📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਵਿਨਯਪਿਟਕੇ

ਵਿਨਯਵਿਨਿਚ੍ਛਯ-ਟੀਕਾ (ਦੁਤਿਯੋ ਭਾਗੋ)

ਪਾਟਿਦੇਸਨੀਯਕਥਾਵਣ੍ਣਨਾ

੧੮੩੦-੧. ਏਵਂ ¶ ¶ ਨਾਤਿਸਙ੍ਖੇਪਵਿਤ੍ਥਾਰਨਯੇਨ ਦ੍ਵੇਨਵੁਤਿ ਪਾਚਿਤ੍ਤਿਯਾਨਿ ਦਸ੍ਸੇਤ੍ਵਾ ਤਦਨਨ੍ਤਰਂ ਨਿਦ੍ਦਿਟ੍ਠੇ ਪਾਟਿਦੇਸਨੀਯੇ ਦਸ੍ਸੇਤੁਮਾਹ ‘‘ਯੋ ਚਨ੍ਤਰਘਰ’’ਨ੍ਤਿਆਦਿ. ਤਤ੍ਥ ਅਨ੍ਤਰਘਰਨ੍ਤਿ ਰਥਿਕਾਦਿਮਾਹ. ਯਥਾਹ ‘‘ਅਨ੍ਤਰਘਰਂ ਨਾਮ ਰਥਿਕਾ ਬ੍ਯੂਹਂ ਸਿਙ੍ਘਾਟਕਂ ਘਰ’’ਨ੍ਤਿ.

ਯੋ ¶ ਪਨ ਭਿਕ੍ਖੁ ਅਨ੍ਤਰਘਰਂ ਪਵਿਟ੍ਠਾਯ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਹਤ੍ਥਤੋ ਯਂ ਕਿਞ੍ਚਿ ਖਾਦਨਂ, ਭੋਜਨਮ੍ਪਿ ਵਾ ਸਹਤ੍ਥਾ ਪਟਿਗ੍ਗਣ੍ਹੇਯ੍ਯ, ਤਸ੍ਸ ਭਿਕ੍ਖੁਨੋ ਗਹਣੇ ਦੁਕ੍ਕਟਂ, ਭੋਗੇ ਅਜ੍ਝੋਹਾਰੇ ਪਾਟਿਦੇਸਨੀਯਂ ਸਿਯਾਤਿ ਯੋਜਨਾ.

ਇਤੋ ਪਟ੍ਠਾਯ ਚਤਸ੍ਸੋ ਗਾਥਾ ਉਪ੍ਪਟਿਪਾਟਿਯਾ ਪੋਤ੍ਥਕੇਸੁ ਲਿਖਿਤਾ, ਤਾਸਂ ਅਯਂ ਪਟਿਪਾਟਿ – ‘‘ਏਤ੍ਥਨ੍ਤਰਘਰ’’ਨ੍ਤਿ ਤਤਿਯਾ, ‘‘ਤਸ੍ਮਾ ਭਿਕ੍ਖੁਨਿਯਾ’’ਤਿ ਚਤੁਤ੍ਥੀ, ‘‘ਰਥਿਕਾਦੀਸੂ’’ਤਿ ਪਞ੍ਚਮੀ ¶ , ‘‘ਰਥਿਕਾਯਪਿ ਵਾ’’ਤਿ ਛਟ੍ਠੀ. ਪਟਿਪਾਟਿ ਪਨਾਯਂ ਮਾਤਿਕਟ੍ਠਕਥਕ੍ਕਮੇਨ ਵੇਦਿਤਬ੍ਬਾ. ਇਮਾਯ ਪਟਿਪਾਟਿਯਾ ਤਾਸਂ ਅਤ੍ਥਵਣ੍ਣਨਾ ਹੋਤਿ –

੧੮੩੨-੩. ਪੁਰਿਮਗਾਥਾਦ੍ਵਯੇਨ ਪਦਭਾਜਨਾਗਤਸਾਮਞ੍ਞਵਿਨਿਚ੍ਛਯਂ ਦਸ੍ਸੇਤ੍ਵਾ ਇਦਾਨਿ ਅਟ੍ਠਕਥਾਗਤਂ ਵਿਸੇਸਂ ਦਸ੍ਸੇਤੁਮਾਹ ‘‘ਏਤ੍ਥਾ’’ਤਿਆਦਿ. ਤਤ੍ਥ ਏਤ੍ਥਾਤਿ ਇਮਸ੍ਮਿਂ ਪਠਮਪਾਟਿਦੇਸਨੀਯਸਿਕ੍ਖਾਪਦੇ. ਤਸ੍ਸਾਤਿ ਅਞ੍ਞਾਤਿਕਭਿਕ੍ਖੁਨਿਯਾ. ਵਾਕ੍ਯਤੋਤਿ ‘‘ਅਨ੍ਤਰਘਰਂ ਪਵਿਟ੍ਠਾਯਾ’’ਤਿ ਵਚਨਤੋ. ਹਿ-ਸਦ੍ਦੋ ਹੇਤੁਮ੍ਹਿ. ਯਸ੍ਮਾ ਭਿਕ੍ਖੁਸ੍ਸ ਠਿਤਟ੍ਠਾਨਂ ਨਪ੍ਪਮਾਣਨ੍ਤਿ ਅਟ੍ਠਕਥਾਯ (ਪਾਚਿ. ਅਟ੍ਠ. ੫੫੩) ਵਣ੍ਣਿਤਂ, ਤਸ੍ਮਾ ਆਰਾਮਾਦੀਸੁ ਠਤ੍ਵਾ ਦੇਨ੍ਤਿਯਾ ਭਿਕ੍ਖੁਨਿਯਾ ਹਤ੍ਥਤੋ ਵੀਥਿਆਦੀਸੁ ਠਤ੍ਵਾ ਯੋ ਪਟਿਗ੍ਗਣ੍ਹੇਯ੍ਯ ਚੇ, ਏਵਂ ਪਟਿਗ੍ਗਣ੍ਹਤੋ ਤਸ੍ਸ ਭਿਕ੍ਖੁਨੋ ਨ ਦੋਸੋਤਿ ਯੋਜਨਾ. ਪਰਿਭੋਗਸ੍ਸ ਪਟਿਗ੍ਗਹਣਮੂਲਕਤ੍ਤਾ ਨ ਦੋਸੋ. ‘‘ਪਟਿਗ੍ਗਣ੍ਹਤੋ’’ਤਿ ਇਮਿਨਾ ਪਰਿਭੋਗੇ ਪਾਟਿਦੇਸਨੀਯਾਭਾਵੋ ਚ ਦੀਪਿਤੋ ਹੋਤਿ.

੧੮੩੪. ਸਚੇ ਭਿਕ੍ਖੁਨੀ ਰਥਿਕਾਦੀਸੁ ਠਤ੍ਵਾ ਭੋਜਨਂ ਦੇਤਿ, ਭਿਕ੍ਖੁ ਅਨ੍ਤਰਾਰਾਮੇ ਠਤ੍ਵਾ ਪਟਿਗ੍ਗਣ੍ਹਾਤਿ ਚੇ, ਤਸ੍ਸ ਆਪਤ੍ਤੀਤਿ ਯੋਜਨਾ. ਗਾਥਾਬਨ੍ਧਵਸੇਨ ‘‘ਭਿਕ੍ਖੁਨਿ ਭੋਜਨ’’ਨ੍ਤਿ ਰਸ੍ਸਤ੍ਤਂ. ਆਪਤ੍ਤੀਤਿ ਚ ਪਟਿਗ੍ਗਹਣਪਰਿਭੋਗੇਸੁ ਦੁਕ੍ਕਟਪਾਟਿਦੇਸਨੀਯਾਪਤ੍ਤਿਯੋ ਸਨ੍ਧਾਯ ਵੁਤ੍ਤਂ.

੧੮੩੫. ਰਥਿਕਾਦੀਸੁ ਠਤ੍ਵਾ ਭਿਕ੍ਖੁਨੀ ਭੋਜਨਂ ਦੇਤਿ ਚੇ, ਤਂ ਰਥਿਕਾਯਪਿ ਵਾ…ਪੇ… ਅਯਂ ਨਯੋਤਿ ਯੋਜਨਾ. ਤਤ੍ਥ ਰਥਿਕਾਤਿ ਰਚ੍ਛਾ. ਬ੍ਯੂਹਨ੍ਤਿ ਅਨਿਬ੍ਬਿਜ੍ਝਿਤ੍ਵਾ ਠਿਤਾ ਗਤਪਚ੍ਚਾਗਤਰਚ੍ਛਾ. ਸਨ੍ਧਿ ਨਾਮ ਘਰਸਨ੍ਧਿ. ਸਿਙ੍ਘਾਟਕਨ੍ਤਿ ਚਤੁਕ੍ਕੋਣਂ ਵਾ ਤਿਕੋਣਂ ਵਾ ਮਗ੍ਗਸਮੋਧਾਨਟ੍ਠਾਨਂ. ਅਯਂ ਨਯੋਤਿ ‘‘ਆਪਤ੍ਤੀ’’ਤਿ ਅਨਨ੍ਤਰਗਾਥਾਯ ਵੁਤ੍ਤਨਯੋ.

੧੮੩੭. ਆਮਿਸੇਨ ¶ ¶ ਅਸਮ੍ਭਿਨ੍ਨਰਸਂ ਸਨ੍ਧਾਯ ਇਦਂ ਦੁਕ੍ਕਟਂ ਭਾਸਿਤਂ. ਆਮਿਸੇਨ ਸਮ੍ਭਿਨ੍ਨੇ ਏਕਰਸੇ ਯਾਮਕਾਲਿਕਾਦਿਮ੍ਹਿ ਪਟਿਗ੍ਗਹੇਤ੍ਵਾ ਅਜ੍ਝੋਹਾਰੇ ਪਾਟਿਦੇਸਨੀਯਾਪਤ੍ਤਿ ਸਿਯਾਤਿ ਯੋਜਨਾ.

੧੮੩੮. ਏਕਤੋਉਪਸਮ੍ਪਨ੍ਨਹਤ੍ਥਤੋਤਿ ਭਿਕ੍ਖੁਨੀਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਹਤ੍ਥਤੋ. ਯਥਾਹ ‘‘ਏਕਤੋਉਪਸਮ੍ਪਨ੍ਨਾਯਾਤਿ ਭਿਕ੍ਖੁਨੀਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯਾ’’ਤਿ (ਪਾਚਿ. ਅਟ੍ਠ. ੫੫੩). ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਪਨ ਯਥਾਵਤ੍ਥੁਕਮੇਵਾਤਿ.

੧੮੩੯. ਅਞ੍ਞਾਤਿਕਾਯ ਞਾਤਿਕਸਞ੍ਞਿਸ੍ਸ, ਤਥੇਵ ਵਿਮਤਿਸ੍ਸ ਚ ਦੁਕ੍ਕਟਨ੍ਤਿ ਯੋਜਨਾ.

੧੮੪੦. ਅਞ੍ਞਾਤਿਕਾਯ ਦਾਪੇਨ੍ਤਿਯਾ ਭੂਮਿਯਾ ਨਿਕ੍ਖਿਪਿਤ੍ਵਾ ਦਦਮਾਨਾਯ ਵਾ ਅਨ੍ਤਰਾਰਾਮਾਦੀਸੁ ਠਤ੍ਵਾ ਦੇਨ੍ਤਿਯਾ ਪਟਿਗ੍ਗਣ੍ਹਤੋ ਭਿਕ੍ਖੁਸ੍ਸ ਅਨਾਪਤ੍ਤੀਤਿ ਯੋਜਨਾ. ਅਨ੍ਤਰਾਰਾਮਾਦੀਸੂਤਿ ਏਤ੍ਥ ਆਦਿ-ਸਦ੍ਦੇਨ ਭਿਕ੍ਖੁਨੁਪਸ੍ਸਯਤਿਤ੍ਥਿਯਸੇਯ੍ਯਾਪਟਿਕ੍ਕਮਨਾਦਿਂ ਸਙ੍ਗਣ੍ਹਾਤਿ. ਪਟਿਕ੍ਕਮਨਂ ਨਾਮ ਭੋਜਨਸਾਲਾ.

੧੮੪੧. ਗਾਮਤੋ ਬਹਿ ਨੀਹਰਿਤ੍ਵਾ ਦੇਤੀਤਿ ਯੋਜਨਾ.

੧੮੪੨. ਹਤ੍ਥਤੋਤਿ ਏਤ੍ਥ ‘‘ਗਹਣੇ’’ਤਿ ਸੇਸੋ. ਤਥਾਤਿ ਅਨਾਪਤ੍ਤਿ. ਸਮੁਟ੍ਠਾਨਂ ਇਦਂ ਸਿਕ੍ਖਾਪਦਂ ਏਲ਼ਕਲੋਮੇਨ ਸਮਂ ਮਤਨ੍ਤਿ ਯੋਜਨਾ.

ਪਠਮਪਾਟਿਦੇਸਨੀਯਕਥਾਵਣ੍ਣਨਾ.

੧੮੪੩-੪. ਅਵੁਤ੍ਤੇਤਿ ਵਕ੍ਖਮਾਨਨਯੇਨ ਅਵੁਤ੍ਤੇ. ਏਕੇਨਪਿ ਚ ਭਿਕ੍ਖੁਨਾਤਿ ਸਮ੍ਬਨ੍ਧੋ. ਅਪਸਕ੍ਕਾਤਿ ਅਪਗਚ੍ਛ. ਆਦਿ-ਅਤ੍ਥਵਾਚਿਨਾ ਇਤਿ-ਸਦ੍ਦੇਨ ‘‘ਅਪਸਕ੍ਕ ਤਾਵ, ਭਗਿਨਿ, ਯਾਵ ਭਿਕ੍ਖੂ ਭੁਞ੍ਜਨ੍ਤੀ’’ਤਿ ਵਾਕ੍ਯਸੇਸੋ ਸਙ੍ਗਹਿਤੋਤਿ ਦਟ੍ਠਬ੍ਬੋ. ਇਮਿਨਾ ਅਪਸਾਦਨਾਕਾਰੋ ¶ ਸਨ੍ਦਸ੍ਸਿਤੋ. ‘‘ਏਕੇਨਪਿ ਚ ਭਿਕ੍ਖੁਨਾ’’ਤਿ ਇਮਿਨਾ ਅਵਕਂਸੋ ਦਸ੍ਸਿਤੋ. ਉਕ੍ਕਂਸੋ ਪਨ ‘‘ਤੇਹਿ ਭਿਕ੍ਖੂਹਿ ਸਾ ਭਿਕ੍ਖੁਨੀ ਅਪਸਾਦੇਤਬ੍ਬਾ’’ਤਿ ਪਾਲ਼ਿਤੋਪਿ ਦਟ੍ਠਬ੍ਬੋ. ‘‘ਆਮਿਸ’’ਨ੍ਤਿ ਸਾਮਞ੍ਞਵਚਨੇਪਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਸ੍ਸੇਵ ਗਹਣਂ. ਯਥਾਹ ‘‘ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨਾ’’ਤਿ. ਭੋਗੇਤਿ ਚ ਏਕਤੋਉਪਸਮ੍ਪਨ੍ਨਨ੍ਤਿ ਚ ਵੁਤ੍ਤਤ੍ਥਮੇਵ.

੧੮੪੫. ਤਥੇਵਾਤਿ ¶ ਦੁਕ੍ਕਟਂ. ਤਤ੍ਥਾਤਿ ਅਨੁਪਸਮ੍ਪਨ੍ਨਾਯ.

੧੮੪੬. ਅਤ੍ਤਨੋ ਭਤ੍ਤੇ ਦਿਨ੍ਨੇਪਿ ਇਮਿਨਾ ਸਿਕ੍ਖਾਪਦੇਨ ਅਨਾਪਤ੍ਤਿ, ਪੁਰਿਮਸਿਕ੍ਖਾਪਦੇਨ ਪਨ ਆਪਤ੍ਤਿਸਮ੍ਭਵਾ ‘‘ਨ ਦੇਤੀ’’ਤਿ ਵੁਤ੍ਤਂ. ਯਥਾਹ ‘‘ਅਤ੍ਤਨੋ ਭਤ੍ਤਂ ਦਾਪੇਤਿ, ਨ ਦੇਤੀਤਿ ਏਤ੍ਥ ਸਚੇਪਿ ਅਤ੍ਤਨੋ ਭਤ੍ਤਂ ਦੇਤਿ, ਇਮਿਨਾ ਸਿਕ੍ਖਾਪਦੇਨ ਅਨਾਪਤ੍ਤਿਯੇਵ, ਪੁਰਿਮਸਿਕ੍ਖਾਪਦੇਨ ਆਪਤ੍ਤੀ’’ਤਿ (ਪਾਚਿ. ਅਟ੍ਠ. ੫੫੮). ਤਥਾਤਿ ਅਨਾਪਤ੍ਤਿ. ਉਭਯਸਿਕ੍ਖਾਪਦੇਹਿਪਿ ਅਨਾਪਤ੍ਤਿਂ ਦਸ੍ਸੇਤੁਮਾਹ ‘‘ਪਦੇਤਿ ਚੇ’’ਤਿ. ਯਥਾਹ ‘‘ਅਞ੍ਞੇਸਂ ਭਤ੍ਤਂ ਦੇਤਿ, ਨ ਦਾਪੇਤੀਤਿ ਏਤ੍ਥ ਪਨ ਸਚੇਪਿ ਦਾਪੇਯ੍ਯ, ਇਮਿਨਾ ਸਿਕ੍ਖਾਪਦੇਨ ਆਪਤ੍ਤਿ ਭਵੇਯ੍ਯ, ਦੇਨ੍ਤਿਯਾ ਪਨ ਨੇਵ ਇਮਿਨਾ, ਨ ਪੁਰਿਮੇਨ ਆਪਤ੍ਤੀ’’ਤਿ.

੧੮੪੭. ਭਿਕ੍ਖੁਨੀ ਯਂ ਨ ਦਿਨ੍ਨਂ, ਤਂ ਦਾਪੇਤਿ, ਯਤ੍ਥ ਵਾ ਨ ਦਿਨ੍ਨਂ, ਤਤ੍ਥ ਦਾਪੇਤਿ, ਤਮ੍ਪਿ ਸਬ੍ਬੇਸਂ ਮਿਤ੍ਤਾਮਿਤ੍ਤਾਨਂ ਸਮਂ ਦਾਪੇਤਿ, ਤਤ੍ਥਾਪਿ ਅਨਾਪਤ੍ਤਿ.

੧੮੪੮. ਸਿਕ੍ਖਮਾਨਾ ਵਾ ਸਾਮਣੇਰਿਕਾ ਵਾ ‘‘ਇਧ ਸੂਪਂ ਦੇਥ, ਓਦਨਂ ਦੇਥਾ’’ਤਿ ਵੋਸਾਸਨ੍ਤੀ ਵਿਧਾਨਂ ਕਰੋਨ੍ਤੀ ਠਿਤਾ, ਤਂ ਅਨਪਸਾਦੇਨ੍ਤਸ੍ਸ ਅਨਾਪਤ੍ਤਿ. ਪਞ੍ਚੇਵ ਭੋਜਨਾਨਿ ਵਿਨਾ ਅਞ੍ਞਂ ਵੋਸਾਸਨ੍ਤਿਂ ਭਿਕ੍ਖੁਨਿਂ ਅਨਪਸਾਦੇਨ੍ਤਸ੍ਸ ਅਨਾਪਤ੍ਤਿ. ਅਨਪਸਾਦੇਨ੍ਤਸ੍ਸ ਉਮ੍ਮਤ੍ਤਕਾਦਿਨੋਪਿ ਅਨਾਪਤ੍ਤੀਤਿ ਯੋਜਨਾ.

੧੮੪੯. ਸਮੁਟ੍ਠਾਨਨ੍ਤਿ ¶ ਏਤ੍ਥ ‘‘ਇਮਸ੍ਸਾ’’ਤਿ ਸੇਸੋ. ਭੋਜਨਂ ਕਿਰਿਯਂ, ਵੋਸਾਸਨ੍ਤਿਯਾ ਅਨਿਵਾਰਣਂ ਅਕਿਰਿਯਨ੍ਤਿ ਏਵਮਿਦਂ ਕ੍ਰਿਯਾਕ੍ਰਿਯਂ.

ਦੁਤਿਯਪਾਟਿਦੇਸਨੀਯਕਥਾਵਣ੍ਣਨਾ.

੧੮੫੦-੧. ਸੇਕ੍ਖਨ੍ਤਿ ਸਮ੍ਮਤੇਤਿ ‘‘ਸੇਕ੍ਖਸਮ੍ਮਤਂ ਨਾਮ ਕੁਲਂ ਯਂ ਕੁਲਂ ਸਦ੍ਧਾਯ ਵਡ੍ਢਤਿ, ਭੋਗੇਨ ਹਾਯਤਿ, ਏਵਰੂਪਸ੍ਸ ਕੁਲਸ੍ਸ ਞਤ੍ਤਿਦੁਤਿਯੇਨ ਕਮ੍ਮੇਨ ਸੇਕ੍ਖਸਮ੍ਮੁਤਿ ਦਿਨ੍ਨਾ ਹੋਤੀ’’ਤਿ (ਪਾਚਿ. ੫੬੭) ਵੁਤ੍ਤਂ ਇਦਂ ਕੁਲਂ ਸੇਕ੍ਖਸਮ੍ਮਤਂ ਨਾਮ. ਤੇਨਾਹ ‘‘ਲਦ੍ਧਸਮ੍ਮੁਤਿਕੇ ਕੁਲੇ’’ਤਿ. ਲਦ੍ਧਾ ਸਮ੍ਮੁਤਿ ਯੇਨਾਤਿ ਵਿਗ੍ਗਹੋ. ਘਰੂਪਚਾਰਂ ਓਕ੍ਕਨ੍ਤੇ ਨਿਮਨ੍ਤਿਤੋਪਿ ਅਨਿਮਨ੍ਤਿਤੋਵ ਹੋਤੀਤਿ ਆਹ ‘‘ਘਰੂਪਚਾਰੋਕ੍ਕਮਨਾ ਪੁਬ੍ਬੇਵਾ’’ਤਿ. ਯਥਾਹ ‘‘ਅਨਿਮਨ੍ਤਿਤੋ ਨਾਮ ਅਜ੍ਜਤਨਾਯ ਵਾ ਸ੍ਵਾਤਨਾਯ ¶ ਵਾ ਅਨਿਮਨ੍ਤਿਤੋ, ਘਰੂਪਚਾਰਂ ਓਕ੍ਕਮਨ੍ਤੇ ਨਿਮਨ੍ਤੇਤਿ, ਏਸੋ ਅਨਿਮਨ੍ਤਿਤੋ ਨਾਮਾ’’ਤਿ (ਪਾਚਿ. ੫੬੭).

‘‘ਅਗਿਲਾਨੋ ਨਾਮ ਯੋ ਸਕ੍ਕੋਤਿ ਪਿਣ੍ਡਾਯ ਚਰਿਤੁ’’ਨ੍ਤਿ ਵੁਤ੍ਤਤ੍ਤਾ ਭਿਕ੍ਖਾਯ ਚਰਿਤੁਂ ਸਮਤ੍ਥੋ ਅਗਿਲਾਨੋ ਨਾਮ. ਗਹੇਤ੍ਵਾਤਿ ਸਹਤ੍ਥਾ ਪਟਿਗ੍ਗਹੇਤ੍ਵਾ. ‘‘ਆਮਿਸ’’ਨ੍ਤਿ ਇਮਿਨਾ ਸਮ੍ਬਨ੍ਧੋ. ਯਥਾਹ ‘‘ਖਾਦਨੀਯਂ ਵਾ ਭੋਜਨੀਯਂ ਵਾ ਸਹਤ੍ਥਾ ਪਟਿਗ੍ਗਹੇਤ੍ਵਾ’’ਤਿ (ਪਾਚਿ. ੫੬੭). ਗਹਣੇਤਿ ਏਤ੍ਥ ‘‘ਆਹਾਰਤ੍ਥਾਯਾ’’ਤਿ ਸੇਸੋ.

੧੮੫੩. ਤਤ੍ਥਾਤਿ ਅਸੇਕ੍ਖਸਮ੍ਮਤੇ ਕੁਲੇ. ਤਥੇਵ ਪਰਿਦੀਪਿਤਨ੍ਤਿ ਦੁਕ੍ਕਟਂ ਪਰਿਦੀਪਿਤਂ.

੧੮੫੪. ਨਿਮਨ੍ਤਿਤਸ੍ਸ ਵਾਤਿ ਏਤ੍ਥ ਵਾ-ਸਦ੍ਦੇਨ ਨਿਮਨ੍ਤਿਤਸ੍ਸ ਅਵਸੇਸਂ ਗਣ੍ਹਾਤਿ. ਯਥਾਹ ‘‘ਨਿਮਨ੍ਤਿਤਸ੍ਸ ਵਾ ਗਿਲਾਨਸ੍ਸ ਵਾ ਸੇਸਕਂ ਭੁਞ੍ਜਤੀ’’ਤਿ. ਅਞ੍ਞੇਸਂ ਭਿਕ੍ਖਾ ਤਤ੍ਥ ਦੀਯਤੀਤਿ ਯੋਜਨਾ. ਤਤ੍ਥਾਤਿ ਤਸ੍ਮਿਂ ਸੇਕ੍ਖਸਮ੍ਮਤੇ ਕੁਲੇ.

੧੮੫੫. ਯਤ੍ਥ ¶ ਕਤ੍ਥਚੀਤਿ ਆਸਨਸਾਲਾਦੀਸੁ ਯਤ੍ਥ ਕਤ੍ਥਚਿ. ਨਿਚ੍ਚਭਤ੍ਤਾਦਿਕੇ ਵਾਪੀਤਿ ਏਤ੍ਥ ਆਦਿ-ਸਦ੍ਦੇਨ ਸਲਾਕਭਤ੍ਤਪਕ੍ਖਿਕਉਪੋਸਥਿਕਪਾਟਿਪਦਿਕਭਤ੍ਤਾਨਂ ਗਹਣਂ.

੧੮੫੬. ਦ੍ਵਾਰੇਤਿ ਏਤ੍ਥ ‘‘ਠਪੇਤ੍ਵਾ’’ਤਿ ਸੇਸੋ. ਸਮ੍ਪਤ੍ਤੇਤਿ ਏਤ੍ਥ ‘‘ਪਚ੍ਛਾ’’ਤਿ ਸੇਸੋ. ਯਥਾਹ ‘‘ਸਚੇਪਿ ਅਨਾਗਤੇ ਭਿਕ੍ਖੁਮ੍ਹਿ ਪਠਮਂਯੇਵ ਨੀਹਰਿਤ੍ਵਾ ਦ੍ਵਾਰੇ ਠਪੇਤ੍ਵਾ ਪਚ੍ਛਾ ਸਮ੍ਪਤ੍ਤਸ੍ਸ ਦੇਨ੍ਤਿ, ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੫੬੯).

੧੮੫੭. ਮਹਾਪਚ੍ਚਰਿਯਾ(ਪਆਚਿ. ਅਟ੍ਠ. ੫੬੯) ਗਤਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਭਿਕ੍ਖੁ’’ਨ੍ਤਿਆਦਿ. ਸਮੁਟ੍ਠਾਨੇਲ਼ਕੂਪਮਨ੍ਤਿ ਸਮੁਟ੍ਠਾਨਤੋ ਏਲ਼ਕਲੋਮਸਿਕ੍ਖਾਪਦਸਦਿਸਨ੍ਤਿ ਅਤ੍ਥੋ.

ਤਤਿਯਪਾਟਿਦੇਸਨੀਯਕਥਾਵਣ੍ਣਨਾ.

੧੮੫੮-੯. ‘‘ਪਞ੍ਚਨ੍ਨਂ ਪਟਿਸਂਵਿਦਿਤਂ, ਏਤਂ ਅਪ੍ਪਟਿਸਂਵਿਦਿਤਂ ਨਾਮਾ’’ਤਿ ਵਚਨਤੋ ਚ ਇਧਾਪਿ ‘‘ਸਹਧਮ੍ਮਿਕਞਾਪਿਤ’’ਨ੍ਤਿ ਵਕ੍ਖਮਾਨਤ੍ਤਾ ਚ ਅਗਹਟ੍ਠ-ਸਦ੍ਦੇਨ ਪਰਿਬ੍ਬਾਜਕਾਨਂ ਗਹਣਂ. ਵੁਤ੍ਤਮੇਵ ¶ ਨਯਂ ਵੋਹਾਰਨ੍ਤਰੇਨ ਦਸ੍ਸੇਤੁਮਾਹ ‘‘ਇਤ੍ਥਿਯਾ ਪੁਰਿਸੇਨ ਵਾ’’ਤਿ. ‘‘ਯਾਨਿ ਖੋ ਪਨ ਤਾਨਿ ਆਰਞ੍ਞਕਾਨਿ ਸੇਨਾਸਨਾਨੀ’’ਤਿ (ਪਾਚਿ. ੫੭੩) ਵਚਨਤੋ ਆਰਾਮਨ੍ਤਿ ਆਰਞ੍ਞਕਾਰਾਮਮਾਹ. ਸਚੇ ਏਵਮਾਰੋਚਿਤਂ ਪਟਿਸਂਵਿਦਿਤਨ੍ਤਿ ਹਿ ਵੁਤ੍ਤਂ ਪਦਭਾਜਨੇਤਿ (ਪਾਚਿ. ੫੭੩) ਯੋਜਨਾ. ਪਟਿਸਂਵਿਦਿਤਨ੍ਤਿ ਪਗੇਵ ਨਿਵੇਦਿਤਂ.

੧੮੬੦. ਪਚ੍ਛਾ ਯਥਾਰੋਚਿਤਂ ਤਮੇਵ ਵਾ ਤਸ੍ਸ ਚ ਪਰਿਵਾਰਂ ਕਤ੍ਵਾ ਅਞ੍ਞਂ ਬਹੁਂ ਵਾ ਆਹਰੀਯਤੁ, ਤਮ੍ਪਿ ਪਟਿਸਂਵੇਦਿਤਂ ਨਾਮਾਤਿ ਯੋਜਨਾ.

੧੮੬੧. ਯਾਗੁਯਾ ਵਿਦਿਤਂ ਕਤ੍ਵਾਤਿ ਏਤ੍ਥ ‘‘ਤਂ ਠਪੇਤ੍ਵਾ’’ਤਿ ਇਦਂ ਸਾਮਤ੍ਥਿਯਾ ਲਬ੍ਭਤਿ. ਇਦਮ੍ਪਿ ਵਿਦਿਤਂ ਕੁਰੁਨ੍ਦਿਯਂ ਵਟ੍ਟਤੀਤਿ ਵੁਤ੍ਤਨ੍ਤਿ ਯੋਜਨਾ.

੧੮੬੨. ਪਨਾਤਿ ¶ ਅਪਿ-ਸਦ੍ਦਤ੍ਥੋ. ਅਞ੍ਞਾਨਿਪਿ ਕੁਲਾਨੀਤਿ ਯੋਜਨਾ. ਏਤ੍ਥ ‘‘ਅਸੁਕਂ ਨਾਮ ਕੁਲਂ ਪਟਿਸਂਵੇਦਿਤਂ ਕਤ੍ਵਾ ਖਾਦਨੀਯਾਦੀਨਿ ਗਹੇਤ੍ਵਾ ਗਚ੍ਛਤੀਤਿ ਸੁਤ੍ਵਾ’’ਤਿ (ਪਾਚਿ. ਅਟ੍ਠ. ੫੭੩) ਅਟ੍ਠਕਥਾਸੇਸੋ. ਤੇਨਾਤਿ ਕਤਪਟਿਸਂਵੇਦਿਤੇਨ. ਤਮ੍ਪਿ ਚ ਸਬ੍ਬਂ ਵਟ੍ਟਤੀਤਿ ਯੋਜਨਾ.

੧੮੬੩. ਏਵਂ ਯਂ ਅਨਾਰੋਚਿਤਨ੍ਤਿ ‘‘ਆਰਾਮਂ ਵਾ ਉਪਚਾਰਂ ਵਾ ਪਵਿਸਿਤ੍ਵਾ’’ਤਿਆਦਿਨਾ ਨਯੇਨ ਯਂ ਪਠਮਂ ਅਨਿਵੇਦਿਤਂ. ‘‘ਏਵ’’ਨ੍ਤਿ ਇਦਂ ‘‘ਯਂ ਆਰਾਮਮਨਾਭਤ’’ਨ੍ਤਿ ਇਮਿਨਾਪਿ ਯੋਜੇਤਬ੍ਬਂ. ਏਵਨ੍ਤਿ ‘‘ਤਸ੍ਸ ਪਰਿਵਾਰਂ ਕਤ੍ਵਾ’’ਤਿਆਦਿਨਾ ਪਕਾਰੇਨ. ‘‘ਤਂ ਅਸਂਵਿਦਿਤਂ ਨਾਮਾ’’ਤਿ ਇਦਂ ‘‘ਸਹਧਮ੍ਮਿਕਞਾਪਿਤ’’ਨ੍ਤਿ ਇਮਿਨਾਪਿ ਯੋਜੇਤਬ੍ਬਂ. ਯਥਾਹ ‘‘ਪਞ੍ਚਨ੍ਨਂ ਪਟਿਸਂਵਿਦਿਤਂ, ਏਤਂ ਅਪ੍ਪਟਿਸਂਵਿਦਿਤਂ ਨਾਮਾ’’ਤਿ (ਪਾਚਿ. ੫੭੩). ਅਟ੍ਠਕਥਾਯਞ੍ਚ ‘‘ਪਞ੍ਚਨ੍ਨਂ ਪਟਿਸਂਵਿਦਿਤਨ੍ਤਿ ਪਞ੍ਚਸੁ ਸਹਧਮ੍ਮਿਕੇਸੁ ਯਂ ਕਿਞ੍ਚਿ ਪੇਸੇਤ੍ਵਾ ‘ਖਾਦਨੀਯਂ ਵਾ ਭੋਜਨੀਯਂ ਵਾ ਆਹਰਿਸ੍ਸਾਮਾ’ਤਿ ਪਟਿਸਂਵਿਦਿਤਂ ਕਤਮ੍ਪਿ ਅਪ੍ਪਟਿਸਂਵਿਦਿਤਮੇਵਾਤਿ ਅਤ੍ਥੋ’’ਤਿ (ਪਾਚਿ. ਅਟ੍ਠ. ੫੭੩) ਵੁਤ੍ਤਂ.

੧੮੬੪. ਕਾਰਾਪੇਤ੍ਵਾਤਿ ਏਤ੍ਥ ‘‘ਪਟਿਸਂਵਿਦਿਤ’’ਨ੍ਤਿ ਸੇਸੋ.

੧੮੬੫. ਭਿਕ੍ਖੁਨਾ ਵਾ ਗਨ੍ਤ੍ਵਾ ਅਨ੍ਤਰਾਮਗ੍ਗੇ ਗਹੇਤਬ੍ਬਨ੍ਤਿ ਯੋਜਨਾ. ਏਵਮਕਤ੍ਵਾਤਿ ‘‘ਬਹਿਆਰਾਮਂ ਪੇਸੇਤ੍ਵਾ’’ਤਿਆਦਿਨਾ ਵੁਤ੍ਤਵਿਧਾਨਂ ਅਕਤ੍ਵਾ. ਉਪਚਾਰਤੋਤਿ ਏਤ੍ਥ ਭੁਮ੍ਮਤ੍ਥੇ ਤੋ-ਪਚ੍ਚਯੋ ਵੇਦਿਤਬ੍ਬੋ.

੧੮੬੮. ‘‘ਪਟਿਸਂਵਿਦਿਤੇ’’ਤਿਆਦੀਨਂ ¶ ਪਦਾਨਂ ‘‘ਅਨਾਪਤ੍ਤੇ ਵਾ’’ਤਿ ਇਮਿਨਾ ਸਮ੍ਬਨ੍ਧੋ. ਪਟਿਸਂਵਿਦਿਤੇਤਿ ਏਤ੍ਥ ‘‘ਗਿਲਾਨਸ੍ਸਾ’’ਤਿ ਸੇਸੋ. ਪਟਿਸਂਵਿਦਿਤੇ ਅਨਾਪਤ੍ਤਿ, ਗਿਲਾਨਸ੍ਸਾਪਿ ਅਨਾਪਤ੍ਤਿ, ਅਪ੍ਪਟਿਸਂਵਿਦਿਤੇਪਿ ਤਸ੍ਸ ਪਟਿਸਂਵਿਦਿਤਸ੍ਸ ਅਵਸੇਸਕੇ ਵਾ ਗਿਲਾਨਸ੍ਸ ਅਵਸੇਸਕੇ ਵਾ ਅਨਾਪਤ੍ਤਿ ਏਵਾਤਿ ਸਮ੍ਬਨ੍ਧੋ ¶ . ਯਥਾਹ ਅਨਾਪਤ੍ਤਿਵਾਰੇ ‘‘ਪਟਿਸਂਵਿਦਿਤਸ੍ਸ ਵਾ ਗਿਲਾਨਸ੍ਸ ਵਾ ਸੇਸਕਂ ਭੁਞ੍ਜਤੀ’’ਤਿ (ਪਾਚਿ. ੫੭੫). ਬਹਾਰਾਮੇ ਪਟਿਗ੍ਗਹੇਤ੍ਵਾ ਅਨ੍ਤੋਯੇਵ ਭੁਞ੍ਜਤੋ ਅਸ੍ਸ ਅਨਾਪਤ੍ਤੀਤਿ ਯੋਜਨਾ. ਗਹੇਤ੍ਵਾ ਵਾਤਿ ਏਤ੍ਥ ਵਾ-ਸਦ੍ਦੋ ‘‘ਤਸ੍ਸਾ’’ਤਿਆਦੀਸੁਪਿ ਯੋਜੇਤਬ੍ਬੋ.

੧੮੬੯. ਤਤ੍ਥਾਤਿ ਤਸ੍ਮਿਂ ਆਰਞ੍ਞਕਾਰਾਮੇ. ਖਾਦਤੋ ਅਨਾਪਤ੍ਤਿ ਏਵਾਤਿ ਯੋਜਨਾ, ਤਤ੍ਥ ‘‘ਅਞ੍ਞੇਨ ਕਪ੍ਪਿਯਂ ਕਤ੍ਵਾ ਦਿਨ੍ਨਾਨੀ’’ਤਿ ਸੇਸੋ.

ਚਤੁਤ੍ਥਪਾਟਿਦੇਸਨੀਯਕਥਾਵਣ੍ਣਨਾ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ ਵਿਨਯਵਿਨਿਚ੍ਛਯਵਣ੍ਣਨਾਯ

ਪਾਟਿਦੇਸਨੀਯਕਥਾਵਣ੍ਣਨਾ ਨਿਟ੍ਠਿਤਾ.

ਸੇਖਿਯਕਥਾਵਣ੍ਣਨਾ

੧੮੭੦. ਏਵਂ ਪਾਟਿਦੇਸਨੀਯਵਿਨਿਚ੍ਛਯਂ ਦਸ੍ਸੇਤ੍ਵਾ ਤਦਨਨ੍ਤਰਂ ਉਦ੍ਦਿਟ੍ਠਾਨਂ ਸੇਖਿਯਾਨਂ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਯੋ ਅਨਾਦਰਿਯੇਨੇਵਾ’’ਤਿਆਦਿ. ਯੋਤਿ ਥੇਰੋ ਵਾ ਨਵੋ ਵਾ ਮਜ੍ਝਿਮੋ ਵਾ. ਏਤ੍ਥ ਅਨਾਦਰਿਯਂ ਨਾਮ ਸਞ੍ਚਿਚ੍ਚ ਆਪਤ੍ਤਿਆਪਜ੍ਜਨਂ, ਨਿਵਾਸਨਾਦਿਵਤ੍ਥਸ੍ਸ ਉਗ੍ਗਹਣੇ ਨਿਰੁਸ੍ਸਾਹਞ੍ਚ. ਪਚ੍ਛਤੋਪਿ ਵਾਤਿ ਏਤ੍ਥ ਵਾ-ਸਦ੍ਦੇਨ ‘‘ਪਸ੍ਸਤੋਪਿ ਵਾ’’ਤਿ ਇਦਂ ਸਙ੍ਗਣ੍ਹਾਤਿ. ਤਸ੍ਸ ਚਾਤਿ ਏਤ੍ਥ ਚ-ਸਦ੍ਦੋ ਵਕ੍ਖਮਾਨਸਮੁਚ੍ਚਯੋ.

੧੮੭੧. ਨ ਕੇਵਲਂ ਵੁਤ੍ਤਨਯੇਨ ਨਿਵਾਸੇਨ੍ਤਸ੍ਸੇਵ ਹੋਤਿ, ਖਨ੍ਧਕਾਗਤਹਤ੍ਥਿਸੋਣ੍ਡਾਦਿਆਕਾਰੇਨਾਪਿ ਨਿਵਾਸੇਨ੍ਤਸ੍ਸ ਦੁਕ੍ਕਟਂ ਹੋਤੀਤਿ ਆਹ ‘‘ਹਤ੍ਥਿਸੋਣ੍ਡਾਦੀ’’ਤਿਆਦਿ. ਹਤ੍ਥਿਸੋਣ੍ਡਾਦਿਨਿਵਾਸਨਂ ਪਰਤੋ ਖੁਦ੍ਦਕਵਤ੍ਥੁਕ੍ਖਨ੍ਧਕੇ (ਚੂਲ਼ਵ. ੨੮੦) ਆਵਿ ¶ ਭਵਿਸ੍ਸਤਿ. ਪਰਿਮਣ੍ਡਲਨ੍ਤਿ ਸਮਨ੍ਤਤੋ ਮਣ੍ਡਲਂ ਕਤ੍ਵਾ. ਵਤ੍ਥਬ੍ਬਨ੍ਤਿ ਨਿਵਤ੍ਥਬ੍ਬਂ ਨਿਵਾਸੇਤਬ੍ਬਨ੍ਤਿ ਅਤ੍ਥੋ.

੧੮੭੨. ਜਾਣੁਮਣ੍ਡਲਤੋ ¶ ਹੇਟ੍ਠਾਤਿ ਏਤ੍ਥ ‘‘ਜਙ੍ਘਟ੍ਠਿਸੀਸਤੋ ਪਟ੍ਠਾਯਾ’’ਤਿ ਸੇਸੋ. ਅਟ੍ਠਙ੍ਗੁਲਪ੍ਪਮਾਣਕਨ੍ਤਿ ਵਡ੍ਢਕਿਅਙ੍ਗੁਲੇਨ ਅਟ੍ਠਙ੍ਗੁਲਮਤ੍ਤਨ੍ਤਿ ਆਚਰਿਯਾ. ‘‘ਯੋ ਪਨ ਸੁਕ੍ਖਜਙ੍ਘੋ ਵਾ ਮਹਾਪਿਣ੍ਡਿਕਮਂਸੋ ਵਾ ਹੋਤਿ, ਤਸ੍ਸ ਸਾਰੁਪ੍ਪਤ੍ਥਾਯ ਜਾਣੁਮਣ੍ਡਲਤੋ ਅਟ੍ਠਙ੍ਗੁਲਾਧਿਕਮ੍ਪਿ ਓਤਾਰੇਤ੍ਵਾ ਨਿਵਾਸੇਤੁਂ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੫੭੬) ਅਟ੍ਠਕਥਂ ਸਙ੍ਗਣ੍ਹਿਤੁਮਾਹ ‘‘ਤਤੋ ਊਨਂ ਨ ਵਟ੍ਟਤੀ’’ਤਿ.

੧੮੭੩. ਅਸਞ੍ਚਿਚ੍ਚ ਅਪਰਿਮਣ੍ਡਲਂ ਨਿਵਾਸੇਨ੍ਤਸ੍ਸ ਅਨਾਪਤ੍ਤੀਤਿ ਯੋਜਨਾ. ਏਵਮੁਪਰਿਪਿ. ਅਸਞ੍ਚਿਚ੍ਚਾਤਿ ‘‘ਅਪਰਿਮਣ੍ਡਲਂ ਨਿਵਾਸੇਸ੍ਸਾਮੀ’’ਤਿ ਏਵਂ ਅਸਞ੍ਚਿਚ੍ਚ, ਅਥ ਖੋ ‘‘ਪਰਿਮਣ੍ਡਲਂਯੇਵ ਨਿਵਾਸੇਸ੍ਸਾਮੀ’’ਤਿ ਵਿਰਜ੍ਝਿਤ੍ਵਾ ਅਪਰਿਮਣ੍ਡਲਂ ਨਿਵਾਸੇਨ੍ਤਸ੍ਸ ਅਨਾਪਤ੍ਤਿ. ਅਸਤਿਸ੍ਸਾਪੀਤਿ ਅਞ੍ਞਵਿਹਿਤਸ੍ਸਾਪਿ ਤਥਾ ਨਿਵਾਸੇਨ੍ਤਸ੍ਸ ਅਨਾਪਤ੍ਤਿ. ਅਜਾਨਨ੍ਤਸ੍ਸਾਤਿ ਕੇਵਲਂ ਪਰਿਮਣ੍ਡਲਂ ਨਿਵਾਸੇਤੁਂ ਅਜਾਨਨ੍ਤਸ੍ਸ ਅਨਾਪਤ੍ਤਿ. ਅਪਿਚ ਨਿਵਾਸਨਵਤ੍ਤਂ ਉਗ੍ਗਹੇਤਬ੍ਬਂ. ਉਗ੍ਗਹਿਤਵਤ੍ਤੋਪਿ ਸਚੇ ‘‘ਆਰੁਲ਼੍ਹ’’ਨ੍ਤਿ ਵਾ ‘‘ਓਰੁਲ਼੍ਹ’’ਨ੍ਤਿ ਵਾ ਨ ਜਾਨਾਤਿ, ਤਸ੍ਸਾਪਿ ਅਨਾਪਤ੍ਤਿਯੇਵ. ਗਿਲਾਨਸ੍ਸਾਤਿ ਯਸ੍ਸ ਜਙ੍ਘਾਯ ਵਾ ਪਾਦੇ ਵਾ ਵਣੋ ਹੋਤਿ, ਤਸ੍ਸ ਉਕ੍ਖਿਪਿਤ੍ਵਾ ਵਾ ਓਤਾਰੇਤ੍ਵਾ ਵਾ ਨਿਵਾਸੇਨ੍ਤਸ੍ਸ ਅਨਾਪਤ੍ਤਿ. ਪਾਦੋਤਿ ਚੇਤ੍ਥ ਪਾਦਸਮੀਪਂ ਅਧਿਪ੍ਪੇਤਂ. ਆਪਦਾਸੂਤਿ ਵਾਲ਼ਾ ਵਾ ਚੋਰਾ ਵਾ ਅਨੁਬਨ੍ਧਨ੍ਤਿ, ਏਵਰੂਪਾਸੁ ਆਪਦਾਸੁ ਅਨਾਪਤ੍ਤਿ.

ਪਰਿਮਣ੍ਡਲਕਥਾਵਣ੍ਣਨਾ.

੧੮੭੪. ਉਭੋ ਕੋਣੇ ਸਮਂ ਕਤ੍ਵਾਤਿ ਪਾਰੁਪਨਸ੍ਸ ਏਕਂਸੇ ਕਤਸ੍ਸ ਪਿਟ੍ਠਿਪਸ੍ਸੇ, ਉਦਰਪਸ੍ਸੇ ਚ ਓਲਮ੍ਬਮਾਨੇ ਉਭੋ ¶ ਕਣ੍ਣੇ ਹਤ੍ਥਿਪਿਟ੍ਠੇ ਗਣ੍ਡਾ ਵਿਯ ਸਮਂ ਕਤ੍ਵਾ. ਪਰਿਮਣ੍ਡਲਂ ਕਤ੍ਵਾਤਿ ਏਤਸ੍ਸੇਵ ਅਤ੍ਥਪਦਂ. ਸਾਦਰਨ੍ਤਿ ਭਾਵਨਪੁਂਸਕਨਿਦ੍ਦੇਸੋ. ਸਾਦਰਂ ਵਾ ਪਾਰੁਪਿਤਬ੍ਬਨ੍ਤਿ ਯੋਜਨਾ, ਸਾਦਰਂ ਪਾਰੁਪਨਂ ਕਤ੍ਤਬ੍ਬਨ੍ਤਿ ਅਤ੍ਥੋ. ਏਵਂ ਅਕਰੋਨ੍ਤਸ੍ਸਾਤਿ ਪਾਰੁਪਨਵਤ੍ਤੇ ਆਦਰਂ ਜਨੇਤ੍ਵਾ ਏਵਂ ਅਪਾਰੁਪਨ੍ਤਸ੍ਸ.

੧੮੭੫. ‘‘ਪਰਿਮਣ੍ਡਲਂ ਨਿਵਾਸੇਸ੍ਸਾਮੀਤਿ ਸਿਕ੍ਖਾ ਕਰਣੀਯਾ’’ਤਿ (ਪਾਚਿ. ੫੭੬) ਵਾ ‘‘ਪਰਿਮਣ੍ਡਲਂ ਪਾਰੁਪਿਸ੍ਸਾਮੀਤਿ ਸਿਕ੍ਖਾ ਕਰਣੀਯਾ’’ਤਿ (ਪਾਚਿ. ੫੭੭) ਵਾ ‘‘ਅਨ੍ਤਰਘਰੇ’’ਤਿ ਅਵਿਸੇਸੇਤ੍ਵਾ ਵੁਤ੍ਤਤ੍ਤਾ ਆਹ ‘‘ਅਵਿਸੇਸੇਨ ਵੁਤ੍ਤ’’ਨ੍ਤਿ. ਇਦਂ ਸਿਕ੍ਖਾਪਦਦ੍ਵਯਂ ਯਸ੍ਮਾ ਅਵਿਸੇਸੇਨ ਵੁਤ੍ਤਂ, ਤਸ੍ਮਾ ਘਰੇ, ਵਿਹਾਰੇ ਵਾ ਕਾਤਬ੍ਬਂ ਪਰਿਮਣ੍ਡਲਨ੍ਤਿ ਯੋਜਨਾ. ਘਰੇਤਿ ਅਨ੍ਤਰਘਰੇ. ਵਿਹਾਰੇ ਵਾਤਿ ਬੁਦ੍ਧੁਪਟ੍ਠਾਨਾਦਿਕਾਲਂ ¶ ਸਨ੍ਧਾਯ ਵੁਤ੍ਤਂ. ਪਰਿਮਣ੍ਡਲਂ ਕਤ੍ਤਬ੍ਬਨ੍ਤਿ ਪਰਿਮਣ੍ਡਲਮੇਵ ਨਿਵਾਸੇਤਬ੍ਬਂ ਪਾਰੁਪਿਤਬ੍ਬਨ੍ਤਿ ਅਤ੍ਥੋ.

ਦੁਤਿਯਂ.

੧੮੭੬. ਉਭੋ ਕੋਣੇ ਸਮਂ ਕਤ੍ਵਾਤਿ ਸਮ੍ਬਨ੍ਧੋ. ਗੀਵਮੇਵ ਚ ਅਨੁਵਾਤੇਨ ਛਾਦੇਤ੍ਵਾਤਿ ਯੋਜਨਾ.

੧੮੭੭. ਤਥਾ ਅਕਤ੍ਵਾਤਿ ਯਥਾਵੁਤ੍ਤਵਿਧਾਨਂ ਅਕਤ੍ਵਾ. ਜਤ੍ਤੂਨਿਪੀਤਿ ਉਭੋ ਅਂਸਕੂਟਾਨਿਪਿ. ਉਰਮ੍ਪਿ ਚਾਤਿ ਹਦਯਮ੍ਪਿ. ਵਿਵਰਿਤ੍ਵਾਤਿ ਅਪ੍ਪਟਿਚ੍ਛਾਦੇਤ੍ਵਾ. ਯਥਾਕਾਮਨ੍ਤਿ ਇਚ੍ਛਾਨੁਰੂਪਂ. ਗਚ੍ਛਤੋਤਿ ਏਤ੍ਥ ‘‘ਅਨ੍ਤਰਘਰੇ’’ਤਿ ਸੇਸੋ. ਅਨ੍ਤਰਘਰਂ ਨਾਮ ਗਾਮੇ ਵਾ ਹੋਤੁ ਵਿਹਾਰੇ ਵਾ, ਪਚਿਤ੍ਵਾ ਭੁਞ੍ਜਿਤ੍ਵਾ ਗਿਹੀਨਂ ਵਸਨਟ੍ਠਾਨਂ.

ਤਤਿਯਂ.

੧੮੭੮-੯. ‘‘ਮਣਿਬਨ੍ਧਤੋ’’ਤਿ ਇਮਿਨਾਪਿ ‘‘ਹੇਟ੍ਠਾ’’ਤਿ ਯੋਜੇਤਬ੍ਬਂ. ਵਾਸੂਪਗਸ੍ਸਾਤਿ ਏਤ੍ਥ ‘‘ਕਾਯਂ ਵਿਵਰਿਤ੍ਵਾ ਨਿਸੀਦਤੋ’’ਤਿ ¶ ਸੇਸੋ. ਵਾਸੂਪਗੋ ਨਾਮ ਰਤ੍ਤਿਵਾਸਤ੍ਥਾਯ ਉਪਗਤੋ, ਏਤੇਨ ਵਾਸਤ੍ਥਾਯ ਅਨ੍ਤਰਘਰਂ ਉਪਗਚ੍ਛਨ੍ਤੇਨ ਸੁਪ੍ਪਟਿਚ੍ਛਨ੍ਨੇਨੇਵ ਉਪਗਨ੍ਤਬ੍ਬਨ੍ਤਿ ਦੀਪਿਤਂ ਹੋਤਿ, ਏਤੇਨੇਵ ਵਾਸੂਪਗਤਸ੍ਸ ਸਨ੍ਤਿਕਂ ਉਪਗਤਸ੍ਸ ਯਥਾਕਾਮਂ ਗਮਨੇ ਨ ਦੋਸੋਤਿ ਚ ਵੁਤ੍ਤਮੇਵ ਹੋਤਿ. ਤੇਨਾਹ ਗਣ੍ਠਿਪਦੇ ‘‘ਏਕਦਿਵਸਮ੍ਪਿ ਵਾਸੂਪਗਤਸ੍ਸ ਸਨ੍ਤਿਕਂ ਯਥਾਸੁਖਂ ਗਨ੍ਤੁਂ ਵਟ੍ਟਤਿ, ਕੋ ਪਨ ਵਾਦੋ ਚਤੁਪਞ੍ਚਾਹਂ ਵਾਸਮਧਿਟ੍ਠਾਯ ਵਸਿਤਭਿਕ੍ਖੂਨਂ ਸਨ੍ਤਿਕ’’ਨ੍ਤਿ.

ਚਤੁਤ੍ਥਂ.

੧੮੮੦. ਸੁਵਿਨੀਤੇਨਾਤਿ ਹਤ੍ਥਪਾਦਾਨਂ ਅਕੀਲ਼ਾਪਨੇਨੇਵ ਸੁਟ੍ਠੁ ਵਿਨੀਤੇਨ.

ਪਞ੍ਚਮਂ.

੧੮੮੧. ਗਾਥਾਬਨ੍ਧਵਸੇਨ ‘‘ਸਤੀਮਤਾ’’ਤਿ ਦੀਘੋ ਕਤੋ. ਅਵਿਕਾਰੇਨਾਤਿ ਤਂਤਦਵਲੋਕਾਸਹਿਤੇਨ ¶ . ਯੁਗਂ ਮਤ੍ਤਾ ਪਮਾਣਂ ਏਤਸ੍ਸਾਤਿ ਯੁਗਮਤ੍ਤਂ, ਰਥਯੁਗਂ ਚਤੁਹਤ੍ਥਪ੍ਪਮਾਣਂ, ਤਤ੍ਤਕਂ ਪਦੇਸਂ. ਪੇਕ੍ਖਿਨਾਤਿ ਓਲੋਕੇਨ੍ਤੇਨ. ‘‘ਭਿਕ੍ਖੁਨਾ ਓਕ੍ਖਿਤ੍ਤਚਕ੍ਖੁਨਾ’’ਤਿ ਪਦਚ੍ਛੇਦੋ.

੧੮੮੨. ਅਨ੍ਤਰਘਰੇ ਯਤ੍ਥ ਕਤ੍ਥਚਿਪਿ ਏਕਸ੍ਮਿਮ੍ਪਿ ਠਾਨੇ ਠਤ੍ਵਾਤਿ ਯੋਜਨਾ. ਏਵਂ ਵੁਤ੍ਤੇਪਿ ਤਥਾਰੂਪੇ ਅਨ੍ਤਰਾਯੇ ਸਤਿ ਗਚ੍ਛਤੋਪਿ ਓਲੋਕੇਤੁਂ ਲਬ੍ਭਤਿ. ਏਕਸ੍ਮਿਂ ਪਨ ਠਾਨੇ ਠਤ੍ਵਾਤਿ ਏਤ੍ਥ ਗਚ੍ਛਨ੍ਤੋਪਿ ਪਰਿਸ੍ਸਯਾਭਾਵਂ ਓਲੋਕੇਤੁਂ ਲਬ੍ਭਤਿਯੇਵ. ‘‘ਤਥਾ ਗਾਮੇ ਪੂਜ’’ਨ੍ਤਿ ਗਣ੍ਠਿਪਦੇਸੁ ਵੁਤ੍ਤਂ. ਪਿ-ਸਦ੍ਦੋ ਪਨ-ਸਦ੍ਦਤ੍ਥੋ, ਓਲੋਕੇਤੁਂ ਪਨ ਵਟ੍ਟਤੀਤਿ ਵੁਤ੍ਤਂ ਹੋਤਿ.

੧੮੮੩. ਓਲੋਕੇਨ੍ਤੋ ਤਹਂ ਤਹਨ੍ਤਿ ਯੋ ਅਨਾਦਰਿਯਂ ਪਟਿਚ੍ਚ ਤਂ ਤਂ ਦਿਸਾਭਾਗਂ ਪਾਸਾਦਂ ਕੂਟਾਗਾਰਂ ਵੀਥਿਂ ਓਲੋਕੇਨ੍ਤੋ.

ਸਤ੍ਤਮਂ.

੧੮੮੪. ਏਕਤੋ ¶ ਵਾਪੀਤਿ ਏਕਅਂਸਕੂਟਤੋ ਵਾ. ਉਭਤੋ ਵਾਪੀਤਿ ਉਭਯਂਸਕੂਟਤੋ ਵਾ. ਇਨ੍ਦਖੀਲਕਤੋ ਅਨ੍ਤੋਤਿ ਗਾਮਦ੍ਵਾਰਿਨ੍ਦਖੀਲਤੋ ਅਨ੍ਤੋ, ਘਰੇਤਿ ਵੁਤ੍ਤਂ ਹੋਤਿ.

ਨਵਮਂ.

੧੮੮੫. ਤਥਾ ਨਿਸਿਨ੍ਨਕਾਲੇਪੀਤਿ ਇਨ੍ਦਖੀਲਸ੍ਸ ਅਨ੍ਤੋ ਨਿਸਿਨ੍ਨਕਾਲੇਪਿ. ਕੁਣ੍ਡਿਕਂ ਨੀਹਰਨ੍ਤੇਨ ਚ ਚੀਵਰਂ ਅਨੁਕ੍ਖਿਪਿਤ੍ਵਾ ਦਾਤਬ੍ਬਾ ਕੁਣ੍ਡਿਕਾਤਿ ਯੋਜਨਾ. ਕੁਣ੍ਡਿਕਨ੍ਤਿ ਚ ਉਪਲਕ੍ਖਣਮਤ੍ਤਂ. ਧਮ੍ਮਕਰਣਾਦੀਸੁਪਿ ਏਸੇਵ ਨਯੋ.

ਦਸਮਂ.

ਪਠਮੋ ਵਗ੍ਗੋ.

੧੮੮੬. ਗਨ੍ਤੁਞ੍ਚੇਵ ਨਿਸੀਦਿਤੁਞ੍ਚ ਨ ਵਟ੍ਟਤੀਤਿ ਯੋਜਨਾ. ਚ-ਸਦ੍ਦੋ ਕਿਰਿਯਾਸਮੁਚ੍ਚਯੋ. ਹਸਨੀਯਸ੍ਮਿਂ ਵਤ੍ਥੁਸ੍ਮਿਨ੍ਤਿ ਹਾਸਜਨਕੇ ਕਾਰਣੇ. ਸਿਤਮਤ੍ਤਨ੍ਤਿ ਮਨ੍ਦਹਾਸਂ.

ਪਠਮਦੁਤਿਯਾਨਿ.

੧੮੮੭. ਅਪ੍ਪਸਦ੍ਦੇਨਾਤਿ ¶ ‘‘ਕਿਤ੍ਤਾਵਤਾ ਅਪ੍ਪਸਦ੍ਦੋ ਹੋਤਿ? ਦ੍ਵਾਦਸਹਤ੍ਥੇ ਗੇਹੇ ਆਦਿਮ੍ਹਿ ਸਙ੍ਘਤ੍ਥੇਰੋ, ਮਜ੍ਝੇ ਦੁਤਿਯਤ੍ਥੇਰੋ, ਅਨ੍ਤੇ ਤਤਿਯਤ੍ਥੇਰੋਤਿ ਏਵਂ ਨਿਸਿਨ੍ਨੇਸੁਯਂ ਸਙ੍ਘਤ੍ਥੇਰੋ ਦੁਤਿਯਤ੍ਥੇਰੇਨ ਸਦ੍ਧਿਂ ਮਨ੍ਤੇਤਿ, ਦੁਤਿਯਤ੍ਥੇਰੋ ਤਸ੍ਸ ਸਦ੍ਦਞ੍ਚੇਵ ਸੁਣਾਤਿ, ਕਥਞ੍ਚ ਵਵਤ੍ਥਪੇਤਿ. ਤਤਿਯਤ੍ਥੇਰੋ ਪਨ ਸਦ੍ਦਮੇਵ ਸੁਣਾਤਿ, ਕਥਂ ਨ ਵਵਤ੍ਥਪੇਤਿ. ਏਤ੍ਤਾਵਤਾ ਅਪ੍ਪਸਦ੍ਦੋ ਹੋਤੀ’’ਤਿ (ਪਾਚਿ. ੫੮੮) ਵੁਤ੍ਤਅਪ੍ਪਸਦ੍ਦਯੁਤ੍ਤੇਨ. ਸਚੇ ¶ ਪਨ ਤਤਿਯਤ੍ਥੇਰੋ ਕਥਞ੍ਚ ਵਵਤ੍ਥਪੇਤਿ, ਮਹਾਸਦ੍ਦੋ ਨਾਮ ਹੋਤੀਤਿ.

ਤਤਿਯਂ.

੧੮੮੮. ਕਾਯਪ੍ਪਚਾਲਕਂ ਕਤ੍ਵਾਤਿ ਕਾਯਂ ਚਾਲੇਤ੍ਵਾ ਚਾਲੇਤ੍ਵਾ. ਉਪਰਿਪਿ ਏਸੇਵ ਨਯੋ. ਹਤ੍ਥਸ੍ਸ ਵੁਤ੍ਤਲਕ੍ਖਣਤ੍ਤਾ ‘‘ਬਾਹੂ’’ਤਿ ਮਣਿਬਨ੍ਧਤੋ ਯਾਵ ਅਂਸਕੂਟਾ ਗਹੇਤਬ੍ਬਾ.

੧੮੮੯. ਉਜੁਂ ਪਗ੍ਗਹੇਤ੍ਵਾਤਿ ਉਜੁਂ ਠਪੇਤ੍ਵਾ. ਆਸਿਤਬ੍ਬਨ੍ਤਿ ਨਿਸੀਦਿਤਬ੍ਬਂ. ‘‘ਸਮੇਨ ਇਰਿਯਾਪਥੇਨ ਤੂ’’ਤਿ ਪਦਚ੍ਛੇਦੋ.

੧੮੯੦. ਇਤ੍ਥਮ੍ਭੂਤੇ ਕਰਣਵਚਨਂ. ਗਮਨਪਟਿਸਂਯੁਤ੍ਤੇਸੁ ਸਿਕ੍ਖਾਪਦੇਸੁ ਗਮਨਸ੍ਸ ਅਸਮ੍ਭਵੋਤਿ ਆਹ ‘‘ਨਿਸੀਦਨੇਨ ਯੁਤ੍ਤੇਸੂ’’ਤਿ.

ਪਞ੍ਚਮਛਟ੍ਠਸਤ੍ਤਮਟ੍ਠਮਨਵਮਾਨਿ.

ਦੁਤਿਯੋ ਵਗ੍ਗੋ.

੧੮੯੧. ਖਮ੍ਭਂ ਕਤ੍ਵਾਤਿ ਕਟਿਯਾ ਏਕਪਸ੍ਸੇ ਵਾ ਦ੍ਵੀਸੁ ਵਾ ਪਸ੍ਸੇਸੁ ਕਪ੍ਪਰਸਨ੍ਧਿਤੋ ਆਭੁਜਿਤ੍ਵਾ ਹਤ੍ਥਂ ਠਪੇਤ੍ਵਾ. ਯਥਾਹ – ‘‘ਖਮ੍ਭਕਤੋ ਨਾਮ ਕਟਿਯਂ ਹਤ੍ਥਂ ਠਪੇਤ੍ਵਾ ਕਤਖਮ੍ਭੋ’’ਤਿ (ਪਾਚਿ. ਅਟ੍ਠ. ੫੯੬). ਉਕ੍ਕੁਟਿਕਾਯ ਵਾ ਗਚ੍ਛਤੋਤਿ ਯੋਜਨਾ. ਉਕ੍ਕੁਟਿਕਾ ਵੁਚ੍ਚਤਿ ਪਣ੍ਹਿਯੋ ਉਕ੍ਖਿਪਿਤ੍ਵਾ ਅਗ੍ਗਪਾਦੇਹਿ ਵਾ ਅਗ੍ਗਪਾਦੇ ਉਕ੍ਖਿਪਿਤ੍ਵਾ ਪਣ੍ਹੀਹਿ ਏਵ ਵਾ ਭੂਮਿਂ ਫੁਸਨ੍ਤਸ੍ਸ ਗਮਨਂ.

੧੮੯੨. ਦੁਸ੍ਸਪਲ੍ਲਤ੍ਥਿਕਾਯਾਤਿ ਆਯੋਗਪਲ੍ਲਤ੍ਥਿਕਾਯ. ਅਨ੍ਤਰਘਰੇ ਨਿਸੀਦਨ੍ਤਸ੍ਸ ਤਸ੍ਸ ਦੁਕ੍ਕਟਂ ਹੋਤੀਤਿ ਯੋਜਨਾ.

੧੮੯੩. ਦੁਤਿਯੇ ¶ ਚਾਤਿ ‘‘ਨ ਖਮ੍ਭਕਤੋ ਅਨ੍ਤਰਘਰੇ ਨਿਸੀਦਿਸ੍ਸਾਮੀ’’ਤਿ (ਪਾਚਿ. ੫੯੭) ਸਿਕ੍ਖਾਪਦੇ ਚ. ਚਤੁਤ੍ਥੇ ਚਾਤਿ ‘‘ਨ ਓਗੁਣ੍ਠਿਤੋ ¶ ਅਨ੍ਤਰਘਰੇ ਨਿਸੀਦਿਸ੍ਸਾਮੀ’’ਤਿ (ਪਾਚਿ. ੫੯੯) ਸਿਕ੍ਖਾਪਦੇ ਚ. ਛਟ੍ਠੇਤਿ ‘‘ਨ ਪਲ੍ਲਤ੍ਥਿਕਾਯ ਅਨ੍ਤਰਘਰੇ’’ਇਚ੍ਚਾਦਿ (ਪਾਚਿ. ੬੦੧) ਸਿਕ੍ਖਾਪਦੇ ਚ. ਇਤਿ ਏਵਂ ਸਾਰੁਪ੍ਪਾ ਸਮਣਾਚਾਰਾਨੁਚ੍ਛਵਿਕਾ ਛਬ੍ਬੀਸਤਿ ਸਿਕ੍ਖਾਪਦਾਨਿ ਪਕਾਸਿਤਾਨਿ.

ਪਠਮਦੁਤਿਯਤਤਿਯਚਤੁਤ੍ਥਪਞ੍ਚਮਛਟ੍ਠਾਨਿ.

੧੮੯੪. ਵਿਞ੍ਞੁਨਾ ਭਿਕ੍ਖੁਨਾ ਸਕ੍ਕਚ੍ਚਂ ਸਤਿਯੁਤ੍ਤੇਨ, ਪਤ੍ਤਸਞ੍ਞਿਨਾ ਚ ਹੁਤ੍ਵਾ ਸਮਸੂਪੋਵ ਪਿਣ੍ਡਪਾਤੋ ਗਹੇਤਬ੍ਬੋਤਿ ਯੋਜਨਾ. ਏਵਂ ਏਤਾਯ ਗਾਥਾਯ ਸਿਕ੍ਖਾਪਦਤ੍ਤਯਂ ਸਙ੍ਗਹਿਤਂ. ਸਕ੍ਕਚ੍ਚਨ੍ਤਿ ਸਤਿਂ ਉਪਟ੍ਠਪੇਤ੍ਵਾ. ‘‘ਸਤਿਯੁਤ੍ਤੇਨਾ’’ਤਿ ਇਦਂ ‘‘ਸਕ੍ਕਚ੍ਚ’’ਨ੍ਤਿ ਏਤਸ੍ਸ ਅਤ੍ਥਪਦਂ. ‘‘ਸਤਿਂ ਉਪਟ੍ਠਪੇਤ੍ਵਾ’’ਤਿ (ਪਾਚਿ. ਅਟ੍ਠ. ੬੦੨) ਹਿ ਅਟ੍ਠਕਥਾਯਂ ਵੁਤ੍ਤਂ. ਪਤ੍ਤੇ ਸਞ੍ਞਾ ਪਤ੍ਤਸਞ੍ਞਾ, ਸਾ ਅਸ੍ਸ ਅਤ੍ਥੀਤਿ ਪਤ੍ਤਸਞ੍ਞੀ, ਅਨਞ੍ਞਵਿਹਿਤੇਨ ਅਤ੍ਤਨੋ ਭਾਜਨੇਯੇਵ ਉਪਨਿਬਦ੍ਧਸਞ੍ਞਿਨਾਤਿ ਅਤ੍ਥੋ.

੧੮੯੫. ਭਤ੍ਤਚਤੁਬ੍ਭਾਗੋਤਿ ਭਤ੍ਤਸ੍ਸ ਚਤੁਬ੍ਭਾਗਪ੍ਪਮਾਣੋ. ਤਤੋ ਅਧਿਕਂ ਗਣ੍ਹਤੋ ਦੁਕ੍ਕਟਂ.

੧੮੯੬. ‘‘ਰਸਰਸੇ’’ਤਿ ਵਤ੍ਤਬ੍ਬੇ ‘‘ਰਸੇਰਸੇ’’ਤਿ ਗਾਥਾਬਨ੍ਧਵਸੇਨ ਵੁਤ੍ਤਂ. ਦ੍ਵੇ ਸੂਪੇ ਠਪੇਤ੍ਵਾ ਅਵਸੇਸਾਨਿ ਓਲੋਣਿਸਾਕਸੂਪੇਯ੍ਯਮਚ੍ਛਰਸਮਂਸਰਸਾਦੀਨਿ ਰਸਰਸਾਤਿ ਵੇਦਿਤਬ੍ਬਾਨਿ. ਏਤ੍ਥ ਚ ‘‘ਓਲੋਣੀਤਿ ਦਧਿਕਤਂ ਗੋਰਸ’’ਨ੍ਤਿ ਕੇਚਿ. ‘‘ਏਕਾ ਬ੍ਯਞ੍ਜਨਵਿਕਤੀ’’ਤਿ ਅਪਰੇ. ‘‘ਯੋ ਕੋਚਿ ਸੁਦ੍ਧੋ ਕਞ੍ਜਿਕਤਕ੍ਕਾਦਿਰਸੋ’’ਤਿ ਅਞ੍ਞੇ. ਸਾਕਸੂਪੇਯ੍ਯਗ੍ਗਹਣੇਨ ਯਾ ਕਾਚਿ ਸੂਪੇਯ੍ਯਸਾਕੇਹਿ ਕਤਾ ਬ੍ਯਞ੍ਜਨਵਿਕਤਿ ਵੁਤ੍ਤਾ. ਮਂਸਰਸਾਦੀਨੀਤਿ ਆਦਿ-ਸਦ੍ਦੇਨ ਅਵਸੇਸਾ ਸਬ੍ਬਾਪਿ ਬ੍ਯਞ੍ਜਨਵਿਕਤਿ ਸਙ੍ਗਹਿਤਾਤਿ ਦਟ੍ਠਬ੍ਬਂ. ਞਾਤਕਾਦੀਨਨ੍ਤਿ ਏਤ੍ਥ ‘‘ਸਨ੍ਤਕਂ ਗਣ੍ਹਨ੍ਤਸ੍ਸਾ’’ਤਿ ਸੇਸੋ. ਅਞ੍ਞਤ੍ਥਾਯਾਤਿ ਏਤ੍ਥ ‘‘ਕਤਂ ਗਣ੍ਹਨ੍ਤਸ੍ਸਾ’’ਤਿ ਸੇਸੋ. ਧਨੇਨਾਤਿ ਏਤ੍ਥ ‘‘ਅਤ੍ਤਨੋ’’ਤਿ ਚ ¶ ‘‘ਕੀਤ’’ਨ੍ਤਿ ਚ ‘‘ਗਣ੍ਹਨ੍ਤਸ੍ਸਾ’’ਤਿ ਚ ਸੇਸੋ. ਞਾਤਕਾਦੀਨਂ ਸਨ੍ਤਕਂ ਗਣ੍ਹਨ੍ਤਸ੍ਸ, ਅਞ੍ਞਤ੍ਥਾਯ ਕਤਂ ਗਣ੍ਹਨ੍ਤਸ੍ਸ, ਅਤ੍ਤਨੋ ਧਨੇਨ ਕੀਤਂ ਗਣ੍ਹਨ੍ਤਸ੍ਸ ਅਨਾਪਤ੍ਤੀਤਿ ਅਤ੍ਥੋ.

ਸਤ੍ਤਮਟ੍ਠਮਨਵਮਾਨਿ.

੧੮੯੭. ਅਧਿਟ੍ਠਾਨੂਪਗਸ੍ਸ ¶ ਪਤ੍ਤਸ੍ਸ ਮੁਖਵਟ੍ਟਿਯਾ ਅਨ੍ਤੋਲੇਖਾਪਮਾਣੇਨ ਪੂਰਿਤੋਵ ਗਹੇਤਬ੍ਬੋਤਿ ਯੋਜਨਾ.

੧੮੯੮. ਅਨਾਪਤ੍ਤਿਵਿਸਯਂ ਦਸ੍ਸੇਤ੍ਵਾ ਆਪਤ੍ਤਿਵਿਸਯਂ ਦਸ੍ਸੇਤੁਮਾਹ ‘‘ਤਤ੍ਥਾ’’ਤਿਆਦਿ. ਤਤ੍ਥਾਤਿ ਅਧਿਟ੍ਠਾਨੂਪਗੇ ਪਤ੍ਤੇ. ਥੂਪੀਕਤਂ ਕਤ੍ਵਾਤਿ ਏਤ੍ਥ ‘‘ਦਿਯ੍ਯਮਾਨ’’ਨ੍ਤਿ ਸੇਸੋ. ਯਥਾਵੁਤ੍ਤਲੇਖਾਤਿਕ੍ਕਮੋ ਯਥਾ ਹੋਤਿ, ਏਵਂ ਥੂਪੀਕਤਂ ਦਿਯ੍ਯਮਾਨਂ ਗਣ੍ਹਤੋ ਆਪਤ੍ਤਿ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਇਮਿਨਾ ਪਠਮਂ ਥੂਪੀਕਤਸ੍ਸ ਅਧਿਟ੍ਠਾਨੂਪਗਪਤ੍ਤਸ੍ਸ ਪਚ੍ਛਾ ਪਟਿਗ੍ਗਹਣਞ੍ਚ ਪਠਮਪਟਿਗ੍ਗਹਿਤਪਤ੍ਤੇ ਪਚ੍ਛਾ ਭੋਜਨਸ੍ਸ ਥੂਪੀਕਤਸ੍ਸ ਪਟਿਗ੍ਗਹਣਞ੍ਚ ਨਿਵਾਰਿਤਨ੍ਤਿ ਵੇਦਿਤਬ੍ਬਂ.

੧੮੯੯. ਕਾਲਿਕਤ੍ਤਯਮੇਵ ਚ ਥੂਪੀਕਤਂ ਵਟ੍ਟਤੇਵਾਤਿ ਯੋਜਨਾ. ਸੇਸੇਤਿ ਅਨਧਿਟ੍ਠਾਨੂਪਗੇ ਪਤ੍ਤੇ. ਸਬ੍ਬਨ੍ਤਿ ਚਤੁਬ੍ਬਿਧਂ ਕਾਲਿਕਂ ਥੂਪੀਕਤਂ ਵਟ੍ਟਤੀਤਿ ਯੋਜਨਾ.

੧੯੦੦. ਪੇਸੇਤੀਤਿ ਏਤ੍ਥ ‘‘ਭਿਕ੍ਖੂ’’ਤਿ ਸੇਸੋ. ਭਿਕ੍ਖੁ ਭਿਕ੍ਖੂਨਂ ਯਦਿ ਪੇਸੇਤੀਤਿ ਯੋਜਨਾ. ‘‘ਵਿਹਾਰਂ ਪੇਸੇਤੁਂ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੬੦੫) ਅਟ੍ਠਕਥਾਯ ਅਧਿਪ੍ਪਾਯਂ ਦਸ੍ਸੇਤੁਂ ‘‘ਭਿਕ੍ਖੂਨ’’ਨ੍ਤਿ ਵਚਨੇਨ ਪਟਿਗ੍ਗਹਣਂ ਅਵਿਜਹਿਤ੍ਵਾ ਭਿਕ੍ਖੁਨਾ ਏਵ ਪੇਸਿਤਂ ਗਣ੍ਹਨ੍ਤਾਨਂ ਭਿਕ੍ਖੂਨਂ ਅਨਾਪਤ੍ਤੀਤਿ ਦੀਪਿਤਂ ਹੋਤਿ. ਅਞ੍ਞਥਾ ‘‘ਪੂਰੇਤੁਂ ਵਟ੍ਟਤੀ’’ਤਿ ਏਤ੍ਤਕਮੇਵ ਵਤ੍ਤਬ੍ਬਨ੍ਤਿ ਵਿਞ੍ਞਾਯਤਿ.

੧੯੦੧. ਪਕ੍ਖਿਪ੍ਪਮਾਨਨ੍ਤਿ ਮੁਖਵਟ੍ਟਿਤੋ ਉਚ੍ਚਂ ਕਤ੍ਵਾ ਮਜ੍ਝੇ ਪਕ੍ਖਿਪਿਯਮਾਨਂ. ਫਲਾਦਿਕਨ੍ਤਿ ਆਦਿ-ਸਦ੍ਦੇਨ ਓਦਨਾਦਿਮ੍ਪਿ ਸਙ੍ਗਣ੍ਹਾਤਿ. ਹੇਟ੍ਠਾ ¶ ਓਰੋਹਤੀਤਿ ਸਮਨ੍ਤਾ ਓਕਾਸਸਮ੍ਭਵਤੋ ਚਾਲਿਯਮਾਨਂ ਮੁਖਵਟ੍ਟਿਪ੍ਪਮਾਣਤੋ ਹੇਟ੍ਠਾ ਭਸ੍ਸਤਿ.

੧੯੦੨. ਤਕ੍ਕੋਲਕਾਦੀਨਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਪੂਗਫਲਾਦੀਨਂ ਸਙ੍ਗਹੋ. ਠਪੇਤ੍ਵਾਤਿ ਭਤ੍ਤਮਤ੍ਥਕੇ ਨਿਕ੍ਖਿਪਿਤ੍ਵਾ. ਵਟਂਸਕਨ੍ਤਿ ਅਵਟਂਸਕਂ.

੧੯੦੩. ਪੂਵਸ੍ਸਾਤਿ ਵਿਕਾਰਸਮ੍ਬਨ੍ਧੇ ਸਾਮਿਵਚਨਂ, ਪੂਵਵਟਂਸਕਨ੍ਤਿ ਵੁਤ੍ਤਂ ਹੋਤਿ. ਪੂਵਸ੍ਸ ਯਾਵਕਾਲਿਕਤ੍ਤਾ ਆਹ ‘‘ਇਦਂ ਥੂਪੀਕਤਂ ਸਿਯਾ’’ਤਿ.

੧੯੦੪. ਪਣ੍ਣਾਨਂ ਵਿਸੁਂ ਭਾਜਨਤ੍ਤਾ ਆਹ ‘‘ਵਟ੍ਟਤੀ’’ਤਿ.

੧੯੦੫. ਅਸ੍ਸਾਤਿ ¶ ਭਿਕ੍ਖੁਸ੍ਸ. ਤਂ ਤੁ ਸਬ੍ਬਨ੍ਤਿ ‘‘ਥੂਪੀਕਤਤ੍ਤਾ ਨ ਵਟ੍ਟਤੀ’’ਤਿ ਵੁਤ੍ਤਂ ਤਂ ਪਨ ਸਬ੍ਬਂ. ਗਹਿਤਂ ਸੁਗਹਿਤਨ੍ਤਿ ਵਿਰਾਧੇਤ੍ਵਾ ਪਟਿਗ੍ਗਹਿਤਂ ਚੇ, ਸੁਪ੍ਪਟਿਗ੍ਗਹਿਤਂ.

ਦਸਮਂ.

ਤਤਿਯੋ ਵਗ੍ਗੋ.

੧੯੦੬. ‘‘ਉਪਰਿ ਓਧਿ’’ਨ੍ਤਿ ਪਦਚ੍ਛੇਦੋ. ਉਪਰੀਤਿ ਭਤ੍ਤਸ੍ਸ ਉਪਰਿ. ਓਧਿਨ੍ਤਿ ਪਰਿਚ੍ਛੇਦਂ. ਪਟਿਪਾਟਿਯਾਤਿ ਅਤ੍ਤਨੋ ਦਿਸਾਯ ਪਰਿਯਨ੍ਤਤੋ ਪਟ੍ਠਾਯ ਅਨੁਕ੍ਕਮੇਨ.

੧੯੦੭. ਅਞ੍ਞੇਸਨ੍ਤਿ ਏਤ੍ਥ ‘‘ਦੇਨ੍ਤੋ’’ਤਿ ਸੇਸੋ. ਅਤ੍ਤਨੋ ਭਤ੍ਤਂ ਅਞ੍ਞੇਸਂ ਦੇਨ੍ਤੋ ਅਞ੍ਞਸ੍ਸ ਭਾਜਨੇ ਆਕਿਰਂ ਆਕਿਰਨ੍ਤੋ ਪਨ ਪਟਿਪਾਟਿਂ ਵਿਨਾਪਿ ਤਹਿਂ ਤਹਿਂ ਓਮਸਤਿ ਚੇ, ਨਤ੍ਥਿ ਦੋਸੋਤਿ ਯੋਜਨਾ. ਉਤ੍ਤਰਿਭਙ੍ਗਕਂ ਤਥਾ ਆਕਿਰਨ੍ਤੋ ਤਤ੍ਥ ਤਤ੍ਥ ਓਮਸਤਿ, ਨਤ੍ਥਿ ਦੋਸੋਤਿ ਯੋਜਨਾ ¶ . ਭੁਞ੍ਜਨਤ੍ਥਾਯ ਗਣ੍ਹਨ੍ਤੋਪਿ ਚੇਤ੍ਥ ਵਤ੍ਤਬ੍ਬੋ. ਉਤ੍ਤਰਿਭਙ੍ਗਂ ਨਾਮ ਬ੍ਯਞ੍ਜਨਂ.

ਤਤਿਯਂ.

੧੯੦੮. ਮਤ੍ਥਕਂ ਓਮਦ੍ਦਿਤ੍ਵਾ ਪਰਿਭੁਞ੍ਜਤੋ ਦੋਸੋਤਿ ਯੋਜਨਾ. ‘‘ਥੂਪਕਤੋਤਿ ਮਤ੍ਥਕਤੋ, ਵੇਮਜ੍ਝਤੋ’’ਤਿ (ਪਾਚਿ. ਅਟ੍ਠ. ੬੧੦) ਅਟ੍ਠਕਥਾਵਚਨਤੋ ਮਤ੍ਥਕਨ੍ਤਿ ਏਤ੍ਥ ਭਤ੍ਤਮਤ੍ਥਕਮਾਹ. ਓਮਦ੍ਦਿਤ੍ਵਾਤਿ ਹਤ੍ਥੇਨ ਭਤ੍ਤਂ ਅਵਮਦ੍ਦਿਤ੍ਵਾ.

੧੯੦੯. ਸੇਸਕੇ ਪਰਿਤ੍ਤੇਪਿ ਚਾਤਿ ਅਵਸਿਟ੍ਠੇ ਅਪ੍ਪਕੇਪਿ ਚ. ਸਂਕਡ੍ਢਿਤ੍ਵਾਨਾਤਿ ਤਸ੍ਮਿਂ ਤਸ੍ਮਿਂ ਠਾਨੇ ਠਿਤਂ ਸਂਹਰਿਤ੍ਵਾ. ਏਕਤੋ ਪਨ ਮਦ੍ਦਿਤ੍ਵਾ ਭੁਞ੍ਜਤੋ ਅਨਾਪਤ੍ਤੀਤਿ ਯੋਜਨਾ.

ਪਞ੍ਚਮਂ.

੧੯੧੦. ਭਿਯ੍ਯੋਕਮ੍ਯਤਾਹੇਤੂਤਿ ਪੁਨ ਗਣ੍ਹਿਤੁਕਾਮਤਾਹੇਤੁ. ਸੂਪਂ ਵਾਤਿ ਮੁਗ੍ਗਾਦਿਸੂਪਂ ਵਾ. ਬ੍ਯਞ੍ਜਨਂ ਵਾਤਿ ਉਤ੍ਤਰਿਭਙ੍ਗਂ ਵਾ.

ਛਟ੍ਠਂ.

੧੯੧੧. ਵਿਞ੍ਞਤ੍ਤਿਯਨ੍ਤਿ ¶ ਸੂਪੋਦਨਵਿਞ੍ਞਤ੍ਤਿਯਂ. ‘‘ਞਾਤਕਾਨਂ ਵਾ ਪਵਾਰਿਤਾਨਂ ਵਾ ਅਞ੍ਞਸ੍ਸ ਅਤ੍ਥਾਯ ਵਾ ਅਤ੍ਤਨੋ ਧਨੇਨ ਵਾ’’ਤਿ ਇਦਂ ਅਨਾਪਤ੍ਤਿਯਂ ਅਧਿਕਂ. ਗਿਲਾਨੋਪਿ ਹੁਤ੍ਵਾ ਪਰੇਸਂ ਪਤ੍ਤਂ ਉਜ੍ਝਾਨਸਞ੍ਞਾਯ ਓਲੋਕੇਨ੍ਤਸ੍ਸ ਆਪਤ੍ਤਿ ਹੋਤੀਤਿ ਆਹ ‘‘ਉਜ੍ਝਾਨੇ ਗਿਲਾਨੋਪਿ ਨ ਮੁਚ੍ਚਤੀ’’ਤਿ. ਉਜ੍ਝਾਨੇਤਿ ਨਿਮਿਤ੍ਤਤ੍ਥੇ ਭੁਮ੍ਮਂ.

੧੯੧੨. ਦਸ੍ਸਾਮੀਤਿ ਇਮਸ੍ਸ ਭਤ੍ਤਂ ਓਲੋਕੇਤ੍ਵਾ ‘‘ਯਂ ਤਤ੍ਥ ਨਤ੍ਥਿ, ਤਂ ਦਸ੍ਸਾਮੀ’’ਤਿ ਵਾ ‘‘ਦਾਪੇਸ੍ਸਾਮੀ’’ਤਿ ਵਾ. ਅਵਮਞ੍ਞਿਤ੍ਵਾ ਉਜ੍ਝਾਯਨਚਿਤ੍ਤਂ ਉਜ੍ਝਾਨਂ, ਉਜ੍ਝਾਨੇ ਸਞ੍ਞਾ ਉਜ੍ਝਾਨਸਞ੍ਞਾ, ਸਾ ¶ ਅਸ੍ਸ ਅਤ੍ਥੀਤਿ ਵਿਗ੍ਗਹੋ. ਨਉਜ੍ਝਾਨਸਞ੍ਞਿਨੋ ਚ ਅਨਾਪਤ੍ਤੀਤਿ ਞਾਤਬ੍ਬਨ੍ਤਿ ਯੋਜਨਾ.

ਸਤ੍ਤਮਟ੍ਠਮਾਨਿ.

੧੯੧੩. ‘‘ਤੇਸਂ ਮਜ੍ਝਪ੍ਪਮਾਣੇਨਾ’’ਤਿ ਇਮਿਨਾ ਅਸਾਰੁਪ੍ਪਵਸੇਨ ਖੁਦ੍ਦਕਪਟਿਕ੍ਖੇਪੋ ਕਤੋਤਿ ਵੇਦਿਤਬ੍ਬੋ. ‘‘ਨਾਤਿਮਹਨ੍ਤ’’ਨ੍ਤਿ ਚ ਅਤਿਮਹਨ੍ਤਸ੍ਸੇਵ ਪਟਿਕ੍ਖਿਤ੍ਤਤ੍ਤਾ ਖੁਦ੍ਦਕੇ ਆਪਤ੍ਤਿ ਨ ਦਿਸ੍ਸਤੀਤਿ. ਕਬਲ਼ੋਤਿ ਆਲੋਪੋ.

੧੯੧੪. ਮੂਲਖਾਦਨੀਯਾਦਿਕੇ ਸਬ੍ਬਤ੍ਥ ਖਜ੍ਜਕੇ ਪਨਾਤਿ ਯੋਜਨਾ. ਫਲਾਫਲੇਤਿ ਖੁਦ੍ਦਕੇ, ਮਹਨ੍ਤੇ ਚ ਫਲੇ.

ਨਵਮਂ.

੧੯੧੫. ਦਸਮੇ ਨਤ੍ਥਿ ਕਿਞ੍ਚਿ ਵਤ੍ਤਬ੍ਬਂ.

ਦਸਮਂ.

ਚਤੁਤ੍ਥੋ ਵਗ੍ਗੋ.

੧੯੧੬. ‘‘ਅਨਾਹਟੇ’’ਤਿ ਏਤਸ੍ਸ ਅਤ੍ਥਪਦਂ ‘‘ਮੁਖਦ੍ਵਾਰਂ ਅਪ੍ਪਤ੍ਤੇ’’ਤਿ. ਯਥਾਹ ‘‘ਅਨਾਹਟੇਤਿ ਅਨਾਹਰਿਤੇ, ਮੁਖਦ੍ਵਾਰਂ ਅਸਮ੍ਪਾਪਿਤੇਤਿ ਅਤ੍ਥੋ’’ਤਿ (ਪਾਚਿ. ਅਟ੍ਠ. ੬੧੭). ‘‘ਮੁਖਦ੍ਵਾਰਂ ਵਿਵਰਨ੍ਤਸ੍ਸਾ’’ਤਿ ਏਤ੍ਤਕੇ ਵੁਤ੍ਤੇ ਮੁਖਦ੍ਵਾਰ-ਸਦ੍ਦਸ੍ਸ ਸਮ੍ਬਨ੍ਧਿਸਦ੍ਦਤ੍ਤਾ ਕਸ੍ਸਾਤਿ ਅਪੇਕ੍ਖਾਯ ‘‘ਮੁਖਦ੍ਵਾਰਂ ਵਿਵਰਿਸ੍ਸਾਮੀ’’ਤਿ ¶ ਅਤ੍ਤਨੋਪਦੇਕਵਚਨੇਨ ਬ੍ਯਞ੍ਜਿਤਮੇਵਤ੍ਥਂ ਪਕਾਸੇਤੁਂ ਅਤ੍ਤਨੋ-ਗਹਣਂ ਕਤਨ੍ਤਿ ਵੇਦਿਤਬ੍ਬਂ. ਚ-ਸਦ੍ਦੋ ਏਵਕਾਰਤ੍ਥੋ, ਅਪ੍ਪਤ੍ਤੇ ਵਾਤਿ ਯੋਜੇਤਬ੍ਬੋ, ਅਸਮ੍ਪਤ੍ਤੇਯੇਵਾਤਿ ਅਤ੍ਥੋ.

ਪਠਮਂ.

੧੯੧੭. ਸਕਲਂ ¶ ਹਤ੍ਥਨ੍ਤਿ ਏਤ੍ਥ ਹਤ੍ਥ-ਸਦ੍ਦੋ ਤਦੇਕਦੇਸੇਸੁ ਅਙ੍ਗੁਲੀਸੁ ਦਟ੍ਠਬ੍ਬੋ. ‘‘ਹਤ੍ਥਮੁਦ੍ਦਾ’’ਤਿਆਦੀਸੁ ਵਿਯ ਸਮੁਦਾਯੇ ਪਵਤ੍ਤਵੋਹਾਰਸ੍ਸ ਅਵਯਵੇਪਿ ਪਵਤ੍ਤਨਤੋ ਏਕਙ੍ਗੁਲਿਮ੍ਪਿ ਮੁਖੇ ਪਕ੍ਖਿਪਿਤੁਂ ਨ ਵਟ੍ਟਤਿ.

੧੯੧੮. ਅਸ੍ਸਾਤਿ ਭਿਕ੍ਖੁਨੋ. ਬ੍ਯਾਹਰਨ੍ਤਸ੍ਸਾਤਿ ਕਥੇਨ੍ਤਸ੍ਸ.

ਦੁਤਿਯਤਤਿਯਾਨਿ.

੧੯੨੦. ਪਿਣ੍ਡੁਕ੍ਖੇਪਕਨ੍ਤਿ ਪਿਣ੍ਡਂ ਉਕ੍ਖਿਪਿਤ੍ਵਾ ਉਕ੍ਖਿਪਿਤ੍ਵਾ. ਇਧਾਪਿ ਖਜ੍ਜਕਫਲਾਫਲੇਸੁ ਅਨਾਪਤ੍ਤਿ. ਕਬਲ਼ਚ੍ਛੇਦਕਮ੍ਪਿ ਵਾਤਿ ਕਬਲ਼ਂ ਛਿਨ੍ਦਿਤ੍ਵਾ. ਇਧ ਖਜ੍ਜਕਫਲਾਫਲੇਹਿ ਸਦ੍ਧਿਂ ਉਤ੍ਤਰਿਭਙ੍ਗੇਪਿ ਅਨਾਪਤ੍ਤਿ. ਗਣ੍ਡੇ ਕਤ੍ਵਾਤਿ ਏਤ੍ਥ ਫਲਾਫਲਮਤ੍ਤੇਯੇਵ ਅਨਾਪਤ੍ਤਿ.

ਚਤੁਤ੍ਥਪਞ੍ਚਮਛਟ੍ਠਾਨਿ.

੧੯੨੧-੨. ਹਤ੍ਥਂ ਨਿਦ੍ਧੁਨਿਤ੍ਵਾਨਾਤਿ ਹਤ੍ਥਂ ਨਿਦ੍ਧੁਨਿਤ੍ਵਾ ਭਤ੍ਤਂ ਭੁਞ੍ਜਤੋਤਿ ਚ ਸਮ੍ਬਨ੍ਧੋ. ਸਿਤ੍ਥਾਵਕਾਰਕਨ੍ਤਿ ਸਿਤ੍ਥਾਨਿ ਅਵਕਿਰਿਤ੍ਵਾ ਅਵਕਿਰਿਤ੍ਵਾ. ਜਿਵ੍ਹਾਨਿਚ੍ਛਾਰਕਂ ਵਾਪੀਤਿ ਜਿਵ੍ਹਂ ਨਿਚ੍ਛਾਰੇਤ੍ਵਾ ਨਿਚ੍ਛਾਰੇਤ੍ਵਾ. ਚਪੁ ਚਪੂਤਿ ਵਾਤਿ ‘‘ਚਪੁ ਚਪੂ’’ਤਿ ਏਵਂ ਸਦ੍ਦਂ ਕਤ੍ਵਾ. ਸਤ੍ਤਮੇਤਿ ‘‘ਨ ਹਤ੍ਥਨਿਦ੍ਧੁਨਕ’’ਨ੍ਤਿ ਸਿਕ੍ਖਾਪਦੇ. ਅਟ੍ਠਮੇਤਿ ‘‘ਨ ਸਿਤ੍ਥਾਵਕਾਰਕ’’ਨ੍ਤਿ ਸਿਕ੍ਖਾਪਦੇ. ਕਚਵਰੁਜ੍ਝਨੇਤਿ ਕਚਵਰਾਪਨਯਨੇ.

ਸਤ੍ਤਮਟ੍ਠਮਨਵਮਦਸਮਾਨਿ.

ਪਞ੍ਚਮੋ ਵਗ੍ਗੋ.

੧੯੨੩. ‘‘ਸੁਰੁ ¶ ਸੁਰੂ’’ਤਿ ਏਵਂ ਸਦ੍ਦਂ ਕਤ੍ਵਾ ਨ ਭੋਤ੍ਤਬ੍ਬਨ੍ਤਿ ਯੋਜਨਾ. ਹਤ੍ਥਨਿਲ੍ਲੇਹਕਂ ਵਾਪੀਤਿ ਹਤ੍ਥਂ ਨਿਲ੍ਲੇਹਿਤ੍ਵਾ ਨਿਲ੍ਲੇਹਿਤ੍ਵਾ.

੧੯੨੪. ਫਾਣਿਤਂ ¶ , ਘਨਯਾਗੁਂ ਵਾ ਅਙ੍ਗੁਲੀਹਿ ਗਹੇਤ੍ਵਾ ਅਙ੍ਗੁਲਿਯੋ ਮੁਖੇ ਪਵੇਸੇਤ੍ਵਾਪਿ ਤਂ ਭੋਤ੍ਤੁਂ ਵਟ੍ਟਤੀਤਿ ਯੋਜਨਾ.

੧੯੨੫. ਏਕਾਯ ਅਙ੍ਗੁਲਿਕਾਯਪਿ ਪਤ੍ਤੋ ਨ ਲੇਹਿਤਬ੍ਬੋਵ. ਜਿਵ੍ਹਾਯ ਏਕਓਟ੍ਠੋਪਿ ਨ ਨਿਲ੍ਲੇਹਿਤਬ੍ਬਕੋਤਿ ਯੋਜਨਾ. ਬਹਿ ਓਟ੍ਠਞ੍ਚ ਜਿਵ੍ਹਾਯ ਨ ਲੇਹਿਤਬ੍ਬਂ. ਓਟ੍ਠੇ ਲਗ੍ਗਂ ਸਿਤ੍ਥਾਦਿਂ ਯਂ ਕਿਞ੍ਚਿ ਉਭੋਹਿ ਓਟ੍ਠਮਂਸੇਹਿਯੇਵ ਗਹੇਤ੍ਵਾ ਅਨ੍ਤੋ ਕਾਤੁਂ ਵਟ੍ਟਤਿ.

ਪਠਮਦੁਤਿਯਤਤਿਯਚਤੁਤ੍ਥਾਨਿ.

੧੯੨੬-੮. ਨ ਚ ਗਹੇਤਬ੍ਬਂ, ਪਟਿਕ੍ਕੂਲਵਸੇਨ ਪਟਿਕ੍ਖਿਤ੍ਤਨ੍ਤਿ ਯੋਜਨਾ. ਹਿ-ਇਤਿ ‘‘ਯਸ੍ਮਾ’’ਤਿ ਏਤਸ੍ਸ ਅਤ੍ਥੇ, ਤੇਨੇਵ ਵਕ੍ਖਤਿ ‘‘ਤਸ੍ਮਾ’’ਤਿ. ‘‘ਪਾਨੀਯਥਾਲਕ’’ਨ੍ਤਿ ਇਦਂ ਉਪਲਕ੍ਖਣਮਤ੍ਤਂ ਸਙ੍ਖਾਦੀਨਮ੍ਪਿ ਤਥਾ ਨਗਹੇਤਬ੍ਬਤ੍ਤਾ. ਸਰਾਵਂ ਵਾਤਿ ਤਟ੍ਟਕਂ ਵਾ.

ਅਨਾਮਿਸੇਨ ਹਤ੍ਥੇਨਾਤਿ ਆਮਿਸਰਹਿਤੇਨ ਹਤ੍ਥੇਕਦੇਸੇਨ. ਯਥਾਹ ‘‘ਸਚੇ ਪਨ ਹਤ੍ਥਸ੍ਸ

ਏਕਦੇਸੋ ਆਮਿਸਮਕ੍ਖਿਤੋ ਨ ਹੋਤਿ, ਤੇਨ ਪਦੇਸੇਨ ਗਹੇਤੁਂ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੬੩੧). ਆਮਿਸਮਕ੍ਖਿਤੇਨੇਵ ਹਤ੍ਥੇਨ ‘‘ਧੋਵਿਸ੍ਸਾਮੀ’’ਤਿ ਵਾ ‘‘ਧੋਵਾਪੇਸ੍ਸਾਮੀ’’ਤਿ ਵਾ ਗਣ੍ਹਨ੍ਤਸ੍ਸ ਪਨ ਅਨਾਪਤ੍ਤਿ.

ਪਞ੍ਚਮਂ.

੧੯੨੯. ਉਦ੍ਧਰਿਤ੍ਵਾਤਿ ਸਸਿਤ੍ਥਕਾ ਪਤ੍ਤਧੋਵਨਾ ਸਿਤ੍ਥਕਾਨਿ ਉਦ੍ਧਰਿਤ੍ਵਾ ਤਂ ਪਤ੍ਤਧੋਵਨੋਦਕਂ ਘਰਾ ਬਹਿ ਅਨ੍ਤਰਘਰੇ ਛਡ੍ਡੇਨ੍ਤਸ੍ਸ ਅਨਾਪਤ੍ਤਿ. ਭਿਨ੍ਦਿਤ੍ਵਾਤਿ ਸਸਿਤ੍ਥਕੇ ਪਤ੍ਤਧੋਵਨੇ ਸਿਤ੍ਥਕਾਨਿ ਮਦ੍ਦਿਤ੍ਵਾ ਉਦਕੇਨ ਸਮ੍ਭਿਨ੍ਦਿਤ੍ਵਾ ਉਦਕਗਤਿਕਾਨੇਵ ਕਤ੍ਵਾ ਤਂ ਉਦਕਂ ਘਰਾ ਬਹਿ ਅਨ੍ਤਰਘਰੇ ਛਡ੍ਡੇਨ੍ਤਸ੍ਸ ਅਨਾਪਤ੍ਤਿ. ਗਹੇਤ੍ਵਾਤਿ ਸਸਿਤ੍ਥਕਂ ਪਤ੍ਤਧੋਵਨੋਦਕਂ ਗਹੇਤ੍ਵਾ ਪਟਿਗ੍ਗਹੇ ਛਡ੍ਡੇਨ੍ਤਸ੍ਸ ਅਨਾਪਤ੍ਤਿ. ਸਸਿਤ੍ਥਕਂ ਪਤ੍ਤਧੋਵਨੋਦਕਂ ਘਰਾ ¶ ਬਹਿ ਨੀਹਰਿਤ੍ਵਾ ਅਨ੍ਤਰਘਰੇ ਛਡ੍ਡੇਨ੍ਤਸ੍ਸ ਅਨਾਪਤ੍ਤੀਤਿ ਅਜ੍ਝਾਹਾਰਯੋਜਨਾ ¶ ਵੇਦਿਤਬ੍ਬਾ. ਏਤ੍ਥ ਪਟਿਗ੍ਗਹੋ ਨਾਮ ਖੇਲ਼ਮਲ੍ਲਾਦਿਕੋ ਉਚ੍ਛਿਟ੍ਠਹਤ੍ਥਧੋਵਨਭਾਜਨਵਿਸੇਸੋ.

ਛਟ੍ਠਂ.

੧੯੩੦. ਛਤ੍ਤਂ ਯਂ ਕਿਞ੍ਚੀਤਿ ‘‘ਛਤ੍ਤਂ ਨਾਮ ਤੀਣਿ ਛਤ੍ਤਾਨਿ ਸੇਤਚ੍ਛਤ੍ਤਂ ਕਿਲਞ੍ਜਚ੍ਛਤ੍ਤਂ ਪਣ੍ਣਚ੍ਛਤ੍ਤਂ ਮਣ੍ਡਲਬਦ੍ਧਂ ਸਲਾਕਬਦ੍ਧ’’ਨ੍ਤਿ (ਪਾਚਿ. ੬੩੪) ਵੁਤ੍ਤੇਸੁ ਤੀਸੁ ਛਤ੍ਤੇਸੁ ਅਞ੍ਞਤਰਂ. ਏਤ੍ਥ ਚ ਸੇਤਚ੍ਛਤ੍ਤਨ੍ਤਿ ਵਤ੍ਥਪਲਿਗੁਣ੍ਠਿਤਂ ਪਣ੍ਡਰਚ੍ਛਤ੍ਤਂ. ਕਿਲਞ੍ਜਚ੍ਛਤ੍ਤਨ੍ਤਿ ਵਿਲੀਵਚ੍ਛਤ੍ਤਂ. ਪਣ੍ਣਚ੍ਛਤ੍ਤਨ੍ਤਿ ਤਾਲਪਣ੍ਣਾਦੀਹਿ ਯੇਹਿ ਕੇਹਿਚਿ ਕਤਂ. ‘‘ਮਣ੍ਡਲਬਦ੍ਧਂ ਸਲਾਕਬਦ੍ਧ’’ਨ੍ਤਿ ਇਦਂ ਪਨ ਤਿਣ੍ਣਮ੍ਪਿ ਛਤ੍ਤਾਨਂ ਪਞ੍ਜਰਦਸ੍ਸਨਤ੍ਥਂ ਵੁਤ੍ਤਂ. ਤਾਨਿ ਹਿ ਮਣ੍ਡਲਬਦ੍ਧਾਨਿ ਚੇਵ ਹੋਨ੍ਤਿ ਸਲਾਕਬਦ੍ਧਾਨਿ ਚ. ‘‘ਯਂ ਕਿਞ੍ਚੀ’’ਤਿ ਅਨਵਸੇਸਪਰਿਗ੍ਗਹਵਚਨੇਨ ‘‘ਯਮ੍ਪਿ ਚ ਤਤ੍ਥਜਾਤਦਣ੍ਡੇਨ ਕਤਂ ਏਕਪਣ੍ਣਚ੍ਛਤ੍ਤਂ ਹੋਤਿ, ਤਮ੍ਪਿ ਛਤ੍ਤਮੇਵਾ’’ਤਿ (ਪਾਚਿ. ਅਟ੍ਠ. ੬੩੪) ਅਟ੍ਠਕਥਾਯ ਵੁਤ੍ਤਂ ਛਤ੍ਤਵਿਸੇਸਂ ਗਣ੍ਹਾਤਿ. ਹਤ੍ਥੇਨਾਤਿ ਏਤ੍ਥ ‘‘ਅਮੁਞ੍ਚਿਤ੍ਵਾ’’ਤਿ ਸੇਸੋ. ਸਰੀਰਾਵਯਵੇਨਾਤਿ ਏਤ੍ਥ ‘‘ਗਹੇਤ੍ਵਾ’’ਤਿ ਸੇਸੋ. ਵਾ-ਸਦ੍ਦੋ ਅਪਿ-ਸਦ੍ਦਤ੍ਥੋ. ਅਂਸਕੂਟਾਦਿਸਰੀਰਾਵਯਵੇਨ ਗਹੇਤ੍ਵਾਪਿ ਹਤ੍ਥੇਨ ਅਮੁਞ੍ਚਿਤ੍ਵਾ ਧਾਰੇਨ੍ਤਸ੍ਸਾਤਿ ਅਤ੍ਥੋ.

ਸਚੇ ਪਨਸ੍ਸ ਅਞ੍ਞੋ ਛਤ੍ਤਂ ਧਾਰੇਤਿ, ਛਤ੍ਤਪਾਦੁਕਾਯ ਵਾ ਠਿਤਂ ਹੋਤਿ, ਪਸ੍ਸੇ ਵਾ ਠਿਤਂ ਹੋਤਿ,

ਹਤ੍ਥਤੋ ਅਪਗਤਮਤ੍ਤੇ ਛਤ੍ਤਪਾਣਿ ਨਾਮ ਨ ਹੋਤਿ, ਤਸ੍ਸ ਧਮ੍ਮਂ ਦੇਸੇਤੁਂ ਵਟ੍ਟਤਿ. ‘‘ਨ ਛਤ੍ਤਪਾਣਿਸ੍ਸ ਅਗਿਲਾਨਸ੍ਸਾ’’ਤਿ ਵਚਨਤੋ, ਇਧ ‘‘ਸਬ੍ਬਤ੍ਥ ਅਗਿਲਾਨਸ੍ਸਾ’’ਤਿ ਵਕ੍ਖਮਾਨਤ੍ਤਾ ਚ ਏਤ੍ਥ ‘‘ਅਗਿਲਾਨਸ੍ਸਾ’’ਤਿ ਲਬ੍ਭਤਿ. ਧਮ੍ਮਪਰਿਚ੍ਛੇਦੋ ਚੇਤ੍ਥ ਪਦਸੋਧਮ੍ਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਏਵਮੁਪਰਿਪਿ.

ਸਤ੍ਤਮਂ.

੧੯੩੧. ਦਣ੍ਡਪਾਣਿਮ੍ਹੀਤਿ ¶ ਏਤ੍ਥ ਦਣ੍ਡੋ ਪਾਣਿਮ੍ਹਿ ਅਸ੍ਸਾਤਿ ਵਿਗ੍ਗਹੋ. ਕਿਤ੍ਤਕਪ੍ਪਮਾਣੋ ਦਣ੍ਡੋਤਿ ਆਹ ‘‘ਚਤੁਹਤ੍ਥਪ੍ਪਮਾਣੋ’’ਤਿਆਦਿ. ਮਜ੍ਝਿਮਹਤ੍ਥਤੋਤਿ ਪਮਾਣਮਜ੍ਝਿਮਸ੍ਸ ਪੁਰਿਸਸ੍ਸ ਹਤ੍ਥਤੋ, ਯੋ ‘‘ਵਡ੍ਢਕਿਹਤ੍ਥੋ’’ਤਿ ਵੁਚ੍ਚਤਿ.

ਅਟ੍ਠਮਂ.

੧੯੩੨. ਸਤ੍ਥਪਾਣਿਸ੍ਸਾਤਿ ¶ ਏਤ੍ਥਾਪਿ ਵਿਗ੍ਗਹੋ ਵੁਤ੍ਤਨਯੋਵ. ਵਕ੍ਖਮਾਨਂ ਸਕਲਂ ਧਨੁਵਿਕਤਿਂ, ਸਰਵਿਕਤਿਞ੍ਚ ਠਪੇਤ੍ਵਾ ਅਵਸੇਸਂ ਖਗ੍ਗਾਦਿ ਸਤ੍ਥਂ ਨਾਮ. ਖਗ੍ਗਂ ਸਨ੍ਨਹਿਤ੍ਵਾ ਠਿਤੋਪਿ ਸਤ੍ਥਪਾਣਿ ਨੁ ਖੋਤਿ ਆਸਙ੍ਕਾਯ ਨਿਵਤ੍ਤਨਤ੍ਥਮਾਹ ‘‘ਸਤ੍ਥਪਾਣੀ’’ਤਿਆਦਿ. ‘‘ਨ ਹੋਤਿ ਅਸਿ’’ਨ੍ਤਿ ਪਦਚ੍ਛੇਦੋ.

ਨਵਮਂ.

੧੯੩੩-੫. ਸਰੇਨ ਸਦ੍ਧਿਂ ਧਨੁਂ ਵਾ ਸੁਦ੍ਧਧਨੁਂ ਵਾ ਸੁਦ੍ਧਸਰਂ ਵਾ ਸਜਿਯਂ ਧਨੁਦਣ੍ਡਂ ਵਾ ਨਿਜਿਯਂ ਧਨੁਦਣ੍ਡਂ ਵਾ ਗਹੇਤ੍ਵਾ ਠਿਤਸ੍ਸਾਪਿ ਵਾ ਨਿਸਿਨ੍ਨਸ੍ਸਾਪਿ ਵਾ ਨਿਪਨ੍ਨਸ੍ਸਾਪਿ ਵਾ ਸਚੇ ਯੋ ਤਥਾ ਪਦਸੋਧਮ੍ਮੇ ਵੁਤ੍ਤਲਕ੍ਖਣਂ ਸਦ੍ਧਮ੍ਮਂ ਦੇਸੇਤਿ, ਤਸ੍ਸ ਆਪਤ੍ਤਿ ਦੁਕ੍ਕਟਂ ਹੋਤੀਤਿ ਯੋਜਨਾ. ਸਚੇ ਪਨਸ੍ਸ ਧਨੁ ਖਨ੍ਧੇ ਪਟਿਮੁਕ੍ਕਂ ਹੋਤਿ, ਯਾਵ ਨ ਗਣ੍ਹਾਤਿ, ਤਾਵ ਵਟ੍ਟਤਿ. ਜਿਯਾਯ ਸਹ ਵਤ੍ਤਤੀਤਿ ਸਜਿਯਂ.

ਦਸਮਂ.

ਛਟ੍ਠੋ ਵਗ੍ਗੋ.

੧੯੩੬. ਪਾਦੁਕਾਰੁਲ਼੍ਹਕਸ੍ਸਾਤਿ ਪਾਦੁਕਂ ਆਰੁਲ਼੍ਹੋ ਪਾਦੁਕਾਰੁਲ਼੍ਹੋ, ਸੋਯੇਵ ਪਾਦੁਕਾਰੁਲ਼੍ਹਕੋ, ਤਸ੍ਸ. ਕਥਂ ਆਰੁਲ਼੍ਹਸ੍ਸਾਤਿ ਆਹ ‘‘ਅਕ੍ਕਮਿਤ੍ਵਾ’’ਤਿਆਦਿ. ਅਕ੍ਕਮਿਤ੍ਵਾ ਠਿਤਸ੍ਸਾਤਿ ¶ ਛਤ੍ਤਦਣ੍ਡਕੇ ਅਙ੍ਗੁਲਨ੍ਤਰਂ ਅਪ੍ਪਵੇਸੇਤ੍ਵਾ ਕੇਵਲਂ ਪਾਦੁਕਂ ਅਕ੍ਕਮਿਤ੍ਵਾ ਠਿਤਸ੍ਸ. ਪਟਿਮੁਕ੍ਕਸ੍ਸ ਵਾਤਿ ਪਟਿਮੁਞ੍ਚਿਤ੍ਵਾ ਠਿਤਸ੍ਸ. ਏਤਂ ਦ੍ਵਯਮ੍ਪਿ ‘‘ਪਾਦੁਕਾਰੁਲ਼੍ਹਕਸ੍ਸਾ’’ਤਿ ਏਤਸ੍ਸ ਅਤ੍ਥਪਦਂ. ਯਥਾਹ ‘‘ਨ ਪਾਦੁਕਾਰੁਲ਼੍ਹਸ੍ਸ ਅਗਿਲਾਨਸ੍ਸ ਧਮ੍ਮੋ ਦੇਸੇਤਬ੍ਬੋ. ਯੋ ਅਨਾਦਰਿਯਂ ਪਟਿਚ੍ਚ ਅਕ੍ਕਨ੍ਤਸ੍ਸ ਵਾ ਪਟਿਮੁਕ੍ਕਸ੍ਸ ਵਾ ਓਮੁਕ੍ਕਸ੍ਸ ਵਾ ਅਗਿਲਾਨਸ੍ਸ ਧਮ੍ਮਂ ਦੇਸੇਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਚਿ. ੬੩੮).

ਪਠਮਂ.

੧੯੩੭-੪੦. ਉਪਾਹਨਗਤਸ੍ਸਾਪੀਤਿ ਅਕ੍ਕਨ੍ਤਾਦਿਆਕਾਰੇਨ ਉਪਾਹਨਾਰੁਲ਼੍ਹਸ੍ਸ ਚ. ਯਥਾਹ ‘‘ਅਕ੍ਕਨ੍ਤਸ੍ਸ ਵਾ ਪਟਿਮੁਕ੍ਕਸ੍ਸ ਵਾ’’ਤਿ. ਸਬ੍ਬਤ੍ਥਾਤਿ ਛਤ੍ਤਪਾਣਿਆਦੀਸੁ ਸਬ੍ਬਸਿਕ੍ਖਾਪਦੇਸੁ. ਅਗਿਲਾਨਸ੍ਸਾਤਿ ਇਦਂ ਯੋਜੇਤਬ੍ਬਨ੍ਤਿ ਸੇਸੋ. ਯਾਨੇ ਵਾ ਗਤਸ੍ਸ ਅਗਿਲਾਨਸ੍ਸ ਧਮ੍ਮਂ ਦੇਸੇਤਿ, ਦੁਕ੍ਕਟਨ੍ਤਿ ਯੋਜਨਾ. ਤਤ੍ਥ ਯਾਨੇ ਵਾ ਗਤਸ੍ਸਾਤਿ ਸਚੇ ਦ੍ਵੀਹਿ ਜਨੇਹਿ ਹਤ੍ਥਸਙ੍ਘਾਤੇਨ ਗਹਿਤੋ, ਸਾਟਕੇ ¶ ਵਾ ਠਪੇਤ੍ਵਾ ਵਂਸੇਨ ਵਯ੍ਹਤਿ, ਅਯੁਤ੍ਤੇ ਵਾ ਵਯ੍ਹਾਦਿਕੇ ਯਾਨੇ, ਵਿਸਙ੍ਖਰਿਤ੍ਵਾ ਵਾ ਠਪਿਤੇ ਚਕ੍ਕਮਤ੍ਤੇਪਿ ਨਿਸਿਨ੍ਨੋ ਹੋਤਿ, ਯਾਨਗਤੋਤ੍ਵੇਵ ਸਙ੍ਖ੍ਯਂ ਗਚ੍ਛਤਿ.

ਸਯਨੇਪਿ ਵਾ ਅਨ੍ਤਮਸੋ ਕਟਸਾਰਕੇ ਵਾ ਛਮਾਯ ਵਾ ਨਿਪਨ੍ਨਸ੍ਸਾਪਿ ਅਗਿਲਾਨਸ੍ਸਾਤਿ ਯੋਜਨਾ. ਯਥਾਹ ‘‘ਸਯਨਗਤਸ੍ਸਾਤਿ ਅਨ੍ਤਮਸੋ ਕਟਸਾਰਕੇਪਿ ਪਕਤਿਭੂਮਿਯਮ੍ਪਿ ਨਿਪਨ੍ਨਸ੍ਸਾ’’ਤਿ (ਪਾਚਿ. ਅਟ੍ਠ. ੬੪੧). ਉਚ੍ਚੇ ਪੀਠੇ ਵਾ ਉਚ੍ਚੇ ਮਞ੍ਚੇਪਿ ਵਾ ਨਿਸਿਨ੍ਨੇਨ, ਠਿਤੇਨ ਵਾ ਨਿਪਨ੍ਨਸ੍ਸ ਦੇਸੇਤੁਂ ਨ ਵਟ੍ਟਤੀਤਿ ਯੋਜਨਾ. ‘‘ਠਤ੍ਵਾ’’ਤਿ ਇਮਿਨਾ ‘‘ਨਿਸੀਦਿਤ੍ਵਾ’’ਤਿ ਇਦਞ੍ਚ ਸਙ੍ਗਹਿਤਮੇਵ. ਸਯਨੇਸੁ ਗਤਸ੍ਸ ਚ ਦੇਸੇਨ੍ਤੇਨ ਸਯਨੇਸੁ ਗਤੇਨਾਪਿ ਸਮਾਨੇ ਵਾਪਿ ਉਚ੍ਚੇ ਵਾ ਨਿਪਨ੍ਨੇਨੇਵ ਵਟ੍ਟਤੀਤਿ ਯੋਜਨਾ.

੧੯੪੧. ‘‘ਤਥੇਵ ¶ ਚਾ’’ਤਿ ਇਮਿਨਾ ‘‘ਵਟ੍ਟਤੀ’’ਤਿ ਇਦਂ ਗਹਿਤਂ.

ਦੁਤਿਯਤਤਿਯਚਤੁਤ੍ਥਾਨਿ.

੧੯੪੨. ‘‘ਪਲ੍ਲਤ੍ਥਿਕਾਯ ਨਿਸਿਨ੍ਨਸ੍ਸਾ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ਯਕਾਰਸ੍ਸ ਲੋਪਂ ਕਤ੍ਵਾ ‘‘ਪਲ੍ਲਤ੍ਥਿਕਾ ਨਿਸਿਨ੍ਨਸ੍ਸਾ’’ਤਿ ਵੁਤ੍ਤਂ, ਆਯੋਗਪਲ੍ਲਤ੍ਥਿਕਾਯ ਵਾ ਹਤ੍ਥਪਲ੍ਲਤ੍ਥਿਕਾਯ ਵਾ ਦੁਸ੍ਸਪਲ੍ਲਤ੍ਥਿਕਾਯ ਵਾ ਯਾਯ ਕਾਯਚਿ ਪਲ੍ਲਤ੍ਥਿਕਾਯ ਨਿਸਿਨ੍ਨਸ੍ਸਾਤਿ ਅਤ੍ਥੋ. ਵੇਠਿਤਸੀਸਸ੍ਸਾਤਿ ਦੁਸ੍ਸਵੇਠਨੇਨ ਵਾ ਮੋਲਿਆਦੀਹਿ ਵਾ ਯਥਾ ਕੇਸਨ੍ਤੋ ਨ ਦਿਸ੍ਸਤਿ, ਏਵਂ ਵੇਠਿਤਸੀਸਸ੍ਸ.

੧੯੪੩. ਯਦਿ ਕੇਸਨ੍ਤਂ ਵਿਵਰਾਪੇਤ੍ਵਾ ਦੇਸੇਤਿ, ਵਟ੍ਟਤੀਤਿ ਯੋਜਨਾ. ‘‘ਅਯਮੇਵ ਵਿਨਿਚ੍ਛਯੋ’’ਤਿ ਇਮਿਨਾ ‘‘ਸੀਸਂ ਵਿਵਰਾਪੇਤ੍ਵਾ ਦੇਸੇਤਿ, ਵਟ੍ਟਤੀ’’ਤਿ ਅਨਾਪਤ੍ਤਿਵਾਰੋਪਿ ਵੁਤ੍ਤੋ ਹੋਤਿ.

ਪਞ੍ਚਮਛਟ੍ਠਸਤ੍ਤਮਾਨਿ.

੧੯੪੪-੫. ਅਟ੍ਠਮੇ ‘‘ਆਸਨੇ ਨਿਸਿਨ੍ਨਸ੍ਸਾਤਿ ਅਨ੍ਤਮਸੋ ਵਤ੍ਥਮ੍ਪਿ ਤਿਣਾਨਿਪਿ ਸਨ੍ਥਰਿਤ੍ਵਾ ਨਿਸਿਨ੍ਨਸ੍ਸਾ’’ਤਿ (ਪਾਚਿ. ਅਟ੍ਠ. ੬੪੫) ਇਦਞ੍ਚ ਨਵਮੇ ‘‘ਉਚ੍ਚੇ ਆਸਨੇਤਿ ਅਨ੍ਤਮਸੋ ਭੂਮਿਪ੍ਪਦੇਸੇਪਿ ਉਨ੍ਨਤੇ ਠਾਨੇ ਨਿਸਿਨ੍ਨਸ੍ਸ ਦੇਸੇਤੁਂ ਨ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੬੪੭) ਇਦਞ੍ਚ ਦਸਮੇ ‘‘ਸਚੇਪੀ’’ਤਿਆਦਿਨਾ ਵਕ੍ਖਮਾਨਵਿਨਿਚ੍ਛਯਞ੍ਚ ਠਪੇਤ੍ਵਾ ਵਤ੍ਤਬ੍ਬਵਿਸੇਸਾਭਾਵਾ ਆਹ ‘‘ਅਟ੍ਠਮੇ ਨਵਮੇ ¶ ਵਾਪਿ, ਦਸਮੇ ਨਤ੍ਥਿ ਕਿਞ੍ਚਿਪੀ’’ਤਿ. ਏਤ੍ਥ ‘‘ਵਤ੍ਤਬ੍ਬ’’ਨ੍ਤਿ ਸੇਸੋ. ਥੇਰੁਪਟ੍ਠਾਨਂ ਗਨ੍ਤ੍ਵਾਨ ਠਿਤਂ ਦਹਰਂ ਆਸਨੇ ਨਿਸਿਨ੍ਨੋ ਥੇਰੋ ਚੇ ਪਞ੍ਹਂ ਪੁਚ੍ਛਤੀਤਿ ਅਜ੍ਝਾਹਾਰਯੋਜਨਾ. ਕਥੇਤਬ੍ਬਮੁਪਾਯਂ ਦਸ੍ਸੇਤੁਮਾਹ ‘‘ਤਸ੍ਸ ਪਸ੍ਸੇ ਪਨਞ੍ਞਸ੍ਸ, ਕਥੇਤਬ੍ਬਂ ਵਿਜਾਨਤਾ’’ਤਿ. ਏਤ੍ਥ ‘‘ਠਿਤਸ੍ਸਾ’’ਤਿ ਸੇਸੋ ¶ . ਤਸ੍ਸ ਸਮੀਪਵਤ੍ਤਿਨੋ ਕਸ੍ਸਚਿ ਅਭਾਵੇ ਸਜ੍ਝਾਯਂ ਅਧਿਟ੍ਠਹਿਤ੍ਵਾਪਿ ਵਤ੍ਤੁਂ ਵਟ੍ਟਤਿ.

ਅਟ੍ਠਮਨਵਮਦਸਮਾਨਿ.

ਸਤ੍ਤਮੋ ਵਗ੍ਗੋ.

੧੯੪੬. ਗਚ੍ਛਤੋ ਪੁਰਤੋਤਿ ਏਤ੍ਥ ‘‘ਪਚ੍ਛਤੋ ਗਚ੍ਛਨ੍ਤੇਨਾ’’ਤਿ ਸੇਸੋ. ਪਚ੍ਛਤੋ ਗਚ੍ਛਨ੍ਤੇਨ ਪੁਰਤੋ ਗਚ੍ਛਤੋ ਪਞ੍ਹਂ ਨ ਵਤ੍ਤਬ੍ਬਨ੍ਤਿ ਯੋਜਨਾ. ਸਚੇ ਪੁਰਤੋ ਗਚ੍ਛਨ੍ਤੋ ਪਞ੍ਹਂ ਪੁਚ੍ਛਤਿ, ਕਿਂ ਕਾਤਬ੍ਬਨ੍ਤਿ ਆਹ ‘‘ਪਚ੍ਛਿਮਸ੍ਸਾ’’ਤਿਆਦਿ.

੧੯੪੭. ਉਗ੍ਗਹਿਤਂ ਧਮ੍ਮਂ ਪੁਰਤੋ ਗਚ੍ਛਨ੍ਤੇਨ ਸਦ੍ਧਿਂ ਪਚ੍ਛਤੋ ਗਚ੍ਛਨ੍ਤੋ ਸਜ੍ਝਾਯਤਿ, ਵਟ੍ਟਤੀਤਿ ਯੋਜਨਾ. ਸਮਮੇਵ ਗਚ੍ਛਤੋ ਯੁਗਗ੍ਗਾਹਂ ਕਥੇਤੁਂ ਵਟ੍ਟਤੀਤਿ ਯੋਜਨਾ. ਯੁਗਗ੍ਗਾਹਨ੍ਤਿ ਅਞ੍ਞਮਞ੍ਞਂ. ਅਞ੍ਞਮਞ੍ਞ-ਸਦ੍ਦਪਰਿਯਾਯੋ ਹਿ ਯੁਗਗ੍ਗਾਹ-ਸਦ੍ਦੋ.

ਪਠਮਂ.

੧੯੪੮. ਸਕਟਮਗ੍ਗੇ ਏਕੇਕਸ੍ਸ ਚਕ੍ਕਸ੍ਸ ਪਥੇਨ ਗਚ੍ਛਨ੍ਤੋ ਏਕੇਕਸ੍ਸ ਚਕ੍ਕਸ੍ਸ ਪਥੇਨ ਸਮਂ ਗਚ੍ਛਤੋ ਧਮ੍ਮਂ ਦੇਸੇਤੁਂ ਵਟ੍ਟਤਿ. ਉਪ੍ਪਥੇਨਾਪਿ ਗਚ੍ਛਨ੍ਤੋ ਉਪ੍ਪਥੇਨ ਸਮਂ ਗਚ੍ਛਨ੍ਤਸ੍ਸ ਧਮ੍ਮਂ ਦੇਸੇਤੁਂ ਵਟ੍ਟਤੀਤਿ ਅਜ੍ਝਾਹਾਰਯੋਜਨਾ. ਉਪ੍ਪਥੇਨਾਤਿ ਅਮਗ੍ਗੇਨ. ਏਵਂ ਅਨਾਪਤ੍ਤਿਵਿਸਯੇ ਦਸ੍ਸਿਤੇ ਤਬ੍ਬਿਪਰਿਯਾਯਤੋ ਆਪਤ੍ਤਿਵਿਸਯੋ ਦਸ੍ਸਿਤੋਯੇਵਾਤਿ ਵੇਦਿਤਬ੍ਬੋ.

ਦੁਤਿਯਂ.

੧੯੪੯. ਤਤਿਯੇ ਨਤ੍ਥਿ ਵਤ੍ਤਬ੍ਬਨ੍ਤਿ ‘‘ਨ ਠਿਤੋ ਅਗਿਲਾਨੋ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਕਰਿਸ੍ਸਾਮੀ’’ਤਿ (ਪਾਚਿ. ੬੫੧) ਏਤਸ੍ਸ ਵਿਨਿਚ੍ਛਯੋ ਯਥਾਰੁਤਵਸੇਨ ¶ ਸੁਵਿਞ੍ਞੇਯ੍ਯੋਤਿ ਕਤ੍ਵਾ ਵੁਤ੍ਤਂ. ਸਚੇ ਪਟਿਚ੍ਛਨ੍ਨਂ ਠਾਨਂ ਗਚ੍ਛਨ੍ਤਸ੍ਸ ਸਹਸਾ ਉਚ੍ਚਾਰੋ ਵਾ ਪਸ੍ਸਾਵੋ ਵਾ ਨਿਕ੍ਖਮਤਿ, ਅਸਞ੍ਚਿਚ੍ਚ ¶ ਕਤੋ ਨਾਮ, ਅਨਾਪਤ੍ਤਿ. ਅਯਮੇਤ੍ਥ ਵਿਸੇਸੋ ਦਟ੍ਠਬ੍ਬੋ. ਸਿਙ੍ਘਾਣਿਕਾਯ ਖੇਲ਼ੇਨੇਵ ਸਙ੍ਗਹਿਤਤ੍ਤੇਪਿ ਬਾਤ੍ਤਿਂਸਕੋਟ੍ਠਾਸੇਸੁ ਵਿਸੁਂਯੇਵ ਦਸ੍ਸਿਤੋ ਏਕੋ ਕੋਟ੍ਠਾਸੋਤਿ ਸਿਕ੍ਖਾਪਦੇਸੁ ਅਵੁਤ੍ਤਮ੍ਪਿ ਸਙ੍ਗਹੇਤ੍ਵਾ ਆਹ ‘‘ਉਚ੍ਚਾਰਾਦਿਚਤੁਕ੍ਕ’’ਨ੍ਤਿ.

੧੯੫੦. ਏਤ੍ਥ ਹਰਿਤਂ ਨਾਮ ਇਦਨ੍ਤਿ ਦਸ੍ਸੇਤੁਮਾਹ ‘‘ਜੀਵਰੁਕ੍ਖਸ੍ਸਾ’’ਤਿਆਦਿ. ਰੁਕ੍ਖਸ੍ਸਾਤਿ ਉਪਲਕ੍ਖਣਂ ਜੀਵਮਾਨਕਤਿਣਲਤਾਦੀਨਮ੍ਪਿ ਹਰਿਤੇਯੇਵ ਸਙ੍ਗਹਿਤਤ੍ਤਾ. ‘‘ਦਿਸ੍ਸਮਾਨਂ ਗਚ੍ਛਤੀ’’ਤਿ ਵਚਨੇਨੇਵ ਅਦਿਸ੍ਸਮਾਨਗਤਂ ਅਹਰਿਤਨ੍ਤਿ ਬ੍ਯਤਿਰੇਕਤੋ ਵਿਞ੍ਞਾਯਤਿ. ਸਾਖਾ ਵਾ ਭੂਮਿਲਗ੍ਗਾ ਦਿਸ੍ਸਮਾਨਾ ਗਚ੍ਛਤਿ, ਤਂ ਸਬ੍ਬਂ ਹਰਿਤਮੇਵਾਤਿ ਯੋਜਨਾ.

੧੯੫੧. ਸਹਸਾ ਵਚ੍ਚਂ ਨਿਕ੍ਖਮਤੇਵਾਤਿ ਸਮ੍ਬਨ੍ਧੋ. ਅਸ੍ਸ ਭਿਕ੍ਖੁਨੋ. ਵਚ੍ਚਨ੍ਤਿ ਉਪਲਕ੍ਖਣਂ ਪਸ੍ਸਾਵਾਦੀਨਮ੍ਪਿ ਦਸ੍ਸਿਤਤ੍ਤਾ. ਵਟ੍ਟਤੀਤਿ ਏਤ੍ਥ ‘‘ਗਿਲਾਨਟ੍ਠਾਨੇ ਠਿਤਤ੍ਤਾ’’ਤਿ ਸੇਸੋ.

੧੯੫੨. ਪਲਾਲਣ੍ਡੁਪਕੇ ਵਾਪੀਤਿ ਪਲਾਲਚੁਮ੍ਬਟਕੇਪਿ. ਏਤ੍ਥ ‘‘ਅਪ੍ਪਹਰਿਤਂ ਅਲਭਨ੍ਤੇਨਾ’’ਤਿ ਸੇਸੋ. ਕਿਸ੍ਮਿਞ੍ਚੀਤਿ ਸੁਕ੍ਖਤਿਣਾਦਿਮ੍ਹਿ ਕਿਸ੍ਮਿਞ੍ਚਿ. ਤਂ ਵਚ੍ਚਂ ਪਚ੍ਛਾ ਹਰਿਤਂ ਓਤ੍ਥਰਤਿ, ਵਟ੍ਟਤੀਤਿ ਯੋਜਨਾ.

੧੯੫੩. ਏਤੀਤਿ ਪਵਿਸਤਿ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ‘‘ਖੇਲ਼ੇਨ ਏਵ ਚਾ’’ਤਿ ਪਦਚ੍ਛੇਦੋ.

ਤਤਿਯਚਤੁਤ੍ਥਾਨਿ.

੧੯੫੪. ਵਚ੍ਚਕੁਟਿਸਮੁਦ੍ਦਾਦਿਉਦਕੇਸੂਤਿ ਏਤ੍ਥ ਆਦਿ-ਸਦ੍ਦੇਨ ਸਬ੍ਬਂ ਅਪਰਿਭੋਗਜਲਂ ਸਙ੍ਗਣ੍ਹਾਤਿ. ਤੇਨੇਵ ‘‘ਤੇਸਂ ਅਪਰਿਭੋਗਤ੍ਤਾ’’ਤਿ ਅਪਰਿਭੋਗਤ੍ਤਮੇਵ ਕਾਰਣਮਾਹ.

੧੯੫੫. ਉਦਕੋਘੇਤਿ ¶ ਏਤ੍ਥ ‘‘ਜਾਤੇ’’ਤਿ ਸੇਸੋ. ਅਜਲਨ੍ਤਿ ਅਜਲਟ੍ਠਾਨਂ. ਜਲੇਤਿ ਪਰਿਭੋਗਾਰਹਜਲੇ. ਇਧਾਪਿ ਥਲਕਤੋ ਉਦਕਂ ਓਤ੍ਥਰਤਿ, ਅਨਾਪਤ੍ਤਿ.

ਪਞ੍ਚਮਂ.

ਅਟ੍ਠਮੋ ਵਗ੍ਗੋ.

੧੯੫੬-੭. ਪਕਿਣ੍ਣਕਵਿਨਿਚ੍ਛਯਂ ¶ ਦਸ੍ਸੇਤੁਮਾਹ ‘‘ਸਮੁਟ੍ਠਾਨਾਦਯੋ’’ਤਿਆਦਿ. ਞੇਯ੍ਯਾਤਿ ਵਕ੍ਖਮਾਨਨਯੇਨ ਵੇਦਿਤਬ੍ਬਾ. ਏਤ੍ਥਾਤਿ ਏਤੇਸੁ ਸੇਖਿਯੇਸੁ. ਉਜ੍ਜਗ੍ਘਿਕਾ ਆਦਿ ਯੇਸਨ੍ਤਿ ਵਿਗ੍ਗਹੋ, ਤਗ੍ਗੁਣਸਂਵਿਞ੍ਞਾਣੋਯਂ ਬਾਹਿਰਤ੍ਥਸਮਾਸੋ, ਉਜ੍ਜਗ੍ਘਿਕਾਅਪ੍ਪਸਦ੍ਦਪਟਿਸਂਯੁਤ੍ਤਾਨਿ ਚਤ੍ਤਾਰਿ ਸਿਕ੍ਖਾਪਦਾਨੀਤਿ ਅਤ੍ਥੋ. ਛਮਾ ਚ ਨੀਚਾਸਨਞ੍ਚ ਠਾਨਞ੍ਚ ਪਚ੍ਛਾ ਚ ਉਪ੍ਪਥੋ ਚ ਛਮਾਨੀਚਾਸਨਟ੍ਠਾਨਪਚ੍ਛਾਉਪ੍ਪਥਾ, ਤੇ ਸਦ੍ਦਾ ਏਤੇਸਂ ਸਿਕ੍ਖਾਪਦਾਨਂ ਅਤ੍ਥੀਤਿ ਤਪ੍ਪਟਿਸਂਯੁਤ੍ਤਾਨਿ ਸਿਕ੍ਖਾਪਦਾਨਿ ਛਮਾ…ਪੇ… ਉਪ੍ਪਥਵਾ, ਛਮਾਦਿਪਦਵਨ੍ਤਾਨਿ ਪਞ੍ਚ ਸਿਕ੍ਖਾਪਦਾਨੀਤਿ ਅਤ੍ਥੋ. ਏਤ੍ਥ ਠਾਨ-ਸਦ੍ਦੇਨ ਠਾ-ਧਾਤੁਸ੍ਸੇਵ ਰੂਪਤ੍ਤਾ ਸਿਕ੍ਖਾਪਦਾਗਤੋ ਠਿਤ-ਸਦ੍ਦੋ ਗਹਿਤੋ. ‘‘ਦਸਸੂ’’ਤਿ ਵਤ੍ਤਬ੍ਬੇ ਵਣ੍ਣਲੋਪੇਨ, ਵਿਭਤ੍ਤਿਵਿਪਲ੍ਲਾਸੇਨ ਵਾ ‘‘ਦਸਾ’’ਤਿ ਵੁਤ੍ਤਂ. ਸਮਨੁਭਾਸਨੇ ਸਮੁਟ੍ਠਾਨਾਦੀਹਿ ਏਤੇਸੁ ਦਸਸੁ ਸਿਕ੍ਖਾਪਦੇਸੁ ਸਮੁਟ੍ਠਾਨਾਦਯੋ ਤੁਲ੍ਯਾ ਵੁਤ੍ਤਾਤਿ ਯੋਜਨਾ.

ਕਿਂ ਵੁਤ੍ਤਂ ਹੋਤਿ? ਇਮਾਨਿ ਦਸ ਸਿਕ੍ਖਾਪਦਾਨਿ ਸਮਨੁਭਾਸਨਸਮੁਟ੍ਠਾਨਾਨਿ, ਏਕੇਕਮੇਤ੍ਥ ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ ਵੁਤ੍ਤਂ ਹੋਤਿ.

੧੯੫੮-੯. ‘‘ਛਤ੍ਤ’’ਨ੍ਤਿਆਦੀਨਿ ਸਿਕ੍ਖਾਪਦਾਨਂ ਉਪਲਕ੍ਖਣਪਦਾਨਿ. ਏਤਾਨਿ ਏਕਾਦਸ ਸਿਕ੍ਖਾਪਦਾਨਿ ਸਮੁਟ੍ਠਾਨਾਦਿਨਾ ਪਨ ਧਮ੍ਮਦੇਸਨੇਨ ਤੁਲ੍ਯਾਵ ਸਦਿਸਾ ਏਵਾਤਿ ਯੋਜਨਾ. ਇਦਂ ਵੁਤ੍ਤਂ ¶ ਹੋਤਿ – ਇਮਾਨਿ ਏਕਾਦਸ ਸਿਕ੍ਖਾਪਦਾਨਿ ਧਮ੍ਮਦੇਸਨਾਸਮੁਟ੍ਠਾਨਾਨਿ, ਕਿਰਿਯਾਕਿਰਿਯਾਨਿ, ਸਞ੍ਞਾਵਿਮੋਕ੍ਖਾਨਿ, ਸਚਿਤ੍ਤਕਾਨਿ, ਲੋਕਵਜ੍ਜਾਨਿ, ਵਚੀਕਮ੍ਮਾਨਿ, ਅਕੁਸਲਚਿਤ੍ਤਾਨਿ, ਦੁਕ੍ਖਵੇਦਨਾਨੀਤਿ.

ਸੂਪੋਦਨੇਨ ਵਿਞ੍ਞਤ੍ਤੀਤਿ ਸੂਪੋਦਨ-ਸਦ੍ਦੇਨ ਲਕ੍ਖਿਤਂ ਵਿਞ੍ਞਤ੍ਤਿਸਿਕ੍ਖਾਪਦਂ. ਵਿਞ੍ਞਤ੍ਤਿਸਿਕ੍ਖਾਪਦਾਨਂ ਬਹੁਤ੍ਤਾ ਇਦਮੇਵ ਵਿਸੇਸਿਤਂ. ਥੇਯ੍ਯਸਤ੍ਥਸਮਂ ਮਤਨ੍ਤਿ ਸਮੁਟ੍ਠਾਨਾਦੀਹਿ ਥੇਯ੍ਯਸਤ੍ਥਸਿਕ੍ਖਾਪਦੇਨ ਸਮਾਨਂ ਮਤਨ੍ਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਂ ਥੇਯ੍ਯਸਤ੍ਥਸਮੁਟ੍ਠਾਨਂ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

੧੯੬੦. ਅਵਸੇਸਾ ਤਿਪਞ੍ਞਾਸਾਤਿ ਅਵਸੇਸਾਨਿ ਤੇਪਞ੍ਞਾਸਸਿਕ੍ਖਾਪਦਾਨਿ. ਸਮਾਨਾ ਪਠਮੇਨ ਤੂਤਿ ਪਠਮੇਨ ਪਾਰਾਜਿਕੇਨ ਸਮੁਟ੍ਠਾਨਾਦਿਤੋ ਸਮਾਨਾਨੀਤਿ ਅਤ੍ਥੋ, ਪਠਮਪਾਰਾਜਿਕਸਦਿਸਸਮੁਟ੍ਠਾਨਾਨੀਤਿ ¶ ਵੁਤ੍ਤਂ ਹੋਤਿ. ‘‘ਅਨਾਪਤ੍ਤਿ ਆਪਦਾਸੂ’’ਤਿ ਪਦਚ੍ਛੇਦੋ. ਪਰਿਮਣ੍ਡਲਂ ਨਿਵਾਸੇਤ੍ਵਾ, ਪਾਰੁਪਿਤ੍ਵਾ ਚਰਨ੍ਤਾਨਂ ਚੋਰੁਪਦ੍ਦਵਾਦਿ ਆਪਦਾ ਨਾਮ. ਅਪਿ-ਸਦ੍ਦੇਨ ਨਦਿਸਨ੍ਤਰਣਾਦਿਂ ਸਙ੍ਗਣ੍ਹਾਤਿ. ਸੇਖਿਯੇਸੁ ਸਬ੍ਬੇਸੂਤਿ ਯੇਭੁਯ੍ਯਵਸੇਨ ਵੁਤ੍ਤਂ.

੧੯੬੧. ‘‘ਨ ਉਜ੍ਝਾਨਸਞ੍ਞੀ ਪਰੇਸਂ ਪਤ੍ਤਂ ਓਲੋਕੇਸ੍ਸਾਮੀ’’ਤਿਆਦੀਨਂ (ਪਾਚਿ. ੬੧੪) ਇਮਸ੍ਸ ਅਨਾਪਤ੍ਤਿਵਾਰਸ੍ਸ ਅਸਮ੍ਭਵਤੋ ਨ ਪਨਾਗਤੋਤਿ ਪਾਲ਼ਿਯਂ ਨ ਵੁਤ੍ਤੋ. ਤਸ੍ਸਾਪਿ ਯਥਾਵਤ੍ਥੁਕਾਵ ਆਪਤ੍ਤਿਯੋ ਦਟ੍ਠਬ੍ਬਾ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ

ਵਿਨਯਵਿਨਿਚ੍ਛਯਵਣ੍ਣਨਾਯ

ਸੇਖਿਯਕਥਾਵਣ੍ਣਨਾ ਨਿਟ੍ਠਿਤਾ.

੧੯੬੨. ਯੋ ¶ ਇਮਂ ਵਿਨਿਚ੍ਛਯਂ ਵਿਦਿਤ੍ਵਾ ਠਿਤੋ, ਸੋ ਹਿ ਯਸ੍ਮਾ ਵਿਨਯੇ ਵਿਸਾਰਦੋ ਹੋਤਿ, ਵਿਨੀਤਮਾਨਸੋ ਚ ਹੋਤਿ, ਪਰੇਹਿ ਦੁਪ੍ਪਧਂਸਿਯੋ ਚ ਹੋਤਿ, ਤਤੋ ਤਸ੍ਮਾ ਕਾਰਣਾ ਸਮਾਹਿਤੋ ਸਤਤਂ ਇਮਂ ਵਿਨਯਵਿਨਿਚ੍ਛਯਂ ਸਿਕ੍ਖੇਯ੍ਯਾਤਿ ਯੋਜਨਾ.

ਤਤ੍ਥ ਇਮਂ ਵਿਨਿਚ੍ਛਯਂ ਵਿਦਿਤ੍ਵਾਤਿ ਸਬ੍ਬਲੋਕਿਯਲੋਕੁਤ੍ਤਰਗੁਣਸਮ੍ਪਤ੍ਤਿਨਿਦਾਨਂ ਇਮਂ ਵਿਨਯਵਿਨਿਚ੍ਛਯਂ ਅਤ੍ਥਤੋ, ਗਨ੍ਥਤੋ, ਵਿਨਿਚ੍ਛਯਤੋ ਚ ਸਕ੍ਕਚ੍ਚਂ ਞਤ੍ਵਾ. ਵਿਸਾਰਦੋਤਿ ਸਾਰਜ੍ਜਨਂ ਸਾਰਦੋ, ਵਿਗਤੋ ਸਾਰਦੋ ਅਸ੍ਸਾਤਿ ਵਿਸਾਰਦੋ, ਵਿਨਯਪਰਿਯਤ੍ਤਿਯਾ, ਆਪਤ੍ਤਾਦਿਵਿਭਾਗੇ ਚ ਨਿਬ੍ਭਯੋ ਨਿਰਾਸਙ੍ਕੋਤਿ ਵੁਤ੍ਤਂ ਹੋਤਿ. ਨ ਕੇਵਲਂ ਇਮਸ੍ਸ ਜਾਨਨੇ ਏਸੋਵ ਆਨਿਸਂਸੋ, ਅਥ ਖੋ ਵਿਨੀਤਮਾਨਸੋ ਚ ਹੋਤਿ, ਸਂਯਤਚਿਤ੍ਤੋ ਹੋਤੀਤਿ ਅਤ੍ਥੋ. ਸੋਤਿ ਇਮਂ ਵਿਨਿਚ੍ਛਯਂ ਸਕ੍ਕਚ੍ਚਂ ਵਿਦਿਤ੍ਵਾ ਠਿਤੋ ਭਿਕ੍ਖੁ. ਪਰੇਹੀਤਿ ਇਮਂ ਅਜਾਨਨ੍ਤੇਹਿ ਅਞ੍ਞੇਹਿ. ਦੁਪ੍ਪਧਂਸਿਯੋ ਚ ਹੋਤੀਤਿ ਅਨਭਿਭਵਨੀਯੋ ਚ ਹੋਤਿ.

ਤਤੋਤਿ ਤਸ੍ਮਾ ਵਿਨਯੇ ਵਿਸਾਰਦਤਾਦਿਸਬ੍ਬਗੁਣਸਮ੍ਪਨ੍ਨਹੇਤੁਤ੍ਤਾ. ਹੀਤਿ ਯਸ੍ਮਾਤਿ ਅਤ੍ਥੋ. ਸਿਕ੍ਖੇਤਿ ਸਜ੍ਝਾਯਨਸਵਨਾਦਿਵਸੇਨ ਸਿਕ੍ਖੇਯ੍ਯ, ਉਗ੍ਗਣ੍ਹੇਯ੍ਯਾਤਿ ਅਤ੍ਥੋ. ‘‘ਸਤਤ’’ਨ੍ਤਿ ਇਮਿਨਾ ਸਬ੍ਬਤ੍ਥਕਕਮ੍ਮਟ੍ਠਾਨੇ ਵਿਯ ਏਤ੍ਥਾਪਿ ਸਤਤਾਭਿਯੋਗੋ ਕਾਤਬ੍ਬੋਤਿ ਦਸ੍ਸੇਤਿ. ਵਿਕ੍ਖਿਤ੍ਤਸ੍ਸ ਯਥਾਭੂਤਪਟਿਵੇਧਾਭਾਵਤੋ ਤਪ੍ਪਟਿਪਕ੍ਖਾਯ ਏਕਗ੍ਗਤਾਯ ਨਿਯੋਜੇਨ੍ਤੋ ਆਹ ‘‘ਸਮਾਹਿਤੋ’’ਤਿ, ਸਮ੍ਮਾ ਵਿਨਯਵਿਨਿਚ੍ਛਯੇ ¶ ਆਹਿਤੋ ਪਤਿਟ੍ਠਿਤੋ ਏਕਗ੍ਗਚਿਤ੍ਤੋਤਿ ਵੁਤ੍ਤਂ ਹੋਤਿ. ਯਥਾਹ ‘‘ਅਵਿਕ੍ਖਿਤ੍ਤਸ੍ਸਾਯਂ ਧਮ੍ਮੋ, ਨਾਯਂ ਧਮ੍ਮੋ ਵਿਕ੍ਖਿਤ੍ਤਸ੍ਸਾ’’ਤਿ.

੧੯੬੩. ਏਵਂ ਇਮਾਯ ਗਾਥਾਯ ਵੁਤ੍ਤਮੇਵਤ੍ਥਂ ਪਕਾਰਨ੍ਤਰੇਨਾਪਿ ਦਸ੍ਸੇਤੁਮਾਹ ‘‘ਇਮ’’ਨ੍ਤਿਆਦਿ. ਤੇਤਿ ਅਪੇਕ੍ਖਿਤ੍ਵਾ ‘‘ਯੇ’’ਤਿ ¶ ਲਬ੍ਭਤਿ. ਯੇ ਥੇਰਾ ਵਾ ਨਵਾ ਵਾ ਮਜ੍ਝਿਮਾ ਵਾ. ਪਰਮਨ੍ਤਿ ਅਮਤਮਹਾਨਿਬ੍ਬਾਨਪ੍ਪਤ੍ਤਿਯਾ ਮੂਲਕਾਰਣਸ੍ਸ ਸੀਲਸ੍ਸ ਪਕਾਸਨਤੋ ਉਤ੍ਤਮਂ. ਅਸਂਕਰਨ੍ਤਿ ਨਿਕਾਯਨ੍ਤਰਲਦ੍ਧੀਹਿ ਅਸਮ੍ਮਿਸ੍ਸਂ. ਸਂਕਰਨ੍ਤਿ ਵੁਤ੍ਤਪ੍ਪਕਾਰਗੁਣੋਪੇਤਤ੍ਤਾ ਕਾਯਚਿਤ੍ਤਸੁਖਕਾਰਣਂ ਸਮ੍ਮੁਖਂ ਕਰੋਤੀਤਿ ਸਂਕਰਂ. ਸਵਨਾਮਤਨ੍ਤਿ ਸਦ੍ਦਰਸਾਦਿਯੋਗੇਨ ਕਣ੍ਣਰਸਾਯਨਂ. ਅਮਤਨ੍ਤਿ ਤਤੋਯੇਵ ਅਮਤਂ ਸੁਮਧੁਰਂ. ਅਮਤਮਹਾਨਿਬ੍ਬਾਨਾਵਹਤ੍ਤਾ ਵਾ ਫਲੂਪਚਾਰੇਨ ਅਮਤਂ. ਇਮਂ ਵਿਨਯਵਿਨਿਚ੍ਛਯਂ. ਅਵੇਚ੍ਚਾਤਿ ਸਕ੍ਕਚ੍ਚਂ ਵਿਦਿਤ੍ਵਾ. ਅਧਿਕੇਤਿ ਅਧਿਸੀਲਾਦਿਸਿਕ੍ਖਤ੍ਤਯਪ੍ਪਕਾਸਨੇਨ ਉਕ੍ਕਟ੍ਠੇ. ਹਿਤੇਤਿ ਲੋਕਿਯਲੋਕੁਤ੍ਤਰਸੁਖਹੇਤੁਤ੍ਤੇਨ ਹਿਤੇ. ਹਿਨੋਤਿ ਅਤ੍ਤਨੋ ਫਲਨ੍ਤਿ ‘‘ਹਿਤ’’ਨ੍ਤਿ ਸੁਖਹੇਤੁ ਵੁਚ੍ਚਤਿ. ਕਲਿਸਾਸਨੇਤਿ ਲੋਭਾਦਿਕਿਲੇਸਵਿਦ੍ਧਂਸਨੇ. ਸਾਸਨੇਤਿ ਵਿਨਯਪਰਿਯਤ੍ਤਿਸਙ੍ਖਾਤਸਾਸਨੇਕਦੇਸੇ. ਪਟੁਤ੍ਤਨ੍ਤਿ ਬ੍ਯਤ੍ਤਭਾਵਂ. ਨ ਯਨ੍ਤਿ ਨ ਗਚ੍ਛਨ੍ਤਿ. ਕੇ ਤੇਤਿ ਕਤਮੇ ਤੇ. ‘‘ਨ ਕੇਚਿ ਸਨ੍ਤਿ ਚਾ’’ਤਿ ਨਿਸ੍ਸਨ੍ਦੇਹੇ ਇਮਿਸ੍ਸਾ ਗਾਥਾਯ ਅਤ੍ਥੋ ਲਿਖਿਤੋ.

ਏਵਂ ਏਤ੍ਥ ਅਤ੍ਥਯੋਜਨਾ ਵੇਦਿਤਬ੍ਬਾ – ਪਰਮਂ ਉਤ੍ਤਮਂ ਅਸਂਕਰਂ ਨਿਕਾਯਨ੍ਤਰਲਦ੍ਧੀਹਿ ਅਸਮ੍ਮਿਸ੍ਸਂ ਸਂਕਰਂ ਸਕਲਲੋਕਿਯਲੋਕੁਤ੍ਤਰਸੁਖਾਭਿਨਿਪ੍ਫਾਦਕਂ ਸਵਨਾਮਤਂ ਸੋਤਰਸਾਯਨਂ ਇਮਂ ਵਿਨਿਚ੍ਛਯਪ੍ਪਕਰਣਂ ਅਵੇਚ੍ਚ ਸਕ੍ਕਚ੍ਚਂ ਵਿਦਿਤ੍ਵਾ ਅਧਿਕੇ ਅਧਿਸੀਲਾਦਿਸਿਕ੍ਖਤ੍ਤਯਪ੍ਪਕਾਸਨੇਨ ਉਕ੍ਕਟ੍ਠੇ ਹਿਤੇ ਲੋਕਿਯਲੋਕੁਤ੍ਤਰਸੁਖਹੇਤੁਭੂਤੇ ਕਲਿਸਾਸਨੇ ਸਕਲਸਂਕਿਲੇਸਵਿਦ੍ਧਂਸਕੇ ਸਾਸਨੇ ਵਿਨਯਪਿਟਕਸਙ੍ਖਾਤੇ ਪਰਿਯਤ੍ਤਿਸਾਸਨੇ ਯੇ ਪਟੁਤ੍ਤਂ ਨ ਯਨ੍ਤਿ, ਤੇ ਕੇ ਨਾਮਾਤਿ ਯੋਜਨਾ, ਯੇ ਇਮਂ ਪਕਰਣਂ ਅਵੇਚ੍ਚ ਵਿਦਿਤ੍ਵਾ ਠਿਤਾ, ਤੇ ਏਕਂਸਤੋ ਵਿਨਯਪਿਟਕੇ ਪਟੁਤ੍ਤਂ ਪਾਪੁਣਨ੍ਤਿ ਯੇਵਾਤਿ ਅਧਿਪ੍ਪਾਯੋ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ

ਵਿਨਯਵਿਨਿਚ੍ਛਯਵਣ੍ਣਨਾਯ

ਭਿਕ੍ਖੁਵਿਭਙ੍ਗਕਥਾਵਣ੍ਣਨਾ ਨਿਟ੍ਠਿਤਾ.

ਭਿਕ੍ਖੁਨਿਵਿਭਙ੍ਗੋ

੧੯੬੪. ਏਵਂ ¶ ਭਿਕ੍ਖੁਵਿਭਙ੍ਗਪਾਲ਼ਿਯਾ, ਅਟ੍ਠਕਥਾਯ ਚ ਆਗਤਂ ਵਿਨਿਚ੍ਛਯਸਾਰਂ ਨਾਤਿਸਙ੍ਖੇਪਵਿਤ੍ਥਾਰਨਯੇਨ ¶ ਦਸ੍ਸੇਤ੍ਵਾ ਇਦਾਨਿ ਤਦਨਨ੍ਤਰਾਯ ਭਿਕ੍ਖੁਨਿਵਿਭਙ੍ਗਪਾਲ਼ਿਯਾ, ਤਦਟ੍ਠਕਥਾਯ ਚ ਆਗਤਵਿਨਿਚ੍ਛਯਸਾਰਂ ਦਸ੍ਸੇਤੁਮਾਰਭਨ੍ਤੋ ਆਹ ‘‘ਭਿਕ੍ਖੁਨੀਨ’’ਨ੍ਤਿਆਦਿ. ਤਸ੍ਮਿਂ ਅਪੀਤਿ ਏਤ੍ਥ ਅਪਿ-ਸਦ੍ਦੋ ਵੁਤ੍ਤਾਪੇਕ੍ਖਾਯਂ. ‘‘ਸਮਾਸੇਨਾ’’ਤਿ ਇਦਂ ਗਨ੍ਥਵਸੇਨ ਸਙ੍ਖਿਪਨਂ ਸਨ੍ਧਾਯ ਵੁਤ੍ਤਂ. ‘‘ਕਿਞ੍ਚਿਮਤ੍ਤ’’ਨ੍ਤਿ ਇਦਂ ਅਤ੍ਥਵਸੇਨਾਤਿ ਵੇਦਿਤਬ੍ਬਂ.

ਪਾਰਾਜਿਕਕਥਾਵਣ੍ਣਨਾ

੧੯੬੫. ਛਨ੍ਦਸੋਤਿ ਮੇਥੁਨਸੇਵਨਰਾਗਪਟਿਸਂਯੁਤ੍ਤੇਨ ਛਨ੍ਦੇਨ. ਏਤੇਨ ‘‘ਛਨ੍ਦੇ ਪਨ ਅਸਤਿ ਬਲਕ੍ਕਾਰੇਨ ਪਧਂਸਿਤਾਯ ਅਨਾਪਤ੍ਤੀ’’ਤਿ (ਕਙ੍ਖਾ. ਅਟ੍ਠ. ਮੇਥੁਨਧਮ੍ਮਸਿਕ੍ਖਾਪਦਵਣ੍ਣਨਾ) ਅਟ੍ਠਕਥਾ ਸੂਚਿਤਾ ਹੋਤਿ. ਸਾ ਸਮਣੀ ਪਾਰਾਜਿਕਾ ਨਾਮ ਹੋਤੀਤਿ ਪਵੁਚ੍ਚਤੀਤਿ ਯੋਜਨਾ.

੧੯੬੬-੭. ‘‘ਸਜੀਵਸ੍ਸ ਅਪਿ ਅਜੀਵਸ੍ਸਾ’’ਤਿ ਪਦਚ੍ਛੇਦੋ. ‘‘ਸਨ੍ਥਤਂ ਵਾ ਅਸਨ੍ਥਤ’’ਨ੍ਤਿ ਇਦਂ ‘‘ਅਙ੍ਗਜਾਤ’’ਨ੍ਤਿ ਇਮਸ੍ਸ ਵਿਸੇਸਨਂ. ਅਤ੍ਤਨੋ ਤਿਵਿਧੇ ਮਗ੍ਗੇਤਿ ਅਤ੍ਤਨੋ ਵਚ੍ਚਪਸ੍ਸਾਵਮੁਖਮਗ੍ਗਾਨਂ ਅਞ੍ਞਤਰਸ੍ਮਿਂ ਮਗ੍ਗੇ. ਏਤ੍ਥ ‘‘ਸਨ੍ਥਤੇ ਵਾ ਅਸਨ੍ਥਤੇ ਵਾ’’ਤਿ ਸੇਸੋ, ‘‘ਅਲ੍ਲੋਕਾਸੇ’’ਤਿ ਇਮਿਨਾ ਸਮ੍ਬਨ੍ਧੋ. ‘‘ਯੇਭੁਯ੍ਯਅਕ੍ਖਾਯਿਤਾਦਿਕ’’ਨ੍ਤਿ ਪਦਚ੍ਛੇਦੋ. ਆਦਿ-ਸਦ੍ਦੇਨ ਅਕ੍ਖਾਯਿਤਂ ਸਙ੍ਗਣ੍ਹਾਤਿ.

ਮਨੁਸ੍ਸਪੁਰਿਸਾਦੀਨਂ ਨਵਨ੍ਨਂ ਸਜੀਵਸ੍ਸਪਿ ਅਜੀਵਸ੍ਸਪਿ ਯਸ੍ਸ ਕਸ੍ਸਚਿ ਸਨ੍ਥਤਂ ਵਾ ਅਸਨ੍ਥਤਂ ਵਾ ਯੇਭੁਯ੍ਯਕ੍ਖਾਯਿਤਾਦਿਕਂ ਅਙ੍ਗਜਾਤਂ ਅਤ੍ਤਨੋ ਸਨ੍ਥਤੇ ਵਾ ਅਸਨ੍ਥਤੇ ਵਾ ਤਿਵਿਧੇ ਮਗ੍ਗੇ ਅਲ੍ਲੋਕਾਸੇ ਤਿਲਫਲਮਤ੍ਤਮ੍ਪਿ ਪਵੇਸੇਨ੍ਤੀ ਪਰਾਜਿਤਾਤਿ ਯੋਜਨਾ.

੧੯੬੮. ਸਾਧਾਰਣਵਿਨਿਚ੍ਛਯਨ੍ਤਿ ¶ ਭਿਕ੍ਖੁਭਿਕ੍ਖੁਨੀਨਂ ਸਾਧਾਰਣਸਿਕ੍ਖਾਪਦਵਿਨਿਚ੍ਛਯਂ.

੧੯੬੯-੭੦. ਅਧਕ੍ਖਕਨ੍ਤਿ ਏਤ੍ਥ ਅਕ੍ਖਕਾਨਂ ਅਧੋਤਿ ਵਿਗ੍ਗਹੋ. ਉਬ੍ਭਜਾਣੁਮਣ੍ਡਲਨ੍ਤਿ ਜਾਣੁਮਣ੍ਡਲਾਨਂ ਉਬ੍ਭਨ੍ਤਿ ਵਿਗ੍ਗਹੋ. ਉਬ੍ਭ-ਸਦ੍ਦੋ ਉਦ੍ਧਂ-ਸਦ੍ਦਪਰਿਯਾਯੋ. ਇਧ ‘‘ਅਤ੍ਤਨੋ’’ਤਿ ਸੇਸੋ. ਅਵਸ੍ਸੁਤਸ੍ਸਾਤਿ ਕਾਯਸਂਸਗ੍ਗਰਾਗੇਨ ਤਿਨ੍ਤਸ੍ਸ. ਅਵਸ੍ਸੁਤਾਤਿ ਏਤ੍ਥਾਪਿ ਏਸੇਵ ਨਯੋ. ਯਾਤਿ ਵੁਤ੍ਤਤ੍ਤਾ ‘‘ਸਾ’’ਤਿ ਲਬ੍ਭਤਿ. ਸਰੀਰਨ੍ਤਿ ਏਤ੍ਥ ‘‘ਯਂ ਕਿਞ੍ਚੀ’’ਤਿ ਸੇਸੋ. ਪਰੋਪਕ੍ਕਮਮੂਲਕਂ ਪਾਰਾਜਿਕਂ ਦਸ੍ਸੇਤੁਮਾਹ ¶ ‘‘ਤੇਨ ਵਾ ਫੁਟ੍ਠਾ’’ਤਿ. ਏਤ੍ਥ ‘‘ਯਥਾਪਰਿਚ੍ਛਿਨ੍ਨੇ ਕਾਯੇ’’ਤਿ ਚ ‘‘ਸਾਦਿਯੇਯ੍ਯਾ’’ਤਿ ਚ ਵਤ੍ਤਬ੍ਬਂ.

ਯਾ ਪਨ ਭਿਕ੍ਖੁਨੀ ਅਵਸ੍ਸੁਤਾ ਅਵਸ੍ਸੁਤਸ੍ਸ ਮਨੁਸ੍ਸਪੁਗ੍ਗਲਸ੍ਸ ਯਂ ਕਿਞ੍ਚਿ ਸਰੀਰਂ ਅਤ੍ਤਨੋ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਯਂ ਸਰੀਰਕਂ, ਤੇਨ ਸਰੀਰਕੇਨ ਛੁਪੇਯ੍ਯ, ਤੇਨ ਮਨੁਸ੍ਸਪੁਰਿਸੇਨ ਯਥਾਪਰਿਚ੍ਛਿਨ੍ਨੇ ਕਾਯੇ ਫੁਟ੍ਠਾ ਸਾਦਿਯੇਯ੍ਯ ਵਾ, ਸਾ ਪਾਰਾਜਿਕਾ ਸਿਯਾਤਿ ਯੋਜਨਾ.

੧੯੭੧-੨. ‘‘ਗਹਿਤਂ ਉਬ੍ਭਜਾਣੁਨਾ’’ਤਿ ਇਮਿਨਾ ਕਪ੍ਪਰਤੋ ਉਦ੍ਧਂ ਪਾਰਾਜਿਕਕ੍ਖੇਤ੍ਤਮੇਵਾਤਿ ਦੀਪੇਤਿ. ਅਤ੍ਤਨੋ ਯਥਾਵੁਤ੍ਤਪ੍ਪਕਾਰੇਨ ਕਾਯੇਨਾਤਿ ਯੋਜਨਾ, ਅਤ੍ਤਨੋ ‘‘ਅਧਕ੍ਖਕ’’ਨ੍ਤਿਆਦਿਵੁਤ੍ਤਪ੍ਪਕਾਰੇਨ ਕਾਯੇਨਾਤਿ ਅਤ੍ਥੋ. ਤਥਾ ਅਵਸ੍ਸੁਤਾਯ ਅਵਸ੍ਸੁਤਸ੍ਸ ਪੁਰਿਸਸ੍ਸ ਕਾਯਪਟਿਬਦ੍ਧਂ ਫੁਸਨ੍ਤਿਯਾ ਥੁਲ੍ਲਚ੍ਚਯਂ ਹੋਤਿ. ਅਤ੍ਤਨੋ ਯਥਾਪਰਿਚ੍ਛਿਨ੍ਨਕਾਯਪਟਿਬਦ੍ਧੇਨ ਤਥਾ ਅਵਸ੍ਸੁਤਾਯ ਅਵਸ੍ਸੁਤਸ੍ਸ ਪੁਰਿਸਸ੍ਸ ਕਾਯਂ ਫੁਸਨ੍ਤਿਯਾ ਥੁਲ੍ਲਚ੍ਚਯਂ ਹੋਤਿ.

੧੯੭੩. ਅਤ੍ਤਨੋ ਅਵਸੇਸੇਨ ਕਾਯੇਨ ਅਵਸ੍ਸੁਤਾਯ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਂ ਫੁਸਨ੍ਤਿਯਾ ਥੁਲ੍ਲਚ੍ਚਯਂ ¶ ਹੋਤਿ. ਏਵਂ ਅਤ੍ਤਨੋ ਪਯੋਗੇ ਚ ਪੁਰਿਸਸ੍ਸ ਪਯੋਗੇ ਚ ਤਸ੍ਸਾ ਭਿਕ੍ਖੁਨਿਯਾਯੇਵ ਥੁਲ੍ਲਚ੍ਚਯਂ ਹੋਤੀਤਿ ਯੋਜਨਾ.

੧੯੭੪. ਯਕ੍ਖਪੇਤਤਿਰਚ੍ਛਾਨਪਣ੍ਡਕਾਨਂ ਕਾਯਂ ‘‘ਅਧਕ੍ਖਕਂ ਉਬ੍ਭਜਾਣੁਮਣ੍ਡਲ’’ਨ੍ਤਿ ਯਥਾਪਰਿਚ੍ਛਿਨ੍ਨਂ ਤਥੇਵ ਅਤ੍ਤਨੋ ਕਾਯੇਨ ਉਭਤੋਅਵਸ੍ਸਵੇ ਸਤਿ ਫੁਸਨ੍ਤਿਯਾ ਅਸ੍ਸਾ ਭਿਕ੍ਖੁਨਿਯਾ ਥੁਲ੍ਲਚ੍ਚਯਂ, ਤਥੇਵ ਯਕ੍ਖਾਦੀਨਂ ਪਯੋਗੇਪਿ ਤਸ੍ਸਾਯੇਵ ਥੁਲ੍ਲਚ੍ਚਯਂ ਹੋਤੀਤਿ ਯੋਜਨਾ.

੧੯੭੫. ਏਕਤੋਵਸ੍ਸਵੇ ਚਾਪੀਤਿ ਭਿਕ੍ਖੁਨਿਯਾ ਵਸੇਨ ਏਕਤੋਅਵਸ੍ਸਵੇ ਚਾਪਿ. ਥੁਲ੍ਲਚ੍ਚਯਮੁਦੀਰਿਤਨ੍ਤਿ ਪਾਰਾਜਿਕਕ੍ਖੇਤ੍ਤਭੂਤੇਨ ਅਤ੍ਤਨੋ ਕਾਯੇਨ ਮਨੁਸ੍ਸਪੁਰਿਸਸ੍ਸ ਕਾਯਂ ਫੁਸਨ੍ਤਿਯਾ ਥੁਲ੍ਲਚ੍ਚਯਂ ਅਟ੍ਠਕਥਾਯਂ (ਪਾਚਿ. ਅਟ੍ਠ. ੬੬੨) ਵੁਤ੍ਤਨ੍ਤਿ ਅਤ੍ਥੋ. ਅਵਸੇਸੇ ਚ ਸਬ੍ਬਤ੍ਥਾਤਿ ਯਥਾਵੁਤ੍ਤਪਾਰਾਜਿਕਕ੍ਖੇਤ੍ਤਤੋ ਅਵਸੇਸੇ ਥੁਲ੍ਲਚ੍ਚਯਕ੍ਖੇਤ੍ਤੇ ਸਬ੍ਬਤ੍ਥ ਏਕਤੋਅਵਸ੍ਸਵੇ ਸਤਿ ਦੁਕ੍ਕਟਂ ਹੋਤੀਤਿ ਅਤ੍ਥੋ. ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਾਮਸਨਾਦੀਸੁ ਸਬ੍ਬਤ੍ਥ ਉਭਤੋਅਵਸ੍ਸਵੇ ਵਾ ਏਕਤੋਅਵਸ੍ਸਵੇ ਵਾ ਦੁਕ੍ਕਟਮੇਵ ਹੋਤਿ.

੧੯੭੬. ‘‘ਉਬ੍ਭਕ੍ਖਕਮਧੋਜਾਣੁਮਣ੍ਡਲ’’ਨ੍ਤਿ ¶ ਯਂ ਅਪਾਰਾਜਿਕਕ੍ਖੇਤ੍ਤਂ ਇਧ ਦਸ੍ਸਿਤਂ, ਏਤ੍ਥ ਏਕਤੋਅਵਸ੍ਸਵੇ ਦੁਕ੍ਕਟਂ ਹੋਤਿ. ਕਪ੍ਪਰਸ੍ਸ ਚ ਹੇਟ੍ਠਾਪਿ ਏਤ੍ਥੇਵ ਅਧੋਜਾਣੁਮਣ੍ਡਲੇ ਸਙ੍ਗਹਂ ਗਤਨ੍ਤਿ ਯੋਜਨਾ.

੧੯੭੭-੯. ਭਿਕ੍ਖੁ ਭਿਕ੍ਖੁਨਿਯਾ ਸਦ੍ਧਿਂ ਸਚੇ ਕਾਯਸਂਸਗ੍ਗਂ ਕੇਲਾਯਤਿ ਸੇਵਤੀਤਿ ਯੋਜਨਾ. ਭਿਕ੍ਖੁਨਿਯਾ ਨਾਸੋ ਸਿਯਾਤਿ ਸੀਲਵਿਨਾਸੋ ਪਾਰਾਜਿਕਾਪਤ੍ਤਿ ਸਿਯਾਤਿ ਅਤ੍ਥੋ. ਗੇਹਪੇਮਨ੍ਤਿ ਏਤ੍ਥ ‘‘ਗੇਹਸਿਤਪੇਮ’’ਨ੍ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ਸਿਤ-ਸਦ੍ਦਲੋਪੋ, ਅਤ੍ਥੋ ਪਨਸ੍ਸ ਭਿਕ੍ਖੁਵਿਭਙ੍ਗੇ ਵੁਤ੍ਤਨਯੋਵ.

੧੯੮੦. ਅਵਿਸੇਸੇਨਾਤਿ ¶ ‘‘ਭਿਕ੍ਖੁਨਿਯਾ’’ਤਿ ਵਾ ‘‘ਭਿਕ੍ਖੁਸ੍ਸਾ’’ਤਿ ਵਾ ਵਿਸੇਸਂ ਅਕਤ੍ਵਾ.

੧੯੮੧. ਯਸ੍ਸਾਤਿ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ. ਯਤ੍ਥਾਤਿ ਭਿਕ੍ਖੁਨਿਯਂ ਵਾ ਭਿਕ੍ਖੁਸ੍ਮਿਂ ਵਾ. ਮਨੋਸੁਦ੍ਧਨ੍ਤਿ ਕਾਯਸਂਸਗ੍ਗਾਦਿਰਾਗਰਹਿਤਂ. ਤਸ੍ਸ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਤਤ੍ਥ ਭਿਕ੍ਖੁਨਿਯਂ ਵਾ ਭਿਕ੍ਖੁਸ੍ਮਿਂ ਵਾ ਵਿਸਯੇ ਨਦੋਸਤਾ ਅਨਾਪਤ੍ਤੀਤਿ ਅਤ੍ਥੋ.

੧੯੮੨. ਭਿਨ੍ਦਿਤ੍ਵਾਤਿ ਸੀਲਭੇਦਂ ਕਤ੍ਵਾ. ਭਿਕ੍ਖੁਨਿਯਾ ਅਪਕਤਤ੍ਤਾ ਆਹ ‘‘ਨੇਵ ਹੋਤਿ ਭਿਕ੍ਖੁਨਿਦੂਸਕੋ’’ਤਿ.

੧੯੮੩. ਅਥਾਤਿ ਵਾਕ੍ਯਾਰਮ੍ਭੇ. ਨ ਹੋਤਾਪਤ੍ਤਿ ਭਿਕ੍ਖੁਨੋਤਿ ਏਤ੍ਥ ਭਿਕ੍ਖੁਨੀਹਿ ਕਾਯਸਂਸਗ੍ਗਸਙ੍ਘਾਦਿਸੇਸਮਾਹ.

੧੯੮੪. ‘‘ਖੇਤ੍ਤੇ’’ਤਿ ਵਕ੍ਖਮਾਨਂ ‘‘ਫੁਟ੍ਠਾ’’ਤਿ ਇਮਿਨਾ ਯੋਜੇਤ੍ਵਾ ‘‘ਪਾਰਾਜਿਕ’’ਨ੍ਤਿਆਦੀਹਿ, ‘‘ਥੁਲ੍ਲਚ੍ਚਯਂ ਖੇਤ੍ਤੇ’’ਤਿਆਦੀਹਿ ਚ ਸਮ੍ਬਨ੍ਧਿਤਬ੍ਬਂ. ‘‘ਪਾਰਾਜਿਕ’’ਨ੍ਤਿ ਵਕ੍ਖਮਾਨਤ੍ਤਾ ਫੁਟ੍ਠਾਤਿ ਏਤ੍ਥ ‘‘ਪਾਰਾਜਿਕਕ੍ਖੇਤ੍ਤੇ’’ਤਿ ਸੇਸੋ.

੧੯੮੫. ਤਥਾਤਿ ਨਿਚ੍ਚਲਾਪਿ ਸਾਦਿਯਤਿ. ਖੇਤ੍ਤੇਤਿ ਥੁਲ੍ਲਚ੍ਚਯਾਦੀਨਂ ਖੇਤ੍ਤੇ. ਕਾਯੇਨ ਨਿਚ੍ਚਲਾਯਪਿ ਚਿਤ੍ਤੇਨ ਸਾਦਿਯਨ੍ਤਿਯਾ ਆਪਤ੍ਤਿ ਕਸ੍ਮਾ ਵੁਤ੍ਤਾਤਿ ਆਹ ‘‘ਵੁਤ੍ਤਤ੍ਤਾ…ਪੇ… ਸਤ੍ਥੁਨਾ’’ਤਿ ¶ , ਭਿਕ੍ਖੁਪਾਤਿਮੋਕ੍ਖੇ ਵਿਯ ‘‘ਕਾਯਸਂਸਗ੍ਗਂ ਸਮਾਪਜ੍ਜੇਯ੍ਯਾ’’ਤਿ ਅਵਤ੍ਵਾ ਇਧ ‘‘ਕਾਯਸਂਸਗ੍ਗਂ ਸਾਦਿਯੇਯ੍ਯਾ’’ਤਿ ਵੁਤ੍ਤਤ੍ਤਾਤਿ ਅਧਿਪ੍ਪਾਯੋ.

੧੯੮੬. ਤਸ੍ਸਾ ਆਪਤ੍ਤਿਯਾ. ਕ੍ਰਿਯਸਮੁਟ੍ਠਾਨਨ੍ਤਿ ਕਿਰਿਯਾਯ ਸਮੁਟ੍ਠਾਨਂ. ਏਵਂ ਸਤੀਤਿ ਸਾਦਿਯਨਮਤ੍ਤੇਨੇਵ ਆਪਜ੍ਜਿਤਬ੍ਬਭਾਵੇ ਸਤਿ. ਇਦਨ੍ਤਿ ‘‘ਕਿਰਿਯਸਮੁਟ੍ਠਾਨ’’ਮਿਤਿਵਿਧਾਨਂ. ਤਬ੍ਬਹੁਲੇਨੇਵ ਨਯੇਨਾਤਿ ¶ ਕਿਰਿਯਸਮੁਟ੍ਠਾਨਬਾਹੁਲ੍ਲੇਨ ਨਯੇਨ ਖਦਿਰਵਨਾਦਿਵੋਹਾਰੋ ਵਿਯਾਤਿ ਦਟ੍ਠਬ੍ਬਂ.

੧੯੮੭. ਤਸ੍ਸਾ ਭਿਕ੍ਖੁਨਿਯਾ ਅਸਞ੍ਚਿਚ੍ਚ ਵਿਰਜ੍ਝਿਤ੍ਵਾ ਆਮਸਨ੍ਤਿਯਾ ਅਨਾਪਤ੍ਤਿ, ‘‘ਅਯਂ ਪੁਰਿਸੋ’’ਤਿ ਵਾ ‘‘ਇਤ੍ਥੀ’’ਤਿ ਵਾ ਅਜਾਨਿਤ੍ਵਾ ਆਮਸਨ੍ਤਿਯਾ ਅਨਾਪਤ੍ਤਿ, ਪੁਰਿਸਸ੍ਸ ਆਮਸਨੇ ਸਤਿ ਫਸ੍ਸਂ ਅਸਾਦਿਯਨ੍ਤਿਯਾ ਵਾ ਅਨਾਪਤ੍ਤੀਤਿ ਯੋਜਨਾ.

੧੯੮੮. ਖਿਤ੍ਤਚਿਤ੍ਤਾਯਾਤਿ ਯਕ੍ਖੁਮ੍ਮਤ੍ਤਾਯ. ਉਮ੍ਮਤ੍ਤਿਕਾਯ ਵਾਤਿ ਪਿਤ੍ਤਕੋਪੇਨ ਉਮ੍ਮਾਦਪ੍ਪਤ੍ਤਾਯ. ਇਦਞ੍ਚ ‘‘ਅਸੁਚੀ’’ਤਿ ਵਾ ‘‘ਚਨ੍ਦਨ’’ਨ੍ਤਿ ਵਾ ਵਿਸੇਸਤਂ ਅਜਾਨਨਮੇਵ ਪਮਾਣਂ.

ਉਬ੍ਭਜਾਣੁਮਣ੍ਡਲਕਥਾਵਣ੍ਣਨਾ.

੧੯੮੯-੯੦. ‘‘ਪਾਰਾਜਿਕਤ੍ਤਂ ਜਾਨਨ੍ਤੀ’’ਤਿ ਇਮਿਨਾ ਅਵਸੇਸਾਪਤ੍ਤਿਂ ਜਾਨਿਤ੍ਵਾ ਛਾਦੇਨ੍ਤਿਯਾ ਪਾਰਾਜਿਕਾਭਾਵਂ ਦੀਪੇਤਿ. ਸਲਿਙ੍ਗੇ ਤੁ ਠਿਤਾਯਾਤਿ ਪਬ੍ਬਜ੍ਜਾਲਿਙ੍ਗੇਯੇਵ ਠਿਤਾਯ. ਇਤਿ ਧੁਰੇ ਨਿਕ੍ਖਿਤ੍ਤਮਤ੍ਤਸ੍ਮਿਨ੍ਤਿ ਯੋਜਨਾ. ਇਤਿ-ਸਦ੍ਦੋ ਨਿਦਸ੍ਸਨੇ. ਇਤਰਾਯ ਪੁਬ੍ਬੇਯੇਵ ਆਪਨ੍ਨਤ੍ਤਾ ਤਮਪੇਕ੍ਖਿਤ੍ਵਾ ‘‘ਸਾ ਚਾ’’ਤਿ ਆਹ.

੧੯੯੧. ਵੁਤ੍ਤਾਵਿਸਿਟ੍ਠਂ ਸਬ੍ਬਂ ਵਿਨਿਚ੍ਛਯਂ ਸਙ੍ਗਹੇਤੁਮਾਹ ‘‘ਸੇਸ’’ਨ੍ਤਿਆਦਿ. ਤਤ੍ਥਾਤਿ ਦੁਟ੍ਠੁਲ੍ਲਪਟਿਚ੍ਛਾਦਨੇ.

ਵਜ੍ਜਪਟਿਚ੍ਛਾਦਿਕਥਾਵਣ੍ਣਨਾ.

੧੯੯੨-੫. ਸਙ੍ਘੇਨਾਤਿ ਸਮਗ੍ਗੇਨ ਸਙ੍ਘੇਨ. ਉਕ੍ਖਿਤ੍ਤਕੋਤਿ ਆਪਤ੍ਤਿਯਾ ਅਦਸ੍ਸਨਾਦੀਸੁ ਉਕ੍ਖਿਤ੍ਤਕੋ. ‘‘ਉਕ੍ਖੇਪਨੇ ਠਿਤੋ’’ਤਿ ਇਮਿਨਾ ਉਕ੍ਖੇਪਨੀਯਕਮ੍ਮਕਤਸ੍ਸ ਅਨੋਸਾਰਿਤਭਾਵਂ ਦੀਪੇਤਿ. ਯਾ ¶ ਦਿਟ੍ਠਿ ਏਤਸ੍ਸਾਤਿ ਯਂਦਿਟ੍ਠਿਕੋ, ਸੋ ਉਕ੍ਖਿਤ੍ਤਕੋ ਭਿਕ੍ਖੁ ਯਾਯ ਦਿਟ੍ਠਿਯਾ ਸਮਨ੍ਨਾਗਤੋ ਹੋਤੀਤਿ ਅਧਿਪ੍ਪਾਯੋ ¶ . ‘‘ਤਸ੍ਸਾ ਦਿਟ੍ਠਿਯਾ ਗਹਣੇਨਾ’’ਤਿ ਇਮਿਨਾ ਅਨੁਵਤ੍ਤਪ੍ਪਕਾਰੋ ਦਸ੍ਸਿਤੋ. ਤਂ ਉਕ੍ਖਿਤ੍ਤਕਂ ਭਿਕ੍ਖੁਨ੍ਤਿ ਯੋਜਨਾ. ਸਾ ਭਿਕ੍ਖੁਨੀ ਅਞ੍ਞਾਹਿ ਭਿਕ੍ਖੁਨੀਹਿ ਵਿਸੁਮ੍ਪਿਚ ਸਙ੍ਘਮਜ੍ਝੇਪਿ ‘‘ਏਸੋ ਖੋ ਅਯ੍ਯੇ ਭਿਕ੍ਖੁ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤੋ’’ਤਿਆਦਿਨਾ (ਪਾਚਿ. ੬੬੯) ਨਯੇਨ ਤਿਕ੍ਖਤ੍ਤੁਂ ਵੁਚ੍ਚਮਾਨਾਤਿ ਯੋਜਨਾ. ਤਂ ਵਤ੍ਥੁਂ ਅਚਜਨ੍ਤੀ ਗਹੇਤ੍ਵਾ ਯਦਿ ਤਥੇਵ ਤਿਟ੍ਠਤੀਤਿ ਯੋਜਨਾ. ਏਤ੍ਥ ‘‘ਯਾਵਤਤਿਯਂ ਸਮਨੁਭਾਸਿਤਬ੍ਬਾ’’ਤਿ ਸੇਸੋ. ਤਸ੍ਸ ਕਮ੍ਮਸ੍ਸ ਓਸਾਨੇਤਿ ਤਤਿਯਾਯ ਕਮ੍ਮਵਾਚਾਯ ਯ੍ਯਕਾਰਪ੍ਪਤ੍ਤਵਸੇਨ ਅਸ੍ਸ ਸਮਨੁਭਾਸਨਕਮ੍ਮਸ੍ਸ ਪਰਿਯੋਸਾਨੇ. ਅਸਾਕਿਯਧੀਤਰਾਤਿ ਅਸਾਕਿਯਧੀਤਾ, ਪਚ੍ਚਤ੍ਤੇ ਕਰਣਵਚਨਂ. ‘‘ਪੁਨ ਅਪ੍ਪਟਿਸਨ੍ਧੇਯਾ’’ਤਿ ਇਮਿਨਾ ਪੁਨ ਤੇਨੇਵ ਚ ਅਤ੍ਤਭਾਵੇਨ ਭਿਕ੍ਖੁਨਿਭਾਵੇ ਪਟਿਸਨ੍ਧਾਤੁਂ ਅਨਰਹਤਾ ਵੁਤ੍ਤਾ.

