📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਵਿਨਯਪਿਟਕੇ

ਪਾਚਿਤ੍ਯਾਦਿਯੋਜਨਾ

ਪਾਚਿਤ੍ਤਿਯਯੋਜਨਾ

ਮਹਾਕਾਰੁਣਿਕਂ ¶ ਨਾਥਂ, ਅਭਿਨਤ੍ਵਾ ਸਮਾਸਤੋ;

ਪਾਚਿਤ੍ਯਾਦਿਵਣ੍ਣਨਾਯ, ਕਰਿਸ੍ਸਾਮਤ੍ਥਯੋਜਨਂ.

੫. ਪਾਚਿਤ੍ਤਿਯਕਣ੍ਡਂ

੧. ਮੁਸਾਵਾਦਸਿਕ੍ਖਾਪਦ-ਅਤ੍ਥਯੋਜਨਾ

ਖੁਦ੍ਦਕਾਨਨ੍ਤਿ ¶ ਸੁਖੁਮਾਪਤ੍ਤਿਪਕਾਸਕਤ੍ਤਾ ਅਪ੍ਪਕਾਨਂ, ਗਣਨਤੋ ਵਾ ਪਚੁਰਤ੍ਤਾ ਬਹੁਕਾਨਂ. ਯੇਸਂ ਸਿਕ੍ਖਾਪਦਾਨਨ੍ਤਿ ਸਮ੍ਬਨ੍ਧੋ. ‘‘ਯੇਸ’’ਨ੍ਤਿ ਪਦਂ ‘‘ਸਙ੍ਗਹੋ’’ਤਿ ਪਦੇ ਸਾਮ੍ਯਤ੍ਥਛਟ੍ਠੀ. ਸਙ੍ਗਹੀਯਤੇ ਸਙ੍ਗਹੋ ¶ . ‘‘ਨਵਹਿ ਵਗ੍ਗੇਹੀ’’ਤਿਪਦਂ ‘‘ਸਙ੍ਗਹੋ, ਸੁਪ੍ਪਤਿਟ੍ਠਿਤੋ’’ਤਿ ਪਦਦ੍ਵਯੇ ਕਰਣਂ. ਦਾਨੀਤਿ ਕਾਲਵਾਚਕੋ ਸਤ੍ਤਮ੍ਯਨ੍ਤਨਿਪਾਤੋ ਇਦਾਨਿ-ਪਰਿਯਾਯੋ, ਇਮਸ੍ਮਿਂ ਕਾਲੇਤਿ ਅਤ੍ਥੋ. ਤੇਸਨ੍ਤਿ ਖੁਦ੍ਦਕਾਨਂ, ਅਯਂ ਵਣ੍ਣਨਾਤਿ ਸਮ੍ਬਨ੍ਧੋ. ਭਵਤੀਤਿ ਏਤ੍ਥ ਤਿ-ਸਦ੍ਦੋ ਏਕਂਸਤ੍ਥੇ ਅਨਾਗਤਕਾਲਿਕੋ ਹੋਤਿ ‘‘ਨਿਰਯਂ ਨੂਨ ਗਚ੍ਛਾਮਿ, ਏਤ੍ਥ ਮੇ ਨਤ੍ਥਿ ਸਂਸਯੋ’’ਤਿਆਦੀਸੁ (ਜਾ. ੨.੨੨.੩੩੧) ਵਿਯ. ਕਿਞ੍ਚਾਪੇਤ੍ਥ ਹਿ ਯਥਾ ਏਕਂਸਵਾਚਕੋ ਨੂਨਸਦ੍ਦੋ ਅਤ੍ਥਿ, ਨ ਏਵਂ ‘‘ਭਵਤੀ’’ਤਿ ਪਦੇ, ਅਤ੍ਥਤੋ ਪਨ ਅਯਂ ਵਣ੍ਣਨਾ ਨੂਨ ਭਵਿਸ੍ਸਤੀਤਿ ਅਤ੍ਥੋ ਗਹੇਤਬ੍ਬੋ. ਅਥ ਵਾ ਅਵਸ੍ਸਮ੍ਭਾਵਿਯਤ੍ਥੇ ਅਨਾਗਤਕਾਲਵਾਚਕੋ ਹੋਤਿ ‘‘ਧੁਵਂ ਬੁਦ੍ਧੋ ਭਵਾਮਹ’’ਨ੍ਤਿਆਦੀਸੁ (ਬੁ. ਵਂ. ੨.੧੦੯-੧੧੪) ਵਿਯ. ਕਾਮਞ੍ਹੇਤ੍ਥ ਯਥਾ ਅਵਸ੍ਸਮ੍ਭਾਵਿਯਤ੍ਥਵਾਚਕੋ ਧੁਵਸਦ੍ਦੋ ਅਤ੍ਥਿ, ਨ ਏਵਂ ‘‘ਭਵਤੀ’’ਤਿ ਪਦੇ, ਅਤ੍ਥਤੋ ਪਨ ਧੁਵਂ ਭਵਿਸ੍ਸਤਿ ਅਯਂ ਵਣ੍ਣਨਾਤਿ ਅਤ੍ਥੋ ਗਹੇਤਬ੍ਬੋਤਿ ਦਟ੍ਠਬ੍ਬਂ.

੧. ‘‘ਤਤ੍ਥਾ’’ਤਿ ¶ ਪਦਂ ‘‘ਮੁਸਾਵਾਦਵਗ੍ਗਸ੍ਸਾ’’ਤਿ ਪਦੇ ਨਿਦ੍ਧਾਰਣਸਮੁਦਾਯੋ, ਤੇਸੁ ਨਵਸੁ ਵਗ੍ਗੇਸੂਤਿ ਅਤ੍ਥੋ. ਪਠਮਸਿਕ੍ਖਾਪਦੇਤਿ ਵਾ, ਤੇਸੁ ਖੁਦ੍ਦਕੇਸੁ ਸਿਕ੍ਖਾਪਦੇਸੂਤਿ ਅਤ੍ਥੋ. ਸਕ੍ਯਾਨਂ ਪੁਤ੍ਤੋਤਿ ਭਗਿਨੀਹਿ ਸਂਵਾਸਕਰਣਤੋ ਲੋਕਮਰਿਯਾਦਂ ਛਿਨ੍ਦਿਤੁਂ, ਜਾਤਿਸਮ੍ਭੇਦਤੋ ਵਾ ਰਕ੍ਖਿਤੁਂ ਸਕ੍ਕੁਣਨ੍ਤੀਤਿ ਸਕ੍ਯਾ. ਸਾਕਵਨਸਣ੍ਡੇ ਨਗਰਂ ਮਾਪੇਨ੍ਤੀਤਿ ਵਾ ਸਕ੍ਯਾ, ਪੁਬ੍ਬਰਾਜਾਨੋ. ਤੇਸਂ ਵਂਸੇ ਭੂਤਤ੍ਤਾ ਏਤਰਹਿਪਿ ਰਾਜਾਨੋ ਸਕ੍ਯਾ ਨਾਮ, ਤੇਸਂ ਪੁਤ੍ਤੋਤਿ ਅਤ੍ਥੋ. ‘‘ਬੁਦ੍ਧਕਾਲੇ’’ਤਿ ਪਦਂ ‘‘ਪਬ੍ਬਜਿਂਸੂ’’ਤਿ ਪਦੇ ਆਧਾਰੋ. ਸਕ੍ਯਕੁਲਤੋ ਨਿਕ੍ਖਮਿਤ੍ਵਾਤਿ ਸਮ੍ਬਨ੍ਧੋ. ‘‘ਵਾਦਕ੍ਖਿਤ੍ਤੋ’’ਤ੍ਯਾਦਿਨਾ ਵਾਦੇਨ ਖਿਤ੍ਤੋ, ਵਾਦਮ੍ਹਿ ਵਾਤਿ ਅਤ੍ਥਂ ਦਸ੍ਸੇਤਿ. ਯਤ੍ਰ ਯਤ੍ਰਾਤਿ ਯਸ੍ਸਂ ਯਸ੍ਸਂ ਦਿਟ੍ਠਿਯਂ ਪਵਤ੍ਤਤੀਤਿ ਸਮ੍ਬਨ੍ਧੋ. ਅਵਜਾਨਿਤ੍ਵਾਤਿ ਪਟਿਸ੍ਸਵੇਨ ਵਿਯੋਗਂ ਕਤ੍ਵਾ. ਅਵਸਦ੍ਦੋ ਹਿ ਵਿਯੋਗਤ੍ਥਵਾਚਕੋ. ‘‘ਅਪਜਾਨਿਤ੍ਵਾ’’ਤਿਪਿ ਪਾਠੋ, ਪਟਿਞ੍ਞਾਤਂ ਅਪਨੀਤਂ ਕਤ੍ਵਾਤਿ ਅਤ੍ਥੋ. ਦੋਸਨ੍ਤਿ ਅਯੁਤ੍ਤਿਦੋਸਂ, ਸਲ੍ਲਕ੍ਖੇਨ੍ਤੋ ਹੁਤ੍ਵਾਤਿ ਸਮ੍ਬਨ੍ਧੋ. ਕਥੇਨ੍ਤੋ ਕਥੇਨ੍ਤੋਤਿ ਅਨ੍ਤਸਦ੍ਦੋ ਮਾਨਸਦ੍ਦਕਾਰਿਯੋ. ਕਥਿਯਮਾਨੋ ਕਥਿਯਮਾਨੋਤਿ ਹਿ ਅਤ੍ਥੋ. ਪਟਿਜਾਨਿਤ੍ਵਾਤਿ ਪਟਿਞ੍ਞਾਤਂ ਕਤ੍ਵਾ. ਆਨਿਸਂਸਨ੍ਤਿ ਨਿਦ੍ਦੋਸਂ ਗੁਣਂ. ਪਟਿਪੁਬ੍ਬੋ ਚਰਸਦ੍ਦੋ ਪਟਿਚ੍ਛਾਦਨਤ੍ਥੋਤਿ ਆਹ ‘‘ਪਟਿਚਰਤਿ ਪਟਿਚ੍ਛਾਦੇਤੀ’’ਤਿ. ‘‘ਕਿਂ ਪਨ ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾ’’ਤਿ ਵੁਤ੍ਤੇ ‘‘ਅਨਿਚ੍ਚ’’ਨ੍ਤਿ ਵਦਤਿ. ਕਸ੍ਮਾਤਿ ਵੁਤ੍ਤੇ ‘‘ਜਾਨਿਤਬ੍ਬਤੋ’’ਤਿ ਵਦਤਿ. ਯਦਿ ਏਵਂ ਨਿਬ੍ਬਾਨਮ੍ਪਿ ਜਾਨਿਤਬ੍ਬਤ੍ਤਾ ਅਨਿਚ੍ਚਂ ਨਾਮ ਸਿਯਾਤਿ ਵੁਤ੍ਤੇ ਅਤ੍ਤਨੋ ਹੇਤੁਮ੍ਹਿ ਦੋਸਂ ਦਿਸ੍ਵਾ ਅਹਂ ‘‘ਜਾਨਿਤਬ੍ਬਤੋ’’ਤਿ ਹੇਤੁਂ ਨ ਵਦਾਮਿ, ‘‘ਜਾਤਿਧਮ੍ਮਤੋ’’ਤਿ ਪਨ ਵਦਾਮਿ. ਤਯਾ ਪਨ ਦੁਸ੍ਸੁਤਤ੍ਤਾ ਏਵਂ ਵੁਤ੍ਤਨ੍ਤਿ ਵਤ੍ਵਾ ਅਞ੍ਞੇਨਞ੍ਞਂ ਪਟਿਚਰਤਿ. ‘‘ਕੁਰੁਨ੍ਦਿਯ’’ਨ੍ਤਿ ਪਦਂ ‘‘ਵੁਤ੍ਤ’’ਨ੍ਤਿ ਪਦੇ ਆਧਾਰੋ. ਏਤਸ੍ਸਾਤਿ ‘‘ਰੂਪਂ ਅਨਿਚ੍ਚਂ ਜਾਨਿਤਬ੍ਬਤੋ’’ਤਿ ਵਚਨਸ੍ਸ. ਤਤ੍ਰਾਤਿ ਕੁਰੁਨ੍ਦਿਯਂ. ਤਸ੍ਸਾਤਿ ਪਟਿਜਾਨਨਾਵਜਾਨਨਸ੍ਸ. ‘‘ਪਟਿਚ੍ਛਾਦਨਤ੍ਥ’’ਨ੍ਤਿ ਪਦਂ ‘‘ਭਾਸਤੀ’’ਤਿਪਦੇ ਸਮ੍ਪਦਾਨਂ. ‘‘ਮਹਾਅਟ੍ਠਕਥਾਯ’’ਨ੍ਤਿਪਦਂ ‘‘ਵੁਤ੍ਤ’’ਨ੍ਤਿ ਪਦੇ ਆਧਾਰੋ. ‘‘ਦਿਵਾਟ੍ਠਾਨਾਦੀਸੂ’’ਤਿ ਪਦਂ ਉਪਨੇਤਬ੍ਬਂ. ਇਦਂ ‘‘ਅਸੁਕਸ੍ਮਿਂ ਨਾਮਪਦੇਸੇ’’ਤਿ ਪਦੇ ਨਿਦ੍ਧਾਰਣਸਮੁਦਾਯੋ.

੩. ਸਮ੍ਮਾ ¶ ਵਦਤਿ ਅਨੇਨਾਤਿ ਸਂਵਾਦਨਂ, ਉਜੁਜਾਤਿਕਚਿਤ੍ਤਂ, ਨ ਸਂਵਾਦਨਂ ਵਿਸਂਵਾਦਨਂ, ਵਞ੍ਚਨਾਧਿਪ੍ਪਾਯਵਸਪ੍ਪਵਤ੍ਤਂ ਚਿਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਵਿਸਂਵਾਦਨਚਿਤ੍ਤ’’ਨ੍ਤਿ. ‘‘ਵਾਚਾ’’ਤ੍ਯਾਦਿਨਾ ਵਚਤਿ ਏਤਾਯਾਤਿ ਵਾਚਾਤਿ ਅਤ੍ਥਂ ਦਸ੍ਸੇਤਿ ¶ . ਹੀਤਿ ਦਲ਼੍ਹੀਕਰਣਜੋਤਕਂ, ਤਦਮਿਨਾ ਸਚ੍ਚਨ੍ਤਿ ਅਤ੍ਥੋ. ‘‘ਵਾਚਾਯੇਵਾ’’ਤਿ ਪਦਂ ‘‘ਬ੍ਯਪ੍ਪਥੋ’’ਤਿ ਪਦੇ ਤੁਲ੍ਯਤ੍ਥਂ, ‘‘ਵੁਚ੍ਚਤੀ’’ਤਿ ਪਦੇ ਕਮ੍ਮਂ. ਪਥਸਦ੍ਦਪਰਤ੍ਤਾ ਵਾਚਾਸਦ੍ਦਸ੍ਸ ਬ੍ਯਾਦੇਸੋ ਕਤੋ. ਸੁਦ੍ਧਚੇਤਨਾ ਕਥਿਤਾਤਿ ਸਮ੍ਬਨ੍ਧੋ. ਤਂਸਮੁਟ੍ਠਿਤਸਦ੍ਦਸਹਿਤਾਤਿ ਤਾਯ ਚੇਤਨਾਯ ਸਮੁਟ੍ਠਿਤੇਨ ਸਦ੍ਦੇਨ ਸਹ ਪਵਤ੍ਤਾ ਚੇਤਨਾ ਕਥਿਤਾਤਿ ਯੋਜਨਾ.

‘‘ਏਵ’’ਨ੍ਤਿ ਪਦਂ ‘‘ਦਸ੍ਸੇਤ੍ਵਾ’’ਤਿ ਪਦੇ ਨਿਦਸ੍ਸਨਂ, ਕਰਣਂ ਵਾ. ‘‘ਦਸ੍ਸੇਤ੍ਵਾ’’ਤਿ ਪਦਂ ‘‘ਦਸ੍ਸੇਨ੍ਤੋ ਆਹਾ’’ਤਿ ਪਦਦ੍ਵਯੇ ਪੁਬ੍ਬਕਾਲਕਿਰਿਯਾ. ਅਨ੍ਤੇਤਿ ‘‘ਵਾਚਾ’’ਤਿਆਦੀਨਂ ਪਞ੍ਚਨ੍ਨਂ ਪਦਾਨਂ ਅਵਸਾਨੇ. ‘‘ਆਹਾ’’ਤਿ ਏਤ੍ਥ ਵਤ੍ਤਮਾਨ-ਤਿਵਚਨਸ੍ਸ ਅਕਾਰੋ ਪਚ੍ਚੁਪ੍ਪਨ੍ਨਕਾਲਵਾਚਕੇਨ ‘‘ਇਦਾਨੀ’’ਤਿ ਪਦੇਨ ਯੋਜਿਤਤ੍ਤਾ. ‘‘ਤਤ੍ਥਾ’’ਤਿ ਪਦਂ ‘‘ਅਤ੍ਥੋ ਵੇਦਿਤਬ੍ਬੋ’’ਤਿ ਪਦੇ ਆਧਾਰੋ. ਏਤ੍ਥਾਤਿ ‘‘ਅਦਿਟ੍ਠਂ ਦਿਟ੍ਠਂ ਮੇ’’ਤਿਆਦੀਸੁ. ‘‘ਪਾਲ਼ਿਯ’’ਨ੍ਤਿ ਪਦਂ ‘‘ਦੇਸਨਾ ਕਤਾ’’ਤਿ ਪਦੇ ਆਧਾਰੋ. ਨਿਸ੍ਸਿਤਵਿਞ੍ਞਾਣਵਸੇਨ ਅਵਤ੍ਵਾ ਨਿਸ੍ਸਯਪਸਾਦਵਸੇਨ ‘‘ਚਕ੍ਖੁਨਾ ਦਿਟ੍ਠ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਓਲ਼ਾਰਿਕੇਨੇਵਾ’’ਤਿ.

੪. ਤਸ੍ਸਾਤਿ ‘‘ਤੀਹਾਕਾਰੇਹੀ’’ਤਿਆਦਿਵਚਨਸ੍ਸ. ‘‘ਅਤ੍ਥੋ’’ਤਿ ਪਦਂ ‘‘ਵੇਦਿਤਬ੍ਬੋ’’ਤਿ ਪਦੇ ਕਮ੍ਮਂ. ਹੀਤਿ ਵਿਸੇਸਜੋਤਕਂ, ਵਿਸੇਸਂ ਕਥਯਿਸ੍ਸਾਮੀਤਿ ਅਤ੍ਥੋ. ਤਤ੍ਥਾਤਿ ਚਤੁਤ੍ਥਪਾਰਾਜਿਕੇ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ.

੯. ਆਦੀਨਮ੍ਪੀਤਿ ਪਿਸਦ੍ਦੋ ਸਮ੍ਪਿਣ੍ਡਨਤ੍ਥੋ.

੧੧. ਮਨ੍ਦਸਦ੍ਦੋ ਜਲ਼ਤ੍ਥਵਾਚਕੋਤਿ ਆਹ ‘‘ਮਨ੍ਦਤ੍ਤਾ ਜਲ਼ਤ੍ਤਾ’’ਤਿ. ਯੋ ਪਨ ਅਞ੍ਞਂ ਭਣਤੀਤਿ ਸਮ੍ਬਨ੍ਧੋ. ‘‘ਸਾਮਣੇਰੇਨਾ’’ਤਿ ਪਦਂ ‘‘ਵੁਤ੍ਤੋ’’ਤਿ ਪਦੇ ਕਤ੍ਤਾ. ਅਪਿਸਦ੍ਦੋ ਪੁਚ੍ਛਾਵਾਚਕੋ, ‘‘ਪਸ੍ਸਿਤ੍ਥਾ’’ਤਿ ਪਦੇਨ ਯੋਜੇਤਬ੍ਬੋ, ਅਪਿ ਪਸ੍ਸਿਤ੍ਥਾਤਿ ਅਤ੍ਥੋ. ‘‘ਅਦਿਟ੍ਠਂ ਦਿਟ੍ਠਂ ਮੇ’’ਤਿਆਦਿਵਚਨਤੋ ਅਞ੍ਞਾ ਪੂਰਣਕਥਾਪਿ ਤਾਵ ਅਤ੍ਥੀਤਿ ਦਸ੍ਸੇਨ੍ਤੋ ਆਹ ‘‘ਅਞ੍ਞਾ ਪੂਰਣਕਥਾ ਨਾਮ ਹੋਤੀ’’ਤਿ. ਅਪ੍ਪਤਾਯ ਊਨਸ੍ਸ ਅਤ੍ਥਸ੍ਸ ਪੂਰਣਵਸੇਨ ਪਵਤ੍ਤਾ ਕਥਾ ਪੂਰਣਕਥਾ. ਏਸਾ ਪੂਰਣਕਥਾ ¶ ਨਾਮ ਕਾਤਿ ਆਹ ‘‘ਏਕੋ’’ਤਿਆਦਿ. ਏਸਾ ਹਿ ਗਾਮੇ ਅਪ੍ਪਕਮ੍ਪਿ ਤੇਲਂ ਵਾ ਪੂਵਖਣ੍ਡਂ ਵਾ ਪਸ੍ਸਿਤ੍ਵਾ ਵਾ ਲਭਿਤ੍ਵਾ ਵਾ ਬਹੁਕਂ ਕਤ੍ਵਾ ਪੂਰਣਵਸੇਨ ਕਥਿਤਤ੍ਤਾ ਪੂਰਣਕਥਾ ਨਾਮ. ਬਹੁਕਾਨਿ ਤੇਲਾਨਿ ਵਾ ਪੂਵੇ ਵਾ ਪਸ੍ਸਨ੍ਤੋਪਿ ਲਭਨ੍ਤੋਪਿ ਅਪ੍ਪਕਂ ਕਤ੍ਵਾ ਊਨਵਸੇਨ ਕਥਿਤਤ੍ਤਾ ¶ ਊਨਕਥਾਪਿ ਅਤ੍ਥੀਤਿ ਸਕ੍ਕਾ ਵਤ੍ਤੁਂ. ਅਟ੍ਠਕਥਾਸੁ ਪਨ ਅਵੁਤ੍ਤਤ੍ਤਾ ਵੀਮਂਸਿਤ੍ਵਾ ਗਹੇਤਬ੍ਬਂ. ਬਹੁਕਾਯ ਪੂਰਣਸ੍ਸ ਅਤ੍ਥਸ੍ਸ ਊਨਵਸੇਨ ਪਵਤ੍ਤਾ ਕਥਾ ਊਨਕਥਾਤਿ ਵਿਗ੍ਗਹੋ ਕਾਤਬ੍ਬੋਤਿ. ਪਠਮਂ.

੨. ਓਮਸਵਾਦ ਸਿਕ੍ਖਾਪਦਂ

੧੨. ਦੁਤਿਯੇ ਮਸਧਾਤੁ ਵਿਜ੍ਝਨਤ੍ਥੇ ਪਵਤ੍ਤਤਿ ‘‘ਓਮਟ੍ਠਂ ਉਮ੍ਮਟ੍ਠ’’ਨ੍ਤਿਆਦੀਸੁ (ਸਂ. ਨਿ. ਅਟ੍ਠ. ੧.੧.੨੧) ਵਿਯਾਤਿ ਦਸ੍ਸੇਨ੍ਤੋ ਆਹ ‘‘ਓਮਸਨ੍ਤੀਤਿ ਓਵਿਜ੍ਝਨ੍ਤੀ’’ਤਿ.

੧੩. ‘‘ਇਦਂ ਵਤ੍ਥੁ’’ਨ੍ਤਿ ਪਦਂ ‘‘ਆਹਰੀ’’ਤਿ ਪਦੇ ਕਮ੍ਮਂ. ਨਨ੍ਦਿਤਬ੍ਬੋਤਿ ਨਨ੍ਦੋ ਵਣ੍ਣਬਲਾਦਿ, ਸੋ ਏਤਸ੍ਸਤ੍ਥੀਤਿ ਨਨ੍ਦੀ. ਵਿਸਾਲਾਨਿ ਮਹਨ੍ਤਾਨਿ ਵਿਸਾਣਾਨਿ ਏਤਸ੍ਸਤ੍ਥੀਤਿ ਵਿਸਾਲੋ, ਨਨ੍ਦੀ ਚ ਸੋ ਵਿਸਾਲੋ ਚੇਤਿ ਨਨ੍ਦਿਵਿਸਾਲੋਤਿ ਵਚਨਤ੍ਥਂ ਦਸ੍ਸੇਤਿ ‘‘ਨਨ੍ਦਿਵਿਸਾਲੋ ਨਾਮਾ’’ਤਿਆਦਿਨਾ. ਸੋਤਿ ਨਨ੍ਦਿਵਿਸਾਲੋ, ‘‘ਆਹਾ’’ਤਿ ਪਦੇ ਕਤ੍ਤਾ. ਤਤ੍ਥੇਵਾਤਿ ਯੁਞ੍ਜਿਤਟ੍ਠਾਨੇਯੇਵ. ਅਹੇਤੁਕਪਟਿਸਨ੍ਧਿਕਾਲੇਪੀਤਿ ਪਿ-ਸਦ੍ਦੋ ਅਨੁਗ੍ਗਹਤ੍ਥਵਾਚਕੋ, ਪਗੇਵ ਦ੍ਵਿਹੇਤੁਕ ਤਿਹੇਤੁਕ ਪਟਿਸਨ੍ਧਿਕਾਲੇਤਿ ਅਤ੍ਥੋ. ‘‘ਤੇਨ ਚਾ’’ਤਿ ਚਕਾਰਸ੍ਸ ਅਵੁਤ੍ਤਸਮ੍ਪਿਣ੍ਡਨਤ੍ਥਤ੍ਤਾ ‘‘ਅਤ੍ਤਨੋ ਕਮ੍ਮੇਨ ਚਾ’’ਤਿ ਅਤ੍ਥਂ ਸਮ੍ਪਿਣ੍ਡੇਤੀਤਿ ਆਹ ‘‘ਅਤ੍ਤਨੋ ਕਮ੍ਮੇਨ ਚਾ’’ਤਿ. ਅਤ੍ਤਨੋਤਿ ਨਨ੍ਦਿਵਿਸਾਲਸ੍ਸ.

੧੫. ਏਤ੍ਥਾਤਿ ਏਤਿਸ੍ਸਂ ਪਦਭਾਜਨਿਯਂ, ‘‘ਆਹਾ’’ਤਿ ਪਦੇ ਆਧਾਰੋ. ‘‘ਯਸ੍ਮਾ’’ਤਿ ਪਦਂ ਵਿਭਜਿਤੁਕਾਮੋ’’ਤਿ ਪਦੇ ਹੇਤੁ. ਅਟ੍ਠੁਪ੍ਪਤ੍ਤਿਯਂਯੇਵ ‘‘ਹੀਨੇਨਾਪੀ’’ਤਿ ਵਤ੍ਵਾ ਪਦਭਾਜਨਿਯਂ ਅਵੁਤ੍ਤਤ੍ਤਾ ਇਦਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਵੇਣੁਕਾਰਜਾਤੀਤਿ ਵਿਲੀਵਕਾਰਜਾਤਿ. ਨੇਸਾਦਜਾਤੀਤਿ ਏਤ੍ਥ ਕੇਵਟ੍ਟਜਾਤਿਪਿ ਸਙ੍ਗਹਿਤਾ.

ਪੁ ਵੁਚ੍ਚਤਿ ਕਰੀਸਂ, ਤਂ ਕੁਸਤਿ ਅਪਨੇਤੀਤਿ ਪੁਕ੍ਕੁਸੋ. ਪੁਪ੍ਫਂ ਵੁਚ੍ਚਤਿ ਕਰੀਸਂ, ਕੁਸੁਮਂ ਵਾ, ਤਂ ਛਡ੍ਡੇਤੀਤਿ ਪੁਪ੍ਫਛਡ੍ਡਕੋ.

ਕੁਟਤਿ ¶ ਛਿਨ੍ਦਤੀਤਿ ਕੋਟ੍ਠੋ, ਸੋਯੇਵ ਕੋਟ੍ਠਕੋ. ਯਕਾਰਭਕਾਰੇ ਏਕਤੋ ਯੋਜੇਤ੍ਵਾ ‘‘ਯਭਾ’’ਤਿ ਯੋ ਅਕ੍ਕੋਸੋ ਅਤ੍ਥਿ, ਏਸੋ ਹੀਨੋ ਨਾਮ ਅਕ੍ਕੋਸੋਤਿ ਯੋਜਨਾ.

੧੬. ਸਬ੍ਬਪਦੇਸੂਤਿ ਨਾਮਾਦੀਸੁ ਸਬ੍ਬਪਦੇਸੁ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਅਲਿਕਨ੍ਤਿ ਅਸਚ੍ਚਂ, ਮਿਚ੍ਛਾਵਾਚਨ੍ਤਿ ਸਮ੍ਬਨ੍ਧੋ. ਯੋਪਿ ਵਦਤੀਤਿ ਯੋਜਨਾ.

੨੬. ਪਰਿਹਰਿਤ੍ਵਾਤਿ ¶ ਪਰਿਮੁਖਂ ਕਥਨਂ ਅਪਨੇਤ੍ਵਾ. ਦਵਂ ਪਰਿਹਾਸਂ ਕਾਮੇਤੀਤਿ ਦਵਕਾਮੋ, ਤਸ੍ਸ ਭਾਵੋ ਦਵਕਮ੍ਯਂ, ਤਂਯੇਵ ਦਵਕਮ੍ਯਤਾ. ਅਨੁਪਸਮ੍ਪਨ੍ਨਨ੍ਤਿ ਏਤ੍ਥ ਅਕਾਰਸ੍ਸ ਸਦਿਸਤ੍ਥਮਗ੍ਗਹੇਤ੍ਵਾ ਅਞ੍ਞਤ੍ਥੋਵ ਗਹੇਤਬ੍ਬੋਤਿ ਆਹ ‘‘ਠਪੇਤ੍ਵਾ ਭਿਕ੍ਖੁ’’ਨ੍ਤਿਆਦਿ. ਯਦਿ ਹਿ ਸਦਿਸਤ੍ਥੋ ਭਵੇਯ੍ਯ, ਸਾਮਣੇਰੋਵ ਅਨੁਪਸਮ੍ਪਨ੍ਨੋ ਨਾਮ ਸਿਯਾ ਸਣ੍ਠਾਨੇਨ ਚ ਪੁਰਿਸਭਾਵੇਨ ਚ ਸਦਿਸਤ੍ਤਾ, ਤਸ੍ਮਾ ਅਞ੍ਞਤ੍ਥੋਵ ਗਹੇਤਬ੍ਬੋਤਿ ਦਟ੍ਠਬ੍ਬਂ. ਸਬ੍ਬਸਤ੍ਤਾਤਿ ਏਤ੍ਥ ਸਬ੍ਬਸਦ੍ਦੋ ਅਨਵਸੇਸਤ੍ਥੋ ਮਨੁਸ੍ਸੇ ਉਪਾਦਾਯ ਵਚਨਤ੍ਥਜਾਨਨਾਜਾਨਨਪਕਤਿਕਾਨਂ ਸਬ੍ਬਸਤ੍ਤਾਨਮ੍ਪਿ ਗਹਿਤਤ੍ਤਾ.

੩੫. ਅਤ੍ਥਪੁਰੇਕ੍ਖਾਰੋ ਨਾਮਾਤਿ ਵੇਦਿਤਬ੍ਬੋਤਿ ਸਮ੍ਬਨ੍ਧੋ. ਸਿਕ੍ਖਾਪਦਮਪੇਕ੍ਖਿਯ ਨਪੁਂਸਕਲਿਙ੍ਗਵਸੇਨ ‘‘ਕਿਰਿਯ’’ਨ੍ਤਿਆਦਿ ਵੁਤ੍ਤਂ. ਆਪਤ੍ਤਿਮਪੇਕ੍ਖਿਯ ਇਤ੍ਥਿਲਿਙ੍ਗਵਸੇਨ ‘‘ਕਿਰਿਯਾ’’ਤਿਆਦਿ ਵੁਤ੍ਤਂ. ਵਜ੍ਜਕਮ੍ਮਸਦ੍ਦਾ ਸਿਕ੍ਖਾਪਦਮਪੇਕ੍ਖਨ੍ਤਾਪਿ ਆਪਤ੍ਤਿ, ਮਪੇਕ੍ਖਨ੍ਤਾਪਿ ਨਿਯਤਨਪੁਂਸਕਲਿਙ੍ਗਤ੍ਤਾ ਨਪੁਂਸਕਾਯੇਵ, ਤਸ੍ਮਾ ਤੇ ਦ੍ਵੇ ਆਪਤ੍ਤਿਟ੍ਠਾਨੇ ਨ ਵੁਤ੍ਤਾਤਿ ਦਟ੍ਠਬ੍ਬਨ੍ਤਿ. ਦੁਤਿਯਂ.

੩. ਪੇਸੁਞ੍ਞਸਿਕ੍ਖਾਪਦਂ

੩੬. ਤਤਿਯੇ ‘‘ਜਾਤਭਣ੍ਡਨਾਨ’’ਨ੍ਤਿ ਵਤ੍ਤਬ੍ਬੇ ਅਗ੍ਯਾਹਿਤੋਤਿਆਦੀਸੁ ਵਿਯ ਵਿਸੇਸਨਪਰਨਿਪਾਤਵਸੇਨ ‘‘ਭਣ੍ਡਨਜਾਤਾਨ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਸਞ੍ਜਾਤਭਣ੍ਡਨਾਨ’’ਨ੍ਤਿ. ‘‘ਪੁਬ੍ਬਭਾਗੋ’’ਤਿ ਵਤ੍ਵਾ ਤਸ੍ਸ ਸਰੂਪਂ ਦਸ੍ਸੇਤਿ ‘‘ਇਮਿਨਾ ਚ ਇਮਿਨਾ ਚਾ’’ਤਿਆਦਿਨਾ. ਵਿਰੁਦ੍ਧਂ ਵਦਤਿ ਏਤੇਨਾਤਿ ਵਿਵਾਦੋ, ਵਿਗ੍ਗਾਹਿਕਕਥਾ ¶ , ਤਂ ਆਪਨ੍ਨਾਤਿ ਵਿਵਾਦਾਪਨ੍ਨਾ, ਤੇਸਂ. ਪਿਸਤਿ ਸਞ੍ਚੁਣ੍ਣੇਤੀਤਿ ਪਿਸੁਣੋ, ਪੁਗ੍ਗਲੋ, ਤਸ੍ਸ ਇਦਨ੍ਤਿ ਪੇਸੁਞ੍ਞਂ, ਵਚਨਨ੍ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪੇਸੁਞ੍ਞਨ੍ਤਿ ਪਿਸੁਣਵਾਚ’’ਨ੍ਤਿ.

੩੭. ਭਿਕ੍ਖੁਪੇਸੁਞ੍ਞੇਤਿ ਭਿਕ੍ਖੂਨਂ ਸਨ੍ਤਿਕਂ ਉਪਸਂਹਟੇ ਪੇਸੁਞ੍ਞਵਚਨੇਤਿ ਛਟ੍ਠੀਸਮਾਸੋ.

੩੮. ‘‘ਦਿਸ੍ਵਾ’’ਤਿ ਪਦਂ ‘‘ਭਣਨ੍ਤਸ੍ਸਾ’’ਤਿ ਪਦੇ ਪੁਬ੍ਬਕਾਲਕਿਰਿਯਾ, ਦਸ੍ਸਨਂ ਹੁਤ੍ਵਾਤਿ ਅਤ੍ਥੋ. ਤਤਿਯਂ.

੪. ਪਦਸੋਧਮ੍ਮਸਿਕ੍ਖਾਪਦਂ

੪੪. ਚਤੁਤ੍ਥੇ ਪਟਿਮੁਖਂ ਆਦਰੇਨ ਸੁਣਨ੍ਤੀਤਿ ਪਤਿਸ੍ਸਾ, ਨ ਪਤਿਸ੍ਸਾ ਅਪ੍ਪਤਿਸ੍ਸਾਤਿ ਦਸ੍ਸੇਨ੍ਤੋ ਆਹ ‘‘ਅਪ੍ਪਤਿਸ੍ਸਵਾ’’ਤਿ.

੪੫. ‘‘ਪਦਸੋ’’ਤਿ ¶ ਏਤ੍ਥ ਸੋ-ਪਚ੍ਚਯੋ ਵਿਚ੍ਛਤ੍ਥਵਾਚਕੋਤਿ ਆਹ ‘‘ਪਦਂ ਪਦ’’ਨ੍ਤਿ. ਤਤ੍ਥਾਤਿ ਤੇਸੁ ਚਤੁਬ੍ਬਿਧੇਸੁ. ਪਦਂ ਨਾਮ ਇਧ ਅਤ੍ਥਜੋਤਕਂ ਵਾ ਵਿਭਤ੍ਯਨ੍ਤਂ ਵਾ ਨ ਹੋਤਿ, ਅਥ ਖੋ ਲੋਕਿਯੇਹਿ ਲਕ੍ਖਿਤੋ ਗਾਥਾਯ ਚਤੁਤ੍ਥਂਸੋ ਪਾਦੋਵ ਅਧਿਪ੍ਪੇਤੋਤਿ ਆਹ ‘‘ਪਦਨ੍ਤਿ ਏਕੋ ਗਾਥਾਪਾਦੋ’’ਤਿ. ਅਨੁ ਪਚ੍ਛਾ ਵੁਤ੍ਤਪਦਤ੍ਤਾ ਦੁਤਿਯਪਾਦੋ ਅਨੁਪਦਂ ਨਾਮ. ਅਨੁ ਸਦਿਸਂ ਬ੍ਯਞ੍ਜਨਂ ਅਨੁਬ੍ਯਞ੍ਜਨਨ੍ਤਿ ਅਤ੍ਥਂ ਦਸ੍ਸੇਤਿ ‘‘ਅਨੁਬ੍ਯਞ੍ਜਨ’’ਨ੍ਤਿਆਦਿਨਾ. ਬ੍ਯਞ੍ਜਨਸਦ੍ਦੋ ਪਦ-ਪਰਿਯਾਯੋ. ਯਂਕਿਞ੍ਚਿ ਪਦਂ ਅਨੁਬ੍ਯਞ੍ਜਨਂ ਨਾਮ ਨ ਹੋਤਿ, ਪੁਰਿਮਪਦੇਨ ਪਨ ਸਦਿਸਂ ਪਚ੍ਛਿਮਪਦਮੇਵ ਅਨੁਬ੍ਯਞ੍ਜਨਂ ਨਾਮ.

ਵਾਚੇਨ੍ਤੋ ਹੁਤ੍ਵਾ ਨਿਟ੍ਠਾਪੇਤੀਤਿ ਯੋਜਨਾ. ‘‘ਏਕਮੇਕਂ ਪਦ’’ਨ੍ਤਿ ਪਦਂ ‘‘ਨਿਟ੍ਠਾਪੇਤੀ’’ਤਿ ਪਦੇ ਕਾਰਿਤਕਮ੍ਮਂ. ‘‘ਥੇਰੇਨਾ’’ਤਿ ਪਦਂ ‘‘ਵੁਤ੍ਤੇ’’ਤਿ ਪਦੇ ਕਤ੍ਤਾ, ‘‘ਏਕਤੋ’’ਤਿ ਪਦੇ ਸਹਤ੍ਥੋ. ਸਾਮਣੇਰੋ ਅਪਾਪੁਣਿਤ੍ਵਾ ਭਣਤੀਤਿ ਸਮ੍ਬਨ੍ਧੋ. ਮਤ੍ਤਮੇਵਾਤਿ ਏਤ੍ਥ ਏਵਸਦ੍ਦੋ ਮਤ੍ਤਸਦ੍ਦਸ੍ਸ ਅਵਧਾਰਣਤ੍ਥਂ ਦਸ੍ਸੇਤਿ, ਤੇਨ ਪਕਾਰਂ ਪਟਿਕ੍ਖਿਪਤਿ. ‘‘ਅਨਿਚ੍ਚ’’ਨ੍ਤਿ ਚ ‘‘ਅਨਿਚ੍ਚਾ’’ਤਿ ਚ ਦ੍ਵਿਨ੍ਨਂ ਪਦਾਨਂ ਸਤਿਪਿ ਲਿਙ੍ਗਵਿਸੇਸਤ੍ਤੇ ਅਨੁਬ੍ਯਞ੍ਜਨਤ੍ਤਾ ਆਪਤ੍ਤਿਮੋਕ੍ਖੋ ਨਤ੍ਥੀਤਿ ਆਹ ‘‘ਅਨੁਬ੍ਯਞ੍ਜਨਗਣਨਾਯ ਪਾਚਿਤ੍ਤਿਯਾ’’ਤਿ.

ਬ੍ਰਹ੍ਮਜਾਲਾਦੀਨੀਤਿ ¶ ਏਤ੍ਥ ਆਦਿਸਦ੍ਦੇਨ ਸਾਮਞ੍ਞਫਲਸੁਤ੍ਤਾਦੀਨਿ ਦੀਘਸੁਤ੍ਤਾਨਿ (ਦੀ. ਨਿ. ੧.੧੫੦ ਆਦਯੋ) ਸਙ੍ਗਹਿਤਾਨਿ. ਚਸਦ੍ਦੇਨ ਓਘਤਰਣਸੁਤ੍ਤਾਦੀਨਿ ਸਂਯੁਤ੍ਤਸੁਤ੍ਤਾਨਿ (ਸਂ. ਨਿ. ੧.੧) ਚ ਚਿਤ੍ਤਪਰਿਯਾਦਾਨਸੁਤ੍ਤਾਦੀਨਿ ਅਙ੍ਗੁਤ੍ਤਰਸੁਤ੍ਤਾਨਿ (ਅ. ਨਿ. ੧.੨ ਆਦਯੋ) ਚ ਸਙ੍ਗਹਿਤਾਨਿ. ਸੋਤਿ ਦੇਵਤਾਭਾਸਿਤੋ ਵੇਦਿਤਬ੍ਬੋਤਿ ਯੋਜਨਾ.

ਕਿਞ੍ਚਾਪਿ ਵਦਤੀਤਿ ਸਮ੍ਬਨ੍ਧੋ. ਏਤ੍ਥ ਚ ਕਿਞ੍ਚਾਪਿਸਦ੍ਦੋ ਗਰਹਤ੍ਥਵਾਚਕੋ, ਪਨਸਦ੍ਦੋ ਅਨੁਗ੍ਗਹਤ੍ਥਵਾਚਕੋ. ਮੇਣ੍ਡਕਮਿਲਿਨ੍ਦਪਞ੍ਹੇਸੂਤਿ ਮੇਣ੍ਡਕਪਞ੍ਹੇ ਚ ਮਿਲਿਨ੍ਦਪਞ੍ਹੇ ਚ. ਯਨ੍ਤਿ ਸੁਤ੍ਤਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਆਰਮ੍ਮਣਕਥਾ ਬੁਦ੍ਧਿਕਕਥਾ ਦਣ੍ਡਕਕਥਾ ਞਾਣਵਤ੍ਥੁਕਥਾਤਿ ਯੋਜੇਤਬ੍ਬਂ ਪੇਯ੍ਯਾਲਵਸੇਨ ਵੁਤ੍ਤਤ੍ਤਾ. ਇਮਾਯੋ ਪਕਰਣਾਨਿ ਨਾਮਾਤਿ ਵਦਨ੍ਤਿ. ਮਹਾਪਚ੍ਚਰਿਯਾਦੀਸੁ ਵਤ੍ਵਾ ਪਰਿਗ੍ਗਹਿਤੋਤਿ ਯੋਜਨਾ. ਯਨ੍ਤਿ ਸੁਤ੍ਤਂ.

੪੮. ਤਤ੍ਰਾਤਿ ‘‘ਏਕਤੋ ਉਦ੍ਦਿਸਾਪੇਨ੍ਤੋ’’ਤਿ ਵਚਨੇ. ਉਦ੍ਦਿਸਾਪੇਨ੍ਤੀਤਿ ਆਚਰਿਯਂ ਦੇਸਾਪੇਨ੍ਤਿ ਬਹੁਕਤ੍ਤਾਰਮਪੇਕ੍ਖਿਯ ਬਹੁਵਚਨਵਸੇਨ ਵੁਤ੍ਤਂ. ਤੇਹੀਤਿ ਉਪਸਮ੍ਪਨ੍ਨਾਨੁਪਸਮ੍ਪਨ੍ਨੇਹਿ. ਦ੍ਵੇਪੀਤਿ ਉਪਸਮ੍ਪਨ੍ਨੋ ਚ ਅਨੁਪਸਮ੍ਪਨ੍ਨੋ ਚ.

ਉਪਚਾਰਨ੍ਤਿ ¶ ਦ੍ਵਾਦਸਹਤ੍ਥੂਪਚਾਰਂ. ਯੇਸਨ੍ਤਿ ਭਿਕ੍ਖੂਨਂ. ਪਲਾਯਨਕਗਨ੍ਥਨ੍ਤਿ ਪਰਿਵਜ੍ਜੇਤ੍ਵਾ ਗਚ੍ਛਨ੍ਤਂ ਪਕਰਣਂ. ਸਾਮਣੇਰੋ ਗਣ੍ਹਾਤੀਤਿ ਯੋਜਨਾ.

ਓਪਾਤੇਤੀਤਿ ਅਵਪਾਤੇਤਿ, ਗਲ਼ਿਤਾਪੇਤੀਤਿ ਅਤ੍ਥੋ. ਸੁਤ੍ਤੇਪੀਤਿ ਵੇਯ੍ਯਾਕਰਣਸੁਤ੍ਤੇਪਿ. ਤਨ੍ਤਿ ਯੇਭੁਯ੍ਯੇਨ ਪਗੁਣਗਨ੍ਥਂ. ਪਰਿਸਙ੍ਕਮਾਨਨ੍ਤਿ ਸਾਰਜ੍ਜਮਾਨਂ. ਯਂ ਪਨ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਕਿਰਿਯਸਮੁਟ੍ਠਾਨਤ੍ਤਾਤਿ ਇਮਸ੍ਸ ਸਿਕ੍ਖਾਪਦਸ੍ਸ ਕਿਰਿਯਸਮੁਟ੍ਠਾਨਤ੍ਤਾਤਿ. ਚਤੁਤ੍ਥਂ.

੫. ਸਹਸੇਯ੍ਯਸਿਕ੍ਖਾਪਦਂ

੪੯. ਪਞ੍ਚਮੇ ਮੁਟ੍ਠਾ ਸਤਿ ਏਤੇਸਨ੍ਤਿ ਮੁਟ੍ਠਸ੍ਸਤੀ. ਨਤ੍ਥਿ ਸਮ੍ਪਜਾਨਂ ਏਤੇਸਨ੍ਤਿ ਅਸਮ੍ਪਜਾਨਾ. ਭਵਙ੍ਗੋਤਿਣ੍ਣਕਾਲੇਤਿ ਨਿਦ੍ਦੋਕ੍ਕਮਨਕਾਲੇ.

੫੦. ‘‘ਪਕਤਿਯਾ’’ਤਿ ਪਦਂ ‘‘ਦੇਨ੍ਤੀ’’ਤਿ ਪਦੇ ਵਿਸੇਸਨਂ. ਤੇ ਭਿਕ੍ਖੂ ਦੇਨ੍ਤੀਤਿ ਸਮ੍ਬਨ੍ਧੋ. ‘‘ਗਾਰਵੇਨਾ’’ਤਿ ਪਦਞ੍ਚ ‘‘ਸਿਕ੍ਖਾਕਾਮਤਾਯਾ’’ਤਿ ਪਦਞ੍ਚ ‘‘ਦੇਨ੍ਤੀ’’ਤਿ ਪਦੇ ਹੇਤੁ. ਸੀਸਸ੍ਸ ਉਪਧਾਨਂ ਉਸ੍ਸੀਸਂ, ਤਸ੍ਸ ਕਰੀਯਤੇ ਉਸ੍ਸੀਸਕਰਣਂ ¶ , ਤਂਯੇਵ ਅਤ੍ਥੋ ਪਯੋਜਨਂ ਉਸ੍ਸੀਸਕਰਣਤ੍ਥੋ, ਤਦਤ੍ਥਾਯ. ਤਤ੍ਰਾਤਿ ਪੁਰਿਮਵਚਨਾਪੇਕ੍ਖਂ, ‘‘ਸਿਕ੍ਖਾਕਾਮਤਾਯਾ’’ਤਿ ਵਚਨੇਤਿ ਅਤ੍ਥੋ. ਨਿਦਸ੍ਸਨਨ੍ਤਿ ਸੇਸੋ. ਅਥ ਵਾ ਸਿਕ੍ਖਾਕਾਮਤਾਯਾਤਿ ਪਚ੍ਚਤ੍ਤੇ ਭੁਮ੍ਮਵਚਨਂ. ‘‘ਇਦਮ੍ਪਿਸ੍ਸ ਹੋਤਿ ਸੀਲਸ੍ਮਿ’’ਨ੍ਤਿਆਦੀਸੁ (ਦੀ. ਨਿ. ੧.੧੯੫ ਆਦਯੋ) ਵਿਯ. ਇਦਮ੍ਪਿ ਸਿਕ੍ਖਾਕਾਮਤਾਯ ਅਯਂ ਸਿਕ੍ਖਾਕਾਮਤਾ ਸਿਕ੍ਖਾਕਾਮਭਾਵੋ ਹੋਤੀਤਿ ਯੋਜਨਾ. ਏਸ ਨਯੋ ‘‘ਤਤ੍ਰਿਦਂ ਸਮਨ੍ਤਪਾਸਾਦਿਕਾਯ ਸਮਨ੍ਤਪਾਸਾਦਿਕਤ੍ਤਸ੍ਮਿ’’ਨ੍ਤਿਆਦੀਸੁਪਿ. ਭਿਕ੍ਖੂ ਖਿਪਨ੍ਤੀਤਿ ਯੋਜਨਾ. ਤਨ੍ਤਿ ਆਯਸ੍ਮਨ੍ਤਂ ਰਾਹੁਲਂ. ਅਥਾਤਿ ਖਿਪਨਤੋ ਪਚ੍ਛਾ. ਇਦਨ੍ਤਿ ਵਤ੍ਥੁ. ਸਮ੍ਮੁਞ੍ਚਨਿਕਚਵਰਛਡ੍ਡਨਕਾਨਿ ਸਨ੍ਧਾਯ ਵੁਤ੍ਤਂ. ਤੇਨਾਯਸ੍ਮਤਾ ਰਾਹੁਲੇਨ ਪਾਤਿਤਂ ਨੁ ਖੋਤਿ ਯੋਜਨਾ. ਸੋ ਪਨਾਯਸ੍ਮਾ ਗਚ੍ਛਤੀਤਿ ਸਮ੍ਬਨ੍ਧੋ. ਅਪਰਿਭੋਗਾ ਅਞ੍ਞੇਸਨ੍ਤਿ ਅਞ੍ਞੇਹਿ ਨ ਪਰਿਭੁਞ੍ਜਿਤਬ੍ਬਾ.

੫੧. ਹੀਤਿ ਸਚ੍ਚਂ, ਯਸ੍ਮਾ ਵਾ. ਸਯਨਂ ਸੇਯ੍ਯਾ, ਕਾਯਪਸਾਰਣਕਿਰਿਯਾ, ਸਯਨ੍ਤਿ ਏਤ੍ਥਾਤਿ ਸੇਯ੍ਯਾ, ਮਞ੍ਚਪੀਠਾਦਿ. ਤਦੁਭਯਮ੍ਪਿ ਏਕਸੇਸੇਨ ਵਾ ਸਾਮਞ੍ਞਨਿਦ੍ਦੇਸੇਨ ਵਾ ਏਕਤੋ ਕਤ੍ਵਾ ‘‘ਸਹਸੇਯ੍ਯ’’ਨ੍ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਸੇਯ੍ਯਾ’’ਤਿਆਦਿ. ਤਤ੍ਥਾਤਿ ਦ੍ਵੀਸੁ ਸੇਯ੍ਯਾਸੁ. ਤਸ੍ਮਾਤਿ ਯਸ੍ਮਾ ਦ੍ਵੇ ਸੇਯ੍ਯਾ ਦਸ੍ਸਿਤਾ, ਤਸ੍ਮਾ. ‘‘ਸਬ੍ਬਚ੍ਛਨ੍ਨਾ’’ਤਿਆਦਿਨਾ ਲਕ੍ਖਣਂ ਵੁਤ੍ਤਨ੍ਤਿ ਯੋਜਨਾ. ਪਾਕਟਵੋਹਾਰਨ੍ਤਿ ਲੋਕੇ ਵਿਦਿਤਂ ਵਚਨਂ. ਦੁਸ੍ਸਕੁਟਿਯਨ੍ਤਿ ਦੁਸ੍ਸੇਨ ਛਾਦਿਤਕੁਟਿਯਂ. ਅਟ੍ਠਕਥਾਸੁ ਯਥਾਵੁਤ੍ਤੇ ਪਞ੍ਚਵਿਧਚ੍ਛਦਨੇਯੇਵ ਗਯ੍ਹਮਾਨੇ ਕੋ ਦੋਸੋਤਿ ਆਹ ‘‘ਪਞ੍ਚਵਿਧਚ੍ਛਦਨੇਯੇਵਾ’’ਤਿਆਦਿ. ਯਂ ਪਨ ¶ ਸੇਨਾਸਨਂ ਪਰਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ. ਪਾਕਾਰੇਨ ਵਾਤਿ ਇਟ੍ਠਕਸਿਲਾਦਾਰੁਨਾ ਵਾ. ਅਞ੍ਞੇਨ ਵਾਤਿ ਕਿਲਞ੍ਜਾਦਿਨਾ ਵਾ. ਵਤ੍ਥੇਨਪੀਤਿ ਪਿਸਦ੍ਦੋ ਪਗੇਵ ਇਟ੍ਠਕਾਦਿਨਾਤਿ ਦਸ੍ਸੇਤਿ. ਯਸ੍ਸਾਤਿ ਸੇਨਾਸਨਸਙ੍ਖਾਤਾਯ ਸੇਯ੍ਯਾਯ. ਉਪਰੀਤਿ ਵਾ ਸਮਨ੍ਤਤੋਤਿ ਵਾ ਯੋਜਨਾ. ਏਕੇਨ ਦ੍ਵਾਰੇਨ ਪਵਿਸਿਤ੍ਵਾ ਸਬ੍ਬਪਾਸਾਦਸ੍ਸ ਵਲ਼ਞ੍ਜਿਤਬ੍ਬਤਂ ਸਨ੍ਧਾਯ ਵੁਤ੍ਤਂ ‘‘ਏਕੂਪਚਾਰੋ’’ਤਿ. ਸਤਗਬ੍ਭਂ ਵਾ ਚਤੁਸ੍ਸਾਲਂ ਏਕੂਪਚਾਰਂ ਹੋਤੀਤਿ ਸਮ੍ਬਨ੍ਧੋ. ਤਨ੍ਤਿ ਸੇਨਾਸਨਸਙ੍ਖਾਤਂ ਸੇਯ੍ਯਂ.

ਤਤ੍ਥਾਤਿ ਸੇਨਾਸਨਸਙ੍ਖਾਤਾਯਂ ਸੇਯ੍ਯਾਯਂ. ਸਮ੍ਬਹੁਲਾ ਸਾਮਣੇਰਾ ਸਚੇ ਹੋਨ੍ਤਿ, ਏਕੋ ਭਿਕ੍ਖੁ ਸਚੇ ਹੋਤੀਤਿ ਯੋਜਨਾ. ‘‘ਸਾਮਣੇਰਾ’’ਤਿ ¶ ਇਦਂ ਪਚ੍ਚਾਸਨ੍ਨਵਸੇਨ ਵੁਤ੍ਤਂ, ਉਪਲਕ੍ਖਣਵਸੇਨ ਵਾ ਅਞ੍ਞੇਹਿਪਿ ਸਹਸੇਯ੍ਯਾਨਂ ਆਪਤ੍ਤਿਸਮ੍ਭਵਤੋ. ਤੇਤਿ ਸਾਮਣੇਰਾ. ਸਬ੍ਬੇਸਨ੍ਤਿ ਭਿਕ੍ਖੂਨਂ. ਤਸ੍ਸਾਤਿ ਸਾਮਣੇਰਸ੍ਸ. ਏਸੇਵ ਨਯੋਤਿ ਏਸੋ ਏਵ ਨਯੋ, ਨ ਅਞ੍ਞੋ ਨਯੋਤਿ ਅਤ੍ਥੋ. ਅਥ ਵਾ ਏਸੇਵ ਨਯੋਤਿ ਏਸੋ ਇਵ ਨਯੋ, ਏਸੋ ਏਤਾਦਿਸੋ ਨਯੋ ਇਵ ਅਯਂ ਨਯੋ ਦਟ੍ਠਬ੍ਬੋਤਿ ਅਤ੍ਥੋ.

ਅਪਿ ਚਾਤਿ ਏਕਂਸੇਨ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਚਤੁਕ੍ਕਨ੍ਤਿ ਏਕਾਵਾਸਏਕਾਨੁਪਸਮ੍ਪਨ੍ਨਂ, ਏਕਾਵਾਸਨਾਨੁਪਸਮ੍ਪਨ੍ਨਂ, ਨਾਨਾਵਾਸਏਕਾਨੁਪਸਮ੍ਪਨ੍ਨਂ, ਨਾਨਾਵਾਸਨਾਨੁਪਸਮ੍ਪਨ੍ਨਨ੍ਤਿ ਚਤੁਸਮੂਹਂ, ਚਤੁਪਰਿਮਾਣਂ ਵਾ. ਯੋਤਿ ਭਿਕ੍ਖੁ. ਹਿਸਦ੍ਦੋ ਵਿਤ੍ਥਾਰਜੋਤਕੋ, ਤਂ ਵਚਨਂ ਵਿਤ੍ਥਾਰਯਿਸ੍ਸਾਮੀਤਿ ਅਤ੍ਥੋ, ਵਿਤ੍ਥਾਰੋ ਮਯਾ ਵੁਚ੍ਚਤੇਤਿ ਵਾ. ਦੇਵਸਿਕਨ੍ਤਿ ਦਿਵਸੇ ਦਿਵਸੇ. ਣਿਕਪਚ੍ਚਯੋ ਹਿ ਵਿਚ੍ਛਤ੍ਥਵਾਚਕੋ. ਯੋਪਿ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਾਪਿ ਆਪਤ੍ਤੀਤਿ ਯੋਜੇਤਬ੍ਬੋ. ਤਤ੍ਰਾਤਿ ‘‘ਤਿਰਚ੍ਛਾਨਗਤੇਨਾਪੀ’’ਤਿ ਵਚਨੇ.

‘‘ਅਪਦਾਨਂ ਅਹਿਮਚ੍ਛਾ, ਦ੍ਵਿਪਦਾਨਞ੍ਚ ਕੁਕ੍ਕੁਟੀ;

ਚਤੁਪ੍ਪਦਾਨਂ ਮਜ੍ਜਾਰੀ, ਵਤ੍ਥੁ ਪਾਰਾਜਿਕਸ੍ਸਿਮਾ’’ਤਿ. (ਪਾਰਾ. ਅਟ੍ਠ. ੧.੫੫);

ਇਮਂ ਗਾਥਂ ਸਨ੍ਧਾਯ ਵੁਤ੍ਤਂ ‘‘ਵੁਤ੍ਤਨਯੇਨੇਵਾ’’ਤਿ. ਤਸ੍ਮਾਤਿ ਯਸ੍ਮਾ ਵੇਦਿਤਬ੍ਬੋ, ਤਸ੍ਮਾ. ਗੋਧਾਤਿ ਕੁਣ੍ਡੋ. ਬਿਲ਼ਾਲੋਤਿ ਆਖੁਭੁਜੋ. ਮਙ੍ਗੁਸੋਤਿ ਨਕੁਲੋ.

ਅਸਮ੍ਬਦ੍ਧਭਿਤ੍ਤਿਕਸ੍ਸ ਕਤਪਾਸਾਦਸ੍ਸਾਤਿ ਯੋਜਨਾ. ਤੁਲਾਤਿ ਏਤ੍ਥ ਤੁਲਾ ਨਾਮ ਥਮ੍ਭਾਨ, ਮੁਪਰਿ ਦਕ੍ਖਿਣੁਤ੍ਤਰਵਿਤ੍ਥਾਰਵਸੇਨ ਠਪਿਤੋ ਦਾਰੁਵਿਸੇਸੋ ਥਲਤਿ ਥਮ੍ਭੇਸੁ ਪਤਿਟ੍ਠਾਤੀਤਿ ਕਤ੍ਵਾ. ਤਾ ਪਨ ਹੇਟ੍ਠਿਮਪਰਿਚ੍ਛੇਦਤੋ ਤਿਸ੍ਸੋ, ਉਕ੍ਕਟ੍ਠਪਰਿਚ੍ਛੇਦੇਨ ਪਨ ਪਞ੍ਚਸਤ੍ਤਨਵਾਦਯੋ. ਨਾਨੂਪਚਾਰੇ ਪਾਸਾਦੇਤਿ ਸਮ੍ਬਨ੍ਧੋ.

ਵਾਲ਼ਸਙ੍ਘਾਟਾਦੀਸੂਤਿ ¶ ਵਾਲ਼ਰੂਪਂ ਦਸ੍ਸੇਤ੍ਵਾ ਕਤੇਸੁ ਸਙ੍ਘਾਟਾਦੀਸੁ. ਆਦਿਸਦ੍ਦੇਨ ਤੁਲਂ ਸਙ੍ਗਣ੍ਹਾਤਿ. ਏਤ੍ਥ ਚ ਸਙ੍ਘਾਟੋ ਨਾਮ ਤੁਲਾਨ, ਮੁਪਰਿ ਪੁਬ੍ਬਪਚ੍ਛਿਮਾਯਾਮਵਸੇਨ ਠਪਿਤੋ ਕਟ੍ਠਵਿਸੇਸੋ ਸਮ੍ਮਾ ਘਟੇਨ੍ਤਿ ਏਤ੍ਥ ਗੋਪਾਨਸ੍ਯਾਦਯੋਤਿ ¶ ਕਤ੍ਵਾ. ਤੇ ਪਨ ਤਯੋ ਹੋਨ੍ਤਿ. ਨਿਬ੍ਬਕੋਸਬ੍ਭਨ੍ਤਰੇਤਿ ਛਦਨਕੋਟਿਅਬ੍ਭਨ੍ਤਰੇ. ਪਰਿਮਣ੍ਡਲਂ ਵਾ ਚਤੁਰਸ੍ਸਂ ਵਾ ਸੇਨਾਸਨਂ ਹੋਤੀਤਿ ਸਮ੍ਬਨ੍ਧੋ. ਤਤ੍ਰਾਤਿ ਤਸ੍ਮਿਂ ਸੇਨਾਸਨੇ. ਅਪਰਿਚ੍ਛਿਨ੍ਨੋ ਗਬ੍ਭਸ੍ਸ ਉਪਚਾਰੋ ਏਤੇਸਨ੍ਤਿ ਅਪਰਿਚ੍ਛਿਨ੍ਨਗਬ੍ਭੂਪਚਾਰਾ ਸਬ੍ਬਗਬ੍ਭਾ, ਤੇ ਪਵਿਸਨ੍ਤੀਤਿ ਅਤ੍ਥੋ. ਨਿਪਨ੍ਨਾਨਂ ਭਿਕ੍ਖੂਨਨ੍ਤਿ ਯੋਜਨਾ. ਤਤ੍ਰਾਤਿ ਤਸ੍ਮਿਂ ਪਮੁਖੇ. ਪਮੁਖਸ੍ਸ ਸਬ੍ਬਚ੍ਛਨ੍ਨਤ੍ਤਾ, ਸਬ੍ਬਪਰਿਚ੍ਛਨ੍ਨਤ੍ਤਾ ਚ ਆਪਤ੍ਤਿਂ ਕਰੋਤੀਤਿ ਯੋਜਨਾ. ਨਨੁ ਪਮੁਖੇ ਛਨ੍ਨਮੇਵ ਅਤ੍ਥਿ, ਨੋ ਪਰਿਚ੍ਛਨ੍ਨਨ੍ਤਿ ਆਹ ‘‘ਗਬ੍ਭਪਰਿਕ੍ਖੇਪੋ’’ਤਿਆਦਿ. ਹੀਤਿ ਸਚ੍ਚਂ.

ਯਂ ਪਨ ਅਨ੍ਧਕਟ੍ਠਕਥਾਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਜਗਤੀਤਿ ਪਥਵਿਯਾ ਚ ਮਨ੍ਦਿਰਾਲਿਨ੍ਦਵਤ੍ਥੁਸ੍ਸ ਚ ਨਾਮਮੇਤਂ. ਇਧ ਪਨ ਮਨ੍ਦਿਰਾਲਿਨ੍ਦਵਤ੍ਥੁਸਙ੍ਖਾਤਾ ਭੂਭੇਦਾ ਗਹਿਤਾ. ਤਤ੍ਥਾਤਿ ਅਨ੍ਧਕਟ੍ਠਕਥਾਯਂ. ਕਸ੍ਮਾ ਪਾਲ਼ਿਯਾ ਨ ਸਮੇਤੀਤਿ ਆਹ ‘‘ਦਸਹਤ੍ਥੁਬ੍ਬੇਧਾਪੀ’’ਤਿਆਦਿ. ਹੀਤਿ ਯਸ੍ਮਾ. ਤਤ੍ਥਾਤਿ ਅਨ੍ਧਕਟ੍ਠਕਥਾਯਂ. ਯੇਪਿ ਮਹਾਪਾਸਾਦਾ ਹੋਨ੍ਤੀਤਿ ਯੋਜਨਾ. ਤੇਸੁਪੀਤਿ ਮਹਾਪਾਸਾਦੇਸੁਪਿ.

ਸੁਧਾਛਦਨਮਣ੍ਡਪਸ੍ਸਾਤਿ ਏਤ੍ਥ ‘‘ਸੁਧਾ’’ਤਿ ਇਦਂ ਉਪਲਕ੍ਖਣਵਸੇਨ ਵੁਤ੍ਤਂ ਯੇਨ ਕੇਨਚਿ ਛਦਨਮਣ੍ਡਪਸ੍ਸਾਪਿ ਅਧਿਪ੍ਪੇਤਤ੍ਤਾ. ਮਣ੍ਡਂ ਵੁਚ੍ਚਤਿ ਸੂਰਿਯਰਸ੍ਮਿ, ਤਂ ਪਾਤਿ ਰਕ੍ਖਤਿ, ਤਤੋ ਵਾ ਜਨਨ੍ਤਿ ਮਣ੍ਡਪਂ. ਨਨੁ ਏਕੂਪਚਾਰਂ ਹੋਤਿ ਪਾਕਾਰਸ੍ਸ ਛਿਦ੍ਦਤ੍ਤਾਤਿ ਆਹ ‘‘ਨ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਵਲ਼ਞ੍ਜਨਤ੍ਥਾਯ ਏਵਾਤਿ ਏਵਕਾਰੋ ਯੋਜੇਤਬ੍ਬੋ. ਤੇਨਾਹ ‘‘ਨ ਵਲ਼ਞ੍ਜਨੂਪਚ੍ਛੇਦਨਤ੍ਥਾਯਾ’’ਤਿ. ਅਥ ਵਾ ‘‘ਸਦ੍ਦਨ੍ਤਰਤ੍ਥਾਪੋਹਨੇਨ ਸਦ੍ਦੋ ਅਤ੍ਥਂ ਵਦਤੀ’’ਤਿ (ਉਦਾ. ਅਟ੍ਠ. ੧; ਦੀ. ਨਿ. ਟਿ. ੧.੧; ਮ. ਨਿ. ਟੀ. ੧.ਮੂਲਪਰਿਯਾਯਸੁਤ੍ਤਵਣ੍ਣਨਾ; ਸਂ. ਨਿ. ਟੀ. ੧.੧.ਓਘਤਰਣਸੁਤ੍ਤਵਣ੍ਣਨਾ; ਅ. ਨਿ. ਟੀ. ੧.੧.ਰੁਪਾਦਿਵਗ੍ਗਵਣ੍ਣਨਾ) ਵੁਤ੍ਤਤ੍ਤਾ ‘‘ਨ ਵਲ਼ਞ੍ਜਨੂਪਚ੍ਛੇਦਨਤ੍ਥਾਯਾ’’ਤਿ ਵੁਤ੍ਤਂ. ਕਵਾਟਨ੍ਤਿ ਏਤ੍ਥ ਦ੍ਵਾਰਮੇਵ ਅਧਿਪ੍ਪੇਤਂ ਪਰਿਯਾਯੇਨ ਵੁਤ੍ਤਤ੍ਤਾ, ਅਸਤਿ ਚ ਦ੍ਵਾਰੇ ਕਵਾਟਸ੍ਸਾਭਾਵਤੋ. ਸਂਵਰਣਵਿਵਰਣਕਾਲੇ ਕਵਤਿ ਸਦ੍ਦਂ ਕਰੋਤੀਤਿ ਕਵਾਟਂ.

ਤਤ੍ਰਾਤਿ ‘‘ਏਕੂਪਚਾਰਤ੍ਤਾ’’ਤਿ ਵਚਨੇ. ਯਸ੍ਸਾਤਿ ਪਰਵਾਦਿਨੋ. ਅਨੁਯੋਗੋ ਸਿਯਾਤਿ ਯੋਜਨਾ. ਇਧਾਤਿ ਇਮਸ੍ਮਿਂ ਸਹਸੇਯ੍ਯਸਿਕ੍ਖਾਪਦੇ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਪਿਹਿਤਦ੍ਵਾਰੇ ਗਬ੍ਭੇ. ਸੋਤਿ ਪਰਵਾਦੀ. ਸਬ੍ਬਚ੍ਛਨ੍ਨਤ੍ਤਾ ਆਪਤ੍ਤਿ ਇਤਿ ਵੁਤ੍ਤੇਤਿ ਯੋਜਨਾ. ਏਸੇਵ ਨਯੋ ¶ ‘‘ਸਬ੍ਬਪਰਿਚ੍ਛਨ੍ਨਤਾ ਨ ਹੋਤੀ’’ਤਿ ਏਤ੍ਥਾਪਿ. ਪਚ੍ਚਾਗਮਿਸ੍ਸਤੀਤਿ ਪਤਿ ਆਗਮਿਸ੍ਸਤਿ, ਪੁਨ ਆਗਮਿਸ੍ਸਤੀਤਿ ਅਤ੍ਥੋ.

ਬ੍ਯਞ੍ਜਨਮਤ੍ਤੇਨੇਵਾਤਿ ‘‘ਸਬ੍ਬਚ੍ਛਨ੍ਨਾ’’ਤਿਆਦਿਅਕ੍ਖਰਪਦਮਤ੍ਤੇਨੇਵ, ਨ ਅਤ੍ਥਵਸੇਨ. ‘‘ਏਵਞ੍ਚ ਸਤੀ’’ਤਿ ¶ ਇਮਿਨਾ ਅਬ੍ਯਾਪਿਤਦੋਸਂ ਦਸ੍ਸੇਤਿ. ਤਤੋਤਿ ਅਨਾਪਤ੍ਤਿਤੋ, ਪਰਿਹਾਯੇਯ੍ਯਾਤਿ ਸਮ੍ਬਨ੍ਧੋ. ਤਸ੍ਮਾਤਿ ਯਸ੍ਮਾ ਅਨਿਯਤੇਸੁ ਵੁਤ੍ਤਂ, ਤਸ੍ਮਾ. ਤਤ੍ਥਾਤਿ ਅਨਿਯਤੇਸੁ. ਇਧਾਪੀਤਿ ਇਮਸ੍ਮਿਂ ਸਿਕ੍ਖਾਪਦੇਪਿ. ਯਂ ਯਨ੍ਤਿ ਸੇਨਾਸਨਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਸੇਨਾਸਨੇਸੁ, ਸਹਸੇਯ੍ਯਾਪਤ੍ਤਿ ਹੋਤੀਤਿ ਸਮ੍ਬਨ੍ਧੋ.

੫੩. ਦ੍ਵੀਸੁ ਅਟ੍ਠਕਥਾਵਾਦੇਸੁ ਮਹਾਅਟ੍ਠਕਥਾਵਾਦੋਵ ਯੁਤ੍ਤੋਤਿ ਸੋ ਪਚ੍ਛਾ ਵੁਤ੍ਤੋ.

ਇਮਿਨਾਪੀਤਿ ਸੇਨਮ੍ਬਮਣ੍ਡਪੇਨਾਪਿ. ਏਤਨ੍ਤਿ ਜਗਤਿਯਾ ਅਪਰਿਕ੍ਖਿਤ੍ਤਤਂ. ਯਥਾਤਿ ਯਂਸਦ੍ਦਤ੍ਥੋ ਤਤਿਯਨ੍ਤਨਿਪਾਤੋ, ਯੇਨ ਸੇਨਮ੍ਬਮਣ੍ਡਪੇਨਾਤਿ ਅਤ੍ਥੋਤਿ. ਪਞ੍ਚਮਂ.

੬. ਦੁਤਿਯਸਹਸੇਯ੍ਯਸਿਕ੍ਖਾਪਦਂ

੫੫. ਛਟ੍ਠੇ ਆਗਨ੍ਤੁਕਾ ਵਸਨ੍ਤਿ ਏਤ੍ਥਾਤਿ ਆਵਸਥੋ, ਆਵਸਥੋ ਚ ਸੋ ਅਗਾਰਞ੍ਚੇਤਿ ਆਵਸਥਾਗਾਰਨ੍ਤਿ ਦਸ੍ਸੇਨ੍ਤੋ ਆਹ ‘‘ਆਗਨ੍ਤੁਕਾਨਂ ਵਸਨਾਗਾਰ’’ਨ੍ਤਿ. ਮਨੁਸ੍ਸਾਨਂ ਸਨ੍ਤਿਕਾ ਵਚਨਂ ਸੁਤ੍ਵਾਤਿ ਵਚਨਸੇਸੋ ਯੋਜੇਤਬ੍ਬੋ. ਸਾਟਕਨ੍ਤਿ ਉਤ੍ਤਰਸਾਟਕਂ, ਨਿਵਤ੍ਥਵਤ੍ਥਨ੍ਤਿਪਿ ਵਦਨ੍ਤਿ. ਅਚ੍ਚਾਗਮ੍ਮਾਤਿ ਤ੍ਵਾਪਚ੍ਚਯਨ੍ਤਪਦਸ੍ਸ ਸਮ੍ਬਨ੍ਧਂ ਦਸ੍ਸੇਤੁਮਾਹ ‘‘ਪਵਤ੍ਤੋ’’ਤਿ. ਯਥਾ ਓਮਸਵਾਦਸਿਕ੍ਖਾਪਦੇ ਅਕ੍ਕੋਸੇਤੁਕਾਮਤਾਯ ਖਤ੍ਤਿਯਂ ‘‘ਚਣ੍ਡਾਲੋ’’ਤਿ ਵਦਤੋ ਅਲਿਕਂ ਭਣਤੋਪਿ ਮੁਸਾਵਾਦਸਿਕ੍ਖਾਪਦੇਨ ਅਨਾਪਤ੍ਤਿ, ਓਮਸਵਾਦਸਿਕ੍ਖਾਪਦੇਨੇਵ ਆਪਤ੍ਤਿ, ਏਵਮਿਧਾਪਿ ਮਾਤੁਗਾਮੇਨ ਸਹ ਸਯਤੋ ਪਠਮਸਹਸੇਯ੍ਯਸਿਕ੍ਖਾਪਦੇਨ ਅਨਾਪਤ੍ਤਿ, ਇਮਿਨਾਵ ਆਪਤ੍ਤੀਤਿ ਦਟ੍ਠਬ੍ਬਨ੍ਤਿ. ਛਟ੍ਠਂ.

੭. ਧਮ੍ਮਦੇਸਨਾਸਿਕ੍ਖਾਪਦਂ

੬੦. ਸਤ੍ਤਮੇ ¶ ਮਹਾਦ੍ਵਾਰੇਤਿ ਬਹਿ ਠਿਤੇ ਮਹਾਦ੍ਵਾਰੇ. ਆਗਮ੍ਮ, ਪਵਿਸਿਤ੍ਵਾ ਵਾ ਵਸਨਟ੍ਠਾਨਤ੍ਤਾ ਓਵਰਕੋ ਆਵਸਥੋ ਨਾਮਾਤਿ ਆਹ ‘‘ਓਵਰਕਦ੍ਵਾਰੇ’’ਤਿ. ਸੁਨਿਗ੍ਗਤੇਨਾਤਿ ਸੁਟ੍ਠੁ ਬਹਿ ਨਿਕ੍ਖਮਿਤ੍ਵਾ ਗਤੇਨ ਸਦ੍ਦੇਨ. ‘‘ਅਞ੍ਞਾਤੁ’’ਨ੍ਤਿ ਪਦਸ੍ਸ ‘‘ਨ ਞਾਤੁ’’ਨ੍ਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਆਜਾਨਿਤੁ’’ਨ੍ਤਿ. ਇਮਿਨਾ ਨਕਾਰਵਿਕਾਰੋ ਅਇਤਿ ਨਿਪਾਤੋ ਨ ਹੋਤਿ, ਆਇਤਿ ਉਪਸਗ੍ਗੋਤਿ ਪਨ ਦਸ੍ਸੇਤਿ. ‘‘ਵਿਞ੍ਞੁਨਾ ਪੁਰਿਸੇਨਾ’’ਤਿ ਏਤ੍ਤਕਮੇਵ ਅਵਤ੍ਵਾ ‘‘ਪੁਰਿਸਵਿਗ੍ਗਹੇਨਾ’’ਤਿ ਵਦਨ੍ਤੋ ਮਨੁਸ੍ਸਪੁਰਿਸਵਿਗ੍ਗਹਂ ਗਹੇਤ੍ਵਾ ਠਿਤੇਨ ਯਕ੍ਖੇਨ ਪੇਤੇਨ ਤਿਰਚ੍ਛਾਨਗਤੇਨ ਸਦ੍ਧਿਂ ਠਿਤਾਯ ਮਾਤੁਗਾਮਸ੍ਸ ਦੇਸੇਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਨ ਯਕ੍ਖੇਨਾਤਿ ਯਕ੍ਖੇਨ ਸਦ੍ਧਿਂ ਠਿਤਾਯ ਮਾਤੁਗਾਮਸ੍ਸ ਦੇਸੇਤੁਂ ਨ ਵਟ੍ਟਤੀਤਿ ਯੋਜਨਾ. ਏਸ ਨਯੋ ‘‘ਨ ਪੇਤੇਨ, ਨ ਤਿਰਚ੍ਛਾਨਗਤੇਨਾ’’ਤਿ ਏਤ੍ਥਾਪਿ.

੬੬. ਛਪ੍ਪਞ੍ਚਵਾਚਾਹੀਤਿ ¶ ਏਤ੍ਥ ‘‘ਪਞ੍ਚਾ’’ਤਿ ਵਾਚਾਸਿਲਿਟ੍ਠਵਸੇਨ ਵੁਤ੍ਤਂ ਕਸ੍ਸਚਿ ਪਯੋਜਨਸ੍ਸਾਭਾਵਾ. ਤਤ੍ਥਾਤਿ ‘‘ਛਪ੍ਪਞ੍ਚਵਾਚਾਹੀ’’ਤਿ ਪਦੇ. ਏਕੋ ਗਾਥਾਪਾਦੋ ਏਕਾ ਵਾਚਾਤਿ ਵਦਨ੍ਤੋ ਚੁਣ੍ਣਿਯੇ ਵਿਭਤ੍ਯਨ੍ਤਂ ਏਕਂ ਪਦਂ ਏਕਾ ਵਾਚਾ ਨਾਮਾਤਿ ਦਸ੍ਸੇਤਿ, ਅਤ੍ਥਜੋਤਕਪਦਂ ਵਾ ਵਾਕ੍ਯਪਦਂ ਵਾ ਨ ਗਹੇਤਬ੍ਬਂ. ‘‘ਏਕਂ ਪਦਂ ਪਾਲ਼ਿਤੋ, ਪਞ੍ਚ ਅਟ੍ਠਕਥਾਤੋ’’ਤਿ ਇਮਿਨਾ ‘‘ਦ੍ਵੇ ਪਦਾਨਿ ਪਾਲ਼ਿਤੋ, ਚਤ੍ਤਾਰਿ ਅਟ੍ਠਕਥਾਤੋ’’ਤਿਆਦਿਨਯੋਪਿ ਗਹੇਤਬ੍ਬੋ. ਛਪਦਾਨਤਿਕ੍ਕਮੋਯੇਵ ਹਿ ਪਮਾਣਂ. ਤਸ੍ਮਿਨ੍ਤਿ ਏਤ੍ਥ ਸਤਿ ਵਿਭਤ੍ਤਿਵਿਪਲ੍ਲਾਸੇ ਲਿਙ੍ਗਸ੍ਸਾਪਿ ਵਿਪਲ੍ਲਾਸੋ ਹੋਤਿ ‘‘ਤਸ੍ਮਿ’’ਨ੍ਤਿ ਪੁਲ੍ਲਿਙ੍ਗੇਨ ਵੁਤ੍ਤਤ੍ਤਾ. ਸਤਿ ਚ ਵਿਭਤ੍ਤਿਵਿਪਲ੍ਲਾਸੇ ‘‘ਤਸ੍ਸਾ’’ਤਿ ਇਤ੍ਥਿਲਿਙ੍ਗਭਾਵੇਨ ਪਵਤ੍ਤਾ. ‘‘ਮਾਤੁਗਾਮਸ੍ਸਾ’’ਤਿ ਨਿਯਤਪੁਲ੍ਲਿਙ੍ਗਾਪੇਕ੍ਖਨਸ੍ਸ ਅਸਮ੍ਭਵਤੋ ਅਤ੍ਥਵਸੇਨ ‘‘ਏਕਿਸ੍ਸਾ’’ਤਿ ਇਤ੍ਥਿਲਿਙ੍ਗਭਾਵੇਨ ਵੁਤ੍ਤਂ. ਇਮਿਨਾ ਭੇਦਲਿਙ੍ਗਨਿਸ੍ਸਿਤੋ ਵਿਸੇਸਨਵਿਸੇਸ੍ਯੋਪਿ ਅਤ੍ਥੀਤਿ ਦਸ੍ਸੇਤਿ. ਤੁਮ੍ਹਾਕਨ੍ਤਿ ਨਿਦ੍ਧਾਰਣਸਮੁਦਾਯੋ. ‘‘ਸੁਣਾਥਾ’’ਤਿ ਅਵਤ੍ਵਾ ਆਭੋਗੋਪਿ ਵਟ੍ਟਤੀਤਿ ਆਹ ‘‘ਪਠਮ’’ਨ੍ਤਿਆਦਿ. ਪਠਮਨ੍ਤਿ ਚ ਪਠਮਮੇਵ. ਤੇਨ ਵੁਤ੍ਤਂ ‘‘ਨ ਪਚ੍ਛਾ’’ਤਿ. ਪੁਟ੍ਠੋ ਹੁਤ੍ਵਾ ਭਿਕ੍ਖੁ ਕਥੇਤੀਤਿ ਯੋਜਨਾਤਿ. ਸਤ੍ਤਮਂ.

੮. ਭੂਤਾਰੋਚਨਸਿਕ੍ਖਾਪਦਂ

੬੭. ਅਟ੍ਠਮੇ ¶ ਤਤ੍ਥਾਤਿ ਚਤੁਤ੍ਥਪਾਰਾਜਿਕਸਿਕ੍ਖਾਪਦੇ. ਇਧਾਤਿ ਭੂਤਾਰੋਚਨਸਿਕ੍ਖਾਪਦੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪਯੁਤ੍ਤਵਾਚਾਤਿ ਪਚ੍ਚਯੇਹਿ ਯੁਤ੍ਤਾ ਵਾਚਾ. ਤਥਾਤਿ ਤਤੋ ਗੁਣਾਰੋਚਨਕਾਰਣਾ, ਅਰਿਯਾ ਸਾਦਿਯਿਂਸੂਤਿ ਯੋਜਨਾ.

ਯਤਸਦ੍ਦਾਨਂ ਨਿਚ੍ਚਸਮ੍ਬਨ੍ਧਤ੍ਤਾ ਵੁਤ੍ਤਂ ‘‘ਯੇ’’ਤਿਆਦਿ. ਸਬ੍ਬੇਪੀਤਿ ਪੁਥੁਜ੍ਜਨਾਰਿਯਾਪਿ. ਭੂਤਨ੍ਤਿ ਵਿਜ੍ਜਮਾਨਂ. ਕਸ੍ਮਾ ਸਬ੍ਬੇਪਿ ਪਟਿਜਾਨਿਂਸੁ, ਨਨੁ ਅਰਿਯੇਹਿ ਅਤ੍ਤਨੋ ਗੁਣਾਨਂ ਅਨਾਰੋਚਿਤਤ੍ਤਾ ਨ ਪਟਿਜਾਨਿਤਬ੍ਬਨ੍ਤਿ ਆਹ ‘‘ਅਰਿਯਾਨਮ੍ਪੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਅਰਿਯਾਨਮ੍ਪਿ ਅਬ੍ਭਨ੍ਤਰੇ ਉਤ੍ਤਰਿਮਨੁਸ੍ਸਧਮ੍ਮੋ ਯਸ੍ਮਾ ਭੂਤੋ ਹੋਤਿ, ਤਸ੍ਮਾ ਸਬ੍ਬੇਪਿ ‘‘ਭੂਤਂ ਭਗਵਾ’’ਤਿ ਪਟਿਜਾਨਿਂਸੂਤਿ ਯੋਜਨਾ. ਯਸ੍ਮਾ ਭਾਸਿਤੋ ਵਿਯ ਹੋਤਿ, ਤਸ੍ਮਾਤਿ ਯੋਜਨਾ. ਅਰਿਯਾ ਪਟਿਜਾਨਿਂਸੂਤਿ ਸਮ੍ਬਨ੍ਧੋ. ਅਨਾਦੀਨਵਦਸ੍ਸਿਨੋਤਿ ਦੋਸਸ੍ਸ ਅਦਸ੍ਸਨਧਮ੍ਮਾ. ਤੇਹੀਤਿ ਅਰਿਯੇਹਿ, ਭਾਸਿਤੋਤਿ ਸਮ੍ਬਨ੍ਧੋ. ਯਂ ਪਿਣ੍ਡਪਾਤਂ ਉਪ੍ਪਾਦੇਸੁਨ੍ਤਿ ਯੋਜਨਾ. ਅਞ੍ਞੇਤਿ ਪੁਥੁਜ੍ਜਨਾ. ਸਬ੍ਬਸਙ੍ਗਾਹਿਕੇਨੇਵਾਤਿ ਸਬ੍ਬੇਸਂ ਪੁਥੁਜ੍ਜਨਾਰਿਯਾਨਂ ਸਙ੍ਗਹਣੇ ਪਵਤ੍ਤੇਨੇਵ. ਸਿਕ੍ਖਾਪਦਵਿਭਙ੍ਗੇਪੀਤਿ ਸਿਕ੍ਖਾਪਦਸ੍ਸ ਪਦਭਾਜਨਿਯੇਪਿ. ਤਤ੍ਥਾਤਿ ਚਤੁਤ੍ਥਪਾਰਾਜਿਕੇ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ.

੭੭. ਉਤ੍ਤਰਿਮਨੁਸ੍ਸਧਮ੍ਮਮੇਵ ਸਨ੍ਧਾਯ ਵੁਤ੍ਤਂ, ਨ ਸੁਤਾਦਿਗੁਣਨ੍ਤਿ ਅਤ੍ਥੋ. ਅਨ੍ਤਰਾ ਵਾਤਿ ਪਰਿਨਿਬ੍ਬਾਨਕਾਲਤੋ ਅਞ੍ਞਸ੍ਮਿਂ ਕਾਲੇ ਵਾ. ਅਤਿਕਡ੍ਢਿਯਮਾਨੇਨਾਤਿ ਅਤਿਨਿਪ੍ਪੀਲ਼ਿਯਮਾਨੇਨ. ਉਮ੍ਮਤ੍ਤਕਸ੍ਸਾਤਿ ¶ ਇਦਂ ਪਨਾਤਿ ਏਤ੍ਥ ਇਤਿ-ਸਦ੍ਦੋ ਆਦ੍ਯਤ੍ਥੋ. ਤੇਨ ‘‘ਖਿਤ੍ਤਚਿਤ੍ਤਸ੍ਸਾ’’ਤਿਆਦਿਂ ਸਙ੍ਗਣ੍ਹਾਤਿ. ਦਿਟ੍ਠਿਸਮ੍ਪਨ੍ਨਾਨਨ੍ਤਿ ਮਗ੍ਗਪਞ੍ਞਾਯ, ਫਲਪਞ੍ਞਾਯ ਚ ਸਮ੍ਪਨ੍ਨਾਨਂ. ਅਨਾਪਤ੍ਤੀਤਿ ਪਾਚਿਤ੍ਤਿਯਾਪਤ੍ਤਿਯਾ ਅਨਾਪਤ੍ਤਿ ਨ ਵਤ੍ਤਬ੍ਬਾ, ਆਪਤ੍ਤਿਯੇਵ ਹੋਤਿ, ਤਸ੍ਮਾ ‘‘ਉਮ੍ਮਤ੍ਤਕਸ੍ਸ ਅਨਾਪਤ੍ਤੀ’’ਤਿ ਨ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋਤਿ. ਅਟ੍ਠਮਂ.

੯. ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਂ

੭੮. ਨਵਮੇ ਤਤ੍ਰਾਤਿ ਤਸ੍ਸਂ ‘‘ਦੁਟ੍ਠੁਲ੍ਲਾ ਨਾਮਾ’’ਤਿਆਦਿਪਾਲ਼ਿਯਂ, ਤਾਸੁ ਵਾ ਪਾਲ਼ਿਅਟ੍ਠਕਥਾਸੁ. ਵਿਚਾਰਣਾਤਿ ਵੀਮਂਸਨਾ. ਉਪਸਮ੍ਪਨ੍ਨਸਦ੍ਦੇਤਿ ਉਪਸਮ੍ਪਨ੍ਨਸਦ੍ਦਤ੍ਥਭਾਵੇ ¶ . ਏਤ੍ਥ ਹਿ ਸਦ੍ਦੇ ਵੁਚ੍ਚਮਾਨੇ ਅਵਿਨਾਭਾਵਤੋ ਸਦ੍ਦੇਨ ਅਤ੍ਥੋਪਿ ਵੁਤ੍ਤੋ, ਵਿਨਾਪਿ ਭਾਵਪਚ੍ਚਯੇਨ ਭਾਵਤ੍ਥਸ੍ਸ ਞਾਤਬ੍ਬਤ੍ਤਾ ਭਾਵੋਪਿ ਗਹੇਤਬ੍ਬੋ, ਤਸ੍ਮਾ ਵੁਤ੍ਤਂ ‘‘ਉਪਸਮ੍ਪਨ੍ਨਸਦ੍ਦਤ੍ਥਭਾਵੇ’’ਤਿ. ਏਸੇਵ ਨਯੋ ‘‘ਦੁਟ੍ਠੁਲ੍ਲਸਦ੍ਦੇ’’ਤਿ ਏਤ੍ਥਾਪਿ. ਏਤਂ ਪਰਿਮਾਣਂ ਯਸ੍ਸਾਤਿ ਏਤਂ, ‘‘ਤੇਰਸ ਸਙ੍ਘਾਦਿਸੇਸਾ’’ਤਿ ਵਚਨਂ. ਏਤਂ ਏਵ ਵਤ੍ਤਬ੍ਬਂ, ਨ ‘‘ਚਤ੍ਤਾਰਿ ਚ ਪਾਰਾਜਿਕਾਨੀ’’ਤਿ ਇਦਨ੍ਤਿ ਅਤ੍ਥੋ. ਤਤ੍ਥਾਤਿ ਪਾਲ਼ਿਯਂ. ਕਸ੍ਸਚਿ ਵਿਮਤਿ ਭਵੇਯ੍ਯ, ਕਿਂ ਭਵੇਯ੍ਯਾਤਿ ਯੋਜਨਾ. ਆਪਤ੍ਤਿਂ ਆਰੋਚੇਨ੍ਤੇਨ ਅਕ੍ਕੋਸਨ੍ਤਸ੍ਸ ਸਮਾਨਤ੍ਤਾ ਵੁਤ੍ਤਂ ‘‘ਏਵਂ ਸਤੀ’’ਤਿਆਦਿ. ਪਾਚਿਤ੍ਤਿਯਮੇਵ ਚਾਤਿ ਚਸਦ੍ਦੋ ਬ੍ਯਤਿਰੇਕਤ੍ਥੋ, ਨ ਦੁਕ੍ਕਟਂ ਆਪਜ੍ਜਤੀਤਿ ਅਤ੍ਥੋ. ਹੀਤਿ ਸਚ੍ਚਂ. ਏਤਨ੍ਤਿ ਪਾਚਿਤ੍ਤਿਯਾਪਜ੍ਜਨਤਂ, ‘‘ਅਸੁਦ੍ਧੋ ਹੋਤਿ…ਪੇ… ਓਮਸਵਾਦਸ੍ਸਾ’’ਤਿ ਵਚਨਂ ਵਾ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਪਾਲ਼ਿਯਂ. ਅਟ੍ਠਕਥਾਚਰਿਯਾਵੇਤਿ ਏਤ੍ਥ ਏਵਕਾਰੋ ਅਟ੍ਠਾਨਯੋਗੋ, ਪਮਾਣਨ੍ਤਿ ਏਤ੍ਥ ਯੋਜੇਤਬ੍ਬੋ, ਕਾਰਣਮੇਵਾਤਿ ਅਤ੍ਥੋ. ਤੇਨ ਵੁਤ੍ਤਂ ‘‘ਨ ਅਞ੍ਞਾ ਵਿਚਾਰਣਾ’’ਤਿ. ਅਥ ਵਾ ਅਞ੍ਞਾਤਿ ਸਾਮ੍ਯਤ੍ਥੇ ਪਚ੍ਚਤ੍ਤਵਚਨਮੇਤਂ, ਨ ਅਞ੍ਞੇਸਂ ਵਿਚਾਰਣਾ ਪਮਾਣਨ੍ਤਿ ਅਤ੍ਥੋ. ਏਵਞ੍ਹਿ ਸਤਿ ਏਵਕਾਰੋ ਠਾਨਯੋਗੋਵ. ਪੁਬ੍ਬੇਪਿ ਚਾਤਿ ਗਨ੍ਥਾਰਮ੍ਭਕਾਲੇਪਿ ਚ.

