚਿਤ੍ਤਵਸੇਨ ਇਤਰੇਸਮ੍ਪਿ ਪਵਤ੍ਤਨਤੋ ਸਬ੍ਬੇਸਂ ਨੋ ਏਕਂ ਵਿਯ ਚਿਤ੍ਤਨ੍ਤਿ ਅਤ੍ਥੋ. ਕਚ੍ਚਿ ਪਨ ਵੋ ਅਨੁਰੁਦ੍ਧਾਤਿ ਏਤ੍ਥ ਵੋਤਿ ਨਿਪਾਤਮਤ੍ਤਂ, ਪਚ੍ਚਤ੍ਤਵਚਨਂ ਵਾ, ਕਚ੍ਚਿ ਤੁਮ੍ਹੇਤਿ ਅਤ੍ਥੋ. ਅਮ੍ਹਾਕਨ੍ਤਿ ਨਿਦ੍ਧਾਰਣੇ ਸਾਮਿਵਚਨਂ, ਅਮ੍ਹੇਸੁ ਤੀਸੁ ਯੋ ਪਠਮਂ ਪਟਿਕ੍ਕਮਤੀਤਿ ਅਤ੍ਥੋ.

ਕੋਸਮ੍ਬਕਵਿਵਾਦਕਥਾਵਣ੍ਣਨਾ ਨਿਟ੍ਠਿਤਾ.

੪੬੭. ਯੇਨ ਪਾਲਿਲੇਯ੍ਯਕਨ੍ਤਿ ਪਚ੍ਚਤ੍ਤੇ ਉਪਯੋਗਵਚਨਂ, ਯਤ੍ਥ ਪਾਲਿਲੇਯ੍ਯਕੋ ਗਾਮੋ, ਤਤ੍ਥ ਅਵਸਰੀਤਿ ਅਤ੍ਥੋ. ਦਹਰਪੋਤਕੇਹੀਤਿ ਭਿਙ੍ਕਚ੍ਛਾਪੇਹਿ. ‘‘ਓਗਾਹਿ’’ਨ੍ਤਿਪਿ ਪਾਠੋ, ਨਹਾਨਪੋਕ੍ਖਰਣਿਨ੍ਤਿ ਅਤ੍ਥੋ.

ਉਦਾਨਗਾਥਾਯਂ ਪਨ – ਰਥਈਸਸਦਿਸਦਨ੍ਤਸ੍ਸ ਨਾਗਸ੍ਸ ਹਤ੍ਥਿਨੋ ਏਤਂ ਵਿਵੇਕਨਿਨ੍ਨਂ ਚਿਤ੍ਤਂ ਨਾਗੇਨ ਬੁਦ੍ਧਨਾਗਸ੍ਸ ਵਿਵੇਕਨਿਨ੍ਨਚਿਤ੍ਤੇਨ ਸਮੇਤਿ. ਕਸ੍ਮਾ? ਯਂ ਯਸ੍ਮਾ ਏਕੋਵ ਰਮਤਿ ਵਨੇ, ਤਸ੍ਮਾ ਏਵਂ ਯੋਜਨਾ ਦਟ੍ਠਬ੍ਬਾ.

ਪਾਲਿਲੇਯ੍ਯਕਗਮਨਕਥਾਵਣ੍ਣਨਾ ਨਿਟ੍ਠਿਤਾ.

੪੬੮. ਯਥਾ ਧਮ੍ਮੋ ਤਥਾ ਤਿਟ੍ਠਾਹੀਤਿ ਯਥਾ ਧਮ੍ਮੋ ਚ ਵਿਨਯੋ ਚ ਠਿਤੋ, ਤਥਾ ਤਿਟ੍ਠ, ਧਮ੍ਮਵਾਦੀਪਕ੍ਖੇ ਤਿਟ੍ਠਾਤਿ ਅਤ੍ਥੋ.

੪੭੩. ‘‘ਯੋ ¶ ਪਟਿਬਾਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਇਦਂ ਸਾਮਗ੍ਗੀਭੇਦਸ੍ਸ ਅਕਾਰਕੇ ਸਨ੍ਧਾਯ ਵੁਤ੍ਤਂ. ਯੇ ਪਨ ਭੇਦਕਾਰਕਾ ਵਿਰੁਦ੍ਧਾ ਅਲਜ੍ਜਿਨੋ ¶ , ਤੇਸਂ ਪਟਿਬਾਹਿਤੁਂ ਵਟ੍ਟਤਿ ਤੇਸਂ ਸਨ੍ਤਕਸ੍ਸਪਿ ਸੇਨਾਸਨਸ੍ਸ ਵਿਨਾਸਨਵਚਨਤੋ. ‘‘ਵਿਵਿਤ੍ਤਂ ਕਤ੍ਵਾਪਿ ਦਾਤਬ੍ਬ’’ਨ੍ਤਿ ਵੁਤ੍ਤਤ੍ਤਾ ਪਨ ਯਥਾਵੁਡ੍ਢਂ ਵਰਸੇਨਾਸਨਂ ਅਦਤ੍ਵਾ ਵੁਡ੍ਢਾਨਮ੍ਪਿ ਅਸਞ੍ਞਤਾਨਂ ਸਞ੍ਞਤੇਹਿ ਵਿਵਿਤ੍ਤਂ ਕਤ੍ਵਾ ਦਾਤਬ੍ਬਨ੍ਤਿ ਦਟ੍ਠਬ੍ਬਂ.

੪੭੫. ਕਮ੍ਮਵਾਚਾਯ ਓਸਾਰੇਤ੍ਵਾਤਿ ਏਤ੍ਥ ਉਕ੍ਖਿਤ੍ਤਸ੍ਸ ਭਿਕ੍ਖੁਨੋ ਆਪਤ੍ਤਿਯਾਪਨ੍ਨਭਾਵਂ ਪਟਿਜਾਨਿਤ੍ਵਾ ਸਮ੍ਮਾਵਤ੍ਤਨੇਨ ਉਕ੍ਖੇਪਕਾਨਂ ਸਮੁਪ੍ਪਨ੍ਨਓਸਾਰਣਚ੍ਛਨ੍ਦਸ੍ਸ ਪਗੇਵ ਞਾਤਤ੍ਤਾ ਪਟਿਪ੍ਪਸ੍ਸਮ੍ਭਨਕਮ੍ਮਵਾਚਾਯ ਉਕ੍ਖਿਤ੍ਤਾਨੁਵਤ੍ਤਕਾ ਸਯਮੇਵ ਨਂ ਓਸਾਰੇਸੁਨ੍ਤਿ ਦਟ੍ਠਬ੍ਬਂ.

੪੭੬. ਅਤ੍ਥਤੋ ਅਪਗਤਾਤਿ ਸਾਮਗ੍ਗੀਅਤ੍ਥਵਿਰਹਿਤਾ, ਤੁਚ੍ਛਬ੍ਯਞ੍ਜਨਾਤਿ ਅਤ੍ਥੋ.

੪੭੭. ਅਪ੍ਪਟਿਚ੍ਛਨ੍ਨਾਚਾਰੋਤਿ ਅਪ੍ਪਟਿਚ੍ਛਾਦੇਤਬ੍ਬਸੁਨ੍ਦਰਾਚਾਰੋ. ਅਨਪਗਤਨ੍ਤਿ ਕਾਰਣਤੋ ਅਨਪੇਤਂ. ਆਦਾਤਬ੍ਬਤੋ ਗਹੇਤਬ੍ਬਤੋ ਆਦਾਯਨ੍ਤਿ ਆਚਰਿਯਵਾਦੋ ਵੁਤ੍ਤੋਤਿ ਆਹ ‘‘ਆਦਾਯਂ ਅਤ੍ਤਨੋ ਆਚਰਿਯਵਾਦ’’ਨ੍ਤਿ.

ਅਟ੍ਠਹਿ ਦੂਤਙ੍ਗੇਹੀਤਿ ‘‘ਸੋਤਾ ਚ ਹੋਤਿ ਸਾਵੇਤਾ ਚ ਉਗ੍ਗਹੇਤਾ ਚ ਧਾਰੇਤਾ ਚ ਵਿਞ੍ਞਾਤਾ ਚ ਵਿਞ੍ਞਾਪੇਤਾ ਚ ਕੁਸਲੋ ਚ ਸਹਿਤਾਸਹਿਤਸ੍ਸ ਨੋ ਚ ਕਲਹਕਾਰਕੋ’’ਤਿ (ਅ. ਨਿ. ੮.੧੬) ਏਵਂ ਵੁਤ੍ਤੇਹਿ ਅਟ੍ਠਹਿ ਦੂਤਙ੍ਗੇਹਿ. ਸੇਸਮੇਤ੍ਥ, ਹੇਟ੍ਠਾ ਚ ਸਬ੍ਬਤ੍ਥ ਸੁਵਿਞ੍ਞੇਯ੍ਯਮੇਵਾਤਿ.

ਅਟ੍ਠਾਰਸਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਕੋਸਮ੍ਬਕਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧. ਚੂਲ਼ਵਗ੍ਗਸ੍ਸ ¶ ¶ ਪਠਮੇ ਕਮ੍ਮਕ੍ਖਨ੍ਧਕੇ ਤਾਵ ‘‘ਬਲਵਾਬਲਵ’’ਨ੍ਤਿ ਇਦਂ ਏਕਪਦਂ. ‘‘ਬਲਵਬਲਵ’’ਨ੍ਤਿ ਵਤ੍ਤਬ੍ਬੇ ਆਕਾਰਂ ਕਤ੍ਵਾ ‘‘ਬਲਵਾਬਲਵ’’ਨ੍ਤਿ ਵੁਤ੍ਤਂ. ਤਞ੍ਚ ‘‘ਦੁਕ੍ਖਦੁਕ੍ਖ’’ਨ੍ਤਿਆਦੀਸੁ ਵਿਯ ਅਤਿਸਯਤ੍ਥੇ ਵਤ੍ਤਤੀਤਿ ਆਹ ‘‘ਸੁਟ੍ਠੁ ਬਲਵਂ ਪਟਿਵਦਥਾ’’ਤਿ, ਅਤਿ ਵਿਯ ਬਲਵਂ ਕਤ੍ਵਾ ਪਟਿਵਚਨਂ ਦੇਥਾਤਿ ਅਤ੍ਥੋ.

੨. ਪਾਲ਼ਿਯਂ ਆਪਤ੍ਤਿ ਆਰੋਪੇਤਬ੍ਬਾਤਿ ਏਤ੍ਥ ਕਿਞ੍ਚਾਪਿ ‘‘ਮਾ ਖੋ ਤੁਮ੍ਹੇ ਆਯਸ੍ਮਨ੍ਤੋ ਏਸੋ ਅਜੇਸੀ’’ਤਿਆਦਿਕੇ ਭਣ੍ਡਨਾਦਿਜਨਕੇ ਵਚਨੇ ਪਞ੍ਞਤ੍ਤਾ ਕਾਚਿ ਆਪਤ੍ਤਿ ਨਾਮ ਨਤ੍ਥਿ ਮੁਸਾਪੇਸੁਞ੍ਞਾਦੀਸੁ ਏਤਸ੍ਸ ਅਪ੍ਪਵਿਟ੍ਠਤ੍ਤਾ, ਤਥਾਪਿ ਭਿਕ੍ਖੂਹਿ ਵਿਸੁਂ, ਸਙ੍ਘਮਜ੍ਝੇ ਚ ‘‘ਮਾ, ਆਵੁਸੋ, ਭਿਕ੍ਖੂ ¶ ਅਞ੍ਞਮਞ੍ਞਂ ਪਯੋਜੇਤ੍ਵਾ ਭਣ੍ਡਨਾਦਿਂ ਅਕਾਸਿ, ਨੇਦਂ ਅਪ੍ਪਿਚ੍ਛਤਾਦੀਨਂ ਅਤ੍ਥਾਯ ਵਤ੍ਤਤੀ’’ਤਿ ਏਵਂ ਅਪਞ੍ਞਤ੍ਤੇਨ ਵੁਚ੍ਚਮਾਨਸ੍ਸ ਭਿਕ੍ਖੁਨੋ ਅਨਾਦਰਿਯੇਨ ਅਨੋਰਮਨਪਚ੍ਚਯਾ ਵਾ ਅਞ੍ਞਵਾਦਵਿਹੇਸਾਦਿਕਰਣਪਚ੍ਚਯਾ ਵਾ ਯਾ ਆਪਤ੍ਤਿ ਹੋਤਿ, ਸਾ ਆਪਤ੍ਤਿ ਆਰੋਪੇਤਬ੍ਬਾ ਦਿਟ੍ਠਿਵਿਪਨ੍ਨਸ੍ਸ ਵਿਯਾਤਿ ਏਵਮਤ੍ਥੋ ਦਟ੍ਠਬ੍ਬੋ.

ਯਸ੍ਸ ਪਨ ਇਦਂ ਵਚਨਂ ਵਿਨਾਵ ਕਾਯਵਾਚਾਹਿ ਆਪਨ੍ਨਾ ਲਹੁਕਾਪਤ੍ਤਿ ਅਤ੍ਥਿ, ਤਸ੍ਸਪਿ ਆਰੋਪੇਤਬ੍ਬਾਵ. ਯਂ ਪਨ ਕਮ੍ਮਵਾਚਾਯ ‘‘ਅਤ੍ਤਨਾ ਭਣ੍ਡਨਕਾਰਕਾ’’ਤਿ ਅਤ੍ਤਨਾ-ਸਦ੍ਦਗ੍ਗਹਣਂ, ‘‘ਯੇਪਿ ਚਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ…ਪੇ… ਤੇ ਉਪਸਙ੍ਕਮਿਤ੍ਵਾ’’ਤਿਆਦਿਵਚਨਞ੍ਚ, ਤਂ ਵਤ੍ਥੁਵਸੇਨ ਗਹਿਤਂ. ਯੋ ਪਨ ਸਯਮੇਵ ਭਣ੍ਡਨਕਾਰਕੋ ਹੋਤਿ, ਅਞ੍ਞੇ ਪਨ ਭਣ੍ਡਨਕਾਰਕੇ ਉਪਸਙ੍ਕਮਿਤ੍ਵਾ ‘‘ਮਾ ਖੋ ਤੁਮ੍ਹੇ’’ਤਿਆਦਿਵਚਨਂ ਨ ਵਦਤਿ, ਤਸ੍ਸਾਪੇਤਂ ਕਮ੍ਮਂ ਕਾਤਬ੍ਬਮੇਵ. ਕਰੋਨ੍ਤੇਹਿ ਚ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਇਤ੍ਥਨ੍ਨਾਮੋ ¶ ਭਿਕ੍ਖੁ ਭਣ੍ਡਨਕਾਰਕੋ…ਪੇ… ਸਙ੍ਘੇ ਅਧਿਕਰਣਕਾਰਕੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲ’’ਨ੍ਤਿਆਦਿਨਾਵ ਕਮ੍ਮਵਾਚਾ ਕਾਤਬ੍ਬਾ. ਯੋ ਚ ਅਞ੍ਞੇਪਿ ਭਿਕ੍ਖੂ ਕਲਹਾਯ ਸਮਾਦਪੇਤਿ, ਤਸ੍ਸਾਪਿ ਏਵਮੇਵ ਕਮ੍ਮਵਾਚਂ ਕਾਤੁਂ ਵਟ੍ਟਤਿ ਅਞ੍ਞੇਸਂ ਸਮਾਦਾਪਨਸ੍ਸਪਿ ਭਣ੍ਡਨਕਾਰਕਤ੍ਤੇ ਏਵ ਪਵਿਸਨਤੋ. ਅਞ੍ਞੇਸਂ ਸਮਾਦਾਪਨਾਕਾਰਮ੍ਪਿ ਵਤ੍ਵਾਵ, ਕਮ੍ਮਵਾਚਂ ਕਾਤੁਕਾਮੇਨਪਿ ਚ ਤੇਹਿ ਵੁਤ੍ਤਵਚਨਤ੍ਥਮੇਵ ਗਹੇਤ੍ਵਾ ਤਦਨੁਗੁਣਂ ਯੋਜੇਤ੍ਵਾਵ ਕਾਤਬ੍ਬਂ, ਨ ਇਧਾਗਤਵਸੇਨੇਵ ਸਬ੍ਬੇਸਮ੍ਪਿ ਇਧਾਗਤਵਸੇਨੇਵ ਵਚਨਾਸਮ੍ਭਵਾ. ਭੂਤੇਨ ਵਤ੍ਥੁਨਾ ਕਤਮੇਵ ਹਿ ਅਵਿਪਨ੍ਨਂ ਹੋਤਿ, ਨਾਞ੍ਞਨ੍ਤਿ ਗਹੇਤਬ੍ਬਂ. ਏਸ ਨਯੋ ਨਿਯਸ੍ਸਕਮ੍ਮਾਦੀਸੁਪਿ.

ਤਜ੍ਜਨੀਯਕਮ੍ਮਕਥਾਵਣ੍ਣਨਾ ਨਿਟ੍ਠਿਤਾ.

ਅਧਮ੍ਮਕਮ੍ਮਦ੍ਵਾਦਸਕਕਥਾਦਿਵਣ੍ਣਨਾ

੪. ਅਪ੍ਪਟਿਞ੍ਞਾਯ ਕਤਨ੍ਤਿ ਵਤ੍ਥੁਂ ਵਾ ਆਪਤ੍ਤਿਂ ਵਾ ਅਸਮ੍ਪਟਿਚ੍ਛਾਪੇਤ੍ਵਾ ਕਤਂ. ਯੋ ਪਨ ਸਬ੍ਬੇਸਂ ਪਸ੍ਸਨ੍ਤਾਨਂ ਏਵ ਵਤ੍ਥੁਵੀਤਿਕ੍ਕਮਂ ਕਤ੍ਵਾ ਪਚ੍ਛਾ ਕਮ੍ਮਕਰਣਭਯੇਨ ‘‘ਨ ਕਰੋਮੀ’’ਤਿ ਮੁਸਾ ਵਦਤਿ, ਤਸ੍ਸ ਭਿਕ੍ਖੂਨਂ ਸਮ੍ਮੁਖੇ ਵੀਤਿਕ੍ਕਮਕਰਣਮੇਵ ਪਟਿਞ੍ਞਾ. ਤਥਤੋ ਜਾਨਨਤ੍ਥਮੇਵ ਪਟਿਞ੍ਞਾਯ ਕਰਣਂ ਅਨੁਞ੍ਞਾਤਂ. ਯਤ੍ਥ ਪਨ ਸਨ੍ਦੇਹੋ ਹੋਤਿ, ਤਤ੍ਥ ਸਮ੍ਪਟਿਚ੍ਛਾਪੇਤ੍ਵਾਵ ਕਤ੍ਤਬ੍ਬਨ੍ਤਿ ਗਹੇਤਬ੍ਬਂ.

‘‘ਪਾਰਾਜਿਕਾਪਤ੍ਤਿਯਾ ਵਾ’’ਤਿ ਇਦਂ ਲਿਙ੍ਗਨਾਸਨਨਿਮਿਤ੍ਤਤਾਯ ਪਾਰਾਜਿਕਸ੍ਸ ਕਮ੍ਮੇਨ ਅਤਿਕਿਚ੍ਛਨੀਯਤੋ ਵੁਤ੍ਤਂ. ‘‘ਸਙ੍ਘਾਦਿਸੇਸਾਪਤ੍ਤਿਯਾ ਵਾ’’ਤਿ ਇਦਂ ਪਨ ਪਰਿਵਾਸਾਦਿਨਿਸ੍ਸਾਰਣਕਮ੍ਮਸ੍ਸ ਆਵੇਣਿਕਸ੍ਸ ¶ ਵਿਜ੍ਜਮਾਨਤ੍ਤਾ ਵੁਤ੍ਤਂ. ਯਂ ਪਨ ਪਰਤੋ ‘‘ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ…ਪੇ… ਤਜ੍ਜਨੀਯਕਮ੍ਮਂ ਕਰੇਯ੍ਯਾ’’ਤਿ (ਚੂਲ਼ਵ. ੬) ਵੁਤ੍ਤਂ, ਤਂ ‘‘ਆਯਤਿਂ ਸਂਵਰੇ ਠਤ੍ਵਾ ਵੁਟ੍ਠਾਨਂ ਕਰੋਹੀ’’ਤਿ ਓਵਦਿਯਮਾਨਸ੍ਸ ਅਨਾਦਰਿਯਾਦਿਪਚ੍ਚਯਲਹੁਕਾਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਸੀਲਵਿਪਤ੍ਤਿਮੂਲਕਞ੍ਹਿ ਲਹੁਕਾਪਤ੍ਤਿਂ ਆਪਨ੍ਨੋ ਇਧ ਅਭੇਦੂਪਚਾਰੇਨ ‘‘ਅਧਿਸੀਲੇ ਸੀਲਵਿਪਨ੍ਨੋ’’ਤਿ ਵੁਤ੍ਤੋ ‘‘ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ’’ਤਿ ਏਤ੍ਥ ਵਿਯ.

ਯਥਾ ਚ ਦਿਟ੍ਠਿਂ ਗਹੇਤ੍ਵਾ ਵੋਹਰਨ੍ਤਸ੍ਸ ‘‘ਇਤੋ ਦਿਟ੍ਠਿਤੋ ਓਰਮਾਹੀ’’ਤਿ ਅਵਤ੍ਵਾ ਕਤਕਮ੍ਮਂ ਕੇਵਲਾਯ ਦਿਟ੍ਠਿਵਿਪਤ੍ਤਿਯਾ ਕਤਤ੍ਤਾ ਅਨਾਪਤ੍ਤਿਯਾ ਕਤਂ ਨਾਮ ਅਧਮ੍ਮਕਮ੍ਮਂ ਹੋਤਿ, ਏਵਂ ਸੀਲਵਿਪਤ੍ਤਿਂ ਆਪਜ੍ਜਿਤ੍ਵਾ ਲਜ੍ਜਿਧਮ੍ਮੇ ¶ ਓਕ੍ਕਨ੍ਤੇ ਯਥਾਧਮ੍ਮਂ ਵੁਟ੍ਠਾਯ ਸਂਵਰੇ ਠਾਤੁਕਾਮਸ੍ਸ ਕਤਂ ਤਜ੍ਜਨੀਯਾਦਿਕਮ੍ਮਂ ਕੇਵਲਾਯ ਸੀਲਵਿਪਤ੍ਤਿਯਾ ਕਤਤ੍ਤਾ ਅਦੇਸਨਾਗਾਮਿਨਿਯਾ ਕਤਂ ਨਾਮ ਅਧਮ੍ਮਕਮ੍ਮਂ ਹੋਤਿ. ਤੇਨੇਵ ਨਿਯਸ੍ਸਕਮ੍ਮੇਪਿ ‘‘ਅਪਿਸ੍ਸੁ ਭਿਕ੍ਖੂ ਪਕਤਾ ਪਰਿਵਾਸਂ ਦੇਨ੍ਤਾ’’ਤਿਆਦਿਨਾ ਸਂਵਰੇ ਅਟ੍ਠਾਨਮੇਵ ਕਮ੍ਮਨਿਮਿਤ੍ਤਭਾਵੇਨ ਵੁਤ੍ਤਂ. ਅਦਨ੍ਤਂ ਦਮਨਤ੍ਥਮੇਵ ਹਿ ਤਜ੍ਜਨੀਯਾਦਿਕਮ੍ਮਾਨਿ ਅਨੁਞ੍ਞਾਤਾਨੀਤਿ. ਕੇਚਿ ਪਨ ‘‘ਅਦੇਸਨਾਗਾਮਿਨਿਯਾਤਿ ਇਦਂ ਪਾਰਾਜਿਕਾਪਤ੍ਤਿਂਯੇਵ ਸਨ੍ਧਾਯ ਵੁਤ੍ਤਂ, ਨ ਸਙ੍ਘਾਦਿਸੇਸ’’ਨ੍ਤਿ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੪) ਵਦਨ੍ਤਿ, ਤਂ ਸੁਕ੍ਕਪਕ੍ਖੇ ‘‘ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤੀ’’ਤਿ ਇਮਿਨਾ ਵਚਨੇਨ ਵਿਰੁਜ੍ਝਤਿ. ਸਙ੍ਘਾਦਿਸੇਸਸ੍ਸਾਪਿ ਚ ਪਰਿਯਾਯਤੋ ਦੇਸਨਾਗਾਮਿਨਿਵੋਹਾਰੇ ਗਯ੍ਹਮਾਨੇ ‘‘ਆਪਤ੍ਤਿਯਾ ਕਤਂ ਹੋਤੀ’’ਤਿ ਵੁਤ੍ਤਵਾਰਤੋ ਇਮਸ੍ਸ ਵਾਰਸ੍ਸ ਵਿਸੇਸੋ ਨ ਸਿਯਾ, ਅਟ੍ਠਕਥਾਯਮ੍ਪੇਤ੍ਥ ਵਿਸੇਸਭਾਵੋ ਨ ਦਸ੍ਸਿਤੋ. ਤਸ੍ਮਾ ਵੁਤ੍ਤਨਯੇਨੇਵੇਤ੍ਥ ਅਧਿਪ੍ਪਾਯੋ ਗਹੇਤਬ੍ਬੋ.

੬. ਸਬ੍ਬਾਨਿਪੀਤਿ ਤਜ੍ਜਨੀਯਨਿਯਸ੍ਸਪਬ੍ਬਾਜਨੀਯਕਮ੍ਮਾਨਿ ਤੀਣਿਪਿ. ਅਞ੍ਞਕਮ੍ਮਸ੍ਸ ਵਤ੍ਥੁਨਾਤਿ ਤਜ੍ਜਨੀਯਤੋ ਅਞ੍ਞਸ੍ਸ ਕਮ੍ਮਸ੍ਸ ਵਤ੍ਥੁਨਾ ਅਞ੍ਞਕਮ੍ਮਕਰਣਂ ਨਾਮ ਕੋਚਿ ਦੋਸੋਪਿ ਨ ਹੋਤੀਤਿ ਅਧਿਪ੍ਪਾਯੋ. ਕਾਰਣਮਾਹ ‘‘ਕਸ੍ਮਾ’’ਤਿਆਦਿਨਾ.

ਅਧਮ੍ਮਕਮ੍ਮਦ੍ਵਾਦਸਕਕਥਾਦਿਵਣ੍ਣਨਾ ਨਿਟ੍ਠਿਤਾ.

੧੧. ਨਿਯਸ੍ਸਕਮ੍ਮੇ ਪਾਲ਼ਿਯਂ ਅਪਿਸ੍ਸੂਤਿ ਅਪਿਚਾਤਿ ਇਮਸ੍ਮਿਂ ਅਤ੍ਥੇ ਨਿਪਾਤਸਮੁਦਾਯੋ. ਨਿਸ੍ਸਾਯ ¶ ਤੇ ਵਤ੍ਥਬ੍ਬਨ੍ਤਿ ਏਤ੍ਥ ਕੇਚਿ ਕਲ੍ਯਾਣਮਿਤ੍ਤਾਯਤ੍ਤਵੁਤ੍ਤਿਤਂ ਸਨ੍ਧਾਯ ਵੁਤ੍ਤਨ੍ਤਿ ਵਦਨ੍ਤਿ, ਅਞ੍ਞੇ ਪਨ ਨਿਸ੍ਸਯਗ੍ਗਹਣਮੇਵਾਤਿ, ਉਭਯੇਨਪਿਸ੍ਸ ਸੇਰਿਵਿਹਾਰੋ ਨ ਵਟ੍ਟਤੀਤਿ ਦੀਪਿਤਨ੍ਤਿ ਦਟ੍ਠਬ੍ਬਂ.

੨੧. ਪਬ੍ਬਾਜਨੀਯਕਮ੍ਮੇ ‘‘ਪਬ੍ਬਾਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤੂ’’ਤਿ ਇਦਂ ਪਕ੍ਕਮਨਾਦਿਂ ਅਕਤ੍ਵਾ ਸਮ੍ਮਾਵਤ੍ਤਨ੍ਤਾਨਂ ਵਸੇਨ ਵੁਤ੍ਤਂ.

੩੩. ਪਟਿਸਾਰਣੀਯਕਮ੍ਮੇ ¶ ਨੇਵ ਭਿਕ੍ਖੁਵਚਨਂ, ਨ ਗਿਹਿਵਚਨਨ੍ਤਿ ਏਤ੍ਥ ਪਰਿਯਾਯਤੋਪਿ ਭਿਕ੍ਖੂ ਪਰਖੁਂਸਨਂ ਨ ਵਦਨ੍ਤਿ, ਗਹਟ੍ਠਾ ਪਨ ਸਰੂਪੇਨੇਵ ਅਕ੍ਕੋਸਿਤੁਂ ਸਮਤ੍ਥਾਪਿ ਉਪਕਾਰੀਸੁ ਅਕਾਰਣਂ ਏਵਰੂਪਂ ਨ ਵਦਨ੍ਤਿ, ਤ੍ਵਂ ਗਿਹਿਗੁਣਤੋਪਿ ਪਰਿਹੀਨੋਤਿ ਅਧਿਪ੍ਪਾਯੋ.

੩੯. ‘‘ਅਙ੍ਗਸਮਨ੍ਨਾਗਮੋ ਪੁਰਿਮੇਹਿ ਅਸਦਿਸੋ’’ਤਿ ਇਮਿਨਾ ਤਜ੍ਜਨੀਯਾਦੀਨਂ ਵੁਤ੍ਤਕਾਰਣਮਤ੍ਤੇਨ ਇਦਂ ਕਾਤੁਂ ਨ ਵਟ੍ਟਤੀਤਿ ਦੀਪੇਤਿ. ਇਧ ਵੁਤ੍ਤੇਨ ਪਨ ਗਿਹੀਨਂ ਅਲਾਭਾਯ ਪਰਿਸਕ੍ਕਨਾਦਿਨਾ ਅਙ੍ਗੇਨ ਤਾਨਿਪਿ ਕਾਤੁਂ ਵਟ੍ਟਤੀਤਿ ਗਹੇਤਬ੍ਬਂ. ਏਤ੍ਥ ਚ ‘‘ਸਦ੍ਧਂ ਪਸਨ੍ਨਂ ਦਾਯਕਂ ਕਾਰਕਂ ਸਙ੍ਘੁਪਟ੍ਠਾਕਂ ਹੀਨੇਨ ਖੁਂਸੇਤੀ’’ਤਿ ਵੁਤ੍ਤਤ੍ਤਾ ਤਾਦਿਸੇਸੁ ਗਿਹੀਸੁ ਖੁਂਸਨਾਦੀਹਿ ਗਿਹਿਪਟਿਸਂਯੁਤ੍ਤੇਹਿ ਏਵ ਅਙ੍ਗੇਹਿ ਕਮ੍ਮਾਰਹਤਾ, ਨ ਆਰਾਮਿਕਚੇਟਕਾਦੀਸੁ ਖੁਂਸਨਾਦੀਹਿ. ਤਤ੍ਥਾਪਿ ਦਾਯਕਾਦੀਸੁ ਖਮਾਪਿਤੇਸੁ ਕਮ੍ਮਾਰਹਤਾ ਨਤ੍ਥਿ, ਆਪਤ੍ਤਿ ਚ ਯਤ੍ਥ ਕਤ੍ਥਚਿ ਦੇਸੇਤੁਂ ਵਟ੍ਟਤਿ. ਯੋ ਚੇ ਤਿਕ੍ਖਤ੍ਤੁਂ ਖਮਾਪਿਯਮਾਨੋਪਿ ਨ ਖਮਤਿ, ਅਕਤਕਮ੍ਮੇਨਪਿ ਦਸ੍ਸਨੂਪਚਾਰੇ ਆਪਤ੍ਤਿ ਦੇਸੇਤਬ੍ਬਾ. ਸੋ ਚੇ ਕਾਲਕਤੋ ਹੋਤਿ, ਦੇਸਨ੍ਤਰਂ ਵਾ ਗਤੋ, ਗਤਦਿਸਾ ਨ ਞਾਯਤਿ, ਅਨ੍ਤਰਾਮਗ੍ਗੇ ਵਾ ਜੀਵਿਤਨ੍ਤਰਾਯੋ ਹੋਤਿ, ਕਤਕਮ੍ਮੇਨਪਿ ਅਕਤਕਮ੍ਮੇਨਪਿ ਸਙ੍ਘਮਜ੍ਝੇ ਯਥਾਭੂਤਂ ਵਿਞ੍ਞਾਪੇਤ੍ਵਾ ਖਮਾਪੇਤ੍ਵਾ ਆਪਤ੍ਤਿ ਦੇਸੇਤਬ੍ਬਾਤਿ ਵਦਨ੍ਤਿ. ਧਮ੍ਮਿਕਪਟਿਸ੍ਸਵਸ੍ਸ ਅਸਚ੍ਚਾਪਨੇ ਪਨ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ‘‘ਮਯਾ ਅਸਮਵੇਕ੍ਖਿਤ੍ਵਾ ਪਟਿਸ੍ਸਵਂ ਕਤ੍ਵਾ ਸੋ ਨ ਸਚ੍ਚਾਪਿਤੋ, ਤਂ ਮੇ ਖਮਥਾ’’ਤਿਆਦਿਨਾ ਖਮਾਪਨੇ ਵਚਨਕ੍ਕਮੋ ਞਾਪੇਤਬ੍ਬੋ.

੪੧. ਪਾਲ਼ਿਯਂ ਮਙ੍ਕੁਭੂਤੋ ਨਾਸਕ੍ਖਿ ਚਿਤ੍ਤਂ ਗਹਪਤਿਂ ਖਮਾਪੇਤੁਨ੍ਤਿ ਤਿਂਸਯੋਜਨਮਗ੍ਗਂ ਪੁਨ ਗਨ੍ਤ੍ਵਾਪਿ ਮਾਨਥਦ੍ਧਤਾਯ ਯਥਾਭੂਤਂ ਦੋਸਂ ਆਵਿਕਤ੍ਵਾ ਅਖਮਾਪਨੇਨ ‘‘ਨਾਹਂ ਖਮਾਮੀ’’ਤਿ ਤੇਨ ਪਟਿਕ੍ਖਿਤ੍ਤੋ ਮਙ੍ਕੁਭੂਤੋ ਖਮਾਪੇਤੁਂ ਨ ਸਕ੍ਖਿ, ਸੋ ਪੁਨਦੇਵ ਸਾਵਤ੍ਥਿਂ ਪਚ੍ਚਾਗਨ੍ਤ੍ਵਾਪਿ ਮਾਨਨਿਗ੍ਗਹਤ੍ਥਾਯੇਵ ਪੁਨਪਿ ਸਤ੍ਥਾਰਾ ਪੇਸਿਤੋ ਪੁਰਿਮਨਯੇਨੇਵ ਖਮਾਪੇਤੁਂ ਅਸਕ੍ਕੋਨ੍ਤੋ ਪੁਨਾਗਚ੍ਛਿ. ਅਥਸ੍ਸ ਭਗਵਾ ‘‘ਅਸਨ੍ਤਂ ਭਾਵਨਮਿਚ੍ਛੇਯ੍ਯਾ’’ਤਿਆਦਿਨਾਵ (ਧ. ਪ. ੭੩) ਧਮ੍ਮਂ ਦੇਸੇਤ੍ਵਾ ਮਾਨਨਿਮ੍ਮਥਨਂ ਕਤ੍ਵਾ ਅਨੁਦੂਤਦਾਨਂ ਅਨੁਞ੍ਞਾਸੀਤਿ ਦਟ੍ਠਬ੍ਬਂ.

੪੨. ‘‘ਨੋ ¶ ਚੇ ਖਮਤਿ…ਪੇ… ਆਪਤ੍ਤਿਂ ਦੇਸਾਪੇਤਬ੍ਬੋ’’ਤਿ ਵੁਤ੍ਤਤ੍ਤਾ ਪਗੇਵ ਗਹਟ੍ਠੋ ਖਮਤਿ ਚੇ, ਦਸ੍ਸਨੂਪਚਾਰੇ ਆਪਤ੍ਤਿਦੇਸਨਾਕਿਚ੍ਚਂ ਨਤ੍ਥੀਤਿ ਗਹੇਤਬ੍ਬਂ.

੪੬. ਉਕ੍ਖੇਪਨੀਯਕਮ੍ਮੇਸੁ ¶ ਤੀਸੁ ਅਰਿਟ੍ਠਵਤ੍ਥੁਸ੍ਮਿਂ ਆਪਤ੍ਤਿਂ ਆਰੋਪੇਤ੍ਵਾਤਿ ਵਿਸੁਂ ਸਙ੍ਘਮਜ੍ਝੇਵ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਜ੍ਜਨਪਚ੍ਚਯਾ ਦੁਕ੍ਕਟਂ, ਸਮਨੁਭਾਸਨਪਰਿਯੋਸਾਨੇ ਪਾਚਿਤ੍ਤਿਯਂ ਵਾ ਆਪਤ੍ਤਿਂ ਆਰੋਪੇਤ੍ਵਾ. ਏਤ੍ਥਾਪਿ ਕਮ੍ਮਵਾਚਾਯ ‘‘ਤਥਾਹਂ ਭਗਵਤਾ’’ਤਿਆਦਿ ਵਤ੍ਥੁਵਸੇਨ ਵੁਤ੍ਤਂ. ਯੇਨ ਯੇਨ ਪਕਾਰੇਨ ਦਿਟ੍ਠਿਗਤਿਕਾ ਵੋਹਰਿਂਸੁ, ਤੇਨ ਤੇਨ ਪਕਾਰੇਨ ਯੋਜੇਤ੍ਵਾ ਕਮ੍ਮਵਾਚਾ ਕਾਤਬ੍ਬਾ. ਗਹਣਾਕਾਰਂ ਪਨ ਵਿਨਾਪਿ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਪਾਪਿਕਂ ਦਿਟ੍ਠਿਗਤਂ ਉਪ੍ਪਨ੍ਨਂ, ਸੋ ਤਂ ਦਿਟ੍ਠਿਂ ਅਪ੍ਪਟਿਨਿਸ੍ਸਜ੍ਜਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲ’’ਨ੍ਤਿ ਏਵਂ ਸਾਮਞ੍ਞਤੋਪਿ ਕਮ੍ਮਵਾਚਂ ਕਾਤੁਂ ਵਟ੍ਟਤਿ.

੬੫. ‘‘ਯਂ ਦਿਟ੍ਠਿਂ ਨਿਸ੍ਸਾਯ ਭਣ੍ਡਨਾਦੀਨਿ ਕਰੋਤੀ’’ਤਿ ਇਮਿਨਾ ਦਿਟ੍ਠਿਂ ਨਿਸ੍ਸਾਯ ਉਪ੍ਪਨ੍ਨਾਨਿ ਏਵ ਭਣ੍ਡਨਾਦੀਨਿ ਇਧ ਅਧਿਪ੍ਪੇਤਾਨਿ, ਨ ਕੇਵਲਾਨੀਤਿ ਦਸ੍ਸੇਤਿ. ਯੋ ਪਨ ‘‘ਭਣ੍ਡਨਾਦੀਨਂ ਕਰਣੇ ਦੋਸੋ ਨਤ੍ਥੀ’’ਤਿ ਦਿਟ੍ਠਿਕੋ ਹੁਤ੍ਵਾ ਭਣ੍ਡਨਾਦਿਂ ਕਰੋਤਿ, ਸਾਪਿਸ੍ਸ ਦਿਟ੍ਠਿ ਏਵ ਹੋਤਿ, ਤਸ੍ਸਪਿ ਅਪ੍ਪਟਿਨਿਸ੍ਸਗ੍ਗੇ ਕਮ੍ਮਂ ਕਾਤੁਂ ਵਟ੍ਟਤਿ.

ਨਿਯਸ੍ਸਕਮ੍ਮਕਥਾਦਿਵਣ੍ਣਨਾ ਨਿਟ੍ਠਿਤਾ.

ਕਮ੍ਮਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੭੫. ਪਾਰਿਵਾਸਿਕਕ੍ਖਨ੍ਧਕੇ ¶ ¶ ਅਨ੍ਤਮਸੋ ਮੂਲਾਯਪਟਿਕਸ੍ਸਨਾਰਹਾਦੀਨਮ੍ਪੀਤਿ ਆਦਿ-ਸਦ੍ਦੇਨ ਮਾਨਤ੍ਤਾਰਹਮਾਨਤ੍ਤਚਾਰਿਕਅਬ੍ਭਾਨਾਰਹੇ ਸਙ੍ਗਣ੍ਹਾਤਿ. ਤੇ ਹਿ ਪਾਰਿਵਾਸਿਕਾਨਂ, ਪਾਰਿਵਾਸਿਕਾ ਚ ਤੇਸਂ ਪਕਤਤ੍ਤਟ੍ਠਾਨੇ ਏਵ ਤਿਟ੍ਠਨ੍ਤਿ. ਅਧੋਤਪਾਦਟ੍ਠਪਨਕਨ੍ਤਿ ਯਤ੍ਥ ਠਤ੍ਵਾ ਪਾਦੇ ਧੋਵਨ੍ਤਿ, ਤਾਦਿਸਂ ਦਾਰੁਫਲਕਖਣ੍ਡਾਦਿਂ. ਪਾਦਘਂਸਨਨ੍ਤਿ ਸਕ੍ਖਰਕਥਲਾਦਿਂ. ‘‘ਵਤ੍ਤਂ ਕਰੋਨ੍ਤੀ’’ਤਿ ਏਤ੍ਤਕਮਤ੍ਤਸ੍ਸੇਵ ਵੁਤ੍ਤਤ੍ਤਾ ਸਦ੍ਧਿਵਿਹਾਰਿਕਾਦੀਹਿਪਿ ਅਭਿਵਾਦਨਾਦਿਂ ਕਾਤੁਂ ਨ ਵਟ੍ਟਤਿ.

‘‘ਪਾਰਿਸੁਦ੍ਧਿਉਪੋਸਥੇ ਕਰਿਯਮਾਨੇ’’ਤਿ ਇਦਂ ਪਵਾਰਣਾਦਿਵਸੇਸੁ ਸਙ੍ਘੇ ਪਵਾਰੇਨ੍ਤੇ ਅਨੁਪਗਤਛਿਨ੍ਨਵਸ੍ਸਾਦੀਹਿ ਕਰਿਯਮਾਨਪਾਰਿਸੁਦ੍ਧਿਉਪੋਸਥਮ੍ਪਿ ਸਨ੍ਧਾਯ ਵੁਤ੍ਤਂ. ਅਤ੍ਤਨੋ ਪਾਲ਼ਿਯਾਤਿ ਨਵਕਾਨਂ ਪੁਰਤੋ.

‘‘ਪਾਰਿਵਾਸਿਕਸ੍ਸੇਵਾ’’ਤਿ ਇਦਂ ਅਬ੍ਭਾਨਾਰਹਪਰਿਯੋਸਾਨੇ ਸਬ੍ਬੇ ਗਰੁਕਟ੍ਠੇ ਸਨ੍ਧਾਯ ਵੁਤ੍ਤਂ. ਤੇਸਮ੍ਪਿ ਪਚ੍ਚੇਕਂ ਓਣੋਜਨਸ੍ਸ ਅਨੁਞ੍ਞਾਤਤ੍ਤਾ ਤਦਵਸੇਸਾ ਪਕਤਤ੍ਤਾ ਏਵ ਤਂ ਨ ਲਭਨ੍ਤਿ.

ਚਤੁਸ੍ਸਾਲਭਤ੍ਤਨ੍ਤਿ ਭੋਜਨਸਾਲਾਯ ਪਟਿਪਾਟਿਯਾ ਦਿਯ੍ਯਮਾਨਭਤ੍ਤਂ. ਹਤ੍ਥਪਾਸੇ ਠਿਤੇਨਾਤਿ ਦਾਯਕਸ੍ਸ ਹਤ੍ਥਪਾਸੇ ਪਟਿਗ੍ਗਹਣਰੁਹਨਟ੍ਠਾਨੇਤਿ ਅਧਿਪ੍ਪਾਯੋ. ਮਹਾਪੇਲ਼ਭਤ੍ਤੇਪੀਤਿ ਮਹਨ੍ਤੇਸੁ ਭਤ੍ਤਪਚ੍ਛਿਆਦਿਭਾਜਨੇਸੁ ਠਪੇਤ੍ਵਾ ਦਿਯ੍ਯਮਾਨਭਤ੍ਤੇਸੁਪਿ.

੭੬. ਪਾਪਿਟ੍ਠਤਰਾਤਿ ਪਾਰਾਜਿਕਾਪਤ੍ਤੀਤਿ ਉਕ੍ਕਂਸਵਸੇਨ ਵੁਤ੍ਤਂ. ਸਞ੍ਚਰਿਤ੍ਤਾਦਿਪਣ੍ਣਤ੍ਤਿਵਜ੍ਜਤੋ ਪਨ ਸੁਕ੍ਕਵਿਸ੍ਸਟ੍ਠਾਦਿਕਾ ਲੋਕਵਜ੍ਜਾਵ, ਤਤ੍ਥਾਪਿ ਸਙ੍ਘਭੇਦਾਦਿਕਾ ਪਾਪਿਟ੍ਠਤਰਾ ਏਵ.

‘‘ਕਮ੍ਮਨ੍ਤਿ ¶ ਪਾਰਿਵਾਸਿਕਕਮ੍ਮਵਾਚਾ’’ਤਿ ਏਤੇਨ ਕਮ੍ਮਭੂਤਾ ਵਾਚਾਤਿ ਕਮ੍ਮਵਾਚਾ-ਸਦ੍ਦਸ੍ਸ ਅਤ੍ਥੋਪਿ ਸਿਦ੍ਧੋਤਿ ਵੇਦਿਤਬ੍ਬੋ. ਸਵਚਨੀਯਨ੍ਤਿ ਏਤ੍ਥ ‘‘ਸਦੋਸ’’ਨ੍ਤਿ (ਸਾਰਤ੍ਥ. ਟੀ. ਚੂਲ਼ਵਗ੍ਗ. ੩.੭੬) ਅਤ੍ਥਂ ਵਦਤਿ. ਅਤ੍ਤਨੋ ਵਚਨੇ ਪਵਤ੍ਤਨਕਮ੍ਮਨ੍ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ, ‘‘ਮਾ ਪਕ੍ਕਮਾਹੀ’’ਤਿ ਵਾ ‘‘ਏਹਿ ਵਿਨਯਧਰਾਨਂ ਸਮ੍ਮੁਖੀਭਾਵ’’ਨ੍ਤਿ ਵਾ ¶ ਏਵਂ ਅਤ੍ਤਨੋ ਆਣਾਯ ਪਵਤ੍ਤਨਕਕਮ੍ਮਂ ਨ ਕਾਤਬ੍ਬਨ੍ਤਿ ਅਧਿਪ੍ਪਾਯੋ. ਏਵਞ੍ਹਿ ਕੇਨਚਿ ਸਵਚਨੀਯੇ ਕਤੇ ਅਨਾਦਰੇਨ ਅਤਿਕ੍ਕਮਿਤੁਂ ਨ ਵਟ੍ਟਤਿ, ਬੁਦ੍ਧਸ੍ਸ ਸਙ੍ਘਸ੍ਸ ਆਣਾ ਅਤਿਕ੍ਕਨ੍ਤਾ ਨਾਮ ਹੋਤਿ.

ਰਜੋਹਤਭੂਮੀਤਿ ਪਣ੍ਣਸਾਲਾਵਿਸੇਸਨਂ. ਪਚ੍ਚਯਨ੍ਤਿ ਵਸ੍ਸਾਵਾਸਿਕਚੀਵਰਂ. ਸੇਨਾਸਨਂ ਨ ਲਭਤੀਤਿ ਵਸ੍ਸਗ੍ਗੇਨ ਨ ਲਭਤਿ.

ਅਪਣ੍ਣਕਪਟਿਪਦਾਤਿ ਅਵਿਰਦ੍ਧਪਟਿਪਦਾ. ਸਚੇ ਵਾਯਮਨ੍ਤੋਪੀਤਿ ਏਤ੍ਥ ਅਵਿਸਯਭਾਵਂ ਞਤ੍ਵਾ ਅਵਾਯਮਨ੍ਤੋਪਿ ਸਙ੍ਗਯ੍ਹਤਿ.

੮੧. ਅਵਿਸੇਸੇਨਾਤਿ ਪਾਰਿਵਾਸਿਕੁਕ੍ਖਿਤ੍ਤਕਾਨਂ ਸਾਮਞ੍ਞੇਨ. ਪਞ੍ਚਵਣ੍ਣਚ੍ਛਦਨਬਦ੍ਧਟ੍ਠਾਨੇਸੂਤਿ ਪਞ੍ਚਪ੍ਪਕਾਰਚ੍ਛਦਨੇਹਿ ਛਨ੍ਨਟ੍ਠਾਨੇਸੁ.

ਓਬਦ੍ਧਨ੍ਤਿ ਉਟ੍ਠਾਨਾਦਿਬ੍ਯਾਪਾਰਪਟਿਬਦ੍ਧਂ. ਪੀਲ਼ਿਤਨ੍ਤਿ ਅਤ੍ਥੋ. ਮਞ੍ਚੇ ਵਾ ਪੀਠੇ ਵਾਤਿ ਏਤ੍ਥ ਵਾ-ਸਦ੍ਦੋ ਸਮੁਚ੍ਚਯਤ੍ਥੋ, ਤੇਨ ਤਟ੍ਟਿਕਾਚਮ੍ਮਖਣ੍ਡਾਦੀਸੁ ਦੀਘਾਸਨੇਸੁਪਿ ਨਿਸੀਦਿਤੁਂ ਨ ਵਟ੍ਟਤੀਤਿ ਦੀਪਿਤਂ ਹੋਤਿ.

ਨ ਵਤ੍ਤਭੇਦਦੁਕ੍ਕਟਨ੍ਤਿ ਵੁਡ੍ਢਤਰਸ੍ਸ ਜਾਨਨ੍ਤਸ੍ਸਾਪਿ ਵਤ੍ਤਭੇਦੇ ਦੁਕ੍ਕਟਂ ਨਤ੍ਥੀਤਿ ਦਸ੍ਸੇਤਿ. ‘‘ਵਤ੍ਤਂ ਨਿਕ੍ਖਿਪਾਪੇਤ੍ਵਾ’’ਤਿ ਇਦਂ ਪਾਰਿਵਾਸਾਦਿਮੇਵ ਸਨ੍ਧਾਯ ਵੁਤ੍ਤਂ.

ਪਾਰਿਵਾਸਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਪਾਰਿਵਾਸਿਕਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੯੭. ਸਮੁਚ੍ਚਯਕ੍ਖਨ੍ਧਕੇ ¶ ¶ ਵੇਦਯਾਮਹਨ੍ਤਿ ਜਾਨਾਪੇਮਿ ਅਹਂ, ਆਰੋਚੇਮੀਤਿਅਤ੍ਥੋ. ਅਨੁਭਵਾਮੀਤਿਪਿਸ੍ਸ ਅਤ੍ਥਂ ਵਦਨ੍ਤਿ. ਪੁਰਿਮਂ ਪਨ ਪਸਂਸਨ੍ਤਿ ਆਰੋਪਨਵਚਨਤ੍ਤਾ. ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਨ੍ਤਿ ਦੁਕ੍ਕਟਪਰਿਮੋਚਨਤ੍ਥਂ ਵੁਤ੍ਤਂ. ਕੇਚਿ ਪਨ ‘‘ਤਦਹੇਵ ਪੁਨ ਵਤ੍ਤਂ ਸਮਾਦਿਯਿਤ੍ਵਾ ਅਰੁਣਂ ਉਟ੍ਠਾਪੇਤੁਕਾਮਸ੍ਸ ਰਤ੍ਤਿਚ੍ਛੇਦਪਰਿਹਾਰਤ੍ਥਮ੍ਪੀ’’ਤਿ ਵਦਨ੍ਤਿ.

‘‘ਸਭਾਗਾ ਭਿਕ੍ਖੂ ਵਸਨ੍ਤੀ’’ਤਿ ਵੁਤ੍ਤਤ੍ਤਾ ਵਿਸਭਾਗਾਨਂ ਵਸਨਟ੍ਠਾਨੇ ਵਤ੍ਤਂ ਅਸਮਾਦਿਯਿਤ੍ਵਾ ਬਹਿ ਏਵ ਕਾਤੁਮ੍ਪਿ ਵਟ੍ਟਤੀਤਿ ਦਟ੍ਠਬ੍ਬਂ. ‘‘ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ’’ਤਿ ਇਦਂ ਵਿਹਾਰੇ ਭਿਕ੍ਖੂਨਂ ਸਜ੍ਝਾਯਾਦਿਸਦ੍ਦਸਵਨੂਪਚਾਰਵਿਜਹਨਤ੍ਥਂ ਵੁਤ੍ਤਂ. ‘‘ਮਹਾਮਗ੍ਗਤੋ ਓਕ੍ਕਮ੍ਮਾ’’ਤਿ ਇਦਂ ਮਗ੍ਗਪਟਿਪਨ੍ਨਾਨਂ ਭਿਕ੍ਖੂਨਂ ਉਪਚਾਰਾਤਿਕ੍ਕਮਨਤ੍ਥਂ ਵੁਤ੍ਤਂ. ਗੁਮ੍ਬੇਨ ਵਾਤਿਆਦਿ ਦਸ੍ਸਨੂਪਚਾਰਵਿਜਹਨਤ੍ਥਂ.

‘‘ਸੋਪਿ ਕੇਨਚਿ ਕਮ੍ਮੇਨ ਪੁਰੇ ਅਰੁਣੇ ਏਵ ਗਚ੍ਛਤੀ’’ਤਿ ਇਮਿਨਾ ਆਰੋਚਨਾਯ ਕਤਾਯ ਸਬ੍ਬੇਸੁਪਿ ਭਿਕ੍ਖੂਸੁ ਵਿਹਾਰਗਤੇਸੁ ਊਨੇ ਗਣੇ ਚਰਣਦੋਸੋ ਵਾ ਵਿਪ੍ਪਵਾਸਦੋਸੋ ਵਾ ਨ ਹੋਤਿ ਆਰੋਚਿਤਤ੍ਤਾ ਸਹਵਾਸਸ੍ਸਾਤਿ ਦਸ੍ਸੇਤਿ. ਤੇਨਾਹ ‘‘ਅਯਞ੍ਚਾ’’ ਤਿਆਦਿ. ਅਬ੍ਭਾਨਂ ਕਾਤੁਂ ਨ ਵਟ੍ਟਤੀਤਿ ਕਤਮ੍ਪਿ ਅਕਤਮੇਵ ਹੋਤੀਤਿ ਅਤ੍ਥੋ.

ਸੁਕ੍ਕਵਿਸ੍ਸਟ੍ਠਿਕਥਾਵਣ੍ਣਨਾ ਨਿਟ੍ਠਿਤਾ.

੧੦੨. ਸੁਦ੍ਧਸ੍ਸਾਤਿ ਸਭਾਗਸਙ੍ਘਾਦਿਸੇਸਂ ਅਨਾਪਨ੍ਨਸ੍ਸ, ਤਤੋ ਵੁਟ੍ਠਿਤਸ੍ਸ ਵਾ. ਅਞ੍ਞਸ੍ਮਿਨ੍ਤਿ ਸੁਦ੍ਧਨ੍ਤਪਰਿਵਾਸਵਸੇਨ ¶ ਆਪਤ੍ਤਿਵੁਟ੍ਠਾਨਤੋ ਅਞ੍ਞਸ੍ਮਿਂ ਆਪਤ੍ਤਿਵੁਟ੍ਠਾਨੇ. ਪਾਲ਼ਿਯਂ ‘‘ਪਟਿਕਸ੍ਸਿਤੋ ਸਙ੍ਘੇਨ ਉਦਾਯਿ ਭਿਕ੍ਖੁ ਅਨ੍ਤਰਾ ਏਕਿਸ੍ਸਾ ਆਪਤ੍ਤਿਯਾ…ਪੇ… ਮੂਲਾਯਪਟਿਕਸ੍ਸਨਾ’’ਤਿ ਇਦਂ ਕਰਣਵਸੇਨ ਵਿਪਰਿਣਾਮੇਤ੍ਵਾ ਮੂਲਾਯਪਟਿਕਸ੍ਸਨਾਯ ਪਟਿਕਸ੍ਸਿਤੋਤਿ ਯੋਜੇਤਬ੍ਬਂ. ਅਥ ਵਾ ‘‘ਮੂਲਾਯ ਪਟਿਕਸ੍ਸਨਾ ਖਮਤਿ ਸਙ੍ਘਸ੍ਸਾ’’ਤਿ ਉਤ੍ਤਰਪਦੇਨ ਸਹ ਪਚ੍ਚਤ੍ਤਵਸੇਨੇਵ ਯੋਜੇਤੁਮ੍ਪਿ ਵਟ੍ਟਤਿ.

‘‘ਉਦਾਯਿਂ ¶ ਭਿਕ੍ਖੁਂ ਅਨ੍ਤਰਾ ਏਕਿਸ੍ਸਾ ਆਪਤ੍ਤਿਯਾ…ਪੇ… ਮੂਲਾਯ ਪਟਿਕਸ੍ਸਿਤ੍ਵਾ’’ਤਿ ਏਤ੍ਥ ਅਨ੍ਤਰਾ ਏਕਿਸ੍ਸਾ ਆਪਤ੍ਤਿਯਾ ਹੇਤੁਭੂਤਾਯ ਉਦਾਯਿਂ ਭਿਕ੍ਖੁਂ ਮੂਲਾਯ ਪਟਿਕਸ੍ਸਿਤ੍ਵਾ ਮੂਲਦਿਵਸੇ ਆਕਡ੍ਢਿਤ੍ਵਾ ਤਸ੍ਸਾ ਅਨ੍ਤਰਾਪਤ੍ਤਿਯਾ ਸਮੋਧਾਨਪਰਿਵਾਸਂ ਦੇਤੂਤਿ ਯੋਜਨਾ. ਆਵਿਕਾਰਾਪੇਤ੍ਵਾ ਵਿਸ੍ਸਜ੍ਜੇਤਬ੍ਬੋਤਿ ਤਸ੍ਸ ਅਤੇਕਿਚ੍ਛਭਾਵਂ ਤੇਨੇਵ ਸਙ੍ਘਸ੍ਸ ਪਾਕਟਂ ਕਾਰੇਤ੍ਵਾ ਲਜ੍ਜਿਗਣਤੋ ਵਿਯੋਜਨਵਸੇਨ ਵਿਸ੍ਸਜ੍ਜੇਤਬ੍ਬੋ.

ਸਤਂ ਆਪਤ੍ਤਿਯੋਤਿ ਕਾਯਸਂਸਗ੍ਗਾਦਿਵਸੇਨ ਏਕਦਿਵਸੇ ਆਪਨ੍ਨਾ ਸਤਂ ਆਪਤ੍ਤਿਯੋ. ਦਸਸਤਨ੍ਤਿ ਸਹਸ੍ਸਾ ਆਪਤ੍ਤਿਯੋ. ਰਤ੍ਤਿਸਤਂ ਛਾਦਯਿਤ੍ਵਾਨਾਤਿ ਯੋਜੇਤਬ੍ਬੋ. ਸਬ੍ਬਪਰਿਵਾਸਕਮ੍ਮਵਾਚਾਵਸਾਨੇਤਿ ਹੇਟ੍ਠਾ ਦਸ੍ਸਿਤਾਨਂ ਦ੍ਵਿਨ੍ਨਂ ਸੁਦ੍ਧਨ੍ਤਪਰਿਵਾਸਾਨਂ, ਤਿਣ੍ਣਂ ਸਮੋਧਾਨਪਰਿਵਾਸਾਨਞ੍ਚਾਤਿ ਇਮੇਸਂ ਸਬ੍ਬੇਸਂ ਪਰਿਵਾਸਾਨਂ ਕਮ੍ਮਵਾਚਾਪਰਿਯੋਸਾਨੇ. ਪੁਰਿਮਨਯੇਨੇਵਾਤਿ ਪਟਿਚ੍ਛਨ੍ਨਪਰਿਵਾਸੇ ਵੁਤ੍ਤਨਯੇਨ.

ਵਿਹਾਰੂਪਚਾਰਤੋਪੀਤਿ ਬਹਿਗਾਮੇ ਭਿਕ੍ਖੂਨਂ ਵਿਹਾਰੂਪਚਾਰਤੋਪਿ. ‘‘ਦ੍ਵੇ ਲੇਡ੍ਡੁਪਾਤਾ ਅਤਿਕ੍ਕਮਿਤਬ੍ਬਾ’’ਤਿ ਇਦਂ ਭਿਕ੍ਖੂਨਂ ਸਵਨੂਪਚਾਰਾਤਿਕ੍ਕਮਨਂ ਵੁਤ੍ਤਂ. ਗਾਮਸ੍ਸਾਤਿ ਨ ਵੁਤ੍ਤਨ੍ਤਿ ਗਾਮਸ੍ਸ ਉਪਚਾਰਂ ਮੁਞ੍ਚਿਤੁਂ ਵਟ੍ਟਤੀਤਿ ਨ ਵੁਤ੍ਤਂ. ਤੇਨ ਗਾਮੂਪਚਾਰੇ ਠਿਤਾਪਿ ਤਤ੍ਥ ਦਸ੍ਸਨਸਵਨੂਪਚਾਰੇ ਅਤਿਕ੍ਕਮਿਤ੍ਵਾ ਠਿਤਾ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਤਸ੍ਸਾ ਰਤ੍ਤਿਚ੍ਛੇਦਂ ਨ ਕਰੋਨ੍ਤੀਤਿ ਦੀਪੇਤਿ.

ਅਨਿਕ੍ਖਿਤ੍ਤਵਤ੍ਤਭਿਕ੍ਖੂਨਂ ਵੁਤ੍ਤਨਯੇਨੇਵਾਤਿ ਉਪਚਾਰਸੀਮਾਯ ਪਵਿਟ੍ਠਾਨਂ ਵਸੇਨ ਰਤ੍ਤਿਚ੍ਛੇਦਂ ਸਨ੍ਧਾਯ ਵੁਤ੍ਤਂ. ਤਸ੍ਮਿਂ ਗਾਮੇਤਿ ਭਿਕ੍ਖੁਨੀਨਂ ਨਿਵਾਸਨਗਾਮੇ. ਅਤ੍ਤਾਨਂ ਦਸ੍ਸੇਤ੍ਵਾਤਿ ਯਥਾ ਆਰੋਚੇਤੁਂ ਸਕ੍ਕਾ, ਤਥਾ ਦਸ੍ਸੇਤ੍ਵਾ. ‘‘ਸਮ੍ਮਨ੍ਨਿਤ੍ਵਾ ਦਾਤਬ੍ਬਾ’’ਤਿ ਇਮਿਨਾ ਸਮ੍ਮਤਾਯ ਸਹਵਾਸੇਪਿ ਰਤ੍ਤਿਚ੍ਛੇਦੋ ਨ ਹੋਤੀਤਿ ਦਸ੍ਸੇਤਿ.

ਮੂਲਾਯਪਟਿਕਸ੍ਸਿਤਸ੍ਸਾਤਿ ਮੂਲਾਯਪਟਿਕਸ੍ਸਿਤਸ੍ਸ ਪੁਨ ਪਰਿਵੁਤ੍ਥਪਰਿਵਾਸਸ੍ਸਾਤਿ ਅਤ੍ਥੋ. ਤਿਸ੍ਸਨ੍ਨਨ੍ਤਿ ਮੂਲਾਪਤ੍ਤਿਯਾ ਸਹ ਦ੍ਵਿਨ੍ਨਂ ਅਨ੍ਤਰਾਪਤ੍ਤੀਨਞ੍ਚ.

੧੦੮. ਸਚੇ ¶ ਪਟਿਚ੍ਛਨ੍ਨਾਤਿ ਨਿਕ੍ਖਿਤ੍ਤਵਤ੍ਤੇਨਾਪਨ੍ਨਾਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਪਾਲ਼ਿਯਂ ਪਞ੍ਚਾਹਪ੍ਪਟਿਚ੍ਛਨ੍ਨਵਾਰੇ ਅਨ੍ਤਰਾਪਤ੍ਤਿਕਥਾਯਂ ‘‘ਏਵਞ੍ਚ ਪਨ, ਭਿਕ੍ਖਵੇ, ਛਾਰਤ੍ਤਂ ਮਾਨਤ੍ਤਂ ਦਾਤਬ੍ਬ’’ਨ੍ਤਿ ਇਦਂ ਮੂਲਾਯਪਟਿਕਸ੍ਸਨਾਕਮ੍ਮਵਾਚਾਨਨ੍ਤਰਮੇਵ ਦਾਤੁਂ ਵੁਤ੍ਤਂ ਨ ਹੋਤਿ. ਮੂਲਾਯਪਟਿਕਸ੍ਸਿਤਸ੍ਸ ਪਨ ਪਞ੍ਚਦਿਵਸਾਨਿ ਪਰਿਵਸਿਤ੍ਵਾ ਯਾਚਿਤਸ੍ਸ ¶ ਮਾਨਤ੍ਤਚਰਣਕਾਲੇ ਆਪਨ੍ਨਾਯ ਤਤਿਯਾਯ ਅਨ੍ਤਰਾਪਤ੍ਤਿਯਾ ਅਪ੍ਪਟਿਚ੍ਛਨ੍ਨਾਯ ਮਾਨਤ੍ਤਦਾਨਂ ਸਨ੍ਧਾਯ ਵੁਤ੍ਤਂ. ਏਵਞ੍ਚ ਦਿਨ੍ਨਮਾਨਤ੍ਤਸ੍ਸ ਏਕੇਨ ਛਾਰਤ੍ਤੇਨ ਪੁਬ੍ਬੇ ਦਿਨ੍ਨਮਾਨਤ੍ਤਾਹਿ ਤੀਹਿ ਆਪਤ੍ਤੀਹਿ ਸਹ ਚਤਸ੍ਸਨ੍ਨਮ੍ਪਿ ਆਪਤ੍ਤੀਨਂ ਮਾਨਤ੍ਤਂ ਚਿਣ੍ਣਮੇਵ ਹੋਤਿ. ਇਮਿਨਾ ਪਨ ਨਯੇਨ ਅਬ੍ਭਾਨਾਰਹਕਾਲੇ ਆਪਨ੍ਨਾਯ ਅਨ੍ਤਰਾਪਤ੍ਤਿਯਾ, ਪਕ੍ਖਪ੍ਪਟਿਚ੍ਛਨ੍ਨਵਾਰੇ ਅਨ੍ਤਰਾਪਤ੍ਤੀਸੁ ਚ ਪਟਿਪਜ੍ਜਨਂ ਵੇਦਿਤਬ੍ਬਂ. ‘‘ਏਕਾਹਪ੍ਪਟਿਚ੍ਛਨ੍ਨਾਦਿਵਸੇਨ ਪਞ੍ਚਾ’’ਤਿ ਇਦਂ ਏਕਾਹਪ੍ਪਟਿਚ੍ਛਨ੍ਨਾਦੀਨਂ ਚਤੁਨ੍ਨਂ ਪਚ੍ਚੇਕਪਰਿਵਾਸਦਾਨਮਾਨਤ੍ਤਦਾਨਅਬ੍ਭਾਨਾਨਿ ਏਕੇਕਂ ਕਤ੍ਵਾ ਵੁਤ੍ਤਂ. ‘‘ਅਨ੍ਤਰਾਪਤ੍ਤਿਵਸੇਨ ਚਤਸ੍ਸੋ’’ਤਿ ਇਦਮ੍ਪਿ ਮਾਨਤ੍ਤਦਾਨਅਬ੍ਭਾਨਾਨਿ ਤਸ੍ਮਿਂ ਤਸ੍ਮਿਂ ਮੂਲਾਯਪਟਿਕਸ੍ਸਨੇ ਏਕਤ੍ਤਂ ਆਰੋਪੇਤ੍ਵਾ ਵੁਤ੍ਤਂ.

ਪਟਿਚ੍ਛਨ੍ਨਪਰਿਵਾਸਕਥਾਵਣ੍ਣਨਾ ਨਿਟ੍ਠਿਤਾ.

੧੨੫. ‘‘ਯਸ੍ਮਾ ਪਟਿਚ੍ਛਨ੍ਨਾ ਅਨ੍ਤਰਾਪਤ੍ਤੀ’’ਤਿ ਇਦਂ ਸਮੋਧਾਨਪਰਿਵਾਸਦਾਨਸ੍ਸ ਕਾਰਣਵਚਨਂ, ਨ ਪਨ ਚਿਣ੍ਣਪਰਿਵੁਤ੍ਥਦਿਵਸਾਨਂ ਮਕ੍ਖਿਤਭਾਵਸ੍ਸ, ਅਪ੍ਪਟਿਚ੍ਛਨ੍ਨਾਯ ਅਨ੍ਤਰਾਪਤ੍ਤਿਯਾ ਮੂਲਾਯਪਟਿਕਸ੍ਸਨੇ ਕਤੇਪਿ ਤੇਸਂ ਮਕ੍ਖਿਤਭਾਵਸਮ੍ਭਵਤੋ. ਤਸ੍ਮਾ ‘‘ਮਾਨਤ੍ਤਚਿਣ੍ਣਦਿਵਸਾਪਿ ਪਰਿਵੁਤ੍ਥਦਿਵਸਾਪਿ ਸਬ੍ਬੇ ਮਕ੍ਖਿਤਾਵ ਹੋਨ੍ਤੀ’’ਤਿ ਇਮਸ੍ਸਾਨਨ੍ਤਰਂ ‘‘ਸਮੋਧਾਨਪਰਿਵਾਸੋ ਚਸ੍ਸ ਦਾਤਬ੍ਬੋ’’ਤਿ ਏਵਮੇਤ੍ਥ ਯੋਜਨਾ ਕਾਤਬ੍ਬਾ. ਤੇਨਾਹ ‘‘ਤੇਨੇਵਾ’’ਤਿਆਦਿ.

ਸਮੋਧਾਨਪਰਿਵਾਸਕਥਾਵਣ੍ਣਨਾ ਨਿਟ੍ਠਿਤਾ.

੧੩੪. ‘‘ਏਕਾਪਤ੍ਤਿਮੂਲਕਞ੍ਚਾ’’ਤਿ ਇਮਿਨਾ ‘‘ਏਕਾ ਆਪਤ੍ਤਿ ਏਕਾਹਪ੍ਪਟਿਚ੍ਛਨ੍ਨਾ, ਏਕਾ ਆਪਤ੍ਤਿ ਦ੍ਵੀਹਪ੍ਪਟਿਚ੍ਛਨ੍ਨਾ’’ਤਿਆਦਿਨਯਂ ਦਸ੍ਸੇਤਿ. ਅਪ੍ਪਟਿਚ੍ਛਨ੍ਨਭਾਵਂ ਦਸ੍ਸੇਤੁਨ੍ਤਿ ਅਜਾਨਨਾਦਿਨਾ ਪਟਿਚ੍ਛਨ੍ਨਾਯਪਿ ਆਪਤ੍ਤਿਯਾ ਮਾਨਤ੍ਤਾਰਹਤਾਵਚਨੇਨ ਅਪ੍ਪਟਿਚ੍ਛਨ੍ਨਭਾਵਂ ਦਸ੍ਸੇਤੁਂ. ‘‘ਏਕਸ੍ਸ, ਆਵੁਸੋ, ਮਾਸਸ੍ਸ ਭਿਕ੍ਖੁ ਮਾਨਤ੍ਤਾਰਹੋ’’ਤਿ ¶ (ਚੂਲ਼ਵ. ੧੫੩) ਹਿ ਵੁਤ੍ਤਂ. ਏਤ੍ਥ ਏਕਸ੍ਸ ਅਜਾਨਨਪਟਿਚ੍ਛਨ੍ਨਮਾਸਸ੍ਸ ¶ ਪਰਿਵਾਸਾਰਹੋ ਨ ਹੋਤਿ, ਕੇਵਲਂ ਆਪਤ੍ਤਿਯਾ ਅਪ੍ਪਟਿਚ੍ਛਨ੍ਨਤ੍ਤਾ ਮਾਨਤ੍ਤਾਰਹੋ ਹੋਤੀਤਿ ਅਧਿਪ੍ਪਾਯੋ. ਪਾਲ਼ਿਯਂ ਮਕ੍ਖਧਮ੍ਮੋਤਿ ਮਦ੍ਦਿਤੁਕਾਮਤਾ. ਸਙ੍ਘਾਦਿਸੇਸਾਨਂ ਪਰਿਵਾਸਦਾਨਾਦਿਸਬ੍ਬਵਿਨਿਚ੍ਛਯਸ੍ਸ ਸਮੁਚ੍ਚਯਤ੍ਤਾ ਪਨੇਸ ਸਮੁਚ੍ਚਯਕ੍ਖਨ੍ਧਕੋਤਿ ਵੁਤ੍ਤੋਤਿ ਵੇਦਿਤਬ੍ਬੋ.

ਅਗ੍ਘਸਮੋਧਾਨਪਰਿਵਾਸਕਥਾਵਣ੍ਣਨਾ ਨਿਟ੍ਠਿਤਾ.

ਸਮੁਚ੍ਚਯਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੧੯੫. ਸਮਥਕ੍ਖਨ੍ਧਕੇ ¶ ¶ ਖੀਣਾਸਵਸ੍ਸ ਵਿਪੁਲਸਤਿਂ ਨਿਸ੍ਸਾਯ ਦਾਤਬ੍ਬੋ ਵਿਨਯੋ ਚੋਦਨਾਦਿਅਸਾਰੁਪ੍ਪਾਨਂ ਵਿਨਯਨੁਪਾਯੋ ਸਤਿਵਿਨਯੋ.

੧੯੬. ਚਿਤ੍ਤਵਿਪਰਿਯਾਸਕਤੋਤਿ ਕਤਚਿਤ੍ਤਵਿਪਰਿਯਾਸੋ. ਗਗ੍ਗਂ ਭਿਕ੍ਖੁਂ…ਪੇ… ਚੋਦੇਨ੍ਤੀਤਿ ਏਤ੍ਥ ਪਨ ਉਮ੍ਮਤ੍ਤਕਸ੍ਸ ਇਦਂ ਉਮ੍ਮਤ੍ਤਕਂ, ਅਜ੍ਝਾਚਿਣ੍ਣਂ. ਤਦੇਵ ਚਿਤ੍ਤਵਿਪਰਿਯਾਸੇਨ ਕਤਨ੍ਤਿ ਚਿਤ੍ਤਵਿਪਰਿਯਾਸਕਤਂ. ਤੇਨ ਉਮ੍ਮਤ੍ਤਕੇਨ ਚਿਤ੍ਤਵਿਪਰਿਯਾਸਕਤੇਨ ਅਜ੍ਝਾਚਿਣ੍ਣੇਨ ਅਨਾਚਾਰੇਨ ਆਪਨ੍ਨਾਯ ਆਪਤ੍ਤਿਯਾ ਗਗ੍ਗਂ ਭਿਕ੍ਖੁਂ ਚੋਦੇਨ੍ਤੀਤਿ ਏਵਮਤ੍ਥੋ ਦਟ੍ਠਬ੍ਬੋ. ਪਠਮਂ ਮੂਲ਼੍ਹੋ ਹੁਤ੍ਵਾ ਪਚ੍ਛਾ ਅਮੂਲ਼੍ਹਭਾਵਂ ਉਪਗਤਸ੍ਸ ਦਾਤਬ੍ਬੋ ਵਿਨਯੋ ਅਮੂਲ਼੍ਹਵਿਨਯੋ.

੨੦੨. ਧਮ੍ਮਵਾਦੀਨਂ ਯੇਭੁਯ੍ਯਭਾਵਸਮ੍ਪਾਦਿਕਾ ਕਿਰਿਯਾ ਯੇਭੁਯ੍ਯਸਿਕਾਤਿ ਇਮਸ੍ਮਿਂ ਅਤ੍ਥੇ ਸ-ਕਾਰਾਗਮਸਹਿਤੋ ਇਕ-ਪਚ੍ਚਯਨ੍ਤੋਯਂ ਸਦ੍ਦੋਤਿ ਦਸ੍ਸੇਤੁਂ ਆਹ ‘‘ਯਸ੍ਸਾ’’ਤਿਆਦਿ. ਤਤ੍ਥ ਯਸ੍ਸਾ ਕਿਰਿਯਾਯਾਤਿ ਗੂਲ਼੍ਹਕਵਿਵਟ੍ਟਕਾਦਿਨਾ ਸਲਾਕਗ੍ਗਾਹਾਪਕਕਿਰਿਯਾਯ. ਯੇਭੁਯ੍ਯਭਾਵਂ ਨਿਸ੍ਸਿਤਸਮਥਕਿਰਿਯਾ ਯੇਭੁਯ੍ਯਸਿਕਾਤਿ ਏਵਂ ਯੇਭੁਯ੍ਯਸਿਕਾਸਦ੍ਦਸ੍ਸ ਅਤ੍ਥੋ ਗਹੇਤਬ੍ਬੋ. ਏਵਞ੍ਹਿ ਅਯਂ ਅਧਿਕਰਣਸਮਥੋ ਨਾਮ ਹੋਤਿ. ਯਥਾਵੁਤ੍ਤਸਲਾਕਗ੍ਗਾਹੇਨ ਹਿ ਧਮ੍ਮਵਾਦੀਨਂ ਯੇਭੁਯ੍ਯਭਾਵੇ ਸਿਦ੍ਧੇ ਪਚ੍ਛਾ ਤਂ ਯੇਭੁਯ੍ਯਭਾਵਂ ਨਿਸ੍ਸਾਯੇਵ ਅਧਿਕਰਣਵੂਪਸਮੋ ਹੋਤਿ, ਨ ਧਮ੍ਮਵਾਦੀਨਂ ਬਹੁਤਰਭਾਵਸਾਧਕਕਿਰਿਯਾਮਤ੍ਤੇਨ.

੨੦੭. ‘‘ਸੇਸਮੇਤ੍ਥ ਤਜ੍ਜਨੀਯਾਦੀਸੁ ਵੁਤ੍ਤਨਯਮੇਵਾ’’ਤਿ ਏਤੇਨ ਤਜ੍ਜਨੀਯਾਦਿਸਤ੍ਤਕਮ੍ਮਾਨਿ ਵਿਯ ਇਦਮ੍ਪਿ ਤਸ੍ਸਪਾਪਿਯਸਿਕਾਕਮ੍ਮਂ ਅਸੁਚਿਭਾਵਾਦਿਦੋਸਯੁਤ੍ਤਸ੍ਸ, ਸਙ੍ਘਸ੍ਸ ਚ ਵਿਨਿਚ੍ਛਯੇ ਅਤਿਟ੍ਠਮਾਨਸ੍ਸ ਕਤ੍ਤਬ੍ਬਂ ਵਿਸੁਂ ਏਕਂ ਨਿਗ੍ਗਹਕਮ੍ਮਨ੍ਤਿ ਦਸ੍ਸੇਤਿ. ਏਤਸ੍ਮਿਞ੍ਹਿ ਨਿਗ੍ਗਹਕਮ੍ਮੇ ਕਤੇ ਸੋ ਪੁਗ੍ਗਲੋ ‘‘ਅਹਂ ¶ ਸੁਦ੍ਧੋ’’ਤਿ ਅਤ੍ਤਨੋ ਸੁਦ੍ਧਿਯਾ ਸਾਧਨਤ੍ਥਂ ਸਙ੍ਘਮਜ੍ਝਂ ਓਤਰਿਤੁਂ, ਸਙ੍ਘੋ ਚਸ੍ਸ ਵਿਨਿਚ੍ਛਯਂ ਦਾਤੁਂ ਨ ਲਭਤਿ, ਤਂ ਕਮ੍ਮਕਰਣਮਤ੍ਤੇਨੇਵ ਚ ਤਂ ਅਧਿਕਰਣਂ ਵੂਪਸਨ੍ਤਂ ਹੋਤਿ.

ਕਥਂ ਪਨੇਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭਤੀਤਿ? ਕੇਚਿ ਪਨੇਤ੍ਥ ‘‘ਸੋ ਤਥਾ ਨਿਗ੍ਗਹਿਤੋ ਨਿਗ੍ਗਹਿਤੋਵ ਹੋਤਿ, ਓਸਾਰਣਂ ਨ ਲਭਤਿ. ਤੇਨੇਵ ਪਾਲ਼ਿਯਂ ¶ ਓਸਾਰਣਾ ਨ ਵੁਤ੍ਤਾ’’ਤਿ ਵਦਨ੍ਤਿ. ਅਞ੍ਞੇ ਪਨ ‘‘ਪਾਲ਼ਿਯਂ ਨ ਉਪਸਮ੍ਪਾਦੇਤਬ੍ਬਨ੍ਤਿਆਦਿਨਾ ਸਮ੍ਮਾਵਤ੍ਤਨਸ੍ਸ ਵੁਤ੍ਤਤ੍ਤਾ ਸਮ੍ਮਾਵਤ੍ਤਿਤ੍ਵਾ ਲਜ੍ਜਿਧਮ੍ਮੇ ਓਕ੍ਕਨ੍ਤਸ੍ਸ ਓਸਾਰਣਾ ਅਵੁਤ੍ਤਾਪਿ ਤਜ੍ਜਨੀਯਾਦੀਸੁ ਵਿਯ ਨਯਤੋ ਕਮ੍ਮਵਾਚਂ ਯੋਜੇਤ੍ਵਾ ਓਸਾਰਣਾ ਕਾਤਬ੍ਬਾ ਏਵਾ’’ਤਿ ਵਦਨ੍ਤਿ, ਇਦਂ ਯੁਤ੍ਤਂ. ਤੇਨੇਵ ਅਟ੍ਠਕਥਾਯਂ ਵਕ੍ਖਤਿ ‘‘ਸਚੇ ਸੀਲਵਾ ਭਵਿਸ੍ਸਤਿ, ਵਤ੍ਤਂ ਪਰਿਪੂਰੇਤ੍ਵਾ ਪਟਿਪ੍ਪਸ੍ਸਦ੍ਧਿਂ ਲਭਿਸ੍ਸਤਿ. ਨੋ ਚੇ, ਤਥਾਨਾਸਿਤਕੋਵ ਭਵਿਸ੍ਸਤੀ’’ਤਿ (ਚੂਲ਼ਵ. ਅਟ੍ਠ. ੨੩੮). ਤਸ੍ਸਪਾਪਿਯਸਿਕਾਕਮ੍ਮਨ੍ਤਿ ਚ ਅਲੁਤ੍ਤਸਮਾਸੋਯੇਵ. ਤੇਨਾਹ ‘‘ਇਦਂ ਹੀ’’ਤਿ ਆਦਿ.

ਸਤਿਵਿਨਯਕਥਾਦਿਵਣ੍ਣਨਾ ਨਿਟ੍ਠਿਤਾ.

੨੧੫. ਵਿਰੂਪਤੋ ਵਿਪਰਿਣਾਮਟ੍ਠੇਨ ਚਿਤ੍ਤਂ ਦੁਕ੍ਖਂ ਵਿਪਚ੍ਚਤੀਤਿ ਆਹ ‘‘ਚਿਤ੍ਤਦੁਕ੍ਖਤ੍ਥਂ ਵੋਹਾਰੋ’’ਤਿਆਦਿ. ਉਪਵਦਨਾਤਿ ਚੋਦਨਾ. ਤਤ੍ਥੇਵਾਤਿ ਅਨੁਵਦਨੇ.

ਆਦਿਤੋ ਪਟ੍ਠਾਯ ਚ ਤਸ੍ਸ ਤਸ੍ਸ ਕਮ੍ਮਸ੍ਸ ਵਿਞ੍ਞਾਤਤ੍ਤਾਤਿ ਵਿਤ੍ਥਾਰਤੋ ਆਗਤਕਮ੍ਮਵਗ੍ਗਸ੍ਸ ਆਦਿਤੋ ਪਟ੍ਠਾਯ ਵਣ੍ਣਨਾਮੁਖੇਨ ਵਿਞ੍ਞਾਤਤ੍ਤਾ ਵਿਨਿਚ੍ਛਯੋ ਭਵਿਸ੍ਸਤੀਤਿ ਯੋਜਨਾ.

੨੧੬. ਪਾਲ਼ਿਯਂ ਅਜ੍ਝਤ੍ਤਂ ਵਾਤਿ ਅਤ੍ਤਨਿ ਵਾ ਅਤ੍ਤਨੋ ਪਰਿਸਾਯ ਵਾ. ਬਹਿਦ੍ਧਾ ਵਾਤਿ ਪਰਸ੍ਮਿਂ ਵਾ ਪਰਸ੍ਸ ਪਰਿਸਾਯ ਵਾ. ਅਨਵਸ੍ਸਵਾਯਾਤਿ ਅਨੁਪ੍ਪਾਦਾਯ.

੨੨੦. ‘‘ਵਿਵਾਦਾਧਿਕਰਣਂ ਕੁਸਲਂ ਅਕੁਸਲਂ ਅਬ੍ਯਾਕਤ’’ਨ੍ਤਿ ਇਦਂ ਪੁਚ੍ਛਾਵਚਨਂ. ਵਿਵਾਦਾਧਿਕਰਣਂ ਸਿਯਾ ਕੁਸਲਨ੍ਤਿਆਦਿ ਵਿਸਜ੍ਜਨਂ. ਏਸ ਨਯੋ ਸੇਸੇਸੁਪਿ.