੧੯੯੬. ਤਿਕਦੁਕ੍ਕਟਂ ਨਿਦ੍ਦਿਟ੍ਠਨ੍ਤਿ ਅਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਾ, ਵੇਮਤਿਕਾ, ਧਮ੍ਮਕਮ੍ਮਸਞ੍ਞਾਤਿ ਏਤਾਸਂ ਵਸੇਨ ਤਿਕਦੁਕ੍ਕਟਂ ਵੁਤ੍ਤਂ. ਸਮਨੁਭਾਸਨੇ ਵੁਤ੍ਤਾ ਸਮੁਟ੍ਠਾਨਾਦਯੋ ਸਬ੍ਬੇ ਇਧ ਵਤ੍ਤਬ੍ਬਾਤਿ ਯੋਜਨਾ.

ਉਕ੍ਖਿਤ੍ਤਾਨੁਵਤ੍ਤਿਕਕਥਾਵਣ੍ਣਨਾ.

੧੯੯੭. ‘‘ਹਤ੍ਥਗ੍ਗਹਣਂ ਵਾ ਸਾਦਿਯੇਯ੍ਯਾਤਿ ਹਤ੍ਥੋ ਨਾਮ ਕਪ੍ਪਰਂ ਉਪਾਦਾਯ ਯਾਵ ਅਗ੍ਗਨਖਾ. ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਉਬ੍ਭਕ੍ਖਕਂ ਅਧੋਜਾਣੁਮਣ੍ਡਲਂ ਗਹਣਂ ਸਾਦਿਯਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਚਿ. ੬੭੬) ਵੁਤ੍ਤਤ੍ਤਾ ਆਹ ‘‘ਅਪਾਰਾਜਿਕਖੇਤ੍ਤਸ੍ਸਾ’’ਤਿਆਦਿ. ‘‘ਤ’’ਨ੍ਤਿ ਵਕ੍ਖਮਾਨਤ੍ਤਾ ‘‘ਯ’’ਨ੍ਤਿ ਲਬ੍ਭਤਿ. ਅਪਾਰਾਜਿਕਕ੍ਖੇਤ੍ਤਸ੍ਸ ਯਸ੍ਸ ਕਸ੍ਸਚਿ ਅਙ੍ਗਸ੍ਸ ਯਂ ਗਹਣਂ, ਤਂ ਹਤ੍ਥਗ੍ਗਹਣਨ੍ਤਿ ਪਵੁਚ੍ਚਤੀਤਿ ਯੋਜਨਾ. ਹਤ੍ਥੇ ਗਹਣਂ ਹਤ੍ਥਗ੍ਗਹਣਂ.

੧੯੯੮. ਯਸ੍ਸ ਕਸ੍ਸਚੀਤਿ ਵੁਤ੍ਤਪ੍ਪਕਾਰੇਨ ਯਸ੍ਸ ਕਸ੍ਸਚਿ ਚੀਵਰਸ੍ਸ ਯਂ ਗਹਣਨ੍ਤਿ ਯੋਜਨਾ.

੧੯੯੯. ਅਸਦ੍ਧਮ੍ਮ-ਸਦ੍ਦੇਨ ¶ ਮੇਥੁਨਸ੍ਸਾਪਿ ਵੁਚ੍ਚਮਾਨਤ੍ਤਾ ਤਤੋ ਵਿਸੇਸੇਤੁਮਾਹ ‘‘ਕਾਯਸਂਸਗ੍ਗ ¶ …ਪੇ… ਕਾਰਣਾ’’ਤਿ. ਭਿਕ੍ਖੁਨੀ ਕਾਯਸਂਸਗ੍ਗਸਙ੍ਖਾਤਸ੍ਸ ਅਸਦ੍ਧਮ੍ਮਸ੍ਸ ਕਾਰਣਾ ਪੁਰਿਸਸ੍ਸ ਹਤ੍ਥਪਾਸਸ੍ਮਿਂ ਤਿਟ੍ਠੇਯ੍ਯ ਵਾਤਿ ਯੋਜਨਾ.

੨੦੦੦. ਤਤੋਤਿ ਤਸ੍ਸ ਅਸਦ੍ਧਮ੍ਮਸ੍ਸ ਕਾਰਣਾ. ਤਤ੍ਥਾਤਿ ਹਤ੍ਥਪਾਸੇ. ਪੁਰਿਸੇਨਾਤਿ ਏਤ੍ਥ ‘‘ਕਤ’’ਨ੍ਤਿ ਸੇਸੋ, ‘‘ਸਙ੍ਕੇਤ’’ਨ੍ਤਿ ਇਮਿਨਾ ਸਮ੍ਬਨ੍ਧੋ. ‘‘ਆਗਮਨਂ ਅਸ੍ਸਾ’’ਤਿ ਪਦਚ੍ਛੇਦੋ. ਇਚ੍ਛੇਯ੍ਯਾਤਿ ਵੁਤ੍ਤੇਪਿ ਨ ਗਮਨਿਚ੍ਛਾਮਤ੍ਤੇਨ, ਅਥ ਖੋ ਭਿਕ੍ਖੁਨਿਯਾ ਪੁਰਿਸਸ੍ਸ ਹਤ੍ਥਪਾਸਂ, ਪੁਰਿਸੇਨ ਚ ਭਿਕ੍ਖੁਨਿਯਾ ਹਤ੍ਥਪਾਸਂ ਓਕ੍ਕਨ੍ਤਕਾਲੇਯੇਵ ਵਤ੍ਥੁਪੂਰਣਂ ਦਟ੍ਠਬ੍ਬਂ. ਯਥਾਹ ‘‘ਸਙ੍ਕੇਤਂ ਵਾ ਗਚ੍ਛੇਯ੍ਯਾਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਪੁਰਿਸੇਨ ‘ਇਤ੍ਥਨ੍ਨਾਮਂ ਆਗਚ੍ਛਾ’ਤਿ ਵੁਤ੍ਤਾ ਗਚ੍ਛਤਿ, ਪਦੇ ਪਦੇ ਆਪਤ੍ਤਿ ਦੁਕ੍ਕਟਸ੍ਸ. ਪੁਰਿਸਸ੍ਸ ਹਤ੍ਥਪਾਸਂ ਓਕ੍ਕਨ੍ਤਮਤ੍ਤੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਚਿ. ੬੭੬) ਚ ‘‘ਪੁਰਿਸਸ੍ਸ ਅਬ੍ਭਾਗਮਨਂ ਸਾਦਿਯਤਿ, ਆਪਤ੍ਤਿ ਦੁਕ੍ਕਟਸ੍ਸ. ਹਤ੍ਥਪਾਸਂ ਓਕ੍ਕਨ੍ਤਮਤ੍ਤੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਚਿ. ੬੭੬) ਚ. ਏਤ੍ਥ ਚ ਇਤ੍ਥਨ੍ਨਾਮਂ ਆਗਚ੍ਛਾਤਿ ਇਤ੍ਥਨ੍ਨਾਮਂ ਠਾਨਂ ਆਗਚ੍ਛਾਤਿ ਅਤ੍ਥੋ.

੨੦੦੧. ਤਦਤ੍ਥਾਯਾਤਿ ਤਸ੍ਸੇਵ ਕਾਯਸਂਸਗ੍ਗਸਙ੍ਖਾਤਅਸਦ੍ਧਮ੍ਮਸ੍ਸ ਸੇਵਨਤ੍ਥਾਯ. ਪਟਿਚ੍ਛਨ੍ਨਟ੍ਠਾਨਞ੍ਚਾਤਿ ਵਤ੍ਥਾਦਿਨਾ ਯੇਨ ਕੇਨਚਿ ਪਟਿਚ੍ਛਨ੍ਨਓਕਾਸਂ. ਪੁਰਿਸਸ੍ਸ ਹਤ੍ਥਪਾਸੇ ਠਿਤਾ ਤਦਤ੍ਥਾਯ ਕਾਯਂ ਉਪਸਂਹਰੇਯ੍ਯ ਵਾਤਿ ਯੋਜਨਾ.

੨੦੦੨. ਹਤ੍ਥਗ੍ਗਹਣਾਦੀਨਂ ਵੁਤ੍ਤਪ੍ਪਕਾਰਾਨਂ ਅਟ੍ਠਨ੍ਨਂ ਵਤ੍ਥੂਨਂ ਪੂਰਣੇਨ ‘‘ਅਟ੍ਠਵਤ੍ਥੁਕਾ’’ਤਿ ਸਙ੍ਖਾਤਾ ਅਯਂ ਭਿਕ੍ਖੁਨੀ ਵਿਨਟ੍ਠਾ ਹੋਤਿ ਸੀਲਵਿਨਾਸੇਨ, ਤਤੋਯੇਵ ਅਸ੍ਸਮਣੀ ਹੋਤਿ ਅਭਿਕ੍ਖੁਨੀ ਹੋਤੀਤਿ ਯੋਜਨਾ.

੨੦੦੩. ਅਨੁਲੋਮੇਨ ¶ ਵਾਤਿ ਹਤ੍ਥਗ੍ਗਹਣਾਦਿਪਟਿਪਾਟਿਯਾ ਵਾ. ਪਟਿਲੋਮੇਨ ਵਾਤਿ ਤਬ੍ਬਿਪਰਿਯਤੋ ਪਟਿਲੋਮੇਨ ਵਾ. ਏਕਨ੍ਤਰਿਕਾਯ ਵਾਤਿ ਏਕਮੇਕਂ ਅਨ੍ਤਰਿਤ੍ਵਾ ਪੁਨ ਤਸ੍ਸਾਪਿ ਕਰਣਵਸੇਨ ਏਕਨ੍ਤਰਿਕਾਯ ਵਾ. ਅਨੁਲੋਮੇਨ ਵਾ ਪਟਿਲੋਮੇਨ ਵਾ ਤਥੇਕਨ੍ਤਰਿਕਾਯ ਵਾ ਅਟ੍ਠਮਂ ਵਤ੍ਥੁਂ ਪਰਿਪੂਰੇਨ੍ਤੀ ਚੁਤਾਤਿ ਯੋਜਨਾ.

੨੦੦੪. ਏਤਦੇਵ ਅਤ੍ਥਂ ਬ੍ਯਤਿਰੇਕਮੁਖੇਨ ਸਮਤ੍ਥੇਤੁਮਾਹ ‘‘ਅਥਾਦਿਤੋ’’ਤਿਆਦਿ. ਸਤਕ੍ਖਤ੍ਤੁਮ੍ਪੀਤਿ ¶ ਬਹੁਕ੍ਖਤ੍ਤੁਮ੍ਪਿ. ਸਤ-ਸਦ੍ਦੋ ਹੇਤ੍ਥ ਬਹੁ-ਸਦ੍ਦਪਰਿਯਾਯੋ. ਪਾਰਾਜਿਕਾ ਨੇਵ ਸਿਯਾਤਿ ਯੋਜਨਾ, ਇਮਿਨਾ ਤਂਤਂਵਤ੍ਥੁਮੂਲਕਂ ਦੁਕ੍ਕਟਥੁਲ੍ਲਚ੍ਚਯਂ ਆਪਜ੍ਜਤੀਤਿ ਵੁਤ੍ਤਂ ਹੋਤਿ.

੨੦੦੫. ਯਾ ਪਨ ਆਪਤ੍ਤਿਯੋ ਆਪਨ੍ਨਾ, ਦੇਸੇਤ੍ਵਾ ਤਾਹਿ ਮੁਚ੍ਚਤੀਤਿ ਯੋਜਨਾ. ਧੁਰਨਿਕ੍ਖੇਪਨਂ ਕਤ੍ਵਾਤਿ ‘‘ਨ ਪੁਨੇਵਂ ਕਰਿਸ੍ਸਾਮੀ’’ਤਿ ਧੁਰਂ ਨਿਕ੍ਖਿਪਿਤ੍ਵਾ. ਦੇਸਿਤਾ ਗਣਨੂਪਿਕਾਤਿ ਦੇਸਿਤਾ ਦੇਸਿਤਗਣਨਮੇਵ ਉਪੇਤਿ, ਪਾਰਾਜਿਕਸ੍ਸ ਅਙ੍ਗਂ ਨ ਹੋਤੀਤਿ ਅਤ੍ਥੋ. ਤਸ੍ਮਾ ਯਾ ਏਕਂ ਆਪਨ੍ਨਾ, ਧੁਰਨਿਕ੍ਖੇਪਂ ਕਤ੍ਵਾ ਦੇਸੇਤ੍ਵਾ ਪੁਨ ਕਿਲੇਸਵਸੇਨ ਆਪਜ੍ਜਤਿ, ਪੁਨ ਦੇਸੇਤਿ, ਏਵਂ ਅਟ੍ਠ ਵਤ੍ਥੂਨਿ ਪੂਰੇਨ੍ਤੀਪਿ ਪਾਰਾਜਿਕਾ ਨ ਹੋਤਿ.

੨੦੦੬. ਸਉਸ੍ਸਾਹਾਯ ਦੇਸਿਤਾਤਿ ਪੁਨ ਆਪਜ੍ਜਨੇ ਅਨਿਕ੍ਖਿਤ੍ਤਧੁਰਾਯ ਭਿਕ੍ਖੁਨਿਯਾ ਦੇਸਿਤਾਪਿ ਆਪਤ੍ਤਿ ਦੇਸਨਾਗਣਨਂ ਨ ਉਪੇਤਿ. ਕਿਂ ਹੋਤੀਤਿ ਆਹ ‘‘ਦੇਸਿਤਾਪਿ ਅਦੇਸਿਤਾ’’ਤਿ, ਤਸ੍ਮਾ ਪਾਰਾਜਿਕਾਪਤ੍ਤਿਯਾ ਅਙ੍ਗਮੇਵ ਹੋਤੀਤਿ ਅਧਿਪ੍ਪਾਯੋ.

੨੦੦੮. ਅਯਂ ਅਤ੍ਥੋਤਿ ‘‘ਅਸਦ੍ਧਮ੍ਮੋ ਨਾਮ ਕਾਯਸਂਸਗ੍ਗੋ’’ਤਿ ਅਯਂ ਅਤ੍ਥੋ. ਉਦ੍ਦਿਸਿਤੋਤਿ ਪਕਾਸਿਤੋ.

੨੦੦੯. ਅਯਮਤ੍ਥੋ ¶ ਕੇਨ ਵਚਨੇਨ ਉਦ੍ਦਿਸਿਤੋਤਿ ਆਹ ‘‘ਵਿਞ੍ਞੂ…ਪੇ… ਸਾਧਕਂ ਵਚਨਂ ਇਦ’’ਨ੍ਤਿ. ਇਦਂ ਵਚਨਨ੍ਤਿ ‘‘ਵਿਞ੍ਞੂ ਪਟਿਬਲੋ ਕਾਯਸਂਸਗ੍ਗਂ ਸਮਾਪਜ੍ਜਿਤੁ’’ਨ੍ਤਿ (ਪਾਚਿ. ੬੭੬) ਇਦਂ ਵਚਨਂ. ਸਾਧਕਂ ਪਮਾਣਂ.

ਅਟ੍ਠਵਤ੍ਥੁਕਕਥਾਵਣ੍ਣਨਾ.

੨੦੧੦. ਅਵਸ੍ਸੁਤਾ, ਵਜ੍ਜਪਟਿਚ੍ਛਾਦਿਕਾ, ਉਕ੍ਖਿਤ੍ਤਾਨੁਵਤ੍ਤਿਕਾ, ਅਟ੍ਠਵਤ੍ਥੁਕਾਤਿ ਇਮਾ ਚਤਸ੍ਸੋ ਪਾਰਾਜਿਕਾਪਤ੍ਤਿਯੋ ਮਹੇਸਿਨਾ ਅਸਾਧਾਰਣਾ ਭਿਕ੍ਖੁਨੀਨਮੇਵ ਪਞ੍ਞਤ੍ਤਾਤਿ ਯੋਜਨਾ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ

ਵਿਨਯਵਿਨਿਚ੍ਛਯਵਣ੍ਣਨਾਯ

ਪਾਰਾਜਿਕਕਥਾਵਣ੍ਣਨਾ ਨਿਟ੍ਠਿਤਾ.

ਸਙ੍ਘਾਦਿਸੇਸਕਥਾਵਣ੍ਣਨਾ

੨੦੧੧. ਏਵਂ ¶ ਭਿਕ੍ਖੁਨਿਵਿਭਙ੍ਗੇ ਆਗਤਂ ਪਾਰਾਜਿਕਵਿਨਿਚ੍ਛਯਂ ਵਤ੍ਵਾ ਇਦਾਨਿ ਤਦਨਨ੍ਤਰੁਦ੍ਦਿਟ੍ਠਂ ਸਙ੍ਘਾਦਿਸੇਸਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਯਾ ਪਨ ਭਿਕ੍ਖੁਨੀ’’ਤਿਆਦਿ. ਉਸ੍ਸਯਵਾਦਾਤਿ ਕੋਧੁਸ੍ਸਯਮਾਨੁਸ੍ਸਯਵਸੇਨ ਵਿਵਦਮਾਨਾ. ਤਤੋਯੇਵ ਅਟ੍ਟਂ ਕਰੋਤਿ ਸੀਲੇਨਾਤਿ ਅਟ੍ਟਕਾਰੀ. ਏਤ੍ਥ ਚ ‘‘ਅਟ੍ਟੋ’’ਤਿ ਵੋਹਾਰਿਕਵਿਨਿਚ੍ਛਯੋ ਵੁਚ੍ਚਤਿ, ਯਂ ਪਬ੍ਬਜਿਤਾ ‘‘ਅਧਿਕਰਣ’’ਨ੍ਤਿਪਿ ਵਦਨ੍ਤਿ. ਸਬ੍ਬਤ੍ਥ ਵਤ੍ਤਬ੍ਬੇ ਮੁਖਮਸ੍ਸਾ ਅਤ੍ਥੀਤਿ ਮੁਖਰੀ, ਬਹੁਭਾਣੀਤਿ ਅਤ੍ਥੋ. ਯੇਨ ਕੇਨਚਿ ਨਰੇਨ ਸਦ੍ਧਿਨ੍ਤਿ ‘‘ਗਹਪਤਿਨਾ ਵਾ ਗਹਪਤਿਪੁਤ੍ਤੇਨ ਵਾ’’ਤਿਆਦਿਨਾ (ਪਾਚਿ. ੬੭੯) ਦਸ੍ਸਿਤੇਨ ਯੇਨ ਕੇਨਚਿ ਮਨੁਸ੍ਸੇਨ ਸਦ੍ਧਿਂ. ਇਧਾਤਿ ਇਮਸ੍ਮਿਂ ਸਾਸਨੇ. ਕਿਰਾਤਿ ਪਦਪੂਰਣੇ, ਅਨੁਸ੍ਸਵਨੇ ਵਾ.

੨੦੧੨. ਸਕ੍ਖਿਂ ¶ ਵਾਤਿ ਪਚ੍ਚਕ੍ਖਤੋ ਜਾਨਨਕਂ ਵਾ. ਅਟ੍ਟਂ ਕਾਤੁਂ ਗਚ੍ਛਨ੍ਤਿਯਾ ਪਦੇ ਪਦੇ ਤਥਾ ਦੁਕ੍ਕਟਨ੍ਤਿ ਯੋਜਨਾ.

੨੦੧੩. ਵੋਹਾਰਿਕੇਤਿ ਵਿਨਿਚ੍ਛਯਾਮਚ੍ਚੇ.

੨੦੧੪. ਅਨਨ੍ਤਰਨ੍ਤਿ ਤਸ੍ਸ ਵਚਨਾਨਨ੍ਤਰਂ.

੨੦੧੫. ਇਤਰੋਤਿ ਅਟ੍ਟਕਾਰਕੋ. ਪੁਬ੍ਬਸਦਿਸੋਵ ਵਿਨਿਚ੍ਛਯੋਤਿ ਪਠਮਾਰੋਚਨੇ ਦੁਕ੍ਕਟਂ, ਦੁਤਿਯਾਰੋਚਨੇ ਥੁਲ੍ਲਚ੍ਚਯਨ੍ਤਿ ਵੁਤ੍ਤਂ ਹੋਤਿ.

੨੦੧੬. ‘‘ਤਵ, ਮਮਾਪਿ ਚ ਕਥਂ ਤੁਵਮੇਵ ਆਰੋਚੇਹੀ’’ਤਿ ਇਤਰੇਨ ਵੁਤ੍ਤਾ ਭਿਕ੍ਖੁਨੀਤਿ ਯੋਜਨਾ. ਯਥਾਕਾਮਨ੍ਤਿ ਤਸ੍ਸਾ ਚ ਅਤ੍ਤਨੋ ਚ ਵਚਨੇ ਯਂ ਪਠਮਂ ਵਤ੍ਤੁਮਿਚ੍ਛਤਿ, ਤਂ ਇਚ੍ਛਾਨੁਰੂਪਂ ਆਰੋਚੇਤੁ.

੨੦੧੮-੯. ਉਭਿਨ੍ਨਮ੍ਪਿ ਯਥਾ ਤਥਾ ਆਰੋਚਿਤਕਥਂ ਸੁਤ੍ਵਾਤਿ ਯੋਜਨਾ. ਯਥਾ ਤਥਾਤਿ ਪੁਬ੍ਬੇ ਵੁਤ੍ਤਨਯੇਨ ਕੇਨਚਿ ਪਕਾਰੇਨ. ਤੇਹੀਤਿ ਵੋਹਾਰਿਕੇਹਿ. ਅਟ੍ਟੇ ਪਨ ਚ ਨਿਟ੍ਠਿਤੇਤਿ ਅਟ੍ਟਕਾਰਕੇਸੁ ਏਕਸ੍ਮਿਂ ਪਕ੍ਖੇ ਪਰਾਜਿਤੇ. ਯਥਾਹ ‘‘ਪਰਾਜਿਤੇ ਅਟ੍ਟਕਾਰਕੇ ਅਟ੍ਟਪਰਿਯੋਸਾਨਂ ਨਾਮ ਹੋਤੀ’’ਤਿ. ਅਟ੍ਟਸ੍ਸ ਪਰਿਯੋਸਾਨੇਤਿ ਏਤ੍ਥ ‘‘ਤਸ੍ਸਾ’’ਤਿ ਸੇਸੋ. ਤਸ੍ਸ ਅਟ੍ਟਸ੍ਸ ਪਰਿਯੋਸਾਨੇਤਿ ਯੋਜਨਾ.

੨੦੨੦-੨੩. ਅਨਾਪਤ੍ਤਿਵਿਸਯਂ ¶ ਦਸ੍ਸੇਤੁਮਾਹ ‘‘ਦੂਤਂ ਵਾਪੀ’’ਤਿਆਦਿ. ਪਚ੍ਚਤ੍ਥਿਕਮਨੁਸ੍ਸੇਹਿ ਦੂਤਂ ਵਾਪਿ ਪਹਿਣਿਤ੍ਵਾ ਸਯਮ੍ਪਿ ਵਾ ਆਗਨ੍ਤ੍ਵਾ ਯਾ ਪਨ ਆਕਡ੍ਢੀਯਤੀਤਿ ਯੋਜਨਾ. ਅਞ੍ਞੇਹੀਤਿ ਗਾਮਦਾਰਕਾਦੀਹਿ ਅਞ੍ਞੇਹਿ. ਕਿਞ੍ਚਿ ਪਰਂ ਅਨੋਦਿਸ੍ਸਾਤਿ ਯੋਜਨਾ. ਇਮਿਸ੍ਸਾ ਓਦਿਸ੍ਸ ਵੁਤ੍ਤੇ ਤੇਹਿ ਗਹਿਤਦਣ੍ਡੇ ਤਸ੍ਸਾ ਚ ਗੀਵਾਤਿ ਸੂਚਿਤਂ ਹੋਤਿ. ਯਾ ਰਕ੍ਖਂ ਯਾਚਤਿ ¶ , ਤਤ੍ਥ ਤਸ੍ਮਿਂ ਰਕ੍ਖਾਯਾਚਨੇ ਤਸ੍ਸਾ ਅਨਾਪਤ੍ਤਿ ਪਕਾਸਿਤਾਤਿ ਯੋਜਨਾ. ਅਞ੍ਞਤੋ ਸੁਤ੍ਵਾਤਿ ਯੋਜਨਾ. ਉਮ੍ਮਤ੍ਤਿਕਾਦੀਨਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਆਦਿਕਮ੍ਮਿਕਾ ਗਹਿਤਾ.

ਸਮੁਟ੍ਠਾਨਂ ਕਥਿਨੇਨ ਤੁਲ੍ਯਨ੍ਤਿ ਯੋਜਨਾ. ਸੇਸਂ ਦਸ੍ਸੇਤੁਮਾਹ ‘‘ਸਕਿਰਿਯਂ ਇਦ’’ਨ੍ਤਿ. ਇਦਂ ਸਿਕ੍ਖਾਪਦਂ. ਕਿਰਿਯਾਯ ਸਹ ਵਤ੍ਤਤੀਤਿ ਸਕਿਰਿਯਂ ਅਟ੍ਟਕਰਣੇਨ ਆਪਜ੍ਜਨਤੋ. ‘‘ਸਮੁਟ੍ਠਾਨ’’ਨ੍ਤਿ ਇਮਿਨਾ ਚ ਸਮੁਟ੍ਠਾਨਾਦਿਵਿਨਿਚ੍ਛਯੋ ਉਪਲਕ੍ਖਿਤੋਤਿ ਦਟ੍ਠਬ੍ਬੋ.

ਅਟ੍ਟਕਾਰਿਕਾਕਥਾਵਣ੍ਣਨਾ.

੨੦੨੪-੫. ਜਾਨਨ੍ਤੀਤਿ ‘‘ਸਾਮਂ ਵਾ ਜਾਨਾਤਿ, ਅਞ੍ਞੇ ਵਾ ਤਸ੍ਸਾ ਆਰੋਚੇਨ੍ਤੀ’’ਤਿ (ਪਾਚਿ. ੬੮੪) ਵੁਤ੍ਤਨਯੇਨ ਜਾਨਨ੍ਤੀ. ਚੋਰਿਨ੍ਤਿ ਯਾਯ ਪਞ੍ਚਮਾਸਗ੍ਘਨਕਤੋ ਪਟ੍ਠਾਯ ਯਂ ਕਿਞ੍ਚਿ ਪਰਸਨ੍ਤਕਂ ਅਵਹਰਿਤਂ, ਅਯਂ ਚੋਰੀ ਨਾਮ. ਵਜ੍ਝਂ ਵਿਦਿਤਨ੍ਤਿ ‘‘ਤੇਨ ਕਮ੍ਮੇਨ ਵਧਾਰਹਾ ਅਯ’’ਨ੍ਤਿ ਏਵਂ ਵਿਦਿਤਂ. ਸਙ੍ਘਨ੍ਤਿ ਭਿਕ੍ਖੁਨਿਸਙ੍ਘਂ. ਅਨਪਲੋਕੇਤ੍ਵਾਤਿ ਅਨਾਪੁਚ੍ਛਾ. ਰਾਜਾਨਂ ਵਾਤਿ ਰਞ੍ਞਾ ਅਨੁਸਾਸਿਤਬ੍ਬਟ੍ਠਾਨੇ ਤਂ ਰਾਜਾਨਂ ਵਾ. ਯਥਾਹ ‘‘ਰਾਜਾ ਨਾਮ ਯਤ੍ਥ ਰਾਜਾ ਅਨੁਸਾਸਤਿ, ਰਾਜਾ ਅਪਲੋਕੇਤਬ੍ਬੋ’’ਤਿ. ਗਣਮੇਵ ਵਾਤਿ ‘‘ਤੁਮ੍ਹੇਵ ਤਤ੍ਥ ਅਨੁਸਾਸਥਾ’’ਤਿ ਰਾਜੂਹਿ ਦਿਨ੍ਨਂ ਗਾਮਨਿਗਮਮਲ੍ਲਗਣਾਦਿਕਂ ਗਣਂ ਵਾ. ਮਲ੍ਲਗਣਂ ਨਾਮ ਪਾਨੀਯਟ੍ਠਪਨਪੋਕ੍ਖਰਣਿਖਣਨਾਦਿਪੁਞ੍ਞਕਮ੍ਮਨਿਯੁਤ੍ਤੋ ਜਨਸਮੂਹੋ. ਏਤੇਨੇਵ ਏਵਮੇਵ ਦਿਨ੍ਨਗਾਮਵਰਾ ਪੂਗਾ ਚ ਸੇਨਿਯੋ ਚ ਸਙ੍ਗਹਿਤਾ. ਵੁਟ੍ਠਾਪੇਯ੍ਯਾਤਿ ਉਪਸਮ੍ਪਾਦੇਯ੍ਯ. ਕਪ੍ਪਨ੍ਤਿ ਚ ਵਕ੍ਖਮਾਨਲਕ੍ਖਣਂ ਕਪ੍ਪਂ. ਸਾ ਚੋਰਿਵੁਟ੍ਠਾਪਨਨ੍ਤਿ ਸਮ੍ਬਨ੍ਧੋ. ਉਪਜ੍ਝਾਯਾ ਹੁਤ੍ਵਾ ਯਾ ਚੋਰਿਂ ਉਪਸਮ੍ਪਾਦੇਤਿ, ਸਾ ਭਿਕ੍ਖੁਨੀਤਿ ਅਤ੍ਥੋ. ਉਪਜ੍ਝਾਯਸ੍ਸ ਭਿਕ੍ਖੁਸ੍ਸ ਦੁਕ੍ਕਟਂ.

੨੦੨੬. ਪਞ੍ਚਮਾਸਗ੍ਘਨਨ੍ਤਿ ਏਤ੍ਥ ਪਞ੍ਚਮਾਸਞ੍ਚ ਪਞ੍ਚਮਾਸਗ੍ਘਨਕਞ੍ਚ ਪਞ੍ਚਮਾਸਗ੍ਘਨਨ੍ਤਿ ਏਕਦੇਸਸਰੂਪੇਕਸੇਸਨਯੇਨ ਪਞ੍ਚਮਾਸਸ੍ਸਾਪਿ ¶ ਗਹਣਂ. ਅਤਿਰੇਕਗ੍ਘਨਂ ਵਾਪੀਤਿ ਏਤ੍ਥਾਪਿ ਏਸੇਵ ਨਯੋ.

੨੦੨੭. ਪਬ੍ਬਜਿਤਂ ¶ ਪੁਬ੍ਬਂ ਯਾਯ ਸਾ ਪਬ੍ਬਜਿਤਪੁਬ੍ਬਾ. ਵੁਤ੍ਤਪ੍ਪਕਾਰਂ ਚੋਰਕਮ੍ਮਂ ਕਤ੍ਵਾਪਿ ਤਿਤ੍ਥਾਯਤਨਾਦੀਸੁ ਯਾ ਪਠਮਂ ਪਬ੍ਬਜਿਤਾਤਿ ਅਤ੍ਥੋ.

੨੦੨੮-੩੦. ਇਦਾਨਿ ਪੁਬ੍ਬਪਯੋਗਦੁਕ੍ਕਟਾਦਿਆਪਤ੍ਤਿਵਿਭਾਗਂ ਦਸ੍ਸੇਤੁਮਾਹ ‘‘ਵੁਟ੍ਠਾਪੇਤਿ ਚ ਯਾ ਚੋਰਿ’’ਨ੍ਤਿਆਦਿ. ਇਧ ‘‘ਉਪਜ੍ਝਾਯਾ ਹੁਤ੍ਵਾ’’ਤਿ ਸੇਸੋ. ਇਦਂ ਕਪ੍ਪਂ ਠਪੇਤ੍ਵਾਤਿ ਯੋਜਨਾ. ਸੀਮਂ ਸਮ੍ਮਨ੍ਨਤਿ ਚਾਤਿ ਅਭਿਨਵਂ ਸੀਮਂ ਸਮ੍ਮਨ੍ਨਤਿ, ਬਨ੍ਧਤੀਤਿ ਵੁਤ੍ਤਂ ਹੋਤਿ. ਅਸ੍ਸਾਤਿ ਭਵੇਯ੍ਯ. ‘‘ਦੁਕ੍ਕਟ’’ਨ੍ਤਿ ਇਮਿਨਾ ਚ ‘‘ਥੁਲ੍ਲਚ੍ਚਯਂ ਦ੍ਵਯ’’ਨ੍ਤਿ ਇਮਿਨਾ ਚ ਯੋਜੇਤਬ੍ਬਂ.

ਕਮ੍ਮਨ੍ਤੇਤਿ ਉਪਸਮ੍ਪਦਕਮ੍ਮਸ੍ਸ ਪਰਿਯੋਸਾਨੇ, ਤਤਿਯਾਯ ਕਮ੍ਮਵਾਚਾਯ ਯ੍ਯਕਾਰਪ੍ਪਤ੍ਤਾਯਾਤਿ ਵੁਤ੍ਤਂ ਹੋਤਿ.

੨੦੩੧. ਅਜਾਨਨ੍ਤੀਤਿ ਚੋਰਿਂ ਅਜਾਨਨ੍ਤੀ. (ਇਦਂ ਸਿਕ੍ਖਾਪਦਂ.)

੨੦੩੨. ਚੋਰਿਵੁਟ੍ਠਾਪਨਂ ਨਾਮਾਤਿ ਇਦਂ ਸਿਕ੍ਖਾਪਦਂ ਚੋਰਿਵੁਟ੍ਠਾਪਨਸਮੁਟ੍ਠਾਨਂ ਨਾਮ. ਵਾਚਚਿਤ੍ਤਤੋਤਿ ਖਣ੍ਡਸੀਮਂ ਅਗਨ੍ਤ੍ਵਾ ਕਰੋਨ੍ਤਿਯਾ ਵਾਚਾਚਿਤ੍ਤੇਹਿ. ਕਾਯਵਾਚਾਦਿਤੋ ਚੇਵਾਤਿ ਗਨ੍ਤ੍ਵਾ ਕਰੋਨ੍ਤਿਯਾ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ. ਯਥਾਹ ‘‘ਕੇਨਚਿਦੇਵ ਕਰਣੀਯੇਨ ਪਕ੍ਕਨ੍ਤਾਸੁ ਭਿਕ੍ਖੁਨੀਸੁ ਅਗਨ੍ਤ੍ਵਾ ਖਣ੍ਡਸੀਮਂ ਵਾ ਨਦਿਂ ਵਾ ਯਥਾਨਿਸਿਨ੍ਨਟ੍ਠਾਨੇਯੇਵ ਅਤ੍ਤਨੋ ਨਿਸ੍ਸਿਤਕਪਰਿਸਾਯ ਸਦ੍ਧਿਂ ਵੁਟ੍ਠਾਪੇਨ੍ਤਿਯਾ ਵਾਚਾਚਿਤ੍ਤਤੋ ਸਮੁਟ੍ਠਾਤਿ, ਖਣ੍ਡਸੀਮਂ ਵਾ ਨਦਿਂ ਵਾ ਗਨ੍ਤ੍ਵਾ ਵੁਟ੍ਠਾਪੇਨ੍ਤਿਯਾ ¶ ਕਾਯਵਾਚਾਚਿਤ੍ਤਤੋ ਸਮੁਟ੍ਠਾਤੀ’’ਤਿ (ਪਾਚਿ. ਅਟ੍ਠ. ੬੮੩). ਕ੍ਰਿਯਾਕ੍ਰਿਯਨ੍ਤਿ ਅਨਾਪੁਚ੍ਛਾਵੁਟ੍ਠਾਪਨਵਸੇਨ ਕਿਰਿਯਾਕਿਰਿਯਂ.

ਚੋਰਿਵੁਟ੍ਠਾਪਨਕਥਾਵਣ੍ਣਨਾ.

੨੦੩੩-੪. ਗਾਮਨ੍ਤਰਨ੍ਤਿ ਅਞ੍ਞਂ ਗਾਮਂ. ਯਾ ਏਕਾ ਸਚੇ ਗਚ੍ਛੇਯ੍ਯਾਤਿ ਸਮ੍ਬਨ੍ਧੋ. ਨਦੀਪਾਰਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਨਦਿਯਾ ਪਾਰਂ ਨਦੀਪਾਰਂ. ‘‘ਏਕਾ ਵਾ’’ਤਿ ਉਪਰਿਪਿ ਯੋਜੇਤਬ੍ਬਂ. ਓਹੀਯੇਯ੍ਯਾਤਿ ਵਿਨਾ ਭਵੇਯ੍ਯ. ਇਧ ‘‘ਅਰਞ੍ਞੇ’’ਤਿ ਸੇਸੋ. ਅਰਞ੍ਞਲਕ੍ਖਣਂ ‘‘ਇਨ੍ਦਖੀਲ’’ਇਚ੍ਚਾਦਿਨਾ ਵਕ੍ਖਤਿ. ‘‘ਏਕਾ ਵਾ ਰਤ੍ਤਿਂ ਵਿਪ੍ਪਵਸੇਯ੍ਯ, ਏਕਾ ਵਾ ਗਣਮ੍ਹਾ ਓਹੀਯੇਯ੍ਯਾ’’ਤਿ ਸਿਕ੍ਖਾਪਦਕ੍ਕਮੋ, ਏਵਂ ਸਨ੍ਤੇਪਿ ਗਾਥਾਬਨ੍ਧਵਸੇਨ ‘‘ਰਤ੍ਤਿਂ ਵਿਪ੍ਪਵਸੇਯ੍ਯਾ’’ਤਿ ਅਨ੍ਤੇ ਵੁਤ੍ਤਂ ¶ . ਤੇਨੇਵ ਵਿਭਾਗਵਿਨਿਚ੍ਛਯੇ ਦੇਸਨਾਰੁਲ਼੍ਹਕ੍ਕਮੇਨੇਵ ‘‘ਪੁਰੇਰੁਣੋਦਯਾਯੇਵਾ’’ਤਿਆਦਿਂ ਵਕ੍ਖਤਿ. ਸਾ ਪਠਮਾਪਤ੍ਤਿਕਂ ਗਰੁਕਂ ਧਮ੍ਮਂ ਆਪਨ੍ਨਾ ਸਿਯਾਤਿ ਯੋਜਨਾ. ਪਠਮਂ ਆਪਤ੍ਤਿ ਏਤਸ੍ਸਾਤਿ ਪਠਮਾਪਤ੍ਤਿਕੋ, ਵੀਤਿਕ੍ਕਮਕ੍ਖਣੇਯੇਵ ਆਪਜ੍ਜਿਤਬ੍ਬੋਤਿ ਅਤ੍ਥੋ. ‘‘ਗਰੁਕਂ ਧਮ੍ਮ’’ਨ੍ਤਿ ਇਮਿਨਾ ਸਮ੍ਬਨ੍ਧੋ. ਸਕਗਾਮਾ ਨਿਕ੍ਖਮਨ੍ਤਿਯਾਤਿ ਭਿਕ੍ਖੁਨਿਯਾ ਅਤ੍ਤਨੋ ਵਸਨਗਾਮਤੋ ਨਿਕ੍ਖਮਨ੍ਤਿਯਾ.

੨੦੩੫. ਤਤੋ ਸਕਗਾਮਤੋ.

੨੦੩੬-੭. ਏਕੇਨ ਪਦਵਾਰੇਨ ਇਤਰਸ੍ਸ ਗਾਮਸ੍ਸ ਪਰਿਕ੍ਖੇਪੇ ਅਤਿਕ੍ਕਨ੍ਤੇ, ਉਪਚਾਰੋਕ੍ਕਮੇ ਵਾ ਥੁਲ੍ਲਚ੍ਚਯਨ੍ਤਿ ਯੋਜਨਾ. ਅਤਿਕ੍ਕਨ੍ਤੇ ਓਕ੍ਕਨ੍ਤੇਤਿ ਏਤ੍ਥ ‘‘ਪਰਿਕ੍ਖੇਪੇ ਉਪਚਾਰੇ’’ਤਿ ਅਧਿਕਾਰਤੋ ਲਬ੍ਭਤਿ.

੨੦੩੮-੯. ਨਿਕ੍ਖਮਿਤ੍ਵਾਤਿ ਅਤ੍ਤਨੋ ਪਵਿਟ੍ਠਗਾਮਤੋ ਨਿਕ੍ਖਮਿਤ੍ਵਾ. ਅਯਮੇਵ ਨਯੋਤਿ ‘‘ਏਕੇਨ ਪਦਵਾਰੇਨ ਥੁਲ੍ਲਚ੍ਚਯਂ, ਦੁਤਿਯੇਨ ਗਰੁਕਾਪਤ੍ਤੀ’’ਤਿ ਅਯਂ ਨਯੋ.

ਵਤਿਚ੍ਛਿਦ੍ਦੇਨ ¶ ਵਾ ਖਣ੍ਡਪਾਕਾਰੇਨ ਵਾਤਿ ਯੋਜਨਾ. ‘‘ਤਥਾ’’ਤਿ ਇਮਿਨਾ ‘‘ਪਾਕਾਰੇਨਾ’’ਤਿ ਏਤ੍ਥਾਪਿ ਵਾ-ਸਦ੍ਦਸ੍ਸ ਸਮ੍ਬਨ੍ਧਨੀਯਤਂ ਦਸ੍ਸੇਤਿ. ‘‘ਭਿਕ੍ਖੁਵਿਹਾਰਸ੍ਸ ਭੂਮਿ ਤਾਸਮਕਪ੍ਪਿਯਾ’’ਤਿ ਵਕ੍ਖਮਾਨਤ੍ਤਾ ਵਿਹਾਰਸ੍ਸ ਭੂਮਿਨ੍ਤਿ ਭਿਕ੍ਖੁਨਿਵਿਹਾਰਭੂਮਿ ਗਹਿਤਾ. ‘‘ਕਪ੍ਪਿਯਨ੍ਤਿ ਪਵਿਟ੍ਠਤ੍ਤਾ’’ਤਿ ਇਮਿਨਾ ਵਕ੍ਖਮਾਨਸ੍ਸ ਕਾਰਣਂ ਦਸ੍ਸੇਤਿ. ਕੋਚਿ ਦੋਸੋਤਿ ਥੁਲ੍ਲਚ੍ਚਯਸਙ੍ਘਾਦਿਸੇਸੋ ਵੁਚ੍ਚਮਾਨੋ ਯੋ ਕੋਚਿ ਦੋਸੋ.

੨੦੪੦. ਤਾਸਨ੍ਤਿ ਭਿਕ੍ਖੁਨੀਨਂ. ‘‘ਅਕਪ੍ਪਿਯਾ’’ਤਿ ਇਮਿਨਾ ਤਤ੍ਥਾਪਿ ਪਵਿਟ੍ਠਾਯ ਗਾਮਨ੍ਤਰਪਚ੍ਚਯਾ ਆਪਤ੍ਤਿਸਮ੍ਭਵਮਾਹ.

੨੦੪੧. ‘‘ਪਠਮਂ ਪਾਦਂ ਅਤਿਕ੍ਕਾਮੇਨ੍ਤਿਯਾ’’ਤਿ (ਪਾਚਿ. ੬੯੨) ਵੁਤ੍ਤਤ੍ਤਾ ‘‘ਹਤ੍ਥਿ…ਪੇ… ਅਨਾਪਤ੍ਤਿ ਸਿਯਾਪਤ੍ਤਿ, ਪਦਸਾ ਗਮਨੇ ਪਨਾ’’ਤਿ ਵੁਤ੍ਤਂ.

੨੦੪੨. ‘‘ਯਂ ਕਿਞ੍ਚਿ…ਪੇ… ਆਪਤ੍ਤਿ ਪਵਿਸਨ੍ਤਿਯਾ’’ਤਿ ਵੁਤ੍ਤਸ੍ਸੇਵਤ੍ਥਸ੍ਸ ਉਪਸਂਹਾਰਤ੍ਤਾ ਨ ਪੁਨਰੁਤ੍ਤਿਦੋਸੋ.

੨੦੪੩-੪. ਲਕ੍ਖਣੇਨੁਪਪਨ੍ਨਾਯਾਤਿ ¶ ‘‘ਨਦੀ ਨਾਮ ਤਿਮਣ੍ਡਲਂ ਪਟਿਚ੍ਛਾਦੇਤ੍ਵਾ ਯਤ੍ਥ ਕਤ੍ਥਚਿ ਉਤ੍ਤਰਨ੍ਤਿਯਾ ਭਿਕ੍ਖੁਨਿਯਾ ਅਨ੍ਤਰਵਾਸਕੋ ਤੇਮਿਯਤੀ’’ਤਿ (ਪਾਚਿ. ੬੯੨) ਵੁਤ੍ਤਲਕ੍ਖਣੇਨ ਸਮਨ੍ਨਾਗਤਾਯ ਨਦਿਯਾ. ਯਾ ਪਾਰਂ ਤੀਰਂ ਗਚ੍ਛਤੀਤਿ ਯੋਜਨਾ.

ਪਠਮਂ ਪਾਦਂ ਉਦ੍ਧਰਿਤ੍ਵਾਨ ਤੀਰੇ ਠਪੇਨ੍ਤਿਯਾਤਿ ‘‘ਇਦਾਨਿ ਪਦਵਾਰੇਨ ਅਤਿਕ੍ਕਮਤੀ’’ਤਿ ਵਤ੍ਤਬ੍ਬਕਾਲੇ ਪਠਮਂ ਪਾਦਂ ਉਕ੍ਖਿਪਿਤ੍ਵਾ ਪਰਤੀਰੇ ਠਪੇਨ੍ਤਿਯਾ. ‘‘ਦੁਤਿਯਪਾਦੁਦ੍ਧਾਰੇ ਸਙ੍ਘਾਦਿਸੇਸੋ’’ਤਿ (ਪਾਚਿ. ਅਟ੍ਠ. ੬੯੨) ਅਟ੍ਠਕਥਾਵਚਨਤੋ ‘‘ਅਤਿਕ੍ਕਮੇ’’ਤਿ ਇਮਿਨਾ ਉਦ੍ਧਾਰੋ ਗਹਿਤੋ.

੨੦੪੫. ਅਨ੍ਤਰਨਦਿਯਨ੍ਤਿ ਨਦਿਵੇਮਜ੍ਝੇ. ਭਣ੍ਡਿਤ੍ਵਾਤਿ ਕਲਹਂ ਕਤ੍ਵਾ. ਓਰਿਮਂ ਤੀਰਨ੍ਤਿ ਆਗਤਦਿਸਾਯ ਤੀਰਂ. ਤਥਾ ਪਠਮੇ ਥੁਲ੍ਲਚ੍ਚਯਂ ¶ , ਦੁਤਿਯੇ ਗਰੁ ਹੋਤੀਤਿ ਅਤ੍ਥੋ. ਇਮਿਨਾ ਸਕਲੇਨ ਵਚਨੇਨ ‘‘ਇਤਰਿਸ੍ਸਾ ਪਨ ਅਯਂ ਪਕ੍ਕਨ੍ਤਟ੍ਠਾਨੇ ਠਿਤਾ ਹੋਤਿ, ਤਸ੍ਮਾ ਪਰਤੀਰਂ ਗਚ੍ਛਨ੍ਤਿਯਾਪਿ ਅਨਾਪਤ੍ਤੀ’’ਤਿ ਅਟ੍ਠਕਥਾਪਿ ਉਲ੍ਲਿਙ੍ਗਿਤਾ.

੨੦੪੬. ਰਜ੍ਜੁਯਾਤਿ ਵਲ੍ਲਿਆਦਿਕਾਯ ਯਾਯ ਕਾਯਚਿ ਰਜ੍ਜੁਯਾ.

੨੦੪੭. ਪਿਵਿਤੁਨ੍ਤਿ ਏਤ੍ਥ ‘‘ਪਾਨੀਯ’’ਨ੍ਤਿ ਪਕਰਣਤੋ ਲਬ੍ਭਤਿ. ਅਵੁਤ੍ਤਸਮੁਚ੍ਚਯਤ੍ਥੇਨ ਅਪਿ-ਸਦ੍ਦੇਨ ਭਣ੍ਡਧੋਵਨਾਦਿਂ ਸਙ੍ਗਣ੍ਹਾਤਿ. ਅਥਾਤਿ ਵਾਕ੍ਯਾਰਮ੍ਭੇ ਨਿਪਾਤੋ. ‘‘ਨਹਾਨਾਦਿਕਿਚ੍ਚਂ ਸਮ੍ਪਾਦੇਤ੍ਵਾ ਓਰਿਮਮੇਵ ਤੀਰਂ ਆਗਮਿਸ੍ਸਾਮੀ’’ਤਿ ਆਲਯਸ੍ਸ ਵਿਜ੍ਜਮਾਨਤ੍ਤਾ ਆਹ ‘‘ਵਟ੍ਟਤੀ’’ਤਿ.

੨੦੪੮. ਪਦਸਾਨਦਿਂ ਓਤਰਿਤ੍ਵਾਨਾਤਿ ਯੋਜਨਾ. ਸੇਤੁਂ ਆਰੋਹਿਤ੍ਵਾ ਤਥਾ ਪਦਸਾ ਉਤ੍ਤਰਨ੍ਤਿਯਾ ਅਨਾਪਤ੍ਤੀਤਿ ਯੋਜਨਾ.

੨੦੪੯. ਗਨ੍ਤ੍ਵਾਨਾਤਿ ਏਤ੍ਥ ‘‘ਨਦਿ’’ਨ੍ਤਿ ਸੇਸੋ. ਉਤ੍ਤਰਣਕਾਲੇ ਪਦਸਾ ਯਾਤੀਤਿ ਯੋਜਨਾ.

੨੦੫੦. ਵੇਗੇਨਾਤਿ ਏਕੇਨੇਵ ਵੇਗੇਨ, ਅਨ੍ਤਰਾ ਅਨਿਵਤ੍ਤਿਤ੍ਵਾਤਿ ਅਤ੍ਥੋ.

੨੦੫੧. ‘‘ਨਿਸੀਦਿਤ੍ਵਾ’’ਤਿ ਇਦਂ ‘‘ਖਨ੍ਧੇ ਵਾ’’ਤਿਆਦੀਹਿਪਿ ਯੋਜੇਤਬ੍ਬਂ. ਖਨ੍ਧਾਦਯੋ ਚੇਤ੍ਥ ਸਭਾਗਾਨਮੇਵ ਗਹੇਤਬ੍ਬਾ. ਹਤ੍ਥਸਙ੍ਘਾਤਨੇ ਵਾਤਿ ਉਭੋਹਿ ਬਦ੍ਧਹਤ੍ਥਵਲਯੇ ਵਾ.

੨੦੫੨-੩. ਪਾਸਨ੍ਤਿ ¶ ਹਤ੍ਥਪਾਸਂ. ‘‘ਆਭੋਗਂ ਵਿਨਾ’’ਤਿ ਇਮਿਨਾ ‘‘ਗਮਿਸ੍ਸਾਮੀ’’ਤਿ ਆਭੋਗੇ ਕਤੇ ਅਜਾਨਨ੍ਤਿਯਾ ਅਰੁਣੇ ¶ ਉਟ੍ਠਿਤੇਪਿ ਅਨਾਪਤ੍ਤੀਤਿ ਦੀਪਿਤਂ ਹੋਤਿ. ਯਥਾਹ ‘‘ਸਚੇ ਸਜ੍ਝਾਯਂ ਵਾ ਸਵਨਂ ਵਾ ਅਞ੍ਞਂ ਵਾ ਕਿਞ੍ਚਿ ਕਮ੍ਮਂ ਕੁਰੁਮਾਨਾ ‘ਪੁਰੇਅਰੁਣੇਯੇਵ ਦੁਤਿਯਿਕਾਯ ਸਨ੍ਤਿਕਂ ਗਮਿਸ੍ਸਾਮੀ’ਤਿ ਆਭੋਗਂ ਕਰੋਤਿ, ਅਜਾਨਨ੍ਤਿਯਾ ਏਵ ਚਸ੍ਸਾ ਅਰੁਣੋ ਉਗ੍ਗਚ੍ਛਤਿ, ਅਨਾਪਤ੍ਤੀ’’ਤਿ (ਪਾਚਿ. ਅਟ੍ਠ. ੬੯੨). ਨਾਨਾਗਬ੍ਭੇ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸੇਤੁਮਾਹ ‘‘ਏਕਗਬ੍ਭੇਪਿ ਵਾ’’ਤਿ. ਏਕਗਬ੍ਭੇਪਿ ਵਾ ਦੁਤਿਯਿਕਾਯ ਹਤ੍ਥਪਾਸਂ ਅਤਿਕ੍ਕਮ੍ਮ ਅਰੁਣਂ ਉਟ੍ਠਪੇਨ੍ਤਿਯਾ ਭਿਕ੍ਖੁਨਿਯਾ ਆਪਤ੍ਤਿ ਸਿਯਾਤਿ ਯੋਜਨਾ.

੨੦੫੪. ਦੁਤਿਯਾਪਾਸਨ੍ਤਿ ਦੁਤਿਯਿਕਾਯ ਹਤ੍ਥਪਾਸਂ. ‘‘ਗਮਿਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਗਚ੍ਛਨ੍ਤਿਯਾ ਸਚੇ ਅਰੁਣਂ ਉਟ੍ਠੇਤਿ, ਨ ਦੋਸੋਤਿ ਯੋਜਨਾ.

੨੦੫੫-੬. ਅਞ੍ਞਤ੍ਥ ਪਞ੍ਚਧਨੁਸਤਿਕਸ੍ਸ (ਪਾਰਾ. ੬੫੪) ਪਚ੍ਛਿਮਸ੍ਸ ਆਰਞ੍ਞਕਸੇਨਾਸਨਸ੍ਸ ਵੁਤ੍ਤਤ੍ਤਾ ਤਤੋ ਨਿਵਤ੍ਤੇਤੁਮਾਹ ‘‘ਇਨ੍ਦਖੀਲਮਤਿਕ੍ਕਮ੍ਮਾ’’ਤਿਆਦਿ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਦੀਪਿਤਨ੍ਤਿ ਅਟ੍ਠਕਥਾਯ ‘‘ਅਰਞ੍ਞੇਤਿ ਏਤ੍ਥ ਨਿਕ੍ਖਮਿਤ੍ਵਾ ਬਹਿ ਇਨ੍ਦਖੀਲਾ ਸਬ੍ਬਮੇਤਂ ਅਰਞ੍ਞ’’ਨ੍ਤਿ (ਪਾਚਿ. ਅਟ੍ਠ. ੬੯੨) ਏਵਂ ਵੁਤ੍ਤਲਕ੍ਖਣਮੇਵ ਅਰਞ੍ਞਂ ਦਸ੍ਸਿਤਨ੍ਤਿ ਅਤ੍ਥੋ.

ਦੁਤਿਯਿਕਾਯ ਦਸ੍ਸਨੂਪਚਾਰਂ ਵਿਜਹਨ੍ਤਿਯਾ ਤਸ੍ਸਾਤਿ ਯੋਜਨਾ. ‘‘ਜਹਿਤੇ’’ਤਿ ਇਦਂ ਅਪੇਕ੍ਖਿਤ੍ਵਾ ‘‘ਉਪਚਾਰੇ’’ਤਿ ਵਿਭਤ੍ਤਿਵਿਪਰਿਣਾਮੋ ਕਾਤਬ੍ਬੋ.

੨੦੫੭. ਸਾਣਿਪਾਕਾਰਪਾਕਾਰਤਰੁਅਨ੍ਤਰਿਤੇ ਠਾਨੇ ਅਸਤਿ ਦਸ੍ਸਨੂਪਚਾਰੇ ਸਤਿਪਿ ਸਵਨੂਪਚਾਰੇ ਆਪਤ੍ਤਿ ਹੋਤੀਤਿ ਯੋਜਨਾ.

੨੦੫੮-੬੦. ਏਤ੍ਥ ਕਥਨ੍ਤਿ ਯਤ੍ਥ ਦੂਰੇਪਿ ਦਸ੍ਸਨਂ ਹੋਤਿ, ਏਵਰੂਪੇ ਅਜ੍ਝੋਕਾਸੇ ਆਪਤ੍ਤਿਨਿਯਮੋ ਕਥਂ ਕਾਤਬ੍ਬੋਤਿ ¶ ਅਤ੍ਥੋ. ਅਨੇਕੇਸੁ ਠਾਨੇਸੁ ‘‘ਸਵਨੂਪਚਾਰਾਤਿਕ੍ਕਮੇ’’ਤਿ ਵੁਚ੍ਚਮਾਨਤ੍ਤਾ ਤਤ੍ਥ ਲਕ੍ਖਣਂ ਠਪੇਤੁਮਾਹ ‘‘ਮਗ੍ਗ…ਪੇ… ਏਵਰੂਪਕੇ’’ਤਿ. ਏਤ੍ਥ ‘‘ਠਾਨੇ’’ਤਿ ਸੇਸੋ. ਕੂਜਨ੍ਤਿਯਾਤਿ ਯਥਾਵਣ੍ਣਵਵਤ੍ਥਾਨਂ ਨ ਹੋਤਿ, ਏਵਂ ਅਬ੍ਯਤ੍ਤਸਦ੍ਦਂ ਕਰੋਨ੍ਤਿਯਾ.

ਏਵਰੂਪਕੇ ਠਾਨੇ ਧਮ੍ਮਸ੍ਸਵਨਾਰੋਚਨੇ ਵਿਯ ਚ ਮਗ੍ਗਮੂਲ਼੍ਹਸ੍ਸ ਸਦ੍ਦੇਨ ਵਿਯ ਚ ‘‘ਅਯ੍ਯੇ’’ਤਿ ਕੂਜਨ੍ਤਿਯਾ ¶ ਤਸ੍ਸਾ ਸਦ੍ਦਸ੍ਸ ਸਵਨਾਤਿਕ੍ਕਮੇ ਭਿਕ੍ਖੁਨਿਯਾ ਗਰੁਕਾ ਆਪਤ੍ਤਿ ਹੋਤੀਤਿ ਯੋਜਨਾ. ‘‘ਭਿਕ੍ਖੁਨਿਯਾ ਗਰੁਕਾ ਹੋਤੀ’’ਤਿ ਇਦਂ ‘‘ਦੁਤਿਯਿਕਂ ਨ ਪਾਪੁਣਿਸ੍ਸਾਮੀ’’ਤਿ ਨਿਰੁਸ੍ਸਾਹਵਸੇਨ ਵੇਦਿਤਬ੍ਬਂ. ਤੇਨੇਵ ਵਕ੍ਖਤਿ ‘‘ਓਹੀਯਿਤ੍ਵਾਥ ਗਚ੍ਛਨ੍ਤੀ’’ਤਿਆਦਿ. ਏਤ੍ਥਾਤਿ ‘‘ਗਣਮ੍ਹਾ ਓਹੀਯੇਯ੍ਯਾ’’ਤਿ ਇਮਸ੍ਮਿਂ.

੨੦੬੧. ਅਥ ਗਚ੍ਛਨ੍ਤੀ ਓਹੀਯਿਤ੍ਵਾਤਿ ਯੋਜਨਾ. ‘‘ਇਦਾਨਿ ਅਹਂ ਪਾਪੁਣਿਸ੍ਸਾਮਿ’’ ਇਤਿ ਏਵਂ ਸਉਸ੍ਸਾਹਾ ਅਨੁਬਨ੍ਧਤਿ, ਵਟ੍ਟਤਿ, ਦੁਤਿਯੋਪਚਾਰਾਤਿਕ੍ਕਮੇਪਿ ਅਨਾਪਤ੍ਤੀਤਿ ਵੁਤ੍ਤਂ ਹੋਤਿ.

੨੦੬੨. ‘‘ਗਚ੍ਛਤੁ ਅਯਂ’’ ਇਤਿ ਉਸ੍ਸਾਹਸ੍ਸਚ੍ਛੇਦਂ ਕਤ੍ਵਾ ਓਹੀਨਾ ਚੇ, ਤਸ੍ਸਾ ਆਪਤ੍ਤੀਤਿ ਅਜ੍ਝਾਹਾਰਯੋਜਨਾ.

੨੦੬੩. ਇਤਰਾਪੀਤਿ ਗਨ੍ਤੁਂ ਸਮਤ੍ਥਾਪਿ. ਓਹੀਯਤੁ ਅਯਨ੍ਤਿ ਚਾਤਿ ਨਿਰੁਸ੍ਸਾਹਪ੍ਪਕਾਰੋ ਸਨ੍ਦਸ੍ਸਿਤੋ. ਵੁਤ੍ਤਤ੍ਥਮੇਵ ਸਮਤ੍ਥਯਿਤੁਮਾਹ ‘‘ਸਉਸ੍ਸਾਹਾ ਨ ਹੋਤਿ ਚੇ’’ਤਿ.

੨੦੬੪-੫. ਪੁਰਿਮਾ ਏਕਕਂ ਮਗ੍ਗਂ ਯਾਤੀਤਿ ਯੋਜਨਾ. ਏਕਮੇਵ ਏਕਕਂ. ਤਸ੍ਮਾਤਿ ਯਸ੍ਮਾ ਏਕਿਸ੍ਸਾ ਇਤਰਾ ਪਕ੍ਕਨ੍ਤਟ੍ਠਾਨੇ ਤਿਟ੍ਠਤਿ, ਤਸ੍ਮਾ. ਤਤ੍ਥਾਤਿ ਤਸ੍ਮਿਂ ਗਣਮ੍ਹਾਓਹੀਯਨੇ. ਪਿ-ਸਦ੍ਦੋ ਏਵਕਾਰਤ੍ਥੋ. ਅਨਾਪਤ੍ਤਿ ਏਵ ਪਕਾਸਿਤਾਤਿ ਯੋਜਨਾ.

੨੦੬੬-੭. ਗਾਮਨ੍ਤਰਗਤਾਯਾਤਿ ਗਾਮਸੀਮਗਤਾਯ. ‘‘ਨਦਿਯਾ’’ਤਿ ਇਮਿਨਾ ਸਮ੍ਬਨ੍ਧੋ. ਆਪਤ੍ਤਿਯੋਚਤਸ੍ਸੋਪੀਤਿ ਰਤ੍ਤਿਵਿਪ੍ਪਵਾਸ ਗਾਮਨ੍ਤਰਗਮਨ ਨਦਿਪਾਰਗਮਨ ਗਣਮ੍ਹਾਓਹੀਯਨ ਸਙ੍ਖਾਤਾ ਚਤਸ੍ਸੋ ¶ ਸਙ੍ਘਾਦਿਸੇਸਾਪਤ੍ਤਿਯੋ. ਗਣਮ੍ਹਾਓਹੀਯਨਮੂਲਕਾਪਤ੍ਤਿਯਾ ਗਾਮਤੋ ਬਹਿ ਆਪਜ੍ਜਿਤਬ੍ਬਤ੍ਤੇਪਿ ਗਾਮਨ੍ਤਰੋਕ੍ਕਮਨਮੂਲਕਾਪਤ੍ਤਿਯਾ ਅਨ੍ਤੋਗਾਮੇ ਆਪਜ੍ਜਿਤਬ੍ਬਤ੍ਤੇਪਿ ਏਕਕ੍ਖਣੇਤਿ ਗਾਮੂਪਚਾਰਂ ਸਨ੍ਧਾਯਾਹ.

੨੦੬੮-੯. ਯਾ ਸਦ੍ਧਿਂ ਯਾਤਾ ਦੁਤਿਯਿਕਾ, ਸਾ ਚ ਪਕ੍ਕਨ੍ਤਾ ਵਾ ਸਚੇ ਹੋਤਿ, ਵਿਬ੍ਭਨ੍ਤਾ ਵਾ ਹੋਤਿ, ਪੇਤਾਨਂ ਲੋਕਂ ਯਾਤਾ ਵਾ ਹੋਤਿ, ਕਾਲਕਤਾ ਵਾ ਹੋਤੀਤਿ ਅਧਿਪ੍ਪਾਯੋ, ਪਕ੍ਖਸਙ੍ਕਨ੍ਤਾ ਵਾ ਹੋਤਿ, ਤਿਤ੍ਥਾਯਤਨਸਙ੍ਕਨ੍ਤਾ ਵਾ ਹੋਤੀਤਿ ਅਧਿਪ੍ਪਾਯੋ, ਨਟ੍ਠਾ ਵਾ ਹੋਤਿ, ਪਾਰਾਜਿਕਾਪਨ੍ਨਾ ਵਾ ਹੋਤੀਤਿ ¶ ਅਧਿਪ੍ਪਾਯੋ. ਏਵਰੂਪੇ ਕਾਲੇ ਗਾਮਨ੍ਤਰੋਕ੍ਕਮਨਾਦੀਨਿ…ਪੇ… ਅਨਾਪਤ੍ਤੀਤਿ ਞਾਤਬ੍ਬਨ੍ਤਿ ਯੋਜਨਾ. ਉਮ੍ਮਤ੍ਤਿਕਾਯਪਿ ਏਵਂ ਚਤ੍ਤਾਰਿਪਿ ਕਰੋਨ੍ਤਿਯਾ ਅਨਾਪਤ੍ਤੀਤਿ ਯੋਜਨਾ.

੨੦੭੦. ‘‘ਅਗਾਮਕੇ ਅਰਞ੍ਞੇ’’ਤਿ ਇਦਂ ਗਾਮਾਭਾਵੇਨ ਵੁਤ੍ਤਂ, ਨ ਵਿਞ੍ਝਾਟਵਿਸਦਿਸਤਾਯ.

੨੦੭੧. ਗਾਮਭਾਵਤੋ ਨਦਿਪਾਰਗਮਨਗਣਮ੍ਹਾਓਹੀਯਨਾਪਤ੍ਤਿ ਨ ਸਮ੍ਭਵਤਿ, ਤਸ੍ਸਾਪਿ ਸਕਗਾਮਤ੍ਤਾ ਗਾਮਨ੍ਤਰਗਮਨਮੂਲਿਕਾਪਤ੍ਤਿ ਚ ਦਿਵਸਭਾਗਤ੍ਤਾ ਰਤ੍ਤਿਵਿਪ੍ਪਵਾਸਮੂਲਿਕਾਪਤ੍ਤਿ ਚ ਨ ਸਮ੍ਭਵਤੀਤਿ ਆਹ ‘‘ਸਕਗਾਮੇ…ਪੇ… ਨ ਵਿਜ੍ਜਰੇ’’ਤਿ. ਯਥਾਕਾਮਨ੍ਤਿ ਯਥਿਚ੍ਛਿਤਂ, ਦੁਤਿਯਿਕਾਯ ਅਸਨ੍ਤਿਯਾਪੀਤਿ ਅਤ੍ਥੋ.

੨੦੭੨. ਸਮੁਟ੍ਠਾਨਾਦਯੋ ਪਠਮਨ੍ਤਿਮਵਤ੍ਥੁਨਾ ਤੁਲ੍ਯਾਤਿ ਯੋਜਨਾ.

ਗਾਮਨ੍ਤਰਗਮਨਕਥਾਵਣ੍ਣਨਾ.

੨੦੭੩. ਸੀਮਾਸਮ੍ਮੁਤਿਯਾ ਚੇਵਾਤਿ ‘‘ਸਮਗ੍ਗੇਨ ਸਙ੍ਘੇਨ ਧਮ੍ਮੇਨ ਵਿਨਯੇਨ ਉਕ੍ਖਿਤ੍ਤਂ ਭਿਕ੍ਖੁਨਿਂ ਕਾਰਕਸਙ੍ਘਂ ਅਨਾਪੁਚ੍ਛਾ ਤਸ੍ਸੇਵ ਕਾਰਕਸਙ੍ਘਸ੍ਸ ਛਨ੍ਦਂ ਅਜਾਨਿਤ੍ਵਾ ਓਸਾਰੇਸ੍ਸਾਮੀ’’ਤਿ ਨਵਸੀਮਾਸਮ੍ਮਨ੍ਨਨੇ ਚ. ਦ੍ਵੀਹਿ ਕਮ੍ਮਵਾਚਾਹਿ ਦੁਵੇ ਥੁਲ੍ਲਚ੍ਚਯਾ ਹੋਨ੍ਤੀਤਿ ਯੋਜਨਾ.

੨੦੭੪. ਕਮ੍ਮਸ੍ਸ ¶ ਪਰਿਯੋਸਾਨੇਤਿ ਓਸਾਰਣਕਮ੍ਮਸ੍ਸ ਅਵਸਾਨੇ. ਤਿਕਸਙ੍ਘਾਦਿਸੇਸਨ੍ਤਿ ‘‘ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞਾ ਓਸਾਰੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਧਮ੍ਮਕਮ੍ਮੇ ਵੇਮਤਿਕਾ, ਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਾ ਓਸਾਰੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸਾ’’ਤਿ (ਪਾਚਿ. ੬੯੭) ਤਿਕਸਙ੍ਘਾਦਿਸੇਸਂ ਵੁਤ੍ਤਂ. ਕਮ੍ਮਨ੍ਤਿ ਚ ਉਕ੍ਖੇਪਨੀਯਕਮ੍ਮਂ. ਅਧਮ੍ਮੇ ਤਿਕਦੁਕ੍ਕਟਨ੍ਤਿ ‘‘ਅਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞਾ ਓਸਾਰੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਧਮ੍ਮਕਮ੍ਮੇ ਵੇਮਤਿਕਾ, ਅਧਮ੍ਮਕਮ੍ਮਸਞ੍ਞਾ ਓਸਾਰੇਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਤਿਕਦੁਕ੍ਕਟਂ ਵੁਤ੍ਤਂ.

੨੦੭੫. ਗਣਸ੍ਸਾਤਿ ਤਸ੍ਸੇਵ ਕਾਰਕਗਣਸ੍ਸ. ਵਤ੍ਤੇ ਵਾ ਪਨ ਵਤ੍ਤਨ੍ਤਿਨ੍ਤਿ ਤੇਚਤ੍ਤਾਲੀਸਪ੍ਪਭੇਦੇ ਨੇਤ੍ਤਾਰਵਤ੍ਤੇ ਵਤ੍ਤਮਾਨਂ. ਤੇਚਤ੍ਤਾਲੀਸਪ੍ਪਭੇਦਂ ਪਨ ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੭੬) ਆਵਿ ਭਵਿਸ੍ਸਤਿ. ਨੇਤ੍ਤਾਰਵਤ੍ਤੇਤਿ ਕਮ੍ਮਤੋ ਨਿਤ੍ਥਰਣਸ੍ਸ ਹੇਤੁਭੂਤੇ ਵਤ੍ਤੇ.

੨੦੭੭. ਓਸਾਰਣਂ ¶ ਕ੍ਰਿਯਂ. ਅਨਾਪੁਚ੍ਛਨਂ ਅਕ੍ਰਿਯਂ.

ਚਤੁਤ੍ਥਂ.

੨੦੭੮-੯. ਅਵਸ੍ਸੁਤਾਤਿ ਮੇਥੁਨਰਾਗੇਨ ਤਿਨ੍ਤਾ. ਏਵਮੁਪਰਿਪਿ. ‘‘ਮਨੁਸ੍ਸਪੁਗ੍ਗਲਸ੍ਸਾ’’ਤਿ ਇਮਿਨਾ ਯਕ੍ਖਾਦੀਨਂ ਪਟਿਕ੍ਖੇਪੋ. ‘‘ਉਦਕੇ…ਪੇ… ਦੁਕ੍ਕਟ’’ਨ੍ਤਿ ਵਕ੍ਖਮਾਨਤ੍ਤਾ ਆਮਿਸਨ੍ਤਿ ਅਞ੍ਞਤ੍ਰ ਦਨ੍ਤਪੋਨਾ ਅਜ੍ਝੋਹਰਣੀਯਸ੍ਸ ਗਹਣਂ. ਪਯੋਗਤੋਤਿ ਪਯੋਗਗਣਨਾਯ.

੨੦੮੦. ਏਕਤੋਵਸ੍ਸੁਤੇਤਿ ਪੁਮਿਤ੍ਥਿਯਾ ਸਾਮਞ੍ਞੇਨ ਪੁਲ੍ਲਿਙ੍ਗਨਿਦ੍ਦੇਸੋ. ਕਥਮੇਤਂ ਵਿਞ੍ਞਾਯਤੀਤਿ? ‘‘ਏਕਤੋਅਵਸ੍ਸੁਤੇਤਿ ਏਤ੍ਥ ਭਿਕ੍ਖੁਨਿਯਾ ਅਵਸ੍ਸੁਤਭਾਵੋ ਦਟ੍ਠਬ੍ਬੋਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨੇਤਂ ਨ ਵੁਤ੍ਤਂ, ਤਂ ¶ ਪਾਲ਼ਿਯਾ ਸਮੇਤੀ’’ਤਿ (ਪਾਚਿ. ਅਟ੍ਠ. ੭੦੧) ਵੁਤ੍ਤਤ੍ਤਾ ਵਿਞ੍ਞਾਯਤਿ. ਏਤ੍ਥ ਚ ਏਤਂ ਨ ਵੁਤ੍ਤਨ੍ਤਿ ‘‘ਭਿਕ੍ਖੁਨਿਯਾ ਅਵਸ੍ਸੁਤਭਾਵੋ ਦਟ੍ਠਬ੍ਬੋ’’ਤਿ ਏਤਂ ਨਿਯਮਨਂ ਨ ਵੁਤ੍ਤਂ. ਤਨ੍ਤਿ ਤਂ ਨਿਯਮੇਤ੍ਵਾ ਅਵਚਨਂ. ਪਾਲ਼ਿਯਾ ਸਮੇਤੀਤਿ ‘‘ਏਕਤੋਅਵਸ੍ਸੁਤੇ’’ਤਿ (ਪਾਚਿ. ੭੦੧-੭੦੨) ਅਵਿਸੇਸੇਤ੍ਵਾ ਵੁਤ੍ਤਪਾਲ਼ਿਯਾ, ‘‘ਅਨਵਸ੍ਸੁਤੋਤਿ ਜਾਨਨ੍ਤੀ ਪਟਿਗ੍ਗਣ੍ਹਾਤੀ’’ਤਿ (ਪਾਚਿ. ੭੦੩) ਇਮਾਯ ਚ ਪਾਲ਼ਿਯਾ ਸਮੇਤਿ. ਯਦਿ ਹਿ ਪੁਗ੍ਗਲਸ੍ਸ ਅਵਸ੍ਸੁਤਭਾਵੋ ਨਪ੍ਪਮਾਣਂ, ਕਿਂ ‘‘ਅਨਵਸ੍ਸੁਤੋਤਿ ਜਾਨਨ੍ਤੀ’’ਤਿ ਇਮਿਨਾ ਵਚਨੇਨ. ‘‘ਅਨਾਪਤ੍ਤਿ ਉਭੋ ਅਨਵਸ੍ਸੁਤਾ ਹੋਨ੍ਤਿ, ਅਨਵਸ੍ਸੁਤਾ ਪਟਿਗ੍ਗਣ੍ਹਾਤੀ’’ਤਿ ਏਤ੍ਤਕਮੇਵ ਵਤ੍ਤਬ੍ਬਂ ਸਿਯਾ. ਅਜ੍ਝੋਹਾਰਪਯੋਗੇਸੁ ਬਹੂਸੁ ਥੁਲ੍ਲਚ੍ਚਯਚਯੋ ਥੁਲ੍ਲਚ੍ਚਯਾਨਂ ਸਮੂਹੋ ਸਿਯਾ, ਪਯੋਗਗਣਨਾਯ ਬਹੂਨਿ ਥੁਲ੍ਲਚ੍ਚਯਾਨਿ ਹੋਨ੍ਤੀਤਿ ਅਧਿਪ੍ਪਾਯੋ.

੨੦੮੧. ਸਮ੍ਭਵੇ, ਬ੍ਯਭਿਚਾਰੇ ਚ ਵਿਸੇਸਨਂ ਸਾਤ੍ਥਕਂ ਭਵਤੀਤਿ ‘‘ਮਨੁਸ੍ਸਵਿਗ੍ਗਹਾਨ’’ਨ੍ਤਿ ਇਦਂ ਵਿਸੇਸਨਂ ਯਕ੍ਖਪੇਤਤਿਰਚ੍ਛਾਨਪਦੇਹਿ ਯੋਜੇਤਬ੍ਬਂ. ਉਭਤੋਅਵਸ੍ਸੁਤੇ ਸਤਿ ਮਨੁਸ੍ਸਵਿਗ੍ਗਹਾਨਂ ਯਕ੍ਖਪੇਤਤਿਰਚ੍ਛਾਨਾਨਂ ਹਤ੍ਥਤੋ ਚ ਪਣ੍ਡਕਾਨਂ ਹਤ੍ਥਤੋ ਚ ਤਥਾਤਿ ਯੋਜਨਾ. ਤਥਾ-ਸਦ੍ਦੇਨੇਤ੍ਥ ‘‘ਯਂ ਕਿਞ੍ਚਿ ਆਮਿਸਂ ਪਟਿਗ੍ਗਣ੍ਹਾਤਿ, ਦੁਕ੍ਕਟਂ. ਅਜ੍ਝੋਹਾਰਪਯੋਗੇਸੁ ਥੁਲ੍ਲਚ੍ਚਯਚਯੋ ਸਿਯਾ’’ਤਿ ਯਥਾਵੁਤ੍ਤਮਤਿਦਿਸਤਿ.

੨੦੮੨. ਏਤ੍ਥਾਤਿ ਇਮੇਸੁ ਯਕ੍ਖਾਦੀਸੁ. ਏਕਤੋਅਵਸ੍ਸੁਤੇ ਸਤਿ ਆਮਿਸਂ ਪਟਿਗ੍ਗਣ੍ਹਨ੍ਤਿਯਾ ਦੁਕ੍ਕਟਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਮਨੁਸ੍ਸਾਮਨੁਸ੍ਸੇਸੁ ਏਕਤੋ, ਉਭਤੋ ਵਾ ਅਨਵਸ੍ਸੁਤੇਸੁ. ਉਦਕੇ ਦਨ੍ਤਕਟ੍ਠਕੇਤਿ ¶ ਉਦਕਸ੍ਸ, ਦਨ੍ਤਕਟ੍ਠਸ੍ਸ ਚ ਗਹਣੇ. ਪਰਿਭੋਗੇ ਚਾਤਿ ਪਟਿਗ੍ਗਹਣੇ ਚੇਵ ਪਰਿਭੋਗੇ ਚ.

੨੦੮੩-੪. ਉਭਯਾਵਸ੍ਸੁਤਾਭਾਵੇਤਿ ਭਿਕ੍ਖੁਨਿਯਾ, ਪੁਗ੍ਗਲਸ੍ਸ ਚ ਉਭਿਨ੍ਨਂ ਅਵਸ੍ਸੁਤਤ੍ਤੇ ਅਸਤਿ ਯਦਿ ਆਮਿਸਂ ਪਟਿਗ੍ਗਣ੍ਹਾਤਿ ¶ , ਨ ਦੋਸੋਤਿ ਯੋਜਨਾ. ਅਯਂ ਪੁਰਿਸਪੁਗ੍ਗਲੋ. ਨ ਚ ਅਵਸ੍ਸੁਤੋਤਿ ਨੇਵ ਅਵਸ੍ਸੁਤੋਤਿ ਞਤ੍ਵਾ. ਯਾ ਪਨ ਆਮਿਸਂ ਪਟਿਗ੍ਗਣ੍ਹਾਤਿ, ਤਸ੍ਸਾ ਚ ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ ਪਕਾਸਿਤਾਤਿ ਯੋਜਨਾ. ‘‘ਯਾ ਗਣ੍ਹਾਤਿ, ਤਸ੍ਸਾ ਅਨਾਪਤ੍ਤੀ’’ਤਿ ਵੁਤ੍ਤੇਪਿ ਪਰਿਭੁਞ੍ਜਨ੍ਤਿਯਾਵ ਅਨਾਪਤ੍ਤਿਭਾਵੋ ਦਟ੍ਠਬ੍ਬੋ.

ਪਞ੍ਚਮਂ.

੨੦੮੫. ਉਯ੍ਯੋਜਨੇਤਿ ‘‘ਕਿਂ ਤੇ ਅਯ੍ਯੇ ਏਸੋ ਪੁਰਿਸਪੁਗ੍ਗਲੋ ਕਰਿਸ੍ਸਤਿ ਅਵਸ੍ਸੁਤੋ ਵਾ ਅਨਵਸ੍ਸੁਤੋ ਵਾ, ਯਤੋ ਤ੍ਵਂ ਅਨਵਸ੍ਸੁਤਾ, ਇਙ੍ਘ ਅਯ੍ਯੇ ਯਂ ਤੇ ਏਸੋ ਪੁਰਿਸਪੁਗ੍ਗਲੋ ਦੇਤਿ ਖਾਦਨੀਯਂ ਵਾ ਭੋਜਨੀਯਂ ਵਾ, ਤਂ ਤ੍ਵਂ ਸਹਤ੍ਥਾ ਪਟਿਗ੍ਗਹੇਤ੍ਵਾ ਖਾਦ ਵਾ ਭੁਞ੍ਜ ਵਾ’’ਤਿ (ਪਾਚਿ. ੭੦੫) ਵੁਤ੍ਤਨਯੇਨ ਨਿਯੋਜਨੇ. ਏਕਿਸ੍ਸਾਤਿ ਉਯ੍ਯੋਜਿਕਾਯ. ਇਤਰਿਸ੍ਸਾਤਿ ਉਯ੍ਯੋਜਿਤਾਯ. ਪਟਿਗ੍ਗਹੇਤਿ ਅਵਸ੍ਸੁਤਸ੍ਸ ਹਤ੍ਥਤੋ ਆਮਿਸਪਟਿਗ੍ਗਹਣੇ. ਦੁਕ੍ਕਟਾਨਿ ਚਾਤਿ ਉਯ੍ਯੋਜਿਕਾਯ ਦੁਕ੍ਕਟਾਨਿ. ਭੋਗੇਸੂਤਿ ਉਯ੍ਯੋਜਿਤਾਯ ਤਥਾ ਪਟਿਗ੍ਗਹਿਤਸ੍ਸ ਆਮਿਸਸ੍ਸ ਪਰਿਭੋਗੇਸੁ. ਥੁਲ੍ਲਚ੍ਚਯਗਣੋ ਸਿਯਾਤਿ ਉਯ੍ਯੋਜਿਕਾਯ ਥੁਲ੍ਲਚ੍ਚਯਸਮੂਹੋ ਸਿਯਾਤਿ ਅਤ੍ਥੋ.

੨੦੮੬-੭. ਭੋਜਨਸ੍ਸਾਵਸਾਨਸ੍ਮਿਨ੍ਤਿ ਉਯ੍ਯੋਜਿਤਾਯ ਭੋਜਨਪਰਿਯਨ੍ਤੇ. ਸਙ੍ਘਾਦਿਸੇਸਤਾਤਿ ਉਯ੍ਯੋਜਿਕਾਯ ਸਙ੍ਘਾਦਿਸੇਸਾਪਤ੍ਤਿ ਹੋਤਿ.

ਯਕ੍ਖਾਦੀਨਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਪੇਤਪਣ੍ਡਕਤਿਰਚ੍ਛਾਨਗਤਾ ਗਹਿਤਾ. ਤਥੇਵ ਪੁਰਿਸਸ੍ਸ ਚਾਤਿ ਅਵਸ੍ਸੁਤਸ੍ਸ ਮਨੁਸ੍ਸਪੁਰਿਸਸ੍ਸ. ‘‘ਗਹਣੇ ਉਯ੍ਯੋਜਨੇ’’ਤਿ ਪਦਚ੍ਛੇਦੋ. ਗਹਣੇਤਿ ਉਯ੍ਯੋਜਿਤਾਯ ਗਹਣੇ. ਉਯ੍ਯੋਜਨੇਤਿ ਉਯ੍ਯੋਜਿਕਾਯ ਅਤ੍ਤਨੋ ਉਯ੍ਯੋਜਨੇ. ਤੇਸਨ੍ਤਿ ਉਦਕਦਨ੍ਤਪੋਨਾਨਂ. ਪਰਿਭੋਗੇਤਿ ਉਯ੍ਯੋਜਿਤਾਯ ਪਰਿਭੁਞ੍ਜਨੇ. ਦੁਕ੍ਕਟਂ ਪਰਿਕਿਤ੍ਤਿਤਨ੍ਤਿ ਉਯ੍ਯੋਜਿਕਾਯ ਦੁਕ੍ਕਟਂ ਵੁਤ੍ਤਂ.

੨੦੮੮. ਸੇਸਸ੍ਸਾਤਿ ¶ ¶ ਉਦਕਦਨ੍ਤਪੋਨਤੋ ਅਞ੍ਞਸ੍ਸ ਪਰਿਭੁਞ੍ਜਿਤਬ੍ਬਾਮਿਸਸ੍ਸ. ‘‘ਗਹਣੁਯ੍ਯੋਜਨੇ’’ਤਿਆਦਿ ਵੁਤ੍ਤਨਯਮੇਵ.

੨੦੮੯-੯੦. ਯਾ ਪਨ ਭਿਕ੍ਖੁਨੀ ‘‘ਅਨਵਸ੍ਸੁਤੋ’’ਤਿ ਞਤ੍ਵਾ ਉਯ੍ਯੋਜੇਤਿ, ‘‘ਕੁਪਿਤਾ ਵਾ ਨ ਪਟਿਗ੍ਗਣ੍ਹਤੀ’’ਤਿ ਉਯ੍ਯੋਜੇਤਿ, ‘‘ਕੁਲਾਨੁਦ੍ਦਯਤਾ ਵਾਪਿ ਨ ਪਟਿਗ੍ਗਣ੍ਹਤੀ’’ਤਿ ਉਯ੍ਯੋਜੇਤਿ, ਤਸ੍ਸਾ ਚ ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ ਪਕਾਸਿਤਾਤਿ ਯੋਜਨਾ. ਯਥਾਹ ‘‘ਅਨਾਪਤ੍ਤਿ ‘ਅਨਵਸ੍ਸੁਤੋ’ਤਿ ਜਾਨਨ੍ਤੀ ਉਯ੍ਯੋਜੇਤਿ, ‘ਕੁਪਿਤਾ ਨ ਪਟਿਗ੍ਗਣ੍ਹਤੀ’ਤਿ ਉਯ੍ਯੋਜੇਤਿ, ‘ਕੁਲਾਨੁਦ੍ਦਯਤਾਯ ਨ ਪਟਿਗ੍ਗਣ੍ਹਤੀ’ਤਿ ਉਯ੍ਯੋਜੇਤੀ’’ਤਿਆਦਿ (ਪਾਚਿ. ੭੦੮).

ਛਟ੍ਠਂ.

੨੦੯੧. ਸਤ੍ਤਮਨ੍ਤਿ ‘‘ਯਾ ਪਨ ਭਿਕ੍ਖੁਨੀ ਕੁਪਿਤਾ ਅਨਤ੍ਤਮਨਾ ਏਵਂ ਵਦੇਯ੍ਯ ਬੁਦ੍ਧਂ ਪਚ੍ਚਕ੍ਖਾਮੀ’’ਤਿਆਦਿਨਯਪ੍ਪਵਤ੍ਤਂ (ਪਾਚਿ. ੭੧੦) ਸਤ੍ਤਮਸਿਕ੍ਖਾਪਦਞ੍ਚ. ਅਟ੍ਠਮਨ੍ਤਿ ‘‘ਯਾ ਪਨ ਭਿਕ੍ਖੁਨੀ ਕਿਸ੍ਮਿਞ੍ਚਿਦੇਵ ਅਧਿਕਰਣੇ ਪਚ੍ਚਾਕਤਾ’’ਤਿਆਦਿਨਯਪ੍ਪਵਤ੍ਤਂ (ਪਾਚਿ. ੭੧੬) ਅਟ੍ਠਮਸਿਕ੍ਖਾਪਦਞ੍ਚ.

ਸਤ੍ਤਮਟ੍ਠਮਾਨਿ.

੨੦੯੨. ਨਵਮੇਤਿ ‘‘ਭਿਕ੍ਖੁਨਿਯੋ ਪਨੇਵ ਸਂਸਟ੍ਠਾ ਵਿਹਰਨ੍ਤੀ’’ਤਿਆਦਿਸਿਕ੍ਖਾਪਦੇ (ਪਾਚਿ. ੭੨੨) ਚ. ਦਸਮੇਤਿ ‘‘ਯਾ ਪਨ ਭਿਕ੍ਖੁਨੀ ਏਵਂ ਵਦੇਯ੍ਯ ਸਂਸਟ੍ਠਾਵ ਅਯ੍ਯੇ ਤੁਮ੍ਹੇ ਵਿਹਰਥ, ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥਾ’’ਤਿਆਦਿਸਿਕ੍ਖਾਪਦੇ (ਪਾਚਿ. ੭੨੮) ਚ.

ਨਵਮਦਸਮਾਨਿ.

੨੦੯੩. ਤੇਨ ਮਹਾਵਿਭਙ੍ਗਾਗਤੇਨ ਦੁਟ੍ਠਦੋਸਦ੍ਵਯੇਨ ਚ ਤਤ੍ਥੇਵ ਆਗਤੇਨ ਤੇਨ ਸਞ੍ਚਰਿਤ੍ਤਸਿਕ੍ਖਾਪਦੇਨ ਚਾਤਿ ਇਮੇਹਿ ਤੀਹਿ ਸਦ੍ਧਿਂ ਇਧਾਗਤਾਨਿ ਛ ਸਿਕ੍ਖਾਪਦਾਨੀਤਿ ਏਵਂ ਨਵ ਪਠਮਾਪਤ੍ਤਿਕਾ ¶ . ਇਤੋ ਭਿਕ੍ਖੁਨਿਵਿਭਙ੍ਗਤੋ ਚਤ੍ਤਾਰਿ ਯਾਵਤਤਿਯਕਾਨਿ ਤਤੋ ਮਹਾਵਿਭਙ੍ਗਤੋ ਚਤ੍ਤਾਰਿ ਯਾਵਤਤਿਯਕਾਨੀਤਿ ¶ ਏਵਂ ਅਟ੍ਠ ਯਾਵਤਤਿਯਕਾਨਿ, ਪੁਰਿਮਾਨਿ ਨਵ ਚਾਤਿ ਸਤ੍ਤਰਸ ਸਙ੍ਘਾਦਿਸੇਸਸਿਕ੍ਖਾਪਦਾਨਿ ਮਯਾ ਚੇਤ੍ਥ ਦਸ੍ਸਿਤਾਨੀਤਿ ਅਧਿਪ੍ਪਾਯੋ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ ਵਿਨਯਵਿਨਿਚ੍ਛਯਵਣ੍ਣਨਾਯ

ਸਙ੍ਘਾਦਿਸੇਸਕਥਾਵਣ੍ਣਨਾ ਨਿਟ੍ਠਿਤਾ.

ਨਿਸ੍ਸਗ੍ਗਿਯਕਥਾਵਣ੍ਣਨਾ

੨੦੯੪-੫. ਏਵਂ ਸਤ੍ਤਰਸਸਙ੍ਘਾਦਿਸੇਸੇ ਦਸ੍ਸੇਤ੍ਵਾ ਇਦਾਨਿ ਤਦਨਨ੍ਤਰਾਨਿ ਨਿਸ੍ਸਗ੍ਗਿਯਾਨਿ ਦਸ੍ਸੇਤੁਮਾਹ ‘‘ਅਧਿਟ੍ਠਾਨੁਪਗਂ ਪਤ੍ਤ’’ਨ੍ਤਿਆਦਿ. ‘‘ਅਧਿਟ੍ਠਾਨੁਪਗਂ ਪਤ੍ਤ’’ਨ੍ਤਿ ਇਮਿਨਾ ਪਦੇਨ ਕੇਨਚਿ ਕਾਰਣੇਨ ਅਨਧਿਟ੍ਠਾਨੁਪਗੇ ਪਤ੍ਤੇ ਅਨਾਪਤ੍ਤਿਭਾਵਂ ਦੀਪੇਤਿ. ‘‘ਤਸ੍ਸਾ’’ਤਿ ਤ-ਸਦ੍ਦਾਪੇਕ੍ਖਾਯ ਭਿਕ੍ਖੁਨੀਤਿ ਏਤ੍ਥ ‘‘ਯਾ’’ਤਿ ਲਬ੍ਭਤਿ. ਪਤ੍ਤਸਨ੍ਨਿਧਿਕਾਰਣਾਤਿ ਅਨਧਿਟ੍ਠਾਯ, ਅਵਿਕਪ੍ਪੇਤ੍ਵਾ ਏਕਰਤ੍ਤਮ੍ਪਿ ਪਤ੍ਤਸ੍ਸ ਨਿਕ੍ਖਿਤ੍ਤਕਾਰਣਾ.

੨੦੯੬. ਇਧ ਇਮਸ੍ਮਿਂ ਸਿਕ੍ਖਾਪਦੇ ਸੇਸੋ ਸਬ੍ਬੋ ਵਿਨਿਚ੍ਛਯੋ ਕਥਾਮਗ੍ਗੋਤਿ ਯੋਜਨਾ, ਅਵਸੇਸਸਬ੍ਬਵਿਨਿਚ੍ਛਯਕਥਾਮਗ੍ਗੋਤਿ ਅਤ੍ਥੋ. ਪਤ੍ਤਸਿਕ੍ਖਾਪਦੇਤਿ ਮਹਾਵਿਭਙ੍ਗਪਠਮਪਤ੍ਤਸਿਕ੍ਖਾਪਦੇ.

੨੦੯੭. ਵਿਸੇਸੋਵ ਵਿਸੇਸਤਾ.

ਪਠਮਂ.

੨੦੯੮. ਅਕਾਲੇਤਿ ‘‘ਅਨਤ੍ਥਤਕਥਿਨੇ ਵਿਹਾਰੇ ਏਕਾਦਸ ਮਾਸਾ, ਅਤ੍ਥਤਕਥਿਨੇ ਵਿਹਾਰੇ ਸਤ੍ਤ ਮਾਸਾ’’ਤਿ (ਪਾਚਿ. ੭੪੦ ਅਤ੍ਥਤੋ ਸਮਾਨਂ) ਏਵਂ ¶ ਵੁਤ੍ਤੇ ਅਕਾਲੇ. ਵਿਕਪ੍ਪਨ੍ਤਰਂ ਦਸ੍ਸੇਤੁਮਾਹ ‘‘ਦਿਨ੍ਨਂ ਕਾਲੇਪਿ ਕੇਨਚੀ’’ਤਿਆਦਿ. ਵੁਤ੍ਤਵਿਪਰਿਯਾਯੇਨ ਕਾਲਨਿਯਮੋ ਵੇਦਿਤਬ੍ਬੋ. ਕੇਨਚਿ ਅਕਾਲੇ ਯਂ ਚੀਵਰਂ ਦਿਨ੍ਨਂ, ਕਾਲੇਪਿ ਯਂ ਚੀਵਰਂ ਆਦਿਸ੍ਸ ਦਿਨ੍ਨਂ, ਤਂ ਅਕਾਲਚੀਵਰਂ ਨਾਮਾਤਿ ਯੋਜਨਾ. ਆਦਿਸ੍ਸ ਦਾਨਪ੍ਪਕਾਰਂ ਦਸ੍ਸੇਤੁਮਾਹ ‘‘ਸਮ੍ਪਤ੍ਤਾ ਭਾਜੇਨ੍ਤੂ’’ਤਿ. ਨਿਯਾਮਿਤਨ੍ਤਿ ‘‘ਸਮ੍ਪਤ੍ਤਾ ਭਾਜੇਨ੍ਤੂ’’ਤਿ ਏਵਂ ਵਤ੍ਵਾ ਦਿਨ੍ਨਞ੍ਚ ‘‘ਇਦਂ ਗਣਸ੍ਸ, ਇਦਂ ਤੁਯ੍ਹਂ ਦਮ੍ਮੀ’’ਤਿ ਵਤ੍ਵਾ ਵਾ ਦਾਤੁਕਾਮਤਾਯ ਪਾਦਮੂਲੇ ਠਪੇਤ੍ਵਾ ਵਾ ਦਿਨ੍ਨਞ੍ਚ ਆਦਿਸ੍ਸ ਦਿਨ੍ਨਂ ਨਾਮਾਤਿ ਅਤ੍ਥੋ. ਯਥਾਹ ‘‘ਸਮ੍ਪਤ੍ਤਾ ਭਾਜੇਨ੍ਤੂ’ਤਿ ਵਤ੍ਵਾ ਵਾ ‘ਇਦਂ ¶ ਗਣਸ੍ਸ, ਇਦਂ ਤੁਮ੍ਹਾਕਂ ਦਮ੍ਮੀ’ਤਿ ਵਤ੍ਵਾ ਵਾ ਦਾਤੁਕਮ੍ਯਤਾਯ ਪਾਦਮੂਲੇ ਠਪੇਤ੍ਵਾ ਵਾ ਦਿਨ੍ਨਮ੍ਪਿ ਆਦਿਸ੍ਸ ਦਿਨ੍ਨਂ ਨਾਮ ਹੋਤੀ’’ਤਿ (ਪਾਚਿ. ਅਟ੍ਠ. ੭੪੦).

੨੦੯੯. ਅਕਾਲਚੀਵਰਨ੍ਤਿ ਵੁਤ੍ਤਪ੍ਪਕਾਰਂ ਅਕਾਲਚੀਵਰਂ.

੨੧੦੦. ਅਤ੍ਤਨਾ ਪਟਿਲਦ੍ਧਨ੍ਤਿ ਤਤੋ ਯਂ ਚੀਵਰਂ ਅਤ੍ਤਨਾ ਵਸ੍ਸਗ੍ਗੇਨ ਪਟਿਲਦ੍ਧਂ. ਨਿਸ੍ਸਜ੍ਜਿਤ੍ਵਾ ਪਟਿਲਦ੍ਧਕਾਲੇ ਕਤ੍ਤਬ੍ਬਵਿਧਿਂ ਦਸ੍ਸੇਤੁਮਾਹ ‘‘ਲਭਿਤ੍ਵਾ…ਪੇ… ਨਿਯੋਜਯੇ’’ਤਿ. ਯਥਾਦਾਨੇ ਨਿਯੋਜਯੇਤਿ ਯਥਾ ਦਾਯਕੇਨ ਦਿਨ੍ਨਂ, ਤਥਾ ਉਪਨੇਤਬ੍ਬਂ, ਅਕਾਲਚੀਵਰਪਕ੍ਖੇਯੇਵ ਠਪੇਤਬ੍ਬਨ੍ਤਿ ਵੁਤ੍ਤਂ ਹੋਤਿ.

੨੧੦੧. ਤਸ੍ਸਾਤਿ ‘‘ਯਥਾਦਾਨੇ ਨਿਯੋਜਯੇ’’ਤਿ ਵਚਨਸ੍ਸ. ਵਿਨਯਕਮ੍ਮਂ ਕਤ੍ਵਾ ਪਟਿਲਦ੍ਧਮ੍ਪਿ ਤਂ ਪੁਨ ਸੇਵਿਤੁਂ ਨ ਚ ਵਟ੍ਟਤੀਤਿ ਅਯਮਧਿਪ੍ਪਾਯੋਤਿ ਯੋਜਨਾ.

੨੧੦੨. ਕਾਲਚੀਵਰੇ ਅਕਾਲਵਤ੍ਥਸਞ੍ਞਾਯ ਦੁਕ੍ਕਟਨ੍ਤਿ ਯੋਜਨਾ. ਉਭਯਤ੍ਥਪੀਤਿ ਅਕਾਲਚੀਵਰੇਪਿ ਕਾਲਚੀਵਰੇਪਿ. ਵੇਮਤਿਕਾਯ ਤਥਾ ਦੁਕ੍ਕਟਨ੍ਤਿ ਯੋਜਨਾ.

੨੧੦੩. ਉਭਯਤ੍ਥਪਿ ¶ ਚੀਵਰੇ ਕਾਲਚੀਵਰੇ ਚ ਅਕਾਲਚੀਵਰੇ ਚਾਤਿ ਉਭਯਚੀਵਰੇਪਿ ਕਾਲਚੀਵਰਸਞ੍ਞਾਯ ਭਾਜਾਪੇਨ੍ਤਿਯਾ ਨਦੋਸੋਤਿ ਯੋਜਨਾ. ਸਚਿਤ੍ਤਕਸਮੁਟ੍ਠਾਨਤ੍ਤਯਂ ਸਨ੍ਧਾਯਾਹ ‘‘ਤਿਸਮੁਟ੍ਠਾਨਤਾ’’ਤਿ.

ਦੁਤਿਯਂ.

੨੧੦੪. ਸਚੇ ਸਯਂ ਅਚ੍ਛਿਨ੍ਦਤਿ ਅਞ੍ਞਾਯ ਭਿਕ੍ਖੁਨਿਯਾ ਸਦ੍ਧਿਂ ਚੀਵਰਂ ਪਰਿਵਤ੍ਤੇਤ੍ਵਾ ਪਚ੍ਛਾ ‘‘ਤੁਯ੍ਹਂ ਚੀਵਰਂ ਤ੍ਵਮੇਵ ਗਣ੍ਹ, ਮਯ੍ਹਂ ਚੀਵਰਂ ਦੇਹੀ’’ਤਿ ਏਵਂ ਯਦਿ ਸਯਂ ਅਚ੍ਛਿਨ੍ਦਤਿ. ਏਤ੍ਥ ‘‘ਸਕਸਞ੍ਞਾਯਾ’’ਤਿ ਸੇਸੋ. ਸਕਸਞ੍ਞਾਯ ਗਹਿਤਤ੍ਤਾ ਪਾਚਿਤ੍ਤਿਯਂ, ਦੁਕ੍ਕਟਞ੍ਚ ਵੁਤ੍ਤਂ, ਇਤਰਥਾ ਭਣ੍ਡਗ੍ਘੇਨ ਕਾਰੇਤਬ੍ਬੋ.

੨੧੦੫. ਇਤਰੇਸੂਤਿ ਅਬਨ੍ਧਨਞ੍ਚ ਆਣਤ੍ਤਿਬਹੁਤ੍ਤਞ੍ਚ ਸਙ੍ਗਣ੍ਹਾਤਿ. ਤੇਨਾਹ ‘‘ਵਤ੍ਥੂਨਂ ਪਯੋਗਸ੍ਸ ਵਸਾ ਸਿਯਾ’’ਤਿ.

੨੧੦੬. ‘‘ਤਿਕਪਾਚਿਤ੍ਤੀ’’ਤਿ ¶ ਇਦਮਪੇਕ੍ਖਿਤ੍ਵਾ ‘‘ਉਦ੍ਦਿਟ੍ਠਾ’’ਤਿ ਸਮ੍ਬਨ੍ਧਨੀਯਂ, ਉਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਾ, ਵੇਮਤਿਕਾ, ਅਨੁਪਸਮ੍ਪਨ੍ਨਸਞ੍ਞਾਤਿ ਏਤਾਸਂ ਵਸੇਨ ਤਿਕਪਾਚਿਤ੍ਤਿ ਵੁਤ੍ਤਾਤਿ ਅਤ੍ਥੋ. ਅਞ੍ਞਸ੍ਮਿਂ ਪਰਿਕ੍ਖਾਰੇਤਿ ਉਪਸਮ੍ਪਨ੍ਨਾਨੁਪਸਮ੍ਪਨ੍ਨਾਨਂ ਅਞ੍ਞਸ੍ਮਿਂ ਪਰਿਕ੍ਖਾਰੇ. ਇਤਰਿਸ੍ਸਾਤਿ ਅਨੁਪਸਮ੍ਪਨ੍ਨਾਯ. ਤਿਕਦੁਕ੍ਕਟਨ੍ਤਿ ਅਨੁਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਾਵੇਮਤਿਕਾਅਨੁਪਸਮ੍ਪਨ੍ਨਸਞ੍ਞਾਨਂ ਵਸੇਨ ਤਿਕਦੁਕ੍ਕਟਂ ਉਦ੍ਦਿਟ੍ਠਂ.

੨੧੦੭. ਤਾਯ ਵਾ ਦੀਯਮਾਨਂ ਤਾਯ ਅਞ੍ਞਾਯ ਭਿਕ੍ਖੁਨਿਯਾ ਦੁਟ੍ਠਾਯ ਵਾ ਤੁਟ੍ਠਾਯ ਵਾ ਦੀਯਮਾਨਂ ਗਣ੍ਹਨ੍ਤਿਯਾ, ਤਸ੍ਸਾ ਵਿਸ੍ਸਾਸਮੇਵ ਵਾ ਗਣ੍ਹਨ੍ਤਿਯਾ ਅਨਾਪਤ੍ਤੀਤਿ ਯੋਜਨਾ. ‘‘ਤਿਸਮੁਟ੍ਠਾਨਤਾ ਮਤਾ’’ਤਿ ਇਦਂ ਵੁਤ੍ਤਤ੍ਥਮੇਵ.

ਤਤਿਯਂ.

੨੧੦੮. ਯਾ ¶ ਪਨ ਭਿਕ੍ਖੁਨੀ ‘‘ਕਿਂ ਤੇ, ਅਯ੍ਯੇ, ਅਫਾਸੁ, ਕਿਂ ਆਹਰੀਯਤੂ’’ਤਿ ਵੁਤ੍ਤਾ ਅਞ੍ਞਂ ਵਿਞ੍ਞਾਪੇਤ੍ਵਾ ਤਂ ਆਹਟਂ ਪਟਿਕ੍ਖਿਪਿਤ੍ਵਾ ਤਞ੍ਚ ਅਞ੍ਞਞ੍ਚ ਗਣ੍ਹਿਤੁਕਾਮਾ ਸਚੇ ਅਞ੍ਞਂ ਵਿਞ੍ਞਾਪੇਤਿ, ਤਸ੍ਸਾ ਵਿਞ੍ਞਤ੍ਤਿਦੁਕ੍ਕਟਂ, ਲਾਭਾ ਨਿਸ੍ਸਗ੍ਗਿਯਂ ਸਿਯਾਤਿ ਸਾਧਿਪ੍ਪਾਯਯੋਜਨਾ. ਵਿਞ੍ਞਤ੍ਤਿਯਾ ਦੁਕ੍ਕਟਂ ਵਿਞ੍ਞਤ੍ਤਿਦੁਕ੍ਕਟਂ.

੨੧੦੯-੧੧. ਤਿਕਪਾਚਿਤ੍ਤਿਯਂ ਵੁਤ੍ਤਨ੍ਤਿ ‘‘ਅਞ੍ਞੇ ਅਞ੍ਞਸਞ੍ਞਾ, ਅਞ੍ਞੇ ਵੇਮਤਿਕਾ, ਅਞ੍ਞੇ ਅਨਞ੍ਞਸਞ੍ਞਾ ਅਞ੍ਞਂ ਵਿਞ੍ਞਾਪੇਤ੍ਵਾ ਅਞ੍ਞਂ ਵਿਞ੍ਞਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੭੫੧) ਤਿਕਪਾਚਿਤ੍ਤਿਯਂ ਵੁਤ੍ਤਂ. ਅਨਞ੍ਞੇ ਦ੍ਵਿਕਦੁਕ੍ਕਟਨ੍ਤਿ ਅਨਞ੍ਞੇ ਅਞ੍ਞਸਞ੍ਞਾਯ, ਵੇਮਤਿਕਾਯ ਚ ਵਸੇਨ ਦ੍ਵਿਕਦੁਕ੍ਕਟਂ. ‘‘ਅਨਞ੍ਞੇਨਞ੍ਞਸਞ੍ਞਾਯਾ’’ਤਿਆਦਿਨਾ ਅਨਾਪਤ੍ਤਿਵਿਸਯੋ ਦਸ੍ਸਿਤੋ. ‘‘ਅਨਞ੍ਞੇ ਅਨਞ੍ਞਸਞ੍ਞਾਯਾ’’ਤਿ ਪਦਚ੍ਛੇਦੋ. ਅਨਞ੍ਞੇ ਅਨਞ੍ਞਸਞ੍ਞਾਯ ਵਿਞ੍ਞਾਪੇਨ੍ਤਿਯਾ ਅਨਾਪਤ੍ਤਿ. ਤਸ੍ਮਿਂ ਪਠਮਵਿਞ੍ਞਾਪਿਤੇ ਅਪ੍ਪਹੋਨ੍ਤੇ ਵਾ ਤਞ੍ਞੇਵ ਵਾ ਵਿਞ੍ਞਾਪੇਨ੍ਤਿਯਾ ਅਨਾਪਤ੍ਤਿ. ਅਞ੍ਞੇਨਪਿ ਅਤ੍ਥੇ ਸਤਿ ਤੇਨ ਸਦ੍ਧਿਂ ਅਞ੍ਞਂ ਵਿਞ੍ਞਾਪੇਨ੍ਤਿਯਾ ਅਨਾਪਤ੍ਤਿ. ਇਦਂ ਵੁਤ੍ਤਂ ਹੋਤਿ – ਸਚੇ ਪਠਮਂ ਸਪ੍ਪਿ ਵਿਞ੍ਞਤ੍ਤਂ, ‘‘ਆਮਕਮਂਸਂ ਪਚਿਤਬ੍ਬ’’ਨ੍ਤਿ ਚ ਵੇਜ੍ਜੇਨ ਵੁਤ੍ਤਤ੍ਤਾ ਤੇਲੇਨ ਅਤ੍ਥੋ ਹੋਤਿ, ਤਤੋ ‘‘ਤੇਲੇਨਾਪਿ ਮੇ ਅਤ੍ਥੋ’’ਤਿ ਏਵਂ ਅਞ੍ਞਞ੍ਚ ਵਿਞ੍ਞਾਪੇਤੀਤਿ. ਆਨਿਸਂਸਞ੍ਚ ਦਸ੍ਸੇਤ੍ਵਾ ਤਤੋ ਅਞ੍ਞਂ ਵਿਞ੍ਞਾਪੇਨ੍ਤਿਯਾਪਿ ਅਨਾਪਤ੍ਤੀਤਿ ਞਾਤਬ੍ਬਨ੍ਤਿ ਯੋਜਨਾ. ਇਦਂ ਵੁਤ੍ਤਂ ਹੋਤਿ – ਸਚੇ ਕਹਾਪਣਸ੍ਸ ¶ ਸਪ੍ਪਿ ਆਭਤਂ ਹੋਤਿ, ਇਮਿਨਾ ਮੂਲੇਨ ਦਿਗੁਣਂ ਤੇਲਂ ਲਬ੍ਭਤਿ, ਤੇਲੇਨਾਪਿ ਚ ਇਦਂ ਕਿਚ੍ਚਂ ਨਿਪ੍ਪਜ੍ਜਤਿ, ਤਸ੍ਮਾ ਤੇਲਮਾਹਰਾਤਿ ਏਵਂ ਆਨਿਸਂਸਂ ਦਸ੍ਸੇਤ੍ਵਾ ਵਿਞ੍ਞਾਪੇਤੀਤਿ.

ਚਤੁਤ੍ਥਂ.

੨੧੧੨-੩. ਪੁਬ੍ਬਂ ¶ ਅਞ੍ਞਂ ਚੇਤਾਪੇਤ੍ਵਾਤਿ ਯੋਜਨਾ, ਅਤ੍ਤਨੋ ਕਪ੍ਪਿਯਭਣ੍ਡੇਨ ‘‘ਇਦਂ ਨਾਮ ਆਹਰਾ’’ਤਿ ਪੁਬ੍ਬਂ ਅਞ੍ਞਂ ਪਰਿਵਤ੍ਤਾਪੇਤ੍ਵਾਤਿ ਅਤ੍ਥੋ. ਏਵਨ੍ਤਿ ਏਤ੍ਥ ‘‘ਵੁਤ੍ਤੇ’’ਤਿ ਸੇਸੋ. ਧਨੇਨ ਨਿਬ੍ਬਤ੍ਤਂ ਧਞ੍ਞਂ, ਅਤ੍ਤਨੋ ਧਨੇਨ ਨਿਪ੍ਫਾਦਿਤਤ੍ਤਾ ਤੇਲਾਦਿ ਇਧ ‘‘ਧਞ੍ਞ’’ਨ੍ਤਿ ਅਧਿਪ੍ਪੇਤਂ, ਨ ਵੀਹਾਦਿ. ਏਵਂ ਵੁਤ੍ਤੇ ਮਯ੍ਹਂ ਅਞ੍ਞਂ ਧਞ੍ਞਂ ਆਨੇਤ੍ਵਾ ਦੇਤਿ ਇਤਿ ਸਞ੍ਞਾਯ ਪਚ੍ਛਾ ਅਞ੍ਞਂ ਚੇਤਾਪੇਯ੍ਯਾਤਿ ਯੋਜਨਾ, ਨ ਮੇ ਇਮਿਨਾ ਅਤ੍ਥੋ, ਅਞ੍ਞਂ ਆਹਰਾਤਿ ਵੁਤ੍ਤੇ ਇਦਞ੍ਚ ਦਤ੍ਵਾ ਅਞ੍ਞਞ੍ਚ ਆਹਰਿਤ੍ਵਾ ਦੇਤੀਤਿ ਸਞ੍ਞਾਯ ‘‘ਨ ਮੇ ਇਦਂ ਰੁਚ੍ਚਤਿ, ਅਞ੍ਞਂ ਆਹਰਾ’’ਤਿ ਪਚ੍ਛਾ ਅਞ੍ਞਂ ਪਰਿਵਤ੍ਤਾਪੇਯ੍ਯਾਤਿ ਅਤ੍ਥੋ. ਚੇਤਾਪਨਪਯੋਗੇਨਾਤਿ ਆਣਤ੍ਤਾਯ ਚੇਤਾਪਨਵਸੇਨ. ਮੂਲਟ੍ਠਾਯਾਤਿ ਆਣਾਪਿਕਾਯ. ਤੇਨ ਚ ਅਞ੍ਞੇਨ ਵਾ ਮੂਲੇਨ ਆਭਤਂ ਹੋਤੁ, ਤਸ੍ਸ ਲਾਭੇ ਨਿਸ੍ਸਗ੍ਗਿਯਂ ਹੋਤੀਤਿ ਯੋਜਨਾ.

੨੧੧੪. ਸੇਸਨ੍ਤਿ ਤਿਕਪਾਚਿਤ੍ਤਿਯਾਦਿਕਂ ਵਿਨਿਚ੍ਛਯਵਿਸੇਸਂ.

ਪਞ੍ਚਮਂ.

੨੧੧੫-੬. ਅਞ੍ਞਦਤ੍ਥਾਯ ਦਿਨ੍ਨੇਨਾਤਿ ਉਪਾਸਕੇਹਿ ‘‘ਏਵਰੂਪਂ ਗਹੇਤ੍ਵਾ ਭਾਜੇਤ੍ਵਾ ਪਰਿਭੁਞ੍ਜਥਾ’’ਤਿ ਅਞ੍ਞਸ੍ਸਤ੍ਥਾਯ ਦਿਨ੍ਨੇਨ. ‘‘ਸਙ੍ਘਿਕੇਨ ਪਰਿਕ੍ਖਾਰੇਨਾ’’ਤਿ ਇਮਿਨਾ ਸਮ੍ਬਨ੍ਧੋ. ਪਰਿਕ੍ਖਾਰੇਨਾਤਿ ਕਪ੍ਪਿਯਭਣ੍ਡੇਨ. ਸਙ੍ਘਿਕੇਨਾਤਿ ਸਙ੍ਘਸ੍ਸ ਪਰਿਚ੍ਚਤ੍ਤੇਨ. ਇਧਾਤਿ ਇਮਸ੍ਮਿਂ ਸਾਸਨੇ. ਤਸ੍ਸਾਤਿ ਯਾਯ ਚੇਤਾਪਿਤਂ. ਨਿਸ੍ਸਗ੍ਗਿਯਂ ਸਿਯਾਤਿ ਏਤ੍ਥ ਨਿਸ੍ਸਟ੍ਠਪਟਿਲਦ੍ਧਂ ਯਥਾਦਾਨੇ ਉਪਨੇਤਬ੍ਬਨ੍ਤਿ ਵਤ੍ਤਬ੍ਬਂ. ਯਥਾਹ ‘‘ਨਿਸ੍ਸਟ੍ਠਂ ਪਟਿਲਭਿਤ੍ਵਾ ਯਥਾਦਾਨੇ ਉਪਨੇਤਬ੍ਬ’’ਨ੍ਤਿ (ਪਾਚਿ. ੭੬੧). ਇਦਂ ਹੇਟ੍ਠਾ ਵੁਤ੍ਤਤ੍ਥਾਧਿਪ੍ਪਾਯਮੇਵ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ‘‘ਅਨਞ੍ਞਦਤ੍ਥਿਕੇ ਅਞ੍ਞਦਤ੍ਥਿਕਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ. ਅਨਞ੍ਞਦਤ੍ਥਿਕੇ ਵੇਮਤਿਕਾ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਤ੍ਤਾ ਆਹ ‘‘ਅਨਞ੍ਞਦਤ੍ਥਿਕੇ ਨਿਦ੍ਦਿਟ੍ਠਂ ¶ ਦ੍ਵਿਕਦੁਕ੍ਕਟ’’ਨ੍ਤਿ. ਇਮਿਨਾ ਚ ‘‘ਅਞ੍ਞਦਤ੍ਥਿਕੇ ਤਿਕਪਾਚਿਤ੍ਤਿਯ’’ਨ੍ਤਿ ਇਦਂ ਵੁਤ੍ਤਮੇਵ. ‘‘ਅਞ੍ਞਦਤ੍ਥਿਕੇ ਅਞ੍ਞਦਤ੍ਥਿਕਸਞ੍ਞਾ, ਵੇਮਤਿਕਾ, ਅਨਞ੍ਞਦਤ੍ਥਿਕਸਞ੍ਞਾ ਅਞ੍ਞਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੭੬੧) ਹਿ ਵੁਤ੍ਤਂ.

੨੧੧੭. ਸੇਸਕਨ੍ਤਿ ¶ ਯਦਤ੍ਥਾਯ ਦਿਨ੍ਨਂ, ਤਂ ਚੇਤਾਪੇਤ੍ਵਾ ਆਹਰਿਤ੍ਵਾ ਅਤਿਰਿਤ੍ਤਂ ਮੂਲਂ ਅਞ੍ਞਦਤ੍ਥਾਯ ਉਪਨੇਨ੍ਤਿਯਾ ਅਨਾਪਤ੍ਤੀਤਿ ਯੋਜੇਤਬ੍ਬਂ. ਸਾਮਿਕੇ ਪੁਚ੍ਛਿਤ੍ਵਾਤਿ ‘‘ਤੁਮ੍ਹੇਹਿ ਚੀਵਰਤ੍ਥਾਯ ਦਿਨ੍ਨਂ, ਅਮ੍ਹਾਕਞ੍ਚ ਚੀਵਰਂ ਸਂਵਿਜ੍ਜਤਿ, ਤੇਲਾਦੀਹਿ ਪਨ ਅਤ੍ਥੋ’’ਤਿ ਏਵਂ ਸਾਮਿਕੇ ਪੁਚ੍ਛਿਤ੍ਵਾ. ਤਨ੍ਤਿ ਤਂ ਚੇਤਾਪਨ੍ਨਂ. ਆਪਦਾਸੂਤਿ ਭਿਕ੍ਖੁਨੀਹਿ ਵਿਹਾਰਂ ਪਹਾਯ ਗਮਨਾਰਹਮੁਪਦ੍ਦਵੋ ਗਹਿਤੋ. ਯਥਾਹ ‘‘ਆਪਦਾਸੂਤਿ ਤਥਾਰੂਪੇਸੁ ਉਪਦ੍ਦਵੇਸੁ ਭਿਕ੍ਖੁਨਿਯੋ ਵਿਹਾਰਂ ਛਡ੍ਡੇਤ੍ਵਾ ਪਕ੍ਕਮਨ੍ਤਿ, ਏਵਰੂਪਾਸੁ ਆਪਦਾਸੁ ਯਂ ਵਾ ਤਂ ਵਾ ਚੇਤਾਪੇਤੁਂ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੭੬੨).

੨੧੧੮. ਸਯਂ ਯਾਚਿਤਕਂ ਵਿਨਾਤਿ ‘‘ਸਂਯਾਚਿਤਕ’’ਨ੍ਤਿ ਪਦਂ ਵਿਨਾ, ਏਤ੍ਤਕਮੇਵ ਵਿਸਦਿਸਨ੍ਤਿ ਵੁਤ੍ਤਂ ਹੋਤਿ.

ਛਟ੍ਠਸਤ੍ਤਮਾਨਿ.

੨੧੧੯. ਅਧਿਕਵਚਨਂ ਦਸ੍ਸੇਤੁਮਾਹ ‘‘ਮਹਾਜਨਿਕਸਞ੍ਞਾਚਿਕੇਨਾ’’ਤਿ. ਪਦਤਾਧਿਕਾਤਿ ਪਦਮੇਵ ਪਦਤਾ. ਮਹਾਜਨਿਕੇਨਾਤਿ ਗਣਸ੍ਸ ਪਰਿਚ੍ਚਤ੍ਤੇਨ. ਸਞ੍ਞਾਚਿਕੇਨਾਤਿ ਸਯਂ ਯਾਚਿਤਕੇਨ.

੨੧੨੦. ਅਨਨ੍ਤਰਸਮਾ ਮਤਾਤਿ ਇਧ ‘‘ਪੁਗ੍ਗਲਿਕੇਨਾ’’ਤਿ ਪਦਂ ਵਿਨਾ ਸਮੁਟ੍ਠਾਨਾਦਿਨਾ ਸਦ੍ਧਿਂ ਸਬ੍ਬੇ ਵਿਨਿਚ੍ਛਯਾ ਅਨਨ੍ਤਰਸਿਕ੍ਖਾਪਦਸਦਿਸਾ ਮਤਾਤਿ ਅਤ੍ਥੋ. ‘‘ਯਾ ਪਨ ਭਿਕ੍ਖੁਨੀ ਅਞ੍ਞਦਤ੍ਥਿਕੇਨ ਪਰਿਕ੍ਖਾਰੇਨ ਅਞ੍ਞੁਦ੍ਦਿਸਿਕੇਨ ਪੁਗ੍ਗਲਿਕੇਨਾ’’ਤਿ ਹਿ ¶ ਸਿਕ੍ਖਾਪਦਂ. ਪੁਗ੍ਗਲਿਕੇਨਾਤਿ ਏਕਭਿਕ੍ਖੁਨਿਯਾ ਪਰਿਚ੍ਚਤ੍ਤੇਨ. ‘‘ਕਿਞ੍ਚਿਪੀ’’ਤਿ ਲਿਖਨ੍ਤਿ. ‘‘ਕੋਚਿਪੀ’’ਤਿ ਪਾਠੋ ਸੁਨ੍ਦਰੋ ‘‘ਵਿਸੇਸੋ’’ਤਿ ਇਮਿਨਾ ਤੁਲ੍ਯਾਧਿਕਰਣਤ੍ਤਾ.

ਅਟ੍ਠਮਨਵਮਦਸਮਾਨਿ.

ਪਠਮੋ ਵਗ੍ਗੋ.

੨੧੨੧-੨. ਚਤ੍ਤਾਰਿ ਕਂਸਾਨਿ ਸਮਾਹਟਾਨਿ, ਚਤੁਨ੍ਨਂ ਕਂਸਾਨਂ ਸਮਾਹਾਰੋ ਵਾ ਚਤੁਕ੍ਕਂਸਂ, ਚਤੁਕ੍ਕਂਸਤੋ ਅਤਿਰੇਕਂ ਅਤਿਰੇਕਚਤੁਕ੍ਕਂਸਂ, ਤੇਨ ਅਤਿਰੇਕਚਤੁਕ੍ਕਂਸਗ੍ਘਨਕਂ ਪਾਵੁਰਣਮਾਹ, ਉਪਚਾਰੇਨ ‘‘ਅਤਿਰੇਕਚਤੁਕ੍ਕਂਸ’’ਨ੍ਤਿ ਵੁਤ੍ਤਂ. ਕਂਸਪਰਿਮਾਣਂ ਪਨੇਤ੍ਥ ਸਯਮੇਵ ਵਕ੍ਖਤਿ ‘‘ਕਹਾਪਣਚਤੁਕ੍ਕਂ ਤੁ, ਕਂਸੋ ਨਾਮ ਪਵੁਚ੍ਚਤੀ’’ਤਿ. ਤਸ੍ਮਾ ਅਤਿਰੇਕਸੋਲ਼ਸਕਹਾਪਣਗ੍ਘਨਕਨ੍ਤਿ ਅਤ੍ਥੋ. ਗਰੁਪਾਵੁਰਣਨ੍ਤਿ ਸੀਤਕਾਲੇ ਪਾਰੁਪਿਤਬ੍ਬਪਾਵੁਰਣਂ. ਚੇਤਾਪੇਯ੍ਯਾਤਿ ਵਿਞ੍ਞਾਪੇਯ੍ਯ. ਚਤ੍ਤਾਰਿ ਸਚ੍ਚਾਨਿ ¶ ਸਮਾਹਟਾਨਿ, ਚਤੁਨ੍ਨਂ ਵਾ ਸਚ੍ਚਾਨਂ ਸਮਾਹਾਰੋ ਚਤੁਸਚ੍ਚਂ, ਤਂ ਪਕਾਸੇਤਿ ਸੀਲੇਨਾਤਿ ਚਤੁਸਚ੍ਚਪ੍ਪਕਾਸੀ, ਤੇਨ, ਚਤੁਨ੍ਨਂ ਅਰਿਯਸਚ੍ਚਾਨਂ ਨਿਦ੍ਦਿਸਕੇਨ ਸਮ੍ਮਾਸਮ੍ਬੁਦ੍ਧੇਨ. ਪਯੋਗੇਤਿ ‘‘ਦੇਹੀ’’ਤਿ ਏਵਂ ਵਿਞ੍ਞਾਪਨਪਯੋਗੇ. ਲਾਭੇਤਿ ਪਟਿਲਾਭੇ.

ਚਤੁਨ੍ਨਂ ਸਮੂਹੋ ਚਤੁਕ੍ਕਂ, ਕਹਾਪਣਾਨਂ ਚਤੁਕ੍ਕਂ ਕਹਾਪਣਚਤੁਕ੍ਕਂ. ਕਹਾਪਣੋ ਚੇਤ੍ਥ ਤਂਤਂਕਾਲੇ, ਤਂਤਂਪਦੇਸੇ ਚ ਵੋਹਾਰੂਪਗੋ ਗਹੇਤਬ੍ਬੋ. ਇਮਾ ਵੁਤ੍ਤਪ੍ਪਕਾਰਾ ਨਿਸ੍ਸਗ੍ਗਿਯਾਵਸਾਨਾਪਤ੍ਤਿਯੋ ‘‘ਞਾਤਕਾਨਞ੍ਚ ਸਨ੍ਤਕੇ’’ਤਿ ਅਨਾਪਤ੍ਤਿਵਿਸਯੇ ਵਕ੍ਖਮਾਨਤ੍ਤਾ ‘‘ਯਦਾ ਯੇਨ ਅਤ੍ਥੋ, ਤਦਾ ਤਂ ਵਦੇਯ੍ਯਾਥਾ’’ਤਿ ਏਵਂ ਨਿਚ੍ਚਪਵਾਰਣਂ ਅਕਤ੍ਵਾ ਤਸ੍ਮਿਂ ਕਾਲੇ ਕਿਸ੍ਮਿਞ੍ਚਿ ਗੁਣੇ ਪਸੀਦਿਤ੍ਵਾ ‘‘ਵਦੇਯ੍ਯਾਥ ਯੇਨ ਅਤ੍ਥੋ’’ਤਿ ਏਵਂ ਪਵਾਰਿਤਟ੍ਠਾਨੇ ਸਮ੍ਭਵਨ੍ਤੀਤਿ ਦਟ੍ਠਬ੍ਬਾ.

੨੧੨੩-੫. ਊਨਕਚਤੁਕ੍ਕਂਸੇ ¶ ਅਤਿਰੇਕਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ. ਊਨਕਚਤੁਕ੍ਕਂਸੇ ਵੇਮਤਿਕਾ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਤ੍ਤਾ ਆਹ ‘‘ਊਨਕੇ ਤੁ ਚਤੁਕ੍ਕਂਸੇ, ਉਦ੍ਦਿਟ੍ਠਂ ਦ੍ਵਿਕਦੁਕ੍ਕਟ’’ਨ੍ਤਿ. ਇਮਿਨਾ ‘‘ਅਤਿਰੇਕਚਤੁਕ੍ਕਂਸੇ ਅਤਿਰੇਕਸਞ੍ਞਾ, ਵੇਮਤਿਕਾ, ਊਨਕਸਞ੍ਞਾ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ ਤਿਕਪਾਚਿਤ੍ਤਿਯਞ੍ਚ ਦਸ੍ਸਿਤਂ ਹੋਤਿ.

ਗਰੁਕਨ੍ਤਿ ਗਰੁਪਾਵੁਰਣਂ. ਤਦੂਨਂ ਵਾਤਿ ਚਤੁਕ੍ਕਂਸਤੋ ਊਨਕਂ ਵਾ. ਞਾਤਕਾਨਞ੍ਚਾਤਿ ਏਤ੍ਥ ਚ-ਸਦ੍ਦੇਨ ਪਵਾਰਿਤਾਨਂ ਸਙ੍ਗਹੋ. ਯਥਾਹ ਅਨਾਪਤ੍ਤਿਵਾਰੇ ‘‘ਞਾਤਕਾਨਂ, ਪਵਾਰਿਤਾਨ’’ਨ੍ਤਿ (ਪਾਚਿ. ੭੮੭). ਏਤ੍ਥ ਚ ‘‘ਅਤਿਰੇਕਚਤੁਕ੍ਕਂਸਮ੍ਪੀ’’ਤਿ ਵਤ੍ਤਬ੍ਬਂ ‘‘ਤਦੂਨਂ ਵਾ’’ਤਿ ਇਮਿਨਾ ਚਤੁਕ੍ਕਂਸੂਨਸ੍ਸ ਵੁਤ੍ਤਤ੍ਤਾ. ‘‘ਅਪ੍ਪਮੇਵ ਵਾ’’ਤਿ ਇਮਿਨਾ ਅਤਿਰੇਕਚਤੁਕ੍ਕਂਸੇਪਿ ਮਹਗ੍ਘਤਰਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਏਕਾਦਸਮਂ.

੨੧੨੬-੭. ‘‘ਲਹੁਪਾਵੁਰਣਂ ਪਨ ਭਿਕ੍ਖੁਨਿਯਾ ਚੇਤਾਪੇਨ੍ਤਿਯਾ ਅਡ੍ਢਤੇਯ੍ਯਕਂਸਪਰਮਂ ਚੇਤਾਪੇਤਬ੍ਬ’’ਨ੍ਤਿ (ਪਾਚਿ. ੭੮੯) ਵਚਨਤੋ ਲਹੁਪਾਵੁਰਣਨ੍ਤਿ ਏਤ੍ਥ ‘‘ਚੇਤਾਪੇਨ੍ਤਿਯਾ ਭਿਕ੍ਖੁਨਿਯਾ’’ਤਿ ਚ ਅਡ੍ਢਤੇਯ੍ਯਕਂਸਗ੍ਘਨਨ੍ਤਿ ਏਤ੍ਥ ‘‘ਚੇਤਾਪੇਤਬ੍ਬ’’ਨ੍ਤਿ ਚ ਸੇਸੋ. ਲਹੁਪਾਵੁਰਣਨ੍ਤਿ ਉਣ੍ਹਕਾਲੇ ਪਾਵੁਰਣਂ. ਤਿਣ੍ਣਂ ਪੂਰਣੋ ਤੇਯ੍ਯੋ, ਅਡ੍ਢੋ ਤੇਯ੍ਯੋ ਅਸ੍ਸਾਤਿ ਅਡ੍ਢਤੇਯ੍ਯੋ, ਅਡ੍ਢਤੇਯ੍ਯੋ ਚ ਸੋ ਕਂਸੋ ਚਾਤਿ ਅਡ੍ਢਤੇਯ੍ਯਕਂਸੋ, ਤਂ ਅਗ੍ਘਤੀਤਿ ਅਡ੍ਢਤੇਯ੍ਯਕਂਸਗ੍ਘਨਂ, ਦਸਕਹਾਪਣਗ੍ਘਨਕਨ੍ਤਿ ਅਤ੍ਥੋ. ਤਤੋਤਿ ਅਡ੍ਢਤੇਯ੍ਯਕਂਸਗ੍ਘਨਕਤੋ. ਯਂ ਪਨ ਪਾਵੁਰਣਂ ਅਡ੍ਢਤੇਯ੍ਯਕਂਸਗ੍ਘਨਕਂ, ਤਂ ਲਹੁਪਾਵੁਰਣਂ ¶ . ਤਤੋ ਅਡ੍ਢਤੇਯ੍ਯਕਂਸਗ੍ਘਨਕਤੋ ਲਹੁਪਾਵੁਰਣਤੋ. ਉਤ੍ਤਰਿਨ੍ਤਿ ਅਤਿਰੇਕਂ. ਅਡ੍ਢਤੇਯ੍ਯਕਂਸਗ੍ਘਨਕਂ ਯਂ ਪਾਵੁਰਣਂ ਯਾ ਭਿਕ੍ਖੁਨੀ ਚੇਤਾਪੇਤਿ ¶ , ਤਸ੍ਸ ਪਾਵੁਰਣਸ੍ਸ ਪਟਿਲਾਭੇ ਤਸ੍ਸਾ ਭਿਕ੍ਖੁਨਿਯਾ ਨਿਸ੍ਸਗ੍ਗਿਯਪਾਚਿਤ੍ਤਿਯਾ ਵੁਤ੍ਤਾਤਿ ਯੋਜਨਾ.

‘‘ਅਨਨ੍ਤਰਸਮਂ ਸੇਸ’’ਨ੍ਤਿ ਇਦਂ ਸਮਤ੍ਥੇਤੁਮਾਹ ‘‘ਨਤ੍ਥਿ ਕਾਚਿ ਵਿਸੇਸਤਾ’’ਤਿ. ਵਿਸੇਸੋਯੇਵ ਵਿਸੇਸਤਾ.

ਦ੍ਵਾਦਸਮਂ.

੨੧੨੮. ਇਦਾਨਿ ਪਾਤਿਮੋਕ੍ਖੁਦ੍ਦੇਸੇ ਆਗਤੇਸੁ ਸਮਤਿਂਸਨਿਸ੍ਸਗ੍ਗਿਯੇਸੁ ਕੇਸਞ੍ਚਿ ਅਤ੍ਤਨੋ ਅਵਚਨੇ ਕਾਰਣਞ੍ਚ ਅਵੁਤ੍ਤੇਹਿ ਸਦ੍ਧਿਂ ਵੁਤ੍ਤਾਨਂ ਗਹਣਞ੍ਚ ਦਸ੍ਸੇਤੁਮਾਹ ‘‘ਸਾਧਾਰਣਾਨੀ’’ਤਿਆਦਿ. ਹਿ ਯਸ੍ਮਾ ਭਿਕ੍ਖੁਨੀਨਂ ਭਿਕ੍ਖੂਹਿ ਸਾਧਾਰਣਾਨਿ ਯਾਨਿ ਸਿਕ੍ਖਾਪਦਾਨਿ ਸੇਸਾਨਿ ਇਧ ਵੁਤ੍ਤੇਹਿ ਅਞ੍ਞਾਨਿ, ਤਾਨਿ ਅਟ੍ਠਾਰਸ ਸਿਕ੍ਖਾਪਦਾਨਿ ਚੇਵ ਇਧ ਵੁਤ੍ਤਸਰੂਪਾਨਿ ਦ੍ਵਾਦਸ ਸਿਕ੍ਖਾਪਦਾਨਿ ਚੇਤਿ ਇਚ੍ਚੇਵਂ ਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਾਨਿ ਸਮਤਿਂਸੇਵ ਹੋਨ੍ਤੀਤਿ ਯੋਜਨਾ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ ਵਿਨਯਵਿਨਿਚ੍ਛਯਵਣ੍ਣਨਾਯ

ਨਿਸ੍ਸਗ੍ਗਿਯਕਥਾਵਣ੍ਣਨਾ ਨਿਟ੍ਠਿਤਾ.

ਪਾਚਿਤ੍ਤਿਯਕਥਾਵਣ੍ਣਨਾ

੨੧੨੯-੩੦. ਏਵਂ ਤਿਂਸ ਨਿਸ੍ਸਗ੍ਗਿਯਪਾਚਿਤ੍ਤਿਯਾਨਿ ਦਸ੍ਸੇਤ੍ਵਾ ਇਦਾਨਿ ਸੁਦ੍ਧਪਾਚਿਤ੍ਤਿਯਾਨਿ ਦਸ੍ਸੇਤੁਮਾਹ ‘‘ਲਸੁਣ’’ਨ੍ਤਿਆਦਿ. ਲਸੁਣਨ੍ਤਿ ਏਤ੍ਥ ਇਤਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ‘‘ਲਸੁਣਂ’’ਇਤਿ ਭਣ੍ਡਿਕਂ ਵੁਤ੍ਤਂ ਅਟ੍ਠਕਥਾਯਂ (ਪਾਚਿ. ਅਟ੍ਠ. ੭੯੩-੭੯੫). ਚਤੁਪਞ੍ਚਮਿਞ੍ਜਾਦਿਪ੍ਪਭੇਦਂ ਭਣ੍ਡਿਕਂ ਲਸੁਣਂ ਨਾਮ, ਨ ਤਤੋ ਊਨਂ. ਤੇਨਾਹ ‘‘ਨ ਏਕਦ੍ਵਿਤਿਮਿਞ੍ਜਕ’’ਨ੍ਤਿ. ਪਕ੍ਕਲਸੁਣਤੋ, ਸੀਹਲ਼ਦੀਪਸਮ੍ਭਵਤੋ ਚ ਵਿਸੇਸਮਾਹ ‘‘ਆਮਕਂ ਮਾਗਧਂਯੇਵਾ’’ਤਿ. ਮਗਧੇਸੁ ਜਾਤਂ ਮਾਗਧਂ, ‘‘ਵੁਤ੍ਤ’’ਨ੍ਤਿ ਇਮਿਨਾ ਸਮ੍ਬਨ੍ਧੋ. ਯਥਾਹ ‘‘ਮਗਧਰਟ੍ਠੇ ਜਾਤਲਸੁਣਮੇਵ ¶ ਹਿ ਇਧ ਲਸੁਣਨ੍ਤਿ ਅਧਿਪ੍ਪੇਤ’’ਨ੍ਤਿ (ਪਾਚਿ. ਅਟ੍ਠ. ੭੯੫). ਤਂ ‘‘ਖਾਦਿਸ੍ਸਾਮੀ’’ਤਿ ਗਣ੍ਹਤੀਤਿ ਸਮ੍ਬਨ੍ਧੋ. ਵੁਤ੍ਤਪ੍ਪਕਾਰਂ ਪਾਚਿਤ੍ਤਿਯਞ੍ਚ ਅਜ੍ਝੋਹਾਰਵਸੇਨਾਤਿ ਦਸ੍ਸੇਤੁਮਾਹ ‘‘ਅਜ੍ਝੋਹਾਰਵਸੇਨੇਵ, ਪਾਚਿਤ੍ਤਿਂ ਪਰਿਦੀਪਯੇ’’ਤਿ.

੨੧੩੧. ਤਦੇਵ ¶ ਵਕ੍ਖਤਿ ‘‘ਦ੍ਵੇ ਤਯੋ’’ਤਿਆਦਿਨਾ. ਸਦ੍ਧਿਨ੍ਤਿ ਏਕਤੋ. ਸਙ੍ਖਾਦਿਤ੍ਵਾਤਿ ਗਲਬਿਲਂ ਅਪ੍ਪਵੇਸੇਤ੍ਵਾ ਦਨ੍ਤੇਹਿ ਸਂਚੁਣ੍ਣਿਯਨ੍ਤੀ ਖਾਦਿਤ੍ਵਾ. ਅਜ੍ਝੋਹਰਤਿ ਪਰਗਲਂ ਕਰੋਤਿ.

੨੧੩੨. ਤਤ੍ਥਾਤਿ ਤਸ੍ਮਿਂ ਭਣ੍ਡਿਕਲਸੁਣੇ. ‘‘ਮਿਞ੍ਜਾਨਂ ਗਣਨਾਯਾ’’ਤਿ ਇਮਿਨਾ ਅਜ੍ਝੋਹਾਰਪਯੋਗਗਣਨਾਯੇਵ ਦੀਪਿਤਾ. ਯਥਾਹ ‘‘ਭਿਨ੍ਦਿਤ੍ਵਾ ਏਕੇਕਂ ਮਿਞ੍ਜਂ ਖਾਦਨ੍ਤਿਯਾ ਪਨ ਪਯੋਗਗਣਨਾਯ ਪਾਚਿਤ੍ਤਿਯਾਨੀ’’ਤਿ (ਪਾਚਿ. ਅਟ੍ਠ. ੭੯੫).

੨੧੩੩. ਸਭਾਵਤੋ ਵਟ੍ਟਨ੍ਤੇਵਾਤਿ ਯੋਜਨਾ.

੨੧੩੫. ਯਥਾਵੁਤ੍ਤਪਲਣ੍ਡੁਕਾਦੀਨਂ ਨਾਨਤ੍ਤਂ ਦਸ੍ਸੇਤੁਮਾਹ ‘‘ਏਕਾ ਮਿਞ੍ਜਾ’’ਤਿਆਦਿ. ਇਧ ਮਿਞ੍ਜਾਨਂ ਵਸੇਨੇਵ ਨਾਨਤ੍ਤਂ ਦਸ੍ਸਿਤਂ. ਅਟ੍ਠਕਥਾਯਂ ਪਨ ਵਣ੍ਣਵਸੇਨਾਪਿ. ਯਥਾਹ ‘‘ਪਲਣ੍ਡੁਕੋ ਪਣ੍ਡੁਵਣ੍ਣੋ ਹੋਤਿ. ਭਞ੍ਜਨਕੋ ਲੋਹਿਤਵਣ੍ਣੋ. ਹਰਿਤਕੋ ਹਰਿਤਪਣ੍ਣਵਣ੍ਣੋ’’ਤਿ (ਪਾਚਿ. ਅਟ੍ਠ. ੭੯੭).

੨੧੩੬. ‘‘ਸਾਲ਼ਵੇ ਉਤ੍ਤਰਿਭਙ੍ਗਕੇ’’ਤਿ ਪਦਚ੍ਛੇਦੋ. ‘‘ਬਦਰਸਾਲ਼ਵਾਦੀਸੂ’’ਤਿ (ਪਾਚਿ. ਅਟ੍ਠ. ੭੯੭) ਅਟ੍ਠਕਥਾਵਚਨਤੋ ਏਤ੍ਥ ਬਦਰ-ਸਦ੍ਦੋ ਸੇਸੋ. ਬਦਰਸਾਲ਼ਵਂ ਨਾਮ ਬਦਰਫਲਾਨਿ ਸੁਕ੍ਖਾਪੇਤ੍ਵਾ ਚੁਣ੍ਣੇਤ੍ਵਾ ਕਾਤਬ੍ਬਾ ਖਾਦਨੀਯਵਿਕਤਿ. ਉਮ੍ਮਤ੍ਤਿਕਾਦੀਨਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਆਦਿਕਮ੍ਮਿਕਾ ਗਹਿਤਾ. ਯਥਾਹ ‘‘ਉਮ੍ਮਤ੍ਤਿਕਾਯ ਆਦਿਕਮ੍ਮਿਕਾਯਾ’’ਤਿ (ਪਾਚਿ. ੭੯੭).

ਪਠਮਂ.

੨੧੩੭. ਸਮ੍ਬਾਧੇਤਿ ¶ ਪਟਿਚ੍ਛਨ੍ਨੋਕਾਸੇ. ਤਸ੍ਸ ਵਿਭਾਗਂ ਦਸ੍ਸੇਤੁਮਾਹ ‘‘ਉਪਕਚ੍ਛੇਸੁ ਮੁਤ੍ਤਸ੍ਸ ਕਰਣੇਪਿ ਵਾ’’ਤਿ.

੨੧੩੮. ਅਸ੍ਸਾ ਤਥਾ ਪਾਚਿਤ੍ਤੀਤਿ ਸਮ੍ਬਨ੍ਧੋ. ‘‘ਨ ਲੋਮਗਣਨਾਯਾ’’ਤਿ ਇਮਿਨਾ ‘‘ਪਯੋਗਗਣਨਾਯਾ’’ਤਿ ਇਦਮੇਵ ਸਮਤ੍ਥਯਤਿ.

੨੧੩੯. ਆਬਾਧੇਤਿ ਕਣ੍ਡੁਆਦਿਕੇ ਰੋਗੇ. ਯਥਾਹ – ‘‘ਆਬਾਧਪਚ੍ਚਯਾਤਿ ਕਣ੍ਡੁਕਚ੍ਛੁਆਦਿਆਬਾਧਪਚ੍ਚਯਾ’’ਤਿ ¶ (ਪਾਚਿ. ਅਟ੍ਠ. ੮੦੧). ਮਗ੍ਗਸਂਵਿਧਾਨਸਮਾ ਮਤਾਤਿ ਭਿਕ੍ਖੁਨਿਯਾ ਸਂਵਿਧਾਯ ਏਕਦ੍ਧਾਨਸਿਕ੍ਖਾਪਦੇਨ ਸਦਿਸਾ ਮਤਾ ਞਾਤਾਤਿ ਅਤ੍ਥੋ.

ਦੁਤਿਯਂ.

੨੧੪੦. ਪਦੁਮਸ੍ਸ ਵਾ ਪੁਣ੍ਡਰੀਕਸ੍ਸ ਵਾ ਅਨ੍ਤਮਸੋ ਕੇਸਰੇਨਾਪਿ ਕਾਮਰਾਗੇਨ ਮੁਤ੍ਤਕਰਣਸ੍ਸ ਤਲਘਾਤਨੇ ਮੁਤ੍ਤਕਰਣਮ੍ਪਿ ਪਹਾਰਦਾਨੇ ਪਾਚਿਤ੍ਤਿ ਹੋਤੀਤਿ ਯੋਜਨਾ. ਕੇਸਰੇਨਾਪੀਤਿ ਅਪਿ-ਸਦ੍ਦੇਨ ਮਹਾਪਦੁਮਪਣ੍ਣੇਹਿ ਵਤ੍ਤਬ੍ਬਮੇਵ ਨਤ੍ਥੀਤਿ ਦੀਪੇਤਿ. ਯਥਾਹ – ‘‘ਅਨ੍ਤਮਸੋ ਉਪ੍ਪਲਪਤ੍ਤੇਨਾਪੀਤਿ ਏਤ੍ਥ ਪਤ੍ਤਂ ਤਾਵ ਮਹਨ੍ਤਂ, ਕੇਸਰੇਨਾਪਿ ਪਹਾਰਂ ਦੇਨ੍ਤਿਯਾ ਆਪਤ੍ਤਿਯੇਵਾ’’ਤਿ (ਪਾਚਿ. ਅਟ੍ਠ. ੮੦੩).

੨੧੪੧. ਤਤ੍ਥਾਤਿ ਤਸ੍ਮਿਂ ਮੁਤ੍ਤਕਰਣਤਲੇ.

ਤਤਿਯਂ.

੨੧੪੨. ਯਾ ਪਨ ਭਿਕ੍ਖੁਨੀ ਕਾਮਰਾਗਪਰੇਤਾ ਕਾਮਰਾਗੇਨ ਪੀਲ਼ਿਤਾ ਅਤ੍ਤਨੋ ਬ੍ਯਞ੍ਜਨੇ ਮੁਤ੍ਤਪਥੇ ਉਪ੍ਪਲਪਤ੍ਤਮ੍ਪਿ ਪਵੇਸੇਤਿ, ਨ ਵਟ੍ਟਤਿ ਪਾਚਿਤ੍ਤਿ ਹੋਤੀਤਿ ਯੋਜਨਾ. ਪਿ-ਸਦ੍ਦੇਨ ‘‘ਕੇਸਰਮਤ੍ਤਮ੍ਪਿ ਪਨ ਪਵੇਸੇਨ੍ਤਿਯਾ ਆਪਤ੍ਤਿਯੇਵਾ’’ਤਿ (ਪਾਚਿ. ਅਟ੍ਠ. ੮੧੨) ਅਟ੍ਠਕਥਾ ਉਲ੍ਲਿਙ੍ਗਿਤਾ.

੨੧੪੩-੪. ਯਦ੍ਯੇਵਂ ¶ ‘‘ਜਤੁਮਟ੍ਠਕੇ ਪਾਚਿਤ੍ਤਿਯ’’ਨ੍ਤਿ ਕਸ੍ਮਾ ਵੁਤ੍ਤਨ੍ਤਿ ਆਹ ‘‘ਇਦਂ…ਪੇ… ਜਤੁਮਟ੍ਠਕ’’ਨ੍ਤਿ. ਇਦਂ ਜਤੁਮਟ੍ਠਕਂ ਵਤ੍ਥੁਵਸੇਨੇਵ ਵੁਤ੍ਤਨ੍ਤਿ ‘‘ਅਥ ਖੋ ਸਾ ਭਿਕ੍ਖੁਨੀ ਜਤੁਮਟ੍ਠਕਂ ਆਦਿਯਿਤ੍ਵਾ ਧੋਵਿਤੁਂ ਵਿਸ੍ਸਰਿਤ੍ਵਾ ਏਕਮਨ੍ਤਂ ਛਡ੍ਡੇਸਿ. ਭਿਕ੍ਖੁਨਿਯੋ ਮਕ੍ਖਿਕਾਹਿ ਸਮ੍ਪਰਿਕਿਣ੍ਣਂ ਪਸ੍ਸਿਤ੍ਵਾ ਏਵਮਾਹਂਸੁ ‘ਕਸ੍ਸਿਦਂ ਕਮ੍ਮ’ਨ੍ਤਿ. ਸਾ ਏਵਮਾਹ ‘ਮਯ੍ਹਿਦਂ ਕਮ੍ਮ’ਨ੍ਤਿ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ, ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ ‘ਕਥਞ੍ਹਿ ਨਾਮ ਭਿਕ੍ਖੁਨੀ ਜਤੁਮਟ੍ਠਕਂ ਆਦਿਯਿਸ੍ਸਤੀ’’ਤਿ (ਪਾਚਿ. ੮੦੬) ਆਗਤਵਤ੍ਥੁਵਸੇਨੇਵ ਵੁਤ੍ਤਂ, ਨ ਤਂ ਵਿਨਾ ਅਞ੍ਞਸ੍ਸ ਵਟ੍ਟਕਸ੍ਸ ਸਮ੍ਭਵਤੋਤਿ ਅਧਿਪ੍ਪਾਯੋ. ਜਤੁਮਟ੍ਠਕਂ ਨਾਮ ਜਤੁਨਾ ਕਤੋ ਮਟ੍ਠਦਣ੍ਡਕੋ.

ਦਣ੍ਡਨ੍ਤਿ ¶ ਏਤ੍ਥ ‘‘ਯਂ ਕਿਞ੍ਚੀ’’ਤਿ ਸੇਸੋ. ਯਥਾਹ ‘‘ਅਨ੍ਤਮਸੋ ਉਪ੍ਪਲਪਤ੍ਤਮ੍ਪਿ ਮੁਤ੍ਤਕਰਣਂ ਪਵੇਸੇਤੀ’’ਤਿ (ਪਾਚਿ. ੮੦੮). ਏਤਮ੍ਪਿ ਚ ਅਤਿਮਹਨ੍ਤਂ, ਕੇਸਰਮਤ੍ਤਮ੍ਪਿ ਪਨ ਪਵੇਸੇਨ੍ਤਿਯਾ ਆਪਤ੍ਤਿ ਏਵ. ਏਲ਼ਾਲੁਕਨ੍ਤਿ ਕਕ੍ਕਾਰਿਫਲਂ ਵਾ. ਤਸ੍ਮਿਨ੍ਤਿ ਅਤ੍ਤਨੋ ਮੁਤ੍ਤਕਰਣੇ.

੨੧੪੫. ਆਬਾਧਪਚ੍ਚਯਾਤਿ ਮੁਤ੍ਤਕਰਣਪ੍ਪਦੇਸੇ ਜਾਤਵਣਾਦਿਮ੍ਹਿ ਵਣਟ੍ਠਾਨਨਿਰੁਪਨਾਦਿਪਚ੍ਚਯਾ.

ਚਤੁਤ੍ਥਂ.

੨੧੪੬. ਅਗ੍ਗਪਬ੍ਬਦ੍ਵਯਾਧਿਕਨ੍ਤਿ ਅਗ੍ਗਪਬ੍ਬਦ੍ਵਯਤੋ ਕੇਸਗ੍ਗਮਤ੍ਤਮ੍ਪਿ ਅਧਿਕਂ. ਯਥਾਹ ‘‘ਅਨ੍ਤਮਸੋ ਕੇਸਗ੍ਗਮਤ੍ਤਮ੍ਪਿ ਅਤਿਕ੍ਕਾਮੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ (ਪਾਚਿ. ੮੧੨). ਦਕਸੁਦ੍ਧਿਂ ਕਰੋਨ੍ਤਿਯਾਤਿ ਮੁਤ੍ਤਕਰਣਟ੍ਠਾਨੇ ਧੋਵਨਂ ਕਰੋਨ੍ਤਿਯਾ. ਯਥਾਹ ‘‘ਉਦਕਸੁਦ੍ਧਿਕਂ ਨਾਮ ਮੁਤ੍ਤਕਰਣਸ੍ਸ ਧੋਵਨਾ ਵੁਚ੍ਚਤੀ’’ਤਿ (ਪਾਚਿ. ੮੧੨).

੨੧੪੭. ‘‘ਤੀਣੀ’’ਤਿ ¶ ਇਮਿਨਾ ਏਕਙ੍ਗੁਲਿਯਾ ਪਬ੍ਬਦ੍ਵਯਸ੍ਸ ਪਵੇਸੇਤ੍ਵਾ ਧੋਵਨੇ ਦੋਸਾਭਾਵਂ ਦੀਪੇਤਿ. ਦੀਘਤੋਤਿ ਅਙ੍ਗੁਲਿਯਾ ਦੀਘਤੋ. ਤੀਣਿ ਪਬ੍ਬਾਨਿ ਗਮ੍ਭੀਰਤੋ ਮੁਤ੍ਤਕਰਣੇ ਪਵੇਸੇਤ੍ਵਾ ਉਦਕਸੁਦ੍ਧਿਂ ਆਦਿਯਨ੍ਤਿਯਾ ਪਾਚਿਤ੍ਤਿਯਂ ਭਵੇਤਿ ਯੋਜਨਾ.

੨੧੪੮. ਤਿਸ੍ਸੋ, ਚਤਸ੍ਸੋ ਵਾ ਅਙ੍ਗੁਲਿਯੋ ਏਕਤੋ ਕਤ੍ਵਾ ਵਿਤ੍ਥਾਰੇਨ ਪਵੇਸਨੇ ਏਕਪਬ੍ਬੇਪਿ ਪਵਿਟ੍ਠੇ ‘‘ਦ੍ਵਙ੍ਗੁਲਪਬ੍ਬਪਰਮ’’ਨ੍ਤਿ ਨਿਯਮਿਤਪ੍ਪਮਾਣਾਤਿਕ੍ਕਮਤੋ ਆਹ ‘‘ਏਕਪਬ੍ਬਮ੍ਪਿ ਯਾ ਪਨਾ’’ਤਿ. ਯਾ ਪਨ ਭਿਕ੍ਖੁਨੀ ਚਤੁਨ੍ਨਂ ਵਾਪਿ ਅਙ੍ਗੁਲੀਨਂ ਤਿਸ੍ਸਨ੍ਨਂ ਵਾਪਿ ਅਙ੍ਗੁਲੀਨਂ ਏਕਪਬ੍ਬਮ੍ਪਿ ਵਿਤ੍ਥਾਰਤੋ ਪਵੇਸੇਤਿ, ਤਸ੍ਸਾ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ.

੨੧੪੯. ਇਤੀਤਿ ਏਵਂ. ਸਬ੍ਬਪ੍ਪਕਾਰੇਨਾਤਿ ਗਮ੍ਭੀਰਪਵੇਸਨਾਦਿਨਾ ਸਬ੍ਬੇਨ ਪਕਾਰੇਨ. ਅਭਿਬ੍ਯਤ੍ਤਤਰਂ ਕਤ੍ਵਾਤਿ ਸੁਪਾਕਟਤਰਂ ਕਤ੍ਵਾ. ਅਯਮਤ੍ਥੋਤਿ ‘‘ਏਕਿਸ੍ਸਙ੍ਗੁਲਿਯਾ ਤੀਣੀ’’ਤਿਆਦਿਨਾ ਵੁਤ੍ਤੋ ਅਯਮਤ੍ਥੋ.

੨੧੫੦. ਦ੍ਵਙ੍ਗੁਲਪਬ੍ਬੇ ਦੋਸੋ ਨਤ੍ਥੀਤਿ ਯੋਜਨਾ. ਉਦਕਸੁਦ੍ਧਿਪਚ੍ਚਯੇ ਪਨ ਸਤਿਪਿ ਫਸ੍ਸਸਾਦਿਯਨੇ ¶ ਯਥਾਵੁਤ੍ਤਪਰਿਚ੍ਛੇਦੇ ਅਨਾਪਤ੍ਤਿ. ਅਧਿਕਮ੍ਪੀਤਿ ਦ੍ਵਙ੍ਗੁਲਪਬ੍ਬਤੋ ਅਧਿਕਮ੍ਪਿ. ਉਦਕਸੁਦ੍ਧਿਂ ਕਰੋਨ੍ਤਿਯਾ ਦੋਸੋ ਨਤ੍ਥੀਤਿ ਯੋਜਨਾ.

੨੧੫੧. ਤਥਾ ਉਦਕਸੁਦ੍ਧਿਂ ਕਰੋਨ੍ਤੀਨਂ ਉਮ੍ਮਤ੍ਤਿਕਾਦੀਨਂ ਅਨਾਪਤ੍ਤਿ ਪਕਾਸਿਤਾਤਿ ਯੋਜਨਾ.

ਪਞ੍ਚਮਂ.

੨੧੫੨. ਭੁਞ੍ਜਤੋ ਪਨ ਭਿਕ੍ਖੁਸ੍ਸਾਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੁਞ੍ਜਤੋ ਭਿਕ੍ਖੁਸ੍ਸ. ਯਥਾਹ ‘‘ਭੁਞ੍ਜਨ੍ਤਸ੍ਸਾਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਂ ਭੁਞ੍ਜਨ੍ਤਸ੍ਸਾ’’ਤਿ (ਪਾਚਿ. ੮੧੭). ਪਾਨੀਯਂ ਵਾ ਵਿਧੂਪਨਂ ¶ ਵਾਤਿ ਵਕ੍ਖਮਾਨਂ ਪਾਨੀਯਂ, ਬੀਜਨੀਯਞ੍ਚ. ਉਪਤਿਟ੍ਠੇਯ੍ਯਾਤਿ ‘‘ਹਤ੍ਥਪਾਸੇ ਤਿਟ੍ਠਤੀ’’ਤਿ (ਪਾਚਿ. ੮੧੭) ਵਚਨਤੋ ਏਤ੍ਥ ਉਪ-ਸਦ੍ਦੋ ਹਤ੍ਥਪਾਸਸਙ੍ਖਾਤਂ ਸਮੀਪਂ ਵਦਤੀਤਿ ਵੇਦਿਤਬ੍ਬਂ.

੨੧੫੩. ਵਤ੍ਥਕੋਣਾਦਿ ਯਾ ਕਾਚਿ ‘‘ਬੀਜਨੀ’’ਤਿ ਵੁਚ੍ਚਤੀਤਿ ਯੋਜਨਾ, ਇਮਿਨਾ ‘‘ਬੀਜਨਿਕਿਚ੍ਚਂ ਸਮ੍ਪਾਦੇਸ੍ਸਾਮੀ’’ਤਿ ਅਧਿਟ੍ਠਾਯ ਗਹਿਤਚੀਵਰਕੋਣਪ੍ਪਕਾਰਂ ਯਂ ਕਿਞ੍ਚਿ ‘‘ਬੀਜਨੀ’’ਤਿ ਵੁਚ੍ਚਤੀਤਿ ਅਤ੍ਥੋ.

੨੧੫੪. ‘‘ਅਥ ਖੋ ਸਾ ਭਿਕ੍ਖੁਨੀ ਤਸ੍ਸ ਭਿਕ੍ਖੁਨੋ ਭੁਞ੍ਜਨ੍ਤਸ੍ਸ ਪਾਨੀਯੇਨ ਚ ਵਿਧੂਪਨੇਨ ਚ ਉਪਤਿਟ੍ਠਿਤ੍ਵਾ ਅਚ੍ਚਾਵਦਤਿ. ਅਥ ਖੋ ਸੋ ਭਿਕ੍ਖੁ ਤਂ ਭਿਕ੍ਖੁਨਿਂ ਅਪਸਾਦੇਤਿ ‘ਮਾ, ਭਗਿਨਿ, ਏਵਰੂਪਂ ਅਕਾਸਿ, ਨੇਤਂ ਕਪ੍ਪਤੀ’ਤਿ. ‘ਪੁਬ੍ਬੇ ਮਂ ਤ੍ਵਂ ਏਵਞ੍ਚ ਏਵਞ੍ਚ ਕਰੋਸਿ, ਇਦਾਨਿ ਏਤ੍ਤਕਂ ਨ ਸਹਸੀ’ਤਿ ਪਾਨੀਯਥਾਲਕਂ ਮਤ੍ਥਕੇ ਆਸੁਮ੍ਭਿਤ੍ਵਾ ਵਿਧੂਪਨੇਨ ਪਹਾਰਂ ਅਦਾਸੀ’’ਤਿ (ਪਾਚਿ. ੮੧੫) ਇਮਸ੍ਮਿਂ ਵਤ੍ਥੁਮ੍ਹਿ ਭਿਕ੍ਖੂਹਿ ਆਰੋਚਿਤੇ ‘‘ਕਥਞ੍ਹਿ ਨਾਮ, ਭਿਕ੍ਖਵੇ, ਭਿਕ੍ਖੁਨੀ ਭਿਕ੍ਖੁਸ੍ਸ ਪਹਾਰਂ ਦਸ੍ਸਤੀ’’ਤਿਆਦੀਨਿ (ਪਾਚਿ. ੮੧੫) ਵਤ੍ਵਾ ‘‘ਯਾ ਪਨ ਭਿਕ੍ਖੁਨੀ ਭਿਕ੍ਖੁਸ੍ਸ ਭੁਞ੍ਜਨ੍ਤਸ੍ਸ ਪਾਨੀਯੇਨ ਵਾ ਵਿਧੂਪਨੇਨ ਵਾ ਉਪਤਿਟ੍ਠੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੮੧੬) ਵੁਤ੍ਤਤ੍ਤਾ ਪਹਾਰਪਚ੍ਚਯਾ ਨੁ ਖੋਤਿ ਆਸਙ੍ਕਂ ਨਿਵਤ੍ਤੇਤੁਮਾਹ ‘‘ਹਤ੍ਥਪਾਸੇ ਇਧ ਠਾਨਪਚ੍ਚਯਾਪਤ੍ਤਿ ਦੀਪਿਤਾ’’ਤਿ. ਏਤ੍ਥ ਚ ਆਸੁਮ੍ਭਿਤ੍ਵਾਤਿ ਪਾਤੇਤ੍ਵਾ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੁਸ੍ਸ ਪਹਾਰੋ ਦਾਤਬ੍ਬੋ. ਯਾ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੪੨੦) ਭਿਕ੍ਖੁਨਿਕ੍ਖਨ੍ਧਕੇ ¶ ਵੁਤ੍ਤਂ ਗਹੇਤ੍ਵਾ ਆਹ ‘‘ਪਹਾਰਪਚ੍ਚਯਾ ਵੁਤ੍ਤਂ, ਖਨ੍ਧਕੇ ਦੁਕ੍ਕਟਂ ਵਿਸੁ’’ਨ੍ਤਿ. ਇਮਿਨਾ ਵੁਤ੍ਤਸ੍ਸੇਵਤ੍ਥਸ੍ਸ ਕਾਰਣਂ ਦਸ੍ਸਿਤਂ ਹੋਤਿ.

੨੧੫੫. ਹਤ੍ਥਪਾਸਂ ਜਹਿਤ੍ਵਾਤਿ ਏਤ੍ਥ ‘‘ਭੋਜਨਂ ਭੁਞ੍ਜਤੋ’’ਤਿ ਚ ਖਾਦਨਂ ਖਾਦਤੋਤਿ ਏਤ੍ਥ ‘‘ਹਤ੍ਥਪਾਸੇ’’ਤਿ ਚ ਵਤ੍ਤਬ੍ਬਂ ¶ . ਭੋਜਨਂ ਭੁਞ੍ਜਤੋ ਹਤ੍ਥਪਾਸਂ ਜਹਿਤ੍ਵਾ ਉਪਤਿਟ੍ਠਨ੍ਤਿਯਾ ਵਾ ਖਾਦਨਂ ਖਾਦਤੋ ਹਤ੍ਥਪਾਸੇ ਉਪਤਿਟ੍ਠਨ੍ਤਿਯਾ ਵਾ ਹੋਤਿ ਆਪਤ੍ਤਿ ਦੁਕ੍ਕਟਨ੍ਤਿ ਯੋਜਨਾ.

੨੧੫੬. ਦੇਤੀਤਿ ਪਾਨੀਯਂ ਵਾ ਸੂਪਾਦਿਂ ਵਾ ‘‘ਇਮਂ ਪਿਵਥ, ਇਮਿਨਾ ਭੁਞ੍ਜਥਾ’’ਤਿ ਦੇਤਿ. ਤਾਲਵਣ੍ਟਂ ‘‘ਇਮਿਨਾ ਬੀਜਨ੍ਤਾ ਭੁਞ੍ਜਥਾ’’ਤਿ ਦੇਤਿ. ਦਾਪੇਤੀਤਿ ਅਞ੍ਞੇਨ ਉਭਯਮ੍ਪਿ ਦਾਪੇਤਿ. ਇਦਂ ਸਿਕ੍ਖਾਪਦਂ ਸਮੁਟ੍ਠਾਨਤੋ ਏਲ਼ਕਲੋਮੇਨ ਸਮਂ ਮਤਨ੍ਤਿ ਯੋਜਨਾ.

ਛਟ੍ਠਂ.

੨੧੫੭. ਵਿਞ੍ਞਤ੍ਵਾਤਿ ਸਯਂ ਵਿਞ੍ਞਤ੍ਵਾ, ਅਞ੍ਞਾਯ ਵਾ ਵਿਞ੍ਞਾਪੇਤ੍ਵਾ. ‘‘ਵਿਞ੍ਞਤ੍ਵਾ ਵਾ ਵਿਞ੍ਞਾਪੇਤ੍ਵਾ ਵਾ’’ਤਿ (ਪਾਚਿ. ੮੨੧) ਹਿ ਸਿਕ੍ਖਾਪਦਂ. ਆਮਕਂ ਧਞ੍ਞਨ੍ਤਿ ਅਪਕ੍ਕਂ ਅਭਟ੍ਠਂ ਸਾਲਿਆਦਿਕਂ ਸਤ੍ਤਵਿਧਂ ਧਞ੍ਞਂ. ਯਥਾਹ – ‘‘ਆਮਕਧਞ੍ਞਂ ਨਾਮ ਸਾਲਿ ਵੀਹਿ ਯਵੋ ਗੋਧੁਮੋ ਕਙ੍ਗੁ ਵਰਕੋ ਕੁਦ੍ਰੂਸਕੋ’’ਤਿ (ਪਾਚਿ. ੮੨੨). ਕੋਟ੍ਟੇਤ੍ਵਾਤਿ ਮੁਸਲੇਹਿ ਕੋਟ੍ਟੇਤ੍ਵਾ. ਯਦਿ ਪਰਿਭੁਞ੍ਜਤੀਤਿ ਯੋਜਨਾ.

੨੧੫੮-੬੦. ‘‘ਭੁਞ੍ਜਿਸ੍ਸਾਮੀਤਿ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਇਦਂ ਪਯੋਗਦੁਕ੍ਕਟਂ ਨਾਮ, ਤਸ੍ਮਾ ਨ ਕੇਵਲਂ ਪਟਿਗ੍ਗਹਣੇਯੇਵ ਦੁਕ੍ਕਟਂ ਹੋਤੀ’’ਤਿਆਦਿਨਾ (ਪਾਚਿ. ਅਟ੍ਠ. ੮੨੨) ਅਟ੍ਠਕਥਾਗਤਂ ਵਿਭਾਗਂ ਦਸ੍ਸੇਤੁਮਾਹ ‘‘ਨ ਕੇਵਲਂ ਤੁ ਧਞ੍ਞਾਨ’’ਨ੍ਤਿਆਦਿ. ਪਨਾਤਿ ਅਪਿ-ਸਦ੍ਦਤ੍ਥੇ, ਸੁਕ੍ਖਾਪਨੇਪੀਤਿ ਅਤ੍ਥੋ. ਭਜ੍ਜਨਤ੍ਥਾਯਾਤਿ ਏਤ੍ਥ ‘‘ਵਦ੍ਦਲਿਦਿਵਸੇ’’ਤਿ ਸੇਸੋ. ‘‘ਕਪਲ੍ਲਸਜ੍ਜਨੇ ਉਦ੍ਧਨਸਜ੍ਜਨੇ’’ਤਿ ਪਚ੍ਚੇਕਂ ਯੋਜੇਤਬ੍ਬਂ. ਦਬ੍ਬਿਸਜ੍ਜਨੇਤਿ ਕਟਚ੍ਛੁਸਮ੍ਪਾਦਨੇ. ਤਤ੍ਥ ਕਪਲ੍ਲਕੇ ਧਞ੍ਞਪਕ੍ਖਿਪਨੇਤਿ ਯੋਜਨਾ. ‘‘ਘਟ੍ਟਨਕੋਟ੍ਟਨੇ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ਨ-ਕਾਰਲੋਪਂ ਕਤ੍ਵਾ ‘‘ਘਟ੍ਟਕੋਟ੍ਟਨੇ’’ਤਿ ਵੁਤ੍ਤਂ.

੨੧੬੧-੩. ਪਮਾਣ-ਸਦ੍ਦਸ੍ਸ ¶ ਆਵਤ੍ਤਲਿਙ੍ਗਸਙ੍ਖ੍ਯਤ੍ਤਾ ਆਹ ‘‘ਭੋਜਨਞ੍ਚੇਵ ਵਿਞ੍ਞਤ੍ਤਿਪਮਾਣ’’ਨ੍ਤਿ ¶ . ਆਵਤ੍ਤਲਿਙ੍ਗਸਙ੍ਖ੍ਯਤ੍ਤਂ ਨਾਮ ਨਿਯਤਲਿਙ੍ਗੇਕਤ੍ਤਬਹੁਤ੍ਤਂ. ਤਥਾ ਹੇਤ੍ਥ ਪਮਾਣ-ਸਦ੍ਦੋ ਨਿਯਤਨਪੁਂਸਕਲਿਙ੍ਗੇ ਨਿਯਤੇਕਤ੍ਤਂ ਵੁਚ੍ਚਤਿ. ਏਤ੍ਥ ਇਮਸ੍ਮਿਂ ਸਿਕ੍ਖਾਪਦੇ ਭੋਜਨਞ੍ਚੇਵ ਵਿਞ੍ਞਤ੍ਤਿ ਚਾਤਿ ਇਦਂ ਦ੍ਵਯਂ ਹਿ ਯਸ੍ਮਾ ਪਮਾਣਂ, ਤਸ੍ਮਾ ਸਯਂ ਵਿਞ੍ਞਤ੍ਵਾ ਵਾ ਅਞ੍ਞਤੋ ਭਜ੍ਜਨਾਦੀਨਿ ਕਾਰਾਪੇਤ੍ਵਾ ਵਾ ਅਞ੍ਞਾਯ ਪਨ ਵਿਞ੍ਞਾਪੇਤ੍ਵਾ ਸਯਂ ਭਜ੍ਜਨਾਦੀਨਿ ਕਤ੍ਵਾ ਵਾ ਯਾ ਪਨ ਭਿਕ੍ਖੁਨੀ ਅਜ੍ਝੋਹਰਤਿ, ਤਸ੍ਸਾ ਅਜ੍ਝੋਹਾਰਪਯੋਗੇਸੁ ਪਾਚਿਤ੍ਤਿਯੋ ਸਿਯੁਨ੍ਤਿ ਯੋਜਨਾ.

ਮਹਾਪਚ੍ਚਰਿਯਂ (ਪਾਚਿ. ਅਟ੍ਠ. ੮੨੩) ਵੁਤ੍ਤਂ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਮਾਤਰਂ ਵਾ’’ਤਿਆਦਿ. ਮਾਤਰਂ ਵਾਪਿ ਯਾਚਿਤ੍ਵਾਤਿ ਏਤ੍ਥ ਵਾ-ਸਦ੍ਦੋ ਅਤ੍ਥਨ੍ਤਰਵਿਕਪ੍ਪਨੇ. ਪਿ-ਸਦ੍ਦੋ ਸਮ੍ਭਾਵਨੇ. ਮਾਤਰਂ ਵਾ ਪਿਤਰਂ ਵਾ ਅਞ੍ਞਂ ਵਾ ਞਾਤਕਂ ਵਾ ਪਵਾਰਿਤਂ ਵਾ ਆਮਕਧਞ੍ਞਂ ਯਾਚਿਤ੍ਵਾ ਵਾ ਅਞ੍ਞਾਯ ਕਾਰਾਪੇਤ੍ਵਾ ਵਾ ਯਾ ਪਰਿਭੁਞ੍ਜਤਿ, ਤਸ੍ਸਾ ਪਾਚਿਤ੍ਤੀਤਿ ਯੋਜਨਾ.

੨੧੬੪. ਅਵਿਞ੍ਞਤ੍ਤਿਯਾ ਲਦ੍ਧਂ ਸਯਂ ਵਾ ਭਜ੍ਜਨਾਦੀਨਿ ਕਤ੍ਵਾ ਵਾ ਅਞ੍ਞਾਯ ਕਾਰਾਪੇਤ੍ਵਾ ਵਾ ਯਾ ਪਰਿਭੁਞ੍ਜਤਿ, ਤਸ੍ਸਾ ਦੁਕ੍ਕਟਨ੍ਤਿ ਯੋਜਨਾ.

੨੧੬੫. ਅਞ੍ਞਾਯ ਪਨ ਵਿਞ੍ਞਤ੍ਤਿਯਾ ਲਦ੍ਧਂ ਤਾਯ ਕਾਰਾਪੇਤ੍ਵਾਪਿ ਸਯਂ ਕਤ੍ਵਾ ਵਾ ਅਜ੍ਝੋਹਰਨ੍ਤਿਯਾ ਤਥਾ ਆਪਤ੍ਤਿ ਦੁਕ੍ਕਟਨ੍ਤਿ ਯੋਜਨਾ. ਇਦਞ੍ਚ ਮਹਾਪਚ੍ਚਰਿਯਾਗਤਨਯਂ ਗਹੇਤ੍ਵਾ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘‘ਅਞ੍ਞਾਯ ਵਿਞ੍ਞਤ੍ਤਂ ਭੁਞ੍ਜਨ੍ਤਿਯਾ ਦੁਕ੍ਕਟ’’ਨ੍ਤਿ (ਪਾਚਿ. ਅਟ੍ਠ. ੮੨੨) ਵੁਤ੍ਤਤ੍ਤਾ ਵਿਞ੍ਞਤ੍ਤਿਯਾਪਿ ਅਞ੍ਞਾਯ ਲਦ੍ਧਂ ਆਮਕਂ ਧਞ੍ਞਂ ਤਾਯ ਕਾਰਾਪੇਤ੍ਵਾ ਵਾ ਸਯਂ ਕਤ੍ਵਾ ਵਾ ਪਰਿਭੁਞ੍ਜਨ੍ਤਸ੍ਸਾਪਿ ਦੁਕ੍ਕਟਮੇਵ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੨੧੬੬-੭. ਸੇਦਕਮ੍ਮਾਦਿਅਤ੍ਥਾਯਾਤਿ ¶ ਵਾਤਰੋਗਾਦਿਨਾ ਆਤੁਰਾਨਂ ਸੇਦਨਾਦਿਪਟਿਕਾਰਤ੍ਥਾਯ. ਇਧ ‘‘ਅਞ੍ਞਾਤਕਅਪ੍ਪਵਾਰਿਤਟ੍ਠਾਨੇਪੀ’’ਤਿ ਸੇਸੋ. ਭਿਕ੍ਖੂਨਮ੍ਪਿ ਏਸੇਵ ਨਯੋ. ਠਪੇਤ੍ਵਾ ਸਤ੍ਤ ਧਞ੍ਞਾਨਿ ਞਾਤਕਪਵਾਰਿਤਟ੍ਠਾਨੇ ਸੇਸਵਿਞ੍ਞਤ੍ਤਿਯਾਪਿ ਅਨਾਪਤ੍ਤੀਤਿ ਞਾਤਬ੍ਬਨ੍ਤਿ ਯੋਜਨਾ. ਸੇਸਵਿਞ੍ਞਤ੍ਤਿਯਾਤਿ ਮੁਗ੍ਗਮਾਸਅਲਾਬੁਕੁਮ੍ਭਣ੍ਡਕਾਦੀਨਂ ਵੁਤ੍ਤਧਞ੍ਞਾਵਸੇਸਾਨਂ ਵਿਞ੍ਞਤ੍ਤਿਯਾ.

ਸਾਲਿਆਦੀਨਂ ਸਤ੍ਤਨ੍ਨਂ ਧਞ੍ਞਾਨਂ ਦੁਕ੍ਕਟਸ੍ਸ ਵੁਤ੍ਤਤ੍ਤਾ, ਅਨਾਮਾਸਤ੍ਤਾ ਚ ਸਬ੍ਬੇਨ ਸਬ੍ਬਂ ਨ ਵਟ੍ਟਨ੍ਤੀਤਿ ਦਸ੍ਸੇਤੁਮਾਹ ‘‘ਞਾਤਕਾਨਮ੍ਪੀ’’ਤਿਆਦਿ.

੨੧੬੮. ਲਦ੍ਧਨ੍ਤਿ ¶ ਲਬ੍ਭਮਾਨਂ. ਨਵਕਮ੍ਮੇਸੂਤਿ ਨਵਕਮ੍ਮਤ੍ਥਾਯ, ਨਿਮਿਤ੍ਤਤ੍ਥੇ ਭੁਮ੍ਮਂ. ਏਤ੍ਥ ‘‘ਸਮ੍ਪਟਿਚ੍ਛਿਤੁ’’ਨ੍ਤਿ ਸੇਸੋ. ‘‘ਅਵਿਞ੍ਞਤ੍ਤਿਯਾ ਲਬ੍ਭਮਾਨਂ ਪਨ ਨਵਕਮ੍ਮਤ੍ਥਾਯ ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੮੨੩) ਮਹਾਪਚ੍ਚਰਿਯਂ ਵੁਤ੍ਤਂ.

ਸਤ੍ਤਮਂ.

੨੧੬੯. ਸਙ੍ਕਾਰਨ੍ਤਿ ਕਚਵਰਂ. ਵਿਘਾਸਕਂ ਵਾਤਿ ਉਚ੍ਛਿਟ੍ਠਕਮਚ੍ਛਕਣ੍ਟਕਮਂਸਟ੍ਠਿਚਲਕਮੁਖਧੋਵਨਾਦਿਕਂ ਯਂ ਕਿਞ੍ਚਿ. ਛਡ੍ਡੇਯ੍ਯ ਵਾਤਿ ਏਤ੍ਥ ‘‘ਸਯ’’ਨ੍ਤਿ ਸੇਸੋ ‘‘ਛਡ੍ਡਾਪੇਯ੍ਯ ਪਰੇਹੀ’’ਤਿ ਵਕ੍ਖਮਾਨਤ੍ਤਾ. ਕੁਟ੍ਟਸ੍ਸ ਤਿਰੋ ਤਿਰੋਕੁਟ੍ਟਂ, ਤਸ੍ਮਿਂ, ਕੁਟ੍ਟਸ੍ਸ ਪਰਭਾਗੇਤਿ ਅਤ੍ਥੋ. ‘‘ਪਾਕਾਰੇਪਿ ਅਯਂ ਨਯੋ’’ਤਿ ਵਕ੍ਖਮਾਨਤ੍ਤਾ ਕੁਟ੍ਟਨ੍ਤਿ ਵਾ ਬ੍ਯਤਿਰਿਤ੍ਤਾ ਭਿਤ੍ਤਿ ਗਹੇਤਬ੍ਬਾ.

੨੧੭੧. ਏਕਾਤਿ ਏਤ੍ਥ ਆਪਤ੍ਤੀਤਿ ਸੇਸੋ. ‘‘ਤਸ੍ਸਾ’’ਤਿ ਇਮਿਨਾ ਸਮ੍ਬਨ੍ਧੋ.

੨੧੭੨. ਛਡ੍ਡਨੇਤਿ ਏਤ੍ਥ ਪਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਦਨ੍ਤਕਟ੍ਠਸ੍ਸ ਛਡ੍ਡਨੇਪਿ ਭਿਕ੍ਖੁਨਿਯਾ ਪਾਚਿਤ੍ਤਿ ਪਰਿਦੀਪਿਤਾਤਿ ਯੋਜਨਾ.

੨੧੭੩-੪. ਸਬ੍ਬਤ੍ਥਾਤਿ ¶ ਵੁਤ੍ਤਪ੍ਪਕਾਰੇਸੁ ਸਬ੍ਬੇਸੁ ਵਿਕਪ੍ਪੇਸੁ. ਅਨਾਪਤ੍ਤਿਵਿਸਯਂ ਦਸ੍ਸੇਤੁਮਾਹ ‘‘ਅਵਲਞ੍ਜੇਪੀ’’ਤਿਆਦਿ. ਅਵਲਞ੍ਜੇ ਠਾਨੇ ਅਨੋਲੋਕੇਤ੍ਵਾ ਛਡ੍ਡੇਨ੍ਤਿਯਾਪਿ ਵਾ ਵਲਞ੍ਜੇ ਠਾਨੇ ਓਲੋਕੇਤ੍ਵਾਪਿ ਵਾ ਪਨ ਛਡ੍ਡੇਨ੍ਤਿਯਾ ਅਨਾਪਤ੍ਤੀਤਿ ਯੋਜਨਾ. ਛਡ੍ਡਨਂ ਕ੍ਰਿਯਂ. ਅਨੋਲੋਕਨਂ ਅਕ੍ਰਿਯਂ.

ਅਟ੍ਠਮਂ.

੨੧੭੫-੬. ਯਾ ਪਨ ਭਿਕ੍ਖੁਨੀ ਖੇਤ੍ਤੇ ਵਾ ਨਾਲ਼ਿਕੇਰਾਦਿਆਰਾਮੇ ਵਾ ਯਤ੍ਥ ਕਤ੍ਥਚਿ ਰੋਪਿਮੇ ਹਰਿਤਟ੍ਠਾਨੇ ਤਾਨਿ ਵਿਘਾਸੁਚ੍ਚਾਰਸਙ੍ਕਾਰਮੁਤ੍ਤਸਙ੍ਖਾਤਾਨਿ ਚਤ੍ਤਾਰਿ ਵਤ੍ਥੂਨਿ ਸਚੇ ਸਯਂ ਛਡ੍ਡੇਤਿ ਵਾ, ਤਥਾ ਪਰੇ ਛਡ੍ਡਾਪੇਤਿ ਵਾ, ਤਸ੍ਸਾ ਭਿਕ੍ਖੁਨਿਯਾ ਆਪਤ੍ਤਿਵਿਨਿਚ੍ਛਯੋ ਵੁਤ੍ਤਨਯੋ ‘‘ਏਕੇਕ’’ਮਿਚ੍ਚਾਦਿਨਾ ਯਥਾਵੁਤ੍ਤਪਕਾਰੋਤਿ ਯੋਜਨਾ.