ਏਤਨ੍ਤਿ ਅਟ੍ਠਕਥਾਚਰਿਯਾਨਂ ਪਮਾਣਤਂ. ਸਂਵਰਤ੍ਥਾਯ ਏਵ, ਅਨਾਪਜ੍ਜਨਤ੍ਥਾਯ ਏਵ ਚ ਅਨੁਞ੍ਞਾਤਨ੍ਤਿ ਯੋਜਨਾ. ਤੇਨਾਹ ‘‘ਨ ਤਸ੍ਸ’’ਤ੍ਯਾਦਿ. ਤਸ੍ਮਾਤਿ ਯਸ੍ਮਾ ਭਿਕ੍ਖੁਭਾਵੋ ਨਾਮ ਨ ਅਤ੍ਥਿ, ਤਸ੍ਮਾ ਸੁਵੁਤ੍ਤਮੇਵਾਤਿ ਸਮ੍ਬਨ੍ਧੋ.

੮੦. ਸਾਤਿ ਭਿਕ੍ਖੁਸਮ੍ਮੁਤਿ, ਸਙ੍ਘੇਨ ਕਾਤਬ੍ਬਾਤਿ ਯੋਜਨਾ. ਕਤ੍ਥਚੀਤਿ ਕਿਸ੍ਮਿਞ੍ਚਿ ਠਾਨੇ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ. ‘‘ਵੁਤ੍ਤਤ੍ਤਾ’’ਤਿ ਪਦਂ ‘‘ਕਾਤਬ੍ਬਾ’’ਤਿ ਪਦੇ ਹੇਤੁ. ਏਸਾਤਿ ਏਸੋ ਭਿਕ੍ਖੁ. ਹਿਤੇਸਿਤਾਯਾਤਿ ਹਿਤਸ੍ਸ ਏਸਿਤਾਯ, ਅਤ੍ਥਸ੍ਸ ਇਚ੍ਛਤਾਯਾਤਿ ਅਤ੍ਥੋ.

੮੨. ਸੇਸਾਨੀਤਿ ¶ ਆਦਿਮ੍ਹਿ ਪਞ੍ਚਸਿਕ੍ਖਾਪਦਤੋ ਸੇਸਾਨਿ ਉਪਰਿ ਪਞ੍ਚ ਸਿਕ੍ਖਾਪਦਾਨਿ. ਅਸ੍ਸਾਤਿ ਅਨੁਪਸਮ੍ਪਨ੍ਨਸ੍ਸ. ਘਟੇਤ੍ਵਾਤਿ ਸਮ੍ਬਨ੍ਧਂ ਕਤ੍ਵਾਤਿ. ਨਵਮਂ.

੧੦. ਪਥਵੀਖਣਨਸਿਕ੍ਖਾਪਦਂ

੮੬. ਦਸਮੇ ¶ ਭਗਵਾ ਦਸ੍ਸੇਤੀਤਿ ਯੋਜਨਾ. ਏਤ੍ਥਾਤਿ ਪਥਵਿਯਂ. ਤਤ੍ਥਾਤਿ ਤੇਸੁ ਪਾਸਾਣਾਦੀਸੁ. ਮੁਟ੍ਠਿਪ੍ਪਮਾਣਤੋਤਿ ਖਟਕਪਮਾਣਤੋ. ਸਾਤਿ ਅਦਡ੍ਢਪਥਵੀ. ਹਤ੍ਥਿਕੁਚ੍ਛਿਯਨ੍ਤਿ ਏਵਂਨਾਮਕੇ ਠਾਨੇ. ਏਕਪਚ੍ਛਿਪੂਰਂ ਪਥਵਿਨ੍ਤਿ ਸਮ੍ਬਨ੍ਧੋ. ਤੇਸਂਯੇਵਾਤਿ ਅਪ੍ਪਪਂਸੁਅਪ੍ਪਮਤ੍ਤਿਕਾਪਦਾਨਂ ਏਵ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤਨ੍ਤਿ ਯੇਭੁਯ੍ਯੇਨਪਾਸਾਣਾਦਿਪਞ੍ਚਕਂ. ਤਨ੍ਤਿ ਕੁਸੀਤਂ. ਆਣਾਪੇਤ੍ਵਾਤਿ ਏਤ੍ਥ ‘‘ਆਣ ਪੇਸਨੇ’’ਤਿ ਧਾਤੁਪਾਠੇਸੁ ਵੁਤ੍ਤਤ੍ਤਾ ਆਣਧਾਤੁਯੇਵ ਪੇਸਨਸਙ੍ਖਾਤਂ ਹੇਤ੍ਵਤ੍ਥਂ ਵਦਤਿ, ਨ ਣਾਪੇਪਚ੍ਚਯੋ, ਸੋ ਪਨ ਧਾਤ੍ਵਤ੍ਥੇਯੇਵ ਵਤ੍ਤਤਿ. ਨ ਹਿ ਤਸ੍ਸ ਵਿਸੁਂ ਵੁਤ੍ਤੋ ਅਭਿਧੇਯ੍ਯੋ ਅਤ੍ਥਿ ਧਾਤ੍ਵਤ੍ਥਤੋ ਅਞ੍ਞਸ੍ਸ ਅਭਿਧੇਯ੍ਯਸ੍ਸਾਭਾਵਾ. ਤਾਵਾਤਿ ਪਠਮਂ ਪਾਲ਼ਿਮੁਤ੍ਤਕਵਿਨਿਚ੍ਛਯਸ੍ਸ, ਤਤੋ ਵਾ.

ਪੋਕ੍ਖਰਂ ਪਦੁਮਂ ਨੇਤੀਤਿ ਪੋਕ੍ਖਰਣੀ. ‘‘ਸੋਧੇਨ੍ਤੇਹੀ’’ਤਿ ਪਦਂ ‘‘ਉਸ੍ਸਿਞ੍ਚਿਤੁਂ ਅਪਨੇਤੁ’’ਨ੍ਤਿ ਪਦੇਸੁ ਭਾਵਕਤ੍ਤਾ. ਯੋਤਿ ‘‘ਤਨੁਕਦ੍ਦਮੋ’’ਤਿ ਪਦੇਨ ਯੋਜੇਤਬ੍ਬੋ. ਯੋ ਤਨੁਕਦ੍ਦਮੋਤਿ ਹਿ ਅਤ੍ਥੋ. ਕੁਟੇਹੀਤਿ ਘਟੇਹਿ. ਉਸ੍ਸਿਞ੍ਚਿਤੁਨ੍ਤਿ ਉਕ੍ਖਿਪਿਤ੍ਵਾ, ਉਦ੍ਧਰਿਤ੍ਵਾ ਵਾ ਸਿਞ੍ਚਿਤੁਂ. ਤਤ੍ਰਾਤਿ ਸੁਕ੍ਖਕਦ੍ਦਮੇ, ‘‘ਯੋ’’ਤਿ ਪਦੇ ਅਵਯਵੀਆਧਾਰੋ. ਯੋਤਿ ਸੁਕ੍ਖਕਦ੍ਦਮੋ.

ਤਟਨ੍ਤਿ ਕੂਲਂ. ਉਦਕਸਾਮਨ੍ਤਾਤਿ ਉਦਕਸ੍ਸ ਸਮੀਪੇ. ਓਮਕਚਤੁਮਾਸਨ੍ਤਿ ਚਤੁਮਾਸਤੋ ਊਨਕਂ. ਓਵਟ੍ਠਨ੍ਤਿ ਦੇਵੇਨ ਓਵਸ੍ਸਿਤਂ ਹੋਤਿ ਸਚੇਤਿ ਯੋਜਨਾ. ਪਤਤੀਤਿ ਤਟਂ ਪਤਤਿ. ਉਦਕੇਯੇਵਾਤਿ ਪਕਤਿਉਦਕੇਯੇਵ. ਉਦਕਸ੍ਸਾਤਿ ਵਸ੍ਸੋਦਕਸ੍ਸ. ਤਤ੍ਥਾਤਿ ਪਾਸਾਣਪਿਟ੍ਠਿਯਂ. ਪਠਮਮੇਵਾਤਿ ਸੋਣ੍ਡਿਖਣਨਤੋ ਪਠਮਂ ਏਵ. ਉਦਕੇ ਪਰਿਯਾਦਿਣ੍ਣੇਤਿ ਉਦਕੇ ਸੁਕ੍ਖੇ. ਪਚ੍ਛਾਤਿ ਉਦਕਪੂਰਤੋ ਪਚ੍ਛਾ. ਤਤ੍ਥਾਤਿ ਸੋਣ੍ਡਿਯਂ. ਉਦਕੇਯੇਵਾਤਿ ਮੂਲਉਦਕੇਯੇਵ. ਉਦਕਨ੍ਤਿ ਆਗਨ੍ਤੁਕਉਦਕਂ. ਅਲ੍ਲੀਯਤੀਤਿ ਪਿਟ੍ਠਿਪਾਸਾਣੇ ਲਗ੍ਗਤਿ. ਤਮ੍ਪੀਤਿ ਸੁਖੁਮਰਜਮ੍ਪਿ. ਅਕਤਪਬ੍ਭਾਰੇਤਿ ਵਲ਼ਞ੍ਜੇਨ ਅਕਤੇ ਪਬ੍ਭਾਰੇ. ਉਪਚਿਕਾਹਿ ਵਮੀਯਤਿ, ਘਰਗੋਲ਼ਿਕਾਦਯੋ ਵਾ ਸਤ੍ਤੇ ਵਮਤੀਤਿ ਵਮ੍ਮਿਕੋ.

ਗਾਵੀਨਂ ¶ ਖੁਰੋ ਕਣ੍ਟਕਸਦਿਸਤ੍ਤਾ ਗੋਕਣ੍ਟਕੋ ਨਾਮ, ਤੇਨ ਛਿਨ੍ਨੋ ਕਦ੍ਦਮੋ ‘‘ਗੋਕਣ੍ਟਕੋ’’ਤਿ ਵੁਚ੍ਚਤਿ. ਅਚ੍ਛਦਨਂ ਵਾ ਵਿਨਟ੍ਠਚ੍ਛਦਨਂ ਵਾ ਪੁਰਾਣਸੇਨਾਸਨਂ ਹੋਤੀਤਿ ਯੋਜਨਾ. ਤਤੋਤਿ ¶ ਪੁਰਾਣਸੇਨਾਸਨਤੋ, ਗਣ੍ਹਿਤੁਂ ਵਟ੍ਟਤੀਤਿ ਸਮ੍ਬਨ੍ਧੋ. ਅਵਸੇਸਨ੍ਤਿ ਵਿਨਟ੍ਠਚ੍ਛਦਨਤੋ. ਅਵਸੇਸਂ ਇਟ੍ਠਕਂ ਗਣ੍ਹਾਮਿ ਇਤਿ ਸਞ੍ਞਾਯਾਤਿ ਯੋਜੇਤਬ੍ਬੋ. ਤੇਨਾਤਿ ਇਟ੍ਠਕਾਦਿਨਾ. ਯਾ ਯਾਤਿ ਮਤ੍ਤਿਕਾ. ਅਤਿਨ੍ਤਾਤਿ ਅਨਲ੍ਲਾ, ਅਕਿਲਿਨ੍ਨਾਤਿ ਅਤ੍ਥੋ.

ਤਸ੍ਮਿਨ੍ਤਿ ਮਤ੍ਤਿਕਾਪੁਞ੍ਜੇ. ਸਬ੍ਬੋਤਿ ਸਕਲੋ ਮਤ੍ਤਿਕਾਪੁਞ੍ਜੋ. ਅਸ੍ਸਾਤਿ ਮਤ੍ਤਿਕਾਪੁਞ੍ਜਸ੍ਸ. ‘‘ਕਪ੍ਪਿਯਕਾਰਕੇਹੀ’’ਤਿ ਪਦਂ ‘‘ਅਪਨਾਮੇਤ੍ਵਾ’’ਤਿ ਪਦੇ ਕਾਰਿਤਕਮ੍ਮਂ. ਕਸ੍ਮਾ ਵਟ੍ਟਤੀਤਿ ਆਹ ‘‘ਉਦਕੇਨਾ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਤਤ੍ਥਾਤਿ ਮਤ੍ਤਿਕਾਪਾਕਾਰੇ. ਅਞ੍ਞਮ੍ਪੀਤਿ ਮਣ੍ਡਪਥਮ੍ਭਤੋ ਅਞ੍ਞਮ੍ਪਿ. ਤੇਨ ਅਪਦੇਸੇਨਾਤਿ ਤੇਨ ਪਾਸਾਣਾਦਿਪਵਟ੍ਟਨਲੇਸੇਨ.

ਪਸ੍ਸਾਵਧਾਰਾਯਾਤਿ ਮੁਤ੍ਤਸੋਤਾਯ. ਕਤ੍ਤਰਯਟ੍ਠਿਯਾਤਿ ਕਤ੍ਤਰਦਣ੍ਡੇਨ. ਏਤ੍ਥ ਹਿ ਕਤ੍ਤਰਯਤਿ ਅਙ੍ਗਪਚ੍ਚਙ੍ਗਾਨਂ ਸਿਥਿਲਭਾਵੇਨ ਸਿਥਿਲੋ ਹੁਤ੍ਵਾ ਭਵਤੀਤਿ ਕਤ੍ਵਾ ਕਤ੍ਤਰੋ ਵੁਚ੍ਚਤਿ ਜਿਣ੍ਣਮਨੁਸ੍ਸੋ, ਤੇਨ ਏਕਨ੍ਤਤੋ ਗਹੇਤਬ੍ਬਤ੍ਤਾ ਕਤ੍ਤਰੇਨ ਗਹਿਤਾ ਯਟ੍ਠਿ, ਕਤ੍ਤਰਸ੍ਸ ਯਟ੍ਠੀਤਿ ਵਾ ਕਤ੍ਵਾ ਕਤ੍ਤਰਯਟ੍ਠਿ ਵੁਚ੍ਚਤਿ ਕਤ੍ਤਰਦਣ੍ਡੋ. ਦਨ੍ਤਜਪਠਮਕ੍ਖਰੇਨ ਸਜ੍ਝਾਯਿਤਬ੍ਬੋ. ਵੀਰਿਯਸਮ੍ਪਗ੍ਗਹਣਤ੍ਥਨ੍ਤਿ ਵੀਰਿਯਸ੍ਸ ਸੁਟ੍ਠੁ ਪਗ੍ਗਣ੍ਹਨਤ੍ਥਂ, ਵੀਰਿਯਸ੍ਸ ਉਕ੍ਖਿਪਨਤ੍ਥਨ੍ਤਿ ਅਤ੍ਥੋ. ਕੇਚਿ ਭਿਕ੍ਖੂਤਿ ਯੋਜਨਾ.

੮੭. ਤਤ੍ਰਾਪੀਤਿ ਇਟ੍ਠਕਕਪਾਲਾਦੀਸੁਪਿ. ਹੀਤਿ ਸਚ੍ਚਂ. ਤੇਸਂ ਅਨੁਪਾਦਾਨਤ੍ਤਾਤਿ ਤੇਸਂ ਇਟ੍ਠਕਾਦੀਨਂ ਅਗ੍ਗਿਸ੍ਸ ਅਨਿਨ੍ਧਨਤ੍ਤਾ. ਹੀਤਿ ਸਚ੍ਚਂ, ਯਸ੍ਮਾਵਾ. ਤਾਨੀਤਿ ਇਟ੍ਠਕਾਦੀਨਿ. ਅਵਿਸਯਤ੍ਤਾਤਿ ਆਪਤ੍ਤਿਯਾ ਅਨੋਕਾਸਤ੍ਤਾ. ਤਿਣੁਕ੍ਕਨ੍ਤਿ ਤਿਣਮਯਂ ਉਕ੍ਕਂ. ਤਤ੍ਥੇਵਾਤਿ ਮਹਾਪਚ੍ਚਰਿਯਂ ਏਵ. ਅਰੀਯਤਿ ਅਗ੍ਗਿਨਿਪ੍ਫਾਦਨਤ੍ਥਂ ਘਂਸੀਯਤਿ ਏਤ੍ਥਾਤਿ ਅਰਣੀ, ਹੇਟ੍ਠਾ ਨਿਮਨ੍ਥਨੀਯਦਾਰੁ. ਸਹ ਧਨੁਨਾ ਏਤਿ ਪਵਤ੍ਤਤੀਤਿ ਸਹਿਤੋ, ਉਪਰਿ ਨਿਮਨ੍ਥਨਦਾਰੁ. ਅਰਣੀ ਚ ਸਹਿਤੋ ਚ ਅਰਣੀਸਹਿਤੋ, ਤੇਨ ਅਗ੍ਗਿਂ ਨਿਬ੍ਬਤ੍ਤੇਤ੍ਵਾਤਿ ਯੋਜਨਾ. ਯਥਾ ਕਰਿਯਮਾਨੇ ਨ ਡਯ੍ਹਤਿ, ਤਥਾ ਕਰੋਹੀਤਿ ਸਮ੍ਬਨ੍ਧੋ.

੮੮. ਆਵਾਟਂ ¶ ਜਾਨਾਤਿ ਆਵਾਟਂ ਕਾਤੁਂ, ਖਣਿਤੁਂ ਵਾ ਜਾਨਾਹੀਤਿ ਅਤ੍ਥੋ. ‘‘ਏਵਂ ਮਹਾਮਤ੍ਤਿਕਂ ਜਾਨ, ਥੁਸਮਤ੍ਤਿਕਂ ਜਾਨਾ’’ਤਿ ਏਤ੍ਥਾਪਿ ਯਥਾਲਾਭਂ ਸਮ੍ਪਦਾਨਵਾਚਕਪਦਂ ਅਜ੍ਝਾਹਰਿਤ੍ਵਾ ਯੋਜਨਾ ਕਾਤਬ੍ਬਾ. ਸਾਤਿ ਪਥਵੀ. ਤੇਨਾਤਿ ਪਵਟ੍ਟਨਾਦਿਨਾਤਿ. ਦਸਮਂ.

ਮੁਸਾਵਾਦਵਗ੍ਗੋ ਪਠਮੋ.

੨. ਭੂਤਗਾਮਵਗ੍ਗੋ

੧. ਭੂਤਗਾਮਸਿਕ੍ਖਾਪਦ-ਅਤ੍ਥਯੋਜਨਾ

੮੯. ਦੁਤਿਯਵਗ੍ਗਸ੍ਸ ¶ ਪਠਮੇ ਤਸ੍ਸਾਤਿ ਦੇਵਤਾਯ. ਉਕ੍ਖਿਤ੍ਤਂ ਫਰਸੁਨ੍ਤਿ ਉਦ੍ਧਂ ਖਿਤ੍ਤਂ ਕੁਠਾਰਿਂ. ਨਿਗ੍ਗਹੇਤੁਨ੍ਤਿ ਸਣ੍ਠਾਤੁਂ, ਨਿਵਤ੍ਤੇਤੁਂ ਵਾ. ਚਕ੍ਖੁਵਿਸਯਾਤੀਤੇਤਿ ਪਸਾਦਚਕ੍ਖੁਸ੍ਸ ਗੋਚਰਾਤਿਕ੍ਕਨ੍ਤੇ. ਮਹਾਰਾਜਸਨ੍ਤਿਕਾਤਿ ਵੇਸ੍ਸਵਣਮਹਾਰਾਜਸ੍ਸ ਸਨ੍ਤਿਕਾ. ਥਨਮੂਲੇਯੇਵਾਤਿ ਥਨਸਮੀਪੇਯੇਵ. ਹਿਮਵਨ੍ਤੇਤਿ ਹਿਮਉਗ੍ਗਿਰਣੇ ਵਨੇ, ਹਿਮਯੁਤ੍ਤੇ ਵਾ. ਤਤ੍ਥਾਤਿ ਹਿਮਵਨ੍ਤੇ, ਦੇਵਤਾਸਨ੍ਨਿਪਾਤੇ ਵਾ. ਰੁਕ੍ਖਧਮ੍ਮੋਤਿ ਰੁਕ੍ਖਸਭਾਵੋ. ਰੁਕ੍ਖਧਮ੍ਮੋ ਚ ਨਾਮ ਛੇਦਨਭੇਦਨਾਦੀਸੁ ਰੁਕ੍ਖਾਨਂ ਅਚੇਤਨਤ੍ਤਾ ਕੋਪਸ੍ਸ ਅਕਰਣਂ, ਤਸ੍ਮਿਂ ਰੁਕ੍ਖਧਮ੍ਮੇ ਠਿਤਾ ਦੇਵਤਾ ਰੁਕ੍ਖਧਮ੍ਮੇ ਠਿਤਾ ਨਾਮ, ਛੇਦਨਭੇਦਨਾਦੀਸੁ ਰੁਕ੍ਖਸ੍ਸ ਵਿਯ ਰੁਕ੍ਖਟ੍ਠਕਦੇਵਤਾਯ ਅਕੋਪਨਂ ਰੁਕ੍ਖਧਮ੍ਮੇ ਠਿਤਾ ਨਾਮਾਤਿ ਅਧਿਪ੍ਪਾਯੋ. ਤਤ੍ਥਾਤਿ ਤਾਸੁ ਸਨ੍ਨਿਪਾਤਦੇਵਤਾਸੁ. ਇਤੀਤਿ ਇਮਸ੍ਸ ਅਲਭਨਸ੍ਸ, ਇਮਸ੍ਮਿਂ ਅਲਭਨੇ ਵਾ, ਆਦੀਨਵਨ੍ਤਿ ਸਮ੍ਬਨ੍ਧੋ. ਭਗਵਤੋ ਚਾਤਿ ਚ-ਸਦ੍ਦੋ ‘‘ਪੁਬ੍ਬਚਰਿਤ’’ਨ੍ਤਿ ਏਤ੍ਥ ਯੋਜੇਤਬ੍ਬੋ. ਇਮਞ੍ਚ ਆਦੀਨਵਂ ਅਦ੍ਦਸ, ਭਗਵਤੋ ਪੁਬ੍ਬਚਰਿਤਞ੍ਚ ਅਨੁਸ੍ਸਰੀਤਿ ਵਾਕ੍ਯਸਮ੍ਪਿਣ੍ਡਨਵਸੇਨ ਯੋਜਨਾ ਕਾਤਬ੍ਬਾ. ਤੇਨਾਤਿ ਦਸ੍ਸਨਾਨੁਸ੍ਸਰਣਕਾਰਣੇਨ. ਅਸ੍ਸਾਤਿ ਦੇਵਤਾਯ. ਸਂਵਿਜ੍ਜਤਿ ਪਿਤਾ ਅਸ੍ਸਾਤਿ ਸਪਿਤਿਕੋ, ਪੁਤ੍ਤੋ. (ਤਾਵਾਤਿ ਅਤਿਵਿਯ, ਪਟਿਸਞ੍ਚਿਕ੍ਖਨ੍ਤਿਯਾਤਿ ਸਮ੍ਬਨ੍ਧੋ) ‘‘ਮਰਿਯਾਦਂ ਬਨ੍ਧਿਸ੍ਸਤੀ’’ਤਿ ਵਤ੍ਵਾ ਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਿਕ੍ਖਾਪਦਂ ਪਞ੍ਞਪੇਸ੍ਸਤੀ’’ਤਿ. ਇਤਿ ਪਟਿਸਞ੍ਚਿਕ੍ਖਨ੍ਤਿਯਾ ਅਸ੍ਸਾ ਦੇਵਤਾਯ ਏਤਦਹੋਸੀਤਿ ਯੋਜਨਾ.

ਯੋਤਿ ¶ ਯੋ ਕੋਚਿ ਜਨੋ. ਵੇਤਿ ਏਕਨ੍ਤੇਨ. ਉਪ੍ਪਤਿਤਨ੍ਤਿ ਉਪ੍ਪਜ੍ਜਨਵਸੇਨ ਅਤ੍ਤਨੋ ਉਪਰਿ ਪਤਿਤਂ. ਭਨ੍ਤਨ੍ਤਿ ਭਮਨ੍ਤਂ ਧਾਵਨ੍ਤਂ, ਵਾਰਯੇਤਿ ਨਿਵਾਰੇਯ੍ਯ ਨਿਗ੍ਗਣ੍ਹੇਯ੍ਯਾਤਿ ਅਤ੍ਥੋ. ਤਨ੍ਤਿ ਜਨਂ. ਅਯਂ ਪਨੇਤ੍ਥ ਯੋਜਨਾ – ਸਾਰਥਿ ਭਨ੍ਤਂ ਰਥਂ ਵਾਰਯੇ ਇਵ, ਤਥਾ ਯੋ ਵੇ ਉਪ੍ਪਤਿਤਂ ਕੋਧਂ ਵਾਰਯੇ, ਤਂ ਅਹਂ ਸਾਰਥਿਂ ਇਤਿ ਬ੍ਰੂਮਿ. ਇਤਰੋ ਕੋਧਨਿਵਾਰਕਤੋ ਅਞ੍ਞੋ ਰਾਜਉਪਰਾਜਾਦੀਨਂ ਸਾਰਥਿਭੂਤੋ ਜਨੋ ਰਸ੍ਮਿਗ੍ਗਾਹੋ ਰਜ੍ਜੁਗ੍ਗਾਹੋ ਨਾਮਾਤਿ.

ਦੁਤਿਯਗਾਥਾਯ ਵੇਜ੍ਜੋ ਵਿਸਟਂ ਵਿਤ੍ਥਤਂ ਸਪ੍ਪਵਿਸਂ ਸਪ੍ਪਸ੍ਸ ਆਸੀਵਿਸਸ੍ਸ ਵਿਸਂ ਗਰਲ਼ਂ ਓਸਧੇਹਿ ਭੇਸਜ੍ਜੇਨ, ਮਨ੍ਤੇਨ ਚ ਵਿਨੇਤਿ ਇਵ, ਤਥਾ ਯੋ ਭਿਕ੍ਖਵੇ ਉਪ੍ਪਤਿਤਂ ਕੋਧਂ ਮੇਤ੍ਤਾਯ ਵਿਨੇਤਿ, ਸੋ ਭਿਕ੍ਖੁ ਉਰਗੋ ਭੁਜਗੋ ਪੁਰਾਣਂ ਪੁਰੇ ਭਵਂ ਜਿਣ੍ਣਂ ਪੁਰਾਣਤ੍ਤਾ ਜਿਣ੍ਣਂ ਤਚਂ ਜਹਾਤਿ ਇਵ, ਤਥਾ ਓਰਪਾਰਂ ਅਪਾਰਸਙ੍ਖਾਤਂ ਪਞ੍ਚੋਰਮ੍ਭਾਗਿਯਸਂਯੋਜਨਂ ਜਹਾਤੀਤਿ ਯੋਜਨਾ ਕਾਤਬ੍ਬਾ.

ਤਤ੍ਰਾਤਿ ¶ ਦ੍ਵੀਸੁ ਗਾਥਾਸੁ. ਵਤ੍ਥੁ ਪਨ ਵਿਨਯੇ ਆਰੂਲ਼੍ਹਨ੍ਤਿ ਯੋਜਨਾ. ਅਥਾਤਿ ਪਚ੍ਛਾ. ਯਸ੍ਸ ਦੇਵਪੁਤ੍ਤਸ੍ਸਾਤਿ ਯੇਨ ਦੇਵਪੁਤ੍ਤੇਨ. ਪਰਿਗ੍ਗਹੋਤਿ ਪਰਿਚ੍ਛਿਨ੍ਦਿਤ੍ਵਾ ਗਹਿਤੋ. ਸੋਤਿ ਦੇਵਪੁਤ੍ਤੋ. ਤਤੋਤਿ ਉਪਗਮਨਤੋ. ਯਦਾ ਹੋਤਿ, ਤਦਾਤਿ ਯੋਜਨਾ. ਮਹੇਸਕ੍ਖਦੇਵਤਾਸੂਤਿ ਮਹਾਪਰਿਵਾਰਾਸੁ ਦੇਵਤਾਸੁ, ਮਹਾਤੇਜਾਸੁ ਵਾ. ਪਟਿਕ੍ਕਮਨ੍ਤੀਤਿ ਅਪੇਨ੍ਤਿ. ਦੇਵਤਾ ਯਮ੍ਪਿ ਪਞ੍ਹਂ ਪੁਚ੍ਛਨ੍ਤੀਤਿ ਯੋਜਨਾ. ਤਤ੍ਥੇਵਾਤਿ ਅਤ੍ਤਨੋ ਵਸਨਟ੍ਠਾਨੇਯੇਵ. ਉਪਟ੍ਠਾਨਨ੍ਤਿ ਉਪਟ੍ਠਾਨਤ੍ਥਾਯ, ਸਮ੍ਪਦਾਨਤ੍ਥੇ ਚੇਤਂ ਉਪਯੋਗਵਚਨਂ. ਅਥ ਵਾ ਉਪਗਨ੍ਤ੍ਵਾ ਤਿਟ੍ਠਤਿ ਏਤ੍ਥਾਤਿ ਉਪਟ੍ਠਾਨਂ, ਭਗਵਤੋ ਸਮੀਪਟ੍ਠਾਨਂ, ਤਂ ਆਗਨ੍ਤ੍ਵਾਤਿ ਅਤ੍ਥੋ. ਨਨ੍ਤਿ ਤਂ, ਅਯਮੇਵ ਵਾ ਪਾਠੋ.

੯੦. ‘‘ਭਵਨ੍ਤੀ’’ਤਿ ਇਮਿਨਾ ਵਿਰੂਲ਼੍ਹੇ ਮੂਲੇ ਨੀਲਭਾਵਂ ਆਪਜ੍ਜਿਤ੍ਵਾ ਵਡ੍ਢਮਾਨਕੇ ਤਰੁਣਰੁਕ੍ਖਗਚ੍ਛਾਦਿਕੇ ਦਸ੍ਸੇਤਿ. ‘‘ਅਹੁਵਤ੍ਥੁ’’ਨ੍ਤਿ ਇਮਿਨਾ ਪਨ ਵਡ੍ਢਿਤ੍ਵਾ ਠਿਤੇ ਮਹਨ੍ਤਰੁਕ੍ਖਗਚ੍ਛਾਦਿਕੇ ਦਸ੍ਸੇਤਿ. ‘‘ਅਹੁਵਤ੍ਥੁ’’ਨ੍ਤਿ ਚ ਹਿਯ੍ਯਤ੍ਤਨਿਸਙ੍ਖਾਤਾਯ ਤ੍ਥੁਂ-ਵਿਭਤ੍ਤਿਯਾ ਹੂ-ਧਾਤੁਸ੍ਸ ਊਕਾਰਸ੍ਸ ਉਵਾਦੇਸੋ ਹੋਤਿ. ਪੋਤ੍ਥਕੇਸੁ ਪਨ ‘‘ਅਹੁਵਤੀ’’ਤਿ ਪਾਠੋ ਦਿਸ੍ਸਤਿ, ਸੋ ਅਪਾਠੋਤਿ ਦਟ੍ਠਬ੍ਬੋ. ‘‘ਜਾਯਨ੍ਤੀ’’ਤਿ ਇਮਿਨਾ ਭੂ-ਧਾਤੁਸ੍ਸ ਸਤ੍ਤਤ੍ਥਭਾਵਂ ਦਸ੍ਸੇਤਿ ¶ , ‘‘ਵਡ੍ਢਨ੍ਤੀ’’ਤਿ ਇਮਿਨਾ ਵਡ੍ਢਨਤ੍ਥਭਾਵਂ. ਏਤਨ੍ਤਿ ‘‘ਭੂਤਗਾਮੋ’’ਤਿ ਨਾਮਂ. ਪੀਯਤੇ ਯਥਾਕਾਮਂ ਪਰਿਭੁਞ੍ਜੀਯਤੇ, ਪਾਤਬ੍ਬਂ ਪਰਿਭੁਞ੍ਜਿਤਬ੍ਬਨ੍ਤਿ ਵਾ ਪਾਤਬ੍ਯਂ, ਪਾਸਦ੍ਦੋ ਯਥਾਕਾਮਪਰਿਭੁਞ੍ਜਨਤ੍ਥੋ. ਤੇਨਾਹ – ‘‘ਛੇਦਨਭੇਦਨਾਦੀਹਿ ਯਥਾਰੁਚਿ ਪਰਿਭੁਞ੍ਜਿਤਬ੍ਬਤਾਤਿ ਅਤ੍ਥੋ’’ਤਿ.

੯੧. ‘‘ਇਦਾਨੀ’’ਤਿ ਪਦਂ ‘‘ਆਹਾ’’ਤਿ ਪਦੇ ਕਾਲਸਤ੍ਤਮੀ. ਯਸ੍ਮਿਨ੍ਤਿ ਬੀਜੇ. ਤਨ੍ਤਿ ਬੀਜਂ. ਪਞ੍ਚ ਬੀਜਜਾਤਾਨੀਤਿ ਏਤ੍ਥ ਜਾਤਸਦ੍ਦਸ੍ਸ ਤਬ੍ਭਾਵਤ੍ਥਤਂ ਸਨ੍ਧਾਯ ਅਟ੍ਠਕਥਾਸੁ ਏਵਂ ਵੁਤ੍ਤਂ. ਤਬ੍ਭਾਵਤ੍ਥਸ੍ਸ ‘‘ਮੂਲੇ ਜਾਯਨ੍ਤੀ’’ਤਿ ਇਮਾਯ ਪਾਲ਼ਿਯਾ ਅਸਂਸਨ੍ਦਨਤਂ ਸਨ੍ਧਾਯ ਵੁਤ੍ਤਂ ਸਙ੍ਗਹਕਾਰੇਨ ‘‘ਨ ਸਮੇਨ੍ਤੀ’’ਤਿ. ਅਟ੍ਠਕਥਾਚਰਿਯਾਨਂ ਮਤੇਨ ਸਤਿ ਜਾਤਸਦ੍ਦਸ੍ਸ ਤਬ੍ਭਾਵਤ੍ਥਭਾਵੇ ‘‘ਮੂਲੇ ਜਾਯਨ੍ਤੀ’’ਤਿਆਦੀਸੁ ਮੂਲੇ ਮੂਲਾਨਿ ਜਾਯਨ੍ਤੀਤਿ ਦੋਸੋ ਭਵੇਯ੍ਯਾਤਿ ਮਨਸਿ ਕਤ੍ਵਾ ਆਹ ‘‘ਨ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਾਨੀਤਿ ਰੁਕ੍ਖਾਦੀਨਿ. ਤਸ੍ਸਾਤਿ ‘‘ਭੂਤਗਾਮੋ ਨਾਮ ਪਞ੍ਚ ਬੀਜਜਾਤਾਨੀ’’ਤਿ ਪਦਸ੍ਸ. ਏਤਨ੍ਤਿ ‘‘ਬੀਜਜਾਤਾਨੀ’’ਤਿ ਨਾਮਂ. ਬੀਜੇਸੁ ਜਾਤਾਨਿ ਬੀਜਜਾਤਾਨੀਤਿ ਵੁਤ੍ਤੇ ‘‘ਮੂਲੇ ਜਾਯਨ੍ਤੀ’’ਤਿਆਦਿਨਾ ਸਮੇਤਿ. ਏਤੇਨਾਤਿ ‘‘ਬੀਜਤੋ’’ਤਿਆਦਿਨਾ ਸਙ੍ਗਹੋਤਿ ਸਮ੍ਬਨ੍ਧੋ.

‘‘ਯੇਹੀ’’ਤਿ ਪਦਂ ‘‘ਜਾਤਤ੍ਤਾ’’ਤਿ ਪਦੇ ਅਪਾਦਾਨਂ, ਹੇਤੁ ਵਾ ‘‘ਵੁਤ੍ਤਾਨੀ’’ਤਿ ਪਦੇ ਕਰਣਂ, ਕਤ੍ਤਾ ਵਾ. ਤੇਸਨ੍ਤਿ ਬੀਜਾਨਂ. ਰੁਕ੍ਖਾਦੀਨਂ ਵਿਰੁਹਨਂ ਜਨੇਤੀਤਿ ਬੀਜਂ. ‘‘ਬੀਜਤੋ’’ਤਿਆਦਿਨਾ ਕਾਰਿਯੋਪਚਾਰੇਨ ਕਾਰਣਸ੍ਸ ਦਸ੍ਸਿਤਤ੍ਤਾ ਕਾਰਣੂਪਚਾਰਂ ਪਦੀਪੇਤਿ. ਅਞ੍ਞਾਨਿਪਿ ਯਾਨਿ ਵਾ ਪਨ ਗਚ੍ਛਵਲ੍ਲਿਰੁਕ੍ਖਾਦੀਨਿ ਅਤ੍ਥਿ ਸਂਵਿਜ੍ਜਨ੍ਤਿ, ਤਾਨਿ ਗਚ੍ਛਵਲ੍ਲਿਰੁਕ੍ਖਾਦੀਨਿ ਜਾਯਨ੍ਤਿ ਸਞ੍ਜਾਯਨ੍ਤੀਤਿ ਯੋਜਨਾ. ਤਾਨੀਤਿ ਗਚ੍ਛਵਲ੍ਲਿਰੁਕ੍ਖਾਦੀਨਿ ¶ . ਤਞ੍ਚ ਮੂਲਂ, ਪਾਲ਼ਿਯਂ ਵੁਤ੍ਤਹਲਿਦ੍ਦਾਦਿ ਚ ਅਤ੍ਥਿ, ਸਬ੍ਬਮ੍ਪਿ ਏਤਂ ਮੂਲਬੀਜਂ ਨਾਮਾਤਿ ਸਮ੍ਬਨ੍ਧੋ. ਏਤ੍ਥਾਤਿ ਬੀਜੇਸੁ, ਖਨ੍ਧਬੀਜੇਸੁ ਵਾ.

੯੨. ਸਞ੍ਞਾਵਸੇਨਾਤਿ ‘‘ਬੀਜ’’ਨ੍ਤਿ ਸਞ੍ਞਾਵਸੇਨ. ‘‘ਤਤ੍ਥਾ’’ਤਿ ਪਦਂ ‘‘ਵੇਦਿਤਬ੍ਬੋ’’ਤਿ ਪਦੇ ਆਧਾਰੋ. ‘‘ਯਥਾ’’ਤਿਆਦਿਨਾ ਕਾਰਣੋਪਚਾਰੇਨ ਕਾਰਿਯਸ੍ਸ ਵੁਤ੍ਤਤ੍ਤਾ ਫਲੂਪਚਾਰਂ ਦਸ੍ਸੇਤਿ. ਯਂ ਬੀਜਂ ਵੁਤ੍ਤਂ, ਤਂ ਦੁਕ੍ਕਟਵਤ੍ਥੂਤਿ ਯੋਜਨਾ. ਯਦੇਤਂ ਆਦਿਪਦਨ੍ਤਿ ਯੋਜੇਤਬ੍ਬਂ. ਤੇਨਾਤਿ ਆਦਿਪਦੇਨ. ਰਵੀਯਤਿ ਭਗਵਤਾ ਕਥੀਯਤੀਤਿ ਰੁਤਂ, ਪਾਲ਼ਿ, ਤਸ੍ਸ ਅਨੁਰੂਪਂ ਯਥਾਰੁਤਂ, ਪਾਲ਼ਿਅਨਤਿਕ੍ਕਨ੍ਤਨ੍ਤਿ ਅਤ੍ਥੋ.

ਏਤ੍ਥਾਤਿ ¶ ‘‘ਬੀਜੇ ਬੀਜਸਞ੍ਞੀ’’ਤਿਆਦਿਪਦੇ, ਇਮਸ੍ਮਿਂ ਸਿਕ੍ਖਾਪਦੇ ਵਾ. ਉਦਕੇ ਠਾਤਿ ਪਵਤ੍ਤਤੀਤਿ ਉਦਕਟ੍ਠੋ, ਏਵਂ ਥਲਟ੍ਠੋਪਿ. ਤਤ੍ਥਾਤਿ ਉਦਕਟ੍ਠਥਲਟ੍ਠੇਸੁ. ਸਾਸਪਸ੍ਸ ਮਤ੍ਤਂ ਪਮਾਣਂ ਅਸ੍ਸ ਸੇਵਾਲਸ੍ਸਾਤਿ ਸਾਸਪਮਤ੍ਤਿਕੋ. ਤਿਲਸ੍ਸ ਬੀਜਪਮਾਣਂ ਅਸ੍ਸ ਸੇਵਾਲਸ੍ਸਾਤਿ ਤਿਲਬੀਜਕੋ. ਪਮਾਣਤ੍ਥੇ ਕੋ. ਆਦਿਸਦ੍ਦੇਨ ਸਙ੍ਖਪਣਕਾਦਯੋ ਸੇਵਾਲੇ ਸਙ੍ਗਣ੍ਹਾਤਿ. ਤਤ੍ਥ ਤਿਲਬੀਜਪਮਾਣੋ ਜਲਸਣ੍ਠਿਤੋ ਨੀਲਾਦਿਵਣ੍ਣਯੁਤ੍ਤੋ ਸੇਵਾਲੋ ਤਿਲਬੀਜਂ ਨਾਮ, ਸਪਤ੍ਤੋ ਅਪ੍ਪਕਣ੍ਡੋ ਉਕ੍ਖਲਿਪਿਧਾਨਾਦਿਪਮਾਣੋ ਸਮੂਲੋ ਏਕੋ ਸੇਵਾਲਵਿਸੇਸੋ ਸਙ੍ਖੋ ਨਾਮ, ਭਮਰਸਣ੍ਠਾਨੋ ਨੀਲਵਣ੍ਣੋ ਏਕੋ ਸੇਵਾਲਵਿਸੇਸੋ ਪਣਕੋ ਨਾਮ. ਉਦਕਂ ਸੇਵਤੀਤਿ ਸੇਵਾਲੋ. ਤਤ੍ਥਾਤਿ ਸੇਵਾਲੇਸੁ. ਯੋਤਿ ਸੇਵਾਲੋ. ਪਤਿਟ੍ਠਿਤਂ ਸੇਵਾਲਨ੍ਤਿ ਸਮ੍ਬਨ੍ਧੋ. ਯਤ੍ਥ ਕਤ੍ਥਚੀਤਿ ਮੂਲੇ ਵਾ ਨਲ਼ੇ ਵਾ ਪਤ੍ਤੇ ਵਾ. ਉਦ੍ਧਰਿਤ੍ਵਾਤਿ ਉਪ੍ਪਾਟੇਤ੍ਵਾ. ‘‘ਹਤ੍ਥੇਹੀ’’ਤਿ ਪਦਂ ‘‘ਵਿਯੂਹਿਤ੍ਵਾ’’ਤਿ ਪਦੇ ਕਰਣਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਸ੍ਸਾਤਿ ਸੇਵਾਲਸ੍ਸ. ਏਤ੍ਤਾਵਤਾਤਿ ਇਤੋ ਚਿਤੋ ਚ ਵਿਯੂਹਨਮਤ੍ਤੇਨ. ਯੋ ਸੇਵਾਲੋ ਨਿਕ੍ਖਮਤਿ, ਤਂ ਸੇਵਾਲਨ੍ਤਿ ਯੋਜਨਾ. ਪਰਿਸ੍ਸਾਵਨਨ੍ਤਰੇਨਾਤਿ ਪਰਿਸ੍ਸਾਵਨਛਿਦ੍ਦੇਨ. ਉਪ੍ਪਲਾਨਿ ਅਸ੍ਮਿਂ ਗਚ੍ਛੇਤਿ ਉਪ੍ਪਲਿਨੀ. ਪਦੁਮਾਨਿ ਅਸ੍ਮਿਂ ਗਚ੍ਛੇਤਿ ਪਦੁਮਿਨੀ, ਇਨੋ, ਇਤ੍ਥਿਲਿਙ੍ਗਜੋਤਕੋ ਈ. ਤਤ੍ਥੇਵਾਤਿ ਉਦਕੇਯੇਵ. ਤਾਨੀਤਿ ਵਲ੍ਲੀਤਿਣਾਨਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਅਨਨ੍ਤਕੋਤਿ ਸਾਸਪਮਤ੍ਤਿਕੋ ਸੇਵਾਲੋ. ਸੋ ਹਿ ਨਤ੍ਥਿ ਅਤ੍ਤਤੋ ਅਨ੍ਤੋ ਲਾਮਕੋ ਸੇਵਾਲੋ ਏਤਸ੍ਸਾਤਿ ਕਤ੍ਵਾ ‘‘ਅਨਨ੍ਤਕੋ’’ਤਿ ਵੁਚ੍ਚਤਿ. ਅਤ੍ਤਨਾਯੇਵ ਹਿ ਸੁਖੁਮੋ, ਤਤੋ ਸੁਖੁਮੋ ਸੇਵਾਲੋ ਨਤ੍ਥੀਤਿ ਅਧਿਪ੍ਪਾਯੋ. ਤਤ੍ਥਾਤਿ ਦੁਕ੍ਕਟਵਤ੍ਥੁਭਾਵੇ. ਤਮ੍ਪੀਤਿ ‘‘ਸਮ੍ਪੁਣ੍ਣਭੂਤਗਾਮਂ ਨ ਹੋਤੀ’’ਤਿ ਵਚਨਮ੍ਪਿ. ਪਿਸਦ੍ਦੋ ਮਹਾਪਚ੍ਚਰਿਆਦਿਅਟ੍ਠਕਥਾਚਰਿਯਾਨਂ ਵਚਨਾਪੇਕ੍ਖੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਨ ਆਗਤੋ, ਤਸ੍ਮਾ ਨ ਸਮੇਤੀਤਿ ਯੋਜਨਾ. ਅਥਾਤਿ ਤਸ੍ਮਿਂ ਅਨਾਗਤੇ. ਏਤਨ੍ਤਿ ਅਨਨ੍ਤਕਸੇਵਾਲਾਦਿਂ. ਗਚ੍ਛਿਸ੍ਸਤੀਤਿ ਵਦੇਯ੍ਯਾਤਿ ਸਮ੍ਬਨ੍ਧੋ. ਤਮ੍ਪੀਤਿ ‘‘ਗਚ੍ਛਿਸ੍ਸਤੀ’’ਤਿ ਵਚਨਮ੍ਪਿ. ਪਿਸਦ੍ਦੋ ਪੁਰਿਮਟ੍ਠਕਥਾਚਰਿਯਾਨਂ ਵਚਨਾਪੇਕ੍ਖੋ.

ਅਭੂਤਗਾਮਮੂਲਤ੍ਤਾ ¶ ਤਾਦਿਸਸ੍ਸ ਬੀਜਗਾਮਸ੍ਸਾਤਿ ਏਤ੍ਥ ਬੀਜਗਾਮੋ ਤਿਵਿਧੋ ਹੋਤਿ – ਯੋ ਸਯਂ ਭੂਤਗਾਮਤੋ ਹੁਤ੍ਵਾ ਅਞ੍ਞਮ੍ਪਿ ਭੂਤਗਾਮਂ ¶ ਜਨੇਤਿ, ਅਮ੍ਬਟ੍ਠਿਆਦਿਕੋ. ਯੋ ਪਨ ਸਯਂ ਭੂਤਗਾਮਤੋ ਹੁਤ੍ਵਾ ਅਞ੍ਞਂ ਪਨ ਭੂਤਗਾਮਂ ਨ ਜਨੇਤਿ, ਤਾਲਨਾਲ਼ਿਕੇਰਾਦਿਖਾਣੁ. ਯੋ ਪਨ ਸਯਮ੍ਪਿ ਭੂਤਗਾਮਤੋ ਅਹੁਤ੍ਵਾ ਅਞ੍ਞਮ੍ਪਿ ਭੂਤਗਾਮਂ ਨ ਜਨੇਤਿ. ਪਾਨੀਯਘਟਾਦੀਨਂ ਬਹਿ ਸੇਵਾਲੋਤਿ. ਭੂਤਗਾਮੋ ਪਨ ਚਤੁਬ੍ਬਿਧੋ ਹੋਤਿ – ਯੋ ਸਯਂ ਬੀਜਗਾਮਤੋ ਹੁਤ੍ਵਾ ਅਞ੍ਞਮ੍ਪਿ ਬੀਜਗਾਮਂ ਜਨੇਤਿ, ਏਤਰਹਿ ਅਮ੍ਬਰੁਕ੍ਖਾਦਿਕੋ. ਯੋ ਪਨ ਸਯਂ ਬੀਜਗਾਮਤੋ ਅਹੁਤ੍ਵਾਵ ਅਞ੍ਞਂ ਬੀਜਗਾਮਂ ਜਨੇਤਿ, ਆਦਿਕਪ੍ਪਕਾਲੇ ਅਮ੍ਬਰੁਕ੍ਖਾਦਿਕੋ. ਯੋ ਪਨ ਸਯਂ ਬੀਜਗਾਮਤੋ ਹੁਤ੍ਵਾ ਅਞ੍ਞਂ ਪਨ ਬੀਜਗਾਮਂ ਨ ਜਨੇਤਿ, ਨੀਲਵਣ੍ਣੋ ਫਲਿਤਕਦਲੀਰੁਕ੍ਖਾਦਿਕੋ. ਯੋ ਪਨ ਸਯਮ੍ਪਿ ਬੀਜਗਾਮਤੋ ਅਹੁਤ੍ਵਾ ਅਞ੍ਞਮ੍ਪਿ ਬੀਜਗਾਮਂ ਨ ਜਨੇਤਿ, ਇਧ ਵੁਤ੍ਤੋ ਅਨਨ੍ਤਕਸੇਵਾਲਾਦਿਕੋਤਿ. ਤਤ੍ਥ ਚਤੁਤ੍ਥਂ ਭੂਤਗਾਮਂ ਸਨ੍ਧਾਯ ਵੁਤ੍ਤਂ ‘‘ਅਭੂਤਗਾਮਮੂਲਕਤ੍ਤਾ ਤਾਦਿਸਸ੍ਸ ਬੀਜਸ੍ਸਾ’’ਤਿ. ਅਯਂ ਪਨ ਤਤਿਯਬੀਜਗਾਮਸ੍ਸ ਚ ਚਤੁਤ੍ਥਭੂਤਗਾਮਸ੍ਸ ਚ ਵਿਸੇਸੋ – ਤਤਿਯਬੀਜਗਾਮੇ ਮੂਲਪਣ੍ਣਾਨਿ ਨ ਪਞ੍ਞਾਯਨ੍ਤਿ, ਚਤੁਤ੍ਥਭੂਤਗਾਮੇ ਤਾਨਿ ਪਞ੍ਞਾਯਨ੍ਤੀਤਿ. ਮੂਲਪਣ੍ਣਾਨਂ ਅਪਞ੍ਞਾਯਨਤ੍ਤਾ ਬੀਜਗਾਮੋਤਿ ਵੁਤ੍ਤੋ, ਤੇਸਂ ਪਞ੍ਞਾਯਨਤ੍ਤਾ ਭੂਤਗਾਮੋਤਿ ਵੁਤ੍ਤੋ. ਇਤਰਥਾ ਹਿ ਵਿਰੋਧੋ ਭਵੇਯ੍ਯਾਤਿ. ਅਤ੍ਤਨੋ ਵਾਦੇ ਪਾਚਿਤ੍ਤਿਯਭਾਵਤੋ ਗਰੁਕਂ, ਮਹਾਪਚ੍ਚਰਿਆਦੀਨਂ ਵਾਦੇ ਦੁਕ੍ਕਟਮਤ੍ਤਭਾਵਤੋ ਲਹੁਕਂ. ਏਤਨ੍ਤਿ ਠਾਨਂ.

ਏਵਂ ਉਦਕਟ੍ਠਂ ਦਸ੍ਸੇਤ੍ਵਾ ਥਲਟ੍ਠਂ ਦਸ੍ਸੇਨ੍ਤੋ ਆਹ ‘‘ਥਲਟ੍ਠੇ’’ਤਿਆਦਿ. ਥਲਟ੍ਠੇ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਤਤ੍ਥਾਤਿ ਹਰਿਤਖਾਣੂਸੁ. ਉਦ੍ਧਂ ਵਡ੍ਢਤੀਤਿ ਨਵਸਾਖਾਨਿਗ੍ਗਮਨੇਨ ਛਿਨ੍ਨਤੋ ਉਪਰਿ ਵਡ੍ਢਤਿ. ਸੋਤਿ ਖਾਣੁ. ਫਲਿਤਾਯ ਕਦਲਿਯਾ ਖਾਣੁ ਬੀਜਗਾਮੇਨ ਸਙ੍ਗਹਿਤੋਤਿ ਯੋਜਨਾ. ਫਲਂ ਸਞ੍ਜਾਤਂ ਏਤਿਸ੍ਸਾਤਿ ਫਲਿਤਾ. ਤਥਾਤਿ ‘‘ਭੂਤਗਾਮੇਨੇਵ ਸਙ੍ਗਹਿਤਾ’’ਤਿ ਪਦਾਨਿ ਆਕਡ੍ਢਤਿ. ਯਦਾਤਿ ਯਸ੍ਮਿਂ ਕਾਲੇ. ਰਤਨਪ੍ਪਮਾਣਾਪੀਤਿ ਹਤ੍ਥਪ੍ਪਮਾਣਾਪਿ. ਅਥਾਤਿ ਅਪਾਦਾਨਤ੍ਥੋ, ਤਤੋ ਰਾਸਿਕਰਣਤੋ ਅਞ੍ਞਨ੍ਤਿ ਅਤ੍ਥੋ. ਭੂਮਿਯਂ ਨਿਖਣਨ੍ਤੀਤਿ ਸਮ੍ਬਨ੍ਧੋ. ‘‘ਮੂਲੇਸੁ ਚੇਵ ਪਣ੍ਣੇਸੁ ਚਾ’’ਤਿ ਏਤ੍ਥ ਚਸਦ੍ਦੋ ਸਮੁਚ੍ਚਯਤ੍ਥੋਵ, ਨ ਵਿਕਪ੍ਪਤ੍ਥੋਤਿ ਆਹ ‘‘ਮੂਲਮਤ੍ਤੇਸੁ ਪਨਾ’’ਤਿਆਦਿ.

ਬੀਜਾਨੀਤਿ ਮੂਲਾਦਿਬੀਜਾਨਿ. ਠਪਿਤਾਨਿ ਹੋਨ੍ਤੀਤਿ ਸਮ੍ਬਨ੍ਧੋ. ‘‘ਉਪਰੀ’’ਤਿ ਪਦੇਨ ਹੇਟ੍ਠਾ ਮੂਲਾਨਿ ਚਾਤਿ ਅਤ੍ਥਂ ਨਯੇਨ ਞਾਪੇਤਿ. ਨ ਅਙ੍ਕੁਰੇ ਨਿਗ੍ਗਤਮਤ੍ਤੇਯੇਵ ¶ , ਅਥ ਖੋ ਹਰਿਤੇ ਨੀਲਪਣ੍ਣਵਣ੍ਣੇ ਜਾਤੇਯੇਵ ਭੂਤਗਾਮਸਙ੍ਗਹੋ ਕਾਤਬ੍ਬੋਤਿ ਆਹ ‘‘ਹਰਿਤੇ’’ਤਿਆਦਿ. ਤਾਲਟ੍ਠੀਨਂ ਮੂਲਨ੍ਤਿ ਸਮ੍ਬਨ੍ਧੋ. ਦਨ੍ਤਸੂਚਿ ਵਿਯਾਤਿ ਹਤ੍ਥਿਦਨ੍ਤਸੂਚਿ ਵਿਯ. ਯਥਾ ਅਸਮ੍ਪੁਣ੍ਣਭੂਤਗਾਮੋ ਤਤਿਯੋ ਕੋਟ੍ਠਾਸੋ ਨ ਆਗਤੋ, ਨ ਏਵਂ ਅਮੂਲਕਭੂਤਗਾਮੋ. ਸੋ ਪਨ ਆਗਤੋਯੇਵਾਤਿ ਆਹ ‘‘ਅਮੂਲਕਭੂਤਗਾਮੇ’’ਤਿ. ਅਮੂਲਿਕਲਤਾ ਵਿਯ ਅਮੂਲਕਭੂਤਗਾਮੇ ਸਙ੍ਗਹਂ ਗਚ੍ਛਤੀਤਿ ਅਤ੍ਥੋ.

ਵਨ੍ਦਾਕਾਤਿ ¶ ਰੁਕ੍ਖਾਦਨੀ. ਸਾ ਹਿ ਸਯਂ ਰੁਕ੍ਖਂ ਨਿਸ੍ਸਾਯ ਜਾਯਨ੍ਤੀਪਿ ਅਤ੍ਤਨੋ ਨਿਸ੍ਸਯਾਨਂ ਰੁਕ੍ਖਾਨਂ ਅਦਨਤ੍ਤਾ ਭਕ੍ਖਨਤ੍ਤਾ ਵਦੀਯਤਿ ਥੁਤੀਯਤੀਤਿ ‘‘ਵਨ੍ਦਾਕਾ’’ਤਿ ਵੁਚ੍ਚਤਿ. ਅਞ੍ਞਾ ਵਾਤਿ ਵਨ੍ਦਾਕਾਯ ਅਞ੍ਞਾ ਵਾ. ਤਨ੍ਤਿ ਵਨ੍ਦਾਕਾਦਿਂ. ਤਤੋਤਿ ਰੁਕ੍ਖਤੋ. ਵਨਨ੍ਤਿ ਖੁਦ੍ਦਕੋ ਗਚ੍ਛੋ. ਪਗੁਮ੍ਬੋਤਿ ਮਹਾਗਚ੍ਛੋ. ਦਣ੍ਡਕੋਤਿ ਰੁਕ੍ਖੋ ਦਣ੍ਡਯੋਗਤੋ. ਤਸ੍ਸਾਪੀਤਿ ਅਮੂਲਿਕਲਤਾਯਪਿ. ਅਯਮੇਵ ਵਿਨਿਚ੍ਛਯੋਤਿ ਵਨ੍ਦਾਕਾਦਿਕਸ੍ਸ ਵਿਨਿਚ੍ਛਯੋ ਵਿਯ ਅਯਂ ਵਿਨਿਚ੍ਛਯੋ ਦਟ੍ਠਬ੍ਬੋਤਿ ਯੋਜਨਾ. ‘‘ਦ੍ਵੇ ਤੀਣਿ ਪਤ੍ਤਾਨੀ’’ਤਿ ਵੁਤ੍ਤਤ੍ਤਾ ਏਕਪਤ੍ਤੋ ਸਞ੍ਜਾਯਨ੍ਤੋਪਿ ਅਗ੍ਗਬੀਜਸਙ੍ਗਹਂ ਗਚ੍ਛਤੀਤਿ ਅਤ੍ਥੋ. ‘‘ਅਨੁਪਸਮ੍ਪਨ੍ਨੇਨਾ’’ਤਿ ਪਦਂ ‘‘ਲਿਤ੍ਤਸ੍ਸਾ’’ਤਿ ਪਦੇ ਕਤ੍ਤਾ. ਨਿਦਾਘਸਮਯੇਤਿ ਗਿਮ੍ਹਕਾਲੇ. ਅਬ੍ਬੋਹਾਰਿਕੋਤਿ ਆਪਤ੍ਤਿਯਾ ਅਙ੍ਗਨ੍ਤਿ ਨ ਵੋਹਰਿਤਬ੍ਬੋ. ਵੋਹਰਿਤੁਂ ਨ ਅਰਹਤੀਤਿ ਅਤ੍ਥੋ. ਏਤਨ੍ਤਿ ਅਬ੍ਬੋਹਾਰਿਕਤਂ, ‘‘ਸਚੇ…ਪੇ… ਪਮਜ੍ਜਿਤਬ੍ਬਾ’’ਤਿ ਵਚਨਂ ਵਾ.

ਅਹਿਂ ਸਪ੍ਪਂ ਛਾਦੇਤੀਤਿ ਅਹਿਚ੍ਛਤ੍ਤਂ, ਤਂਯੇਵ ਅਹਿਚ੍ਛਤ੍ਤਕਂ. ਯਥਾਕਥਞ੍ਚਿ ਹਿ ਬ੍ਯੁਪ੍ਪਤ੍ਤਿ, ਰੁਲ਼੍ਹਿਯਾ ਅਤ੍ਥਵਿਨਿਚ੍ਛਯੋ. ਤਸ੍ਮਾਤਿ ਤਤੋ ਵਿਕੋਪਨਤੋ. ਤਤ੍ਥਾਤਿ ਅਹਿਚ੍ਛਤ੍ਤਕੇ. ਹੇਟ੍ਠਾ ‘‘ਉਦਕਪਪ੍ਪਟਕੋ’’ਤਿ ਵਤ੍ਵਾ ਇਧ ‘‘ਰੁਕ੍ਖਪਪ੍ਪਟਿਕਾਯਪੀ’’ਤਿ ਵੁਤ੍ਤਤ੍ਤਾ ਪਪ੍ਪਟਕਸਦ੍ਦੋ ਦ੍ਵਿਲਿਙ੍ਗੋਤਿ ਦਟ੍ਠਬ੍ਬੋ. ਤਨ੍ਤਿ ਪਪ੍ਪਟਿਕਂ. ਠਿਤਂ ਨਿਯ੍ਯਾਸਨ੍ਤਿ ਸਮ੍ਬਨ੍ਧੋ. ਏਵਂ ‘‘ਲਗ੍ਗ’’ਨ੍ਤਿ ਏਤ੍ਥਾਪਿ. ਹਤ੍ਥਕੁਕ੍ਕੁਚ੍ਚੇਨਾਤਿ ਹਤ੍ਥਲੋਲੇਨ. ‘‘ਛਿਨ੍ਦਨ੍ਤਸ੍ਸਾਪੀ’’ਤਿ ਪਦੇ ਹੇਤੁ.

ਵਾਸਤ੍ਥਿਕੇਨਾਤਿ ਵਾਸਂ ਇਚ੍ਛਨ੍ਤੇਨ. ‘‘ਓਚਿਨਾਪੇਤਬ੍ਬਾ’’ਤਿ ਪਦੇ ਕਤ੍ਤਾ. ਉਪ੍ਪਾਟੇਨ੍ਤੇਹੀਤਿ ਉਦ੍ਧਰਨ੍ਤੇਹਿ. ਤੇਸਨ੍ਤਿ ਸਾਮਣੇਰਾਨਂ. ਸਾਖਂ ਗਹਿਤਨ੍ਤਿ ਸਮ੍ਬਨ੍ਧੋ. ਠਪਿਤਸ੍ਸ ਸਿਙ੍ਗੀਵੇਰਸ੍ਸਾਤਿ ਯੋਜਨਾ.

ਛਿਜ੍ਜਨਕਨ੍ਤਿ ¶ ਛਿਜ੍ਜਨਯੁਤ੍ਤਂ, ਛਿਜ੍ਜਨਾਰਹਨ੍ਤਿ ਅਤ੍ਥੋ. ‘‘ਚਙ੍ਕਮਿਤਟ੍ਠਾਨਂ ਦਸ੍ਸੇਸ੍ਸਾਮੀ’’ਤਿ ਇਮਿਨਾ ਵਤ੍ਤਸੀਸੇਨ ਚਙ੍ਕਮਨਂ ਵਟ੍ਟਤੀਤਿ ਦਸ੍ਸੇਤਿ. ‘‘ਭਿਜ੍ਜਤੀ’’ਤਿ ਇਮਿਨਾ ਅਭਿਜ੍ਜਮਾਨੇ ਗਣ੍ਠਿਪਿ ਕਾਤਬ੍ਬੋਤਿ ਦਸ੍ਸੇਤਿ. ਦਾਰੁਮਕ੍ਕਟਕਨ੍ਤਿ ਮਕ੍ਕਟਸ੍ਸ ਹਤ੍ਥੋ ਮਕ੍ਕਟੋ ਉਪਚਾਰੇਨ, ਮਕ੍ਕਟੋ ਵਿਯਾਤਿ ਮਕ੍ਕਟਕੋ, ਸਦਿਸਤ੍ਥੇ ਕੋ. ਦਾਰੁਸਙ੍ਖਾਤੋ ਮਕ੍ਕਟਕੋ ਦਾਰੁਮਕ੍ਕਟਕੋ. ਤਂ ਆਕੋਟੇਨ੍ਤੀਤਿ ਸਮ੍ਬਨ੍ਧੋ. ਅਨਿਯਾਮਿਤਤ੍ਤਾਤਿ ਇਮਨ੍ਤਿ ਅਨਿਯਾਮਿਤਤ੍ਤਾ ਵਚਨਸ੍ਸ. ਇਦਂ ਮਹਾਸਾਮਞ੍ਞਂ, ਵਿਸੇਸਸਾਮਞ੍ਞਮ੍ਪਿ ਵਟ੍ਟਤੀਤਿ ਆਹ ‘‘ਨਾਮਂ ਗਹੇਤ੍ਵਾਪੀ’’ਤਿਆਦਿ. ਸਬ੍ਬਨ੍ਤਿ ਸਬ੍ਬਂ ਵਚਨਂ.

‘‘ਇਮਂ ਜਾਨਾਤਿਆਦੀਸੂ’’ਤਿ ਪਦਂ ‘‘ਏਵਮਤ੍ਥੋ ਦਟ੍ਠਬ੍ਬੋ’’ਤਿ ਪਦੇ ਆਧਾਰੋ. ਇਮਂ ਮੂਲਭੇਸਜ੍ਜਂ ਜਾਨਾਤਿ ਇਮਂ ਮੂਲਭੇਸਜ੍ਜਂ ਯੋਜਿਤੁਂ ਜਾਨਾਤਿ ਯੋਜਨਾ. ਏਤ੍ਤਾਵਤਾਤਿ ‘‘ਇਮਂ ਜਾਨਾ’’ਤਿਆਦਿਵਚਨਮਤ੍ਤੇਨ. ਕਪ੍ਪਿਯਨ੍ਤਿ ਸਮਣਵੋਹਾਰੇਨ, ਵੋਹਾਰਸ੍ਸ ਵਾ ਯੁਤ੍ਤਂ ਅਨੁਰੂਪਂ. ਏਤ੍ਥਾਤਿ ‘‘ਕਪ੍ਪਿਯਂ ¶ ਕਾਤਬ੍ਬ’’ਨ੍ਤਿ ਵਚਨੇ. ਨਿਬ੍ਬਟ੍ਟਬੀਜਮੇਵਾਤਿ ਫਲਤੋ ਨਿਬ੍ਬਟ੍ਟੇਤ੍ਵਾ ਵਿਸੁਂ ਕਤਂ ਬੀਜਂ ਏਵ. ਤਤ੍ਥਾਤਿ ਸੁਤ੍ਤੇ. ਕਰੋਨ੍ਤੇਨ ਭਿਕ੍ਖੁਨਾ ਕਾਤਬ੍ਬਨ੍ਤਿ ਯੋਜਨਾ. ‘‘ਕਪ੍ਪਿਯਨ੍ਤਿ ਵਤ੍ਵਾਵਾ’’ਤਿ ਇਮਿਨਾ ਪਠਮਂ ਕਤ੍ਵਾ ਅਗ੍ਗਿਸਤ੍ਥਨਖਾਨਿ ਉਦ੍ਧਰਿਤ੍ਵਾ ਪਚ੍ਛਾ ਵਤ੍ਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਲੋਹਮਯਸਤ੍ਥਸ੍ਸਾਤਿ ਅਯਤਮ੍ਬਾਦਿਲੋਹਮਯਸ੍ਸ ਸਤ੍ਥਸ੍ਸ. ਤੇਹੀਤਿ ਮਨੁਸ੍ਸਾਦੀਨਂ ਨਖੇਹਿ. ਤੇਹੀਤਿ ਅਸ੍ਸਾਦੀਨਂ ਖੁਰੇਹਿ. ਤੇਹੀਤਿ ਹਤ੍ਥਿਨਖੇਹਿ. ਯੇਹੀਤਿ ਨਖੇਹਿ. ਤਤ੍ਥਜਾਤਕੇਹਿਪੀਤਿ ਤਸ੍ਮਿਂ ਸਤ੍ਥੇ ਜਾਤਕੇਹਿਪਿ, ਨਖੇਹੀਤਿ ਸਮ੍ਬਨ੍ਧੋ.

ਤਤ੍ਥਾਤਿ ਪੁਰਿਮਵਚਨਾਪੇਕ੍ਖਂ. ‘‘ਕਪ੍ਪਿਯਂ ਕਰੋਨ੍ਤੇਨਾ’’ਤਿਆਦਿਵਚਨਮਪੇਕ੍ਖਤਿ. ‘‘ਉਚ੍ਛੁਂ ਕਪ੍ਪਿਯਂ ਕਰਿਸ੍ਸਾਮੀ’’ਤਿ ਉਚ੍ਛੁਮੇਵ ਵਿਜ੍ਝਤਿ, ਪਗੇਵ. ‘‘ਦਾਰੁਂ ਕਪ੍ਪਿਯਂ ਕਰਿਸ੍ਸਾਮੀ’’ਤਿ ਉਚ੍ਛੁਂ ਵਿਜ੍ਝਤਿ, ‘‘ਦਾਰੁਂ ਕਪ੍ਪਿਯਂ ਕਰਿਸ੍ਸਾਮੀ’’ਤਿ ਦਾਰੁਮੇਵ ਵਾ ਵਿਜ੍ਝਤਿ, ਵਟ੍ਟਤਿ ਏਕਾਬਦ੍ਧਤ੍ਤਾਤਿ ਵਦਨ੍ਤਿ. ਤਨ੍ਤਿ ਰਜ੍ਜੁਂ ਵਾ ਵਲ੍ਲਿਂ ਵਾ. ਸਬ੍ਬਂ ਖਣ੍ਡਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਮਰਿਚਪਕ੍ਕੇਸੁ. ਕਟਾਹਨ੍ਤਿ ਏਕਾਯ ਭਾਜਨਵਿਕਤਿਯਾ ਨਾਮਮੇਤਂ. ਇਧ ਪਨ ਬੀਜਾਨਂ ਭਾਜਨਭਾਵੇਨ ਤਂਸਦਿਸਤ੍ਤਾ ਫਲਫੇਗ੍ਗੁਪਿ ‘‘ਕਟਾਹ’’ਨ੍ਤਿ ਵੁਚ੍ਚਤਿ. ਏਕਾਬਦ੍ਧਨ੍ਤਿ ਕਟਾਹੇਨ ਏਕਤੋ ਆਬਦ੍ਧਂ.

ਤਾਨੀਤਿ ਤਿਣਾਨਿ. ਤੇਨਾਤਿ ਰੁਕ੍ਖਪਵਟ੍ਟਨਾਦਿਨਾ. ਤਤ੍ਰਾਤਿ ਤਸ੍ਮਿਂ ਠਪਨਪਾਤਨਟ੍ਠਾਨੇ. ‘‘ਮਨੁਸ੍ਸਵਿਗ੍ਗਹਪਾਰਾਜਿਕਵਣ੍ਣਨਾਯ’’ਨ੍ਤਿ ਪਦਂ ‘‘ਵੁਤ੍ਤ’’ਨ੍ਤਿ ਪਦੇ ¶ ਸਾਮਞ੍ਞਾਧਾਰੋ. ਭਿਕ੍ਖੁ ਅਜ੍ਝੋਤ੍ਥਟੋ ਹੋਤੀਤਿ ਸਮ੍ਬਨ੍ਧੋ. ਓਪਾਤੇਤਿ ਆਵਾਟੇ. ਸੋ ਹਿ ਅਵਪਤਨਟ੍ਠਾਨਤ੍ਤਾ ‘‘ਓਪਾਤੋ’’ਤਿ ਵੁਚ੍ਚਤਿ. ਰੁਕ੍ਖਨ੍ਤਿ ਅਜ੍ਝੋਤ੍ਥਟਰੁਕ੍ਖਂ. ਭੂਮਿਨ੍ਤਿ ਓਪਾਤਥਿਰਭੂਮਿਂ. ਜੀਵਿਤਹੇਤੂਤਿ ਨਿਮਿਤ੍ਤਤ੍ਥੇ ਪਚ੍ਚਤ੍ਤਵਚਨਂ, ਜੀਵਿਤਕਾਰਣਾਤਿ ਅਤ੍ਥੋ. ‘‘ਭਿਕ੍ਖੁਨਾ’’ਤਿ ਪਦਂ ‘‘ਨਿਕ੍ਖਾਮੇਤੁ’’ਨ੍ਤਿ ਪਦੇ ਭਾਵਕਤ੍ਤਾ, ਕਾਰਿਤਕਤ੍ਤਾ ਵਾ. ‘‘ਅਜ੍ਝੋਤ੍ਥਟਭਿਕ੍ਖੁ’’ਨ੍ਤਿ ਵਾ ‘‘ਓਪਾਤਭਿਕ੍ਖੁ’’ਨ੍ਤਿ ਵਾ ਕਾਰਿਤਕਮ੍ਮਂ ਅਜ੍ਝਾਹਰਿਤਬ੍ਬਂ. ਤਤ੍ਥਾਤਿ ਅਨਾਪਤ੍ਤਿਭਾਵੇ, ਅਨਾਪਤ੍ਤਿਭਾਵਸ੍ਸ ਵਾ. ਏਤਸ੍ਸਾਤਿ ਸੁਤ੍ਤਸ੍ਸ. ਪਰੋ ਪਨ ਕਾਰੁਞ੍ਞੇਨ ਕਰੋਤੀਤਿ ਸਮ੍ਬਨ੍ਧੋ. ਏਤਮ੍ਪੀਤਿ ਕਾਰੁਞ੍ਞਮ੍ਪਿ. ਹੀਤਿ ਸਚ੍ਚਂ, ਯਸ੍ਮਾ ਵਾਤਿ. ਪਠਮਂ.

੨. ਅਞ੍ਞਵਾਦਕਸਿਕ੍ਖਾਪਦਂ

੯੪. ਦੁਤਿਯੇ ਅਨਾਚਾਰਨ੍ਤਿ ਅਚਰਿਤਬ੍ਬਂ ਕਾਯਵਚੀਦ੍ਵਾਰਵੀਤਿਕ੍ਕਮਂ. ਸਬ੍ਬਨਾਮਸ੍ਸ ਅਨਿਯਮਤ੍ਥਤ੍ਤਾ ਇਧ ਵਚਨਨ੍ਤਿ ਆਹ ‘‘ਅਞ੍ਞੇਨ ਵਚਨੇਨ ਅਞ੍ਞਂ ਵਚਨ’’ਨ੍ਤਿ. ਸੋਤਿ ਭਿਕ੍ਖੁ, ਵਦਤੀਤਿ ਸਮ੍ਬਨ੍ਧੋ. ਕੋਤਿ ਕੋ ਪੁਗ੍ਗਲੋ. ਕਿਨ੍ਤਿ ਕਿਂ ਆਪਤ੍ਤਿਂ. ਕਿਸ੍ਮਿਨ੍ਤਿ ਕਿਸ੍ਮਿਂ ਵਤ੍ਥੁਸ੍ਮਿਂ. ਕਿਨ੍ਤਿ ਕਿਂ ਕਮ੍ਮਂ. ਕਨ੍ਤਿ ਕਂ ਪੁਗ੍ਗਲਂ. ਕਿਨ੍ਤਿ ਕਿਂ ਵਚਨਂ.

ਏਤ੍ਥਾਤਿ ¶ ‘‘ਕੋ ਆਪਨ੍ਨੋ’’ਤਿਆਦਿਪਾਲ਼ਿਯਂ. ‘‘ਭਿਕ੍ਖੂਹੀ’’ਤਿ ਪਦਂ ‘‘ਵੁਤ੍ਤੋ’’ਤਿ ਪਦੇ ਕਤ੍ਤਾ. ਅਸਾਰੁਪ੍ਪਨ੍ਤਿ ਭਿਕ੍ਖੂਨਂ ਅਸਾਰੁਪ੍ਪਂ. ਏਸੋਤਿ ਏਸੋ ਅਤ੍ਥੋ, ਵਿਭਵੋਤਿ ਅਤ੍ਥੋ. ਏਤਨ੍ਤਿ ਵਤ੍ਥੁ. ਭਣਨ੍ਤੋ ਵਾ ਹੁਤ੍ਵਾ ਅਞ੍ਞੇਨਞ੍ਞਂ ਪਟਿਚਰਤੀਤਿ ਸਮ੍ਬਨ੍ਧੋ. ਏਤ੍ਥਾਤਿ ਪਟਿਚ੍ਛਨ੍ਨਾਸਨੇ. ਸੋਤਨ੍ਤਿ ਸੋਤਦ੍ਵਾਰਂ. ਚਕ੍ਖੁਨ੍ਤਿ ਚਕ੍ਖੁਦ੍ਵਾਰਂ.

੯੮. ਅਞ੍ਞਨ੍ਤਿ ਪੁਚ੍ਛਿਤਤ੍ਥਤੋ ਅਞ੍ਞਂ ਅਪੁਚ੍ਛਿਤਮਤ੍ਥਂ. ਭਾਵਪ੍ਪਧਾਨੋਯਂ ਕਤ੍ਤੁਨਿਦ੍ਦੇਸੋਤਿ ਆਹ ‘‘ਅਞ੍ਞੇਨਞ੍ਞਂ ਪਟਿਚਰਣਸ੍ਸੇਤਂ ਨਾਮ’’ਨ੍ਤਿ. ਤੁਣ੍ਹੀਭਾਵਸ੍ਸਾਤਿ ਅਭਾਸਨਸ੍ਸ. ਆਤ੍ਯੂਪਸਗ੍ਗੋ ਲੁਤ੍ਤਨਿਦ੍ਦਿਟ੍ਠੋਤਿ ਆਹ ‘‘ਆਰੋਪੇਤੂ’’ਤਿ. ਏਵਂ ‘‘ਅਰੋਪਿਤੇ’’ਤਿ ਏਤ੍ਥਪਿ. ਤੇਨਾਹ ‘‘ਅਨਾਰੋਪਿਤੇ’’ਤਿ.

੧੦੧. ਤਨ੍ਤਿ ਅਞ੍ਞਵਾਦਕਵਿਹੇਸਕਰੋਪਨਕਮ੍ਮਂ. ਅਸ੍ਸਾਤਿ ਭਵੇਯ੍ਯ, ਹੋਤਿ ਵਾ.

੧੦੨. ਕਿਨ੍ਤਿ ¶ ਕਿਂ ਵਚਨਂ. ਯੇਨਾਤਿ ਯੇਨ ਬ੍ਯਾਧਿਨਾ ਕਥੇਤੁਂ ਨ ਸਕ੍ਕੋਤਿ, ਤਾਦਿਸੋ ਬ੍ਯਾਧਿ ਮੁਖੇ ਹੋਤੀਤਿ ਯੋਜਨਾ. ਤਪ੍ਪਚ੍ਚਯਾਤਿ ਤਤੋ ਕਥਿਤਕਾਰਣਾਤਿ. ਦੁਤਿਯਂ.

੩. ਉਜ੍ਝਾਪਨਕਸਿਕ੍ਖਾਪਦਂ

੧੦੩. ਤਤਿਯੇ ਭਿਕ੍ਖੂ ਉਜ੍ਝਾਪੇਨ੍ਤੀਤਿ ਏਤ੍ਥ ‘‘ਭਿਕ੍ਖੂ’’ਤਿ ਕਾਰਿਤਕਮ੍ਮਤ੍ਤਾ ਕਰਣਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਤੇਹਿ ਭਿਕ੍ਖੂਹੀ’’ਤਿ. ਓਕਾਰਵਿਪਰੀਤੋ ਉਕਾਰੋਤਿ ਚ ਝੇਸਦ੍ਦੋ ਞਾਣਤ੍ਥੋਤਿ ਚ ਦਸ੍ਸੇਨ੍ਤੋ ਆਹ ‘‘ਅਵਜਾਨਾਪੇਨ੍ਤੀ’’ਤਿ. ‘‘ਤਂ ਆਯਸ੍ਮਨ੍ਤ’’ਨ੍ਤਿ ਪਦਂ ‘‘ਅਵਜਾਨਾਪੇਨ੍ਤੀ’’ਤਿ ਪਦੇ ਧਾਤੁਕਮ੍ਮਂ. ਅਨੇਕਤ੍ਥਤ੍ਤਾ ਧਾਤੂਨਂ ਝੇਸਦ੍ਦੋ ਓਲੋਕਨਤ੍ਥੋ ਚ ਚਿਨ੍ਤਨਤ੍ਥੋ ਚ ਹੋਤਿ, ਤੇਨਾਹ ‘‘ਓਲੋਕਾਪੇਨ੍ਤੀ’’ਤਿਆਦਿ. ਏਤ੍ਥਾਤਿ ‘‘ਭਿਕ੍ਖੂ ਉਜ੍ਝਾਪੇਨ੍ਤੀ’’ਤਿ ਪਦੇ. ਛਨ੍ਦਾਯਾਤਿ ਛਨ੍ਦਤ੍ਥਂ. ਯੇਸਂ ਸੇਨਾਸਨਾਨਿ ਚ ਪਞ੍ਞਪੇਤਿ, ਭਤ੍ਤਾਨਿ ਚ ਉਦ੍ਦਿਸਤਿ, ਤੇਸਂ ਅਤ੍ਤਨਿ ਪੇਮਤ੍ਥਨ੍ਤਿ ਅਤ੍ਥੋ. ਅਟ੍ਠਕਥਾਯਂ ਪਨ ‘‘ਛਨ੍ਦਾਯਾਤਿ ਛਨ੍ਦੇਨਾ’’ਤਿ ਵੁਤ੍ਤਂ. ਇਮਿਨਾ ਲਿਙ੍ਗਵਿਪਲ੍ਲਾਸਨਯੋ ਵੁਤ੍ਤੋ. ਪਰੇਸਂ ਅਤ੍ਤਨੋ ਪੇਮੇਨਾਤਿ ਅਤ੍ਥੋ. ਪਕ੍ਖਪਾਤੇਨਾਤਿ ਅਤ੍ਤਨੋ ਪਕ੍ਖੇ ਪਾਤਾਪਨੇਨ.

੧੦੫. ਉਜ੍ਝਾਪੇਨ੍ਤਿ ਅਨੇਨਾਤਿ ਉਜ੍ਝਾਪਨਕਂ. ਖਿਯ੍ਯਨ੍ਤਿ ਅਨੇਨਾਤਿ ਖਿਯ੍ਯਨਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਯੇਨ ਵਚਨੇਨਾ’’ਤਿਆਦਿ.

੧੦੬. ਉਪਸਮ੍ਪਨ੍ਨਂ ਸਙ੍ਘੇਨ ਸਮ੍ਮਤਂ ਮਙ੍ਕੁਕਤ੍ਤੁਕਾਮੋਤਿ ਸਮ੍ਬਨ੍ਧਂ ਦਸ੍ਸੇਨ੍ਤੋ ਆਹ ‘‘ਉਪਸਮ੍ਪਨ੍ਨਂ ਸਙ੍ਘੇਨ ¶ ਸਮ੍ਮਤ’’ਨ੍ਤਿਆਦਿ. ਸਮ੍ਬਜ੍ਝਨਂ ਸਮ੍ਬਨ੍ਧੋ, ਕਾਤਬ੍ਬੋਤਿ ਯੋਜਨਾ. ਉਪਸਮ੍ਪਨ੍ਨਸ੍ਸ ਸਙ੍ਘੇਨ ਸਮ੍ਮਤਸ੍ਸ ਅਵਣ੍ਣਂ ਕਤ੍ਤੁਕਾਮੋ ਅਯਸਂ ਕਤ੍ਤੁਕਾਮੋਤਿ ਵਿਭਤ੍ਤਿਵਿਪਰਿਣਾਮੇਨ ਸਮ੍ਬਨ੍ਧਂ ਦਸ੍ਸੇਨ੍ਤੋ ਆਹ ‘‘ਵਿਭਤ੍ਤਿਵਿਪਰਿਣਾਮੋ ਕਾਤਬ੍ਬੋ’’ਤਿ. ‘‘ਵਸੇਨਾ’’ਤਿ ਪਦਂ ਵਿਭਤ੍ਤਿਵਿਪਰਿਣਾਮੋ ਕਾਤਬ੍ਬੋ’’ਤਿ ਪਦੇ ਵਿਸੇਸਨਂ. ਯਸ੍ਮਾ ਵਿਸੇਸੋ ਨਤ੍ਥਿ, ਤਸ੍ਮਾ ਕਤਨ੍ਤਿ ਯੋਜਨਾ. ਤਨ੍ਤਿ ‘‘ਖਿਯ੍ਯਨਕ’’ਨ੍ਤਿ ਪਦਂ. ਸੋ ਚ ਭਿਕ੍ਖੂਤਿ ਉਜ੍ਝਾਪਨਕੋ ਚ ਖਿਯ੍ਯਨਕੋ ਚ ਸੋ ਚ ਭਿਕ੍ਖੁ. ਅਥਾਤਿ ਤਸ੍ਮਾ ਉਜ੍ਝਾਪਨਕਖਿਯ੍ਯਨਕਕਰਤ੍ਤਾ. ਅਸ੍ਸਾਤਿ ਭਿਕ੍ਖੁਨੋ. ਅਸ੍ਸਾਤਿ ਭਵੇਯ੍ਯ.

‘‘ਉਪਸਮ੍ਪਨ੍ਨ’’ਨ੍ਤਿ ¶ ਪਦਂ ‘‘ਉਜ੍ਝਾਪੇਤੀ’’ਤਿ ਪਦੇ ਧਾਤੁਕਮ੍ਮਂ ‘‘ਅਨੁਪਸਮ੍ਪਨ੍ਨ’’ਨ੍ਤਿ ਪਦਂ ਕਾਰਿਤਕਮ੍ਮਂ, ‘‘ਅਨੁਪਸਮ੍ਪਨ੍ਨ’’ਨ੍ਤਿ ਪਦਂ ‘‘ਉਜ੍ਝਾਪੇਤੀ’’ਤਿ ਕਾਰਿਤਕਿਰਿਯਂ ਅਪੇਕ੍ਖਿਤ੍ਵਾ ਕਮ੍ਮਂ ਹੋਤਿ. ‘‘ਖਿਯ੍ਯਤੀ’’ਤਿ ਸੁਦ੍ਧਕਿਰਿਯਾਯ ਅਪੇਕ੍ਖਾਯ ਵਿਭਤ੍ਤਿਵਿਪਲ੍ਲਾਸੋ ਹੋਤੀਤਿ ਆਹ ‘‘ਤਸ੍ਸ ਵਾ’’ਤਿਆਦਿ. ਤਸ੍ਸਾਤਿ ਅਨੁਪਸਮ੍ਪਨ੍ਨਸ੍ਸ ਸਨ੍ਤਿਕੇਤਿ ਸਮ੍ਬਨ੍ਧੋ. ਤਨ੍ਤਿ ਸਙ੍ਘੇਨ ਸਮ੍ਮਤਂ ਉਪਸਮ੍ਪਨ੍ਨਂ. ‘‘ਸਙ੍ਘੇਨ ਅਸਮ੍ਮਤ’’ਨ੍ਤਿ ਏਤ੍ਥ ਨ ਅਪਲੋਕਨਕਮ੍ਮੇਨ ਅਸਮ੍ਮਤਂ, ਕਮ੍ਮਵਾਚਾਯ ਪਨ ਅਸਮ੍ਮਤਨ੍ਤਿ ਆਹ ‘‘ਕਮ੍ਮਵਾਚਾਯਾ’’ਤਿਆਦਿ. ਦ੍ਵੇ ਤਯੋ ਹੁਤ੍ਵਾ ਕਮ੍ਮਵਾਚਾਯ ਸਮ੍ਮਨਿਤੁਮਸਕ੍ਕੁਣੇਯ੍ਯਤ੍ਤਾ ਅਸਮ੍ਮਤਨ੍ਤਿ ਚ ਦਸ੍ਸੇਨ੍ਤੋ ਆਹ ‘‘ਯਤ੍ਰਾ’’ਤਿਆਦਿ. ਯਤ੍ਰਾਤਿ ਯਸ੍ਮਿਂ ਵਿਹਾਰੇ. ‘‘ਅਨੁਪਸਮ੍ਪਨ੍ਨਂ ਸਙ੍ਘੇਨ ਸਮ੍ਮਤ’’ਨ੍ਤਿ ਏਤ੍ਥ ਅਨੁਪਸਮ੍ਪਨ੍ਨਸ੍ਸ ਸਮ੍ਮੁਤਿਯੋ ਦਾਤੁਮਸਕ੍ਕੁਣੇਯ੍ਯਤ੍ਤਾ ਪੁਬ੍ਬਵੋਹਾਰਵਸੇਨ ਸਮ੍ਮਤਨ੍ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਕਿਞ੍ਚਾਪੀ’’ਤਿਆਦਿ. ਤਨ੍ਤਿ ਅਨੁਪਸਮ੍ਪਨ੍ਨਭਾਵੇ ਠਿਤਂ. ਬ੍ਯਤ੍ਤਸ੍ਸਾਤਿ ਵਿਯਤ੍ਤਸ੍ਸ. ਸਙ੍ਘੇਨ ਵਾ ਕਤੋਤਿ ਯੋਜਨਾਤਿ. ਤਤਿਯਂ.

੪. ਪਠਮਸੇਨਾਸਨਸਿਕ੍ਖਾਪਦਂ

੧੦੮. ਚਤੁਤ੍ਥੇ ਹਿਮਮੇਵ ਹਿਮਨ੍ਤੋ, ਹਿਮਨ੍ਤੇ ਨਿਯੁਤ੍ਤੋ ਹੇਮਨ੍ਤਿਕੋ, ਕਾਲੋਤਿ ਆਹ ‘‘ਹੇਮਨ੍ਤਕਾਲੇ’’ਤਿ. ਓਤਾਪੇਨ੍ਤਾ ਪਕ੍ਕਮਿਂਸੂਤਿ ਸਮ੍ਬਨ੍ਧੋ. ਕਾਲਸਦ੍ਦਸ੍ਸ ਸਮ੍ਬਨ੍ਧਿਸਦ੍ਦਤ੍ਤਾ ਸਮ੍ਬਨ੍ਧਾਪੇਕ੍ਖੋਤਿ ਆਹ ‘‘ਯਸ੍ਸ ਕਸ੍ਸਚੀ’’ਤਿ. ਹਿਮਵਸ੍ਸੇਨਾਤਿ ਹਿਮੇਨ ਚ ਵਸ੍ਸੇਨ ਚ.