੨੨੨. ਸਮ੍ਮੁਤਿਸਭਾਵਾਯਪਿ ਆਪਤ੍ਤਿਯਾ ਕਾਰਣੂਪਚਾਰੇਨ ਅਕੁਸਲਾਬ੍ਯਾਕਤਭਾਵੇਨ ਵੁਚ੍ਚਮਾਨੇ ਕੁਸਲਸ੍ਸਾਪਿ ਆਪਤ੍ਤਿਕਾਰਣਤ੍ਤਾ ਤਦੁਪਚਾਰੇਨ ‘‘ਆਪਤ੍ਤਾਧਿਕਰਣਂ ਸਿਯਾ ਕੁਸਲ’’ਨ੍ਤਿ ਵਤ੍ਤਬ੍ਬਂ ਭਵੇਯ੍ਯ ¶ , ਤਥਾ ¶ ਅਵਤ੍ਵਾ ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਏਵਂਵਚਨਸ੍ਸ ਕਾਰਣਂ ਦਸ੍ਸੇਤੁਂ ‘‘ਏਤ੍ਥ ਸਨ੍ਧਾਯਭਾਸਿਤਵਸੇਨ ਅਤ੍ਥੋ ਵੇਦਿਤਬ੍ਬੋ’’ਤਿ ਵੁਤ੍ਤਂ. ਏਤ੍ਥ ਚਾਯਮਧਿਪ੍ਪਾਯੋ – ਯਦਿ ਹਿ ਆਪਤ੍ਤਿ ਨਾਮ ਪਰਮਤ੍ਥਧਮ੍ਮਸਭਾਵਾ ਭਵੇਯ੍ਯ, ਤਦਾ ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲ’’ਨ੍ਤਿਆਦਿਵਚਨਂ ਯੁਜ੍ਜੇਯ੍ਯ. ਯਸ੍ਮਾ ਦੁਟ੍ਠਦੋਸਸਿਕ੍ਖਾਪਦਟ੍ਠਕਥਾਦੀਸੁ ਦਸ੍ਸਿਤਦੋਸਪ੍ਪਸਙ੍ਗਤੋ ਪਰਮਤ੍ਥਸਭਆਵਤਾ ਨ ਯੁਤ੍ਤਾ, ਏਕਨ੍ਤਸਮ੍ਮੁਤਿਸਭਾਵਾ ਏਵ ਸਾ ਹੋਤਿ, ਤਸ੍ਮਾ ‘‘ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’’ਨ੍ਤਿਪਿ ਨਿਪ੍ਪਰਿਯਾਯਤੋ ਨ ਵਤ੍ਤਬ੍ਬਾ. ਯਦਿ ਪਨ ਅਕੁਸਲਅਬ੍ਯਾਕਤਧਮ੍ਮਸਮੁਟ੍ਠਿਤਤ੍ਤਮੇਵ ਉਪਾਦਾਯ ਪਰਿਯਾਯਤੋ ‘‘ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’’ਨ੍ਤਿ ਵੁਤ੍ਤਂ. ਤਦਾ ਕੁਸਲਧਮ੍ਮਸਮਉਟ੍ਠਿਤਤ੍ਤਮ੍ਪਿ ਉਪਾਦਾਯ ਪਰਿਯਾਯਤੋ ‘‘ਆਪਤ੍ਤਾਧਿਕਰਣਂ ਸਿਯਾ ਕੁਸਲ’’ਨ੍ਤਿਪਿ ਵਤ੍ਤਬ੍ਬਂ ਭਵੇਯ੍ਯ. ਯਤੋ ਚੇਤਂ ਵਚਨਂ ਆਪਤ੍ਤਿਯਾ ਅਕੁਸਲਾਬ੍ਯਾਕਤੂਪਚਾਰਾਰਹਤ੍ਤਸ੍ਸ ਕੁਸਲੂਪਚਾਰਾਨਾਰਹਤ੍ਤਸ੍ਸ ਵਿਸੁਂ ਕਾਰਣਸਬ੍ਭਾਵਂ ਸਨ੍ਧਾਯ ਭਾਸਿਤਂ, ਤਸ੍ਮਾ ਯਂ ਤਂ ਕਾਰਣਵਿਸੇਸਂ ਸਨ੍ਧਾਯ ਇਦਂ ਭਾਸਿਤਂ, ਤਸ੍ਸ ਵਸੇਨੇਵੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਇਦਾਨਿ ਪਨ ਯੋ ਅਙ੍ਗਪ੍ਪਹੋਨਕਚਿਤ੍ਤਮੇਵ ਸਨ੍ਧਾਯ ਆਪਤ੍ਤਿਯਾ ਅਕੁਸਲਾਦਿਭਾਵੋ ਵੁਤ੍ਤੋ, ਨਾਞ੍ਞਂ ਵਿਸੇਸਕਾਰਣਂ ਸਨ੍ਧਾਯਾਤਿ ਗਣ੍ਹੇਯ੍ਯ, ਤਸ੍ਸ ਗਾਹੇ ਦੋਸਂ ਦਸ੍ਸੇਨ੍ਤੋ ‘‘ਯਸ੍ਮਿਂ ਹੀ’’ਤਿਆਦਿਮਾਹ. ਤਤ੍ਥ ਪਥਵੀਖਣਨਾਦਿਕੇਤਿ ਪਥਵੀਖਣਨਾਦਿਨਿਮਿਤ੍ਤੇ ਪਣ੍ਣਤ੍ਤਿਵਜ੍ਜੇ. ਆਪਤ੍ਤਾਧਿਕਰਣੇ ਕੁਸਲਚਿਤ੍ਤਂ ਅਙ੍ਗਨ੍ਤਿ ਪਣ੍ਣਤ੍ਤਿਂ ਅਜਾਨਿਤ੍ਵਾ ਕੁਸਲਚਿਤ੍ਤੇਨ ਚੇਤਿਯਙ੍ਗਣਾਦੀਸੁ ਭੂਮਿਸੋਧਨਾਦਿਵਸੇਨ ਪਥਵੀਭੂਤਗਾਮਵਿਕੋਪਨਾਦਿਕਾਲੇ ਕੁਸਲਚਿਤ੍ਤਂ ਕਾਰਣਂ ਹੋਤਿ. ਤਸ੍ਮਿਂ ਸਤੀਤਿ ਤਸ੍ਮਿਂ ਆਪਤ੍ਤਾਧਿਕਰਣੇ ਵਿਜ੍ਜਮਾਨੇ ਕੁਸਲਚਿਤ੍ਤਸਮੁਟ੍ਠਿਤਤ੍ਤੇਨ ਕੁਸਲਵੋਹਾਰਾਰਹਾਯ ਆਪਤ੍ਤਿਯਾ ਵਿਜ੍ਜਮਾਨਾਯਾਤਿ ਅਧਿਪ੍ਪਾਯੋ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੨੨੨) ਪਨ ‘‘ਤਸ੍ਮਿਂ ਸਤੀ’’ਤਿ ਇਮਸ੍ਸ ‘‘ਤਸ੍ਮਿਂ ਕੁਸਲਚਿਤ੍ਤੇ ਆਪਤ੍ਤਿਭਾਵੇਨ ਗਹਿਤੇ’’ਤਿ ਅਤ੍ਥੋ ਵੁਤ੍ਤੋ, ਤਂ ਨ ਯੁਜ੍ਜਤਿ ‘‘ਯਸ੍ਮਿ’’ਨ੍ਤਿ ਯ-ਸਦ੍ਦੇਨ ਪਰਾਮਟ੍ਠਸ੍ਸੇਵ ਆਪਤ੍ਤਾਧਿਕਰਣਸ੍ਸ ‘‘ਤਸ੍ਮਿ’’ਨ੍ਤਿ ਪਰਾਮਸਿਤਬ੍ਬਤੋ.

ਨ ਸਕ੍ਕਾ ਵਤ੍ਤੁਨ੍ਤਿ ਯਦਿ ਸਮ੍ਮੁਤਿਸਭਾਵਾਯਪਿ ਆਪਤ੍ਤਿਯਾ ਅਕੁਸਲਾਦਿਸਮੁਟ੍ਠਿਤਤ੍ਤੇਨ ਅਕੁਸਲਾਦਿਵੋਹਾਰੋ ਕਰੀਯਤਿ, ਤਦਾ ਕੁਸਲਵੋਹਾਰੋਪਿ ਕਤ੍ਤਬ੍ਬੋਤਿ ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਨ ਸਕ੍ਕਾ ਵਤ੍ਤੁਂ, ਅਞ੍ਞਥਾ ਅਕੁਸਲਾਦਿਭਾਵੋਪਿਸ੍ਸ ਪਟਿਕ੍ਖਿਪਿਤਬ੍ਬੋਤਿ ਅਧਿਪ੍ਪਾਯੋ. ਤਸ੍ਮਾਤਿ ¶ ਯਸ੍ਮਾ ਕੁਸਲਾਦੀਨਂ ਤਿਣ੍ਣਂ ਸਮਾਨੇਪਿ ਆਪਤ੍ਤਿਯਾ ਅਙ੍ਗਪ੍ਪਹੋਨਕਤ੍ਤੇ ਕੁਸਲਵੋਹਾਰੋਵ ਆਪਤ੍ਤਿਯਾ ਪਟਿਕ੍ਖਿਤ੍ਤੋ, ਨ ਅਕੁਸਲਾਦਿਵੋਹਾਰੋ, ਤਸ੍ਮਾ ਨਯਿਦਂ ਅਙ੍ਗਪ੍ਪਹੋਨਕਂ ਚਿਤ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤਂ, ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਇਦਂ ਆਪਤ੍ਤਿਯਾ ਸਮੁਟ੍ਠਾਪਕਤ੍ਤੇਨ ਅਙ੍ਗਪ੍ਪਹੋਨਕਂ ਕਾਰਣਭੂਤਂ ਚਿਤ੍ਤਮਤ੍ਤਂ ਸਨ੍ਧਾਯ ਨ ਵੁਤ੍ਤਂ ¶ , ਅਞ੍ਞਥਾ ‘‘ਆਪਤ੍ਤਾਧਿਕਰਣਂ ਸਿਯਾ ਕੁਸਲ’’ਨ੍ਤਿਪਿ ਵਤ੍ਤਬ੍ਬਤੋਤਿ ਅਧਿਪ੍ਪਾਯੋ. ਏਤੇਨ ਆਪਤ੍ਤਿਯਾ ਅਕੁਸਲਾਦਿਭਾਵੋਪਿ ਕੇਨਚਿ ਨਿਮਿਤ੍ਤੇਨ ਪਰਿਯਾਯਤੋਵ ਵੁਤ੍ਤੋ, ਨ ਪਰਮਤ੍ਥਤੋਤਿ ਦਸ੍ਸੇਤਿ. ਯਥਾਹ ‘‘ਯਂ ਕੁਸਲਚਿਤ੍ਤੇਨ ਆਪਜ੍ਜਤਿ, ਤਂ ਕੁਸਲਂ, ਇਤਰੇਹਿ ਇਤਰ’’ਨ੍ਤਿ.

ਇਦਂ ਪਨਾਤਿਆਦੀਸੁ ਅਯਂ ਅਧਿਪ੍ਪਾਯੋ – ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’’ਨ੍ਤਿ ਇਦਞ੍ਹਿ ਯਂ ਕਿਞ੍ਚਿ ਕਦਾਚਿ ਕਤ੍ਥਚਿ ਕਾਰਣਂ ਭਵਨ੍ਤਂ ਅਨਿਯਤਕਾਰਣਂ ਸਨ੍ਧਾਯ ਵੁਤ੍ਤਂ ਨ ਹੋਤਿ. ਯਂ ਪਨ ਸਬ੍ਬਸਿਕ੍ਖਾਪਦੇਸੁ ਆਪਤ੍ਤਿਯਾ ਕਾਰਣਂ ਭਵਿਤੁਮਰਹਤਿ, ਇਦਮੇਵ ਕਾਰਣਂ ਸਨ੍ਧਾਯ ਵੁਤ੍ਤਂ. ਅਕੁਸਲਞ੍ਹਿ ਪਣ੍ਣਤ੍ਤਿਂ ਞਤ੍ਵਾ ਵੀਤਿਕ੍ਕਮਨ੍ਤਸ੍ਸ ਸਬ੍ਬਾਪਤ੍ਤਿਯਾ ਕਾਰਣਂ ਹੋਤਿ, ਲੋਕਵਜ੍ਜਾਪਤ੍ਤਿਯਾ ਪਨ ਪਣ੍ਣਤ੍ਤਿਂ ਅਜਾਨਨ੍ਤਸ੍ਸਪਿ ਕਾਰਣਂ ਹੋਤਿ. ਕੇਵਲਂ ਪਣ੍ਣਤ੍ਤਿਵਜ੍ਜਾਪਤ੍ਤੀਸੁ ਕੁਸਲਾਬ੍ਯਾਕਤਚਿਤ੍ਤਪਵਤ੍ਤਿਕ੍ਖਣੇ ਏਵ ਅਕੁਸਲਂ ਨ ਵਤ੍ਤਤਿ, ਤਦਞ੍ਞਤ੍ਥ ਸਯਮੇਵ ਪਵਤ੍ਤਤਿ. ਅਬ੍ਯਾਕਤਂ ਪਨ ਕਾਯਵਚੀਭੂਤਂ ਕੁਸਲਾਕੁਸਲਾਦੀਨਂ ਪਵਤ੍ਤਿਕ੍ਖਣੇ ਨਿਰੋਧਸਮਾਪਨ੍ਨਸ੍ਸ ਸਹਸੇਯ੍ਯਾਪਤ੍ਤਿਯਨ੍ਤਿ ਸਬ੍ਬਾਪਤ੍ਤਿਯਾ ਅਙ੍ਗਮੇਵ ਹੋਤਿ ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਕਾਯਵਾਚਙ੍ਗਵਿਰਹਿਤਤ੍ਤਾਭਾਵਾ. ਤਸ੍ਮਾ ਇਮੇਸਂ ਅਕੁਸਲਾਬ੍ਯਾਕਤਾਨਂ ਸਬ੍ਬਾਪਤ੍ਤਿਮੂਲਕਤ੍ਤਮੇਵ ਸਨ੍ਧਾਯ ਇਦਂ ਆਪਤ੍ਤਿਯਾ ਅਕੁਸਲਤ੍ਤਂ, ਅਬ੍ਯਾਕਤਤ੍ਤਞ੍ਚ ਵੁਤ੍ਤਂ. ਯਤ੍ਥ ਪਨ ਪਥਵੀਖਣਨਾਦੀਸੁ ਕੁਸਲਮ੍ਪਿ ਆਪਤ੍ਤਿਯਾ ਕਾਰਣਂ ਹੋਤਿ, ਤਤ੍ਥਾਪਿ ਆਪਤ੍ਤਿਯਾ ਤਦੁਪਚਾਰੇਨ ਕੁਸਲਤ੍ਤਵੋਹਾਰੋ ਅਯੁਤ੍ਤੋ ਸਾਵਜ੍ਜਾਨਵਜ੍ਜਾਨਂ ਏਕਤ੍ਤਵੋਹਾਰਸ੍ਸ ਵਿਰੁਦ੍ਧਤ੍ਤਾ. ਯਦਗ੍ਗੇਨ ਅਞ੍ਞਮਞ੍ਞਂ ਵਿਰੁਦ੍ਧਾ, ਤਦਗ੍ਗੇਨ ਕਾਰਣਕਾਰਿਯਵੋਹਾਰੋਪਿ ਨੇਸਂ ਅਯੁਤ੍ਤੋ. ਤਸ੍ਮਾ ਤਤ੍ਥ ਵਿਜ੍ਜਮਾਨਮ੍ਪਿ ਕੁਸਲਂ ਅਬ੍ਬੋਹਾਰਿਕਂ, ਕਾਯਵਚੀਦ੍ਵਾਰਮੇਵ ਆਵੇਣਿਕਂ ਕਾਰਣਨ੍ਤਿ.

ਤਤ੍ਥ ਏਕਨ੍ਤਤੋ ਅਕੁਸਲਮੇਵਾਤਿ ਅਕੁਸਲਚਿਤ੍ਤੇਨ ਸਮੁਟ੍ਠਹਨਤੋ ਕਾਰਣੂਪਚਾਰਤੋ ਏਵਂ ਵੁਤ੍ਤਂ. ਤਤ੍ਥਾਤਿ ਲੋਕਵਜ੍ਜੇ. ਵਿਕਪ੍ਪੋ ਨਤ੍ਥੀਤਿ ਸਿਯਾ-ਸਦ੍ਦਸ੍ਸ ਵਿਕਪ੍ਪਨਤ੍ਥਤਂ ਦਸ੍ਸੇਤਿ. ਅਕੁਸਲਂ ਹੋਤੀਤਿ ਅਕੁਸਲਸਮੁਟ੍ਠਿਤਾਯ ਕਾਰਣੂਪਚਾਰੇਨ ਅਕੁਸਲਂ ਹੋਤਿ. ਸਹਸੇਯ੍ਯਾਦਿਵਸੇਨ ਆਪਜ੍ਜਨਤੋ ¶ ਅਬ੍ਯਾਕਤਂ ਹੋਤੀਤਿ ਇਤ੍ਥਿਯਾਦੀਹਿ ਸਹ ਪਿਟ੍ਠਿਪਸਾਰਣਵਸਪ੍ਪਵਤ੍ਤਕਾਯਦ੍ਵਾਰਸਙ੍ਖਾਤਰੂਪਾਬ੍ਯਾਕਤਵਸੇਨੇਵ ਆਪਜ੍ਜਿਤਬ੍ਬਤੋ ਕਾਰਣੂਪਚਾਰੇਨੇਵ ਆਪਤ੍ਤਿ ਅਬ੍ਯਾਕਤਂ ਹੋਤਿ. ਤਤ੍ਥਾਤਿ ਤਸ੍ਮਿਂ ਪਣ੍ਣਤ੍ਤਿਵਜ੍ਜਾਪਤ੍ਤਾਧਿਕਰਣੇ. ਸਞ੍ਚਿਚ੍ਚਾਸਞ੍ਚਿਚ੍ਚਵਸੇਨਾਤਿ ਪਣ੍ਣਤ੍ਤਿਂ ਞਤ੍ਵਾ, ਅਞ੍ਞਤ੍ਵਾ ਚ ਆਪਜ੍ਜਨਵਸੇਨ ਇਮਂ ਵਿਕਪ੍ਪਭਾਵਂ ਸਨ੍ਧਾਯ ਅਕੁਸਲਤ੍ਤਅਬ੍ਯਾਕਤਤ੍ਤਸਙ੍ਖਾਤਂ ਯਥਾਵੁਤ੍ਤਂ ਇਮਂ ਵਿਕਪ੍ਪਸਭਾਵਂ ਸਨ੍ਧਾਯ ਇਦਂ ਵਚਨਂ ਵੁਤ੍ਤਂ.

ਯਦਿ ਏਵਂ ਅਸਞ੍ਚਿਚ੍ਚਾਪਜ੍ਜਨਪਕ੍ਖੇ ਕੁਸਲੇਨਾਪਿ ਆਪਜ੍ਜਨਤੋ ਤਮ੍ਪਿ ਵਿਕਪ੍ਪਂ ਸਨ੍ਧਾਯ ‘‘ਆਪਤ੍ਤਾਧਿਕਰਣਂ ਸਿਯਾ ਕੁਸਲ’’ਨ੍ਤਿਪਿ ਕਸ੍ਮਾ ਨ ਵੁਤ੍ਤਨ੍ਤਿ ਆਹ ‘‘ਸਚੇ ਪਨਾ’’ਤਿਆਦਿ. ‘‘ਅਚਿਤ੍ਤਕਾਨ’’ਨ੍ਤਿ ¶ ਵੁਤ੍ਤਮੇਵਤ੍ਥਂ ਸਮੁਟ੍ਠਾਨਵਸੇਨ ਵਿਭਾਵੇਤੁਂ ‘‘ਏਲ਼ਕਲੋਮਪਦਸੋਧਮ੍ਮਾਦਿਸਮੁਟ੍ਠਾਨਾਨਮ੍ਪੀ’’ਤਿ ਵੁਤ੍ਤਂ. ਅਚਿਤ੍ਤਕਸਮੁਟ੍ਠਾਨਾਨਂ ‘‘ਕੁਸਲਚਿਤ੍ਤਂ ਆਪਜ੍ਜੇਯ੍ਯਾ’’ਤਿ ਏਤੇਨ ਸਾਵਜ੍ਜਭੂਤਾਯ ਆਪਤ੍ਤਿਯਾ ਕਾਰਣੂਪਚਾਰੇਨਾਪਿ ਅਨਵਜ੍ਜਭੂਤਕੁਸਲਵੋਹਾਰੋ ਅਯੁਤ੍ਤੋਤਿ ਦਸ੍ਸੇਤਿ. ‘‘ਨ ਚ ਤਤ੍ਥਾ’’ਤਿਆਦਿਨਾ ਕੁਸਲਸ੍ਸ ਆਪਤ੍ਤਿਯਾ ਕਾਰਣਤ੍ਤਂ ਵਿਜ੍ਜਮਾਨਮ੍ਪਿ ਤਥਾ ਵੋਹਰਿਤੁਂ ਅਯੁਤ੍ਤਨ੍ਤਿ ਪਟਿਕ੍ਖਿਪਿਤ੍ਵਾ ਕਾਯਵਾਚਾਸਙ੍ਖਾਤਂ ਅਬ੍ਯਾਕਤਸ੍ਸੇਵ ਕਾਰਣਤ੍ਤਂ ਦਸ੍ਸੇਤਿ. ਤਤ੍ਥ ਚਲਿਤਪ੍ਪਵਤ੍ਤਾਨਨ੍ਤਿ ਚਲਿਤਾਨਂ, ਪਵਤ੍ਤਾਨਞ੍ਚ. ਚਲਿਤੋ ਹਿ ਕਾਯੋ, ਪਵਤ੍ਤਾ ਵਾਚਾ. ਏਤ੍ਥ ਚ ਕਾਯਵਾਚਾਨਮਞ੍ਞਤਰਮੇਵ ਅਙ੍ਗਂ. ਤਞ੍ਚ…ਪੇ… ਅਬ੍ਯਾਕਤਨ੍ਤਿ ਏਵਂ ਅਬ੍ਯਾਕਤਸ੍ਸ ਆਪਤ੍ਤਿਕਾਰਣਭਾਵੇਨੇਵ ਵੁਤ੍ਤਤ੍ਤਾ. ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’’ਨ੍ਤਿ ਇਦਂ ਕਾਰਣੂਪਚਾਰੇਨ ਪਰਿਯਾਯਤੋ ਵੁਤ੍ਤਂ, ਨ ਨਿਪ੍ਪਰਿਯਾਯਤੋਤਿ ਸਿਜ੍ਝਤਿ.

ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਚੂਲ਼ਵ. ੩.੨੨੨) ਆਪਤ੍ਤਿਯਾ ਨਿਪ੍ਪਰਿਯਾਯਤੋਵ ਅਕੁਸਲਾਦਿਸਭਾਵਤਂ ਸਮਤ੍ਥੇਤੁਂ ਬਹੁਂ ਪਪਞ੍ਚਿਤਂ, ਤਂ ਨ ਸਾਰਤੋ ਪਚ੍ਚੇਤਬ੍ਬਂ ਦੁਟ੍ਠਦੋਸਸਿਕ੍ਖਾਪਦਟ੍ਠਕਥਾਯਮੇਵ ਪਟਿਕ੍ਖਿਤ੍ਤਤ੍ਤਾ. ਤੇਨੇਵੇਤ੍ਥਾਪਿ ‘‘ਯਂ ਚਿਤ੍ਤਂ ਆਪਤ੍ਤਿਯਾ ਅਙ੍ਗਂ ਹੋਤੀ’’ਤਿਆਦਿਨਾ ਅਕੁਸਲਚਿਤ੍ਤਸ੍ਸਾਪਿ ਆਪਤ੍ਤਿਯਾ ਕਾਰਣਤ੍ਤੇਨ ਭਿਨ੍ਨਤਾਵ ਦਸ੍ਸਿਤਾ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਦਸ੍ਸਿਤਮੇਵਾਤਿ ਇਧ ਨ ਵਿਤ੍ਥਾਰਯਿਮ੍ਹ. ਏਵਂ ਵੀਤਿਕ੍ਕਮਤੋ ਯੋ ਵੀਤਿਕ੍ਕਮੋਤਿ ਏਤ੍ਥ ਅਕੁਸਲਚਿਤ੍ਤੇਨ ਞਤ੍ਵਾ ਵੀਤਿਕ੍ਕਮਨ੍ਤਸ੍ਸ ਕਾਯਵਚੀਵੀਤਿਕ੍ਕਮਸਮੁਟ੍ਠਿਤਾ ਆਪਤ੍ਤਿਵੀਤਿਕ੍ਕਮੋਤਿ ਵੁਤ੍ਤੋ. ਏਸ ਨਯੋ ਅਬ੍ਯਾਕਤਵਾਰੇਪਿ.

੨੨੮. ਪਾਲ਼ਿਯਂ ¶ ਵਿਵਾਦਾਧਿਕਰਣਂ ਏਕਂ ਸਮਥਂ ਅਨਾਗਮ੍ਮਾਤਿਆਦਿ ਪੁਚ੍ਛਾ. ਸਿਯਾਤਿਆਦਿ ਵਿਸ੍ਸਜ੍ਜਨਂ. ਸਿਯਾਤਿਸ੍ਸ ਵਚਨੀਯਨ੍ਤਿ ਏਤੇਨੇਵ ਵੂਪਸਮਂ ਸਿਯਾਤਿ ਵਤ੍ਤਬ੍ਬਂ ਭਵੇਯ੍ਯਾਤਿ ਅਤ੍ਥੋ. ਸਮ੍ਮੁਖਾਵਿਨਯਸ੍ਮਿਨ੍ਤਿ ਸਮ੍ਮੁਖਾਵਿਨਯਤ੍ਤਸ੍ਮਿਨ੍ਤਿ ਭਾਵਪ੍ਪਧਾਨੋ ਨਿਦ੍ਦੇਸੋ ਦਟ੍ਠਬ੍ਬੋ. ਏਵਂ ਸਬ੍ਬਵਾਰੇਸੁ. ‘‘ਕਾਰਕੋ ਉਕ੍ਕੋਟੇਤੀ’’ਤਿ ਇਦਂ ਉਪਲਕ੍ਖਣਮਤ੍ਤਂ, ਯਸ੍ਸ ਕਸ੍ਸਚਿ ਉਕ੍ਕੋਟੇਨ੍ਤਸ੍ਸ ਪਾਚਿਤ੍ਤਿਯਮੇਵ. ਉਬ੍ਬਾਹਿਕਾਯ ਖੀਯਨਕੇ ਪਾਚਿਤ੍ਤਿਯਂ ਨ ਵੁਤ੍ਤਂ ਤਤ੍ਥ ਛਨ੍ਦਦਾਨਸ੍ਸ ਨਤ੍ਥਿਤਾਯ.

੨੩੫. ਵਣ੍ਣਾਵਣ੍ਣਾਯੋ ਕਤ੍ਵਾਤਿ ਖੁਦ੍ਦਕਮਹਨ੍ਤੇਹਿ ਸਞ੍ਞਾਣੇਹਿ ਯੁਤ੍ਤਾਯੋ ਕਤ੍ਵਾ. ਤੇਨਾਹ ‘‘ਨਿਮਿਤ੍ਤਸਞ੍ਞਂ ਆਰੋਪੇਤ੍ਵਾ’’ਤਿ.

੨੪੨. ਕਿਚ੍ਚਾਧਿਕਰਣਂ ¶ …ਪੇ… ਸਮ੍ਮਤੀਤਿ ਏਤ੍ਥ ਸਮ੍ਮੁਖਾਵਿਨਯੇਨ ਅਪਲੋਕਨਾਦਿਕਮ੍ਮਂ ਸਮ੍ਪਜ੍ਜਤੀਤਿ ਅਤ੍ਥੋ ਦਟ੍ਠਬ੍ਬੋ.

ਅਧਿਕਰਣਵੂਪਸਮਨਸਮਥਕਥਾਦਿਵਣ੍ਣਨਾ ਨਿਟ੍ਠਿਤਾ.

ਸਮਥਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੨੪੩. ਖੁਦ੍ਦਕਵਤ੍ਥੁਕ੍ਖਨ੍ਧਕੇ ¶ ¶ ਅਟ੍ਠਪਦਾਕਾਰੇਨਾਤਿ ਜੂਤਫਲਕੇ ਅਟ੍ਠਗਬ੍ਭਰਾਜਿਆਕਾਰੇਨ. ਮਲ੍ਲਕਮੂਲਸਣ੍ਠਾਨੇਨਾਤਿ ਖੇਲ਼ਮਲ੍ਲਕਮੂਲਸਣ੍ਠਾਨੇਨ. ਇਦਞ੍ਚ ਵਟ੍ਟਾਧਾਰਕਂ ਸਨ੍ਧਾਯ ਵੁਤ੍ਤਂ, ਕਣ੍ਟਕੇ ਉਟ੍ਠਾਪੇਤ੍ਵਾ ਕਤਵਟ੍ਟਕਪਾਲਸ੍ਸੇਤਂ ਅਧਿਵਚਨਂ.

੨੪੪. ਪੁਥੁਪਾਣਿਕਨ੍ਤਿ ਮੁਟ੍ਠਿਂ ਅਕਤ੍ਵਾ ਵਿਕਸਿਤਹਤ੍ਥਤਲੇਹਿ ਪਿਟ੍ਠਿਪਰਿਕਮ੍ਮਂ ਵੁਚ੍ਚਤਿ. ਏਤਮੇਵ ਸਨ੍ਧਾਯ ‘‘ਹਤ੍ਥਪਰਿਕਮ੍ਮ’’ਨ੍ਤਿ ਵੁਤ੍ਤਂ.

੨੪੫. ਮੁਤ੍ਤੋਲਮ੍ਬਕਾਦੀਨਨ੍ਤਿ ਆਦਿ-ਸਦ੍ਦੇਨ ਕੁਣ੍ਡਲਾਦਿਂ ਸਙ੍ਗਣ੍ਹਾਤਿ. ਪਲਮ੍ਬਕਸੁਤ੍ਤਨ੍ਤਿ ਬ੍ਰਾਹ੍ਮਣਾਨਂ ਯਞ੍ਞੋਪਚਿਤਸੁਤ੍ਤਾਦਿਆਕਾਰਂ ਵੁਚ੍ਚਤਿ. ਵਲਯਨ੍ਤਿ ਹਤ੍ਥਪਾਦਵਲਯਂ.

੨੪੬. ਦ੍ਵਙ੍ਗੁਲੇਤਿ ਉਪਯੋਗਬਹੁਵਚਨਂ, ਦ੍ਵਙ੍ਗੁਲਪ੍ਪਮਾਣਂ ਅਤਿਕ੍ਕਾਮੇਤੁਂ ਨ ਵਟ੍ਟਤੀਤਿ ਅਤ੍ਥੋ. ਏਤ੍ਥ ਚ ਦੁਮਾਸਸ੍ਸ ਵਾ ਦ੍ਵਙ੍ਗੁਲਸ੍ਸ ਵਾ ਅਤਿਕ੍ਕਨ੍ਤਭਾਵਂ ਅਜਾਨਨ੍ਤਸ੍ਸਾਪਿ ਕੇਸਮਸ੍ਸੁਗਣਨਾਯ ਅਚਿਤ੍ਤਕਾਪਤ੍ਤਿਯੋ ਹੋਨ੍ਤੀਤਿ ਵਦਨ੍ਤਿ.

ਕੋਚ੍ਛੇਨਾਤਿ ਉਸੀਰਤਿਣਾਦੀਨਿ ਬਨ੍ਧਿਤ੍ਵਾ ਸਮਂ ਛਿਨ੍ਦਿਤ੍ਵਾ ਗਹਿਤਕੋਚ੍ਛੇਨ. ਚਿਕ੍ਕਲੇਨਾਤਿ ਸਿਲੇਸਯੁਤ੍ਤਤੇਲੇਨ. ਉਣ੍ਹਾਭਿਤਤ੍ਤਰਜਸਿਰਾਨਮ੍ਪੀਤਿ ਉਣ੍ਹਾਭਿਤਤ੍ਤਾਨਂ ਰਜੋਕਿਣ੍ਣਸਿਰਾਨਂ. ਅਦ੍ਦਹਤ੍ਥੇਨਾਤਿ ਅਲ੍ਲਹਤ੍ਥੇਨ.

੨੪੮-੯. ਸਾਧੁਗੀਤਨ੍ਤਿ ਅਨਿਚ੍ਚਤਾਦਿਪਟਿਸਞ੍ਞੁਤ੍ਤਂ ਗੀਤਂ. ਚਤੁਰਸ੍ਸੇਨ ਵਤ੍ਤੇਨਾਤਿ ਪਰਿਪੁਣ੍ਣੇਨ ਉਚ੍ਚਾਰਣਵਤ੍ਤੇਨ. ਤਰਙ੍ਗਵਤ੍ਤਾਦੀਨਂ ਸਬ੍ਬੇਸਮ੍ਪਿ ਸਾਮਞ੍ਞਲਕ੍ਖਣਂ ਦਸ੍ਸੇਤੁਂ ‘‘ਸਬ੍ਬੇਸਂ…ਪੇ… ਲਕ੍ਖਣ’’ਨ੍ਤਿ ¶ ਵੁਤ੍ਤਂ. ਯਤ੍ਤਕਾਹਿ ਮਤ੍ਤਾਹਿ ਅਕ੍ਖਰਂ ਪਰਿਪੁਣ੍ਣਂ ਹੋਤਿ, ਤਤੋਪਿ ਅਧਿਕਮਤ੍ਤਾਯੁਤ੍ਤਂ ਕਤ੍ਵਾ ਕਥਨਂ ਵਿਕਾਰਕਥਨਂ ਨਾਮ, ਤਥਾ ਅਕਤ੍ਵਾ ਕਥਨਮੇਵ ਲਕ੍ਖਣਨ੍ਤਿ ਅਤ੍ਥੋ. ਬਾਹਿਰਲੋਮਿਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਯਥਾ ਬਹਿਦ੍ਧਾ ਲੋਮਾਨਿ ਦਿਸ੍ਸਨ੍ਤਿ, ਏਵਂ ਧਾਰੇਨ੍ਤਸ੍ਸ ਦੁਕ੍ਕਟਨ੍ਤਿ ਅਤ੍ਥੋ.

੨੫੦. ਪਾਲ਼ਿਯਂ ¶ ਤਰੁਣਞ੍ਞੇਵ ਅਮ੍ਬਨ੍ਤਿ ਤਰੁਣਂ ਅਸਞ੍ਜਾਤਬੀਜਂ ਏਵ ਅਮ੍ਬਫਲਂ. ਪਾਤਾਪੇਤ੍ਵਾਤਿ ਛਿਨ੍ਦਾਪੇਤ੍ਵਾਵ. ‘‘ਮਤ੍ਤਾਵਣ੍ਣਿਤਾ’’ਤਿ ਇਦਂ ‘‘ਪਰੇ ਨਿਨ੍ਦਨ੍ਤੀ’’ਤਿ ਸਾਸਨਹਿਤੇਸਿਤਾਯ ਵੁਤ੍ਤਂ. ਨ ਪਰਿਯਾਪੁਣਿਂਸੂਤਿ ਨਾਸਿਕ੍ਖਿਂਸੁ.

੨੫੧. ਚਤ੍ਤਾਰਿ ਅਹਿਰਾਜਕੁਲਾਨੀਤਿ ਸਬ੍ਬੇਸਂ ਅਹਿਭੇਦਾਨਂ ਚਤੂਸੁ ਏਵ ਸਙ੍ਗਹਤੋ ਵੁਤ੍ਤਂ. ਅਤ੍ਤਪਰਿਤ੍ਤਂ ਕਾਤੁਨ੍ਤਿ ਅਤ੍ਤਨੋ ਪਰਿਤ੍ਤਾਣਂ ਕਾਤੁਂ.

ਵਿਰੂਪਕ੍ਖੇਹਿ ਮੇ ਮੇਤ੍ਤਨ੍ਤਿ ਵਿਰੂਪਕ੍ਖਜਾਤਿਕੇਹਿ ਨਾਗੇਹਿ ਸਹ ਮਯ੍ਹਂ ਮਿਤ੍ਤਭਾਵੋ ਹੋਤੁ, ਮੇਤ੍ਤਾ ਹੋਤੂਤਿ ਅਤ੍ਥੋ, ਤੇ ਸੁਖਿਤਾ ਨਿਦ੍ਦੁਕ੍ਖਾ ਅਵੇਰਾ ਹੋਨ੍ਤੂਤਿ ਅਧਿਪ੍ਪਾਯੋ. ਏਵਞ੍ਹਿ ਮੇਤ੍ਤਾਫਰਣਂ ਹੋਤਿ. ਸੇਸੇਸੁਪਿ ਏਸੇਵ ਨਯੋ. ਅਪਾਦਕੇਹੀਤਿ ਅਹਿਕੁਲੇਹਿ ਸਹ ਸਬ੍ਬਸਤ੍ਤੇਸੁ ਓਧਿਸੋ ਮੇਤ੍ਤਾਫਰਣਦਸ੍ਸਨਂ. ਮਾ ਮਂ ਅਪਾਦਕੋ ਹਿਂਸੀਤਿ ਤਾਯ ਮੇਤ੍ਤਾਯ ਅਤ੍ਤਰਕ੍ਖਾਵਿਧਾਨਦਸ੍ਸਨਂ.

ਸਬ੍ਬੇ ਸਤ੍ਤਾਤਿਆਦਿ ਅਤ੍ਤਾਨਂ ਉਪਮਂ ਕਤ੍ਵਾ ਸਬ੍ਬਸਤ੍ਤੇਸੁ ਅਨੋਧਿਸੋ ਮੇਤ੍ਤਾਫਰਣਦਸ੍ਸਨਂ. ਤਤ੍ਥ ਮਾ ਕਞ੍ਚਿ ਪਾਪਮਾਗਮਾਤਿ ਕਞ੍ਚਿ ਸਤ੍ਤਂ ਲਾਮਕਂ ਦੁਕ੍ਖਹੇਤੁ, ਦੁਕ੍ਖਞ੍ਚ ਮਾ ਆਗਚ੍ਛਤੁ.

ਏਵਂ ਮੇਤ੍ਤਾਯ ਅਤ੍ਤਗੁਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਰਤਨਤ੍ਤਯਾਨੁਸ੍ਸਰਣੇਨ ਦਸ੍ਸੇਤੁਂ ‘‘ਅਪ੍ਪਮਾਣੋ’’ਤਿਆਦਿ ਵੁਤ੍ਤਂ. ਤਤ੍ਥ ਪਮਾਣਕਰਧਮ੍ਮਾ ਅਕੁਸਲਾ, ਤਬ੍ਬਿਪਾਕਾ ਚ ਪਮਾਣਾ, ਤਪ੍ਪਟਿਪਕ੍ਖਾ ਸੀਲਾਦਯੋ ਗੁਣਾ, ਤਬ੍ਬਿਪਾਕਾ ਚ ਲੋਕਿਯਲੋਕੁਤ੍ਤਰਫਲਾਨਿ ਅਪ੍ਪਮਾਣਾ, ਤੇ ਅਸ੍ਸ ਅਤ੍ਥੀਤਿ ਅਪ੍ਪਮਾਣੋ, ਅਪ੍ਪਮਾਣਾ ਵਾ ਅਪਰਿਮੇਯ੍ਯਗੁਣਾ ਅਸ੍ਸਾਤਿਪਿ ਅਪ੍ਪਮਾਣੋ. ਪਮਾਣਵਨ੍ਤਾਨੀਤਿ ਯਥਾਵੁਤ੍ਤਪਮਾਣਕਰਧਮ੍ਮਯੁਤ੍ਤਾਨਿ. ਅਹਿਵਿਚ੍ਛਿਕਾਤਿ ਸਰੀਸਪਾਨਞ੍ਞੇਵ ਪਭੇਦਦਸ੍ਸਨਂ. ਉਣ੍ਣਨਾਭੀਤਿ ਲੋਮਸਨਾਭਿਕੋ ਮਕ੍ਕਟੋ. ਸਰਬੂਤਿ ਘਰਗੋਲ਼ਿਕਾ.

ਪਟਿਕ੍ਕਮਨ੍ਤੂਤਿ ਅਪਗਚ੍ਛਨ੍ਤੁ, ਮਾ ਮਂ ਵਿਹੇਸਯਿਂਸੂਤਿ ਅਤ੍ਥੋ. ਸੋਹਂ ਨਮੋਤਿ ਏਤ੍ਥ ‘‘ਕਰੋਮੀ’’ਤਿ ਪਾਠਸੇਸੋ. ਯਸ੍ਮਾ ਮਯਾ ਮੇਤ੍ਤਾਦੀਹਿ ਤੁਮ੍ਹਾਕਞ੍ਚ ਮਯ੍ਹਞ੍ਚ ਰਕ੍ਖਾ ਕਤਾ, ਯਸ੍ਮਾ ਚ ਸੋਹਂ ਭਗਵਤੋ ਨਮੋ ਕਰੋਮਿ, ਵਿਪਸ੍ਸੀਆਦੀਨਂ ਸਤ੍ਤਨ੍ਨਮ੍ਪਿ ਨਮੋ ਕਰੋਮਿ, ਤਸ੍ਮਾ ਪਟਿਕ੍ਕਮਨ੍ਤੁ ਭੂਤਾਨੀਤਿ ਯੋਜਨਾ.

ਅਞ੍ਞਮ੍ਹੀਤਿ ¶ ਕਾਮਰਾਗੇ ਅਸੁਭਮਨਸਿਕਾਰਾਦਿਨਾ ਛੇਤਬ੍ਬੇਤਿ ਅਤ੍ਥੋ. ਅਙ੍ਗਜਾਤਨ੍ਤਿ ਬੀਜਵਿਰਹਿਤਂ ਪੁਰਿਸਨਿਮਿਤ੍ਤਂ. ਬੀਜੇ ਹਿ ਛਿਨ੍ਨੇ ਓਪਕ੍ਕਮਿਕਪਣ੍ਡਕੋ ਨਾਮ ਅਭਬ੍ਬੋ ਹੋਤੀਤਿ ਵਦਨ੍ਤਿ. ਏਕੇ ਪਨ ‘‘ਬੀਜਸ੍ਸਾਪਿ ਛੇਦਨਕ੍ਖਣੇ ¶ ਦੁਕ੍ਕਟਾਪਤ੍ਤਿ ਏਵ ਕਮੇਨ ਪੁਰਿਸਿਨ੍ਦ੍ਰਿਯਾਦਿਕੇ ਅਨ੍ਤਰਹਿਤੇ ਪਣ੍ਡਕੋ ਨਾਮ ਅਭਬ੍ਬੋ ਹੋਤਿ, ਤਦਾ ਲਿਙ੍ਗਨਾਸਨਾਯ ਨਾਸੇਤਬ੍ਬੋ’’ਤਿ ਵਦਨ੍ਤਿ. ਤਾਦਿਸਂ ਵਾ ਦੁਕ੍ਖਂ ਉਪ੍ਪਾਦੇਨ੍ਤਸ੍ਸਾਤਿ ਮੁਟ੍ਠਿਪ੍ਪਹਾਰਾਦੀਹਿ ਅਤ੍ਤਨੋ ਦੁਕ੍ਖਂ ਉਪ੍ਪਾਦੇਨ੍ਤਸ੍ਸ.

੨੫੨. ਪਾਲ਼ਿਯਂ ਤੁਯ੍ਹੇਸੋ ਪਤ੍ਤੋਤਿ ‘‘ਯੋ ਚ ਅਰਹਾ ਚੇਵ ਇਦ੍ਧਿਮਾ ਚ, ਤਸ੍ਸ ਦਿਨ੍ਨਮੇਵਾ’’ਤਿ ਸੇਟ੍ਠਿਨਾ ਵੁਤ੍ਤਂ, ਤਂ ਸਨ੍ਧਾਯ ਵਦਤਿ. ਤਂ ਪਤ੍ਤਂ ਗਹੇਤ੍ਵਾ ਤਿਕ੍ਖਤ੍ਤੁਂ ਰਾਜਗਹਂ ਅਨੁਪਰਿਯਾਯੀਤਿ ਏਤ੍ਥ ਵੇਲ਼ੁਪਰਮ੍ਪਰਾਯ ਬਦ੍ਧਪਤ੍ਤਸ੍ਸ ਉਪਰਿਭਾਗੇ ਆਕਾਸੇ ਨਗਰਂ ਤਿਕ੍ਖਤ੍ਤੁਂ ਅਨੁਪਰਿਯਾਯਿਤ੍ਵਾ ਠਿਤਭਾਵਂ ਸਨ੍ਧਾਯ ‘‘ਪਤ੍ਤਂ ਗਹੇਤ੍ਵਾ’’ਤਿ ਵੁਤ੍ਤਂ, ਨ ਪਨ ਥੇਰੋ ਹਤ੍ਥੇਨ ਪਤ੍ਤਂ ਸਯਮੇਵ ਅਗ੍ਗਹੇਸਿ. ਕੇਚਿ ਪਨ ਵਦਨ੍ਤਿ ‘‘ਇਦ੍ਧਿਬਲੇਨ ਤਂ ਪਤ੍ਤਂ ਵੇਲ਼ੁਪਰਮ੍ਪਰਤੋ ਮੁਞ੍ਚਿਤ੍ਵਾ ਥੇਰਂ ਅਨੁਬਨ੍ਧਮਾਨੋ ਅਟ੍ਠਾਸਿ, ਸੋ ਚ ਅਨੇਨ ਹਤ੍ਥੇਨ ਗਹਿਤੋ ਵਿਯ ਅਹੋਸੀ’’ਤਿ. ਤਥਾ ਠਿਤਮੇਵ ਪਨ ਸਨ੍ਧਾਯ ‘‘ਭਾਰਦ੍ਵਾਜਸ੍ਸ ਹਤ੍ਥਤੋ ਪਤ੍ਤਂ ਗਹੇਤ੍ਵਾ’’ਤਿ ਵੁਤ੍ਤਂ. ਤੇ ਚ ਮਨੁਸ੍ਸਾ…ਪੇ… ਅਨੁਬਨ੍ਧਿਂਸੂਤਿ ਯੇ ਚ ਮਨੁਸ੍ਸਾ ਪਠਮਂ ਪਾਟਿਹਾਰਿਯਂ ਨਾਦ੍ਦਸਂਸੁ, ਤੇ ਅਮ੍ਹਾਕਮ੍ਪਿ ਪਾਟਿਹਾਰਿਯਂ ਦਸ੍ਸੇਹੀਤਿ ਥੇਰਮਨੁਬਨ੍ਧਿਂਸੁ. ਥੇਰੋ ਚ ਸੀਹਬ੍ਯਗ੍ਘਾਦਿਰੂਪਂ ਗਹੇਤ੍ਵਾ ਵਿਕੁਬ੍ਬਨਿਦ੍ਧਿਂ ਦਸ੍ਸੇਤਿ, ਤੇ ਚ ਅਚ੍ਛਰਿਯਬ੍ਭੁਤਜਾਤਾ ਉਚ੍ਚਾਸਦ੍ਦਾ ਮਹਾਸਦ੍ਦਾ ਅਹੇਸੁਂ. ਤੇਨਾਹ ‘‘ਕਿਂ ਨੁ ਖੋ ਸੋ, ਆਨਨ੍ਦ, ਉਚ੍ਚਾਸਦ੍ਦੋ ਮਹਾਸਦ੍ਦੋ’’ਤਿ. ਇਦ੍ਧਿਪਾਟਿਹਾਰਿਯਂ ਨ ਦਸ੍ਸੇਤਬ੍ਬਨ੍ਤਿ ਏਤ੍ਥ ‘‘ਯੋ ਪਕਤਿਵਣ੍ਣਂ ਵਿਜਹਿਤ੍ਵਾ ਕੁਮਾਰਵਣ੍ਣਂ ਵਾ ਦਸ੍ਸੇਤਿ, ਨਾਗਵਣ੍ਣਂ ਵਾ…ਪੇ… ਵਿਵਿਧਮ੍ਪਿ ਸੇਨਾਬ੍ਯੂਹਂ ਦਸ੍ਸੇਤੀ’’ਤਿ (ਪਟਿ. ਮ. ੩.੧੩) ਏਵਮਾਗਤਾ ਅਤ੍ਤਨੋ ਸਰੀਰਸ੍ਸ ਵਿਕਾਰਾਪਾਦਨਵਸਪ੍ਪਵਤ੍ਤਾ ਵਿਕੁਬ੍ਬਨਿਦ੍ਧਿ ਅਧਿਪ੍ਪੇਤਾਤਿ ਆਹ ‘‘ਅਧਿਟ੍ਠਾਨਿਦ੍ਧਿ ਪਨ ਅਪ੍ਪਟਿਕ੍ਖਿਤ੍ਤਾ’’ਤਿ. ਪਕਤਿਯਾ ਏਕੋ ਬਹੁਕਂ ਆਵਜ੍ਜਤਿ, ਸਤਂ ਵਾ ਸਹਸ੍ਸਂ ਵਾ ਸਤਸਹਸ੍ਸਂ ਵਾ ਆਵਜ੍ਜੇਤ੍ਵਾ ਞਾਣੇਨ ਅਧਿਟ੍ਠਾਤਿ ‘‘ਬਹੁਕੋ ਹੋਮੀ’’ਤਿ (ਪਟਿ. ਮ. ੩.੧੦) ਏਵਂ ਦਸ੍ਸਿਤਾ ਅਧਿਟ੍ਠਾਨਵਸੇਨ ਨਿਪ੍ਫਨ੍ਨਾ ਅਧਿਟ੍ਠਾਨਿਦ੍ਧਿ ਨਾਮ. ਗਿਹਿਵਿਕਟਾਨੀਤਿ ਗਿਹਿਸਨ੍ਤਕਾਨਿ.

੨੫੩. ਪਾਲ਼ਿਯਂ ਨ ਅਚ੍ਛੁਪਿਯਨ੍ਤੀਤਿ ਨ ਫੁਸਿਤਾਨਿ ਹੋਨ੍ਤਿ. ਰੂਪਕਾਕਿਣ੍ਣਾਨੀਤਿ ਇਤ੍ਥਿਰੂਪਾਦੀਹਿ ਆਕਿਣ੍ਣਾਨਿ.

੨੫੪. ਭੂਮਿਆਧਾਰਕੇਤਿ ਦਨ੍ਤਾਦੀਹਿ ਕਤੇ ਵਲਯਾਧਾਰਕੇ. ਏਤਸ੍ਸ ਵਲਯਾਧਾਰਕਸ੍ਸ ਅਨੁਚ੍ਚਤਾਯ ਠਪਿਤਾ ਪਤ੍ਤਾ ਨ ਪਰਿਪਤਨ੍ਤੀਤਿ ‘‘ਤਯੋ ਪਤ੍ਤੇ ¶ ਠਪੇਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਅਨੁਚ੍ਚਤਞ੍ਹਿ ਸਨ੍ਧਾਯ ਅਯਂ ‘‘ਭੂਮਿਆਧਾਰਕੋ’’ਤਿ ਵੁਤ੍ਤੋ. ਦਾਰੁਆਧਾਰਕਦਣ੍ਡਾਧਾਰਕੇਸੂਤਿ ਏਕਦਾਰੁਨਾ ¶ ਕਤਆਧਾਰਕੇ, ਬਹੂਹਿ ਦਣ੍ਡੇਹਿ ਕਤਆਧਾਰਕੇ ਚ. ਏਤੇ ਚ ਉਚ੍ਚਤਰਾ ਹੋਨ੍ਤਿ ਪਤ੍ਤੇਹਿ ਸਹ ਪਤਨਸਭਾਵਾ. ਤੇਨ ‘‘ਸੁਸਜ੍ਜਿਤੇਸੂ’’ਤਿ ਵੁਤ੍ਤਂ. ਭਮਕੋਟਿਸਦਿਸੋਤਿ ਯਤ੍ਥ ਧਮਕਰਣਾਦਿਂ ਪਵੇਸੇਤ੍ਵਾ ਲਿਖਨ੍ਤਿ, ਤਸ੍ਸ ਭਮਕਸ੍ਸ ਕੋਟਿਯਾ ਸਦਿਸੋ. ਤਾਦਿਸਸ੍ਸ ਦਾਰੁਆਧਾਰਕਸ੍ਸ ਅਵਿਤ੍ਥਿਣ੍ਣਤਾਯ ਠਪਿਤੋਪਿ ਪਤ੍ਤੋ ਪਤਤੀਤਿ ‘‘ਅਨੋਕਾਸੋ’’ਤਿ ਵੁਤ੍ਤੋ.

ਆਲਿਨ੍ਦਕਮਿਡ੍ਢਿਕਾਦੀਨਨ੍ਤਿ ਪਮੁਖਮਿਡ੍ਢਿਕਾਦੀਨਂ, ਉਚ੍ਚਵਤ੍ਥੁਕਾਨਨ੍ਤਿ ਅਤ੍ਥੋ. ਬਾਹਿਰਪਸ੍ਸੇਤਿ ਪਾਸਾਦਾਦੀਨਂ ਬਹਿਕੁਟ੍ਟੇ. ਤਨੁਕਮਿਡ੍ਢਿਕਾਯਾਤਿ ਵੇਦਿਕਾਯ. ਸਬ੍ਬਤ੍ਥ ਪਨ ਹਤ੍ਥਪ੍ਪਮਾਣਤੋ ਅਬ੍ਭਨ੍ਤਰੇ ਠਪੇਤੁਂ ਵਟ੍ਟਤਿ. ਆਧਾਰੇ ਪਨ ਤਤੋ ਬਹਿਪਿ ਵਟ੍ਟਤਿ.

ਪਾਲ਼ਿਯਂ ਓਟ੍ਠੋਤਿ ਮੁਖਵਟ੍ਟਿ. ਪਤ੍ਤਮਾਲ਼ਕਨ੍ਤਿ ਉਪਚਿਕਾਨਂ ਅਨੁਟ੍ਠਹਨਤ੍ਥਾਯ ਭੂਮਿਤੋ ਉਚ੍ਚਤਰਂ ਕਤਂ ਵੇਦਿਕਾਕਾਰਮਾਲ਼ਕਂ. ਮਹਾਮੁਖਕੁਣ੍ਡਸਣ੍ਠਾਨਾਤਿ ਮਹਾਮੁਖਚਾਟਿਸਣ੍ਠਾਨਾ. ਲਗ੍ਗੇਨ੍ਤਸ੍ਸ ਦੁਕ੍ਕਟਨ੍ਤਿ ਕੇਵਲਂ ਪਤ੍ਤਂ ਲਗ੍ਗੇਨ੍ਤਸ੍ਸ, ਨ ਥਵਿਕਾਯ ਲਗ੍ਗੇਨ੍ਤਸ੍ਸਾਤਿ ਵਦਨ੍ਤਿ. ਵੀਮਂਸਿਤਬ੍ਬਂ. ਅਞ੍ਞੇਨ ਪਨ ਭਣ੍ਡਕੇਨਾਤਿ ਅਞ੍ਞੇਨ ਭਾਰਬਨ੍ਧਨੇਨ ਭਣ੍ਡਕੇਨ. ‘‘ਬਨ੍ਧਿਤ੍ਵਾ ਓਲਮ੍ਬੇਤੁ’’ਨ੍ਤਿ ਵੁਤ੍ਤਤ੍ਤਾ ਪਤ੍ਤਤ੍ਥਵਿਕਾਯ ਅਂਸਬਦ੍ਧਕੋ ਯਥਾ ਲਗ੍ਗਿਤਟ੍ਠਾਨਤੋ ਨ ਪਰਿਗਲ਼ਤਿ, ਤਥਾ ਸਬ੍ਬਥਾਪਿ ਬਨ੍ਧਿਤ੍ਵਾ ਠਪੇਤੁਂ ਵਟ੍ਟਤਿ. ਬਨ੍ਧਿਤ੍ਵਾਪਿ ਉਪਰਿ ਠਪੇਤੁਂ ਨ ਵਟ੍ਟਤੀਤਿ ਉਪਰਿ ਨਿਸੀਦਨ੍ਤਾ ਓਤ੍ਥਰਿਤ੍ਵਾ ਭਿਨ੍ਦਨ੍ਤੀਤਿ ਵੁਤ੍ਤਂ. ਤਤ੍ਥ ਠਪੇਤੁਂ ਵਟ੍ਟਤੀਤਿ ਨਿਸੀਦਨਸਙ੍ਕਾਭਾਵਤੋ ਵੁਤ੍ਤਂ. ਬਨ੍ਧਿਤ੍ਵਾ ਵਾਤਿ ਬਨ੍ਧਿਤ੍ਵਾ ਠਪਿਤਛਤ੍ਤੇ ਵਾ. ਯੋ ਕੋਚੀਤਿ ਭਤ੍ਤਪੂਰੋਪਿ ਤੁਚ੍ਛਪਤ੍ਤੋਪਿ.

੨੫੫. ਪਰਿਹਰਿਤੁਨ੍ਤਿ ਦਿਵਸੇ ਦਿਵਸੇ ਪਿਣ੍ਡਾਯ ਚਰਣਤ੍ਥਾਯ ਠਪੇਤੁਂ. ਪਤ੍ਤਂ ਅਲਭਨ੍ਤੇਨ ਪਨ ਏਕਦਿਵਸਂ ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਤ੍ਵਾ ਛਡ੍ਡੇਤੁਂ ਵਟ੍ਟਤਿ. ਤੇਨਾਹ ‘‘ਤਾਵਕਾਲਿਕਂ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ. ਪਣ੍ਣਪੁਟਾਦੀਸੁਪਿ ਏਸੇਵ ਨਯੋ. ਅਭੁਂ ਮੇਤਿ ਅਭੂਤਿ ਮਯ੍ਹਂ, ਵਿਨਾਸੋ ਮਯ੍ਹਨ੍ਤਿ ਅਤ੍ਥੋ. ਪਾਲ਼ਿਯਂ ਪਿਸਾਚੋ ਵਤਮਨ੍ਤਿ ਪਿਸਾਚੋ ਵਤਾਯਂ, ਅਯਮੇਵ ਵਾ ਪਾਠੋ. ਪਿਸਾਚਿਲ੍ਲਿਕਾਤਿ ਪਿਸਾਚਦਾਰਕਾ. ਛਵਸੀਸਸ੍ਸ ਪਤ੍ਤੋਤਿ ਛਵਸੀਸਮਯੋ ਪਤ੍ਤੋ. ਪਕਤਿਵਿਕਾਰਸਮ੍ਬਨ੍ਧੇ ਚੇਤਂ ਸਾਮਿਵਚਨਂ.

ਚਬ੍ਬੇਤ੍ਵਾਤਿ ¶ ਨਿਟ੍ਠੁਭਿਤ੍ਵਾ. ‘‘ਪਟਿਗ੍ਗਹਂ ਕਤ੍ਵਾ’’ਤਿ ਵੁਤ੍ਤਤ੍ਤਾ ਉਚ੍ਛਿਟ੍ਠਹਤ੍ਥੇਨ ਉਦਕਂ ਗਹੇਤ੍ਵਾ ਪਤ੍ਤਂ ਪਰਿਪ੍ਫੋਸਿਤ੍ਵਾ ਧੋਵਨਘਂਸਨਵਸੇਨ ਹਤ੍ਥਂ ਧੋਵਿਤੁਂ ਵਟ੍ਟਤਿ, ਏਤ੍ਤਕੇਨ ਪਤ੍ਤਂ ਪਟਿਗ੍ਗਹਂ ਕਤ੍ਵਾ ਹਤ੍ਥੋ ਧੋਵਿਤੋ ਨਾਮ ਨ ਹੋਤਿ. ਏਕਂ ਉਦਕਗਣ੍ਡੁਸਂ ਗਹੇਤ੍ਵਾਤਿ ਪਤ੍ਤਂ ਅਫੁਸਿਤ੍ਵਾ ਤਤ੍ਥ ਉਦਕਮੇਵ ਉਚ੍ਛਿਟ੍ਠਹਤ੍ਥੇਨ ਉਕ੍ਖਿਪਿਤ੍ਵਾ ਗਣ੍ਡੁਸਂ ਕਤ੍ਵਾ, ਵਾਮਹਤ੍ਥੇਨੇਵ ਵਾ ਪਤ੍ਤਂ ਉਕ੍ਖਿਪਿਤ੍ਵਾ ਮੁਖੇਨ ਗਣ੍ਡੁਸਂ ਗਹੇਤੁਮ੍ਪਿ ਵਟ੍ਟਤਿ. ਬਹਿ ਉਦਕੇਨ ਵਿਕ੍ਖਾਲੇਤ੍ਵਾਤਿ ਦ੍ਵੀਸੁ ਅਙ੍ਗੁਲੀਸੁ ਆਮਿਸਮਤ੍ਤਂ ਵਿਕ੍ਖਾਲੇਤ੍ਵਾ ਬਹਿ ਗਹੇਤੁਮ੍ਪਿ ਵਟ੍ਟਤਿ. ਪਟਿਖਾਦਿਤੁਕਾਮੋਤਿ ਏਤ੍ਥ ਨ ਸਯਂ ਖਾਦਿਤੁਕਾਮੋਪਿ ਅਞ੍ਞੇਸਂ ਖਾਦਨਾਰਹਂ ਠਪੇਤੁਂ ਲਭਤਿ ¶ . ਤਤ੍ਥੇਵ ਕਤ੍ਵਾਤਿ ਪਤ੍ਤੇਯੇਵ ਯਥਾਠਪਿਤਟ੍ਠਾਨਤੋ ਅਨੁਦ੍ਧਰਿਤ੍ਵਾ. ਲੁਞ੍ਚਿਤ੍ਵਾਤਿ ਤਤੋ ਮਂਸਮੇਵ ਨਿਰਵਸੇਸਂ ਉਪ੍ਪਟ੍ਟੇਤ੍ਵਾ.

੨੫੬. ਕਿਣ੍ਣਚੁਣ੍ਣੇਨਾਤਿ ਸੁਰਾਕਿਣ੍ਣਚੁਣ੍ਣੇਨ. ਮਕ੍ਖੇਤੁਨ੍ਤਿ ਸੂਚਿਂ ਮਕ੍ਖੇਤੁਂ. ਨਿਸ੍ਸੇਣਿਮ੍ਪੀਤਿ ਚਤੂਹਿ ਦਣ੍ਡੇਹਿ ਚੀਵਰਪ੍ਪਮਾਣੇਨ ਆਯਤਚਤੁਰਸ੍ਸਂ ਕਤ੍ਵਾ ਬਦ੍ਧਪਟਲਮ੍ਪਿ. ਏਤ੍ਥ ਹਿ ਚੀਵਰਕੋਟਿਯੋ ਸਮਕਂ ਬਨ੍ਧਿਤ੍ਵਾ ਚੀਵਰਂ ਯਥਾਸੁਖਂ ਸਿਬ੍ਬਨ੍ਤਿ. ਤਤ੍ਥ ਅਤ੍ਥਰਿਤਬ੍ਬਨ੍ਤਿ ਤਸ੍ਸਾ ਨਿਸ੍ਸੇਣਿਯਾ ਉਪਰਿ ਚੀਵਰਸ੍ਸ ਉਪਤ੍ਥਮ੍ਭਨਤ੍ਥਾਯ ਅਤ੍ਥਰਿਤਬ੍ਬਂ. ਕਥਿਨਸਙ੍ਖਾਤਾਯ ਨਿਸ੍ਸੇਣਿਯਾ ਚੀਵਰਸ੍ਸ ਬਨ੍ਧਨਕਰਜ੍ਜੁ ਕਥਿਨਰਜ੍ਜੂਤਿ ਮਜ੍ਝਿਮਪਦਲੋਪੀਸਮਾਸੋਤਿ ਆਹ ‘‘ਯਾਯਾ’’ਤਿਆਦਿ. ਤਤ੍ਥ ਯਸ੍ਮਾ ਦ੍ਵਿਨ੍ਨਂ ਪਟਲਾਨਂ ਏਕਸ੍ਮਿਂ ਅਧਿਕੇ ਜਾਤੇ ਤਤ੍ਥ ਵਲਿਯੋ ਹੋਨ੍ਤਿ, ਤਸ੍ਮਾ ਦੁਪਟ੍ਟਚੀਵਰਸ੍ਸ ਪਟਲਦ੍ਵਯਮ੍ਪਿ ਸਮਕਂ ਕਤ੍ਵਾ ਬਨ੍ਧਨਕਰਜ੍ਜੁ ਕਥਿਨਰਜ੍ਜੂਤਿ ਵੇਦਿਤਬ੍ਬਂ.

ਪਾਲ਼ਿਯਂ ਕਥਿਨਸ੍ਸ ਅਨ੍ਤੋ ਜੀਰਤੀਤਿ ਕਥਿਨੇ ਬਦ੍ਧਸ੍ਸ ਚੀਵਰਸ੍ਸ ਪਰਿਯਨ੍ਤੋ ਜੀਰਤਿ. ਕਥਿਨਨਿਸ੍ਸਿਤਞ੍ਹਿ ਚੀਵਰਂ ਇਧ ਨਿਸ੍ਸਯਵੋਹਾਰੇਨ ‘‘ਕਥਿਨ’’ਨ੍ਤਿ ਵੁਤ੍ਤਂ ‘‘ਮਞ੍ਚਾ ਘੋਸਨ੍ਤੀ’’ਤਿਆਦੀਸੁ ਵਿਯ. ਅਨੁਵਾਤਂ ਪਰਿਭਣ੍ਡਨ੍ਤਿ ਕਥਿਨੇ ਬਨ੍ਧਨਰਜ੍ਜੂਹਿ ਚੀਵਰਸ੍ਸ ਸਮਨ੍ਤਾ ਪਰਿਯਨ੍ਤਸ੍ਸ ਅਜੀਰਣਤ੍ਥਂ ਯੇਹਿ ਕੇਹਿਚਿ ਚੋਲ਼ਕੇਹਿ ਦੀਘਤੋ ਅਨੁਵਾਤਂ, ਤਿਰਿਯਤੋ ਪਰਿਭਣ੍ਡਞ੍ਚ ਸਿਬ੍ਬਿਤ੍ਵਾ ਕਾਤੁਂ ਯਤ੍ਥ ਰਜ੍ਜੁਕੇ ਪਵੇਸੇਤ੍ਵਾ ਦਣ੍ਡੇਸੁ ਪਲਿਵੇਠੇਤ੍ਵਾ ਚੀਵਰਸਮਕਂ ਆਕਡ੍ਢਿਤੁਂ ਸਕ੍ਕਾ, ਤਾਦਿਸਨ੍ਤਿ ਅਤ੍ਥੋ. ਕੇਚਿ ਪਨ ‘‘ਕਥਿਨਸਙ੍ਖਾਤੇਸੁ ਕਿਲਞ੍ਜਾਦੀਸੁ ਏਵ ਅਜੀਰਣਤ੍ਥਾਯ ਅਨੁਵਾਤਪਰਿਭਣ੍ਡਕਰਣਂ ਅਨੁਞ੍ਞਾਤ’’ਨ੍ਤਿ ਵਦਨ੍ਤਿ. ਤਸ੍ਸ ਮਜ੍ਝੇਤਿ ਪੁਰਾਣਕਥਿਨਸ੍ਸੇਵ ਅਨ੍ਤੋ. ਭਿਕ੍ਖੁਨੋ ਪਮਾਣੇਨਾਤਿ ਭਿਕ੍ਖੁਨੋ ਚੀਵਰਸ੍ਸ ਪਮਾਣੇਨ. ਅਞ੍ਞਂ ਨਿਸ੍ਸੇਣਿਨ੍ਤਿ ਦੀਘਤੋ ਚ ਤਿਰਿਯਤੋ ਚ ਅਞ੍ਞਂ ਦਣ੍ਡਂ ਠਪੇਤ੍ਵਾ ਬਨ੍ਧਿਤੁਂ.

ਬਿਦਲਕਨ੍ਤਿ ¶ ਦਿਗੁਣਕਰਣਸਙ੍ਖਾਤਕਿਰਿਯਾਵਿਸੇਸਸ੍ਸ ਅਧਿਵਚਨਂ. ਤੇਨਾਹ ‘‘ਦੁਗੁਣਕਰਣ’’ਨ੍ਤਿ. ਪਵੇਸਨਸਲਾਕਨ੍ਤਿ ਵਲੀਨਂ ਅਗ੍ਗਹਣਤ੍ਥਾਯ ਪਵੇਸਨਕਵੇਲ਼ੁਸਲਾਕਾਦਿ. ਪਾਲ਼ਿਯਂ ਪਟਿਗ੍ਗਹਨ੍ਤਿ ਅਙ੍ਗੁਲਿਕਞ੍ਚੁਕਂ.

੨੫੭. ਪਾਤਿ ਨਾਮ ਭਣ੍ਡਟ੍ਠਪਨਕੋ ਭਾਜਨਵਿਸੇਸੋ. ਪਾਲ਼ਿਯਂ ਪਟਿਗ੍ਗਹਥਵਿਕਨ੍ਤਿ ਪਾਤਿਆਦਿਭਾਜਨਤ੍ਥਵਿਕਂ. ਚਿਨਿਤੁਨ੍ਤਿ ਉਚ੍ਚਵਤ੍ਥੁਪਰਿਯਨ੍ਤਸ੍ਸ ਅਪਤਨਤ੍ਥਾਯ ਇਟ੍ਠਕਾਦੀਹਿ ਚਿਨਿਤੁਂ. ਆਲਮ੍ਬਨਬਾਹਨ੍ਤਿ ਆਲਮ੍ਬਨਰਜ੍ਜੁਦਣ੍ਡਾਦਿ. ਪਰਿਭਿਜ੍ਜਤੀਤਿ ਕਟਸਾਰਾਦਿਕਂ ਕਥਿਨਮਜ੍ਝੇ ਭਙ੍ਗਂ ਹੋਤਿ. ਉਸ੍ਸਾਪੇਤ੍ਵਾਤਿ ਦਣ੍ਡਕਥਿਨਂ ਸਨ੍ਧਾਯ ਵੁਤ੍ਤਂ.

੨੫੮-੯. ਉਦਕਂ ¶ ਅਕਪ੍ਪਿਯਨ੍ਤਿ ਸਪ੍ਪਾਣਕਂ. ਉਪਨਨ੍ਧੀਤਿ ਵੇਰਂ ਬਨ੍ਧਿ. ਅਦ੍ਧਾਨਮਗ੍ਗੋ ਪਟਿਪਜ੍ਜਿਤਬ੍ਬੋਤਿ ਏਤ੍ਥ ਅਦ੍ਧਯੋਜਨਂ ਅਦ੍ਧਾਨਮਗ੍ਗੋ ਨਾਮ, ਤਂ ਪਟਿਪਜ੍ਜਿਤੁਕਾਮਸ੍ਸ ਸਞ੍ਚਿਚ੍ਚ ਵਿਹਾਰੂਪਚਾਰਾਤਿਕ੍ਕਮਨੇ ਆਪਤ੍ਤਿ. ਅਸਞ੍ਚਿਚ੍ਚ ਗਤਸ੍ਸ ਪਨ ਯਤ੍ਥ ਸਰਤਿ, ਤਤ੍ਥ ਠਤ੍ਵਾ ਸਙ੍ਘਾਟਿਕਣ੍ਣਾਦਿਂ ਅਨਧਿਟ੍ਠਹਿਤ੍ਵਾ ਗਮਨੇ ਪਦਵਾਰੇਨ ਆਪਤ੍ਤੀਤਿ ਵੇਦਿਤਬ੍ਬਂ. ਨ ਸਮ੍ਮਤੀਤਿ ਨ ਪਹੋਤਿ.

੨੬੦. ਅਭਿਸਨ੍ਨਕਾਯਾਤਿ ਸੇਮ੍ਹਾਦਿਦੋਸਸਨ੍ਨਿਚਿਤਕਾਯਾ. ਤਤ੍ਥ ਮਜ੍ਝੇਤਿ ਅਗ੍ਗਲ਼ਪਾਸਕਸ੍ਸ ਮਜ੍ਝੇ. ਉਪਰੀਤਿ ਅਗ੍ਗਲ਼ਪਾਸਕਸ੍ਸ ਉਪਰਿਭਾਗੇ. ਉਦਕਟ੍ਠਪਨਟ੍ਠਾਨਨ੍ਤਿ ਉਦਕਟ੍ਠਪਨਤ੍ਥਾਯ ਪਰਿਚ੍ਛਿਨ੍ਦਿਤ੍ਵਾ ਕਤਟ੍ਠਾਨਂ.

੨੬੧. ਪਾਲ਼ਿਯਂ ਉਦਪਾਨਨ੍ਤਿ ਕੂਪਂ. ਨੀਚਵਤ੍ਥੁਕੋਤਿ ਕੂਪਸ੍ਸ ਸਮਨ੍ਤਾ ਕੂਲਟ੍ਠਾਨਂ, ਭੂਮਿਸਮਂ ਤਿਟ੍ਠਤੀਤਿ ਅਤ੍ਥੋ. ਉਦਕੇਨ ਓਤ੍ਥਰਿਯ੍ਯਤੀਤਿ ਸਮਨ੍ਤਾ ਵਸ੍ਸੋਦਕਂ ਆਗਨ੍ਤ੍ਵਾ ਕੂਪੇ ਪਤਤੀਤਿ ਅਤ੍ਥੋ.

੨੬੨. ਵਾਹੇਨ੍ਤੀਤਿ ਉਸ੍ਸਿਞ੍ਚਨ੍ਤਿ. ਅਰਹਟਘਟਿਯਨ੍ਤਂ ਨਾਮ ਚਕ੍ਕਸਣ੍ਠਾਨਂ ਅਨੇਕਾਰਂ ਅਰੇ ਅਰੇ ਘਟਿਕਾਨਿ ਬਨ੍ਧਿਤ੍ਵਾ ਏਕੇਨ, ਦ੍ਵੀਹਿ ਵਾ ਪਰਿਬ੍ਭਮਿਯਮਾਨਯਨ੍ਤਂ.

੨੬੩. ਆਵਿਦ੍ਧਪਕ੍ਖਪਾਸਕਨ੍ਤਿ ਕਣ੍ਣਿਕਮਣ੍ਡਲਸ੍ਸ ਸਮਨ੍ਤਾ ਠਪਿਤਪਕ੍ਖਪਾਸਕਂ. ਮਣ੍ਡਲੇਤਿ ਕਣ੍ਣਿਕਮਣ੍ਡਲੇ. ਪਕ੍ਖਪਾਸਕੇ ਠਪੇਤ੍ਵਾਤਿ ਸਮਨ੍ਤਾ ਚਤੁਰਸ੍ਸਾਕਾਰੇਨ ਫਲਕਾਦੀਨਿ ਠਪੇਤ੍ਵਾ.

੨੬੪. ਨਮਤਕਂ ¶ ਨਾਮ ਸਨ੍ਥਤਸਦਿਸਨ੍ਤਿ ਕੇਚਿ ਵਦਨ੍ਤਿ. ਕੇਚਿ ਪਨ ‘‘ਰੁਕ੍ਖਤਚਮਯ’’ਨ੍ਤਿ. ਚਮ੍ਮਖਣ੍ਡਪਰਿਹਾਰੇਨਾਤਿ ਅਨਧਿਟ੍ਠਹਿਤ੍ਵਾ ਸਯਨਾਸਨਵਿਧਿਨਾਤਿ ਅਤ੍ਥੋ. ਪੇਲ਼ਾਯਾਤਿ ਅਟ੍ਠਂਸਸੋਲ਼ਸਂਸਾਦਿਆਕਾਰੇਨ ਕਤਾਯ ਭਾਜਨਾਕਾਰਾਯ ਪੇਲ਼ਾਯ. ਯਤ੍ਥ ਉਣ੍ਹਪਾਯਾਸਾਦਿਂ ਪਕ੍ਖਿਪਿਤ੍ਵਾ ਉਪਰਿ ਭੋਜਨਪਾਤਿਂ ਠਪੇਨ੍ਤਿ ਭਤ੍ਤਸ੍ਸ ਉਣ੍ਹਭਾਵਾਵਿਗਮਨਤ੍ਥਂ, ਤਾਦਿਸਸ੍ਸ ਭਾਜਨਾਕਾਰਸ੍ਸ ਆਧਾਰਸ੍ਸੇਤਂ ਅਧਿਵਚਨਂ. ਤੇਨੇਵ ਪਾਲ਼ਿਯਂ ‘‘ਆਸਿਤ੍ਤਕੂਪਧਾਨ’’ਨ੍ਤਿ ਵੁਤ੍ਤਂ. ਤਸ੍ਸ ਚ ਪਾਯਾਸਾਦੀਹਿ ਆਸਿਤ੍ਤਕਾਧਾਰੋਤਿ ਅਤ੍ਥੋ. ਇਦਞ੍ਚ ਆਸਿਤ੍ਤਕੂਪਧਾਨਂ ਪਚ੍ਚਨ੍ਤੇਸੁ ਨ ਜਾਨਨ੍ਤਿ ਕਾਤੁਂ, ਮਜ੍ਝਿਮਦੇਸੇਯੇਵ ਕਰੋਨ੍ਤਿ. ਕੇਚਿ ਪਨ ‘‘ਗਿਹਿਪਰਿਭੋਗੋ ਅਯੋਮਯਾਦਿ ਸਬ੍ਬੋਪਿ ਆਧਾਰੋ ਆਸਿਤ੍ਤਕੂਪਧਾਨਮੇਵ ਅਨੁਲੋਮੇਤੀ’’ਤਿ ਵਦਨ੍ਤਿ, ਏਕੇ ਪਨ ‘‘ਕਪ੍ਪਿਯਲੋਹਮਯੋ ਆਧਾਰੋ ਮਲ਼ੋਰਿਕਮੇਵ ਅਨੁਲੋਮੇਤੀ’’ਤਿ. ਵੀਮਂਸਿਤ੍ਵਾ ਗਹੇਤਬ੍ਬਂ. ਪੁਬ੍ਬੇ ਪਤ੍ਤਗੁਤ੍ਤਿਯਾ ਆਧਾਰੋ ਅਨੁਞ੍ਞਾਤੋ. ਇਦਾਨਿ ਭੁਞ੍ਜਿਤੁਂ ਮਲ਼ੋਰਿਕਾ ਅਨੁਞ੍ਞਾਤਾ. ਛਿਦ੍ਦਨ੍ਤਿ ਛਿਦ੍ਦਯੁਤ੍ਤਂ. ਵਿਦ੍ਧਨ੍ਤਿ ਅਨ੍ਤੋਵਿਨਿਵਿਦ੍ਧਛਿਦ੍ਦਂ. ਆਵਿਦ੍ਧਨ੍ਤਿ ਸਮਨ੍ਤਤੋ ਛਿਦ੍ਦਂ.

੨੬੫. ਪਤ੍ਤਂ ਨਿਕ੍ਕੁਜ੍ਜਿਤੁਨ੍ਤਿ ਏਤ੍ਥ ਕਮ੍ਮਵਾਚਾਯ ਅਸਮ੍ਭੋਗਕਰਣਵਸੇਨੇਵ ਨਿਕ੍ਕੁਜ੍ਜਨਂ, ਨ ਪਤ੍ਤਾਨਂ ¶ ਅਧੋਮੁਖਟ੍ਠਪਨੇਨ. ਤੇਨਾਹ ‘‘ਅਸਮ੍ਭੋਗਂ ਸਙ੍ਘੇਨ ਕਰੋਤੂ’’ਤਿਆਦਿ, ਤਂ ਵਡ੍ਢਂ ਕਮ੍ਮਵਾਚਾਯ ਸਙ੍ਘੇਨ ਸਦ੍ਧਿਂ ਅਸਮ੍ਭੋਗਂ ਸਙ੍ਘੋ ਕਰੋਤੂਤਿ ਅਤ੍ਥੋ.

ਪਤ੍ਤਂ ਨਿਕ੍ਕੁਜ੍ਜੇਯ੍ਯਾਤਿ ਵਡ੍ਢਸ੍ਸ ਪਤ੍ਤਨਿਕ੍ਕੁਜ੍ਜਨਦਣ੍ਡਕਮ੍ਮਂ ਕਰੇਯ੍ਯ. ਅਸਮ੍ਭੋਗਂ ਸਙ੍ਘੇਨ ਕਰਣਨ੍ਤਿ ਸਙ੍ਘੇਨ ਵਡ੍ਢਸ੍ਸ ਅਸਮ੍ਭੋਗਕਰਣਂ. ਯਥਾ ਅਸਮ੍ਭੋਗੋ ਹੋਤਿ, ਤਥਾ ਕਰਣਨ੍ਤਿ ਅਤ੍ਥੋ. ਨਿਕ੍ਕੁਜ੍ਜਿਤੋ…ਪੇ… ਅਸਮ੍ਭੋਗਂ ਸਙ੍ਘੇਨਾਤਿ ਏਤ੍ਥ ਸਙ੍ਘੇਨ ਅਸਮ੍ਭੋਗੋ ਹੋਤੀਤਿ ਅਤ੍ਥੋ ਦਟ੍ਠਬ੍ਬੋ. ਏਵਂ ਭਗਵਤਾ ਅਸਮ੍ਭੋਗਕਰਣਸ੍ਸ ਆਣਤ੍ਤਤ੍ਤਾ, ਕਮ੍ਮਵਾਚਾਯ ਚ ਸਾਵਿਤਤ੍ਤਾ, ਅਟ੍ਠਕਥਾਯਞ੍ਚ ‘‘ਕੋਚਿ ਦੇਯ੍ਯਧਮ੍ਮੋ ਨ ਗਹੇਤਬ੍ਬੋ’’ਤਿ ਵੁਤ੍ਤਤ੍ਤਾ ਪਤ੍ਤੇ ਨਿਕ੍ਕੁਜ੍ਜਿਤੇ ਤਸ੍ਸ ਸਨ੍ਤਕਂ ਞਤ੍ਵਾ ਗਣ੍ਹਨ੍ਤਸ੍ਸ ਦੁਕ੍ਕਟਮੇਵਾਤਿ ਗਹੇਤਬ੍ਬਂ.

ਅਚ੍ਚਯੋਤਿ ਞਾਯਪ੍ਪਟਿਪਤ੍ਤਿਂ ਅਤਿਕ੍ਕਮਿਤ੍ਵਾ ਪਵਤ੍ਤਿ, ਅਪਰਾਧੋਤਿ ਅਤ੍ਥੋ. ਮਂ ਅਚ੍ਚਗਮਾਤਿ ਮਂ ਅਤਿਕ੍ਕਮ੍ਮ ਪਵਤ੍ਤੋ. ਤਂ ਤੇ ਮਯਂ ਪਟਿਗ੍ਗਣ੍ਹਾਮਾਤਿ ਤਂ ਤੇ ਅਪਰਾਧਂ ਮਯਂ ਖਮਾਮ. ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਤੀਤਿਆਦੀਸੁ ਅਲਾਭਾਯ ¶ ਪਰਿਸਕ੍ਕਨਾਦਿਤੋ ਵਿਰਤੋਤਿ ਏਵਮਤ੍ਥੋ ਗਹੇਤਬ੍ਬੋ. ਅਸਮ੍ਭੋਗਂ ਭਿਕ੍ਖੁਸਙ੍ਘੇਨਾਤਿ ਏਤ੍ਥ ‘‘ਕਤੋ’’ਤਿ ਪਾਠਸੇਸੋ.

੨੬੮. ਯਾਵ ਪਚ੍ਛਿਮਾ ਸੋਪਾਨਕਲ਼ੇਵਰਾਤਿ ਪਠਮਸੋਪਾਨਫਲਕਂ ਸਨ੍ਧਾਯ ਵੁਤ੍ਤਂ. ਤਞ੍ਹਿ ਪਚ੍ਛਾ ਦੁਸ੍ਸੇਨ ਸਨ੍ਥਤਤ੍ਤਾ ਏਵ ਵੁਤ੍ਤਂ. ‘‘ਪਚ੍ਛਿਮਂ ਜਨਤਂ ਤਥਾਗਤੋ ਅਨੁਕਮ੍ਪਤੀ’’ਤਿ ਇਦਂ ਥੇਰੋ ਅਨਾਗਤੇ ਭਿਕ੍ਖੂਨਂ ਚੇਲਪਟਿਕਸ੍ਸ ਅਕ੍ਕਮਨਪਚ੍ਚਯਾ ਅਪਵਾਦਂ ਸਿਕ੍ਖਾਪਦਪਞ੍ਞਤ੍ਤਿਯਾ ਨਿਵਾਰਣੇਨ ਭਗਵਤੋ ਅਨੁਕਮ੍ਪਂ ਸਨ੍ਧਾਯਾਹ. ਅਪਗਤਗਬ੍ਭਾਤਿ ਵਿਜਾਤਪੁਤ੍ਤਾ. ਤੇਨਾਹ ‘‘ਮਙ੍ਗਲਤ੍ਥਾਯਾ’’ਤਿ.

੨੬੯-੨੭੦. ਬੀਜਨਿਨ੍ਤਿ ਚਤੁਰਸ੍ਸਬੀਜਨਿਂ. ਏਕਪਣ੍ਣਚ੍ਛਤ੍ਤਨ੍ਤਿ ਤਾਲਪਣ੍ਣਾਦਿਨਾ ਏਕੇਨ ਪਤ੍ਤੇਨ ਕਤਛਤ੍ਤਂ.

੨੭੪-੫. ਅਨੁਰਕ੍ਖਣਤ੍ਥਨ੍ਤਿ ਪਰਿਗ੍ਗਹੇਤ੍ਵਾ ਗੋਪਨਤ੍ਥਂ. ਦੀਘਂ ਕਾਰੇਨ੍ਤੀਤਿ ਕੇਸੇਹਿ ਸਦ੍ਧਿਂ ਅਚ੍ਛਿਨ੍ਦਿਤ੍ਵਾ ਠਪਾਪੇਨ੍ਤਿ. ਚਤੁਕੋਣਨ੍ਤਿ ਯਥਾ ਉਪਰਿ ਨਲਾਟਨ੍ਤੇਸੁ ਦ੍ਵੇ, ਹੇਟ੍ਠਾ ਹਨੁਕਪਸ੍ਸੇ ਦ੍ਵੇਤਿ ਚਤ੍ਤਾਰੋ ਕੋਣਾ ਪਞ੍ਞਾਯਨ੍ਤਿ, ਏਵਂ ਚਤੁਰਸ੍ਸਂ ਕਤ੍ਵਾ ਕਪ੍ਪਾਪਨਂ. ਪਾਲ਼ਿਯਂ ਦਾਠਿਕਂ ਠਪਾਪੇਨ੍ਤੀਤਿ ਉਤ੍ਤਰੋਟ੍ਠੇ ਮਸ੍ਸੁਂ ਅਚ੍ਛਿਨ੍ਦਿਤ੍ਵਾ ਠਪਾਪੇਨ੍ਤਿ. ਰੁਧੀਤਿ ਖੁਦ੍ਦਕਵਣਂ.

੨੭੭. ਪਾਲ਼ਿਯਂ ਲੋਹਭਣ੍ਡਕਂਸਭਣ੍ਡਸਨ੍ਨਿਚਯੋਤਿ ਲੋਹਭਣ੍ਡਸ੍ਸ, ਕਂਸਭਣ੍ਡਸ੍ਸ ਚ ਸਨ੍ਨਿਚਯੋਤਿ ¶ ਅਤ੍ਥੋ. ਬਨ੍ਧਨਮਤ੍ਤਨ੍ਤਿ ਵਾਸਿਦਣ੍ਡਾਦੀਨਂ ਕੋਟੀਸੁ ਅਪਾਤਨਤ੍ਥਂ ਲੋਹੇਹਿ ਬਨ੍ਧਨਂ. ਤਨ੍ਤਕਨ੍ਤਿ ਆਯੋਗਵਾਯਨਤ੍ਥਂ ਤਦਾਕਾਰੇਨ ਪਸਾਰਿਤਤਨ੍ਤਂ.

੨੭੮. ‘‘ਯਤ੍ਥ ਸਰਤਿ, ਤਤ੍ਥ ਬਨ੍ਧਿਤਬ੍ਬ’’ਨ੍ਤਿ ਏਤੇਨ ਅਸਞ੍ਚਿਚ੍ਚ ਕਾਯਬਨ੍ਧਨਂ ਅਬਨ੍ਧਿਤ੍ਵਾ ਪਵਿਟ੍ਠਸ੍ਸ ਅਨਾਪਤ੍ਤੀਤਿ ਦਸ੍ਸੇਤਿ. ਮੁਰਜਵਟ੍ਟਿਸਣ੍ਠਾਨਂ ਵੇਠੇਤ੍ਵਾ ਕਤਨ੍ਤਿ ਏਵਂ ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਨਾਨਾਵਣ੍ਣੇਹਿ ਸੁਤ੍ਤੇਹਿ ਕਤਨ੍ਤਿ ਕੇਚਿ ਵਦਨ੍ਤਿ. ਏਕਵਣ੍ਣਸੁਤ੍ਤੇਨਾਪਿ ਵਲਯਘਟਕਾਦਿਵਿਕਾਰਂ ਦਸ੍ਸੇਤ੍ਵਾ ਵੇਠਿਤਮ੍ਪਿ ਮੁਰਜਮੇਵ. ਵਿਕਾਰਂ ਪਨ ਅਦਸ੍ਸੇਤ੍ਵਾ ਮਟ੍ਠਂ ਕਤ੍ਵਾ ਨਿਰਨ੍ਤਰਂ ਵੇਠਿਤਂ ਵਟ੍ਟਤਿ. ਤੇਨੇਵ ਦੁਤਿਯਪਾਰਾਜਿਕਸਂਵਣ੍ਣਨਾਯਂ ਵੁਤ੍ਤਂ ‘‘ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ‘ਬਹੁਰਜ੍ਜੁਕ’ਨ੍ਤਿ ਨ ਵਤ੍ਤਬ੍ਬਂ, ਵਟ੍ਟਤੀ’’ਤਿ. ਮੁਦ੍ਦਿਕਕਾਯਬਨ੍ਧਨਂ ਨਾਮ ਚਤੁਰਸ੍ਸਂ ਅਕਤ੍ਵਾ ¶ ਸਜ੍ਜਿਤਂ. ਪਾਮਙ੍ਗਦਸਾ ਚਤੁਰਸ੍ਸਾ. ਮੁਦਿਙ੍ਗਸਣ੍ਠਾਨੇਨਾਤਿ ਵਰਕਸੀਸਾਕਾਰੇਨ. ਪਾਸਨ੍ਤੋਤਿ ਦਸਾਪਰਿਯੋਸਾਨਂ.