੨੧੭੭-੮. ਯਾ ਪਨ ਭਿਕ੍ਖੁਨੀ ਹਰਿਤੇ ਖੇਤ੍ਤੇ ਨਿਸੀਦਿਤ੍ਵਾ ਭੁਞ੍ਜਮਾਨਾ ਵਾ ਤਥਾ ਹਰਿਤੇ ਤਤ੍ਥ ¶ ਖੇਤ੍ਤੇ ਉਚ੍ਛੁਆਦੀਨਿ ਖਾਦਨ੍ਤਿ ਖਾਦਮਾਨਾ ਗਚ੍ਛਨ੍ਤੀ ਵਾ ਯਦਿ ਉਚ੍ਛਿਟ੍ਠਂ ਉਦਕਂ ਵਾ ਚਲਕਾਦਿਂ ਵਾ ਛਡ੍ਡੇਤਿ, ਤਸ੍ਸਾ ਪਾਚਿਤ੍ਤਿਯਂ ਹੋਤੀਤਿ ਯੋਜਨਾ. ਚਲਕਂ ਨਾਮ ਵਮਿਕਰਂ.

੨੧੭੯. ਤਾਦਿਸੇ ਹਰਿਤੇ ਠਾਨੇ ਅਨ੍ਤਮਸੋ ਮਤ੍ਥਕਛਿਨ੍ਨਂ ਨਾਲ਼ਿਕੇਰਮ੍ਪਿ ਜਲਂ ਪਿਵਿਤ੍ਵਾ ਛਡ੍ਡੇਨ੍ਤਿਯਾ ਆਪਤ੍ਤਿ ਸਿਯਾਤਿ ਯੋਜਨਾ.

੨੧੮੦. ਸਬ੍ਬੇਸਨ੍ਤਿ ਭਿਕ੍ਖੁਭਿਕ੍ਖੁਨੀਨਂ.

੨੧੮੧. ਲਾਯਿਤਮ੍ਪਿ ਖੇਤ੍ਤਂ ਪੁਨ ਰੋਹਣਤ੍ਥਾਯ ਮਨੁਸ੍ਸਾ ਰਕ੍ਖਨ੍ਤਿ ਚੇ, ਤਤ੍ਥ ਤਸ੍ਮਿਂ ਖੇਤ੍ਤੇ ਵਿਘਾਸੁਚ੍ਚਾਰਾਦੀਨਿ ਛਡ੍ਡੇਨ੍ਤਿਯਾ ਅਸ੍ਸਾ ਭਿਕ੍ਖੁਨਿਯਾ ਯਥਾਵਤ੍ਥੁਕਮੇਵ ਹਿ ਪਾਚਿਤ੍ਤਿਯਮੇਵਾਤਿ ¶ ਯੋਜਨਾ. ‘‘ਅਸ੍ਸਾ ਯਥਾਵਤ੍ਥੁਕ’’ਨ੍ਤਿ ਇਮਿਨਾ ਭਿਕ੍ਖੁਸ੍ਸ ਦੁਕ੍ਕਟਨ੍ਤਿ ਵੁਤ੍ਤਮੇਵ ਹੋਤਿ.

੨੧੮੨. ਛਡ੍ਡਿਤੇ ਖੇਤ੍ਤੇਤਿ ਮਨੁਸ੍ਸੇਹਿ ਉਦ੍ਧਟਸਸ੍ਸੇ ਖੇਤ੍ਤੇ. ਯਥਾਹ – ‘‘ਮਨੁਸ੍ਸੇਸੁ ਸਸ੍ਸਂ ਉਦ੍ਧਰਿਤ੍ਵਾ ਗਤੇਸੁ ਛਡ੍ਡਿਤਖੇਤ੍ਤਂ ਨਾਮ ਹੋਤਿ, ਤਤ੍ਥ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੮੩੦). ਏਵਂ ਅਕਤੇਪਿ ਖੇਤ੍ਤੇ ਸਾਮਿਕੇ ਆਪੁਚ੍ਛਿਤ੍ਵਾ ਕਾਤੁਂ ਵਟ੍ਟਤਿ. ਯਥਾਹ ‘‘ਸਾਮਿਕੇ ਅਪਲੋਕੇਤ੍ਵਾ ਛਡ੍ਡੇਤੀ’’ਤਿ (ਪਾਚਿ. ੮੩੨). ਇਧ ਖੇਤ੍ਤਪਾਲਕਾ, ਆਰਾਮਾਦਿਗੋਪਕਾ ਚ ਸਾਮਿਕਾ ਏਵ. ਸਙ੍ਘਸ੍ਸ ਖੇਤ੍ਤੇ, ਆਰਾਮੇ ਚ ਸਚੇ ‘‘ਤਤ੍ਥ ਕਚਵਰਂ ਨ ਛਡ੍ਡੇਤਬ੍ਬ’’ਨ੍ਤਿ ਕਤਿਕਾ ਨਤ੍ਥਿ, ਭਿਕ੍ਖੁਸ੍ਸ ਛਡ੍ਡੇਤੁਂ ਵਟ੍ਟਤਿ ਸਙ੍ਘਪਰਿਯਾਪਨ੍ਨਤ੍ਤਾ, ਨ ਭਿਕ੍ਖੁਨੀਨਂ. ਤਾਸਂ ਪਨ ਭਿਕ੍ਖੁਸਙ੍ਘੇ ਵੁਤ੍ਤਨਯੇਨ ਨ ਵਟ੍ਟਤਿ, ਨ ਤਸ੍ਸ ਭਿਕ੍ਖੁਸ੍ਸ, ਏਵਂ ਸਨ੍ਤੇਪਿ ਸਾਰੁਪ੍ਪਵਸੇਨ ਕਾਤਬ੍ਬਨ੍ਤਿ. ਸਬ੍ਬਨ੍ਤਿ ਉਚ੍ਚਾਰਾਦਿ ਚਤੁਬ੍ਬਿਧਂ.

ਨਵਮਂ.

੨੧੮੩. ਏਤ੍ਥ ‘‘ਨਚ੍ਚਂ ਨਾਮ ਯਂ ਕਿਞ੍ਚਿ ਨਚ੍ਚਂ. ਗੀਤਂ ਨਾਮ ਯਂ ਕਿਞ੍ਚਿ ਗੀਤਂ. ਵਾਦਿਤਂ ਨਾਮ ਯਂ ਕਿਞ੍ਚਿ ਵਾਦਿਤ’’ਨ੍ਤਿ (ਪਾਚਿ. ੮੩੫) ਵਚਨਤੋ ‘‘ਯਂ ਕਿਞ੍ਚੀ’’ਤਿ ਸੇਸੋ. ਯਾ ਪਨ ਭਿਕ੍ਖੁਨੀ ਯਂ ਕਿਞ੍ਚਿ ਨਚ੍ਚਂ ਵਾ ਯਂ ਕਿਞ੍ਚਿ ਗੀਤਂ ਵਾ ਯਂ ਕਿਞ੍ਚਿ ਵਾਦਿਤਂ ਵਾ ਦਸ੍ਸਨਤ੍ਥਾਯ ਗਚ੍ਛੇਯ੍ਯਾਤਿ ਯੋਜਨਾ. ਤਤ੍ਥ ਯਂ ਕਿਞ੍ਚਿ ਨਚ੍ਚਨ੍ਤਿ ਨਟਾਦਯੋ ਵਾ ਨਚ੍ਚਨ੍ਤੁ ਸੋਣ੍ਡਾ ਵਾ, ਅਨ੍ਤਮਸੋ ਮੋਰਸੁਕਮਕ੍ਕਟਾਦਯੋਪਿ, ਸਬ੍ਬਮ੍ਪੇਤਂ ਨਚ੍ਚਮੇਵ. ਯਂ ਕਿਞ੍ਚਿ ਗੀਤਨ੍ਤਿ ਨਟਾਦੀਨਂ ਵਾ ਗੀਤਂ ਹੋਤੁ ਅਰਿਯਾਨਂ ਪਰਿਨਿਬ੍ਬਾਨਕਾਲੇ ਰਤਨਤ੍ਤਯਗੁਣੂਪਸਂਹਿਤਂ ਸਾਧੁਕੀਲ਼ਿਤਗੀਤਂ ਵਾ ਅਸਞ੍ਞਤਭਿਕ੍ਖੂਨਂ ¶ ਧਮ੍ਮਭਾਣਕਗੀਤਂ ਵਾ, ਸਬ੍ਬਮ੍ਪੇਤਂ ਗੀਤਮੇਵ. ਯਂ ਕਿਞ੍ਚਿ ਵਾਦਿਤਨ੍ਤਿ ਘਨਾਦਿਵਾਦਨੀਯਭਣ੍ਡਵਾਦਿਤਂ ਵਾ ਹੋਤੁ ਕੁਟਭੇਰਿਵਾਦਿਤਂ ਵਾ ਅਨ੍ਤਮਸੋ ਉਦਰਭੇਰਿਵਾਦਿਤਮ੍ਪਿ ¶ , ਸਬ੍ਬਮ੍ਪੇਤਂ ਵਾਦਿਤਮੇਵ. ‘‘ਦਸ੍ਸਨਸਵਨਤ੍ਥਾਯਾ’’ਤਿ ਵਤ੍ਤਬ੍ਬੇ ਵਿਰੂਪੇਕਸੇਸਨਯੇਨ ‘‘ਦਸ੍ਸਨਤ੍ਥਾਯਾ’’ਤਿ ਵੁਤ੍ਤਂ. ਪਞ੍ਚਨ੍ਨਂ ਵਿਞ੍ਞਾਣਾਨਂ ਯਥਾਸਕਂ ਵਿਸਯਸ੍ਸ ਆਲੋਚਨਸਭਾਵਤਾਯ ਵਾ ‘‘ਦਸ੍ਸਨਤ੍ਥਾਯ’’ ਇਚ੍ਚੇਵ ਵੁਤ੍ਤਂ.

੨੧੮੪. ਪੁਬ੍ਬਪਯੋਗਦੁਕ੍ਕਟੇਨ ਸਹ ਪਾਚਿਤ੍ਤਿਯਂ ਦਸ੍ਸੇਤੁਮਾਹ ‘‘ਦਸ੍ਸਨਤ੍ਥਾਯ ਨਚ੍ਚਸ੍ਸਾ’’ਤਿਆਦਿ. ਗੀਤਸ੍ਸਾਤਿ ਏਤ੍ਥ ‘‘ਵਾਦਿਤਸ੍ਸਾ’’ਤਿ ਪਕਰਣਤੋ ਲਬ੍ਭਤਿ.

੨੧੮੫. ਏਕਪਯੋਗੇਨਾਤਿ ਏਕਦਿਸਾਵਲੋਕਨਪਯੋਗੇਨ. ਤੇਨੇਵ ਵਕ੍ਖਤਿ ‘‘ਅਞ੍ਞਸ੍ਮਿਮ੍ਪਿ…ਪੇ… ਸਿਯੁ’’ਨ੍ਤਿ. ਪਸ੍ਸਤੀਤਿ ਏਤ੍ਥ ‘‘ਨਚ੍ਚ’’ਨ੍ਤਿ ਸੇਸੋ. ਤੇਸਨ੍ਤਿ ਯੇਸਂ ਨਚ੍ਚਂ ਪਸ੍ਸਤਿ. ਪਿ-ਸਦ੍ਦੇਨ ਵਾਦਿਤਮ੍ਪਿ ਸਮ੍ਪਿਣ੍ਡੇਤਿ. ਯਥਾਹ ‘‘ਤੇਸਂਯੇਵ ਗੀਤਵਾਦਿਤਂ ਸੁਣਾਤਿ, ਏਕਮੇਵ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ਅਟ੍ਠ. ੮੩੬).

੨੧੮੬. ਅਞ੍ਞਤੋਤਿ ਅਞ੍ਞਸ੍ਮਿਂ ਦਿਸਾਭਾਗੇ.

੨੧੮੭. ‘‘ਵਿਸੁਂ ਪਾਚਿਤ੍ਤਿਯੋ ਸਿਯੁ’’ਨ੍ਤਿ ਇਦਮੇਵ ਪਕਾਸੇਤੁਮਾਹ ‘‘ਪਯੋਗਗਣਨਾਯੇਤ੍ਥ, ਆਪਤ੍ਤਿਗਣਨਾ ਸਿਯਾ’’ਤਿ. ਏਤ੍ਥਾਤਿ ਇਮਸ੍ਮਿਂ ਨਾਨਾਦਿਸਾਭਾਗੇ. ਨਚ੍ਚਗੀਤਵਾਦਿਤਾਨਂ ਦਸ੍ਸਨਸਵਨੇ ਅਟ੍ਠਕਥਾਗਤਂ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਨਚ੍ਚਿਤੁ’’ਨ੍ਤਿਆਦਿ.

੨੧੮੮. ‘‘ਨਚ੍ਚ ਇਤੀ’’ਤਿ ਪਦਚ੍ਛੇਦੋ, ‘‘ਨਚ੍ਚਾਹੀ’’ਤਿਪਿ ਪਾਠੋ. ਉਪਟ੍ਠਾਨਨ੍ਤਿ ਭੇਰਿਸਦ੍ਦਪੂਜਂ. ਸਮ੍ਪਟਿਚ੍ਛਿਤੁਨ੍ਤਿ ‘‘ਸਾਧੂ’’ਤਿ ਅਧਿਵਾਸੇਤੁਂ. ਇਮਸ੍ਸ ਉਪਲਕ੍ਖਣਵਸੇਨ ਵੁਤ੍ਤਤ੍ਤਾ ਨਚ੍ਚਗੀਤੇਪਿ ਏਸੇਵ ਨਯੋ.

੨੧੮੯-੯੦. ਸਬ੍ਬਤ੍ਥਾਤਿ ਨਚ੍ਚਨਾਦੀਸੁ ਸਬ੍ਬਤ੍ਥ. ਉਪਟ੍ਠਾਨਂ ਕਰੋਮਾਤਿ ਤੁਮ੍ਹਾਕਂ ਚੇਤਿਯਸ੍ਸ ਨਚ੍ਚਾਦੀਹਿ ਉਪਹਾਰਂ ਕਰੋਮਾਤਿ. ਉਪਟ੍ਠਾਨਂ ਪਸਤ੍ਥਨ੍ਤਿ ਉਪਟ੍ਠਾਨਕਰਣਂ ਨਾਮ ਸੁਨ੍ਦਰਨ੍ਤਿ.

ਯਾ ¶ ਆਰਾਮੇਯੇਵ ਚ ਠਤ੍ਵਾ ਪਸ੍ਸਤਿ ਵਾ ਸੁਣਾਤਿ ਵਾਤਿ ਯੋਜਨਾ, ਇਧ ‘‘ਅਨ੍ਤਰਾਰਾਮੇ ਵਾ’’ਤਿਆਦਿ ¶ ਸੇਸੋ. ‘‘ਆਰਾਮੇ ਠਤ੍ਵਾ ਅਨ੍ਤਰਾਰਾਮੇ ਵਾ ਬਹਿਆਰਾਮੇ ਵਾ ਨਚ੍ਚਾਦੀਨਿ ਪਸ੍ਸਤਿ ਵਾ ਸੁਣਾਤਿ ਵਾ, ਅਨਾਪਤ੍ਤੀ’’ਤਿ (ਪਾਚਿ. ਅਟ੍ਠ. ੮੩੭) ਅਟ੍ਠਕਥਾਯ ਵੁਤ੍ਤਂ. ‘‘ਠਤ੍ਵਾ’’ਤਿ ਵੁਤ੍ਤੇਪਿ ਸਬ੍ਬੇਸੁਪਿ ਇਰਿਯਾਪਥੇਸੁ ਲਬ੍ਭਤਿ. ਆਰਾਮੇ ਠਤ੍ਵਾਤਿ ਨ ਕੇਵਲਂ ਠਤ੍ਵਾਵ, ਤਤੋ ਗਨ੍ਤ੍ਵਾਪਿ ਸਬ੍ਬਿਰਿਯਾਪਥੇਹਿਪਿ ਲਭਤਿ. ‘‘ਆਰਾਮੇ ਠਿਤਾ’’ਤਿ (ਪਾਚਿ. ੮੩੭) ਪਨ ਆਰਾਮਪਰਿਯਾਪਨ੍ਨਦਸ੍ਸਨਤ੍ਥਂ ਵੁਤ੍ਤਂ. ਇਤਰਥਾ ਨਿਸਿਨ੍ਨਾਪਿ ਨ ਲਭੇਯ੍ਯਾਤਿ ਗਣ੍ਠਿਪਦਾਦੀਸੁ ਵੁਤ੍ਤਂ. ਭਿਕ੍ਖੂਨਮ੍ਪਿ ਏਸੇਵ ਨਯੋ.

੨੧੯੧. ਯਾ ਅਤ੍ਤਨੋ ਠਿਤੋਕਾਸਂ ਆਗਨ੍ਤ੍ਵਾ ਪਯੋਜਿਤਂ ਪਸ੍ਸਤਿ ਵਾ ਸੁਣਾਤਿ ਵਾਤਿ ਯੋਜਨਾ. ਠਿਤੋਕਾਸਨ੍ਤਿ ਏਤ੍ਥ ਗਤਿਨਿਵਤ੍ਤਿਸਾਮਞ੍ਞੇਨ ਸਯਿਤਨਿਸਿਨ੍ਨਮ੍ਪਿ ਗਯ੍ਹਤਿ. ਤਥਾਰੂਪਾ ਹਿ ਕਾਰਣਾ ਗਨ੍ਤ੍ਵਾ ਪਸ੍ਸਨ੍ਤਿਯਾ ਵਾਪੀਤਿ ਯੋਜਨਾ. ਕਾਰਣਂ ਨਾਮ ਸਲਾਕਭਤ੍ਤਾਦਿਕਾਰਣਂ. ਯਥਾਹ ‘‘ਸਤਿ ਕਰਣੀਯੇਤਿ ਸਲਾਕਭਤ੍ਤਾਦੀਨਂ ਵਾ ਅਤ੍ਥਾਯ ਅਞ੍ਞੇਨ ਵਾ ਕੇਨਚਿ ਕਰਣੀਯੇਨ ਗਨ੍ਤ੍ਵਾ ਗਤਟ੍ਠਾਨੇ ਪਸ੍ਸਤਿ ਵਾ ਸੁਣਾਤਿ ਵਾ, ਅਨਾਪਤ੍ਤੀ’’ਤਿ (ਪਾਚਿ. ਅਟ੍ਠ. ੮੩੭).

੨੧੯੨. ਮਗ੍ਗਂ ਗਚ੍ਛਨ੍ਤੀ ਪਟਿਪਥੇ ਨਚ੍ਚਂ ਅਟ੍ਠਤ੍ਵਾ ਪਸ੍ਸਤੀਤਿ ਏਵਂ ਪਸ੍ਸਨ੍ਤਿਯਾਪਿ ਚ ਤਥਾ ਅਨਾਪਤ੍ਤੀਤਿ ਅਜ੍ਝਾਹਾਰਯੋਜਨਾ. ਪਟਿਪਥੇਤਿ ਗਮਨਮਗ੍ਗਾਭਿਮੁਖੇ. ਆਪਦਾਸੁਪੀਤਿ ਤਾਦਿਸੇਨ ਉਪਦ੍ਦਵੇਨ ਉਪਦ੍ਦੁਤਾ ਸਮਜ੍ਜਟ੍ਠਾਨਂ ਪਵਿਸਤਿ, ਏਵਂ ਪਵਿਸਿਤ੍ਵਾ ਪਸ੍ਸਨ੍ਤਿਯਾ ਵਾ ਸੁਣਨ੍ਤਿਯਾ ਵਾ ਅਨਾਪਤ੍ਤਿ.

੨੧੯੩. ਇਦਂ ਸਿਕ੍ਖਾਪਦਂ ਸਮੁਟ੍ਠਾਨਤੋ ਏਲ਼ਕਲੋਮਸਿਕ੍ਖਾਪਦੇਨ ਸਮਂ ਮਤਂ ‘‘ਸਮਾਨ’’ਨ੍ਤਿ ਵਿਞ੍ਞਾਤਂ.

ਦਸਮਂ.

ਲਸੁਣਵਗ੍ਗੋ ਪਠਮੋ.

੨੧੯੪-੫. ਇਧ ¶ ਇਮਸ੍ਮਿਂ ਸਾਸਨੇ ਯਾ ਪਨ ਭਿਕ੍ਖੁਨੀ ਰਤ੍ਤਨ੍ਧਕਾਰਸ੍ਮਿਂ ਅਪ੍ਪਦੀਪੇ ਪੁਰਿਸੇਨ ਸਦ੍ਧਿਂ ਏਕਿਕਾ ਸਚੇ ਸਨ੍ਤਿਟ੍ਠਤਿ, ਤਸ੍ਸਾ ਪਾਚਿਤ੍ਤਿਯਂ ਵੁਤ੍ਤਨ੍ਤਿ ਯੋਜਨਾ. ਰਤ੍ਤਨ੍ਧਕਾਰਸ੍ਮਿਨ੍ਤਿ ਰਤ੍ਤਿਯਂ. ਰਤ੍ਤਿਪਰਿਯਾਯੋ ਹਿ ਰਤ੍ਤਨ੍ਧਕਾਰ-ਸਦ੍ਦੋ. ਯਥਾਹ ਪਦਭਾਜਨੇ ‘‘ਰਤ੍ਤਨ੍ਧਕਾਰੇਤਿ ਓਗ੍ਗਤੇ ਸੂਰਿਯੇ’’ਤਿ (ਪਾਚਿ. ੮੪੦). ਅਪ੍ਪਦੀਪੇਤਿ ਪਜ੍ਜੋਤਚਨ੍ਦਸੂਰਿਯਅਗ੍ਗੀਸੁ ਏਕੇਨਾਪਿ ਅਨੋਭਾਸਿਤੇ, ਇਮਿਨਾ ¶ ਰਤ੍ਤਿਕ੍ਖੇਤ੍ਤਂ ਦਸ੍ਸੇਤਿ. ‘‘ਸਨ੍ਤਿਟ੍ਠਤੀ’’ਤਿ ਇਮਿਨਾ ਗਮਨਨਿਸਿਨ੍ਨਸਯਨਸਙ੍ਖਾਤਂ ਇਰਿਯਾਪਥਤ੍ਤਿਕਞ੍ਚ ਉਪਲਕ੍ਖਿਤਨ੍ਤਿ ਦਟ੍ਠਬ੍ਬਂ. ਵੁਤ੍ਤਞ੍ਹਿ ਵਜਿਰਬੁਦ੍ਧਿਨਾ ‘‘ਸਨ੍ਤਿਟ੍ਠੇਯ੍ਯਾਤਿ ਏਤ੍ਥ ਠਾਨਾਪਦੇਸੇਨ ਚਤੁਬ੍ਬਿਧੋਪਿ ਇਰਿਯਾਪਥੋ ਸਙ੍ਗਹਿਤੋ, ਤਸ੍ਮਾ ਪੁਰਿਸੇਨ ਸਦ੍ਧਿਂ ਚਙ੍ਕਮਨਾਦੀਨਿ ਕਰੋਨ੍ਤਿਯਾਪਿ ਪਾਚਿਤ੍ਤਿਯਞ੍ਚ ਉਪਲਬ੍ਭਤੀ’’ਤਿ (ਵਜਿਰ. ਟੀ. ਪਾਚਿਤ੍ਤਿਯ ੮੩੯ ਥੋਕਂ ਵਿਸਦਿਸਂ). ਪੁਰਿਸੇਨ ਸਦ੍ਧਿਨ੍ਤਿ ਸਨ੍ਤਿਟ੍ਠਿਤੁਂ, ਸਲ੍ਲਪਿਤੁਞ੍ਚ ਵਿਞ੍ਞੁਨਾ ਮਨੁਸ੍ਸਪੁਰਿਸੇਨ ਸਦ੍ਧਿਂ.

ਰਹਸ੍ਸਾਦਵਸੇਨ ਪੁਰਿਸਸ੍ਸ ਹਤ੍ਥਪਾਸਂ ਸਮਾਗਨ੍ਤ੍ਵਾ ਤੇਨ ਸਦ੍ਧਿਂ ਸਲ੍ਲਪਨ੍ਤਿਯਾ ਵਾ ਪਾਚਿਤ੍ਤਿਯਂ ਵੁਤ੍ਤਨ੍ਤਿ ਯੋਜਨਾ.

੨੧੯੬-੭. ਯਾ ਪਨ ਭਿਕ੍ਖੁਨੀ ਸਚੇ ਮਨੁਸ੍ਸਪੁਰਿਸਸ੍ਸ ਹਤ੍ਥਪਾਸਂ ਵਿਜਹਿਤ੍ਵਾ ਸਨ੍ਤਿਟ੍ਠਤਿ ਵਾ ਸਲ੍ਲਪਤਿ ਵਾ, ਯਕ੍ਖਪੇਤਤਿਰਚ੍ਛਾਨਗਤਾਨਂ ਹਤ੍ਥਪਾਸਂ ਅਵਿਜਹਿਤ੍ਵਾ ਸਨ੍ਤਿਟ੍ਠਤਿ ਵਾ ਸਲ੍ਲਪਤਿ ਵਾ, ਤਸ੍ਸਾ ਦੁਕ੍ਕਟਂ ਪਰਿਦੀਪਿਤਨ੍ਤਿ ਯੋਜਨਾ.

ਵਿਞ੍ਞੁਗ੍ਗਹਣੇਨ ਅਵਿਞ੍ਞੂ ਪੁਰਿਸੋ ਅਨਾਪਤ੍ਤਿਂ ਨ ਕਰੋਤੀਤਿ ਦੀਪੇਤਿ.

੨੧੯੮. ਅਞ੍ਞਵਿਹਿਤਾਯਾਤਿ ਰਹੋਅਸ੍ਸਾਦਤੋ ਅਞ੍ਞਂ ਚਿਨ੍ਤੇਨ੍ਤਿਯਾ. ਯਥਾਹ ‘‘ਰਹੋਅਸ੍ਸਾਦਤੋ ਅਞ੍ਞਵਿਹਿਤਾਵ ਹੁਤ੍ਵਾ’’ਤਿ (ਪਾਚਿ. ਅਟ੍ਠ. ੮੪੧). ਚਤੁਤ੍ਥੇਨ, ਛਟ੍ਠੇਨ ਚ ਸਮੁਟ੍ਠਾਨੇਨ ਸਮੁਟ੍ਠਾਨਤੋ ¶ ਥੇਯ੍ਯਸਤ੍ਥਸਮੁਟ੍ਠਾਨਂ. ਸਨ੍ਤਿਟ੍ਠਨਸਲ੍ਲਪਨਵਸੇਨ ਕ੍ਰਿਯਂ. ਸਞ੍ਞਾਯ ਵਿਮੋਕ੍ਖੋ ਏਤਸ੍ਮਿਨ੍ਤਿ ਸਞ੍ਞਾਵਿਮੋਕ੍ਖਕਂ.

ਪਠਮਂ.

੨੧੯੯. ਪਟਿਚ੍ਛਨ੍ਨੇ ਓਕਾਸੇਤਿ ਕੁਟ੍ਟਾਦੀਸੁ ਯੇਨ ਕੇਨਚਿ ਪਟਿਚ੍ਛਨ੍ਨੇ ਓਕਾਸੇ. ਇਦਂ ਵਚਨਂ.

ਦੁਤਿਯਂ.

੨੨੦੦. ਤਤਿਯੇ ‘‘ਅਜ੍ਝੋਕਾਸੇ’’ਤਿ ਚ ਚਤੁਤ੍ਥੇ ‘‘ਰਥਿਕਾਯ, ਬ੍ਯੂਹੇ, ਸਿਙ੍ਘਾਟਕੇ’’ਤਿ ਪਦਾਨਿ ਚ ਵਜ੍ਜੇਤ੍ਵਾ ਅਵਸੇਸਂ ਸਨ੍ਧਾਯਾਹ ‘‘ਅਪੁਬ੍ਬਂ ਨਤ੍ਥਿ ਕਿਞ੍ਚਿਪੀ’’ਤਿ. ਏਤ੍ਥ ‘‘ਵਤ੍ਤਬ੍ਬ’’ਨ੍ਤਿ ਸੇਸੋ. ਏਤ੍ਥ ¶ ਚ ਰਥਿਕਾਯਾਤਿ ਰਚ੍ਛਾਯ. ਬ੍ਯੂਹੇਤਿ ਅਨਿਬ੍ਬਿਦ੍ਧਰਚ੍ਛਾਯ. ਸਿਙ੍ਘਾਟਕੇਤਿ ਚਚ੍ਚਰੇ ਓਕਾਸੇ, ਤਿਕੋਣਂ ਵਾ ਚਤੁਕੋਣਂ ਵਾ ਮਗ੍ਗਸਮੋਧਾਨਟ੍ਠਾਨੇਤਿ ਵੁਤ੍ਤਂ ਹੋਤਿ.

ਤਤਿਯਚਤੁਤ੍ਥਾਨਿ.

੨੨੦੧-੨. ‘‘ਯਾ ਪਨ ਭਿਕ੍ਖੁਨੀ ਪੁਰੇਭਤ੍ਤਂ ਕੁਲਾਨਿ ਉਪਸਙ੍ਕਮਿਤ੍ਵਾ ਆਸਨੇ ਨਿਸੀਦਿਤ੍ਵਾ ਸਾਮਿਕੇ ਅਨਾਪੁਚ੍ਛਾ ਪਕ੍ਕਮੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੮੫੫) ਵਚਨਤੋ ਯਾ ਪਨ ਭਿਕ੍ਖੁਨੀ ਪੁਰੇਭਤ੍ਤਂ ਕੁਲਾਨਿ ਉਪਸਙ੍ਕਮਿਤ੍ਵਾ ਛਦਨਨ੍ਤੋ ਆਸਨੇ ਨਿਸੀਦਿਤ੍ਵਾ ਸਾਮਿਕੇ ਅਨਾਪੁਚ੍ਛਾ ਅਨੋਵਸ੍ਸਕਪ੍ਪਦੇਸਂ ਅਤਿਕ੍ਕਮੇਤਿ, ਯਾ ਚ ਅਜ੍ਝੋਕਾਸੇ ਵਾ ਨਿਸੀਦਿਤ੍ਵਾ ਸਚੇ ਉਪਚਾਰਂ ਅਤਿਕ੍ਕਮੇਤਿ, ਤਸ੍ਸਾ ਪਠਮੇ ਪਦੇ ਦੁਕ੍ਕਟਂ ਹੋਤਿ, ਦੁਤਿਯੇ ਪਦੇ ਪਾਚਿਤ੍ਤਿ ਪਰਿਯਾਪੁਤਾਤਿ ਯੋਜਨਾ. ‘‘ਆਸਨੇ’’ਤਿ ਇਮਿਨਾ ਪਲ੍ਲਙ੍ਕਮਾਭੁਜਿਤ੍ਵਾ ਨਿਸੀਦਨਾਰਹਮਾਸਨਂ ਅਧਿਪ੍ਪੇਤਂ. ਯਥਾਹ – ‘‘ਆਸਨਂ ਨਾਮ ਪਲ੍ਲਙ੍ਕਸ੍ਸ ਓਕਾਸੋ ਵੁਚ੍ਚਤੀ’’ਤਿ (ਪਾਚਿ. ੮੫੬). ਅਨੋਵਸ੍ਸਪ੍ਪਦੇਸਨ੍ਤਿ ਨਿਬ੍ਬਕੋਸਬ੍ਭਨ੍ਤਰਂ. ਅਬ੍ਭੋਕਾਸੇ ਆਪਤ੍ਤਿਖੇਤ੍ਤਂ ਦਸ੍ਸੇਤੁਮਾਹ ‘‘ਉਪਚਾਰਮ੍ਪਿ ਵਾ ਸਚੇ’’ਤਿ. ਉਪਚਾਰਨ੍ਤਿ ਦ੍ਵਾਦਸਹਤ੍ਥਪ੍ਪਮਾਣਂ ¶ ਪਦੇਸਂ. ਯਥਾਹ ਗਣ੍ਠਿਪਦੇ ‘‘ਉਪਚਾਰੋ ਦ੍ਵਾਦਸਹਤ੍ਥੋ’’ਤਿ.

੨੨੦੩. ‘‘ਤਥਾ’’ਤਿ ਇਮਿਨਾ ‘‘ਦੁਕ੍ਕਟਂ ਸਮੁਦੀਰਿਤ’’ਨ੍ਤਿ ਇਦਂ ਪਚ੍ਚਾਮਸਤਿ. ਆਪੁਟ੍ਠੇ ਅਨਾਪੁਟ੍ਠਸਞ੍ਞਾਯ ਆਪੁਟ੍ਠੇ ਵਿਚਿਕਿਚ੍ਛਤੋ ਪਕ੍ਕਮਨ੍ਤਿਯਾ ਤਥਾ ਦੁਕ੍ਕਟਨ੍ਤਿ ਯੋਜਨਾ. ਏਤ੍ਥ ਚ ‘‘ਭਿਕ੍ਖੁਨਿਯਾ’’ਤਿ ਸਮ੍ਬਨ੍ਧਿਨਿਯਾ ਸਮਾਨਤ੍ਤਾ ‘‘ਵਿਚਿਕਿਚ੍ਛਨ੍ਤਿਯਾ’’ਤਿ ਵਤ੍ਤਬ੍ਬੇ ਲਿਙ੍ਗਵਿਪਲ੍ਲਾਸਵਸੇਨ ‘‘ਵਿਚਿਕਿਚ੍ਛਤੋ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ.

੨੨੦੪. ਗਿਲਾਨਾਯਾਤਿ ਯਾ ਤਾਦਿਸੇਨ ਗੇਲਞ੍ਞੇਨ ਆਪੁਚ੍ਛਿਤੁਂ ਨ ਸਕ੍ਕੋਤਿ. ਆਪਦਾਸੂਤਿ ਘਰੇ ਅਗ੍ਗਿ ਉਟ੍ਠਿਤੋ ਹੋਤਿ ਚੋਰਾ ਵਾ, ਏਵਰੂਪੇ ਉਪਦ੍ਦਵੇ ਅਨਾਪੁਚ੍ਛਾ ਪਕ੍ਕਮਨ੍ਤਿਯਾ ਅਨਾਪਤ੍ਤਿ.

ਪਞ੍ਚਮਂ.

੨੨੦੫-੬. ‘‘ਗਚ੍ਛਨ੍ਤਿਯਾ ਵਜਨ੍ਤਿਯਾ’’ਤਿ ਚ ਨਿਸੀਦਨਨਿਪਜ੍ਜਨਾਵਸਾਨਦਸ੍ਸਨਤ੍ਥਂ ਵੁਤ੍ਤਂ. ਪਾਚਿਤ੍ਤਿਯਂ ਪਨ ਪਚ੍ਛਾਭਤ੍ਤਂ ਸਾਮਿਕੇ ‘‘ਇਧ ਨਿਸੀਦਾਮ ਵਾ ਸਯਾਮ ਵਾ’’ਤਿ ਅਨਾਪੁਚ੍ਛਿਤ੍ਵਾ ਨਿਸਿਨ੍ਨਨਿਪਨ੍ਨਪਚ੍ਚਯਾ ¶ ਹੋਤੀਤਿ ਵੇਦਿਤਬ੍ਬਂ. ਪਚ੍ਛਾਭਤ੍ਤਂ ਸਾਮਿਕੇ ਅਨਾਪੁਚ੍ਛਾ ਆਸਨੇ ਨਿਸੀਦਿਤ੍ਵਾ ਗਚ੍ਛਨ੍ਤਿਯਾ ਏਕਾ ਪਾਚਿਤ੍ਤਿ ਹੋਤੀਤਿ ਯੋਜਨਾ. ਏਸ ਨਯੋ ‘‘ਨਿਪਜ੍ਜਿਤ੍ਵਾ’’ਤਿਆਦੀਸੁਪਿ.

ਯਥਾ ਪਨ ਤਤ੍ਥ ਅਸਂਹਾਰਿਮੇ ਅਨਾਪਤ੍ਤਿ, ਏਵਮਿਧ ਧੁਵਪਞ੍ਞਤ੍ਤੇ ਵਾ ਅਨਾਪਤ੍ਤੀਤਿ.

ਛਟ੍ਠਂ.

੨੨੦੭. ਤਿਸਮੁਟ੍ਠਾਨਨ੍ਤਿ ਸਚਿਤ੍ਤਕੇਹਿ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਨਤੋ.

ਅਟ੍ਠਮਂ.

੨੨੦੮. ਯਾ ¶ ਪਨ ਭਿਕ੍ਖੁਨੀ ਅਤ੍ਤਾਨਮ੍ਪਿ ਵਾ ਪਰਮ੍ਪਿ ਵਾ ਨਿਰਯਬ੍ਰਹ੍ਮਚਰਿਯੇਹਿ ਅਭਿਸਪੇਯ੍ਯ, ਤਸ੍ਸਾ ਵਾਚਤੋ ਵਾਚਤੋ ਸਿਯਾ ਪਾਚਿਤ੍ਤੀਤਿ ਯੋਜਨਾ. ਤਤ੍ਥ ਅਭਿਸਪੇਯ੍ਯਾਤਿ ਸਪਥਂ ਕਰੇਯ੍ਯ, ‘‘ਨਿਰਯੇ ਨਿਬ੍ਬਤ੍ਤਾਮਿ, ਅਵੀਚਿਮ੍ਹਿ ਨਿਬ੍ਬਤ੍ਤਾਮੀ’’ਤਿ ਅਤ੍ਤਾਨਂ ਵਾ ‘‘ਨਿਰਯੇ ਨਿਬ੍ਬਤ੍ਤਤੁ, ਅਵੀਚਿਮ੍ਹਿ ਨਿਬ੍ਬਤ੍ਤਤੂ’’ਤਿ ਪਰਂ ਵਾ ‘‘ਗਿਹਿਨੀ ਹੋਮਿ, ਓਦਾਤਵਤ੍ਥਾ ਹੋਮੀ’’ਤਿ ਅਤ੍ਤਾਨਂ ਵਾ ‘‘ਗਿਹਿਨੀ ਹੋਤੁ, ਓਦਾਤਵਤ੍ਥਾ ਹੋਤੂ’’ਤਿ ਪਰਂ ਵਾ ਅਭਿਸਪੇਯ੍ਯਾਤਿ ਵੁਤ੍ਤਂ ਹੋਤਿ.

੨੨੧੦. ਅਕ੍ਕੋਸਤਿ ਅਤ੍ਤਾਨਂ ਵਾ ਪਰਂ ਵਾਤਿ ਸਮ੍ਬਨ੍ਧੋ. ਤਿਕਪਾਚਿਤ੍ਤਿਯਨ੍ਤਿ ਉਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਾਵੇਮਤਿਕਾਅਨੁਪਸਮ੍ਪਨ੍ਨਸਞ੍ਞਾਵਸੇਨ. ਸੇਸਾਯਾਤਿ ਅਨੁਪਸਮ੍ਪਨ੍ਨਾਯ. ਅਨੁਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਾ, ਵੇਮਤਿਕਾ, ਅਨੁਪਸਮ੍ਪਨ੍ਨਸਞ੍ਞਾ ਅਕ੍ਕੋਸਤਿ, ਦੁਕ੍ਕਟਨ੍ਤਿ ਏਵਂ ਤਿਕਦੁਕ੍ਕਟਂ.

੨੨੧੧. ਅਤ੍ਥਧਮ੍ਮਾਨੁਸਾਸਨਿਂ ਪੁਰਕ੍ਖਤ੍ਵਾ ਵਦਨ੍ਤੀਨਂ ਅਨਾਪਤ੍ਤੀਤਿ ਯੋਜਨਾ. ਯਥਾਹ ਅਟ੍ਠਕਥਾਯਂ ‘‘ਅਤ੍ਥਪੁਰੇਕ੍ਖਾਰਾਯਾਤਿ ਅਟ੍ਠਕਥਂ ਕਥੇਨ੍ਤਿਯਾ. ਧਮ੍ਮਪੁਰੇਕ੍ਖਾਰਾਯਾਤਿ ਪਾਲ਼ਿਂ ਵਾਚੇਨ੍ਤਿਯਾ. ਅਨੁਸਾਸਨਿਪੁਰੇਕ੍ਖਾਰਾਯਾਤਿ ‘ਇਦਾਨਿਪਿ ਤ੍ਵਂ ਏਦਿਸਾ, ਸਾਧੁ ਵਿਰਮਸ੍ਸੁ, ਨੋ ਚੇ ਵਿਰਮਸਿ, ਅਦ੍ਧਾ ਪੁਨ ਏਵਰੂਪਾਨਿ ਕਮ੍ਮਾਨਿ ਕਤ੍ਵਾ ਨਿਰਯੇ ਉਪ੍ਪਜ੍ਜਿਸ੍ਸਸਿ, ਤਿਰਚ੍ਛਾਨਯੋਨਿਯਾ ਉਪ੍ਪਜ੍ਜਿਸ੍ਸਸੀ’ਤਿ ਏਵਂ ਅਨੁਸਾਸਨਿਯਂ ਠਤ੍ਵਾ ਵਦਨ੍ਤਿਯਾ ਅਨਾਪਤ੍ਤੀ’’ਤਿ (ਪਾਚਿ. ਅਟ੍ਠ. ੮੭੮).

ਨਵਮਂ.

੨੨੧੨. ਵਧਿਤ੍ਵਾਤਿ ¶ ਸਤ੍ਥਾਦੀਹਿ ਪਹਰਿਤ੍ਵਾ. ਵਧਿਤ੍ਵਾ ਵਾਤਿ ਏਤ੍ਥ ਵਾ-ਸਦ੍ਦੋ ਪਾਲ਼ਿਯਂ ‘‘ਵਧਿਤ੍ਵਾ ਵਧਿਤ੍ਵਾ’’ਤਿ (ਪਾਚਿ. ੮੮੦) ਵੁਤ੍ਤਂ ਆਮੇਡਿਤਂ ਸੂਚੇਤਿ.

੨੨੧੩. ਏਤ੍ਥਾਤਿ ¶ ਇਮਸ੍ਮਿਂ ਸਿਕ੍ਖਾਪਦੇ. ਕਾਯਵਾਚਾਚਿਤ੍ਤਸਮੁਟ੍ਠਾਨਂ ਧੁਰਨਿਕ੍ਖੇਪਸਮੁਟ੍ਠਾਨਂ ਨਾਮ, ਸਮਨੁਭਾਸਨਸਮੁਟ੍ਠਾਨਨ੍ਤਿਪਿ ਏਤਸ੍ਸੇਵ ਨਾਮਂ.

ਦਸਮਂ.

ਅਨ੍ਧਕਾਰਵਗ੍ਗੋ ਦੁਤਿਯੋ.

੨੨੧੪. ਯਾ ਪਨ ਭਿਕ੍ਖੁਨੀ ਨਗ੍ਗਾ ਅਨਿਵਤ੍ਥਾ ਅਪਾਰੁਤਾ ਹੁਤ੍ਵਾ ਨਹਾਯਤਿ, ਅਸ੍ਸਾ ਸਬ੍ਬਪਯੋਗੇ ਦੁਕ੍ਕਟਂ. ਤਸ੍ਸ ਨਹਾਨਸ੍ਸ ਵੋਸਾਨੇ ਪਰਿਯੋਸਾਨੇ ਸਾ ਭਿਕ੍ਖੁਨੀ ਜਿਨਵੁਤ੍ਤਂ ਜਿਨੇਨ ਭਗਵਤਾ ਭਿਕ੍ਖੁਨੀਨਂ ਪਞ੍ਞਤ੍ਤਂ ਦੋਸਂ ਪਾਚਿਤ੍ਤਿਯਾਪਤ੍ਤਿਂ ਸਮੁਪੇਤਿ ਆਪਜ੍ਜਤੀਤਿ ਯੋਜਨਾ. ਭਿਕ੍ਖੁਨਿ ਦੋਸਨ੍ਤਿ ਏਤ੍ਥ ਗਾਥਾਬਨ੍ਧਵਸੇਨ ਰਸ੍ਸੋ ਕਤੋ.

੨੨੧੫. ਅਚ੍ਛਿਨ੍ਨਚੀਵਰਾਤਿ ਅਚ੍ਛਿਨ੍ਨਉਦਕਸਾਟਿਕਚੀਵਰਾ. ਨਟ੍ਠਚੀਵਰਾਤਿ ਚੋਰਾਦੀਹਿ ਨਟ੍ਠਉਦਕਸਾਟਿਕਚੀਵਰਾ. ਆਪਦਾਸੁ ਵਾਤਿ ‘‘ਮਹਗ੍ਘਂ ਇਮਂ ਦਿਸ੍ਵਾ ਚੋਰਾਪਿ ਹਰੇਯ੍ਯੁ’’ਨ੍ਤਿ ਏਵਰੂਪਾਸੁ ਆਪਦਾਸੁ ਵਾ ਨਗ੍ਗਾਯ ਨਹਾਯਨ੍ਤਿਯਾ ਨ ਦੋਸੋ.

ਪਠਮਂ.

੨੨੧੬. ਦੁਤਿਯੇਤਿ ‘‘ਉਦਕਸਾਟਿਕਂ ਪਨ ਭਿਕ੍ਖੁਨਿਯਾ ਕਾਰਯਮਾਨਾਯਾ’’ਤਿਆਦਿਸਿਕ੍ਖਾਪਦੇ (ਪਾਚਿ. ੮੮੮).

ਦੁਤਿਯਂ.

੨੨੧੭-੮. ਦੁਸ੍ਸਿਬ੍ਬਿਤਂ ਚੀਵਰਨ੍ਤਿ ਅਸਕ੍ਕਚ੍ਚਸਿਬ੍ਬਿਤਂ ਚੀਵਰਂ. ਵਿਸਿਬ੍ਬੇਤ੍ਵਾਤਿ ਦੁਸ੍ਸਿਬ੍ਬਿਤਂ ਪੁਨ ਸਿਬ੍ਬਨਤ੍ਥਾਯ ਸਯਂ ਵਾ ਵਿਗਤਸਿਬ੍ਬਨਂ ਕਤ੍ਵਾ. ‘‘ਵਿਸਿਬ੍ਬਾਪੇਤ੍ਵਾ’’ਤਿ ਸੇਸੋ. ਯਥਾਹ ‘‘ਵਿਸਿਬ੍ਬੇਤ੍ਵਾ ਵਾ ਵਿਸਿਬ੍ਬਾਪੇਤ੍ਵਾ ਵਾ’’ਤਿ (ਪਾਚਿ. ੮੯੩). ਅਨਨ੍ਤਰਾਯਾਤਿ ਦਸਸੁ ਅਨ੍ਤਰਾਯੇਸੁ ¶ ਅਞ੍ਞਤਰਨ੍ਤਰਾਯਰਹਿਤਾ. ਤਂ ਵਿਸਿਬ੍ਬਿਤਂ, ਵਿਸਿਬ੍ਬਾਪਿਤਂ ਵਾ ਚੀਵਰਂ. ‘‘ਅਨਨ੍ਤਰਾਯਾ ਤਂ ¶ ਪਚ੍ਛਾ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ਰਸ੍ਸੋ ਕਤੋ. ਨ ਸਿਬ੍ਬੇਯ੍ਯਾਤਿ ਏਤ੍ਥਾਪਿ ‘‘ਨ ਸਿਬ੍ਬਾਪੇਯ੍ਯਾ’’ਤਿ ਸੇਸੋ. ਯਥਾਹ ‘‘ਨੇਵ ਸਿਬ੍ਬੇਯ੍ਯ, ਨ ਸਿਬ੍ਬਾਪਨਾਯ ਉਸ੍ਸੁਕ੍ਕਂ ਕਰੇਯ੍ਯਾ’’ਤਿ (ਪਾਚਿ. ੮੯੩).

ਚਤੁਪਞ੍ਚਾਹਨ੍ਤਿ ਏਤ੍ਥ ‘‘ਉਤ੍ਤਰਿਛਪ੍ਪਞ੍ਚਵਾਚਾਹਿ (ਪਾਚਿ. ੬੨-੬੪), ਉਤ੍ਤਰਿਦਿਰਤ੍ਤਤਿਰਤ੍ਤ’’ਨ੍ਤਿਆਦੀਸੁ (ਪਾਚਿ. ੫੧-੫੨) ਵਿਯ ਅਪ੍ਪਸਙ੍ਖ੍ਯਾਯ ਬਹੁਸਙ੍ਖ੍ਯਾਯਂ ਅਨ੍ਤੋਗਧਤ੍ਤੇਪਿ ਉਭਯਵਚਨਂ ਲੋਕਵੋਹਾਰਵਸੇਨ ਵਚਨਸਿਲਿਟ੍ਠਤਾਯਾਤਿ ਦਟ੍ਠਬ੍ਬਂ. ਧੁਰੇਤਿ ਸਿਬ੍ਬਨੁਸ੍ਸਾਹੇ. ਨਿਕ੍ਖਿਤ੍ਤਮਤ੍ਤੇਤਿ ਵਿਸ੍ਸਟ੍ਠਮਤ੍ਤੇ.

੨੨੧੯. ਤਿਕਪਾਚਿਤ੍ਤਿਯਂ ਵੁਤ੍ਤਨ੍ਤਿ ਉਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਾ, ਵੇਮਤਿਕਾ, ਅਨੁਪਸਮ੍ਪਨ੍ਨਸਞ੍ਞਾਤਿ ਤੀਸੁ ਵਾਰੇਸੁ ਤਿਕਪਾਚਿਤ੍ਤਿਯਂ ਵੁਤ੍ਤਂ. ਸੇਸਾਯਾਤਿ ਅਨੁਪਸਮ੍ਪਨ੍ਨਾਯ. ਤਿਕਦੁਕ੍ਕਟਨ੍ਤਿ ਵਾਰਤ੍ਤਯੇ ਦੁਕ੍ਕਟਤ੍ਤਯਂ.

੨੨੨੦. ਉਭਿਨ੍ਨਨ੍ਤਿ ਉਪਸਮ੍ਪਨ੍ਨਾਨੁਪਸਮ੍ਪਨ੍ਨਾਨਂ. ਅਞ੍ਞਸ੍ਮਿਨ੍ਤਿ ਚੀਵਰਤੋ ਅਞ੍ਞਸ੍ਮਿਂ. ਅਨ੍ਤਰਾਯੇਪਿ ਵਾ ਸਤੀਤਿ ਰਾਜਚੋਰਾਦਿਅਨ੍ਤਰਾਯਾਨਂ ਦਸਨ੍ਨਂ ਅਞ੍ਞਤਰੇ ਸਤਿ.

੨੨੨੧. ‘‘ਧੁਰਨਿਕ੍ਖੇਪਨਂ ਨਾਮ, ਸਮੁਟ੍ਠਾਨਮਿਦਂ ਮਤ’’ਨ੍ਤਿ ਇਦਂ ਅਟ੍ਠਕਥਾਯ ‘‘ਧੁਰਨਿਕ੍ਖੇਪਸਮੁਟ੍ਠਾਨ’’ਨ੍ਤਿ (ਪਾਚਿ. ਅਟ੍ਠ. ੮੯੩) ਵੁਤ੍ਤਮੇਵ ਗਹੇਤ੍ਵਾ ਵੁਤ੍ਤਂ, ਤੇਰਸਸੁ ਸਮੁਟ੍ਠਾਨਸੀਸੇਸੁ ‘‘ਧੁਰਨਿਕ੍ਖੇਪਸਮੁਟ੍ਠਾਨ’’ਨ੍ਤਿ ਵਿਸੁਂ ਸਮੁਟ੍ਠਾਨਸੀਸਂ ਨਾਮ ਨਤ੍ਥਿ. ਮਾਤਿਕਟ੍ਠਕਥਾਯਞ੍ਚ ‘‘ਸਮਨੁਭਾਸਨਸਮੁਟ੍ਠਾਨ’’ਨ੍ਤਿ (ਕਙ੍ਖਾ. ਅਟ੍ਠ. ਚੀਵਰਸਿਬ੍ਬਨਸਿਕ੍ਖਾਪਦਵਣ੍ਣਨਾ, ਅਤ੍ਥਤੋ ਸਮਾਨਂ) ਵੁਤ੍ਤਂ, ਤਂ ਸਮੁਟ੍ਠਾਨਸੀਸੇਸੁ ਅਨ੍ਤੋਗਧਮੇਵ. ਤਸ੍ਮਾ ‘‘ਧੁਰਨਿਕ੍ਖੇਪਸਮੁਟ੍ਠਾਨ’’ਨ੍ਤਿ ਇਦਂ ਸਮਨੁਭਾਸਨਸਮੁਟ੍ਠਾਨਸ੍ਸੇਵ ਪਰਿਯਾਯੋਤਿ ਗਹੇਤਬ੍ਬਂ.

ਤਤਿਯਂ.

੨੨੨੨. ਪਞ੍ਚ ¶ ਅਹਾਨਿ ਪਞ੍ਚਾਹਂ, ਪਞ੍ਚਾਹਮੇਵ ਪਞ੍ਚਾਹਿਕਂ. ‘‘ਅਤਿਕ੍ਕਮੇਯ੍ਯਾ’’ਤਿ ਕਿਰਿਯਾਯ ਦ੍ਵਿਕਮ੍ਮਕਤ੍ਤਾ ‘‘ਪਞ੍ਚਾਹਿਕ’’ਨ੍ਤਿ ਚ ‘‘ਸਙ੍ਘਾਟਿਚਾਰ’’ਨ੍ਤਿ ਚ ਉਪਯੋਗਤ੍ਥੇ ਏਵ ਉਪਯੋਗਵਚਨਂ. ਸਙ੍ਘਟਿਤਟ੍ਠੇਨ ਸਙ੍ਘਾਟਿ, ਇਤਿ ਵਕ੍ਖਮਾਨਾਨਂ ਪਞ੍ਚਨ੍ਨਂ ਚੀਵਰਾਨਮੇਵਾਧਿਵਚਨਂ, ਸਙ੍ਘਾਟੀਨਂ ¶ ਚਾਰੋ ਸਙ੍ਘਾਟਿਚਾਰੋ, ਪਰਿਭੋਗਵਸੇਨ ਵਾ ਓਤਾਪਨਵਸੇਨ ਵਾ ਪਰਿਵਤ੍ਤਨਨ੍ਤਿ ਅਤ੍ਥੋ. ‘‘ਪਞ੍ਚਾਹਿਕਂ ਸਙ੍ਘਾਟਿਚਾਰਂ ਅਤਿਕ੍ਕਮੇਯ੍ਯਾਤਿ ਪਞ੍ਚਮਂ ਦਿਵਸਂ ਪਞ੍ਚ ਚੀਵਰਾਨਿ ਨੇਵ ਨਿਵਾਸੇਤਿ ਨ ਪਾਰੁਪਤਿ ਨ ਓਤਾਪੇਤਿ ਪਞ੍ਚਮਂ ਦਿਵਸਂ ਅਤਿਕ੍ਕਾਮੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ (ਪਾਚਿ. ੮੯੯) ਵਚਨਤੋ ਪਞ੍ਚਦਿਵਸਬ੍ਭਨ੍ਤਰੇ ਯਂ ਕਿਞ੍ਚਿ ਅਕਤ੍ਵਾ ਅਤਿਕ੍ਕਾਮੇਨ੍ਤਿਯਾ ਚੀਵਰਗਣਨਾਯ ਪਾਚਿਤ੍ਤਿ ਹੋਤੀਤਿ ਦਸ੍ਸੇਤੁਮਾਹ ‘‘ਯਾਤਿਕ੍ਕਮੇਯ੍ਯਾ’’ਤਿਆਦਿ.

੨੨੨੩. ਤਿਚੀਵਰਨ੍ਤਿ ਅਨ੍ਤਰਵਾਸਕਉਤ੍ਤਰਾਸਙ੍ਗਸਙ੍ਘਾਟਿਸਙ੍ਖਾਤਂ ਤਿਚੀਵਰਞ੍ਚ. ਸਂਕਚ੍ਚੀਤਿ ਥਨਵੇਠਨਸਙ੍ਖਾਤਂ ਚੀਵਰਞ੍ਚ. ਦਕਸਾਟੀਤਿ ਉਤੁਨਿਕਾਲੇ ਨਿਵਾਸੇਤਬ੍ਬਉਦਕਸਾਟਿਚੀਵਰਞ੍ਚ. ਇਤਿ ਇਮੇ ਪਞ੍ਚ. ਪਞ੍ਚ ਤੂਤਿ ਪਞ੍ਚ ਚੀਵਰਾਨਿ ਨਾਮ.

੨੨੨੪-੫. ਤਿਕਪਾਚਿਤ੍ਤੀਤਿ ਪਞ੍ਚਾਹਾਤਿਕ੍ਕਨ੍ਤਸਞ੍ਞਾ, ਵੇਮਤਿਕਾ, ਅਨਤਿਕ੍ਕਨ੍ਤਸਞ੍ਞਾਤਿ ਵਿਕਪ੍ਪਤ੍ਤਯੇ ਪਾਚਿਤ੍ਤਿਯਤ੍ਤਯਂ ਹੋਤਿ. ਪਞ੍ਚਾਹਾਨਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞਾਵੇਮਤਿਕਾਨਂ ਵਸੇਨ ਦ੍ਵਿਕਦੁਕ੍ਕਟਂ.

‘‘ਪਞ੍ਚਮੇ ਦਿਵਸੇ’’ਤਿਆਦਿ ਅਨਾਪਤ੍ਤਿਵਾਰਸਨ੍ਦਸ੍ਸਨਂ. ਨਿਸੇਵਤੀਤਿ ਨਿਵਾਸੇਤਿ ਵਾ ਪਾਰੁਪਤਿ ਵਾ. ਓਤਾਪੇਤੀਤਿ ਏਤ੍ਥ ਵਾ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ, ਓਤਾਪੇਤਿ ਵਾਤਿ ਅਤ੍ਥੋ. ਆਪਦਾਸੁਪੀਤਿ ਮਹਗ੍ਘਂ ਚੀਵਰਂ, ਨ ਸਕ੍ਕਾ ਹੋਤਿ ਚੋਰਭਯਾਦੀਸੁ ਪਰਿਭੁਞ੍ਜਿਤੁਂ, ਏਵਰੂਪੇ ਉਪਦ੍ਦਵੇ ਅਨਾਪਤ੍ਤਿ.

ਚਤੁਤ੍ਥਂ.

੨੨੨੬. ਅਞ੍ਞਿਸ੍ਸਾ ¶ ਸਙ੍ਕਮੇਤਬ੍ਬਚੀਵਰਂ ਅਨਾਪੁਚ੍ਛਾ ਗਹੇਤ੍ਵਾ ਯਾ ਪਰਿਭੁਞ੍ਜਤਿ, ਤਸ੍ਸਾ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ, ਅਞ੍ਞਿਸ੍ਸਾ ਉਪਸਮ੍ਪਨ੍ਨਾਯ ਸਨ੍ਤਕਂ ਪਞ੍ਚਨ੍ਨਂ ਚੀਵਰਾਨਂ ਅਞ੍ਞਤਰਂ ਤਸ੍ਸਾ ਅਵਤ੍ਵਾ ਆਦਾਯ ਪੁਨ ਤਸ੍ਸਾ ਦਾਤਬ੍ਬਂ, ਅਦਤ੍ਵਾ ਯਾ ਭਿਕ੍ਖੁਨੀ ਪਟਿਸੇਵਤਿ, ਤਸ੍ਸਾ ਪਾਚਿਤ੍ਤਿਯਂ ਹੋਤੀਤਿ ਅਤ੍ਥੋ. ‘‘ਸਙ੍ਕਮੇਤਬ੍ਬਚੀਵਰਂ ਸਙ੍ਕਮਨੀਯ’’ਨ੍ਤਿ ਪਰਿਯਾਯਸਦ੍ਦਾ ਏਤੇ. ਯਥਾਹ ‘‘ਚੀਵਰਸਙ੍ਕਮਨੀਯਨ੍ਤਿ ਸਙ੍ਕਮੇਤਬ੍ਬਚੀਵਰਂ, ਅਞ੍ਞਿਸ੍ਸਾ ਸਨ੍ਤਕਂ ਅਨਾਪੁਚ੍ਛਾ ਗਹਿਤਂ ਪੁਨ ਪਟਿਦਾਤਬ੍ਬਚੀਵਰਨ੍ਤਿ ਅਤ੍ਥੋ’’ਤਿ (ਪਾਚਿ. ਅਟ੍ਠ. ੯੦੩).

੨੨੨੭. ਤਿਕਪਾਚਿਤ੍ਤਿਯਂ ਵੁਤ੍ਤਨ੍ਤਿ ‘‘ਉਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਾ…ਪੇ… ਵੇਮਤਿਕਾ ¶ …ਪੇ… ਅਨੁਪਸਮ੍ਪਨ੍ਨਸਞ੍ਞਾ ਚੀਵਰਸਙ੍ਕਮਨੀਯਂ ਧਾਰੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ (ਪਾਚਿ. ੯੦੫) ਏਵਂ ਤਿਕਪਾਚਿਤ੍ਤਿਯਂ ਪਾਲ਼ਿਯਂ ਵੁਤ੍ਤਂ. ਸੇਸਾਯਾਤਿ ਅਨੁਪਸਮ੍ਪਨ੍ਨਾਯ. ‘‘ਤਿਕਦੁਕ੍ਕਟ’’ਨ੍ਤਿ ਇਦਞ੍ਚ ਵੁਤ੍ਤਨਯਮੇਵ. ਆਪਦਾਸੂਤਿ ਸਚੇ ਅਪਾਰੁਤਂ ਵਾ ਅਨਿਵਤ੍ਥਂ ਵਾ ਚੋਰਾ ਹਰਨ੍ਤਿ, ਏਵਰੂਪਾਸੁ ਆਪਦਾਸੁ ਵਾ.

੨੨੨੮. ਏਤਂ ਸਮੁਟ੍ਠਾਨਂ ਕਥਿਨੇਨ ਤੁਲ੍ਯਨ੍ਤਿ ਯੋਜਨਾ. ਗਹਣਂ, ਪਰਿਭੋਗੋ ਚ ਕ੍ਰਿਯਂ. ਅਨਾਪੁਚ੍ਛਨਂ ਅਕ੍ਰਿਯਂ.

ਪਞ੍ਚਮਂ.

੨੨੨੯. ਲਭਿਤਬ੍ਬਂ ਤੁ ਚੀਵਰਨ੍ਤਿ ਲਭਿਤਬ੍ਬਂ ਵਿਕਪ੍ਪਨੁਪਗਂ ਚੀਵਰਂ. ਨਿਵਾਰੇਤੀਤਿ ਯਥਾ ਤੇ ਦਾਤੁਕਾਮਾ ਨ ਦੇਨ੍ਤਿ, ਏਵਂ ਅਨ੍ਤਰਾਯਂ ਪਰਕ੍ਕਮਤਿ. ਪਾਚਿਤ੍ਤਿਂ ਪਰਿਦੀਪਯੇਤਿ ਸਚੇ ਤਸ੍ਸਾ ਵਚਨੇਨ ਤੇ ਨ ਦੇਨ੍ਤਿ, ਭਿਕ੍ਖੁਨਿਯਾ ਪਾਚਿਤ੍ਤਿਯਂ ਵਦੇਯ੍ਯਾਤਿ ਅਤ੍ਥੋ.

੨੨੩੦. ਏਤ੍ਥ ਪਠਮਂ ‘‘ਸਙ੍ਘਸ੍ਸਾ’’ਤਿ ਵੁਤ੍ਤਤ੍ਤਾ ਗਣਸ੍ਸਾਤਿ ਦ੍ਵੇ ਤਯੋਵ ਗਹੇਤਬ੍ਬਾ. ਲਾਭੇਤਿ ਏਤ੍ਥ ‘‘ਨਿਵਾਰਿਤੇ’’ਤਿ ਸੇਸੋ. ਸਚੇ ਅਞ੍ਞਂ ਪਰਿਕ੍ਖਾਰਂ ਨਿਵਾਰੇਤਿ, ਤਥੇਵ ਦੁਕ੍ਕਟਨ੍ਤਿ ਯੋਜਨਾ. ਅਞ੍ਞਨ੍ਤਿ ਵਿਕਪ੍ਪਨੁਪਗਚੀਵਰਤੋ ਅਞ੍ਞਂ. ਪਰਿਕ੍ਖਾਰਨ੍ਤਿ ¶ ਯਂ ਕਿਞ੍ਚਿ ਥਾਲਕਾਦੀਨਂ ਵਾ ਸਪ੍ਪਿਤੇਲਾਦੀਨਂ ਵਾ ਅਞ੍ਞਤਰਂ.

੨੨੩੧. ਆਨਿਸਂਸਂ ਨਿਦਸ੍ਸੇਤ੍ਵਾਤਿ ‘‘ਕਿਤ੍ਤਕਂ ਅਗ੍ਘਨਕਂ ਦਾਤੁਕਾਮਤ੍ਥਾਤਿ ਪੁਚ੍ਛਤਿ, ‘ਏਤ੍ਤਕਂ ਨਾਮਾ’ਤਿ ਵਦਨ੍ਤਿ, ‘ਆਗਮੇਥ ਤਾਵ, ਇਦਾਨਿ ਵਤ੍ਥੁ ਮਹਗ੍ਘਂ, ਕਤਿਪਾਹੇਨ ਕਪ੍ਪਾਸੇ ਆਗਤੇ ਸਮਗ੍ਘਂ ਭਵਿਸ੍ਸਤੀ’’ਤਿ ਏਵਂ ਆਨਿਸਂਸਂ ਦਸ੍ਸੇਤ੍ਵਾ. ਨ ਦੋਸਤਾਤਿ ਨ ਦੋਸੋ, ਅਨਾਪਤ੍ਤੀਤਿ ਅਤ੍ਥੋ.

ਛਟ੍ਠਂ.

੨੨੩੨-੩. ਧਮ੍ਮਿਕਂ ਸਮਗ੍ਗੇਨ ਸਙ੍ਘੇਨ ਸਨ੍ਨਿਪਤਿਤ੍ਵਾ ਕਰਿਯਮਾਨਂ ਚੀਵਰਾਨਂ ਵਿਭਙ੍ਗਂ ਭਾਜਨਂ ਯਾ ਭਿਕ੍ਖੁਨੀ ਪਟਿਸੇਧੇਯ੍ਯ ਪਟਿਬਾਹੇਯ੍ਯ, ਤਸ੍ਸਾ ਏਵਂ ਪਟਿਸੇਧੇਨ੍ਤਿਯਾ ਪਾਚਿਤ੍ਤਿਯਂ ਹੋਤੀਤਿ ਯੋਜਨਾ. ਅਧਮ੍ਮੇ ਧਮ੍ਮਸਞ੍ਞਾਯ ਦੁਕ੍ਕਟਂ ਪਰਿਦੀਪਿਤਨ੍ਤਿ ਯੋਜਨਾ. ਉਭੋ ਵੇਮਤਿਕਾਯ ਵਾਤਿ ਉਭੋਸੁ ਵੇਮਤਿਕਾਯ. ਗਾਥਾਬਨ੍ਧਵਸੇਨ ਸੁ-ਸਦ੍ਦਲੋਪੋ. ਧਮ੍ਮਿਕੇ ਅਧਮ੍ਮਿਕੇ ਚੀਵਰਵਿਭਙ੍ਗੇ ਵੇਮਤਿਕਾਯ ਪਟਿਬਾਹਨ੍ਤਿਯਾ ¶ ਦੁਕ੍ਕਟਂ ਪਰਿਦੀਪਿਤਨ੍ਤਿ ਯੋਜਨਾ. ਯਥਾਹ ‘‘ਧਮ੍ਮਿਕੇ ਵੇਮਤਿਕਾ ਪਟਿਬਾਹਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਧਮ੍ਮਿਕੇ ਵੇਮਤਿਕਾ ਪਟਿਬਾਹਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ. ਆਨਿਸਂਸਂ ਨਿਦਸ੍ਸੇਤ੍ਵਾਤਿ ‘‘ਏਕਿਸ੍ਸਾ ਏਕਂ ਸਾਟਕਂ ਨਪ੍ਪਹੋਤਿ, ਆਗਮੇਥ ਤਾਵ, ਕਤਿਪਾਹੇਨੇਵ ਉਪ੍ਪਜ੍ਜਿਸ੍ਸਤਿ, ਤਤੋ ਭਾਜੇਸ੍ਸਾਮੀ’’ਤਿ (ਪਾਚਿ. ੯੧੪) ਏਵਂ ਆਨਿਸਂਸਂ ਦਸ੍ਸੇਤ੍ਵਾ.

ਸਤ੍ਤਮਂ.

੨੨੩੫-੬. ਨਿਵਾਸਨੁਪਗਂ ਵਾ ਤਥਾ ਪਾਰੁਪਨੁਪਗਂ ਵਾ ਕਪ੍ਪਬਿਨ੍ਦੁਕਤਂ ਵਾ ਯਂ ਕਿਞ੍ਚਿ ਚੀਵਰਂ ਪਞ੍ਚ ਸਹਧਮ੍ਮਿਕੇ ਚ ਮਾਤਾਪਿਤਰੋਪਿ ਮੁਞ੍ਚਿਤ੍ਵਾ ਅਞ੍ਞਸ੍ਸ ਯਸ੍ਸ ਕਸ੍ਸਚਿ ਗਹਟ੍ਠਸ੍ਸ ਵਾ ਪਰਿਬ੍ਬਾਜਕਸ੍ਸ ਵਾ ¶ ਯਦਿ ਦਦੇਯ੍ਯ, ਤਸ੍ਸਾਪਿ ਪਾਚਿਤ੍ਤਿਯਂ ਪਰਿਯਾਪੁਤਨ੍ਤਿ ਯੋਜਨਾ. ਏਤ੍ਥ ਚ ‘‘ਪਿਤਰੋ’’ਤਿ ਮਾਤਾ ਚ ਪਿਤਾ ਚ ਮਾਤਾਪਿਤਰੋਤਿ ਵਤ੍ਤਬ੍ਬੇ ਵਿਰੂਪੇਕਸੇਸਵਸੇਨ ਨਿਦ੍ਦੇਸੋ ਦਟ੍ਠਬ੍ਬੋ.

੨੨੩੭. ਏਤ੍ਥ ਇਮਸ੍ਮਿਂ ਸਿਕ੍ਖਾਪਦੇ ਤਾ ਪਨ ਪਾਚਿਤ੍ਤਿਯੋ ਚੀਵਰਾਨਂ ਗਣਨਾਯ ਵਸੇਨ ਗਣੇਤਬ੍ਬਾਤਿ ਯੋਜਨਾ.

੨੨੩੮. ਤਾਵ ਸਮ੍ਪਟਿਚ੍ਛਿਤੋ ਕਾਲੋ ਏਤਸ੍ਸਾਤਿ ਤਾਵਕਾਲਿਕਂ, ਚੀਵਰਂ. ‘‘ਅਞ੍ਞਸ੍ਸਾ’’ਤਿ ਪੁਬ੍ਬੇ ਵੁਤ੍ਤਸ੍ਸ ਦੂਰਤ੍ਤਾ ਪੁਨਪਿ ‘‘ਅਞ੍ਞੇਸ’’ਨ੍ਤਿ ਆਹ, ਸੋਯੇਵਤ੍ਥੋ.

ਅਟ੍ਠਮਂ.

੨੨੩੯. ਯਾ ਪਨ ਭਿਕ੍ਖੁਨੀ ‘‘ਸਚੇ ਮਯਂ ਸਕ੍ਕੋਮ, ਦਸ੍ਸਾਮ ਕਰਿਸ੍ਸਾਮਾਤਿ ਏਵਂ ਵਾਚਾ ਭਿਨ੍ਨਾ ਹੋਤੀ’’ਤਿ ਵੁਤ੍ਤਾਯ ਦੁਬ੍ਬਲਾਯ ਚੀਵਰਪਚ੍ਚਾਸਾਯ ਚੀਵਰਸ੍ਸ ਵਿਭਙ੍ਗਂ ਨਿਸੇਧੇਤ੍ਵਾ ਚੀਵਰੇ ਕਾਲਂ ਅਤਿਕ੍ਕਮੇਯ੍ਯ, ਅਸ੍ਸਾ ਦੋਸਤਾ ਪਾਚਿਤ੍ਤਿਯਾਪਤ੍ਤਿ ਹੋਤੀਤਿ ਯੋਜਨਾ. ਚੀਵਰੇ ਕਾਲਨ੍ਤਿ ‘‘ਚੀਵਰਕਾਲਸਮਯੋ ਨਾਮ ਅਨਤ੍ਥਤੇ ਕਥਿਨੇ ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ, ਅਤ੍ਥਤੇ ਕਥਿਨੇ ਪਞ੍ਚਮਾਸਾ’’ਤਿ (ਪਾਚਿ. ੯੨੨) ਪਦਭਾਜਨੇ ਵੁਤ੍ਤਂ ਚੀਵਰਕਾਲਂ. ਅਤਿਕ੍ਕਮੇਯ੍ਯਾਤਿ ‘‘ਅਨਤ੍ਥਤੇ ਕਥਿਨੇ ਵਸ੍ਸਾਨਸ੍ਸ ਪਚ੍ਛਿਮਂ ਦਿਵਸਂ, ਅਤ੍ਥਤੇ ਕਥਿਨੇ ਕਥਿਨੁਦ੍ਧਾਰਦਿਵਸਂ ਅਤਿਕ੍ਕਾਮੇਤੀ’’ਤਿ ਵੁਤ੍ਤਵਿਧਿਂ ਅਤਿਕ੍ਕਾਮੇਯ੍ਯ.

੨੨੪੦. ‘‘ਅਦੁਬ੍ਬਲਚੀਵਰੇ ¶ ਦੁਬ੍ਬਲਚੀਵਰਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵਚਨਤੋ ਸੁਦੁਬ੍ਬਲਨ੍ਤਿ ਚੇਤਸਾਤਿ ਏਤ੍ਥ ਸੁ-ਸਦ੍ਦੋ ਪਦਪੂਰਣੇ. ਉਭੋਸੂਤਿ ਦੁਬ੍ਬਲੇ, ਅਦੁਬ੍ਬਲੇ ਚ. ਕਙ੍ਖਿਤਾਯ ਵਾਤਿ ਵੇਮਤਿਕਾਯ ਵਾ.

੨੨੪੧. ਆਨਿਸਂਸਂ ਨਿਦਸ੍ਸੇਤ੍ਵਾਤਿ ‘‘ਕਿਞ੍ਚਾਪਿ ‘ਨ ਮਯਂ ਅਯ੍ਯੇ ਸਕ੍ਕੋਮਾ’ਤਿ ਵਦਨ੍ਤਿ, ਇਦਾਨਿ ਪਨ ਤੇਸਂ ਕਪ੍ਪਾਸੋ ਆਗਮਿਸ੍ਸਤਿ, ਸਦ੍ਧੋ ਪਸਨ੍ਨੋ ਪੁਰਿਸੋ ਆਗਮਿਸ੍ਸਤਿ ¶ , ਅਦ੍ਧਾ ਦਸ੍ਸਤੀ’’ਤਿ (ਪਾਚਿ. ਅਟ੍ਠ. ੯੨੧) ਏਵਂ ਅਟ੍ਠਕਥਾਯ ਵੁਤ੍ਤਨਯੇਨ ਆਨਿਸਂਸਂ ਦਸ੍ਸੇਤ੍ਵਾ.

ਨਵਮਂ.

੨੨੪੨. ਧਮ੍ਮਿਕਂ ਕਥਿਨੁਦ੍ਧਾਰਨ੍ਤਿ ‘‘ਧਮ੍ਮਿਕੋ ਨਾਮ ਕਥਿਨੁਦ੍ਧਾਰੋ ਸਮਗ੍ਗੋ ਭਿਕ੍ਖੁਨਿਸਙ੍ਘੋ ਸਨ੍ਨਿਪਤਿਤ੍ਵਾ ਉਦ੍ਧਰਤੀ’’ਤਿ (ਪਾਚਿ. ੯੨੯) ਵੁਤ੍ਤਂ ਕਥਿਨੁਦ੍ਧਾਰਂ.

੨੨੪੩. ਯਸ੍ਸਾਤਿ ਯਸ੍ਸ ਕਥਿਨਸ੍ਸ. ਅਤ੍ਥਾਰਮੂਲਕੋ ਆਨਿਸਂਸੋ ਨਾਮ ‘‘ਯੋ ਚ ਤਤ੍ਥ ਚੀਵਰੁਪ੍ਪਾਦੋ, ਸੋ ਨੇਸਂ ਭਵਿਸ੍ਸਤੀ’’ਤਿ (ਮਹਾਵ. ੩੦੬) ਅਨੁਞ੍ਞਾਤੋ ਤਸ੍ਮਿਂ ਵਿਹਾਰੇ ਉਪ੍ਪਜ੍ਜਨਕਚੀਵਰਵਤ੍ਥਾਨਿਸਂਸੋ. ਉਦ੍ਧਾਰਮੂਲਕੋ ਨਾਮ ਅਨ੍ਤਰੁਬ੍ਭਾਰਂ ਕਾਰਾਪੇਨ੍ਤੇਹਿ ਉਪਾਸਕੇਹਿ ਦਿਯ੍ਯਮਾਨਚੀਵਰਵਤ੍ਥਾਨਿਸਂਸੋ.

੨੨੪੫. ਸਮਾਨਿਸਂਸੋਪੀਤਿ ਅਤ੍ਥਾਰਆਨਿਸਂਸੇਨ ਸਮਾਨਿਸਂਸੋਪਿ ਉਬ੍ਭਾਰੋ. ਸਦ੍ਧਾਪਾਲਨਕਆਰਣਾਤਿ ਪਸਾਦਾਨੁਰਕ੍ਖਨਤ੍ਥਾਯ ਦਾਤਬ੍ਬੋਤਿ ਯੋਜਨਾ. ਆਨਿਸਂਸਂ ਨਿਦਸ੍ਸੇਤ੍ਵਾਤਿ ‘‘ਭਿਕ੍ਖੁਨਿਸਙ੍ਘੋ ਜਿਣ੍ਣਚੀਵਰੋ, ਕਥਿਨਾਨਿਸਂਸਮੂਲਕੋ ਮਹਾਲਾਭੋ’’ਤਿ ਏਵਰੂਪਂ ਆਨਿਸਂਸਂ ਦਸ੍ਸੇਤ੍ਵਾ.

੨੨੪੬. ਸਮੁਟ੍ਠਾਨਾਦਿਨਾ ਸਦ੍ਧਿਂ ਸੇਸਂ ਪਨ ਵਿਨਿਚ੍ਛਯਜਾਤਂ ਅਸੇਸੇਨ ਸਬ੍ਬਾਕਾਰੇਨ ਸਤ੍ਤਮੇਨ ਸਿਕ੍ਖਾਪਦੇਨ ਸਮਂ ਮਤਂ ‘‘ਸਦਿਸ’’ਨ੍ਤਿ ਵਿਞ੍ਞਾਤਂ. ਕਿਞ੍ਚਿਪਿ ਅਪ੍ਪਕਮ੍ਪਿ ਅਪੁਬ੍ਬਂ ਤਤ੍ਥ ਵੁਤ੍ਤਨਯਤੋ ਅਞ੍ਞਂ ਨਤ੍ਥੀਤਿ ਯੋਜਨਾ.

ਦਸਮਂ.

ਨਗ੍ਗਵਗ੍ਗੋ ਤਤਿਯੋ.

੨੨੪੭. ‘‘ਯਾ ¶ ¶ ਪਨ ਭਿਕ੍ਖੁਨਿਯੋ ਦ੍ਵੇ ਏਕਮਞ੍ਚੇ ਤੁਵਟ੍ਟੇਯ੍ਯੁਂ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੯੩੩) ਪਞ੍ਞਤ੍ਤਸਿਕ੍ਖਾਪਦੇ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਏਕਾਯਾ’’ਤਿਆਦਿ. ਏਕਾਯਾਤਿ ਏਕਾਯ ਭਿਕ੍ਖੁਨਿਯਾ. ਅਪਰਾਤਿ ਅਞ੍ਞਾ ਉਪਸਮ੍ਪਨ੍ਨਾ. ਨਿਪਜ੍ਜੇਯ੍ਯੁਨ੍ਤਿ ਏਤ੍ਥ ‘‘ਏਕਮਞ੍ਚੇ’’ਤਿ ਸੇਸੋ. ਦ੍ਵੇਤਿ ਦ੍ਵੇ ਭਿਕ੍ਖੁਨਿਯੋ.

੨੨੪੮-੯. ‘‘ਏਕਾਯ ਚਾ’’ਤਿਆਦਿ ਅਨਾਪਤ੍ਤਿਵਾਰਨਿਦ੍ਦੇਸੋ. ਉਭੋ ਵਾਪਿ ਸਮਂ ਨਿਸੀਦਨ੍ਤੀਤਿ ਯੋਜਨਾ. ਏਲ਼ਕੇਨਾਤਿ ਏਲ਼ਕਲੋਮਸਿਕ੍ਖਾਪਦੇਨ.

ਪਠਮਂ.

੨੨੫੦-੧. ਪਾਵਾਰਕਟਸਾਰਾਦਿਨ੍ਤਿ ਏਤ੍ਥ ਭੁਮ੍ਮੇਕਵਚਨਂ. ‘‘ਸਂਹਾਰਿਮੇਸੂ’’ਤਿ ਇਮਿਨਾ ਸਮਾਨਾਧਿਕਰਣਤ੍ਤਾ ਬਹੁਵਚਨਪ੍ਪਸਙ੍ਗੇ ਵਚਨਵਿਪਲ੍ਲਾਸੇਨੇਤ੍ਥ ਏਕਵਚਨਨਿਦ੍ਦੇਸੋਤਿ ਦਟ੍ਠਬ੍ਬੋ. ਪਾਵਾਰੋ ਚ ਕਟਸਾਰੋ ਚ ਤੇ ਆਦਿ ਯਸ੍ਸਾਤਿ ਵਿਗ੍ਗਹੋ, ਨਿਦ੍ਧਾਰਣੇ ਚੇਤਂ ਭੁਮ੍ਮਂ. ਏਕਕਨ੍ਤਿ ਨਿਦ੍ਧਾਰਿਤਬ੍ਬਨਿਦਸ੍ਸਨਂ. ਏਕਮੇਵ ਏਕਕਂ. ਸਂਹਾਰਿਮੇਸੁ ਪਾਵਾਰਾਦੀਸੁ ਅਞ੍ਞਤਰਨ੍ਤਿ ਅਤ੍ਥੋ. ‘‘ਪਾਵਾਰੋਤਿ ਕੋਜਵਾਦਯੋ’’ਤਿ ਵਦਨ੍ਤਿ. ਕਟਸਾਰੋਤਿ ਕਟੋਯੇਵ. ਆਦਿ-ਸਦ੍ਦੇਨ ਅਤ੍ਥਰਿਤ੍ਵਾ ਸਯਨਾਰਹਂ ਸਬ੍ਬਂ ਸਙ੍ਗਣ੍ਹਾਤਿ. ਤੇਨੇਵਾਤਿ ਯਂ ਅਤ੍ਥਤਂ, ਤੇਨੇਵ. ਪਾਰੁਪਿਤ੍ਵਾ ਸਚੇ ਯਾ ਪਨ ਦ੍ਵੇ ਸਹੇਵ ਨਿਪਜ੍ਜਨ੍ਤਿ, ਤਾਸਂ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ. ਏਤ੍ਥ ਚ ਅਤ੍ਥਰਣਪਾਵੁਰਣਕਿਚ੍ਚੇ ਏਕਸ੍ਸੇਵ ਨਿਦ੍ਦਿਟ੍ਠਤ੍ਤਾ ਏਕਸ੍ਸ ਅਨ੍ਤਸ੍ਸ ਅਤ੍ਥਰਣਞ੍ਚ ਏਕਸ੍ਸ ਅਨ੍ਤਸ੍ਸ ਪਾਰੁਪਨਞ੍ਚ ਵਿਞ੍ਞਾਯਤਿ. ਯਥਾਹ ‘‘ਸਂਹਾਰਿਮਾਨਂ ਪਾਵਾਰਤ੍ਥਰਣਕਟਸਾਰਕਾਦੀਨਂ ਏਕਂ ਅਨ੍ਤਂ ਅਤ੍ਥਰਿਤ੍ਵਾ ਏਕਂ ਪਾਰੁਪਿਤ੍ਵਾ ਤੁਵਟ੍ਟੇਨ੍ਤੀਨਮੇਤਂ ਅਧਿਵਚਨ’’ਨ੍ਤਿ (ਪਾਚਿ. ਅਟ੍ਠ. ੯੩੭).

ਏਕਸ੍ਮਿਂ ਏਕਤ੍ਥਰਣੇ ਵਾ ਏਕਪਾਵੁਰਣੇ ਵਾ ਨਿਪਜ੍ਜਨੇ ਸਤਿ ਤਾਸਂ ਦ੍ਵਿਨ੍ਨਂ ਭਿਕ੍ਖੁਨੀਨਂ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਦ੍ਵਿਕਦੁਕ੍ਕਟਂ ਵੁਤ੍ਤਨ੍ਤਿ ¶ ‘‘ਨਾਨਤ੍ਥਰਣਪਾਵੁਰਣੇ ਏਕਤ੍ਥਰਣਪਾਵੁਰਣਸਞ੍ਞਾ…ਪੇ… ਵੇਮਤਿਕਾ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਚਿ. ੯੩੯) ਵੁਤ੍ਤਂ ਦੁਕ੍ਕਟਦ੍ਵਯਂ.

੨੨੫੨. ਵਵਤ੍ਥਾਨਂ ਨਿਦਸ੍ਸੇਤ੍ਵਾਤਿ ਮਜ੍ਝੇ ਕਾਸਾਵਂ ਵਾ ਕਤ੍ਤਰਯਟ੍ਠਿਂ ਵਾ ਅਨ੍ਤਮਸੋ ਕਾਯਬਨ੍ਧਨਮ੍ਪਿ ¶ ਠਪੇਤ੍ਵਾ ਨਿਪਜ੍ਜਨ੍ਤਿ, ਅਨਾਪਤ੍ਤੀਤਿ ਅਤ੍ਥੋ. ਸੇਸਂ ਸਮੁਟ੍ਠਾਨਾਦਿਵਿਧਾਨਂ. ਆਦਿਨਾਤਿ ਇਮਸ੍ਮਿਂਯੇਵ ਵਗ੍ਗੇ ਪਠਮਸਿਕ੍ਖਾਪਦੇਨ. ਤੁਲ੍ਯਨ੍ਤਿ ਸਮਾਨਂ.

ਦੁਤਿਯਂ.

੨੨੫੩. ਅਞ੍ਞਿਸ੍ਸਾ ਭਿਕ੍ਖੁਨਿਯਾ. ਅਫਾਸੁਕਾਰਣਾਤਿ ਅਫਾਸੁਕਰਣਹੇਤੁ. ਅਨਾਪੁਚ੍ਛਾਤਿ ਅਨਾਪੁਚ੍ਛਿਤ੍ਵਾ. ਤਸ੍ਸਾ ਪੁਰਤੋ ਚ ਚਙ੍ਕਮਨਾਦਯੋ ਯਦਿ ਕਰੇਯ੍ਯ, ਏਵਂ ਕਰੋਨ੍ਤਿਯਾ ਪਾਚਿਤ੍ਤਿਯਾਪਤ੍ਤਿ ਹੋਤੀਤਿ ਯੋਜਨਾ. ਚਙ੍ਕਮਨਾਦਯੋਤਿ ਏਤ੍ਥ ਆਦਿ-ਸਦ੍ਦੇਨ ‘‘ਤਿਟ੍ਠਤਿ ਵਾ ਨਿਸੀਦਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ ਉਦ੍ਦਿਸਤਿ ਵਾ ਉਦ੍ਦਿਸਾਪੇਤਿ ਵਾ ਸਜ੍ਝਾਯਂ ਵਾ ਕਰੋਤੀ’’ਤਿ (ਪਾਚਿ. ੯੪੩) ਪਦਭਾਜਨੇ ਵੁਤ੍ਤਾਨਂ ਸਙ੍ਗਹੋ.

੨੨੫੪. ਨਿਵਤ੍ਤਨਾਨਂ ਗਣਨਾਯਾਤਿ ਚਙ੍ਕਮਨ੍ਤਿਯਾ ਚਙ੍ਕਮਸ੍ਸ ਉਭਯਕੋਟਿਂ ਪਤ੍ਵਾ ਨਿਵਤ੍ਤਨ੍ਤਿਯਾ ਨਿਵਤ੍ਤਨਗਣਨਾਯ. ਪਯੋਗਤੋਯੇਵਾਤਿ ਪਯੋਗਗਣਨਾਯੇਵ, ਇਰਿਯਾਪਥਪਰਿਵਤ੍ਤਨਗਣਨਾਯੇਵਾਤਿ ਵੁਤ੍ਤਂ ਹੋਤਿ. ਦੋਸਾਤਿ ਪਾਚਿਤ੍ਤਿਯਾਪਤ੍ਤਿਯੋ.

੨੨੫੫. ਪਦਾਨਂ ਗਣਨਾਵਸਾਤਿ ਏਤ੍ਥ ਆਦਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਯਥਾਹ ‘‘ਪਦਾਦਿਗਣਨਾਯਾ’’ਤਿ (ਪਾਚਿ. ਅਟ੍ਠ. ੯੪੩). ਤਿਕਪਾਚਿਤ੍ਤਿਯਂ ਵੁਤ੍ਤਨ੍ਤਿ ਉਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਾ, ਵੇਮਤਿਕਾ, ਅਨੁਪਸਮ੍ਪਨ੍ਨਸਞ੍ਞਾਤਿ ਵਿਕਪ੍ਪਤ੍ਤਯਸ੍ਸ ਵਸੇਨ ਪਾਚਿਤ੍ਤਿਯਤ੍ਤਯਂ ਵੁਤ੍ਤਂ. ਸੇਸਾਯਾਤਿ ਅਨੁਪਸਮ੍ਪਨ੍ਨਾਯ.

੨੨੫੬. ਨ ¶ ਚ ਅਫਾਸੁਕਾਮਾਯਾਤਿ ਆਪੁਚ੍ਛਿਤ੍ਵਾ ਤਸ੍ਸਾ ਭਿਕ੍ਖੁਨਿਯਾ ਪੁਰਤੋ ਚਙ੍ਕਮਨਾਦੀਨਿ ਕਰੋਨ੍ਤਿਯਾ ਅਨਾਪਤ੍ਤੀਤਿ ਯੋਜਨਾ.

੨੨੫੭. ਕ੍ਰਿਯਾਕ੍ਰਿਯਨ੍ਤਿ ਚਙ੍ਕਮਨਾਦਿਕਰਣਂ ਕਿਰਿਯਂ. ਆਪੁਚ੍ਛਾਯ ਅਕਰਣਂ ਅਕਿਰਿਯਂ. ਪਾਪਮਾਨਸਨ੍ਤਿ ਅਕੁਸਲਚਿਤ੍ਤਂ.

ਤਤਿਯਂ.

੨੨੫੮-੯. ਅਨਨ੍ਤਰਾਯਾਤਿ ਵਕ੍ਖਮਾਨੇਸੁ ਰਾਜਨ੍ਤਰਾਯਾਦੀਸੁ ਦਸਸੁ ਅਨ੍ਤਰਾਯੇਸੁ ਅਞ੍ਞਤਰਰਹਿਤਾ ¶ ਭਿਕ੍ਖੁਨੀ. ਦੁਕ੍ਖਿਤਨ੍ਤਿ ਗਿਲਾਨਂ. ਯਥਾਹ ‘‘ਦੁਕ੍ਖਿਤਾ ਨਾਮ ਗਿਲਾਨਾ ਵੁਚ੍ਚਤੀ’’ਤਿ (ਪਾਚਿ. ੯੪੮). ਸਹਜੀਵਿਨਿਨ੍ਤਿ ਸਦ੍ਧਿਵਿਹਾਰਿਨਿਂ. ਯਥਾਹ ‘‘ਸਹਜੀਵਿਨੀ ਨਾਮ ਸਦ੍ਧਿਵਿਹਾਰਿਨੀ ਵੁਚ੍ਚਤੀ’’ਤਿ. ਅਞ੍ਞਾਯ ਵਾ ਨੁਪਟ੍ਠਾਪੇਯ੍ਯਾਤਿ ਅਞ੍ਞਾਯ ਭਿਕ੍ਖੁਨਿਯਾ, ਸਿਕ੍ਖਮਾਨਾਯ, ਸਾਮਣੇਰਿਯਾ ਵਾ ਗਿਹਿਨਿਯਾ ਵਾ ਉਪਟ੍ਠਾਨਂ ਨ ਕਾਰਾਪੇਯ੍ਯ. ਨੁਪਟ੍ਠੇਯ੍ਯ ਸਯਮ੍ਪਿ ਵਾਤਿ ਯਾ ਉਪਟ੍ਠਾਨਂ ਨ ਕਰੇਯ੍ਯ. ਧੁਰੇ ਨਿਕ੍ਖਿਤ੍ਤਮਤ੍ਤੇ ਵਾਤਿ ‘‘ਨੇਵ ਉਪਟ੍ਠੇਸ੍ਸਾਮਿ, ਨ ਉਪਟ੍ਠਾਪਨਾਯ ਉਸ੍ਸੁਕ੍ਕਂ ਕਰਿਸ੍ਸਾਮੀ’’ਤਿ ਧੁਰੇ ਉਸ੍ਸਾਹੇ ਨਿਕ੍ਖਿਤ੍ਤਮਤ੍ਤੇਯੇਵ. ਤਸ੍ਸਾਤਿ ਉਪਜ੍ਝਾਯਾਯ.

ਅਨ੍ਤੇਵਾਸਿਨਿਯਾ ਵਾਪੀਤਿ ਪਬ੍ਬਜ੍ਜਾਉਪਸਮ੍ਪਦਾਧਮ੍ਮਨਿਸ੍ਸਯਵਸੇਨ ਚਤੁਬ੍ਬਿਧਾਸੁ ਅਨ੍ਤੇਵਾਸਿਨੀਸੁ ਅਞ੍ਞਤਰਾਯ. ਇਤਰਾਯਾਤਿ ਅਨੁਪਸਮ੍ਪਨ੍ਨਾਯ.

੨੨੬੦. ਗਿਲਾਨਾਯਾਤਿ ਸਯਂ ਗਿਲਾਨਾਯ. ‘‘ਗਵੇਸਿਤ੍ਵਾ ਅਲਭਨ੍ਤਿਯਾ’’ਤਿ ਪਦਚ੍ਛੇਦੋ, ਅਞ੍ਞਂ ਉਪਟ੍ਠਾਯਿਕਂ ਪਰਿਯੇਸਿਤ੍ਵਾ ਅਲਭਮਾਨਾਯਾਤਿ ਅਤ੍ਥੋ. ‘‘ਆਪਦਾਸੁ ਉਮ੍ਮਤ੍ਤਿਕਾਦੀਨ’’ਨ੍ਤਿ ਪਦਚ੍ਛੇਦੋ. ਗਾਥਾਬਨ੍ਧਵਸੇਨ ਵਣ੍ਣਲੋਪੋਪਿ ਦਟ੍ਠਬ੍ਬੋ. ਆਪਦਾਸੂਤਿ ਤਥਾਰੂਪੇ ਉਪਦ੍ਦਵੇ ਸਤਿ. ਧੁਰਨਿਕ੍ਖੇਪਨੋਦਯਨ੍ਤਿ ¶ ਧੁਰਨਿਕ੍ਖੇਪਸਮੁਟ੍ਠਾਨਂ. ਯਦੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ.

ਚਤੁਤ੍ਥਂ.

੨੨੬੧-੨. ਪੁਗ੍ਗਲਿਕਸ੍ਸ ਅਤ੍ਤਾਯਤ੍ਤਪਰਾਯਤ੍ਤਵਸੇਨ ਅਨਿਯਮਿਤਤ੍ਤਾ ‘‘ਸਕ’’ਨ੍ਤਿ ਇਮਿਨਾ ਨਿਯਮੇਤਿ. ਸਕਂ ਪੁਗ੍ਗਲਿਕਨ੍ਤਿ ਅਤ੍ਤਨੋ ਪੁਗ੍ਗਲਿਕਂ. ਦਤ੍ਵਾਤਿ ਏਤ੍ਥ ‘‘ਭਿਕ੍ਖੁਨਿਯਾ’’ਤਿ ਸੇਸੋ. ਸਕਵਾਟਨ੍ਤਿ ਪਰਿਵਤ੍ਤਕਦ੍ਵਾਰਕਵਾਟਸਹਿਤਂ. ਉਪਸ੍ਸਯਨ੍ਤਿ ਗੇਹਂ. ਦ੍ਵਾਰਾਦੀਸੂਤਿ ਏਤ੍ਥ ਆਦਿ-ਸਦ੍ਦੇਨ ਗਬ੍ਭਪਮੁਖਾਨਂ ਸਙ੍ਗਹੋ, ਨਿਦ੍ਧਾਰਣੇ ਚੇਤਂ ਭੁਮ੍ਮਂ. ਬਹੂਨਿਪੀਤਿ ਨਿਦ੍ਧਾਰੇਤਬ੍ਬਨਿਦਸ੍ਸਨਂ. ਬਹੂਨਿਪਿ ਦ੍ਵਾਰਾਨਿ ਵਾ ਬਹੂ ਗਬ੍ਭੇ ਵਾ ਬਹੂਨਿ ਪਮੁਖਾਨਿ ਵਾ. ਤਨ੍ਤਿ ਯਸ੍ਸਾ ਉਪਸ੍ਸਯੋ ਦਿਨ੍ਨੋ, ਤਂ ਭਿਕ੍ਖੁਨਿਂ. ਨਿਕ੍ਕਡ੍ਢਨ੍ਤਿਯਾਤਿ ਅਤਿਕ੍ਕਾਮੇਨ੍ਤਿਯਾ. ਤਸ੍ਸਾਤਿ ਯਾ ਨਿਕ੍ਕਡ੍ਢਤਿ, ਤਸ੍ਸਾ.

੨੨੬੩. ਏਤ੍ਥਾਤਿ ਨਿਕ੍ਕਡ੍ਢਨੇ. ਏਸੇਵ ਨਯੋਤਿ ‘‘ਪਯੋਗਗਣਨਾਯ ਆਪਤ੍ਤੀ’’ਤਿ ਦਸ੍ਸਿਤਨਯੋ. ਏਤ੍ਥ ਪਯੋਗੋ ਨਾਮ ਆਣਾਪਨਂ, ਇਮਿਨਾ ‘‘ਏਕਾਯਾਣਤ੍ਤਿਯਾ ਅਨੇਕੇਸੁ ਦ੍ਵਾਰੇਸੁ ਅਤਿਕ੍ਕਾਮਿਤੇਸੁਪਿ ਏਕਾਵ ਆਪਤ੍ਤਿ ਹੋਤੀ’’ਤਿ ਏਵਮਾਦਿਕਂ ਅਟ੍ਠਕਥਾਗਤਵਿਨਿਚ੍ਛਯਂ (ਪਾਚਿ. ਅਟ੍ਠ. ੯੪੩, ੯੫੨ ਅਤ੍ਥਤੋ ਸਮਾਨਂ) ਸਙ੍ਗਣ੍ਹਾਤਿ.

੨੨੬੪. ਤੇਸੁ ¶ ਵਿਨਿਚ੍ਛਯੇਸੁ ਏਕਂ ਵਿਨਿਚ੍ਛਯਵਿਸੇਸਂ ਦਸ੍ਸੇਤੁਮਾਹ ‘‘ਏਤ੍ਤਕਾਵ ਇਮਂ ਦ੍ਵਾਰਾ’’ਤਿਆਦਿ. ਦ੍ਵਾਰਗਣਨਾਯ ਆਪਤ੍ਤਿਯੋ ਦ੍ਵਾਰਗਣਨਾਪਤ੍ਤਿਯੋ.

੨੨੬੫. ਅਕਵਾਟਮ੍ਹਾਤਿ ਅਕਵਾਟਬਨ੍ਧਤੋ ਉਪਸ੍ਸਯਾ ਨਿਕ੍ਕਡ੍ਢਨ੍ਤਿਯਾ ਦੁਕ੍ਕਟਨ੍ਤਿ ਯੋਜਨਾ. ਸੇਸਾਯਾਤਿ ਅਨੁਪਸਮ੍ਪਨ੍ਨਾਯ. ਤਿਕਦੁਕ੍ਕਟਨ੍ਤਿ ਅਨੁਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਾਯ, ਵੇਮਤਿਕਾਯ, ਅਨੁਪਸਮ੍ਪਨ੍ਨਸਞ੍ਞਾਯ ਚ ਵਸੇਨ ਤਿਕਦੁਕ੍ਕਟਂ. ਉਭਿਨ੍ਨਨ੍ਤਿ ਉਪਸਮ੍ਪਨ੍ਨਾਨੁਪਸਮ੍ਪਨ੍ਨਾਨਂ. ਪਰਿਕ੍ਖਾਰੇਸੂਤਿ ਪਤ੍ਤਚੀਵਰਾਦੀਸੁ ਪਰਿਕ੍ਖਾਰੇਸੁ ¶ . ਸਬ੍ਬਤ੍ਥਾਤਿ ਸਬ੍ਬੇਸੁ ਪਯੋਗੇਸੁ, ਨਿਕ੍ਕਡ੍ਢਿਯਮਾਨੇਸੁ, ਨਿਕ੍ਕਡ੍ਢਾਪਿਯਮਾਨੇਸੁ ਚਾਤਿ ਵੁਤ੍ਤਂ ਹੋਤਿ.

੨੨੬੬. ਏਤ੍ਥ ਇਮਸ੍ਮਿਂ ਸਿਕ੍ਖਾਪਦੇ ਸਮੁਟ੍ਠਾਨਾਦਿਵਿਨਿਚ੍ਛਯੇਨ ਸਹ ਸੇਸਂ ਵਿਨਿਚ੍ਛਯਜਾਤਂ ਅਸੇਸੇਨ ਸਬ੍ਬਪ੍ਪਕਾਰੇਨ ਸਙ੍ਘਿਕਾ ਵਿਹਾਰਸ੍ਮਾ ਨਿਕ੍ਕਡ੍ਢਨਸਿਕ੍ਖਾਪਦੇਨ ਸਮਂ ਮਤਂ ‘‘ਸਦਿਸ’’ਨ੍ਤਿ ਸਲ੍ਲਕ੍ਖਿਤਨ੍ਤਿ ਯੋਜਨਾ.

ਪਞ੍ਚਮਂ.

੨੨੬੭. ਛਟ੍ਠੇਤਿ ‘‘ਯਾ ਪਨ ਭਿਕ੍ਖੁਨੀ ਸਂਸਟ੍ਠਾ ਵਿਹਰੇਯ੍ਯ ਗਹਪਤਿਨਾ ਵਾ ਗਹਪਤਿਪੁਤ੍ਤੇਨ ਵਾ’’ਤਿਆਦਿਮਾਤਿਕਾਯ (ਪਾਚਿ. ੯੫੬) ਨਿਦ੍ਦਿਟ੍ਠੇ ਛਟ੍ਠਸਿਕ੍ਖਾਪਦੇ. ਇਧ ਵਤ੍ਤਬ੍ਬਨ੍ਤਿ ਇਮਸ੍ਮਿਂ ਵਿਨਯਵਿਨਿਚ੍ਛਯੇ ਕਥੇਤਬ੍ਬਂ. ਅਰਿਟ੍ਠਸ੍ਸ ਸਿਕ੍ਖਾਪਦੇਨਾਤਿ ਅਰਿਟ੍ਠਸਿਕ੍ਖਾਪਦੇਨ. ਵਿਨਿਚ੍ਛਯੋਤਿ ਸਮੁਟ੍ਠਾਨਾਦਿਕੋ.

ਛਟ੍ਠਂ.

੨੨੬੮. ਸਾਸਙ੍ਕਸਮ੍ਮਤੇਤਿ ਏਤ੍ਥ ‘‘ਸਪ੍ਪਟਿਭਯੇ’’ਤਿ ਸੇਸੋ. ਉਭਯਮ੍ਪਿ ਹੇਟ੍ਠਾ ਵੁਤ੍ਤਤ੍ਥਮੇਵ. ਅਨ੍ਤੋਰਟ੍ਠੇਤਿ ਯਸ੍ਸ ਵਿਜਿਤੇ ਵਿਹਰਤਿ, ਤਸ੍ਸੇਵ ਰਟ੍ਠੇ. ਸਾਸਙ੍ਕਸਮ੍ਮਤੇ ਸਪ੍ਪਟਿਭਯੇ ਅਨ੍ਤੋਰਟ੍ਠੇ ਸਤ੍ਥੇਨ ਵਿਨਾ ਚਾਰਿਕਂ ਚਰਨ੍ਤਿਯਾ ਭਿਕ੍ਖੁਨਿਯਾ ਆਪਤ੍ਤਿ ਸਿਯਾਤਿ ਯੋਜਨਾ.

੨੨੬੯. ਏਵਂ ਚਰਨ੍ਤਿਯਾ ਸਗਾਮਕਟ੍ਠਾਨੇ ਗਾਮਨ੍ਤਰਪ੍ਪਵੇਸੇ ਚ ਅਗਾਮਕੇ ਅਰਞ੍ਞੇ ਅਦ੍ਧਯੋਜਨੇ ਚ ਵਿਨਯਞ੍ਞੁਨਾ ਭਿਕ੍ਖੁਨਾ ਪਾਚਿਤ੍ਤਿਯਨਯੋ ਪਾਚਿਤ੍ਤਿਯਾਪਤ੍ਤਿਵਿਧਾਨਕ੍ਕਮੋ ਞੇਯ੍ਯੋ ਞਾਤਬ੍ਬੋਤਿ ਯੋਜਨਾ.

੨੨੭੦. ਸਹ ¶ ਸਤ੍ਥੇਨ ਚਰਨ੍ਤਿਯਾ ਨ ਦੋਸੋਤਿ ਯੋਜਨਾ. ਖੇਮਟ੍ਠਾਨੇ ਚਰਨ੍ਤਿਯਾ, ਆਪਦਾਸੁ ਵਾ ਚਰਨ੍ਤਿਯਾ ਨ ਦੋਸੋਤਿ ਯੋਜਨਾ.

ਸਤ੍ਤਮਂ.

੨੨੭੧. ਅਟ੍ਠਮੇ ¶ ਨਵਮੇ ਵਾਪੀਤਿ ‘‘ਯਾ ਪਨ ਭਿਕ੍ਖੁਨੀ ਤਿਰੋਰਟ੍ਠੇ’’ਤਿਆਦਿਕੇ (ਪਾਚਿ. ੯੬੬) ਅਟ੍ਠਮਸਿਕ੍ਖਾਪਦੇ ਚ ‘‘ਯਾ ਪਨ ਭਿਕ੍ਖੁਨੀ ਅਨ੍ਤੋਵਸ੍ਸਂ ਚਾਰਿਕਂ ਚਰੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੯੭੦) ਵੁਤ੍ਤਨਵਮਸਿਕ੍ਖਾਪਦੇ ਚ. ਅਨੁਤ੍ਤਾਨਂ ਨ ਵਿਜ੍ਜਤਿ, ਸਬ੍ਬਂ ਉਤ੍ਤਾਨਮੇਵ, ਤਸ੍ਮਾ ਏਤ੍ਥ ਮਯਾ ਨ ਵਿਚਾਰੀਯਤੀਤਿ ਅਧਿਪ੍ਪਾਯੋ.

ਅਟ੍ਠਮਨਵਮਾਨਿ.

੨੨੭੨. ‘‘ਯਾ ਪਨ ਭਿਕ੍ਖੁਨੀ ਵਸ੍ਸਂਵੁਤ੍ਥਾ ਚਾਰਿਕਂ ਨ ਪਕ੍ਕਮੇਯ੍ਯ ਅਨ੍ਤਮਸੋ ਛਪ੍ਪਞ੍ਚਯੋਜਨਾਨਿਪਿ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੯੭੪) ਵੁਤ੍ਤਸਿਕ੍ਖਾਪਦੇ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਪਾਚਿਤ੍ਤੀ’’ਤਿਆਦਿ. ਅਹਂ ਨ ਗਮਿਸ੍ਸਾਮਿ ਨ ਪਕ੍ਕਮਿਸ੍ਸਾਮੀਤਿ ਧੁਰਨਿਕ੍ਖੇਪੇ ਕਤੇ ਪਾਚਿਤ੍ਤੀਤਿ ਯੋਜਨਾ. ਤਥਾਤਿ ਪਾਚਿਤ੍ਤਿ.

੨੨੭੩. ਵਸ੍ਸਂਵੁਤ੍ਥਾਯ ਪਵਾਰੇਤ੍ਵਾ ਅਨ੍ਤਮਸੋ ਪਞ੍ਚ ਯੋਜਨਾਨਿ ਗਨ੍ਤੁਂ ਵਟ੍ਟਤਿ. ਏਤ੍ਥ ਅਪਿ-ਸਦ੍ਦਸ੍ਸ ਸਮ੍ਭਾਵਨਤ੍ਥਤਂ ਦਸ੍ਸੇਤੁਮਾਹ ‘‘ਛਸੂ’’ਤਿਆਦਿ. ਇਧ ਇਮਸ੍ਮਿਂ ਅਨਾਪਤ੍ਤਿਵਾਰੇ ਛਸੁ ਯੋਜਨੇਸੁ ਯਦਤ੍ਥਿ ਵਤ੍ਤਬ੍ਬਂ, ਤਂ ਕਿਨ੍ਨੁ ਨਾਮ ਸਿਯਾ, ਨਤ੍ਥਿ ਕਿਞ੍ਚਿ ਵਤ੍ਤਬ੍ਬਨ੍ਤਿ ਅਤ੍ਥੋ. ਪਵਾਰੇਤ੍ਵਾ ਛ ਯੋਜਨਾਨਿ ਗਚ੍ਛਨ੍ਤਿਯਾ ਅਨਾਪਤ੍ਤਿਭਾਵੋ ਅਵੁਤ੍ਤਸਿਦ੍ਧੋਵਾਤਿ ਦੀਪੇਤਿ.

੨੨੭੪. ਤੀਣਿ ਯੋਜਨਾਨਿ. ਤੇਨੇਵਾਤਿ ਯੇਨ ਗਤਾ, ਤੇਨੇਵ ਮਗ੍ਗੇਨ. ਅਞ੍ਞੇਨ ਮਗ੍ਗੇਨਾਤਿ ਗਤਮਗ੍ਗਤੋ ਅਞ੍ਞੇਨ ਪਥੇਨ.

੨੨੭੫. ਦਸਵਿਧੇ ਅਨ੍ਤਰਾਯਸ੍ਮਿਂ ਸਤੀਤਿ ਵਕ੍ਖਮਾਨੇਸੁ ਅਨ੍ਤਰਾਯੇਸੁ ਅਞ੍ਞਤਰਸ੍ਮਿਂ ਸਤਿ. ਤਸ੍ਸਾ ਅਨਾਪਤ੍ਤੀਤਿ ਯੋਜਨਾ. ਆਪਦਾਸੂਤਿ ਅਟ੍ਟਾਦਿਕਾਰਣੇਨ ਕੇਨਚਿ ਪਲਿਬੁਦ੍ਧਾਦਿਭਾਵਸਙ੍ਖਾਤਾਸੁ ਆਪਦਾਸੁ. ਗਿਲਾਨਾਯਾਤਿ ਸਯਂ ਗਿਲਾਨਾਯ. ਦੁਤਿਯਾਯ ਭਿਕ੍ਖੁਨਿਯਾ ਅਲਾਭੇ ਵਾ ਅਪਕ੍ਕਮਨ੍ਤਿਯਾ ਅਨਾਪਤ੍ਤਿ.

੨੨੭੬. ਰਾਜਾ ¶ ¶ ਚ ਚੋਰਾ ਚ ਅਮਨੁਸ੍ਸਾ ਚ ਅਗ੍ਗਿ ਚ ਤੋਯਞ੍ਚ ਵਾਲ਼ਾ ਚ ਸਰੀਸਪਾ ਚਾਤਿ ਵਿਗ੍ਗਹੋ. ਮਨੁਸ੍ਸੋਤਿ ਏਤ੍ਥ ਗਾਥਾਬਨ੍ਧਵਸੇਨ ਪੁਬ੍ਬਪਦਲੋਪੋ ‘‘ਲਾਬੂਨਿ ਸੀਦਨ੍ਤੀ’’ਤਿਆਦੀਸੁ (ਜਾ. ੧.੧.੭੭) ਵਿਯ. ਜੀਵਿਤਞ੍ਚ ਬ੍ਰਹ੍ਮਚਰਿਯਾ ਚ ਜੀਵਿਤਬ੍ਰਹ੍ਮਚਰਿਯਨ੍ਤਿ ਸਮਾਹਾਰਦ੍ਵਨ੍ਦੇ ਸਮਾਸੋ, ਤਸ੍ਸ ਜੀਵਿਤਬ੍ਰਹ੍ਮਚਰਿਯਸ੍ਸ. ਅਨ੍ਤਰਾਯਾ ਏਵ ਅਨ੍ਤਰਾਯਿਕਾ. ਏਤੇਸਂ ਦਸਨ੍ਨਂ ਅਞ੍ਞਤਰਸ੍ਮਿਂ ਅਪਕ੍ਕਮਨ੍ਤਿਯਾ ਅਨਾਪਤ੍ਤਿ. ਯਥਾਹ ‘‘ਅਨ੍ਤਰਾਯੇਤਿ ਦਸਵਿਧੇ ਅਨ੍ਤਰਾਯੇ. ‘ਪਰਂ ਗਚ੍ਛਿਸ੍ਸਾਮੀ’ਤਿ ਨਿਕ੍ਖਨ੍ਤਾ, ਨਦਿਪੂਰੋ ਪਨ ਆਗਤੋ, ਚੋਰਾ ਵਾ ਮਗ੍ਗੇ ਹੋਨ੍ਤਿ, ਮੇਘੋ ਵਾ ਉਟ੍ਠਾਤਿ, ਨਿਵਤ੍ਤਿਤੁਂ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੯੭੬).

੨੨੭੭. ਅਪਕ੍ਕਮਨਂ ਅਕ੍ਰਿਯਂ. ਅਨਾਦਰਿਯੇਨ ਆਪਜ੍ਜਨਤੋ ਆਹ ‘‘ਦੁਕ੍ਖਵੇਦਨ’’ਨ੍ਤਿ.

ਦਸਮਂ.

ਤੁਵਟ੍ਟਵਗ੍ਗੋ ਚਤੁਤ੍ਥੋ.

੨੨੭੮-੮੦. ਰਾਜਾਗਾਰਨ੍ਤਿ ਰਞ੍ਞੋ ਕੀਲ਼ਨਘਰਂ. ਚਿਤ੍ਤਾਗਾਰਨ੍ਤਿ ਕੀਲ਼ਨਚਿਤ੍ਤਸਾਲਂ. ਆਰਾਮਨ੍ਤਿ ਕੀਲ਼ਨਉਪਵਨਂ. ਕੀਲ਼ੁਯ੍ਯਾਨਨ੍ਤਿ ਕੀਲ਼ਨਤ੍ਥਾਯ ਕਤਂ ਉਯ੍ਯਾਨਂ. ਕੀਲ਼ਾਵਾਪਿਨ੍ਤਿ ਏਤ੍ਥ ਕਿਞ੍ਚਾਪਿ ਪਾਲ਼ਿਯਂ (ਪਾਚਿ. ੯੭੯) ਪੋਕ੍ਖਰਣੀ ਵੁਤ੍ਤਾ, ਸਾ ਪਨ ਸਬ੍ਬਜਲਾਸਯਾਨਂ ਕੀਲ਼ਾਯ ਕਤਾਨਂ ਉਪਲਕ੍ਖਣਵਸੇਨ ਵੁਤ੍ਤਾਤਿ ਆਹ ‘‘ਕੀਲ਼ਾਵਾਪਿ’’ਨ੍ਤਿ, ਕੀਲ਼ਨਤ੍ਥਾਯ ਕਤਵਾਪਿਨ੍ਤਿ ਅਤ੍ਥੋ. ‘‘ਨਾਨਾਕਾਰ’’ਨ੍ਤਿ ਇਦਂ ਯਥਾਵੁਤ੍ਤਪਦੇਹਿ ਪਚ੍ਚੇਕਂ ਯੋਜੇਤਬ੍ਬਂ. ਸਬ੍ਬਸਙ੍ਗਾਹਿਕਵਸੇਨ ‘‘ਤਾਨੀ’’ਤਿ ਵੁਤ੍ਤਂ. ਨਾਨਾਕਾਰਂ ਰਾਜਾਗਾਰਂ ਚਿਤ੍ਤਾਗਾਰਂ ਆਰਾਮਂ ਕੀਲ਼ੁਯ੍ਯਾਨਂ ਵਾ ਕੀਲ਼ਾਵਾਪਿਂ ਦਟ੍ਠੁਂ ਗਚ੍ਛਨ੍ਤੀਨਂ ਤਾਨਿ ਸਬ੍ਬਾਨਿ ਏਕਤੋ ਦਟ੍ਠੁਂ ਗਚ੍ਛਨ੍ਤੀਨਂ ਤਾਸਂ ਭਿਕ੍ਖੁਨੀਨਂ ਪਦੇ ਪਦੇ ਦੁਕ੍ਕਟਂ ਮੁਨਿਨਾ ਨਿਦ੍ਦਿਟ੍ਠਨ੍ਤਿ ਯੋਜਨਾ.

ਪਞ੍ਚਪੀਤਿ ¶ ਰਾਜਾਗਾਰਾਦੀਨਿ ਪਞ੍ਚਪਿ. ਏਕਾਯੇਵ ਪਾਚਿਤ੍ਤਿ ਆਪਤ੍ਤਿ ਪਰਿਦੀਪਿਤਾਤਿ ਯੋਜਨਾ. ਤਂ ਤਂ ਦਿਸਾਭਾਗਂ ਗਨ੍ਤ੍ਵਾ ਪਸ੍ਸਨ੍ਤਿ ਚੇ, ਪਾਟੇਕ੍ਕਾਪਤ੍ਤਿਯੋ ਪਯੋਗਗਣਨਾਯ ਸਿਯੁਨ੍ਤਿ ਯੋਜਨਾ.

੨੨੮੧. ਗਮਨਬਾਹੁਲ੍ਲੇਨ ਆਪਤ੍ਤਿਬਾਹੁਲ੍ਲਂ ਪਕਾਸੇਤ੍ਵਾ ਗੀਵਾਪਰਿਵਤ੍ਤਨਸਙ੍ਖਾਤੇਨ ਪਯੋਗਬਾਹੁਲ੍ਲੇਨਾਪਿ ¶ ਆਪਤ੍ਤਿਬਾਹੁਲ੍ਲਂ ਪਕਾਸੇਤੁਮਾਹ ‘‘ਪਯੋਗਬਹੁਤਾਯਾਪਿ, ਪਾਚਿਤ੍ਤਿਬਹੁਤਾ ਸਿਯਾ’’ਤਿ. ਸਬ੍ਬਤ੍ਥਾਤਿ ਯਤ੍ਥ ਭਿਕ੍ਖੁਨਿਯਾ ਪਾਚਿਤ੍ਤਿਯਂ ਵੁਤ੍ਤਂ, ਤਤ੍ਥ ਸਬ੍ਬਤ੍ਥ.

੨੨੮੨. ‘‘ਅਵਸੇਸੋਪਿ ਅਨਾਪਤ੍ਤੀ’’ਤਿ ਪਦਚ੍ਛੇਦੋ. ਅਨਾਪਤ੍ਤਿ ਚ ਕਥਾਮਗ੍ਗੋ ਚ ਅਨਾਪਤ੍ਤਿਕਥਾਮਗ੍ਗੋ, ਤੇਸਂ ਵਿਨਿਚ੍ਛਯੋ ਅਨਾਪਤ੍ਤਿਕਥਾਮਗ੍ਗਵਿਨਿਚ੍ਛਯੋ, ‘‘ਅਨਾਪਤ੍ਤਿ ਆਰਾਮੇ ਠਿਤਾ ਪਸ੍ਸਤੀ’’ਤਿਆਦਿਕੋ (ਪਾਚਿ. ੯੮੧) ਅਨਾਪਤ੍ਤਿਵਿਨਿਚ੍ਛਯੋ ਚ ਅਟ੍ਠਕਥਾਗਤੋ (ਪਾਚਿ. ਅਟ੍ਠ. ੯੮੧) ਅਵਸੇਸਵਿਨਿਚ੍ਛਯੋ ਚਾਤਿ ਅਤ੍ਥੋ. ‘‘ਆਰਾਮੇ ਠਿਤਾ’’ਤਿ ਏਤੇਨ ਅਜ੍ਝਾਰਾਮੇ ਰਾਜਾਗਾਰਾਦੀਨਿ ਕਰੋਨ੍ਤਿ, ਤਾਨਿ ਪਸ੍ਸਨ੍ਤਿਯਾ ਅਨਾਪਤ੍ਤੀਤਿ ਅਯਮਨਾਪਤ੍ਤਿਵਾਰੋ ਦਸ੍ਸਿਤੋ. ਏਤੇਨੇਵ ਅਨ੍ਤੋਆਰਾਮੇ ਤਤ੍ਥ ਤਤ੍ਥ ਗਨ੍ਤ੍ਵਾ ਨਚ੍ਚਾਦੀਨਿ ਵਿਯ ਰਾਜਾਗਾਰਾਦੀਨਿਪਿ ਪਸ੍ਸਿਤੁਂ ਲਭਤੀਤਿਪਿ ਸਿਦ੍ਧਂ. ਆਦਿ-ਸਦ੍ਦੇਨ ‘‘ਪਿਣ੍ਡਪਾਤਾਦੀਨਂ ਅਤ੍ਥਾਯ ਗਚ੍ਛਨ੍ਤਿਯਾ ਮਗ੍ਗੇ ਹੋਨ੍ਤਿ, ਤਾਨਿ ਪਸ੍ਸਤਿ, ਅਨਾਪਤ੍ਤਿ. ਰਞ੍ਞੋ ਸਨ੍ਤਿਕਂ ਕੇਨਚਿ ਕਰਣੀਯੇਨ ਗਨ੍ਤ੍ਵਾ ਪਸ੍ਸਤਿ, ਅਨਾਪਤ੍ਤਿ. ਕੇਨਚਿ ਉਪਦ੍ਦੁਤਾ ਪਵਿਸਿਤ੍ਵਾ ਪਸ੍ਸਤਿ, ਅਨਾਪਤ੍ਤੀ’’ਤਿ ਏਤੇ ਅਨਾਪਤ੍ਤਿਵਾਰਾ ਸਙ੍ਗਹਿਤਾ. ਨਚ੍ਚਦਸ੍ਸਨ…ਪੇ… ਸਹਾਤਿ ਸਮੁਟ੍ਠਾਨਾਦਿਨਾ ਵਿਨਿਚ੍ਛਯੇਨ ਸਹ ਨਚ੍ਚਦਸ੍ਸਨਸਿਕ੍ਖਾਪਦਸਦਿਸੋਵ.

ਪਠਮਂ.

੨੨੮੩. ਮਾਨਤੋ ¶ ਪਮਾਣਤੋ ਅਤੀਤਾ ਅਪੇਤਾ ਮਾਨਾਤੀਤਾ, ਆਸਨ੍ਦੀ, ਤਂ. ਵਾਲ਼ੇਹਿ ਉਪੇਤੋ ਵਾਲ਼ੂਪੇਤੋ, ਪਲ੍ਲਙ੍ਕੋ, ਤਂ. ‘‘ਆਸਨ੍ਦੀ ਨਾਮ ਅਤਿਕ੍ਕਨ੍ਤਪ੍ਪਮਾਣਾ ਵੁਚ੍ਚਤੀ’’ਤਿ ਵਚਨਤੋ ਹੇਟ੍ਠਾ ਅਟ੍ਟਨਿਯਾ ਵਡ੍ਢਕਿਹਤ੍ਥਤੋ ਉਚ੍ਚਤਰਪਾਦੋ ਆਯਾਮਚਤੁਰਸ੍ਸੋ ਮਞ੍ਚਪੀਠਵਿਸੇਸੋ ਆਸਨ੍ਦੀ ਨਾਮ ਸਮਚਤੁਰਸ੍ਸਾਨਂ ਅਤਿਕ੍ਕਨ੍ਤਪ੍ਪਮਾਣਾਨਮ੍ਪਿ ਅਨੁਞ੍ਞਾਤਤ੍ਤਾ. ‘‘ਪਲ੍ਲਙ੍ਕੋ ਨਾਮ ਆਹਰਿਮੇਹਿ ਵਾਲ਼ੇਹਿ ਕਤੋ’’ਤਿ (ਪਾਚਿ. ੯੮੪) ਵਚਨਤੋ ਪਮਾਣਯੁਤ੍ਤੋਪਿ ਏਵਰੂਪੋ ਨ ਵਟ੍ਟਤਿ. ਆਹਰਿਤ੍ਵਾ ਯਥਾਨੁਰੂਪਟ੍ਠਾਨੇ ਠਪੇਤਬ੍ਬਵਾਲ਼ਰੂਪਾਨਿ ਆਹਰਿਮਵਾਲ਼ਾ ਨਾਮ, ਸਂਹਰਿਮਵਾਲ਼ਰੂਪਯੁਤ੍ਤੋਤਿ ਵੁਤ੍ਤਂ ਹੋਤਿ. ਮਾਨਾਤੀਤਂ ਆਸਨ੍ਦਿਂ ਵਾ ਵਾਲ਼ੂਪੇਤਂ ਪਲ੍ਲਙ੍ਕਂ ਵਾ ਸੇਵਨ੍ਤੀਨਂ ਅਭਿਨਿਸੀਦਨ੍ਤੀਨਂ, ਅਭਿਨਿਪਜ੍ਜਨ੍ਤੀਨਞ੍ਚ ਯਾਸਂ ਭਿਕ੍ਖੁਨੀਨਂ ਸਤ੍ਥਾ ਪਾਚਿਤ੍ਤਿਯਾਪਤ੍ਤਿਂ ਆਹ.

੨੨੮੪. ਤਾਸਂ ਨਿਸੀਦਨਸ੍ਸਾਪਿ ਨਿਪਜ੍ਜਨਸ੍ਸਾਪਿ ਪਯੋਗਬਾਹੁਲ੍ਲਵਸੇਨ ਪਾਚਿਤ੍ਤਿਯਾਨਂ ਗਣਨਾ ਹੋਤਿ ਇਤਿ ਏਵਂ ਨਿਦ੍ਦਿਟ੍ਠਾ ਏਵਂ ਅਯਂ ਗਣਨਾ ਅਚ੍ਚਨ੍ਤਯਸੇਨ ਅਨਨ੍ਤਪਰਿਵਾਰੇਨ ਭਗਵਤਾ ਵੁਤ੍ਤਾਤਿ ¶ ਯੋਜਨਾ. ਏਤ੍ਥ ਚ ਇਚ੍ਚੇਵਨ੍ਤਿ ਨਿਪਾਤਸਮੁਦਾਯੋ, ਇਤਿ-ਸਦ੍ਦੋ ਨਿਦਸ੍ਸਨੇ, ਏਵਂ-ਸਦ੍ਦੋ ਇਦਮਤ੍ਥੇ ਦਟ੍ਠਬ੍ਬੋ.

੨੨੮੫. ਪਾਦੇ ਆਸਨ੍ਦਿਯਾ ਛੇਤ੍ਵਾਤਿ ਆਸਨ੍ਦਿਯਾ ਪਾਦੇ ਪਮਾਣਤੋ ਅਧਿਕਟ੍ਠਾਨਛਿਨ੍ਦਨੇਨ ਛੇਤ੍ਵਾ. ਪਲ੍ਲਙ੍ਕਸ੍ਸ ਪਾਦੇ ਵਾਲ਼ਕਾ ਪਲ੍ਲਙ੍ਕਵਾਲ਼ਕਾ, ਤੇ ਹਿਤ੍ਵਾ ਅਪਨੇਤ੍ਵਾ, ਅਨਾਪਤ੍ਤੀਤਿ ਸੇਵਨ੍ਤੀਨਂ ਅਨਾਪਤ੍ਤਿ.

ਦੁਤਿਯਂ.

੨੨੮੬-੭. ਛਨ੍ਨਨ੍ਤਿ ਖੋਮਾਦੀਨਂ ਛਨ੍ਨਂ, ਨਿਦ੍ਧਾਰਣੇ ਸਾਮਿਵਚਨਂ. ਅਞ੍ਞਤਰਂ ਸੁਤ੍ਤਨ੍ਤਿ ਨਿਦ੍ਧਾਰਿਤਬ੍ਬਨਿਦਸ੍ਸਨਂ. ਹਤ੍ਥਾਤਿ ਹਤ੍ਥੇਨ, ਕਰਣਤ੍ਥੇ ਚੇਤਂ ਨਿਸ੍ਸਕ੍ਕਵਚਨਂ. ਅਞ੍ਚਿਤਨ੍ਤਿ ਹਤ੍ਥਾਯਾਮੇਨ ਆਕਡ੍ਢਿਤਂ ¶ . ਤਸ੍ਮਿਨ੍ਤਿ ਤਸ੍ਮਿਂ ਅਞ੍ਛਿਤੇ ਸੁਤ੍ਤਪ੍ਪਦੇਸੇ. ਤਕ੍ਕਮ੍ਹੀਤਿ ਕਨ੍ਤਨਸੂਚਿਮ੍ਹਿ. ਵੇਠਿਤੇਤਿ ਪਲਿਵੇਠਿਤੇ.

ਸੁਤ੍ਤਕਨ੍ਤਨਤੋ ਸਬ੍ਬਪੁਬ੍ਬਪਯੋਗੇਸੂਤਿ ਸੁਤ੍ਤਕਨ੍ਤਨਤੋ ਪੁਬ੍ਬੇਸੁ ਕਪ੍ਪਾਸਵਿਚਿਨਨਾਦਿਸਬ੍ਬਪਯੋਗੇਸੁ. ਹਤ੍ਥਵਾਰਤੋਤਿ ਹਤ੍ਥਵਾਰਗਣਨਾਯ. ਯਥਾਹ ‘‘ਕਪ੍ਪਾਸਵਿਚਿਨਨਂ ਆਦਿਂ ਕਤ੍ਵਾ ਸਬ੍ਬਪੁਬ੍ਬਪਯੋਗੇਸੁ ਹਤ੍ਥਵਾਰਗਣਨਾਯ ਦੁਕ੍ਕਟ’’ਨ੍ਤਿ (ਪਾਚਿ. ਅਟ੍ਠ. ੯੮੮).

੨੨੮੮. ਕਨ੍ਤਿਤਂ ਸੁਤ੍ਤਨ੍ਤਿ ਪਠਮਮੇਵ ਕਨ੍ਤਿਤਂ ਦਸਿਕਸੁਤ੍ਤਾਦਿਂ. ਪੁਨ ਕਨ੍ਤਨ੍ਤਿਯਾਤਿ ਕੋਟਿਯਾ ਕੋਟਿਂ ਸਙ੍ਘਾਟੇਤ੍ਵਾ ਪੁਨ ਕਨ੍ਤਨ੍ਤਿਯਾ.

ਤਤਿਯਂ.

੨੨੮੯. ਤਣ੍ਡੁਲਾਨਂ ਕੋਟ੍ਟਨਂ ਤੁ ਆਦਿਂ ਕਤ੍ਵਾ ਗਿਹੀਨਂ ਵੇਯ੍ਯਾਵਚ੍ਚਂ ਕਰੋਨ੍ਤਿਯਾ ਸਬ੍ਬਪੁਬ੍ਬਪਯੋਗੇਸੁ ਦੁਕ੍ਕਟਨ੍ਤਿ ਯੋਜਨਾ.

੨੨੯੦. ਯਾਗੁਆਦਿਸੁ ਨਿਪ੍ਫਾਦੇਤਬ੍ਬੇਸੁ ਤਦਾਧਾਰਾਨਿ ਭਾਜਨਾਨਿ ਗਣੇਤ੍ਵਾਵ ਪਾਚਿਤ੍ਤਿਂ ਪਰਿਦੀਪਯੇ, ਖਜ੍ਜਕਾਦੀਸੁ ਰੂਪਾਨਂ ਗਣਨਾਯ ਪਾਚਿਤ੍ਤਿਂ ਪਰਿਦੀਪਯੇਤਿ ਯੋਜਨਾ. ਯਾਗੁਆਦਿਸੂਤਿ ਏਤ੍ਥ ¶ ਆਦਿ-ਸਦ੍ਦੇਨ ਭਤ੍ਤਸੂਪਾਦੀਨਂ ਸਙ੍ਗਹੋ. ਖਜ੍ਜਕਾਦੀਸੂਤਿ ਆਦਿ-ਸਦ੍ਦੇਨ ਮਚ੍ਛਮਂਸਾਦਿਉਤ੍ਤਰਿਭਙ੍ਗਾਨਂ ਸਙ੍ਗਹੋ.

੨੨੯੧. ‘‘ਸਚੇਪਿ ਮਾਤਾਪਿਤਰੋ ਆਗਚ੍ਛਨ੍ਤਿ, ਯਂਕਿਞ੍ਚਿ ਬੀਜਨਿਂ ਵਾ ਸਮ੍ਮਜ੍ਜਨਿਦਣ੍ਡਂ ਵਾ ਕਾਰਾਪੇਤ੍ਵਾ ਵੇਯ੍ਯਾਵਚ੍ਚਕਰਟ੍ਠਾਨੇ ਠਪੇਤ੍ਵਾਵ ਯਂ ਕਿਞ੍ਚਿ ਪਚਿਤੁਂ ਵਟ੍ਟਤੀ’’ਤਿ ਅਟ੍ਠਕਥਾਗਤਂ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਸਚੇ’’ਤਿਆਦਿ. ਸਚੇਤਿ ਏਤ੍ਥ ‘‘ਮਾਤਾਪਿਤਰੋ ਆਗਚ੍ਛਨ੍ਤੀ’’ਤਿ ਸੇਸੋ. ਅਤ੍ਤਨੋ ਏਵਮਾਗਤਾਨਂ ਮਾਤਾਪਿਤੂਨਮ੍ਪਿ ¶ ਕਿਞ੍ਚਿ ਕਮ੍ਮਂ ਅਕਾਰੇਤ੍ਵਾ ਕਿਞ੍ਚਿ ਕਮ੍ਮਂ ਕਾਤੁਂ ਨ ਵਟ੍ਟਤੀਤਿ ਯੋਜਨਾ. ਅਪਿ-ਸਦ੍ਦੋ ਸਮ੍ਭਾਵਨੇ, ਤੇਨ ਅਞ੍ਞੇਸਂ ਕਥਾਯੇਵ ਨਤ੍ਥੀਤਿ ਦੀਪੇਤਿ.

੨੨੯੨-੩. ਸਙ੍ਘਸ੍ਸ ਯਾਗੁਪਾਨੇ ਵੇਯ੍ਯਾਵਚ੍ਚਂ ਕਰੋਨ੍ਤਿਯਾ ਅਨਾਪਤ੍ਤੀਤਿ ਯੋਜਨਾ. ‘‘ਸਙ੍ਘਭਤ੍ਤੇਪੀ’’ਤਿਆਦੀਸੁਪਿ ਏਸੇਵ ਨਯੋ. ਅਤ੍ਤਨੋ ਵੇਯ੍ਯਾਵਚ੍ਚਕਰਸ੍ਸ ਵਾਤਿ ਸਮ੍ਬਨ੍ਧੋ. ਯਥਾਹ ‘‘ਯਾਗੁਪਾਨੇਤਿ ਮਨੁਸ੍ਸੇਹਿ ਸਙ੍ਘਸ੍ਸਤ੍ਥਾਯ ਕਰਿਯਮਾਨੇ ਯਾਗੁਪਾਨੇ ਵਾ ਸਙ੍ਘਭਤ੍ਤੇ ਵਾ ਤੇਸਂ ਸਹਾਯਿਕਭਾਵੇਨ ਯਂ ਕਿਞ੍ਚਿ ਪਚਨ੍ਤਿਯਾ ਅਨਾਪਤ੍ਤਿ. ਚੇਤਿਯਪੂਜਾਯ ਸਹਾਯਿਕਾ ਹੁਤ੍ਵਾ ਗਨ੍ਧਮਾਲਾਦੀਨਿ ਪੂਜੇਤਿ, ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੯੯੩).

ਚਤੁਤ੍ਥਂ.

੨੨੯੪. ‘‘ਯਾ ਪਨ ਭਿਕ੍ਖੁਨੀ ‘ਏਹਾਯ੍ਯੇ ਇਮਂ ਅਧਿਕਰਣਂ ਵੂਪਸਮੇਹੀ’ਤਿ ਵੁਚ੍ਚਮਾਨਾ ‘ਸਾਧੂ’ਤਿ ਪਟਿਸ੍ਸੁਣਿਤ੍ਵਾ ਸਾ ਪਚ੍ਛਾ ਅਨਨ੍ਤਰਾਯਿਕਿਨੀ ਨੇਵ ਵੂਪਸਮੇਯ੍ਯ ਨ ਵੂਪਸਮਾਯ ਉਸ੍ਸੁਕ੍ਕਂ ਕਰੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੯੯੫) ਸਿਕ੍ਖਾਪਦਸ੍ਸ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਪਾਚਿਤ੍ਤਿ ਧੁਰਨਿਕ੍ਖੇਪੇ’’ਤਿਆਦਿ. ਧੁਰਨਿਕ੍ਖੇਪੇਤਿ ਨ ਦਾਨਿ ਤਂ ਵੂਪਸਮੇਸ੍ਸਾਮਿ, ਅਞ੍ਞਾਹਿ ਵਾ ਨ ਵੂਪਸਮਾਪੇਸ੍ਸਾਮੀ’’ਤਿ ਏਵਂ ਧੁਰਸ੍ਸ ਉਸ੍ਸਾਹਸ੍ਸ ਨਿਕ੍ਖੇਪੇ ਪਾਚਿਤ੍ਤੀਤਿ ਯੋਜਨਾ. ਚੀਵਰਸਿਬ੍ਬਨੇ ਯਥਾ ਪਞ੍ਚਾਹਪਰਿਹਾਰੋ ਲਬ੍ਭਤਿ, ਇਧ ਪਨ ਤਥਾ ਏਕਾਹਮ੍ਪਿ ਪਰਿਹਾਰੋ ਨ ਲਬ੍ਭਤੀਤਿ ਯੋਜਨਾ.

੨੨੯੫. ਸੇਸਨ੍ਤਿ ‘‘ਧੁਰਂ ਨਿਕ੍ਖਿਪਿਤ੍ਵਾ ਪਚ੍ਛਾ ਵਿਨਿਚ੍ਛਿਨਨ੍ਤੀ ਆਪਤ੍ਤਿਂ ਆਪਜ੍ਜਿਤ੍ਵਾਵ ਵਿਨਿਚ੍ਛਿਨਾਤੀ’’ਤਿਆਦਿਕਂ ਵਿਨਿਚ੍ਛਯਜਾਤਂ. ਤਤ੍ਥ ਚੀਵਰਸਿਬ੍ਬਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ ਯੋਜਨਾ.

ਪਞ੍ਚਮਂ.

੨੨੯੬-੭. ਯਾ ¶ ¶ ਪਨ ਭਿਕ੍ਖੁਨੀ ਗਿਹੀਨਂ ਵਾ ਸਹਧਮ੍ਮਿਕੇ ਠਪੇਤ੍ਵਾ ਅਞ੍ਞੇਸਂ ਪਰਿਬ੍ਬਾਜਕਪਰਿਬ੍ਬਾਜਿਕਾਨਂ ਵਾ ਦਨ੍ਤਪੋਨੋਦਕਂ ਵਿਨਾ ਅਞ੍ਞਂ ਯਂ ਕਿਞ੍ਚਿ ਅਜ੍ਝੋਹਰਣੀਯਂ ਖਾਦਨੀਯਂ, ਭੋਜਨੀਯਂ ਵਾ ਕਾਯੇਨ ਵਾ ਕਾਯਪਟਿਬਦ੍ਧੇਨ ਵਾ ਨਿਸ੍ਸਗ੍ਗਿਯੇਨ ਵਾ ਦਦਾਤਿ, ਤਸ੍ਸਾ ਪਾਚਿਤ੍ਤਿਯਂ ਹੋਤੀਤਿ ਯੋਜਨਾ.

੨੨੯੮-੯. ਇਧ ਇਮਸ੍ਮਿਂ ਸਿਕ੍ਖਾਪਦੇ ਮੁਨਿਨਾ ਦਨ੍ਤਕਟ੍ਠੋਦਕੇ ਦੁਕ੍ਕਟਂ ਵੁਤ੍ਤਨ੍ਤਿ ਯੋਜਨਾ. ਯਾ ਪਨ ਭਿਕ੍ਖੁਨੀ ਕਾਯਾਦੀਹਿ ਸਯਂ ਨ ਦੇਤਿ ਅਞ੍ਞੇਨ ਦਾਪੇਤਿ, ਤਸ੍ਸਾ ਚ ਕਾਯਾਦੀਹਿ ਅਦਤ੍ਵਾ ਭੂਮਿਯਂ ਨਿਕ੍ਖਿਪਿਤ੍ਵਾ ਦੇਨ੍ਤਿਯਾਪਿ ਯਾ ਬਾਹਿਰਲੇਪਂ ਵਾ ਦੇਤਿ, ਤਸ੍ਸਾਪਿ ਉਮ੍ਮਤ੍ਤਿਕਾਯ ਚ ਨ ਦੋਸੋ ਅਨਾਪਤ੍ਤੀਤਿ ਯੋਜਨਾ.

ਛਟ੍ਠਂ.

੨੩੦੦-੧. ਆਵਸਥਚੀਵਰਨ੍ਤਿ ‘‘ਉਤੁਨਿਯੋ ਭਿਕ੍ਖੁਨਿਯੋ ਪਰਿਭੁਞ੍ਜਨ੍ਤੂ’’ਤਿ ਦਿਨ੍ਨਂ ਚੀਵਰਂ. ਯਾ ਭਿਕ੍ਖੁਨੀ ਯਂ ‘‘ਆਵਸਥਚੀਵਰ’’ਨ੍ਤਿ ਨਿਯਮਿਤਂ ਚੀਵਰਂ, ਤਂ ਚਤੁਤ੍ਥੇ ਦਿਵਸੇ ਧੋਵਿਤ੍ਵਾ ਅਨ੍ਤਮਸੋ ਉਤੁਨਿਯਾ ਸਾਮਣੇਰਾਯ ਵਾ ਅਦਤ੍ਵਾ ਸਚੇ ਪਰਿਭੁਞ੍ਜੇਯ੍ਯ, ਤਸ੍ਸਾ ਪਾਚਿਤ੍ਤਿਯਂ ਵੁਤ੍ਤਨ੍ਤਿ ਯੋਜਨਾ. ਤਿਕਪਾਚਿਤ੍ਤਿਯਂ ਸਿਯਾਤਿ ‘‘ਅਨਿਸ੍ਸਜ੍ਜਿਤੇ ਅਨਿਸ੍ਸਜ੍ਜਿਤਸਞ੍ਞਾ…ਪੇ… ਵੇਮਤਿਕਾ…ਪੇ… ਨਿਸ੍ਸਜ੍ਜਿਤਸਞ੍ਞਾ ਪਰਿਭੁਞ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ (ਪਾਚਿ. ੧੦੦੬) ਵੁਤ੍ਤਂ ਪਾਚਿਤ੍ਤਿਯਂ ਹੋਤੀਤਿ ਯੋਜਨਾ.

੨੩੦੨-੩. ਤਸ੍ਮਿਂ ਚੀਵਰੇ ਨਿਸ੍ਸਜ੍ਜਿਤੇ ਅਨਿਸ੍ਸਜ੍ਜਿਤਸਞ੍ਞਾਯ ਵਾ ਵੇਮਤਿਕਾਯ ਵਾ ਤਸ੍ਸਾ ਭਿਕ੍ਖੁਨਿਯਾ ਦ੍ਵਿਕਦੁਕ੍ਕਟਂ ਵੁਤ੍ਤਨ੍ਤਿ ਯੋਜਨਾ. ਅਞ੍ਞਾਸਂ ਉਤੁਨੀਨਂ ਅਭਾਵੇ ਅਦਤ੍ਵਾਪਿ ਪਰਿਭੁਞ੍ਜਨ੍ਤਿਯਾ ਅਨਾਪਤ੍ਤਿ. ਪੁਨ ਪਰਿਯਯੇਤਿ ਪੁਨ ਉਤੁਨਿਵਾਰੇ ਯਥਾਕਾਲਂ ਪਰਿਭੁਞ੍ਜਨ੍ਤਿਯਾ ਅਨਾਪਤ੍ਤਿ. ਅਚ੍ਛਿਨ੍ਨਚੀਵਰਾਦੀਨਞ੍ਚ ਅਨਾਪਤ੍ਤੀਤਿ ਯੋਜਨਾ. ਪਰਿਯਯੇਤਿ ਗਾਥਾਬਨ੍ਧਵਸੇਨ ਰਸ੍ਸਤ੍ਤਂ ¶ . ਅਚ੍ਛਿਨ੍ਨਚੀਵਰਾਦੀਨਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਨਟ੍ਠਚੀਵਰਾਦੀਨਂ ਸਙ੍ਗਹੋ. ਆਪਦਾਸੁਪੀਤਿ ਮਹਗ੍ਘਚੀਵਰਂ ਸਰੀਰਤੋ ਮੋਚੇਤ੍ਵਾ ਸੁਪ੍ਪਟਿਸਾਮਿਤਮ੍ਪਿ ਚੋਰਾ ਹਰਨ੍ਤਿ, ਏਵਰੂਪਾਸੁ ਆਪਦਾਸੁ ਪਰਿਭੁਞ੍ਜਨ੍ਤਿਯਾ ਅਨਾਪਤ੍ਤੀਤਿ ਯੋਜਨਾ.

ਸਤ੍ਤਮਂ.

੨੩੦੪. ਸਕਵਾਟਕਂ ¶ ਵਿਹਾਰਨ੍ਤਿ ਕਵਾਟਬਨ੍ਧਵਿਹਾਰਂ, ਦ੍ਵਾਰਕਵਾਟਯੁਤ੍ਤਂ ਸੁਗੁਤ੍ਤਸੇਨਾਸਨਨ੍ਤਿ ਵੁਤ੍ਤਂ ਹੋਤਿ. ਰਕ੍ਖਨਤ੍ਥਾਯ ਅਦਤ੍ਵਾਤਿ ‘‘ਇਮਂ ਜਗ੍ਗੇਯ੍ਯਾਸੀ’’ਤਿ ਏਵਂ ਅਨਾਪੁਚ੍ਛਿਤ੍ਵਾ.

੨੩੦੫-੬. ‘‘ਹੋਤਿ ਪਾਚਿਤ੍ਤਿਯਂ ਤਸ੍ਸਾ, ਚਾਰਿਕਂ ਪਕ੍ਕਮਨ੍ਤਿਯਾ’’ਤਿ ਵੁਤ੍ਤਮੇਵ ਪਕਾਸੇਤੁਮਾਹ ‘‘ਅਤ੍ਤਨੋ ਗਾਮਤੋ’’ਤਿਆਦਿ. ਅਤ੍ਤਨੋ ਗਾਮਤੋਤਿ ਅਤ੍ਤਨੋ ਵਸਨਕਗਾਮਤੋ. ਤਥਾ ਇਤਰਸ੍ਸਾਤਿ ਅਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਂ ਉਪਚਾਰਂ. ਤਨ੍ਤਿਆਦਿਪਦਤ੍ਤਯੇ ਭੁਮ੍ਮਤ੍ਥੇ ਉਪਯੋਗਵਚਨਂ ਵੇਦਿਤਬ੍ਬਂ. ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪੇ ਪਠਮੇਨ ਪਦੇਨ ਸਮਤਿਕ੍ਕਨ੍ਤੇ ਦੁਕ੍ਕਟਂ, ਤਥਾ ਇਤਰਸ੍ਸ ਅਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਤਸ੍ਮਿਂ ਉਪਚਾਰੇ ਅਤਿਕ੍ਕਨ੍ਤੇ ਦੁਕ੍ਕਟਂ. ਦੁਤਿਯੇਨ ਪਦੇਨ ਪਰਿਕ੍ਖੇਪੇ, ਉਪਚਾਰੇ ਸਮਤਿਕ੍ਕਨ੍ਤਮਤ੍ਤੇ ਪਾਚਿਤ੍ਤੀਤਿ ਯੋਜਨਾ.

੨੩੦੭. ਅਕਵਾਟਬਨ੍ਧਨਸ੍ਮਿਂ ਕਵਾਟਬਨ੍ਧਰਹਿਤੇ ਵਿਹਾਰੇ ਤਥਾ ਅਨਿਸ੍ਸਜ੍ਜਨ੍ਤਿਯਾ ਦੁਕ੍ਕਟਂ ਪਰਿਦੀਪਿਤਂ. ਜਗ੍ਗਿਕਂ ਅਲਭਨ੍ਤਿਯਾਤਿ ਏਤ੍ਥ ‘‘ਪਰਿਯੇਸਿਤ੍ਵਾ’’ਤਿ ਸੇਸੋ. ਜਗ੍ਗਿਕਨ੍ਤਿ ਵਿਹਾਰਪਟਿਜਗ੍ਗਿਕਂ.

੨੩੦੮. ਆਪਦਾਸੂਤਿ ਰਟ੍ਠੇ ਭਿਜ੍ਜਨ੍ਤੇ ਆਵਾਸੇ ਛਡ੍ਡੇਤ੍ਵਾ ਗਚ੍ਛਨ੍ਤਿ, ਏਵਰੂਪਾਸੁ ਆਪਦਾਸੁ. ਗਿਲਾਨਾਯਾਤਿ ਵਚੀਭੇਦਂ ਕਾਤੁਂ ਅਸਮਤ੍ਥਾਯਾਤਿ.

ਅਟ੍ਠਮਂ.

੨੩੦੯-੧੦. ਹਤ੍ਥੀ ¶ ਚ ਅਸ੍ਸੋ ਚ ਰਥੋ ਚ ਹਤ੍ਥਿਅਸ੍ਸਰਥਾ, ਤੇ ਆਦਿ ਯੇਸਂ ਤੇ ਹਤ੍ਥਿਅਸ੍ਸਰਥਾਦਯੋ, ਤੇਹਿ. ਆਦਿ-ਸਦ੍ਦੇਨ ਧਨੁ ਥਰੂਤਿ ਪਦਦ੍ਵਯਂ ਗਹਿਤਂ. ਸਂਯੁਤ੍ਤਨ੍ਤਿ ਯਥਾਵੁਤ੍ਤੇਹਿ ਹਤ੍ਥਿਅਸ੍ਸਾਦਿਪਦੇਹਿ ਸਂਯੋਜਿਤਂ, ‘‘ਹਤ੍ਥੀਨਂ ਸਿਪ੍ਪਂ ਹਤ੍ਥਿਸਿਪ੍ਪ’’ਨ੍ਤਿਆਦਿਨਾ ਕਤਸਮਾਸਨ੍ਤਿ ਅਤ੍ਥੋ, ‘‘ਹਤ੍ਥਿਸਿਪ੍ਪਂ ਅਸ੍ਸਸਿਪ੍ਪਂ ਰਥਸਿਪ੍ਪਂ ਧਨੁਸਿਪ੍ਪਂ ਥਰੁਸਿਪ੍ਪ’’ਨ੍ਤਿ ਏਵਂ ਵੁਤ੍ਤਂ ਯਂ ਕਿਞ੍ਚਿ ਸਿਪ੍ਪਨ੍ਤਿ ਵੁਤ੍ਤਂ ਹੋਤਿ. ਹਤ੍ਥਿਸਿਕ੍ਖਾਦਿਸਿਪ੍ਪਂ ਸਨ੍ਦੀਪਕੋ ਗਨ੍ਥੋ ਵਚ੍ਚਵਾਚਕਾਨਂ ਅਭੇਦੋਪਚਾਰੇਨ ਏਵਂ ਵੁਤ੍ਤੋਤਿ ਗਹੇਤਬ੍ਬਂ. ਤੇਨੇਵ ਵਕ੍ਖਤਿ ‘‘ਪਦਾਦੀਨਂ ਵਸੇਨਿਧਾ’’ਤਿ. ਪਰੂਪਘਾਤਕਂ ਮਨ੍ਤਾਗਦਯੋਗਪ੍ਪਭੇਦਕਂ ਕਿਞ੍ਚੀਤਿ ਪਰੇਸਂ ਅਨ੍ਤਰਾਯਕਰਂ ਖਿਲਨਵਸੀਕਰਣਸੋਸਾਪਨਾਦਿਭੇਦਂ ਆਥਬ੍ਬਣਮਨ੍ਤਞ੍ਚ ਵਿਸਯੋਗਾਦਿਪ੍ਪਭੇਦਕਞ੍ਚ ਯਂ ਕਿਞ੍ਚਿ ਸਿਪ੍ਪਨ੍ਤਿ ਅਤ੍ਥੋ.

ਏਤ੍ਥ ¶ ਚ ਖਿਲਨਮਨ੍ਤੋ ਨਾਮ ਦਾਰੁਸਾਰਖਿਲਂ ਮਨ੍ਤੇਤ੍ਵਾ ਪਥਵਿਯਂ ਪਵੇਸੇਤ੍ਵਾ ਮਾਰਣਮਨ੍ਤੋ. ਵਸੀਕਰਣਮਨ੍ਤੋ ਨਾਮ ਪਰਂ ਅਤ੍ਤਨੋ ਵਸੇ ਵਤ੍ਤਾਪਨਕਮਨ੍ਤੋ. ਸੋਸਾਪਨਕਮਨ੍ਤੋ ਨਾਮ ਪਰਸਰੀਰਂ ਰਸਾਦਿਧਾਤੁਕ੍ਖਯੇਨ ਸੁਕ੍ਖਭਾਵਂ ਪਾਪਨਕਮਨ੍ਤੋ. ਆਦਿ-ਸਦ੍ਦੇਨ ਵਿਦੇਸ੍ਸਨਾਦਿਮਨ੍ਤਾਨਂ ਸਙ੍ਗਹੋ. ਵਿਦੇਸ੍ਸਨਂ ਨਾਮ ਮਿਤ੍ਤਾਨਂ ਅਞ੍ਞਮਞ੍ਞਸ੍ਸ ਵੇਰਿਭਾਵਾਪਾਦਨਂ. ਇਧ ਇਮਸ੍ਮਿਂ ਸਾਸਨੇ ਯਾ ਭਿਕ੍ਖੁਨੀ ਹਤ੍ਥਿ…ਪੇ… ਕਿਞ੍ਚਿ ਯਸ੍ਸ ਕਸ੍ਸਚਿ ਸਨ੍ਤਿਕੇ ਪਦਾਦੀਨਂ ਵਸੇਨ ਪਰਿਯਾਪੁਣੇਯ੍ਯ ਅਧੀਯੇਯ੍ਯ ਚੇ, ਤਸ੍ਸਾ ਪਾਚਿਤ੍ਤਿਯਂ ਹੋਤੀਤਿ ਯੋਜਨਾ.

੨੩੧੧. ਲੇਖੇਤਿ ਲਿਖਿਤਸਿਪ੍ਪੇ. ਧਾਰਣਾਯ ਚਾਤਿ ਧਾਰਣਸਤ੍ਥੇ, ਯਸ੍ਮਿਂ ਵੁਤ੍ਤਨਯੇਨ ਪਟਿਪਜ੍ਜਨ੍ਤਾ ਬਹੂਨਿਪਿ ਗਨ੍ਥਾਨਿ ਧਾਰੇਨ੍ਤਿ. ਗੁਤ੍ਤਿਯਾਤਿ ਅਤ੍ਤਨੋ ਵਾ ਪਰੇਸਂ ਵਾ ਗੁਤ੍ਤਤ੍ਥਾਯ. ਪਰਿਤ੍ਤੇਸੁ ਚ ਸਬ੍ਬੇਸੂਤਿ ਯਕ੍ਖਪਰਿਤ੍ਤਚੋਰਵਾਲ਼ਾਦਿਸਬ੍ਬੇਸੁ ਪਰਿਤ੍ਤੇਸੁ ਚ.

ਨਵਮਂ.

੨੩੧੨. ਦਸਮੇਤਿ ¶ ‘‘ਯਾ ਪਨ ਭਿਕ੍ਖੁਨੀ ਤਿਰਚ੍ਛਾਨਵਿਜ੍ਜਂ ਵਾਚੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੦੧੮) ਸਮੁਦ੍ਦਿਟ੍ਠੇ ਦਸਮਸਿਕ੍ਖਾਪਦੇ. ਇਦਂ ਦਸਮਸਿਕ੍ਖਾਪਦਂ.

ਦਸਮਂ.

ਚਿਤ੍ਤਾਗਾਰਵਗ੍ਗੋ ਪਞ੍ਚਮੋ.

੨੩੧੩. ਸਭਿਕ੍ਖੁਕਂ ਆਰਾਮਨ੍ਤਿ ਯਤ੍ਥ ਭਿਕ੍ਖੂ ਰੁਕ੍ਖਮੂਲੇਪਿ ਵਸਨ੍ਤਿ, ਤਂ ਪਦੇਸਂ. ਜਾਨਿਤ੍ਵਾਤਿ ‘‘ਸਭਿਕ੍ਖੁਕ’’ਨ੍ਤਿ ਜਾਨਿਤ੍ਵਾ. ਯਂ ਕਿਞ੍ਚੀਤਿ ਭਿਕ੍ਖੁਂ ਵਾ ਸਾਮਣੇਰਂ ਵਾ ਆਰਾਮਿਕਂ ਵਾ ਯਂ ਕਿਞ੍ਚਿ.

੨੩੧੪-੫. ‘‘ਸਭਿਕ੍ਖੁਕੋ ਨਾਮ ਆਰਾਮੋ ਯਤ੍ਥ ਭਿਕ੍ਖੂ ਰੁਕ੍ਖਮੂਲੇਪਿ ਵਸਨ੍ਤੀ’’ਤਿ (ਪਾਚਿ. ੧੦੨੫) ਵਚਨਤੋ ਆਹ ‘‘ਸਚੇ ਅਨ੍ਤਮਸੋ’’ਤਿਆਦਿ. ਯਾ ਪਨ ਭਿਕ੍ਖੁਨੀ ਅਨ੍ਤਮਸੋ ਰੁਕ੍ਖਮੂਲਸ੍ਸਪਿ ਅਨਾਪੁਚ੍ਛਾ ਸਚੇ ਪਰਿਕ੍ਖੇਪਂ ਅਤਿਕ੍ਕਾਮੇਤਿ, ਤਸ੍ਸਾ ਪਠਮੇ ਪਾਦੇ ਦੁਕ੍ਕਟਂ, ਅਪਰਿਕ੍ਖਿਤ੍ਤੇ ਤਸ੍ਸ ਵਿਹਾਰਸ੍ਸ ਉਪਚਾਰੋਕ੍ਕਮੇ ਵਾਪਿ ਭਿਕ੍ਖੁਨਿਯਾ ਦੁਕ੍ਕਟਂ, ਦੁਤਿਯੇ ਪਾਦੇ ਅਤਿਕ੍ਕਾਮਿਤੇ ਪਾਚਿਤ੍ਤਿ ਸਿਯਾਤਿ ਯੋਜਨਾ.

੨੩੧੬. ਅਭਿਕ੍ਖੁਕੇ ¶ ਆਰਾਮੇ ਸਭਿਕ੍ਖੂਤਿ ਸਞ੍ਞਾਯ ਉਭੋਸੁਪਿ ਸਭਿਕ੍ਖੁਕਾਭਿਕ੍ਖੁਕੇਸੁ ਆਰਾਮੇਸੁ ਜਾਤਕਙ੍ਖਾਯ ਸਞ੍ਜਾਤਵਿਚਿਕਿਚ੍ਛਾਯ, ਵੇਮਤਿਕਾਯਾਤਿ ਅਤ੍ਥੋ. ਤਸ੍ਸਾ ਆਪਤ੍ਤਿ ਦੁਕ੍ਕਟਂ ਹੋਤੀਤਿ ਯੋਜਨਾ.

੨੩੧੭. ਸੀਸਾਨੁਲੋਕਿਕਾ ਯਾ ਭਿਕ੍ਖੁਨੀ ਗਚ੍ਛਤਿ, ਤਸ੍ਸਾ ਚ ਅਨਾਪਤ੍ਤਿ ਪਕਾਸਿਤਾਤਿ ਯੋਜਨਾ. ਏਵਮੁਪਰਿਪਿ. ਤਾ ਭਿਕ੍ਖੁਨਿਯੋ ਯਤ੍ਥ ਸਨ੍ਨਿਪਤਿਤਾ ਹੋਨ੍ਤਿ, ਤਾਸਂ ਸਨ੍ਤਿਕਂ ‘‘ਗਚ੍ਛਾਮੀ’’ਤਿ ਗਚ੍ਛਤਿ. ਯਥਾਹ ‘‘ਯਤ੍ਥ ਭਿਕ੍ਖੁਨਿਯੋ ਪਠਮਤਰਂ ¶ ਪਵਿਸਿਤ੍ਵਾ ਸਜ੍ਝਾਯਂ ਵਾ ਚੇਤਿਯਵਨ੍ਦਨਾਦੀਨਿ ਵਾ ਕਰੋਨ੍ਤਿ, ਤਤ੍ਥ ਤਾਸਂ ਸਨ੍ਤਿਕਂ ਗਚ੍ਛਾਮੀਤਿ ਗਨ੍ਤੁਂ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੧੦੨੭).

੨੩੧੮. ‘‘ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ’’ਤਿ ਵਚਨੇਨੇਵ ਅਭਿਕ੍ਖੁਕਂ ਆਰਾਮਂ ਕਿਞ੍ਚਿ ਅਨਾਪੁਚ੍ਛਾ ਪਵਿਸਨ੍ਤਿਯਾ ਅਨਾਪਤ੍ਤੀਤਿ ਦੀਪਿਤਂ ਹੋਤਿ. ਆਰਾਮਮਜ੍ਝਤੋ ਵਾ ਮਗ੍ਗੋ ਹੋਤਿ, ਤੇਨ ਗਚ੍ਛਨ੍ਤਿਯਾਪਿ. ਆਪਦਾਸੂਤਿ ਯੇਨ ਕੇਨਚਿ ਉਪਦ੍ਦੁਤਾ ਹੋਤਿ, ਏਵਰੂਪਾਸੁ ਆਪਦਾਸੁ ਪਵਿਸਨ੍ਤਿਯਾ.

ਪਠਮਂ.

੨੩੨੦. ਅਕ੍ਕੋਸੇਯ੍ਯਾਤਿ ਦਸਨ੍ਨਂ ਅਕ੍ਕੋਸਵਤ੍ਥੂਨਂ ਅਞ੍ਞਤਰੇਨ ਸਮ੍ਮੁਖਾ, ਪਰਮ੍ਮੁਖਾ ਵਾ ਅਕ੍ਕੋਸੇਯ੍ਯ ਵਾ. ਪਰਿਭਾਸੇਯ੍ਯ ਵਾਤਿ ਭਯ’ਮਸ੍ਸ ਉਪਦਂਸੇਯ੍ਯ ਵਾ. ਤਿਕਪਾਚਿਤ੍ਤਿਯਨ੍ਤਿ ‘‘ਉਪਸਮ੍ਪਨ੍ਨੇ ਉਪਸਮ੍ਪਨ੍ਨਸਞ੍ਞਾ…ਪੇ… ਵੇਮਤਿਕਾ…ਪੇ… ਅਨੁਪਸਮ੍ਪਨ੍ਨਸਞ੍ਞਾ ਅਕ੍ਕੋਸਤਿ ਵਾ ਪਰਿਭਾਸਤਿ ਵਾ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ (ਪਾਚਿ. ੧੦੩੧) ਤਿਕਪਾਚਿਤ੍ਤਿਯਂ ਵੁਤ੍ਤਂ. ਸੇਸੇਤਿ ਅਨੁਪਸਮ੍ਪਨ੍ਨੇ. ਤਿਕਦੁਕ੍ਕਟਂ ਤਸ੍ਸਾ ਹੋਤੀਤਿ ਯੋਜਨਾ.

੨੩੨੧. ‘‘ਪੁਰਕ੍ਖਤ੍ਵਾ’’ਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ‘‘ਅਭਿਸਪੇਯ੍ਯਾ’’ਤਿ (ਪਾਚਿ. ੮੭੫) ਵੁਤ੍ਤਸਿਕ੍ਖਾਪਦੇ ਵੁਤ੍ਤਨਯਮੇਵ.

ਦੁਤਿਯਂ.

੨੩੨੨-੩. ਸਙ੍ਘਨ੍ਤਿ ਭਿਕ੍ਖੁਨਿਸਙ੍ਘਂ. ਪਰਿਭਾਸੇਯ੍ਯਾਤਿ ‘‘ਬਾਲਾ ਏਤਾ, ਅਬ੍ਯਤ੍ਤਾ ਏਤਾ, ਨੇਤਾ ਜਾਨਨ੍ਤਿ ਕਮ੍ਮਂ ਵਾ ਕਮ੍ਮਦੋਸਂ ਵਾ ਕਮ੍ਮਵਿਪਤ੍ਤਿਂ ਵਾ ਕਮ੍ਮਸਮ੍ਪਤ੍ਤਿਂ ਵਾ’’ਤਿ (ਪਾਚਿ. ੧੦੩੫) ਆਗਤਨਯੇਨ ¶ ਪਰਿਭਾਸੇਯ੍ਯਾਤਿ ਅਤ੍ਥੋ. ਇਤਰਾਯਾਤਿ ਏਤ੍ਥ ਉਪਯੋਗਤ੍ਥੇ ਕਰਣਵਚਨਂ. ਏਕਂ ਭਿਕ੍ਖੁਨਿਂ ਵਾ ਸਮ੍ਬਹੁਲਾ ਭਿਕ੍ਖੁਨਿਯੋ ¶ ਵਾ ਤਥੇਵ ਇਤਰਂ ਅਨੁਪਸਮ੍ਪਨ੍ਨਂ ਵਾ ਪਰਿਭਾਸਨ੍ਤਿਯਾ ਤਸ੍ਸਾ ਦੁਕ੍ਕਟਂ ਪਰਿਦੀਪਿਤਨ੍ਤਿ ਯੋਜਨਾ.

ਤਤਿਯਂ.

੨੩੨੪-੬. ਯਾ ਨਿਮਨ੍ਤਨਪਵਾਰਣਾ ਉਭੋਪਿ ਗਣਭੋਜਨਸਿਕ੍ਖਾਪਦੇ (ਪਾਚਿ. ੨੧੭-੨੧੯), ਪਵਾਰਣਸਿਕ੍ਖਾਪਦੇ (ਪਾਚਿ. ੨੩੮-੨੩੯) ਚ ਵੁਤ੍ਤਲਕ੍ਖਣਾ, ਤਾਹਿ ਉਭੋਹਿ ਨਿਮਨ੍ਤਨਪਵਾਰਣਾਹਿ ਯਾ ਚ ਭਿਕ੍ਖੁਨੀ ਸਚੇ ਨਿਮਨ੍ਤਿਤਾਪਿ ਵਾ ਪਵਾਰਿਤਾਪਿ ਵਾ ਭਵੇਯ੍ਯ, ਸਾ ਪੁਰੇਭਤ੍ਤਂ ਯਾਗੁਞ੍ਚ ਯਾਮਕਾਲਿਕਾਦਿਕਾਲਿਕਤ੍ਤਯਞ੍ਚ ਠਪੇਤ੍ਵਾ ਯਂ ਕਿਞ੍ਚਿ ਆਮਿਸਂ ਯਾਵਕਾਲਿਕਂ ਅਜ੍ਝੋਹਰਣਤ੍ਥਾਯ ਪਟਿਗ੍ਗਣ੍ਹਾਤਿ ਚੇ, ਤਸ੍ਸਾ ਗਹਣੇ ਦੁਕ੍ਕਟਂ ਸਿਯਾ, ਅਜ੍ਝੋਹਾਰਵਸੇਨ ਏਤ੍ਥ ਇਮਸ੍ਮਿਂ ਸਿਕ੍ਖਾਪਦੇ ਪਾਚਿਤ੍ਤਿ ਪਰਿਦੀਪਿਤਾਤਿ ਯੋਜਨਾ.

ਏਤ੍ਥ ਚ ਨਿਮਨ੍ਤਿਤਾ ਨਾਮ ‘‘ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਭੋਜਨੇਨ ਨਿਮਨ੍ਤਿਤਾ’’ਤਿ ਗਣਭੋਜਨਸਿਕ੍ਖਾਪਦੇ ਵੁਤ੍ਤਲਕ੍ਖਣਾ. ਪਵਾਰਣਾ ਚ ‘‘ਪਵਾਰਿਤੋ ਨਾਮ ਅਸਨਂ ਪਞ੍ਞਾਯਤਿ, ਭੋਜਨਂ ਪਞ੍ਞਾਯਤਿ, ਹਤ੍ਥਪਾਸੇ ਠਿਤੋ ਅਭਿਹਰਤਿ, ਪਟਿਕ੍ਖੇਪੋ ਪਞ੍ਞਾਯਤੀ’’ਤਿ ਪਵਾਰਣਸਿਕ੍ਖਾਪਦੇ ਵੁਤ੍ਤਲਕ੍ਖਣਾਤਿ ਵੇਦਿਤਬ੍ਬਾ.

੨੩੨੭. ਕਾਲਿਕਾਨਿ ਚ ਤੀਣੇਵਾਤਿ ਯਾਮਕਾਲਿਕਾਦੀਨਿ ਤੀਣਿ ਕਾਲਿਕਾਨਿ ਏਵ.

੨੩੨੮-੯. ਨਿਮਨ੍ਤਿਤਪਵਾਰਿਤਾਨਂ ਦ੍ਵਿਨ੍ਨਂ ਸਾਧਾਰਣਾਪਤ੍ਤਿਂ ਦਸ੍ਸੇਤ੍ਵਾ ਅਨਾਪਤ੍ਤਿਂ ਦਸ੍ਸੇਤੁਮਾਹ ‘‘ਨਿਮਨ੍ਤਿਤਾ’’ਤਿਆਦਿ. ਇਧ ਇਮਸ੍ਮਿਂ ਸਾਸਨੇ ਯਾ ਪਨ ਭਿਕ੍ਖੁਨੀ ਨਿਮਨ੍ਤਿਤਾ ਅਪ੍ਪਵਾਰਿਤਾ ਸਚੇ ਯਾਗੁਂ ਪਿਵਤਿ, ਵਟ੍ਟਤਿ ਅਨਾਪਤ੍ਤੀਤਿ ਅਤ੍ਥੋ. ਸਾਮਿਕਸ੍ਸਾਤਿ ਯੇਨ ਨਿਮਨ੍ਤਿਤਾ, ਤਸ੍ਸ ਨਿਮਨ੍ਤਨਸਾਮਿਕਸ੍ਸੇਵ. ਅਞ੍ਞਭੋਜਨਨ੍ਤਿ ¶ ਯੇਨ ਨਿਮਨ੍ਤਿਤਾ, ਤਤੋ ਅਞ੍ਞਸ੍ਸ ਭੋਜਨਂ. ਸਚੇ ਸਾ ਭੁਞ੍ਜਤਿ, ਤਥਾ ਵਟ੍ਟਤੀਤਿ ਯੋਜਨਾ.

ਕਾਲਿਕਾਨਿ ਚ ਤੀਣੇਵਾਤਿ ਯਾਮਕਾਲਿਕਾਦੀਨਿ ਤੀਣਿ ਕਾਲਿਕਾਨੇਵ. ਪਚ੍ਚਯੇ ਸਤੀਤਿ ਪਿਪਾਸਾਦਿਪਚ੍ਚਯੇ ਸਤਿ.

੨੩੩੦. ਇਮਸ੍ਸ ¶ ਸਿਕ੍ਖਾਪਦਸ੍ਸ ਇਦਂ ਸਮੁਟ੍ਠਾਨਂ ਅਦ੍ਧਾਨੇਨ ਤੁਲ੍ਯਨ੍ਤਿ ਯੋਜਨਾ. ਪਵਾਰਿਤਾਯ, ਅਪ੍ਪਵਾਰਿਤਾਯ ਵਾ ਨਿਮਨ੍ਤਿਤਾਯ ਵਸੇਨ ਕਿਰਿਯਾਕਿਰਿਯਤਂ ਦਸ੍ਸੇਤੁਮਾਹ ‘‘ਨਿਮਨ੍ਤਿਤਾ’’ਤਿਆਦਿ. ਨਿਮਨ੍ਤਿਤਾ ਪਨ ਸਾਮਿਕਂ ਅਨਾਪੁਚ੍ਛਾ ਭੁਞ੍ਜਤਿ ਚੇ, ਤਸ੍ਸਾ ਵਸੇਨ ਇਦਂ ਸਿਕ੍ਖਾਪਦਂ ਕਿਰਿਯਾਕਿਰਿਯਂ ਹੋਤਿ. ਏਤ੍ਥ ਭੁਞ੍ਜਨਂ ਕ੍ਰਿਯਂ. ਸਾਮਿਕਸ੍ਸ ਅਨਾਪੁਚ੍ਛਨਂ ਅਕ੍ਰਿਯਂ.

੨੩੩੧. ‘‘ਕਪ੍ਪਿਯਂ ਕਾਰਾਪੇਤ੍ਵਾ’’ਤਿਆਦਿਂ ਪਵਾਰਿਤਮੇਵ ਸਨ੍ਧਾਯਾਹ. ਯਾ ਯਦਿ ਪਰਿਭੁਞ੍ਜਤਿ, ਤਸ੍ਸਾ ਚ ਪਾਚਿਤ੍ਤਿ ਸਿਯਾ ਕਿਰਿਯਤੋ ਹੋਤੀਤਿ ਯੋਜਨਾ. ਸਿਯਾਤਿ ਅਵਸ੍ਸਂ. ਪਵਾਰਣਸਿਕ੍ਖਾਪਦੇ ਵੁਤ੍ਤਨਯੇਨ ਕਪ੍ਪਿਯਂ ਕਾਰੇਤ੍ਵਾ ਵਾ ਅਕਾਰਾਪੇਤ੍ਵਾ ਵਾ ਪਰਿਭੁਞ੍ਜਨ੍ਤਿਯਾ ਤਸ੍ਸਾ ਪਰਿਭੋਗੇਨੇਵ ਇਮਿਨਾ ਸਿਕ੍ਖਾਪਦੇਨ ਅਵਸ੍ਸਂ ਆਪਤ੍ਤਿ ਹੋਤੀਤਿ ਅਤ੍ਥੋ.

ਚਤੁਤ੍ਥਂ.

੨੩੩੨. ‘‘ਯਾ ਪਨ ਭਿਕ੍ਖੁਨੀ ਕੁਲਮਚ੍ਛਰਿਨੀ ਅਸ੍ਸ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੦੪੩) ਇਮਸ੍ਮਿਂ ਸਿਕ੍ਖਾਪਦੇ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਭਿਕ੍ਖੁਨੀਨ’’ਨ੍ਤਿਆਦਿ. ਕੁਲਸਨ੍ਤਿਕੇ ਭਿਕ੍ਖੁਨੀਨਂ ਅਵਣ੍ਣਂ ਵਦਨ੍ਤਿਯਾ ਪਾਚਿਤ੍ਤੀਤਿ ਸਮ੍ਬਨ੍ਧੋ, ਕੁਲਸ੍ਸ ਸਨ੍ਤਿਕੇ ‘‘ਭਿਕ੍ਖੁਨਿਯੋ ਦੁਸ੍ਸੀਲਾ ਪਾਪਧਮ੍ਮਾ’’ਤਿ ਭਿਕ੍ਖੁਨੀਨਂ ਅਵਣ੍ਣਂ ਭਾਸਨ੍ਤਿਯਾਤਿ ਅਤ੍ਥੋ. ਕੁਲਸ੍ਸਾਵਣ੍ਣਨਂ ਵਾਪੀਤਿ ‘‘ਤਂ ਕੁਲਂ ਅਸ੍ਸਦ੍ਧਂ ਅਪ੍ਪਸਨ੍ਨ’’ਨ੍ਤਿ ਭਿਕ੍ਖੁਨੀਨਂ ਸਨ੍ਤਿਕੇ ਕੁਲਸ੍ਸ ਅਵਣ੍ਣਂ ਅਗੁਣਂ ਵਦਨ੍ਤਿਯਾ ਪਾਚਿਤ੍ਤੀਤਿ ਸਮ੍ਬਨ੍ਧੋ.

੨੩੩੩. ਸਨ੍ਤਂ ¶ ਭਾਸਨ੍ਤਿਯਾ ਦੋਸਨ੍ਤਿ ਅਮਚ੍ਛਰਾਯਿਤ੍ਵਾ ਕੁਲਸ੍ਸ ਵਾ ਭਿਕ੍ਖੁਨੀਨਂ ਵਾ ਸਨ੍ਤਂ ਦੋਸਂ ਆਦੀਨਵਂ ਕਥੇਨ੍ਤਿਯਾ.

ਪਞ੍ਚਮਂ.

੨੩੩੪-੫. ਓਵਾਦਦਾਯਕੋਤਿ ਅਟ੍ਠਹਿ ਗਰੁਧਮ੍ਮੇਹਿ ਓਵਾਦਂ ਦੇਨ੍ਤੋ. ਵਸ੍ਸਂ ਉਪਗਚ੍ਛਨ੍ਤਿਯਾਤਿ ਵਸ੍ਸਂ ਵਸਨ੍ਤਿਯਾ.

੨੩੩੬. ਭਿਕ੍ਖੂਤਿ ਓਵਾਦਦਾਯਕਾ ਭਿਕ੍ਖੂ.

ਛਟ੍ਠਂ.

੨੩੩੮. ਯਾ ¶ ਸਾ ਭਿਕ੍ਖੁਨੀ ਵਸ੍ਸਂ ਵੁਤ੍ਥਾ ਪੁਰਿਮਂ ਵਾ ਪਚ੍ਛਿਮਂ ਵਾ ਤੇਮਾਸਂ ਵੁਤ੍ਥਾ ਤਤੋ ਅਨਨ੍ਤਰਂ ਉਭਤੋਸਙ੍ਘੇ ਭਿਕ੍ਖੁਨਿਸਙ੍ਘੇ ਚ ਭਿਕ੍ਖੁਸਙ੍ਘੇ ਚ ‘‘ਨਾਹਂ ਪਵਾਰੇਸ੍ਸਾਮੀ’’ਤਿ ਧੁਰਂ ਨਿਕ੍ਖਿਪਤਿ ਚੇਤਿ ਯੋਜਨਾ.

ਸਤ੍ਤਮਂ.

੨੩੪੧. ਓਵਾਦਾਦੀਨਮਤ੍ਥਾਯਾਤਿ ਅਟ੍ਠਗਰੁਧਮ੍ਮਸ੍ਸਵਨਾਦੀਨਮਤ੍ਥਾਯ. ਆਦਿ-ਸਦ੍ਦੇਨ ਉਪੋਸਥਪੁਚ੍ਛਨਪਵਾਰਣਾਨਂ ਗਹਣਂ.

੨੩੪੨. ਓਵਾਦਾਦੀਨਮਤ੍ਥਾਯ ਅਗਮਨੇਨ ਅਕ੍ਰਿਯਂ. ਕਾਯਿਕਨ੍ਤਿ ਕਾਯਕਮ੍ਮਂ.

ਅਟ੍ਠਮਂ.

੨੩੪੩. ‘‘ਅਨ੍ਵਦ੍ਧਮਾਸਂ ਭਿਕ੍ਖੁਨਿਯਾ ਭਿਕ੍ਖੁਸਙ੍ਘਤੋ ਦ੍ਵੇ ਧਮ੍ਮਾ ਪਚ੍ਚਾਸੀਸਿਤਬ੍ਬਾ ਉਪੋਸਥਪੁਚ੍ਛਨਞ੍ਚ ਓਵਾਦੂਪਸਙ੍ਕਮਨਞ੍ਚ, ਤਂ ਅਤਿਕ੍ਕਾਮੇਨ੍ਤਿਯਾ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੦੫੯) ਇਮਸ੍ਮਿਂ ਸਿਕ੍ਖਾਪਦੇ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਨ ਯਾਚਿਸ੍ਸਾਮੀ’’ਤਿਆਦਿ. ਤਂ ਉਤ੍ਤਾਨਤ੍ਥਮੇਵ.

ਨਵਮਂ.

੨੩੪੬-੭. ਪਸਾਖੋ ¶ ਨਾਮ ਨਾਭਿਯਾ ਹੇਟ੍ਠਾ, ਜਾਣੁਮਣ੍ਡਲਾਨਂ ਉਪਰਿ ਪਦੇਸੋ. ਤਥਾ ਹਿ ਯਸ੍ਮਾ ਰੁਕ੍ਖਸ੍ਸ ਸਾਖਾ ਵਿਯ ਉਭੋ ਊਰੂ ਪਭਿਜ੍ਜਿਤ੍ਵਾ ਗਤਾ, ਤਸ੍ਮਾ ਸੋ ਪਸਾਖੋਤਿ ਵੁਚ੍ਚਤਿ, ਤਸ੍ਮਿਂ ਪਸਾਖੇ. ਸਞ੍ਜਾਤਨ੍ਤਿ ਉਟ੍ਠਿਤਂ. ਗਣ੍ਡਨ੍ਤਿ ਯਂ ਕਿਞ੍ਚਿ ਗਣ੍ਡਂ. ਰੁਧਿਤਨ੍ਤਿ ਯਂ ਕਿਞ੍ਚਿ ਵਣਂ. ਸਙ੍ਘਂ ਵਾਤਿ ਭਿਕ੍ਖੁਨਿਸਙ੍ਘਂ ਵਾ. ਗਣਂ ਵਾਤਿ ਸਮ੍ਬਹੁਲਾ ਭਿਕ੍ਖੁਨਿਯੋ ਵਾ. ਏਕੇਨਾਤਿ ਏਤ੍ਥ ‘‘ਪੁਰਿਸੇਨਾ’’ਤਿ ਸੇਸੋ, ਸਹਤ੍ਥੇ ਇਦਂ ਕਰਣਵਚਨਂ. ਯਥਾਹ ‘‘ਪੁਰਿਸੇਨ ਸਦ੍ਧਿਂ ਏਕੇਨੇਕਾ’’ਤਿ. ਪੁਰਿਸੋਤਿ ਚ ਮਨੁਸ੍ਸਪੁਰਿਸੋਵ ਗਹੇਤਬ੍ਬੋ.

ਧੋਵਾਤਿ ਏਤ੍ਥ ਆਦਿ-ਅਤ੍ਥੇ ਵਤ੍ਤਮਾਨੇਨ ਇਤਿ-ਸਦ੍ਦੇਨ ‘‘ਆਲਿਮ੍ਪਾਪੇਯ੍ਯ ਵਾ ਬਨ੍ਧਾਪੇਯ੍ਯ ਵਾ ਮੋਚਾਪੇਯ੍ਯ ਵਾ’’ਤਿ (ਪਾਚਿ. ੧੦੬੩) ਸਿਕ੍ਖਾਪਦਾਗਤਾਨਂ ਇਤਰੇਸਂ ਤਿਣ੍ਣਂ ਸਙ੍ਗਣ੍ਹਨਤੋ ‘‘ਆਲਿਮ੍ਪ ¶ ਬਨ੍ਧ ਮੋਚੇਹੀ’’ਤਿ ਆਣਤ੍ਤਿਤ੍ਤਯਂ ਸਙ੍ਗਹਿਤਂ. ਤੇਨੇਵ ਵਕ੍ਖਤਿ ‘‘ਦੁਕ੍ਕਟਾਨਿਚ੍ਛ ਪਾਚਿਤ੍ਤਿਯੋ ਛ ਚਾ’’ਤਿ.

ਯਾ ਪਨ ਭਿਕ੍ਖੁਨੀ ਪਸਾਖੇ ਜਾਤਂ ਗਣ੍ਡਂ ਵਾ ਰੁਧਿਤਂ ਵਾ ਸਙ੍ਘਂ ਵਾ ਗਣਂ ਵਾ ਅਨਾਪੁਚ੍ਛਿਤ੍ਵਾ ਏਕੇਨ ਪੁਰਿਸੇਨ ਏਕਿਕਾ ‘‘ਭਿਨ੍ਦ ਫਾਲੇਹਿ ਧੋਵ ਆਲਿਮ੍ਪ ਬਨ੍ਧ ਮੋਚੇਹੀ’’ਤਿ ਸਬ੍ਬਾਨਿ ਕਾਤਬ੍ਬਾਨਿ ਆਣਾਪੇਤਿ, ਤਸ੍ਸਾ ਛ ਦੁਕ੍ਕਟਾਨਿ, ਕਤੇਸੁ ਭਿਨ੍ਦਨਾਦੀਸੁ ਛਸੁ ਕਿਚ੍ਚੇਸੁ ਤਸ੍ਸਾ ਛ ਪਾਚਿਤ੍ਤਿਯੋ ਹੋਨ੍ਤੀਤਿ ਯੋਜਨਾ.

੨੩੪੮-੯. ਏਤ੍ਥਾਤਿ ਗਣ੍ਡੇ ਵਾ ਵਣੇ ਵਾ. ‘‘ਯਂ ਕਾਤਬ੍ਬਂ ਅਤ੍ਥਿ, ਤਂ ਸਬ੍ਬਂ ਤ੍ਵਂ ਕਰੋਹਿ’’ਇਤਿ ਸਚੇ ਏਵਂ ਯਾ ਆਣਾਪੇਤੀਤਿ ਯੋਜਨਾ. ਤਸ੍ਸਾ ਏਕਾਯ ਆਣਾਪਨਵਾਚਾਯ ਛ ਦੁਕ੍ਕਟਾਨਿ ਚ ਪਾਚਿਤ੍ਤਿਯਚ੍ਛਕ੍ਕਞ੍ਚੇਤਿ ਦ੍ਵਾਦਸਾਪਤ੍ਤਿਯੋ ਸਿਯੁਨ੍ਤਿ ਯੋਜਨਾ.