੧੧੦. ‘‘ਵਸ੍ਸਿਕੋ’’ਤਿ ਨ ਸਙ੍ਕੇਤਾਤਿ ਅਵਸ੍ਸਿਕਸਙ੍ਕੇਤਾ. ‘‘ਅਟ੍ਠ ਮਾਸੇ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ‘‘ਅਵਸ੍ਸਿਕਸਙ੍ਕੇਤੇ’’ਤਿ ਵਿਸੇਸਿਤਤ੍ਤਾ ਹੇਮਨ੍ਤਿਕਗਿਮ੍ਹਿਕਮਾਸਾਯੇਵ ਗਹੇਤਬ੍ਬਾਤਿ ਆਹ ‘‘ਚਤ੍ਤਾਰੋ ਹੇਮਨ੍ਤਿਕੇ’’ਤਿਆਦਿ. ਯਤ੍ਥਾਤਿ ਯਸ੍ਮਿਂ ਰੁਕ੍ਖੇ. ਨ ਊਹਦਨ੍ਤੀਤਿ ਸਮ੍ਬਨ੍ਧੋ. ‘‘ਕਾਕਾ ਵਾ’’ਤਿ ਏਤ੍ਥ ਵਾਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨਾਹ ‘‘ਅਞ੍ਞੇ ਵਾ ਸਕੁਨ੍ਤਾ’’ਤਿ. ਤਸ੍ਮਾਤਿ ਯਸ੍ਮਾ ਅਨੁਜਾਨਾਤਿ, ਤਸ੍ਮਾ. ਯਤ੍ਥਾਤਿ ਯਸ੍ਮਿਂ ਰੁਕ੍ਖੇ, ਵਿਸ੍ਸਮਿਤ੍ਵਾ ਗਚ੍ਛਨ੍ਤੀਤਿ ਯੋਜਨਾ. ਯਸ੍ਮਿਨ੍ਤਿ ਰੁਕ੍ਖੇ, ਕਤ੍ਵਾ ਵਸਨ੍ਤੀਤਿ ਯੋਜਨਾ. ਅਟ੍ਠ ਮਾਸੇ ਏਵਾਤਿ ਸਮ੍ਭਵਤੋ ਆਹ ‘‘ਯੇਸੁ ਜਨਪਦੇਸੂ’’ਤਿਆਦਿ ¶ . ਤੇਸੁਪੀਤਿ ਜਨਪਦੇਸੁਪਿ. ਅਵਸ੍ਸਿਕਸਙ੍ਕੇਤੇ ਏਵਾਤਿ ਸਮ੍ਭਵਤੋ ਆਹ ‘‘ਯਤ੍ਥਾ’’ਤਿਆਦਿ. ਯਤ੍ਥਾਤਿ ਯੇਸੁ ¶ ਜਨਪਦੇਸੁ. ‘‘ਵਿਗਤਵਲਾਹਕਂ ਵਿਸੁਦ੍ਧਂ ਨਭਂ ਹੋਤੀ’’ਤਿ ਇਮਿਨਾ ਸਚੇ ਅਵਿਗਤਵਲਾਹਕਂ ਅਵਿਸੁਦ੍ਧਂ ਨਭਂ ਹੋਤਿ, ਨਿਕ੍ਖਿਪਿਤੁਂ ਨ ਵਟ੍ਟਤੀਤਿ ਦੀਪੇਤਿ. ‘‘ਏਵਰੂਪੇ ਕਾਲੇ’’ਤਿ ਪਦਂ ‘‘ਨਿਕ੍ਖਿਪਿਤੁਂ ਵਟ੍ਟਤੀ’’ਤਿ ਪਦੇ ਆਧਾਰੋ.

ਅਬ੍ਭੋਕਾਸਿਕੇਨਾਪੀਤਿ ਅਬ੍ਭੋਕਾਸਧੁਤਙ੍ਗਯੁਤ੍ਤੇਨਾਪਿ. ਪਿਸਦ੍ਦੋ ਰੁਕ੍ਖਮੂਲਿਕਸ੍ਸ ਅਪੇਕ੍ਖਕੋ. ਵਤ੍ਤਂ ਵਿਤ੍ਥਾਰੇਨ੍ਤੋ ਆਹ ‘‘ਤਸ੍ਸ ਹੀ’’ਤਿਆਦਿ. ਤਸ੍ਸਾਤਿ ਅਬ੍ਭੋਕਾਸਿਕਸ੍ਸ. ਹਿਸਦ੍ਦੋ ਵਿਤ੍ਥਾਰਜੋਤਕੋ. ਤਤ੍ਥੇਵਾਤਿ ਪੁਗ੍ਗਲਿਕਮਞ੍ਚਕੇਯੇਵ. ਸਙ੍ਘਿਕਂ ਮਞ੍ਚਨ੍ਤਿ ਸਮ੍ਬਨ੍ਧੋ. ਵੀਤਮਞ੍ਚਕੋਤਿ ਵਾਯਿਤਮਞ੍ਚਕੋ. ਤਸ੍ਮਿਨ੍ਤਿ ਵੀਤਮਞ੍ਚਕੇ. ਪੁਰਾਣਮਞ੍ਚਕੋ ਨਸ੍ਸਨ੍ਤੋਪਿ ਅਨਗ੍ਘੋਤਿ ਆਹ ‘‘ਪੁਰਾਣਮਞ੍ਚਕੋ ਗਹੇਤਬ੍ਬੋ’’ਤਿ. ਚਮ੍ਮੇਨ ਅਵਨਹਿਤਬ੍ਬੋਤਿ ਓਨਦ੍ਧੋ, ਸੋ ਏਵ ਓਨਦ੍ਧਕੋ. ਗਹੇਤ੍ਵਾ ਚ ਪਨ ਪਞ੍ਞਪੇਤ੍ਵਾ ਨਿਪਜ੍ਜਿਤੁਂ ਨ ਵਟ੍ਟਤੀਤਿ ਯੋਜਨਾ. ਅਸਮਯੇਤਿ ਵਸ੍ਸਿਕਸਙ੍ਖਾਤੇ ਅਕਾਲੇ. ਚਤੁਗ੍ਗੁਣੇਨਾਪੀਤਿ ਚਤੁਪਟਲੇਨਪਿ. ਵਟ੍ਟਨ੍ਤਿ ਵਲਾਹਕਾ ਆਵਟ੍ਟਨ੍ਤਿ ਅਸ੍ਮਿਂ ਸਮਯੇਤਿ ਵਟ੍ਟੁਲੋ, ਸੋ ਏਵ ਵਟ੍ਟਲਿਕੋ, ਸਤ੍ਤਾਹਂ ਵਟ੍ਟਲਿਕੋ, ਸਤ੍ਤਾਹੋ ਵਾ ਵਟ੍ਟਲਿਕੋ ਸਤ੍ਤਾਹਵਟ੍ਟਲਿਕੋ, ਸੋ ਆਦਿ ਯੇਸਂ ਤਾਨੀਤਿ ਸਤ੍ਤਾਹਵਟ੍ਟਲਿਕਾਦੀਨਿ. ਆਦਿਸਦ੍ਦੇਨ ਸਤ੍ਤਾਹਤੋ ਊਨਾਧਿਕਾਨਿ ਗਹੇਤਬ੍ਬਾਨਿ. ਕਾਯਾਨੁਗਤਿਕਤ੍ਤਾਤਿ ਕਾਯਂ ਅਨੁਗਮਕਤ੍ਤਾ ਕਾਯਸਦਿਸਤ੍ਤਾਤਿ ਅਤ੍ਥੋ.

ਪਣ੍ਣਕੁਟੀਸੂਤਿ ਪਣ੍ਣੇਨ ਛਾਦਿਤਕੁਟੀਸੁ. ਸਭਾਗਭਿਕ੍ਖੂਨਨ੍ਤਿ ਅਤ੍ਤਨਾ ਸਭਾਗਭਿਕ੍ਖੂਨਂ, ਸਨ੍ਤਿਕਨ੍ਤਿ ਸਮ੍ਬਨ੍ਧੋ. ਅਨੋਵਸ੍ਸਕੇ ਠਾਨੇਤਿ ਯੋਜਨਾ. ਲਗ੍ਗੇਤ੍ਵਾਤਿ ਲਮ੍ਬੇਤ੍ਵਾ, ਅਯਮੇਵ ਵਾ ਪਾਠੋ. ‘‘ਸਮ੍ਮਜ੍ਜਨਿ’’ਨ੍ਤਿ ਪਦਂ ‘‘ਗਹੇਤ੍ਵਾ’’ਤਿ ਪਦੇ ਅਵੁਤ੍ਤਕਮ੍ਮਂ, ‘‘ਠਪੇਤਬ੍ਬਾ’’ਤਿ ਪਦੇ ਵੁਤ੍ਤਕਮ੍ਮਂ. ਧੋਵਿਤ੍ਵਾਤਿ ਸਮ੍ਮਜ੍ਜਨਿਂ ਸੁਦ੍ਧਂ ਕਤ੍ਵਾ. ਉਪੋਸਥਾਗਾਰਾਦੀਸੂਤਿਆਦਿਸਦ੍ਦੇਨ ਪਰਿਵੇਣਾਦੀਨਿ ਗਹੇਤਬ੍ਬਾਨਿ.

ਯੋ ਪਨ ਭਿਕ੍ਖੁ ਗਨ੍ਤੁਕਾਮੋ ਹੋਤਿ, ਤੇਨਾਤਿ ਯੋਜਨਾ. ਤਤ੍ਥਾਤਿ ਸਾਲਾਯਂ. ਯਤ੍ਥ ਕਤ੍ਥਚੀਤਿ ਯਸ੍ਮਿਂ ਕਿਸ੍ਮਿਞ੍ਚਿ ਠਾਨੇ. ਪਾਕਤਿਕਟ੍ਠਾਨੇਤਿ ਪਕਤਿਯਾ ਗਹਿਤਟ੍ਠਾਨੇ. ਤਤ੍ਰ ਤਤ੍ਰੇਵਾਤਿ ਤੇਸੁ ਤੇਸੁ ਚੇਤਿਯਙ੍ਗਣਾਦੀਸੁਯੇਵ ¶ . ਅਸਨਸਾਲਨ੍ਤਿ ਅਸਨ੍ਤਿ ਭਕ੍ਖਨ੍ਤਿ ਅਸ੍ਸਂ ਸਾਲਾਯਨ੍ਤਿ ਅਸਨਾ, ਅਸਨਾ ਚ ਸਾ ਸਾਲਾ ਚੇਤਿ ਅਸਨਸਾਲਾ, ਭੋਜਨਸਾਲਾਤਿ ਅਤ੍ਥੋ. ਤਤ੍ਰਾਤਿ ਤਸ੍ਸ ਸਮ੍ਮਜ੍ਜਨ੍ਤਸ੍ਸ, ਤਸ੍ਮਿਂ ‘‘ਵਤ੍ਤਂ ਜਾਨਿਤਬ੍ਬ’’ਨ੍ਤਿ ਪਾਠੇ ਵਾ. ਮਜ੍ਝਤੋਤਿ ਪਵਿਤ੍ਤਤੋ, ਸੁਦ੍ਧਟ੍ਠਾਨਤੋਤਿ ਅਤ੍ਥੋ. ਪਾਦਟ੍ਠਾਨਾਭਿਮੁਖਾਤਿ ਸਮ੍ਮਜ੍ਜਨ੍ਤਸ੍ਸ ਪਾਦਟ੍ਠਾਨਂ ਅਭਿਮੁਖਾ. ਵਾਲਿਕਾ ਹਰਿਤਬ੍ਬਾਤਿ ਪਂਸੁ ਚ ਵਾਲਿਕਾ ਚ ਅਪਨੇਤਬ੍ਬਾ. ਸਮ੍ਮੁਞ੍ਚਨੀਸਲਾਕਾਯ ਪਰਂ ਪੇਲ੍ਲੇਤਬ੍ਬਾਤਿ ਅਧਿਪ੍ਪਾਯੋ. ਬਹੀਤਿ ਸਮ੍ਮਜ੍ਜਿਤਬ੍ਬਤਲਤੋ ਬਹਿ.

੧੧੧. ਮਸਾਰਕੋਤੀਤਿ ¶ ਏਤ੍ਥ ਇਤਿਸਦ੍ਦੋ ਨਾਮਪਰਿਯਾਯੋ, ਮਸਾਰਕੋ ਨਾਮਾਤਿ ਅਤ੍ਥੋ. ਏਵਂ ਬੁਨ੍ਦਿਕਾਬਦ੍ਧੋਤੀਤਿਆਦੀਸੁਪਿ. ਪਾਦੇ ਮਸਿਤ੍ਵਾ ਵਿਜ੍ਝਿਤ੍ਵਾ ਤਤ੍ਥ ਅਟਨਿਯੋ ਪਵੇਸੇਤਬ੍ਬਾ ਏਤ੍ਥਾਤਿ ਮਸਾਰਕੋ. ਬੁਨ੍ਦੋ ਏਵ ਬੁਨ੍ਦਿਕੋ, ਪਾਦੋ, ਤਸ੍ਮਿਂ ਆਬਦ੍ਧਾ ਬਨ੍ਧਿਤਾ ਅਟਨੀ ਯਸ੍ਸਾਤਿ ਬੁਨ੍ਦਿਕਾਬਦ੍ਧੋ. ਕੁਲ਼ੀਰਸ੍ਸ ਪਾਦੋ ਵਿਯ ਪਾਦੋ ਯਸ੍ਸਾਤਿ ਕੁਲ਼ੀਰਪਾਦਕੋ, ਯਥਾ ਕੁਲ਼ੀਰੋ ਵਙ੍ਕਪਾਦੋ ਹੋਤਿ, ਏਵਂ ਵਙ੍ਕਪਾਦੋਤਿ ਵੁਤ੍ਤਂ ਹੋਤਿ. ਆਹਚ੍ਚ ਅਙ੍ਗੇ ਵਿਜ੍ਝਿਤ੍ਵਾ ਤਤ੍ਥ ਪਵੇਸਿਤੋ ਪਾਦੋ ਯਸ੍ਸਾਤਿ ਆਹਚ੍ਚਪਾਦਕੋ. ਆਣਿਨ੍ਤਿ ਅਗ੍ਗਖਿਲਂ. ਮਞ੍ਚਤਿ ਪੁਗ੍ਗਲਂ ਧਾਰੇਤੀਤਿ ਮਞ੍ਚੋ. ਪੀਠਤਿ ਵਿਸਮਦੁਕ੍ਖਂ ਹਿਂਸਤੀਤਿ ਪੀਠਂ. ਪਣਵੋਤਿ ਏਕੋ ਤੂਰਿਯਵਿਸੇਸੋ, ਤਸ੍ਸ ਸਣ੍ਠਾਨਂ ਕਤ੍ਵਾਤਿ ਅਤ੍ਥੋ. ਤਞ੍ਹਿ ਏਤਰਹਿ ਬੁਦ੍ਧਪਟਿਮਸ੍ਸ ਪਲ੍ਲਙ੍ਕਸਣ੍ਠਾਨਂ ਹੋਤਿ. ਤਨ੍ਤਿ ਕੋਚ੍ਛਂ. ਕਰੋਨ੍ਤਿ ਕਿਰਾਤਿ ਸਮ੍ਬਨ੍ਧੋ. ਏਤ੍ਥਾਤਿ ਸੇਨਾਸਨਪਰਿਭੋਗੇ. ਹੀਤਿ ਸਚ੍ਚਂ. ਤਨ੍ਤਿ ਕੋਚ੍ਛਂ ਮਹਗ੍ਘਂ ਹੋਤਿ, ਮਹਗ੍ਘਤ੍ਤਾ ਭਦ੍ਦਪੀਠਨ੍ਤਿਪਿ ਵੁਚ੍ਚਤਿ. ਯੇਨਾਤਿ ਯੇਨ ਭਿਕ੍ਖੁਨਾ. ‘‘ਥਾਮਮਜ੍ਝਿਮਸ੍ਸਾ’’ਤਿ ਪਦੇਨ ਪਮਾਣਮਜ੍ਝਿਮਂ ਨਿਵਤ੍ਤੇਤਿ.

ਏਤ੍ਥਾਤਿ ‘‘ਅਨਾਪੁਚ੍ਛਂ ਵਾ ਗਚ੍ਛੇਯ੍ਯਾ’’ਤਿ ਪਦੇ. ਥੇਰੋ ਆਣਾਪੇਤੀਤਿ ਯੋਜਨਾ. ਆਣਾਪੇਤੀਤਿ ਚ ਆਣ-ਧਾਤੁਯਾ ਏਵ ਪੇਸਨਸਙ੍ਖਾਤਸ੍ਸ ਹੇਤ੍ਵਤ੍ਥਸ੍ਸ ਵਾਚਕਤ੍ਤਾ ਣਾਪੇਸਦ੍ਦੋ ਸ੍ਵਤ੍ਥੋਵ. ਸੋਤਿ ਦਹਰੋ. ਤਥਾਤਿ ਯਥਾ ਥੇਰੇਨ ਵੁਤ੍ਤੋ, ਤਥਾ ਕਤ੍ਵਾਤਿ ਅਤ੍ਥੋ. ਤਤ੍ਥਾਤਿ ਦਿਵਾਟ੍ਠਾਨੇ, ਮਞ੍ਚਪੀਠੇ ਵਾ. ਤਤੋਤਿ ਠਪਨਕਾਲਤੋ. ਪਰਿਬੁਨ੍ਧੇਤਿ ਹਿਂ ਸੇਤੀਤਿ ਪਲਿਬੋਧੋ, ਪਰਿਸਦ੍ਦੋ ਉਪਸਗ੍ਗੋ, ਸੋ ਵਿਕਾਰਵਸੇਨ ਅਞ੍ਞਥਾ ਜਾਤੋ. ਸੋ ਪਲਿਬੋਧੋ ਅਞ੍ਞਤ੍ਥ ਆਵਾਸਾਦਿਕੋ, ਇਧ ਪਨ ¶ ਸਨ੍ਥਰਾਪਿਤਮਞ੍ਚਾਦਿਕੋ. ਸਾਯਨ੍ਤਿ ਸਾਯਨ੍ਹੇ, ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਥੇਰੋ ਭਣਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਮਞ੍ਚਪੀਠੇ. ‘‘ਬਾਲੋ ਹੋਤੀ’’ਤਿ ਵਤ੍ਵਾ ਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਨੁਗ੍ਗਹਿਤਵਤ੍ਤੋ’’ਤਿ. ਅਨੁਗ੍ਗਹਿਤਂ ਵਤ੍ਤਂ ਯੇਨਾਤਿ ਅਨੁਗ੍ਗਹਿਤਵਤ੍ਤੋ, ਥੇਰੋ. ਤਜ੍ਜੇਤੀਤਿ ਉਬ੍ਬੇਜੇਤਿ. ਤਸ੍ਮਿਨ੍ਤਿ ਦਹਰੇ. ਅਸ੍ਸਾਤਿ ਥੇਰਸ੍ਸ.

ਆਣਤ੍ਤਿਕ੍ਖਣੇਯੇਵਾਤਿ ਥੇਰਸ੍ਸ ਪੇਸਨਕ੍ਖਣੇਯੇਵ. ਦਹਰੋ ਵਦਤੀਤਿ ਯੋਜਨਾ. ‘‘ਥੇਰੋ’’ਤਿ ਪਦਂ ‘‘ਵਤ੍ਵਾ ਗਚ੍ਛਤੀ’’ਤਿ ਪਦਦ੍ਵਯੇ ਕਤ੍ਤਾ, ‘‘ਕਾਰੇਤਬ੍ਬੋ’’ਤਿ ਪਦੇ ਕਮ੍ਮਂ. ਨਨ੍ਤਿ ਮਞ੍ਚਪੀਠਂ, ‘‘ਪਞ੍ਞਪੇਤ੍ਵਾ’’ਤਿਪਦਮਪੇਕ੍ਖਿਯ ਏਵਂ ਵੁਤ੍ਤਂ. ਨਨ੍ਤਿ ਦਹਰਂ ਵਾ. ‘‘ਵਤ੍ਵਾ’’ਤਿ ਪਦਮਪੇਕ੍ਖਿਯ ਏਵਂ ਵੁਤ੍ਤਂ. ਤਤ੍ਥੇਵਾਤਿ ਮਞ੍ਚਪੀਠੇਯੇਵ. ਅਸ੍ਸਾਤਿ ਥੇਰਸ੍ਸ. ਤਤ੍ਥਾਤਿ ਦਿਵਾਟ੍ਠਾਨੇ. ਭੋਜਨਸਾਲਤੋ ਅਞ੍ਞਤ੍ਥ ਗਚ੍ਛਨ੍ਤੋਤਿ ਭੋਜਨਸਾਲਤੋ ਨਿਕ੍ਖਮਿਤ੍ਵਾ ਮਞ੍ਚਪੀਠਪਞ੍ਞਾਪਨਟ੍ਠਾਨਤੋ ਅਞ੍ਞਂ ਠਾਨਂ ਗਚ੍ਛਨ੍ਤੋ, ਥੇਰੋਤਿ ਯੋਜਨਾ. ਤਤ੍ਥੇਵਾਤਿ ਦਿਵਾਟ੍ਠਾਨੇਯੇਵ. ਯਤ੍ਰਿਚ੍ਛਤੀਤਿ ਯਂ ਠਾਨਂ ਗਨ੍ਤੁਮਿਚ੍ਛਤੀਤਿ ਅਤ੍ਥੋ. ਅਨ੍ਤਰਸਨ੍ਨਿਪਾਤੇਤਿ ਸਕਲਂ ਅਹੋਰਤ੍ਤਂ ਅਸਨ੍ਨਿਪਾਤੇਤ੍ਵਾ ਅਨ੍ਤਰੇ ਸਨ੍ਨਿਪਾਤੇ ਸਤੀਤਿ ਯੋਜਨਾ.

ਤਤ੍ਥਾਤਿ ਤਸ੍ਮਿਂ ਠਾਨੇ. ਆਗਨ੍ਤੁਕਾ ਗਣ੍ਹਨ੍ਤੀਤਿ ਸਮ੍ਬਨ੍ਧੋ. ਤਤੋਤਿ ਗਣ੍ਹਨਤੋ. ਤੇਸਨ੍ਤਿ ਆਗਨ੍ਤੁਕਾਨਂ ¶ . ਯੇਹੀਤਿ ਆਵਾਸਿਕੋ ਵਾ ਹੋਤੁ, ਆਗਨ੍ਤੁਕੋ ਵਾ, ਯੇਹਿ ਭਿਕ੍ਖੂਹਿ. ਤੇਤਿ ਨਿਸਿਨ੍ਨਕਭਿਕ੍ਖੂ. ਉਦ੍ਧਂ ਪਾਲ਼ਿਪਾਠਂ ਸਾਰੇਤਿ ਪਵਤ੍ਤੇਤੀਤਿ ਉਸ੍ਸਾਰਕੋ. ਧਮ੍ਮਕਥਾਯਂ ਸਾਧੂਤਿ ਧਮ੍ਮਕਥਿਕੋ. ਤਸ੍ਮਿਨ੍ਤਿ ਉਸ੍ਸਾਰਕੇ ਵਾ ਧਮ੍ਮਕਥਿਕੇ ਵਾ. ਅਹੋਰਤ੍ਤਨ੍ਤਿ ਅਹੋ ਚ ਰਤ੍ਤਿ ਚ ਅਹੋਰਤ੍ਤਂ, ਅਚ੍ਚਨ੍ਤਸਂਯੋਗਪਦਂ. ਇਤਰਸ੍ਮਿਨ੍ਤਿ ਪਠਮਂ ਨਿਸਿਨ੍ਨਭਿਕ੍ਖੁਤੋ ਅਞ੍ਞਸ੍ਮਿਂ ਭਿਕ੍ਖੁਮ੍ਹੀਤਿ ਯੋਜਨਾ. ਅਨ੍ਤੋਉਪਚਾਰਟ੍ਠੇਯੇਵਾਤਿ ਲੇਡ੍ਡੁਪਾਤਸਙ੍ਖਾਤਸ੍ਸ ਉਪਚਾਰਸ੍ਸ ਅਨ੍ਤੋ ਠਿਤੇਯੇਵ, ਅਨਾਦਰੇ ਚੇਤਂ ਭੁਮ੍ਮਂ. ਸਬ੍ਬਤ੍ਥਾਤਿ ਆਪਤ੍ਤਿਵਾਰਅਨਾਪਤ੍ਤਿਵਾਰੇਸੁ.

੧੧੨. ਚਿਮਿਲਿਕਂ ਵਾਤਿਆਦੀਸੁ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਤਨ੍ਤਿ ਚਿਮਿਲਿਕਤ੍ਥਰਣਂ. ਉਤ੍ਤਰਿ ਅਤ੍ਥਰਿਤਬ੍ਬਨ੍ਤਿ ਉਤ੍ਤਰਤ੍ਥਰਣਨ੍ਤਿ ਦਸ੍ਸੇਨ੍ਤੋ ¶ ਆਹ ‘‘ਉਤ੍ਤਰਤ੍ਥਰਣਂ ਨਾਮਾ’’ਤਿਆਦਿ. ਭੂਮਿਯਨ੍ਤਿ ਸੁਧਾਦਿਪਰਿਕਮ੍ਮੇਨ ਅਕਤਾਯਂ ਪਕਤਿਭੂਮਿਯਂ. ਚਮ੍ਮਖਣ੍ਡੋਤਿ ਏਤ੍ਥ ਚਮ੍ਮਂਯੇਵ ਅਨ੍ਤੇ ਖਣ੍ਡਤ੍ਤਾ ਛਿਨ੍ਨਤ੍ਤਾ ਚਮ੍ਮਖਣ੍ਡੋਤਿ ਵੁਚ੍ਚਤਿ. ਨਨੁ ਸੀਹਚਮ੍ਮਾਦੀਨਿ ਨ ਕਪ੍ਪਨ੍ਤੀਤਿ ਆਹ ‘‘ਅਟ੍ਠਕਥਾਸੁ ਹੀ’’ਤਿਆਦਿ. ਹੀਤਿ ਸਚ੍ਚਂ. ਤਸ੍ਮਾਤਿ ਯਸ੍ਮਾ ਨ ਦਿਸ੍ਸਤਿ, ਤਸ੍ਮਾ. ਪਰਿਹਰਣੇਯੇਵਾਤਿ ਅਤ੍ਤਨੋ ਸਨ੍ਤਕਨ੍ਤਿ ਪਰਿਚ੍ਛਿਨ੍ਦਿਤ੍ਵਾ, ਪੁਗ੍ਗਲਿਕਨ੍ਤਿ ਵਾ ਪਰਿਗ੍ਗਹੇਤ੍ਵਾ ਤਂ ਤਂ ਠਾਨਂ ਹਰਣੇਯੇਵ. ਪਾਦੋ ਪੁਞ੍ਛੀਯਤਿ ਸੋਧੀਯਤਿ ਏਤਾਯਾਤਿ ਪਾਦਪੁਞ੍ਛਨੀਤਿ ਕਤ੍ਵਾ ਰਜ੍ਜੁਪਿਲੋਤਿਕਾਯੋ ਪਾਦਪੁਞ੍ਛਨੀਤਿ ਵੁਚ੍ਚਤੀਤਿ ਆਹ ‘‘ਪਾਦਪੁਞ੍ਛਨੀ ਨਾਮਾ’’ਤਿਆਦਿ. ਮਯਸਦ੍ਦਲੋਪਂ ਕਤ੍ਵਾ ਫਲਕਪੀਠਨ੍ਤਿ ਵੁਤ੍ਤਨ੍ਤਿ ਆਹ ‘‘ਫਲਕਪੀਠਂ ਨਾਮ ਫਲਕਮਯਂ ਪੀਠ’’ਨ੍ਤਿ. ਫਲਕਞ੍ਚ ਪੀਠਞ੍ਚ ਫਲਕਪੀਠਨ੍ਤਿ ਵਾ ਦਸ੍ਸੇਤੁਂ ਵੁਤ੍ਤਂ ‘‘ਅਥ ਵਾ’’ਤਿ. ਏਤੇਨਾਤਿ ‘‘ਫਲਕਪੀਠ’’ਨ੍ਤਿ ਪਦੇਨ. ‘‘ਸਙ੍ਗਹਿਤ’’ਨ੍ਤਿ ਪਦੇ ਕਰਣਂ, ਕਤ੍ਤਾ ਵਾ. ਬੀਜਨਿਪਤ੍ਤਕਨ੍ਤਿ ਚਤੁਰਸ੍ਸਬੀਜਨੀਯੇਵ ਸਕੁਣਪਤ੍ਤਸਦਿਸਤ੍ਤਾ ਬੀਜਨਿਪਤ੍ਤਕਂ, ਸਦਿਸਤ੍ਥੇ ਕੋ. ‘‘ਅਜ੍ਝੋਕਾਸੇ’’ਤਿ ਪਦਂ ‘‘ਪਚਿਤ੍ਵਾ’’ਤਿ ਪਦੇ ਆਧਾਰੋ. ਅਗ੍ਗਿਸਾਲਾਯਨ੍ਤਿ ਅਗ੍ਗਿਨਾ ਪਚਨਸਾਲਾਯਂ. ਪਬ੍ਭਾਰੇਤਿ ਲੇਣਸਦਿਸੇ ਪਬ੍ਭਾਰੇ. ਯਤ੍ਥਾਤਿ ਯਸ੍ਮਿਂ ਠਾਨੇ.

ਯਸ੍ਮਿਨ੍ਤਿ ਪੁਗ੍ਗਲੇ. ‘‘ਅਤ੍ਤਨੋ ਪੁਗ੍ਗਲਿਕਮਿਵ ਹੋਤੀ’’ਤਿ ਇਮਿਨਾ ਅਨਾਪਤ੍ਤੀਤਿ ਦਸ੍ਸੇਤਿ.

੧੧੩. ਯੋ ਭਿਕ੍ਖੁ ਵਾ ਲਜ੍ਜੀ ਹੋਤਿ, ਤਥਾਰੂਪਂ ਭਿਕ੍ਖੁਂ ਵਾ ਤਿ ਯੋਜਨਾ. ‘‘ਲਜ੍ਜੀ ਹੋਤੀ’’ਤਿ ਵਤ੍ਵਾ ਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ ਪਲਿਬੋਧਂ ਵਿਯ ਮਞ੍ਞਤੀ’’ਤਿ. ਯੋਤਿ ਆਪੁਚ੍ਛਕੋ ਭਿਕ੍ਖੁ. ‘‘ਕੇਨਚਿ ਉਪਦ੍ਦੁਤਂ ਹੋਤੀ’’ਤਿ ਸਙ੍ਖੇਪੇਨ ਵੁਤ੍ਤਮਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਸਚੇਪਿ ਹੀ’’ਤਿਆਦਿ. ਹਿਸਦ੍ਦੋ ਵਿਤ੍ਥਾਰਜੋਤਕੋ. ਵੁਡ੍ਢਤਰੋ ਭਿਕ੍ਖੁ ਗਣ੍ਹਾਤੀਤਿ ਸਮ੍ਬਨ੍ਧੋ. ਤਂ ਪਦੇਸਨ੍ਤਿ ਸੇਨਾਸਨਟ੍ਠਪਿਤਟ੍ਠਾਨਂ. ਆਪਦਾਸੂਤਿ ਵਿਪਤ੍ਤੀਸੂਤਿ. ਚਤੁਤ੍ਥਂ.

੫. ਦੁਤਿਯਸੇਨਾਸਨਸਿਕ੍ਖਾਪਦਂ

੧੧੬. ਪਞ੍ਚਮੇ ¶ ਮਞ੍ਚਕਭਿਸੀਤਿ ਮਞ੍ਚੇ ਅਤ੍ਥਰਿਤਬ੍ਬੋ ਮਞ੍ਚਕੋ, ਸੋਯੇਵ ਭਿਸੀਤਿ ਮਞ੍ਚਕਭਿਸਿ. ਏਵਂ ਪੀਠਕਭਿਸਿਪਿ. ਪਾਵਾਰੋ ਕੋਜਵੋਤਿ ਦ੍ਵੇਯੇਵ ਪਚ੍ਚਤ੍ਥਰਣਨ੍ਤਿ ਵੁਤ੍ਤਾਤਿ ਆਹ ‘‘ਪਾਵਾਰੋ’’ਤਿਆਦਿ. ਵੁਤ੍ਤਨ੍ਤਿ ਅਟ੍ਠਕਥਾਸੁ ¶ ਵੁਤ੍ਤਂ. ਦੁਤਿਯਾਤਿਕ੍ਕਮੇਤਿ ਦੁਤਿਯਪਾਦਾਤਿਕ੍ਕਮੇ. ਸੇਨਾਸਨਤੋਤਿ ਸਚੇ ਏਕਂ ਸੇਨਾਸਨਂ ਹੋਤਿ, ਤਤੋ. ਅਥ ਬਹੂਨਿ ਸੇਨਾਸਨਾਨਿ ਹੋਨ੍ਤਿ, ਸਬ੍ਬਪਚ੍ਛਿਮਸੇਨਾਸਨਤੋ. ਏਕੋ ਲੇਡ੍ਡੁਪਾਤੋ ਸੇਨਾਸਨਸ੍ਸ ਉਪਚਾਰੋ ਹੋਤਿ, ਏਕੋ ਪਰਿਕ੍ਖੇਪਾਰਹੋਤਿ ਆਹ ‘‘ਦ੍ਵੇ ਲੇਡ੍ਡੁਪਾਤਾ’’ਤਿ.

ਸਚੇ ਭਿਕ੍ਖੁ, ਸਾਮਣੇਰੋ, ਆਰਾਮਿਕੋ ਚਾਤਿ ਤਯੋ ਹੋਨ੍ਤਿ, ਭਿਕ੍ਖੁਂ ਅਨਾਪੁਚ੍ਛਿਤ੍ਵਾ ਸਾਮਣੇਰੋ ਵਾ ਆਰਾਮਿਕੋ ਵਾ ਨ ਆਪੁਚ੍ਛਿਤਬ੍ਬੋ. ਅਥ ਸਾਮਣੇਰੋ, ਆਰਾਮਿਕੋ ਚਾਤਿ ਦ੍ਵੇ ਹੋਨ੍ਤਿ, ਸਾਮਣੇਰਂ ਅਨਾਪੁਚ੍ਛਿਤ੍ਵਾ ਆਰਾਮਿਕੋਵ ਨ ਆਪੁਚ੍ਛਿਤਬ੍ਬੋਤਿ ਦਸ੍ਸੇਨ੍ਤੋ ਆਹ ‘‘ਭਿਕ੍ਖੁਮ੍ਹਿ ਸਤੀ’’ਤਿਆਦਿ. ਤੀਸੁਪਿ ਅਸਨ੍ਤੇਸੁ ਆਪੁਚ੍ਛਿਤਬ੍ਬਵਿਧਿਂ ਦਸ੍ਸੇਤੁਂ ਵੁਤ੍ਤਂ ‘‘ਤਸ੍ਮਿਮ੍ਪਿ ਅਸਤੀ’’ਤਿਆਦਿ. ਯੇਨਾਤਿ ਉਪਾਸਕੇਨ, ‘‘ਕਾਰਿਤੋ’’ਤਿ ਪਦੇ ਕਤ੍ਤਾ. ਤਸ੍ਸਾਤਿ ਵਿਹਾਰਸਾਮਿਕਸ੍ਸ. ਤਸ੍ਮਿਮ੍ਪਿ ਅਸਤਿ ਗਨ੍ਤਬ੍ਬਨ੍ਤਿ ਯੋਜਨਾ. ਪਾਸਾਣੇਸੂਤਿ ਪਾਸਾਣਫਲਕੇਸੁ. ਸਚੇ ਉਸ੍ਸਹਤੀਤਿ ਸਚੇ ਸਕ੍ਕੋਤਿ. ਉਸ੍ਸਹਨ੍ਤੇਨ ਭਿਕ੍ਖੁਨਾ ਠਪੇਤਬ੍ਬਨ੍ਤਿ ਯੋਜਨਾ. ਤੇਪੀਤਿ ਉਪਾਸਕਾਪਿ, ਨ ਸਮ੍ਪਟਿਚ੍ਛਨ੍ਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਦਾਰੁਭਣ੍ਡਾਦੀਸੁ.

ਪਰਿਚ੍ਛੇਦਾਕਾਰੇਨ ਵੇਣੀਯਤਿ ਦਿਸ੍ਸਤੀਤਿ ਪਰਿਵੇਣਂ. ‘‘ਅਥ ਖੋ’’ਤਿ ਪਦਂ ‘‘ਵੇਦਿਤਬ੍ਬ’’ਨ੍ਤਿ ਪਦੇ ਅਰੁਚਿਲਕ੍ਖਣਂ. ‘‘ਆਸਨ੍ਨੇ’’ਤਿ ਇਮਿਨਾ ਉਪਚਾਰਸਦ੍ਦਸ੍ਸ ਉਪਟ੍ਠਾਨਤ੍ਥਅਞ੍ਞਰੋਪਨਤ੍ਥੇ ਨਿਵਤ੍ਤੇਤਿ. ਯਸ੍ਮਾ ਵਮ੍ਮਿਕਰਾਸਿਯੇਵ ਹੋਤਿ, ਤਸ੍ਮਾਤਿ ਯੋਜਨਾ. ਉਪਚਿਨਨ੍ਤੀਤਿ ਉਪਚਿਕਾ, ਤਾਹਿ ਨਿਮਿਤ੍ਤਭੂਤਾਹਿ ਪਲੁਜ੍ਜਤਿ ਨਸ੍ਸਤੀਤਿ ਅਤ੍ਥੋ. ਸੇਨਾਸਨਨ੍ਤਿ ਵਿਹਾਰਂ. ਖਾਯਿਤੁਨ੍ਤਿ ਖਾਦਿਤੁਂ, ਅਯਮੇਵ ਵਾ ਪਾਠੋ. ਤਨ੍ਤਿ ਮਞ੍ਚਪੀਠਂ. ਮਞ੍ਚਪੀਠਂ ਵਿਹਾਰੇ ਅਪਞ੍ਞਪੇਤ੍ਵਾ ਵਿਹਾਰੂਪਚਾਰੇ ਪਞ੍ਞਾਪਨਸ੍ਸ ਵਿਸੇਸਫਲਂ ਦਸ੍ਸੇਤੁਂ ਆਹ ‘‘ਵਿਹਾਰੂਪਚਾਰੇ ਪਨਾ’’ਤਿਆਦਿ. ਵਿਹਾਰੂਪਚਾਰੇ ਪਞ੍ਞਪਿਤਨ੍ਤਿ ਸਮ੍ਬਨ੍ਧੋ.

੧੧੮. ‘‘ਗਚ੍ਛਨ੍ਤੇਨਾ’’ਤਿ ਪਦਂ ‘‘ਗਨ੍ਤਬ੍ਬ’’ਨ੍ਤਿ ਪਦੇ ਕਤ੍ਤਾ. ਤਥੇਵਾਤਿ ਯਥਾ ਪੁਰਿਮਭਿਕ੍ਖੁ ਕਰੋਤਿ, ਤਥੇਵ. ਵਸਨ੍ਤੇਨ ਭਿਕ੍ਖੁਨਾ ਪਟਿਸਾਮੇਤਬ੍ਬਨ੍ਤਿ ਯੋਜਨਾ. ਰਤ੍ਤਿਟ੍ਠਾਨਨ੍ਤਿ ਰਤ੍ਤਿਂ ਵਸਨਟ੍ਠਾਨਂ.

ਯਾ ਦੀਘਸਾਲਾ ਵਾ ਯਾ ਪਣ੍ਣਸਾਲਾ ਵਾ ਉਪਚਿਕਾਨਂ ਉਟ੍ਠਾਨਟ੍ਠਾਨਂ ਹੋਤਿ, ਤਤੋਤਿ ਯੋਜਨਾ. ਤਸ੍ਮਿਨ੍ਤਿ ¶ ਦੀਘਸਾਲਾਦਿਕੇ. ਹੀਤਿ ਸਚ੍ਚਂ ¶ , ਯਸ੍ਮਾ ਵਾ, ਸਨ੍ਤਿਟ੍ਠਨ੍ਤੀਤਿ ਸਮ੍ਬਨ੍ਧੋ. ਸਿਲੁਚ੍ਚਯੋਤਿ ਪਬ੍ਬਤੋ, ਤਸ੍ਮਿਂ ਲੇਣਂ ਸਿਲੁਚ੍ਚਯਲੇਣਂ, ਪਬ੍ਬਤਗੁਹਾਤਿ ਅਤ੍ਥੋ. ਉਪਚਿਕਾਸਙ੍ਕਾਤਿ ਉਪਚਿਕਾਨਂ ਉਟ੍ਠਾਨਟ੍ਠਾਨਨ੍ਤਿ ਆਸਙ੍ਕਾ. ਤਤੋਤਿ ਪਾਸਾਣਪਿਟ੍ਠਿਯਂ ਵਾ ਪਾਸਾਣਥਮ੍ਭੇਸੁ ਵਾ ਕਤਸੇਨਾਸਨਾਦਿਤੋ. ਆਗਨ੍ਤੁਕੋ ਯੋ ਭਿਕ੍ਖੁ ਅਨੁਵਤ੍ਤਨ੍ਤੋ ਵਸਤੀਤਿ ਸਮ੍ਬਨ੍ਧੋ. ਸੋਤਿ ਆਗਨ੍ਤੁਕੋ ਭਿਕ੍ਖੁ. ਪੁਨ ਸੋਤਿ ਆਗਨ੍ਤੁਕੋ ਭਿਕ੍ਖੁਯੇਵ. ਤਤੋਤਿ ਗਹੇਤ੍ਵਾ ਇਸ੍ਸਰਿਯੇਨ ਵਸਨਤੋ. ਉਭੋਪੀਤਿ ਆਵਾਸਿਕੋਪਿ ਆਗਨ੍ਤੁਕੋਪਿ ਦ੍ਵੇ ਭਿਕ੍ਖੂ. ਤੇਸੂਤਿ ਦ੍ਵੀਸੁ ਤੀਸੁ. ਪਚ੍ਛਿਮਸ੍ਸਾਤਿ ਸਬ੍ਬਪਚ੍ਛਿਮਸ੍ਸ. ਆਭੋਗੇਨਾਤਿ ਆਭੋਗਮਤ੍ਤੇਨ ਮੁਤ੍ਤਿ ਨਤ੍ਥਿ, ਆਪੁਚ੍ਛਿਤਬ੍ਬਮੇਵਾਤਿ ਅਧਿਪ੍ਪਾਯੋ. ਅਞ੍ਞਤੋਤਿ ਅਞ੍ਞਾਵਾਸਤੋ. ਅਞ੍ਞਤ੍ਰਾਤਿ ਅਞ੍ਞਸ੍ਮਿਂ ਆਵਾਸੇ. ਤਤ੍ਥੇਵਾਤਿ ਆਨੀਤਾਵਾਸੇਯੇਵ. ਤੇਨਾਤਿ ਵੁਡ੍ਢਤਰੇਨ, ‘‘ਸਮ੍ਪਟਿਚ੍ਛਿਤੇ’’ਤਿ ਪਦੇ ਕਤ੍ਤਾ. ਸਮ੍ਪਟਿਚ੍ਛਿਤੇਤਿ ਵੁਡ੍ਢਤਰੇਨ ਸਮ੍ਪਟਿਚ੍ਛਿਤੇਪਿ ਇਤਰਸ੍ਸ ਗਨ੍ਤੁਂ ਵਟ੍ਟਤਿ ਆਪੁਚ੍ਛਿਤਤ੍ਤਾਤਿ ਵਦਨ੍ਤਿ. ਨਟ੍ਠਂ ਵਾਤਿ ਨਟ੍ਠੇ ਵਾ ਸੇਨਾਸਨੇ ਸਤਿ ਗੀਵਾ ਨ ਹੋਤੀਤਿ ਯੋਜਨਾ. ਅਞ੍ਞਸ੍ਸਾਤਿ ਅਵਿਸ੍ਸਾਸਿਕਪੁਗ੍ਗਲਸ੍ਸ. ਨਟ੍ਠਾਨੀਤਿ ਨਟ੍ਠੇਸੁ ਮਞ੍ਚਪੀਠੇਸੁ ਸਨ੍ਤੇਸੁ.

ਵੁਡ੍ਢਤਰੋ ਭਿਕ੍ਖੁ ਚ ਇਸ੍ਸਰਿਯੋ ਚ ਯਕ੍ਖੋ ਚ ਸੀਹੋ ਚ ਵਾਲ਼ਮਿਗੋ ਚ ਕਣ੍ਹਸਪ੍ਪੋ ਚ ਵੁਡ੍ਢ…ਪੇ… ਕਣ੍ਹਸਪ੍ਪਾ, ਤੇ ਆਦਯੋ ਯੇਸਂ ਤੇਤਿ ਵੁਡ੍ਢ…ਪੇ… ਕਣ੍ਹਸਪ੍ਪਾਦਯੋ, ਤੇਸੁ. ਆਦਿਸਦ੍ਦੇਨ ਪੇਤਾਦਯੋ ਸਙ੍ਗਣ੍ਹਾਤਿ. ਯਤ੍ਥਾਤਿ ਯਸ੍ਮਿਂ ਠਾਨੇ. ਅਸ੍ਸਾਤਿ ਭਿਕ੍ਖੁਨੋ. ‘‘ਪਲਿਬੁਦ੍ਧੋ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਉਪਦ੍ਦੁਤੋ’’ਤਿ. ਪਞ੍ਚਮਂ.

੬. ਅਨੁਪਖਜ੍ਜਸਿਕ੍ਖਾਪਦਂ

੧੧੯. ਛਟ੍ਠੇ ਰੂਮ੍ਭਿਤ੍ਵਾਤਿ ਨਿਵਾਰੇਤ੍ਵਾ, ਆਵਰਣਂ ਕਤ੍ਵਾਤਿ ਅਤ੍ਥੋ. ਵਸ੍ਸਗ੍ਗੇਨਾਤਿ ਵਸ੍ਸਗਣਨਾਯ. ਅਨੁਪਖਜ੍ਜਾਤਿ ਏਤ੍ਥ ਖਦ ਹਿਂਸਾਯਨ੍ਤਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੫ ਦਕਾਰਨ੍ਤਧਾਤੁ) ਵੁਤ੍ਤਤ੍ਤਾ ਖਦਸਦ੍ਦੋ ਹਿਂਸਤ੍ਥੋ ਹੋਤਿ. ਅਨੁਸਮੀਪਂ ਉਪਗਨ੍ਤ੍ਵਾ ਖਦਨਂ ਹਿਂ ਸਨਂ ਨਾਮ ਅਨੁਸਮੀਪਂ ਪਵਿਸਨਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਅਨੁਪਵਿਸਿਤ੍ਵਾ’’ਤਿ.

੧੨੦. ‘‘ਜਾਨ’’ਨ੍ਤਿ ¶ ਏਤ੍ਥ ਜਾਨਨਾਕਾਰਂ ਦਸ੍ਸੇਤੁਂ ਵੁਤ੍ਤਂ ‘‘ਅਨੁਟ੍ਠਾਪਨੀਯੋ ਅਯ’’ਨ੍ਤਿ. ਤੇਨੇਵਾਤਿ ਜਾਨਨਹੇਤੁਨਾ ਏਵ. ਅਸ੍ਸਾਤਿ ‘‘ਜਾਨ’’ਨ੍ਤਿਪਦਸ੍ਸ. ਹੀਤਿ ਵਿਤ੍ਥਾਰਜੋਤਕੋ. ਸਙ੍ਘੋ ਪਨ ਦੇਤੀਤਿ ਸਮ੍ਬਨ੍ਧੋ. ਯਸ੍ਸਾਤਿ ਵੁਡ੍ਢਾਦੀਸੁ ਅਞ੍ਞਤਰਸ੍ਸ. ਏਤ੍ਥਾਤਿ ਵੁਡ੍ਢਗਿਲਾਨਾਦੀਸੁ. ਗਿਲਾਨਸ੍ਸਪਿ ਦੇਤੀਤਿ ਯੋਜਨਾ. ‘‘ਗਿਲਾਨੋ’’ਤਿ ਪਦਂ ‘‘ਨ ਪੀਲ਼ੇਤਬ੍ਬੋ, ਅਨੁਕਮ੍ਪਿਤਬ੍ਬੋ’’ਤਿਪਦਦ੍ਵਯੇ ਵੁਤ੍ਤਕਮ੍ਮਂ. ‘‘ਕਾਮਞ੍ਚਾ’’ਤਿ ਪਦਸ੍ਸ ਅਨੁਗ੍ਗਹਤ੍ਥਜੋਤਕਤ੍ਤਾ ਪਨਸਦ੍ਦੋ ਗਰਹਤ੍ਥਜੋਤਕੋ.

੧੨੧. ਮਞ੍ਚਪੀਠਾਨਂ ¶ ਉਪਚਾਰੋ ਨਾਮਾਤਿ ਸਮ੍ਬਨ੍ਧੋ. ਯਤੋਤਿ ਯਤੋ ਕੁਤੋਚਿ ਠਾਨਤੋ. ਯਾਵ ਮਞ੍ਚਪੀਠਂ ਅਤ੍ਥਿ, ਤਾਵ ਉਪਚਾਰੋ ਨਾਮਾਤਿ ਯੋਜਨਾ. ਤਸ੍ਮਿਂ ਉਪਚਾਰੇ ਠਿਤਸ੍ਸ ਭਿਕ੍ਖੁਨੋ ਉਪਚਾਰੇਤਿ ਸਮ੍ਬਨ੍ਧੋ.

‘‘ਅਭਿਨਿਸੀਦਤਿ ਵਾ ਅਭਿਨਿਪਜ੍ਜਤਿ ਵਾ’’ਤਿ ਏਤ੍ਥ ਵਾਸਦ੍ਦਸ੍ਸ ਅਨਿਯਮਵਿਕਪ੍ਪਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਅਭਿਨਿਸੀਦਨਮਤ੍ਤੇਨਾ’’ਤਿਆਦਿ.

੧੨੨. ਇਤੋਤਿ ਵਾਰਤੋ. ਇਧਾਤਿ ਇਮਸ੍ਮਿਂ ਪਾਚਿਤ੍ਤਿਯਵਾਰੇ. ਯਥਾ ਵੁਤ੍ਤੋ, ਏਵਨ੍ਤਿ ਸਮ੍ਬਨ੍ਧੋ. ਸਬ੍ਬਤ੍ਥੇਵਾਤਿ ਸਬ੍ਬੇਸੁ ਏਵ ਵਿਹਾਰਪਰਿਵੇਣੇਸੁ. ਅਸ੍ਸਾਤਿ ਵਿਸਭਾਗਪੁਗ੍ਗਲਸ੍ਸ. ਇਧਾਪੀਤਿ ਇਮਸ੍ਮਿਮ੍ਪਿ ਸਿਕ੍ਖਾਪਦੇ. ਤਤ੍ਥਾਤਿ ਵਿਸ੍ਸਾਸਿਕਪੁਗ੍ਗਲੇ.

੧੨੩. ਪਾਲ਼ਿਯਂ ‘‘ਆਪਦਾਸੂ’’ਤਿਪਦਂ ‘‘ਪਵਿਸਤੀ’’ਤਿ ਅਜ੍ਝਾਹਾਰਪਦੇਨ ਸਮ੍ਬਨ੍ਧਿਤਬ੍ਬਨ੍ਤਿ ਆਹ ‘‘ਆਪਦਾਸੂਤਿਆਦੀ’’ਤਿ. ਛਟ੍ਠਂ.

੭. ਨਿਕ੍ਕਡ੍ਢਨਸਿਕ੍ਖਾਪਦਂ

੧੨੬. ਸਤ੍ਤਮੇ ਯੇ ਪਾਸਾਦਾ ਵਾ ਯਾਨਿ ਵਾ ਚਤੁਸ੍ਸਾਲਾਨੀਤਿ ਯੋਜਨਾ. ਚਤਸ੍ਸੋ ਭੂਮਿਯੋ ਏਤੇਸਨ੍ਤਿ ਚਤੁਭੂਮਕਾ. ਏਵਂ ਪਞ੍ਚਭੂਮਕਾ. ਕੋਟ੍ਠਕਾਨੀਤਿ ਦ੍ਵਾਰਕੋਟ੍ਠਕਾਨਿ. ‘‘ਪਾਸਾਦਾ’’ਤਿਪਦਮਪੇਕ੍ਖਿਯ ਵੁਤ੍ਤਂ ‘‘ਯੇ’’ਤਿਪਦਂ, ‘‘ਚਤੁਸ੍ਸਾਲਾਨੀ’’ਤਿਪਦੇ ਅਪੇਕ੍ਖਿਤੇ ‘‘ਯਾਨੀ’’ਤਿ ਲਿਙ੍ਗਵਿਪਲ੍ਲਾਸੋ ਹੋਤਿ. ਸੇਨਾਸਨੇਸੁ ਏਕੇਨ ਪਯੋਗੇਨ ਬਹੁਕੇ ਦ੍ਵਾਰੇ ਭਿਕ੍ਖੁਂ ਅਤਿਕ੍ਕਾਮੇਤੀਤਿ ਸਮ੍ਬਨ੍ਧੋ. ਨਾਨਾਪਯੋਗੇਹਿ ਨਾਨਾਦ੍ਵਾਰੇ ਭਿਕ੍ਖੁਂ ਅਤਿਕ੍ਕਾਮੇਨ੍ਤਸ੍ਸਾਤਿ ਯੋਜਨਾ. ‘‘ਦ੍ਵਾਰਗਣਨਾਯਾ’’ਤਿਇਮਿਨਾ ਪਯੋਗਗਣਨਾਯਾਤਿਪਿ ਅਤ੍ਥਂ ਞਾਪੇਤਿ ਅਤ੍ਥਤੋ ਪਾਕਟਤ੍ਤਾ. ਅਨਾਮਸਿਤ੍ਵਾਤਿ ਅਛੁਪਿਤ੍ਵਾ.

ਏਤ੍ਤਕਾਨੀਤਿ ¶ ਏਤਪਮਾਣਾਨਿ. ਤਸ੍ਸਾਤਿ ਨਿਕ੍ਕਡ੍ਢਿਯਮਾਨਸ੍ਸ ਭਿਕ੍ਖੁਸ੍ਸ. ਗਾਲ਼੍ਹਨ੍ਤਿ ਦਲ਼੍ਹਂ.

੧੨੭. ਇਧਾਪੀਤਿ ਇਮਸ੍ਮਿਮ੍ਪਿ ਸਿਕ੍ਖਾਪਦੇ. ਪਿਸਦ੍ਦੋ ਪੁਰਿਮਸਿਕ੍ਖਾਪਦਾਪੇਕ੍ਖੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਸਿਕ੍ਖਾਪਦੇਸੁ. ਯਤ੍ਰਾਤਿ ਯਸ੍ਮਿਂ ਸਿਕ੍ਖਾਪਦੇ.

੧੨੮. ਸੋਤਿ ਭਣ੍ਡਨਕਾਰਕਕਲਹਕਾਰਕੋ ਭਿਕ੍ਖੁ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪਕ੍ਖਨ੍ਤਿ ਅਤ੍ਤਨੋ ¶ ਪਕ੍ਖਂ. ਨਿਕ੍ਕਡ੍ਢਿਯਮਾਨਪੁਗ੍ਗਲਪਕ੍ਖੇ ਉਮ੍ਮਤ੍ਤਕਸ੍ਸ ਨਿਕ੍ਕਡ੍ਢਤਿ ਵਾ ਨਿਕ੍ਕਡ੍ਢਾਪੇਤਿ ਵਾਤਿ ਸਮ੍ਬਨ੍ਧਿਤਬ੍ਬਂ. ਨਿਕ੍ਕਡ੍ਢਕਪੁਗ੍ਗਲਪਕ੍ਖੇ ਉਮ੍ਮਤ੍ਤਕਸ੍ਸ ਅਨਾਪਤ੍ਤੀਤਿ ਸਮ੍ਬਨ੍ਧਿਤਬ੍ਬਨ੍ਤਿ. ਸਤ੍ਤਮਂ.

੮. ਵੇਹਾਸਕੁਟਿਸਿਕ੍ਖਾਪਦਂ

੧੨੯. ਅਟ੍ਠਮੇ ਅਚ੍ਛਨ੍ਨਤਲਤ੍ਤਾ ਉਪਰਿ ਵੇਹਾਸੋ ਏਤਿਸ੍ਸਾਤਿ ਉਪਰਿਵੇਹਾਸਾ, ਸਾ ਚ ਸਾ ਕੁਟਿ ਚੇਤਿ ਉਪਰਿਵੇਹਾਸਕੁਟੀਤਿ ਦਸ੍ਸੇਨ੍ਤੋ ਆਹ ‘‘ਉਪਰਿਅਚ੍ਛਨ੍ਨਤਲਾਯਾ’’ਤਿ. ਤਸ੍ਸਾ ਕੁਟਿਯਾ ਸਰੂਪਂ ਦਸ੍ਸੇਤੁਂ ਵੁਤ੍ਤਂ ‘‘ਦ੍ਵਿਭੂਮਿਕਕੁਟਿਯਾ ਵਾ’’ਤਿਆਦਿ. ‘‘ਮਞ੍ਚ’’ਨ੍ਤਿ ਪਦਂ ‘‘ਅਭੀ’’ਤਿਉਪਸਗ੍ਗੇਨ ਸਮ੍ਬਨ੍ਧਿਤਬ੍ਬਨ੍ਤਿ ਆਹ ‘‘ਅਭਿਭਵਿਤ੍ਵਾ’’ਤਿ. ‘‘ਨਿਸੀਦਤੀ’’ਤਿ ਕਿਰਿਯਾਪਦੇਨ ਵਾ ਯੋਜੇਤਬ੍ਬੋਤਿ ਆਹ ‘‘ਭੁਮ੍ਮਤ੍ਥੇ ਵਾ’’ਤਿਆਦਿ. ਏਤਨ੍ਤਿ ‘‘ਮਞ੍ਚ’’ਨ੍ਤਿਪਦੇ ਏਤਂ ਵਚਨਂ ਉਪਯੋਗਵਚਨਂ. ਅਥ ਵਾ ਏਤਨ੍ਤਿ ‘‘ਮਞ੍ਚ’’ਨ੍ਤਿਪਦਂ ਉਪਯੋਗਵਚਨਵਨ੍ਤਂ. ਏਤ੍ਥ ਚ ਪਚ੍ਛਿਮਸਮ੍ਬਨ੍ਧੇ ਅਭੀਤ੍ਯੂਪਸਗ੍ਗੋ ਪਦਾਲਙ੍ਕਾਰਮਤ੍ਤੋ ਪਦਵਿਭੂਸਨਮਤ੍ਤੋਤਿ ਆਹ ‘‘ਅਭੀਤਿ ਇਦਂ ਪਨਾ’’ਤਿਆਦਿ. ਪਦਸੋਭਣਤ੍ਥਨ੍ਤਿ ਪਦਸ੍ਸ ਅਲਙ੍ਕਾਰਤ੍ਥਂ ਵਿਭੂਸਨਤ੍ਥਂ ਪਦਸ੍ਸ ਫੁਲ੍ਲਿਤਤ੍ਥਨ੍ਤਿ ਅਧਿਪ੍ਪਾਯੋ. ਨਿਪਤਿਤ੍ਵਾਤਿ ਏਤ੍ਥ ਨੀਤ੍ਯੂਪਸਗ੍ਗੋ ਧਾਤ੍ਵਤ੍ਥਾਨੁਵਤ੍ਤਕੋਤਿ ਆਹ ‘‘ਪਤਿਤ੍ਵਾ’’ਤਿ. ਅਥ ਵਾ ਨਿਕ੍ਖਨ੍ਤਤ੍ਥਵਾਚਕੋਤਿ ਆਹ ‘‘ਨਿਕ੍ਖਮਿਤ੍ਵਾ ਵਾ’’ਤਿ. ਇਮਿਨਾ ਨੀਤ੍ਯੂਪਸਗ੍ਗਸ੍ਸ ਧਾਤ੍ਵਤ੍ਥਵਿਸੇਸਕਤਂ ਦੀਪੇਤਿ, ਨਿਕ੍ਖਨ੍ਤੋ ਹੁਤ੍ਵਾ ਪਤਿਤ੍ਵਾਤਿ ਅਤ੍ਥੋ. ਹੀਤਿ ਯਸ੍ਮਾ. ਆਣੀਤਿ ਅਗ੍ਗਖੀਲਾ.

੧੩੧. ਯਾ ਕੁਟਿ ਸੀਸਂ ਨ ਘਟ੍ਟੇਤਿ, ਸਾ ਅਸੀਸਘਟ੍ਟਾ ਨਾਮਾਤਿ ਯੋਜਨਾ. ‘‘ਪਮਾਣਮਜ੍ਝਿਮਸ੍ਸਾ’’ਤਿਇਮਿਨਾ ਥਾਮਮਜ੍ਝਿਮਂ ਨਿਵਤ੍ਤੇਤਿ. ਸਬ੍ਬਹੇਟ੍ਠਿਮਾਹੀਤਿ ¶ ਸਬ੍ਬੇਸਂ ਦਬ੍ਬਸਮ੍ਭਾਰਾਨਂ ਹੇਟ੍ਠਾ ਠਿਤਾਹਿ. ਤੁਲਾਹੀਤਿ ਗੇਹਥਮ੍ਭਾਨਮੁਪਰਿ ਵਿਤ੍ਥਾਰਵਸੇਨ ਠਿਤੇਹਿ ਕਟ੍ਠਵਿਸੇਸੇਹਿ. ਇਮਿਨਾ ਅਟ੍ਠਕਥਾਵਚਨੇਨ ਚ ਤੁਲਾਯ ਸਰੂਪਂ ਪਾਕਟਂ. ਕੇਚਿ ਪਨ ਤੁਲਾਯ ਸਰੂਪਂ ਅਞ੍ਞਥਾ ਵਦਨ੍ਤਿ. ਏਤੇਨਾਤਿ ‘‘ਮਜ੍ਝਿਮਸ੍ਸ ਪੁਰਿਸਸ੍ਸ ਅਸੀਸਘਟ੍ਟਾ’’ਤਿਵਚਨੇਨ ਦਸ੍ਸਿਤਾ ਹੋਤੀਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਯਾ ਕਾਚਿ ਕੁਟਿ ਵੁਚ੍ਚਤੀਤਿ ਯੋਜਨਾ. ਉਪਰੀਤਿ ਦ੍ਵਿਭੂਮਿਕਕੁਟਿਯਂ ਭੂਮਿਤੋ ਉਪਰਿ ਭੂਮਿਯਂ. ਅਚ੍ਛਨ੍ਨਤਲਾਤਿ ਅਨੁਲ੍ਲੋਚਤਲਾ, ਅਵਿਤਾਨਤਲਾਤਿ ਅਤ੍ਥੋ. ਇਧ ਪਨਾਤਿ ਇਮਸ੍ਮਿਂ ਪਨ ਸਿਕ੍ਖਾਪਦੇ.

੧੩੩. ਹੀਤਿ ਸਚ੍ਚਂ, ਯਸ੍ਮਾ ਵਾ. ਯਾਯਨ੍ਤਿ ਯਾ ਅਯਂ ਕੁਟਿ. ਤਤ੍ਥਾਤਿ ਤਸ੍ਸਂ ਸੀਸਘਟ੍ਟਕੁਟਿਯਂ. ਅਨੋਣਤੇਨ ਭਿਕ੍ਖੁਨਾਤਿ ਯੋਜਨਾ. ਯਸ੍ਸਾਤਿ ਕੁਟਿਯਾ. ਅਪਰਿਭੋਗਨ੍ਤਿ ਨ ਪਰਿਭੁਞ੍ਜਿਤਬ੍ਬਂ, ਨ ਪਰਿਭੁਞ੍ਜਨਾਰਹਨ੍ਤਿ ਅਤ੍ਥੋ. ਪਤਾਣੀਤਿ ਪਤਨਸ੍ਸ ਨਿਵਾਰਣਾ ਆਣਿ ਅਗ੍ਗਖੀਲਾ. ਸਾ ਹਿ ਆਬਨ੍ਧਂ ਨਯਤਿ ਪਵਤ੍ਤੇਤੀਤਿ ਆਣੀਤਿ ਵੁਚ੍ਚਤਿ. ਯਤ੍ਥਾਤਿ ਯਸ੍ਮਿਂ ਮਞ੍ਚਪੀਠੇ ¶ . ਨ ਨਿਪ੍ਪਤਨ੍ਤੀਤਿ ਨਿਕ੍ਖਨ੍ਤੋ ਹੁਤ੍ਵਾ ਨ ਪਤਨ੍ਤਿ. ਆਹਚ੍ਚਪਾਦਕੇਤਿ ਅਙ੍ਗੇ ਆਹਨਿਤ੍ਵਾ ਵਿਜ੍ਝਿਤ੍ਵਾ ਤਤ੍ਥ ਪਵੇਸਿਤਪਾਦਕੇ. ਨਾਗਦਨ੍ਤਕਾਦੀਸੂਤਿ ਨਾਗਸ੍ਸ ਦਨ੍ਤੋ ਵਿਯਾਤਿ ਨਾਗਦਨ੍ਤਕੋ, ਸਦਿਸਤ੍ਥੇ ਕੋ, ਸੋ ਆਦਿ ਯੇਸਂ ਤੇਤਿ ਨਾਗਦਨ੍ਤਕਾਦਯੋ, ਤੇਸੁ. ਆਦਿਸਦ੍ਦੇਨ ਭਿਤ੍ਤਿਖੀਲਾਦਯੋ ਸਙ੍ਗਣ੍ਹਾਤੀਤਿ. ਅਟ੍ਠਮਂ.

੯. ਮਹਲ੍ਲਕਵਿਹਾਰਸਿਕ੍ਖਾਪਦਂ

੧੩੫. ਨਵਮੇ ਪਿਟ੍ਠਸਙ੍ਘਾਟਸ੍ਸਾਤਿ ਦ੍ਵਾਰਬਾਹਾਯ. ਸਾ ਹਿ ਪਿਟ੍ਠੇ ਦ੍ਵਿਨ੍ਨਂ ਕਵਾਟਾਨਂ ਸਂ ਏਕਤੋ ਘਾਟੋ ਘਟਨਂ ਸਮਾਗਮੋ ਏਤਸ੍ਸਤ੍ਥੀਤਿ ਪਿਟ੍ਠਸਙ੍ਘਾਟੋਤਿ ਵੁਚ੍ਚਤਿ. ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਮਹਾਅਟ੍ਠਕਥਾਯਂ ਵੁਤ੍ਤਨ੍ਤਿ ਯੋਜਨਾ. ਤਨ੍ਤਿ ਮਹਾਅਟ੍ਠਕਥਾਯ ਵੁਤ੍ਤਵਚਨਂ. ਏਵਂ ‘‘ਤਦੇਵਾ’’ਤਿ ਏਤ੍ਥਾਪਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਭਗਵਤਾਪੀਤਿ ਨ ਮਹਾਅਟ੍ਠਕਥਾਚਰਿਯੇਹਿ ਏਵ ਵੁਤ੍ਤਂ, ਅਥ ਖੋ ਭਗਵਤਾਪਿ ਕਤੋਤਿ ਯੋਜਨਾ. ਦ੍ਵਾਰਬਨ੍ਧੇਨ ਅਗ੍ਗਲ਼ਸ੍ਸ ਅਵਿਨਾਭਾਵਤੋ ‘‘ਅਗ੍ਗਲ਼ਟ੍ਠਪਨਾਯਾ’’ਤਿ ਵੁਤ੍ਤੇਪਿ ਅਗ੍ਗਲ਼ੇਨ ਸਹ ਦ੍ਵਾਰਬਨ੍ਧਟ੍ਠਪਨਾਯਾਤਿ ਅਤ੍ਥੋਵ ਗਹੇਤਬ੍ਬੋਤਿ ਆਹ ‘‘ਸਕਵਾਟਕਦ੍ਵਾਰਬਨ੍ਧਟ੍ਠਪਨਾਯਾ’’ਤਿ. ਅਗ੍ਗਲ਼ੋਤਿ ਕਵਾਟਫਲਕੋ. ਇਮਮੇਵਤ੍ਥਨ੍ਤਿ ¶ ਮਯਾ ਵੁਤ੍ਤਂ ਇਮਂ ਏਵ ਅਤ੍ਥਂ ਸਨ੍ਧਾਯਾਤਿ ਸਮ੍ਬਨ੍ਧੋ. ਏਤ੍ਥਾਤਿ ‘‘ਅਗ੍ਗਲ਼ਟ੍ਠਪਨਾਯਾ’’ਤਿਵਚਨੇ. ਅਧਿਪ੍ਪਾਯੋਤਿ ਭਗਵਤੋ ਅਭਿਸਨ੍ਧਿ. ਹਿ-ਸਦ੍ਦੋ ਵਿਤ੍ਥਾਰਜੋਤਕੋ. ਕਮ੍ਪਤੀਤਿ ਭੁਸਂ ਕਮ੍ਪਤਿ. ਚਲਤੀਤਿ ਈਸਂ ਚਲਤਿ. ਤੇਨਾਤਿ ਤੇਨ ਸਿਥਿਲਪਤਨਹੇਤੁਨਾ. ਮਾਤਿਕਾਯਂ, ਪਦਭਾਜਨੀਯਞ੍ਚ ‘‘ਅਗ੍ਗਲ਼ਟ੍ਠਪਨਾਯਾ’’ਤਿਪਦਸ੍ਸ ਸਮ੍ਬਨ੍ਧਾਭਾਵਤੋ ਤਸ੍ਸ ਸਮ੍ਬਨ੍ਧਂ ਦਸ੍ਸੇਤੁਂ ਵੁਤ੍ਤਂ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ‘‘ਅਗ੍ਗਲ਼ਟ੍ਠਪਨਾਯਾ’’ਤਿਵਚਨੇ ਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਅਤ੍ਥਸ੍ਸ ਕਾਰਣਸ੍ਸ ਉਪ੍ਪਤ੍ਤਿ ਅਤ੍ਥੁਪ੍ਪਤ੍ਤਿ, ਸਾਯੇਵ ਅਟ੍ਠੁਪ੍ਪਤ੍ਤੀਤਿ ਵੁਚ੍ਚਤਿ ਤ੍ਥਕਾਰਸ੍ਸ ਟ੍ਠਕਾਰਂ ਕਤ੍ਵਾ. ਅਧਿਕਾਰਤੋ ਦਟ੍ਠਬ੍ਬੋਤਿ ਯੋਜਨਾ.

ਯਂ ਪਨ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਯਸ੍ਸਾਤਿ ਮਹਾਵਿਹਾਰਸ੍ਸ. ਉਪਰੀਤਿ ਦ੍ਵਾਰਤੋ ਉਪਰਿ. ਤੀਸੁ ਦਿਸਾਸੂਤਿ ਉਭੋਸੁ ਪਸ੍ਸੇਸੁ, ਉਪਰੀਤਿ ਤੀਸੁ ਦਿਸਾਸੁ. ਤਤ੍ਰਾਪੀਤਿ ਖੁਦ੍ਦਕੇ ਵਿਹਾਰੇਪਿ. ਸਾਤਿ ਭਿਤ੍ਤਿ. ਅਪਰਿਪੂਰਉਪਚਾਰਾਪੀਤਿ ਸਮਨ੍ਤਾ ਕਵਾਟਪਮਾਣੇਨ ਅਪਰਿਪੂਰਉਪਚਾਰਾਪਿ. ਉਕ੍ਕਟ੍ਠਪਰਿਚ੍ਛੇਦੇਨਾਤਿ ਉਕ੍ਕਂਸਪਮਾਣੇਨ. ਹਤ੍ਥਪਾਸਤੋ ਅਤਿਰੇਕਂ ਨ ਲਿਮ੍ਪਿਤਬ੍ਬੋਤਿ ਅਧਿਪ੍ਪਾਯੋ. ਤੀਸੁ ਦਿਸਾਸੁ ਏਵ ਲਿਮ੍ਪਿਤਬ੍ਬੋ ਨ ਹੋਤਿ, ਲੇਪੋਕਾਸੇ ਸਤਿ ਅਧੋਭਾਗੇਪਿ ਲਿਮ੍ਪਿਤਬ੍ਬੋਤਿ ਆਹ ‘‘ਸਚੇ ਪਨਸ੍ਸਾ’’ਤਿਆਦਿ. ਅਸ੍ਸਾਤਿ ਵਿਹਾਰਸ੍ਸ. ਆਲੋਕਂ ਸਨ੍ਧੇਨ੍ਤਿ ਪਿਦਹਨ੍ਤੀਤਿ ‘‘ਆਲੋਕਸਨ੍ਧੀ’’ਤਿ ਵੁਤ੍ਤੇ ਵਾਤਪਾਨਕਵਾਟਕਾਯੇਵਾਤਿ ਦਸ੍ਸੇਨ੍ਤੋ ਆਹ ‘‘ਵਾਤਪਾਨਕਵਾਟਕਾ ਵੁਚ੍ਚਨ੍ਤੀ’’ਤਿ. ਵਾਤਂ ਪਿਵਤੀਤਿ ਵਾਤਪਾਨਂ, ਦ੍ਵਾਰਂ, ਤਸ੍ਮਿਂ ਠਿਤਾ ਕਵਾਟਕਾ ਵਾਤਪਾਨਕਵਾਟਕਾ. ਤੇਤਿ ਵਾਤਪਾਨਕਵਾਟਕਾ ਪਹਰਨ੍ਤੀਤਿ ਸਮ੍ਬਨ੍ਧੋ. ਏਤ੍ਥਾਤਿ ਆਲੋਕਸਨ੍ਧਿਮ੍ਹਿ. ਸਬ੍ਬਦਿਸਾਸੂਤਿ ਉਭੋਸੁ ਪਸ੍ਸੇਸੁ, ਹੇਟ੍ਠਾ, ਉਪਰੀਤਿ ¶ ਚਤੂਸੁ ਦਿਸਾਸੁ. ‘‘ਤਸ੍ਮਾ’’ਤਿਪਦਂ ‘‘ਲਿਮ੍ਪਿਤਬ੍ਬੋ ਵਾ ਲੇਪਾਪੇਤਬ੍ਬੋ ਵਾ’’ਤਿਪਦਦ੍ਵਯੇ ਹੇਤੁ. ਏਤ੍ਥਾਤਿ ‘‘ਆਲੋਕਸਨ੍ਧਿਪਰਿਕਮ੍ਮਾਯਾ’’ਤਿਪਦੇ.

ਇਮਿਨਾਤਿ ਸੇਤਵਣ੍ਣਾਦਿਨਾ. ਸਬ੍ਬਮੇਤਨ੍ਤਿ ਏਤਂ ਸਬ੍ਬਂ ਸੇਤਵਣ੍ਣਾਦਿਕਂ.

ਯਨ੍ਤਿ ਕਿਚ੍ਚਂ. ਕਤ੍ਤਬ੍ਬਂ ਕਿਚ੍ਚਨ੍ਤਿ ਸਮ੍ਬਨ੍ਧੋ. ਸਦ੍ਦਨ੍ਤਰਬ੍ਯਵਹਿਤੋਪਿ ਦ੍ਵਤ੍ਤਿਸਦ੍ਦੋ ਪਰਿਯਾਯਸਦ੍ਦੇਨ ਸਮਾਸੋ ਹੋਤੀਤਿ ਆਹ ‘‘ਛਦਨਸ੍ਸ ਦ੍ਵਤ੍ਤਿਪਰਿਯਾਯ’’ਨ੍ਤਿ. ਦ੍ਵੇ ਵਾ ਤਯੋ ਵਾ ਪਰਿਯਾਯਾ ਸਮਾਹਟਾਤਿ ਦ੍ਵਤ੍ਤਿਪਰਿਯਾਯਂ ¶ , ਸਮਾਹਾਰੇ ਦਿਗੁ, ਤਿਸਦ੍ਦੇ ਪਰੇ ਦ੍ਵਿਸ੍ਸ ਅਕਾਰੋ ਹੋਤਿ. ਪਰਿਕ੍ਖੇਪੋਤਿ ਅਨੁਕ੍ਕਮੇਨ ਪਰਿਕ੍ਖੇਪੋ. ਅਪਤ੍ਯੂਪਸਗ੍ਗਸ੍ਸ ਪਟਿਸੇਧਵਾਚਕਤ੍ਤਾ ‘‘ਅਹਰਿਤੇ’’ਤਿ ਵੁਤ੍ਤਂ. ਏਤ੍ਥਾਤਿ ‘‘ਅਪਹਰਿਤੇ’’ਤਿ ਪਦੇ. ‘‘ਹਰਿਤ’’ਨ੍ਤਿ ਇਮਿਨਾ ਅਧਿਪ੍ਪੇਤਨ੍ਤਿ ਸਮ੍ਬਨ੍ਧੋ. ਆਦਿਕਪ੍ਪਕਾਲੇ ਅਪਰਣ੍ਣਤੋ ਪੁਬ੍ਬੇ ਪਵਤ੍ਤਂ ਅਨ੍ਨਂ ਪੁਬ੍ਬਣ੍ਣਂ, ਅਪਰਸ੍ਮਿਂ ਪੁਬ੍ਬਣ੍ਣਤੋ ਪਚ੍ਛਾ ਪਵਤ੍ਤਂ ਅਨ੍ਨਂ ਅਪਰਣ੍ਣਂ, ਨਕਾਰਦ੍ਵਯਸ੍ਸ ਣਕਾਰਦ੍ਵਯਂ ਕਤ੍ਵਾ. ਤੇਨੇਵਾਤਿ ਅਧਿਪ੍ਪੇਤਤ੍ਤਾ ਏਵ.

ਵੁਤ੍ਤਨ੍ਤਿ ਵਪਿਤਂ, ਯਥਾ ‘‘ਸੁਮੇਧਭੂਤੋ ਭਗਵਾ’’ਤਿਏਤ੍ਥ ਬੋਧਿਂ ਅਸਮ੍ਪਤ੍ਤੋਪਿ ਬੋਧਿਸਤ੍ਤੋ ਸੁਮੇਧਭੂਤੋ ‘‘ਭਗਵਾ’’ਤਿ ਵੁਚ੍ਚਤਿ ਅਵਸ੍ਸਮ੍ਭਾਵਿਯਤ੍ਤਾ, ਏਵਂ ਹਰਿਤਂ ਅਸਮ੍ਪਤ੍ਤਮ੍ਪਿ ਖੇਤ੍ਤਂ ‘‘ਹਰਿਤ’’ਨ੍ਤਿ ਵੁਚ੍ਚਤਿ ਅਵਸ੍ਸਮ੍ਭਾਵਿਯਤ੍ਤਾਤਿ ਅਤ੍ਥਂ ਦਸ੍ਸੇਤਿ ‘‘ਯਸ੍ਮਿਮ੍ਪਿ ਖੇਤ੍ਤੇ’’ਤਿਆਦਿਨਾ.

ਅਹਰਿਤੇਯੇਵਾਤਿ ਹਰਿਤਵਿਰਹੇ ਏਵ ਖੇਤ੍ਤੇਤਿ ਯੋਜਨਾ. ਤਤ੍ਰਾਪੀਤਿ ਅਹਰਿਤਖੇਤ੍ਤੇਪਿ. ‘‘ਪਿਟ੍ਠਿਵਂਸਸ੍ਸਾ’’ਤਿਪਦਂ ‘‘ਪਸ੍ਸੇ’’ਤਿਪਦੇ ਸਾਮ੍ਯਤ੍ਥਛਟ੍ਠੀ, ਇਮਿਨਾ ਪਕਤਿਗੇਹਂ ਦਸ੍ਸੇਤਿ. ‘‘ਕੂਟਾਗਾਰਕਣ੍ਣਿਕਾਯਾ’’ਤਿਪਦਂ ‘‘ਉਪਰਿ, ਥੂਪਿਕਾਯਾ’’ਤਿਪਦੇ ਸਾਮ੍ਯਤ੍ਥਛਟ੍ਠੀ, ਇਮਿਨਾ ਏਕਕੂਟਯੁਤ੍ਤੇ ਮਾਲ਼ਾਦਿਕੇ ਦਸ੍ਸੇਤਿ. ਠਿਤਂ ਭਿਕ੍ਖੁਨ੍ਤਿ ਸਮ੍ਬਨ੍ਧੋ. ਨਿਸਿਨ੍ਨਕਂ ਯਂਕਞ੍ਚਿ ਜਨਨ੍ਤਿ ਯੋਜਨਾ. ਤਸ੍ਸਾਤਿ ਠਿਤਟ੍ਠਾਨਸ੍ਸ. ਅਨ੍ਤੋਤਿ ਅਬ੍ਭਨ੍ਤਰੇ, ਹਿ ਯਸ੍ਮਾ ਅਯਂ ਓਕਾਸੋ ਪਤਨੋਕਾਸੋਤਿ ਯੋਜਨਾ.

੧੩੬. ਛਾਦਿਤਂ ਨਾਮਾਤਿ ਏਤ੍ਥ ਛਾਦਿਤਸਦ੍ਦੋ ਭਾਵਤ੍ਥੋ ਹੋਤਿ, ਤੇਨਾਹ ‘‘ਛਾਦਨ’’ਨ੍ਤਿ. ਉਜੁਕਮੇਵਾਤਿ ਛਦਨੁਟ੍ਠਾਪਨਤੋ ਉਦ੍ਧਂ ਉਜੁਕਂ ਏਵ. ਤਨ੍ਤਿ ਛਾਦਨਂ. ਅਪਨੇਤ੍ਵਾਪੀਤਿ ਨਾਸੇਤ੍ਵਾਪਿ. ਤਸ੍ਮਾਤਿ ਯਸ੍ਮਾ ਲਬ੍ਭਤਿ, ਤਸ੍ਮਾ, ਪਕ੍ਕਮਿਤਬ੍ਬਨ੍ਤਿ ਸਮ੍ਬਨ੍ਧੋ. ਪਰਿਕ੍ਖੇਪੇਨਾਤਿ ਪਰਿਵਾਰੇਨ ਛਾਦੇਨ੍ਤਸ੍ਸਾਤਿ ਯੋਜਨਾ. ਇਧਾਪੀਤਿ ਪਰਿਯਾਯਛਾਦਨੇਪਿ ਅਧਿਟ੍ਠਹਿਤ੍ਵਾਤਿ ਸਮ੍ਬਨ੍ਧੋ. ਤੁਣ੍ਹੀਭੂਤੇਨਾਤਿ ਤੁਣ੍ਹੀਭੂਤੋ ਹੁਤ੍ਵਾ. ਛਦਨੁਪਰੀਤਿ ਛਦਨਸ੍ਸ ਉਪਰਿ. ਹੀਤਿ ਸਚ੍ਚਂ. ‘‘ਤਤੋ ਚੇ ਉਤ੍ਤਰਿ’’ਨ੍ਤਿ ਏਤ੍ਥ ਤਤੋ ਦ੍ਵਤ੍ਤਿਪਰਿਯਾਯਤੋ ਉਪਰੀਤਿ ਦਸ੍ਸੇਨ੍ਤੋ ਆਹ ‘‘ਤਿਣ੍ਣਂ ਮਗ੍ਗਾਨਂ ਵਾ’’ਤਿਆਦਿ.

੧੩੭. ਕਰੇਨ ¶ ¶ ਹਤ੍ਥੇਨ ਲੁਨਿਤਬ੍ਬੋ, ਛਿਨ੍ਦਿਤਬ੍ਬੋ, ਲਾਤਬ੍ਬੋ ਗਹੇਤਬ੍ਬੋਤਿ ਵਾ ਕਰਲ਼ੋਤਿ ਕਤੇ ਅਤ੍ਥਪਕਰਣਾਦਿਤੋ ਤਿਣਮੁਟ੍ਠਿ ਏਵਾਤਿ ਆਹ ‘‘ਤਿਣਮੁਟ੍ਠਿਯ’’ਨ੍ਤਿ. ਨਵਮਂ.

੧੦. ਸਪ੍ਪਾਣਕਸਿਕ੍ਖਾਪਦਂ

੧੪੦. ਦਸਮੇ ‘‘ਜਾਨ’’ਨ੍ਤਿ ਗਚ੍ਛਨ੍ਤਾਦਿਗਣੋਤਿ ਆਹ ‘‘ਜਾਨਨ੍ਤੋ’’ਤਿ. ਸਂ ਵਿਜ੍ਜਤਿ ਪਾਣੋ ਏਤ੍ਥਾਤਿ ਸਪਾਣਕਂ. ਏਤਨ੍ਤਿ ਉਦਕਂ. ਸਯਂ ਜਾਨਨ੍ਤੋਪਿ ਪਰੇਨ ਜਾਨਾਪੇਨ੍ਤੋਪਿ ਜਾਨਾਤਿਯੇਵ ਨਾਮਾਤਿ ਆਹ ‘‘ਯਥਾ ਤਥਾ ਵਾ’’ਤਿ. ਸਪਾਣਕਂ ਉਦਕਨ੍ਤਿ ਕਰਣਤ੍ਥੇ ਚੇਤਂ ਉਪਯੋਗਵਚਨਂ, ਤੇਨਾਹ ‘‘ਤੇਨ ਉਦਕੇਨਾ’’ਤਿ. ਪੁਬ੍ਬੇਤਿ ਪਥਵਿਖਣਨਸਿਕ੍ਖਾਪਦਾਦਿਕੇ.

ਤਤ੍ਥਾਤਿ ‘‘ਸਿਞ੍ਚੇਯ੍ਯ ਵਾ ਸਿਞ੍ਚਾਪੇਯ੍ਯ ਵਾ’’ਤਿਪਦੇ. ਧਾਰਨ੍ਤਿ ਸੋਤਂ. ਮਾਤਿਕਂ ਪਮੁਖਨ੍ਤਿ ਮਾਤਿਕਂ ਅਭਿਮੁਖਂ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਾਨੇ. ਅਞ੍ਞਤੋ ਠਾਨਤੋ ਅਞ੍ਞਂ ਠਾਨਂ ਨੇਤੀਤਿ ਯੋਜਨਾ. ‘‘ਸਪਾਣਕਂ ਉਦਕ’’ਨ੍ਤਿ ਸਾਮਞ੍ਞਵਚਨਸ੍ਸਪਿ ਵਿਸੇਸੇ ਅਵਟ੍ਠਾਨਤੋ, ਵਿਸੇਸਤ੍ਥਿਨਾ ਚ ਵਿਸੇਸਸ੍ਸ ਅਨੁਪਯੋਜਿਤਬ੍ਬਤੋ ਇਧ ਵਿਸੇਸਉਦਕਨ੍ਤਿ ਸਨ੍ਧਾਯਭਾਸਿਤਤ੍ਥਂ ਦਸ੍ਸੇਨ੍ਤੋ ਆਹ ‘‘ਇਦਂ ਪਨਾ’’ਤਿਆਦਿ. ਇਦਂ ਪਨ ਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਯਨ੍ਤਿ ਉਦਕਂ ‘‘ਗਚ੍ਛਤੀ’’ਤਿਪਦੇ ਕਤ੍ਤਾ. ਯਤ੍ਥਾਤਿ ਯਸ੍ਮਿਂ ਉਦਕੇਤਿ. ਦਸਮਂ.

ਭੂਤਗਾਮਵਗ੍ਗੋ ਦੁਤਿਯੋ.

੩. ਓਵਾਦਵਗ੍ਗੋ

੧. ਓਵਾਦਸਿਕ੍ਖਾਪਦ-ਅਤ੍ਥਯੋਜਨਾ

੧੪੪. ਭਿਕ੍ਖੁਨਿਵਗ੍ਗਸ੍ਸ ਪਠਮੇ ਤੇਸਨ੍ਤਿ ਥੇਰਾਨਂ. ਮਹਾਕੁਲੇਹਿ ਨਿਕ੍ਖਮਿਤ੍ਵਾ ਪਬ੍ਬਜਿਤਾਤਿ ਯੋਜਨਾ. ਕੁਲਧੀਤਰੋ ਵਿਜ੍ਜਮਾਨਗੁਣਂ ਕਥਯਨ੍ਤੀਤਿ ¶ ਸਮ੍ਬਨ੍ਧੋ. ‘‘ਞਾਤਿਮਨੁਸ੍ਸਾਨ’’ਨ੍ਤਿਪਦਂ ‘‘ਕਥਯਨ੍ਤੀ’’ਤਿਪਦੇ ਸਮ੍ਪਦਾਨਂ. ਕੁਤੋਤਿ ਕਸ੍ਸ ਥੇਰਸ੍ਸ ਸਨ੍ਤਿਕਾਤਿ ਅਤ੍ਥੋ. ਤੇਸਨ੍ਤਿ ਥੇਰਾਨਂ ਗੁਣਨ੍ਤਿ ਸਮ੍ਬਨ੍ਧੋ. ‘‘ਕਥੇਤੁ’’ਨ੍ਤਿਪਦਮਪੇਕ੍ਖਿਤ੍ਵਾ ‘‘ਵਿਜ੍ਜਮਾਨਗੁਣੇ’’ਤਿ ਵਤ੍ਤਬ੍ਬੇ ਅਵਤ੍ਵਾ ‘‘ਵਟ੍ਟਨ੍ਤੀ’’ਤਿਪਦਮਪੇਕ੍ਖਿਯ ¶ ‘‘ਵਿਜ੍ਜਮਾਨਗੁਣਾ’’ਤਿ ਵੁਤ੍ਤਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਤੋਤਿ ਕਥਨਕਾਰਣਾ ਅਭਿਹਰਿਂਸੂਤਿ ਸਮ੍ਬਨ੍ਧੋ. ਤੇਨਾਤਿ ਅਭਿਹਰਣਹੇਤੁਨਾ.

ਤੇਸਨ੍ਤਿ ਛਬ੍ਬਗ੍ਗਿਯਾਨਂ. ਤਾਸੂਤਿ ਭਿਕ੍ਖੁਨੀਸੁ. ‘‘ਭਿਕ੍ਖੁਨਿਯੋ’’ਤਿਪਦਂ ‘‘ਉਪਸਙ੍ਕਮਿਤ੍ਵਾ’’ਤਿਪਦੇ ਕਮ੍ਮਂ. ਛਬ੍ਬਗ੍ਗਿਯਾਨਂ ਭਿਕ੍ਖੁਨੀਸੁ ਉਪਸਙ੍ਕਮਨਂ ਲਾਭਤਣ੍ਹਾਯ ਹੋਤਿ, ਭਿਕ੍ਖੁਨੀਨਂ ਛਬ੍ਬਗ੍ਗੀਸੁ ਉਪਸਙ੍ਕਮਨਂ ਚਲਚਿਤ੍ਤਤਾਯ ਹੋਤੀਤਿ ਅਞ੍ਞਮਞ੍ਞੂਪਸਙ੍ਕਮਨ੍ਤਾਨਂ ਵਿਸੇਸੋ. ਤਿਰਚ੍ਛਾਨਭੂਤਾ ਕਥਾ ਤਿਰਚ੍ਛਾਨਕਥਾ ਨਿਰਤ੍ਥਕਕਥਾਤਿ ਦਸ੍ਸੇਨ੍ਤੋ ਆਹ ‘‘ਤਿਰਚ੍ਛਾਨਕਥਨ੍ਤੀ’’ਤਿ. ਸਗ੍ਗਮਗ੍ਗਗਮਨੇਪੀਤਿ ਪਿਸਦ੍ਦੋ ਮੋਕ੍ਖਗਮਨੇ ਪਨ ਕਾ ਨਾਮ ਕਥਾਤਿ ਦਸ੍ਸੇਤਿ. ਰਾਜਾਨੋ ਆਰਬ੍ਭ ਪਵਤ੍ਤਾ ਕਥਾ ਰਾਜਕਥਾ. ਆਦਿਸਦ੍ਦੇਨ ਚੋਰਕਥਾਦਯੋ ਸਙ੍ਗਣ੍ਹਾਤਿ.

੧੪੭. ਤੇ ਭਿਕ੍ਖੂਤਿ ਛਬ੍ਬਗ੍ਗਿਯਾ ਭਿਕ੍ਖੂ ਭਵੇਯ੍ਯੁਨ੍ਤਿ ਸਮ੍ਬਨ੍ਧੋ. ਅਦਿਟ੍ਠਂ ਸਚ੍ਚਂ ਯੇਹੀਤਿ ਅਦਿਟ੍ਠਸਚ੍ਚਾ, ਤੇਸਂ ਭਾਵੋ ਅਦਿਟ੍ਠਸਚ੍ਚਤ੍ਤਂ, ਤਸ੍ਮਾ ਅਦਿਟ੍ਠਸਚ੍ਚਤ੍ਤਾ ਬਨ੍ਧਿਤ੍ਵਾਤਿ ਯੋਜਨਾ. ਨੇਸਨ੍ਤਿ ਛਬ੍ਬਗ੍ਗਿਯਾਨਂ. ਅਞ੍ਞੇਨੇਵ ਉਪਾਯੇਨਾਤਿ ਅਲਦ੍ਧਸਮ੍ਮੁਤਿਤੋ ਅਞ੍ਞੇਨੇਵ ਲਦ੍ਧਸਮ੍ਮੁਤਿਸਙ੍ਖਾਤੇਨ ਕਾਰਣੇਨ ਕਤ੍ਤੁਕਾਮੋਤਿ ਸਮ੍ਬਨ੍ਧੋ. ਪਰਤੋਤਿ ਪਰਸ੍ਮਿਂ ਪਚ੍ਛਾ, ਉਪਰੀਤਿ ਅਤ੍ਥੋ. ਕਰੋਨ੍ਤੋ ਵਾਤਿ ਪਰਿਬਾਹਿਰੇ ਕਰੋਨ੍ਤੋ ਏਵ ਹੁਤ੍ਵਾ ਆਹਾਤਿ ਯੋਜਨਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਯਸ੍ਮਾ ਨ ਭੂਤਪੁਬ੍ਬਾਨਿ, ਇਤਿ ਤਸ੍ਮਾ ਪਰਿਬਾਹਿਰਂ ਕਰੋਨ੍ਤੋ ਵਾਤਿ ਅਤ੍ਥੋ.