੨੭੯. ਪਾਲ਼ਿਯਂ ਗਣ੍ਠਿਕਫਲਕਂ ਪਾਸਕਫਲਕਨ੍ਤਿ ਏਤ੍ਥ ਦਾਰੁਦਨ੍ਤਾਦਿਮਯੇਸੁ ਫਲਕੇਸੁ ਗਣ੍ਠਿਕਪਾਸਕਾਨਿ ਅਪ੍ਪੇਤ੍ਵਾ ਚੀਵਰੇ ਠਪੇਤੁਂ ਅਨੁਞ੍ਞਾਤਂ. ਕੋਟ੍ਟੋ ਵਿਵਰਿਯਤੀਤਿ ਅਨੁਵਾਤੋ ਵਿਵਰਿਯਤਿ.

੨੮੦-੧. ਪਾਲ਼ਿਕਾਰਕੋਤਿ ਭਿਕ੍ਖੂਨਂ ਯਥਾਵੁਡ੍ਢਂ ਪਾਲ਼ਿਯਾ ਪਤਿਟ੍ਠਾਪਕੋ. ਤਸ੍ਸਾਪਿ ਤਥਾ ਪਾਰੁਪਿਤੁਂ ਨ ਵਟ੍ਟਤਿ. ਪਾਲ਼ਿਯਂ ਮੁਣ੍ਡਵਟ੍ਟੀਤਿ ਮਲ੍ਲਾਦਯੋ.

੨੮੨. ਪਮਾਣਙ੍ਗੁਲੇਨਾਤਿ ਵਡ੍ਢਕੀਅਙ੍ਗੁਲੇਨ. ਕੇਚਿ ਪਨ ‘‘ਪਕਤਿਅਙ੍ਗੁਲੇਨਾ’’ਤਿ ਵਦਨ੍ਤਿ, ਤਂ ਚਤੁਰਙ੍ਗੁਲਪਚ੍ਛਿਮਕਵਚਨੇਨ ਨ ਸਮੇਤਿ. ਨ ਹਿ ਪਕਤਙ੍ਗੁਲੇਨ ਚਤੁਰਙ੍ਗੁਲਪ੍ਪਮਾਣਂ ਦਨ੍ਤਕਟ੍ਠਂ ਕਣ੍ਠੇ ਅਵਿਲਗ੍ਗਂ ਖਾਦਿਤੁਂ ਸਕਾਤਿ.

੨੮੫. ਪਾਲ਼ਿਯਂ ਸਕਾਯ ਨਿਰੁਤ੍ਤਿਯਾ ਬੁਦ੍ਧਵਚਨਂ ਦੂਸੇਨ੍ਤੀਤਿ ਮਾਗਧਭਾਸਾਯ ਸਬ੍ਬੇਸਂ ਵਤ੍ਤੁਂ ਸੁਕਰਤਾਯ ਹੀਨਜਚ੍ਚਾਪਿ ਉਗ੍ਗਣ੍ਹਨ੍ਤਾ ਦੂਸੇਨ੍ਤੀਤਿ ਅਤ੍ਥੋ.

੨੮੯. ਮਾ ਭਿਕ੍ਖੂ ਬ੍ਯਾਬਾਧਯਿਂਸੂਤਿ ਲਸੁਣਗਨ੍ਧੇਨ ਭਿਕ੍ਖੂ ਮਾ ਬਾਧਯਿਂਸੁ.

੨੯੧. ਅਵਲੇਖਨਪੀਠਰੋਤਿ ¶ ਅਵਲੇਖਨਕਟ੍ਠਾਨਂ ਠਪਨਭਾਜਨਵਿਸੇਸੋ. ਅਪਿਧਾਨਨ੍ਤਿ ਪਿਧਾਨਫਲਕਾਦਿ.

ਖੁਦ੍ਦਕਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਖੁਦ੍ਦਕਵਤ੍ਥੁਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੨੯੫. ਸੇਨਾਸਨਕ੍ਖਨ੍ਧਕੇ ¶ ¶ ਸਿਸਿਰੇਤਿ ਸਿਸਿਰਕਾਲੇ ਹਿਮਪਾਤਵਸੇਨ ਸਤ੍ਤਾਹਵਦ੍ਦਲਿਕਾਦਿਵਸ੍ਸਪਾਤਵਸ੍ਸੇਨ ਚ ਉਪ੍ਪਨ੍ਨੋ ਖਰੋ ਸੀਤਸਮ੍ਫਸ੍ਸੋ ਅਧਿਪ੍ਪੇਤੋਤਿ ਆਹ ‘‘ਸਮ੍ਫੁਸਿਤਕੋ’’ਤਿ. ‘‘ਤਤੋ’’ਤਿ ਇਦਂ ਕਤ੍ਤੁਅਤ੍ਥੇ ਨਿਸ੍ਸਕ੍ਕਵਚਨਂ, ਤੇਨ ਚ ਵਿਹਾਰੇਨ ਵਾਤਾਤਪੋ ਪਟਿਹਞ੍ਞਤੀਤਿ ਅਤ੍ਥੋਤਿ ਆਹ ‘‘ਵਿਹਾਰੇਨ ਪਟਿਹਞ੍ਞਤੀ’’ਤਿ.

੨੯੬. ਆਵਿਞ੍ਛਨਛਿਦ੍ਦਨ੍ਤਿ ਯਤ੍ਥ ਅਙ੍ਗੁਲਿਂ ਵਾ ਰਜ੍ਜੁਸਙ੍ਖਲਿਕਾਦਿਂ ਵਾ ਪਵੇਸੇਤ੍ਵਾ ਕਵਾਟਂ ਆਕਡ੍ਢਨ੍ਤਾ ਦ੍ਵਾਰਬਾਹਂ ਫੁਸਾਪੇਨ੍ਤਿ, ਤਸ੍ਸੇਤਂ ਅਧਿਵਚਨਂ. ਸੇਨਾਸਨਪਰਿਭੋਗੇ ਅਕਪ੍ਪਿਯਂ ਨਾਮ ਨਤ੍ਥੀਤਿ ਦਸ੍ਸਨਤ੍ਥਂ ‘‘ਸਚੇਪਿ ਦੀਪਿਨਙ੍ਗੁਟ੍ਠੇਨਾ’’ਤਿਆਦਿ ਵੁਤ੍ਤਂ. ਚੇਤਿਯੇ ਵੇਦਿਕਾਸਦਿਸਨ੍ਤਿ ਵਾਤਪਾਨਦਾਰੁਂ ਵਾ ਜਾਲਂ ਵਾ ਅਟ੍ਠਪੇਤ੍ਵਾ ਦਾਰੁਟ੍ਠਾਨੇ ਚੇਤਿਯੇ ਵੇਦਿਕਾਯ ਪਟ੍ਟਾਦੀਨਿ ਵਿਯ ਇਟ੍ਠਕਾਦੀਹਿ ਉਦ੍ਧਂ, ਤਿਰਿਯਞ੍ਚ ਪਟ੍ਟਿਕਾਦਯੋ ਦਸ੍ਸੇਤ੍ਵਾ ਚਤੁਛਿਦ੍ਦਯੁਤ੍ਤਂ ਕਤਂ. ਥਮ੍ਭਕਵਾਤਪਾਨਂ ਨਾਮ ਤਿਰਿਯਂ ਦਾਰੂਨਿ ਅਦਤ੍ਵਾ ਉਦ੍ਧਂ ਠਪਿਤਦਾਰੂਹਿ ਏਵ ਕਤਂ. ਚੋਲ਼ਕਪਾਦਪੁਞ੍ਛਨਂ ਬਨ੍ਧਿਤੁਨ੍ਤਿ ਵਾਤਪਾਨਪ੍ਪਮਾਣੇਨ ਪਾਦਪੁਞ੍ਛਨਸਦਿਸਂ ਚੋਲ਼ਕਾਦਿਨਾ ਬਨ੍ਧਿਤ੍ਵਾ ਵਗ੍ਗੁਲਿਆਦਿਪ੍ਪਵੇਸਨਨਿਵਾਰਣਤ੍ਥਂ, ਕਥੇਤੁਨ੍ਤਿ ਅਤ੍ਥੋ. ਮਿਡ੍ਢਕਨ੍ਤਿ ਮਞ੍ਚਾਕਾਰੇਨ ਕਟ੍ਠਮਤ੍ਤਿਕਾਦੀਹਿ ਕਤਵੇਦਿਕਾਕਾਰਂ.

੨੯੭. ਚਤੁਰਸ੍ਸਪੀਠਨ੍ਤਿ ਸਮਚਤੁਰਸ੍ਸਂ. ਅਟ੍ਠਙ੍ਗੁਲਪਾਦਕਂ ਵਟ੍ਟਤੀਤਿ ਅਟ੍ਠਙ੍ਗੁਲਪਾਦਕਮੇਵ ਵਟ੍ਟਤਿ. ਪਮਾਣਾਤਿਕ੍ਕਨ੍ਤੋਪਿ ਵਟ੍ਟਤੀਤਿ ਸਮਚਤੁਰਸ੍ਸਮੇਵ ਸਨ੍ਧਾਯ ਵੁਤ੍ਤਂ. ਆਯਤਚਤੁਰਸ੍ਸਾ ਪਨ ਸਤ੍ਤਙ੍ਗਪਞ੍ਚਙ੍ਗਾਪਿ ਉਚ੍ਚਪਾਦਾ ਨ ਵਟ੍ਟਨ੍ਤਿ. ਵੇਤ੍ਤੇਹੇਵ ਚਤੁਰਸ੍ਸਾਦਿਆਕਾਰੇਨ ਕਤਂ ਭਦ੍ਦਪੀਠਨ੍ਤਿ ਆਹ ‘‘ਵੇਤ੍ਤਮਯਂ ਪੀਠ’’ਨ੍ਤਿ. ਦਾਰੁਪਟ੍ਟਿਕਾਯ ਉਪਰੀਤਿ ਅਟਨਿਆਕਾਰੇਨ ਠਿਤਦਾਰੁਪਟਲਸ੍ਸ ਹੇਟ੍ਠਾ ਉਦ੍ਧਂ ਪਾਦਂ ਕਤ੍ਵਾ. ਪਵੇਸਨਕਾਲਞ੍ਹਿ ਸਨ੍ਧਾਯ ‘‘ਉਪਰੀ’’ਤਿ ਵੁਤ੍ਤਂ. ਏਲ਼ਕਸ੍ਸ ਪਚ੍ਛਿਮਪਾਦਦ੍ਵਯਂ ਵਿਯ ਵਙ੍ਕਾਕਾਰੇਨ ਠਿਤਤ੍ਤਾ ਪਨੇਤਂ ‘‘ਏਲ਼ਕਪਾਦਪੀਠ’’ਨ੍ਤਿ ਵੁਤ੍ਤਂ. ਪਲੋਠੇਨ੍ਤੀਤਿ ਸਹ ਮਞ੍ਚੇਹਿ ਪਵਟ੍ਟੇਨ੍ਤਿ. ਰੁਕ੍ਖੇ ¶ , ਲਤਾ ਚ ਮੁਞ੍ਚਿਤ੍ਵਾ ਅਵਸੇਸਂ ਗਚ੍ਛਾਦਿਕਂ ਸਬ੍ਬਮ੍ਪਿ ਤਿਣਜਾਤਿ ਏਵਾਤਿ ਆਹ ‘‘ਯੇਸਂ ਕੇਸਞ੍ਚਿ ਤਿਣਜਾਤਿਕਾਨ’’ਨ੍ਤਿਆਦਿ.

ਉਪਦਹਨ੍ਤੀਤਿ ¶ ਠਪੇਨ੍ਤਿ. ਸੀਸਪ੍ਪਮਾਣਂ ਨਾਮ ਯਤ੍ਥ ਗੀਵਾਯ ਸਹ ਸਕਲਂ ਸੀਸਂ ਠਪੇਤੁਂ ਸਕ੍ਕਾ, ਤਸ੍ਸ ਚ ਮੁਟ੍ਠਿਰਤਨਂ ਵਿਤ੍ਥਾਰਪ੍ਪਮਾਣਨ੍ਤਿ ਦਸ੍ਸੇਨ੍ਤੋ ‘‘ਵਿਤ੍ਥਾਰਤੋ’’ਤਿਆਦਿਮਾਹ. ਇਦਞ੍ਚ ਬਿਮ੍ਬੋਹਨਸ੍ਸ ਉਭੋਸੁ ਅਨ੍ਤੇਸੁ ਠਪੇਤਬ੍ਬਚੋਲ਼ਪ੍ਪਮਾਣਦਸ੍ਸਨਂ. ਤਸ੍ਸ ਵਸੇਨ ਬਿਮ੍ਬੋਹਨਸ੍ਸ ਵਿਤ੍ਥਾਰਪ੍ਪਮਾਣਂ ਪਰਿਚ੍ਛਿਜ੍ਜਤਿ, ਤਂ ਵਟ੍ਟਂ ਵਾ ਚਤੁਰਸ੍ਸਂ ਵਾ ਕਤ੍ਵਾ ਸਿਬ੍ਬਿਤਂ ਯਥਾ ਕੋਟਿਤੋ ਕੋਟਿ ਵਿਤ੍ਥਾਰਤੋ ਪੁਥੁਲਟ੍ਠਾਨਂ ਮੁਟ੍ਠਿਰਤਨਪ੍ਪਮਾਣਂ ਹੋਤਿ, ਏਵਂ ਸਿਬ੍ਬਿਤਬ੍ਬਂ. ਇਤੋ ਅਧਿਕਂ ਨ ਵਟ੍ਟਤਿ, ਤਂ ਪਨ ਅਨ੍ਤੇਸੁ ਠਪਿਤਚੋਲ਼ਂ ਕੋਟਿਯਾ ਕੋਟਿਂ ਆਹਚ੍ਚ ਦਿਗੁਣਂ ਕਤਂ ਤਿਕਣ੍ਣਂ ਹੋਤਿ. ਤੇਸੁ ਤੀਸੁ ਕਣ੍ਣੇਸੁ ਦ੍ਵਿਨ੍ਨਂ ਕਣ੍ਣਾਨਮਨ੍ਤਰਂ ਵਿਦਤ੍ਥਿਚਤੁਰਙ੍ਗੁਲਂ ਹੋਤਿ, ਮਜ੍ਝਟ੍ਠਾਨਂ ਕੋਟਿਤੋ ਕੋਟਿਂ ਆਹਚ੍ਚ ਮੁਟ੍ਠਿਰਤਨਂ ਹੋਤਿ, ਇਦਮਸ੍ਸ ਉਕ੍ਕਟ੍ਠਪ੍ਪਮਾਣਂ. ਤੇਨਾਹ ‘‘ਤੀਸੁ ਕਣ੍ਣੇਸੂ’’ਤਿਆਦਿ.

‘‘ਕਮ੍ਬਲਮੇਵ…ਪੇ… ਉਣ੍ਣਭਿਸਿਸਙ੍ਖ੍ਯਮੇਵ ਗਚ੍ਛਤੀ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਗੋਨਕਾਦਿਅਕਪ੍ਪਿਯਮ੍ਪਿ ਉਣ੍ਣਮਯਤ੍ਥਰਣਂ ਭਿਸਿਯਂ ਪਕ੍ਖਿਪਿਤ੍ਵਾ ਸਯਿਤੁਂ ਵਟ੍ਟਤੀਤਿ ਦਟ੍ਠਬ੍ਬਂ.

ਮਸੂਰਕੇਤਿ ਚਮ੍ਮਮਯਭਿਸਿਯਂ. ਚਮ੍ਮਮਯਂ ਪਨ ਬਿਮ੍ਬੋਹਨਂ ਤੂਲਪੁਣ੍ਣਮ੍ਪਿ ਨ ਵਟ੍ਟਤਿ. ਪਾਲ਼ਿਯਂ ਸੇਨਾਸਨਪਰਿਕ੍ਖਾਰਦੁਸ੍ਸਨ੍ਤਿ ਸੇਨਾਸਨਪਰਿਕ੍ਖਾਰਕਰਣਤ੍ਥਾਯ ਦੁਸ੍ਸਂ. ਭਿਸਿਂ ਓਨਨ੍ਧਿਤੁਨ੍ਤਿ ਭਿਸਿਤ੍ਥਵਿਕਾਯ ਪਕ੍ਖਿਪਿਤ੍ਵਾ ਬਨ੍ਧਿਤੁਂ. ਪਰਿਭਿਜ੍ਜਤੀਤਿ ਮਞ੍ਚਾਦਿਤੋ ਸਾਰਿਯਮਾਨਾ ਪੀਠਕੋਟਿਆਦੀਸੁ ਨਿਸੀਦਨ੍ਤੇਹਿ ਘਂਸਿਯਮਾਨਾ ਭਿਸਿ ਪਰਿਭਿਜ੍ਜਤਿ. ਓਨਦ੍ਧਮਞ੍ਚਨ੍ਤਿ ਭਿਸਿਂ ਏਕਾਬਦ੍ਧਂ ਕਤ੍ਵਾ ਬਦ੍ਧਮਞ੍ਚਂ. ਪਾਲ਼ਿਯਂ ਛਵਿਂ ਉਪ੍ਪਾਟੇਤ੍ਵਾ ਹਰਨ੍ਤੀਤਿ ਭਿਸਿਚ੍ਛਵਿਂ ਚੋਰਾ ਹਰਨ੍ਤਿ. ਫੋਸਿਤੁਨ੍ਤਿ ਚੋਰੇਹਿ ਹਰਿਤਸ੍ਸ ਪਚ੍ਛਾ ਹਰਿਤਸਞ੍ਞਾਣਫੁਸਿਤਬਿਨ੍ਦੂਨਿ ਦਾਤੁਂ. ਭਿਤ੍ਤਿਕਮ੍ਮਨ੍ਤਿ ਨਾਨਾਵਣ੍ਣੇਹਿ ਵਿਭਿਤ੍ਤਿਰਾਜਿਕਰਣਂ. ਹਤ੍ਥਕਮ੍ਮਨ੍ਤਿ ਹਤ੍ਥੇਨ ਯਂ ਕਿਞ੍ਚਿ ਸਞ੍ਞਾਕਰਣਂ.

੨੯੮. ਪਾਲ਼ਿਯਂ ਨ ਨਿਪਤਤੀਤਿ ਨ ਅਲ੍ਲੀਯਤਿ. ਪਟਿਬਾਹੇਤ੍ਵਾਤਿ ਘਂਸਿਤ੍ਵਾ. ਨ ਨਿਬਨ੍ਧਤੀਤਿ ਅਨਿਬਨ੍ਧਨੀਯੋ, ਨ ਲਗ੍ਗਨਕੋਤਿ ਅਤ੍ਥੋ.

੨੯੯. ‘‘ਕਰੋਹੀ’’ਤਿ ਵਤ੍ਤੁਮ੍ਪਿ ਨ ਲਬ੍ਭਤੀਤਿ ਆਣਤ੍ਤਿਯਾ ਏਵ ਪਟਿਕ੍ਖਿਤ੍ਤਤ੍ਤਾ ਦ੍ਵਾਰਪਾਲਂ ‘‘ਕਿਂ ਨ ਕਰੋਸੀ’’ਤਿਆਦਿਨਾ ਪਰਿਯਾਯੇਨ ਵਤ੍ਤੁਂ ਵਟ੍ਟਤਿ. ਜਾਤਕਪਕਰਣਨ੍ਤਿ ਜਾਤਕਪਟਿਸਂਯੁਤ੍ਤਂ ਇਤ੍ਥਿਪੁਰਿਸਾਦਿ ਯਂ ਕਿਞ੍ਚਿ ਰੂਪਂ ਅਧਿਪ੍ਪੇਤਂ. ‘‘ਪਰੇਹਿ ਕਾਰਾਪੇਤੁ’’ਨ੍ਤਿ ਵੁਤ੍ਤਤ੍ਤਾ ਬੁਦ੍ਧਰੂਪਮ੍ਪਿ ਸਯਂ ਕਾਤੁਂ ਨ ਲਭਤਿ. ਪਾਲ਼ਿਯਂ ਪਞ੍ਚਪਟਿਕਨ੍ਤਿ ਜਾਤਿਆਦਿਪਞ੍ਚਪ੍ਪਕਾਰਵਣ੍ਣਮਟ੍ਠਂ.

੩੦੦. ਉਪਚਾਰੋ ¶ ¶ ਨ ਹੋਤੀਤਿ ਗਬ੍ਭਸ੍ਸ ਬਹਿ ਸਮਨ੍ਤਾ ਅਨੁਪਰਿਗਮਨਸ੍ਸ ਓਕਾਸੋ ਨਪ੍ਪਹੋਤਿ. ਰੁਕ੍ਖਂ ਵਿਜ੍ਝਿਤ੍ਵਾਤਿ ਤਚ੍ਛਿਤਸਾਰਦਾਰੁਂ ਅਗ੍ਗਸਮੀਪੇ ਵਿਜ੍ਝਿਤ੍ਵਾ. ਕਤ੍ਵਾਤਿ ਛਿਦ੍ਦੇ ਕਤ੍ਵਾ. ਕਪ੍ਪਕਤਂ ਵਿਯ ਸਾਰਖਾਣੁਕੇ ਆਕੋਟੇਤ੍ਵਾ ਏਵਂ ਕਤਮੇਵ ‘‘ਆਹਰਿਮਂ ਭਿਤ੍ਤਿਪਾਦ’’ਨ੍ਤਿ ਵੁਤ੍ਤਂ. ਉਪਤ੍ਥਮ੍ਭਨਤ੍ਥਂ ਭੂਮਿਯਂ ਪਤਿਟ੍ਠਾਪੇਤੁਨ੍ਤਿ ਜਿਣ੍ਣਭਿਤ੍ਤਿਪਾਦੇਨ ਬਹਿ ਸਮਾਨਭਾਰਂ ਖਾਣੁਕਪ੍ਪਸੀਸੇਨ ਉਸ੍ਸਾਪੇਤ੍ਵਾ ਮੂਲੇਨ ਭੂਮਿਯਂ ਪਤਿਟ੍ਠਾਪੇਤੁਂ. ਪਰਿਤ੍ਤਾਣਤ੍ਥਨ੍ਤਿ ਉਲ੍ਲਿਤ੍ਤਾਵਲਿਤ੍ਤਕੁਟਿਯਾ ਓਵਸ੍ਸਨਟ੍ਠਾਨਸ੍ਸ ਪਰਿਤ੍ਤਾਣਤ੍ਥਂ. ਕਿਟਿਕਨ੍ਤਿ ਤਾਲਪਣ੍ਣਾਦੀਹਿ ਕਤਪਦਲਂ. ਮਦ੍ਦਿਤਮਤ੍ਤਿਕਨ੍ਤਿ ਓਵਸ੍ਸਨਛਿਦ੍ਦਸ੍ਸ ਪਿਦਹਨਤ੍ਥਂ ਵੁਤ੍ਤਂ.

ਉਭਤੋਕੁਟ੍ਟਂ ਨੀਹਰਿਤ੍ਵਾ ਕਤਪਦੇਸਸ੍ਸਾਤਿ ਯਥਾ ਬਹਿ ਠਿਤਾ ਉਜੁਕਂ ਅਨ੍ਤੋ ਨਿਸਿਨ੍ਨੇ ਨ ਪਸ੍ਸਨ੍ਤਿ, ਏਵਂ ਦ੍ਵਾਰਾਭਿਮੁਖਂ ਪਿਦਹਨਵਸੇਨ ਭਿਤ੍ਤਿਞ੍ਚ ਅਞ੍ਞਤੋ ਦ੍ਵਾਰਞ੍ਚ ਯੋਜੇਤ੍ਵਾ ਕਤਟ੍ਠਾਨਂ ਵਦਤਿ. ਸਮਨ੍ਤਾ ਪਰਿਯਾਗਾਰੋਤਿ ਸਮਨ੍ਤਤੋ ਆਵਿਦ੍ਧਪਮੁਖਂ. ਵਂਸਂ ਦਤ੍ਵਾਤਿ ਪੁਰਿਸਪ੍ਪਮਾਣੇ ਪਾਦੇ ਨਿਖਣਿਤ੍ਵਾ ਤੇਸਂ ਉਪਰਿ ਪਿਟ੍ਠਿਵਂਸਸਦਿਸਂ ਪਸ੍ਸਵਂਸਂ ਠਪੇਤ੍ਵਾ ਓਸਾਰੇਤ੍ਵਾ. ਏਕਂ ਦਣ੍ਡਕੋਟਿਂ ਅਤਿਉਚ੍ਚਾਯ ਵਿਹਾਰਭਿਤ੍ਤਿਕੋਟਿਯਾ ਏਕਂ ਕੋਟਿਂ ਨੀਚੇ ਵਂਸਪਿਟ੍ਠਿਯਂ ਠਪਨਵਸੇਨ ਦਣ੍ਡਕੇ ਪਸਾਰੇਤ੍ਵਾ. ਚਕ੍ਕਲਯੁਤ੍ਤੋ ਕਿਟਿਕੋਤਿ ਕਵਾਟਂ ਵਿਯ ਵਿਵਰਣਥਕਨਸੁਖਤ੍ਥਂ ਚਕ੍ਕਲਬਨ੍ਧਕਿਟਿਕਂ. ਪਾਲ਼ਿਯਂ ਉਗ੍ਘਾਟਨਕਿਟਿਕਨ੍ਤਿ ਆਪਣਾਦੀਸੁ ਅਨਤ੍ਥਿਕਕਾਲੇ ਉਕ੍ਖਿਪਿਤ੍ਵਾ, ਉਪਰਿ ਚ ਬਨ੍ਧਿਤ੍ਵਾ ਪਚ੍ਛਾ ਓਤਰਣਕਿਟਿਕਂ, ਕਪ੍ਪਸੀਸੇਹਿ ਵਾ ਉਪਤ੍ਥਮ੍ਭਨੀਹਿ ਉਕ੍ਖਿਪਿਤ੍ਵਾ ਪਚ੍ਛਾ ਓਤਰਣਕਿਟਿਕਮ੍ਪਿ.

੩੦੧. ਪਾਨੀਯਂ ਓਤਪ੍ਪਤੀਤਿ ਪਾਨੀਯਭਾਜਨੇਸੁ ਠਪਿਤਪਾਨੀਯਂ ਆਤਪੇਨ ਸਨ੍ਤਪ੍ਪਤਿ.

੩੦੩. ਤਯੋ ਵਾਟੇਤਿ ਤਯੋ ਪਰਿਕ੍ਖੇਪੇ. ਵੇਲ਼ੁਵਾਟਨ੍ਤਿ ਸਬ੍ਬਂ ਦਾਰੁਪਰਿਕ੍ਖੇਪਂ ਸਙ੍ਗਣ੍ਹਾਤਿ. ਕਣ੍ਟਕਵਾਟਨ੍ਤਿ ਸਬ੍ਬਸਾਖਾਪਰਿਕ੍ਖੇਪਂ.

੩੦੫. ਆਲੋਕੋ ਅਨ੍ਤਰਧਾਯੀਤਿ ਯੋ ਬੁਦ੍ਧਾਰਮ੍ਮਣਾਯ ਪੀਤਿਯਾ ਆਨੁਭਾਵੇਨ ਮਹਨ੍ਤੋ ਓਭਾਸੋ ਅਹੋਸਿ, ਯੇਨ ਚਸ੍ਸ ਪਦੀਪਸਹਸ੍ਸੇਨ ਵਿਯ ਵਿਗਤਨ੍ਧਕਾਰੋ ਮਗ੍ਗੋ ਅਹੋਸਿ, ਸੋ ਬਹਿਨਗਰੇ ਛਵਸਰੀਰਸਮਾਕੁਲਂ ਦੁਗ੍ਗਨ੍ਧਂ ਬੀਭਚ੍ਛਂ ਆਮਕਸੁਸਾਨਂ ਪਤ੍ਤਸ੍ਸ ਭਯੇਨ ਪੀਤਿਵੇਗੇ ਮਨ੍ਦੀਭੂਤੇ ਅਨ੍ਤਰਧਾਯਿ.

ਸਤਂ ¶ ਹਤ੍ਥੀਤਿ ਗਾਥਾਯ ਹਤ੍ਥਿਨੋ ਸਤਸਹਸ੍ਸਾਨੀਤਿ ਏਵਂ ਪਚ੍ਚੇਕਂ ਸਹਸ੍ਸ-ਸਦ੍ਦੇਨ ਯੋਜੇਤ੍ਵਾ ਅਤ੍ਥੋ ਞਾਤਬ੍ਬੋ. ਪਦਵੀਤਿਹਾਰਸ੍ਸਾਤਿ ‘‘ਬੁਦ੍ਧਂ ਵਨ੍ਦਿਸ੍ਸਾਮੀ’’ਤਿ ਰਤਨਤ੍ਤਯਂ ਉਦ੍ਦਿਸ੍ਸ ਗਚ੍ਛਤੋ ਏਕਪਦਵੀਤਿਹਾਰਸ੍ਸ ¶ , ਤਪ੍ਪਚ੍ਚਯਕੁਸਲਫਲਸ੍ਸਾਤਿ ਅਤ੍ਥੋ. ਤਸ੍ਸ ਸੋਲ਼ਸਮੋ ਭਾਗੋ ਕਲਂ ਨਾਮ, ਤਂ ਸੋਲ਼ਸਿਂ ਕਲਂ ਯਥਾਵੁਤ੍ਤਾ ਹਤ੍ਥਿਆਦਯੋ ਸਬ੍ਬੇ ਨਾਗ੍ਘਨ੍ਤਿ ਨਾਰਹਨ੍ਤਿ, ਨਿਦਸ੍ਸਨਮਤ੍ਤਞ੍ਚੇਤਂ. ਅਨੇਕਸਤਸਹਸ੍ਸਭਾਗਮ੍ਪਿ ਨਾਗ੍ਘਨ੍ਤਿ.

ਅਨ੍ਧਕਾਰੋ ਅਨ੍ਤਰਧਾਯੀਤਿ ਪੁਨ ਬਲਵਪੀਤਿਯਾ ਆਲੋਕੇ ਸਮੁਪ੍ਪਨ੍ਨੇ ਅਨ੍ਤਰਧਾਯਿ. ਆਸਤ੍ਤਿਯੋਤਿ ਤਣ੍ਹਾਯੋ. ਵਯਕਰਣਨ੍ਤਿ ਦੇਯ੍ਯਧਮ੍ਮਮੂਲਂ ਨਵਕਮ੍ਮਂ.

੩੦੯. ਦਦੇਯ੍ਯਾਤਿ ਨਵਕਮ੍ਮਂ ਅਧਿਟ੍ਠਾਤੁਂ ਵਿਹਾਰੇ ਇਸ੍ਸਰਿਯਂ ਦਦੇਯ੍ਯਾਤਿ ਅਤ੍ਥੋ. ਦਿਨ੍ਨੋਤਿ ਨਵਕਮ੍ਮਂ ਕਾਤੁਂ ਵਿਹਾਰੋ ਦਿਨ੍ਨੋ, ਵਿਹਾਰੇ ਨਵਕਮ੍ਮਂ ਦਿਨ੍ਨਨ੍ਤਿ ਵਾ ਅਤ੍ਥੋ.

੩੧੩-੪. ਸਨ੍ਥਾਗਾਰੇਤਿ ਸਨ੍ਨਿਪਾਤਮਣ੍ਡਪੇ. ਓਕਾਸੇਤਿ ਨਿਵਾਸੋਕਾਸੇ. ਉਦ੍ਦਿਸ੍ਸ ਕਤਨ੍ਤਿ ਸਙ੍ਘਂ ਉਦ੍ਦਿਸ੍ਸ ਕਤਂ. ਗਿਹਿਵਿਕਟਨ੍ਤਿ ਗਿਹੀਹਿ ਕਤਂ ਪਞ੍ਞਤ੍ਤਂ, ਗਿਹਿਸਨ੍ਤਕਨ੍ਤਿ ਅਤ੍ਥੋ.

ਵਿਹਾਰਾਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

੩੧੮. ‘‘ਛਮਾਸਚ੍ਚਯੇਨ ਛਮਾਸਚ੍ਚਯੇਨਾ’’ਤਿ ਇਦਂ ਦ੍ਵਿਕ੍ਖਤ੍ਤੁਂ ਪਚ੍ਚਯਦਾਨਕਾਲਪਰਿਚ੍ਛੇਦਦਸ੍ਸਨਂ, ਏਵਂ ਉਪਰਿਪਿ. ‘‘ਤਂ ਨ ਗਾਹੇਤਬ੍ਬ’’ਨ੍ਤਿ ਵਚਨਸ੍ਸ ਕਾਰਣਮਾਹ ‘‘ਪਚ੍ਚਯੇਨੇਵ ਹਿ ਤ’’ਨ੍ਤਿਆਦਿਨਾ, ਪਚ੍ਚਯਞ੍ਞੇਵ ਨਿਸ੍ਸਾਯ ਤਤ੍ਥ ਵਸਿਤ੍ਵਾ ਪਟਿਜਗ੍ਗਨਾ ਭਵਿਸ੍ਸਨ੍ਤੀਤਿ ਅਧਿਪ੍ਪਾਯੋ.

ਉਬ੍ਭਣ੍ਡਿਕਾਤਿ ਉਕ੍ਖਿਤ੍ਤਭਣ੍ਡਾ ਭਵਿਸ੍ਸਨ੍ਤਿ. ਦੀਘਸਾਲਾਤਿ ਚਙ੍ਕਮਨਸਾਲਾ. ਮਣ੍ਡਲਮਾਲ਼ੋਤਿ ਉਪਟ੍ਠਾਨਸਾਲਾ. ਅਨੁਦਹਤੀਤਿ ਪੀਲ਼ੇਤਿ. ‘‘ਅਦਾਤੁਂ ਨ ਲਬ੍ਭਤੀ’’ਤਿ ਇਮਿਨਾ ਸਞ੍ਚਿਚ੍ਚ ਅਦਦਨ੍ਤਸ੍ਸ ਪਟਿਬਾਹਨੇ ਪਵਿਸਨਤੋ ਦੁਕ੍ਕਟਨ੍ਤਿ ਦੀਪੇਤਿ.

‘‘ਨ ¶ ਗੋਚਰਗਾਮੋ ਘਟ੍ਟੇਤਬ੍ਬੋ’’ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘‘ਨ ਤਤ੍ਥ ਮਨੁਸ੍ਸਾ ਵਤ੍ਤਬ੍ਬਾ’’ਤਿਆਦਿ ਵੁਤ੍ਤਂ. ਵਿਤਕ੍ਕਂ ਛਿਨ੍ਦਿਤ੍ਵਾਤਿ ‘‘ਇਮਿਨਾ ਨੀਹਾਰੇਨ ਗਚ੍ਛਨ੍ਤਂ ਦਿਸ੍ਵਾ ਨਿਵਾਰੇਤ੍ਵਾ ਪਚ੍ਚਯੇ ਦਸ੍ਸਨ੍ਤੀ’’ਤਿ ਏਵਰੂਪਂ ਵਿਤਕ੍ਕਂ ਅਨੁਪ੍ਪਾਦੇਤ੍ਵਾ. ਭਣ੍ਡਪ੍ਪਟਿਚ੍ਛਾਦਨਨ੍ਤਿ ਪਟਿਚ੍ਛਾਦਨਭਣ੍ਡਂ. ਸਰੀਰਪ੍ਪਟਿਚ੍ਛਾਦਨਚੀਵਰਨ੍ਤਿ ਅਤ੍ਥੋ. ‘‘ਸੁਦ੍ਧਚਿਤ੍ਤਤ੍ਤਾਵ ਅਨਵਜ੍ਜ’’ਨ੍ਤਿ ਇਦਂ ਪੁਚ੍ਛਿਤਕ੍ਖਣੇ ਕਾਰਣਾਚਿਕ੍ਖਨਂ ¶ ਸਨ੍ਧਾਯ ਵੁਤ੍ਤਂ ਨ ਹੋਤਿ ਅਸੁਦ੍ਧਚਿਤ੍ਤਸ੍ਸਪਿ ਪੁਚ੍ਛਿਤਪਞ੍ਹਵਿਸਜ੍ਜਨੇ ਦੋਸਾਭਾਵਾ. ਏਵਂ ਪਨ ਗਤੇ ਮਂ ਪੁਚ੍ਛਿਸ੍ਸਨ੍ਤੀਤਿਸਞ੍ਞਾਯ ਅਗਮਨਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਪਟਿਜਗ੍ਗਿਤਬ੍ਬਾਨੀਤਿ ਖਣ੍ਡਫੁਲ੍ਲਪਟਿਸਙ੍ਖਰਣਸਮ੍ਮਜ੍ਜਨਾਦੀਹਿ ਪਟਿਜਗ੍ਗਿਤਬ੍ਬਾਨਿ. ਮੁਦ੍ਦਵੇਦਿਕਾਯਾਤਿ ਚੇਤਿਯਸ੍ਸ ਹਮ੍ਮਿਯਵੇਦਿਕਾਯ ਘਟਾਕਾਰਸ੍ਸ ਉਪਰਿ ਚਤੁਰਸ੍ਸਵੇਦਿਕਾਯ. ਕਸ੍ਮਾ ਪੁਚ੍ਛਿਤਬ੍ਬਨ੍ਤਿਆਦਿ ਯਤੋ ਪਕਤਿਯਾ ਲਭਤਿ. ਤਤ੍ਥਾਪਿ ਪੁਚ੍ਛਨਸ੍ਸ ਕਾਰਣਸਨ੍ਦਸ੍ਸਨਤ੍ਥਂ ਵੁਤ੍ਤਂ.

ਪਟਿਕ੍ਕਮ੍ਮਾਤਿ ਵਿਹਾਰਤੋ ਅਪਸਕ੍ਕਿਤ੍ਵਾ. ਤਮਤ੍ਥਂ ਦਸ੍ਸੇਨ੍ਤੋ ‘‘ਯੋਜਨਦ੍ਵਿਯੋਜਨਨ੍ਤਰੇ ਹੋਤੀ’’ਤਿ ਆਹ. ਉਪਨਿਕ੍ਖੇਪਂ ਠਪੇਤ੍ਵਾਤਿ ਵਡ੍ਢਿਯਾ ਕਹਾਪਣਾਦਿਂ ਠਪੇਤ੍ਵਾ, ਖੇਤ੍ਤਾਦੀਨਿ ਵਾ ਨਿਯਮੇਤ੍ਵਾ. ਇਤਿ ਸਦ੍ਧਾਦੇਯ੍ਯੇਤਿ ਏਵਂ ਹੇਟ੍ਠਾ ਵੁਤ੍ਤਨਯੇਨ ਸਦ੍ਧਾਯ ਦਾਤਬ੍ਬੇ ਵਸ੍ਸਾਵਾਸਿਕਲਾਭਵਿਸਯੇਤਿ ਅਤ੍ਥੋ.

ਵਤ੍ਥੁ ਪਨਾਤਿ ਤਤ੍ਰੁਪ੍ਪਾਦੇ ਉਪ੍ਪਨ੍ਨਰੂਪਿਯਂ, ਤਞ੍ਚ ‘‘ਤਤੋ ਚਤੁਪਚ੍ਚਯਂ ਪਰਿਭੁਞ੍ਜਥਾ’’ਤਿ ਦਿਨ੍ਨਖੇਤ੍ਤਾਦਿਤੋ ਉਪ੍ਪਨ੍ਨਤ੍ਤਾ ਕਪ੍ਪਿਯਕਾਰਕਾਨਂ ਹਤ੍ਥੇ ‘‘ਕਪ੍ਪਿਯਭਣ੍ਡਂ ਪਰਿਭੁਞ੍ਜਥਾ’’ਤਿ ਦਾਯਕੇਹਿ ਦਿਨ੍ਨਵਤ੍ਥੁਸਦਿਸਂ ਹੋਤੀਤਿ ਆਹ ‘‘ਕਪ੍ਪਿਯਕਾਰਕਾਨਂ ਹੀ’’ਤਿਆਦਿ.

ਸਙ੍ਘਸੁਟ੍ਠੁਤਾਯਾਤਿ ਸਙ੍ਘਸ੍ਸ ਹਿਤਾਯ. ਪੁਗ੍ਗਲਵਸੇਨਾਤਿ ‘‘ਭਿਕ੍ਖੂ ਚੀਵਰੇਨ ਕਿਲਮਨ੍ਤੀ’’ਤਿ ਏਵਂ ਪੁਗ੍ਗਲਪਰਾਮਾਸਵਸੇਨ, ਨ ‘‘ਸਙ੍ਘੋ ਕਿਲਮਤੀ’’ਤਿ ਏਵਂ ਸਙ੍ਘਪਰਾਮਾਸਵਸੇਨ.

‘‘ਕਪ੍ਪਿਯਭਣ੍ਡਵਸੇਨਾ’’ਤਿ ਸਾਮਞ੍ਞਤੋ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘‘ਚੀਵਰਤਣ੍ਡੁਲਾਦਿਵਸੇਨੇਵ ਚਾ’’ਤਿ ਵੁਤ੍ਤਂ. ਚ-ਕਾਰੋ ਚੇਤ੍ਥ ਪਨ-ਸਦ੍ਦਤ੍ਥੇ ਵਤ੍ਤਤਿ, ਨ ਸਮੁਚ੍ਚਯਤ੍ਥੇਤਿ ਦਟ੍ਠਬ੍ਬਂ. ਪੁਗ੍ਗਲਵਸੇਨੇਵ, ਕਪ੍ਪਿਯਭਣ੍ਡਵਸੇਨ ਚ ਅਪਲੋਕਨਪ੍ਪਕਾਰਂ ਦਸ੍ਸੇਤੁਂ ‘‘ਤਂ ਪਨ ਏਵਂ ਕਤ੍ਤਬ੍ਬ’’ਨ੍ਤਿਆਦਿ ਵੁਤ੍ਤਂ.

ਚੀਵਰਪਚ੍ਚਯਂ ਸਲ੍ਲਕ੍ਖੇਤ੍ਵਾਤਿ ਸਦ੍ਧਾਦੇਯ੍ਯਤਤ੍ਰੁਪ੍ਪਾਦਾਦਿਵਸੇਨ ਤਸ੍ਮਿਂ ਵਸ੍ਸਾਵਾਸੇ ਲਬ੍ਭਮਾਨਂ ਚੀਵਰਸਙ੍ਖਾਤਂ ਪਚ੍ਚਯਂ ‘‘ਏਤ੍ਤਕ’’ਨ੍ਤਿ ਪਰਿਚ੍ਛਿਨ੍ਦਿਤ੍ਵਾ. ਸੇਨਾਸਨਸ੍ਸਾਤਿ ਸੇਨਾਸਨਗ੍ਗਾਹਾਪਨਸ੍ਸ. ‘‘ਨਵਕੋ ਵੁਡ੍ਢਤਰਸ੍ਸ, ਵੁਡ੍ਢੋ ਚ ¶ ਨਵਕਸ੍ਸਾ’’ਤਿ ਇਦਂ ਸੇਨਾਸਨਗ੍ਗਾਹਸ੍ਸ ਅਤ੍ਤਨਾਵ ਅਤ੍ਤਨੋ ਗਹਣਂ ਅਸਾਰੁਪ੍ਪਨ੍ਤਿ ਵੁਤ੍ਤਂ, ਦ੍ਵੇ ਅਞ੍ਞਮਞ੍ਞਂ ਗਾਹੇਸ੍ਸਨ੍ਤੀਤਿ ਅਧਿਪ੍ਪਾਯੋ. ਅਟ੍ਠਪਿ ਸੋਲ਼ਸਪਿ ਜਨੇ ਸਮ੍ਮਨ੍ਨਿਤੁਂ ਵਟ੍ਟਤੀਤਿ ਏਕਕਮ੍ਮਵਾਚਾਯ ਸਬ੍ਬੇਪਿ ਏਕਤੋ ਸਮ੍ਮਨ੍ਨਿਤੁਂ ਵਟ੍ਟਤਿ. ਨਿਗ੍ਗਹਕਮ੍ਮਮੇਵ ਹਿ ਸਙ੍ਘੋ ਸਙ੍ਘਸ੍ਸ ਨ ਕਰੋਤਿ. ਤੇਨੇਵ ਸਤ੍ਤਸਤਿਕਕ੍ਖਨ੍ਧਕੇ ‘‘ਉਬ੍ਬਾਹਿਕਕਮ੍ਮਸਮ੍ਮੁਤਿਯਂ ਅਟ੍ਠਪਿ ਜਨਾ ਏਕਤੋਵ ਸਮ੍ਮਤਾਤਿ.

ਆਸਨਘਰਨ੍ਤਿ ¶ ਪਟਿਮਾਘਰਂ. ਮਗ੍ਗੋਤਿ ਉਪਚਾਰਸੀਮਬ੍ਭਨ੍ਤਰਗਤੇ ਗਾਮਾਭਿਮੁਖਮਗ੍ਗੇ ਕਤਸਾਲਾ ਵੁਚ੍ਚਤਿ. ਏਵਂ ਪੋਕ੍ਖਰਣੀਰੁਕ੍ਖਮੂਲਾਦੀਸੁਪਿ.

ਲਭਨ੍ਤੀਤਿ ਤਤ੍ਰਵਾਸਿਨੋ ਭਿਕ੍ਖੂ ਲਭਨ੍ਤਿ. ਵਿਜਟੇਤ੍ਵਾਤਿ ‘‘ਏਕੇਕਸ੍ਸ ਪਹੋਨਕਪ੍ਪਮਾਣੇਨ ਵਿਯੋਜੇਤ੍ਵਾ. ਆਵਾਸੇਸੁ ਪਕ੍ਖਿਪਿਤ੍ਵਾਤਿ ‘‘ਇਤੋ ਉਪ੍ਪਨ੍ਨਂ ਅਸੁਕਸ੍ਮਿਂ ਅਸੁਕਸ੍ਮਿਞ੍ਚ ਆਵਾਸੇ ਵਸਨ੍ਤਾ ਪਾਪੇਤ੍ਵਾ ਗਣ੍ਹਨ੍ਤੂ’’ਤਿ ਵਾਚਾਯ ਉਪਸਂਹਰਿਤ੍ਵਾ. ਪਵਿਸਿਤਬ੍ਬਨ੍ਤਿ ਮਹਾਲਾਭੇ ਪਰਿਵੇਣੇ ਵਸਿਤ੍ਵਾਵ ਲਾਭੋ ਗਹੇਤਬ੍ਬੋਤਿ ਅਧਿਪ੍ਪਾਯੋ.

ਅਯਮ੍ਪੀਤਿ ਏਤ੍ਥ ਯੋ ਪਂਸੁਕੂਲਿਕੋ ਪਚ੍ਚਯਂ ਵਿਸ੍ਸਜ੍ਜੇਤਿ. ਤੇਨੇਵ ਵਿਸ੍ਸਟ੍ਠੋ ਅਯਂ ਚੀਵਰਪਚ੍ਚਯੋਪੀਤਿ ਯੋਜਨਾ. ਪਾਦਮੂਲੇ ਠਪੇਤ੍ਵਾ ਸਾਟਕਂ ਦੇਨ੍ਤੀਤਿ ਪਚ੍ਚਯਦਾਯਕਾ ਦੇਨ੍ਤਿ. ਏਤੇਨ ਗਹਟ੍ਠੇਹਿ ਪਾਦਮੂਲੇ ਠਪੇਤ੍ਵਾ ਦਿਨ੍ਨਮ੍ਪਿ ਪਂਸੁਕੂਲਿਕਾਨਮ੍ਪਿ ਵਟ੍ਟਤੀਤਿ ਦਸ੍ਸੇਤਿ. ਅਥ ਵਸ੍ਸਾਵਾਸਿਕਂ ਦੇਮਾਤਿ ਵਦਨ੍ਤੀਤਿ ਏਤ੍ਥ ਪਂਸੁਕੂਲਿਕਾਨਂ ਨ ਵਟ੍ਟਤੀਤਿ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਂ. ਵਸ੍ਸਂਵੁਤ੍ਥਭਿਕ੍ਖੂਨਨ੍ਤਿ ਪਂਸੁਕੂਲਿਕਤੋ ਅਞ੍ਞੇਸਂ ਭਿਕ੍ਖੂਨਂ.

ਉਪਨਿਬਨ੍ਧਿਤ੍ਵਾ ਗਾਹਾਪੇਤਬ੍ਬਨ੍ਤਿ ਇਧ ਰੁਕ੍ਖਾਦੀਸੁ ਵਸਿਤ੍ਵਾ ਚੀਵਰਂ ਗਣ੍ਹਥਾਤਿ ਪਟਿਬਨ੍ਧਂ ਕਤ੍ਵਾ ਗਾਹੇਤਬ੍ਬਂ.

ਪਾਟਿਪਦਅਰੁਣਤੋਤਿਆਦਿ ਵਸ੍ਸੂਪਨਾਯਿਕਦਿਵਸਂ ਸਨ੍ਧਾਯ ਵੁਤ੍ਤਂ. ਅਨ੍ਤਰਾਮੁਤ੍ਤਕਂ ਪਨ ਪਾਟਿਪਦਂ ਅਤਿਕ੍ਕਮਿਤ੍ਵਾਪਿ ਗਾਹੇਤੁਂ ਵਟ੍ਟਤਿ. ਨਿਬਦ੍ਧਵਤ੍ਤਂ ਠਪੇਤ੍ਵਾਤਿ ਸਜ੍ਝਾਯਮਨਸਿਕਾਰਾਦੀਸੁ ਨਿਰਨ੍ਤਰਕਰਣੀਯੇਸੁ ਕਤ੍ਤਬ੍ਬਂ ਕਤਿਕਵਤ੍ਤਂ ਕਤ੍ਵਾ. ਕਸਾਵਪਰਿਭਣ੍ਡਨ੍ਤਿ ਕਸਾਵਰਸੇਹਿ ਭੂਮਿਪਰਿਕਮ੍ਮਂ.

ਤਿਵਿਧਮ੍ਪੀਤਿ ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਵਸੇਨ ਤਿਵਿਧਮ੍ਪਿ. ਸੋਧੇਤ੍ਵਾਤਿ ਆਚਾਰਾਦੀਸੁ ਉਪਪਰਿਕ੍ਖਿਤ੍ਵਾ. ਏਕਚਾਰਿਕਵਤ੍ਤਨ੍ਤਿ ਭਾਵਨਾਕਮ੍ਮਂ. ਤਞ੍ਹਿ ਗਣਸਙ੍ਗਣਿਕਂ ਪਹਾਯ ਏਕਚਾਰਿਕੇਨੇਵ ਵਤ੍ਤਿਤਬ੍ਬਤ੍ਤਾ ਏਵਂ ਵੁਤ੍ਤਂ. ਦਸਵਤ੍ਥੁਕਕਥਾ ¶ ਨਾਮ ਅਪ੍ਪਿਚ੍ਛਕਥਾ, ਸਨ੍ਤੁਟ੍ਠਿ, ਪਵਿਵੇਕ, ਅਸਂਸਗ੍ਗ, ਵੀਰਿਯਾਰਮ੍ਭ, ਸੀਲ, ਸਮਾਧਿ, ਪਞ੍ਞਾ, ਵਿਮੁਤ੍ਤਿ, ਵਿਮੁਤ੍ਤਿਞਾਣਦਸ੍ਸਨਕਥਾਤਿ ਇਮਾ ਦਸ.

ਦਨ੍ਤਕਟ੍ਠਖਾਦਨਵਤ੍ਤਨ੍ਤਿ ਦਨ੍ਤਕਟ੍ਠਮਾਲ਼ਕੇ ਨਿਕ੍ਖਿਤ੍ਤੇਸੁ ਦਨ੍ਤਕਟ੍ਠੇਸੁ ‘‘ਦਿਵਸੇ ਦਿਵਸੇ ਏਕਮੇਵ ਦਨ੍ਤਕਟ੍ਠਂ ਗਹੇਤਬ੍ਬ’’ਨ੍ਤਿਆਦਿਨਾ (ਪਾਰਾ. ਅਟ੍ਠ. ੧.੧੦੯) ਅਦਿਨ੍ਨਾਦਾਨੇ ਦਨ੍ਤਪੋਨਕਥਾਯਂ ਵੁਤ੍ਤਂ ਵਤ੍ਤਂ. ਪਤ੍ਤਂ ਵਾ…ਪੇ… ਨ ਕਥੇਤਬ੍ਬਨ੍ਤਿ ਪਤ੍ਤਗੁਤ੍ਤਤ੍ਥਾਯ ਵੁਤ੍ਤਂ. ਵਿਸਭਾਗਕਥਾਤਿ ਤਿਰਚ੍ਛਾਨਕਥਾ. ਖਨ੍ਧਕਵਤ੍ਤਨ੍ਤਿ ¶ ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੬੫) ਆਗਤਂ ਪਿਣ੍ਡਚਾਰਿਕਵਤ੍ਤਤੋ ਅਵਸਿਟ੍ਠਵਤ੍ਤਂ ਤਸ੍ਸ ‘‘ਭਿਕ੍ਖਾਚਾਰਵਤ੍ਤ’’ਨ੍ਤਿ ਵਿਸੁਂ ਗਹਿਤਤ੍ਤਾ.

ਇਦਾਨਿ ਯਂ ਦਾਯਕਾ ਪਚ੍ਛਿਮਵਸ੍ਸਂਵੁਤ੍ਥਾਨਂ ਵਸ੍ਸਾਵਾਸਿਕਂ ਦੇਨ੍ਤਿ, ਤਤ੍ਥ ਪਟਿਪਜ੍ਜਨਵਿਧਿਂ ਦਸ੍ਸੇਤੁਂ ‘‘ਪਚ੍ਛਿਮਵਸ੍ਸੂਪਨਾਯਿਕਦਿਵਸੇ ਪਨਾ’’ਤਿ ਆਰਦ੍ਧਂ. ਆਗਨ੍ਤੁਕੋ ਸਚੇ ਭਿਕ੍ਖੂਤਿ ਚੀਵਰੇ ਗਾਹਿਤੇ ਪਚ੍ਛਾ ਆਗਤੋ ਆਗਨ੍ਤੁਕੋ ਭਿਕ੍ਖੁ. ਪਤ੍ਤਟ੍ਠਾਨੇਤਿ ਵਸ੍ਸਗ੍ਗੇਨ ਪਤ੍ਤਟ੍ਠਾਨੇ. ਪਠਮਵਸ੍ਸੂਪਗਤਾਤਿ ਆਗਨ੍ਤੁਕਸ੍ਸ ਆਗਮਨਤੋ ਪੁਰੇਤਰਮੇਵ ਪਚ੍ਛਿਮਿਕਾਯ ਵਸ੍ਸੂਪਨਾਯਿਕਾਯ ਵਸ੍ਸੂਪਗਤਾ. ਲਦ੍ਧਂ ਲਦ੍ਧਨ੍ਤਿ ਪੁਨਪ੍ਪੁਨਂ ਦਾਯਕਾਨਂ ਸਨ੍ਤਿਕਾ ਆਗਤਾਗਤਸਾਟਕਂ.

ਨੇਵ ਵਸ੍ਸਾਵਾਸਿਕਸ੍ਸ ਸਾਮਿਨੋਤਿ ਛਿਨ੍ਨਵਸ੍ਸਤ੍ਤਾ ਵੁਤ੍ਤਂ. ਪਠਮਮੇਵ ਕਤਿਕਾਯ ਕਤਤ੍ਤਾ ‘‘ਨੇਵ ਅਦਾਤੁਂ ਲਭਨ੍ਤੀ’’ਤਿ ਵੁਤ੍ਤਂ, ਦਾਤਬ੍ਬਂ ਵਾਰੇਨ੍ਤਾਨਂ ਗੀਵਾ ਹੋਤੀਤਿ ਅਧਿਪ੍ਪਾਯੋ. ਤੇਸਮੇਵ ਦਾਤਬ੍ਬਨ੍ਤਿ ਵਸ੍ਸੂਪਗਤੇਸੁ ਅਲਦ੍ਧਵਸ੍ਸਾਵਾਸਿਕਾਨਂ ਏਕਚ੍ਚਾਨਮੇਵ ਦਾਤਬ੍ਬਂ.

ਭਤਿਨਿਵਿਟ੍ਠਨ੍ਤਿ ਪਾਨੀਯੁਪਟ੍ਠਾਨਾਦਿਭਤਿਂ ਕਤ੍ਵਾ ਲਦ੍ਧਂ. ਸਙ੍ਘਿਕਂ ਪਨਾਤਿਆਦਿ ਕੇਸਞ੍ਚਿ ਵਾਦਦਸ੍ਸਨਂ. ਤਤ੍ਥ ਅਪਲੋਕਨਕਮ੍ਮਂ ਕਤ੍ਵਾ ਗਾਹਿਤਨ੍ਤਿ ‘‘ਛਿਨ੍ਨਵਸ੍ਸਾਨਂ ਵਸ੍ਸਾਵਾਸਿਕਞ੍ਚ ਇਦਾਨਿ ਉਪ੍ਪਜ੍ਜਨਕਵਸ੍ਸਾਵਾਸਿਕਞ੍ਚ ਇਮੇਸਂ ਦਾਤੁਂ ਰੁਚ੍ਚਤੀ’’ਤਿ ਅਨਨ੍ਤਰੇ ਵੁਤ੍ਤਨਯੇਨ ਅਪਲੋਕਨਂ ਕਤ੍ਵਾ ਗਾਹਿਤਂ ਸਙ੍ਘੇਨ ਦਿਨ੍ਨਤ੍ਤਾ ਵਿਬ੍ਭਨ੍ਤੋਪਿ ਲਭਤਿ. ਪਗੇਵ ਛਿਨ੍ਨਵਸ੍ਸੋ. ਪਚ੍ਚਯਵਸੇਨ ਗਾਹਿਤਂ ਪਨ ਤੇਮਾਸਂ ਵਸਿਤ੍ਵਾ ਗਹੇਤੁਂ ਅਤ੍ਤਨਾ, ਦਾਯਕੇਹਿ ਚ ਅਨੁਮਤਤ੍ਤਾ ਭਤਿਨਿਵਿਟ੍ਠਮ੍ਪਿ ਛਿਨ੍ਨਵਸ੍ਸੋਪਿ ਵਿਬ੍ਭਨ੍ਤੋਪਿ ਨ ਲਭਤੀਤਿ ਕੇਚਿ ਆਚਰਿਯਾ ਵਦਨ੍ਤਿ. ਇਦਞ੍ਚ ਪਚ੍ਛਾ ਵੁਤ੍ਤਤ੍ਤਾ ਪਮਾਣਂ. ਤੇਨੇਵ ਵਸ੍ਸੂਪਨਾਯਿਕਦਿਵਸੇ ਏਵ ਦਾਯਕੇਹਿ ਦਿਨ੍ਨਵਸ੍ਸਾਵਾਸਿਕਂ ਗਹਿਤਭਿਕ੍ਖੁਨੋ ਵਸ੍ਸਚ੍ਛੇਦਂ ਅਕਤ੍ਵਾ ਵਾਸੋਵ ਹੇਟ੍ਠਾ ਵਿਹਿਤੋ, ਨ ਪਾਨੀਯੁਪਟ੍ਠਾਨਾਦਿਭਤਿਕਰਣਵਤ੍ਤਂ. ਯਦਿ ਹਿ ਤਂ ¶ ਨਿਵਿਟ੍ਠਮੇਵ ਸਿਯਾ, ਭਤਿਕਰਣਮੇਵ ਵਿਧਾਤਬ੍ਬਂ. ਤਸ੍ਮਾ ਵਸ੍ਸਗ੍ਗੇਨ ਗਾਹਿਤਂ ਛਿਨ੍ਨਵਸ੍ਸਾਦਯੋ ਨ ਲਭਨ੍ਤੀਤਿ ਵੇਦਿਤਬ੍ਬਂ.

‘‘ਸਙ੍ਘਿਕਂ ਹੋਤੀ’’ਤਿ ਏਤੇਨ ਵੁਤ੍ਥਵਸ੍ਸਾਨਮ੍ਪਿ ਵਸ੍ਸਾਵਾਸਿਕਭਾਗੋ ਸਙ੍ਘਿਕਤੋ ਅਮੋਚਿਤੋ ਤੇਸਂ ਵਿਬ੍ਭਮੇਨ ਸਙ੍ਘਿਕੋ ਹੋਤੀਤਿ ਦਸ੍ਸੇਤਿ. ਲਭਤੀਤਿ ‘‘ਮਮ ਪਤ੍ਤਭਾਗਂ ਏਤਸ੍ਸ ਦੇਥਾ’’ਤਿ ਦਾਯਕੇ ਸਮ੍ਪਟਿਚ੍ਛਾਪੇਨ੍ਤੇਨੇਵ ਸਙ੍ਘਿਕਤੋ ਵਿਯੋਜਿਤਂ ਹੋਤੀਤਿ ਵੁਤ੍ਤਂ.

ਵਰਭਾਗਂ ਸਾਮਣੇਰਸ੍ਸਾਤਿ ਤਸ੍ਸ ਪਠਮਗਾਹਤ੍ਤਾ, ਥੇਰੇਨ ਪੁਬ੍ਬੇ ਪਠਮਭਾਗਸ੍ਸ ਗਹਿਤਤ੍ਤਾ, ਇਦਾਨਿ ਗਯ੍ਹਮਾਨਸ੍ਸ ਦੁਤਿਯਭਾਗਤ੍ਤਾ ਚ ਵੁਤ੍ਤਂ.

ਸੇਨਾਸਨਗ੍ਗਾਹਕਥਾਵਣ੍ਣਨਾ ਨਿਟ੍ਠਿਤਾ.

੩੧੯. ਪਾਲ਼ਿਯਂ ¶ ਉਭਯਤ੍ਥ ਪਰਿਬਾਹਿਰੋਤਿ ਕਮੇਨ ਉਭਯਸ੍ਸਪਿ ਮੁਤ੍ਤਤ੍ਤਾ ਵੁਤ੍ਤਂ, ਨ ਸਬ੍ਬਥਾ ਉਭਯਤੋ ਪਰਿਬਾਹਿਰਤ੍ਤਾ. ਤੇਨਾਹ ‘‘ਪਚ੍ਛਿਮੇ…ਪੇ… ਤਿਟ੍ਠਤੀ’’ਤਿ.

੩੨੦. ਯਂ ਤਿਣ੍ਣਂ ਪਹੋਤੀਤਿ ਮਞ੍ਚਪੀਠਵਿਨਿਮੁਤ੍ਤਂ ਯਂ ਆਸਨਂ ਤਿਣ੍ਣਂ ਸੁਖਂ ਨਿਸੀਦਿਤੁਂ ਪਹੋਤਿ, ਇਦਂ ਪਚ੍ਛਿਮਦੀਘਾਸਨਂ. ਏਤ੍ਥ ਮਞ੍ਚਪੀਠਰਹਿਤੇਸੁ ਅਸਮਾਨਾਸਨਿਕਾਪਿ ਤਯੋ ਨਿਸੀਦਿਤੁਂ ਲਭਨ੍ਤਿ. ਮਞ੍ਚਪੀਠੇਸੁ ਪਨ ਦ੍ਵੇ. ਅਦੀਘਾਸਨੇਸੁ ਮਞ੍ਚਪੀਠੇਸੁ ਸਮਾਨਾਸਨਿਕਾ ਏਵ ਦ੍ਵੇ ਨਿਸੀਦਿਤੁਂ ਲਭਨ੍ਤਿ ਦੁਵਗ੍ਗਸ੍ਸੇਵ ਅਨੁਞ੍ਞਾਤਤ੍ਤਾ.

ਹਤ੍ਥਿਨਖੋ ਹੇਟ੍ਠਾਭਾਗੇ ਏਤਸ੍ਸ ਅਤ੍ਥੀਤਿ ਹਤ੍ਥਿਨਖੋ, ਪਾਸਾਦੋ. ਪਾਸਾਦਸ੍ਸ ਨਖੋ ਨਾਮ ਹੇਟ੍ਠਿਮਭਾਗੋ ਪਾਦਨਖਸਦਿਸਤ੍ਤਾ, ਸੋ ਸਬ੍ਬਦਿਸਾਸੁ ਅਨੇਕੇਹਿ ਹਤ੍ਥਿਰੂਪੇਹਿ ਸਮਲਙ੍ਕਤੋ ਠਿਤੋ. ਤਸ੍ਸੂਪਰਿ ਕਤੋ ਪਾਸਾਦੋ ਹਤ੍ਥਿਕੁਮ੍ਭੇ ਪਤਿਟ੍ਠਿਤੋ ਵਿਯ ਹੋਤੀਤਿ ਆਹ ‘‘ਹਤ੍ਥਿਕੁਮ੍ਭੇ ਪਤਿਟ੍ਠਿਤ’’ਨ੍ਤਿ. ਸੁਵਣ੍ਣਰਜਤਾਦਿਵਿਚਿਤ੍ਰਾਨੀਤਿ ਸਙ੍ਘਿਕਸੇਨਾਸਨਂ ਸਨ੍ਧਾਯ ਵੁਤ੍ਤਂ. ਪੁਗ੍ਗਲਿਕਂ ਪਨ ਸੁਵਣ੍ਣਾਦਿਵਿਚਿਤ੍ਰਂ ਭਿਕ੍ਖੁਸ੍ਸ ਸਮ੍ਪਟਿਚ੍ਛਿਤੁਮੇਵ ਨ ਵਟ੍ਟਤਿ ‘‘ਨ ਕੇਨਚਿ ਪਰਿਯਾਯੇਨ ਜਾਤਰੂਪਰਜਤਂ ਸਾਦਿਤਬ੍ਬ’’ਨ੍ਤਿ (ਮਹਾਵ. ੨੯੯) ਵੁਤ੍ਤਤ੍ਤਾ. ਤੇਨੇਵੇਤ੍ਥ ਅਟ੍ਠਕਥਾਯਂ ‘‘ਸਙ੍ਘਿਕਵਿਹਾਰੇ ਵਾ ਪੁਗ੍ਗਲਿਕਵਿਹਾਰੇ ਵਾ’’ਤਿ ਨ ¶ ਵੁਤ੍ਤਂ, ਗੋਨਕਾਦਿਅਕਪ੍ਪਿਯਭਣ੍ਡਵਿਸਯੇ ਏਵ ਵੁਤ੍ਤਂ ਏਕਭਿਕ੍ਖੁਸ੍ਸਾਪਿ ਤੇਸਂ ਗਹਣੇ ਦੋਸਾਭਾਵਾ. ਗਿਹਿਵਿਕਟਨੀਹਾਰੇਨਾਤਿ ਗਿਹੀਹਿ ਕਤਨੀਹਾਰੇਨ, ਗਿਹੀਹਿ ਅਤ੍ਤਨੋ ਸਨ੍ਤਕਂ ਅਤ੍ਥਰਿਤ੍ਵਾ ਦਿਨ੍ਨਨਿਯਾਮੇਨਾਤਿ ਅਤ੍ਥੋ. ਲਬ੍ਭਨ੍ਤੀਤਿ ਨਿਸੀਦਿਤੁਂ ਲਬ੍ਭਨ੍ਤਿ.

ਉਪਨਨ੍ਦਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੩੨੧. ਅਰਞ੍ਜਰੋਤਿ ਬਹੁਉਦਕਗਣ੍ਹਨਿਕਾ ਮਹਾਚਾਟਿ, ਜਲਂ ਗਣ੍ਹਿਤੁਮਲਨ੍ਤਿ ਅਰਞ੍ਜਰੋ.

ਥਾਵਰੇਨ ਚ ਥਾਵਰਨ੍ਤਿਆਦੀਸੁ ਪਞ੍ਚਸੁ ਕੋਟ੍ਠਾਸੇਸੁ ਪੁਰਿਮਦ੍ਵਯਂ ਥਾਵਰਂ, ਪਚ੍ਛਿਮਤ੍ਤਯਂ ਗਰੁਭਣ੍ਡਨ੍ਤਿ ਵੇਦਿਤਬ੍ਬਂ. ਸਮਕਮੇਵ ਦੇਤੀਤਿ ਏਤ੍ਥ ਊਨਕਂ ਦੇਨ੍ਤਮ੍ਪਿ ਵਿਹਾਰਵਤ੍ਥੁਸਾਮਨ੍ਤਂ ਗਹੇਤ੍ਵਾ ਦੂਰਤਰਂ ਦੁਕ੍ਖਗੋਪਂ ਵਿਸ੍ਸਜ੍ਜੇਤੁਂ ਵਟ੍ਟਤੀਤਿ ਦਟ੍ਠਬ੍ਬਂ. ਵਕ੍ਖਤਿ ਹਿ ‘‘ਭਿਕ੍ਖੂਨਂ ਚੇ ਮਹਗ੍ਘਤਰਂ…ਪੇ… ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੩੨੧). ਜਾਨਾਪੇਤ੍ਵਾਤਿ ਭਿਕ੍ਖੁਸਙ੍ਘਸ੍ਸ ¶ ਜਾਨਾਪੇਤ੍ਵਾ, ਅਪਲੋਕੇਤ੍ਵਾਤਿ ਅਤ੍ਥੋ. ‘‘ਨਨੁ ਤੁਮ੍ਹਾਕਂ ਬਹੁਤਰਾ ਰੁਕ੍ਖਾਤਿ ਵਤ੍ਤਬ੍ਬ’’ਨ੍ਤਿ ਇਦਂ ਸਾਮਿਕੇਸੁ ਅਤ੍ਤਨੋ ਭਣ੍ਡਸ੍ਸ ਮਹਗ੍ਘਤਂ ਅਜਾਨਿਤ੍ਵਾ ਦੇਨ੍ਤੇਸੁ ਤਂ ਞਤ੍ਵਾ ਥੇਯ੍ਯਚਿਤ੍ਤੇਨ ਗਣ੍ਹਤੋ ਅਵਹਾਰੋ ਹੋਤੀਤਿ ਵੁਤ੍ਤਂ.

ਵਿਹਾਰੇਨ ਵਿਹਾਰੋ ਪਰਿਵਤ੍ਤੇਤਬ੍ਬੋਤਿ ਸਵਤ੍ਥੁਕੇਨ ਅਞ੍ਞੇਸਂ ਭੂਮਿਯਂ ਕਤਪਾਸਾਦਾਦਿਨਾ, ਅਵਤ੍ਥੁਕੇਨ ਵਾ ਸਵਤ੍ਥੁਕਂ ਪਰਿਵਤ੍ਤੇਤਬ੍ਬਂ. ਅਵਤ੍ਥੁਕਂ ਪਨ ਅਵਤ੍ਥੁਕੇਨੇਵ ਪਰਿਵਤ੍ਤੇਤਬ੍ਬਂ. ਕੇਵਲਂ ਪਾਸਾਦਸ੍ਸ ਭੂਮਿਤੋ ਅਥਾਵਰਤ੍ਤਾ. ਏਵਂ ਥਾਵਰੇਸੁਪਿ ਥਾਵਰਵਿਭਾਗਂ ਞਤ੍ਵਾਵ ਪਰਿਵਤ੍ਤੇਤਬ੍ਬਂ.

‘‘ਕਪ੍ਪਿਯਮਞ੍ਚਾ ਸਮ੍ਪਟਿਚ੍ਛਿਤਬ੍ਬਾ’’ਤਿ ਇਮਿਨਾ ਸੁਵਣ੍ਣਾਦਿਵਿਚਿਤ੍ਤਂ ਅਕਪ੍ਪਿਯਮਞ੍ਚਂ ‘‘ਸਙ੍ਘਸ੍ਸਾ’’ਤਿ ਵੁਤ੍ਤੇਪਿ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ‘‘ਵਿਹਾਰਸ੍ਸ ਦੇਮਾ’’ਤਿ ਵੁਤ੍ਤੇ ਸਙ੍ਘਸ੍ਸ ਵਟ੍ਟਤਿ, ਨ ਪੁਗ੍ਗਲਸ੍ਸ ਖੇਤ੍ਤਾਦਿ ਵਿਯਾਤਿ ਦਟ੍ਠਬ੍ਬਂ. ਏਤੇਸੂਤਿ ਮਞ੍ਚਾਦੀਸੁ. ਕਪ੍ਪਿਯਾਕਪ੍ਪਿਯਂ ਵੁਤ੍ਤਨਯਮੇਵਾਤਿ ਆਸਨ੍ਦੀਤੂਲਿਕਾਦਿਵਿਨਿਚ੍ਛਯੇਸੁ ਵੁਤ੍ਤਨਯਮੇਵ. ਅਕਪ੍ਪਿਯਂ ਵਾਤਿ ਆਸਨ੍ਦੀਆਦਿ, ਪਮਾਣਾਤਿਕ੍ਕਨ੍ਤਂ ¶ ਬਿਮ੍ਬੋਹਨਾਦਿ ਚ. ਮਹਗ੍ਘਂ ਕਪ੍ਪਿਯਂ ਵਾਤਿ ਸੁਵਣ੍ਣਾਦਿਵਿਚਿਤ੍ਤਂ ਕਪ੍ਪਿਯਵੋਹਾਰੇਨ ਦਿਨ੍ਨਂ.

‘‘ਕਾਲ਼ਲੋਹ…ਪੇ… ਭਾਜੇਤਬ੍ਬੋ’’ਤਿ ਵੁਤ੍ਤਤ੍ਤਾ ਵਟ੍ਟਕਂਸਲੋਹਮਯਮ੍ਪਿ ਭਾਜਨਂ ਪੁਗ੍ਗਲਿਕਮ੍ਪਿ ਸਮ੍ਪਟਿਚ੍ਛਿਤੁਮ੍ਪਿ ਪਰਿਹਰਿਤੁਮ੍ਪਿ ਵਟ੍ਟਤਿ ਪੁਗ੍ਗਲਪਰਿਹਰਿਤਬ੍ਬਸ੍ਸੇਵ ਭਾਜੇਤਬ੍ਬਤ੍ਤਾਤਿ ਵਦਨ੍ਤਿ. ਤਂ ਉਪਰਿ ‘‘ਕਂਸਲੋਹਵਟ੍ਟਲੋਹਭਾਜਨਵਿਕਤਿ ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾ ਵਾ ਵਟ੍ਟਤੀ’’ਤਿਆਦਿਕੇਨ ਮਹਾਪਚ੍ਚਰਿਵਚਨੇਨ ਵਿਰੁਜ੍ਝਤਿ. ਇਮਸ੍ਸ ਹਿ ‘‘ਵਟ੍ਟਲੋਹਕਂਸਲੋਹਾਨਂ ਯੇਨ ਕੇਨਚਿ ਕਤੋ ਸੀਹਲ਼ਦੀਪੇ ਪਾਦਗ੍ਗਣ੍ਹਨਕੋ ਭਾਜੇਤਬ੍ਬੋ’’ਤਿ ਵੁਤ੍ਤਸ੍ਸ ਮਹਾਅਟ੍ਠਕਥਾਵਚਨਸ੍ਸ ਪਟਿਕ੍ਖੇਪਾਯ ਤਂ ਮਹਾਪਚ੍ਚਰਿਵਚਨਂ ਪਚ੍ਛਾ ਦਸ੍ਸਿਤਂ. ਤਸ੍ਮਾ ਵਟ੍ਟਲੋਹਕਂਸਲੋਹਮਯਂ ਯਂ ਕਿਞ੍ਚਿ ਪਾਦਗ੍ਗਣ੍ਹਨਕਵਾਰਕਮ੍ਪਿ ਉਪਾਦਾਯ ਅਭਾਜਨੀਯਮੇਵ. ਗਿਹੀਹਿ ਦਿਯ੍ਯਮਾਨਮ੍ਪਿ ਪੁਗ੍ਗਲਸ੍ਸ ਸਮ੍ਪਟਿਚ੍ਛਿਤੁਮ੍ਪਿ ਨ ਵਟ੍ਟਤਿ. ਪਾਰਿਹਾਰਿਯਂ ਨ ਵਟ੍ਟਤੀਤਿ ਪਤ੍ਤਾਦਿਪਰਿਕ੍ਖਾਰਂ ਵਿਯ ਸਯਮੇਵ ਪਟਿਸਾਮੇਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤਿ. ਗਿਹਿਸਨ੍ਤਕਂ ਵਿਯ ਆਰਾਮਿਕਾਦਯੋ ਚੇ ਸਯਮੇਵ ਗੋਪੇਤ੍ਵਾ ਵਿਨਿਯੋਗਕਾਲੇ ਆਨੇਤ੍ਵਾ ਪਟਿਨੇਨ੍ਤਿ, ਪਰਿਭੁਞ੍ਜਿਤੁਂ ਵਟ੍ਟਤਿ. ‘‘ਪਟਿਸਾਮੇਤ੍ਵਾ ਭਿਕ੍ਖੂਨਂ ਦੇਥਾ’’ਤਿ ਵਤ੍ਤੁਮ੍ਪਿ ਵਟ੍ਟਤਿ.

ਪਣ੍ਣਸੂਚਿ ਨਾਮ ਲੇਖਨੀਤਿ ਵਦਨ੍ਤਿ. ‘‘ਅਤ੍ਤਨਾ ਲਦ੍ਧਾਨਿਪੀ’’ਤਿਆਦਿਨਾ ਪਟਿਗ੍ਗਹਣੇ ਦੋਸੋ ਨਤ੍ਥਿ, ਪਰਿਹਰਿਤ੍ਵਾ ਪਰਿਭੋਗੋਵ ਆਪਤ੍ਤਿਕਰੋਤਿ ਦਸ੍ਸੇਤਿ. ਯਥਾ ਚੇਤ੍ਥ, ਏਵਂ ਉਪਰਿ ਅਭਾਜਨੀਯਵਾਸਿਆਦੀਸੁ ਅਤ੍ਤਨੋ ਸਨ੍ਤਕੇਸੁਪਿ.

ਅਨਾਮਾਸਮ੍ਪੀਤਿ ¶ ਸੁਵਣ੍ਣਾਦਿਮਯਮ੍ਪਿ ਸਬ੍ਬਂ ਤਂ ਆਮਸਿਤ੍ਵਾਪਿ ਪਰਿਭੁਞ੍ਜਿਤੁਂ ਵਟ੍ਟਤਿ. ਉਪਕ੍ਖਰੇਤਿ ਉਪਕਰਣੇ. ਅਡ੍ਢਬਾਹੁਪ੍ਪਮਾਣਾ ਨਾਮ ਅਡ੍ਢਬਾਹੁਮਤ੍ਤਾ. ਅਡ੍ਢਬ੍ਯਾਮਮਤ੍ਤਾਤਿਪਿ ਵਦਨ੍ਤਿ. ਯੋਤ੍ਤਾਨੀਤਿ ਚਮ੍ਮਰਜ੍ਜੁਕਾ.

ਅਟ੍ਠਙ੍ਗੁਲਸੂਚਿਦਣ੍ਡਮਤ੍ਤੋਪੀਤਿ ਤਸਰਦਣ੍ਡਾਦਿਸੂਚਿਆਕਾਰਤਨੁਦਣ੍ਡਕਮਤ੍ਤੋਪਿ. ਰਿਤ੍ਤਪੋਤ੍ਥਕੋਪੀਤਿ ਅਲਿਖਿਤਪੋਤ੍ਥਕੋ. ਇਦਞ੍ਚ ਪਣ੍ਣਪ੍ਪਸਙ੍ਗੇਨ ਵੁਤ੍ਤਂ.

‘‘ਘਟ੍ਟਨਫਲਕਂ ਘਟ੍ਟਨਮੁਗ੍ਗਰੋ’’ਤਿ ਇਦਂ ਰਜਿਤਚੀਵਰਂ ਏਕਸ੍ਮਿਂ ਮਟ੍ਠੇ ਦਣ੍ਡਮੁਗ੍ਗਰੇ ਵੇਠੇਤ੍ਵਾ ਏਕਸ੍ਸ ਮਟ੍ਠਫਲਕਸ੍ਸ ਉਪਰਿ ਠਪੇਤ੍ਵਾ ਉਪਰਿ ਅਪਰੇਨ ਮਟ੍ਠਫਲਕੇਨ ਨਿਕੁਜ੍ਜਿਤ੍ਵਾ ਏਕੋ ਉਪਰਿ ਅਕ੍ਕਮਿਤ੍ਵਾ ਤਿਟ੍ਠਤਿ. ਦ੍ਵੇ ਜਨਾ ਉਪਰਿ ਫਲਕਂ ਦ੍ਵੀਸੁ ਕੋਟੀਸੁ ਗਹੇਤ੍ਵਾ ਅਪਰਾਪਰਂ ਆਕਡ੍ਢਨਵਿਕਡ੍ਢਨਂ ਕਰੋਨ੍ਤਿ, ਏਤਂ ਸਨ੍ਧਾਯ ਵੁਤ੍ਤਂ. ਹਤ੍ਥੇ ਠਪਾਪੇਤ੍ਵਾ ਹਤ੍ਥੇਨ ਪਹਰਣਂ ਪਨ ¶ ਨਿਟ੍ਠਿਤਰਜਨਸ੍ਸ ਚੀਵਰਸ੍ਸ ਅਲ੍ਲਕਾਲੇ ਕਾਤਬ੍ਬਂ. ਇਦਂ ਪਨ ਫਲਕਮੁਗ੍ਗਰੇਹਿ ਘਟ੍ਟਨਂ ਸੁਕ੍ਖਕਾਲੇ ਥਦ੍ਧਭਾਵਵਿਮੋਚਨਤ੍ਥਨ੍ਤਿ ਦਟ੍ਠਬ੍ਬਂ. ਅਮ੍ਬਣਨ੍ਤਿ ਏਕਦੋਣਿਕਨਾਵਾਫਲਕੇਹਿ ਪੋਕ੍ਖਰਣੀਸਦਿਸਂ ਕਤਂ. ਪਾਨੀਯਭਾਜਨਨ੍ਤਿਪਿ ਵਦਨ੍ਤਿ. ਰਜਨਦੋਣੀਤਿ ਏਕਦਾਰੁਨਾਵ ਕਤਂ ਰਜਨਭਾਜਨਂ. ਉਦਕਦੋਣੀਪਿ ਏਕਦਾਰੁਨਾਵ ਕਤਂ ਉਦਕਭਾਜਨਂ.

ਭੂਮਤ੍ਥਰਣਂ ਕਾਤੁਂ ਵਟ੍ਟਤੀਤਿ ਅਕਪ੍ਪਿਯਚਮ੍ਮਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਭੂਮਤ੍ਥਰਣਸਙ੍ਖੇਪੇਨ ਸਯਿਤੁਮ੍ਪਿ ਵਟ੍ਟਤਿਯੇਵ. ‘‘ਪਚ੍ਚਤ੍ਥਰਣਗਤਿਕ’’ਨ੍ਤਿ ਇਮਿਨਾ ਮਞ੍ਚਾਦੀਸੁ ਅਤ੍ਥਰਿਤਬ੍ਬਂ ਮਹਾਚਮ੍ਮਂ ਏਲ਼ਕਚਮ੍ਮਂ ਨਾਮਾਤਿ ਦਸ੍ਸੇਤਿ.

ਛਤ੍ਤਮੁਟ੍ਠਿਪਣ੍ਣਨ੍ਤਿ ਤਾਲਪਣ੍ਣਂ ਸਨ੍ਧਾਯ ਵੁਤ੍ਤਂ. ਪਤ੍ਤਕਟਾਹਨ੍ਤਿ ਪਤ੍ਤਪਚਨਕਟਾਹਂ.

ਅਵਿਸ੍ਸਜ੍ਜਿਯਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

੩੨੩. ਪਾਲ਼ਿਯਂ ਪਿਣ੍ਡਨਿਕ੍ਖੇਪਨਮਤ੍ਤੇਨਾਤਿਆਦੀਸੁ ਖਣ੍ਡਫੁਲ੍ਲਟ੍ਠਾਨੇ ਮਤ੍ਤਿਕਾਪਿਣ੍ਡਟ੍ਠਪਨਂ ਪਿਣ੍ਡਨਿਕ੍ਖੇਪਨਂ ਨਾਮ. ਨਵਕਮ੍ਮਨ੍ਤਿ ਨਵਕਮ੍ਮਸਮ੍ਮੁਤਿ. ਅਗ੍ਗਲ਼ਵਟ੍ਟਿ ਨਾਮ ਕਵਾਟਬਨ੍ਧੋ. ਛਾਦਨਂ ਨਾਮ ਤਿਣਾਦੀਹਿ ਗੇਹਚ੍ਛਾਦਨਂ. ਬਨ੍ਧਨਂ ਨਾਮ ਦਣ੍ਡਵਲ੍ਲਿਆਦੀਹਿ ਛਦਨਬਨ੍ਧਨਮੇਵ. ਚਤੁਹਤ੍ਥਵਿਹਾਰੇਤਿ ਵਿਤ੍ਥਾਰਪ੍ਪਮਾਣਤੋ ਵੁਤ੍ਤਂ. ਉਬ੍ਬੇਧਤੋ ਪਨ ਅਨੇਕਭੂਮਕਤ੍ਤਾ ਵਡ੍ਢਕੀਹਤ੍ਥੇਨ ਵੀਸਤਿਹਤ੍ਥੋਪਿ ¶ ਨਾਨਾਸਣ੍ਠਾਨਵਿਚਿਤ੍ਤੋਪਿ ਹੋਤਿ. ਤੇਨਸ੍ਸ ਚਤੁਵਸ੍ਸਿਕਂ ਨਵਕਮ੍ਮਂ ਵੁਤ੍ਤਂ. ਏਵਂ ਸੇਸੇਸੁਪਿ.

ਪਾਲ਼ਿਯਂ ਸਬ੍ਬੇ ਵਿਹਾਰੇਤਿ ਭੁਮ੍ਮਤ੍ਥੇ ਉਪਯੋਗਬਹੁਵਚਨਂ. ਏਕਸ੍ਸ ਸਬ੍ਬੇਸੁ ਵਿਹਾਰੇਸੁ ਨਵਕਮ੍ਮਂ ਦੇਤੀਤਿ ਅਤ੍ਥੋ. ਸਬ੍ਬਕਾਲਂ ਪਟਿਬਾਹਨ੍ਤੀਤਿ ਨਵਕਮ੍ਮਿਕਾ ਅਤ੍ਤਨੋ ਗਾਹਿਤਂ ਵਰਸੇਯ੍ਯਂ ਸਮ੍ਪਤ੍ਤਾਨਂ ਯਥਾਵੁਡ੍ਢਂ ਅਕਤ੍ਵਾ ਉਤੁਕਾਲੇਪਿ ਪਟਿਬਾਹਨ੍ਤਿ.