੨੩੫੧. ਆਪੁਚ੍ਛਿਤ੍ਵਾ ¶ ਵਾਤਿ ਸਙ੍ਘਂ ਵਾ ਗਣਂ ਵਾ ਆਪੁਚ੍ਛਿਤ੍ਵਾ. ਦੁਤਿਯਨ੍ਤਿ ਦੁਤਿਯਿਕਂ. ਵਿਞ੍ਞੁਂ ਦੁਤਿਯਂ ਗਹੇਤ੍ਵਾਪਿ ਵਾਤਿ ਯੋਜਨਾ.

ਦਸਮਂ.

ਆਰਾਮਵਗ੍ਗੋ ਛਟ੍ਠੋ.

੨੩੫੩. ‘‘ਗਣਪਰਿਯੇਸਨਾਦਿਸ੍ਮਿ’’ਨ੍ਤਿ ਵਤ੍ਤਬ੍ਬੇ ਛਨ੍ਦਾਨੁਰਕ੍ਖਨਤ੍ਥਂ ਨਿਗ੍ਗਹਿਤਾਗਮੋ. ਗਬ੍ਭਿਨਿਨ੍ਤਿ ਆਪਨ੍ਨਸਤ੍ਤਂ, ਕੁਚ੍ਛਿਪਵਿਟ੍ਠਸਤ੍ਤਨ੍ਤਿ ਅਤ੍ਥੋ. ਵੁਟ੍ਠਾਪੇਨ੍ਤਿਯਾਤਿ ਉਪਸਮ੍ਪਾਦੇਨ੍ਤਿਯਾ. ਕਮ੍ਮਵਾਚਾਹੀਤਿ ਦ੍ਵੀਹਿ ਕਮ੍ਮਵਾਚਾਹਿ.

੨੩੫੪-੫. ਕਮ੍ਮਵਾਚਾਯ ਓਸਾਨੇਤਿ ਤਤਿਯਕਮ੍ਮਵਾਚਾਯ ਪਰਿਯੋਸਾਨੇ, ਯ੍ਯਕਾਰਪ੍ਪਤ੍ਤੇਤਿ ਅਤ੍ਥੋ. ਗਬ੍ਭਿਨਿਸਞ੍ਞਾਯ ਨ ਚ ਗਬ੍ਭਿਨਿਯਾਤਿ ਅਗਬ੍ਭਿਨਿਯਾ ਗਬ੍ਭਿਨਿਸਞ੍ਞਾਯ ਚ. ਉਭੋ ਸਞ੍ਜਾਤਕਙ੍ਖਾਯਾਤਿ ਉਭੋਸੁ ਸਮੁਪ੍ਪਨ੍ਨਸਂਸਯਾਯ, ਗਬ੍ਭਿਨਿਯਾ, ਅਗਬ੍ਭਿਨਿਯਾ ਚ ਵੇਮਤਿਕਾਯਾਤਿ ਅਤ੍ਥੋ. ਗਾਥਾਬਨ੍ਧਵਸੇਨੇਤ੍ਥ ਸੁ-ਸਦ੍ਦਲੋਪੋ. ਤਥਾ ਵੁਟ੍ਠਾਪੇਨ੍ਤਿਯਾ ਉਪਜ੍ਝਾਯਾਯ ਆਪਤ੍ਤਿ ਦੁਕ੍ਕਟਂ ਹੋਤੀਤਿ ਯੋਜਨਾ. ਆਚਰਿਨਿਯਾ ਤਸ੍ਸਾਤਿ ਉਪਜ੍ਝਾਯਾ ਗਬ੍ਭਿਨਿਂ ਵੁਟ੍ਠਾਪੇਤਿ, ਤਸ੍ਸਾ ਕਮ੍ਮਵਾਚਂ ਸਾਵੇਨ੍ਤਿਯਾ ¶ ਆਚਰਿਨਿਯਾ ਚ. ਗਣਸ੍ਸਾਤਿ ਉਪਜ੍ਝਾਯਾਚਰਿਨੀਹਿ ਅਞ੍ਞਸ੍ਸ ਭਿਕ੍ਖੁਨਿਗਣਸ੍ਸ ਚ. ਤਥਾ ਦੁਕ੍ਕਟਂ ਦੀਪਿਤਨ੍ਤਿ ਯੋਜਨਾ.

੨੩੫੬. ‘‘ਦ੍ਵੀਸੁ ਅਗਬ੍ਭਿਨਿਸਞ੍ਞਾਯਾ’’ਤਿ ਪਦਚ੍ਛੇਦੋ. ਦ੍ਵੀਸੂਤਿ ਗਬ੍ਭਿਨਿਯਾ, ਅਗਬ੍ਭਿਨਿਯਾ ਚ.

ਪਠਮਂ.

੨੩੫੭. ਦੁਤਿਯੇਤਿ ‘‘ਯਾ ਪਨ ਭਿਕ੍ਖੁਨੀ ਪਾਯਨ੍ਤਿਂ ਵੁਟ੍ਠਾਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੦੭੩) ਸਿਕ੍ਖਾਪਦੇ. ਇਮਸ੍ਮਿਂ ਸਿਕ੍ਖਾਪਦੇ ਪਾਯਨ੍ਤੀ ¶ ਨਾਮ ਮਾਤਾ ਵਾ ਹੋਤਿ ਧਾਤਿ ਵਾਤਿ ਅਯਂ ਵਿਸੇਸੋ.

ਦੁਤਿਯਂ.

੨੩੫੮. ਯਾ ਪਨ ਭਿਕ੍ਖੁਨੀ ਦ੍ਵੇ ਵਸ੍ਸਾਨਿ ਛਸੁ ਧਮ੍ਮੇਸੁ ਅਸਿਕ੍ਖਿਤਸਿਕ੍ਖਂ ਸਿਕ੍ਖਮਾਨਂ ਸਚੇ ਵੁਟ੍ਠਾਪੇਯ੍ਯ, ਪਾਚਿਤ੍ਤਿ ਸਿਯਾਤਿ ਯੋਜਨਾ. ਤਤ੍ਥ ਦ੍ਵੇ ਵਸ੍ਸਾਨੀਤਿ ਪਵਾਰਣਵਸੇਨ ਦ੍ਵੇ ਸਂਵਚ੍ਛਰਾਨਿ. ਛਸੁ ਧਮ੍ਮੇਸੂਤਿ ਪਾਣਾਤਿਪਾਤਾਵੇਰਮਣਿਆਦੀਸੁ ਵਿਕਾਲਭੋਜਨਾਵੇਰਮਣਿਪਰਿਯੋਸਾਨੇਸੁ ਛਸੁ ਧਮ੍ਮੇਸੁ. ਅਸਿਕ੍ਖਿਤਸਿਕ੍ਖਨ੍ਤਿ ‘‘ਪਾਣਾਤਿਪਾਤਾਵੇਰਮਣਿਂ ਦ੍ਵੇ ਵਸ੍ਸਾਨਿ ਅਵੀਤਿਕ੍ਕਮ੍ਮ ਸਮਾਦਾਨਂ ਸਮਾਦਿਯਾਮੀ’’ਤਿਆਦਿਨਾ (ਪਾਚਿ. ੧੦੭੯) ਨਯੇਨ ਅਨਾਦਿਨ੍ਨਸਿਕ੍ਖਾਪਦਂ ਵਾ ਏਵਂ ਸਮਾਦਿਯਿਤ੍ਵਾਪਿ ਕੁਪਿਤਸਿਕ੍ਖਂ ਵਾ. ਸਿਕ੍ਖਮਾਨਂ ਤੇਸੁ ਛਸੁ ਧਮ੍ਮੇਸੁ ਸਿਕ੍ਖਨਤੋ ਵਾ ਤੇ ਵਾ ਸਿਕ੍ਖਾਸਙ੍ਖਾਤੇ ਧਮ੍ਮੇ ਮਾਨਨਤੋ ਏਵਂ ਲਦ੍ਧਨਾਮਂ ਅਨੁਪਸਮ੍ਪਨ੍ਨਂ. ਵੁਟ੍ਠਾਪੇਯ੍ਯਾਤਿ ਉਪਸਮ੍ਪਾਦੇਯ੍ਯ. ਆਪਤ੍ਤਿ ਸਿਯਾਤਿ ਪਠਮਸਿਕ੍ਖਾਪਦੇ ਵੁਤ੍ਤਨਯੇਨੇਵ ਕਮ੍ਮਵਾਚਾਪਰਿਯੋਸਾਨੇ ਪਾਚਿਤ੍ਤਿ ਆਪਤ੍ਤਿ ਸਿਯਾ, ਪਾਚਿਤ੍ਤਿ ਹੋਤੀਤਿ ਅਤ੍ਥੋ.

੨੩੫੯. ‘‘ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞਾ ਵੁਟ੍ਠਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਧਮ੍ਮਕਮ੍ਮੇ ਵੇਮਤਿਕਾ ਵੁਟ੍ਠਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਾ ਵੁਟ੍ਠਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ ਏਵਂ ਧਮ੍ਮਕਮ੍ਮੇ ਸਤ੍ਥੁਨਾ ਤਿਕਪਾਚਿਤ੍ਤਿਯਂ ਵੁਤ੍ਤਂ. ‘‘ਅਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ. ਅਧਮ੍ਮਕਮ੍ਮੇ ਵੇਮਤਿਕਾ ਆਪਤ੍ਤਿ ਦੁਕ੍ਕਟਸ੍ਸ. ਅਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਾ ਵੁਟ੍ਠਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਚਿ. ੧੦੮੨) ਏਵਂ ਅਧਮ੍ਮੇ ਪਨ ਕਮ੍ਮਸ੍ਮਿਂ ਸਤ੍ਥੁਨਾ ਤਿਕਦੁਕ੍ਕਟਂ ਦੀਪਿਤਂ.

੨੩੬੦. ਅਖਣ੍ਡਤੋ ¶ ਖਣ੍ਡਂ ਅਕਤ੍ਵਾ.

੨੩੬੧. ਸਚੇ ¶ ਉਪਸਮ੍ਪਦਾਪੇਕ੍ਖਾ ਪਬ੍ਬਜ੍ਜਾਯ ਸਟ੍ਠਿਵਸ੍ਸਾਪਿ ਹੋਤਿ, ਤਸ੍ਸਾ ਇਮਾ ਛ ਸਿਕ੍ਖਾਯੋ ਦ੍ਵੇ ਵਸ੍ਸਾਨਿ ਅਵੀਤਿਕ੍ਕਮਨੀਯਾ ਪਦਾਤਬ੍ਬਾ, ਇਮਾ ਅਦਤ੍ਵਾ ਨ ਕਾਰਯੇ ਨੇਵ ਵੁਟ੍ਠਾਪੇਯ੍ਯਾਤਿ ਯੋਜਨਾ.

ਤਤਿਯਂ.

੨੩੬੨. ਚਤੁਤ੍ਥੇ ਨਤ੍ਥਿ ਵਤ੍ਤਬ੍ਬਨ੍ਤਿ ਵਕ੍ਖਮਾਨਵਿਸੇਸਤੋ ਅਞ੍ਞਂ ਵਤ੍ਤਬ੍ਬਂ ਨਤ੍ਥੀਤਿ ਯਥਾਵੁਤ੍ਤਨਯਮੇਵਾਤਿ ਅਧਿਪ੍ਪਾਯੋ. ‘‘ਇਧਾ’’ਤਿਆਦਿਨਾ ਇਮਸ੍ਮਿਂ ਸਿਕ੍ਖਾਪਦੇ ਲਬ੍ਭਮਾਨਵਿਸੇਸਂ ਦਸ੍ਸੇਤਿ. ਇਧ ਇਮਸ੍ਮਿਂ ਸਿਕ੍ਖਾਪਦੇ ਸਙ੍ਘੇਨ ਸਮ੍ਮਤਂ ਤਂ ਸਿਕ੍ਖਮਾਨਂ ਵੁਟ੍ਠਾਪੇਨ੍ਤਿਯਾ ਭਿਕ੍ਖੁਨਿਯਾ ਅਨਾਪਤ੍ਤਿ ਹੋਤੀਤਿ ਯੋਜਨਾ.

੨੩੬੩. ਦ੍ਵੇ ਵਸ੍ਸਾਨਿ ਛਸੁ ਧਮ੍ਮੇਸੁ ਸਿਕ੍ਖਿਤਸਿਕ੍ਖਾਯ ਸਿਕ੍ਖਮਾਨਾਯ ਭਿਕ੍ਖੁਨਿਸਙ੍ਘੇਨ ਉਪਸਮ੍ਪਦਤੋ ਪਠਮਂ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ ਯਾ ਵੁਟ੍ਠਾਨਸਮ੍ਮੁਤਿ ਦਾਤਬ੍ਬਾ ਹੋਤਿ, ਸਾ ਵੁਟ੍ਠਾਨਸਮ੍ਮੁਤਿ ਸਚੇ ਪਠਮਂ ਅਦਿਨ੍ਨਾ ਹੋਤਿ. ਤਤ੍ਥ ਤਸ੍ਮਿਂ ਉਪਸਮ੍ਪਦਮਾਲ਼ਕੇਪਿ ਪਦਾਤਬ੍ਬਾਯੇਵਾਤਿ ਯੋਜਨਾ.

੨੩੬੪. ਤਤਿਯਞ੍ਚਾਤਿ ਤਤਿਯਸਿਕ੍ਖਾਪਦਞ੍ਚ. ਚਤੁਤ੍ਥਞ੍ਚਾਤਿ ਇਦਂ ਚਤੁਤ੍ਥਸਿਕ੍ਖਾਪਦਞ੍ਚ. ਪਠਮੇਨ ਸਮਂ ਞੇਯ੍ਯਨ੍ਤਿ ਪਠਮੇਨ ਸਿਕ੍ਖਾਪਦੇਨ ਸਮੁਟ੍ਠਾਨਾਦਿਨਾ ਵਿਨਿਚ੍ਛਯੇਨ ਸਮਾਨਨ੍ਤਿ ਞਾਤਬ੍ਬਂ. ਚਤੁਤ੍ਥਂ ਪਨ ਸਿਕ੍ਖਾਪਦਂ ਵੁਟ੍ਠਾਪਨਸਮ੍ਮੁਤਿਂ ਅਦਾਪੇਤ੍ਵਾ ਵੁਟ੍ਠਾਪਨਵਸੇਨ ਕ੍ਰਿਯਾਕ੍ਰਿਯਂ ਹੋਤਿ.

ਚਤੁਤ੍ਥਂ.

੨੩੬੫. ਗਿਹਿਗਤਨ੍ਤਿ ਪੁਰਿਸਨ੍ਤਰਗਤਂ, ਪੁਰਿਸਸਮਾਗਮਪ੍ਪਤ੍ਤਨ੍ਤਿ ਅਤ੍ਥੋ. ਪਰਿਪੁਣ੍ਣਦ੍ਵਾਦਸਵਸ੍ਸਾ ਪਰਿਪੁਣ੍ਣਾ ਉਤ੍ਤਰਪਦਲੋਪੇਨ. ਕਿਞ੍ਚਾਪਿ ਨ ਦੋਸੋਤਿ ਯੋਜਨਾ. ਵੁਟ੍ਠਾਪੇਨ੍ਤਿਯਾਤਿ ਉਪਜ੍ਝਾਯਾ ਹੁਤ੍ਵਾ ਉਪਸਮ੍ਪਾਦੇਨ੍ਤਿਯਾ.

੨੩੬੬. ਸੇਸਨ੍ਤਿ ¶ ¶ ਵੁਤ੍ਤਂ. ਅਸੇਸੇਨ ਸਬ੍ਬਸੋ.

ਪਞ੍ਚਮਂ.

੨੩੬੮. ਦੁਕ੍ਖਿਤਂ ਸਹਜੀਵਿਨਿਨ੍ਤਿ ਏਤ੍ਥ ‘‘ਸਿਕ੍ਖਾਪਦ’’ਨ੍ਤਿ ਸੇਸੋ. ਤੁਵਟ੍ਟਕਵਗ੍ਗਸ੍ਮਿਂ ‘‘ਦੁਕ੍ਖਿਤਂ ਸਹਜੀਵਿਨਿ’’ਨ੍ਤਿ ਇਮੇਹਿ ਪਦੇਹਿ ਯੁਤ੍ਤਂ ਯਂ ਸਿਕ੍ਖਾਪਦਂ ਵੁਤ੍ਤਂ, ਤੇਨ ਸਿਕ੍ਖਾਪਦੇਨ ਅਟ੍ਠਮਂ ਸਮਂ ਞੇਯ੍ਯਂ, ਨ ਵਿਸੇਸਤਾ ਵਿਸੇਸੋ ਨਤ੍ਥੀਤਿ ਯੋਜਨਾ. ਅਟ੍ਠਮਨ੍ਤਿ ‘‘ਯਾ ਪਨ ਭਿਕ੍ਖੁਨੀ ਸਹਜੀਵਿਨਿਂ ਵੁਟ੍ਠਾਪੇਤ੍ਵਾ ਦ੍ਵੇ ਵਸ੍ਸਾਨਿ ਨੇਵ ਅਨੁਗ੍ਗਣ੍ਹੇਯ੍ਯ ਨ ਅਨੁਗ੍ਗਣ੍ਹਾਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੧੦੮) ਵੁਤ੍ਤਸਿਕ੍ਖਾਪਦਂ. ਤਤ੍ਥ ਸਹਜੀਵਿਨਿਨ੍ਤਿ ਸਦ੍ਧਿਵਿਹਾਰਿਨਿਂ. ਨੇਵ ਅਨੁਗ੍ਗਣ੍ਹੇਯ੍ਯਾਤਿ ਸਯਂ ਉਦ੍ਦੇਸਾਦੀਹਿ ਨਾਨੁਗ੍ਗਣ੍ਹੇਯ੍ਯ. ਨ ਅਨੁਗ੍ਗਣ੍ਹਾਪੇਯ੍ਯਾਤਿ ‘‘ਇਮਿਸ੍ਸਾ ਅਯ੍ਯੇ ਉਦ੍ਦੇਸਾਦੀਨਿ ਦੇਹੀ’’ਤਿ ਏਵਂ ਨ ਅਞ੍ਞਾਯ ਅਨੁਗ੍ਗਣ੍ਹਾਪੇਯ੍ਯ. ਪਾਚਿਤ੍ਤਿਯਨ੍ਤਿ ਧੁਰੇ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.

ਅਟ੍ਠਮਂ.

੨੩੬੯. ਯਾ ਕਾਚਿ ਭਿਕ੍ਖੁਨੀ ਵੁਟ੍ਠਾਪਿਤਪਵਤ੍ਤਿਨਿਂ ਦ੍ਵੇ ਵਸ੍ਸਾਨਿ ਨਾਨੁਬਨ੍ਧੇਯ੍ਯ ਚੇ, ਤਸ੍ਸਾ ਪਾਚਿਤ੍ਤਿ ਪਰਿਯਾਪੁਤਾ ਕਥਿਤਾਤਿ ਯੋਜਨਾ. ਵੁਟ੍ਠਾਪੇਤੀਤਿ ਵੁਟ੍ਠਾਪਿਤਾ, ਪਵਤ੍ਤੇਤਿ ਸੁਸਿਕ੍ਖਾਪੇਤੀਤਿ ਪਵਤ੍ਤਿਨੀ, ਵੁਟ੍ਠਾਪਿਤਾ ਚ ਸਾ ਪਵਤ੍ਤਿਨੀ ਚਾਤਿ ਵੁਟ੍ਠਾਪਿਤਪਵਤ੍ਤਿਨੀ, ਉਪਜ੍ਝਾਯਾਯੇਤਂ ਅਧਿਵਚਨਂ, ਤਂ, ਉਪਜ੍ਝਾਯਂ. ਨਾਨੁਬਨ੍ਧੇਯ੍ਯਾਤਿ ਚੁਣ੍ਣੇਨ, ਮਤ੍ਤਿਕਾਯ, ਦਨ੍ਤਕਟ੍ਠੇਨ, ਮੁਖੋਦਕੇਨਾਤਿ ਏਵਂ ਤੇਨ ਤੇਨ ਕਰਣੀਯੇਨ ਉਪਟ੍ਠਹੇਯ੍ਯ.

੨੩੭੦. ‘‘ਦ੍ਵੇ ਵਸ੍ਸਾਨਿ ਅਹਂ ਨਾਨੁਬਨ੍ਧਿਸ੍ਸਾਮੀ’’ਤਿ ਧੁਰਂ ਨਿਕ੍ਖਿਪਤਿ ਚੇ, ਏਵਂ ਧੁਰੇ ਨਿਕ੍ਖਿਤ੍ਤਮਤ੍ਤਸ੍ਮਿਂ ਪਨ ਤਸ੍ਸਾ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ.

੨੩੭੧. ਯਾ ¶ ਪਨ ਭਿਕ੍ਖੁਨੀ ਉਪਜ੍ਝਾਯਂ ਬਾਲਂ ਵਾ ਅਲਜ੍ਜਿਂ ਵਾ ਨਾਨੁਬਨ੍ਧਤਿ, ਤਸ੍ਸਾ, ਗਿਲਾਨਾਯ ਵਾ ਆਪਦਾਸੁ ਵਾ ਉਮ੍ਮਤ੍ਤਿਕਾਯ ਵਾ ਨਾਨੁਬਨ੍ਧਨ੍ਤਿਯਾ ਨ ਦੋਸੋਤਿ ਯੋਜਨਾ.

੨੩੭੨. ਅਨੁਪਟ੍ਠਾਨੇਨ ਹੋਤੀਤਿ ਆਹ ‘‘ਅਕ੍ਰਿਯਂ ਵੁਤ੍ਤ’’ਨ੍ਤਿ.

ਨਵਮਂ.

੨੩੭੩-੫. ਯਾ ¶ ਕਾਚਿ ਭਿਕ੍ਖੁਨੀ ਸਹਜੀਵਿਨਿਂ ਸਦ੍ਧਿਵਿਹਾਰਿਨਿਂ ਵੁਟ੍ਠਾਪੇਤ੍ਵਾ ਉਪਸਮ੍ਪਾਦੇਤ੍ਵਾ ਤਂ ਗਹੇਤ੍ਵਾ ਅਨ੍ਤਮਸੋ ਛਪ੍ਪਞ੍ਚਯੋਜਨਾਨਿਪਿ ਨ ਗਚ੍ਛੇਯ੍ਯ ਨ ਚਞ੍ਞਂ ਆਣਾਪੇਯ੍ਯ ‘‘ਇਮਂ, ਅਯ੍ਯੇ, ਗਹੇਤ੍ਵਾ ਗਚ੍ਛਾ’’ਤਿ ਅਞ੍ਞਞ੍ਚ ਨ ਨਿਯੋਜੇਯ੍ਯ ਚੇ, ਧੁਰੇ ਨਿਕ੍ਖਿਤ੍ਤਮਤ੍ਤਸ੍ਮਿਂ ‘‘ਨ ਦਾਨਿ ਗਚ੍ਛਿਸ੍ਸਾਮਿ, ਅਞ੍ਞਞ੍ਚ ਗਹੇਤ੍ਵਾ ਗਨ੍ਤੁਂ ਨ ਨਿਯੋਜੇਸ੍ਸਾਮੀ’’ਤਿ ਉਸ੍ਸਾਹੇ ਵਿਸ੍ਸਟ੍ਠਮਤ੍ਤੇ ਤਸ੍ਸਾ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ.

ਅਨ੍ਤਰਾਯਸ੍ਮਿਂ ਸਤਿ ਵਾ ਦੁਤਿਯਂ ਅਲਭਨ੍ਤਿਯਾ ਵਾ ਆਪਦਾਸੁ ਵਾ ਗਿਲਾਨਾਯ ਵਾ ਉਮ੍ਮਤ੍ਤਿਕਾਯ ਵਾ ਨ ਦੋਸੋਤਿ ਯੋਜਨਾ.

ਦਸਮਂ.

ਗਬ੍ਭਿਨਿਵਗ੍ਗੋ ਸਤ੍ਤਮੋ.

੨੩੭੬. ਗਿਹਿਗਤੇਹਿ ਤੀਹੇਵਾਤਿ ਅਨਨ੍ਤਰੇ ਗਬ੍ਭਿਨਿਵਗ੍ਗੇ ਗਿਹਿਗਤਪਦਯੁਤ੍ਤੇਹਿ ਪਞ੍ਚਮਛਟ੍ਠਸਤ੍ਤਮੇਹਿ ਤੀਹੇਵ ਸਿਕ੍ਖਾਪਦੇਹਿ. ਸਦਿਸਾਨੀਤਿ ਇਧ ਵੀਸਤਿਵਸ੍ਸਵਚਨਞ੍ਚ ਕੁਮਾਰਿਭੂਤਵਚਨਞ੍ਚ ਤਤ੍ਥ ਦ੍ਵਾਦਸਵਸ੍ਸਵਚਨਞ੍ਚ ਗਿਹਿਗਤਵਚਨਞ੍ਚ ਠਪੇਤ੍ਵਾ ਅਵਸੇਸੇਹਿ ਵਿਨਿਚ੍ਛਯੇਹਿ ਯਥਾਕ੍ਕਮਂ ਸਦਿਸਾਨੇਵਾਤਿ.

੨੩੭੭. ਮਹੂਪਪਦਾਤਿ ਮਹਾ ਉਪਪਦੋ ਯਾਸਂ ਸਿਕ੍ਖਮਾਨਾਨਂ ਤਾ ਮਹੂਪਪਦਾ. ਉਪਪਦਂ ਨਾਮ ਪਦਾਨਮੇਵ ਯੁਜ੍ਜਤਿ, ਨ ਅਤ੍ਥਾਨਨ੍ਤਿ ¶ ‘‘ਯਾਸ’’ਨ੍ਤਿ ਅਞ੍ਞਪਦੇਨ ਸਿਕ੍ਖਮਾਨਾਦਿਪਦਾਨਂ ਗਹਣਂ, ਸਦ੍ਦਤ੍ਥਾਨਮਭੇਦੋਪਚਾਰਸ੍ਸ ਪਨ ਇਚ੍ਛਿਤਤ੍ਤਾ ਸਿਕ੍ਖਮਾਨਪਦਗਹਿਤਾਨਮੇਤ੍ਥ ਗਹਣਂ ਵੇਦਿਤਬ੍ਬਂ, ਮਹਾਸਿਕ੍ਖਮਾਨਾਤਿ ਵੁਤ੍ਤਂ ਹੋਤਿ. ਆਦਿਤੋਤਿ ਏਤ੍ਥ ‘‘ਵੁਤ੍ਤਾ’’ਤਿ ਸੇਸੋ, ਗਬ੍ਭਿਨਿਵਗ੍ਗੇ ਤਿਸ੍ਸਨ੍ਨਂ ਗਿਹਿਗਤਾਨਂ ਪੁਰਿਮੇਸੁ ਤਤਿਯਚਤੁਤ੍ਥਸਿਕ੍ਖਾਪਦੇਸੁ ਆਗਤਾ ਦ੍ਵੇ ਸਿਕ੍ਖਮਾਨਾਤਿ ਅਤ੍ਥੋ. ਗਿਹਿਗਤਾਯ ‘‘ਪਰਿਪੁਣ੍ਣਦ੍ਵਾਦਸਵਸ੍ਸਾ’’ਤਿ ਚ ਕੁਮਾਰਿਭੂਤਾਯ ‘‘ਪਰਿਪੁਣ੍ਣਵੀਸਤਿਵਸ੍ਸਾ’’ਤਿ ਚ ਵਸ੍ਸਵਸੇਨ ਨਾਨਾਕਰਣਸ੍ਸ ਵੁਤ੍ਤਤ੍ਤਾ ਤਾਹਿ ਦ੍ਵੀਹਿ ਮਹਾਸਿਕ੍ਖਮਾਨਾਯ ਵਸ੍ਸਵਸੇਨੇਵ ਨਾਨਾਕਰਣਂ ਦਸ੍ਸੇਤੁਮਾਹ ‘‘ਗਤਾ ਵੀਸਤਿਵਸ੍ਸਾਤਿ, ਵਿਞ੍ਞਾਤਬ੍ਬਾ ਵਿਭਾਵਿਨਾ’’ਤਿ, ਅਤਿਕ੍ਕਨ੍ਤਵੀਸਤਿਵਸ੍ਸਾ ਮਹਾਸਿਕ੍ਖਮਾਨਾ ਨਾਮ ਹੋਤੀਤਿ ਅਤ੍ਥੋ.

੨੩੭੮. ਤਾ ਦ੍ਵੇ ਮਹਾਸਿਕ੍ਖਮਾਨਾ ਸਚੇ ਗਿਹਿਗਤਾ ਵਾ ਹੋਨ੍ਤੁ, ਨ ਚ ਪੁਰਿਸਗਤਾ ਵਾ ਹੋਨ੍ਤੁ ¶ , ਸਮ੍ਮੁਤਿਆਦਿਸੁ ਕਮ੍ਮਵਾਚਾਯ ‘‘ਸਿਕ੍ਖਮਾਨਾ’’ਤਿ ਵਤ੍ਤਬ੍ਬਾਤਿ ਯੋਜਨਾ. ਏਤ੍ਥ ਚ ਸਮ੍ਮੁਤਿ ਨਾਮ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ ਕਾਤਬ੍ਬਾਯ ਸਿਕ੍ਖਾਯ ਸਮ੍ਮੁਤਿ ਚੇਵ ਵੁਟ੍ਠਾਨਸਮ੍ਮੁਤਿ ਚ. ਆਦਿ-ਸਦ੍ਦੇਨ ਉਪਸਮ੍ਪਦਾਕਮ੍ਮਂ ਗਹਿਤਂ.

੨੩੭੯. ਇਮਾਸਂ ਦ੍ਵਿਨ੍ਨਂ ਸਮ੍ਮੁਤਿਦਾਨਾਦੀਸੁ ਞਤ੍ਤਿਯਾ ਚ ਕਮ੍ਮਵਾਚਾਯ ਚ ਵਤ੍ਤਬ੍ਬਂ ਦਸ੍ਸੇਤ੍ਵਾ ਇਦਾਨਿ ਅਵਤ੍ਤਬ੍ਬਂ ਦਸ੍ਸੇਤੁਮਾਹ ‘‘ਨ ਤਾ’’ਤਿਆਦਿ. ਤਾ ਏਤਾ ਉਭੋਪਿ ਮਹਾਸਿਕ੍ਖਮਾਨਾ ‘‘ਕੁਮਾਰਿਭੂਤਾ’’ਤਿ ਵਾ ਤਥਾ ‘‘ਗਿਹਿਗਤਾ’’ਤਿ ਵਾ ਕਮ੍ਮਵਾਚਾਯ ਨ ਵਤ੍ਤਬ੍ਬਾ ਯਸ੍ਮਾ, ਤਸ੍ਮਾ ਏਵਂ ਵਤ੍ਤੁਂ ਨ ਵਟ੍ਟਤੀਤਿ ਯੋਜਨਾ. ‘‘ਨ ਵਤ੍ਤਬ੍ਬਾ’’ਤਿ ਇਮਿਨਾ ਤਥਾ ਚੇ ਕਮ੍ਮਵਾਚਾ ਵੁਚ੍ਚੇਯ੍ਯ, ਤਂ ਕਮ੍ਮਂ ਕੁਪ੍ਪਤੀਤਿ ਦੀਪੇਤਿ. ਇਧ ਪਨ-ਸਦ੍ਦੋ ਯਸ੍ਮਾ-ਪਦਤ੍ਥੋਤਿ ਤਦਤ੍ਥਵਸੇਨ ਯੋਜਨਾ ਦਸ੍ਸਿਤਾ.

੨੩੮੦. ਸਮ੍ਮੁਤਿਨ੍ਤਿ ¶ ਸਿਕ੍ਖਮਾਨਸਮ੍ਮੁਤਿਂ. ਦਸਵਸ੍ਸਾਯਾਤਿ ਏਤ੍ਥ ‘‘ਗਿਹਿਗਤਾਯਾ’’ਤਿ ਸੇਸੋ. ਯਥਾਹ – ‘‘ਗਿਹਿਗਤਾਯ ਦਸਵਸ੍ਸਕਾਲੇ ਸਿਕ੍ਖਾਸਮ੍ਮੁਤਿਂ ਦਤ੍ਵਾ ਦ੍ਵਾਦਸਵਸ੍ਸਕਾਲੇ ਉਪਸਮ੍ਪਦਾ ਕਾਤਬ੍ਬਾ’’ਤਿ (ਪਾਚਿ. ਅਟ੍ਠ. ੧੧੧੯). ਸੇਸਾਸੁਪੀਤਿ ਏਕਾਦਸਵਸ੍ਸਕਾਲੇ ਦਤ੍ਵਾ ਤੇਰਸਵਸ੍ਸਕਾਲੇ ਕਾਤਬ੍ਬਾ, ਦ੍ਵਾਦਸ, ਤੇਰਸ, ਚੁਦ੍ਦਸ, ਪਨ੍ਨਰਸ, ਸੋਲ਼ਸ, ਸਤ੍ਤਰਸ, ਅਟ੍ਠਾਰਸਵਸ੍ਸਕਾਲੇ ਸਿਕ੍ਖਾਸਮ੍ਮੁਤਿਂ ਦਤ੍ਵਾ ਵੀਸਤਿਵਸ੍ਸਕਾਲੇ ਕਾਤਬ੍ਬਾਤਿ ਏਵਂ ਅਟ੍ਠਾਰਸਵਸ੍ਸਪਰਿਯਨ੍ਤਾਸੁ ਸੇਸਾਸੁਪਿ ਸਿਕ੍ਖਮਾਨਾਸੁ. ਅਯਂ ਨਯੋਤਿ ‘‘ਸਮ੍ਮੁਤਿਯਾ ਦਿਨ੍ਨਸਂਵਚ੍ਛਰਤੋ ਆਗਾਮਿਨਿ ਦੁਤਿਯੇ ਸਂਵਚ੍ਛਰੇ ਉਪਸਮ੍ਪਾਦੇਤਬ੍ਬਾ’’ਤਿ ਅਯਂ ਨਯੋ. ਤੇਨੇਵ ਵੁਤ੍ਤਂ ‘‘ਏਕਾਦਸਵਸ੍ਸਕਾਲੇ ਦਤ੍ਵਾ ਤੇਰਸਵਸ੍ਸਕਾਲੇ ਕਾਤਬ੍ਬਾ’’ਤਿਆਦਿ.

੨੩੮੧. ‘‘ਕੁਮਾਰਿਭੂਤਾ’’ਤਿਪਿ ‘‘ਗਿਹਿਗਤਾ’’ਤਿਪਿ ਵਤ੍ਤੁਂ ਵਟ੍ਟਤੀਤਿ ਅਟ੍ਠਕਥਾਯਂ ਵੁਤ੍ਤਾਤਿ ਯੋਜਨਾ.

੨੩੮੨. ਯਾ ਪਨ ਪਰਿਪੁਣ੍ਣਵੀਸਤਿਵਸ੍ਸਾ ਸਾਮਣੇਰੀ ‘‘ਕੁਮਾਰਿਭੂਤਾ’’ਤਿ ਵੁਤ੍ਤਾ, ਸਾ ਕਮ੍ਮਵਾਚਾਯ ‘‘ਕੁਮਾਰਿਭੂਤਾ’’ਇਚ੍ਚੇਵ ਵਤ੍ਤਬ੍ਬਾ, ਅਞ੍ਞਥਾ ਪਨ ਨ ਵਤ੍ਤਬ੍ਬਾ ‘‘ਗਿਹਿਗਤਾ’’ਤਿ ਵਾ ‘‘ਪੁਰਿਸਨ੍ਤਰਗਤਾ’’ਤਿ ਵਾ ਨ ਵਤ੍ਤਬ੍ਬਾਤਿ ਯੋਜਨਾ. ਯਥਾਹ ‘‘ਕੁਮਾਰਿਭੂਤਾ ਪਨ ‘ਗਿਹਿਗਤਾ’ਤਿ ਨ ਵਤ੍ਤਬ੍ਬਾ, ‘ਕੁਮਾਰਿਭੂਤਾ’ਇਚ੍ਚੇਵ ਵਤ੍ਤਬ੍ਬਾ’’ਤਿ.

੨੩੮੩. ਏਤਾ ਤੁ ਪਨ ਤਿਸ੍ਸੋਪੀਤਿ ਮਹਾਸਿਕ੍ਖਮਾਨਾ ਗਿਹਿਗਤਾ, ਕੁਮਾਰਿਭੂਤਾਤਿ ਵੁਤ੍ਤਾ ਪਨ ¶ ਏਤਾ ਤਿਸ੍ਸੋਪਿ. ਅਪਿ-ਸਦ੍ਦੇਨ ਗਿਹਿਗਤਾ ਕੁਮਾਰਿਭੂਤਾ ਦ੍ਵੇ ਸਕਸਕਨਾਮੇਨਾਪਿ ਵਤ੍ਤੁਂ ਵਟ੍ਟਨ੍ਤੀਤਿ ਦੀਪੇਤਿ. ‘‘ਕੁਮਾਰਿਭੂਤਸਿਕ੍ਖਮਾਨਾਯਾ’’ਤਿ ਪਾਲ਼ਿਯਂ ਅਵੁਤ੍ਤਤ੍ਤਾ ਨ ਵਟ੍ਟਤੀਤਿ ਕੋਚਿ ਮਞ੍ਞੇਯ੍ਯਾਤਿ ¶ ਆਹ ‘‘ਨ ਸਂਸਯੋ’’ਤਿ. ਤਥਾ ਵਤ੍ਤਬ੍ਬਤਾਹੇਤੁਦਸ੍ਸਨਤ੍ਥਮਾਹ ‘‘ਸਿਕ੍ਖਾਸਮ੍ਮੁਤਿਦਾਨਤੋ’’ਤਿ.

ਪਠਮਦੁਤਿਯਤਤਿਯਾਨਿ.

੨੩੮੪-੫. ਯਾ ਪਨ ਭਿਕ੍ਖੁਨੀ ਊਨਦ੍ਵਾਦਸਵਸ੍ਸਾਵ ਉਪਸਮ੍ਪਦਾਵਸੇਨ ਅਪਰਿਪੁਣ੍ਣਦ੍ਵਾਦਸਵਸ੍ਸਾ ਏਵ ਸਯਂ ਉਪਜ੍ਝਾਯਾ ਹੁਤ੍ਵਾ ਪਰਂ ਸਿਕ੍ਖਮਾਨਂ ਸਚੇ ਵੁਟ੍ਠਾਪੇਤਿ, ਪੁਬ੍ਬੇ ਵੁਤ੍ਤਨਯੇਨੇਵ ਗਣਪਰਿਯੇਸਨਾਦਿਦੁਤਿਯਾਨੁਸ੍ਸਾਵਨਪਰਿਯੋਸਾਨੇਸੁ ਆਪਨ੍ਨਾਨਂ ਦੁਕ੍ਕਟਾਨਂ ਅਨਨ੍ਤਰਂ ਕਮ੍ਮਵਾਚਾਨਂ ਓਸਾਨੇ ਤਤਿਯਾਨੁਸ੍ਸਾਵਨਾਯ ਯ੍ਯਤਾਰਪ੍ਪਤ੍ਤਾਯ ਤਸ੍ਸਾ ਪਾਚਿਤ੍ਤਿ ਪਰਿਦੀਪਿਤਾਤਿ ਯੋਜਨਾ.

ਚਤੁਤ੍ਥਂ.

੨੩੮੬. ਪਞ੍ਚਮੇਤਿ ‘‘ਯਾ ਪਨ ਭਿਕ੍ਖੁਨੀ ਪਰਿਪੁਣ੍ਣਦ੍ਵਾਦਸਵਸ੍ਸਾ ਸਙ੍ਘੇਨ ਅਸਮ੍ਮਤਾ ਵੁਟ੍ਠਾਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੧੪੨) ਸਿਕ੍ਖਾਪਦੇ. ਕਾਯਚਿਤ੍ਤਵਾਚਾਚਿਤ੍ਤਕਾਯਵਾਚਾਚਿਤ੍ਤਵਸੇਨ ਤਿਸਮੁਟ੍ਠਾਨਂ. ਕ੍ਰਿਯਾਕ੍ਰਿਯਨ੍ਤਿ ਵੁਟ੍ਠਾਪਨਂ ਕਿਰਿਯਂ, ਸਙ੍ਘਸਮ੍ਮੁਤਿਯਾ ਅਗ੍ਗਹਣਂ ਅਕਿਰਿਯਂ.

ਪਞ੍ਚਮਂ.

੨੩੮੭. ਸਙ੍ਘੇਨਾਤਿ ਭਿਕ੍ਖੁਨਿਸਙ੍ਘੇਨ. ਉਪਪਰਿਕ੍ਖਿਤ੍ਵਾਤਿ ਅਲਜ੍ਜਿਭਾਵਾਦਿਂ ਉਪਪਰਿਕ੍ਖਿਤ੍ਵਾ. ਅਲਂ ਤਾਵਾਤਿ ਏਤ੍ਥ ‘‘ਤੇ ਅਯ੍ਯੇ’’ਤਿ ਸੇਸੋ. ਵਾਰਿਤਾਤਿ ਏਤ੍ਥ ‘‘ਸਾਧੂਤਿ ਪਟਿਸ੍ਸੁਣਿਤ੍ਵਾ’’ਤਿ ਸੇਸੋ. ‘‘ਅਲਂ ਤਾਵ ਤੇ, ਅਯ੍ਯੇ, ਉਪਸਮ੍ਪਾਦਿਤੇਨਾ’’ਤਿ ਵਾਰਿਤਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਏਤ੍ਥ ਏਤਸ੍ਮਿਂ ਪਵਾਰਣੇ ਪਚ੍ਛਾ ਖੀਯਤਿ ‘‘ਅਹਮੇਵ ਨੂਨ ਬਾਲਾ, ਅਹਮੇਵ ਨੂਨ ਅਲਜ੍ਜਿਨੀ’’ਤਿਆਦਿਨਾ ਅਵਣ੍ਣਂ ਪਕਾਸੇਤਿ, ਦੋਸਤਾ ਪਾਚਿਤ੍ਤਿਯਾਪਤ੍ਤਿ ਹੋਤੀਤਿ ਯੋਜਨਾ.

੨੩੮੮. ਛਨ੍ਦਦੋਸਾਦੀਹਿ ¶ ਕਰੋਨ੍ਤਿਯਾਤਿ ਏਤ੍ਥ ‘‘ਪਕਤਿਯਾ’’ਤਿ ਸੇਸੋ. ਪਕਤਿਯਾ ਛਨ੍ਦਦੋਸਾਦੀਹਿ ਅਗਤਿਗਮਨੇਹਿ ਨਿਵਾਰਣਂ ਕਰੋਨ੍ਤਿਯਾ ਸਚੇ ਉਜ੍ਝਾਯਤਿ, ਨ ਦੋਸੋਤਿ ਯੋਜਨਾ.

ਛਟ੍ਠਂ.

੨੩੮੯-੯੦. ਲਦ੍ਧੇ ¶ ਚੀਵਰੇਤਿ ਸਿਕ੍ਖਾਮਾਨਾਯ ‘‘ਸਚੇ ਮੇ ਤ੍ਵਂ, ਅਯ੍ਯੇ, ਚੀਵਰਂ ਦਸ੍ਸਸਿ, ਏਵਾਹਂ ਤਂ ਵੁਟ੍ਠਾਪੇਸ੍ਸਾਮੀ’’ਤਿ ਵਤ੍ਵਾ ਯਾਚਿਤੇ ਤਸ੍ਮਿਂ ਚੀਵਰੇ ਲਦ੍ਧੇ. ਪਚ੍ਛਾਤਿ ਚੀਵਰਲਾਭਤੋ ਪਚ੍ਛਾ. ਅਸਨ੍ਤੇ ਅਨ੍ਤਰਾਯਿਕੇਤਿ ਦਸਨ੍ਨਂ ਅਨ੍ਤਰਾਯਾਨਂ ਅਞ੍ਞਤਰਸ੍ਮਿਂ ਅਨ੍ਤਰਾਯੇ ਅਵਿਜ੍ਜਮਾਨੇ. ਵੁਟ੍ਠਾਪੇਸ੍ਸਾਮਿਨਾਹਨ੍ਤਿ ਅਹਂ ਤਂ ਨ ਸਮੁਟ੍ਠਾਪੇਸ੍ਸਾਮੀਤਿ ਧੁਰਨਿਕ੍ਖੇਪਨੇ ਤਸ੍ਸਾ ਪਾਚਿਤ੍ਤਿਯਂ ਹੋਤੀਤਿ ਯੋਜਨਾ.

੨੩੯੧. ਇਦਨ੍ਤਿ ਇਦਂ ਸਿਕ੍ਖਾਪਦਂ. ਅਵੁਟ੍ਠਾਪਨੇਨ ਅਕ੍ਰਿਯਂ.

ਸਤ੍ਤਮਂ.

੨੩੯੨. ਅਟ੍ਠਮਨ੍ਤਿ ‘‘ਯਾ ਪਨ ਭਿਕ੍ਖੁਨੀ ਸਿਕ੍ਖਮਾਨਂ ‘ਸਚੇ ਮਂ ਤ੍ਵਂ, ਅਯ੍ਯੇ, ਦ੍ਵੇ ਵਸ੍ਸਾਨਿ ਅਨੁਬਨ੍ਧਿਸ੍ਸਸਿ, ਏਵਾਹਂ ਤਂ ਵੁਟ੍ਠਾਪੇਸ੍ਸਾਮੀ’’ਤਿਆਦਿ (ਪਾਚਿ. ੧੧੫੫) ਸਿਕ੍ਖਾਪਦਂ. ਨਵਮੇਤਿ ‘‘ਯਾ ਪਨ ਭਿਕ੍ਖੁਨੀ ਪੁਰਿਸਸਂਸਟ੍ਠਂ ਕੁਮਾਰਕਸਂਸਟ੍ਠਂ ਚਣ੍ਡਿਂ ਸੋਕਾਵਾਸਂ ਸਿਕ੍ਖਮਾਨਂ ਵੁਟ੍ਠਾਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੧੫੯) ਵੁਤ੍ਤਸਿਕ੍ਖਾਪਦੇ. ‘‘ਵਤ੍ਤਬ੍ਬਂ ਨਤ੍ਥੀ’’ਤਿ ਇਦਂ ਸਦ੍ਦਤ੍ਥਵਿਸੇਸਮਨ੍ਤਰੇਨ ਵਿਨਿਚ੍ਛਯਸ੍ਸ ਸੁਵਿਞ੍ਞੇਯ੍ਯਤ੍ਤਾ ਵੁਤ੍ਤਂ. ਤੇਨੇਵਾਹ ‘‘ਉਤ੍ਤਾਨਮੇਵਿਦ’’ਨ੍ਤਿ.

ਸਦ੍ਦਤ੍ਥੋ ਪਨ ਏਵਂ ਵੇਦਿਤਬ੍ਬੋ – ਪੁਰਿਸਸਂਸਟ੍ਠਨ੍ਤਿ ਪਰਿਪੁਣ੍ਣਵੀਸਤਿਵਸ੍ਸੇਨ ਪੁਰਿਸੇਨ ਅਨਨੁਲੋਮਿਕੇਨ ਕਾਯਵਚੀਕਮ੍ਮੇਨ ਸਂਸਟ੍ਠਂ. ਕੁਮਾਰਕਸਂਸਟ੍ਠਨ੍ਤਿ ਊਨਵੀਸਤਿਵਸ੍ਸੇਨ ਕੁਮਾਰੇਨ ਤਥੇਵ ਸਂਸਟ੍ਠਂ. ਚਣ੍ਡਿਨ੍ਤਿ ਕੋਧਨਂ. ਸੋਕਾਵਾਸਨ੍ਤਿ ਸਙ੍ਕੇਤਂ ਕਤ੍ਵਾ ¶ ਆਗਚ੍ਛਮਾਨਾ ਪੁਰਿਸਾਨਂ ਅਨ੍ਤੋ ਸੋਕਂ ਪਵੇਸੇਤੀਤਿ ਸੋਕਾਵਾਸਾ, ਤਂ ਸੋਕਾਵਾਸਂ. ਅਥ ਵਾ ਘਰਂ ਵਿਯ ਘਰਸਾਮਿਕਾ, ਅਯਮ੍ਪਿ ਪੁਰਿਸਸਮਾਗਮਂ ਅਲਭਮਾਨਾ ਸੋਕਂ ਆਵਿਸਤਿ, ਇਤਿ ਯਂ ਆਵਿਸਤਿ, ਸ੍ਵਾਸ੍ਸਾ ਆਵਾਸੋ ਹੋਤੀਤਿ ਸੋਕਾਵਾਸਾ. ਤੇਨੇਵਸ੍ਸ ਪਦਭਾਜਨੇ ‘‘ਸੋਕਾਵਾਸਾ ਨਾਮ ਪਰੇਸਂ ਦੁਕ੍ਖਂ ਉਪ੍ਪਾਦੇਤਿ, ਸੋਕਂ ਆਵਿਸਤੀ’’ਤਿ (ਪਾਚਿ. ੧੧੬੦) ਦ੍ਵੇਧਾ ਅਤ੍ਥੋ ਵੁਤ੍ਤੋ. ਪਾਚਿਤ੍ਤਿਯਨ੍ਤਿ ਏਵਰੂਪਂ ਵੁਟ੍ਠਾਪੇਨ੍ਤਿਯਾ ਵੁਤ੍ਤਨਯੇਨੇਵ ਕਮ੍ਮਵਾਚਾਪਰਿਯੋਸਾਨੇ ਉਪਜ੍ਝਾਯਾਯ ਪਾਚਿਤ੍ਤਿਯਂ.

੨੩੯੩. ‘‘ਨਤ੍ਥਿ ਅਜਾਨਨ੍ਤਿਯਾ’’ਤਿ ਪਚ੍ਛੇਦੋ, ਸਿਕ੍ਖਮਾਨਾਯ ਪੁਰਿਸਸਂਸਟ੍ਠਾਦਿਭਾਵਂ ਅਜਾਨਨ੍ਤਿਯਾਤਿ ਅਤ੍ਥੋ.

ਅਟ੍ਠਮਨਵਮਾਨਿ.

੨੩੯੪. ਵਿਜਾਤਮਾਤਰਾ ¶ ਵਾ ਜਨਕਪਿਤਰਾ ਵਾ ਸਾਮਿਨਾ ਪਰਿਗ੍ਗਾਹਕਸਾਮਿਨਾ ਵਾ ਨਾਨੁਞ੍ਞਾਤਂ ਉਪਸਮ੍ਪਦਤ੍ਥਾਯ ਅਨਨੁਞ੍ਞਾਤਂ ਤਂ ਸਿਕ੍ਖਮਾਨਂ ਵੁਟ੍ਠਾਪੇਨ੍ਤਿਯਾ ਤਸ੍ਸਾ ਪਾਚਿਤ੍ਤਿਯਾਪਤ੍ਤਿ ਸਿਯਾਤਿ ਯੋਜਨਾ.

੨੩੯੫. ਨ ਭਿਕ੍ਖੁਨਾਤਿ ਭਿਕ੍ਖੁਨਾ ਦ੍ਵਿਕ੍ਖਤ੍ਤੁਂ ਨ ਪੁਚ੍ਛਿਤਬ੍ਬਂ, ਸਕਿਮੇਵ ਪੁਚ੍ਛਿਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਯਥਾਹ ‘‘ਭਿਕ੍ਖੁਨੀਹਿ ਦ੍ਵਿਕ੍ਖਤ੍ਤੁਂ ਆਪੁਚ੍ਛਿਤਬ੍ਬਂ ਪਬ੍ਬਜ੍ਜਾਕਾਲੇ ਚ ਉਪਸਮ੍ਪਦਾਕਾਲੇ ਚ, ਭਿਕ੍ਖੂਨਂ ਪਨ ਸਕਿਂ ਆਪੁਚ੍ਛਿਤੇਪਿ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੧੧੬੨).

੨੩੯੬-੭. ਅਤ੍ਥਿਤਨ੍ਤਿ ਅਤ੍ਥਿਭਾਵਂ. ਚਤੂਹਿ ਸਮੁਟ੍ਠਾਤਿ, ਚਤ੍ਤਾਰਿ ਵਾ ਸਮੁਟ੍ਠਾਨਾਨਿ ਏਤਸ੍ਸਾਤਿ ਚਤੁਸਮੁਟ੍ਠਾਨਂ. ਕਤਮੇਹਿ ਚਤੂਹਿ ਸਮੁਟ੍ਠਾਤੀਤਿ ਆਹ ‘‘ਵਾਚਤੋ…ਪੇ… ਕਾਯਵਾਚਾਦਿਤੋਪਿ ਚਾ’’ਤਿ. ਕਥਂ ਵਾਚਾਦੀਹਿ ਚਤੂਹਿ ਸਮੁਟ੍ਠਾਤਿ? ਅਬ੍ਭਾਨਕਮ੍ਮਾਦੀਸੁ ਕੇਨਚਿਦੇਵ ਕਰਣੀਯੇਨ ਖਣ੍ਡਸੀਮਾਯਂ ਨਿਸਿਨ੍ਨਾ ¶ ‘‘ਪਕ੍ਕੋਸਥ ਸਿਕ੍ਖਮਾਨਂ, ਇਧੇਵ ਨਂ ਉਪਸਮ੍ਪਾਦੇਸ੍ਸਾਮਾ’’ਤਿ ਉਪਸਮ੍ਪਾਦੇਤਿ, ਏਵਂ ਵਾਚਤੋ ਸਮੁਟ੍ਠਾਤਿ. ‘‘ਉਪਸ੍ਸਯਤੋ ਪਟ੍ਠਾਯ ਉਪਸਮ੍ਪਾਦੇਸ੍ਸਾਮੀ’’ਤਿ ਵਤ੍ਵਾ ਖਣ੍ਡਸੀਮਂ ਗਚ੍ਛਨ੍ਤਿਯਾ ਕਾਯਵਾਚਤੋ ਸਮੁਟ੍ਠਾਤਿ. ਦ੍ਵੀਸੁਪਿ ਠਾਨੇਸੁ ਪਣ੍ਣਤ੍ਤਿਂ ਜਾਨਿਤ੍ਵਾ ਵੀਤਿਕ੍ਕਮਂ ਕਰੋਨ੍ਤਿਯਾ ਵਾਚਾਚਿਤ੍ਤਤੋ, ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ. ਉਪਸਮ੍ਪਾਦਨਂ ਕ੍ਰਿਯਂ, ਅਨਾਪੁਚ੍ਛਨਂ ਅਕ੍ਰਿਯਂ.

ਦਸਮਂ.

੨੩੯੮. ਏਤ੍ਥ ਇਮਸ੍ਮਿਂ ਸਾਸਨੇ ਯਾ ਭਿਕ੍ਖੁਨੀ ਪਾਰਿਵਾਸਿਕੇਨ ਛਨ੍ਦਦਾਨੇਨ ਸਿਕ੍ਖਮਾਨਂ ਸਚੇ ਵੁਟ੍ਠਾਪੇਤਿ, ਤਸ੍ਸਾ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ. ਤਤ੍ਥ ਪਾਰਿਵਾਸਿਕੇਨ ਛਨ੍ਦਦਾਨੇਨਾਤਿ ਚਤੁਬ੍ਬਿਧਂ ਪਾਰਿਵਾਸਿਯਂ ਪਰਿਸਪਾਰਿਵਾਸਿਯਂ, ਰਤ੍ਤਿਪਾਰਿਵਾਸਿਯਂ, ਛਨ੍ਦਪਾਰਿਵਾਸਿਯਂ, ਅਜ੍ਝਾਸਯਪਾਰਿਵਾਸਿਯਨ੍ਤਿ.

ਤਤ੍ਥ ਪਰਿਸਪਾਰਿਵਾਸਿਯਂ ਨਾਮ ਭਿਕ੍ਖੂ ਕੇਨਚਿਦੇਵ ਕਰਣੀਯੇਨ ਸਨ੍ਨਿਪਤਿਤਾ ਹੋਨ੍ਤਿ, ਅਥ ਮੇਘੋ ਵਾ ਉਟ੍ਠਹਤਿ, ਉਸ੍ਸਾਰਣਾ ਵਾ ਕਰੀਯਤਿ, ਮਨੁਸ੍ਸਾ ਵਾ ਅਜ੍ਝੋਤ੍ਥਰਨ੍ਤਾ ਆਗਚ੍ਛਨ੍ਤਿ, ਭਿਕ੍ਖੂ ‘‘ਅਨੋਕਾਸੋ ਅਯਂ, ਅਞ੍ਞਤ੍ਰ ਗਚ੍ਛਾਮਾ’’ਤਿ ਛਨ੍ਦਂ ਅਵਿਸ੍ਸਜ੍ਜੇਤ੍ਵਾਵ ਉਟ੍ਠਹਨ੍ਤਿ. ਇਦਂ ਪਰਿਸਪਾਰਿਵਾਸਿਯਂ. ਕਿਞ੍ਚਾਪਿ ਪਰਿਸਪਾਰਿਵਾਸਿਯਂ, ਛਨ੍ਦਸ੍ਸ ਪਨ ਅਵਿਸ੍ਸਟ੍ਠਤ੍ਤਾ ਕਮ੍ਮਂ ਕਾਤੁਂ ਵਟ੍ਟਤਿ.

ਪੁਨ ¶ ਭਿਕ੍ਖੂ ‘‘ਉਪੋਸਥਾਦੀਨਿ ਕਰਿਸ੍ਸਾਮਾ’’ਤਿ ਰਤ੍ਤਿਂ ਸਨ੍ਨਿਪਤਿਤ੍ਵਾ ‘‘ਯਾਵ ਸਬ੍ਬੇ ਸਨ੍ਨਿਪਤਨ੍ਤਿ, ਤਾਵ ਧਮ੍ਮਂ ਸੁਣਿਸ੍ਸਾਮਾ’’ਤਿ ਏਕਂ ਅਜ੍ਝੇਸਨ੍ਤਿ, ਤਸ੍ਮਿਂ ਧਮ੍ਮਕਥਂ ਕਥੇਨ੍ਤੇਯੇਵ ਅਰੁਣੋ ਉਗ੍ਗਚ੍ਛਤਿ. ਸਚੇ ‘‘ਚਾਤੁਦ੍ਦਸਿਕਂ ਉਪੋਸਥਂ ਕਰਿਸ੍ਸਾਮਾ’’ਤਿ ਨਿਸਿਨ੍ਨਾ, ‘‘ਪਨ੍ਨਰਸੋ’’ਤਿ ਕਾਤੁਂ ਵਟ੍ਟਤਿ. ਸਚੇ ਪਨ੍ਨਰਸਿਕਂ ਕਾਤੁਂ ¶ ਨਿਸਿਨ੍ਨਾ, ਪਾਟਿਪਦੇ ਅਨੁਪੋਸਥੇ ਉਪੋਸਥਂ ਕਾਤੁਂ ਨ ਵਟ੍ਟਤਿ. ਅਞ੍ਞਂ ਪਨ ਸਙ੍ਘਕਿਚ੍ਚਂ ਕਾਤੁਂ ਵਟ੍ਟਤਿ. ਇਦਂ ਪਨ ਰਤ੍ਤਿਪਾਰਿਵਾਸਿਯਂ ਨਾਮ.

ਪੁਨ ਭਿਕ੍ਖੂ ‘‘ਕਿਞ੍ਚਿਦੇਵ ਅਬ੍ਭਾਨਾਦਿਸਙ੍ਘਕਮ੍ਮਂ ਕਰਿਸ੍ਸਾਮਾ’’ਤਿ ਨਿਸਿਨ੍ਨਾ ਹੋਨ੍ਤਿ, ਤਤ੍ਰੇਕੋ ਨਕ੍ਖਤ੍ਤਪਾਠਕੋ ਭਿਕ੍ਖੁ ਏਵਂ ਵਦਤਿ ‘‘ਅਜ੍ਜ ਨਕ੍ਖਤ੍ਤਂ ਦਾਰੁਣਂ, ਮਾ ਇਦਂ ਕਮ੍ਮਂ ਕਰੋਥਾ’’ਤਿ, ਤੇ ਤਸ੍ਸ ਵਚਨੇਨ ਛਨ੍ਦਂ ਵਿਸ੍ਸਜ੍ਜੇਤ੍ਵਾ ਤਤ੍ਥੇਵ ਨਿਸਿਨ੍ਨਾ ਹੋਨ੍ਤਿ, ਅਥਞ੍ਞੋ ਆਗਨ੍ਤ੍ਵਾ –

‘‘ਨਕ੍ਖਤ੍ਤਂ ਪਟਿਮਾਨੇਨ੍ਤਂ, ਅਤ੍ਥੋ ਬਾਲਂ ਉਪਚ੍ਚਗਾ’’ਤਿ. (ਜਾ. ੧.੧.੪੯) –

ਵਤ੍ਵਾ ‘‘ਕਿਂ ਨਕ੍ਖਤ੍ਤੇਨ, ਕਰੋਥਾ’’ਤਿ ਵਦਤਿ. ਇਦਂ ਛਨ੍ਦਪਾਰਿਵਾਸਿਯਞ੍ਚੇਵ ਅਜ੍ਝਾਸਯਪਾਰਿਵਾਸਿਯਞ੍ਚ. ਏਤਸ੍ਮਿਂ ਪਾਰਿਵਾਸਿਯੇ ਪੁਨ ਛਨ੍ਦਪਾਰਿਸੁਦ੍ਧਿਂ ਅਨਾਹਰਿਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤਿ. ਇਦਂ ਸਨ੍ਧਾਯ ਵੁਤ੍ਤਂ ‘‘ਪਾਰਿਵਾਸਿਕੇਨ ਛਨ੍ਦਦਾਨੇਨਾ’’ਤਿ.

ਪਾਚਿਤ੍ਤਿਯਂ ਸਿਯਾਤਿ ਏਵਂ ਵੁਟ੍ਠਾਪੇਨ੍ਤਿਯਾ ਵੁਤ੍ਤਨਯੇਨੇਵ ਕਮ੍ਮਵਾਚਾਪਰਿਯੋਸਾਨੇ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ.

੨੩੯੯. ਛਨ੍ਦਂ ਅਵਿਹਾਯ ਵਾ ਅਵਿਸ੍ਸਜ੍ਜੇਤ੍ਵਾਵ ਅਵੁਟ੍ਠਿਤਾਯ ਪਰਿਸਾਯ ਤੁ ਯਥਾਨਿਸਿਨ੍ਨਾਯ ਪਰਿਸਾਯ ਵੁਟ੍ਠਾਪੇਨ੍ਤਿਯਾ ਅਨਾਪਤ੍ਤੀਤਿ ਯੋਜਨਾ. ਵਾ-ਸਦ੍ਦੋ ਏਵਕਾਰਤ੍ਥੋ.

ਏਕਾਦਸਮਂ.

੨੪੦੦. ਦ੍ਵਾਦਸੇਤਿ ‘‘ਯਾ ਪਨ ਭਿਕ੍ਖੁਨੀ ਅਨੁਵਸ੍ਸਂ ਵੁਟ੍ਠਾਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੧੭੧) ਸਿਕ੍ਖਾਪਦੇ. ਤੇਰਸੇਤਿ ‘‘ਯਾ ਪਨ ਭਿਕ੍ਖੁਨੀ ਏਕਂ ਵਸ੍ਸਂ ਦ੍ਵੇ ਵੁਟ੍ਠਾਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੧੭੫) ਸਿਕ੍ਖਾਪਦੇ.

ਦ੍ਵਾਦਸਮਤੇਰਸਮਾਨਿ.

ਕੁਮਾਰਿਭੂਤਵਗ੍ਗੋ ਅਟ੍ਠਮੋ.

੨੪੦੧. ਅਗਿਲਾਨਾਤਿ ¶ ¶ ਛਤ੍ਤੁਪਾਹਨੇਨ ਵੂਪਸਮੇਤਬ੍ਬਰੋਗਰਹਿਤਾ. ਯਥਾਹ ‘‘ਅਗਿਲਾਨਾ ਨਾਮ ਯਸ੍ਸਾ ਵਿਨਾ ਛਤ੍ਤੁਪਾਹਨਾ ਫਾਸੁ ਹੋਤੀ’’ਤਿ. ਛਤ੍ਤਞ੍ਚ ਉਪਾਹਨਾ ਚ ਛਤ੍ਤੁਪਾਹਨਂ. ਤਤ੍ਥ ਛਤ੍ਤਂ ਵੁਤ੍ਤਲਕ੍ਖਣਂ, ਉਪਾਹਨਾ ਵਕ੍ਖਮਾਨਲਕ੍ਖਣਾ. ਧਾਰੇਯ੍ਯਾਤਿ ਉਭਯਂ ਏਕਤੋ ਧਾਰੇਯ੍ਯ. ਵਿਸੁਂ ਧਾਰੇਨ੍ਤਿਯਾ ਹਿ ਦੁਕ੍ਕਟਂ ਵਕ੍ਖਤਿ.

੨੪੦੨. ਦਿਵਸਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਸਚੇ ਧਾਰੇਤੀਤਿ ਯੋਜਨਾ.

੨੪੦੩. ਕਦ੍ਦਮਾਦੀਨੀਤਿ ਏਤ੍ਥ ਆਦਿ-ਸਦ੍ਦੇਨ ਮਹਾਵਾਲੁਕਾਦੀਨਂ ਗਹਣਂ.

੨੪੦੪. ਸਚੇ ਗਚ੍ਛਤੀਤਿ ਸਮ੍ਬਨ੍ਧੋ. ਦਿਸ੍ਵਾ ਗਚ੍ਛਾਦਿਕਨ੍ਤਿ ਛਤ੍ਤੇ ਲਗ੍ਗਨਯੋਗ੍ਗਂ ਨੀਚਤਰਂ ਗਚ੍ਛਾਦਿਕਂ ਦਿਸ੍ਵਾ. ਆਦਿ-ਸਦ੍ਦੇਨ ਗੁਮ੍ਬਾਦੀਨਂ ਗਹਣਂ. ਦੁਕ੍ਕਟਨ੍ਤਿ ਉਪਾਹਨਮਤ੍ਤਸ੍ਸੇਵ ਧਾਰਣੇ ਦੁਕ੍ਕਟਂ.

੨੪੦੫. ਅਪਨਾਮੇਤ੍ਵਾਤਿ ਸੀਸਤੋ ਅਪਨਾਮੇਤ੍ਵਾ. ਓਮੁਞ੍ਚਿਤ੍ਵਾਤਿ ਪਾਦਤੋ ਓਮੁਞ੍ਚਿਤ੍ਵਾ. ਹੋਤਿ ਪਾਚਿਤ੍ਤਿਯਨ੍ਤਿ ਪੁਨ ਪਾਚਿਤ੍ਤਿਯਂ ਹੋਤਿ.

੨੪੦੬. ਪਯੋਗਗਣਨਾਯੇਵਾਤਿ ਛਤ੍ਤੁਪਾਹਨਸ੍ਸ ਅਪਨੇਤ੍ਵਾ ਅਪਨੇਤ੍ਵਾ ਏਕਤੋ ਧਾਰਣਪਯੋਗਗਣਨਾਯ. ਤਿਕਪਾਚਿਤ੍ਤਿਯਂ ਵੁਤ੍ਤਨ੍ਤਿ ‘‘ਅਗਿਲਾਨਾ ਅਗਿਲਾਨਸਞ੍ਞਾ, ਵੇਮਤਿਕਾ, ਗਿਲਾਨਸਞ੍ਞਾ ਛਤ੍ਤੁਪਾਹਨਂ ਧਾਰੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ (ਪਾਚਿ. ੧੧੮੧) ਏਵਂ ਤਿਕਪਾਚਿਤ੍ਤਿਯਂ ਵੁਤ੍ਤਂ. ‘‘ਗਿਲਾਨਾ ਅਗਿਲਾਨਸਞ੍ਞਾ, ਗਿਲਾਨਾ ਵੇਮਤਿਕਾ, ਛਤ੍ਤੁਪਾਹਨਂ ਧਾਰੇਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਚਿ. ੧੧੮੨) ਏਵਂ ਦ੍ਵਿਕਦੁਕ੍ਕਟਂ ਤਥੇਵ ਵੁਤ੍ਤਨ੍ਤਿ ਸਮ੍ਬਨ੍ਧੋ.

੨੪੦੭. ਯਤ੍ਥ ¶ ਭਿਕ੍ਖੂ ਵਾ ਭਿਕ੍ਖੁਨਿਯੋ ਵਾ ਨਿਵਸਨ੍ਤਿ, ਤਸ੍ਮਿਂ ਆਰਾਮੇ ਵਾ ਉਪਚਾਰੇ ਵਾ ਅਪਰਿਕ੍ਖਿਤ੍ਤਸ੍ਸ ਆਰਾਮਸ੍ਸ ਉਪਚਾਰੇ ਵਾ. ਆਪਦਾਸੂਤਿ ਰਟ੍ਠਭੇਦਾਦਿਆਪਦਾਸੁ.

ਪਠਮਂ.

੨੪੦੮. ਭਿਕ੍ਖੁਨਿਯਾਤਿ ਏਤ੍ਥ ‘‘ਅਗਿਲਾਨਾਯਾ’’ਤਿ ਸੇਸੋ, ਪਾਦੇਨ ਗਨ੍ਤੁਂ ਸਮਤ੍ਥਾਯ ਅਗਿਲਾਨਾਯ ¶ ਭਿਕ੍ਖੁਨਿਯਾਤਿ ਅਤ੍ਥੋ. ਯਥਾਹ ‘‘ਅਗਿਲਾਨਾ ਨਾਮ ਸਕ੍ਕੋਤਿ ਪਦਸਾ ਗਨ੍ਤੁ’’ਨ੍ਤਿ (ਪਾਚਿ. ੧੧੮੭). ਯਾਨਂ ਨਾਮ ਰਥਾਦਿ, ਤਂ ਹੇਟ੍ਠਾ ਵੁਤ੍ਤਸਰੂਪਮੇਵ.

੨੪੦੯. ਆਪਦਾਸੂਤਿ ਰਟ੍ਠਭੇਦਾਦਿਆਪਦਾਸੁ. ਛਤ੍ਤੁਪਾਹਨਸਿਕ੍ਖਾਪਦੇ ਆਰਾਮੇ, ਆਰਾਮੂਪਚਾਰੇ ਚ ਅਨਾਪਤ੍ਤਿ ਵੁਤ੍ਤਾ, ਇਧ ਤਥਾ ਅਵੁਤ੍ਤਤ੍ਤਾ ਸਬ੍ਬਤ੍ਥਾਪਿ ਆਪਤ੍ਤਿਯੇਵ ਵੇਦਿਤਬ੍ਬਾ.

ਦੁਤਿਯਂ.

੨੪੧੦. ‘‘ਯਂ ਕਿਞ੍ਚਿਪਿ ਕਟੂਪਿਯ’’ਨ੍ਤਿ ਇਦਂ ‘‘ਸਙ੍ਘਾਣਿ’’ਨ੍ਤਿ ਏਤਸ੍ਸ ਅਤ੍ਥਪਦਂ. ਯਥਾਹ – ‘‘ਸਙ੍ਘਾਣਿ ਨਾਮ ਯਾ ਕਾਚਿ ਕਟੂਪਗਾ’’ਤਿ. ਸਙ੍ਘਾਣਿ ਨਾਮ ਮੇਖਲਾਦਿਕਟਿਪਿਲ਼ਨ੍ਧਨਂ. ਕਟੂਪਿਯਨ੍ਤਿ ਕਟਿਪ੍ਪਦੇਸੋਪਗਂ.

੨੪੧੨. ਕਟਿਸੁਤ੍ਤਂ ਨਾਮ ਕਟਿਯਂ ਪਿਲ਼ਨ੍ਧਨਰਜ੍ਜੁਸੁਤ੍ਤਕਂ.

੨੪੧੩. ਇਧ ਇਮਸ੍ਮਿਂ ਸਿਕ੍ਖਾਪਦੇ ਚਿਤ੍ਤਂ ਅਕੁਸਲਂ, ਇਦਂ ਪਨ ਸਿਕ੍ਖਾਪਦਂ ਲੋਕਵਜ੍ਜਂ, ਇਤਿ ਇਦਂ ਉਭਯਮੇਵ ਵਿਸੇਸਤਾ ਪੁਰਿਮਸਿਕ੍ਖਾਪਦਤੋ ਇਮਸ੍ਸ ਨਾਨਾਕਰਣਂ.

ਤਤਿਯਂ.

੨੪੧੪. ਸੀਸੂਪਗਾਦਿਸੁ ¶ ਯਂ ਕਿਞ੍ਚਿ ਸਚੇ ਯਾ ਧਾਰੇਤਿ, ਤਸ੍ਸਾ ਤਸ੍ਸ ਵਤ੍ਥੁਸ੍ਸ ਗਣਨਾਯ ਆਪਤ੍ਤਿਯੋ ਸਿਯੁਨ੍ਤਿ ਯੋਜਨਾ. ਸੀਸਂ ਉਪਗਚ੍ਛਤੀਤਿ ਸੀਸੂਪਗਂ, ਸੀਸੇ ਪਿਲ਼ਨ੍ਧਨਾਰਹਨ੍ਤਿ ਅਤ੍ਥੋ. ਆਦਿ-ਸਦ੍ਦੇਨ ਗੀਵੂਪਗਾਦੀਨਂ ਗਹਣਂ. ਯਥਾਹ – ‘‘ਇਤ੍ਥਾਲਙ੍ਕਾਰੋ ਨਾਮ ਸੀਸੂਪਗੋ ਗੀਵੂਪਗੋ ਹਤ੍ਥੂਪਗੋ ਪਾਦੂਪਗੋ ਕਟੂਪਗੋ’’ਤਿ.

੨੪੧੫. ਨ ਚ ਦੋਸੋਤਿ ਯੋਜਨਾ. ‘‘ਸਦਿਸਨ੍ਤਿ ਪਰਿਦੀਪਿਤ’’ਨ੍ਤਿ ਵਤ੍ਤਬ੍ਬੇ ਇਤਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ.

ਚਤੁਤ੍ਥਂ.

੨੪੧੬. ਯੇਨ ¶ ਕੇਨਚਿ ਗਨ੍ਧੇਨਾਤਿ ਚਨ੍ਦਨਤਗਰਾਦਿਨਾ ਯੇਨ ਕੇਨਚਿ ਗਨ੍ਧਕਕ੍ਕੇਨ. ਸਵਣ੍ਣਾਵਣ੍ਣਕੇਨ ਚਾਤਿ ਵਣ੍ਣੇਨ ਸਹ ਵਤ੍ਤਤੀਤਿ ਸਵਣ੍ਣਕਂ, ਹਲਿਦ੍ਦਿਕਕ੍ਕਾਦਿ, ਨਤ੍ਥਿ ਏਤਸ੍ਸ ਉਬ੍ਬਟ੍ਟਨਪਚ੍ਚਯਾ ਦਿਸ੍ਸਮਾਨੋ ਵਣ੍ਣਵਿਸੇਸੋਤਿ ਅਵਣ੍ਣਕਂ, ਸਾਸਪਕਕ੍ਕਾਦਿ, ਸਵਣ੍ਣਕਞ੍ਚ ਅਵਣ੍ਣਕਞ੍ਚ ਸਵਣ੍ਣਾਵਣ੍ਣਕਂ, ਤੇਨ ਸਵਣ੍ਣਾਵਣ੍ਣਕੇਨ ਚ. ਉਬ੍ਬਟ੍ਟੇਤ੍ਵਾ ਨ੍ਹਾਯਨ੍ਤਿਯਾ ਨ੍ਹਾਨੋਸਾਨੇ ਪਾਚਿਤ੍ਤਿਯਾਪਤ੍ਤਿ ਪਕਾਸਿਤਾਤਿ ਯੋਜਨਾ.

੨੪੧੭. ਸਬ੍ਬਪਯੋਗੇਤਿ ਸਬ੍ਬਸ੍ਮਿਂ ਪੁਬ੍ਬਪਯੋਗੇ. ਆਬਾਧਪਚ੍ਚਯਾਤਿ ਦਦ੍ਦੁਕੁਟ੍ਠਾਦਿਰੋਗਪਚ੍ਚਯਾ.

੨੪੧੮. ਛਟ੍ਠਨ੍ਤਿ ‘‘ਯਾ ਪਨ ਭਿਕ੍ਖੁਨੀ ਵਾਸਿਤਕੇਨ ਪਿਞ੍ਞਾਕੇਨ ਨਹਾਯੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੨੦੩) ਸਿਕ੍ਖਾਪਦਂ.

ਪਞ੍ਚਮਛਟ੍ਠਾਨਿ.

੨੪੧੯. ਯਾ ਪਨ ਭਿਕ੍ਖੁਨੀ ਅਞ੍ਞਾਯ ਭਿਕ੍ਖੁਨਿਯਾ ਸਚੇ ਉਬ੍ਬਟ੍ਟਾਪੇਯ੍ਯ ਵਾ ਸਮ੍ਬਾਹਾਪੇਯ੍ਯ ਵਾ, ਤਸ੍ਸਾ ਭਿਕ੍ਖੁਨਿਯਾ ਤਥਾ ਪਾਚਿਤ੍ਤਿਯਾਪਤ੍ਤਿ ਹੋਤੀਤਿ ਯੋਜਨਾ.

੨੪੨੦. ਏਤ੍ਥ ¶ ਇਮਸ੍ਮਿਂ ਉਬ੍ਬਟ੍ਟਨੇ, ਸਮ੍ਬਾਹਨੇ ਚ ਹਤ੍ਥਂ ਅਮੋਚੇਤ੍ਵਾ ਉਬ੍ਬਟ੍ਟਨੇ ਏਕਾ ਆਪਤ੍ਤਿ ਸਿਯਾ, ਹਤ੍ਥਂ ਮੋਚੇਤ੍ਵਾ ਮੋਚੇਤ੍ਵਾ ਉਬ੍ਬਟ੍ਟਨੇ ਪਯੋਗਗਣਨਾਯ ਸਿਯਾਤਿ ਯੋਜਨਾ.

੨੪੨੧. ਆਪਦਾਸੂਤਿ ਚੋਰਭਯਾਦੀਹਿ ਸਰੀਰਕਮ੍ਪਨਾਦੀਸੁ. ਗਿਲਾਨਾਯਾਤਿ ਅਨ੍ਤਮਸੋ ਮਗ੍ਗਗਮਨਪਰਿਸ੍ਸਮੇਨਾਪਿ ਆਬਾਧਿਕਾਯ.

੨੪੨੨. ਅਟ੍ਠਮਸਿਕ੍ਖਾਪਦੇ ‘‘ਸਿਕ੍ਖਮਾਨਾਯਾ’’ਤਿ ਚ ਨਵਮਸਿਕ੍ਖਾਪਦੇ ‘‘ਸਾਮਣੇਰਿਯਾ’’ਤਿ ਚ ਦਸਮਸਿਕ੍ਖਾਪਦੇ ‘‘ਗਿਹਿਨਿਯਾ’’ਤਿ ਚ ਵਿਸੇਸਂ ਵਜ੍ਜੇਤ੍ਵਾ ਅਵਸੇਸਵਿਨਿਚ੍ਛਯੋ ਸਤ੍ਤਮੇਨੇਵ ਸਮਾਨੋਤਿ ਦਸ੍ਸੇਤੁਮਾਹ ‘‘ਅਟ੍ਠਮਾਦੀਨਿ ਤੀਣਿਪੀ’’ਤਿ.

ਸਤ੍ਤਮਟ੍ਠਮਨਵਮਦਸਮਾਨਿ.

੨੪੨੩. ਅਨ੍ਤੋਉਪਚਾਰਸ੍ਮਿਨ੍ਤਿ ¶ ਦ੍ਵਾਦਸਰਤਨਬ੍ਭਨ੍ਤਰੇ. ‘‘ਭਿਕ੍ਖੁਸ੍ਸ ਪੁਰਤੋ’’ਤਿ ਇਦਂ ਉਪਲਕ੍ਖਣਂ. ਤਸ੍ਮਾ ਪੁਰਤੋ ਵਾ ਹੋਤੁ ਪਚ੍ਛਤੋ ਵਾ ਪਸ੍ਸਤੋ ਵਾ, ਸਮਨ੍ਤਤੋ ਦ੍ਵਾਦਸਰਤਨਬ੍ਭਨ੍ਤਰੇਤਿ ਨਿਦਸ੍ਸਨਪਦਮੇਤਂ. ਛਮਾਯਪੀਤਿ ਅਨਨ੍ਤਰਹਿਤਾਯ ਭੂਮਿਯਾਪਿ. ਯਾ ਨਿਸੀਦੇਯ੍ਯਾਤਿ ਸਮ੍ਬਨ੍ਧੋ. ਨ ਵਟ੍ਟਤਿ ਪਾਚਿਤ੍ਤਿਯਾਪਤ੍ਤਿ ਹੋਤੀਤਿ ਅਤ੍ਥੋ.

੨੪੨੪. ਤਿਕਪਾਚਿਤ੍ਤਿਯਂ ਵੁਤ੍ਤਨ੍ਤਿ ਅਨਾਪੁਚ੍ਛਿਤੇ ਅਨਾਪੁਚ੍ਛਿਤਸਞ੍ਞਾ, ਵੇਮਤਿਕਾ, ਆਪੁਚ੍ਛਿਤਸਞ੍ਞਾਤਿ ਤੀਸੁ ਵਿਕਪ੍ਪੇਸੁ ਪਾਚਿਤ੍ਤਿਯਤ੍ਤਯਂ ਵੁਤ੍ਤਂ. ਆਪੁਚ੍ਛਿਤੇ ਅਨਾਪੁਚ੍ਛਿਤਸਞ੍ਞਾ, ਵੇਮਤਿਕਾ ਵਾ ਭਿਕ੍ਖੁਸ੍ਸ ਪੁਰਤੋ ਨਿਸੀਦੇਯ੍ਯਾਤਿ ਵਿਕਪ੍ਪਦ੍ਵਯੇ ਦੁਕ੍ਕਟਦ੍ਵਯਂ ਹੋਤਿ. ਆਪਦਾਸੂਤਿ ਰਟ੍ਠਭੇਦਾਦਿਆਪਦਾਸੁ. ਆਪੁਚ੍ਛਿਤੁਞ੍ਚ ਠਾਤੁਞ੍ਚ ਅਸਕ੍ਕੋਨ੍ਤਿਯਾ ਗਿਲਾਨਾਯ.

੨੪੨੫. ਨਿਪਜ੍ਜਨਂ ਕ੍ਰਿਯਂ. ਅਨਾਪੁਚ੍ਛਨਂ ਅਕ੍ਰਿਯਂ.

ਏਕਾਦਸਮਂ.

੨੪੨੬. ਓਕਾਸੋ ¶ ਕਤੋ ਯੇਨ ਸੋ ਓਕਾਸਕਤੋ, ਨ ਓਕਾਸਕਤੋ ਅਨੋਕਾਸਕਤੋ, ਤਂ, ਅਕਤੋਕਾਸਨ੍ਤਿ ਅਤ੍ਥੋ, ‘‘ਅਸੁਕਸ੍ਮਿਂ ਨਾਮ ਠਾਨੇ ਪੁਚ੍ਛਾਮੀ’’ਤਿ ਅਤ੍ਤਨਾ ਪੁਚ੍ਛਿਤਬ੍ਬਵਿਨਯਾਦੀਨਂ ਨਾਮਂ ਗਹੇਤ੍ਵਾ ਓਕਾਸਂ ਕਾਰਾਪਨਕਾਲੇ ਅਧਿਵਾਸਨਵਸੇਨ ਅਕਤੋਕਾਸਨ੍ਤਿ ਵੁਤ੍ਤਂ ਹੋਤਿ. ਦੋਸਤਾਤਿ ਪਾਚਿਤ੍ਤਿਯਾਪਤ੍ਤਿ. ਏਕਸ੍ਮਿਂ ਪਿਟਕੇ ਓਕਾਸਂ ਕਾਰਾਪੇਤ੍ਵਾ ਅਞ੍ਞਸ੍ਮਿਂ ਪਿਟਕੇ ਪਞ੍ਹਂ ਪੁਚ੍ਛਨ੍ਤਿਯਾਪਿ ਪਾਚਿਤ੍ਤਿਯਂ ਹੋਤੀਤਿ ਦਸ੍ਸੇਤੁਮਾਹ ‘‘ਵਿਨਯੇ ਚਾ’’ਤਿਆਦਿ.

ਪੁਚ੍ਛਨ੍ਤਿਯਾਪਿ ਚਾਤਿ ਏਤ੍ਥ ਪਿ-ਸਦ੍ਦੇਨ ‘‘ਅਭਿਧਮ੍ਮਂ ਪੁਚ੍ਛਨ੍ਤਿਯਾਪੀ’’ਤਿ ਇਦਞ੍ਚ ਅਨੁਤ੍ਤਸਮੁਚ੍ਚਯਤ੍ਥੇਨ ਚ-ਸਦ੍ਦੇਨ ‘‘ਸੁਤ੍ਤਨ੍ਤੇ ਓਕਾਸਂ ਕਾਰਾਪੇਤ੍ਵਾ ਵਿਨਯਂ ਵਾ ਅਭਿਧਮ੍ਮਂ ਵਾ ਪੁਚ੍ਛਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਭਿਧਮ੍ਮੇ ਓਕਾਸਂ ਕਾਰਾਪੇਤ੍ਵਾ ਸੁਤ੍ਤਨ੍ਤਂ ਵਾ ਵਿਨਯਂ ਵਾ ਪੁਚ੍ਛਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ ਇਦਞ੍ਚ ਸਙ੍ਗਹਿਤਂ.

੨੪੨੭. ਅਨੋਦਿਸ੍ਸਾਤਿ ‘‘ਅਸੁਕਸ੍ਮਿਂ ਨਾਮ ਪੁਚ੍ਛਾਮੀ’’ਤਿ ਏਵਂ ਅਨਿਯਮੇਤ੍ਵਾ ਕੇਵਲਂ ‘‘ਪੁਚ੍ਛਿਤਬ੍ਬਂ ਅਤ੍ਥਿ, ਪੁਚ੍ਛਾਮਿ ਅਯ੍ਯਾ’’ਤਿ ਏਵਂ ਵਤ੍ਵਾ.

ਦ੍ਵਾਦਸਮਂ.

੨੪੨੮-੯. ਸਂਕਚ੍ਚਿਕਨ੍ਤਿ ¶ ਥਨਵੇਠਨਚੀਵਰਂ, ਤਂ ਪਨ ਪਾਰੁਪਨ੍ਤਿਯਾ ਅਧਕ੍ਖਕਂ ਉਬ੍ਭਨਾਭਿਮਣ੍ਡਲਂ ਪਟਿਚ੍ਛਾਦੇਨ੍ਤਿਯਾ ਪਾਰੁਪਿਤਬ੍ਬਂ. ਤੇਨਾਹ ਮਾਤਿਕਟ੍ਠਕਥਾਯਂ ‘‘ਅਸਂਕਚ੍ਚਿਕਾਤਿ ਅਧਕ੍ਖਕਉਬ੍ਭਨਾਭਿਮਣ੍ਡਲਸਙ੍ਖਾਤਸ੍ਸ ਸਰੀਰਸ੍ਸ ਪਟਿਚ੍ਛਾਦਨਤ੍ਥਂ ਅਨੁਞ੍ਞਾਤਸਂਕਚ੍ਚਿਕਚੀਵਰਰਹਿਤਾ’’ਤਿ (ਕਙ੍ਖਾ. ਅਟ੍ਠ. ਅਸਂਕਚ੍ਚਿਕਸਿਕ੍ਖਾਪਦਵਣ੍ਣਨਾ). ‘‘ਸਂਕਚ੍ਚਿਕਾਯ ਪਮਾਣਂ ਤਿਰਿਯਂ ਦਿਯਡ੍ਢਹਤ੍ਥਨ੍ਤਿ ਪੋਰਾਣਗਣ੍ਠਿਪਦੇ ਵੁਤ੍ਤ’’ਨ੍ਤਿ (ਵਜਿਰ. ਟੀ. ਪਾਚਿਤ੍ਤਿਯ ੧੨੨੪-੧੨੨੬) ਵਜਿਰਬੁਦ੍ਧਿਤ੍ਥੇਰੋ. ਪਰਿਕ੍ਖੇਪੋਕ੍ਕਮੇਤਿ ਪਰਿਕ੍ਖੇਪਸ੍ਸ ਅਨ੍ਤੋਪਵੇਸਨੇ. ਉਪਚਾਰੋਕ੍ਕਮੇਪੀਤਿ ¶ ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਦੁਤਿਯਲੇਡ੍ਡੁਪਾਤਬ੍ਭਨ੍ਤਰਪਵੇਸਨੇਪਿ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਏਸੇਵ ਨਯੋਤਿ ‘‘ਪਠਮੇ ਪਾਦੇ ਦੁਕ੍ਕਟਂ, ਦੁਤਿਯੇ ਪਾਚਿਤ੍ਤਿਯ’’ਨ੍ਤਿ ਯਥਾਵੁਤ੍ਤੋਯੇਵ ਨਯੋ ਮਤੋ ਵਿਞ੍ਞਾਤੋਤਿ ਅਤ੍ਥੋ.

੨੪੩੦. ਆਪਦਾਸੁਪੀਤਿ ਮਹਗ੍ਘਂ ਹੋਤਿ ਸਂਕਚ੍ਚਿਕਂ, ਪਾਰੁਪਿਤ੍ਵਾ ਗਚ੍ਛਨ੍ਤਿਯਾ ਚ ਉਪਦ੍ਦਵੋ ਉਪ੍ਪਜ੍ਜਤਿ, ਏਵਰੂਪਾਸੁ ਆਪਦਾਸੁ ਅਨਾਪਤ੍ਤਿ.

੨੪੩੧. ਸੇਸਨ੍ਤਿ ਇਧ ਸਰੂਪਤੋ ਅਦਸ੍ਸਿਤਞ੍ਚ. ਵੁਤ੍ਤਨਯੇਨੇਵਾਤਿ ਮਾਤਿਕਾਪਦਭਾਜਨਾਦੀਸੁ ਵੁਤ੍ਤਨਯੇਨੇਵ. ਸੁਨਿਪੁਣਸ੍ਮਿਂ ਧਮ੍ਮਜਾਤਂ, ਅਤ੍ਥਜਾਤਞ੍ਚ ਵਿਭਾਵੇਤਿ ਵਿਵਿਧੇਨਾਕਾਰੇਨ ਪਕਾਸੇਤੀਤਿ ਵਿਭਾਵੀ, ਤੇਨ ਵਿਭਾਵਿਨਾ.

ਤੇਰਸਮਂ.

ਛਤ੍ਤੁਪਾਹਨਵਗ੍ਗੋ ਨਵਮੋ.

ਏਵਂ ਨਵਹਿ ਵਗ੍ਗੇਹਿ ਭਿਕ੍ਖੁਨੀਨਂ ਭਿਕ੍ਖੂਹਿ ਅਸਾਧਾਰਣਾਨਿ ਛਨ੍ਨਵੁਤਿ ਸਿਕ੍ਖਾਪਦਾਨਿ ਦਸ੍ਸੇਤ੍ਵਾ ਇਤੋ ਪਰੇਸੁ ਮੁਸਾਵਾਦਵਗ੍ਗਾਦੀਸੁ ਸਤ੍ਤਸੁ ਵਗ੍ਗੇਸੁ ਭਿਕ੍ਖੂਹਿ ਸਾਧਾਰਣਸਿਕ੍ਖਾਪਦਾਨਿ ਭਿਕ੍ਖੁਪਾਤਿਮੋਕ੍ਖਵਿਨਿਚ੍ਛਯਕਥਾਯ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨੀਤਿ ਤਾਨਿ ਇਧ ਨ ਦਸ੍ਸਿਤਾਨਿ.

ਸਬ੍ਬਾਨੇਵ ਭਿਕ੍ਖੁਨੀਨਂ ਖੁਦ੍ਦਕੇਸੁ ਛਨ੍ਨਵੁਤਿ, ਭਿਕ੍ਖੂਨਂ ਦ੍ਵੇਨਵੁਤੀਤਿ ਅਟ੍ਠਾਸੀਤਿਸਤਂ ਸਿਕ੍ਖਾਪਦਾਨਿ. ਤਤੋ ਪਰਂ ਸਕਲਂ ਭਿਕ੍ਖੁਨਿਵਗ੍ਗਂ, ਪਰਮ੍ਪਰਭੋਜਨਂ, ਅਨਤਿਰਿਤ੍ਤਭੋਜਨਂ, ਅਨਤਿਰਿਤ੍ਤੇਨ ਅਭਿਹਟ੍ਠੁਂ ਪਵਾਰਣਂ, ਪਣੀਤਭੋਜਨਵਿਞ੍ਞਤ੍ਤਿ, ਅਚੇਲਕਸਿਕ੍ਖਾਪਦਂ, ਦੁਟ੍ਠੁਲ੍ਲਪਅਚ੍ਛਾਦਨਂ, ਊਨਵੀਸਤਿਵਸ੍ਸਉਪਸਮ੍ਪਾਦਨਂ, ਮਾਤੁਗਾਮੇਨ ਸਦ੍ਧਿਂ ਸਂਵਿਧਾਯ ਅਦ੍ਧਾਨਗਮਨਂ, ਰਾਜਨ੍ਤੇਪੁਰਪ੍ਪਵੇਸਨਂ ¶ , ਸਨ੍ਤਂ ¶ ਭਿਕ੍ਖੁਂ ਅਨਾਪੁਚ੍ਛਾ ਵਿਕਾਲੇ ਗਾਮਪ੍ਪਵੇਸਨਂ, ਨਿਸੀਦਨਂ, ਵਸ੍ਸਿਕਸਾਟਿਕਨ੍ਤਿ ਇਮਾਨਿ ਬਾਵੀਸਤਿ ਸਿਕ੍ਖਾਪਦਾਨਿ ਅਪਨੇਤ੍ਵਾ ਸੇਸਾਨਿ ਸਤਞ੍ਚ ਛਸਟ੍ਠਿ ਚ ਸਿਕ੍ਖਾਪਦਾਨਿ ਭਿਕ੍ਖੁਨਿਪਾਤਿਮੋਕ੍ਖੁਦ੍ਦੇਸਮਗ੍ਗੇਨ ਉਦ੍ਦਿਟ੍ਠਾਨੀਤਿ ਵੇਦਿਤਬ੍ਬਾਨਿ.

ਤਤ੍ਰਾਯਂ ਸਙ੍ਖੇਪਤੋ ਅਸਾਧਾਰਣਸਿਕ੍ਖਾਪਦੇਸੁ ਸਮੁਟ੍ਠਾਨਵਿਨਿਚ੍ਛਯੋ – ਗਿਰਗ੍ਗਸਮਜ੍ਜਾ, ਚਿਤ੍ਤਾਗਾਰਸਿਕ੍ਖਾਪਦਂ, ਸਙ੍ਘਾਣਿ, ਇਤ੍ਥਾਲਙ੍ਕਾਰੋ, ਗਨ੍ਧਵਣ੍ਣਕੋ, ਵਾਸਿਤਕਪਿਞ੍ਞਾਕੋ, ਭਿਕ੍ਖੁਨਿਆਦੀਹਿ ਉਮ੍ਮਦ੍ਦਨਪਰਿਮਦ੍ਦਨਾਨੀਤਿ ਇਮਾਨਿ ਦਸ ਸਿਕ੍ਖਾਪਦਾਨਿ ਅਚਿਤ੍ਤਕਾਨਿ, ਲੋਕਵਜ੍ਜਾਨਿ, ਅਕੁਸਲਚਿਤ੍ਤਾਨਿ. ਅਯਂ ਪਨੇਤ੍ਥ ਅਧਿਪ੍ਪਾਯੋ – ਵਿਨਾਪਿ ਚਿਤ੍ਤੇਨ ਆਪਜ੍ਜਿਤਬ੍ਬਤ੍ਤਾ ਅਚਿਤ੍ਤਕਾਨਿ, ਚਿਤ੍ਤੇ ਪਨ ਸਤਿ ਅਕੁਸਲੇਨੇਵ ਆਪਜ੍ਜਿਤਬ੍ਬਤ੍ਤਾ ਲੋਕਵਜ੍ਜਾਨਿ ਚੇਵ ਅਕੁਸਲਚਿਤ੍ਤਾਨਿ ਚ. ਅਵਸੇਸਾਨਿ ਅਚਿਤ੍ਤਕਾਨਿ ਪਣ੍ਣਤ੍ਤਿਵਜ੍ਜਾਨੇਵ. ਚੋਰਿਵੁਟ੍ਠਾਪਨਂ, ਗਾਮਨ੍ਤਰਂ, ਆਰਾਮਸਿਕ੍ਖਾਪਦਂ, ਗਬ੍ਭਿਨਿਵਗ੍ਗੇ ਆਦਿਤੋ ਪਟ੍ਠਾਯ ਸਤ੍ਤ, ਕੁਮਾਰਿਭੂਤਵਗ੍ਗੇ ਆਦਿਤੋ ਪਟ੍ਠਾਯ ਪਞ੍ਚ, ਪੁਰਿਸਸਂਸਟ੍ਠਂ, ਪਾਰਿਵਾਸਿਯਛਨ੍ਦਦਾਨਂ, ਅਨੁਵਸ੍ਸਵੁਟ੍ਠਾਪਨਂ, ਏਕਨ੍ਤਰਿਕਵੁਟ੍ਠਾਪਨਨ੍ਤਿ ਇਮਾਨਿ ਏਕੂਨਵੀਸਤਿ ਸਿਕ੍ਖਾਪਦਾਨਿ ਸਚਿਤ੍ਤਕਾਨਿ, ਪਣ੍ਣਤ੍ਤਿਵਜ੍ਜਾਨਿ. ਅਵਸੇਸਾਨਿ ਸਚਿਤ੍ਤਕਾਨਿ ਲੋਕਵਜ੍ਜਾਨੇਵਾਤਿ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ ਵਿਨਯਵਿਨਿਚ੍ਛਯਵਣ੍ਣਨਾਯ

ਪਾਚਿਤ੍ਤਿਯਕਥਾਵਣ੍ਣਨਾ ਨਿਟ੍ਠਿਤਾ.

ਪਾਟਿਦੇਸਨੀਯਕਥਾਵਣ੍ਣਨਾ

੨੪੩੨. ਏਵਂ ਪਾਚਿਤ੍ਤਿਯਵਿਨਿਚ੍ਛਯਂ ਦਸ੍ਸੇਤ੍ਵਾ ਇਦਾਨਿ ਪਾਟਿਦੇਸਨੀਯਂ ਦਸ੍ਸੇਤੁਮਾਹ ‘‘ਅਗਿਲਾਨਾ’’ਤਿਆਦਿ. ਯਾ ਪਨ ਭਿਕ੍ਖੁਨੀ ¶ ਅਗਿਲਾਨਾ ਸਯਂ ਅਤ੍ਤਨਾ ਵਿਞ੍ਞਤ੍ਤਿਯਾ ਲਦ੍ਧਂ ਸਪ੍ਪਿਂ ਸਚੇ ‘‘ਭੁਞ੍ਜਿਸ੍ਸਾਮੀ’’ਤਿ ਗਣ੍ਹਤਿ, ਤਸ੍ਸਾ ਏਵਂ ਗਹਣੇ ਦੁਕ੍ਕਟਂ ਪਰਿਦੀਪਿਤਨ੍ਤਿ ਯੋਜਨਾ. ਤਤ੍ਥ ਯਸ੍ਸਾ ਵਿਨਾ ਸਪ੍ਪਿਨਾ ਫਾਸੁ ਹੋਤਿ, ਸਾ ਅਗਿਲਾਨਾ ਨਾਮ. ਸਪ੍ਪਿਨ੍ਤਿ ਪੁਬ੍ਬੇ ਵੁਤ੍ਤਵਿਨਿਚ੍ਛਯਂ ਪਾਲ਼ਿਆਗਤਂ ਗੋਸਪ੍ਪਿਆਦਿਕਮੇਵ.

੨੪੩੩. ਤਿਪਾਟਿਦੇਸਨੀਯਨ੍ਤਿ ਅਗਿਲਾਨਾ ਅਗਿਲਾਨਸਞ੍ਞਾ, ਵੇਮਤਿਕਾ, ਗਿਲਾਨਸਞ੍ਞਾਤਿ ਤੀਸੁ ¶ ਵਿਕਪ੍ਪੇਸੁ ਤੀਣਿ ਪਾਟਿਦੇਸਨੀਯਾਨਿ. ਗਿਲਾਨਾ ਦ੍ਵਿਕਦੁਕ੍ਕਟਨ੍ਤਿ ਗਿਲਾਨਾਯ ਦ੍ਵਿਕਦੁਕ੍ਕਟਂ. ਗਿਲਾਨਾ ਅਗਿਲਾਨਸਞ੍ਞਾ, ਵੇਮਤਿਕਾ ਵਾਤਿ ਦ੍ਵੀਸੁ ਵਿਕਪ੍ਪੇਸੁ ਦ੍ਵੇ ਦੁਕ੍ਕਟਾਨਿ.

੨੪੩੪-੫. ਗਿਲਾਨਾ ਹੁਤ੍ਵਾ ਸਪ੍ਪਿਂ ਵਿਞ੍ਞਾਪੇਤ੍ਵਾ ਪਚ੍ਛਾ ਵੂਪਸਨ੍ਤਗੇਲਞ੍ਞਾ ਹੁਤ੍ਵਾ ਸੇਵਨ੍ਤਿਯਾ ਪਰਿਭੁਞ੍ਜਨ੍ਤਿਯਾਪਿ ਚ ਗਿਲਾਨਾਯ ਅਵਸੇਸਂ ਪਰਿਭੁਞ੍ਜਨ੍ਤਿਯਾ ਵਾ ਞਾਤਕਾਦਿਤੋ ਞਾਤਕਪਵਾਰਿਤਟ੍ਠਾਨਤੋ ਵਿਞ੍ਞਤ੍ਤਂ ਭੁਞ੍ਜਨ੍ਤਿਯਾ ਵਾ ਅਞ੍ਞਸ੍ਸਤ੍ਥਾਯ ਵਿਞ੍ਞਤ੍ਤਂ ਪਰਿਭੁਞ੍ਜਨ੍ਤਿਯਾ ਵਾ ਅਤ੍ਤਨੋ ਧਨੇਨ ਗਹਿਤਂ ਭੁਞ੍ਜਨ੍ਤਿਯਾ ਵਾ ਉਮ੍ਮਤ੍ਤਿਕਾਯ ਵਾ ਅਨਾਪਤ੍ਤੀਤਿ ਯੋਜਨਾ.

ਪਠਮਂ.

੨੪੩੬. ਸੇਸੇਸੁ ਦੁਤਿਯਾਦੀਸੂਤਿ ‘‘ਯਾ ਪਨ ਭਿਕ੍ਖੁਨੀ ਅਗਿਲਾਨਾ ਤੇਲਂ…ਪੇ… ਮਧੁਂ…ਪੇ… ਫਾਣਿਤਂ…ਪੇ… ਮਚ੍ਛਂ…ਪੇ… ਮਂਸਂ…ਪੇ… ਖੀਰਂ…ਪੇ… ਦਧਿਂ ਵਿਞ੍ਞਾਪੇਤ੍ਵਾ ਭੁਞ੍ਜੇਯ੍ਯ, ਪਟਿਦੇਸੇਤਬ੍ਬਂ ਤਾਯ ਭਿਕ੍ਖੁਨਿਯਾ ਗਾਰਯ੍ਹਂ ਅਯ੍ਯੇ ਧਮ੍ਮਂ ਆਪਜ੍ਜਿਂ ਅਸਪ੍ਪਾਯਂ ਪਾਟਿਦੇਸਨੀਯਂ, ਤਂ ਪਟਿਦੇਸੇਮੀ’’ਤਿ (ਪਾਚਿ. ੧੨੩੬) ਏਵਂ ਦੁਤਿਯਾਦੀਸੁ ਸਤ੍ਤਸੁ ਪਾਟਿਦੇਸਨੀਯੇਸੁ. ਨਤ੍ਥਿ ਕਾਚਿ ਵਿਸੇਸਤਾਤਿ ਤੇਲਾਦਿਪਦਾਨਿ ਵਿਨਾ ਅਞ੍ਞੋ ਕੋਚਿ ਵਿਸੇਸੋ ਨਤ੍ਥੀਤਿ ਅਤ੍ਥੋ.

੨੪੩੭. ਪਾਲ਼ਿਯਂ ¶ ਅਨਾਗਤੇਸੁ ਸਬ੍ਬੇਸੁ ਸਪ੍ਪਿਆਦੀਸੁ ਅਟ੍ਠਸੁ ਅਞ੍ਞਤਰਂ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤਿਯਾਪਿ ਦੁਕ੍ਕਟਨ੍ਤਿ ਯੋਜਨਾ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ ਵਿਨਯਵਿਨਿਚ੍ਛਯਵਣ੍ਣਨਾਯ

ਪਾਟਿਦੇਸਨੀਯਕਥਾਵਣ੍ਣਨਾ ਨਿਟ੍ਠਿਤਾ.

ਸਿਕ੍ਖਾਕਰਣੀਯਕਥਾਵਣ੍ਣਨਾ

੨੪੩੮. ਪਾਟਿਦੇਸਨੀਯਾਨਨ੍ਤਰਂ ਉਦ੍ਦਿਟ੍ਠਾਨਿ ਪਞ੍ਚਸਤ੍ਤਤਿ ਸੇਖਿਯਾਨਿ ਮਹਾਵਿਭਙ੍ਗੇ ਵੁਤ੍ਤਵਿਨਿਚ੍ਛਯਾਨੇਵਾਤਿ ਤਦੇਵ ਅਤਿਦਿਸਨ੍ਤੋ ਆਹ ‘‘ਸੇਖਿਯਾ ਪਨ ਯੇ ਧਮ੍ਮਾ’’ਤਿਆਦਿ. ਯੇ ਪਨ ਪਞ੍ਚਸਤ੍ਤਤਿ ¶ ਸੇਖਿਯਾ ਧਮ੍ਮਾ ਪਾਟਿਦੇਸਨੀਯਾਨਨ੍ਤਰਂ ਉਦ੍ਦਿਟ੍ਠਾ, ਤੇਸਂ ਅਤ੍ਥਵਿਨਿਚ੍ਛਯੋ ਮਹਾਵਿਭਙ੍ਗੇ ਵੁਤ੍ਤੋਵਾਤਿ ਯੋਜਨਾ, ਅਤ੍ਥਿਕੇਹਿ ਤਤੋਵ ਗਹੇਤਬ੍ਬੋ, ਨ ਪੁਨ ਇਧ ਦਸ੍ਸੇਸ੍ਸਾਮੀਤਿ ਅਧਿਪ੍ਪਾਯੋ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ ਵਿਨਯਵਿਨਿਚ੍ਛਯਵਣ੍ਣਨਾਯ

ਸਿਕ੍ਖਾਕਰਣੀਯਕਥਾਵਣ੍ਣਨਾ ਨਿਟ੍ਠਿਤਾ.

੨੪੩੯-੪੦. ਸਵਿਭਙ੍ਗਾਨਂ ਉਭਤੋਵਿਭਙ੍ਗਸਹਿਤਾਨਂ ਉਭਤੋਪਾਤਿਮੋਕ੍ਖਾਨਂ ਭਿਕ੍ਖੂਨਂ, ਭਿਕ੍ਖੁਨੀਨਞ੍ਚ ਪਾਤਿਮੋਕ੍ਖਾਨਂ ਅਟ੍ਠਕਥਾਸਾਰੋ ਸਬ੍ਬਟ੍ਠਕਥਾਨਂ ਸਾਰਭੂਤੋ ਯੋ ਸੋ ਅਤ੍ਥੋ ਵਿਸੇਸਤੋ ਸਮਨ੍ਤਪਾਸਾਦਿਕਾਯਂ ਵੁਤ੍ਤੋ. ਤਂ ਸਬ੍ਬਂ ਸਾਰਭੂਤਂ ਅਤ੍ਥਂ ਸਮਾਦਾਯ ਯੋ ਵਿਨਯਸ੍ਸਵਿਨਿਚ੍ਛਯੋ ਭਿਕ੍ਖੂਨਂ, ਭਿਕ੍ਖੁਨੀਨਞ੍ਚ ਹਿਤਤ੍ਥਾਯ ਮਯਾ ਕਤੋ ਵਿਰਚਿਤੋਤਿ ਸਮ੍ਬਨ੍ਧੋ.

੨੪੪੧. ਨੋ ਅਮ੍ਹਾਕਂ ਪਟਿਭਾਣਜਂ ਪਟਿਭਾਣਤੋ ਜਾਤਂ ਇਮਂ ਤੁ ਇਮਂ ਵਿਨਯਵਿਨਿਚ੍ਛਯਂ ਪਨ ਯੇ ਜਨ੍ਤੁਨੋ ਸਤ੍ਤਾ ਸੁਣਨ੍ਤਿ ¶ , ਤੇ ਜਨ੍ਤੁਨੋ ਜਨਸ੍ਸ ਸਤ੍ਤਲੋਕਸ੍ਸ ਹਿਤੇ ਅਧਿਸੀਲਸਿਕ੍ਖਾਪਕਾਸਕਤ੍ਤਾ ਉਪਕਾਰਕੇ ਸੁਮਤਸ੍ਸ ਸੋਭਣਨ੍ਤਿ ਬੁਦ੍ਧਾਦੀਹਿ ਮਤਸ੍ਸ, ਸੋਭਣੇਹਿ ਵਾ ਬੁਦ੍ਧਾਦੀਹਿ ਮਤਸ੍ਸ ਪਟਿਵਿਦ੍ਧਸ੍ਸ ਅਮਤਮਹਾਨਿਬ੍ਬਾਨਸ੍ਸ ਅਯਨੇ ਅਞ੍ਜਸਭੂਤੇ ਜਨਸ੍ਸ ਤਾਯਨੇ ਕਾਯਿਕਵਾਚਸਿਕਵੀਤਿਕ੍ਕਮਪਟਿਪਕ੍ਖਤ੍ਤਾ ਅਪਾਯਭਯਨਿਵਾਰਣਟ੍ਠੇਨ ਤਾਣਭੂਤੇ ਵਿਨਯੇ ਵਿਨਯਪਿਟਕੇ ਪਕਤਞ੍ਞੁਨੋ ਯਥਾਸਭਾਵਂ ਜਾਨਨ੍ਤਾ ਤਞ੍ਞੁਨੋ ਭਵਨ੍ਤਿ ਤਂ ਤਂ ਕਪ੍ਪਿਯਾਕਪ੍ਪਿਯਂ ਸੇਵਿਤਬ੍ਬਾਸੇਵਿਤਬ੍ਬਂ ਜਾਨਨ੍ਤਾ ਭਵਨ੍ਤੇਵਾਤਿ ਅਤ੍ਥੋ.

੨੪੪੨. ਬਹਵੋ ਸਾਰਭੂਤਾ ਨਯਾ ਏਤ੍ਥਾਤਿ ਬਹੁਸਾਰਨਯੋ, ਤਸ੍ਮਿਂ ਬਹੁਸਾਰਨਯੇ. ਪਰਮੇ ਉਤ੍ਤਮੇ ਵਿਨਯੇ ਵਿਨਯਪਿਟਕੇ ਵਿਸਾਰਦਤਂ ਵੇਸਾਰਜ੍ਜਂ ਅਸਂਹੀਰਞਾਣਂ ਅਭਿਪਤ੍ਥਯਤਾ ਵਿਸੇਸਤੋ ਇਚ੍ਛਨ੍ਤੇਨ ਬੁਦ੍ਧਿਮਤਾ ਞਾਣਾਤਿਸਯਮਨ੍ਤੇਨ ਯਤਿਨਾ ਸਬ੍ਬਕਾਲਂ ਤਿਵਿਧਸਿਕ੍ਖਾਪਰਿਪੂਰਣੇ ਅਸਿਥਿਲਪਵਤ੍ਤਸਮ੍ਮਾਵਾਯਾਮੇਨ ਭਿਕ੍ਖੁਨਾ ਇਮਸ੍ਮਿਂ ਵਿਨਯਵਿਨਿਚ੍ਛਯੇ ਪਰਮਾ ਉਤ੍ਤਰਿਤਰਾ ਮਹਤੀ ਆਦਰਤਾ ਕਰਣੀਯਤਮਾ ਵਿਸੇਸੇਨ ਕਾਤਬ੍ਬਾਯੇਵਾਤਿ ਅਤ੍ਥੋ.

੨੪੪੩. ਇਚ੍ਚੇਵਂ ਸੀਲਵਿਸੁਦ੍ਧਿਸਾਧਨੇ ਵਿਨਯਪਿਟਕੇ ਵੇਸਾਰਜ੍ਜਹੇਤੁਤਾਯ ਇਮਸ੍ਸ ਵਿਨਯਵਿਨਿਚ੍ਛਯਸ੍ਸ ਸੀਲਵਿਸੁਦ੍ਧਿਆਦਿਸਤ੍ਤਵਿਸੁਦ੍ਧਿਪਰਮ੍ਪਰਾਯ ਅਧਿਗਨ੍ਤਬ੍ਬਸ੍ਸ ਅਮਤਮਹਾਨਿਬ੍ਬਾਨਸ੍ਸ ਪਤ੍ਤਿਯਾਪਿ ਮੂਲਭੂਤਤਂ ਦਸ੍ਸੇਤੁਮਾਹ ‘‘ਅਵਗਚ੍ਛਤੀ’’ਤਿਆਦਿ.

ਯੋ ¶ ਪਨ ਭਿਕ੍ਖੁ ਅਤ੍ਥਯੁਤ੍ਤਂ ਮਹਤਾ ਪਯੋਜਨਤ੍ਥੇਨ, ਅਭਿਧੇਯ੍ਯਤ੍ਥੇਨ ਚ ਸਮਨ੍ਨਾਗਤਂ ਇਮਂ ਵਿਨਯਸ੍ਸਵਿਨਿਚ੍ਛਯਂ ਅਵਗਚ੍ਛਤਿ ਅਵੇਚ੍ਚ ਯਾਥਾਵਤੋ ਜਾਨਾਤਿ, ਸੋ ਅਪਰਮ੍ਪਰਂ ਮਰਣਾਭਾਵਾ ਅਮਰਂ ਜਰਾਯਾਭਾਵਾ ਅਜਰਂ ਰਾਗਾਦਿਕਿਲੇਸਰਜਪਟਿਪਕ੍ਖਤ੍ਤਾ ਅਰਜਂ ਅਨੇਕਪ੍ਪਕਾਰਰੋਗਾਨਂ ਅਪ੍ਪਵਤ੍ਤਿਹੇਤੁਤ੍ਤਾ ਅਰੁਜਂ ਸਨ੍ਤਿਪਦਂ ਸਬ੍ਬਕਿਲੇਸਦਰਥਪਰਿਲ਼ਾਹਾਨਂ ਵੂਪਸਮਹੇਤੁਤ੍ਤਾ ¶ ਸਨ੍ਤਿਸਙ੍ਖਾਤਂ ਨਿਬ੍ਬਾਨਪਦਂ ਅਧਿਗਚ੍ਛਤਿ ਸੀਲਵਿਸੁਦ੍ਧਿਆਦਿਸਤ੍ਤਵਿਸੁਦ੍ਧਿਪਰਮ੍ਪਰਾਯ ਗਨ੍ਤ੍ਵਾ ਪਟਿਵਿਜ੍ਝਤੀਤਿ ਯੋਜਨਾ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ ਵਿਨਯਵਿਨਿਚ੍ਛਯਵਣ੍ਣਨਾਯ

ਭਿਕ੍ਖੁਨਿਵਿਭਙ੍ਗਕਥਾਵਣ੍ਣਨਾ ਨਿਟ੍ਠਿਤਾ.

ਖਨ੍ਧਕਕਥਾ

ਮਹਾਵਗ੍ਗੋ

ਮਹਾਖਨ੍ਧਕਕਥਾ

ਪਬ੍ਬਜ੍ਜਾਕਥਾਵਣ੍ਣਨਾ

੨੪੪੪. ਇਚ੍ਚੇਵਂ ¶ ¶ ਨਾਤਿਸਙ੍ਖੇਪਵਿਤ੍ਥਾਰਵਸੇਨ ਵਿਭਙ੍ਗਦ੍ਵਯੇ, ਤਦਟ੍ਠਕਥਾਯ ਚ ਆਗਤਂ ਵਿਨਿਚ੍ਛਯਂ ਦਸ੍ਸੇਤ੍ਵਾ ਇਦਾਨਿ ਖਨ੍ਧਕਾਗਤਂ ਵਿਨਿਚ੍ਛਯਂ ਦਸ੍ਸੇਤੁਮਾਰਭਨ੍ਤੋ ਆਹ ‘‘ਸੀਲਕ੍ਖਨ੍ਧਾਦੀ’’ਤਿਆਦਿ. ਤਤ੍ਥ ਸੀਲਕ੍ਖਨ੍ਧਾਦਿਯੁਤ੍ਤੇਨਾਤਿ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਸਙ੍ਖਾਤੇਹਿ ਪਞ੍ਚਹਿ ਖਨ੍ਧੇਹਿ ਗੁਣਰਾਸੀਹਿ ਯੁਤ੍ਤੇਨ ਸਮਨ੍ਨਾਗਤੇਨ. ਸੁਭਕ੍ਖਨ੍ਧੇਨਾਤਿ ਸੁਵਣ੍ਣਾਲਿਙ੍ਗਸਦਿਸਵਟ੍ਟਕ੍ਖਨ੍ਧਤਾਯ ਸੁਭੋ ਸੁਨ੍ਦਰੋ ਖਨ੍ਧੋ ਏਤਸ੍ਸਾਤਿ ਸੁਭਕ੍ਖਨ੍ਧੋ, ਭਗਵਾ, ਤੇਨ. ਇਮਿਨਾ ਬਾਤ੍ਤਿਂਸਲਕ੍ਖਣਾਨਮੇਕਦੇਸਭੂਤਸ੍ਸ ਸਮਵਟ੍ਟਕ੍ਖਨ੍ਧਤਾਲਕ੍ਖਣਸ੍ਸ ਪਰਿਦੀਪਕੇਨ ਵਚਨੇਨ ਲਕ੍ਖਣਾਹਾਰਨਯੇਨ ਬਾਤ੍ਤਿਂਸਲਕ੍ਖਣਾਦਿਕਾ ਸਬ੍ਬਾਪਿ ਰੂਪਕਾਯਸਿਰੀ ਸਨ੍ਦਸ੍ਸਿਤਾਤਿ ਵੇਦਿਤਬ੍ਬਾ.

ਖਨ੍ਧਕੇਤਿ ਖਨ੍ਧਾਨਂ ਸਮੂਹੋ ਖਨ੍ਧਕੋ, ਖਨ੍ਧਾਨਂ ਵਾ ਕਾਯਨਤੋ ਦੀਪਨਤੋ ਖਨ੍ਧਕੋ. ‘‘ਖਨ੍ਧਾ’’ਤਿ ਚੇਤ੍ਥ ਪਬ੍ਬਜ੍ਜੂਪਸਮ੍ਪਦਾਦਿਵਿਨਯਕਮ੍ਮਸਙ੍ਖਾਤਾ, ਚਾਰਿਤ੍ਤਵਾਰਿਤ੍ਤਸਿਕ੍ਖਾਪਦਸਙ੍ਖਾਤਾ ਚ ਪਞ੍ਞਤ੍ਤਿਯੋ ਅਧਿਪ੍ਪੇਤਾ. ਪਬ੍ਬਜ੍ਜਾਦੀਨਿ ਹਿ ਭਗਵਤਾ ਪਞ੍ਞਤ੍ਤਤ੍ਤਾ ‘‘ਪਞ੍ਞਤ੍ਤਿਯੋ’’ਤਿ ਵੁਚ੍ਚਨ੍ਤਿ. ਪਞ੍ਞਤ੍ਤਿਯਞ੍ਚ ਖਨ੍ਧ-ਸਦ੍ਦੋ ਦਿਸ੍ਸਤਿ ‘‘ਦਾਰੁਕ੍ਖਨ੍ਧੋ (ਸਂ. ਨਿ. ੪.੨੪੧) ਅਗ੍ਗਿਕ੍ਖਨ੍ਧੋ (ਪਟਿ. ਮ. ੧.੧੧੬) ਉਦਕਕ੍ਖਨ੍ਧੋ’’ਤਿਆਦੀਸੁ (ਅ. ਨਿ. ੬.੩੭) ਵਿਯ. ਅਪਿਚ ਭਾਗਰਾਸਤ੍ਥਤਾ ¶ ਚੇਤ੍ਥ ਯੁਜ੍ਜਤਿਯੇਵ ਤਾਸਂ ਪਞ੍ਞਤ੍ਤੀਨਂ ਭਾਗਸੋ, ਰਾਸਿਤੋ ਚ ਵਿਭਤ੍ਤਤ੍ਤਾ. ਤਸ੍ਮਿਂ ਖਨ੍ਧਕੇ. ਪਿ-ਸਦ੍ਦੋ ਵੁਤ੍ਤਾਪੇਕ੍ਖਾਯ ਪਞ੍ਚਸਤਿਕਸਤ੍ਤਸਤਿਕਕ੍ਖਨ੍ਧਕੇ ਦ੍ਵੇ ਵਜ੍ਜੇਤ੍ਵਾ ¶ ਪਬ੍ਬਜ੍ਜਕ੍ਖਨ੍ਧਕਾਦਿਕੇ ਭਿਕ੍ਖੁਨਿਖਨ੍ਧਕਪਰਿਯੋਸਾਨੇ ਵੀਸਤਿਵਿਧੇ ਖਨ੍ਧਕੇ ਵੁਤ੍ਤਵਿਨਿਚ੍ਛਯਸ੍ਸ ਇਧ ਵਕ੍ਖਮਾਨਤ੍ਤਾ. ਤਦੇਵ ਸਨ੍ਧਾਯਾਹ ‘‘ਖਨ੍ਧਕੇਪਿ ਪਵਕ੍ਖਾਮਿ, ਸਮਾਸੇਨ ਵਿਨਿਚ੍ਛਯ’’ਨ੍ਤਿ.

੨੪੪੫. ‘‘ਮਾਤਰਾ ਪਿਤਰਾ’’ਤਿ ਇਮਿਨਾ ਜਨਕਾਯੇਵ ਅਧਿਪ੍ਪੇਤਾ. ‘‘ਭਣ੍ਡੁਕਮ੍ਮਂ, ਸਮਣਕਰਣਂ, ਪਬ੍ਬਾਜਨਨ੍ਤਿ ਚ ਪਰਿਯਾਯ-ਸਦ੍ਦਾ’’ਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਂ ਅਪਲੋਕੇਤੁਂ ਭਣ੍ਡੁਕਮ੍ਮਾਯਾ’’ਤਿ (ਮਹਾਵ. ੯੮) ਇਮਿਸ੍ਸਾ ਪਾਲ਼ਿਯਾ ਅਟ੍ਠਕਥਾਯ (ਮਹਾਵ. ਅਟ੍ਠ. ੯੮) ਵੁਤ੍ਤਂ. ਆਪੁਚ੍ਛਿਤ੍ਵਾਤਿ ਏਤ੍ਥ ‘‘ਸਙ੍ਘ’’ਨ੍ਤਿ ਸੇਸੋ.

੨੪੪੬. ਵਾਵਟੋਤਿ ਪਸੁਤੋ, ਯੁਤ੍ਤਪਯੁਤ੍ਤੋਤਿ ਅਤ੍ਥੋ. ‘‘ਪਬ੍ਬਾਜੇਤ੍ਵਾ ਆਨਯ ਇਤਿ ਚਾ’’ਤਿ ਪਦਚ੍ਛੇਦੋ. ਏਤ੍ਥ ਚ ਤਿਧਾ ਪਬ੍ਬਾਜਨਂ ਵੇਦਿਤਬ੍ਬਂ ਕੇਸਚ੍ਛੇਦਨਂ, ਕਾਸਾਯਅਚ੍ਛਾਦਨਂ, ਸਰਣਦਾਨਨ੍ਤਿ, ਇਮਾਨਿ ਤੀਣਿ ਕਰੋਨ੍ਤੋ ‘‘ਪਬ੍ਬਾਜੇਤੀ’’ਤਿ ਵੁਚ੍ਚਤਿ. ਤੇਸੁ ਏਕਂ, ਦ੍ਵੇ ਵਾਪਿ ਕਰੋਨ੍ਤੋ ਤਥਾ ਵੋਹਰੀਯਤਿਯੇਵ. ਤਸ੍ਮਾ ‘‘ਪਬ੍ਬਾਜੇਤ੍ਵਾਨਯਾ’’ਤਿ ਇਮਿਨਾ ਕੇਸੇ ਛਿਨ੍ਦਿਤ੍ਵਾ ਕਾਸਾਯਾਨਿ ਅਚ੍ਛਾਦੇਤ੍ਵਾ ਆਨੇਹੀਤਿ ਅਯਮਤ੍ਥੋ ਦੀਪਿਤੋਤਿ ਦਟ੍ਠਬ੍ਬੋ.

੨੪੪੭. ਅਵੁਤ੍ਤੋਤਿ ਉਪਜ੍ਝਾਯੇਨ ਅਨੁਯ੍ਯੋਜਿਤੋ. ਸੋ ਦਹਰੋ ਸਚੇ ਤਂ ਸਯਮੇਵ ਕੇਸਚ੍ਛੇਦਨਕਾਸਾਯਚ੍ਛਾਦਨੇਹਿ ਪਬ੍ਬਾਜੇਤਿ, ਵਟ੍ਟਤੀਤਿ ਯੋਜਨਾ.

੨੪੪੮. ਤਤ੍ਥਾਤਿ ਅਤ੍ਤਨੋ ਸਮੀਪੇ. ਖਣ੍ਡਸੀਮਂ ਨੇਤ੍ਵਾਤਿ ਭਣ੍ਡੁਕਮ੍ਮਾਰੋਚਨਪਰਿਹਾਰਤ੍ਥਂ ਵੁਤ੍ਤਂ. ਤੇਨ ਸਭਿਕ੍ਖੁਕੇ ਵਿਹਾਰੇ ਅਞ੍ਞਮ੍ਪਿ ਭਿਕ੍ਖੁਂ ‘‘ਏਤਸ੍ਸ ਕੇਸੇ ਛਿਨ੍ਦਾ’’ਤਿ ਵਤ੍ਤੁਂ ਨ ਵਟ੍ਟਤਿ. ਪਬ੍ਬਾਜੇਤ੍ਵਾਤਿ ਕੇਸਚ੍ਛੇਦਨਂ ਸਨ੍ਧਾਯ ਵਦਤਿ.

੨੪੫੦. ‘‘ਪੁਰਿਸਂ ¶ ਭਿਕ੍ਖੁਤੋ ਅਞ੍ਞੋ, ਪਬ੍ਬਾਜੇਤਿ ਨ ਵਟ੍ਟਤੀ’’ਤਿ ਇਦਂ ਸਰਣਦਾਨਂ ਸਨ੍ਧਾਯ ਵੁਤ੍ਤਂ. ਤੇਨੇਵਾਹ ‘‘ਸਾਮਣੇਰੋ’’ਤਿਆਦਿ.

੨੪੫੧. ਉਭਿਨ੍ਨਮ੍ਪਿ ਥੇਰਥੇਰੀਨਂ ‘‘ਇਮੇਹਿ ਚੀਵਰੇਹਿ ਇਮਂ ਅਚ੍ਛਾਦੇਹੀ’’ਤਿ ਆਣਤ੍ਤਿਯਾ ਸਾਮਣੇਰੋਪਿ ¶ ਵਾ ਹੋਤੁ, ਤਥਾ ਸਾਮਣੇਰੀ ਵਾ ਹੋਤੁ, ਤੇ ਉਭੋ ਸਾਮਣੇਰਸਾਮਣੇਰੀ ਕਾਸਾਯਾਨਿ ਦਾਤੁਂ ਲਭਨ੍ਤੀਤਿ ਯੋਜਨਾ.

੨੪੫੨-੪. ਪਬ੍ਬਾਜੇਨ੍ਤੇਨ ਭਿਕ੍ਖੁਨਾਤਿ ਏਤ੍ਥ ‘‘ਤਚਪਞ੍ਚਕਕਮ੍ਮਟ੍ਠਾਨਂ ਦਤ੍ਵਾ’’ਤਿ ਵਤ੍ਤਬ੍ਬਂ ਏਵਞ੍ਹਿ ਕਤ੍ਵਾ ਕੇਸਾਪਨਯਨਸ੍ਸ ਅਟ੍ਠਕਥਾਯਂ ਵੁਤ੍ਤਤ੍ਤਾ. ਵੁਤ੍ਤਞ੍ਹਿ ਤਤ੍ਥ ‘‘ਆਵੁਸੋ, ਸੁਟ੍ਠੁ ਉਪਧਾਰੇਹਿ, ਸਤਿਂ ਉਪਟ੍ਠਾਪੇਹੀਤਿ ਵਤ੍ਵਾ ਤਚਪਞ੍ਚਕਕਮ੍ਮਟ੍ਠਾਨਂ ਆਚਿਕ੍ਖਿਤਬ੍ਬਂ. ਆਚਿਕ੍ਖਨ੍ਤੇਨ ਚ ਵਣ੍ਣਸਣ੍ਠਾਨਗਨ੍ਧਾਸਯੋਕਾਸਵਸੇਨ ਅਸੁਚਿਜੇਗੁਚ੍ਛਪਟਿਕ੍ਕੂਲਭਾਵਂ, ਨਿਜ੍ਜੀਵਨਿਸ੍ਸਤ੍ਤਭਾਵਂ ਵਾ ਪਾਕਟਂ ਕਰੋਨ੍ਤੇਨ ਆਚਿਕ੍ਖਿਤਬ੍ਬ’’ਨ੍ਤਿਆਦਿ. ਕਿਮਤ੍ਥਮੇਵਂ ਕਰੀਯਤੀਤਿ ਚੇ? ਸਚੇ ਉਪਨਿਸ੍ਸਯਸਮ੍ਪਨ੍ਨੋ ਹੋਤਿ, ਤਸ੍ਸ ਖੁਰਗ੍ਗੇਯੇਵ ਅਰਹਤ੍ਤਪਾਪੁਣਨਤ੍ਥਂ. ਵੁਤ੍ਤਞ੍ਚੇਤਂ ਅਟ੍ਠਕਥਾਯਂ –

‘‘ਯੇ ਹਿ ਕੇਚਿ ਖੁਰਗ੍ਗੇ ਅਰਹਤ੍ਤਂ ਪਤ੍ਤਾ, ਸਬ੍ਬੇ ਤੇ ਏਵਰੂਪਂ ਸਵਨਂ ਲਭਿਤ੍ਵਾ ਕਲ੍ਯਾਣਮਿਤ੍ਤੇਨ ਆਚਰਿਯੇਨ ਦਿਨ੍ਨਨਯਂ ਨਿਸ੍ਸਾਯ, ਨੋ ਅਨਿਸ੍ਸਾਯ, ਤਸ੍ਮਾਸ੍ਸ ਆਦਿਤੋਵ ਏਵਰੂਪੀ ਕਥਾ ਕਥੇਤਬ੍ਬਾ’’ਤਿ (ਮਹਾਵ. ਅਟ੍ਠ. ੩੪).

ਏਤੇਨੇਵ ਬ੍ਯਤਿਰੇਕਤੋ ਇਤੋ ਅਞ੍ਞਾ ਅਨਿਯ੍ਯਾਨਿਕਕਥਾ ਨ ਕਥੇਤਬ੍ਬਾਤਿ ਦੀਪਿਤਂ ਹੋਤਿ. ਗੋਮਯਾਦਿਨਾਤਿ ਗੋਮਯਚੁਣ੍ਣਾਦਿਨਾ. ਆਦਿ-ਸਦ੍ਦੇਨ ਮਤ੍ਤਿਕਾਦੀਨਂ ਗਹਣਂ. ਪੀਲ਼ਕਾ ਵਾਤਿ ਥੁਲ੍ਲਪੀਲ਼ਕਾ ਵਾ. ਕਚ੍ਛੁ ਵਾਤਿ ਸੁਖੁਮਕਚ੍ਛੁ ਵਾ. ਨਿਯਂਪੁਤ੍ਤਨ੍ਤਿ ¶ ਅਤ੍ਤਨੋ ਪੁਤ੍ਤਂ. ‘‘ਭਿਕ੍ਖੁਨਾ’’ਤਿ ਇਮਸ੍ਸ ਪਦਸ੍ਸ ਦੂਰਤ੍ਤਾ ‘‘ਯਤਿਨਾ’’ਤਿ ਆਹ.

੨੪੫੫-੬. ਕਸ੍ਮਾ ਪਨ ਏਵਂ ਨਹਾਪੇਤਬ੍ਬੋਤਿ ਆਹ ‘‘ਏਤ੍ਤਕੇਨਾਪੀ’’ਤਿਆਦਿ. ਸੋਤਿ ਪਬ੍ਬਜ੍ਜਾਪੇਕ੍ਖੋ. ਉਪਜ੍ਝਾਯਕਾਦਿਸੂਤਿ ਏਤ੍ਥ ਆਦਿ-ਸਦ੍ਦੇਨ ਆਚਰਿਯਸਮਾਨੁਪਜ੍ਝਾਯਕਾਦੀਨਂ ਗਹਣਂ. ਪਾਪੁਣਨ੍ਤਿ ਹੀਤਿ ਏਤ੍ਥ ਹਿ-ਸਦ੍ਦੋ ਯਸ੍ਮਾ-ਪਦਤ੍ਥੇ ਵਤ੍ਤਤਿ. ਯਸ੍ਮਾ ਏਤ੍ਤਕੇਨਾਪਿ ਉਪਜ੍ਝਾਯਾਦੀਸੁ ਸਗਾਰਵੋ ਹੋਤਿ, ਯਸ੍ਮਾ ਚ ਏਵਰੂਪਂ ਉਪਕਾਰਂ ਲਭਿਤ੍ਵਾ ਕੁਲਪੁਤ੍ਤਾ ਉਪ੍ਪਨ੍ਨਂ ਅਨਭਿਰਤਿਂ ਪਟਿਵਿਨੋਦੇਤ੍ਵਾ ਸਿਕ੍ਖਾਯੋ ਪਰਿਪੂਰੇਤ੍ਵਾ ਨਿਬ੍ਬਾਨਂ ਪਾਪੁਣਿਸ੍ਸਨ੍ਤਿ, ਤਸ੍ਮਾ ਏਵਰੂਪੋ ਉਪਕਾਰੋ ਕਾਤਬ੍ਬੋਤਿ ਅਤ੍ਥੋ.

੨੪੫੮. ਏਕਤੋਤਿ ਸਬ੍ਬਾਨਿ ਚੀਵਰਾਨਿ ਏਕਤੋ ਕਤ੍ਵਾ.

੨੪੫੯. ਅਥਾਤਿ ¶ ਅਧਿਕਾਰਨ੍ਤਰਾਰਮ੍ਭੇ ਨਿਪਾਤੋ. ਤਸ੍ਸ ਹਤ੍ਥੇ ਅਦਤ੍ਵਾਪਿ ਉਪਜ੍ਝਾਯੋ ਵਾ ਆਚਰਿਯੋ ਵਾਪਿ ਸਯਮੇਵ ਤਂ ਪਬ੍ਬਜ੍ਜਾਪੇਕ੍ਖਂ ਅਚ੍ਛਾਦੇਤਿ, ਵਟ੍ਟਤੀਤਿ ਯੋਜਨਾ.

੨੪੬੦. ਅਦਿਨ੍ਨਚੀਵਰਸ੍ਸ ਅਗ੍ਗਹੇਤਬ੍ਬਤ੍ਤਾ ਆਹ ‘‘ਅਪਨੇਤ੍ਵਾ ਤਤੋ ਸਬ੍ਬਂ, ਪੁਨ ਦਾਤਬ੍ਬਮੇਵ ਤ’’ਨ੍ਤਿ. ਤਤੋਤਿ ਤਸ੍ਸ ਸਰੀਰਤੋ. ਤਨ੍ਤਿ ਚੀਵਰਂ.

੨੪੬੧-੨. ਏਤਦੇਵ ਆਹ ‘‘ਭਿਕ੍ਖੁਨਾ’’ਤਿਆਦਿਨਾ. ਅਦਿਨ੍ਨਂ ਨ ਵਟ੍ਟਤੀਤਿ ਏਤ੍ਥ ਪਬ੍ਬਜ੍ਜਾ ਨ ਰੁਹਤੀਤਿ ਵਦਨ੍ਤਿ. ਤਸ੍ਸੇਵ ਸਨ੍ਤਕਂ ਵਾਪਿ ਚੀਵਰਂ ਅਦਿਨ੍ਨਂ ਨ ਵਟ੍ਟਤਿ ਅਤ੍ਤਸਨ੍ਤਕੇ ਆਚਰਿਯੁਪਜ੍ਝਾਯਾਨਂ ਅਤ੍ਤਨੋ ਸਨ੍ਤਕੇ ਚੀਵਰੇ ਕਾ ਕਥਾ ਵਤ੍ਤਬ੍ਬਮੇਵ ਨਤ੍ਥੀਤਿ ਅਤ੍ਥੋ. ਭਿਕ੍ਖੂਤਿ ਯੇ ਤਤ੍ਥ ਸਨ੍ਨਿਪਤਿਤਾ. ਕਾਰਾਪੇਤ੍ਵਾਨ ਉਕ੍ਕੁਟਿਨ੍ਤਿ ਏਤ੍ਥ ਸਬ੍ਬਧਾਤ੍ਵਤ੍ਥਾਨੁਗਤੋ ਕਰੋਤਿ-ਸਦ੍ਦੋ ਗਹਿਤੋਤਿ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾਤਿ ਅਤ੍ਥੋ ਗਹੇਤਬ੍ਬੋ, ‘‘ਉਕ੍ਕੁਟਿਕ’’ਨ੍ਤਿ (ਮਹਾਵ. ਅਟ੍ਠ. ੩੪) ਅਟ੍ਠਕਥਾਪਾਠੋ ਗਾਥਾਬਨ੍ਧਸੁਖਤ੍ਥਂ ਇਧ ਕ-ਕਾਰਲੋਪੇਨ ਨਿਦ੍ਦਿਟ੍ਠੋ.

੨੪੬੪. ਏਕਪਦਂ ¶ ਵਾਪੀਤਿ ਬੁਦ੍ਧਮਿਚ੍ਚਾਦਿਕਂ ਏਕਮ੍ਪਿ ਵਾ ਪਦਂ. ਏਕਕ੍ਖਰਮ੍ਪਿ ਵਾਤਿ ਬੁਕਾਰਾਦਿਅਕ੍ਖਰੇਸੁ ਏਕਮ੍ਪਿ ਵਾ ਅਕ੍ਖਰਂ. ਪਟਿਪਾਟਿਨ੍ਤਿ ‘‘ਬੁਦ੍ਧ’’ਮਿਚ੍ਚਾਦਿਕਂ ਪਦਪਨ੍ਤਿਂ.

੨੪੬੫. ਅਕਤ੍ਤਬ੍ਬਪ੍ਪਕਾਰਨ੍ਤਰਂ ਦਸ੍ਸੇਤੁਮਾਹ ‘‘ਤਿਕ੍ਖਤ੍ਤੁਂ ਯਦਿ ਵਾ’’ਤਿਆਦਿ. ਤਥਾ ਸੇਸੇਸੂਤਿ ਯਦਿ ਵਾ ‘‘ਧਮ੍ਮਂ ਸਰਣ’’ਨ੍ਤਿ ਤਿਕ੍ਖਤ੍ਤੁਂ ਦੇਤਿ, ‘‘ਸਙ੍ਘਂ ਸਰਣ’’ਨ੍ਤਿ ਯਦਿ ਵਾ ਤਿਕ੍ਖਤ੍ਤੁਂ ਦੇਤਿ, ਏਵਮ੍ਪਿ ਤੀਣਿ ਸਰਣਾਨਿ ਅਦਿਨ੍ਨਾਨੇਵ ਹੋਨ੍ਤਿ.

੨੪੬੬. ਅਨੁਨਾਸਿਕਨ੍ਤਾਨਿ ਕਤ੍ਵਾ ਦਾਤਬ੍ਬਾਨੀਤਿ ਸਮ੍ਬਨ੍ਧੋ. ਅਨੁਨਾਸਿਕਨ੍ਤਂ ਕਤ੍ਵਾ ਦਾਨਕਾਲੇ ਅਨ੍ਤਰਾਵਿਚ੍ਛੇਦਂ ਅਕਤ੍ਵਾ ਦਾਤਬ੍ਬਾਨੀਤਿ ਦਸ੍ਸੇਤੁਂ ‘‘ਏਕਾਬਦ੍ਧਾਨਿ ਵਾ ਪਨਾ’’ਤਿ ਵੁਤ੍ਤਂ. ਵਿਚ੍ਛਿਨ੍ਦਿਤ੍ਵਾ ਪਦਪਟਿਪਾਟਿਤੋ ਮ-ਕਾਰਨ੍ਤਂ ਕਤ੍ਵਾ ਦਾਨਸਮਯੇ ਵਿਚ੍ਛੇਦਂ ਕਤ੍ਵਾ. ਮਨ੍ਤਾਨੀਤਿ ‘‘ਬੁਦ੍ਧਂ ਸਰਣਂ ਇਚ੍ਚਾਦਿਨਾ ਮ-ਕਾਰਨ੍ਤਾਨਿ. ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿਆਦਿਨਾ ਨਯੇਨ ਨਿਗ੍ਗਹਿਤਨ੍ਤਮੇਵ ਕਤ੍ਵਾ ਨ ਦਾਤਬ੍ਬਨ੍ਤਿ ‘‘ਅਥਾ’’ਤਿ ਆਹ.

੨੪੬੭. ਸੁਦ੍ਧਿ ਨਾਮ ਆਚਰਿਯਸ੍ਸ ਞਤ੍ਤਿਯਾ, ਕਮ੍ਮਵਾਚਾਯ ਚ ਉਚ੍ਚਾਰਣਵਿਸੁਦ੍ਧਿ. ਪਬ੍ਬਜ੍ਜਾਤਿ ਸਾਮਣੇਰਸਾਮਣੇਰਿਪਬ੍ਬਜ੍ਜਾ. ਉਭਤੋਸੁਦ੍ਧਿਯਾ ਵਿਨਾਤਿ ਉਭਤੋਸੁਦ੍ਧਿਂ ਵਿਨਾ ਆਚਰਿਯਨ੍ਤੇਵਾਸੀਨਂ ¶ ਉਭਿਨ੍ਨਂ ਤੀਸੁ ਸਰਣਤ੍ਤਯਦਾਨਗ੍ਗਹਣੇਸੁ ਉਚ੍ਚਾਰਣਸੁਦ੍ਧਿਂ ਵਿਨਾ, ਏਕਸ੍ਸਾਪਿ ਅਕ੍ਖਰਸ੍ਸ ਵਿਪਤ੍ਤਿਸਬ੍ਭਾਵੇ ਨ ਹੋਤੀਤਿ ਅਤ੍ਥੋ.

੨੪੬੮-੯. ‘‘ਪਬ੍ਬਜ੍ਜਾਗੁਣਮਿਚ੍ਛਤਾ’’ਤਿ ਇਦਂ ‘‘ਆਚਰਿਯੇਨ, ਅਨ੍ਤੇਵਾਸਿਕੇਨਾ’’ਤਿ ਪਦਦ੍ਵਯਸ੍ਸ ਵਿਸੇਸਨਂ ਦਟ੍ਠਬ੍ਬਂ, ਅਨ੍ਤੇਵਾਸਿਕਸ੍ਸ ਪਬ੍ਬਜ੍ਜਾਗੁਣਂ ਇਚ੍ਛਨ੍ਤੇਨ ਆਚਰਿਯੇਨ, ਅਤ੍ਤਨੋ ਪਬ੍ਬਜ੍ਜਾਗੁਣਂ ਇਚ੍ਛਨ੍ਤੇਨ ਅਨ੍ਤੇਵਾਸਿਕੇਨ ਚ ਬੁ-ਦ੍ਧ-ਕਾਰਾਦਯੋ ਵਣ੍ਣਾ ਬੁ-ਕਾਰ ਧ-ਕਾਰਾਦਯੋ ਵਣ੍ਣਾ ਅਕ੍ਖਰਾ ਠਾਨਕਰਣਸਮ੍ਪਦਂ ਕਣ੍ਠਤਾਲੁਮੁਦ੍ਧਦਨ੍ਤਓਟ੍ਠਨਾਸਿਕਾਭੇਦਂ ਠਾਨਸਮ੍ਪਦਞ੍ਚ ¶ ਅਕ੍ਖਰੁਪ੍ਪਤ੍ਤਿਸਾਧਕਤਮਜਿਵ੍ਹਾਮਜ੍ਝਾਦਿਕਰਣਸਮ੍ਪਦਞ੍ਚ ਅਹਾਪੇਨ੍ਤੇਨ ਅਪਰਿਹਾਪੇਨ੍ਤੇਨ ਵਤ੍ਤਬ੍ਬਾਤਿ ਯੋਜਨਾ. ਕਸ੍ਮਾ ਇਦਮੇਵ ਦਲ਼੍ਹਂ ਕਤ੍ਵਾ ਵੁਤ੍ਤਨ੍ਤਿ ਆਹ ‘‘ਏਕਵਣ੍ਣਵਿਨਾਸੇਨਾ’’ਤਿਆਦਿ. ਹਿ-ਸਦ੍ਦੋ ਯਸ੍ਮਾ-ਪਦਤ੍ਥੇ, ਯਸ੍ਮਾ ਏਕਸ੍ਸਾਪਿ ਵਣ੍ਣਸ੍ਸ ਵਿਨਾਸੇਨ ਅਨੁਚ੍ਚਾਰਣੇਨ ਵਾ ਦੁਰੁਚ੍ਚਾਰਣੇਨ ਵਾ ਪਬ੍ਬਜ੍ਜਾ ਨ ਰੁਹਤਿ, ਤਸ੍ਮਾ ਏਵਂ ਵੁਤ੍ਤਨ੍ਤਿ ਅਧਿਪ੍ਪਾਯੋ.

੨੪੭੦. ਯਦਿ ਸਿਦ੍ਧਾਤਿ ਸਾਸਙ੍ਕਵਚਨੇਨ ਉਭਤੋਉਚ੍ਚਾਰਣਸੁਦ੍ਧਿਯਾ ਦੁਕ੍ਕਰਤ੍ਤਂ ਦੀਪੇਤ੍ਵਾ ‘‘ਅਪ੍ਪਮਤ੍ਤੇਹਿ ਭਵਿਤਬ੍ਬ’’ਨ੍ਤਿ ਉਭਿਨ੍ਨਂ ਆਚਰਿਯਨ੍ਤੇਵਾਸਿਕਾਨਂ ਅਨੁਸਿਟ੍ਠਿ ਦਿਨ੍ਨਾ ਹੋਤਿ. ਸਰਣਗਮਨਤੋਵਾਤਿ ਅਵਧਾਰਣੇਨ ਸਾਮਣੇਰਪਬ੍ਬਜ੍ਜਾ ਉਪਸਮ੍ਪਦਾ ਵਿਯ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਨ ਹੋਤਿ, ਇਦਾਨਿਪਿ ਸਰਣਗਮਨੇਨੇਵ ਸਿਜ੍ਝਤੀਤਿ ਦੀਪੇਤਿ. ਹਿ-ਸਦ੍ਦੋ ਪਸਿਦ੍ਧਿਯਂ. ਯਥਾਹ –

‘‘ਯਸ੍ਮਾ ਸਰਣਗਮਨੇਨ ਉਪਸਮ੍ਪਦਾ ਪਰਤੋ ਪਟਿਕ੍ਖਿਤ੍ਤਾ, ਤਸ੍ਮਾ ਸਾ ਏਤਰਹਿ ਸਰਣਗਮਨਮਤ੍ਤੇਨੇਵ ਨ ਰੁਹਤਿ. ਸਾਮਣੇਰਸ੍ਸ ਪਬ੍ਬਜ੍ਜਾ ਪਨ ਯਸ੍ਮਾ ਪਰਤੋਪਿ ‘ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਤੀਹਿ ਸਰਣਗਮਨੇਹਿ ਸਾਮਣੇਰਪਬ੍ਬਜ੍ਜ’ਨ੍ਤਿ (ਮਹਾਵ. ੧੦੫) ਅਨੁਞ੍ਞਾਤਾ ਏਵ, ਤਸ੍ਮਾ ਸਾ ਏਤਰਹਿਪਿ ਸਰਣਗਮਨਮਤ੍ਤੇਨੇਵ ਰੁਹਤੀ’’ਤਿ (ਮਹਾਵ. ਅਟ੍ਠ. ੩੪).

ਸਰਣਗਮਨਤੋ ਏਵ ਪਬ੍ਬਜ੍ਜਾ ਯਦਿਪਿ ਕਿਞ੍ਚਾਪਿ ਸਿਦ੍ਧਾ ਨਿਪ੍ਫਨ੍ਨਾ, ਤਥਾਪਿ ਅਸ੍ਸ ਸਾਮਣੇਰਸ੍ਸ ‘‘ਇਦਞ੍ਚਿਦਞ੍ਚ ਮਯਾ ਪੂਰੇਤਬ੍ਬਂ ਸੀਲ’’ਨ੍ਤਿ ਞਤ੍ਵਾ ਪਰਿਪੂਰਣਤ੍ਥਾਯ ਭਿਕ੍ਖੁਨਾ ਦਸ ਸੀਲਾਨਿ ਦਾਤਬ੍ਬਾਨੀਤਿ ਯੋਜਨਾ. ਯਥਾਹ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਾਮਣੇਰਾਨਂ ਦਸ ਸਿਕ੍ਖਾਪਦਾਨਿ, ਤੇਸੁ ਚ ਸਾਮਣੇਰੇਹਿ ਸਿਕ੍ਖਿਤੁਂ. ਪਾਣਾਤਿਪਾਤਾ ਵੇਰਮਣੀ’’ਤਿਆਦਿ (ਮਹਾਵ. ੧੦੬).

ਪਬ੍ਬਜ੍ਜਾਕਥਾਵਣ੍ਣਨਾ.

੨੪੭੧. ਉਪਜ੍ਝਾਯਨ੍ਤਿ ¶ ¶ ਵਜ੍ਜਾਵਜ੍ਜੇ ਉਪਨਿਜ੍ਝਾਯਤੀਤਿ ਉਪਜ੍ਝਾਯੋ, ਤਂ, ਭਗਵਤਾ ਵੁਤ੍ਤੇਹਿ ਅਙ੍ਗੇਹਿ ਸਮਨ੍ਨਾਗਤੋ ਪਰਿਪੁਣ੍ਣਦਸਵਸ੍ਸੋ ਪੁਗ੍ਗਲੋ. ਨਿਵਾਸੇਤ੍ਵਾ ਚ ਪਾਰੁਪਿਤ੍ਵਾ ਚ ਸਿਰਸਿ ਅਞ੍ਜਲਿਂ ਪਗ੍ਗਹੇਤ੍ਵਾ ਅਤ੍ਤਨੋ ਅਭਿਮੁਖੇ ਉਕ੍ਕੁਟਿਕਂ ਨਿਸੀਦਿਤ੍ਵਾ ‘‘ਉਪਜ੍ਝਾਯੋ ਮੇ, ਭਨ੍ਤੇ, ਹੋਹੀ’’ਤਿ ਤਿਕ੍ਖਤ੍ਤੁਂ ਵਤ੍ਵਾ ਆਯਾਚਨਾਯ ਕਤਾਯ ‘‘ਸਾਹੁ, ਲਹੁ, ਓਪਾਯਿਕਂ, ਪਟਿਰੂਪਂ, ਪਾਸਾਦਿਕੇਨ ਸਮ੍ਪਾਦੇਹੀ’’ਤਿ ਇਮੇਸੁ ਪਞ੍ਚਸੁ ਪਦੇਸੁ ਅਞ੍ਞਤਰਂ ਕਾਯੇਨ ਵਾ ਵਾਚਾਯ ਵਾ ਉਭਯੇਨ ਵਾ ਵਿਞ੍ਞਾਪੇਤ੍ਵਾ ਤਸ੍ਮਿਂ ਸਮ੍ਪਟਿਚ੍ਛਿਤੇ ਪਿਤੁਟ੍ਠਾਨੇ ਠਤ੍ਵਾ ਅਤ੍ਰਜਮਿਵ ਤਂ ਗਹੇਤ੍ਵਾ ਵਜ੍ਜਾਵਜ੍ਜਂ ਉਪਪਰਿਕ੍ਖਿਤ੍ਵਾ ਦੋਸੇਨ ਨਿਗ੍ਗਣ੍ਹਿਤ੍ਵਾ ਸਦ੍ਧਿਵਿਹਾਰਿਕੇ ਸਿਕ੍ਖਾਪੇਨ੍ਤੋ ਉਪਜ੍ਝਾਯੋ ਨਾਮ.

ਵਿਜ੍ਜਾਸਿਪ੍ਪਂ, ਆਚਾਰਸਮਾਚਾਰਂ ਵਾ ਸਿਕ੍ਖਿਤੁਕਾਮੇਹਿ ਆਦਰੇਨ ਚਰਿਤਬ੍ਬੋ ਉਪਟ੍ਠਾਤਬ੍ਬੋਤਿ ਆਚਰਿਯੋ, ਤਂ, ਉਪਜ੍ਝਾਯੇ ਵੁਤ੍ਤਲਕ੍ਖਣਸਮਨ੍ਨਾਗਤੋਯੇਵ ਪੁਗ੍ਗਲੋ. ਵੁਤ੍ਤਨਯੇਨੇਵ ਨਿਸੀਦਿਤ੍ਵਾ ‘‘ਆਚਰਿਯੋ ਮੇ, ਭਨ੍ਤੇ, ਹੋਹਿ, ਆਯਸ੍ਮਤੋ ਨਿਸ੍ਸਾਯ ਵਚ੍ਛਾਮੀ’’ਤਿ ਤਿਕ੍ਖਤ੍ਤੁਂ ਵਤ੍ਵਾ ਆਯਾਚਨਾਯ ਕਤਾਯ ‘‘ਸਾਹੂ’’ਤਿਆਦੀਸੁ ਪਞ੍ਚਸੁ ਅਞ੍ਞਤਰਂ ਵਤ੍ਵਾ ਤਸ੍ਮਿਂ ਸਮ੍ਪਟਿਚ੍ਛਿਤੇ ਪਿਤੁਟ੍ਠਾਨੇ ਠਤ੍ਵਾ ਪੁਤ੍ਤਟ੍ਠਾਨਿਯਂ ਅਨ੍ਤੇਵਾਸਿਂ ਸਿਕ੍ਖਾਪੇਨ੍ਤੋ ਆਚਰਿਯੋ ਨਾਮ.

ਏਤ੍ਥ ਚ ਸਾਹੂਤਿ ਸਾਧੁ. ਲਹੂਤਿ ਅਗਰੁ, ਮਮ ਤੁਯ੍ਹਂ ਉਪਜ੍ਝਾਯਭਾਵੇ ਭਾਰਿਯਂ ਨਤ੍ਥੀਤਿ ਅਤ੍ਥੋ. ਓਪਾਯਿਕਨ੍ਤਿ ਉਪਾਯਪਟਿਸਂਯੁਤ੍ਤਂ, ਤਂ ਉਪਜ੍ਝਾਯਗ੍ਗਹਣਂ ਇਮਿਨਾ ਉਪਾਯੇਨ ਤ੍ਵਂ ਮੇ ਇਤੋ ਪਟ੍ਠਾਯ ਭਾਰੋ ਜਾਤੋਸੀਤਿ ਵੁਤ੍ਤਂ ਹੋਤਿ. ਪਟਿਰੂਪਨ੍ਤਿ ਅਨੁਰੂਪਂ ਤੇ ਉਪਜ੍ਝਾਯਗ੍ਗਹਣਨ੍ਤਿ ਅਤ੍ਥੋ. ਪਾਸਾਦਿਕੇਨਾਤਿ ਪਸਾਦਾਵਹੇਨ ਕਾਯਵਚੀਪਯੋਗੇਨ. ਸਮ੍ਪਾਦੇਹੀਤਿ ਤਿਵਿਧਂ ਸਿਕ੍ਖਂ ਨਿਪ੍ਫਾਦੇਹੀਤਿ ਅਤ੍ਥੋ. ਕਾਯੇਨ ਵਾਤਿ ਹਤ੍ਥਮੁਦ੍ਦਾਦਿਂ ਦਸ੍ਸੇਨ੍ਤੋ ਕਾਯੇਨ ਵਾ. ਨਾਮਵਿਸੇਸਂ ਵਿਨਾ ਪੂਰੇਤਬ੍ਬਵਤ੍ਤਾਨਂ ਸਮਤਾਯ ਉਭੋਪਿ ਏਕਤੋ ਵੁਤ੍ਤਾ.

ਏਤਾਨਿ ¶ ਵਤ੍ਤਾਨਿ ਉਪਜ੍ਝਾਯਸ੍ਸ ਸਦ੍ਧਿਵਿਹਾਰਿਕੇਨ, ਆਚਰਿਯਸ੍ਸ ਅਨ੍ਤੇਵਾਸਿਕੇਨਾਪਿ ਏਵਮੇਵ ਕਾਤਬ੍ਬਾਨੇਵਾਤਿ. ਵਸਤਾਤਿ ਵਸਨ੍ਤੇਨ. ਪਿਯਸੀਲੇਨਾਤਿ ਪਿਯਂ ਸੀਲਮੇਤਸ੍ਸਾਤਿ ਪਿਯਸੀਲੋ, ਤੇਨ, ਸੀਲਂ ਪਰਿਪੂਰਿਤੁਕਾਮੇਨਾਤਿ ਵੁਤ੍ਤਂ ਹੋਤਿ.

੨੪੭੨-੩. ਆਸਨਂ ਪਞ੍ਞਪੇਤਬ੍ਬਨ੍ਤਿ ਏਤ੍ਥ ‘‘ਕਾਲਸ੍ਸੇਵ ਵੁਟ੍ਠਾਯ ਉਪਾਹਨਾ ਓਮੁਞ੍ਚਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ’’ਤਿ (ਮਹਾਵ. ੬੬) ਵੁਤ੍ਤਾ ਪੁਬ੍ਬਕਿਰਿਯਾ ਵਤ੍ਤਬ੍ਬਾ. ਆਸਨਂ ਪਞ੍ਞਪੇਤਬ੍ਬਨ੍ਤਿ ¶ ਦਨ੍ਤਕਟ੍ਠਖਾਦਨਟ੍ਠਾਨਂ ਸਮ੍ਮਜ੍ਜਿਤ੍ਵਾ ਨਿਸੀਦਨਤ੍ਥਾਯ ਆਸਨਂ ਪਞ੍ਞਪੇਤਬ੍ਬਂ. ਇਮਿਨਾ ਚ ਯਾਗੁਪਾਨਟ੍ਠਾਨਾਦੀਸੁਪਿ ਆਸਨਾਨਿ ਪਞ੍ਞਪੇਤਬ੍ਬਾਨੇਵਾਤਿ ਦਸ੍ਸਿਤਂ ਹੋਤਿ.

ਦਨ੍ਤਕਟ੍ਠਂ ਦਾਤਬ੍ਬਨ੍ਤਿ ਮਹਨ੍ਤਂ, ਮਜ੍ਝਿਮਂ, ਖੁਦ੍ਦਕਨ੍ਤਿ ਤੀਣਿ ਦਨ੍ਤਕਟ੍ਠਾਨਿ ਉਪਨੇਤ੍ਵਾ ਤਤੋ ਯਂ ਤੀਣਿ ਦਿਵਸਾਨਿ ਗਣ੍ਹਾਤਿ, ਚਤੁਤ੍ਥਦਿਵਸਤੋ ਪਟ੍ਠਾਯ ਤਾਦਿਸਮੇਵ ਦਾਤਬ੍ਬਂ. ਸਚੇ ਅਨਿਯਮਂ ਕਤ੍ਵਾ ਯਂ ਵਾ ਤਂ ਵਾ ਗਣ੍ਹਾਤਿ, ਅਥ ਯਾਦਿਸਂ ਲਭਤਿ, ਤਾਦਿਸਂ ਦਾਤਬ੍ਬਂ.

ਮੁਖੋਦਕਂ ਦਾਤਬ੍ਬਨ੍ਤਿ ਮੁਖਧੋਵਨੋਦਕਂ ਮੁਖੋਦਕਨ੍ਤਿ ਮਜ੍ਝੇਪਦਲੋਪੀਸਮਾਸੋ, ਤਂ ਦੇਨ੍ਤੇਨ ਸੀਤਞ੍ਚ ਉਣ੍ਹਞ੍ਚ ਉਦਕਂ ਉਪਨੇਤ੍ਵਾ ਤਤੋ ਯਂ ਤੀਣਿ ਦਿਵਸਾਨਿ ਵਲ਼ਞ੍ਜੇਤਿ, ਚਤੁਤ੍ਥਦਿਵਸਤੋ ਪਟ੍ਠਾਯ ਤਾਦਿਸਮੇਵ ਮੁਖਧੋਵਨੋਦਕਂ ਦਾਤਬ੍ਬਂ. ਸਚੇ ਅਨਿਯਮਂ ਕਤ੍ਵਾ ਯਂ ਵਾ ਤਂ ਵਾ ਗਣ੍ਹਾਤਿ, ਅਥ ਯਾਦਿਸਂ ਲਭਤਿ, ਤਾਦਿਸਂ ਦਾਤਬ੍ਬਂ. ਸਚੇ ਦੁਵਿਧਮ੍ਪਿ ਵਲ਼ਞ੍ਜੇਤਿ, ਦੁਵਿਧਮ੍ਪਿ ਉਪਨੇਤਬ੍ਬਂ. ‘‘ਮੁਖੋਦਕਂ ਮੁਖਧੋਵਨਟ੍ਠਾਨੇ ਠਪੇਤ੍ਵਾ ਅਵਸੇਸਟ੍ਠਾਨਾਨਿ ਸਮ੍ਮਜ੍ਜਿਤਬ੍ਬਾਨਿ. ਸਮ੍ਮਜ੍ਜਨ੍ਤੇਨ ਚ ਵਚ੍ਚਕੁਟਿਤੋ ਪਟ੍ਠਾਯ ਸਮ੍ਮਜ੍ਜਿਤਬ੍ਬਂ. ਥੇਰੇ ਵਚ੍ਚਕੁਟਿਂ ਗਤੇ ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ, ਏਵਂ ਪਰਿਵੇਣਂ ਅਸੁਞ੍ਞਂ ਹੋਤੀ’’ਤਿ ਅਟ੍ਠਕਥਾਯਂ (ਮਹਾਵ. ਅਟ੍ਠ. ੬੪ ਅਤ੍ਥਤੋ ਸਮਾਨਂ) ਵੁਤ੍ਤਨਯੇਨੇਵ ਸਮ੍ਮਜ੍ਜਿਤਬ੍ਬਂ.

ਤਤੋ ¶ ਉਤ੍ਤਰਿਂ ਕਤ੍ਤਬ੍ਬਂ ਦਸ੍ਸੇਤੁਮਾਹ ‘‘ਤਸ੍ਸ ਕਾਲੇਨਾ’’ਤਿਆਦਿ. ਤਸ੍ਸਾਤਿ ਉਪਜ੍ਝਾਯਸ੍ਸ ਵਾ ਆਚਰਿਯਸ੍ਸ ਵਾ. ਕਾਲੇਨਾਤਿ ਯਾਗੁਪਾਨਕਾਲੇ. ਇਧਾਪਿ ‘‘ਆਸਨਂ ਪਞ੍ਞਪੇਤਬ੍ਬ’’ਨ੍ਤਿ ਸੇਸੋ. ਯਥਾਹ ‘‘ਥੇਰੇ ਵਚ੍ਚਕੁਟਿਤੋ ਅਨਿਕ੍ਖਨ੍ਤੇਯੇਵ ਆਸਨਂ ਪਞ੍ਞਪੇਤਬ੍ਬਂ. ਸਰੀਰਕਿਚ੍ਚਂ ਕਤ੍ਵਾ ਆਗਨ੍ਤ੍ਵਾ ਤਸ੍ਮਿਂ ਨਿਸਿਨ੍ਨਸ੍ਸ ‘ਸਚੇ ਯਾਗੁ ਹੋਤੀ’ਤਿਆਦਿਨਾ ਨਯੇਨ ਵੁਤ੍ਤਂ ਵਤ੍ਤਂ ਕਾਤਬ੍ਬ’’ਨ੍ਤਿ (ਮਹਾਵ. ਅਟ੍ਠ. ੬੪).

ਯਾਗੁ ਤਸ੍ਸੁਪਨੇਤਬ੍ਬਾਤਿ ਏਤ੍ਥ ‘‘ਭਾਜਨਂ ਧੋਵਿਤ੍ਵਾ’’ਤਿ ਸੇਸੋ. ਯਥਾਹ – ‘‘ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ’’ਤਿ (ਮਹਾਵ. ੬੬). ਸਙ੍ਘਤੋ ਵਾਤਿ ਸਲਾਕਾਦਿਵਸੇਨ ਸਙ੍ਘਤੋ ਲਬ੍ਭਮਾਨਾ ਵਾ. ਕੁਲਤੋਪਿ ਵਾਤਿ ਉਪਾਸਕਾਦਿਕੁਲਤੋ ਵਾ.

‘‘ਪਤ੍ਤੇ ਵਤ੍ਤਞ੍ਚ ਕਾਤਬ੍ਬ’’ਨ੍ਤਿ ਇਦਂ ‘‘ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ, ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ ¶ . ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ’’ਤਿ (ਮਹਾਵ. ੬੬) ਆਗਤਵਤ੍ਤਂ ਸਨ੍ਧਾਯਾਹ. ਦਿਵਾ ਭੁਤ੍ਤਪਤ੍ਤੇਪਿ ਕਾਤਬ੍ਬਂ ਏਤੇਨੇਵ ਦਸ੍ਸਿਤਂ ਹੋਤਿ.

ਵਤ੍ਤਂ ‘‘ਗਾਮਪ੍ਪਵੇਸਨੇ’’ਤਿ ਇਦਂ ‘‘ਸਚੇ ਉਪਜ੍ਝਾਯੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬ’’ਨ੍ਤਿਆਦਿਨਯਪ੍ਪਵਤ੍ਤਂ (ਮਹਾਵ. ੬੬) ਵਤ੍ਤਂ ਸਨ੍ਧਾਯਾਹ. ‘‘ਕਾਤਬ੍ਬ’’ਨ੍ਤਿ ਇਦਂ ਸਬ੍ਬਪਦੇਹਿ ਯੋਜੇਤਬ੍ਬਂ.

੨੪੭੪. ਚੀਵਰੇ ਯਾਨਿ ਵਤ੍ਤਾਨੀਤਿ ਗਾਮਂ ਪਵਿਸਿਤੁਕਾਮਸ੍ਸ ਚੀਵਰਦਾਨੇ, ਪਟਿਨਿਵਤ੍ਤਸ੍ਸ ਚੀਵਰਗ੍ਗਹਣਸਙ੍ਘਰਣਪਟਿਸਾਮਨੇਸੁ ਮਹੇਸਿਨਾ ਯਾਨਿ ਵਤ੍ਤਾਨਿ ਵੁਤ੍ਤਾਨਿ, ਤਾਨਿ ਚ ਕਾਤਬ੍ਬਾਨਿ. ਸੇਨਾਸਨੇ ਤਥਾਤਿ ‘‘ਯਸ੍ਮਿਂ ਵਿਹਾਰੇ ਉਪਜ੍ਝਾਯੋ ਵਿਹਰਤੀ’’ਤਿਆਦਿਨਾ ¶ (ਮਹਾਵ. ੬੬) ਵੁਤ੍ਤਨਯੇਨ ‘‘ਸੇਨਾਸਨੇ ਕਤ੍ਤਬ੍ਬ’’ਨ੍ਤਿ ਦਸ੍ਸਿਤਂ ਸੇਨਾਸਨਵਤ੍ਤਞ੍ਚ.

ਪਾਦਪੀਠਕਥਲਿਕਾਦੀਸੁ ਤਥਾਤਿ ਯੋਜਨਾ. ਉਪਜ੍ਝਾਯੇ ਗਾਮਤੋ ਪਟਿਨਿਵਤ੍ਤੇ ਚ ਜਨ੍ਤਾਘਰੇ ਚ ‘‘ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬ’’ਨ੍ਤਿ (ਮਹਾਵ. ੬੬) ਏਵਮਾਗਤਂ ਵਤ੍ਤਞ੍ਚ ਕਾਤਬ੍ਬਂ. ਆਦਿ-ਸਦ੍ਦੇਨ ‘‘ਉਪਜ੍ਝਾਯੋ ਪਾਨੀਯੇਨ ਪੁਚ੍ਛਿਤਬ੍ਬੋ’’ਤਿਆਦਿਵਤ੍ਤਂ (ਮਹਾਵ. ੬੬) ਸਙ੍ਗਣ੍ਹਾਤਿ.

੨੪੭੫. ਏਵਂ ਸਬ੍ਬਤ੍ਥ ਵਤ੍ਤੇਸੁ ਪਾਟਿਯੇਕ੍ਕਂ ਦਸ੍ਸਿਯਮਾਨੇਸੁ ਪਪਞ੍ਚੋਤਿ ਖਨ੍ਧਕਂ ਓਲੋਕੇਤ੍ਵਾ ਸੁਖਗ੍ਗਹਣਤ੍ਥਾਯ ਗਣਨਂ ਦਸ੍ਸੇਤੁਕਾਮੋ ਆਹ ‘‘ਏਵਮਾਦੀਨੀ’’ਤਿਆਦਿ. ਰੋਗਤੋ ਵੁਟ੍ਠਾਨਾਗਮਨਨ੍ਤਾਨੀਤਿ ਆਚਰਿਯੁਪਜ੍ਝਾਯਾਨਂ ਰੋਗਤੋ ਵੁਟ੍ਠਾਨਾਗਮਨਪਰਿਯੋਸਾਨਾਨਿ. ਸਤ੍ਤਤਿਂਸਸਤਂ ਸਿਯੁਨ੍ਤਿ ਸਤ੍ਤਤਿਂਸਾਧਿਕਸਤਵਤ੍ਤਾਨੀਤਿ ਅਤ੍ਥੋ.

ਤਾਨਿ ਪਨ ਵਤ੍ਤਾਨਿ ਖਨ੍ਧਕਪਾਲ਼ਿਯਾ (ਮਹਾਵ. ੬੬) ਆਗਤਕ੍ਕਮੇਨ ਏਵਂ ਯਥਾਵੁਤ੍ਤਗਣਨਾਯ ਸਮਾਨੇਤਬ੍ਬਾਨਿ – ਦਨ੍ਤਕਟ੍ਠਦਾਨਂ, ਮੁਖੋਦਕਦਾਨਂ, ਆਸਨਪਞ੍ਞਾਪਨਂ, ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁਯਾ ਉਪਨਾਮਨਂ, ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮਨਂ, ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਸ੍ਸ ਉਦ੍ਧਰਣਂ, ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਤਸ੍ਸ ਸਮ੍ਮਜ੍ਜਨਂ, ਸਚੇ ਉਪਜ੍ਝਾਯੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਤਸ੍ਸ ਨਿਵਾਸਨਦਾਨਂ, ਪਟਿਨਿਵਾਸਨਪਟਿਗ੍ਗਹਣਂ, ਕਾਯਬਨ੍ਧਨਦਾਨਂ, ਸਗੁਣਂ ਕਤ੍ਵਾ ¶ ਸਙ੍ਘਾਟਿਦਾਨਂ, ਧੋਵਿਤ੍ਵਾ ਸੋਦਕਪਤ੍ਤਸ੍ਸ ਦਾਨਂ, ਸਚੇ ਉਪਜ੍ਝਾਯੋ ਪਚ੍ਛਾਸਮਣਂ ਆਕਙ੍ਖਤਿ, ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ¶ ਗਣ੍ਠਿਕਂ ਪਰਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਉਪਜ੍ਝਾਯਸ੍ਸ ਪਚ੍ਛਾਸਮਣੇਨ ਗਮਨਂ, ਨਾਤਿਦੂਰਨਚ੍ਚਾਸਨ੍ਨੇ ਗਮਨਂ, ਪਤ੍ਤਪਰਿਯਾਪਨ੍ਨਸ੍ਸ ਪਟਿਗ੍ਗਹਣਂ, ਨ ਉਪਜ੍ਝਾਯਸ੍ਸ ਭਣਮਾਨਸ੍ਸ ਅਨ੍ਤਰਨ੍ਤਰਾ ਕਥਾਓਪਾਤਨਂ, ਉਪਜ੍ਝਾਯਸ੍ਸ ਆਪਤ੍ਤਿਸਾਮਨ੍ਤਾ ਭਣਮਾਨਸ੍ਸ ਚ ਨਿਵਾਰਣਂ, ਨਿਵਤ੍ਤਨ੍ਤੇਨ ਪਠਮਤਰਂ ਆਗਨ੍ਤ੍ਵਾ ਆਸਨਪਞ੍ਞਾਪਨਂ, ਪਾਦੋਦਕਪਾਦਪੀਠਪਾਦਕਥਲਿਕਾਨਂ ਉਪਨਿਕ੍ਖਿਪਨਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਪਟਿਗ੍ਗਹਣਂ, ਪਟਿਨਿਵਾਸਨਦਾਨਂ, ਨਿਵਾਸਨਪਟਿਗ੍ਗਹਣਂ, ਸਚੇ ਚੀਵਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪਨਂ, ਨੇਵ ਉਣ੍ਹੇ ਚੀਵਰਸ੍ਸ ਨਿਦਹਨਂ, ਮਜ੍ਝੇ ਯਥਾ ਭਙ੍ਗੋ ਨ ਹੋਤਿ, ਏਵਂ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਸ੍ਸ ਸਙ੍ਘਰਣਂ, ਓਭੋਗੇ ਕਾਯਬਨ੍ਧਨਸ੍ਸ ਕਰਣਂ, ਸਚੇ ਪਿਣ੍ਡਪਾਤੋ ਹੋਤਿ, ਉਪਜ੍ਝਾਯੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤਸ੍ਸ ਉਪਨਾਮਨਂ, ਉਪਜ੍ਝਾਯਸ੍ਸ ਪਾਨੀਯੇਨ ਪੁਚ੍ਛਨਂ, ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪਨਂ, ਨ ਚ ਉਣ੍ਹੇ ਪਤ੍ਤਸ੍ਸ ਨਿਦਹਨਂ, ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ –

ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤਸ੍ਸ ਨਿਕ੍ਖਿਪਨਂ, ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤਸ੍ਸ ਨਿਕ੍ਖਿਪਨਂ, ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਸ੍ਸ ਨਿਕ੍ਖਿਪਨਂ, ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਸ੍ਸ ਉਦ੍ਧਰਣਂ, ਪਾਦੋਦਕਪਾਦਪੀਠਪਾਦਕਥਲਿਕਾਨਂ ਪਟਿਸਾਮਨਂ, ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਤਸ੍ਸ ਸਮ੍ਮਜ੍ਜਨਂ, ਸਚੇ ਉਪਜ੍ਝਾਯੋ ਨ੍ਹਾਯਿਤੁਕਾਮੋ ਹੋਤਿ, ਨ੍ਹਾਨਸ੍ਸ ਪਟਿਯਾਦਨਂ, ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਸ੍ਸ ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਸ੍ਸ ਪਟਿਯਾਦਨਂ, ਸਚੇ ਉਪਜ੍ਝਾਯੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਸ੍ਸ ¶ ਸਨ੍ਨਯਨਂ, ਮਤ੍ਤਿਕਾਤੇਮਨਂ, ਜਨ੍ਤਾਘਰਪੀਠਂ ਆਦਾਯ ਉਪਜ੍ਝਾਯਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਨਂ, ਚੁਣ੍ਣਦਾਨਂ, ਮਤ੍ਤਿਕਾਦਾਨਂ, ਸਚੇ ਉਸ੍ਸਹਤਿ, ਜਨ੍ਤਾਘਰਂ ਪਵਿਸਿਤਬ੍ਬਂ –

ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਪ੍ਪਵੇਸੋ, ਨ ਥੇਰਾਨਂ ਭਿਕ੍ਖੂਨਂ ਅਨੁਪਖਜ੍ਜ ਨਿਸੀਦਨਂ, ਨ ਨਵਾਨਂ ਭਿਕ੍ਖੂਨਂ ਆਸਨੇਨ ਪਟਿਬਾਹਨਂ, ਜਨ੍ਤਾਘਰੇ ਉਪਜ੍ਝਾਯਸ੍ਸ ਪਰਿਕਮ੍ਮਸ੍ਸ ਕਰਣਂ, ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ¶ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਨਂ, ਉਦਕੇਪਿ ਉਪਜ੍ਝਾਯਸ੍ਸ ਪਰਿਕਮ੍ਮਕਰਣਂ, ਨ੍ਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਉਪਜ੍ਝਾਯਸ੍ਸ ਗਤ੍ਤਤੋ ਉਦਕਸ੍ਸ ਪਮਜ੍ਜਨਂ, ਨਿਵਾਸਨਦਾਨਂ, ਸਙ੍ਘਾਟਿਦਾਨਂ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਸ੍ਸ ਪਞ੍ਞਾਪਨਂ, ਪਾਦੋਦਕਪਾਦਪੀਠਪਾਦਕਥਲਿਕਾਨਂ ਉਪਨਿਕ੍ਖਿਪਨਂ, ਉਪਜ੍ਝਾਯਸ੍ਸ ਪਾਨੀਯੇਨ ਪੁਚ੍ਛਨਂ, ਸਚੇ ਉਦ੍ਦਿਸਾਪੇਤੁਕਾਮੋ ਹੋਤਿ, ਉਦ੍ਦਿਸਾਪਨਂ, ਸਚੇ ਪਰਿਪੁਚ੍ਛਿਤੁਕਾਮੋ ਹੋਤਿ, ਪਰਿਪੁਚ੍ਛਨਂ, ਯਸ੍ਮਿਂ ਵਿਹਾਰੇ ਉਪਜ੍ਝਾਯੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਤਸ੍ਸ ਸੋਧਨਂ, ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਸ੍ਸ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਨਂ, ਨਿਸੀਦਨਪਚ੍ਚਤ੍ਥਰਣਸ੍ਸ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਨਂ, ਭਿਸਿਬਿਬ੍ਬੋਹਨਸ੍ਸ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਨਂ, ਮਞ੍ਚਸ੍ਸ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਨਂ, ਪੀਠਸ੍ਸ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਨਂ, ਮਞ੍ਚਪਟਿਪਾਦਕਾਨਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਨਂ, ਖੇਲ਼ਮਲ੍ਲਕਸ੍ਸ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਨਂ, ਅਪਸ੍ਸੇਨਫਲਕਸ੍ਸ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਨਂ, ਭੂਮਤ੍ਥਰਣਸ੍ਸ ਯਥਾਪਞ੍ਞਤ੍ਤਸ੍ਸ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਨਂ ¶ , ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰਣਂ, ਆਲੋਕਸਨ੍ਧਿਕਣ੍ਣਭਾਗਾਨਂ ਪਮਜ੍ਜਨਂ, ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਨਂ, ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਨਂ, ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਪਮਜ੍ਜਨਂ ‘‘ਮਾ ਵਿਹਾਰੋ ਰਜੇਨ ਉਹਞ੍ਞੀ’’ਤਿ, ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡਨਂ, ਭੂਮਤ੍ਥਰਣਸ੍ਸ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਾਪਨਂ, ਮਞ੍ਚਪਟਿਪਾਦਕਾਨਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਟ੍ਠਾਨੇ ਠਪਨਂ, ਮਞ੍ਚਸ੍ਸ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਾਪਨਂ, ਪੀਠਸ੍ਸ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਾਪਨਂ, ਭਿਸਿਬਿਬ੍ਬੋਹਨਸ੍ਸ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਾਪਨਂ, ਨਿਸੀਦਨਪਚ੍ਚਤ੍ਥਰਣਸ੍ਸ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਾਪਨਂ, ਖੇਲ਼ਮਲ੍ਲਕਸ੍ਸ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਟ੍ਠਾਨੇ ਠਪਨਂ, ਅਪਸ੍ਸੇਨਫਲਕਸ੍ਸ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਟ੍ਠਾਨੇ ਠਪਨਂ, ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ –

ਪਤ੍ਤਂ ¶ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤਸ੍ਸ ਨਿਕ੍ਖਿਪਨਂ, ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤਸ੍ਸ ਨਿਕ੍ਖਿਪਨਂ, ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ¶ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਸ੍ਸ ਨਿਕ੍ਖਿਪਨਂ, ਸਚੇ ਪੁਰਤ੍ਥਿਮਾਯ ਸਰਜਾ ਵਾਤਾ ਵਾਯਨ੍ਤਿ, ਪੁਰਤ੍ਥਿਮਾਨਂ ਵਾਤਪਾਨਾਨਂ ਥਕਨਂ, ਤਥਾ ਪਚ੍ਛਿਮਾਨਂ, ਤਥਾ ਉਤ੍ਤਰਾਨਂ, ਤਥਾ ਦਕ੍ਖਿਣਾਨਂ ਵਾਤਪਾਨਾਨਂ ਥਕਨਂ, ਸਚੇ ਸੀਤਕਾਲੋ ਹੋਤਿ, ਦਿਵਾ ਵਾਤਪਾਨਾਨਂ ਵਿਵਰਣਂ, ਰਤ੍ਤਿਂ ਥਕਨਂ, ਸਚੇ ਉਣ੍ਹਕਾਲੋ ਹੋਤਿ, ਦਿਵਾ ਵਾਤਪਾਨਾਨਂ ਥਕਨਂ, ਰਤ੍ਤਿਂ ਵਿਵਰਣਂ, ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਸ੍ਸ ਸਮ੍ਮਜ੍ਜਨਂ, ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕਸ੍ਸ ਸਮ੍ਮਜ੍ਜਨਂ, ਸਚੇ ਉਪਟ੍ਠਾਨਸਾਲਾ ਉਕ੍ਲਾਪਾ ਹੋਤਿ, ਤਸ੍ਸਾ ਸਮ੍ਮਜ੍ਜਨਂ, ਸਚੇ ਅਗ੍ਗਿਸਾਲਾ ਉਕ੍ਲਾਪਾ ਹੋਤਿ, ਤਸ੍ਸਾ ਸਮ੍ਮਜ੍ਜਨਂ, ਸਚੇ ਵਚ੍ਚਕੁਟਿ ਉਕ੍ਲਾਪਾ ਹੋਤਿ, ਤਸ੍ਸਾ ਸਮ੍ਮਜ੍ਜਨਂ, ਸਚੇ ਪਾਨੀਯਂ ਨ ਹੋਤਿ, ਪਾਨੀਯਸ੍ਸ ਉਪਟ੍ਠਾਪਨਂ, ਸਚੇ ਪਰਿਭੋਜਨੀਯਂ ਨ ਹੋਤਿ, ਪਰਿਭੋਜਨੀਯਸ੍ਸ ਉਪਟ੍ਠਾਪਨਂ, ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਸ੍ਸ ਆਸਿਞ੍ਚਨਂ, ਸਚੇ ਉਪਜ੍ਝਾਯਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਸਦ੍ਧਿਵਿਹਾਰਿਕੇਨ ਵੂਪਕਾਸਨਂ ਵੂਪਕਾਸਾਪਨਂ ਵਾ, ਧਮ੍ਮਕਥਾਯ ਵਾ ਤਸ੍ਸ ਕਰਣਂ, ਸਚੇ ਉਪਜ੍ਝਾਯਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਸਦ੍ਧਿਵਿਹਾਰਿਕੇਨ ਵਿਨੋਦਨਂ ਵਿਨੋਦਾਪਨਂ ਵਾ, ਧਮ੍ਮਕਥਾਯ ਵਾ ਤਸ੍ਸ ਕਰਣਂ, ਸਚੇ ਉਪਜ੍ਝਾਯਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਸਦ੍ਧਿਵਿਹਾਰਿਕੇਨ ਵਿਵੇਚਨਂ ਵਿਵੇਚਾਪਨਂ ਵਾ, ਧਮ੍ਮਕਥਾਯ ਵਾ ਤਸ੍ਸ ਕਰਣਂ, ਸਚੇ ਉਪਜ੍ਝਾਯੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਕਰਣਂ ‘‘ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਪਰਿਵਾਸਂ ਦਦੇਯ੍ਯਾ’’ਤਿ, ਸਚੇ ਉਪਜ੍ਝਾਯੋ ਮੂਲਾਯਪਟਿਕਸ੍ਸਨਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਕਰਣਂ ‘‘ਕਿਨ੍ਤਿ ¶ ਨੁ ਖੋ ਸਙ੍ਘੋ ਉਪਜ੍ਝਾਯਂ ਮੂਲਾਯ ਪਟਿਕਸ੍ਸੇਯ੍ਯਾ’’ਤਿ, ਸਚੇ ਉਪਜ੍ਝਾਯੋ ਮਾਨਤ੍ਤਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਕਰਣਂ ‘‘ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਮਾਨਤ੍ਤਂ ਦਦੇਯ੍ਯਾ’’ਤਿ, ਸਚੇ ਉਪਜ੍ਝਾਯੋ ਅਬ੍ਭਾਨਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਕਰਣਂ ‘‘ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਂ ਅਬ੍ਭੇਯ੍ਯਾ’’ਤਿ, ਸਚੇ ਸਙ੍ਘੋ ਉਪਜ੍ਝਾਯਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਕਰਣਂ ‘‘ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾ’’ਤਿ, ਕਤਂ ਵਾ ਪਨਸ੍ਸ ਹੋਤਿ ਸਙ੍ਘੇਨ ਕਮ੍ਮਂ ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਕਰਣਂ ‘‘ਕਿਨ੍ਤਿ ਨੁ ਖੋ ਉਪਜ੍ਝਾਯੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾ’’ਤਿ, ਸਚੇ ਉਪਜ੍ਝਾਯਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ ¶ , ਸਦ੍ਧਿਵਿਹਾਰਿਕੇਨ ਧੋਵਨਂ ਉਸ੍ਸੁਕ੍ਕਕਰਣਂ ਵਾ ‘‘ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਧੋਵਿਯੇਥਾ’’ਤਿ, ਸਚੇ ਉਪਜ੍ਝਾਯਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਕਰਣਂ ਉਸ੍ਸੁਕ੍ਕਕਰਣਂ ਵਾ ‘‘ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਕਰਿਯੇਥਾ’’ਤਿ, ਸਚੇ ਉਪਜ੍ਝਾਯਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਪਚਨਂ ਉਸ੍ਸੁਕ੍ਕਕਰਣਂ ਵਾ ‘‘ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਰਜਨਂ ਪਚਿਯੇਥਾ’’ਤਿ, ਸਚੇ ਉਪਜ੍ਝਾਯਸ੍ਸ ਚੀਵਰਂ ਰਜੇਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਰਜਨਂ ਉਸ੍ਸੁਕ੍ਕਕਰਣਂ ਵਾ ‘‘ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਰਜਿਯੇਥਾ’’ਤਿ, ਚੀਵਰਂ ਰਜਨ੍ਤੇਨ ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਨਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਨਂ, ਉਪਜ੍ਝਾਯਂ ਅਨਾਪੁਚ੍ਛਾ ਨ ਏਕਚ੍ਚਸ੍ਸ ਪਤ੍ਤਦਾਨਂ, ਨ ਏਕਚ੍ਚਸ੍ਸ ਪਤ੍ਤਪਟਿਗ੍ਗਹਣਂ, ਨ ਏਕਚ੍ਚਸ੍ਸ ਚੀਵਰਦਾਨਂ, ਨ ਏਕਚ੍ਚਸ੍ਸ ਚੀਵਰਪਟਿਗ੍ਗਹਣਂ, ਨ ਏਕਚ੍ਚਸ੍ਸ ਪਰਿਕ੍ਖਾਰਦਾਨਂ, ਨ ਏਕਚ੍ਚਸ੍ਸ ਪਰਿਕ੍ਖਾਰਪਟਿਗ੍ਗਹਣਂ, ਨ ਏਕਚ੍ਚਸ੍ਸ ਕੇਸਚ੍ਛੇਦਨਂ, ਨ ਏਕਚ੍ਚੇਨ ਕੇਸਾਨਂ ਛੇਦਾਪਨਂ, ਨ ਏਕਚ੍ਚਸ੍ਸ ਪਰਿਕਮ੍ਮਕਰਣਂ, ਨ ਏਕਚ੍ਚੇਨ ਪਰਿਕਮ੍ਮਸ੍ਸ ਕਾਰਾਪਨਂ, ਨ ਏਕਚ੍ਚਸ੍ਸ ਵੇਯ੍ਯਾਵਚ੍ਚਕਰਣਂ, ਨ ਏਕਚ੍ਚੇਨ ਵੇਯ੍ਯਾਵਚ੍ਚਸ੍ਸ ¶ ਕਾਰਾਪਨਂ, ਨ ਏਕਚ੍ਚਸ੍ਸ ਪਚ੍ਛਾਸਮਣੇਨ ਗਮਨਂ, ਨ ਏਕਚ੍ਚਸ੍ਸ ਪਚ੍ਛਾਸਮਣਸ੍ਸ ਆਦਾਨਂ, ਨ ਏਕਚ੍ਚਸ੍ਸ ਪਿਣ੍ਡਪਾਤਸ੍ਸ ਨੀਹਰਣਂ, ਨ ਏਕਚ੍ਚੇਨ ਪਿਣ੍ਡਪਾਤਨੀਹਰਾਪਨਂ, ਨ ਉਪਜ੍ਝਾਯਂ ਅਨਾਪੁਚ੍ਛਾ ਗਾਮਪ੍ਪਵੇਸਨਂ, ਨ ਸੁਸਾਨਗਮਨਂ, ਨ ਦਿਸਾਪਕ੍ਕਮਨਂ, ਸਚੇ ਉਪਜ੍ਝਾਯੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਨਂ, ਵੁਟ੍ਠਾਨਮਸ੍ਸ ਆਗਮਨਨ੍ਤਿ ਤੇਸੁ ਕਾਨਿਚਿ ਵਤ੍ਤਾਨਿ ਸਵਿਭਤ੍ਤਿਕਾਨਿ, ਕਾਨਿਚਿ ਅਵਿਭਤ੍ਤਿਕਾਨਿ, ਤੇਸੁ ਅਵਿਭਤ੍ਤਿਕਾਨਂ ਵਿਭਾਗੇ ਵੁਚ੍ਚਮਾਨੇ ਯਥਾਵੁਤ੍ਤਗਣਨਾਯ ਅਤਿਰੇਕਤਰਾਨਿ ਹੋਨ੍ਤਿ, ਤਂ ਪਨ ਵਿਭਾਗਂ ਅਨਾਮਸਿਤ੍ਵਾ ਪਿਣ੍ਡਵਸੇਨ ਗਹੇਤ੍ਵਾ ਯਥਾ ਅਯਂ ਗਣਨਾ ਦਸ੍ਸਿਤਾਤਿ ਵੇਦਿਤਬ੍ਬਾ.