ਤਤ੍ਥਾਤਿ ‘‘ਅਨੁਜਾਨਾਮੀ’’ਤਿਆਦਿਵਚਨੇ. ਸੀਲਵਾਤਿ ਏਤ੍ਥ ਵਨ੍ਤੁਸਦ੍ਦੋ ਪਸਂਸਤ੍ਥੇ ਚ ਅਤਿਸਯਤ੍ਥੇ ਚ ਨਿਚ੍ਚਯੋਗਤ੍ਥੇ ਚ ਹੋਤਿ. ਤਸ੍ਸਾਤਿ ਲਦ੍ਧਸਮ੍ਮੁਤਿਕਸ੍ਸ. ਤਨ੍ਤਿ ਸੀਲਂ. ਪਾਤਿਮੋਕ੍ਖਸਂਵਰਸਦ੍ਦਾਨਂ ਕਮ੍ਮਧਾਰਯਭਾਵਂ, ਤੇਹਿ ਚ ਸਂਵੁਤਸਦ੍ਦਸ੍ਸ ਤਪ੍ਪੁਰਿਸਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਪਾਤਿਮੋਕ੍ਖੋਵਾ’’ਤਿਆਦਿ. ਤਤ੍ਥ ਏਵਸਦ੍ਦੇਨ ਕਮ੍ਮਧਾਰਯਭਾਵਂ, ਏਨਸਦ੍ਦੇਨ ਚ ਤਪ੍ਪੁਰਿਸਭਾਵਂ ਦਸ੍ਸੇਤੀਤਿ ਦਟ੍ਠਬ੍ਬਂ.

ਵਤ੍ਤਤੀਤਿ ¶ ਅਤ੍ਤਭਾਵਂ ਪਵਤ੍ਤੇਤਿ. ਕਾਰਿਤਪਚ੍ਚਯੋ ਹਿ ਅਦਸ੍ਸਨਂ ਗਤੋ. ਇਮਿਨਾ ਇਰਿਯਾਪਥਵਿਹਾਰ ਦਿਬ੍ਬਵਿਹਾਰ ਬ੍ਰਹ੍ਮਵਿਹਾਰ ਅਰਿਯਵਿਹਾਰੇਸੁ ਚਤੂਸੁ ਵਿਹਾਰੇਸੁ ਅਤ੍ਤਭਾਵਵਤ੍ਤਨਂ ਇਰਿਯਾਪਥਵਿਹਾਰਂ ਦਸ੍ਸੇਤਿ. ਹੀਤਿ ਸਚ੍ਚਂ. ਏਤਨ੍ਤਿ ‘‘ਪਾਤਿਮੋਕ੍ਖਸਂਵਰਸਂਵੁਤੋ ਵਿਹਰਤੀ’’ਤਿਵਚਨਂ. ਵਿਭਙ੍ਗੇਤਿ ਝਾਨਵਿਭਙ੍ਗੇ.

‘‘ਸੀਲ’’ਨ੍ਤਿਆਦੀਨਿ ਅਟ੍ਠ ਪਦਾਨਿ ਤੁਲ੍ਯਾਧਿਕਰਣਾਨਿ. ਅਯਂ ਪਨੇਤ੍ਥ ਸਮ੍ਬਨ੍ਧੋ – ਸੀਲਂ ਕੁਸਲਾਨਂ ਧਮ੍ਮਾਨਂ ਸਮਾਪਤ੍ਤਿਯਾ ਪਤਿਟ੍ਠਾ ਆਦਿ ਚਰਣਂ ਸਂਯਮੋ ਸਂਵਰੋ ਮੋਕ੍ਖਂ ਪਮੋਕ੍ਖਨ੍ਤਿ. ਸਮਾਪਤ੍ਤਿਯਾਤਿ ¶ ਸਮਾਪਤ੍ਤਤ੍ਥਾਯ. ‘‘ਉਪੇਤੋ’’ਤਿਆਦੀਨਿ ਸਤ੍ਤ ਪਦਾਨਿ ਅਞ੍ਞਮਞ੍ਞਵੇਵਚਨਾਨਿ. ਤਤ੍ਥ ਉਪਪਨ੍ਨੋਤਿ ਯੁਤ੍ਤੋ ਅਨੁਯੁਤ੍ਤੋ. ਸਮਨ੍ਨਾਗਤੋਤਿ ਸਮਨ੍ਤਤੋ ਅਨੁ ਪੁਨਪ੍ਪੁਨਂ ਆਗਤੋਤਿ ਸਮਨ੍ਨਾਗਤੋ, ਸਮਙ੍ਗੀਭੂਤੋਤਿ ਅਤ੍ਥੋ. ਏਤ੍ਥ ਹਿ ਸਂਸਦ੍ਦੋ ਸਮਨ੍ਤਤ੍ਥਵਾਚਕੋ, ਅਨੁਸਦ੍ਦੋ ਨਉਪਚ੍ਛਿਨ੍ਨਤ੍ਥਵਾਚਕੋ. ਤੇਨਾਤਿ ਤੇਨ ਕਾਰਣੇਨ. ਪਾਲੇਤੀਤਿ ਅਤ੍ਤਭਾਵਂ ਬਾਧਨਤੋ ਰਕ੍ਖਤਿ. ਯਪੇਤੀਤਿ ਅਤ੍ਤਭਾਵੋ ਪਵਤ੍ਤਤਿ. ਯਾਪੇਤੀਤਿ ਅਤ੍ਤਭਾਵਂ ਪਵਤ੍ਤਾਪੇਤਿ. ਯਪ ਯਾਪਨੇ. ਯਾਪਨਂ ਪਵਤ੍ਤਨਨ੍ਤਿ ਹਿ ਧਾਤੁਪਾਠੇਸੁ ਵੁਤ੍ਤਂ (ਸਦ੍ਦਨੀਤਿਧਾਤੁਮਾਲਾਯਂ ੧੮ ਪਕਾਰਨ੍ਤਧਾਤੁ). ਵਿਹਰਤੀਤਿ ਏਤ੍ਥ ਏਕੋ ਆਕਾਰਤ੍ਥਵਾਚਕੋ ਇਤਿਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ, ਇਤਿ ਵੁਚ੍ਚਤਿ, ਇਤਿ ਵੁਤ੍ਤਨ੍ਤਿ ਵਾ ਯੋਜਨਾ.

ਆਚਾਰਗੋਚਰਸਦ੍ਦਾਨਂ ਦ੍ਵਨ੍ਦਭਾਵਂ, ਤੇਹਿ ਚ ਸਮ੍ਪਨ੍ਨਸਦ੍ਦਸ੍ਸ ਤਪ੍ਪੁਰਿਸਭਾਵਂ ਦਸ੍ਸੇਨ੍ਤੋ ਆਹ ‘‘ਆਚਾਰਗੋਚਰਸਮ੍ਪਨ੍ਨੋ’’ਤਿਆਦਿ. ਤਤ੍ਥ ਚਸਦ੍ਦੇਨ ਦ੍ਵਨ੍ਦਭਾਵਂ, ਏਨਸਦ੍ਦੇਨ ਚ ਤਪ੍ਪੁਰਿਸਭਾਵਂ ਦਸ੍ਸੇਤਿ. ਅਣੁਸਦ੍ਦੋ ਅਪ੍ਪਤ੍ਥੋ, ਮਤ੍ਤਸਦ੍ਦੋ ਪਮਾਣਤ੍ਥੋਤਿ ਆਹ ‘‘ਅਪ੍ਪਮਤ੍ਤਕੇਸੂ’’ਤਿ. ‘‘ਦਸ੍ਸਨਸੀਲੋ’’ਤਿਇਮਿਨਾ ‘‘ਦਸ੍ਸਾਵੀ’’ਤਿਏਤ੍ਥ ਆਵੀਸਦ੍ਦਸ੍ਸ ਤਸ੍ਸੀਲਤ੍ਥਭਾਵਂ ਦਸ੍ਸੇਤਿ. ‘‘ਸਮਾਦਾਯਾ’’ਤਿ ਏਤ੍ਥ ਸਂਪੁਬ੍ਬਆਪੁਬ੍ਬਸ੍ਸ ਦਾਸਦ੍ਦਸ੍ਸ ਕਮ੍ਮਾਪੇਕ੍ਖਤ੍ਤਾ ਤਸ੍ਸ ਕਮ੍ਮਂ ਦਸ੍ਸੇਤੁਂ ਵੁਤ੍ਤਂ ‘‘ਤਂ ਤਂ ਸਿਕ੍ਖਾਪਦ’’ਨ੍ਤਿ. ਇਮਿਨਾ ‘‘ਸਿਕ੍ਖਾਪਦੇਸੂ’’ਤਿ ਉਪਯੋਗਤ੍ਥੇ ਭੁਮ੍ਮਵਚਨਨ੍ਤਿ ਦਸ੍ਸੇਤਿ. ਅਥ ਵਾ ਸਿਕ੍ਖਾਪਦੇਸੂਤਿ ਨਿਦ੍ਧਾਰਣਤ੍ਥੇ ਭੁਮ੍ਮਵਚਨਮੇਤਂ. ‘‘ਤਂ ਤਂ ਸਿਕ੍ਖਾਪਦ’’ਨ੍ਤਿ ਕਮ੍ਮਂ ਪਨ ਅਜ੍ਝਾਹਰਿਤਬ੍ਬਨ੍ਤਿ ਦਸ੍ਸੇਤਿ. ‘‘ਸਮਾਦਾਯਾ’’ਤਿ ਏਤ੍ਥ ਸਂਸਦ੍ਦਸ੍ਸ ਚ ਆਪੁਬ੍ਬਸ੍ਸ ਦਾਸਦ੍ਦਸ੍ਸ ਚ ਯਕਾਰਸ੍ਸ ਚ ਅਤ੍ਥਂ ਦਸ੍ਸੇਤੁਂ ¶ ‘‘ਸਾਧੁਕਂ ਗਹੇਤ੍ਵਾ’’ਤਿ ਵੁਤ੍ਤਂ. ਏਤ੍ਥਾਤਿ ਇਮਿਸ੍ਸਂ ਅਟ੍ਠਕਥਾਯਂ. ਵਿਤ੍ਥਾਰੋ ਪਨ ਗਹੇਤਬ੍ਬੋਤਿ ਯੋਜਨਾ. ਯੋਤਿ ਕੁਲਪੁਤ੍ਤੋ.

ਅਸ੍ਸਾਤਿ ਲਦ੍ਧਸਮ੍ਮੁਤਿਕਸ੍ਸ. ਯਂ ਤਂ ਬਹੁ ਸੁਤਂ ਨਾਮ ਅਤ੍ਥਿ, ਤਂ ਨ ਸੁਤਮਤ੍ਤਮੇਵਾਤਿ ਯੋਜਨਾ. ਮਞ੍ਜੂਸਾਯਨ੍ਤਿ ਪੇਲ਼ਾਯਂ. ਸਾ ਹਿ ਸਾਮਿਕਸ੍ਸ ਸਧਨਤ੍ਤਂ ਮਞ੍ਞਤੇ ਇਮਾਯਾਤਿ ‘‘ਮਞ੍ਜੂਸਾ’’ਤਿ ਵੁਚ੍ਚਤਿ. ਮਞ੍ਜੂਸਾਯਂ ਰਤਨਂ ਸਨ੍ਨਿਚਿਤਂ ਵਿਯ ਸੁਤਂ ਸਨ੍ਨਿਚਿਤਂ ਅਸ੍ਮਿਂ ਪੁਗ੍ਗਲੇਤਿ ਯੋਜਨਾ, ਏਤੇਨਾਤਿ ‘‘ਸਨ੍ਨਿਚਿਤ’’ਨ੍ਤਿਪਦੇਨ, ਦਸ੍ਸੇਤੀਤਿ ਸਮ੍ਬਨ੍ਧੋ. ਸੋਤਿ ਲਦ੍ਧਸਮ੍ਮੁਤਿਕੋ ਭਿਕ੍ਖੁ. ਸਨ੍ਨਿਚਿਤਰਤਨਸ੍ਸੇਵਾਤਿ ਸਨ੍ਨਿਚਿਤਰਤਨਸ੍ਸ ਇਵ. ਤਨ੍ਤਿ ‘‘ਯੇ ਤੇ ਧਮ੍ਮਾ’’ਤਿਆਦਿਵਚਨਂ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਅਸ੍ਸਾਤਿ ਲਦ੍ਧਸਮ੍ਮੁਤਿਕਸ੍ਸ ਭਿਕ੍ਖੁਨੋ. ਤਤ੍ਥਾਤਿ ‘‘ਵਚਸਾ ਪਰਿਚਿਤਾ’’ਤਿਆਦਿਵਚਨੇ. ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਪਗੁਣਾਤਿ ਉਜੁਕਾ. ਉਜੁਕੋ ਹਿ ਅਜਿਮ੍ਹਤ੍ਤਾ ਪਕਟ੍ਠੋ ਉਤ੍ਤਮੋ ਗੁਣੋਤਿ ਅਤ੍ਥੇਨ ‘‘ਪਗੁਣੋ’’ਤਿ ਵੁਚ੍ਚਤਿ. ਅਨੁਪੇਕ੍ਖਿਤਾਤਿ ਪੁਨਪ੍ਪੁਨਂ ਉਪਗਨ੍ਤ੍ਵਾ ਇਕ੍ਖਿਤਾ, ਪਸ੍ਸਿਤਾ ਦਸ੍ਸਿਤਾਤਿ ਅਤ੍ਥੋ. ਅਤ੍ਥਤੋਤਿ ਅਭਿਧੇਯ੍ਯਤ੍ਥਤੋ, ਅਟ੍ਠਕਥਾਤੋਤਿ ਅਤ੍ਥੋ. ਕਾਰਣਤੋਤਿ ਧਮ੍ਮਤੋ, ਪਾਲ਼ਿਤੋਤਿ ਅਤ੍ਥੋ. ਦਿਟ੍ਠਿਸਦ੍ਦਸ੍ਸ ਪਞ੍ਞਾਸਦ੍ਦਵੇਵਚਨਤ੍ਤਾ ‘‘ਪਞ੍ਞਾਯਾ’’ਤਿ ਵੁਤ੍ਤਂ. ਸੁਪਚ੍ਚਕ੍ਖਕਤਾਤਿ ਸੁਟ੍ਠੁ ਅਕ੍ਖਾਨਂ ਇਨ੍ਦ੍ਰਿਯਾਨਂ ਪਟਿਮੁਖਂ ਕਤਾ.

‘‘ਬਹੁਸ੍ਸੁਤੋ’’ਤਿ ¶ ਏਤ੍ਥ ਬਹੁਸ੍ਸੁਤਸ੍ਸ ਤਿਵਿਧਭਾਵਂ ਦਸ੍ਸੇਨ੍ਤੋ ਆਹ ‘‘ਅਯਂ ਪਨਾ’’ਤਿਆਦਿ. ਨਿਸ੍ਸਯਤੋ ਮੁਚ੍ਚਤੀਤਿ ਨਿਸ੍ਸਯਮੁਚ੍ਚਨਕੋ. ਪਰਿਸਂ ਉਪਟ੍ਠਾਪੇਤੀਤਿ ਪਰਿਸੁਪਟ੍ਠਾਕੋ. ਭਿਕ੍ਖੁਨਿਯੋ ਓਵਦਤੀਤਿ ਭਿਕ੍ਖੁਨੋਵਾਦਕੋ. ਤਤ੍ਥਾਤਿ ਤਿਵਿਧੇਸੁ ਬਹੁਸ੍ਸੁਤੇਸੁ. ਨਿਸ੍ਸਯਮੁਚ੍ਚਨਕੇਨ ਏਤ੍ਤਕਂ ਉਗ੍ਗਹੇਤਬ੍ਬਨ੍ਤਿ ਸਮ੍ਬਨ੍ਧੋ. ਉਪਸਮ੍ਪਦਾਯਾਤਿ ਉਪਸਮ੍ਪਾਦੇਤ੍ਵਾ. ਪਞ੍ਚ ਵਸ੍ਸਾਨਿ ਏਤਸ੍ਸਾਤਿ ਪਞ੍ਚਵਸ੍ਸੋ. ਤੇਨ ਉਗ੍ਗਹੇਤਬ੍ਬਨ੍ਤਿ ਯੋਜਨਾ. ਸਬ੍ਬਨ੍ਤਿਮੇਨਾਤਿ ਸਬ੍ਬੇਸਂ ਪਰਿਚ੍ਛੇਦਾਨਂ ਅਨ੍ਤੇ ਲਾਮਕੇ ਪਵਤ੍ਤੇਨ. ਪਗੁਣਾਤਿ ਅਜਿਮ੍ਹਾ ਉਜੁਕਾ. ਵਾਚੁਗ੍ਗਤਾਤਿ ਤਸ੍ਸੇਵ ਵੇਵਚਨਂ. ਯਸ੍ਸ ਹਿ ਪਾਲ਼ਿਪਾਠਾ ਸਜ੍ਝਾਯਨਕਾਲੇ ਪਗੁਣਾ ਹੋਨ੍ਤਿ, ਤਸ੍ਸ ਵਾਚੁਗ੍ਗਤਾ. ਯਸ੍ਸ ਵਾ ਪਨ ਵਾਚੁਗ੍ਗਤਾ ਹੋਨ੍ਤਿ, ਤਸ੍ਸ ਪਗੁਣਾ. ਤਸ੍ਮਾ ਤਾਨਿ ਪਦਾਨਿ ਅਞ੍ਞਮਞ੍ਞਕਾਰਣਵੇਵਚਨਾਨਿ. ਪਕ੍ਖਦਿਵਸੇਸੂਤਿ ਜੁਣ੍ਹਪਕ੍ਖਕਾਲ਼ਪਕ੍ਖਪਰਿਯਾਪਨ੍ਨੇਸੁ ¶ ਦਿਵਸੇਸੁ. ਧਮ੍ਮਸਾਵਨਤ੍ਥਾਯਾਤਿ ਸਮ੍ਪਤ੍ਤਾਨਂ ਪਰਿਸਾਨਂ ਧਮ੍ਮਸ੍ਸ ਸਾਵਨਤ੍ਥਾਯ ਸੁਣਾਪਨਤ੍ਥਾਯਾਤਿ ਅਧਿਪ੍ਪਾਯੋ. ਸਾਵਨਤ੍ਥਾਯਾਤਿ ਏਤ੍ਥ ਯੁਪਚ੍ਚਯਪਰਤ੍ਤਾ ਕਾਰਿਤਪਚ੍ਚਯੋ ਲੋਪੋ ਹੋਤੀਤਿ ਦਟ੍ਠਬ੍ਬਂ. ਤਸ੍ਮਾ ਸਾਵੀਯਤੇ ਸੁਣਾਪੀਯਤੇ ਸਾਵਨਨ੍ਤਿ ਵਚਨਤ੍ਥੋ ਕਾਤਬ੍ਬੋ. ਭਾਣਵਾਰਾ ਉਗ੍ਗਹੇਤਬ੍ਬਾਤਿ ਸਮ੍ਬਨ੍ਧੋ. ਸਮ੍ਪਤ੍ਤਾਨਨ੍ਤਿ ਅਤ੍ਤਨੋ ਸਨ੍ਤਿਕਂ ਸਮ੍ਪਤ੍ਤਾਨਂ. ਪਰਿਕਥਨਤ੍ਥਾਯਾਤਿ ਪਰਿਸ੍ਸਙ੍ਗੇਨ ਆਲਿਙ੍ਗਨੇਨ ਕਥਨਤ੍ਥਂ, ਅਪ੍ਪਸਦ੍ਦਸਙ੍ਖਾਤਾਯ ਵਾਚਾਯ ਕਥਨਤ੍ਥਨ੍ਤਿ ਅਤ੍ਥੋ. ‘‘ਕਥਾਮਗ੍ਗੋ’’ਤਿ ਵੁਤ੍ਤਤ੍ਤਾ ਵਤ੍ਥੁਕਥਾਯੇਵ ਅਧਿਪ੍ਪੇਤਾ, ਨ ਸੁਤ੍ਤਸਙ੍ਖਾਤੋ ਪਾਲ਼ਿਪਾਠੋ. ਅਨੁ ਪਚ੍ਛਾ, ਪੁਨਪ੍ਪੁਨਂ ਵਾ ਦਾਯਕਾ ਮੋਦਨ੍ਤਿ ਏਤਾਯਾਤਿ ਅਨੁਮੋਦਨਾ. ਝਾਨਂ ਵਾ ਮਗ੍ਗੋ ਵਾ ਫਲਂ ਵਾ ਸਮਣਧਮ੍ਮੋ ਨਾਮ. ਤਸ੍ਸ ਕਰਣਤ੍ਥਂ ਉਗ੍ਗਹੇਤਬ੍ਬਨ੍ਤਿ ਯੋਜਨਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਚਤੂਸੁ ਦਿਸਾਸੁ ਅਪਟਿਹਤੋਤਿ ਚਾਤੁਦ੍ਦਿਸੋ, ਅਪਟਿਹਤਤ੍ਥੇ ਣਪਚ੍ਚਯੋ.

ਪਰਿਸੁਪਟ੍ਠਾਪਕੇਨ ਕਾਤਬ੍ਬਾਤਿ ਯੋਜਨਾ. ਅਭਿਵਿਨਯੇਤਿ ਅਞ੍ਞਮਞ੍ਞਪਰਿਚ੍ਛਿਨ੍ਨੇ ਵਿਨਯਪਿਟਕੇ. ਦ੍ਵੇ ਵਿਭਙ੍ਗਾਤਿ ਭਿਕ੍ਖੁਵਿਭਙ੍ਗੋ ਚ ਭਿਕ੍ਖੁਨਿਵਿਭਙ੍ਗੋ ਚ. ਅਸਕ੍ਕੋਨ੍ਤੇਨ ਪਰਿਸੁਪਟ੍ਠਾਪਕੇਨ ਭਿਕ੍ਖੁਨਾਤਿ ਸਮ੍ਬਨ੍ਧੋ. ਏਵਂ ਅਤ੍ਤਨੋ ਅਤ੍ਥਾਯ ਉਗ੍ਗਹੇਤਬ੍ਬਂ ਦਸ੍ਸੇਤ੍ਵਾ ਇਦਾਨਿ ਪਰਿਸਾਯ ਅਤ੍ਥਾਯ ਉਗ੍ਗਹੇਤਬ੍ਬਂ ਦਸ੍ਸੇਨ੍ਤੋ ਆਹ ‘‘ਪਰਿਸਾਯ ਪਨਾ’’ਤਿਆਦਿ. ਅਭਿਧਮ੍ਮੇਤਿ ਅਞ੍ਞਮਞ੍ਞਪਰਿਚ੍ਛਿਨ੍ਨੇ ਸੁਤ੍ਤਨ੍ਤਪਿਟਕੇ ਏਵ, ਨ ਅਭਿਧਮ੍ਮਪਿਟਕੇ. ਤਯੋ ਵਗ੍ਗਾਤਿ ਸਗਾਥਾਵਗ੍ਗੋ ਨਿਦਾਨਵਗ੍ਗੋ ਖਨ੍ਧਵਗ੍ਗੋਤਿ ਤਯੋ ਵਗ੍ਗਾ. ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋ. ਏਕਨ੍ਤਿ ਏਕਂ ਨਿਪਾਤਂ. ਤਤੋ ਤਤੋਤਿ ਨਿਕਾਯਤੋ. ਸਮੁਚ੍ਚਯਂ ਕਤ੍ਵਾਤਿ ਰਾਸਿਂ ਕਤ੍ਵਾ. ਨ ਵੁਤ੍ਤਨ੍ਤਿ ਅਟ੍ਠਕਥਾਸੁ ਨ ਕਥਿਤਂ. ਯਸ੍ਸ ਪਨ ਨਤ੍ਥਿ, ਸੋ ਨ ਲਭਤੀਤਿ ਯੋਜਨਾ. ਸੁਤ੍ਤਨ੍ਤੇ ਚਾਤਿ ਸੁਤ੍ਤਨ੍ਤਪਿਟਕੇ ਪਨ. ਉਗ੍ਗਹਿਤੋਤਿ ਸਰੂਪਕਥਨੇਨ ਗਹਿਤੋ, ਉਚ੍ਚਾਰਿਤੋਤਿ ਅਤ੍ਥੋ. ਦਿਸਾਪਾਮੋਕ੍ਖੋਤਿ ਦਿਸਾਸੁ ਠਿਤਾਨਂ ਭਿਕ੍ਖੁਆਦੀਨਂ ਪਾਮੋਕ੍ਖੋ. ਯੇਨ ਕਾਮਂ ਗਮੋਤਿ ਯਥਾਕਾਮਂ ਗਮੋ.

ਚਤੂਸੁ ਨਿਕਾਯੇਸੂਤਿ ਖੁਦ੍ਦਕਨਿਕਾਯਤੋ ਅਞ੍ਞੇਸੁ ਦੀਘਨਿਕਾਯਾਦੀਸੁ. ਏਕਸ੍ਸਾਤਿ ਅਞ੍ਞਤਰਸ੍ਸ ਏਕਸ੍ਸ ¶ . ਏਕਨਿਕਾਯੇਨਾਤਿ ਏਕਸ੍ਮਿਂ ¶ ਨਿਕਾਯੇ ਲਦ੍ਧਨਯੇਨ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਤ੍ਥਾਤਿ ਚਤੁਪ੍ਪਕਰਣਸ੍ਸ ਅਟ੍ਠਕਥਾਯਂ. ਨਾਨਤ੍ਥਨ੍ਤਿ ਨਾਨਾਪਯੋਜਨਂ. ਤਨ੍ਤਿ ਵਿਨਯਪਿਟਕਂ. ਏਤ੍ਤਾਵਤਾਤਿ ਏਤ੍ਤਕਪਮਾਣੇਨ ਪਗੁਣੇਨ. ਹੋਤੀਤਿ ਇਤਿਸਦ੍ਦੋ ਪਰਿਸਮਾਪਨਤ੍ਥੋ. ਇਤਿ ਪਰਿਸਮਾਪਨਂ ਵੇਦਿਤਬ੍ਬਨ੍ਤਿ ਯੋਜਨਾ.

ਉਭਯਾਨਿ ਖੋ ਪਨਸ੍ਸਾਤਿ ਆਦਿ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਅਞ੍ਞਸ੍ਮਿਨ੍ਤਿ ਵਿਨਯਪਿਟਕਤੋ ਇਤਰਸ੍ਮਿਂ. ਤਤ੍ਥਾਤਿ ‘‘ਉਭਯਾਨਿ ਖੋ ਪਨਸ੍ਸਾ’’ਤਿਆਦਿਵਚਨੇ. ਯਥਾ ਯੇਨਾਕਾਰੇਨ ਆਗਤਾਨਿ, ਤਂ ਆਕਾਰਂ ਦਸ੍ਸੇਤੁਨ੍ਤਿ ਯੋਜਨਾ. ਪਦਪਚ੍ਚਾਭਟ੍ਠਸਙ੍ਕਰਦੋਸਵਿਰਹਿਤਾਨੀਤਿ ਪਦਾਨਂ ਪਚ੍ਚਾਭਟ੍ਠਸਙ੍ਕਰਭੂਤੇਹਿ ਦੋਸੇਹਿ ਵਿਰਹਿਤਾਨਿ. ਏਤ੍ਥ ਚ ਪਦਪਚ੍ਚਾਭਟ੍ਠਨ੍ਤਿ ਪਦਾਨਂ ਪਟਿਨਿਵਤ੍ਤਿਤ੍ਵਾ ਆਭਸ੍ਸਨਂ ਗਲ਼ਨਂ, ਚੁਤਨ੍ਤਿ ਅਤ੍ਥੋ. ਪਦਸਙ੍ਕਰਨ੍ਤਿ ਪਦਾਨਂ ਵਿਪਤ੍ਤਿ, ਵਿਨਾਸੋਤਿ ਅਤ੍ਥੋ. ‘‘ਸੁਤ੍ਤਸੋ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ਖਨ੍ਧਕਪਰਿਵਾਰਸੁਤ੍ਤਂ ਏਵ ਗਹੇਤਬ੍ਬਨ੍ਤਿ ਆਹ ‘‘ਖਨ੍ਧਕਪਰਿਵਾਰਤੋ’’ਤਿ. ਅਨੁਬ੍ਯਞ੍ਜਨਸੋਤਿ ਏਤ੍ਥ ਬ੍ਯਞ੍ਜਨਸਦ੍ਦੋ ਅਕ੍ਖਰਸ੍ਸ ਚ ਪਦਸ੍ਸ ਚ ਵਾਚਕੋਤਿ ਆਹ ‘‘ਅਕ੍ਖਰਪਦਪਾਰਿਪੂਰਿਯਾ ਚਾ’’ਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ.

‘‘ਸਿਥਿਲਧਨਿਤਾਦੀਨ’’ਨ੍ਤਿਪਦਂ ‘‘ਵਚਨੇਨਾ’’ਤਿਪਦੇ ਕਮ੍ਮਂ, ‘‘ਵਚਨੇਨਾ’’ਤਿਪਦਂ ‘‘ਸਮ੍ਪਨ੍ਨਾਗਤੋ’’ਤਿਪਦੇ ਹੇਤੁ, ‘‘ਵਿਸ੍ਸਟ੍ਠਾਯ ਅਨੇਲਗਲ਼ਾਯ ਅਤ੍ਥਸ੍ਸ ਵਿਞ੍ਞਾਪਨਿਯਾ’’ਤਿਪਦਾਨਿ ‘‘ਵਾਚਾਯਾ’’ਤਿਪਦੇ ਵਿਸੇਸਨਾਨਿ. ਸਿਥਿਲਧਨਿਤਾਦੀਨਨ੍ਤਿ ਆਦਿਸਦ੍ਦੇਨ ਨਿਗ੍ਗਹਿਤਵਿਮੁਤ੍ਤਸਮ੍ਬਨ੍ਧਵਵਤ੍ਥਿਤਦੀਘ ਰਸ੍ਸ ਗਰੁ ਲਹੁ ਸਙ੍ਖਾਤਾ ਅਟ੍ਠ ਬ੍ਯਞ੍ਜਨਬੁਦ੍ਧਿਯੋ ਸਙ੍ਗਣ੍ਹਾਤਿ. ਯਥਾਵਿਧਾਨਵਚਨੇਨਾਤਿ ਅਕ੍ਖਰਚਿਨ੍ਤਕਾਨਂ ਯਥਾ ਸਂਵਿਦਹਨਵਚਨੇਨ. ਵਾਚਾਯੇਵ ਕਰੀਯਤਿ ਕਥੀਯਤਿ ਉਚ੍ਚਾਰੀਯਤਿ ਵਾਕ੍ਕਰਣਂ ਚਕਾਰਸ੍ਸ ਕਕਾਰਂ ਕਤ੍ਵਾ. ਹੀਤਿ ਤਦੇਵ ਯੁਤ੍ਤਂ. ਮਾਤੁਗਾਮੋ ਯਸ੍ਮਾ ਸਰਸਮ੍ਪਤ੍ਤਿਰਤੋ, ਤਸ੍ਮਾ ਹੀਲ਼ੇਤੀਤਿ ਯੋਜਨਾ. ‘‘ਸਰਸਮ੍ਪਤ੍ਤਿਰਹਿਤ’’ਨ੍ਤਿਪਦਂ ‘‘ਵਚਨ’’ਨ੍ਤਿਪਦੇ ਵਿਸੇਸਨਭਾਵੇਨ ਵਿਸੇਸਂ ਕਤ੍ਵਾ ‘‘ਹੀਲ਼ੇਤੀ’’ਤਿਪਦੇ ਹੇਤੁਭਾਵੇਨ ਸਮ੍ਪਜ੍ਜਨਤੋ ਹੇਤੁਅਨ੍ਤੋਗਧਵਿਸੇਸਨਨ੍ਤਿ ਦਟ੍ਠਬ੍ਬਂ. ਸਬ੍ਬਾਸਨ੍ਤਿ ਭਿਕ੍ਖੁਨੀਨਂ. ‘‘ਸੀਲਾਚਾਰਸਮ੍ਪਤ੍ਤਿਯਾ’’ਤਿਇਮਿਨਾ ਜਾਤਿ ਗੋਤ੍ਤ ਰੂਪ ਭੋਗਾਦਿਨਾਤਿਅਤ੍ਥਂ ਨਿਵਤ੍ਤੇਤਿ. ਕਾਰਣਞ੍ਚਾਤਿ ਅਟ੍ਠਕਥਞ੍ਚ. ਤਜ੍ਜੇਤ੍ਵਾਤਿ ਉਬ੍ਬੇਜੇਤ੍ਵਾ. ਤਾਸਨ੍ਤਿ ਭਿਕ੍ਖੁਨੀਨਂ. ਗਿਹਿਕਾਲੇਤਿ ਭਿਕ੍ਖੁਨੋਵਾਦਕਸ੍ਸ ਗਿਹਿਕਾਲੇ ਅਨਜ੍ਝਾਪਨ੍ਨਪੁਬ੍ਬੋ ¶ ਹੋਤੀਤਿ ਸਮ੍ਬਨ੍ਧੋ. ਹਿ ਤਦੇਵ ਯੁਤ੍ਤਂ. ‘‘ਮਾਤੁਗਾਮੋ’’ਤਿਪਦਂ ‘‘ਨ ਕਰੋਤੀ’’ਤਿਪਦੇ ਸੁਦ੍ਧਕਤ੍ਤਾ, ‘‘ਉਪ੍ਪਾਦੇਤੀ’’ਤਿਪਦੇ ਹੇਤੁਕਤ੍ਤਾ. ਠਿਤਸ੍ਸ ਭਿਕ੍ਖੁਨੋ ਧਮ੍ਮਦੇਸਨਾਯਾਪੀਤਿ ਯੋਜਨਾ. ਅਪਿਸਦ੍ਦੋ ਗਰਹਤ੍ਥੋ. ਵਿਸਭਾਗੇਹੀਤਿ ਵਿਰੁਦ੍ਧੇਹਿ ਵਤ੍ਥਾਰਮ੍ਮਣੇਹਿ. ਅਯੁਤ੍ਤਟ੍ਠਾਨੇਤਿ ਪਬ੍ਬਜਿਤਾਨਂ ਅਨਨੁਰੂਪਟ੍ਠਾਨੇ. ਛਨ੍ਦਰਾਗਨ੍ਤਿ ਬਲਵਤਣ੍ਹਂ. ਤੇਨਾਤਿ ਤੇਨ ਹੇਤੁਨਾ.

‘‘ਏਤ੍ਥ ¶ ਚਾ’’ਤਿਆਦਿਮ੍ਹਿ ਅਯਂ ਪਨ ਸਙ੍ਗਹੋ –

‘‘ਸੀਲਵਾ ਬਹੁਸ੍ਸੁਤੋ ਚ, ਸ੍ਵਾਗਤੋ ਚ ਸੁਵਾਚਕੋ;

ਪਿਯੋ ਪਟਿਬਲੋ ਚਾਪਿ, ਨਜ੍ਝਾਪਨ੍ਨੋ ਚ ਵੀਸਤੀ’’ਤਿ.

੧੪੮. ਵਤ੍ਥੁਸ੍ਮਿਨ੍ਤਿ ਅਟ੍ਠੁਪ੍ਪਤ੍ਤਿਯਂ. ਕਕਾਰਲੋਪਂ ਕਤ੍ਵਾ ਗਰੁਧਮ੍ਮਾਤਿ ਵੁਚ੍ਚਨ੍ਤੀਤਿ ਆਹ ‘‘ਗਰੁਕੇਹਿ ਧਮ੍ਮੇਹੀ’’ਤਿ. ਤੇਤਿ ਗਰੁਧਮ੍ਮਾ. ਹੀਤਿ ਯਸ੍ਮਾ. ‘‘ਏਕਤੋ’’ਤਿ ਸਾਮਞ੍ਞੇਨ ਵੁਤ੍ਤਵਚਨਸ੍ਸ ਵਿਸੇਸੇਨ ਗਹੇਤਬ੍ਬਤਂ ਦਸ੍ਸੇਤੁਂ ਵੁਤ੍ਤਂ ‘‘ਭਿਕ੍ਖੁਨੀਨਂ ਸਨ੍ਤਿਕੇ’’ਤਿ. ਯਥਾਵਤ੍ਥੁਕਮੇਵਾਤਿ ਪਾਚਿਤ੍ਤਿਯਮੇਵ. ਤਞ੍ਹਿ ਵਤ੍ਥੁਸ੍ਸ ਆਪਤ੍ਤਿਕਾਰਣਸ੍ਸ ਅਨੁਰੂਪਂ ਪਵਤ੍ਤਤ੍ਤਾ ‘‘ਯਥਾਵਤ੍ਥੁਕ’’ਨ੍ਤਿ ਵੁਚ੍ਚਤਿ.

੧੪੯. ਪਾਤੋਤਿ ਪਗੇਵ, ਪਠਮਨ੍ਤਿ ਅਤ੍ਥੋ. ਅਸਮ੍ਮਟ੍ਠਂ ਸਮ੍ਮਜ੍ਜੀਤਬ੍ਬਨ੍ਤਿ ਸਮ੍ਬਨ੍ਧੋ. ਅਸਮ੍ਮਜ੍ਜਨੇ ਦੋਸਂ ਪਾਕਟਂ ਕਰੋਨ੍ਤੋ ਆਹ ‘‘ਅਸਮ੍ਮਟ੍ਠਂ ਹੀ’’ਤਿਆਦਿ. ਹੀਤਿ ਤਪ੍ਪਾਕਟੀਕਰਣਜੋਤਕੋ. ਤਨ੍ਤਿ ਪਰਿਵੇਣਂ. ਦਿਸ੍ਵਾ ਭਵੇਯ੍ਯੁਨ੍ਤਿ ਸਮ੍ਬਨ੍ਧੋ. ਤੇਨਾਤਿ ਅਸੋਤੁਕਾਮਾਨਂ ਵਿਯ ਭਵਨਹੇਤੁਨਾ. ਪਰਿਵੇਣਸਮ੍ਮਜ੍ਜਨਸ੍ਸ ਆਨਿਸਂਸਂ ਦਸ੍ਸੇਤ੍ਵਾ ਪਾਨੀਯਪਰਿਭੋਜਨੀਯਉਪਟ੍ਠਾਨਸ੍ਸ ਤਮੇਵ ਦਸ੍ਸੇਨ੍ਤੋ ਆਹ ‘‘ਅਨ੍ਤੋ ਗਾਮਤੋ ਪਨਾ’’ਤਿ ਆਦਿ. ਤਸ੍ਮਿਨ੍ਤਿ ਪਾਨੀਯਪਰਿਭੋਜਨੀਯੇ.

ਸਾਖਾਭਙ੍ਗਮ੍ਪੀਤਿ ਭਞ੍ਜਿਤਬ੍ਬਸਾਖਮ੍ਪਿ. ਦੁਤਿਯੋਤਿ ਵਿਞ੍ਞੂ ਪੁਰਿਸੋ ਦੁਤਿਯੋ. ਨਿਸੀਦਿਤਬ੍ਬਟ੍ਠਾਨਂ ਦਸ੍ਸੇਨ੍ਤੋ ਆਹ ‘‘ਨਿਸੀਦਿਤਬ੍ਬ’’ਨ੍ਤਿਆਦਿ. ‘‘ਵਿਹਾਰਮਜ੍ਝੇ’’ਤਿ ਸਾਮਞ੍ਞਤੋ ਵਤ੍ਵਾ ਵਿਸੇਸਤੋ ਦਸ੍ਸੇਤੁਂ ਵੁਤ੍ਤਂ ‘‘ਦ੍ਵਾਰੇ’’ਤਿ. ਓਸਰਨ੍ਤਿ ਅਵਸਰਨ੍ਤਿ ਏਤ੍ਥਾਤਿ ਓਸਰਣਂ, ਤਞ੍ਚ ਤਂ ਠਾਨਞ੍ਚੇਤਿ ਓਸਰਣਟ੍ਠਾਨਂ, ਤਸ੍ਮਿਂ. ਸਮਗ੍ਗਤ੍ਥਾਤਿ ਏਤ੍ਥ ਸਂਪੁਬ੍ਬੋ ਚ ਆਪੁਬ੍ਬੋ ਚ ਗਮੁਸਦ੍ਦੋ ¶ ਹੋਤਿ, ਤਤੋ ਹਿਯ੍ਯਤ੍ਤਨੀਸਙ੍ਖਾਤਂ ਤ੍ਥਵਚਨਂ ਵਾ ਹੋਤਿ, ਪਞ੍ਚਮੀਸਙ੍ਖਾਤਸ੍ਸ ਥਵਚਨਸ੍ਸ ਤ੍ਥਤ੍ਤਂ ਵਾ ਹੋਤਿ, ਸਂਯੋਗਪਰਤ੍ਤਾ ਆ ਉਪਸਗ੍ਗੋ ਰਸ੍ਸੋ ਚ ਹੋਤਿ, ਇਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਮ੍ਮਾ ਆਗਤਤ੍ਥਾ’’ਤਿ. ਤਤ੍ਥ ‘‘ਸਮ੍ਮਾ’’ਤਿਪਦੇਨ ਸਂਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ, ‘‘ਆ’’ਇਤਿਪਦੇਨ ਆਤ੍ਯੂਪਸਗ੍ਗਂ, ‘‘ਗਤ’’ਇਤਿਪਦੇਨ ਗਮੁਧਾਤੁਂ, ‘‘ਤ੍ਥ’’ਇਤਿਪਦੇਨ ਹਿਯ੍ਯਤ੍ਤਨੀਸਙ੍ਖਾਤਂ ਤ੍ਥਵਚਨਂ ਵਾ, ਪਞ੍ਚਮੀਸਙ੍ਖਾਤਸ੍ਸ ਥਵਚਨਸ੍ਸ ਤ੍ਥਤ੍ਤਂ ਵਾ ਦਸ੍ਸੇਤਿ. ਅਯਂ ਪਨੇਤ੍ਥਤ੍ਥੋ – ਸਮਂ ਤੁਮ੍ਹੇ ਆਗਤਤ੍ਥਾਤਿ. ਪਞ੍ਚਮੀਸਙ੍ਖਾਤਸ੍ਸ ਥਵਚਨਸ੍ਸ ਤ੍ਥਤ੍ਤਕਾਲੇ ਸਮਂ ਤੁਮ੍ਹੇ ਆਗਾ ਅਤ੍ਥ ਭਵਥਾਤਿ. ‘‘ਆਗਚ੍ਛਨ੍ਤੀ’’ਤਿਪਦੇਨ ‘‘ਵਤ੍ਤਨ੍ਤੀ’’ਤਿ ਏਤ੍ਥ ਵਤੁਧਾਤੁਯਾ ਅਤ੍ਥਂ ਦਸ੍ਸੇਤਿ, ‘‘ਪਗੁਣਾ ਵਾਚੁਗ੍ਗਤਾ’’ਤਿਪਦੇਹਿ ਅਧਿਪ੍ਪਾਯਂ ਦਸ੍ਸੇਤਿ. ਪਾਲ਼ੀਤਿ ਗਰੁਧਮ੍ਮਪਾਲ਼ਿ.

ਤਤ੍ਥਾਤਿ ¶ ਤਸ੍ਸਂ ਪਾਲ਼ਿਯਂ, ਤੇਸੁ ਵਾ ਅਭਿਵਾਦਨਾਦੀਸੁ ਚਤੂਸੁ. ਮਗ੍ਗਸਮ੍ਪਦਾਨਨ੍ਤਿ ਮਗ੍ਗਂ ਪਰਿਹਰਿਤ੍ਵਾ ਭਿਕ੍ਖੁਸ੍ਸ ਓਕਾਸਦਾਨਂ. ਬੀਜਨਨ੍ਤਿ ਬੀਜਨਿਯਾ ਵਿਧੂਪਨਂ. ਪਾਨੀਯਾਪੁਚ੍ਛਨਨ੍ਤਿ ਪਾਨੀਯਸ੍ਸ ਆਪੁਚ੍ਛਨਂ. ਆਦਿਸਦ੍ਦੇਨ ਪਰਿਭੋਜਨੀਯਾਪੁਚ੍ਛਨਾਦਿਕਂ ਸਙ੍ਗਣ੍ਹਾਤਿ. ਏਤ੍ਥ ਚਾਤਿ ਏਤੇਸੁ ਚਤੂਸੁ ਅਭਿਵਾਦਨਾਦੀਸੁ. ‘‘ਅਨ੍ਤੋ ਗਾਮੇ ਵਾ’’ਤਿਆਦੀਨਿ ਛ ਪਦਾਨਿ ‘‘ਕਾਤਬ੍ਬਮੇਵਾ’’ਤਿਪਦੇ ਆਧਾਰੋ. ਰਾਜੁਸ੍ਸਾਰਣਾਯਾਤਿ ਰਞ੍ਞੋ ਆਨੁਭਾਵੇਨ ਜਨਾਨਂ ਉਸ੍ਸਾਰਣਾਯ. ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਤਿ ਏਤ੍ਥਾਤਿ ਮਹਾਸਨ੍ਨਿਪਾਤਂ, ਤਸ੍ਮਿਂ ਮਹਾਸਨ੍ਨਿਪਾਤੇ ਠਾਨੇ ਨਿਸਿਨ੍ਨੇ ਸਤੀਤਿ ਯੋਜਨਾ. ਪਚ੍ਚੁਟ੍ਠਾਨਨ੍ਤਿ ਪਟਿਕਚ੍ਚੇਵ ਉਟ੍ਠਾਨਂ. ਤਂ ਤਨ੍ਤਿ ਸਾਮੀਚਿਕਮ੍ਮਂ.

ਸਕ੍ਕਤ੍ਵਾਤਿ ਚਿਤ੍ਤਿਂ ਕਤ੍ਵਾ, ਸਂ ਆਦਰਂ ਕਤ੍ਵਾਤਿ ਅਤ੍ਥੋ. ਤੇਨਾਹ ‘‘ਯਥਾ ਕਤੋ’’ਤਿਆਦਿ. ਤਿਣ੍ਣਂ ਕਿਚ੍ਚਾਨਨ੍ਤਿ ‘‘ਸਕ੍ਕਤ੍ਵਾ ਗਰੁਂਕਤ੍ਵਾ ਮਾਨੇਤ੍ਵਾ’’ਤਿਸਙ੍ਖਾਤਾਨਂ ਤਿਣ੍ਣਂ ਕਿਚ੍ਚਾਨਂ. ਅਨੀਯਸਦ੍ਦੋ ਕਮ੍ਮਤ੍ਥੋਤਿ ਆਹ ‘‘ਨ ਅਤਿਕ੍ਕਮਿਤਬ੍ਬੋ’’ਤਿ.

ਨਤ੍ਥਿ ਭਿਕ੍ਖੁ ਏਤ੍ਥਾਤਿ ਅਭਿਕ੍ਖੁਕੋ ਆਵਾਸੋ, ਸੋ ਕਿਤ੍ਤਕੇ ਠਾਨੇ ਅਭਿਕ੍ਖੁਕੋ, ਯੋ ਆਵਾਸੋ ਅਭਿਕ੍ਖੁਕੋ ਨਾਮ ਹੋਤੀਤਿ ਆਹ ‘‘ਸਚੇ’’ਤਿ ਆਦਿ. ‘‘ਉਪਸ੍ਸਯਤੋ’’ਤਿਪਦਂ ‘‘ਅਬ੍ਭਨ੍ਤਰੇ’’ਤਿਪਦੇ ਅਪਾਦਾਨਂ. ਏਤ੍ਥਾਤਿ ਅਭਿਕ੍ਖੁਕੇ ਆਵਾਸੇ. ਹੀਤਿ ਸਚ੍ਚਂ. ਤਤੋਤਿ ਅਡ੍ਢਯੋਜਨਬ੍ਭਨ੍ਤਰੇ ¶ ਠਿਤਆਵਾਸਤੋ. ਪਰਨ੍ਤਿ ਅਞ੍ਞਸ੍ਮਿਂ ਆਵਾਸੇ, ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਪਚ੍ਛਾਭਤ੍ਤਨ੍ਤਿ ਭਤ੍ਤਤੋ ਪਚ੍ਛਾ. ਤਤ੍ਥਾਤਿ ਅਭਿਕ੍ਖੁਕੇ ਆਵਾਸੇ. ‘‘ਭਿਕ੍ਖੁਨਿਯੋ’’ਤਿਪਦਂ ‘‘ਵਦਨ੍ਤੀ’’ਤਿਪਦੇ ਕਮ੍ਮਂ. ਵੁਤ੍ਤਪ੍ਪਮਾਣੇਤਿ ਅਡ੍ਢਯੋਜਨਬ੍ਭਨ੍ਤਰਸਙ੍ਖਾਤੇ ਵੁਤ੍ਤਪ੍ਪਮਾਣੇ. ਸਾਖਾਮਣ੍ਡਪੇਪੀਤਿ ਸਾਖਾਯ ਛਾਦਿਤਮਣ੍ਡਪੇਪਿ. ਪਿਸਦ੍ਦੇਨ ਆਵਾਸੇ ਪਨ ਕਾ ਨਾਮ ਕਥਾਤਿ ਦਸ੍ਸੇਤਿ. ਵੁਤ੍ਤਾਤਿ ਵਸਿਤਾ. ਏਤ੍ਤਾਵਤਾਤਿ ਏਕਰਤ੍ਤਂ ਵਸਿਤਮਤ੍ਤੇਨ. ਏਤ੍ਥਾਤਿ ਸਭਿਕ੍ਖੁਕੇ ਆਵਾਸੇ. ਉਪਗਚ੍ਛਨ੍ਤੀਹਿ ਭਿਕ੍ਖੁਨੀਹਿ ਯਾਚਿਤਬ੍ਬਾਤਿ ਯੋਜਨਾ. ਪਕ੍ਖਸ੍ਸਾਤਿ ਆਸਲ਼੍ਹੀਮਾਸਸ੍ਸ ਜੁਣ੍ਹਪਕ੍ਖਸ੍ਸ. ‘‘ਤੇਰਸਿਯ’’ਨ੍ਤਿਪਦੇਨ ਅਵਯਵਿਅਵਯਵਭਾਵੇਨ ਯੋਜੇਤਬ੍ਬਂ. ਮਯਨ੍ਤਿ ਅਮ੍ਹੇ. ਯਤੋਤਿ ਯੇਨ ਉਜੁਨਾ ਮਗ੍ਗੇਨਾਤਿ ਸਮ੍ਬਨ੍ਧੋ. ਤੇਨਾਹ ‘‘ਤੇਨ ਮਗ੍ਗੇਨਾ’’ਤਿ. ਅਞ੍ਞੇਨ ਮਗ੍ਗੇਨਾਤਿ ਉਜੁਮਗ੍ਗਤੋ ਅਞ੍ਞੇਨ ਜਿਮ੍ਹਮਗ੍ਗੇਨ. ਅਯਨ੍ਤਿ ਅਯਂ ਆਵਾਸੋ. ਤਤੋਤਿ ਭਿਕ੍ਖੂਨਂ ਆਵਾਸਤੋ, ਭਿਕ੍ਖੁਨਿਉਪਸ੍ਸਯਤੋ ਵਾ, ਇਦਮੇਵ ਯੁਤ੍ਤਤਰਂ. ਵਕ੍ਖਤਿ ਹਿ ‘‘ਅਮ੍ਹਾਕਂ ਉਪਸ੍ਸਯਤੋ ਗਾਵੁਤਮਤ੍ਤੇ’’ਤਿ. ਖੇਮਟ੍ਠਾਨੇਤਿ ਅਭਯਟ੍ਠਾਨੇ. ਤਞ੍ਹਿ ਖੀਯਨ੍ਤਿ ਭਯਾ ਏਤ੍ਥਾਤਿ ਖੇਮਂ, ਖੇਮਞ੍ਚ ਤਂ ਠਾਨਞ੍ਚੇਤਿ ਖੇਮਟ੍ਠਾਨਨ੍ਤਿ ਕਤ੍ਵਾ ‘‘ਖੇਮਟ੍ਠਾਨ’’ਨ੍ਤਿ ਵੁਚ੍ਚਤਿ. ਤਾਹਿ ਭਿਕ੍ਖੁਨੀਹੀਤਿ ਅਡ੍ਢਯੋਜਨਮਤ੍ਤੇ ਠਾਨੇ ਵਸਨ੍ਤੀਹਿ. ਤਾ ਭਿਕ੍ਖੁਨਿਯੋਤਿ ਗਾਵੁਤਮਤ੍ਤੇ ਠਾਨੇ ਵਸਨ੍ਤਿਯੋ. ਅਨ੍ਤਰਾਤਿ ਤੁਮ੍ਹਾਕਂ, ਅਮ੍ਹਾਕਞ੍ਚ ਨਿਵਾਸਨਟ੍ਠਾਨਸ੍ਸ, ਨਿਵਾਸਨਟ੍ਠਾਨਤੋ ਵਾ ਅਨ੍ਤਰੇ ਵੇਮਜ੍ਝੇ. ਭੁਮ੍ਮਤ੍ਥੇ ਚੇਤਂ ਨਿਸ੍ਸਕ੍ਕਵਚਨਂ. ਠਿਤੇ ਮਗ੍ਗੇਤਿ ਸਮ੍ਬਨ੍ਧੋ ‘‘ਸਨ੍ਤਿਕਾ’’ਤਿਪਦਂ ¶ ‘‘ਆਗਤ’’ਇਤਿਪਦੇ ਅਪਾਦਾਨਂ. ਤਤ੍ਥਾਤਿ ਅਞ੍ਞਾਸਂ ਭਿਕ੍ਖੁਨੀਨਂ ਉਪਸ੍ਸਯੇ. ਇਤਿ ਯਾਚਿਤਬ੍ਬਾਤਿ ਯੋਜਨਾ. ਤਤੋਤਿ ਭਿਕ੍ਖੂਨਂ ਯਾਚਿਤਬ੍ਬਤੋ, ਪਰਨ੍ਤਿ ਸਮ੍ਬਨ੍ਧੋ.

ਚਾਤੁਦ੍ਦਸੇਤਿ ਆਸਲ਼੍ਹੀਮਾਸਸ੍ਸ ਜੁਣ੍ਹਪਕ੍ਖਸ੍ਸ ਚਤੁਦ੍ਦਸਨ੍ਨਂ ਦਿਵਸਾਨਂ ਪੂਰਣੇ ਦਿਵਸੇ. ਇਧਾਤਿ ਇਮਸ੍ਮਿਂ ਵਿਹਾਰੇ. ‘‘ਓਵਾਦ’’ਨ੍ਤਿਪਦਂ ‘‘ਅਨੁ’’ਇਤਿਪਦੇ ਕਮ੍ਮਂ. ਅਨੁਜੀਵਨ੍ਤਿਯੋਤਿ ਅਨੁਗਨ੍ਤ੍ਵਾ ਜੀਵਨਂ ਵੁਤ੍ਤਿਂ ਕਰੋਨ੍ਤਿਯੋ. ਵੁਤ੍ਤਾ ਭਿਕ੍ਖੂਤਿ ਸਮ੍ਬਨ੍ਧੋ. ਦੁਤਿਯਦਿਵਸੇਤਿ ਆਸਲ਼੍ਹੀਪੁਣ੍ਣਮਿਯਂ. ਅਥਾਤਿ ਪਕ੍ਕਮਨਾਨਨ੍ਤਰਂ. ਏਤ੍ਥਾਤਿ ਭਿਕ੍ਖੂਨਂ ਪਕ੍ਕਨ੍ਤਤ੍ਤਾ ਅਪਸ੍ਸਨੇ. ‘‘ਆਭੋਗਂ ਕਤ੍ਵਾ’’ਤਿਇਮਿਨਾ ਆਭੋਗਂ ਅਕਤ੍ਵਾ ਵਸਿਤੁਂ ¶ ਨ ਵਟ੍ਟਤੀਤਿ ਦੀਪੇਤਿ. ਸਭਿਕ੍ਖੁਕਾਵਾਸਂ ਗਨ੍ਤਬ੍ਬਮੇਵਾਤਿ ਅਧਿਪ੍ਪਾਯੋ. ਸਾਤਿ ਵਸ੍ਸਚ੍ਛੇਦਾਪਤ੍ਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਕੇਨਚਿ ਕਾਰਣੇਨਾਤਿ ਭਿਕ੍ਖਾਚਾਰਸ੍ਸ ਅਸਮ੍ਪਦਾਦਿਨਾ ਕੇਨਚਿ ਨਿਮਿਤ੍ਤੇਨ. ਹੀਤਿ ਸਚ੍ਚਂ. ਭਿਕ੍ਖੂਨਂ ਪਕ੍ਕਨ੍ਤਾਦਿਕਾਰਣਾ ਅਭਿਕ੍ਖੁਕਾਵਾਸੇ ਵਸਨ੍ਤਿਯਾ ਕਿਂ ਅਭਿਕ੍ਖੁਕਾਵਾਸੇਵ ਪਵਾਰੇਤਬ੍ਬਨ੍ਤਿ ਆਹ ‘‘ਪਵਾਰੇਨ੍ਤਿਯਾ ਪਨਾ’’ਤਿਆਦਿ.

ਅਨ੍ਵਦ੍ਧਮਾਸਨ੍ਤਿ ਏਤ੍ਥ ਅਨੁਸਦ੍ਦੋ ਵਿਚ੍ਛਤ੍ਥਵਾਚਕੋ ਕਮ੍ਮਪ੍ਪਵਚਨੀਯੋ, ਤੇਨ ਪਯੋਗਤ੍ਤਾ ਭੁਮ੍ਮਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਅਦ੍ਧਮਾਸੇ ਅਦ੍ਧਮਾਸੇ’’ਤਿ. ਪਚ੍ਚਾਸੀਸਿਤਬ੍ਬਾਤਿ ਏਤ੍ਥ ਪਤਿਪੁਬ੍ਬੋ ਚ ਆਪੁਬ੍ਬੋ ਚ ਸਿਧਾਤੁ ਇਚ੍ਛਤ੍ਥੇਤਿ ਆਹ ‘‘ਇਚ੍ਛਿਤਬ੍ਬਾ’’ਤਿ. ਸਿਧਾਤੁਯਾ ਦ੍ਵੇਭਾਵੋ ਹੋਤਿ. ਆਪੁਬ੍ਬੋ ਸਿਸਿ ਇਚ੍ਛਾਯਨ੍ਤਿਪਿ ਧਾਤੁਪਾਠੇਸੁ ਵੁਤ੍ਤਂ. ਤਤ੍ਥਾਤਿ ‘‘ਉਪੋਸਥਪੁਚ੍ਛਕ’’ਨ੍ਤਿਵਚਨੇ. ਪਕ੍ਖਸ੍ਸਾਤਿ ਯਸ੍ਸ ਕਸ੍ਸਚਿ ਪਕ੍ਖਸ੍ਸ. ਮਹਾਪਚ੍ਚਰਿਯਂ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਓਵਾਦਸ੍ਸ ਯਾਚਨਂ ਓਵਾਦੋ ਉਤ੍ਤਰਪਦਲੋਪੇਨ, ਸੋਯੇਵ ਅਤ੍ਥੋ ਪਯੋਜਨਂ ਓਵਾਦਤ੍ਥੋ, ਤਦਤ੍ਥਾਯ. ਪਾਟਿਪਦਦਿਵਸਤੋਤਿ ਦੁਤਿਯਦਿਵਸਤੋ. ਸੋ ਹਿ ਚਨ੍ਦੋ ਵੁਦ੍ਧਿਞ੍ਚ ਹਾਨਿਞ੍ਚ ਪਟਿਮੁਖਂ ਪਜ੍ਜਤਿ ਏਤ੍ਥ, ਏਤੇਨਾਤਿ ਵਾ ਪਾਟਿਪਦੋਤਿ ਵੁਚ੍ਚਤਿ. ਇਤੀਤਿ ਏਵਂ ਵੁਤ੍ਤਨਯੇਨ. ਭਗਵਾ ਪਞ੍ਞਪੇਤੀਤਿ ਯੋਜਨਾ. ਅਞ੍ਞਸ੍ਸਾਤਿ ਧਮ੍ਮਸ੍ਸਵਨਕਮ੍ਮਤੋ ਅਞ੍ਞਸ੍ਸ. ਨਿਰਨ੍ਤਰਨ੍ਤਿ ਅਭਿਕ੍ਖਣਂ, ‘‘ਪਞ੍ਞਪੇਤੀ’’ਤਿਪਦੇ ਭਾਵਨਪੁਂਸਕਂ. ਹੀਤਿ ਵਿਤ੍ਥਾਰੋ. ਏਵਞ੍ਚ ਸਤੀਤਿ ਏਵਂ ਬਹੂਪਕਾਰੇ ਸਤਿ ਚ. ਯਨ੍ਤਿ ਯਂ ਧਮ੍ਮਂ. ਸਾਤ੍ਥਿਕਨ੍ਤਿ ਸਪਯੋਜਨਂ. ਯਥਾਨੁਸਿਟ੍ਠਨ੍ਤਿ ਅਨੁਸਿਟ੍ਠਿਯਾ ਅਨੁਰੂਪਂ. ਸਬ੍ਬਾਯੇਵ ਭਿਕ੍ਖੁਨਿਯੋਪੀਤਿ ਯੋਜਨਾ. ਹੀਤਿ ਸਚ੍ਚਂ.

ਓਵਾਦਂ ਗਚ੍ਛਤੀਤਿ ਓਵਾਦਂ ਯਾਚਿਤੁਂ ਭਿਕ੍ਖੁਸਙ੍ਘਸ੍ਸ ਆਰਾਮਂ ਗਚ੍ਛਤਿ. ਨ ਓਵਾਦੋ ਗਨ੍ਤਬ੍ਬੋਤਿ ਓਵਾਦਂ ਯਾਚਿਤੁਂ ਭਿਕ੍ਖੁਸਙ੍ਘਸ੍ਸ ਆਰਾਮੋ ਨ ਗਨ੍ਤਬ੍ਬੋ. ਓਵਾਦੋਤਿ ਚ ਉਪਯੋਗਤ੍ਥੇ ਪਚ੍ਚਤ੍ਤਵਚਨਨ੍ਤਿ ਦਟ੍ਠਬ੍ਬਂ. ਇਤਰਥਾ ਹਿ ਸਦ੍ਦਪਯੋਗੋ ਵਿਰੁਜ੍ਝੇਯ੍ਯ. ਓਵਾਦਂ ਗਨ੍ਤੁਨ੍ਤਿ ਓਵਾਦਂ ਯਾਚਨਤ੍ਥਾਯ ਭਿਕ੍ਖੁਸਙ੍ਘਸ੍ਸ ਆਰਾਮਂ ਗਨ੍ਤੁਂ.

‘‘ਦ੍ਵੇ ¶ ¶ ਤਿਸ੍ਸੋ ਭਿਕ੍ਖੁਨਿਯੋ’’ਤਿਪਦਂ ‘‘ਯਾਚਿਤ੍ਵਾ’’ਤਿਪਦੇ ਦੁਤਿਯਾਕਮ੍ਮਂ. ‘‘ਪੇਸੇਤਬ੍ਬਾ’’ਤਿਪਦੇ ਪਠਮਾਕਮ੍ਮਂ. ਓਵਾਦੂਪਸਙ੍ਕਮਨਨ੍ਤਿ ਓਵਾਦਸ੍ਸ ਗਹਣਤ੍ਥਾਯ ਉਪਸਙ੍ਕਮਨਂ. ਆਰਾਮਨ੍ਤਿ ਭਿਕ੍ਖੁਸਙ੍ਘਸ੍ਸ ਆਰਾਮਂ. ਤਤੋਤਿ ਗਮਨਤੋ ਪਰਨ੍ਤਿ ਸਮ੍ਬਨ੍ਧੋ. ਤੇਨ ਭਿਕ੍ਖੁਨਾਤਿ ਓਵਾਦਪਟਿਗ੍ਗਾਹਕੇਨ ਭਿਕ੍ਖੁਨਾ. ਤਨ੍ਤਿ ਸਮ੍ਮਤਂ ਭਿਕ੍ਖੁਂ.

ਉਸ੍ਸਹਤੀਤਿ ਸਕ੍ਕੋਤਿ. ਪਾਸਾਦਿਕੇਨਾਤਿ ਪਸਾਦਂ ਆਵਹੇਨ ਪਸਾਦਜਨਕੇਨ ਕਾਯਵਚੀਮਨੋਕਮ੍ਮੇਨਾਤਿ ਅਤ੍ਥੋ. ਸਮ੍ਪਾਦੇਤੂਤਿ ਤਿਵਿਧਂ ਸਿਕ੍ਖਂ ਸਮ੍ਪਾਦੇਤੁ. ਏਤ੍ਤਾਵਤਾਤਿ ਏਤ੍ਤਕੇਨ ‘‘ਪਾਸਾਦਿਕੇਨ ਸਮ੍ਪਾਦੇਤੂ’’ਤਿ ਵਚਨਮਤ੍ਤੇਨ. ਹੀਤਿ ਫਲਜੋਤਕੋ. ਏਤਨ੍ਤਿ ‘‘ਤਾਹੀ’’ਤਿਵਚਨਂ.

ਏਤ੍ਥ ਚ ਭਿਕ੍ਖੂਨਂ ਸਙ੍ਘਗਣਪੁਗ੍ਗਲਵਸੇਨ ਵਚਨਵਾਰੋ ਤਿਵਿਧੋ ਹੋਤਿ, ਤਂ ਤਿਵਿਧਂ ਵਚਨਵਾਰਂ ਭਿਕ੍ਖੁਨੀਨਂ ਸਙ੍ਘਗਣਪੁਗ੍ਗਲਵਸੇਨ ਤੀਹਿ ਵਚਨਵਾਰੇਹਿ ਗੁਣਿਤਂ ਕਤ੍ਵਾ ਨਵ ਵਚਨਵਾਰਾ ਹੋਨ੍ਤਿ, ਤਂ ਆਕਾਰਂ ਦਸ੍ਸੇਨ੍ਤੋ ਆਹ ‘‘ਤਤ੍ਰਾਯਂ ਵਚਨਕ੍ਕਮੋ’’ਤਿ. ਤਤ੍ਰਾਤਿ ਪੁਰਿਮਵਚਨਾਪੇਕ੍ਖਂ. ਵਚਨਾਕਾਰੋ ਪਾਕਟੋਵ.

ਏਕਾ ਭਿਕ੍ਖੁਨੀ ਵਾ ਬਹੂਹਿ ਭਿਕ੍ਖੁਨੀਉਪਸ੍ਸਯੇਹਿ ਓਵਾਦਤ੍ਥਾਯ ਪੇਸਿਤੇ ਵਚਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਭਿਕ੍ਖੁਨਿਸਙ੍ਘੋ ਚ ਅਯ੍ਯਾ’’ਤਿਆਦਿ.

ਤੇਨਾਪੀਤਿ ਓਵਾਦਪਟਿਗ੍ਗਾਹਕੇਨਾਪਿ ‘‘ਓਵਾਦ’’ਨ੍ਤਿਪਦਂ ‘‘ਪਟਿਗ੍ਗਾਹਕੇਨਾ’’ਤਿ ਪਦੇ ਕਮ੍ਮਂ. ਪੁਨ ‘‘ਓਵਾਦ’’ਨ੍ਤਿਪਦਂ ‘‘ਅਪਟਿਗ੍ਗਹੇਤੁ’’ਨ੍ਤਿਪਦੇ ਕਮ੍ਮਂ. ਬਲਤਿ ਅਸ੍ਸਾਸਪਸ੍ਸਾਸਮਤ੍ਤੇਨ ਜੀਵਤਿ, ਨ ਪਞ੍ਞਾਜੀਵਿਤੇਨਾਤਿ ਬਾਲੋ. ਗਿਲਾਯਤਿ ਰੁਜਤੀਤਿ ਗਿਲਾਨੋ. ਗਮਿਸ੍ਸਤਿ ਗਨ੍ਤੁਂ ਭਬ੍ਬੋਤਿ ਗਮਿਕੋ. ਅਯਂ ਪਨੇਤ੍ਥ ਯੋਜਨਾ – ਗਨ੍ਤੁਂ ਭਬ੍ਬੋ ਯੋ ਭਿਕ੍ਖੁ ਗਮਿਸ੍ਸਤਿ ਗਮਨਂ ਕਰਿਸ੍ਸਤਿ, ਇਤਿ ਤਸ੍ਮਾ ਸੋ ਭਿਕ੍ਖੁ ਗਮਿਕੋ ਨਾਮ. ਅਥ ਵਾ ਯੋ ਭਿਕ੍ਖੁ ਗਨ੍ਤੁਂ ਭਬ੍ਬਤ੍ਤਾ ਗਮਿਸ੍ਸਤਿ ਗਮਨਂ ਕਰਿਸ੍ਸਤਿ, ਇਤਿ ਤਸ੍ਮਾ ਸੋ ਭਿਕ੍ਖੁ ਗਮਿਕੋ ਨਾਮਾਤਿ. ‘‘ਭਬ੍ਬੋ’’ਤਿ ਚ ਹੇਤੁਅਨ੍ਤੋਗਧਵਿਸੇਸਨਂ.

ਤਤ੍ਥਾਤਿ ¶ ¶ ਬਾਲਾਦੀਸੁ ਤੀਸੁ ਪੁਗ੍ਗਲੇਸੁ. ਦੁਤਿਯਪਕ੍ਖਦਿਵਸੇਤਿ ਪਾਟਿਪਦਤੋ ਦੁਤਿਯਪਕ੍ਖਦਿਵਸੇ. ਉਪੋਸਥਗ੍ਗੇਤਿ ਉਪੋਸਥਗੇਹੇ. ਤਞ੍ਹਿ ਉਪੋਸਥਂ ਗਣ੍ਹਨ੍ਤਿ, ਉਪੋਸਥੋ ਵਾ ਗਯ੍ਹਤਿ ਅਸ੍ਮਿਨ੍ਤਿ ‘‘ਉਪੋਸਥਗ੍ਗ’’ਨ੍ਤਿ ਵੁਚ੍ਚਤਿ. ਤਸ੍ਮਿਂ ਉਪੋਸਥਗ੍ਗੇ. ‘‘ਅਨਾਰੋਚੇਤੁ’’ਨ੍ਤਿ ਵਚਨਸ੍ਸ ਞਾਪਕਂ ਦਸ੍ਸੇਤ੍ਵਾ ‘‘ਅਪਚ੍ਚਾਹਰਿਤੁ’’ਨ੍ਤਿ ਵਚਨਸ੍ਸ ਤਮੇਵ ਦਸ੍ਸੇਨ੍ਤੋ ਆਹ ‘‘ਅਪਰਮ੍ਪਿ ਵੁਤ੍ਤ’’ਨ੍ਤਿਆਦਿ.

ਤਤ੍ਥਾਤਿ ਓਵਾਦਪਟਿਗ੍ਗਾਹਕੇਸੁ ਭਿਕ੍ਖੂਸੁ. ਨੋ ਚਸ੍ਸਾਤਿ ਨੋ ਚੇ ਅਸ੍ਸ. ਸਭਂ ਵਾਤਿ ਸਮਜ੍ਜਂ ਵਾ. ਸਾ ਹਿ ਸਹ ਭਾਸਨ੍ਤਿ ਏਤ੍ਥ, ਸਨ੍ਤੇਹਿ ਵਾ ਭਾਤਿ ਦਿਬ੍ਬਤੀਤਿ ‘‘ਸਭਾ’’ਤਿ ਵੁਚ੍ਚਤਿ, ਤਂ ਸਭਂ ਵਾ ਉਪਸਙ੍ਕਮਿਸ੍ਸਾਮੀਤਿ ਯੋਜਨਾ. ਤਤ੍ਰਾਤਿ ਤਸ੍ਮਿਂ ਸਭਾਦਿਕੇ. ਏਵਂ ‘‘ਤਤ੍ਥਾ’’ਤਿਪਦੇਪਿ.

ਚਤੁਦ੍ਦਸਨ੍ਨਂ ਪੂਰਣੋ ਚਾਤੁਦ੍ਦਸੋ, ਤਸ੍ਮਿਂ ਪਵਾਰੇਤ੍ਵਾਤਿ ਸਮ੍ਬਨ੍ਧੋ. ਭਿਕ੍ਖੁਸਙ੍ਘੇਤਿ ਭਿਕ੍ਖੁਸਙ੍ਘਸ੍ਸ ਸਨ੍ਤਿਕੇ, ਸਮੀਪਤ੍ਥੇ ਚੇਤਂ ਭੁਮ੍ਮਵਚਨਂ. ਅਜ੍ਜਤਨਾਤਿ ਏਤ੍ਥ ਅਸ੍ਮਿਂ ਅਹਨਿ ਅਜ੍ਜ, ਇਮਸਦ੍ਦਤੋ ਅਹਨੀਤਿ ਅਤ੍ਥੇ ਜ੍ਜਪਚ੍ਚਯੋ, ਇਮਸਦ੍ਦਸ੍ਸ ਚ ਅਕਾਰੋ, ਅਜ੍ਜ ਏਵ ਅਜ੍ਜਤਨਾ, ਸ੍ਵਤ੍ਥੋ ਹਿ ਤਨਪਚ੍ਚਯੋ. ਅਪਰਸ੍ਮਿਂ ਅਹਨਿ ਅਪਰਜ੍ਜ, ਅਪਰਸਦ੍ਦਤੋ ਅਹਨੀਤਿ ਅਤ੍ਥੇ ਜ੍ਜਪਚ੍ਚਯੋ ਸਤ੍ਤਮ੍ਯਨ੍ਤੋਯੇਵ. ਏਤ੍ਥਾਤਿ ਪਵਾਰਣੇ, ‘‘ਅਨੁਜਾਨਾਮੀ’’ਤਿਆਦਿਵਚਨੇ ਵਾ. ਹੀਤਿ ਸਚ੍ਚਂ.

ਕੋਲਾਹਲਨ੍ਤਿ ਕੋਤੂਹਲਂ. ਪਠਮਂ ਭਿਕ੍ਖੁਨੀ ਯਾਚਿਤਬ੍ਬਾਤਿ ਸਙ੍ਘੇਨ ਪਠਮਂ ਭਿਕ੍ਖੁਨੀ ਯਾਚਿਤਬ੍ਬਾ.

ਤਾਯ ਭਿਕ੍ਖੁਨਿਯਾ ਵਚਨੀਯੋ ਅਸ੍ਸਾਤਿ ਯੋਜਨਾ. ਪਸ੍ਸਨ੍ਤੋ ਪਟਿਕਰਿਸ੍ਸਤੀਤਿ ਵਜ੍ਜਾਵਜ੍ਜਂ ਪਸ੍ਸਨ੍ਤੋ ਹੁਤ੍ਵਾ ਪਟਿਕਰਿਸ੍ਸਤਿ.

ਉਭਿਨ੍ਨਨ੍ਤਿ ਭਿਕ੍ਖੁਭਿਕ੍ਖੁਨੀਨਂ. ਯਥਾਠਾਨੇਯੇਵਾਤਿ ਯਂ ਯਂ ਠਾਨਂ ਯਥਾਠਾਨਂ, ਤਸ੍ਮਿਂ ਯਥਾਠਾਨੇਯੇਵ. ਕੇਨਚਿ ਪਰਿਯਾਯੇਨਾਤਿ ਕੇਨਚਿ ਕਾਰਣੇਨ. ਅਵਪੁਬ੍ਬੋ ਵਰਸਦ੍ਦੋ ਪਿਹਿਤਤ੍ਥੋਤਿ ਆਹ ‘‘ਪਿਹਿਤੋ’’ਤਿ. ਵਚਨਂਯੇਵਾਤਿ ਓਵਾਦਵਚਨਂਯੇਵ. ਪਥੋਤਿ ਜੇਟ੍ਠਕਟ੍ਠਾਨੇ ਠਾਨਸ੍ਸ ਕਾਰਣਤ੍ਤਾ ਪਥੋ. ਦੋਸਂ ਪਨਾਤਿ ਅਭਿਕ੍ਕਮਨਾਦੀਸੁ ¶ ਆਦੀਨਵਂ ਪਨ. ਅਞ੍ਜੇਨ੍ਤੀਤਿ ਮਕ੍ਖੇਨ੍ਤਿ. ਭਿਕ੍ਖੂਹਿ ਪਨ ਓਵਦਿਤੁਂ ਅਨੁਸਾਸਿਤੁਂ ਵਟ੍ਟਤੀਤਿ ਯੋਜਨਾ.

ਅਞ੍ਞਨ੍ਤਿ ਓਵਾਦਤੋ ਅਞ੍ਞਂ. ਏਸੋਤਿ ਗਰੁਧਮ੍ਮੋ.

੧੫੦. ‘‘ਅਧਮ੍ਮਕਮ੍ਮੇ’’ਤਿ ਏਤ੍ਥ ਕਤਮਂ ਕਮ੍ਮਂ ਨਾਮਾਤਿ ਆਹ ‘‘ਅਧਮ੍ਮਕਮ੍ਮੇਤਿਆਦੀਸੂ’’ਤਿਆਦਿ. ਤਤ੍ਥਾਤਿ ਅਧਮ੍ਮਕਮ੍ਮਧਮ੍ਮਕਮ੍ਮੇਸੁ.

੧੫੨. ਉਦ੍ਦੇਸਂ ਦੇਨ੍ਤੋ ਭਣਤਿ, ਅਨਾਪਤ੍ਤੀਤਿ ਯੋਜਨਾ. ਓਸਾਰੇਤੀਤਿ ਕਥੇਤਿ. ਚਤੁਪਰਿਸਤੀਤਿ ਚਤੁਪਰਿਸਸ੍ਮਿਂ. ਤਤ੍ਰਾਪੀਤਿ ਤੇਨ ਭਿਕ੍ਖੁਨੀਨਂ ਸੁਣਨਕਾਰਣੇਨਾਤਿ. ਪਠਮਂ.

੨. ਅਤ੍ਥਙ੍ਗਤਸਿਕ੍ਖਾਪਦਂ

੧੫੩. ਦੁਤਿਯੇ ¶ ਪਰਿਯਾਯਸਦ੍ਦੋ ਵਾਰਤ੍ਥੋਤਿ ਆਹ ‘‘ਵਾਰੇਨਾ’’ਤਿ. ਵਾਰੋਤਿ ਚ ਅਨੁਕ੍ਕਮੋਯੇਵਾਤਿ ਆਹ ‘‘ਪਟਿਪਾਟਿਯਾਤਿ ਅਤ੍ਥੋ’’ਤਿ. ਅਧਿਕਂ ਚਿਤ੍ਤਂ ਇਮਸ੍ਸਾਤਿ ਅਧਿਚੇਤੋਤਿ ਦਸ੍ਸੇਨ੍ਤੋ ਆਹ ‘‘ਅਧਿਚਿਤ੍ਤਵਤੋ’’ਤਿਆਦਿ. ਅਧਿਚਿਤ੍ਤਂ ਨਾਮ ਇਧ ਅਰਹਤ੍ਤਫਲਚਿਤ੍ਤਮੇਵ, ਨ ਵਿਪਸ੍ਸਨਾਪਾਦਕਭੂਤਂ ਅਟ੍ਠਸਮਾਪਤ੍ਤਿਚਿਤ੍ਤਨ੍ਤਿ ਆਹ ‘‘ਅਰਹਤ੍ਤਫਲਚਿਤ੍ਤੇਨਾ’’ਤਿ. ‘‘ਅਧਿਚਿਤ੍ਤਸਿਕ੍ਖਾ’’ਤਿਆਦੀਸੁ (ਪਾਰਾ. ੪੫; ਦੀ. ਨਿ. ੩.੩੦੫; ਮ. ਨਿ. ੧.੪੯੭; ਅ. ਨਿ. ੬.੧੦੫; ਮਹਾਨਿ. ੧੦) ਹਿ ਵਿਪਸ੍ਸਨਾਪਾਦਕਭੂਤਂ ਅਟ੍ਠਸਮਾਪਤ੍ਤਿਚਿਤ੍ਤਂ ‘‘ਅਧਿਚਿਤ੍ਤ’’ਨ੍ਤਿ ਵੁਚ੍ਚਤਿ. ਨ ਪਮਜ੍ਜਤੋਤਿ ਨ ਪਮਜ੍ਜਨ੍ਤਸ੍ਸ. ਸਾਤਚ੍ਚਕਿਰਿਯਾਯਾਤਿ ਸਤਤਕਰਣੇਨ. ਉਭੋ ਲੋਕੇ ਮੁਨਤਿ ਜਾਨਾਤੀਤਿ ਮੁਨੀਤਿ ਚ, ਮੋਨਂ ਵੁਚ੍ਚਤਿ ਞਾਣਂ ਮੁਨਨਟ੍ਠੇਨ ਜਾਨਨਤ੍ਥੇਨ, ਤਮਸ੍ਸਤ੍ਥੀਤਿ ਮੁਨੀਤਿ ਚ ਦਸ੍ਸੇਨ੍ਤੋ ਆਹ ‘‘ਮੁਨਿਨੋਤੀ’’ਤਿਆਦਿ. ਤਤ੍ਥ ‘‘ਯੋ ਮੁਨਤਿ…ਪੇ… ਮੁਨਨੇਨ ਵਾ’’ਤਿਇਮਿਨਾ ਪਠਮਤ੍ਥਂ ਦਸ੍ਸੇਤਿ, ‘‘ਮੋਨਂ ਵੁਚ੍ਚਤਿ…ਪੇ… ਵੁਚ੍ਚਤੀ’’ਤਿਇਮਿਨਾ ਦੁਤਿਯਤ੍ਥਂ ਦਸ੍ਸੇਤਿ. ਮੁਨ ਗਤਿਯਨ੍ਤਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੫ ਪਕਾਰਨ੍ਤਧਾਤੁ) ਵੁਤ੍ਤਤ੍ਤਾ ‘‘ਯੋ ਮੁਨਤੀ’’ਤਿ ਏਤ੍ਥ ਭੂਵਾਦਿਗਣਿਕੋ ਮੁਨਧਾਤੁਯੇਵ, ਨ ਕੀਯਾਦਿਗਣਿਕੋ ਮੁਧਾਤੂਤਿ ਦਟ੍ਠਬ੍ਬਂ. ਅਥ ਵਾ ਮੁਨ ਞਾਣੇਤਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੭ ਕਿਯਾਦਿਗਣਿਕ) ਵੁਤ੍ਤਤ੍ਤਾ ‘‘ਮੁਨਾਤੀ’’ਤਿ ਕੀਯਾਦਿਗਣਿਕੋਵ. ਧਾਤ੍ਵਨ੍ਤਨਕਾਰਲੋਪੋਤਿ ਦਟ੍ਠਬ੍ਬਂ. ‘‘ਮੋਨਂ ਵੁਚ੍ਚਤਿ ਞਾਣ’’ਨ੍ਤਿ ਚੇਤ੍ਥ ਞਾਣਂ ਨਾਮ ¶ ਅਰਹਤ੍ਤਞਾਣਮੇਵ. ਮੋਨਸ੍ਸ ਪਥੋ ਮੋਨਪਥੋਤਿ ਵੁਤ੍ਤੇ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮਾਵ ਅਧਿਪ੍ਪੇਤਾਤਿ ਆਹ ‘‘ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮੇਸੂ’’ਤਿ. ਅਥ ਵਾ ਅਧਿਸੀਲਸਿਕ੍ਖਾਦਯੋ ਅਧਿਪ੍ਪੇਤਾਤਿ ਆਹ ‘‘ਤੀਸੁ ਵਾ ਸਿਕ੍ਖਾਸੂ’’ਤਿ. ਪੁਬ੍ਬਭਾਗਪਟਿਪਦਨ੍ਤਿ ਅਰਹਤ੍ਤਞਾਣਸ੍ਸ ਪੁਬ੍ਬਭਾਗੇ ਪਵਤ੍ਤਂ ਸੀਲਸਮਥਵਿਪਸ੍ਸਨਾਸਙ੍ਖਾਤਂ ਪਟਿਪਦਂ. ਪੁਬ੍ਬਭਾਗੇਤਿ ਅਰਹਤ੍ਤਞਾਣਸ੍ਸ ਪੁਬ੍ਬਭਾਗੇ. ਏਤ੍ਥਾਤਿ ‘‘ਅਧਿਚੇਤਸੋ…ਪੇ… ਸਿਕ੍ਖਤੋ’’ਤਿ ਵਚਨੇ. ‘‘ਤਾਦਿਨੋ’’ਤਿਪਦਂ ‘‘ਮੁਨਿਨੋ’’ਤਿਪਦੇਨ ਯੋਜੇਤਬ੍ਬਨ੍ਤਿ ਆਹ ‘‘ਤਾਦਿਸਸ੍ਸ ਖੀਣਾਸਵਮੁਨਿਨੋ’’ਤਿ. ਏਤ੍ਥਾਤਿ ‘‘ਸੋਕਾ ਨ ਭਵਨ੍ਤਿ ਤਾਦਿਨੋ’’ਤਿ ਵਚਨੇ. ਰਾਗਾਦਯੋ ਉਪਸਮੇਤੀਤਿ ਉਪਸਨ੍ਤੋਤਿ ਦਸ੍ਸੇਤੁਂ ਵੁਤ੍ਤਂ ‘‘ਰਾਗਾਦੀਨ’’ਨ੍ਤਿ. ਸਤਿ ਅਸ੍ਸਤ੍ਥੀਤਿ ਸਤਿਮਾਤਿ ਕਤ੍ਵਾ ਮਨ੍ਤੁਸਦ੍ਦੋ ਨਿਚ੍ਚਯੋਗਤ੍ਥੋਤਿ ਆਹ ‘‘ਸਤਿਯਾ ਅਵਿਰਹਿਤਸ੍ਸਾ’’ਤਿ.

ਨ ਕਸੀਯਤਿ ਨ ਵਿਲੇਖੀਯਤੀਤਿ ਅਕਾਸੋ, ਸੋਯੇਵ ਆਕਾਸੋ. ਅਨ੍ਤਰੇਨ ਛਿਦ੍ਦੇਨ ਇਕ੍ਖਿਤਬ੍ਬੋਤਿ ਅਨ੍ਤਲਿਕ੍ਖੋ. ਆਕਾਸੋ ਹਿ ਚਤੁਬ੍ਬਿਧੋ ਅਜਟਾਕਾਸੋ, ਕਸਿਣੁਗ੍ਘਾਟਿਮਾਕਾਸੋ, ਪਰਿਚ੍ਛਿਨ੍ਨਾਕਾਸੋ, ਰੂਪਪਰਿਚ੍ਛੇਦਾਕਾਸੋਤਿ. ਤਤ੍ਥ ਅਜਟਾਕਾਸੋਵ ਇਧਾਧਿਪ੍ਪੇਤੋ ‘‘ਅਨ੍ਤਲਿਕ੍ਖੇ’’ਤਿ ਵਿਸੇਸਿਤਤ੍ਤਾ. ਤੇਨਾਹ ‘‘ਨ ਕਸਿਣੁਗ੍ਘਾਟਿਮੇ, ਨ ਪਨ ਰੂਪਪਰਿਚ੍ਛੇਦੇ’’ਤਿ. ਪਰਿਚ੍ਛਿਨ੍ਨਾਕਾਸੋਪਿ ਰੂਪਪਰਿਚ੍ਛੇਦਾਕਾਸੇਨ ਸਙ੍ਗਹਿਤੋ. ‘‘ਮ’’ਨ੍ਤਿ ਪਦਂ ‘‘ਅਵਮਞ੍ਞਨ੍ਤੀ’’ਤਿ ਪਦੇ ਕਮ੍ਮਂ. ਏਤ੍ਤਕਮੇਵਾਤਿ ਏਤਪ੍ਪਮਾਣਂ ¶ ‘‘ਅਧਿਚੇਤਸੋ’’ਤਿਆਦਿਸਙ੍ਖਾਤਂ ਵਚਨਮੇਵ, ਨ ਅਞ੍ਞਂ ਬੁਦ੍ਧਵਚਨਨ੍ਤਿ ਅਤ੍ਥੋ. ਅਯਨ੍ਤਿ ਚੂਲ਼ਪਨ੍ਥਕੋ ਥੇਰੋ. ਹਨ੍ਦਾਤਿ ਵਸ੍ਸਗ੍ਗਤ੍ਥੇ ਨਿਪਾਤੋ. ਮਮ ਆਨੁਭਾਵਂ ਦਸ੍ਸੇਮਿ, ਤੁਮ੍ਹੇ ਪਸ੍ਸਥ ਗਣ੍ਹਥਾਤਿ ਅਧਿਪ੍ਪਾਯੋ. ਵੁਟ੍ਠਾਯਾਤਿ ਤਤੋ ਚਤੁਤ੍ਥਜ੍ਝਾਨਤੋ ਵੁਟ੍ਠਹਿਤ੍ਵਾ. ਅਨ੍ਤਰਾਪਿ ਧਾਯਤੀਤਿ ਏਤ੍ਥ ਪਿਸਦ੍ਦਸ੍ਸ ਅਟ੍ਠਾਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਨ੍ਤਰਧਾਯਤਿਪੀ’’ਤਿ. ਏਸੇਵ ਨਯੋ ‘‘ਸੇਯ੍ਯਮ੍ਪਿ ਕਪ੍ਪੇਤੀ’’ਤਿ ਏਤ੍ਥਪਿ. ਥੇਰੋਤਿ ਚੂਲ਼ਪਨ੍ਥਕੋ ਥੇਰੋ. ਇਦਂ ਪਦਂ ਅਨ੍ਤਰਨ੍ਤਰਾ ਯੁਤ੍ਤਟ੍ਠਾਨੇਸੁ ਸਮ੍ਬਨ੍ਧਿਤ੍ਵਾ ‘‘ਤਞ੍ਚੇਵ ਭਣਤੀ’’ਤਿਇਮਿਨਾ ਸਮ੍ਬਨ੍ਧਿਤਬ੍ਬਂ. ਭਾਤੁਥੇਰਸ੍ਸਾਤਿ ਜੇਟ੍ਠਕਭਾਤੁਭੂਤਸ੍ਸ ਮਹਾਪਨ੍ਥਕਥੇਰਸ੍ਸ.

ਪਦ੍ਮਨ੍ਤਿ ¶ ਗਾਥਾਯਂ ਤਯੋ ਪਾਦਾ ਇਨ੍ਦਵਜਿਰਾ, ਚਤੁਤ੍ਥਪਾਦੋ ਉਪੇਨ੍ਦਵਜਿਰੋ. ਤਸ੍ਮਾ ਪਦ੍ਮਨ੍ਤਿ ਏਤ੍ਥ ਮਕਾਰੇ ਪਰੇ ਦੁਕਾਰੁਕਾਰਸ੍ਸ ਲੋਪਂ ਕਤ੍ਵਾ ਪਰਕ੍ਖਰਂ ਨੇਤ੍ਵਾ ‘‘ਪਦ੍ਮ’’ਨ੍ਤਿ ਦ੍ਵਿਭਾਵੇਨ ਲਿਖਿਤਬ੍ਬਂ. ਅਵੀਤਗਨ੍ਧਨ੍ਤਿ ਏਤ੍ਥ ਵੀਤਿ ਦੀਘੁਚ੍ਚਾਰਣਮੇਵ ਯੁਤ੍ਤਂ. ਪਙ੍ਕੇ ਦਵਤਿ ਗਚ੍ਛਤੀਤਿ ਪਦੁਮਂ. ਕੋਕਂ ਦੁਗ੍ਗਨ੍ਧਸ੍ਸ ਆਦਾਨਂ ਨੁਦਤਿ ਅਪਨੇਤੀਤਿ ਕੋਕਨੁਦਂ. ਸੁਨ੍ਦਰੋ ਗਨ੍ਧੋ ਇਮਸ੍ਸਾਤਿ ਸੁਗਨ੍ਧਂ. ਅਯਂ ਪਨੇਤ੍ਥ ਯੋਜਨਾ – ਯਥਾ ਕੋਕਨੁਦਸਙ੍ਖਾਤਂ ਸੁਗਨ੍ਧਂ ਪਾਤੋ ਪਗੇਵ ਬਾਲਾਤਪੇਨ ਫੁਲ੍ਲਂ ਵਿਕਸਿਤਂ ਅਵੀਤਗਨ੍ਧਂ ਹੁਤ੍ਵਾ ਵਿਰੋਚਮਾਨਂ ਪਦੁਮਂ ਸਿਯਾ, ਤਥਾ ਅਙ੍ਗੀਰਸਂ ਅਙ੍ਗਿਤੋ ਸਰੀਰਤੋ ਨਿਚ੍ਛਰਣਪਭਸ੍ਸਰਰਸਂ ਹੁਤ੍ਵਾ ਵਿਰੋਚਮਾਨਭੂਤਂ ਅਨ੍ਤਲਿਕ੍ਖੇ ਤਪਨ੍ਤਂ ਆਦਿਚ੍ਚਂ ਇਵ ਤੇਧਾਤੁਕੇ ਤਪਨ੍ਤਂ ਸਮ੍ਮਾਸਮ੍ਬੁਦ੍ਧਂ ਪਸ੍ਸਾਤਿ.