‘‘ਸਚੇ ਸੋ ਆਵਾਸੋ ਜੀਰਤੀ’’ਤਿਆਦਿ ਪਾਲ਼ਿਮੁਤ੍ਤਕਵਿਨਿਚ੍ਛਯੋ. ਮਞ੍ਚਟ੍ਠਾਨਂ ਦਤ੍ਵਾਤਿ ਮਞ੍ਚਟ੍ਠਾਨਂ ਪੁਗ੍ਗਲਿਕਂ ਦਤ੍ਵਾ. ਤਿਭਾਗਨ੍ਤਿ ਤਤਿਯਭਾਗਂ. ਏਵਂ ਵਿਸ੍ਸਜ੍ਜਨਮ੍ਪਿ ਥਾਵਰੇਨ ਥਾਵਰਪਰਿਵਤ੍ਤਨਟ੍ਠਾਨੇ ਏਵ ਪਵਿਸਤਿ, ਨ ਇਤਰਥਾ ਸਬ੍ਬਸੇਨਾਸਨਾਨਂ ¶ ਵਿਨਸ੍ਸਨਤੋ. ਸਚੇ ਸਦ੍ਧਿਵਿਹਾਰਿਕਾਨਂ ਦਾਤੁਕਾਮੋ ਹੋਤੀਤਿ ਸਚੇ ਸੋ ਸਙ੍ਘਸ੍ਸ ਭਣ੍ਡਕਟ੍ਠਪਨਟ੍ਠਾਨਂ ਵਾ ਅਞ੍ਞੇਸਂ ਭਿਕ੍ਖੂਨਂ ਵਸਨਟ੍ਠਾਨਂ ਵਾ ਦਾਤੁਂ ਨ ਇਚ੍ਛਤਿ, ਅਤ੍ਤਨੋ ਸਦ੍ਧਿਵਿਹਾਰਿਕਾਨਞ੍ਞੇਵ ਦਾਤੁਕਾਮੋ ਹੋਤਿ, ਤਾਦਿਸਸ੍ਸ ਤੁਯ੍ਹਂ ਪੁਗ੍ਗਲਿਕਮੇਵ ਕਤ੍ਵਾ ਜਗ੍ਗਾਤਿ ਨ ਸਬ੍ਬਂ ਤਸ੍ਸ ਦਾਤਬ੍ਬਨ੍ਤਿ ਅਧਿਪ੍ਪਾਯੋ. ਤਤ੍ਥ ਪਨ ਕਤ੍ਤਬ੍ਬਵਿਧਿਂ ਦਸ੍ਸੇਨ੍ਤੋ ਆਹ ‘‘ਕਮ੍ਮ’’ਨ੍ਤਿਆਦਿ. ਏਵਞ੍ਹੀਤਿਆਦਿਮ੍ਹਿ ਵਯਾਨੁਰੂਪਂ ਤਤਿਯਭਾਗੇ ਵਾ ਉਪਡ੍ਢਭਾਗੇ ਵਾ ਗਹਿਤੇ ਤਂ ਭਾਗਂ ਦਾਤੁਂ ਲਭਤੀਤਿ ਅਤ੍ਥੋ.

ਯੇਨਾਤਿ ਤੇਸੁ ਦ੍ਵੀਸੁ ਭਿਕ੍ਖੂਸੁ ਯੇਨ. ਸੋ ਸਾਮੀਤਿ ਤਸ੍ਸਾ ਭੂਮਿਯਾ ਵਿਹਾਰਕਰਣੇ ਸੋਵ ਸਾਮੀ, ਤਂ ਪਟਿਬਾਹਿਤ੍ਵਾ ਇਤਰੇਨ ਨ ਕਾਤਬ੍ਬਨ੍ਤਿ ਅਧਿਪ੍ਪਾਯੋ. ਸੋ ਹਿ ਪਠਮਂ ਗਹਿਤੋ. ਅਕਤਟ੍ਠਾਨੇਤਿ ਚਯਾਦੀਨਂ ਅਕਤਪੁਬ੍ਬਟ੍ਠਾਨੇ. ਚਯਂ ਵਾ ਪਮੁਖਂ ਵਾਤਿ ਸਙ੍ਘਿਕਸੇਨਾਸਨਂ ਨਿਸ੍ਸਾਯ ਤਤੋ ਬਹਿ ਚਯਂ ਬਨ੍ਧਿਤ੍ਵਾ, ਏਕਂ ਸੇਨਾਸਨਂ ਵਾ. ਬਹਿਕੁਟ੍ਟੇਤਿ ਕੁਟ੍ਟਤੋ ਬਹਿ, ਅਤ੍ਤਨੋ ਕਤਟ੍ਠਾਨੇਤਿ ਅਤ੍ਥੋ.

ਨਵਕਮ੍ਮਦਾਨਕਥਾਵਣ੍ਣਨਾ ਨਿਟ੍ਠਿਤਾ.

ਅਞ੍ਞਤ੍ਰਪਰਿਭੋਗਪਟਿਕ੍ਖੇਪਾਦਿਕਥਾਵਣ੍ਣਨਾ

੩੨੪. ਵਡ੍ਢਿਕਮ੍ਮਤ੍ਥਾਯਾਤਿ ਯਥਾ ਤਮ੍ਮੂਲਗ੍ਘਤੋ ਨ ਪਰਿਹਾਯਤਿ, ਏਵਂ ਕਤ੍ਤਬ੍ਬਸ੍ਸ ਏਵਂ ਨਿਪ੍ਫਾਦੇਤਬ੍ਬਸ੍ਸ ਮਞ੍ਚਪੀਠਾਦਿਨੋ ਅਤ੍ਥਾਯ.

ਚਕ੍ਕਲਿਕਨ੍ਤਿ ਪਾਦਪੁਞ੍ਛਨਤ੍ਥਂ ਚਕ੍ਕਾਕਾਰੇਨ ਕਤਂ. ਪਰਿਭਣ੍ਡਕਤਭੂਮਿ ਵਾਤਿ ਕਾਲ਼ਵਣ੍ਣਾਦਿਕਤਸਣ੍ਹਭੂਮਿ ਵਾ. ਸੇਨਾਸਨਂ ਵਾਤਿ ਮਞ੍ਚਪੀਠਾਦਿ ਵਾ.

‘‘ਤਥੇਵ ¶ ਵਲ਼ਞ੍ਜੇਤੁਂ ਵਟ੍ਟਤੀ’’ਤਿ ਇਮਿਨਾ ਨੇਵਾਸਿਕੇਹਿ ਧੋਤਪਾਦਾਦੀਹਿ ਵਲ਼ਞ੍ਜਨਟ੍ਠਾਨੇ ਸਞ੍ਚਿਚ੍ਚ ਅਧੋਤਪਾਦਾਦੀਹਿ ਵਲ਼ਞ੍ਜਨ੍ਤਸ੍ਸੇਵ ਆਪਤ੍ਤਿ ਪਞ੍ਞਤ੍ਤਾਤਿ ਦਸ੍ਸੇਤਿ.

‘‘ਦ੍ਵਾਰਮ੍ਪੀ’’ਤਿਆਦਿਨਾ ਸਾਮਞ੍ਞਤੋ ਵੁਤ੍ਤਤ੍ਤਾ ਦ੍ਵਾਰਵਾਤਪਾਨਾਦਯੋ ਅਪਰਿਕਮ੍ਮਕਤਾਪਿ ਨ ਅਪਸ੍ਸਯਿਤਬ੍ਬਾ. ਅਜਾਨਿਤ੍ਵਾ ਅਪਸ੍ਸਯਨ੍ਤਸ੍ਸਪਿ ਇਧ ਲੋਮਗਣਨਾਯ ਆਪਤ੍ਤਿ.

ਅਞ੍ਞਤ੍ਰਪਰਿਭੋਗਪਟਿਕ੍ਖੇਪਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਸਙ੍ਘਭਤ੍ਤਾਦਿਅਨੁਜਾਨਨਕਥਾਵਣ੍ਣਨਾ

੩੨੫. ਉਦ੍ਦੇਸਭਤ੍ਤਂ ¶ ਨਿਮਨ੍ਤਨਨ੍ਤਿ ਇਮਂ ਵੋਹਾਰਂ ਪਤ੍ਤਾਨੀਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ, ਉਦ੍ਦੇਸਭਤ੍ਤਂ ਨਿਮਨ੍ਤਨਨ੍ਤਿਆਦਿਵੋਹਾਰਂ ਪਤ੍ਤਾਨੀਤਿ ਅਤ੍ਥੋ. ਤਮ੍ਪੀਤਿ ਸਙ੍ਘਭਤ੍ਤਮ੍ਪਿ.

ਸਙ੍ਘਭਤ੍ਤਾਦਿਅਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

ਭੋਜਨਸਾਲਾਯਾਤਿ ਭਤ੍ਤੁਦ੍ਦੇਸਟ੍ਠਾਨਂ ਸਨ੍ਧਾਯ ਵੁਤ੍ਤਂ. ਏਕਵਲ਼ਞ੍ਜਨ੍ਤਿ ਏਕਦ੍ਵਾਰੇਨ ਵਲ਼ਞ੍ਜਿਤਬ੍ਬਂ. ਨਾਨਾਨਿਵੇਸਨੇਸੂਤਿ ਨਾਨਾਕੁਲਸ੍ਸ ਨਾਨੂਪਚਾਰੇਸੁ ਨਿਵੇਸਨੇਸੁ.

ਨਿਸਿਨ੍ਨਸ੍ਸਪਿ ਨਿਦ੍ਦਾਯਨ੍ਤਸ੍ਸਪੀਤਿ ਅਨਾਦਰੇ ਸਾਮਿਵਚਨਂ, ਵੁਡ੍ਢਤਰੇ ਨਿਦ੍ਦਾਯਨ੍ਤੇ ਨਵਕਸ੍ਸ ਗਾਹਿਤਂ ਸੁਗ੍ਗਹਿਤਨ੍ਤਿ ਅਤ੍ਥੋ.

ਵਿਸ੍ਸਟ੍ਠਦੂਤੋਤਿ ਯਥਾਰੁਚਿ ਵਤ੍ਤੁਂ ਲਭਨਤੋ ਨਿਰਾਸਙ੍ਕਦੂਤੋ. ਪੁਚ੍ਛਾਸਭਾਗੇਨਾਤਿ ਪੁਚ੍ਛਾਵਚਨਪਟਿਭਾਗੇਨ. ‘‘ਏਕਾ ਕੂਟਟ੍ਠਿਤਿਕਾ ਨਾਮਾ’’ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘‘ਰਞ੍ਞੋ ਵਾ ਹੀ’’ਤਿਆਦਿ ਵੁਤ੍ਤਂ.

ਸਬ੍ਬਂ ਪਤ੍ਤਸ੍ਸਾਮਿਕਸ੍ਸ ਹੋਤੀਤਿ ਚੀਵਰਾਦਿਕਮ੍ਪਿ ਸਬ੍ਬਂ ਪਤ੍ਤਸ੍ਸਾਮਿਕਸ੍ਸੇਵ ਹੋਤਿ, ਮਯਾ ਭਤ੍ਤਮੇਵ ਸਨ੍ਧਾਯ ਵੁਤ੍ਤਂ, ਨ ਚੀਵਰਾਦਿਨ੍ਤਿ ਵਤ੍ਵਾ ਗਹੇਤੁਂ ਨ ਵਟ੍ਟਤੀਤਿ ਅਤ੍ਥੋ.

ਅਕਤਭਾਗੋਨਾਮਾਤਿ ¶ ਆਗਨ੍ਤੁਕਭਾਗੋ ਨਾਮ, ਅਦਿਨ੍ਨਪੁਬ੍ਬਭਾਗੋਤਿ ਅਤ੍ਥੋ.

ਕਿਂ ਆਹਰੀਯਤੀਤਿ ਅਵਤ੍ਵਾਤਿ ‘‘ਕਤਰਭਤ੍ਤਂ ਵਾ ਤਯਾ ਆਹਰੀਯਤੀ’’ਤਿ ਦਾਯਕਂ ਅਪੁਚ੍ਛਿਤ੍ਵਾ. ਪਕਤਿਟ੍ਠਿਤਿਕਾਯਾਤਿ ਉਦ੍ਦੇਸਭਤ੍ਤਟ੍ਠਿਤਿਕਾਯ.

ਉਦ੍ਦੇਸਭਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਵਿਚ੍ਛਿਨ੍ਦਿਤ੍ਵਾਤਿ ¶ ‘‘ਭਤ੍ਤਂ ਗਣ੍ਹਥਾ’’ਤਿ ਪਦਂ ਅਵਤ੍ਵਾ. ਤੇਨੇਵਾਹ ‘‘ਭਤ੍ਤਨ੍ਤਿ ਅਵਦਨ੍ਤੇਨਾ’’ਤਿ.

ਆਲੋਪਸਙ੍ਖੇਪੇਨਾਤਿ ਏਕੇਕਪਿਣ੍ਡਵਸੇਨ, ਏਵਞ੍ਚ ਭਾਜਨਂ ਉਦ੍ਦੇਸਭਤ੍ਤੇ ਨ ਵਟ੍ਟਤਿ. ਤਤ੍ਥ ਹਿ ਏਕਸ੍ਸ ਪਹੋਨਕਪ੍ਪਮਾਣੇਨੇਵ ਭਾਜੇਤਬ੍ਬਂ.

ਆਰੁਲ਼੍ਹਾਯੇਵ ਮਾਤਿਕਂ, ਸਙ੍ਘਤੋ ਅਟ੍ਠ ਭਿਕ੍ਖੂਤਿ ਏਤ੍ਥ ਯੇ ਮਾਤਿਕਂ ਆਰੁਲ਼੍ਹਾ, ਤੇ ਅਟ੍ਠ ਭਿਕ੍ਖੂਤਿ ਯੋਜੇਤਬ੍ਬਂ. ਉਦ੍ਦੇਸਭਤ੍ਤਨਿਮਨ੍ਤਨਭਤ੍ਤਾਦਿਸਙ੍ਘਿਕਭਤ੍ਤਮਾਤਿਕਾਸੁ ਨਿਮਨ੍ਤਨਭਤ੍ਤਮਾਤਿਕਾਯ ਠਿਤਿਵਸੇਨ ਆਰੁਲ਼੍ਹੇ ਭਤ੍ਤੁਦ੍ਦੇਸਕੇਨ ਵਾ ਸਯਂ ਵਾ ਸਙ੍ਘਤੋ ਉਦ੍ਦਿਸਾਪੇਤ੍ਵਾ ਗਹੇਤ੍ਵਾ ਗਨ੍ਤਬ੍ਬਂ, ਨ ਅਤ੍ਤਨੋ ਰੁਚਿਤੇ ਗਹੇਤ੍ਵਾਤਿ ਅਧਿਪ੍ਪਾਯੋ. ਮਾਤਿਕਂ ਆਰੋਪੇਤ੍ਵਾਤਿ ‘‘ਸਙ੍ਘਤੋ ਗਣ੍ਹਾਮੀ’’ਤਿਆਦਿਨਾ ਵੁਤ੍ਤਮਾਤਿਕਾਭੇਦਂ ਦਾਯਕਸ੍ਸ ਵਿਞ੍ਞਾਪੇਤ੍ਵਾਤਿ ਅਤ੍ਥੋ.

ਪਟਿਬਦ੍ਧਕਾਲਤੋ ਪਨ ਪਟ੍ਠਾਯਾਤਿ ਤਤ੍ਥੇਵ ਵਾਸਸ੍ਸ ਨਿਬਦ੍ਧਕਾਲਤੋ ਪਟ੍ਠਾਯ.

ਨਿਮਨ੍ਤਨਭਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਉਪਨਿਬਨ੍ਧਿਤ੍ਵਾਤਿ ਲਿਖਿਤ੍ਵਾ. ਗਾਮਵਸੇਨਪੀਤਿ ਯੇਭੁਯ੍ਯੇਨ ਸਮਲਾਭਗਾਮਵਸੇਨਪਿ. ਬਹੂਨਿ ਸਲਾਕਭਤ੍ਤਾਨੀਤਿ ਤਿਂਸਂ ਵਾ ਚਤ੍ਤਾਰੀਸਂ ਵਾ ਭਤ੍ਤਾਨਿ. ‘‘ਸਚੇ ਹੋਨ੍ਤੀ’’ਤਿ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਂ.

ਸਲ੍ਲਕ੍ਖੇਤ੍ਵਾਤਿ ¶ ਤਾਨਿ ਭਤ੍ਤਾਨਿ ਪਮਾਣਵਸੇਨ ਸਲ੍ਲਕ੍ਖੇਤ੍ਵਾ. ਨਿਗ੍ਗਹੇਨ ਦਤ੍ਵਾਤਿ ਦੂਰਂ ਗਨ੍ਤੁਂ ਅਨਿਚ੍ਛਨ੍ਤਸ੍ਸ ਨਿਗ੍ਗਹੇਨ ਸਮ੍ਪਟਿਚ੍ਛਾਪੇਤ੍ਵਾ ਦਤ੍ਵਾ. ਪੁਨ ਵਿਹਾਰਂ ਆਗਨ੍ਤ੍ਵਾਤਿ ਏਤ੍ਥ ਵਿਹਾਰਂ ਅਨਾਗਨ੍ਤ੍ਵਾ ਭਤ੍ਤਂ ਗਹੇਤ੍ਵਾ ਪਚ੍ਛਾ ਵਿਹਾਰੇ ਅਤ੍ਤਨੋ ਪਾਪੇਤ੍ਵਾ ਭੁਞ੍ਜਿਤੁਮ੍ਪਿ ਵਟ੍ਟਤਿ.

ਏਕਗੇਹਵਸੇਨਾਤਿ ਵੀਥਿਯਮ੍ਪਿ ਏਕਪਸ੍ਸੇ ਘਰਪਾਲ਼ਿਯਾ ਵਸੇਨ. ਉਦ੍ਦਿਸਿਤ੍ਵਾਪੀਤਿ ਅਸੁਕਕੁਲੇ ਸਲਾਕਭਤ੍ਤਾਨਿ ਤੁਯ੍ਹਂ ਪਾਪੁਣਨ੍ਤੀਤਿ ਵਤ੍ਵਾ.

ਵਾਰਗਾਮੇਤਿ ¶ ਅਤਿਦੂਰਤ੍ਤਾ ਵਾਰੇਨ ਗਨ੍ਤਬ੍ਬਗਾਮੇ. ਸਟ੍ਠਿਤੋ ਵਾ ਪਣ੍ਣਾਸਤੋ ਵਾਤਿ ਦਣ੍ਡਕਮ੍ਮਤ੍ਥਾਯ ਉਦਕਘਟਂ ਸਨ੍ਧਾਯ ਵੁਤ੍ਤਂ. ਵਿਹਾਰਵਾਰੋਤਿ ਸਬ੍ਬਭਿਕ੍ਖੂਸੁ ਭਿਕ੍ਖਤ੍ਥਾਯ ਗਤੇਸੁ ਵਿਹਾਰਰਕ੍ਖਣਵਾਰੋ.

ਤੇਸਨ੍ਤਿ ਵਿਹਾਰਵਾਰਿਕਾਨਂ. ਫਾਤਿਕਮ੍ਮਮੇਵਾਤਿ ਵਿਹਾਰਰਕ੍ਖਣਕਿਚ੍ਚਸ੍ਸ ਪਹੋਨਕਪਟਿਪਾਦਨਮੇਵ. ਏਕਸ੍ਸੇਵ ਪਾਪੁਣਨ੍ਤੀਤਿ ਦਿਵਸੇ ਦਿਵਸੇ ਏਕੇਕਸ੍ਸੇਵ ਪਾਪਿਤਾਨੀਤਿ ਅਤ੍ਥੋ.

ਰਸਸਲਾਕਨ੍ਤਿ ਉਚ੍ਛੁਰਸਸਲਾਕਂ. ‘‘ਸਲਾਕਵਸੇਨ ਗਾਹਿਤਤ੍ਤਾ ਪਨ ਨ ਸਾਦਿਤਬ੍ਬਾ’’ਤਿ ਇਦਂ ਅਸਾਰੁਪ੍ਪਵਸੇਨ ਵੁਤ੍ਤਂ, ਨ ਧੁਤਙ੍ਗਭੇਦਵਸੇਨ. ‘‘ਸਙ੍ਘਤੋ ਨਿਰਾਮਿਸਸਲਾਕਾ…ਪੇ… ਵਟ੍ਟਤਿਯੇਵਾ’’ਤਿ (ਵਿਸੁਦ੍ਧਿ. ੧.੨੬) ਹਿ ਵਿਸੁਦ੍ਧਿਮਗ੍ਗੇ ਵੁਤ੍ਤਂ. ਅਗ੍ਗਭਿਕ੍ਖਾਮਤ੍ਤਨ੍ਤਿ ਏਕਕਟਚ੍ਛੁਭਿਕ੍ਖਾਮਤ੍ਤਂ. ਲਦ੍ਧਾ ਵਾ ਅਲਦ੍ਧਾ ਵਾ ਸ੍ਵੇਪਿ ਗਣ੍ਹੇਯ੍ਯਾਸੀਤਿ ਲਦ੍ਧੇਪਿ ਅਪ੍ਪਮਤ੍ਤਤਾਯ ਵੁਤ੍ਤਂ. ਤੇਨਾਹ ‘‘ਯਾਵਦਤ੍ਥਂ ਲਭਤਿ…ਪੇ… ਅਲਭਿਤ੍ਵਾ ‘ਸ੍ਵੇ ਗਣ੍ਹੇਯ੍ਯਾਸੀ’ਤਿ ਵਤ੍ਤਬ੍ਬੋ’’ਤਿ.

ਤਤ੍ਥਾਤਿ ਤਸ੍ਮਿਂ ਦਿਸਾਭਾਗੇ. ਤਂ ਗਹੇਤ੍ਵਾਤਿ ਤਂ ਵਾਰਗਾਮੇ ਸਲਾਕਂ ਅਤ੍ਤਨੋ ਗਹੇਤ੍ਵਾ. ਤੇਨਾਤਿ ਦਿਸਂਗਮਿਕਤੋ ਅਞ੍ਞੇਨ ਤਸ੍ਮਿਂ ਦਿਸਂਗਮਿਕੇ. ਦੇਵਸਿਕਂ ਪਾਪੇਤਬ੍ਬਾਤਿ ਉਪਚਾਰਸੀਮਾਯ ਠਿਤਸ੍ਸ ਯਸ੍ਸ ਕਸ੍ਸਚਿ ਵਸ੍ਸਗ੍ਗੇਨ ਪਾਪੇਤਬ੍ਬਾ. ਏਵਂ ਏਤੇਸੁ ਅਗਤੇਸੁ ਆਸਨ੍ਨਵਿਹਾਰੇ ਭਿਕ੍ਖੂਨਂ ਭੁਞ੍ਜਿਤੁਂ ਵਟ੍ਟਤਿ ਇਤਰਥਾ ਸਙ੍ਘਿਕਤੋ.

ਅਮ੍ਹਾਕਂ ਗੋਚਰਗਾਮੇਵਾਤਿ ਸਲਾਕਭਤ੍ਤਦਾਯਕਾਨਂ ਗਾਮਂ ਸਨ੍ਧਾਯ ਵੁਤ੍ਤਂ. ਵਿਹਾਰੇ ਥੇਰਸ੍ਸ ਪਤ੍ਤਸਲਾਕਭਤ੍ਤਨ੍ਤਿ ਵਿਹਾਰੇ ਏਕੇਕਸ੍ਸੇਵ ਓਹੀਨਤ੍ਥੇਰਸ੍ਸ ਸਬ੍ਬਸਲਾਕਾਨਂ ਅਤ੍ਤਨੋ ਪਾਪਨਵਸੇਨ ਪਤ੍ਤਸਲਾਕਭਤ੍ਤਂ.

‘‘ਸ੍ਵੇ ¶ ਪਕ੍ਖੋ’’ਤਿ ਅਜ੍ਜ ਪਕ੍ਖਿਕਂ ਨ ਗਾਹੇਤਬ੍ਬਨ੍ਤਿ ਅਟ੍ਠਮਿਯਾ ਭੁਞ੍ਜਿਤਬ੍ਬਂ ਸਤ੍ਤਮਿਯਾ ਭੁਞ੍ਜਨਤ੍ਥਾਯ ਨ ਗਾਹੇਤਬ੍ਬਂ, ਦਾਯਕੇਹਿ ਨਿਯਮਿਤਦਿਵਸੇਨੇਵ ਗਾਹੇਤਬ੍ਬਨ੍ਤਿ ਅਤ੍ਥੋ. ਤੇਨਾਹ ‘‘ਸਚੇ ਪਨਾ’’ਤਿਆਦਿ. ਸ੍ਵੇ ਲੂਖਨ੍ਤਿ ਅਜ੍ਜ ਆਵਾਹਮਙ੍ਗਲਾਦਿਕਰਣਤੋ ਅਤਿਪਣੀਤਭੋਜਨਂ ਕਰੀਯਤਿ, ਸ੍ਵੇ ਤਥਾ ਨ ਭਵਿਸ੍ਸਤਿ, ਅਜ੍ਜੇਵ ਭਿਕ੍ਖੂ ਭੋਜੇਸ੍ਸਾਮੀਤਿ ਅਧਿਪ੍ਪਾਯੋ.

ਪਕ੍ਖਿਕਭਤ੍ਤਤੋ ¶ ਉਪੋਸਥਿਕਸ੍ਸ ਭੇਦਂ ਦਸ੍ਸੇਨ੍ਤੋ ਆਹ ‘‘ਉਪੋਸਥਙ੍ਗਾਨਿ ਸਮਾਦਿਯਿਤ੍ਵਾ’’ਤਿਆਦਿ. ਨਿਬਨ੍ਧਾਪਿਤਨ੍ਤਿ ‘‘ਅਸੁਕਵਿਹਾਰੇ ਆਗਨ੍ਤੁਕਾ ਭੁਞ੍ਜਨ੍ਤੂ’’ਤਿ ਨਿਯਮਿਤਂ.

ਗਮਿਕੋ ਆਗਨ੍ਤੁਕਭਤ੍ਤਮ੍ਪੀਤਿ ਗਾਮਨ੍ਤਰਤੋ ਆਗਨ੍ਤ੍ਵਾ ਅਵੂਪਸਨ੍ਤੇਨ ਗਮਿਕਚਿਤ੍ਤੇਨ ਵਸਿਤ੍ਵਾ ਪੁਨ ਅਞ੍ਞਤ੍ਥ ਗਚ੍ਛਨ੍ਤਂ ਸਨ੍ਧਾਯ ਵੁਤ੍ਤਂ. ਆਵਾਸਿਕਸ੍ਸ ਪਨ ਗਨ੍ਤੁਕਾਮਸ੍ਸ ਗਮਿਕਭਤ੍ਤਮੇਵ ਲਬ੍ਭਤਿ. ‘‘ਲੇਸਂ ਓਡ੍ਡੇਤ੍ਵਾ’’ਤਿ ਵੁਤ੍ਤਤ੍ਤਾ ਲੇਸਾਭਾਵੇ ਯਾਵ ਗਮਨਪਰਿਬਨ੍ਧੋ ਵਿਗਚ੍ਛਤਿ, ਤਾਵ ਭੁਞ੍ਜਿਤੁਂ ਵਟ੍ਟਤੀਤਿ ਞਾਪਿਤਨ੍ਤਿ ਦਟ੍ਠਬ੍ਬਂ.

ਤਣ੍ਡੁਲਾਦੀਨਿ ਪੇਸੇਨ੍ਤਿ…ਪੇ… ਵਟ੍ਟਤੀਤਿ ਅਭਿਹਟਭਿਕ੍ਖਤ੍ਤਾ ਵਟ੍ਟਤਿ. ਤਥਾ ਪਟਿਗ੍ਗਹਿਤਤ੍ਤਾਤਿ ਭਿਕ੍ਖਾਨਾਮੇਨ ਪਟਿਗ੍ਗਹਿਤਤ੍ਤਾ.

ਅਵਿਭਤ੍ਤਂ ਸਙ੍ਘਿਕਂ ਭਣ੍ਡਨ੍ਤਿ ਕੁਕ੍ਕੁਚ੍ਚੁਪ੍ਪਤ੍ਤਿਆਕਾਰਦਸ੍ਸਨਂ. ਏਵਂ ਕੁਕ੍ਕੁਚ੍ਚਂ ਕਤ੍ਵਾ ਪੁਚ੍ਛਿਤਬ੍ਬਕਿਚ੍ਚਂ ਨਤ੍ਥਿ, ਅਪੁਚ੍ਛਿਤ੍ਵਾ ਦਾਤਬ੍ਬਨ੍ਤਿ ਅਧਿਪ੍ਪਾਯੋ.

ਪਕ੍ਖਿਕਭਤ੍ਤਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਸੇਨਾਸਨਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੩੩੦. ਸਙ੍ਘਭੇਦਕਕ੍ਖਨ੍ਧਕੇ ¶ ¶ ਪਾਲ਼ਿਯਂ ਅਨੁਪਿਯਂ ਨਾਮਾਤਿ ਅਨੁਪਿਯਾ ਨਾਮ. ਹੇਟ੍ਠਾ ਪਾਸਾਦਾਤਿ ਪਾਸਾਦਤੋ ਹੇਟ੍ਠਾ ਹੇਟ੍ਠਿਮਤਲਂ, ‘‘ਹੇਟ੍ਠਾਪਾਸਾਦ’’ਨ੍ਤਿਪਿ ਪਾਠੋ. ਅਭਿਨੇਤਬ੍ਬਨ੍ਤਿ ਵਪਿਤਖੇਤ੍ਤੇਸੁ ਪਵੇਸੇਤਬ੍ਬਂ. ਨਿਨ੍ਨੇਤਬ੍ਬਨ੍ਤਿ ਤਤੋ ਨੀਹਰਿਤਬ੍ਬਂ. ਨਿਦ੍ਧਾਪੇਤਬ੍ਬਨ੍ਤਿ ਸਸ੍ਸਦੂਸਕਤਿਣਾਦੀਨਿ ਉਦ੍ਧਰਿਤਬ੍ਬਂ. ਉਜੁਂ ਕਾਰਾਪੇਤਬ੍ਬਨ੍ਤਿ ਪੁਞ੍ਜਂ ਕਾਰਾਪੇਤਬ੍ਬਂ, ਅਯਮੇਵ ਵਾ ਪਾਠੋ.

੩੩੨. ਪਰਦਤ੍ਤੋਤਿ ਪਰੇਹਿ ਦਿਨ੍ਨਪਚ੍ਚਯੇਹਿ ਪਵਤ੍ਤਮਾਨੋ. ਮਿਗਭੂਤੇਨ ਚੇਤਸਾਤਿ ਕਤ੍ਥਚਿ ਅਲਗ੍ਗਤਾਯ ਮਿਗਸ੍ਸ ਵਿਯ ਜਾਤੇਨ ਚਿਤ੍ਤੇਨ.

੩੩੩. ਮਨੋਮਯਂ ਕਾਯਨ੍ਤਿ ਝਾਨਮਨੇਨ ਨਿਬ੍ਬਤ੍ਤਂ ਬ੍ਰਹ੍ਮਕਾਯਂ, ‘‘ਕਿਂ ਨੁ ਖੋ ਅਹਂ ਪਸਾਦੇਯ੍ਯਂ, ਯਸ੍ਮਿਂ ਮੇ ਪਸਨ੍ਨੇ ਬਹੁਲਾਭਸਕ੍ਕਾਰੋ ਉਪ੍ਪਜ੍ਜੇਯ੍ਯਾ’’ਤਿ ਪਠਮਂ ਉਪ੍ਪਨ੍ਨਪਰਿਵਿਤਕ੍ਕਸ੍ਸ ਮਨ੍ਦਪਰਿਯੁਟ੍ਠਾਨਤਾਯ ਦੇਵਦਤ੍ਤਸ੍ਸ ਤਸ੍ਮਿਂ ਖਣੇ ਝਾਨਪਰਿਹਾਨਿ ਨਾਹੋਸਿ, ਪਚ੍ਛਾ ਏਵ ਅਹੋਸੀਤਿ ਦਟ੍ਠਬ੍ਬਂ. ਤੇਨਾਹ ‘‘ਸਹ ਚਿਤ੍ਤੁਪ੍ਪਾਦਾ’’ਤਿਆਦਿ. ਦ੍ਵੇ ਵਾ ਤੀਣਿ ਵਾ ਮਾਗਧਕਾਨਿ ਗਾਮਖੇਤ੍ਤਾਨੀਤਿ ਏਤ੍ਥ ਮਗਧਰਟ੍ਠੇ ਖੁਦ੍ਦਕਂ ਗਾਮਖੇਤ੍ਤਂ ਗਾਵੁਤਮਤ੍ਤਂ, ਮਜ੍ਝਿਮਂ ਪਨ ਦਿਯਡ੍ਢਗਾਵੁਤਮਤ੍ਤਂ, ਮਹਨ੍ਤਂ ਅਨੇਕਯੋਜਨਮ੍ਪਿ ਹੋਤਿ. ਤੇਸੁ ਮਜ੍ਝਿਮੇਨ ਗਾਮਖੇਤ੍ਤੇਨ ਦ੍ਵੇ ਵਾ ਖੁਦ੍ਦਕੇਨ ਤੀਣਿ ਵਾ ਗਾਮਖੇਤ੍ਤਾਨਿ, ਤਸ੍ਸ ਸਰੀਰਂ ਤਿਗਾਵੁਤਪ੍ਪਮਾਣੋ ਅਤ੍ਤਭਾਵੋਤਿ ਵੁਤ੍ਤਂ ਹੋਤਿ.

੩੩੪. ਸਤ੍ਥਾਰੋਤਿ ਗਣਸਤ੍ਥਾਰੋ. ਨਾਸ੍ਸਸ੍ਸਾਤਿ ਨ ਏਤਸ੍ਸ ਭਵੇਯ੍ਯ. ਤਨ੍ਤਿ ਸਤ੍ਥਾਰਂ. ਤੇਨਾਤਿ ਅਮਨਾਪੇਨ. ਸਮ੍ਮਨ੍ਨਤੀਤਿ ਚੀਵਰਾਦਿਨਾ ਅਮ੍ਹਾਕਂ ਸਮ੍ਮਾਨਂ ਕਰੋਤਿ, ਪਰੇਹਿ ਵਾ ਅਯਂ ਸਤ੍ਥਾ ਸਮ੍ਮਾਨੀਯਤੀਤਿ ਅਤ੍ਥੋ.

੩੩੫. ਨਾਸਾਯ ¶ ਪਿਤ੍ਤਂ ਭਿਨ੍ਦੇਯ੍ਯੁਨ੍ਤਿ ਅਚ੍ਛਪਿਤ੍ਤਂ ਵਾ ਮਚ੍ਛਪਿਤ੍ਤਂ ਵਾ ਨਾਸਾਪੁਟੇ ਪਕ੍ਖਿਪੇਯ੍ਯੁਂ. ਅਸ੍ਸਤਰੀਤਿ ਵਲ਼ਵਾਯ ਕੁਚ੍ਛਿਸ੍ਮਿਂ ਗਦ੍ਰਭਸ੍ਸ ਜਾਤਾ. ਤਸ੍ਸਾ ਹਿ ਗਹਿਤਗਬ੍ਭਾਯ ਵਿਜਾਯਿਤੁਮਸਕ੍ਕੋਨ੍ਤਿਯਾ ਉਦਰਂ ਫਾਲੇਤ੍ਵਾ ਪੋਤਕਂ ਨੀਹਰਨ੍ਤਿ. ਤੇਨਾਹ ‘‘ਅਤ੍ਤਵਧਾਯ ਗਬ੍ਭਂ ਗਣ੍ਹਾਤੀ’’ਤਿ.

੩੩੯. ਪੋਤ੍ਥਨਿਕਨ੍ਤਿ ਛੁਰਿਕਂ, ‘‘ਖਰ’’ਨ੍ਤਿਪਿ ਵੁਚ੍ਚਤਿ.

੩੪੨. ਮਾ ¶ ਕੁਞ੍ਜਰ ਨਾਗਮਾਸਦੋਤਿ ਹੇ ਕੁਞ੍ਜਰ ਬੁਦ੍ਧਨਾਗਂ ਵਧਕਚਿਤ੍ਤੇਨ ਮਾ ਉਪਗਚ੍ਛ. ਦੁਕ੍ਖਨ੍ਤਿ ਦੁਕ੍ਖਕਾਰਣਤ੍ਤਾ ਦੁਕ੍ਖਂ. ਇਤੋਤਿ ਇਤੋ ਜਾਤਿਤੋ. ਯਤੋਤਿ ਯਸ੍ਮਾ, ਯਨ੍ਤਸ੍ਸ ਵਾ, ਗਚ੍ਛਨ੍ਤਸ੍ਸਾਤਿ ਅਤ੍ਥੋ. ਮਾ ਚ ਮਦੋਤਿ ਮਦੋ ਤਯਾ ਨ ਕਾਤਬ੍ਬੋਤਿ ਅਤ੍ਥੋ.

੩੪੩. ਤਿਕਭੋਜਨਨ੍ਤਿ ਤੀਹਿ ਭੁਞ੍ਜਿਤਬ੍ਬਂ ਭੋਜਨਂ, ਤਤੋ ਅਧਿਕੇਹਿ ਏਕਤੋ ਪਟਿਗ੍ਗਹੇਤ੍ਵਾ ਭੁਞ੍ਜਿਤੁਂ ਨ ਵਟ੍ਟਨਕਂ ਗਣਭੋਜਨਪਟਿਪਕ੍ਖਂ ਭੋਜਨਨ੍ਤਿ ਅਤ੍ਥੋ. ਕੋਕਾਲਿਕੋਤਿਆਦੀਨਿ ਦੇਵਦਤ੍ਤਪਰਿਸਾਯ ਗਣਪਾਮੋਕ੍ਖਾਨਂ ਨਾਮਾਨਿ. ਕਪ੍ਪਨ੍ਤਿ ਮਹਾਨਿਰਯੇ ਆਯੁਕਪ੍ਪਂ, ਤਂ ਅਨ੍ਤਰਕਪ੍ਪਨ੍ਤਿ ਕੇਚਿ. ਕੇਚਿ ਪਨ ‘‘ਅਸਙ੍ਖ੍ਯੇਯ੍ਯਕਪ੍ਪ’’ਨ੍ਤਿ.

ਛਸਕ੍ਯਪਬ੍ਬਜ੍ਜਾਕਥਾਦਿਵਣ੍ਣਨਾ ਨਿਟ੍ਠਿਤਾ.

੩੪੫. ਪਰਸ੍ਸ ਚਿਤ੍ਤਂ ਞਤ੍ਵਾ ਕਥਨਂ ਆਦੇਸਨਾਪਾਟਿਹਾਰਿਯਂ. ਕੇਵਲਂ ਧਮ੍ਮਦੇਸਨਾ ਅਨੁਸਾਸਨੀਪਾਟਿਹਾਰਿਯਂ. ਤਦੁਭਯਮ੍ਪਿ ਧਮ੍ਮੀ ਕਥਾ ਨਾਮ. ਤਾਯ ਥੇਰੋ ਓਵਦਿ. ਇਦ੍ਧਿਵਿਧਂ ਇਦ੍ਧਿਪਾਟਿਹਾਰਿਯਂ ਨਾਮ. ਤੇਨ ਸਹਿਤਾ ਅਨੁਸਾਸਨੀ ਏਵ ਧਮ੍ਮੀ ਕਥਾ. ਤਾਯ ਥੇਰੋ ਓਵਦਿ.

‘‘ਥੁਲ੍ਲਚ੍ਚਯਂ ਦੇਸਾਪੇਹੀ’’ਤਿ ਇਦਂ ਭੇਦਪੁਰੇਕ੍ਖਾਰਸ੍ਸ ਉਪੋਸਥਾਦਿਕਰਣੇ ਥੁਲ੍ਲਚ੍ਚਯਸ੍ਸ ਉਪੋਸਥਕ੍ਖਨ੍ਧਕਾਦੀਸੁ ਪਠਮਮੇਵ ਪਞ੍ਞਤ੍ਤਤ੍ਤਾ ਵੁਤ੍ਤਂ, ਇਤਰਥਾ ਏਤੇਸਂ ਆਦਿਕਮ੍ਮਿਕਤ੍ਤਾ ਅਨਾਪਤ੍ਤਿਯੇਵ ਸਿਯਾ.

੩੪੬. ਸਰਸੀਤਿ ਸਰੋ. ਮਹਿਂ ਵਿਕ੍ਰੁਬ੍ਬਤੋਤਿ ਮਹਿਂ ਦਨ੍ਤੇਹਿ ਵਿਲਿਖਨ੍ਤਸ੍ਸ. ਇਦਞ੍ਚ ਹਤ੍ਥੀਨਂ ਸਭਾਵਦਸ੍ਸਨਂ. ਨਦੀਸੂਤਿ ਸਰੇਸੁ. ਭਿਸਂ ਘਸਮਾਨਸ੍ਸਾਤਿ ਯੋਜਨਾ. ਜਗ੍ਗਤੋਤਿ ਯੂਥਂ ਪਾਲੇਨ੍ਤਸ੍ਸ.

੩੪੭. ਦੂਤੇਯ੍ਯਂ ¶ ਗਨ੍ਤੁਨ੍ਤਿ ਦੂਤਕਮ੍ਮਂ ਪਤ੍ਤੁਂ, ਦੂਤਕਮ੍ਮਂ ਕਾਤੁਨ੍ਤਿ ਅਤ੍ਥੋ. ਸਹਿਤਾਸਹਿਤਸ੍ਸਾਤਿ ਯੁਤ੍ਤਾਯੁਤ੍ਤਸ੍ਸ, ਯਂ ਵਤ੍ਤੁਂ, ਕਾਤੁਞ੍ਚ ਯੁਤ੍ਤਂ, ਤਤ੍ਥ ਕੁਸਲੋ. ਅਥ ਵਾ ਅਧਿਪ੍ਪੇਤਾਨਾਧਿਪ੍ਪੇਤਸ੍ਸ ਵਚਨਸ੍ਸ ਕੁਸਲੋ, ਬ੍ਯਞ੍ਜਨਮਤ੍ਤੇ ਨ ਤਿਟ੍ਠਤਿ, ਅਧਿਪ੍ਪੇਤਤ੍ਥਮੇਵ ਆਰੋਚੇਤੀਤਿ ਅਤ੍ਥੋ.

੩੫੦. ਗਾਥਾਸੁ ¶ ਜਾਤੂਤਿ ਏਕਂਸੇਨ. ਮਾ ਉਦਪਜ੍ਜਥ ਮਾ ਹੋਤੂਤਿ ਅਤ੍ਥੋ. ਪਾਪਿਚ੍ਛਾਨਂ ਯਥਾਗਤੀਤਿ ਪਾਪਿਚ੍ਛਾਨਂ ਪੁਗ੍ਗਲਾਨਂ ਯਾਦਿਸੀ ਗਤਿ ਅਭਿਸਮ੍ਪਰਾਯੋ. ਤਂ ਅਤ੍ਥਜਾਤਂ. ਇਮਿਨਾਪਿ ਕਾਰਣੇਨ ਜਾਨਾਥਾਤਿ ਦੇਵਦਤ੍ਤਸ੍ਸ ‘‘ਪਣ੍ਡਿਤੋ’’ਤਿਆਦਿਨਾ ਉਪਰਿ ਵਕ੍ਖਮਾਨਾਕਾਰਂ ਦਸ੍ਸੇਤਿ.

ਪਮਾਦਂ ਅਨੁਚਿਣ੍ਣੋਤਿ ਪਮਾਦਂ ਆਪਨ੍ਨੋ. ਆਸੀਸਾਯਨ੍ਤਿ ਅਵਸ੍ਸਂਭਾਵੀਅਤ੍ਥਸਿਦ੍ਧਿਯਂ. ਸਾ ਹਿ ਇਧ ਆਸੀਸਾਤਿ ਅਧਿਪ੍ਪੇਤਾ, ਨ ਪਤ੍ਥਨਾ. ਈਦਿਸੇ ਅਨਾਗਤਤ੍ਥੇ ਅਤੀਤਵਚਨਂ ਸਦ੍ਦਵਿਦੂ ਇਚ੍ਛਨ੍ਤਿ.

ਦੁਬ੍ਭੇਤਿ ਦੁਬ੍ਭੇਯ੍ਯ. ਵਿਸਕੁਮ੍ਭੇਨਾਤਿ ਏਕੇਨ ਵਿਸਪੁਣ੍ਣਕੁਮ੍ਭੇਨ. ਸੋਤਿ ਸੋ ਪੁਗ੍ਗਲੋ. ਨ ਪਦੂਸੇਯ੍ਯ ਵਿਸਮਿਸ੍ਸਂ ਕਾਤੁਂ ਨ ਸਕ੍ਕੋਤੀਤਿ ਅਤ੍ਥੋ. ਭਯਾਨਕੋਤਿ ਵਿਪੁਲਗਮ੍ਭੀਰਭਾਵੇਨ ਭਯਾਨਕੋ. ਤੇਨਾਪਿ ਦੂਸੇਤੁਂ ਨ ਸਕ੍ਕੁਣੇਯ੍ਯਤਂ ਦਸ੍ਸੇਤਿ. ਵਾਦੇਨਾਤਿ ਦੋਸਕਥਨੇਨ. ਉਪਹਿਂਸਤੀਤਿ ਬਾਧਤਿ.

੩੫੧. ਨ ਪਨ ਏਤ੍ਤਾਵਤਾ ਸਙ੍ਘੋ ਭਿਨ੍ਨੋ ਹੋਤੀਤਿ ਸਲਾਕਗ੍ਗਾਹਾਪਨਮਤ੍ਤੇਨ ਸਙ੍ਘਭੇਦਾਨਿਬ੍ਬਤ੍ਤਿਤੋ ਵੁਤ੍ਤਂ. ਉਪੋਸਥਾਦਿਸਙ੍ਘਕਮ੍ਮੇ ਕਤੇ ਏਵ ਹਿ ਸਙ੍ਘੋ ਭਿਨ੍ਨੋ ਹੋਤਿ. ਤਤ੍ਥ ਚ ਉਪੋਸਥਪਵਾਰਣਾਸੁ ਞਤ੍ਤਿਨਿਟ੍ਠਾਨੇਨ, ਸੇਸਕਮ੍ਮੇਸੁ ਅਪਲੋਕਨਾਦਿਕਮ੍ਮਪਰਿਯੋਸਾਨੇਨ ਸਙ੍ਘਭੇਦੋ ਸਮਤ੍ਥੋਤਿ ਦਟ੍ਠਬ੍ਬੋ.

‘‘ਅਭਬ੍ਬਤਾ ਨ ਵੁਤ੍ਤਾ’’ਤਿ ਇਦਂ ‘‘ਭਿਕ੍ਖਵੇ, ਦੇਵਦਤ੍ਤੇਨ ਪਠਮਂ ਆਨਨ੍ਤਰਿਯਕਮ੍ਮਂ ਉਪਚਿਤ’’ਨ੍ਤਿਆਦਿਨਾ ਆਨਨ੍ਤਰਿਯਤ੍ਤਂ ਵਦਤਾ ਭਗਵਤਾ ਤਸ੍ਸ ਅਭਬ੍ਬਤਾਸਙ੍ਖਾਤਾ ਪਾਰਾਜਿਕਤਾ ਨ ਪਞ੍ਞਤ੍ਤਾ. ਏਤੇਨ ਆਪਤ੍ਤਿ ਵਿਯ ਅਭਬ੍ਬਤਾਪਿ ਪਞ੍ਞਤ੍ਤਿਅਨਨ੍ਤਰਮੇਵ ਹੋਤਿ, ਨ ਤਤੋ ਪੁਰੇਤਿ ਦਸ੍ਸੇਤਿ. ਇਧ ਪਨ ਆਦਿਕਮ੍ਮਿਕਸ੍ਸਪਿ ਅਨਾਪਤ੍ਤਿਯਾ ਅਵੁਤ੍ਤਤ੍ਤਾ ਦੇਵਦਤ੍ਤਾਦਯੋਪਿ ਨ ਮੁਤ੍ਤਾਤਿ ਦਟ੍ਠਬ੍ਬਂ.

ਤਯੋ ਸਤਿਪਟ੍ਠਾਨਾਤਿਆਦੀਸੁ ਤਯੋ ਏਵ ਸਤਿਪਟ੍ਠਾਨਾ, ਨ ਤਤੋ ਪਰਨ੍ਤਿ ਏਕਸ੍ਸ ਸਤਿਪਟ੍ਠਾਨਸ੍ਸ ¶ ਪਟਿਕ੍ਖੇਪੋਵ ਇਧ ਅਧਮ੍ਮੋ, ਨ ਪਨ ਤਿਣ੍ਣਂ ਸਤਿਪਟ੍ਠਾਨਤ੍ਤਵਿਧਾਨਂ ¶ ਤਸ੍ਸ ਧਮ੍ਮਤ੍ਤਾ. ਏਵਂ ਸੇਸੇਸੁਪਿ ਹਾਪਨਕੋਟ੍ਠਾਸੇਸੁ. ਵਡ੍ਢਨੇਸੁ ਪਨ ਛ ਇਨ੍ਦ੍ਰਿਯਾਨੀਤਿ ਅਨਿਨ੍ਦ੍ਰਿਯਸ੍ਸਪਿ ਏਕਸ੍ਸ ਇਨ੍ਦ੍ਰਿਯਤ੍ਤਵਿਧਾਨਮੇਵ ਅਧਮ੍ਮੋ. ਏਵਂ ਸੇਸੇਸੁਪਿ. ਨ ਕੇਵਲਞ੍ਚ ਏਤੇਵ, ‘‘ਚਤ੍ਤਾਰੋ ਖਨ੍ਧਾ, ਤੇਰਸਾਯਤਨਾਨੀ’’ਤਿਆਦਿਨਾ ਯਤ੍ਥ ਕਤ੍ਥਚਿ ਵਿਪਰੀਤਤੋ ਪਕਾਸਨਂ ਸਬ੍ਬਂ ਅਧਮ੍ਮੋ. ਯਾਥਾਵਤੋ ਪਕਾਸਨਞ੍ਚ ਸਬ੍ਬਂ ਧਮ੍ਮੋਤਿ ਦਟ੍ਠਬ੍ਬਂ. ਪਕਾਸਨਨ੍ਤਿ ਚੇਤ੍ਥ ਤਥਾ ਤਥਾ ਕਾਯਵਚੀਪਯੋਗਸਮੁਟ੍ਠਾਪਿਕਾ ਅਰੂਪਕ੍ਖਨ੍ਧਾਵ ਅਧਿਪ੍ਪੇਤਾ, ਏਵਮੇਤ੍ਥ ਦਸਕੁਸਲਕਮ੍ਮਪਥਾਦੀਸੁ ਅਨਵਜ੍ਜਟ੍ਠੇਨ ਸਰੂਪਤੋ ਧਮ੍ਮੇਸੁ, ਅਕੁਸਲਕਮ੍ਮਪਥਾਦੀਸੁ ਸਾਵਜ੍ਜਟ੍ਠੇਨ ਸਰੂਪਤੋ ਅਧਮ੍ਮੇਸੁ ਚ ਤਦਞ੍ਞੇਸੁ ਚ ਅਬ੍ਯਾਕਤੇਸੁ ਯਸ੍ਸ ਕਸ੍ਸਚਿ ਕੋਟ੍ਠਾਸਸ੍ਸ ਭਗਵਤਾ ਪਞ੍ਞਤ੍ਤਕ੍ਕਮੇਨੇਵ ਪਕਾਸਨਂ ‘‘ਧਮ੍ਮੋ’’ਤਿ ਚ ਵਿਪਰੀਤਤੋ ਪਕਾਸਨਂ ‘‘ਅਧਮ੍ਮੋ’’ਤਿ ਚ ਦਸ੍ਸਿਤਨ੍ਤਿ ਦਟ੍ਠਬ੍ਬਂ. ਕਾਮਞ੍ਚੇਤ੍ਥ ਵਿਨਯਾਦਯੋਪਿ ਯਥਾਭੂਤਤੋ, ਅਯਥਾਭੂਤਤੋ ਚ ਪਕਾਸਨਵਸੇਨ ਧਮ੍ਮਾਧਮ੍ਮੇਸੁ ਏਵ ਪਵਿਸਨ੍ਤਿ, ਵਿਨਯਾਦਿਨਾਮੇਨ ਪਨ ਵਿਸੇਸੇਤ੍ਵਾ ਵਿਸੁਂ ਗਹਿਤਤ੍ਤਾ ਤਦਵਸੇਸਮੇਵ ਧਮ੍ਮਾਧਮ੍ਮਕੋਟ੍ਠਾਸੇ ਪਵਿਸਤੀਤਿ ਦਟ੍ਠਬ੍ਬਂ.

ਇਮਂ ਅਧਮ੍ਮਂ ਧਮ੍ਮੋਤਿ ਕਰਿਸ੍ਸਾਮਾਤਿਆਦਿ ਧਮ੍ਮਞ੍ਚ ਅਧਮ੍ਮਞ੍ਚ ਯਾਥਾਵਤੋ ਞਤ੍ਵਾਵ ਪਾਪਿਚ੍ਛਂ ਨਿਸ੍ਸਾਯ ਵਿਪਰੀਤਤੋ ਪਕਾਸੇਨ੍ਤਸ੍ਸੇਵ ਸਙ੍ਘਭੇਦੋ ਹੋਤਿ, ਨ ਪਨ ਤਥਾਸਞ੍ਞਾਯ ਪਕਾਸੇਨ੍ਤਸ੍ਸਾਤਿ ਦਸ੍ਸਨਤ੍ਥਂ ਵੁਤ੍ਤਂ. ਏਸ ਨਯੋ ‘‘ਅਵਿਨਯਂ ਵਿਨਯੋਤਿ ਦੀਪੇਨ੍ਤੀ’’ਤਿਆਦੀਸੁਪਿ. ਤਤ੍ਥ ਨਿਯ੍ਯਾਨਿਕਨ੍ਤਿ ਉਕ੍ਕਟ੍ਠਨ੍ਤਿ ਅਤ੍ਥੋ. ‘‘ਤਥੇਵਾ’’ਤਿ ਇਮਿਨਾ ‘‘ਏਵਂ ਅਮ੍ਹਾਕਂ ਆਚਰਿਯਕੁਲ’’ਨ੍ਤਿਆਦਿਨਾ ਵੁਤ੍ਤਮਤ੍ਥਂ ਆਕਡ੍ਢਤਿ.

ਸਂਵਰੋ ਪਹਾਨਂ ਪਟਿਸਙ੍ਖਾਤਿ ਸਂਵਰਵਿਨਯੋ, ਪਹਾਨਵਿਨਯੋ, ਪਟਿਸਙ੍ਖਾਵਿਨਯੋ ਚ ਵੁਤ੍ਤੋ. ਤੇਨਾਹ ‘‘ਅਯਂ ਵਿਨਯੋ’’ਤਿ. ‘‘ਪਞ੍ਞਤ੍ਤਂ ਅਪਞ੍ਞਤ੍ਤ’’ਨ੍ਤਿ ਦੁਕਂ ‘‘ਭਾਸਿਤਂ ਅਭਾਸਿਤ’’ਨ੍ਤਿ ਦੁਕੇਨ ਅਤ੍ਥਤੋ ਸਮਾਨਮੇਵ, ਤਥਾ ਦੁਟ੍ਠੁਲ੍ਲਦੁਕਂ ਗਰੁਕਦੁਕੇਨ. ਤੇਨੇਵ ਤੇਸਂ ‘‘ਚਤ੍ਤਾਰੋ ਸਤਿਪਟ੍ਠਾਨਾ…ਪੇ… ਇਦਂ ਅਪਞ੍ਞਤ੍ਤਂ ਨਾਮਾ’’ਤਿਆਦਿਨਾ ਸਦਿਸਨਿਦ੍ਦੇਸੋ ਕਤੋ. ਸਾਵਸੇਸਾਪਤ੍ਤਿਨ੍ਤਿ ਅਵਸੇਸਸੀਲੇਹਿ ਸਹਿਤਾਪਤ੍ਤਿਂ. ਨਤ੍ਥਿ ਏਤਿਸ੍ਸਂ ਆਪਨ੍ਨਾਯਂ ਸੀਲਾਵਸੇਸਾਤਿ ਅਨਵਸੇਸਾਪਤ੍ਤਿ.

੩੫੪. ਪਾਲ਼ਿਯਂ ਸਮਗ੍ਗਾਨਞ੍ਚ ਅਨੁਗ੍ਗਹੋਤਿ ਯਥਾ ਸਮਗ੍ਗਾਨਂ ਸਾਮਗ੍ਗੀ ਨ ਭਿਜ੍ਜਤਿ, ਏਵਂ ਅਨੁਗ੍ਗਹਣਂ ਅਨੁਬਲਪ੍ਪਦਾਨਂ.

੩੫੫. ਸਿਯਾ ¶ ਨੁ ਖੋਤਿ ਸਮ੍ਭਵੇਯ੍ਯ ਨੁ ਖੋ. ਤਸ੍ਮਿਂ ਅਧਮ੍ਮਦਿਟ੍ਠੀਤਿ ਅਤ੍ਤਨੋ ‘‘ਅਧਮ੍ਮਂ ਧਮ੍ਮੋ’’ਤਿ ਏਤਸ੍ਮਿਂ ਦੀਪਨੇ ਅਯੁਤ੍ਤਦਿਟ੍ਠਿ. ਭੇਦੇ ਅਧਮ੍ਮਦਿਟ੍ਠੀਤਿ ‘‘ਅਧਮ੍ਮਂ ਧਮ੍ਮੋ’’ਤਿ ਦੀਪੇਤ੍ਵਾ ਅਨੁਸ੍ਸਾਵਨਸਲਾਕਗ੍ਗਾਹਾਪਨਾਦਿਨਾ ਅਤ੍ਤਾਨਂ ਮੁਞ੍ਚਿਤ੍ਵਾ ਚਤੁਵਗ੍ਗਾਦਿਕਂ ਸਙ੍ਘਂ ਏਕਸੀਮਾਯਮੇਵ ਠਿਤਤੋ ¶ ਚਤੁਵਗ੍ਗਾਦਿਸਙ੍ਘਤੋ ਵਿਯੋਜੇਤ੍ਵਾ ਏਕਕਮ੍ਮਾਦਿਨਿਪ੍ਫਾਦਨਵਸੇਨ ਸਙ੍ਘਭੇਦਕਰਣੇ ਅਧਮ੍ਮਦਿਟ੍ਠਿਕੋ ਹੁਤ੍ਵਾਤਿ ਅਤ੍ਥੋ. ਵਿਨਿਧਾਯ ਦਿਟ੍ਠਿਨ੍ਤਿ ਯਾ ਤਸ੍ਮਿਂ ‘‘ਅਧਮ੍ਮਂ ਧਮ੍ਮੋ’’ਤਿ ਦੀਪਨੇ ਅਤ੍ਤਨੋ ਅਧਮ੍ਮਦਿਟ੍ਠਿ ਉਪ੍ਪਜ੍ਜਤਿ, ਤਂ ਵਿਨਿਧਾਯ ਪਟਿਚ੍ਛਾਦੇਤ੍ਵਾ ‘‘ਧਮ੍ਮੋ ਏਵਾਯ’’ਨ੍ਤਿ ਵਿਪਰੀਤਤੋ ਪਕਾਸੇਤ੍ਵਾਤਿ ਅਤ੍ਥੋ. ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

ਭੇਦੇ ਧਮ੍ਮਦਿਟ੍ਠੀਤਿ ਯਥਾਵੁਤ੍ਤਨਯੇਨ ਸਙ੍ਘਭੇਦਨੇ ਦੋਸੋ ਨਤ੍ਥੀਤਿ ਲਦ੍ਧਿਕੋ. ਅਯਂ ਪਨ ‘‘ਅਧਮ੍ਮਂ ਧਮ੍ਮੋ’’ਤਿ ਦੀਪਨੇ ਅਧਮ੍ਮਦਿਟ੍ਠਿਕੋ ਹੁਤ੍ਵਾਪਿ ਤਂ ਦਿਟ੍ਠਿਂ ਵਿਨਿਧਾਯ ਕਰਣੇਨ ਸਙ੍ਘਭੇਦਕੋ ਅਤੇਕਿਚ੍ਛੋ ਜਾਤੋ. ਏਵਂ ਭੇਦੇ ਵੇਮਤਿਕੋਤਿ ਇਮਸ੍ਸ ਪਨ ਭੇਦੇ ਵੇਮਤਿਕਦਿਟ੍ਠਿਯਾ ਵਿਨਿਧਾਨਮ੍ਪਿ ਅਤ੍ਥਿ. ਸੇਸਂ ਸਮਮੇਵ. ਤਸ੍ਮਿਂ ਧਮ੍ਮਦਿਟ੍ਠਿਭੇਦੇ ਅਧਮ੍ਮਦਿਟ੍ਠੀਤਿ ਅਯਂ ਪਨ ਭੇਦੇ ਅਧਮ੍ਮਦਿਟ੍ਠਿਂ ਵਿਨਿਧਾਯ ਕਤਤ੍ਤਾ ਸਙ੍ਘਭੇਦਕੋ ਅਤੇਕਿਚ੍ਛੋ ਜਾਤੋ. ਸੁਕ੍ਕਪਕ੍ਖੇ ਪਨ ਸਬ੍ਬਤ੍ਥ ‘‘ਅਧਮ੍ਮਂ ਧਮ੍ਮੋ’’ਤਿਆਦਿਦੀਪਨੇ ਵਾ ਭੇਦੇ ਵਾ ਧਮ੍ਮਦਿਟ੍ਠਿਤਾਯ ਦਿਟ੍ਠਿਂ ਅਵਿਨਿਧਾਯੇਵ ਕਤਤ੍ਤਾ ਸਙ੍ਘਭੇਦਕੋਪਿ ਸਤੇਕਿਚ੍ਛੋ ਜਾਤੋ. ਤਸ੍ਮਾ ‘‘ਅਧਮ੍ਮਂ ਧਮ੍ਮੋ’’ਤਿਆਦਿਦੀਪਨੇ ਵਾ ਸਙ੍ਘਭੇਦੇ ਵਾ ਉਭੋਸੁਪਿ ਵਾ ਅਧਮ੍ਮਦਿਟ੍ਠਿ ਵਾ ਵੇਮਤਿਕੋ ਵਾ ਹੁਤ੍ਵਾ ਤਂ ਦਿਟ੍ਠਿਂ, ਵਿਮਤਿਞ੍ਚ ਵਿਨਿਧਾਯ ‘‘ਧਮ੍ਮੋ’’ਤਿ ਪਕਾਸੇਤ੍ਵਾ ਵੁਤ੍ਤਨਯੇਨ ਸਙ੍ਘਭੇਦਂ ਕਰੋਨ੍ਤਸ੍ਸੇਵ ਆਨਨ੍ਤਰਿਯਂ ਹੋਤੀਤਿ ਵੇਦਿਤਬ੍ਬਂ.

ਉਪਾਲਿਪਞ੍ਹਾਕਥਾਵਣ੍ਣਨਾ ਨਿਟ੍ਠਿਤਾ.

ਸਙ੍ਘਭੇਦਕਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੩੫੭. ਵਤ੍ਤਕ੍ਖਨ੍ਧਕੇ ¶ ¶ ਪਤ੍ਥਰਿਤਬ੍ਬਨ੍ਤਿ ਆਤਪੇ ਪਤ੍ਥਰਿਤਬ੍ਬਂ. ਪਾਲ਼ਿਯਂ ਅਭਿਵਾਦਾਪੇਤਬ੍ਬੋਤਿ ਵਨ੍ਦਨਤ੍ਥਾਯ ਵਸ੍ਸਂ ਪੁਚ੍ਛਨੇਨ ਨਵਕੋ ਸਯਮੇਵ ਵਨ੍ਦਤੀਤਿ ਵੁਤ੍ਤਂ. ਨਿਲ੍ਲੋਕੇਤਬ੍ਬੋਤਿ ਓਲੋਕੇਤਬ੍ਬੋ.

ਆਗਨ੍ਤੁਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

੩੫੯. ‘‘ਯਥਾਭਾਗ’’ਨ੍ਤਿ ਠਪਿਤਟ੍ਠਾਨਂ ਅਨਤਿਕ੍ਕਮਿਤ੍ਵਾ ਮਞ੍ਚਪੀਠਾਦਿਂ ਪਪ੍ਫੋਟੇਤ੍ਵਾ ਪਤ੍ਥਰਿਤ੍ਵਾ ਉਪਰਿ ਪਚ੍ਚਤ੍ਥਰਣਂ ਦਤ੍ਵਾ ਦਾਨਮ੍ਪਿ ਸੇਨਾਸਨਪਞ੍ਞਾਪਨਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਪਪ੍ਫੋਟੇਤ੍ਵਾ ਹਿ ਪਤ੍ਥਰਿਤੁਂ ਪਨ ਵਟ੍ਟਤਿਯੇਵਾ’’ਤਿ.

ਆਵਾਸਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

੩੬੨. ਪਞ੍ਚਮੇ ਨਿਸਿਨ੍ਨੇਤਿ ਅਨੁਮੋਦਨਤ੍ਥਾਯ ਨਿਸਿਨ੍ਨੇ. ਨ ਮਹਾਥੇਰਸ੍ਸ ਭਾਰੋ ਹੋਤੀਤਿ ਅਨੁਮੋਦਕਂ ਆਗਮੇਤੁਂ ਨ ਭਾਰੋ. ਅਜ੍ਝਿਟ੍ਠੋਵ ਆਗਮੇਤਬ੍ਬੋਤਿ ਅਤ੍ਤਨਾ ਅਜ੍ਝਿਟ੍ਠੇਹਿ ਭਿਕ੍ਖੂਹਿ ਅਨੁਮੋਦਨ੍ਤੇਯੇਵ ਨਿਸੀਦਿਤਬ੍ਬਨ੍ਤਿ ਅਤ੍ਥੋ.

ਅਨੁਮੋਦਨਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

੩੬੪. ਮਨੁਸ੍ਸਾਨਂ ¶ ਪਰਿਵਿਸਨਟ੍ਠਾਨਨ੍ਤਿ ਯਤ੍ਥ ਅਨ੍ਤੋਵਿਹਾਰੇਪਿ ਮਨੁਸ੍ਸਾ ਸਪੁਤ੍ਤਦਾਰਾ ਆਵਸਿਤ੍ਵਾ ਭਿਕ੍ਖੂ ਨੇਤ੍ਵਾ ਭੋਜੇਨ੍ਤਿ. ਆਸਨੇਸੁ ਸਤੀਤਿ ਨਿਸੀਦਨਟ੍ਠਾਨੇਸੁ ¶ ਸਨ੍ਤੇਸੁ. ਇਦਂ, ਭਨ੍ਤੇ, ਆਸਨਂ ਉਚ੍ਚਨ੍ਤਿ ਆਸਨ੍ਨੇ ਸਮਭੂਮਿਭਾਗੇ ਪਞ੍ਞਤ੍ਤਂ ਥੇਰਾਸਨੇਨ ਸਮਕਂ ਆਸਨਂ ਸਨ੍ਧਾਯ ਵੁਤ੍ਤਂ, ਥੇਰਾਸਨਤੋ ਪਨ ਉਚ੍ਚਤਰੇ ਆਪੁਚ੍ਛਿਤ੍ਵਾਪਿ ਨਿਸੀਦਿਤੁਂ ਨ ਵਟ੍ਟਤਿ. ਯਦਿ ਤਂ ਆਸਨ੍ਨਮ੍ਪਿ ਨੀਚਤਰਂ ਹੋਤਿ, ਅਨਾਪੁਚ੍ਛਾਪਿ ਨਿਸੀਦਿਤੁਂ ਵਟ੍ਟਤਿ. ਮਹਾਥੇਰਸ੍ਸੇਵ ਆਪਤ੍ਤੀਤਿ ਆਸਨੇਨ ਪਟਿਬਾਹਨਾਪਤ੍ਤਿਯਾ ਆਪਤ੍ਤਿ. ਅਵਤ੍ਥਰਿਤ੍ਵਾਤਿ ਪਾਰੁਤਸਙ੍ਘਾਟਿਂ ਅਵਤ੍ਥਰਿਤ੍ਵਾ, ਅਨੁਕ੍ਖਿਪਿਤ੍ਵਾਤਿ ਅਤ੍ਥੋ.

ਪਾਲ਼ਿਯਂ ‘‘ਉਭੋਹਿ ਹਤ੍ਥੇਹਿ…ਪੇ… ਓਦਨੋ ਪਟਿਗ੍ਗਹੇਤਬ੍ਬੋ’’ਤਿ ਇਦਂ ਹਤ੍ਥਤਲੇ ਵਾ ਪਚ੍ਛਿਪਿਟ੍ਠਿਆਦਿਦੁਸ੍ਸਣ੍ਠਿਤਾਧਾਰੇ ਵਾ ਪਤ੍ਤਂ ਠਪੇਤ੍ਵਾ ਓਦਨਸ੍ਸ ਗਹਣਕਾਲੇ ਪਤ੍ਤਸ੍ਸ ਅਪਤਨਤ੍ਥਾਯ ਵੁਤ੍ਤਂ, ਸੁਸਜ੍ਜਿਤੇ ਪਨ ਆਧਾਰੇ ਪਤ੍ਤਂ ਠਪੇਤ੍ਵਾ ਏਕੇਨ ਹਤ੍ਥੇਨ ਤਂ ਪਰਾਮਸਿਤ੍ਵਾਪਿ ਓਦਨਂ ਪਟਿਗ੍ਗਹੇਤੁਂ ਵਟ੍ਟਤਿ ਏਵ. ਉਭੋਹਿ ਹਤ੍ਥੇਹਿ…ਪੇ… ਉਦਕਂ ਪਟਿਗ੍ਗਹੇਤਬ੍ਬਨ੍ਤਿ ਏਤ੍ਥਾਪਿ ਏਸੇਵ ਨਯੋ.

ਹਤ੍ਥਧੋਵਨਉਦਕਨ੍ਤਿ ਭੋਜਨਾਵਸਾਨੇ ਉਦਕਂ. ਤੇਨਾਹ ‘‘ਪਾਨੀਯਂ ਪਿਵਿਤ੍ਵਾ ਹਤ੍ਥਾ ਧੋਵਿਤਬ੍ਬਾ’’ਤਿ. ਤੇਨ ਪਰਿਯੋਸਾਨੇ ਧੋਵਨਮੇਵ ਪਟਿਕ੍ਖਿਤ੍ਤਂ, ਭੋਜਨਨ੍ਤਰੇ ਪਨ ਪਾਨੀਯਪਿਵਨਾਦਿਨਾ ਨਯੇਨ ਹਤ੍ਥਂ ਧੋਵਿਤ੍ਵਾ ਪੁਨ ਭੁਞ੍ਜਿਤੁਂ ਵਟ੍ਟਤੀਤਿ ਦਸ੍ਸੇਤਿ. ਪੋਤ੍ਥਕੇਸੁ ਪਨ ‘‘ਪਾਨੀਯਂ ਪਿਵਿਤ੍ਵਾ ਹਤ੍ਥਾ ਨ ਧੋਵਿਤਬ੍ਬਾ’’ਤਿ ਲਿਖਨ੍ਤਿ, ਤਂ ਪੁਰਿਮਵਚਨੇਨ ਨ ਸਮੇਤਿ ਪਰਿਯੋਸਾਨੇ ਉਦਕਸ੍ਸੇਵ ‘‘ਹਤ੍ਥਧੋਵਨਉਦਕ’’ਨ੍ਤਿ ਵੁਤ੍ਤਤ੍ਤਾ. ਸਚੇ ਮਨੁਸ੍ਸਾ ਧੋਵਥ, ਭਨ੍ਤੇਤਿਆਦਿ ਨਿਟ੍ਠਿਤਭਤ੍ਤਂ ਨਿਸਿਨ੍ਨਂ ਥੇਰਂ ਸਨ੍ਧਾਯ ਵੁਤ੍ਤਂ. ਧੁਰੇ ਦ੍ਵਾਰਸਮੀਪੇ.

ਭਤ੍ਤਗ੍ਗਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

੩੬੬. ਪਾਲ਼ਿਯਂ ਠਾਪੇਤਿ ਵਾਤਿ ਤਿਟ੍ਠ ਭਨ੍ਤੇਤਿ ਵਦਨ੍ਤਿ.

੩੬੭. ਅਤ੍ਥਿ, ਭਨ੍ਤੇ, ਨਕ੍ਖਤ੍ਤਪਦਾਨੀਤਿ ਨਕ੍ਖਤ੍ਤਪਦਵਿਸਯਾਨਿ ਞਾਤਾਨਿ ਅਤ੍ਥਿ, ਅਸ੍ਸਯੁਜਾਦਿਨਕ੍ਖਤ੍ਤਂ ਜਾਨਾਥਾਤਿ ਅਧਿਪ੍ਪਾਯੋ. ਤੇਨਾਹ ‘‘ਨ ਜਾਨਾਮ, ਆਵੁਸੋ’’ਤਿ. ਅਤ੍ਥਿ, ਭਨ੍ਤੇ ¶ , ਦਿਸਾਭਾਗਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਕੇਨਜ੍ਜ, ਭਨ੍ਤੇ, ਯੁਤ੍ਤਨ੍ਤਿ ਕੇਨ ਨਕ੍ਖਤ੍ਤੇਨ ਚਨ੍ਦੋ ਯੁਤ੍ਤੋਤਿ ਅਤ੍ਥੋ.

੩੬੯. ਅਙ੍ਗਣੇਤਿ ¶ ਅਬ੍ਭੋਕਾਸੇ. ਏਵਮੇਵ ਪਟਿਪਜ੍ਜਿਤਬ੍ਬਨ੍ਤਿ ਉਦ੍ਦੇਸਦਾਨਾਦਿ ਆਪੁਚ੍ਛਿਤਬ੍ਬਨ੍ਤਿ ਦਸ੍ਸੇਤਿ.

੩੭੪. ਨਿਬਦ੍ਧਗਮਨਤ੍ਥਾਯਾਤਿ ਅਤ੍ਤਨੋਵ ਨਿਰਨ੍ਤਰਗਮਨਤ੍ਥਾਯ. ਊਹਦਿਤਾਤਿ ਏਤ੍ਥ ਹਦ-ਧਾਤੁਸ੍ਸ ਵਚ੍ਚਵਿਸ੍ਸਜ੍ਜਨਤ੍ਥਤਾਯਾਹ ‘‘ਬਹਿ ਵਚ੍ਚਮਕ੍ਖਿਤਾ’’ਤਿ.

ਪਿਣ੍ਡਚਾਰਿਕਵਤ੍ਤਕਥਾਦਿਵਣ੍ਣਨਾ ਨਿਟ੍ਠਿਤਾ.

ਵਤ੍ਤਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

ਪਾਤਿਮੋਕ੍ਖੁਦ੍ਦੇਸਯਾਚਨਕਥਾਵਣ੍ਣਨਾ

੩੮੩. ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ ¶ ¶ ਪਾਲ਼ਿਯਂ ਨਨ੍ਦਿਮੁਖਿਯਾਤਿ ਓਦਾਤਦਿਸਾਮੁਖਤਾਯ ਤੁਟ੍ਠਮੁਖਿਯਾ. ‘‘ਉਦ੍ਧਸ੍ਤਂ ਅਰੁਣ’’ਨ੍ਤਿ ਵਤ੍ਵਾਪਿ ‘‘ਉਦ੍ਦਿਸਤੁ, ਭਨ੍ਤੇ, ਭਗਵਾ’’ਤਿ ਪਾਤਿਮੋਕ੍ਖੁਦ੍ਦੇਸਯਾਚਨਂ ਅਨੁਪੋਸਥੇ ਉਪੋਸਥਕਰਣਪਟਿਕ੍ਖੇਪਸ੍ਸ ਸਿਕ੍ਖਾਪਦਸ੍ਸ ਅਪਞ੍ਞਤ੍ਤਤ੍ਤਾ ਥੇਰੇਨ ਕਤਨ੍ਤਿ ਦਟ੍ਠਬ੍ਬਂ. ਕਸ੍ਮਾ ਪਨ ਭਗਵਾ ਏਵਂ ਤੁਣ੍ਹੀਭੂਤੋਵ ਤਿਯਾਮਰਤ੍ਤਿਂ ਵੀਤਿਨਾਮੇਸੀਤਿ? ਅਪਰਿਸੁਦ੍ਧਾਯ ਪਰਿਸਾਯ ਉਪੋਸਥਾਦਿਸਂਵਾਸਕਰਣਸ੍ਸ ਸਾਵਜ੍ਜਤਂ ਭਿਕ੍ਖੁਸਙ੍ਘੇ ਪਾਕਟਂ ਕਾਤੁਂ, ਤਞ੍ਚ ਆਯਤਿਂ ਭਿਕ੍ਖੂਨਂ ਤਥਾਪਟਿਪਜ੍ਜਨਤ੍ਥਂ ਸਿਕ੍ਖਾਪਦਂ ਞਾਪੇਤੁਂ. ਕੇਚਿ ਪਨੇਤ੍ਥ ‘‘ਅਪਰਿਸੁਦ੍ਧਮ੍ਪਿ ਪੁਗ੍ਗਲਂ ਤਸ੍ਸ ਸਮ੍ਮੁਖਾ ‘ਅਪਰਿਸੁਦ੍ਧੋ’ਤਿ ਵਤ੍ਤੁਂ ਮਹਾਕਰੁਣਾਯ ਅਵਿਸਹਨ੍ਤੋ ਭਗਵਾ ਤਥਾ ਨਿਸੀਦੀ’’ਤਿ ਕਾਰਣਂ ਵਦਨ੍ਤਿ. ਤਂ ਅਕਾਰਣਂ ਪਚ੍ਛਾਪਿ ਅਵਤ੍ਤਬ੍ਬਤੋ, ਮਹਾਮੋਗ੍ਗਲ੍ਲਾਨਤ੍ਥੇਰੇਨਾਪਿ ਤਂ ਬਾਹਾਯਂ ਗਹੇਤ੍ਵਾ ਬਹਿ ਨੀਹਰਣਸ੍ਸ ਅਕਤ੍ਤਬ੍ਬਤਾਪਸਙ੍ਗਤੋ. ਤਸ੍ਮਾ ਯਥਾਵੁਤ੍ਤਮੇਵੇਤ੍ਥ ਕਾਰਣਨ੍ਤਿ. ਤੇਨੇਵ ‘‘ਅਟ੍ਠਾਨਮੇਤਂ, ਭਿਕ੍ਖਵੇ, ਅਨਵਕਾਸੋ, ਯਂ ਤਥਾਗਤੋ ਅਪਰਿਸੁਦ੍ਧਾਯ ਪਰਿਸਾਯ ਉਪੋਸਥਂ ਕਰੇਯ੍ਯ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾ’’ਤਿ (ਅ. ਨਿ. ੮.੨੦; ਚੂਲ਼ਵ. ੩੮੬; ਉਦਾ. ੪੫) ਵਤ੍ਵਾ ‘‘ਨ ਚ, ਭਿਕ੍ਖਵੇ, ਸਾਪਤ੍ਤਿਕੇਨ ਪਾਤਿਮੋਕ੍ਖਂ ਸੋਤਬ੍ਬ’’ਨ੍ਤਿਆਦਿਨਾ (ਚੂਲ਼ਵ. ੩੮੬) ਸਾਪਤ੍ਤਿਕਪਰਿਸਾਯ ਕਤ੍ਤਬ੍ਬਵਿਧਿ ਦਸ੍ਸਿਤੋ.

ਸਙ੍ਕਸ੍ਸਰਸਮਾਚਾਰਨ੍ਤਿ ਕਿਞ੍ਚਿਦੇਵ ਅਸਾਰੁਪ੍ਪਂ ਦਿਸ੍ਵਾ ‘‘ਇਦਂ ਇਮਿਨਾ ਕਤਂ ਭਵਿਸ੍ਸਤੀ’’ਤਿ ਪਰੇਹਿ ਸਙ੍ਕਾਯ ਸਰਿਤਬ੍ਬਸਮਾਚਾਰਂ, ਅਤ੍ਤਨਾ ਵਾ ‘‘ਮਮ ਅਨਾਚਾਰਂ ਏਤੇ ਜਾਨਨ੍ਤੀ’’ਤਿ ਸਙ੍ਕਾਯ ਸਰਿਤਬ੍ਬਸਮਾਚਾਰਂ. ਸਮਣਵੇਸਧਾਰਣੇਨ, ਸਙ੍ਘਿਕਪਚ੍ਚਯਭਾਗਗਹਣਾਦਿਨਾ ਚ ਜੀਵਿਕਂ ਕਪ੍ਪੇਨ੍ਤੋ ‘‘ਅਹਂ ਸਮਣੋ’’ਤਿ ਪਟਿਞ੍ਞਂ ਅਦੇਨ੍ਤੋਪਿ ਅਤ੍ਥਤੋ ਦੇਨ੍ਤੋ ਵਿਯ ਹੋਤੀਤਿ ‘‘ਸਮਣਪਟਿਞ੍ਞਂ ਬ੍ਰਹ੍ਮਚਾਰਿਪਟਿਞ੍ਞ’’ਨ੍ਤਿ ਵੁਤ੍ਤਂ. ਅਵਸ੍ਸੁਤਨ੍ਤਿ ਕਿਲੇਸਾਵਸ੍ਸਨੇਨ ਤਿਨ੍ਤਂ. ਸਞ੍ਜਾਤਦੁਸ੍ਸਿਲ੍ਯਕਚਵਰਤ੍ਤਾ ਕਸਮ੍ਬੁਜਾਤਂ ¶ , ਅਸਾਰਤਾਯ ਵਾ ਕਸਮ੍ਬੁ ਵਿਯ ਜਾਤਂ. ਬਹਿਦ੍ਵਾਰਕੋਟ੍ਠਕਾ ਨਿਕ੍ਖਾਮੇਤ੍ਵਾਤਿ ਦ੍ਵਾਰਸਾਲਤੋ ਬਹਿ ਨਿਕ੍ਖਮਾਪੇਤ੍ਵਾ.

੩੮੪. ਮਹਾਸਮੁਦ੍ਦੇ ¶ ਅਭਿਰਮਨ੍ਤੀਤਿ ਬਹੁਸੋ ਦਸ੍ਸਨਪਵਿਸਨਾਦਿਨਾ ਮਹਾਸਮੁਦ੍ਦੇ ਅਭਿਰਤਿਂ ਵਿਨ੍ਦਨ੍ਤਿ. ਨ ਆਯਤਕੇਨੇਵ ਪਪਾਤੋਤਿ ਛਿਨ੍ਨਤਟਮਹਾਸੋਬ੍ਭੋ ਵਿਯ ਨ ਆਦਿਤੋਵ ਨਿਨ੍ਨੋਤਿ ਅਤ੍ਥੋ. ਠਿਤਧਮ੍ਮੋਤਿ ਅਵਟ੍ਠਿਤਸਭਾਵੋ. ਪੂਰਤ੍ਤਨ੍ਤਿ ਪੁਣ੍ਣਤ੍ਤਂ. ਨਾਗਾਤਿ ਸਪ੍ਪਜਾਤਿਕਾ.

ਪਾਤਿਮੋਕ੍ਖੁਦ੍ਦੇਸਯਾਚਨਕਥਾਵਣ੍ਣਨਾ ਨਿਟ੍ਠਿਤਾ.

੩੮੬. ਉਦਾਹਰਿਤਬ੍ਬਨ੍ਤਿ ਪਾਲ਼ਿਯਾ ਅਵਤ੍ਵਾ ਤਮਤ੍ਥਂ ਯਾਯ ਕਾਯਚਿ ਭਾਸਾਯ ਉਦਾਹਟਮ੍ਪਿ ਉਦਾਹਟਮੇਵਾਤਿ ਦਟ੍ਠਬ੍ਬਂ.

ਪੁਰੇ ਵਾ ਪਚ੍ਛਾ ਵਾਤਿ ਞਤ੍ਤਿਆਰਮ੍ਭਤੋ ਪੁਬ੍ਬੇ ਵਾ ਞਤ੍ਤਿਨਿਟ੍ਠਾਨਤੋ ਪਚ੍ਛਾ ਵਾ.

੩੮੭. ਕਤਞ੍ਚ ਅਕਤਞ੍ਚ ਉਭਯਂ ਗਹੇਤ੍ਵਾਤਿ ਯਸ੍ਸ ਕਤਾਪਿ ਅਤ੍ਥਿ ਅਕਤਾਪਿ. ਤਸ੍ਸ ਤਦੁਭਯਂ ਗਹੇਤ੍ਵਾ. ਧਮ੍ਮਿਕਂ ਸਾਮਗ੍ਗਿਨ੍ਤਿ ਧਮ੍ਮਿਕਂ ਸਮਗ੍ਗਕਮ੍ਮਂ. ਪਚ੍ਚਾਦਿਯਤੀਤਿ ਉਕ੍ਕੋਟਨਾਧਿਪ੍ਪਾਯੇਨ ਪੁਨ ਕਾਤੁਂ ਆਦਿਯਤਿ.

੩੮੮. ਆਕਾਰਾਦਿਸਞ੍ਞਾ ਵੇਦਿਤਬ੍ਬਾਤਿ ਆਕਾਰਲਿਙ੍ਗਨਿਮਿਤ੍ਤਨਾਮਾਨਿ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ.

ਪਾਤਿਮੋਕ੍ਖਸਵਨਾਰਹਕਥਾਦਿਵਣ੍ਣਨਾ ਨਿਟ੍ਠਿਤਾ.

੩੯੮. ਪੁਨ ਚੋਦੇਤੁਂ ਅਤ੍ਤਨਾ ਆਦਾਤਬ੍ਬਂ ਗਹੇਤਬ੍ਬਂ ਅਧਿਕਰਣਂ ਅਤ੍ਤਾਦਾਨਨ੍ਤਿ ਆਹ ‘‘ਸਾਸਨਂ ਸੋਧੇਤੁਕਾਮੋ’’ਤਿਆਦਿ. ਵਸ੍ਸਾਰਤ੍ਤੋਤਿ ਵਸ੍ਸਕਾਲੋ. ਸੋਪਿ ਹਿ ਦੁਬ੍ਭਿਕ੍ਖਾਦਿਕਾਲੋ ਵਿਯ ਅਧਿਕਰਣਵੂਪਸਮਤ੍ਥਂ ਲਜ੍ਜਿਪਰਿਸਾਯ ਦੂਰਤੋ ਆਨਯਨਸ੍ਸ, ਆਗਤਾਨਞ੍ਚ ਪਿਣ੍ਡਾਯ ਚਰਣਾਦਿਸਮਾਚਾਰਸ੍ਸ ਦੁਕ੍ਕਰਤ੍ਤਾ ਅਕਾਲੋ ਏਵ.

ਸਮਨੁਸ੍ਸਰਣਕਰਣਨ੍ਤਿ ¶ ਅਨੁਸ੍ਸਰਿਤਾਨੁਸ੍ਸਰਿਤਕ੍ਖਣੇ ਪੀਤਿਪਾਮੋਜ੍ਜਜਨਨਤੋ ਅਨੁਸ੍ਸਰਣੁਪ੍ਪਾਦਕਂ. ਵਿਗਤੂਪਕ੍ਕਿਲੇਸ…ਪੇ… ਸਂਵਤ੍ਤਤੀਤਿ ਏਤ੍ਥ ਯਥਾ ¶ ਅਬ੍ਭਹਿਮਾਦਿਉਪਕ੍ਕਿਲੇਸਵਿਰਹਿਤਾਨਂ ਚਨ੍ਦਿਮਸੂਰਿਯਾਨਂ ਸਸ੍ਸਿਰੀਕਤਾ ਹੋਤਿ, ਏਵਮਸ੍ਸਾਪਿ ਚੋਦਕਸ੍ਸ ਪਾਪਪੁਗ੍ਗਲੂਪਕ੍ਕਿਲੇਸਵਿਗਮੇਨ ਸਸ੍ਸਿਰੀਕਤਾ ਹੋਤੀਤਿ ਅਧਿਪ੍ਪਾਯੋ.

੩੯੯. ਅਧਿਗਤਂ ਮੇਤ੍ਤਚਿਤ੍ਤਨ੍ਤਿ ਅਪ੍ਪਨਾਪ੍ਪਤ੍ਤਂ ਮੇਤ੍ਤਝਾਨਂ.

੪੦੦-੧. ‘‘ਦੋਸਨ੍ਤਰੋ’’ਤਿ ਏਤ੍ਥ ਅਨ੍ਤਰ-ਸਦ੍ਦੋ ਚਿਤ੍ਤਪਰਿਯਾਯੋਤਿ ਆਹ ‘‘ਨ ਦੁਟ੍ਠਚਿਤ੍ਤੋ ਹੁਤ੍ਵਾ’’ਤਿ.