੨੪੭੬. ਅਕਰੋਨ੍ਤਸ੍ਸਾਤਿ ਏਤ੍ਥ ‘‘ਵਤ੍ਤ’’ਨ੍ਤਿ ਸੇਸੋ. ਅਨਾਦਰਵਸੇਨੇਵ ਵਤ੍ਤਂ ਅਕਰੋਨ੍ਤਸ੍ਸ ਭਿਕ੍ਖੁਨੋ ਤੇਨ ਵਤ੍ਤਭੇਦੇਨ ਵਤ੍ਤਾਕਰਣੇਨ ਸਬ੍ਬਤ੍ਥ ਸਤ੍ਤਤਿਂਸਾਧਿਕਸਤਪ੍ਪਭੇਦਟ੍ਠਾਨੇ ਤਤ੍ਤਕਂਯੇਵ ਦੁਕ੍ਕਟਂ ਪਕਾਸਿਤਨ੍ਤਿ ਯੋਜਨਾ.

ਉਪਜ੍ਝਾਯਾਚਰਿਯਵਤ੍ਤਕਥਾਵਣ੍ਣਨਾ.

੨੪੭੭. ਏਵਂ ਉਪਜ੍ਝਾਯਾਚਰਿਯਵਤ੍ਤਾਨਿ ਸਙ੍ਖੇਪੇਨ ਦਸ੍ਸੇਤ੍ਵਾ ਉਪਜ੍ਝਾਯਾਚਰਿਯੇਹਿ ਸਦ੍ਧਿਵਿਹਾਰਿਕਨ੍ਤੇਵਾਸੀਨਂ ਕਾਤਬ੍ਬਵਤ੍ਤਾਨਿ ਦਸ੍ਸੇਤੁਮਾਹ ‘‘ਉਪਜ੍ਝਾਯਸ੍ਸ ਵਤ੍ਤਾਨੀ’’ਤਿਆਦਿ. ਉਪਜ੍ਝਾਯਸ੍ਸ ਵਤ੍ਤਾਨੀਤਿ ਉਪਜ੍ਝਾਯੇਨ ਸਦ੍ਧਿਵਿਹਾਰਿਕਸ੍ਸ ਯੁਤ੍ਤਪਤ੍ਤਕਾਲੇ ਕਤ੍ਤਬ੍ਬਤ੍ਤਾ ਉਪਜ੍ਝਾਯਾਯਤ੍ਤਵਤ੍ਤਾਨੀਤਿ ¶ ਅਤ੍ਥੋ. ਤਥਾ ਸਦ੍ਧਿਵਿਹਾਰਿਕੇਤਿ ਯਥਾ ਸਦ੍ਧਿਵਿਹਾਰਿਕੇਨ ਉਪਜ੍ਝਾਯਸ੍ਸ ਕਾਤਬ੍ਬਾਨਿ, ਤਥਾ ਉਪਜ੍ਝਾਯੇਨ ਸਦ੍ਧਿਵਿਹਾਰਿਕੇ ਕਾਤਬ੍ਬਾਨਿ.

ਉਪਜ੍ਝਾਯਾਚਰਿਯਵਤ੍ਤੇਸੁ ਗਾਮਪ੍ਪਵੇਸੇ ਪਚ੍ਛਾਸਮਣੇਨ ਹੁਤ੍ਵਾ ਨਾਤਿਦੂਰਨਚ੍ਚਾਸਨ੍ਨਗਮਨਂ, ਨ ਅਨ੍ਤਰਨ੍ਤਰਾ ਕਥਾਓਪਾਤਨਂ, ਆਪਤ੍ਤਿਸਾਮਨ੍ਤਾ ਭਣਮਾਨਸ੍ਸ ਨਿਵਾਰਣਂ, ਪਤ੍ਤਪਰਿਯਾਪਨ੍ਨਪਟਿਗ੍ਗਹਣਨ੍ਤਿ ਚਤ੍ਤਾਰਿ ਵਤ੍ਤਾਨਿ, ਨ ਏਕਚ੍ਚਸ੍ਸ ਪਤ੍ਤਦਾਨਾਦਿਅਨਾਪੁਚ੍ਛਾਦਿਸਾਪਕ੍ਕਮਨਾਵਸਾਨਾਨਿ ਵੀਸਤਿ ਪਟਿਕ੍ਖੇਪਾ ਚੇਤਿ ਏਤਾਨਿ ¶ ਚਤੁਵੀਸਤਿ ਵਤ੍ਤਾਨਿ ਠਪੇਤ੍ਵਾ ਅਵਸੇਸਾਨਿ ਤੇਰਸਾਧਿਕਸਤਵਤ੍ਤਾਨਿ ਸਨ੍ਧਾਯਾਹ ‘‘ਸਤਂ ਤੇਰਸ ਹੋਨ੍ਤੇਵਾ’’ਤਿ, ਤੇਰਸਾਧਿਕਸਤਵਤ੍ਤਾਨਿ ਹੋਨ੍ਤੀਤਿ ਅਤ੍ਥੋ. ਆਚਰਿਯੇਨ ਅਨ੍ਤੇਵਾਸਿਕੇਪਿ ਚ ਕਾਤਬ੍ਬਵਤ੍ਤਾਨਿ ਤਥਾ ਤਤ੍ਤਕਾਨੇਵਾਤਿ ਅਤ੍ਥੋ.

ਸਦ੍ਧਿਵਿਹਾਰਿਕਨ੍ਤੇਵਾਸਿਕਵਤ੍ਤਕਥਾਵਣ੍ਣਨਾ.

੨੪੭੮. ਉਪਜ੍ਝਾਯਾਚਰਿਯੇਹਿ ਸਦ੍ਧਿਵਿਹਾਰਿਕਨ੍ਤੇਵਾਸਿਕਾਨਂ ਨਿਸ੍ਸਯਪਟਿਪ੍ਪਸ੍ਸਦ੍ਧਿਪ੍ਪਕਾਰਂ ਦਸ੍ਸੇਤੁਮਾਹ ‘‘ਪਕ੍ਕਨ੍ਤੇ ਵਾਪੀ’’ਤਿਆਦਿ. ਪਕ੍ਕਨ੍ਤੇ ਵਾਪਿ ਵਿਬ੍ਭਨ੍ਤੇ ਵਾਪਿ ਪਕ੍ਖਸਙ੍ਕਨ੍ਤੇ ਵਾਪਿ ਮਤੇ ਵਾਪਿ ਆਣਤ੍ਤਿਯਾ ਵਾਪਿ ਏਵਂ ਪਞ੍ਚਧਾ ਉਪਜ੍ਝਾਯਾ ਸਦ੍ਧਿਵਿਹਾਰਿਕੇਨ ਗਹਿਤੋ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਤੀਤਿ ਯੋਜਨਾ. ਪਕ੍ਕਨ੍ਤੇਤਿ ਤਦਹੁ ਅਪਚ੍ਚਾਗਨ੍ਤੁਕਾਮਤਾਯ ਦਿਸਂ ਗਤੇ. ਵਿਬ੍ਭਨ੍ਤੇਤਿ ਗਿਹਿਭਾਵਂ ਪਤ੍ਤੇ. ਪਕ੍ਖਸਙ੍ਕਨ੍ਤਕੇਤਿ ਤਿਤ੍ਥਿਯਾਯਤਨਂ ਗਤੇ. ਮਤੇਤਿ ਕਾਲਕਤੇ. ਆਣਤ੍ਤਿਯਾਤਿ ਨਿਸ੍ਸਯਪਣਾਮਨੇਨ.

੨੪੭੯-੮੦. ਆਚਰਿਯਮ੍ਹਾਪਿ ਅਨ੍ਤੇਵਾਸਿਕੇਨ ਗਹਿਤਨਿਸ੍ਸਯਸ੍ਸ ਭੇਦਨਂ ਛਧਾ ਛਪ੍ਪਕਾਰੇਨ ਹੋਤੀਤਿ ਯੋਜਨਾ. ਕਥਨ੍ਤਿ ਆਹ ‘‘ਪਕ੍ਕਨ੍ਤੇ ਚਾ’’ਤਿਆਦਿ. ਤਂ ਉਪਜ੍ਝਾਯਤੋ ਨਿਸ੍ਸਯਭੇਦੇ ਵੁਤ੍ਤਨਯਮੇਵ. ਵਿਸੇਸਂ ਪਨ ਸਯਮੇਵ ਵਕ੍ਖਤਿ ‘‘ਆਣਤ੍ਤਿਯ’’ਨ੍ਤਿਆਦਿਨਾ. ਆਣਤ੍ਤਿਯਨ੍ਤਿ ਏਤ੍ਥ ਵਿਸੇਸਤ੍ਥਜੋਤਕੋ ਪਨ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਉਭਿਨ੍ਨਮ੍ਪਿ ਧੁਰਨਿਕ੍ਖੇਪਨੇਪਿ ਚਾਤਿ ਆਚਰਿਯਸ੍ਸ ਨਿਸ੍ਸਯਪਣਾਮਨੇ ਪਨ ਉਭਿਨ੍ਨਂ ਆਚਰਿਯਨ੍ਤੇਵਾਸਿਕਾਨਂਯੇਵ ਅਞ੍ਞਮਞ੍ਞਨਿਰਾਲਯਭਾਵੇ ਸਤਿ ਨਿਸ੍ਸਯਭੇਦੋ ਹੋਤਿ, ਨ ਏਕਸ੍ਸਾਤਿ ਅਤ੍ਥੋ. ਤਮੇਵਤ੍ਥਂ ਬ੍ਯਤਿਰੇਕਤੋ ਦਲ਼੍ਹੀਕਰੋਤਿ ‘‘ਏਕੇਕਸ੍ਸਾ’’ਤਿਆਦਿਨਾ. ਏਕੇਕਸ੍ਸ ਵਾ ਉਭਿਨ੍ਨਂ ਵਾ ਆਲਯੇ ਸਤਿ ਨ ਭਿਜ੍ਜਤੀਤਿ ਯੋਜਨਾ. ਯਥਾਹ –

‘‘ਆਣਤ੍ਤਿਯਂ ¶ ¶ ਪਨ ਸਚੇਪਿ ਆਚਰਿਯੋ ਮੁਞ੍ਚਿਤੁਕਾਮੋਵ ਹੁਤ੍ਵਾ ਨਿਸ੍ਸਯਪਣਾਮਨਾਯ ਪਣਾਮੇਤਿ, ਅਨ੍ਤੇਵਾਸਿਕੋ ਚ ‘ਕਿਞ੍ਚਾਪਿ ਮਂ ਆਚਰਿਯੋ ਪਣਾਮੇਤਿ, ਅਥ ਖੋ ਹਦਯੇਨ ਮੁਦੁਕੋ’ਤਿ ਸਾਲਯੋਵ ਹੋਤਿ, ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤਿਯੇਵ. ਸਚੇਪਿ ਆਚਰਿਯੋ ਸਾਲਯੋ, ਅਨ੍ਤੇਵਾਸਿਕੋ ਨਿਰਾਲਯੋ ‘ਨ ਦਾਨਿ ਇਮਂ ਨਿਸ੍ਸਾਯ ਵਸਿਸ੍ਸਾਮੀ’ਤਿ ਧੁਰਂ ਨਿਕ੍ਖਿਪਤਿ, ਏਵਮ੍ਪਿ ਨ ਪਟਿਪ੍ਪਸ੍ਸਮ੍ਭਤਿ. ਉਭਿਨ੍ਨਂ ਸਾਲਯਭਾਵੇ ਪਨ ਨ ਪਟਿਪ੍ਪਸ੍ਸਮ੍ਭਤਿਯੇਵ. ਉਭਿਨ੍ਨਂ ਧੁਰਨਿਕ੍ਖੇਪੇਨ ਪਟਿਪ੍ਪਸ੍ਸਮ੍ਭਤੀ’’ਤਿ (ਮਹਾਵ. ਅਟ੍ਠ. ੮੩).

ਅਯਂ ਪਨ ਵਿਸੇਸੋ ਆਚਰਿਯਾਣਤ੍ਤਿਯਾ ਨਿਸ੍ਸਯਭੇਦੇਯੇਵ ਦਸ੍ਸਿਤੋ, ਨ ਉਪਜ੍ਝਾਯਾਣਤ੍ਤਿਯਾ. ਸਾਰਤ੍ਥਦੀਪਨਿਯਂ ਪਨ ‘‘ਸਚੇਪਿ ਆਚਰਿਯੋ ਮੁਞ੍ਚਿਤੁਕਾਮੋਵ ਹੁਤ੍ਵਾ ਨਿਸ੍ਸਯਪਣਾਮਨਾਯ ਪਣਾਮੇਤੀਤਿਆਦਿ ਸਬ੍ਬਂ ਉਪਜ੍ਝਾਯਸ੍ਸ ਆਣਤ੍ਤਿਯਮ੍ਪਿ ਵੇਦਿਤਬ੍ਬ’’ਨ੍ਤਿ ਵੁਤ੍ਤਂ.

੨੪੮੧. ਏਵਂ ਪਞ੍ਚ ਸਾਧਾਰਣਙ੍ਗਾਨਿ ਦਸ੍ਸੇਤ੍ਵਾ ਅਸਾਧਾਰਣਙ੍ਗਂ ਦਸ੍ਸੇਤੁਮਾਹ ‘‘ਉਪਜ੍ਝਾਯਸਮੋਧਾਨ-ਗਤਸ੍ਸਾਪਿ ਚ ਭਿਜ੍ਜਤੀ’’ਤਿ. ਤਤ੍ਥ ਸਮੋਧਾਨਗਮਨਂ ਸਰੂਪਤੋ, ਪਭੇਦਤੋ ਚ ਦਸ੍ਸੇਤੁਮਾਹ ‘‘ਦਸ੍ਸਨਂ ਸਵਨਞ੍ਚਾਤਿ, ਸਮੋਧਾਨਂ ਦ੍ਵਿਧਾ ਮਤ’’ਨ੍ਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ (ਮਹਾਵ. ਅਟ੍ਠ. ੮੩) ਗਹੇਤਬ੍ਬੋ. ਗਨ੍ਥਵਿਤ੍ਥਾਰਭੀਰੂਨਂ ਅਨੁਗ੍ਗਹਾਯ ਪਨ ਇਧ ਨ ਵਿਤ੍ਥਾਰਿਤੋ.

੨੪੮੨-੩. ਸਭਾਗੇ ਦਾਯਕੇ ਅਸਨ੍ਤੇ ਅਦ੍ਧਿਕਸ੍ਸ ਚ ਗਿਲਾਨਸ੍ਸ ਚ ‘‘ਗਿਲਾਨੇਨ ਮਂ ਉਪਟ੍ਠਹਾ’’ਤਿ ਯਾਚਿਤਸ੍ਸ ਗਿਲਾਨੁਪਟ੍ਠਾਕਸ੍ਸ ਚ ਨਿਸ੍ਸਯਂ ਵਿਨਾ ਵਸਿਤੁਂ ਦੋਸੋ ਨਤ੍ਥੀਤਿ ਯੋਜਨਾ ¶ . ‘‘ਗਿਲਾਨੁਪਟ੍ਠਾਕਸ੍ਸਾ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ਰਸ੍ਸਤ੍ਤਂ. ਇਮਿਨਾ ਸਭਾਗੇ ਨਿਸ੍ਸਯਦਾਯਕੇ ਸਨ੍ਤੇ ਏਕਦਿਵਸਮ੍ਪਿ ਪਰਿਹਾਰੋ ਨ ਲਬ੍ਭਤੀਤਿ ਦੀਪੇਤਿ. ਅਤ੍ਤਨੋ ਵਨੇ ਫਾਸੁਵਿਹਾਰਤਂ ਜਾਨਤਾਤਿ ਅਤ੍ਤਨੋ ਸਮਥਵਿਪਸ੍ਸਨਾਪਟਿਲਾਭਸ੍ਸ ਵਨੇ ਫਾਸੁਵਿਹਾਰਂ ਜਾਨਨ੍ਤੇਨਪਿ. ‘‘ਸਭਾਗੇ ਦਾਯਕੇ ਅਸਨ੍ਤੇ’’ਤਿ ਪਦਚ੍ਛੇਦੋ. ਸਬ੍ਬਮੇਤਂ ਵਿਧਾਨਂ ਅਨ੍ਤੋਵਸ੍ਸਤੋ ਅਞ੍ਞਸ੍ਮਿਂ ਕਾਲੇ ਵੇਦਿਤਬ੍ਬਂ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯ ਗਹੇਤਬ੍ਬੋ.

ਨਿਸ੍ਸਯਪਟਿਪ੍ਪਸ੍ਸਮ੍ਭਨਕਥਾਵਣ੍ਣਨਾ.

੨੪੮੪. ਕੁਟ੍ਠਮਸ੍ਸ ¶ ਅਤ੍ਥੀਤਿ ਕੁਟ੍ਠੀ, ਤਂ. ‘‘ਗਣ੍ਡਿ’’ਨ੍ਤਿਆਦੀਸੁਪਿ ਏਸੇਵ ਨਯੋ. ਰਤ੍ਤਸੇਤਾਦਿਭੇਦੇਨ ਯੇਨ ਕੇਨਚਿ ਕੁਟ੍ਠੇਨ ਵੇਵਣ੍ਣਿਯਂ ਪਤ੍ਤਸਰੀਰਨ੍ਤਿ ਅਤ੍ਥੋ. ਯਥਾਹ –

‘‘ਰਤ੍ਤਕੁਟ੍ਠਂ ਵਾ ਹੋਤੁ ਕਾਲ਼ਕੁਟ੍ਠਂ ਵਾ, ਯਂ ਕਿਞ੍ਚਿ ਕਿਟਿਭਦਦ੍ਦੁਕਚ੍ਛੁਆਦਿਪ੍ਪਭੇਦਮ੍ਪਿ ਸਬ੍ਬਂ ਕੁਟ੍ਠਮੇਵਾਤਿ ਵੁਤ੍ਤਂ. ਤਞ੍ਚੇ ਨਖਪਿਟ੍ਠਿਪ੍ਪਮਾਣਮ੍ਪਿ ਵਡ੍ਢਨਕਪਕ੍ਖੇ ਠਿਤਂ ਹੋਤਿ, ਨ ਪਬ੍ਬਾਜੇਤਬ੍ਬੋ. ਸਚੇ ਪਨ ਨਿਵਾਸਨਪਾਰੁਪਨੇਹਿ ਪਕਤਿਪਟਿਚ੍ਛਨ੍ਨਟ੍ਠਾਨੇ ਨਖਪਿਟ੍ਠਿਪ੍ਪਮਾਣਂ ਅਵਡ੍ਢਨਕਪਕ੍ਖੇ ਠਿਤਂ ਹੋਤਿ, ਵਟ੍ਟਤਿ. ਮੁਖੇ, ਪਨ ਹਤ੍ਥਪਾਦਪਿਟ੍ਠੇਸੁ ਵਾ ਸਚੇਪਿ ਅਵਡ੍ਢਨਕਪਕ੍ਖੇ ਠਿਤਂ ਨਖਪਿਟ੍ਠਿਤੋ ਖੁਦ੍ਦਕਪਮਾਣਮ੍ਪਿ ਨ ਵਟ੍ਟਤਿਯੇਵਾਤਿ ਕੁਰੁਨ੍ਦਿਯਂ ਵੁਤ੍ਤਂ. ਤਂ ਤਿਕਿਚ੍ਛਾਪੇਤ੍ਵਾ ਪਬ੍ਬਾਜੇਨ੍ਤੇਨਾਪਿ ਪਕਤਿਵਣ੍ਣੇ ਜਾਤੇਯੇਵ ਪਬ੍ਬਾਜੇਤਬ੍ਬੋ’’ਤਿ (ਮਹਾਵ. ਅਟ੍ਠ. ੮੮).

ਨਖਪਿਟ੍ਠਿਪ੍ਪਮਾਣਨ੍ਤਿ ਏਤ੍ਥ ‘‘ਕਨਿਟ੍ਠਙ੍ਗੁਲਿਨਖਪਿਟ੍ਠਿ ਅਧਿਪ੍ਪੇਤਾ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ.

ਗਣ੍ਡਿਨ੍ਤਿ ¶ ਮੇਦਗਣ੍ਡਾਦਿਗਣ੍ਡਭੇਦਵਨ੍ਤਂ. ਯਥਾਹ ‘‘ਮੇਦਗਣ੍ਡੋ ਵਾ ਹੋਤੁ ਅਞ੍ਞੋ ਵਾ, ਯੋ ਕੋਚਿ ਕੋਲਟ੍ਠਿਮਤ੍ਤਕੋਪਿ ਚੇ ਵਡ੍ਢਨਕਪਕ੍ਖੇ ਠਿਤੋ ਗਣ੍ਡੋ ਹੋਤਿ, ਨ ਪਬ੍ਬਾਜੇਤਬ੍ਬੋ’’ਤਿਆਦਿ (ਮਹਾਵ. ਅਟ੍ਠ. ੮੮). ਕੋਲਟ੍ਠੀਤਿ ਬਦਰਟ੍ਠਿ. ਕਿਲਾਸਿਨ੍ਤਿ ਕਿਲਾਸਵਨ੍ਤਂ. ਯਥਾਹ – ‘‘ਕਿਲਾਸੋਤਿ ਨਭਿਜ੍ਜਨਕਂ ਨਪਗ੍ਘਰਣਕਂ ਪਦੁਮਪੁਣ੍ਡਰੀਕਪਤ੍ਤਵਣ੍ਣਂ ਕੁਟ੍ਠਂ, ਯੇਨ ਗੁਨ੍ਨਂ ਵਿਯ ਸਬਲਂ ਸਰੀਰਂ ਹੋਤੀ’’ਤਿ (ਮਹਾਵ. ਅਟ੍ਠ. ੮੮). ਚ-ਸਦ੍ਦੋ ਸਬ੍ਬੇਹਿ ਉਪਯੋਗਵਨ੍ਤੇਹਿ ਪਚ੍ਚੇਕਂ ਯੋਜੇਤਬ੍ਬੋ. ਸੋਸਿਨ੍ਤਿ ਖਯਰੋਗਵਨ੍ਤਂ. ਯਥਾਹ – ‘‘ਸੋਸੋਤਿ ਸੋਸਬ੍ਯਾਧਿ. ਤਸ੍ਮਿਂ ਸਤਿ ਨ ਪਬ੍ਬਾਜੇਤਬ੍ਬੋ’’ਤਿ (ਮਹਾਵ. ਅਟ੍ਠ. ੮੮). ਅਪਮਾਰਿਕਨ੍ਤਿ ਅਪਮਾਰਵਨ੍ਤਂ. ਯਥਾਹ – ‘‘ਅਪਮਾਰੋਤਿ ਪਿਤ੍ਤੁਮ੍ਮਾਰੋ ਵਾ ਯਕ੍ਖੁਮ੍ਮਾਰੋ ਵਾ. ਤਤ੍ਥ ਪੁਬ੍ਬਵੇਰਿਕੇਨ ਅਮਨੁਸ੍ਸੇਨ ਗਹਿਤੋ ਦੁਤ੍ਤਿਕਿਚ੍ਛੋ ਹੋਤਿ, ਅਪ੍ਪਮਤ੍ਤਕੇਪਿ ਪਨ ਅਪਮਾਰੇ ਸਤਿ ਨ ਪਬ੍ਬਾਜੇਤਬ੍ਬੋ’’ਤਿ.

ਰਾਜਭਟਨ੍ਤਿ ਰਞ੍ਞੋ ਭਤ੍ਤਵੇਤਨਭਟਂ ਵਾ ਠਾਨਨ੍ਤਰਂ ਪਤ੍ਤਂ ਵਾ ਅਪ੍ਪਤ੍ਤਂ ਵਾ ਰਾਜਪੁਰਿਸਂ. ਯਥਾਹ – ‘‘ਅਮਚ੍ਚੋ ਵਾ ਹੋਤੁ ਮਹਾਮਤ੍ਤੋ ਵਾ ਸੇਵਕੋ ਵਾ ਕਿਞ੍ਚਿ ਠਾਨਨ੍ਤਰਂ ਪਤ੍ਤੋ ਵਾ ਅਪ੍ਪਤ੍ਤੋ ਵਾ, ਯੋ ਕੋਚਿ ਰਞ੍ਞੋ ਭਤ੍ਤਵੇਤਨਭਟੋ. ਸਬ੍ਬੋ ‘ਰਾਜਭਟੋ’ਤਿ ਸਙ੍ਖ੍ਯਂ ਗਚ੍ਛਤੀ’’ਤਿ. ਚੋਰਨ੍ਤਿ ਮਨੁਸ੍ਸੇਹਿ ਅਪ੍ਪਮਾਦਨਂ ਗਾਮਘਾਤਪਨ੍ਥਘਾਤਾਦਿਕਮ੍ਮੇਨ ਪਾਕਟਂ ਚੋਰਞ੍ਚ. ਲਿਖਿਤਕਨ੍ਤਿ ਯਂ ਕਞ੍ਚਿ ਚੋਰਿਕਂ ਵਾ ਅਞ੍ਞਂ ਵਾ ਗਰੁਂ ਰਾਜਾਪਰਾਧਂ ਕਤ੍ਵਾ ਪਲਾਤਂ, ਰਾਜਾ ਚ ਨਂ ਪਣ੍ਣੇ ਵਾ ਪੋਤ੍ਥਕੇ ਵਾ ‘‘ਇਤ੍ਥਨ੍ਨਾਮੋ ¶ ਯਤ੍ਥ ਦਿਸ੍ਸਤਿ, ਤਤ੍ਥ ਗਹੇਤ੍ਵਾ ਮਾਰੇਤਬ੍ਬੋ’’ਤਿ ਵਾ ‘‘ਹਤ੍ਥਪਾਦਾਦੀਨਿਸ੍ਸ ਛਿਨ੍ਦਿਤਬ੍ਬਾਨੀ’’ਤਿ ਵਾ ‘‘ਏਤ੍ਤਕਂ ਨਾਮ ਦਣ੍ਡਂ ਹਰਾਪੇਤਬ੍ਬੋ’’ਤਿ ਵਾ ਲਿਖਾਪੇਤਿ, ਏਵਰੂਪਂ ਲਿਖਿਤਕਂ.

‘‘ਕਾਰਭੇਦਕ’’ਨ੍ਤਿ ਗਾਥਾਬਨ੍ਧਵਸੇਨ ਰਸ੍ਸੋ ਕਤੋ. ਕਾਰਭੇਦਕਨ੍ਤਿ ਦਾਤਬ੍ਬਕਰਸ੍ਸ ਵਾ ਕਤਚੋਰਕਮ੍ਮਸ੍ਸ ਵਾ ਕਾਰਣਾ ¶ ਕਾਰਾਘਰੇ ਪਕ੍ਖਿਤ੍ਤੋ ਵਾ ਨਿਗਲ਼ਬਨ੍ਧਨਾਦੀਹਿ ਬਦ੍ਧੋ ਵਾ, ਤਤੋ ਸੋ ਮੁਚ੍ਚਿਤ੍ਵਾ ਪਲਾਯਤਿ, ਏਵਰੂਪਂ ਕਾਰਾਭੇਦਕਞ੍ਚ. ਯਥਾਹ – ‘‘ਕਾਰਾ ਵੁਚ੍ਚਤਿ ਬਨ੍ਧਨਾਗਾਰਂ, ਇਧ ਪਨ ਅਨ੍ਦੁਬਨ੍ਧਨਂ ਵਾ ਹੋਤੁ ਸਙ੍ਖਲਿਕਬਨ੍ਧਨਂ ਵਾ ਰਜ੍ਜੁਬਨ੍ਧਨਂ ਵਾ ਗਾਮਬਨ੍ਧਨਂ ਵਾ ਨਿਗਮਬਨ੍ਧਨਂ ਵਾ ਨਗਰਬਨ੍ਧਨਂ ਵਾ ਪੁਰਿਸਗੁਤ੍ਤਿ ਵਾ ਜਨਪਦਬਨ੍ਧਨਂ ਵਾ ਦੀਪਬਨ੍ਧਨਂ ਵਾ, ਯੋ ਏਤੇਸੁ ਯਂ ਕਿਞ੍ਚਿ ਬਨ੍ਧਨਂ ਛਿਨ੍ਦਿਤ੍ਵਾ ਭਿਨ੍ਦਿਤ੍ਵਾ ਮੁਞ੍ਚਿਤ੍ਵਾ ਵਿਵਰਿਤ੍ਵਾ ਵਾ ਪਸ੍ਸਮਾਨਾਨਂ ਵਾ ਅਪਸ੍ਸਮਾਨਾਨਂ ਵਾ ਪਲਾਯਤਿ, ਸੋ ‘ਕਾਰਾਭੇਦਕੋ’ਤਿ ਸਙ੍ਖ੍ਯਂ ਗਚ੍ਛਤੀ’’ਤਿ (ਮਹਾਵ. ਅਟ੍ਠ. ੯੨).

੨੪੮੫. ਕਸਾਹਤਨ੍ਤਿ ਇਣਂ ਗਹੇਤ੍ਵਾ ਦਾਤੁਂ ਅਸਮਤ੍ਥਤ੍ਤਾ ‘‘ਅਯਮੇਵ ਤੇ ਦਣ੍ਡੋ ਹੋਤੂ’’ਤਿ ਕਸਾਦਿਨਾ ਦਿਨ੍ਨਪ੍ਪਹਾਰਂ ਅਵੂਪਸਨ੍ਤਵਣਂ. ਯਥਾਹ –

‘‘ਯੋ ਵਚਨਪੇਸਨਾਦੀਨਿ ਅਕਰੋਨ੍ਤੋ ਹਞ੍ਞਤਿ, ਨ ਸੋ ਕਤਦਣ੍ਡਕਮ੍ਮੋ. ਯੋ ਪਨ ਕੇਣਿਯਾ ਵਾ ਅਞ੍ਞਥਾ ਵਾ ਕਿਞ੍ਚਿ ਗਹੇਤ੍ਵਾ ਖਾਦਿਤ੍ਵਾ ਪੁਨ ਦਾਤੁਂ ਅਸਕ੍ਕੋਨ੍ਤੋ ‘ਅਯਮੇਵ ਤੇ ਦਣ੍ਡੋ ਹੋਤੂ’ਤਿ ਕਸਾਹਿ ਹਞ੍ਞਤਿ, ਅਯਂ ਕਸਾਹਤੋ ਕਤਦਣ੍ਡਕਮ੍ਮੋ. ਯੋ ਚ ਕਸਾਹਿ ਵਾ ਹਤੋ ਹੋਤੁ ਅਦ੍ਧਦਣ੍ਡਕਾਦੀਨਂ ਵਾ ਅਞ੍ਞਤਰੇਨ, ਯਾਵ ਅਲ੍ਲਵਣੋ ਹੋਤਿ, ਤਾਵ ਨ ਪਬ੍ਬਾਜੇਤਬ੍ਬੋ’’ਤਿ (ਮਹਾਵ. ਅਟ੍ਠ. ੯੪).

ਲਕ੍ਖਣਾਹਤਨ੍ਤਿ ਏਕਂਸਂ ਕਤ੍ਵਾ ਪਾਰੁਤੇਨ ਉਤ੍ਤਰਾਸਙ੍ਗੇਨ ਅਪ੍ਪਟਿਚ੍ਛਾਦਨੀਯਟ੍ਠਾਨੇ ਤਤ੍ਤੇਨ ਲੋਹੇਨ ਆਹਤਂ ਅਸਚ੍ਛਵਿਭੂਤਲਕ੍ਖਣੇਨ ਸਮਨ੍ਨਾਗਤਂ. ਯਥਾਹ –

‘‘ਯਸ੍ਸ ਪਨ ਨਲਾਟੇ ਵਾ ਉਰਾਦੀਸੁ ਵਾ ਤਤ੍ਤੇਨ ਲੋਹੇਨ ਲਕ੍ਖਣਂ ਆਹਤਂ ਹੋਤਿ, ਸੋ ਸਚੇ ਭੁਜਿਸ੍ਸੋ, ਯਾਵ ਅਲ੍ਲਵਣੋ ਹੋਤਿ, ਤਾਵ ਨ ਪਬ੍ਬਾਜੇਤਬ੍ਬੋ. ਸਚੇਪਿਸ੍ਸ ਵਣਾ ਰੁਲ਼੍ਹਾ ਹੋਨ੍ਤਿ ਛਵਿਯਾ ¶ ਸਮਪਰਿਚ੍ਛੇਦਾ, ਲਕ੍ਖਣਂ ਪਨ ਪਞ੍ਞਾਯਤਿ, ਤਿਮਣ੍ਡਲਂ ਨਿਵਤ੍ਥਸ੍ਸ ਉਤ੍ਤਰਾਸਙ੍ਗੇ ¶ ਕਤੇ ਪਟਿਚ੍ਛਨ੍ਨੋਕਾਸੇ ਚੇ ਹੋਤਿ, ਪਬ੍ਬਾਜੇਤੁਂ ਵਟ੍ਟਤਿ. ਅਪ੍ਪਟਿਚ੍ਛਨ੍ਨੋਕਾਸੇ ਚੇ, ਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੯੫).

ਇਣਾਯਿਕਞ੍ਚਾਤਿ ਮਾਤਾਪਿਤੁਪਿਤਾਮਹਾਦੀਹਿ ਵਾ ਅਤ੍ਤਨਾ ਵਾ ਗਹਿਤਇਣਂ. ਯਥਾਹ –

‘‘ਇਣਾਯਿਕੋ ਨਾਮ ਯਸ੍ਸ ਪਿਤਿਪਿਤਾਮਹੇਹਿ ਵਾ ਇਣਂ ਗਹਿਤਂ ਹੋਤਿ, ਸਯਂ ਵਾ ਇਣਂ ਗਹਿਤਂ ਹੋਤਿ, ਯਂ ਵਾ ਆਠਪੇਤ੍ਵਾ ਮਾਤਾਪਿਤੂਹਿ ਕਿਞ੍ਚਿ ਗਹਿਤਂ ਹੋਤਿ, ਸੋ ਤਂ ਇਣਂ ਪਰੇਸਂ ਧਾਰੇਤੀਤਿ ਇਣਾਯਿਕੋ. ਯਂ ਪਨ ਅਞ੍ਞੇ ਞਾਤਕਾ ਆਠਪੇਤ੍ਵਾ ਕਿਞ੍ਚਿ ਗਣ੍ਹਨ੍ਤਿ, ਸੋ ਨ ਇਣਾਯਿਕੋ. ਨ ਹਿ ਤੇ ਤਂ ਆਠਪੇਤੁਂ ਇਸ੍ਸਰਾ. ਤਸ੍ਮਾ ਤਂ ਪਬ੍ਬਾਜੇਤੁਂ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੯੬).

ਦਾਸਨ੍ਤਿ ਅਨ੍ਤੋਜਾਤੋ, ਧਨਕ੍ਕੀਤੋ, ਕਰਮਰਾਨੀਤੋ, ਸਯਂ ਵਾ ਦਾਸਬ੍ਯਂ ਉਪਗਤੋਤਿ ਚਤੁਨ੍ਨਂ ਦਾਸਾਨਂ ਅਞ੍ਞਤਰਂ. ਦਾਸਵਿਨਿਚ੍ਛਯੋ ਪਨੇਤ੍ਥ ਸਮਨ੍ਤਪਾਸਾਦਿਕਾਯ (ਮਹਾਵ. ਅਟ੍ਠ. ੯੭) ਵਿਤ੍ਥਾਰਤੋ ਗਹੇਤਬ੍ਬੋ. ਪਬ੍ਬਾਜੇਨ੍ਤਸ੍ਸ ਦੁਕ੍ਕਟਨ੍ਤਿ ‘‘ਕੁਟ੍ਠਿ’’ਨ੍ਤਿਆਦੀਹਿ ਉਪਯੋਗਵਨ੍ਤਪਦੇਹਿ ਪਚ੍ਚੇਕਂ ਯੋਜੇਤਬ੍ਬਂ.

੨੪੮੬. ਹਤ੍ਥਚ੍ਛਿਨ੍ਨਨ੍ਤਿ ਹਤ੍ਥਤਲੇ ਵਾ ਮਣਿਬਨ੍ਧੇ ਵਾ ਕਪ੍ਪਰੇ ਵਾ ਯਤ੍ਥ ਕਤ੍ਥਚਿ ਛਿਨ੍ਨਹਤ੍ਥਂ. ਅਟ੍ਠਚ੍ਛਿਨ੍ਨਨ੍ਤਿ ਯਥਾ ਨਖਂ ਨ ਪਞ੍ਞਾਯਤਿ, ਏਵਂ ਚਤੂਸੁ ਅਙ੍ਗੁਟ੍ਠਕੇਸੁ ਅਞ੍ਞਤਰਂ ਵਾ ਸਬ੍ਬੇ ਵਾ ਯਸ੍ਸ ਛਿਨ੍ਨਾ ਹੋਨ੍ਤਿ, ਏਵਰੂਪਂ. ਪਾਦਚ੍ਛਿਨ੍ਨਨ੍ਤਿ ਯਸ੍ਸ ਅਗ੍ਗਪਾਦੇਸੁ ਵਾ ਗੋਪ੍ਫਕੇਸੁ ਵਾ ਜਙ੍ਘਾਯ ਵਾ ਯਤ੍ਥ ਕਤ੍ਥਚਿ ਏਕੋ ਵਾ ਦ੍ਵੇ ਵਾ ਪਾਦਾ ਛਿਨ੍ਨਾ ਹੋਨ੍ਤਿ. ਹਤ੍ਥਪਾਦਛਿਨ੍ਨਸ੍ਸਾਪਿ ਪਾਲ਼ਿਯਂ (ਮਹਾਵ. ੧੧੯) ਆਗਤਤ੍ਤਾ ਸੋਪਿ ਇਧ ਵਤ੍ਤਬ੍ਬੋ, ਯਥਾਵੁਤ੍ਤਨਯੇਨੇਵ ਤਸ੍ਸ ਦੁਕ੍ਕਟਵਤ੍ਥੁਤਾ ਪਞ੍ਞਾਯਤੀਤਿ ਨ ਵੁਤ੍ਤੋਤਿ ਦਟ੍ਠਬ੍ਬਂ.

ਕਣ੍ਣਨਾਸਙ੍ਗੁਲਿਚ੍ਛਿਨ੍ਨਨ੍ਤਿ ¶ ਏਤ੍ਥ ‘‘ਕਣ੍ਣਚ੍ਛਿਨ੍ਨਂ ਨਾਸਚ੍ਛਿਨ੍ਨਂ ਕਣ੍ਣਨਾਸਚ੍ਛਿਨ੍ਨਂ ਅਙ੍ਗੁਲਿਚ੍ਛਿਨ੍ਨ’’ਨ੍ਤਿ ਯੋਜਨਾ. ਕਣ੍ਣਚ੍ਛਿਨ੍ਨਨ੍ਤਿ ਯਸ੍ਸ ਕਣ੍ਣਮੂਲੇ ਵਾ ਕਣ੍ਣਸਕ੍ਖਲਿਕਾਯ ਵਾ ਏਕੋ ਵਾ ਦ੍ਵੇ ਵਾ ਕਣ੍ਣਾ ਛਿਨ੍ਨਾ ਹੋਨ੍ਤਿ. ਯਸ੍ਸ ਪਨ ਕਣ੍ਣਾਵਟ੍ਟੇ ਛਿਨ੍ਨਾ ਹੋਨ੍ਤਿ, ਸਕ੍ਕਾ ਚ ਹੋਨ੍ਤਿ ਸਙ੍ਘਾਟੇਤੁਂ, ਸੋ ਕਣ੍ਣਂ ਸਙ੍ਘਾਟੇਤ੍ਵਾ ਪਬ੍ਬਾਜੇਤਬ੍ਬੋ. ਨਾਸਚ੍ਛਿਨ੍ਨਨ੍ਤਿ ਯਸ੍ਸ ਅਜਪਦਕੇ ਵਾ ਅਗ੍ਗੇ ਵਾ ਏਕਪੁਟੇ ਵਾ ਯਤ੍ਥ ਕਤ੍ਥਚਿ ਨਾਸਾ ਛਿਨ੍ਨਾ ਹੋਤਿ. ਯਸ੍ਸ ਪਨ ਨਾਸਿਕਾ ਸਕ੍ਕਾ ਹੋਤਿ ਸਨ੍ਧੇਤੁਂ, ਸੋ ¶ ਤਂ ਫਾਸੁਕਂ ਕਤ੍ਵਾ ਪਬ੍ਬਾਜੇਤਬ੍ਬੋ. ਕਣ੍ਣਨਾਸਚ੍ਛਿਨ੍ਨਨ੍ਤਿ ਤਦੁਭਯਚ੍ਛਿਨ੍ਨਂ. ਅਙ੍ਗੁਲਿਚ੍ਛਿਨ੍ਨਨ੍ਤਿ ਯਸ੍ਸ ਨਖਸੇਸਂ ਅਦਸ੍ਸੇਤ੍ਵਾ ਏਕਾ ਵਾ ਬਹੂ ਵਾ ਅਙ੍ਗੁਲਿਯੋ ਛਿਨ੍ਨਾ ਹੋਨ੍ਤਿ. ਯਸ੍ਸ ਪਨ ਸੁਤ੍ਤਤਨ੍ਤੁਮਤ੍ਤਮ੍ਪਿ ਨਖਸੇਸਂ ਪਞ੍ਞਾਯਤਿ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਕਣ੍ਡਰਚ੍ਛਿਨ੍ਨਮੇਵ ਚਾਤਿ ਯਸ੍ਸ ਕਣ੍ਡਰਨਾਮਕਾ ਮਹਾਨ੍ਹਾਰੂ ਪੁਰਤੋ ਵਾ ਪਚ੍ਛਤੋ ਵਾ ਛਿਨ੍ਨਾ ਹੋਨ੍ਤਿ, ਯੇਸੁ ਏਕਸ੍ਸਾਪਿ ਛਿਨ੍ਨਤ੍ਤਾ ਅਗ੍ਗਪਾਦੇਨ ਵਾ ਚਙ੍ਕਮਤਿ, ਮੂਲੇਨ ਵਾ ਚਙ੍ਕਮਤਿ, ਨ ਵਾ ਪਾਦਂ ਪਤਿਟ੍ਠਾਪੇਤੁਂ ਸਕ੍ਕੋਤਿ.

੨੪੮੭. ਕਾਣਨ੍ਤਿ ਪਸਨ੍ਨਨ੍ਧੋ ਵਾ ਹੋਤੁ ਪੁਪ੍ਫਾਦੀਹਿ ਵਾ ਉਪਹਤਪਸਾਦੋ, ਯੋ ਦ੍ਵੀਹਿ ਵਾ ਏਕੇਨ ਵਾ ਅਕ੍ਖਿਨਾ ਨ ਪਸ੍ਸਤਿ, ਤਂ ਕਾਣਂ. ਕੁਣਿਨ੍ਤਿ ਹਤ੍ਥਕੁਣੀ ਵਾ ਪਾਦਕੁਣੀ ਵਾ ਅਙ੍ਗੁਲਿਕੁਣੀ ਵਾ, ਯਸ੍ਸ ਏਤੇਸੁ ਹਤ੍ਥਾਦੀਸੁ ਯਂ ਕਿਞ੍ਚਿ ਵਙ੍ਕਂ ਪਞ੍ਞਾਯਤਿ, ਸੋ ਕੁਣੀ. ਖੁਜ੍ਜਞ੍ਚਾਤਿ ਯੋ ਉਰਸ੍ਸ ਵਾ ਪਿਟ੍ਠਿਯਾ ਵਾ ਪਸ੍ਸਸ੍ਸ ਵਾ ਨਿਕ੍ਖਨ੍ਤਤ੍ਤਾ ਖੁਜ੍ਜਸਰੀਰੋ, ਤਂ ਖੁਜ੍ਜਂ. ਯਸ੍ਸ ਪਨ ਕਿਞ੍ਚਿ ਕਿਞ੍ਚਿ ਅਙ੍ਗਪਚ੍ਚਙ੍ਗਂ ਈਸਕਂ ਵਙ੍ਕਂ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਮਹਾਪੁਰਿਸੋ ਏਵ ਹਿ ਬ੍ਰਹ੍ਮੁਜੁਗਤ੍ਤੋ, ਅਵਸੇਸੋ ਸਤ੍ਤੋ ਅਖੁਜ੍ਜੋ ਨਾਮ ਨਤ੍ਥਿ.

ਵਾਮਨਨ੍ਤਿ ਯੋ ਜਙ੍ਘਵਾਮਨੋ ਵਾ ਕਟਿਵਾਮਨੋ ਵਾ ਉਭਯਵਾਮਨੋ ਵਾ, ਤਂ. ਤਤ੍ਥ ਜਙ੍ਘਵਾਮਨਸ੍ਸ ਕਟਿਤੋ ਪਟ੍ਠਾਯ ਹੇਟ੍ਠਿਮਕਾਯੋ ¶ ਰਸ੍ਸੋ ਹੋਤਿ, ਉਪਰਿਮਕਾਯੋ ਪਰਿਪੁਣ੍ਣੋ. ਕਟਿਵਾਮਨਸ੍ਸ ਕਟਿਤੋ ਪਟ੍ਠਾਯ ਉਪਰਿਮਕਾਯੋ ਰਸ੍ਸੋ ਹੋਤਿ, ਹੇਟ੍ਠਿਮਕਾਯੋ ਪਰਿਪੁਣ੍ਣੋ ਹੋਤਿ. ਉਭਯਵਾਮਨਸ੍ਸ ਉਭੋਪਿ ਕਾਯਾ ਰਸ੍ਸਾ ਹੋਨ੍ਤਿ. ਯੇਸਂ ਕਾਯਰਸ੍ਸਤ੍ਤਾ ਭੂਤਾਨਂ ਵਿਯ ਪਰਿਵਟੁਮੋ ਮਹਾਕੁਚ੍ਛਿਘਟਸਦਿਸੋ ਅਤ੍ਤਭਾਵੋ ਹੋਤਿ. ਤਂ ਤਿਵਿਧਮ੍ਪਿ ਪਬ੍ਬਾਜੇਤੁਂ ਨ ਵਟ੍ਟਤਿ.

ਫਣਹਤ੍ਥਕਨ੍ਤਿ ਯਸ੍ਸ ਵਗ੍ਗੁਲਿਪਕ੍ਖਕਾ ਵਿਯ ਅਙ੍ਗੁਲਿਯੋ ਸਮ੍ਬਦ੍ਧਾ ਹੋਨ੍ਤਿ, ਤਂ. ਏਤਂ ਪਬ੍ਬਾਜੇਤੁਕਾਮੇਨ ਅਙ੍ਗੁਲਨ੍ਤਰਿਕਾਯੋ ਫਾਲੇਤ੍ਵਾ ਸਬ੍ਬਂ ਅਨ੍ਤਰਚਮ੍ਮਂ ਅਪਨੇਤ੍ਵਾ ਫਾਸੁਕਂ ਕਤ੍ਵਾ ਪਬ੍ਬਾਜੇਤਬ੍ਬੋ. ਯਸ੍ਸਾਪਿ ਛ ਅਙ੍ਗੁਲਿਯੋ ਹੋਨ੍ਤਿ, ਤਂ ਪਬ੍ਬਾਜੇਤੁਕਾਮੇਨ ਅਧਿਕਂ ਅਙ੍ਗੁਲਿਂ ਛਿਨ੍ਦਿਤ੍ਵਾ ਫਾਸੁਕਂ ਕਤ੍ਵਾ ਪਬ੍ਬਾਜੇਤਬ੍ਬੋ.

ਖਞ੍ਜਨ੍ਤਿ ਯੋ ਨਤਜਾਣੁਕੋ ਵਾ ਭਿਨ੍ਨਜਙ੍ਘੋ ਵਾ ਮਜ੍ਝੇ ਸਂਕੁਟਿਤਪਾਦਤ੍ਤਾ ਕੁਣ੍ਡਪਾਦਕੋ ਵਾ ਪਿਟ੍ਠਿਪਾਦਮਜ੍ਝੇਨ ਚਙ੍ਕਮਨ੍ਤੋ ਅਗ੍ਗੇ ਸਂਕੁਟਿਤਪਾਦਤ੍ਤਾ ਕੁਣ੍ਡਪਾਦਕੋ ਵਾ ਪਿਟ੍ਠਿਪਾਦਗ੍ਗੇਨ ਚਙ੍ਕਮਨ੍ਤੋ ਅਗ੍ਗਪਾਦੇਨੇਵ ਚਙ੍ਕਮਨਖਞ੍ਜੋ ਵਾ ਪਣ੍ਹਿਕਾਯ ਚਙ੍ਕਮਨਖਞ੍ਜੋ ਵਾ ਪਾਦਸ੍ਸ ਬਾਹਿਰਨ੍ਤੇਨ ਚਙ੍ਕਮਨਖਞ੍ਜੋ ਵਾ ਪਾਦਸ੍ਸ ਅਬ੍ਭਨ੍ਤਰਨ੍ਤੇਨ ਚਙ੍ਕਮਨਖਞ੍ਜੋ ਵਾ ਗੋਪ੍ਫਕਾਨਂ ਉਪਰਿ ਭਗ੍ਗਤ੍ਤਾ ਸਕਲੇਨ ¶ ਪਿਟ੍ਠਿਪਾਦੇਨ ਚਙ੍ਕਮਨਖਞ੍ਜੋ ਵਾ, ਤਂ ਪਬ੍ਬਾਜੇਤੁਂ ਨ ਵਟ੍ਟਤਿ. ਏਤ੍ਥ ਨਤਜਾਣੁਕੋਤਿ ਅਨ੍ਤੋਪਵਿਟ੍ਠਆਨਤਪਾਦੋ. ਪਕ੍ਖਹਤਨ੍ਤਿ ਯਸ੍ਸ ਏਕੋ ਹਤ੍ਥੋ ਵਾ ਪਾਦੋ ਵਾ ਅਡ੍ਢਸਰੀਰਂ ਵਾ ਸੁਖਂ ਨ ਵਹਤਿ.

ਸੀਪਦਿਨ੍ਤਿ ਭਾਰਪਾਦਂ. ਯਸ੍ਸ ਪਾਦੋ ਥੂਲੋ ਹੋਤਿ ਸਞ੍ਜਾਤਪੀਲ਼ਕੋ ਖਰੋ, ਸੋ ਨ ਪਬ੍ਬਾਜੇਤਬ੍ਬੋ. ਯਸ੍ਸ ਪਨ ਨ ਤਾਵ ਖਰਭਾਵਂ ਗਣ੍ਹਾਤਿ, ਸਕ੍ਕਾ ਹੋਤਿ ਉਪਨਾਹਂ ਬਨ੍ਧਿਤ੍ਵਾ ਉਦਕਆਵਾਟੇ ਪਵੇਸੇਤ੍ਵਾ ਉਦਕਵਾਲਿਕਾਯ ਪੂਰੇਤ੍ਵਾ ¶ ਯਥਾ ਸਿਰਾ ਪਞ੍ਞਾਯਨ੍ਤਿ, ਜਙ੍ਘਾ ਚ ਤੇਲਨਾਲ਼ਿਕਾ ਵਿਯ ਹੋਨ੍ਤਿ, ਏਵਂ ਮਿਲਾਪੇਤੁਂ ਸਕ੍ਕਾ, ਤਸ੍ਸ ਪਾਦਂ ਈਦਿਸਂ ਕਤ੍ਵਾ ਤਂ ਪਬ੍ਬਾਜੇਤੁਂ ਵਟ੍ਟਤਿ. ਸਚੇ ਪੁਨ ਵਡ੍ਢਤਿ, ਉਪਸਮ੍ਪਾਦੇਨ੍ਤੇਨਾਪਿ ਤਥਾ ਕਤ੍ਵਾਵ ਉਪਸਮ੍ਪਾਦੇਤਬ੍ਬੋ. ਪਾਪਰੋਗਿਨਨ੍ਤਿ ਯੋ ਅਰਿਸਭਗਨ੍ਦਰਪਿਤ੍ਤਸੇਮ੍ਹਕਾਸਸੋਸਾਦੀਸੁ ਯੇਨ ਕੇਨਚਿ ਰੋਗੇਨ ਨਿਚ੍ਚਾਤੁਰੋ ਅਤੇਕਿਚ੍ਛਰੋਗੋ ਜੇਗੁਚ੍ਛੋ ਅਮਨਾਪੋ, ਤਂ.

੨੪੮੮. ਜਰਾਯ ਦੁਬ੍ਬਲਨ੍ਤਿ ਯੋ ਜਿਣ੍ਣਭਾਵੇਨ ਦੁਬ੍ਬਲੋ ਅਤ੍ਤਨੋ ਚੀਵਰਰਜਨਾਦਿਕਮ੍ਮਮ੍ਪਿ ਕਾਤੁਂ ਅਸਮਤ੍ਥੋ, ਤਂ. ਯੋ ਪਨ ਮਹਲ੍ਲਕੋਪਿ ਬਲਵਾ ਹੋਤਿ ਅਤ੍ਤਾਨਂ ਪਟਿਜਗ੍ਗਿਤੁਂ ਸਕ੍ਕੋਤਿ, ਸੋ ਪਬ੍ਬਾਜੇਤਬ੍ਬੋ. ਅਨ੍ਧਨ੍ਤਿ ਜਚ੍ਚਨ੍ਧਂ. ਪਧਿਰਞ੍ਚੇਵਾਤਿ ਯੋ ਸਬ੍ਬੇਨ ਸਬ੍ਬਂ ਨ ਸੁਣਾਤਿ, ਤਂ. ਯੋ ਪਨ ਮਹਾਸਦ੍ਦਂ ਸੁਣਾਤਿ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਮਮ੍ਮਨਨ੍ਤਿ ਯਸ੍ਸ ਵਚੀਭੇਦੋ ਵਤ੍ਤਤਿ, ਸਰਣਗਮਨਂ ਪਰਿਪੁਣ੍ਣਂ ਭਾਸਿਤੁਂ ਨ ਸਕ੍ਕੋਤਿ, ਤਾਦਿਸਂ ਮਮ੍ਮਨਮ੍ਪਿ ਪਬ੍ਬਾਜੇਤੁਂ ਨ ਵਟ੍ਟਤਿ. ਯੋ ਪਨ ਸਰਣਗਮਨਮਤ੍ਤਂ ਪਰਿਪੁਣ੍ਣਂ ਭਾਸਿਤੁਂ ਸਕ੍ਕੋਤਿ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਅਥ ਵਾ ਮਮ੍ਮਨਨ੍ਤਿ ਖਲਿਤਵਚਨਂ, ਯੋ ਏਕਮੇਵ ਅਕ੍ਖਰਂ ਚਤੁਪਞ੍ਚਕ੍ਖਤ੍ਤੁਂ ਵਦਤਿ, ਤਸ੍ਸੇਤਮਧਿਵਚਨਂ. ਪੀਠਸਪ੍ਪਿਨ੍ਤਿ ਛਿਨ੍ਨਿਰਿਯਾਪਥਂ. ਮੂਗਨ੍ਤਿ ਯਸ੍ਸ ਵਚੀਭੇਦੋ ਨਪ੍ਪਵਤ੍ਤਤਿ.

੨੪੮੯. ਅਤ੍ਤਨੋ ਵਿਰੂਪਭਾਵੇਨ ਪਰਿਸਂ ਦੂਸੇਨ੍ਤੇਨ ਪਰਿਸਦੂਸਕੇ (ਮਹਾਵ. ਅਟ੍ਠ. ੧੧੯) ਦਸ੍ਸੇਤੁਮਾਹ ‘‘ਅਤਿਦੀਘੋ’’ਤਿਆਦਿ. ਅਤਿਦੀਘੋਤਿ ਅਞ੍ਞੇਸਂ ਸੀਸਪ੍ਪਮਾਣਨਾਭਿਪ੍ਪਦੇਸੋ. ਅਤਿਰਸ੍ਸੋਤਿ ਵੁਤ੍ਤਪ੍ਪਕਾਰੋ ਉਭਯਵਾਮਨੋ ਵਿਯ ਅਤਿਰਸ੍ਸੋ. ਅਤਿਕਾਲ਼ੋ ਵਾਤਿ ਝਾਪਿਤਖੇਤ੍ਤੇ ਖਾਣੁਕੋ ਵਿਯ ਅਤਿਕਾਲ਼ਵਣ੍ਣੋ. ਮਟ੍ਠਤਮ੍ਬਲੋਹਨਿਦਸ੍ਸਨੋ ਅਚ੍ਚੋਦਾਤੋਪਿ ਵਾਤਿ ਸਮ੍ਬਨ੍ਧੋ, ਦਧਿਤਕ੍ਕਾਦੀਹਿ ਮਜ੍ਜਿਤਮਟ੍ਠਤਮ੍ਬਲੋਹਵਣ੍ਣੋ ਅਤੀਵ ਓਦਾਤਸਰੀਰੋਤਿ ਅਤ੍ਥੋ.

੨੪੯੦. ਅਤਿਥੂਲੋ ¶ ਵਾਤਿ ਭਾਰਿਯਮਂਸੋ ਮਹੋਦਰੋ ਮਹਾਭੂਤਸਦਿਸੋ. ਅਤਿਕਿਸੋਤਿ ਮਨ੍ਦਮਂਸਲੋਹਿਤੋ ¶ ਅਟ੍ਠਿਸਿਰਾਚਮ੍ਮਸਰੀਰੋ ਵਿਯ. ਅਤਿਮਹਾਸੀਸੋ ਵਾਤਿ ਯੋਜਨਾ. ਅਤਿਮਹਾਸੀਸੋ ਵਾਤਿ ਪਚ੍ਛਿਂ ਸੀਸੇ ਕਤ੍ਵਾ ਠਿਤੋ ਵਿਯ. ‘‘ਅਤਿਖੁਦ੍ਦਕਸੀਸੇਨ ਅਸਹਿਤੇਨਾ’’ਤਿ ਪਦਚ੍ਛੇਦੋ. ਅਸਹਿਤੇਨਾਤਿ ਸਰੀਰਸ੍ਸ ਅਨਨੁਰੂਪੇਨ. ‘‘ਅਤਿਖੁਦ੍ਦਕਸੀਸੇਨਾ’’ਤਿ ਏਤਸ੍ਸ ਵਿਸੇਸਨਂ. ਅਸਹਿਤੇਨ ਅਤਿਖੁਦ੍ਦਕਸੀਸੇਨ ਸਮਨ੍ਨਾਗਤੋਤਿ ਯੋਜਨਾ. ਯਥਾਹ – ‘‘ਅਤਿਖੁਦ੍ਦਕਸੀਸੋ ਵਾ ਸਰੀਰਸ੍ਸ ਅਨਨੁਰੂਪੇਨ ਅਤਿਖੁਦ੍ਦਕੇਨ ਸੀਸੇਨ ਸਮਨ੍ਨਾਗਤੋ’’ਤਿ.

੨੪੯੧. ਕੁਟਕੁਟਕਸੀਸੋਤਿ ਤਾਲਫਲਪਿਣ੍ਡਿਸਦਿਸੇਨ ਸੀਸੇਨ ਸਮਨ੍ਨਾਗਤੋ. ਸਿਖਰਸੀਸਕੋਤਿ ਉਦ੍ਧਂ ਅਨੁਪੁਬ੍ਬਤਨੁਕੇਨ ਸੀਸੇਨ ਸਮਨ੍ਨਾਗਤੋ, ਮਤ੍ਥਕਤੋ ਸਂਕੁਟਿਕੋ ਮੂਲਤੋ ਵਿਤ੍ਥਤੋ ਹੁਤ੍ਵਾ ਠਿਤਪਬ੍ਬਤਸਿਖਰਸਦਿਸਸੀਸੋਤਿ ਅਤ੍ਥੋ. ਵੇਲ਼ੁਨਾਲ਼ਿਸਮਾਨੇਨਾਤਿ ਮਹਾਵੇਲ਼ੁਪਬ੍ਬਸਦਿਸੇਨ. ਸੀਸੇਨਾਤਿ ਦੀਘਸੀਸੇਨ. ਯਥਾਹ – ‘‘ਨਾਲ਼ਿਸੀਸੋ ਵਾ ਮਹਾਵੇਲ਼ੁਪਬ੍ਬਸਦਿਸੇਨ ਸੀਸੇਨ ਸਮਨ੍ਨਾਗਤੋ’’ਤਿ (ਮਹਾਵ. ਅਟ੍ਠ. ੧੧੯).

੨੪੯੨. ਕਪ੍ਪਸੀਸੋਪੀਤਿ ਮਜ੍ਝੇ ਦਿਸ੍ਸਮਾਨਆਵਾਟੇਨ ਹਤ੍ਥਿਕੁਮ੍ਭਸਦਿਸੇਨ ਦ੍ਵਿਧਾਭੂਤਸੀਸੇਨ ਸਮਨ੍ਨਾਗਤੋ. ਪਬ੍ਭਾਰਸੀਸੋ ਵਾਤਿ ਚਤੂਸੁ ਪਸ੍ਸੇਸੁ ਯੇਨ ਕੇਨਚਿ ਪਸ੍ਸੇਨ ਓਣਤੇਨ ਸੀਸੇਨ ਸਮਨ੍ਨਾਗਤੋ. ਵਣਸੀਸਕੋਤਿ ਵਣੇਹਿ ਸਮਨ੍ਨਾਗਤਸੀਸੋ. ਕਣ੍ਣਿਕਕੇਸੋ ਵਾਤਿ ਪਾਣਕੇਹਿ ਖਾਯਿਤਕੇਦਾਰੇ ਸਸ੍ਸਸਦਿਸੇਹਿ ਤਹਿਂ ਤਹਿਂ ਉਟ੍ਠਿਤੇਹਿ ਕੇਸੇਹਿ ਸਮਨ੍ਨਾਗਤੋ. ਥੂਲਕੇਸੋਪਿ ਵਾਤਿ ਤਾਲਹੀਰਸਦਿਸੇਹਿ ਕੇਸੇਹਿ ਸਮਨ੍ਨਾਗਤੋ.

੨੪੯੩. ਪੂਤਿਸੀਸੋਤਿ ¶ ਦੁਗ੍ਗਨ੍ਧਸੀਸੋ. ਨਿਲ੍ਲੋਮਸੀਸੋ ਵਾਤਿ ਲੋਮਰਹਿਤਸੀਸੋ. ਜਾਤਿਪਣ੍ਡਰਕੇਸਕੋਤਿ ਜਾਤਿਫਲਿਤੇਹਿ ਪਣ੍ਡਰਕੇਸੋ ਵਾ. ਜਾਤਿਯਾ ਤਮ੍ਬਕੇਸੋ ਵਾਤਿ ਆਦਿਤ੍ਤੇਹਿ ਵਿਯ ਤਮ੍ਬਵਣ੍ਣੇਹਿ ਕੇਸੇਹਿ ਸਮਨ੍ਨਾਗਤੋ. ਆਵਟ੍ਟਸੀਸਕੋਤਿ ਗੁਨ੍ਨਂ ਸਰੀਰੇ ਆਵਟ੍ਟਸਦਿਸੇਹਿ ਉਦ੍ਧਗ੍ਗੇਹਿ ਕੇਸਾਵਟ੍ਟੇਹਿ ਸਮਨ੍ਨਾਗਤੋ.

੨੪੯੪. ਸੀਸਲੋਮੇਕਬਦ੍ਧੇਹਿ ਭਮੁਕੇਹਿ ਯੁਤੋਪੀਤਿ ਸੀਸਲੋਮੇਹਿ ਸਦ੍ਧਿਂ ਏਕਾਬਦ੍ਧਲੋਮੇਹਿ ਭਮੁਕੇਹਿ ਸਮਨ੍ਨਾਗਤੋ. ਸਮ੍ਬਦ੍ਧਭਮੁਕੋ ਵਾਤਿ ਏਕਾਬਦ੍ਧਉਭਯਭਮੁਕੋ, ਮਜ੍ਝੇ ਸਞ੍ਜਾਤਲੋਮੇਹਿ ਭਮੁਕੇਹਿ ਸਮਨ੍ਨਾਗਤੋਤਿ ਅਤ੍ਥੋ. ਨਿਲ੍ਲੋਮਭਮੁਕੋਪਿ ਵਾਤਿ ਭਮੁਲੋਮਰਹਿਤੋ. ਨਿਲ੍ਲੋਮਭਮੁਕੋਪਿ ਵਾਤਿ ਪਿ-ਸਦ੍ਦੇਨ ਅਵੁਤ੍ਤਸਮੁਚ੍ਚਯਤ੍ਥੇਨ ਮਕ੍ਕਟਭਮੁਕੋ ਸਙ੍ਗਹਿਤੋ.

੨੪੯੫. ਮਹਨ੍ਤਖੁਦ੍ਦਨੇਤ੍ਤੋ ¶ ਵਾਤਿ ਏਤ੍ਥ ਨੇਤ੍ਤ-ਸਦ੍ਦੋ ਮਹਨ੍ਤਖੁਦ੍ਦ-ਸਦ੍ਦੇਹਿ ਪਚ੍ਚੇਕਂ ਯੋਜੇਤਬ੍ਬੋ, ਮਹਨ੍ਤਨੇਤ੍ਤੋ ਵਾ ਖੁਦ੍ਦਕਨੇਤ੍ਤੋ ਵਾਤਿ ਅਤ੍ਥੋ. ਮਹਨ੍ਤਨੇਤ੍ਤੋ ਵਾਤਿ ਅਤਿਮਹਨ੍ਤੇਹਿ ਨੇਤ੍ਤੇਹਿ ਸਮਨ੍ਨਾਗਤੋ. ਖੁਦ੍ਦਕਨੇਤ੍ਤੋ ਵਾਤਿ ਮਹਿਂਸਚਮ੍ਮੇ ਵਾਸਿਕੋਣੇਨ ਪਹਰਿਤ੍ਵਾ ਕਤਛਿਦ੍ਦਸਦਿਸੇਹਿ ਅਤਿਖੁਦ੍ਦਕਕ੍ਖੀਹਿ ਸਮਨ੍ਨਾਗਤੋ. ਵਿਸਮਲੋਚਨੋਤਿ ਏਕੇਨ ਮਹਨ੍ਤੇਨ, ਏਕੇਨ ਖੁਦ੍ਦਕੇਨ ਅਕ੍ਖਿਨਾ ਸਮਨ੍ਨਾਗਤੋ. ਕੇਕਰੋ ਵਾਪੀਤਿ ਤਿਰਿਯਂ ਪਸ੍ਸਨ੍ਤੋ. ਏਤ੍ਥ ਅਪਿ-ਸਦ੍ਦੇਨ ਨਿਕ੍ਖਨ੍ਤਕ੍ਖਿਂ ਸਮ੍ਪਿਣ੍ਡੇਤਿ, ਯਸ੍ਸ ਕਕ੍ਕਟਕਸ੍ਸੇਵ ਅਕ੍ਖਿਤਾਰਕਾ ਨਿਕ੍ਖਨ੍ਤਾ ਹੋਨ੍ਤਿ. ਗਮ੍ਭੀਰਨੇਤ੍ਤੋਤਿ ਯਸ੍ਸ ਗਮ੍ਭੀਰੇ ਉਦਪਾਨੇ ਉਦਕਤਾਰਕਾ ਵਿਯ ਅਕ੍ਖਿਤਾਰਕਾ ਪਞ੍ਞਾਯਨ੍ਤਿ. ਏਤ੍ਥ ਚ ਉਦਕਤਾਰਕਾ ਨਾਮ ਉਦਕਪੁਬ੍ਬੁਲ਼ਂ. ਅਕ੍ਖਿਤਾਰਕਾਤਿ ਅਕ੍ਖਿਗੇਣ੍ਡਕਾ. ਵਿਸਮਚਕ੍ਕਲੋਤਿ ਏਕੇਨ ਉਦ੍ਧਂ, ਏਕੇਨ ਅਧੋਤਿ ਏਵਂ ਵਿਸਮਜਾਤੇਹਿ ਅਕ੍ਖਿਚਕ੍ਕੇਹਿ ਸਮਨ੍ਨਾਗਤੋ.

੨੪੯੬. ਜਤੁਕਣ੍ਣੋ ¶ ਵਾਤਿ ਅਤਿਖੁਦ੍ਦਿਕਾਹਿ ਕਣ੍ਣਸਕ੍ਖਲੀਹਿ ਸਮਨ੍ਨਾਗਤੋ. ਮੂਸਿਕਕਣ੍ਣੋ ਵਾਤਿ ਮੂਸਿਕਾਨਂ ਕਣ੍ਣਸਦਿਸੇਹਿ ਕਣ੍ਣੇਹਿ ਸਮਨ੍ਨਾਗਤੋ. ਹਤ੍ਥਿਕਣ੍ਣੋਪਿ ਵਾਤਿ ਅਨਨੁਰੂਪਾਹਿ ਮਹਨ੍ਤਾਹਿ ਹਤ੍ਥਿਕਣ੍ਣਸਦਿਸਾਹਿ ਕਣ੍ਣਸਕ੍ਖਲੀਹਿ ਸਮਨ੍ਨਾਗਤੋ. ਛਿਦ੍ਦਮਤ੍ਤਕਕਣ੍ਣੋ ਵਾਤਿ ਯਸ੍ਸ ਵਿਨਾ ਕਣ੍ਣਸਕ੍ਖਲੀਹਿ ਕਣ੍ਣਚ੍ਛਿਦ੍ਦਮੇਵ ਹੋਤਿ. ਅਵਿਦ੍ਧਕਣ੍ਣਕੋਤਿ ਕਣ੍ਣਬਨ੍ਧਤ੍ਥਾਯ ਅਵਿਦ੍ਧੇਨ ਕਣ੍ਣੇਨ ਸਮਨ੍ਨਾਗਤੋ.

੨੪੯੭. ਟਙ੍ਕਿਤਕਣ੍ਣੋ ਵਾਤਿ ਗੋਭਤ੍ਤਨਾਲ਼ਿਕਾਯ ਅਗ੍ਗਸਦਿਸੇਹਿ ਕਣ੍ਣੇਹਿ ਸਮਨ੍ਨਾਗਤੋ, ਗੋਹਨੁਕੋਟਿਸਣ੍ਠਾਨੇਹਿ ਕਣ੍ਣੇਹਿ ਸਮਨ੍ਨਾਗਤੋਤਿ ਅਤ੍ਥੋ. ਪੂਤਿਕਣ੍ਣੋਪਿ ਵਾਤਿ ਸਦਾ ਪਗ੍ਘਰਿਤਪੁਬ੍ਬੇਨ ਕਣ੍ਣੇਨ ਸਮਨ੍ਨਾਗਤੋ. ਪੂਤਿਕਣ੍ਣੋਪੀਤਿ ਅਪਿ-ਸਦ੍ਦੇਨ ਕਣ੍ਣਭਗਨ੍ਦਰਿਕੋ ਗਹਿਤੋ. ਕਣ੍ਣਭਗਨ੍ਦਰਿਕੋਤਿ ਨਿਚ੍ਚਪੂਤਿਨਾ ਕਣ੍ਣੇਨ ਸਮਨ੍ਨਾਗਤੋ. ਅਵਿਦ੍ਧਕਣ੍ਣੋ ਪਰਿਸਦੂਸਕੋ ਵੁਤ੍ਤੋ, ਕਥਂ ਯੋਨਕਜਾਤੀਨਂ ਪਬ੍ਬਜ੍ਜਾਤਿ ਆਹ ‘‘ਯੋਨਕਾਦਿਪ੍ਪਭੇਦੋਪਿ, ਨਾਯਂ ਪਰਿਸਦੂਸਕੋ’’ਤਿ, ਕਣ੍ਣਾਵੇਧਨਂ ਯੋਨਕਾਨਂ ਸਭਾਵੋ, ਅਯਂ ਯੋਨਕਾਦਿਪ੍ਪਭੇਦੋ ਪਰਿਸਦੂਸਕੋ ਨ ਹੋਤੀਤਿ ਵੁਤ੍ਤਂ ਹੋਤਿ.

੨੪੯੮. ਅਤਿਪਿਙ੍ਗਲਨੇਤ੍ਤੋਤਿ ¶ ਅਤਿਸਯੇਨ ਪਿਙ੍ਗਲੇਹਿ ਨੇਤ੍ਤੇਹਿ ਸਮਨ੍ਨਾਗਤੋ. ਮਧੁਪਿਙ੍ਗਲਂ ਪਨ ਪਬ੍ਬਾਜੇਤੁਂ ਵਟ੍ਟਤਿ. ਨਿਪ੍ਪਖੁਮਕ੍ਖਿ ਵਾਤਿ ਅਕ੍ਖਿਦਲਰੋਮੇਹਿ ਵਿਰਹਿਤਅਕ੍ਖਿਕੋ. ਪਖੁਮ-ਸਦ੍ਦੋ ਹਿ ਲੋਕੇ ਅਕ੍ਖਿਦਲਰੋਮੇਸੁ ਨਿਰੁਲ਼੍ਹੋ. ਅਸ੍ਸੁਪਗ੍ਘਰਨੇਤ੍ਤੋ ਵਾਤਿ ਪਗ੍ਘਰਣਸ੍ਸੂਹਿ ਨੇਤ੍ਤੇਹਿ ਸਮਨ੍ਨਾਗਤੋ. ਪਕ੍ਕਪੁਪ੍ਫਿਤਲੋਚਨੋਤਿ ਪਕ੍ਕਲੋਚਨੋ ਪੁਪ੍ਫਿਤਲੋਚਨੋਤਿ ਯੋਜਨਾ. ਪਰਿਪਕ੍ਕਨੇਤ੍ਤੋ ਸਞ੍ਜਾਤਪੁਪ੍ਫਨੇਤ੍ਤੋਤਿ ਅਤ੍ਥੋ.

੨੪੯੯. ਮਹਾਨਾਸੋਤਿ ਸਰੀਰਸ੍ਸ ਅਨਨੁਰੂਪਾਯ ਮਹਤਿਯਾ ਨਾਸਾਯ ਸਮਨ੍ਨਾਗਤੋ. ਅਤਿਖੁਦ੍ਦਕਨਾਸਿਕੋਤਿ ਤਥਾ ¶ ਅਤਿਖੁਦ੍ਦਿਕਾਯ ਨਾਸਾਯ ਸਮਨ੍ਨਾਗਤੋ. ਚਿਪਿਟਨਾਸੋ ਵਾਤਿ ਚਿਪਿਟਾਯ ਅਨ੍ਤੋ ਪਵਿਟ੍ਠਾਯ ਵਿਯ ਅਲ੍ਲਿਨਾਸਾਯ ਸਮਨ੍ਨਾਗਤੋ. ਚਿਪਿਟਨਾਸੋ ਵਾਤਿ ਅਵੁਤ੍ਤਵਿਕਪ੍ਪਤ੍ਥੇਨ ਵਾ-ਸਦ੍ਦੇਨ ਦੀਘਨਾਸਿਕੋ ਸਙ੍ਗਯ੍ਹਤਿ. ਸੋ ਚ ਸੁਕਤੁਣ੍ਡਸਦਿਸਾਯ ਜਿਵ੍ਹਾਯ ਲੇਹਿਤੁਂ ਸਕ੍ਕੁਣੇਯ੍ਯਾਯ ਨਾਸਿਕਾਯ ਸਮਨ੍ਨਾਗਤੋ. ਕੁਟਿਲਨਾਸਿਕੋਤਿ ਮੁਖਮਜ੍ਝੇ ਅਪ੍ਪਤਿਟ੍ਠਹਿਤ੍ਵਾ ਏਕਪਸ੍ਸੇ ਠਿਤਨਾਸਿਕੋ.

੨੫੦੦. ਨਿਚ੍ਚਵਿਸ੍ਸਵਨਾਸੋ ਵਾਤਿ ਨਿਚ੍ਚਪਗ੍ਘਰਿਤਸਿਙ੍ਘਾਣਿਕਨਾਸੋ ਵਾ. ਮਹਾਮੁਖੋਤਿ ਯਸ੍ਸ ਪਟਙ੍ਗਮਣ੍ਡੁਕਸ੍ਸੇਵ ਮੁਖਨਿਮਿਤ੍ਤਂਯੇਵ ਮਹਨ੍ਤਂ ਹੋਤਿ, ਮੁਖਂ ਪਨ ਲਾਬੁਸਦਿਸਂ ਅਤਿਖੁਦ੍ਦਕਂ. ਪਟਙ੍ਗਮਣ੍ਡੁਕੋ ਨਾਮ ਮਹਾਮੁਖਮਣ੍ਡੁਕੋ. ਵਙ੍ਕਭਿਨ੍ਨਮੁਖੋ ਵਾਪੀਤਿ ਏਤ੍ਥ ‘‘ਵਙ੍ਕਮੁਖੋ ਵਾ ਭਿਨ੍ਨਮੁਖੋ ਵਾਪੀ’’ਤਿ ਯੋਜਨਾ. ਵਙ੍ਕਮੁਖੋਤਿ ਭਮੁਕਸ੍ਸ, ਨਲਾਤਸ੍ਸ ਵਾ ਏਕਪਸ੍ਸੇ ਨਿਨ੍ਨਤਾਯ ਵਙ੍ਕਮੁਖੋ. ਭਿਨ੍ਨਮੁਖੋ ਵਾਤਿ ਮਕ੍ਕਟਸ੍ਸੇਵ ਭਿਨ੍ਨਮੁਖੋ. ਮਹਾਓਟ੍ਠੋਪਿ ਵਾਤਿ ਉਕ੍ਖਲਿਮੁਖਵਟ੍ਟਿਸਦਿਸੇਹਿ ਓਟ੍ਠੇਹਿ ਸਮਨ੍ਨਾਗਤੋ.

੨੫੦੧. ਤਨੁਕਓਟ੍ਠੋ ਵਾਤਿ ਭੇਰਿਚਮ੍ਮਸਦਿਸੇਹਿ ਦਨ੍ਤੇ ਪਿਦਹਿਤੁਂ ਅਸਮਤ੍ਥੇਹਿ ਓਟ੍ਠੇਹਿ ਸਮਨ੍ਨਾਗਤੋ. ਭੇਰਿਚਮ੍ਮਸਦਿਸੇਹੀਤਿ ਭੇਰਿਮੁਖਚਮ੍ਮਸਦਿਸੇਹਿ. ਤਨੁਕਓਟ੍ਠੋ ਵਾਤਿ ਏਤ੍ਥ ਵਾ-ਸਦ੍ਦੇਨ ਮਹਾਧਰੋਟ੍ਠੋ ਵਾ ਤਨੁਕਉਤ੍ਤਰੋਟ੍ਠੋ ਵਾ ਤਨੁਕਅਧਰੋਟ੍ਠੋ ਵਾਤਿ ਤਯੋ ਵਿਕਪ੍ਪਾ ਸਙ੍ਗਹਿਤਾ. ਵਿਪੁਲੁਤ੍ਤਰਓਟ੍ਠਕੋਤਿ ਮਹਾਉਤ੍ਤਰੋਟ੍ਠੋ. ਓਟ੍ਠਛਿਨ੍ਨੋਤਿ ਯਸ੍ਸ ਏਕੋ ਵਾ ਦ੍ਵੇ ਵਾ ਓਟ੍ਠਾ ਛਿਨ੍ਨਾ ਹੋਨ੍ਤਿ. ਉਪ੍ਪਕ੍ਕਮੁਖੋਤਿ ਪਕ੍ਕਮੁਖੋ. ਏਲ਼ਮੁਖੋਪਿ ਵਾਤਿ ਨਿਚ੍ਚਪਗ੍ਘਰਣਮੁਖੋ.

੨੫੦੨-੩. ਸਙ੍ਖਤੁਣ੍ਡੋਪੀਤਿ ਬਹਿ ਸੇਤੇਹਿ ਅਨ੍ਤੋ ਅਤਿਰਤ੍ਤੇਹਿ ਓਟ੍ਠੇਹਿ ਸਮਨ੍ਨਾਗਤੋ. ਦੁਗ੍ਗਨ੍ਧਮੁਖੋਤਿ ਦੁਗ੍ਗਨ੍ਧਕੁਣਪਮੁਖੋ. ਮਹਾਦਨ੍ਤੋਪੀਤਿ ਅਟ੍ਠਕਦਨ੍ਤਸਦਿਸੇਹਿ ਸਮਨ੍ਨਾਗਤੋ ¶ . ਅਚ੍ਚਨ੍ਤਨ੍ਤਿ ਅਤਿਸਯੇਨ. ‘‘ਹੇਟ੍ਠਾ ਉਪਰਿਤੋ ਵਾਪਿ, ਬਹਿ ਨਿਕ੍ਖਨ੍ਤਦਨ੍ਤਕੋ’’ਤਿ ਇਦਂ ‘‘ਅਸੁਰਦਨ੍ਤਕੋ’’ਤਿ ਏਤਸ੍ਸ ਅਤ੍ਥਪਦਂ. ਅਸੁਰੋਤਿ ਦਾਨਵੋ. ‘‘ਸਿਪ੍ਪਿਦਨ੍ਤੋ ਵਾ ਓਟ੍ਠਦਨ੍ਤੋ ਵਾ’’ਤਿ ਗਣ੍ਠਿਪਦੇ ਲਿਖਿਤੋ. ਯਸ੍ਸ ਪਨ ਸਕ੍ਕਾ ਹੋਨ੍ਤਿ ਓਟ੍ਠੇਹਿ ਪਿਦਹਿਤੁਂ, ਕਥੇਨ੍ਤਸ੍ਸੇਵ ਪਞ੍ਞਾਯਤਿ, ਨੋ ਅਕਥੇਨ੍ਤਸ੍ਸ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਅਦਨ੍ਤੋਤਿ ਦਨ੍ਤਰਹਿਤੋ. ਪੂਤਿਦਨ੍ਤੋਤਿ ਪੂਤਿਭੂਤੇਹਿ ਦਨ੍ਤੇਹਿ ਸਮਨ੍ਨਾਗਤੋ.

੨੫੦੪. ‘‘ਅਤਿਖੁਦ੍ਦਕਦਨ੍ਤਕੋ’’ਤਿ ਇਮਸ੍ਸ ‘‘ਯਸ੍ਸਾ’’ਤਿਆਦਿ ਅਪਵਾਦੋ. ਯਸ੍ਸ ਦਨ੍ਤਨ੍ਤਰੇ ਕਾਲ਼ਕਦਨ੍ਤਸਨ੍ਨਿਭੋ ¶ ਕਲਨ੍ਦਕਦਨ੍ਤਸਦਿਸੋ ਦਨ੍ਤੋ ਸੁਖੁਮੋਵ ਠਿਤੋ ਚੇ, ਤਂ ਤੁ ਪਬ੍ਬਾਜੇਤੁਂ ਵਟ੍ਟਤੀਤਿ ਯੋਜਨਾ. ਪਬ੍ਬਾਜੇਤੁਮ੍ਪੀਤਿ ਏਤ੍ਥ ਪਿ-ਸਦ੍ਦੋ ਤੁ-ਸਦ੍ਦਤ੍ਥੋ.

੨੫੦੫. ਯੋ ਪੋਸੋਤਿ ਸਮ੍ਬਨ੍ਧੋ. ਮਹਾਹਨੁਕੋਤਿ ਗੋਹਨੁਸਦਿਸੇਨ ਹਨੁਨਾ ਸਮਨ੍ਨਾਗਤੋ. ‘‘ਰਸ੍ਸੇਨ ਹਨੁਨਾ ਯੁਤੋ’’ਤਿ ਇਦਂ ‘‘ਚਿਪਿਟਹਨੁਕੋ ਵਾ’’ਤਿ ਇਮਸ੍ਸ ਅਤ੍ਥਪਦਂ. ਯਥਾਹ – ‘‘ਚਿਪਿਟਹਨੁਕੋ ਵਾ ਅਨ੍ਤੋਪਵਿਟ੍ਠੇਨ ਵਿਯ ਅਤਿਰਸ੍ਸੇਨ ਹਨੁਕੇਨ ਸਮਨ੍ਨਾਗਤੋ’’ਤਿ (ਮਹਾਵ. ਅਟ੍ਠ. ੧੧੯). ਚਿਪਿਟਹਨੁਕੋ ਵਾਪੀਤਿ ਏਤ੍ਥ ਪਿ-ਸਦ੍ਦੇਨ ‘‘ਭਿਨ੍ਨਹਨੁਕੋ ਵਾ ਵਙ੍ਕਹਨੁਕੋ ਵਾ’’ਤਿ ਵਿਕਪ੍ਪਦ੍ਵਯਂ ਸਙ੍ਗਣ੍ਹਾਤਿ.

੨੫੦੬. ਨਿਮ੍ਮਸ੍ਸੁਦਾਠਿਕੋ ਵਾਪੀਤਿ ਭਿਕ੍ਖੁਨਿਸਦਿਸਮੁਖੋ. ਅਤਿਦੀਘਗਲੋਪਿ ਵਾਤਿ ਬਕਗਲਸਦਿਸੇਨ ਗਲੇਨ ਸਮਨ੍ਨਾਗਤੋ. ਅਤਿਰਸ੍ਸਗਲੋਪਿ ਵਾਤਿ ਅਨ੍ਤੋਪਵਿਟ੍ਠੇਨ ਵਿਯ ਗਲੇਨ ਸਮਨ੍ਨਾਗਤੋ. ਭਿਨ੍ਨਗਲੋ ਵਾ ਗਣ੍ਡਗਲੋਪਿ ਵਾਤਿ ਯੋਜਨਾ, ਭਿਨ੍ਨਗਲਟ੍ਠਿਕੋ ਵਾ ਗਣ੍ਡੇਨ ਸਮਨ੍ਨਾਗਤਗਲੋਪਿ ਵਾਤਿ ਅਤ੍ਥੋ.

੨੫੦੭. ਭਟ੍ਠਂਸਕੂਟੋ ¶ ਵਾਤਿ ਮਾਤੁਗਾਮਸ੍ਸ ਵਿਯ ਭਟ੍ਠੇਨ ਅਂਸਕੂਟੇਨ ਸਮਨ੍ਨਾਗਤੋ. ਭਿਨ੍ਨਪਿਟ੍ਠਿ ਵਾ ਭਿਨ੍ਨਉਰੋਪਿ ਵਾਤਿ ਯੋਜਨਾ, ਸੁਦੀਘਹਤ੍ਥੋ ਵਾ ਸੁਰਸ੍ਸਹਤ੍ਥੋ ਵਾਤਿ ਯੋਜਨਾ, ਅਤਿਦੀਘਹਤ੍ਥੋ ਵਾ ਅਤਿਰਸ੍ਸਹਤ੍ਥੋ ਵਾਤਿ ਅਤ੍ਥੋ. ਵਾ-ਸਦ੍ਦੇਨ ਅਹਤ੍ਥਏਕਹਤ੍ਥਾਨਂ ਗਹਣਂ. ਕਚ੍ਛੁਸਮਾਯੁਤੋ ਵਾ ਕਣ੍ਡੁਸਮਾਯੁਤੋ ਵਾਤਿ ਯੋਜਨਾ. ਵਾ-ਸਦ੍ਦੇਨ ‘‘ਦਦ੍ਦੁਗਤ੍ਤੋ ਵਾ ਗੋਧਾਗਤ੍ਤੋ ਵਾ’’ਤਿ ਇਮੇ ਦ੍ਵੇ ਸਙ੍ਗਣ੍ਹਾਤਿ. ਤਤ੍ਥ ਗੋਧਾਗਤ੍ਤੋ ਵਾਤਿ ਯਸ੍ਸ ਗੋਧਾਯ ਵਿਯ ਗਤ੍ਤਤੋ ਚੁਣ੍ਣਾਨਿ ਪਤਨ੍ਤਿ.

੨੫੦੮. ਮਹਾਨਿਸਦਮਂਸੋਤਿ ਇਮਸ੍ਸ ਅਤ੍ਥਪਦਂ ‘‘ਉਦ੍ਧਨਗ੍ਗੁਪਮਾਯੁਤੋ’’ਤਿ. ਯਥਾਹ – ‘‘ਮਹਾਆਨਿਸਦੋ ਵਾ ਉਦ੍ਧਨਕੂਟਸਦਿਸੇਹਿ ਆਨਿਸਦਮਂਸੇਹਿ ਅਚ੍ਚੁਗ੍ਗਤੇਹਿ ਸਮਨ੍ਨਾਗਤੋ’’ਤਿ (ਮਹਾਵ. ਅਟ੍ਠ. ੧੧੯). ਮਹਾਨਿਸਦਮਂਸੋ ਵਾਤਿ ਏਤ੍ਥ ਵਾ-ਸਦ੍ਦੇਨ ਭਟ੍ਠਕਟਿਕੋ ਸਙ੍ਗਹਿਤੋ. ਵਾਤਣ੍ਡਿਕੋਤਿ ਅਣ੍ਡਕੋਸੇਸੁ ਵੁਦ੍ਧਿਰੋਗੇਨ ਸਮਨ੍ਨਾਗਤੋ. ਮਹਾਊਰੂਤਿ ਸਰੀਰਸ੍ਸ ਅਨਨੁਰੂਪੇਹਿ ਮਹਨ੍ਤੇਹਿ ਸਤ੍ਤੀਹਿ ਸਮਨ੍ਨਾਗਤੋ. ਸਙ੍ਘਟ੍ਟਨਕਜਾਣੁਕੋਤਿ ਅਞ੍ਞਮਞ੍ਞਂ ਸਙ੍ਘਟ੍ਟੇਹਿ ਜਾਣੂਹਿ ਸਮਨ੍ਨਾਗਤੋ.

੨੫੦੯. ਭਿਨ੍ਨਜਾਣੂਤਿ ਯਸ੍ਸ ਏਕੋ ਵਾ ਦ੍ਵੇ ਵਾ ਜਾਣੂ ਭਿਨ੍ਨਾ ਹੋਨ੍ਤਿ. ਮਹਾਜਾਣੂਤਿ ਮਹਨ੍ਤੇਨ ¶ ਜਾਣੁਨਾ ਸਮਨ੍ਨਾਗਤੋ. ਦੀਘਜਙ੍ਘੋਤਿ ਯਟ੍ਠਿਸਦਿਸਜਙ੍ਘੋ. ਵਿਕਟੋ ਵਾਤਿ ਤਿਰਿਯਂ ਗਮਨਪਾਦੇਹਿ ਸਮਨ੍ਨਾਗਤੋ, ਯਸ੍ਸ ਚਙ੍ਕਮਤੋ ਜਾਣੁਕਾ ਬਹਿ ਨਿਗ੍ਗਚ੍ਛਨ੍ਤਿ. ਪਣ੍ਹੋ ਵਾਤਿ ਪਚ੍ਛਤੋ ਪਰਿਵਤ੍ਤਪਾਦੇਹਿ ਸਮਨ੍ਨਾਗਤੋ, ਯਸ੍ਸ ਚਙ੍ਕਮਤੋ ਜਾਣੁਕਾ ਅਨ੍ਤੋ ਪਵਿਸਨ੍ਤਿ. ‘‘ਪਨ੍ਤੋ’’ਤਿ ਚ ‘‘ਸਣ੍ਹੋ’’ਤਿ ਚ ਏਤਸ੍ਸੇਵ ਵੇਵਚਨਾਨਿ. ਉਬ੍ਬਦ੍ਧਪਿਣ੍ਡਿਕੋਤਿ ਹੇਟ੍ਠਾ ਓਰੁਲ਼੍ਹਾਹਿ ਵਾ ਉਪਰਿ ਆਰੁਲ਼੍ਹਾਹਿ ਵਾ ਮਹਤੀਹਿ ਜਙ੍ਘਪਿਣ੍ਡਿਕਾਹਿ ਸਮਨ੍ਨਾਗਤੋ.

੨੫੧੦. ਯਟ੍ਠਿਜਙ੍ਘੋਤਿ ¶ ਯਟ੍ਠਿਸਦਿਸਾਯ ਜਙ੍ਘਾਯ ਸਮਨ੍ਨਾਗਤੋ. ਮਹਾਜਙ੍ਘੋਤਿ ਸਰੀਰਸ੍ਸ ਅਨਨੁਰੂਪਾਯ ਮਹਤਿਯਾ ਜਙ੍ਘਾਯ ਸਮਨ੍ਨਾਗਤੋ. ਮਹਾਪਾਦੋਪਿ ਵਾਤਿ ਸਰੀਰਸ੍ਸ ਅਨਨੁਰੂਪੇਹਿ ਮਹਨ੍ਤੇਹਿ ਪਾਦੇਹਿ ਸਮਨ੍ਨਾਗਤੋ. ਅਪਿ-ਸਦ੍ਦੇਨ ਥੂਲਜਙ੍ਘਪਿਣ੍ਡਿਕੋ ਸਙ੍ਗਹਿਤੋ, ਭਤ੍ਤਪੁਟਸਦਿਸਾਯ ਥੂਲਾਯ ਜਙ੍ਘਪਿਣ੍ਡਿਯਾ ਸਮਨ੍ਨਾਗਤੋਤਿ ਅਤ੍ਥੋ. ਪਿਟ੍ਠਿਕਪਾਦੋ ਵਾਤਿ ਪਾਦਵੇਮਜ੍ਝਤੋ ਉਟ੍ਠਿਤਜਙ੍ਘੋ. ਮਹਾਪਣ੍ਹਿਪਿ ਵਾਤਿ ਅਨਨੁਰੂਪੇਹਿ ਅਤਿਮਹਨ੍ਤੇਹਿ ਪਣ੍ਹੀਹਿ ਸਮਨ੍ਨਾਗਤੋ.

੨੫੧੧. ਵਙ੍ਕਪਾਦੋਤਿ ਅਨ੍ਤੋ ਵਾ ਬਹਿ ਵਾ ਪਰਿਵਤ੍ਤਪਾਦਵਸੇਨ ਦੁਵਿਧੋ ਵਙ੍ਕਪਾਦੋ. ਗਣ੍ਠਿਕਙ੍ਗੁਲਿਕੋਤਿ ਸਿਙ੍ਗਿਵੇਰਫਣਸਦਿਸਾਹਿ ਅਙ੍ਗੁਲੀਹਿ ਸਮਨ੍ਨਾਗਤੋ. ‘‘ਅਨ੍ਧਨਖੋ ਵਾਪੀ’’ਤਿ ਏਤਸ੍ਸ ਅਤ੍ਥਪਦਂ ‘‘ਕਾਲ਼ਪੂਤਿਨਖੋਪਿ ਚਾ’’ਤਿ. ਯਥਾਹ – ‘‘ਅਨ੍ਧਨਖੋ ਵਾ ਕਾਲ਼ਵਣ੍ਣੇਹਿ ਪੂਤਿਨਖੇਹਿ ਸਮਨ੍ਨਾਗਤੋ’’ਤਿ (ਮਹਾਵ. ਅਟ੍ਠ. ੧੧੯).

੨੫੧੨. ਇਚ੍ਚੇਵਨ੍ਤਿ ਯਥਾਵੁਤ੍ਤਵਚਨੀਯਨਿਦਸ੍ਸਨਤ੍ਥੋਯਂ ਨਿਪਾਤਸਮੁਦਾਯੋ. ਅਙ੍ਗਵੇਕਲ੍ਲਤਾਯ ਬਹੁਵਿਧਤ੍ਤਾ ਅਨਵਸੇਸਂ ਵੇਕਲ੍ਲਪ੍ਪਕਾਰਂ ਸਙ੍ਗਣ੍ਹਿਤੁਮਾਹ ‘‘ਇਚ੍ਚੇਵਮਾਦਿਕ’’ਨ੍ਤਿ.

ਪਰਿਸਦੂਸਕਕਥਾਵਣ੍ਣਨਾ.

੨੫੧੪. ਪਤ੍ਤਚੀਵਰਨ੍ਤਿ ਏਤ੍ਥ ‘‘ਸਾਮਣੇਰਸ੍ਸਾ’’ਤਿ ਅਧਿਕਾਰਤੋ ਲਬ੍ਭਤਿ. ਅਨ੍ਤੋ ਨਿਕ੍ਖਿਪਤੋਤਿ ਓਵਰਕਾਦੀਨਂ ਅਨ੍ਤੋ ਨਿਕ੍ਖਿਪਨ੍ਤਸ੍ਸ. ਸਬ੍ਬਪਯੋਗੇਸੂਤਿ ਪਤ੍ਤਚੀਵਰਸ੍ਸ ਆਮਸਨਾਦਿਸਬ੍ਬਪਯੋਗੇਸੁ.

੨੫੧੫-੬. ਦਣ੍ਡਕਮ੍ਮਂ ਕਤ੍ਵਾਤਿ ਦਣ੍ਡਕਮ੍ਮਂ ਯੋਜੇਤ੍ਵਾ. ਦਣ੍ਡੇਨ੍ਤਿ ਵਿਨੇਨ੍ਤਿ ਏਤੇਨਾਤਿ ਦਣ੍ਡੋ, ਸੋਯੇਵ ਕਤ੍ਤਬ੍ਬਤ੍ਤਾ ਕਮ੍ਮਨ੍ਤਿ ¶ ਦਣ੍ਡਕਮ੍ਮਂ, ਆਵਰਣਾਦਿ. ਅਨਾਚਾਰਸ੍ਸ ਦੁਬ੍ਬਚਸਾਮਣੇਰਸ੍ਸ ਕੇਵਲਂ ¶ ਹਿਤਕਾਮੇਨ ਭਿਕ੍ਖੁਨਾ ਦਣ੍ਡਕਮ੍ਮਂ ਕਤ੍ਵਾ ਦਣ੍ਡਕਮ੍ਮਂ ਯੋਜੇਤ੍ਵਾ ਯਾਗੁਂ ਵਾ ਭਤ੍ਤਂ ਵਾ ਵਾ-ਸਦ੍ਦੇਨ ਪਤ੍ਤਂ ਵਾ ਚੀਵਰਂ ਵਾ ਦਸ੍ਸੇਤ੍ਵਾ ‘‘ਦਣ੍ਡਕਮ੍ਮੇ ਆਹਟੇ ਤ੍ਵਂ ਇਦਂ ਲਚ੍ਛਸਿ’’ ਇਤਿ ਭਾਸਿਤੁਂ ਵਟ੍ਟਤੀਤਿ ਯੋਜਨਾ. ਕਿਰਾਤਿ ਪਦਪੂਰਣਤ੍ਥੇ ਨਿਪਾਤੋ.

੨੫੧੭. ਧਮ੍ਮਸਙ੍ਗਾਹਕਤ੍ਥੇਰੇਹਿ ਠਪਿਤਦਣ੍ਡਕਮ੍ਮਂ ਦਸ੍ਸੇਤੁਮਾਹ ‘‘ਅਪਰਾਧਾਨੁਰੂਪੇਨਾ’’ਤਿਆਦਿ. ਤਂ ਅਪਰਾਧਾਨੁਰੂਪਦਣ੍ਡਕਮ੍ਮਂ ਨਾਮ ਵਾਲਿਕਾਸਲਿਲਾਦੀਨਂ ਆਹਰਾਪਨਮੇਵਾਤਿ ਯੋਜੇਤਬ੍ਬਂ. ਆਦਿ-ਸਦ੍ਦੇਨ ਦਾਰੁਆਦੀਨਂ ਆਹਰਾਪਨਂ ਗਣ੍ਹਾਤਿ. ਤਞ੍ਚ ਖੋ ‘‘ਓਰਮਿਸ੍ਸਤੀ’’ਤਿ ਅਨੁਕਮ੍ਪਾਯ, ਨ ‘‘ਨਸ੍ਸਿਸ੍ਸਤਿ ਵਿਬ੍ਭਮਿਸ੍ਸਤੀ’’ਤਿਆਦਿਨਯਪ੍ਪਵਤ੍ਤੇਨ ਪਾਪਜ੍ਝਾਸਯੇਨ.

੨੫੧੮-੯. ਅਕਤ੍ਤਬ੍ਬਂ ਦਣ੍ਡਕਮ੍ਮਂ ਦਸ੍ਸੇਤੁਮਾਹ ‘‘ਸੀਸੇ ਵਾ’’ਤਿਆਦਿ. ਸੀਸੇ ਵਾਤਿ ਏਤ੍ਥ ‘‘ਸਾਮਣੇਰਸ੍ਸਾ’’ਤਿ ਅਧਿਕਾਰਤੋ ਲਬ੍ਭਤਿ. ਪਾਸਾਣਾਦੀਨੀਤਿ ਏਤ੍ਥ ਆਦਿ-ਸਦ੍ਦੇਨ ਇਟ੍ਠਕਾਦੀਨਂ ਗਹਣਂ. ਸਾਮਣੇਰਂ ਉਣ੍ਹੇ ਪਾਸਾਣੇ ਨਿਪਜ੍ਜਾਪੇਤੁਂ ਵਾ ਉਣ੍ਹਾਯ ਭੂਮਿਯਾ ਨਿਪਜ੍ਜਾਪੇਤੁਂ ਵਾ ਉਦਕਂ ਪਵੇਸੇਤੁਂ ਵਾ ਭਿਕ੍ਖੁਨੋ ਨ ਵਟ੍ਟਤੀਤਿ ਯੋਜਨਾ.

ਭਗਵਤਾ ਅਨੁਞ੍ਞਾਤਦਣ੍ਡਕਮ੍ਮਂ ਦਸ੍ਸੇਤੁਮਾਹ ‘‘ਇਧਾ’’ਤਿਆਦਿ. ਇਧਾਤਿ ਇਮਸ੍ਮਿਂ ਦਣ੍ਡਕਮ੍ਮਾਧਿਕਾਰੇ. ਆਵਰਣਮਤ੍ਤਨ੍ਤਿ ‘‘ਮਾ ਇਧ ਪਾਵਿਸੀ’’ਤਿ ਨਿਵਾਰਣਮਤ੍ਤਂ. ਪਕਾਸਿਤਨ੍ਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਯਤ੍ਥ ਵਾ ਵਸਤਿ, ਯਤ੍ਥ ਵਾ ਪਟਿਕ੍ਕਮਤਿ, ਤਤ੍ਥ ਆਵਰਣਂ ਕਾਤੁ’’ਨ੍ਤਿ (ਮਹਾਵ. ੧੦੭) ਭਾਸਿਤਂ.

‘‘ਯਤ੍ਥ ਵਾ ਵਸਤਿ, ਯਤ੍ਥ ਵਾ ਪਟਿਕ੍ਕਮਤੀਤਿ ਯਤ੍ਥ ਵਸਤਿ ਵਾ ਪਵਿਸਤਿ ਵਾ, ਉਭਯੇਨਾਪਿ ਅਤ੍ਤਨੋ ਪਰਿਵੇਣਞ੍ਚ ਵਸ੍ਸਗ੍ਗੇਨ ਪਤ੍ਤਸੇਨਾਸਨਞ੍ਚ ਵੁਤ੍ਤ’’ਨ੍ਤਿ (ਮਹਾਵ. ਅਟ੍ਠ. ੧੦੭) ਅਟ੍ਠਕਥਾਯ ਵੁਤ੍ਤਤ੍ਤਾ ਯਾਵ ਯੋਜਿਤਂ ¶ ਦਣ੍ਡਕਮ੍ਮਂ ਕਰੋਨ੍ਤਿ, ਤਾਵ ਅਤ੍ਤਨੋ ਪੁਗ੍ਗਲਿਕਪਰਿਵੇਣਂ ਵਾ ਵਸ੍ਸਗ੍ਗੇਨ ਪਤ੍ਤਸੇਨਾਸਨਂ ਵਾ ਪਵਿਸਿਤੁਂ ਅਦਤ੍ਵਾ ਨਿਵਾਰਣਂ ਆਵਰਣਂ ਨਾਮ. ਅਟ੍ਠਕਥਾਯਂ ‘‘ਅਤ੍ਤਨੋ’’ਤਿ ਵਚਨਂ ਯੇ ਆਵਰਣਂ ਕਰੋਨ੍ਤਿ, ਤੇ ਆਚਰਿਯੁਪਜ੍ਝਾਯੇ ਸਨ੍ਧਾਯ ਵੁਤ੍ਤਨ੍ਤਿ ਵਿਞ੍ਞਾਯਤਿ. ਕੇਚਿ ਪਨੇਤ੍ਥ ‘‘ਅਤ੍ਤਨੋ’’ਤਿ ਇਦਂ ਯਸ੍ਸ ਆਵਰਣਂ ਕਰੋਨ੍ਤਿ, ਤਂ ਸਨ੍ਧਾਯ ਵੁਤ੍ਤਨ੍ਤਿ ਗਹੇਤ੍ਵਾ ਤਤ੍ਥ ਵਿਨਿਚ੍ਛਯਂ ਵਦਨ੍ਤਿ. ਕੇਚਿ ਉਭਯਥਾਪਿ ਅਤ੍ਥਂ ਗਹੇਤ੍ਵਾ ਉਭਯਤ੍ਥਾਪਿ ਆਵਰਣਂ ਕਾਤਬ੍ਬਨ੍ਤਿ ਵਦਨ੍ਤਿ. ਵੀਮਂਸਿਤ੍ਵਾ ਯਮੇਤ੍ਥ ਯੁਤ੍ਤਤਰਂ, ਤਂ ਗਹੇਤਬ੍ਬਂ.

ਨਿਵਾਰਣਕਥਾਵਣ੍ਣਨਾ.

੨੫੨੦. ਪਕ੍ਖੋ ¶ ਚ ਓਪਕ੍ਕਮਿਕੋ ਚ ਆਸਿਤ੍ਤੋ ਚਾਤਿ ਵਿਗ੍ਗਹੋ. ਏਤ੍ਥ ਚ ‘‘ਅਨੁਪੋਸਥੇ ਉਪੋਸਥਂ ਕਰੋਤੀ’’ਤਿਆਦੀਸੁ ਯਥਾ ਉਪੋਸਥਦਿਨੇ ਕਤ੍ਤਬ੍ਬਕਮ੍ਮਂ ‘‘ਉਪੋਸਥੋ’’ਤਿ ਵੁਚ੍ਚਤਿ, ਤਥਾ ਮਾਸਸ੍ਸ ਪਕ੍ਖੇ ਪਣ੍ਡਕਭਾਵਮਾਪਜ੍ਜਨ੍ਤੋ ‘‘ਪਕ੍ਖੋ’’ਤਿ ਵੁਤ੍ਤੋ. ਅਥ ਵਾ ਪਕ੍ਖਪਣ੍ਡਕੋ ਪਕ੍ਖੋ ਉਤ੍ਤਰਪਦਲੋਪੇਨ ਯਥਾ ‘‘ਭੀਮਸੇਨੋ ਭੀਮੋ’’ਤਿ. ਇਦਞ੍ਚ ਪਾਪਾਨੁਭਾਵੇਨ ਕਣ੍ਹਪਕ੍ਖੇਯੇਵ ਪਣ੍ਡਕਭਾਵਮਾਪਜ੍ਜਨ੍ਤਸ੍ਸ ਅਧਿਵਚਨਂ. ਯਥਾਹ ‘‘ਅਕੁਸਲਵਿਪਾਕਾਨੁਭਾਵੇਨ ਕਾਲ਼ਪਕ੍ਖੇ ਕਾਲ਼ਪਕ੍ਖੇ ਪਣ੍ਡਕੋ ਹੋਤਿ, ਜੁਣ੍ਹਪਕ੍ਖੇ ਪਨਸ੍ਸ ਪਰਿਲ਼ਾਹੋ ਵੂਪਸਮ੍ਮਤਿ, ਅਯਂ ਪਕ੍ਖਪਣ੍ਡਕੋ’’ਤਿ (ਮਹਾਵ. ਅਟ੍ਠ. ੧੦੯).

ਯਸ੍ਸ ਉਪਕ੍ਕਮੇਨ ਬੀਜਾਨਿ ਅਪਨੀਤਾਨਿ, ਅਯਂ ਓਪਕ੍ਕਮਿਕਪਣ੍ਡਕੋ. ਯਸ੍ਸ ਪਰੇਸਂ ਅਙ੍ਗਜਾਤਂ ਮੁਖੇਨ ਗਹੇਤ੍ਵਾ ਅਸੁਚਿਨਾ ਆਸਿਤ੍ਤਸ੍ਸ ਪਰਿਲ਼ਾਹੋ ਵੂਪਸਮ੍ਮਤਿ, ਅਯਂ ਆਸਿਤ੍ਤਪਣ੍ਡਕੋ. ਉਸੂਯਕੋਤਿ ਯਸ੍ਸ ਪਰੇਸਂ ਅਜ੍ਝਾਚਾਰਂ ਪਸ੍ਸਤੋ ਉਸੂਯਾਯ ਉਪ੍ਪਨ੍ਨਾਯ ਪਰਿਲ਼ਾਹੋ ਵੂਪਸਮ੍ਮਤਿ, ਅਯਂ ਉਸੂਯਪਣ੍ਡਕੋ. ਯੋ ਪਟਿਸਨ੍ਧਿਯਂਯੇਵ ਅਭਾਵਕੋ ਉਪ੍ਪਨ੍ਨੋ, ਅਯਂ ਨਪੁਂਸਕਪਣ੍ਡਕੋ.

੨੫੨੧. ਤੇਸੂਤਿ ¶ ਤੇਸੁ ਪਞ੍ਚਸੁ ਪਣ੍ਡਕੇਸੁ. ‘‘ਪਕ੍ਖਪਣ੍ਡਕਸ੍ਸ ਯਸ੍ਮਿਂਪਕ੍ਖੇ ਪਣ੍ਡਕੋ ਹੋਤਿ, ਤਸ੍ਮਿਂਯੇਵਸ੍ਸ ਪਕ੍ਖੇ ਪਬ੍ਬਜ੍ਜਾ ਵਾਰਿਤਾ’’ਤਿ (ਮਹਾਵ. ਅਟ੍ਠ. ੧੦੯) ਕੁਰੁਨ੍ਦਿਯਂ ਵੁਤ੍ਤਤ੍ਤਾ ‘‘ਤਿਣ੍ਣਂ ਨਿਵਾਰਿਤਾ’’ਤਿ ਇਦਂ ਤਸ੍ਸ ਪਣ੍ਡਕਸ੍ਸ ਪਣ੍ਡਕਪਕ੍ਖਂ ਸਨ੍ਧਾਯ ਵੁਤ੍ਤਨ੍ਤਿ ਗਹੇਤਬ੍ਬਂ.

੨੫੨੨. ‘‘ਨਾਸੇਤਬ੍ਬੋ’’ਤਿ ਇਦਂ ਲਿਙ੍ਗਨਾਸਨਂ ਸਨ੍ਧਾਯ ਵੁਤ੍ਤਂ. ਯਥਾਹ ‘‘ਸੋਪਿ ਲਿਙ੍ਗਨਾਸਨੇਨੇਵ ਨਾਸੇਤਬ੍ਬੋ’’ਤਿ (ਮਹਾਵ. ਅਟ੍ਠ. ੧੦੯). ਏਸ ਨਯੋ ਉਪਰਿਪਿ ਈਦਿਸੇਸੁ ਠਾਨੇਸੁ.

ਪਣ੍ਡਕਕਥਾਵਣ੍ਣਨਾ.

੨੫੨੩. ਥੇਨੇਤੀਤਿ ਥੇਨੋ, ਲਿਙ੍ਗਸ੍ਸ ਪਬ੍ਬਜਿਤਵੇਸਸ੍ਸ ਥੇਨੋ ਲਿਙ੍ਗਥੇਨੋ. ਸਂਵਾਸਸ੍ਸ ਭਿਕ੍ਖੁਵਸ੍ਸਗਣਨਾਦਿਕਸ੍ਸ ਥੇਨੋ ਸਂਵਾਸਥੇਨੋ. ਤਦੁਭਯਸ੍ਸ ਚਾਤਿ ਤਸ੍ਸ ਲਿਙ੍ਗਸ੍ਸ, ਸਂਵਾਸਸ੍ਸ ਚ ਉਭਯਸ੍ਸ ਥੇਨੋਤਿ ਸਮ੍ਬਨ੍ਧੋ. ਏਸ ਤਿਵਿਧੋਪਿ ਥੇਯ੍ਯਸਂਵਾਸਕੋ ਨਾਮ ਪਵੁਚ੍ਚਤੀਤਿ ਯੋਜਨਾ.

੨੫੨੪-੬. ਤਤ੍ਥ ਤੇਸੁ ਤੀਸੁ ਥੇਯ੍ਯਸਂਵਾਸਕੇਸੁ ਯੋ ਸਯਮੇਵ ਪਬ੍ਬਜਿਤ੍ਵਾ ਭਿਕ੍ਖੁਵਸ੍ਸਾਨਿ ਨ ਗਣ੍ਹਤਿ, ਯਥਾਵੁਡ੍ਢਂ ਵਨ੍ਦਨਮ੍ਪਿ ਨੇਵ ਗਣ੍ਹਤਿ, ਅਪਿ-ਸਦ੍ਦੇਨ ਆਸਨੇਨ ਨੇਵ ਪਟਿਬਾਹਤਿ ਉਪੋਸਥਪਵਾਰਣਾਦੀਸੁ ¶ ਨੇਵ ਸਨ੍ਦਿਸ੍ਸਤੀਤਿ ਸਙ੍ਗਣ੍ਹਨਤੋ ਤਦੁਭਯਮ੍ਪਿ ਨ ਕਰੋਤਿ, ਅਯਂ ਲਿਙ੍ਗਮਤ੍ਤਸ੍ਸ ਪਬ੍ਬਜਿਤਵੇਸਮਤ੍ਤਸ੍ਸ ਥੇਨਤੋ ਚੋਰਿਕਾਯ ਗਹਣਤੋ ਲਿਙ੍ਗਤ੍ਥੇਨੋ ਸਿਯਾਤਿ ਯੋਜਨਾ.

ਯੋ ਚ ਪਬ੍ਬਜਿਤੋ ਹੁਤ੍ਵਾ ਭਿਕ੍ਖੁਵਸ੍ਸਾਨਿ ਗਣ੍ਹਤਿ, ਸੋ ਯਥਾਵੁਡ੍ਢਵਨ੍ਦਨਾਦਿਕਂ ਸਂਵਾਸਂ ਸਾਦਿਯਨ੍ਤੋਵ ਸਂਵਾਸਤ੍ਥੇਨਕੋ ਮਤੋਤਿ ਯੋਜਨਾ. ਯਥਾਹ – ‘‘ਭਿਕ੍ਖੁਵਸ੍ਸਗਣਨਾਦਿਕੋ ਹਿ ਸਬ੍ਬੋਪਿ ਕਿਰਿਯਭੇਦੋ ਇਮਸ੍ਮਿਂ ਅਤ੍ਥੇ ‘ਸਂਵਾਸੋ’ਤਿ ਵੇਦਿਤਬ੍ਬੋ’’ਤਿ (ਮਹਾਵ. ਅਟ੍ਠ. ੧੧੦).

ਵੁਤ੍ਤਨਯੋਯੇਵਾਤਿ ¶ ਉਭਿਨ੍ਨਂ ਪਚ੍ਚੇਕਂ ਵੁਤ੍ਤਲਕ੍ਖਣਮੇਵ ਏਤਸ੍ਸ ਲਕ੍ਖਣਨ੍ਤਿ ਕਤ੍ਵਾ ਵੁਤ੍ਤਂ. ਅਯਂ ਤਿਵਿਧੋਪਿ ਥੇਯ੍ਯਸਂਵਾਸਕੋ ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ, ਪੁਨ ਪਬ੍ਬਜ੍ਜਂ ਯਾਚਨ੍ਤੋਪਿ ਨ ਪਬ੍ਬਾਜੇਤਬ੍ਬੋ. ਬ੍ਯਤਿਰੇਕਮੁਖੇਨ ਥੇਯ੍ਯਸਂਵਾਸਲਕ੍ਖਣਂ ਨਿਯਮੇਤੁਂ ਅਟ੍ਠਕਥਾਯ (ਮਹਾਵ. ਅਟ੍ਠ. ੧੧੦) ਵੁਤ੍ਤਗਾਥਾਦ੍ਵਯਂ ਉਦਾਹਰਨ੍ਤੋ ਆਹ ‘‘ਯਥਾਹ ਚਾ’’ਤਿ. ਯਥਾ ਅਟ੍ਠਕਥਾਚਰਿਯੋ ਰਾਜਦੁਬ੍ਭਿਕ੍ਖਾਦਿਗਾਥਾਦ੍ਵਯਮਾਹ, ਤਥਾਯਮਤ੍ਥੋ ਬ੍ਯਤਿਰੇਕਤੋ ਵੇਦਿਤਬ੍ਬੋਤਿ ਅਧਿਪ੍ਪਾਯੋ.

੨੫੨੭-੮. ਰਾਜਦੁਬ੍ਭਿਕ੍ਖਕਨ੍ਤਾਰ-ਰੋਗਵੇਰਿਭਯੇਹਿ ਵਾਤਿ ਏਤ੍ਥ ਭਯ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ ‘‘ਰਾਜਭਯੇਨ ਦੁਬ੍ਭਿਕ੍ਖਭਯੇਨਾ’’ਤਿਆਦਿਨਾ. ਚੀਵਰਾਹਰਣਤ੍ਥਂ ਵਾਤਿ ਅਤ੍ਤਨਾ ਪਰਿਚ੍ਚਤ੍ਤਚੀਵਰਂ ਪੁਨ ਵਿਹਾਰਂ ਆਹਰਣਤ੍ਥਾਯ. ਇਧ ਇਮਸ੍ਮਿਂ ਸਾਸਨੇ. ਸਂਵਾਸਂ ਨਾਧਿਵਾਸੇਤਿ, ਯਾਵ ਸੋ ਸੁਦ੍ਧਮਾਨਸੋਤਿ ਰਾਜਭਯਾਦੀਹਿ ਗਹਿਤਲਿਙ੍ਗਤਾਯ ਸੋ ਸੁਦ੍ਧਮਾਨਸੋ ਯਾਵ ਸਂਵਾਸਂ ਨਾਧਿਵਾਸੇਤੀਤਿ ਅਤ੍ਥੋ.

ਯੋ ਹਿ ਰਾਜਭਯਾਦੀਹਿ ਵਿਨਾ ਕੇਵਲਂ ਭਿਕ੍ਖੂ ਵਞ੍ਚੇਤ੍ਵਾ ਤੇਹਿ ਸਦ੍ਧਿਂ ਵਸਿਤੁਕਾਮਤਾਯ ਲਿਙ੍ਗਂ ਗਣ੍ਹਾਤਿ, ਸੋ ਅਸੁਦ੍ਧਚਿਤ੍ਤਤਾਯ ਲਿਙ੍ਗਗ੍ਗਹਣੇਨੇਵ ਥੇਯ੍ਯਸਂਵਾਸਕੋ ਨਾਮ ਹੋਤਿ. ਅਯਂ ਪਨ ਤਾਦਿਸੇਨ ਅਸੁਦ੍ਧਚਿਤ੍ਤੇਨ ਭਿਕ੍ਖੂ ਵਞ੍ਚੇਤੁਕਾਮਤਾਯ ਅਭਾਵਤੋ ਯਾਵ ਸਂਵਾਸਂ ਨਾਧਿਵਾਸੇਤਿ, ਤਾਵ ਥੇਯ੍ਯਸਂਵਾਸਕੋ ਨਾਮ ਨ ਹੋਤਿ. ਤੇਨੇਵ ‘‘ਰਾਜਭਯਾਦੀਹਿ ਗਹਿਤਲਿਙ੍ਗਾਨਂ ‘ਗਿਹੀ ਮਂ ਸਮਣੋਤਿ ਜਾਨਨ੍ਤੂ’ਤਿ ਵਞ੍ਚਨਾਚਿਤ੍ਤੇ ਸਤਿਪਿ ਭਿਕ੍ਖੂਨਂ ਵਞ੍ਚੇਤੁਕਾਮਤਾਯ ਅਭਾਵਾ ਦੋਸੋ ਨ ਜਾਤੋ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ.

ਕੇਚਿ ¶ ਪਨ ‘‘ਵੂਪਸਨ੍ਤਭਯਤਾ ਇਧ ਸੁਦ੍ਧਚਿਤ੍ਤਤਾ’’ਤਿ ਵਦਨ੍ਤਿ, ਏਵਞ੍ਚ ਸਤਿ ਸੋ ਵੂਪਸਨ੍ਤਭਯੋ ਯਾਵ ਸਂਵਾਸਂ ਨਾਧਿਵਾਸੇਤਿ, ਤਾਵ ਥੇਯ੍ਯਸਂਵਾਸਕੋ ਨਾਮ ਨ ਹੋਤੀਤਿ ਅਯਮਤ੍ਥੋ ਵਿਞ੍ਞਾਯਤਿ. ਇਮਸ੍ਮਿਞ੍ਚ ਅਤ੍ਥੇ ਵਿਞ੍ਞਾਯਮਾਨੇ ਅਵੂਪਸਨ੍ਤਭਯਸ੍ਸ ਸਂਵਾਸਸਾਦਿਯਨੇਪਿ ਥੇਯ੍ਯਸਂਵਾਸਕਤਾ ¶ ਨ ਹੋਤੀਤਿ ਆਪਜ੍ਜੇਯ੍ਯ, ਨ ਚ ਅਟ੍ਠਕਥਾਯਂ ਅਵੂਪਸਨ੍ਤਭਯਸ੍ਸ ਸਂਵਾਸਸਾਦਿਯਨੇ ਅਥੇਯ੍ਯਸਂਵਾਸਕਤਾ ਦਸ੍ਸਿਤਾ. ‘‘ਸਬ੍ਬਪਾਸਣ੍ਡਿਯਭਤ੍ਤਾਨਿ ਭੁਞ੍ਜਨ੍ਤੋ’’ਤਿ ਚ ਇਮਿਨਾ ਅਵੂਪਸਨ੍ਤਭਯੇਨਾਪਿ ਸਂਵਾਸਂ ਅਸਾਦਿਯਨ੍ਤੇਨੇਵ ਵਸਿਤਬ੍ਬਨ੍ਤਿ ਦੀਪੇਤਿ. ਤੇਨੇਵ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ ‘‘ਯਸ੍ਮਾ ਵਿਹਾਰਂ ਆਗਨ੍ਤ੍ਵਾ ਸਙ੍ਘਿਕਂ ਗਣ੍ਹਨ੍ਤਸ੍ਸ ਸਂਵਾਸਂ ਪਰਿਹਰਿਤੁਂ ਦੁਕ੍ਕਰਂ, ਤਸ੍ਮਾ ‘ਸਬ੍ਬਪਾਸਣ੍ਡਿਯਭਤ੍ਤਾਨਿ ਭੁਞ੍ਜਨ੍ਤੋ’ਤਿ ਇਦਂ ਵੁਤ੍ਤ’’ਨ੍ਤਿ. ਤਸ੍ਮਾ ਰਾਜਭਯਾਦੀਹਿ ਗਹਿਤਲਿਙ੍ਗਤਾ ਚੇਤ੍ਥ ਸੁਦ੍ਧਚਿਤ੍ਤਤਾਤਿ ਗਹੇਤਬ੍ਬਂ.

ਤਾਵ ਏਸ ਥੇਯ੍ਯਸਂਵਾਸਕੋ ਨਾਮ ਨ ਵੁਚ੍ਚਤੀਤਿ ਯੋਜਨਾ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ‘‘ਤਤ੍ਰਾਯਂ ਵਿਤ੍ਥਾਰਨਯੋ’’ਤਿ ਅਟ੍ਠਕਥਾਯਂ (ਮਹਾਵ. ਅਟ੍ਠ. ੧੧੦) ਆਗਤਨਯੇਨ ਵੇਦਿਤਬ੍ਬੋ.

ਥੇਯ੍ਯਸਂਵਾਸਕਕਥਾਵਣ੍ਣਨਾ.

੨੫੨੯-੩੦. ਯੋ ਉਪਸਮ੍ਪਨ੍ਨੋ ਭਿਕ੍ਖੁ ‘‘ਅਹਂ ਤਿਤ੍ਥਿਯੋ ਭਵਿਸ੍ਸ’’ਨ੍ਤਿ ਸਲਿਙ੍ਗੇਨੇਵ ਅਤ੍ਤਨੋ ਭਿਕ੍ਖੁਵੇਸੇਨੇਵ ਤਿਤ੍ਥਿਯਾਨਂ ਉਪਸ੍ਸਯਂ ਯਾਤਿ ਚੇਤਿ ਸਮ੍ਬਨ੍ਧੋ. ਤਿਤ੍ਥਿਯੇਸੁ ਪਕ੍ਕਨ੍ਤਕੋ ਪਵਿਟ੍ਠੋ ਤਿਤ੍ਥਿਯਪਕ੍ਕਨ੍ਤਕੋ. ਤੇਸਂ ਲਿਙ੍ਗੇ ਨਿਸ੍ਸਿਤੇਤਿ ਤੇਸਂ ਤਿਤ੍ਥਿਯਾਨਂ ਵੇਸੇ ਗਹਿਤੇ.

੨੫੩੧. ‘‘ਅਹਂ ਤਿਤ੍ਥਿਯੋ ਭਵਿਸ੍ਸ’’ਨ੍ਤਿ ਕੁਸਚੀਰਾਦਿਕਂ ਯੋ ਸਯਮੇਵ ਨਿਵਾਸੇਤਿ, ਸੋਪਿ ਪਕ੍ਕਨ੍ਤਕੋ ਤਿਤ੍ਥਿਯਪਕ੍ਕਨ੍ਤਕੋ ਸਿਯਾਤਿ ਯੋਜਨਾ.

੨੫੩੨-੪. ਨਗ੍ਗੋ ¶ ਤੇਸਂ ਆਜੀਵਕਾਦੀਨਂ ਉਪਸ੍ਸਯਂ ਗਨ੍ਤ੍ਵਾਤਿ ਯੋਜਨਾ. ਕੇਸੇ ਲੁਞ੍ਚਾਪੇਤੀਤਿ ਅਤ੍ਤਨੋ ਕੇਸੇ ਲੁਞ੍ਚਾਪੇਤਿ. ਤੇਸਂ ਵਤਾਨਿ ਆਦਿਯਤਿ ਵਾਤਿ ਯੋਜਨਾ. ਵਤਾਨਿ ਆਦਿਯਤੀਤਿ ਉਕ੍ਕੁਟਿਕਪ੍ਪਧਾਨਾਦੀਨਿ ਵਾ ਵਤਾਨਿ ਆਦਿਯਤਿ. ਤੇਸਂ ਤਿਤ੍ਥਿਯਾਨਂ ਮੋਰਪਿਞ੍ਛਾਦਿਕਂ ਲਿਙ੍ਗਂ ਸਞ੍ਞਾਣਂ ਸਚੇ ਗਣ੍ਹਾਤਿ ਵਾ ਤੇਸਂ ਪਬ੍ਬਜ੍ਜਂ, ਲਦ੍ਧਿਮੇਵ ਵਾ ਸਾਰਤੋ ਵਾ ਏਤਿ ਉਪਗਚ੍ਛਤਿ ਵਾਤਿ ਯੋਜਨਾ. ‘‘ਅਯਂ ਪਬ੍ਬਜ੍ਜਾ ਸੇਟ੍ਠਾਤਿ ਸੇਟ੍ਠਭਾਵਂ ਵਾ ਉਪਗਚ੍ਛਤੀ’’ਤਿ (ਮਹਾਵ. ਅਟ੍ਠ. ੧੧੦ ਤਿਤ੍ਥਿਯਪਕ੍ਕਨ੍ਤਕਕਥਾ) ਅਟ੍ਠਕਥਾਯਂ ਵੁਤ੍ਤਂ. ਏਸ ਤਿਤ੍ਥਿਯਪਕ੍ਕਨ੍ਤਕੋ ਹੋਤਿ ਏਵ, ਨ ਪਨ ਵਿਮੁਚ੍ਚਤਿ ਤਿਤ੍ਥਿਯਪਕ੍ਕਨ੍ਤਭਾਵਤੋ. ਨਗ੍ਗਸ੍ਸ ਗਚ੍ਛਤੋਤਿ ‘‘ਆਜੀਵਕੋ ਭਵਿਸ੍ਸ’’ਨ੍ਤਿ ਕਾਸਾਯਾਦੀਨਿ ਅਨਾਦਾਯ ਨਗ੍ਗਸ੍ਸ ਆਜੀਵਕਾਨਂ ਉਪਸਂਗਚ੍ਛਤੋ.

੨੫੩੫. ਥੇਯ੍ਯਸਂਵਾਸਕੋ ¶ ਅਨੁਪਸਮ੍ਪਨ੍ਨਵਸੇਨ ਵੁਤ੍ਤੋ, ਨੋ ਉਪਸਮ੍ਪਨ੍ਨਵਸੇਨ. ਇਮਿਨਾ ‘‘ਉਪਸਮ੍ਪਨ੍ਨੋ ਭਿਕ੍ਖੁ ਕੂਟਵਸ੍ਸਂ ਗਣ੍ਹਨ੍ਤੋਪਿ ਅਸ੍ਸਮਣੋ ਨ ਹੋਤਿ. ਲਿਙ੍ਗੇ ਸਉਸ੍ਸਾਹੋ ਪਾਰਾਜਿਕਂ ਆਪਜ੍ਜਿਤ੍ਵਾ ਭਿਕ੍ਖੁਵਸ੍ਸਾਦੀਨਿ ਗਣੇਨ੍ਤੋਪਿ ਥੇਯ੍ਯਸਂਵਾਸਕੋ ਨ ਹੋਤੀ’’ਤਿ ਅਟ੍ਠਕਥਾਗਤਵਿਨਿਚ੍ਛਯਂ ਦੀਪੇਤਿ. ਤਥਾ ਵੁਤ੍ਤੋਤਿ ਯੋਜਨਾ. ‘‘ਉਪਸਮ੍ਪਨ੍ਨਭਿਕ੍ਖੁਨਾ’’ਤਿ ਇਮਿਨਾ ਅਨੁਪਸਮ੍ਪਨ੍ਨਂ ਨਿਵਤ੍ਤੇਤਿ. ਤੇਨ ਚ ‘‘ਸਾਮਣੇਰੋ ਸਲਿਙ੍ਗੇਨ ਤਿਤ੍ਥਾਯਤਨਂ ਗਤੋਪਿ ਪੁਨ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਲਭਤੀ’’ਤਿ ਕੁਰੁਨ੍ਦਟ੍ਠਕਥਾਗਤਵਿਨਿਚ੍ਛਯਂ ਦਸ੍ਸੇਤਿ.

ਤਿਤ੍ਥਿਯਪਕ੍ਕਨ੍ਤਕਸ੍ਸ ਕਿਂ ਕਾਤਬ੍ਬਨ੍ਤਿ? ਨ ਪਬ੍ਬਾਜੇਤਬ੍ਬੋ, ਪਬ੍ਬਾਜਿਤੋਪਿ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਾਦਿਤੋ ਚ ਕਾਸਾਯਾਨਿ ਅਪਨੇਤ੍ਵਾ ਸੇਤਕਾਨਿ ਦਤ੍ਵਾ ਗਿਹਿਭਾਵਂ ਉਪਨੇਤਬ੍ਬੋ. ਅਯਮਤ੍ਥੋ ਚ ‘‘ਤਿਤ੍ਥਿਯਪਕ੍ਕਨ੍ਤਕੋ ਭਿਕ੍ਖਵੇ ਅਨੁਪਸਮ੍ਪਨ੍ਨੋ ¶ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ’’ਤਿ (ਮਹਾਵ. ੧੧੦) ਪਾਲ਼ਿਤੋ ਚ ‘‘ਸੋ ਨ ਕੇਵਲਂ ਨ ਉਪਸਮ੍ਪਾਦੇਤਬ੍ਬੋ, ਅਥ ਖੋ ਨ ਪਬ੍ਬਾਜੇਤਬ੍ਬੋਪੀ’’ਤਿ (ਮਹਾਵ. ਅਟ੍ਠ. ੧੧੦ ਤਿਤ੍ਥਿਯਪਕ੍ਕਨ੍ਤਕਕਥਾ) ਅਟ੍ਠਕਥਾਵਚਨਤੋ ਚ ਵੇਦਿਤਬ੍ਬੋ.

ਤਿਤ੍ਥਿਯਪਕ੍ਕਨ੍ਤਕਕਥਾਵਣ੍ਣਨਾ.

੨੫੩੬. ਇਧਾਤਿ ਇਮਸ੍ਮਿਂ ਪਬ੍ਬਜ੍ਜੂਪਸਮ੍ਪਦਾਧਿਕਾਰੇ. ਮਨੁਸ੍ਸਜਾਤਿਕਤੋ ਅਞ੍ਞਸ੍ਸ ਤਿਰਚ੍ਛਾਨਗਤੇਯੇਵ ਅਨ੍ਤੋਗਧਤ੍ਤਂ ਦਸ੍ਸੇਤੁਮਾਹ ‘‘ਯਕ੍ਖੋ ਸਕ੍ਕੋਪਿ ਵਾ’’ਤਿ. ਤਿਰਚ੍ਛਾਨਗਤੋ ਵੁਤ੍ਤੋਤਿ ਏਤ੍ਥ ਇਤਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ‘‘ਤਿਰਚ੍ਛਾਨਗਤੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ’’ਤਿ (ਮਹਾਵ. ੧੧੧) ਵਚਨਤੋ ਪਬ੍ਬਜ੍ਜਾਪਿ ਉਪਲਕ੍ਖਣਤੋ ਨਿਵਾਰਿਤਾਯੇਵਾਤਿ ਕਤ੍ਵਾ ਵੁਤ੍ਤਂ ‘‘ਪਬ੍ਬਾਜੇਤੁਂ ਨ ਵਟ੍ਟਤੀ’’ਤਿ. ਤੇਨ ਤਿਰਚ੍ਛਾਨਗਤੋ ਚ ਭਗਵਤੋ ਅਧਿਪ੍ਪਾਯਞ੍ਞੂਹਿ ਅਟ੍ਠਕਥਾਚਰਿਯੇਹਿ ਨ ਪਬ੍ਬਾਜੇਤਬ੍ਬੋਤਿ (ਮਹਾਵ. ਅਟ੍ਠ. ੧੧੧) ਵੁਤ੍ਤਂ.

ਤਿਰਚ੍ਛਾਨਕਥਾਵਣ੍ਣਨਾ.

੨੫੩੭. ਪਞ੍ਚਾਨਨ੍ਤਰਿਕੇ ਪੋਸੇਤਿ ਮਾਤੁਘਾਤਕੋ, ਪਿਤੁਘਾਤਕੋ, ਅਰਹਨ੍ਤਘਾਤਕੋ, ਲੋਹਿਤੁਪ੍ਪਾਦਕੋ, ਸਙ੍ਘਭੇਦਕੋਤਿ ਆਨਨ੍ਤਰਿਯਕਮ੍ਮੇਹਿ ਸਮਨ੍ਨਾਗਤੇ ਪਞ੍ਚ ਪੁਗ੍ਗਲੇ.

ਤਤ੍ਥ ¶ ਮਾਤੁਘਾਤਕੋ (ਮਹਾਵ. ਅਟ੍ਠ. ੧੧੨) ਨਾਮ ਯੇਨ ਮਨੁਸ੍ਸਿਤ੍ਥਿਭੂਤਾ ਜਨਿਕਾ ਮਾਤਾ ਸਯਮ੍ਪਿ ਮਨੁਸ੍ਸਜਾਤਿਕੇਨੇਵ ਸਤਾ ਸਞ੍ਚਿਚ੍ਚ ਜੀਵਿਤਾ ਵੋਰੋਪਿਤਾ, ਅਯਂ ਆਨਨ੍ਤਰਿਯੇਨ ਮਾਤੁਘਾਤਕਕਮ੍ਮੇਨ ਮਾਤੁਘਾਤਕੋ, ਏਤਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਪਟਿਕ੍ਖਿਤ੍ਤਾ. ਯੇਨ ਪਨ ਮਨੁਸ੍ਸਿਤ੍ਥਿਭੂਤਾਪਿ ਅਜਨਿਕਾ ਪੋਸਾਵਨਿਕਮਾਤਾ ਵਾ ਚੂਲ਼ਮਾਤਾ ਵਾ ਮਹਾਮਾਤਾ ਵਾ ਜਨਿਕਾਪਿ ਵਾ ਨਮਨੁਸ੍ਸਿਤ੍ਥਿਭੂਤਾ ¶ ਮਾਤਾਘਾਤਿਤਾ, ਤਸ੍ਸ ਪਬ੍ਬਜ੍ਜਾ ਨ ਵਾਰਿਤਾ, ਨ ਚ ਆਨਨ੍ਤਰਿਯੋ ਹੋਤਿ. ਯੇਨ ਸਯਂ ਤਿਰਚ੍ਛਾਨਭੂਤੇਨ ਮਨੁਸ੍ਸਿਤ੍ਥਿਭੂਤਾ ਮਾਤਾ ਘਾਤਿਤਾ, ਸੋਪਿ ਆਨਨ੍ਤਰਿਯੋ ਨ ਹੋਤਿ, ਤਿਰਚ੍ਛਾਨਗਤਤ੍ਤਾ ਪਨਸ੍ਸ ਪਬ੍ਬਜ੍ਜਾ ਪਟਿਕ੍ਖਿਤ੍ਤਾਵ. ਪਿਤੁਘਾਤਕੇਪਿ ਏਸੇਵ ਨਯੋ. ਸਚੇਪਿ ਹਿ ਵੇਸਿਯਾ ਪੁਤ੍ਤੋ ਹੋਤਿ, ‘‘ਅਯਂ ਮੇ ਪਿਤਾ’’ਤਿ ਨ ਜਾਨਾਤਿ, ਯਸ੍ਸ ਸਮ੍ਭਵੇਨ ਨਿਬ੍ਬਤ੍ਤੋ, ਸੋ ਚੇ ਅਨੇਨ ਘਾਤਿਤੋ, ‘‘ਪਿਤੁਘਾਤਕੋ’’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ, ਆਨਨ੍ਤਰਿਯਞ੍ਚ ਫੁਸਤਿ.

ਅਰਹਨ੍ਤਘਾਤਕੋਪਿ ਮਨੁਸ੍ਸਅਰਹਨ੍ਤਵਸੇਨੇਵ ਵੇਦਿਤਬ੍ਬੋ. ਮਨੁਸ੍ਸਜਾਤਿਯਞ੍ਹਿ ਅਨ੍ਤਮਸੋ ਅਪਬ੍ਬਜਿਤਮ੍ਪਿ ਖੀਣਾਸਵਂ ਦਾਰਕਂ ਵਾ ਦਾਰਿਕਂ ਵਾ ਸਞ੍ਚਿਚ੍ਚ ਜੀਵਿਤਾ ਵੋਰੋਪੇਨ੍ਤੋ ਅਰਹਨ੍ਤਘਾਤਕੋਵ ਹੋਤਿ, ਆਨਨ੍ਤਰਿਯਞ੍ਚ ਫੁਸਤਿ, ਪਬ੍ਬਜ੍ਜਾ ਚਸ੍ਸ ਵਾਰਿਤਾ. ਅਮਨੁਸ੍ਸਜਾਤਿਕਂ ਪਨ ਅਰਹਨ੍ਤਂ, ਮਨੁਸ੍ਸਜਾਤਿਕਂ ਵਾ ਅਵਸੇਸਂ ਅਰਿਯਪੁਗ੍ਗਲਂ ਘਾਤੇਤ੍ਵਾ ਆਨਨ੍ਤਰਿਯੋ ਨ ਹੋਤਿ, ਪਬ੍ਬਜ੍ਜਾਪਿਸ੍ਸ ਨ ਵਾਰਿਤਾ, ਕਮ੍ਮਂ ਪਨ ਬਲਵਂ ਹੋਤਿ. ਤਿਰਚ੍ਛਾਨੋ ਮਨੁਸ੍ਸਅਰਹਨ੍ਤਮ੍ਪਿ ਘਾਤੇਤ੍ਵਾ ਆਨਨ੍ਤਰਿਯੋ ਨ ਹੋਤਿ, ਕਮ੍ਮਂ ਪਨ ਭਾਰਿਯਂ.

ਯੋ ਦੇਵਦਤ੍ਤੋ ਵਿਯ ਦੁਟ੍ਠਚਿਤ੍ਤੇਨ ਵਧਕਚਿਤ੍ਤੇਨ ਤਥਾਗਤਸ੍ਸ ਜੀਵਮਾਨਕਸਰੀਰੇ ਖੁਦ੍ਦਕਮਕ੍ਖਿਕਾਯ ਪਿਵਨਕਮਤ੍ਤਮ੍ਪਿ ਲੋਹਿਤਂ ਉਪ੍ਪਾਦੇਤਿ, ਅਯਂ ਲੋਹਿਤੁਪ੍ਪਾਦਕੋ ਨਾਮ, ਏਤਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਵਾਰਿਤਾ. ਯੋ ਪਨ ਰੋਗਵੂਪਸਮਨਤ੍ਥਂ ਜੀਵਕੋ ਵਿਯ ਸਤ੍ਥੇਨ ਫਾਲੇਤ੍ਵਾ ਪੂਤਿਮਂਸਞ੍ਚ ਲੋਹਿਤਞ੍ਚ ਨੀਹਰਿਤ੍ਵਾ ਫਾਸੁਂ ਕਰੋਤਿ, ਬਹੁਂ ਸੋ ਪੁਞ੍ਞਂ ਪਸਵਤਿ.

ਯੋ ਦੇਵਦਤ੍ਤੋ ਵਿਯ ਸਾਸਨਂ ਉਦ੍ਧਮ੍ਮਂ ਉਬ੍ਬਿਨਯਂ ਕਤ੍ਵਾ ਚਤੁਨ੍ਨਂ ਕਮ੍ਮਾਨਂ ਅਞ੍ਞਤਰਵਸੇਨ ਸਙ੍ਘਂ ਭਿਨ੍ਦਤਿ, ਅਯਂ ਸਙ੍ਘਭੇਦਕੋ ਨਾਮ, ਏਤਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਵਾਰਿਤਾ. ‘‘ਮਾਤੁਘਾਤਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ¶ ਨਾਸੇਤਬ੍ਬੋ’’ਤਿਆਦਿਕਾਯ (ਮਹਾਵ. ੧੧੨) ਪਾਲ਼ਿਯਾ ਉਪਸਮ੍ਪਦਾਪਟਿਕ੍ਖੇਪੋ ਪਬ੍ਬਜ੍ਜਾਪਟਿਕ੍ਖੇਪਸ੍ਸ ਉਪਲਕ੍ਖਣਨ੍ਤਿ ਆਹ ‘‘ਪਬ੍ਬਾਜੇਨ੍ਤਸ੍ਸ ਦੁਕ੍ਕਟ’’ਨ੍ਤਿ.

ਉਭਤੋਬ੍ਯਞ੍ਜਨਞ੍ਚੇਵ ¶ ਭਿਕ੍ਖੁਨਿਦੂਸਕਞ੍ਚ ਤਥਾ ਪਬ੍ਬਾਜੇਨ੍ਤਸ੍ਸ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਉਭਤੋਬ੍ਯਞ੍ਜਨਨ੍ਤਿ ਕ-ਕਾਰਲੋਪੇਨ ਨਿਦ੍ਦੇਸੋ. ਇਤ੍ਥਿਨਿਮਿਤ੍ਤੁਪ੍ਪਾਦਨਕਮ੍ਮਤੋ ਚ ਪੁਰਿਸਨਿਮਿਤ੍ਤੁਪ੍ਪਾਦਨਕਮ੍ਮਤੋ ਚ ਉਭਤੋ ਬ੍ਯਞ੍ਜਨਮਸ੍ਸ ਅਤ੍ਥੀਤਿ ਉਭਤੋਬ੍ਯਞ੍ਜਨਕੋ. ਸੋ ਦੁਵਿਧੋ ਹੋਤਿ ਇਤ੍ਥਿਉਭਤੋਬ੍ਯਞ੍ਜਨਕੋ, ਪੁਰਿਸਉਭਤੋਬ੍ਯਞ੍ਜਨਕੋਤਿ.

ਤਤ੍ਥ ਇਤ੍ਥਿਉਭਤੋਬ੍ਯਞ੍ਜਨਕਸ੍ਸ (ਮਹਾਵ. ਅਟ੍ਠ. ੧੧੬) ਇਤ੍ਥਿਨਿਮਿਤ੍ਤਂ ਪਾਕਟਂ ਹੋਤਿ, ਪੁਰਿਸਨਿਮਿਤ੍ਤਂ ਪਟਿਚ੍ਛਨ੍ਨਂ. ਪੁਰਿਸਉਭਤੋਬ੍ਯਞ੍ਜਨਕਸ੍ਸ ਪੁਰਿਸਨਿਮਿਤ੍ਤਂ ਪਾਕਟਂ ਹੋਤਿ, ਇਤ੍ਥਿਨਿਮਿਤ੍ਤਂ ਪਟਿਚ੍ਛਨ੍ਨਂ. ਇਤ੍ਥਿਉਭਤੋਬ੍ਯਞ੍ਜਨਕਸ੍ਸ ਇਤ੍ਥੀਸੁ ਪੁਰਿਸਤ੍ਤਂ ਕਰੋਨ੍ਤਸ੍ਸ ਇਤ੍ਥਿਨਿਮਿਤ੍ਤਂ ਪਟਿਚ੍ਛਨ੍ਨਂ ਹੋਤਿ, ਪੁਰਿਸਨਿਮਿਤ੍ਤਂ ਪਾਕਟਂ ਹੋਤਿ. ਪੁਰਿਸਉਭਤੋਬ੍ਯਞ੍ਜਨਕਸ੍ਸ ਪੁਰਿਸਾਨਂ ਇਤ੍ਥਿਭਾਵਂ ਉਪਗਚ੍ਛਨ੍ਤਸ੍ਸ ਪੁਰਿਸਨਿਮਿਤ੍ਤਂ ਪਟਿਚ੍ਛਨ੍ਨਂ ਹੋਤਿ, ਇਤ੍ਥਿਨਿਮਿਤ੍ਤਂ ਪਾਕਟਂ ਹੋਤਿ. ਇਤ੍ਥਿਉਭਤੋਬ੍ਯਞ੍ਜਨਕੋ ਸਯਞ੍ਚ ਗਬ੍ਭਂ ਗਣ੍ਹਾਤਿ, ਪਰਞ੍ਚ ਗਬ੍ਭਂ ਗਣ੍ਹਾਪੇਤਿ. ਪੁਰਿਸਉਭਤੋਬ੍ਯਞ੍ਜਨਕੋ ਸਯਂ ਨ ਗਣ੍ਹਾਤਿ, ਪਰਂ ਗਣ੍ਹਾਪੇਤੀਤਿ ਇਦਮੇਤੇਸਂ ਨਾਨਾਕਰਣਂ. ਇਮਸ੍ਸ ਪਨ ਦੁਵਿਧਸ੍ਸਾਪਿ ਉਭਤੋਬ੍ਯਞ੍ਜਨਕਸ੍ਸਨੇਵ ਪਬ੍ਬਜ੍ਜਾ ਅਤ੍ਥਿ, ਨ ਉਪਸਮ੍ਪਦਾਤਿ ਇਦਮਿਧ ਸਨ੍ਨਿਟ੍ਠਾਨਂ ਵੇਦਿਤਬ੍ਬਂ.

ਯੋ ਪਕਤਤ੍ਤਂ ਭਿਕ੍ਖੁਨਿਂ (ਮਹਾਵ. ਅਟ੍ਠ. ੧੧੫) ਤਿਣ੍ਣਂ ਮਗ੍ਗਾਨਂ ਅਞ੍ਞਤਰਸ੍ਮਿਂ ਦੂਸੇਤਿ, ਅਯਂ ਭਿਕ੍ਖੁਨਿਦੂਸਕੋ ਨਾਮ, ਏਤਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਵਾਰਿਤਾ. ਯੋ ਪਨ ਕਾਯਸਂਸਗ੍ਗੇਨ ਸੀਲਵਿਨਾਸਂ ਪਾਪੇਤਿ, ਤਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਨ ਵਾਰਿਤਾ. ਬਲਕ੍ਕਾਰੇਨ ਪਨ ਓਦਾਤਵਤ੍ਥਵਸਨਂ ਕਤ੍ਵਾ ਅਨਿਚ੍ਛਮਾਨਂਯੇਵ ਦੂਸੇਨ੍ਤੋਪਿ ਭਿਕ੍ਖੁਨਿਦੂਸਕੋਯੇਵ. ਬਲਕ੍ਕਾਰੇਨ ਪਨ ਓਦਾਤਵਤ੍ਥਵਸਨਂ ¶ ਕਤ੍ਵਾ ਇਚ੍ਛਮਾਨਂ ਦੂਸੇਨ੍ਤੋ ਭਿਕ੍ਖੁਨਿਦੂਸਕੋ ਨ ਹੋਤਿ. ਕਸ੍ਮਾ? ਯਸ੍ਮਾ ਗਿਹਿਭਾਵੇ ਸਮ੍ਪਟਿਚ੍ਛਿਤਮਤ੍ਤੇਯੇਵ ਸਾ ਅਭਿਕ੍ਖੁਨੀ ਹੋਤਿ. ਸਕਿਂ ਸੀਲਵਿਪਨ੍ਨਂ ਪਨ ਪਚ੍ਛਾ ਦੂਸੇਨ੍ਤੋ ਨੇਵ ਭਿਕ੍ਖੁਨਿਦੂਸਕੋ ਹੋਤਿ, ਪਬ੍ਬਜ੍ਜਮ੍ਪਿ ਉਪਸਮ੍ਪਦਮ੍ਪਿ ਲਭਤਿ.

੨੫੩੮. ਪਾਲ਼ਿਅਟ੍ਠਕਥਾਵਿਮੁਤ੍ਤਂ ਆਚਰਿਯਪਰਮ੍ਪਰਾਭਤਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਏਕਤੋ’’ਤਿਆਦਿ. ‘‘ਏਕਤੋ’’ਤਿ ਇਮਿਨਾ ਭਿਕ੍ਖੁਸਙ੍ਘਸ੍ਸਾਪਿ ਗਹਣਂ ਭਵੇਯ੍ਯਾਤਿ ਤਂ ਪਰਿਵਜ੍ਜੇਤੁਂ ‘‘ਭਿਕ੍ਖੁਨੀਨਂ ਤੁ ਸਨ੍ਤਿਕੇ’’ਤਿ ਵੁਤ੍ਤਂ. ਏਤੇਨ ਤਂਦੂਸਕਸ੍ਸ ਭਬ੍ਬਤਂ ਦੀਪੇਤਿ. ਸੋ ਨੇਵ ਭਿਕ੍ਖੁਨਿਦੂਸਕੋ ਸਿਯਾ, ‘‘ਉਪਸਮ੍ਪਦਂ ਲਭਤੇਵ ਚ ਪਬ੍ਬਜ੍ਜਂ, ਸਾ ਚ ਨੇਵ ਪਰਾਜਿਤਾ’’ਤਿ ਇਦਂ ਦੁਤਿਯਗਾਥਾਯ ਇਧਾਨੇਤ੍ਵਾ ਯੋਜੇਤਬ੍ਬਂ. ਕੇਵਲਂ ਭਿਕ੍ਖੁਨਿਸਙ੍ਘੇ ਉਪਸਮ੍ਪਨ੍ਨਾ ਨਾਮ ਨ ਹੋਤੀਤਿ ਅਧਿਪ੍ਪਾਯੇਨੇਵ ਵੁਤ੍ਤਂ. ‘‘ਸਾ ਚ ਨੇਵ ਪਰਾਜਿਤਾ’’ਤਿ ਇਮਿਨਾ ਤਸ੍ਸਾ ਚ ਪੁਨ ਪਬ੍ਬਜ੍ਜੂਪਸਮ੍ਪਦਾਯ ਭਬ੍ਬਤਂ ¶ ਦੀਪੇਤਿ. ਅਯਮਤ੍ਥੋ ਅਟ੍ਠਕਥਾਗਣ੍ਠਿਪਦੇਪਿ ਵੁਤ੍ਤੋਯੇਵ ‘‘ਭਿਕ੍ਖੁਨੀਨਂ ਵਸੇਨ ਏਕਤੋਉਪਸਮ੍ਪਨ੍ਨਂ ਦੂਸੇਤ੍ਵਾ ਭਿਕ੍ਖੁਨਿਦੂਸਕੋ ਨ ਹੋਤਿ, ਪਬ੍ਬਜ੍ਜਾਦੀਨਿ ਲਭਤਿ, ਸਾ ਚ ਪਾਰਾਜਿਕਾ ਨ ਹੋਤੀਤਿ ਵਿਨਿਚ੍ਛਯੋ’’ਤਿ.

੨੫੩੯. ‘‘ਸਿਕ੍ਖਮਾਨਾਸਾਮਣੇਰੀਸੁ ਚ ਵਿਪ੍ਪਟਿਪਜ੍ਜਨ੍ਤੋ ਨੇਵ ਭਿਕ੍ਖੁਨਿਦੂਸਕੋ ਹੋਤਿ, ਪਬ੍ਬਜ੍ਜਮ੍ਪਿ ਉਪਸਮ੍ਪਦਮ੍ਪਿ ਲਭਤੀ’’ਤਿ (ਮਹਾਵ. ਅਟ੍ਠ. ੧੧੫) ਅਟ੍ਠਕਥਾਗਤਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਸਚੇ ਅਨੁਪਸਮ੍ਪਨ੍ਨਦੂਸਕੋ’’ਤਿ. ‘‘ਉਪਸਮ੍ਪਦਂ ਲਭਤੇਵ ਚ ਪਬ੍ਬਜ੍ਜ’’ਨ੍ਤਿ ਇਦਂ ਯਥਾਠਾਨੇਪਿ ਯੋਜੇਤਬ੍ਬਂ. ਸਾ ਚ ਨੇਵ ਪਰਾਜਿਤਾਤਿ ਇਦਂ ਪਨ ਅਟ੍ਠਕਥਾਯ ਅਨਾਗਤਤ੍ਤਾ ਚ ਅਨੁਪਸਮ੍ਪਨ੍ਨਾਯ ਉਪਸਮ੍ਪਨ੍ਨਵਿਕਪ੍ਪਾਭਾਵਾ ਚ ਨ ਯੋਜੇਤਬ੍ਬਂ. ਅਸਤਿ ਹਿ ਉਪਸਮ੍ਪਨ੍ਨਵਿਕਪ੍ਪੇ ਪਰਾਜਿਤਵਿਕਪ੍ਪਾਸਙ੍ਗਹੋ ਪਟਿਸੇਧੋ ਨਿਰਤ੍ਥਕੋਤਿ ਸਾ ਪਬ੍ਬਜ੍ਜੂਪਸਮ੍ਪਦਾਨਂ ਭਬ੍ਬਾਯੇਵਾਤਿ ਦਟ੍ਠਬ੍ਬਾ. ਇਮੇ ¶ ਪਨ ਪਣ੍ਡਕਾਦਯੋ ਏਕਾਦਸ ਪੁਗ੍ਗਲਾ ‘‘ਪਣ੍ਡਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ’’ਤਿਆਦਿਵਚਨਤੋ (ਮਹਾਵ. ੧੦੯) ਅਭਬ੍ਬਾਯੇਵ, ਨੇਸਂ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਨ ਰੁਹਤਿ, ਤਸ੍ਮਾ ਨ ਪਬ੍ਬਾਜੇਤਬ੍ਬਾ. ਜਾਨਿਤ੍ਵਾ ਪਬ੍ਬਾਜੇਨ੍ਤੋ, ਉਪਸਮ੍ਪਾਦੇਨ੍ਤੋ ਚ ਦੁਕ੍ਕਟਂ ਆਪਜ੍ਜਤਿ. ਅਜਾਨਿਤ੍ਵਾਪਿ ਪਬ੍ਬਾਜਿਤਾ, ਉਪਸਮ੍ਪਾਦਿਤਾ ਚ ਜਾਨਿਤ੍ਵਾ ਲਿਙ੍ਗਨਾਸਨਾਯ ਨਾਸੇਤਬ੍ਬਾ.

ਏਕਾਦਸਅਭਬ੍ਬਪੁਗ੍ਗਲਕਥਾਵਣ੍ਣਨਾ.

੨੫੪੦. ਨੂਪਸਮ੍ਪਾਦਨੀਯੋਵਾਤਿ ਨ ਉਪਸਮ੍ਪਾਦੇਤਬ੍ਬੋਵ. ਅਨੁਪਜ੍ਝਾਯਕੋਤਿ ਅਸਨ੍ਨਿਹਿਤਉਪਜ੍ਝਾਯੋ ਵਾ ਅਗ੍ਗਹਿਤਉਪਜ੍ਝਾਯਗ੍ਗਹਣੋ ਵਾ. ਕਰੋਤੋਤਿ ਅਨੁਪਜ੍ਝਾਯਕਂ ਉਪਸਮ੍ਪਾਦਯਤੋ. ਦੁਕ੍ਕਟਂ ਹੋਤੀਤਿ ਆਚਰਿਯਸ੍ਸ ਚ ਗਣਸ੍ਸ ਚ ਦੁਕ੍ਕਟਾਪਤ੍ਤਿ ਹੋਤਿ. ਨ ਕੁਪ੍ਪਤਿ ਸਚੇ ਕਤਨ੍ਤਿ ਸਚੇ ਅਨੁਪਜ੍ਝਾਯਕਸ੍ਸ ਉਪਸਮ੍ਪਦਾਕਮ੍ਮਂ ਕਤਂ ਭਵੇਯ੍ਯ, ਤਂ ਨ ਕੁਪ੍ਪਤਿ ਸਮਗ੍ਗੇਨ ਸਙ੍ਘੇਨ ਅਕੁਪ੍ਪੇਨ ਠਾਨਾਰਹੇਨ ਕਤਤ੍ਤਾ.

੨੫੪੧. ਏਕੇਤਿ ਅਭਯਗਿਰਿਵਾਸਿਨੋ. ‘‘ਨ ਗਹੇਤਬ੍ਬਮੇਵਾ’’ਤਿ ਅਟ੍ਠਕਥਾਯ ਦਲ਼੍ਹਂ ਵੁਤ੍ਤਤ੍ਤਾ ਵੁਤ੍ਤਂ. ਤਂ ਵਚਨਂ. ਏਤ੍ਥ ਚ ਉਪਜ੍ਝਾਯੇ ਅਸਨ੍ਨਿਹਿਤੇਪਿ ਉਪਜ੍ਝਾਯਗ੍ਗਹਣੇ ਅਕਤੇਪਿ ਕਮ੍ਮਵਾਚਾਯਂ ਪਨ ਉਪਜ੍ਝਾਯਕਿਤ੍ਤਨਂ ਕਤਂਯੇਵਾਤਿ ਦਟ੍ਠਬ੍ਬਂ. ਅਞ੍ਞਥਾ ‘‘ਪੁਗ੍ਗਲਂ ਨ ਪਰਾਮਸਤੀ’’ਤਿ ਵੁਤ੍ਤਾਯ ਕਮ੍ਮਵਿਪਤ੍ਤਿਯਾ ਸਮ੍ਭਵਤੋ ਕਮ੍ਮਂ ਕੁਪ੍ਪੇਯ੍ਯ. ਤੇਨੇਵ ‘‘ਉਪਜ੍ਝਾਯਂ ਅਕਿਤ੍ਤੇਤ੍ਵਾ’’ਤਿ ਅਵਤ੍ਵਾ ‘‘ਉਪਜ੍ਝਂ ਅਗ੍ਗਾਹਾਪੇਤ੍ਵਾ’’ਤਿ (ਮਹਾਵ. ਅਟ੍ਠ. ੧੧੭) ਅਟ੍ਠਕਥਾਯਂ ਵੁਤ੍ਤਂ. ਯਥਾ ਚ ਅਪਰਿਪੁਣ੍ਣਪਤ੍ਤਚੀਵਰਸ੍ਸ ¶ ਉਪਸਮ੍ਪਦਾਕਾਲੇ ਕਮ੍ਮਵਾਚਾਯਂ ‘‘ਪਰਿਪੁਣ੍ਣਸ੍ਸ ਪਤ੍ਤਚੀਵਰ’’ਨ੍ਤਿ ਅਸਨ੍ਤਂ ਵਤ੍ਥੁਂ ਕਿਤ੍ਤੇਤ੍ਵਾ ਕਮ੍ਮਵਾਚਾਯ ਕਤਾਯਪਿ ਉਪਸਮ੍ਪਦਾ ਰੁਹਤਿ, ਏਵਂ ‘‘ਅਯਂ ਬੁਦ੍ਧਰਕ੍ਖਿਤੋ ਆਯਸ੍ਮਤੋ ਧਮ੍ਮਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਅਸਨ੍ਤਂ ਪੁਗ੍ਗਲਂ ਕਿਤ੍ਤੇਤ੍ਵਾ ਕੇਵਲਂ ਸਨ੍ਤਪਦਨੀਹਾਰੇਨ ਕਮ੍ਮਵਾਚਾਯ ¶ ਕਤਾਯ ਉਪਸਮ੍ਪਦਾ ਰੁਹਤਿਯੇਵਾਤਿ ਦਟ੍ਠਬ੍ਬਂ. ਤੇਨੇਵਾਹ ‘‘ਨ ਕੁਪ੍ਪਤਿ ਸਚੇ ਕਤ’’ਨ੍ਤਿ. ‘‘ਨ, ਭਿਕ੍ਖਵੇ, ਅਨੁਪਜ੍ਝਾਯਕੋ ਉਪਸਮ੍ਪਾਦੇਤਬ੍ਬੋ, ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੧੭) ਏਤ੍ਤਕਮੇਵ ਵਤ੍ਵਾ ‘‘ਸੋ ਚ ਪੁਗ੍ਗਲੋ ਅਨੁਪਸਮ੍ਪਨ੍ਨੋ’’ਤਿ ਅਵੁਤ੍ਤਤ੍ਤਾ, ਕਮ੍ਮਵਿਪਤ੍ਤਿਲਕ੍ਖਣਸ੍ਸ ਚ ਅਸਮ੍ਭਵਤੋ ‘‘ਨ ਗਹੇਤਬ੍ਬਮੇਵ ਤ’’ਨ੍ਤਿ ਵੁਤ੍ਤਂ.

ਸੇਸੇਸੁ ਸਬ੍ਬਤ੍ਥਪੀਤਿ ਸਙ੍ਘਗਣਪਣ੍ਡਕਥੇਯ੍ਯਸਂਵਾਸਕਤਿਤ੍ਥਿਯਪਕ੍ਕਨ੍ਤਕਤਿਰਚ੍ਛਾਨਗਤਮਾਤੁਪਿਤੁਅਰਹਨ੍ਤਘਾਤਕਭਿਕ੍ਖੁਨਿਦੂਸਕਸਙ੍ਘਭੇਦਕਲੋਹਿਤੁਪ੍ਪਾਦਕਉਭਤੋਬ੍ਯਞ੍ਜਨਕਸਙ੍ਖਾਤੇਹਿ ਉਪਜ੍ਝਾਯੇਹਿ ਉਪਸਮ੍ਪਾਦਿਤੇਸੁ ਸਬ੍ਬੇਸੁ ਤੇਰਸਸੁ ਵਿਕਪ੍ਪੇਸੁ. ਵੁਤ੍ਤਞ੍ਹਿ ਭਗਵਤਾ ‘‘ਨ, ਭਿਕ੍ਖਵੇ, ਸਙ੍ਘੇਨ ਉਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ, ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਆਦਿ. ਨ ਕੇਵਲਂ ਏਤੇਸੁਯੇਵ ਤੇਰਸਸੁ, ਅਥ ‘‘ਅਪਤ੍ਤਕਅਚੀਵਰਕਅਚੀਵਰਪਤ੍ਤਕਯਾਚਿਤਕਪਤ੍ਤਯਾਚਿਤਕਚੀਵਰਯਾਚਿਤਕਪਤ੍ਤਚੀਵਰਕਾ’’ਤਿ ਏਤੇਸੁ ਛਸੁ ਵਿਕਪ੍ਪੇਸੁ ਅਯਂ ਨਯੋ ਯੋਜੇਤਬ੍ਬੋਤਿ. ਸੇਸ-ਗ੍ਗਹਣੇਨ ਏਤੇਸਮ੍ਪਿ ਸਙ੍ਗਹੋ. ਵੁਤ੍ਤਞ੍ਹੇਤਂ ਭਗਵਤਾ ‘‘ਨ, ਭਿਕ੍ਖਵੇ, ਅਪਤ੍ਤਕੋ ਉਪਸਮ੍ਪਾਦੇਤਬ੍ਬੋ, ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਆਦਿ (ਮਹਾਵ. ੧੧੮). ਅਯਂ ਨਯੋਤਿ ‘‘ਨ ਕੁਪ੍ਪਤਿ ਸਚੇ ਕਤ’’ਨ੍ਤਿ ਵੁਤ੍ਤਨਯੋ.

੨੫੪੨. ਪਞ੍ਚਵੀਸਤੀਤਿ ਚਤੁਵੀਸਤਿ ਪਾਰਾਜਿਕਾ, ਊਨਵੀਸਤਿਵਸ੍ਸੋ ਚਾਤਿ ਪਞ੍ਚਵੀਸਤਿ. ਵੁਤ੍ਤਞ੍ਹਿ ‘‘ਨ, ਭਿਕ੍ਖਵੇ, ਜਾਨਂ ਊਨਵੀਸਤਿਵਸ੍ਸੋ ਪੁਗ੍ਗਲੋ ਉਪਸਮ੍ਪਾਦੇਤਬ੍ਬੋ. ਯੋ ਉਪਸਮ੍ਪਾਦੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ (ਮਹਾਵ. ੯੯). ਓਸਾਰੋਤਿ ਉਪਸਮ੍ਪਦਾਸਙ੍ਖਾਤੋ ਓਸਾਰੋ. ਤੇਨੇਵ ਚਮ੍ਪੇਯ੍ਯਕ੍ਖਨ੍ਧਕੇ ‘‘ਤਞ੍ਚੇ ਸਙ੍ਘੋ ਓਸਾਰੇਤਿ, ਏਕਚ੍ਚੋ ਸੋਸਾਰਿਤੋ’’ਤਿਆਦਿਪਾਠਸ੍ਸ (ਮਹਾਵ. ੩੯੬) ਅਟ੍ਠਕਥਾਯਂ ‘‘ਓਸਾਰੇਤੀਤਿ ਉਪਸਮ੍ਪਦਾਕਮ੍ਮਵਸੇਨ ¶ ਪਵੇਸੇਤੀ’’ਤਿ (ਮਹਾਵ. ਅਟ੍ਠ. ੩੯੬) ਵੁਤ੍ਤਂ. ‘‘ਨਾਸਨਾਰਹੋ’’ਤਿ ਇਮਿਨਾ ‘‘ਪਣ੍ਡਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ’’ਤਿਆਦਿਵਚਨਤੋ (ਮਹਾਵ. ੧੦੯) ਉਪਸਮ੍ਪਾਦਿਤਸ੍ਸਾਪਿ ਸੇਤਕਾਨਿ ਦਤ੍ਵਾ ਗਿਹਿਭਾਵਂ ਪਾਪੇਤਬ੍ਬਤਂ ਦੀਪੇਤਿ.

੨੫੪੩. ਹਤ੍ਥਚ੍ਛਿਨ੍ਨਾਦਿ ¶ ਬਾਤ੍ਤਿਂਸਾਤਿ ਚਮ੍ਪੇਯ੍ਯਕ੍ਖਨ੍ਧਕੇ –

‘‘ਹਤ੍ਥਚ੍ਛਿਨ੍ਨੋ, ਭਿਕ੍ਖਵੇ, ਅਪ੍ਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ, ਸੋਸਾਰਿਤੋ. ਪਾਦਚ੍ਛਿਨ੍ਨੋ…ਪੇ… ਹਤ੍ਥਪਾਦਚ੍ਛਿਨ੍ਨੋ… ਕਣ੍ਣਚ੍ਛਿਨ੍ਨੋ… ਨਾਸਚ੍ਛਿਨ੍ਨੋ… ਕਣ੍ਣਨਾਸਚ੍ਛਿਨ੍ਨੋ… ਅਙ੍ਗੁਲਿਚ੍ਛਿਨ੍ਨੋ… ਅਲ਼ਚ੍ਛਿਨ੍ਨੋ… ਕਣ੍ਡਰਚ੍ਛਿਨ੍ਨੋ… ਫਣਹਤ੍ਥਕੋ… ਖੁਜ੍ਜੋ… ਵਾਮਨੋ… ਗਲਗਣ੍ਡੀ… ਲਕ੍ਖਣਾਹਤੋ… ਕਸਾਹਤੋ… ਲਿਖਿਤਕੋ… ਸੀਪਦਿਕੋ… ਪਾਪਰੋਗੀ… ਪਰਿਸਦੂਸਕੋ… ਕਾਣੋ… ਕੁਣੀ… ਖਞ੍ਜੋ… ਪਕ੍ਖਹਤੋ… ਛਿਨ੍ਨਿਰਿਯਾਪਥੋ… ਜਰਾਦੁਬ੍ਬਲੋ… ਅਨ੍ਧੋ… ਮੂਗੋ… ਪਧਿਰੋ… ਅਨ੍ਧਮੂਗੋ… ਅਨ੍ਧਪਧਿਰੋ… ਮੂਗਪਧਿਰੋ… ਅਨ੍ਧਮੂਗਪਧਿਰੋ, ਭਿਕ੍ਖਵੇ, ਅਪ੍ਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ, ਸੋਸਾਰਿਤੋ’’ਤਿ (ਮਹਾਵ. ੩੯੬) ਬਾਤ੍ਤਿਂਸ.

ਕੁਟ੍ਠਿਆਦਿ ਚ ਤੇਰਸਾਤਿ ਮਹਾਖਨ੍ਧਕੇ ਆਗਤਾ –

‘‘ਕੁਟ੍ਠਿਂ ਗਣ੍ਡਿਂ ਕਿਲਾਸਿਞ੍ਚ, ਸੋਸਿਞ੍ਚ ਅਪਮਾਰਿਕਂ;

ਤਥਾ ਰਾਜਭਟਂ ਚੋਰਂ, ਲਿਖਿਤਂ ਕਾਰਭੇਦਕਂ.

‘‘ਕਸਾਹਤਂ ਨਰਞ੍ਚੇਵ, ਪੁਰਿਸਂ ਲਕ੍ਖਣਾਹਤਂ;

ਇਣਾਯਿਕਞ੍ਚ ਦਾਸਞ੍ਚ, ਪਬ੍ਬਾਜੇਨ੍ਤਸ੍ਸ ਦੁਕ੍ਕਟ’’ਨ੍ਤਿ. –

ਯਥਾਵੁਤ੍ਤਾ ਤੇਰਸ.

ਏਵਮੇਤੇ ਪਞ੍ਚਚਤ੍ਤਾਲੀਸ ਵੁਤ੍ਤਾ. ਤੇਸੁ ਕਸਾਹਤਲਕ੍ਖਣਾਹਤਲਿਖਿਤਕਾਨਂ ਤਿਣ੍ਣਂ ਉਭਯਤ੍ਥ ਆਗਤਤ੍ਤਾ ਅਗ੍ਗਹਿਤਗ੍ਗਹਣੇਨ ਦ੍ਵਾਚਤ੍ਤਾਲੀਸੇਵ ਦਟ੍ਠਬ੍ਬਾ.

‘‘ਹਤ੍ਥਚ੍ਛਿਨ੍ਨਾਦਿਬਾਤ੍ਤਿਂਸ ¶ , ਕੁਟ੍ਠਿਆਦਿ ਚ ਤੇਰਸਾ’’ਤਿ ਯੇ ਪੁਗ੍ਗਲਾ ਵੁਤ੍ਤਾ, ਤੇਸਂ. ਓਸਾਰੋ ਅਪ੍ਪਤ੍ਤੋਤਿ ਉਪਸਮ੍ਪਦਾਅਨਨੁਰੂਪਾਤਿ ਅਤ੍ਥੋ. ਕਤੋ ਚੇਤਿ ਅਕਤ੍ਤਬ੍ਬਭਾਵਮਸਲ੍ਲਕ੍ਖਨ੍ਤੇਹਿ ਭਿਕ੍ਖੂਹਿ ਯਦਿ ਉਪਸਮ੍ਪਦਾਸਙ੍ਖਾਤੋ ਓਸਾਰੋ ਕਤੋ ਭਵੇਯ੍ਯ. ਰੂਹਤੀਤਿ ਸਿਜ੍ਝਤਿ, ਤੇ ਪੁਗ੍ਗਲਾ ਉਪਸਮ੍ਪਨ੍ਨਾਯੇਵਾਤਿ ਅਧਿਪ੍ਪਾਯੋ. ਆਚਰਿਯਾਦਯੋ ਪਨ ਆਪਤ੍ਤਿਂ ਆਪਜ੍ਜਨ੍ਤਿ. ਯਥਾਹ ਚਮ੍ਪੇਯ੍ਯਕ੍ਖਨ੍ਧਕਟ੍ਠਕਥਾਯਂ ¶ – ‘‘ਹਤ੍ਥਚ੍ਛਿਨ੍ਨਾਦਯੋ ਪਨ ਦ੍ਵਤ੍ਤਿਂਸ ਸੁਓਸਾਰਿਤਾ, ਉਪਸਮ੍ਪਾਦਿਤਾ ਉਪਸਮ੍ਪਨ੍ਨਾਵ ਹੋਨ੍ਤਿ, ਨ ਤੇ ਲਬ੍ਭਾ ਕਿਞ੍ਚਿ ਵਤ੍ਤੁਂ. ਆਚਰਿਯੁਪਜ੍ਝਾਯਾ, ਪਨ ਕਾਰਕਸਙ੍ਘੋ ਚ ਸਾਤਿਸਾਰਾ, ਨ ਕੋਚਿ ਆਪਤ੍ਤਿਤੋ ਮੁਚ੍ਚਤੀ’’ਤਿ (ਮਹਾਵ. ਅਟ੍ਠ. ੩੯੬).

੨੫੪੪-੫. ‘‘ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਤਯੋ ਏਕਾਨੁਸ੍ਸਾਵਨੇ ਕਾਤੁਂ, ਤਞ੍ਚ ਖੋ ਏਕੇਨ ਉਪਜ੍ਝਾਯੇਨਾ’’ਤਿ (ਮਹਾਵ. ੧੨੩) ਵਚਨਤੋ ਸਚੇ ਤਯੋ ਆਚਰਿਯਾ ਏਕਸੀਮਾਯਂ ਨਿਸਿਨ੍ਨਾ ਏਕਸ੍ਸ ਉਪਜ੍ਝਾਯਸ੍ਸ ਨਾਮਂ ਗਹੇਤ੍ਵਾ ਤਿਣ੍ਣਂ ਉਪਸਮ੍ਪਦਾਪੇਕ੍ਖਾਨਂ ਵਿਸੁਂ ਵਿਸੁਂਯੇਵ ਕਮ੍ਮਵਾਚਂ ਏਕਕ੍ਖਣੇ ਵਤ੍ਵਾ ਤਯੋ ਉਪਸਮ੍ਪਾਦੇਨ੍ਤਿ, ਵਟ੍ਟਤੀਤਿ ਦਸ੍ਸੇਤੁਮਾਹ ‘‘ਏਕੂਪਜ੍ਝਾਯਕੋ ਹੋਤੀ’’ਤਿਆਦਿ.

‘‘ਤਯੋ’’ਤਿ ਇਦਂ ਅਟ੍ਠੁਪ੍ਪਤ੍ਤਿਯਂ ‘‘ਸਮ੍ਬਹੁਲਾਨਂ ਥੇਰਾਨ’’ਨ੍ਤਿ (ਮਹਾਵ. ੧੨੩) ਆਗਤਤ੍ਤਾ ਵੁਤ੍ਤਂ. ਏਕਤੋਤਿ ਏਕਕ੍ਖਣੇ. ਅਨੁਸਾਵਨਨ੍ਤਿ ਕਮ੍ਮਵਾਚਂ. ਓਸਾਰੇਤ੍ਵਾਤਿ ਵਤ੍ਵਾ. ਕਮ੍ਮਨ੍ਤਿ ਉਪਸਮ੍ਪਦਾਕਮ੍ਮਂ. ਨ ਚ ਕੁਪ੍ਪਤੀਤਿ ਨ ਵਿਪਜ੍ਜਤਿ. ਕਪ੍ਪਤੀਤਿ ਅਵਿਪਜ੍ਜਨਤੋ ਏਵਂ ਕਾਤੁਂ ਵਟ੍ਟਤਿ.

੨੫੪੬-੭. ‘‘ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਤਯੋ ਏਕਾਨੁਸ੍ਸਾਵਨੇ ਕਾਤੁ’’ਨ੍ਤਿ (ਮਹਾਵ. ੧੨੩) ਵਚਨਤੋ ਸਚੇ ਏਕੋ ਆਚਰਿਯੋ ‘‘ਬੁਦ੍ਧਰਕ੍ਖਿਤੋ ਚ ਧਮ੍ਮਰਕ੍ਖਿਤੋ ਚ ਸਙ੍ਘਰਕ੍ਖਿਤੋ ਚ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਉਪਸਮ੍ਪਦਾਪੇਕ੍ਖਾਨਂ ¶ ਪਚ੍ਚੇਕਂ ਨਾਮਂ ਗਹੇਤ੍ਵਾ ਕਮ੍ਮਵਾਚਂ ਵਤ੍ਵਾ ਦ੍ਵੇ ਤਯੋਪਿ ਉਪਸਮ੍ਪਾਦੇਤਿ, ਵਟ੍ਟਤੀਤਿ ਦਸ੍ਸੇਤੁਮਾਹ ‘‘ਏਕੂਪਜ੍ਝਾਯਕੋ ਹੋਤੀ’’ਤਿਆਦਿ.

ਉਪਸਮ੍ਪਦਂ ਅਪੇਕ੍ਖਨ੍ਤੀਤਿ ‘‘ਉਪਸਮ੍ਪਦਾਪੇਕ੍ਖਾ’’ਤਿ ਉਪਸਮ੍ਪਜ੍ਜਨਕਾ ਵੁਚ੍ਚਨ੍ਤਿ. ਤੇਸਂ ਨਾਮਨ੍ਤਿ ਤੇਸਂ ਉਪਸਮ੍ਪਜ੍ਜਨ੍ਤਾਨਞ੍ਚੇਵ ਉਪਜ੍ਝਾਯਾਨਞ੍ਚ ਨਾਮਂ. ਅਨੁਪੁਬ੍ਬੇਨ ਸਾਵੇਤ੍ਵਾਤਿ ਯੋਜਨਾ, ‘‘ਬੁਦ੍ਧਰਕ੍ਖਿਤੋ’’ਤਿਆਦਿਨਾ ਯਥਾਵੁਤ੍ਤਨਯੇਨ ਕਮ੍ਮਵਾਚਾਯਂ ਸਕਟ੍ਠਾਨੇ ਵਤ੍ਵਾ ਸਾਵੇਤ੍ਵਾਤਿ ਵੁਤ੍ਤਂ ਹੋਤਿ. ਤੇਨਾਤਿ ਏਕੇਨ ਆਚਰਿਯੇਨ. ਏਕਤੋਤਿ ਦ੍ਵੇ ਤਯੋ ਜਨੇ ਏਕਤੋ ਕਤ੍ਵਾ. ਅਨੁਸਾਵੇਤ੍ਵਾਤਿ ਕਮ੍ਮਵਾਚਂ ਵਤ੍ਵਾ. ਕਤਂ ਉਪਸਮ੍ਪਦਾਕਮ੍ਮਂ.

੨੫੪੮. ਅਞ੍ਞਮਞ੍ਞਾਨੁਸਾਵੇਤ੍ਵਾਤਿ ¶ ਅਞ੍ਞਮਞ੍ਞਸ੍ਸ ਨਾਮਂ ਅਨੁਸਾਵੇਤ੍ਵਾ, ਗਹੇਤ੍ਵਾਤਿ ਅਤ੍ਥੋ, ਅਞ੍ਞਮਞ੍ਞਸ੍ਸ ਨਾਮਂ ਗਹੇਤ੍ਵਾ ਕਮ੍ਮਵਾਚਂ ਵਤ੍ਵਾਤਿ ਵੁਤ੍ਤਂ ਹੋਤਿ.