ਪਗੁਣਨ੍ਤਿ ਵਾਚੁਗ੍ਗਤਂ. ਤਤੋਤਿ ਅਸਕ੍ਕੁਣੇਯ੍ਯਤੋ. ਨਨ੍ਤਿ ਚੂਲ਼ਪਨ੍ਥਕਂ. ਥੇਰੋਤਿ ਮਹਾਪਨ੍ਥਕੋ ਥੇਰੋ ਨਿਕ੍ਕਡ੍ਢਾਪੇਸੀਤਿ ਸਮ੍ਬਨ੍ਧੋ. ਸੋਤਿ ਚੂਲ਼ਪਨ੍ਥਕੋ. ਅਥਾਤਿ ਤਸ੍ਮਿਂ ਕਾਲੇ. ਭਗਵਾ ਆਹਾਤਿ ਯੋਜਨਾ. ਬੁਦ੍ਧਚਕ੍ਖੁਨਾਤਿ ਆਸਯਾਨੁਸਯਇਨ੍ਦ੍ਰਿਯਪਰੋਪਰਿਯਤ੍ਤਞਾਣਸਙ੍ਖਾਤੇਨ ਸਬ੍ਬਞ੍ਞੁਬੁਦ੍ਧਾਨਂ ਚਕ੍ਖੁਨਾ. ਤਨ੍ਤਿ ਚੂਲ਼ਪਨ੍ਥਕਂ. ਤਸ੍ਸਾਤਿ ਚੂਲ਼ਪਨ੍ਥਕਸ੍ਸ. ਅਥਾਤਿ ਤਸ੍ਮਿਂ ਆਰੋਚਨਕਾਲੇ. ਅਸ੍ਸਾਤਿ ਚੂਲ਼ਪਨ੍ਥਕਸ੍ਸ, ਦਤ੍ਵਾਤਿ ਸਮ੍ਬਨ੍ਧੋ. ਰਜਂ ਮਲਂ ਹਰਤਿ ਅਪਨੇਤੀਤਿ ਰਜੋਹਰਣਂ, ਪਿਲੋਤਿਕਖਣ੍ਡਂ. ਸੋਤਿ ਚੂਲ਼ਪਨ੍ਥਕੋ. ਤਸ੍ਸਾਤਿ ਪਿਲੋਤਿਕਖਣ੍ਡਸ੍ਸ, ‘‘ਅਨ੍ਤ’’ਨ੍ਤਿਪਦੇ ਅਵਯਵਿਸਮ੍ਬਨ੍ਧੋ. ਪਰਿਸੁਦ੍ਧਮ੍ਪੀਤਿ ਪਿਸਦ੍ਦੋ ਅਪਰਿਸੁਦ੍ਧੇ ਪਿਲੋਤਿਕਖਣ੍ਡੇ ਕਾ ਨਾਮ ਕਥਾਤਿ ਦਸ੍ਸੇਤਿ. ਸਂਵੇਗਨ੍ਤਿ ਸਨ੍ਤਾਸਂ ਭਯਨ੍ਤਿ ਅਤ੍ਥੋ. ਅਥਾਤਿ ਤਸ੍ਮਿਂ ਆਰਮ੍ਭਕਾਲੇ. ਅਸ੍ਸਾਤਿ ਚੂਲ਼ਪਨ੍ਥਕਸ੍ਸ. ‘‘ਤ’’ਨ੍ਤਿਪਦਂ ‘‘ਮਮਾਯਨਭਾਵ’’ਨ੍ਤਿਪਦੇਨ ਸਮ੍ਬਨ੍ਧਂ ਕਤ੍ਵਾ ਯੋਜਨਾ ਕਾਤਬ੍ਬਾਤਿ. ਦੁਤਿਯਂ.

੩. ਭਿਕ੍ਖੁਨੁਪਸ੍ਸਯਸਿਕ੍ਖਾਪਦਂ

੧੬੨. ਤਤਿਯੇ ‘‘ਓਵਦਤਿ ਪਾਚਿਤ੍ਤਿਯਸ੍ਸਾ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ਵਿਸੇਸਤੋ ਅਤ੍ਥੋ ਗਹੇਤਬ੍ਬੋਤਿ ¶ ਆਹ ‘‘ਅਟ੍ਠਹਿ ਗਰੁਧਮ੍ਮੇਹਿ ਓਵਦਨ੍ਤਸ੍ਸੇਵ ਪਾਚਿਤ੍ਤਿਯ’’ਨ੍ਤਿ. ਇਤੋਤਿ ਇਮਸ੍ਮਾ ਸਿਕ੍ਖਾਪਦਮ੍ਹਾ. ਯਤ੍ਥ ¶ ਯਤ੍ਥਾਤਿ ਯਸ੍ਮਿਂ ਯਸ੍ਮਿਂ ਸਿਕ੍ਖਾਪਦੇ. ਸਬ੍ਬਤ੍ਥ ਤਤ੍ਥ ਤਤ੍ਥਾਤਿ ਯੋਜਨਾਤਿ. ਤਤਿਯਂ.

ਪਕਿਣ੍ਣਕਕਥਾ

ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਇਦਂ ਪਕਿਣ੍ਣਕਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤੀਣਿ ਪਾਚਿਤ੍ਤਿਯਾਨੀਤਿ ਭਿਕ੍ਖੁਨੋ ਅਸਮ੍ਮਤਤ੍ਤਾ ਏਕਂ ਪਾਚਿਤ੍ਤਿਯਂ, ਸੂਰਿਯਸ੍ਸ ਅਤ੍ਥਙ੍ਗਤਤ੍ਤਾ ਏਕਂ, ਭਿਕ੍ਖੁਨੁਪਸ੍ਸਯਂ ਉਪਸਙ੍ਕਮਿਤਤ੍ਤਾ ਏਕਨ੍ਤਿ ਤੀਣਿ ਪਾਚਿਤ੍ਤਿਯਾਨਿ. ਕਥਨ੍ਤਿ ਕੇਨ ਕਾਰਣੇਨ ਹੋਤੀਤਿ ਯੋਜਨਾ. ਤਤ੍ਥਾਤਿ ਭਿਕ੍ਖੁਨੁਪਸ੍ਸਯਂ. ਤਸ੍ਸੇਵਾਤਿ ਸਮ੍ਮਤਸ੍ਸੇਵ ਭਿਕ੍ਖੁਨੋ. ਅਞ੍ਞੇਨ ਧਮ੍ਮੇਨਾਤਿ ਗਰੁਧਮ੍ਮੇਹਿ ਅਞ੍ਞੇਨ ਧਮ੍ਮੇਨ. ਦਿਵਾ ਪਨਾਤਿ ਸੂਰਿਯੁਗ੍ਗਮਨਤੋ ਤਸ੍ਸ ਅਨਤ੍ਥਙ੍ਗਤੇਯੇਵਾਤਿ.

੪. ਆਮਿਸਸਿਕ੍ਖਾਪਦਂ

੧੬੪. ਚਤੁਤ੍ਥੇ ਬਹੁਂ ਮਾਨਂ ਕਤਂ ਯੇਹੀਤਿ ਬਹੁਕਤਾ. ਬਹੁਕਤਾ ਹੁਤ੍ਵਾ ਨ ਓਵਦਨ੍ਤੀਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਨ ਬਹੁਕਤਾ’’ਤਿਆਦਿ. ਧਮ੍ਮੇਤਿ ਸੀਲਾਦਿਧਮ੍ਮੇ. ਅਧਿਪ੍ਪਾਯੋਤਿ ‘‘ਨ ਬਹੁਕਤਾ’’ਤਿਪਦਸ੍ਸ, ਛਬ੍ਬਗ੍ਗਿਯਾਨਂ ਵਾ ਅਧਿਪ੍ਪਾਯੋਤਿ ਯੋਜਨਾ. ‘‘ਕਤ੍ਤੁਕਾਮੋਤਿ ਆਦੀਨ’’ਨ੍ਤਿਪਦਂ ‘‘ਅਤ੍ਥੋ’’ਤਿਪਦੇ ਵਾਚਕਸਮ੍ਬਨ੍ਧੋ.

ਅਸਮ੍ਮਤੋ ਨਾਮ ਠਪਿਤੋ ਵੇਦਿਤਬ੍ਬੋਤਿ ਯੋਜਨਾ. ਸਮ੍ਮੁਤਿਨ੍ਤਿ ਭਿਕ੍ਖੁਨੋਵਾਦਕਸਮ੍ਮੁਤਿਂ. ਪਚ੍ਛਾ ਸਾਮਣੇਰਭੂਮਿਯਂ ਠਿਤੋਤਿ ਯੋਜਨਾਤਿ. ਚਤੁਤ੍ਥਂ.

੫. ਚੀਵਰਦਾਨਸਿਕ੍ਖਾਪਦਂ

੧੬੯. ਪਞ੍ਚਮੇ ਰਥਿਕਾਯਾਤਿ ਰਚ੍ਛਾਯ. ਸਾ ਹਿ ਰਥਸ੍ਸ ਹਿਤਤ੍ਤਾ ਰਥਿਕਾਤਿ ਵੁਚ੍ਚਤਿ. ਸਨ੍ਦਿਟ੍ਠਾਤਿ ਸਮੋਧਾਨਵਸੇਨ ਦਸ੍ਸੀਯਿਤ੍ਥਾਤਿ ਸਨ੍ਦਿਟ੍ਠਾ. ਦਿਟ੍ਠਮਤ੍ਤਕਾ ਮਿਤ੍ਤਾਤਿ ਆਹ ‘‘ਮਿਤ੍ਤਾ’’ਤਿ. ਸੇਸਨ੍ਤਿ ਵੁਤ੍ਤਵਚਨਤੋ ਸੇਸਂ ਵਚਨਂ. ਤਤ੍ਰਾਤਿ ਚੀਵਰਪਟਿਗ੍ਗਹਣਸਿਕ੍ਖਾਪਦੇ. ਹੀਤਿ ਵਿਸੇਸਜੋਤਕਂ. ਇਧਾਤਿ ਇਮਸ੍ਮਿਂ ਚੀਵਰਦਾਨਸਿਕ੍ਖਾਪਦੇਤਿ. ਪਞ੍ਚਮਂ.

੬. ਚੀਵਰਸਿਬ੍ਬਨਸਿਕ੍ਖਾਪਦਂ

੧੭੫. ਛਟ੍ਠੇ ¶ ¶ ਉਦਾਯੀਤਿ ਏਤ੍ਥ ਮਹਾਉਦਾਯੀ, ਕਾਲ਼ੁਦਾਯੀ, ਲਾਲ਼ੁਦਾਯੀਤਿ ਤਯੋ ਉਦਾਯੀ ਹੋਨ੍ਤਿ. ਤੇਸੁ ਤਤਿਯੋਵਾਧਿਪ੍ਪੇਤੋਤਿ ਆਹ ‘‘ਲਾਲ਼ੁਦਾਯੀ’’ਤਿ. ਪਭਾਵੇਨ ਠਾਤਿ ਪਵਤ੍ਤਤੀਤਿ ਪਟ੍ਠੋਤਿ ਕਤੇ ਪਟਿਬਲੋਵ ਲਬ੍ਭਤਿ. ਤੇਨਾਹ ‘‘ਪਟਿਬਲੋ’’ਤਿ. ਨਿਪੁਣੋਤਿ ਕੁਸਲੋ. ‘‘ਪਟਿਭਾਨੇਨ ਕਤਚਿਤ੍ਤ’’ਨ੍ਤਿਇਮਿਨਾ ‘‘ਪਟਿਭਾਨਚਿਤ੍ਤ’’ਨ੍ਤਿ ਪਦਸ੍ਸ ਮਜ੍ਝੇ ਪਦਲੋਪਂ ਦਸ੍ਸੇਤਿ. ਸੋਤਿ ਲਾਲ਼ੁਦਾਯੀ ਅਕਾਸੀਤਿ ਸਮ੍ਬਨ੍ਧੋ. ਤਸ੍ਸਾਤਿ ਚੀਵਰਸ੍ਸ. ‘‘ਯਥਾਸਂਹਟ’’ਨ੍ਤਿ ਏਤ੍ਥ ਏਵਸਦ੍ਦੋ ਅਜ੍ਝਾਹਰਿਤਬ੍ਬੋਤਿ ਆਹ ‘‘ਯਥਾਸਂਹਟਮੇਵਾ’’ਤਿ.

੧੭੬. ਯਂ ਚੀਵਰਂ ਨਿਵਾਸਿਤੁਂ ਵਾ ਪਾਰੁਪਿਤੁਂ ਵਾ ਸਕ੍ਕਾ ਹੋਤਿ, ਤਂ ਚੀਵਰਂ ਨਾਮਾਤਿ ਯੋਜਨਾ. ਏਵਂ ਹੀਤਿ ਏਵਮੇਵ. ‘‘ਦੁਕ੍ਕਟ’’ਨ੍ਤਿਇਮਿਨਾ ‘‘ਸਯਂ ਸਿਬ੍ਬਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ ਏਤ੍ਥ ਅਨ੍ਤਰਾਪਤ੍ਤਿਂ ਦਸ੍ਸੇਤਿ. ਆਰਾਤਿ ਸੂਚਿ. ਸਾ ਹਿ ਅਰਤਿ ਨਿਸ੍ਸਙ੍ਗਵਸੇਨ ਗਚ੍ਛਤਿ ਪਵਿਸਤੀਤਿ ‘‘ਆਰਾ’’ਤਿ ਵੁਚ੍ਚਤਿ, ਤਸ੍ਸਾ ਪਥੋ ਗਮਨਂ ਆਰਾਪਥੋ, ਤਸ੍ਮਿਂ, ਆਰਾਪਥਸ੍ਸ ਨੀਹਰਣਾਵਸਾਨਤ੍ਤਾ ‘‘ਨੀਹਰਣੇ’’ਤਿ ਵੁਤ੍ਤਂ. ਸਤਕ੍ਖਤ੍ਤੁਮ੍ਪੀਤਿ ਅਨੇਕਕ੍ਖਤ੍ਤੁਮ੍ਪਿ. ਆਣਤ੍ਤੋਤਿ ਆਣਾਪੀਯਤੀਤਿ ਆਣਤ੍ਤੋ. ‘‘ਆਣਾਪਿਤੋ’’ਤਿ ਵਤ੍ਤਬ੍ਬੇ ਣਾਪੇਸਦ੍ਦਸ੍ਸ ਲੋਪਂ, ਇਕਾਰਸ੍ਸ ਚ ਅਕਾਰਂ ਕਤ੍ਵਾ, ‘‘ਆਦਤ੍ਤੇ’’ਤਿ ਆਖ੍ਯਾਤਪਦੇ ਤੇਵਿਭਤ੍ਤਿਯਾ ਵਿਯ ਤਪਚ੍ਚਯਸ੍ਸ ਚ ਦ੍ਵਿਭਾਵਂ ਕਤ੍ਵਾ ਏਵਂ ਵੁਤ੍ਤਂ. ਤੇਨਾਹ ‘‘ਸਕਿਂ ਚੀਵਰਂ ਸਿਬ੍ਬਾਤਿ ਵੁਤ੍ਤੋ’’ਤਿ. ਅਥ ਪਨਾਤਿ ਤਤੋ ਅਞ੍ਞਥਾ ਪਨ. ਆਣਤ੍ਤਸ੍ਸਾਤਿ ਆਣਾਪਿਤਸ੍ਸ. ਸਮ੍ਬਹੁਲਾਨਿਪਿ ਪਾਚਿਤ੍ਤਿਯਾਨਿ ਹੋਨ੍ਤੀਤਿ ਸਮ੍ਬਨ੍ਧੋ.

ਯੇਪਿ ਨਿਸ੍ਸਿਤਕਾ ਸਿਬ੍ਬਨ੍ਤੀਤਿ ਯੋਜਨਾ, ਆਚਰਿਯੁਪਜ੍ਝਾਯੇਸੁ ਸਿਬ੍ਬਨ੍ਤੇਸੂਤਿ ਸਮ੍ਬਨ੍ਧੋ. ਤੇਸਨ੍ਤਿ ਆਚਰਿਯੁਪਜ੍ਝਾਯਾਨਂ. ਤੇਸਮ੍ਪੀਤਿ ਨਿਸ੍ਸਿਤਕਾਨਮ੍ਪਿ. ਞਾਤਿਕਾਨਂ ਭਿਕ੍ਖੁਨੀਨਂ ਚੀਵਰਨ੍ਤਿ ਸਮ੍ਬਨ੍ਧੋ. ‘‘ਅਨ੍ਤੇਵਾਸਿਕੇਹੀ’’ਤਿਪਦਂ ‘‘ਸਿਬ੍ਬਾਪੇਨ੍ਤੀ’’ਤਿਪਦੇ ਕਾਰਿਤਕਮ੍ਮਂ. ਤਤ੍ਰਾਪੀਤਿ ਆਚਰਿਯੁਪਜ੍ਝਾਯੇਹਿ ਸਿਬ੍ਬਾਪਨੇਪਿ. ‘‘ਅਨ੍ਤੇਵਾਸਿਕੇ’’ਤਿਪਦਂ ‘‘ਵਞ੍ਚੇਤ੍ਵਾ’’ਤਿਪਦੇ ¶ ਸੁਦ੍ਧਕਮ੍ਮਂ, ‘‘ਸਿਬ੍ਬਾਪੇਨ੍ਤੀ’’ਤਿਪਦੇ ਕਾਰਿਤਕਮ੍ਮਂ. ਇਤਰੇਸਨ੍ਤਿ ਆਚਰਿਯੁਪਜ੍ਝਾਯਾਨਨ੍ਤਿ. ਛਟ੍ਠਂ.

੭. ਸਂਵਿਧਾਨਸਿਕ੍ਖਾਪਦਂ

੧੮੧. ਸਤ੍ਤਮੇ ‘‘ਤਾਸਂ ਭਿਕ੍ਖੁਨੀਨਂ ਪਚ੍ਛਾ ਗਚ੍ਛਨ੍ਤੀਨ’’ਨ੍ਤਿ ਪਦਾਨਿ ‘‘ਪਤ੍ਤਚੀਵਰ’’ਨ੍ਤਿ ਪਾਠਸੇਸੇਨ ਯੋਜੇਤਬ੍ਬਾਨੀਤਿ ਆਹ ‘‘ਪਚ੍ਛਾ ਗਚ੍ਛਨ੍ਤੀਨਂ ਪਤ੍ਤਚੀਵਰ’’ਨ੍ਤਿ. ਤਾ ਭਿਕ੍ਖੁਨਿਯੋ ਪਚ੍ਛਾ ਗਚ੍ਛਨ੍ਤਿਯੋਤਿ ਵਿਭਤ੍ਤਿਵਿਪਲ੍ਲਾਸਂ ਕਤ੍ਵਾ ‘‘ਦੂਸੇਸੁ’’ਨ੍ਤਿਪਦੇਨ ਯੋਜੇਤਬ੍ਬਾਨੀਤਿ ਆਹ ‘‘ਤਾ ਭਿਕ੍ਖੁਨਿਯੋ ¶ ਚੋਰਾ ਦੂਸਯਿਂਸੂ’’ਤਿ. ਅਥ ਵਾ ਵਿਭਤ੍ਤਿਵਿਪਲ੍ਲਾਸਮਕਤ੍ਵਾ ‘‘ਅਚ੍ਛਿਨ੍ਦਿਂਸੂ’’ਤਿ ਪਦੇ ‘‘ਪਤ੍ਤਚੀਵਰ’’ਨ੍ਤਿਪਦਂ ਅਜ੍ਝਾਹਰਿਤ੍ਵਾ ‘‘ਦੂਸੇਸੁ’’ਨ੍ਤਿਪਦੇ ‘‘ਸੀਲ’’ਨ੍ਤਿ ਪਾਠਂ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਨ੍ਤਿ ਦਟ੍ਠਬ੍ਬਂ.

੧੮੨-੩. ਸਂਪੁਬ੍ਬੋ, ਵਿਪੁਬ੍ਬੋ ਚ ਧਾਧਾਤੁ ਤ੍ਵਾਪਚ੍ਚਯੋ ਹੋਤੀਤਿ ਆਹ ‘‘ਸਂਵਿਦਹਿਤ੍ਵਾ’’ਤਿ. ਕੁਕ੍ਕੁਟੋਤਿ ਤਮ੍ਬਚੂਲ਼ੋ. ਸੋ ਹਿ ਕੁਕਤਿ ਆਹਾਰਤ੍ਥਂ ਪਾਣਕਾਦਯੋ ਆਦਦਾਤੀਤਿ ਕੁਕ੍ਕੁਟੋ. ਅਯਨ੍ਤਿ ਗਾਮੋ. ਅਧਿਕਰਣੇ ਣੋਤਿ ਆਹ ‘‘ਸਮ੍ਪਦਨ੍ਤਿ ਏਤ੍ਥਾ’’ਤਿ. ਏਤ੍ਥਾਤਿ ਚ ਏਤਸ੍ਮਿਂ ਗਾਮੇ. ਉਤ੍ਤਰਪਦਸ੍ਸ ਅਧਿਕਰਣਤ੍ਥਤ੍ਤਾ ਪੁਬ੍ਬਪਦੇਨ ਛਟ੍ਠੀਸਮਾਸੋਤਿ ਆਹ ‘‘ਕੁਕ੍ਕੁਟਾਨ’’ਨ੍ਤਿਆਦਿ. ਏਵਂ ਣਸਦ੍ਦਸ੍ਸ ਅਧਿਕਰਣਤ੍ਥਂ, ਪੁਬ੍ਬਪਦੇਨ ਛਟ੍ਠੀਸਮਾਸਞ੍ਚ ਦਸ੍ਸੇਤ੍ਵਾ ਇਦਾਨਿ ਣਸਦ੍ਦਸ੍ਸ ਭਾਵਤ੍ਥਂ, ਪੁਬ੍ਬਪਦੇਨ ਬਾਹਿਰਤ੍ਥਸਮਾਸਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਅਥ ਵਾ’’ਤਿ. ਤਤ੍ਥਾਤਿ ਪਚ੍ਛਿਮਪਾਠੇ. ਉਪ੍ਪਤਿਤ੍ਵਾਤਿ ਉਡ੍ਡਿਤ੍ਵਾ ਉਦ੍ਧਂ ਆਕਾਸਂ ਲਙ੍ਗਿਤ੍ਵਾਤਿ ਅਤ੍ਥੋ. ਏਤ੍ਥਾਤਿ ਪਚ੍ਛਿਮਪਾਠੇ. ਦ੍ਵਿਧਾਤਿ ਪਦਗਮਨਪਕ੍ਖਗਮਨਵਸੇਨ ਦ੍ਵਿਪਕਾਰੇਨ. ‘‘ਉਪਚਾਰੋ ਨ ਲਬ੍ਭਤੀ’’ਤਿਇਮਿਨਾ ਗਾਮਨ੍ਤਰੋ ਨ ਹੋਤਿ, ਏਕਗਾਮੋਯੇਵ ਪਨ ਹੋਤਿ, ਤਸ੍ਮਾ ਆਪਤ੍ਤਿਪਿ ਏਕਾਯੇਵ ਹੋਤੀਤਿ ਦਸ੍ਸੇਤਿ. ਪਚ੍ਚੂਸੇਤਿ ਪਭਾਤੇ. ਸੋ ਹਿ ਪਟਿਵਿਰੁਦ੍ਧਂ ਤਿਮਿਰਂ ਉਸੇਤਿ ਨਾਸੇਤੀਤਿ ਪਚ੍ਚੂਸੋਤਿ ਵੁਚ੍ਚਤਿ. ਵਸ੍ਸਨ੍ਤਸ੍ਸਾਤਿ ਰਵਨ੍ਤਸ੍ਸ. ‘‘ਵਚਨਤੋ’’ਤਿਪਦਂ ‘‘ਆਪਤ੍ਤਿਯੇਵਾ’’ਤਿਪਦੇ ਞਾਪਕਹੇਤੁ. ਰਤਨਮਤ੍ਤਨ੍ਤਰੋਤਿ ਕੁਕ੍ਕੁਪਮਾਣੇਨ ਬ੍ਯਵਧਾਨੋ.

ਤਤ੍ਰਾਤਿ ¶ ‘‘ਗਾਮਨ੍ਤਰੇ ਗਾਮਨ੍ਤਰੇ’’ਤਿ ਵਚਨੇ. ਹੀਤਿ ਵਿਤ੍ਥਾਰੋ. ਉਭੋਪੀਤਿ ਭਿਕ੍ਖੁਭਿਕ੍ਖੁਨਿਯੋਪਿ ਸਂਵਿਦਹਨ੍ਤੀਤਿ ਸਮ੍ਬਨ੍ਧੋ. ਨ ਵਦਨ੍ਤੀਤਿ ਅਟ੍ਠਕਥਾਚਰਿਯਾ ਨ ਕਥਯਨ੍ਤਿ. ਚਤੁਨ੍ਨਂ ਮਗ੍ਗਾਨਂ ਸਮਾਗਮਟ੍ਠਾਨਂ ਚਤੁਕ੍ਕਂ, ਦ੍ਵਿਨ੍ਨਂ, ਤਿਣ੍ਣਂ, ਚਤੁਕ੍ਕਤੋ ਅਤਿਰੇਕਾਨਂ ਵਾ ਮਗ੍ਗਾਨਂ ਸਮ੍ਬਦ੍ਧਟ੍ਠਾਨਂ ਸਿਙ੍ਘਾਟਕਂ. ਤਤ੍ਰਾਪੀਤਿ ਉਪਚਾਰੋਕ੍ਕਮਨੇਪਿ. ਗਾਮਤੋਤਿ ਅਤ੍ਤਨੋ ਗਾਮਤੋ. ਯਾਵ ਨ ਓਕ੍ਕਮਨ੍ਤਿ, ਤਾਵਾਤਿ ਯੋਜਨਾ. ਸਨ੍ਧਾਯਾਤਿ ਆਰਬ੍ਭ. ਅਥਾਤਿ ਤਸ੍ਮਿਂ ਨਿਕ੍ਖਮਨਕਾਲੇ. ਦ੍ਵੇਪੀਤਿ ਭਿਕ੍ਖੁਭਿਕ੍ਖੁਨਿਯੋਪਿ ਗਚ੍ਛਨ੍ਤੀਤਿ ਸਮ੍ਬਨ੍ਧੋ. ਤਨ੍ਤਿ ਵਚਨਂ.

ਹੀਤਿ ਵਿਸੇਸੋ. ‘‘ਗਾਮਨ੍ਤਰੇ ਗਾਮਨ੍ਤਰੇ’’ਤਿ ਪੁਰਿਮਸ੍ਮਿਂ ਨਯੇ ਅਤਿਕ੍ਕਮੇ ਅਨਾਪਤ੍ਤਿ, ਓਕ੍ਕਮਨੇ ਆਪਤ੍ਤੀਤਿ ਅਯਂ ਵਿਸੇਸੋ.

੧੮੪. ਗਤਪੁਬ੍ਬਤ੍ਥਾਤਿ ਗਤਪੁਬ੍ਬਾ ਅਤ੍ਥ ਭਵਥਾਤਿ ਅਤ੍ਥੋ. ਏਹਿ ਗਚ੍ਛਾਮਾਤਿ ਵਾ ਆਗਚ੍ਛੇਯ੍ਯਾਸੀਤਿ ਵਾ ਵਦਤੀਤਿ ਯੋਜਨਾ. ਚੇਤਿਯਵਨ੍ਦਨਤ੍ਥਨ੍ਤਿ ਥੂਪਸ੍ਸ ਵਨ੍ਦਿਤੁਂ.

੧੮੫. ਵਿਸਙ੍ਕੇਤੇਨਾਤਿ ¶ ਏਤ੍ਥ ਕਾਲਵਿਸਙ੍ਕੇਤੋ, ਦ੍ਵਾਰਵਿਸਙ੍ਕੇਤੋ, ਮਗ੍ਗਵਿਸਙ੍ਕੇਤੋਤਿ ਤਿਵਿਧੋ. ਤਤ੍ਥ ਕਾਲਵਿਸਙ੍ਕੇਤੇਨੇਵ ਅਨਾਪਤ੍ਤਿਂ ਸਨ੍ਧਾਯ ‘‘ਵਿਸਙ੍ਕੇਤੇਨ ਗਚ੍ਛਨ੍ਤਿ, ਅਨਾਪਤ੍ਤੀ’’ਤਿ ਆਹ. ਦ੍ਵਾਰਵਿਸਙ੍ਕੇਤੇਨ ਵਾ ਮਗ੍ਗਵਿਸਙ੍ਕੇਤੇਨ ਵਾ ਆਪਤ੍ਤਿਮੋਕ੍ਖੋ ਨਤ੍ਥਿ. ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਪੁਰੇਭਤ੍ਤ’’ਨ੍ਤਿਆਦਿ. ਚਕ੍ਕਸਮਾਰੁਲ਼੍ਹਾਤਿ ਇਰਿਯਾਪਥਚਕ੍ਕਂ ਵਾ ਸਕਟਚਕ੍ਕਂ ਵਾ ਸਮ੍ਮਾ ਆਰੁਲ਼੍ਹਾ. ਜਨਪਦਾਤਿ ਜਨਕੋਟ੍ਠਾਸਾ. ਪਰਿਯਾਯਨ੍ਤੀਤਿ ਪਰਿ ਪੁਨਪ੍ਪੁਨਂ ਯਨ੍ਤਿ ਚ ਆਯਨ੍ਤਿ ਚਾਤਿ. ਸਤ੍ਤਮਂ.

੮. ਨਾਵਾਭਿਰੁਹਨਸਿਕ੍ਖਾਪਦਂ

੧੮੮. ਅਟ੍ਠਮੇ ਸਹ ਅਞ੍ਞਮਞ੍ਞਂ ਥਵਨਂ ਅਭਿਤ੍ਥਵਨਂ ਸਨ੍ਥਵੋ, ਸਙ੍ਗਮੋਤਿ ਵੁਤ੍ਤਂ ਹੋਤਿ. ਮਿਤ੍ਤਭਾਵੇਨ ਸਨ੍ਥਵੋ ਮਿਤ੍ਤਸਨ੍ਥਵੋ, ਲੋਕੇਹਿ ਅਸ੍ਸਾਦੇਤਬ੍ਬੋ ਚ ਸੋ ਮਿਤ੍ਤਸਨ੍ਥਵੋ ਚੇਤਿ ਲੋਕਸ੍ਸਾਦਮਿਤ੍ਤਸਨ੍ਥਵੋ, ਤਸ੍ਸ ਵਸੋ ਪਭੂ, ਤੇਨ ਵਾ ਆਯਤ੍ਤੋਤਿ ਲੋਕਸ੍ਸਾਦਮਿਤ੍ਤਸਨ੍ਥਵਵਸੋ, ਤੇਨ. ਉਦ੍ਧਂ ਗਚ੍ਛਤੀਤਿ ਉਦ੍ਧਂਗਾਮਿਨੀਤਿ ਦਸ੍ਸੇਨ੍ਤੋ ਆਹ ‘‘ਉਦ੍ਧ’’ਨ੍ਤਿਆਦਿ. ਉਦ੍ਧਨ੍ਤਿ ਚ ਇਧ ਪਟਿਸੋਤੋ. ਤੇਨਾਹ ¶ ‘‘ਨਦਿਯਾ ਪਟਿਸੋਤ’’ਨ੍ਤਿ. ‘‘ਉਦ੍ਧਂਗਾਮਿਨਿ’’ਨ੍ਤਿਮਾਤਿਕਾਪਦਂ ‘‘ਉਜ੍ਜਵਨਿਕਾਯਾ’’ਤਿਪਦਭਾਜਨਿਯਾ ਸਂਸਨ੍ਦੇਨ੍ਤੋ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਯੋਤਿ ਭਿਕ੍ਖੁ. ਉਦ੍ਧਂ ਜਵਨਤੋਤਿ ਪਟਿਸੋਤਂ ਗਮਨਤੋ. ਤੇਨਾਤਿ ਤੇਨ ਹੇਤੁਨਾ. ਅਸ੍ਸਾਤਿ ‘‘ਉਦ੍ਧਂਗਾਮਿਨਿ’’ਨ੍ਤਿਪਦਸ੍ਸ. ਅਨੁਸੋਤਂ ਇਧ ਅਧੋ ਨਾਮਾਤਿ ਆਹ ‘‘ਅਨੁਸੋਤ’’ਨ੍ਤਿ. ਅਸ੍ਸਪੀਤਿ ਪਿਸਦ੍ਦੋ ਪੁਰਿਮਾਪੇਕ੍ਖੋ. ਤਤ੍ਥਾਤਿ ‘‘ਉਦ੍ਧਂਗਾਮਿਨਿਂ ਵਾ ਅਧੋਗਾਮਿਨਿਂ ਵਾ’’ਤਿਵਚਨੇ. ਯਨ੍ਤਿ ਨਾਵਂ ਹਰਨ੍ਤੀਤਿ ਸਮ੍ਬਨ੍ਧੋ. ਸਮ੍ਪਟਿਪਾਦਨਤ੍ਥਨ੍ਤਿ ਸਮ੍ਮਾ ਪਟਿਮੁਖਂ ਪਾਦਨਤ੍ਥਂ, ਉਜੁਪਜ੍ਜਾਪਨਤ੍ਥਨ੍ਤਿ ਅਤ੍ਥੋ. ਏਤ੍ਥਾਤਿ ਨਾਵਾਯਂ. ‘‘ਠਪੇਤ੍ਵਾ’’ਤਿਪਦਭਾਜਨਿਮਪੇਕ੍ਖਿਤ੍ਵਾ ‘‘ਉਪਯੋਗਤ੍ਥੇ ਨਿਸ੍ਸਕ੍ਕਵਚਨ’’ਨ੍ਤਿ ਆਹ. ‘‘ਅਞ੍ਞਤ੍ਰਾ’’ਤਿ ਮਾਤਿਕਾਪਦੇ ਅਪੇਕ੍ਖਿਤੇ ਨਿਸ੍ਸਕ੍ਕਤ੍ਥੇ ਨਿਸ੍ਸਕ੍ਕਵਚਨਮ੍ਪਿ ਯੁਜ੍ਜਤੇਵ.

੧੮੯. ਏਕਂ ਤੀਰਂ ਅਗਾਮਕਂ ਅਰਞ੍ਞਂ ਹੋਤੀਤਿ ਯੋਜਨਾ. ਅਦ੍ਧਯੋਜਨਗਣਨਾਯ ਪਾਚਿਤ੍ਤਿਯਾਨਿ ਹੋਨ੍ਤੀਤਿ ਸਮ੍ਬਨ੍ਧੋ. ਮਜ੍ਝੇਨ ਗਮਨੇਪੀਤਿ ਪਿਸਦ੍ਦੋ ਅਗਾਮਕਅਰਞ੍ਞਤੀਰਪਸ੍ਸੇਨ ਗਮਨੇ ਕਾ ਨਾਮ ਕਥਾਤਿ ਦਸ੍ਸੇਤਿ. ਨ ਕੇਵਲਂ ਨਦਿਯਾਤਿ ਕੇਵਲਂ ਨਦਿਯਾ ਏਵ ਅਨਾਪਤ੍ਤਿ ਨਾਤਿ ਯੋਜਨਾ, ਅਞ੍ਞੇਸੁਪਿ ਸਮੁਦ੍ਦਾਦੀਸੁ ਅਨਾਪਤ੍ਤੀਤਿ ਅਧਿਪ੍ਪਾਯੋ. ਯੋਪਿ ਭਿਕ੍ਖੁ ਗਚ੍ਛਤੀਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ, ਯਸ੍ਮਾ ਵਾ.

੧੯੧. ਕਾਲਵਿਸਙ੍ਕੇਤੋ, ਤਿਤ੍ਥਵਿਸਙ੍ਕੇਤੋ, ਨਾਵਾਵਿਸਙ੍ਕੇਤੋਤਿ ਤਿਵਿਧੋ ਵਿਸਙ੍ਕੇਤੋ. ਤਤ੍ਥ ਕਾਲਵਿਸਙ੍ਕੇਤੇਨ ¶ ਅਨਾਪਤ੍ਤਿਂ ਸਨ੍ਧਾਯ ‘‘ਵਿਸਙ੍ਕੇਤੇਨ ਅਭਿਰੁਹਨ੍ਤੀ’’ਤਿ ਵੁਤ੍ਤਂ. ਅਞ੍ਞੇਨ ਵਿਸਙ੍ਕੇਤੇਨ ਆਪਤ੍ਤਿਯੇਵ, ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਇਧਾਪੀ’’ਤਿਆਦੀਤਿ. ਅਟ੍ਠਮਂ.

੯. ਪਰਿਪਾਚਿਤਸਿਕ੍ਖਾਪਦਂ

੧੯੨. ਨਵਮੇ ਮਹਾਨਾਗੇਸੂਤਿ ਮਹਾਅਰਹਨ੍ਤੇਸੁ ਤਿਟ੍ਠਮਾਨੇਸੁ ਸਨ੍ਤੇਸੁ, ਚੇਤਕੇ ਪੇਸ੍ਸਭੂਤੇ ਨਵਕੇ ਭਿਕ੍ਖੂ ਨਿਮਨ੍ਤੇਤੀਤਿ ਅਧਿਪ੍ਪਾਯੋ. ਇਤਰਥਾਤਿ ਵਿਭਤ੍ਤਿਵਿਪਲ੍ਲਾਸਤੋ ਵਾ ਪਾਠਸੇਸਤੋ ਵਾ ਅਞ੍ਞੇਨ ਪਕਾਰੇਨ. ਅਨ੍ਤਰਂ ਮਜ੍ਝਂ ਪਤ੍ਤਾ ਕਥਾ ਅਨ੍ਤਰਕਥਾਤਿ ਦਸ੍ਸੇਨ੍ਤੋ ਆਹ ‘‘ਅਵਸਾਨ’’ਨ੍ਤਿਆਦਿ. ਪਕਿਰੀਯਿਤ੍ਥਾਤਿ ਪਕਤਾ, ਨ ¶ ਪਕਤਾ ਵਿਪ੍ਪਕਤਾਤਿ ਵੁਤ੍ਤੇ ਕਰਿਯਮਾਨਕਥਾਵਾਤਿ ਆਹ ‘‘ਕਰਿਯਮਾਨਾ ਹੋਤੀ’’ਤਿ. ਅਦ੍ਧਚ੍ਛਿਕੇਨਾਤਿ ਉਪਡ੍ਢਚਕ੍ਖੁਨਾ. ਤੇਹੀਤਿ ਥੇਰੇਹਿ.

੧੯੪. ਲਦ੍ਧਬ੍ਬਨ੍ਤਿ ਲਦ੍ਧਾਰਹਂ. ਅਸ੍ਸਾਤਿ ‘‘ਭਿਕ੍ਖੁਨਿਪਰਿਪਾਚਿਤ’’ਨ੍ਤਿਪਦਸ੍ਸ. ਸਮ੍ਮਾ ਆਰਭਿਤਬ੍ਬੋਤਿ ਸਮਾਰਮ੍ਭੋਤਿ ਦਸ੍ਸੇਨ੍ਤੋ ਆਹ ‘‘ਸਮਾਰਦ੍ਧਂ ਵੁਚ੍ਚਤੀ’’ਤਿ. ਪਟਿਯਾਦਿਤਸ੍ਸਾਤਿ ਪਰਿਪਾਚਿਤਸ੍ਸ ਭਤ੍ਤਸ੍ਸ. ਗਿਹੀਨਂ ਸਮਾਰਮ੍ਭੋਤਿ ਗਿਹਿਸਮਾਰਮ੍ਭੋ, ਕਤ੍ਵਤ੍ਥੇ ਚੇਤਂ ਸਾਮਿਵਚਨਂ. ਤਤੋਤਿ ਤਤੋ ਭਤ੍ਤਤੋ. ਅਞ੍ਞਤ੍ਰਾਤਿ ਵਿਨਾ. ਤਮਤ੍ਥਂ ਵਿਵਰਨ੍ਤੋ ਆਹ ‘‘ਤਂ ਪਿਣ੍ਡਪਾਤਂ ਠਪੇਤ੍ਵਾ’’ਤਿ. ਪਦਭਾਜਨੇ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਞਾਤਕਪਵਾਰਿਤੇਹੀ’’ਤਿਪਦਂ ‘‘ਅਸਮਾਰਦ੍ਧੋ’’ਤਿਪਦੇ ਕਤ੍ਤਾ. ਅਤ੍ਥਤੋਤਿ ਭਿਕ੍ਖੁਨਿਅਪਰਿਪਾਚਿਤਅਤ੍ਥਤੋ. ਤਸ੍ਮਾਤਿ ਯਸ੍ਮਾ ਅਤ੍ਥਤੋ ਸਮਾਰਦ੍ਧੋਵ ਹੋਤਿ, ਤਸ੍ਮਾ.

੧੯੫. ਪਟਿਯਾਦਿਤਨ੍ਤਿ ਪਟਿਯਤ੍ਤਂ. ਪਕਤਿਯਾ ਪਟਿਯਤ੍ਤਂ ਪਕਤਿਪਟਿਯਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਪਕਤਿਯਾ’’ਤਿਆਦਿ. ਮਹਾਪਚ੍ਚਰਿਯਂ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਸ੍ਸਾਤਿ ਤਸ੍ਸੇਵ ਭਿਕ੍ਖੁਨੋ. ਅਞ੍ਞਸ੍ਸਾਤਿ ਤਤੋ ਅਞ੍ਞਸ੍ਸ ਭਿਕ੍ਖੁਨੋ.

੧੯੭. ਭਿਕ੍ਖੁਨਿਪਰਿਪਾਚਿਤੇਪੀਤਿ ਪਿਸਦ੍ਦੋ ਭਿਕ੍ਖੁਨਿਅਪਰਿਪਾਚਿਤੇ ਕਾ ਨਾਮ ਕਥਾਤਿ ਦਸ੍ਸੇਤੀਤਿ. ਨਵਮਂ.

੧੦. ਰਹੋਨਿਸਜ੍ਜਸਿਕ੍ਖਾਪਦਂ

੧੯੮. ਦਸਮੇ ਪਾਲ਼ਿਅਤ੍ਥੋ ਚਾਤਿ ਏਤ੍ਥ ਪਾਲ਼ਿਸਦ੍ਦੋ ਵਿਨਿਚ੍ਛਿਯਸਦ੍ਦੇ ਚ ਯੋਜੇਤਬ੍ਬੋ ‘‘ਪਾਲ਼ਿਵਿਨਿਚ੍ਛਯੋ’’ਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ‘‘ਇਦਂ ਸਿਕ੍ਖਾਪਦ’’ਨ੍ਤਿਪਦਂ ‘‘ਏਕਪਰਿਚ੍ਛੇਦ’’ਨ੍ਤਿਪਦੇ ¶ ਤੁਲ੍ਯਤ੍ਥਕਤ੍ਤਾ, ‘‘ਪਞ੍ਞਤ੍ਤ’’ਨ੍ਤਿਪਦੇ ਕਮ੍ਮਂ. ਉਪਰੀਤਿ ਅਚੇਲਕਵਗ੍ਗੇਤਿ. ਦਸਮਂ.

ਓਵਾਦਵਗ੍ਗੋ ਤਤਿਯੋ.

੪. ਭੋਜਨਵਗ੍ਗੋ

੧. ਆਵਸਥਪਿਣ੍ਡਸਿਕ੍ਖਾਪਦ-ਅਤ੍ਥਯੋਜਨਾ

੨੦੩. ਭੋਜਨਵਗ੍ਗਸ੍ਸ ¶ ਪਠਮੇ ਆਵਸਥੇ ਪਞ੍ਞਤ੍ਤੋ ਪਿਣ੍ਡੋ ਆਵਸਥਪਿਣ੍ਡੋਤਿ ਦਸ੍ਸੇਨ੍ਤੋ ਆਹ ‘‘ਸਮਨ੍ਤਾ’’ਤਿਆਦਿ. ਪਰਿਕ੍ਖਿਤ੍ਤਨ੍ਤਿ ਪਰਿਵੁਤਂ ਆਵਸਥਨ੍ਤਿ ਸਮ੍ਬਨ੍ਧੋ. ਅਦ੍ਧਂ ਪਥਂ ਗਚ੍ਛਨ੍ਤੀਤਿ ਅਦ੍ਧਿਕਾ. ਗਿਲਾਯਨ੍ਤਿ ਰੁਜਨ੍ਤੀਤਿ ਗਿਲਾਨਾ. ਗਬ੍ਭੋ ਕੁਚ੍ਛਿਟ੍ਠਸਤ੍ਤੋ ਏਤਾਸਨ੍ਤਿ ਗਬ੍ਭਿਨਿਯੋ. ਮਲਂ ਪਬ੍ਬਾਜੇਨ੍ਤੀਤਿ ਪਬ੍ਬਜਿਤਾ, ਤੇਸਂ ਯਥਾਨੁਰੂਪਨ੍ਤਿ ਸਮ੍ਬਨ੍ਧੋ. ਪਞ੍ਞਤ੍ਤਾਨਿ ਮਞ੍ਚਪੀਠਾਨਿ ਏਤ੍ਥਾਤਿ ਪਞ੍ਞਤ੍ਤਮਞ੍ਚਪੀਠੋ, ਤਂ. ਅਨੇਕਗਬ੍ਭਪਰਿਚ੍ਛੇਦਂ ਅਨੇਕਪਮੁਖਪਰਿਚ੍ਛੇਦਂ ਆਵਸਥਂ ਕਤ੍ਵਾਤਿ ਯੋਜਨਾ. ਤਤ੍ਥਾਤਿ ਆਵਸਥੇ. ਤੇਸਂ ਤੇਸਨ੍ਤਿ ਅਦ੍ਧਿਕਾਦੀਨਂ. ਹਿਯ੍ਯੋਸਦ੍ਦਸ੍ਸ ਅਤੀਤਾਨਨ੍ਤਰਾਹਸ੍ਸ ਚ ਅਨਾਗਤਾਨਨ੍ਤਰਾਹਸ੍ਸ ਚ ਵਾਚਕਤ੍ਤਾ ਇਧ ਅਨਾਗਤਾਨਨ੍ਤਰਾਹਵਾਚਕੋਤਿ ਆਹ ‘‘ਸ੍ਵੇਪੀ’’ਤਿ. ਕੁਹਿਂ ਗਤਾ ਇਤਿ ਵੁਤ੍ਤੇਤਿ ਯੋਜਨਾ. ‘‘ਕੁਕ੍ਕੁਚ੍ਚਾਯਨ੍ਤੋ’’ਤਿਪਦਸ੍ਸ ਨਾਮਧਾਤੁਂ ਦਸ੍ਸੇਨ੍ਤੋ ਆਹ ‘‘ਕੁਕ੍ਕੁਚ੍ਚਂ ਕਰੋਨ੍ਤੋ’’ਤਿ.

੨੦੬. ‘‘ਅਦ੍ਧਯੋਜਨਂ ਵਾ ਯੋਜਨਂ ਵਾ’’ਤਿਇਮਿਨਾ ‘‘ਪਕ੍ਕਮਿਤੁ’’ਨ੍ਤਿਪਦਸ੍ਸ ਕਮ੍ਮਂ ਦਸ੍ਸੇਤਿ. ‘‘ਗਨ੍ਤੁ’’ਨ੍ਤਿਇਮਿਨਾ ਕਮੁਸਦ੍ਦਸ੍ਸ ਪਦਵਿਕ੍ਖੇਪਤ੍ਥਂ ਦਸ੍ਸੇਤਿ. ‘‘ਅਨੋਦਿਸ੍ਸਾ’’ਤਿਪਦਸ੍ਸ ਤ੍ਵਾਪਚ੍ਚਯਨ੍ਤਭਾਵਂ ਦਸ੍ਸੇਤੁਂ ‘‘ਅਨੁਦ੍ਦਿਸਿਤ੍ਵਾ’’ਤਿ ਵੁਤ੍ਤਂ. ਪਾਸਂ ਡੇਤੀਤਿ ਪਾਸਣ੍ਡੋ, ਸਤ੍ਤਾਨਂ ਚਿਤ੍ਤੇਸੁ ਦਿਟ੍ਠਿਪਾਸਂ ਖਿਪਤੀਤਿ ਅਤ੍ਥੋ. ਅਥ ਵਾ ਤਣ੍ਹਾਪਾਸਂ, ਦਿਟ੍ਠਿਪਾਸਞ੍ਚ ਡੇਤਿ ਉਡ੍ਡੇਤੀਤਿ ਪਾਸਣ੍ਡੋ, ਤਂ ਪਾਸਣ੍ਡਂ. ਯਾਵਤਤ੍ਥੋ ਪਞ੍ਞਤ੍ਤੋ ਹੋਤੀਤਿ ਯਾਵਤਾ ਅਤ੍ਥੋ ਹੋਤਿ, ਤਾਵਤਾ ਪਞ੍ਞਤ੍ਤੋ ਹੋਤੀਤਿ ਯੋਜਨਾ. ‘‘ਯਾਵਦਤ੍ਥੋ’’ਤਿਪਿ ਪਾਠੋ, ਅਯਮੇਵਤ੍ਥੋ. ਦਕਾਰੋ ਪਦਸਨ੍ਧਿਕਰੋ. ਸਕਿਂ ਭੁਞ੍ਜਿਤਬ੍ਬਨ੍ਤਿ ਏਕਦਿਵਸਂ ਸਕਿਂ ਭੁਞ੍ਜਿਤਬ੍ਬਨ੍ਤਿ ਅਤ੍ਥੋ. ਤੇਨਾਹ ‘‘ਏਕਦਿਵਸਂ ਭੁਞ੍ਜਿਤਬ੍ਬ’’ਨ੍ਤਿ.

ਏਤ੍ਥਾਤਿ ¶ ਇਮਸ੍ਮਿਂ ਸਿਕ੍ਖਾਪਦੇ. ਏਕਕੁਲੇਨ ਵਾ ਪਞ੍ਞਤ੍ਤਨ੍ਤਿ ਸਮ੍ਬਨ੍ਧੋ. ਭੁਞ੍ਜਿਤੁਂ ਨ ਵਟ੍ਟਤਿ ਏਕਤੋ ਹੁਤ੍ਵਾ ਪਞ੍ਞਤ੍ਤਤ੍ਤਾਤਿ ਅਧਿਪ੍ਪਾਯੋ. ਨਾਨਾਕੁਲੇਹਿ ਪਞ੍ਞਤ੍ਤਂ ਪਿਣ੍ਡਨ੍ਤਿ ਯੋਜਨਾ. ਭੁਞ੍ਜਿਤੁਂ ਵਟ੍ਟਤਿ ਨਾਨਾਕੁਲਾਨਿ ਏਕਤੋ ਅਹੁਤ੍ਵਾ ਵਿਸੁਂ ਵਿਸੁਂ ਪਞ੍ਞਤ੍ਤਤ੍ਤਾਤਿ ਅਧਿਪ੍ਪਾਯੋ. ਯੋਪਿ ਪਿਣ੍ਡੋ ¶ ਛਿਜ੍ਜਤੀਤਿ ਸਮ੍ਬਨ੍ਧੋ. ਉਪਚ੍ਛਿਨ੍ਦਿਤ੍ਵਾਤਿ ਅਸਦ੍ਧਿਯਾਦਿਪਾਪਚਿਤ੍ਤਤ੍ਤਾ ਉਪਚ੍ਛਿਨ੍ਦਿਤ੍ਵਾ.

੨੦੮. ਅਨੁਵਸਿਤ੍ਵਾਤਿ ਪੁਨਪ੍ਪੁਨਂ ਵਸਿਤ੍ਵਾ. ਅਨ੍ਤਰਾਮਗ੍ਗੇ ਗਚ੍ਛਨ੍ਤਤ੍ਤਾ ‘‘ਗਚ੍ਛਨ੍ਤੋ ਭੁਞ੍ਜਤੀ’’ਤਿ ਇਦਂ ਤਾਵ ਯੁਤ੍ਤਂ ਹੋਤੁ, ਗਤਟ੍ਠਾਨੇ ਪਨ ਗਮਿਤਤ੍ਤਾ ਕਥਂ? ਪਚ੍ਚੁਪ੍ਪਨ੍ਨਸਮੀਪੋਪਿ ਅਤੀਤੋ ਤੇਨ ਸਙ੍ਗਹਿਤਤ੍ਤਾ ਯੁਤ੍ਤਂ. ‘‘ਕੁਤੋ ਨੁ ਤ੍ਵਂ ਭਿਕ੍ਖੁ ਆਗਚ੍ਛਸੀ’’ਤਿਆਦੀਸੁ (ਸਂ. ਨਿ. ੧.੧੩੦) ਵਿਯ. ਤਂਸਮੀਪੋਪਿ ਹਿ ਤਾਦਿਸੋ. ਨਾਨਾਟ੍ਠਾਨੇਸੁ ਨਾਨਾਕੁਲਾਨਂ ਸਨ੍ਤਕੇ ਪਕਤਿਯਾ ਅਨਾਪਤ੍ਤਿਭਾਵਤੋ ਨਾਨਾਟ੍ਠਾਨੇਸੁ ਏਕਕੁਲਸ੍ਸੇਵ ਸਨ੍ਤਕਂ ਸਨ੍ਧਾਯ ਵੁਤ੍ਤਂ ‘‘ਅਨਾਪਤ੍ਤੀ’’ਤਿ. ਆਰਦ੍ਧਸ੍ਸ ਵਿਚ੍ਛੇਦਤ੍ਤਾ ‘‘ਪੁਨ ਏਕਦਿਵਸਂ ਭੁਞ੍ਜਿਤੁਂ ਲਭਤੀ’’ਤਿ ਵੁਤ੍ਤਂ. ‘‘ਓਦਿਸ੍ਸਾ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ਭਿਕ੍ਖੂਯੇਵ ਗਹੇਤਬ੍ਬਾਤਿ ਆਹ ‘‘ਭਿਕ੍ਖੂਨਂਯੇਵਾ’’ਤਿ. ਪਠਮਂ.

੨. ਗਣਭੋਜਨਸਿਕ੍ਖਾਪਦਂ

੨੦੯. ਦੁਤਿਯੇ ਪਹੀਨਲਾਭਸਕ੍ਕਾਰਸ੍ਸ ਹੇਤੁਂ ਦਸ੍ਸੇਨ੍ਤੋ ਆਹ ‘‘ਸੋ ਕਿਰਾ’’ਤਿਆਦਿ. ਸੋਤਿ ਦੇਵਦਤ੍ਤੋ. ‘‘ਅਹੋਸੀ’’ਤਿ ਚ ‘‘ਪਾਕਟੋ ਜਾਤੋ’’ਤਿ ਚ ਯੋਜੇਤਬ੍ਬੋ. ਅਜਾਤਸਤ੍ਤੁਨਾਤਿ ਅਜਾਤਸ੍ਸੇਯੇਵ ਪਿਤੁਰਾਜਸ੍ਸ ਸਤ੍ਤੁਭਾਵਤੋ ਅਜਾਤਸਤ੍ਤੁਨਾ, ‘‘ਮਾਰਾਪੇਤ੍ਵਾ’’ਤਿਪਦੇ ਕਾਰਿਤਕਮ੍ਮਂ. ਰਾਜਾਨਨ੍ਤਿ ਬਿਮ੍ਬਿਸਾਰਰਾਜਂ, ‘‘ਮਾਰਾਪੇਤ੍ਵਾ’’ਤਿਪਦੇ ਧਾਤੁਕਮ੍ਮਂ. ਅਭਿਮਾਰੇਤਿ ਅਭਿਨਿਲੀਯਿਤ੍ਵਾ ਭਗਵਤੋ ਮਾਰਣਤ੍ਥਾਯ ਪੇਸਿਤੇ ਧਨੁਧਰੇ. ਗੂਲ਼੍ਹਪਟਿਚ੍ਛਨ੍ਨੋਤਿ ਗੁਹਿਤੋ ਹੁਤ੍ਵਾ ਪਟਿਚ੍ਛਨ੍ਨੋ. ਪਰਿਕਥਾਯਾਤਿ ਪਰਿਗੁਹਨਾਯ ਕਥਾਯ. ‘‘ਰਾਜਾਨਮ੍ਪੀ’’ਤਿਪਦਂ ‘‘ਮਾਰਾਪੇਸੀ’’ਤਿਪਦੇ ਧਾਤੁਕਮ੍ਮਂ. ਪਵਿਜ੍ਝੀਤਿ ਪਵਟ੍ਟੇਸਿ. ਤਤੋਤਿ ਤਤੋ ਵੁਤ੍ਤਤੋ ਪਰਂ ਉਟ੍ਠਹਿਂਸੂਤਿ ਸਮ੍ਬਨ੍ਧੋ. ਨਗਰੇ ਨਿਵਸਨ੍ਤੀਤਿ ਨਾਗਰਾ. ਰਾਜਾਤਿ ਅਜਾਤਸਤ੍ਤੁਰਾਜਾ. ਸਾਸਨਕਣ੍ਟਕਨ੍ਤਿਸਾਸਨਸ੍ਸ ਕਣ੍ਟਕਸਦਿਸਤ੍ਤਾ ਸਾਸਨਕਣ੍ਟਕਂ. ਤਤੋਤਿ ਨੀਹਰਤੋ. ਉਪਟ੍ਠਾਨਮ੍ਪੀਤਿ ਉਪਟ੍ਠਾਨਮ੍ਪਿ, ਉਪਟ੍ਠਾਨਤ੍ਥਾਯਪਿ ਵਾ. ਅਞ੍ਞੇਪੀਤਿ ਰਾਜਤੋ ਅਞ੍ਞੇਪਿ. ਅਸ੍ਸਾਤਿ ਦੇਵਦਤ੍ਤਸ੍ਸ. ਕਿਞ੍ਚਿ ਖਾਦਨੀਯਭੋਜਨੀਯਂ ‘‘ਦਾਤਬ੍ਬ’’ਨ੍ਤਿ ਇਮਿਨਾ ਯੋਜੇਤਬ੍ਬਂ. ਕਿਞ੍ਚਿ ਵਾ ਅਭਿਵਾਦਨਾਦਿ ‘‘ਕਾਤਬ੍ਬ’’ਨ੍ਤਿ ਇਮਿਨਾ ਸਮ੍ਬਨ੍ਧੋ. ਕੁਲੇਸੁ ¶ ਵਿਞ੍ਞਾਪੇਤ੍ਵਾ ਭੁਞ੍ਜਨਸ੍ਸ ਹੇਤੁਂ ਦਸ੍ਸੇਨ੍ਤੋ ਆਹ ‘‘ਮਾ ਮੇ’’ਤਿਆਦਿ. ਪੋਸੇਨ੍ਤੋ ਹੁਤ੍ਵਾ ਭੁਞ੍ਜਤੀਤਿ ਸਮ੍ਬਨ੍ਧੋ.

੨੧੧. ਭਤ੍ਤਂ ਅਨਧਿਵਾਸੇਨ੍ਤਾਨਂ ਕਸ੍ਮਾ ਚੀਵਰਂ ਪਰਿਤ੍ਤਂ ਉਪ੍ਪਜ੍ਜਤੀਤਿ ਆਹ ‘‘ਭਤ੍ਤਂ ਅਗਣ੍ਹਨ੍ਤਾਨ’’ਨ੍ਤਿਆਦਿ.

੨੧੨. ਚੀਵਰਕਾਰਕੇ ¶ ਭਿਕ੍ਖੂ ਭਤ੍ਤੇਨ ਕਸ੍ਮਾ ਨਿਮਨ੍ਤੇਨ੍ਤੀਤਿ ਆਹ ‘‘ਗਾਮੇ’’ਤਿਆਦਿ.

੨੧੫. ਨਾਨਾਵੇਰਜ੍ਜਕੇਤਿ ਏਤ੍ਥ ਰਞ੍ਞੋ ਇਦਂ ਰਜ੍ਜਂ, ਵਿਸਦਿਸਂ ਰਜ੍ਜਂ ਵਿਰਜ੍ਜਂ, ਨਾਨਪ੍ਪਕਾਰਂ ਵਿਰਜ੍ਜਂ ਨਾਨਾਵਿਰਜ੍ਜਂ. ਨਾਨਾਵਿਰਜ੍ਜੇਹਿ ਆਗਤਾ ਨਾਨਾਵੇਰਜ੍ਜਕਾ. ਮਜ੍ਝੇ ਵੁਦ੍ਧਿ ਹੋਤੀਤਿ ਆਹ ‘‘ਨਾਨਾਵਿਧੇਹਿ ਅਞ੍ਞਰਜ੍ਜੇਹਿ ਆਗਤੇ’’ਤਿ. ਅਞ੍ਞਰਜ੍ਜੇਹੀਤਿ ਰਾਜਗਹਤੋ ਅਞ੍ਞੇਹਿ ਰਜ੍ਜੇਹਿ. ਰਞ੍ਜਿਤਬ੍ਬਨ੍ਤਿ ਰਞ੍ਜਨ੍ਤਿ ਵੁਤ੍ਤੇ ਨਿਗ੍ਗਹਿਤਸ੍ਸ ਅਨਾਸਨਂ ਸਨ੍ਧਾਯ ਵੁਤ੍ਤਂ ‘‘ਨਾਨਾਵੇਰਞ੍ਜਕੇਇਤਿਪਿ ਪਾਠੋ’’ਤਿ.

੨੧੮. ਗਣਭੋਜਨੇਤਿ ਗਣਸ੍ਸ ਭੋਜਨਂ ਗਣਭੋਜਨਂ, ਗਣਭੋਜਨਸ੍ਸ ਭੋਜਨਂ ਗਣਭੋਜਨਂ, ਤਸ੍ਮਿਂ ਗਣਭੋਜਨੇ ਪਾਚਿਤ੍ਤਿਯਨ੍ਤਿ ਅਤ੍ਥੋ. ‘‘ਰਤ੍ਤੂਪਰਤੋ’’ਤਿਆਦੀਸੁ (ਦੀ. ਨਿ. ੧.੧੦; ਮ. ਨਿ. ੧.੨੯੩) ਵਿਯ ਏਕਸ੍ਸ ਭੋਜਨਸਦ੍ਦਸ੍ਸ ਲੋਪੋ ਦਟ੍ਠਬ੍ਬੋ. ਨਨੁ ਉਪੋਸਥੇ ਵਿਯ ਦ੍ਵੇ ਤਯੋ ਗਣੋ ਨਾਮਾਤਿ ਆਹ ‘‘ਇਧ ਗਣੋ ਨਾਮ ਚਤ੍ਤਾਰੋ’’ਤਿਆਦਿ. ਤੇਨ ਦ੍ਵੇ ਤਯੋ ਗਣੋ ਨਾਮ ਨ ਹੋਨ੍ਤਿ, ਚਤ੍ਤਾਰੋ ਪਨ ਆਦਿਂ ਕਤ੍ਵਾ ਤਦੁਤ੍ਤਰਿ ਗਣੋ ਨਾਮਾਤਿ ਦਸ੍ਸੇਤਿ. ਤਂ ਪਨੇਤਨ੍ਤਿ ਏਤ੍ਥ ਏਤਸਦ੍ਦੋ ਵਚਨਾਲਙ੍ਕਾਰੋ ਦ੍ਵੀਸੁ ਸਬ੍ਬਨਾਮੇਸੁ ਪੁਬ੍ਬਸ੍ਸੇਵ ਯੇਭੁਯ੍ਯੇਨ ਪਧਾਨਤ੍ਤਾ. ਪਸਵਤੀਤਿ ਵਡ੍ਢਤਿ, ਜਾਯਤੀਤਿ ਅਤ੍ਥੋ. ਵੇਵਚਨੇਨ ਵਾਤਿ ‘‘ਭਤ੍ਤੇਨ ਨਿਮਨ੍ਤੇਮਿ, ਭੋਜਨੇਨ ਨਿਮਨ੍ਤੇਮੀ’’ਤਿ ਪਰਿਯਾਯੇਨ ਵਾ. ਭਾਸਨ੍ਤਰੇਨ ਵਾਤਿ ਮੂਲਭਾਸਾਤੋ ਅਞ੍ਞਾਯ ਭਾਸਾਯ ਵਾ. ਏਕਤੋ ਨਿਮਨ੍ਤਿਤਾ ਭਿਕ੍ਖੂਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪਮਾਣਨ੍ਤਿ ਕਾਰਣਂ. ‘‘ਚਤ੍ਤਾਰੋ’’ਤਿ ਲਿਙ੍ਗਵਿਪਲ੍ਲਾਸਂ ਕਤ੍ਵਾ ‘‘ਵਿਹਾਰੇ’’ਤਿਪਦੇਨ ਯੋਜੇਤਬ੍ਬਂ. ਠਿਤੇਸੁਯੇਵਾਤਿ ਪਦਂ ਨਿਦ੍ਧਾਰਣਸਮੁਦਾਯੋ. ਏਕੋ ਨਿਮਨ੍ਤਿਤੋਤਿ ਸਮ੍ਬਨ੍ਧੋ.

ਚਤ੍ਤਾਰੋ ¶ ਭਿਕ੍ਖੂ ਵਿਞ੍ਞਾਪੇਯ੍ਯੁਨ੍ਤਿ ਸਮ੍ਬਨ੍ਧੋ. ਪਾਟੇਕ੍ਕਨ੍ਤਿ ਪਤਿਏਕਸ੍ਸ ਭਾਵੋ ਪਾਟੇਕ੍ਕਂ, ਵਿਸੁਨ੍ਤਿ ਅਤ੍ਥੋ. ਏਕਤੋ ਵਾ ਨਾਨਾਤੋ ਵਾ ਵਿਞ੍ਞਾਪੇਯ੍ਯੁਨ੍ਤਿ ਸਮ੍ਬਨ੍ਧੋ.

ਛਵਿਸਙ੍ਖਾਤਤੋ ਬਾਹਿਰਚਮ੍ਮਤੋ ਅਬ੍ਭਨ੍ਤਰਚਮ੍ਮਸ੍ਸ ਥੂਲਤ੍ਤਾ ‘‘ਮਹਾਚਮ੍ਮਸ੍ਸਾ’’ਤਿ ਵੁਤ੍ਤਂ. ਫਾਲਂ ਏਤੇਸਂ ਪਾਦਾਨਂ ਸਞ੍ਜਾਤਨ੍ਤਿ ਫਾਲਿਤਾ, ਉਪ੍ਪਾਦੇਨ੍ਤੀਤਿ ਸਮ੍ਬਨ੍ਧੋ. ਪਹਟਮਤ੍ਤੇ ਸਤੀਤਿ ਯੋਜਨਾ. ਲੇਸੇਨ ਕਪ੍ਪਨ੍ਤਿ ਪਵਤ੍ਤਂ ਚਿਤ੍ਤਂ ਲੇਸਕਪ੍ਪਿਯਂ.

ਸੁਤ੍ਤਞ੍ਚਾਤਿ ਸੂਚਿਪਾਸਪਵੇਸਨਸੁਤ੍ਤਞ੍ਚ. ਨਨੁ ਵਿਸੁਂ ਚੀਵਰਦਾਨਸਮਯੋ ਵਿਯ ਚੀਵਰਕਾਰਸਮਯੋਪਿ ਅਤ੍ਥਿ, ਕਸ੍ਮਾ ‘‘ਯਦਾ ਤਦਾ’’ਤਿ ਵੁਤ੍ਤਨ੍ਤਿ ਆਹ ‘‘ਵਿਸੁਂ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਵਿਸੁਂ ਚੀਵਰਦਾਨਸਮਯੋ ਵਿਯ ਚੀਵਰਕਾਰਸਮਯੋ ਨਾਮ ਯਸ੍ਮਾ ਨਤ੍ਥਿ, ਤਸ੍ਮਾ ¶ ‘‘ਯਦਾ ਤਦਾ’’ਤਿ ਮਯਾ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਤਸ੍ਮਾ ਯੋ ਭਿਕ੍ਖੁ ਕਰੋਤਿ, ਤੇਨ ਭੁਞ੍ਜਿਤਬ੍ਬਨ੍ਤਿ ਯੋਜਨਾ. ਸੂਚਿਵੇਠਨਕੋਤਿ ਸਿਬ੍ਬਨਤ੍ਥਾਯ ਦ੍ਵੇ ਪਿਲੋਤਿਕਖਣ੍ਡੇ ਸਮ੍ਬਨ੍ਧਿਤ੍ਵਾ ਸੂਚਿਯਾ ਵਿਜ੍ਝਨਕੋ. ਵਿਚਾਰੇਤੀਤਿ ਪਞ੍ਚਖਣ੍ਡਸਤ੍ਤਖਣ੍ਡਾਦਿਵਸੇਨ ਸਂਵਿਦਹਤਿ. ਛਿਨ੍ਦਤੀਤਿ ਸਤ੍ਥਕੇਨ ਵਾ ਹਤ੍ਥੇਨ ਵਾ ਛਿਨ੍ਦਤਿ. ਮੋਘਸੁਤ੍ਤਨ੍ਤਿ ਮੁਯ੍ਹਨਂ ਮੋਘੋ, ਅਤ੍ਥਤੋ ਗਹੇਤਬ੍ਬਛਟ੍ਟੇਤਬ੍ਬਟ੍ਠਾਨੇ ਮੁਯ੍ਹਨਚਿਤ੍ਤਂ, ਤਸ੍ਸ ਛਿਨ੍ਦਨਂ ਸੁਤ੍ਤਨ੍ਤਿ ਮੋਘਸੁਤ੍ਤਂ. ਆਗਨ੍ਤੁਕਪਟ੍ਟਨ੍ਤਿ ਦੁਪਟ੍ਟਚੀਵਰੇ ਮੂਲਪਟ੍ਟਸ੍ਸ ਉਪਰਿ ਠਪਿਤਪਟ੍ਟਂ. ਪਚ੍ਚਾਗਤਨ੍ਤਿ ਪਟ੍ਟਚੀਵਰਾਦੀਸੁ ਲਬ੍ਭਤਿ. ਬਨ੍ਧਤੀਤਿ ਮੂਲਪਟ੍ਟੇਨ ਆਗਨ੍ਤੁਕਪਟ੍ਟਂ. ਬਨ੍ਧਤਿ. ਅਨੁਵਾਤਨ੍ਤਿ ਚੀਵਰਂ ਅਨੁਪਰਿਯਾਯਿਤ੍ਵਾ ਵੀਯਤਿ ਬਨ੍ਧੀਯਤੀਤਿ ਅਨੁਵਾਤਂ, ਤਂ ਛਿਨ੍ਦਤਿ. ਘਟ੍ਟੇਤੀਤਿ ਦ੍ਵੇ ਅਨੁਵਾਤਨ੍ਤੇ ਅਞ੍ਞਮਞ੍ਞਂ ਸਮ੍ਬਜ੍ਝਤਿ. ਆਰੋਪੇਤੀਤਿ ਚੀਵਰਸ੍ਸ ਉਪਰਿ ਆਰੋਪੇਤਿ. ਤਤ੍ਥਾਤਿ ਚੀਵਰੇ. ਸੁਤ੍ਤਂ ਕਰੋਤੀਤਿ ਸੂਚਿਪਾਸਪਵੇਸਨਸੁਤ੍ਤਂ ਵਟ੍ਟੇਤਿ. ਵਲੇਤੀਤਿ ਵਟ੍ਟਿਤ੍ਵਾ ਸੁਤ੍ਤਵੇਠਨਦਣ੍ਡਕੇ ਆਵਟ੍ਟੇਤਿ. ਪਿਪ੍ਫਲਿਕਨ੍ਤਿ ਸਤ੍ਥਕਂ. ਤਞ੍ਹਿ ਪਿਯਮ੍ਪਿ ਫਾਲੇਤੀਤਿ ਪਿਪ੍ਫਲਿ, ਸਾਯੇਵ ਪਿਪ੍ਫਲਿਕਨ੍ਤਿ ਕਤ੍ਵਾ ਪਿਪ੍ਫਲਿਕਨ੍ਤਿ ਵੁਚ੍ਚਤਿ, ਤਂ ਨਿਸੇਤਿ ਨਿਸਾਨਂ ਕਰੋਤੀਤਿ ਅਤ੍ਥੋ. ਯੋ ਪਨ ਕਥੇਤਿ, ਏਤਂ ਠਪੇਤ੍ਵਾਤਿ ਯੋਜਨਾ.

ਅਦ੍ਧਾਨਮਗ੍ਗਸ੍ਸ ਦ੍ਵਿਗਾਵੁਤਤ੍ਤਾ ‘‘ਅਦ੍ਧਯੋਜਨਬ੍ਭਨ੍ਤਰੇ ਗਾਵੁਤੇ’’ਤਿ ਵੁਤ੍ਤਂ. ਅਭਿਰੂਲ਼੍ਹੇਨ ਭੁਞ੍ਜਿਤਬ੍ਬਨ੍ਤਿ ਸਮ੍ਬਨ੍ਧੋ. ਯਤ੍ਥਾਤਿ ਯਸ੍ਮਿਂ ਕਾਲੇ. ‘‘ਸਨ੍ਨਿਪਤਨ੍ਤੀ’’ਤਿ ਬਹੁਕਤ੍ਤੁਵਸੇਨ ਵੁਤ੍ਤਂ. ਅਕੁਸਲਂ ਪਰਿਵਜ੍ਜੇਤੀਤਿ ਪਰਿਬ੍ਬਾਜਕੋ ¶ , ਪਬ੍ਬਜ੍ਜਵੇਸਂ ਵਾ ਪਰਿਗ੍ਗਹੇਤ੍ਵਾ ਵਜਤਿ ਗਚ੍ਛਤਿ ਪਵਤ੍ਤਤੀਤਿ ਪਰਿਬ੍ਬਾਜਕੋ. ਵਿਨਾ ਭਾਵਪਚ੍ਚਯੇਨ ਭਾਵਤ੍ਥਸ੍ਸ ਞਾਤਬ੍ਬਤੋ ਪਰਿਬ੍ਬਾਜਕਭਾਵੋ ਪਰਿਬ੍ਬਾਜਕੋ, ਤਂ ਸਮਾਪਨ੍ਨੋਤਿ ਪਰਿਬ੍ਬਾਜਕਸਮਾਪਨ੍ਨੋ. ਅਥ ਵਾ ਪਰਿਬ੍ਬਾਜਕੇਸੁ ਸਮਾਪਨ੍ਨੋ ਪਰਿਯਾਪਨ੍ਨੋਤਿ ਪਰਿਬ੍ਬਾਜਕਸਮਾਪਨ੍ਨੋ. ‘‘ਏਤੇਸ’’ਨ੍ਤਿਪਦਂ ‘‘ਯੇਨ ਕੇਨਚੀ’’ਤਿਪਦੇ ਨਿਦ੍ਧਾਰਣਸਮੁਦਾਯੋ.

੨੨੦. ਯੇਪਿ ਭਿਕ੍ਖੂ ਭੁਞ੍ਜਨ੍ਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਦ੍ਵੇ ਤਯੋ ਏਕਤੋ’’ਤਿਵਚਨੇ. ਅਨਿਮਨ੍ਤਿਤੋ ਚਤੁਤ੍ਥੋ ਯਸ੍ਸ ਚਤੁਕ੍ਕਸ੍ਸਾਤਿ ਅਨਿਮਨ੍ਤਿਤਚਤੁਤ੍ਥਂ, ਅਨਿਮਨ੍ਤਿਤੇਨ ਵਾ ਚਤੁਤ੍ਥਂ ਅਨਿਮਨ੍ਤਿਤਚਤੁਤ੍ਥਂ. ਏਸੇਵ ਨਯੋ ਅਞ੍ਞੇਸੁਪਿ ਚਤੁਤ੍ਥੇਸੁ. ਇਧਾਤਿ ਇਮਸ੍ਮਿਂ ਸਾਸਨੇ. ਨਿਮਨ੍ਤੇਤੀਤਿ ਅਕਪ੍ਪਿਯਨਿਮਨ੍ਤਨੇਨ ਨਿਮਨ੍ਤੇਤਿ. ਤੇਸੂਤਿ ਚਤੂਸੁ ਭਿਕ੍ਖੂਸੁ. ਸੋਤਿ ਉਪਾਸਕੋ. ਅਞ੍ਞਨ੍ਤਿ ਨਾਗਤਭਿਕ੍ਖੁਤੋ ਅਞ੍ਞਂ, ਨਿਮਨ੍ਤਿਤਭਿਕ੍ਖੁਤੋ ਵਾ. ਤਙ੍ਖਣਪ੍ਪਤ੍ਤਨ੍ਤਿ ਤਸ੍ਮਿਂ ਪੁਚ੍ਛਨਕਥਨਕ੍ਖਣੇ ਪਤ੍ਤਂ. ਹੀਤਿ ਵਿਤ੍ਥਾਰੋ. ਤਤ੍ਥਾਤਿ ਤਸ੍ਮਿਂ ਠਾਨੇ, ਗੇਹੇ ਵਾ. ਤੇਹੀਤਿ ਕਰਣਭੂਤੇਹਿ ਭਿਕ੍ਖੂਹਿ.

ਸੋਤਿ ਪਿਣ੍ਡਪਾਤਿਕੋ. ਅਨਾਗਚ੍ਛਨ੍ਤਮ੍ਪੀਤਿ ਸਯਂ ਨ ਆਗਚ੍ਛਨ੍ਤਮ੍ਪਿ. ਲਚ੍ਛਥਾਤਿ ਲਭਿਸ੍ਸਥ.

ਸੋਪੀਤਿ ਸਾਮਣੇਰੋਪਿ, ਨ ਪਿਣ੍ਡਪਾਤਿਕੋਯੇਵਾਤਿ ਅਤ੍ਥੋ.

ਤਤ੍ਥਾਤਿ ¶ ਗਿਲਾਨਚਤੁਤ੍ਥੇ, ਤੇਸੁ ਚਤੂਸੁ ਵਾ. ਗਿਲਾਨੋ ਇਤਰੇਸਂ ਪਨ ਗਣਪੂਰਕੋ ਹੋਤੀਤਿ ਯੋਜਨਾ.

ਗਣਪੂਰਕਤ੍ਤਾਤਿ ਸਮਯਲਦ੍ਧਸ੍ਸ ਗਣਪੂਰਕਤ੍ਤਾ. ਚਤੁਕ੍ਕਾਨੀਤਿ ਚੀਵਰਦਾਨਚਤੁਤ੍ਥਂ ਚੀਵਰਕਾਰਚਤੁਤ੍ਥਂ ਅਦ੍ਧਾਨਗਮਨਚਤੁਤ੍ਥਂ ਨਾਵਾਭਿਰੁਹਨਚਤੁਤ੍ਥਂ ਮਹਾਸਮਯਚਤੁਤ੍ਥਂ, ਸਮਣਭਤ੍ਤਚਤੁਤ੍ਥਨ੍ਤਿ ਛ ਚਤੁਕ੍ਕਾਨਿ. ਪੁਰਿਮੇਹਿ ਮਿਸ੍ਸੇਤ੍ਵਾ ਏਕਾਦਸ ਚਤੁਕ੍ਕਾਨਿ ਵੇਦਿਤਬ੍ਬਾਨਿ. ਏਕੋ ਪਣ੍ਡਿਤੋ ਭਿਕ੍ਖੁ ਨਿਸਿਨ੍ਨੋ ਹੋਤੀਤਿ ਸਮ੍ਬਨ੍ਧੋ. ਤੇਸੂਤਿ ਤੀਸੁ ਭਿਕ੍ਖੂਸੁ, ਗਤੇਸੁ ਗਚ੍ਛਤੀਤਿ ਯੋਜਨਾ. ਭੁਤ੍ਵਾ ਆਗਨ੍ਤ੍ਵਾ ਠਿਤੇਸੁਪਿ ਅਨਾਪਤ੍ਤਿਯੇਵ. ਕਸ੍ਮਾ ਸਬ੍ਬੇਸਂ ਅਨਾਪਤ੍ਤਿ, ਨਨੁ ਚਤ੍ਤਾਰੋ ਭਿਕ੍ਖੂ ਏਕਤੋ ਗਣ੍ਹਨ੍ਤੀਤਿ ਆਹ ‘‘ਪਞ੍ਚਨ੍ਨਂ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਭੋਜਨਾਨਂਯੇਵਾਤਿ ਨ ਯਾਗੁਖਜ੍ਜਕਫਲਾਫਲਾਦੀਨਂ. ਤਾਨਿ ਚਾਤਿ ਯੇਹਿ ਭੋਜਨੇਹਿ ਵਿਸਙ੍ਕੇਤਂ ਨਤ੍ਥਿ, ਤਾਨਿ ਚ ਭੋਜਨਾਨਿ. ਤੇਹੀਤਿ ਚਤੂਹਿ ਭਿਕ੍ਖੂਹਿ ¶ . ਤਾਨੀਤਿ ਯਾਗੁਆਦੀਨਿ. ਇਤੀਤਿ ਤਸ੍ਮਾ ਅਨਾਪਤ੍ਤਿਨ੍ਤਿ ਯੋਜਨਾ.

ਕੋਚਿ ਪੇਸਿਤੋ ਅਪਣ੍ਡਿਤਮਨੁਸ੍ਸੋ ਵਦਤੀਤਿ ਯੋਜਨਾ. ਕਤ੍ਤੁਕਾਮੇਨ ਪੇਸਿਤੋਤਿ ਸਮ੍ਬਨ੍ਧੋ. ਭਤ੍ਤਂ ਗਣ੍ਹਥਾਤਿ ਵਾਤਿ ਵਾਸਦ੍ਦੋ ‘‘ਓਦਨਂ ਗਣ੍ਹਥ, ਭੋਜਨਂ ਗਣ੍ਹਥ, ਅਨ੍ਨਂ ਗਣ੍ਹਥ, ਕੁਰਂ ਗਣ੍ਹਥਾ’’ਤਿ ਵਚਨਾਨਿਪਿ ਸਙ੍ਗਣ੍ਹਾਤਿ. ਨਿਮਨ੍ਤਨਂ ਸਾਦਿਯਨ੍ਤੀਤਿ ਨੇਮਨ੍ਤਨਿਕਾ. ਪਿਣ੍ਡਪਾਤੇ ਧੁਤਙ੍ਗੇ ਨਿਯੁਤ੍ਤਾਤਿ ਪਿਣ੍ਡਪਾਤਿਕਾ. ਪੁਨਦਿਵਸੇ ਭਨ੍ਤੇਤਿ ਵੁਤ੍ਤੇਤਿ ਯੋਜਨਾ. ਹਰਿਤ੍ਵਾਤਿ ਅਪਨੇਤ੍ਵਾ. ਤਤੋਤਿ ਤਤੋ ਵਦਨਤੋ ਪਰਨ੍ਤਿ ਸਮ੍ਬਨ੍ਧੋ. ਵਿਕ੍ਖੇਪਨ੍ਤਿ ਵਿਵਿਧਂ ਖੇਪਂ. ਤੇਤਿ ਅਸੁਕਾ ਚ ਅਸੁਕਾ ਚ ਗਾਮਿਕਾ. ਭਨ੍ਤੇਤਿ ਵੁਤ੍ਤੇਤਿ ਯੋਜਨਾ. ਸੋਪੀਤਿ ਅਪਣ੍ਡਿਤਮਨੁਸ੍ਸੋਪਿ, ਨ ਗਾਮਿਕਾਯੇਵਾਤਿ ਅਤ੍ਥੋ. ਕਸ੍ਮਾ ਨ ਲਭਾਮਿ ਭਨ੍ਤੇਤਿ ਵੁਤ੍ਤੇਤਿ ਯੋਜਨਾ. ਏਵਂ ‘‘ਕਥਂ ਨਿਮਨ੍ਤੇਸੁਂ ਭਨ੍ਤੇ’’ਤਿ ਏਤ੍ਥਾਪਿ. ਤਤੋਤਿ ਤਸ੍ਮਾ ਕਾਰਣਾ. ਏਸਾਤਿ ਏਸੋ ਗਾਮੋ. ਤਨ੍ਤਿ ਭੂਮਤ੍ਥੇ ਚੇਤਂ ਉਪਯੋਗਵਚਨਂ, ਤਸ੍ਮਿਂ ਗਾਮੇ ਚਰਥਾਤਿ ਹਿ ਅਤ੍ਥੋ. ਕਿਂ ਏਤੇਨਾਤਿ ਏਤੇਨ ਪੁਚ੍ਛਨੇਨ ਕਿਂ ਪਯੋਜਨਂ. ਏਤ੍ਥਾਤਿ ਪੁਚ੍ਛਨੇ. ਮਾ ਪਮਜ੍ਜਿਤ੍ਥਾਤਿ ਵਦਤੀਤਿ ਸਮ੍ਬਨ੍ਧੋ. ਦੁਤਿਯਦਿਵਸੇਤਿ ਨਿਮਨ੍ਤਨਦਿਵਸਤੋ ਦੁਤਿਯਦਿਵਸੇ. ਧੁਰਗਾਮੇਤਿ ਪਧਾਨਗਾਮੇ, ਅਨ੍ਤਿਕਗਾਮੇ ਵਾ. ਭਾਵੋ ਨਾਮ ਕਿਰਿਯਤ੍ਤਾ ਏਕੋਯੇਵ ਹੋਤਿ, ਤਸ੍ਮਾ ਕਤ੍ਤਾਰਂ ਵਾ ਕਮ੍ਮਂ ਵਾ ਸਮ੍ਬਨ੍ਧਂ ਵਾ ਅਪੇਕ੍ਖਿਤ੍ਵਾ ਬਹੁਵਚਨੇਨ ਨ ਭਵਿਤਬ੍ਬਂ, ਤੇਨ ਵੁਤ੍ਤਂ ‘‘ਨ ਦੁਬ੍ਬਚੇਹਿ ਭਵਿਤਬ੍ਬ’’ਨ੍ਤਿ. ਤੇਸੂਤਿ ਗਾਮਿਕੇਸੁ ਭੋਜੇਨ੍ਤੇਸੂਤਿ ਸਮ੍ਬਨ੍ਧੋ. ਅਸਨਸਾਲਾਯਨ੍ਤਿ ਭੋਜਨਸਾਲਾਯਂ. ਸਾ ਹਿ ਅਸਤਿ ਭੁਞ੍ਜਤਿ ਏਤ੍ਥਾਤਿ ਅਸਨਾ, ਸਲਨ੍ਤਿ ਪਵਿਸਨ੍ਤਿ ਅਸ੍ਸਨ੍ਤਿ ਸਾਲਾ, ਅਸਨਾ ਚ ਸਾ ਸਾਲਾਚੇਤਿ ਅਸਨਸਾਲਾਤਿ ਅਤ੍ਥੇਨ ‘‘ਅਸਨਸਾਲਾ’’ਤਿ ਵੁਚ੍ਚਤਿ.

ਅਥ ਪਨਾਤਿ ਤਤੋ ਅਞ੍ਞਥਾ ਪਨ. ਅਪਾਦਾਨਤ੍ਥੋ ਹਿ ਅਥਸਦ੍ਦੋ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ¶ ਠਾਨੇ ਅਨ੍ਤਰਵੀਥਿਆਦੀਸੂਤਿ ਅਤ੍ਥੋ. ਪਟਿਕਚ੍ਚੇਵਾਤਿ ਪਠਮਂ ਕਤ੍ਵਾ ਏਵ. ਭਿਕ੍ਖੂਸੁ ਗਾਮਤੋ ਅਨਿਕ੍ਖਨ੍ਤੇਸੁ ਪਗੇਵਾਤਿ ਵੁਤ੍ਤਂ ਹੋਤਿ. ਨ ਵਟ੍ਟਤੀਤਿ ‘‘ਭਤ੍ਤਂ ਗਣ੍ਹਥਾ’’ਤਿ ਪਹਿਣਤ੍ਤਾ ਨ ਵਟ੍ਟਤਿ. ਯੇ ਪਨ ਮਨੁਸ੍ਸਾ ਭੋਜੇਨ੍ਤੀਤਿ ਸਮ੍ਬਨ੍ਧੋ. ਨਿਵਤ੍ਤਥਾਤਿ ਵੁਤ੍ਤਪਦੇਤਿ ‘‘ਨਿਵਤ੍ਤਥਾ’’ਤਿ ਵੁਤ੍ਤੇ ਕਿਰਿਯਾਪਦੇ. ਯਸ੍ਸ ਕਸ੍ਸਚਿ ¶ ਹੋਤੀਤਿ ਯਸ੍ਸ ਕਸ੍ਸਚਿ ਅਤ੍ਥਾਯ ਹੋਤੀਤਿ ਯੋਜਨਾ. ਨਿਵਤ੍ਤਿਤੁਂ ਵਟ੍ਟਤੀਤਿ ‘‘ਭਤ੍ਤਂ ਗਣ੍ਹਥਾ’’ਤਿ ਅਵੁਤ੍ਤਤ੍ਤਾ ਨਿਵਤ੍ਤਿਤੁਂ ਵਟ੍ਟਤਿ. ਸਮ੍ਬਨ੍ਧਂ ਕਤ੍ਵਾਤਿ ‘‘ਨਿਵਤ੍ਤਥ ਭਨ੍ਤੇ’’ਤਿ ਭਨ੍ਤੇਸਦ੍ਦੇਨ ਅਬ੍ਯਵਹਿਤਂ ਕਤ੍ਵਾ. ਨਿਸੀਦਥ ਭਨ੍ਤੇ, ਭਤ੍ਤਂ ਗਣ੍ਹਥਾਤਿ ਭਨ੍ਤੇਸਦ੍ਦੇਨ ਬ੍ਯਵਹਿਤਂ ਕਤ੍ਵਾ ਵੁਤ੍ਤੇ ‘‘ਨਿਸੀਦਥਾ’’ਤਿਪਦੇ ਨਿਸੀਦਿਤੁਂ ਵਟ੍ਟਤਿ. ਅਥ ਭਨ੍ਤੇਸਦ੍ਦੇਨ ਬ੍ਯਵਹਿਤਂ ਅਕਤ੍ਵਾ ‘‘ਨਿਸੀਦਥ, ਭਤ੍ਤਂ ਗਣ੍ਹਥਾ’’ਤਿ ਸਮ੍ਬਨ੍ਧਂ ਕਤ੍ਵਾ ਵੁਤ੍ਤੇ ਨਿਸੀਦਿਤੁਂ ਵਟ੍ਟਤਿ. ਇਚ੍ਚੇਤਂ ਨਯਂ ਅਤਿਦਿਸਤਿ ‘‘ਏਸੇਵ ਨਯੋ’’ਤਿਇਮਿਨਾਤਿ. ਦੁਤਿਯਂ.

੩. ਪਰਮ੍ਪਰਭੋਜਨਸਿਕ੍ਖਾਪਦਂ

੨੨੧. ਤਤਿਯੇ ‘‘ਨ ਖੋ…ਪੇ… ਕਰੋਨ੍ਤੀ’’ਤਿਪਾਠਸ੍ਸ ਅਤ੍ਥਸਮ੍ਬਨ੍ਧਂ ਦਸ੍ਸੇਨ੍ਤੋ ਆਹ ‘‘ਯੇਨ ਨਿਯਾਮੇਨਾ’’ਤਿਆਦਿ. ਤਤ੍ਥ ‘‘ਯੇਨ ਨਿਯਾਮੇਨਾ’’ਤਿਇਮਿਨਾ ‘‘ਯਥਯਿਮੇ ਮਨੁਸ੍ਸਾ’’ਤਿ ਏਤ੍ਥ ਯਥਾਸਦ੍ਦਸ੍ਸ ਯਂਸਦ੍ਦਤ੍ਥਭਾਵਂ ਦਸ੍ਸੇਤਿ. ਤੇਨਾਤਿ ਤੇਨ ਨਿਯਾਮੇਨ. ਇਮਿਨਾ ਯਥਾਸਦ੍ਦਸ੍ਸ ਨਿਯਮਨਿਦ੍ਦਿਟ੍ਠਭਾਵਂ ਦਸ੍ਸੇਤਿ. ‘‘ਞਾਯਤੀ’’ਤਿਇਮਿਨਾ ਕਿਰਿਯਾਪਾਠਸੇਸਂ ਦਸ੍ਸੇਤਿ. ‘‘ਸਾਸਨਂ ਵਾ ਦਾਨਂ ਵਾ’’ਤਿਪਦੇਹਿ ਇਦਂਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ. ਬੁਦ੍ਧਪ੍ਪਮੁਖੇ ਸਙ੍ਘੇਤਿ ਸਮ੍ਪਦਾਨਤ੍ਥੇ ਚੇਤਾਨਿ ਭੁਮ੍ਮਵਚਨਾਨਿ, ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਦਾਨਂ ਵਾਤਿ ਅਤ੍ਥੋ. ‘‘ਪਰਿਤ੍ਤ’’ਨ੍ਤਿਇਮਿਨਾ ਓਰਕਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ. ‘‘ਲਾਮਕ’’ਨ੍ਤਿਇਮਿਨਾ ਪਰਿਤ੍ਤਸਦ੍ਦਸ੍ਸ ਪਰਿਵਾਰਤ੍ਥਂ ਨਿਵਤ੍ਤੇਤਿ. ਕਿਰੋ ਏਵ ਪਤਿਭਾਵੇ ਨਿਯੁਤ੍ਤੋ ਕਿਰਪਤਿਕੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਕਿਰਪਤਿਕੋਤਿ ਏਤ੍ਥਾ’’ਤਿ ਆਦਿ. ਸੋਤਿ ਕਿਰਪਤਿਕੋ. ਕਮ੍ਮਂ ਕਾਰੇਤੀਤਿ ਸਮ੍ਬਨ੍ਧੋ. ਉਪਚਾਰਵਸੇਨਾਤਿ ਵੋਹਾਰਵਸੇਨ, ਉਪਲਕ੍ਖਣਵਸੇਨ, ਪਧਾਨਵਸੇਨ ਵਾਤਿ ਅਤ੍ਥੋ. ਨ ਕੇਵਲਂ ਬਦਰਾਯੇਵ, ਅਞ੍ਞੇਪਿ ਪਨ ਬਹੂ ਖਾਦਨੀਯਭੋਜਨੀਯਾ ਪਟਿਯਤ੍ਤਾਤਿ ਅਧਿਪ੍ਪਾਯੋ. ਬਦਰੇਨ ਮਿਸ੍ਸੋ ਬਦਰਮਿਸ੍ਸੋ, ਬਦਰਸਾਲ਼ਵੋਤਿ ਆਹ ‘‘ਬਦਰਸਾਲ਼ਵੇਨਾ’’ਤਿ. ਬਦਰਚੁਣ੍ਣੇਨ ਮਿਸ੍ਸੋ ਮਧੁਸਕ੍ਖਰਾਦਿ ‘‘ਬਦਰਸਾਲ਼ਵੋ’’ਤਿ ਵੁਚ੍ਚਤਿ.