ਕਾਰੁਞ੍ਞਂ ਨਾਮ ਕਰੁਣਾ ਏਵਾਤਿ ਆਹ ‘‘ਕਾਰੁਞ੍ਞਤਾਤਿ ਕਰੁਣਾਭਾਵੋ’’ਤਿ. ਕਰੁਣਨ੍ਤਿ ਅਪ੍ਪਨਾਪ੍ਪਤ੍ਤਂ ਵਦਤਿ. ਤਥਾ ਮੇਤ੍ਤਨ੍ਤਿ.

ਅਤ੍ਤਾਦਾਨਅਙ੍ਗਕਥਾਦਿਵਣ੍ਣਨਾ ਨਿਟ੍ਠਿਤਾ.

ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

ਮਹਾਪਜਾਪਤਿਗੋਤਮੀਵਤ੍ਥੁਕਥਾਵਣ੍ਣਨਾ

੪੦੩. ਭਿਕ੍ਖੁਨਿਕ੍ਖਨ੍ਧਕੇ ¶ ¶ ‘‘ਮਾਤੁਗਾਮਸ੍ਸ ਪਬ੍ਬਜਿਤਤ੍ਤਾ’’ਤਿ ਇਦਂ ਪਞ੍ਚਵਸ੍ਸਸਤਤੋ ਉਦ੍ਧਂ ਸਦ੍ਧਮ੍ਮਸ੍ਸ ਅਪ੍ਪਵਤ੍ਤਨਕਾਰਣਦਸ੍ਸਨਂ. ਸੁਕ੍ਖਵਿਪਸ੍ਸਕਖੀਣਾਸਵਵਸੇਨ ਵਸ੍ਸਸਹਸ੍ਸਨ੍ਤਿਆਦਿ ਖਨ੍ਧਕਭਾਣਕਾਨਂ ਮਤਂ ਗਹੇਤ੍ਵਾ ਵੁਤ੍ਤਂ. ਦੀਘਨਿਕਾਯਟ੍ਠਕਥਾਯਂ ਪਨ ‘‘ਪਟਿਸਮ੍ਭਿਦਾਪ੍ਪਤ੍ਤੇਹਿ ਵਸ੍ਸਸਹਸ੍ਸਂ ਅਟ੍ਠਾਸਿ, ਛਲ਼ਭਿਞ੍ਞੇਹਿ ਵਸ੍ਸਸਹਸ੍ਸਂ, ਤੇਵਿਜ੍ਜੇਹਿ ਵਸ੍ਸਸਹਸ੍ਸਂ, ਸੁਕ੍ਖਵਿਪਸ੍ਸਕੇਹਿ ਵਸ੍ਸਸਹਸ੍ਸਂ, ਪਾਤਿਮੋਕ੍ਖੇਹਿ ਵਸ੍ਸਸਹਸ੍ਸਂ ਅਟ੍ਠਾਸੀ’’ਤਿ (ਦੀ. ਨਿ. ਅਟ੍ਠ. ੩.੧੬੧) ਵੁਤ੍ਤਂ. ਅਙ੍ਗੁਤ੍ਤਰ (ਅ. ਨਿ. ਅਟ੍ਠ. ੩.੮.੫੧) -ਸਂਯੁਤ੍ਤਟ੍ਠਕਥਾਸੁਪਿ (ਸਂ. ਨਿ. ਅਟ੍ਠ. ੨.੨.੧੫੬) ਅਞ੍ਞਥਾਵ ਵੁਤ੍ਤਂ, ਤਂ ਸਬ੍ਬਂ ਅਞ੍ਞਮਞ੍ਞਵਿਰੁਦ੍ਧਮ੍ਪਿ ਤਂਤਂਭਾਣਕਾਨਂ ਮਤੇਨ ਲਿਖਿਤਸੀਹਲ਼ਟ੍ਠਕਥਾਸੁ ਆਗਤਨਯਮੇਵ ਗਹੇਤ੍ਵਾ ਆਚਰਿਯੇਨ ਲਿਖਿਤਂ ਈਦਿਸੇ ਕਥਾਵਿਰੋਧੇ ਸਾਸਨਪਰਿਹਾਨਿਯਾ ਅਭਾਵਤੋ, ਸੋਧਨੁਪਾਯਾਭਾਵਾ ਚ. ਪਰਮਤ੍ਥਵਿਰੋਧੋ ਏਵ ਹਿ ਸੁਤ੍ਤਾਦਿਨਯੇਨ ਸੋਧਨੀਯੋ, ਨ ਕਥਾਮਗ੍ਗਵਿਰੋਧੋਤਿ.

ਮਹਾਪਜਾਪਤਿਗੋਤਮੀਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾਵਣ੍ਣਨਾ

੪੦੪-੮. ਪਾਲ਼ਿਯਂ ਯਦਗ੍ਗੇਨਾਤਿ ਯਸ੍ਮਿਂ ਦਿਵਸੇ. ਤਦਾਤਿ ਤਸ੍ਮਿਂਯੇਵ ਦਿਵਸੇ. ਵਿਮਾਨੇਤ੍ਵਾਤਿ ਅਵਮਾਨਂ ਕਤ੍ਵਾ.

੪੧੦-੧. ਆਪਤ੍ਤਿਗਾਮਿਨਿਯੋਤਿ ਆਪਤ੍ਤਿਂ ਆਪਨ੍ਨਾਯੋ. ਕਮ੍ਮਵਿਭਙ੍ਗੇਤਿ ਪਰਿਵਾਰੇ ਕਮ੍ਮਵਿਭਙ੍ਗੇ (ਪਰਿ. ੪੮੨ ਆਦਯੋ).

੪੧੩-੫. ਪਾਲ਼ਿਯਂ ¶ ਦ੍ਵੇ ਤਿਸ੍ਸੋ ਭਿਕ੍ਖੁਨਿਯੋਤਿ ਦ੍ਵੀਹਿ ਤੀਹਿ ਭਿਕ੍ਖੁਨੀਹਿ. ਨ ਆਰੋਚੇਨ੍ਤੀਤਿ ਪਾਤਿਮੋਕ੍ਖੁਦ੍ਦੇਸਕਸ੍ਸ ਨ ਆਰੋਚੇਨ੍ਤਿ.

੪੧੬. ਦੁਸ੍ਸਵੇਣਿਯਾਤਿ ਅਨੇਕਦੁਸ੍ਸਪਟ੍ਟੇ ਏਕਤੋ ਕਤ੍ਵਾ ਕਤਵੇਣਿਯਾ.

੪੧੭. ਵਿਸੇਸਕਨ੍ਤਿ ¶ ਪਤ੍ਤਲੇਖਾਦਿਵਣ੍ਣਵਿਸੇਸਂ. ਪਕਿਣਨ੍ਤੀਤਿ ਵਿਕ੍ਕਿਣਨ੍ਤਿ. ਨਮਨਕਨ੍ਤਿ ਪਾਸੁਕਟ੍ਠਿਨਮਨਕਬਨ੍ਧਨਂ.

੪੨੨-੫. ਸਂਵੇਲ੍ਲਿਯਨ੍ਤਿ ਕਚ੍ਛਂ ਬਨ੍ਧਿਤ੍ਵਾ ਨਿਵਾਸਨਂ. ਤਯੋ ਨਿਸ੍ਸਯੇਤਿ ਰੁਕ੍ਖਮੂਲਸੇਨਾਸਨਸ੍ਸ ਤਾਸਂ ਅਲਬ੍ਭਨਤੋ ਵੁਤ੍ਤਂ.

੪੨੬-੮. ਅਟ੍ਠੇਵ ਭਿਕ੍ਖੁਨਿਯੋ ਯਥਾਵੁਡ੍ਢਂ ਪਟਿਬਾਹਨ੍ਤੀਤਿ ਅਟ੍ਠ ਭਿਕ੍ਖੁਨਿਯੋ ਵੁਡ੍ਢਪਟਿਪਾਟਿਯਾਵ ਗਣ੍ਹਨ੍ਤਿਯੋ ਆਗਤਪਟਿਪਾਟਿਂ ਪਟਿਬਾਹਨ੍ਤਿ, ਨਾਞ੍ਞਾਤਿ ਅਤ੍ਥੋ. ਅਨੁਵਾਦਂ ਪਟ੍ਠਪੇਨ੍ਤੀਤਿ ਇਸ੍ਸਰਿਯਂ ਪਵਤ੍ਤੇਨ੍ਤੀਤਿ ਅਤ੍ਥਂ ਵਦਨ੍ਤਿ.

੪੩੦. ਭਿਕ੍ਖੁਦੂਤੇਨਾਤਿ ਭਿਕ੍ਖੁਨਾ ਦੂਤਭੂਤੇਨ. ਸਿਕ੍ਖਮਾਨਦੂਤੇਨਾਤਿ ਸਿਕ੍ਖਮਾਨਾਯ ਦੂਤਾਯ.

੪੩੧. ਨ ਸਮ੍ਮਤੀਤਿ ਨਪ੍ਪਹੋਤਿ. ਨਵਕਮ੍ਮਨ੍ਤਿ ‘‘ਨਵਕਮ੍ਮਂ ਕਤ੍ਵਾ ਵਸਤੂ’’ਤਿ ਅਪਲੋਕੇਤ੍ਵਾ ਸਙ੍ਘਿਕਭੂਮਿਯਾ ਓਕਾਸਦਾਨਂ.

੪੩੨-੬. ਸਨ੍ਨਿਸਿਨ੍ਨਗਬ੍ਭਾਤਿ ਦੁਵਿਞ੍ਞੇਯ੍ਯਗਬ੍ਭਾ. ਮਹਿਲਾਤਿਤ੍ਥੇਤਿ ਇਤ੍ਥੀਨਂ ਸਾਧਾਰਣਤਿਤ੍ਥੇ.

ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

ਭਿਕ੍ਖੁਨਿਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

ਖੁਦ੍ਦਾਨੁਖੁਦ੍ਦਕਸਿਕ੍ਖਾਪਦਕਥਾਵਣ੍ਣਨਾ

੪੩੭. ਪਞ੍ਚਸਤਿਕਕ੍ਖਨ੍ਧਕੇ ¶ ¶ ਪਾਲ਼ਿਯਂ ‘‘ਅਪਾਵੁਸੋ, ਅਮ੍ਹਾਕਂ ਸਤ੍ਥਾਰਂ ਜਾਨਾਸੀ’’ਤਿ ਇਦਂ ਥੇਰੋ ਸਯਂ ਭਗਵਤੋ ਪਰਿਨਿਬ੍ਬੁਤਭਾਵਂ ਜਾਨਨ੍ਤੋਪਿ ਅਤ੍ਤਨਾ ਸਹਗਤਭਿਕ੍ਖੁਪਰਿਸਾਯ ਞਾਪਨਤ੍ਥਮੇਵ, ਸੁਭਦ੍ਦਸ੍ਸ ਵੁਡ੍ਢਪਬ੍ਬਜਿਤਸ੍ਸ ਸਾਸਨਸ੍ਸ ਪਟਿਪਕ੍ਖਵਚਨਂ ਭਿਕ੍ਖੂਨਂ ਵਿਞ੍ਞਾਪਨਤ੍ਥਞ੍ਚ ਏਵਂ ਪੁਚ੍ਛਿ. ਸੁਭਦ੍ਦੋ ਹਿ ਕੁਸਿਨਾਰਾਯਂ ਭਗਵਤਿ ਅਭਿਪ੍ਪਸਨ੍ਨਾਯ ਖਤ੍ਤਿਯਾਦਿਗਹਟ੍ਠਪਰਿਸਾਯ ਮਜ੍ਝੇ ਭਗਵਤੋ ਪਰਿਨਿਬ੍ਬਾਨਂ ਸੁਤ੍ਵਾ ਹਟ੍ਠਪਹਟ੍ਠੋਪਿ ਭਯੇਨ ਪਹਟ੍ਠਾਕਾਰਂ ਵਾਚਾਯ ਪਕਾਸੇਤੁਂ ਨ ਸਕ੍ਖਿਸ੍ਸਤਿ, ਇਧੇਵ ਪਨ ਵਿਜਨਪਦੇਸੇ ਸੁਤ੍ਵਾ ਯਥਾਜ੍ਝਾਸਯਂ ਅਤ੍ਤਨੋ ਪਾਪਲਦ੍ਧਿਂ ਪਕਾਸੇਸ੍ਸਤਿ, ਤਤੋ ਤਮੇਵ ਪਚ੍ਚਯਂ ਦਸ੍ਸੇਤ੍ਵਾ ਭਿਕ੍ਖੂ ਸਮੁਸ੍ਸਾਹੇਤ੍ਵਾ ਧਮ੍ਮਵਿਨਯਸਙ੍ਗਹਂ ਕਾਰੇਤ੍ਵਾ ਏਤਸ੍ਸ ਪਾਪਭਿਕ੍ਖੁਸ੍ਸ, ਅਞ੍ਞੇਸਞ੍ਚ ਈਦਿਸਾਨਂ ਮਨੋਰਥਵਿਘਾਤਂ, ਸਾਸਨਟ੍ਠਿਤਿਞ੍ਚ ਕਰਿਸ੍ਸਾਮੀਤਿ ਜਾਨਨ੍ਤੋਵ ਤਂ ਪੁਚ੍ਛੀਤਿ ਵੇਦਿਤਬ੍ਬਂ. ਤੇਨੇਵ ਥੇਰੋ ‘‘ਏਕਮਿਦਾਹਂ, ਆਵੁਸੋ, ਸਮਯ’’ਨ੍ਤਿਆਦਿਨਾ ਸੁਭਦ੍ਦਵਚਨਮੇਵ ਦਸ੍ਸੇਤ੍ਵਾ ਧਮ੍ਮਵਿਨਯਂ ਸਙ੍ਗਾਯਾਪੇਸਿ. ਨਾਨਾਭਾਵੋਤਿ ਸਰੀਰੇਨ ਨਾਨਾਦੇਸਭਾਵੋ, ਵਿਪ੍ਪਵਾਸੋਤਿ ਅਤ੍ਥੋ. ਵਿਨਾਭਾਵੋਤਿ ਮਰਣੇਨ ਵਿਯੁਜ੍ਜਨਂ. ਅਞ੍ਞਥਾਭਾਵੋਤਿ ਭਵਨ੍ਤਰੂਪਗਮਨੇਨ ਅਞ੍ਞਾਕਾਰਪ੍ਪਤ੍ਤਿ.

੪੪੧. ‘‘ਆਕਙ੍ਖਮਾਨੋ…ਪੇ… ਸਮੂਹਨੇਯ੍ਯਾ’’ਤਿ ਇਦਂ ਭਗਵਾ ਮਯਾ ‘‘ਆਕਙ੍ਖਮਾਨੋ’’ਤਿ ਵੁਤ੍ਤਤ੍ਤਾ ਏਕਸਿਕ੍ਖਾਪਦਮ੍ਪਿ ਸਮੂਹਨਿਤਬ੍ਬਂ ਅਪਸ੍ਸਨ੍ਤਾ, ਸਮੂਹਨੇ ਚ ਦੋਸਂ ਦਿਸ੍ਵਾ ਧਮ੍ਮਸਙ੍ਗਹਕਾ ਭਿਕ੍ਖੂ ‘‘ਅਪਞ੍ਞਤ੍ਤਂ ਨ ਪਞ੍ਞਾਪੇਸ੍ਸਾਮ, ਪਞ੍ਞਤ੍ਤਂ ਨ ਸਮੁਚ੍ਛਿਨ੍ਦਿਸ੍ਸਾਮਾ’’ਤਿਆਦਿਨਾ ਪੁਨ ‘‘ਪਞ੍ਞਤ੍ਤਿਸਦਿਸਾਯ ਅਕੁਪ੍ਪਾਯ ਕਮ੍ਮਵਾਚਾਯ ਸਾਵੇਤ੍ਵਾ ਸਮਾਦਾਯ ਵਤ੍ਤਿਸ੍ਸਨ੍ਤਿ, ਤਤੋ ਯਾਵ ਸਾਸਨਨ੍ਤਰਧਾਨਾ ਅਪ੍ਪਟਿਬਾਹਿਯਾਨਿ ਸਿਕ੍ਖਾਪਦਾਨਿ ਭਵਿਸ੍ਸਨ੍ਤੀ’’ਤਿ ਇਮਿਨਾ ਅਧਿਪ੍ਪਾਯੇਨ ਅਵੋਚਾਤਿ ਦਟ੍ਠਬ੍ਬਂ. ਤੇਨੇਵ ਮਹਾਥੇਰਾਪਿ ਤਥੇਵ ਪਟਿਪਜ੍ਜਿਂਸੁ.

ਗਿਹਿਗਤਾਨੀਤਿ ¶ ਗਿਹੀਸੁ ਗਤਾਨਿ. ਖਤ੍ਤਿਯਮਹਾਸਾਰਾਦਿਗਿਹੀਹਿ ਞਾਤਾਨੀਤਿ ਅਤ੍ਥੋ. ਚਿਤਕਧੂਮਕਾਲੋ ਅਤ੍ਤਨੋ ਪਵਤ੍ਤਿਪਰਿਯੋਸਾਨਭੂਤੋ ਏਤਸ੍ਸਾਤਿ ਧੂਮਕਾਲਿਕਂ.

੪੪੩. ਓਲ਼ਾਰਿਕੇ ¶ ਨਿਮਿਤ੍ਤੇ ਕਰਿਯਮਾਨੇਪੀਤਿ ‘‘ਆਕਙ੍ਖਮਾਨੋ, ਆਨਨ੍ਦ, ਤਥਾਗਤੋ ਕਪ੍ਪਂ ਵਾ ਤਿਟ੍ਠੇਯ੍ਯ ਕਪ੍ਪਾਵਸੇਸਂ ਵਾ’’ਤਿ ਏਵਂ ਥੂਲਤਰੇ ‘‘ਤਿਟ੍ਠਤੁ, ਭਗਵਾ, ਕਪ੍ਪ’’ਨ੍ਤਿ ਯਾਚਨਹੇਤੁਭੂਤੇ ਓਕਾਸਨਿਮਿਤ੍ਤੇ ਕਮ੍ਮੇ ਕਰਿਯਮਾਨੇ. ਮਾਰੇਨ ਪਰਿਯੁਟ੍ਠਿਤਚਿਤ੍ਤੋਤਿ ਮਾਰੇਨ ਆਵਿਟ੍ਠਚਿਤ੍ਤੋ.

੪੪੫. ਉਜ੍ਜਵਨਿਕਾਯਾਤਿ ਪਟਿਸੋਤਗਾਮਿਨਿਯਾ. ਕੁਚ੍ਛਿਤੋ ਲਵੋ ਛੇਦੋ ਵਿਨਾਸੋ ਕੁਲਵੋ, ਨਿਰਤ੍ਥਕਵਿਨਿਯੋਗੋ. ਤਂ ਨ ਗਚ੍ਛਨ੍ਤੀਤਿ ਨ ਕੁਲਵਂ ਗਮੇਨ੍ਤਿ.

ਖੁਦ੍ਦਾਨੁਖੁਦ੍ਦਕਸਿਕ੍ਖਾਪਦਕਥਾਵਣ੍ਣਨਾ ਨਿਟ੍ਠਿਤਾ.

ਪਞ੍ਚਸਤਿਕਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

੪੪੬. ਸਤ੍ਤਸਤਿਕਕ੍ਖਨ੍ਧਕੇ ¶ ¶ ਭਿਕ੍ਖਗ੍ਗੇਨਾਤਿ ਭਿਕ੍ਖੁਗਣਨਾਯ. ਮਹੀਤਿ ਹਿਮਂ.

੪੪੭. ਅਵਿਜ੍ਜਾਨਿਵੁਤਾਤਿ ਅਵਿਜ੍ਜਾਨੀਵਰਣੇਨ ਨਿਵੁਤਾ ਪਟਿਚ੍ਛਨ੍ਨਾ. ਅਵਿਦ੍ਦਸੂਤਿ ਅਞ੍ਞਾਣਿਨੋ. ਉਪਕ੍ਕਿਲੇਸਾ ਵੁਤ੍ਤਾਤਿ ਤੇਸਂ ਸਮਣਬ੍ਰਾਹ੍ਮਣਾਨਂ ਏਤੇ ਸੁਰਾਪਾਨਾਦਯੋ ਉਪਕ੍ਕਿਲੇਸਾਤਿ ਵੁਤ੍ਤਾ. ਨੇਤ੍ਤਿਯਾ ਤਣ੍ਹਾਯ ਸਹਿਤਾ ਸਨੇਤ੍ਤਿਕਾ.

੪੫੦-੧. ਅਹੋਗਙ੍ਗੋਤਿ ਤਸ੍ਸ ਪਬ੍ਬਤਸ੍ਸ ਨਾਮਂ. ਪਟਿਕਚ੍ਚੇਵ ਗਚ੍ਛੇਯ੍ਯਨ੍ਤਿ ਯਤ੍ਥ ਨਂ ਅਧਿਕਰਣਂ ਵੂਪਸਮਿਤੁਂ ਭਿਕ੍ਖੂ ਸਨ੍ਨਿਪਤਿਸ੍ਸਨ੍ਤਿ, ਤਤ੍ਥਾਹਂ ਪਠਮਮੇਵ ਗਚ੍ਛੇਯ੍ਯਂ. ਸਮ੍ਭਾਵੇਸੁਨ੍ਤਿ ਸਮ੍ਪਾਪੁਣਿਂਸੁ.

੪੫੨. ਅਲੋਣਿਕਨ੍ਤਿ ਲੋਣਰਹਿਤਂ ਭਤ੍ਤਂ, ਬ੍ਯਞ੍ਜਨਂ ਵਾ. ਆਸੁਤਾਤਿ ਸਬ੍ਬਸਮ੍ਭਾਰਸਜ੍ਜਿਤਾ, ‘‘ਅਸੁਤ੍ਤਾ’’ਤਿ ਵਾ ਪਾਠੋ.

੪੫੩. ਉਜ੍ਜਵਿਂਸੂਤਿ ਨਾਵਾਯ ਪਟਿਸੋਤਂ ਗਚ੍ਛਿਂਸੁ. ਪਾਚੀਨਕਾਤਿ ਪੁਰਤ੍ਥਿਮਦਿਸਾਯ ਜਾਤਤ੍ਤਾ ਵਜ੍ਜਿਪੁਤ੍ਤਕੇ ਸਨ੍ਧਾਯ ਵੁਤ੍ਤਂ. ਪਾਵੇਯ੍ਯਕਾਤਿ ਪਾਵੇਯ੍ਯਦੇਸਵਾਸਿਨੋ.

੪੫੪. ਨਨੁ ਤ੍ਵਂ, ਆਵੁਸੋ, ਵੁਡ੍ਢੋਤਿ ਨਨੁ ਤ੍ਵਂ ਥੇਰੋ ਨਿਸ੍ਸਯਮੁਤ੍ਤੋ, ਕਸ੍ਮਾ ਤਂ ਥੇਰੋ ਪਣਾਮੇਸੀਤਿ ਭੇਦਵਚਨਂ ਵਦਨ੍ਤਿ. ਗਰੁਨਿਸ੍ਸਯਂ ਗਣ੍ਹਾਮਾਤਿ ਨਿਸ੍ਸਯਮੁਤ੍ਤਾਪਿ ਮਯਂ ਏਕਂ ਸਮ੍ਭਾਵਨੀਯਗਰੁਂ ਨਿਸ੍ਸਯਭੂਤਂ ਗਹੇਤ੍ਵਾਵ ਵਸਿਸ੍ਸਾਮਾਤਿ ਅਧਿਪ੍ਪਾਯੋ.

੪੫੫. ਮੂਲਾਦਾਯਕਾਤਿ ਪਠਮਂ ਦਸਵਤ੍ਥੂਨਂ ਦਾਯਕਾ, ਆਵਾਸਿਕਾਤਿ ਅਤ੍ਥੋ. ਪਥਬ੍ਯਾ ਸਙ੍ਘਤ੍ਥੇਰੋਤਿ ¶ ਲੋਕੇ ਸਬ੍ਬਭਿਕ੍ਖੂਨਂ ਤਦਾ ਉਪਸਮ੍ਪਦਾਯ ਵੁਡ੍ਢੋ. ਸੁਞ੍ਞਤਾਵਿਹਾਰੇਨਾਤਿ ਸੁਞ੍ਞਤਾਮੁਖੇਨ ਅਧਿਗਤਫਲਸਮਾਪਤ੍ਤਿਂ ਸਨ੍ਧਾਯ ਵਦਤਿ.

੪੫੭. ਸੁਤ੍ਤਵਿਭਙ੍ਗੇਤਿ ਪਦਭਾਜਨੀਯੇ. ਇਦਞ੍ਚ ‘‘ਯੋ ਪਨ ਭਿਕ੍ਖੁ ਸਨ੍ਨਿਧਿਕਾਰਕਂ ਖਾਦਨੀਯਂ ਵਾ ਭੋਜਨੀਯਂ ਵਾ’’ਤਿ (ਪਾਚਿ. ੨੫੩) ਸੁਤ੍ਤੇ ਯਾਵਕਾਲਿਕਸ੍ਸੇਵ ਪਰਾਮਟ੍ਠਤ੍ਤਾ ¶ ਸਿਙ੍ਗੀਲੋਣਸ੍ਸ ਯਾਵਜੀਵਿਕਸ੍ਸ ਸਨ੍ਨਿਧਿਕਤਸ੍ਸ ਆਮਿਸੇਨ ਸਦ੍ਧਿਂ ਪਰਿਭੋਗੇ ਪਾਚਿਤ੍ਤਿਯਂ ਵਿਭਙ੍ਗਨਯੇਨੇਵ ਸਿਜ੍ਝਤੀਤਿ ਵੁਤ੍ਤਂ, ਤਂ ਪਨ ਪਾਚਿਤ੍ਤਿਯਂ ਵਿਭਙ੍ਗੇ ਆਗਤਭਾਵਂ ਸਾਧੇਤੁਂ ‘‘ਕਥਂ ਸੁਤ੍ਤਵਿਭਙ੍ਗੇ’’ਤਿਆਦਿ ਵੁਤ੍ਤਂ. ਤਤ੍ਥ ਹਿ ਲੋਣਮੇਤ੍ਥ ਸਨ੍ਨਿਧਿਕਤਂ, ਨ ਖਾਦਨੀਯਂ ਭੋਜਨੀਯਨ੍ਤਿ ਲੋਣਮਿਸ੍ਸਭੋਜਨੇ ਵਜ੍ਜਿਪੁਤ੍ਤਕਾ ਅਨਵਜ੍ਜਸਞ੍ਞਿਨੋ ਅਹੇਸੁਂ. ਤਥਾਸਞ੍ਞੀਨਮ੍ਪਿ ਨੇਸਂ ਆਪਤ੍ਤਿਦਸ੍ਸਨਤ੍ਥਂ ‘‘ਸਨ੍ਨਿਧਿਕਾਰੇ ਅਸਨ੍ਨਿਧਿਕਾਰਸਞ੍ਞੀ’’ਤਿ ਇਦਂ ਸੁਤ੍ਤਵਿਭਙ੍ਗਂ ਉਦ੍ਧਟਨ੍ਤਿ ਵੇਦਿਤਬ੍ਬਂ.

ਤੇਨ ਸਦ੍ਧਿਨ੍ਤਿ ਪੁਰੇਪਟਿਗ੍ਗਹਿਤਲੋਣੇਨ ਸਦ੍ਧਿਂ. ਦੁਕ੍ਕਟੇਨੇਤ੍ਥ ਭਵਿਤਬ੍ਬਨ੍ਤਿ ‘‘ਯਾਵਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ ਪਟਿਗ੍ਗਹਿਤ’’ਨ੍ਤਿ ਅਵਤ੍ਵਾ ‘‘ਤਦਹੁਪਟਿਗ੍ਗਹਿਤ’’ਨ੍ਤਿ ਵਚਨਸਾਮਤ੍ਥਿਯਤੋ ਪੁਰੇਪਟਿਗ੍ਗਹਿਤਂ ਯਾਵਜੀਵਿਕਂ ਯਾਵਕਾਲਿਕੇਨ ਸਦ੍ਧਿਂ ਸਮ੍ਭਿਨ੍ਨਰਸਂ ਕਾਲੇਪਿ ਨ ਕਪ੍ਪਤੀਤਿ ਸਿਜ੍ਝਤਿ, ਤਤ੍ਥ ਦੁਕ੍ਕਟੇਨ ਭਵਿਤਬ੍ਬਨ੍ਤਿ ਅਧਿਪ੍ਪਾਯੋ. ਦੁਕ੍ਕਟੇਨਪਿ ਨ ਭਵਿਤਬ੍ਬਨ੍ਤਿ ਯਦਿ ਹਿ ਸਨ੍ਨਿਧਿਕਾਰਪਚ੍ਚਯਾ ਦੁਕ੍ਕਟਂ ਮਞ੍ਞਥ, ਯਾਵਜੀਵਿਕਸ੍ਸ ਲੋਣਸ੍ਸ ਸਨ੍ਨਿਧਿਦੋਸਾਭਾਵਾ ਦੁਕ੍ਕਟੇਨ ਨ ਭਵਿਤਬ੍ਬਂ, ਅਥ ਆਮਿਸੇਨ ਸਮ੍ਭਿਨ੍ਨਰਸਸ੍ਸ ਤਸ੍ਸ ਆਮਿਸਗਤਿਕਤ੍ਤਾ ਦੁਕ੍ਕਟਂ ਮਾ ਮਞ੍ਞਥ. ਤਦਾ ਚ ਹਿ ਪਾਚਿਤ੍ਤਿਯੇਨੇਵ ਭਵਿਤਬ੍ਬਂ ਆਮਿਸਤ੍ਤੁਪਗਮਨਤੋਤਿ ਅਧਿਪ੍ਪਾਯੋ. ਨ ਹਿ ਏਤ੍ਥ ਯਾਵਜੀਵਿਕਨ੍ਤਿਆਦਿਨਾਪਿ ਦੁਕ੍ਕਟਾਭਾਵਂ ਸਮਤ੍ਥੇਤਿ.

ਪਾਲ਼ਿਯਂ ਰਾਜਗਹੇ ਸੁਤ੍ਤਵਿਭਙ੍ਗੇਤਿਆਦੀਸੁ ਸਬ੍ਬਤ੍ਥ ਸੁਤ੍ਤੇ ਚ ਵਿਭਙ੍ਗੇ ਚਾਤਿ ਅਤ੍ਥੋ ਗਹੇਤਬ੍ਬੋ. ਤਸ੍ਸ ਤਸ੍ਸ ਵਿਕਾਲਭੋਜਨਾਦਿਨੋ ਸੁਤ੍ਤੇਪਿ ਪਟਿਕ੍ਖਿਤ੍ਤਤ੍ਤਾ ਵਿਨਯਸ੍ਸ ਅਤਿਸਰਣਂ ਅਤਿਕ੍ਕਮੋ ਵਿਨਯਾਤਿਸਾਰੋ. ‘‘ਨਿਸੀਦਨਂ ਨਾਮ ਸਦਸਂ ਵੁਚ੍ਚਤੀਤਿ ਆਗਤ’’ਨ੍ਤਿ ਇਦਂ ਵਿਭਙ੍ਗੇ ਚ ਆਗਤਦਸ੍ਸਨਤ੍ਥਂ ਵੁਤ੍ਤਂ. ਤਂ ਪਮਾਣਂ ਕਰੋਨ੍ਤਸ੍ਸਾਤਿ ਸੁਗਤਵਿਦਤ੍ਥਿਯਾ ਵਿਦਤ੍ਥਿਤ੍ਤਯਪ੍ਪਮਾਣਂ ਕਰੋਨ੍ਤਸ੍ਸ, ਦਸਾਯ ਪਨ ਵਿਦਤ੍ਥਿਦ੍ਵਯਪ੍ਪਮਾਣਂ ਕਤਂ. ਅਦਸਕਮ੍ਪਿ ਨਿਸੀਦਨਂ ਵਟ੍ਟਤਿ ਏਵਾਤਿ ਅਧਿਪ੍ਪਾਯੋ. ਸੇਸਮਿਧ ਹੇਟ੍ਠਾ ਸਬ੍ਬਤ੍ਥ ਸੁਵਿਞ੍ਞੇਯ੍ਯਮੇਵ.

ਸਤ੍ਤਸਤਿਕਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧. ਵਿਸੁਦ੍ਧਪਰਿਵਾਰਸ੍ਸ ¶ ¶ ਸੀਲਕ੍ਖਨ੍ਧਾਦਿਧਮ੍ਮਕ੍ਖਨ੍ਧਸਰੀਰਸ੍ਸ ਭਗਵਤੋ ਵਿਨਯਪਰਿਯਤ੍ਤਿਸਾਸਨੇ ਖਨ੍ਧਕਾਨਂ ਅਨਨ੍ਤਰਂ ਪਰਿਵਾਰੋਤਿ ਯੋ ਵਿਨਯੋ ਸਙ੍ਗਹਂ ਸਮਾਰੁਲ਼੍ਹੋ, ਤਸ੍ਸ ਦਾਨਿ ਅਨੁਤ੍ਤਾਨਤ੍ਥਵਣ੍ਣਨਂ ਕਰਿਸ੍ਸਾਮੀਤਿ ਯੋਜਨਾ.

ਸਮਨ੍ਤਚਕ੍ਖੁਨਾਤਿ ਸਬ੍ਬਞ੍ਞੁਤਞ੍ਞਾਣੇਨ. ਅਤਿਵਿਸੁਦ੍ਧੇਨ ਮਂਸਚਕ੍ਖੁਨਾਤਿ ਰਤ੍ਤਿਨ੍ਦਿਵਂ ਸਮਨ੍ਤਾ ਯੋਜਨਪ੍ਪਮਾਣੇ ਅਤਿਸੁਖੁਮਾਨਿਪਿ ਰੂਪਾਨਿ ਪਸ੍ਸਨਤੋ ਅਤਿਵਿਯ ਪਰਿਸੁਦ੍ਧੇਨ ਪਸਾਦਚਕ੍ਖੁਨਾ. ‘‘ਅਤ੍ਥਿ ਤਤ੍ਥ ਪਞ੍ਞਤ੍ਤੀ’’ਤਿਆਦੀਸੁ ਅਤ੍ਥਿ ਨੁ ਖੋ ਤਤ੍ਥ ਪਞ੍ਞਤ੍ਤੀਤਿਆਦਿਨਾ ਅਤ੍ਥੋ ਗਹੇਤਬ੍ਬੋਤਿ ਆਹ ‘‘ਤਤ੍ਥ ਪਞ੍ਞਤ੍ਤਿ…ਪੇ… ਕੇਨਾਭਤਨ੍ਤਿ ਪੁਚ੍ਛਾ’’ਤਿ.

੨. ਪੁਚ੍ਛਾਵਿਸ੍ਸਜ੍ਜਨੇਤਿ ¶ ਪੁਚ੍ਛਾਯ ਵਿਸ੍ਸਜ੍ਜਨੇ. ਵਿਨੀਤਕਥਾਤਿ ਵਿਨੀਤਵਤ੍ਥੁਕਥਾ, ਅਯਮੇਵ ਵਾ ਪਾਠੋ.

ਦ੍ਵਙ੍ਗਿਕੇਨ ਏਕੇਨ ਸਮੁਟ੍ਠਾਨੇਨਾਤਿ ਅਙ੍ਗਦ੍ਵਯਸਮੁਦਾਯਭੂਤੇਨ ਏਕੇਨ. ਅਙ੍ਗਦ੍ਵਯਵਿਮੁਤ੍ਤਸ੍ਸ ਸਮੁਟ੍ਠਾਨਸ੍ਸ ਅਭਾਵੇਪਿ ਤੇਸੁ ਏਕੇਨਙ੍ਗੇਨ ਵਿਨਾ ਅਯਂ ਆਪਤ੍ਤਿ ਨ ਹੋਤੀਤਿ ਦਸ੍ਸਨਤ੍ਥਮੇਵ ‘‘ਏਕੇਨ ਸਮੁਟ੍ਠਾਨੇਨਾ’’ਤਿ ਵੁਤ੍ਤਂ. ਇਦਾਨਿ ਤੇਸੁ ਦ੍ਵੀਸੁ ਅਙ੍ਗੇਸੁ ਪਧਾਨਙ੍ਗਂ ਦਸ੍ਸੇਤੁਮਾਹ ‘‘ਏਤ੍ਥ ਹਿ ਚਿਤ੍ਤਂ ਅਙ੍ਗਂ ਹੋਤੀ’’ਤਿਆਦਿ. ਯਸ੍ਮਾ ਪਨ ਮਗ੍ਗੇਨਮਗ੍ਗਪ੍ਪਟਿਪਤ੍ਤਿਸਙ੍ਖਾਤਾਯ ਕਾਯਵਿਞ੍ਞਤ੍ਤਿਯਾ ਸੇਵਨਚਿਤ੍ਤੇਨੇਵ ਸਮ੍ਭਵੇ ਸਤਿ ਅਯਂ ਤਂ ਅਙ੍ਗਦ੍ਵਯਂ ਉਪਾਦਾਯ ਭਗਵਤਾ ਪਞ੍ਞਤ੍ਤਾ ਆਪਤ੍ਤਿਸਮ੍ਮੁਤਿ ਹੋਤਿ, ਨਾਸਤਿ. ਤਸ੍ਮਾ ਤਂ ਚਿਤ੍ਤਂ ਕਾਯਵਿਞ੍ਞਤ੍ਤਿਸਙ੍ਖਾਤਸ੍ਸ ਕਾਯਸ੍ਸ ਅਙ੍ਗਂ ਕਾਰਣਂ ਹੋਤਿ, ਨ ਆਪਤ੍ਤਿਯਾ. ਤਸ੍ਸ ਪਨ ਤਂਸਮੁਟ੍ਠਿਤਕਾਯੋ ਏਵ ਅਙ੍ਗਂ ਅਬ੍ਯਵਹਿਤਕਾਰਣਂ, ਚਿਤ੍ਤਂ ਪਨ ਕਾਰਣਕਾਰਣਨ੍ਤਿ ਅਧਿਪ੍ਪਾਯੋ. ਏਵਂ ਉਪਰਿਪਿ ਸਬ੍ਬਤ੍ਥ ਚਿਤ੍ਤਙ੍ਗਯੁਤ੍ਤਸਮੁਟ੍ਠਾਨੇਸੁ ਅਧਿਪ੍ਪਾਯੋ ¶ ਵੇਦਿਤਬ੍ਬੋ. ‘‘ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤੀ’’ਤਿਆਦਿਪਰਿਵਾਰਵਚਨੇਨੇਵ ਆਪਤ੍ਤਿਯਾ ਅਕੁਸਲਾਦਿਪਰਮਤ੍ਥਸਭਾਵਤਾ ਪਾਲ਼ਿਅਟ੍ਠਕਥਾਸੁ ਪਰਿਯਾਯਤੋਵ ਵੁਤ੍ਤਾ, ਸਮ੍ਮੁਤਿਸਭਾਵਾ ਏਵ ਆਪਤ੍ਤੀਤਿ ਸਿਜ੍ਝਤਿ ਸਮੁਟ੍ਠਾਨਸਮੁਟ੍ਠਿਤਾਨਂ ਭੇਦਸਿਦ੍ਧਿਤੋਤਿ ਗਹੇਤਬ੍ਬਂ. ਇਮਮਤ੍ਥਂ ਸਨ੍ਧਾਯਾਤਿ ਆਪਨ੍ਨਾਯ ਪਾਰਾਜਿਕਾਪਤ੍ਤਿਯਾ ਕੇਹਿਚਿਪਿ ਸਮਥੇਹਿ ਅਨਾਪਤ੍ਤਿਭਾਵਾਪਾਦਨਸ੍ਸ ਅਸਕ੍ਕੁਣੇਯ੍ਯਤ੍ਤਸਙ੍ਖਾਤਮਤ੍ਥਂ ਸਨ੍ਧਾਯ.

੩. ਪੋਰਾਣਕੇਹਿ ਮਹਾਥੇਰੇਹੀਤਿ ਸਙ੍ਗੀਤਿਤ੍ਤਯਤੋ ਪਚ੍ਛਾ ਪੋਤ੍ਥਕਸਙ੍ਗੀਤਿਕਾਰਕੇਹਿ ਛਲ਼ਭਿਞ੍ਞਾਪਅਸਮ੍ਭਿਦਾਦਿਗੁਣਸਮੁਜ੍ਜਲੇਹਿ ਮਹਾਥੇਰੇਹਿ. ਚਤੁਤ੍ਥਸਙ੍ਗੀਤਿਸਦਿਸਾ ਹਿ ਪੋਤ੍ਥਕਾਰੋਹਸਙ੍ਗੀਤਿ.

੧੮੮. ਮਹਾਵਿਭਙ੍ਗੇਤਿ ਭਿਕ੍ਖੁਵਿਭਙ੍ਗੇ. ਸੋਲ਼ਸ ਵਾਰਾ ਦਸ੍ਸਿਤਾਤਿ ਯੇਹਿ ਵਾਰੇਹਿ ਆਦਿਭੂਤੇਹਿ ਉਪਲਕ੍ਖਿਤਤ੍ਤਾ ਅਯਂ ਸਕਲੋਪਿ ਪਰਿਵਾਰੋ ਸੋਲ਼ਸਪਰਿਵਾਰੋਤਿ ਵੋਹਰੀਯਤਿ, ਤੇ ਸਨ੍ਧਾਯ ਵਦਤਿ.

੨੫੭. ਪਾਲ਼ਿਯਂ ਨਿਬ੍ਬਾਨਞ੍ਚੇਵ ਪਞ੍ਞਤ੍ਤੀਤਿ ਏਤ੍ਥ ਯਸ੍ਮਾ ਸਙ੍ਖਤਧਮ੍ਮੇ ਉਪਾਦਾਯ ਪਞ੍ਞਤ੍ਤਾ ਸਮ੍ਮੁਤਿਸਚ੍ਚਭੂਤਾ ਪੁਗ੍ਗਲਾਦਿਪਞ੍ਞਤ੍ਤਿ ਪਰਮਤ੍ਥਤੋ ਅਵਿਜ੍ਜਮਾਨਤ੍ਤਾ ਉਪ੍ਪਤ੍ਤਿਵਿਨਾਸਯੁਤ੍ਤਵਤ੍ਥੁਧਮ੍ਮਨਿਯਤੇਨ ਅਨਿਚ੍ਚਦੁਕ੍ਖਲਕ੍ਖਣਦ੍ਵਯੇਨ ਯੁਤ੍ਤਾਤਿ ਵਤ੍ਤੁਂ ਅਯੁਤ੍ਤਾ, ਕਾਰਕਵੇਦਕਾਦਿਰੂਪੇਨ ਪਨ ਪਰਿਕਪ੍ਪਿਤੇਨ ਅਤ੍ਤਸਭਾਵੇਨ ਵਿਰਹਿਤਤ੍ਤਾ ‘‘ਅਨਤ੍ਤਾ’’ਤਿ ਵਤ੍ਤੁਂ ਯੁਤ੍ਤਾ. ਤਸ੍ਮਾ ਅਯਂ ਪਞ੍ਞਤ੍ਤਿਪਿ ਅਸਙ੍ਖਤਤ੍ਤਸਾਮਞ੍ਞਤੋ ¶ ਵਤ੍ਥੁਭੂਤੇਨ ਨਿਬ੍ਬਾਨੇਨ ਸਹ ‘‘ਅਨਤ੍ਤਾ ਇਤਿ ਨਿਚ੍ਛਯਾ’’ਤਿ ਵੁਤ੍ਤਾ. ਅਵਿਜ੍ਜਮਾਨਾਪਿ ਹਿ ਸਮ੍ਮੁਤਿ ਕੇਨਚਿ ਪਚ੍ਚਯੇਨ ਅਕਤਤ੍ਤਾ ਅਸਙ੍ਖਤਾ ਏਵਾਤਿ.

ਕਰੁਣਾਸੀਤਲਤ੍ਤਂ, ਪਞ੍ਞਾਪਭਾਸਿਤਤ੍ਤਞ੍ਚ ਭਗਵਤੋ ਦਸ੍ਸੇਤੁਂ ‘‘ਬੁਦ੍ਧਚਨ੍ਦੇ, ਬੁਦ੍ਧਾਦਿਚ੍ਚੇ’’ਤਿ ਏਤਂ ਉਭਯਂ ਵੁਤ੍ਤਂ. ਹਾਯਤਿ ਏਤੇਨਾਤਿ ਹਾਨਿ, ਦੁਕ੍ਖਸ੍ਸ ਹਾਨਿ ਦੁਕ੍ਖਹਾਨਿ, ਸਬ੍ਬਦੁਕ੍ਖਾਪਨੂਦਨਕਾਰਣਨ੍ਤਿ ਅਤ੍ਥੋ. ਪਿਟਕੇ ਤੀਣਿ ਦੇਸਯੀਤਿ ਯਸ੍ਮਾ ਅਞ੍ਞੇਪਿ ਮਹਾਵੀਰਾ ਸਮ੍ਮਾਸਮ੍ਬੁਦ੍ਧਾ ਸਦ੍ਧਮ੍ਮਂ ਦੇਸਯਨ੍ਤਿ, ਤਸ੍ਮਾ ¶ ਅਙ੍ਗੀਰਸੋ ਪਿਟਕਾਨਿ ਤੀਣਿ ਦੇਸਯੀਤਿ ਯੋਜਨਾ. ਮਹਾਗੁਣਨ੍ਤਿ ਮਹਾਨਿਸਂਸਂ. ਏਵਂ ਨੀਯਤਿ ਸਦ੍ਧਮ੍ਮੋਤਿ ਯਦਿ ਵਿਨਯਪਰਿਯਤ੍ਤਿ ਅਪਰਿਹੀਨਾ ਤਿਟ੍ਠਤਿ, ਏਵਂ ਸਤਿ ਪਟਿਪਤ੍ਤਿਪਟਿਵੇਧਸਦ੍ਧਮ੍ਮੋਪਿ ਨੀਯਤਿ ਪਵਤ੍ਤੀਯਤਿ, ਨ ਪਰਿਹਾਯਤੀਤਿ ਅਤ੍ਥੋ.

ਵਿਨਯਪਰਿਯਤ੍ਤਿ ਪਨ ਕਥਂ ਤਿਟ੍ਠਤੀਤਿ ਆਹ ‘‘ਉਭਤੋ ਚਾ’’ਤਿਆਦਿ. ਪਰਿਵਾਰੇਨ ਗਨ੍ਥਿਤਾ ਤਿਟ੍ਠਤੀਤਿ ਯੋਜੇਤਬ੍ਬਂ. ਤਸ੍ਸੇਵ ਪਰਿਵਾਰਸ੍ਸਾਤਿ ਤਸ੍ਮਿਂ ਏਵ ਪਰਿਵਾਰੇ. ਸਮੁਟ੍ਠਾਨਂ ਨਿਯਤੋ ਕਤਨ੍ਤਿ ਏਕਚ੍ਚਂ ਸਮੁਟ੍ਠਾਨੇਨ ਨਿਯਤਂ ਕਤਂ. ਤਸ੍ਮਿਂ ਪਰਿਵਾਰੇ ਕਿਞ੍ਚਿ ਸਿਕ੍ਖਾਪਦਂ ਨਿਯਤਸਮੁਟ੍ਠਾਨਂ ਅਞ੍ਞੇਹਿ ਅਸਾਧਾਰਣਂ, ਤਂ ਪਕਾਸਿਤਨ੍ਤਿ ਅਤ੍ਥੋ.

ਸਮ੍ਭੇਦਂ ਨਿਦਾਨਞ੍ਚਞ੍ਞਨ੍ਤਿ ਸਮ੍ਭੇਦੋ ਸਿਕ੍ਖਾਪਦਾਨਂ ਅਞ੍ਞਮਞ੍ਞਸਮੁਟ੍ਠਾਨੇਨ ਸਂਕਿਣ੍ਣਤਾ, ਨਿਦਾਨਞ੍ਚ ਪਞ੍ਞਤ੍ਤਿਟ੍ਠਾਨਂ, ਅਞ੍ਞਂ ਪੁਗ੍ਗਲਾਦਿਵਤ੍ਥਾਦਿ ਚ. ਸੁਤ੍ਤੇ ਦਿਸ੍ਸਨ੍ਤਿ ਉਪਰੀਤਿ ਹੇਟ੍ਠਾ ਵੁਤ੍ਤੇ, ਉਪਰਿ ਵਕ੍ਖਮਾਨੇ ਚ ਪਰਿਵਾਰਸੁਤ੍ਤੇ ਏਵ ਦਿਸ੍ਸਨ੍ਤਿ. ਯਸ੍ਮਾ ਚ ਏਵਂ, ਤਸ੍ਮਾ ਸਕਲਸਾਸਨਾਧਾਰਸ੍ਸ ਵਿਨਯਸ੍ਸ ਠਿਤਿਹੇਤੁਭੂਤਂ ਪਰਿਵਾਰਂ ਸਿਕ੍ਖੇਤਿ, ਏਵਮੇਤ੍ਥ ਯੋਜਨਾ ਦਟ੍ਠਬ੍ਬਾ.

ਸਮ੍ਭਿਨ੍ਨਸਮੁਟ੍ਠਾਨਾਨੀਤਿ ਅਞ੍ਞੇਹਿ ਸਾਧਾਰਣਸਮੁਟ੍ਠਾਨਾਨਿ. ਆਦਿਮ੍ਹਿ ਤਾਵ ਪੁਰਿਮਨਯੇਤਿ ਸਬ੍ਬਪਠਮੇ ਪਞ੍ਞਤ੍ਤਿਵਾਰੇ ਆਗਤਨਯਂ ਸਨ੍ਧਾਯ ਵਦਤਿ, ਤਤ੍ਥ ਪਨ ਪਞ੍ਞਤ੍ਤਿਵਾਰੇ ‘‘ਪਠਮਂ ਪਾਰਾਜਿਕਂ ਕਤ੍ਥ ਪਞ੍ਞਤ੍ਤਨ੍ਤਿ, ਵੇਸਾਲਿਯਂ ਪਞ੍ਞਤ੍ਤ’’ਨ੍ਤਿਆਦਿਨਾ (ਪਰਿ. ੧) ਨਿਦਾਨਮ੍ਪਿ ਦਿਸ੍ਸਤਿ ਏਵ. ਪਰਤੋਤਿ ਆਗਤਭਾਵਂ ਪਨ ਸਨ੍ਧਾਯ ਪਰਤੋ ਆਗਤੇ ਸੁਤ੍ਤੇ ਦਿਸ੍ਸਤੀਤਿ ਵੇਦਿਤਬ੍ਬਨ੍ਤਿ ਵੁਤ੍ਤਂ. ਤਸ੍ਸਾਤਿ ਉਭਤੋਵਿਭਙ੍ਗਪਰਿਯਾਪਨ੍ਨਸ੍ਸ ਸਿਕ੍ਖਾਪਦਸ੍ਸ.

੨੫੮. ਅਨਿਯਤਾ ਪਠਮਿਕਾਤਿ ਆਪਤ੍ਤਿਂ ਅਪੇਕ੍ਖਿਤ੍ਵਾਵ ਇਤ੍ਥਿਲਿਙ੍ਗਂ ਕਤਂ, ਪਠਮਾਨਿਯਤਂ ਸਿਕ੍ਖਾਪਦਨ੍ਤਿ ਅਤ੍ਥੋ. ਪਾਲ਼ਿਯਂ ਨਾਨੁਬਨ੍ਧੇ ਪਵਤ੍ਤਿਨਿਨ੍ਤਿ ਵੁਟ੍ਠਾਪਿਤਂ ਪਵਤ੍ਤਿਨਿਂ ਅਨਨੁਬਨ੍ਧਨਸਿਕ੍ਖਾਪਦਂ.

੨੬੦. ਏਲ਼ਕਲੋਮਸਿਕ੍ਖਾਪਦਵਤ੍ਥੁਸ੍ਮਿਂ ¶ ‘‘ਭਿਕ੍ਖੁਨਿਯੋ ਏਲ਼ਕਲੋਮਾਨਿ ਧੋਵਨ੍ਤਿਯੋ ਰਜਨ੍ਤਿਯੋ ਵਿਜਟੇਨ੍ਤਿਯੋ ਰਿਞ੍ਚਨ੍ਤਿ ਉਦ੍ਦੇਸਂ ਪਰਿਪੁਚ੍ਛ’’ਨ੍ਤਿ (ਪਾਰਾ. ੫੭੬) ਆਗਤਤ੍ਤਾ ਇਮਂ ਰਿਞ੍ਚਨ੍ਤਿ-ਪਦਂ ਗਹੇਤ੍ਵਾ ਸਿਕ੍ਖਾਪਦਂ ਉਪਲਕ੍ਖਿਤਨ੍ਤਿ ਦਸ੍ਸੇਨ੍ਤੋ ‘‘ਵਿਭਙ੍ਗੇ ‘ਰਿਞ੍ਚਨ੍ਤਿ ਉਦ੍ਦੇਸ’ਨ੍ਤਿ ਆਗਤਂ ਏਲ਼ਕਲੋਮਧੋਵਾਪਨਸਿਕ੍ਖਾਪਦ’’ਨ੍ਤਿ ਆਹ.

ਵਸ੍ਸਿਕਸਾਟਿਕਸਿਕ੍ਖਾਪਦਨ੍ਤਿ ¶ ਅਸਮਯੇ ਵਸ੍ਸਿਕਸਾਟਿਕਪਰਿਯੇਸਨਸਿਕ੍ਖਾਪਦਂ (ਪਾਰਾ. ੬੨੬ ਆਦਯੋ). ਰਤਨਸਿਕ੍ਖਾਪਦਨ੍ਤਿ ਰਤਨਂ ਵਾ ਰਤਨਸਮ੍ਮਤਂ ਵਾ ਪਟਿਸਾਮਨਸਿਕ੍ਖਾਪਦਂ (ਪਾਚਿ. ੫੦੨ ਆਦਯੋ).

੨੬੫. ਪਾਲ਼ਿਯਂ ਬੁਦ੍ਧਞਾਣੇਨਾਤਿ ਪਟਿਵਿਦ੍ਧਸਬ੍ਬਞ੍ਞੁਤਞ੍ਞਾਣੇਨ.

੨੬੭. ‘‘ਨ ਦੇਸੇਨ੍ਤਿ ਤਥਾਗਤਾ’’ਤਿ ਏਤੇਨ ਛਤ੍ਤਪਾਣਿਸ੍ਸ ਧਮ੍ਮਦੇਸਨਾਪਟਿਕ੍ਖੇਪਂ ਦਸ੍ਸੇਤਿ.

੨੬੯. ਅਕਤਨ੍ਤਿ ਅਞ੍ਞੇਹਿ ਅਮਿਸ੍ਸੀਕਤਂ, ਨਿਯਤਸਮੁਟ੍ਠਾਨਨ੍ਤਿ ਅਤ੍ਥੋ. ਅਕਤਨ੍ਤਿ ਵਾ ਪੁਬ੍ਬੇ ਅਨਾਗਤਂ, ਅਭਿਨਵਨ੍ਤਿ ਅਤ੍ਥੋ.

੨੭੦. ਸਮੁਟ੍ਠਾਨਞ੍ਹਿ ਸਙ੍ਖੇਪਨ੍ਤਿ ਏਤ੍ਥ ਸਙ੍ਖਿਪਨ੍ਤਿ ਸਙ੍ਗਯ੍ਹਨ੍ਤਿ ਸਦਿਸਸਮੁਟ੍ਠਾਨਾਨਿ ਏਤ੍ਥਾਤਿ ਸਙ੍ਖੇਪੋ, ਸਮੁਟ੍ਠਾਨਸੀਸਂ. ਨੇਤਿ ਵਿਨੇਤਿ ਕਾਯਵਚੀਦੁਚ੍ਚਰਿਤਨ੍ਤਿ ਨੇਤ੍ਤਿ, ਵਿਨਯਪਾਲ਼ਿ, ਸਾ ਏਵ ਧਮ੍ਮੋਤਿ ਨੇਤ੍ਤਿਧਮ੍ਮੋਤਿ ਆਹ ‘‘ਵਿਨਯਪਾਲ਼ਿਧਮ੍ਮਸ੍ਸਾ’’ਤਿ.

੨੭੧. ਕਤਿ ¶ ਆਪਤ੍ਤਿਯੋਤਿ ਪਾਰਾਜਿਕਾਦੀਸੁ ਪਞ੍ਚਸੁ ਆਪਤ੍ਤੀਸੁ ਮੇਥੁਨਾਦਿਨ੍ਨਾਦਾਨਾਦਿਅਨ੍ਤੋਗਧਭੇਦਂ ਅਪੇਕ੍ਖਿਤ੍ਵਾ ਜਾਤਿਵਸੇਨ ਏਕਤ੍ਤਂ ਆਰੋਪੇਤ੍ਵਾ ਪੁਚ੍ਛਾ ਕਤਾ. ਕਤਿ ਆਪਤ੍ਤਿਕ੍ਖਨ੍ਧਾਤਿ ਅਨ੍ਤੋਗਧਭੇਦਂ ਅਪੇਕ੍ਖਿਤ੍ਵਾ ਪਚ੍ਚੇਕਂ ਰਾਸਟ੍ਠੇਨਾਤਿ ਏਤ੍ਤਕਮੇਵੇਤ੍ਥ ਭੇਦੋ. ਵਿਨੀਤਾਨਿਯੇਵ ¶ ਵਿਨੀਤਵਤ੍ਥੂਨੀਤਿ ਆਪਤ੍ਤਿਤੋ ਵਿਰਮਣਾਨਿ ਏਵ ਅਵਿਪ੍ਪਟਿਸਾਰਪਾਮੋਜ੍ਜਾਦਿਧਮ੍ਮਾਨਂ ਕਾਰਣਤ੍ਤਾ ਵਤ੍ਥੂਨੀਤਿ ਵਿਨੀਤਵਤ੍ਥੂਨਿ, ਤਾਨਿ ਏਤ੍ਥ ਅਤ੍ਥਤੋ ਵਿਰਤਿਆਦਿਅਨਵਜ੍ਜਧਮ੍ਮਾ ਏਵ. ਵੇਰਂ ਮਣਤੀਤਿ ਵੇਰਹੇਤੁਤ੍ਤਾ ‘‘ਵੇਰ’’ਨ੍ਤਿ ਲਦ੍ਧਨਾਮਂ ਰਾਗਾਦਿਅਕੁਸਲਪਕ੍ਖਂ ਵਿਨਾਸੇਤਿ.

ਧਮ੍ਮਸ੍ਸਵਨਗ੍ਗਂ ਭਿਨ੍ਦਿਤ੍ਵਾ ਗਚ੍ਛਤੀਤਿ ਬਹੂਸੁ ਏਕਤੋ ਨਿਸੀਦਿਤ੍ਵਾ ਧਮ੍ਮਂ ਸੁਣਨ੍ਤੇਸੁ ਤਂ ਧਮ੍ਮਸ੍ਸਵਨਸਮਾਗਮਂ ਕੋਪੇਤ੍ਵਾ ਉਟ੍ਠਾਯ ਗਚ੍ਛਤਿ. ਅਨਾਦਰੋਵਾਤਿ ਤੁਸ੍ਸਿਤਬ੍ਬਟ੍ਠਾਨੇ ਤੁਟ੍ਠਿਂ, ਸਂਵਿਜਿਤਬ੍ਬਟ੍ਠਾਨੇ ਸਂਵੇਗਞ੍ਚ ਅਪਵੇਦੇਨ੍ਤੋ ਏਵ. ਕਾਯਪਾਗਬ੍ਭਿਯਨ੍ਤਿ ਉਨ੍ਨਤਿਵਸੇਨ ਪਵਤ੍ਤਨਕਾਯਾਨਾਚਾਰਂ.

੨੭੪. ਮੇਤ੍ਤਾਯ ਸਮ੍ਭੂਤਂ ਮੇਤ੍ਤਂ, ਕਾਯਕਮ੍ਮਂ. ਉਭਯੇਹਿਪੀਤਿ ਨਵਕੇਹਿ, ਥੇਰੇਹਿ ਚ. ਪਿਯਂ ਕਰੋਤੀਤਿ ਤਂ ਪੁਗ੍ਗਲਂ ਪੇਮਟ੍ਠਾਨਂ ਕਰੋਤਿ, ਕੇਸਨ੍ਤਿ ਆਹ ‘‘ਸਬ੍ਰਹ੍ਮਚਾਰੀਨ’’ਨ੍ਤਿ.

ਪੁਗ੍ਗਲਂ ਪਟਿਵਿਭਜਿਤ੍ਵਾ ਭੁਞ੍ਜਤੀਤਿ ਪਕਤੇਨ ਸਮ੍ਬਨ੍ਧੋ. ਤਮੇਵ ਪੁਗ੍ਗਲਪਟਿਵਿਭਾਗਂ ਦਸ੍ਸੇਤੁਂ ‘‘ਅਸੁਕਸ੍ਸਾ’’ਤਿਆਦਿ ਵੁਤ੍ਤਂ.

ਭੁਜਿਸ੍ਸਭਾਵਕਰਣਤੋਤਿ ਤਣ੍ਹਾਦਾਸਬ੍ਯਤੋ ਮੋਚੇਤ੍ਵਾ ਸਮਥਵਿਪਸ੍ਸਨਾਸੁ ਸੇਰਿਵਿਹਾਰਿਤਾਕਰਣਤੋਤਿ ਅਤ੍ਥੋ. ਨਿਯ੍ਯਾਤੀਤਿ ਪਵਤ੍ਤਤਿ. ਸਮ੍ਮਾਦੁਕ੍ਖਕ੍ਖਯਾਯ ਸਂਵਤ੍ਤਤੀਤਿ ਅਤ੍ਥੋ.

ਕਤਿਪੁਚ੍ਛਾਵਾਰਵਣ੍ਣਨਾ ਨਿਟ੍ਠਿਤਾ.

੨੭੬. ਪਠਮੇਨ ਆਪਤ੍ਤਿਸਮੁਟ੍ਠਾਨੇਨਾਤਿ ਕੇਵਲਂ ਕਾਯੇਨ. ਪਾਰਾਜਿਕਾਪਤ੍ਤਿਯਾ ਏਕਨ੍ਤਸਚਿਤ੍ਤਕਸਮੁਟ੍ਠਾਨਤ੍ਤਾ ‘‘ਨ ਹੀਤਿ ਵਤ੍ਤਬ੍ਬ’’ਨ੍ਤਿ ਵੁਤ੍ਤਂ. ਸਙ੍ਘਾਦਿਸੇਸਾਦੀਨਂ ¶ ਦੁਕ੍ਕਟਪਰਿਯੋਸਾਨਾਨਂ ਪਞ੍ਚਨ੍ਨਂ ਅਚਿਤ੍ਤਕਾਨਮ੍ਪਿ ਸਮ੍ਭਵਤੋ ‘‘ਸਿਯਾ’’ਤਿ ਵੁਤ੍ਤਂ, ਆਪਜ੍ਜਨਂ ਸਿਯਾ ਭਵੇਯ੍ਯਾਤਿ ਅਤ੍ਥੋ. ਹੀਨੁਕ੍ਕਟ੍ਠੇਹਿ ਜਾਤਿਆਦੀਹਿ ਓਮਸਨੇ ਏਵ ਦੁਬ੍ਭਾਸਿਤਸ੍ਸ ਪਞ੍ਞਤ੍ਤਤ੍ਤਾ ਸਾ ਏਕਨ੍ਤਵਾਚਾਚਿਤ੍ਤਸਮੁਟ੍ਠਾਨਾ ਏਵਾਤਿ.

ਦੁਤਿਯਸਮੁਟ੍ਠਾਨਨਯੇ ਵਾਚਾਯ ਏਵ ਸਮਾਪਜ੍ਜਿਤਬ੍ਬਪਾਟਿਦੇਸਨੀਯਸ੍ਸ ਅਭਾਵਾ ‘‘ਨ ਹੀ’’ਤਿ ਵੁਤ੍ਤਂ.

ਤਤਿਯੇ ¶ ਪਨ ਵੋਸਾਸਮਾਨਰੂਪਂ ਭਿਕ੍ਖੁਨਿਂ ਕਾਯਵਾਚਾਹਿ ਅਨਪਸਾਦਨਪਚ੍ਚਯਾ ਪਾਟਿਦੇਸਨੀਯਸਮ੍ਭਵਤੋ ‘‘ਸਿਯਾ’’ਤਿ ਵੁਤ੍ਤਂ.

ਓਮਸਨੇ ਪਾਚਿਤ੍ਤਿਯਸ੍ਸ ਅਦਿਨ੍ਨਾਦਾਨਸਮੁਟ੍ਠਾਨਤ੍ਤੇਪਿ ਤਪ੍ਪਚ੍ਚਯਾ ਪਞ੍ਞਤ੍ਤਸ੍ਸ ਦੁਬ੍ਭਾਸਿਤਸ੍ਸ ਪਞ੍ਚਮੇਨੇਵ ਸਮੁਪ੍ਪਤ੍ਤੀਤਿ ਦਸ੍ਸੇਤੁਂ ਚਤੁਤ੍ਥਵਾਰੇ ‘‘ਦੁਬ੍ਭਾਸਿਤਂ ਆਪਜ੍ਜੇਯ੍ਯਾਤਿ ਨ ਹੀਤਿ ਵਤ੍ਤਬ੍ਬ’’ਨ੍ਤਿ ਵਤ੍ਵਾ ਪਞ੍ਚਮਵਾਰੇ ‘‘ਸਿਯਾਤਿ ਵਤ੍ਤਬ੍ਬ’’ਨ੍ਤਿ ਵੁਤ੍ਤਂ. ਕਾਯਵਿਕਾਰੇਨੇਵ ਓਮਸਨ੍ਤਸ੍ਸ ਪਨੇਤ੍ਥ ਦੁਬ੍ਭਾਸਿਤਭਾਵੇਪਿ ਕਾਯਕੀਲ਼ਾਭਾਵਾਭਾਵਤੋ ਦੁਕ੍ਕਟਮੇਵਾਤਿ ਦਟ੍ਠਬ੍ਬਂ.

ਛਟ੍ਠਵਾਰੇ ਪਨ ਵਿਜ੍ਜਮਾਨੋਪਿ ਕਾਯੋ ਦੁਬ੍ਭਾਸਿਤਸ੍ਸ ਅਙ੍ਗਂ ਨ ਹੋਤਿ, ਪਞ੍ਚਮਸਮੁਟ੍ਠਾਨੇ ਏਵ ਛਟ੍ਠਮ੍ਪਿ ਪਵਿਸਤੀਤਿ ਦਸ੍ਸੇਤੁਂ ‘‘ਨ ਹੀ’’ਤਿ ਪਟਿਕ੍ਖਿਤ੍ਤਂ, ਨ ਪਨ ਤਤ੍ਥ ਸਬ੍ਬਥਾ ਦੁਬ੍ਭਾਸਿਤੇਨ ਅਨਾਪਤ੍ਤੀਤਿ ਦਸ੍ਸੇਤੁਂ. ਨ ਹਿ ਦਵਕਮ੍ਯਤਾਯ ਕਾਯਵਾਚਾਹਿ ਓਮਸਨ੍ਤਸ੍ਸ ਦੁਬ੍ਭਾਸਿਤਾਪਤ੍ਤਿ ਨ ਸਮ੍ਭਵਤਿ. ਯਞ੍ਹਿ ਪਞ੍ਚਮੇਨੇਵ ਸਮਾਪਜ੍ਜਤਿ, ਤਂ ਛਟ੍ਠੇਨਪਿ ਸਮਾਪਜ੍ਜਤਿ ਏਵ ਧਮ੍ਮਦੇਸਨਾਪਤ੍ਤਿ ਵਿਯਾਤਿ ਗਹੇਤਬ੍ਬਂ. ਸੇਸਂ ਸਮੁਟ੍ਠਾਨਵਾਰੇ ਸੁਵਿਞ੍ਞੇਯ੍ਯਮੇਵ.

ਛਆਪਤ੍ਤਿਸਮੁਟ੍ਠਾਨਵਾਰਵਣ੍ਣਨਾ ਨਿਟ੍ਠਿਤਾ.

੨੭੭. ਦੁਤਿਯੇ ਪਨ ਕਤਿਵਾਰੇ ਪਠਮਸਮੁਟ੍ਠਾਨੇਨ ਆਪਜ੍ਜਿਤਬ੍ਬਾਨਂ ਆਪਤ੍ਤੀਨਂ ਲਹੁਦਸ੍ਸਨਸੁਖਤ੍ਥਂ ਕੁਟਿਕਾਰਾਦੀਨਿ ਏਵ ਸਮੁਦ੍ਧਟਾਨਿ, ਨ ਅਞ੍ਞੇਸਂ ਅਭਾਵਾ, ਸਞ੍ਚਰਿਤ੍ਤਾਦੀਨਮ੍ਪਿ ਵਿਜ੍ਜਮਾਨਤ੍ਤਾ. ਏਵਂ ਦੁਤਿਯਸਮੁਟ੍ਠਾਨਾਦੀਸੁਪਿ. ‘‘ਕਪ੍ਪਿਯਸਞ੍ਞੀ’’ਤਿ ਇਮਿਨਾ ਅਚਿਤ੍ਤਕਤ੍ਤਂ ਦਸ੍ਸੇਤਿ. ‘‘ਕੁਟਿਂ ਕਰੋਤੀ’’ਤਿ ਇਮਿਨਾ ਵਚੀਪਯੋਗਾਭਾਵਂ. ਉਭਯੇਨਾਪਿ ਕੇਵਲਂ ਕਾਯੇਨੇਵ ਦੁਕ੍ਕਟਾਦੀਨਂ ਸਮ੍ਭਵਂ ਦਸ੍ਸੇਤਿ. ਏਵਂ ਉਪਰਿਪਿ ਯਥਾਨੁਰੂਪਂ ਕਾਤਬ੍ਬਂ.

‘‘ਏਕੇਨ ¶ ਸਮੁਟ੍ਠਾਨੇਨ ਸਮੁਟ੍ਠਹਨ੍ਤੀ’’ਤਿ ਇਦਂ ਇਧ ਵਿਸੇਸੇਤ੍ਵਾ ਦਸ੍ਸਿਤਾਨਂ ਕਾਯਤੋਵ ਸਮੁਟ੍ਠਿਤਾਨਂ ਵਸੇਨ ਵੁਤ੍ਤਂ, ਅਵਿਸੇਸਤੋ ਪਨ ਤਾ ਆਪਤ੍ਤਿਯੋ ਇਤਰਸਮੁਟ੍ਠਾਨੇਹਿਪਿ ਯਥਾਰਹਂ ਸਮੁਟ੍ਠਹਨ੍ਤਿ ਏਵ. ਏਵਂ ਉਪਰਿਪਿ.

‘‘ਤਿਣਵਤ੍ਥਾਰਕੇਨ ਚਾ’’ਤਿ ਇਦਂ ਸਙ੍ਘਾਦਿਸੇਸਵਜ੍ਜਿਤਾਨਂ ਚਤੁਨ੍ਨਂ ਆਪਤ੍ਤੀਨਂ ਵਸੇਨ ਵੁਤ੍ਤਂ.

੨੭੯. ਸਂਵਿਦਹਿਤ੍ਵਾ ¶ ਕੁਟਿਂ ਕਰੋਤੀਤਿ ਵਾਚਾਯ ਸਂਵਿਦਹਤਿ, ਸਯਞ੍ਚ ਕਾਯੇਨ ਕਰੋਤੀਤਿ ਅਤ੍ਥੋ.

੨੮੩. ਤਤਿਯੋ ਪਨ ਗਾਥਾਵਾਰੋ ਦੁਤਿਯਵਾਰੇਨ ਵੁਤ੍ਤਮੇਵਤ੍ਥਂ ਸਙ੍ਗਹੇਤ੍ਵਾ ਦਸ੍ਸੇਤੁਂ ਵੁਤ੍ਤੋ. ਤਤ੍ਥ ਕਾਯੋਵ ਕਾਯਿਕੋਤਿ ਵਤ੍ਤਬ੍ਬੇ ਵਚਨਵਿਪਲ੍ਲਾਸੇਨ ‘‘ਕਾਯਿਕਾ’’ਤਿ ਵੁਤ੍ਤਂ. ਤੇਨਾਹ ‘‘ਤੇਨ ਸਮੁਟ੍ਠਿਤਾ’’ਤਿ, ਕਾਯੋ ਸਮੁਟ੍ਠਾਨਂ ਅਕ੍ਖਾਤੋਤਿ ਅਤ੍ਥੋ.

ਵਿਵੇਕਦਸ੍ਸਿਨਾਤਿ ਸਬ੍ਬਸਙ੍ਖਤਵਿਵਿਤ੍ਤਤ੍ਤਾ, ਤਤੋ ਵਿਵਿਤ੍ਤਹੇਤੁਤ੍ਤਾ ਚ ਨੀਵਰਣਵਿਵੇਕਞ੍ਚ ਨਿਬ੍ਬਾਨਞ੍ਚ ਦਸ੍ਸਨਸੀਲੇਨ. ਵਿਭਙ੍ਗਕੋਵਿਦਾਤਿ ਉਭਤੋਵਿਭਙ੍ਗਕੁਸਲਾਤਿ ਆਲਪਨਂ. ਇਧ ਪਨੇਵਂ ਅਞ੍ਞੋ ਪੁਚ੍ਛਨ੍ਤੋ ਨਾਮ ਨਤ੍ਥਿ, ਉਪਾਲਿਤ੍ਥੇਰੋ ਸਯਮੇਵ ਅਤ੍ਥਂ ਪਾਕਟਂ ਕਾਤੁਂ ਪੁਚ੍ਛਾਵਿਸਜ੍ਜਨਞ੍ਚ ਅਕਾਸੀਤਿ ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

ਆਪਤ੍ਤਿਸਮੁਟ੍ਠਾਨਗਾਥਾਵਣ੍ਣਨਾ ਨਿਟ੍ਠਿਤਾ.

੨੮੪. ਚਤੁਤ੍ਥੇ ਪਨ ਵਿਪਤ੍ਤਿਪਚ੍ਚਯਵਾਰੇ ਸੀਲਵਿਪਤ੍ਤਿਪਚ੍ਚਯਾਤਿ ਸੀਲਵਿਪਤ੍ਤਿਪਅਚ੍ਛਾਦਨਪਚ੍ਚਯਾ.

੨੮੬. ਦਿਟ੍ਠਿਵਿਪਤ੍ਤਿਪਚ੍ਚਯਾਤਿ ਦਿਟ੍ਠਿਵਿਪਤ੍ਤਿਯਾ ਅਪ੍ਪਟਿਨਿਸ੍ਸਜ੍ਜਨਪਚ੍ਚਯਾ.

੨੮੭. ਆਜੀਵਵਿਪਤ੍ਤਿਪਚ੍ਚਯਾਤਿ ¶ ਏਤ੍ਥ ਆਗਮ੍ਮ ਜੀਵਨ੍ਤਿ ਏਤੇਨਾਤਿ ਆਜੀਵੋ, ਚਤੁਪਚ੍ਚਯੋ, ਸੋਵ ਮਿਚ੍ਛਾਪਤ੍ਤਿਯਾ ਵਿਪਨ੍ਨਤ੍ਤਾ ਵਿਪਤ੍ਤੀਤਿ ਆਜੀਵਵਿਪਤ੍ਤਿ, ਤਸ੍ਸਾ ਆਜੀਵਵਿਪਤ੍ਤਿਯਾ ਹੇਤੁ, ਤਦੁਪ੍ਪਾਦਨਤਪਰਿਭੋਗਨਿਮਿਤ੍ਤਨ੍ਤਿ ਅਤ੍ਥੋ.

ਵਿਪਤ੍ਤਿਪਚ੍ਚਯਵਾਰਵਣ੍ਣਨਾ ਨਿਟ੍ਠਿਤਾ.

੨੯੧. ਪਞ੍ਚਮੇ ¶ ਅਧਿਕਰਣਪਚ੍ਚਯਵਾਰੇ ਕਿਚ੍ਚਾਧਿਕਰਣਪਚ੍ਚਯਾਤਿ ਅਪਲੋਕਨਵਚਨਞਤ੍ਤਿਕਮ੍ਮਵਾਚਾਸਙ੍ਖਤਕਮ੍ਮਵਾਚਾਪਚ੍ਚਯਾ. ਪਞ੍ਚਾਤਿ ਏਤ੍ਥ ਅਧਮ੍ਮਿਕਕਤਿਕਾਦਿਂ ਅਪਲੋਕੇਤ੍ਵਾ ਕਰੋਨ੍ਤਾਨਂ ਅਨਿਮਿਤ੍ਤਨ੍ਤਿ ਅਤ੍ਥੋ. ਪਞ੍ਚਮੇ ਅਧਿਕਰਣਪਚ੍ਚਯਵਾਰੇ ਕਿਚ੍ਚਾਧਿਕਰਣਪਚ੍ਚਯਾ ਅਪਲੋਕਨਾਵਸਾਨੇ ਦੁਕ੍ਕਟਂ, ਅਧਿਪ੍ਪਾਯਾਦਿਨਾ ਞਤ੍ਤਿਕਮ੍ਮਾਦਿਂ ਕਰੋਨ੍ਤਾਨਂ ਥੁਲ੍ਲਚ੍ਚਯਾਦਿ ਚ ਸਙ੍ਗਯ੍ਹਤੀਤਿ ਦਟ੍ਠਬ੍ਬਂ. ਅਵਸੇਸਾ ਆਪਤ੍ਤਿਯੋਤਿ ਸੋਤਾਪਤ੍ਤਿਫਲਸਮਾਪਤ੍ਤਿਆਦਯੋ. ‘‘ਨਤ੍ਥਞ੍ਞਾ ਆਪਤ੍ਤਿਯੋ’’ਤਿ ਇਦਂ ਵਿਪਤ੍ਤਿਆਦਿਭਾਗਿਨਿਯੋ ਸਾਵਜ੍ਜਾਪਤ੍ਤਿਯੋ ਸਨ੍ਧਾਯ ਵੁਤ੍ਤਂ.

ਅਧਿਕਰਣਪਚ੍ਚਯਵਾਰਵਣ੍ਣਨਾ ਨਿਟ੍ਠਿਤਾ.

੨੯੩. ਛਟ੍ਠੇ ¶ ਪਰਿਯਾਯਵਾਰੇ ਅਲੋਭੋ ਪੁਬ੍ਬਙ੍ਗਮੋਤਿਆਦਿ ਸਾਸਨਟ੍ਠਿਤਿਯਾ ਅਵਿਪਰੀਤਤੋ ਧਮ੍ਮਵਾਦਿਸ੍ਸ ਵਿਵਾਦਂ ਸਨ੍ਧਾਯ ਵੁਤ੍ਤਂ. ਅਟ੍ਠਾਰਸ ਭੇਦਕਰਵਤ੍ਥੂਨਿ ਠਾਨਾਨੀਤਿ ਧਮ੍ਮਾਦੀਸੁ ਅਧਮ੍ਮੋਤਿਆਦਿਨਾ ਗਹੇਤ੍ਵਾ ਦੀਪਨਾਨਿ ਇਧੇਵ ਭੇਦਕਰਵਤ੍ਥੂਨਿ, ਤਾਨਿ ਏਵ ਕਾਯਕਲਹਾਦਿਵਿਵਾਦਸ੍ਸ ਕਾਰਣਤ੍ਤਾ ਠਾਨਾਨਿ, ਓਕਾਸਤ੍ਤਾ ਵਤ੍ਥੂਨਿ, ਆਧਾਰਤ੍ਤਾ ਭੂਮਿਯੋਤਿ ਚ ਵੁਤ੍ਤਾਨਿ. ਅਬ੍ਯਾਕਤਹੇਤੂਤਿ ਅਸੇਕ੍ਖਾਨਂ ਵਿਵਾਦਂ ਸਨ੍ਧਾਯ ਵੁਤ੍ਤਂ. ਦ੍ਵਾਦਸ ਮੂਲਾਨੀਤਿ ਕੋਧੋ ਉਪਨਾਹੋ, ਮਕ੍ਖੋ ਪਲਾਸੋ, ਇਸ੍ਸਾ ਮਚ੍ਛਰਿਯਂ, ਮਾਯਾ ਸਾਠੇਯ੍ਯਂ, ਪਾਪਿਚ੍ਛਤਾ ਮਹਿਚ੍ਛਤਾ, ਸਨ੍ਦਿਟ੍ਠਿਪਰਾਮਾਸਿਤਾ ਆਧਾਨਗ੍ਗਾਹੀਦੁਪ੍ਪਟਿਨਿਸ੍ਸਜ੍ਜਿਤਾਨੀਤਿ ਇਮੇਸਂ ਛਨ੍ਨਂ ਯੁਗਲ਼ਾਨਂ ਵਸੇਨ ਛ ਧਮ੍ਮਾ ਚੇਵ ਲੋਭਾਦਯੋ ਛ ਹੇਤੂ ਚਾਤਿ ਦ੍ਵਾਦਸ ਧਮ੍ਮਾ ਵਿਵਾਦਾਧਿਕਰਣਸ੍ਸ ਮੂਲਾਨਿ.

੨੯੪. ਚੁਦ੍ਦਸ ਮੂਲਾਨੀਤਿ ਤਾਨੇਵ ਦ੍ਵਾਦਸ ਕਾਯਵਾਚਾਹਿ ਸਦ੍ਧਿਂ ਚੁਦ੍ਦਸ ਅਨੁਵਾਦਾਧਿਕਰਣਸ੍ਸ ਮੂਲਾਨਿ.

੨੯੫. ਪਥਵੀਖਣਨਾਦੀਸੁ ਪਣ੍ਣਤ੍ਤਿਵਜ੍ਜੇਸੁ ਕੁਸਲਾਬ੍ਯਾਕਤਚਿਤ੍ਤਮੂਲਿਕਾ ਆਪਤ੍ਤਿ ਹੋਤੀਤਿ ਦਸ੍ਸੇਤੁਂ ‘‘ਅਲੋਭੋ ਪੁਬ੍ਬਙ੍ਗਮੋ’’ਤਿਆਦਿ ਵੁਤ੍ਤਂ. ਸਤ੍ਤ ਆਪਤ੍ਤਿਕ੍ਖਨ੍ਧਾ ਠਾਨਾਨੀਤਿਆਦਿ ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ¶ ਪਟਿਚ੍ਛਾਦਨਪਚ੍ਚਯਾ ਆਪਤ੍ਤਿਸਮ੍ਭਵਤੋ ਵੁਤ੍ਤਂ. ‘‘ਆਪਤ੍ਤਾਧਿਕਰਣਪਚ੍ਚਯਾ ਚਤਸ੍ਸੋ ਆਪਤ੍ਤਿਯੋ ਆਪਜ੍ਜਤੀ’’ਤਿ (ਪਰਿ. ੨੯੦) ਹਿ ਵੁਤ੍ਤਂ. ‘‘ਛ ਹੇਤੂ’’ਤਿ ਇਦਂ ਕੁਸਲਾਨਂ ਆਪਤ੍ਤਿਹੇਤੁਵੋਹਾਰਸ੍ਸ ਅਯੁਤ੍ਤਤਾਯ ਵੁਤ੍ਤਂ, ਨ ਪਨ ਕੁਸਲਹੇਤੂਨਂ ਅਭਾਵਤੋ. ‘‘ਅਲੋਭੋ ਪੁਬ੍ਬਙ੍ਗਮੋ’’ਤਿ ਹਿ ਆਦਿ ਵੁਤ੍ਤਂ. ਆਪਤ੍ਤਿਹੇਤਵੋ ਏਵ ਹਿ ਪੁਬ੍ਬਙ੍ਗਮਨਾਮੇਨ ਵੁਤ੍ਤਾ.

੨੯੬. ਚਤ੍ਤਾਰਿ ਕਮ੍ਮਾਨਿ ਠਾਨਾਨੀਤਿਆਦੀਸੁ ਅਪਲੋਕਨਵਾਚਾ, ਞਤ੍ਤਿਆਦਿਵਾਚਾਯੋ ਚ ਕਮ੍ਮਾਨੀਤਿ ਵੁਤ੍ਤਂ. ਤਾ ਏਵ ਹਿ ਏਕਸੀਮਾਯਂ ਸਾਮਗ੍ਗਿਮੁਪਗਤਾਨਂ ਕਮ੍ਮਪ੍ਪਤ੍ਤਾਨਂ ਅਨੁਮਤਿਯਾ ਸਾਵਨਕਿਰਿਯਾਨਿਪ੍ਫਤ੍ਤਿਸਙ੍ਖਾਤਸ੍ਸ ਸਙ੍ਘਗਣਕਿਚ੍ਚਸਭਾਵਸ੍ਸ ਕਿਚ੍ਚਾਧਿਕਰਣਸ੍ਸ ਅਧਿਟ੍ਠਾਨਾਭਾਵੇਨ ‘‘ਠਾਨਵਤ੍ਥੁਭੂਮਿਯੋ’’ਤਿ ਵੁਚ੍ਚਨ੍ਤਿ. ਏਕਂ ਮੂਲਂ ਸਙ੍ਘੋਤਿ ਯੇਭੁਯ੍ਯਵਸੇਨ ਵੁਤ੍ਤਂ. ਗਣਞਤ੍ਤਿਅਪਲੋਕਨਾਨਞ੍ਹਿ ¶ ਗਣੋਪਿ ਮੂਲਨ੍ਤਿ. ਞਤ੍ਤਿਤੋ ਵਾਤਿ ਞਤ੍ਤਿਞਤ੍ਤਿਦੁਤਿਯਞਤ੍ਤਿਚਤੁਤ੍ਥਕਮ੍ਮਵਾਚਾਨਂ ਞਤ੍ਤਿਰੂਪਤ੍ਤਾ, ਞਤ੍ਤਿਪੁਬ੍ਬਕਤ੍ਤਾ ਚ ਵੁਤ੍ਤਂ. ਕਮ੍ਮਞਤ੍ਤਿਕਮ੍ਮਵਾਚਾਞਤ੍ਤਿਵਸੇਨ ਹਿ ਦੁਵਿਧਾਸੁ ਞਤ੍ਤੀਸੁ ਅਨੁਸ੍ਸਾਵਨਾਪਿ ਕਮ੍ਮਮੂਲਕਨ੍ਤ੍ਵੇਵ ਸਙ੍ਗਯ੍ਹਨ੍ਤਿ. ਞਤ੍ਤਿਵਿਭਾਗੋ ਚਾਯਂ ਉਪਰਿ ਆਵਿ ਭਵਿਸ੍ਸਤਿ.

‘‘ਇਮੇ ਸਤ੍ਤ ਸਮਥਾ…ਪੇ… ਪਰਿਯਾਯੇਨਾ’’ਤਿ ਇਦਂ ਪੁਚ੍ਛਾਵਚਨਂ. ‘‘ਸਿਯਾ’’ਤਿ ਇਦਂ ਵਿਸਜ੍ਜਨਂ. ‘‘ਕਥਞ੍ਚ ਸਿਯਾ’’ਤਿ ਇਦਂ ਪੁਨ ਪੁਚ੍ਛਾ. ਵਿਵਾਦਾਧਿਕਰਣਸ੍ਸ ਦ੍ਵੇ ਸਮਥਾਤਿਆਦਿ ਪੁਨ ਵਿਸਜ੍ਜਨਂ. ਤਤ੍ਥ ‘‘ਵਤ੍ਥੁਵਸੇਨਾ’’ਤਿ ਇਦਂ ‘‘ਸਤ੍ਤ ਸਮਥਾ ਦਸ ਸਮਥਾ ਹੋਨ੍ਤੀ’’ਤਿ ਇਮਸ੍ਸ ਕਾਰਣਵਚਨਂ. ‘‘ਪਰਿਯਾਯੇਨਾ’’ਤਿ ਇਦਂ ‘‘ਦਸ ਸਮਥਾ ਸਤ੍ਤ ਸਮਥਾ ਹੋਨ੍ਤੀ’’ਤਿ ਇਮਸ੍ਸ ਕਾਰਣਵਚਨਂ. ਚਤੁਬ੍ਬਿਧਾਧਿਕਰਣਸਙ੍ਖਾਤਵਤ੍ਥੁਵਸੇਨ ਚ ਦੇਸਨਾਕ੍ਕਮਸਙ੍ਖਾਤਪਰਿਯਾਯਵਸੇਨ ਚਾਤਿ ਅਤ੍ਥੋ.