੨੫੪੯. ਤਂ ਵਿਧਿਂ ਦਸ੍ਸੇਤੁਮਾਹ ‘‘ਸੁਮਨੋ’’ਤਿਆਦਿ. ਸੁਮਨੋਤਿ ਆਚਰਿਯੋ. ਤਿਸ੍ਸਥੇਰਸ੍ਸ ਉਪਜ੍ਝਾਯਸ੍ਸ. ਸਿਸ੍ਸਕਂ ਸਦ੍ਧਿਵਿਹਾਰਿਕਂ. ਅਨੁਸਾਵੇਤੀਤਿ ਕਮ੍ਮਵਾਚਂ ਸਾਵੇਤਿ. ਤਿਸ੍ਸੋਤਿ ਪਠਮਂ ਉਪਜ੍ਝਾਯਭੂਤਸ੍ਸ ਗਹਣਂ. ਸੁਮਨਥੇਰਸ੍ਸਾਤਿ ਪਠਮਂ ਆਚਰਿਯਤ੍ਥੇਰਮਾਹ. ਇਮੇ ਦ੍ਵੇ ਏਕਸੀਮਾਯਂ ਨਿਸੀਦਿਤ੍ਵਾ ਏਕਕ੍ਖਣੇ ਅਞ੍ਞਮਞ੍ਞਸ੍ਸ ਸਦ੍ਧਿਵਿਹਾਰਿਕਾਨਂ ਕਮ੍ਮਵਾਚਂ ਵਦਨ੍ਤਾ ਅਤ੍ਤਨੋ ਅਤ੍ਤਨੋ ਸਦ੍ਧਿਵਿਹਾਰਿਕਂ ਪਟਿਚ੍ਚ ਉਪਜ੍ਝਾਯਾਪਿ ਹੋਨ੍ਤਿ, ਅਨ੍ਤੇਵਾਸਿਕੇ ਪਟਿਚ੍ਚ ਆਚਰਿਯਾਪਿ ਹੋਨ੍ਤਿ, ਅਞ੍ਞਮਞ੍ਞਸ੍ਸ ਗਣਪੂਰਕਾ ਚ ਹੋਨ੍ਤੀਤਿ ਵੁਤ੍ਤਂ ਹੋਤਿ. ਯਥਾਹ –

‘‘ਸਚੇ ਪਨ ਨਾਨਾਚਰਿਯਾ ਨਾਨਾਉਪਜ੍ਝਾਯਾ ਹੋਨ੍ਤਿ, ਤਿਸ੍ਸਤ੍ਥੇਰੋ ਸੁਮਨਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ, ਸੁਮਨਤ੍ਥੇਰੋ ਤਿਸ੍ਸਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ ਅਨੁਸ੍ਸਾਵੇਤਿ ¶ , ਅਞ੍ਞਮਞ੍ਞਞ੍ਚ ਗਣਪੂਰਕਾ ਹੋਨ੍ਤਿ, ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੨੩).

੨੫੫੦. ਇਧਾਤਿ ਇਮਸ੍ਮਿਂ ਉਪਸਮ੍ਪਦਾਧਿਕਾਰੇ. ਪਟਿਕ੍ਖਿਤ੍ਤਾਤਿ ‘‘ਨ ਤ੍ਵੇਵ ਨਾਨੁਪਜ੍ਝਾਯੇਨਾ’’ਤਿ (ਮਹਾਵ. ੧੨੩) ਪਟਿਸਿਦ੍ਧਾ. ਲੋਕਿਯੇਹਿ ਆਦਿਚ੍ਚਪੁਤ੍ਤੋ ਮਨੂਤਿ ਯੋ ਪਠਮਕਪ੍ਪਿਕੋ ਮਨੁਸ੍ਸਾਨਂ ਆਦਿਰਾਜਾ ਵੁਚ੍ਚਤਿ, ਤਸ੍ਸ ਵਂਸੇ ਜਾਤਤ੍ਤਾ ਆਦਿਚ੍ਚੋ ਬਨ੍ਧੁ ਏਤਸ੍ਸਾਤਿ ਆਦਿਚ੍ਚਬਨ੍ਧੁ, ਭਗਵਾ, ਤੇਨ.

ਮਹਾਖਨ੍ਧਕਕਥਾਵਣ੍ਣਨਾ.

ਉਪੋਸਥਕ੍ਖਨ੍ਧਕਕਥਾਵਣ੍ਣਨਾ

੨੫੫੧-੨. ਯਾ ਏਕਾਦਸਹਿ ਸੀਮਾਵਿਪਤ੍ਤੀਹਿ ਵਜ੍ਜਿਤਾ ਤਿਸਮ੍ਪਤ੍ਤਿਸਂਯੁਤਾ ਨਿਮਿਤ੍ਤੇਨ ਨਿਮਿਤ੍ਤਂ ਘਟੇਤ੍ਵਾ ਸਮ੍ਮਤਾ, ਸਾ ਅਯਂ ਬਦ੍ਧਸੀਮਾ ਨਾਮ ਸਿਯਾਤਿ ਯੋਜਨਾ. ਤਤ੍ਥ ਅਤਿਖੁਦ੍ਦਕਾ, ਅਤਿਮਹਤੀ, ਖਣ੍ਡਨਿਮਿਤ੍ਤਾ, ਛਾਯਾਨਿਮਿਤ੍ਤਾ, ਅਨਿਮਿਤ੍ਤਾ, ਬਹਿਸੀਮੇ ਠਿਤਸਮ੍ਮਤਾ, ਨਦਿਯਾ ਸਮ੍ਮਤਾ, ਸਮੁਦ੍ਦੇ ਸਮ੍ਮਤਾ, ਜਾਤਸ੍ਸਰੇ ਸਮ੍ਮਤਾ, ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤੇਨ ਸਮ੍ਮਤਾ, ਸੀਮਾਯ ਸੀਮਂ ਅਜ੍ਝੋਤ੍ਥਰਨ੍ਤੇਨ ਸਮ੍ਮਤਾਤਿ ‘‘ਇਮੇਹਿ ਏਕਾਦਸਹਿ ਆਕਾਰੇਹਿ ਸੀਮਤੋ ਕਮ੍ਮਾਨਿ ਵਿਪਜ੍ਜਨ੍ਤੀ’’ਤਿ ¶ (ਪਰਿ. ੪੮੬) ਵਚਨਤੋ ਇਮਾ ਏਕਾਦਸ ਵਿਪਤ੍ਤਿਸੀਮਾਯੋ ਨਾਮ, ਵਿਪਨ੍ਨਸੀਮਾਤਿ ਵੁਤ੍ਤਂ ਹੋਤਿ.

ਤਤ੍ਥ ਅਤਿਖੁਦ੍ਦਕਾ ਨਾਮ ਯਤ੍ਥ ਏਕਵੀਸਤਿ ਭਿਕ੍ਖੂ ਨਿਸੀਦਿਤੁਂ ਨ ਸਕ੍ਕੋਨ੍ਤਿ. ਅਤਿਮਹਤੀ ਨਾਮ ਯਾ ਅਨ੍ਤਮਸੋ ਕੇਸਗ੍ਗਮਤ੍ਤੇਨਾਪਿ ਤਿਯੋਜਨਂ ਅਤਿਕ੍ਕਮਿਤ੍ਵਾ ਸਮ੍ਮਤਾ. ਖਣ੍ਡਨਿਮਿਤ੍ਤਾ ਨਾਮ ਅਘਟਿਤਨਿਮਿਤ੍ਤਾ ਵੁਚ੍ਚਤਿ. ਪੁਰਤ੍ਥਿਮਾਯ ਦਿਸਾਯ ਨਿਮਿਤ੍ਤਂ ਕਿਤ੍ਤੇਤ੍ਵਾ ਅਨੁਕ੍ਕਮੇਨੇਵ ਦਕ੍ਖਿਣਾਯ, ਪਚ੍ਛਿਮਾਯ, ਉਤ੍ਤਰਾਯ ਦਿਸਾਯ ਕਿਤ੍ਤੇਤ੍ਵਾ ਪੁਨ ਪੁਰਤ੍ਥਿਮਾਯ ਦਿਸਾਯ ਪੁਬ੍ਬਕਿਤ੍ਤਿਤਂ ¶ ਪਟਿਕਿਤ੍ਤੇਤ੍ਵਾ ਠਪੇਤੁਂ ਵਟ੍ਟਤਿ, ਏਵਂ ਅਖਣ੍ਡਨਿਮਿਤ੍ਤਾ ਹੋਤਿ. ਸਚੇ ਪਨ ਅਨੁਕ੍ਕਮੇਨ ਆਹਰਿਤ੍ਵਾ ਉਤ੍ਤਰਾਯ ਦਿਸਾਯ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤ੍ਥੇਵ ਠਪੇਤਿ, ਖਣ੍ਡਨਿਮਿਤ੍ਤਾ ਨਾਮ ਹੋਤਿ. ਅਪਰਾਪਿ ਖਣ੍ਡਨਿਮਿਤ੍ਤਾ ਨਾਮ ਯਾ ਅਨਿਮਿਤ੍ਤੁਪਗਂ ਤਚਸਾਰਰੁਕ੍ਖਂ ਵਾ ਖਾਣੁਕਂ ਵਾ ਪਂਸੁਪੁਞ੍ਜਵਾਲਿਕਾਪੁਞ੍ਜਾਨਂ ਵਾ ਅਞ੍ਞਤਰਂ ਅਨ੍ਤਰਾ ਏਕਂ ਨਿਮਿਤ੍ਤਂ ਕਤ੍ਵਾ ਸਮ੍ਮਤਾ. ਛਾਯਾਨਿਮਿਤ੍ਤਾ ਨਾਮ ਪਬ੍ਬਤਚ੍ਛਾਯਾਦੀਨਂ ਯਂ ਕਿਞ੍ਚਿ ਛਾਯਂ ਨਿਮਿਤ੍ਤਂ ਕਤ੍ਵਾ ਸਮ੍ਮਤਾ. ਅਨਿਮਿਤ੍ਤਾ ਨਾਮ ਸਬ੍ਬੇਨ ਸਬ੍ਬਂ ਨਿਮਿਤ੍ਤਾਨਿ ਅਕਿਤ੍ਤੇਤ੍ਵਾ ਸਮ੍ਮਤਾ. ਬਹਿਸੀਮੇ ਠਿਤਸਮ੍ਮਤਾ ਨਾਮ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਨਿਮਿਤ੍ਤਾਨਂ ਬਹਿ ਠਿਤੇਨ ਸਮ੍ਮਤਾ.

ਨਦਿਯਾ ਸਮੁਦ੍ਦੇ ਜਾਤਸ੍ਸਰੇ ਸਮ੍ਮਤਾ ਨਾਮ ਏਤੇਸੁ ਨਦਿਆਦੀਸੁ ਸਮ੍ਮਤਾ. ਸਾ ਹਿ ਏਵਂ ਸਮ੍ਮਤਾਪਿ ‘‘ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ, ਸਬ੍ਬੋ ਸਮੁਦ੍ਦੋ ਅਸੀਮੋ, ਸਬ੍ਬੋ ਜਾਤਸ੍ਸਰੋ ਅਸੀਮੋ’’ਤਿ (ਮਹਾਵ. ੧੪੮) ਵਚਨਤੋ ਅਸਮ੍ਮਤਾਵ ਹੋਤਿ. ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤੇਨ ਸਮ੍ਮਤਾ ਨਾਮ ਅਤ੍ਤਨੋ ਸੀਮਾਯ ਪਰੇਸਂ ਸੀਮਂ ਸਮ੍ਭਿਨ੍ਦਨ੍ਤੇਨ ਸਮ੍ਮਤਾ. ਸਚੇ ਹਿ ਪੋਰਾਣਕਸ੍ਸ ਵਿਹਾਰਸ੍ਸ ਪੁਰਤ੍ਥਿਮਾਯ ਦਿਸਾਯ ਅਮ੍ਬੋ ਚੇਵ ਜਮ੍ਬੂ ਚਾਤਿ ਦ੍ਵੇ ਰੁਕ੍ਖਾ ਅਞ੍ਞਮਞ੍ਞਂ ਸਂਸਟ੍ਠਵਿਟਪਾ ਹੋਨ੍ਤਿ, ਤੇਸੁ ਅਮ੍ਬਸ੍ਸ ਪਚ੍ਛਿਮਦਿਸਾਭਾਗੇ ਜਮ੍ਬੂ, ਵਿਹਾਰਸੀਮਾ ਚ ਜਮ੍ਬੁਂ ਅਨ੍ਤੋ ਕਤ੍ਵਾ ਅਮ੍ਬਂ ਕਿਤ੍ਤੇਤ੍ਵਾ ਬਦ੍ਧਾ ਹੋਤਿ, ਅਥ ਪਚ੍ਛਾ ਤਸ੍ਸ ਵਿਹਾਰਸ੍ਸ ਪੁਰਤ੍ਥਿਮਾਯ ਦਿਸਾਯ ਵਿਹਾਰੇ ਕਤੇ ਸੀਮਂ ਬਨ੍ਧਨ੍ਤਾ ਭਿਕ੍ਖੂ ਤਂ ਅਮ੍ਬਂ ਅਨ੍ਤੋ ਕਤ੍ਵਾ ਜਮ੍ਬੁਂ ਕਿਤ੍ਤੇਤ੍ਵਾ ਬਨ੍ਧਨ੍ਤਿ, ਸੀਮਾਯ ਸੀਮਂ ਸਮ੍ਭਿਨ੍ਨਾ ਹੋਤਿ. ਸੀਮਾਯ ਸੀਮਂ ਅਜ੍ਝੋਤ੍ਥਰਨ੍ਤੇਨ ਸਮ੍ਮਤਾ ਨਾਮ ਅਤ੍ਤਨੋ ਸੀਮਾਯ ਪਰੇਸਂ ਸੀਮਂ ਅਜ੍ਝੋਤ੍ਥਰਨ੍ਤੇਨ ਸਮ੍ਮਤਾ. ਸਚੇ ਹਿ ਪਰੇਸਂ ਬਦ੍ਧਸੀਮਂ ਸਕਲਂ ਵਾ ਤਸ੍ਸਾ ਪਦੇਸਂ ਵਾ ਅਨ੍ਤੋ ਕਤ੍ਵਾ ਅਤ੍ਤਨੋ ਸੀਮਂ ਸਮ੍ਮਨ੍ਨਤਿ, ਸੀਮਾਯ ਸੀਮਾ ਅਜ੍ਝੋਤ੍ਥਰਿਤਾ ਨਾਮ ਹੋਤੀਤਿ. ਇਤਿ ਇਮਾਹਿ ਏਕਾਦਸਹਿ ਵਿਪਤ੍ਤਿਸੀਮਾਹਿ ਵਜ੍ਜਿਤਾਤਿ ਅਤ੍ਥੋ.

ਤਿਸਮ੍ਪਤ੍ਤਿਸਂਯੁਤਾਤਿ ¶ ਨਿਮਿਤ੍ਤਸਮ੍ਪਤ੍ਤਿ, ਪਰਿਸਾਸਮ੍ਪਤ੍ਤਿ, ਕਮ੍ਮਵਾਚਾਸਮ੍ਪਤ੍ਤੀਤਿ ਇਮਾਹਿ ਤੀਹਿ ਸਮ੍ਪਤ੍ਤੀਹਿ ¶ ਸਮਨ੍ਨਾਗਤਾ. ਤਤ੍ਥ ਨਿਮਿਤ੍ਤਸਮ੍ਪਤ੍ਤਿਯੁਤ੍ਤਾ ਨਾਮ ‘‘ਪਬ੍ਬਤਨਿਮਿਤ੍ਤਂ, ਪਾਸਾਣਨਿਮਿਤ੍ਤਂ, ਵਨਨਿਮਿਤ੍ਤਂ, ਰੁਕ੍ਖਨਿਮਿਤ੍ਤਂ, ਮਗ੍ਗਨਿਮਿਤ੍ਤਂ, ਵਮ੍ਮਿਕਨਿਮਿਤ੍ਤਂ, ਨਦਿਨਿਮਿਤ੍ਤਂ, ਉਦਕਨਿਮਿਤ੍ਤ’’ਨ੍ਤਿ (ਮਹਾਵ. ੧੩੮) ਏਵਂ ਵੁਤ੍ਤੇਸੁ ਅਟ੍ਠਸੁ ਨਿਮਿਤ੍ਤੇਸੁ ਤਸ੍ਮਿਂ ਤਸ੍ਮਿਂ ਦਿਸਾਭਾਗੇ ਯਥਾਲਦ੍ਧਾਨਿ ਨਿਮਿਤ੍ਤੁਪਗਾਨਿ ਨਿਮਿਤ੍ਤਾਨਿ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤਂ? ਪਬ੍ਬਤੋ, ਭਨ੍ਤੇ, ਏਸੋ ਪਬ੍ਬਤੋ ਨਿਮਿਤ੍ਤ’’ਨ੍ਤਿਆਦਿਨਾ ਨਯੇਨ ਸਮ੍ਮਾ ਕਿਤ੍ਤੇਤ੍ਵਾ ਸਮ੍ਮਤਾ.

ਪਰਿਸਾਸਮ੍ਪਤ੍ਤਿਯੁਤ੍ਤਾ ਨਾਮ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਚਤੂਹਿ ਭਿਕ੍ਖੂਹਿ ਸਨ੍ਨਿਪਤਿਤ੍ਵਾ ਯਾਵਤਿਕਾ ਤਸ੍ਮਿਂ ਗਾਮਖੇਤ੍ਤੇ ਬਦ੍ਧਸੀਮਂ ਵਾ ਨਦਿਸਮੁਦ੍ਦਜਾਤਸ੍ਸਰੇ ਵਾ ਅਨੋਕ੍ਕਮਿਤ੍ਵਾ ਠਿਤਾ ਭਿਕ੍ਖੂ, ਤੇ ਸਬ੍ਬੇ ਹਤ੍ਥਪਾਸੇ ਵਾ ਕਤ੍ਵਾ, ਛਨ੍ਦਂ ਵਾ ਆਹਰਿਤ੍ਵਾ ਸਮ੍ਮਤਾ.

ਕਮ੍ਮਵਾਚਾਸਮ੍ਪਤ੍ਤਿਯੁਤ੍ਤਾ ਨਾਮ ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ’’ਤਿਆਦਿਨਾ (ਮਹਾਵ. ੧੩੯) ਨਯੇਨ ਵੁਤ੍ਤਾਯ ਪਰਿਸੁਦ੍ਧਾਯ ਞਤ੍ਤਿਦੁਤਿਯਕਮ੍ਮਵਾਚਾਯ ਸਮ੍ਮਤਾ. ਏਵਂ ਏਕਾਦਸ ਵਿਪਤ੍ਤਿਸੀਮਾਯੋ ਅਤਿਕ੍ਕਮਿਤ੍ਵਾ ਤਿਵਿਧਸਮ੍ਪਤ੍ਤਿਯੁਤ੍ਤਾ ਨਿਮਿਤ੍ਤੇਨ ਨਿਮਿਤ੍ਤਂ ਘਟੇਤ੍ਵਾ ਸਮ੍ਮਤਾ ਸੀਮਾ ਬਦ੍ਧਸੀਮਾਤਿ ਵੇਦਿਤਬ੍ਬਾ.

੨੫੫੩-੪. ਖਣ੍ਡਸਮਾਨਸਂਵਾਸਅਵਿਪ੍ਪਵਾਸਾ ਆਦਯੋ ਆਦਿਭੂਤਾ, ਆਦਿਮ੍ਹਿ ਵਾ ਯਾਸਂ ਸੀਮਾਨਂ ਤਾ ਖਣ੍ਡਸਮਾਨਸਂਵਾਸਾਵਿਪ੍ਪਵਾਸਾਦੀ, ਤਾਸਂ, ਤਾਹਿ ਵਾ ਪਭੇਦੋ ਖਣ੍ਡਸਮਾਨਸਂਵਾਸਾਦਿਭੇਦੋ, ਤਤੋ ਖਣ੍ਡਸਮਾਨਸਂਵਾਸਾਦਿਭੇਦਤੋ, ਖਣ੍ਡਸੀਮਾ, ਸਮਾਨਸਂਵਾਸਸੀਮਾ, ਅਵਿਪ੍ਪਵਾਸਸੀਮਾਤਿ ਇਮਾਸਂ ਸੀਮਾਨਂ ਏਤਾਹਿ ਵਾ ਕਰਣਭੂਤਾਹਿ, ਹੇਤੁਭੂਤਾਹਿ ਵਾ ਜਾਤੇਨ ਵਿਭਾਗੇਨਾਤਿ ਵੁਤ੍ਤਂ ਹੋਤਿ. ਸਮਾਨਸਂਵਾਸਾਵਿਪ੍ਪਵਾਸਾਨਮਨ੍ਤਰੇ ਖਣ੍ਡਾ ਪਰਿਚ੍ਛਿਨ੍ਨਾ ਤਾਹਿ ਅਸਙ੍ਕਰਾ ¶ ਸੀਮਾ ਖਣ੍ਡਸੀਮਾ ਨਾਮ. ਸਮਾਨਸਂਵਾਸੇਹਿ ਭਿਕ੍ਖੂਹਿ ਏਕਤੋ ਉਪੋਸਥਾਦਿਕੋ ਸਂਵਾਸੋ ਏਤ੍ਥ ਕਰੀਯਤੀਤਿ ਸਮਾਨਸਂਵਾਸਾ ਨਾਮ. ਅਵਿਪ੍ਪਵਾਸਾਯ ਲਕ੍ਖਣਂ ‘‘ਬਨ੍ਧਿਤ੍ਵਾ’’ਤਿਆਦਿਨਾ ਵਕ੍ਖਤਿ. ਇਤਿ ਬਦ੍ਧਾ ਤਿਧਾ ਵੁਤ੍ਤਾਤਿ ਏਵਂ ਬਦ੍ਧਸੀਮਾ ਤਿਪ੍ਪਭੇਦਾ ਵੁਤ੍ਤਾ.

ਉਦਕੁਕ੍ਖੇਪਾਤਿ ਹੇਤੁਮ੍ਹਿ ਨਿਸ੍ਸਕ੍ਕਵਚਨਂ. ਸਤ੍ਤਨ੍ਨਂ ਅਬ੍ਭਨ੍ਤਰਾਨਂ ਸਮਾਹਾਰਾ ਸਤ੍ਤਬ੍ਭਨ੍ਤਰਾ, ਤਤੋਪਿ ਚ. ਅਬਦ੍ਧਾਪਿ ਤਿਵਿਧਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਤਾਸੁ ਤੀਸੁ ਅਬਦ੍ਧਸੀਮਾਸੁ. ਗਾਮਪਰਿਚ੍ਛੇਦੋਤਿ ਸਬ੍ਬਦਿਸਾਸੁ ਸੀਮਂ ਪਰਿਚ੍ਛਿਨ੍ਦਿਤ੍ਵਾ ‘‘ਇਮਸ੍ਸ ਪਦੇਸਸ੍ਸ ਏਤ੍ਤਕੋ ਕਰੋ’’ਤਿ ਏਵਂ ਕਰੇਨ ਨਿਯਮਿਤੋ ਗਾਮਪ੍ਪਦੇਸੋ. ਯਥਾਹ – ‘‘ਯਤ੍ਤਕੇ ਪਦੇਸੇ ਤਸ੍ਸ ਗਾਮਸ੍ਸ ਭੋਜਕਾ ਬਲਿਂ ਹਰਨ੍ਤਿ ¶ , ਸੋ ਪਦੇਸੋ ਅਪ੍ਪੋ ਵਾ ਹੋਤੁ ਮਹਨ੍ਤੋ ਵਾ, ‘ਗਾਮਸੀਮਾ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਯਮ੍ਪਿ ਏਕਸ੍ਮਿਂਯੇਵ ਗਾਮਕ੍ਖੇਤ੍ਤੇ ਏਕਂ ਪਦੇਸਂ ‘ਅਯਂ ਵਿਸੁਂ ਗਾਮੋ ਹੋਤੂ’ਤਿ ਪਰਿਚ੍ਛਿਨ੍ਦਿਤ੍ਵਾ ਰਾਜਾ ਕਸ੍ਸਚਿ ਦੇਤਿ, ਸੋਪਿ ਵਿਸੁਂਗਾਮਸੀਮਾ ਹੋਤਿਯੇਵਾ’’ਤਿ (ਮਹਾਵ. ਅਟ੍ਠ. ੧੪੭).

‘‘ਗਾਮਪਰਿਚ੍ਛੇਦੋ’’ਤਿ ਇਮਿਨਾ ਚ ਨਗਰਪਰਿਚ੍ਛੇਦੋ ਚ ਸਙ੍ਗਹਿਤੋ. ਯਥਾਹ – ‘‘ਗਾਮਗ੍ਗਹਣੇਨ ਚੇਤ੍ਥ ਨਗਰਮ੍ਪਿ ਗਹਿਤਮੇਵ ਹੋਤੀ’’ਤਿ (ਮਹਾਵ. ਅਟ੍ਠ. ੧੪੭). ਨਿਗਮਸੀਮਾਯ ਵਿਸੁਂਯੇਵ ਵੁਤ੍ਤਤ੍ਤਾ ਤਸ੍ਸਾ ਇਧ ਸਙ੍ਗਹੋ ਨ ਵਤ੍ਤਬ੍ਬੋ. ਵੁਤ੍ਤਞ੍ਹਿ ਪਾਲ਼ਿਯਂ ‘‘ਯਂ ਗਾਮਂ ਵਾ ਨਿਗਮਂ ਵਾ ਉਪਨਿਸ੍ਸਾਯ ਵਿਹਰਤਿ. ਯਾ ਤਸ੍ਸ ਵਾ ਗਾਮਸ੍ਸ ਗਾਮਸੀਮਾ, ਨਿਗਮਸ੍ਸ ਵਾ ਨਿਗਮਸੀਮਾ, ਅਯਂ ਤਤ੍ਥ ਸਮਾਨਸਂਵਾਸਾ ਏਕੁਪੋਸਥਾ’’ਤਿ (ਮਹਾਵ. ੧੪੭). ਇਮਿਸ੍ਸਾ ਵਿਸੁਂਯੇਵ ਲਕ੍ਖਣਸ੍ਸ ਵੁਤ੍ਤਤ੍ਤਾ ਗਾਮਸੀਮਾਲਕ੍ਖਣੇਨੇਵ ਉਪਲਕ੍ਖਿਤਾ.

੨੫੫੫. ‘‘ਜਾਤਸ੍ਸਰੇ’’ਤਿਆਦੀਸੁ ਜਾਤਸ੍ਸਰਾਦੀਨਂ ਲਕ੍ਖਣਂ ਏਵਂ ਵੇਦਿਤਬ੍ਬਂ – ਯੋ ਪਨ ਕੇਨਚਿ ਖਣਿਤ੍ਵਾ ਅਕਤੋ ਸਯਂਜਾਤੋ ਸੋਬ੍ਭੋ ਸਮਨ੍ਤਤੋ ਆਗਤੇਨ ਉਦਕੇਨ ਪੂਰਿਤੋ ¶ ਤਿਟ੍ਠਤਿ, ਯਤ੍ਥ ਨਦਿਯਂ ਵਕ੍ਖਮਾਨਪ੍ਪਕਾਰੇ ਵਸ੍ਸਕਾਲੇ ਉਦਕਂ ਸਨ੍ਤਿਟ੍ਠਤਿ, ਅਯਂ ਜਾਤਸ੍ਸਰੋ ਨਾਮ. ਯੋਪਿ ਨਦਿਂ ਵਾ ਸਮੁਦ੍ਦਂ ਵਾ ਭਿਨ੍ਦਿਤ੍ਵਾ ਨਿਕ੍ਖਨ੍ਤਉਦਕੇਨ ਖਣਿਤੋ ਸੋਬ੍ਭੋ ਏਤਂ ਲਕ੍ਖਣਂ ਪਾਪੁਣਾਤਿ, ਅਯਮ੍ਪਿ ਜਾਤਸ੍ਸਰੋਯੇਵ. ਸਮੁਦ੍ਦੋ ਪਾਕਟੋਯੇਵ.

ਯਸ੍ਸਾ ਧਮ੍ਮਿਕਾਨਂ ਰਾਜੂਨਂ ਕਾਲੇ ਅਨ੍ਵਡ੍ਢਮਾਸਂ ਅਨੁਦਸਾਹਂ ਅਨੁਪਞ੍ਚਾਹਂ ਅਨਤਿਕ੍ਕਮਿਤ੍ਵਾ ਦੇਵੇ ਵਸ੍ਸਨ੍ਤੇ ਵਲਾਹਕੇਸੁ ਵਿਗਤਮਤ੍ਤੇਸੁ ਸੋਤਂ ਪਚ੍ਛਿਜ੍ਜਤਿ, ਅਯਂ ਨਦਿਸਙ੍ਖ੍ਯਂ ਨ ਗਚ੍ਛਤਿ. ਯਸ੍ਸਾ ਪਨ ਈਦਿਸੇ ਸੁਵੁਟ੍ਠਿਕਾਲੇ ਵਸ੍ਸਾਨਸ੍ਸ ਚਤੁਮਾਸੇ ਸੋਤਂ ਨ ਪਚ੍ਛਿਜ੍ਜਤਿ, ਯਤ੍ਥ ਤਿਤ੍ਥੇਨ ਵਾ ਅਤਿਤ੍ਥੇਨ ਵਾ ਸਿਕ੍ਖਾਕਰਣੀਯੇ ਆਗਤਲਕ੍ਖਣੇਨ ਤਿਮਣ੍ਡਲਂ ਪਟਿਚ੍ਛਾਦੇਤ੍ਵਾ ਅਨ੍ਤਰਵਾਸਕਂ ਅਨੁਕ੍ਖਿਪਿਤ੍ਵਾ ਉਤ੍ਤਰਨ੍ਤਿਯਾ ਭਿਕ੍ਖੁਨਿਯਾ ਏਕਦ੍ਵਙ੍ਗੁਲਮਤ੍ਤਮ੍ਪਿ ਅਨ੍ਤਰਵਾਸਕੋ ਤੇਮਿਯਤਿ, ਅਯਂ ਸਮੁਦ੍ਦਂ ਵਾ ਪਵਿਸਤੁ ਤਲ਼ਾਕਂ ਵਾ, ਪਭਵਤੋ ਪਟ੍ਠਾਯ ਨਦੀ ਨਾਮ.

ਸਮਨ੍ਤਤੋਤਿ ਸਮਨ੍ਤਾ. ਮਜ੍ਝਿਮਸ੍ਸਾਤਿ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ. ਉਦਕੁਕ੍ਖੇਪੋਤਿ ਵਕ੍ਖਮਾਨੇਨ ਨਯੇਨ ਥਾਮਪ੍ਪਮਾਣੇਨ ਖਿਤ੍ਤਸ੍ਸ ਉਦਕਸ੍ਸ ਵਾ ਵਾਲੁਕਾਯ ਵਾ ਪਤਿਤਟ੍ਠਾਨੇਨ ਪਰਿਚ੍ਛਿਨ੍ਨੋ ਅਨ੍ਤੋਪਦੇਸੋ. ਯਥਾ ਅਕ੍ਖਧੁਤ੍ਤਾ ਦਾਰੁਗੁਲ਼ਂ ਖਿਪਨ੍ਤਿ, ਏਵਂ ਉਦਕਂ ਵਾ ਵਾਲੁਕਂ ਵਾ ਹਤ੍ਥੇਨ ਗਹੇਤ੍ਵਾ ਥਾਮਮਜ੍ਝਿਮੇਨ ਪੁਰਿਸੇਨ ਸਬ੍ਬਥਾਮੇਨ ਖਿਪਿਤਬ੍ਬਂ, ਤਤ੍ਥ ਯਤ੍ਥ ਏਵਂ ਖਿਤ੍ਤਂ ਉਦਕਂ ਵਾ ¶ ਵਾਲੁਕਾ ਵਾ ਪਤਤਿ, ਅਯਂ ਉਦਕੁਕ੍ਖੇਪੋ ਨਾਮਾਤਿ. ਉਦਕੁਕ੍ਖੇਪਸਞ੍ਞਿਤੋਤਿ ‘‘ਉਦਕੁਕ੍ਖੇਪੋ’’ਤਿ ਸਲ੍ਲਕ੍ਖਿਤੋ.

੨੫੫੬. ਅਗਾਮਕੇ ਅਰਞ੍ਞੇਤਿ ਵਿਞ੍ਝਾਟਵਿਸਦਿਸੇ ਗਾਮਰਹਿਤੇ ਮਹਾਅਰਞ੍ਞੇ. ਸਮਨ੍ਤਤੋ ਸਤ੍ਤੇਵਬ੍ਭਨ੍ਤਰਾਤਿ ਅਤ੍ਤਨੋ ਠਿਤਟ੍ਠਾਨਤੋ ਪਰਿਕ੍ਖਿਪਿਤ੍ਵਾ ਸਤ੍ਤੇਵ ਅਬ੍ਭਨ੍ਤਰਾ ਯਸ੍ਸਾ ਸੀਮਾਯ ਪਰਿਚ੍ਛੇਦੋ, ਅਯਂ ਸਤ੍ਤਬ੍ਭਨ੍ਤਰਨਾਮਿਕਾ ਸੀਮਾ ਨਾਮ.

੨੫੫੭. ਗੁਲ਼ੁਕ੍ਖੇਪਨਯੇਨਾਤਿ ¶ ਅਕ੍ਖਧੁਤ੍ਤਕਾਨਂ ਦਾਰੁਗੁਲ਼ੁਕ੍ਖਿਪਨਾਕਾਰੇਨ. ਉਦਕੁਕ੍ਖੇਪਕਾਤਿ ਉਦਕੁਕ੍ਖੇਪਸਦਿਸਵਸੇਨ.

੨੫੫੮. ਇਮਾਸਂ ਦ੍ਵਿਨ੍ਨਂ ਸੀਮਾਨਂ ਵਡ੍ਢਨਕ੍ਕਮਂ ਦਸ੍ਸੇਤੁਮਾਹ ‘‘ਅਬ੍ਭਨ੍ਤਰੂਦਕੁਕ੍ਖੇਪਾ, ਠਿਤੋਕਾਸਾ ਪਰਂ ਸਿਯੁ’’ਨ੍ਤਿ. ਠਿਤੋਕਾਸਾ ਪਰਨ੍ਤਿ ਪਰਿਸਾਯ ਠਿਤਟ੍ਠਾਨਤੋ ਪਰਂ, ਪਰਿਸਪਰਿਯਨ੍ਤਤੋ ਪਟ੍ਠਾਯ ਸਤ੍ਤਬ੍ਭਨ੍ਤਰਾ ਚ ਮਿਨਿਤਬ੍ਬਾ, ਉਦਕੁਕ੍ਖੇਪੋ ਚ ਕਾਤਬ੍ਬੋਤਿ ਅਤ੍ਥੋ.

੨੫੫੯-੬੦. ਅਨ੍ਤੋਪਰਿਚ੍ਛੇਦੇਤਿ ਉਦਕੁਕ੍ਖੇਪੇਨ ਵਾ ਸਤ੍ਤਬ੍ਭਨ੍ਤਰੇਹਿ ਵਾ ਪਰਿਚ੍ਛਿਨ੍ਨੋਕਾਸਸ੍ਸ ਅਨ੍ਤੋ. ਹਤ੍ਥਪਾਸਂ ਵਿਹਾਯ ਠਿਤੋ ਵਾ ਪਰਂ ਤਤ੍ਤਕਂ ਪਰਿਚ੍ਛੇਦਂ ਅਨਤਿਕ੍ਕਮ੍ਮ ਠਿਤੋ ਵਾਤਿ ਯੋਜਨਾ, ਸੀਮਨ੍ਤਰਿਕਤ੍ਥਾਯ ਠਪੇਤਬ੍ਬਂ ਏਕਂ ਉਦਕੁਕ੍ਖੇਪਂ ਵਾ ਸਤ੍ਤਬ੍ਭਨ੍ਤਰਂ ਏਵ ਵਾ ਅਨਤਿਕ੍ਕਮ੍ਮ ਠਿਤੋਤਿ ਅਤ੍ਥੋ.

ਕਮ੍ਮਂ ਵਿਕੋਪੇਤੀਤਿ ਅਨ੍ਤੋ ਠਿਤੋ ਕਮ੍ਮਸ੍ਸ ਵਗ੍ਗਭਾਵਕਰਣਤੋ, ਬਹਿ ਤਤ੍ਤਕਂ ਪਦੇਸਂ ਅਨਤਿਕ੍ਕਮਿਤ੍ਵਾ ਠਿਤੋ ਅਞ੍ਞਸ੍ਸ ਸਙ੍ਘਸ੍ਸ ਗਣਪੂਰਣਭਾਵਂ ਗਚ੍ਛਨ੍ਤੋ ਸੀਮਾਯ ਸਙ੍ਕਰਭਾਵਕਰਣੇਨ ਕਮ੍ਮਂ ਵਿਕੋਪੇਤਿ. ਇਤਿ ਯਸ੍ਮਾ ਅਟ੍ਠਕਥਾਨਯੋ, ਤਸ੍ਮਾ ਸੋ ਅਨ੍ਤੋਸੀਮਾਯ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੋ ਹਤ੍ਥਪਾਸੇ ਵਾ ਕਾਤਬ੍ਬੋ, ਸੀਮਨ੍ਤਰਿਕਤ੍ਥਾਯ ਪਰਿਚ੍ਛਿਨ੍ਨੋਕਾਸਤੋ ਬਹਿ ਵਾ ਕਾਤਬ੍ਬੋ. ਤਤ੍ਤਕਂ ਪਰਿਚ੍ਛੇਦਂ ਅਨਤਿਕ੍ਕਮਿਤ੍ਵਾ ਠਿਤੋ ਯਥਾਠਿਤੋਵ ਸਚੇ ਅਞ੍ਞਸ੍ਸ ਕਮ੍ਮਸ੍ਸ ਗਣਪੂਰਕੋ ਨ ਹੋਤਿ, ਕਮ੍ਮਂ ਨ ਕੋਪੇਤੀਤਿ ਗਹੇਤਬ੍ਬਂ.

੨੫੬੧-੨. ਸਣ੍ਠਾਨਨ੍ਤਿ ਤਿਕੋਟਿਸਣ੍ਠਾਨਂ. ਨਿਮਿਤ੍ਤਨ੍ਤਿ ਪਬ੍ਬਤਾਦਿਨਿਮਿਤ੍ਤਂ. ਦਿਸਕਿਤ੍ਤਨਨ੍ਤਿ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤ’’ਨ੍ਤਿਆਦਿਨਾ ਦਿਸਾਕਿਤ੍ਤਨਂ. ਪਮਾਣਨ੍ਤਿ ਤਿਯੋਜਨਪਰਮਂ ਪਮਾਣਂ ¶ . ਸੋਧੇਤ੍ਵਾਤਿ ਯਸ੍ਮਿਂ ਗਾਮਕ੍ਖੇਤ੍ਤੇ ਸੀਮਂ ਬਨ੍ਧਤਿ, ਤਤ੍ਥ ਵਸਨ੍ਤੇ ¶ ਉਪਸਮ੍ਪਨ੍ਨਭਿਕ੍ਖੂ ਬਦ੍ਧਸੀਮਵਿਹਾਰੇ ਵਸਨ੍ਤੇ ਸੀਮਾਯ ਬਹਿ ਗਨ੍ਤੁਂ ਅਦਤ੍ਵਾ, ਅਬਦ੍ਧਸੀਮਵਿਹਾਰੇ ਵਸਨ੍ਤੇ ਹਤ੍ਥਪਾਸਂ ਉਪਨੇਤਬ੍ਬੇ ਹਤ੍ਥਪਾਸਂ ਨੇਤ੍ਵਾ ਅਵਸੇਸੇ ਬਹਿਸੀਮਾਯ ਕਤ੍ਵਾ ਸਬ੍ਬਮਗ੍ਗੇਸੁ ਆਰਕ੍ਖਂ ਵਿਦਹਿਤ੍ਵਾਤਿ ਵੁਤ੍ਤਂ ਹੋਤਿ. ਸੀਮਨ੍ਤਿ ਖਣ੍ਡਸੀਮਂ.

ਕੀਦਿਸਨ੍ਤਿ ਆਹ ‘‘ਤਿਕੋਣ’’ਨ੍ਤਿਆਦਿ. ਪਣਵੂਪਮਨ੍ਤਿ ਪਣਵਸਣ੍ਠਾਨਂ ਮਜ੍ਝੇ ਸਂਖਿਤ੍ਤਂ ਉਭਯਕੋਟਿਯਾ ਵਿਤ੍ਥਤਂ. ‘‘ਵਿਤਾਨਾਕਾਰਂ ਧਨੁਕਾਕਾਰ’’ਨ੍ਤਿ ਆਕਾਰ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਧਨੁਕਾਕਾਰਨ੍ਤਿ ਆਰੋਪਿਤਧਨੁਸਣ੍ਠਾਨਂ, ‘‘ਮੁਦਿਙ੍ਗੂਪਮਂ ਸਕਟੂਪਮ’’ਨ੍ਤਿ ਉਪਮਾ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਮੁਦਿਙ੍ਗੂਪਮਨ੍ਤਿ ਮਜ੍ਝੇ ਵਿਤ੍ਥਤਂ ਉਭਯਕੋਟਿਯਾ ਤਨੁਕਂ ਤੁਰਿਯਵਿਸੇਸਂ ਮੁਦਿਙ੍ਗਨ੍ਤਿ ਵਦਨ੍ਤਿ, ਤਾਦਿਸਨ੍ਤਿ ਅਤ੍ਥੋ. ਸੀਮਂ ਬਨ੍ਧੇਯ੍ਯਾਤਿ ਯੋਜਨਾ.

੨੫੬੩. ਪਬ੍ਬਤਾਦਿਨਿਮਿਤ੍ਤੁਪਗਨਿਮਿਤ੍ਤਾਨਿ ਦਸ੍ਸੇਤੁਮਾਹ ‘‘ਪਬ੍ਬਤ’’ਨ੍ਤਿਆਦਿ. ਇਤਿ ਅਟ੍ਠ ਨਿਮਿਤ੍ਤਾਨਿ ਦੀਪਯੇਤਿ ਯੋਜਨਾ. ਤਤ੍ਰੇਵਂ ਸਙ੍ਖੇਪਤੋ ਨਿਮਿਤ੍ਤੁਪਗਤਾ ਵੇਦਿਤਬ੍ਬਾ – ਸੁਦ੍ਧਪਂਸੁਸੁਦ੍ਧਪਾਸਾਣਉਭਯਮਿਸ੍ਸਕਵਸੇਨ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ; ਮਹਾਵ. ਅਟ੍ਠ. ੧੩੮) ਤਿਵਿਧੋਪਿ ਹਿ ਪਬ੍ਬਤੋ ਹਤ੍ਥਿਪ੍ਪਮਾਣਤੋ ਪਟ੍ਠਾਯ ਉਦ੍ਧਂ ਨਿਮਿਤ੍ਤੁਪਗੋ, ਤਤੋ ਓਮਕਤਰੋ ਨ ਵਟ੍ਟਤਿ. ਅਨ੍ਤੋਸਾਰੇਹਿ ਵਾ ਅਨ੍ਤੋਸਾਰਮਿਸ੍ਸਕੇਹਿ ਵਾ ਰੁਕ੍ਖੇਹਿ ਚਤੁਪਞ੍ਚਰੁਕ੍ਖਮਤ੍ਤਮ੍ਪਿ ਵਨਂ ਨਿਮਿਤ੍ਤੁਪਗਂ, ਤਤੋ ਊਨਤਰਂ ਨ ਵਟ੍ਟਤਿ. ਪਾਸਾਣਨਿਮਿਤ੍ਤੇ ਅਯਗੁਲ਼ਮ੍ਪਿ ਪਾਸਾਣਸਙ੍ਖ੍ਯਮੇਵ ਗਚ੍ਛਤਿ, ਤਸ੍ਮਾ ਯੋ ਕੋਚਿ ਪਾਸਾਣੋ ਉਕ੍ਕਂਸੇਨ ਹਤ੍ਥਿਪ੍ਪਮਾਣਤੋ ਓਮਕਤਰਂ ਆਦਿਂ ਕਤ੍ਵਾ ਹੇਟ੍ਠਿਮਪਰਿਚ੍ਛੇਦੇਨ ਦ੍ਵਤ੍ਤਿਂਸਪਲਗੁਲ਼ਪਿਣ੍ਡਪਰਿਮਾਣੋ ਨਿਮਿਤ੍ਤੁਪਗੋ, ਨ ਤਤੋ ਖੁਦ੍ਦਕਤਰੋ. ਪਿਟ੍ਠਿਪਾਸਾਣੋ ਪਨ ਅਤਿਮਹਨ੍ਤੋਪਿ ਵਟ੍ਟਤਿ. ਰੁਕ੍ਖੋ ਜੀਵਨ੍ਤੋਯੇਵ ਅਨ੍ਤੋਸਾਰੋ ਭੂਮਿਯਂ ਪਤਿਟ੍ਠਿਤੋ ਅਨ੍ਤਮਸੋ ਉਬ੍ਬੇਧਤੋ ਅਟ੍ਠਙ੍ਗੁਲੋ ¶ ਪਰਿਣਾਹਤੋ ਸੂਚਿਦਣ੍ਡਪ੍ਪਮਾਣੋਪਿ ਨਿਮਿਤ੍ਤੁਪਗੋ, ਨ ਤਤੋ ਓਰਂ ਵਟ੍ਟਤਿ. ਮਗ੍ਗੋ ਜਙ੍ਘਮਗ੍ਗੋ ਵਾ ਹੋਤੁ ਸਕਟਮਗ੍ਗੋ ਵਾ, ਯੋ ਵਿਨਿਵਿਜ੍ਝਿਤ੍ਵਾ ਦ੍ਵੇ ਤੀਣਿ ਗਾਮਕ੍ਖੇਤ੍ਤਾਨਿ ਗਚ੍ਛਤਿ, ਤਾਦਿਸੋ ਜਙ੍ਘਸਕਟਸਤ੍ਥੇਹਿ ਵਲ਼ਞ੍ਜਿਯਮਾਨੋਯੇਵ ਨਿਮਿਤ੍ਤੁਪਗੋ, ਅਵਲ਼ਞ੍ਜੋ ਨ ਵਟ੍ਟਤਿ. ਹੇਟ੍ਠਿਮਪਰਿਚ੍ਛੇਦੇਨ ਤਂਦਿਵਸਂ ਜਾਤੋ ਅਟ੍ਠਙ੍ਗੁਲੁਬ੍ਬੇਧੋ ਗੋਵਿਸਾਣਮਤ੍ਤੋਪਿ ਵਮ੍ਮਿਕੋ ਨਿਮਿਤ੍ਤੁਪਗੋ, ਤਤੋ ਓਰਂ ਨ ਵਟ੍ਟਤਿ. ਉਦਕਂ ਯਂ ਅਸਨ੍ਦਮਾਨਂ ਆਵਾਟਪੋਕ੍ਖਰਣਿਤਲ਼ਾਕਜਾਤਸ੍ਸਰਲੋਣਿਸਮੁਦ੍ਦਾਦੀਸੁ ਠਿਤਂ, ਤਂ ਆਦਿਂ ਕਤ੍ਵਾ ਅਨ੍ਤਮਸੋ ਤਙ੍ਖਣਂਯੇਵ ਪਥਵਿਯਂ ਖਤੇ ਆਵਾਟੇ ਘਟੇਹਿ ਆਹਰਿਤ੍ਵਾ ਪੂਰਿਤਮ੍ਪਿ ਯਾਵ ਕਮ੍ਮਵਾਚਾਪਰਿਯੋਸਾਨਾ ਸਣ੍ਠਹਨਕਂ ਨਿਮਿਤ੍ਤੁਪਗਂ, ਇਤਰਂ ਸਨ੍ਦਮਾਨਕਂ, ਵੁਤ੍ਤਪਰਿਚ੍ਛੇਦਕਾਲਂ ¶ ਅਤਿਟ੍ਠਨ੍ਤਂ, ਭਾਜਨਗਤਂ ਵਾ ਨ ਵਟ੍ਟਤਿ. ਯਾ ਅਬਦ੍ਧਸੀਮਾਲਕ੍ਖਣੇ ਨਦੀ ਵੁਤ੍ਤਾ, ਸਾ ਨਿਮਿਤ੍ਤੁਪਗਾ, ਅਞ੍ਞਾ ਨ ਵਟ੍ਟਤੀਤਿ.

੨੫੬੪. ਤੇਸੂਤਿ ਨਿਦ੍ਧਾਰਣੇ ਭੁਮ੍ਮਂ. ਤੀਣੀਤਿ ਨਿਦ੍ਧਾਰਿਤਬ੍ਬਦਸ੍ਸਨਂ, ਇਮਿਨਾ ਏਕਂ ਵਾ ਦ੍ਵੇ ਵਾ ਨਿਮਿਤ੍ਤਾਨਿ ਨ ਵਟ੍ਟਨ੍ਤੀਤਿ ਦਸ੍ਸੇਤਿ. ਯਥਾਹ – ‘‘ਸਾ ਏਵਂ ਸਮ੍ਮਨ੍ਨਿਤ੍ਵਾ ਬਜ੍ਝਮਾਨਾ ਏਕੇਨ, ਦ੍ਵੀਹਿ ਵਾ ਨਿਮਿਤ੍ਤੇਹਿ ਅਬਦ੍ਧਾ ਹੋਤੀ’’ਤਿ (ਮਹਾਵ. ਅਟ੍ਠ. ੧੩੮). ਸਤੇਨਾਪੀਤਿ ਏਤ੍ਥ ਪਿ-ਸਦ੍ਦੋ ਸਮ੍ਭਾਵਨਾਯਂ ਦਟ੍ਠਬ੍ਬੋ, ਤੇਨ ਵੀਸਤਿਯਾ, ਤਿਂਸਾਯ ਵਾ ਨਿਮਿਤ੍ਤੇਹਿ ਵਤ੍ਤਬ੍ਬਮੇਵ ਨਤ੍ਥੀਤਿ ਦੀਪੇਤਿ.

੨੫੬੫. ਤਿਯੋਜਨਂ ਪਰਂ ਉਕ੍ਕਟ੍ਠੋ ਪਰਿਚ੍ਛੇਦੋ ਏਤਿਸ੍ਸਾਤਿ ਤਿਯੋਜਨਪਰਾ. ‘‘ਵੀਸਤੀ’’ਤਿਆਦੀਨਂ ਸਙ੍ਖ੍ਯਾਨੇ, ਸਙ੍ਖ੍ਯੇਯ੍ਯੇ ਚ ਵਤ੍ਤਨਤੋ ਇਧ ਸਙ੍ਖ੍ਯਾਨੇ ਵਤ੍ਤਮਾਨਂ ਵੀਸਤਿ-ਸਦ੍ਦਂ ਗਹੇਤ੍ਵਾ ਏਕਵੀਸਤਿ ਭਿਕ੍ਖੂਨਨ੍ਤਿ ਭਿਨ੍ਨਾਧਿਕਰਣਨਿਦ੍ਦੇਸੋ ਕਤੋਤਿ ਦਟ੍ਠਬ੍ਬਂ. ‘‘ਏਕਵੀਸਤਿ’’ਨ੍ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ਨਿਗ੍ਗਹੀਤਲੋਪੋ, ਵੀਸਤਿਵਗ੍ਗਕਰਣੀਯਪਰਮਤ੍ਤਾ ਸਙ੍ਘਕਮ੍ਮਸ੍ਸ ਕਮ੍ਮਾਰਹੇਨ ਸਦ੍ਧਿਂ ਭਿਕ੍ਖੂਨਂ ਏਕਵੀਸਤਿਂ ਗਣ੍ਹਨ੍ਤੀਤਿ ਅਤ੍ਥੋ, ਇਦਞ੍ਚ ¶ ਨਿਸਿਨ੍ਨਾਨਂ ਵਸੇਨ ਵੁਤ੍ਤਂ. ਹੇਟ੍ਠਿਮਨ੍ਤਤੋ ਹਿ ਯਤ੍ਥ ਏਕਵੀਸਤਿ ਭਿਕ੍ਖੂ ਨਿਸੀਦਿਤੁਂ ਸਕ੍ਕੋਨ੍ਤਿ, ਤਤ੍ਤਕੇ ਪਦੇਸੇ ਸੀਮਂ ਬਨ੍ਧਿਤੁਂ ਵਟ੍ਟਤੀਤਿ.

੨੫੬੬. ਯਾ ਉਕ੍ਕਟ੍ਠਾਯਪਿ ਯਾ ਚ ਹੇਟ੍ਠਿਮਾਯਪਿ ਕੇਸਗ੍ਗਮਤ੍ਤਤੋਪਿ ਅਧਿਕਾ ਵਾ ਊਨਾ ਵਾ, ਏਤਾ ਦ੍ਵੇਪਿ ਸੀਮਾਯੋ ‘‘ਅਸੀਮਾ’’ਤਿ ਆਦਿਚ੍ਚਬਨ੍ਧੁਨਾ ਵੁਤ੍ਤਾਤਿ ਯੋਜਨਾ.

੨੫੬੭. ਸਮਨ੍ਤਤੋ ਸਬ੍ਬਮੇਵ ਨਿਮਿਤ੍ਤਂ ਕਿਤ੍ਤੇਤ੍ਵਾਤਿ ਪੁਬ੍ਬਦਿਸਾਨੁਦਿਸਾਦੀਸੁ ਪਰਿਤੋ ਸਬ੍ਬਦਿਸਾਸੁ ਯਥਾਲਦ੍ਧਂ ਨਿਮਿਤ੍ਤੋਪਗਂ ਸਬ੍ਬਨਿਮਿਤ੍ਤਂ ‘‘ਵਿਨਯਧਰੇਨ ਪੁਚ੍ਛਿਤਬ੍ਬਂ ‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤ’ਨ੍ਤਿ? ‘ਪਬ੍ਬਤੋ, ਭਨ੍ਤੇ’ਤਿ. ਪੁਨ ਵਿਨਯਧਰੇਨ ‘ਏਸੋ ਪਬ੍ਬਤੋ ਨਿਮਿਤ੍ਤ’’ਨ੍ਤਿਆਦਿਨਾ (ਮਹਾਵ. ਅਟ੍ਠ. ੧੩੮) ਅਟ੍ਠਕਥਾਯਂ ਵੁਤ੍ਤਨਯੇਨ ਨਿਮਿਤ੍ਤੇਨ ਨਿਮਿਤ੍ਤਂ ਘਟੇਤ੍ਵਾ ਕਿਤ੍ਤੇਤ੍ਵਾ. ਞਤ੍ਤਿ ਦੁਤਿਯਾ ਯਸ੍ਸਾਤਿ ਵਿਗ੍ਗਹੋ, ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ’’ਤਿਆਦਿਨਾ (ਮਹਾਵ. ੧੩੯) ਪਦਭਾਜਨੇ ਵੁਤ੍ਤੇਨ ਞਤ੍ਤਿਦੁਤਿਯੇਨ ਕਮ੍ਮੇਨਾਤਿ ਅਤ੍ਥੋ. ਅਰਹਤਿ ਪਹੋਤਿ ਵਿਨਯਧਰੋਤਿ ਅਧਿਪ੍ਪਾਯੋ.

੨੫੬੮. ਬਨ੍ਧਿਤ੍ਵਾਤਿ ਯਥਾਵੁਤ੍ਤਲਕ੍ਖਣਨਯੇਨ ਸਮਾਨਸਂਵਾਸਸੀਮਂ ਪਠਮਂ ਬਨ੍ਧਿਤ੍ਵਾ. ਅਨਨ੍ਤਰਨ੍ਤਿ ਕਿਚ੍ਚਨ੍ਤਰੇਨ ਬ੍ਯਵਹਿਤਂ ਅਕਤ੍ਵਾ, ਕਾਲਕ੍ਖੇਪਂ ਅਕਤ੍ਵਾਤਿ ਵੁਤ੍ਤਂ ਹੋਤਿ, ਸੀਮਂ ਸਮੂਹਨਿਤੁਕਾਮਾਨਂ ¶ ਪਚ੍ਚਤ੍ਤਿਕਾਨਂ ਓਕਾਸਂ ਅਦਤ੍ਵਾਤਿ ਅਧਿਪ੍ਪਾਯੋ. ਪਚ੍ਛਾਤਿ ਸਮਾਨਸਂਵਾਸਸਮ੍ਮੁਤਿਤੋ ਪਚ੍ਛਾ. ਚੀਵਰਾਵਿਪ੍ਪਵਾਸਕਂ ਸਮ੍ਮਨ੍ਨਿਤ੍ਵਾਨ ਯਾ ਬਦ੍ਧਾ, ਸਾ ‘‘ਅਵਿਪ੍ਪਵਾਸਾ’’ਤਿ ਵੁਚ੍ਚਤੀਤਿ ਯੋਜਨਾ.

ਤਤ੍ਥ ਚੀਵਰਾਵਿਪ੍ਪਵਾਸਕਂ ਸਮ੍ਮਨ੍ਨਿਤ੍ਵਾਨ ਯਾ ਬਦ੍ਧਾਤਿ ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ¶ ਏਕੁਪੋਸਥਾ…ਪੇ… ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੧੪੪) ਵੁਤ੍ਤਨਯੇਨ ਚੀਵਰੇਨ ਅਵਿਪ੍ਪਵਾਸਂ ਸਮ੍ਮਨ੍ਨਿਤ੍ਵਾ ਯਾ ਬਦ੍ਧਾ. ਸਾ ਅਵਿਪ੍ਪਵਾਸਾਤਿ ਵੁਚ੍ਚਤੀਤਿ ਤਤ੍ਥ ਵਸਨ੍ਤਾਨਂ ਭਿਕ੍ਖੂਨਂ ਚੀਵਰੇਨ ਵਿਪ੍ਪਵਾਸਨਿਮਿਤ੍ਤਾਪਤ੍ਤਿਯਾ ਅਭਾਵਤੋ ਤਥਾ ਵੁਚ੍ਚਤਿ, ‘‘ਅਵਿਪ੍ਪਵਾਸਸੀਮਾ’’ਤਿ ਵੁਚ੍ਚਤੀਤਿ ਵੁਤ੍ਤਂ ਹੋਤਿ.

੨੫੬੯. ‘‘ਯਾ ਕਾਚਿ ਨਦਿਲਕ੍ਖਣਪ੍ਪਤ੍ਤਾ ਨਦੀ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ‘ਏਤਂ ਬਦ੍ਧਸੀਮਂ ਕਰੋਮਾ’ਤਿ ਕਤਾਪਿ ਅਸੀਮਾਵ ਹੋਤੀ’’ਤਿਆਦਿਕਂ (ਮਹਾਵ. ਅਟ੍ਠ. ੧੪੭) ਅਟ੍ਠਕਥਾਨਯਂ ਦਸ੍ਸੇਤੁਮਾਹ ‘‘ਨਦੀ…ਪੇ… ਨ ਵੋਤ੍ਥਰਤੀ’’ਤਿ, ਨ ਪਤ੍ਥਰਤਿ ਸੀਮਾਭਾਵੇਨ ਬ੍ਯਾਪਿਨੀ ਨ ਹੋਤੀਤਿ ਅਤ੍ਥੋ. ਤੇਨੇਵਾਤਿ ਯੇਨ ਨ ਵੋਤ੍ਥਰਤਿ, ਤੇਨੇਵ ਕਾਰਣੇਨ. ਅਬ੍ਰਵੀਤਿ ‘‘ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ, ਸਬ੍ਬੋ ਸਮੁਦ੍ਦੋ ਅਸੀਮੋ, ਸਬ੍ਬੋ ਜਾਤਸ੍ਸਰੋ ਅਸੀਮੋ’’ਤਿ (ਮਹਾਵ. ੧੪੭) ਅਵੋਚ.

ਸੀਮਾਕਥਾਵਣ੍ਣਨਾ.

੨੫੭੦. ਅਟ੍ਠਮਿਯਾਪਿ ਉਪੋਸਥਵੋਹਾਰਤ੍ਤਾ ਦਿਨਵਸੇਨ ਉਪੋਸਥਾਨਂ ਅਤਿਰੇਕਤ੍ਤੇਪਿ ਇਧ ਅਧਿਪ੍ਪੇਤੇਯੇਵ ਉਪੋਸਥੇ ਗਹੇਤ੍ਵਾ ਆਹ ‘‘ਨਵੇਵਾ’’ਤਿ.

੨੫੭੧-੩. ਤੇ ਸਰੂਪਤੋ ਦਸ੍ਸੇਤੁਮਾਹ ‘‘ਚਾਤੁਦ੍ਦਸੋ…ਪੇ… ਕਮ੍ਮੇਨੁਪੋਸਥਾ’’ਤਿ. ਚਤੁਦ੍ਦਸਨ੍ਨਂ ਪੂਰਣੋ ਚਾਤੁਦ੍ਦਸੋ. ਪਨ੍ਨਰਸਨ੍ਨਂ ਪੂਰਣੋ ਪਨ੍ਨਰਸੋ. ਯਦਾ ਪਨ ਕੋਸਮ੍ਬਕ੍ਖਨ੍ਧਕੇ (ਮਹਾਵ. ੪੫੧ ਆਦਯੋ) ਆਗਤਨਯੇਨ ਭਿਨ੍ਨੇ ਸਙ੍ਘੇ ਓਸਾਰਿਤੇ ਤਸ੍ਮਿਂ ਭਿਕ੍ਖੁਸ੍ਮਿਂ ਸਙ੍ਘੋ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਤਿ, ਤਦਾ ‘‘ਤਾਵਦੇਵ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿ (ਮਹਾਵ. ੪੭੫) ਵਚਨਤੋ ਠਪੇਤ੍ਵਾ ਚਾਤੁਦ੍ਦਸਪਨ੍ਨਰਸੇ ¶ ਅਞ੍ਞੋਪਿ ਯੋ ਕੋਚਿ ਦਿਵਸੋ ਸਾਮਗ੍ਗੀ ਉਪੋਸਥੋਤਿ. ਏਤ੍ਥ ਇਤਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਚਾਤੁਦ੍ਦਸੋ, ਪਨ੍ਨਰਸੋ, ਸਾਮਗ੍ਗੀ ਚ ਉਪੋਸਥੋਤਿ ਏਤੇ ਤਯੋਪਿ ਉਪੋਸਥਾ ਦਿਵਸੇਨੇਵ ਨਿਦ੍ਦਿਟ੍ਠਾ ਦਿਵਸੇਨੇਵ ਵੁਤ੍ਤਾਤਿ ਯੋਜਨਾ.

ਸਙ੍ਘੇਉਪੋਸਥੋਤਿ ¶ ਸਙ੍ਘੇਨ ਕਾਤਬ੍ਬਉਪੋਸਥੋ. ਗਣੇਪੁਗ੍ਗਲੁਪੋਸਥੋਤਿ ਏਤ੍ਥਾਪਿ ਏਸੇਵ ਨਯੋ. ਸਾਧ੍ਯਸਾਧਨਲਕ੍ਖਣਸ੍ਸ ਸਮ੍ਬਨ੍ਧਸ੍ਸ ਲਬ੍ਭਮਾਨਤ੍ਤਾ ‘‘ਸਙ੍ਘੇ’’ਤਿਆਦੀਸੁ ਸਾਮਿਵਚਨਪ੍ਪਸਙ੍ਗੇ ਭੁਮ੍ਮਨਿਦ੍ਦੇਸੋ. ਉਪੋਸਥੋ ਸਾਧ੍ਯੋ ਕਮ੍ਮਭਾਵਤੋ, ਸਙ੍ਘਗਣਪੁਗ੍ਗਲਾ ਸਾਧਨਂ ਕਾਰਕਭਾਵਤੋ.

ਸੁਤ੍ਤਸ੍ਸ ਉਦ੍ਦੇਸੋ ਸੁਤ੍ਤੁਦ੍ਦੇਸੋ, ਸੁਤ੍ਤੁਦ੍ਦੇਸੋਤਿ ਅਭਿਧਾਨਂ ਨਾਮਂ ਯਸ੍ਸ ਸੋ ਸੁਤ੍ਤੁਦ੍ਦੇਸਾਭਿਧਾਨੋ. ਕਮ੍ਮੇਨਾਤਿ ਕਿਚ੍ਚਵਸੇਨ.

੨੫੭੪. ‘‘ਅਧਿਟ੍ਠਾਨ’’ਨ੍ਤਿ ਵਾਚ੍ਚਲਿਙ੍ਗਮਪੇਕ੍ਖਿਤ੍ਵਾ ‘‘ਨਿਦ੍ਦਿਟ੍ਠ’’ਨ੍ਤਿ ਨਪੁਂਸਕਨਿਦ੍ਦੇਸੋ. ਵਾਚ੍ਚਲਿਙ੍ਗਾ ਹਿ ਤਬ੍ਬਾਦਯੋਤਿ ਪਾਤਿਮੋਕ੍ਖੋ ਨਿਦ੍ਦਿਟ੍ਠੋ, ਪਾਰਿਸੁਦ੍ਧਿ ਨਿਦ੍ਦਿਟ੍ਠਾਤਿ ਪੁਮਿਤ੍ਥਿਲਿਙ੍ਗੇਨ ਯੋਜੇਤਬ੍ਬਾ.

੨੫੭੫. ਵੁਤ੍ਤਾਤਿ ‘‘ਪਞ੍ਚਿਮੇ, ਭਿਕ੍ਖਵੇ, ਪਾਤਿਮੋਕ੍ਖੁਦ੍ਦੇਸਾ, ਨਿਦਾਨਂ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਪਠਮੋ ਪਾਤਿਮੋਕ੍ਖੁਦ੍ਦੇਸੋ’’ਤਿਆਦਿਨਾ (ਮਹਾਵ. ੧੫੦) ਦੇਸਿਤਾ, ਸਯਞ੍ਚ ਤੇਸਞ੍ਚ ਉਦ੍ਦੇਸੇ ਸਙ੍ਖੇਪਤੋ ਦਸ੍ਸੇਤੁਮਾਹ ‘‘ਨਿਦਾਨ’’ਨ੍ਤਿਆਦਿ. ਸਾਵੇਤਬ੍ਬਨ੍ਤਿ ਏਤ੍ਥ ‘‘ਸੁਤੇਨਾ’’ਤਿ ਸੇਸੋ. ਸੇਸਕਨ੍ਤਿ ਅਨੁਦ੍ਦਿਟ੍ਠਟ੍ਠਾਨਂ –

‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ…ਪੇ… ਆਵਿਕਤਾ ਹਿਸ੍ਸ ਫਾਸੁ ਹੋਤੀਤਿ ਇਮਂ ਨਿਦਾਨਂ ਉਦ੍ਦਿਸਿਤ੍ਵਾ ‘ਉਦ੍ਦਿਟ੍ਠਂ ਖੋ ¶ ਆਯਸ੍ਮਨ੍ਤੋ ਨਿਦਾਨਂ, ਤਤ੍ਥਾਯਸ੍ਮਨ੍ਤੇ ਪੁਚ੍ਛਾਮਿ ਕਚ੍ਚਿਤ੍ਥ ਪਰਿਸੁਦ੍ਧਾ, ਦੁਤਿਯਮ੍ਪਿ ਪੁਚ੍ਛਾਮਿ…ਪੇ… ਏਵਮੇਤਂ ਧਾਰਯਾਮੀ’ਤਿ ਵਤ੍ਵਾ ‘ਉਦ੍ਦਿਟ੍ਠਂ ਖੋ ਆਯਸ੍ਮਨ੍ਤੋ ਨਿਦਾਨਂ. ਸੁਤਾ ਖੋ ਪਨਾਯਸ੍ਮਨ੍ਤੇਹਿ ਚਤ੍ਤਾਰੋ ਪਾਰਾਜਿਕਾ ਧਮ੍ਮਾ…ਪੇ… ਅਵਿਵਦਮਾਨੇਹਿ ਸਿਕ੍ਖਿਤਬ੍ਬ’’ਨ੍ਤਿ (ਮਹਾਵ. ਅਟ੍ਠ. ੧੫੦) –

ਅਟ੍ਠਕਥਾਯ ਵੁਤ੍ਤਨਯੇਨ ਅਵਸੇਸਂ ਸੁਤੇਨ ਸਾਵੇਤਬ੍ਬਂ.

੨੫੭੬. ਸੇਸੇਸੁਪੀਤਿ ਉਦ੍ਦਿਟ੍ਠਾਪੇਕ੍ਖਾਯ ਸੇਸੇਸੁ ਪਾਰਾਜਿਕੁਦ੍ਦੇਸਾਦੀਸੁਪਿ. ‘‘ਅਯਮੇਵ ਨਯੋ ਞੇਯ੍ਯੋ’’ਤਿ ਸਾਮਞ੍ਞੇਨ ਵੁਤ੍ਤੇਪਿ ‘‘ਵਿਤ੍ਥਾਰੇਨੇਵ ਪਞ੍ਚਮੋ’’ਤਿ ਵਚਨਤੋ ਵਿਤ੍ਥਾਰੁਦ੍ਦੇਸੇ ‘‘ਸਾਵੇਤਬ੍ਬਂ ਤੁ ਸੇਸਕ’’ਨ੍ਤਿ ਅਯਂ ਨਯੋ ਨ ਲਬ੍ਭਤਿ. ‘‘ਸਾਵੇਤਬ੍ਬਂ ਤੁ ਸੇਸਕ’’ਨ੍ਤਿ ਵਚਨਤੋ ਪਾਰਾਜਿਕੁਦ੍ਦੇਸਾਦੀਸੁ ਯਸ੍ਮਿਂ ਵਿਪ੍ਪਕਤੇ ਅਨ੍ਤਰਾਯੋ ਉਪ੍ਪਜ੍ਜਤਿ, ਤੇਨ ਸਦ੍ਧਿਂ ਅਵਸੇਸਂ ਸੁਤੇਨ ਸਾਵੇਤਬ੍ਬਂ. ਨਿਦਾਨੁਦ੍ਦੇਸੇ ਪਨ ¶ ਅਨੁਦ੍ਦਿਟ੍ਠੇ ਸੁਤੇਨ ਸਾਵੇਤਬ੍ਬਂ ਨਾਮ ਨਤ੍ਥਿ. ਭਿਕ੍ਖੁਨਿਪਾਤਿਮੋਕ੍ਖੇ ਅਨਿਯਤੁਦ੍ਦੇਸਸ੍ਸ ਪਰਿਹੀਨਤ੍ਤਾ ‘‘ਭਿਕ੍ਖੁਨੀਨਞ੍ਚ ਚਤ੍ਤਾਰੋ’’ਤਿ ਵੁਤ੍ਤਂ. ਉਦ੍ਦੇਸਾ ਨਵਿਮੇ ਪਨਾਤਿ ਭਿਕ੍ਖੂਨਂ ਪਞ੍ਚ, ਭਿਕ੍ਖੁਨੀਨਂ ਚਤ੍ਤਾਰੋਤਿ ਉਭਤੋਪਾਤਿਮੋਕ੍ਖੇ ਇਮੇ ਨਵ ਉਦ੍ਦੇਸਾ ਵੁਤ੍ਤਾਤਿ ਅਤ੍ਥੋ.

੨੫੭੭. ਉਪੋਸਥੇਤਿ ਸਙ੍ਘੁਪੋਸਥੇ. ਅਨ੍ਤਰਾਯਨ੍ਤਿ ਰਾਜਨ੍ਤਰਾਯਾਦਿਕਂ ਦਸਵਿਧਂ ਅਨ੍ਤਰਾਯਂ. ਯਥਾਹ – ‘‘ਰਾਜਨ੍ਤਰਾਯੋ ਚੋਰਨ੍ਤਰਾਯੋ ਅਗ੍ਯਨ੍ਤਰਾਯੋ ਉਦਕਨ੍ਤਰਾਯੋ ਮਨੁਸ੍ਸਨ੍ਤਰਾਯੋ ਅਮਨੁਸ੍ਸਨ੍ਤਰਾਯੋ ਵਾਲ਼ਨ੍ਤਰਾਯੋ ਸਰੀਸਪਨ੍ਤਰਾਯੋ ਜੀਵਿਤਨ੍ਤਰਾਯੋ ਬ੍ਰਹ੍ਮਚਰਿਯਨ੍ਤਰਾਯੋ’’ਤਿ (ਮਹਾਵ. ੧੫੦).

ਤਤ੍ਥ ਸਚੇ ਭਿਕ੍ਖੂਸੁ ‘‘ਉਪੋਸਥਂ ਕਰਿਸ੍ਸਾਮਾ’’ਤਿ (ਮਹਾਵ. ਅਟ੍ਠ. ੧੫੦) ਨਿਸਿਨ੍ਨੇਸੁ ਰਾਜਾ ਆਗਚ੍ਛਤਿ, ਅਯਂ ਰਾਜਨ੍ਤਰਾਯੋ. ਚੋਰਾ ਆਗਚ੍ਛਨ੍ਤਿ ¶ , ਅਯਂ ਚੋਰਨ੍ਤਰਾਯੋ. ਦਵਦਾਹੋ ਆਗਚ੍ਛਤਿ ਵਾ, ਆਵਾਸੇ ਵਾ ਅਗ੍ਗਿ ਉਟ੍ਠਹਤਿ, ਅਯਂ ਅਗ੍ਯਨ੍ਤਰਾਯੋ. ਮੇਘੋ ਵਾ ਉਟ੍ਠੇਤਿ, ਓਘੋ ਵਾ ਆਗਚ੍ਛਤਿ, ਅਯਂ ਉਦਕਨ੍ਤਰਾਯੋ. ਬਹੂ ਮਨੁਸ੍ਸਾ ਆਗਚ੍ਛਨ੍ਤਿ, ਅਯਂ ਮਨੁਸ੍ਸਨ੍ਤਰਾਯੋ. ਭਿਕ੍ਖੁਂ ਯਕ੍ਖੋ ਗਣ੍ਹਾਤਿ, ਅਯਂ ਅਮਨੁਸ੍ਸਨ੍ਤਰਾਯੋ. ਬ੍ਯਗ੍ਘਾਦਯੋ ਚਣ੍ਡਮਿਗਾ ਆਗਚ੍ਛਨ੍ਤਿ, ਅਯਂ ਵਾਲ਼ਨ੍ਤਰਾਯੋ. ਭਿਕ੍ਖੁਂ ਸਪ੍ਪਾਦਯੋ ਡਂਸਨ੍ਤਿ, ਅਯਂ ਸਰੀਸਪਨ੍ਤਰਾਯੋ. ਭਿਕ੍ਖੁ ਗਿਲਾਨੋ ਵਾ ਹੋਤਿ, ਕਾਲਂ ਵਾ ਕਰੋਤਿ, ਵੇਰਿਨੋ ਵਾ ਤਂ ਮਾਰੇਤੁਂ ਗਣ੍ਹਨ੍ਤਿ, ਅਯਂ ਜੀਵਿਤਨ੍ਤਰਾਯੋ. ਮਨੁਸ੍ਸਾ ਏਕਂ ਵਾ ਬਹੁਂ ਵਾ ਭਿਕ੍ਖੂ ਬ੍ਰਹ੍ਮਚਰਿਯਾ ਚਾਵੇਤੁਕਾਮਾ ਗਣ੍ਹਨ੍ਤਿ, ਅਯਂ ਬ੍ਰਹ੍ਮਚਰਿਯਨ੍ਤਰਾਯੋ.

‘‘ਚੇਵਾ’’ਤਿ ਇਮਿਨਾ ਅਨ੍ਤਰਾਯੇਵ ਅਨ੍ਤਰਾਯਸਞ੍ਞਿਨਾ ਵਿਤ੍ਥਾਰੁਦ੍ਦੇਸੇ ਅਕਤੇਪਿ ਅਨਾਪਤ੍ਤੀਤਿ ਦੀਪੇਤਿ. ਅਨੁਦ੍ਦੇਸੋਤਿ ਵਿਤ੍ਥਾਰੇਨ ਅਨੁਦ੍ਦੇਸੋ. ਨਿਵਾਰਿਤੋਤਿ ‘‘ਨ, ਭਿਕ੍ਖਵੇ, ਅਸਤਿ ਅਨ੍ਤਰਾਯੇ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿਆਦਿਨਾ (ਮਹਾਵ. ੧੫੦) ਪਟਿਸਿਦ੍ਧੋ. ਇਮਿਨਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤਿ ਅਨ੍ਤਰਾਯੇ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤੁ’’ਨ੍ਤਿ (ਮਹਾਵ. ੧੫੦) ਇਦਮ੍ਪਿ ਵਿਭਾਵਿਤਂ ਹੋਤਿ.

੨੫੭੮. ਤਸ੍ਸਾਤਿ ਪਾਤਿਮੋਕ੍ਖਸ੍ਸ. ਇਸ੍ਸਰਣਸ੍ਸ ਹੇਤੁਮਾਹ ‘‘‘ਥੇਰਾਧੇਯ੍ਯ’ਨ੍ਤਿ ਪਾਠਤੋ’’ਤਿ. ਥੇਰਾਧੇਯ੍ਯਨ੍ਤਿ ਥੇਰਾਧੀਨਂ, ਥੇਰਾਯਤ੍ਤਨ੍ਤਿ ਅਤ੍ਥੋ. ਪਾਠਤੋਤਿ ਪਾਲ਼ਿਵਚਨਤੋ. ‘‘ਯੋ ਤਤ੍ਥ ਭਿਕ੍ਖੁ ਬ੍ਯਤ੍ਤੋ ਪਟਿਬਲੋ, ਤਸ੍ਸਾਧੇਯ੍ਯਂ ਪਾਤਿਮੋਕ੍ਖ’’ਨ੍ਤਿ (ਮਹਾਵ. ੧੫੫) ਵਚਨਤੋ ਆਹ ‘‘ਅਵਤ੍ਤਨ੍ਤੇਨਾ’’ਤਿਆਦਿ. ਅਵਤ੍ਤਨ੍ਤੇਨਾਤਿ ਅਨ੍ਤਮਸੋ ਦ੍ਵੇਪਿ ਉਦ੍ਦੇਸੇ ਉਦ੍ਦਿਸਿਤੁਂ ਅਸਕ੍ਕੋਨ੍ਤੇਨ. ਥੇਰੇਨ ਯੋ ¶ ਅਜ੍ਝਿਟ੍ਠੋ, ਏਵਮਜ੍ਝਿਟ੍ਠਸ੍ਸ ਯਸ੍ਸ ਪਨ ਥੇਰਸ੍ਸ, ਨਵਸ੍ਸ, ਮਜ੍ਝਿਮਸ੍ਸ ਵਾ ਸੋ ਪਾਤਿਮੋਕ੍ਖੋ ¶ ਵਤ੍ਤਤਿ ਪਗੁਣੋ ਹੋਤਿ, ਸੋ ਇਸ੍ਸਰੋਤਿ ਸਮ੍ਬਨ੍ਧੋ.

ਅਜ੍ਝਿਟ੍ਠੋਤਿ ‘‘ਤ੍ਵਂ, ਆਵੁਸੋ, ਪਾਤਿਮੋਕ੍ਖਂ ਉਦ੍ਦਿਸਾ’’ਤਿ ਆਣਤ੍ਤੋ, ਇਮਿਨਾ ਅਨਾਣਤ੍ਤਸ੍ਸ ਉਦ੍ਦਿਸਿਤੁਂ ਸਾਮਤ੍ਥਿਯਾ ਸਤਿਪਿ ਅਨਿਸ੍ਸਰਭਾਵੋ ਦੀਪਿਤੋ ਹੋਤਿ. ਯਥਾਹ – ‘‘ਸਚੇ ਥੇਰਸ੍ਸ ਪਞ੍ਚ ਵਾ ਚਤ੍ਤਾਰੋ ਵਾ ਤਯੋ ਵਾ ਪਾਤਿਮੋਕ੍ਖੁਦ੍ਦੇਸਾ ਨਾਗਚ੍ਛਨ੍ਤਿ, ਦ੍ਵੇ ਪਨ ਅਖਣ੍ਡਾ ਸੁਵਿਸਦਾ ਵਾਚੁਗ੍ਗਤਾ ਹੋਨ੍ਤਿ, ਥੇਰਾਯਤ੍ਤੋਵ ਪਾਤਿਮੋਕ੍ਖੋ. ਸਚੇ ਪਨ ਏਤ੍ਤਕਮ੍ਪਿ ਵਿਸਦਂ ਕਾਤੁਂ ਨ ਸਕ੍ਕੋਤਿ, ਬ੍ਯਤ੍ਤਸ੍ਸ ਭਿਕ੍ਖੁਨੋ ਆਯਤ੍ਤੋ ਹੋਤੀ’’ਤਿ (ਮਹਾਵ. ਅਟ੍ਠ. ੧੫੫).

੨੫੭੯. ਉਦ੍ਦਿਸਨ੍ਤੇਤਿ ਪਾਤਿਮੋਕ੍ਖੁਦ੍ਦੇਸਕੇ ਪਾਤਿਮੋਕ੍ਖਂ ਉਦ੍ਦਿਸਨ੍ਤੇ. ਸਮਾ ਵਾਤਿ ਆਵਾਸਿਕੇਹਿ ਗਣਨੇਨ ਸਮਾ ਵਾ. ਅਪ੍ਪਾ ਵਾਤਿ ਊਨਾ ਵਾ. ਆਗਚ੍ਛਨ੍ਤਿ ਸਚੇ ਪਨਾਤਿ ਸਚੇ ਪਨ ਆਗਨ੍ਤੁਕਾ ਭਿਕ੍ਖੂ ਆਗਚ੍ਛਨ੍ਤਿ. ਸੇਸਕਨ੍ਤਿ ਅਨੁਦ੍ਦਿਟ੍ਠਟ੍ਠਾਨਂ.

੨੫੮੦. ਉਦ੍ਦਿਟ੍ਠਮਤ੍ਤੇਤਿ ਉਦ੍ਦਿਟ੍ਠਕ੍ਖਣੇਯੇਵ ਕਥਾਰਮ੍ਭਤੋ ਪੁਬ੍ਬਮੇਵ. ‘‘ਵਾ’’ਤਿ ਇਦਂ ਏਤ੍ਥਾਪਿ ਯੋਜੇਤਬ੍ਬਂ, ਇਮਿਨਾ ਅਵੁਤ੍ਤਂ ‘‘ਅਵੁਟ੍ਠਿਤਾਯ ਵਾ’’ਤਿ ਇਮਂ ਵਿਕਪ੍ਪਂ ਸਮ੍ਪਿਣ੍ਡੇਤਿ. ਅਵੁਟ੍ਠਿਤਾਯ ਪਰਿਸਾਯਾਤਿ ਚ ਭਿਕ੍ਖੁਪਰਿਸਾਯ ਅਞ੍ਞਮਞ੍ਞਂ ਸੁਖਕਥਾਯ ਨਿਸਿਨ੍ਨਾਯਯੇਵਾਤਿ ਅਤ੍ਥੋ. ਪਰਿਸਾਯਾਤਿ ਏਤ੍ਥ ‘‘ਏਕਚ੍ਚਾਯਾ’’ਤਿ ਚ ‘‘ਸਬ੍ਬਾਯਾ’’ਤਿ ਚ ਸੇਸੋ. ਭਿਕ੍ਖੂਨਂ ਏਕਚ੍ਚਾਯ ਪਰਿਸਾਯ ਵੁਟ੍ਠਿਤਾਯ ਵਾ ਸਬ੍ਬਾਯ ਪਰਿਸਾਯ ਵੁਟ੍ਠਿਤਾਯ ਵਾਤਿ ਯੋਜਨਾ. ਤੇਸਨ੍ਤਿ ਵੁਤ੍ਤਪ੍ਪਕਾਰਾਨਂ ਆਵਾਸਿਕਾਨਂ. ਮੂਲੇਤਿ ਸਨ੍ਤਿਕੇ. ਪਾਰਿਸੁਦ੍ਧਿ ਕਾਤਬ੍ਬਾਤਿ ਯੋਜਨਾ. ‘‘ਇਧ ਪਨ, ਭਿਕ੍ਖਵੇ…ਪੇ… ਆਗਚ੍ਛਨ੍ਤਿ ਬਹੁਤਰਾ, ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿ ਵੁਤ੍ਤਨਯਂ ਦਸ੍ਸੇਤੁਮਾਹ ‘‘ਸਚੇ ਬਹੂ’’ਤਿ. ਏਤ੍ਥ ‘‘ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿ ਸੇਸੋ. ਸਬ੍ਬਵਿਕਪ੍ਪੇਸੁ ਪੁਬ੍ਬਕਿਚ੍ਚਂ ਕਤ੍ਵਾ ¶ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਨ੍ਤਿ ਅਤ੍ਥੋ. ਅਯਂ ਪਨੇਤ੍ਥ ਸੇਸਵਿਨਿਚ੍ਛਯੋ –

‘‘ਪਨ੍ਨਰਸੋਵਾਸਿਕਾਨਂ, ਇਤਰਾਨਂ ਸਚੇਤਰੋ;

ਸਮਾਨੇਤਰੇਨੁਵਤ੍ਤਨ੍ਤੁ, ਪੁਰਿਮਾਨਂ ਸਚੇਧਿਕਾ;

ਪੁਰਿਮਾ ਅਨੁਵਤ੍ਤਨ੍ਤੁ, ਤੇਸਂ ਸੇਸੇਪ੍ਯਯਂ ਨਯੋ.

‘‘ਪਾਟਿਪਦੋਵਾਸਿਕਾਨਂ ¶ ,

ਇਤਰਾਨਂ ਉਪੋਸਥੋ;

ਸਮਥੋਕਾਨਂ ਸਾਮਗ੍ਗਿਂ,

ਮੂਲਟ੍ਠਾ ਦੇਨ੍ਤੁ ਕਾਮਤੋ.

ਬਹਿ ਗਨ੍ਤ੍ਵਾਨ ਕਾਤਬ੍ਬੋ,

ਨੋ ਚੇ ਦੇਨ੍ਤਿ ਉਪੋਸਥੋ;

ਦੇਯ੍ਯਾਨਿਚ੍ਛਾਯ ਸਾਮਗ੍ਗੀ,

ਬਹੂਸੁ ਬਹਿ ਵਾ ਵਜੇ.

‘‘ਪਾਟਿਪਦੇਗਨ੍ਤੁਕਾਨਂ, ਏਵਮੇਵ ਅਯਂ ਨਯੋ;

ਸਾਵੇਯ੍ਯ ਸੁਤ੍ਤਂ ਸਞ੍ਚਿਚ੍ਚ, ਅਸ੍ਸਾਵੇਨ੍ਤਸ੍ਸ ਦੁਕ੍ਕਟਨ੍ਤਿ.

੨੫੮੧. ਵਿਨਿਦ੍ਦਿਟ੍ਠਸ੍ਸਾਤਿ ਆਣਤ੍ਤਸ੍ਸ, ਇਮਿਨਾ ਇਤਰੇਸਂ ਅਨਾਪਤ੍ਤੀਤਿ ਦੀਪੇਤਿ. ਇਧ ‘‘ਅਗਿਲਾਨਸ੍ਸਾ’’ਤਿ ਸੇਸੋ. ਥੇਰੇਨ ਆਣਾਪੇਨ੍ਤੇਨ ‘‘ਕਿਞ੍ਚਿ ਕਮ੍ਮਂ ਕਰੋਨ੍ਤੋ ਵਾ ਸਦਾਕਾਲਮੇਵ ਏਕੋ ਵਾ ਭਾਰਨਿਤ੍ਥਰਣਕੋ ਵਾ ਸਰਭਾਣਕਧਮ੍ਮਕਥਿਕਾਦੀਸੁ ਅਞ੍ਞਤਰੋ ਵਾ ਨ ਉਪੋਸਥਾਗਾਰਸਮ੍ਮਜ੍ਜਨਤ੍ਥਂ ਆਣਾਪੇਤਬ੍ਬੋ, ਅਵਸੇਸਾ ਪਨ ਵਾਰੇਨ ਆਣਾਪੇਤਬ੍ਬਾ’’ਤਿ (ਮਹਾਵ. ਅਟ੍ਠ. ੧੫੯) ਅਟ੍ਠਕਥਾਯ ਵੁਤ੍ਤਵਿਧਿਨਾ ਆਣਾਪੇਤਬ੍ਬੋ. ਸਚੇ ਆਣਤ੍ਤੋ ਸਮ੍ਮਜ੍ਜਨਿਂ ਤਾਵਕਾਲਿਕਮ੍ਪਿ ਨ ਲਭਤਿ, ਸਾਖਾਭਙ੍ਗਂ ਕਪ੍ਪਿਯਂ ਕਾਰੇਤ੍ਵਾ ਸਮ੍ਮਜ੍ਜਿਤਬ੍ਬਂ. ਤਮ੍ਪਿ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ.

ਆਸਨਪਞ੍ਞਾਪਨਾਣਤ੍ਤਿਯਮ੍ਪਿ ¶ ਵੁਤ੍ਤਨਯੇਨੇਵ ਆਣਾਪੇਤਬ੍ਬੋ. ਆਣਾਪੇਨ੍ਤੇਨ ਚ ਸਚੇ ਉਪੋਸਥਾਗਾਰੇ ਆਸਨਾਨਿ ਨਤ੍ਥਿ, ਸਙ੍ਘਿਕਾਵਾਸਤੋਪਿ ਆਹਰਿਤ੍ਵਾ ਪਞ੍ਞਪੇਤ੍ਵਾ ਪੁਨ ਆਹਰਿਤਬ੍ਬਾਨਿ. ਆਸਨੇਸੁ ਅਸਤਿ ਕਟਸਾਰਕੇਪਿ ਤਟ੍ਟਿਕਾਯੋਪਿ ਪਞ੍ਞਪੇਤੁਂ ਵਟ੍ਟਤਿ, ਤਟ੍ਟਿਕਾਸੁਪਿ ਅਸਤਿ ਸਾਖਾਭਙ੍ਗਾਨਿ ਕਪ੍ਪਿਯਂ ਕਾਰੇਤ੍ਵਾ ਪਞ੍ਞਪੇਤਬ੍ਬਾਨਿ, ਕਪ੍ਪਿਯਕਾਰਕਂ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ.

ਪਦੀਪਕਰਣੇਪਿ ਵੁਤ੍ਤਨਯੇਨੇਵ ਆਣਾਪੇਤਬ੍ਬੋ. ਆਣਾਪੇਨ੍ਤੇਨ ਚ ‘‘ਅਸੁਕਸ੍ਮਿਂ ਨਾਮ ਓਕਾਸੇ ਤੇਲਂ ਵਾ ਵਟ੍ਟਿ ਵਾ ਕਪਲ੍ਲਿਕਾ ਵਾ ਅਤ੍ਥਿ, ਤਂ ਗਹੇਤ੍ਵਾ ਕਰੋਹੀ’’ਤਿ ਵਤ੍ਤਬ੍ਬੋ. ਸਚੇ ਤੇਲਾਦੀਨਿ ਨਤ੍ਥਿ ¶ , ਭਿਕ੍ਖਾਚਾਰੇਨਪਿ ਪਰਿਯੇਸਿਤਬ੍ਬਾਨਿ. ਪਰਿਯੇਸਿਤ੍ਵਾ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ. ਅਪਿਚ ਕਪਾਲੇ ਅਗ੍ਗਿਪਿ ਜਾਲੇਤਬ੍ਬੋ.

੨੫੮੨. ਦੀਪਨ੍ਤਿ ਏਤ੍ਥ ‘‘ਜਾਲੇਤ੍ਵਾ’’ਤਿ ਸੇਸੋ. ਅਥ ਵਾ ‘‘ਕਤ੍ਵਾ’’ਤਿ ਇਮਿਨਾ ਚ ਯੋਜੇਤਬ੍ਬਂ. ਗਣਞਤ੍ਤਿਂ ਠਪੇਤ੍ਵਾਤਿ ‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤਾ, ਅਜ੍ਜੁਪੋਸਥੋ ਪਨ੍ਨਰਸੋ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਮਯਂ ਅਞ੍ਞਮਞ੍ਞਂ ਪਾਰਿਸੁਦ੍ਧਿਉਪੋਸਥਂ ਕਰੇਯ੍ਯਾਮਾ’’ਤਿ ਏਵਂ ਗਣਞਤ੍ਤਿਂ ਨਿਕ੍ਖਿਪਿਤ੍ਵਾ. ਕਤ੍ਤਬ੍ਬੋ ਤੀਹੁਪੋਸਥੋਤਿ ਤੀਹਿ ਭਿਕ੍ਖੂਹਿ ਉਪੋਸਥੋ ਕਾਤਬ੍ਬੋ. ਤੀਸੁ ਥੇਰੇਨ ਏਕਂਸਂ ਉਤ੍ਤਰਾਸਙ੍ਗਂ ਕਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਦ੍ਵੇ ਏਵਂ ਤਿਕ੍ਖਤ੍ਤੁਮੇਵ ਵਤ੍ਤਬ੍ਬੋ ‘‘ਪਰਿਸੁਦ੍ਧੋ ਅਹਂ, ਆਵੁਸੋ, ‘ਪਰਿਸੁਦ੍ਧੋ’ਤਿ ਮਂ ਧਾਰੇਥਾ’’ਤਿ (ਮਹਾਵ. ੧੬੮). ਦੁਤਿਯੇਨ, ਤਤਿਯੇਨ ਚ ਯਥਾਕ੍ਕਮਂ ‘‘ਪਰਿਸੁਦ੍ਧੋ ਅਹਂ, ਭਨ੍ਤੇ, ‘ਪਰਿਸੁਦ੍ਧੋ’ਤਿ ਮਂ ਧਾਰੇਥਾ’’ਤਿ ਤਿਕ੍ਖਤ੍ਤੁਮੇਵ ਵਤ੍ਤਬ੍ਬਂ.

੨੫੮੩. ਪੁਬ੍ਬਕਿਚ੍ਚਾਦੀਨਿ ਕਤ੍ਵਾ ਞਤ੍ਤਿਂ ਅਟ੍ਠਪੇਤ੍ਵਾ ਥੇਰੇਨ ਨਵੋ ਏਵਂ ਤਿਕ੍ਖਤ੍ਤੁਮੇਵ ਵਤ੍ਤਬ੍ਬੋ ‘‘ਪਰਿਸੁਦ੍ਧੋ ਅਹਂ, ਆਵੁਸੋ ¶ , ‘ਪਰਿਸੁਦ੍ਧੋ’ਤਿ ਮਂ ਧਾਰੇਹੀ’’ਤਿ (ਮਹਾਵ. ੧੬੮), ਨਵੇਨ ਥੇਰੋਪਿ ‘‘ਪਰਿਸੁਦ੍ਧੋ ਅਹਂ, ਭਨ੍ਤੇ, ‘ਪਰਿਸੁਦ੍ਧੋ’ਤਿ ਮਂ ਧਾਰੇਥਾ’’ਤਿ (ਮਹਾਵ. ੧੬੮) ਤਿਕ੍ਖਤ੍ਤੁਂ ਵਤ੍ਤਬ੍ਬੋ. ਇਮਸ੍ਮਿਂ ਪਨ ਵਾਰੇ ਞਤ੍ਤਿਯਾ ਅਟ੍ਠਪਨਞ੍ਚ ‘‘ਧਾਰੇਹੀ’’ਤਿ ਏਕਵਚਨਨਿਦ੍ਦੇਸੋ ਚਾਤਿ ਏਤ੍ਤਕੋਵ ਵਿਸੇਸੋਤਿ ਤਂ ਅਨਾਦਿਯਿਤ੍ਵਾ ਪੁਗ੍ਗਲੇਨ ਕਾਤਬ੍ਬਂ ਉਪੋਸਥਵਿਧਿਂ ਦਸ੍ਸੇਤੁਮਾਹ ‘‘ਪੁਬ੍ਬਕਿਚ੍ਚਂ ਸਮਾਪੇਤ੍ਵਾ, ਅਧਿਟ੍ਠੇਯ੍ਯ ਪਨੇਕਕੋ’’ਤਿ. ਅਧਿਟ੍ਠੇਯ੍ਯਾਤਿ ‘‘ਅਜ੍ਜ ਮੇ ਉਪੋਸਥੋ, ਪਨ੍ਨਰਸੋ’ਤਿ ਵਾ ‘ਚਾਤੁਦ੍ਦਸੋ’ਤਿ ਵਾ ਅਧਿਟ੍ਠਾਮੀ’’ਤਿ ਅਧਿਟ੍ਠੇਯ੍ਯ. ਅਸ੍ਸਾਤਿ ਅਵਸਾਨੇ ਵੁਤ੍ਤਪੁਗ੍ਗਲਂ ਸਨ੍ਧਾਯ ਏਕਵਚਨਨਿਦ੍ਦੇਸੋ. ਯਥਾਵੁਤ੍ਤੋ ਸਙ੍ਘੋਪਿ ਤਯੋਪਿ ਦ੍ਵੇਪਿ ਅਤ੍ਤਨੋ ਅਤ੍ਤਨੋ ਅਨੁਞ੍ਞਾਤਂ ਉਪੋਸਥਂ ਅਨ੍ਤਰਾਯਂ ਵਿਨਾ ਸਚੇ ਨ ਕਰੋਨ੍ਤਿ, ਏਵਮੇਵ ਆਪਤ੍ਤਿਮਾਪਜ੍ਜਨ੍ਤੀਤਿ ਵੇਦਿਤਬ੍ਬੋ.

੨੫੮੪-੫. ਇਦਾਨਿ ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਉਪੋਸਥਕਮ੍ਮਾਨਿ, ਅਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮ’’ਨ੍ਤਿਆਦਿਨਾ (ਮਹਾਵ. ੧੪੯) ਨਯੇਨ ਵੁਤ੍ਤਂ ਕਮ੍ਮਚਤੁਕ੍ਕਂ ਦਸ੍ਸੇਤੁਮਾਹ ‘‘ਅਧਮ੍ਮੇਨ ਚ ਵਗ੍ਗੇਨਾ’’ਤਿਆਦਿ. ਅਧਮ੍ਮੇਨ ਵਗ੍ਗੇਨ ਕਮ੍ਮਂ, ਅਧਮ੍ਮਤੋ ਸਮਗ੍ਗੇਨ ਕਮ੍ਮਂ, ਧਮ੍ਮੇਨ ਵਗ੍ਗੇਨ ਕਮ੍ਮਂ, ਧਮ੍ਮਤੋ ਸਮਗ੍ਗੇਨ ਕਮ੍ਮਨ੍ਤਿ ਏਤਾਨਿ ਚਤ੍ਤਾਰਿ ਉਪੋਸਥਸ੍ਸ ਕਮ੍ਮਾਨੀਤਿ ਜਿਨੋ ਅਬ੍ਰਵੀਤਿ ਯੋਜਨਾ. ਚਤੂਸ੍ਵਪਿ ਪਨੇਤੇਸੂਤਿ ਏਤੇਸੁ ਚਤੂਸੁ ਕਮ੍ਮੇਸੁ ਪਨ. ਚਤੁਤ੍ਥਨ੍ਤਿ ‘‘ਸਮਗ੍ਗੇਨ ਚ ਧਮ੍ਮਤੋ’’ਤਿ ਵੁਤ੍ਤਂ ਚਤੁਤ੍ਥਂ ਉਪੋਸਥਕਮ੍ਮਂ ‘‘ਧਮ੍ਮਕਮ੍ਮ’’ਨ੍ਤਿ ਅਧਿਪ੍ਪੇਤਂ.

੨੫੮੬-੭. ਤਾਨਿ ¶ ਕਮ੍ਮਾਨਿ ਵਿਭਾਵੇਤੁਮਾਹ ‘‘ਅਧਮ੍ਮੇਨਿਧਾ’’ਤਿਆਦਿ. ਇਧ ਇਮਸ੍ਮਿਂ ਸਾਸਨੇ ਏਤ੍ਥ ਏਤੇਸੁ ਚਤੂਸੁ ਉਪੋਸਥੇਸੁ. ਅਧਮ੍ਮੇਨ ਵਗ੍ਗੋ ਉਪੋਸਥੋ ਕਤਮੋਤਿ ਕਥੇਤੁਕਾਮਤਾਪੁਚ੍ਛਾ. ਯਤ੍ਥ ਯਸ੍ਸਂ ਏਕਸੀਮਾਯਂ ਭਿਕ੍ਖੁਨੋ ਚਤ੍ਤਾਰੋ ਵਸਨ੍ਤੀਤਿ ਯੋਜਨਾ.

ਤਤ੍ਰ ¶ ਏਕਸ੍ਸ ਪਾਰਿਸੁਦ੍ਧਿਂ ਆਨਯਿਤ੍ਵਾ ਤੇ ਤਯੋ ਜਨਾ ਪਾਰਿਸੁਦ੍ਧਿਂ ਉਪੋਸਥਂ ਕਰੋਨ੍ਤਿ ਚੇ, ਏਵਂ ਕਤੋ ਉਪੋਸਥੋ ਅਧਮ੍ਮੋ ਵਗ੍ਗੁਪੋਸਥੋ ਨਾਮਾਤਿ ਯੋਜਨਾ, ਏਕਸੀਮਟ੍ਠੇਹਿ ਚਤੂਹਿ ਸਙ੍ਘੁਪੋਸਥੇ ਕਾਤਬ੍ਬੇ ਗਣੁਪੋਸਥਸ੍ਸ ਕਤਤ੍ਤਾ ਅਧਮ੍ਮੋ ਚ ਸਙ੍ਘਮਜ੍ਝਂ ਵਿਨਾ ਗਣਮਜ੍ਝਂ ਪਾਰਿਸੁਦ੍ਧਿਯਾ ਅਗਮਨਤੋ ਤਸ੍ਸ ਹਤ੍ਥਪਾਸਂ ਅਨੁਪਗਮਨੇਨ ਵਗ੍ਗੋ ਚ ਹੋਤੀਤਿ ਅਤ੍ਥੋ.

੨੫੮੮. ਅਧਮ੍ਮੇਨ ਸਮਗ੍ਗੋਤਿ ਏਤ੍ਥ ‘‘ਉਪੋਸਥੋ ਕਤਮੋ’’ਤਿ ਅਨੁਵਤ੍ਤੇਤਬ੍ਬਂ. ‘‘ਭਿਕ੍ਖੁਨੋ ਏਕਤੋ’’ਤਿ ਪਦਚ੍ਛੇਦੋ. ‘‘ਹੋਤਿ ਅਧਮ੍ਮਿਕੋ’’ਤਿ ਪਦਚ੍ਛੇਦੋ. ਚਤੂਹਿ ਸਮਗ੍ਗੇਹਿ ਸਙ੍ਘੁਪੋਸਥੇ ਕਾਤਬ੍ਬੇ ਗਣੁਪੋਸਥਕਰਣਂ ਅਧਮ੍ਮੋ, ਹਤ੍ਥਪਾਸੁਪਗਮਨਤੋ ਸਮਗ੍ਗੋ ਹੋਤਿ.

੨੫੮੯-੯੦. ਯੋ ਉਪੋਸਥੋ ਧਮ੍ਮੇਨ ਵਗ੍ਗੋ ਹੋਤਿ, ਸੋ ਕਤਮੋਤਿ ਯੋਜਨਾ. ਯਤ੍ਥ ਯਸ੍ਸਂ ਏਕਸੀਮਾਯਂ ਚਤ੍ਤਾਰੋ ਭਿਕ੍ਖੁਨੋ ਵਸਨ੍ਤਿ, ਤਤ੍ਰ ਏਕਸ੍ਸ ਪਾਰਿਸੁਦ੍ਧਿਂ ਆਨਯਿਤ੍ਵਾ ਤੇ ਤਯੋ ਜਨਾ ਪਾਤਿਮੋਕ੍ਖਂ ਉਦ੍ਦਿਸਨ੍ਤੇ ਚੇ, ਧਮ੍ਮੇਨ ਵਗ੍ਗੋ ਉਪੋਸਥੋ ਹੋਤੀਤਿ ਯੋਜਨਾ. ਏਕਸੀਮਟ੍ਠੇਹਿ ਚਤੂਹਿ ਸਙ੍ਘੁਪੋਸਥਸ੍ਸ ਕਤਤ੍ਤਾ ਧਮ੍ਮੋ, ਏਕਸ੍ਸ ਹਤ੍ਥਪਾਸਂ ਅਨੁਪਗਮਨੇਨ ਵਗ੍ਗੋ ਚ ਹੋਤੀਤਿ ਅਤ੍ਥੋ.

੨੫੯੧. ਯੋ ਧਮ੍ਮਤੋ ਸਮਗ੍ਗੋ, ਸੋ ਕਤਮੋਤਿ ਯੋਜਨਾ. ਇਧ ਇਮਸ੍ਮਿਂ ਸਾਸਨੇ ਚਤ੍ਤਾਰੋ ਭਿਕ੍ਖੁਨੋ ਏਕਤੋ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ ਚੇ, ਅਯਂ ਧਮ੍ਮਤੋ ਸਮਗ੍ਗੋ ਉਪੋਸਥੋਤਿ ਮਤੋ ਅਧਿਪ੍ਪੇਤੋਤਿ ਯੋਜਨਾ. ਚਤੂਹਿ ਸਙ੍ਘੁਪੋਸਥਸ੍ਸ ਕਤਤ੍ਤਾ ਧਮ੍ਮੋ, ਏਕਸ੍ਸਾਪਿ ਹਤ੍ਥਪਾਸਂ ਅਵਿਜਹਨੇਨ ਸਮਗ੍ਗੋਤਿ ਅਧਿਪ੍ਪਾਯੋ.

੨੫੯੨. ਵਗ੍ਗੇ ਸਙ੍ਘੇ ਵਗ੍ਗੋਤਿ ਸਞ੍ਞਿਨੋ, ਸਮਗ੍ਗੇ ਚ ਸਙ੍ਘੇ ਵਗ੍ਗੋਤਿ ਸਞ੍ਞਿਨੋ ਉਭਯਤ੍ਥ ਵਿਮਤਿਸ੍ਸ ਵਾ ਉਪੋਸਥਂ ਕਰੋਨ੍ਤਸ੍ਸ ਦੁਕ੍ਕਟਂ ਆਪਤ੍ਤਿ ਹੋਤੀਤਿ ਯੋਜਨਾ.

੨੫੯੩. ਭੇਦਾਧਿਪ੍ਪਾਯਤੋਤਿ ¶ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਏਵਂ ਭੇਦਪੁਰੇਕ੍ਖਾਰਤਾਯ ‘‘ਉਪੋਸਥਂ ਕਰੋਨ੍ਤਸ੍ਸਾ’’ਤਿ ਆਨੇਤ੍ਵਾ ਯੋਜੇਤਬ੍ਬਂ. ਤਸ੍ਸ ਭਿਕ੍ਖੁਨੋ ਥੁਲ੍ਲਚ੍ਚਯਂ ਹੋਤਿ ¶ ਅਕੁਸਲਬਲਵਤਾਯ ਚ ਥੁਲ੍ਲਚ੍ਚਯਂ ਹੋਤੀਤਿ. ਯਥਾਹ – ‘‘ਭੇਦਪੁਰੇਕ੍ਖਾਰਪਨ੍ਨਰਸਕੇ ਅਕੁਸਲਬਲਵਤਾਯ ਥੁਲ੍ਲਚ੍ਚਯਂ ਵੁਤ੍ਤ’’ਨ੍ਤਿ (ਮਹਾਵ. ਅਟ੍ਠ. ੧੭੬). ਵਗ੍ਗੇ ਵਾ ਸਮਗ੍ਗੇ ਵਾ ਸਙ੍ਘੇ ਸਮਗ੍ਗੋ ਇਤਿ ਸਞ੍ਞਿਨੋ ਉਪੋਸਥਂ ਕਰੋਨ੍ਤਸ੍ਸ ਅਨਾਪਤ੍ਤੀਤਿ ਯੋਜਨਾ. ਅਵਸੇਸੋ ਪਨੇਤ੍ਥ ਵਤ੍ਤਬ੍ਬਵਿਨਿਚ੍ਛਯੋ ਪਵਾਰਣਵਿਨਿਚ੍ਛਯਾਵਸਾਨੇ ‘‘ਪਾਰਿਸੁਦ੍ਧਿਪ੍ਪਦਾਨੇਨਾ’’ਤਿਆਦੀਹਿ (ਵਿ. ਵਿ. ੨੬੪੨) ਏਕਤੋ ਵਤ੍ਤੁਮਿਚ੍ਛਨ੍ਤੇਨ ਨ ਵੁਤ੍ਤੋ.

੨੫੯੪-੫. ‘‘ਉਕ੍ਖਿਤ੍ਤੇਨਾ’’ਤਿਆਦਿਕਾਨਿ ਕਰਣਵਚਨਨ੍ਤਾਨਿ ਪਦਾਨਿ ‘‘ਸਹਾ’’ਤਿ ਇਮਿਨਾ ਸਦ੍ਧਿਂ ‘‘ਉਪੋਸਥੋ ਨ ਕਾਤਬ੍ਬੋ’’ਤਿ ਪਦੇਨ ਪਚ੍ਚੇਕਂ ਯੋਜੇਤਬ੍ਬਾਨਿ. ਉਕ੍ਖਿਤ੍ਤੇਨਾਤਿ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋਤਿ ਤਿਵਿਧੇਨ ਉਕ੍ਖਿਤ੍ਤੇਨ. ਏਤੇਸੁ ਹਿ ਤਿਵਿਧੇ ਉਕ੍ਖਿਤ੍ਤਕੇ ਸਤਿ ਉਪੋਸਥਂ ਕਰੋਨ੍ਤੋ ਸਙ੍ਘੋ ਪਾਚਿਤ੍ਤਿਯਂ ਆਪਜ੍ਜਤਿ.

‘‘ਗਹਟ੍ਠੇਨਾ’’ਤਿ ਇਮਿਨਾ ਤਿਤ੍ਥਿਯੋਪਿ ਸਙ੍ਗਹਿਤੋ. ਸੇਸੇਹਿ ਸਹਧਮ੍ਮਿਹੀਤਿ ਭਿਕ੍ਖੁਨੀ, ਸਿਕ੍ਖਮਾਨਾ, ਸਾਮਣੇਰੋ, ਸਾਮਣੇਰੀਤਿ ਚਤੂਹਿ ਸਹਧਮ੍ਮਿਕੇਹਿ. ਚੁਤਨਿਕ੍ਖਿਤ੍ਤਸਿਕ੍ਖੇਹੀਤਿ ਏਤ੍ਥ ਚੁਤੋ ਚ ਨਿਕ੍ਖਿਤ੍ਤਸਿਕ੍ਖੋ ਚਾਤਿ ਵਿਗ੍ਗਹੋ. ਚੁਤੋ ਨਾਮ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ. ਨਿਕ੍ਖਿਤ੍ਤਸਿਕ੍ਖੋ ਨਾਮ ਸਿਕ੍ਖਾਪਚ੍ਚਕ੍ਖਾਤਕੋ.

ਏਕਾਦਸਹੀਤਿ ਪਣ੍ਡਕੋ, ਥੇਯ੍ਯਸਂਵਾਸਕੋ, ਤਿਤ੍ਥਿਯਪਕ੍ਕਨ੍ਤਕੋ, ਤਿਰਚ੍ਛਾਨਗਤੋ, ਮਾਤੁਘਾਤਕੋ, ਪਿਤੁਘਾਤਕੋ, ਅਰਹਨ੍ਤਘਾਤਕੋ, ਭਿਕ੍ਖੁਨਿਦੂਸਕੋ, ਸਙ੍ਘਭੇਦਕੋ ¶ , ਲੋਹਿਤੁਪ੍ਪਾਦਕੋ, ਉਭਤੋਬ੍ਯਞ੍ਜਨਕੋਤਿ ਇਮੇਹਿ ਏਕਾਦਸਹਿ ਅਭਬ੍ਬੇਹਿ.

ਸਭਾਗਾਪਤ੍ਤਿਕੇਨ ਵਾ ਸਹ ਉਪੋਸਥੋ ਨ ਕਾਤਬ੍ਬੋ, ਪਾਰਿਵੁਤ੍ਥੇਨ ਛਨ੍ਦੇਨ ਉਪੋਸਥੋ ਨ ਕਾਤਬ੍ਬੋ, ਕਰੋਤੋ ਦੁਕ੍ਕਟਂ ਹੋਤੀਤਿ ਯੋਜਨਾ. ਏਵਂ ਉਕ੍ਖਿਤ੍ਤਵਜ੍ਜਿਤੇਸੁ ਸਬ੍ਬਵਿਕਪ੍ਪੇਸੁ ਦੁਕ੍ਕਟਮੇਵ ਵੇਦਿਤਬ੍ਬਂ. ‘‘ਯਂ ਦ੍ਵੇਪਿ ਜਨਾ ਵਿਕਾਲਭੋਜਨਾਦਿਨਾ ਸਭਾਗਵਤ੍ਥੁਨਾ ਆਪਤ੍ਤਿਂ ਆਪਜ੍ਜਨ੍ਤਿ, ਏਵਰੂਪਾ ਵਤ੍ਥੁਸਭਾਗਾ ‘ਸਭਾਗਾ’ਤਿ ਵੁਚ੍ਚਤੀ’’ਤਿ (ਮਹਾਵ. ਅਟ੍ਠ. ੧੬੯) ਵਚਨਤੋ ‘‘ਸਭਾਗਾਪਤ੍ਤੀ’’ਤਿ ਵਤ੍ਥੁਸਭਾਗਾਪਤ੍ਤਿਯੇਵ ਗਹੇਤਬ੍ਬਾ.

ਉਪੋਸਥਦਿਵਸੇ ਸਬ੍ਬੋਵ ਸਙ੍ਘੋ ਸਚੇ ਸਭਾਗਾਪਤ੍ਤਿਂ ਆਪਨ੍ਨੋ ਹੋਤਿ,

‘‘ਇਧ ¶ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ ਹੋਤਿ, ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ ‘ਗਚ੍ਛਾਵੁਸੋ, ਤਂ ਆਪਤ੍ਤਿਂ ਪਟਿਕਰਿਤ੍ਵਾ ਆਗਚ੍ਛ, ਮਯਂ ਤੇ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮਾ’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ – ‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਅਯਂ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ, ਯਦਾ ਅਞ੍ਞਂ ਭਿਕ੍ਖੁਂ ਸੁਦ੍ਧਂ ਅਨਾਪਤ੍ਤਿਕਂ ਪਸ੍ਸਿਸ੍ਸਤਿ, ਤਦਾ ਤਸ੍ਸ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’’ਤਿ (ਮਹਾਵ. ੧੭੧) ਚ,

ਵੇਮਤਿਕੋ ਚੇ ਹੋਤਿ,

‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਅਯਂ ਸਬ੍ਬੋ ਸਙ੍ਘੋ ਸਭਾਗਾਯ ਆਪਤ੍ਤਿਯਾ ਵੇਮਤਿਕੋ, ਯਦਾ ਨਿਬ੍ਬੇਮਤਿਕੋ ¶ ਭਵਿਸ੍ਸਤਿ, ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’’ਤਿ (ਮਹਾਵ. ੧੭੧) ਚ,

ਵੁਤ੍ਤਨਯੇਨ ਉਪੋਸਥੋ ਕਾਤਬ੍ਬੋ.

ਏਤ੍ਥ ਚ ਸਜ੍ਝੁਕਨ੍ਤਿ ਤਦਹੇਵਾਗਮਨਤ੍ਥਾਯ. ਗਣੁਪੋਸਥਾਦੀਸੁਪਿ ਏਸੇਵ ਨਯੋ. ਵੁਤ੍ਤਞ੍ਹਿ ਅਟ੍ਠਕਥਾਗਣ੍ਠਿਪਦੇ ‘‘ਯਥਾ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਜ੍ਜਿਤ੍ਵਾ ਸੁਦ੍ਧਂ ਅਲਭਿਤ੍ਵਾ ‘ਯਦਾ ਸੁਦ੍ਧਂ ਪਸ੍ਸਿਸ੍ਸਤਿ, ਤਦਾ ਤਸ੍ਸ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’ਤਿ ਵਤ੍ਵਾ ਉਪੋਸਥਂ ਕਾਤੁਂ ਲਭਤਿ, ਏਵਂ ਦ੍ਵੀਹਿਪਿ ਅਞ੍ਞਮਞ੍ਞਂ ਆਰੋਚੇਤ੍ਵਾ ਉਪੋਸਥਂ ਕਾਤੁਂ ਵਟ੍ਟਤਿ. ਏਕੇਨਾਪਿ ‘ਪਰਿਸੁਦ੍ਧਂ ਲਭਿਤ੍ਵਾ ਪਟਿਕਰਿਸ੍ਸਾਮੀ’ਤਿ ਆਭੋਗਂ ਕਤ੍ਵਾ ਕਾਤੁਂ ਵਟ੍ਟਤਿ ਕਿਰਾ’’ਤਿ. ਕਿਰਾਤਿ ਚੇਤ੍ਥ ਅਨੁਸ੍ਸਵਤ੍ਥੇ ਦਟ੍ਠਬ੍ਬੋ, ਨ ਪਨਾਰੁਚਿਯਂ.

ਪਾਰਿਵੁਤ੍ਥੇਨ ਛਨ੍ਦੇਨਾਤਿ ਛਨ੍ਦਂ ਆਹਰਿਤ੍ਵਾ ਕਮ੍ਮਂ ਕਾਤੁਂ ਨਿਸਿਨ੍ਨੇਨਪਿ ‘‘ਅਸੁਭਲਕ੍ਖਣਤਾਦਿਨਾ ਕੇਨਚਿ ਕਾਰਣੇਨ ਨ ਕਰਿਸ੍ਸਾਮੀ’’ਤਿ ਵਿਸ੍ਸਟ੍ਠੇ ਛਨ੍ਦੇ ਸਚੇ ਪੁਨ ਕਰਿਸ੍ਸਤਿ, ਪੁਨ ਛਨ੍ਦਪਾਰਿਸੁਦ੍ਧਿਂ ਆਹਰਿਤ੍ਵਾ ਕਾਤਬ੍ਬਂ. ਯਥਾਹ – ‘‘ਏਤਸ੍ਮਿਂ ਪਾਰਿਵਾਸਿਯੇ ਪੁਨ ਛਨ੍ਦਪਾਰਿਸੁਦ੍ਧਿਂ ਅਨਾਨੇਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੧੬੭).

੨੫੯੬. ਅਦੇਸੇਤ੍ਵਾ ¶ ਪਨਾਪਤ੍ਤਿਨ੍ਤਿ ਆਪਨ੍ਨਂ ਆਪਤ੍ਤਿਂ ਅਦੇਸੇਤ੍ਵਾ. ਨਾਵਿਕਤ੍ਵਾਨ ਵੇਮਤਿਨ੍ਤਿ ‘‘ਅਹਂ, ਭਨ੍ਤੇ, ਸਮ੍ਬਹੁਲਾਸੁ ਆਪਤ੍ਤੀਸੁ ਵੇਮਤਿਕੋ, ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ, ਤਦਾ ਤਾ ਆਪਤ੍ਤਿਯੋ ਪਟਿਕਰਿਸ੍ਸਾਮੀ’’ਤਿ ਵਿਮਤਿਂ ਅਨਾਰੋਚੇਤ੍ਵਾ. ‘‘ਯਦਾ ਨਿਬ੍ਬੇਮਤਿਕੋਤਿ ਏਤ੍ਥ ਸਚੇ ਪਨੇਸ ਨਿਬ੍ਬੇਮਤਿਕੋ ਨ ਹੋਤਿ, ਵਤ੍ਥੁਂ ਕਿਤ੍ਤੇਤ੍ਵਾਵ ਦੇਸੇਤੁਂ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੬੯) ਅਨ੍ਧਕਟ੍ਠਕਥਾਯਂ ਵੁਤ੍ਤਂ. ਤਤ੍ਰਾਯਂ ਦੇਸਨਾਵਿਧਿ – ਸਚੇ ਮੇਘਚ੍ਛਨ੍ਨੇ ਸੂਰਿਯੇ ‘‘ਕਾਲੋ ਨੁ ਖੋ, ਵਿਕਾਲੋ’’ਤਿ ¶ ਵੇਮਤਿਕੋ ਭੁਞ੍ਜਤਿ, ਤੇਨ ਭਿਕ੍ਖੁਨਾ ‘‘ਅਹਂ, ਭਨ੍ਤੇ, ਵੇਮਤਿਕੋ ਭੁਞ੍ਜਿਂ, ਸਚੇ ਕਾਲੋ ਅਤ੍ਥਿ, ਸਮ੍ਬਹੁਲਾ ਦੁਕ੍ਕਟਾ ਆਪਤ੍ਤਿਯੋ ਆਪਨ੍ਨੋਮ੍ਹਿ. ਨੋ ਚੇ ਅਤ੍ਥਿ, ਸਮ੍ਬਹੁਲਾ ਪਾਚਿਤ੍ਤਿਯਾਪਤ੍ਤਿਯੋ ਆਪਨ੍ਨੋਮ੍ਹੀ’’ਤਿ ਏਵਂ ਵਤ੍ਥੁਂ ਕਿਤ੍ਤੇਤ੍ਵਾ ‘‘ਅਹਂ, ਭਨ੍ਤੇ, ਯਾ ਤਸ੍ਮਿਂ ਵਤ੍ਥੁਸ੍ਮਿਂ ਸਮ੍ਬਹੁਲਾ ਦੁਕ੍ਕਟਾ ਵਾ ਪਾਚਿਤ੍ਤਿਯਾ ਵਾ ਆਪਤ੍ਤਿਯੋ ਆਪਨ੍ਨੋ, ਤਾ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਵਤ੍ਤਬ੍ਬਂ. ਏਸੇਵ ਨਯੋ ਸਬ੍ਬਾਪਤ੍ਤੀਸੂਤਿ.

ਗਣ੍ਠਿਪਦੇਸੁ ਪਨੇਵਂ ਵਿਨਿਚ੍ਛਯੋ ਵੁਤ੍ਤੋ – ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਾਯ ਆਪਤ੍ਤਿਯਾ ਵੇਮਤਿਕੋ, ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ, ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’ਤਿ ਵਤ੍ਵਾ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਸੋਤਬ੍ਬ’’ਨ੍ਤਿ (ਮਹਾਵ. ੧੭੦) ਵਚਨਤੋ ਯਾਵ ਨਿਬ੍ਬੇਮਤਿਕੋ ਨ ਹੋਤਿ, ਤਾਵ ਸਭਾਗਾਪਤ੍ਤਿਂ ਪਟਿਗ੍ਗਹੇਤੁਂ ਨ ਲਭਤਿ. ਅਞ੍ਞੇਸਞ੍ਚ ਕਮ੍ਮਾਨਂ ਪਰਿਸੁਦ੍ਧੋ ਨਾਮ ਹੋਤਿ. ‘‘ਪੁਨ ਨਿਬ੍ਬੇਮਤਿਕੋ ਹੁਤ੍ਵਾ ਦੇਸੇਤਬ੍ਬਮੇਵਾ’’ਤਿ (ਕਙ੍ਖਾ. ਅਭਿ. ਟੀ. ਨਿਦਾਨਵਣ੍ਣਨਾ) ਨੇਵ ਪਾਲ਼ਿਯਂ, ਨ ਅਟ੍ਠਕਥਾਯਂ ਅਤ੍ਥਿ, ਦੇਸਿਤੇ ਪਨ ਨ ਦੋਸੋ. ‘‘ਇਤੋ ਵੁਟ੍ਠਹਿਤ੍ਵਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ (ਮਹਾਵ. ੧੭੦) ਏਤ੍ਥਾਪਿ ਏਸੇਵ ਨਯੋਤਿ.

੨੫੯੭. ਉਪੋਸਥੇਤਿ ਦਿਨਕਾਰਕਕਤ੍ਤਬ੍ਬਾਕਾਰਵਸੇਨ ਪਨ੍ਨਰਸੀ, ਸਙ੍ਘੁਪੋਸਥੋ, ਸੁਤ੍ਤੁਦ੍ਦੇਸੋਤਿ ਇਮੇਹਿ ਤੀਹਿ ਲਕ੍ਖਣੇਹਿ ਸਮਨ੍ਨਾਗਤੇ ਉਪੋਸਥੇ. ਸਭਿਕ੍ਖੁਮ੍ਹਾ ਚ ਆਵਾਸਾਤਿ ‘‘ਯਸ੍ਮਿਂ ਉਪੋਸਥੇ ਕਿਚ੍ਚ’’ਨ੍ਤਿਆਦਿਨਾ ਵਕ੍ਖਮਾਨਪ੍ਪਕਾਰਾ ਸਭਿਕ੍ਖੁਕਾ ਆਵਾਸਾ. ਇਧ ‘‘ਅਨਾਵਾਸਾ’’ਤਿ ਸੇਸੋ. ਆਵਾਸੋ ਵਾ ਅਨਾਵਾਸੋ ਵਾਤਿ ਏਤ੍ਥ ‘‘ਅਭਿਕ੍ਖੁਕੋ ਵਾ ਨਾਨਾਸਂਵਾਸਕੇਹਿ ਸਭਿਕ੍ਖੁਕੋ ਵਾ’’ਤਿ ਚ ¶ ਨ ਗਨ੍ਤਬ੍ਬੋਤਿ ਏਤ੍ਥ ‘‘ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ’’ਤਿ ਚ ਸੇਸੋ. ‘‘ਅਨਾਵਾਸੋ’’ਤਿ ਉਦੋਸਿਤਾਦਯੋ ਵੁਤ੍ਤਾ. ਭਿਕ੍ਖੁਨਾ ਉਪੋਸਥੇ ਸਭਿਕ੍ਖੁਮ੍ਹਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਵਾ ਨਾਨਾਸਂਵਾਸਕੇਹਿ ਸਭਿਕ੍ਖੁਕੋ ਵਾ ਆਵਾਸੋ ਵਾ ਅਨਾਵਾਸੋ ਵਾ ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ ਕੁਦਾਚਨਂ ਕਦਾਚਿਪਿ ਨ ਗਨ੍ਤਬ੍ਬੋਤਿ ਯੋਜਨਾ.

੨੫੯੮. ਯਸ੍ਮਿਂ ¶ ਆਵਾਸੇ ਪਨ ਉਪੋਸਥੇ ਕਿਚ੍ਚਂ ਸਚੇ ਵਤ੍ਤਤਿ, ਸੋ ਆਵਾਸੋ ‘‘ਸਭਿਕ੍ਖੁਕੋ ਨਾਮਾ’’ਤਿ ਪਕਾਸਿਤੋਤਿ ਯੋਜਨਾ, ਇਮਿਨਾ ਸਚੇ ਯਤ੍ਥ ਉਪੋਸਥੋ ਨ ਵਤ੍ਤਤਿ, ਸੋ ਸਨ੍ਤੇਸੁਪਿ ਭਿਕ੍ਖੂਸੁ ਅਭਿਕ੍ਖੁਕੋ ਨਾਮਾਤਿ ਦੀਪੇਤਿ.

੨੫੯੯. ਉਪੋਸਥਸ੍ਸ ਪਯੋਜਨਂ, ਤਪ੍ਪਸਙ੍ਗੇਨ ਪਵਾਰਣਾਯ ਚ ਨਿਦ੍ਧਾਰੇਤੁਕਾਮਤਾਯਾਹ ‘‘ਉਪੋਸਥੋ ਕਿਮਤ੍ਥਾਯਾ’’ਤਿਆਦਿ.

੨੬੦੦. ਪਟਿਕ੍ਕੋਸੇਯ੍ਯਾਤਿ ਨਿਵਾਰੇਯ੍ਯ. ਅਦੇਨ੍ਤਸ੍ਸਪਿ ਦੁਕ੍ਕਟਨ੍ਤਿ ਏਤ੍ਥ ‘‘ਕੋਪੇਤੁਂ ਧਮ੍ਮਿਕਂ ਕਮ੍ਮ’’ਨ੍ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ.

੨੬੦੧. ਸੋ ਚਾਤਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਚਤੁਵਗ੍ਗਾਦਿਪ੍ਪਭੇਦੇਨ ਪਞ੍ਚਵਿਧੋ ਸੋ ਸਙ੍ਘੋ ਚ. ਹੇਟ੍ਠਿਮਪਰਿਚ੍ਛੇਦੇਨ ਕਤ੍ਤਬ੍ਬਕਮ੍ਮਾਨਂ ਵਸੇਨ ਪਰਿਦੀਪਿਤੋ, ਨ ਛਬ੍ਬਗ੍ਗਾਦੀਨਂ ਕਾਤੁਂ ਅਯੁਤ੍ਤਤਾਦਸ੍ਸਨਵਸੇਨ.

੨੬੦੨. ਚਤੁਵਗ੍ਗਾਦਿਭੇਦਨਿਬਨ੍ਧਨਂ ਕਮ੍ਮਂ ਦਸ੍ਸੇਤੁਮਾਹ ‘‘ਪਵਾਰਣ’’ਨ੍ਤਿਆਦਿ. ਪਵਾਰਣਞ੍ਚ ਤਥਾ ਅਬ੍ਭਾਨਞ੍ਚ ਉਪਸਮ੍ਪਦਞ੍ਚ ਠਪੇਤ੍ਵਾ ਚਤੁਵਗ੍ਗੇਨ ਅਕਤ੍ਤਬ੍ਬਂ ਕਮ੍ਮਂ ਨ ਵਿਜ੍ਜਤੀਤਿ ਯੋਜਨਾ.

੨੬੦੩. ਮਜ੍ਝਦੇਸੇ ¶ ਉਪਸਮ੍ਪਦਾ ਮਜ੍ਝਦੇਸੂਪਸਮ੍ਪਦਾ, ਤਂ. ਅਬ੍ਭਾਨਂ, ਮਜ੍ਝਦੇਸੂਪਸਮ੍ਪਦਞ੍ਚ ਵਿਨਾ ਪਞ੍ਚਵਗ੍ਗੇਨ ਸਬ੍ਬਂ ਕਮ੍ਮਂ ਕਾਤੁਂ ਵਟ੍ਟਤੀਤਿ ਯੋਜਨਾ.

੨੬੦੪. ਕਿਞ੍ਚਿਪਿ ਕਮ੍ਮਂ ਨ ਨ ਕਤ੍ਤਬ੍ਬਨ੍ਤਿ ਯੋਜਨਾ, ਸਬ੍ਬਮ੍ਪਿ ਕਮ੍ਮਂ ਕਤ੍ਤਬ੍ਬਮੇਵਾਤਿ ਅਤ੍ਥੋ. ਦ੍ਵੇ ਪਟਿਸੇਧਾ ਪਕਤਤ੍ਥਂ ਗਮਯਨ੍ਤੀਤਿ. ਵੀਸਤਿਵਗ੍ਗੇਨ ਸਙ੍ਘੇਨ ਸਬ੍ਬੇਸਮ੍ਪਿ ਕਮ੍ਮਾਨਂ ਕਤ੍ਤਬ੍ਬਭਾਵੇ ਕਿਮਤ੍ਥਂ ਅਤਿਰੇਕਵੀਸਤਿਵਗ੍ਗਸ੍ਸ ਗਹਣਨ੍ਤਿ ਆਹ ‘‘ਊਨੇ ਦੋਸੋਤਿ ਞਾਪੇਤੁਂ, ਨਾਧਿਕੇ ਅਤਿਰੇਕਤਾ’’ਤਿ. ਯਥਾਵੁਤ੍ਤੇ ਚਤੁਬ੍ਬਿਧੇ ਸਙ੍ਘੇ ਗਣਨਤੋ ਊਨੇ ਦੋਸੋ ਹੋਤਿ, ਅਧਿਕੇ ਦੋਸੋ ਨ ਹੋਤੀਤਿ ਞਾਪੇਤੁਂ ਅਤਿਰੇਕਤਾ ਦਸ੍ਸਿਤਾ, ਅਤਿਰੇਕਵੀਸਤਿਵਗ੍ਗਸਙ੍ਘੋ ਦਸ੍ਸਿਤੋਤਿ ਅਧਿਪ੍ਪਾਯੋ.

੨੬੦੫. ਚਤੁਵਗ੍ਗੇਨ ਕਤ੍ਤਬ੍ਬੇ ਪਕਤਤ੍ਤਾਵ ਚਤ੍ਤਾਰੋ ਕਮ੍ਮਪ੍ਪਤ੍ਤਾਤਿ ਦੀਪਿਤਾਤਿ ਯੋਜਨਾ. ਸੇਸਾ ¶ ਪਕਤਤ੍ਤਾ ਛਨ੍ਦਾਰਹਾਤਿ ਸੇਸੋ. ਪਕਤਤ੍ਤਾਤਿ ਅਨੁਕ੍ਖਿਤ੍ਤਾ ਚੇਵ ਅਨ੍ਤਿਮਵਤ੍ਥੁਂ ਅਨਜ੍ਝਾਪਨ੍ਨਾ ਚ ਗਹੇਤਬ੍ਬਾ. ਸੇਸੇਸੁ ਚਾਤਿ ਪਞ੍ਚਵਗ੍ਗਾਦੀਸੁਪਿ.

੨੬੦੬. ਚਤੁਵਗ੍ਗਾਦਿਕਤ੍ਤਬ੍ਬਕਮ੍ਮਂ ਅਸਂਵਾਸਪੁਗ੍ਗਲਂ ਗਣਪੂਰਂ ਕਤ੍ਵਾ ਕਰੋਨ੍ਤਸ੍ਸ ਦੁਕ੍ਕਟਂ ਹੋਤਿ. ਨ ਕੇਵਲਂ ਦੁਕ੍ਕਟਮੇਵ, ਕਤਞ੍ਚ ਕਮ੍ਮਂ ਕੁਪ੍ਪਤੀਤਿ ਯੋਜਨਾ.

੨੬੦੭. ਪਰਿਵਾਸਾਦੀਤਿ ਏਤ੍ਥ ਆਦਿ-ਸਦ੍ਦੇਨ ਮੂਲਾਯਪਟਿਕਸ੍ਸਨਾਦੀਨਂ ਗਹਣਂ. ਤਤ੍ਰਟ੍ਠਨ੍ਤਿ ਪਰਿਵਾਸਾਦੀਸੁ ਠਿਤਂ. ‘‘ਤਥਾ’’ਤਿ ਇਮਿਨਾ ‘‘ਕਤਂ ਕੁਪ੍ਪਤਿ ਦੁਕ੍ਕਟ’’ਨ੍ਤਿ ਇਦਂ ਅਨੁਵਤ੍ਤੇਤਿ. ਸੇਸਂ ਤੂਤਿ ਪਰਿਵਾਸਾਦਿਕਮ੍ਮਤੋ ਅਞ੍ਞਂ ਪਨ ਉਪੋਸਥਾਦਿਕਮ੍ਮਂ ¶ . ਵਟ੍ਟਤੀਤਿ ਤੇ ਪਾਰਿਵਾਸਿਕਾਦਯੋ ਗਣਪੂਰਕੇ ਕਤ੍ਵਾ ਕਾਤੁਂ ਵਟ੍ਟਤਿ.

ਉਪੋਸਥਕ੍ਖਨ੍ਧਕਕਥਾਵਣ੍ਣਨਾ.

ਵਸ੍ਸੂਪਨਾਯਿਕਕ੍ਖਨ੍ਧਕਕਥਾਵਣ੍ਣਨਾ

੨੬੦੮. ਵਸ੍ਸੂਪਨਾਯਿਕਾ ਵੁਤ੍ਤਾਤਿ ਸੇਸੋ. ਪਚ੍ਛਿਮਾ ਚਾਤਿ ਏਤ੍ਥ ਇਤਿ-ਸਦ੍ਦੋ ਨਿਦਸ੍ਸਨੇ. ਵਸ੍ਸੂਪਨਾਯਿਕਾਤਿ ਵਸ੍ਸੂਪਗਮਨਾ. ਆਲਯੋ, ਵਚੀਭੇਦੋ ਵਾ ਕਾਤਬ੍ਬੋ ਉਪਗਚ੍ਛਤਾਤਿ ਇਮਿਨਾ ਵਸ੍ਸੂਪਗਮਨਪ੍ਪਕਾਰੋ ਦਸ੍ਸਿਤੋ. ਉਪਗਚ੍ਛਤਾ ਆਲਯੋ ਕਤ੍ਤਬ੍ਬੋ, ਵਚੀਭੇਦੋ ਵਾ ਕਤ੍ਤਬ੍ਬੋਤਿ ਸਮ੍ਬਨ੍ਧੋ. ਉਪਗਚ੍ਛਨ੍ਤੇਨ ਚ ਸੇਨਾਸਨੇ ਅਸਤਿ ‘‘ਇਧ ਵਸ੍ਸਂ ਵਸਿਸ੍ਸਾਮੀ’’ਤਿ ਚਿਤ੍ਤੁਪ੍ਪਾਦਮਤ੍ਤਂ ਵਾ ਕਾਤਬ੍ਬਂ, ਸੇਨਾਸਨੇ ਸਤਿ ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ ਚ ‘‘ਇਧ ਵਸ੍ਸਂ ਉਪੇਮੀ’’ਤਿ ਚ ਵਚੀਭੇਦੋ ਵਾ ਕਾਤਬ੍ਬੋਤਿ ਅਤ੍ਥੋ.

੨੬੦੯. ਜਾਨਂ ਵਸ੍ਸੂਪਗਮਨਂ ਅਨੁਪਗਚ੍ਛਤੋ ਵਾਪੀਤਿ ਯੋਜਨਾ. ਤੇਮਾਸਨ੍ਤਿ ਏਤ੍ਥ ‘‘ਪੁਰਿਮਂ ਵਾ ਪਚ੍ਛਿਮਂ ਵਾ’’ਤਿ ਸੇਸੋ. ਚਰਨ੍ਤਸ੍ਸਾਪੀਤਿ ਏਤ੍ਥ ‘‘ਚਾਰਿਕ’’ਨ੍ਤਿ ਸੇਸੋ. ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾਵ ਚਾਰਿਕਂ ਚਰਨ੍ਤਸ੍ਸਾਪਿ ਦੁਕ੍ਕਟਨ੍ਤਿ ਯੋਜਨਾ. ਤੇਮਾਸਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਯਥਾਹ – ‘‘ਨ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤ੍ਵਾ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ, ਯੋ ਪਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੮੫).

੨੬੧੦. ਰੁਕ੍ਖਸ੍ਸ ¶ ਸੁਸਿਰੇਤਿ ਏਤ੍ਥ ‘‘ਸੁਦ੍ਧੇ’’ਤਿ ਸੇਸੋ. ਯਥਾਹ – ‘‘ਰੁਕ੍ਖਸੁਸਿਰੇਤਿ ਏਤ੍ਥ ਸੁਦ੍ਧੇ ਰੁਕ੍ਖਸੁਸਿਰੇਯੇਵ ਨ ਵਟ੍ਟਤਿ, ਮਹਨ੍ਤਸ੍ਸ ਪਨ ਰੁਕ੍ਖਸੁਸਿਰਸ੍ਸ ਅਨ੍ਤੋ ਪਦਰਚ੍ਛਦਨਂ ਕੁਟਿਕਂ ¶ ਕਤ੍ਵਾ ਪਵਿਸਨਦ੍ਵਾਰਂ ਯੋਜੇਤ੍ਵਾ ਉਪਗਨ੍ਤੁਂ ਵਟ੍ਟਤੀ’’ਤਿ. ‘‘ਰੁਕ੍ਖਸ੍ਸ ਸੁਸਿਰੇ’’ਤਿ ਇਮਿਨਾ ਰੁਕ੍ਖੇਕਦੇਸੋ ਵਿਟਪੋਪਿ ਸਙ੍ਗਹਿਤੋ, ਸੋਪਿ ਸੁਦ੍ਧੋਵ ਨ ਵਟ੍ਟਤਿ. ਯਥਾਹ – ‘‘ਰੁਕ੍ਖਵਿਟਭਿਯਾਤਿ ਏਤ੍ਥਾਪਿ ਸੁਦ੍ਧੇ ਵਿਟਪਮਤ੍ਤੇ ਨ ਵਟ੍ਟਤਿ, ਮਹਾਵਿਟਪੇ ਪਨ ਅਟ੍ਟਕਂ ਬਨ੍ਧਿਤ੍ਵਾ ਤਤ੍ਥ ਪਦਰਚ੍ਛਦਨਂ ਕੁਟਿਕਂ ਕਤ੍ਵਾ ਉਪਗਨ੍ਤੁਂ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੦੩).

‘‘ਛਤ੍ਤੇਤਿ ਏਤ੍ਥਾਪਿ ਚਤੂਸੁ ਥਮ੍ਭੇਸੁ ਛਤ੍ਤਂ ਠਪੇਤ੍ਵਾ ਆਵਰਣਂ ਕਤ੍ਵਾ ਦ੍ਵਾਰਂ ਯੋਜੇਤ੍ਵਾ ਉਪਗਨ੍ਤੁਂ ਵਟ੍ਟਤਿ, ਛਤ੍ਤਕੁਟਿਕਾ ਨਾਮੇਸਾ ਹੋਤਿ. ਚਾਟਿਯਾਤਿ ਏਤ੍ਥਾਪਿ ਮਹਨ੍ਤੇਨ ਕਪਲ੍ਲੇਨ ਛਤ੍ਤੇ ਵੁਤ੍ਤਨਯੇਨ ਕੁਟਿਂ ਕਤ੍ਵਾਵ ਉਪਗਨ੍ਤੁਂ ਵਟ੍ਟਤੀ’’ਤਿ ਅਟ੍ਠਕਥਾਵਚਨਤੋ ਏਵਮਕਤਾਸੁ ਸੁਦ੍ਧਛਤ੍ਤਚਾਟੀਸੁ ਨਿਵਾਰਣਂ ਵੇਦਿਤਬ੍ਬਂ. ਛਵਕੁਟੀਤਿ ਟਙ੍ਕਿਤਮਞ੍ਚਾਦਯੋ ਵੁਤ੍ਤਾ. ਯਥਾਹ – ‘‘ਛਵਕੁਟਿਕਾ ਨਾਮ ਟਙ੍ਕਿਤਮਞ੍ਚਾਦਿਭੇਦਾ ਕੁਟਿ, ਤਤ੍ਥ ਉਪਗਨ੍ਤੁਂ ਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੦੩).

ਸੁਸਾਨੇ ਪਨ ਅਞ੍ਞਂ ਕੁਟਿਕਂ ਕਤ੍ਵਾ ਉਪਗਨ੍ਤੁਂ ਵਟ੍ਟਤਿ. ‘‘ਛਵਸਰੀਰਂ ਝਾਪੇਤ੍ਵਾ ਛਾਰਿਕਾਯ, ਅਟ੍ਠਿਕਾਨਞ੍ਚ ਅਤ੍ਥਾਯ ਕੁਟਿਕਾ ਕਰੀਯਤੀ’’ਤਿ ਅਨ੍ਧਕਟ੍ਠਕਥਾਯਂ ਛਵਕੁਟਿ ਵੁਤ੍ਤਾ. ‘‘ਟਙ੍ਕਿਤਮਞ੍ਚੋਤਿ ਕਸਿਕੁਟਿਕਾਪਾਸਾਣਘਰਨ੍ਤਿ ਲਿਖਿਤ’’ਨ੍ਤਿ (ਵਜਿਰ. ਟੀ. ਮਹਾਵਗ੍ਗ ੨੦੩) ਵਜਿਰਬੁਦ੍ਧਿਤ੍ਥੇਰੋ. ਚਤੁਨ੍ਨਂ ਪਾਸਾਣਾਨਂ ਉਪਰਿ ਪਾਸਾਣਂ ਅਤ੍ਥਰਿਤ੍ਵਾ ਕਤੋ ਗੇਹੋਪਿ ‘‘ਟਙ੍ਕਿਤਮਞ੍ਚੋ’’ਤਿ ਵੁਚ੍ਚਤਿ. ਦੀਘੇ ਮਞ੍ਚਪਾਦੇ ਮਜ੍ਝੇ ਵਿਜ੍ਝਿਤ੍ਵਾ ਅਟਨਿਯੋ ਪਵੇਸੇਤ੍ਵਾ ਮਞ੍ਚਂ ਕਰੋਨ੍ਤੀਤਿ ਤਸ੍ਸ ਇਦਂ ਉਪਰਿ, ਇਦਂ ਹੇਟ੍ਠਾਤਿ ਨਤ੍ਥਿ, ਪਰਿਵਤ੍ਤੇਤ੍ਵਾ ਅਤ੍ਥਤੋਪਿ ਤਾਦਿਸੋਵ ਹੋਤਿ, ਤਂ ਸੁਸਾਨੇ, ਦੇਵਟ੍ਠਾਨੇ ਚ ਠਪੇਨ੍ਤਿ, ਅਯਮ੍ਪਿ ਟਙ੍ਕਿਤਮਞ੍ਚੋ ਨਾਮ.

੨੬੧੧. ‘‘ਸਤਿ ਪਚ੍ਚਯਵੇਕਲ੍ਲੇ, ਸਰੀਰਾਫਾਸੁਤਾਯ ਵਾ’’ਤਿ ਅਵਸੇਸਨ੍ਤਰਾਯਾਨਂ ਵਕ੍ਖਮਾਨਤ੍ਤਾ ‘‘ਅਨ੍ਤਰਾਯੋ’’ਤਿ ਇਮਿਨਾ ਰਾਜਨ੍ਤਰਾਯਾਦਿ ਦਸਵਿਧੋ ਗਹੇਤਬ੍ਬੋ.

੨੬੧੨-੪. ‘‘ਅਨੁਜਾਨਾਮਿ ¶ , ਭਿਕ੍ਖਵੇ, ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇਵ ਪਹਿਤੇ ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਸਿਕ੍ਖਮਾਨਾਯ ਸਾਮਣੇਰਸ੍ਸ ਸਾਮਣੇਰਿਯਾ ਮਾਤੁਯਾ ਚ ਪਿਤੁਸ੍ਸ ਚਾ’’ਤਿ (ਮਹਾਵ. ੧੯੮) ਵੁਤ੍ਤਨਯਂ ਦਸ੍ਸੇਤੁਮਾਹ ‘‘ਮਾਤਾਪਿਤੂਨ’’ਨ੍ਤਿਆਦਿ.

ਮਾਤਾਪਿਤੂਨਂ ¶ ਦਸ੍ਸਨਤ੍ਥਂ, ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਦਸ੍ਸਨਤ੍ਥਂ ਵਾ ਨੇਸਂ ਅਤ੍ਥੇ ਸਤਿ ਵਾ ਨੇਸਂ ਅਨ੍ਤਰੇ ਗਿਲਾਨਂ ਦਟ੍ਠੁਂ ਵਾ ਤਦੁਪਟ੍ਠਾਕਾਨਂ ਭਤ੍ਤਾਦਿਂ ਪਰਿਯੇਸਨਤ੍ਥਂ ਵਾ ਨੇਸਂ ਭਤ੍ਤਾਦਿਂ ਪਰਿਯੇਸਨਤ੍ਥਂ ਵਾ ਤਥਾ ਨੇਸਂ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਞ੍ਞਤਰਂ ਅਨਭਿਰਤਂ ਉਕ੍ਕਣ੍ਠਿਤਂ ਅਹਂ ਗਨ੍ਤ੍ਵਾ ਵੂਪਕਾਸੇਸ੍ਸਂ ਵਾ ਵੂਪਕਾਸਾਪੇਸ੍ਸਾਮਿ ਵਾ ਧਮ੍ਮਕਥਮਸ੍ਸ ਕਰਿਸ੍ਸਾਮੀਤਿ ਵਾ ਤਸ੍ਸ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਞ੍ਞਤਰਸ੍ਸ ਉਟ੍ਠਿਤਂ ਉਪ੍ਪਨ੍ਨਂ ਦਿਟ੍ਠਿਂ ਵਿਵੇਚੇਸ੍ਸਾਮਿ ਵਾ ਵਿਵੇਚਾਪੇਸ੍ਸਾਮਿ ਵਾ ਧਮ੍ਮਕਥਮਸ੍ਸ ਕਰਿਸ੍ਸਾਮੀਤਿ ਵਾ ਤਥਾ ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਵਿਨੋਦੇਸ੍ਸਾਮੀਤਿ ਵਾ ਵਿਨੋਦਾਪੇਸ੍ਸਾਮੀਤਿ ਵਾ ਧਮ੍ਮਕਥਮਸ੍ਸ ਕਰਿਸ੍ਸਾਮੀਤਿ ਵਾ ਏਵਂ ਵਿਨਯਞ੍ਞੁਨਾ ਭਿਕ੍ਖੁਨਾ ਸਤ੍ਤਾਹਕਿਚ੍ਚੇਨ ਅਪੇਸਿਤੇਪਿ ਗਨ੍ਤਬ੍ਬਂ, ਪਗੇਵ ਪਹਿਤੇਤਿ ਯੋਜਨਾ.

ਭਤ੍ਤਾਦੀਤਿ ਏਤ੍ਥ ਆਦਿ-ਸਦ੍ਦੇਨ ਭੇਸਜ੍ਜਪਰਿਯੇਸਨਾਦਿਂ ਸਙ੍ਗਣ੍ਹਾਤਿ. ਯਥਾਹ – ‘‘ਗਿਲਾਨਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ ਉਪਟ੍ਠਹਿਸ੍ਸਾਮਿ ਵਾ’’ਤਿ. ਵੂਪਕਾਸੇਸ੍ਸਨ੍ਤਿ ਯਤ੍ਥ ਅਨਭਿਰਤਿ ਉਪ੍ਪਨ੍ਨਾ, ਤਤੋ ਅਞ੍ਞਤ੍ਥ ਗਹੇਤ੍ਵਾ ਗਮਿਸ੍ਸਾਮੀਤਿ ਅਤ੍ਥੋ.

ਵਿਨੋਦੇਸ੍ਸਾਮਹਨ੍ਤਿ ਵਾਤਿ ਏਤ੍ਥ ਵਾ-ਸਦ੍ਦੇਨ ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ ‘ਅਹਞ੍ਹਿ ਗਰੁਧਮ੍ਮਂ ਅਜ੍ਝਾਪਨ੍ਨੋ ਪਰਿਵਾਸਾਰਹੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ¶ ਭਿਕ੍ਖੂਨਂ ਆਗਤ’ਨ੍ਤਿ. ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ, ਪਗੇਵ ਪਹਿਤੇ ‘ਪਰਿਵਾਸਦਾਨਂ ਉਸ੍ਸੁਕ੍ਕਂ ਕਰਿਸ੍ਸਾਮਿ ਵਾ ਅਨੁਸ੍ਸਾਵੇਸ੍ਸਾਮਿ ਵਾ ਗਣਪੂਰਕੋ ਵਾ ਭਵਿਸ੍ਸਾਮੀ’’ਤਿਆਦਿਨਯਂ (ਮਹਾਵ. ੧੯੩) ਸਙ੍ਗਣ੍ਹਾਤਿ. ਏਵਂ ਸਤ੍ਤਾਹਕਿਚ੍ਚੇਨ ਗਚ੍ਛਨ੍ਤੇਨ ਅਨ੍ਤੋਉਪਚਾਰਸੀਮਾਯ ਠਿਤੇਨੇਵ ‘‘ਅਨ੍ਤੋਸਤ੍ਤਾਹੇ ਆਗਚ੍ਛਿਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਗਨ੍ਤਬ੍ਬਂ. ਸਚੇ ਆਭੋਗਂ ਅਕਤ੍ਵਾ ਉਪਚਾਰਸੀਮਂ ਅਤਿਕ੍ਕਮਤਿ, ਛਿਨ੍ਨਵਸ੍ਸੋ ਹੋਤੀਤਿ ਵਦਨ੍ਤਿ.

੨੬੧੫. ‘‘ਅਯਂ ਪਨੇਤ੍ਥ ਪਾਲ਼ਿਮੁਤ੍ਤਕਰਤ੍ਤਿਚ੍ਛੇਦਵਿਨਿਚ੍ਛਯੋ’’ਤਿ ਅਟ੍ਠਕਥਾਗਤਂ ਰਤ੍ਤਿਚ੍ਛੇਦਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਵਸ੍ਸਂ ਉਪਗਤੇਨੇਤ੍ਥਾ’’ਤਿਆਦਿ. ਏਤ੍ਥਾਤਿ ਇਮਸ੍ਮਿਂ ਸਤ੍ਤਾਹਕਿਚ੍ਚਾਧਿਕਾਰੇ. ਅਯਂ ਪਾਲ਼ਿਮੁਤ੍ਤਕਵਿਨਿਚ੍ਛਯੋ ਦਟ੍ਠਬ੍ਬੋਤਿ ਅਤ੍ਥੋ.

੨੬੧੬. ‘‘ਅਸੁਕਂ ਨਾਮ ਦਿਵਸ’’ਨ੍ਤਿਆਦਿਨਾ ਨਿਮਨ੍ਤਨਾਕਾਰਂ ਵਕ੍ਖਤਿ. ਪੁਬ੍ਬਨ੍ਤਿ ਪਠਮਂ. ਵਟ੍ਟਤੀਤਿ ¶ ਸਤ੍ਤਾਹਕਿਚ੍ਚੇਨ ਗਨ੍ਤੁਂ ਵਟ੍ਟਤਿ. ਯਥਾਹ – ‘‘ਸਚੇ ਏਕਸ੍ਮਿਂ ਮਹਾਵਾਸੇ ਪਠਮਂਯੇਵ ਕਤਿਕਾ ਕਤਾ ਹੋਤਿ ‘ਅਸੁਕਦਿਵਸਂ ਨਾਮ ਸਨ੍ਨਿਪਤਿਤਬ੍ਬ’ਨ੍ਤਿ, ਨਿਮਨ੍ਤਿਤੋਯੇਵ ਨਾਮ ਹੋਤਿ, ਗਨ੍ਤੁਂ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੯੯). ‘‘ਉਪਾਸਕੇਹਿ ‘ਇਮਸ੍ਮਿਂ ਨਾਮ ਦਿਵਸੇ ਦਾਨਾਦੀਨਿ ਕਰੋਮ, ਸਬ੍ਬੇ ਏਵ ਸਨ੍ਨਿਪਤਨ੍ਤੂ’ਤਿ ਕਤਿਕਾਯਪਿ ਕਤਾਯ ਗਨ੍ਤੁਂ ਵਟ੍ਟਤਿ, ਨਿਮਨ੍ਤਿਤੋਯੇਵ ਨਾਮ ਹੋਤੀ’’ਤਿ ਕੇਚਿ.

੨੬੧੭. ਭਣ੍ਡਕਨ੍ਤਿ ਅਤ੍ਤਨੋ ਚੀਵਰਭਣ੍ਡਂ. ਨ ਵਟ੍ਟਤੀਤਿ ਸਤ੍ਤਾਹਕਿਚ੍ਚੇਨ ਗਨ੍ਤੁਂ ਨ ਵਟ੍ਟਤਿ. ਪਹਿਣਨ੍ਤੀਤਿ ਚੀਵਰਧੋਵਨਾਦਿਕਮ੍ਮੇਨ ਪਹਿਣਨ੍ਤਿ. ਆਚਰਿਯੁਪਜ੍ਝਾਯਾਨਂ ਆਣਤ੍ਤਿਯੇਨ ਕੇਨਚਿ ਅਨਵਜ੍ਜਕਿਚ੍ਚੇਨ ਸਤ੍ਤਾਹਕਰਣੀਯੇਨ ਗਨ੍ਤੁਂ ਵਟ੍ਟਤੀਤਿ ਇਮਿਨਾਵ ਦੀਪਿਤਂ ਹੋਤਿ.

੨੬੧੮. ਉਦ੍ਦੇਸਾਦੀਨਮਤ੍ਥਾਯਾਤਿ ¶ ਪਾਲ਼ਿਵਾਚਨਾਨਿ ਸਨ੍ਧਾਯ. ਆਦਿ-ਸਦ੍ਦੇਨ ਪਰਿਪੁਚ੍ਛਾਦਿਂ ਸਙ੍ਗਣ੍ਹਾਤਿ. ਗਰੂਨਨ੍ਤਿ ਅਗਿਲਾਨਾਨਮ੍ਪਿ ਆਚਰਿਯੁਪਜ੍ਝਾਯਾਨਂ. ਗਨ੍ਤੁਂ ਲਭਤੀਤਿ ਸਤ੍ਤਾਹਕਰਣੀਯੇਨ ਗਨ੍ਤੁਂ ਲਭਤਿ. ਪੁਗ੍ਗਲੋਤਿ ਪਕਰਣਤੋ ਭਿਕ੍ਖੁਂਯੇਵ ਗਣ੍ਹਾਤਿ.

੨੬੧੯. ਆਚਰਿਯੋਤਿ ਨਿਦਸ੍ਸਨਮਤ੍ਤਂ, ਉਪਜ੍ਝਾਯੇਨ ਨਿਵਾਰਿਤੇਪਿ ਏਸੇਵ ਨਯੋ. ‘‘ਸਚੇ ਪਨ ਨਂ ਆਚਰਿਯੋ ‘ਅਜ੍ਜ ਮਾ ਗਚ੍ਛਾ’ਤਿ ਵਦਤਿ, ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੯੯) ਅਟ੍ਠਕਥਾਨਯਂ ਦਸ੍ਸੇਤੁਮਾਹ ‘‘ਰਤ੍ਤਿਚ੍ਛੇਦੇ ਅਨਾਪਤ੍ਤਿ, ਹੋਤੀਤਿ ਪਰਿਦੀਪਿਤਾ’’ਤਿ. ਰਤ੍ਤਿਚ੍ਛੇਦੇਤਿ ਵਸ੍ਸਚ੍ਛੇਦਨਿਮਿਤ੍ਤਂ. ‘‘ਰਤ੍ਤਿਚ੍ਛੇਦੇ’’ਤਿ ਸਬ੍ਬਤ੍ਥ ਵਸ੍ਸਚ੍ਛੇਦੋਤਿ ਸਨ੍ਨਿਟ੍ਠਾਨਂ ਕਤ੍ਵਾ ਵਦਨ੍ਤਿ, ਏਵਂ ਸਤ੍ਤਾਹਕਰਣੀਯੇਨ ਗਤਂ ਨਂ ਅਨ੍ਤੋਸਤ੍ਤਾਹੇਯੇਵ ਪੁਨ ਆਗਚ੍ਛਨ੍ਤਂ ਸਚੇ ਆਚਰਿਯੋ ਵਾ ਉਪਜ੍ਝਾਯੋ ਵਾ ‘‘ਅਜ੍ਜ ਮਾ ਗਚ੍ਛਾ’’ਤਿ ਵਦਤਿ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤੀਤਿ ਅਧਿਪ੍ਪਾਯੋ, ਵਸ੍ਸਚ੍ਛੇਦੋ ਪਨ ਹੋਤਿਯੇਵਾਤਿ ਦਟ੍ਠਬ੍ਬਂ ਸਤ੍ਤਾਹਸ੍ਸ ਬਹਿਦ੍ਧਾ ਵੀਤਿਨਾਮਿਤਤ੍ਤਾ.

੨੬੨੦. ਯਸ੍ਸ ਕਸ੍ਸਚਿ ਞਾਤਿਸ੍ਸਾਤਿ ਮਾਤਾਪਿਤੂਹਿ ਅਞ੍ਞਸ੍ਸ ਞਾਤਿਜਨਸ੍ਸ. ‘‘ਗਚ੍ਛਤੋ ਦਸ੍ਸਨਤ੍ਥਾਯਾ’’ਤਿ ਇਮਿਨਾ ਸੇਸਞਾਤਿਕੇਹਿ ‘‘ਮਯਂ ਗਿਲਾਨਾ ਭਦਨ੍ਤਾਨਂ ਆਗਮਨਂ ਇਚ੍ਛਾਮਾ’’ਤਿ ਚ ‘‘ਉਪਟ੍ਠਾਕਕੁਲੇਹਿ ਦਾਨਂ ਦਸ੍ਸਾਮ, ਧਮ੍ਮਂ ਸੋਸ੍ਸਾਮ, ਭਿਕ੍ਖੂਨਂ ਦਸ੍ਸਨਂ ਇਚ੍ਛਾਮਾ’’ਤਿ ਚ ਏਵਂ ਕਤ੍ਤਬ੍ਬਂ ਨਿਦ੍ਦਿਸਿਤ੍ਵਾ ਦੂਤੇ ਵਾ ਪੇਸਿਤੇ ਸਤ੍ਤਾਹਕਰਣੀਯੇਨ ਗਚ੍ਛਤੋ ਰਤ੍ਤਿਚ੍ਛੇਦੋ ਚ ਦੁਕ੍ਕਟਞ੍ਚ ਨ ਹੋਤੀਤਿ ਵੁਤ੍ਤਂ ਹੋਤਿ. ਯਥਾਹ ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਞਾਤਕੋ ਗਿਲਾਨੋ ਹੋਤਿ…ਪੇ… ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ’’ਤਿ (ਮਹਾਵ. ੧੯੯) ਚ ¶ ‘‘ਇਧ ਪਨ, ਭਿਕ੍ਖਵੇ, ਉਪਾਸਕੇਨ ਸਙ੍ਘਂ ਉਦ੍ਦਿਸ੍ਸ ਵਿਹਾਰੋ ਕਾਰਾਪਿਤੋ ਹੋਤਿ…ਪੇ… ਇਚ੍ਛਾਮਿ ਦਾਨਞ੍ਚ ¶ ਦਾਤੁਂ ਧਮ੍ਮਞ੍ਚ ਸੋਤੁਂ ਭਿਕ੍ਖੂ ਚ ਪਸ੍ਸਿਤੁਨ੍ਤਿ. ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ’’ਤਿ (ਮਹਾਵ. ੧੮੮) ਚ.

੨੬੨੧. ‘‘ਅਹਂ ਗਾਮਕਂ ਗਨ੍ਤ੍ਵਾ ਅਜ੍ਜੇਵ ਆਗਮਿਸ੍ਸਾਮੀ’’ਤਿ ਆਗਚ੍ਛਂ ਆਗਚ੍ਛਨ੍ਤੋ ਸਚੇ ਪਾਪੁਣਿਤੁਂ ਨ ਸਕ੍ਕੋਤੇਵ, ਵਟ੍ਟਤੀਤਿ ਯੋਜਨਾ. ਵਟ੍ਟਤੀਤਿ ਏਤ੍ਥ ‘‘ਅਜ੍ਜੇਵ ਆਗਮਿਸ੍ਸਾਮੀ’’ਤਿ ਗਨ੍ਤ੍ਵਾ ਆਗਚ੍ਛਨ੍ਤਸ੍ਸ ਅਨ੍ਤਰਾਮਗ੍ਗੇ ਸਚੇ ਅਰੁਣੁਗ੍ਗਮਨਂ ਹੋਤਿ, ਵਸ੍ਸਚ੍ਛੇਦੋਪਿ ਨ ਹੋਤਿ, ਰਤ੍ਤਿਚ੍ਛੇਦਦੁਕ੍ਕਟਞ੍ਚ ਨਤ੍ਥੀਤਿ ਅਧਿਪ੍ਪਾਯੋ.

੨੬੨੨. ਵਜੇਤਿ (ਮਹਾਵ. ਅਟ੍ਠ. ੨੦੩) ਗੋਪਾਲਕਾਨਂ ਨਿਵਾਸਨਟ੍ਠਾਨੇ. ਸਤ੍ਥੇਤਿ ਜਙ੍ਘਸਤ੍ਥਸਕਟਸਤ੍ਥਾਨਂ ਸਨ੍ਨਿਵਿਟ੍ਠੋਕਾਸੇ. ਤੀਸੁ ਠਾਨੇਸੁ ਭਿਕ੍ਖੁਨੋ, ਵਸ੍ਸਚ੍ਛੇਦੇ ਅਨਾਪਤ੍ਤੀਤਿ ਤੇਹਿ ਸਦ੍ਧਿਂ ਗਚ੍ਛਨ੍ਤਸ੍ਸੇਵ ਨਤ੍ਥਿ ਆਪਤ੍ਤਿ, ਤੇਹਿ ਵਿਯੁਞ੍ਜਿਤ੍ਵਾ ਗਮਨੇ ਪਨ ਆਪਤ੍ਤਿਯੇਵ, ਪਵਾਰੇਤੁਞ੍ਚ ਨ ਲਭਤਿ.

ਵਜਾਦੀਸੁ ਵਸ੍ਸਂ ਉਪਗਚ੍ਛਨ੍ਤੇਨ ਵਸ੍ਸੂਪਨਾਯਿਕਦਿਵਸੇ ਤੇਨ ਭਿਕ੍ਖੁਨਾ ਉਪਾਸਕਾ ਵਤ੍ਤਬ੍ਬਾ ‘‘ਕੁਟਿਕਾ ਲਦ੍ਧੁਂ ਵਟ੍ਟਤੀ’’ਤਿ. ਸਚੇ ਕਰਿਤ੍ਵਾ ਦੇਨ੍ਤਿ, ਤਤ੍ਥ ਪਵਿਸਿਤ੍ਵਾ ‘‘ਇਧ ਵਸ੍ਸਂ ਉਪੇਮੀ’’ਤਿ ਤਿਕ੍ਖਤ੍ਤੁਂ ਵਤ੍ਤਬ੍ਬਂ. ਨੋ ਚੇ ਦੇਨ੍ਤਿ, ਸਾਲਾਸਙ੍ਖੇਪੇਨ ਠਿਤਸਕਟਸ੍ਸ ਹੇਟ੍ਠਾ ਉਪਗਨ੍ਤਬ੍ਬਂ. ਤਮ੍ਪਿ ਅਲਭਨ੍ਤੇਨ ਆਲਯੋ ਕਾਤਬ੍ਬੋ. ਸਤ੍ਥੇ ਪਨ ਕੁਟਿਕਾਦੀਨਂ ਅਭਾਵੇ ‘‘ਇਧ ਵਸ੍ਸਂ ਉਪੇਮੀ’’ਤਿ ਵਚੀਭੇਦਂ ਕਤ੍ਵਾ ਉਪਗਨ੍ਤੁਂ ਨ ਵਟ੍ਟਤਿ, ਆਲਯਕਰਣਮਤ੍ਤਮੇਵ ਵਟ੍ਟਤਿ. ਆਲਯੋ ਨਾਮ ‘‘ਇਧ ਵਸ੍ਸਂ ਵਸਿਸ੍ਸਾਮੀ’’ਤਿ ਚਿਤ੍ਤੁਪ੍ਪਾਦਮਤ੍ਤਂ.

ਸਚੇ ਮਗ੍ਗਪ੍ਪਟਿਪਨ੍ਨੇਯੇਵ ਸਤ੍ਥੇ ਪਵਾਰਣਦਿਵਸੋ ਹੋਤਿ, ਤਤ੍ਥੇਵ ਪਵਾਰੇਤਬ੍ਬਂ. ਅਥ ਸਤ੍ਥੋ ਅਨ੍ਤੋਵਸ੍ਸੇਯੇਵ ਭਿਕ੍ਖੁਨਾ ਪਤ੍ਥਿਤਟ੍ਠਾਨਂ ਪਤ੍ਵਾ ਅਤਿਕ੍ਕਮਤਿ. ਪਤ੍ਥਿਤਟ੍ਠਾਨੇ ¶ ਵਸਿਤ੍ਵਾ ਤਤ੍ਥ ਭਿਕ੍ਖੂਹਿ ਸਦ੍ਧਿਂ ਪਵਾਰੇਤਬ੍ਬਂ. ਅਥਾਪਿ ਸਤ੍ਥੋ ਅਨ੍ਤੋਵਸ੍ਸੇਯੇਵ ਅਨ੍ਤਰਾ ਏਕਸ੍ਮਿਂ ਗਾਮੇ ਤਿਟ੍ਠਤਿ ਵਾ ਵਿਪ੍ਪਕਿਰਤਿ ਵਾ, ਤਸ੍ਮਿਂਯੇਵ ਗਾਮੇ ਭਿਕ੍ਖੂਹਿ ਸਦ੍ਧਿਂ ਵਸਿਤ੍ਵਾ ਪਵਾਰੇਤਬ੍ਬਂ, ਅਪ੍ਪਵਾਰੇਤ੍ਵਾ ਤਤੋ ਪਰਂ ਗਨ੍ਤੁਂ ਨ ਵਟ੍ਟਤਿ.

ਨਾਵਾਯ ਵਸ੍ਸਂ ਉਪਗਚ੍ਛਨ੍ਤੇਨਾਪਿ ਕੁਟਿਯਂਯੇਵ ਉਪਗਨ੍ਤਬ੍ਬਂ. ਪਰਿਯੇਸਿਤ੍ਵਾ ਅਲਭਨ੍ਤੇ ਆਲਯੋ ਕਾਤਬ੍ਬੋ ¶ . ਸਚੇ ਅਨ੍ਤੋਤੇਮਾਸਂ ਨਾਵਾ ਸਮੁਦ੍ਦੇਯੇਵ ਹੋਤਿ, ਤਤ੍ਥੇਵ ਪਵਾਰੇਤਬ੍ਬਂ. ਅਥ ਨਾਵਾ ਕੂਲਂ ਲਭਤਿ, ਸਯਞ੍ਚ ਪਰਤੋ ਗਨ੍ਤੁਕਾਮੋ ਹੋਤਿ, ਗਨ੍ਤੁਂ ਨ ਵਟ੍ਟਤਿ. ਨਾਵਾਯ ਲਦ੍ਧਗਾਮੇਯੇਵ ਵਸਿਤ੍ਵਾ ਭਿਕ੍ਖੂਹਿ ਸਦ੍ਧਿਂ ਪਵਾਰੇਤਬ੍ਬਂ. ਸਚੇਪਿ ਨਾਵਾ ਅਨੁਤੀਰਮੇਵ ਅਞ੍ਞਤ੍ਥ ਗਚ੍ਛਤਿ, ਭਿਕ੍ਖੁ ਚ ਪਠਮਂ ਲਦ੍ਧਗਾਮੇਯੇਵ ਵਸਿਤੁਕਾਮੋ, ਨਾਵਾ ਗਚ੍ਛਤੁ, ਭਿਕ੍ਖੁਨਾ ਤਤ੍ਥੇਵ ਵਸਿਤ੍ਵਾ ਭਿਕ੍ਖੂਹਿ ਸਦ੍ਧਿਂ ਪਵਾਰੇਤਬ੍ਬਂ.

ਇਤਿ ਵਜੇ, ਸਤ੍ਥੇ, ਨਾਵਾਯਨ੍ਤਿ ਤੀਸੁ ਠਾਨੇਸੁ ਨਤ੍ਥਿ ਵਸ੍ਸਚ੍ਛੇਦੇ ਆਪਤ੍ਤਿ, ਪਵਾਰੇਤੁਞ੍ਚ ਲਭਤਿ.

੨੬੨੩. ਸਤਿ ਪਚ੍ਚਯਵੇਕਲ੍ਲੇਤਿ ਪਿਣ੍ਡਪਾਤਾਦੀਨਂ ਪਚ੍ਚਯਾਨਂ ਊਨਤ੍ਤੇ ਸਤਿ. ਸਰੀਰਾਫਾਸੁਤਾਯ ਵਾਤਿ ਸਰੀਰਸ੍ਸ ਅਫਾਸੁਤਾਯ ਆਬਾਧੇ ਵਾ ਸਤਿ. ਵਸ੍ਸਂ ਛੇਤ੍ਵਾਪਿ ਪਕ੍ਕਮੇਤਿ ਵਸ੍ਸਚ੍ਛੇਦਂ ਕਤ੍ਵਾਪਿ ਯਥਾਫਾਸੁਕਟ੍ਠਾਨਂ ਗਚ੍ਛੇਯ੍ਯ. ਅਪਿ-ਸਦ੍ਦੇਨ ਵਸ੍ਸਂ ਅਛੇਤ੍ਵਾ ਵਸ੍ਸਚ੍ਛੇਦਕਾਰਣੇ ਸਤਿ ਸਤ੍ਤਾਹਕਰਣੀਯੇਨ ਗਨ੍ਤੁਮ੍ਪਿ ਵਟ੍ਟਤੀਤਿ ਦੀਪੇਤਿ.

੨੬੨੪. ਯੇਨ ਕੇਨਨ੍ਤਰਾਯੇਨਾਤਿ ਰਾਜਨ੍ਤਰਾਯਾਦੀਸੁ ਯੇਨ ਕੇਨਚਿ ਅਨ੍ਤਰਾਯੇਨ. ਯੋ ਭਿਕ੍ਖੁ ਵਸ੍ਸਂ ਨੋਪਗਤੋ, ਤੇਨਾਪਿ ਛਿਨ੍ਨਵਸ੍ਸੇਨ ਵਾਪਿ ਦੁਤਿਯਾ ਵਸ੍ਸੂਪਨਾਯਿਕਾ ਉਪਗਨ੍ਤਬ੍ਬਾਤਿ ਯੋਜਨਾ.

੨੬੨੫-੬. ਸਤ੍ਤਾਹਨ੍ਤਿ ¶ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ‘‘ਵੀਤਿਨਾਮੇਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਉਪਗਨ੍ਤ੍ਵਾਪਿ ਵਾ ਬਹਿਦ੍ਧਾ ਏਵ ਸਤ੍ਤਾਹਂ ਵੀਤਿਨਾਮੇਤਿ ਚੇ. ਯੋ ਗਚ੍ਛਤਿ, ਯੋ ਚ ਵੀਤਿਨਾਮੇਤਿ, ਤਸ੍ਸ ਭਿਕ੍ਖੁਸ੍ਸ. ਪੁਰਿਮਾਪਿ ਨ ਵਿਜ੍ਜਤੀਤਿ ਅਨੁਪਗਤਤ੍ਤਾ, ਛਿਨ੍ਨਵਸ੍ਸਤ੍ਤਾ ਚ ਪੁਰਿਮਾਪਿ ਵਸ੍ਸੂਪਨਾਯਿਕਾ ਨ ਵਿਜ੍ਜਤਿ ਨ ਲਭਤਿ. ਇਮੇਸਂ ਦ੍ਵਿਨ੍ਨਂ ਯਥਾਕ੍ਕਮਂ ਉਪਚਾਰਾਤਿਕ੍ਕਮੇ, ਸਤ੍ਤਾਹਾਤਿਕ੍ਕਮੇ ਚ ਆਪਤ੍ਤਿ ਵੇਦਿਤਬ੍ਬਾ.

ਪਟਿਸ੍ਸਵੇ ਚ ਭਿਕ੍ਖੁਸ੍ਸ, ਹੋਤਿ ਆਪਤ੍ਤਿ ਦੁਕ੍ਕਟਨ੍ਤਿ ‘‘ਇਧ ਵਸ੍ਸਂ ਵਸਥਾ’’ਤਿ ਵੁਤ੍ਤੇ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਸ੍ਸ ਵਿਸਂਵਾਦੇ ਅਸਚ੍ਚਾਪਨੇ ਆਪਤ੍ਤਿ ਹੋਤਿ. ਕਤਮਾਤਿ ਆਹ ‘‘ਦੁਕ੍ਕਟ’’ਨ੍ਤਿ. ਨ ਕੇਵਲਂ ਏਤਸ੍ਸੇਵ ਵਿਸਂਵਾਦੇ ਆਪਤ੍ਤਿ ਹੋਤਿ, ਅਥ ਖੋ ਇਤਰੇਸਮ੍ਪਿ ਪਟਿਸ੍ਸਵਾਨਂ ਵਿਸਂਵਾਦੇ ਆਪਤ੍ਤਿ ਵੇਦਿਤਬ੍ਬਾ. ਯਥਾਹ – ‘‘ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਨ ਕੇਵਲਂ ‘ਇਮਂ ਤੇਮਾਸਂ ਇਧ ਵਸ੍ਸਂ ਵਸਥਾ’ਤਿ ਏਤਸ੍ਸੇਵ ਪਟਿਸ੍ਸਵਸ੍ਸ ਵਿਸਂਵਾਦੇ ਆਪਤ੍ਤਿ, ‘ਇਮਂ ¶ ਤੇਮਾਸਂ ਭਿਕ੍ਖਂ ਗਣ੍ਹਥ, ਉਭੋਪਿ ਮਯਂ ਇਧ ਵਸ੍ਸਂ ਵਸਿਸ੍ਸਾਮ, ਏਕਤੋਵ ਉਦ੍ਦਿਸਾਪੇਸ੍ਸਾਮਾ’ਤਿ ਏਵਮਾਦਿਨਾਪਿ ਤਸ੍ਸ ਤਸ੍ਸ ਪਟਿਸ੍ਸਵਸ੍ਸ ਵਿਸਂਵਾਦੇ ਦੁਕ੍ਕਟ’’ਨ੍ਤਿ (ਮਹਾਵ. ਅਟ੍ਠ. ੨੦੭). ਤਞ੍ਚ ਖੋ ਪਟਿਸ੍ਸਵਕਾਲੇ ਸੁਦ੍ਧਚਿਤ੍ਤਸ੍ਸ ਪਚ੍ਛਾ ਵਿਸਂਵਾਦਨਪਚ੍ਚਯਾ ਹੋਤਿ. ਪਠਮਂ ਅਸੁਦ੍ਧਚਿਤ੍ਤਸ੍ਸ ਪਨ ਪਟਿਸ੍ਸਵੇ ਪਾਚਿਤ੍ਤਿਯਂ, ਵਿਸਂਵਾਦੇਨ ਦੁਕ੍ਕਟਨ੍ਤਿ ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਂ ਯੁਜ੍ਜਤਿ.

੨੬੨੭. ‘‘ਵਸ੍ਸਂ ਉਪਗਨ੍ਤ੍ਵਾ ਪਨ ਅਰੁਣਂ ਅਨੁਟ੍ਠਾਪੇਤ੍ਵਾ ਤਦਹੇਵ ਸਤ੍ਤਾਹਕਰਣੀਯੇਨ ਪਕ੍ਕਮਨ੍ਤਸ੍ਸਾਪਿ ਅਨ੍ਤੋਸਤ੍ਤਾਹੇ ਨਿਵਤ੍ਤਨ੍ਤਸ੍ਸ ਅਨਾਪਤ੍ਤੀ’’ਤਿ (ਮਹਾਵ. ਅਟ੍ਠ. ੨੦੭) ਅਟ੍ਠਕਥਾਵਚਨਤੋ, ‘‘ਕੋ ਵਾਦੋ ਵਸਿਤ੍ਵਾ ਬਹਿ ਗਚ੍ਛਤੋ’’ਤਿ ਵਕ੍ਖਮਾਨਤ੍ਤਾ ¶ ਚ ‘‘ਨੁਟ੍ਠਾਪੇਤ੍ਵਾ ਪਨਾਰੁਣ’’ਨ੍ਤਿ ਪਾਠੋ ਗਹੇਤਬ੍ਬੋ. ਕਤ੍ਥਚਿ ਪੋਤ੍ਥਕੇਸੁ ‘‘ਉਟ੍ਠਾਪੇਤ੍ਵਾ ਪਨਾਰੁਣ’’ਨ੍ਤਿ ਪਾਠੋ ਦਿਸ੍ਸਤਿ, ਸੋ ਨ ਗਹੇਤਬ੍ਬੋ.

੨੬੨੮. ਵਸਿਤ੍ਵਾਤਿ ਦ੍ਵੀਹਤੀਹਂ ਵਸਿਤ੍ਵਾ. ਯਥਾ ਵਸ੍ਸਂ ਵਸਿਤ੍ਵਾ ਅਰੁਣਂ ਅਨੁਟ੍ਠਾਪੇਤ੍ਵਾਵ ਸਤ੍ਤਾਹਕਰਣੀਯੇਨ ਗਚ੍ਛਤੋ ਅਨਾਪਤ੍ਤਿ, ਤਥਾ ਗਤਟ੍ਠਾਨਤੋ ਅਨ੍ਤੋਸਤ੍ਤਾਹੇ ਆਗਨ੍ਤ੍ਵਾ ਪੁਨਪਿ ਅਰੁਣਂ ਅਨੁਟ੍ਠਾਪੇਤ੍ਵਾਵ ਸਤ੍ਤਾਹਕਰਣੀਯੇਨ ਗਚ੍ਛਤੋ ਅਨਾਪਤ੍ਤਿ. ‘‘ਸਤ੍ਤਾਹਵਾਰੇਨ ਅਰੁਣੋ ਉਟ੍ਠਾਪੇਤਬ੍ਬੋ’’ਤਿ (ਮਹਾਵ. ਅਟ੍ਠ. ੨੦੧) ਅਟ੍ਠਕਥਾਵਚਨਂ ਸਤ੍ਤਮਾਰੁਣੇਨ ਪਟਿਬਦ੍ਧਦਿਵਸਂ ਸਤ੍ਤਮੇਨ ਅਰੁਣੇਨੇਵ ਸਙ੍ਗਹੇਤ੍ਵਾ ਸਤ੍ਤਮਅਰੁਣਬ੍ਭਨ੍ਤਰੇ ਅਨਾਗਨ੍ਤ੍ਵਾ ਅਟ੍ਠਮਂ ਅਰੁਣਂ ਬਹਿ ਉਟ੍ਠਾਪੇਨ੍ਤਸ੍ਸ ਰਤ੍ਤਿਚ੍ਛੇਦਦਸ੍ਸਨਪਰਂ, ਨ ਸਤ੍ਤਮਅਰੁਣਸ੍ਸੇਵ ਤਤ੍ਥ ਉਟ੍ਠਾਪੇਤਬ੍ਬਭਾਵਦਸ੍ਸਨਪਰਨ੍ਤਿ ਗਹੇਤਬ੍ਬਂ ਸਿਕ੍ਖਾਭਾਜਨਅਟ੍ਠਕਥਾਯ, ਸੀਹਲ਼ਗਣ੍ਠਿਪਦੇਸੁ ਚ ਤਥਾ ਵਿਨਿਚ੍ਛਿਤਤ੍ਤਾ.

੨੬੨੯. ‘‘ਨੋਪੇਤਿ ਅਸਤਿਯਾ’’ਤਿ ਪਦਚ੍ਛੇਦੋ, ਨੋਪੇਤੀਤਿ ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ ਵਚੀਭੇਦੇਨ ਨ ਉਪਗਚ੍ਛਤਿ.

੨੬੩੦. ਵੁਤ੍ਤਮੇਵਤ੍ਥਂ ਸਮਤ੍ਥੇਤੁਮਾਹ ‘‘ਨ ਦੋਸੋ ਕੋਚਿ ਵਿਜ੍ਜਤੀ’’ਤਿ.

੨੬੩੧. ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ ਤਿਕ੍ਖਤ੍ਤੁਂ ਵਚਨੇ ਨਿਚ੍ਛਾਰਿਤੇ ਏਵ ਵਸ੍ਸਂ ਉਪਗਤੋ ਸਿਯਾਤਿ ਯੋਜਨਾ. ‘‘ਨਿਚ੍ਛਾਰਿਤੇਵ ਤਿਕ੍ਖਤ੍ਤੁ’’ਨ੍ਤਿ ਇਦਂ ਉਕ੍ਕਂਸਵਸੇਨ ਵੁਤ੍ਤਂ, ਸਕਿਂ, ਦ੍ਵਿਕ੍ਖਤ੍ਤੁਂ ਵਾ ਨਿਚ੍ਛਾਰਿਤੇਪਿ ਵਸ੍ਸੂਪਗਤੋ ਨਾਮ ਹੋਤੀਤਿ. ਯਥਾਹ – ‘‘ਇਮਸ੍ਮਿਂ ਵਿਹਾਰੇ ਇਮਂ ¶ ਤੇਮਾਸਂ ਵਸ੍ਸਂ ਉਪੇਮੀਤਿ ਸਕਿਂ ਵਾ ਦ੍ਵਤ੍ਤਿਕ੍ਖਤ੍ਤੁਂ ਵਾ ਵਾਚਂ ਨਿਚ੍ਛਾਰੇਤ੍ਵਾਵ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ (ਮਹਾਵ. ਅਟ੍ਠ. ੧੮੪).

੨੬੩੨. ਨਵਮਿਤੋ ¶ ਪਟ੍ਠਾਯ ਗਨ੍ਤੁਂ ਵਟ੍ਟਤਿ, ਆਗਚ੍ਛਤੁ ਵਾ ਮਾ ਵਾ, ਅਨਾਪਤ੍ਤੀ’’ਤਿ (ਮਹਾਵ. ਅਟ੍ਠ. ੨੦੭) ਅਟ੍ਠਕਥਾਨਯਂ ਦਸ੍ਸੇਤੁਮਾਹ ‘‘ਆਦਿਂ ਤੁ ਨਵਮਿਂ ਕਤ੍ਵਾ’’ਤਿਆਦਿ. ਨਵਮਿਂ ਪਭੁਤਿ ਆਦਿਂ ਕਤ੍ਵਾ, ਨਵਮਿਤੋ ਪਟ੍ਠਾਯਾਤਿ ਵੁਤ੍ਤਂ ਹੋਤਿ. ਗਨ੍ਤੁਂ ਵਟ੍ਟਤੀਤਿ ਸਤ੍ਤਾਹਕਰਣੀਯੇਨੇਵ ਗਨ੍ਤੁਂ ਵਟ੍ਟਤਿ, ਤਸ੍ਮਾ ਪਵਾਰਣਦਿਵਸੇਪਿ ਤਦਹੇਵ ਆਗਨ੍ਤੁਂ ਅਸਕ੍ਕੁਣੇਯ੍ਯਟ੍ਠਾਨਂ ਪਵਾਰਣਤ੍ਥਾਯ ਗਚ੍ਛਨ੍ਤੇਨ ਲਬ੍ਭਮਾਨੇਨ ਸਤ੍ਤਾਹਕਰਣੀਯੇਨ ਗਨ੍ਤੁਂ ਵਟ੍ਟਤਿ. ‘‘ਪਵਾਰੇਤ੍ਵਾ ਪਨ ਗਨ੍ਤੁਂ ਵਟ੍ਟਤਿ ਪਵਾਰਣਾਯ ਤਂਦਿਵਸਸਨ੍ਨਿਸ੍ਸਿਤਤ੍ਤਾ’’ਤਿ (ਵਜਿਰ. ਟੀ. ਮਹਾਵਗ੍ਗ ੨੦੭) ਹਿ ਵਜਿਰਬੁਦ੍ਧਿਤ੍ਥੇਰੋ. ਸੋ ਪਚ੍ਛਾ ਆਗਚ੍ਛਤੁ ਵਾ ਮਾ ਵਾ, ਦੋਸੋ ਨ ਵਿਜ੍ਜਤੀਤਿ ਯੋਜਨਾ.

ਵਸ੍ਸੂਪਨਾਯਿਕਕ੍ਖਨ੍ਧਕਕਥਾਵਣ੍ਣਨਾ.