੨੨੨. ਉਦ੍ਧਂ ¶ ਸੂਰੋ ਉਗ੍ਗਤੋ ਅਸ੍ਮਿਂ ਕਾਲੇਤਿ ਉਸ੍ਸੂਰੋਤਿ ਵੁਤ੍ਤੇ ਅਤਿਦਿਵਾਕਾਲੋਤਿ ਆਹ ‘‘ਅਤਿਦਿਵਾ’’ਤਿ.

੨੨੬. ਅਯਂ ਭਤ੍ਤਵਿਕਪ੍ਪਨਾ ਨਾਮ ਵਟ੍ਟਤੀਤਿ ਯੋਜਨਾ. ਪਞ੍ਚਸੁ ਸਹਧਮ੍ਮਿਕੇਸੂਤਿ ਨਿਦ੍ਧਾਰਣਸਮੁਦਾਯੋ, ਇਤ੍ਥਨ੍ਨਾਮਸ੍ਸਾਤਿ ਸਮ੍ਬਨ੍ਧੋ. ਯਦਿ ਪਨ ਸਮ੍ਮੁਖਾਪਿ ਵਿਕਪ੍ਪਿਤੁਂ ਵਟ੍ਟਤਿ, ਤਦਾ ਅਤ੍ਤਨਾ ¶ ਸਹ ਠਿਤਸ੍ਸ ਭਗਵਤੋ ਕਸ੍ਮਾ ਨ ਵਿਕਪ੍ਪੇਤੀਤਿ ਆਹ ‘‘ਸਾ ਚਾਯ’’ਨ੍ਤਿਆਦਿ. ਸਾ ਅਯਂ ਵਿਕਪ੍ਪਨਾ ਸਙ੍ਗਹਿਤਾਤਿ ਸਮ੍ਬਨ੍ਧੋ. ਕਸ੍ਮਾ ਭਗਵਤੋ ਵਿਕਪ੍ਪੇਤੁਂ ਨ ਵਟ੍ਟਤੀਤਿ ਆਹ ‘‘ਭਗਵਤਿ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਸਙ੍ਘੇਨ ਕਤਨ੍ਤਿ ਸਮ੍ਬਨ੍ਧੋ.

੨੨੯. ‘‘ਦ੍ਵੇ ਤਯੋ ਨਿਮਨ੍ਤਨੇ’’ਤਿਪਦਾਨਿ ਲਿਙ੍ਗਵਿਪਲ੍ਲਾਸਾਨੀਤਿ ਆਹ ‘‘ਦ੍ਵੇ ਤੀਣਿ ਨਿਮਨ੍ਤਨਾਨੀ’’ਤਿ. ਨਿਮਨ੍ਤਿਤਬ੍ਬੋ ਏਤੇਹੀਤਿ ਨਿਮਨ੍ਤਨਾਨਿ ਭੋਜਨਾਨਿ ਭੁਞ੍ਜਤੀਤਿ ਸਮ੍ਬਨ੍ਧੋ. ਦ੍ਵੇ ਤੀਣਿ ਕੁਲਾਨਿ ਆਕਿਰਨ੍ਤੀਤਿ ਯੋਜਨਾ. ਸੂਪਬ੍ਯਞ੍ਜਨਨ੍ਤਿ ਸੂਪੋ ਚ ਬ੍ਯਞ੍ਜਨਞ੍ਚ ਸੂਪਬ੍ਯਞ੍ਜਨਂ. ਅਨਾਪਤ੍ਤਿ ਏਕਤੋ ਮਿਸ੍ਸਿਤਤ੍ਤਾਤਿ ਅਧਿਪ੍ਪਾਯੋ. ਮੂਲਨਿਮਨ੍ਤਨਨ੍ਤਿ ਪਠਮਨਿਮਨ੍ਤਨਂ ਭੋਜਨਂ. ਅਨ੍ਤੋਤਿ ਹੇਟ੍ਠਾ. ਏਕਮ੍ਪਿ ਕਬਲ਼ਨ੍ਤਿ ਏਕਮ੍ਪਿ ਆਲੋਪਂ. ਯਥਾ ਤਥਾ ਵਾਤਿ ਯੇਨ ਵਾ ਤੇਨ ਵਾ ਆਕਾਰੇਨ. ਤਤ੍ਥਾਤਿ ਤਸ੍ਮਿਂ ਭੋਜਨੇ. ਰਸਂ ਵਾਤਿ ਖੀਰਤੋ ਅਞ੍ਞਂ ਰਸਂ ਵਾ. ਯੇਨ ਖੀਰਰਸੇਨ ਅਜ੍ਝੋਤ੍ਥਤਂ ਭਤ੍ਤਂ ਏਕਰਸਂ ਹੋਤਿ, ਤਂ ਖੀਰਂ ਵਾ ਤਂ ਰਸਂ ਵਾ ਆਕਿਰਨ੍ਤੀਤਿ ਯੋਜਨਾ. ਯਂਸਦ੍ਦੋ ਹਿ ਉਤ੍ਤਰਵਾਕ੍ਯੇ ਠਿਤੋ ਪੁਬ੍ਬਵਾਕ੍ਯੇ ਤਂਸਦ੍ਦਂ ਅਵਗਮਯਤਿ. ਖੀਰੇਨ ਸਂਸਟ੍ਠਂ ਭਤ੍ਤਂ ਖੀਰਭਤ੍ਤਂ. ਏਵਂ ਰਸਭਤ੍ਤਂ. ਅਞ੍ਞੇਪੀਤਿ ਖੀਰਭਤ੍ਤਰਸਭਤ੍ਤਦਾਯਕਤੋ ਅਞ੍ਞੇਪਿ. ਅਨਾਪਤ੍ਤਿ ਭਤ੍ਤੇਨ ਅਮਿਸ੍ਸਿਤਤ੍ਤਾਤਿ ਅਧਿਪ੍ਪਾਯੋ. ‘‘ਭੁਞ੍ਜਨ੍ਤੇਨਾ’’ਤਿਪਦਂ ‘‘ਭੁਞ੍ਜਿਤੁ’’ਨ੍ਤਿਪਦੇ ਭਾਵਕਤ੍ਤਾ. ਸਪ੍ਪਿਪਾਯਾਸੇਪੀਤਿ ਸਪ੍ਪਿਨਾ ਚ ਪਾਯਾਸੇਨ ਚ ਕਤੇ ਭਤ੍ਤੇਪਿ.

ਤਸ੍ਸਾਤਿ ਮਹਾਉਪਾਸਕਸ੍ਸ. ਆਪਤ੍ਤੀਤਿ ਚ ਵਟ੍ਟਤੀਤਿ ਚ ਦ੍ਵਿਨ੍ਨਂ ਅਟ੍ਠਕਥਾਵਾਦਾਨਂ ਯੁਤ੍ਤਭਾਵਂ ਮਹਾਪਚ੍ਚਰਿਵਾਦੇਨ ਦਸ੍ਸੇਤੁਂ ਵੁਤ੍ਤਂ ‘‘ਮਹਾਪਚ੍ਚਰਿਯ’’ਨ੍ਤਿਆਦਿ. ਦ੍ਵੇ ਅਟ੍ਠਕਥਾਵਾਦਾ ਹਿ ਸਨ੍ਧਾਯਭਾਸਿਤਮਤ੍ਤਮੇਵ ਵਿਸੇਸਾ, ਅਤ੍ਥਤੋ ਪਨ ਏਕਾ. ਮਹਾਪਚ੍ਚਰਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਏਕੋਵਾਤਿ ਕੁਮ੍ਭਿਯਾ ਏਕੋਵ. ਪਰਮ੍ਪਰਭੋਜਨਨ੍ਤਿ ਪਰਸ੍ਸ ਪਰਸ੍ਸ ਭੋਜਨਂ ¶ . ਨਿਮਨ੍ਤਿਤਮ੍ਹਾਤਿ ਅਹਂ ਨਿਮਨ੍ਤਿਤੋ ਅਮ੍ਹਿ ਨਨੂਤਿ ਅਤ੍ਥੋ. ਆਪੁਚ੍ਛਿਤ੍ਵਾਪੀਤਿ ਮਹਾਉਪਾਸਕਂ ਆਪੁਚ੍ਛਿਤ੍ਵਾਪਿ.

ਸੋਤਿ ਅਨੁਮੋਦਕੋ ਭਿਕ੍ਖੁ. ਤਨ੍ਤਿ ਭਿਕ੍ਖੁਂ. ਅਞ੍ਞੋਤਿ ਅਞ੍ਞਤਰੋ. ਕਿਨ੍ਤਿ ਕਸ੍ਮਾ. ਨਿਮਨ੍ਤਿਤਤ੍ਤਾਤਿ ਨਿਮਨ੍ਤਿਤਭਾਵਤੋ.

ਸਕਲੇਨ ਗਾਮੇਨ ਨਿਮਨ੍ਤਿਤੋਪਿ ਏਕਤੋ ਹੁਤ੍ਵਾਵ ਨਿਮਨ੍ਤਿਤਸ੍ਸ ਕਪ੍ਪਤਿ, ਨ ਵਿਸੁਂ ਵਿਸੁਨ੍ਤਿ ਆਹ ‘‘ਏਕਤੋ ਹੁਤ੍ਵਾ’’ਤਿ. ਪੂਗੇਪੀਤਿ ਸਮਾਦਪੇਤ੍ਵਾ ਪੁਞ੍ਞਂ ਕਰੋਨ੍ਤਾਨਂ ਸਮੂਹੇਪਿ. ‘‘ਨਿਮਨ੍ਤਿਯਮਾਨੋ’’ਤਿਪਦਸ੍ਸ ਨਿਮਨ੍ਤਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਭਤ੍ਤਂ ਗਣ੍ਹਾ’’ਤਿ. ਯਦਗ੍ਗੇਨਾਤਿ ਯਂ ਅਗ੍ਗੇਨ ਯੇਨ ਕੋਟ੍ਠਾਸੇਨਾਤਿ ਅਤ੍ਥੋ. ਦ੍ਵੀਸੁ ਥੇਰਵਾਦੇਸੁ ਮਹਾਸੁਮਤ੍ਥੇਰਵਾਦੋਵ ਯੁਤ੍ਤੋਤਿ ਸੋ ਪਚ੍ਛਾ ਵੁਤ੍ਤੋਤਿ. ਤਤਿਯਂ.

੪. ਕਾਣਮਾਤਾਸਿਕ੍ਖਾਪਦਂ

੨੩੦. ਚਤੁਤ੍ਥੇ ¶ ‘‘ਨਕੁਲਮਾਤਾਤਿ’’ਆਦੀਸੁ (ਅ. ਨਿ. ੧.੨੬੬; ਅ. ਨਿ. ਅਟ੍ਠ. ੧.੧.੨੬੬) ਨਕੁਲਸ੍ਸ ਭਗਵਤੋ ਮਾਤਾ ਨਕੁਲਮਾਤਾਤਿ ਚ ਨਕੁਲਞ੍ਚ ਭਗਵਤੋ ਤਂ ਮਾਤਾ ਚਾਤਿ ਨਕੁਲਮਾਤਾਤਿ ਚ ਅਤ੍ਥੋ ਸਮ੍ਭਵਤਿ, ‘‘ਉਤ੍ਤਰਮਾਤਾਤਿ’’ਆਦੀਸੁ ਉਤ੍ਤਰਾਯ ਮਾਤਾ ਉਤ੍ਤਰਮਾਤਾਤਿ ਅਤ੍ਥੋਯੇਵ ਸਮ੍ਭਵਤਿ. ਤੇਸੁ ‘‘ਉਤ੍ਤਰਮਾਤਾ’’ਤਿਪਦਸ੍ਸੇਵ ‘‘ਕਾਣਮਾਤਾ’’ਤਿਪਦਸ੍ਸ ਕਾਣਾਯ ਮਾਤਾ ਕਾਣਮਾਤਾਤਿ ਅਤ੍ਥੋਯੇਵ ਸਮ੍ਭਵਤੀਤਿ ਆਹ ‘‘ਕਾਣਾਯ ਮਾਤਾ’’ਤਿ. ਤਸ੍ਸਾ ਧੀਤੁਯਾ ‘‘ਕਾਣਾ’’ਤਿਨਾਮੇਨ ਵਿਸ੍ਸੁਤਭਾਵਂ ਦਸ੍ਸੇਨ੍ਤੋ ਆਹ ‘‘ਸਾ ਕਿਰਾ’’ਤਿਆਦਿ. ਸਾਤਿ ਦਾਰਿਕਾ ਵਿਸ੍ਸੁਤਾ ਅਹੋਸੀਤਿ ਸਮ੍ਬਨ੍ਧੋ. ਅਸ੍ਸਾਤਿ ਮਹਾਉਪਾਸਿਕਾਯ. ਯੇ ਯੇਤਿ ਪੁਰਿਸਾ. ‘‘ਰਾਗੇਨ ਕਾਣਾ ਹੋਨ੍ਤੀ’’ਤਿਇਮਿਨਾ ਕਣਨ੍ਤਿ ਨਿਮਿਲਨ੍ਤਿ ਰਾਗੇਨ ਪੁਰਿਸਾ ਏਤਾਯਾਤਿ ਕਾਣਾਤਿ ਅਤ੍ਥਂ ਦਸ੍ਸੇਤਿ. ਤਸ੍ਸਾਤਿ ਕਾਣਾਯ. ਆਗਤਨ੍ਤਿ ਏਤ੍ਥ ਭਾਵਤ੍ਥੇ ਤੋਤਿ ਆਹ ‘‘ਆਗਮਨ’’ਨ੍ਤਿ. ਅਧਿਪ੍ਪਾਯੋਤਿ ‘‘ਕਿਸ੍ਮਿਂ ਵਿਯਾ’’ਤਿਪਦਸ੍ਸ, ਕਾਣਮਾਤਾਯ ਵਾ ਅਧਿਪ੍ਪਾਯੋ ¶ . ਰਿਤ੍ਤਾਤਿ ਤੁਚ੍ਛਾ, ਸੁਞ੍ਞਾਤਿ ਅਤ੍ਥੋ. ‘‘ਅਸ੍ਮਿਂ ਗਮਨੇ’’ਤਿਇਮਿਨਾ ਬਾਹਿਰਤ੍ਥਸਮਾਸਂ ਦਸ੍ਸੇਤਿ. ‘‘ਅਰਿਯਸਾਵਿਕਾ’’ਤਿਆਦਿਨਾ ਅਰਿਯਾਨਂ ਭਿਕ੍ਖੂਹਿ ਅਪਟਿਵਿਭਤ੍ਤਭੋਗਂ ਦਸ੍ਸੇਤਿ. ਨ ਕੇਵਲਂ ਕਿਞ੍ਚਿ ਪਰਿਕ੍ਖਯਂ ਅਗਮਾਸਿ, ਅਥ ਖੋ ਸਬ੍ਬਨ੍ਤਿ ਆਹ ‘‘ਸਬ੍ਬਂ ਪਰਿਕ੍ਖਯਂ ਅਗਮਾਸੀ’’ਤਿ. ਕਾਣਾਪੀਤਿ ਪਿਸਦ੍ਦੋ ਨ ਕੇਵਲਂ ਮਾਤਾਯੇਵ ਮਗ੍ਗਫਲਭਾਗਿਨੀ ਅਹੋਸਿ, ਅਥ ਖੋ ਕਾਣਾਪਿ ਸੋਤਾਪਨ੍ਨਾ ਅਹੋਸੀਤਿ ਦਸ੍ਸੇਤਿ. ਸੋਪਿ ਪੁਰਿਸੋਤਿ ਕਾਣਾਯ ਪਤਿਭੂਤੋ ਸੋਪਿ ਪੁਰਿਸੋ. ਪਕਤਿਟ੍ਠਾਨੇਯੇਵਾਤਿ ਜੇਟ੍ਠਕਪਜਾਪਤਿਟ੍ਠਾਨੇਯੇਵ.

੨੩੧. ਇਮਸ੍ਮਿਂ ਪਨ ਵਤ੍ਥੁਸ੍ਮਿਨ੍ਤਿ ਇਮਸ੍ਮਿਂ ਪੂਵਵਤ੍ਥੁਸ੍ਮਿਂ. ਏਤਨ੍ਤਿ ਪਾਥੇਯ੍ਯਵਤ੍ਥੁਂ. ਅਰਿਯਸਾਵਕਤ੍ਤਾਤਿ ਅਰਿਯਭੂਤਸ੍ਸ ਸਾਵਕਸ੍ਸ ਭਾਵਤੋ, ਅਰਿਯਸ੍ਸ ਵਾ ਸਮ੍ਮਾਸਮ੍ਬੁਦ੍ਧਸ੍ਸ ਸਾਵਕਭਾਵਤੋ.

੨੩੩. ਪਹੇਣਕਪਣ੍ਣਾਕਾਰਸਦ੍ਦਾਨਂ ਅਞ੍ਞਮਞ੍ਞਵੇਵਚਨਤ੍ਤਾ ਵੁਤ੍ਤਂ ‘‘ਪਹੇਣਕਤ੍ਥਾਯਾਤਿ ਪਣ੍ਣਾਕਾਰਤ੍ਥਾਯਾ’’ਤਿ. ਇਧਾਤਿ ‘‘ਪੂਵੇਹਿ ਵਾ’’ਤਿਪਦੇ, ਸਿਕ੍ਖਾਪਦੇ ਵਾ. ਬਦ੍ਧਸਤ੍ਤੂਤਿ ਮਧੁਸਕ੍ਖਰਾਦੀਹਿ ਮਿਸ੍ਸੇਤ੍ਵਾ ਬਦ੍ਧਸਤ੍ਤੁ. ਥੂਪੀਕਤਨ੍ਤਿ ਥੂਪੀਕਤਂ ਕਤ੍ਵਾ.

‘‘ਦ੍ਵਤ੍ਤਿਪਤ੍ਤਪੂਰੇ’’ਤਿਪਦਸ੍ਸ ਵਿਸੇਸਨੁਤ੍ਤਰਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਪੂਰੇ ਪਤ੍ਤੇ’’ਤਿ. ਦ੍ਵੇ ਵਾ ਤਯੋ ਵਾ ਪਤ੍ਤਾਤਿ ਦ੍ਵਤ੍ਤਿਪਤ੍ਤਾ, ਵਾਸਦ੍ਦਤ੍ਥੇ ਸਙ੍ਖ੍ਯੋਭਯਬਾਹਿਰਤ੍ਥਸਮਾਸੋ, ਤਿਸਦ੍ਦਪਰਤ੍ਤਾ ਦ੍ਵਿਸ੍ਸ ਚ ਅਕਾਰੋ ਹੋਤਿ, ਦ੍ਵਤ੍ਤਿਪਤ੍ਤਾ ਚ ਤੇ ਪੂਰਾ ਚਾਤਿ ਦ੍ਵਤ੍ਤਿਪਤ੍ਤਪੂਰਾ, ਤੇ ਦ੍ਵਤ੍ਤਿਪਤ੍ਤਪੂਰੇ ਗਹੇਤ੍ਵਾਤਿ ਯੋਜਨਾ. ‘‘ਆਚਿਕ੍ਖਿਤਬ੍ਬ’’ਨ੍ਤਿ ਵੁਤ੍ਤਵਚਨਸ੍ਸ ਆਚਿਕ੍ਖਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਅਤ੍ਰ ਮਯਾ’’ਤਿਆਦਿ. ਤੇਨਾਪੀਤਿ ¶ ਦੁਤਿਯੇਨਾਪਿ. ਪਠਮਭਿਕ੍ਖੁ ਏਕਂ ਗਹੇਤ੍ਵਾ ਦੁਤਿਯਭਿਕ੍ਖੁਸ੍ਸ ਆਰੋਚਨਞ੍ਚ ਦੁਤਿਯਭਿਕ੍ਖੁ ਏਕਂ ਗਹੇਤ੍ਵਾ ਤਤਿਯਭਿਕ੍ਖੁਸ੍ਸ ਆਰੋਚਨਞ੍ਚ ਅਤਿਦਿਸਨ੍ਤੋ ਆਹ ‘‘ਯੇਨਾ’’ਤਿਆਦਿ. ਤਤ੍ਥ ਯੇਨਾਤਿ ਪਠਮਭਿਕ੍ਖੁਨਾ. ਪਟਿਕ੍ਕਮਨ੍ਤਿ ਭੁਞ੍ਜੀਤ੍ਵਾ ਏਤ੍ਥਾਤਿ ਪਟਿਕ੍ਕਮਨਨ੍ਤਿ ਵੁਤ੍ਤੇ ਅਸਨਸਾਲਾਵ ਗਹੇਤਬ੍ਬਾਤਿ ਆਹ ‘‘ਅਸਨਸਾਲ’’ਨ੍ਤਿ. ਯਤ੍ਥਾਤਿ ਯਸ੍ਸਂ ਅਸਨਸਾਲਾਯਂ. ਮੁਖੋਲੋਕਨਂ ਨ ਵਟ੍ਟਤੀਤਿ ਆਹ ‘‘ਅਤ੍ਤਨੋ’’ਤਿਆਦਿ. ਅਞ੍ਞਤ੍ਥਾਤਿ ਪਟਿਕ੍ਕਮਨਤੋ ਅਞ੍ਞਤ੍ਥ. ਅਸ੍ਸਾਤਿ ਭਿਕ੍ਖੁਸ੍ਸ.

‘‘ਸਂਵਿਭਜਿਤਬ੍ਬ’’ਨ੍ਤਿ ¶ ਵੁਤ੍ਤਵਚਨਸ੍ਸ ਸਂਵਿਭਜਨਾਕਾਰਂ ਦਸ੍ਸੇਤੁਂ ਵੁਤ੍ਤਂ ‘‘ਸਚੇ ਤਯੋ’’ਤਿਆਦਿ. ਯਥਾਮਿਤ੍ਤਨ੍ਤਿ ਯਸ੍ਸ ਯਸ੍ਸ ਮਿਤ੍ਤਸ੍ਸ. ਅਕਾਮਾਤਿ ਨ ਕਾਮੇਨ. ਕਾਰਣਤ੍ਥੇ ਚੇਤਂ ਨਿਸ੍ਸਕ੍ਕਵਚਨਂ.

੨੩੫. ਅਨ੍ਤਰਾਮਗ੍ਗੇਤਿ ਮਗ੍ਗਸ੍ਸ ਅਨ੍ਤਰੋ ਅਨ੍ਤਰਾਮਗ੍ਗੋ, ਸੁਖੁਚ੍ਚਾਰਣਤ੍ਥਂ ਮਜ੍ਝੇ ਦੀਘੋ, ਤਸ੍ਮਿਂ. ਬਹੁਮ੍ਪਿ ਦੇਨ੍ਤਾਨਂ ਏਤੇਸਂ ਞਾਤਕਪਵਾਰਿਤਾਨਂ ਬਹੁਮ੍ਪਿ ਪਟਿਗ੍ਗਣ੍ਹਨ੍ਤਸ੍ਸਾਤਿ ਯੋਜਨਾ. ਅਟ੍ਠਕਥਾਸੁ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਅਟ੍ਠਕਥਾਨਂ ਵਚਨਂ ਪਾਲ਼ਿਯਾ ਨ ਸਮੇਤੀਤਿ. ਚਤੁਤ੍ਥਂ.

੫. ਪਠਮਪਵਾਰਣਸਿਕ੍ਖਾਪਦਂ

੨੩੬. ਪਞ੍ਚਮੇ ਪਵਾਰਿਤਾਤਿ ਏਤ੍ਥ ਵਸ੍ਸਂਵੁਤ੍ਥਪਵਾਰਣਾ, ਪਚ੍ਚਯਪਵਾਰਣਾ, ਪਟਿਕ੍ਖੇਪਪਵਾਰਣਾ, ਯਾਵਦਤ੍ਥਪਵਾਰਣਾ ਚਾਤਿ ਚਤੁਬ੍ਬਿਧਾਸੁ ਪਵਾਰਣਾਸੁ ਯਾਵਦਤ੍ਥਪਵਾਰਣਾ ਚ ਪਟਿਕ੍ਖੇਪਪਵਾਰਣਾ ਚਾਤਿ ਦ੍ਵੇ ਪਵਾਰਣਾ ਅਧਿਪ੍ਪੇਤਾਤਿ ਦਸ੍ਸੇਨ੍ਤੋ ਆਹ ‘‘ਬ੍ਰਾਹ੍ਮਣੇਨਾ’’ਤਿਆਦਿ. ਬ੍ਰਾਹ੍ਮਣੇਨ ਪਵਾਰਿਤਾਤਿ ਸਮ੍ਬਨ੍ਧੋ. ਸਯਨ੍ਤਿ ਤਤਿਯਨ੍ਤਨਿਪਾਤੋ ‘‘ਪਵਾਰਿਤਾ’’ਤਿਪਦੇਨ ਸਮ੍ਬਨ੍ਧੋ. ਚਸਦ੍ਦੋ ਅਞ੍ਞਤ੍ਥ ਯੋਜੇਤਬ੍ਬੋ ਯਾਵਦਤ੍ਥਪਵਾਰਣਾਯ ਚ ਪਟਿਕ੍ਖੇਪਪਵਾਰਣਾਯ ਚਾਤਿ. ਪਟਿਮੁਖਂ ਅਤ੍ਤਨੋ ਗੇਹਂ ਵਿਸਨ੍ਤਿ ਪਵਿਸਨ੍ਤੀਤਿ ਪਟਿਵਿਸ੍ਸਕਾਤਿ ਵੁਤ੍ਤੇ ਆਸਨ੍ਨਗੇਹਵਾਸਿਕਾ ਗਹੇਤਬ੍ਬਾਤਿ ਆਹ ‘‘ਸਾਮਨ੍ਤਘਰਵਾਸਿਕੇ’’ਤਿ.

੨੩੭. ਉਦ੍ਧਙ੍ਗਮੋ ਰਵੋ ਓਰਵੋ, ਸੋਯੇਵ ਸਦ੍ਦੋ ਓਰਵਸਦ੍ਦੋ, ਕਾਕਾਨਂ ਓਰਵਸਦ੍ਦੋ ਕਕੋਰਵਸਦ੍ਦੋਤਿ ਦਸ੍ਸੇਨ੍ਤੋ ਆਹ ‘‘ਕਾਕਾਨ’’ਨ੍ਤਿਆਦਿ.

੨੩੯. ਤਵਨ੍ਤੁਪਚ੍ਚਯਸ੍ਸ ਅਤੀਤਤ੍ਥਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਤਤ੍ਥ ਚਾ’’ਤਿਆਦਿ. ਤਤ੍ਥਾਤਿ ‘‘ਭੁਤ੍ਤਵਾ’’ਤਿਪਦੇ. ਯਸ੍ਮਾ ਯੇਨ ਭਿਕ੍ਖੁਨਾ ਅਜ੍ਝੋਹਰਿਤਂ ਹੋਤਿ, ਤਸ੍ਮਾ ਸੋ ‘‘ਭੁਤ੍ਤਾਵੀ’’ਤਿ ਸਙ੍ਖ੍ਯਂ ਗਚ੍ਛਤੀਤਿ ¶ ਯੋਜਨਾ. ਸਙ੍ਖਾਦਿਤ੍ਵਾਤਿ ਦਨ੍ਤੇਹਿ ਚੁਣ੍ਣਂ ਕਤ੍ਵਾ. ਤੇਨਾਤਿ ਤੇਨ ਹੇਤੁਨਾ. ਅਸ੍ਸਾਤਿ ‘‘ਭੁਤ੍ਤਾਵੀ’’ਤਿਪਦਸ੍ਸ. ਪਵਾਰੇਤਿ ਪਟਿਕ੍ਖਿਪਤੀਤਿ ਪਵਾਰਿਤੋ ਭਿਕ੍ਖੂਤਿ ਦਸ੍ਸੇਨ੍ਤੋ ਆਹ ‘‘ਕਤਪਵਾਰਣੋ’’ਤਿ. ਸੋਪਿ ਚਾਤਿ ਸੋ ਪਟਿਕ੍ਖੇਪੋ ਚ ਹੋਤੀਤਿ ਸਮ੍ਬਨ੍ਧੋ. ਅਸ੍ਸਾਤਿ ‘‘ਪਵਾਰਿਤੋ’’ਤਿਪਦਸ੍ਸ. ਤਤ੍ਥਾਤਿ ‘‘ਅਸਨਂ ਪਞ੍ਞਾਯਤੀ’’ਤਿਆਦਿਵਚਨੇ. ਯਸ੍ਮਾ ¶ ਭੁਤ੍ਤਾਵੀਤਿਪਿ ਸਙ੍ਖ੍ਯਂ ਗਚ੍ਛਤਿ, ਤਸ੍ਮਾ ਨ ਪਸ੍ਸਾਮਾਤਿ ਯੋਜਨਾ. ‘‘ਅਸਨਂ ਪਞ੍ਞਾਯਤੀ’’ਤਿ ਪਦਭਾਜਨਿਯਾ ‘‘ਭੁਤ੍ਤਾਵੀ’’ਤਿ ਮਾਤਿਕਾਪਦਸ੍ਸ ਅਸਂਸਨ੍ਦਨਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਅਸਨਂ ਪਞ੍ਞਾਯਤੀਤਿ ਇਮਿਨਾ’’ਤਿਆਦਿ. ਯਞ੍ਚਾਤਿ ਯਞ੍ਚ ਭੋਜਨਂ. ਦਿਰਤ੍ਤਾਦੀਤਿ ਏਤ੍ਥ ਆਦਿਸਦ੍ਦੇਨ ਪਞ੍ਚਾਦਿਵਚਨਂ ਸਙ੍ਗਣ੍ਹਾਤਿ. ਏਤਨ੍ਤਿ ‘‘ਭੁਤ੍ਤਾਵੀ’’ਤਿਪਦਂ.

‘‘ਅਸਨਂ ਪਞ੍ਞਾਯਤੀ’’ਤਿਆਦੀਸੁ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਸਮ੍ਬਨ੍ਧੋ. ‘‘ਪਞ੍ਞਾਯਤੀ’’ਤਿ ਏਤ੍ਥ ਞਾਧਾਤੁਯਾ ਖਾਯਨਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਦਿਸ੍ਸਤੀ’’ਤਿ. ‘‘ਹਤ੍ਥਪਾਸੇ’’ਤਿਪਦਸ੍ਸ ਦ੍ਵਾਦਸਹਤ੍ਥਪ੍ਪਮਾਣੋ ਹਤ੍ਥਪਾਸੋ ਨਾਧਿਪ੍ਪੇਤੋਤਿ ਆਹ ‘‘ਅਡ੍ਢਤੇਯ੍ਯਹਤ੍ਥਪ੍ਪਮਾਣੇ’’ਤਿ. ਵਾਚਾਯ ਅਭਿਹਰਣਂ ਨਾਧਿਪ੍ਪੇਤਂ. ਤੇਨਾਹ ‘‘ਕਾਯੇਨਾ’’ਤਿ. ਅਭਿਹਰਤੀਤਿ ਅਭਿਮੁਖਂ ਹਰਤਿ. ਤਨ੍ਤਿ ਭੋਜਨਂ. ਏਤਨ੍ਤਿ ਪਞ੍ਚਙ੍ਗਭਾਵਂ, ‘‘ਪਞ੍ਚਹਿ…ਪੇ… ਪਞ੍ਞਾਯਤੀ’’ਤਿ ਵਚਨਂ ਵਾ.

ਤਤ੍ਰਾਤਿ ‘‘ਅਸਨਂ ਪਞ੍ਞਾਯਤੀ’’ਤਿਆਦਿਵਚਨੇ. ਅਸ੍ਨਾਤੀਤਿ ਕੀਯਾਦਿਗਣਤ੍ਤਾ, ਤਸ੍ਸ ਚ ਏਕਕ੍ਖਰਧਾਤੁਤ੍ਤਾ ਸਕਾਰਨਕਾਰਾਨਂ ਸਂਯੋਗੋ ਦਟ੍ਠਬ੍ਬੋ. ਤਨ੍ਤਿ ਭੋਜਨਂ. ਉਨ੍ਦਤਿ ਪਸਵਤਿ ਭੁਞ੍ਜਨ੍ਤਾਨਂ ਆਯੁਬਲਂ ਜਨੇਤੀਤਿ ਓਦਨੋ. ਯਵਾਦਯੋ ਪੂਤਿਂ ਕਤ੍ਵਾ ਕਤਤ੍ਤਾ ਕੁਚ੍ਛਿਤੇਨ ਮਸੀਯਤਿ ਆਮਸੀਯਤੀਤਿ ਕੁਮਾਸੋ. ਸਚਤਿ ਸਮਵਾਯੋ ਹੁਤ੍ਵਾ ਭਵਤੀਤਿ ਸਤ੍ਤੁ. ਬ੍ਯਞ੍ਜਨਤ੍ਥਾਯ ਮਾਰੇਤਬ੍ਬੋਤਿ ਮਚ੍ਛੋ. ਮਾਨੀਯਤਿ ਭੁਞ੍ਜਨ੍ਤੇਹੀਤਿ ਮਂਸਂ. ਤਤ੍ਥਾਤਿ ਓਦਨਾਦੀਸੁ ਪਞ੍ਚਸੁ ਭੋਜਨੇਸੁ. ਸਾਰੋ ਅਸ੍ਸਤ੍ਥਿ ਅਞ੍ਞੇਸਂ ਧਞ੍ਞਾਨਨ੍ਤਿ ਸਾਲੀ. ਵਹਤਿ ਭੁਞ੍ਜਨ੍ਤਾਨਂ ਜੀਵਿਤਨ੍ਤਿ ਵੀਹਿ. ਯਵਤਿ ਅਮਿਸ੍ਸਿਤੋਪਿ ਮਿਸ੍ਸਿਤੋ ਵਿਯ ਭਵਤੀਤਿ ਯਵੋ. ਗੁਧਤਿ ਪਰਿਵੇਠਤਿ ਮਿਲਕ੍ਖਭੋਜਨਤ੍ਤਾਤਿ ਗੋਧੁਮੋ. ਸੋਭਨਸੀਸਤ੍ਤਾ ਕਮਨੀਯਭਾਵਂ ਗਚ੍ਛਤੀਤਿ ਕਙ੍ਗੁ. ਮਹਨ੍ਤਸੀਸਤ੍ਤਾ, ਮਧੁਰਰਸਨਾਲ਼ਤ੍ਤਾ ਚ ਵਰੀਯਤਿ ਪਤ੍ਥੀਯਤਿ ਜਨੇਹੀਤਿ ਵਰਕੋ. ਕੋਰਂ ਰੁਧਿਰਂ ਦੂਸਤਿ ਭੁਞ੍ਜਨ੍ਤਾਨਨ੍ਤਿ ਕੁਦ੍ਰੂਸਕੋ. ਨਿਬ੍ਬਤ੍ਤੋ ਓਦਨੋ ਨਾਮਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਸਤ੍ਤਸੁ ਧਞ੍ਞੇਸੁ. ਸਾਲੀਤੀਤਿ ਏਤ੍ਥ ਇਤਿਸਦ੍ਦੋ ਨਾਮਪਰਿਯਾਯੋ. ਸਾਲੀ ਨਾਮਾਤਿ ਅਤ੍ਥੋ. ਏਸੇਵ ਨਯੋ ‘‘ਵੀਹੀਤੀ’’ਤਿਆਦੀਸੁਪਿ.

ਏਤ੍ਥਾਤਿ ¶ ਤਿਣਧਞ੍ਞਜਾਤੀਸੁ. ਨੀਵਾਰੋ ਸਾਲਿਯਾ ਅਨੁਲੋਮੋ, ਵਰਕਚੋਰਕੋ ਵਰਕਸ੍ਸ ਅਨੁਲੋਮੋ. ਅਮ੍ਬਿਲਪਾਯਾਸਾਦੀਸੂਤਿ ਏਤ੍ਥ ਆਦਿਸਦ੍ਦੇਨ ਖੀਰਭਤ੍ਤਾਦਯੋ ਸਙ੍ਗਣ੍ਹਨ੍ਤਿ. ਓਧੀਤਿ ਅਵਧਿ, ਮਰਿਯਾਦੋਤਿ ਅਤ੍ਥੋ. ਸੋ ਹਿ ਅਵਹੀਯਤਿ ਚਜੀਯਤਿ ਅਸ੍ਮਾਤਿ ਓਧੀਤਿ ਵੁਚ੍ਚਤਿ.

ਯੋਪਿ ¶ ਪਾਯਾਸੋ ਵਾ ਯਾਪਿ ਅਮ੍ਬਿਲਯਾਗੁ ਵਾ ਓਧਿਂ ਨ ਦਸ੍ਸੇਤਿ, ਸੋ ਪਵਾਰਣਂ ਨ ਜਨੇਤੀਤਿ ਯੋਜਨਾ. ਪਯੇਨ ਖੀਰੇਨ ਕਤਤ੍ਤਾ ਪਾਯਾਸੋ. ਪਾਤਬ੍ਬਸ੍ਸ, ਅਸਿਤਬ੍ਬਸ੍ਸ ਚਾਤਿ ਦ੍ਵਿਨ੍ਨਂ ਬ੍ਯੁਪ੍ਪਤ੍ਤਿਨਿਮਿਤ੍ਤਾਨਂ ਸਮ੍ਭਵਤੋ ਵਾ ਪਾਯਾਸੋਤਿ ਵੁਚ੍ਚਤਿ. ਉਦ੍ਧਨਤੋਤਿ ਚੁਲ੍ਲਿਤੋ. ਸਾ ਹਿ ਉਪਰਿ ਧੀਯਨ੍ਤਿ ਠਪਿਯਨ੍ਤਿ ਥਾਲ੍ਯਾਦਯੋ ਏਤ੍ਥਾਤਿ ਉਦ੍ਧਨਨ੍ਤਿ ਵੁਚ੍ਚਤਿ. ਆਵਜ੍ਜਿਤ੍ਵਾਤਿ ਪਰਿਣਾਮੇਤ੍ਵਾ. ਘਨਭਾਵਨ੍ਤਿ ਕਥਿਨਭਾਵਂ. ਏਤ੍ਥਾਪਿ ਵਾਕ੍ਯੇ ‘‘ਯੋ ਸੋ’’ਤਿ ਪਦਾਨਿ ਯੋਜੇਤਬ੍ਬਾਨਿ. ਪੁਬ੍ਬੇਤਿ ਅਬ੍ਭੁਣ੍ਹਕਾਲੇ. ਨਿਮਨ੍ਤਨੇਤਿ ਨਿਮਨ੍ਤਨਟ੍ਠਾਨੇ. ਭਤ੍ਤੇ ਆਕਿਰਿਤ੍ਵਾ ਦੇਨ੍ਤੀਤਿ ਸਮ੍ਬਨ੍ਧੋ. ਯਾਪਨਂ ਗਚ੍ਛਤਿ ਇਮਾਯਾਤਿ ਯਾਗੁ. ਕਿਞ੍ਚਾਪਿ ਤਨੁਕਾ ਹੋਤਿ, ਤਥਾਪੀਤਿ ਯੋਜਨਾ. ਉਦਕਾਦੀਸੂਤਿਆਦਿਸਦ੍ਦੇਨ ਕਿਞ੍ਜਿਕਖੀਰਾਦਯੋ ਸਙ੍ਗਯ੍ਹਨ੍ਤਿ. ਯਾਗੁਸਙ੍ਗਹਮੇਵ ਗਚ੍ਛਤਿ, ਕਸ੍ਮਾ? ਉਦਕਾਦੀਨਂ ਪਕ੍ਕੁਥਿਤਤ੍ਤਾਤਿ ਅਧਿਪ੍ਪਾਯੋ. ਤਸ੍ਮਿਂ ਵਾਤਿ ਸਭਤ੍ਤੇ, ਪਕ੍ਕੁਥਿਤਉਦਕਾਦਿਕੇ ਵਾ. ਅਞ੍ਞਸ੍ਮਿਂ ਵਾਤਿ ਪਕ੍ਕੁਥਿਤਉਦਕਾਦਿਤੋ ਅਞ੍ਞਸ੍ਮਿਂ ਉਦਕਾਦਿਕੇ ਵਾ. ਯਤ੍ਥ ਯਸ੍ਮਿਂ ਉਦਕਾਦਿਕੇ ਪਕ੍ਖਿਪਨ੍ਤਿ, ਤਂ ਪਵਾਰਣਂ ਜਨੇਤੀਤਿ ਯੋਜਨਾ.

ਸੁਦ੍ਧਰਸਕੋਤਿ ਮਚ੍ਛਮਂਸਖਣ੍ਡਨ੍ਹਾਰੂਹਿ ਅਮਿਸ੍ਸੋ ਸੁਦ੍ਧੋ ਮਚ੍ਛਾਦਿਰਸਕੋ. ਰਸਕਯਾਗੂਤਿ ਰਸਕਭੂਤਾ ਦ੍ਰਵਭੂਤਾ ਯਾਗੁ. ਘਨਯਾਗੂਤਿ ਕਥਿਨਯਾਗੁ. ਏਤ੍ਥਾਤਿ ਘਨਯਾਗੁਯਂ. ਪੁਪ੍ਫਿਅਤ੍ਥਾਯਾਤਿ ਪੁਪ੍ਫਂ ਫੁਲ੍ਲਂ ਇਮਸ੍ਸ ਖਜ੍ਜਕਸ੍ਸਾਤਿ ਪੁਪ੍ਫੀ, ਪੁਪ੍ਫਿਨੋ ਅਤ੍ਥੋ ਪਯੋਜਨਂ ਪੁਪ੍ਫਿਅਤ੍ਥੋ, ਤਦਤ੍ਥਾਯ ਕਤਨ੍ਤਿ ਸਮ੍ਬਨ੍ਧੋ. ਤੇ ਤਣ੍ਡੁਲੇਤਿ ਤੇ ਸੇਦਿਤਤਣ੍ਡੁਲੇ. ਅਚੁਣ੍ਣਤ੍ਤਾ ਨੇਵ ਸਤ੍ਤੁਸਙ੍ਖ੍ਯਂ, ਅਪਕ੍ਕਤ੍ਤਾ ਨ ਭਤ੍ਤਸਙ੍ਖ੍ਯਂ ਗਚ੍ਛਨ੍ਤਿ. ਤੇਹੀਤਿ ਸੇਦਿਤਤਣ੍ਡੁਲੇਹਿ. ਤੇ ਤਣ੍ਡੁਲੇ ਪਚਨ੍ਤਿ, ਕਰੋਨ੍ਤੀਤਿ ਸਮ੍ਬਨ੍ਧੋ.

‘‘ਯਵੇਹੀ’’ਤਿ ਬਹੁਵਚਨੇਨ ਸਤ੍ਤ ਧਞ੍ਞਾਨਿਪਿ ਗਹਿਤਾਨਿ. ਏਸ ਨਯੋ ਸਾਲਿਵੀਹਿਯਵੇਹੀਤਿ ਏਤ੍ਥਾਪਿ. ਥੁਸੇਤਿ ਧਞ੍ਞਤਚੇ. ਪਲਾਪੇਤ੍ਵਾਤਿ ਪਟਿਕ੍ਕਮਾਪੇਤ੍ਵਾ ¶ . ਤਨ੍ਤਿ ਚੁਣ੍ਣਂ ਗਚ੍ਛਤੀਤਿ ਸਮ੍ਬਨ੍ਧੋ. ਖਰਪਾਕਭਜ੍ਜਿਤਾਨਨ੍ਤਿ ਖਰੋ ਪਾਕੋ ਖਰਪਾਕੋ, ਖਰਪਾਕੇਨ ਭਜ੍ਜਿਤਾ ਖਰਪਾਕਭਜ੍ਜਿਤਾ, ਤੇਸਂ. ਨ ਪਵਾਰੇਨ੍ਤਿ ਅਸਤ੍ਤੁਸਙ੍ਗਹਤ੍ਤਾਤਿ ਅਧਿਪ੍ਪਾਯੋ. ਕੁਣ੍ਡਕਮ੍ਪੀਤਿ ਕਣਮ੍ਪਿ. ਪਵਾਰੇਤਿ ਸਤ੍ਤੁਸਙ੍ਗਹਤ੍ਤਾਤਿ ਅਧਿਪ੍ਪਾਯੋ. ਤੇਹੀਤਿ ਲਾਜੇਹਿ. ਸੁਦ੍ਧਖਜ੍ਜਕਨ੍ਤਿ ਪਿਟ੍ਠੇਹਿ ਅਮਿਸ੍ਸਿਤਂ ਸੁਦ੍ਧਂ ਫਲਾਫਲਾਦਿਖਜ੍ਜਕਂ. ਯਾਗੁਂ ਪਿਵਨ੍ਤਸ੍ਸ ਦੇਨ੍ਤੀਤਿ ਯੋਜਨਾ. ਤਾਨੀਤਿ ਦ੍ਵੇ ਮਚ੍ਛਮਂਸਖਣ੍ਡਾਨਿ. ਨ ਪਵਾਰੇਤਿ ਦ੍ਵਿਨ੍ਨਂ ਮਚ੍ਛਮਂਸਖਣ੍ਡਾਨਂ ਅਖਾਦਿਤਤ੍ਤਾਤਿ ਅਧਿਪ੍ਪਾਯੋ. ਤਤੋਤਿ ਦ੍ਵੇਮਚ੍ਛਮਂਸਖਣ੍ਡਤੋ ਨੀਹਰਿਤ੍ਵਾ ਏਕਨ੍ਤਿ ਸਮ੍ਬਨ੍ਧੋ, ਤੇਸੁ ਵਾ. ਸੋਤਿ ਖਾਦਕੋ ਭਿਕ੍ਖੁ. ਅਞ੍ਞਨ੍ਤਿ ਦ੍ਵੀਹਿ ਮਚ੍ਛਮਂਸਖਣ੍ਡੇਹਿ ਅਞ੍ਞਂ ਪਵਾਰਣਪਹੋਨਕਂ ਭੋਜਨਂ.

ਅਵਤ੍ਥੁਤਾਯਾਤਿ ਪਵਾਰਣਾਯ ਅਵਤ੍ਥੁਭਾਵਤੋ. ਤਂ ਵਿਤ੍ਥਾਰੇਨ੍ਤੋ ਆਹ ‘‘ਯਂ ਹੀ’’ਤਿ. ਹਿਸਦ੍ਦੋ ਵਿਤ੍ਥਾਰਜੋਤਕੋ. ਯਨ੍ਤਿ ਮਂਸਂ. ਇਦਂ ਪਨਾਤਿ ਇਦਂ ਮਂਸਂ ਪਨ. ਪਟਿਕ੍ਖਿਤ੍ਤਮਂਸਂ ਕਪ੍ਪਿਯਭਾਵਤੋ ਅਪਟਿਕ੍ਖਿਪਿਤਬ੍ਬਟ੍ਠਾਨੇ ¶ ਠਿਤਤ੍ਤਾ ਪਟਿਕ੍ਖਿਤ੍ਤਮ੍ਪਿ ਮਂਸਭਾਵਂ ਨ ਜਹਾਤਿ. ਨਨੁ ਖਾਦਿਤਮਂਸਂ ਪਨ ਅਕਪ੍ਪਿਯਭਾਵਤੋ ਪਟਿਕ੍ਖਿਪਿਤਬ੍ਬਟ੍ਠਾਨੇ ਠਿਤਤ੍ਤਾ ਖਾਦਿਯਮਾਨਮ੍ਪਿ ਮਂਸਭਾਵਂ ਜਹਾਤੀਤਿ ਆਹ ‘‘ਯਂ ਪਨਾ’’ਤਿਆਦਿ. ਕੁਲਦੂਸਕਕਮ੍ਮਞ੍ਚ ਵੇਜ੍ਜਕਮ੍ਮਞ੍ਚ ਉਤ੍ਤਰਿਮਨੁਸ੍ਸਧਮ੍ਮਾਰੋਚਨਞ੍ਚ ਸਾਦਿਤਰੂਪਿਯਞ੍ਚ ਕੁਲ…ਪੇ… ਰੂਪਿਯਾਨਿ, ਤਾਨਿ ਆਦੀਨਿ ਯੇਸਂ ਕੁਹਨਾਦੀਨਨ੍ਤਿ ਕੁਲ…ਪੇ… ਰੂਪਿਯਾਦਯੋ, ਤੇਹਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਵਾਰੇਸੁ.

ਏਵਨ੍ਤਿਆਦਿ ਨਿਗਮਨਨਿਦਸ੍ਸਨਂ. ਤਨ੍ਤਿ ਭੋਜਨਂ. ਯਥਾਤਿ ਯੇਨਾਕਾਰੇਨ. ਯੇਨ ਅਜ੍ਝੋਹਟਂ ਹੋਤਿ, ਸੋ ਪਟਿਕ੍ਖਿਪਤਿ ਪਵਾਰੇਤੀਤਿ ਯੋਜਨਾ. ਕਤ੍ਥਚੀਤਿ ਕਿਸ੍ਮਿਞ੍ਚਿ ਪਤ੍ਤਾਦਿਕੇ. ਤਸ੍ਮਿਂ ਚੇ ਅਨ੍ਤਰੇਤਿ ਤਸ੍ਮਿਂ ਖਣੇ ਚੇ. ਅਞ੍ਞਤ੍ਰਾਤਿ ਅਞ੍ਞਸ੍ਮਿਂ ਠਾਨੇ. ਪਤ੍ਤੇ ਵਿਜ੍ਜਮਾਨਭੋਜਨਂ ਅਨਜ੍ਝੋਹਰਿਤੁਕਾਮੋ ਹੋਤਿ ਯਥਾ, ਏਵਨ੍ਤਿ ਯੋਜਨਾ. ਹੀਤਿ ਸਚ੍ਚਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਦੇਸੁ. ਤਤ੍ਥਾਤਿ ਕੁਰੁਨ੍ਦੀਯਂ. ਆਨਿਸਦਸ੍ਸਾਤਿ ਆਗਮ੍ਮ ਨਿਸੀਦਤਿ ਏਤੇਨਾਤਿ ਆਨਿਸਦੋ, ਤਸ੍ਸ ਪਚ੍ਛਿਮਨ੍ਤਤੋਤਿ ਸਮ੍ਬਨ੍ਧੋ. ਪਣ੍ਹਿਅਨ੍ਤਤੋਤਿ ਪਸਤਿ ਠਿਤਕਾਲੇ ਵਾ ਗਮਨਕਾਲੇ ¶ ਵਾ ਭੂਮਿਂ ਫੁਸਤੀਤਿ ਪਣ੍ਹੀ, ਤਸ੍ਸ ਅਨ੍ਤਤੋ. ‘‘ਦਾਯਕਸ੍ਸਾ’’ਤਿਪਦਂ ‘‘ਪਸਾਰਿਤਹਤ੍ਥ’’ਨ੍ਤਿ ਪਦੇਨ ਚ ‘‘ਅਙ੍ਗ’’ਨ੍ਤਿ ਪਦੇਨ ਚ ਅਵਯਵੀਸਮ੍ਬਨ੍ਧੋ. ਹਤ੍ਥਪਾਸੋਤਿ ਹਤ੍ਥਸ੍ਸ ਪਾਸੋ ਸਮੀਪੋ ਹਤ੍ਥਪਾਸੋ, ਹਤ੍ਥੋ ਪਸਤਿ ਫੁਸਤਿ ਅਸ੍ਮਿਂ ਠਾਨੇਤਿ ਵਾ ਹਤ੍ਥਪਾਸੋ, ਅਡ੍ਢਤੇਯ੍ਯਹਤ੍ਥੋ ਪਦੇਸੋ. ਤਸ੍ਮਿਨ੍ਤਿ ਹਤ੍ਥਪਾਸੇ.

ਉਪਨਾਮੇਤੀਤਿ ਸਮੀਪਂ ਨਾਮੇਤਿ. ਅਨਨ੍ਤਰਨਿਸਿਨ੍ਨੋਪੀਤਿ ਹਤ੍ਥਪਾਸਂ ਅਵਿਜਹਿਤ੍ਵਾ ਅਨਨ੍ਤਰੇ ਠਾਨੇ ਨਿਸਿਨ੍ਨੋਪਿ ਭਿਕ੍ਖੁ ਵਦਤੀਤਿ ਯੋਜਨਾ. ਭਤ੍ਤਪਚ੍ਛਿਨ੍ਤਿ ਭਤ੍ਤੇਨ ਪਕ੍ਖਿਤ੍ਤਂ ਪਚ੍ਛਿਂ. ਈਸਕਨ੍ਤਿ ਭਾਵਨਪੁਂਸਕਂ. ਉਦ੍ਧਰਿਤ੍ਵਾ ਵਾ ਅਪਨਾਮੇਤ੍ਵਾ ਵਾਤਿ ਸਮ੍ਬਨ੍ਧਿਤਬ੍ਬਂ. ਦੂਰੇਤਿ ਨਵਾਸਨੇ. ਇਤੋਤਿ ਪਤ੍ਤਤੋ. ਗਤੋ ਦੂਤੋਤਿ ਸਮ੍ਬਨ੍ਧੋ.

ਪਰਿਵੇਸਨਾਯਾਤਿ ਪਰਿਵੇਸਨਤ੍ਥਾਯ, ਭਤ੍ਤਗ੍ਗੇ ਵਾ. ਤਤ੍ਰਾਤਿ ਅਸ੍ਮਿਂ ਪਰਿਵੇਸਨੇ. ਤਨ੍ਤਿ ਭਤ੍ਤਪਚ੍ਛਿਂ. ਫੁਟ੍ਠਮਤ੍ਤਾਵਾਤਿ ਫੁਸਿਯਮਤ੍ਤਾਵ. ਕਟਚ੍ਛੁਨਾ ਉਦ੍ਧਟਭਤ੍ਤੇ ਪਨ ਪਵਾਰਣਾ ਹੋਤੀਤਿ ਯੋਜਨਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਸ੍ਸਾਤਿ ਪਰਿਵੇਸਕਸ੍ਸ. ਅਭਿਹਟੇ ਪਟਿਕ੍ਖਿਤ੍ਤਤ੍ਤਾਤਿ ਅਭਿਹਟਸ੍ਸ ਭਤ੍ਤਸ੍ਸ ਪਟਿਕ੍ਖਿਤ੍ਤਭਾਵਤੋ.

‘‘ਕਾਯੇਨ ਵਾਚਾਯ ਵਾ ਪਟਿਕ੍ਖਿਪਨ੍ਤਸ੍ਸ ਪਵਾਰਣਾ ਹੋਤੀ’’ਤਿ ਸਙ੍ਖੇਪੇਨ ਵੁਤ੍ਤਮਤ੍ਥਂ ਵਿਤ੍ਥਾਰੇਨ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥਾਤਿ ਤੇਸੁ ਕਾਯਵਾਚਾਪਟਿਕ੍ਖੇਪੇਸੁ. ਮਚ੍ਛਿਕਬੀਜਨਿਨ੍ਤਿ ਮਕ੍ਖਿਕਾਨਂ ਉਤ੍ਤਾਸਨਿਂ ਬੀਜਨਿਂ. ਖਕਾਰਸ੍ਸ ਹਿ ਛਕਾਰਂ ਕਤ੍ਵਾ ‘‘ਮਚ੍ਛਿਕਾ’’ਤਿ ਵੁਚ੍ਚਤਿ ‘‘ਸਚ੍ਛਿਕਤ੍ਵਾ’’ਤਿਆਦੀਸੁ ¶ ਵਿਯ (ਅ. ਨਿ. ੩.੧੦੩). ਏਤ੍ਥ ਹਿ ‘‘ਸਕ੍ਖਿਕਤ੍ਵਾ’’ਤਿ ਵਤ੍ਤਬ੍ਬੇ ਖਕਾਰਸ੍ਸ ਛਕਾਰੋ ਹੋਤਿ.

ਏਕੋ ਵਦਤੀਤਿ ਸਮ੍ਬਨ੍ਧੋ. ਅਪਨੇਤ੍ਵਾਤਿ ਪਤ੍ਤਤੋ ਅਪਨੇਤ੍ਵਾ. ਏਤ੍ਥਾਤਿ ਵਚਨੇ. ਕਥਨ੍ਤਿ ਕੇਨਾਕਾਰੇਨ ਹੋਤੀਤਿ ਯੋਜਨਾ. ਵਦਨ੍ਤਸ੍ਸ ਨਾਮਾਤਿ ਏਤ੍ਥ ਨਾਮਸਦ੍ਦੋ ਗਰਹਤ੍ਥੋ ‘‘ਅਤ੍ਥੀ’’ਤਿਪਦੇਨ ਯੋਜੇਤਬ੍ਬੋ. ਅਤ੍ਥਿ ਨਾਮਾਤਿ ਅਤ੍ਥੋ. ਇਤੋਪੀਤਿ ਪਤ੍ਤਤੋਪਿ. ਤਤ੍ਰਾਪੀਤਿ ਤਸ੍ਮਿਂ ਵਚਨੇਪਿ.

ਸਮਂਸਕਨ੍ਤਿ ਮਂਸੇਨ ਸਹ ਪਵਤ੍ਤਂ. ਰਸਨ੍ਤਿ ਦ੍ਰਵਂ. ਤਨ੍ਤਿ ਵਚਨਂ. ਪਟਿਕ੍ਖਿਪਤੋ ਹੋਤਿ. ਕਸ੍ਮਾ? ਮਚ੍ਛੋ ਚ ਰਸੋ ਚ ਮਚ੍ਛੇਨ ਮਿਸ੍ਸੋ ਰਸੋ ¶ ਚਾਤਿ ਅਤ੍ਥਸ੍ਸ ਸਮ੍ਭਵਤੋ. ਇਦਨ੍ਤਿ ਵਤ੍ਥੁਂ. ਮਂਸਂ ਵਿਸੁਂ ਕਤ੍ਵਾਤਿ ‘‘ਮਂਸਸ੍ਸ ਰਸਂ ਮਂਸਰਸ’’ਨ੍ਤਿ ਮਂਸਪਦਤ੍ਥਸ੍ਸ ਪਧਾਨਭਾਵਂ ਅਕਤ੍ਵਾ, ਰਸਪਦਤ੍ਥਸ੍ਸੇਵ ਪਧਾਨਭਾਵਂ ਕਤ੍ਵਾਤਿ ਅਤ੍ਥੋ.

ਆਪੁਚ੍ਛਨ੍ਤਨ੍ਤਿ ‘‘ਮਂਸਰਸਂ ਗਣ੍ਹਥਾ’’ਤਿ ਆਪੁਚ੍ਛਨ੍ਤਂ. ਤਨ੍ਤਿ ਮਂਸਂ. ਕਰਮ੍ਬਕੋਤਿ ਮਿਸ੍ਸਕਾਧਿਵਚਨਮੇਤਂ. ਯਞ੍ਹਿ ਅਞ੍ਞੇਨ ਅਞ੍ਞੇਨ ਮਿਸ੍ਸੇਤ੍ਵਾ ਕਰੋਨ੍ਤਿ, ਸੋ ‘‘ਕਰਮ੍ਬਕੋ’’ਤਿ ਵੁਚ੍ਚਤਿ. ਅਯਂ ਪਨੇਤ੍ਥ ਵਚਨਤ੍ਥੋ – ਕਰੋਤਿ ਸਮੂਹਂ ਅਵਯਵਿਨ੍ਤਿ ਕਰੋ, ਕਰੀਯਤਿ ਵਾ ਸਮੂਹੇਨ ਅਵਯਵਿਨਾਤਿ ਕਰੋ, ਅਵਯਵੋ, ਤਂ ਵਕਤਿ ਆਦਦਾਤੀਤਿ ਕਰਮ੍ਬਕੋ, ਸਮੂਹੋ. ‘‘ਕਦਮ੍ਬਕੋ’’ਤਿਪਿ ਪਾਠੋ, ਸੋਪਿ ਯੁਤ੍ਤੋਯੇਵ ਅਨੁਮਤਤ੍ਤਾ ਪਣ੍ਡਿਤੇਹਿ. ਅਭਿਧਾਨੇਪਿ ਏਵਮੇਵ ਅਤ੍ਥੀ. ਅਤ੍ਥੋ ਪਨ ਅਞ੍ਞਥਾ ਚਿਨ੍ਤੇਤਬ੍ਬੋ. ਇਮਸ੍ਮਿਂ ਵਾ ਅਤ੍ਥੇ ਰਕਾਰਸ੍ਸ ਦਕਾਰੋ ਕਾਤਬ੍ਬੋ. ਮਂਸੇਨ ਮਿਸ੍ਸੋ, ਲਕ੍ਖਿਤੋ ਵਾ ਕਰਮ੍ਬਕੋ ਮਂਸਕਰਮ੍ਬਕੋ. ਨ ਪਵਾਰੇਤੀਤਿ ਯੇਸਂ ਕੇਸਞ੍ਚਿ ਮਿਸ੍ਸਕਤ੍ਤਾ ਨ ਪਵਾਰੇਤਿ. ਪਵਾਰੇਤੀਤਿ ਮਂਸੇਨ ਮਿਸ੍ਸਿਤਤ੍ਤਾ ਪਵਾਰੇਤਿ.

ਯੋ ਪਨ ਪਟਿਕ੍ਖਿਪਤਿ, ਸੋ ਪਵਾਰਿਤੋਵ ਹੋਤੀਤਿ ਯੋਜਨਾ. ਨਿਮਨ੍ਤਨੇਤਿ ਨਿਮਨ੍ਤਨਟ੍ਠਾਨੇ. ਹੀਤਿ ਸਚ੍ਚਂ. ਤਤ੍ਥਾਤਿ ਕੁਰੁਨ੍ਦਿਯਂ. ਯੇਨਾਤਿ ਯੇਨ ਭਤ੍ਤੇਨ. ਏਤ੍ਥਾਤਿ ‘‘ਯਾਗੁਂ ਗਣ੍ਹਥਾ’’ਤਿਆਦਿਵਚਨੇ. ਅਧਿਪ੍ਪਾਯੋਤਿ ਅਟ੍ਠਕਥਾਚਰਿਯਾਨਂ ਅਧਿਪ੍ਪਾਯੋ. ਏਤ੍ਥਾਤਿ ‘‘ਯਾਗੁਮਿਸ੍ਸਕਂ ਗਣ੍ਹਥਾ’’ਤਿਆਦਿਵਚਨੇ. ਦੁਦ੍ਦਸਨ੍ਤਿ ਦੁਕ੍ਕਰਂ ਦਸ੍ਸਨਂ. ਇਦਞ੍ਚਾਤਿ ‘‘ਮਿਸ੍ਸਕਂ ਗਣ੍ਹਥਾ’’ਤਿਵਚਨਞ੍ਚ. ਨ ਸਮਾਨੇਤਬ੍ਬਨ੍ਤਿ ਸਮਂ ਨ ਆਨੇਤਬ੍ਬਂ, ਸਮਾਨਂ ਵਾ ਨ ਕਾਤਬ੍ਬਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਇਦਂ ਪਨਾਤਿ ਮਿਸ੍ਸਕਂ ਪਨ. ਏਤ੍ਥਾਤਿ ਮਿਸ੍ਸਕੇ. ਵਿਸੁਂ ਕਤ੍ਵਾਤਿ ਰਸਖੀਰਸਪ੍ਪੀਨਿ ਆਵੇਣਿਂ ਕਤ੍ਵਾ. ਤਨ੍ਤਿ ਰਸਾਦਿਂ.

ਕਦ੍ਦੀਯਤਿ ਮਦ੍ਦੀਯਤੀਤਿ ਕਦ੍ਦਮੋ. ਉਨ੍ਦਤਿ ਪਸਵਤਿ ਵਡ੍ਢਤੀਤਿ ਉਦਕਂ. ਉਨ੍ਦਤਿ ਵਾ ਕ੍ਲੇਦਨਂ ਕਰੋਤੀਤਿ ¶ ਉਦਕਂ, ਨਿਲੀਨੇ ਸਤ੍ਤੇ ਗੁਪਤਿ ਰਕ੍ਖਤੀਤਿ ਗੁਮ੍ਬੋ, ਗੁਹਤਿ ਸਂਵਰਤੀਤਿ ਵਾ ਗੁਮ੍ਬੋ. ਅਨੁਪਰਿਯਾਯਨ੍ਤੇਨਾਤਿ ਅਨੁਕ੍ਕਮੇਨ ਪਰਿਵਤ੍ਤਿਤ੍ਵਾ ¶ ਆਯਨ੍ਤੇਨ. ਤਨ੍ਤਿ ਨਾਵਂ ਵਾ ਸੇਤੁਂ ਵਾ. ਮਜ੍ਝਨ੍ਹਿਕਨ੍ਤਿ ਅਹਸ੍ਸ ਮਜ੍ਝਂ ਮਜ੍ਝਨ੍ਹਂ, ਅਹਸਦ੍ਦਸ੍ਸ ਨ੍ਹਾਦੇਸੋ, ਮਜ੍ਝਨ੍ਹਂ ਏਵ ਮਜ੍ਝਨ੍ਹਿਕਂ. ਪੋਤ੍ਥਕੇਸੁ ਪਨ ਮਜ੍ਝਨ੍ਤਿਕਨ੍ਤਿ ਪਾਠੋ ਅਤ੍ਥਿ, ਸੋ ਅਪਾਠੋਯੇਵ. ਯੋ ਠਿਤੋ ਪਵਾਰੇਤਿ, ਤੇਨ ਠਿਤੇਨੇਵ ਭੁਞ੍ਜਿਤਬ੍ਬਨ੍ਤਿ ਯੋਜਨਾ. ਆਨਿਸਦਨ੍ਤਿ ਪੀਠੇ ਫੁਟ੍ਠਆਨਿਸਦਮਂਸਂ. ਅਚਾਲੇਤ੍ਵਾਤਿ ਅਚਾਵੇਤ੍ਵਾ. ਅਯਮੇਵ ਵਾ ਪਾਠੋ. ਉਪਰਿ ਚ ਪਸ੍ਸੇਸੁ ਚ ਅਮੋਚੇਤ੍ਵਾਤਿ ਵੁਤ੍ਤਂ ਹੋਤਿ. ਅਦਿਨ੍ਨਾਦਾਨੇ ਵਿਯ ਠਾਨਾਚਾਵਨਂ ਨ ਵੇਦਿਤਬ੍ਬਂ. ਸਂਸਰਿਤੁਨ੍ਤਿ ਸਂਸਬ੍ਬਿਤੁਂ. ਨਨ੍ਤਿ ਭਿਕ੍ਖੁਂ.

ਅਤਿਰੇਕਂ ਰਿਚਤਿ ਗਚ੍ਛਤੀਤਿ ਅਤਿਰਿਤ੍ਤਂ, ਨ ਅਤਿਰਿਤ੍ਤਂ ਅਨਤਿਰਿਤ੍ਤਨ੍ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਨ ਅਤਿਰਿਤ੍ਤ’’ਨ੍ਤਿ. ‘‘ਅਧਿਕ’’ਨ੍ਤਿਇਮਿਨਾ ਅਤਿਰਿਤ੍ਤਸਦ੍ਦਸ੍ਸ ਅਤਿਸੁਞ੍ਞਤ੍ਥਂ ਨਿਵਤ੍ਤੇਤਿ. ਅਧਿ ਹੁਤ੍ਵਾ ਏਤਿ ਪਵਤ੍ਤਤੀਤਿ ਅਧਿਕਂ. ਤਂ ਪਨਾਤਿ ਅਨਤਿਰਿਤ੍ਤਂ ਪਨ ਹੋਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਅਕਪ੍ਪਿਯਕਤ’’ਨ੍ਤਿਆਦਿਵਚਨੇ. ਵਿਤ੍ਥਾਰੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਤਤ੍ਥਾਤਿ ਅਤਿਰਿਤ੍ਤਂ ਕਾਤਬ੍ਬੇਸੁ ਵਤ੍ਥੂਸੁ. ਯਂ ਫਲਂ ਵਾ ਯਂ ਕਨ੍ਦਮੂਲਾਦਿ ਵਾ ਅਕਤਨ੍ਤਿ ਯੋਜਨਾ. ਅਕਪ੍ਪਿਯਭੋਜਨਂ ਵਾਤਿ ਕੁਲਦੂਸਕਕਮ੍ਮਾਦੀਹਿ ਨਿਬ੍ਬਤ੍ਤਂ ਅਕਪ੍ਪਿਯਭੋਜਨਂ ਵਾ ਅਤ੍ਥੀਤਿ ਸਮ੍ਬਨ੍ਧੋ. ਯੋਤਿ ਵਿਨਯਧਰੋ ਭਿਕ੍ਖੁ. ਤੇਨ ਕਤਨ੍ਤਿ ਯੋਜਨਾ. ‘‘ਭੁਤ੍ਤਾਵਿਨਾ ਪਵਾਰਿਤੇਨ ਆਸਨਾ ਵੁਟ੍ਠਿਤੇਨ ਕਤ’’ਨ੍ਤਿਵਚਨਤੋ ਭੁਤ੍ਤਾਵਿਨਾ ਅਪਵਾਰਿਤੇਨ ਆਸਨਾ ਵੁਟ੍ਠਿਤੇਨ ਕਤ੍ਤਬ੍ਬਨ੍ਤਿ ਸਿਦ੍ਧਂ. ਤਸ੍ਮਾ ਪਾਤੋ ਅਦ੍ਧਾਨਂ ਗਚ੍ਛਨ੍ਤੇਸੁ ਦ੍ਵੀਸੁ ਏਕੋ ਪਵਾਰਿਤੋ, ਤਸ੍ਸ ਇਤਰੋ ਪਿਣ੍ਡਾਯ ਚਰਿਤ੍ਵਾ ਲਦ੍ਧਂ ਭਿਕ੍ਖਂ ਅਤ੍ਤਨਾ ਅਭੁਤ੍ਵਾਪਿ ‘‘ਅਲਮੇਤਂ ਸਬ੍ਬ’’ਨ੍ਤਿ ਕਾਤੁਂ ਲਭਤਿ ਏਵ. ਯਨ੍ਤਿ ਖਾਦਨੀਯਭੋਜਨੀਯਂ. ‘‘ਤਦੁਭਯਮ੍ਪੀ’’ਤਿਇਮਿਨਾ ਅਤਿਰਿਤ੍ਤਞ੍ਚ ਅਤਿਰਿਤ੍ਤਞ੍ਚ ਅਤਿਰਿਤ੍ਤਂ, ਨ ਅਤਿਰਿਤ੍ਤਂ ਅਨਤਿਰਿਤ੍ਤਨ੍ਤਿ ਅਤ੍ਥਂ ਦਸ੍ਸੇਤਿ.

ਤਸ੍ਸੇਵਾਤਿ ਅਨਤਿਰਿਤ੍ਤਸ੍ਸੇਵ. ਏਤ੍ਥਾਤਿ ਅਨਤਿਰਿਤ੍ਤੇ, ‘‘ਕਪ੍ਪਿਯਕਤ’’ਨ੍ਤਿ ਆਦੀਸੁ ਸਤ੍ਤਸੁ ਵਿਨਯਕਮ੍ਮਾਕਾਰੇਸੁ ਵਾ. ਅਨਨ੍ਤਰੇਤਿ ਵਿਨਯਧਰਸ੍ਸ ਅਨਨ੍ਤਰੇ ਆਸਨੇ. ਪਤ੍ਤਤੋ ਨੀਹਰਿਤ੍ਵਾਤਿ ਸਮ੍ਬਨ੍ਧੋ. ਤਤ੍ਥੇਵਾਤਿ ਭੁਞ੍ਜਨਟ੍ਠਾਨੇਯੇਵ. ਤਸ੍ਸਾਤਿ ਨਿਸਿਨ੍ਨਸ੍ਸ. ਤੇਨਾਤਿ ਭਤ੍ਤਂ ਆਨੇਨ੍ਤੇਨ ਭਿਕ੍ਖੁਨਾ ਭੁਞ੍ਜਿਤਬ੍ਬਨ੍ਤਿ ਯੋਜਨਾ. ‘‘ਨਿਸਿਨ੍ਨੇਨ ਭਿਕ੍ਖੁਨਾ’’ਤਿ ਕਾਰਿਤਕਮ੍ਮਂ ¶ ਆਨੇਤਬ੍ਬਂ. ਕਸ੍ਮਾ ‘‘ਹਤ੍ਥਂ ਧੋਵਿਤ੍ਵਾ’’ਤਿ ਵੁਤ੍ਤਨ੍ਤਿ ਪੁਚ੍ਛਨ੍ਤੋ ਆਹ ‘‘ਕਸ੍ਮਾ’’ਤਿ. ਹੀਤਿ ਕਾਰਣਂ. ਯਸ੍ਮਾ ਅਕਪ੍ਪਿਯਂ ਹੋਤਿ, ਤਸ੍ਮਾ ਹਤ੍ਥਂ ਧੋਵਿਤ੍ਵਾਤਿ ਮਯਾ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਤਸ੍ਸਾਤਿ ਭਤ੍ਤਂ ਆਨੇਨ੍ਤਸ੍ਸ. ਯੇਨਾਤਿ ਵਿਨਯਧਰੇਨ. ਪੁਨ ਯੇਨਾਤਿ ਏਵਮੇਵ. ਯਞ੍ਚਾਤਿ ਖਾਦਨੀਯਭੋਜਨੀਯਞ੍ਚ. ਯੇਨ ਵਿਨਯਧਰੇਨ ਪਠਮਂ ਅਕਤਂ, ਤੇਨੇਵ ਕਤ੍ਤਬ੍ਬਂ. ਯਞ੍ਚ ਖਾਦਨੀਯਭੋਜਨੀਯਂ ਪਠਮਂ ਅਕਤਂ, ਤਞ੍ਞੇਵ ਕਤ੍ਤਬ੍ਬਨ੍ਤਿ ਵੁਤ੍ਤਂ ਹੋਤਿ ¶ . ਤਤ੍ਥਾਤਿ ਪਠਮਭਾਜਨੇ. ਹੀਤਿ ਸਚ੍ਚਂ. ਪਠਮਭਾਜਨਂ ਸੁਦ੍ਧਂ ਧੋਵਿਤ੍ਵਾ ਕਤਮ੍ਪਿ ਨਿਦ੍ਦੋਸਮੇਵ. ਤੇਨ ਭਿਕ੍ਖੁਨਾਤਿ ਪਵਾਰਿਤੇਨ ਭਿਕ੍ਖੁਨਾ.

ਕੁਣ੍ਡੇਪੀਤਿ ਉਕ੍ਖਲਿਯਮ੍ਪਿ. ਸਾ ਹਿ ਕੁਡਤਿ ਓਦਨਾਦਿਂ ਦਾਹਂ ਕਰੋਤੀਤਿ ਕੁਣ੍ਡੋਤਿ ਵੁਚ੍ਚਤਿ. ਤਨ੍ਤਿ ਅਤਿਰਿਤ੍ਤਕਤਂ ਖਾਦਨੀਯਭੋਜਨੀਯਂ. ਯੇਨ ਪਨਾਤਿ ਵਿਨਯਧਰੇਨ ਪਨ. ਭਿਕ੍ਖੁਂ ਨਿਸੀਦਾਪੇਨ੍ਤੀਤਿ ਸਮ੍ਬਨ੍ਧੋ. ਮਙ੍ਗਲਨਿਮਨ੍ਤਨੇਤਿ ਮਙ੍ਗਲਤ੍ਥਾਯ ਨਿਮਨ੍ਤਨਟ੍ਠਾਨੇ. ਤਤ੍ਥਾਤਿ ਮਙ੍ਗਲਨਿਮਨ੍ਤਨੇ. ਕਰੋਨ੍ਤੇਨਾਤਿ ਕਰੋਨ੍ਤੇਨ ਵਿਨਯਧਰੇਨ.

ਗਿਲਾਨੇਨ ਭੁਞ੍ਜਿਤਾਵਸੇਸਮੇਵ ਨ ਕੇਵਲਂ ਗਿਲਾਨਾਤਿਰਿਤ੍ਤਂ ਨਾਮ, ਗਿਲਾਨਂ ਪਨ ਉਦ੍ਦਿਸ੍ਸ ਆਭਤਂ ਗਿਲਾਨਾਤਿਰਿਤ੍ਤਮੇਵ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਨ ਕੇਵਲ’’ਨ੍ਤਿਆਦਿ. ਯਂਕਿਞ੍ਚਿ ਗਿਲਾਨਨ੍ਤਿ ਉਪਸਮ੍ਪਨ੍ਨਂ ਵਾ ਅਨੁਪਸਮ੍ਪਨ੍ਨਂ ਵਾ ਯਂਕਿਞ੍ਚਿ ਗਿਲਾਨਂ. ਯਂ ਦੁਕ੍ਕਟਂ ਵੁਤ੍ਤਂ, ਤਂ ਅਸਂਸਟ੍ਠਵਸੇਨ ਵੁਤ੍ਤਨ੍ਤਿ ਯੋਜਨਾ. ਅਨਾਹਾਰਤ੍ਥਾਯਾਤਿ ਪਿਪਾਸਚ੍ਛੇਦਨਆਬਾਧਵੂਪਸਮਤ੍ਥਾਯ.

੨੪੧. ਸਤਿ ਪਚ੍ਚਯੇਤਿ ਏਤ੍ਥ ਪਚ੍ਚਯਸ੍ਸ ਸਰੂਪਂ ਦਸ੍ਸੇਤੁਂ ‘‘ਪਿਪਾਸਾਯ ਸਤੀ’’ਤਿ ਚ ‘‘ਆਬਾਧੇ ਸਤੀ’’ਤਿ ਚ ਵੁਤ੍ਤਂ. ਤੇਨ ਤੇਨਾਤਿ ਸਤ੍ਤਾਹਕਾਲਿਕੇਨ ਚ ਯਾਵਜੀਵਿਕੇਨ ਚ. ਤਸ੍ਸਾਤਿ ਆਬਾਧਸ੍ਸ. ਇਦਂ ਪਦਂ ‘‘ਉਪਸਮਨਤ੍ਥ’’ਨ੍ਤਿ ਏਤ੍ਥ ਸਮੁਧਾਤੁਯਾ ਸਮ੍ਬਨ੍ਧੇ ਸਮ੍ਬਨ੍ਧੋ, ਯੁਪਚ੍ਚਯੇਨ ਸਮ੍ਬਨ੍ਧੇ ਕਮ੍ਮਨ੍ਤਿ ਦਟ੍ਠਬ੍ਬਨ੍ਤਿ. ਪਞ੍ਚਮਂ.

੬. ਦੁਤਿਯਪਵਾਰਣਸਿਕ੍ਖਾਪਦਂ

੨੪੨. ਛਟ੍ਠੇ ਨ ਆਚਰਿਤਬ੍ਬੋਤਿ ਅਨਾਚਾਰੋਤਿ ਵੁਤ੍ਤੇ ਪਣ੍ਣਤ੍ਤਿਵੀਤਿਕ੍ਕਮੋਤਿ ਆਹ ‘‘ਪਣ੍ਣਤ੍ਤਿਵੀਤਿਕ੍ਕਮ’’ਨ੍ਤਿ. ‘‘ਕਰੋਤੀ’’ਤਿਇਮਿਨਾ ‘‘ਅਤ੍ਤਾਨਮਾਚਰਤੀ’’ਤਿਆਦੀਸੁ ¶ ਵਿਯ ਚਰਸਦ੍ਦੋ ਕਰਸਦ੍ਦਤ੍ਥੋਤਿ ਦਸ੍ਸੇਤਿ. ਉਪਨਨ੍ਧੀਤਿ ਏਤ੍ਥ ਉਪਸਦ੍ਦੋ ਉਪਨਾਹਤ੍ਥੋ, ਨਹਧਾਤੁ ਬਨ੍ਧਨਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਉਪਨਾਹ’’ਨ੍ਤਿਆਦਿ. ਜਨਿਤੋ ਉਪਨਾਹੋ ਯੇਨਾਤਿ ਜਨਿਤਉਪਨਾਹੋ. ਇਮਿਨਾ ‘‘ਉਪਨਨ੍ਧੋ’’ਤਿ ਪਦਸ੍ਸ ਉਪਨਹਤੀਤਿ ਉਪਨਨ੍ਧੋਤਿ ਕਤ੍ਥੁਤ੍ਥਂ ਦਸ੍ਸੇਤਿ.

੨੪੩. ਅਭਿਹਟ੍ਠੁਨ੍ਤਿ ਏਤ੍ਥ ਤੁਂਪਚ੍ਚਯੋ ਤ੍ਵਾਪਚ੍ਚਯਤ੍ਥੋਤਿ ਆਹ ‘‘ਅਭਿਹਰਿਤ੍ਵਾ’’ਤਿ. ਪਦਭਾਜਨੇ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸਾਧਾਰਣਮੇਵ ਅਤ੍ਥਨ੍ਤਿ ਯੋਜਨਾ. ਅਸ੍ਸਾਤਿ ਭਿਕ੍ਖੁਸ੍ਸ. ਤੀਹਾਕਾਰੇਹੀਤਿ ਸਾਮਂ ਜਾਨਨੇਨ ਚ ਅਞ੍ਞੇਸਮਾਰੋਚਨੇਨ ਚ ਤਸ੍ਸਾਰੋਚਨੇਨ ਚਾਤਿ ਤੀਹਿ ਕਾਰਣੇਹਿ. ਆਸਾਦੀਯਤੇ ¶ ਮਙ੍ਕੁਂ ਕਰੀਯਤੇ ਆਸਾਦਨਂ, ਤਂ ਅਪੇਕ੍ਖੋ ਆਸਾਦਨਾਪੇਕ੍ਖੋਤਿ ਦਸ੍ਸੇਨ੍ਤੋ ਆਹ ‘‘ਆਸਾਦਨ’’ਨ੍ਤਿਆਦਿ.

ਯਸ੍ਸ ਅਤ੍ਥਾਯ ਅਭਿਹਟਨ੍ਤਿ ਸਮ੍ਬਨ੍ਧੋ. ਇਤਰਸ੍ਸਾਤਿ ਅਭਿਹਾਰਕਤੋ ਅਞ੍ਞਸ੍ਸ ਭੁਤ੍ਤਸ੍ਸਾਤਿ. ਛਟ੍ਠਂ.

੭. ਵਿਕਾਲਭੋਜਨਸਿਕ੍ਖਾਪਦਂ

੨੪੭. ਸਤ੍ਤਮੇ ਗਿਰਿਮ੍ਹੀਤਿ ਪਬ੍ਬਤਮ੍ਹਿ. ਸੋ ਹਿ ਹਿਮਵਮਨਾਦਿਵਸੇਨ ਜਲਂ, ਸਾਰਭੂਤਾਨਿ ਚ ਭੇਸਜ੍ਜਾਦਿਵਤ੍ਥੂਨਿ ਗਿਰਤਿ ਨਿਗ੍ਗਿਰਤੀਤਿ ਗਿਰੀਤਿ ਵੁਚ੍ਚਤਿ. ਅਗ੍ਗਸਮਜ੍ਜੋਤਿ ਉਤ੍ਤਮਸਮਜ੍ਜੋ. ਇਮੇਹਿ ਪਦੇਹਿ ਅਗ੍ਗੋ ਸਮਜ੍ਜੋ ਅਗ੍ਗਸਮਜ੍ਜੋ, ਗਿਰਿਮ੍ਹਿ ਪਵਤ੍ਤੋ ਅਗ੍ਗਸਮਜ੍ਜੋ ਗਿਰਗ੍ਗਸਮਜ੍ਜੋਤਿ ਅਤ੍ਥਂ ਦਸ੍ਸੇਤਿ. ਸਮਜ੍ਜੋਤਿ ਚ ਸਭਾ. ਸਾ ਹਿ ਸਮਾਗਮਂ ਅਜਨ੍ਤਿ ਗਚ੍ਛਨ੍ਤਿ ਜਨਾ ਏਤ੍ਥਾਤਿ ਸਮਜ੍ਜੋਤਿ ਵੁਚ੍ਚਤਿ. ‘‘ਗਿਰਿਸ੍ਸ ਵਾ’’ਤਿਆਦਿਨਾ ਗਿਰਿਸ੍ਸ ਅਗ੍ਗੋ ਕੋਟਿ ਗਿਰਗ੍ਗੋ, ਤਸ੍ਮਿਂ ਪਵਤ੍ਤੋ ਸਮਜ੍ਜੋ ਗਿਰਗ੍ਗਸਮਜ੍ਜੋਤਿ ਅਤ੍ਥੋ ਦਸ੍ਸਿਤੋ. ਸੋਤਿ ਗਿਰਗ੍ਗਸਮਜ੍ਜੋ. ਭਵਿਸ੍ਸਤਿ ਕਿਰਾਤਿ ਯੋਜਨਾ. ਭੂਮਿਭਾਗੇਤਿ ਅਵਯਵਿਆਧਾਰੋ, ਸਨ੍ਨਿਪਤਤੀਤਿ ਸਮ੍ਬਨ੍ਧੋ. ਨਟਞ੍ਚ ਨਾਟਕਞ੍ਚ ਨਟਨਾਟਕਾਨਿ. ‘‘ਨਚ੍ਚਂ ਗੀਤਂ ਵਾਦਿਤਞ੍ਚਾ’’ਤਿ ਇਦਂ ਤਯਂ ‘‘ਨਾਟਕ’’ਨ੍ਤਿ ਵੁਚ੍ਚਤਿ. ਤੇਸਨ੍ਤਿ ਨਟਨਾਟਕਾਨਂ. ਦਸ੍ਸਨਤ੍ਥਨ੍ਤਿ ਦਸ੍ਸਨਾਯ ਚ ਸਵਨਾਯ ਚ. ਸਵਨਮ੍ਪਿ ਹਿ ਦਸ੍ਸਨੇਨੇਵ ਸਙ੍ਗਹਿਤਂ. ਅਪਞ੍ਞਤ੍ਤੇ ¶ ਸਿਕ੍ਖਾਪਦੇਤਿ ਊਨਵੀਸਤਿਵਸ੍ਸਸਿਕ੍ਖਾਪਦਸ੍ਸ ਤਾਵ ਅਪਞ੍ਞਤ੍ਤਤ੍ਤਾ. ਤੇਤਿ ਸਤ੍ਤਰਸਵਗ੍ਗਿਯਾ. ਤਤ੍ਥਾਤਿ ਗਿਰਗ੍ਗਸਮਜ੍ਜਂ. ਅਥਾਤਿ ਤਸ੍ਮਿਂ ਕਾਲੇ. ਨੇਸਨ੍ਤਿ ਸਤ੍ਤਰਸਵਗ੍ਗਿਯਾਨਂ ਅਦਂਸੂਤਿ ਸਮ੍ਬਨ੍ਧੋ. ਵਿਲਿਮ੍ਪੇਤ੍ਵਾਤਿ ਵਿਲੇਪਨੇਹਿ ਵਿਵਿਧਾਕਾਰੇਨ ਲਿਮ੍ਪੇਤ੍ਵਾ.

੨੪੯. ‘‘ਵਿਕਾਲੇ’’ਤਿ ਸਾਮਞ੍ਞੇਨ ਵੁਤ੍ਤੇਪਿ ਵਿਸੇਸਕਾਲੋਵ ਗਹੇਤਬ੍ਬੋਤਿ ਆਹ ‘‘ਕਾਲੋ’’ਤਿਆਦਿ. ਸੋ ਚਾਤਿ ਭੋਜਨਕਾਲੋ ਚ. ਮਜ੍ਝਨ੍ਹਿਕੋ ਹੋਤੀਤਿ ਯੋਜਨਾ. ਤੇਨੇਵਾਤਿ ਭੋਜਨਕਾਲਸ੍ਸ ਅਧਿਪ੍ਪੇਤਤ੍ਤਾ ਏਵ. ਅਸ੍ਸਾਤਿ ‘‘ਵਿਕਾਲੇ’’ਤਿਪਦਸ੍ਸ. ‘‘ਵਿਕਾਲੋ ਨਾਮ…ਪੇ… ਅਰੁਣੁਗ੍ਗਮਨਾ’’ਤਿ ਪਦਭਾਜਨੇਨ ਅਰੁਣੁਗ੍ਗਮਨਤੋ ਯਾਵ ਮਜ੍ਝਨ੍ਹਿਕਾ ਕਾਲੋ ਨਾਮਾਤਿ ਅਤ੍ਥੋ ਨਯੇਨ ਦਸ੍ਸਿਤੋ ਹੋਤਿ. ਤਤੋਤਿ ਠਿਤਮਜ੍ਝਨ੍ਹਿਕਤੋ. ਸੂਰਿਯਸ੍ਸ ਅਤਿਸੀਘਤ੍ਤਾ ਵੇਗੇਨ ਠਿਤਮਜ੍ਝਨ੍ਹਿਕਂ ਵੀਤਿਵਤ੍ਤੇਯ੍ਯਾਤਿ ਆਹ ‘‘ਕੁਕ੍ਕੁਚ੍ਚਕੇਨ ਪਨ ਨ ਕਤ੍ਤਬ੍ਬ’’ਨ੍ਤਿ. ਕਾਲਤ੍ਥਮ੍ਭੋਤਿ ਕਾਲਸ੍ਸ ਜਾਨਨਤ੍ਥਾਯ ਥੂਣੋ. ਕਾਲਨ੍ਤਰੇਤਿ ਕਾਲਸ੍ਸ ਅਬ੍ਭਨ੍ਤਰੇ.

ਅਵਸੇਸਂ ਖਾਦਨੀਯਂ ਨਾਮਾਤਿ ਏਤ੍ਥ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਯਨ੍ਤਿ ਖਾਦਨੀਯਂ ¶ ਅਤ੍ਥੀਤਿ ਸਮ੍ਬਨ੍ਧੋ. ਵਨਮੂਲਾਦਿਪਭੇਦਂ ਯਮ੍ਪਿ ਖਾਦਨੀਯਂ ਅਤ੍ਥਿ, ਤਮ੍ਪਿ ਆਮਿਸਗਤਿਕਂ ਹੋਤੀਤਿ ਯੋਜਨਾ. ਸੇਯ੍ਯਥਿਦਨ੍ਤਿ ਪੁਚ੍ਛਾਵਾਚਕਨਿਪਾਤਸਮੁਦਾਯੋ. ਇਦਂ ਖਾਦਨੀਯਂ ਸੇਯ੍ਯਥਾ ਕਤਮਨ੍ਤਿ ਅਤ੍ਥੋ. ਇਦਮ੍ਪੀਤਿ ਇਦਂ ਦ੍ਵਾਦਸਵਿਧਮ੍ਪਿ. ਪਿਸਦ੍ਦੇਨ ਨ ਪੂਵਾਦਿਯੇਵਾਤਿ ਦਸ੍ਸੇਤਿ.