ਅਧਿਕਰਣਪਰਿਯਾਯਵਾਰਵਣ੍ਣਨਾ ਨਿਟ੍ਠਿਤਾ.

੨੯੭. ਸਤ੍ਤਮੇ ਸਾਧਾਰਣਵਾਰੇ ਸਾਧਾਰਣਾਤਿ ਵਿਵਾਦਾਧਿਕਰਣਸ੍ਸ ਵੂਪਸਮਨਕਿਚ੍ਚਸਾਧਾਰਣਾ. ਏਵਂ ਸਬ੍ਬਤ੍ਥ.

੨੯੮. ਅਟ੍ਠਮੇ ਤਬ੍ਭਾਗਿਯਵਾਰੇ ਤਬ੍ਭਾਗਿਯਾਤਿ ਵਿਵਾਦਾਧਿਕਰਣਸ੍ਸ ਵੂਪਸਮਨਤੋ ਤਪ੍ਪਕ੍ਖਿਕਾ.

ਸਾਧਾਰਣਵਾਰਾਦਿਵਣ੍ਣਨਾ ਨਿਟ੍ਠਿਤਾ.

੨੯੯. ਨਵਮੇ ¶ ਸਮਥਾਸਮਥਸਾਧਾਰਣਵਾਰੇ ‘‘ਸਬ੍ਬੇ ਸਮਥਾ ਏਕਤੋਵ ਅਧਿਕਰਣਂ ਸਮੇਨ੍ਤਿ ਉਦਾਹੁ ਨਾਨਾ’’ਤਿ ਪੁਚ੍ਛਨ੍ਤੇਨ ‘‘ਸਮਥਾ ਸਮਥਸ੍ਸ ਸਾਧਾਰਣਾ, ਸਮਥਾ ਸਮਥਸ੍ਸ ਅਸਾਧਾਰਣਾ’’ਤਿ ਵੁਤ੍ਤਂ. ਵਿਵਾਦਾਦਿਅਧਿਕਰਣਕ੍ਕਮੇਨ ਤਬ੍ਬੂਪਸਮਹੇਤੁਭੂਤੇ ਸਮਥੇ ਉਦ੍ਧਰਨ੍ਤੋ ‘‘ਯੇਭੁਯ੍ਯਸਿਕਾ’’ਤਿਆਦਿਮਾਹ. ਸਮ੍ਮੁਖਾਵਿਨਯਂ ਵਿਨਾ ਕਸ੍ਸਚਿ ਸਮਥਸ੍ਸ ਅਸਮ੍ਭਵਾ ਸੇਸਾ ਛਪਿ ਸਮਥਾ ਸਮ੍ਮੁਖਾਵਿਨਯਸ੍ਸ ਸਾਧਾਰਣਾ ਵੁਤ੍ਤਾ, ਤੇਸਂ ¶ ਪਨ ਛਨ੍ਨਂ ਅਞ੍ਞਮਞ੍ਞਾਪੇਕ੍ਖਾਭਾਵਤੋ ਤੇ ਅਞ੍ਞਮਞ੍ਞਂ ਅਸਾਧਾਰਣਾ ਵੁਤ੍ਤਾ. ਤਬ੍ਭਾਗਿਯਵਾਰੇਪਿ ਏਸੇਵ ਨਯੋ.

ਸਮਥਾਸਮਥਸ੍ਸਸਾਧਾਰਣਵਾਰਵਣ੍ਣਨਾ ਨਿਟ੍ਠਿਤਾ.

੩੦੧-੩. ਏਕਾਦਸਮਵਾਰੇਪਿ ਸਮ੍ਮੁਖਾਵਿਨਯੋਤਿਆਦਿ ਪੁਚ੍ਛਾ. ਯੇਭੁਯ੍ਯਸਿਕਾ ਸਤਿਵਿਨਯੋਤਿਆਦਿ ਵਿਸਜ੍ਜਨਂ. ਏਵਂ ਵਿਨਯਵਾਰੇ ਕੁਸਲ-ਵਾਰੇ ਤਤੋ ਪਰੇਸੁਪਿ ਪੁਚ੍ਛਾਵਿਸਜ੍ਜਨਪਰਿਚ੍ਛੇਦੋ ਵੇਦਿਤਬ੍ਬੋ.

ਤਤ੍ਥ ਸਮ੍ਮੁਖਾਵਿਨਯੋ ਸਿਯਾ ਕੁਸਲੋਤਿਆਦੀਸੁ ਤਸ੍ਮਿਂ ਤਸ੍ਮਿਂ ਵਿਨਯਕਮ੍ਮੇ, ਵਿਵਾਦਾਦਿਮ੍ਹਿ ਚ ਨਿਯੁਤ੍ਤਪੁਗ੍ਗਲਾਨਂ ਸਮੁਪ੍ਪਜ੍ਜਨਕਕੁਸਲਾਦੀਨਂ ਵਸੇਨ ਸਮ੍ਮੁਖਾਵਿਨਯਾਦੀਨਂ, ਵਿਵਾਦਾਦੀਨਞ੍ਚ ਕੁਸਲਾਦਿਭਾਵੋ ਤੇਨ ਤੇਨ ਉਪਚਾਰੇਨ ਵੁਤ੍ਤੋ. ਯਸ੍ਮਾ ਪਨੇਤਸ੍ਸ ਸਮ੍ਮੁਖਾਵਿਨਯੋ ਨਾਮ ਸਙ੍ਘਸਮ੍ਮੁਖਤਾਦਯੋ ਹੋਨ੍ਤਿ, ਤੇਸਞ੍ਚ ਅਨਵਜ੍ਜਸਭਾਵਤ੍ਤਾ ਅਕੁਸਲੇ ਵਿਜ੍ਜਮਾਨੇਪਿ ਅਕੁਸਲਤ੍ਤੂਪਚਾਰੋ ਨ ਯੁਤ੍ਤੋ ਆਪਤ੍ਤਾਧਿਕਰਣਸ੍ਸ ਅਕੁਸਲਤ੍ਤੂਪਚਾਰੋ ਵਿਯ, ਤਸ੍ਮਾ ਨਤ੍ਥਿ ਸਮ੍ਮੁਖਾਵਿਨਯੋ ਅਕੁਸਲੋਤਿ ਅਤ੍ਥੋ.

੩੦੪. ਤਤੋ ਪਰੇਸੁ ਯਤ੍ਥ ਯੇਭੁਯ੍ਯਸਿਕਾ ਲਬ੍ਭਤਿ, ਤਤ੍ਥ ਸਮ੍ਮੁਖਾਵਿਨਯੋ ਲਬ੍ਭਤੀਤਿਆਦਿ ਸਮ੍ਮੁਖਾਵਿਨਯਸ੍ਸ ਇਤਰੇਹਿ ਸਮਥੇਹਿ ਨਿਯਮੇਨ ਸਂਸਟ੍ਠਤਂ, ਇਤਰੇਸਂ ਪਨ ਛਨ੍ਨਂ ਅਞ੍ਞਮਞ੍ਞਂ ਸਂਸਗ੍ਗਾਭਾਵਞ੍ਚ ਦਸ੍ਸੇਤੁਂ ਵੁਤ੍ਤਂ.

ਸਮਥਸਮ੍ਮੁਖਾਵਿਨਯਵਾਰਾਦਿਵਣ੍ਣਨਾ ਨਿਟ੍ਠਿਤਾ.

੩੦੬. ਅਧਿਕਰਣਨ੍ਤਿ ¶ ਵਾ ਸਮਥਾਤਿ ਵਾ ਇਮੇ ਧਮ੍ਮਾ ਸਂਸਟ੍ਠਾਤਿਆਦਿ ਸਮਥਾਨਂ ਅਧਿਕਰਣੇਸੁ ਏਵ ਯਥਾਰਹਂ ਪਵਤ੍ਤਿਂ, ਅਧਿਕਰਣਾਨਿ ਵਿਨਾ ਤੇਸਂ ਵਿਸੁਂ ਅਟ੍ਠਾਨਞ੍ਚ ਦਸ੍ਸੇਤੁਂ ਵੁਤ੍ਤਂ. ਵਿਨਿਬ੍ਭੁਜਿਤ੍ਵਾ ਨਾਨਾਕਰਣਂ ਪਞ੍ਞਾਪੇਤੁਨ੍ਤਿ ਅਧਿਕਰਣਤੋ ਸਮਥੇਹਿ ਵਿਯੋਜੇਤ੍ਵਾ ਅਸਂਸਟ੍ਠੇ ਕਤ੍ਵਾ ਨਾਨਾਕਰਣਂ ਅਞ੍ਞਮਞ੍ਞਂ ਅਸਂਸਟ੍ਠਤਾਯ ਠਿਤਭਾਵਸਙ੍ਖਾਤਂ ਨਾਨਤ੍ਤਂ ਪਞ੍ਞਾਪੇਤੁਂ ਅਧਿਕਰਣਵੂਪਸਮਕ੍ਖਣੇ ਏਵ ਤੇਸਂ ਅਸਂਸਗ੍ਗਂ ਪਞ੍ਞਾਪੇਤੁਂ ਕਿਂ ਸਕ੍ਕਾਤਿ ਪੁਚ੍ਛਤਿ.

ਅਧਿਕਰਣਨ੍ਤਿਆਦਿ ¶ ਗਾਰਯ੍ਹਵਾਦਦਸ੍ਸਨਂ. ਸੋ ਮਾ ਹੇਵਨ੍ਤਿ ਯੋ ਏਵਂ ਵਦਤਿ, ਸੋ ‘‘ਮਾ ਏਵਂ ਵਦਾ’’ਤਿ ਵਚਨੀਯੋ ਅਸ੍ਸ, ਨ ਚ ਲਬ੍ਭਤਿ ਸਮਥਾਨਂ ਅਞ੍ਞਤ੍ਰ ਅਧਿਕਰਣਾ ਵੂਪਸਮਲਕ੍ਖਣਨ੍ਤਿ ਪਹਾਨਾਵਤ੍ਥਾਨਸਙ੍ਖਾਤਂ ਨਾਨਾਕਰਣਂ ਪਟਿਕ੍ਖਿਪਤਿ. ਲਕ੍ਖਣਤੋ ਪਨ ਅਧਿਕਰਣੇਹਿ ਸਮਥਾਨਂ ਨਾਨਾਕਰਣਂ ਅਤ੍ਥੇਵਾਤਿ ਦਟ੍ਠਬ੍ਬਂ. ਸਮਥਾ ਅਧਿਕਰਣੇਹਿ ਸਮ੍ਮਨ੍ਤੀਤਿ ਅਪਲੋਕਨਾਦੀਹਿ ਚਤੂਹਿ ਕਿਚ੍ਚਾਧਿਕਰਣੇਹਿ ਸਬ੍ਬੇਪਿ ਸਮਥਾ ਨਿਟ੍ਠਾਨਂ ਗਚ੍ਛਨ੍ਤਿ, ਨਾਞ੍ਞੇਹੀਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਂ. ਤੇਨੇਵ ਵਕ੍ਖਤਿ ‘‘ਸਮ੍ਮੁਖਾਵਿਨਯੋ ਵਿਵਾਦਾਧਿਕਰਣੇਨ ਨ ਸਮ੍ਮਤਿ. ਅਨੁਵਾਦ…ਪੇ… ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ, ਕਿਚ੍ਚਾਧਿਕਰਣੇਨ ਸਮ੍ਮਤੀ’’ਤਿਆਦਿ (ਪਰਿ. ੩੧੧).

੩੦੭-੩੧੩. ਵਿਵਾਦਾਧਿਕਰਣਂ ਕਤਿਹਿ ਸਮਥੇਹਿ ਸਮ੍ਮਤੀਤਿਆਦਿਕੋ ਸਮ੍ਮਤਿਵਾਰੋ. ਤਦਨਨ੍ਤਰੋ ਸਮ੍ਮਤਿਨਸਮ੍ਮਤਿਵਾਰੋ ਚ ਅਧਿਕਰਣੇਹਿ ਸਮਥਾਨਂ ਸਂਸਟ੍ਠਤਂ, ਵਿਸਂਸਟ੍ਠਤਞ੍ਚ ਦਸ੍ਸੇਤੁਂ ਵੁਤ੍ਤੋ. ਸਮਥਾ ਸਮਥੇਹਿ ਸਮ੍ਮਨ੍ਤੀਤਿਆਦਿਕੋ ਸਮਥਾਧਿਕਰਣਵਾਰੋ ਸਮਥਾਨਂ ਅਞ੍ਞਮਞ੍ਞਂ, ਅਧਿਕਰਣੇਹਿ ਚ ਅਧਿਕਰਣਾਨਞ੍ਚ ਅਞ੍ਞਮਞ੍ਞਂ, ਸਮਥੇਹਿ ਚ ਵੂਪਸਮਾਵੂਪਸਮਂ ਦਸ੍ਸੇਤੁਂ ਵੁਤ੍ਤੋ.

੩੧੪. ਸਮੁਟ੍ਠਾਪੇਤਿਵਾਰੋ ਪਨ ਅਧਿਕਰਣੇਹਿ ਅਧਿਕਰਣਾਨਂ ਉਪ੍ਪਤ੍ਤਿਪ੍ਪਕਾਰਦਸ੍ਸਨਤ੍ਥਂ ਵੁਤ੍ਤੋ. ਨ ਕਤਮਂ ਅਧਿਕਰਣਨ੍ਤਿ ਅਤ੍ਤਨੋ ਸਮ੍ਭਵਮਤ੍ਤੇਨ ਏਕਮ੍ਪਿ ਅਧਿਕਰਣਂ ਨ ਸਮੁਟ੍ਠਾਪੇਤੀਤਿ ਅਤ੍ਥੋ. ਕਥਞ੍ਚਰਹਿ ਸਮੁਟ੍ਠਾਪੇਤੀਤਿ ਆਹ ‘‘ਅਪਿ ਚਾ’’ਤਿਆਦਿ. ਤਤ੍ਥ ਜਾਯਨ੍ਤੀਤਿ ਅਨਨ੍ਤਰਮੇਵ ਅਨੁਪ੍ਪਜ੍ਜਿਤ੍ਵਾ ਪਰਮ੍ਪਰਪਚ੍ਚਯਾ ਜਾਯਨ੍ਤੀਤਿ ਅਧਿਪ੍ਪਾਯੋ. ‘‘ਧਮ੍ਮੋ ਅਧਮ੍ਮੋ’’ਤਿਆਦਿਨਾ ਉਭਿਨ੍ਨਂ ਪੁਗ੍ਗਲਾਨਂ ਵਿਵਾਦਪਚ੍ਚਯਾ ਅਞ੍ਞਮਞ੍ਞਖੇਮਭਙ੍ਗਾ ਹੋਨ੍ਤਿ, ਤਪ੍ਪਚ੍ਚਯਾ ਤੇਸਂ ਪਕ੍ਖਂ ਪਰਿਯੇਸਨੇਨ ਕਲਹਂ ਵਡ੍ਢਨ੍ਤਾਨਂ ਵਿਵਾਦੋ ਕਞ੍ਚਿ ਮਹਾਪਰਿਸਂ ਸਙ੍ਘਪਰਿਣਾਯਕਂ ਲਜ੍ਜਿਂ ਆਗਮ੍ਮ ਵੂਪਸਮਂ ਗਚ੍ਛਤਿ. ਤਥਾ ਅਵੂਪਸਮਨ੍ਤੇ ਪਨ ਵਿਵਾਦੋ ਕਮੇਨ ਵਡ੍ਢਿਤ੍ਵਾ ਸਕਲੇਪਿ ਸਙ੍ਘੇ ਵਿਵਾਦਂ ਸਮੁਟ੍ਠਾਪੇਤਿ, ਤਤੋ ਅਨੁਵਾਦਾਦੀਨੀਤਿ ਏਵਂ ਪਰਮ੍ਪਰਕ੍ਕਮੇਨ ਵੂਪਸਮਕਾਰਣਾਭਾਵੇ ਚਤ੍ਤਾਰਿ ਅਧਿਕਰਣਾਨਿ ਜਾਯਨ੍ਤਿ. ਤਂ ਸਨ੍ਧਾਯਾਹ ¶ ‘‘ਸਙ੍ਘੋ ਵਿਵਦਤਿ ਵਿਵਾਦਾਧਿਕਰਣ’’ਨ੍ਤਿ. ਸਙ੍ਘਸ੍ਸ ਵਿਵਦਤੋ ਯੋ ਵਿਵਾਦੋ, ਤਂ ਵਿਵਾਦਾਧਿਕਰਣਂ ਹੋਤੀਤਿ ਅਤ੍ਥੋ. ਏਸ ਨਯੋ ਸੇਸੇਸੁਪਿ.

ਸਂਸਟ੍ਠਵਾਰਾਦਿਵਣ੍ਣਨਾ ਨਿਟ੍ਠਿਤਾ.

੩੧੮. ਤਦਨਨ੍ਤਰਵਾਰੇ ¶ ਪਨ ਵਿਵਾਦਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਨ੍ਤਿਆਦਿ ਅਧਿਕਰਣਾਨਂ ਵੁਤ੍ਤਨਯੇਨ ਅਞ੍ਞਮਞ੍ਞਪਚ੍ਚਯਤ੍ਤੇਪਿ ਸਂਸਗ੍ਗਭਾਵਦਸ੍ਸਨਤ੍ਥਂ ਵੁਤ੍ਤਂ. ਵਿਵਾਦਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਂ ਵਿਵਾਦਾਧਿਕਰਣਂ ਭਜਤੀਤਿਆਦੀਸੁ ਵਿਵਾਦਾਧਿਕਰਣਂ ਚਤੂਸੁ ਅਧਿਕਰਣੇਸੁ ਵਿਵਾਦਾਧਿਕਰਣਭਾਵਮੇਵ ਭਜਤਿ, ਨਾਞ੍ਞਾਧਿਕਰਣਭਾਵਂ, ਚਤੂਸੁ ਅਧਿਕਰਣੇਸੁ ਵਿਵਾਦਾਧਿਕਰਣਤ੍ਤਮੇਵ ਨਿਸ੍ਸਿਤਂ ਵਿਵਾਦਾਧਿਕਰਣਮੇਵ ਪਰਿਯਾਪਨ੍ਨਂ ਵਿਵਾਦਾਧਿਕਰਣਭਾਵੇਨੇਵ ਸਙ੍ਗਹਿਤਨ੍ਤਿ ਏਵਮਤ੍ਥੋ ਗਹੇਤਬ੍ਬੋ.

੩੧੯. ਵਿਵਾਦਾਧਿਕਰਣਂ ਸਤ੍ਤਨ੍ਨਂ ਸਮਥਾਨਂ ਕਤਿ ਸਮਥੇ ਭਜਤੀਤਿਆਦਿ ਪਨ ਚਤੁਨ੍ਨਂ ਅਧਿਕਰਣਾਨਂ ਵੂਪਸਮਨੇ ਸਤਿ ਨਿਯਤਸਮਥੇ ਦਸ੍ਸੇਤੁਂ ਵੁਤ੍ਤਂ. ਤਤ੍ਥ ਕਤਿ ਸਮਥੇ ਭਜਤੀਤਿ ਅਤ੍ਤਨੋ ਉਪਸਮਤ੍ਥਾਯ ਕਿਤ੍ਤਕੇ ਸਮਥੇ ਉਪਗਚ੍ਛਤਿ, ਕਿਤ੍ਤਕੇ ਸਮਥੇ ਆਗਮ੍ਮ ਵੂਪਸਮਂ ਗਚ੍ਛਤੀਤਿ ਅਤ੍ਥੋ. ਕਤਿ ਸਮਥਪਰਿਯਾਪਨ੍ਨਨ੍ਤਿ ਅਤ੍ਤਾਨਂ ਵੂਪਸਮੇਤੁਂ ਕਤਿਸੁ ਸਮਥੇਸੁ ਤੇਹਿ ਸਮਾਨਵਸੇਨ ਪਵਿਟ੍ਠਂ. ਕਤਿਹਿ ਸਮਥੇਹਿ ਸਙ੍ਗਹਿਤਨ੍ਤਿ ਵੂਪਸਮਂ ਕਰੋਨ੍ਤੇਹਿ ਕਤਿਹਿ ਸਮਥੇਹਿ ਵੂਪਸਮਕਰਣਤ੍ਥਂ ਸਙ੍ਗਹਿਤਂ.

੩੨੦. ਉਪਸਮ੍ਪਦਕ੍ਖਨ੍ਧਕਨ੍ਤਿ ¶ ਪਬ੍ਬਜ੍ਜਾਖਨ੍ਧਕਂ (ਮਹਾਵ. ੮੪). ਸਹ ਨਿਦ੍ਦੇਸੇਨਾਤਿ ਸਨਿਦ੍ਦੇਸਂ. ‘‘ਸਨ੍ਨਿਦ੍ਦੇਸ’’ਨ੍ਤਿ ਵਾ ਪਾਠੋ, ਸੋ ਏਵਤ੍ਥੋ. ਨਿਦਾਨੇਨ ਚ ਨਿਦ੍ਦੇਸੇਨ ਚ ਸਦ੍ਧਿਨ੍ਤਿ ਏਤ੍ਥ ਪਞ੍ਞਤ੍ਤਿਟ੍ਠਾਨਪੁਗ੍ਗਲਾਦਿਪ੍ਪਕਾਸਕਂ ਨਿਦਾਨਵਚਨਂ ਨਿਦਾਨਂ ਨਾਮ, ਤਨ੍ਨਿਦਾਨਂ ਪਟਿਚ੍ਚ ਨਿਦ੍ਦਿਟ੍ਠਸਿਕ੍ਖਾਪਦਾਨਿ ¶ ਨਿਦ੍ਦੇਸੋ ਨਾਮ, ਤੇਹਿ ਅਵਯਵਭੂਤੇਹਿ ਸਹਿਤਂ ਤਂਸਮੁਦਾਯਭੂਤਂ ਖਨ੍ਧਕਂ ਪੁਚ੍ਛਾਮੀਤਿ ਅਤ੍ਥੋ. ਉਤ੍ਤਮਾਨਿ ਪਦਾਨੀਤਿ ਆਪਤ੍ਤਿਪਞ੍ਞਾਪਕਾਨਿ ਵਚਨਾਨਿ ਅਧਿਪ੍ਪੇਤਾਨਿ. ਤੇਸਂ…ਪੇ… ਕਤਿ ਆਪਤ੍ਤਿਯੋ ਹੋਨ੍ਤੀਤਿ ਤੇਹਿ ਵਚਨੇਹਿ ਪਞ੍ਞਤ੍ਤਾ ਕਤਿ ਆਪਤ੍ਤਿਕ੍ਖਨ੍ਧਾ ਹੋਨ੍ਤੀਤਿ ਅਤ੍ਥੋ. ਨਨੁ ਆਪਤ੍ਤਿਯੋ ਨਾਮ ਪੁਗ੍ਗਲਾਨਞ੍ਞੇਵ ਹੋਨ੍ਤਿ, ਨ ਪਦਾਨਂ, ਕਸ੍ਮਾ ਪਨ ‘‘ਸਮੁਕ੍ਕਟ੍ਠਪਦਾਨਂ ਕਤਿ ਆਪਤ੍ਤਿਯੋ’’ਤਿ ਸਾਮਿਵਸੇਨ ਨਿਦ੍ਦੇਸੋ ਕਤੋਤਿ ਆਹ ‘‘ਯੇਨ ਯੇਨ ਹਿ ਪਦੇਨਾ’’ਤਿਆਦਿ. ਪਾਲ਼ਿਯਂ ਉਪੋਸਥਨ੍ਤਿਆਦਿ ਉਪੋਸਥਕ੍ਖਨ੍ਧਕਾਦੀਨਞ੍ਞੇਵ (ਮਹਾਵ. ੧੩੨ ਆਦਯੋ) ਗਹਣਂ.

ਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ ਨਿਟ੍ਠਿਤਾ.

੩੨੧. ਏਕੁਤ੍ਤਰਿਕਨਯੇ ¶ ਪਨ ਅਜਾਨਨ੍ਤੇਨ ਵੀਤਿਕ੍ਕਨ੍ਤਾਤਿ ਪਣ੍ਣਤ੍ਤਿਂ ਵਾ ਵਤ੍ਥੁਂ ਵਾ ਅਜਾਨਨ੍ਤੇਨ ਵੀਤਿਕ੍ਕਨ੍ਤਾ ਪਥਵੀਖਣਨਸਹਸੇਯ੍ਯਾਦਿਕਾ, ਸਾਪਿ ਪਚ੍ਛਾ ਆਪਨ੍ਨਭਾਵਂ ਞਤ੍ਵਾ ਪਟਿਕਮ੍ਮਂ ਅਕਰੋਨ੍ਤਸ੍ਸ ਅਨ੍ਤਰਾਯਿਕਾਵ ਹੋਤਿ.

ਪਾਰਿਵਾਸਿਕਾਦੀਹਿ ਪਚ੍ਛਾ ਆਪਨ੍ਨਾਤਿ ਵਤ੍ਤਭੇਦੇਸੁ ਦੁਕ੍ਕਟਾਨਿ ਸਨ੍ਧਾਯ ਵੁਤ੍ਤਂ. ਤਸ੍ਮਿਂ ਖਣੇ ਆਪਜ੍ਜਿਤਬ੍ਬਅਨ੍ਤਰਾਪਤ੍ਤਿਯੋ ਸਨ੍ਧਾਯਾਤਿ ਕੇਚਿ ਵਦਨ੍ਤਿ, ਤਸ੍ਸ ਪੁਬ੍ਬਾਪਤ੍ਤੀਨਂਅਨ੍ਤਰਾਪਤ੍ਤਿ-ਪਦੇਨੇਵ ਵਕ੍ਖਮਾਨਤ੍ਤਾ ਪੁਰਿਮਮੇਵ ਯੁਤ੍ਤਤਰਂ. ਮੂਲਵਿਸੁਦ੍ਧਿਯਾ ਅਨ੍ਤਰਾਪਤ੍ਤੀਤਿ ਮੂਲਾਯਪਟਿਕਸ੍ਸਨਾਦੀਨਿ ਅਕਤ੍ਵਾ ਸਬ੍ਬਪਠਮਂ ਦਿਨ੍ਨਪਰਿਵਾਸਮਾਨਤ੍ਤਵਿਸੁਦ੍ਧਿਯਾ ਚਰਣਕਾਲੇ ਆਪਨ੍ਨਅਨ੍ਤਰਾਪਤ੍ਤਿਸਙ੍ਖਾਤਸਙ੍ਘਾਦਿਸੇਸੋ. ਅਗ੍ਘਵਿਸੁਦ੍ਧਿਯਾਤਿ ਅਨ੍ਤਰਾਪਤ੍ਤਿਂ ਆਪਨ੍ਨਸ੍ਸ ਮੂਲਾਯ ਪਟਿਕਸ੍ਸਿਤ੍ਵਾ ਓਧਾਨਸਮੋਧਾਨਵਸੇਨ ਓਧੁਨਿਤ੍ਵਾ ਪੁਰਿਮਾਪਤ੍ਤਿਯਾ ਸਮੋਧਾਯ ਤਦਗ੍ਘਵਸੇਨ ਪੁਨ ਦਿਨ੍ਨਪਰਿਵਾਸਾਦਿਸੁਦ੍ਧਿਯਾ ਚਰਣਕਾਲੇ ਪੁਨ ਆਪਨ੍ਨਾ ਅਨ੍ਤਰਾਪਤ੍ਤਿ.

ਸਉਸ੍ਸਾਹੇਨੇਵਾਤਿ ਪੁਨਪਿ ਤਂ ਆਪਤ੍ਤਿਂ ਆਪਜ੍ਜਿਤੁਕਾਮਤਾਚਿਤ੍ਤੇਨ, ਏਵਂ ਦੇਸਿਤਾਪਿ ਆਪਤ੍ਤਿ ਨ ਵੁਟ੍ਠਾਤੀਤਿ ਅਧਿਪ੍ਪਾਯੋ. ਧੁਰਨਿਕ੍ਖੇਪਂ ਅਕਤ੍ਵਾ ਆਪਜ੍ਜਨੇ ਸਿਖਾਪ੍ਪਤ੍ਤਦੋਸਂ ਦਸ੍ਸੇਨ੍ਤੋ ਆਹ ‘‘ਅਟ੍ਠਮੇ ਵਤ੍ਥੁਸ੍ਮਿਂ ਭਿਕ੍ਖੁਨਿਯਾ ਪਾਰਾਜਿਕਮੇਵਾ’’ਤਿ. ਨ ਕੇਵਲਞ੍ਚ ਭਿਕ੍ਖੁਨਿਯਾ ਏਵ, ਭਿਕ੍ਖੂਨਮ੍ਪਿ ਧੁਰਨਿਕ੍ਖੇਪਂ ਅਕਤ੍ਵਾ ਥੋਕਂ ਥੋਕਂ ਸਪ੍ਪਿਆਦਿਕਂ ਥੇਯ੍ਯਾਯ ਗਣ੍ਹਨ੍ਤਾਨਂ ਪਾਦਗ੍ਘਨਕੇ ਪੁਣ੍ਣੇ ਪਾਰਾਜਿਕਮੇਵ. ਕੇਚਿ ਪਨ ‘‘ਅਟ੍ਠਮੇ ਵਤ੍ਥੁਸ੍ਮਿਂ ਭਿਕ੍ਖੁਨਿਯਾ ਪਾਰਾਜਿਕਮੇਵ ¶ ਹੋਤੀਤਿ ਵੁਤ੍ਤਤ੍ਤਾ ਅਟ੍ਠਵਤ੍ਥੁਕਮੇਵੇਤਂ ਸਨ੍ਧਾਯ ਵੁਤ੍ਤ’’ਨ੍ਤਿ ਵਦਨ੍ਤਿ.

ਧਮ੍ਮਿਕਸ੍ਸ ਪਟਿਸ੍ਸਵਸ੍ਸਾਤਿ ‘‘ਇਧ ਵਸ੍ਸਂ ਵਸਿਸ੍ਸਾਮੀ’’ਤਿਆਦਿਨਾ ਗਿਹੀਨਂ ਸਮ੍ਮੁਖਾ ਕਤਸ੍ਸ ਧਮ੍ਮਿਕਸ੍ਸ ਪਟਿਸ੍ਸਵਸ੍ਸ, ਅਧਮ੍ਮਿਕਸ੍ਸ ਪਨ ‘‘ਅਸੁਕਂ ਪਹਰਿਸ੍ਸਾਮੀ’’ਤਿਆਦਿਕਸ੍ਸ ਪਟਿਸ੍ਸਵਸ੍ਸ ਅਸਚ੍ਚਾਪਨੇਨ ਆਪਤ੍ਤਿ ਨਤ੍ਥਿ.

ਤਥਾ ਚੋਦਿਤੋਤਿ ਅਧਮ੍ਮੇਨ ਚੋਦਿਤੋ, ਸਯਂ ਸਚ੍ਚੇ, ਅਕੁਪ੍ਪੇ ਚ ਅਟ੍ਠਤ੍ਵਾ ਪਟਿਚ੍ਛਾਦੇਨ੍ਤੋਪਿ ਅਧਮ੍ਮਚੁਦਿਤਕੋ ਏਵ. ਪਞ੍ਚਾਨਨ੍ਤਰਿਯਨਿਯਤਮਿਚ੍ਛਾਦਿਟ੍ਠਿਯੇਵ ਮਿਚ੍ਛਤ੍ਤਨਿਯਤਾ ਨਾਮ. ਚਤ੍ਤਾਰੋ ਮਗ੍ਗਾ ਸਮ੍ਮਤ੍ਤਨਿਯਤਾ ਨਾਮ.

੩੨੨. ਦੁਕੇਸੁ ¶ ਸਯਮੇਵ ਸਪੁਗ੍ਗਲੋਤਿ ਆਹ ‘‘ਮੁਦੁਪਿਟ੍ਠਿਕਸ੍ਸਾ’’ਤਿਆਦਿ. ਆਦਿ-ਸਦ੍ਦੇਨ ਅਙ੍ਗਜਾਤਚ੍ਛੇਦਅਤ੍ਤਘਾਤਾਦਿਆਪਤ੍ਤਿਯੋ ਸਙ੍ਗਹਿਤਾ.

ਭਣ੍ਡਾਗਾਰਿਕਚਿਤ੍ਤਕਮ੍ਮਾਨਿ ਵਾਤਿ ਗਹਟ੍ਠਾਨਂ ਭਣ੍ਡਪਟਿਸਾਮਨਂ, ਇਤ੍ਥਿਪੁਰਿਸਾਦਿਪਟਿਭਾਨਚਿਤ੍ਤਕਮ੍ਮਾਨਿ ਵਾ. ‘‘ਚੀਵਰਾਦੀਨਿ ਅਦੇਨ੍ਤੋ ਆਪਜ੍ਜਤੀ’’ਤਿ ਇਦਂ ‘‘ਉਪਜ੍ਝਾਯੇਨ, ਭਿਕ੍ਖਵੇ, ਸਦ੍ਧਿਵਿਹਾਰਿਕੋ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋ…ਪੇ… ਪਤ੍ਤੋ ਦਾਤਬ੍ਬੋ’’ਤਿਆਦਿ (ਮਹਾਵ. ੬੭) ਵਚਨਤੋ ਅਨਾਦਰਿਯੇਨ ਆਮਿਸਸਙ੍ਗਹਂ ਅਕਰੋਨ੍ਤਸ੍ਸ ਦੁਕ੍ਕਟਂ, ਭਿਕ੍ਖੁਨਿਯਾ ਪਾਚਿਤ੍ਤਿਯਞ੍ਚ ਸਨ੍ਧਾਯ ਵੁਤ੍ਤਂ. ਨਿਸ੍ਸਟ੍ਠਚੀਵਰਾਦੀਨਂ ਅਦਾਨਆਪਤ੍ਤਿਪਿ ਏਤ੍ਥੇਵ ਸਙ੍ਗਹਿਤਾ.

ਪਾਲ਼ਿਯਂ ਦੇਸੇਨ੍ਤੋਤਿ ਸਭਾਗਾਪਤ੍ਤਿਂ, ਅਦੇਸਨਾਗਾਮਿਨਿਆਦਿਞ੍ਚ ਦੇਸੇਨ੍ਤੋ. ਨਿਦਾਨੁਦ੍ਦੇਸੇ ਆਪਤ੍ਤਿਂ ਅਨਾਵਿਕਰੋਨ੍ਤੋ, ਨ ਦੇਸੇਨ੍ਤੋ ਚ ਆਪਜ੍ਜਤਿ ਨਾਮ. ਓਵਾਦਂ ਅਗਣ੍ਹਨ੍ਤੋਤਿ ਭਿਕ੍ਖੂਹਿ ਭਿਕ੍ਖੁਨਿਓਵਾਦਤ੍ਥਾਯ ਵੁਤ੍ਤਂ ਵਚਨਂ ਅਗਣ੍ਹਨ੍ਤੋ ਬਾਲਗਿਲਾਨਗਮਿਯਵਿਵਜ੍ਜਿਤੋ. ਅਤ੍ਤਨੋ ਪਰਿਭੋਗਤ੍ਥਂ ਦਿਨ੍ਨਂ ਅਞ੍ਞਸ੍ਸ ਦਾਨੇ, ਸਙ੍ਘਾਟਿਂ ਅਪਾਰੁਪਿਤ੍ਵਾ ਸਨ੍ਤਰੁਤ੍ਤਰੇਨ ਗਾਮਪ੍ਪਵੇਸਨਾਦੀਸੁ ਚ ਆਪਤ੍ਤਿਯੋਪਿ ਅਪਰਿਭੋਗੇਨ ਆਪਜ੍ਜਿਤਬ੍ਬਾਪਤ੍ਤਿਯੋਵ. ਪਮਾਣਨ੍ਤਿ ਸਙ੍ਘਭੇਦਾਨਨ੍ਤਰਿਯਨਿਪ੍ਫਤ੍ਤਿਯਾ ਲਕ੍ਖਣਂ. ਬਾਲਸ੍ਸਾਤਿ ਨਿਸ੍ਸਯਗ੍ਗਹਣਵਿਧਿਂ ਅਜਾਨਨ੍ਤਸ੍ਸ ਲਜ੍ਜਿਬਾਲਸ੍ਸੇਵ. ਲਜ੍ਜਿਸ੍ਸਾਤਿ ਬ੍ਯਤ੍ਤਸ੍ਸ ਨਿਸ੍ਸਯਦਾਯਕਸਭਾਗਤਂ ¶ ਪਰਿਵੀਮਂਸਨ੍ਤਸ੍ਸ. ਵਿਨਯੇ ਆਗਤਾ ਅਤ੍ਥਾ ਵੇਨਯਿਕਾਤਿ ਆਹ ‘‘ਦ੍ਵੇ ਅਤ੍ਥਾ ਵਿਨਯਸਿਦ੍ਧਾ’’ਤਿ.

ਪਾਲ਼ਿਯਂ ਅਪ੍ਪਤ੍ਤੋ ਨਿਸ੍ਸਾਰਣਨ੍ਤਿ ਏਤ੍ਥ ਪਬ੍ਬਾਜਨੀਯਕਮ੍ਮਂ ਵਿਹਾਰਤੋ ਨਿਸ੍ਸਾਰਣਤ੍ਤਾ ਨਿਸ੍ਸਾਰਣਨ੍ਤਿ ਅਧਿਪ੍ਪੇਤਂ, ਤਞ੍ਚ ਯਸ੍ਮਾ ਕੁਲਦੂਸਕਂ ਅਕਰੋਨ੍ਤੋ ਪੁਗ੍ਗਲੋ ਆਪਤ੍ਤਿਬਹੁਲੋਪਿ ਆਵੇਣਿਕਲਕ੍ਖਣੇਨ ਅਪ੍ਪਤ੍ਤੋ ਨਾਮ ਹੋਤਿ, ਤਸ੍ਮਾ ਅਪ੍ਪਤ੍ਤੋ ਨਿਸ੍ਸਾਰਣਂ. ਯਸ੍ਮਾ ਪਨ ਆਪਤ੍ਤਾਦਿਬਹੁਲਸ੍ਸਾਪਿ ‘‘ਆਕਙ੍ਖਮਾਨੋ ਸਙ੍ਘੋ ਪਬ੍ਬਾਜਨੀਯਕਮ੍ਮਂ ਕਰੇਯ੍ਯਾ’’ਤਿ (ਚੂਲ਼ਵ. ੨੭) ਵੁਤ੍ਤਂ, ਤਸ੍ਮਾ ਸੁਨਿਸ੍ਸਾਰਿਤੋ, ਸਬ੍ਬਥਾ ਪਨ ਸੁਦ੍ਧੋ ਨਿਰਾਪਤ੍ਤਿਕੋ ਦੁਨ੍ਨਿਸ੍ਸਾਰਿਤੋਤਿ ਦਟ੍ਠਬ੍ਬੋ.

ਅਪ੍ਪਤ੍ਤੋ ਓਸਾਰਣਨ੍ਤਿਆਦੀਸੁ ਉਪਸਮ੍ਪਦਾਕਮ੍ਮਂ ਏਤ੍ਥ ਓਸਾਰਣਂ ਅਧਿਪ੍ਪੇਤਂ, ਤਞ੍ਚ ਹਤ੍ਥਚ੍ਛਿਨ੍ਨਾਦਿਕੋ ਏਕਚ੍ਚੋ ਪਟਿਕ੍ਖਿਤ੍ਤਤ੍ਤਾ ਅਪ੍ਪਤ੍ਤੋਪਿ ਸੋਸਾਰਿਤੋ, ਪਣ੍ਡਕਾਦਿਕੋ ਦੋਸਾਰਿਤੋਤਿ ਅਤ੍ਥੋ.

੩੨੩. ਤਿਕੇਸੁ ¶ ਲੋਹਿਤੁਪ੍ਪਾਦਾਪਤ੍ਤਿਨ੍ਤਿ ਪਾਰਾਜਿਕਾਪਤ੍ਤਿਂ. ਆਵੁਸੋਵਾਦੇਨਾਤਿ ‘‘ਆਵੁਸੋ’’ਤਿ ਆਲਪਨੇਨ. ਆਪਤ੍ਤਿਨ੍ਤਿ ਦੁਕ੍ਕਟਾਪਤ੍ਤਿਂ. ਸੇਸਾ ਰਤ੍ਤਿਞ੍ਚੇਵ ਦਿਵਾ ਚਾਤਿ ਏਤ੍ਥ ਅਰੁਣੁਗ੍ਗਮਨੇ ਆਪਜ੍ਜਿਤਬ੍ਬਾ ਪਠਮਕਥਿਨਾਦੀ (ਪਾਰਾ. ੪੫੯) ਸਬ੍ਬਾ ਆਪਤ੍ਤਿਯੋਪਿ ਰਤ੍ਤਿਨ੍ਦਿਵਾਨਂ ਵੇਮਜ੍ਝੇਯੇਵ ਆਪਜ੍ਜਿਤਬ੍ਬਤ੍ਤਾ ਤਤਿਯਕੋਟ੍ਠਾਸਞ੍ਞੇਵ ਪਵਿਟ੍ਠਾਤਿ ਦਟ੍ਠਬ੍ਬਾ. ਅਥ ਵਾ ਉਦ੍ਧਸ੍ਤੇ ਅਰੁਣੇ ਆਪਜ੍ਜਿਤਬ੍ਬਤ੍ਤਾ ਦਿਵਾ ਆਪਜ੍ਜਿਤਬ੍ਬੇਸੁ ਏਵ ਪਵਿਟ੍ਠਾਤਿ ਦਟ੍ਠਬ੍ਬਾ, ਅਤ੍ਥਙ੍ਗਤੇ ਸੂਰਿਯੇ ਭਿਕ੍ਖੁਨਿਯੋ ਓਵਾਦਨਾਪਤ੍ਤਿਯੋ, ਪਨ ਰਤ੍ਤਨ੍ਧਕਾਰੇ ਪੁਰਿਸੇਨ ਸਦ੍ਧਿਂ ਸਨ੍ਤਿਟ੍ਠਨਾਪਤ੍ਤਿ ਚ ਰਤ੍ਤਿਯਞ੍ਞੇਵ ਆਪਜ੍ਜਿਤਬ੍ਬਾ.

ਪੁਰੇਭਤ੍ਤਂ ਕੁਲਾਨਿ ਉਪਸਙ੍ਕਮਨਅਨਤਿਰਿਤ੍ਤਭੋਜਨਾਦੀਨਿ ਦਿਵਾ ਏਵ ਆਪਜ੍ਜਿਤਬ੍ਬਾਨਿ. ਕੇਚਿ ਪਨ ‘‘ਭੋਜਨਪਟਿਸਂਯੁਤ੍ਤਾਨਿ ਸੇਖਿਯਾਨਿ, ਗਣਭੋਜਨਾਦੀਨਿ ਚ ਦਿਵਾ ਏਵ ਆਪਜ੍ਜਿਤਬ੍ਬਾਨੀ’’ਤਿ ਵਦਨ੍ਤਿ. ਤਸ੍ਮਾ ਈਦਿਸਾ ਆਪਤ੍ਤਿਯੋ ਮੁਞ੍ਚਿਤ੍ਵਾ ਸੇਸਾਵ ਤਤਿਯਕੋਟ੍ਠਾਸਂ ਭਜਨ੍ਤੀਤਿ ਵੇਦਿਤਬ੍ਬਂ.

ਨ ਊਨਦਸਵਸ੍ਸੋਤਿ ਦਸਵਸ੍ਸਸ੍ਸ ਬਾਲਸ੍ਸੇਵ ਪਞ੍ਞਤ੍ਤਸਿਕ੍ਖਾਪਦਤ੍ਤਾ ਵੁਤ੍ਤਂ. ਸਦ੍ਧਿਵਿਹਾਰਿਕਅਨ੍ਤੇਵਾਸਿਕੇਸੁ ¶ ਅਸਮ੍ਮਾਵਤ੍ਤਨਾਪਤ੍ਤਿਂ, ਅਲਜ੍ਜੀਨਂ ਨਿਸ੍ਸਯਦਾਨਾਦਿਮ੍ਪਿ ਦਸਵਸ੍ਸੋਵ ਆਪਜ੍ਜਤਿ, ਵੁਟ੍ਠਾਪਿਨਿਂ ਦ੍ਵੇ ਵਸ੍ਸਾਨਿ ਅਨਨੁਬਨ੍ਧਾਦਿਮ੍ਪਿ ਊਨਦਸਵਸ੍ਸਾ ਆਪਜ੍ਜਨ੍ਤਿ. ਅਬ੍ਯਾਕਤਚਿਤ੍ਤੋਤਿ ਸੁਪਨ੍ਤਸ੍ਸ ਭਵਙ੍ਗਚਿਤ੍ਤਂ ਸਨ੍ਧਾਯ ਵੁਤ੍ਤਂ.

ਅਪ੍ਪਵਾਰੇਨ੍ਤੋਤਿ ਅਨਾਦਰਿਯੇਨ ਅਪ੍ਪਵਾਰੇਨ੍ਤੋ ਕੇਨਚਿ ਪਚ੍ਚਯੇਨ ਅਪ੍ਪਵਾਰੇਤ੍ਵਾ ਕਾਲ਼ਪਕ੍ਖਚਾਤੁਦ੍ਦਸੇ ਸਙ੍ਘੇ ਪਵਾਰੇਨ੍ਤੇ ਤਤ੍ਥ ਅਨਾਦਰਿਯੇਨ ਅਪ੍ਪਵਾਰੇਨ੍ਤੋ ਤਮੇਵ ਆਪਤ੍ਤਿਂ ਕਾਲ਼ੇਪਿ ਆਪਜ੍ਜਤੀਤਿ ਜੁਣ੍ਹੇ ਏਵਾਤਿ ਨਿਯਮੋ ਨ ਦਿਸ੍ਸਤਿ, ਪਚ੍ਛਿਮਵਸ੍ਸਂਵੁਤ੍ਥੋ ਪਨ ਪਚ੍ਛਿਮਕਤ੍ਤਿਕਪੁਣ੍ਣਮਿਯਮੇਵ ਪਵਾਰੇਤੁਂ ਲਬ੍ਭਤੀਤਿ ਤਤ੍ਥ ਅਪ੍ਪਵਾਰਣਾਪਚ੍ਚਯਾ ਆਪਤ੍ਤਿਂ ਆਪਜ੍ਜਮਾਨੋ ਏਵ ਜੁਣ੍ਹੇ ਆਪਜ੍ਜਤੀਤਿ ਨਿਯਮੇਤਬ੍ਬੋਤਿ ਦਟ੍ਠਬ੍ਬਂ. ਜੁਣ੍ਹੇ ਕਪ੍ਪਤੀਤਿ ਏਤ੍ਥਾਪਿ ਏਸੇਵ ਨਯੋ.

‘‘ਅਪਚ੍ਚੁਦ੍ਧਰਿਤ੍ਵਾ ਹੇਮਨ੍ਤੇ ਆਪਜ੍ਜਤੀ’’ਤਿ ਇਮਿਨਾ ‘‘ਵਸ੍ਸਾਨਂ ਚਾਤੁਮਾਸਂ ਅਧਿਟ੍ਠਾਤੁ’’ਨ੍ਤਿ ਨਿਯਮਵਚਨੇਨੇਵ ਅਪਚ੍ਚੁਦ੍ਧਰਨ੍ਤਸ੍ਸ ਦੁਕ੍ਕਟਨ੍ਤਿ ਦਸ੍ਸੇਤਿ. ਵਸ੍ਸਾਨੁਪਗਮਨਅਕਰਣੀਯੇਨ ਪਕ੍ਕਮਾਦਯੋਪਿ ਵਸ੍ਸੇ ਏਵ ਆਪਜ੍ਜਤਿ. ਵਤ੍ਥਿਕਮ੍ਮਾਦਿਮ੍ਪਿ ਗਿਲਾਨੋ ਏਵ. ਅਧੋਤਪਾਦੇਹਿ ਅਕ੍ਕਮਨਾਦੀਨਿਪਿ ਅਨ੍ਤੋ ਏਵ ਆਪਜ੍ਜਤਿ ¶ . ਭਿਕ੍ਖੁਨਿਯਾ ਅਨਾਪੁਚ੍ਛਾ ਆਰਾਮਪ੍ਪਵੇਸਨਾਦਿ ਚ ਅਨ੍ਤੋਸੀਮਾਯਮੇਵ. ਨਿਸ੍ਸਯਪਟਿਪਨ੍ਨਸ੍ਸ ਅਨਾਪੁਚ੍ਛਾਦਿਸਾਪਕ੍ਕਮਨਾਦਿ ਚ ਬਹਿਸੀਮਾਯਮੇਵ. ਪਾਤਿਮੋਕ੍ਖੁਦ੍ਦੇਸੇ ਸਨ੍ਤਿਯਾ ਆਪਤ੍ਤਿਯਾ ਅਨਾਵਿਕਰਣਾਪਤ੍ਤਿਸਮਨੁਭਾਸਨਊਨਵੀਸਤਿਵਸ੍ਸੂਪਸਮ੍ਪਾਦਨਾਦਿਸਬ੍ਬਅਧਮ੍ਮਕਮ੍ਮਾਪਤ੍ਤਿਯੋਪਿ ਸਙ੍ਘੇ ਏਵ. ਅਧਮ੍ਮੇਨ ਗਣੁਪੋਸਥਾਦੀਸੁਪਿ ਗਣਾਦਿਮਜ੍ਝੇ ਏਵ. ਅਲਜ੍ਜਿਸ੍ਸ ਸਨ੍ਤਿਕੇ ਨਿਸ੍ਸਯਗ੍ਗਹਣਾਦਿਪਿ ਪੁਗ੍ਗਲਸ੍ਸ ਸਨ੍ਤਿਕੇ ਏਵ ਆਪਜ੍ਜਤਿ.

ਤੀਣਿ ਅਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨੀਤਿ ਯੋ ਉਮ੍ਮਤ੍ਤਕੋਪਿ ਵੀਤਿਕ੍ਕਮਕਾਲੇ, ਅਨੁਮ੍ਮਤ੍ਤੋ ਸਞ੍ਚਿਚ੍ਚੇਵ ਆਪਤ੍ਤਿਂ ਆਪਜ੍ਜਿਤ੍ਵਾ ਭਿਕ੍ਖੂਹਿ ਪਚ੍ਛਾ ਚੋਦਿਤੋ ਸਰਮਾਨੋ ਏਵ ‘‘ਨ ਸਰਾਮੀ’’ਤਿ ਵਦਤਿ, ਯੋ ਚ ‘‘ਸੁਪਿਨਂ ਵਿਯ ਸਰਾਮੀ’’ਤਿ ਵਾ ਮੁਸਾ ਵਦਤਿ, ਯੋ ਚ ਉਮ੍ਮਤ੍ਤਕਕਾਲੇ ਕਤਂ ਸਬ੍ਬਮ੍ਪਿ ਸਬ੍ਬੇਸਂ ਵਟ੍ਟਤੀਤਿ ਵਦਤਿ, ਇਮੇਸਂ ਤਿਣ੍ਣਂ ਦਿਨ੍ਨਾਨਿ ਤੀਣਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ ਅਧਮ੍ਮਿਕਾਨਿ.

ਅਪਕਤਤ੍ਤੋਤਿ ਵਿਨਯੇ ਅਪਕਤਞ੍ਞੂ. ਤੇਨਾਹ ‘‘ਆਪਤ੍ਤਾਨਾਪਤ੍ਤਿਂ ਨ ਜਾਨਾਤੀ’’ਤਿ (ਪਰਿ. ੩੨੫). ‘‘ਦਿਟ੍ਠਿਞ੍ਚ ਅਨਿਸ੍ਸਜ੍ਜਨ੍ਤਾਨਂਯੇਵ ਕਮ੍ਮਂ ਕਾਤਬ੍ਬ’’ਨ੍ਤਿ ਇਦਂ ਭਿਕ੍ਖੂਹਿ ਓਵਦਿਯਮਾਨਸ੍ਸ ਦਿਟ੍ਠਿਯਾ ਅਨਿਸ੍ਸਜ੍ਜਨਪਚ੍ਚਯਾ ਦੁਕ੍ਕਟਂ, ਪਾਚਿਤ੍ਤਿਯਮ੍ਪਿ ਵਾ ਅਵਸ੍ਸਮੇਵ ਸਮ੍ਭਵਤੀਤਿ ਵੁਤ੍ਤਂ.

ਮੁਖਾਲਮ੍ਬਰਕਰਣਾਦਿਭੇਦੋਤਿ ¶ ਮੁਖਭੇਰੀਵਾਦਨਾਦਿਪ੍ਪਭੇਦੋ. ਉਪਘਾਤੇਤੀਤਿ ਵਿਨਾਸੇਤਿ. ਬੀਜਨਿਗ੍ਗਾਹਾਦਿਕੇਤਿ ਚਿਤ੍ਤਂ ਬੀਜਨਿਂ ਗਾਹੇਤ੍ਵਾ ਅਨੁਮੋਦਨਾਦਿਕਰਣੇਤਿ ਅਤ੍ਥੋ.

੩੨੪. ਚਤੁਕ੍ਕੇਸੁ ਸੋਤਿ ਗਿਹਿਪਰਿਕ੍ਖਾਰੋ. ਅਵਾਪੁਰਣਂ ਦਾਤੁਨ੍ਤਿ ਗਬ੍ਭਂ ਵਿਵਰਿਤ੍ਵਾ ਅਨ੍ਤੋ ਪਰਿਕ੍ਖਾਰਟ੍ਠਪਨਤ੍ਥਾਯ ਵਿਵਰਣਕੁਞ੍ਚਿਕਂ ਦਾਤੁਂ. ਸਙ੍ਘਤ੍ਥਾਯ ਉਪਨੀਤਂ ਸਯਮੇਵ ਅਨ੍ਤੋ ਪਟਿਸਾਮਿਤੁਮ੍ਪਿ ਵਟ੍ਟਤਿ. ਤੇਨਾਹ ‘‘ਅਨ੍ਤੋ ਠਪਾਪੇਤੁਞ੍ਚ ਵਟ੍ਟਤੀ’’ਤਿ.

ਆਦਿਕਮ੍ਮਿਕੇਸੁ ਪਠਮਂ ਪੁਰਿਸਲਿਙ੍ਗਂ ਉਪ੍ਪਜ੍ਜਤੀਤਿ ਆਹ ‘‘ਪਠਮਂ ਉਪ੍ਪਨ੍ਨਵਸੇਨਾ’’ਤਿ. ਪਾਲ਼ਿਯਂ ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸਾਤਿ ਵਸ੍ਸਚ੍ਛੇਦਸਮ੍ਬਨ੍ਧਿਨਿਯਾ ਅਨਾਪਤ੍ਤਿਯਾ ¶ ਏਵਮਤ੍ਥੋ. ਮਨ੍ਤਭਾਸਾਤਿ ਮਨ੍ਤਾਯ ਪਞ੍ਞਾਯ ਕਥਨਂ. ‘‘ਨਵਮਭਿਕ੍ਖੁਨਿਤੋ ਪਟ੍ਠਾਯਾ’’ਤਿ ਇਦਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਨ੍ਨਂ ਭਿਕ੍ਖੁਨੀਨਂ ਯਥਾਵੁਡ੍ਢਂ ਅਵਸੇਸਾਨਂ ਯਥਾਕਤਿਕ’’ਨ੍ਤਿ (ਚੂਲ਼ਵ. ੪੨੬) ਵਚਨਤੋ ਆਦਿਤੋ ਅਟ੍ਠਨ੍ਨਂ ਭਿਕ੍ਖੁਨੀਨਂ ਪਚ੍ਚੁਟ੍ਠਾਤਬ੍ਬਤ੍ਤਾ ਵੁਤ੍ਤਂ.

‘‘ਇਧ ਨ ਕਪ੍ਪਨ੍ਤੀਤਿ ਵਦਨ੍ਤੋਪਿ ਪਚ੍ਚਨ੍ਤਿਮੇਸੁ ਆਪਜ੍ਜਤੀ’’ਤਿਆਦਿਨਾ ਸਞ੍ਚਿਚ੍ਚ ਕਪ੍ਪਿਯਂ ਅਕਪ੍ਪਿਯਨ੍ਤਿ ਵਾ ਅਕਪ੍ਪਿਯਂ ਕਪ੍ਪਿਯਨ੍ਤਿ ਵਾ ਕਥੇਨ੍ਤਸ੍ਸ ਸਬ੍ਬਤ੍ਥ ਦੁਕ੍ਕਟਨ੍ਤਿ ਦਸ੍ਸੇਤਿ.

ਪੁਬ੍ਬਕਰਣਨ੍ਤਿ ਵੁਚ੍ਚਤੀਤਿ ਅਟ੍ਠਕਥਾਸੁ ਵੁਤ੍ਤਂ, ਤਾਨਿ ਇਧ ਪਰਿਵਾਰੇ ਉਦ੍ਧਟਾਨੀਤਿ ਅਧਿਪ੍ਪਾਯੋ. ਇਧਾਧਿਪ੍ਪੇਤਾਨਿ ਪਨ ਦਸ੍ਸੇਨ੍ਤੋ ‘‘ਛਨ੍ਦਪਾਰਿਸੁਦ੍ਧੀ’’ਤਿਆਦਿਮਾਹ.

੩੨੫. ਪਞ੍ਚਕੇਸੁ ਆਪੁਚ੍ਛਿਤ੍ਵਾ ਚਾਰਸ੍ਸ ਅਭਾਵੋਤਿ ਪਿਣ੍ਡਪਾਤਿਕਸ੍ਸ ‘‘ਨਿਮਨ੍ਤਿਤੋ ਸਭਤ੍ਤੋ’’ਤਿ ਇਮਸ੍ਸ ਅਙ੍ਗਸ੍ਸ ਅਭਾਵਾ ਤੇਨ ਸਿਕ੍ਖਾਪਦੇਨ ਤਸ੍ਸ ਸਬ੍ਬਥਾ ਅਨਾਪਤ੍ਤੀਤਿ ਅਧਿਪ੍ਪਾਯੋ ¶ . ਸੁਸਾਨਂ ਨੇਤ੍ਵਾ ਪੁਨ ਆਨੀਤਕਨ੍ਤਿ ਸੁਸਾਨੇ ਪੇਤਕਿਚ੍ਚਂ ਕਤ੍ਵਾ ਨਿਕ੍ਖਨ੍ਤੇਹਿ ਨ੍ਹਤ੍ਵਾ ਛਡ੍ਡਿਤਾਨਿ ਨਿਵਤ੍ਥਪਾਰੁਤਵਤ੍ਥਾਨਿ ਏਵਂ ਵੁਚ੍ਚਨ੍ਤਿ.

ਪਾਲ਼ਿਯਂ ਪਞ੍ਚਹਾਕਾਰੇਹੀਤਿ ਪਞ੍ਚਹਿ ਅਵਹਾਰਙ੍ਗੇਹਿ. ਵਤ੍ਥੁਤੋ ਪਨ ਗਰੁਕਲਹੁਕਭੇਦੇਨ ਪਾਰਾਜਿਕਥੁਲ੍ਲਚ੍ਚਯਦੁਕ੍ਕਟਾਨਿ ਵੁਤ੍ਤਾਨਿ. ਇਤ੍ਥਿਪੁਰਿਸਸਂਯੋਗਾਦਿਕਂ ਕਿਲੇਸਸਮੁਦਾਚਾਰਹੇਤੁਕਂ ਪਟਿਭਾਨਚਿਤ੍ਤਕਮ੍ਮਂ ਨਾਮ. ਪਞ੍ਹਾਸਹਸ੍ਸਂ ਪੁਚ੍ਛੀਤਿ ਸਮਥਵਿਪਸ੍ਸਨਾਕਮ੍ਮਟ੍ਠਾਨੇਸੁ ਪਞ੍ਹਾਸਹਸ੍ਸਂ ਸਮ੍ਮਜ੍ਜਿਤ੍ਵਾ ਠਿਤਂ ਦਹਰਂ ਪੁਚ੍ਛਿ. ਇਤਰੋਪਿ ਦਹਰੋ ਅਤ੍ਤਨੋ ਗਤਮਗ੍ਗਤ੍ਤਾ ਸਬ੍ਬਂ ਵਿਸ੍ਸਜ੍ਜੇਸਿ, ਤੇਨ ਥੇਰੋ ਪਸੀਦਿ. ਵਤ੍ਤਂ ਪਰਿਚ੍ਛਿਨ੍ਦੀਤਿ ਵਤ੍ਤਂ ਨਿਟ੍ਠਾਪੇਸਿ. ਕਿਂ ਤ੍ਵਂ ਆਵੁਸੋਤਿਆਦਿਕਂ ਥੇਰੋ ਖੀਣਾਸਵੋ ਸਮ੍ਮਜ੍ਜਨਾਨਿਸਂਸਂ ਸਬ੍ਬੇਸਂ ਪਾਕਟਂ ਕਾਤੁਂ ਅਵੋਚਾਤਿ ਦਟ੍ਠਬ੍ਬਂ.

‘‘ਜਣ੍ਣੁਕੇਹਿ ¶ ਪਤਿਟ੍ਠਾਯ ਪਦਚੇਤਿਯ’’ਨ੍ਤਿ ਪਾਠਸੇਸੋ. ਚੋਦਨਂ ਕਾਰੇਸ੍ਸਾਮੀਤਿ ਭਗਵਤਾ ਅਤ੍ਤਾਨਂ ਚੋਦਾਪੇਸ੍ਸਾਮਿ, ਅਤ੍ਤਾਨਂ ਨਿਗ੍ਗਣ੍ਹਾਪੇਸ੍ਸਾਮੀਤਿ ਅਤ੍ਥੋ.

ਏਤ੍ਤਕਂ ਗਯ੍ਹੂਪਗਨ੍ਤਿ ਏਤ੍ਤਕਂ ਅਧਿਕਰਣਵੂਪਸਮਤ੍ਥਾਯ ਗਹੇਤਬ੍ਬਵਚਨਨ੍ਤਿ ਯਥਾ ਸੁਤ੍ਵਾ ਵਿਞ੍ਞਾਤੁਂ ਸਕ੍ਕੋਤਿ, ਏਵਂ ਅਨੁਗ੍ਗਣ੍ਹਨ੍ਤੋਤਿ ਯੋਜਨਾ. ਏਤ੍ਥ ਚ ‘‘ਅਤ੍ਤਨੋ ਭਾਸਪਰਿਯਨ੍ਤਂ ਅਨੁਗ੍ਗਹੇਤ੍ਵਾ ਪਰਸ੍ਸ ਭਾਸਪਰਿਯਨ੍ਤਂ ਅਨੁਗ੍ਗਹੇਤ੍ਵਾ’’ਤਿ ਏਕਂ, ‘‘ਅਧਮ੍ਮੇਨ ਕਰੋਤੀ’’ਤਿ ਏਕਂ, ‘‘ਅਪ੍ਪਟਿਞ੍ਞਾਯਾ’’ਤਿ ਏਕਞ੍ਚ ਕਤ੍ਵਾ ਪੁਰਿਮੇਹਿ ਦ੍ਵੀਹਿ ਪਞ੍ਚਙ੍ਗਾਨਿ ਵੇਦਿਤਬ੍ਬਾਨਿ. ਵਤ੍ਥੁਨ੍ਤਿ ਮੇਥੁਨਾਦਿਵੀਤਿਕ੍ਕਮਂ. ਕਥਾਨੁਸਨ੍ਧਿਵਿਨਿਚ੍ਛਯਾਨੁਲੋਮਸਨ੍ਧਿਵਸੇਨ ਵਤ੍ਥੁਂ ਨ ਜਾਨਾਤੀਤਿ ਚੋਦਕੇਨ ਵਾ ਚੁਦਿਤਕੇਨ ਵਾ ਵੁਤ੍ਤਕਥਾਨੁਸਨ੍ਧਿਨਾ ਤੇਸਂ ਵਚਨਪਟਿਵਚਨਾਨੁਰੂਪੇਨ ਵਦਨ੍ਤੋ ਕਥਾਨੁਸਨ੍ਧਿਨਾ ਵਤ੍ਥੁਂ ਨ ਜਾਨਾਤਿ ਨਾਮ, ਤਞ੍ਚ ਸੁਤ੍ਤਵਿਭਙ੍ਗੇ ਵਿਨੀਤਵਤ੍ਥੁਸਙ੍ਖਾਤੇਨ ਵਿਨਿਚ੍ਛਯਾਨੁਲੋਮੇਨੇਵ ਵਦਨ੍ਤੋ ਵਿਨਿਚ੍ਛਯਾਨੁਲੋਮਸਨ੍ਧਿਵਸੇਨ ਵਤ੍ਥੁਂ ਨ ਜਾਨਾਤਿ ਨਾਮ. ਞਤ੍ਤਿਕਮ੍ਮਂ ਨਾਮ ਹੋਤੀਤਿ ਞਤ੍ਤਿਕਮ੍ਮਂ ਨਿਟ੍ਠਿਤਂ ਨਾਮ ਹੋਤੀਤਿ ਨ ਜਾਨਾਤੀਤਿ ਸਮ੍ਬਨ੍ਧੋ. ਞਤ੍ਤਿਯਾ ਕਮ੍ਮਪ੍ਪਤ੍ਤੋਤਿ ਞਤ੍ਤਿਯਾ ਨਿਟ੍ਠਿਤਾਯਪਿ ਕਮ੍ਮਪ੍ਪਤ੍ਤੋ ਏਵ ਹੋਤਿ. ਅਨੁਸ੍ਸਾਵਨਟ੍ਠਾਨੇ ਏਵ ਕਮ੍ਮਂ ਨਿਟ੍ਠਿਤਂ ਹੋਤੀਤਿ ਞਤ੍ਤਿਕਮ੍ਮਂ ਨਿਟ੍ਠਿਤਂ ਨਾਮ ਹੋਤਿ, ਤਂ ਞਤ੍ਤਿਯਾ ਕਾਰਣਂ ਨ ਜਾਨਾਤੀਤਿ ਅਤ੍ਥੋ.

ਪਾਲ਼ਿਯਂ ਪਞ੍ਚ ਵਿਸੁਦ੍ਧਿਯੋਤਿ ਆਪਤ੍ਤਿਤੋ ਵਿਸੁਦ੍ਧਿਹੇਤੁਤ੍ਤਾ, ਵਿਸੁਦ੍ਧੇਹਿ ਕਤ੍ਤਬ੍ਬਤੋ ਚ ਪਾਤਿਮੋਕ੍ਖੁਦ੍ਦੇਸਾ ਵੁਤ੍ਤਾ.

੩੨੬. ਛਕ੍ਕਾਦੀਸੁ ¶ ਪਾਲ਼ਿਯਂ ਛ ਅਗਾਰਵਾਤਿ ਬੁਦ੍ਧਧਮ੍ਮਸਙ੍ਘਸਿਕ੍ਖਾਸੁ, ਅਪ੍ਪਮਾਦੇ, ਪਟਿਸਨ੍ਥਾਰੇ ਚ ਛ ਅਗਾਰਵਾ, ਤੇਸੁ ਏਵ ਚ ਛ ਗਾਰਵਾ ਵੇਦਿਤਬ੍ਬਾ. ‘‘ਛਬ੍ਬਸ੍ਸਪਰਮਤਾ ਧਾਰੇਤਬ੍ਬ’’ਨ੍ਤਿ ਇਦਂ ਵਿਭਙ੍ਗੇ ਆਗਤਸ੍ਸ ਪਰਮਸ੍ਸ ਦਸ੍ਸਨਂ.

੩੨੮. ਪਾਲ਼ਿਯਂ ਆਗਤੇਹਿ ਸਤ੍ਤਹੀਤਿ ‘‘ਪੁਬ੍ਬੇਵਸ੍ਸ ਹੋਤਿ ਮੁਸਾ ਭਣਿਸ੍ਸ’’ਨ੍ਤਿਆਦਿਨਾ ਮੁਸਾਵਾਦਸਿਕ੍ਖਾਪਦੇ (ਪਾਚਿ. ੪) ਆਗਤੇਹਿ ਸਤ੍ਤਹਿ.

੩੨੯. ਤਂ ¶ ਕੁਤੇਤ੍ਥ ਲਬ੍ਭਾਤਿ ਤਂ ਅਨਤ੍ਥਸ੍ਸ ਅਚਰਣਂ ਏਤ੍ਥ ਏਤਸ੍ਮਿਂ ਪੁਗ੍ਗਲੇ, ਲੋਕਸਨ੍ਨਿਵਾਸੇ ਵਾ ਕੁਤੋ ਕੇਨ ਕਾਰਣੇਨ ਸਕ੍ਕਾ ਲਦ੍ਧੁਨ੍ਤਿ ਆਘਾਤਂ ਪਟਿਵਿਨੇਤਿ.

੩੩੦. ਸਸ੍ਸਤੋ ਲੋਕੋਤਿਆਦਿਨਾ ਵਸੇਨਾਤਿ ‘‘ਸਸ੍ਸਤੋ ਲੋਕੋ, ਅਸਸ੍ਸਤੋ ਲੋਕੋ. ਅਨ੍ਤਵਾ ਲੋਕੋ, ਅਨਨ੍ਤਵਾ ਲੋਕੋ. ਤਂ ਜੀਵਂ ਤਂ ਸਰੀਰਨ੍ਤਿ ਵਾ, ਅਞ੍ਞਂ ਜੀਵਂ ਅਞ੍ਞਂ ਸਰੀਰਨ੍ਤਿ ਵਾ. ਹੋਤਿ ਤਥਾਗਤੋ ਪਰਮ੍ਮਰਣਾ, ਨ ਹੋਤਿ ਤਥਾਗਤੋ ਪਰਮ੍ਮਰਣਾ. ਹੋਤਿ ਚ ਨ ਹੋਤਿ ਚ ਤਥਾਗਤੋ ਪਰਮ੍ਮਰਣਾ, ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਮ੍ਮਰਣਾ’’ਤਿ (ਮ. ਨਿ. ੧.੨੬੯) ਏਵਂ ਆਗਤਾ ਦਸ ਅਨ੍ਤਗ੍ਗਾਹਿਕਾ ਦਿਟ੍ਠਿਯੋ ਸਨ੍ਧਾਯ ਵੁਤ੍ਤਂ. ਮਿਚ੍ਛਾਦਿਟ੍ਠਿਆਦਯੋਤਿ ਮਿਚ੍ਛਾਦਿਟ੍ਠਿਮਿਚ੍ਛਾਸਙ੍ਕਪ੍ਪਾਦਯੋ ਅਟ੍ਠਮਿਚ੍ਛਾਞਾਣਮਿਚ੍ਛਾਵਿਮੁਤ੍ਤੀਹਿ ਸਦ੍ਧਿਂ ਦਸ ਮਿਚ੍ਛਤ੍ਤਾ. ਤਤ੍ਥ ਮਿਚ੍ਛਾਞਾਣਨ੍ਤਿ ਮਿਚ੍ਛਾਦਿਟ੍ਠਿਸਮ੍ਪਯੁਤ੍ਤੋ ਮੋਹੋ. ਅਵਿਮੁਤ੍ਤਸ੍ਸੇਵ ਵਿਮੁਤ੍ਤਸਞ੍ਞਿਤਾ ਮਿਚ੍ਛਾਵਿਮੁਤ੍ਤਿ ਨਾਮ.

ਵਿਪਰੀਤਾਤਿ ਸਮ੍ਮਾਦਿਟ੍ਠਿਆਦਯੋ ਸਮ੍ਮਾਞਾਣਸਮ੍ਮਾਵਿਮੁਤ੍ਤਿਪਰਿਯੋਸਾਨਾ ਦਸ. ਤਤ੍ਥ ਸਮ੍ਮਾਵਿਮੁਤ੍ਤਿ ਅਰਹਤ੍ਤਫਲਂ, ਤਂਸਮ੍ਪਯੁਤ੍ਤਂ ਪਨ ਞਾਣਂ ਵਾ ਪਚ੍ਚਵੇਕ੍ਖਣਞਾਣਂ ਵਾ ਸਮ੍ਮਾਞਾਣਨ੍ਤਿ ਵੇਦਿਤਬ੍ਬਂ.

ਉਪੋਸਥਾਦਿਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ

੩੩੨. ਉਪੋਸਥਾਦਿਪੁਚ੍ਛਾਸੁ ¶ ਪਵਾਰਣਗਾਥਾਤਿ ਦਿਟ੍ਠਾਦੀਹਿ ਤੀਹਿ ਠਾਨੇਹਿ ਪਵਾਰਣਾਵਾਚਾ ਏਵ. ਏਵਂ ਵੁਤ੍ਤਾਨਂ ਪਨ ਛਨ੍ਦੋਵਿਚਿਤਿਲਕ੍ਖਣੇਨ ਵੁਤ੍ਤਜਾਤਿਭੇਦਾ ਗਾਥਾ.

ਸਤ੍ਤਨਗਰੇਸੁ ਪਞ੍ਞਤ੍ਤਸਿਕ੍ਖਾਪਦਵਣ੍ਣਨਾ

੩੩੫. ਅਡ੍ਢੁਡ੍ਢਸਤਾਨੀਤਿ ¶ ¶ ਪਞ੍ਞਾਸਾਧਿਕਾਨਿ ਤੀਣਿ ਸਤਾਨਿ. ਵਿਗ੍ਗਹਪਦੇਨ ਮਨੁਸ੍ਸਵਿਗ੍ਗਹਂ ਵੁਤ੍ਤਂ.

ਅਤਿਰੇਕਨ੍ਤਿ ਪਠਮਕਥਿਨਂ. ਕਾਲ਼ਕਨ੍ਤਿ ਸੁਦ੍ਧਕਾਲ਼ਕਂ. ਭੂਤਨ੍ਤਿ ਭੂਤਾਰੋਚਨਂ. ਭਿਕ੍ਖੁਨੀਸੁ ਚ ਅਕ੍ਕੋਸੋਤਿ ‘‘ਯਾ ਪਨ ਭਿਕ੍ਖੁਨੀ ਭਿਕ੍ਖੁਂ ਅਕ੍ਕੋਸੇਯ੍ਯਾ’’ਤਿ (ਪਾਚਿ. ੧੦੨੯) ਵੁਤ੍ਤਂ ਸਿਕ੍ਖਾਪਦਂ.

ਦ੍ਵੇਪਿ ਚ ਭੇਦਾਤਿ ਦ੍ਵੇ ਸਙ੍ਘਭੇਦਸਿਕ੍ਖਾਪਦਾਨਿ. ਅਨ੍ਤਰਵਾਸਕਨਾਮੇਨ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਹਤ੍ਥਤੋ ਚੀਵਰਪਟਿਗ੍ਗਹਣਂ ਵੁਤ੍ਤਂ. ਸੁਤ੍ਤਨ੍ਤਿ ਸੁਤ੍ਤਂ ਵਿਞ੍ਞਾਪੇਤ੍ਵਾ ਵਾਯਾਪਨਂ. ਵਿਕਾਲੇਤਿ ਵਿਕਾਲਭੋਜਨਂ. ਚਾਰਿਤ੍ਤਨ੍ਤਿ ਪੁਰੇਭਤ੍ਤਂ ਪਚ੍ਛਾਭਤ੍ਤਂ ਚਾਰਿਤ੍ਤਂ. ਨਹਾਨਨ੍ਤਿ ਓਰੇਨਦ੍ਧਮਾਸਨਹਾਨਂ.

ਚੀਵਰਂ ਦਤ੍ਵਾਤਿ ਸਮਗ੍ਗੇਨ ਸਙ੍ਘੇਨ ਚੀਵਰਂ ਦਤ੍ਵਾ ਖਿਯ੍ਯਨਂ. ਗਿਰਗ੍ਗਨ੍ਤਿ ਨਚ੍ਚਗੀਤਂ. ਚਰਿਯਾਤਿ ਅਨ੍ਤੋਵਸ੍ਸਂ ਚਾਰਿਕਚਰਣਂ. ਤਤ੍ਥੇਵਾਤਿ ਵਸ੍ਸਂਵੁਤ੍ਥਾਯ ਚਾਰਿਕਂ ਅਪਕ੍ਕਮਿਤ੍ਵਾ ਤਤ੍ਥੇਵ ਨਿਵਾਸਨਂ ਪਟਿਚ੍ਚ ਪਞ੍ਞਤ੍ਤਸਿਕ੍ਖਾਪਦਂ. ਛਨ੍ਦਦਾਨੇਨਾਤਿ ਪਾਰਿਵਾਸਿਕੇਨ ਛਨ੍ਦਦਾਨੇਨ.

ਪਾਰਾਜਿਕਾਨਿ ਚਤ੍ਤਾਰੀਤਿ ਭਿਕ੍ਖੁਨੀਨਂ ਅਸਾਧਾਰਣਾਨਿ. ਸੋਲ਼ਸਾਤਿ ਆਦਿਤੋ ਪਞ੍ਚ ਸਿਕ੍ਖਾਪਦਾਨਿ, ਕੁਲਦੂਸਨਞ੍ਚਾਤਿ ਛ, ਭਿਕ੍ਖੁਨੀਨਂ ਅਸਾਧਾਰਣਾਨਿ ਦਸ ਨਿਸ੍ਸਗ੍ਗਿਯਾਨਿ.

ਚਤੁਤ੍ਤਿਂਸਾਤਿ ਪਠਮਕਥਿਨਸੁਦ੍ਧਕਾਲ਼ਕਚੀਵਰਪਟਿਗ੍ਗਹਣਰੂਪਿਯਚੀਵਰਵਾਯਾਪਨਕੋਸੇਯ੍ਯਮਿਸ੍ਸਕਏਲ਼ਕਲੋਮਧੋਵਾਪਨਦੁਤਿਯਪਤ੍ਤਵਜ੍ਜਿਤਾਨਿ ¶ ਭਿਕ੍ਖੁਵਿਭਙ੍ਗੇ ਦ੍ਵਾਵੀਸਤਿ, ਭਿਕ੍ਖੁਨੀਨਂ ਅਸਾਧਾਰਣਾਨਿ ਦ੍ਵਾਦਸ ਚਾਤਿ ਚਤੁਤ੍ਤਿਂਸ. ਛਪਞ੍ਞਾਸਸਤਨ੍ਤਿ ਵੇਸਾਲਿਯਾਦੀਸੁ ਪਞ੍ਞਤ੍ਤਾਨਿ ਦ੍ਵਤ੍ਤਿਂਸਸਿਕ੍ਖਾਪਦਾਨਿ ਠਪੇਤ੍ਵਾ ਸੇਸਾ ਛਪਞ੍ਞਾਸਸਤਂ.

ਦਸ ¶ ਗਾਰਯ੍ਹਾਤਿ ਵੋਸਾਸਅਪ੍ਪਟਿਸਂ ਵਿਦਿਤਸਿਕ੍ਖਾਪਦਦ੍ਵਯਞ੍ਚ ਠਪੇਤ੍ਵਾ ਸੇਸਾਨਿ ਦਸ ਪਾਟਿਦੇਸਨੀਯਾਨਿ. ਦ੍ਵੇ ਸਤ੍ਤਤਿ ਸੇਖਿਯਾਨਿ ਸੁਰੁਸੁਰੁਕਾਰਕਸਾਮਿਸੇਨਹਤ੍ਥੇਨਪਾਨੀਯਥਾਲਕਪਟਿਗ੍ਗਹਣਸਸਿਤ੍ਥਕਪਤ੍ਤਧੋਵਨਾਨਿ ਤੀਣਿ ਠਪੇਤ੍ਵਾ ਸੇਸਾਨਿ ਸੇਖਿਯਾਨਿ.

ਸੇਯ੍ਯਾਤਿ ਅਨੁਪਸਮ੍ਪਨ੍ਨੇਨ ਸਹਸੇਯ੍ਯਸਿਕ੍ਖਾਪਦਂ. ਖਣਨੇਤਿ ਪਥਵੀਖਣਨਂ. ਗਚ੍ਛ ਦੇਵਤੇਤਿ ਭੂਤਗਾਮਸਿਕ੍ਖਾਪਦਂ ਵੁਤ੍ਤਂ. ਸਪ੍ਪਾਣਕਂ ਸਿਞ੍ਚਨ੍ਤਿ ਸਪ੍ਪਾਣੋਦਕਸਿਞ੍ਚਨਂ. ਮਹਾਵਿਹਾਰੋਤਿ ਮਹਲ੍ਲਕਵਿਹਾਰੋ.

ਅਞ੍ਞਨ੍ਤਿ ਅਞ੍ਞਵਾਦਕਂ. ਦ੍ਵਾਰਨ੍ਤਿ ਯਾਵ ਦ੍ਵਾਰਕੋਸਾ ਅਗ੍ਗਲ਼ਟ੍ਠਪਨਂ. ਸਹਧਮ੍ਮੋਤਿ ਸਹਧਮ੍ਮਿਕਂ ਵੁਚ੍ਚਮਾਨੋ. ਪਯੋਪਾਨਨ੍ਤਿ ਸੁਰੁਸੁਰੁਕਾਰਕਸਿਕ੍ਖਾਪਦਂ.

ਏਲ਼ਕਲੋਮੋਤਿ ਏਲ਼ਕਲੋਮਧੋਵਾਪਨਂ. ਪਤ੍ਤੋ ਚਾਤਿ ਦੁਤਿਯਪਤ੍ਤੋ. ਓਵਾਦੋਤਿ ਭਿਕ੍ਖੁਨੁਪਸ੍ਸਯਂ ਉਪਸਙ੍ਕਮਿਤ੍ਵਾ ਓਵਾਦੋ. ਭੇਸਜ੍ਜਨ੍ਤਿ ਚਤੁਮਾਸਪਚ੍ਚਯਪਵਾਰਣਾਸਿਕ੍ਖਾਪਦਂ. ਆਰਞ੍ਞਿਕੋਤਿ ਚਤੁਤ੍ਥਪਾਟਿਦੇਸਨੀਯਂ. ਓਵਾਦੋਤਿ ਓਵਾਦਾਯ ਵਾ ਸਂਵਾਸਾਯ ਵਾ ਅਗਮਨਂ.

੩੩੭. ‘‘ਯੇ ਚ ਯਾਵਤਤਿਯਕਾ’’ਤਿ ਪਞ੍ਹਸ੍ਸ ‘‘ਇਮੇ ਖੋ ਯਾਵਤਤਿਯਕਾ’’ਤਿ ਵਿਸ੍ਸਜ੍ਜਨਂ ਵਤ੍ਵਾ ਤਦਨਨ੍ਤਰਂ ‘‘ਸਾਧਾਰਣਂ ਅਸਾਧਾਰਣ’’ਨ੍ਤਿਆਦਿਪਞ੍ਹਾਨਂ ਵਿਸ੍ਸਜ੍ਜਨੇ ਵਤ੍ਤਬ੍ਬੇ ਯਸ੍ਮਾ ਤਂ ਅਵਤ੍ਵਾ ‘‘ਕਤਿ ਛੇਦਨਕਾਨੀ’’ਤਿਆਦਿਕੇ ਅਟ੍ਠ ਪਞ੍ਹੇ ਅਨ੍ਤਰਾ ਵਿਸ੍ਸਜ੍ਜੇਤ੍ਵਾ ਤੇਸਂ ਅਨਨ੍ਤਰਾ ‘‘ਵੀਸਂ ਦ੍ਵੇ ਸਤਾਨਿ ਭਿਕ੍ਖੂਨਂ…ਪੇ… ਛਚਤ੍ਤਾਰੀਸਾ ਭਿਕ੍ਖੂਨਂ, ਭਿਕ੍ਖੁਨੀਹਿ ਅਸਾਧਾਰਣਾ’’ਤਿਆਦਿਨਾ ਉਕ੍ਕਮੇਨੇਵ ਸਾਧਾਰਣਾਦਿਪਞ੍ਹਾ ਵਿਸ੍ਸਜ੍ਜਿਤਾ, ਤਸ੍ਮਾ ਤਂ ਉਕ੍ਕਮਵਿਸ੍ਸਜ੍ਜਨਕਾਰਣਂ ਦਸ੍ਸੇਤੁਂ ‘‘ਯਸ੍ਮਾ ਪਨ ਯੇ ਚ ਯਾਵਤਤਿਯਕਾਤਿ ਅਯਂ ਪਞ੍ਹੋ’’ਤਿਆਦਿਮਾਹ.

੩੩੮. ਧੋਵਨਞ੍ਚ ਪਟਿਗ੍ਗਹੋਤਿਆਦਿਗਾਥਾ ਅਟ੍ਠਕਥਾਚਰਿਯਾਨਂ ਗਾਥਾਵ. ਛਬ੍ਬਸ੍ਸਾਨਿ ਨਿਸੀਦਨਨ੍ਤਿ ਦ੍ਵੇ ਸਿਕ੍ਖਾਪਦਾਨਿ. ਦ੍ਵੇ ਲੋਮਾਤਿ ਤਿਯੋਜਨਾਤਿਕ੍ਕਮਧੋਵਾਪਨਵਸੇਨ ਦ੍ਵੇ ਏਲ਼ਕਲੋਮਸਿਕ੍ਖਾਪਦਾਨਿ. ਵਸ੍ਸਿਕਾ ਆਰਞ੍ਞਕੇਨ ਚਾਤਿ ਵਸ੍ਸਿਕਸਾਟਿਕਾ ਪਰਿਯੇਸਨਅਰਞ੍ਞਕੇਸੁ ਸੇਨਾਸਨੇਸੁ ਵਿਹਰਣਸਿਕ੍ਖਾਪਦੇਨ ਸਹ.

ਪਣੀਤਨ੍ਤਿ ¶ ਪਣੀਤਭੋਜਨਵਿਞ੍ਞਾਪਨਂ. ਊਨਨ੍ਤਿ ਊਨਵੀਸਤਿਵਸ੍ਸੂਪਸਮ੍ਪਾਦਨਂ. ਮਾਤੁਗਾਮੇਨ ਸਦ੍ਧਿਨ੍ਤਿ ਸਂਵਿਧਾਯ ਗਮਨਂ ਵੁਤ੍ਤਂ. ਯਾ ਸਿਕ੍ਖਾਤਿ ਯਂ ਸਿਕ੍ਖਾਪਦਂ. ਨਿਸੀਦਨੇ ¶ ਚ ਯਾ ਸਿਕ੍ਖਾਤਿ ਪਮਾਣਾਤਿਕ੍ਕਨ੍ਤਨਿਸੀਦਨਕਾਰਾਪਨੇ ਯਂ ਸਿਕ੍ਖਾਪਦਂ. ਤਥਾ ਵਸ੍ਸਿਕਾ ਯਾ ਚ ਸਾਟਿਕਾਤਿ ਏਤ੍ਥਾਪਿ.

ਪਾਲ਼ਿਯਂ ਸਤਂ ਸਤ੍ਤਤਿ ਛਚ੍ਚੇਵਿਮੇ ਹੋਨ੍ਤਿ ਉਭਿਨ੍ਨਂ ਅਸਾਧਾਰਣਾਤਿ ਭਿਕ੍ਖੂਨਂ ਭਿਕ੍ਖੁਨੀਹਿ ਅਸਾਧਾਰਣਾ ਛਚਤ੍ਤਾਰੀਸ, ਭਿਕ੍ਖੁਨੀਨਂ ਭਿਕ੍ਖੂਹਿ ਅਸਾਧਾਰਣਾ ਤਿਂਸਾਧਿਕਂ ਸਤਞ੍ਚਾਤਿ ਏਵਂ ਉਭਿਨ੍ਨਂ ਅਸਾਧਾਰਣਾ ਚ ਛਸਤ੍ਤਤਿਅਧਿਕਂ ਸਤਂ ਸਿਕ੍ਖਾਪਦਾਨੀਤਿ ਅਤ੍ਥੋ. ਸਤਂ ਸਤ੍ਤਤਿ ਚਤ੍ਤਾਰੀਤਿ ਉਭਿਨ੍ਨਂ ਸਾਧਾਰਣਸਿਕ੍ਖਾਨਂ ਗਣਨਾ ਚਤੁਸਤ੍ਤਤਿਅਧਿਕਂ ਸਤਂ ਸਿਕ੍ਖਾਪਦਾਨੀਤਿ ਅਤ੍ਥੋ.