ਪਵਾਰਣਕ੍ਖਨ੍ਧਕਕਥਾਵਣ੍ਣਨਾ

੨੬੩੩. ‘‘ਪਵਾਰਣਾ’’ਤਿ ਇਦਂ ‘‘ਚਾਤੁਦ੍ਦਸੀ’’ਤਿਆਦੀਹਿ ਪਚ੍ਚੇਕਂ ਯੋਜੇਤਬ੍ਬਂ. ਤਸ੍ਮਿਂ ਤਸ੍ਮਿਂ ਦਿਨੇ ਕਾਤਬ੍ਬਾ ਪਵਾਰਣਾ ਅਭੇਦੋਪਚਾਰੇਨ ਤਥਾ ਵੁਤ੍ਤਾ. ਸਾਮਗ੍ਗੀ ਉਪੋਸਥਕ੍ਖਨ੍ਧਕਕਥਾਵਣ੍ਣਨਾਯ ਵੁਤ੍ਤਸਰੂਪਾਵ. ਸਾਮਗ੍ਗਿਪਵਾਰਣਂ ਕਰੋਨ੍ਤੇਹਿ ਚ ਪਠਮਂ ਪਵਾਰਣਂ ਠਪੇਤ੍ਵਾ ਪਾਟਿਪਦਤੋ ਪਟ੍ਠਾਯ ਯਾਵ ਕਤ੍ਤਿਕਚਾਤੁਮਾਸਿਪੁਣ੍ਣਮਾ ਏਤ੍ਥਨ੍ਤਰੇ ਕਾਤਬ੍ਬਾ, ਤਤੋ ਪਚ੍ਛਾ ਵਾ ਪੁਰੇ ਵਾ ਨ ਵਟ੍ਟਤਿ. ਤੇਵਾਚੀ ਦ੍ਵੇਕਵਾਚੀਤਿ ‘‘ਸੁਣਾਤੁ ਮੇ, ਭਨ੍ਤੇ…ਪੇ… ਤੇਵਾਚਿਕਂ ਪਵਾਰੇਯ੍ਯ, ਦ੍ਵੇਵਾਚਿਕਂ ਪਵਾਰੇਯ੍ਯ, ਏਕਵਾਚਿਕਂ ਪਵਾਰੇਯ੍ਯਾ’’ਤਿ ਤਂ ਤਂ ਞਤ੍ਤਿਂ ਠਪੇਤ੍ਵਾ ਕਾਤਬ੍ਬਾ ਪਵਾਰਣਾ ਵੁਚ੍ਚਤਿ.

੨੬੩੪. ਤੀਣਿ ਕਮ੍ਮਾਨਿ ਮੁਞ੍ਚਿਤ੍ਵਾ, ਅਨ੍ਤੇਨੇਵ ਪਵਾਰਯੇਤਿ ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਪਵਾਰਣਕਮ੍ਮਾਨਿ, ਅਧਮ੍ਮੇਨ ਵਗ੍ਗਂ ਪਵਾਰਣਕਮ੍ਮਂ…ਪੇ… ਧਮ੍ਮੇਨ ਸਮਗ੍ਗਂ ਪਵਾਰਣਕਮ੍ਮ’’ਨ੍ਤਿ (ਮਹਾਵ. ੨੧੨) ਵਤ੍ਵਾ ‘‘ਤਤ੍ਰ, ਭਿਕ੍ਖਵੇ ¶ , ਯਦਿਦਂ ਅਧਮ੍ਮੇਨ ਵਗ੍ਗਂ ਪਵਾਰਣਕਮ੍ਮਂ, ਨ, ਭਿਕ੍ਖਵੇ, ਏਵਰੂਪਂ ਪਵਾਰਣਕਮ੍ਮਂ ਕਾਤਬ੍ਬਂ…ਪੇ… ਤਤ੍ਰ, ਭਿਕ੍ਖਵੇ, ਯਦਿਦਂ ਧਮ੍ਮੇਨ ਸਮਗ੍ਗਂ ਪਵਾਰਣਕਮ੍ਮਂ, ਏਵਰੂਪਂ, ਭਿਕ੍ਖਵੇ, ਪਵਾਰਣਕਮ੍ਮਂ ਕਾਤਬ੍ਬ’’ਨ੍ਤਿਆਦਿਵਚਨਤੋ (ਮਹਾਵ. ੨੧੨) ਤੀਣਿ ¶ ਅਕਤ੍ਤਬ੍ਬਾਨਿ ਪਵਾਰਣਕਮ੍ਮਾਨਿ ਮੁਞ੍ਚਿਤ੍ਵਾ ਕਾਤੁਂ ਅਨੁਞ੍ਞਾਤੇਨ ਚਤੁਤ੍ਥੇਨ ਪਵਾਰਣਕਮ੍ਮੇਨ ਪਵਾਰੇਯ੍ਯਾਤਿ ਅਤ੍ਥੋ. ਤਸ੍ਸ ਵਿਭਾਗੇਕਦੇਸਂ ‘‘ਪਞ੍ਚ ਯਸ੍ਮਿਂ ਪਨਾਵਾਸੇ’’ਤਿਆਦਿਨਾ ਵਕ੍ਖਤਿ.

੨੬੩੫. ਪੁਬ੍ਬਕਿਚ੍ਚਂ ਸਮਾਪੇਤ੍ਵਾਤਿ –

‘‘ਸਮ੍ਮਜ੍ਜਨੀ ਪਦੀਪੋ ਚ, ਉਦਕਂ ਆਸਨੇਨ ਚ;

ਪਵਾਰਣਾਯ ਏਤਾਨਿ, ‘ਪੁਬ੍ਬਕਰਣ’ਨ੍ਤਿ ਵੁਚ੍ਚਤਿ.

‘‘ਛਨ੍ਦਪਾਰਿਸੁਦ੍ਧਿਉਤੁਕ੍ਖਾਨਂ, ਭਿਕ੍ਖੁਗਣਨਾ ਚ ਓਵਾਦੋ;

ਪਵਾਰਣਾਯ ਏਤਾਨਿ, ‘ਪੁਬ੍ਬਕਿਚ੍ਚ’ਨ੍ਤਿ ਵੁਚ੍ਚਤੀ’’ਤਿ. –

ਵੁਤ੍ਤਂ ਨਵਵਿਧਂ ਪੁਬ੍ਬਕਿਚ੍ਚਂ ਨਿਟ੍ਠਾਪੇਤ੍ਵਾ.

ਪਤ੍ਤਕਲ੍ਲੇ ਸਮਾਨਿਤੇਤਿ –

‘‘ਪਵਾਰਣਾ ਯਾਵਤਿਕਾ ਚ ਭਿਕ੍ਖੂ ਕਮ੍ਮਪ੍ਪਤ੍ਤਾ,

ਸਭਾਗਾਪਤ੍ਤਿਯੋ ਚ ਨ ਵਿਜ੍ਜਨ੍ਤਿ;

ਵਜ੍ਜਨੀਯਾ ਚ ਪੁਗ੍ਗਲਾ ਤਸ੍ਮਿਂ ਨ ਹੋਨ੍ਤਿ,

‘ਪਤ੍ਤਕਲ੍ਲ’ਨ੍ਤਿ ਵੁਚ੍ਚਤੀ’’ਤਿ. –

ਵੁਤ੍ਤੇ ਚਤੁਬ੍ਬਿਧੇ ਪਤ੍ਤਕਲ੍ਲੇ ਸਮੋਧਾਨਿਤੇ ਪਰਿਸਮਾਪਿਤੇ.

ਞਤ੍ਤਿਂ ਠਪੇਤ੍ਵਾਤਿ ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਅਜ੍ਜ ਪਵਾਰਣਾ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ (ਮਹਾਵ. ੨੧੦) ਏਵਂ ਸਬ੍ਬਸਙ੍ਗਾਹਿਕਵਸੇਨ ਚ ‘‘ਤੇਵਾਚਿਕਂ ਪਵਾਰੇਯ੍ਯਾ’’ਤਿ ਚ ਦਾਨਾਦਿਕਰਣੇਨ ਯੇਭੁਯ੍ਯੇਨ ਰਤ੍ਤਿਯਾ ਖੇਪਿਤਾਯ ਚ ਰਾਜਾਦਿਅਨ੍ਤਰਾਯੇ ਸਤਿ ਚ ਤਦਨੁਰੂਪਤੋ ‘‘ਦ੍ਵੇਵਾਚਿਕਂ, ਏਕਵਾਚਿਕਂ, ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ ਚ ਞਤ੍ਤਿਂ ਠਪੇਤ੍ਵਾ ¶ , ਤਾਸਂ ਵਿਸੇਸੋ ਅਟ੍ਠਕਥਾਯਂ ਦਸ੍ਸਿਤੋਯੇਵ. ਯਥਾਹ –

‘‘ਏਵਞ੍ਹਿ ¶ ਵੁਤ੍ਤੇ ਤੇਵਾਚਿਕਞ੍ਚ ਦ੍ਵੇਵਾਚਿਕਞ੍ਚ ਏਕਵਾਚਿਕਞ੍ਚ ਪਵਾਰੇਤੁਂ ਵਟ੍ਟਤਿ, ਸਮਾਨਵਸ੍ਸਿਕਂ ਨ ਵਟ੍ਟਤਿ. ‘ਤੇਵਾਚਿਕਂ ਪਵਾਰੇਯ੍ਯਾ’ਤਿ ਵੁਤ੍ਤੇ ਪਨ ਤੇਵਾਚਿਕਮੇਵ ਵਟ੍ਟਤਿ, ਅਞ੍ਞਂ ਨ ਵਟ੍ਟਤਿ, ‘ਦ੍ਵੇਵਾਚਿਕਂ ਪਵਾਰੇਯ੍ਯਾ’ਤਿ ਵੁਤ੍ਤੇ ਦ੍ਵੇਵਾਚਿਕਞ੍ਚ ਤੇਵਾਚਿਕਞ੍ਚ ਵਟ੍ਟਤਿ, ਏਕਵਾਚਿਕਞ੍ਚ ਸਮਾਨਵਸ੍ਸਿਕਞ੍ਚ ਨ ਵਟ੍ਟਤਿ. ‘ਏਕਵਾਚਿਕਂ ਪਵਾਰੇਯ੍ਯਾ’ਤਿ ਵੁਤ੍ਤੇ ਪਨ ਏਕਵਾਚਿਕਦ੍ਵੇਵਾਚਿਕਤੇਵਾਚਿਕਾਨਿ ਵਟ੍ਟਨ੍ਤਿ, ਸਮਾਨਵਸ੍ਸਿਕਮੇਵ ਨ ਵਟ੍ਟਤਿ. ‘ਸਮਾਨਵਸ੍ਸਿਕ’ਨ੍ਤਿ ਵੁਤ੍ਤੇ ਸਬ੍ਬਂ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੧੦).

ਕਾਤਬ੍ਬਾਤਿ ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ ‘‘ਸਙ੍ਘਂ, ਆਵੁਸੋ, ਪਵਾਰੇਮਿ ਦਿਟ੍ਠੇਨ ਵਾ…ਪੇ… ਤਤਿਯਮ੍ਪਿ ਆਵੁਸੋ, ਸਙ੍ਘਂ ਪਵਾਰੇਮਿ ਦਿਟ੍ਠੇਨ ਵਾ…ਪੇ… ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ (ਮਹਾਵ. ੨੧੦) ਵੁਤ੍ਤਨਯੇਨ ਕਾਤਬ੍ਬਾ. ਨਵਕੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ…ਪੇ… ਤਤਿਯਮ੍ਪਿ, ਭਨ੍ਤੇ, ਸਙ੍ਘਂ ਪਵਾਰੇਮਿ ਦਿਟ੍ਠੇਨ ਵਾ…ਪੇ… ਪਸ੍ਸਨ੍ਤੋ ਪਟਿਕਰਿਸ੍ਸਾਮੀਤਿ (ਮਹਾਵ. ੨੧੦) ਵੁਤ੍ਤਨਯੇਨ ਕਾਤਬ੍ਬਾ.

੨੬੩੬. ਥੇਰੇਸੁ ਪਵਾਰੇਨ੍ਤੇਸੁ ਯੋ ਪਨ ਨਵੋ, ਸੋ ਸਯਂ ਯਾਵ ਪਵਾਰੇਤਿ, ਤਾਵ ਉਕ੍ਕੁਟਿਕਂ ਨਿਸੀਦੇਯ੍ਯਾਤਿ ਯੋਜਨਾ.

੨੬੩੭. ਚਤ੍ਤਾਰੋ ਵਾ ਤਯੋਪਿ ਵਾ ਏਕਾਵਾਸੇ ਏਕਸੀਮਾਯਂ ਵਸਨ੍ਤਿ ਚੇ, ਞਤ੍ਤਿਂ ਵਤ੍ਵਾ ‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤੋ, ਅਜ੍ਜ ਪਵਾਰਣਾ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਮਯਂ ਅਞ੍ਞਮਞ੍ਞਂ ਪਵਾਰੇਯ੍ਯਾਮਾ’’ਤਿ (ਮਹਾਵ. ੨੧੬) ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਯ੍ਯੁਨ੍ਤਿ ਯੋਜਨਾ.

ਪਵਾਰੇਯ੍ਯੁਨ੍ਤਿ ¶ ਏਤ੍ਥ ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਤੇ ਤਯੋ ਵਾ ਦ੍ਵੇ ਵਾ ਭਿਕ੍ਖੂ ਏਵਮਸ੍ਸੁ ਵਚਨੀਯਾ ‘‘ਅਹਂ, ਆਵੁਸੋ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਅਹਂ, ਆਵੁਸੋ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ (ਮਹਾਵ. ੨੧੬) ਪਵਾਰੇਤਬ੍ਬਂ. ਨਵੇਨਪਿ ‘‘ਅਹਂ, ਭਨ੍ਤੇ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ ¶ , ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਅਹਂ, ਭਨ੍ਤੇ, ਆਯਸ੍ਮਨ੍ਤੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਨ੍ਤੁ ਮਂ ਆਯਸ੍ਮਨ੍ਤੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ ਪਵਾਰੇਤਬ੍ਬਂ.

੨੬੩੮. ਅਞ੍ਞਮਞ੍ਞਂ ਪਵਾਰੇਯ੍ਯੁਂ, ਵਿਨਾ ਞਤ੍ਤਿਂ ਦੁਵੇ ਜਨਾ. ਤੇਸੁ ਥੇਰੇਨ ‘‘ਅਹਂ, ਆਵੁਸੋ, ਆਯਸ੍ਮਨ੍ਤਂ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਤੁ ਮਂ ਆਯਸ੍ਮਾ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਅਹਂ, ਆਵੁਸੋ, ਆਯਸ੍ਮਨ੍ਤਂ ਪਵਾਰੇਮਿ…ਪੇ… ਪਟਿਕਰਿਸ੍ਸਾਮੀ’’ਤਿ (ਮਹਾਵ. ੨੧੭) ਪਵਾਰੇਤਬ੍ਬਂ. ਨਵੇਨਪਿ ‘‘ਅਹਂ, ਭਨ੍ਤੇ, ਆਯਸ੍ਮਨ੍ਤਂ ਪਵਾਰੇਮਿ…ਪੇ… ਵਦਤੁ ਮਂ ਆਯਸ੍ਮਾ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਾਮਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਅਹਂ, ਭਨ੍ਤੇ, ਆਯਸ੍ਮਨ੍ਤਂ ਪਵਾਰੇਮਿ…ਪੇ… ਪਟਿਕਰਿਸ੍ਸਾਮੀ’’ਤਿ ਪਵਾਰੇਤਬ੍ਬਂ.

ਅਧਿਟ੍ਠੇਯ੍ਯਾਤਿ ਪੁਬ੍ਬਕਿਚ੍ਚਂ ਸਮਾਪੇਤ੍ਵਾ ‘‘ਅਜ੍ਜ ਮੇ ਪਵਾਰਣਾ ਚਾਤੁਦ੍ਦਸੀ’’ਤਿ ਵਾ ‘‘ਪਨ੍ਨਰਸੀ’’ਤਿ ਵਾ ਵਤ੍ਵਾ ‘‘ਅਧਿਟ੍ਠਾਮੀ’’ਤਿ ਅਧਿਟ੍ਠੇਯ੍ਯ ¶ . ਯਥਾਹ ‘‘ਅਜ੍ਜ ਮੇ ਪਵਾਰਣਾਤਿ ਏਤ੍ਥ ਸਚੇ ਚਾਤੁਦ੍ਦਸਿਕਾ ਹੋਤਿ, ‘ਅਜ੍ਜ ਮੇ ਪਵਾਰਣਾ ਚਾਤੁਦ੍ਦਸੀ’ਤਿ, ਸਚੇ ਪਨ੍ਨਰਸਿਕਾ, ‘ਅਜ੍ਜ ਮੇ ਪਵਾਰਣਾ ਪਨ੍ਨਰਸੀ’ਤਿ ਏਵਂ ਅਧਿਟ੍ਠਾਤਬ੍ਬ’’ਨ੍ਤਿ (ਮਹਾਵ. ਅਟ੍ਠ. ੨੧੮), ਇਮਿਨਾ ਸਬ੍ਬਸਙ੍ਗਾਹਾਦਿਞਤ੍ਤੀਸੁ ਚ ਤਸ੍ਮਿਂ ਤਸ੍ਮਿਂ ਦਿਵਸੇ ਸੋ ਸੋ ਵੋਹਾਰੋ ਕਾਤਬ੍ਬੋਤਿ ਦੀਪਿਤਮੇਵ.

ਸੇਸਾ ਸਙ੍ਘਪਵਾਰਣਾਤਿ ਪਞ੍ਚਹਿ, ਅਤਿਰੇਕੇਹਿ ਵਾ ਭਿਕ੍ਖੂਹਿ ਕਤ੍ਤਬ੍ਬਾ ਪਵਾਰਣਾ ਸਙ੍ਘਪਵਾਰਣਾ.

੨੬੩੯. ਪਵਾਰਿਤੇਤਿ ਪਠਮਪਵਾਰਣਾਯ ਪਵਾਰਿਤੇ. ਅਨਾਗਤੋਤਿ ਕੇਨਚਿ ਅਨ੍ਤਰਾਯੇਨ ਪੁਰਿਮਿਕਾਯ ਚ ਪਚ੍ਛਿਮਿਕਾਯ ਚ ਵਸ੍ਸੂਪਨਾਯਿਕਾਯ ਵਸ੍ਸਂ ਅਨੁਪਗਤੋ. ਅਵੁਤ੍ਥੋਤਿ ਪਚ੍ਛਿਮਿਕਾਯ ਉਪਗਤੋ. ਵੁਤ੍ਤਞ੍ਹਿ ਖੁਦ੍ਦਸਿਕ੍ਖਾਵਣ੍ਣਨਾਯ ‘‘ਅਵੁਤ੍ਥੋਤਿ ਪਚ੍ਛਿਮਿਕਾਯ ਉਪਗਤੋ ਅਪਰਿਨਿਟ੍ਠਿਤਤ੍ਤਾ ‘ਅਵੁਤ੍ਥੋ’ਤਿ ਵੁਚ੍ਚਤੀ’’ਤਿ. ਪਾਰਿਸੁਦ੍ਧਿਉਪੋਸਥਂ ਕਰੇਯ੍ਯਾਤਿ ਯੋਜਨਾ. ਏਤ੍ਥ ‘‘ਤੇਸਂ ਸਨ੍ਤਿਕੇ’’ਤਿ ਸੇਸੋ.

੨੬੪੦-੧. ਯਸ੍ਮਿਂ ¶ ਪਨਾਵਾਸੇ ਪਞ੍ਚ ਵਾ ਚਤ੍ਤਾਰੋ ਵਾ ਤਯੋ ਵਾ ਸਮਣਾ ਵਸਨ੍ਤਿ, ਤੇ ਤਤ੍ਥ ਏਕੇਕਸ੍ਸ ਪਵਾਰਣਂ ਹਰਿਤ੍ਵਾਨ ਸਚੇ ਅਞ੍ਞਮਞ੍ਞਂ ਪਵਾਰੇਨ੍ਤਿ, ਆਪਤ੍ਤਿ ਦੁਕ੍ਕਟਨ੍ਤਿ ਯੋਜਨਾ.

ਸੇਸਨ੍ਤਿ ‘‘ਅਧਮ੍ਮੇਨ ਸਮਗ੍ਗ’’ਨ੍ਤਿਆਦਿਕਂ ਵਿਨਿਚ੍ਛਯਂ. ਇਧਾਤਿ ਇਮਸ੍ਮਿਂ ਪਵਾਰਣਾਧਿਕਾਰੇ. ਬੁਧੋਤਿ ਵਿਨਯਧਰੋ. ਉਪੋਸਥੇ ਵੁਤ੍ਤਨਯੇਨਾਤਿ ਉਪੋਸਥਵਿਨਿਚ੍ਛਯੇ ਵੁਤ੍ਤਕ੍ਕਮੇਨ. ਨਯੇਤਿ ਜਾਨੇਯ੍ਯ.

੨੬੪੨. ਸਮ੍ਪਾਦੇਤਤ੍ਤਨੋ ਸੁਚਿਨ੍ਤਿ ਅਤ੍ਤਨੋ ਉਪੋਸਥਂ ਸਮ੍ਪਾਦੇਤਿ. ਸਬ੍ਬਂ ਸਾਧੇਤੀਤਿ ਉਪੋਸਥਾਦਿਸਬ੍ਬਂ ਕਮ੍ਮਂ ਨਿਪ੍ਫਾਦੇਤਿ. ਨਤ੍ਤਨੋਤਿ ਅਤ੍ਤਨੋ ਉਪੋਸਥਂ ਨ ਨਿਪ੍ਫਾਦੇਤਿ.

੨੬੪੩. ਤਸ੍ਮਾਤਿ ¶ ਯਸ੍ਮਾ ਅਤ੍ਤਨੋ ਸੁਚਿਂ ਨ ਸਾਧੇਤਿ, ਤਸ੍ਮਾ. ਉਭਿਨ੍ਨਨ੍ਤਿ ਅਤ੍ਤਨੋ ਚ ਸਙ੍ਘਸ੍ਸ ਚ. ਕਿਚ੍ਚਸਿਦ੍ਧਤ੍ਥਮੇਵਿਧਾਤਿ ਉਪੋਸਥਾਦਿਕਮ੍ਮਨਿਪ੍ਪਜ੍ਜਨਤ੍ਥਂ ਇਧ ਇਮਸ੍ਮਿਂ ਉਪੋਸਥਕਮ੍ਮਾਦਿਪਕਰਣੇ. ਪਾਰਿਸੁਦ੍ਧਿਪੀਤਿ ਏਤ੍ਥ ਪਿ-ਸਦ੍ਦੇਨ ਪਵਾਰਣਾ ਸਙ੍ਗਹਿਤਾ. ਤੇਨੇਵ ਵਕ੍ਖਤਿ ‘‘ਛਨ੍ਦਂ ਵਾ ਪਾਰਿਸੁਦ੍ਧਿਂ ਵਾ, ਗਹੇਤ੍ਵਾ ਵਾ ਪਵਾਰਣ’’ਨ੍ਤਿ.

ਛਨ੍ਦਪਾਰਿਸੁਦ੍ਧਿਪਵਾਰਣਂ ਦੇਨ੍ਤੇਨ ਸਚੇ ਸਾਪਤ੍ਤਿਕੋ ਹੋਤਿ, ਆਪਤ੍ਤਿਂ ਦੇਸੇਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਛਨ੍ਦਾਦਿਹਾਰਕੋ ਭਿਕ੍ਖੁ ਵਤ੍ਤਬ੍ਬੋ ‘‘ਛਨ੍ਦਂ ਦਮ੍ਮਿ, ਛਨ੍ਦਂ ਮੇ ਹਰ, ਛਨ੍ਦਂ ਮੇ ਆਰੋਚੇਹੀ’’ਤਿ (ਮਹਾਵ. ੧੬੫), ‘‘ਪਾਰਿਸੁਦ੍ਧਿਂ ਦਮ੍ਮਿ, ਪਾਰਿਸੁਦ੍ਧਿਂ ਮੇ ਹਰ, ਪਾਰਿਸੁਦ੍ਧਿਂ ਮੇ ਆਰੋਚੇਹੀ’’ਤਿ (ਮਹਾਵ. ੧੬੪), ‘‘ਪਵਾਰਣਂ ਦਮ੍ਮਿ, ਪਵਾਰਣਂ ਮੇ ਹਰ, ਪਵਾਰਣਂ ਮੇ ਆਰੋਚੇਹਿ, ਮਮਤ੍ਥਾਯ ਪਵਾਰੇਹੀ’’ਤਿ (ਮਹਾਵ. ੨੧੩).

੨੬੪੪. ‘‘ਛਨ੍ਦੋ ਏਕੇਨਾ’’ਤਿ ਪਦਚ੍ਛੇਦੋ. ਏਕੇਨ ਬਹੂਨਮ੍ਪਿ ਛਨ੍ਦੋ ਹਾਤਬ੍ਬੋ, ਤਥਾ ਪਾਰਿਸੁਦ੍ਧਿ ਹਾਤਬ੍ਬਾ. ਪਿ-ਸਦ੍ਦੇਨ ਪਵਾਰਣਾ ਹਾਤਬ੍ਬਾਤਿ ਯੋਜਨਾ. ਪਰਮ੍ਪਰਾਹਟੋ ਛਨ੍ਦੋਤਿ ਬਹੂਨਂ ਵਾ ਏਕਸ੍ਸ ਵਾ ਛਨ੍ਦਾਦਿਹਾਰਕਸ੍ਸ ਹਤ੍ਥਤੋ ਅਨ੍ਤਰਾ ਅਞ੍ਞੇਨ ਗਹਿਤਾ ਛਨ੍ਦਪਾਰਿਸੁਦ੍ਧਿਪਵਾਰਣਾ. ਵਿਸੁਦ੍ਧਿਯਾ ਨ ਗਚ੍ਛਤਿ ਅਨਵਜ੍ਜਭਾਵਾਯ ਨ ਪਾਪੁਣਾਤਿ ਬਿਲ਼ਾਲਸਙ੍ਖਲਿਕਛਨ੍ਦਾਦੀਨਂ ਸਙ੍ਘਮਜ੍ਝਂ ਅਗਮਨੇਨ ਵਗ੍ਗਭਾਵਕਰਣਤੋ.

ਏਤ੍ਥ ਚ ਯਥਾ ਬਿਲ਼ਾਲਸਙ੍ਖਲਿਕਾਯ ਪਠਮਵਲਯਂ ਦੁਤਿਯਵਲਯਂ ਪਾਪੁਣਾਤਿ, ਨ ਤਤਿਯਂ, ਏਵਮਿਮੇਪਿ ਛਨ੍ਦਾਦਯੋ ਦਾਯਕੇਨ ਯਸ੍ਸ ਦਿਨ੍ਨਾ, ਤਤੋ ਅਞ੍ਞਤ੍ਥ ਨ ਗਚ੍ਛਤੀਤਿ ਬਿਲ਼ਾਲਸਙ੍ਖਲਿਕਾਸਦਿਸਤ੍ਤਾ ¶ ‘‘ਬਿਲ਼ਾਲਸਙ੍ਖਲਿਕਾ’’ਤਿ ਵੁਤ੍ਤਾ. ਬਿਲ਼ਾਲਸਙ੍ਖਲਿਕਾਗ੍ਗਹਣਞ੍ਚੇਤ੍ਥ ਯਾਸਂ ਕਾਸਞ੍ਚਿ ਸਙ੍ਖਲਿਕਾਨਂ ਉਪਲਕ੍ਖਣਮਤ੍ਤਨ੍ਤਿ ਦਟ੍ਠਬ੍ਬਂ.

੨੬੪੫-੬. ਛਨ੍ਦਂ ¶ ਵਾ ਪਾਰਿਸੁਦ੍ਧਿਂ ਵਾ ਪਵਾਰਣਂ ਵਾ ਗਹੇਤ੍ਵਾ ਛਨ੍ਦਾਦਿਹਾਰਕੋ ਸਙ੍ਘਮਪ੍ਪਤ੍ਵਾ ਸਚੇ ਸਾਮਣੇਰਾਦਿਭਾਵਂ ਪਟਿਜਾਨੇਯ੍ਯ ਵਾ ਵਿਬ੍ਭਮੇਯ੍ਯ ਵਾ ਮਰੇਯ੍ਯ ਵਾ, ਤਂ ਸਬ੍ਬਂ ਛਨ੍ਦਾਦਿਭਾਵਂ ਨਾਹਟਂ ਹੋਤਿ, ਸਙ੍ਘਂ ਪਤ੍ਵਾ ਏਵਂ ਸਿਯਾ ਸਾਮਣੇਰਾਦਿਭਾਵਂ ਪਟਿਜਾਨਨ੍ਤੋ, ਵਿਬ੍ਭਨ੍ਤੋ, ਕਾਲਕਤੋ ਵਾ ਭਵੇਯ੍ਯ, ਤਂ ਸਬ੍ਬਂ ਹਟਂ ਆਨੀਤਂ ਹੋਤੀਤਿ ਯੋਜਨਾ.

ਤਤ੍ਥ ਸਾਮਣੇਰਾਦਿਭਾਵਂ ਵਾ ਪਟਿਜਾਨੇਯ੍ਯਾਤਿ ‘‘ਅਹਂ ਸਾਮਣੇਰੋ’’ਤਿਆਦਿਨਾ ਭੂਤਂ ਸਾਮਣੇਰਾਦਿਭਾਵਂ ਕਥੇਯ੍ਯ, ਪਚ੍ਛਾ ਸਾਮਣੇਰਭੂਮਿਯਂ ਪਤਿਟ੍ਠਹੇਯ੍ਯਾਤਿ ਅਤ੍ਥੋ. ਆਦਿ-ਸਦ੍ਦੇਨ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨੋ ਗਹਿਤੋ.

੨੬੪੭. ਸਙ੍ਘਂ ਪਤ੍ਵਾਤਿ ਅਨ੍ਤਮਸੋ ਤਂਤਂਕਮ੍ਮਪ੍ਪਤ੍ਤਸ੍ਸ ਚਤੁਵਗ੍ਗਾਦਿਸਙ੍ਘਸ੍ਸ ਹਤ੍ਥਪਾਸਂ ਪਤ੍ਵਾਤਿ ਅਤ੍ਥੋ. ਪਮਤ੍ਤੋਤਿ ਪਮਾਦਂ ਸਤਿਸਮ੍ਮੋਸਂ ਪਤ੍ਤੋ. ਸੁਤ੍ਤੋਤਿ ਨਿਦ੍ਦੂਪਗਤੋ. ਖਿਤ੍ਤਚਿਤ੍ਤਕੋਤਿ ਯਕ੍ਖਾਦੀਹਿ ਵਿਕ੍ਖੇਪਮਾਪਾਦਿਤਚਿਤ੍ਤੋ. ਨਾਰੋਚੇਤੀਤਿ ਅਤ੍ਤਨੋ ਛਨ੍ਦਾਦੀਨਂ ਆਹਟਭਾਵਂ ਏਕਸ੍ਸਾਪਿ ਭਿਕ੍ਖੁਨੋ ਨ ਕਥੇਤਿ. ਸਞ੍ਚਿਚ੍ਚਾਤਿ ਸਞ੍ਚੇਤੇਤ੍ਵਾ ਜਾਨਨ੍ਤੋਯੇਵ ਅਨਾਦਰਿਯੋ ਨਾਰੋਚੇਤਿ, ਦੁਕ੍ਕਟਂ ਹੋਤਿ.

੨੬੪੮. ਯੇ ਤੇਤਿ ਯੇ ਤੇ ਭਿਕ੍ਖੂ ਥੇਰਾ ਵਾ ਨਵਾ ਵਾ ਮਜ੍ਝਿਮਾ ਵਾ. ਵਿਪਸ੍ਸਨਾਤਿ ਸਹਚਰਿਯੇਨ ਸਮਥੋਪਿ ਗਯ੍ਹਤਿ. ਸਮਥਵਿਪਸ੍ਸਨਾ ਚ ਇਧ ਤਰੁਣਾਯੇਵ ਅਧਿਪ੍ਪੇਤਾ, ਤਸ੍ਮਾ ਵਿਪਸ੍ਸਨਾਯੁਤ੍ਤਾਤਿ ਏਤ੍ਥ ਤਰੁਣਾਹਿ ਸਮਥਵਿਪਸ੍ਸਨਾਹਿ ਸਮਨ੍ਨਾਗਤਾਤਿ ਅਤ੍ਥੋ. ਰਤ੍ਤਿਨ੍ਦਿਵਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਅਤਨ੍ਦਿਤਾਤਿ ਅਨਲਸਾ.

‘‘ਰਤ੍ਤਿਨ੍ਦਿਵ’’ਨ੍ਤਿ ਏਤ੍ਥ ਰਤ੍ਤਿ-ਸਦ੍ਦੇਨ ਰਤ੍ਤਿਯਾਯੇਵ ਗਹਣਂ, ਉਦਾਹੁ ਏਕਦੇਸਸ੍ਸਾਤਿ ਆਹ ‘‘ਪੁਬ੍ਬਰਤ੍ਤਾਪਰਰਤ੍ਤ’’ਨ੍ਤਿ. ਪੁਬ੍ਬਾ ਚ ਸਾ ਰਤ੍ਤਿ ਚਾਤਿ ਪੁਬ੍ਬਰਤ੍ਤਿ, ਪਠਮਯਾਮੋ, ਅਪਰਾ ਚ ¶ ਸਾ ਰਤ੍ਤਿ ਚਾਤਿ ਅਪਰਰਤ੍ਤਿ, ਪਚ੍ਛਿਮਯਾਮੋ, ਪੁਬ੍ਬਰਤ੍ਤਿ ਚ ਅਪਰਰਤ੍ਤਿ ਚਾਤਿ ਸਮਾਹਾਰਦ੍ਵਨ੍ਦੇ ਸਮਾਸਨ੍ਤੇ ਅ-ਕਾਰਪਚ੍ਚਯਂ ਕਤ੍ਵਾ ‘‘ਪੁਬ੍ਬਰਤ੍ਤਾਪਰਰਤ੍ਤ’’ਨ੍ਤਿ ਵੁਤ੍ਤਂ. ਇਧਾਪਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਮਜ੍ਝਿਮਯਾਮੇ ਕਾਯਦਰਥਵੂਪਸਮਨਤ੍ਥਾਯ ਸੁਪਨਂ ਅਨੁਞ੍ਞਾਤਨ੍ਤਿ ਤਂ ਵਜ੍ਜੇਤ੍ਵਾ ਪੁਰਿਮਪਚ੍ਛਿਮਯਾਮੇਸੁ ਨਿਰਨ੍ਤਰਭਾਵਨਾਨੁਯੋਗੋ ਕਾਤਬ੍ਬੋਤਿ ਦਸ੍ਸਨਤ੍ਥਮੇਵ ਵੁਤ੍ਤਂ. ਵਿਪਸ੍ਸਨਾ ਪਰਾਯਨਾ ਸਮਥਵਿਪਸ੍ਸਨਾਵ ਪਰਂ ¶ ਅਯਨਂ ਪਤਿਟ੍ਠਾ ਏਤੇਸਨ੍ਤਿ ਵਿਪਸ੍ਸਨਾਪਰਾਯਨਾ, ਸਮਥਵਿਪਸ੍ਸਨਾਯ ਯੁਤ੍ਤਪਯੁਤ੍ਤਾ ਹੋਨ੍ਤੀਤਿ ਵੁਤ੍ਤਂ ਹੋਤਿ.

੨੬੪੯. ਲਦ੍ਧੋ ਫਾਸੁਵਿਹਾਰੋ ਯੇਹਿ ਤੇ ਲਦ੍ਧਫਾਸੁਵਿਹਾਰਾ, ਤੇਸਂ. ਫਾਸੁਵਿਹਾਰੋਤਿ ਚ ਸੁਖਵਿਹਾਰਸ੍ਸ ਮੂਲਕਾਰਣਤ੍ਤਾ ਤਰੁਣਾ ਸਮਥਵਿਪਸ੍ਸਨਾ ਅਧਿਪ੍ਪੇਤਾ, ਪਟਿਲਦ੍ਧਤਰੁਣਸਮਥਵਿਪਸ੍ਸਨਾਨਨ੍ਤਿ ਅਤ੍ਥੋ. ਸਿਯਾ ਨ ਪਰਿਹਾਨਿਤਿ ਪਰਿਹਾਨਿ ਨਾਮ ਏਵਂ ਕਤੇ ਨ ਭਵੇਯ੍ਯ.

ਕਤ੍ਤਿਕਮਾਸਕੇਤਿ ਚੀਵਰਮਾਸਸਙ੍ਖਾਤੇ ਕਤ੍ਤਿਕਮਾਸੇ ਪਵਾਰਣਾਯ ਸਙ੍ਗਹੋ ਵੁਤ੍ਤੋਤਿ ਯੋਜਨਾ. ਗਾਥਾਬਨ੍ਧਵਸੇਨ ‘‘ਸਙ੍ਗਾਹੋ’’ਤਿ ਦੀਘੋ ਕਤੋ, ਪਵਾਰਣਾਸਙ੍ਗਹੋ ਵੁਤ੍ਤੋਤਿ ਅਤ੍ਥੋ. ਯਥਾਹ –

‘‘ਪਵਾਰਣਾਸਙ੍ਗਹੋ ਚ ਨਾਮਾਯਂ ਵਿਸ੍ਸਟ੍ਠਕਮ੍ਮਟ੍ਠਾਨਾਨਂ ਥਾਮਗਤਸਮਥਵਿਪਸ੍ਸਨਾਨਂ ਸੋਤਾਪਨ੍ਨਾਦੀਨਞ੍ਚ ਨ ਦਾਤਬ੍ਬੋ. ਤਰੁਣਸਮਥਵਿਪਸ੍ਸਨਾਲਾਭਿਨੋ ਪਨ ਸਬ੍ਬੇ ਵਾ ਹੋਨ੍ਤੁ, ਉਪਡ੍ਢਾ ਵਾ, ਏਕਪੁਗ੍ਗਲੋ ਵਾ, ਏਕਸ੍ਸਪਿ ਵਸੇਨ ਦਾਤਬ੍ਬੋਯੇਵ. ਦਿਨ੍ਨੇ ਪਵਾਰਣਾਸਙ੍ਗਹੇ ਅਨ੍ਤੋਵਸ੍ਸੇ ਪਰਿਹਾਰੋਵ ਹੋਤਿ, ਆਗਨ੍ਤੁਕਾ ਤੇਸਂ ਸੇਨਾਸਨਂ ਗਹੇਤੁਂ ਨ ਲਭਨ੍ਤਿ. ਤੇਹਿਪਿ ਛਿਨ੍ਨਵਸ੍ਸੇਹਿ ਨ ਭਵਿਤਬ੍ਬਂ, ਪਵਾਰੇਤ੍ਵਾ ਪਨ ਅਨ੍ਤਰਾਪਿ ਚਾਰਿਕਂ ਪਕ੍ਕਮਿਤੁਂ ਲਭਨ੍ਤੀ’’ਤਿ (ਮਹਾਵ. ਅਟ੍ਠ. ੨੪੧).

ਪਵਾਰਣਾਸਙ੍ਗਹਸ੍ਸ ¶ ਦਾਨਪ੍ਪਕਾਰੋ ਪਨ ਪਾਲ਼ਿਤੋ ਗਹੇਤਬ੍ਬੋ.

ਪਵਾਰਣਕ੍ਖਨ੍ਧਕਕਥਾਵਣ੍ਣਨਾ.

ਚਮ੍ਮਕ੍ਖਨ੍ਧਕਕਥਾਵਣ੍ਣਨਾ

੨੬੫੦. ਏਲ਼ਕਾ ਚ ਅਜਾ ਚ ਮਿਗਾ ਚਾਤਿ ਵਿਗ੍ਗਹੋ. ਪਸੂਨਂ ਦ੍ਵਨ੍ਦੇ ਏਕਤ੍ਤਨਪੁਂਸਕਤ੍ਤਸ੍ਸ ਵਿਭਾਸਿਤਤ੍ਤਾ ਬਹੁਵਚਨਨਿਦ੍ਦੇਸੋ. ਏਲ਼ਕਾਨਞ੍ਚ ਅਜਾਨਞ੍ਚ ਮਿਗਾਨਂ ਰੋਹਿਤੇਣਿਕੁਰੁਙ੍ਗਾਨਞ੍ਚ. ਪਸਦਾ ਚ ਮਿਗਮਾਤਾ ਚ ਪਸਦਮਿਗਮਾਤਾ, ‘‘ਪਸਦਮਿਗਮਾਤੁਯਾ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ‘‘ਪਸਦ’’ਨ੍ਤਿ ਨਿਗ੍ਗਹਿਤਾਗਮੋ. ਪਸਦਮਿਗਮਾਤੁਯਾ ਚ ਚਮ੍ਮਂ ਭਿਕ੍ਖੁਨੋ ਵਟ੍ਟਤੀਤਿ ਯੋਜਨਾ. ‘‘ਮਿਗਾਨ’’ਨ੍ਤਿ ਇਮਿਨਾ ਗਹਿਤਾਨਮੇਵੇਤ੍ਥ ਵਿਭਾਗਦਸ੍ਸਨਂ ‘‘ਰੋਹਿਤੇਣੀ’’ਤਿਆਦਿ. ਰੋਹਿਤਾਦਯੋ ਮਿਗਵਿਭਾਗਵਿਸੇਸਾ.

੨੬੫੧. ਏਤੇਸਂ ¶ ਯਥਾਵੁਤ੍ਤਸਤ੍ਤਾਨਂ ਚਮ੍ਮਂ ਠਪੇਤ੍ਵਾ ਅਞ੍ਞਂ ਚਮ੍ਮਂ ਦੁਕ੍ਕਟਾਪਤ੍ਤਿਯਾ ਵਤ੍ਥੁਭੂਤਨ੍ਤਿ ਅਤ੍ਥੋ. ਅਞ੍ਞਨ੍ਤਿ ਚ –

‘‘ਮਕ੍ਕਟੋ ਕਾਲ਼ਸੀਹੋ ਚ, ਸਰਭੋ ਕਦਲੀਮਿਗੋ;

ਯੇ ਚ ਵਾਲ਼ਮਿਗਾ ਹੋਨ੍ਤਿ, ਤੇਸਂ ਚਮ੍ਮਂ ਨ ਵਟ੍ਟਤੀ’’ਤਿ. (ਮਹਾਵ. ਅਟ੍ਠ. ੨੫੯) –

ਅਟ੍ਠਕਥਾਯ ਪਟਿਕ੍ਖਿਤ੍ਤਂ ਚਮ੍ਮਮਾਹ. ਮਕ੍ਕਟੋ ਨਾਮ ਸਾਖਮਿਗੋ. ਕਾਲ਼ਸੀਹੋ ਨਾਮ ਮਹਾਮੁਖਵਾਨਰਜਾਤਿਕੋ. ਵਾਲ਼ਮਿਗਾ ਨਾਮ ਸੀਹਬ੍ਯਗ੍ਘਾਦਯੋ. ਯਥਾਹ – ‘‘ਤਤ੍ਥ ਵਾਲ਼ਮਿਗਾਤਿ ਸੀਹਬ੍ਯਗ੍ਘਅਚ੍ਛਤਰਚ੍ਛਾ, ਨ ਕੇਵਲਞ੍ਚ ਏਤੇਯੇਵ, ਯੇਸਂ ਪਨ ਚਮ੍ਮਂ ਵਟ੍ਟਤੀਤਿ ਵੁਤ੍ਤਂ, ਤੇ ਠਪੇਤ੍ਵਾ ਅਵਸੇਸਾ ਅਨ੍ਤਮਸੋ ਗੋਮਹਿਂਸਸ੍ਸਮਿਲ਼ਾਰਾਦਯੋਪਿ ਸਬ੍ਬੇ ਇਮਸ੍ਮਿਂ ਅਤ੍ਥੇ ‘ਵਾਲ਼ਮਿਗਾ’ਤ੍ਵੇਵ ਵੇਦਿਤਬ੍ਬਾ’’ਤਿ.

ਥਵਿਕਾ ¶ ਚ ਉਪਾਹਨਾ ਚ ਥਵਿਕੋਪਾਹਨਂ. ਅਮਾਨੁਸਂ ਮਨੁਸ੍ਸਚਮ੍ਮਰਹਿਤਂ ਸਬ੍ਬਂ ਚਮ੍ਮਂ ਥਵਿਕੋਪਾਹਨੇ ਵਟ੍ਟਤੀਤਿ ਯੋਜਨਾ. ਏਤ੍ਥ ਥਵਿਕਾਤਿ ਉਪਾਹਨਾਦਿਕੋਸਕਸ੍ਸ ਗਹਣਂ. ਯਥਾਹ ‘‘ਮਨੁਸ੍ਸਚਮ੍ਮਂ ਠਪੇਤ੍ਵਾ ਯੇਨ ਕੇਨਚਿ ਚਮ੍ਮੇਨ ਉਪਾਹਨਾ ਵਟ੍ਟਤਿ. ਉਪਾਹਨਾਕੋਸਕਸਤ੍ਥਕਕੋਸਕਕੁਞ੍ਜਿਕਾਕੋਸਕੇਸੁਪਿ ਏਸੇਵ ਨਯੋ’’ਤਿ (ਮਹਾਵ. ਅਟ੍ਠ. ੨੫੯).

੨੬੫੨. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਪਚ੍ਚਨ੍ਤਿਮੇਸੁ ਜਨਪਦੇਸੁ ਗੁਣਙ੍ਗੁਣੂਪਾਹਨ’’ਨ੍ਤਿ (ਮਹਾਵ. ੨੫੯) ਵਚਨਤੋ ‘‘ਵਟ੍ਟਨ੍ਤਿ ਮਜ੍ਝਿਮੇ ਦੇਸੇ, ਨ ਗੁਣਙ੍ਗੁਣੂਪਾਹਨਾ’’ਤਿ ਵੁਤ੍ਤਂ. ਮਜ੍ਝਿਮੇ ਦੇਸੇਤਿ ‘‘ਪੁਰਤ੍ਥਿਮਾਯ ਦਿਸਾਯ ਗਜਙ੍ਗਲਂ ਨਾਮ ਨਿਗਮੋ’’ਤਿਆਦਿਨਾ (ਮਹਾਵ. ੨੫੯) ਵੁਤ੍ਤਸੀਮਾਪਰਿਚ੍ਛੇਦੇ ਮਜ੍ਝਿਮਦੇਸੇ. ਗੁਣਙ੍ਗੁਣੂਪਾਹਨਾਤਿ ਚਤੁਪਟਲਤੋ ਪਟ੍ਠਾਯ ਬਹੁਪਟਲਾ ਉਪਾਹਨਾ. ਯਥਾਹ – ‘‘ਗੁਣਙ੍ਗੁਣੂਪਾਹਨਾਤਿ ਚਤੁਪਟਲਤੋ ਪਟ੍ਠਾਯ ਵੁਚ੍ਚਤੀ’’ਤਿ (ਮਹਾਵ. ਅਟ੍ਠ. ੨੪੫). ਮਜ੍ਝਿਮਦੇਸੇ ਗੁਣਙ੍ਗੁਣੂਪਾਹਨਾ ਨ ਵਟ੍ਟਨ੍ਤੀਤਿ ਯੋਜਨਾ. ਅਨ੍ਤੋਆਰਾਮੇਤਿ ਏਤ੍ਥ ਪਕਰਣਤੋ ‘‘ਸਬ੍ਬੇਸ’’ਨ੍ਤਿ ਲਬ੍ਭਤਿ, ਗਿਲਾਨਾਨਮਿਤਰੇਸਞ੍ਚ ਸਬ੍ਬੇਸਨ੍ਤਿ ਅਤ੍ਥੋ. ਸਬ੍ਬਤ੍ਥਾਪਿ ਚਾਤਿ ਅਨ੍ਤੋਆਰਾਮੇ, ਬਹਿ ਚਾਤਿ ਸਬ੍ਬਤ੍ਥਾਪਿ. ਰੋਗਿਨੋਤਿ ਗਿਲਾਨਸ੍ਸ ਵਟ੍ਟਨ੍ਤੀਤਿ ਯੋਜਨਾ.

੨੬੫੩. ਪੁਟਬਦ੍ਧਾ ਖਲ੍ਲਕਬਦ੍ਧਾਚਾਤਿ ਪਚ੍ਚੇਕਂ ਯੋਜੇਤਬ੍ਬਂ. ਵਿਸੇਸੋ ਪਨੇਤਾਸਂ ਅਟ੍ਠਕਥਾਯਮੇਵ ¶ ਵੁਤ੍ਤੋ ‘‘ਪੁਟਬਦ੍ਧਾਤਿ ਯੋਨਕਉਪਾਹਨਾ ਵੁਚ੍ਚਤਿ, ਯਾ ਯਾਵਜਙ੍ਘਤੋ ਸਬ੍ਬਪਾਦਂ ਪਟਿਚ੍ਛਾਦੇਤਿ. ਖਲ੍ਲਕਬਦ੍ਧਾਤਿ ਪਣ੍ਹਿਪਿਧਾਨਤ੍ਥਂ ਤਲੇ ਖਲ੍ਲਕਂ ਬਨ੍ਧਿਤ੍ਵਾ ਕਤਾ’’ਤਿ. ਪਾਲਿਗੁਣ੍ਠਿਮਾ ਚ ‘‘ਪਲਿਗੁਣ੍ਠਿਤ੍ਵਾ ਕਤਾ, ਯਾ ਉਪਰਿ ਪਾਦਮਤ੍ਤਮੇਵ ਪਟਿਚ੍ਛਾਦੇਤਿ, ਨ ਜਙ੍ਘ’’ਨ੍ਤਿ ਅਟ੍ਠਕਥਾਯਂ ਦਸ੍ਸਿਤਾਵ. ਤੂਲਪੁਣ੍ਣਾਤਿ ਤੂਲਪਿਚੁਨਾ ਪੂਰੇਤ੍ਵਾ ਕਤਾ.

ਸਬ੍ਬਾਵ ¶ ਨੀਲਾ ਸਬ੍ਬਨੀਲਾ, ਸਾ ਆਦਿ ਯਾਸਂ ਤਾ ਸਬ੍ਬਨੀਲਾਦਯੋ. ਆਦਿ-ਸਦ੍ਦੇਨ ਮਹਾਨਾਮਰਤ੍ਤਪਰਿਯਨ੍ਤਾਨਂ ਗਹਣਂ. ਏਤਾਸਂ ਸਰੂਪਂ ਅਟ੍ਠਕਥਾਯਮੇਵ ਵੁਤ੍ਤਂ ‘‘ਨੀਲਿਕਾ ਉਮਾਪੁਪ੍ਫਵਣ੍ਣਾ ਹੋਤਿ, ਪੀਤਿਕਾ ਕਣਿਕਾਰਪੁਪ੍ਫਵਣ੍ਣਾ, ਲੋਹਿਤਿਕਾ ਜਯਸੁਮਨਪੁਪ੍ਫਵਣ੍ਣਾ, ਮਞ੍ਜਿਟ੍ਠਿਕਾ ਮਞ੍ਜਿਟ੍ਠਵਣ੍ਣਾ ਏਵ, ਕਣ੍ਹਾ ਅਦ੍ਦਾਰਿਟ੍ਠਕਵਣ੍ਣਾ, ਮਹਾਰਙ੍ਗਰਤ੍ਤਾ ਸਤਪਦਿਪਿਟ੍ਠਿਵਣ੍ਣਾ, ਮਹਾਨਾਮਰਤ੍ਤਾ ਸਮ੍ਭਿਨ੍ਨਵਣ੍ਣਾ ਹੋਤਿ ਪਣ੍ਡੁਪਲਾਸਵਣ੍ਣਾ. ਕੁਰੁਨ੍ਦਿਯਂ ਪਨ ‘ਪਦੁਮਪੁਪ੍ਫਵਣ੍ਣਾ’ਤਿ ਵੁਤ੍ਤ’’ਨ੍ਤਿ (ਮਹਾਵ. ਅਟ੍ਠ. ੨੪੬). ਸਬ੍ਬਨੀਲਾਦਯੋਪਿ ਚਾਤਿ ਅਪਿ-ਸਦ੍ਦੇਨ ਨੀਲਾਦਿਵਦ੍ਧਿਕਾਨਂ ਗਹਣਂ.

੨੬੫੪. ਚਿਤ੍ਰਾਤਿ ਵਿਚਿਤ੍ਰਾ. ਮੇਣ੍ਡਵਿਸਾਣੂਪਮਵਦ੍ਧਿਕਾਤਿ ਮੇਣ੍ਡਾਨਂ ਵਿਸਾਣਸਦਿਸਵਦ੍ਧਿਕਾ, ਕਣ੍ਣਿਕਟ੍ਠਾਨੇ ਮੇਣ੍ਡਸਿਙ੍ਗਸਣ੍ਠਾਨੇ ਵਦ੍ਧੇ ਯੋਜੇਤ੍ਵਾ ਕਤਾਤਿ ਅਤ੍ਥੋ. ‘‘ਮੇਣ੍ਡਵਿਸਾਣੂਪਮਵਦ੍ਧਿਕਾ’’ਤਿ ਇਦਂ ਅਜਵਿਸਾਣੂਪਮਵਦ੍ਧਿਕਾਨਂ ਉਪਲਕ੍ਖਣਂ. ਮੋਰਸ੍ਸ ਪਿਞ੍ਛੇਨ ਪਰਿਸਿਬ੍ਬਿਤਾਤਿ ਤਲੇਸੁ ਵਾ ਵਦ੍ਧੇਸੁ ਵਾ ਮੋਰਪਿਞ੍ਛੇਹਿ ਸੁਤ੍ਤਕਸਦਿਸੇਹਿ ਪਰਿਸਿਬ੍ਬਿਤਾ. ਉਪਾਹਨਾ ਨ ਚ ਵਟ੍ਟਨ੍ਤੀਤਿ ਯੋਜਨਾ.

੨੬੫੫. ਮਜ੍ਜਾਰਾਤਿ ਬਿਲ਼ਾਰਾ. ਕਾਲ਼ਕਾ ਰੁਕ੍ਖਕਣ੍ਟਕਾ. ਊਲੂਕਾ ਪਕ੍ਖਿਬਿਲ਼ਾਲਾ. ਸੀਹਾਤਿ ਕੇਸਰਸੀਹਾਦਯੋ ਸੀਹਾ. ਉਦ੍ਦਾਤਿ ਚਤੁਪ੍ਪਦਜਾਤਿਕਾ. ਦੀਪੀ ਸਦ੍ਦਲਾ. ਅਜਿਨਸ੍ਸਾਤਿ ਏਵਂਨਾਮਿਕਸ੍ਸ. ਪਰਿਕ੍ਖਟਾਤਿ ਉਪਾਹਨਪਰਿਯਨ੍ਤੇ ਚੀਵਰੇ ਅਨੁਵਾਤਂ ਵਿਯ ਵੁਤ੍ਤਪ੍ਪਕਾਰਂ ਚਮ੍ਮਂ ਯੋਜੇਤ੍ਵਾ ਕਤਾ.

੨੬੫੬. ਸਚੇ ਈਦਿਸਾ ਉਪਾਹਨਾ ਲਭਨ੍ਤਿ, ਤਾਸਂ ਵਲ਼ਞ੍ਜਨਪ੍ਪਕਾਰਂ ਦਸ੍ਸੇਤੁਮਾਹ ‘‘ਪੁਟਾਦਿਂ ਅਪਨੇਤ੍ਵਾ’’ਤਿਆਦਿ. ਪੁਟਾਦਿਂ ਸਬ੍ਬਸੋ ਛਿਨ੍ਦਿਤ੍ਵਾ ਵਾ ਅਪਨੇਤ੍ਵਾ ਵਾ ਉਪਾਹਨਾ ਧਾਰੇਤਬ੍ਬਾਤਿ ਯੋਜਨਾ. ਏਵਮਕਤ੍ਵਾ ਲਦ੍ਧਨੀਹਾਰੇਨੇਵ ਧਾਰੇਨ੍ਤਸ੍ਸ ਦੁਕ੍ਕਟਂ. ਯਥਾਹ – ‘‘ਏਤਾਸੁ ਯਂ ਕਿਞ੍ਚਿ ਲਭਿਤ੍ਵਾ ਸਚੇ ¶ ਤਾਨਿ ਖਲ੍ਲਕਾਦੀਨਿ ਅਪਨੇਤ੍ਵਾ ਸਕ੍ਕਾ ਹੋਨ੍ਤਿ ਵਲ਼ਞ੍ਜਿਤੁਂ, ਵਲ਼ਞ੍ਜੇਤਬ੍ਬਾ, ਤੇਸੁ ਪਨ ਸਤਿ ਵਲ਼ਞ੍ਜਨ੍ਤਸ੍ਸ ਦੁਕ੍ਕਟ’’ਨ੍ਤਿ (ਮਹਾਵ. ਅਟ੍ਠ. ੨੪੬).

ਵਣ੍ਣਭੇਦਂ ¶ ਤਥਾ ਕਤ੍ਵਾਤਿ ਏਤ੍ਥ ‘‘ਏਕਦੇਸੇਨਾ’’ਤਿ ਸੇਸੋ. ‘‘ਸਬ੍ਬਸੋ ਵਾ’’ਤਿ ਆਹਰਿਤ੍ਵਾ ਸਬ੍ਬਸੋ ਵਾ ਏਕਦੇਸੇਨ ਵਾ ਵਣ੍ਣਭੇਦਂ ਕਤ੍ਵਾ ਸਬ੍ਬਨੀਲਾਦਯੋ ਉਪਾਹਨਾ ਧਾਰੇਤਬ੍ਬਾਤਿ ਯੋਜਨਾ. ਤਥਾ ਅਕਤ੍ਵਾ ਧਾਰੇਨ੍ਤਸ੍ਸ ਦੁਕ੍ਕਟਂ. ਯਥਾਹ ‘‘ਏਤਾਸੁ ਯਂ ਕਿਞ੍ਚਿ ਲਭਿਤ੍ਵਾ ਰਜਨਂ ਚੋਲ਼ਕੇਨ ਪੁਞ੍ਛਿਤ੍ਵਾ ਵਣ੍ਣਂ ਭਿਨ੍ਦਿਤ੍ਵਾ ਧਾਰੇਤੁਂ ਵਟ੍ਟਤਿ. ਅਪ੍ਪਮਤ੍ਤਕੇਪਿ ਭਿਨ੍ਨੇ ਵਟ੍ਟਤਿਯੇਵਾ’’ਤਿ. ਨੀਲਵਦ੍ਧਿਕਾਦਯੋਪਿ ਵਣ੍ਣਭੇਦਂ ਕਤ੍ਵਾ ਧਾਰੇਤਬ੍ਬਾ.

੨੬੫੭. ਤਤ੍ਥ ਠਾਨੇ ਪਸ੍ਸਾਵਪਾਦੁਕਾ, ਵਚ੍ਚਪਾਦੁਕਾ, ਆਚਮਨਪਾਦੁਕਾਤਿ ਤਿਸ੍ਸੋ ਪਾਦੁਕਾਯੋ ਠਪੇਤ੍ਵਾ ਸਬ੍ਬਾਪਿ ਪਾਦੁਕਾ ਤਾਲਪਤ੍ਤਿਕਾਦਿਭੇਦਾ ਸਬ੍ਬਾਪਿ ਸਙ੍ਕਮਨੀਯਾ ਪਾਦੁਕਾ ਧਾਰੇਤੁਂ ਨ ਵਟ੍ਟਨ੍ਤੀਤਿ ਯੋਜਨਾ.

੨੬੫੮. ਅਤਿਕ੍ਕਨ੍ਤਪਮਾਣਂ ਉਚ੍ਚਾਸਯਨਸਞ੍ਞਿਤਂ ਆਸਨ੍ਦਿਞ੍ਚੇਵ ਪਲ੍ਲਙ੍ਕਞ੍ਚ ਸੇਵਮਾਨਸ੍ਸ ਦੁਕ੍ਕਟਨ੍ਤਿ ਯੋਜਨਾ. ਆਸਨ੍ਦੀ ਵੁਤ੍ਤਲਕ੍ਖਣਾਵ. ਪਲ੍ਲਙ੍ਕੋਤਿ ਪਾਦੇਸੁ ਆਹਰਿਮਾਨਿ ਵਾਲ਼ਰੂਪਾਨਿ ਠਪੇਤ੍ਵਾ ਕਤੋ, ਏਕਸ੍ਮਿਂਯੇਵ ਦਾਰੁਮ੍ਹਿ ਕਟ੍ਠਕਮ੍ਮਵਸੇਨ ਛਿਨ੍ਦਿਤ੍ਵਾ ਕਤਾਨਿ ਅਸਂਹਾਰਿਮਾਨਿ ਤਤ੍ਰਟ੍ਠਾਨੇਵ ਵਾਲ਼ਰੂਪਾਨਿ ਯਸ੍ਸ ਪਾਦੇਸੁ ਸਨ੍ਤਿ, ਏਵਰੂਪੋ ਪਲ੍ਲਙ੍ਕੋ ਕਪ੍ਪਤੀਤਿ ‘‘ਆਹਰਿਮੇਨਾ’’ਤਿ ਇਮਿਨਾਵ ਦੀਪਿਤਂ. ‘‘ਅਕਪ੍ਪਿਯਰੂਪਕਤੋ ਅਕਪ੍ਪਿਯਮਞ੍ਚੋ ਪਲ੍ਲਙ੍ਕੋ’’ਤਿ ਹਿ ਸਾਰਸਮਾਸੇ ਵੁਤ੍ਤਂ.

੨੬੫੯. ਗੋਨਕਨ੍ਤਿ ਦੀਘਲੋਮਕਮਹਾਕੋਜਵਂ. ਚਤੁਰਙ੍ਗੁਲਾਧਿਕਾਨਿ ਕਿਰ ਤਸ੍ਸ ਲੋਮਾਨਿ, ਕਾਲ਼ਵਣ੍ਣਞ੍ਚ ਹੋਤਿ. ‘‘ਚਤੁਰਙ੍ਗੁਲਤੋ ਊਨਕਪ੍ਪਮਾਣਲੋਮੋ ਕੋਜਵੋ ਵਟ੍ਟਤੀ’’ਤਿ ਵਦਨ੍ਤਿ. ਕੁਤ੍ਤਕਨ੍ਤਿ ਸੋਲ਼ਸਨ੍ਨਂ ਨਾਟਕਿਤ੍ਥੀਨਂ ਠਤ੍ਵਾ ਨਚ੍ਚਨਯੋਗ੍ਗਂ ¶ ਉਣ੍ਣਾਮਯਤ੍ਥਰਣਂ. ਚਿਤ੍ਤਨ੍ਤਿ ਭਿਤ੍ਤਿਚ੍ਛਿਦ੍ਦਾਦਿਕਵਿਚਿਤ੍ਰਂ ਉਣ੍ਣਾਮਯਤ੍ਥਰਣਂ. ਪਟਿਕਨ੍ਤਿ ਉਣ੍ਣਾਮਯਂ ਸੇਤਤ੍ਥਰਣਂ. ਪਟਲਿਕਨ੍ਤਿ ਘਨਪੁਪ੍ਫਕਂ ਉਣ੍ਣਾਮਯਂ ਲੋਹਿਤਤ੍ਥਰਣਂ, ਯੋ ‘‘ਆਮਲਕਪਤ੍ਤੋ’’ਤਿਪਿ ਵੁਚ੍ਚਤਿ.

ਏਕਨ੍ਤਲੋਮਿਨ੍ਤਿ ਉਭਤੋ ਉਗ੍ਗਤਲੋਮਂ ਉਣ੍ਣਾਮਯਤ੍ਥਰਣਂ. ਵਿਕਤਿਨ੍ਤਿ ਸੀਹਬ੍ਯਗ੍ਘਾਦਿਰੂਪਵਿਚਿਤ੍ਰਂ ਉਣ੍ਣਾਮਯਤ੍ਥਰਣਂ. ‘‘ਏਕਨ੍ਤਲੋਮੀਤਿ ਏਕਤੋਦਸਂ ਉਣ੍ਣਾਮਯਤ੍ਥਰਣ’’ਨ੍ਤਿ ਦੀਘਨਿਕਾ. ਤੂਲਿਕਨ੍ਤਿ ਰੁਕ੍ਖਤੂਲਲਤਾਤੂਲਪੋਟਕਿਤੂਲਸਙ੍ਖਾਤਾਨਂ ਤਿਣ੍ਣਂ ਤੂਲਾਨਂ ਅਞ੍ਞਤਰਪੁਣ੍ਣਂ ਪਕਤਿਤੂਲਿਕਂ. ਉਦ੍ਦਲੋਮਿਕਨ੍ਤਿ ਏਕਤੋ ਉਗ੍ਗਤਲੋਮਂ ਉਣ੍ਣਾਮਯਤ੍ਥਰਣਂ. ‘‘ਉਦ੍ਦਲੋਮੀਤਿ ਉਭਤੋਦਸਂ ਉਣ੍ਣਾਮਯਤ੍ਥਰਣਂ. ਏਕਨ੍ਤਲੋਮੀਤਿ ਏਕਤੋਦਸਂ ਉਣ੍ਣਾਮਯਤ੍ਥਰਣ’’ਨ੍ਤਿ (ਦੀ. ਨਿ. ਅਟ੍ਠ. ੧.੧੫) ਦੀਘਨਿਕਾਯਟ੍ਠਕਥਾਯਂ ¶ ਵੁਤ੍ਤਂ. ਸਾਰਸਮਾਸੇ ਪਨ ‘‘ਉਦ੍ਦਲੋਮੀਤਿ ਏਕਤੋ ਉਗ੍ਗਤਪੁਪ੍ਫਂ. ਏਕਨ੍ਤਲੋਮੀਤਿ ਉਭਤੋ ਉਗ੍ਗਤਪੁਪ੍ਫ’’ਨ੍ਤਿ ਵੁਤ੍ਤਂ.

੨੬੬੦. ਕਟ੍ਟਿਸ੍ਸਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸੇਯ੍ਯਕਟ੍ਟਿਸ੍ਸਮਯਂ ਪਚ੍ਚਤ੍ਥਰਣਂ. ‘‘ਕੋਸੇਯ੍ਯਕਟ੍ਟਿਸ੍ਸਮਯਨ੍ਤਿ ਕੋਸੇਯ੍ਯਕਸਟਮਯ’’ਨ੍ਤਿ (ਦੀ. ਨਿ. ਟੀ. ੧.੧੫) ਆਚਰਿਯਧਮ੍ਮਪਾਲਤ੍ਥੇਰੇਨ ਵੁਤ੍ਤਂ, ਕਨ੍ਤਿਤਕੋਸੇਯ੍ਯਪੁਟਮਯਨ੍ਤਿ ਅਤ੍ਥੋ. ਕੋਸੇਯ੍ਯਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸਿਯਸੁਤ੍ਤਮਯਂ ਪਚ੍ਚਤ੍ਥਰਣਂ. ਰਤਨਪਰਿਸਿਬ੍ਬਨਰਹਿਤਂ ਸੁਦ੍ਧਕੋਸੇਯ੍ਯਂ ਪਨ ਵਟ੍ਟਤਿ.

ਦੀਘਨਿਕਾਯਟ੍ਠਕਥਾਯਂ ਪਨੇਤ੍ਥ ‘‘ਠਪੇਤ੍ਵਾ ਤੂਲਿਕਂ ਸਬ੍ਬਾਨੇਵ ਗੋਨਕਾਦੀਨਿ ਰਤਨਪਰਿਸਿਬ੍ਬਿਤਾਨਿ ਨ ਵਟ੍ਟਨ੍ਤੀ’’ਤਿ (ਦੀ. ਨਿ. ਅਟ੍ਠ. ੧.੧੫) ਵੁਤ੍ਤਂ. ਤਤ੍ਥ ‘‘ਠਪੇਤ੍ਵਾ ਤੂਲਿਕ’’ਨ੍ਤਿ ਏਤੇਨ ਰਤਨਪਰਿਸਿਬ੍ਬਨਰਹਿਤਾਪਿ ਤੂਲਿਕਾ ਨ ਵਟ੍ਟਤੀਤਿ ਦੀਪੇਤਿ. ‘‘ਰਤਨਪਰਿਸਿਬ੍ਬਿਤਾਨਿ ਨ ਵਟ੍ਟਨ੍ਤੀ’’ਤਿ ਇਮਿਨਾ ਪਨ ਯਾਨਿ ਰਤਨਪਰਿਸਿਬ੍ਬਿਤਾਨਿ, ਤਾਨਿ ਭੂਮਤ੍ਥਰਣਵਸੇਨ ਯਥਾਨੁਰੂਪਂ ਮਞ੍ਚਾਦੀਸੁ ਚ ਉਪਨੇਤੁਂ ਵਟ੍ਟਤੀਤਿ ਦੀਪਿਤਨ੍ਤਿ ¶ ਵੇਦਿਤਬ੍ਬਂ. ਏਤ੍ਥ ਚ ਵਿਨਯਪਰਿਯਾਯਂ ਪਤ੍ਵਾ ਗਰੁਕੇ ਠਾਤਬ੍ਬਤ੍ਤਾ ਇਧ ਵੁਤ੍ਤਨਯੇਨੇਵੇਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋ. ਸੁਤ੍ਤਨ੍ਤਿਕਦੇਸਨਾਯਂ ਪਨ ਗਹਟ੍ਠਾਨਮ੍ਪਿ ਵਸੇਨ ਵੁਤ੍ਤਤ੍ਤਾ ਨੇਸਂ ਸਙ੍ਗਣ੍ਹਨਤ੍ਥਂ ‘‘ਠਪੇਤ੍ਵਾ ਤੂਲਿਕਂ…ਪੇ… ਵਟ੍ਟਨ੍ਤੀਤਿ ਵੁਤ੍ਤ’’ਨ੍ਤਿ (ਦੀ. ਨਿ. ਅਟ੍ਠ. ੧.੧੫) ਅਪਰੇ.

ਹਤ੍ਥਿਅਸ੍ਸਰਥਤ੍ਥਰਨ੍ਤਿ ਹਤ੍ਥਿਪਿਟ੍ਠੇ ਅਤ੍ਥਰਿਤਂ ਅਤ੍ਥਰਣਂ ਹਤ੍ਥਤ੍ਥਰਣਂ ਨਾਮ. ਅਸ੍ਸਰਥਤ੍ਥਰੇਪਿ ਏਸੇਵ ਨਯੋ. ਕਦਲਿਮਿਗਪਵਰ-ਪਚ੍ਚਤ੍ਥਰਣਕਮ੍ਪਿ ਚਾਤਿ ਕਦਲਿਮਿਗਚਮ੍ਮਂ ਨਾਮ ਅਤ੍ਥਿ, ਤੇਨ ਕਤਂ ਪਵਰਪਚ੍ਚਤ੍ਥਰਣਨ੍ਤਿ ਅਤ੍ਥੋ. ਤਂ ਕਿਰ ਸੇਤਵਤ੍ਥਸ੍ਸ ਉਪਰਿ ਕਦਲਿਮਿਗਚਮ੍ਮਂ ਪਤ੍ਥਰਿਤ੍ਵਾ ਸਿਬ੍ਬੇਤ੍ਵਾ ਕਰੋਨ੍ਤਿ. ਪਿ-ਸਦ੍ਦੇਨ ਅਜਿਨਪ੍ਪਵੇਣੀ ਗਹਿਤਾ. ਅਜਿਨਪ੍ਪਵੇਣੀ ਨਾਮ ਅਜਿਨਚਮ੍ਮੇਹਿ ਮਞ੍ਚਪਮਾਣੇਨ ਸਿਬ੍ਬੇਤ੍ਵਾ ਕਤਾ ਪਵੇਣੀ. ਤਾਨਿ ਕਿਰ ਚਮ੍ਮਾਨਿ ਸੁਖੁਮਤਰਾਨਿ, ਤਸ੍ਮਾ ਦੁਪਟ੍ਟਤਿਪਟ੍ਟਾਨਿ ਕਤ੍ਵਾ ਸਿਬ੍ਬਨ੍ਤਿ. ਤੇਨ ਵੁਤ੍ਤਂ ‘‘ਅਜਿਨਪ੍ਪਵੇਣੀ’’ਤਿ.

੨੬੬੧. ਰਤ੍ਤਵਿਤਾਨਸ੍ਸ ਹੇਟ੍ਠਾਤਿ ਕੁਸੁਮ੍ਭਾਦਿਰਤ੍ਤਸ੍ਸ ਲੋਹਿਤਵਿਤਾਨਸ੍ਸ ਹੇਟ੍ਠਾ ਕਪ੍ਪਿਯਪਚ੍ਚਤ੍ਥਰਣੇਹਿ ਅਤ੍ਥਤਂ ਸਯਨਾਸਨਞ੍ਚ. ਕਸਾਵਰਤ੍ਤਵਿਤਾਨਸ੍ਸ ਪਨ ਹੇਟ੍ਠਾ ਕਪ੍ਪਿਯਪਚ੍ਚਤ੍ਥਰਣੇਨ ਅਤ੍ਥਤਂ ਵਟ੍ਟਤਿ. ਤੇਨੇਵ ਵਕ੍ਖਤਿ ‘‘ਹੇਟ੍ਠਾ ਅਕਪ੍ਪਿਯੇ’’ਤਿਆਦਿ.

ਦ੍ਵਿਧਾ ¶ ਰਤ੍ਤੂਪਧਾਨਕਨ੍ਤਿ ਸੀਸਪਸ੍ਸੇ, ਪਾਦਪਸ੍ਸੇ ਚਾਤਿ ਉਭਤੋਪਸ੍ਸੇ ਪਞ੍ਞਤ੍ਤਰਤ੍ਤਬਿਬ੍ਬੋਹਨਵਨ੍ਤਞ੍ਚ ਸਯਨਾਸਨਂ. ਇਦਂ ਸਬ੍ਬਂ ਅਕਪ੍ਪਿਯਂ ਪਰਿਭੁਞ੍ਜਤੋ ਦੁਕ੍ਕਟਂ ਹੋਤਿ. ‘‘ਯਂ ਪਨ ਏਕਮੇਵ ਉਪਧਾਨਂ ਉਭੋਸੁ ਪਸ੍ਸੇਸੁ ਰਤ੍ਤਂ ਵਾ ਹੋਤਿ ਪਦੁਮਵਣ੍ਣਂ ਵਾ ਵਿਚਿਤ੍ਰਂ ਵਾ, ਸਚੇ ਪਮਾਣਯੁਤ੍ਤਂ, ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੫੪) ਅਟ੍ਠਕਥਾਵਿਨਿਚ੍ਛਯੋ ਏਤੇਨੇਵ ਬ੍ਯਤਿਰੇਕਤੋ ਵੁਤ੍ਤੋ ਹੋਤਿ. ‘‘ਯੇਭੁਯ੍ਯਰਤ੍ਤਾਨਿਪਿ ਦ੍ਵੇ ਬਿਬ੍ਬੋਹਨਾਨਿ ਨ ਵਟ੍ਟਨ੍ਤੀ’’ਤਿ ਗਣ੍ਠਿਪਦੇ ਵੁਤ੍ਤਂ. ਤੇਨੇਵ ਯੇਭੁਯ੍ਯੇਨ ਰਤ੍ਤਵਿਤਾਨਮ੍ਪਿ ਨ ਵਟ੍ਟਤੀਤਿ ਵਿਞ੍ਞਾਯਤਿ.

ਏਤ੍ਥ ¶ ਚ ਕਿਞ੍ਚਾਪਿ ਦੀਘਨਿਕਾਯਟ੍ਠਕਥਾਯਂ ‘‘ਅਲੋਹਿਤਕਾਨਿ ਦ੍ਵੇਪਿ ਵਟ੍ਟਨ੍ਤਿਯੇਵ, ਤਤੋ ਉਤ੍ਤਰਿ ਲਭਿਤ੍ਵਾ ਅਞ੍ਞੇਸਂ ਦਾਤਬ੍ਬਾਨਿ, ਦਾਤੁਂ ਅਸਕ੍ਕੋਨ੍ਤੋ ਮਞ੍ਚੇ ਤਿਰਿਯਂ ਅਤ੍ਥਰਿਤ੍ਵਾ ਉਪਰਿ ਪਚ੍ਚਤ੍ਥਰਣਂ ਦਤ੍ਵਾ ਨਿਪਜ੍ਜਿਤੁਮ੍ਪਿ ਲਭਤੀ’’ਤਿ (ਦੀ. ਨਿ. ਅਟ੍ਠ. ੧.੧੫) ਅਵਿਸੇਸੇਨ ਵੁਤ੍ਤਂ. ਸੇਨਾਸਨਕ੍ਖਨ੍ਧਕਸਂਵਣ੍ਣਨਾਯਂ ਪਨ ‘‘ਅਗਿਲਾਨਸ੍ਸ ਸੀਸੂਪਧਾਨਞ੍ਚ ਪਾਦੂਪਧਾਨਞ੍ਚਾਤਿ ਦ੍ਵਯਮੇਵ ਵਟ੍ਟਤਿ, ਗਿਲਾਨਸ੍ਸ ਬਿਬ੍ਬੋਹਨਾਨਿ ਸਨ੍ਥਰਿਤ੍ਵਾ ਉਪਰਿ ਪਚ੍ਚਤ੍ਥਰਣਂ ਦਤ੍ਵਾ ਨਿਪਜ੍ਜਿਤੁਮ੍ਪਿ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੨੯੭) ਵੁਤ੍ਤਤ੍ਤਾ ਗਿਲਾਨੋਯੇਵ ਮਞ੍ਚੇ ਤਿਰਿਯਂ ਅਤ੍ਥਰਿਤ੍ਵਾ ਨਿਪਜ੍ਜਿਤੁਂ ਲਭਤੀਤਿ ਵੇਦਿਤਬ੍ਬਂ.

੨੬੬੨. ਉਦ੍ਧਂ ਸੇਤਵਿਤਾਨਮ੍ਪਿ ਹੇਟ੍ਠਾ ਅਕਪ੍ਪਿਯੇ ਪਚ੍ਚਤ੍ਥਰਣੇ ਸਤਿ ਨ ਵਟ੍ਟਤੀਤਿ ਯੋਜਨਾ. ਤਸ੍ਮਿਨ੍ਤਿ ਅਕਪ੍ਪਿਯਪਚ੍ਚਤ੍ਥਰਣੇ.

੨੬੬੩. ‘‘ਠਪੇਤ੍ਵਾ’’ਤਿ ਇਮਿਨਾ ਆਸਨ੍ਦਾਦਿਤ੍ਤਯਸ੍ਸ ਵਟ੍ਟਨਾਕਾਰੋ ਨਤ੍ਥੀਤਿ ਦੀਪੇਤਿ. ਸੇਸਂ ਸਬ੍ਬਨ੍ਤਿ ਗੋਨਕਾਦਿ ਦ੍ਵਿਧਾਰਤ੍ਤੂਪਧਾਨਕਪਰਿਯਨ੍ਤਂ ਸਬ੍ਬਂ. ਗਿਹਿਸਨ੍ਤਕਨ੍ਤਿ ਗਿਹੀਨਂ ਸਨ੍ਤਕਂ ਤੇਹਿਯੇਵ ਪਞ੍ਞਤ੍ਤਂ, ਇਮਿਨਾ ਪਞ੍ਚਸੁ ਸਹਧਮ੍ਮਿਕੇਸੁ ਅਞ੍ਞਤਰੇਨ ਵਾ ਤੇਸਂ ਆਣਤ੍ਤਿਯਾ ਵਾ ਪਞ੍ਞਤ੍ਤਂ ਨ ਵਟ੍ਟਤੀਤਿ ਦੀਪੇਤਿ. ਲਭਤੇਤਿ ਨਿਸੀਦਿਤੁਂ ਲਭਤਿ.

੨੬੬੪. ਤਂ ਕਤ੍ਥ ਲਭਤੀਤਿ ਪਦੇਸਨਿਯਮਂ ਦਸ੍ਸੇਤੁਮਾਹ ‘‘ਧਮ੍ਮਾਸਨੇ’’ਤਿਆਦਿ. ਧਮ੍ਮਾਸਨੇਤਿ ਏਤ੍ਥ ਅਟ੍ਠਕਥਾਯਂ ‘‘ਯਦਿ ਧਮ੍ਮਾਸਨੇ ਸਙ੍ਘਿਕਮ੍ਪਿ ਗੋਨਕਾਦਿਂ ਭਿਕ੍ਖੂਹਿ ਅਨਾਣਤ੍ਤਾ ਆਰਾਮਿਕਾਦਯੋ ਸਯਮੇਵ ਪਞ੍ਞਾਪੇਨ੍ਤਿ ਚੇਵ ਨੀਹਰਨ੍ਤਿ ਚ, ਏਤਂ ਗਿਹਿਵਿਕਤਨੀਹਾਰਂ ਨਾਮ. ਇਮਿਨਾ ਗਿਹਿਵਿਕਤਨੀਹਾਰੇਨ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੩੨੦; ਵਿ. ਸਙ੍ਗ. ਅਟ੍ਠ. ਪਕਿਣ੍ਣਕਵਿਨਿਚ੍ਛਯਕਥਾ ੫੬ ਅਤ੍ਥਤੋ ਸਮਾਨਂ) ਵੁਤ੍ਤਂ. ਭਤ੍ਤਗ੍ਗੇ ਵਾਤਿ ਵਿਹਾਰੇ ਨਿਸੀਦਾਪੇਤ੍ਵਾ ਪਰਿਵੇਸਨਟ੍ਠਾਨੇ ¶ ਵਾ ਭੋਜਨਸਾਲਾਯਂ ਵਾ. ਅਪਿਸਦ੍ਦੇਨ ਗਿਹੀਨਂ ਗੇਹੇਪਿ ਤੇਹਿ ਪਞ੍ਞਤ੍ਤੇ ਗੋਨਕਾਦਿਮ੍ਹਿ ਨਿਸੀਦਿਤੁਂ ¶ ਅਨਾਪਤ੍ਤੀਤਿ ਦੀਪੇਤਿ. ਧਮ੍ਮਾਸਨਾਦਿਪਦੇਸਨਿਯਮਨੇਨ ਤਤੋ ਅਞ੍ਞਤ੍ਥ ਗਿਹਿਪਞ੍ਞਤ੍ਤੇਪਿ ਤਤ੍ਥ ਨਿਸੀਦਿਤੁਂ ਨ ਵਟ੍ਟਤੀਤਿ ਬ੍ਯਤਿਰੇਕਤੋ ਵਿਞ੍ਞਾਯਤਿ.

ਭੂਮਤ੍ਥਰਣਕੇਤਿ ਏਤ੍ਥ ‘‘ਕਤੇ’’ਤਿ ਸੇਸੋ. ਤਤ੍ਥਾਤਿ ਸਙ੍ਘਿਕੇ ਵਾ ਗਿਹਿਸਨ੍ਤਕੇ ਵਾ ਗੋਨਕਾਦਿਮ੍ਹਿ ਸਹਧਮ੍ਮਿਕੇਹਿ ਅਨਾਣਤ੍ਤੇਹਿ ਗਿਹੀਹਿ ਏਵ ਭੂਮਤ੍ਥਰਣੇ ਕਤੇ. ਸਯਿਤੁਨ੍ਤਿ ਉਪਰਿ ਅਤ੍ਤਨੋ ਪਚ੍ਚਤ੍ਥਰਣਂ ਦਤ੍ਵਾ ਨਿਪਜ੍ਜਿਤੁਂ ਵਟ੍ਟਤਿ. ਅਪਿ-ਸਦ੍ਦੇਨ ਨਿਸੀਦਿਤੁਮ੍ਪਿ ਵਾਤਿ ਸਮੁਚ੍ਚਿਨੋਤਿ. ‘‘ਭੂਮਤ੍ਥਰਣਕੇ’’ਤਿ ਇਮਿਨਾ ਗਿਹੀਹਿ ਏਵ ਮਞ੍ਚਾਦੀਸੁ ਸਯਨਤ੍ਥਂ ਅਤ੍ਥਤੇ ਉਪਰਿ ਅਤ੍ਤਨੋ ਪਚ੍ਚਤ੍ਥਰਣਂ ਦਤ੍ਵਾ ਸਯਿਤੁਂ ਵਾ ਨਿਸੀਦਿਤੁਂ ਵਾ ਨ ਵਟ੍ਟਤੀਤਿ ਦੀਪੇਤਿ.

ਚਮ੍ਮਕ੍ਖਨ੍ਧਕਕਥਾਵਣ੍ਣਨਾ.

ਭੇਸਜ੍ਜਕ੍ਖਨ੍ਧਕਕਥਾਵਣ੍ਣਨਾ

੨੬੬੫. ਗਹਪਤਿਸ੍ਸ ਭੂਮਿ, ਸਮ੍ਮੁਤਿਭੂਮਿ, ਉਸ੍ਸਾਵਨਨ੍ਤਿਕਾਭੂਮਿ, ਗੋਨਿਸਾਦਿਭੂਮੀਤਿ ਕਪ੍ਪਿਯਭੂਮਿਯੋ ਚਤਸ੍ਸੋ ਹੋਨ੍ਤੀਤਿ ਵੁਤ੍ਤਾ ਭਗਵਤਾਤਿ ਯੋਜਨਾ.

੨੬੬੬. ਕਥਂ ਕਪ੍ਪਿਯਂ ਕਤ੍ਤਬ੍ਬਨ੍ਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਚਤਸ੍ਸੋ ਕਪ੍ਪਿਯਭੂਮਿਯੋ ਉਸ੍ਸਾਵਨਨ੍ਤਿਕਂ ਗੋਨਿਸਾਦਿਕਂ ਗਹਪਤਿਂ ਸਮ੍ਮੁਤਿ’’ਨ੍ਤਿ (ਮਹਾਵ. ੨੯੫) ਏਵਂ ਚਤਸ੍ਸੋ ਭੂਮਿਯੋ ਉਦ੍ਧਰਿਤ੍ਵਾ ਤਾਸਂ ਸਾਮਞ੍ਞਲਕ੍ਖਣਂ ਦਸ੍ਸੇਤੁਮਾਹ ‘‘ਸਙ੍ਘਸ੍ਸਾ’’ਤਿਆਦਿ. ਸਙ੍ਘਸ੍ਸ ਸਨ੍ਤਕਂ ਵਾਸਤ੍ਥਾਯ ਕਤਂ ਗੇਹਂ ਵਾ ਭਿਕ੍ਖੁਨੋ ਸਨ੍ਤਕਂ ਵਾਸਤ੍ਥਾਯ ਕਤਂ ਗੇਹਂ ਵਾਤਿ ਯੋਜਨਾ. ਕਪ੍ਪਿਯਂ ਕਤ੍ਤਬ੍ਬਨ੍ਤਿ ਕਪ੍ਪਿਯਟ੍ਠਾਨਂ ਕਤ੍ਤਬ੍ਬਂ. ਸਹਸੇਯ੍ਯਪ੍ਪਹੋਨਕਨ੍ਤਿ ਸਬ੍ਬਚ੍ਛਨ੍ਨਪਰਿਚ੍ਛਨ੍ਨਾਦਿਲਕ੍ਖਣੇਨ ਸਹਸੇਯ੍ਯਾਰਹਂ.

੨੬੬੭. ਇਦਾਨਿ ¶ ਚਤਸ੍ਸੋਪਿ ਭੂਮਿਯੋ ਸਰੂਪਤੋ ਦਸ੍ਸੇਤੁਮਾਹ ‘‘ਠਪੇਤ੍ਵਾ’’ਤਿਆਦਿ. ਭਿਕ੍ਖੁਂ ਠਪੇਤ੍ਵਾ ਅਞ੍ਞੇਹਿ ਕਪ੍ਪਿਯਭੂਮਿਯਾ ਅਤ੍ਥਾਯ ਦਿਨ੍ਨਂ ਵਾ ਤੇਸਂ ਸਨ੍ਤਕਂ ਵਾ ਯਂ ਗੇਹਂ, ਇਦਂ ਏਵ ਗਹਪਤਿਭੂਮਿ ਨਾਮਾਤਿ ਯੋਜਨਾ.

੨੬੬੮. ਯਾ ਪਨ ਕੁਟਿ ਸਙ੍ਘੇਨ ਸਮ੍ਮਤਾ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ, ਸਾ ਸਮ੍ਮੁਤਿਕਾ ਨਾਮ. ਤਸ੍ਸਾ ਸਮ੍ਮਨ੍ਨਨਕਾਲੇ ਕਮ੍ਮਵਾਚਂ ਅਵਤ੍ਵਾ ਅਪਲੋਕਨਂ ਵਾ ਕਾਤੁਂ ਵਟ੍ਟਤੇਵਾਤਿ ਯੋਜਨਾ.

੨੬੬੯-੭੦. ਪਠਮਇਟ੍ਠਕਾਯ ¶ ਵਾ ਪਠਮਪਾਸਾਣਸ੍ਸ ਵਾ ਪਠਮਤ੍ਥਮ੍ਭਸ੍ਸ ਵਾ ਆਦਿ-ਗ੍ਗਹਣੇਨ ਪਠਮਭਿਤ੍ਤਿਪਾਦਸ੍ਸ ਵਾ ਠਪਨੇ ਪਰੇਸੁ ਮਨੁਸ੍ਸੇਸੁ ਉਕ੍ਖਿਪਿਤ੍ਵਾ ਠਪੇਨ੍ਤੇਸੁ ਸਮਨ੍ਤਤੋ ਪਰਿਵਾਰੇਤ੍ਵਾ ‘‘ਕਪ੍ਪਿਯਕੁਟਿਂ ਕਰੋਮ, ਕਪ੍ਪਿਯਕੁਟਿਂ ਕਰੋਮਾ’’ਤਿ ਅਭਿਕ੍ਖਣਂ ਵਦਨ੍ਤੇਹਿ ਆਮਸਿਤ੍ਵਾ ਵਾ ਸਯਮੇਵ ਉਕ੍ਖਿਪਿਤ੍ਵਾ ਵਾ ਇਟ੍ਠਕਾ ਠਪੇਯ੍ਯ ਪਾਸਾਣੋ ਵਾ ਥਮ੍ਭੋ ਵਾ ਭਿਤ੍ਤਿਪਾਦੋ ਵਾ ਠਪੇਯ੍ਯ ਠਪੇਤਬ੍ਬੋ, ਅਯਂ ਉਸ੍ਸਾਵਨਨ੍ਤਿਕਾ ਕੁਟੀਤਿ ਯੋਜਨਾ.

੨੬੭੧. ਇਟ੍ਠਕਾਦਿਪਤਿਟ੍ਠਾਨਨ੍ਤਿ ਪਠਮਿਟ੍ਠਕਾਦੀਨਂ ਭੂਮਿਯਂ ਪਤਿਟ੍ਠਾਨਂ. ਵਦਤਨ੍ਤਿ ‘‘ਕਪ੍ਪਿਯਕੁਟਿਂ ਕਰੋਮ, ਕਪ੍ਪਿਯਕੁਟਿਂ ਕਰੋਮਾ’’ਤਿ ਵਦਨ੍ਤਾਨਂ. ਸਮਕਾਲਂ ਤੁ ਵਟ੍ਟਤੀਤਿ ਏਕਕਾਲਂ ਵਟ੍ਟਤਿ, ਇਮਿਨਾ ‘‘ਸਚੇ ਹਿ ਅਨਿਟ੍ਠਿਤੇ ਵਚਨੇ ਥਮ੍ਭੋ ਪਤਿਟ੍ਠਾਤਿ, ਅਪ੍ਪਤਿਟ੍ਠਿਤੇ ਵਾ ਤਸ੍ਮਿਂ ਵਚਨਂ ਨਿਟ੍ਠਾਤਿ, ਅਕਤਾ ਹੋਤਿ ਕਪ੍ਪਿਯਕੁਟੀ’’ਤਿ (ਮਹਾਵ. ਅਟ੍ਠ. ੨੯੫) ਅਟ੍ਠਕਥਾਵਿਨਿਚ੍ਛਯੋ ਸੂਚਿਤੋ.

੨੬੭੨. ਆਰਾਮੋ ਸਕਲੋ ਅਪਰਿਕ੍ਖਿਤ੍ਤੋ ਵਾ ਯੇਭੁਯ੍ਯਤੋ ਅਪਰਿਕ੍ਖਿਤ੍ਤੋ ਵਾਤਿ ਦੁਵਿਧੋਪਿ ਵਿਞ੍ਞੂਹਿ ਵਿਨਯਧਰੇਹਿ ¶ ‘‘ਗੋਨਿਸਾਦੀ’’ਤਿ ਵੁਚ੍ਚਤਿ. ਪਵੇਸਨਿਵਾਰਣਾਭਾਵੇਨ ਪਵਿਟ੍ਠਾਨਂ ਗੁਨ੍ਨਂ ਨਿਸਜ੍ਜਾਯੋਗਤੋ ਤਥਾ ਵੁਚ੍ਚਤੀਤਿ ਯੋਜਨਾ.

੨੬੭੩. ਪਯੋਜਨਂ ਦਸ੍ਸੇਤੁਮਾਹ ‘‘ਏਤ੍ਥ ਪਕ੍ਕਞ੍ਚਾ’’ਤਿਆਦਿ. ਆਮਿਸਨ੍ਤਿ ਪੁਰਿਮਕਾਲਿਕਦ੍ਵਯਂ. ‘‘ਆਮਿਸ’’ਨ੍ਤਿ ਇਮਿਨਾ ਨਿਰਾਮਿਸਂ ਇਤਰਕਾਲਿਕਦ੍ਵਯਂ ਅਕਪ੍ਪਿਯਕੁਟਿਯਂ ਵੁਤ੍ਥਮ੍ਪਿ ਪਕ੍ਕਮ੍ਪਿ ਕਪ੍ਪਤੀਤਿ ਦੀਪੇਤਿ.

੨੬੭੪-੫. ਇਮਾ ਕਪ੍ਪਿਯਕੁਟਿਯੋ ਕਦਾ ਜਹਿਤਵਤ੍ਥੁਕਾ ਹੋਨ੍ਤੀਤਿ ਆਹ ‘‘ਉਸ੍ਸਾਵਨਨ੍ਤਿਕਾ ਯਾ ਸਾ’’ਤਿਆਦਿ. ਯਾ ਉਸ੍ਸਾਵਨਨ੍ਤਿਕਾ ਯੇਸੁ ਥਮ੍ਭਾਦੀਸੁ ਅਧਿਟ੍ਠਿਤਾ, ਸਾ ਤੇਸੁ ਥਮ੍ਭਾਦੀਸੁ ਅਪਨੀਤੇਸੁ ਤਦਞ੍ਞੇਸੁਪਿ ਥਮ੍ਭਾਦੀਸੁ ਤਿਟ੍ਠਤੀਤਿ ਯੋਜਨਾ.

ਸਬ੍ਬੇਸੁ ਥਮ੍ਭਾਦੀਸੁ ਅਪਨੀਤੇਸੁ ਸਾ ਜਹਿਤਵਤ੍ਥੁਕਾ ਸਿਯਾਤਿ ਯੋਜਨਾ. ਗੋਨਿਸਾਦਿਕੁਟਿ ਪਰਿਕ੍ਖਿਤ੍ਤਾ ਵਤਿਆਦੀਹਿ ਜਹਿਤਵਤ੍ਥੁਕਾ ਸਿਯਾ. ਪਰਿਕ੍ਖਿਤ੍ਤਾਤਿ ਚ ‘‘ਆਰਾਮੋ ਪਨ ਉਪਡ੍ਢਪਰਿਕ੍ਖਿਤ੍ਤੋਪਿ ਬਹੁਤਰਂ ਪਰਿਕ੍ਖਿਤ੍ਤੋਪਿ ਪਰਿਕ੍ਖਿਤ੍ਤੋਯੇਵ ਨਾਮਾ’’ਤਿ (ਮਹਾਵ. ਅਟ੍ਠ. ੨੯੫) ਕੁਰੁਨ੍ਦਿਮਹਾਪਚ੍ਚਰਿਯਾਦੀਸੁ ਵੁਤ੍ਤਤ੍ਤਾ ਨ ਕੇਵਲਂ ਸਬ੍ਬਪਰਿਕ੍ਖਿਤ੍ਤਾਵ, ਉਪਡ੍ਢਪਰਿਕ੍ਖਿਤ੍ਤਾਪਿ ਯੇਭੁਯ੍ਯਪਰਿਕ੍ਖਿਤ੍ਤਾਪਿ ਗਹੇਤਬ੍ਬਾ.

ਸੇਸਾਤਿ ¶ ਗਹਪਤਿਸਮ੍ਮੁਤਿਕੁਟਿਯੋ. ਛਦਨਨਾਸਤੋ ਜਹਿਤਵਤ੍ਥੁਕਾ ਸਿਯੁਨ੍ਤਿ ਯੋਜਨਾ. ਛਦਨਨਾਸਤੋਤਿ ਏਤ੍ਥ ‘‘ਗੋਪਾਨਸਿਮਤ੍ਤਂ ਠਪੇਤ੍ਵਾ’’ਤਿ ਸੇਸੋ. ਸਚੇ ਗੋਪਾਨਸੀਨਂ ਉਪਰਿ ਏਕਮ੍ਪਿ ਪਕ੍ਖਪਾਸਮਣ੍ਡਲਂ ਅਤ੍ਥਿ, ਰਕ੍ਖਤਿ. ਯਤ੍ਰ ਪਨਿਮਾ ਚਤਸ੍ਸੋਪਿ ਕਪ੍ਪਿਯਭੂਮਿਯੋ ਨਤ੍ਥਿ, ਤਤ੍ਥ ਕਿਂ ਕਾਤਬ੍ਬਂ? ਅਨੁਪਸਮ੍ਪਨ੍ਨਸ੍ਸ ਦਤ੍ਵਾ ਤਸ੍ਸ ਸਨ੍ਤਕਂ ਕਤ੍ਵਾ ਪਰਿਭੁਞ੍ਜਿਤਬ੍ਬਂ.

੨੬੭੬. ਭਿਕ੍ਖੁਂ ¶ ਠਪੇਤ੍ਵਾ ਅਞ੍ਞੇਸਂ ਹਤ੍ਥਤੋ ਪਟਿਗ੍ਗਹੋ ਚ ਤੇਸਂ ਸਨ੍ਨਿਧਿ ਚ ਤੇਸਂ ਅਨ੍ਤੋਵੁਤ੍ਥਞ੍ਚ ਭਿਕ੍ਖੁਸ੍ਸ ਵਟ੍ਟਤੀਤਿ ਯੋਜਨਾ.

੨੬੭੭. ਭਿਕ੍ਖੁਸ੍ਸ ਸਨ੍ਤਕਂ ਸਙ੍ਘਿਕਮ੍ਪਿ ਵਾ ਅਕਪ੍ਪਿਯਭੂਮਿਯਂ ਸਹਸੇਯ੍ਯਪ੍ਪਹੋਨਕੇ ਗੇਹੇ ਅਨ੍ਤੋਵੁਤ੍ਥਞ੍ਚ ਅਨ੍ਤੋਪਕ੍ਕਞ੍ਚ ਭਿਕ੍ਖੁਸ੍ਸ ਨ ਵਟ੍ਟਤਿ. ਭਿਕ੍ਖੁਨਿਯਾ ਸਨ੍ਤਕਂ ਸਙ੍ਘਿਕਮ੍ਪਿ ਵਾ ਅਕਪ੍ਪਿਯਭੂਮਿਯਂ ਸਹਸੇਯ੍ਯਪ੍ਪਹੋਨਕੇ ਗੇਹੇ ਅਨ੍ਤੋਵੁਤ੍ਥਞ੍ਚ ਅਨ੍ਤੋਪਕ੍ਕਞ੍ਚ ਭਿਕ੍ਖੁਨਿਯਾ ਨ ਵਟ੍ਟਤੀਤਿ ਏਵਂ ਉਭਿਨ੍ਨਂ ਭਿਕ੍ਖੁਭਿਕ੍ਖੁਨੀਨਂ ਨ ਵਟ੍ਟਤੀਤਿ ਯੋਜਨਾ.

੨੬੭੮. ਅਕਪ੍ਪਕੁਟਿਯਾਤਿ ਅਕਪ੍ਪਿਯਕੁਟਿਯਾ, ‘‘ਅਕਪ੍ਪਿਯਭੂਮਿਯਂ ਸਹਸੇਯ੍ਯਪ੍ਪਹੋਨਕੇ ਗੇਹੇ’’ਤਿ ਅਟ੍ਠਕਥਾਯਂ ਵੁਤ੍ਤਾਯ ਅਕਪ੍ਪਿਯਭੂਮਿਯਾਤਿ ਅਤ੍ਥੋ. ਆਦਿ-ਸਦ੍ਦੇਨ ਨਵਨੀਤਤੇਲਮਧੁਫਾਣਿਤਾਨਂ ਗਹਣਂ.

੨੬੭੯. ਤੇਹੇਵ ਅਨ੍ਤੋਵੁਤ੍ਥੇਹਿ ਸਪ੍ਪਿਆਦੀਹਿ ਸਤ੍ਤਾਹਕਾਲਿਕੇਹਿ ਸਹ ਭਿਕ੍ਖੁਨਾ ਪਕ੍ਕਂ ਤਂ ਯਾਵਜੀਵਿਕਂ ਨਿਰਾਮਿਸਂ ਸਤ੍ਤਾਹਂ ਪਰਿਭੁਞ੍ਜਿਤੁਂ ਵਟ੍ਟਤੇਵਾਤਿ ਯੋਜਨਾ.

੨੬੮੦. ਪਕ੍ਕਂ ਸਾਮਂਪਕ੍ਕਂ ਤਂ ਯਾਵਜੀਵਿਕਂ ਸਚੇ ਆਮਿਸਸਂਸਟ੍ਠਂ ਪਰਿਭੁਞ੍ਜਤਿ, ਅਨ੍ਤੋਵੁਤ੍ਥਞ੍ਚ ਭੁਞ੍ਜਤਿ, ਕਿਞ੍ਚ ਭਿਯ੍ਯੋ ਸਾਮਂਪਕ੍ਕਞ੍ਚ ਭੁਞ੍ਜਤੀਤਿ ਯੋਜਨਾ. ਯਾਵਜੀਵਿਕਸ੍ਸ ਆਮਿਸਸਂਸਟ੍ਠਸ੍ਸ ਆਮਿਸਗਤਿਕਤ੍ਤਾ ‘‘ਅਨ੍ਤੋਵੁਤ੍ਥ’’ਨ੍ਤਿ ਵੁਤ੍ਤਂ.

੨੬੮੨. ਉਦਕਂ ਨ ਹੋਤਿ ਕਾਲਿਕਂ ਚਤੂਸੁ ਕਾਲਿਕੇਸੁ ਅਸਙ੍ਗਹਿਤਤ੍ਤਾ.

੨੬੮੩. ਤਿਕਾਲਿਕਾ ਯਾਵਕਾਲਿਕਾ ਯਾਮਕਾਲਿਕਾ ਸਤ੍ਤਾਹਕਾਲਿਕਾਤਿ ਤਯੋ ਕਾਲਿਕਾ ਪਟਿਗ੍ਗਹਵਸੇਨੇਵ ¶ ਅਤ੍ਤਨੋ ¶ ਅਤ੍ਤਨੋ ਕਾਲਂ ਅਤਿਕ੍ਕਮਿਤ੍ਵਾ ਭੁਤ੍ਤਾ ਦੋਸਕਰਾ ਹੋਨ੍ਤਿ, ਤਤਿਯਂ ਸਤ੍ਤਾਹਾਤਿਕ੍ਕਮੇ ਨਿਸ੍ਸਗ੍ਗਿਯਪਾਚਿਤ੍ਤਿਯਵਤ੍ਥੁਤ੍ਤਾ ਅਭੁਤ੍ਤਮ੍ਪਿ ਦੋਸਕਰਨ੍ਤਿ ਯੋਜਨਾ.

‘‘ਭੁਤ੍ਤਾ ਦੋਸਕਰਾ’’ਤਿ ਇਮਿਨਾ ਪੁਰਿਮਕਾਲਿਕਦ੍ਵਯਂ ਪਟਿਗ੍ਗਹੇਤ੍ਵਾ ਕਾਲਾਤਿਕ੍ਕਮਨਮਤ੍ਤੇਨ ਆਪਤ੍ਤਿਯਾ ਕਾਰਣਂ ਨ ਹੋਤਿ, ਭੁਤ੍ਤਮੇਵ ਹੋਤਿ. ਸਤ੍ਤਾਹਕਾਲਿਕਂ ਕਾਲਾਤਿਕ੍ਕਮੇਨ ਅਪਰਿਭੁਤ੍ਤਮ੍ਪਿ ਆਪਤ੍ਤਿਯਾ ਕਾਰਣਂ ਹੋਤੀਤਿ ਦੀਪੇਤਿ. ਤੇਸੁ ਸਤ੍ਤਾਹਕਾਲਿਕੇਯੇਵ ਵਿਸੇਸਂ ਦਸ੍ਸੇਤੁਮਾਹ ‘‘ਅਭੁਤ੍ਤਂ ਤਤਿਯਮ੍ਪਿ ਚਾ’’ਤਿ. ਚ-ਸਦ੍ਦੋ ਤੁ-ਸਦ੍ਦਤ੍ਥੇ. ਯਾਵਜੀਵਿਕਂ ਪਨ ਪਟਿਗ੍ਗਹੇਤ੍ਵਾ ਯਾਵਜੀਵਂ ਪਰਿਭੁਞ੍ਜਿਯਮਾਨਂ ਇਤਰਕਾਲਿਕਸਂਸਗ੍ਗਂ ਵਿਨਾ ਦੋਸਕਰਂ ਨ ਹੋਤੀਤਿ ਨ ਗਹਿਤਂ.

੨੬੮੪. ਅਮ੍ਬਾਦਯੋ ਸਦ੍ਦਾ ਰੁਕ੍ਖਾਨਂ ਨਾਮਭੂਤਾ ਤਂਤਂਫਲੇਪਿ ਵਤ੍ਤਮਾਨਾ ਇਧ ਉਪਚਾਰਵਸੇਨ ਤਜ੍ਜੇ ਪਾਨਕੇ ਵੁਤ੍ਤਾ, ਤੇਨੇਵਾਹ ‘‘ਪਾਨਕਂ ਮਤ’’ਨ੍ਤਿ. ਚੋਚਂ ਅਟ੍ਠਿਕਕਦਲਿਪਾਨਂ. ਮੋਚਂ ਇਤਰਕਦਲਿਪਾਨਂ. ਮਧੂਤਿ ਮੁਦ੍ਦਿਕਫਲਾਨਂ ਰਸਂ. ਮੁਦ੍ਦਿਕਾਤਿ ਸੀਤੋਦਕੇ ਮਦ੍ਦਿਤਾਨਂ ਮੁਦ੍ਦਿਕਫਲਾਨਂ ਪਾਨਂ. ‘‘ਸਾਲੂਕਪਾਨਨ੍ਤਿ ਰਤ੍ਤੁਪ੍ਪਲਨੀਲੁਪ੍ਪਲਾਦੀਨਂ ਸਾਲੂਕੇ ਮਦ੍ਦਿਤ੍ਵਾ ਕਤਪਾਨ’’ਨ੍ਤਿ ਪਾਲ਼ਿਯਂ, ਅਟ੍ਠਕਥਾਯ (ਮਹਾਵ. ਅਟ੍ਠ. ੩੦੦) ਚ ਸਾਲੂਕ-ਸਦ੍ਦਸ੍ਸ ਦੀਘਵਸੇਨ ਸਂਯੋਗਦਸ੍ਸਨਤੋ ‘‘ਸਾਲੁ ਫਾਰੁਸਕਞ੍ਚਾ’’ਤਿ ਗਾਥਾਬਨ੍ਧਵਸੇਨ ਰਸ੍ਸੋ ਕਤੋ.

ਸਾਲੂਕਂ ਕੁਮੁਦੁਪ੍ਪਲਾਨਂ ਫਲਰਸਂ. ਖੁਦ੍ਦਸਿਕ੍ਖਾਵਣ੍ਣਨਾਯਂ ਪਨ ‘‘ਸਾਲੂਕਪਾਨਂ ਨਾਮ ਰਤ੍ਤੁਪ੍ਪਲਨੀਲੁਪ੍ਪਲਾਦੀਨਂ ਕਿਞ੍ਜਕ੍ਖਰੇਣੂਹਿ ਕਤਪਾਨ’’ਨ੍ਤਿ ਵੁਤ੍ਤਂ. ‘‘ਫਾਰੁਸਕ’ਨ੍ਤਿਆਦੀਸੁ ਏਕੋ ਰੁਕ੍ਖੋ’’ਤਿ ਗਣ੍ਠਿਪਦੇ ਵੁਤ੍ਤਂ. ਤਸ੍ਸ ਫਲਰਸੋ ਫਾਰੁਸਕਂ ਨਾਮ. ਏਤੇਸਂ ਅਟ੍ਠਨ੍ਨਂ ਫਲਾਨਂ ਰਸੋ ਉਦਕਸਮ੍ਭਿਨ੍ਨੋ ਵਟ੍ਟਤਿ, ਸੀਤੁਦਕੇ ਮਦ੍ਦਿਤੋ ਪਸਨ੍ਨੋ ਨਿਕ੍ਕਸਟੋਵ ਵਟ੍ਟਤਿ, ਉਦਕੇਨ ਪਨ ਅਸਮ੍ਭਿਨ੍ਨੋ ਰਸੋ ਯਾਵਕਾਲਿਕੋ.

੨੬੮੫. ਫਲਨ੍ਤਿ ¶ ਅਮ੍ਬਾਦਿਫਲਂ. ਸਵਤ੍ਥੁਕਪਟਿਗ੍ਗਹੋਤਿ ਪਾਨਵਤ੍ਥੁਕਾਨਂ ਫਲਾਨਂ ਪਟਿਗ੍ਗਹੋ. ਵਸਤਿ ਏਤ੍ਥ ਪਾਨਨ੍ਤਿ ਵਤ੍ਥੁ, ਫਲਂ, ਵਤ੍ਥੁਨਾ ਸਹ ਵਟ੍ਟਤੀਤਿ ਸਵਤ੍ਥੁਕਂ, ਪਾਨਂ, ਸਵਤ੍ਥੁਕਸ੍ਸ ਪਟਿਗ੍ਗਹੋ ਸਵਤ੍ਥੁਕਪਟਿਗ੍ਗਹੋ. ਸਵਤ੍ਥੁਕਸ੍ਸ ਪਟਿਗ੍ਗਹਂ ਨਾਮ ਵਤ੍ਥੁਪਟਿਗ੍ਗਹਣਮੇਵਾਤਿ ਕਤ੍ਵਾ ਵੁਤ੍ਤਂ ‘‘ਪਾਨਵਤ੍ਥੁਕਾਨਂ ਫਲਾਨਂ ਪਟਿਗ੍ਗਹੋ’’ਤਿ.

੨੬੮੬. ‘‘ਸੁਕੋਟ੍ਟੇਤ੍ਵਾ’’ਤਿ ਵੁਚ੍ਚਮਾਨਤ੍ਤਾ ‘‘ਅਮ੍ਬਪਕ੍ਕ’’ਨ੍ਤਿ ਆਮਕਮੇਵ ਅਮ੍ਬਫਲਂ ਵੁਚ੍ਚਤਿ ¶ . ਉਦਕੇਤਿ ਸੀਤੋਦਕੇ. ਪਰਿਸ੍ਸਵਂ ਪਰਿਸ੍ਸਾਵਿਤਂ. ਕਤ੍ਵਾਤਿ ਮਧੁਆਦੀਹਿ ਅਭਿਸਙ੍ਖਰਿਤ੍ਵਾ. ਯਥਾਹ – ‘‘ਤਦਹੁਪਟਿਗ੍ਗਹਿਤੇਹਿ ਮਧੁਸਕ੍ਕਰਕਪ੍ਪੂਰਾਦੀਹਿ ਯੋਜੇਤ੍ਵਾ ਕਾਤਬ੍ਬ’’ਨ੍ਤਿ (ਮਹਾਵ. ਅਟ੍ਠ. ੩੦੦). ਪਾਤੁਂ ਵਟ੍ਟਤੀਤਿ ਏਤ੍ਥ ਵਿਨਿਚ੍ਛਯੋ ‘‘ਏਵਂ ਕਤਂ ਪੁਰੇਭਤ੍ਤਮੇਵ ਕਪ੍ਪਤਿ, ਅਨੁਪਸਮ੍ਪਨ੍ਨੇਹਿ ਕਤਂ ਲਭਿਤ੍ਵਾ ਪਨ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਪਰਿਭੋਗੇਨਾਪਿ ਵਟ੍ਟਤਿ, ਪਚ੍ਛਾਭਤ੍ਤਂ ਨਿਰਾਮਿਸਪਰਿਭੋਗੇਨ ਯਾਵ ਅਰੁਣੁਗ੍ਗਮਨਾ ਵਟ੍ਟਤਿਯੇਵ. ਏਸ ਨਯੋ ਸਬ੍ਬਪਾਨੇਸੂ’’ਤਿ ਅਟ੍ਠਕਥਾਯਂ ਵੁਤ੍ਤੋ.

੨੬੮੭. ਸੇਸਪਾਨਕੇਸੁਪੀਤਿ ਜਮ੍ਬੁਪਾਨਕਾਦੀਸੁਪਿ.

੨੬੮੮. ਉਚ੍ਛੁਰਸੋ ਅਨ੍ਤੋਗਧਤ੍ਤਾ ਇਧ ਵੁਤ੍ਤੋ, ਨ ਪਨ ਯਾਮਕਾਲਿਕਤ੍ਤਾ, ਸੋ ਪਨ ਸਤ੍ਤਾਹਕਾਲਿਕੋਯੇਵ.

੨੬੮੯. ਮਧੁਕਸ੍ਸ ਰਸਨ੍ਤਿ ਮਧੁਕਪੁਪ੍ਫਸ੍ਸ ਰਸਂ. ਏਤ੍ਥ ਮਧੁਕਪੁਪ੍ਫਰਸੋ ਅਗ੍ਗਿਪਾਕੋ ਵਾ ਹੋਤੁ ਆਦਿਚ੍ਚਪਾਕੋ ਵਾ, ਪਚ੍ਛਾਭਤ੍ਤਂ ਨ ਵਟ੍ਟਤਿ. ਪੁਰੇਭਤ੍ਤਮ੍ਪਿ ਯਂ ਪਾਨਂ ਗਹੇਤ੍ਵਾ ਮਜ੍ਜਂ ਕਰੋਨ੍ਤਿ, ਸੋ ਆਦਿਤੋ ਪਟ੍ਠਾਯ ਨ ਵਟ੍ਟਤਿ. ਮਧੁਕਪੁਪ੍ਫਂ ਪਨ ਅਲ੍ਲਂ ਵਾ ਸੁਕ੍ਖਂ ਵਾ ਭਜ੍ਜਿਤਂ ਵਾ ਤੇਨ ਕਤਫਾਣਿਤਂ ਵਾ ਯਤੋ ਪਟ੍ਠਾਯ ਮਜ੍ਜਂ ਨ ਕਰੋਨ੍ਤਿ, ਤਂ ਸਬ੍ਬਂ ਪੁਰੇਭਤ੍ਤਂ ਵਟ੍ਟਤਿ.

ਪਕ੍ਕਡਾਕਰਸਨ੍ਤਿ ¶ ਪਕ੍ਕਸ੍ਸ ਯਾਵਕਾਲਿਕਸ੍ਸ ਰਸਂ. ਸਬ੍ਬੋ ਪਤ੍ਤਰਸੋ ਯਾਮਕਾਲਿਕੋ ਵੁਤ੍ਤੋਤਿ ਯੋਜਨਾ. ਅਟ੍ਠਕਥਾਯਂ ‘‘ਯਾਵਕਾਲਿਕਪਤ੍ਤਾਨਞ੍ਹਿ ਪੁਰੇਭਤ੍ਤਂਯੇਵ ਰਸੋ ਕਪ੍ਪਤੀ’’ਤਿ (ਮਹਾਵ. ਅਟ੍ਠ. ੩੦੦) ਇਮਮੇਵ ਸਨ੍ਧਾਯ ਵੁਤ੍ਤਂ.

੨੬੯੦. ਸਾਨੁਲੋਮਾਨਂ ਸਤ੍ਤਨ੍ਨਂ ਧਞ੍ਞਾਨਂ ਫਲਜਂ ਰਸਂ ਠਪੇਤ੍ਵਾ ਸਬ੍ਬੋ ਫਲਜੋ ਰਸੋ ਵਿਕਾਲੇ ਯਾਮਸਞ੍ਞਿਤੇ ਅਨੁਲੋਮਤੋ ਪਰਿਭੁਞ੍ਜਿਤੁਂ ਅਨੁਞ੍ਞਾਤੋਤਿ ਯੋਜਨਾ.

੨੬੯੧. ਯਾਵਕਾਲਿਕਪਤ੍ਤਾਨਂ ਸੀਤੁਦਕੇ ਮਦ੍ਦਿਤ੍ਵਾ ਕਤੋ ਰਸੋਪਿ ਅਪਕ੍ਕੋ, ਆਦਿਚ੍ਚਪਾਕੋਪਿ ਵਿਕਾਲੇ ਪਨ ਵਟ੍ਟਤੀਤਿ ਯੋਜਨਾ.

੨੬੯੨-੩. ਸਤ੍ਤਧਞ੍ਞਾਨੁਲੋਮਾਨਿ ਸਰੂਪਤੋ ਦਸ੍ਸੇਤੁਮਾਹ ‘‘ਤਾਲਞ੍ਚਨਾਲ਼ਿਕੇਰਞ੍ਚਾ’’ਤਿਆਦਿ. ਅਪਰਣ੍ਣਂ ¶ ਮੁਗ੍ਗਾਦਿ. ‘‘ਸਤ੍ਤਧਞ੍ਞਾਨੁਲੋਮਿਕ’’ਨ੍ਤਿ ਇਮਿਨਾ ਏਤੇਸਂ ਰਸੋ ਯਾਵਕਾਲਿਕੋ ਯਾਮਕਾਲਸਙ੍ਖਾਤੇ ਵਿਕਾਲੇ ਪਰਿਭੁਞ੍ਜਿਤੁਂ ਨ ਵਟ੍ਟਤੀਤਿ ਦਸ੍ਸੇਤਿ.

੨੬੯੫. ਏਵਮਾਦੀਨਂ ਖੁਦ੍ਦਕਾਨਂ ਫਲਾਨਂ ਰਸੋ ਪਨ ਅਟ੍ਠਪਾਨਾਨੁਲੋਮਤ੍ਤਾ ਅਨੁਲੋਮਿਕੇ ਯਾਮਕਾਲਿਕਾਨੁਲੋਮਿਕੇ ਨਿਦ੍ਦਿਟ੍ਠੋ ਕਥਿਤੋਤਿ ਯੋਜਨਾ.

੨੬੯੬. ਇਧ ਇਮਸ੍ਮਿਂ ਲੋਕੇ ਸਾਨੁਲੋਮਸ੍ਸ ਧਞ੍ਞਸ੍ਸ ਫਲਜਂ ਰਸਂ ਠਪੇਤ੍ਵਾ ਅਯਾਮਕਾਲਿਕੋ ਅਞ੍ਞੋ ਫਲਰਸੋ ਨਤ੍ਥੀਤਿ ਯੋਜਨਾ, ਸਬ੍ਬੋ ਯਾਮਕਾਲਿਕੋਯੇਵਾਤਿ ਦੀਪੇਤਿ.

ਭੇਸਜ੍ਜਕ੍ਖਨ੍ਧਕਕਥਾਵਣ੍ਣਨਾ.

ਕਥਿਨਕ੍ਖਨ੍ਧਕਕਥਾਵਣ੍ਣਨਾ

੨੬੯੭. ਵੁਤ੍ਥਵਸ੍ਸਾਨਂ ¶ ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਯਾਵ ਮਹਾਪਵਾਰਣਾ, ਤਾਵ ਰਤ੍ਤਿਚ੍ਛੇਦਂ ਅਕਤ੍ਵਾ ਵੁਤ੍ਥਵਸ੍ਸਾਨਂ ਭਿਕ੍ਖੂਨਂ ਏਕਸ੍ਸ ਵਾ ਦ੍ਵਿਨ੍ਨਂ ਤਿਣ੍ਣਂ ਚਤੁਨ੍ਨਂ ਪਞ੍ਚਨ੍ਨਂ ਅਤਿਰੇਕਾਨਂ ਵਾ ਭਿਕ੍ਖੂਨਂ ਪਞ੍ਚਨ੍ਨਂ ਆਨਿਸਂਸਾਨਂ ਵਕ੍ਖਮਾਨਾਨਂ ਅਨਾਮਨ੍ਤਚਾਰਾਦੀਨਂ ਪਞ੍ਚਨ੍ਨਂ ਆਨਿਸਂਸਾਨਂ ਪਟਿਲਾਭਕਾਰਣਾ ਮੁਨਿਪੁਙ੍ਗਵੋ ਸਬ੍ਬੇਸਂ ਅਗਾਰਿਕਾਦਿਮੁਨੀਨਂ ਸਕਲਗੁਣਗਣੇਹਿ ਉਤ੍ਤਮੋ ਭਗਵਾ ਕਥਿਨਤ੍ਥਾਰਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂਵੁਤ੍ਥਾਨਂ ਭਿਕ੍ਖੂਨਂ ਕਥਿਨਂ ਅਤ੍ਥਰਿਤੁ’’ਨ੍ਤਿ (ਮਹਾਵ. ੩੦੬) ਅਬ੍ਰ੍ਵਿ ਕਥੇਸੀਤਿ ਯੋਜਨਾ.

ਏਤ੍ਥਾਯਂ ਵਿਨਿਚ੍ਛਯੋ – ‘‘ਕਥਿਨਤ੍ਥਾਰਂ ਕੇ ਲਭਨ੍ਤਿ, ਕੇ ਨ ਲਭਨ੍ਤੀਤਿ? ਗਣਨਵਸੇਨ ਤਾਵ ਪਚ੍ਛਿਮਕੋਟਿਯਾ ਪਞ੍ਚ ਜਨਾ ਲਭਨ੍ਤਿ, ਉਦ੍ਧਂ ਸਤਸਹਸ੍ਸਮ੍ਪਿ, ਪਞ੍ਚਨ੍ਨਂ ਹੇਟ੍ਠਾ ਨ ਲਭਨ੍ਤੀ’’ਤਿ (ਮਹਾਵ. ਅਟ੍ਠ. ੩੦੬) ਇਦਂ ਅਟ੍ਠਕਥਾਯ ਅਤ੍ਥਾਰਕਸ੍ਸ ਭਿਕ੍ਖੁਨੋ ਸਙ੍ਘਸ੍ਸ ਕਥਿਨਦੁਸ੍ਸਦਾਨਕਮ੍ਮਂ ਸਨ੍ਧਾਯ ਵੁਤ੍ਤਂ. ‘‘ਵੁਤ੍ਥਵਸ੍ਸਵਸੇਨ ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਪਠਮਪਵਾਰਣਾਯ ਪਵਾਰਿਤਾ ਲਭਨ੍ਤਿ, ਛਿਨ੍ਨਵਸ੍ਸਾ ਵਾ ਪਚ੍ਛਿਮਿਕਾਯ ਉਪਗਤਾ ਵਾ ਨ ਲਭਨ੍ਤਿ. ਅਞ੍ਞਸ੍ਮਿਂ ਵਿਹਾਰੇ ਵੁਤ੍ਥਵਸ੍ਸਾਪਿ ਨ ਲਭਨ੍ਤੀਤਿ ਮਹਾਪਚ੍ਚਰਿਯਂ ਵੁਤ੍ਤ’’ਨ੍ਤਿ (ਮਹਾਵ. ਅਟ੍ਠ. ੩੦੬) ਇਦਂ ਅਟ੍ਠਕਥਾਯ ਆਨਿਸਂਸਲਾਭਂ ਸਨ੍ਧਾਯ ਵੁਤ੍ਤਂ, ਨ ਕਮ੍ਮਂ.

ਇਦਾਨਿ ਤਦੁਭਯਂ ਵਿਭਜਿਤ੍ਵਾ ਦਸ੍ਸੇਤਿ –

‘‘ਪੁਰਿਮਿਕਾਯ ¶ ਉਪਗਤਾਨਂ ਪਨ ਸਬ੍ਬੇ ਗਣਪੂਰਕਾ ਹੋਨ੍ਤਿ, ਆਨਿਸਂਸਂ ਨ ਲਭਨ੍ਤਿ, ਆਨਿਸਂਸੋ ਇਤਰੇਸਂਯੇਵ ਹੋਤਿ. ਸਚੇ ਪੁਰਿਮਿਕਾਯ ਉਪਗਤਾ ਚਤ੍ਤਾਰੋ ਵਾ ਹੋਨ੍ਤਿ, ਤਯੋ ਵਾ ਦ੍ਵੇ ਵਾ ਏਕੋ ਵਾ, ਇਤਰੇ ਗਣਪੂਰਕੇ ਕਤ੍ਵਾ ਕਥਿਨਂ ਅਤ੍ਥਰਿਤਬ੍ਬਂ. ਅਥ ਚਤ੍ਤਾਰੋ ਭਿਕ੍ਖੂ ਉਪਗਤਾ, ਏਕੋ ਪਰਿਪੁਣ੍ਣਵਸ੍ਸੋ ਸਾਮਣੇਰੋ, ਸੋ ਚੇ ਪਚ੍ਛਿਮਿਕਾਯ ਉਪਸਮ੍ਪਜ੍ਜਤਿ, ਗਣਪੂਰਕੋ ਚੇਵ ਹੋਤਿ, ਆਨਿਸਂਸਞ੍ਚ ਲਭਤਿ ¶ . ਤਯੋ ਭਿਕ੍ਖੂ ਦ੍ਵੇ ਸਾਮਣੇਰਾ, ਦ੍ਵੇ ਭਿਕ੍ਖੂ ਤਯੋ ਸਾਮਣੇਰਾ, ਏਕੋ ਭਿਕ੍ਖੁ ਚਤ੍ਤਾਰੋ ਸਾਮਣੇਰਾਤਿ ਏਤ੍ਥਾਪਿ ਏਸੇਵ ਨਯੋ. ਸਚੇ ਪੁਰਿਮਿਕਾਯ ਉਪਗਤਾ ਕਥਿਨਤ੍ਥਾਰਕੁਸਲਾ ਨ ਹੋਨ੍ਤਿ, ਅਤ੍ਥਾਰਕੁਸਲਾ ਖਨ੍ਧਕਭਾਣਕਤ੍ਥੇਰਾ ਪਰਿਯੇਸਿਤ੍ਵਾ ਆਨੇਤਬ੍ਬਾ, ਕਮ੍ਮਵਾਚਂ ਸਾਵੇਤ੍ਵਾ ਕਥਿਨਂ ਅਤ੍ਥਰਾਪੇਤ੍ਵਾ ਦਾਨਞ੍ਚ ਭੁਞ੍ਜਿਤ੍ਵਾ ਗਮਿਸ੍ਸਨ੍ਤਿ, ਆਨਿਸਂਸੋ ਪਨ ਇਤਰੇਸਂਯੇਵ ਹੋਤੀ’’ਤਿ (ਮਹਾਵ. ਅਟ੍ਠ. ੩੦੬).

ਕਥਿਨਂ ਕੇਨ ਦਿਨ੍ਨਂ ਵਟ੍ਟਤੀਤਿ? ਯੇਨ ਕੇਨਚਿ ਦੇਵੇਨ ਵਾ ਮਨੁਸ੍ਸੇਨ ਵਾ ਪਞ੍ਚਨ੍ਨਂ ਵਾ ਸਹਧਮ੍ਮਿਕਾਨਂ ਅਞ੍ਞਤਰੇਨ ਦਿਨ੍ਨਂ ਵਟ੍ਟਤਿ. ਕਥਿਨਦਾਯਕਸ੍ਸ ਵਤ੍ਤਂ ਅਤ੍ਥਿ, ਸਚੇ ਸੋ ਤਂ ਅਜਾਨਨ੍ਤੋ ਪੁਚ੍ਛਤਿ ‘‘ਭਨ੍ਤੇ, ਕਥਂ ਕਥਿਨਂ ਦਾਤਬ੍ਬ’’ਨ੍ਤਿ, ਤਸ੍ਸ ਏਵਂ ਆਚਿਕ੍ਖਿਤਬ੍ਬਂ ‘‘ਤਿਣ੍ਣਂ ਚੀਵਰਾਨਂ ਅਞ੍ਞਤਰਪ੍ਪਹੋਨਕਂ ਸੂਰਿਯੁਗ੍ਗਮਨਸਮਯੇ ਵਤ੍ਥਂ ‘ਕਥਿਨਚੀਵਰਂ ਦੇਮਾ’ਤਿ ਦਾਤੁਂ ਵਟ੍ਟਤਿ, ਤਸ੍ਸ ਪਰਿਕਮ੍ਮਤ੍ਥਂ ਏਤ੍ਤਕਾ ਨਾਮ ਸੂਚਿਯੋ, ਏਤ੍ਤਕਂ ਸੁਤ੍ਤਂ, ਏਤ੍ਤਕਂ ਰਜਨਂ, ਪਰਿਕਮ੍ਮਂ ਕਰੋਨ੍ਤਾਨਂ ਏਤ੍ਤਕਾਨਂ ਭਿਕ੍ਖੂਨਂ ਯਾਗੁਭਤ੍ਤਞ੍ਚ ਦਾਤੁਂ ਵਟ੍ਟਤੀ’’ਤਿ.

ਕਥਿਨਤ੍ਥਾਰਕੇਨਾਪਿ ਧਮ੍ਮੇਨ ਸਮੇਨ ਉਪ੍ਪਨ੍ਨਂ ਕਥਿਨਂ ਅਤ੍ਥਰਨ੍ਤੇਨ ਵਤ੍ਤਂ ਜਾਨਿਤਬ੍ਬਂ. ਤਨ੍ਤਵਾਯਗੇਹਤੋ ਹਿ ਆਭਤਸਨ੍ਤਾਨੇਨੇਵ ਖਲਿਮਕ੍ਖਿਤਸਾਟਕੋਪਿ ਨ ਵਟ੍ਟਤਿ, ਮਲੀਨਸਾਟਕੋਪਿ ਨ ਵਟ੍ਟਤਿ, ਤਸ੍ਮਾ ਕਥਿਨਤ੍ਥਾਰਸਾਟਕਂ ਲਭਿਤ੍ਵਾ ਸੁਦ੍ਧਂ ਧੋਵਿਤ੍ਵਾ ਸੂਚਿਆਦੀਨਿ ਚੀਵਰਕਮ੍ਮੂਪਕਰਣਾਨਿ ਸਜ੍ਜੇਤ੍ਵਾ ਬਹੂਹਿ ਭਿਕ੍ਖੂਹਿ ਸਦ੍ਧਿਂ ਤਦਹੇਵ ਸਿਬ੍ਬਿਤ੍ਵਾ ਨਿਟ੍ਠਿਤਸੂਚਿਕਮ੍ਮਂ ਰਜਿਤ੍ਵਾ ਕਪ੍ਪਬਿਨ੍ਦੁਂ ਦਤ੍ਵਾ ਕਥਿਨਂ ਅਤ੍ਥਰਿਤਬ੍ਬਂ. ਸਚੇ ਤਸ੍ਮਿਂ ਅਨਤ੍ਥਤੇਯੇਵ ਅਞ੍ਞੋ ਕਥਿਨਸਾਟਕਂ ਅਤ੍ਥਰਿਤਬ੍ਬਕਂ ਆਹਰਤਿ, ਅਞ੍ਞਾਨਿ ਚ ਬਹੂਨਿ ਕਥਿਨਾਨਿਸਂਸਵਤ੍ਥਾਨਿ ਦੇਤਿ, ਯੋ ¶ ਆਨਿਸਂਸਂ ਬਹੁਂ ਦੇਤਿ, ਤਸ੍ਸ ਸਨ੍ਤਕੇਨੇਵ ਅਤ੍ਥਰਿਤਬ੍ਬਂ. ਇਤਰੋ ਯਥਾ ਤਥਾ ਓਵਦਿਤ੍ਵਾ ਸਞ੍ਞਾਪੇਤਬ੍ਬੋ.

ਕਥਿਨਂ ਪਨ ਕੇਨ ਅਤ੍ਥਰਿਤਬ੍ਬਂ? ਯਸ੍ਸ ਸਙ੍ਘੋ ਕਥਿਨਚੀਵਰਂ ਦੇਤਿ. ਸਙ੍ਘੇਨ ਪਨ ਕਸ੍ਸ ਦਾਤਬ੍ਬਂ? ਯੋ ਜਿਣ੍ਣਚੀਵਰੋ ਹੋਤਿ. ਸਚੇ ਬਹੂ ਜਿਣ੍ਣਚੀਵਰਾ ਹੋਨ੍ਤਿ, ਵੁਡ੍ਢਸ੍ਸ ਦਾਤਬ੍ਬਂ. ਵੁਡ੍ਢੇਸੁਪਿ ਯੋ ਮਹਾਪਰਿਵਾਰੋ ਤਦਹੇਵ ਚੀਵਰਂ ਕਤ੍ਵਾ ਅਤ੍ਥਰਿਤੁਂ ਸਕ੍ਕੋਤਿ, ਤਸ੍ਸ ਦਾਤਬ੍ਬਂ. ਸਚੇ ਵੁਡ੍ਢੋ ¶ ਨ ਸਕ੍ਕੋਤਿ, ਨਵਕਤਰੋ ਸਕ੍ਕੋਤਿ, ਤਸ੍ਸ ਦਾਤਬ੍ਬਂ. ਅਪਿ ਚ ਸਙ੍ਘੇਨ ਮਹਾਥੇਰਸ੍ਸ ਸਙ੍ਗਹਂ ਕਾਤੁਂ ਵਟ੍ਟਤਿ, ਤਸ੍ਮਾ ‘‘ਤੁਮ੍ਹੇ, ਭਨ੍ਤੇ, ਗਣ੍ਹਥ, ਮਯਂ ਕਤ੍ਵਾ ਦਸ੍ਸਾਮਾ’’ਤਿ ਵਤ੍ਤਬ੍ਬਂ.

ਤੀਸੁ ਚੀਵਰੇਸੁ ਯਂ ਜਿਣ੍ਣਂ ਹੋਤਿ, ਤਦਤ੍ਥਾਯ ਦਾਤਬ੍ਬਂ. ਪਕਤਿਯਾ ਦੁਪਟ੍ਟਚੀਵਰਸ੍ਸ ਦੁਪਟ੍ਟਤ੍ਥਾਯੇਵ ਦਾਤਬ੍ਬਂ. ਸਚੇਪਿਸ੍ਸ ਏਕਪਟ੍ਟਚੀਵਰਂ ਘਨਂ ਹੋਤਿ, ਕਥਿਨਸਾਟਕੋ ਚ ਪੇਲਵੋ, ਸਾਰੁਪ੍ਪਤ੍ਥਾਯ ਦੁਪਟ੍ਟਪ੍ਪਹੋਨਕਮੇਵ ਦਾਤਬ੍ਬਂ. ‘‘ਅਹਂ ਅਲਭਨ੍ਤੋ ਏਕਪਟ੍ਟਂ ਪਾਰੁਪਾਮੀ’’ਤਿ ਵਦਨ੍ਤਸ੍ਸਾਪਿ ਦੁਪਟ੍ਟਂ ਦਾਤੁਂ ਵਟ੍ਟਤਿ. ਯੋ ਪਨ ਲੋਭਪਕਤਿਕੋ ਹੋਤਿ, ਤਸ੍ਸ ਨ ਦਾਤਬ੍ਬਂ. ਤੇਨਾਪਿ ਕਥਿਨਂ ਅਤ੍ਥਰਿਤ੍ਵਾ ‘‘ਪਚ੍ਛਾ ਵਿਸਿਬ੍ਬਿਤ੍ਵਾ ਦ੍ਵੇ ਚੀਵਰਾਨਿ ਕਰਿਸ੍ਸਾਮੀ’’ਤਿ ਨ ਗਹੇਤਬ੍ਬਂ.

ਯਸ੍ਸ ਪਨ ਦਿਯ੍ਯਤਿ, ਤਸ੍ਸ –

‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯ ਕਥਿਨਂ ਅਤ੍ਥਰਿਤੁਂ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ, ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦੇਤਿ ਕਥਿਨਂ ਅਤ੍ਥਰਿਤੁਂ, ਯਸ੍ਸਾਯਸ੍ਮਤੋ ਖਮਤਿ ¶ ਇਮਸ੍ਸ ਕਥਿਨਦੁਸ੍ਸਸ੍ਸ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਾਨਂ ਕਥਿਨਂ ਅਤ੍ਥਰਿਤੁਂ, ਸੋ ਤੁਣ੍ਹਸ੍ਸ, ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨਂ ਇਦਂ ਸਙ੍ਘੇਨ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕਥਿਨਂ ਅਤ੍ਥਰਿਤੁਂ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੩੦੭) –

ਏਵਂ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ ਦਾਤਬ੍ਬਨ੍ਤਿ ਏਵਂ ਦਿਨ੍ਨਂ.

੨੬੯੮-੯. ਨ ਉਲ੍ਲਿਖਿਤਮਤ੍ਤਾਦਿ-ਚਤੁਵੀਸਤਿਵਜ੍ਜਿਤਨ੍ਤਿ ਪਾਲ਼ਿਯਂ ਆਗਤੇਹਿ ‘‘ਨ ਉਲ੍ਲਿਖਿਤਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨ’’ਨ੍ਤਿ (ਮਹਾਵ. ੩੦੮) ਉਲ੍ਲਿਖਿਤਮਤ੍ਤਾਦੀਹਿ ਚਤੁਵੀਸਤਿਯਾ ਆਕਾਰੇਹਿ ਵਜ੍ਜਿਤਂ. ਚੀਵਰਨ੍ਤਿ ‘‘ਅਹਤੇਨ ਅਤ੍ਥਤਂ ਹੋਤਿ ਕਥਿਨ’’ਨ੍ਤਿ (ਮਹਾਵ. ੩੦੯) ਪਾਲ਼ਿਯਂ ¶ ਆਗਤਾਨਂ ਸੋਲ਼ਸਨ੍ਨਂ ਆਕਾਰਾਨਂ ਅਞ੍ਞਤਰੇਨ ਯੁਤ੍ਤਂ ਕਤਪਰਿਯੋਸਿਤਂ ਦਿਨ੍ਨਂ ਕਪ੍ਪਬਿਨ੍ਦੁਂ ਤਿਣ੍ਣਂ ਚੀਵਰਾਨਂ ਅਞ੍ਞਤਰਚੀਵਰਂ. ਤੇ ਪਨ ਚਤੁਵੀਸਤਿ ਆਕਾਰਾ, ਸੋਲ਼ਸਾਕਾਰਾ ਚ ਪਾਲ਼ਿਤੋ (ਮਹਾਵ. ੩੦੮), ਅਟ੍ਠਕਥਾਤੋ (ਮਹਾਵ. ਅਟ੍ਠ. ੩੦੮) ਚ ਗਹੇਤਬ੍ਬਾ. ਗਨ੍ਥਗਾਰਵਪਰਿਹਾਰਤ੍ਥਮਿਧ ਨ ਵੁਤ੍ਤਾ.

ਭਿਕ੍ਖੁਨਾ ਵਕ੍ਖਮਾਨੇ ਅਟ੍ਠਧਮ੍ਮੇ ਜਾਨਨ੍ਤੇਨ ਅਤ੍ਥਰਕੇਨ ਆਦਾਯ ਗਹੇਤ੍ਵਾ ਪੁਰਾਣਕਂ ਅਤ੍ਤਨਾ ਪਰਿਭੁਞ੍ਜਿਯਮਾਨਂ ਅਤ੍ਥਰਿਤਬ੍ਬਚੀਵਰੇਨ ਏਕਨਾਮਕਂ ਪੁਰਾਣਚੀਵਰਂ ਉਦ੍ਧਰਿਤ੍ਵਾ ਪਚ੍ਚੁਦ੍ਧਰਿਤ੍ਵਾ ਨਵਂ ਅਤ੍ਥਰਿਤਬ੍ਬਂ ਚੀਵਰਂ ਅਧਿਟ੍ਠਹਿਤ੍ਵਾ ਪੁਰਾਣਪਚ੍ਚੁਦ੍ਧਟਚੀਵਰਸ੍ਸ ਨਾਮੇਨ ਅਧਿਟ੍ਠਹਿਤ੍ਵਾਵ ਤਂ ਅਨ੍ਤਰਵਾਸਕਂ ਚੇ, ‘‘ਇਮਿਨਾ ਅਨ੍ਤਰਵਾਸਕੇਨ ਕਥਿਨਂ ਅਤ੍ਥਰਾਮਿ’’ਇਤਿ ਵਚਸਾ ਵਤ੍ਤਬ੍ਬਨ੍ਤਿ ਯੋਜਨਾ. ਸਚੇ ਉਤ੍ਤਰਾਸਙ੍ਗੋ ਹੋਤਿ, ‘‘ਇਮਿਨਾ ਉਤ੍ਤਰਾਸਙ੍ਗੇਨ ਕਥਿਨਂ ਅਤ੍ਥਰਾਮਿ’’, ਸਚੇ ਸਙ੍ਘਾਟਿ ਹੋਤਿ, ‘‘ਇਮਾਯ ਸਙ੍ਘਾਟਿਯਾ ਕਥਿਨਂ ਅਤ੍ਥਰਾਮੀ’’ਤਿ ਵਤ੍ਤਬ੍ਬਂ.

੨੭੦੦-੧. ਇਚ੍ਚੇਵਂ ¶ ਤਿਕ੍ਖਤ੍ਤੁਂ ਵੁਤ੍ਤੇ ਕਥਿਨਂ ਅਤ੍ਥਤਂ ਹੋਤੀਤਿ ਯੋਜਨਾ. ਤੇਨ ਪਨ ਭਿਕ੍ਖੁਨਾ ਨਵਕੇਨ ਕਥਿਨਚੀਵਰਂ ਆਦਾਯ ਸਙ੍ਘਂ ਉਪਸਙ੍ਕਮ੍ਮ ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਥ’’ਇਤਿ ਵਤ੍ਤਬ੍ਬਨ੍ਤਿ ਯੋਜਨਾ.

੨੭੦੨. ਅਨੁਮੋਦਕੇਸੁ ਚ ਥੇਰੇਹਿ ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮਾ’’ਤਿ ਵਤ੍ਤਬ੍ਬਂ, ਨਵੇਨ ਪਨ ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮੀ’’ਤਿ ਇਤਿ ਪੁਨ ਈਰਯੇ ਕਥੇਯ੍ਯਾਤਿ ਯੋਜਨਾ. ਗਾਥਾਯ ਪਨ ਅਨੁਮੋਦਨਪਾਠਸ੍ਸ ਅਤ੍ਥਦਸ੍ਸਨਮੁਖੇਨ ‘‘ਸੁਅਤ੍ਥਤਂ ਤਯਾ ਭਨ੍ਤੇ’’ਤਿ ਵੁਤ੍ਤਂ, ਨ ਪਾਠਕ੍ਕਮਦਸ੍ਸਨਵਸੇਨਾਤਿ ਵੇਦਿਤਬ੍ਬਂ.

ਅਤ੍ਥਾਰਕੇਸੁ ਚ ਅਨੁਮੋਦਕੇਸੁ ਚ ਨਵੇਹਿ ਵੁਡ੍ਢਾਨਂ ਵਚਨਕ੍ਕਮੋ ਵੁਤ੍ਤੋ, ਵੁਡ੍ਢੇਹਿ ਨਵਾਨਂ ਵਚਨਕ੍ਕਮੋ ਪਨ ਤਦਨੁਸਾਰੇਨ ਯਥਾਰਹਂ ਯੋਜੇਤ੍ਵਾ ਵਤ੍ਤਬ੍ਬੋਤਿ ਗਾਥਾਸੁ ਨ ਵੁਤ੍ਤੋਤਿ ਵੇਦਿਤਬ੍ਬੋ. ਅਤ੍ਥਾਰਕੇਨ ਥੇਰੇਨ ਵਾ ਨਵੇਨ ਵਾ ਗਣਪੁਗ੍ਗਲਾਨਂ ਵਚਨਕ੍ਕਮੋ ਚ ਗਣਪੁਗ੍ਗਲੇਹਿ ਅਤ੍ਥਾਰਕਸ੍ਸ ਵਚਨਕ੍ਕਮੋ ਚ ਵੁਤ੍ਤਨਯੇਨ ਯਥਾਰਹਂ ਯੋਜੇਤੁਂ ਸਕ੍ਕਾਤਿ ਨ ਵੁਤ੍ਤੋ.

ਏਵਂ ਅਤ੍ਥਤੇ ਪਨ ਕਥਿਨੇ ਸਚੇ ਕਥਿਨਚੀਵਰੇਨ ਸਦ੍ਧਿਂ ਆਭਤਂ ਆਨਿਸਂਸਂ ਦਾਯਕਾ ‘‘ਯੇਨ ਅਮ੍ਹਾਕਂ ¶ ਕਥਿਨਂ ਗਹਿਤਂ, ਤਸ੍ਸੇਵ ਚ ਦੇਮਾ’’ਤਿ ਦੇਨ੍ਤਿ, ਭਿਕ੍ਖੁਸਙ੍ਘੋ ਅਨਿਸ੍ਸਰੋ. ਅਥ ਅਵਿਚਾਰੇਤ੍ਵਾਵ ਦਤ੍ਵਾ ਗਚ੍ਛਨ੍ਤਿ, ਭਿਕ੍ਖੁਸਙ੍ਘੋ ਇਸ੍ਸਰੋ. ਤਸ੍ਮਾ ਸਚੇ ਕਥਿਨਤ੍ਥਾਰਕਸ੍ਸ ਸੇਸਚੀਵਰਾਨਿਪਿ ਦੁਬ੍ਬਲਾਨਿ ਹੋਨ੍ਤਿ, ਸਙ੍ਘੇਨ ਅਪਲੋਕੇਤ੍ਵਾ ਤੇਸਮ੍ਪਿ ਅਤ੍ਥਾਯ ਵਤ੍ਥਾਨਿ ਦਾਤਬ੍ਬਾਨਿ, ਕਮ੍ਮਵਾਚਾਯ ਪਨ ਏਕਾਯੇਵ ਵਟ੍ਟਤਿ. ਅਵਸੇਸੇ ¶ ਕਥਿਨਾਨਿਸਂਸੇ ਬਲਵਵਤ੍ਥਾਨਿ ਵਸ੍ਸਾਵਾਸਿਕਠਿਤਿਕਾਯ ਦਾਤਬ੍ਬਾਨਿ, ਠਿਤਿਕਾਯ ਅਭਾਵੇ ਥੇਰਾਸਨਤੋ ਪਟ੍ਠਾਯ ਦਾਤਬ੍ਬਾਨਿ, ਗਰੁਭਣ੍ਡਂ ਨ ਭਾਜੇਤਬ੍ਬਂ. ਸਚੇ ਪਨ ਏਕਸੀਮਾਯ ਬਹੂ ਵਿਹਾਰਾ ਹੋਨ੍ਤਿ, ਸਬ੍ਬੇ ਭਿਕ੍ਖੂ ਸਨ੍ਨਿਪਾਤੇਤ੍ਵਾ ਏਕਤ੍ਥ ਕਥਿਨਂ ਅਤ੍ਥਰਿਤਬ੍ਬਂ, ਵਿਸੁਂ ਵਿਸੁਂ ਅਤ੍ਥਰਿਤੁਂ ਨ ਵਟ੍ਟਤਿ.

੨੭੦੩. ‘‘ਕਥਿਨਸ੍ਸ ਚ ਕਿਂ ਮੂਲ’’ਨ੍ਤਿਆਦੀਨਿ ਸਯਮੇਵ ਵਿਵਰਿਸ੍ਸਤਿ.

੨੭੦੬. ਅਟ੍ਠਧਮ੍ਮੁਦ੍ਦੇਸਗਾਥਾਯ ਪੁਬ੍ਬਕਿਚ੍ਚਂ ਪੁਬ੍ਬ-ਵਚਨੇਨੇਵ ਉਤ੍ਤਰਪਦਲੋਪੇਨ ਵੁਤ੍ਤਂ. ਤੇਨੇਵ ਵਕ੍ਖਤਿ ‘‘ਪੁਬ੍ਬਕਿਚ੍ਚਨ੍ਤਿ ਵੁਚ੍ਚਤੀ’’ਤਿ. ‘‘ਪਚ੍ਚੁਦ੍ਧਾਰ’’ਇਤਿ ਵਤ੍ਤਬ੍ਬੇ ‘‘ਪਚ੍ਚੁਦ੍ਧਰ’’ਇਤਿ ਗਾਥਾਬਨ੍ਧਵਸੇਨ ਰਸ੍ਸੋ. ਤੇਨੇਵ ਵਕ੍ਖਤਿ ‘‘ਪਚ੍ਚੁਦ੍ਧਾਰੋ’’ਤਿ. ਅਧਿਟ੍ਠਹਨਂ ਅਧਿਟ੍ਠਾਨਂ. ਪਚ੍ਚੁਦ੍ਧਾਰੋ ਚ ਅਧਿਟ੍ਠਾਨਞ੍ਚ ਪਚ੍ਚੁਦ੍ਧਰਾਧਿਟ੍ਠਾਨਾ. ਇਤਰੀਤਰਯੋਗੇਨ ਦ੍ਵਨ੍ਦਸਮਾਸੋ. ਅਤ੍ਥਾਰੋਤਿ ਏਤ੍ਥ ‘‘ਕਥਿਨਤ੍ਥਾਰੋ’’ਤਿ ਪਕਰਣਤੋ ਲਬ੍ਭਤਿ.

‘‘ਮਾਤਿਕਾ’’ਤਿ ਇਮਿਨਾ ‘‘ਅਟ੍ਠ ਕਥਿਨੁਬ੍ਭਾਰਮਾਤਿਕਾ’’ਤਿ ਪਕਰਣਤੋ ਵਿਞ੍ਞਾਯਤਿ. ਯਥਾਹ – ‘‘ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ ਕਥਿਨਸ੍ਸ ਉਬ੍ਭਾਰਾਯਾ’’ਤਿ (ਮਹਾਵ. ੩੧੦). ਮਾਤਿਕਾਤਿ ਮਾਤਰੋ ਜਨੇਤ੍ਤਿਯੋ, ਕਥਿਨੁਬ੍ਭਾਰਂ ਏਤਾ ਅਟ੍ਠ ਜਨੇਨ੍ਤੀਤਿ ਅਤ੍ਥੋ. ਉਦ੍ਧਾਰੋਤਿ ਕਥਿਨਸ੍ਸ ਉਦ੍ਧਾਰੋ. ਆਨਿਸਂਸਾਤਿ ਏਤ੍ਥ ‘‘ਕਥਿਨਸ੍ਸਾ’’ਤਿ ਪਕਰਣਤੋ ਲਬ੍ਭਤਿ. ਕਥਿਨਸ੍ਸ ਆਨਿਸਂਸਾਤਿ ਇਮੇ ਅਟ੍ਠ ਧਮ੍ਮਾਤਿ ਯੋਜਨਾ. ਯਥਾਹ ‘‘ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਪਞ੍ਚ ਕਪ੍ਪਿਸ੍ਸਨ੍ਤੀ’’ਤਿਆਦਿ (ਮਹਾਵ. ੩੦੬). ‘‘ਆਨਿਸਂਸੇਨਾ’’ਤਿਪਿ ਪਾਠੋ. ਆਨਿਸਂਸੇਨ ਸਹ ਇਮੇ ਅਟ੍ਠ ਧਮ੍ਮਾਤਿ ਯੋਜਨਾ.

੨੭੦੭. ‘‘ਨ ਉਲ੍ਲਿਖਿਤਮਤ੍ਤਾਦਿ-ਚਤੁਵੀਸਤਿਵਜ੍ਜਿਤ’’ਨ੍ਤਿਆਦਿਨਾ ਕਥਿਨਂ ਅਤ੍ਥਰਿਤੁਂ ਕਤਪਰਿਯੋਸਿਤਂ ਚੀਵਰਂ ਚੇ ਲਦ੍ਧਂ, ਤਤ੍ਥ ¶ ਪਟਿਪਜ੍ਜਨਵਿਧਿਂ ਦਸ੍ਸੇਤ੍ਵਾ ਸਚੇ ਅਕਤਸਿਬ੍ਬਨਾਦਿਕਮ੍ਮਂ ਵਤ੍ਥਮੇਵ ਲਦ੍ਧਂ, ਤਤ੍ਥ ਪਟਿਪਜ੍ਜਨਵਿਧਿਂ ਪੁਬ੍ਬਕਿਚ੍ਚਵਸੇਨ ਦਸ੍ਸੇਤੁਮਾਹ ‘‘ਧੋਵਨ’’ਨ੍ਤਿਆਦਿ. ਤਤ੍ਥ ਧੋਵਨਨ੍ਤਿ ਕਥਿਨਦੁਸ੍ਸਸ੍ਸ ਸੇਤਭਾਵਕਰਣਂ. ਵਿਚਾਰੋਤਿ ‘‘ਪਞ੍ਚਕਂ ਵਾ ਸਤ੍ਤਕਂ ਵਾ ਨਵਕਂ ਵਾ ਏਕਾਦਸਕਂ ¶ ਵਾ ਹੋਤੂ’’ਤਿ ਵਿਚਾਰਣਂ. ਛੇਦਨਨ੍ਤਿ ਯਥਾਵਿਚਾਰਿਤਸ੍ਸ ਵਤ੍ਥਸ੍ਸ ਛੇਦਨਂ. ਬਨ੍ਧਨਨ੍ਤਿ ਮੋਘਸੁਤ੍ਤਕਾਰੋਪਨਂ. ਸਿਬ੍ਬਨਨ੍ਤਿ ਸਬ੍ਬਸੂਚਿਕਮ੍ਮਂ. ਰਜਨਨ੍ਤਿ ਰਜਨਕਮ੍ਮਂ. ਕਪ੍ਪਨ੍ਤਿ ਕਪ੍ਪਬਿਨ੍ਦੁਦਾਨਂ. ‘‘ਪੁਬ੍ਬਕਿਚ੍ਚ’’ਨ੍ਤਿ ਵੁਚ੍ਚਤਿ ਇਦਂ ਸਬ੍ਬਂ ਕਥਿਨਤ੍ਥਾਰਸ੍ਸ ਪਠਮਮੇਵ ਕਤ੍ਤਬ੍ਬਤ੍ਤਾ.

੨੭੦੮. ਅਨ੍ਤਰਵਾਸਕੋਤਿ ਏਤ੍ਥ ਇਤਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਸਙ੍ਘਾਟਿ, ਉਤ੍ਤਰਾਸਙ੍ਗੋ, ਅਥੋ ਅਨ੍ਤਰਵਾਸਕੋਤਿ ਏਸਮੇਵ ਤੁ ਪਚ੍ਚੁਦ੍ਧਾਰੋਪਿ ਅਧਿਟ੍ਠਾਨਮ੍ਪਿ ਅਤ੍ਥਾਰੋਪਿ ਵੁਤ੍ਤੋਤਿ ਯੋਜਨਾ.

੨੭੦੯. ਅਟ੍ਠਮਾਤਿਕਾ (ਮਹਾਵ. ੩੧੦-੩੧੧; ਪਰਿ. ੪੧੫; ਮਹਾਵ. ਅਟ੍ਠ. ੩੧੦-੩੧੧) ਦਸ੍ਸੇਤੁਮਾਹ ‘‘ਪਕ੍ਕਮਨਞ੍ਚਾ’’ਤਿਆਦਿ. ਪਕ੍ਕਮਨਂ ਅਨ੍ਤੋ ਏਤਸ੍ਸਾਤਿ ਪਕ੍ਕਮਨਨ੍ਤਿਕਾਤਿ ਵਤ੍ਤਬ੍ਬੇ ਉਤ੍ਤਰਪਦਲੋਪੇਨ ‘‘ਪਕ੍ਕਮਨ’’ਨ੍ਤਿ ਵੁਤ੍ਤਂ. ਏਸ ਨਯੋ ਸਬ੍ਬਤ੍ਥ. ਅਟ੍ਠਿਮਾਤਿ ਏਤ੍ਥ ‘‘ਮਾਤਿਕਾ’’ਤਿ ਪਕਰਣਤੋ ਲਬ੍ਭਤਿ. ਇਮਾ ਅਟ੍ਠ ਮਾਤਿਕਾਤਿ ਯੋਜਨਾ.

੨੭੧੦. ਉਦ੍ਦੇਸਾਨੁਕ੍ਕਮੇਨ ਨਿਦ੍ਦਿਸਿਤੁਮਾਹ ‘‘ਕਤਚੀਵਰਮਾਦਾਯਾ’’ਤਿਆਦਿ. ‘‘ਕਤਚੀਵਰਮਾਦਾਯਾ’’ਤਿ ਇਮਿਨਾ ਚੀਵਰਪਲਿਬੋਧੁਪਚ੍ਛੇਦੋ ਦਸ੍ਸਿਤੋ. ‘‘ਆਵਾਸੇ ਨਿਰਪੇਕ੍ਖਕੋ’’ਤਿ ਇਮਿਨਾ ਦੁਤਿਯੋ ਆਵਾਸਪਲਿਬੋਧੁਪਚ੍ਛੇਦੋ ਦਸ੍ਸਿਤੋ. ਏਤ੍ਥ ਸਬ੍ਬਵਾਕ੍ਯੇਸੁ ‘‘ਅਤ੍ਥਤਕਥਿਨੋ ਯੋ ਭਿਕ੍ਖੁ ਸਚੇ ਪਕ੍ਕਮਤੀ’’ਤਿ ਸੇਸੋ. ਅਤਿਕ੍ਕਨ੍ਤਾਯ ਸੀਮਾਯਾਤਿ ਵਿਹਾਰਸੀਮਾਯ ਅਤਿਕ੍ਕਨ੍ਤਾਯ. ਹੋਤਿ ਪਕ੍ਕਮਨਨ੍ਤਿਕਾਤਿ ਏਤ੍ਥ ‘‘ਤਸ੍ਸ ਭਿਕ੍ਖੁਨੋ’’ਤਿ ਸੇਸੋ, ਤਸ੍ਸ ਭਿਕ੍ਖੁਨੋ ਪਕ੍ਕਮਨਨ੍ਤਿਕਾ ਨਾਮ ਮਾਤਿਕਾ ਹੋਤੀਤਿ ਅਤ੍ਥੋ.

੨੭੧੧-੨. ਆਨਿਸਂਸਂ ¶ ਨਾਮ ਵੁਤ੍ਥਵਸ੍ਸੇਨ ਲਦ੍ਧਂ ਅਕਤਸੂਚਿਕਮ੍ਮਵਤ੍ਥਂ. ਤੇਨੇਵ ਵਕ੍ਖਤਿ ‘‘ਕਰੋਤੀ’’ਤਿਆਦਿ. ‘‘ਵਿਹਾਰੇ ਅਨਪੇਕ੍ਖਕੋ’’ਤਿ ਇਮਿਨਾ ਏਤ੍ਥ ਪਠਮਂ ਆਵਾਸਪਲਿਬੋਧੁਪਚ੍ਛੇਦੋ ਦਸ੍ਸਿਤੋ. ਸੁਖਵਿਹਰਣਂ ਪਯੋਜਨਮਸ੍ਸਾਤਿ ਸੁਖਵਿਹਾਰਿਕੋ, ਵਿਹਾਰੋਤਿ. ਤਤ੍ਥ ਤਸ੍ਮਿਂ ਵਿਹਾਰੇ ਵਿਹਰਨ੍ਤੋਵ ਤਂ ਚੀਵਰਂ ਯਦਿ ਕਰੋਤਿ, ਤਸ੍ਮਿਂ ਚੀਵਰੇ ਨਿਟ੍ਠਿਤੇ ਨਿਟ੍ਠਾਨਨ੍ਤਾ ਨਿਟ੍ਠਾਨਨ੍ਤਿਕਾਤਿ ਵੁਚ੍ਚਤੀਤਿ ਯੋਜਨਾ. ‘‘ਨਿਟ੍ਠਿਤੇਚੀਵਰੇ’’ਤਿ ਇਮਿਨਾ ਚੀਵਰਪਲਿਬੋਧੁਪਚ੍ਛੇਦੋ ਦਸ੍ਸਿਤੋ.

੨੭੧੩. ਤਮਸ੍ਸਮਨ੍ਤਿ ਤਂ ਵੁਤ੍ਥਵਸ੍ਸਾਵਾਸਂ. ਧੁਰਨਿਕ੍ਖੇਪੇਤਿ ਉਭਯਧੁਰਨਿਕ੍ਖੇਪਵਸੇਨ ਚਿਤ੍ਤਪ੍ਪਵਤ੍ਤਕ੍ਖਣੇ. ਸਨ੍ਨਿਟ੍ਠਾਨਂ ਨਾਮ ਧੁਰਨਿਕ੍ਖੇਪੋ. ਏਤ੍ਥ ਪਲਿਬੋਧਦ੍ਵਯਸ੍ਸ ਏਕਕ੍ਖਣੇਯੇਵ ਉਪਚ੍ਛੇਦੋ ਅਟ੍ਠਕਥਾਯਂ ¶ ਵੁਤ੍ਤੋ ‘‘ਸਨ੍ਨਿਟ੍ਠਾਨਨ੍ਤਿਕੇ ਦ੍ਵੇਪਿ ਪਲਿਬੋਧਾ ‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’ਨ੍ਤਿ ਚਿਨ੍ਤਿਤਮਤ੍ਤੇਯੇਵ ਏਕਤੋ ਛਿਜ੍ਜਨ੍ਤੀ’’ਤਿ (ਮਹਾਵ. ਅਟ੍ਠ. ੩੧੧).

੨੭੧੪. ਕਥਿਨਚ੍ਛਾਦਨਨ੍ਤਿ ਕਥਿਨਾਨਿਸਂਸਂ ਚੀਵਰਵਤ੍ਥੁਂ. ਨ ਪਚ੍ਚੇਸ੍ਸਨ੍ਤਿ ਨ ਪਚ੍ਚਾਗਮਿਸ੍ਸਾਮਿ. ਕਰੋਨ੍ਤਸ੍ਸੇਵਾਤਿ ਏਤ੍ਥ ‘‘ਚੀਵਰ’’ਨ੍ਤਿ ਪਕਰਣਤੋ ਲਬ੍ਭਤਿ. ‘‘ਕਥਿਨਚ੍ਛਾਦਨ’’ਨ੍ਤਿ ਇਦਂ ਵਾ ਸਮ੍ਬਨ੍ਧਨੀਯਂ. ਕਰੋਨ੍ਤਸ੍ਸਾਤਿ ਅਨਾਦਰੇ ਸਾਮਿਵਚਨਂ. ਨਟ੍ਠਨ੍ਤਿ ਚੋਰੇਹਿ ਹਟਤ੍ਤਾ ਵਾ ਉਪਚਿਕਾਦੀਹਿ ਖਾਦਿਤਤ੍ਤਾ ਵਾ ਨਟ੍ਠਂ. ਦਡ੍ਢਂ ਵਾਤਿ ਅਗ੍ਗਿਨਾ ਦਡ੍ਢਂ ਵਾ. ਨਾਸਨਨ੍ਤਿਕਾਤਿ ਏਵਂ ਚੀਵਰਸ੍ਸ ਨਾਸਨਨ੍ਤੇ ਲਬ੍ਭਮਾਨਾ ਅਯਂ ਮਾਤਿਕਾ ਨਾਸਨਨ੍ਤਿਕਾ ਨਾਮਾਤਿ ਅਤ੍ਥੋ. ਏਤ੍ਥ ‘‘ਨ ਪਚ੍ਚੇਸ੍ਸ’’ਨ੍ਤਿ ਇਮਿਨਾ ਪਠਮਂ ਆਵਾਸਪਲਿਬੋਧੁਪਚ੍ਛੇਦੋ ਦਸ੍ਸਿਤੋ. ‘‘ਕਰੋਨ੍ਤਸ੍ਸੇਵਾ’’ਤਿ ਇਮਿਨਾ ਦੁਤਿਯਂ ਚੀਵਰਪਲਿਬੋਧੁਪਚ੍ਛੇਦੋ ਦਸ੍ਸਿਤੋ.

੨੭੧੫. ਲਦ੍ਧਾਨਿਸਂਸੋਤਿ ਲਦ੍ਧਕਥਿਨਾਨਿਸਂਸਚੀਵਰੋ. ਆਨਿਸਂਸੇ ਚੀਵਰੇ ਸਾਪੇਕ੍ਖੋ ਅਪੇਕ੍ਖਵਾ ਬਹਿਸੀਮਗਤੋ ਵਸ੍ਸਂਵੁਤ੍ਥਸੀਮਾਯ ¶ ਬਹਿਸੀਮਗਤੋ ਤਂ ਚੀਵਰਂ ਕਰੋਤਿ, ਸੋ ਕਤਚੀਵਰੋ ਅਨ੍ਤਰੁਬ੍ਭਾਰਂ ਅਨ੍ਤਰਾ ਉਬ੍ਭਾਰਂ ਸੁਣਾਤਿ ਚੇ, ਸਵਨਨ੍ਤਿਕਾ ਨਾਮ ਹੋਤੀਤਿ ਯੋਜਨਾ. ‘‘ਬਹਿਸੀਮਗਤੋ’’ਤਿਆਦਿਨਾ ਦੁਤਿਯਪਲਿਬੋਧੁਪਚ੍ਛੇਦੋ ਦਸ੍ਸਿਤੋ. ਏਤ੍ਥ ‘‘ਕਤਚੀਵਰੋ’’ਤਿ ਵੁਤ੍ਤਤ੍ਤਾ ਚੀਵਰਪਲਿਬੋਧੁਪਚ੍ਛੇਦੋ ਪਠਮਂ ਹੋਤਿ, ਇਤਰੋ ਪਨ ‘‘ਸਹ ਸਵਨੇਨ ਆਵਾਸਪਲਿਬੋਧੋ ਛਿਜ੍ਜਤੀ’’ਤਿ (ਮਹਾਵ. ਅਟ੍ਠ. ੩੧੧) ਅਟ੍ਠਕਥਾਯ ਵੁਤ੍ਤਤ੍ਤਾ ਪਚ੍ਛਾ ਹੋਤਿ.

੨੭੧੬-੭. ਚੀਵਰਾਸਾਯ ਵਸ੍ਸਂਵੁਤ੍ਥੋ ਆਵਾਸਤੋ ਪਕ੍ਕਨ੍ਤੋ ‘‘ਤੁਯ੍ਹਂ ਚੀਵਰਂ ਦਸ੍ਸਾਮੀ’’ਤਿ ਕੇਨਚਿ ਵੁਤ੍ਤੋ ਬਹਿਸੀਮਗਤੋ ਪਨ ਸਵਤਿ, ਪੁਨ ‘‘ਤਵ ਚੀਵਰਂ ਦਾਤੁਂ ਨ ਸਕ੍ਕੋਮੀ’’ਤਿ ਵੁਤ੍ਤੋ ਆਸਾਯ ਛਿਨ੍ਨਮਤ੍ਤਾਯ ਚੀਵਰੇ ਪਚ੍ਚਾਸਾਯ ਉਪਚ੍ਛਿਨ੍ਨਮਤ੍ਤਾਯ ਆਸਾਵਚ੍ਛੇਦਿਕਾ ਨਾਮ ਮਾਤਿਕਾਤਿ ਮਤਾ ਞਾਤਾਤਿ ਯੋਜਨਾ. ਆਸਾਵਚ੍ਛਾਦਿਕੇ ਕਥਿਨੁਬ੍ਭਾਰੇ ਆਵਾਸਪਲਿਬੋਧੋ ਪਠਮਂ ਛਿਜ੍ਜਤਿ, ਚੀਵਰਾਸਾਯ ਉਪਚ੍ਛਿਨ੍ਨਾਯ ਚੀਵਰਪਲਿਬੋਧੋ ਛਿਜ੍ਜਤਿ.

੨੭੧੮-੨੦. ਯੋ ਵਸ੍ਸਂਵੁਤ੍ਥਵਿਹਾਰਮ੍ਹਾ ਅਞ੍ਞਂ ਵਿਹਾਰਂ ਗਤੋ ਹੋਤਿ, ਸੋ ਆਗਚ੍ਛਂ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਕਥਿਨੁਦ੍ਧਾਰਂ ਅਤਿਕ੍ਕਮੇਯ੍ਯ, ਤਸ੍ਸ ਸੋ ਕਥਿਨੁਦ੍ਧਾਰੋ ਸੀਮਾਤਿਕ੍ਕਨ੍ਤਿਕੋ ਮਤੋਤਿ ਯੋਜਨਾ. ਤਤ੍ਥ ਸੀਮਾਤਿਕ੍ਕਨ੍ਤਿਕੇ ਕਥਿਨੁਬ੍ਭਾਰੇ ਚੀਵਰਪਲਿਬੋਧੋ ਪਠਮਂ ਛਿਜ੍ਜਤਿ, ਤਸ੍ਸ ਬਹਿਸੀਮੇ ਆਵਾਸਪਲਿਬੋਧੋ ਛਿਜ੍ਜਤਿ.

ਏਤ੍ਥ ¶ ਚ ‘‘ਸੀਮਾਤਿਕ੍ਕਨ੍ਤਿਕੋ ਨਾਮ ਚੀਵਰਕਾਲਸੀਮਾਤਿਕ੍ਕਨ੍ਤਿਕੋ’’ਤਿ ਕੇਨਚਿ ਵੁਤ੍ਤਂ. ‘‘ਬਹਿਸੀਮਾਯਂ ਚੀਵਰਕਾਲਸਮਯਸ੍ਸ ਅਤਿਕ੍ਕਨ੍ਤਤ੍ਤਾ ਸੀਮਾਤਿਕ੍ਕਨ੍ਤਿਕੋ’’ਤਿ (ਸਾਰਤ੍ਥ. ਟੀ. ਮਹਾਵ. ੩੧੧) ਸਾਰਤ੍ਥਦੀਪਨਿਯਂ ਵੁਤ੍ਤਂ. ‘‘ਆਗਚ੍ਛਂ ਅਨ੍ਤਰਾਮਗ੍ਗੇ, ਤਦੁਦ੍ਧਾਰਮਤਿਕ੍ਕਮੇ’’ਤਿ ਵੁਤ੍ਤਤ੍ਤਾ ਪਨ ਸਙ੍ਘੇਨ ¶ ਕਰਿਯਮਾਨਂ ਅਨ੍ਤਰੁਬ੍ਭਾਰਂ ਆਗਚ੍ਛਨ੍ਤੋ ਵਿਹਾਰਸੀਮਂ ਅਸਮ੍ਪਤ੍ਤੇਯੇਵ ਕਥਿਨੁਬ੍ਭਾਰਸ੍ਸ ਜਾਤਤ੍ਤਾ ਤਂ ਨ ਸਮ੍ਭੁਣੇਯ੍ਯ, ਤਸ੍ਸੇਵਂ ਸੀਮਮਤਿਕ੍ਕਨ੍ਤਸ੍ਸੇਵ ਸਤੋ ਪੁਨ ਆਗਚ੍ਛਤੋ ਅਨ੍ਤਰਾਮਗ੍ਗੇ ਜਾਤੋ ਕਥਿਨੁਬ੍ਭਾਰੋ ਸੀਮਾਤਿਕ੍ਕਨ੍ਤਿਕੋਤਿ ਅਮ੍ਹਾਕਂ ਖਨ੍ਤਿ.

ਕਥਿਨਾਨਿਸਂਸਚੀਵਰਂ ਆਦਾਯ ਸਚੇ ਆਵਾਸੇ ਸਾਪੇਕ੍ਖੋਵ ਗਤੋ ਹੋਤਿ, ਪੁਨ ਆਗਨ੍ਤ੍ਵਾ ਕਥਿਨੁਦ੍ਧਾਰਂ ਕਥਿਨਸ੍ਸ ਅਨ੍ਤਰੁਬ੍ਭਾਰਮੇਵ ਸਮ੍ਭੁਣਾਤਿ ਚੇ ਯਦਿ ਪਾਪੁਣੇਯ੍ਯ, ਤਸ੍ਸ ਸੋ ਕਥਿਨੁਦ੍ਧਾਰੋ ਹੋਤਿ, ਸੋ ‘‘ਸਹੁਬ੍ਭਾਰੋ’’ਤਿ ਵੁਚ੍ਚਤੀਤਿ ਯੋਜਨਾ. ਸਹੁਬ੍ਭਾਰੇ ਦ੍ਵੇ ਪਲਿਬੋਧਾ ਅਪੁਬ੍ਬਂ ਅਚਰਿਮਂ ਛਿਜ੍ਜਨ੍ਤਿ.

੨੭੨੧. ‘‘ਸੀਮਾਤਿਕ੍ਕਨ੍ਤਿਕੇਨਾ’’ਤਿ ਵਤ੍ਤਬ੍ਬੇ ਉਤ੍ਤਰਪਦਲੋਪੇਨ ‘‘ਸੀਮਤੋ’’ਤਿ ਵੁਤ੍ਤਂ. ਪਕ੍ਕਮਨਞ੍ਚ ਨਿਟ੍ਠਾਨਞ੍ਚ ਸਨ੍ਨਿਟ੍ਠਾਨਞ੍ਚ ਸੀਮਤੋ ਸੀਮਾਤਿਕ੍ਕਨ੍ਤਿਕੇਨ ਸਹ ਇਮੇ ਚਤ੍ਤਾਰੋ ਕਥਿਨੁਬ੍ਭਾਰਾ ਪੁਗ੍ਗਲਾਧੀਨਾ ਪੁਗ੍ਗਲਾਯਤ੍ਤਾ ਸਹੁਬ੍ਭਾਰਸਙ੍ਖਾਤੋ ਅਨ੍ਤਰੁਬ੍ਭਾਰੋ ਸਙ੍ਘਾਧੀਨੋਤਿ ਯੋਜਨਾ. ‘‘ਅਨ੍ਤਰੁਬ੍ਭਰੋ’’ਤਿ ਗਾਥਾਬਨ੍ਧਵਸੇਨ ਰਸ੍ਸਤ੍ਤਂ.

੨੭੨੨. ਨਾਸਨਨ੍ਤਿ ਨਾਸਨਨ੍ਤਿਕੋ. ਸਵਨਨ੍ਤਿ ਸਵਨਨ੍ਤਿਕੋ. ਆਸਾਵਚ੍ਛੇਦਿਕਾਪਿ ਚਾਤਿ ਤਯੋਪਿ ਕਥਿਨੁਬ੍ਭਾਰਾ. ਨ ਤੁ ਸਙ੍ਘਾ ਨ ਭਿਕ੍ਖੁਤੋਤਿ ਸਙ੍ਘਤੋਪਿ ਨ ਹੋਨ੍ਤਿ, ਪੁਗ੍ਗਲਤੋਪਿ ਨ ਹੋਨ੍ਤੀਤਿ ਅਤ੍ਥੋ. ਚੀਵਰਸ੍ਸ ਵਿਨਾਸੋ ਸਙ੍ਘਸ੍ਸ ਵਾ ਚੀਵਰਸਾਮਿਕਸ੍ਸ ਵਾ ਪਯੋਗੇਨ ਨ ਜਾਤੋਤਿ ਨਾਸਨਕੋ ਤਾਵ ਕਥਿਨੁਬ੍ਭਾਰੋ ਉਭਤੋਪਿ ਨ ਹੋਤੀਤਿ ਵੁਤ੍ਤੋ. ਸਵਨਞ੍ਚ ਉਭਯੇਸਂ ਪਯੋਗਤੋ ਨ ਜਾਤਨ੍ਤਿ ਤਥਾ ਵੁਤ੍ਤਂ. ਤਥਾ ਆਸਾਵਚ੍ਛੇਦਿਕਾਪਿ.

੨੭੨੩. ਆਵਾਸੋਯੇਵ ਪਲਿਬੋਧੋਤਿ ਵਿਗ੍ਗਹੋ. ਪਲਿਬੋਧੋ ਚ ਚੀਵਰੇਤਿ ਏਤ੍ਥ ਚੀਵਰੇਤਿ ਭੇਦਵਚਨਿਚ੍ਛਾਯ ਨਿਮਿਤ੍ਤਤ੍ਥੇ ¶ ਭੁਮ੍ਮਂ, ਚੀਵਰਨਿਮਿਤ੍ਤਪਲਿਬੋਧੋਤਿ ਅਤ੍ਥੋ, ਚੀਵਰਸਙ੍ਖਾਤੋ ਪਲਿਬੋਧੋਤਿ ਵੁਤ੍ਤਂ ਹੋਤਿ. ਸਚ੍ਚਾਦਿਗੁਣਯੁਤ੍ਤਂ ਮੁਸਾਵਾਦਾਦਿਦੋਸਵਿਮੁਤ੍ਤਂ ਅਤ੍ਥਂ ਵਦਤਿ ਸੀਲੇਨਾਤਿ ਯੁਤ੍ਤਮੁਤ੍ਤਤ੍ਥਵਾਦੀ, ਤੇਨ.

੨੭੨੪. ਅਟ੍ਠਨ੍ਨਂ ¶ ਮਾਤਿਕਾਨਨ੍ਤਿ ਬਹਿਸੀਮਗਤਾਨਂ ਵਸੇਨ ਵੁਤ੍ਤਾ ਪਕ੍ਕਮਨਨ੍ਤਿਕਾਦਯੋ ਸਤ੍ਤ ਮਾਤਿਕਾ, ਬਹਿਸੀਮਂ ਗਨ੍ਤ੍ਵਾ ਅਨ੍ਤਰੁਬ੍ਭਾਰਂ ਸਮ੍ਭੁਣਨ੍ਤਸ੍ਸ ਵਸੇਨ ਵੁਤ੍ਤੋ ਸਹੁਬ੍ਭਾਰੋਤਿ ਇਮਾਸਂ ਅਟ੍ਠਨ੍ਨਂ ਮਾਤਿਕਾਨਂ ਵਸੇਨ ਚ. ਅਨ੍ਤਰੁਬ੍ਭਾਰਤੋਪਿ ਵਾਤਿ ਬਹਿਸੀਮਂ ਅਗਨ੍ਤ੍ਵਾ ਤਤ੍ਥੇਵ ਵਸਿਤ੍ਵਾ ਕਥਿਨੁਬ੍ਭਾਰਕਮ੍ਮੇਨ ਉਬ੍ਭਾਰਕਥਿਨਾਨਂ ਵਸੇਨ ਲਬ੍ਭਨਤੋ ਅਨ੍ਤਰੁਬ੍ਭਾਰਤੋ ਚਾਤਿ ਮਹੇਸਿਨਾ ਕਥਿਨਸ੍ਸ ਦੁਵੇ ਉਬ੍ਭਾਰਾਪਿ ਵੁਤ੍ਤਾਤਿ ਯੋਜਨਾ. ਬਹਿਸੀਮਂ ਗਨ੍ਤ੍ਵਾ ਆਗਤਸ੍ਸ ਵਸੇਨ ਸਹੁਬ੍ਭਾਰੋ, ਬਹਿਸੀਮਂ ਆਗਤਾਨਂ ਵਸੇਨ ਅਨ੍ਤਰੁਬ੍ਭਾਰੋਤਿ ਏਕੋਯੇਵ ਉਬ੍ਭਾਰੋ ਦ੍ਵਿਧਾ ਵੁਤ੍ਤੋ, ਤਸ੍ਮਾ ਅਨ੍ਤਰੁਬ੍ਭਾਰਂ ਵਿਸੁਂ ਅਗ੍ਗਹੇਤ੍ਵਾ ਅਟ੍ਠੇਵ ਮਾਤਿਕਾ ਪਾਲ਼ਿਯਂ (ਮਹਾਵ. ੩੧੦) ਵਿਭਤ੍ਤਾਤਿ ਵੇਦਿਤਬ੍ਬਾ.

੨੭੨੫. ਅਨਾਮਨ੍ਤਚਾਰੋ ਉਤ੍ਤਰਪਦਲੋਪਵਸੇਨ ‘‘ਅਨਾਮਨ੍ਤਾ’’ ਇਤਿ ਵੁਤ੍ਤੋ. ਯਾਵ ਕਥਿਨਂ ਨ ਉਦ੍ਧਰੀਯਤਿ, ਤਾਵ ਅਨਾਮਨ੍ਤੇਤ੍ਵਾ ਚਰਣਂ ਕਪ੍ਪਿਸ੍ਸਤਿ, ਚਾਰਿਤ੍ਤਸਿਕ੍ਖਾਪਦੇਨ ਅਨਾਪਤ੍ਤਿ ਭਵਿਸ੍ਸਤੀਤਿ ਅਤ੍ਥੋ.

ਅਸਮਾਦਾਨਚਾਰੋ ‘‘ਅਸਮਾਦਾਨ’’ਨ੍ਤਿ ਉਤ੍ਤਰਪਦਲੋਪੇਨ ਵੁਤ੍ਤੋ. ਅਸਮਾਦਾਨਚਾਰੋਤਿ ਤਿਚੀਵਰਂ ਅਸਮਾਦਾਯ ਚਰਣਂ, ਚੀਵਰਵਿਪ੍ਪਵਾਸੋ ਕਪ੍ਪਿਸ੍ਸਤੀਤਿ ਅਤ੍ਥੋ.

‘‘ਗਣਤੋ’’ਤਿ ਇਮਿਨਾ ਉਤ੍ਤਰਪਦਲੋਪੇਨ ਗਣਭੋਜਨਂ ਦਸ੍ਸਿਤਂ. ਗਣਭੋਜਨਮ੍ਪਿ ਕਪ੍ਪਿਸ੍ਸਤਿ, ਤਂ ਸਰੂਪਤੋ ਪਾਚਿਤ੍ਤਿਯਕਣ੍ਡੇ ਵੁਤ੍ਤਂ.

‘‘ਯਾਵਦਤ੍ਥਿਕ’’ਨ੍ਤਿ ¶ ਇਮਿਨਾ ਯਾਵਦਤ੍ਥਚੀਵਰਂ ਵੁਤ੍ਤਂ. ਯਾਵਦਤ੍ਥਚੀਵਰਨ੍ਤਿ ਯਾਵਤਕੇਨ ਚੀਵਰੇਨ ਅਤ੍ਥੋ, ਤਾਵਤਕਂ ਅਨਧਿਟ੍ਠਿਤਂ ਅਵਿਕਪ੍ਪਿਤਂ ਕਪ੍ਪਿਸ੍ਸਤੀਤਿ ਅਤ੍ਥੋ.

‘‘ਤਤ੍ਥ ਯੋ ਚੀਵਰੁਪ੍ਪਾਦੋ’’ਤਿ ਇਮਿਨਾ ‘‘ਯੋ ਚ ਤਤ੍ਥ ਚੀਵਰੁਪ੍ਪਾਦੋ’’ਤਿ (ਮਹਾਵ. ੩੦੬) ਵੁਤ੍ਤੋ ਆਨਿਸਂਸੋ ਦਸ੍ਸਿਤੋ. ਯੋ ਚ ਤਤ੍ਥ ਚੀਵਰੁਪ੍ਪਾਦੋਤਿ ਤਤ੍ਥ ਕਥਿਨਤ੍ਥਤਸੀਮਾਯਂ ਮਤਕਚੀਵਰਂ ਵਾ ਹੋਤੁ ਸਙ੍ਘਸ੍ਸ ਉਦ੍ਦਿਸ੍ਸ ਦਿਨ੍ਨਂ ਵਾ ਸਙ੍ਘਿਕੇਨ ਤਤ੍ਰੁਪ੍ਪਾਦੇਨ ਆਭਤਂ ਵਾ, ਯੇਨ ਕੇਨਚਿ ਆਕਾਰੇਨ ਯਂ ਸਙ੍ਘਿਕਂ ਚੀਵਰਂ ਉਪ੍ਪਜ੍ਜਤਿ, ਤਂ ਤੇਸਂ ਭਵਿਸ੍ਸਤੀਤਿ ਅਤ੍ਥੋ. ਇਮੇ ਪਞ੍ਚ ਕਥਿਨਾਨਿਸਂਸਾ ਚ ਵੁਤ੍ਤਾਤਿ ਸਮ੍ਬਨ੍ਧੋ.

ਕਥਿਨਕ੍ਖਨ੍ਧਕਕਥਾਵਣ੍ਣਨਾ.

ਚੀਵਰਕ੍ਖਨ੍ਧਕਕਥਾਵਣ੍ਣਨਾ

੨੭੨੬-੭. ਚੀਵਰਂ ¶ ਉਪ੍ਪਜ੍ਜਤਿ ਏਤਾਸੂਤਿ ‘‘ਉਪ੍ਪਾਦਾ’’ਤਿ ਜਨਿਕਾਵ ਵੁਚ੍ਚਨ੍ਤਿ, ਚੀਵਰਵਤ੍ਥਪਰਿਲਾਭਕ੍ਖੇਤ੍ਤਨ੍ਤਿ ਅਤ੍ਥੋ. ਯਥਾਹ – ‘‘ਯਥਾਵੁਤ੍ਤਾਨਂ ਚੀਵਰਾਨਂ ਪਟਿਲਾਭਾਯ ਖੇਤ੍ਤਂ ਦਸ੍ਸੇਤੁਂ ਅਟ੍ਠਿਮਾ ਭਿਕ੍ਖਵੇ ਮਾਤਿਕਾਤਿਆਦਿਮਾਹਾ’’ਤਿ (ਮਹਾਵ. ਅਟ੍ਠ. ੩੭੯). ਚੀਵਰਮਾਤਿਕਾਤਿ ਚੀਵਰੁਪ੍ਪਾਦਹੇਤੁਭੂਤਮਾਤਰੋ. ਤੇਨਾਹ ਕਥਿਨਕ੍ਖਨ੍ਧਕਵਣ੍ਣਨਾਯਂ ‘‘ਮਾਤਿਕਾਤਿ ਮਾਤਰੋ, ਜਨੇਤ੍ਤਿਯੋਤਿ ਅਤ੍ਥੋ’’ਤਿ (ਮਹਾਵ. ਅਟ੍ਠ. ੩੧੦). ਮਾਤਿਕਾਤਿ ਚੇਤ੍ਥ ਚੀਵਰਦਾਨਮਧਿਪ੍ਪੇਤਂ. ਯਥਾਹ ‘‘ਸੀਮਾਯ ਦਾਨਂ ਏਕਾ ਮਾਤਿਕਾ, ਕਤਿਕਾਯ ਦਾਨਂ ਦੁਤਿਯਾ’’ਤਿਆਦਿ. ਸੀਮਾਯ ਦੇਤਿ, ਕਤਿਕਾਯ ਦੇਤਿ, ਭਿਕ੍ਖਾਪਞ੍ਞਤ੍ਤਿਯਾ ਦੇਤਿ, ਸਙ੍ਘਸ੍ਸ ਦੇਤਿ, ਉਭਤੋਸਙ੍ਘੇ ਦੇਤਿ, ਵਸ੍ਸਂਵੁਤ੍ਥਸਙ੍ਘਸ੍ਸ ਦੇਤਿ, ਆਦਿਸ੍ਸ ਦੇਤਿ, ਪੁਗ੍ਗਲਸ੍ਸ ਦੇਤਿ. ‘‘ਇਮਾ ਪਨ ਅਟ੍ਠ ਮਾਤਿਕਾ’’ਤਿ ਵੁਤ੍ਤਮੇਵ ਨਿਗਮਨਵਸੇਨ ਵੁਤ੍ਤਂ.