ਤਤ੍ਥਾਤਿ ਦ੍ਵਾਦਸਸੁ ਖਾਦਨੀਯੇਸੁ, ਆਧਾਰੇ ਭੁਮ੍ਮਂ. ਮੂਲਤਿ ਪਤਿਟ੍ਠਾਤਿ ਏਤ੍ਥ, ਏਤੇਨਾਤਿ ਵਾ ਮੂਲਂ. ਖਾਦਿਤਬ੍ਬਨ੍ਤਿ ਖਾਦਨੀਯਂ. ਮੂਲਮੇਵ ਖਾਦਨੀਯਂ ਮੂਲਖਾਦਨੀਯਂ, ਤਸ੍ਮਿਂ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਮੂਲਕਮੂਲਾਦੀਨਿ ਲੋਕਸਙ੍ਕੇਤੋ ਪਦੇਸਤੋਯੇਵ ਵੇਦਿਤਬ੍ਬਾਨਿ. ਤਂ ਤਞ੍ਹਿ ਨਾਮਂ ਅਜਾਨਨ੍ਤਾਨਂ ਅਤਿਸਮ੍ਮੂਲ਼੍ਹਕਾਰਣਤ੍ਤਾ ਸਹ ਪਰਿਯਾਯਨ੍ਤਰੇਨ ਵਚਨਤ੍ਥਂ ਵਕ੍ਖਾਮ. ਸੂਪਸ੍ਸ ਹਿਤਂ ਸੂਪੇਯ੍ਯਂ, ਸੂਪੇਯ੍ਯਂ ਪਣ੍ਣਂ ਏਤੇਸਨ੍ਤਿ ਸੂਪੇਯ੍ਯਪਣ੍ਣਾ, ਤੇਸਂ ਮੂਲਾਨਿ ਸੂਪੇਯ੍ਯਪਣ੍ਣਮੂਲਾਨਿ. ਆਮੀਯਤਿ ਅਨ੍ਤੋ ਪਵੇਸੀਯਤੀਤਿ ਆਮਿਸੋ, ਆਕਾਰੋ ਅਨ੍ਤੋਕਰਣਤ੍ਥੋ, ਆਮਿਸਸ੍ਸ ਗਤਿ ਵਿਯ ਗਤਿ ਏਤੇਸਨ੍ਤਿ ਆਮਿਸਗਤਿਕਾਨਿ ¶ . ਏਤ੍ਥਾਤਿ ਮੂਲੇਸੁ. ਜਰਡ੍ਢਨ੍ਤਿ ਜਰਭੂਤਂ ਉਪਡ੍ਢਂ. ਅਞ੍ਞਮ੍ਪੀਤਿ ਵਜਕਲਿਮੂਲਤੋ ਅਞ੍ਞਮ੍ਪਿ.

ਯਾਨਿ ਪਨ ਮੂਲਾਨਿ ਵੁਤ੍ਤਾਨਿ, ਤਾਨਿ ਯਾਵਜੀਵਿਕਾਨੀਤਿ ਯੋਜਨਾ. ਪਾਲ਼ਿਯਂ ਵੁਤ੍ਤਾਨੀਤਿ ਸਮ੍ਬਨ੍ਧੋ. ਖਾਦਨੀਯਤ੍ਥਨ੍ਤਿ ਖਾਦਨੀਯਸ੍ਸ, ਖਾਦਨੀਯੇ ਵਾ ਵਿਜ੍ਜਮਾਨਂ, ਖਾਦਨੀਯੇਨ ਵਾ ਕਾਤਬ੍ਬਂ ਕਿਚ੍ਚਂ, ਪਯੋਜਨਂ ਵਾਤਿ ਖਾਦਨੀਯਤ੍ਥਂ. ‘‘ਖਾਦਨੀਯੇ’’ਤਿਇਮਿਨਾ ‘‘ਤਤ੍ਥ ਵੁਤ੍ਤਾਭਿਧਮ੍ਮਤ੍ਥਾ’’ਤਿਆਦੀਸੁ ਵਿਯ ਖਾਦਨੀਯਤ੍ਥਪਦਸ੍ਸ ਉਤ੍ਤਰਪਦਤ੍ਥਪਧਾਨਭਾਵਂ ਦਸ੍ਸੇਤਿ. ਤਤ੍ਥ ਖਾਦਨੀਯਸ੍ਸ, ਖਾਦਨੀਯੇ ਵਾ ਵਿਜ੍ਜਮਾਨਂ, ਖਾਦਨੀਯੇਨ ਵਾ ਕਾਤਬ੍ਬਂ ਕਿਚ੍ਚਂ ਨਾਮ ਜਿਘਚ੍ਛਾਹਰਣਮੇਵ. ਯਞ੍ਹਿ ਪੂਵਾਦਿਖਾਦਨੀਯਂ ਖਾਦਿਤ੍ਵਾ ਜਿਘਚ੍ਛਾਹਰਣਂ ਹੋਤਿ, ਤਸ੍ਸ ਕਿਚ੍ਚਂ ਕਿਚ੍ਚਂ ਨਾਮਾਤਿ ਵੁਤ੍ਤਂ ਹੋਤਿ. ਤਂ ਕਿਚ੍ਚਂ, ਪਯੋਜਨਂ ਵਾ ਨੇਵ ਫਰਨ੍ਤਿ, ਨੇਵ ਨਿਪ੍ਫਾਦੇਨ੍ਤਿ. ਏਸੇਵ ਨਯੋ ‘‘ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤੀ’’ਤਿਏਤ੍ਥਾਪਿ.

ਤੇਸਨ੍ਤਿ ਮੂਲਾਨਂ ਅਨ੍ਤੋ, ਲਕ੍ਖਣਨ੍ਤਿ ਵਾ ਸਮ੍ਬਨ੍ਧੋ. ਏਕਸ੍ਮਿਂ ਜਨਪਦੇ ਖਾਦਨੀਯਤ੍ਥਭੋਜਨੀਯਤ੍ਥੇਸੁ ਫਰਮਾਨੇਸੁ ਅਞ੍ਞੇਸੁਪਿ ਜਨਪਦੇਸੁ ਫਰਨ੍ਤਿਯੇਵਾਤਿ ਦਸ੍ਸਨਤ੍ਥਂ ‘‘ਤੇਸੁ ਤੇਸੁ ਜਨਪਦੇਸੂ’’ਤਿ ਵਿਚ੍ਛਾਪਦਂ ਵੁਤ੍ਤਂ. ਕਿਞ੍ਚਾਪਿ ਹਿ ਬਹੂਸੁ ਜਨਪਦੇਸੁ ਪਥਵੀਰਸਆਪੋਰਸਸਮ੍ਪਤ੍ਤਿਵਸੇਨ ਖਾਦਨੀਯਤ੍ਥਭੋਜਨੀਯਤ੍ਥਂ ਫਰਮਾਨਮ੍ਪਿ ਏਕਸ੍ਮਿਂ ਜਨਪਦੇ ਪਥਵੀਰਸਆਪੋਰਸਵਿਪਤ੍ਤਿਵਸੇਨ ਅਫਰਮਾਨਂ ਭਵੇਯ੍ਯ, ਵਿਕਾਰਵਸੇਨ ਪਨ ਤਤ੍ਥ ਪਵਤ੍ਤਤ੍ਤਾ ਤਂ ਜਨਪਦਂ ਪਮਾਣਂ ਨ ਕਾਤਬ੍ਬਂ, ਗਹੇਤਬ੍ਬਮੇਵਾਤਿ ਵੁਤ੍ਤਂ ਹੋਤਿ. ਪਕਤਿਆਹਾਰਵਸੇਨਾਤਿ ਅਞ੍ਞੇਹਿ ਯਾਵਕਾਲਿਕ, ਸਤ੍ਤਾਹਕਾਲਿਕੇਹਿ ਅਮਿਸ੍ਸਿਤਂ ਅਤ੍ਤਨੋ ਪਕਤਿਯਾਵ ਆਹਾਰਕਿਚ੍ਚਕਰਣਵਸੇਨ. ‘‘ਮਨੁਸ੍ਸਾਨ’’ਨ੍ਤਿਇਮਿਨਾ ਅਞ੍ਞੇਸਂ ਤਿਰਚ੍ਛਾਨਾਦੀਨਂ ਖਾਦਨੀਯਤ੍ਥਭੋਜਨੀਯਤ੍ਥਂ ¶ ਫਰਮਾਨਮ੍ਪਿ ਨ ਪਮਾਣਨ੍ਤਿ ਦਸ੍ਸੇਤਿ. ਤਨ੍ਤਿ ਮੂਲਂ. ਹੀਤਿ ਸਚ੍ਚਂ. ਨਾਮਸਞ੍ਞਾਸੂਤਿ ਨਾਮਸਙ੍ਖਾਤਾਸੁ ਸਞ੍ਞਾਸੁ.

ਯਥਾ ਮੂਲੇ ਲਕ੍ਖਣਂ ਦਸ੍ਸਿਤਂ, ਏਵਂ ਕਨ੍ਦਾਦੀਸੁਪਿ ਯਂ ਲਕ੍ਖਣਂ ਦਸ੍ਸਿਤਨ੍ਤਿ ਯੋਜਨਾ. ਨ ਕੇਵਲਂ ਪਾਲ਼ਿਯਂ ਆਗਤਾਨਂ ਹਲਿਦ੍ਦਾਦੀਨਂ ਮੂਲਂਯੇਵ ਯਾਵਜੀਵਿਕਂ ਹੋਤਿ, ਅਥ ਖੋ ਤਚਾਦਯੋਪੀਤਿ ਆਹ ‘‘ਯਞ੍ਚੇਤ’’ਨ੍ਤਿਆਦਿ. ਯਂ ਏਤਂ ਅਟ੍ਠਵਿਧਨ੍ਤਿ ਸਮ੍ਬਨ੍ਧੋ.

ਏਵਂ ¶ ਮੂਲਖਾਦਨੀਯੇ ਵਿਨਿਚ੍ਛਯਂ ਦਸ੍ਸੇਤ੍ਵਾ ਇਦਾਨਿ ਕਨ੍ਦਖਾਦਨੀਯੇ ਤਂ ਦਸ੍ਸੇਨ੍ਤੋ ਆਹ ‘‘ਕਨ੍ਦਖਾਦਨੀਯੇ’’ਤਿਆਦਿ. ਤਤ੍ਥ ਕਨ੍ਦਖਾਦਨੀਯੇਤਿ ਕਂ ਸੁਖਂ ਦਦਾਤੀਤਿ ਕਨ੍ਦੋ, ਪਦੁਮਾਦਿਕਨ੍ਦੋ, ਸੁਖਸ੍ਸ ਅਦਾਯਕਾ ਪਨ ਕਨ੍ਦਾ ਰੁਲ਼੍ਹੀਵਸੇਨ ਕਨ੍ਦਾਤਿ ਵੁਚ੍ਚਨ੍ਤਿ, ਕਨ੍ਦੋ ਏਵ ਖਾਦਨੀਯਂ ਕਨ੍ਦਖਾਦਨੀਯਂ, ਤਸ੍ਮਿਂ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਏਸੇਵ ਨਯੋ ਉਪਰਿਪਿ. ਯਨ੍ਤਿ ਕਨ੍ਦਂ. ਇਮਿਨਾ ਤਂਸਦ੍ਦਾਨਪੇਕ੍ਖੋ ਯਂਸਦ੍ਦੋਪਿ ਅਤ੍ਥੀਤਿ ਞਾਪੇਤਿ. ਤਤ੍ਥਾਤਿ ਕਨ੍ਦਖਾਦਨੀਯੇ. ਤਰੁਣੋ, ਸੁਖਖਾਦਨੀਯੋਤਿ ਵਿਸੇਸਨਪਦਾਨਿ ਯਥਾਵਚਨਂ ਉਪਰਿਪਿ ਯੋਜੇਤਬ੍ਬਾਨਿ. ਏਵਮਾਦਯੋ ਫਰਣਕਕਨ੍ਦਾ ਯਾਵਕਾਲਿਕਾਤਿ ਸਮ੍ਬਨ੍ਧੋ.

ਅਧੋਤੋਤਿ ਵਿਸਰਸੋ ਉਦਕੇਨ ਅਧੂਨਿਤੋ. ਤੇਤਿ ਕਨ੍ਦਾ ਸਙ੍ਗਹਿਤਾਤਿ ਸਮ੍ਬਨ੍ਧੋ.

ਮੂਲੇ ਅਲਤਿ ਪਵਤ੍ਤਤੀਤਿ ਮੁਲ਼ਾਲੋ, ਉਦਕਤੋ ਵਾ ਉਦ੍ਧਟਮਤ੍ਤੇ ਮਿਲਤਿ ਨਿਮਿਲਤੀਤਿ ਮੁਲ਼ਾਲਂ. ਏਵਮਾਦਿ ਫਰਣਕਮੁਲ਼ਾਲਂ ਯਾਵਕਾਲਿਕਨ੍ਤਿ ਯੋਜਨਾ. ਤਂ ਸਬ੍ਬਮ੍ਪੀਤਿ ਸਬ੍ਬਮ੍ਪਿ ਤਂ ਮੁਲ਼ਾਲਂ ਸਙ੍ਗਹਿਤਨ੍ਤਿ ਸਮ੍ਬਨ੍ਧੋ.

ਮਸਤਿ ਵਿਜ੍ਝਤੀਤਿ ਮਤ੍ਥਕੋ. ਏਵਮਾਦਿ ਮਤ੍ਥਕੋ ਯਾਵਕਾਲਿਕੋਤਿ ਯੋਜਨਾ. ਜਰਡ੍ਢਬੁਨ੍ਦੋਤਿ ਜਰਭੂਤਅਡ੍ਢਸਙ੍ਖਾਤੋ ਪਾਦੋ.

ਖਨੀਯਤਿ ਅਵਦਾਰੀਯਤੀਤਿ ਖਨ੍ਧੋ, ਖਾਯਤੀਤਿ ਵਾ ਖਨ੍ਧੋ. ‘‘ਅਨ੍ਤੋਪਥਵੀਗਤੋ’’ਤਿਪਦਂ ‘‘ਸਾਲਕਲ੍ਯਾਣਿਖਨ੍ਧੋ’’ਤਿਪਦੇਨੇਵ ਯੋਜੇਤਬ੍ਬਂ, ਨ ਅਞ੍ਞੇਹਿ. ਏਵਮਾਦਿ ਖਨ੍ਧੋ ਯਾਵਕਾਲਿਕੋਤਿ ਯੋਜਨਾ. ਅਵਸੇਸਾਤਿ ਤੀਹਿ ਦਣ੍ਡਕਾਦੀਹਿ ਅਵਸੇਸਾ.

ਤਚਤਿ ਸਂਵਰਤਿ ਪਟਿਚ੍ਛਾਦੇਤੀਤਿ ਤਚੋ. ਸਰਸੋਤਿ ਏਤ੍ਥ ਏਵਕਾਰੋ ਯੋਜੇਤਬ੍ਬੋ, ਸਰਸੋ ਏਵਾਤਿ ਅਤ੍ਥੋ. ਤੇਸਂ ਸਙ੍ਗਹੋਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਏਤਨ੍ਤਿ ਕਸਾਵਭੇਸਜ੍ਜਂ, ‘‘ਅਨੁਜਾਨਾਮਿ ¶ …ਪੇ… ਭੋਜਨੀਯਤ੍ਥ’’ਨ੍ਤਿ ਵਚਨਂ ਵਾ. ਏਤ੍ਥਾਤਿ ਕਸਾਵਭੇਸਜ੍ਜੇ. ਏਤੇਸਮ੍ਪੀਤਿ ਮਤ੍ਥਕਖਨ੍ਧਤ੍ਤਚਾਨਮ੍ਪਿ.

ਪਤਤੀਤਿ ਪਤ੍ਤਂ. ਏਤੇਸਨ੍ਤਿ ਮੂਲਕਾਦੀਨਂ. ਏਵਰੂਪਾਨਿ ਪਤ੍ਤਾਨਿ ਚ ਏਕਂਸੇਨ ਯਾਵਕਾਲਿਕਾਨੀਤਿ ਯੋਜਨਾ. ਯਾ ਲੋਣੀ ਆਰੋਹਤਿ, ਤਸ੍ਸਾ ਲੋਣਿਯਾ ਪਤ੍ਤਂ ਯਾਵਜੀਵਿਕਨ੍ਤਿ ਯੋਜਨਾ. ਦੀਪਵਾਸਿਨੋਤਿ ਤਮ੍ਬਪਣ੍ਣਿਦੀਪਵਾਸਿਨੋ ¶ , ਜਮ੍ਬੁਦੀਪਵਾਸਿਨੋ ਵਾ. ਯਾਨਿ ਵਾ ਫਰਨ੍ਤੀਤਿ ਵੁਤ੍ਤਾਨੀਤਿ ਸਮ੍ਬਨ੍ਧੋ. ਤੇਸਨ੍ਤਿ ਨਿਮ੍ਬਾਦੀਨਂ. ਇਦਂ ਪਦਂ ਪੁਬ੍ਬਪਰਾਪੇਕ੍ਖਕਂ, ਤਸ੍ਮਾ ਦ੍ਵਿਨ੍ਨਂ ਮਜ੍ਝੇ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਪਣ੍ਣਾਨਂ ਅਨ੍ਤੋ ਨਤ੍ਥੀਤਿ ਸਮ੍ਬਨ੍ਧੋ.

ਪੁਪ੍ਫਤਿ ਵਿਕਸਤੀਤਿ ਪੁਪ੍ਫਂ. ਏਵਮਾਦਿ ਪੁਪ੍ਫਂ ਯਾਵਕਾਲਿਕਨ੍ਤਿ ਯੋਜਨਾ. ਤਸ੍ਸਾਤਿ ਪੁਪ੍ਫਸ੍ਸ. ਅਸ੍ਸਾਤਿ ਏਵਮੇਵ.

ਫਲਤੀਤਿ ਫਲਂ. ਯਾਨੀਤਿ ਫਲਾਨਿ. ਫਰਨ੍ਤੀਤਿ ਸਮ੍ਬਨ੍ਧੋ. ਨੇਸਨ੍ਤਿ ਫਲਾਨਂ ਪਰਿਯਨ੍ਤਨ੍ਤਿ ਸਮ੍ਬਨ੍ਧੋ. ਯਾਨਿ ਵੁਤ੍ਤਾਨਿ, ਤਾਨਿ ਯਾਵਜੀਵਿਕਾਨੀਤਿ ਯੋਜਨਾ. ਤੇਸਮ੍ਪੀਤਿ ਫਲਾਨਮ੍ਪਿ ਪਰਿਯਨ੍ਤਨ੍ਤਿ ਸਮ੍ਬਨ੍ਧੋ.

ਅਸੀਯਤਿ ਖਿਪੀਯਤਿ, ਛਡ੍ਡੀਯਤੀਤਿ ਵਾ ਅਟ੍ਠਿ. ਏਵਮਾਦੀਨਿ ਫਰਣਕਾਨਿ ਅਟ੍ਠੀਨਿ ਯਾਵਕਾਲਿਕਾਨੀਤਿ ਯੋਜਨਾ. ਤੇਸਨ੍ਤਿ ਅਟ੍ਠੀਨਂ.

ਪਿਸੀਯਤਿ ਚੁਣ੍ਣਂ ਕਰੀਯਤੀਤਿ ਪਿਟ੍ਠਂ. ਏਵਮਾਦੀਨਿ ਫਰਣਕਾਨਿ ਪਿਟ੍ਠਾਨਿ ਯਾਵਕਾਲਿਕਾਨੀਤਿ ਯੋਜਨਾ. ਅਧੋਤਕਨ੍ਤਿ ਉਦਕੇਨ ਅਧੂਨਿਤਂ. ਤੇਸਨ੍ਤਿ ਪਿਟ੍ਠਾਨਂ.

ਨਿਰਨ੍ਤਰਂ ਅਸਤਿ ਸਮ੍ਬਜ੍ਝਤੀਤਿ ਨਿਯ੍ਯਾਸੋ. ਸੇਸਾਤਿ ਉਚ੍ਛੁਨਿਯ੍ਯਾਸਤੋ ਸੇਸਾ. ਪਾਲ਼ਿਯਂ ਵੁਤ੍ਤਨਿਯ੍ਯਾਸਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਨਿਯ੍ਯਾਸਖਾਦਨੀਯੇ. ਸਙ੍ਗਹਿਤਾਨਂ ਨਿਯ੍ਯਾਸਾਨਂ ਪਰਿਯਨ੍ਤਨ੍ਤਿ ਯੋਜਨਾ. ਏਵਨ੍ਤਿਆਦਿ ਨਿਗਮਨਂ.

ਵੁਤ੍ਤਮੇਵਾਤਿ ਹੇਟ੍ਠਾ ਪਠਮਪਵਾਰਣਸਿਕ੍ਖਾਪਦੇ ਵੁਤ੍ਤਮੇਵਾਤਿ. ਸਤ੍ਤਮਂ.

੮. ਸਨ੍ਨਿਧਿਕਾਰਕਸਿਕ੍ਖਾਪਦਂ

੨੫੨. ਅਟ੍ਠਮੇ ¶ ਅਬ੍ਭਨ੍ਤਰੇ ਜਾਤੋ ਅਬ੍ਭਨ੍ਤਰੋ. ਮਹਾਥੇਰੋਤਿ ਮਹਨ੍ਤੇਹਿ ਥਿਰਗੁਣੇਹਿ ਯੁਤ੍ਤੋ. ਇਮਿਨਾ ‘‘ਬੇਲਟ੍ਠੋ’’ਤਿ ਸਞ੍ਞਾਨਾਮਸ੍ਸ ਸਞ੍ਞਿਨਾਮਿਂ ਦਸ੍ਸੇਤਿ. ਪਧਾਨਘਰੇਤਿ ਸਮਥਵਿਪਸ੍ਸਨਾਨਂ ਪਦਹਨਟ੍ਠਾਨਘਰਸਙ੍ਖਾਤੇ ਏਕਸ੍ਮਿਂ ਆਵਾਸੇ. ਸੁਕ੍ਖਕੁਰਨ੍ਤਿ ਏਤ੍ਥ ਸੋਸਨਕੁਰਤ੍ਤਾ ਨ ਸੁਕ੍ਖਕੁਰਂ ਹੋਤਿ, ਕੇਵਲਂ ਪਨ ਅਸੂਪਬ੍ਯਞ੍ਜਨਤ੍ਤਾਤਿ ਆਹ ‘‘ਅਸੂਪਬ੍ਯਞ੍ਜਨਂ ¶ ਓਦਨ’’ਨ੍ਤਿ. ਸੋਸਨਕੁਰਮ੍ਪਿ ਯੁਤ੍ਤਮੇਵ. ਵਕ੍ਖਤਿ ਹਿ ‘‘ਤਂ ਪਿਣ੍ਡਪਾਤਂ ਉਦਕੇਨ ਤੇਮੇਤ੍ਵਾ’’ਤਿ. ‘‘ਓਦਨ’’ਨ੍ਤਿਇਮਿਨਾ ਕੁਰਸਦ੍ਦਸ੍ਸ ਓਦਨਪਰਿਯਾਯਤਂ ਦਸ੍ਸੇਤਿ. ਓਦਨਞ੍ਹਿ ਕਰੋਤਿ ਆਯੁਵਣ੍ਣਾਦਯੋਤਿ ‘‘ਕੁਰ’’ਨ੍ਤਿ ਵੁਚ੍ਚਤਿ. ਸੋਤਿ ਬੇਲਟ੍ਠਸੀਸੋ. ਤਞ੍ਚ ਖੋਤਿ ਤਞ੍ਚ ਸੁਕ੍ਖਕੁਰਂ ਆਹਰਤੀਤਿ ਸਮ੍ਬਨ੍ਧੋ. ਪਚ੍ਚਯਗਿਦ੍ਧਤਾਯਾਤਿ ਪਿਣ੍ਡਪਾਤਪਚ੍ਚਯੇ ਲੁਦ੍ਧਤਾਯ. ਥੇਰੋ ਭੁਞ੍ਜਤੀਤਿ ਸਮ੍ਬਨ੍ਧੋ. ਮਨੁਸ੍ਸਾਨਂ ਏਕਾਹਾਰਸ੍ਸ ਸਤ੍ਤਾਹਮਤ੍ਤਟ੍ਠਿਤਤ੍ਤਾ ‘‘ਸਤ੍ਤਾਹ’’ਨ੍ਤਿ ਵੁਤ੍ਤਂ. ਤਤੋਤਿ ਭੁਞ੍ਜਨਤੋ ਪਰਨ੍ਤਿ ਸਮ੍ਬਨ੍ਧੋ. ਚਤ੍ਤਾਰਿਪੀਤਿ ਏਤ੍ਥ ਪਿਸਦ੍ਦੇਨ ਅਧਿਕਾਨਿਪਿ ਸਤ੍ਤਾਹਾਨਿ ਗਹੇਤਬ੍ਬਾਨਿ.

੨੫੩. ਇਤੀਤਿ ਇਦਂ ਤਯਂ. ‘‘ਸਨ੍ਨਿਧਿ ਕਾਰੋ ਅਸ੍ਸਾ’’ਤਿ ਸਮਾਸੋ ਵਿਸੇਸਨਪਰਨਿਪਾਤਵਸੇਨ ਗਹੇਤਬ੍ਬੋ. ‘‘ਸਨ੍ਨਿਧਿਕਿਰਿਯਨ੍ਤਿ ਅਤ੍ਥੋ’’ਤਿ ਇਮਿਨਾ ਕਰੀਯਤੀਤਿ ਕਾਰੋਤਿ ਕਮ੍ਮਤ੍ਥਂ ਦਸ੍ਸੇਤਿ. ਏਕਰਤ੍ਤਨ੍ਤਿ ਅਨ੍ਤਿਮਪਰਿਚ੍ਛੇਦਵਸੇਨ ਵੁਤ੍ਤਂ ਤਦਧਿਕਾਨਮ੍ਪਿ ਅਧਿਪ੍ਪੇਤਤ੍ਤਾ. ਅਸ੍ਸਾਤਿ ‘‘ਸਨ੍ਨਿਧਿਕਾਰਕ’’ਨ੍ਤਿ ਪਦਸ੍ਸ.

ਸਨ੍ਨਿਧਿਕਾਰਕਸ੍ਸ ਸਤ੍ਤਾਹਕਾਲਿਕਸ੍ਸ ਨਿਸ੍ਸਗ੍ਗਿਯਪਾਚਿਤ੍ਤਿਯਾਪਤ੍ਤਿਯਾ ਪਚ੍ਚਯਤ੍ਤਾ ਸਨ੍ਨਿਧਿਕਾਰਕਂ ਯਾਮਕਾਲਿਕਂ ਖਾਦਨੀਯਭੋਜਨੀਯਂ ਅਸਮਾਨਮ੍ਪਿ ਸੁਦ੍ਧਪਾਚਿਤ੍ਤਿਯਾਪਤ੍ਤਿਯਾ ਪਚ੍ਚਯੋ ਹੋਤੀਤਿ ਆਹ ‘‘ਯਾਮਕਾਲਿਕਂ ਵਾ’’ਤਿ. ਪਟਿਗ੍ਗਹਣੇਤਿ ਪਟਿਗ੍ਗਹਣੇ ਚ ਗਹਣੇ ਚ. ਅਜ੍ਝੋਹਰਿਤੁਕਾਮਤਾਯ ਹਿ ਪਟਿਗ੍ਗਹਣੇ ਚ ਪਟਿਗ੍ਗਹੇਤ੍ਵਾ ਗਹਣੇ ਚਾਤਿ ਵੁਤ੍ਤਂ ਹੋਤਿ. ਯਂ ਪਤ੍ਤਂ ਅਙ੍ਗੁਲਿਯਾ ਘਂਸਨ੍ਤਸ੍ਸ ਲੇਖਾ ਪਞ੍ਞਾਯਤਿ, ਸੋ ਪਤ੍ਤੋ ਦੁਦ੍ਧੋਤੋ ਹੋਤਿ ਸਚੇਤਿ ਯੋਜਨਾ ਉਤ੍ਤਰਵਾਕ੍ਯੇ ਯਂਸਦ੍ਦਂ ਦਿਸ੍ਵਾ ਪੁਬ੍ਬਵਾਕ੍ਯੇ ਤਂਸਦ੍ਦਸ੍ਸ ਗਮਨੀਯਤ੍ਤਾ. ਗਣ੍ਠਿਕਪਤ੍ਤਸ੍ਸਾਤਿ ਬਨ੍ਧਨਪਤ੍ਤਸ੍ਸ. ਸੋਤਿ ਸ੍ਨੇਹੋ. ਪਗ੍ਘਰਤਿ ਸਨ੍ਦਿਸ੍ਸਤੀਤਿ ਸਮ੍ਬਨ੍ਧੋ. ਤਾਦਿਸੇਤਿ ਦੁਦ੍ਧੋਤੇ, ਗਣ੍ਠਿਕੇ ਵਾ. ਤਤ੍ਥਾਤਿ ਧੋਵਿਤਪਤ੍ਤੇ ਆਸਿਞ੍ਚਿਤ੍ਵਾਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਅਬ੍ਬੋਹਾਰਿਕਾਤਿ ਨ ਵੋਹਰਿਤਬ੍ਬਾ, ਵੋਹਰਿਤੁਂ ਨ ਯੁਤ੍ਤਾਤਿ ਅਤ੍ਥੋ. ਯਨ੍ਤਿ ਖਾਦਨੀਯਭੋਜਨੀਯਂ ਪਰਿਚ੍ਚਜਨ੍ਤੀਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਤੋਤਿ ਅਪਰਿਚ੍ਚਤ੍ਤਖਾਦਨੀਯਭੋਜਨੀਯਤੋ ਨੀਹਰਿਤ੍ਵਾਤਿ ਸਮ੍ਬਨ੍ਧੋ.

ਅਕਪ੍ਪਿਯਮਂਸੇਸੂਤਿ ¶ ਨਿਦ੍ਧਾਰਣਸਮੁਦਾਯੋ. ਸਤਿ ਪਚ੍ਚਯੇਤਿ ਪਿਪਾਸਸਙ੍ਖਾਤੇ ਪਚ੍ਚਯੇ ਸਤਿ. ਅਨਤਿਰਿਤ੍ਤਕਤਨ੍ਤਿ ¶ ਅਤਿਰਿਤ੍ਤੇਨ ਅਕਤਂ ਸਨ੍ਨਿਧਿਕਾਰਕਂ ਖਾਦਨੀਯਭੋਜਨੀਯਨ੍ਤਿ ਯੋਜਨਾ. ਏਕਮੇਵ ਪਾਚਿਤ੍ਤਿਯਨ੍ਤਿ ਸਮ੍ਬਨ੍ਧੋ. ਵਿਕਪ੍ਪਦ੍ਵਯੇਤਿ ਸਾਮਿਸਨਿਰਾਮਿਸਸਙ੍ਖਾਤੇ ਵਿਕਪ੍ਪਦ੍ਵਯੇ. ਸਬ੍ਬਵਿਕਪ੍ਪੇਸੂਤਿ ਵਿਕਾਲਸਨ੍ਨਿਧਿਅਕਪ੍ਪਿਯਮਂਸਯਾਮਕਾਲਿਕਪਚ੍ਚਯਸਙ੍ਖਾਤੇਸੁ ਸਬ੍ਬੇਸੁ ਵਿਕਪ੍ਪੇਸੁ.

੨੫੫. ਆਮਿਸਸਂਸਟ੍ਠਨ੍ਤਿ ਆਮਿਸੇਨ ਸਂਸਟ੍ਠਂ ਸਤ੍ਤਾਹਕਾਲਿਕਂ ਯਾਵਜੀਵਿਕਂ.

੨੫੬. ਚਤੁਬ੍ਬਿਧਕਾਲਿਕਸ੍ਸ ਸਰੂਪਞ੍ਚ ਵਚਨਤ੍ਥਞ੍ਚ ਦਸ੍ਸੇਨ੍ਤੋ ਆਹ ‘‘ਵਿਕਾਲਭੋਜਨਸਿਕ੍ਖਾਪਦੇ’’ਤਿਆਦਿ. ਤਤ੍ਥ ਨਿਦ੍ਦਿਟ੍ਠਂ ਖਾਦਨੀਯਭੋਜਨੀਯ’’ਨ੍ਤਿਇਮਿਨਾ ਯਾਵਕਾਲਿਕਸ੍ਸ ਸਰੂਪਂ ਦਸ੍ਸੇਤਿ. ‘‘ਯਾਵ…ਪੇ… ਕਾਲਿਕ’’ਨ੍ਤਿਇਮਿਨਾ ਵਚਨਤ੍ਥਂ ਦਸ੍ਸੇਤਿ. ‘‘ਸਦ੍ਧਿਂ…ਪੇ… ਪਾਨ’’ਨ੍ਤਿਇਮਿਨਾ ਯਾਮਕਾਲਿਕਸ੍ਸ ਸਰੂਪਂ ਦਸ੍ਸੇਤਿ. ‘‘ਯਾਵ…ਪੇ… ਕਾਲਿਕ’’ਨ੍ਤਿਇਮਿਨਾ ਵਚਨਤ੍ਥਂ ਦਸ੍ਸੇਤਿ. ‘‘ਸਬ੍ਬਿਆਦਿ ਪਞ੍ਚਵਿਧਂ ਭੇਸਜ੍ਜ’’ਨ੍ਤਿਇਮਿਨਾ ਸਤ੍ਤਾਹਕਾਲਿਕਸ੍ਸ ਸਰੂਪਂ ਦਸ੍ਸੇਤਿ. ‘‘ਸਤ੍ਤਾਹਂ…ਪੇ… ਕਾਲਿਕ’’ਨ੍ਤਿਇਮਿਨਾ ਵਚਨਤ੍ਥਂ ਦਸ੍ਸੇਤਿ. ‘‘ਠਪੇਤ੍ਵਾ…ਪੇ… ਸਬ੍ਬਮ੍ਪੀ’’ਤਿਇਮਿਨਾ ਯਾਵਜੀਵਿਕਸ੍ਸ ਸਰੂਪਂ ਦਸ੍ਸੇਤਿ. ‘‘ਯਾਵ…ਪੇ… ਜੀਵਿਕ’’ਨ੍ਤਿਇਮਿਨਾ ਵਚਨਤ੍ਥਂ ਦਸ੍ਸੇਤਿ. ਸਬ੍ਬਵਚਨਤ੍ਥੋ ਲਹੁਕਮਤ੍ਤਮੇਵ, ਗਰੁਕੋ ਪਨੇਵਂ ਵੇਦਿਤਬ੍ਬੋ – ਯਾਵ ਯਤ੍ਤਕੋ ਮਜ੍ਝਨ੍ਹਿਕੋ ਕਾਲੋ ਯਾਵਕਾਲੋ, ਸੋ ਅਸ੍ਸਤ੍ਥੀ, ਤਂ ਵਾ ਕਾਲਂ ਭੁਞ੍ਜਿਤਬ੍ਬਨ੍ਤਿ ਯਾਵਕਾਲਿਕਂ. ਯਾਮੋ ਕਾਲੋ ਯਾਮਕਾਲੋ, ਸੋ ਅਸ੍ਸਤ੍ਥਿ, ਤਂ ਵਾ ਕਾਲਂ ਪਰਿਭੁਞ੍ਜੀਤਬ੍ਬਨ੍ਤਿ ਯਾਮਕਾਲਿਕਂ. ਸਤ੍ਤਾਹੋ ਕਾਲੋ ਸਤ੍ਤਾਹਕਾਲੋ, ਸੋ ਅਸ੍ਸਤ੍ਥਿ, ਤਂ ਵਾ ਕਾਲਂ ਨਿਦਹਿਤ੍ਵਾ ਪਰਿਭੁਞ੍ਜਿਤਬ੍ਬਨ੍ਤਿ ਸਤ੍ਤਾਹਕਾਲਿਕਂ. ਯਾਵ ਯਤ੍ਤਕੋ ਜੀਵੋ ਯਾਵਜੀਵੋ, ਸੋ ਅਸ੍ਸਤ੍ਥਿ, ਯਾਵਜੀਵਂ ਵਾ ਪਰਿਹਰਿਤ੍ਵਾ ਪਰਿਭੁਞ੍ਜਿਤਬ੍ਬਨ੍ਤਿ ਯਾਵਜੀਵਿਕਨ੍ਤਿ.

ਤਤ੍ਥਾਤਿ ਚਤੁਬ੍ਬਿਧੇਸੁ ਕਾਲਿਕੇਸੁ. ਸਤਕ੍ਖਤ੍ਤੁਨ੍ਤਿ ਅਨੇਕਵਾਰਂ. ਯਾਵ ਕਾਲੋ ਨਾਤਿਕ੍ਕਮਤਿ, ਤਾਵ ਭੁਞ੍ਜਨ੍ਤਸ੍ਸਾਤਿ ਯੋਜਨਾ. ਅਹੋਰਤ੍ਤਂ ਭੁਞ੍ਜਨ੍ਤਸ੍ਸਾਤਿ ਸਮ੍ਬਨ੍ਧੋਤਿ. ਅਟ੍ਠਮਂ.

੯. ਪਣੀਤਭੋਜਨਸਿਕ੍ਖਾਪਦਂ

੨੫੭. ਨਵਮੇ ¶ ਪਕਟ੍ਠਭਾਵਂ ਨੀਤਨ੍ਤਿ ਪਣੀਤਨ੍ਤਿ ਵੁਤ੍ਤੇ ਪਣੀਤਸਦ੍ਦੋ ਉਤ੍ਤਮਤ੍ਥੋਤਿ ਆਹ ‘‘ਉਤ੍ਤਮਭੋਜਨਾਨੀ’’ਤਿ. ਸਮ੍ਪਨ੍ਨੋ ਨਾਮ ਨ ਮਧੁਰਗੁਣੋ, ਅਥ ਖੋ ਮਧੁਰਗੁਣਯੁਤ੍ਤਂ ਭੋਜਨਮੇਵਾਤਿ ਆਹ ‘‘ਸਮ੍ਪਤ੍ਤਿਯੁਤ੍ਤ’’ਨ੍ਤਿ. ਕਸ੍ਸਾਤਿ ਕਰਣਤ੍ਥੇ ਚੇਤਂ ਸਾਮਿਵਚਨਂ, ਕੇਨਾਤਿ ਹਿ ਅਤ੍ਥੋ. ‘‘ਸੁਰਸ’’ਨ੍ਤਿਇਮਿਨਾ ਸਾਦੀਯਤਿ ਅਸ੍ਸਾਦੀਯਤੀਤਿ ਸਾਦੂਤਿ ਵਚਨਤ੍ਥਸ੍ਸ ਸਰੂਪਂ ਦਸ੍ਸੇਤਿ.

੨੫੯. ‘‘ਯੋ ¶ ਪਨ…ਪੇ… ਭੁਞ੍ਜੇਯ੍ਯਾ’’ਤਿ ਏਤ੍ਥ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਸੁਦ੍ਧਾਨੀਤਿ ਓਦਨੇਨ ਅਸਂਸਟ੍ਠਾਨਿ. ਓਦਨਸਂਸਟ੍ਠਾਨਿ ਸਬ੍ਬਿਆਦੀਨੀਤਿ ਸਮ੍ਬਨ੍ਧੋ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਹੀਤਿ ਸਚ੍ਚਂ. ‘‘ਪਣੀਤਸਂਸਟ੍ਠਾਨੀ’’ਤਿਇਮਿਨਾ ਪਣੀਤੇਹਿ ਸਬ੍ਬਿਆਦੀਹਿ ਸਂਸਟ੍ਠਾਨਿ ਭੋਜਨਾਨਿ ਪਣੀਤਭੋਜਨਾਨੀਤਿ ਅਤ੍ਥਂ ਦਸ੍ਸੇਤਿ. ‘‘ਸਤ੍ਤਧਞ੍ਞਨਿਬ੍ਬਤ੍ਤਾਨੀ’’ਤਿ ਇਮਿਨਾ ਭੋਜਨਾਨਂ ਸਰੂਪਂ ਦਸ੍ਸੇਤਿ.

‘‘ਸਬ੍ਬਿਨਾ ਭਤ੍ਤ’’ਨ੍ਤਿਆਦੀਨਂ ਪਞ੍ਚਨ੍ਨਂ ਵਿਕਪ੍ਪਾਨਂ ਮਜ੍ਝੇ ਤੀਸੁਪਿ ਵਿਕਪ੍ਪੇਸੁ ‘‘ਭਤ੍ਤ’’ਨ੍ਤਿ ਯੋਜੇਤਬ੍ਬਂ. ਏਵਂ ਵਾਕ੍ਯਂ ਕਤ੍ਵਾ ਵਿਞ੍ਞਾਪਨੇ ਆਪਤ੍ਤਿਂ ਦਸ੍ਸੇਤ੍ਵਾ ਸਮਾਸਂ ਕਤ੍ਵਾ ਵਿਞ੍ਞਾਪਨੇ ਤਂ ਦਸ੍ਸੇਨ੍ਤੋ ਆਹ ‘‘ਸਬ੍ਬਿਭਤ੍ਤਂ ਦੇਹੀ’’ਤਿਆਦਿ.

ਇਤੋਤਿ ਗਾਵਿਤੋ ਲਦ੍ਧੇਨਾਤਿ ਸਮ੍ਬਨ੍ਧੋ. ਵਿਸਙ੍ਕੇਤਨ੍ਤਿ ਸਙ੍ਕੇਤਤੋ ਞਾਪਿਤਤੋ ਵਿਗਤਂ ਵਿਰਹਿਤਨ੍ਤਿ ਅਤ੍ਥੋ. ਹੀਤਿ ਸਚ੍ਚਂ. ਇਮਿਨਾ ਵਿਸਙ੍ਕੇਤਸ੍ਸ ਗੁਣਦੋਸਂ ਦਸ੍ਸੇਤਿ.

ਕਪ੍ਪਿਯਸਬ੍ਬਿਨਾ ਦੇਹੀਤਿ ਕਪ੍ਪਿਯਸਬ੍ਬਿਨਾ ਸਂਸਟ੍ਠਂ ਭਤ੍ਤਂ ਦੇਹੀਤਿ ਯੋਜਨਾ. ਏਸੇਵ ਨਯੋ ਸੇਸੇਸੁਪਿ. ਯੇਨ ਯੇਨਾਤਿ ਯੇਨ ਯੇਨ ਸਬ੍ਬਿਆਦਿਨਾ. ਤਸ੍ਮਿਂ ਤਸ੍ਸਾਤਿ ਏਤ੍ਥਾਪਿ ਵਿਚ੍ਛਾਵਸੇਨ ਅਤ੍ਥੋ ਦਟ੍ਠਬ੍ਬੋ. ਪਾਲ਼ਿਯਂ ਆਗਤਸਬ੍ਬਿ ਨਾਮ ਗੋਸਬ੍ਬਿ, ਅਜਿਕਾਸਬ੍ਬਿ, ਮਹਿਂਸਸਬ੍ਬਿ, ਯੇਸਂ ਮਂਸਂ ਕਪ੍ਪਤਿ, ਤੇਸਂ ਸਬ੍ਬਿ ਚ. ਨਵਨੀਤਂ ਨਾਮ ਏਵਮੇਵ. ਤੇਲਂ ਨਾਮ ਤਿਲਤੇਲਂ, ਸਾਸਪਤੇਲਂ, ਮਧੁਕਤੇਲਂ, ਏਰਣ੍ਡਤੇਲਂ, ਵਸਾਤੇਲਞ੍ਚ. ਮਧੁ ਨਾਮ ਮਕ੍ਖਿਕਾਮਧੁ. ਫਾਣਿਤਂ ਨਾਮ ਉਚ੍ਛੁਮ੍ਹਾ ਨਿਬ੍ਬਤ੍ਤਂ. ਮਚ੍ਛੋ ਨਾਮ ਉਦਕਚਰੋ. ਪਾਲ਼ਿਅਨਾਗਤੋ ਮਚ੍ਛੋ ਨਾਮ ਨਤ੍ਥਿ. ਮਂਸਂ ਨਾਮ ¶ ਯੇਸਂ ਮਂਸਂ ਕਪ੍ਪਤਿ, ਤੇਸਂ ਮਂਸਂ. ਖੀਰਦਧੀਨਿ ਸਬ੍ਬਿਸਦਿਸਾਨੇਵ. ਵੁਤ੍ਤਂ ਯਥਾ ਏਵਂ ‘‘ਨਵਨੀਤਭਤ੍ਤਂ ਦੇਹੀ’’ਤਿਆਦੀਸੁਪਿ ਸੂਪੋਦਨਵਿਞ੍ਞਤ੍ਤਿਦੁਕ੍ਕਟਮੇਵ ਹੋਤੀਤਿ ਯੋਜਨਾ. ਹੀਤਿ ਸਚ੍ਚਂ. ਸੋ ਚਾਤਿ ਸੋ ਚਤ੍ਥੋ. ਤਤ੍ਥਾਤਿ ਤਸ੍ਮਿਂ ਅਤ੍ਥੇ. ਕਿਂ ਪਯੋਜਨਂ. ਨਤ੍ਥੇਵ ਪਯੋਜਨਨ੍ਤਿ ਅਧਿਪ੍ਪਾਯੋ.

ਪਟਿਲਦ੍ਧਂ ਭੋਜਨਨ੍ਤਿ ਸਮ੍ਬਨ੍ਧੋ. ਏਕਰਸਨ੍ਤਿ ਏਕਕਿਚ੍ਚਂ. ਤਤੋਤਿ ਨਵਪਣੀਤਭੋਜਨਤੋ ਨੀਹਰਿਤ੍ਵਾਤਿ ਸਮ੍ਬਨ੍ਧੋ.

ਸਬ੍ਬਾਨੀਤਿ ਨਵ ਪਾਚਿਤ੍ਤਿਯਾਨਿ ਸਨ੍ਧਾਯ ਵੁਤ੍ਤਂ.

੨੬੧. ਉਭਯੇਸਮ੍ਪੀਤਿ ਭਿਕ੍ਖੁਭਿਕ੍ਖੁਨੀਨਮ੍ਪਿ. ਸਬ੍ਬੀਤਿ ਚੇਤ੍ਥ ਯੋ ਨਂ ਪਰਿਭੁਞ੍ਜਤਿ, ਤਸ੍ਸ ਬਲਾਯੁਵਡ੍ਢਨਤ੍ਥਂ ਸਬ੍ਬਤਿ ਗਚ੍ਛਤਿ ਪਵਤ੍ਤਤੀਤਿ ਸਬ੍ਬਿ, ਘਤਂ. ਤਤਿਯਕ੍ਖਰੇਨੇਵ ਸਜ੍ਝਾਯਿਤਬ੍ਬਂ ਲਿਖਿਤਬ੍ਬਞ੍ਚ ¶ . ਕਸ੍ਮਾ? ਤਤਿਯਕ੍ਖਰਟ੍ਠਾਨੇਯੇਵ ਸਬ੍ਬ ਗਤਿਯਨ੍ਤਿ ਗਤਿਅਤ੍ਥਸ੍ਸ ਸਬ੍ਬਧਾਤੁਸ੍ਸ ਧਾਤੁਪਾਠੇਸੁ ਆਗਤਤ੍ਤਾਤਿ. ਨਵਮਂ.

੧੦. ਦਨ੍ਤਪੋਨਸਿਕ੍ਖਾਪਦਂ

੨੬੩. ਦਸਮੇ ਦਨ੍ਤਕਟ੍ਠਨ੍ਤਿ ਦਨ੍ਤਪੋਨਂ. ਤਞ੍ਹਿ ਦਨ੍ਤੋ ਕਸੀਯਤਿ ਵਿਲੇਖੀਯਤਿ ਅਨੇਨਾਤਿ ‘‘ਦਨ੍ਤਕਟ੍ਠ’’ਨ੍ਤਿ ਵੁਚ੍ਚਤਿ. ‘‘ਸਬ੍ਬ’’ਨ੍ਤਿ ਆਦਿਨਾ ਸਬ੍ਬਮੇਵ ਪਂਸੁਕੂਲਂ ਸਬ੍ਬਪਂਸੁਕੂਲਂ, ਤਮਸ੍ਸਤ੍ਥੀਤਿ ‘‘ਸਬ੍ਬਪਂਸੁਕੂਲਿਕੋ’’ਤਿ ਅਤ੍ਥਂ ਦਸ੍ਸੇਤਿ. ਸੋਤਿ ਭਿਕ੍ਖੁ ਪਰਿਭੁਞ੍ਜਤਿ ਕਿਰਾਤਿ ਸਮ੍ਬਨ੍ਧੋ. ਸੁਸਾਨੇਤਿ ਆਲ਼ਹਨੇ. ਤਞ੍ਹਿ ਛਵਾਨਂ ਸਯਨਟ੍ਠਾਨਤ੍ਤਾ ‘‘ਸੁਸਾਨ’’ਨ੍ਤਿ ਵੁਚ੍ਚਤਿ ਨਿਰੁਤ੍ਤਿਨਯੇਨ. ਤਤ੍ਥਾਤਿ ਸੁਸਾਨੇ. ਪੁਨ ਤਤ੍ਥਾਤਿ ਏਵਮੇਵ. ਅਯ੍ਯਸਰੂਪਞ੍ਚ ਵੋਸਾਟਿਤਕਸਰੂਪਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਅਯ੍ਯਵੋਸਾਟਿਤਕਾਨੀਤਿ ਏਤ੍ਥਾ’’ਤਿ. ਤਤ੍ਥ ‘‘ਅਯ੍ਯਾ…ਪੇ… ਪਿਤਾਮਹਾ’’ਤਿਇਮਿਨਾ ਅਯ੍ਯਸਰੂਪਂ ਦਸ੍ਸੇਤਿ. ‘‘ਵੋ…ਪੇ… ਭੋਜਨੀਯਾਨੀ’’ਤਿਇਮਿਨਾ ਵੋਸਾਟਿਤਕਸਰੂਪਂ. ਅਯ੍ਯਸਙ੍ਖਾਤਾਨਂ ਪਿਤਿਪਿਤਾਮਹਾਨਂ ਅਤ੍ਥਾਯ, ਤੇ ਵਾ ਉਦ੍ਦਿਸ੍ਸ ਛਡ੍ਡਿਤਾਨਿ ਵੋਸਾਟਿਤਕਸਙ੍ਖਤਾਨਿ ¶ ਖਾਦਨੀਯਭੋਜਨੀਯਾਨਿ ਅਯ੍ਯਵੋਸਾਟਿਤਕਾਨੀਤਿ ਵਿਗ੍ਗਹੋ ਕਾਤਬ੍ਬੋ. ਮਨੁਸ੍ਸਾ ਠਪੇਨ੍ਤਿ ਕਿਰਾਤਿ ਸਮ੍ਬਨ੍ਧੋ. ਯਨ੍ਤਿ ਖਾਦਨੀਯਭੋਜਨੀਯਂ. ਤੇਸਨ੍ਤਿ ਞਾਤਕਾਨਂ. ਪਿਣ੍ਡਂ ਪਿਣ੍ਡਂ ਕਤ੍ਵਾਤਿ ਸਙ੍ਘਾਟਂ ਸਙ੍ਘਾਟਂ ਕਤ੍ਵਾ. ਅਞ੍ਞਨ੍ਤਿ ਵੁਤ੍ਤਖਾਦਨੀਯਭੋਜਨੀਯਤੋ ਅਞ੍ਞਂ. ਉਮ੍ਮਾਰੇਪੀਤਿ ਸੁਸਾਨਸ੍ਸ ਇਨ੍ਦਖੀਲੇਪਿ. ਸੋ ਹਿ ਉਦ੍ਧਟੋ ਕਿਲੇਸਮਾਰੋ ਏਤ੍ਥਾਤਿ ‘‘ਉਮ੍ਮਾਰੋ’’ਤਿ ਵੁਚ੍ਚਤਿ. ਬੋਧਿਸਤ੍ਤੋ ਹਿ ਅਭਿਨਿਕ੍ਖਮਨਕਾਲੇ ਪੁਤ੍ਤਂ ਚੁਮ੍ਬਿਸ੍ਸਾਮੀਤਿ ਓਵਰਕਸ੍ਸ ਇਨ੍ਦਖੀਲੇ ਠਤ੍ਵਾ ਪਸ੍ਸਨ੍ਤੋ ਮਾਤਰਂ ਪੁਤ੍ਤਸ੍ਸ ਨਲਾਟੇ ਹਤ੍ਥਂ ਠਪੇਤ੍ਵਾ ਸਯਨ੍ਤਿਂ ਦਿਸ੍ਵਾ ‘‘ਸਚੇ ਮੇ ਪੁਤ੍ਤਂ ਗਣ੍ਹੇਯ੍ਯਂ, ਮਾਤਾ ਤਸ੍ਸ ਪਬੁਜ੍ਝੇਯ੍ਯ, ਪਬੁਜ੍ਝਮਾਨਾਯ ਅਨ੍ਤਰਾਯੋ ਭਵੇਯ੍ਯਾ’’ਤਿ ਅਭਿਨਿਕ੍ਖਮਨਨ੍ਤਰਾਯਭਯੇਨ ਪੁਤ੍ਤਦਾਰੇ ਪਰਿਚ੍ਚਜਿਤ੍ਵਾ ਇਨ੍ਦਖੀਲਤੋ ਨਿਵਤ੍ਤਿਤ੍ਵਾ ਮਹਾਭਿਨਿਕ੍ਖਮਨਂ ਨਿਕ੍ਖਮਿ. ਤਸ੍ਮਾ ਬੋਧਿਸਤ੍ਤਸ੍ਸ ਠਤ੍ਵਾ ਪੁਤ੍ਤਦਾਰੇਸੁ ਅਪੇਕ੍ਖਾਸਙ੍ਖਾਤਸ੍ਸ ਮਾਰਸ੍ਸ ਉਦ੍ਧਟਟ੍ਠਾਨਤ੍ਤਾ ਸੋ ਇਨ੍ਦਖੀਲੋ ਨਿਪ੍ਪਰਿਯਾਯੇਨ ‘‘ਉਮ੍ਮਾਰੋ’’ਤਿ ਵੁਚ੍ਚਤਿ, ਅਞ੍ਞੇ ਪਨ ਰੂਲ਼੍ਹੀਵਸੇਨ. ਥਿਰੋਤਿ ਥਦ੍ਧੋ. ਘਨਬਦ੍ਧੋਤਿ ਘਨੇਨ ਬਦ੍ਧੋ. ਕਥਿਨੇਨ ਮਂਸੇਨ ਆਬਦ੍ਧੋਤਿ ਅਤ੍ਥੋ. ਵਠਤਿ ਥੂਲੋ ਭਵਤੀਤਿ ਵਠੋ, ਮੁਦ੍ਧਜਦੁਤਿਯੋਯਂ, ਸੋ ਅਸ੍ਸਤ੍ਥੀਤਿ ਵਠਰੋਤਿ ਦਸ੍ਸੇਨ੍ਤੋ ਆਹ ‘‘ਵਠਰੋਤਿ ਥੂਲੋ’’ਤਿ. ‘‘ਸਲ੍ਲਕ੍ਖੇਮਾ’’ਤਿਇਮਿਨਾ ‘‘ਮਞ੍ਞੇ’’ਤਿ ਏਤ੍ਥ ਮਨਧਾਤੁ ਸਲ੍ਲਕ੍ਖਣਤ੍ਥੋ, ਮਕਾਰਸ੍ਸੇਕਾਰੋਤਿ ਦਸ੍ਸੇਤਿ. ਹੀਤਿ ਸਚ੍ਚਂ. ਤੇਸਨ੍ਤਿ ਮਨੁਸ੍ਸਾਨਂ.

੨੬੪. ਸਮ੍ਮਾਤਿ ਅਵਿਪਰੀਤਂ. ਅਸਲ੍ਲਕ੍ਖੇਤ੍ਵਾਤਿ ਆਹਾਰਸਦ੍ਦਸ੍ਸ ਖਾਦਨੀਯਭੋਜਨੀਯਾਦੀਸੁ ਨਿਰੂਲ਼੍ਹਭਾਵਂ ਅਮਞ੍ਞਿਤ੍ਵਾ. ਭਗਵਾ ਪਨ ਠਪੇਸੀਤਿ ਸਮ੍ਬਨ੍ਧੋ. ਯਥਾਉਪ੍ਪਨ੍ਨਸ੍ਸਾਤਿ ਯੇਨਾਕਾਰੇਨ ਉਪ੍ਪਨ੍ਨਸ੍ਸ ¶ . ਪਿਤਾ ਪੁਤ੍ਤਸਙ੍ਖਾਤੇ ਦਾਰਕੇ ਸਞ੍ਞਾਪੇਨ੍ਤੋ ਵਿਯ ਭਗਵਾ ਤੇ ਭਿਕ੍ਖੂ ਸਞ੍ਞਾਪੇਨ੍ਤੋਤਿ ਯੋਜਨਾ.

੨੬੫. ਏਤਦੇਵਾਤਿ ਤਿਣ੍ਣਮਾਕਾਰਾਨਮਞ੍ਞਤਰਵਸੇਨ ਅਦਿਨ੍ਨਮੇਵ ਸਨ੍ਧਾਯਾਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਮਾਤਿਕਾਯਂ ‘‘ਦਿਨ੍ਨ’’ਨ੍ਤਿ ਵੁਤ੍ਤਟ੍ਠਾਨਂ ਨਤ੍ਥਿ, ਅਥ ਕਸ੍ਮਾ ਪਦਭਾਜਨੇਯੇਵ ਵੁਤ੍ਤਨ੍ਤਿ ਆਹ ‘‘ਦਿਨ੍ਨਨ੍ਤਿ ਇਦ’’ਨ੍ਤਿਆਦਿ. ‘‘ਦਿਨ੍ਨ’’ਨ੍ਤਿ ਇਦਂ ਉਦ੍ਧਟਨ੍ਤਿ ਸਮ੍ਬਨ੍ਧੋ. ਅਸ੍ਸਾਤਿ ‘‘ਦਿਨ੍ਨ’’ਨ੍ਤਿ ਪਦਸ੍ਸ. ਨਿਦ੍ਦੇਸੇ ਚ ‘‘ਕਾਯੇਨ…ਪੇ… ਦੇਨ੍ਤੇ’’ਤਿ ਉਦ੍ਧਟਨ੍ਤਿ ਯੋਜਨਾ. ਏਵਨ੍ਤਿ ਇਮੇਹਿ ਤੀਹਾਕਾਰੇਹਿ ਦਦਮਾਨੇਤਿ ਸਮ੍ਬਨ੍ਧੋ. ਏਵਨ੍ਤਿ ਇਮੇਹਿ ਦ੍ਵੀਹਾਕਾਰੇਹਿ ¶ . ਆਦੀਯਮਾਨਨ੍ਤਿ ਸਮ੍ਬਨ੍ਧੋ. ਰਥਰੇਣੁਮ੍ਪੀਤਿ ਰਥਿਕਵੀਥਿਯਂ ਉਟ੍ਠਿਤਪਂਸੁਮ੍ਪਿ. ਪੁਬ੍ਬੇਤਿ ਪਠਮਪਵਾਰਣਸਿਕ੍ਖਾਪਦੇ. ਏਵਂ ਪਟਿਗ੍ਗਹਿਤਂ ਏਤਂ ਆਹਾਰਂ ਦਿਨ੍ਨਂ ਨਾਮ ਵੁਚ੍ਚਤੀਤਿ ਯੋਜਨਾ. ‘‘ਏਤਮੇਵਾ’’ਤਿ ਏਵਸ੍ਸ ਸਮ੍ਭਵਤੋ ਤਸ੍ਸ ਫਲਂ ਦਸ੍ਸੇਤੁਂ ਵੁਤ੍ਤਂ ‘‘ਨ ਇਦ’’ਨ੍ਤਿਆਦਿ. ਨਿਸ੍ਸਟ੍ਠਂ ਨ ਵੁਚ੍ਚਤੀਤਿ ਯੋਜਨਾ.

ਤਤ੍ਥਾਤਿ ‘‘ਕਾਯੇਨਾ’’ਤਿਆਦਿਵਚਨੇ. ਹੀਤਿ ਸਚ੍ਚਂ. ਨਤ੍ਥੁ ਕਰੀਯਤਿ ਇਮਾਯਾਤਿ ਨਤ੍ਥੁਕਰਣੀ, ਤਾਯ. ਨਾਸਾਪੁਟੇਨ ਪਟਿਗ੍ਗਣ੍ਹਾਤੀਤਿ ਸਮ੍ਬਨ੍ਧੋ. ਅਕਲ੍ਲਕੋਤਿ ਗਿਲਾਨੋ. ਹੀਤਿ ਸਚ੍ਚਂ. ਕਾਯੇਨ ਪਟਿਬਦ੍ਧੋ ਕਾਯਪਟਿਬਦ੍ਧੋ ਕਟਚ੍ਛੁਆਦੀਤਿ ਆਹ ‘‘ਕਟਚ੍ਛੁਆਦੀਸੂ’’ਤਿਆਦਿ. ਹੀਤਿ ਸਚ੍ਚਂ. ਪਾਤਿਯਮਾਨਨ੍ਤਿ ਪਾਤਾਪਿਯਮਾਨਂ.

ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ‘‘ਪਞ੍ਚਹਙ੍ਗੇਹੀ’’ਤਿ ਪਦਸ੍ਸ ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਥਾਮਮਜ੍ਝਿਮਸ੍ਸਾ’’ਤਿਆਦਿ. ਤਨ੍ਤਿ ਦਾਤਬ੍ਬਵਤ੍ਥੁਂ.

ਤਤ੍ਥਾਤਿ ‘‘ਹਤ੍ਥਪਾਸੋ ਪਞ੍ਞਾਯਤੀ’’ਤਿਵਚਨੇ. ਗਚ੍ਛਨ੍ਤੋਪਿ ਠਿਤੇਨੇਵ ਸਙ੍ਗਹਿਤੋ. ਭੂਮਟ੍ਠਸ੍ਸਾਤਿ ਭੂਮਿਯਂ ਠਿਤਸ੍ਸ. ਆਕਾਸਟ੍ਠਸ੍ਸਾਤਿ ਆਕਾਸੇ ਠਿਤਸ੍ਸ. ‘‘ਹਤ੍ਥਂ ਅਙ੍ਗ’’ਨ੍ਤਿ ਪਦੇਹਿ ਅਵਯਵਿਸਮ੍ਬਨ੍ਧੋ ਕਾਤਬ੍ਬੋ. ਵੁਤ੍ਤਨਯੇਨੇਵਾਤਿ ‘‘ਭੂਮਟ੍ਠਸ੍ਸ ਚ ਸੀਸੇਨਾ’’ਤਿਆਦਿਨਾ ਵੁਤ੍ਤਨਯੇਨੇਵ. ਪਕ੍ਖੀਤਿ ਸਕੁਣੋ. ਸੋ ਹਿ ਪਕ੍ਖਯੁਤ੍ਤਤ੍ਤਾ ਪਕ੍ਖੀਤਿ ਵੁਚ੍ਚਤਿ. ਹਤ੍ਥੀਤਿ ਕੁਞ੍ਜਰੋ. ਸੋ ਹਿ ਸੋਣ੍ਡਸਙ੍ਖਾਤਹਤ੍ਥਯੁਤ੍ਤਤ੍ਤਾ ਹਤ੍ਥੀਤਿ ਵੁਚ੍ਚਤਿ. ਅਦ੍ਧੇਨ ਅਟ੍ਠਮਂ ਰਤਨਮਸ੍ਸਾਤਿ ਅਦ੍ਧਟ੍ਠਮਰਤਨੋ, ਹਤ੍ਥੀ, ਤਸ੍ਸ. ਤੇਨਾਤਿ ਹਤ੍ਥਿਨਾ.

ਏਕੋ ਦਾਯਕੋ ਵਦਤੀਤਿ ਸਮ੍ਬਨ੍ਧੋ. ਓਣਮਤੀਤਿ ਹੇਟ੍ਠਾ ਨਮਤਿ. ਏਤ੍ਤਾਵਤਾਤਿ ਏਕਦੇਸਸਮ੍ਪਟਿਚ੍ਛਨਮਤ੍ਤੇਨ. ਤਤੋਤਿ ਸਮ੍ਪਟਿਚ੍ਛਨਤੋ. ਉਗ੍ਘਾਟੇਤ੍ਵਾਤਿ ਵਿਵਰਿਤ੍ਵਾ. ਕਾਜੇਨਾਤਿ ਬ੍ਯਾਭਙ੍ਗਿਯਾ. ਸਾ ਹਿ ਕਚਤਿ ਬਨ੍ਧਤਿ ਵਿਵਿਧਂ ਭਾਰਂ ਅਸ੍ਮਿਨ੍ਤਿ ਕਾਚੋਤਿ ਵੁਚ੍ਚਤਿ, ਚਕਾਰਸ੍ਸ ਜਕਾਰੇ ਕਤੇ ਕਾਜੋਪਿ ਯੁਤ੍ਤੋਯੇਵ. ਤਿਂਸ ਹਤ੍ਥਾ ਰਤਨਾਨਿ ਇਮਸ੍ਸਾਤਿ ਤਿਂਸਹਤ੍ਥੋ, ਵੇਣੁ. ਗੁਲ਼ਕੁਮ੍ਭੋਤਿ ¶ ਫਾਣਿਤੇਨ ਪੂਰਿਤੋ ਘਟੋ. ਪਟਿਗ੍ਗਹਿਤਮੇਵਾਤਿ ਕੁਮ੍ਭੇਸੁ ਹਤ੍ਥਪਾਸਤੋ ਬਹਿ ਠਿਤੇਸੁਪਿ ਅਭਿਹਾਰਕਸ੍ਸ ¶ ਹਤ੍ਥਪਾਸੇ ਠਿਤਤ੍ਤਾ ਪਟਿਗ੍ਗਹਿਤਮੇਵਾਤਿ ਵੁਤ੍ਤਂ ਹੋਤਿ. ਉਚ੍ਛੁਯਨ੍ਤਦੋਣਿਤੋਤਿ ਉਚ੍ਛੁਂ ਪੀਲ਼ਨਯਨ੍ਤਸ੍ਸ ਅਮ੍ਬਣਤੋ.

ਬਹੂ ਪਤ੍ਤਾ ਠਪਿਤਾ ਹੋਨ੍ਤੀਤਿ ਸਮ੍ਬਨ੍ਧੋ. ਯਤ੍ਥਾਤਿ ਯਸ੍ਮਿਂ ਠਾਨੇ. ਠਿਤਸ੍ਸ ਭਿਕ੍ਖੁਨੋ ਹਤ੍ਥਪਾਸੇਤਿ ਯੋਜਨਾ. ਠਤ੍ਵਾ ਫੁਸਿਤ੍ਵਾ ‘‘ਨਿਸਿਨ੍ਨਸ੍ਸ ਭਿਕ੍ਖੁਨੋ’’ਤਿ ਪਾਠਸੇਸੇਨ ਯੋਜੇਤਬ੍ਬਂ. ਠਿਤੇਨ ਵਾ ਨਿਸਿਨ੍ਨੇਨ ਵਾ ਨਿਪਨ੍ਨੇਨ ਵਾ ਦਾਯਕੇਨ ਦਿਯ੍ਯਤੀਤਿ ਸਮ੍ਬਨ੍ਧੋ.

ਪਥਵਿਯਂ ਠਿਤਾ ਹੋਨ੍ਤੀਤਿ ਸਮ੍ਬਨ੍ਧੋ. ਯਂ ਯਨ੍ਤਿ ਯਂ ਯਂ ਪਤ੍ਤਂ. ਯਤ੍ਥ ਕਤ੍ਥਚੀਤਿ ਯੇਸੁ ਕੇਸੁਚੀਤਿ ਸਮ੍ਬਨ੍ਧੋ. ਤਨ੍ਤਿ ਤਂ ਵਚਨਂ.

ਤਤ੍ਥ ਤਸ੍ਮਿਂ ਠਾਨੇ ਜਾਤੋ ਤਤ੍ਥਜਾਤੋ, ਅਲੁਤ੍ਤਸਮਾਸੋਯਂ, ਸੋਯੇਵ ਤਤ੍ਥਜਾਤਕੋ, ਤਸ੍ਮਿਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਤ੍ਥਜਾਤਕੇ ਨ ਰੁਹਤਿ ਯਥਾ, ਏਵਂ ਨ ਰੁਹਤਿਯੇਵਾਤਿ ਯੋਜਨਾ. ਥਾਮਮਜ੍ਝਿਮੇਨ ਪੁਰਿਸੇਨ ਸੁਟ੍ਠੁ ਹਰਿਤਬ੍ਬਨ੍ਤਿ ਸਂਹਾਰਿਯਂ, ਤਂਯੇਵ ਸਂਹਾਰਿਮਂ ਯਕਾਰਸ੍ਸ ਮਕਾਰਂ ਕਤ੍ਵਾ, ਨ ਸਂਹਾਰਿਮਂ ਅਸਂਹਾਰਿਮਂ, ਤਸ੍ਮਿਂ. ਤੇਪੀਤਿ ਤੇ ਅਸਂਹਾਰਿਮਾਪਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਤ੍ਥਜਾਤਕਸਙ੍ਖੇਪੂਪਗਾਤਿ ਤਤ੍ਥਜਾਤਕੇ ਸਮੋਧਾਨੇਤ੍ਵਾ ਖੇਪਂ ਪਕ੍ਖੇਪਂ ਉਪਗਤਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਇਦਞ੍ਹਿ ਵਾਕ੍ਯਨ੍ਤਰਤ੍ਤਾ ਪੁਨਪ੍ਪੁਨਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਾਨੀਤਿ ਤਿਨ੍ਤਿਣਿਕਾਦਿਪਣ੍ਣਾਨਿ. ਸਨ੍ਧਾਰੇਤੁਨ੍ਤਿ ਸਮ੍ਮਾ ਧਾਰੇਤੁਂ. ਠਿਤੋ ਦਾਯਕੋਤਿ ਸਮ੍ਬਨ੍ਧੋ.

ਲਦ੍ਧਸ੍ਸ ਲਦ੍ਧਸ੍ਸ ਵਤ੍ਥੁਸ੍ਸ ਸਨ੍ਨਿਧਿਟ੍ਠਾਨਤ੍ਤਾ, ਪਕ੍ਖਿਤ੍ਤਟ੍ਠਾਨਤ੍ਤਾ ਵਾ ਥਵੀਯਤਿ ਪਸਂਸੀਯਤੀਤਿ ਥਵਿਕਾ, ਤਤੋ. ਪੁਞ੍ਛਿਤ੍ਵਾ ਪਟਿਗ੍ਗਹੇਤ੍ਵਾਤਿ ‘‘ਪੁਞ੍ਛਿਤ੍ਵਾ ਵਾ ਪਟਿਗ੍ਗਹੇਤ੍ਵਾ ਵਾ’’ਤਿ ਅਨਿਯਮਵਿਕਪ੍ਪਤ੍ਥੋ ਵਾਸਦ੍ਦੋ ਅਜ੍ਝਾਹਰਿਤਬ੍ਬੋ. ਤੇਸੁ ਤੇਸੁ ਵਤ੍ਥੂਸੁ ਰਞ੍ਜਤਿ ਲਗ੍ਗਤੀਤਿ ਰਜੋ, ਤਂ. ਵਿਨਯੇ ਪਞ੍ਞਤ੍ਤਂ ਦੁਕ੍ਕਟਂ ਵਿਨਯਦੁਕ੍ਕਟਂ. ਤਂ ਪਨਾਤਿ ਭਿਕ੍ਖਂ ਪਨ. ਪਟਿਗ੍ਗਹੇਤ੍ਵਾ ਦੇਥਾਤਿ ਮਂ ਪਟਿਗ੍ਗਹਾਪੇਤ੍ਵਾ ਮਮ ਦੇਥਾਤਿ ਅਧਿਪ੍ਪਾਯੋ.

ਤਤੋ ਤਤੋਤਿ ਤਸ੍ਮਾ ਤਸ੍ਮਾ ਠਾਨਾ ਉਟ੍ਠਾਪੇਤ੍ਵਾਤਿ ਸਮ੍ਬਨ੍ਧੋ. ਤਨ੍ਤਿ ਭਿਕ੍ਖਂ. ਤਸ੍ਸਾਤਿ ਅਨੁਪਸਮ੍ਪਨ੍ਨਸ੍ਸ.

ਸੋ ਵਤ੍ਤਬ੍ਬੋਤਿ ਸੋ ਦਿਯ੍ਯਮਾਨੋ ਭਿਕ੍ਖੁ ਦਾਯਕੇਨ ਭਿਕ੍ਖੁਨਾ ਵਤ੍ਤਬ੍ਬੋਤਿ ਯੋਜਨਾ. ਇਮਨ੍ਤਿ ਸਰਜਪਤ੍ਤਂ. ਤੇਨਾਤਿ ਦਿਯ੍ਯਮਾਨਭਿਕ੍ਖੁਨਾ. ਤਥਾ ¶ ਕਾਤਬ੍ਬਨ੍ਤਿ ਯਥਾ ਦਾਯਕੇਨ ਭਿਕ੍ਖੁਨਾ ਵੁਤ੍ਤਂ, ਤਥਾ ¶ ਕਾਤਬ੍ਬਨ੍ਤਿ ਅਤ੍ਥੋ. ਉਪ੍ਲਵਤੀਤਿ ਉਪਰਿ ਗਚ੍ਛਤਿ, ਪ੍ਲੁ ਗਤਿਯਨ੍ਤਿ ਹਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੬ ਲ਼ਕਾਰਨ੍ਤਧਾਤੁ) ਵੁਤ੍ਤਂ. ਏਤ੍ਥ ਉਇਤਿ ਉਪਸਗ੍ਗਸ੍ਸ ਅਤ੍ਥਦਸ੍ਸਨਤ੍ਥਂ ‘‘ਉਪਰੀ’’ਤਿ ਵੁਤ੍ਤਂ, ਪਕਾਰਲਕਾਰਸਂਯੋਗੋ ਦਟ੍ਠਬ੍ਬੋ. ਪੋਤ੍ਥਕੇਸੁ ਪਨ ‘‘ਉਪ੍ਪਿਲਵਤੀ’’ਤਿ ਲਿਖਨ੍ਤਿ, ਸੋ ਅਪਾਠੋ. ਕਞ੍ਜਿਕਨ੍ਤਿ ਬਿਲਙ੍ਗਂ. ਤਞ੍ਹਿ ਕੇਨ ਜਲੇਨ ਅਞ੍ਜਿਯਂ ਅਭਿਬ੍ਯਤ੍ਤਂ ਅਸ੍ਸਾਤਿ ‘‘ਕਞ੍ਜਿਯ’’ਨ੍ਤਿ ਵੁਚ੍ਚਤਿ, ਤਮੇਵ ਕਞ੍ਜਿਕਂ ਯਕਾਰਸ੍ਸ ਕਕਾਰਂ ਕਤ੍ਵਾ. ਤਂ ਪਵਾਹੇਤ੍ਵਾ, ਅਪਨੇਤ੍ਵਾਤਿ ਅਤ੍ਥੋ. ਯਤ੍ਥਾਤਿ ਯਸ੍ਮਿਂ ਠਾਨੇ. ਸੁਕ੍ਖਮੇਵ ਭਤ੍ਤਂ ਭਜਿਤਬ੍ਬਟ੍ਠੇਨ ਸੇਵਿਤਬ੍ਬਟ੍ਠੇਨਾਤਿ ਸੁਕ੍ਖਭਤ੍ਤਂ, ਤਸ੍ਮਿਂ. ਪੁਰਤੋਤਿ ਭਿਕ੍ਖੁਸ੍ਸ ਪੁਰਤੋ, ਪੁਬ੍ਬੇ ਵਾ. ਫੁਸਿਤਾਨੀਤਿ ਬਿਨ੍ਦੂਨਿ. ਤਾਨਿ ਹਿ ਸਮ੍ਬਾਧਟ੍ਠਾਨੇਸੁਪਿ ਫੁਸਨ੍ਤੀਤਿ ਫੁਸਿਤਾਨੀਤਿ ਵੁਚ੍ਚਨ੍ਤਿ.

ਉਲ਼ੁਙ੍ਕੋਤਿ ਕੋਸਿਯਸਕੁਣਨਾਮੋ ਦੀਘਦਣ੍ਡਕੋ ਏਕੋ ਭਾਜਨਵਿਸੇਸੋ, ਤੇਨ. ਥੇਵਾਤਿ ਫੁਸਿਤਾਨਿ. ਤਾਨਿ ਹਿ ਸਮ੍ਬਾਧਟ੍ਠਾਨੇਸੁਪਿ ਫੁਸਿਤਤ੍ਤਾ ਥਵੀਯਨ੍ਤਿ ਪਸਂਸੀਯਨ੍ਤੀਤਿ ‘‘ਥੇਵਾ’’ਤਿ ਵੁਚ੍ਚਨ੍ਤਿ. ਚਰੁਕੇਨਾਤਿ ਚਰੀਯਤਿ ਭਕ੍ਖੀਯਤੀਤਿ ਚਰੁ, ਹਬ੍ਯਪਾਕੋ, ਤਂ ਕਰੋਤਿ ਅਨੇਨਾਤਿ ਚਰੁਕਂ, ਥਾਲ੍ਯਾਦਿਕਂ ਖੁਦ੍ਦਕਭਾਜਨਂ, ਤੇਨ ਆਕਿਰਿਯਮਾਨੇਤਿ ਸਮ੍ਬਨ੍ਧੋ. ਕਾਲ਼ਵਣ੍ਣਕਾਮੇਹਿ ਮਾਨੀਯਤੀਤਿ ਮਸਿ. ਖਾਦਤੀਤਿ ਛਾਰੋ ਖਕਾਰਸ੍ਸ ਛਕਾਰਂ, ਦਕਾਰਸ੍ਸ ਚ ਰਕਾਰਂ ਕਤ੍ਵਾ, ਖਾਰਰਸੋ, ਸੋ ਇਮਿਸ੍ਸਤ੍ਥੀਤਿ ਛਾਰਿਕਾ. ਉਪ੍ਪਤਿਤ੍ਵਾਤਿ ਉਦ੍ਧਂ ਗਨ੍ਤ੍ਵਾ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਫਾਲੇਤ੍ਵਾਤਿ ਛਿਨ੍ਦਿਤ੍ਵਾ. ਦੇਨ੍ਤਾਨਂ ਅਨੁਪਸਮ੍ਪਨ੍ਨਾਨਨ੍ਤਿ ਸਮ੍ਬਨ੍ਧੋ. ਪਾਯਾਸਸ੍ਸਾਤਿ ਪਾਯਾਸੇਨ. ਤਥਾਪੀਤਿ ਤੇਨ ਮੁਖਵਟ੍ਟਿਯਾ ਗਹਣਾਕਾਰੇਨਪਿ.

ਆਭੋਗਂ ਕਤ੍ਵਾਤਿ ‘‘ਪਟਿਗ੍ਗਹੇਸ੍ਸਾਮੀ’’ਤਿ ਮਨਸਿਕਾਰਂ ਕਤ੍ਵਾ. ਸੋਤਿ ਨਿਦ੍ਦਂ ਓਕ੍ਕਨ੍ਤੋ ਭਿਕ੍ਖੁ. ਵਟ੍ਟਤਿਯੇਵਾਤਿ ਆਭੋਗਸ੍ਸ ਕਤਤ੍ਤਾ ਵਟ੍ਟਤਿਯੇਵ. ਅਨਾਦਰਨ੍ਤਿ ਅਨਾਦਰੇਨ, ਕਰਣਤ੍ਥੇ ਚੇਤਂ ਉਪਯੋਗਵਚਨਂ, ਅਨਾਦਰਂ ਹੁਤ੍ਵਾਤਿ ਵਾ ਯੋਜੇਤਬ੍ਬਂ. ਕੇਚੀਤਿ ਅਭਯਗਿਰਿਵਾਸਿਨੋ. ਕਾਯੇਨ ਪਟਿਬਦ੍ਧੋ ਕਾਯਪਟਿਬਦ੍ਧੋ, ਤੇਨ ਪਟਿਬਦ੍ਧੋ ਕਾਯਪਟਿਬਦ੍ਧਪਟਿਬਦ੍ਧੋ ¶ , ਤੇਨ. ਵਚਨਮਤ੍ਤਮੇਵਾਤਿ ‘‘ਪਟਿਬਦ੍ਧਪਟਿਬਦ੍ਧ’’ਨ੍ਤਿ ਏਕਂ ਅਤਿਰੇਕਂ ਪਟਿਬਦ੍ਧਵਚਨਮਤ੍ਤਮੇਵ ਨਾਨਂ, ਅਤ੍ਥਤੋ ਪਨ ਕਾਯਪਟਿਬਦ੍ਧਮੇਵਾਤਿ ਅਧਿਪ੍ਪਾਯੋ. ਯਮ੍ਪੀਤਿ ਯਮ੍ਪਿ ਵਤ੍ਥੁ. ਤਤ੍ਰਾਤਿ ਤਸ੍ਮਿਂ ਵਟ੍ਟਨੇ. ਤਨ੍ਤਿ ਅਨੁਜਾਨਨਂ.

ਨੇਯ੍ਯੋ ਅਧਿਪ੍ਪਾਯਂ ਨੇਤ੍ਵਾ ਞਾਤੋ ਅਤ੍ਥੋ ਇਮਸ੍ਸਾਤਿ ਨੇਯ੍ਯਤ੍ਥਂ. ਏਤ੍ਥਾਤਿ ਸੁਤ੍ਤੇ, ਸੁਤ੍ਤਸ੍ਸ ਵਾ. ਯਨ੍ਤਿ ਵਤ੍ਥੁ ਪਤਤੀਤਿ ਸਮ੍ਬਨ੍ਧੋ. ਪਰਿਗਲ਼ਿਤ੍ਵਾਤਿ ਭਸ੍ਸਿਤ੍ਵਾ. ਸੁਦ੍ਧਾਯਾਤਿ ਨਿਰਜਾਯ. ਸਾਮਨ੍ਤਿ ਸਯਂ. ਪੁਞ੍ਛਿਤ੍ਵਾ ਵਾਤਿਆਦੀਸੁ ਤਯੋ ਵਾਸਦ੍ਦਾ ਅਨਿਯਮਵਿਕਪ੍ਪਤ੍ਥਾ. ਪੁਞ੍ਛਿਤਾਦੀਸੁ ਹਿ ਏਕਸ੍ਮਿਂ ਕਿਚ੍ਚੇ ¶ ਕਤੇ ਇਤਰਕਿਚ੍ਚਂ ਕਾਤਬ੍ਬਂ ਨਤ੍ਥੀਤਿ ਅਧਿਪ੍ਪਾਯੋ. ਤੇਨਾਤਿ ਤੇਨ ਭਿਕ੍ਖੁਨਾ, ‘‘ਆਹਰਾਪੇਤੁਮ੍ਪੀ’’ਤਿਪਦੇ ਕਾਰਿਤਕਮ੍ਮਂ. ‘‘ਕਸ੍ਮਾ ਨ ਵਟ੍ਟਤੀ’’ਤਿ ਪੁਚ੍ਛਾ. ਹੀਤਿ ਵਿਤ੍ਥਾਰੋ. ਵਦਨ੍ਤੇਨ ਭਗਵਤਾਤਿ ਸਮ੍ਬਨ੍ਧੋ. ਏਤ੍ਥਾਤਿ ਸੁਤ੍ਤਵਚਨੇਸੁ. ‘‘ਪਰਿਚ੍ਚਤ੍ਤਂ ਤਂ ਭਿਕ੍ਖਵੇ ਦਾਯਕੇਹੀ’’ਤਿ ਵਚਨੇਨਾਤਿ ਯੋਜਨਾ. ਅਧਿਪ੍ਪਾਯੋਤਿ ਨੀਤਤ੍ਥੋ ਅਧਿਪ੍ਪਾਯੋ, ਨਿਪ੍ਪਰਿਯਾਯੇਨ ਇਤਤ੍ਥੋ ਞਾਤਤ੍ਥੋ ਅਧਿਪ੍ਪਾਯੋਤਿ ਵੁਤ੍ਤਂ ਹੋਤਿ.

ਏਵਂ ਨੀਤਤ੍ਥਮਧਿਪ੍ਪਾਯਂ ਦਸ੍ਸੇਤ੍ਵਾ ਨੇਯ੍ਯਤ੍ਥ, ਮਧਿਪ੍ਪਾਯਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਾ ਚਾ’’ਤਿ ਆਦਿ. ਤਨ੍ਤਿ ਪਰਿਭੁਞ੍ਜਨਂ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ. ਦੁਤਿਯਦਿਵਸੇਪੀਤਿ ਪਿਸਦ੍ਦੋ ਸਮ੍ਪਿਣ੍ਡਨਤ੍ਥੋ, ਅਪਰਦਿਵਸੇਪੀਤਿ ਅਤ੍ਥੋ. ਅਧਿਪ੍ਪਾਯੋਤਿ ਨੇਯ੍ਯਤ੍ਥੋ ਅਧਿਪ੍ਪਾਯੋ ਨੇਤ੍ਵਾ ਇਯ੍ਯਤ੍ਥੋ ਞਾਤਤ੍ਥੋ ਅਧਿਪ੍ਪਾਯੋਤਿ ਵੁਤ੍ਤਂ ਹੋਤਿ.

ਭੁਞ੍ਜਨ੍ਤਾਨਂ ਭਿਕ੍ਖੂਨਨ੍ਤਿ ਸਮ੍ਬਨ੍ਧੋ. ਹੀਤਿ ਵਿਤ੍ਥਾਰੋ. ਦਨ੍ਤਾਤਿ ਦਸਨਾ. ਤੇ ਹਿ ਦਂਸੀਯਨ੍ਤਿ ਭਕ੍ਖੀਯਨ੍ਤਿ ਏਤੇਹੀਤਿ ‘‘ਦਨ੍ਤਾ’’ਤਿ ਵੁਚ੍ਚਨ੍ਤਿ. ਸਤ੍ਥਂਯੇਵ ਸਤ੍ਥਕਂ ਖੁਦ੍ਦਕਟ੍ਠੇਨ, ਤੇਨ ਪਟਿਗ੍ਗਹਿਤੇਨ ਸਤ੍ਥਕੇਨ. ਏਤਨ੍ਤਿ ਮਲਂ. ਤਨ੍ਤਿ ਲੋਹਗਨ੍ਧਮਤ੍ਤਂ. ਪਰਿਹਰਨ੍ਤੀਤਿ ਪਟਿਗ੍ਗਹੇਤ੍ਵਾ ਹਰਨ੍ਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਂ ਸਤ੍ਥਕਂ ਪਰਿਭੋਗਤ੍ਥਾਯ ਯਸ੍ਮਾ ਨ ਪਰਿਹਰਨ੍ਤਿ, ਤਸ੍ਮਾ ਏਸੇਵ ਨਯੋਤਿ ਅਤ੍ਥੋ. ਉਗ੍ਗਹਿਤਪਚ੍ਚਯਾ, ਸਨ੍ਨਿਧਿਪਚ੍ਚਯਾ ਵਾ ਦੋਸੋ ਨਤ੍ਥੀਤਿ ਵੁਤ੍ਤਂ ਹੋਤਿ. ਤਤ੍ਥਾਤਿ ਤੇਸੁ ਤਕ੍ਕਖੀਰੇਸੁ. ਨੀਲਿਕਾਤਿ ਨੀਲਵਣ੍ਣਾ ਸ੍ਨੇਹਾ. ਆਮਕਤਕ੍ਕਾਦੀਸੂਤਿ ਅਪਕ੍ਕੇਸੁ ਤਕ੍ਕਖੀਰੇਸੁ.

ਕਿਲਿਟ੍ਠਉਦਕਨ੍ਤਿ ¶ ਸਮਲਂ ਉਦਕਂ. ਤਸ੍ਸਾਤਿ ਸਾਮਣੇਰਸ੍ਸ. ਪਤ੍ਤਗਤਂ ਓਦਨਨ੍ਤਿ ਸਮ੍ਬਨ੍ਧੋ. ਅਸ੍ਸਾਤਿ ਸਾਮਣੇਰਸ੍ਸ. ਉਗ੍ਗਹਿਤਕੋਤਿ ਅਵਗਹਿਤਕੋ. ‘‘ਉਞ੍ਞਾਤੋ’’ਤਿਆਦੀਸੁ (ਸਂ. ਨਿ. ੧.੧੧੨) ਵਿਯ ਉਕਾਰੋ ਓਕਾਰਵਿਪਰੀਤੋ ਹੋਤਿ, ਅਪਟਿਗ੍ਗਹੇਤ੍ਵਾ ਗਹਿਤਤ੍ਤਾ ਦੁਗ੍ਗਹਿਤਕੋਤਿ ਵੁਤ੍ਤਂ ਹੋਤਿ.

ਏਤੇਨਾਤਿ ਓਦਨੇਨ. ਪਟਿਗ੍ਗਹਿਤਮੇਵ ਹੋਤਿ ਹਤ੍ਥਤੋ ਅਮੁਤ੍ਤਤ੍ਤਾਤਿ ਅਧਿਪ੍ਪਾਯੋ.

ਪੁਨ ਪਟਿਗ੍ਗਹੇਤਬ੍ਬਂ ਸਾਪੇਕ੍ਖੇ ਸਤੀਤਿ ਅਧਿਪ੍ਪਾਯੋ. ਏਤ੍ਤੋਤਿ ਇਤੋ ਪਤ੍ਤਤੋ. ਸਾਮਣੇਰੋ ਪਕ੍ਖਿਪਤੀਤਿ ਸਮ੍ਬਨ੍ਧੋ. ਤਤੋਤਿ ਪਤ੍ਤਤੋ. ਕੇਚੀਤਿ ਅਭਯਗਿਰਿਵਾਸਿਨੋ. ਤਨ੍ਤਿ ‘‘ਪੁਨ ਪਟਿਗ੍ਗਹੇਤਬ੍ਬ’’ਨ੍ਤਿ ਵਦਨ੍ਤਾਨਂ ਕੇਸਞ੍ਚਿ ਆਚਰਿਯਾਨਂ ਵਚਨਂ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਯਨ੍ਤਿ ਪੂਵਭਤ੍ਤਾਦਿ.

ਅਤ੍ਤਨੋ ¶ ਵਾਤਿ ਸਾਮਣੇਰਸ੍ਸ ਵਾ. ਸਾਮਣੇਰਾਤਿ ਆਮਨ੍ਤਨਂ. ਤਸ੍ਸਾਤਿ ਸਾਮਣੇਰਸ੍ਸ. ਭਾਜਨੇਤਿ ਯਾਗੁਪਚਨਕਭਾਜਨੇ. ਯਾਗੁਕੁਟਨ੍ਤਿ ਯਾਗੁਯਾ ਪੂਰਿਤਂ ਕੁਟਂ. ਤਨ੍ਤਿ ਯਾਗੁਕੁਟਂ. ‘‘ਭਿਕ੍ਖੁਨਾ ਪਟਿਗ੍ਗਣ੍ਹਾਪੇਤੁ’’ਨ੍ਤਿ ਕਾਰਿਤਕਮ੍ਮਂ ਉਪਨੇਤਬ੍ਬਂ. ਗੀਵਂ ਠਪੇਤ੍ਵਾ ਆਵਜ੍ਜੇਤੀਤਿ ਸਮ੍ਬਨ੍ਧੋ. ਆਵਜ੍ਜੇਤੀਤਿ ਪਰਿਣਾਮੇਤਿ.

ਪਟਿਗ੍ਗਹਣੂਪਗਂ ਭਾਰਨ੍ਤਿ ਥਾਮਮਜ੍ਝਿਮੇਨ ਪੁਰਿਸੇਨ ਸਂਹਾਰਿਮਂ ਭਾਰਂ. ਬਲਵਤਾ ਸਾਮਣੇਰੇਨਾਤਿ ਸਮ੍ਬਨ੍ਧੋ. ਤੇਲਘਟਂ ਵਾਤਿ ਤੇਲੇਨ ਪਕ੍ਖਿਤ੍ਤਂ ਘਟਂ ਵਾ. ਲਗ੍ਗੇਨ੍ਤੀਤਿ ਲਮ੍ਬੇਨ੍ਤਿ. ਅਯਮੇਵ ਵਾ ਪਾਠੋ.

ਨਾਗਸ੍ਸ ਦਨ੍ਤੋ ਵਿਯਾਤਿ ਨਾਗਦਨ੍ਤਕੋ, ਸਦਿਸਤ੍ਥੇ ਕੋ. ਅਙ੍ਕੀਯਤੇ ਲਕ੍ਖੀਯਤੇ ਅਨੇਨਾਤਿ ਅਙ੍ਕੁਸੋ, ਗਜਮਤ੍ਥਕਮ੍ਹਿ ਵਿਜ੍ਝਨਕਣ੍ਡਕੋ. ਅਙ੍ਕੁਸੋ ਵਿਯਾਤਿ ਅਙ੍ਕੁਸਕੋ, ਤਸ੍ਮਿਂ ਅਙ੍ਕੁਸਕੇ ਵਾ ਲਗ੍ਗਿਤਾ ਹੋਨ੍ਤੀਤਿ ਸਮ੍ਬਨ੍ਧੋ. ਗਣ੍ਹਤੋਤਿ ਗਣ੍ਹਨ੍ਤਸ੍ਸ. ਮਞ੍ਚਸ੍ਸ ਹੇਟ੍ਠਾ ਹੇਟ੍ਠਾਮਞ੍ਚੋ, ਤਸ੍ਮਿਂ. ਤਨ੍ਤਿ ਤੇਲਥਾਲਕਂ.