ਵਿਭਤ੍ਤਿਯੋਤਿ ਆਪਤ੍ਤਿਕ੍ਖਨ੍ਧਾ ਚੇਵ ਉਪੋਸਥਪਵਾਰਣਾਦਯੋ ਚ ਅਧਿਪ੍ਪੇਤਾ. ਤੇ ਹਿ ਪਾਰਾਜਿਕਾਦਿਭੇਦੇਨ, ਭਿਕ੍ਖੁਉਪੋਸਥਾਦਿਭੇਦੇਨ ਚ ਵਿਭਜੀਯਨ੍ਤਿ. ਤੇਨਾਹ ‘‘ਵਿਭਤ੍ਤਿਯੋ’’ਤਿਆਦਿ. ਤੇਸਨ੍ਤਿ ਅਟ੍ਠਨ੍ਨਂ ਪਾਰਾਜਿਕਾਦੀਨਂ. ਦ੍ਵੀਹੀਤਿਆਦਿ ਵਿਵਾਦਾਧਿਕਰਣਾਦੀਨਂ ਸਮਥੇਹਿ ਵੂਪਸਮਦਸ੍ਸਨਂ.

ਸਤ੍ਤਨਗਰੇਸੁ ਪਞ੍ਞਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩੩੯. ਇਦਨ੍ਤਿ ‘‘ਪਾਰਾਜਿਕਨ੍ਤਿ ਯਂ ਵੁਤ੍ਤ’’ਨ੍ਤਿਆਦਿਨਾ ਵੁਤ੍ਤਂ ਵਚਨਂ ਸਨ੍ਧਾਯ ਵਦਤਿ. ਇਦਞ੍ਹਿ ਹੇਟ੍ਠਾ ‘‘ਗਰੁਕ ਲਹੁਕ’’ਨ੍ਤਿਆਦਿਨਾ ਉਦ੍ਧਟਪਞ੍ਹੇਸੁ ਅਨਾਗਤਮ੍ਪਿ ‘‘ਸਬ੍ਬਾਨਿਪੇਤਾਨਿ ਵਿਯਾਕਰੋਹਿ, ਹਨ੍ਦ ਵਾਕ੍ਯਂ ਸੁਣੋਮ ਤੇ’’ਤਿ ਏਤ੍ਥ ਯਥਾਵੁਤ੍ਤਾਨਿ ਅਞ੍ਞਾਨਿਪਿ ‘‘ਸਬ੍ਬਾਨਿਪੇਤਾਨਿ ਵਿਯਾਕਰੋਹਿ, ਹਨ੍ਦ ਵਾਕ੍ਯਂ ਸੁਣੋਮਾ’’ਤਿ ਏਵਂ ਗਹਿਤਮੇਵਾਤਿ ਦਸ੍ਸੇਨ੍ਤੋ ‘‘ਇਮਿਨਾ ਪਨ ਆਯਾਚਨਵਚਨੇਨ ਸਙ੍ਗਹਿਤਸ੍ਸਾ’’ਤਿਆਦਿ ਵੁਤ੍ਤਂ.

ਅਤਿਵਸ੍ਸਤੀਤਿ ਓਵਸ੍ਸਤਿ, ਵਸ੍ਸੋਦਕਂ ਪਵਿਸਤੀਤਿ ਅਤ੍ਥੋ. ਧਮ੍ਮਾਨਨ੍ਤਿ ਯਥਾ ਚਤੁਪਚ੍ਚਯੇ ਧਾਰਯਤੀਤਿ ਧਮ੍ਮੋ, ਤੇਸਂ. ਤੇਨਾਹ ‘‘ਸਙ੍ਖਤਧਮ੍ਮਾਨ’’ਨ੍ਤਿ. ਗਾਥਾਸਙ੍ਗਣਿਕਨ੍ਤਿ ਗਾਥਾਸਙ੍ਗਹੋ, ਤੇ ਤੇ ਅਤ੍ਥਾ ਗਾਥਾਹਿ ਸਙ੍ਗਹੇਤ੍ਵਾ ਗਣੀਯਨ੍ਤਿ ਕਥੀਯਨ੍ਤਿ ਏਤ੍ਥਾਤਿ ਹਿ ਗਾਥਾਸਙ੍ਗਣਿਕਂ.

ਪਾਰਾਜਿਕਾਦਿਆਪਤ੍ਤਿਵਣ੍ਣਨਾ ਨਿਟ੍ਠਿਤਾ.

ਪਠਮਗਾਥਾਸਙ੍ਗਣਿਕਵਣ੍ਣਨਾਨਯੋ ਨਿਟ੍ਠਿਤੋ.

੩੪੧. ‘‘ਅਲਂ ¶ ¶ ਆਵੁਸੋ’’ਤਿ ਅਤ੍ਤਪਚ੍ਚਤ੍ਥਿਕੇ ਸਞ੍ਞਾਪੇਤ੍ਵਾਤਿ ਪਤ੍ਤਚੀਵਰਾਦਿਅਤ੍ਥਾਯ ਅਲਂ ਭਣ੍ਡਨਾਦਿਕਰਣਨ੍ਤਿ ਵਿਵਾਦਾਦੀਸੁ ਦੋਸਦਸ੍ਸਨਮਤ੍ਤੇਨ ਸਞ੍ਞਾਪੇਤ੍ਵਾ ਅਞ੍ਞਮਞ੍ਞਂ ਖਮਾਪੇਤ੍ਵਾ ਵੂਪਸਮੇਨ੍ਤਿ, ਨ ਪਨ ਅਞ੍ਞਮਞ੍ਞਂ ਆਪਤ੍ਤਾਨਾਪਤ੍ਤਿਦਸ੍ਸਨਵਸੇਨਾਤਿ ਅਧਿਪ੍ਪਾਯੋ. ਤੇਨਾਹ ‘‘ਪਾਲ਼ਿਮੁਤ੍ਤਕਵਿਨਿਚ੍ਛਯੇਨੇਵਾ’’ਤਿ.

ਵਿਸਮਾਨਿ ਕਾਯਕਮ੍ਮਾਦੀਨਿ ਨਿਸ੍ਸਿਤੋ ਭਿਕ੍ਖੁ ਵਿਸਮਨਿਸ੍ਸਿਤੋ ਨਾਮ, ਮਿਚ੍ਛਾਦਿਟ੍ਠਿਨਿਸ੍ਸਿਤੋ ਗਹਨਨਿਸ੍ਸਿਤੋ, ਬਲਵਨ੍ਤੇ ਪੁਰਿਸੇ ਨਿਸ੍ਸਿਤੋ ਬਲਵਨਿਸ੍ਸਿਤੋ ਨਾਮਾਤਿ ਦਸ੍ਸੇਨ੍ਤੋ ‘‘ਏਕੋ ਵਿਸਮਾਨੀ’’ਤਿਆਦਿਮਾਹ.

ਉਕ੍ਕੋਟਨਭੇਦਾਦਿਕਥਾਵਣ੍ਣਨਾ ਨਿਟ੍ਠਿਤਾ.

੩੪੨. ਆਪਤ੍ਤਿਂ ਨਿਸ੍ਸਾਯ ਉਪ੍ਪਜ੍ਜਨਕਆਪਤ੍ਤਿਵਸੇਨਾਤਿ ਪਰੇਸਂ, ਅਤ੍ਤਨੋ ਚ ਆਪਤ੍ਤਿਂ ਪਟਿਚ੍ਛਾਦੇਨ੍ਤਾਨਂ ਵਜ੍ਜਪਟਿਚ੍ਛਾਦੀਨਂ ਪਾਰਾਜਿਕਾਦਿਆਪਤ੍ਤਿਮੇਵ ਸਨ੍ਧਾਯ ਵੁਤ੍ਤਂ, ਨ ਸਬ੍ਬਾਪਤ੍ਤਿਯੋ. ਕਿਚ੍ਚਂ ਨਿਸ੍ਸਾਯ ਉਪ੍ਪਜ੍ਜਨਕਕਿਚ੍ਚਾਨਨ੍ਤਿ ਉਕ੍ਖੇਪਨੀਯਾਦਿਕਮ੍ਮਂ ਨਿਸ੍ਸਾਯ ਉਪ੍ਪਜ੍ਜਨਕਾਨਂ ਤਦਨੁਵਤ੍ਤਿਕਾਯ ਭਿਕ੍ਖੁਨਿਯਾ ਯਾਵਤਤਿਯਾਨੁਸ੍ਸਾਵਨਾਨਂ ਕਿਚ੍ਚਾਨਂ ਵਸੇਨ, ਨ ਸਬ੍ਬੇਸਂ ਕਿਚ੍ਚਾਨਂ ਵਸੇਨਾਤਿ.

੩੪੪. ਪਾਲ਼ਿਯਂ ‘‘ਕਤਿਹਿ ਅਧਿਕਰਣੇਹੀ’’ਤਿ ਪੁਚ੍ਛਾਯ ‘‘ਏਕੇਨ ਅਧਿਕਰਣੇਨ ਕਿਚ੍ਚਾਧਿਕਰਣੇਨਾ’’ਤਿ ਵੁਤ੍ਤਂ. ‘‘ਕਤਿਸੁ ਠਾਨੇਸੂ’’ਤਿ ਪੁਚ੍ਛਾਯ ‘‘ਤੀਸੁ ਠਾਨੇਸੁ ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ’’ਤਿ ਵੁਤ੍ਤਂ. ‘‘ਕਤਿਹਿ ਸਮਥੇਹੀ’’ਤਿ ਪੁਚ੍ਛਾਯ ‘‘ਤੀਹਿ ਸਮਥੇਹੀ’’ਤਿ ਵੁਤ੍ਤਂ. ਤੀਹਿਪਿ ਏਤੇਹਿ ਏਕੋ ਵੂਪਸਮਨਪ੍ਪਕਾਰੋਵ ਪੁਚ੍ਛਿਤੋ, ਵਿਸ੍ਸਜ੍ਜਿਤੋ ਚਾਤਿ ਵੇਦਿਤਬ੍ਬੋ.

੩੪੮. ਵਿਵਾਦਾਧਿਕਰਣਂ ¶ ਹੋਤਿ ਅਨੁਵਾਦਾਧਿਕਰਣਨ੍ਤਿਆਦੀਸੁ ਵਿਵਾਦਾਧਿਕਰਣਮੇਵ ਅਨੁਵਾਦਾਧਿਕਰਣਾਦਿਪਿ ਹੋਤੀਤਿ ਪੁਚ੍ਛਾਯ ਵਿਵਾਦਾਧਿਕਰਣਂ ਵਿਵਾਦਾਧਿਕਰਣਮੇਵ ਹੋਤਿ, ਅਨੁਵਾਦਾਦਯੋ ਨ ਹੋਤੀਤਿ ਵਿਸ੍ਸਜ੍ਜਨਂ.

ਅਧਿਕਰਣਨਿਦਾਨਾਦਿਵਣ੍ਣਨਾ ਨਿਟ੍ਠਿਤਾ.

੩੫੪. ਅਧਿਕਰਣਪੁਚ੍ਛਾਵਿਸ੍ਸਜ੍ਜਨੇ ¶ ਪਾਲ਼ਿਯਂ ਵਿਪਚ੍ਚਯਤਾਯ ਵੋਹਾਰੋਤਿ ਵਿਰੂਪਵਿਪਾਕਾਯ ਅਞ੍ਞਮਞ੍ਞਂ ਦੁਕ੍ਖੁਪ੍ਪਾਦਨਾਯ ਕਾਯਵਚੀਵੋਹਾਰੋ. ਮੇਧਗਨ੍ਤਿ ਵੁਦ੍ਧਿਪ੍ਪਤ੍ਤੋ ਕਲਹੋ.

ਅਨੁਸਮ੍ਪਵਙ੍ਕਤਾਤਿ ਵਿਪਤ੍ਤਿਚੋਦਨਾਯ ਅਨੁ ਅਨੁ ਸਂਯੁਜ੍ਜਨਵਸੇਨ ਨਿਨ੍ਨਤਾ.

ਅਬ੍ਭੁਸ੍ਸਹਨਤਾਤਿ ਅਤਿਵਿਯ ਸਞ੍ਜਾਤੁਸ੍ਸਾਹਤਾ. ਅਨੁਬਲਪ੍ਪਦਾਨਨ੍ਤਿ ਚੋਦਕਾਨਮ੍ਪਿ ਉਪਤ੍ਥਮ੍ਭਕਰਣਂ. ਕਮ੍ਮਸਙ੍ਗਹਾਭਾਵੇਨਾਤਿ ਸਙ੍ਘਸਮ੍ਮੁਖਤਾਦਿਮਤ੍ਤਸ੍ਸ ਸਮ੍ਮੁਖਾਵਿਨਯਸ੍ਸ ਸਙ੍ਘਾਦੀਹਿ ਕਤ੍ਤਬ੍ਬਕਿਚ੍ਚੇਸੁ ਸਙ੍ਗਹਾਭਾਵਾ.

ਸਤ੍ਤਸਮਥਨਾਨਾਤ੍ਥਾਦਿਵਣ੍ਣਨਾ ਨਿਟ੍ਠਿਤਾ.

ਅਧਿਕਰਣਭੇਦਵਣ੍ਣਨਾਨਯੋ ਨਿਟ੍ਠਿਤੋ.

ਚੋਦਨਾਦਿਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ

੩੫੯. ਦੁਤਿਯਗਾਥਾਸਙ੍ਗਣਿਕਾਯ ¶ ‘‘ਚੋਦਨਾ ਕਿਮਤ੍ਥਾਯਾ’’ਤਿਆਦਿਕਾ ਪੁਚ੍ਛਾ ਉਪਾਲਿਤ੍ਥੇਰੇਨ ਕਤਾ. ‘‘ਚੋਦਨਾ ਸਾਰਣਤ੍ਥਾਯਾ’’ਤਿਆਦਿਵਿਸ੍ਸਜ੍ਜਨਂ ਭਗਵਤਾ ਵੁਤ੍ਤਂ. ਉਪਾਲਿਤ੍ਥੇਰੋ ਸਯਮੇਵ ਪੁਚ੍ਛਿਤ੍ਵਾ ਵਿਸ੍ਸਜ੍ਜਨਂ ਅਕਾਸੀਤਿਪਿ ਵਦਨ੍ਤਿ.

ਮਨ੍ਤਗ੍ਗਹਣਨ੍ਤਿ ਤੇਸਂ ਵਿਚਾਰਣਾਗਹਣਂ, ਸੁਤ੍ਤਨ੍ਤਿਕਤ੍ਥੇਰਾਨਂ, ਵਿਨਯਧਰਤ੍ਥੇਰਾਨਞ੍ਚ ਅਧਿਪ੍ਪਾਯਗਹਣਨ੍ਤਿ ¶ ਅਤ੍ਥੋ. ਪਾਟੇਕ੍ਕਂ ਵਿਨਿਚ੍ਛਯਸਨ੍ਨਿਟ੍ਠਾਪਨਤ੍ਥਨ੍ਤਿ ਤੇਸਂ ਪਚ੍ਚੇਕਂ ਅਧਿਪ੍ਪਾਯਂ ਞਤ੍ਵਾ ਤੇਹਿ ਸਮੁਟ੍ਠਾਪਿਤਨਯਮ੍ਪਿ ਗਹੇਤ੍ਵਾ ਵਿਨਿਚ੍ਛਯਪਰਿਯੋਸਾਪਨਤ੍ਥਨ੍ਤਿ ਅਧਿਪ੍ਪਾਯੋ.

‘‘ਮਾ ਖੋ ਤੁਰਿਤੋ ਅਭਣੀ’’ਤਿਆਦਿਨਾ ਅਭਿਮੁਖੇ ਠਿਤਂ ਕਞ੍ਚਿ ਅਨੁਵਿਜ੍ਜਕਂ ਓਵਦਨ੍ਤੇਨ ਵਿਯ ਥੇਰੇਨ ਅਨੁਵਿਜ੍ਜਕਵਤ੍ਤਂ ਕਥਿਤਂ.

ਅਨੁਯੁਞ੍ਜਨਵਤ੍ਤਨ੍ਤਿ ਅਨੁਯੁਜ੍ਜਨਕ੍ਕਮਂ, ਤਂ ਪਨ ਯਸ੍ਮਾ ਸਬ੍ਬਸਿਕ੍ਖਾਪਦਵੀਤਿਕ੍ਕਮਵਿਸਯੇਪਿ ਤਂਤਂਸਿਕ੍ਖਾਪਦਾਨੁਲੋਮੇਨ ਕਤ੍ਤਬ੍ਬਂ, ਤਸ੍ਮਾ ‘‘ਸਿਕ੍ਖਾਪਦਾਨੁਲੋਮਿਕ’’ਨ੍ਤਿ ਵੁਤ੍ਤਂ. ਅਤ੍ਤਨੋ ਗਤਿਂ ਨਾਸੇਤੀਤਿ ਅਤ੍ਤਨੋ ਸੁਗਤਿਗਮਨਂ ਵਿਨਾਸੇਤਿ.

ਅਨੁਸਨ੍ਧਿਤ-ਸਦ੍ਦੋ ਭਾਵਸਾਧਨੋਤਿ ਆਹ ‘‘ਅਨੁਸਨ੍ਧਿਤਨ੍ਤਿ ਕਥਾਨੁਸਨ੍ਧੀ’’ਤਿ. ਵਤ੍ਤਾਨੁਸਨ੍ਧਿਤੇਨਾਤਿ ਏਤ੍ਥਾਪਿ ਏਸੇਵ ਨਯੋ. ਵਤ੍ਤਾਨੁਸਨ੍ਧਿਤੇਨਾਤਿ ਆਚਾਰਾਨੁਸਨ੍ਧਿਨਾ, ਆਚਾਰੇਨ ਸਦ੍ਧਿਂ ਸਮੇਨ੍ਤਿਯਾ ਪਟਿਞ੍ਞਾਯਾਤਿ ਅਤ੍ਥੋ. ਤੇਨਾਹ ‘‘ਯਾ ਅਸ੍ਸ ਵਤ੍ਤੇਨਾ’’ਤਿਆਦਿ.

ਪਾਲ਼ਿਯਂ ਸਞ੍ਚਿਚ੍ਚ ਆਪਤ੍ਤਿਨ੍ਤਿਆਦਿ ਅਲਜ੍ਜਿਲਜ੍ਜਿਲਕ੍ਖਣਂ ਭਿਕ੍ਖੁਭਿਕ੍ਖੁਨੀਨਂ ਵਸੇਨ ਵੁਤ੍ਤਂ ਤੇਸਞ੍ਞੇਵ ਸਬ੍ਬਪ੍ਪਕਾਰਤੋ ਸਿਕ੍ਖਾਪਦਾਧਿਕਾਰਤ੍ਤਾ. ਸਾਮਣੇਰਾਦੀਨਮ੍ਪਿ ਸਾਧਾਰਣਵਸੇਨ ਪਨ ਸਞ੍ਚਿਚ੍ਚ ਯਥਾਸਕਂ ਸਿਕ੍ਖਾਪਦਵੀਤਿਕ੍ਕਮਨਾਦਿਕਂ ਅਲਜ੍ਜਿਲਜ੍ਜਿਲਕ੍ਖਣਂ ਵੇਦਿਤਬ੍ਬਂ.

ਕਥਾਨੁਸਨ੍ਧਿਵਚਨਨ੍ਤਿ ਚੁਦਿਤਕਅਨੁਵਿਜ੍ਜਕਾਨਂ ਕਥਾਯ ਅਨੁਸਨ੍ਧਿਯੁਤ੍ਤਂ ਵਚਨਂ ਨ ਜਾਨਾਤਿ, ਤੇਹਿ ਏਕਸ੍ਮਿਂ ਕਾਰਣੇ ਵੁਤ੍ਤੇ ਸਯਂ ਤਂ ਅਸਲ੍ਲਕ੍ਖੇਤ੍ਵਾ ਅਤ੍ਤਨੋ ਅਭਿਰੁਚਿਤਮੇਵ ਅਸਮ੍ਬਨ੍ਧਿਤਤ੍ਥਨ੍ਤਿ ਅਤ੍ਥੋ. ਵਿਨਿਚ੍ਛਯਾਨੁਸਨ੍ਧਿਵਚਨਞ੍ਚਾਤਿ ਅਨੁਵਿਜ੍ਜਕੇਨ ਕਤਸ੍ਸ ਆਪਤ੍ਤਾਨਾਪਤ੍ਤਿਵਿਨਿਚ੍ਛਯਸ੍ਸ ਅਨੁਗੁਣਂ, ਸਮ੍ਬਨ੍ਧਵਚਨਞ੍ਚ.

ਚੋਦਨਾਦਿਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ ਨਿਟ੍ਠਿਤਾ.

੩੬੦. ਪਾਲ਼ਿਯਂ ¶ ¶ ਯਂ ਖੋ ਤ੍ਵਨ੍ਤਿਆਦੀਸੁ ਤ੍ਵਂ, ਆਵੁਸੋ, ਯਂ ਇਮਂ ਭਿਕ੍ਖੁਂ ਚੋਦੇਸਿ, ਤਂ ਕਿਮ੍ਹਿ ਦੋਸੇ ਚੋਦੇਸਿ, ਕਤਰਾਯ ਵਿਪਤ੍ਤਿਯਾ ਚੋਦੇਸੀਤਿ ਅਤ੍ਥੋ. ਏਵਂ ਸਬ੍ਬਤ੍ਥ.

੩੬੧. ਅਸੁਦ੍ਧਪਰਿਸਙ੍ਕਿਤੋਤਿ ਅਸੁਦ੍ਧਾਯ ਅਟ੍ਠਾਨੇ ਉਪ੍ਪਨ੍ਨਾਯ ਪਰਿਸਙ੍ਕਾਯ ਪਰਿਸਙ੍ਕਿਤੋ. ਤੇਨਾਹ ‘‘ਅਮੂਲਕਪਰਿਸਙ੍ਕਿਤੋ’’ਤਿ.

੩੬੪. ਪਾਲ਼ਿਯਂ ਉਪੋਸਥੋ ਸਾਮਗ੍ਗਤ੍ਥਾਯਾਤਿ ਵਿਸੁਦ੍ਧਾਨਂ ਭਿਕ੍ਖੂਨਂ ਅਞ੍ਞੋਞ੍ਞਨਿਰਪੇਕ੍ਖੋ ਅਹੁਤ੍ਵਾ ਉਪੋਸਥੋ ਉਪੋਸਥਟ੍ਠਾਨਂ ਸਨ੍ਨਿਪਤਿਤ੍ਵਾ ‘‘ਪਾਰਿਸੁਦ੍ਧਿਂ ਆਯਸ੍ਮਨ੍ਤੋ ਆਰੋਚੇਥ, ਪਰਿਸੁਦ੍ਧੇਤ੍ਥਾਯਸ੍ਮਨ੍ਤੋ, ਪਰਿਸੁਦ੍ਧੋ ਅਹਂ ਆਵੁਸੋ’’ਤਿਆਦਿਨਾ ਅਞ੍ਞਮਞ੍ਞਂ ਪਰਿਸੁਦ੍ਧਿਵੀਮਂਸਨਾਰੋਚਨਵਸੇਨ ਅਯੁਤ੍ਤੇ ਵਿਵਜ੍ਜੇਤ੍ਵਾ ਯੁਤ੍ਤੇਹੇਵ ਕਾਯਚਿਤ੍ਤਸਾਮਗ੍ਗੀਕਰਣਤ੍ਥਾਯ.

ਵਿਸੁਦ੍ਧਾਯ ਪਵਾਰਣਾਤਿ ਦਿਟ੍ਠਸੁਤਾਦੀਹਿ ਅਞ੍ਞਮਞ੍ਞਂ ਕਥਾਪੇਤ੍ਵਾ ਵਿਸੁਦ੍ਧਿਸਮ੍ਪਾਦਨਤ੍ਥਾਯਾਤਿ ਅਤ੍ਥੋ. ਉਭੋ ਏਤੇਤਿ ਆਮਿਸਪੁਗ੍ਗਲਨਿਸ੍ਸਯਨੇ ਏਤੇ ਉਭੋ.

ਅਨੁਵਿਜ੍ਜਕਕਿਚ੍ਚਵਣ੍ਣਨਾ ਨਿਟ੍ਠਿਤਾ.

੩੬੫. ਤਤ੍ਰ ¶ ਹੀਤਿ ਤਸ੍ਮਿਂ ਸਨ੍ਨਿਪਾਤੇ. ਅਤ੍ਤਪਚ੍ਚਤ੍ਥਿਕਾਤਿ ਲਜ੍ਜਿਪੇਸਲਸ੍ਸ ਚੋਦਕਪਾਪਗਰਹੀਪੁਗ੍ਗਲਸ੍ਸ ਅਨਤ੍ਥਕਾਮਾ ਵੇਰੀਪੁਗ੍ਗਲਾ. ਸਾਸਨਪਚ੍ਚਤ੍ਥਿਕਾਤਿ ਅਤ੍ਤਨੋ ਅਨਾਚਾਰਾਨੁਗੁਣਂ ਬੁਦ੍ਧਵਚਨਂ ਪਕਾਸੇਨ੍ਤੋ ਤਣ੍ਹਾਗਤਿਕਾ, ਦਿਟ੍ਠਿਗਤਿਕਾ ਚ. ਅਜ੍ਝੋਗਾਹੇਤ੍ਵਾਤਿ ਅਲਜ੍ਜਿਅਭਿਭਵਨਵਸੇਨ ¶ ਸਙ੍ਘਮਜ੍ਝਂ ਪਵਿਸਿਤ੍ਵਾ. ਸੋ ਸਙ੍ਗਾਮਾਵਚਰੋਤਿ ਸੋ ਚੋਦਕੋ ਸਙ੍ਗਾਮਾਵਚਰੋ ਨਾਮ. ਦਿਟ੍ਠਸੁਤਮੁਤਮ੍ਪਿ ਰਾਜਕਥਾਦਿਕਨ੍ਤਿ ਦਿਟ੍ਠਸੁਤਵਸੇਨੇਵ ਰਾਜਚੋਰਾਦਿਕਥਂ, ਮੁਤਵਸੇਨਪਿ ਅਨ੍ਨਾਦਿਕਥਞ੍ਚ ਅਕਥੇਨ੍ਤੇਨਾਤਿ ਯੋਜੇਤਬ੍ਬਂ. ਕਪ੍ਪਿਯਾਕਪ੍ਪਿਯਨਿਸ੍ਸਿਤਾ ਵਾਤਿਆਦੀਸੁ ਰੂਪਾਰੂਪਪਟਿਚ੍ਛੇਦਪਦੇਨ ਸਕਲਅਭਿਧਮ੍ਮਤ੍ਥਪਿਟਕਤ੍ਤਂ ਦਸ੍ਸੇਤਿ. ਸਮਥਾਚਾਰਾਦੀਹਿ ਪਟਿਸਂਯੁਤ੍ਤਨ੍ਤਿ ਸਕਲਸੁਤ੍ਤਨ੍ਤਪਿਟਕਤ੍ਤਂ. ਤਤ੍ਥ ਸਮਥਾਚਾਰੋ ਨਾਮ ਸਮਥਭਾਵਨਾਕ੍ਕਮੋ. ਤਥਾ ਵਿਪਸ੍ਸਨਾਚਾਰੋ. ਠਾਨਨਿਸਜ੍ਜਵਤ੍ਤਾਦਿਨਿਸ੍ਸਿਤਾਤਿ ਸਙ੍ਘਮਜ੍ਝਾਦੀਸੁ ਗਰੁਚਿਤ੍ਤੀਕਾਰਂ ਪਚ੍ਚੁਪਟ੍ਠਪੇਤ੍ਵਾ ਠਾਨਾਦਿਕ੍ਕਮਨਿਸ੍ਸਿਤਾ ਚੇਵ ਚੁਦ੍ਦਸਮਹਾਵਤ੍ਤਾਦਿਵਤ੍ਤਨਿਸ੍ਸਿਤਾ ਚ, ਆਦਿ-ਸਦ੍ਦੇਨ ਅਪ੍ਪਿਚ੍ਛਤਾਦਿਨਿਸ੍ਸਿਤਾ ਚਾਤਿ ਅਤ੍ਥੋ. ਪਞ੍ਹੇ ਉਪ੍ਪਨ੍ਨੇਤਿ ਕੇਨਚਿ ਉਪ੍ਪਨ੍ਨੇ ਪਞ੍ਹੇ ਪੁਚ੍ਛਿਤੇ. ਇਦਞ੍ਚ ਉਪਲਕ੍ਖਣਮਤ੍ਤਂ, ਯਂ ਕਿਞ੍ਚਿ ਉਪਟ੍ਠਿਤਂ ਧਮ੍ਮਂ ਭਾਸਸ੍ਸੂਤਿ ਅਧਿਪ੍ਪਾਯੋ.

ਕੁਲਪਦੇਸੋ ਨਾਮ ਖਤ੍ਤਿਯਾਦਿਜਾਤਿਯਮ੍ਪਿ ਕਾਸਿਕਰਾਜਕੁਲਾਦਿਕੁਲਵਿਸੇਸੋ. ਏਤਮੇਵਾਹ ‘‘ਕੁਲਪਦੇਸੋ ਖਤ੍ਤਿਯਕੁਲਾਦਿਵਸੇਨੇਵ ਵੇਦਿਤਬ੍ਬੋ’’ਤਿ. ਸਨ੍ਨਿਪਾਤਮਣ੍ਡਲੇਤਿ ਅਤ੍ਤਨੋ ਅਨੁਵਿਜ੍ਜਮਾਨਪ੍ਪਕਾਰਂ ਸਙ੍ਘਸ੍ਸ ਞਾਪਨਤ੍ਥਂ ਉਟ੍ਠਾਯ ਸਙ੍ਘਸਨ੍ਨਿਪਾਤਮਜ੍ਝੇ ਇਤੋ ਚਿਤੋ ਚ ਪਰੇਸਂ ਮੁਖਂ ਓਲੋਕੇਨ੍ਤੇਨ ਨ ਚਰਿਤਬ੍ਬਂ. ਯਥਾਨਿਸਿਨ੍ਨੇਨੇਵ ਧਮ੍ਮਵਿਨਯਾਨੁਗੁਣਂ ਵਿਨਿਚ੍ਛਯਂ ਯਥਾ ਸਬ੍ਬੇ ਸੁਣਨ੍ਤਿ, ਤਥਾ ਵਤ੍ਤਬ੍ਬਨ੍ਤਿ ਅਤ੍ਥੋ.

ਪਾਲ਼ਿਯਂ ਅਚਣ੍ਡਿਕਤੇਨਾਤਿ ਅਕਤਚਣ੍ਡਭਾਵੇਨ, ਅਫਰੁਸੇਨਾਤਿ ਅਤ੍ਥੋ. ‘‘ਹਿਤਾਨੁਕਮ੍ਪਿਨਾ’’ਤਿ ਏਤੇਨ ਮੇਤ੍ਤਾਪੁਬ੍ਬਭਾਗੋ ਵੁਤ੍ਤੋ. ‘‘ਕਾਰੁਣਿਕੇਨ ਭਵਿਤਬ੍ਬ’’ਨ੍ਤਿ ਇਮਿਨਾ ਅਪ੍ਪਨਾਪ੍ਪਤ੍ਤਕਰੁਣਾ ਵੁਤ੍ਤਾ. ‘‘ਹਿਤਪਰਿਸਕ੍ਕਿਨਾ’’ਤਿ ਇਮਿਨਾ ਕਰੁਣਾਪੁਬ੍ਬਭਾਗੋ. ਤੇਨਾਹ ‘‘ਕਰੁਣਾ ਚ ਕਰੁਣਾਪੁਬ੍ਬਭਾਗੋ ਚ ਉਪਟ੍ਠਾਪੇਤਬ੍ਬੋਤਿ ਅਯਂ ਪਦਦ੍ਵਯੇਪਿ ਅਧਿਪ੍ਪਾਯੋ’’ਤਿ. ਲਜ੍ਜਿਯਾਤਿ ਲਜ੍ਜਿਨੀ.

ਅਨੁਯੋਗਵਤ੍ਤਂ ¶ ਕਥਾਪੇਤ੍ਵਾਤਿ ‘‘ਕਾਲੇਨ ਵਕ੍ਖਾਮੀ’’ਤਿਆਦਿਨਾ (ਪਰਿ. ੩੬੨) ਵੁਤ੍ਤਵਤ੍ਤਂ. ਅਨੁਯੁਞ੍ਜਨਾਚਾਰਕ੍ਕਮੇਨੇਵ ਅਨੁਯੁਞ੍ਜਨਂ ਅਨੁਯੋਗਵਤ੍ਤਂ ਨਾਮ, ਤਂ ਕਥਾਪੇਤ੍ਵਾ ਤੇਨੇਵ ਕਮੇਨ ਅਨੁਯੁਞ੍ਜਾਪੇਤ੍ਵਾਤਿ ਅਤ੍ਥੋ. ਉਜੁਮਦ੍ਦਵੇਨਾਤਿ ਏਤ੍ਥ ਅਜ੍ਝਾਹਰਿਤਬ੍ਬਪਦਂ ਦਸ੍ਸੇਤਿ ‘‘ਉਪਚਰਿਤਬ੍ਬੋ’’ਤਿ. ‘‘ਧਮ੍ਮੇਸੁ ਚ ਪੁਗ੍ਗਲੇਸੁ ਚਾ’’ਤਿ ਇਦਂ ‘‘ਮਜ੍ਝਤ੍ਤੇਨ ਭਵਿਤਬ੍ਬ’’ਨ੍ਤਿ ਪਕਤੇਨ ਸਮ੍ਬਨ੍ਧਿਤਬ੍ਬਨ੍ਤਿ ਆਹ ‘‘ਧਮ੍ਮੇਸੁ ਚ ਪੁਗ੍ਗਲੇਸੁ ਚ…ਪੇ… ਮਜ੍ਝਤ੍ਤੋਤਿ ਵੇਦਿਤਬ੍ਬੋ’’ਤਿ. ਯਞ੍ਹਿ ਯਤ੍ਥ ਕਤ੍ਥਚਿ ਕਤ੍ਤਬ੍ਬਂ, ਤਂ ਤਤ੍ਥ ਅਤਿਕ੍ਕਮਨ੍ਤੋ ਮਜ੍ਝਤ੍ਤੋ ਨਾਮ ਨ ਹੋਤਿ, ਧਮ੍ਮੇਸੁ ਚ ਗਾਰਵੋ ਕਤ੍ਤਬ੍ਬੋ. ਪੁਗ੍ਗਲੇਸੁ ਪਨ ਮੇਤ੍ਤਾਭਾਵੇਨ ਪਕ੍ਖਪਾਤਗਾਰਵੋ. ਤਸ੍ਮਾ ਇਮਂ ਵਿਧਿਂ ਅਨਤਿਕ੍ਕਨ੍ਤੋਵ ਤੇਸੁ ਮਜ੍ਝਤ੍ਤੋਤਿ ਵੇਦਿਤਬ੍ਬੋ.

੩੬੬. ਸਂਸਨ੍ਦਨਤ੍ਥਨ੍ਤਿ ਆਪਤ੍ਤਿ ਵਾ ਅਨਾਪਤ੍ਤਿ ਵਾਤਿ ਸਂਸਯੇ ਜਾਤੇ ਸਂਸਨ੍ਦਿਤ੍ਵਾ ਨਿਚ੍ਛਯਕਰਣਤ੍ਥਂ ¶ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਅਤ੍ਥਦਸ੍ਸਨਾਯਾਤਿ ਸਾਧੇਤਬ੍ਬਸ੍ਸ ਆਪਤ੍ਤਾਦਿਉਪਮੇਯ੍ਯਤ੍ਥਸ੍ਸ ਚੋਦਕਚੁਦਿਤਕੇ ਅਤ੍ਤਨੋ ਪਟਿਞ੍ਞਾਯ ਏਵ ਸਰੂਪਵਿਭਾਵਨਤ੍ਥਂ. ਅਤ੍ਥੋ ਜਾਨਾਪਨਤ੍ਥਾਯਾਤਿ ਏਵਂ ਵਿਭਾਵਿਤੋ ਅਤ੍ਥੋ ਚੋਦਕਚੁਦਿਤਕਸਙ੍ਘਾਨਂ ਞਾਪਨਤ੍ਥਾਯ ਨਿਜ੍ਝਾਪਨਤ੍ਥਾਯ, ਸਮ੍ਪਟਿਚ੍ਛਾਪਨਤ੍ਥਾਯਾਤਿ ਅਤ੍ਥੋ. ਪੁਗ੍ਗਲਸ੍ਸ ਠਪਨਤ੍ਥਾਯਾਤਿ ਚੋਦਕਚੁਦਿਤਕੇ ਅਤ੍ਤਨੋ ਪਟਿਞ੍ਞਾਯ ਏਵ ਆਪਤ੍ਤਿਯਂ, ਅਨਾਪਤ੍ਤਿਯਂ ਵਾ ਪਤਿਟ੍ਠਾਪਨਤ੍ਥਾਯ. ਸਾਰਣਤ੍ਥਾਯਾਤਿ ਪਮੁਟ੍ਠਸਰਾਪਨਤ੍ਥਾਯ. ਸਵਚਨੀਯਕਰਣਤ੍ਥਾਯਾਤਿ ਦੋਸੇ ਸਾਰਿਤੇਪਿ ਸਮ੍ਪਟਿਚ੍ਛਿਤ੍ਵਾ ਪਟਿਕਮ੍ਮਂ ਅਕਰੋਨ੍ਤਸ੍ਸ ਸਵਚਨੀਯਕਰਣਤ੍ਥਾਯ. ‘‘ਨ ਤੇ ਅਪਸਾਦੇਤਬ੍ਬਾ’’ਤਿ ਇਦਂ ਅਧਿਪ੍ਪੇਤਤ੍ਥਦਸ੍ਸਨਂ. ਤਤ੍ਥ ਅਵਿਸਂਵਾਦਕਟ੍ਠਾਨੇ ਠਿਤਾ ਏਵ ਨ ਅਪਸਾਦੇਤਬ੍ਬਾ, ਨ ਇਤਰੇਤਿ ਦਟ੍ਠਬ੍ਬਂ.

ਅਪ੍ਪਚ੍ਚਯਪਰਿਨਿਬ੍ਬਾਨਤ੍ਥਾਯਾਤਿ ਆਯਤਿਂ ਪਟਿਸਨ੍ਧਿਯਾ ਅਕਾਰਣਭੂਤਪਰਿਨਿਬ੍ਬਾਨਤ੍ਥਾਯ. ਪਰਿਨਿਬ੍ਬਾਨਞ੍ਹਿ ਨਾਮ ਖੀਣਾਸਵਾਨਂ ਸਬ੍ਬਪਚ੍ਛਿਮਾ ਚੁਤਿਚਿਤ੍ਤਕਮ੍ਮਜਰੂਪਸਙ੍ਖਾਤਾ ਖਨ੍ਧਾ, ਤੇ ਚ ਸਬ੍ਬਾਕਾਰਤੋ ਸਮੁਚ੍ਛਿਨ੍ਨਾਨੁਸਯਤਾਯ ਪੁਨਬ੍ਭਵਾਯ ਅਨਨ੍ਤਰਾਦਿਪਚ੍ਚਯਾ ਨ ਹੋਨ੍ਤਿ ਅਞ੍ਞੇਹਿ ਚ ਤਣ੍ਹਾਦਿਪਚ੍ਚਯੇਹਿ ਵਿਰਹਿਤਤ੍ਤਾ. ਤਸ੍ਮਾ ‘‘ਅਪ੍ਪਚ੍ਚਯਪਰਿਨਿਬ੍ਬਾਨ’’ਨ੍ਤਿ ਵੁਚ੍ਚਤਿ. ਤਨ੍ਤਿ ਵਿਮੁਤ੍ਤਿਞਾਣਦਸ੍ਸਨਂ. ਤੇਨੇਵਾਹ ‘‘ਤਸ੍ਮਿ’’ਨ੍ਤਿ. ਵਿਨਯਮਨ੍ਤਨਾਤਿ ਵਿਨਯਵਿਨਿਚ੍ਛਯੋ. ਸੋਤਾਵਧਾਨਨ੍ਤਿ ਸੋਤਸ੍ਸ ਓਦਹਨਂ, ਸਵਨਨ੍ਤਿ ਅਤ੍ਥੋ. ਤੇਨਾਹ ‘‘ਯਂ ਉਪ੍ਪਜ੍ਜਤਿ ਞਾਣ’’ਨ੍ਤਿ. ਯਥਾਵੁਤ੍ਤਾਯ ਵਿਨਯਸਂਵਰਾਦਿਕਾਰਣਪਰਮ੍ਪਰਾਯ ਵਿਮੁਤ੍ਤਿਯਾ ਏਵ ਪਧਾਨਤ੍ਤਾ ਸਾ ਪੁਨ ਚਿਤ੍ਤਸ੍ਸ ਵਿਮੋਕ੍ਖੋਤਿ ਉਦ੍ਧਟੋਤਿ ਆਹ ‘‘ਅਰਹਤ੍ਤਫਲਸਙ੍ਖਾਤੋ ਵਿਮੋਕ੍ਖੋ’’ਤਿ. ਅਥ ਵਾ ਯੋ ਯਂ ਕਿਞ੍ਚਿ ਧਮ੍ਮਂ ਅਨੁਪਾਦਿਯਿਤ੍ਵਾ ¶ ਪਰਿਨਿਬ੍ਬਾਨਵਸੇਨ ਚਿਤ੍ਤਸ੍ਸ ਚਿਤ੍ਤਸਨ੍ਤਤਿਯਾ, ਤਪ੍ਪਟਿਬਦ੍ਧਕਮ੍ਮਜਰੂਪਸਨ੍ਤਤਿਯਾ ਚ ਵਿਮੋਕ੍ਖੋ ਵਿਮੁਚ੍ਚਨਂ ਅਪੁਨਪ੍ਪਵਤ੍ਤਿਵਸੇਨ ਵਿਗਮੋ, ਏਤਦਤ੍ਥਾਯ ਏਤਸ੍ਸ ਵਿਗਮਸ੍ਸਤ੍ਥਾਯ ਏਵਾਤਿ ਏਵਂ ਨਿਗਮਨਵਸੇਨਪੇਤ੍ਥ ਅਤ੍ਥੋ ਵੇਦਿਤਬ੍ਬੋ.

੩੬੭. ਅਨੁਯੋਗਵਤ੍ਤਗਾਥਾਸੁ ਕੁਸਲੇਨ ਬੁਦ੍ਧਿਮਤਾਤਿ ਸਮ੍ਮਾਸਮ੍ਬੁਦ੍ਧੇਨ. ਕਤਨ੍ਤਿ ਨਿਬ੍ਬਤ੍ਤਿਤਂ, ਪਕਾਸਿਤਨ੍ਤਿ ਅਤ੍ਥੋ. ਤੇਨੇਵਾਤਿਆਦੀਸੁ ਤੇਨੇਵ ਕਤਾਕਤਸ੍ਸ ਅਜਾਨਨੇਵ ਪੁਬ੍ਬਾਪਰਂ ਅਜਾਨਨਸ੍ਸ, ਅਞ੍ਞਸ੍ਸਪਿ ਭਿਕ੍ਖੁਨੋ ਯਂ ਕਤਾਕਤਂ ਹੋਤਿ, ਤਮ੍ਪਿ ਨ ਜਾਨਾਤੀਤਿ ਅਤ੍ਥੋ. ਅਤ੍ਤਨੋ ਸਦਿਸਾਯਾਤਿ ਯਥਾਵੁਤ੍ਤੇਹਿ ਦੋਸੇਹਿ ਯੁਤ੍ਤਤਾਯ ਅਤ੍ਤਨਾ ਸਦਿਸਾਯ.

ਅਨੁਵਿਜ੍ਜਕਸ੍ਸ ਪਟਿਪਤ੍ਤਿਵਣ੍ਣਨਾ ਨਿਟ੍ਠਿਤਾ.

੩੬੮-੩੭੪. ਮਹਾਸਙ੍ਗਾਮੇ ¶ ¶ ਪਾਲ਼ਿਯਂ ਸਙ੍ਗਾਮਾਵਚਰੇਨਾਤਿ ਅਨੁਵਿਜ੍ਜਕਂ ਸਨ੍ਧਾਯ ਵੁਤ੍ਤਂ. ਵਤ੍ਥੂਤਿ ਮੇਥੁਨਾਦਿਵੀਤਿਕ੍ਕਮੋ. ਨਿਦਾਨਨ੍ਤਿ ਵੇਸਾਲਿਆਦਿਪਞ੍ਞਤ੍ਤਿਟ੍ਠਾਨਂ. ਪੁਗ੍ਗਲੋ ਅਕਾਰਕੋ ਜਾਨਿਤਬ੍ਬੋਤਿ ਏਤ੍ਥ ਸਙ੍ਘੇ ਵਾ ਗਣੇ ਵਾ ਪਰਿਣਾਯਕਭੂਤੋ ਪੁਗ੍ਗਲੋਤਿ ਦਟ੍ਠਬ੍ਬਂ.

੩੭੫. ਵਿਸ੍ਸਟ੍ਠਿਸਿਕ੍ਖਾਪਦਨ੍ਤਿ ਨੀਲਾਦਿਦਸਨ੍ਨਂ ਸੁਕ੍ਕਾਨਂ ਮੋਚਨਵਸੇਨ ਵੁਤ੍ਤਂ ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਂ. ਤਞ੍ਹਿ ਤੇਲਾਦਿਮਨ੍ਦਵਣ੍ਣਾਨਂ ਨੀਲਾਦਿਪਚੁਰਵਣ੍ਣਾਨਂ ਵਸੇਨ ‘‘ਵਣ੍ਣਾਵਣ੍ਣਾ’’ਤਿ ਵੁਤ੍ਤਂ. ਪਚੁਰਤ੍ਥੇ ਹਿ ਇਧ ਅਵਣ੍ਣੋਤਿ ਅ-ਕਾਰੋ.

੩੭੯. ਯਾਵ ਅਕਨਿਟ੍ਠਬ੍ਰਹ੍ਮਾਨੋ ਦ੍ਵਿਧਾ ਹੋਨ੍ਤੀਤਿ ਏਤ੍ਥ ਅਵਿਹਾਦਿਸੁਦ੍ਧਾਵਾਸਿਕਾ ਅਞ੍ਞਭੂਮੀਸੁ ਅਰਿਯਾ ਧਮ੍ਮਵਾਦੀਪਕ੍ਖਂ ਏਵ ਭਜਨ੍ਤਿ, ਇਤਰੇ ਦੁਵਿਧਮ੍ਪੀਤਿ ਦਟ੍ਠਬ੍ਬਂ.

ਵੋਹਰਨ੍ਤੇਨ ਜਾਨਿਤਬ੍ਬਾਦਿਵਣ੍ਣਨਾ ਨਿਟ੍ਠਿਤਾ.

੪੦੪. ਕਥਿਨੇ ¶ ਅਨਾਗਤਵਸੇਨਾਤਿ ਉਦਕਾਹਰਣਾਦਿਪਯੋਗੇ ਉਪ੍ਪਨ੍ਨੇ ਪਚ੍ਛਾ ਧੋਵਨਾਦਿਪੁਬ੍ਬਕਰਣਸ੍ਸ ਉਪ੍ਪਤ੍ਤਿਤੋ ਤਪ੍ਪਯੋਗਸ੍ਸ ਅਨਾਗਤਵਸੇਨੇਵ ਅਨਨ੍ਤਰਪਚ੍ਚਯੋ. ਪਚ੍ਚਯਤ੍ਤਞ੍ਚਸ੍ਸ ਕਾਰਿਯਭੂਤਸ੍ਸ ਯਸ੍ਮਾ ਨਿਪ੍ਫਾਦੇਤਬ੍ਬਤਂ ਨਿਸ੍ਸਾਯ ਪਚ੍ਚਯਾ ਪਵਤ੍ਤਾ, ਨ ਵਿਨਾ ਤੇਨ, ਤਸ੍ਮਾ ਤੇਨ ਪਰਿਯਾਯੇਨ ਵੁਤ੍ਤਂ, ਨ ਸਭਾਵਤੋ ਸਬ੍ਬਤ੍ਥ. ਤੇਨਾਹ ‘‘ਪਯੋਗਸ੍ਸ ਹੀ’’ਤਿਆਦਿ. ਤਤ੍ਥ ਪਯੋਗਸ੍ਸ ਸਤ੍ਤਵਿਧਮ੍ਪਿ ਪੁਬ੍ਬਕਰਣਂ ਪਚ੍ਚਯੋ ਹੋਤੀਤਿ ਸਮ੍ਬਨ੍ਧੋ. ਕਾਰਣਮਾਹ ‘‘ਯਸ੍ਮਾ’’ਤਿਆਦਿ. ਪੁਬ੍ਬਕਰਣਸ੍ਸਤ੍ਥਾਯਾਤਿ ਪੁਬ੍ਬਕਰਣਸ੍ਸ ਨਿਪ੍ਫਾਦਨਤ੍ਥਾਯ. ਪੁਰੇਜਾਤਪਚ੍ਚਯੇਤਿ ਪੁਰੇਜਾਤਪਚ੍ਚਯਸ੍ਸ ¶ ਵਿਸਯੇ. ਏਸਾਤਿ ਪਯੋਗੋ. ਧੋਵਨਾਦਿਧਮ੍ਮੇਸੁ ਏਕਮ੍ਪਿ ਅਤ੍ਤਨੋ ਪੁਰੇਜਾਤਪਚ੍ਚਯਭੂਤਂ ਧਮ੍ਮਂ ਨ ਲਭਤਿ, ਅਤ੍ਤਨੋ ਉਪ੍ਪਤ੍ਤਿਤੋ ਪੁਰੇਜਾਤਸ੍ਸ ਪੁਬ੍ਬਕਰਣਸ੍ਸ ਅਭਾਵਾਤਿ ਅਤ੍ਥੋ. ਲਭਤੀਤਿ ਪਚ੍ਛਾਜਾਤਪਚ੍ਚਯਂ ਪੁਬ੍ਬਕਰਣਂ ਲਭਤਿ, ਪਚ੍ਛਾਜਾਤਪਚ੍ਚਯੋ ਹੋਤੀਤਿ ਅਤ੍ਥੋ.

ਪਾਲ਼ਿਯਂ ਪਨ੍ਨਰਸ ਧਮ੍ਮਾ ਸਹਜਾਤਪਚ੍ਚਯੇਨ ਪਚ੍ਚਯੋਤਿ ਏਤ੍ਥ ਪੁਬ੍ਬਕਰਣਸ੍ਸਾਤਿ ਵਾ ਪਯੋਗਸ੍ਸਾਤਿ ਵਾ ਅਞ੍ਞਸ੍ਸ ਕਸ੍ਸਚਿ ਪਚ੍ਚਯੁਪ੍ਪਨ੍ਨਸ੍ਸ ਅਪਰਾਮਟ੍ਠਤ੍ਤਾ ਪਨ੍ਨਰਸ ਧਮ੍ਮਾ ਸਯਂ ਅਞ੍ਞਮਞ੍ਞਸਹਜਾਤਪਚ੍ਚਯੇਨ ਪਚ੍ਚਯੋਤਿ ਏਵਮਤ੍ਥੋ ਗਹੇਤਬ੍ਬੋ, ਤੇਹਿ ਸਹ ਉਪ੍ਪਜ੍ਜਨਕਸ੍ਸ ਅਞ੍ਞਸ੍ਸ ਅਭਾਵਾ. ਏਵਂ ਉਪਰਿ ਸਬ੍ਬਤ੍ਥ. ਤੇਨਾਹ ‘‘ਸਹਜਾਤਪਚ੍ਚਯਂ ਪਨਾ’’ਤਿਆਦਿ. ਮਾਤਿਕਾ ਚ ਪਲਿਬੋਧਾ ਚਾਤਿ ਏਤ੍ਥ ਚ-ਸਦ੍ਦੇਨ ਪਞ੍ਚਾਨਿਸਂਸਾਨਿ ਗਹਿਤਾਨੀਤਿ ਦਟ੍ਠਬ੍ਬਂ. ਏਵਂ ਮਾਤਿਕਾਨਞ੍ਚ ਪਲਿਬੋਧਾਨਞ੍ਚਾਤਿ ਏਤ੍ਥਾਪਿ. ਤੇਹਿਪਿ ਅਤ੍ਥੋ ਅਨਨ੍ਤਰਮੇਵ ਮਾਤਿਕਾਦੀਹਿ ਸਹ ਜਾਯਨ੍ਤਿ. ਤੇਨੇਵ ‘‘ਪਨ੍ਨਰਸ ਧਮ੍ਮਾ ਸਹਜਾਤਪਚ੍ਚਯੇਨ ਪਚ੍ਚਯੋ’’ਤਿ ਵੁਤ੍ਤਾ. ਆਸਾਤਿ ਚੀਵਰਾਸਾ. ਵਤ੍ਥੂਤਿ ਆਸਾਯ ਨਿਮਿਤ੍ਤਭੂਤਂ ਅਨੁਪ੍ਪਨ੍ਨਚੀਵਰਂ. ‘‘ਦਸ੍ਸਾਮ ਕਰਿਸ੍ਸਾਮਾ’’ਤਿ ਹਿ ਦਾਯਕੇਹਿ ਪਟਿਞ੍ਞਾਤਚੀਵਰਂ ਨਿਸ੍ਸਾਯ ਅਨਨ੍ਤਰਂ ਉਪ੍ਪਜ੍ਜਮਾਨਾ ਚੀਵਰਾਸਾ ਅਨਨ੍ਤਰਪਚ੍ਚਯਾਦਿਭਾਵੇਨ ਵੁਤ੍ਤਾ. ਆਸਾਨਞ੍ਚ ਅਨਾਸਾਨਞ੍ਚਾਤਿ ਲਬ੍ਭਮਾਨਕਚੀਵਰੇ ਉਪ੍ਪਜ੍ਜਨਕਚੀਵਰਾਸਾਨਞ੍ਚੇਵ ਅਲਬ੍ਭਮਾਨੇ ਚੀਵਰੇ ਉਪ੍ਪਜ੍ਜਨਕਅਨਾਸਾਨਞ੍ਚ, ਆਸਾਨਂ, ਤਬ੍ਬਿਗਮਾਨਞ੍ਚਾਤਿ ਅਤ੍ਥੋ. ਖਣੇ ਖਣੇ ਉਪ੍ਪਤ੍ਤਿਭੇਦਂ ਸਨ੍ਧਾਯ ‘‘ਆਸਾਨ’’ਨ੍ਤਿ ਬਹੁਵਚਨਂ ਕਤਂ, ਆਸਾਯ ¶ , ਅਨਾਸਾਯ ਚਾਤਿ ਅਤ੍ਥੋ. ਤੇਨਾਹ ‘‘ਆਸਾ ਚ ਅਨਾਸਾ ਚਾ’’ਤਿ.

ਕਥਿਨਅਤ੍ਥਤਾਦਿਵਣ੍ਣਨਾ ਨਿਟ੍ਠਿਤਾ.

ਪੁਬ੍ਬਕਰਣਨਿਦਾਨਾਦਿਵਿਭਾਗਵਣ੍ਣਨਾ

੪੦੬-੭. ਛ ਚੀਵਰਾਨੀਤਿ ਖੋਮਾਦੀਸੁ ਛਸੁ ਅਞ੍ਞਤਰਂ ਸਨ੍ਧਾਯ ਵੁਤ੍ਤਂ. ਸਬ੍ਬਸਙ੍ਗਾਹਿਕਵਸੇਨ ਪਨ ‘‘ਚੀਵਰਾਨੀ’’ਤਿ ਬਹੁਵਚਨਂ ਕਤਂ. ਪਾਲ਼ਿਯਂ ਪਨੇਤ੍ਥ ਵਤ੍ਥੁ, ਆਸਾ ਚ ਅਨਾਸਾ ਚਾਤਿਆਦੀਸੁ ਅਤ੍ਥਤੇ ਕਥਿਨੇ ਆਨਿਸਂਸਵਸੇਨ ਉਪ੍ਪਜ੍ਜਨਕਪਚ੍ਚਾਸਾਚੀਵਰਂ ‘‘ਵਤ੍ਥੂ’’ਤਿ ਵੁਤ੍ਤਂ. ਕਥਿਨਚੀਵਰਂ ਹੇਤੁਪਚ੍ਚਯ-ਸਦ੍ਦੇਹਿ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੪੦੮. ਪਚ੍ਚੁਦ੍ਧਾਰੋ ਤੀਹਿ ਧਮ੍ਮੇਹੀਤਿਆਦਿ ਕਥਿਨਤ੍ਥਾਰਤ੍ਥਾਯ ਤਿਚੀਵਰਤੋ ਅਞ੍ਞਂ ਵਸ੍ਸਿਕਸਾਟਿਕਾਦਿਂ ਪਚ੍ਚੁਦ੍ਧਰਿਤੁਂ, ਅਧਿਟ੍ਠਹਿਤ੍ਵਾ ਅਤ੍ਥਰਿਤੁਞ੍ਚ ਨ ਵਟ੍ਟਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ‘‘ਵਚੀਭੇਦੇਨਾ’’ਤਿ ਏਤੇਨ ਕੇਵਲਂ ਕਾਯੇਨ ਕਥਿਨਤ੍ਥਾਰੋ ਨ ਰੁਹਤੀਤਿ ਦਸ੍ਸੇਤਿ.

ਪੁਬ੍ਬਕਰਣਨਿਦਾਨਾਦਿਵਿਭਾਗਵਣ੍ਣਨਾ ਨਿਟ੍ਠਿਤਾ.

੪੧੨. ਯੇਸੁ ¶ ਰੂਪਾਦਿਧਮ੍ਮੇਸੂਤਿ ‘‘ਪੁਰਿਮਵਸ੍ਸਂਵੁਤ੍ਥਾ ਭਿਕ੍ਖੂ, ਪਞ੍ਚਹਿ ਅਨੂਨੋ ਸਙ੍ਘੋ, ਚੀਵਰਮਾਸੋ, ਧਮ੍ਮੇਨ ਸਮੇਨ ਸਮੁਪ੍ਪਨ੍ਨਂ ਚੀਵਰ’’ਨ੍ਤਿ ਏਵਮਾਦੀਸੁ ਯੇਸੁ ਰੂਪਾਰੂਪਧਮ੍ਮੇਸੁ. ਸਤੀਤਿ ਸਨ੍ਤੇਸੁ. ਮਿਸ੍ਸੀਭਾਵੋਤਿ ਸਂਸਗ੍ਗਤਾ ਸਮੂਹਪਞ੍ਞਤ੍ਤਿਮਤ੍ਤਂ. ਤੇਨਾਹ ‘‘ਨ ਪਰਮਤ੍ਥਤੋ ਏਕੋ ਧਮ੍ਮੋ ਅਤ੍ਥੀ’’ਤਿ.

੪੧੬. ਏਕਤੋ ਉਪ੍ਪਜ੍ਜਨ੍ਤੀਤਿ ਕਥਿਨੁਦ੍ਧਾਰੇਨ ਸਹ ਉਪ੍ਪਜ੍ਜਮਾਨਾਰਹਾ ਹੋਨ੍ਤੀਤਿ ਅਤ੍ਥੋ. ਕਥਿਨਤ੍ਥਾਰਤੋ ਹਿ ਪਭੁਤਿ ਸਬ੍ਬੇ ਕਥਿਨੁਦ੍ਧਾਰਾ ਤਂ ਤਂ ਕਾਰਣਨ੍ਤਰਮਾਗਮ੍ਮ ਉਪ੍ਪਜ੍ਜਨ੍ਤਿ, ਤਸ੍ਮਾ ਸਬ੍ਬੇ ਏਕੁਪ੍ਪਾਦਾ ਨਾਮ ਜਾਤਾ. ਤੇਸੁ ਅਨ੍ਤਰੁਬ੍ਭਾਰਸਹੁਬ੍ਭਾਰਾ ਦ੍ਵੇ ਏਵ ਤਂ ਵਿਹਾਰਂ ਅਨਤ੍ਥਤਕਥਿਨਵਿਹਾਰਸਦਿਸਂ ਕਰੋਨ੍ਤਾ ਸਯਂ ਸਕਲੇਨ ਕਥਿਨਤ੍ਥਾਰੇਨ ਸਹ ਨਿਰੁਜ੍ਝਨ੍ਤਿ ਉਦ੍ਧਾਰਭਾਵਂ ਪਾਪੁਣਨ੍ਤਿ ¶ . ਅਵਸੇਸਾ ਪਨ ਤਂ ਤਂ ਪਾਟਿਪੁਗ੍ਗਲਿਕਮੇਵ ਕਥਿਨਤ੍ਥਾਰਂ ਦ੍ਵਿਨ੍ਨਂ ਪਲਿਬੋਧਾਨਂ ਉਪਚ੍ਛਿਨ੍ਦਨਵਸੇਨ ਨਿਰੋਧੇਨ੍ਤਾ ਸਯਂ ਉਦ੍ਧਾਰਭਾਵਂ ਪਾਪੁਣਨ੍ਤਿ, ਨ ਸਕਲਂ ਕਥਿਨਤ੍ਥਾਰਂ. ਕਥਿਨੁਦ੍ਧਾਰਾਨਞ੍ਚ ਨਿਰੋਧੋ ਨਾਮ ਤਂ ਤਂ ਕਾਰਣਮਾਗਮ੍ਮ ਉਦ੍ਧਾਰਭਾਵਪ੍ਪਤ੍ਤਿ, ਏਵਞ੍ਚ ਉਪ੍ਪਤ੍ਤਿ ਨਾਮ ਕਥਿਨੁਦ੍ਧਾਰੋ ਏਵ. ਤੇਨਾਹ ‘‘ਸਬ੍ਬੇਪਿ ਅਤ੍ਥਾਰੇਨ ਸਦ੍ਧਿਂ ਏਕਤੋ ਉਪ੍ਪਜ੍ਜਨ੍ਤੀ’’ਤਿਆਦਿ. ਤਤ੍ਥ ਪੁਰਿਮਾ ਦ੍ਵੇਤਿ ‘‘ਏਕੁਪ੍ਪਾਦਾ ਏਕਨਿਰੋਧਾ’’ਤਿ ਪਾਲ਼ਿਯਂ ਪਠਮਂ ਵੁਤ੍ਤਾ ਅਨ੍ਤਰੁਬ੍ਭਾਰਸਹੁਬ੍ਭਾਰਾ ਦ੍ਵੇ. ਤੇਸੂਤਿ ਪਕ੍ਕਮਨਨ੍ਤਿਕਾਦੀਸੁ. ਉਦ੍ਧਾਰਭਾਵਂ ਪਤ੍ਤੇਸੂਤਿ ਉਦ੍ਧਾਰਭਾਵਪ੍ਪਤ੍ਤਿਸਙ੍ਖਾਤਨਿਰੋਧਂ ਪਤ੍ਤੇਸੂਤਿ ਅਤ੍ਥੋ. ਅਤ੍ਥਾਰੋ ਤਿਟ੍ਠਤੀਤਿ ਕਤਚੀਵਰਂ ਆਦਾਯ ਪਕ੍ਕਨ੍ਤਾਦਿਪੁਗ੍ਗਲਂ ਠਪੇਤ੍ਵਾ ਤਦਵਸੇਸਾਨਂ ਪਲਿਬੋਧਸਬ੍ਭਾਵਤੋ ਕਥਿਨਤ੍ਥਾਰੋ ਤਿਟ੍ਠਤਿ.

ਕਥਿਨਾਦਿਜਾਨਿਤਬ੍ਬਵਿਭਾਗਵਣ੍ਣਨਾ ਨਿਟ੍ਠਿਤਾ.

ਪਞ੍ਞਤ੍ਤਿਵਗ੍ਗਵਣ੍ਣਨਾਨਯੋ ਨਿਟ੍ਠਿਤੋ.

੪੨੧. ਸਮਗ੍ਗੇਹਿ ¶ ¶ ਕਰਣੀਯਾਨੀਤਿ ਵਿਵਾਦਾਧਿਕਰਣੇਹਿ ਪੁਬ੍ਬੇ ਅਸਮਗ੍ਗਾ ਹੁਤ੍ਵਾ ਪਚ੍ਛਾ ਸਾਮਗ੍ਗਿਂ ਉਪਗਤੇਹਿ ਕਤ੍ਤਬ੍ਬਾਨਿ. ਕਿਂ ਪਨ ਅਸਞ੍ਞਤਮਿਸ੍ਸਪਰਿਸਾਯ ਸਦ੍ਧਿਂ ਲਜ੍ਜਿਨੋ ਸਾਮਗ੍ਗਿਂ ਕਰੋਨ੍ਤੀਤਿ ਆਹ ‘‘ਉਪੋਸਥਪਵਾਰਣਾਦੀਸੁ ਹੀ’’ਤਿਆਦਿ. ਤਤ੍ਥ ਠਿਤਾਸੂਤਿ ਉਪੋਸਥਪਵਾਰਣਾਸੁ ਅਪ੍ਪਵਤ੍ਤੀਸੁ. ਉਪਤ੍ਥਮ੍ਭੋ ਨ ਦਾਤਬ੍ਬੋਤਿ ਉਪਰੂਪਰਿ ਅਪ੍ਪਵਤ੍ਤਨਤ੍ਥਾਯ ਮਯਮ੍ਪਿ ਉਪੋਸਥਂ ਨ ਕਰਿਸ੍ਸਾਮਾਤਿਆਦਿਨਾ ਕਲਹਸ੍ਸ ਉਪਤ੍ਥਮ੍ਭੋ ਨ ਦਾਤਬ੍ਬੋ, ਧਮ੍ਮੇਨ ਵਿਨਯੇਨ ਸਾਮਗ੍ਗਿਂ ਕਤ੍ਵਾ ਸਮਗ੍ਗੇਹੇਵ ਅਸਞ੍ਞਤਾ ਭਿਕ੍ਖੂ ਵਿਨੇਤਬ੍ਬਾਤਿ ਅਧਿਪ੍ਪਾਯੋ. ਤੇਨਾਹ ‘‘ਸਚੇ ਸਙ੍ਘੋ ਅਚ੍ਚਯਂ ਦੇਸਾਪੇਤ੍ਵਾ’’ਤਿਆਦਿ. ਭਿਕ੍ਖੁਨੋ ਨਕ੍ਖਮਤੀਤਿ ਕੇਸੁਚਿ ਪੁਗ੍ਗਲੇਸੁ ਅਪ੍ਪਮਤ੍ਤਕਦੋਸਦਸ੍ਸਨੇਨ ਨ ਰੁਚ੍ਚਤਿ. ਦਿਟ੍ਠਾਵਿਕਮ੍ਮਮ੍ਪਿ ਕਤ੍ਵਾਤਿ ‘‘ਨ ਮੇਤਂ ਖਮਤੀ’’ਤਿ ਸਭਾਗਸ੍ਸ ਭਿਕ੍ਖੁਨੋ ਅਤ੍ਤਨੋ ਦਿਟ੍ਠਿਂ ਆਵਿਕਤ੍ਵਾ. ਉਪੇਤਬ੍ਬਾਤਿ ਸਾਸਨਹਾਨਿਯਾ ਅਭਾਵਾ ਸਾਮਗ੍ਗਿਂ ਅਕੋਪੇਤ੍ਵਾ ਕਾਯਸਾਮਗ੍ਗੀ ਦਾਤਬ੍ਬਾ, ਈਦਿਸੇ ਠਾਨੇ ਅਲਜ੍ਜਿਪਰਿਭੋਗੋ ਆਪਤ੍ਤਿਕਰੋ ਨ ਹੋਤਿ, ਵਟ੍ਟਤਿਯੇਵ. ਯੇ ਪਨ ਸਾਸਨਵਿਨਾਸਾਯ ਪਟਿਪਨ੍ਨਾ, ਤੇਹਿ ਸਹ ਨ ਵਤ੍ਤਤਿ, ਆਪਤ੍ਤਿ ਏਵ ਹੋਤਿ ਸਾਸਨਵਿਨਾਸੋ ਚ. ਤੇਨਾਹ ‘‘ਯਤ੍ਰ ਪਨ ਉਦ੍ਧਮ੍ਮ’’ਨ੍ਤਿਆਦਿ. ‘‘ਦਿਟ੍ਠਾਵਿਕਮ੍ਮਂ ਨ ਵਟ੍ਟਤੀ’’ਤਿ ਇਮਿਨਾ ਦਿਟ੍ਠਿਯਾ ਆਵਿਕਤਾਯਪਿ ਆਪਤ੍ਤਿਂ ਦਸ੍ਸੇਤਿ.

੪੨੨. ਕਣ੍ਹਵਾਚੋਤਿ ਰਾਗਦੋਸਾਦੀਹਿ ਕਿਲਿਟ੍ਠਵਚਨੋ. ਅਨਤ੍ਥਕਵਚਨਸ੍ਸ ਦੀਪਨਂ ਪਕਾਸਨਂ ਅਸ੍ਸਾਤਿ ਅਨਤ੍ਥਕਦੀਪਨੋ. ਮਾਨਂ ਨਿਸ੍ਸਾਯਾਤਿ ਵਿਨਿਚ੍ਛਯਕਰਣਂ ਤਵ ਭਾਰੋਤਿ ਸਙ੍ਘੇਨ ਭਾਰੇ ਅਕਤੇਪਿ ‘‘ਅਹਮੇਵੇਤ੍ਥ ਵੋਹਰਿਤੁਂ ਅਰਹਰੂਪੋ’’ਤਿ ਮਾਨਂ ਨਿਸ੍ਸਾਯ. ਯਥਾਦਿਟ੍ਠਿਯਾਤਿ ਅਨੁਰੂਪਲਦ੍ਧਿਯਾ. ਯਸ੍ਸ ਹਿ ਅਤ੍ਥਸ੍ਸ ਯਾਦਿਸੀ ਦਿਟ੍ਠਿ ਅਨੁਰੂਪਾ, ਤਂ ਗਹੇਤ੍ਵਾ ਨ ਬ੍ਯਾਕਤਾਤਿ ਅਤ੍ਥੋ ¶ .ਅਸ੍ਸ ਅਤ੍ਤਨੋਤਿ ਅਧਮ੍ਮਾਦਿਅਤ੍ਥਂ ਸਨ੍ਧਾਯ ਵਦਤਿ, ਨ ਪੁਗ੍ਗਲਂ, ਅਸ੍ਸ ਅਧਮ੍ਮਾਦਿਅਤ੍ਥਸਙ੍ਖਾਤਸ੍ਸ ਅਤ੍ਤਨੋ ਸਰੂਪਸ੍ਸ ਯਾ ਅਨੁਰੂਪਾ ਦਿਟ੍ਠੀਤਿ ¶ ਅਤ੍ਥੋ. ਲਦ੍ਧਿਂ ਨਿਕ੍ਖਿਪਿਤ੍ਵਾਤਿ ਅਨੁਰੂਪਲਦ੍ਧਿਂ ਛਡ੍ਡੇਤ੍ਵਾ, ਅਗ੍ਗਹੇਤ੍ਵਾਤਿ ਅਤ੍ਥੋ. ਤੇਨਾਹ ‘‘ਅਧਮ੍ਮਾਦੀਸੁ ਧਮ੍ਮਾਦਿਲਦ੍ਧਿਕੋ ਹੁਤ੍ਵਾ’’ਤਿ. ਅਥ ਵਾ ਅਤ੍ਤਨੋ ਲਦ੍ਧਿਂ ਨਿਗੂਹਿਤ੍ਵਾ ਪੁਗ੍ਗਲਾਨੁਗੁਣਂ ਤਥਾ ਬ੍ਯਾਕਰੋਨ੍ਤੋ ਨ ਯਥਾਦਿਟ੍ਠਿਯਾ ਬ੍ਯਾਕਤਾ ਨਾਮ. ਇਮਸ੍ਮਿਂ ਪਕ੍ਖੇ ਅਧਮ੍ਮਾਦੀਸੁ ਧਮ੍ਮਾਦਿਲਦ੍ਧਿਕੋ ਹੁਤ੍ਵਾਤਿ ਏਤ੍ਥ ਅਧਮ੍ਮਾਦੀਸੁ ਧਮ੍ਮਾਦਿਲਦ੍ਧਿਕੋ ਵਿਯ ਹੁਤ੍ਵਾਤਿ ਅਤ੍ਥੋ ਗਹੇਤਬ੍ਬੋ.

ਨਪ੍ਪਟਿਪ੍ਪਸ੍ਸਮ੍ਭਨਵਗ੍ਗਵਣ੍ਣਨਾ ਨਿਟ੍ਠਿਤਾ.

੪੨੪. ਕਮ੍ਮਞਤ੍ਤੀਤਿ ਕਮ੍ਮਭੂਤਾ ਞਤ੍ਤਿ. ਅਨੁਸ੍ਸਾਵਨਨਿਰਪੇਕ੍ਖਾ ਞਤ੍ਤਿਕਮ੍ਮਭੂਤਾ ਞਤ੍ਤੀਤਿ ਅਤ੍ਥੋ. ਕਮ੍ਮਪਾਦਞਤ੍ਤਿ ਨਾਮ ਞਤ੍ਤਿਦੁਤਿਯਕਮ੍ਮਾਦੀਸੁ ਅਨੁਸ੍ਸਾਵਨਕਮ੍ਮਸ੍ਸ ਪਾਦਭੂਤਾ ਅਧਿਟ੍ਠਾਨਭੂਤਾ ਞਤ੍ਤਿ. ਨਵਸੁ ਠਾਨੇਸੂਤਿ ਓਸਾਰਣਾਦੀਸੁ ਨਵਸੁ ਠਾਨੇਸੁ. ਦ੍ਵੀਸੁ ਠਾਨੇਸੂਤਿ ਞਤ੍ਤਿਦੁਤਿਯਞਤ੍ਤਿਚਤੁਤ੍ਥਕਮ੍ਮੇਸੁ.

ਸੁਤ੍ਤਾਨੁਲੋਮਨ੍ਤਿ ਉਭਤੋਵਿਭਙ੍ਗੇ ਸੁਤ੍ਤਾਨੁਲੋਮਭੂਤੇ ਮਹਾਪਦੇਸੇ ਸਨ੍ਧਾਯ ਵੁਤ੍ਤਂ. ਵਿਨਯਾਨੁਲੋਮਨ੍ਤਿ ਖਨ੍ਧਕਪਰਿਵਾਰਾਨੁਲੋਮਭੂਤੇ ਮਹਾਪਦੇਸੇ. ਸੁਤ੍ਤਨ੍ਤਿਕੇ ਚਤ੍ਤਾਰੋ ਮਹਾਪਦੇਸੇਤਿ ਸੁਤ੍ਤਾਭਿਧਮ੍ਮਪਿਟਕੇਸੁ ਅਨੁਞ੍ਞਾਤਪਟਿਕ੍ਖਿਤ੍ਤਸੁਤ੍ਤਾਨੁਲੋਮਵਸੇਨ ਨਯਤੋ ਗਹੇਤਬ੍ਬੇ ਚਤ੍ਤਾਰੋ ਅਤ੍ਥੇ.

੪੨੫. ਦਿਟ੍ਠੀਨਂ ਆਵਿਕਮ੍ਮਾਨੀਤਿ ਆਪਤ੍ਤਿਲਦ੍ਧੀਨਂ ਪਕਾਸਨਾਨਿ, ਆਪਤ੍ਤਿਦੇਸਨਾਕਮ੍ਮਾਨੀਤਿ ਅਤ੍ਥੋ.

ਯਥਾ ਚਤੂਹਿ ਪਞ੍ਚਹਿ ਦਿਟ੍ਠਿ ਆਵਿਕਤਾ ਹੋਤੀਤਿ ਯਥਾ ਆਵਿਕਤੇ ਚਤੂਹਿ ਪਞ੍ਚਹਿ ਏਕੀਭੂਤੇਹਿ ਏਕਸ੍ਸ ਪੁਗ੍ਗਲਸ੍ਸ ਸਨ੍ਤਿਕੇ ਆਪਤ੍ਤਿ ਦੇਸਿਤਾ ਨਾਮ ਹੋਤਿ, ਏਵਂ ਦੇਸੇਤੀਤਿ ਅਤ੍ਥੋ. ਏਵਂ ਦੇਸੇਨ੍ਤੋ ਚ ਅਤ੍ਤਨਾ ਸਦ੍ਧਿਂ ਤਯੋ ਵਾ ਚਤ੍ਤਾਰੋ ਵਾ ਭਿਕ੍ਖੂ ਗਹੇਤ੍ਵਾ ਏਕਸ੍ਸ ਸਨ੍ਤਿਕੇ ਦੇਸੇਤਿ. ਏਵਂ ਦੇਸੇਤੁਂ ਨ ਵਟ੍ਟਤਿ. ਦੇਸਿਤਾ ਚ ਆਪਤ੍ਤਿ ਨ ਵੁਟ੍ਠਾਤਿ, ਦੇਸਨਾਪਚ੍ਚਯਾ ਦੁਕ੍ਕਟਞ੍ਚ ਹੋਤਿ. ਦ੍ਵਿਨ੍ਨਂ ਤਿਣ੍ਣਂ ਪਨ ਏਕਤੋ ਦੇਸੇਤੁਂ ਵਟ੍ਟਤਿ.

੪੪੪. ਅਦਸ੍ਸਨੇਨਾਤਿ ਇਮਸ੍ਸ ਅਕਪ੍ਪਿਯਂ ਪਰਿਵਜ੍ਜੇਨ੍ਤਾਨਂ ਵਿਨਯਧਰਾਨਂ ਪਟਿਪਤ੍ਤਿਯਾ ਅਦਸ੍ਸਨੇਨ ¶ , ਤੇਸਂ ਦਿਟ੍ਠਾਨੁਗਤਿਂ ਅਨਾਪਜ੍ਜਨੇਨਾਤਿਪਿ ਅਤ੍ਥੋ ਗਹੇਤਬ੍ਬੋ. ਅਕਪ੍ਪਿਯੇ ਕਪ੍ਪਿਯਸਅਞਤਾਯਾਤਿ ਰਜਤਾਦਿਅਕਪ੍ਪਿਯੇ ਤਿਪੁਆਦਿਸਞ੍ਞਿਤਾਯ ¶ . ਪੁਚ੍ਛਿਤ੍ਵਾ ਵਾ ਅਞ੍ਞੇਸਂ ਵਾ ਵੁਚ੍ਚਮਾਨਂ ਅਸੁਣਨ੍ਤੋ ਆਪਜ੍ਜਤੀਤਿ ਏਤ੍ਥ ਪੁਚ੍ਛਿਤ੍ਵਾ ਅਸੁਣਨ੍ਤੋ ਵਾ ਪੁਚ੍ਛਿਯਮਾਨਂ ਅਸੁਣਨ੍ਤੋ ਵਾਤਿ ਪਚ੍ਚੇਕਂ ਯੋਜੇਤਬ੍ਬਂ. ਏਕਰਤ੍ਤਾਤਿਕ੍ਕਮਾਦਿਵਸੇਨਾਤਿ ਅਧਿਟ੍ਠਿਤਚੀਵਰੇਨ ਵਿਪ੍ਪਵਸਿਤ੍ਵਾ ਏਕਰਤ੍ਤਾਤਿਕ੍ਕਮੇਨ ਪਾਚਿਤ੍ਤਿਯਂ ਆਪਜ੍ਜਤਿ. ਆਦਿ-ਸਦ੍ਦੇਨ ਛਰਤ੍ਤਾਤਿਕ੍ਕਮਾਦੀਨਂ ਸਙ੍ਗਹੋ.

੪੫੦. ਅਨਤ੍ਥਂ ਕਲਿਸਾਸਨਨ੍ਤਿ ਅਨਤ੍ਥਾਵਹਂ ਕੋਧਵਚਨਂ ਆਰੋਪੇਨ੍ਤੋ ਦੋਸਂ ਆਰੋਪੇਨ੍ਤੋ ਉਪਦ੍ਦਵਾਯ ਪਰਿਸਕ੍ਕਤੀਤਿ ਅਤ੍ਥੋ.

੪੫੪. ਵੋਹਾਰਨਿਰੁਤ੍ਤਿਯਨ੍ਤਿ ਤਸ੍ਸ ਤਸ੍ਸ ਅਤ੍ਥਸ੍ਸ ਵਾਚਕਸਦ੍ਦੇ ਪਭੇਦਗਤਞਾਣਪ੍ਪਤ੍ਤੋ ਨ ਹੋਤੀਤਿ ਅਤ੍ਥੋ.

੪੫੫. ਪਰਿਮਣ੍ਡਲਬ੍ਯਞ੍ਜਨਾਰੋਪਨੇ ਕੁਸਲੋ ਨ ਹੋਤੀਤਿ ਪਰਿਮਣ੍ਡਲੇਨ ਪਦਬ੍ਯਞ੍ਜਨੇਨ ਵਤ੍ਥੁਂ, ਪਰੇਹਿ ਵੁਤ੍ਤਂ ਜਾਨਿਤੁਞ੍ਚ ਅਸਮਤ੍ਥੋਤਿ ਅਤ੍ਥੋ.

੪੫੮. ਅਨੁਸ੍ਸਾਵਨੇਨਾਤਿ ਅਨੁ ਅਨੁ ਕਥਨੇਨ. ਤੇਨਾਹ ‘‘ਨਨੁ ਤੁਮ੍ਹੇ’’ਤਿਆਦਿ, ਯਂ ਅਵੋਚੁਮ੍ਹ, ਸ੍ਵਾਯਂ ਪਕਾਸਿਤੋਤਿ ਸਮ੍ਬਨ੍ਧੋ. ਤਤ੍ਥ ਯਨ੍ਤਿ ਇਦਂ ਯਸ੍ਮਾ ਵਚਨਾਪੇਕ੍ਖਂ ਨ ਹੋਤਿ, ਵਚਨਤ੍ਥਾਪੇਕ੍ਖਮੇਵ, ਤਸ੍ਮਾ ਤੇਨ ਵਚਨੇਨ ਨਾਨਾਕਰਣਾਭਾਵਂ ਪਕਾਸਯਿਸ੍ਸਾਮਾਤਿ ਯਮਤ੍ਥਂ ਅਵੋਚੁਮ੍ਹਾਤਿ ਅਤ੍ਥੋ ਗਹੇਤਬ੍ਬੋ. ਤੇਨੇਵ ‘‘ਸ੍ਵਾਯ’’ਨ੍ਤਿ ਪੁਲ੍ਲਿਙ੍ਗਵਸੇਨ ਪਟਿਨਿਦ੍ਦੇਸੋ ਕਤੋ, ਤਸ੍ਸ ਸੋ ਅਯਂ ਨਾਨਾਕਰਣਾਭਾਵੋਤਿ ਅਤ੍ਥੋ.

੪੬੭. ਮਞ੍ਚਪਦਾਦੀਸੁਪਿ ਨਲ਼ਾਟਂ ਪਟਿਹਞ੍ਞੇਯ੍ਯਾਤਿ ਅਨ੍ਧਕਾਰੇ ਚਮ੍ਮਖਣ੍ਡਂ ਪਞ੍ਞਪੇਤ੍ਵਾ ਵਨ੍ਦਿਤੁਂ ਓਨਮਨ੍ਤਸ੍ਸ ਨਲ਼ਾਟਂ ਵਾ ਅਕ੍ਖਿ ਵਾ ਮਞ੍ਚਾਦੀਸੁ ਪਟਿਹਞ੍ਞਤਿ. ਏਤੇਨ ਵਨ੍ਦਤੋਪਿ ਆਪਤ੍ਤਿਅਭਾਵਂ ਵਤ੍ਵਾ ਵਨ੍ਦਨਾਯ ਸਬ੍ਬਥਾ ਪਟਿਕ੍ਖੇਪਾਭਾਵਞ੍ਚ ਦੀਪੇਤਿ. ਏਵਂ ਸਬ੍ਬਤ੍ਥ ਸੁਤ੍ਤਨ੍ਤਰੇਹਿ ਅਪ੍ਪਟਿਕ੍ਖਿਤ੍ਤੇਸੁ. ਨਗ੍ਗਾਦੀਸੁ ਪਨ ਵਨ੍ਦਿਤੁਂ ਨ ਵਟ੍ਟਤੀਤਿ. ਏਕਤੋ ਆਵਟ੍ਟੋਤਿ ਏਕਸ੍ਮਿਂ ਦੋਸਾਗਤਿਪਕ੍ਖੇ ਪਰਿਵਤ੍ਤੋ ਪਵਿਟ੍ਠੋਤਿ ਅਤ੍ਥੋ. ਤੇਨਾਹ ‘‘ਸਪਤ੍ਤਪਕ੍ਖੇ ਠਿਤੋ’’ਤਿ. ਵਨ੍ਦਿਯਮਾਨੋਤਿ ਓਨਮਿਤ੍ਵਾ ਵਨ੍ਦਿਯਮਾਨੋ. ਵਨ੍ਦਿਤਬ੍ਬੇਸੁ ਉਦ੍ਦੇਸਾਚਰਿਯੋ, ਨਿਸ੍ਸਯਾਚਰਿਯੋ ਚ ਯਸ੍ਮਾ ਨਵਕਾਪਿ ਹੋਨ੍ਤਿ, ਤਸ੍ਮਾ ਤੇ ਵੁਡ੍ਢਾ ਏਵ ਵਨ੍ਦਿਯਾਤਿ ਵੇਦਿਤਬ੍ਬਾ.

੪੭੦. ਪੁਬ੍ਬੇ ¶ ਵੁਤ੍ਤਮੇਵਾਤਿ ਸਹਸੇਯ੍ਯਾਦਿਪਣ੍ਣਤ੍ਤਿਵਜ੍ਜਂ. ਇਤਰਨ੍ਤਿ ਸਚਿਤ੍ਤਕਂ.

ਵੋਹਾਰਵਗ੍ਗਾਦਿਵਣ੍ਣਨਾ ਨਿਟ੍ਠਿਤਾ.

੪੭੪. ‘‘ਕਤਿ ¶ ਆਪਤ੍ਤਿਯੋ’’ਤਿਆਦਿਨਾ ਉਪਾਲਿਤ੍ਥੇਰੇਨ ਵਿਨਯਸ੍ਸ ਪਾਟਵਤ੍ਥਂ ਸਯਮੇਵ ਪੁਚ੍ਛਿਤ੍ਵਾ ਵਿਸ੍ਸਜ੍ਜਨਂ ਕਤਂ. ਭਿਕ੍ਖੁਨੀਨਂਯੇਵ…ਪੇ… ਅਟ੍ਠਵਤ੍ਥੁਕਾ ਨਾਮਾਤਿ ਭਿਕ੍ਖੁਨੀਨਂ ਪਞ੍ਞਤ੍ਤਾ ਏਕਾ ਏਵ ਆਪਤ੍ਤਿ ਅਟ੍ਠਵਤ੍ਥੁਕਾ ਨਾਮਾਤਿ ਅਤ੍ਥੋ.

੪੭੫. ਕਮ੍ਮਞ੍ਚ ਕਮ੍ਮਪਾਦਕਾ ਚਾਤਿ ਏਤ੍ਥ ਯਸ੍ਮਾ ਞਤ੍ਤਿਕਮ੍ਮੇਸੁ ਞਤ੍ਤਿ ਸਯਮੇਵ ਕਮ੍ਮਂ ਹੋਤਿ, ਞਤ੍ਤਿਦੁਤਿਯਞਤ੍ਤਿਚਤੁਤ੍ਥੇਸੁ ਕਮ੍ਮੇਸੁ ਅਨੁਸ੍ਸਾਵਨਸਙ੍ਖਾਤਸ੍ਸ ਕਮ੍ਮਸ੍ਸ ਞਤ੍ਤਿਪਾਦਕਭਾਵੇਨ ਤਿਟ੍ਠਤਿ, ਤਸ੍ਮਾ ਇਮਾਨਿ ਦ੍ਵੇ ‘‘ਞਤ੍ਤਿਕਿਚ੍ਚਾਨੀ’’ਤਿ ਵੁਤ੍ਤਾਨਿ.

ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਾ ਕਤਾਤਿ ਦਸਸੁਪਿ ਸਿਕ੍ਖਾਪਦੇਸੁ ਏਕਤੋਉਪਸਮ੍ਪਨ੍ਨਾਯ ਵਸੇਨ ਵੁਤ੍ਤਦੁਕ੍ਕਟਂ ਸਨ੍ਧਾਯ ਵੁਤ੍ਤਂ. ਪਠਮਸਿਕ੍ਖਾਪਦਮ੍ਹੀਤਿ ਭਿਕ੍ਖੁਨੋਵਾਦਵਗ੍ਗਸ੍ਸ ਪਠਮਸਿਕ੍ਖਾਪਦਵਿਭਙ੍ਗੇ (ਪਾਚਿ. ੧੪੪ ਆਦਯੋ). ਅਧਮ੍ਮਕਮ੍ਮੇਤਿ ਭਿਕ੍ਖੁਨੋਵਾਦਕਸਮ੍ਮੁਤਿਕਮ੍ਮੇ ਅਧਮ੍ਮਕਮ੍ਮੇ ਜਾਤੇ ਆਪਜ੍ਜਿਤਬ੍ਬਾ ਦ੍ਵੇ ਆਪਤ੍ਤਿਨਵਕਾ, ਧਮ੍ਮਕਮ੍ਮੇ ਦ੍ਵੇ ਆਪਤ੍ਤਿਨਵਕਾਤਿ ਚਤ੍ਤਾਰੋ ਨਵਕਾ ਵੁਤ੍ਤਾ. ਆਮਕਧਞ੍ਞਂ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤਿਯਾ ਵਿਞ੍ਞਾਪਨਾਦਿਪੁਬ੍ਬਪਯੋਗੇ ਦੁਕ੍ਕਟਂ, ਅਜ੍ਝੋਹਾਰੇ ਪਾਚਿਤ੍ਤਿਯਂ. ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਾ ਕਤਾਯੇਵਾਤਿ ਵੁਤ੍ਤਂ.

ਵਿਜਹਨ੍ਤੀ ਤਿਟ੍ਠਤੀਤਿਆਦੀਸੁ ਯਦਾ ਭਿਕ੍ਖੁਨਿਯਾ ਏਕੇਨ ਪਾਦੇਨ ਹਤ੍ਥਪਾਸਂ ਵਿਜਹਿਤ੍ਵਾ ਠਤ੍ਵਾ ਕਿਞ੍ਚਿ ਕਮ੍ਮਂ ਕਤ੍ਵਾ ਤਤੋ ਅਪਰੇਨ ਪਾਦੇਨ ਵਿਜਹਿਤ੍ਵਾ ਠਾਤੁਕਾਮਤਾ ਉਪ੍ਪਜ੍ਜਤਿ, ਤਦਾ ਸਾ ਯਥਾਕ੍ਕਮਂ ‘‘ਵਿਜਹਨ੍ਤੀ ਤਿਟ੍ਠਤਿ, ਵਿਜਹਿਤ੍ਵਾ ਤਿਟ੍ਠਤੀ’’ਤਿ ਇਮਂ ਵੋਹਾਰਂ ਲਭਤਿ. ਅਞ੍ਞਥਾ ਹਿਸ੍ਸਾ ਗਾਮੂਪਚਾਰਮੋਕ੍ਕਨ੍ਤਿਯਾ ਵਿਸੇਸੋ ਨ ਸਿਯਾ ਹਤ੍ਥਪਾਸਵਿਜਹਨਸ੍ਸਾਪਿ ਗਮਨਤ੍ਤਾ. ਨਿਸੀਦਤਿ ਵਾ ਨਿਪਜ੍ਜਤਿ ਵਾਤਿ ਏਤ੍ਥਾਪਿ ਯਥਾਵੁਤ੍ਤਾਧਿਪ੍ਪਾਯੇਨ ਅਦ੍ਧਾਸਨੇਨ ਹਤ੍ਥਪਾਸਂ ਵਿਜਹਨ੍ਤੀ ਨਿਸੀਦਤਿ, ਸਕਲੇਨ ¶ ਵਾ ਆਸਨੇਨ ਵਿਜਹਿਤ੍ਵਾ ਨਿਸੀਦਤਿ, ਅਦ੍ਧਸਰੀਰੇਨ ਵਿਜਹਨ੍ਤੀ ਨਿਪਜ੍ਜਤਿ, ਸਕਲੇਨ ਸਰੀਰੇਨ ਵਿਜਹਿਤ੍ਵਾ ਨਿਪਜ੍ਜਤੀਤਿ ਯੋਜੇਤਬ੍ਬਂ.

ਕਾਯਿਕਾਦਿਆਪਤ੍ਤਿਵਣ੍ਣਨਾ ਨਿਟ੍ਠਿਤਾ.

੪੭੬. ਸਬ੍ਬਾਨਿ ¶ ਨਾਨਾਵਤ੍ਥੁਕਾਨੀਤਿ ਸਪ੍ਪਿਨਵਨੀਤਾਦੀਨਂ ਪਞ੍ਚਨ੍ਨਂ ਵਤ੍ਥੂਨਂ ਭੇਦੇਨ ਪਾਚਿਤ੍ਤਿਯਾਨਿ ਪਞ੍ਚ ਨਾਨਾਵਤ੍ਥੁਕਾਨਿ. ਏਸ ਨਯੋ ਪਣੀਤਭੋਜਨਵਿਸਯੇ ਨਵ ਪਾਚਿਤ੍ਤਿਯਾਨੀਤਿਆਦੀਸੁਪਿ. ਏਤੇਨ ਭੇਸਜ੍ਜਪਣੀਤਭੋਜਨਸਿਕ੍ਖਾਪਦਾਨਿ ਏਕੇਕਸਿਕ੍ਖਾਪਦਵਸੇਨ ਪਞ੍ਞਤ੍ਤਾਨਿਪਿ ਵਤ੍ਥੁਭੇਦੇਨ ਪਚ੍ਚੇਕਂ ਪਞ੍ਚਸਿਕ੍ਖਾਪਦਨਵਸਿਕ੍ਖਾਪਦਸਦਿਸਾਨਿ ਭਿਕ੍ਖੁਨੀਨਂ ਪਾਟਿਦੇਸਨੀਯਾਪਤ੍ਤਿਯੋ ਵਿਯਾਤਿ ਦਸ੍ਸੇਤਿ. ਤੇਨੇਵ ‘‘ਨਾਨਾਵਤ੍ਥੁਕਾਨੀ’’ਤਿ ਵੁਤ੍ਤਂ. ਸਪ੍ਪਿਂ ਏਵ ਪਟਿਗ੍ਗਹੇਤ੍ਵਾ ਅਨੇਕਭਾਜਨੇਸੁ ਠਪੇਤ੍ਵਾ ਸਤ੍ਤਾਹਂ ਅਤਿਕ੍ਕਾਮੇਨ੍ਤਸ੍ਸ ਭਾਜਨਗਣਨਾਯ ਸਮ੍ਭਵਨ੍ਤਿਯੋ ਬਹੁਕਾਪਿ ਆਪਤ੍ਤਿਯੋ ਏਕਵਤ੍ਥੁਕਾ ਏਵ ਹੋਨ੍ਤਿ, ਏਵਂ ਸਪ੍ਪਿਭੋਜਨਮੇਵ ਬਹੂਸੁ ਠਾਨੇਸੁ ਵਿਞ੍ਞਾਪੇਤ੍ਵਾ ਏਕਤੋ ਵਾ ਵਿਸੁਂ ਵਿਸੁਮੇਵ ਵਾ ਭੁਞ੍ਜਨ੍ਤਸ੍ਸ ਆਪਤ੍ਤਿਯੋ ਏਕਵਤ੍ਥੁਕਾ ਏਵਾਤਿ ਦਟ੍ਠਬ੍ਬਾ.

ਪਾਲ਼ਿਯਂ ਏਕਵਾਚਾਯ ਦੇਸੇਯ੍ਯ, ਵੁਤ੍ਤਾ ਆਦਿਚ੍ਚਬਨ੍ਧੁਨਾਤਿ ਏਤ੍ਥ ‘‘ਦੇਸੇਯ੍ਯਾਤਿ ਵੁਤ੍ਤਾ’’ਤਿ ਇਤਿ-ਸਦ੍ਦਂ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਂ. ਏਵਂ ਸੇਸੇਸੁਪਿ.

ਭੇਦਾਨੁਵਤ੍ਤਕਾਨਨ੍ਤਿ ਏਤ੍ਥ ਆਦਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਯਾਵਤਤਿਯਕਾ ਚ ਸਬ੍ਬੇ ਉਭਤੋਵਿਭਙ੍ਗੇ ਆਗਤਾ, ਸਙ੍ਘਾਦਿਸੇਸਸਾਮਞ੍ਞੇਨ ਏਕਂ, ਪਾਚਿਤ੍ਤਿਯਸਾਮਞ੍ਞੇਨ ਚ ਏਕਂ ਕਤ੍ਵਾ ‘‘ਯਾਵਤਤਿਯਕੇ ਤਿਸ੍ਸੋ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਤ੍ਥ ਚ ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾਪਿ ਸਨ੍ਤਿ ਏਵ. ਤਾਨਿ ਮਾਤਿਕਾਯ ਨ ਆਗਤਾਨਿ. ਮਾਤਿਕਾਗਤਵਸੇਨ ਹੇਤ੍ਥ ‘‘ਤਿਸ੍ਸੋ’’ਤਿ ਵੁਤ੍ਤਂ.

ਸਙ੍ਘਾਦੀਹੀਤਿ ਸਙ੍ਘਗਣਪੁਗ੍ਗਲੇਹਿ ਕਾਰਣਭੂਤੇਹਿ. ਅਬ੍ਭੁਣ੍ਹਸੀਲੋਤਿ ਪਰਿਸੁਦ੍ਧਭਾਵੂਪਗਮਨੇਨ ਅਭਿਨਵੁਪ੍ਪਨ੍ਨਸੀਲੋ. ਅਭਿਨਵੁਪ੍ਪਨ੍ਨਞ੍ਹਿ ‘‘ਅਬ੍ਭੁਣ੍ਹ’’ਨ੍ਤਿ ਵੁਚ੍ਚਤਿ, ਪਰਿਸੁਦ੍ਧਸੀਲੋਤਿ ਅਤ੍ਥੋ. ਤੇਨਾਹ ‘‘ਪਾਕਤਿਕੋ’’ਤਿ.

‘‘ਕੋਸਮ੍ਬਕਕ੍ਖਨ੍ਧਕੇ ਵੁਤ੍ਤਾਨਿਸਂਸੇ’’ਤਿ ਇਦਂ ਕੋਸਮ੍ਬਕਕ੍ਖਨ੍ਧਕੇ ‘‘ਸਚੇ ਮਂ ਇਮੇ ਭਿਕ੍ਖੂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਨ੍ਤਿ, ਨ ਮਯਾ ਸਦ੍ਧਿਂ ਉਪੋਸਥਂ ਕਰਿਸ੍ਸਨ੍ਤੀ’’ਤਿਆਦਿਨਾ ਆਪਤ੍ਤਿਯਾ ¶ ਅਦਸ੍ਸਨੇ ਆਦੀਨਵਂ ਦਸ੍ਸੇਤ੍ਵਾ ਪਰੇਸਮ੍ਪਿ ਸਦ੍ਧਾਯ ਆਪਤ੍ਤਿਦੇਸਨਾਵਿਧਾਨਮੁਖੇਨ ਸਾਮਤ੍ਥਿਯਤੋ ਪਕਾਸਿਤੋ. ਏਕਤੋ ਉਪੋਸਥਕਰਣ, ਪਵਾਰਣਾਕਰਣ, ਸਙ੍ਘਕਮ੍ਮਕਰਣ, ਆਸਨੇਨਿਸੀਦਨ, ਯਾਗੁਪਾਨੇਨਿਸੀਦਨ, ਭਤ੍ਤਗ੍ਗੇਨਿਸੀਦਨ, ਏਕਚ੍ਛਨ੍ਨੇਸਯਨ, ਯਥਾਵੁਡ੍ਢਅਭਿਵਾਦਨਾਦਿਕਰਣਸਙ੍ਖਾਤੇ ਅਟ੍ਠਾਨਿਸਂਸੇ ਸਨ੍ਧਾਯ ਵੁਤ੍ਤਂ.

ਚਤੁਨ੍ਨਨ੍ਤਿ ¶ ਵਿਨਯਪਿਟਕੇ ਆਗਤਾਨਂ ਵਸੇਨ ਵੁਤ੍ਤਂ. ਕਤਮਾ ਪਨ ਸਾਤਿ ਸਾ ਚਤੁਬ੍ਬਿਧਾ ਅਚ੍ਚਯਦੇਸਨਾ ਕਤਮਾਤਿ ਅਤ੍ਥੋ. ਅਭਿਮਾਰਾਨਨ੍ਤਿ ਮਾਰਣਤ੍ਥਾਯ ਪਯੋਜਿਤਧਨੁਗ੍ਗਹਾਨਂ. ਉਪਟ੍ਠਾਯਿਕਾਯਾਤਿ ਸਹਸੇਯ੍ਯਸਿਕ੍ਖਾਪਦਵਤ੍ਥੁਸ੍ਮਿਂ ਆਗਤਾਯ.

ਅਟ੍ਠਨ੍ਨਂ ਭਿਕ੍ਖੁਨੀਨਨ੍ਤਿ ਥੇਰਾਸਨਤੋ ਪਟ੍ਠਾਯ ਅਟ੍ਠਹਿ ਭਿਕ੍ਖੁਨੀਹਿ ਇਤਰਾਯ ਆਗਤਾਯ ਵੁਡ੍ਢਾਯ ਭਿਕ੍ਖੁਨਿਯਾ ਆਸਨਂ ਦਾਤਬ੍ਬਂ. ਅਟ੍ਠਨ੍ਨਂ ਪਨ ਭਿਕ੍ਖੁਨੀਨਂ ਨਵਕਾਯ ਆਗਤਾਯ ਅਦਾਤੁਮ੍ਪਿ ਵਟ੍ਟਤਿ. ਤਾਯ ਪਨ ਸਙ੍ਘਨਵਕਾਸਨੇ ਲਦ੍ਧੋਕਾਸੇ ਨਿਸੀਦਿਤਬ੍ਬਂ. ਅਥ ਵਾ ਅਟ੍ਠਨ੍ਨਂ ਵੁਡ੍ਢਾਨਂ ਭਿਕ੍ਖੁਨੀਨਂ ਇਤਰਾਯ ਨਵਕਤਰਾਯ ਆਸਨਂ ਦਾਤਬ੍ਬਂ. ਕਮ੍ਮਾਨਿ ਨਵਾਤਿ ਓਸਾਰਣਾਦੀਨਿ ਨਵ ਏਵ.

੪੭੭. ਦਸ ਜਨਾਤਿ ‘‘ਦਸ ਇਮੇ, ਭਿਕ੍ਖਵੇ, ਅਵਨ੍ਦਿਯਾ’’ਤਿਆਦਿਨਾ (ਪਰਿ. ੩੩੦) ਵੁਤ੍ਤਾ ਨਵਕਅਨੁਪਸਮ੍ਪਨ੍ਨਨਾਨਾਸਂਵਾਸਕਮਾਤੁਗਾਮਪਣ੍ਡਕਾ ਪਞ੍ਚ, ਪਾਰਿਵਾਸਿਕਾਦਯੋ ਚ ਪਞ੍ਚਾਤਿ ਦਸ ਜਨਾ.

ਦ੍ਵਾਦਸ ਕਮ੍ਮਦੋਸਾਤਿ ਦੋਸਯੁਤ੍ਤਕਮ੍ਮਾਨਿ ਦ੍ਵਾਦਸਾਤਿ ਅਤ੍ਥੋ. ਕਮ੍ਮਸਮ੍ਪਤ੍ਤਿਯੋਤਿ ਸਮ੍ਪਨ੍ਨਕਮ੍ਮਾਨਿ, ਵਿਸੁਦ੍ਧਕਮ੍ਮਾਨੀਤਿ ਅਤ੍ਥੋ. ਏਤਦੇਵਾਤਿ ਧਮ੍ਮੇਨ ਸਮਗ੍ਗਮੇਵ.

ਅਨਨ੍ਤਂ ਨਿਬ੍ਬਾਨਂ ਅਜਿਨਿ ਜਿਨਿਤ੍ਵਾ ਪਟਿਲਭਤੀਤਿ ਅਨਨ੍ਤਜਿਨੋਤਿ ਆਹ ‘‘ਪਰਿਯਨ੍ਤ’’ਇਚ੍ਚਾਦਿ. ਸ੍ਵੇਵਾਤਿ ਸੋ ਏਵ ਭਗਵਾ.

‘‘ਵਿਨਯਂ ਪਟਿਜਾਨਨ੍ਤਸ੍ਸ, ਵਿਨਯਾਨਿ ਸੁਣੋਮ ਤੇ’’ਤਿਆਦਿਨਾ ਉਪਾਲਿਤ੍ਥੇਰੇਨੇਵ ਏਕਂ ਵਿਨਯਧਰਂ ਸਮ੍ਮੁਖੇ ¶ ਠਿਤਂ ਪੁਚ੍ਛਨ੍ਤੇਨ ਵਿਯ ਪੁਚ੍ਛਿਤ੍ਵਾ ਤੇਨ ਵਿਸ੍ਸਜ੍ਜਿਤਂ ਵਿਯ ਵਿਸ੍ਸਜ੍ਜਨਂ ਕਤਂ. ਤਤ੍ਥ ਵਿਨਯਂ ਪਟਿਜਾਨਨ੍ਤਸ੍ਸਾਤਿ ਵਿਨਯਂ ਜਾਨਾਮੀਤਿ ਪਟਿਜਾਨਨ੍ਤਸ੍ਸ. ਵਿਨਯਾਨੀਤਿ ਵਿਨਯੇ ਤਯਾ ਵੁਚ੍ਚਮਾਨੇ ਸੁਣੋਮ.

੪੭੮. ਪਾਲ਼ਿਯਂ ਪਾਰਾਜਿਕਾਤਿਆਦਿ ਉਭਤੋਵਿਭਙ੍ਗੇਸੁ ਆਗਤੇਸੁ ਅਗ੍ਗਹਿਤਗ੍ਗਹਣਵਸੇਨ ਵੁਤ੍ਤਂ.

ਅਵਨ੍ਦਨੀਯਪੁਗ੍ਗਲਾਦਿਵਣ੍ਣਨਾ ਨਿਟ੍ਠਿਤਾ.

੪੭੯. ਸੇਦਮੋਚਨਗਾਥਾਸੁ ¶ ਅਕਪ੍ਪਿਯਸਮ੍ਭੋਗੋਤਿ ਅਨੁਪਸਮ੍ਪਨ੍ਨੇਹਿ ਸਦ੍ਧਿਂ ਕਾਤੁਂ ਪਟਿਕ੍ਖਿਤ੍ਤੋ ਉਪੋਸਥਾਦਿਸਂਵਾਸੋ ਏਵ ਵੁਤ੍ਤੋ. ਪਞ੍ਹਾ ਮੇਸਾਤਿ ਏਤ੍ਥ ਮ-ਕਾਰੋ ਪਦਸਨ੍ਧਿਕਰੋ. ਏਸਾਤਿ ਚ ਲਿਙ੍ਗਵਿਪਲ੍ਲਾਸਵਸੇਨ ਵੁਤ੍ਤਂ, ਪਞ੍ਹੋ ਏਸੋਤਿ ਅਤ੍ਥੋ. ਪਞ੍ਹ-ਸਦ੍ਦੋ ਵਾ ਦ੍ਵਿਲਿਙ੍ਗੋ ਦਟ੍ਠਬ੍ਬੋ. ਤੇਨਾਹ ‘‘ਏਸਾ ਪਞ੍ਹਾ’’ਤਿਆਦਿ.

ਗਰੁਭਣ੍ਡਂ ਸਨ੍ਧਾਯਾਤਿ ਗਰੁਭਣ੍ਡੇਨ ਗਰੁਭਣ੍ਡਪਰਿਵਤ੍ਤਨਂ ਸਨ੍ਧਾਯ. ਦਸਾਤਿ ਦਸ ਅਵਨ੍ਦਿਯਪੁਗ੍ਗਲੇ. ਏਕਾਦਸੇਤਿ ਅਭਬ੍ਬਪੁਗ੍ਗਲੇ. ਸਿਕ੍ਖਾਯ ਅਸਾਧਾਰਣੋਤਿ ਖੁਰਭਣ੍ਡਂ ਧਾਰੇਤੁਂ ਅਨੁਞ੍ਞਾਤਸਿਕ੍ਖਾਪਦੇਨ ਭਿਕ੍ਖੂਹਿ ਅਸਾਧਾਰਣਸਿਕ੍ਖਾਪਦੋਤਿ ਅਤ੍ਥੋ.

ਉਬ੍ਭਕ੍ਖਕੇ ਨ ਵਦਾਮੀਤਿ ਅਕ੍ਖਤੋ ਉਦ੍ਧਂ ਸੀਸੇ ਠਿਤਮੁਖਮਗ੍ਗੇਪਿ ਪਾਰਾਜਿਕਂ ਸਨ੍ਧਾਯ ਨ ਵਦਾਮਿ. ਅਧੋਨਾਭਿਨ੍ਤਿ ਨਾਭਿਤੋ ਹੇਟ੍ਠਾ ਠਿਤਵਚ੍ਚਪਸ੍ਸਾਵਮਗ੍ਗੇਪਿ ਵਿਵਜ੍ਜਿਯ ਅਞ੍ਞਸ੍ਮਿਂ ਸਰੀਰਪ੍ਪਦੇਸੇ ਮੇਥੁਨਧਮ੍ਮਪਚ੍ਚਯਾ ਕਥਂ ਪਾਰਾਜਿਕੋ ਸਿਯਾਤਿ ਅਤ੍ਥੋ.

ਅਵਿਪ੍ਪਵਾਸਪਞ੍ਹਾਵਣ੍ਣਨਾ ਨਿਟ੍ਠਿਤਾ.

੪੮੦. ਦੁਸ੍ਸਕੁਟਿਆਦੀਨੀਤਿ ¶ ਆਦਿ-ਸਦ੍ਦੇਨ ਅਚ੍ਛਤਰਤਿਪੁਪਟ੍ਟਾਦੀਹਿ, ਤਿਣਪਣ੍ਣਾਦੀਹਿ ਚ ਪਟਿਚ੍ਛਨ੍ਨਕੁਟਿਯੋ ਸਙ੍ਗਣ੍ਹਾਤਿ. ਤਾਦਿਸਾਯ ਹਿ ਕੁਟਿਯਾ ਬਹਿ ਠਤ੍ਵਾ ਅਨ੍ਤੋ ਠਿਤਾਯ ਇਤ੍ਥਿਯਾ ਮਗ੍ਗੇ ਦੁਸ੍ਸਾਦਿਨਾ ਸਨ੍ਥਤਂ ਕਤ੍ਵਾ ਪਵੇਸੇਨ੍ਤੋਪਿ ਪਾਰਾਜਿਕੋ ਸਿਯਾ. ਲਿਙ੍ਗਪਰਿਵਤ੍ਤਂ ਸਨ੍ਧਾਯ ਵੁਤ੍ਤਾਤਿ ਲਿਙ੍ਗੇ ਪਰਿਵਤ੍ਤੇ ਪਟਿਗ੍ਗਹਣਸ੍ਸ ਵਿਜਹਨਤੋ ਪੁਨ ਅਪ੍ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਨਾਪਤ੍ਤਿਂ ਸਨ੍ਧਾਯ ਵੁਤ੍ਤਂ.

ਪਾਲ਼ਿਯਂ ਭਿਕ੍ਖੂ ਸਿਯਾ ਵੀਸਤਿਯਾ ਸਮਾਗਤਾਤਿ ਵੀਸਤਿਯਾ ਸਙ੍ਖਾਤਾਯ ਭਿਕ੍ਖੂ ਸਮਾਗਤਾ, ਏਤੇਨ ਸਬ੍ਬਕਮ੍ਮਾਰਹਤਂ ਸਙ੍ਘਸ੍ਸ ਦਸ੍ਸੇਤਿ.

ਨਿਵਤ੍ਥੋਤਿ ¶ ਗਾਥਾਯ ਅਨ੍ਤਰਵਾਸਕੇਨ ਨਿਵਤ੍ਥੋ ਉਤ੍ਤਰਾਸਙ੍ਗੇਨ ਦਿਗੁਣਂ ਕਤ੍ਵਾ ਪਾਰੁਤਸਙ੍ਘਾਟਿਯੋ. ਇਤਿ ਤਾਨਿ ਤੀਣਿਪਿ ਚੀਵਰਾਨਿ ਕਾਯੇ ਗਤਾਨੇਵ ਭਿਕ੍ਖੁਨਿਯਾ ਬਿਨ੍ਦੁਮਤ੍ਤਂ ਕਾਲ਼ਕਂ ਉਦਕੇਨ ਧੋਵਿਤਮਤ੍ਤੇ ਨਿਸ੍ਸਗ੍ਗਿਯਾਨਿ ਹੋਨ੍ਤੀਤਿ ਅਤ੍ਥੋ.

ਇਤ੍ਥਿਂ ਹਨੇਤਿ ਗਾਥਾਯ ਨ ਮਾਤੁਭੂਤਂ ਇਤ੍ਥਿਂ ਹਨੇਯ੍ਯ, ਨ ਪਿਤੁਭੂਤਂ ਪੁਰਿਸਂ ਹਨੇਯ੍ਯ. ਅਨਰਿਯਨ੍ਤਿ ਤਞ੍ਚ ਅਨਰਹਨ੍ਤਮੇਵ ਹਨੇਯ੍ਯ, ਏਤੇਨ ਅਰਹਨ੍ਤਘਾਤਕੋਪਿ ਨ ਹੋਤੀਤਿ ਦਸ੍ਸੇਤਿ. ਅਨਨ੍ਤਰਂ ਫੁਸੇਤਿ ਆਨਨ੍ਤਰਿਯਂ ਫੁਸਤੀਤਿ ਅਤ੍ਥੋ.

੪੮੧. ਸੁਪ੍ਪਤਿਟ੍ਠਿਤ-ਨਿਗ੍ਰੋਧਸਦਿਸਨ੍ਤਿ ਯੋਜਨਵਿਤ੍ਥਤਂ ਰੁਕ੍ਖਂ ਸਨ੍ਧਾਯ ਵੁਤ੍ਤਂ.

ਸਤ੍ਤਰਸਕੇਸੂਤਿ ਭਿਕ੍ਖੁਨੀਨਂ ਪਞ੍ਞਤ੍ਤਸਤ੍ਤਰਸਸਙ੍ਘਾਦਿਸੇਸੇਸੁ.

ਪਾਰਾਜਿਕਾਦਿਪਞ੍ਹਾਵਣ੍ਣਨਾ ਨਿਟ੍ਠਿਤਾ.

੪੮੩. ਕਮ੍ਮਵਗ੍ਗੇ ¶ ¶ ਠਪਿਤਉਪੋਸਥਪਵਾਰਣਾਨਂ ਕਤ੍ਤਿਕਮਾਸੇ ਸਾਮਗ੍ਗਿਯਾ ਕਤਾਯ ਸਾਮਗ੍ਗੀਪਵਾਰਣਂ ਮੁਞ੍ਚਿਤ੍ਵਾ ਉਪੋਸਥਂ ਕਾਤੁਂ ਨ ਵਟ੍ਟਤੀਤਿ ਆਹ ‘‘ਠਪੇਤ੍ਵਾ ਕਤ੍ਤਿਕਮਾਸ’’ਨ੍ਤਿ. ਸਚੇ ਪਨ ਤੇਸਂ ਨਾਨਾਸੀਮਾਸੁ ਮਹਾਪਵਾਰਣਾਯ ਵਿਸੁਂ ਪਵਾਰਿਤਾਨਂ ਕਤ੍ਤਿਕਮਾਸਬ੍ਭਨ੍ਤਰੇ ਸਾਮਗ੍ਗੀ ਹੋਤਿ, ਸਾਮਗ੍ਗੀਉਪੋਸਥੋ ਏਵ ਤੇਹਿ ਕਤ੍ਤਬ੍ਬੋ, ਨ ਪਵਾਰਣਾ. ਏਕਸ੍ਮਿਂ ਵਸ੍ਸੇ ਕਤਪਵਾਰਣਾਨਂ ਪੁਨ ਪਵਾਰਣਾਯ ਅਵਿਹਿਤਤ੍ਤਾ. ਸਾਮਗ੍ਗੀਦਿਵਸੋਤਿ ਅਨੁਪੋਸਥਦਿਵਸੇ ਸਾਮਗ੍ਗੀਕਰਣਂ ਸਨ੍ਧਾਯ ਵੁਤ੍ਤਂ. ਸਚੇ ਪਨ ਚਾਤੁਦ੍ਦਸਿਯਂ, ਪਨ੍ਨਰਸਿਯਂ ਵਾ ਸਙ੍ਘੋ ਸਾਮਗ੍ਗਿਂ ਕਰੋਤਿ, ਤਦਾ ਸਾਮਗ੍ਗੀਉਪੋਸਥਦਿਵਸੋ ਨ ਹੋਤਿ, ਚਾਤੁਦ੍ਦਸੀਪਨ੍ਨਰਸੀਉਪੋਸਥੋਵ ਹੋਤਿ. ਉਪਰਿ ਪਵਾਰਣਾਯਪਿ ਏਸੇਵ ਨਯੋ.

ਪਚ੍ਚੁਕ੍ਕਡ੍ਢਿਤ੍ਵਾ ਠਪਿਤਦਿਵਸੋਤਿ ਭਣ੍ਡਨਕਾਰਕੇਹਿ ਉਪਦ੍ਦੁਤਾ ਵਾ ਕੇਨਚਿਦੇਵ ਕਰਣੀਯੇਨ ਪਵਾਰਣਾਸਙ੍ਗਹਂ ਵਾ ਕਤ੍ਵਾ ਠਪਿਤੋ ਕਾਲ਼ਪਕ੍ਖਚਾਤੁਦ੍ਦਸੀਦਿਵਸੋਵ. ਦ੍ਵੇ ਚ ਪੁਣ੍ਣਮਾਸਿਯੋਤਿ ਪੁਬ੍ਬ-ਕਤ੍ਤਿਕਪੁਣ੍ਣਮਾ, ਪਚ੍ਛਿਮਕਤ੍ਤਿਕਪੁਣ੍ਣਮਾ ਚਾਤਿ ਦ੍ਵੇ ਪੁਣ੍ਣਮਾਸਿਯੋ. ਏਵਂ ਚਤੁਬ੍ਬਿਧਮ੍ਪੀਤਿ ਪੁਣ੍ਣਮਾਸੀਦ੍ਵਯੇਨ ਸਦ੍ਧਿਂ ਸਾਮਗ੍ਗੀਪਵਾਰਣਂ, ਚਾਤੁਦ੍ਦਸੀਪਵਾਰਣਞ੍ਚ ਸਮ੍ਪਿਣ੍ਡੇਤ੍ਵਾ ਵੁਤ੍ਤਂ. ਇਦਞ੍ਚ ਪਕਤਿਚਾਰਿਤ੍ਤਵਸੇਨ ਵੁਤ੍ਤਂ. ਤਥਾਰੂਪਪਚ੍ਚਯੇ ਪਨ ਸਤਿ ਉਭਿਨ੍ਨਂ ਪੁਣ੍ਣਮਾਸੀਨਂ ਪੁਰਿਮਾ ਦ੍ਵੇ ਚਾਤੁਦ੍ਦਸਿਯੋਪਿ ਕਾਲ਼ਪਕ੍ਖਚਾਤੁਦ੍ਦਸਿਯਾ ਅਨਨ੍ਤਰਾ ਪਨ੍ਨਰਸੀਪੀਤਿ ਇਮੇਪਿ ਤਯੋ ਦਿਵਸਾ ਪਵਾਰਣਾਦਿਵਸਾ ਏਵਾਤਿ ਇਮਂ ਸਤ੍ਤਵਿਧਮ੍ਪਿ ਪਵਾਰਣਾਦਿਵਸਂ ਠਪੇਤ੍ਵਾ ਅਞ੍ਞਸ੍ਮਿਂ ਦਿਵਸੇ ਪਵਾਰੇਤੁਂ ਨ ਵਟ੍ਟਤਿ.

੪੮੪. ਅਨੁਸ੍ਸਾਵਨਕਮ੍ਮਂ ਕਤ੍ਵਾਤਿ ਪਠਮਂ ਅਨੁਸ੍ਸਾਵਨਂ ਸਾਵੇਤ੍ਵਾ ‘‘ਏਸਾ ਞਤ੍ਤੀ’’ਤਿ ਅਨੁਸ੍ਸਾਵਨਾਨਨ੍ਤਰਮੇਵ ਸਕਲਂ ਞਤ੍ਤਿਂ ਵਤ੍ਵਾ, ਪਰਿਯੋਸਾਨੇ ‘‘ਏਸਾ ਞਤ੍ਤੀ’’ਤਿ ਵਤ੍ਵਾਤਿ ਅਧਿਪ੍ਪਾਯੋ.

੪੮੫. ਯ੍ਵਾਯਨ੍ਤਿ ¶ ਬ੍ਯਞ੍ਜਨਪ੍ਪਭੇਦੋ ਅਧਿਪ੍ਪੇਤੋ. ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋਤਿ ਏਤ੍ਥ ਦਸਧਾ ਦਸਵਿਧੇਨ ਬ੍ਯਞ੍ਜਨਾਨਂ ਪਭੇਦੋਤਿ ਯੋਜੇਤਬ੍ਬਂ. ਕੇਨਾਯਂ ਪਭੇਦੋਤਿ ਆਹ ‘‘ਬ੍ਯਞ੍ਜਨਬੁਦ੍ਧਿਯਾ’’ਤਿ. ਯਥਾਧਿਪ੍ਪੇਤਤ੍ਥਬ੍ਯਞ੍ਜਨਤੋ ਬ੍ਯਞ੍ਜਨਸਙ੍ਖਾਤਾਨਂ ਅਕ੍ਖਰਾਨਂ ਜਨਿਕਾ ਬੁਦ੍ਧਿ ਬ੍ਯਞ੍ਜਨਬੁਦ੍ਧਿ, ਤਾਯ ਬ੍ਯਞ੍ਜਨਬੁਦ੍ਧਿਯਾ ¶ , ਅਕ੍ਖਰਸਮੁਟ੍ਠਾਪਕਚਿਤ੍ਤਭੇਦੇਨੇਵਾਤਿ ਅਤ੍ਥੋ. ਯਂ ਵਾ ਸਂਯੋਗਪਰਂ ਕਤ੍ਵਾ ਵੁਚ੍ਚਤਿ, ਇਦਮ੍ਪਿ ਗਰੁਕਨ੍ਤਿ ਯੋਜਨਾ.

ਤਤ੍ਥ ਆਯਸ੍ਮਤੋਤਿਆਦੀਸੁ ਯਾਨਿ ਅਨਨ੍ਤਰਿਤਾਨਿ ਸ-ਕਾਰਮ-ਕਾਰਾਦਿਬ੍ਯਞ੍ਜਨਾਨਿ ‘‘ਸਂਯੋਗੋ’’ਤਿ ਵੁਚ੍ਚਨ੍ਤਿ, ਸੋ ਸਂਯੋਗੋ ਪਰੋ ਯਸ੍ਸ ਅ-ਕਾਰਾਦਿਨੋ, ਸੋ ਸਂਯੋਗਪਰੋ ਨਾਮ. ਰਸ੍ਸਨ੍ਤਿ ਅਕਾਰਾਦਿਬ੍ਯਞ੍ਜਨਰਹਿਤਂ ਸਰਂ. ਅਸਂਯੋਗਪਰਨ੍ਤਿ ‘‘ਯਸ੍ਸ ਨਕ੍ਖਮਤੀ’’ਤਿਆਦੀਸੁ ਯ-ਕਾਰ ਨ-ਕਾਰਾਦਿਬ੍ਯਞ੍ਜਨਸਹਿਤਸਰਂ ਸਨ੍ਧਾਯ ਵੁਤ੍ਤਂ. ਤ-ਕਾਰਸ੍ਸ ਥ-ਕਾਰਂ ਅਕਤ੍ਵਾ ਵਗ੍ਗਨ੍ਤਰੇ ਸਿਥਿਲਮੇਵ ਕਤ੍ਵਾ ‘‘ਸੁਣਾਟੁ ਮੇ’’ਤਿਆਦਿਂ ਵਦਨ੍ਤੋਪਿ ਦੁਰੁਤ੍ਤਂ ਕਰੋਤਿਯੇਵ ਠਪੇਤ੍ਵਾ ਅਨੁਰੂਪਂ ਆਦੇਸਂ. ਯਞ੍ਹਿ ‘‘ਸਚ੍ਚਿਕਤ੍ਥਪਰਮਤ੍ਥੇਨਾ’’ਤਿ ਵਤ੍ਤਬ੍ਬੇ ‘‘ਸਚ੍ਚਿਕਟ੍ਠਪਰਮਟ੍ਠੇਨਾ’’ਤਿ ਚ ‘‘ਅਤ੍ਥਕਥਾ’’ਤਿ ਵਤ੍ਤਬ੍ਬੇ ‘‘ਅਟ੍ਠਕਥਾ’’ਤਿ ਚ ਤਤ੍ਥ ਤਤ੍ਥ ਵੁਚ੍ਚਤਿ, ਤਾਦਿਸਂ ਪਾਲ਼ਿਅਟ੍ਠਕਥਾਸੁ ਦਿਟ੍ਠਪਯੋਗਂ, ਤਦਨੁਰੂਪਞ੍ਚ ਵਤ੍ਤੁਂ ਵਟ੍ਟਤਿ, ਤਤੋ ਅਞ੍ਞਂ ਨ ਵਟ੍ਟਤਿ. ਤੇਨਾਹ ‘‘ਅਨੁਕ੍ਕਮਾਗਤਂ ਪਵੇਣਿਂ ਅਵਿਨਾਸੇਨ੍ਤੇਨਾ’’ਤਿਆਦਿ.

ਦੀਘੇ ਵਤ੍ਤਬ੍ਬੇ ਰਸ੍ਸਨ੍ਤਿਆਦੀਸੁ ‘‘ਭਿਕ੍ਖੂਨ’’ਨ੍ਤਿ ਵਤ੍ਤਬ੍ਬੇ ‘‘ਭਿਕ੍ਖੁਨ’’ਨ੍ਤਿ ਵਾ ‘‘ਬਹੂਸੂ’’ਤਿ ਵਤ੍ਤਬ੍ਬੇ ‘‘ਬਹੁਸੂ’’ਤਿ ਵਾ ‘‘ਨਕ੍ਖਮਤੀ’’ਤਿ ਵਤ੍ਤਬ੍ਬੇ ‘‘ਨ ਖਮਤੀ’’ਤਿ ਵਾ ‘‘ਉਪਸਮ੍ਪਦਾਪੇਕ੍ਖੋ’’ਤਿ ਵਤ੍ਤਬ੍ਬੇ ‘‘ਉਪਸਮ੍ਪਦਾਪੇਖੋ’’ਤਿ ਵਾ ਏਵਂ ਅਨੁਰੂਪਟ੍ਠਾਨੇਸੁ ਏਵ ਦੀਘਰਸ੍ਸਾਦਿ ਰਸ੍ਸਦੀਘਾਦਿਵਸੇਨ ਪਰਿਵਤ੍ਤੇਤੁਂ ਵਟ੍ਟਤਿ, ਨ ਪਨ ‘‘ਨਾਗੋ’’ਤਿ ਵਤ੍ਤਬ੍ਬੇ ‘‘ਨਗੋ’’ਤਿ ਵਾ ‘‘ਸਙ੍ਘੋ’’ਤਿ ਵਤ੍ਤਬ੍ਬੇ ‘‘ਸਘੋ’’ਤਿ ਵਾ ‘‘ਤਿਸ੍ਸੋ’’ਤਿ ਵਤ੍ਤਬ੍ਬੇ ‘‘ਤਿਸੋ’’ਤਿ ਵਾ ‘‘ਯਾਚਤੀ’’ਤਿ ਵਤ੍ਤਬ੍ਬੇ ‘‘ਯਾਚਨ੍ਤੀ’’ਤਿ ਵਾ ਏਵਂ ਅਨਨੁਰੂਪਟ੍ਠਾਨੇਸੁ ਵਤ੍ਤੁਂ. ਸਮ੍ਬਨ੍ਧਂ, ਪਨ ਵਵਤ੍ਥਾਨਞ੍ਚ ਸਬ੍ਬਥਾਪਿ ਵਟ੍ਟਤੀਤਿ ਗਹੇਤਬ੍ਬਂ.

੪੮੬. ਸੇਸਸੀਮਾਸੁਪੀਤਿ ਅਤਿਮਹਤੀਆਦੀਸੁ ਦਸਸੁਪਿ.

੪੮੮. ਚਤੁਵਗ੍ਗਕਰਣੇਤਿ ਚਤੁਵਗ੍ਗੇਨ ਸਙ੍ਘੇਨ ਕਤ੍ਤਬ੍ਬੇ. ਅਨਿਸ੍ਸਾਰਿਤਾਤਿ ਉਪੋਸਥਟ੍ਠਪਨਾਦਿਨਾ ਵਾ ਲਦ੍ਧਿਨਾਨਾਸਂਵਾਸਕਭਾਵੇਨ ਵਾ ਨ ਬਹਿਕਤਾ. ਅਟ੍ਠਕਥਾਯਞ੍ਹਿ ‘‘ਅਪਕਤਤ੍ਤਸ੍ਸਾਤਿ ਉਕ੍ਖਿਤ੍ਤਕਸ੍ਸ ਵਾ, ਯਸ੍ਸ ਵਾ ਉਪੋਸਥਪਵਾਰਣਾ ਠਪਿਤਾ ਹੋਨ੍ਤੀ’’ਤਿ (ਪਰਿ. ਅਟ੍ਠ. ੪੨੫) ਵੁਤ੍ਤਤ੍ਤਾ ਠਪਿਤਉਪੋਸਥਪਵਾਰਣੋ ਭਿਕ੍ਖੁ ਅਪਕਤਤ੍ਤੋ ਏਵਾਤਿ ਗਹੇਤਬ੍ਬਂ. ਪਰਿਸੁਦ੍ਧਸੀਲਾਤਿ ਪਾਰਾਜਿਕਂ ਅਨਾਪਨ੍ਨਾ ਅਧਿਪ੍ਪੇਤਾ. ਪਰਿਵਾਸਾਦਿਕਮ੍ਮੇਸੁ ਪਨ ਗਰੁਕਟ੍ਠਾਪਿ ਅਪਕਤਤ੍ਤਾ ਏਵਾਤਿ ਗਹੇਤਬ੍ਬਂ ¶ . ਅਵਸੇਸਾ…ਪੇ… ਛਨ੍ਦਾਰਹਾਵ ਹੋਨ੍ਤੀਤਿ ਸਙ੍ਘਤੋ ¶ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੇ ਸਨ੍ਧਾਯ ਵੁਤ੍ਤਂ. ਅਵਿਜਹਿਤ੍ਵਾ ਠਿਤਾ ਪਨ ਛਨ੍ਦਾਰਹਾ ਨ ਹੋਨ੍ਤਿ, ਤੇਪਿ ਚਤੁਵਗ੍ਗਾਦਿਤੋ ਅਧਿਕਾ ਹਤ੍ਥਪਾਸਂ ਵਿਜਹਿਤ੍ਵਾਵ ਛਨ੍ਦਾਰਹਾ ਹੋਨ੍ਤਿ. ਤਸ੍ਮਾ ਸਙ੍ਘਤੋ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੇਨੇਵ ਛਨ੍ਦੋ ਵਾ ਪਾਰਿਸੁਦ੍ਧਿ ਵਾ ਦਾਤਬ੍ਬਾ.

੪੯੬. ਏਤਰਹਿ ਸਚੇਪਿ ਸਾਮਣੇਰੋਤਿਆਦੀਸੁ ਬੁਦ੍ਧਾਦੀਨਂ ਅਵਣ੍ਣਭਾਸਨਮ੍ਪਿ ਅਕਪ੍ਪਿਯਾਦਿਂ ਕਪ੍ਪਿਯਾਦਿਭਾਵੇਨ ਦੀਪਨਮ੍ਪਿ ਦਿਟ੍ਠਿਵਿਪਤ੍ਤਿਯਞ੍ਞੇਵ ਪਵਿਸਤਿ. ਤੇਨੇਵ ਵਕ੍ਖਤਿ ‘‘ਤਂ ਲਦ੍ਧਿਂ ਨਿਸ੍ਸਜ੍ਜਾਪੇਤਬ੍ਬੋ’’ਤਿ. ਭਿਕ੍ਖੂਨਮ੍ਪਿ ਏਸੇਵ ਨਯੋ. ਮਿਚ੍ਛਾਦਿਟ੍ਠਿਕੋਤਿ ਬੁਦ੍ਧਵਚਨਾਧਿਪ੍ਪਾਯਂ ਵਿਪਰੀਤਤੋ ਗਣ੍ਹਨ੍ਤੋ, ਸੋ ਏਵ ਅਨ੍ਤਗ੍ਗਾਹਿਕਾਯ ਦਿਟ੍ਠਿਯਾ ਸਮਨ੍ਨਾਗਤੋਤਿ ਚ ਵੁਤ੍ਤੋ. ਕੇਚਿ ਪਨ ‘‘ਸਸ੍ਸਤੁਚ੍ਛੇਦਾਨਂ ਅਞ੍ਞਤਰਦਿਟ੍ਠਿਯਾ ਸਮਨ੍ਨਾਗਤੋ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ, ਸਸ੍ਸਤੁਚ੍ਛੇਦਗ੍ਗਾਹਸ੍ਸ ਸਾਮਣੇਰਾਨਂ ਲਿਙ੍ਗਨਾਸਨਾਯ ਕਾਰਣਤ੍ਤੇਨ ਹੇਟ੍ਠਾ ਅਟ੍ਠਕਥਾਯਮੇਵ (ਮਹਾਵ. ਅਟ੍ਠ. ੧੦੮) ਵੁਤ੍ਤਤ੍ਤਾ, ਇਧ ਚ ਦਣ੍ਡਕਮ੍ਮਨਾਸਨਾਯ ਏਵ ਅਧਿਪ੍ਪੇਤਤ੍ਤਾ.

ਤਸ੍ਸਾਪਿ ਦਾਤਬ੍ਬੋਤਿ ਵਿਜ੍ਜਮਾਨਂ ਮੁਖਰਾਦਿਭਾਵਂ ਨਿਸ੍ਸਾਯ ਅਪ੍ਪਟਿਪੁਚ੍ਛਿਤ੍ਵਾਪਿ ਪਟਿਞ੍ਞਂ ਅਗ੍ਗਹੇਤ੍ਵਾਪਿ ਆਪਤ੍ਤਿਂ ਅਨਾਰੋਪੇਤ੍ਵਾਪਿ ਦੇਸਿਤਾਯਪਿ ਆਪਤ੍ਤਿਯਾ ਖੁਂਸਨਾਦਿਤੋ ਅਨੋਰਮਨ੍ਤਸ੍ਸ ਦਾਤਬ੍ਬੋਵ. ਓਰਮਨ੍ਤਸ੍ਸ ਪਨ ਖਮਾਪੇਨ੍ਤਸ੍ਸ ਨ ਦਾਤਬ੍ਬੋ.

ਬ੍ਰਹ੍ਮਦਣ੍ਡਸ੍ਸ ਦਾਨਨ੍ਤਿ ਖਰਦਣ੍ਡਸ੍ਸ ਉਕ੍ਕਟ੍ਠਦਣ੍ਡਸ੍ਸ ਦਾਨਂ. ਤਜ੍ਜਨੀਯਾਦਿਕਮ੍ਮੇ ਹਿ ਕਤੇ ਓਵਾਦਾਨੁਸਾਸਨਿਪ੍ਪਦਾਨਪਟਿਕ੍ਖੇਪੋ ਨਤ੍ਥਿ. ਦਿਨ੍ਨਬ੍ਰਹ੍ਮਦਣ੍ਡੇ ਪਨ ਤਸ੍ਮਿਂ ਸਦ੍ਧਿਂ ਤਜ੍ਜਨੀਯਾਦਿਕਮ੍ਮਕਤੇਹਿ ਪਟਿਕ੍ਖਿਤ੍ਤਮ੍ਪਿ ਕਾਤੁਂ ਨ ਵਟ੍ਟਤਿ, ‘‘ਨੇਵ ਵਤ੍ਤਬ੍ਬੋ’’ਤਿਆਦਿਨਾ ਆਲਾਪਸਲ੍ਲਾਪਾਦਿਮਤ੍ਤਸ੍ਸਾਪਿ ਨਕਾਰੇਨ ਪਟਿਕ੍ਖਿਤ੍ਤਤ੍ਤਾ. ਤਞ੍ਹਿ ਦਿਸ੍ਵਾ ਭਿਕ੍ਖੂ ਗੀਵਂ ਪਰਿਵਤ੍ਤੇਤ੍ਵਾ ਓਲੋਕਨਮਤ੍ਤਮ੍ਪਿ ਨ ਕਰੋਨ੍ਤਿ, ਏਵਂ ਵਿਵਜ੍ਜੇਤਬ੍ਬਂ ਨਿਮ੍ਮਦਨਕਰਣਤ੍ਥਮੇਵ ਤਸ੍ਸ ਦਣ੍ਡਸ੍ਸ ਅਨੁਞ੍ਞਾਤਤ੍ਤਾ. ਤੇਨੇਵ ਛਨ੍ਨਤ੍ਥੇਰੋਪਿ ਉਕ੍ਖੇਪਨੀਯਾਦਿਕਮ੍ਮਕਤੋਪਿ ਅਭਾਯਿਤ੍ਵਾ ਬ੍ਰਹ੍ਮਦਣ੍ਡੇ ਦਿਨ੍ਨੇ ‘‘ਸਙ੍ਘੇਨਾਹਂ ਸਬ੍ਬਥਾ ਵਿਵਜ੍ਜਿਤੋ’’ਤਿ ਮੁਚ੍ਛਿਤੋ ਪਪਤਿ. ਯੋ ਪਨ ਬ੍ਰਹ੍ਮਦਣ੍ਡਕਤੇਨ ਸਦ੍ਧਿਂ ਞਤ੍ਵਾ ਸਂਸਟ੍ਠੋ ਅਵਿਵਜ੍ਜੇਤ੍ਵਾ ਵਿਹਰਤਿ, ਤਸ੍ਸ ਦੁਕ੍ਕਟਮੇਵਾਤਿ ਗਹੇਤਬ੍ਬਂ ਅਞ੍ਞਥਾ ਬ੍ਰਹ੍ਮਦਣ੍ਡਵਿਧਾਨਸ੍ਸ ¶ ਨਿਰਤ੍ਥਕਤਾਪਸਙ੍ਗਤੋ. ਤੇਨਾਤਿ ਬ੍ਰਹ੍ਮਦਣ੍ਡਕਤੇਨ. ਯਥਾ ਤਜ੍ਜਨੀਯਾਦਿਕਮ੍ਮਕਤੇਹਿ, ਏਵਮੇਵ ਤਤੋ ਅਧਿਕਮ੍ਪਿ ¶ ਸਙ੍ਘਂਆਰਾਧੇਨ੍ਤੇਨ ਸਮ੍ਮਾਵਤ੍ਤਿਤਬ੍ਬਂ. ਤਞ੍ਚ ‘‘ਸੋਰਤੋ ਨਿਵਾਤਵੁਤ੍ਤੀ’’ਤਿਆਦਿਨਾ ਸਰੂਪਤੋ ਦਸ੍ਸਿਤਮੇਵ. ਤੇਨਾਹ ‘‘ਸਮ੍ਮਾਵਤ੍ਤਿਤ੍ਵਾ ਖਮਾਪੇਨ੍ਤਸ੍ਸ ਬ੍ਰਹ੍ਮਦਣ੍ਡੋ ਪਟਿਪ੍ਪਸ੍ਸਮ੍ਭੇਤਬ੍ਬੋ’’ਤਿ.

ਯਂ ਤਂ ਭਗਵਤਾ ਅਵਨ੍ਦਿਯਕਮ੍ਮਂ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ. ‘‘ਤਸ੍ਸ ਭਿਕ੍ਖੁਨੋ ਦਣ੍ਡਕਮ੍ਮਂ ਕਾਤੁ’’ਨ੍ਤਿ ਸਾਮਞ੍ਞਤੋ ਅਨੁਞ੍ਞਾਤਪ੍ਪਕਾਰਂ ਦਸ੍ਸੇਤ੍ਵਾ ਪੁਨ ਵਿਸੇਸਤੋ ਅਨੁਞ੍ਞਾਤਪ੍ਪਕਾਰਂ ਦਸ੍ਸੇਤੁਂ ‘‘ਅਥ ਖੋ’’ਤਿਆਦਿਪਾਲ਼ਿ ਉਦ੍ਧਟਾਤਿ ਵੇਦਿਤਬ੍ਬਂ. ਇਮਸ੍ਸ ਅਪਲੋਕਨਕਮ੍ਮਸ੍ਸ ਠਾਨਂ ਹੋਤੀਤਿ ਅਪਲੋਕਨਕਮ੍ਮਸ੍ਸ ਸਾਮਞ੍ਞਸ੍ਸ ਪਵਤ੍ਤਿਟ੍ਠਾਨਂ ਹੋਤੀਤਿ. ਵਿਸੇਸਬ੍ਯਤਿਰੇਕੇਨ ਅਵਿਜ੍ਜਮਾਨਮ੍ਪਿ ਤਦਞ੍ਞਤ੍ਥ ਅਪ੍ਪਵਤ੍ਤਿਂ ਦਸ੍ਸੇਤੁਂ ਵਿਸੇਸਨਿਸ੍ਸਿਤਂ ਵਿਯ ਵੋਹਰੀਯਤਿ. ‘‘ਕਮ੍ਮਞ੍ਞੇਵ ਲਕ੍ਖਣ’’ਨ੍ਤਿ ਇਮਿਨਾ ਓਸਾਰਣਾਦਿਵਸੇਨ ਗਹਿਤਾਵਸੇਸਾਨਂ ਸਬ੍ਬੇਸਂ ਅਪਲੋਕਨਕਮ੍ਮਸ੍ਸ ਸਾਮਞ੍ਞਲਕ੍ਖਣਵਸੇਨ ਗਹਿਤਤ੍ਤਾ ਕਮ੍ਮਞ੍ਞੇਵ ਲਕ੍ਖਣਮਸ੍ਸਾਤਿ ਕਮ੍ਮਲਕ੍ਖਣਨ੍ਤਿ ਨਿਬ੍ਬਚਨਂ ਦਸ੍ਸੇਤਿ. ਇਦਞ੍ਚ ਵੁਤ੍ਤਾਵਸੇਸਾਨਂ ਕਮ੍ਮਾਨਂ ਨਿਟ੍ਠਾਨਟ੍ਠਾਨਂ, ਸਙ੍ਖਾਰਕ੍ਖਨ੍ਧਧਮ੍ਮਾਯਤਨਾਨਿ ਵਿਯ ਵੁਤ੍ਤਾਵਸੇਸਖਨ੍ਧਾਯਤਨਾਨਨ੍ਤਿ ਦਟ੍ਠਬ੍ਬਂ. ਤੇਨੇਵ ਵਕ੍ਖਤਿ ‘‘ਅਯਂ ਪਨੇਤ੍ਥ ਪਾਲ਼ਿਮੁਤ੍ਤਕੋਪਿ ਕਮ੍ਮਲਕ੍ਖਣਵਿਨਿਚ੍ਛਯੋ’’ਤਿਆਦਿ (ਪਰਿ. ਅਟ੍ਠ. ੪੯੫-੪੯੬). ਯਥਾ ਚੇਤ੍ਥ, ਏਵਂ ਉਪਰਿ ਞਤ੍ਤਿਕਮ੍ਮਾਦੀਸੁਪਿ ਕਮ੍ਮਲਕ੍ਖਣਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਤਸ੍ਸ ਕਰਣਨ੍ਤਿ ਅਵਨ੍ਦਿਯਕਮ੍ਮਸ੍ਸ ਕਰਣਵਿਧਾਨਂ.

‘‘ਨ ਵਨ੍ਦਿਤਬ੍ਬੋ’’ਤਿ ਇਮਿਨਾ ਵਨ੍ਦਨ੍ਤਿਯਾ ਦੁਕ੍ਕਟਨ੍ਤਿ ਦਸ੍ਸੇਤੀਤਿ ਦਟ੍ਠਬ੍ਬਂ. ਸਙ੍ਘੇਨ ਕਤਂ ਕਤਿਕਂ ਞਤ੍ਵਾ ਮਦ੍ਦਨਂ ਵਿਯ ਹਿ ਸਙ੍ਘਸਮ੍ਮੁਤਿਂ ਅਨਾਦਰੇਨ ਅਤਿਕ੍ਕਮਨ੍ਤਸ੍ਸ ਆਪਤ੍ਤਿ ਏਵ ਹੋਤਿ.

ਭਿਕ੍ਖੁਸਙ੍ਘਸ੍ਸਾਪਿ ਪਨੇਤਂ ਲਬ੍ਭਤਿਯੇਵਾਤਿ ਅਵਨ੍ਦਿਯਕਮ੍ਮਸ੍ਸ ਉਪਲਕ੍ਖਣਮਤ੍ਤੇਨ ਗਹਿਤਤ੍ਤਾ ਭਿਕ੍ਖੁਸਙ੍ਘਸ੍ਸਾਪਿ ਕਮ੍ਮਲਕ੍ਖਣਂ ਲਬ੍ਭਤਿ ਏਵ.

ਸਲਾਕਦਾਨਟ੍ਠਾਨਂ ਸਲਾਕਗ੍ਗਂ ਨਾਮ. ਯਾਗੁਭਤ੍ਤਾਨਂ ਭਾਜਨਟ੍ਠਾਨਾਨਿ ਯਾਗਗ੍ਗਭਤ੍ਤਗ੍ਗਾਨਿ ਨਾਮ. ਏਤੇਸੁਪਿ ਹਿ ਠਾਨੇਸੁ ਸਬ੍ਬੋ ਸਙ੍ਘੋ ਉਪੋਸਥੇ ਵਿਯ ਸਨ੍ਨਿਪਤਿਤੋ, ਕਮ੍ਮਞ੍ਚ ਵਗ੍ਗਕਮ੍ਮਂ ਨ ਹੋਤਿ, ‘‘ਮਯਮੇਤਂ ਨ ਜਾਨਿਮ੍ਹਾ’’ਤਿ ਪਚ੍ਛਾ ਖਿਯ੍ਯਨ੍ਤਾਪਿ ਨ ਹੋਨ੍ਤਿ. ਖਣ੍ਡਸੀਮਾਯ ਪਨ ਕਤੇ ਖਿਯ੍ਯਨ੍ਤਿ. ਸਙ੍ਘਿਕਪਚ੍ਚਯਞ੍ਹਿ ਅਚ੍ਛਿਨ੍ਨਚੀਵਰਾਦੀਨਂ ਦਾਤੁਂ ਅਪਲੋਕੇਨ੍ਤੇਹਿ ਉਪਚਾਰਸੀਮਟ੍ਠਾਨਂ ਸਬ੍ਬੇਸਂ ¶ ਅਨੁਮਤਿਂ ਗਹੇਤ੍ਵਾਵ ਕਾਤਬ੍ਬਂ. ਯੋ ਪਨ ਵਿਸਭਾਗਪੁਗ੍ਗਲੋ ਧਮ੍ਮਿਕਂ ਅਪਲੋਕਨਂ ਪਟਿਬਾਹਤਿ, ਤਂ ਉਪਾਯੇਨ ਬਹਿਉਪਚਾਰਸੀਮਾਗਤਂ ਵਾ ਕਤ੍ਵਾ ਖਣ੍ਡਸੀਮਂ ਵਾ ਪਵਿਸਿਤ੍ਵਾ ਕਾਤੁਂ ਵਟ੍ਟਤਿ.

ਯਂ ਸਨ੍ਧਾਯ ‘‘ਅਪਲੋਕਨਕਮ੍ਮਂ ਕਰੋਤੀ’’ਤਿ ਸਾਮਞ੍ਞਤੋ ਦਸ੍ਸੇਤਿ, ਤਂ ਅਪਲੋਕਨਕਮ੍ਮਂ ਸਰੂਪਤੋ ¶ ਦਸ੍ਸੇਤੁਮਾਹ ‘‘ਅਚ੍ਛਿਨ੍ਨਚੀਵਰਂ’’ਇਚ੍ਚਾਦਿ. ਯਦਿ ਅਪਲੋਕੇਤ੍ਵਾਵ ਚੀਵਰਂ ਦਾਤਬ੍ਬਂ, ਕਿਂ ਪਨ ਅਪ੍ਪਮਤ੍ਤਕਵਿਸ੍ਸਜ੍ਜਕਸਮ੍ਮੁਤਿਯਾਤਿ ਆਹ ‘‘ਅਪ੍ਪਮਤ੍ਤਕਵਿਸ੍ਸਜ੍ਜਨਕੇਨ ਪਨਾ’’ਤਿਆਦਿ. ਨਾਲ਼ਿ ਵਾ ਉਪਡ੍ਢਨਾਲ਼ਿ ਵਾਤਿ ਦਿਵਸੇ ਦਿਵਸੇ ਅਪਲੋਕੇਤ੍ਵਾ ਦਾਤਬ੍ਬਸ੍ਸ ਪਮਾਣਦਸ੍ਸਨਂ. ਤੇਨ ਯਾਪਨਮਤ੍ਤਮੇਵ ਅਪਲੋਕੇਤਬ੍ਬਂ, ਨ ਅਧਿਕਨ੍ਤਿ ਦਸ੍ਸੇਤਿ. ਏਕਦਿਵਸਂਯੇਵ ਵਾਤਿਆਦਿ ਦਸਵੀਸਤਿਦਿਵਸਾਨਂ ਏਕਸ੍ਮਿਂ ਦਿਵਸੇਯੇਵ ਦਾਤਬ੍ਬਪਰਿਚ੍ਛੇਦਦਸ੍ਸਨਂ, ਤੇਨ ਯਾਵ ਜੀਵਨ੍ਤਿ ਵਾ ਯਾਵ ਰੋਗਾ ਵੁਟ੍ਠਹਤੀਤਿ ਵਾ ਏਵਂ ਅਪਲੋਕੇਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਇਣਪਲਿਬੋਧਨ੍ਤਿ ਇਣਵਤ੍ਥੁਂ ਦਾਤੁਂ ਵਟ੍ਟਤੀਤਿ ਸਮ੍ਬਨ੍ਧੋ. ਤਞ੍ਚ ਇਣਾਯਿਕੇਹਿ ਪਲਿਬੁਦ੍ਧਸ੍ਸ ਲਜ੍ਜਿਪੇਸਲਸ੍ਸ ਸਾਸਨੁਪਕਾਰਕਸ੍ਸ ਪਮਾਣਯੁਤ੍ਤਮੇਵ ਕਪ੍ਪਿਯਭਣ੍ਡਂ ਨਿਯਮੇਤ੍ਵਾ ਅਪਲੋਕੇਤ੍ਵਾ ਦਾਤਬ੍ਬਂ, ਨ ਪਨ ਸਹਸ੍ਸਂ ਵਾ ਸਤਸਹਸ੍ਸਂ ਵਾ ਮਹਾਇਣਂ. ਤਾਦਿਸਞ੍ਹਿ ਭਿਕ੍ਖਾਚਰਿਯਵਤ੍ਤੇਨ ਸਬ੍ਬੇਹਿ ਭਿਕ੍ਖੂਹਿ ਤਾਦਿਸਸ੍ਸ ਭਿਕ੍ਖੁਨੋ ਪਰਿਯੇਸਿਤ੍ਵਾ ਦਾਤਬ੍ਬਂ.

ਉਪਨਿਕ੍ਖੇਪਤੋਤਿ ਚੇਤਿਯਪਟਿਜਗ੍ਗਨਤ੍ਥਾਯ ਵਡ੍ਢਿਯਾ ਪਯੋਜੇਤ੍ਵਾ ਕਪ੍ਪਿਯਕਾਰਕੇਹਿ ਠਪਿਤਵਤ੍ਥੁਤੋ. ਸਙ੍ਘਿਕੇਨਪੀਤਿ ਨ ਕੇਵਲਞ੍ਚ ਤਤ੍ਰੁਪ੍ਪਾਦਤੋ ਪਚ੍ਚਯਦਾਯਕੇਹਿ ਚਤੁਪਚ੍ਚਯਤ੍ਥਾਯ ਸਙ੍ਘਸ੍ਸ ਦਿਨ੍ਨਵਤ੍ਥੁਨਾਪੀਤਿ ਅਤ੍ਥੋ.

ਸਙ੍ਘਭਤ੍ਤਂ ਕਾਤੁਂ ਨ ਵਟ੍ਟਤੀਤਿ ਮਹਾਦਾਨਂ ਦੇਨ੍ਤੇਹਿਪਿ ਕਰਿਯਮਾਨਂ ਸਙ੍ਘਭਤ੍ਤਂ ਵਿਯ ਕਾਰੇਤੁਂ ਨ ਵਟ੍ਟਤੀਤਿ ਅਧਿਪ੍ਪਾਯੋ.

‘‘ਯਥਾਸੁਖਂ ਪਰਿਭੁਞ੍ਜਿਤੁਂ ਰੁਚ੍ਚਤੀ’’ਤਿ ਵੁਤ੍ਤਤ੍ਤਾ ਅਤ੍ਤਨੋ ਪਰਿਭੋਗਪ੍ਪਹੋਨਕਂ ਅਪ੍ਪਂ ਵਾ ਬਹੁਂ ਵਾ ਗਹੇਤਬ੍ਬਂ, ਅਧਿਕਂ ਪਨ ਗਹੇਤੁਂ ਨ ਲਭਤਿ. ਉਪੋਸਥਦਿਵਸੇਤਿ ਨਿਦਸ੍ਸਨਮਤ੍ਤਂ, ਯਸ੍ਮਿਂ ਕਿਸ੍ਮਿਞ੍ਚਿ ਦਿਵਸੇਪਿ ਕਤਂ ਸੁਕਤਮੇਵ ਹੋਤਿ. ਕਰੋਨ੍ਤੇਨ ‘‘ਯਂ ਇਮਸ੍ਮਿਂ ਵਿਹਾਰੇ ਅਨ੍ਤੋਸੀਮਾਯ ਸਙ੍ਘਸਨ੍ਤਕਂ…ਪੇ… ਯਥਾਸੁਖਂ ਪਰਿਭੁਞ੍ਜਿਤੁਂ ਮਯ੍ਹਂ ਰੁਚ੍ਚਤੀ’’ਤਿ ਏਵਂ ਕਤਿਕਾ ਕਾਤਬ੍ਬਾ, ਤਥਾ ਦ੍ਵੀਹਿ ਤੀਹਿਪਿ ‘‘ਆਯਸ੍ਮਨ੍ਤਾਨਂ ਰੁਚ੍ਚਤੀ’’ਤਿ ਵਚਨਮੇਵ ਹੇਤ੍ਥ ਵਿਸੇਸੋ. ਤੇਸਮ੍ਪੀਤਿ ਰੁਕ੍ਖਾਨਂ. ਸਾ ਏਵ ਕਤਿਕਾਤਿ ਵਿਸੁਂ ਕਤਿਕਾ ਨ ਕਾਤਬ੍ਬਾਤਿ ਅਤ੍ਥੋ.

ਤੇਸਨ੍ਤਿ ¶ ਰੁਕ੍ਖਾਨਂ. ਸਙ੍ਘੋ ਸਾਮੀਤਿ ਸਮ੍ਬਨ੍ਧੋ. ਪੁਰਿਮਵਿਹਾਰੇਤਿ ਪੁਰਿਮੇ ਯਥਾਸੁਖਂ ਪਰਿਭੋਗਤ੍ਥਾਯ ਕਤਕਤਿਕੇ ਵਿਹਾਰੇ. ਪਰਿਵੇਣਾਨਿ ਕਤ੍ਵਾ ਜਗ੍ਗਨ੍ਤੀਤਿ ਯਤ੍ਥ ਅਰਕ੍ਖਿਯਮਾਨੇ ਫਲਾਫਲਾਨਿ, ਰੁਕ੍ਖਾ ਚ ਵਿਨਸ੍ਸਨ੍ਤਿ, ਤਾਦਿਸਂ ਠਾਨਂ ਸਨ੍ਧਾਯ ਵੁਤ੍ਤਂ, ਤਤ੍ਥ ਸਙ੍ਘਸ੍ਸ ਕਤਿਕਾ ਨ ਪਵਤ੍ਤੀਤਿ ਅਧਿਪ੍ਪਾਯੋ. ਯੇ ਪਨ ਰੁਕ੍ਖਾ ਬੀਜਾਨਿ ਰੋਪੇਤ੍ਵਾ ਆਦਿਤੋ ਪਟ੍ਠਾਯ ਪਟਿਜਗ੍ਗਿਤਾ, ਤੇਪਿ ਦਸਮਭਾਗਂ ਦਤ੍ਵਾ ਰੋਪਕੇਹੇਵ ਪਰਿਭੁਞ੍ਜਿਤਬ੍ਬਾ. ਤੇਹੀਤਿ ਜਗ੍ਗਕੇਹਿ.

ਤਤ੍ਥਾਤਿ ¶ ਤਸ੍ਮਿਂ ਵਿਹਾਰੇ. ਮੂਲੇਤਿ ਆਦਿਕਾਲੇ, ਪੁਬ੍ਬੇਤਿ ਅਤ੍ਥੋ. ਦੀਘਾ ਕਤਿਕਾਤਿ ਅਪਰਿਚ੍ਛਿਨ੍ਨਕਾਲਾ ਯਥਾਸੁਖਂ ਪਰਿਭੋਗਤ੍ਥਾਯ ਕਤਿਕਾ. ਨਿਕ੍ਕੁਕ੍ਕੁਚ੍ਚੇਨਾਤਿ ‘‘ਅਭਾਜਿਤਮਿਦ’’ਨ੍ਤਿ ਕੁਕ੍ਕੁਚ੍ਚਂ ਅਕਤ੍ਵਾਤਿ ਅਤ੍ਥੋ. ਖਿਯ੍ਯਨਮਤ੍ਤਮੇਵੇਤਨ੍ਤਿ ਤੇਨ ਖਿਯ੍ਯਨੇਨ ਬਹੁਂ ਖਾਦਨ੍ਤਾਨਂ ਦੋਸੋ ਨਤ੍ਥਿ ਅਤ੍ਤਨੋ ਪਰਿਭੋਗਪ੍ਪਮਾਣਸ੍ਸੇਵ ਗਹਿਤਤ੍ਤਾ, ਖਿਯ੍ਯਨ੍ਤੇਪਿ ਅਤ੍ਤਨੋ ਪਹੋਨਕਂ ਗਹੇਤ੍ਵਾ ਖਾਦਿਤਬ੍ਬਨ੍ਤਿ ਅਧਿਪ੍ਪਾਯੋ.

ਗਣ੍ਹਥਾਤਿ ਨ ਵਤ੍ਤਬ੍ਬਾਤਿ ਤਥਾਵੁਤ੍ਤੇ ਤੇਨੇਵ ਭਿਕ੍ਖੁਨਾ ਦਿਨ੍ਨਂ ਵਿਯ ਮਞ੍ਞੇਯ੍ਯੁਂ, ਤਂ ਨਿਸ੍ਸਾਯ ਮਿਚ੍ਛਾਜੀਵਸਮ੍ਭਵੋ ਹੋਤੀਤਿ ਵੁਤ੍ਤਂ. ਤੇਨਾਹ ‘‘ਅਨੁਵਿਚਰਿਤ੍ਵਾ’’ਤਿਆਦਿ. ਉਪਡ੍ਢਭਾਗੋਤਿ ਏਕਭਿਕ੍ਖੁਨੋ ਪਟਿਵੀਸਤੋ ਉਪਡ੍ਢਭਾਗੋ. ਦੇਨ੍ਤੇਨ ਚ ‘‘ਏਤ੍ਤਕਂ ਦਾਤੁਂ ਸਙ੍ਘੋ ਅਨੁਞ੍ਞਾਸੀ’’ਤਿ ਏਵਂ ਅਤ੍ਤਾਨਂ ਪਰਿਮੋਚੇਤ੍ਵਾ ਯਥਾ ਤੇ ਸਙ੍ਘੇ ਏਵ ਪਸੀਦਨ੍ਤਿ, ਏਵਂ ਵਤ੍ਵਾ ਦਾਤਬ੍ਬਂ.

ਅਪਚ੍ਚਾਸੀਸਨ੍ਤੇਨਾਤਿ ਗਿਲਾਨਗਮਿਕਿਸ੍ਸਰਾਦੀਨਂ ਅਨੁਞ੍ਞਾਤਪੁਗ੍ਗਲਾਨਮ੍ਪਿ ਅਤ੍ਤਨੋ ਸਨ੍ਤਕਂ ਦੇਨ੍ਤੇਨ ਅਪਚ੍ਚਾਸੀਸਨ੍ਤੇਨੇਵ ਦਾਤਬ੍ਬਂ, ਅਨਨੁਞ੍ਞਾਤਪੁਗ੍ਗਲਾਨਂ ਪਨ ਅਪਚ੍ਚਾਸੀਸਨ੍ਤੇਨਾਪਿ ਦਾਤੁਂ ਨ ਵਟ੍ਟਤੀਤਿ. ਸਙ੍ਘਿਕਮੇਵ ਯਥਾਕਤਿਤਾਯ ਦਾਪੇਤਬ੍ਬਂ. ਅਤ੍ਤਨੋ ਸਨ੍ਤਕਮ੍ਪਿ ਪਚ੍ਚਯਦਾਯਕਾਦੀ ਸਯਮੇਵ ਵਿਸ੍ਸਾਸੇਨ ਗਣ੍ਹਨ੍ਤਿ, ਨ ਵਾਰੇਤਬ੍ਬਾ, ਲਦ੍ਧਕਪ੍ਪਿਯਨ੍ਤਿ ਤੁਣ੍ਹੀ ਭਵਿਤਬ੍ਬਂ. ਪੁਬ੍ਬੇ ਵੁਤ੍ਤਮੇਵਾਤਿ ‘‘ਕੁਦ੍ਧੋ ਹਿ ਸੋ ਰੁਕ੍ਖੇਪਿ ਛਿਨ੍ਦੇਯ੍ਯਾ’’ਤਿਆਦਿਨਾ ਤੁਣ੍ਹੀਭਾਵੇ ਕਾਰਣਂ ਪੁਬ੍ਬੇ ਵੁਤ੍ਤਮੇਵ. ਤੇਹਿ ਕਤਅਨਤ੍ਥਾਭਾਵੇਪਿ ਕਾਰੁਞ੍ਞੇਨ ਤੁਣ੍ਹੀ ਭਵਿਤੁਂ ਵਟ੍ਟਤਿ, ‘‘ਗਣ੍ਹਥਾ’’ਤਿਆਦਿ ਪਨ ਵਤ੍ਤੁਂ ਨ ਵਟ੍ਟਤਿ.

ਗਰੁਭਣ੍ਡਤ੍ਤਾ…ਪੇ… ਨ ਦਾਤਬ੍ਬਨ੍ਤਿ ਜੀਵਰੁਕ੍ਖਾਨਂ ਆਰਾਮਟ੍ਠਾਨੀਯਤ੍ਤਾ, ਦਾਰੂਨਞ੍ਚ ਗੇਹਸਮ੍ਭਾਰਾਨੁਪਗਤਤ੍ਤਾ ‘‘ਸਬ੍ਬਂ ਤ੍ਵਮੇਵ ਗਣ੍ਹਾ’’ਤਿ ਦਾਤੁਂ ਨ ਵਟ੍ਟਤੀਤਿ ਵੁਤ੍ਤਂ. ਅਕਤਾਵਾਸਂ ਵਾ ਕਤ੍ਵਾਤਿ ਪੁਬ੍ਬੇ ਅਵਿਜ੍ਜਮਾਨਂ ਸੇਨਾਸਨਂ ਕਤ੍ਵਾ ਜਗ੍ਗਿਤਕਾਲੇ ਫਲਵਾਰੇ ਸਮ੍ਪਤ੍ਤੇ.

ਅਪਲੋਕਨਕਮ੍ਮਕਥਾਵਣ੍ਣਨਾ ਨਿਟ੍ਠਿਤਾ.

੪੯੮. ਵਿਪਾਕਦੁਕ੍ਖਸਙ੍ਖਾਤਾਨਂ ¶ ਸਮ੍ਪਰਾਯਿਕਵੇਰਾਨਨ੍ਤਿ ਏਤ੍ਥ ਪਾਣਾਤਿਪਾਤਾਦਿਵੇਰੇਨ ਨਿਬ੍ਬਤ੍ਤਤ੍ਤਾ, ਵੇਰਪ੍ਪਤ੍ਤਿਯਾ ਹੇਤੁਤ੍ਤਾ ਚ ‘‘ਵਿਪਾਕਦੁਕ੍ਖਵੇਦਨਾ’’ਤਿ ਵੁਤ੍ਤਾ. ਪਾਣਾਤਿਪਾਤਾਦਿਪਞ੍ਚਵੇਰਵਿਨਿਮੁਤ੍ਤਾਨਮ੍ਪਿ ਅਕੁਸਲਾਨਂ ਵੇਰੇਹਿ ਸਹ ਏਕਤੋ ਸਙ੍ਗਣ੍ਹਨਤ੍ਥਂ ‘‘ਦਸਅਕੁਸਲਕਮ੍ਮਪਥਪ੍ਪਭੇਦਾਨ’’ਨ੍ਤਿ ਪੁਨ ਵੁਤ੍ਤਂ.

੪੯੯-੫੦੦. ਤਂ ¶ ਕਮ੍ਮਨ੍ਤਿ ਤਜ੍ਜਨੀਯਾਦਿਕਮ੍ਮਮੇਵ, ਸਤ੍ਤਾ ਆਪਤ੍ਤਿਕ੍ਖਨ੍ਧਾ ਪਞ੍ਞਤ੍ਤਂ ਨਾਮਾਤਿ ਸਮ੍ਬਨ੍ਧੋ. ਅਨ੍ਤਰਾ ਕੇਨਚਿ ਅਪਞ੍ਞਤ੍ਤੇ ਸਿਕ੍ਖਾਪਦੇਤਿ ਇਮਸ੍ਮਿਂ ਕਪ੍ਪੇ ਆਦਿਤੋ ਪਟ੍ਠਾਯ ਯਾਵ ਅਮ੍ਹਾਕਂ ਭਗਵਤੋ ਅਭਿਸਮ੍ਬੋਧਿ, ਤਾਵ ਅਨ੍ਤਰਾਕਾਲੇ ਕਕੁਸਨ੍ਧਾਦਿਂ ਠਪੇਤ੍ਵਾ ਕੇਨਚਿ ਅਪਞ੍ਞਤ੍ਤੇ ਸਿਕ੍ਖਾਪਦੇਤਿ ਅਤ੍ਥੋ. ਵਿਨੀਤਕਥਾ ਸਿਕ੍ਖਾਪਦਨ੍ਤਿ ਵਿਨੀਤਵਤ੍ਥੂਨਿ ਏਵ. ਤਾਨਿ ਹਿ ਤਂਤਂਸਿਕ੍ਖਾਕੋਟ੍ਠਾਸਾਨਂ ਪਕਾਸਨਤੋ ‘‘ਸਿਕ੍ਖਾਪਦ’’ਨ੍ਤਿ ਚ ਆਪਤ੍ਤਿਅਨਾਪਤ੍ਤੀਨਂ ਅਨੁਪਞ੍ਞਾਪਨਤੋ ‘‘ਅਨੁਪਞ੍ਞਤ੍ਤ’’ਨ੍ਤਿ ਚ ਵੁਚ੍ਚਨ੍ਤਿ.

ਅਤ੍ਥਵਸਵਗ੍ਗਾਦਿਵਣ੍ਣਨਾ ਨਿਟ੍ਠਿਤਾ.

ਸਙ੍ਗਹਵਗ੍ਗਵਣ੍ਣਨਾਨਯੋ ਨਿਟ੍ਠਿਤੋ.

ਇਤਿ ਮਹਾਵਗ੍ਗੋ, ਪਞ੍ਞਤ੍ਤਿਵਗ੍ਗੋ, ਸਙ੍ਗਹਵਗ੍ਗੋਤਿ ਤੀਹਿ ਮਹਾਵਗ੍ਗੇਹਿ ਪਟਿਮਣ੍ਡਿਤੋ ਪਰਿਵਾਰੋਤਿ ਵੇਦਿਤਬ੍ਬੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਅਵਸਾਨਗਾਥਾਸੁ ¶ ਉਭਤੋਵਿਭਙ੍ਗ-ਖਨ੍ਧਕ-ਪਰਿਵਾਰੇਹਿ ਵਿਭਤ੍ਤਤ੍ਤਾ ਵਿਭਾਗਪਟਿਦੇਸਨਾ ਯਸ੍ਮਿਂ ਵਿਨਯਪਿਟਕੇ. ਸੋ ਉਭਤੋਵਿਭਙ੍ਗ-ਖਨ੍ਧਕ-ਪਰਿਵਾਰਵਿਭਤ੍ਤਦੇਸਨੋ ਆਹਾਤਿ ਯੋਜਨਾ. ਤਸ੍ਸਾਤਿ ਵਿਨਯਪਿਟਕਸ੍ਸ.

ਸਤ੍ਥੁ ਮਹਾਬੋਧੀਤਿ ਦਕ੍ਖਿਣਸਾਖਂ ਸਨ੍ਧਾਯ ਵਦਤਿ. ਯਂ ਪਧਾਨਘਰਂ ਨਾਮ ਪਰਿਵੇਣਂ, ਤਤ੍ਥ ਚਾਰੁਪਾਕਾਰੇਨ ਸਞ੍ਚਿਤਂ ਪਰਿਕ੍ਖਿਤ੍ਤਂ ਯਂ ਪਾਸਾਦਂ ਕਾਰਯਿ, ਤਤ੍ਰ ਤਸ੍ਮਿਂ ਮਹਾਨਿਗਮਸਾਮਿਨੋ ਪਾਸਾਦੇ ਵਸਤਾਤਿ ਯੋਜੇਤਬ੍ਬਾ.

ਬੁਦ੍ਧਸਿਰਿਂ ਉਦ੍ਦਿਸਿਤ੍ਵਾ ਨਿਸ੍ਸਾਯ, ਤਸ੍ਸ ਵਾ ਅਜ੍ਝੇਸਨਮ੍ਪਿ ਪਟਿਚ੍ਚ ਯਾ ਇਦ੍ਧਾ ਪਰਿਪੁਣ੍ਣਵਿਨਿਚ੍ਛਯਤਾਯ ਸਮਿਦ੍ਧਾ ਵਿਨਯਸਂਵਣ੍ਣਨਾ ਆਰਦ੍ਧਾਤਿ ਯੋਜਨਾ.

ਸਿਰਿਨਿਵਾਸਸ੍ਸਾਤਿ ਸਿਰਿਯਾ ਨਿਵਾਸਨਟ੍ਠਾਨਭੂਤਸ੍ਸ ਸਿਰਿਪਾਲਨਾਮਕਸ੍ਸ ਰਞ੍ਞੋ. ਜਯਸਂਵਚ੍ਛਰੇਤਿ ਵਿਜਯਯੁਤ੍ਤੇ ਸਂਵਚ੍ਛਰੇ. ਆਰਦ੍ਧਕਾਲਦਸ੍ਸਨਤ੍ਥਂ ਪੁਨ ‘‘ਜਯਸਂਵਚ੍ਛਰੇ ਅਯਂ ਆਰਦ੍ਧਾ’’ਤਿ ਵੁਤ੍ਤਂ.

ਕਾਲੇ ¶ ਵਸ੍ਸਨ੍ਤਿ ਯੁਤ੍ਤਕਾਲੇ ਵਸ੍ਸਨਸੀਲੋ. ਦੇਵੋਤਿ ਮੇਘੋ.

ਏਤ੍ਤਾਵਤਾ ¶ ਚ ਆਰਦ੍ਧਾ, ਵਿਨਯਟ੍ਠਕਥਾਯ ਯਾ;

ਵਣ੍ਣਨਾ ਨਾਤਿਵਿਤ੍ਥਿਣ੍ਣਾ, ਪਰਿਪੁਣ੍ਣਵਿਨਿਚ੍ਛਯਾ.

ਪਞ੍ਞਾਸਭਾਣਵਾਰਾਯ, ਤਨ੍ਤਿਯਾ ਪਰਿਮਾਣਤੋ;

ਸਮਿਜ੍ਝਨਿਟ੍ਠਿਪਰਮਾ, ਯਾ ਵਿਮਤਿਵਿਨੋਦਨੀ.

ਅਨਨ੍ਤਰਾਯੇਨ ਕਤਾ, ਅਯਂ ਨਿਟ੍ਠਮੁਪਾਗਤਾ;

ਯਂ ਤਂ ਨਿਟ੍ਠਂ ਤਥਾ ਸਬ੍ਬੇ, ਪਾਣਿਨੋ ਸਮਨੋਰਥਾ.

ਥੇਰੇਹਿ ਵਿਨਯਞ੍ਞੂਹਿ, ਸੁਚਿਸਲ੍ਲੇਖਵੁਤ੍ਤਿਹਿ;

ਅਵਿਸ੍ਸਤ੍ਥਾਤਿਵਿਤ੍ਥਿਣ੍ਣ-ਗਨ੍ਥਭੀਰੂ ਹਿਪਤ੍ਥਿਤਂ.

ਕਰੋਨ੍ਤੇਨ ਮਯਾ ਏਵਂ, ਵਿਨਯਅਤ੍ਥਵਣ੍ਣਨਂ;

ਯਂ ਪਤ੍ਤਂ ਕੁਸਲਂ ਤੇਨ, ਪਤ੍ਵਾ ਸਮ੍ਬੋਧਿਮੁਤ੍ਤਮਂ.

ਵਿਨਯਤ੍ਥਂ ਪਕਾਸੇਤ੍ਵਾ, ਯੋ ਸੋਪਾਯੇਨ ਲਕ੍ਖਣਂ;

ਸੋਪਾਯਂ ਵਿਮਤਿਚ੍ਛੇਦ-ਞਾਣਚਕ੍ਖੁਪਦਾਯਕਂ.

ਵਿਰਦ੍ਧਤ੍ਥਵਿਪਲ੍ਲਾਸ-ਗਨ੍ਥਵਿਤ੍ਥਾਰਹਾਨਿਯਾ;

ਵਿਸੁਦ੍ਧਿਂ ਪਾਪਯਿਸ੍ਸਾਮਿ, ਸਤ੍ਤੇ ਸਂਸਾਰਦੁਕ੍ਖਤੋ.

ਲੋਕਿਯੇਹਿ ਚ ਭੋਗੇਹਿ, ਗੁਣੇਹਿ ਨਿਖਿਲਾ ਪਜਾ;

ਸਬ੍ਬੇਹਿ ਸਹਿਤਾ ਹੋਨ੍ਤੁ, ਰਤਾ ਸਮ੍ਬੁਦ੍ਧਸਾਸਨੇਤਿ.