੨੭੨੮. ਤਤ੍ਥਾਤਿ ¶ ਤਾਸੁ ਅਟ੍ਠਮਾਤਿਕਾਸੁ. ਸੀਮਾਯ ਦੇਤੀਤਿ ‘‘ਸੀਮਾਯ ਦਮ੍ਮੀ’’ਤਿ ਏਵਂ ਸੀਮਂ ਪਰਾਮਸਿਤ੍ਵਾ ਦੇਨ੍ਤੋ ਸੀਮਾਯ ਦੇਤਿ, ਏਵਂ ਦਿਨ੍ਨਂ ਅਨ੍ਤੋਸੀਮਗਤੇਹਿ ਭਿਕ੍ਖੂਹਿ ਭਾਜੇਤਬ੍ਬਨ੍ਤਿ ਵਣ੍ਣਿਤਨ੍ਤਿ ਯੋਜਨਾ. ਤਤ੍ਥ ਅਨ੍ਤੋਸੀਮਗਤੇਹੀਤਿ ਦਾਯਕੋ ਯਂ ਸੀਮਂ ਅਪੇਕ੍ਖਿਤ੍ਵਾ ਏਵਮਾਹ, ਤਸ੍ਸਾ ਸੀਮਾਯ ਅਨ੍ਤੋਗਤੇਹਿ ਸਬ੍ਬੇਹਿ. ਭਾਜੇਤਬ੍ਬਨ੍ਤਿ ਤਂ ਚੀਵਰਂ ਭਾਜੇਤਬ੍ਬਂ. ਵਰਵਣ੍ਣਿਨਾਤਿ ‘‘ਇਤਿਪਿ ਸੋ ਭਗਵਾ ਅਰਹ’’ਨ੍ਤਿਆਦਿਨਾ ਸਕਲਲੋਕਬ੍ਯਾਪਿਗੁਣਾਤਿਸਯਯੁਤ੍ਤੇਨ ਬ੍ਯਾਮਪ੍ਪਭਾਯ, ਛਬ੍ਬਣ੍ਣਾਨਂ ਰਂਸੀਨਞ੍ਚ ਵਸੇਨ ਉਤ੍ਤਮਪ੍ਪਭਾਤਿਸਯਯੁਤ੍ਤੇਨ ਵਰਵਣ੍ਣਿਨਾ ਵਣ੍ਣਿਤਂ ਕਥਿਤਂ. ਅਯਮੇਤ੍ਥ ਪਦਵਣ੍ਣਨਾ, ਅਯਂ ਪਨ ਵਿਨਿਚ੍ਛਯੋ – ਸੀਮਾਯ ਦੇਤੀਤਿ ਏਤ੍ਥ ਤਾਵ ਖਣ੍ਡਸੀਮਾ ਉਪਚਾਰਸੀਮਾ ਸਮਾਨਸਂਵਾਸਸੀਮਾ ਅਵਿਪ੍ਪਵਾਸਸੀਮਾ ਲਾਭਸੀਮਾ ਗਾਮਸੀਮਾ ਨਿਗਮਸੀਮਾ ਨਗਰਸੀਮਾ ਅਬ੍ਭਨ੍ਤਰਸੀਮਾ ਉਦਕੁਕ੍ਖੇਪਸੀਮਾ ਜਨਪਦਸੀਮਾ ਰਟ੍ਠਸੀਮਾ ਰਜ੍ਜਸੀਮਾ ਦੀਪਸੀਮਾ ਚਕ੍ਕਵਾਲ਼ਸੀਮਾ ਇਤਿ ਪਨ੍ਨਰਸ ਸੀਮਾ ਵੇਦਿਤਬ੍ਬਾ.

ਤਤ੍ਥ ਖਣ੍ਡਸੀਮਾ ਸੀਮਾਕਥਾਯਂ ਵੁਤ੍ਤਾ. ਉਪਚਾਰਸੀਮਾ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪੇਨ, ਅਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਾਰਹਟ੍ਠਾਨੇਨ ਪਰਿਚ੍ਛਿਨ੍ਨਾ ਹੋਤਿ. ਅਪਿਚ ਭਿਕ੍ਖੂਨਂ ਧੁਵਸਨ੍ਨਿਪਾਤਟ੍ਠਾਨਤੋ ਵਾ ਪਰਿਯਨ੍ਤੇ ਠਿਤਭੋਜਨਸਾਲਤੋ ਵਾ ਨਿਬਦ੍ਧਵਸਨਕਆਵਾਸਤੋ ਵਾ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਦ੍ਵਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤੋ ਉਪਚਾਰਸੀਮਾ ਵੇਦਿਤਬ੍ਬਾ. ਸਾ ਪਨ ਆਵਾਸੇਸੁ ਵਡ੍ਢਨ੍ਤੇਸੁ ਵਡ੍ਢਤਿ, ਪਰਿਹਾਯਨ੍ਤੇਸੁ ਪਰਿਹਾਯਤਿ. ਮਹਾਪਚ੍ਚਰਿਯਂ ਪਨ ‘‘ਭਿਕ੍ਖੂਸੁਪਿ ਵਡ੍ਢਨ੍ਤੇਸੁ ਵਡ੍ਢਤੀ’’ਤਿ (ਮਹਾਵ. ਅਟ੍ਠ. ੩੭੯) ਵੁਤ੍ਤਂ. ਤਸ੍ਮਾ ਸਚੇ ਵਿਹਾਰੇ ਸਨ੍ਨਿਪਤਿਤਭਿਕ੍ਖੂਹਿ ਸਦ੍ਧਿਂ ¶ ਏਕਾਬਦ੍ਧਾ ਹੁਤ੍ਵਾ ਯੋਜਨਸਤਮ੍ਪਿ ਪੂਰੇਤ੍ਵਾ ਨਿਸੀਦਨ੍ਤਿ, ਯੋਜਨਸਤਮ੍ਪਿ ਉਪਚਾਰਸੀਮਾਵ ਹੋਤਿ, ਸਬ੍ਬੇਸਂ ਲਾਭੋ ਪਾਪੁਣਾਤਿ. ਸਮਾਨਸਂਵਾਸਅਵਿਪ੍ਪਵਾਸਸੀਮਾਦ੍ਵਯਮ੍ਪਿ ਵੁਤ੍ਤਮੇਵ.

ਲਾਭਸੀਮਾ ¶ ਨਾਮ ਨੇਵ ਸਮ੍ਮਾਸਮ੍ਬੁਦ੍ਧੇਨ ਅਨੁਞ੍ਞਾਤਾ, ਨ ਧਮ੍ਮਸਙ੍ਗਾਹਕਤ੍ਥੇਰੇਹਿ ਠਪਿਤਾ, ਅਪਿਚ ਖੋ ਰਾਜਰਾਜਮਹਾਮਤ੍ਤਾ ਵਿਹਾਰਂ ਕਾਰੇਤ੍ਵਾ ਗਾਵੁਤਂ ਵਾ ਅਡ੍ਢਯੋਜਨਂ ਵਾ ਯੋਜਨਂ ਵਾ ਸਮਨ੍ਤਤੋ ਪਰਿਚ੍ਛਿਨ੍ਦਿਤ੍ਵਾ ‘‘ਅਯਂ ਅਮ੍ਹਾਕਂ ਵਿਹਾਰਸ੍ਸ ਲਾਭਸੀਮਾ’’ਤਿ ਨਾਮਲਿਖਿਤਕੇ ਥਮ੍ਭੇ ਨਿਖਣਿਤ੍ਵਾ ‘‘ਯਂ ਏਤ੍ਥਨ੍ਤਰੇ ਉਪ੍ਪਜ੍ਜਤਿ, ਸਬ੍ਬਂ ਤਂ ਅਮ੍ਹਾਕਂ ਵਿਹਾਰਸ੍ਸ ਦੇਮਾ’’ਤਿ ਸੀਮਂ ਠਪੇਨ੍ਤਿ, ਅਯਂ ਲਾਭਸੀਮਾ ਨਾਮ. ਗਾਮਨਿਗਮਨਗਰਅਬ੍ਭਨ੍ਤਰਉਦਕੁਕ੍ਖੇਪਸੀਮਾਪਿ ਵੁਤ੍ਤਾ ਏਵ.

ਜਨਪਦਸੀਮਾ ਨਾਮ ਕਾਸਿਕੋਸਲਰਟ੍ਠਾਦੀਨਂ ਅਨ੍ਤੋ ਬਹੂ ਜਨਪਦਾ ਹੋਨ੍ਤਿ, ਏਤ੍ਥ ਏਕੇਕੋ ਜਨਪਦਪਰਿਚ੍ਛੇਦੋ ਜਨਪਦਸੀਮਾ. ਰਟ੍ਠਸੀਮਾ ਨਾਮ ਕਾਸਿਕੋਸਲਾਦਿਰਟ੍ਠਪਰਿਚ੍ਛੇਦੋ. ਰਜ੍ਜਸੀਮਾ ਨਾਮ ਮਹਾਚੋਲ਼ਭੋਗੋ ਕੇਰਲ਼ਭੋਗੋਤਿ ਏਵਂ ਏਕੇਕਸ੍ਸ ਰਞ੍ਞੋ ਆਣਾਪਵਤ੍ਤਿਟ੍ਠਾਨਂ. ਦੀਪਸੀਮਾ ਨਾਮ ਸਮੁਦ੍ਦਨ੍ਤੇਨ ਸਮੁਚ੍ਛਿਨ੍ਨਮਹਾਦੀਪਾ ਚ ਅਨ੍ਤਰਦੀਪਾ ਚ. ਚਕ੍ਕਵਾਲ਼ਸੀਮਾ ਨਾਮ ਚਕ੍ਕਵਾਲ਼ਪਬ੍ਬਤੇਨੇਵ ਪਰਿਚ੍ਛਿਨ੍ਨਾ.

ਏਵਮੇਤਾਸੁ ਸੀਮਾਸੁ ਖਣ੍ਡਸੀਮਾਯ ਕੇਨਚਿ ਕਮ੍ਮੇਨ ਸਨ੍ਨਿਪਤਿਤਂ ਸਙ੍ਘਂ ਦਿਸ੍ਵਾ ‘‘ਏਤ੍ਥੇਵ ਸੀਮਾਯ ਸਙ੍ਘਸ੍ਸ ਦੇਮੀ’’ਤਿ ਵੁਤ੍ਤੇ ਯਾਵਤਿਕਾ ਭਿਕ੍ਖੂ ਅਨ੍ਤੋਖਣ੍ਡਸੀਮਗਤਾ, ਤੇਹਿ ਭਾਜੇਤਬ੍ਬਂ. ਤੇਸਂਯੇਵ ਹਿ ਤਂ ਪਾਪੁਣਾਤਿ, ਅਞ੍ਞੇਸਂ ਸੀਮਨ੍ਤਰਿਕਾਯ ਵਾ ਉਪਚਾਰਸੀਮਾਯ ਵਾ ਠਿਤਾਨਮ੍ਪਿ ਨ ਪਾਪੁਣਾਤਿ. ਖਣ੍ਡਸੀਮਾਯ ਠਿਤੇ ਪਨ ਰੁਕ੍ਖੇ ਵਾ ਪਬ੍ਬਤੇ ਵਾ ਠਿਤਸ੍ਸ ਹੇਟ੍ਠਾ ਵਾ ਪਥਵਿਯਾ ਵੇਮਜ੍ਝਂ ਗਤਸ੍ਸ ਪਾਪੁਣਾਤਿਯੇਵ.

‘‘ਇਮਿਸ੍ਸਾ ਉਪਚਾਰਸੀਮਾਯ ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨਂ ਪਨ ਖਣ੍ਡਸੀਮਾਸੀਮਨ੍ਤਰਿਕਾਸੁ ਠਿਤਾਨਮ੍ਪਿ ਪਾਪੁਣਾਤਿ. ‘‘ਸਮਾਨਸਂਵਾਸਸੀਮਾਯ ਦਮ੍ਮੀ’’ਤਿ ਦਿਨ੍ਨਂ ਪਨ ਖਣ੍ਡਸੀਮਾਸੀਮਨ੍ਤਰਿਕਾਸੁ ਠਿਤਾਨਂ ਨ ਪਾਪੁਣਾਤਿ. ਅਵਿਪ੍ਪਵਾਸਸੀਮਾਲਾਭਸੀਮਾਸੁ ਦਿਨ੍ਨਂ ਤਾਸੁ ਸੀਮਾਸੁ ਅਨ੍ਤੋਗਤਾਨਂਯੇਵ ਪਾਪੁਣਾਤਿ. ਗਾਮਸੀਮਾਦੀਸੁ ਦਿਨ੍ਨਂ ¶ ਤਾਸਂ ਸੀਮਾਨਂ ਅਬ੍ਭਨ੍ਤਰੇ ਬਦ੍ਧਸੀਮਾਯ ਠਿਤਾਨਮ੍ਪਿ ਪਾਪੁਣਾਤਿ. ਅਬ੍ਭਨ੍ਤਰਸੀਮਾਉਦਕੁਕ੍ਖੇਪਸੀਮਾਸੁ ਦਿਨ੍ਨਂ ਤਤ੍ਥ ਅਨ੍ਤੋਗਤਾਨਂਯੇਵ ਪਾਪੁਣਾਤਿ. ਜਨਪਦਰਟ੍ਠਰਜ੍ਜਦੀਪਚਕ੍ਕਵਾਲ਼ਸੀਮਾਸੁਪਿ ਗਾਮਸੀਮਾਦੀਸੁ ਵੁਤ੍ਤਸਦਿਸੋਯੇਵ ਵਿਨਿਚ੍ਛਯੋ.

ਸਚੇ ¶ ਪਨ ਜਮ੍ਬੁਦੀਪੇ ਠਿਤੋ ‘‘ਤਮ੍ਬਪਣ੍ਣਿਦੀਪੇ ਸਙ੍ਘਸ੍ਸ ਦਮ੍ਮੀ’’ਤਿ ਵਦਤਿ, ਤਮ੍ਬਪਣ੍ਣਿਦੀਪਤੋ ਏਕੋਪਿ ਗਨ੍ਤ੍ਵਾ ਸਬ੍ਬੇਸਂ ਗਣ੍ਹਿਤੁਂ ਲਭਤਿ. ਸਚੇਪਿ ਤਤ੍ਰੇਵ ਏਕੋ ਸਭਾਗਭਿਕ੍ਖੁ ਸਭਾਗਾਨਂ ਭਾਗਂ ਗਣ੍ਹਾਤਿ, ਨ ਵਾਰੇਤਬ੍ਬੋ. ਏਵਂ ਤਾਵ ਯੋ ਸੀਮਂ ਪਰਾਮਸਿਤ੍ਵਾ ਦੇਤਿ, ਤਸ੍ਸ ਦਾਨੇ ਵਿਨਿਚ੍ਛਯੋ ਵੇਦਿਤਬ੍ਬੋ.

ਯੋ ਪਨ ‘‘ਅਸੁਕਸੀਮਾਯਾ’’ਤਿ ਵਤ੍ਤੁਂ ਨ ਜਾਨਾਤਿ, ਕੇਵਲਂ ‘‘ਸੀਮਾ’’ਤਿ ਵਚਨਮਤ੍ਤਮੇਵ ਜਾਨਨ੍ਤੋ ਵਿਹਾਰਂ ਆਗਨ੍ਤ੍ਵਾ ‘‘ਸੀਮਾਯ ਦਮ੍ਮੀ’’ਤਿ ਵਾ ‘‘ਸੀਮਟ੍ਠਕਸਙ੍ਘਸ੍ਸ ਦਮ੍ਮੀ’’ਤਿ ਵਾ ਭਣਤਿ, ਸੋ ਪੁਚ੍ਛਿਤਬ੍ਬੋ ‘‘ਸੀਮਾ ਨਾਮ ਬਹੁਵਿਧਾ, ਕਤਰਂ ਸੀਮਂ ਸਨ੍ਧਾਯ ਭਣਸੀ’’ਤਿ, ਸਚੇ ਵਦਤਿ ‘‘ਅਹਂ ‘ਅਸੁਕਸੀਮਾ’ਤਿ ਨ ਜਾਨਾਮਿ, ਸੀਮਟ੍ਠਕਸਙ੍ਘੋ ਭਾਜੇਤ੍ਵਾ ਗਣ੍ਹਤੂ’’ਤਿ, ਕਤਰਸੀਮਾਯ ਭਾਜੇਤਬ੍ਬਂ? ਮਹਾਸੀਵਤ੍ਥੇਰੋ ਕਿਰਾਹ ‘‘ਅਵਿਪ੍ਪਵਾਸਸੀਮਾਯਾ’’ਤਿ. ਤਤੋ ਨਂ ਆਹਂਸੁ ‘‘ਅਵਿਪ੍ਪਵਾਸਸੀਮਾ ਨਾਮ ਤਿਯੋਜਨਾਪਿ ਹੋਤਿ, ਏਵਂ ਸਨ੍ਤੇ ਤਿਯੋਜਨੇ ਠਿਤਾ ਲਾਭਂ ਗਣ੍ਹਿਸ੍ਸਨ੍ਤਿ, ਤਿਯੋਜਨੇ ਠਤ੍ਵਾ ਆਗਨ੍ਤੁਕਵਤ੍ਤਂ ਪੂਰੇਤ੍ਵਾ ਆਰਾਮਂ ਪਵਿਸਿਤਬ੍ਬਂ ਭਵਿਸ੍ਸਤਿ, ਗਮਿਕੋ ਤਿਯੋਜਨਂ ਗਨ੍ਤ੍ਵਾ ਸੇਨਾਸਨਂ ਆਪੁਚ੍ਛਿਸ੍ਸਤਿ, ਨਿਸ੍ਸਯਪਟਿਪਨ੍ਨਸ੍ਸ ਤਿਯੋਜਨਾਤਿਕ੍ਕਮੇ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਿਸ੍ਸਤਿ, ਪਾਰਿਵਾਸਿਕੇਨ ਤਿਯੋਜਨਂ ਅਤਿਕ੍ਕਮਿਤ੍ਵਾ ਅਰੁਣਂ ਉਟ੍ਠਾਪੇਤਬ੍ਬਂ ਭਵਿਸ੍ਸਤਿ, ਭਿਕ੍ਖੁਨਿਯਾ ਤਿਯੋਜਨੇ ਠਤ੍ਵਾ ਆਰਾਮਪ੍ਪਵੇਸਨਂ ਆਪੁਚ੍ਛਿਤਬ੍ਬਂ ਭਵਿਸ੍ਸਤਿ, ਸਬ੍ਬਮ੍ਪੇਤਂ ਉਪਚਾਰਸੀਮਾਪਰਿਚ੍ਛੇਦਵਸੇਨੇਵ ਕਤ੍ਤੁਂ ਵਟ੍ਟਤਿ. ਤਸ੍ਮਾ ਉਪਚਾਰਸੀਮਾਯਮੇਵ ਭਾਜੇਤਬ੍ਬ’’ਨ੍ਤਿ.

੨੭੨੯. ਯੇ ¶ ਵਿਹਾਰਾ ਸਙ੍ਘੇਨ ਕਤਿਕਾਯ ਏਕਲਾਭਕਾ ਸਮਾਨਲਾਭਕਾ ਏਤ੍ਥ ਏਤੇਸੁ ਵਿਹਾਰੇਸੁ ਦਿਨ੍ਨਂ ‘‘ਕਤਿਕਾਯ ਦਮ੍ਮੀ’’ਤਿ ਦਿਨ੍ਨਂ ਸਬ੍ਬੇਹਿ ਭਿਕ੍ਖੂਹਿ ਸਹ ਭਾਜੇਤਬ੍ਬਂ ਚੀਵਰਂ ਕਤਿਕਾਯ ਵੁਚ੍ਚਤੀਤਿ ਯੋਜਨਾ.

ਅਯਮੇਤ੍ਥ ਵਿਨਿਚ੍ਛਯੋ – ਕਤਿਕਾ ਨਾਮ ਸਮਾਨਲਾਭਕਤਿਕਾ, ਤਤ੍ਰੇਵਂ ਕਤਿਕਾ ਕਾਤਬ੍ਬਾ – ਏਕਸ੍ਮਿਂ ਵਿਹਾਰੇ ਸਨ੍ਨਿਪਤਿਤੇਹਿ ਭਿਕ੍ਖੂਹਿ ਯਂ ਵਿਹਾਰਂ ਸਙ੍ਗਣ੍ਹਿਤੁਕਾਮਾ ਸਮਾਨਲਾਭਂ ਕਾਤੁਂ ਇਚ੍ਛਨ੍ਤਿ, ਅਸ੍ਸ ਨਾਮਂ ਗਹੇਤ੍ਵਾ ‘‘ਅਸੁਕੋ ਨਾਮ ਵਿਹਾਰੋ ਪੋਰਾਣਕੋ’’ਤਿ ਵਾ ‘‘ਬੁਦ੍ਧਾਧਿਵੁਤ੍ਥੋ’’ਤਿ ਵਾ ‘‘ਅਪ੍ਪਲਾਭੋ’’ਤਿ ਵਾ ਯਂ ਕਿਞ੍ਚਿ ਕਾਰਣਂ ਵਤ੍ਵਾ ‘‘ਤਂ ਵਿਹਾਰਂ ਇਮਿਨਾ ਵਿਹਾਰੇਨ ਸਦ੍ਧਿਂ ਏਕਲਾਭਂ ਕਾਤੁਂ ਸਙ੍ਘਸ੍ਸ ਰੁਚ੍ਚਤੀ’’ਤਿ ਤਿਕ੍ਖਤ੍ਤੁਂ ਸਾਵੇਤਬ੍ਬਂ. ਏਤ੍ਤਾਵਤਾ ਤਸ੍ਮਿਂ ਵਿਹਾਰੇ ਨਿਸਿਨ੍ਨੋਪਿ ਇਧ ਨਿਸਿਨ੍ਨੋਵ ਹੋਤਿ. ਤਸ੍ਮਿਂ ਵਿਹਾਰੇਪਿ ਸਙ੍ਘੇਨ ਏਵਮੇਵ ਕਾਤਬ੍ਬਂ. ਏਤ੍ਤਾਵਤਾ ਇਧ ¶ ਨਿਸਿਨ੍ਨੋਪਿ ਤਸ੍ਮਿਂ ਵਿਹਾਰੇ ਨਿਸਿਨ੍ਨੋਵ ਹੋਤਿ. ਏਕਸ੍ਮਿਂ ਲਾਭੇ ਭਾਜਿਯਮਾਨੇ ਇਤਰਸ੍ਮਿਂ ਠਿਤਸ੍ਸ ਭਾਗਂ ਗਹੇਤੁਂ ਵਟ੍ਟਤਿ. ਏਵਂ ਏਕੇਨ ਵਿਹਾਰੇਨ ਸਦ੍ਧਿਂ ਬਹੂਪਿ ਆਵਾਸਾ ਏਕਲਾਭਾ ਕਾਤਬ੍ਬਾਤਿ.

੨੭੩੦. ਚੀਵਰਦਾਯਕੇਨ ਧੁਵਕਾਰਾ ਪਾਕਵਤ੍ਤਾਦਿਨਿਚ੍ਚਸਕ੍ਕਾਰਾ ਯਤ੍ਥ ਸਙ੍ਘਸ੍ਸ ਕ੍ਰੀਯਨ੍ਤਿ ਕਰੀਯਨ੍ਤਿ ਤਤ੍ਥ ਤਸ੍ਮਿਂ ਵਿਹਾਰੇ ਤੇਨੇਵ ਦਾਯਕੇਨ ਸਙ੍ਘਸ੍ਸ ਦਿਨ੍ਨਂ ਵਿਹਾਰਂ ‘‘ਭਿਕ੍ਖਾਪਞ੍ਞਤ੍ਤਿਯਾ ਦਿਨ੍ਨ’’ਨ੍ਤਿ ਮਹੇਸਿਨਾ ਵੁਤ੍ਤਨ੍ਤਿ ਯੋਜਨਾ.

ਤਤ੍ਰਾਯਂ ਵਿਨਿਚ੍ਛਯੋ – ਯਸ੍ਮਿਂ ਵਿਹਾਰੇ ਇਮਸ੍ਸ ਚੀਵਰਦਾਯਕਸ੍ਸ ਸਨ੍ਤਕਂ ਸਙ੍ਘਸ੍ਸ ਪਾਕਵਤ੍ਤਂ ਵਾ ਵਤ੍ਤਤਿ, ਯਸ੍ਮਿਂ ਵਾ ਵਿਹਾਰੇ ਭਿਕ੍ਖੂ ਅਤ੍ਤਨੋ ਭਾਰਂ ਕਤ੍ਵਾ ਸਦਾ ਗੇਹੇ ਭੋਜੇਤਿ, ਯਤ੍ਥ ਵਾ ਤੇਨ ਆਵਾਸੋ ਕਾਰਿਤੋ, ਸਲਾਕਭਤ੍ਤਾਦੀਨਿ ਵਾ ਨਿਬਦ੍ਧਾਨਿ, ਯੇਨ ਪਨ ਸਕਲੋਪਿ ਵਿਹਾਰੋ ¶ ਪਤਿਟ੍ਠਾਪਿਤੋ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ, ਇਮੇ ਧੁਵਕਾਰਾ ਨਾਮ. ਤਸ੍ਮਾ ਸਚੇ ਸੋ ‘‘ਯਤ੍ਥ ਮਯ੍ਹਂ ਧੁਵਕਾਰਾ ਕਰੀਯਨ੍ਤਿ, ਏਤ੍ਥ ਦਮ੍ਮੀ’’ਤਿ ਵਾ ‘‘ਤਤ੍ਥ ਦੇਥਾ’’ਤਿ ਵਾ ਭਣਤਿ, ਬਹੂਸੁ ਚੇਪਿ ਠਾਨੇਸੁ ਧੁਵਕਾਰਾ ਹੋਨ੍ਤਿ, ਸਬ੍ਬਤ੍ਥ ਦਿਨ੍ਨਮੇਵ ਹੋਤਿ.

ਸਚੇ ਪਨ ਏਕਸ੍ਮਿਂ ਵਿਹਾਰੇ ਭਿਕ੍ਖੂ ਬਹੁਤਰਾ ਹੋਨ੍ਤਿ, ਤੇਹਿ ਵਤ੍ਤਬ੍ਬਂ ‘‘ਤੁਮ੍ਹਾਕਂ ਧੁਵਕਾਰੇ ਏਕਤ੍ਥ ਭਿਕ੍ਖੂ ਬਹੂ, ਏਕਤ੍ਥ ਅਪ੍ਪਕਾ’’ਤਿ, ਸਚੇ ‘‘ਭਿਕ੍ਖੁਗਣਨਾਯ ਗਣ੍ਹਥਾ’’ਤਿ ਭਣਤਿ, ਤਥਾ ਭਾਜੇਤ੍ਵਾ ਗਣ੍ਹਿਤੁਂ ਵਟ੍ਟਤਿ. ਏਤ੍ਥ ਚ ਵਤ੍ਥਭੇਸਜ੍ਜਾਦਿ ਅਪ੍ਪਕਮ੍ਪਿ ਸੁਖੇਨ ਭਾਜੀਯਤਿ, ਯਦਿ ਪਨ ਮਞ੍ਚੋ ਵਾ ਪੀਠਕਂ ਵਾ ਏਕਮੇਵ ਹੋਤਿ, ਤਂ ਪੁਚ੍ਛਿਤ੍ਵਾ ਯਸ੍ਸ ਵਾ ਵਿਹਾਰਸ੍ਸ ਏਕਵਿਹਾਰੇਪਿ ਵਾ ਯਸ੍ਸ ਸੇਨਾਸਨਸ੍ਸ ਸੋ ਵਿਚਾਰੇਤਿ, ਤਤ੍ਥ ਦਾਤਬ੍ਬਂ. ਸਚੇ ‘‘ਅਸੁਕਭਿਕ੍ਖੁ ਗਣ੍ਹਤੂ’’ਤਿ ਵਦਤਿ, ਵਟ੍ਟਤਿ.

ਅਥ ‘‘ਮਯ੍ਹਂ ਧੁਵਕਾਰੇ ਦੇਥਾ’’ਤਿ ਵਤ੍ਵਾ ਅਵਿਚਾਰੇਤ੍ਵਾਵ ਗਚ੍ਛਤਿ, ਸਙ੍ਘਸ੍ਸਪਿ ਵਿਚਾਰੇਤੁਂ ਵਟ੍ਟਤਿ. ਏਵਂ ਪਨ ਵਿਚਾਰੇਤਬ੍ਬਂ – ‘‘ਸਙ੍ਘਤ੍ਥੇਰਸ੍ਸ ਵਸਨਟ੍ਠਾਨੇ ਦੇਥਾ’’ਤਿ ਵਤ੍ਤਬ੍ਬਂ. ਸਚੇ ਤਤ੍ਥ ਸੇਨਾਸਨਂ ਪਰਿਪੁਣ੍ਣਂ ਹੋਤਿ. ਯਤ੍ਥ ਨਪ੍ਪਹੋਤਿ, ਤਤ੍ਥ ਦਾਤਬ੍ਬਂ. ਸਚੇ ਏਕੋ ਭਿਕ੍ਖੁ ‘‘ਮਯ੍ਹਂ ਵਸਨਟ੍ਠਾਨੇ ਸੇਨਾਸਨਪਰਿਭੋਗਭਣ੍ਡਂ ਨਤ੍ਥੀ’’ਤਿ ਵਦਤਿ, ਤਤ੍ਥ ਦਾਤਬ੍ਬਨ੍ਤਿ.

੨੭੩੧. ਸਙ੍ਘਸ੍ਸ ਪਨ ਯਂ ਦਿਨ੍ਨਨ੍ਤਿ ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਸਙ੍ਘਸ੍ਸ ਦਮ੍ਮੀ’’ਤਿ ਯਂ ਚੀਵਰਂ ਦਿਨ੍ਨਂ. ‘‘ਸਮ੍ਮੁਖੀਭੂਤੇਨਾ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧੇਨ ਰਸ੍ਸਤ੍ਤਂ. ਸਮ੍ਮੁਖਿਭੂਤੇਨਾਤਿ ਚ ¶ ਉਪਚਾਰਸੀਮਾਯ ਠਿਤੇਨ. ਭਾਜੇਤਬ੍ਬਨ੍ਤਿ ਘਣ੍ਟਿਂ ਪਹਰਿਤ੍ਵਾ ਕਾਲਂ ਘੋਸੇਤ੍ਵਾ ਭਾਜੇਤਬ੍ਬਂ. ਇਦਮੇਤ੍ਥ ਮੁਖਮਤ੍ਤਦਸ੍ਸਨਂ. ਵਿਨਿਚ੍ਛਯੋ ਅਟ੍ਠਕਥਾਯ (ਮਹਾਵ. ਅਟ੍ਠ. ੩੭੯) ਵੇਦਿਤਬ੍ਬੋ. ਸੇਯ੍ਯਥਿਦਂ – ਚੀਵਰਦਾਯਕੇਨ ¶ ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨੇਸੁ ਭਾਜਿਯਮਾਨੇਸੁ ਸੀਮਟ੍ਠਸ੍ਸ ਅਸਮ੍ਪਤ੍ਤਸ੍ਸਪਿ ਭਾਗਂ ਗਣ੍ਹਨ੍ਤੋ ਨ ਵਾਰੇਤਬ੍ਬੋ. ਵਿਹਾਰੋ ਮਹਾ ਹੋਤਿ, ਥੇਰਾਸਨਤੋ ਪਟ੍ਠਾਯ ਵਤ੍ਥੇਸੁ ਦਿਯ੍ਯਮਾਨੇਸੁ ਅਲਸਜਾਤਿਕਾ ਮਹਾਥੇਰਾ ਪਚ੍ਛਾ ਆਗਚ੍ਛਨ੍ਤਿ, ‘‘ਭਨ੍ਤੇ, ਵੀਸਤਿਵਸ੍ਸਾਨਂ ਦਿਯ੍ਯਤਿ, ਤੁਮ੍ਹਾਕਂ ਠਿਤਿਕਾ ਅਤਿਕ੍ਕਨ੍ਤਾ’’ਤਿ ਨ ਵਤ੍ਤਬ੍ਬਾ, ਠਿਤਿਕਂ ਠਪੇਤ੍ਵਾ ਤੇਸਂ ਦਤ੍ਵਾ ਪਚ੍ਛਾ ਠਿਤਿਕਾਯ ਦਾਤਬ੍ਬਂ.

‘‘ਅਸੁਕਵਿਹਾਰੇ ਕਿਰ ਬਹੁਂ ਚੀਵਰਂ ਉਪ੍ਪਨ੍ਨ’’ਨ੍ਤਿ ਸੁਤ੍ਵਾ ਯੋਜਨਨ੍ਤਰਿਕਵਿਹਾਰਤੋਪਿ ਭਿਕ੍ਖੂ ਆਗਚ੍ਛਨ੍ਤਿ, ਸਮ੍ਪਤ੍ਤਸਮ੍ਪਤ੍ਤਾਨਂ ਠਿਤਟ੍ਠਾਨਤੋ ਪਟ੍ਠਾਯ ਦਾਤਬ੍ਬਂ. ਅਸਮ੍ਪਤ੍ਤਾਨਮ੍ਪਿ ਉਪਚਾਰਸੀਮਂ ਪਵਿਟ੍ਠਾਨਂ ਅਨ੍ਤੇਵਾਸਿਕਾਦੀਸੁ ਗਣ੍ਹਨ੍ਤੇਸੁ ਦਾਤਬ੍ਬਮੇਵ. ‘‘ਬਹਿ ਉਪਚਾਰਸੀਮਾਯ ਠਿਤਾਨਂ ਦੇਥਾ’’ਤਿ ਵਦਨ੍ਤਿ, ਨ ਦਾਤਬ੍ਬਂ. ਸਚੇ ਪਨ ਉਪਚਾਰਸੀਮਂ ਓਕ੍ਕਨ੍ਤੇਹਿ ਏਕਾਬਦ੍ਧਾ ਹੁਤ੍ਵਾ ਅਤ੍ਤਨੋ ਵਿਹਾਰਦ੍ਵਾਰੇ ਵਾ ਅਨ੍ਤੋਵਿਹਾਰੇਯੇਵ ਵਾ ਹੋਨ੍ਤਿ, ਪਰਿਸਵਸੇਨ ਵਡ੍ਢਿਤਾ ਨਾਮ ਸੀਮਾ ਹੋਤਿ, ਤਸ੍ਮਾ ਦਾਤਬ੍ਬਂ. ਸਙ੍ਘਨਵਕਸ੍ਸ ਦਿਨ੍ਨੇਪਿ ਪਚ੍ਛਾ ਆਗਤਾਨਂ ਦਾਤਬ੍ਬਮੇਵ. ਦੁਤਿਯਭਾਗੇ ਪਨ ਥੇਰਾਸਨਂ ਆਰੁਲ਼੍ਹੇ ਆਗਤਾਨਂ ਪਠਮਭਾਗੋ ਨ ਪਾਪੁਣਾਤਿ, ਦੁਤਿਯਭਾਗਤੋ ਵਸ੍ਸਗ੍ਗੇਨ ਦਾਤਬ੍ਬਂ.

ਏਕਸ੍ਮਿਂ ਵਿਹਾਰੇ ਦਸ ਭਿਕ੍ਖੂ ਹੋਨ੍ਤਿ, ਦਸ ਵਤ੍ਥਾਨਿ ‘‘ਸਙ੍ਘਸ੍ਸ ਦੇਮਾ’’ਤਿ ਦੇਨ੍ਤਿ, ਪਾਟੇਕ੍ਕਂ ਭਾਜੇਤਬ੍ਬਾਨਿ. ਸਚੇ ‘‘ਸਬ੍ਬਾਨੇਵ ਅਮ੍ਹਾਕਂ ਪਾਪੁਣਨ੍ਤੀ’’ਤਿ ਗਹੇਤ੍ਵਾ ਗਚ੍ਛਨ੍ਤਿ, ਦੁਪ੍ਪਾਪਿਤਾਨਿ ਚੇਵ ਦੁਗ੍ਗਹਿਤਾਨਿ ਚ, ਗਤਗਤਟ੍ਠਾਨੇ ਸਙ੍ਘਿਕਾਨੇਵ ਹੋਨ੍ਤਿ. ਏਕਂ ਪਨ ਉਦ੍ਧਰਿਤ੍ਵਾ ‘‘ਇਦਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਸਙ੍ਘਤ੍ਥੇਰਸ੍ਸ ਦਤ੍ਵਾ ਸੇਸਾਨਿ ‘‘ਇਮਾਨਿ ਅਮ੍ਹਾਕਂ ਪਾਪੁਣਨ੍ਤੀ’’ਤਿ ਗਹੇਤੁਂ ਵਟ੍ਟਤਿ.

ਏਕਮੇਵ ਵਤ੍ਥਂ ‘‘ਸਙ੍ਘਸ੍ਸ ਦੇਮਾ’’ਤਿ ਆਹਰਨ੍ਤਿ, ਅਭਾਜੇਤ੍ਵਾਵ ‘‘ਅਮ੍ਹਾਕਂ ਪਾਪੁਣਾਤੀ’’ਤਿ ਗਣ੍ਹਨ੍ਤਿ, ਦੁਪ੍ਪਾਪਿਤਞ੍ਚੇਵ ਦੁਗ੍ਗਹਿਤਞ੍ਚ, ਸਤ੍ਥਕੇਨ, ਪਨ ਹਲਿਦ੍ਦਿਆਦਿਨਾ ਵਾ ਲੇਖਂ ਕਤ੍ਵਾ ਏਕਂ ¶ ਕੋਟ੍ਠਾਸਂ ‘‘ਇਮਂ ਠਾਨਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਸਙ੍ਘਤ੍ਥੇਰਸ੍ਸ ਪਾਪੇਤ੍ਵਾ ਸੇਸਂ ‘‘ਅਮ੍ਹਾਕਂ ਪਾਪੁਣਾਤੀ’’ਤਿ ਗਹੇਤੁਂ ਵਟ੍ਟਤਿ. ਯਂ ਪਨ ਵਤ੍ਥਸ੍ਸੇਵ ਪੁਪ੍ਫਂ ਵਾ ਵਲਿ ਵਾ, ਤੇਨ ਪਰਿਚ੍ਛੇਦਂ ਕਾਤੁਂ ਨ ਵਟ੍ਟਤਿ. ਸਚੇ ਏਕਂ ਤਨ੍ਤਂ ਉਦ੍ਧਰਿਤ੍ਵਾ ‘‘ਇਦਂ ਠਾਨਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਸਙ੍ਘਤ੍ਥੇਰਸ੍ਸ ਦਤ੍ਵਾ ਸੇਸਂ ‘‘ਅਮ੍ਹਾਕਂ ਪਾਪੁਣਾਤੀ’’ਤਿ ਗਣ੍ਹਨ੍ਤਿ, ਵਟ੍ਟਤਿ. ਖਣ੍ਡਂ ਖਣ੍ਡਂ ਛਿਨ੍ਦਿਤ੍ਵਾ ਭਾਜਿਯਮਾਨਂ ਵਟ੍ਟਤਿਯੇਵ.

ਏਕਭਿਕ੍ਖੁਕੇ ¶ ਵਿਹਾਰੇ ਸਙ੍ਘਸ੍ਸ ਚੀਵਰੇਸੁ ਉਪ੍ਪਨ੍ਨੇਸੁ ਸਚੇ ਪੁਬ੍ਬੇ ਵੁਤ੍ਤਨਯੇਨੇਵ ਸੋ ਭਿਕ੍ਖੁ ‘‘ਸਬ੍ਬਾਨਿ ਮਯ੍ਹਂ ਪਾਪੁਣਨ੍ਤੀ’’ਤਿ ਗਣ੍ਹਾਤਿ, ਸੁਗ੍ਗਹਿਤਾਨਿ, ਠਿਤਿਕਾ ਪਨ ਨ ਤਿਟ੍ਠਤਿ. ਸਚੇ ਏਕੇਕਂ ਉਦ੍ਧਰਿਤ੍ਵਾ ‘‘ਇਦਂ ਮਯ੍ਹਂ ਪਾਪੁਣਾਤੀ’’ਤਿ ਗਣ੍ਹਾਤਿ, ਠਿਤਿਕਾ ਤਿਟ੍ਠਤਿ. ਤਤ੍ਥ ਠਿਤਿਕਾਯ ਅਟ੍ਠਿਤਾਯ ਪੁਨ ਅਞ੍ਞਸ੍ਮਿਂ ਚੀਵਰੇ ਉਪ੍ਪਨ੍ਨੇ ਸਚੇ ਏਕੋ ਭਿਕ੍ਖੁ ਆਗਚ੍ਛਤਿ, ਮਜ੍ਝੇ ਛਿਨ੍ਦਿਤ੍ਵਾ ਦ੍ਵੀਹਿਪਿ ਗਹੇਤਬ੍ਬਂ. ਠਿਤਾਯ ਠਿਤਿਕਾਯ ਪੁਨ ਅਞ੍ਞਸ੍ਮਿਂ ਚੀਵਰੇ ਉਪ੍ਪਨ੍ਨੇ ਸਚੇ ਨਵਕਤਰੋ ਆਗਚ੍ਛਤਿ, ਠਿਤਿਕਾ ਹੇਟ੍ਠਾ ਓਰੋਹਤਿ. ਸਚੇ ਵੁਡ੍ਢਤਰੋ ਆਗਚ੍ਛਤਿ, ਠਿਤਿਕਾ ਉਦ੍ਧਂ ਆਰੋਹਤਿ. ਅਥ ਅਞ੍ਞੋ ਨਤ੍ਥਿ, ਪੁਨ ਅਤ੍ਤਨੋ ਪਾਪੇਤ੍ਵਾ ਗਹੇਤਬ੍ਬਂ.

‘‘ਸਙ੍ਘਸ੍ਸ ਦੇਮਾ’’ਤਿ ਵਾ ‘‘ਭਿਕ੍ਖੁਸਙ੍ਘਸ੍ਸ ਦੇਮਾ’’ਤਿ ਵਾ ਯੇਨ ਕੇਨਚਿ ਆਕਾਰੇਨ ਸਙ੍ਘਂ ਆਮਸਿਤ੍ਵਾ ਦਿਨ੍ਨਂ ਪਨ ਪਂਸੁਕੂਲਿਕਾਨਂ ਨ ਵਟ੍ਟਤਿ ‘‘ਗਹਪਤਿਚੀਵਰਂ ਪਟਿਕ੍ਖਿਪਾਮਿ, ਪਂਸੁਕੂਲਿਕਙ੍ਗਂ ਸਮਾਦਿਯਾਮੀ’’ਤਿ ਵੁਤ੍ਤਤ੍ਤਾ, ਨ ਪਨ ਅਕਪ੍ਪਿਯਤ੍ਤਾ. ਭਿਕ੍ਖੁਸਙ੍ਘੇਨ ਅਪਲੋਕੇਤ੍ਵਾ ਦਿਨ੍ਨਮ੍ਪਿ ਨ ਗਹੇਤਬ੍ਬਂ. ਯਂ ਪਨ ਭਿਕ੍ਖੁ ਅਤ੍ਤਨੋ ਸਨ੍ਤਕਂ ਦੇਤਿ, ਤਂ ਭਿਕ੍ਖੁਦਤ੍ਤਿਯਂ ਨਾਮ ਵਟ੍ਟਤਿ. ਪਂਸੁਕੂਲਂ ਪਨ ਨ ਹੋਤਿ. ਏਵਂ ਸਨ੍ਤੇਪਿ ਧੁਤਙ੍ਗਂ ਨ ਭਿਜ੍ਜਤਿ. ‘‘ਭਿਕ੍ਖੂਨਂ ਦੇਮ, ਥੇਰਾਨਂ ਦੇਮਾ’’ਤਿ ਵੁਤ੍ਤੇ ਪਨ ਪਂਸੁਕੂਲਿਕਾਨਮ੍ਪਿ ਵਟ੍ਟਤਿ. ‘‘ਇਦਂ ਵਤ੍ਥਂ ਸਙ੍ਘਸ੍ਸ ਦੇਮ, ਇਮਿਨਾ ਉਪਾਹਨਤ੍ਥਵਿਕਪਤ੍ਤਤ੍ਥਵਿਕਆਯੋਗਅਂਸਬਦ੍ਧਕਾਦੀਨਿ ¶ ਕਰੋਥਾ’’ਤਿ ਦਿਨ੍ਨਮ੍ਪਿ ਵਟ੍ਟਤਿ.

ਪਤ੍ਤਤ੍ਥਵਿਕਾਦੀਨਂ ਅਤ੍ਥਾਯ ਦਿਨ੍ਨਾਨਿ ਬਹੂਨਿਪਿ ਹੋਨ੍ਤਿ, ਚੀਵਰਤ੍ਥਾਯਪਿ ਪਹੋਨ੍ਤਿ, ਤਤੋ ਚੀਵਰਂ ਕਤ੍ਵਾ ਪਾਰੁਪਿਤੁਂ ਵਟ੍ਟਤਿ. ਸਚੇ ਪਨ ਸਙ੍ਘੋ ਭਾਜਿਤਾਤਿਰਿਤ੍ਤਾਨਿ ਵਤ੍ਥਾਨਿ ਛਿਨ੍ਦਿਤ੍ਵਾ ਉਪਾਹਨਤ੍ਥਵਿਕਾਦੀਨਂ ਅਤ੍ਥਾਯ ਭਾਜੇਤਿ, ਤਤੋ ਗਹੇਤੁਂ ਨ ਵਟ੍ਟਤਿ. ਸਾਮਿਕੇਹਿ ਵਿਚਾਰਿਤਮੇਵ ਹਿ ਵਟ੍ਟਤਿ, ਨ ਇਤਰਂ.

‘‘ਪਂਸੁਕੂਲਿਕਸਙ੍ਘਸ੍ਸ ਧਮ੍ਮਕਰਣਅਂਸਬਦ੍ਧਾਦੀਨਂ ਅਤ੍ਥਾਯ ਦੇਮਾ’’ਤਿ ਵੁਤ੍ਤੇਪਿ ਗਹੇਤੁਂ ਵਟ੍ਟਤਿ. ਪਰਿਕ੍ਖਾਰੋ ਨਾਮ ਪਂਸੁਕੂਲਿਕਾਨਮ੍ਪਿ ਇਚ੍ਛਿਤਬ੍ਬੋ. ਯਂ ਤਤ੍ਥ ਅਤਿਰੇਕਂ ਹੋਤਿ, ਤਂ ਚੀਵਰੇਪਿ ਉਪਨੇਤੁਂ ਵਟ੍ਟਤਿ. ਸੁਤ੍ਤਂ ਸਙ੍ਘਸ੍ਸ ਦੇਨ੍ਤਿ, ਪਂਸੁਕੂਲਿਕੇਹਿਪਿ ਗਹੇਤਬ੍ਬਂ. ਅਯਂ ਤਾਵ ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨੇਸੁ ਵਿਨਿਚ੍ਛਯੋ.

ਸਚੇ ਪਨ ਬਹਿ ਉਪਚਾਰਸੀਮਾਯ ਅਦ੍ਧਾਨਪਟਿਪਨ੍ਨੇ ਭਿਕ੍ਖੂ ਦਿਸ੍ਵਾ ‘‘ਸਙ੍ਘਸ੍ਸ ਦਮ੍ਮੀ’’ਤਿ ਸਙ੍ਘਤ੍ਥੇਰਸ੍ਸ ਵਾ ਸਙ੍ਘਨਵਕਸ੍ਸ ਵਾ ਆਰੋਚੇਤਿ, ਸਚੇਪਿ ਯੋਜਨਂ ਫਰਿਤ੍ਵਾ ਪਰਿਸਾ ਠਿਤਾ ਹੋਤਿ, ਏਕਾਬਦ੍ਧਾ ¶ ਚੇ, ਸਬ੍ਬੇਸਂ ਪਾਪੁਣਾਤਿ. ਯੇ ਪਨ ਦ੍ਵਾਦਸਹਿ ਹਤ੍ਥੇਹਿ ਪਰਿਸਂ ਅਸਮ੍ਪਤ੍ਤਾ, ਤੇਸਂ ਨ ਪਾਪੁਣਾਤੀਤਿ.

੨੭੩੨. ਇਦਾਨਿ ‘‘ਉਭਤੋਸਙ੍ਘੇ ਦੇਤੀ’’ਤਿ ਮਾਤਿਕਂ ਵਿਵਰਨ੍ਤੋ ਆਹ ‘‘ਉਭਤੋਸਙ੍ਘਮੁਦ੍ਦਿਸ੍ਸਾ’’ਤਿਆਦਿ. ਉਭਤੋਸਙ੍ਘਮੁਦ੍ਦਿਸ੍ਸਾਤਿ ਭਿਕ੍ਖੁਸਙ੍ਘਂ, ਭਿਕ੍ਖੁਨਿਸਙ੍ਘਞ੍ਚ ਉਦ੍ਦਿਸਿਤ੍ਵਾ. ਦੇਤੀਤਿ ‘‘ਉਭਤੋਸਙ੍ਘਸ੍ਸ ਦੇਮੀ’’ਤਿ ਦੇਤਿ. ‘‘ਬਹੁ ਵਾ’’ਤਿ ਏਤ੍ਥ ‘‘ਬਹੂ ਵਾ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ਰਸ੍ਸਤ੍ਤਂ. ਭਿਕ੍ਖੁਨੀਨਂ ਭਿਕ੍ਖੂ ਥੋਕਾ ਵਾ ਹੋਨ੍ਤੁ ਬਹੂ ਵਾ, ਪੁਗ੍ਗਲਗ੍ਗੇਨ ਅਕਤ੍ਵਾ ਉਭਤੋਸਙ੍ਘਵਸੇਨ ਸਮਭਾਗੋਵ ਕਾਤੁਂ ਵਟ੍ਟਤੀਤਿ ਯੋਜਨਾ.

ਤਤ੍ਰਾਯਂ ¶ ਵਿਨਿਚ੍ਛਯੋ – ‘‘ਉਭਤੋਸਙ੍ਘਸ੍ਸ ਦਮ੍ਮੀ’’ਤਿ ਵੁਤ੍ਤੇਪਿ ‘‘ਦ੍ਵੇਧਾਸਙ੍ਘਸ੍ਸ ਦਮ੍ਮਿ, ਦ੍ਵਿਨ੍ਨਂ ਸਙ੍ਘਾਨਂ ਦਮ੍ਮਿ, ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨਿਸਙ੍ਘਸ੍ਸ ਚ ਦਮ੍ਮੀ’’ਤਿ ਵੁਤ੍ਤੇਪਿ ਉਭਤੋਸਙ੍ਘਸ੍ਸ ਦਿਨ੍ਨਮੇਵ ਹੋਤਿ, ਦ੍ਵੇ ਭਾਗੇ ਸਮੇ ਕਤ੍ਵਾ ਏਕੋ ਦਾਤਬ੍ਬੋ.

‘‘ਉਭਤੋਸਙ੍ਘਸ੍ਸ ਚ ਤੁਯ੍ਹਞ੍ਚ ਦਮ੍ਮੀ’’ਤਿ ਵੁਤ੍ਤੇ ਸਚੇ ਦਸ ਦਸ ਭਿਕ੍ਖੂ, ਭਿਕ੍ਖੁਨਿਯੋ ਚ ਹੋਨ੍ਤਿ, ਏਕਵੀਸਤਿ ਪਟਿਵੀਸੇ ਕਤ੍ਵਾ ਏਕੋ ਪੁਗ੍ਗਲਸ੍ਸ ਦਾਤਬ੍ਬੋ, ਦਸ ਭਿਕ੍ਖੁਸਙ੍ਘਸ੍ਸ, ਦਸ ਭਿਕ੍ਖੁਨਿਸਙ੍ਘਸ੍ਸ. ਯੇਨ ਪੁਗ੍ਗਲਿਕੋ ਲਦ੍ਧੋ, ਸੋ ਸਙ੍ਘਤੋਪਿ ਅਤ੍ਤਨੋ ਵਸ੍ਸਗ੍ਗੇਨ ਗਹੇਤੁਂ ਲਭਤਿ. ਕਸ੍ਮਾ? ਉਭਤੋਸਙ੍ਘਗ੍ਗਹਣੇਨ ਗਹਿਤਤ੍ਤਾ.

‘‘ਉਭਤੋਸਙ੍ਘਸ੍ਸ ਚ ਚੇਤਿਯਸ੍ਸ ਚ ਦਮ੍ਮੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਇਧ ਪਨ ਚੇਤਿਯਸ੍ਸ ਸਙ੍ਘਤੋ ਪਾਪੁਣਨਕੋਟ੍ਠਾਸੋ ਨਾਮ ਨਤ੍ਥਿ, ਏਕਪੁਗ੍ਗਲਸ੍ਸ ਪਤ੍ਤਕੋਟ੍ਠਾਸਸਮੋਵ ਕੋਟ੍ਠਾਸੋ ਹੋਤਿ.

‘‘ਉਭਤੋਸਙ੍ਘਸ੍ਸ ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਦ੍ਵਾਵੀਸਤਿ ਕੋਟ੍ਠਾਸੇ ਕਤ੍ਵਾ ਦਸ ਭਿਕ੍ਖੂਨਂ, ਦਸ ਭਿਕ੍ਖੁਨੀਨਂ, ਏਕੋ ਪੁਗ੍ਗਲਸ੍ਸ, ਏਕੋ ਚੇਤਿਯਸ੍ਸ ਦਾਤਬ੍ਬੋ. ਤਤ੍ਥ ਪੁਗ੍ਗਲੋ ਸਙ੍ਘਤੋਪਿ ਅਤ੍ਤਨੋ ਵਸ੍ਸਗ੍ਗੇਨ ਪੁਨ ਗਹੇਤੁਂ ਲਭਤਿ. ਚੇਤਿਯਸ੍ਸ ਏਕੋਯੇਵ.

‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਦਮ੍ਮੀ’’ਤਿ ਵੁਤ੍ਤੇ ਪਨ ਮਜ੍ਝੇ ਭਿਨ੍ਦਿਤ੍ਵਾ ਨ ਦਾਤਬ੍ਬਂ, ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਦਾਤਬ੍ਬਂ.

‘‘ਭਿਕ੍ਖੁਸਙ੍ਘਸ੍ਸ ¶ ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇ ਪਨ ਪੁਗ੍ਗਲੋ ਵਿਸੁਂ ¶ ਨ ਲਭਤਿ, ਪਾਪੁਣਨਟ੍ਠਾਨਤੋ ਏਕਮੇਵ ਲਭਤਿ. ਕਸ੍ਮਾ? ਭਿਕ੍ਖੁਸਙ੍ਘਗ੍ਗਹਣੇਨ ਗਹਿਤਤ੍ਤਾ.

‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸ ਏਕਪੁਗ੍ਗਲਪਟਿਵੀਸੋ ਲਬ੍ਭਤਿ, ਪੁਗ੍ਗਲਸ੍ਸ ਵਿਸੁਂ ਨ ਲਬ੍ਭਤਿ. ਤਸ੍ਮਾ ਏਕਂ ਚੇਤਿਯਸ੍ਸ ਦਤ੍ਵਾ ਅਵਸੇਸਂ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਭਾਜੇਤਬ੍ਬਂ.

‘‘ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਦਮ੍ਮੀ’’ਤਿ ਵੁਤ੍ਤੇਪਿ ਨ ਮਜ੍ਝੇ ਭਿਨ੍ਦਿਤ੍ਵਾ ਦਾਤਬ੍ਬਂ, ਪੁਗ੍ਗਲਗਣਨਾਯ ਏਵ ਵਿਭਜਿਤਬ੍ਬਂ.

‘‘ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਏਵਂ ਵੁਤ੍ਤੇਪਿ ਚੇਤਿਯਸ੍ਸ ਏਕਪੁਗ੍ਗਲਪਟਿਵੀਸੋ ਲਬ੍ਭਤਿ, ਪੁਗ੍ਗਲਸ੍ਸ ਵਿਸੁਂ ਨਤ੍ਥਿ, ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਏਵ ਭਾਜੇਤਬ੍ਬਂ. ਯਥਾ ਚ ਭਿਕ੍ਖੁਸਙ੍ਘਂ ਆਦਿਂ ਕਤ੍ਵਾ ਨਯੋ ਨੀਤੋ, ਏਵਂ ਭਿਕ੍ਖੁਨਿਸਙ੍ਘਂ ਆਦਿਂ ਕਤ੍ਵਾਪਿ ਨੇਤਬ੍ਬੋ.

‘‘ਭਿਕ੍ਖੁਸਙ੍ਘਸ੍ਸ ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇ ਪੁਗ੍ਗਲਸ੍ਸ ਵਿਸੁਂ ਨ ਲਬ੍ਭਤਿ, ਵਸ੍ਸਗ੍ਗੇਨੇਵ ਗਹੇਤਬ੍ਬਂ.

‘‘ਭਿਕ੍ਖੁਸਙ੍ਘਸ੍ਸ ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਚੇਤਿਯਸ੍ਸ ਵਿਸੁਂ ਪਟਿਵੀਸੋ ਲਬ੍ਭਤਿ.

‘‘ਭਿਕ੍ਖੁਸਙ੍ਘਸ੍ਸ ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸੇਵ ਲਬ੍ਭਤਿ, ਨ ਪੁਗ੍ਗਲਸ੍ਸ.

‘‘ਭਿਕ੍ਖੂਨਞ੍ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇਪਿ ਵਿਸੁਂ ਨ ਲਬ੍ਭਤਿ.

‘‘ਭਿਕ੍ਖੂਨਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਚੇਤਿਯਸ੍ਸ ਲਬ੍ਭਤਿ.

‘‘ਭਿਕ੍ਖੂਨਞ੍ਚ ¶ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸੇਵ ਵਿਸੁਂ ਲਬ੍ਭਤਿ, ਨ ਪੁਗ੍ਗਲਸ੍ਸ. ਭਿਕ੍ਖੁਨਿਸਙ੍ਘਂ ਆਦਿਂ ਕਤ੍ਵਾਪਿ ਏਵਮੇਵ ਯੋਜੇਤਬ੍ਬਂ.

ਪੁਬ੍ਬੇ ਬੁਦ੍ਧਪ੍ਪਮੁਖਸ੍ਸ ਉਭਤੋਸਙ੍ਘਸ੍ਸ ਦਾਨਂ ਦੇਨ੍ਤਿ, ਭਗਵਾ ਮਜ੍ਝੇ ਨਿਸੀਦਤਿ, ਦਕ੍ਖਿਣਤੋ ਭਿਕ੍ਖੂ, ਵਾਮਤੋ ਭਿਕ੍ਖੁਨਿਯੋ ਨਿਸੀਦਨ੍ਤਿ, ਭਗਵਾ ਉਭਿਨ੍ਨਂ ਸਙ੍ਘਤ੍ਥੇਰੋ, ਤਦਾ ਭਗਵਾ ਅਤ੍ਤਨੋ ਲਦ੍ਧਪਚ੍ਚਯੇ ਅਤ੍ਤਨਾਪਿ ਪਰਿਭੁਞ੍ਜਤਿ, ਭਿਕ੍ਖੂਨਮ੍ਪਿ ਦਾਪੇਤਿ. ਏਤਰਹਿ ਪਨ ਪਣ੍ਡਿਤਮਨੁਸ੍ਸਾ ਸਧਾਤੁਕਂ ਪਟਿਮਂ ਵਾ ਚੇਤਿਯਂ ਵਾ ਠਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਉਭਤੋਸਙ੍ਘਸ੍ਸ ਦਾਨਂ ਦੇਨ੍ਤਿ, ਪਟਿਮਾਯ ਵਾ ¶ ਚੇਤਿਯਸ੍ਸ ਵਾ ਪੁਰਤੋ ਆਧਾਰਕੇ ਪਤ੍ਤਂ ਠਪੇਤ੍ਵਾ ਦਕ੍ਖਿਣੋਦਕਂ ਦਤ੍ਵਾ ‘‘ਬੁਦ੍ਧਾਨਂ ਦੇਮਾ’’ਤਿ ਤਤ੍ਥ ਯਂ ਪਠਮਂ ਖਾਦਨੀਯਂ ਭੋਜਨੀਯਂ ਦੇਨ੍ਤਿ, ਵਿਹਾਰਂ ਵਾ ਆਹਰਿਤ੍ਵਾ ‘‘ਇਦਂ ਚੇਤਿਯਸ੍ਸ ਦੇਮਾ’’ਤਿ ਪਿਣ੍ਡਪਾਤਞ੍ਚ ਮਾਲਾਗਨ੍ਧਾਦੀਨਿ ਚ ਦੇਨ੍ਤਿ, ਤਤ੍ਥ ਕਥਂ ਪਟਿਪਜ੍ਜਿਤਬ੍ਬਨ੍ਤਿ? ਮਾਲਾਗਨ੍ਧਾਦੀਨਿ ਤਾਵ ਚੇਤਿਯੇ ਆਰੋਪੇਤਬ੍ਬਾਨਿ, ਵਤ੍ਥੇਹਿ ਪਟਾਕਾ, ਤੇਲੇਨ ਪਦੀਪਾ ਕਾਤਬ੍ਬਾ. ਪਿਣ੍ਡਪਾਤਮਧੁਫਾਣਿਤਾਦੀਨਿ ਪਨ ਯੋ ਨਿਬਦ੍ਧਂ ਚੇਤਿਯਸ੍ਸ ਜਗ੍ਗਕੋ ਹੋਤਿ ਪਬ੍ਬਜਿਤੋ ਵਾ ਗਹਟ੍ਠੋ ਵਾ, ਤਸ੍ਸ ਦਾਤਬ੍ਬਾਨਿ. ਨਿਬਦ੍ਧਜਗ੍ਗਕੇ ਅਸਤਿ ਆਹਟਪਤ੍ਤਂ ਠਪੇਤ੍ਵਾ ਵਤ੍ਤਂ ਕਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਉਪਕਟ੍ਠੇ ਕਾਲੇ ਭੁਞ੍ਜਿਤ੍ਵਾ ਪਚ੍ਛਾਪਿ ਵਤ੍ਤਂ ਕਾਤੁਂ ਵਟ੍ਟਤਿਯੇਵ.

ਮਾਲਾਗਨ੍ਧਾਦੀਸੁ ਚ ਯਂ ਕਿਞ੍ਚਿ ‘‘ਇਦਂ ਹਰਿਤ੍ਵਾ ਚੇਤਿਯਸ੍ਸ ਪੂਜਂ ਕਰੋਥਾ’’ਤਿ ਵੁਤ੍ਤੇ ਦੂਰਮ੍ਪਿ ਹਰਿਤ੍ਵਾ ਪੂਜੇਤਬ੍ਬਂ. ‘‘ਭਿਕ੍ਖਂ ਸਙ੍ਘਸ੍ਸ ਹਰਾ’’ਤਿ ਵੁਤ੍ਤੇਪਿ ਹਰਿਤਬ੍ਬਂ. ਸਚੇ ਪਨ ‘‘ਅਹਂ ਪਿਣ੍ਡਾਯ ਚਰਾਮਿ, ਆਸਨਸਾਲਾਯ ਭਿਕ੍ਖੂ ਅਤ੍ਥਿ, ਤੇ ਹਰਿਸ੍ਸਨ੍ਤੀ’’ਤਿ ਵੁਤ੍ਤੇ ‘‘ਭਨ੍ਤੇ, ਤੁਯ੍ਹਂਯੇਵ ਦਮ੍ਮੀ’’ਤਿ ਵਦਤਿ, ਭੁਞ੍ਜਿਤੁਂ ਵਟ੍ਟਤਿ. ਅਥ ਪਨ ‘‘ਭਿਕ੍ਖੁਸਙ੍ਘਸ੍ਸ ਦਸ੍ਸਾਮੀ’’ਤਿ ਹਰਨ੍ਤਸ੍ਸ ਗਚ੍ਛਤੋ ਅਨ੍ਤਰਾਵ ਕਾਲੋ ਉਪਕਟ੍ਠੋ ਹੋਤਿ, ਅਤ੍ਤਨੋ ਪਾਪੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ.

੨੭੩੩. ਯਂ ਪਨ ਚੀਵਰਂ ‘‘ਯਸ੍ਮਿਂ ਆਵਾਸੇ ਵਸ੍ਸਂਵੁਤ੍ਥਸ੍ਸ ਸਙ੍ਘਸ੍ਸ ਦਮ੍ਮੀ’’ਤਿ ਦੇਤਿ, ਤਸ੍ਮਿਂਯੇਵ ਆਵਾਸੇ ਵੁਤ੍ਥਵਸ੍ਸੇਨ ਸਙ੍ਘੇਨ ਵਾ ਗਣੇਨ ਵਾ ਪੁਗ੍ਗਲੇਨ ਵਾ ਤਂ ਚੀਵਰਂ ਭਾਜੇਤਬ੍ਬਨ੍ਤਿ ਵਣ੍ਣਿਤਂ ਦੇਸਿਤਨ੍ਤਿ ਯੋਜਨਾ.

ਤਤ੍ਰਾਯਂ ਵਿਨਿਚ੍ਛਯੋ – ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਵਸ੍ਸਂਵੁਤ੍ਥਸਙ੍ਘਸ੍ਸ ਦਮ੍ਮੀ’’ਤਿ ਦੇਤਿ, ਯਾਵਤਿਕਾ ਭਿਕ੍ਖੂ ਤਸ੍ਮਿਂ ਆਵਾਸੇ ਵਸ੍ਸਂਵੁਤ੍ਥਾ, ਯਤ੍ਤਕਾ ਵਸ੍ਸਚ੍ਛੇਦਂ ਅਕਤ੍ਵਾ ਪੁਰਿਮਵਸ੍ਸਂਵੁਤ੍ਥਾ, ਤੇਹਿ ਭਾਜੇਤਬ੍ਬਂ, ਅਞ੍ਞੇਸਂ ਨ ਪਾਪੁਣਾਤਿ. ਦਿਸਾਪਕ੍ਕਨ੍ਤਸ੍ਸਾਪਿ ¶ ਸਤਿ ਗਾਹਕੇ ¶ ਯਾਵ ਕਥਿਨਸ੍ਸ ਉਬ੍ਭਾਰਾ ਦਾਤਬ੍ਬਂ. ਅਨਤ੍ਥਤੇ ਪਨ ਕਥਿਨੇ ਅਨ੍ਤੋਹੇਮਨ੍ਤੇ ਏਵਞ੍ਚ ਵਤ੍ਵਾ ਦਿਨ੍ਨਂ ਪਚ੍ਛਿਮਵਸ੍ਸਂਵੁਤ੍ਥਾਨਮ੍ਪਿ ਪਾਪੁਣਾਤੀਤਿ ਲਕ੍ਖਣਞ੍ਞੂ ਵਦਨ੍ਤਿ. ਅਟ੍ਠਕਥਾਸੁ ਪਨੇਤਂ ਅਵਿਚਾਰਿਤਂ.

ਸਚੇ ਪਨ ਬਹਿ ਉਪਚਾਰਸੀਮਾਯਂ ਠਿਤੋ ‘‘ਵਸ੍ਸਂਵੁਤ੍ਥਸਙ੍ਘਸ੍ਸ ਦਮ੍ਮੀ’’ਤਿ ਵਦਤਿ, ਸਮ੍ਪਤ੍ਤਾਨਂ ਸਬ੍ਬੇਸਂ ਪਾਪੁਣਾਤਿ. ਅਥ ‘‘ਅਸੁਕਵਿਹਾਰੇ ਵਸ੍ਸਂਵੁਤ੍ਥਸਙ੍ਘਸ੍ਸਾ’’ਤਿ ਵਦਤਿ, ਤਤ੍ਰ ਵਸ੍ਸਂਵੁਤ੍ਥਾਨਮੇਵ ਯਾਵ ਕਥਿਨਸ੍ਸੁਬ੍ਭਾਰਾ ਪਾਪੁਣਾਤਿ. ਸਚੇ ਪਨ ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਏਵਂ ਵਦਤਿ, ਤਤ੍ਰ ਸਮ੍ਮੁਖੀਭੂਤਾਨਂਯੇਵ ਸਬ੍ਬੇਸਂ ਪਾਪੁਣਾਤਿ. ਕਸ੍ਮਾ? ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ. ਅਨ੍ਤੋਵਸ੍ਸੇਯੇਵ ‘‘ਵਸ੍ਸਂ ਵਸਨ੍ਤਾਨਂ ਦਮ੍ਮੀ’’ਤਿ ਵੁਤ੍ਤੇ ਛਿਨ੍ਨਵਸ੍ਸਾ ਨ ਲਭਨ੍ਤਿ, ਵਸ੍ਸਂ ਵਸਨ੍ਤਾਵ ਲਭਨ੍ਤਿ. ਚੀਵਰਮਾਸੇ ਪਨ ‘‘ਵਸ੍ਸਂ ਵਸਨ੍ਤਾਨਂ ਦਮ੍ਮੀ’’ਤਿ ਵੁਤ੍ਤੇ ਪਚ੍ਛਿਮਿਕਾਯ ਵਸ੍ਸੂਪਗਤਾਨਂਯੇਵ ਪਾਪੁਣਾਤਿ, ਪੁਰਿਮਿਕਾਯ ਵਸ੍ਸੂਪਗਤਾਨਞ੍ਚ ਛਿਨ੍ਨਵਸ੍ਸਾਨਞ੍ਚ ਨ ਪਾਪੁਣਾਤਿ.

ਚੀਵਰਮਾਸਤੋ ਪਟ੍ਠਾਯ ਯਾਵ ਹੇਮਨ੍ਤਸ੍ਸ ਪਚ੍ਛਿਮੋ ਦਿਵਸੋ, ਤਾਵ ‘‘ਵਸ੍ਸਾਵਾਸਿਕਂ ਦੇਮਾ’’ਤਿ ਵੁਤ੍ਤੇ ਕਥਿਨਂ ਅਤ੍ਥਤਂ ਵਾ ਹੋਤੁ ਅਨਤ੍ਥਤਂ ਵਾ, ਅਤੀਤਵਸ੍ਸਂਵੁਤ੍ਥਾਨਮੇਵ ਪਾਪੁਣਾਤਿ. ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਵੁਤ੍ਤੇ ਪਨ ਮਾਤਿਕਾ ਆਰੋਪੇਤਬ੍ਬਾ ‘‘ਅਤੀਤਵਸ੍ਸਾਵਾਸਸ੍ਸ ਪਞ੍ਚ ਮਾਸਾ ਅਭਿਕ੍ਕਨ੍ਤਾ, ਅਨਾਗਤੇ ਚਾਤੁਮਾਸਚ੍ਚਯੇਨ ਭਵਿਸ੍ਸਤਿ, ਕਤਰਵਸ੍ਸਾਵਾਸਸ੍ਸ ਦੇਸੀ’’ਤਿ. ਸਚੇ ‘‘ਅਤੀਤਵਸ੍ਸਂਵੁਤ੍ਥਾਨਂ ਦਮ੍ਮੀ’’ਤਿ ਵਦਤਿ, ਤਂ ਅਨ੍ਤੋਵਸ੍ਸਂ ਵੁਤ੍ਥਾਨਮੇਵ ਪਾਪੁਣਾਤਿ. ਦਿਸਾਪਕ੍ਕਨ੍ਤਾਨਮ੍ਪਿ ਸਭਾਗਾ ਗਣ੍ਹਿਤੁਂ ਲਭਨ੍ਤਿ.

ਸਚੇ ‘‘ਅਨਾਗਤੇ ਵਸ੍ਸਾਵਾਸਿਕਂ ਦਮ੍ਮੀ’’ਤਿ ਵਦਤਿ, ਤਂ ਠਪੇਤ੍ਵਾ ਵਸ੍ਸੂਪਨਾਯਿਕਦਿਵਸੇ ਗਹੇਤਬ੍ਬਂ. ਅਥ ‘‘ਅਗੁਤ੍ਤੋ ਵਿਹਾਰੋ, ਚੋਰਭਯਂ ਅਤ੍ਥਿ, ਨ ਸਕ੍ਕਾ ਠਪੇਤੁਂ, ਗਣ੍ਹਿਤ੍ਵਾ ਵਾ ਆਹਿਣ੍ਡਿਤੁ’’ਨ੍ਤਿ ¶ ਵੁਤ੍ਤੇ ‘‘ਸਮ੍ਪਤ੍ਤਾਨਂ ਦਮ੍ਮੀ’’ਤਿ ਵਦਤਿ, ਭਾਜੇਤ੍ਵਾ ਗਹੇਤਬ੍ਬਂ. ਸਚੇ ਵਦਤਿ ‘‘ਇਤੋ ਮੇ, ਭਨ੍ਤੇ, ਤਤਿਯੇ ਵਸ੍ਸੇ ਵਸ੍ਸਾਵਾਸਿਕਂ ਨ ਦਿਨ੍ਨਂ, ਤਂ ਦਮ੍ਮੀ’’ਤਿ, ਤਸ੍ਮਿਂ ਅਨ੍ਤੋਵਸ੍ਸੇ ਵੁਤ੍ਥਭਿਕ੍ਖੂਨਂ ਪਾਪੁਣਾਤਿ. ਸਚੇ ਤੇ ਦਿਸਾਪਕ੍ਕਨ੍ਤਾ, ਅਞ੍ਞੋ ਵਿਸ੍ਸਾਸਿਕੋ ਗਣ੍ਹਾਤਿ, ਦਾਤਬ੍ਬਂ. ਅਥ ਏਕੋਯੇਵ ਅਵਸਿਟ੍ਠੋ, ਸੇਸਾ ਕਾਲਕਤਾ, ਸਬ੍ਬਂ ਏਕਸ੍ਸੇਵ ਪਾਪੁਣਾਤਿ. ਸਚੇ ਏਕੋਪਿ ਨਤ੍ਥਿ, ਸਙ੍ਘਿਕਂ ਹੋਤਿ, ਸਮ੍ਮੁਖੀਭੂਤੇਹਿ ਭਾਜੇਤਬ੍ਬਨ੍ਤਿ.

੨੭੩੪. ਯਾਗੁਯਾ ਪਨ ਪੀਤਾਯ ਵਾ ਭਤ੍ਤੇ ਵਾ ਭੁਤ੍ਤੇ ਸਚੇ ਪਨ ਆਦਿਸ੍ਸ ‘‘ਯੇਨ ਮੇ ਯਾਗੁ ਪੀਤਾ, ਤਸ੍ਸ ਦਮ੍ਮਿ, ਯੇਨ ਮੇ ਭਤ੍ਤਂ ਭੁਤ੍ਤਂ, ਤਸ੍ਸ ਦਮ੍ਮੀ’’ਤਿ ਪਰਿਚ੍ਛਿਨ੍ਦਿਤ੍ਵਾ ਚੀਵਰਂ ਦੇਤਿ, ਵਿਨਯਧਰੇਨ ¶ ਤਤ੍ਥ ਤਤ੍ਥੇਵ ਦਾਨਂ ਦਾਤਬ੍ਬਨ੍ਤਿ ਯੋਜਨਾ. ਏਸ ਨਯੋ ਖਾਦਨੀਯਚੀਵਰਸੇਨਾਸਨਭੇਸਜ੍ਜਾਦੀਸੁ.

ਤਤ੍ਰਾਯਂ ਵਿਨਿਚ੍ਛਯੋ – ਭਿਕ੍ਖੂ ਅਜ੍ਜਤਨਾਯ ਵਾ ਸ੍ਵਾਤਨਾਯ ਵਾ ਯਾਗੁਯਾ ਨਿਮਨ੍ਤੇਤ੍ਵਾ ਤੇਸਂ ਘਰਂ ਪਵਿਟ੍ਠਾਨਂ ਯਾਗੁਂ ਦੇਤਿ, ਯਾਗੁਂ ਦਤ੍ਵਾ ਪੀਤਾਯ ਯਾਗੁਯਾ ‘‘ਇਮਾਨਿ ਚੀਵਰਾਨਿ ਯੇਹਿ ਮਯ੍ਹਂ ਯਾਗੁ ਪੀਤਾ, ਤੇਸਂ ਦਮ੍ਮੀ’’ਤਿ ਦੇਤਿ, ਯੇਹਿ ਨਿਮਨ੍ਤਿਤੇਹਿ ਯਾਗੁ ਪੀਤਾ, ਤੇਸਂਯੇਵ ਪਾਪੁਣਨ੍ਤਿ, ਯੇਹਿ ਪਨ ਭਿਕ੍ਖਾਚਾਰਵਤ੍ਤੇਨ ਘਰਦ੍ਵਾਰੇਨ ਗਚ੍ਛਨ੍ਤੇਹਿ ਵਾ ਘਰਂ ਪਵਿਟ੍ਠੇਹਿ ਵਾ ਯਾਗੁ ਲਦ੍ਧਾ, ਯੇਸਂ ਵਾ ਆਸਨਸਾਲਤੋ ਪਤ੍ਤਂ ਆਹਰਿਤ੍ਵਾ ਮਨੁਸ੍ਸੇਹਿ ਨੀਤਾ, ਯੇ ਵਾ ਥੇਰੇਹਿ ਪੇਸਿਤਾ, ਤੇਸਂ ਨ ਪਾਪੁਣਨ੍ਤਿ.

ਸਚੇ ਪਨ ਨਿਮਨ੍ਤਿਤਭਿਕ੍ਖੂਹਿ ਸਦ੍ਧਿਂ ਅਞ੍ਞੇਪਿ ਬਹੂ ਆਗਨ੍ਤ੍ਵਾ ਅਨ੍ਤੋਗੇਹਞ੍ਚ ਬਹਿਗੇਹਞ੍ਚ ਪੂਰੇਤ੍ਵਾ ਨਿਸਿਨ੍ਨਾ, ਦਾਯਕੋ ਚ ਏਵਂ ਵਦਤਿ ‘‘ਨਿਮਨ੍ਤਿਤਾ ਵਾ ਹੋਨ੍ਤੁ ਅਨਿਮਨ੍ਤਿਤਾ ਵਾ, ਯੇਸਂ ਮਯਾ ਯਾਗੁ ਦਿਨ੍ਨਾ, ਸਬ੍ਬੇਸਂ ਇਮਾਨਿ ਵਤ੍ਥਾਨਿ ਹੋਨ੍ਤੂ’’ਤਿ, ਸਬ੍ਬੇਸਂ ਪਾਪੁਣਨ੍ਤਿ. ਯੇਹਿ ਪਨ ਥੇਰਾਨਂ ਹਤ੍ਥਤੋ ਯਾਗੁ ¶ ਲਦ੍ਧਾ, ਤੇਸਂ ਨ ਪਾਪੁਣਨ੍ਤਿ. ਅਥ ਸੋ ‘‘ਯੇਹਿ ਮਯ੍ਹਂ ਯਾਗੁ ਪੀਤਾ, ਸਬ੍ਬੇਸਂ ਹੋਨ੍ਤੂ’’ਤਿ ਵਦਤਿ, ਸਬ੍ਬੇਸਂ ਪਾਪੁਣਨ੍ਤਿ. ਭਤ੍ਤਖਾਦਨੀਯੇਸੁਪਿ ਏਸੇਵ ਨਯੋ.

ਚੀਵਰੇ ਵਾਤਿ ਪੁਬ੍ਬੇਪਿ ਯੇਨ ਵਸ੍ਸਂ ਵਾਸੇਤ੍ਵਾ ਭਿਕ੍ਖੂਨਂ ਚੀਵਰਂ ਦਿਨ੍ਨਪੁਬ੍ਬਂ ਹੋਤਿ, ਸੋ ਚੇ ਭਿਕ੍ਖੂ ਭੋਜੇਤ੍ਵਾ ਵਦਤਿ ‘‘ਯੇਸਂ ਮਯਾ ਪੁਬ੍ਬੇ ਚੀਵਰਂ ਦਿਨ੍ਨਂ, ਤੇਸਂਯੇਵ ਇਮਂ ਚੀਵਰਂ ਵਾ ਸੁਤ੍ਤਂ ਵਾ ਸਪ੍ਪਿਮਧੁਫਾਣਿਤਾਦੀਨਿ ਵਾ ਹੋਨ੍ਤੂ’’ਤਿ, ਸਬ੍ਬਂ ਤੇਸਂਯੇਵ ਪਾਪੁਣਾਤਿ.

ਸੇਨਾਸਨੇ ਵਾਤਿ ‘‘ਯੋ ਮਯਾ ਕਾਰਿਤੇ ਵਿਹਾਰੇ ਵਾ ਪਰਿਵੇਣੇ ਵਾ ਵਸਤਿ, ਤਸ੍ਸਿਦਂ ਹੋਤੂ’’ਤਿ ਵੁਤ੍ਤੇ ਤਸ੍ਸੇਵ ਹੋਤਿ.

ਭੇਸਜ੍ਜੇ ਵਾਤਿ ‘‘ਮਯਂ ਕਾਲੇਨ ਕਾਲਂ ਥੇਰਾਨਂ ਸਪ੍ਪਿਆਦੀਨਿ ਭੇਸਜ੍ਜਾਨਿ ਦੇਮ, ਯੇਹਿ ਤਾਨਿ ਲਦ੍ਧਾਨਿ, ਤੇਸਂਯੇਵਿਦਂ ਹੋਤੂ’’ਤਿ ਵੁਤ੍ਤੇ ਤੇਸਂਯੇਵ ਹੋਤੀਤਿ.

੨੭੩੫. ਦੀਯਤੇਤਿ ਦਾਨਨ੍ਤਿ ਕਮ੍ਮਸਾਧਨੇਨ ਚੀਵਰਂ ਵੁਚ੍ਚਤਿ. ਯਂ-ਸਦ੍ਦੇਨ ਚੀਵਰਸ੍ਸ ਪਰਾਮਟ੍ਠਤ੍ਤਾ ਤਂ-ਸਦ੍ਦੇਨਾਪਿ ਤਦੇਵ ਪਰਾਮਸਿਤਬ੍ਬਨ੍ਤਿ.

ਤਤ੍ਰਾਯਂ ਵਿਨਿਚ੍ਛਯੋ – ‘‘ਇਮਂ ¶ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ ਏਵਂ ਪਰਮ੍ਮੁਖਾ ਵਾ ‘‘ਇਦਂ ਮੇ, ਭਨ੍ਤੇ, ਤੁਮ੍ਹਾਕਂ ਦਮ੍ਮੀ’’ਤਿ ਏਵਂ ਸਮ੍ਮੁਖਾ ਵਾ ਪਾਦਮੂਲੇ ਠਪੇਤ੍ਵਾ ਵਾ ਦੇਤਿ, ਤਂ ਤਸ੍ਸੇਵ ਹੋਤਿ. ਸਚੇ ਪਨ ‘‘ਇਦਂ ਤੁਮ੍ਹਾਕਞ੍ਚ ਤੁਮ੍ਹਾਕਂ ਅਨ੍ਤੇਵਾਸਿਕਾਨਞ੍ਚ ਦਮ੍ਮੀ’’ਤਿ ਏਵਂ ਵਦਤਿ, ਥੇਰਸ੍ਸ ਚ ਅਨ੍ਤੇਵਾਸਿਕਾਨਞ੍ਚ ਪਾਪੁਣਾਤਿ. ਉਦ੍ਦੇਸਂ ਗਹੇਤੁਂ ਆਗਤੋ ਗਹੇਤ੍ਵਾ ਗਚ੍ਛਨ੍ਤੋ ਚ ਅਤ੍ਥਿ, ਤਸ੍ਸਾਪਿ ਪਾਪੁਣਾਤਿ. ‘‘ਤੁਮ੍ਹੇਹਿ ਸਦ੍ਧਿਂ ਨਿਬਦ੍ਧਚਾਰਿਕਭਿਕ੍ਖੂਨਂ ਦਮ੍ਮੀ’’ਤਿ ਵੁਤ੍ਤੇ ਉਦ੍ਦੇਸਨ੍ਤੇਵਾਸਿਕਾਨਂ ਵਤ੍ਤਂ ਕਤ੍ਵਾ ਉਦ੍ਦੇਸਪਰਿਪੁਚ੍ਛਾਦੀਨਿ ਗਹੇਤ੍ਵਾ ਵਿਚਰਨ੍ਤਾਨਂ ਸਬ੍ਬੇਸਂ ਪਾਪੁਣਾਤੀਤਿ.

੨੭੩੭. ਵਦਤਿਚ੍ਚੇਵਮੇਵ ¶ ਚੇਤਿ ਇਚ੍ਚੇਵਂ ਯਥਾਵੁਤ੍ਤਨਯੇਨ ਵਦਤਿ ਚੇ. ਤਨ੍ਤਿ ਤਂ ਪਰਿਕ੍ਖਾਰਂ. ਤੇਸਨ੍ਤਿ ਮਾਤੁਆਦੀਨਂ. ਸਙ੍ਘਸ੍ਸੇਵ ਸਨ੍ਤਕਂ ਹੋਤੀਤਿ ਯੋਜਨਾ.

੨੭੩੮. ‘‘ਪਞ੍ਚਨ੍ਨਂ…ਪੇ… ਹੋਤੀ’’ਤਿ ਇਮਿਨਾ ਪੁਰਿਮਗਾਥਾਦ੍ਵਯੇਨ ਵਿਤ੍ਥਾਰਿਤਮੇਵਤ੍ਥਂ ਸਂਖਿਪਿਤ੍ਵਾ ਦਸ੍ਸੇਤਿ. ਪਞ੍ਚਨ੍ਨਂ ਸਹਧਮ੍ਮਿਕਾਨਂ. ਅਚ੍ਚਯੇਤਿ ਕਾਲਕਿਰਿਯਾਯ. ਦਾਨਨ੍ਤਿ ‘‘ਮਯਿ ਕਾਲਕਤੇ ਇਮਂ ਪਰਿਕ੍ਖਾਰਂ ਤੁਯ੍ਹਂ ਹੋਤੁ, ਤਵ ਸਨ੍ਤਕਂ ਕਰੋਹੀ’’ਤਿਆਦਿਨਾ ਪਰਿਚ੍ਚਜਨਂ. ਕਿਞ੍ਚਿਪੀਤਿ ਅਨ੍ਤਮਸੋ ਦਨ੍ਤਕਟ੍ਠਮ੍ਪਿ. ਗਿਹੀਨਂ ਪਨ ਦਾਨਂ ਤਥਾ ਦਾਯਕਾਨਂ ਗਿਹੀਨਮੇਵ ਅਚ੍ਚਯੇ ਰੂਹਤੀਤਿ ਯੋਜਨਾ.

੨੭੩੯. ਭਿਕ੍ਖੁ ਵਾ ਸਾਮਣੇਰੋ ਵਾ ਭਿਕ੍ਖੁਨਿਉਪਸ੍ਸਯੇ ਕਾਲਂ ਕਰੋਤਿ, ਅਸ੍ਸ ਭਿਕ੍ਖੁਸ੍ਸ ਵਾ ਸਾਮਣੇਰਸ੍ਸ ਵਾ ਪਰਿਕ੍ਖਾਰਾ ਭਿਕ੍ਖੂਨਂਯੇਵ ਸਨ੍ਤਕਾ ਭਿਕ੍ਖੁਸਙ੍ਘਸ੍ਸੇਵ ਸਨ੍ਤਕਾਤਿ ਯੋਜਨਾ. ਭਿਕ੍ਖੁਸਙ੍ਘਸ੍ਸੇਵ ਸਨ੍ਤਕਾ ਕਾਲਕਤਸ੍ਸ ਭਿਕ੍ਖੁਸਙ੍ਘਪਰਿਯਾਪਨ੍ਨਤ੍ਤਾ.

੨੭੪੦. ਸਾਮਣੇਰੀ ਵਾਤਿ ਏਤ੍ਥ ਵਾ-ਸਦ੍ਦੇਨ ‘‘ਸਿਕ੍ਖਮਾਨਾ ਵਾ’’ਤਿ ਇਦਂ ਸਙ੍ਗਣ੍ਹਾਤਿ. ਵਿਹਾਰਸ੍ਮਿਂ ਭਿਕ੍ਖੂਨਂ ਨਿਵਾਸਨਟ੍ਠਾਨੇ. ਤਸ੍ਸਾਤਿ ਭਿਕ੍ਖੁਨਿਯਾ ਵਾ ਸਾਮਣੇਰਿਯਾ ਵਾ ਸਿਕ੍ਖਮਾਨਾਯ ਵਾ ਪਰਿਕ੍ਖਾਰਾ ਭਿਕ੍ਖੁਨੀਨਂ ਸਨ੍ਤਕਾ ਹੋਨ੍ਤੀਤਿ ਯੋਜਨਾ. ਸਨ੍ਤਕਾਤਿ ਏਤ੍ਥਾਪਿ ਭਿਕ੍ਖੂਸੁ ਵੁਤ੍ਤਨਯੇਨੇਵਤ੍ਥੋ ਗਹੇਤਬ੍ਬੋ.

੨੭੪੧. ਦੇਹਿ ਨੇਤ੍ਵਾਤਿ ਏਤ੍ਥ ‘‘ਇਮਂ ਚੀਵਰ’’ਨ੍ਤਿ ਪਕਰਣਤੋ ਲਬ੍ਭਤਿ. ‘‘ਇਮਂ ਚੀਵਰਂ ਨੇਤ੍ਵਾ ਅਸੁਕਸ੍ਸ ਦੇਹੀ’’ਤਿ ਯਂ ਚੀਵਰਂ ਦਿਨ੍ਨਂ, ਤਂ ਤਸ੍ਸ ਪੁਰਿਮਸ੍ਸੇਵ ਸਨ੍ਤਕਂ ਹੋਤਿ. ‘‘ਇਦਂ ਚੀਵਰਂ ¶ ਅਸੁਕਸ੍ਸ ਦਮ੍ਮੀ’’ਤਿ ਯਂ ਚੀਵਰਂ ਦਿਨ੍ਨਂ, ਤਂ ਯਸ੍ਸ ਪਹਿਯ੍ਯਤਿ, ਤਸ੍ਸ ਪਚ੍ਛਿਮਸ੍ਸੇਵ ਸਨ੍ਤਕਂ ਹੋਤੀਤਿ ਯੋਜਨਾ.

੨੭੪੨. ਯਥਾਵੁਤ੍ਤਵਚਨਪ੍ਪਕਾਰਾਨੁਰੂਪੇਨ ¶ ਸਾਮਿਕੇ ਞਤ੍ਵਾ ਸਾਮਿਕੇਸੁ ਵਿਸ੍ਸਾਸੇਨ ਵਾ ਤੇਸੁ ਮਤੇਸੁ ਮਤਕਚੀਵਰਮ੍ਪਿ ਗਣ੍ਹਿਤੁਂ ਵਟ੍ਟਤੀਤਿ ਦਸ੍ਸੇਤੁਂ ਆਹ ‘‘ਏਵ’’ਨ੍ਤਿਆਦਿ. ‘‘ਮਤਸ੍ਸ ਵਾ ਅਮਤਸ੍ਸ ਵਾ’’ਤਿ ਪਦਚ੍ਛੇਦੋ. ਵਿਸ੍ਸਾਸਂ ਵਾਪਿ ਗਣ੍ਹੇਯ੍ਯਾਤਿ ਜੀਵਨ੍ਤਸ੍ਸ ਸਨ੍ਤਕਂ ਵਿਸ੍ਸਾਸਗ੍ਗਾਹਂ ਗਣ੍ਹੇਯ੍ਯ. ਗਣ੍ਹੇ ਮਤਕਚੀਵਰਨ੍ਤਿ ਮਤਸ੍ਸ ਚੀਵਰਂ ਮਤਕਪਰਿਕ੍ਖਾਰਨੀਹਾਰੇਨ ਪਾਪੇਤ੍ਵਾ ਗਣ੍ਹੇਯ੍ਯ.

੨੭੪੩. ਰਜਤੇ ਅਨੇਨਾਤਿ ਰਜਨਨ੍ਤਿ ਮੂਲਾਦਿਸਬ੍ਬਮਾਹ. ਵਨ੍ਤਦੋਸੇਨਾਤਿ ਸਵਾਸਨਸਮੁਚ੍ਛਿਨ੍ਨਰਾਗਾਦਿਦੋਸੇਨ. ਤਾਦਿਨਾਤਿ ਰੂਪਾਦੀਸੁ ਛਲ਼ਾਰਮ੍ਮਣੇਸੁ ਰਾਗਾਦੀਨਂ ਅਨੁਪ੍ਪਤ੍ਤਿਯਾ ਅਟ੍ਠਸੁ ਲੋਕਧਮ੍ਮੇਸੁ ਨਿਬ੍ਬਿਕਾਰਤਾਯ ਏਕਸਦਿਸੇਨ.

੨੭੪੪-੫. ‘‘ਮੂਲੇ’’ਤਿਆਦੀਸੁ ਨਿਦ੍ਧਾਰਣੇ ਭੁਮ੍ਮਂ. ਮੂਲਰਜਨੇ ਹਲਿਦ੍ਦਿਂ ਠਪੇਤ੍ਵਾ ਸਬ੍ਬਂ ਮੂਲਰਜਨਂ ਵਟ੍ਟਤਿ. ਖਨ੍ਧੇਸੁ ਰਜਨੇਸੁ ਮਞ੍ਜੇਟ੍ਠਞ੍ਚ ਤੁਙ੍ਗਹਾਰਕਞ੍ਚ ਠਪੇਤ੍ਵਾ ਸਬ੍ਬਂ ਖਨ੍ਧਰਜਨਂ ਵਟ੍ਟਤਿ. ਪਤ੍ਤੇਸੁ ਰਜਨੇਸੁ ਅਲ੍ਲਿਯਾ ਪਤ੍ਤਂ ਤਥਾ ਨੀਲਿਯਾ ਪਤ੍ਤਞ੍ਚ ਠਪੇਤ੍ਵਾ ਸਬ੍ਬਂ ਪਤ੍ਤਰਜਨਂ ਵਟ੍ਟਤਿ. ਪੁਪ੍ਫਰਜਨੇਸੁ ਕੁਸੁਮ੍ਭਞ੍ਚ ਕਿਂਸੁਕਞ੍ਚ ਠਪੇਤ੍ਵਾ ਸਬ੍ਬਂ ਪੁਪ੍ਫਰਜਨਂ ਵਟ੍ਟਤਿ. ਤਚਰਜਨੇ ਲੋਦ੍ਦਞ੍ਚ ਕਣ੍ਡੁਲਞ੍ਚ ਠਪੇਤ੍ਵਾ ਸਬ੍ਬਂ ਤਚਰਜਨਂ ਵਟ੍ਟਤਿ. ਫਲਰਜਨਂ ਸਬ੍ਬਮ੍ਪਿ ਵਟ੍ਟਤੀਤਿ ਯੋਜਨਾ.

ਮਞ੍ਜੇਟ੍ਠਨ੍ਤਿ ਏਕੋ ਸਕਣ੍ਟਕਰੁਕ੍ਖੋ, ਵਲ੍ਲਿਵਿਸੇਸੋ ਚ, ਯਸ੍ਸ ਰਜਨਂ ਮਞ੍ਜੇਟ੍ਠਬੀਜਵਣ੍ਣਂ ਹੋਤਿ. ਮਞ੍ਜੇਟ੍ਠਰੁਕ੍ਖਸ੍ਸ ਖਨ੍ਧੋ ਸੇਤਵਣ੍ਣੋਤਿ ਸੋ ਇਧ ਨ ਗਹੇਤਬ੍ਬੋ ਰਜਨਾਧਿਕਾਰਤ੍ਤਾ. ਤੁਙ੍ਗਹਾਰਕੋ ਨਾਮ ਏਕੋ ਸਕਣ੍ਟਕਰੁਕ੍ਖੋ, ਯਸ੍ਸ ਰਜਨਂ ਹਰਿਤਾਲਵਣ੍ਣਂ ਹੋਤਿ. ਅਲ੍ਲੀਤਿ ਚੁਲ੍ਲਤਾਪਿਞ੍ਛਰੁਕ੍ਖੋ, ਯਸ੍ਸ ਪਣ੍ਣਰਜਨਂ ਹਲਿਦ੍ਦਿਵਣ੍ਣਂ ਹੋਤਿ. ਨੀਲੀਤਿ ਗਚ੍ਛਵਿਸੇਸੋ, ਯਸ੍ਸ ਪਨ ਰਜਨਂ ਨੀਲਵਣ੍ਣਂ ਹੋਤਿ. ਕਿਂਸੁਕਂ ਨਾਮ ਵਲ੍ਲਿਕਿਂਸੁਕਪੁਪ੍ਫਂ, ਯਸ੍ਸ ਰਜਨਂ ਲੋਹਿਤਵਣ੍ਣਂ ਹੋਤਿ.

੨੭੪੬. ਕਿਲਿਟ੍ਠਸਾਟਕਨ੍ਤਿ ¶ ਮਲੀਨਸਾਟਕਂ. ਧੋਵਿਤੁਨ੍ਤਿ ਏਕਵਾਰਂ ਧੋਵਿਤੁਂ. ਅਲ੍ਲਿਯਾ ਧੋਤਂ ਕਿਰ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹਾਤਿ.

੨੭੪੭. ਚੀਵਰਾਨਂ ¶ ਕਥਾ ਸੇਸਾਤਿ ਭੇਦਕਾਰਣਪ੍ਪਕਾਰਕਥਾਦਿਕਾ ਇਧ ਅਵੁਤ੍ਤਕਥਾ. ਪਠਮੇ ਕਥਿਨੇ ਵੁਤ੍ਤਾਤਿ ਸੇਸੋ. ਵਿਭਾਵਿਨਾਤਿ ਖਨ੍ਧਕਭਾਣਕੇਨ.

ਚੀਵਰਕ੍ਖਨ੍ਧਕਕਥਾਵਣ੍ਣਨਾ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ ਵਿਨਯਵਿਨਿਚ੍ਛਯਵਣ੍ਣਨਾਯ

ਮਹਾਵਗ੍ਗਵਿਨਿਚ੍ਛਯਵਣ੍ਣਨਾ ਨਿਟ੍ਠਿਤਾ.

ਚੂਲ਼ਵਗ੍ਗੋ

ਪਾਰਿਵਾਸਿਕਕ੍ਖਨ੍ਧਕਕਥਾਵਣ੍ਣਨਾ

੨੭੪੮. ਏਵਂ ¶ ¶ ਮਹਾਵਗ੍ਗਵਿਨਿਚ੍ਛਯਂ ਸਙ੍ਖੇਪੇਨ ਦਸ੍ਸੇਤ੍ਵਾ ਚੂਲ਼ਵਗ੍ਗਾਗਤਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਤਜ੍ਜਨੀਯ’’ਨ੍ਤਿਆਦਿ. ਤਜ੍ਜਨੀਯਨ੍ਤਿ ਕਲਹਕਾਰਕਾਨਂ ਭਿਕ੍ਖੂਨਂ ਤਤੋ ਵਿਰਮਨਤ੍ਥਾਯ ਨਿਗ੍ਗਹਵਸੇਨ ਅਨੁਞ੍ਞਾਤਂ ਞਤ੍ਤਿਚਤੁਤ੍ਥਂ ਤਜ੍ਜਨੀਯਕਮ੍ਮਞ੍ਚ. ਨਿਯਸ੍ਸਨ੍ਤਿ ਬਾਲਸ੍ਸ ਅਬ੍ਯਤ੍ਤਸ੍ਸ ਆਪਤ੍ਤਿਬਹੁਲਸ੍ਸ ਅਨਪਦਾਨਸ੍ਸ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ ਸਂਸਟ੍ਠਸ੍ਸ ਵਿਹਰਤੋ ਭਿਕ੍ਖੁਨੋ ਨਿਗ੍ਗਹਵਸੇਨ ਨਿਸ੍ਸਾਯ ਵਸਨਤ੍ਥਾਯ ਕਾਤੁਂ ਅਨੁਞ੍ਞਾਤਂ ਞਤ੍ਤਿਚਤੁਤ੍ਥਂ ਨਿਯਸ੍ਸਕਮ੍ਮਞ੍ਚ.

ਪਬ੍ਬਾਜਨ੍ਤਿ ਕੁਲਦੂਸਕਸ੍ਸ ਭਿਕ੍ਖੁਨੋ ਯਤ੍ਥ ਤੇਨ ਕੁਲਦੂਸਨਂ ਕਤਂ, ਤਤ੍ਥ ਨ ਲਭਿਤਬ੍ਬਆਵਾਸਤ੍ਥਾਯ ਨਿਗ੍ਗਹਵਸੇਨ ਅਨੁਞ੍ਞਾਤਂ ਞਤ੍ਤਿਚਤੁਤ੍ਥਂ ਪਬ੍ਬਾਜਨੀਯਕਮ੍ਮਞ੍ਚ. ਪਟਿਸਾਰਣਨ੍ਤਿ ਸਦ੍ਧਸ੍ਸ ਉਪਾਸਕਸ੍ਸ ਦਾਯਕਸ੍ਸ ਕਾਰਕਸ੍ਸ ਸਙ੍ਘੁਪਟ੍ਠਾਕਸ੍ਸ ਜਾਤਿਆਦੀਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਕਸ੍ਸ ਭਿਕ੍ਖੁਨੋ ਤਂਖਮਾਪਨਤ੍ਥਾਯ ਨਿਗ੍ਗਹਵਸੇਨ ਅਨੁਞ੍ਞਾਤਂ ਞਤ੍ਤਿਚਤੁਤ੍ਥਂ ਪਟਿਸਾਰਣੀਯਕਮ੍ਮਞ੍ਚ.

ਤਿਵਿਧੁਕ੍ਖੇਪਨਨ੍ਤਿ ਆਪਤ੍ਤਿਯਾ ਅਦਸ੍ਸਨੇ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਚ ਤਤੋ ਓਰਮਿਤੁਂ ਨਿਗ੍ਗਹਵਸੇਨ ਅਨੁਞ੍ਞਾਤਂ ਞਤ੍ਤਿਚਤੁਤ੍ਥਂ ਤਿਵਿਧਂ ਉਕ੍ਖੇਪਨੀਯਕਮ੍ਮਞ੍ਚਾਤਿ. ਦੀਪਯੇਤਿ ਪਾਲ਼ਿਯਾ, ਅਟ੍ਠਕਥਾਯ ਚ ਵੁਤ੍ਤਨਯੇਨ ਪਕਾਸੇਯ੍ਯਾਤਿ ਅਤ੍ਥੋ.

ਤਜ੍ਜਨੀਯਾਦਿਕਮ੍ਮਾਨਂ ਓਸਾਰਣਨਿਸ੍ਸਾਰਣਵਸੇਨ ਪਚ੍ਚੇਕਂ ਦੁਵਿਧਤ੍ਤੇਪਿ ਤਂ ਭੇਦਂ ਅਨਾਮਸਿਤ੍ਵਾ ਕੇਵਲਂ ¶ ਜਾਤਿਵਸੇਨ ‘‘ਸਤ੍ਤ ਕਮ੍ਮਾਨੀ’’ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਯਥਾ ਦਸ੍ਸਿਤੋ ਪਨੇਤੇਸਂ ¶ ਵਿਸੇਸੋ ਅਤ੍ਥੁਪ੍ਪਤ੍ਤਿਵਸੇਨਾਤਿ ਦਟ੍ਠਬ੍ਬੋ. ਵਿਤ੍ਥਾਰੋ ਪਨੇਸਂ ਕਮ੍ਮਕ੍ਖਨ੍ਧਕਤੋ ਵੇਦਿਤਬ੍ਬੋ.

੨੭੪੯. ਖਨ੍ਧਕੇ ਕਮ੍ਮਸਙ੍ਖਾਤੇ ਖਨ੍ਧਕੇ ਆਗਤਾਨਿ ਤੇਚਤ੍ਤਾਲੀਸ ਵਤ੍ਤਾਨਿ. ਤਦਨਨ੍ਤਰੇਤਿ ਤਸ੍ਸ ਕਮ੍ਮਕ੍ਖਨ੍ਧਕਸ੍ਸ ਅਨਨ੍ਤਰੇ. ਖਨ੍ਧਕੇਤਿ ਪਾਰਿਵਾਸਿਕਕ੍ਖਨ੍ਧਕੇ. ਨਵ ਅਧਿਕਾਨਿ ਯੇਸਂ ਤੇ ਨਵਾਧਿਕਾਨਿ ਤਿਂਸੇਵ ਵਤ੍ਤਾਨਿ, ਏਕੂਨਚਤ੍ਤਾਲੀਸ ਵਤ੍ਤਾਨੀਤਿ ਵੁਤ੍ਤਂ ਹੋਤਿ.

ਕਮ੍ਮਕ੍ਖਨ੍ਧਕੇ ਤਾਵ –

‘‘ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ – ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ, ਨ ਭਿਕ੍ਖੁਨੋਵਾਦਕਸਮ੍ਮੁਤਿ ਸਾਦਿਤਬ੍ਬਾ, ਸਮ੍ਮਤੇਨਾਪਿ ਭਿਕ੍ਖੁਨਿਯੋ ਨ ਓਵਦਿਤਬ੍ਬਾ, ਯਾਯ ਆਪਤ੍ਤਿਯਾ ਸਙ੍ਘੇਨ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਤਂ ਹੋਤਿ, ਸਾ ਆਪਤ੍ਤਿ ਨ ਆਪਜ੍ਜਿਤਬ੍ਬਾ, ਅਞ੍ਞਾ ਵਾ ਤਾਦਿਸਿਕਾ, ਤਤੋ ਵਾ ਪਾਪਿਟ੍ਠਤਰਾ, ਕਮ੍ਮਂ ਨ ਗਰਹਿਤਬ੍ਬਂ, ਕਮ੍ਮਿਕਾ ਨ ਗਰਹਿਤਬ੍ਬਾ, ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਆਸਨਾਭਿਹਾਰੋ ਸੇਯ੍ਯਾਭਿਹਾਰੋ ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਤ੍ਤਚੀਵਰਪਟਿਗ੍ਗਹਣਂ ਨਹਾਨੇ ਪਿਟ੍ਠਿਪਰਿਕਮ੍ਮਂ ਸਾਦਿਤਬ੍ਬਂ, ਨ ਪਕਤਤ੍ਤੋ ਭਿਕ੍ਖੁ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਤਬ੍ਬੋ, ਨ ਆਚਾਰਵਿਪਤ੍ਤਿਯਾ ਅਨੁਦ੍ਧਂਸੇਤਬ੍ਬੋ, ਨ ਦਿਟ੍ਠਿਵਿਪਤ੍ਤਿਯਾ ਅਨੁਦ੍ਧਂਸੇਤਬ੍ਬੋ, ਨ ਆਜੀਵਵਿਪਤ੍ਤਿਯਾ ਅਨੁਦ੍ਧਂਸੇਤਬ੍ਬੋ, ਨ ਭਿਕ੍ਖੁ ਭਿਕ੍ਖੂਹਿ ਭੇਦੇਤਬ੍ਬੋ, ਨ ਗਿਹਿਦ੍ਧਜੋ ਧਾਰੇਤਬ੍ਬੋ, ਨ ਤਿਤ੍ਥਿਯਦ੍ਧਜੋ ਧਾਰੇਤਬ੍ਬੋ, ਨ ਤਿਤ੍ਥਿਯਾ ਸੇਵਿਤਬ੍ਬਾ, ਭਿਕ੍ਖੂ ਸੇਵਿਤਬ੍ਬਾ, ਭਿਕ੍ਖੁਸਿਕ੍ਖਾਯ ¶ ਸਿਕ੍ਖਿਤਬ੍ਬਂ, ਨ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਆਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਅਨਾਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਆਵਾਸੇ ਵਾ ਅਨਾਵਾਸੇ ਵਾ ਵਤ੍ਥਬ੍ਬਂ, ਪਕਤਤ੍ਤਂ ਭਿਕ੍ਖੁਂ ਦਿਸ੍ਵਾ ਆਸਨਾ ਵੁਟ੍ਠਾਤਬ੍ਬਂ, ਨ ਪਕਤਤ੍ਤੋ ਭਿਕ੍ਖੁ ਆਸਾਦੇਤਬ੍ਬੋ ਅਨ੍ਤੋ ਵਾ ਬਹਿ ਵਾ, ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥੋ ਠਪੇਤਬ੍ਬੋ, ਨ ਪਵਾਰਣਾ ਠਪੇਤਬ੍ਬਾ, ਨ ਸਵਚਨੀਯਂ ਕਾਤਬ੍ਬਂ, ਨ ਅਨੁਵਾਦੋ ਪਟ੍ਠਪੇਤਬ੍ਬੋ, ਨ ਓਕਾਸੋ ਕਾਰੇਤਬ੍ਬੋ, ਨ ਚੋਦੇਤਬ੍ਬੋ, ਨ ਸਾਰੇਤਬ੍ਬੋ, ਨ ਭਿਕ੍ਖੂਹਿ ਸਮ੍ਪਯੋਜੇਤਬ੍ਬ’’ਨ੍ਤਿ (ਚੂਲ਼ਵ. ੫੧) –

ਏਵਂ ¶ ਚੇਤਾਨਿ ਤੇਚਤ੍ਤਾਲੀਸ ਵਤ੍ਤਾਨਿ ਸਨ੍ਧਾਯ ਵੁਤ੍ਤਂ ‘‘ਤੇਚਤ੍ਤਾਲੀਸ ਵਤ੍ਤਾਨਿ, ਖਨ੍ਧਕੇ ਕਮ੍ਮਸਞ੍ਞਿਤੇ’’ਤਿ.

ਪਾਰਿਵਾਸਿਕਕ੍ਖਨ੍ਧਕੇ (ਚੂਲ਼ਵ. ੭੬-੮੨) –

‘‘ਪਾਰਿਵਾਸਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ – ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ, ਨ ਭਿਕ੍ਖੁਨੋਵਾਦਕਸਮ੍ਮੁਤਿ ਸਾਦਿਤਬ੍ਬਾ, ਸਮ੍ਮਤੇਨਪਿ ਭਿਕ੍ਖੁਨਿਯੋ ਨ ਓਵਦਿਤਬ੍ਬਾ, ਯਾਯ ਆਪਤ੍ਤਿਯਾ ਸਙ੍ਘੇਨ ਪਰਿਵਾਸੋ ਦਿਨ੍ਨੋ ਹੋਤਿ, ਸਾ ਆਪਤ੍ਤਿ ਨ ਆਪਜ੍ਜਿਤਬ੍ਬਾ, ਅਞ੍ਞਾ ਵਾ ਤਾਦਿਸਿਕਾ, ਤਤੋ ਵਾ ਪਾਪਿਟ੍ਠਤਰਾ, ਕਮ੍ਮਂ ਨ ਗਰਹਿਤਬ੍ਬਂ, ਕਮ੍ਮਿਕਾ ਨ ਗਰਹਿਤਬ੍ਬਾ, ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥੋ ਠਪੇਤਬ੍ਬੋ, ਨ ਪਵਾਰਣਾ ਠਪੇਤਬ੍ਬਾ, ਨ ਸਵਚਨੀਯਂ ਕਾਤਬ੍ਬਂ, ਨ ਅਨੁਵਾਦੋ ਪਟ੍ਠਪੇਤਬ੍ਬੋ, ਨ ਓਕਾਸੋ ਕਾਰੇਤਬ੍ਬੋ, ਨ ਚੋਦੇਤਬ੍ਬੋ, ਨ ਸਾਰੇਤਬ੍ਬੋ, ਨ ਭਿਕ੍ਖੂਹਿ ਸਮ੍ਪਯੋਜੇਤਬ੍ਬਂ.

‘‘ਨ ¶ , ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਪਕਤਤ੍ਤਸ੍ਸ ਭਿਕ੍ਖੁਨੋ ਪੁਰਤੋ ਗਨ੍ਤਬ੍ਬਂ, ਨ ਪੁਰਤੋ ਨਿਸੀਦਿਤਬ੍ਬਂ, ਯੋ ਹੋਤਿ ਸਙ੍ਘਸ੍ਸ ਆਸਨਪਰਿਯਨ੍ਤੋ ਸੇਯ੍ਯਾਪਰਿਯਨ੍ਤੋ ਵਿਹਾਰਪਰਿਯਨ੍ਤੋ, ਸੋ ਤਸ੍ਸ ਪਦਾਤਬ੍ਬੋ, ਤੇਨ ਚ ਸੋ ਸਾਦਿਤਬ੍ਬੋ.

‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਪਕਤਤ੍ਤਸ੍ਸ ਭਿਕ੍ਖੁਨੋ ਪੁਰੇਸਮਣੇਨ ਵਾ ਪਚ੍ਛਾਸਮਣੇਨ ਵਾ ਕੁਲਾਨਿ ਉਪਸਙ੍ਕਮਿਤਬ੍ਬਾਨਿ, ਨ ਆਰਞ੍ਞਿਕਙ੍ਗਂ ਸਮਾਦਾਤਬ੍ਬਂ, ਨ ਪਿਣ੍ਡਪਾਤਿਕਙ੍ਗਂ ਸਮਾਦਾਤਬ੍ਬਂ, ਨ ਚ ਤਪ੍ਪਚ੍ਚਯਾ ਪਿਣ੍ਡਪਾਤੋ ਨੀਹਰਾਪੇਤਬ੍ਬੋ ‘ਮਾ ਮਂ ਜਾਨਿਂਸੂ’ਤਿ.

‘‘ਪਾਰਿਵਾਸਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਆਗਨ੍ਤੁਕੇਨ ਆਰੋਚੇਤਬ੍ਬਂ, ਆਗਨ੍ਤੁਕਸ੍ਸ ਆਰੋਚੇਤਬ੍ਬਂ, ਉਪੋਸਥੇ ਆਰੋਚੇਤਬ੍ਬਂ, ਪਵਾਰਣਾਯ ਆਰੋਚੇਤਬ੍ਬਂ, ਸਚੇ ਗਿਲਾਨੋ ਹੋਤਿ, ਦੂਤੇਨਪਿ ਆਰੋਚੇਤਬ੍ਬਂ.

‘‘ਨ ¶ , ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ.

‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ.

‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਅਨਾਵਾਸਾ ਅਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਅਨਾਵਾਸਾ ਅਭਿਕ੍ਖੁਕੋ ¶ ਅਨਾਵਾਸੋ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਅਨਾਵਾਸਾ ਅਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ.

‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ.

‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਆਵਾਸੋ ¶ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ.

‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ ਯਤ੍ਥਸ੍ਸੁ ¶ ਭਿਕ੍ਖੂ ਨਾਨਾਸਂਵਾਸਕਾ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ.

‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ. ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ.

‘‘ਗਨ੍ਤਬ੍ਬੋ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਆਵਾਸੋ ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ ਯਂ ਜਞ੍ਞਾ ‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’ਨ੍ਤਿ.

‘‘ਗਨ੍ਤਬ੍ਬੋ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ਅਨਾਵਾਸੋ ਯਤ੍ਥਸ੍ਸੁ ¶ ਭਿਕ੍ਖੂ ਸਮਾਨਸਂਵਾਸਕਾ ਯਂ ਜਞ੍ਞਾ ‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’ਨ੍ਤਿ.

‘‘ਗਨ੍ਤਬ੍ਬੋ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਸਭਿਕ੍ਖੁਕੋ ¶ ਆਵਾਸੋ ਵਾ ਅਨਾਵਾਸੋ ਵਾ ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ ਯਂ ਜਞ੍ਞਾ ‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’ਨ੍ਤਿ.

‘‘ਗਨ੍ਤਬ੍ਬੋ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਆਵਾਸੋ ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ ਯਂ ਜਞ੍ਞਾ ‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’ਨ੍ਤਿ.

‘‘ਗਨ੍ਤਬ੍ਬੋ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਅਨਾਵਾਸੋ ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ ਯਂ ਜਞ੍ਞਾ ‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’ਨ੍ਤਿ.

‘‘ਗਨ੍ਤਬ੍ਬੋ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਅਨਾਵਾਸਾ ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ ਯਂ ਜਞ੍ਞਾ ‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’ਨ੍ਤਿ.

‘‘ਗਨ੍ਤਬ੍ਬੋ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਆਵਾਸੋ ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ ਯਂ ਜਞ੍ਞਾ ‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’ਨ੍ਤਿ.

‘‘ਗਨ੍ਤਬ੍ਬੋ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਅਨਾਵਾਸੋ ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ ਯਂ ਜਞ੍ਞਾ ‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’ਨ੍ਤਿ.

‘‘ਗਨ੍ਤਬ੍ਬੋ ¶ , ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਵਾ ਅਨਾਵਾਸਾ ਵਾ ਸਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਯਤ੍ਥਸ੍ਸੁ ਭਿਕ੍ਖੂ ਸਮਾਨਸਂਵਾਸਕਾ ਯਂ ਜਞ੍ਞਾ ‘ਸਕ੍ਕੋਮਿ ਅਜ੍ਜੇਵ ਗਨ੍ਤੁ’ਨ੍ਤਿ.

‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਆਵਾਸੇ ¶ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਅਨਾਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਆਵਾਸੇ ਵਾ ਅਨਾਵਾਸੇ ਵਾ ਵਤ੍ਥਬ੍ਬਂ, ਪਕਤਤ੍ਤਂ ਭਿਕ੍ਖੁਂ ਦਿਸ੍ਵਾ ਆਸਨਾ ਵੁਟ੍ਠਾਤਬ੍ਬਂ, ਪਕਤਤ੍ਤੋ ਭਿਕ੍ਖੁ ਆਸਨੇਨ ਨਿਮਨ੍ਤੇਤਬ੍ਬੋ, ਨ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਾਸਨੇ ਨਿਸੀਦਿਤਬ੍ਬਂ, ਨ ਨੀਚੇ ਆਸਨੇ ਨਿਸਿਨ੍ਨੇ ਉਚ੍ਚੇ ਆਸਨੇ ਨਿਸੀਦਿਤਬ੍ਬਂ, ਨ ਛਮਾਯਂ ਨਿਸਿਨ੍ਨੇ ਆਸਨੇ ਨਿਸੀਦਿਤਬ੍ਬਂ, ਨ ਏਕਚਙ੍ਕਮੇ ਚਙ੍ਕਮਿਤਬ੍ਬਂ, ਨ ਨੀਚੇ ਚਙ੍ਕਮੇ ਚਙ੍ਕਮਨ੍ਤੇ ਉਚ੍ਚੇ ਚਙ੍ਕਮੇ ਚਙ੍ਕਮਿਤਬ੍ਬਂ, ਨ ਛਮਾਯਂ ਚਙ੍ਕਮਨ੍ਤੇ ਚਙ੍ਕਮੇ ਚਙ੍ਕਮਿਤਬ੍ਬਂ.

‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਪਾਰਿਵਾਸਿਕੇਨ ਵੁਡ੍ਢਤਰੇਨ ਭਿਕ੍ਖੁਨਾ ਸਦ੍ਧਿਂ…ਪੇ… ਮੂਲਾਯਪਟਿਕਸ੍ਸਨਾਰਹੇਨ ਭਿਕ੍ਖੁਨਾ ਸਦ੍ਧਿਂ…ਪੇ… ਮਾਨਤ੍ਤਾਰਹੇਨ ਭਿਕ੍ਖੁਨਾ ਸਦ੍ਧਿਂ…ਪੇ… ਮਾਨਤ੍ਤਚਾਰਿਕੇਨ ਭਿਕ੍ਖੁਨਾ ਸਦ੍ਧਿਂ…ਪੇ… ਅਬ੍ਭਾਨਾਰਹੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਆਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਅਨਾਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਆਵਾਸੇ ਵਾ ਅਨਾਵਾਸੇ ਵਾ ਵਤ੍ਥਬ੍ਬਂ, ਨ ਏਕਾਸਨੇ ਨਿਸੀਦਿਤਬ੍ਬਂ, ਨ ਨੀਚੇ ਆਸਨੇ ਨਿਸਿਨ੍ਨੇ ਉਚ੍ਚੇ ਆਸਨੇ ਨਿਸੀਦਿਤਬ੍ਬਂ, ਨ ਛਮਾਯਂ ਨਿਸਿਨ੍ਨੇ ਆਸਨੇ ਨਿਸੀਦਿਤਬ੍ਬਂ, ਨ ਏਕਚਙ੍ਕਮੇ ਚਙ੍ਕਮਿਤਬ੍ਬਂ, ਨ ਨੀਚੇ ਚਙ੍ਕਮੇ ਚਙ੍ਕਮਨ੍ਤੇ ਉਚ੍ਚੇ ਚਙ੍ਕਮੇ ਚਙ੍ਕਮਿਤਬ੍ਬਂ, ਨ ਛਮਾਯਂ ਚਙ੍ਕਮਨ੍ਤੇ ਚਙ੍ਕਮੇ ਚਙ੍ਕਮਿਤਬ੍ਬਂ.

‘‘ਪਾਰਿਵਾਸਿਕਚਤੁਤ੍ਥੋ ¶ ਚੇ, ਭਿਕ੍ਖਵੇ, ਪਰਿਵਾਸਂ ਦਦੇਯ੍ਯ, ਮੂਲਾਯ ਪਟਿਕਸ੍ਸੇਯ੍ਯ, ਮਾਨਤ੍ਤਂ ਦਦੇਯ੍ਯ, ਤਂਵੀਸੋ ਅਬ੍ਭੇਯ੍ਯ, ਅਕਮ੍ਮਂ ਨ ਚ ਕਰਣੀਯ’’ਨ੍ਤਿ (ਚੂਲ਼ਵ. ੭੬-੮੨) –

ਏਵਂ ਪਾਰਿਵਾਸਿਕਾਨਂ ਚਤੁਨਵੁਤਿ ਵਤ੍ਤਾਨਿ.

ਸਾ ਚ ਨੇਸਂ ਚਤੁਨਵੁਤਿਸਙ੍ਖਾ ਏਵਂ ਵੇਦਿਤਬ੍ਬਾ – ਨਉਪਸਮ੍ਪਾਦਨਾਦਿਨਕਮ੍ਮਿਕਗਰਹਪਰਿਯੋਸਾਨਾਨਿ ਨਵ ਵਤ੍ਤਾਨਿ, ਤਤੋ ਪਕਤਤ੍ਤਸ੍ਸ ਉਪੋਸਥਟ੍ਠਪਨਾਦਿਭਿਕ੍ਖੂਹਿਸਮ੍ਪਯੋਜਨਪਰਿਯੋਸਾਨਾਨਿ ਅਟ੍ਠ, ਤਤੋ ਨਪੁਰਤੋਗਮਨਾਦੀ ਪਞ੍ਚ, ਨਪੁਰੇਗਮਨਾਦੀ ਚਤ੍ਤਾਰਿ, ਆਗਨ੍ਤੁਕੇਨ ਆਰੋਚਨਾਦੀ ਚਤ੍ਤਾਰੀਤਿ ਤਿਂਸ, ਸਭਿਕ੍ਖੁਕਾਵਾਸਾਦਿਤੋ ਅਭਿਕ੍ਖੁਕਾਵਾਸਾਦਿਗਮਨਪਅਸਂਯੁਤ੍ਤਾਨਿ ਤੀਣਿ ਨਵਕਾਨਿ ਚਾਤਿ ਸਤ੍ਤਪਞ੍ਞਾਸ, ਤਤੋ ਨਪਕਤਤ੍ਤੇਨ ਸਦ੍ਧਿਂ ਏਕਚ੍ਛਨ੍ਨਵਾਸਾਦਿਪਟਿਸਂਯੁਤ੍ਤਾਨਿ ਏਕਾਦਸ, ਤਤੋ ਨਪਾਰਿਵਾਸਿਕਵੁਡ੍ਢਤਰਮੂਲਾਯਪਟਿਕਸ੍ਸਨਾਰਹਮਾਨਤ੍ਤਾਰਹਮਾਨਤ੍ਤਚਾਰਿਕਅਬ੍ਭਾਨਾਰਹੇਹਿ ¶ ਸਦ੍ਧਿਂ ਏਕਚ੍ਛਨ੍ਨਵਾਸਾਦਿਪਟਿਸਂਯੁਤ੍ਤਾਨਿ ਪਚ੍ਚੇਕਂ ਏਕਾਦਸ ਕਤ੍ਵਾ ਪਞ੍ਚਪਞ੍ਞਾਸਾਯ ਵਤ੍ਤੇਸੁ ਪਾਰਿਵਾਸਿਕਵੁਡ੍ਢਤਰਮੂਲਾਯਪਟਿਕਸ੍ਸਨਾਰਹਮਾਨਤ੍ਤਾਰਹਾਨਂ ਤਿਣ੍ਣਂ ਸਮਾਨਤ੍ਤਾ ਤੇਸੁ ਏਕਂ ਏਕਾਦਸਕਂ, ਮਾਨਤ੍ਤਚਾਰਿਕਅਬ੍ਭਾਨਾਰਹਾਨਂ ਦ੍ਵਿਨ੍ਨਂ ਸਮਾਨਤ੍ਤਾ ਤੇਸੁ ਏਕਂ ਏਕਾਦਸਕਨ੍ਤਿ ਦੁਵੇ ਏਕਾਦਸਕਾਨਿ, ਅਨ੍ਤੇ ਪਾਰਿਵਾਸਿਕਚਤੁਤ੍ਥਸ੍ਸ ਸਙ੍ਘਸ੍ਸ ਪਰਿਵਾਸਾਦਿਦਾਨਚਤੁਕ੍ਕੇ ਗਣਪੂਰਣਤ੍ਥਦੋਸਤੋ ਨਿਵਤ੍ਤਿਵਸੇਨ ਚਤ੍ਤਾਰਿ ਚਤ੍ਤਾਰੀਤਿ ਚਤੁਨਵੁਤਿ ਵਤ੍ਤਾਨਿ. ਤਾਨਿ ਅਗ੍ਗਹਿਤਗ੍ਗਹਣੇਨ ਏਕੂਨਚਤ੍ਤਾਲੀਸਵਤ੍ਤਾਨਿ ਨਾਮ. ਆਦਿਤੋ ਨਵ, ਉਪੋਸਥਟ੍ਠਪਨਾਦੀਨਿ ਅਟ੍ਠ, ਪਕਤਤ੍ਤੇਨ ਏਕਚ੍ਛਨ੍ਨਵਾਸਾਦੀ ਚਤ੍ਤਾਰਿ ਚਾਤਿ ਏਕਵੀਸਤਿ ਵਤ੍ਤਾਨਿ ਕਮ੍ਮਕ੍ਖਨ੍ਧਕੇ ਗਹਿਤਤ੍ਤਾ ਇਧ ਗਣਨਾਯ ਅਗ੍ਗਹੇਤ੍ਵਾ ਤਤੋ ਸੇਸੇਸੁ ਤੇਸਤ੍ਤਤਿਯਾ ਵਤ੍ਤੇਸੁ ਪਾਰਿਵਾਸਿਕਵੁਡ੍ਢਤਰਾਦੀਹਿ ਏਕਚ੍ਛਨ੍ਨੇ ਵਾਸਾਦਿਪਟਿਸਂਯੁਤ੍ਤਾਨਿ ਦ੍ਵਾਵੀਸਤਿ ਵਤ੍ਤਾਨਿ ਪਕਤਤ੍ਤੇਹਿ ਸਮਾਨਤ੍ਤਾ ਤਾਨਿ ਚ ‘‘ਗਨ੍ਤਬ੍ਬੋ ਭਿਕ੍ਖਵੇ’’ਤਿਆਦਿਕਂ ਨਵਕਂ ਤਥਾ ¶ ਗਚ੍ਛਨ੍ਤਸ੍ਸ ਅਨਾਪਤ੍ਤਿਦਸ੍ਸਨਪਰਂ, ਨ ਆਵਾਸਤੋ ਗਚ੍ਛਨ੍ਤਸ੍ਸ ਆਪਤ੍ਤਿਦਸ੍ਸਨਪਰਨ੍ਤਿ ਤਞ੍ਚ ਅਗ੍ਗਹੇਤ੍ਵਾ ਅਵਸੇਸੇਸੁ ਦ੍ਵਾਚਤ੍ਤਾਲੀਸਵਤ੍ਤੇਸੁ ਪਾਰਿਵਾਸਿਕਚਤਉਤ੍ਥਾਦਿਕਮ੍ਮਚਤੁਕ੍ਕਂ ਗਰੁਕਾਪਤ੍ਤਿਵੁਟ੍ਠਾਨਾਯ ਗਣਪੂਰਣਤ੍ਥਸਾਮਞ੍ਞੇਨ ਏਕਂ ਕਤ੍ਵਾ ਤਯੋ ਅਪਨੇਤ੍ਵਾ ਗਣਿਤਾਨਿ ਏਕੂਨਚਤ੍ਤਾਲੀਸਾਨਿ ਹੋਨ੍ਤੀਤਿ ਵੁਤ੍ਤਂ ‘‘ਨਵਾਧਿਕਾਨਿ ਤਿਂਸੇਵ, ਖਨ੍ਧਕੇ ਤਦਨਨ੍ਤਰੇ’’ਤਿ.

੨੭੫੦. ਇਮਾਨਿ ਏਕੂਨਚਤ੍ਤਾਲੀਸ ਵਤ੍ਤਾਨਿ ਪੁਰਿਮੇਹਿ ਤੇਚਤ੍ਤਾਲੀਸਵਤ੍ਤੇਹਿ ਸਦ੍ਧਿਂ ਦ੍ਵਾਸੀਤਿ ਹੋਨ੍ਤੀਤਿ ਆਹ ‘‘ਏਵਂ ਸਬ੍ਬਾਨਿ…ਪੇ… ਗਹਿਤਾਗਹਣੇਨ ਤੂ’’ਤਿ.

ਏਵਂ ਕਮ੍ਮਕ੍ਖਨ੍ਧਕਪਾਰਿਵਾਸਿਕਕ੍ਖਨ੍ਧਕੇਸੁ ਮਹੇਸਿਨਾ ਵੁਤ੍ਤਾਨਿ ਖਨ੍ਧਕਵਤ੍ਤਾਨਿ ਗਹਿਤਾਗਹਣੇਨ ਦ੍ਵਾਸੀਤਿ ਏਵ ਹੋਨ੍ਤੀਤਿ ਯੋਜਨਾ. ਏਵਮੇਤ੍ਥ ਦ੍ਵਾਸੀਤਿਕ੍ਖਨ੍ਧਕਵਤ੍ਤਾਨਿ ਦਸ੍ਸਿਤਾਨਿ.

ਆਗਮਟ੍ਠਕਥਾਵਣ੍ਣਨਾਯਂ ਪਨ –

‘‘ਪਾਰਿਵਾਸਿਕਾਨਂ ਭਿਕ੍ਖੂਨਂ ਵਤ੍ਤਂ ਪਞ੍ਞਪੇਸ੍ਸਾਮੀਤਿ (ਚੂਲ਼ਵ. ੭੫) ਆਰਭਿਤ੍ਵਾ ‘ਨ ਉਪਸਮ੍ਪਾਦੇਤਬ੍ਬਂ…ਪੇ… ਨ ਛਮਾਯਂ ਚਙ੍ਕਮਨ੍ਤੇ ਚਙ੍ਕਮੇ ਚਙ੍ਕਮਿਤਬ੍ਬ’ਨ੍ਤਿ (ਚੂਲ਼ਵ. ੭੬-੮੧) ਵੁਤ੍ਤਾਵਸਾਨਾਨਿ ਛਸਟ੍ਠਿ, ਤਤੋ ਪਰਂ ‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਪਾਰਿਵਾਸਿਕੇਨ ਵੁਡ੍ਢਤਰੇਨ ਭਿਕ੍ਖੁਨਾ ਸਦ੍ਧਿਂ, ਮੂਲਾਯਪਟਿਕਸ੍ਸਨਾਰਹੇਨ, ਮਾਨਤ੍ਤਾਰਹੇਨ, ਮਾਨਤ੍ਤਚਾਰਿਕੇਨ, ਅਬ੍ਭਾਨਾਰਹੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਆਵਾਸੇ ਵਤ੍ਥਬ੍ਬ’ਨ੍ਤਿਆਦੀਨਂ (ਚੂਲ਼ਵ. ੮੨) ਪਕਤਤ੍ਤੇ ਚਰਿਤਬ੍ਬੇਹਿ ਅਨਞ੍ਞਤ੍ਤਾ ਵਿਸੁਂ ਤੇ ਅਗਣੇਤ੍ਵਾ ਪਾਰਿਵਾਸਿਕਵੁਡ੍ਢਤਰਾਦੀਸੁ ¶ ਪੁਗ੍ਗਲਨ੍ਤਰੇਸੁ ਚਰਿਤਬ੍ਬਤ੍ਤਾ ਤੇਸਂ ਵਸੇਨ ਸਮ੍ਪਿਣ੍ਡੇਤ੍ਵਾ ਏਕੇਕਂ ਕਤ੍ਵਾ ਗਣਿਤਾਨਿ ਪਞ੍ਚਾਤਿ ਏਕਸਤ੍ਤਤਿ ਵਤ੍ਤਾਨਿ, ਉਕ੍ਖੇਪਨੀਯਕਮ੍ਮਕਤਵਤ੍ਤੇਸੁ ਵਤ੍ਤਪਞ੍ਞਾਪਨਵਸੇਨ ਵੁਤ੍ਤਂ ‘ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਅਭਿਵਾਦਨਂ ¶ …ਪੇ… ਨਹਾਨੇ ਪਿਟ੍ਠਿਪਰਿਕਮ੍ਮਂ ਸਾਦਿਤਬ੍ਬ’ਨ੍ਤਿ (ਚੂਲ਼ਵ. ੫੧) ਇਦਂ ਅਭਿਵਾਦਨਾਦੀਨਂ ਅਸਾਦਿਯਨਂ ਏਕਂ, ‘ਨ ਪਕਤਤ੍ਤੋ ਭਿਕ੍ਖੁ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਤਬ੍ਬੋ’ਤਿਆਦੀਨਿ ਚ ਦਸਾਤਿ ਏਵਮੇਤਾਨਿ ਦ੍ਵਾਸੀਤਿ ਹੋਨ੍ਤਿ. ਏਤੇਸ੍ਵੇਵ ਕਾਨਿਚਿ ਤਜ੍ਜਨੀਯਕਮ੍ਮਾਦਿਵਤ੍ਤਾਨਿ, ਕਾਨਿਚਿ ਪਾਰਿਵਾਸਿਕਾਦਿਵਤ੍ਤਾਨੀਤਿ ਅਗ੍ਗਹਿਤਗ੍ਗਹਣੇਨ ਦ੍ਵਾਸੀਤਿ ਏਵਾ’’ਤਿ (ਮ. ਨਿ. ਟੀ. ੨.੨੫; ਸਾਰਤ੍ਥ. ਟੀ. ੨.੩੯; ਵਿ. ਵਿ. ਟੀ. ੧.੩੯) –

ਵੁਤ੍ਤਂ. ਏਤਾਨਿ ਪਨ ਵਤ੍ਤਾਨਿ ਕਦਾਚਿ ਤਜ੍ਜਨੀਯਕਮ੍ਮਕਤਾਦਿਕਾਲੇ, ਪਾਰਿਵਾਸਿਕਾਦਿਕਾਲੇ ਚ ਚਰਿਤਬ੍ਬਾਨਿ ਖੁਦ੍ਦਕਵਤ੍ਤਾਨੀਤਿ ਗਹੇਤਬ੍ਬਾਨਿ ਆਗਨ੍ਤੁਕਵਤ੍ਤਾਦੀਨਂ ਚੁਦ੍ਦਸਮਹਾਵਤ੍ਤਾਨਂ ਵਕ੍ਖਮਾਨਤ੍ਤਾ.

੨੭੫੧. ਇਦਾਨਿ ਪਾਰਿਵਾਸਿਕਸ੍ਸ ਭਿਕ੍ਖੁਨੋ ਰਤ੍ਤਿਚ੍ਛੇਦਂ, ਵਤ੍ਤਭੇਦਞ੍ਚ ਦਸ੍ਸੇਤੁਮਾਹ ‘‘ਪਰਿਵਾਸਞ੍ਚ ਵਤ੍ਤਞ੍ਚਾ’’ਤਿਆਦਿ. ਪਰਿਵਾਸਞ੍ਚ ਵਤ੍ਤਞ੍ਚ ਸਮਾਦਿਨ੍ਨਸ੍ਸਾਤਿ ‘‘ਪਰਿਵਾਸਂ ਸਮਾਦਿਯਾਮੀ’’ਤਿ ਪਰਿਵਾਸਞ੍ਚ ‘‘ਵਤ੍ਤਂ ਸਮਾਦਿਯਾਮੀ’’ਤਿ ਵਤ੍ਤਞ੍ਚ ਪਕਤਤ੍ਤਸ੍ਸ ਭਿਕ੍ਖੁਨੋ ਸਨ੍ਤਿਕੇ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਵਚੀਭੇਦਂ ਕਤ੍ਵਾ ਸਮਾਦਿਨ੍ਨਸ੍ਸ. ਭਿਕ੍ਖੁਨੋਤਿ ਪਾਰਿਵਾਸਿਕਸ੍ਸ ਭਿਕ੍ਖੁਨੋ.

੨੭੫੨. ਸਹਵਾਸਾਦਯੋ ‘‘ਏਕਚ੍ਛਨ੍ਨੇ’’ਤਿਆਦਿਨਾ ਸਯਮੇਵ ਵਕ੍ਖਤਿ. ਸਹਵਾਸੋ, ਵਿਨਾਵਾਸੋ, ਅਨਾਰੋਚਨਮੇਵ ਚਾਤਿ ਇਮੇਹਿ ਤੀਹਿ ਪਾਰਿਵਾਸਿਕਭਿਕ੍ਖੁਸ੍ਸ ਰਤ੍ਤਿਚ੍ਛੇਦੋ ਚ ਦੁਕ੍ਕਟਞ੍ਚ ਹੋਤੀਤਿ ਯੋਜਨਾ.

੨੭੫੩. ਉਦਕਪਾਤੇਨ ਸਮਨ੍ਤਾ ਨਿਬ੍ਬਕੋਸਸ੍ਸ ਉਦਕਪਾਤਟ੍ਠਾਨੇਨ. ਏਕਚ੍ਛਨ੍ਨੇਤਿ ਏਕਚ੍ਛਨ੍ਨੇ ਪਰਿਚ੍ਛਨ੍ਨੇ ਵਾ ਅਪਰਿਚ੍ਛਨ੍ਨੇ ਵਾ ਆਵਾਸੇ. ਪਕਤਤ੍ਤੇਨ ਭਿਕ੍ਖੁਨਾ ਸਹ ਉਕ੍ਖਿਤ੍ਤਸ੍ਸ ਨਿਵਾਸੋ ¶ ਨਿਵਾਰਿਤੋਤਿ ਯੋਜਨਾ. ‘‘ਨਿਵਾਰਿਤੋ’’ਤਿ ਇਮਿਨਾ ਦੁਕ੍ਕਟਂ ਹੋਤੀਤਿ ਦੀਪੇਤਿ.

੨੭੫੪. ਅਨ੍ਤੋਯੇਵਾਤਿ ਏਕਚ੍ਛਨ੍ਨਸ੍ਸ ਆਵਾਸਪਰਿਚ੍ਛੇਦਸ੍ਸ ਅਨ੍ਤੋਯੇਵ. ‘‘ਨ ਲਬ੍ਭਤੀ’’ਤਿ ਇਮਿਨਾ ਰਤ੍ਤਿਚ੍ਛੇਦੋ ਚ ਦੁਕ੍ਕਟਞ੍ਚ ਹੋਤੀਤਿ ਦੀਪੇਤਿ.

੨੭੫੫. ਮਹਾਅਟ੍ਠਕਥਾਦਿਸੂਤਿ ¶ ਆਦਿ-ਸਦ੍ਦੇਨ ਕੁਰੁਨ੍ਦਟ੍ਠਕਥਾਦਿਂ ਸਙ੍ਗਣ੍ਹਾਤਿ. ਉਭਿਨ੍ਨਨ੍ਤਿ ਉਕ੍ਖਿਤ੍ਤਕਪਾਰਿਵਾਸਿਕਾਨਂ. ਇਤਿ ਅਵਿਸੇਸੇਨ ਨਿਦ੍ਦਿਟ੍ਠਨ੍ਤਿ ਯੋਜਨਾ.

੨੭੫੬. ਇਮਿਨਾ ਸਹਵਾਸੇਨ ਰਤ੍ਤਿਚ੍ਛੇਦਞ੍ਚ ਦੁਕ੍ਕਟਞ੍ਚ ਦਸ੍ਸੇਤ੍ਵਾ ਵਿਨਾਵਾਸੇਨ ਦਸ੍ਸੇਤੁਮਾਹ ‘‘ਅਭਿਕ੍ਖੁਕੇ ਪਨਾਵਾਸੇ’’ਤਿ. ਆਵਾਸੇਤਿ ਵਸਨਤ੍ਥਾਯ ਕਤਸੇਨਾਸਨੇ. ਅਨਾਵਾਸੇਤਿ ਵਾਸਤ੍ਥਾਯ ਅਕਤੇ ਚੇਤਿਯਘਰੇ ਵਾ ਬੋਧਿਘਰੇ ਵਾ ਸਮ੍ਮਜ੍ਜਨਿਅਟ੍ਟਕੇ ਵਾ ਦਾਰੁਅਟ੍ਟਕੇ ਵਾ ਪਾਨੀਯਮਾਲ਼ੇ ਵਾ ਵਚ੍ਚਕੁਟਿਯਂ ਵਾ ਦ੍ਵਾਰਕੋਟ੍ਠਕੇ ਵਾ ਅਞ੍ਞਤ੍ਰ ਵਾ ਯਤ੍ਥ ਕਤ੍ਥਚਿ ਏਵਰੂਪੇ ਠਾਨੇ. ਵਿਪ੍ਪਵਾਸਂ ਵਸਨ੍ਤਸ੍ਸਾਤਿ ਪਕਤਤ੍ਤੇਨ ਵਿਨਾ ਵਾਸਂ ਕਪ੍ਪੇਨ੍ਤਸ੍ਸ. ਰਤ੍ਤਿਚ੍ਛੇਦੋ ਚ ਦੁਕ੍ਕਟਨ੍ਤਿ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ ਹੋਤਿ.

੨੭੫੭. ਏਵਂ ਵਿਪ੍ਪਵਾਸੇਨ ਰਤ੍ਤਿਚ੍ਛੇਦਦੁਕ੍ਕਟਾਨਿ ਦਸ੍ਸੇਤ੍ਵਾ ਅਨਾਰੋਚਨੇਨ ਦਸ੍ਸੇਤੁਮਾਹ ‘‘ਪਾਰਿਵਾਸਿਕਭਿਕ੍ਖੁਸ੍ਸਾ’’ਤਿਆਦਿ. ਭਿਕ੍ਖੁਂ ਦਿਸ੍ਵਾਨਾਤਿ ਆਕਾਸੇਨਾਪਿ ਗਚ੍ਛਨ੍ਤਂ ਸਮਾਨਸਂਵਾਸਕਂ ਆਗਨ੍ਤੁਕਂ ਭਿਕ੍ਖੁਂ ਦਿਸ੍ਵਾ. ਤਙ੍ਖਣੇਤਿ ਤਸ੍ਮਿਂ ਦਿਟ੍ਠਕ੍ਖਣੇਯੇਵ. ‘‘ਅਨਾਰੋਚੇਨ੍ਤਸ੍ਸ ਏਵ ਏਤਸ੍ਸਾ’’ਤਿ ਪਦਚ੍ਛੇਦੋ. ਏਵਕਾਰੇਨ ਰਤ੍ਤਿਚ੍ਛੇਦੋ ਚ ਦੁਕ੍ਕਟਞ੍ਚਾਤਿ ਉਭਯਂ ਏਤਸ੍ਸ ਹੋਤੀਤਿ ਦੀਪੇਨ੍ਤੇਨ ਅਦਿਟ੍ਠੋ ਚੇ, ਰਤ੍ਤਿਚ੍ਛੇਦੋਵ ਹੋਤੀਤਿ ਞਾਪੇਤਿ. ਯਥਾਹ – ‘‘ਸੋਪਿਸ੍ਸ ਰਤ੍ਤਿਚ੍ਛੇਦਂ ਕਰੋਤਿ, ਅਞ੍ਞਾਤਤ੍ਤਾ ਪਨ ਵਤ੍ਤਭੇਦਦੁਕ੍ਕਟਂ ਨਤ੍ਥੀ’’ਤਿ (ਚੂਲ਼ਵ. ਅਟ੍ਠ. ੭੫). ਨਾਨਾਸਂਵਾਸਕੇਨ ¶ ਸਹ ਵਿਨਯਕਮ੍ਮਂ ਕਾਤੁਂ ਨ ਵਟ੍ਟਤਿ, ਤਸ੍ਸ ਅਨਾਰੋਚਨੇਪਿ ਰਤ੍ਤਿਚ੍ਛੇਦੋ ਨ ਹੋਤਿ.

੨੭੫੮-੯. ਪਾਰਿਵਾਸਿਕੋ ਭਿਕ੍ਖੁ ਯਤ੍ਥ ਸਙ੍ਘਨਵਕਟ੍ਠਾਨੇ ਠਿਤੋ, ਤਤ੍ਥੇਵ ਤਸ੍ਮਿਂਯੇਵ ਠਾਨੇ ਠਤ੍ਵਾ ਯਥਾਵੁਡ੍ਢਂ ਪਕਤਤ੍ਤੇਹਿਪਿ ਸਦ੍ਧਿਂ ਵੁਡ੍ਢਪਟਿਪਾਟਿਯਾ ਪਞ੍ਚ ਕਿਚ੍ਚਾਨਿ ਕਾਤੁਂ ਵਟ੍ਟਤੀਤਿ ਯੋਜਨਾ.

ਤਾਨਿ ਸਰੂਪਤੋ ਦਸ੍ਸੇਤੁਮਾਹ ‘‘ਉਪੋਸਥਪਵਾਰਣ’’ਨ੍ਤਿਆਦਿ. ਉਪੋਸਥਪਵਾਰਣਂ ਯਥਾਵੁਡ੍ਢਂ ਕਾਤੁਂ ਲਭਤੀਤਿ ਯੋਜਨਾ. ਦੇਨ੍ਤੀਤਿ ਏਤ੍ਥ ‘‘ਘਣ੍ਟਿਂ ਪਹਰਿਤ੍ਵਾ’’ਤਿ ਸੇਸੋ. ਸਙ੍ਘਦਾਯਕਾਤਿ ਕਮ੍ਮਧਾਰਯਸਮਾਸੋ. ਸਙ੍ਘਸ੍ਸ ਏਕਤ੍ਤੇਪਿ ਗਰੂਸੁ ਬਹੁਵਚਨਨਿਦ੍ਦੇਸੋ. ‘‘ਦੇਤਿ ਚੇ ਸਙ੍ਘਦਾਯਕੋ’’ਤਿਪਿ ਪਾਠੋ. ਤਤ੍ਥ ਘਣ੍ਟਿਂ ਪਹਰਿਤ੍ਵਾ ਭਾਜੇਤ੍ਵਾ ਦੇਨ੍ਤੋ ਸਙ੍ਘੋ ਵਸ੍ਸਿਕਸਾਟਿਕਂ ਦੇਤਿ ਚੇ, ਪਾਰਿਵਾਸਿਕੋ ਯਥਾਵੁਡ੍ਢਂ ਅਤ੍ਤਨੋ ਪਤ੍ਤਟ੍ਠਾਨੇ ਲਭਤੀਤਿ ਯੋਜਨਾ.

ਓਣੋਜਨਨ੍ਤਿ ਵਿਸ੍ਸਜ੍ਜਨਂ, ਸਙ੍ਘਤੋ ਅਤ੍ਤਨੋ ਪਤ੍ਤਾਨਂ ਦ੍ਵਿਨ੍ਨਂ, ਤਿਣ੍ਣਂ ਵਾ ਉਦ੍ਦੇਸਭਤ੍ਤਾਦੀਨਂ ਅਤ੍ਤਨੋ ¶ ਪੁਗ੍ਗਲਿਕਭਤ੍ਤਪਚ੍ਚਾਸਾਯ ਪਟਿਗ੍ਗਹੇਤ੍ਵਾ ‘‘ਮਯ੍ਹਂ ਅਜ੍ਜ ਭਤ੍ਤਪਚ੍ਚਾਸਾ ਅਤ੍ਥਿ, ਸ੍ਵੇ ਗਣ੍ਹਿਸ੍ਸਾਮੀ’’ਤਿ ਵਤ੍ਵਾ ਸਙ੍ਘਵਿਸ੍ਸਜ੍ਜਨਂ ਲਭਤੀਤਿ ਵੁਤ੍ਤਂ ਹੋਤਿ. ਭਤ੍ਤਨ੍ਤਿ ਆਗਤਾਗਤੇਹਿ ਵੁਡ੍ਢਪਟਿਪਾਟਿਯਾ ਗਹੇਤ੍ਵਾ ਗਨ੍ਤਬ੍ਬਂ ਵਿਹਾਰੇ ਸਙ੍ਘਸ੍ਸ ਚਤੁਸ੍ਸਾਲਭਤ੍ਤਂ. ਤਥਾ ਪਾਰਿਵਾਸਿਕੋ ਯਥਾਵੁਡ੍ਢਂ ਲਭਤੀਤਿ ਯੋਜਨਾ. ਇਮੇ ਪਞ੍ਚਾਤਿ ਵੁਤ੍ਤਮੇਵਤ੍ਥਂ ਨਿਗਮਯਤਿ.

ਤਤ੍ਰਾਯਂ ਵਿਨਿਚ੍ਛਯੋ (ਚੂਲ਼ਵ. ਅਟ੍ਠ. ੭੫) – ਉਪੋਸਥਪਵਾਰਣੇ ਤਾਵ ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇ ਹਤ੍ਥਪਾਸੇ ਨਿਸੀਦਿਤੁਂ ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ‘‘ਪਾਲ਼ਿਯਾ ਅਨਿਸੀਦਿਤ੍ਵਾ ਪਾਲ਼ਿਂ ਵਿਹਾਯ ਹਤ੍ਥਪਾਸਂ ਅਮੁਞ੍ਚਨ੍ਤੇਨ ਨਿਸੀਦਿਤਬ੍ਬ’’ਨ੍ਤਿ ਵੁਤ੍ਤਂ. ਪਾਰਿਸੁਦ੍ਧਿਉਪੋਸਥੇ ਕਰਿਯਮਾਨੇ ਸਙ੍ਘਨਵਕਟ੍ਠਾਨੇ ਨਿਸੀਦਿਤ੍ਵਾ ਤਤ੍ਥੇਵ ¶ ਨਿਸਿਨ੍ਨੇਨ ਅਤ੍ਤਨੋ ਪਾਲ਼ਿਯਾ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋਵ. ਪਵਾਰਣਾਯਪਿ ਸਙ੍ਘਨਵਕਟ੍ਠਾਨੇ ਨਿਸੀਦਿਤ੍ਵਾ ਤਤ੍ਥੇਵ ਨਿਸਿਨ੍ਨੇਨ ਅਤ੍ਤਨੋ ਪਾਲ਼ਿਯਾ ਪਵਾਰੇਤਬ੍ਬਂ. ਸਙ੍ਘੇਨ ਘਣ੍ਟਿਂ ਪਹਰਿਤ੍ਵਾ ਭਾਜਿਯਮਾਨਂ ਵਸ੍ਸਿਕਸਾਟਿਕਮ੍ਪਿ ਅਤ੍ਤਨੋ ਪਤ੍ਤਟ੍ਠਾਨੇ ਗਹੇਤੁਂ ਵਟ੍ਟਤਿ.

ਓਣੋਜਨੇ ਸਚੇ ਪਾਰਿਵਾਸਿਕਸ੍ਸ ਦ੍ਵੇ ਤੀਣਿ ਉਦ੍ਦੇਸਭਤ੍ਤਾਦੀਨਿ ਪਾਪੁਣਨ੍ਤਿ, ਅਞ੍ਞਾ ਚਸ੍ਸ ਪੁਗ੍ਗਲਿਕਭਤ੍ਤਪਚ੍ਚਾਸਾ ਹੋਤਿ, ਤਾਨਿ ਪਟਿਪਾਟਿਯਾ ਗਹੇਤ੍ਵਾ ‘‘ਭਨ੍ਤੇ, ਹੇਟ੍ਠਾ ਗਾਹੇਥ, ਅਜ੍ਜ ਮਯ੍ਹਂ ਭਤ੍ਤਪਚ੍ਚਾਸਾ ਅਤ੍ਥਿ, ਸ੍ਵੇਵ ਗਣ੍ਹਿਸ੍ਸਾਮੀ’’ਤਿ ਵਤ੍ਵਾ ਵਿਸ੍ਸਜ੍ਜੇਤਬ੍ਬਾਨਿ, ਏਵਂ ਤਾਨਿ ਪੁਨਦਿਵਸੇਸੁ ਗਣ੍ਹਿਤੁਂ ਲਭਤਿ. ‘‘ਪੁਨਦਿਵਸੇ ਸਬ੍ਬਪਠਮਂ ਏਤਸ੍ਸ ਦਾਤਬ੍ਬ’’ਨ੍ਤਿ ਕੁਰੁਨ੍ਦਿਯਂ ਵੁਤ੍ਤਂ. ਯਦਿ ਪਨ ਨ ਗਣ੍ਹਾਤਿ ਨ ਵਿਸ੍ਸਜ੍ਜੇਤਿ, ਪੁਨਦਿਵਸੇ ਨ ਲਭਤਿ. ਇਦਂ ਓਣੋਜਨਂ ਨਾਮ ਪਾਰਿਵਾਸਿਕਸ੍ਸੇਵ ਓਦਿਸ੍ਸ ਅਨੁਞ੍ਞਾਤਂ. ਕਸ੍ਮਾ? ਤਸ੍ਸ ਹਿ ਸਙ੍ਘਨਵਕਟ੍ਠਾਨੇ ਨਿਸਿਨ੍ਨਸ੍ਸ ਭਤ੍ਤਗ੍ਗੇ ਯਾਗੁਖਜ੍ਜਕਾਦੀਨਿ ਪਾਪੁਣਨ੍ਤਿ ਵਾ ਨ ਵਾ, ਤਸ੍ਮਾ ‘‘ਸੋ ਭਿਕ੍ਖਾਹਾਰੇਨ ਮਾ ਕਿਲਮਿਤ੍ਥਾ’’ਤਿ ਇਦਮਸ੍ਸ ਸਙ੍ਗਹਕਰਣਤ੍ਥਾਯ ਓਦਿਸ੍ਸ ਅਨੁਞ੍ਞਾਤਂ.

ਭਤ੍ਤੇ ਚਤੁਸ੍ਸਾਲਭਤ੍ਤਂ ਯਥਾਵੁਡ੍ਢਂ ਲਭਤਿ, ਪਾਲ਼ਿਯਾ ਪਨ ਗਨ੍ਤੁਂ ਵਾ ਠਾਤੁਂ ਵਾ ਨ ਲਭਤਿ. ਤਸ੍ਮਾ ਪਾਲ਼ਿਤੋ ਓਸਕ੍ਕਿਤ੍ਵਾ ਹਤ੍ਥਪਾਸੇ ਠਿਤੇਨ ਹਤ੍ਥਂ ਪਸਾਰੇਤ੍ਵਾ ਯਥਾ ਸੇਨੋ ਨਿਪਤਿਤ੍ਵਾ ਗਣ੍ਹਾਤਿ, ਏਵਂ ਗਣ੍ਹਿਤਬ੍ਬਂ. ਆਰਾਮਿਕਸਮਣੁਦ੍ਦੇਸੇਹਿ ਆਹਰਾਪੇਤੁਂ ਨ ਲਭਤਿ. ਸਚੇ ਸਯਮੇਵ ਆਹਰਨ੍ਤਿ, ਵਟ੍ਟਤਿ. ਰਞ੍ਞੋ ਮਹਾਪੇਲ਼ਭਤ੍ਤੇਪਿ ਏਸੇਵ ਨਯੋ. ਚਤੁਸ੍ਸਾਲਭਤ੍ਤੇ ਪਨ ਸਚੇ ਓਣੋਜਨਂ ਕਤ੍ਤੁਕਾਮੋ ਹੋਤਿ, ਅਤ੍ਤਨੋ ਅਤ੍ਥਾਯ ਉਕ੍ਖਿਤ੍ਤੇ ਪਿਣ੍ਡੇ ‘‘ਅਜ੍ਜ ਮੇ ਭਤ੍ਤਂ ਅਤ੍ਥਿ, ਸ੍ਵੇਵ ਗਣ੍ਹਿਸ੍ਸਾਮੀ’’ਤਿ ਵਤ੍ਤਬ੍ਬਂ. ‘‘ਪੁਨਦਿਵਸੇ ਦ੍ਵੇ ਪਿਣ੍ਡੇ ਲਭਤੀ’’ਤਿ (ਚੂਲ਼ਵ. ਅਟ੍ਠ. ੭੫) ਮਹਾਪਚ੍ਚਰਿਯਂ ਵੁਤ੍ਤਂ. ਉਦ੍ਦੇਸਭਤ੍ਤਾਦੀਨਿਪਿ ¶ ਪਾਲ਼ਿਤੋ ਓਸਕ੍ਕਿਤ੍ਵਾਵ ਗਹੇਤਬ੍ਬਾਨਿ. ਯਤ੍ਥ ਪਨ ਨਿਸੀਦਾਪੇਤ੍ਵਾ ਪਰਿਵਿਸਨ੍ਤਿ ¶ , ਤਤ੍ਥ ਸਾਮਣੇਰਾਨਂ ਜੇਟ੍ਠਕੇਨ ਭਿਕ੍ਖੂਨਂ ਸਙ੍ਘਨਵਕੇਨ ਹੁਤ੍ਵਾ ਨਿਸੀਦਿਤਬ੍ਬਨ੍ਤਿ.

ਪਾਰਿਵਾਸਿਕਕ੍ਖਨ੍ਧਕਕਥਾਵਣ੍ਣਨਾ.

ਸਮਥਕ੍ਖਨ੍ਧਕਕਥਾਵਣ੍ਣਨਾ

੨੭੬੦. ਇਦਾਨਿ ਸਮਥਵਿਨਿਚ੍ਛਯਂ ਦਸ੍ਸੇਤੁਂ ਯੇਸੁ ਅਧਿਕਰਣੇਸੁ ਸਨ੍ਤੇਸੁ ਸਮਥੇਹਿ ਭਵਿਤਬ੍ਬਂ, ਤਾਨਿ ਤਾਵ ਦਸ੍ਸੇਨ੍ਤੋ ਆਹ ‘‘ਵਿਵਾਦਾਧਾਰਤਾ’’ਤਿਆਦਿ. ਵਿਵਾਦਾਧਾਰਤਾਤਿ ਵਿਵਾਦਾਧਿਕਰਣਂ. ਆਪਤ੍ਤਾਧਾਰਤਾਤਿ ਏਤ੍ਥਾਪਿ ਏਸੇਵ ਨਯੋ. ਆਧਾਰਤਾਤਿ ਅਧਿਕਰਣਪਰਿਯਾਯੋ. ਆਧਾਰੀਯਤਿ ਅਭਿਭੁਯ੍ਯਤਿ ਵੂਪਸਮ੍ਮਤਿ ਸਮਥੇਹੀਤਿ ਆਧਾਰੋ, ਵਿਵਾਦੋ ਚ ਸੋ ਆਧਾਰੋ ਚਾਤਿ ਵਿਵਾਦਾਧਾਰੋ, ਸੋ ਏਵ ਵਿਵਾਦਾਧਾਰਤਾ. ਏਵਮਾਧਾਰਾਧਿਕਰਣ-ਸਦ੍ਦਾਨਂ ਵਿਵਾਦਾਦਿਸਦ੍ਦੇਹਿ ਸਹ ਕਮ੍ਮਧਾਰਯਸਮਾਸੋ ਦਟ੍ਠਬ੍ਬੋ. ਅਧਿਕਰੀਯਤਿ ਅਭਿਭੁਯ੍ਯਤਿ ਵੂਪਸਮ੍ਮਤਿ ਸਮਥੇਹੀਤਿ ਅਧਿਕਰਣਨ੍ਤਿ ਵਿਵਾਦਾਦਿਚਤੁਬ੍ਬਿਧਮੇਵ ਪਾਲ਼ਿਯਂ ਦਸ੍ਸਿਤਂ. ਅਯਮਤ੍ਥੋ ‘‘ਏਤੇਸਂ ਤੁ ਚਤੁਨ੍ਨਮ੍ਪਿ, ਸਮਤ੍ਤਾ ਸਮਥਾ ਮਤਾ’’ਤਿ ਵਕ੍ਖਮਾਨੇਨ ਵਿਞ੍ਞਾਯਤਿ.

੨੭੬੧. ਏਤਾਨਿ ਚਤ੍ਤਾਰਿ ਅਧਿਕਰਣਾਨਿ ਚ ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੂ ਵਿਵਦਨ੍ਤਿ ‘ਧਮ੍ਮੋ’ਤਿ ਵਾ ‘ਅਧਮ੍ਮੋ’ਤਿ ਵਾ’’ਤਿ (ਚੂਲ਼ਵ. ੨੧੫) ਅਟ੍ਠਾਰਸ ਭੇਦਕਾਰਕਵਤ੍ਥੂਨਿ ਚ ਮਹੇਸਿਨਾ ਵੁਤ੍ਤਾਨਿ. ਤਤ੍ਥ ਤੇਸੁ ਚਤੂਸੁ ਅਧਿਕਰਣੇਸੁ ਵਿਵਾਦੋ ਅਧਿਕਰਣਸਙ੍ਖਾਤੋ ਏਤਾਨਿ ਅਟ੍ਠਾਰਸ ਭੇਦਕਰਵਤ੍ਥੂਨਿ ਨਿਸ੍ਸਿਤੋ ਨਿਸ੍ਸਾਯ ਪਵਤ੍ਤੋਤਿ ਯੋਜਨਾ.

੨੭੬੨. ਵਿਪਤ੍ਤਿਯੋ ਚਤਸ੍ਸੋਵਾਤਿ ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੂ ਭਿਕ੍ਖੁਂ ਅਨੁਵਦਨ੍ਤਿ ਸੀਲਵਿਪਤ੍ਤਿਯਾ ਵਾ ਆਚਾਰਵਿਪਤ੍ਤਿਯਾ ਵਾ ¶ ਦਿਟ੍ਠਿਵਿਪਤ੍ਤਿਯਾ ਵਾ ਆਜੀਵਵਿਪਤ੍ਤਿਯਾ ਵਾ’’ਤਿ (ਚੂਲ਼ਵ. ੨੧੫) ਵੁਤ੍ਤਾ ਚਤਸ੍ਸੋ ਵਿਪਤ੍ਤਿਯੋ. ਦਿਟ੍ਠਾਦੀਨਂ ਅਨੁਗਨ੍ਤ੍ਵਾ ਸੀਲਵਿਪਤ੍ਤਿਆਦੀਹਿ ਵਦਨਂ ਚੋਦਨਾ ਅਨੁਵਾਦੋ. ਉਪਾਗਤੋਤਿ ਨਿਸ੍ਸਿਤੋ, ਅਨੁਵਾਦੋ ਚਤਸ੍ਸੋ ਵਿਪਤ੍ਤਿਯੋ ਨਿਸ੍ਸਾਯ ਪਵਤ੍ਤੋਤਿ ਅਤ੍ਥੋ. ‘‘ਤਤ੍ਥਾ’’ਤਿ ਪਠਮਮੇਵ ਨਿਦ੍ਧਾਰਣਸ੍ਸ ਵੁਤ੍ਤਤ੍ਤਾ ਇਧ ਪੁਨਵਚਨੇ ਪਯੋਜਨਂ ਨ ਦਿਸ੍ਸਤਿ, ‘‘ਸਮ੍ਭਵਾ’’ਤਿ ਵਚਨਸ੍ਸਾਪਿ ਨ ਕੋਚਿ ਅਤ੍ਥਵਿਸੇਸੋ ਦਿਸ੍ਸਤਿ. ਤਸ੍ਮਾ ‘‘ਆਪਤ੍ਤਾਧਾਰਤਾ ਤਤ੍ਥ, ਸਤ੍ਤਆਪਤ੍ਤਿਸਮ੍ਭਵਾ’’ਤਿ ਪਾਠੋ ਨ ਯੁਜ੍ਜਤਿ, ‘‘ਆਪਤ੍ਤਾਧਾਰਤਾ ਨਾਮ, ਸਤ੍ਤ ਆਪਤ੍ਤਿਯੋ ਮਤਾ’’ਤਿ ਪਾਠੋ ¶ ਯੁਤ੍ਤਤਰੋ, ਆਪਤ੍ਤਾਧਾਰਤਾ ਨਾਮ ਆਪਤ੍ਤਾਧਿਕਰਣਂ ਨਾਮ ਸਤ੍ਤ ਆਪਤ੍ਤਿਯੋ ਮਤਾ ਸਤ੍ਤ ਆਪਤ੍ਤਿਯੋਵ ਅਧਿਪ੍ਪੇਤਾਤਿ ਅਤ੍ਥੋ.

੨੭੬੩. ਸਙ੍ਘਕਿਚ੍ਚਾਨਿ ਨਿਸ੍ਸਾਯਾਤਿ ਅਪਲੋਕਨਕਮ੍ਮਾਦੀਨਿ ਚਤ੍ਤਾਰਿ ਸਙ੍ਘਕਮ੍ਮਾਨਿ ਉਪਾਦਾਯ ਕਿਚ੍ਚਾਧਿਕਰਣਾਭਿਧਾਨਂ ਸਿਯਾ, ਕਿਚ੍ਚਾਧਿਕਰਣਂ ਨਾਮ ਚਤ੍ਤਾਰਿ ਸਙ੍ਘਕਮ੍ਮਾਨੀਤਿ ਅਤ੍ਥੋ. ਏਤੇਸਂ ਤੁ ਚਤੁਨ੍ਨਮ੍ਪੀਤਿ ਏਤੇਸਂ ਪਨ ਚਤੁਨ੍ਨਮ੍ਪਿ ਅਧਿਕਰਣਾਨਂ. ਸਮਤ੍ਤਾਤਿ ਵੂਪਸਮਹੇਤੁਤ੍ਤਾ. ਸਮਥਾ ਮਤਾਤਿ ਸਮ੍ਮੁਖਾਵਿਨਯਾਦਯੋ ਸਤ੍ਤ ਅਧਿਕਰਣਸਮਥਾਤਿ ਅਧਿਪ੍ਪੇਤਾ. ਅਧਿਕਰਣਾਨਿ ਸਮੇਨ੍ਤਿ, ਸਮ੍ਮਨ੍ਤਿ ਵਾ ਏਤੇਹੀਤਿ ‘‘ਸਮਥਾ’’ਤਿ ਵੁਚ੍ਚਨ੍ਤੀਤਿ ‘‘ਸਮਤ੍ਤਾ ਸਮਥਾ ਮਤਾ’’ਤਿ ਇਮਿਨਾ ਸਮਥ-ਸਦ੍ਦਸ੍ਸ ਅਨ੍ਵਤ੍ਥਂ ਦੀਪੇਤਿ.

੨੭੬੪-੫. ਤੇ ਸਰੂਪਤੋ ਦਸ੍ਸੇਤੁਮਾਹ ‘‘ਸਮ੍ਮੁਖਾ’’ਤਿਆਦਿ. ‘‘ਵਿਨਯੋ’’ਤਿ ਇਦਂ ਸਮ੍ਮੁਖਾਦਿਪਦੇਹਿ ਪਚ੍ਚੇਕਂ ਯੋਜੇਤਬ੍ਬਂ ‘‘ਸਮ੍ਮੁਖਾਵਿਨਯੋ ਸਤਿਵਿਨਯੋ ਅਮੂਲ਼੍ਹਵਿਨਯੋ’’ਤਿ. ‘‘ਪਟਿਞ੍ਞਾਵਿਨਯੋ’’ਤਿ ਚ ਪਟਿਞ੍ਞਾਤਕਰਣਂ ਵੁਤ੍ਤਂ. ਸਤ੍ਤਮੋ ਵਿਨਯੋਤਿ ਸਮਥੋ ਅਧਿਪ੍ਪੇਤੋ. ਤਿਣਵਤ੍ਥਾਰਕੋਤਿ ਇਮੇ ਸਤ੍ਤ ਸਮਥਾ ਬੁਦ੍ਧੇਨਾਦਿਚ੍ਚਬਨ੍ਧੁਨਾ ਵੁਤ੍ਤਾਤਿ ਯੋਜਨਾ.

੨੭੬੬. ਚਤੂਸੁ ¶ ਅਧਿਕਰਣੇਸੁ ਯਂ ਅਧਿਕਰਣਂ ਯਤ੍ਤਕੇਹਿ ਸਮਥੇਹਿ ਸਮ੍ਮਤਿ, ਤੇ ਸਙ੍ਗਹੇਤ੍ਵਾ ਦਸ੍ਸੇਨ੍ਤੋ ਆਹ ‘‘ਵਿਵਾਦੋ’’ਤਿਆਦਿ.

੨੭੬੭-੯. ‘‘ਵਿਵਾਦੋ’’ਤਿਆਦਿਨਾ ਉਦ੍ਦਿਟ੍ਠਮਤ੍ਥਂ ਨਿਦ੍ਦਿਸਨ੍ਤੋ ਆਹ ‘‘ਛਟ੍ਠੇਨਾ’’ਤਿਆਦਿ. ਏਤ੍ਥ ਏਤੇਸੁ ਚਤੂਸੁ ਅਧਿਕਰਣੇਸੁ, ਸਮਥੇਸੁ ਚ ਕਿਂ ਕੇਨ ਸਮ੍ਮਤੀਤਿ ਚੇ? ਵਿਵਾਦੋ ਵਿਵਾਦਾਧਿਕਰਣਂ ਛਟ੍ਠੇਨ ਯੇਭੁਯ੍ਯਸਿਕਾਯ, ਪਠਮੇਨ ਸਮਥੇਨ ਸਮ੍ਮੁਖਾਵਿਨਯੇਨ ਚਾਤਿ ਦ੍ਵੀਹਿ ਸਮਥੇਹਿ ਸਮ੍ਮਤਿ. ਯਸ੍ਸਾ ਕਿਰਿਯਾਯ ਧਮ੍ਮਵਾਦਿਨੋ ਬਹੁਤਰਾ, ਏਸਾ ਯੇਭੁਯ੍ਯਸਿਕਾ. ‘‘ਸਙ੍ਘਸਮ੍ਮੁਖਤਾ, ਧਮ੍ਮਸਮ੍ਮੁਖਤਾ, ਵਿਨਯਸਮ੍ਮੁਖਤਾ, ਪੁਗ੍ਗਲਸਮ੍ਮੁਖਤਾ’’ਤਿ (ਚੂਲ਼ਵ. ੨੨੯, ੨੩੪, ੨੩੬, ੨੩੭, ੨੪੨) ਵੁਤ੍ਤਾਨਂ ਸਙ੍ਘਾਦੀਨਂ ਚਤੁਨ੍ਨਂ ਸਨ੍ਨਿਧਾਨੇਨ ਵਾ ਗਣਪੁਗ੍ਗਲੇਹਿ ਸਮਿਯਮਾਨਂ ਵਿਵਾਦਾਧਿਕਰਣਂ ਸਙ੍ਘਸਮ੍ਮੁਖਤਂ ਵਿਨਾ ਇਤਰੇਹਿ ਤੀਹਿ ਵਾ ਸਮ੍ਮਤੀਤਿ ਵੁਤ੍ਤਂ ਹੋਤਿ.

ਏਤ੍ਥ ਚ ਕਾਰਕਸਙ੍ਘਸ੍ਸ ਸਙ੍ਘਸਾਮਗ੍ਗਿਵਸੇਨ ਸਮ੍ਮੁਖੀਭਾਵੋ ਸਙ੍ਘਸਮ੍ਮੁਖਤਾ, ਸਮੇਤਬ੍ਬਸ੍ਸ ਵਤ੍ਥੁਨੋ ¶ ਭੂਤਤਾ ਧਮ੍ਮਸਮ੍ਮੁਖਤਾ, ਯਥਾ ਤਂ ਸਮੇਤਬ੍ਬਂ, ਤਥੇਵਸ੍ਸ ਸਮਨਂ ਵਿਨਯਸਮ੍ਮੁਖਤਾ, ਯੋ ਚ ਵਿਵਦਤਿ, ਯੇਨ ਚ ਵਿਵਦਤਿ, ਤੇਸਂ ਉਭਿਨ੍ਨਂ ਅਤ੍ਥਪਚ੍ਚਤ੍ਥਿਕਾਨਂ ਸਮ੍ਮੁਖੀਭਾਵੋ ਪੁਗ੍ਗਲਸਮ੍ਮੁਖਤਾ.

‘‘ਅਨੁਵਾਦੋ ਚਤੂਹਿਪੀ’’ਤਿ ਉਦ੍ਦਿਟ੍ਠਂ ਨਿਦ੍ਦਿਸਨ੍ਤੋ ਆਹ ‘‘ਸਮ੍ਮੁਖਾ’’ਤਿਆਦਿ. ਅਨੁਪੁਬ੍ਬੇਨਾਤਿ ਅਨੁਪਟਿਪਾਟਿਯਾ. ਸਮ੍ਮੁਖਾਵਿਨਯਾਦੀਹਿ ਤੀਹਿਪੀਤਿ ਸਮ੍ਮੁਖਾਵਿਨਯਸਤਿਵਿਨਯਅਮੂਲ਼੍ਹਵਿਨਯੇਹਿ ਤੀਹਿਪਿ. ਤਥੇਵਾਤਿ ਯਥਾ ਤੀਹਿ, ਤਥਾ ਪਞ੍ਚਮੇਨ ਤਸ੍ਸਪਾਪਿਯਸਿਕਾਸਮਥੇਨਾਪਿ ਅਨੁਵਾਦੋ ਸਮ੍ਮਤਿ, ਪਗੇਵ ਚਤੂਹੀਤਿ ਅਤ੍ਥੋ.

ਯੋ ਪਾਪੁਸ੍ਸਨ੍ਨਤਾਯ ਪਾਪਿਯੋ ਪੁਗ੍ਗਲੋ, ਤਸ੍ਸ ਕਤ੍ਤਬ੍ਬਤੋ ‘‘ਤਸ੍ਸਪਾਪਿਯਸਿਕਾ’’ਤਿ ਕਮ੍ਮਂ ਵੁਚ੍ਚਤਿ. ਆਯਸ੍ਮਤੋ ਦਬ੍ਬਸ੍ਸ ¶ ਮਲ੍ਲਪੁਤ੍ਤਸ੍ਸ ਵਿਯ ਸਤਿਵੇਪੁਲ੍ਲਪ੍ਪਤ੍ਤਸ੍ਸ ਖੀਣਾਸਵਸ੍ਸ ਕਤਾ ਅਮੂਲਿਕਾ ਸੀਲਵਿਪਤ੍ਤਿਚੋਦਨਾ ਸਮ੍ਮੁਖਾਵਿਨਯੇਨ, ਞਤ੍ਤਿਚਤੁਤ੍ਥਾਯ ਕਮ੍ਮਵਾਚਾਯ ਦਿਨ੍ਨੇਨ ਸਤਿਵਿਨਯੇਨ ਚ ਸਮ੍ਮਤਿ. ਉਮ੍ਮਤ੍ਤਕਸ੍ਸ ਭਿਕ੍ਖੁਨੋ ਕਤਾ ਆਪਤ੍ਤਿਚੋਦਨਾ ਸਮ੍ਮੁਖਾਵਿਨਯੇਨ ਚ ਤਥੇਵ ਦਿਨ੍ਨੇਨ ਅਮੂਲ਼੍ਹਵਿਨਯੇਨ ਚ ਸਮ੍ਮਤਿ. ਸਙ੍ਘਮਜ੍ਝੇ ਆਪਤ੍ਤਿਯਾ ਚੋਦਿਯਮਾਨਸ੍ਸ ਅਵਜਾਨਿਤ੍ਵਾ ਪਟਿਜਾਨਨਾਦਿਂ ਕਰੋਨ੍ਤਸ੍ਸ ਪਾਪਭਿਕ੍ਖੁਨੋ ਬਹੁਲਾਪਤ੍ਤਿਚੋਦਨਾ ਸਮ੍ਮੁਖਾਵਿਨਯੇਨ ਚੇਵ ਤਥੇਵ ਪਕਤੇਨ ਤਸ੍ਸਪਾਪਿਯਸਿਕਾਕਮ੍ਮੇਨ ਚ ਵੂਪਸਮ੍ਮਤੀਤਿ ਵੁਤ੍ਤਂ ਹੋਤਿ.

‘‘ਆਪਤ੍ਤਿ ਪਨ ਤੀਹੇਵਾ’’ਤਿ ਉਦ੍ਦੇਸਸ੍ਸ ਨਿਦ੍ਦੇਸਮਾਹ ‘‘ਸਮ੍ਮੁਖੇਨਾ’’ਤਿਆਦਿ. ਸਮ੍ਮੁਖੇਨ ਸਮ੍ਮੁਖਾਵਿਨਯੇਨ, ਪਟਿਞ੍ਞਾਯ ਪਟਿਞ੍ਞਾਤਕਰਣੇਨ, ਤਿਣਵਤ੍ਥਾਰਕੇਨ ਵਾ ਇਮੇਹਿ ਤੀਹਿ ਏਵ ਸਮਥੇਹਿ ਸਾ ਆਪਤ੍ਤਿ ਆਪਤ੍ਤਾਧਿਕਰਣਂ ਉਪਸਮਂ ਯਾਤੀਤਿ ਯੋਜਨਾ. ਏਤ੍ਥ ਪਟਿਞ੍ਞਾਤਕਰਣਂ ਨਾਮ ਆਪਤ੍ਤਿਂ ਪਟਿਗ੍ਗਣ੍ਹਨ੍ਤੇਨ ‘‘ਪਸ੍ਸਸੀ’’ਤਿ ਵੁਤ੍ਤੇ ਆਪਤ੍ਤਿਂ ਦੇਸੇਨ੍ਤੇਨ ‘‘ਆਮ ਪਸ੍ਸਾਮੀ’’ਤਿ ਸਮ੍ਪਟਿਚ੍ਛਨਂ. ਤਿਣਵਤ੍ਥਾਰਕਂ ਪਨ ਸਯਮੇਵ ਵਕ੍ਖਤਿ.

ਤੀਹੇਵ ਸਮਥੇਹੀਤਿ ਏਤ੍ਥ ਗਰੁਕਾਪਤ੍ਤਿ ਸਮ੍ਮੁਖਾਵਿਨਯੇਨ, ਪਟਿਞ੍ਞਾਤਕਰਣੇਨ ਚਾਤਿ ਦ੍ਵੀਹਿ, ਲਹੁਕਾਪਤ੍ਤਿਂ ਆਪਜ੍ਜਿਤ੍ਵਾ ਸਙ੍ਘੇ ਵਾ ਗਣੇ ਵਾ ਪੁਗ੍ਗਲੇ ਵਾ ਦੇਸਨਾਯ ਸਮ੍ਮੁਖਾਵਿਨਯੇਨ ਚੇਵ ਪਟਿਞ੍ਞਾਤਕਰਣੇਨ ਚ, ਕੋਸਮ੍ਬਕਾਨਂ ਵਿਗ੍ਗਹਸਦਿਸਂ ਮਹਾਵਿਗ੍ਗਹਂ ਕਰੋਨ੍ਤੇਹਿ ਆਪਨ੍ਨਾ ਅਨੇਕਵਿਧਾ ਆਪਤ੍ਤਿਯੋ ਸਚੇ ਹੋਨ੍ਤਿ, ਤਾਸੁ ਵਕ੍ਖਮਾਨਸਰੂਪਂ ਥੁਲ੍ਲਵਜ੍ਜਾਦਿਂ ਠਪੇਤ੍ਵਾ ਅਵਸੇਸਾ ਸਬ੍ਬਾ ਆਪਤ੍ਤਿਯੋ ਸਮ੍ਮੁਖਾਵਿਨਯੇਨ, ਤਿਣਵਤ੍ਥਾਰਕੇਨ ਚ ਸਮ੍ਮਨ੍ਤੀਤਿ ਅਤ੍ਥੋ.

ਕਿਚ੍ਚਂ ¶ ਕਿਚ੍ਚਾਧਿਕਰਣਂ ਏਕੇਨ ਸਮ੍ਮੁਖਾਵਿਨਯੇਨੇਵ ਸਮ੍ਮਤੀਤਿ ਯੋਜਨਾ.

੨੭੭੦. ਯੇਭੁਯ੍ਯਸਿਕਕਮ੍ਮੇਤਿ ¶ ਏਤ੍ਥ ਨਿਮਿਤ੍ਤਤ੍ਥੇ ਭੁਮ੍ਮਂ. ਸਲਾਕਂ ਗਾਹਯੇਤਿ ਵਿਨਿਚ੍ਛਯਕਾਰਕੇ ਸਙ੍ਘੇ ਧਮ੍ਮਵਾਦੀਨਂ ਬਹੁਤ੍ਤਂ ਵਾ ਅਪ੍ਪਤਰਤ੍ਤਂ ਵਾ ਜਾਨਿਤੁਂ ਵਕ੍ਖਮਾਨੇਨ ਨਯੇਨ ਸਲਾਕਂ ਗਾਹਾਪੇਯ੍ਯ. ਬੁਧੋਤਿ ‘‘ਨ ਛਨ੍ਦਾਗਤਿਂ ਗਚ੍ਛਤਿ…ਪੇ… ਗਹਿਤਾਗਹਿਤਞ੍ਚ ਜਾਨਾਤੀ’’ਤਿ ਵੁਤ੍ਤਂ ਪਞ੍ਚਹਿ ਅਙ੍ਗੇਹਿ ਸਮਨ੍ਨਾਗਤਂ ਪੁਗ੍ਗਲਂ ਦਸ੍ਸੇਤਿ. ‘‘ਗੂਲ਼੍ਹੇਨਾ’’ਤਿਆਦਿਨਾ ਸਲਾਕਗ੍ਗਾਹਪ੍ਪਕਾਰੋ ਦਸ੍ਸਿਤੋ. ਕਣ੍ਣਜਪ੍ਪੇਨਾਤਿ ਏਤ੍ਥ ਕਣ੍ਣੇ ਜਪ੍ਪੋ ਯਸ੍ਮਿਂ ਸਲਾਕਗ੍ਗਾਹਪਯੋਗੇਤਿ ਵਿਗ੍ਗਹੋ. ਏਤ੍ਥ ਗੂਲ਼੍ਹਸਲਾਕਗ੍ਗਾਹੋ ਨਾਮ ਧਮ੍ਮਵਾਦਿਸਲਾਕਾ ਚ ਅਧਮ੍ਮਵਾਦਿਸਲਾਕਾ ਚ ਵਿਸੁਂ ਵਿਸੁਂ ਚੀਵਰਕਣ੍ਣੇ ਪਕ੍ਖਿਪਿਤ੍ਵਾ ਪੁਗ੍ਗਲਾਨਂ ਸਨ੍ਤਿਕਂ ਵਿਸੁਂ ਵਿਸੁਂ ਉਪਸਙ੍ਕਮਿਤ੍ਵਾ ਸਲਾਕਾ ਵਿਸੁਂ ਵਿਸੁਂ ਦਸ੍ਸੇਤ੍ਵਾ ‘‘ਇਤੋ ਤਵ ਰੁਚ੍ਚਨਕਂ ਗਣ੍ਹਾਹੀ’’ਤਿ ਰਹੋ ਠਤ੍ਵਾ ਗਾਹਾਪਨਂ. ਵਿਵਟਕਂ ਨਾਮ ਧਮ੍ਮਵਾਦੀਨਂ ਬਹੁਭਾਵਂ ਞਤ੍ਵਾ ਸਬ੍ਬੇਸੁ ਜਾਨਨ੍ਤੇਸੁ ਪੁਗ੍ਗਲਾਨਂ ਸਨ੍ਤਿਕਂ ਗਾਹਾਪਨਂ. ਕਣ੍ਣਜਪ੍ਪਨਂ ਨਾਮ ਏਵਮੇਵ ਕਣ੍ਣਮੂਲੇ ਰਹੋ ਠਤ੍ਵਾ ਗਾਹਾਪਨਂ.

੨੭੭੧. ਅਲਜ੍ਜੁਸ੍ਸਦੇਤਿ ਏਤ੍ਥ ‘‘ਸਙ੍ਘੇ’’ਤਿ ਸੇਸੋ. ਲਜ੍ਜਿਸੁ ਬਾਲੇਸੂਤਿ ਏਤ੍ਥਾਪਿ ‘‘ਉਸ੍ਸਦੇਸੂ’’ਤਿ ਵਤ੍ਤਬ੍ਬਂ.

੨੭੭੨. ਸਕੇਨ ਕਮ੍ਮੁਨਾਯੇਵਾਤਿ ਅਤ੍ਤਨੋ ਯਂ ਕਿਚ੍ਚਂ, ਤੇਨੇਵਾਤਿ.