ਆਰੋਹਨ੍ਤੇਹਿ ¶ ਚ ਓਰੋਹਨ੍ਤੇਹਿ ਚ ਨਿਚ੍ਚਂ ਸੇਵੀਯਤੀਤਿ ਨਿਸ੍ਸੇਣੀ, ਤਸ੍ਸਾ ਮਜ੍ਝਂ ਨਿਸ੍ਸੇਣਿਮਜ੍ਝਂ, ਤਸ੍ਮਿਂ. ਕਣ੍ਣੇ ਉਟ੍ਠਿਤਂ ਕਣ੍ਣਿਕਂ, ਕਣ੍ਣਮਲਂ, ਕਣ੍ਣਿਕਂ ਵਿਯ ਕਣ੍ਣਿਕਂ, ਯਥਾ ਹਿ ਕਣ੍ਣਮਲਂ ਕਣ੍ਣਤੋ ਉਟ੍ਠਹਿਤ੍ਵਾ ਸਯਂ ਪਵਤ੍ਤਤਿ, ਏਵਂ ਤੇਲਾਦਿਤੋ ਉਟ੍ਠਹਿਤ੍ਵਾ ਸਯਂ ਪਵਤ੍ਤਤੀਤਿ ਵੁਤ੍ਤਂ ਹੋਤਿ. ਘਨਚੁਣ੍ਣਨ੍ਤਿ ਕਥਿਨਚੁਣ੍ਣਂ. ਤਂਸਮੁਟ੍ਠਾਨਮੇਵ ਨਾਮਾਤਿ ਤਤੋ ਤੇਲਾਦਿਤੋ ਸਮੁਟ੍ਠਾਨਮੇਵ ਨਾਮ ਹੋਤੀਤਿ ਅਤ੍ਥੋ. ਏਤਨ੍ਤਿ ਕਣ੍ਣਿਕਾਦਿ. ਇਦਂ ਪਦਂ ਪੁਬ੍ਬਾਪਰਾਪੇਕ੍ਖਂ.

ਯੋਤ੍ਤੇਨਾਤਿ ਰਜ੍ਜੁਨਾ. ਅਞ੍ਞੋ ਦੇਤੀਤਿ ਸਮ੍ਬਨ੍ਧੋ.

ਪਵਿਸਨ੍ਤੇ ਚ ਨਿਕ੍ਖਮਨ੍ਤੇ ਚ ਵਰਤਿ ਆਵਰਤਿ ਇਮਾਯਾਤਿ ਵਤਿ, ਤਂ. ਉਚ੍ਛੂਤਿ ਰਸਾਲੋ. ਸੋ ਹਿ ਉਸਤਿ ਵਿਸਂ ਦਾਹੇਤੀਤਿ ਉਚ੍ਛੂਤਿ ਵੁਚ੍ਚਤਿ, ਤਂ. ਤਿਮ੍ਬਰੁਸਕਨ੍ਤਿ ਤਿਨ੍ਦੁਕਂ. ਤਞ੍ਹਿ ਤੇਮੇਤਿ ਭੁਞ੍ਜਨ੍ਤਂ ਪੁਗ੍ਗਲਂ ਅਦ੍ਦੇਤਿ ਰਸੇਨਾਤਿ ਤਿਮ੍ਬੋ, ਰੁਸਤਿ ਖੁਦ੍ਦਿਤਂ ਨਾਸੇਤੀਤਿ ਰੁਸਕੋ, ਤਿਮ੍ਬੋ ਚ ਸੋ ਰੁਸਕੋ ਚਾਤਿ ‘‘ਤਿਮ੍ਬਰੁਸਕੋ’’ਤਿ ਵੁਚ੍ਚਤਿ, ਤਂ. ਵਤਿਦਣ੍ਡਕੇਸੂਤਿ ਵਤਿਯਾ ਅਤ੍ਥਾਯ ਨਿਕ੍ਖਣਿਤੇਸੁ ਦਣ੍ਡਕੇਸੁ. ਮਯਂ ਪਨਾਤਿ ਸਙ੍ਗਹਕਾਰਾਚਰਿਯਭੂਤਾ ਬੁਦ੍ਧਘੋਸਨਾਮਕਾ ਮਯਂ ਪਨ, ਅਤ੍ਤਾਨਂ ਸਨ੍ਧਾਯ ਬਹੁਵਚਨਵਸੇਨ ਵੁਤ੍ਤਂ. ਨ ਪੁਥੁਲੋ ਪਾਕਾਰੋਤਿ ਅਡ੍ਢਤੇਯ੍ਯਹਤ੍ਥਪਾਸਾਨਤਿਕ੍ਕਮਂ ਸਨ੍ਧਾਯ ਵੁਤ੍ਤਂ. ਹਤ੍ਥਸਤਮ੍ਪੀਤਿ ਰਤਨਸਤਮ੍ਪਿ.

ਸੋਤਿ ¶ ਸਾਮਣੇਰੋ. ਭਿਕ੍ਖੁਸ੍ਸ ਦੇਤੀਤਿ ਯੋਜਨਾ. ਅਪਰੋਤਿ ਸਾਮਣੇਰੋ.

ਫਲਂ ਇਮਿਸ੍ਸਤ੍ਥੀਤਿ ਫਲਿਨੀ, ਇਨਪਚ੍ਚਯੋ ਇਤ੍ਥਿਲਿਙ੍ਗਜੋਤਕੋ ਈ, ਤਂ ਸਾਖਨ੍ਤਿ ਯੋਜਨਾ. ਫਲਿਨਿਸਾਖਨ੍ਤਿ ਸਮਾਸਤੋਪਿ ਪਾਠੋ ਅਤ੍ਥਿ. ਮਚ੍ਛਿਕਵਾਰਣਤ੍ਥਨ੍ਤਿ ਮਧੁਫਾਣਿਤਾਦੀਹਿ ਮਕ੍ਖਨਟ੍ਠਾਨੇ ਨਿਲੀਯਨ੍ਤੀਤਿ ਮਕ੍ਖਿਕਾ, ਤਾਯੇਵ ਮਚ੍ਛਿਕਾ ਖਕਾਰਸ੍ਸ ਛਕਾਰਂ ਕਤ੍ਵਾ, ਤਾਸਂ ਨਿਵਾਰਣਾਯ. ਮੂਲਪਟਿਗ੍ਗਹਮੇਵਾਤਿ ਮੂਲੇ ਪਟਿਗ੍ਗਹਣਮੇਵ, ਪਠਮਪਟਿਗ੍ਗਹਮੇਵਾਤਿ ਵੁਤ੍ਤਂ ਹੋਤਿ.

ਭਿਕ੍ਖੁ ਗਚ੍ਛਤੀਤਿ ਸਮ੍ਬਨ੍ਧੋ. ਅਰਿਤ੍ਤੇਨਾਤਿ ਕੇਨਿਪਾਤੇਨ. ਤਞ੍ਹਿ ਅਰਤਿ ਨਾਵਾ ਗਚ੍ਛਤਿ ਅਨੇਨਾਤਿ ਅਰਿਤ੍ਤਂ, ਤੇਨ. ਤਨ੍ਤਿ ਪਟਿਗ੍ਗਹਣਾਰਹਂ ਭਣ੍ਡਂ ¶ . ਅਨੁਪਸਮ੍ਪਨ੍ਨੇਨਾਤਿ ਕਾਰਿਤਕਮ੍ਮਂ. ਤਸ੍ਮਿਮ੍ਪੀਤਿ ਚਾਟਿਕੁਣ੍ਡਕੇਪਿ. ਤਨ੍ਤਿ ਅਨੁਪਸਮ੍ਪਨ੍ਨਂ.

ਪਾਥੇਯ੍ਯਤਣ੍ਡੁਲੇਤਿ ਪਥਸ੍ਸ ਹਿਤੇ ਤਣ੍ਡੁਲੇ. ਤੇਸਨ੍ਤਿ ਸਾਮਣੇਰਾਨਂ. ਇਤਰੇਹੀਤਿ ਭਿਕ੍ਖੂਹਿ ਗਹਿਤਤਣ੍ਡੁਲੇਹਿ. ਸਬ੍ਬੇਹਿ ਭਿਕ੍ਖੂਹਿ ਭੁਤ੍ਤਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਭਿਕ੍ਖੂਹਿ ਗਹਿਤੇਹਿ ਸਾਮਣੇਰਸ੍ਸ ਤਣ੍ਡੁਲੇਹਿ ਯਾਗੁਪਚਨੇ ਨ ਦਿਸ੍ਸਤੀਤਿ ਸਮ੍ਬਨ੍ਧੋ. ਕਾਰਣਨ੍ਤਿ ਪਰਿਵਤ੍ਤੇਤ੍ਵਾ ਭੁਤ੍ਤਸ੍ਸ ਚ ਅਪਰਿਵਤ੍ਤੇਤ੍ਵਾ ਭੁਤ੍ਤਸ੍ਸ ਚ ਕਾਰਣਂ.

ਭਤ੍ਤਂ ਪਚਿਤੁਕਾਮੋ ਸਾਮਣੇਰੋਤਿ ਯੋਜਨਾ. ਭਿਕ੍ਖੁਨਾ ਆਰੋਪੇਤਬ੍ਬਂ, ਅਗ੍ਗਿ ਨ ਕਾਤਬ੍ਬੋਤਿ ਸਮ੍ਬਨ੍ਧੋ. ਪੁਨ ਪਟਿਗ੍ਗਹਣਕਿਚ੍ਚਂ ਨਤ੍ਥਿ ਮੂਲੇ ਪਟਿਗ੍ਗਹਿਤਤ੍ਤਾਤਿ ਅਧਿਪ੍ਪਾਯੋ.

ਅਸ੍ਸਾਤਿ ਸਾਮਣੇਰਸ੍ਸ. ਤਤੋਤਿ ਅਗ੍ਗਿਜਾਲਨਤੋ.

ਤਤ੍ਤੇ ਉਦਕੇਤਿ ਉਦਕੇ ਤਾਪੇ. ਤਤੋਤਿ ਤਣ੍ਡੁਲਪਕ੍ਖਿਪਨਤੋ.

ਪਿਧਾਨਨ੍ਤਿ ਉਕ੍ਖਲਿਪਿਧਾਨਂ. ਤਸ੍ਸੇਵਾਤਿ ਹਤ੍ਥਕੁਕ੍ਕੁਚ੍ਚਕਸ੍ਸ ਭਿਕ੍ਖੁਨੋ ਏਵ. ਦਬ੍ਬਿਂ ਵਾਤਿ ਕਟਚ੍ਛੁਂ ਵਾ. ਸੋ ਹਿ ਦਰੀਯਤਿ ਵਿਲੋਲ਼ੀਯਤਿ ਇਮਾਯਾਤਿ ਦਬ੍ਬੀਤਿ ਵੁਚ੍ਚਤਿ.

ਤਤ੍ਰਾਤਿ ਤਸ੍ਮਿਂ ਠਪਨੇ. ਤਸ੍ਸੇਵਾਤਿ ਲੋਲਭਿਕ੍ਖੁਸ੍ਸੇਵ. ਤਤੋਤਿ ਪਤ੍ਤਤੋ. ਪੁਨ ਤਤੋਤਿ ਸਾਖਾਦਿਤੋ. ਤਤ੍ਥਾਤਿ ਫਲਰੁਕ੍ਖੇ.

ਵਿਤਕ੍ਕਂ ਸੋਧੇਤੁਨ੍ਤਿ ‘‘ਮਯ੍ਹਮ੍ਪਿ ਦਸ੍ਸਤੀ’’ਤਿ ਵਿਤਕ੍ਕਂ ਸੋਧੇਤੁਂ. ਤਤੋਤਿ ਅਮ੍ਬਫਲਾਦਿਤੋ.

ਪੁਨ ¶ ਤਤੋਤਿ ਮਾਤਾਪਿਤੂਨਮਤ੍ਥਾਯ ਗਹਿਤਤੇਲਾਦਿਤੋ. ਤੇਤਿ ਮਾਤਾਪਿਤਰੋ. ਤਤੋਯੇਵਾਤਿ ਤੇਹਿਯੇਵ ਤਣ੍ਡੁਲੇਹਿ ਸਮ੍ਪਾਦੇਤ੍ਵਾਤਿ ਸਮ੍ਬਨ੍ਧੋ.

ਏਤ੍ਥਾਤਿ ਤਾਪਿਤਉਦਕੇ. ਅਮੁਞ੍ਚਨ੍ਤੇਨੇਵ ਹਤ੍ਥੇਨਾਤਿ ਯੋਜਨਾ. ਅਙ੍ਗਨ੍ਤਿ ਵਿਨਾਸਂ ਗਚ੍ਛਨ੍ਤੀਤਿ ਅਙ੍ਗਾਰਾ. ਦਰੀਯਨ੍ਤਿ ਫਲੀਯਨ੍ਤੀਤਿ ਦਾਰੂਨਿ.

ਵੁਤ੍ਤੋ ਸਾਮਣੇਰੋਤਿ ਯੋਜਨਾ.

ਗਵਤਿ ¶ ਪਰਿਭੁਞ੍ਜਨ੍ਤਾਨਂ ਵਿਸ੍ਸਟ੍ਠਂ ਸਦ੍ਦਂ ਕਰੋਤੀਤਿ ਗੁਲ਼ੋ, ਗੁਲ਼ਤਿ ਵਿਸਤੋ ਜੀਵਿਤਂ ਰਕ੍ਖਤੀਤਿ ਵਾ ਗੁਲ਼ੋ, ਤਂ ਭਾਜੇਨ੍ਤੋ ਭਿਕ੍ਖੂਤਿ ਸਮ੍ਬਨ੍ਧੋ. ਤਸ੍ਸਾਤਿ ਲੋਲਸਾਮਣੇਰਸ੍ਸ.

ਧੂਮਸ੍ਸਤ੍ਥਾਯ ਵਟ੍ਟੀਯਤਿ ਵਟ੍ਟਿਤ੍ਵਾ ਕਰੀਯਤੀਤਿ ਧੂਮਵਟ੍ਟਿ, ਤਂ. ਮੁਖੀਯਤਿ ਵਿਪਰੀਯਤੀਤਿ ਮੁਖਂ. ਕਂ ਵੁਚ੍ਚਤਿ ਸੀਸਂ, ਤਂ ਤਿਟ੍ਠਤਿ ਏਤ੍ਥਾਤਿ ਕਣ੍ਠੋ.

ਭਤ੍ਤੁਗ੍ਗਾਰੋਤਿ ਉਦ੍ਧਂ ਗਿਰਤਿ ਨਿਗ੍ਗਿਰਤੀਤਿ ਉਗ੍ਗਾਰੋ, ਭਤ੍ਤਮੇਵ ਉਗ੍ਗਾਰੋ ਭਤ੍ਤੁਗ੍ਗਾਰੋ, ਉਗ੍ਗਾਰਭਤ੍ਤਨ੍ਤਿ ਅਤ੍ਥੋ. ਦਨ੍ਤਨ੍ਤਰੇਤਿ ਦਨ੍ਤਵਿਵਰੇ.

ਉਪਕਟ੍ਠੇ ਕਾਲੇਤਿ ਆਸਨ੍ਨੇ ਮਜ੍ਝਨ੍ਹਿਕੇ ਕਾਲੇ. ਕਕ੍ਖਾਰੇਤ੍ਵਾਤਿ ਸਞ੍ਚਿਤ੍ਵਾ. ਤਸ੍ਸ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਦ੍ਵੇ ਤਯੋ ਖੇਲ਼ਪਿਣ੍ਡੇ ਪਾਤੇਤ੍ਵਾ’’ਤਿ. ਫਲ਼ੁਸਙ੍ਖਾਤਂ ਸਿਙ੍ਗਂ ਵਿਸਾਣਂ ਅਸ੍ਮਿਂ ਅਤ੍ਥੀਤਿ ਸਿਙ੍ਗੀ, ਸੋਯੇਵ ਕਟੁਕਭਯੇਹਿ ਵਿਰਮਿਤਬ੍ਬਤ੍ਤਾ ਸਿਙ੍ਗੀਵੇਰੋਤਿ ਵੁਚ੍ਚਤਿ. ਅਙ੍ਕੀਯਤਿ ਰੁਕ੍ਖੋ ਨਵਂ ਉਗ੍ਗਤੋਤਿ ਲਕ੍ਖੀਯਤਿ ਏਤੇਹੀਤਿ ਅਙ੍ਕੁਰਾ, ਸਮਂ ਲੋਣੇਨ ਉਦਕਂ, ਸਮਂ ਵਾ ਉਦਕੇਨ ਲੋਣਂ ਅਸ੍ਮਿਨ੍ਤਿ ਸਮੁਦ੍ਦੋ, ਤਸ੍ਸ ਉਦਕਂ ਅਵਯਵੀਅਵਯਵਭਾਵੇਨਾਤਿ ਸਮੁਦ੍ਦੋਦਕਂ, ਤੇਨ ਅਪਟਿਗ੍ਗਹਿਤੇਨਾਤਿ ਸਮ੍ਬਨ੍ਧੋ. ਫਾਣਤਿ ਗੁਲ਼ਤੋ ਥਦ੍ਧਭਾਵਂ ਗਚ੍ਛਤੀਤਿ ਫਾਣਿਤਂ. ਕਰੇਨ ਹਤ੍ਥੇਨ ਗਹਿਤਬ੍ਬਾਤਿ ਕਰਕਾ, ਵਸ੍ਸੋਪਲਂ, ਕਰੇਨ ਗਣ੍ਹਿਤੁਮਰਹਾਤਿ ਅਤ੍ਥੋ. ਕਤਕਟ੍ਠਿਨਾਤਿ ਕਤਕਨਾਮਕਸ੍ਸ ਏਕਸ੍ਸ ਰੁਕ੍ਖਵਿਸੇਸਸ੍ਸ ਅਟ੍ਠਿਨਾ. ਤਨ੍ਤਿ ਉਦਕਂ. ਕਪਿਤ੍ਥੋਤਿ ਏਕਸ੍ਸ ਅਮ੍ਬਿਲਫਲਸ੍ਸ ਰੁਕ੍ਖਵਿਸੇਸਸ੍ਸ ਨਾਮਂ.

ਬਹਲਨ੍ਤਿ ਆਵਿਲਂ. ਸਨ੍ਦਿਤ੍ਵਾਤਿ ਵਿਸਨ੍ਦਿਤ੍ਵਾ. ਕਕੁਧਸੋਬ੍ਭਾਦਯੋਤਿ ਕਕੁਧਰੁਕ੍ਖਸਮੀਪੇ ਠਿਤਾ ਸੋਬ੍ਭਾਦਯੋ. ਰੁਕ੍ਖਤੋਤਿ ਕਕੁਧਰੁਕ੍ਖਤੋ. ਪਰਿਤ੍ਤਨ੍ਤਿ ਅਪ੍ਪਕਂ.

ਪਾਨੀਯਘਟੇ ਪਕ੍ਖਿਤ੍ਤਾਨਿ ਹੋਨ੍ਤੀਤਿ ਸਮ੍ਬਨ੍ਧੋ. ਤਨ੍ਤਿ ਵਾਸਮਤ੍ਤਂ ਉਦਕਂ. ਤਤ੍ਥੇਵਾਤਿ ਠਪਿਤਪੁਪ੍ਫਵਾਸਿਤਪਾਨੀਯੇਯੇਵ ¶ . ਠਪਿਤਂ ਦਨ੍ਤਕਟ੍ਠਨ੍ਤਿ ਸਮ੍ਬਨ੍ਧੋ. ਅਜਾਨਨ੍ਤਸ੍ਸ ਭਿਕ੍ਖੁਸ੍ਸਾਤਿ ਯੋਜਨਾ. ਅਨਾਦਰੇ ਚੇਤਂ ਸਾਮਿਵਚਨਂ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਕਿਂ ¶ ਮਹਾਭੂਤਂ ਵਟ੍ਟਤਿ, ਕਿਂ ਨ ਵਟ੍ਟਤੀਤਿ ਯੋਜਨਾ. ਯਂ ਪਨਾਤਿ ਮਹਾਭੂਤਂ ਪਨ. ਅਙ੍ਗਲਗ੍ਗਨ੍ਤਿ ਅਙ੍ਗੇਸੁ ਲਗ੍ਗਂ, ਮਹਾਭੂਤਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਸੇਦੇ. ਸੁਝਾਪਿਤਨ੍ਤਿ ਅਙ੍ਗਾਰਸਦਿਸਂ ਕਤ੍ਵਾ ਸੁਟ੍ਠੁ ਝਾਪਿਤਂ.

ਚਤ੍ਤਾਰੀਤਿ ਪਥਵੀ ਛਾਰਿਕਾ ਗੂਥਂ ਮੁਤ੍ਤਨ੍ਤਿ ਚਤ੍ਤਾਰਿ. ਮਹਾਵਿਕਟਾਨੀਤਿ ਮਹਨ੍ਤਾਨਿ ਸਪ੍ਪਦਟ੍ਠਕ੍ਖਣਸਙ੍ਖਾਤੇ ਵਿਕਾਰਕਾਲੇ ਕਤ੍ਤਬ੍ਬਾਨਿ ਓਸਧਾਨਿ. ਏਤ੍ਥਾਤਿ ‘‘ਅਸਤਿ ਕਪ੍ਪਿਯਕਾਰਕੇ’’ਤਿ ਵਚਨੇ. ਕਾਲੋਦਿਸ੍ਸਂ ਨਾਮਾਤਿ ਬ੍ਯਾਧੋਦਿਸ੍ਸ, ਪੁਗ੍ਗਲੋਦਿਸ੍ਸ, ਕਾਲੋਦਿਸ੍ਸ, ਸਮਯੋਦਿਸ੍ਸ, ਦੇਸੋਦਿਸ੍ਸ, ਵਸੋਦਿਸ੍ਸ, ਭੇਸਜ੍ਜੋਦਿਸ੍ਸਸਙ੍ਖਾਤੇਸੁ ਸਤ੍ਤਸੁ ਓਦਿਸ੍ਸੇਸੁ ਕਾਲੋਦਿਸ੍ਸਂ ਨਾਮਾਤਿ ਅਤ੍ਥੋ. ਦਸਮਂ.

ਭੋਜਨਵਗ੍ਗੋ ਚਤੁਤ੍ਥੋ.

੫. ਅਚੇਲਕਵਗ੍ਗੋ

੧. ਅਚੇਲਕਸਿਕ੍ਖਾਪਦ-ਅਤ੍ਥਯੋਜਨਾ

੨੬੯. ਅਚੇਲਕਵਗ੍ਗਸ੍ਸ ਪਠਮੇ ਪਰਿਵਿਸਤਿ ਏਤ੍ਥਾਤਿ ਪਰਿਵੇਸਨਨ੍ਤਿ ਦਸ੍ਸੇਨ੍ਤੋ ਆਹ ‘‘ਪਰਿਵੇਸਨਟ੍ਠਾਨ’’ਨ੍ਤਿ. ਪਰਿਬ੍ਬਾਜਕਪਬ੍ਬਜਸਦ੍ਦਾ ਸਮਾਨਾਤਿ ਆਹ ‘‘ਪਰਿਬ੍ਬਾਜਕਸਮਾਪਨ੍ਨੋਤਿ ਪਬ੍ਬਜ੍ਜਂ ਸਮਾਪਨ੍ਨੋ’’ਤਿ. ਤਿਤ੍ਥੇਨ ਸਮਂ ਪੂਰਤੀਤਿ ਸਮਤਿਤ੍ਥੀਕਂ, ਨਦੀਆਦੀਸੁ ਉਦਕਂ, ਸਮਤਿਤ੍ਥਿਕਂ ਵਿਯਾਤਿ ਸਮਤਿਤ੍ਥਿਕਂ, ਪਤ੍ਤਭਾਜਨੇਸੁ ਯਾਗੁਭਤ੍ਤਂ. ਤੇਸਨ੍ਤਿ ਮਾਤਾਪਿਤੂਨਂ ਦੇਨ੍ਤਸ੍ਸਾਤਿ ਸਮ੍ਬਨ੍ਧੋ. ‘‘ਦਾਪੇਤੀ’’ਤਿ ਏਤ੍ਥ ਦਾਧਾਤੁਯਾ ਸਮ੍ਪਦਾਨਸ੍ਸ ਸੁਵਿਜਾਨਿਤਤ੍ਤਾ ਤਂ ਅਦਸ੍ਸੇਤ੍ਵਾ ਕਾਰਿਤਕਮ੍ਮਮੇਵ ਦਸ੍ਸੇਨ੍ਤੋ ਆਹ ‘‘ਅਨੁਪਸਮ੍ਪਨ੍ਨੇਨਾ’’ਤਿ.

੨੭੩. ‘‘ਸਨ੍ਤਿਕੇ’’ਤਿਇਮਿਨਾ ‘‘ਉਪਨਿਕ੍ਖਿਪਿਤ੍ਵਾ’’ਤਿ ਏਤ੍ਥ ਉਪਸਦ੍ਦਸ੍ਸ ਸਮੀਪਤ੍ਥਂ ਦਸ੍ਸੇਤਿ. ਤੇਸਨ੍ਤਿ ¶ ਤਿਤ੍ਥਿਯਾਨਂ. ਤਤ੍ਥਾਤਿ ਭਾਜਨੇ. ਇਤੋਤਿ ਪਤ੍ਤਤੋ. ਇਧਾਤਿ ਮਯ੍ਹਂ ਭਾਜਨੇ. ਨਨ੍ਤਿ ਖਾਦਨੀਯਭੋਜਨੀਯਂ. ਤਸ੍ਸਾਤਿ ਤਿਤ੍ਥਿਯਸ੍ਸਾਤਿ. ਪਠਮਂ.

੨. ਉਯ੍ਯੋਜਨਸਿਕ੍ਖਾਪਦਂ

੨੭੪. ਦੁਤਿਯੇ ¶ ਪਟਿਕ੍ਕਮਨਅਸਨਸਾਲਸਦ੍ਦਾਨਂ ਪਰਿਯਾਯਤ੍ਤਾ ਵੁਤ੍ਤਂ ‘‘ਅਸਨਸਾਲਾਯਪੀ’’ਤਿ. ਭਤ੍ਤਸ੍ਸ ਵਿਸ੍ਸਜ੍ਜਨਂ ਭਤ੍ਤਵਿਸ੍ਸਗ੍ਗੋਤਿ ਕਤੇ ਭਤ੍ਤਕਿਚ੍ਚਨ੍ਤਿ ਆਹ ‘‘ਭਤ੍ਤਕਿਚ੍ਚ’’ਨ੍ਤਿ. ਸਮ੍ਭੂਧਾਤੁਸ੍ਸ ਪਪੁਬ੍ਬਅਪਧਾਤ੍ਵਤ੍ਥਤ੍ਤਾ ਵੁਤ੍ਤਂ ‘‘ਨ ਪਾਪੁਣੀ’’ਤਿ.

੨੭੬. ਵੁਤ੍ਤਾਵਸੇਸਨ੍ਤਿ ਵੁਤ੍ਤੇਹਿ ਮਾਤੁਗਾਮੇਨ ਸਦ੍ਧਿਂ ਹਸਿਤੁਕਾਮਤਾਦੀਹਿ ਅਵਸੇਸਂ. ਤਸ੍ਮਿਨ੍ਤਿ ਉਯ੍ਯੋਜਿਤਭਿਕ੍ਖੁਮ੍ਹਿ. ਅਤ੍ਥਤੋਤਿ ਵਿਜਹਨ੍ਤਵਿਜਹਿਤਭਿਕ੍ਖੂਨਂ ਅਵਿਨਾਭਾਵਸਙ੍ਖਾਤਅਤ੍ਥਤੋ. ਇਤਰੇਨਾਤਿ ਉਯ੍ਯੋਜਕਭਿਕ੍ਖੁਨਾ. ਤਤ੍ਥਾਤਿ ‘‘ਦਸ੍ਸਨੂਪਚਾਰਂ ਵਾ ਸਵਨੂਪਚਾਰਂ ਵਾ’’ਤਿਵਚਨੇ. ਏਤ੍ਥਾਤਿ ਨਿਦ੍ਧਾਰਣਸਮੁਦਾਯੋ, ਦਸ੍ਸਨੂਪਚਾਰਸਵਨੂਪਚਾਰੇਸੂਤਿ ਅਤ੍ਥੋ. ‘‘ਤਥਾਤਿਇਮਿਨਾ ਦ੍ਵਾਦਸਹਤ੍ਥਪਮਾਣਂ ਅਤਿਦਿਸਤਿ. ਤੇਹੀਤਿ ਕੁਟ੍ਟਾਦੀਹਿ. ਤਸ੍ਸਾਤਿ ਦਸ੍ਸਨੂਪਚਾਰਾਤਿਕ੍ਕਮਸ੍ਸ. ‘‘ਵੁਤ੍ਤਪਕਾਰਮਨਾਚਾਰ’’ਨ੍ਤਿ ਇਮਿਨਾ ‘‘ਨ ਅਞ੍ਞੋ ਕੋਚਿ ਪਚ੍ਚਯੋ’’ਤਿ ਏਤ੍ਥ ਅਞ੍ਞਸਦ੍ਦਸ੍ਸ ਅਪਾਦਾਨਂ ਦਸ੍ਸੇਤਿ, ‘‘ਕਾਰਣ’’ਨ੍ਤਿਇਮਿਨਾ ਪਚ੍ਚਯਸਦ੍ਦਸ੍ਸਤ੍ਥਂ.

੨੭੭. ਕਲਿਸਦ੍ਦਸ੍ਸ ਪਾਪਪਰਾਜਯਸਙ੍ਖਾਤੇਸੁ ਦ੍ਵੀਸੁ ਅਤ੍ਥੇਸੁ ਪਾਪਸਙ੍ਖਾਤੋ ਕੋਧੋਤਿ ਆਹ ‘‘ਕਲੀਤਿ ਕੋਧੋ’’ਤਿ. ‘‘ਆਣ’’ਨ੍ਤਿਇਮਿਨਾ ਸਾਸਨਸਦ੍ਦਸ੍ਸਤ੍ਥਂ ਦਸ੍ਸੇਤਿ. ਵੁਤ੍ਤਞ੍ਹਿ ‘‘ਆਣਾ ਚ ਸਾਸਨਂ ਞੇਯ੍ਯ’’ਨ੍ਤਿ. ਕੋਧਵਸੇਨ ਵਦਤੀਤਿ ਸਮ੍ਬਨ੍ਧੋ. ਦਸ੍ਸੇਤ੍ਵਾ ਵਦਤੀਤਿ ਯੋਜਨਾ. ਇਮਸ੍ਸ ਠਾਨਂ ਨਿਸਜ੍ਜਂ ਆਲੋਕਿਤਂ ਵਿਲੋਕਿਤਂ ਪਸ੍ਸਥ ਭੋਤਿ ਯੋਜਨਾ. ਇਮਿਨਾਪੀਤਿ ਅਮਨਾਪਵਚਨਂ ਵਚਨੇਨਾਪੀਤਿ. ਦੁਤਿਯਂ.

੩. ਸਭੋਜਨਸਿਕ੍ਖਾਪਦਂ

੨੭੯. ਤਤਿਯੇ ‘‘ਸਯਨਿਯਘਰੇ’’ਤਿ ਵਤ੍ਤਬ੍ਬੇ ਯਕਾਰਲੋਪਂ ਕਤ੍ਵਾ ‘‘ਸਯਨਿਘਰੇ’’ਤਿ ਵੁਤ੍ਤਨ੍ਤਿ ਆਹ ‘‘ਸਯਨਿਘਰੇ’’ਤਿ. ਯਤੋਤਿ ਏਤ੍ਥ ਤੋਸਦ੍ਦੋ ਪਠਮਾਦੀਸੁ ਅਤ੍ਥੇਸੁ ਦਿਸ੍ਸਤਿ. ‘‘ਯਤੋਨਿਦਾਨ’’ਨ੍ਤਿਆਦੀਸੁ (ਸੁ. ਨਿ. ੨੭੫) ਪਠਮਤ੍ਥੇ. ‘‘ਅਨ੍ਤਰਾਯੇ ਅਸੇਸਤੋ’’ਤਿਆਦੀਸੁ (ਧ. ਸ. ਅਟ੍ਠ. ਗਨ੍ਥਾਰਮ੍ਭਕਥਾ ੭) ਦੁਤਿਯਤ੍ਥੇ ¶ . ‘‘ਅਨਿਚ੍ਚਤੋ’’ਤਿਆਦੀਸੁ (ਪਟ੍ਠਾ. ੧.੧.੪੦੯) ਤਤਿਯਤ੍ਥੇ. ‘‘ਮਾਤਿਤੋ ਪਿਤਿਤੋ’’ਤਿਆਦੀਸੁ (ਦੀ. ਨਿ. ੧.੩੧੧) ਪਞ੍ਚਮ੍ਯਤ੍ਥੇ. ‘‘ਯਂ ¶ ਪਰਤੋ ਦਾਨਪਚ੍ਚਯਾ’’ਤਿਆਦੀਸੁ (ਜਾ. ੨.੨੨.੫੮੫) ਛਟ੍ਠ੍ਯਤ੍ਥੇ. ‘‘ਪੁਰਤੋ ਪਚ੍ਛਤੋ’’ਤਿਆਦੀਸੁ (ਪਾਚਿ. ੫੭੬) ਸਤ੍ਤਮ੍ਯਤ੍ਥੇ. ‘‘ਪਦਮਤੋ’’ਤਿਆਦੀਸੁ ਕਾਰਣਤ੍ਥੇ ਦਿਸ੍ਸਤਿ. ਇਧਾਪਿ ਕਾਰਣਤ੍ਥੇਯੇਵਾਤਿ ਆਹ ‘‘ਯਸ੍ਮਾ’’ਤਿ. ਯਸ੍ਮਾ ਕਾਰਣਾ ਅਯ੍ਯਸ੍ਸ ਭਿਕ੍ਖਾ ਦਿਨ੍ਨਾ, ਤਸ੍ਮਾ ਗਚ੍ਛਥ ਭਨ੍ਤੇ ਤੁਮ੍ਹੇਤਿ ਅਤ੍ਥੋ. ਯਨ੍ਤਿ ਭਿਕ੍ਖਂ. ਵੋਤਿ ਤੁਮ੍ਹੇਹਿ. ਅਧਿਪ੍ਪਾਯੋਤਿ ਪੁਰਿਸਸ੍ਸ ਅਜ੍ਝਾਸਯੋ. ‘‘ਪਰਿਯੁਟ੍ਠਿਤੋ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ਅਤ੍ਥਪਕਰਣਾਦਿਤੋ ਰਾਗਪਰਿਯੁਟ੍ਠਿਤੋਵਾਧਿਪ੍ਪੇਤੋਤਿ ਆਹ ‘‘ਰਾਗਪਰਿਯੁਟ੍ਠਿਤੋ’’ਤਿ, ਰਾਗੇਨ ਪਰਿਭਵਿਤ੍ਵਾ ਉਟ੍ਠਿਤੋਤਿ ਅਤ੍ਥੋ.

੨੮੦. ਸਭੋਜਨਨ੍ਤਿ ਏਤ੍ਥ ਸਕਾਰੋ ਸਹਸਦ੍ਦਕਾਰਿਯੋ ਚ ਅਕਾਰੁਕਾਰਾਨਂ ਅਸਰੂਪਤ੍ਤਾ ਅਕਾਰਤੋ ਉਕਾਰਸ੍ਸ ਲੋਪੋ ਚ ਤੀਸੁ ਪਦੇਸੁ ਪਚ੍ਛਿਮਾਨਂ ਦ੍ਵਿਨ੍ਨਂ ਪਦਾਨਂ ਤੁਲ੍ਯਤ੍ਥਨਿਸ੍ਸਿਤਸਮਾਸੋ ਚ ਪੁਬ੍ਬਪਦੇਨ ਸਹ ਭੇਦਨਿਸ੍ਸਿਤਬਾਹਿਰਤ੍ਥਸਮਾਸੋ ਚ ਹੋਤਿ, ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਹ ਉਭੋਹਿ ਜਨੇਹੀ’’ਤਿ. ਅਥ ਵਾ ਭੁਞ੍ਜਿਤਬ੍ਬਨ੍ਤਿ ਭੋਜਨਂ, ਸਂ ਵਿਜ੍ਜਤਿ ਭੋਜਨਂ ਅਸ੍ਮਿਂ ਕੁਲੇਤਿ ਸਭੋਜਨਨ੍ਤਿ ਦਸ੍ਸੇਨ੍ਤੋ ਆਹ ‘‘ਅਥ ਵਾ’’ਤਿਆਦਿ. ਹੀਤਿ ਸਚ੍ਚਂ. ਤੇਨੇਵਾਤਿ ਤੇਨੇਵ ਅਞ੍ਞਮਞ੍ਞਂ ਭੁਞ੍ਜਿਤਬ੍ਬਤ੍ਤਾ. ਅਸ੍ਸਾਤਿ ‘‘ਸਭੋਜਨੇ’’ਤਿਪਦਸ੍ਸ. ਘਰੇਤਿ ਏਤ੍ਥ ਪੁਬ੍ਬੋ ਸਯਨਿਸਦ੍ਦੋ ਲੋਪੋਤਿ ਆਹ ‘‘ਸਯਨਿਘਰੇ’’ਤਿ. ਇਮਿਨਾ ‘‘ਦਤ੍ਤੋ’’ਤਿਆਦੀਸੁ ਵਿਯ ਪੁਬ੍ਬਪਦਲੋਪਸਮਾਸਂ ਦਸ੍ਸੇਤਿ. ਪਿਟ੍ਠਸਙ੍ਘਾਟਸ੍ਸਾਤਿ ਏਤ੍ਥ ਪਿਟ੍ਠਸਙ੍ਘਾਟੋ ਨਾਮ ਨ ਅਞ੍ਞਸ੍ਸ ਯਸ੍ਸ ਕਸ੍ਸਚਿ, ਅਥ ਖੋ ਸਯਨਿਘਰਗਬ੍ਭਸ੍ਸੇਵਾਤਿ ਆਹ ‘‘ਤਸ੍ਸ ਸਯਨਿਘਰਗਬ੍ਭਸ੍ਸਾ’’ਤਿ. ਯਥਾ ਵਾ ਤਥਾ ਵਾਤਿ ਯੇਨ ਵਾ ਤੇ ਨ ਵਾ ਆਕਾਰੇਨ. ਕਤਸ੍ਸਾਤਿ ਪਿਟ੍ਠਿਵਂਸਂ ਆਰੋਪੇਤ੍ਵਾ ਵਾ ਅਨਾਰੋਪੇਤ੍ਵਾ ਵਾ ਕਤਸ੍ਸਾਤਿ. ਤਤਿਯਂ.

੨੮੪. ਚਤੁਤ੍ਥਪਞ੍ਚਮੇਸੁ ਯਥਾ ਚ ਸਭੋਜਨਸਿਕ੍ਖਾਪਦਂ ਪਠਮਪਾਰਾਜਿਕਸਮੁਟ੍ਠਾਨਂ, ਏਵਮੇਵ ਤਾਨਿਪੀਤਿ ਯੋਜਨਾਤਿ. ਚਤੁਤ੍ਥਪਞ੍ਚਮਾਨਿ.

੬. ਚਾਰਿਤ੍ਤਸਿਕ੍ਖਾਪਦਂ

੨੯੪. ਛਟ੍ਠੇ ¶ ਕਸ੍ਮਾ ਤੇਹਿ ‘‘ਦੇਥਾਵੁਸੋ ਭਤ੍ਤ’’ਨ੍ਤਿ ਵੁਤ੍ਤਂ, ਨਨੁ ਭਿਕ੍ਖੂਨਂ ਏਵਂ ਵਤ੍ਤੁਂ ਨ ਵਟ੍ਟਤੀਤਿ ਆਹ ‘‘ਏਤ੍ਥ ਤਂ ਕਿਰਾ’’ਤਿਆਦਿ. ਤਸ੍ਮਾਤਿ ਯਸ੍ਮਾ ਅਭਿਹਟਂ ਅਹੋਸਿ, ਤਸ੍ਮਾ.

੨੯੫. ਇਦਂ ਪਨ ਵਚਨਂ ਆਹਾਤਿ ਸਮ੍ਬਨ੍ਧੋ. ਪਸਾਦਞ੍ਞਥਤ੍ਤਨ੍ਤਿ ਪਸਾਦਸ੍ਸ ਅਞ੍ਞੇਨਾਕਾਰੇਨ ਭਾਵੋ. ਨਨ੍ਤਿ ਖਾਦਨੀਯਂ. ‘‘ਗਹੇਤ੍ਵਾ ਆਗਮਂਸੂ’’ਤਿਇਮਿਨਾ ‘‘ਉਸ੍ਸਾਰਿਯਿਤ੍ਥਾ’’ਤਿ ਏਤ੍ਥ ਉਕਾਰਸ੍ਸ ਉਗ੍ਗਹਤ੍ਥਤਞ੍ਚ ¶ ਸਰਧਾਤੁਸ੍ਸ ਗਤ੍ਯਤ੍ਥਤਞ੍ਚ ਅਜ੍ਜਤਨਿਞੁਂਵਿਭਤ੍ਤਿਯਾ ਤ੍ਥਤ੍ਤਞ੍ਚ ਦਸ੍ਸੇਤਿ, ਉਗ੍ਗਹੇਤ੍ਵਾ ਸਾਰਿਂਸੁ ਅਗਮਂਸੂਤਿ ਅਤ੍ਥੋ.

੨੯੮. ਯਤ੍ਥਾਤਿ ਯਸ੍ਮਿਂ ਠਾਨੇ. ਠਿਤਸ੍ਸ ਭਿਕ੍ਖੁਨੋ ਚਿਤ੍ਤਂ ਉਪ੍ਪਨ੍ਨਨ੍ਤਿ ਯੋਜਨਾ. ਤਤੋਤਿ ਚਿਤ੍ਤੁਪ੍ਪਨ੍ਨਤੋ. ਯਨ੍ਤਿ ਭਿਕ੍ਖੁਂ. ਪਕਤਿਵਚਨੇਨਾਤਿ ਉਚ੍ਚਾਸਦ੍ਦਮਕਤ੍ਵਾ ਪਵਤ੍ਤੇਨ ਸਭਾਵਵਚਨੇਨ. ਅਨ੍ਤੋਵਿਹਾਰੇਤਿ ਵਚਨਸ੍ਸ ਅਤਿਸਮ੍ਬਾਧਤ੍ਤਾ ਅਯੁਤ੍ਤਭਾਵਂ ਮਞ੍ਞਮਾਨੋ ਆਹ ‘‘ਅਪਿ ਚ ਅਨ੍ਤੋਉਪਚਾਰਸੀਮਾਯਾ’’ਤਿ.

੩੦੨. ਗਾਮਸ੍ਸ ਅਨ੍ਤਰੇ ਆਰਾਮੋ ਤਿਟ੍ਠਤੀਤਿ ਅਨ੍ਤਰਾਰਾਮੋ ਵਿਹਾਰੋ, ਤਂ ਗਚ੍ਛਤੀਤਿ ਦਸ੍ਸੇਨ੍ਤੋ ਆਹ ‘‘ਅਨ੍ਤੋਗਾਮੇ’’ਤਿਆਦੀਤਿ. ਛਟ੍ਠਂ.

੭. ਮਹਾਨਾਮਸਿਕ੍ਖਾਪਦਂ

੩੦੩. ਸਤ੍ਤਮੇ ‘‘ਭਗਵਤੋ’’ਤਿਪਦਂ ‘‘ਚੂਲ਼ਪਿਤੁਪੁਤ੍ਤੋ’’ਤਿਪਦੇ ਸਮ੍ਬਨ੍ਧੋ, ‘‘ਮਹਲ੍ਲਕਤਰੋ’’ਤਿਪਦੇ ਅਪਾਦਾਨਂ. ਚੂਲ਼ਪਿਤੁਪੁਤ੍ਤੋਤਿ ਸੁਦ੍ਧੋਦਨੋ, ਸਕ੍ਕੋਦਨੋ, ਸੁਕ੍ਕੋਦਨੋ, ਧੋਤੋਦਨੋ, ਅਮਿਤੋਦਨੋਤਿ ਪਞ੍ਚ ਜਨਾ ਭਾਤਰੋ, ਅਮਿਤਾ, ਪਾਲਿਤਾਤਿ ਦ੍ਵੇ ਭਗਿਨਿਯੋ. ਤੇਸੁ ਭਗਵਾ ਚ ਨਨ੍ਦੋ ਚ ਜੇਟ੍ਠਭਾਤੁਭੂਤਸ੍ਸ ਸੁਦ੍ਧੋਦਨਸ੍ਸ ਪੁਤ੍ਤਾ, ਆਨਨ੍ਦੋ ਕਨਿਟ੍ਠਭਾਤੁਭੂਤਸ੍ਸ ਅਮਿਤੋਦਨਸ੍ਸ ਪੁਤ੍ਤੋ, ਮਹਾਨਾਮੋ ਚ ਅਨੁਰੁਦ੍ਧੋ ਚ ਤਤਿਯਸ੍ਸ ਸੁਕ੍ਕੋਦਨਸ੍ਸ ਪੁਤ੍ਤਾ. ਸਕ੍ਕੋਦਨਧੋਤੋਦਨਾਨਂ ਪੁਤ੍ਤਾ ਅਪਾਕਟਾ. ਤਿਸ੍ਸਤ੍ਥੇਰੋ ਅਮਿਤਾਯ ਨਾਮ ਭਗਿਨਿਯਾ ਪੁਤ੍ਤੋ, ਪਾਲਿਤਾਯ ਪੁਤ੍ਤਧੀਤਰਾ ਅਪਾਕਟਾ. ਤਸ੍ਮਾ ਚੂਲ਼ਪਿਤੁਨੋ ਸੁਕ੍ਕੋਦਨਸ੍ਸ ¶ ਪੁਤ੍ਤੋ ਚੂਲ਼ਪਿਤੁਪੁਤ੍ਤੋਤਿ ਅਤ੍ਥੋ ਦਟ੍ਠਬ੍ਬੋ. ਦ੍ਵੀਸੁ ਫਲੇਸੂਤਿ ਹੇਟ੍ਠਿਮੇਸੁ ਦ੍ਵੀਸੁ ਫਲੇਸੁ. ਉਸ੍ਸਨ੍ਨਸਦ੍ਦੋ ਬਹੁਪਰਿਯਾਯੋਤਿ ਆਹ ‘‘ਬਹੂ’’ਤਿ. ਵਜਤੋਤਿ ਗੋਟ੍ਠਤੋ. ਤਞ੍ਹਿ ਗਾਵੋ ਗੋਚਰਟ੍ਠਾਨਤੋ ਪਟਿਕ੍ਕਮਿਤ੍ਵਾ ਨਿਵਾਸਤ੍ਥਾਯ ਵਜਨ੍ਤਿ ਗਚ੍ਛਨ੍ਤਿ ਅਸ੍ਮਿਨ੍ਤਿ ਵਜੋਤਿ ਵੁਚ੍ਚਤਿ.

੩੦੬. ਤਸ੍ਮਿਂ ਸਮਯੇਤਿ ਤਸ੍ਮਿਂ ਪਵਾਰਣਸਮਯੇ. ‘‘ਏਤ੍ਤਕੇਹੀ’’ਤਿਪਦਸ੍ਸ ਨਾਮਵਸੇਨ ਵਾ ਪਰਿਮਾਣਵਸੇਨ ਵਾ ਦੁਵਿਧਸ੍ਸ ਅਤ੍ਥਸ੍ਸ ਅਧਿਪ੍ਪੇਤਤ੍ਤਾ ਵੁਤ੍ਤਂ ‘‘ਨਾਮਵਸੇਨ ਪਰਿਮਾਣਵਸੇਨਾ’’ਤਿ. ਤੇਸੁ ਨਾਮਂ ਸਨ੍ਧਾਯ ਏਤਂ ਨਾਮਂ ਏਤੇਸਂ ਭੇਸਜ੍ਜਾਨਨ੍ਤਿ ਏਤ੍ਤਕਾਨੀਤਿ ਵਚਨਤ੍ਥੋ ਕਾਤਬ੍ਬੋ, ਪਰਿਮਾਣਂ ਸਨ੍ਧਾਯ ਏਤਂ ਪਰਿਮਾਣਂ ਏਤੇਸਨ੍ਤਿ ਏਤ੍ਤਕਾਨੀਤਿ ਵਚਨਤ੍ਥੋ ਕਾਤਬ੍ਬੋ. ‘‘ਅਞ੍ਞਂ ਭੇਸਜ੍ਜ’’ਨ੍ਤਿ ਏਤ੍ਥ ਅਞ੍ਞਸਦ੍ਦਸ੍ਸ ਅਪਾਦਾਨਂ ਨਾਮਂ ਵਾ ਪਰਿਮਾਣਂ ਵਾ ਭਵੇਯ੍ਯਾਤਿ ਆਹ ‘‘ਸਬ੍ਬਿਨਾ ਪਵਾਰਿਤੋ’’ਤਿਆਦਿ.

੩੧੦. ਯੇਤਿ ¶ ਦਾਯਕਾ, ਪਵਾਰਿਤਾ ਹੋਨ੍ਤੀਤਿ ਸਮ੍ਬਨ੍ਧੋਤਿ. ਸਤ੍ਤਮਂ.

੮. ਉਯ੍ਯੁਤ੍ਤਸੇਨਾਸਿਕ੍ਖਾਪਦਂ

੩੧੧. ਅਟ੍ਠਮੇ ‘‘ਅਭਿਮੁਖ’’ਨ੍ਤਿਇਮਿਨਾ ਅਭਿਸਦ੍ਦਸ੍ਸਤ੍ਥਂ ਦਸ੍ਸੇਤਿ. ‘‘ਉਯ੍ਯਾਤੋ’’ਤਿਪਦਸ੍ਸ ਉਟ੍ਠਹਿਤ੍ਵਾ ਯਾਤੋਤਿ ਦਸ੍ਸੇਨ੍ਤੋ ਆਹ ‘‘ਨਗਰਤੋ ਨਿਗ੍ਗਤੋ’’ਤਿ. ‘‘ਕਤਉਯ੍ਯੋਗ’’ਨ੍ਤਿ ਇਮਿਨਾ ਉਟ੍ਠਹਿਤ੍ਵਾ ਯੁਞ੍ਜਤਿ ਗਚ੍ਛਤੀਤਿ ਉਯ੍ਯੁਤ੍ਤਾਤਿ ਦਸ੍ਸੇਤਿ. ਧਾਤੂਨ, ਮਨੇਕਤ੍ਥਤ੍ਤਾ ਵੁਤ੍ਤਂ ‘‘ਗਾਮਤੋ ਨਿਕ੍ਖਨ੍ਤ’’ਨ੍ਤਿ.

੩੧੪. ਦ੍ਵਾਦਸ ਪੁਰਿਸਾ ਇਮਸ੍ਸ ਹਤ੍ਥਿਨੋਤਿ ਦ੍ਵਾਦਸਪੁਰਿਸੋ, ਆਵੁਧੋ ਹਤ੍ਥੇਸੁ ਏਤੇਸਨ੍ਤਿ ਆਵੁਧਹਤ੍ਥਾ. ਨਿਨ੍ਨਨ੍ਤਿ ਨਿਨ੍ਨਟ੍ਠਾਨਂ, ਪਸ੍ਸਤੋ ਭਿਕ੍ਖੁਨੋਤਿ ਸਮ੍ਬਨ੍ਧੋਤਿ. ਅਟ੍ਠਮਂ.

੯. ਸੇਨਾਵਾਸਸਿਕ੍ਖਾਪਦਂ

੩੧੯. ਨਵਮੇ ‘‘ਤਿਟ੍ਠਤੁ ਵਾ’’ਤਿਆਦਿਨਾ ਵਸਨਾਕਾਰਂ ਦਸ੍ਸੇਤਿ. ਵਾਸਦ੍ਦੋ ‘‘ਚਙ੍ਕਮਤੁ ਵਾ’’ਤਿਅਤ੍ਥਂ ਸਮ੍ਪਿਣ੍ਡੇਤਿ. ਕਿਞ੍ਚਿ ਇਰਿਯਾਪਥਨ੍ਤਿ ਚਤੂਸੁ ¶ ਇਰਿਯਾਪਥੇਸੁ ਕਿਞ੍ਚਿ ਇਰਿਯਾਪਥਂ. ਯਥਾ ਰੁਦ੍ਧਮਾਨੇ ਸਞ੍ਚਾਰੋ ਛਿਜ੍ਜਤਿ, ਏਵਂ ਰੁਦ੍ਧਾ ਸਂਵੁਤਾ ਹੋਤੀਤਿ ਯੋਜਨਾ. ‘‘ਰੁਦ੍ਧੋ’’ਤਿ ਇਮਿਨਾ ‘‘ਪਲਿਬੁਦ੍ਧੋ’’ਤਿ ਏਤ੍ਥ ਪਰਿਪੁਬ੍ਬਸ੍ਸ ਬੁਧਿਧਾਤੁਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤੀਤਿ. ਨਵਮਂ.

੧੦. ਉਯ੍ਯੋਧਿਕਸਿਕ੍ਖਾਪਦਂ

੩੨੨. ਦਸਮੇ ਯੁਜ੍ਝਨ੍ਤੀਤਿ ਸਂਪਹਰਨ੍ਤਿ. ‘‘ਬਲਸ੍ਸ ਅਗ੍ਗਂ ਏਤ੍ਥਾ’’ਤਿਇਮਿਨਾ ਭਿਨ੍ਨਾਧਿਕਰਣਬਾਹਿਰਤ੍ਥਸਮਾਸਂ ਦਸ੍ਸੇਤਿ. ‘‘ਜਾਨਨ੍ਤੀ’’ਤਿਪਦਂ ਅਤ੍ਥਸਮ੍ਪੁਣ੍ਣਤ੍ਥਾਯ ਪਕ੍ਖਿਤ੍ਤਂ. ਅਗ੍ਗਨ੍ਤਿ ਕੋਟ੍ਠਾਸਂ. ਬਲਂ ਗਣੀਯਤਿ ਏਤ੍ਥਾਤਿ ਬਲਗ੍ਗਨ੍ਤਿ ਵਚਨਤ੍ਥੋਪਿ ਯੁਜ੍ਜਤਿ. ਤੇਨਾਹ ‘‘ਬਲਗਣਨਟ੍ਠਾਨ’’ਨ੍ਤਿ. ਇਦਞ੍ਹਿ ਵਚਨਂ ਅਮ੍ਬਸੇਚਨਗਰੁਸਿਨਨਯੇਨ ਵੁਤ੍ਤਂ. ਕਥਂ? ‘‘ਬਲਗਣਨਟ੍ਠਾਨ’’ਨ੍ਤਿ ਵਦਨ੍ਤੇਨ ਅਟ੍ਠਕਥਾਚਰਿਯੇਨ ‘‘ਬਲਸ੍ਸ ਅਗ੍ਗਂ ਜਾਨਨ੍ਤਿ ਏਤ੍ਥਾਤਿ ਬਲਗ੍ਗ’’ਨ੍ਤਿ ਵਚਨਤ੍ਥਸ੍ਸ ਪਿਣ੍ਡਤ੍ਥੋ ਚ ਞਾਪੀਯਤਿ, ‘‘ਬਲਂ ਗਣੀਯਤਿ ਏਤ੍ਥਾਤਿ ਬਲਗ੍ਗ’’ਨ੍ਤਿ ਵਚਨਤ੍ਥੋ ਚ ਦਸ੍ਸੀਯਤਿ. ਵਿਯੂਹੀਯਤੇ ਸਮ੍ਪਿਣ੍ਡੀਯਤੇ ਬ੍ਯੂਹੋ, ਸੇਨਾਯ ਬ੍ਯੂਹੋ ਸੇਨਾਬ੍ਯੂਹੋਤਿ ਅਤ੍ਥਂ ਦਸ੍ਸੇਤਿ ‘‘ਸੇਨਾਯ ਵਿਯੂਹ’’ਨ੍ਤਿਆਦਿਨਾ. ਅਣਤਿ ਭੇਰਵਸਦ੍ਦਂ ਕਰੋਤੀਤਿ ਅਣੀਕਂ, ਮੁਦ੍ਧਜਣਕਾਰੋ, ਹਤ੍ਥੀਯੇਵ ਅਣੀਕਂ ¶ ਹਤ੍ਥਾਣੀਕਂ. ਏਸੇਵ ਨਯੋ ਸੇਸੇਸੁਪਿ. ਯੋ ਹਤ੍ਥੀ ਪੁਬ੍ਬੇ ਵੁਤ੍ਤੋ, ਤੇਨ ਹਤ੍ਥਿਨਾਤਿ ਯੋਜਨਾਤਿ. ਦਸਮਂ.

ਅਚੇਲਕਵਗ੍ਗੋ ਪਞ੍ਚਮੋ.

੬. ਸੁਰਾਪਾਨਵਗ੍ਗੋ

੧. ਸੁਰਾਪਾਨਸਿਕ੍ਖਾਪਦ-ਅਤ੍ਥਯੋਜਨਾ

੩੨੬. ਸੁਰਾਪਾਨਵਗ੍ਗਸ੍ਸ ਪਠਮੇ ਭਦ੍ਦਾ ਵਤਿ ਏਤ੍ਥਾਤਿ ਭਦ੍ਦਵਤਿਕਾਤਿ ਚ, ਭਦ੍ਦਾ ਵਤਿ ਭਦ੍ਦਵਤਿ, ਸਾ ਏਤ੍ਥ ਅਤ੍ਥੀਤਿ ਭਦ੍ਦਵਤਿਕਾਤਿ ਚ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਸੋ’’ਤਿਆਦਿ. ਸੋਤਿ ਗਾਮੋ ਲਭੀਤਿ ਸਮ੍ਬਨ੍ਧੋ. ਪਥਂ ਗਚ੍ਛਨ੍ਤੀਤਿ ਪਥਾਵਿਨੋਤਿ ਕਤੇ ਅਦ੍ਧਿਕਾਯੇਵਾਤਿ ਆਹ ‘‘ਅਦ੍ਧਿਕਾ’’ਤਿ. ਅਦ੍ਧਂ ਗਚ੍ਛਨ੍ਤੀਤਿ ਅਦ੍ਧਿਕਾ. ‘‘ਪਥਿਕਾ’’ਤਿਪਿ ਪਾਠੋ, ਅਯਮੇਵਤ੍ਥੋ. ‘‘ਤੇਜਸਾ ਤੇਜ’’ਨ੍ਤਿਪਦਾਨਿ ਸਮ੍ਬਨ੍ਧਾਪੇਕ੍ਖਾਨਿ ਚ ਹੋਨ੍ਤਿ ¶ , ਪਦਾਨਂ ਸਮਾਨਤ੍ਤਾ ਸਮ੍ਬਨ੍ਧੋ ਚ ਸਮਾਨੋਤਿ ਮਞ੍ਞਿਤੁਂ ਸਕ੍ਕੁਣੇਯ੍ਯਾ ਚ ਹੋਨ੍ਤਿ, ਤਸ੍ਮਾ ਤੇਸਂ ਸਮ੍ਬਨ੍ਧਞ੍ਚ ਤਸ੍ਸ ਅਸਮਾਨਤਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਅਤ੍ਤਨੋ ਤੇਜਸਾ ਨਾਗਸ੍ਸ ਤੇਜ’’ਨ੍ਤਿ. ‘‘ਆਨੁਭਾਵੇਨਾ’’ਤਿਇਮਿਨਾ ਪਨ ਤੇਜਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ. ਕਪੋਤਸ੍ਸ ਪਾਦੋ ਕਪੋਤੋ ਉਪਚਾਰੇਨ, ਤਸ੍ਸ ਏਸੋ ਕਾਪੋਤੋ, ਵਣ੍ਣੋ. ਕਾਪੋਤੋ ਵਿਯ ਵਣ੍ਣੋ ਅਸ੍ਸਾਤਿ ਕਾਪੋਤਿਕਾਤਿ ਦਸ੍ਸੇਨ੍ਤੋ ਆਹ ‘‘ਕਪੋਤਪਾਦਸਮਵਣ੍ਣਰਤ੍ਤੋਭਾਸਾ’’ਤਿ. ਪਸਨ੍ਨਸਦ੍ਦਸ੍ਸ ਪਸਾਦਸਦ੍ਧਾਦਯੋ ਨਿਵਤ੍ਤੇਤੁਂ ‘‘ਸੁਰਾਮਣ੍ਡਸ੍ਸੇਤਂ ਅਧਿਵਚਨ’’ਨ੍ਤਿ ਵੁਤ੍ਤਂ. ਪਞ੍ਚਾਭਿਞ੍ਞਸ੍ਸ ਸਤੋਤਿ ਪਞ੍ਚਾਭਿਞ੍ਞਸ੍ਸ ਸਮਾਨਸ੍ਸ ਸਾਗਤਸ੍ਸਾਤਿ ਯੋਜਨਾ.

੩੨੮. ‘‘ਮਧੁਕਪੁਪ੍ਫਾਦੀਨਂ ਰਸੇਨ ਕਤੋ’’ਤਿਇਮਿਨਾ ਪੁਪ੍ਫਾਨਂ ਰਸੇਨ ਕਤੋ ਆਸਵੋ ਪੁਪ੍ਫਾਸਵੋਤਿ ਵਚਨਤ੍ਥਂ ਦਸ੍ਸੇਤਿ. ਏਸ ਨਯੋ ‘‘ਫਲਾਸਵੋ’’ਤਿਆਦੀਸੁਪਿ. ਸੁਰਾਮੇਰਯਾਨਂ ਵਿਸੇਸਂ ਦਸ੍ਸੇਤੁਂ ਵੁਤ੍ਤਂ ‘‘ਸੁਰਾ ਨਾਮਾ’’ਤਿਆਦਿ. ਪਿਟ੍ਠਕਿਣ੍ਣਪਕ੍ਖਿਤ੍ਤਾਤਿ ਪਿਟ੍ਠੇਨ ਚ ਕਿਣ੍ਣੇਨ ਚ ਪਕ੍ਖਿਤ੍ਤਾ ਕਤਾ ਵਾਰੁਣੀਤਿ ਸਮ੍ਬਨ੍ਧੋ. ਕਿਣ੍ਣਾਤਿ ਚ ਸੁਰਾਯ ਬੀਜਂ. ਤਞ੍ਹਿ ਕਿਰਨ੍ਤਿ ਨਾਨਾਸਮ੍ਭਾਰਾਨਿ ਮਿਸ੍ਸੀਭਵਨ੍ਤਿ ਏਤ੍ਥਾਤਿ ਕਿਣ੍ਣਾਤਿ ਵੁਚ੍ਚਤਿ. ਤਸ੍ਸਾਯੇਵ ਮਣ੍ਡੇਤਿ ਯੋਜਨਾ. ਸੁਰਨਾਮਕੇਨ ਏਕੇਨ ਵਨਚਰਕੇਨ ਕਤਾਤਿ ਸੁਰਾ. ਮਦਂ ਜਨੇਤੀਤਿ ਮੇਰਯਂ.

੩੨੯. ਲੋਣਸੋਵੀਰਕਨ੍ਤਿ ¶ ਏਵਂਨਾਮਕਂ ਪਾਨਂ. ਸੁਤ੍ਤਨ੍ਤਿਪਿ ਏਵਮੇਵ. ਤਸ੍ਮਿਨ੍ਤਿ ਸੂਪਸਂਪਾਕੇ. ਤੇਲਂ ਪਨ ਪਚਨ੍ਤੀਤਿ ਸਮ੍ਬਨ੍ਧੋ. ਨਤ੍ਥਿ ਤਿਖਿਣਂ ਮਜ੍ਜਂ ਏਤ੍ਥਾਤਿ ਅਤਿਖਿਣਮਜ੍ਜਂ, ਅਤਿਖਿਣਮਜ੍ਜੇ ਤਸ੍ਮਿਂਯੇਵ ਤੇਲੇਤਿ ਅਤ੍ਥੋ. ਯਂ ਪਨਾਤਿ ਤੇਲਂ ਪਨ. ਤਿਖਿਣਂ ਮਜ੍ਜਂ ਇਮਸ੍ਸ ਤੇਲਸ੍ਸਾਤਿ ਤਿਖਿਣਮਜ੍ਜਂ. ਯਤ੍ਥਾਤਿ ਤੇਲੇ. ਅਰਿਟ੍ਠੋਤਿ ਏਵਂਨਾਮਕਂ ਭੇਸਜ੍ਜਂ. ਤਨ੍ਤਿ ਅਰਿਟ੍ਠਂ, ‘‘ਸਨ੍ਧਾਯਾ’’ਤਿਪਦੇ ਅਵੁਤ੍ਤਕਮ੍ਮਂ. ਏਤਨ੍ਤਿ ‘‘ਅਮਜ੍ਜਂ ਅਰਿਟ੍ਠ’’ਨ੍ਤਿਵਚਨਂ, ‘‘ਵੁਤ੍ਤ’’ਨ੍ਤਿਪਦੇ ਵੁਤ੍ਤਕਮ੍ਮਨ੍ਤਿ. ਪਠਮਂ.

੨. ਅਙ੍ਗੁਲਿਪਤੋਦਕਸਿਕ੍ਖਾਪਦਂ

੩੩੦. ਦੁਤਿਯੇ ਅਙ੍ਗੁਲੀਹਿ ਪਤੁਜ੍ਜਨਂ ਅਙ੍ਗੁਲਿਪਤੋਦੋ, ਸੋਯੇਵ ਅਙ੍ਗੁਲਿਪਤੋਦਕੋਤਿ ਦਸ੍ਸੇਨ੍ਤੋ ਆਹ ‘‘ਅਙ੍ਗੁਲੀਹੀ’’ਤਿਆਦਿ. ਉਤ੍ਤਨ੍ਤੋਤਿ ¶ ਅਵਤਪਨ੍ਤੋ. ਅਵਤਪਨ੍ਤੋਤਿ ਚ ਅਤ੍ਥਤੋ ਕਿਲਮਨ੍ਤੋਯੇਵਾਤਿ ਆਹ ‘‘ਕਿਲਮਨ੍ਤੋ’’ਤਿ. ਕਿਲਮਨ੍ਤੋ ਹੁਤ੍ਵਾਤਿ ਯੋਜਨਾ. ਅਸ੍ਸਾਸਗਹਣੇਨ ਪਸ੍ਸਾਸੋਪਿ ਗਹੇਤਬ੍ਬੋਤਿ ਆਹ ‘‘ਅਸ੍ਸਾਸਪਸ੍ਸਾਸਸਞ੍ਚਾਰੋ’’ਤਿ. ਤਮ੍ਪੀਤਿ ਭਿਕ੍ਖੁਨਿਮ੍ਪੀਤਿ. ਦੁਤਿਯਂ.

੩. ਹਸਧਮ੍ਮਸਿਕ੍ਖਾਪਦਂ

੩੩੫. ਤਤਿਯੇ ਪਕਾਰੇਨ ਕਰੀਯਤਿ ਠਪੀਯਤੀਤਿ ਪਕਤਂ ਪਞ੍ਞਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਯਂ ਭਗਵਤਾ’’ਤਿਆਦਿ. ਯਨ੍ਤਿ ਸਿਕ੍ਖਾਪਦਂ.

੩੩੬. ਹਸਸਙ੍ਖਾਤੋ ਧਮ੍ਮੋ ਸਭਾਵੋ ਹਸਧਮ੍ਮੋਤਿ ਵੁਤ੍ਤੇ ਅਤ੍ਥਤੋ ਕੀਲ਼ਿਕਾਯੇਵਾਤਿ ਆਹ ‘‘ਕੀਲ਼ਿਕਾ ਵੁਚ੍ਚਤੀ’’ਤਿ.

੩੩੭. ਗੋਪ੍ਫਕਾਨਨ੍ਤਿ ਚਰਣਗਣ੍ਠਿਕਾਨਂ. ਤੇ ਹਿ ਪਾਦੇ ਪਾਦਂ ਠਪਨਕਾਲੇ ਅਞ੍ਞਮਞ੍ਞੂਪਰਿ ਠਪਨਤੋ ਗੋਪੀਯਨ੍ਤੀਤਿ ਗੋਪ੍ਫਾ, ਤੇ ਏਵ ਗੋਪ੍ਫਕਾਤਿ ਵੁਚ੍ਚਨ੍ਤਿ. ਪਾਦਸ੍ਸ ਹਿ ਉਪਰਿ ਪਾਦਂ ਠਪਨਕਾਲੇ ਏਕਸ੍ਸ ਉਪਰਿ ਏਕੋ ਨ ਠਪੇਤਬ੍ਬੋ. ਤੇਨਾਹ ਭਗਵਾ ‘‘ਪਾਦੇ ਪਾਦਂ ਅਚ੍ਚਾਧਾਯਾ’’ਤਿ (ਦੀ. ਨਿ. ੨.੧੯੬; ਮ. ਨਿ. ੧.੪੨੩; ਅ. ਨਿ. ੩.੧੬). ਓਟ੍ਠਜੋ ਦੁਤਿਯੋ. ਓਰੋਹਨ੍ਤਸ੍ਸ ਭਿਕ੍ਖੁਨੋਤਿ ਸਮ੍ਬਨ੍ਧੋ.

੩੩੮. ਫਿਯਾਰਿਤ੍ਤਾਦੀਹੀਤਿ ਆਦਿਸਦ੍ਦੇਨ ਲਙ੍ਕਾਰਾਦਯੋ ਸਙ੍ਗਣ੍ਹਾਤਿ. ਕੇਚਿ ਵਦਨ੍ਤੀਤਿ ਸਮ੍ਬਨ੍ਧੋ. ਪਤਨੁਪ੍ਪਤਨਵਾਰੇਸੂਤਿ ਪਤਨਵਾਰ ਉਪ੍ਪਤਨਵਾਰੇਸੁ. ਤਤ੍ਥਾਤਿ ਤਸ੍ਸਂ ਖਿਤ੍ਤਕਥਲਾਯਂ. ਹੀਤਿ ਸਚ੍ਚਂ ¶ , ਯਸ੍ਮਾ ਵਾ. ਠਪੇਤ੍ਵਾ ਕੀਲ਼ਨ੍ਤਸ੍ਸਾਤਿ ਸਮ੍ਬਨ੍ਧੋ. ਲਿਖਿਤੁਂ ਵਟ੍ਟਤਿ ਕੀਲ਼ਾਧਿਪ੍ਪਾਯਸ੍ਸ ਵਿਰਹਿਤਤ੍ਤਾਤਿ ਅਧਿਪ੍ਪਾਯੋ. ਕੀਲ਼ਾਧਿਪ੍ਪਾਯੇਨ ਅਤ੍ਥਜੋਤਕਂ ਅਕ੍ਖਰਂ ਲਿਖਨ੍ਤਸ੍ਸਾਪਿ ਆਪਤ੍ਤਿਯੇਵਾਤਿ ਵਦਨ੍ਤਿ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇਤਿ. ਤਤਿਯਂ.

੪. ਅਨਾਦਰਿਯਸਿਕ੍ਖਾਪਦਂ

੩੪੨. ਚਤੁਤ੍ਥੇ ਧਮ੍ਮੋ ਨਾਮ ਤਨ੍ਤਿਯੇਵਾਤਿ ਆਹ ‘‘ਤਨ੍ਤੀ’’ਤਿ. ਪਵੇਣੀਤਿ ਤਸ੍ਸੇਵ ਵੇਵਚਨਂ. ‘‘ਤਂ ਵਾ ਨ ਸਿਕ੍ਖਿਤੁਕਾਮੋ’’ਤਿ ਏਤ੍ਥ ਤਂਸਦ੍ਦਸ੍ਸ ਅਤ੍ਥਮਾਵਿਕਾਤੁਂ ਵੁਤ੍ਤਂ ‘‘ਯੇਨ ਪਞ੍ਞਤ੍ਤੇਨਾ’’ਤਿ. ਵਿਨਯੇ ਅਪਞ੍ਞਤ੍ਤਂ ¶ ਸਨ੍ਧਾਯ ਵੁਤ੍ਤਂ ‘‘ਅਪਞ੍ਞਤ੍ਤੇਨਾ’’ਤਿ ਆਹ ‘‘ਸੁਤ੍ਤੇ ਵਾ ਅਭਿਧਮ੍ਮੇ ਵਾ ਆਗਤੇਨਾ’’ਤਿ.

੩੪੪. ਪਵੇਣਿਯਾਤਿ ਉਪਾਲਿਆਦਿਕਾਯ ਆਚਰਿਯਪਰਮ੍ਪਰਸਙ੍ਖਾਤਾਯ ਤਨ੍ਤਿਯਾ. ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਮਹਾਪਚ੍ਚਰਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਂ ਸਬ੍ਬਨ੍ਤਿ ਕੁਰੁਨ੍ਦਿਵਾਦਮਹਾਪਚ੍ਚਰਿਵਾਦਸਙ੍ਖਾਤਂ ਸਬ੍ਬਂ ਤਂ ਵਚਨਂ. ਪਵੇਣਿਯਾ ਆਗਤੇਤਿ ਪਵੇਣਿਯਾ ਆਗਤਸਙ੍ਖਾਤੇ ਮਹਾਅਟ੍ਠਕਥਾਵਾਦੇਤਿ. ਚਤੁਤ੍ਥਂ.

੩੪੫. ਪਞ੍ਚਮੇ ਮਨੁਸ੍ਸਵਿਗ੍ਗਹੇਤਿ ਮਨੁਸ੍ਸਵਿਗ੍ਗਹਪਾਰਾਜਿਕੇਤਿ. ਪਞ੍ਚਮਂ.

੬. ਜੋਤਿਸਿਕ੍ਖਾਪਦਂ

੩੫੦. ਛਟ੍ਠੇ ਜਨਪਦਸ੍ਸ ਨਾਮਤ੍ਤਾ ਬਹੁਵਚਨਵਸੇਨ ‘‘ਭਗ੍ਗੇਸੂ’’ਤਿ ਪਾਲ਼ਿਯਂ ਵੁਤ੍ਤਂ. ਸੁਸੁਮਾਰਸਣ੍ਠਾਨੋ ਪਬ੍ਬਤਸਙ੍ਖਾਤੋ ਗਿਰਿ ਏਤ੍ਥਾਤਿ ਸੁਸੁਮਾਰਗਿਰਿ, ਏਤਸ੍ਸ ਵਾ ਮਾਪਿਤਕਾਲੇ ਸੁਸੁਮਾਰੋ ਗਿਰਤਿ ਸਦ੍ਦਂ ਨਿਗ੍ਗਿਰਤਿ ਏਤ੍ਥਾਤਿ ਸੁਸੁਮਾਰਗਿਰੀਤਿ ਅਤ੍ਥਮਨਪੇਕ੍ਖਿਤ੍ਵਾ ਵੁਤ੍ਤਂ ‘‘ਨਗਰਸ੍ਸ ਨਾਮ’’ਨ੍ਤਿ. ਤਂ ਪਨਾਤਿ ਵਨਂ ਪਨ. ‘‘ਮਿਗਾਨ’’ਨ੍ਤਿਆਦਿਨਾ ਮਿਗਾਨਂ ਅਭਯੋ ਦੀਯਤਿ ਏਤ੍ਥਾਤਿ ਮਿਗਦਾਯੋਤਿ ਅਤ੍ਥਂ ਦਸ੍ਸੇਤਿ.

੩੫੨. ‘‘ਜੋਤਿਕੇ’’ਤਿਪਦਸ੍ਸ ਜੋਤਿਸ੍ਸ ਅਗ੍ਗਿਸ੍ਸ ਕਰਣਂ ਜੋਤਿਕਨ੍ਤਿ ਦਸ੍ਸੇਤੁਂ ਵੁਤ੍ਤਂ ‘‘ਜੋਤਿਕਰਣੇ’’ਤਿ.

੩੫੪. ‘‘ਸਮਾਦਹਿਤੁਕਾਮਤਾਯਾ’’ਤਿਪਦਂ ¶ ‘‘ਅਰਣਿਸਣ੍ਠਾਪਨਤੋ’’ਤਿਪਦੇ ਹੇਤੁ. ਜਾਲਾਤਿ ਸਿਖਾ. ਸਾ ਹਿ ਜਲਤਿ ਦਿਬ੍ਬਤੀਤਿ ਜਾਲਾਤਿ ਵੁਚ੍ਚਤਿ.

ਪਤਿਲਾਤਂ ਉਕ੍ਖਿਪਤੀਤਿ ਏਤ੍ਥ ‘‘ਪਤਿਤਾਲਾਤ’’ਨ੍ਤਿ ਵਤ੍ਤਬ੍ਬੇ ਤਕਾਰਲੋਪਂ ਕਤ੍ਵਾ ਸਨ੍ਧਿਵਸੇਨ ਪਤਿਲਾਤਨ੍ਤਿ ਵੁਤ੍ਤਨ੍ਤਿ ਆਹ ‘‘ਅਲਾਤਂ ਪਤਿਤਂ ਉਕ੍ਖਿਪਤੀ’’ਤਿ. ਅਲਾਤਨ੍ਤਿ ਉਮ੍ਮੁਕ੍ਕਂ. ਤਞ੍ਹਿ ਆਦਿਤ੍ਤਂ ਹੁਤ੍ਵਾ ਅਤਿਉਣ੍ਹਤ੍ਤਾ ਨ ਲਾਤਬ੍ਬਂ ਨ ਗਣ੍ਹਿਤਬ੍ਬਨ੍ਤਿ ਅਲਾਤਨ੍ਤਿ ਵੁਚ੍ਚਤਿ. ਅਵਿਜ੍ਝਾਤਨ੍ਤਿ ਝਾਯਨਤੋ ਡਯ੍ਹਨਤੋ ਅਵਿਗਤਂ ਅਲਾਤਨ੍ਤਿ ਸਮ੍ਬਨ੍ਧੋ. ਝਾਯਨਂ ਡਯ੍ਹਨਂ ਝਾਤਂ, ਵਿਗਤਂ ਝਾਤਂ ਇਮਸ੍ਸਾਲਾਤਸ੍ਸਾਤਿ ਵਿਜ੍ਝਾਤਂ.

੩੫੬. ਪਦੀਪਾਦੀਨੀਤਿ ¶ ਪਦੀਪਜੋਤਿਕਾਦੀਨਿ. ਤਤ੍ਥਾਤਿ ਤਾਸੁ ਦੁਟ੍ਠਵਾਲ਼ਮਿਗਅਮਨੁਸ੍ਸਸਙ੍ਖਾਤਾਸੁ ਆਪਦਾਸੁ ਨਿਮਿਤ੍ਤਭੂਤਾਸੁ. ਨਿਮਿਤ੍ਤਤ੍ਥੇ ਚੇਤਂ ਭੁਮ੍ਮਵਚਨਨ੍ਤਿ. ਛਟ੍ਠਂ.

੭. ਨਹਾਨਸਿਕ੍ਖਾਪਦਂ

੩੬੬. ਸਤ੍ਤਮੇ ਪਾਰਂ ਗਚ੍ਛਨ੍ਤੋ ਨ ਕੇਵਲਂ ਸਉਦਕਾਯ ਨਦਿਯਾ ਏਵ ਨ੍ਹਾਯਿਤੁਂ ਵਟ੍ਟਤਿ, ਸੁਕ੍ਖਾਯ ਨਦਿਯਾਪਿ ਵਟ੍ਟਤੀਤਿ ਦਸ੍ਸੇਨ੍ਤੋ ਆਹ ‘‘ਸੁਕ੍ਖਾਯਾ’’ਤਿਆਦਿ. ਉਕ੍ਕਿਰਿਤ੍ਵਾਤਿ ਵਿਯੂਹਿਤ੍ਵਾ. ਆਵਾਟਾਯੇਵ ਖੁਦ੍ਦਕਟ੍ਠੇਨ ਆਵਾਟਕਾ, ਤੇਸੂਤਿ. ਸਤ੍ਤਮਂ.

੮. ਦੁਬ੍ਬਣ੍ਣਕਰਣਸਿਕ੍ਖਾਪਦਂ

੩੬੮. ਅਟ੍ਠਮੇ ਅਲਭੀਤਿ ਲਭੋਤਿ ਵਚਨਤ੍ਥੇ ਅਪਚ੍ਚਯਂ ਕਤ੍ਵਾ ਣਪਚ੍ਚਯਸ੍ਸ ਸ੍ਵਤ੍ਥਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਲਭੋਯੇਵ ਲਾਭੋ’’ਤਿ. ਅਪਚ੍ਚਯਮਕਤ੍ਵਾ ਪਕਤਿਯਾ ਣਪਚ੍ਚਯੋਪਿ ਯੁਤ੍ਤੋਯੇਵਾਤਿ ਦਟ੍ਠਬ੍ਬਂ. ਸਦ੍ਦਨ੍ਤਰੋਪਿ ਅਤ੍ਥਨ੍ਤਰਾਭਾਵਾ ਸਮਾਸੋ ਹੋਤੀਤਿ ਆਹ ‘‘ਨਵਚੀਵਰਲਾਭੇਨਾਤਿ ਵਤ੍ਤਬ੍ਬੇ’’ਤਿ. ਅਨੁਨਾਸਿਕਲੋਪਨ੍ਤਿ ‘‘ਨਵ’’ਨ੍ਤਿ ਏਤ੍ਥ ਨਿਗ੍ਗਹੀਤਸ੍ਸ ਵਿਨਾਸਂ. ਨਿਗ੍ਗਹੀਤਞ੍ਹਿ ਨਾਸਂ ਅਨੁਗਤਤ੍ਤਾ ‘‘ਅਨੁਨਾਸਿਕ’’ਨ੍ਤਿ ਵੁਚ੍ਚਤਿ, ਤਸ੍ਸ ਅਦਸ੍ਸਨ, ਮਕਤ੍ਵਾਤਿ ਅਤ੍ਥੋ. ਮਜ੍ਝੇ ਠਿਤਪਦਦ੍ਵਯੇਤਿ ‘‘ਨਵ’’ਨ੍ਤਿ ਚ ‘‘ਚੀਵਰਲਾਭੇਨਾ’’ਤਿ ਚ ਦ੍ਵਿਨ੍ਨਂ ਪਦਾਨਮਨ੍ਤਰੇ ‘‘ਠਿਤੇ ਪਨਾ’’ਤਿ ਚ ‘‘ਭਿਕ੍ਖੁਨਾ’’ਤਿ ਚ ਪਦਦ੍ਵਯੇ. ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ. ਨਿਪਾਤੋਤਿ ਨਿਪਾਤਮਤ੍ਤਂ. ਅਲਭੀਤਿ ਲਭੋਤਿ ਵਚਨਤ੍ਥਸ੍ਸ ਅਭਿਧੇਯ੍ਯਤ੍ਥਂ ਦਸ੍ਸੇਤੁਂ ‘‘ਭਿਕ੍ਖੁਨਾ’’ਤਿ ਵੁਤ੍ਤਨ੍ਤਿ ਆਹ ‘‘ਭਿਕ੍ਖੁਨਾ’’ਤਿਆਦਿ. ਪਦਭਾਜਨੇ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਯਨ੍ਤਿ ਯਂ ਚੀਵਰਂ. ‘‘ਚੀਵਰ’’ਨ੍ਤਿ ਏਤ੍ਥ ਚੀਵਰਸਰੂਪਂ ਦਸ੍ਸੇਨ੍ਤੋ ਆਹ ‘‘ਯਂ ਨਿਵਾਸੇਤੁਂ ਵਾ’’ਤਿਆਦਿ. ਚਮ੍ਮਕਾਰਨੀਲਨ੍ਤਿ ਚਮ੍ਮਕਾਰਾਨਂ ਤਿਫਲੇ ਪਕ੍ਖਿਤ੍ਤਸ੍ਸ ਅਯਗੂਥਸ੍ਸ ਨੀਲਂ. ਮਹਾਪਚ੍ਚਰਿਯਂ ¶ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਦੁਬ੍ਬਣ੍ਣੋ ਕਰੀਯਤਿ ਅਨੇਨਾਤਿ ਦੁਬ੍ਬਣ੍ਣਕਰਣਂ, ਕਪ੍ਪਬਿਨ੍ਦੁਨ੍ਤਿ ਆਹ ‘‘ਕਪ੍ਪਬਿਨ੍ਦੁਂ ਸਨ੍ਧਾਯਾ’’ਤਿ. ਆਦਿਯਨ੍ਤੇਨ ਭਿਕ੍ਖੁਨਾ ਆਦਾਤਬ੍ਬਨ੍ਤਿ ਸਮ੍ਬਨ੍ਧੋ. ਕੋਣੇਸੂਤਿ ਅਨ੍ਤੇਸੁ. ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋ. ਅਕ੍ਖਿਮਣ੍ਡਲਮਤ੍ਤਂ ਵਾਤਿ ਅਕ੍ਖਿਮਣ੍ਡਲਸ੍ਸ ਪਮਾਣਂ ਵਾ ਕਪ੍ਪਬਿਨ੍ਦੂਤਿ ਸਮ੍ਬਨ੍ਧੋ. ਪਟ੍ਟੇ ਵਾਤਿ ਅਨੁਵਾਤਪਟ੍ਟੇ ¶ ਵਾ. ਗਣ੍ਠਿਯਂ ਵਾਤਿ ਗਣ੍ਠਿਕਪਟ੍ਟੇ ਵਾ. ਪਾਲ਼ਿਕਪ੍ਪੋਤਿ ਦ੍ਵੇ ਵਾ ਤਿਸ੍ਸੋ ਵਾ ਤਤੋ ਅਧਿਕਾ ਵਾ ਬਿਨ੍ਦੁਆਵਲੀ ਕਤ੍ਵਾ ਕਤੋ ਕਪ੍ਪੋ. ਕਣ੍ਣਿਕਕਪ੍ਪੋਤਿ ਕਣ੍ਣਿਕਂ ਵਿਯ ਬਿਨ੍ਦੁਗੋਚ੍ਛਕਂ ਕਤ੍ਵਾ ਕਤੋ ਕਪ੍ਪੋ. ਆਦਿਸਦ੍ਦੇਨ ਅਗ੍ਘਿਯਕਪ੍ਪਾਦਯੋ ਸਙ੍ਗਣ੍ਹਾਤਿ. ਸਬ੍ਬਤ੍ਥਾਤਿ ਸਬ੍ਬਾਸੁ ਅਟ੍ਠਕਥਾਸੁ. ਏਕੋਪਿ ਬਿਨ੍ਦੁ ਵਟ੍ਟੋਯੇਵ ਵਟ੍ਟਤੀਤਿ ਆਹ ‘‘ਏਕਂ ਵਟ੍ਟਬਿਨ੍ਦੁ’’ਨ੍ਤਿ.

੩੭੧. ਅਗ੍ਗਲ਼ਾਦੀਨੀਤਿ ਆਦਿਸਦ੍ਦੇਨ ਅਨੁਵਾਤਪਰਿਭਣ੍ਡੇ ਸਙ੍ਗਣ੍ਹਾਤੀਤਿ. ਅਟ੍ਠਮਂ.

੯. ਵਿਕਪ੍ਪਨਸਿਕ੍ਖਾਪਦਂ

੩੭੪. ਨਵਮੇ ਤਸ੍ਸਾਤਿ ਏਤ੍ਥ ਤਸਦ੍ਦਸ੍ਸ ਵਿਸਯੋ ਚੀਵਰਸਾਮਿਕੋਯੇਵਾਤਿ ਆਹ ‘‘ਚੀਵਰਸਾਮਿਕਸ੍ਸਾ’’ਤਿ. ਦੁਤਿਯਸ੍ਸ ਤਸਦ੍ਦਸ੍ਸ ਵਿਸਯੋ ਵਿਨਯਧਰੋਯੇਵਾਤਿ ਆਹ ‘‘ਯੇਨਾ’’ਤਿਆਦਿ. ‘‘ਅਵਿਸ੍ਸਾਸਨ੍ਤੋ’’ਤਿਪਦਸ੍ਸ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਅਵਿਸ੍ਸਾਸੇਨਾ’’ਤਿ. ਤੇਨਾਤਿ ਵਿਨਯਧਰੇਨਾਤਿ. ਨਵਮਂ.

੧੦. ਚੀਵਰਾਪਨਿਧਾਨਸਿਕ੍ਖਾਪਦਂ

੩੭੭. ਦਸਮੇ ‘‘ਅਪਨੇਤ੍ਵਾ’’ਤਿਇਮਿਨਾ ਅਪਇਤ੍ਯੂਪਸਗ੍ਗਸ੍ਸ ਅਤ੍ਥਂ ਦਸ੍ਸੇਤਿ. ਨਿਧੇਨ੍ਤੀਤਿ ਨਿਗੂਹਿਤ੍ਵਾ ਠਪੇਨ੍ਤਿ. ਹਸਾਧਿਪ੍ਪਾਯੋਤਿ ਹਸਂ, ਹਸਨਤ੍ਥਾਯ ਵਾ ਅਧਿਪ੍ਪਾਯੋ. ਪਰਿਕ੍ਖਾਰਸ੍ਸ ਸਰੂਪਂ ਦਸ੍ਸੇਤੁਂ ਵੁਤ੍ਤਂ ‘‘ਪਤ੍ਤਤ੍ਥਵਿਕਾਦਿ’’ਨ੍ਤਿ. ਪਤ੍ਤਸ੍ਸ ਪਾਲ਼ਿਯਮਾਗਤਤ੍ਤਾ ਪਤ੍ਤਸ੍ਸ ਥਵਿਕਾਤਿ ਅਤ੍ਥੋਯੇਵ ਗਹੇਤਬ੍ਬੋ, ਨ ਪਤ੍ਤੋ ਚ ਥਵਿਕਾ ਚਾਤਿ. ‘‘ਸਮਣੇਨ ਨਾਮਾ’’ਤਿਪਦਂ ‘‘ਭਵਿਤੁ’’ਨ੍ਤਿਪਦੇ ਭਾਵਕਤ੍ਤਾਤਿ. ਦਸਮਂ.

ਸੁਰਾਪਾਨਵਗ੍ਗੋ ਛਟ੍ਠੋ.

੭. ਸਪ੍ਪਾਣਕਵਗ੍ਗੋ

੧. ਸਞ੍ਚਿਚ੍ਚਪਾਣਸਿਕ੍ਖਾਪਦ-ਅਤ੍ਥਯੋਜਨਾ

੩੮੨. ਸਪ੍ਪਾਣਕਵਗ੍ਗਸ੍ਸ ¶ ਪਠਮੇ ਉਸੁਂ ਅਸਤਿ ਖਿਪਤਿ ਅਨੇਨਾਤਿ ਇਸ੍ਸਾਸੋਤਿ ਕਤੇ ਧਨੁਯੇਵ ਮੁਖ੍ਯਤੋ ਇਸ੍ਸਾਸੋ ਨਾਮ, ਧਨੁਗ੍ਗਹਾ- ਚਰਿਯੋ ¶ ਪਨ ਉਪਚਾਰੇਨ. ਉਸੁਂ ਅਸਤਿ ਖਿਪਤੀਤਿ ਇਸ੍ਸਾਸੋਤਿ ਕਤੇ ਧਨੁਗ੍ਗਹਾਚਰਿਯੋ ਇਸ੍ਸਾਸੋ ਨਾਮ, ਇਧ ਪਨ ਉਪਚਾਰਤ੍ਥੋ ਵਾ ਕਤ੍ਤੁਤ੍ਥੋ ਵਾ ਗਹੇਤਬ੍ਬੋਤਿ ਆਹ ‘‘ਧਨੁਗ੍ਗਹਾਚਰਿਯੋ ਹੋਤੀ’’ਤਿ. ਪਬ੍ਬਜਿਤਕਾਲੇ ਇਸ੍ਸਾਸਸ੍ਸ ਅਯੁਤ੍ਤਤ੍ਤਾ ਵੁਤ੍ਤਂ ‘‘ਗਿਹਿਕਾਲੇ’’ਤਿ. ਵੋਰੋਪਿਤਾਤਿ ਏਤ੍ਥ ਵਿ ਅਵ ਪੁਬ੍ਬਸ੍ਸ ਰੁਹਧਾਤੁਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਵਿਯੋਜਿਤਾ’’ਤਿ.

ਯਸ੍ਮਾ ਗਚ੍ਛਤੀਤਿ ਸਮ੍ਬਨ੍ਧੋ. ਏਤਨ੍ਤਿ ‘‘ਜੀਵਿਤਾ ਵੋਰੋਪਿਤਾ’’ਤਿਵਚਨਂ. ਕਸ੍ਮਾ ਵੋਹਾਰਮਤ੍ਤਮੇਵ ਹੋਤਿ, ਨਨੁ ਯਤੋ ਕੁਤੋਚਿ ਯਸ੍ਮਿਂ ਕਿਸ੍ਮਿਂਚਿ ਵਿਯੋਜਿਤੇ ਦ੍ਵੇ ਵਤ੍ਥੂਨਿ ਵਿਯ ਵਿਸੁਂ ਤਿਟ੍ਠਨ੍ਤਿ ਪਾਣਤੋ ਜੀਵਿਤੇ ਵਿਯੋਜਿਤੇ ਪਾਣਜੀਵਿਤਾਪੀਤਿ ਆਹ ‘‘ਨ ਹੇਤ੍ਥਾ’’ਤਿਆਦਿ. ਹੀਤਿ ਸਚ੍ਚਂ. ਏਤ੍ਥਾਤਿ ‘‘ਜੀਵਿਤਾ ਵੋਰੋਪਿਤਾ’’ਤਿਵਚਨੇ ਦਸ੍ਸੇਤੁਨ੍ਤਿ ਸਮ੍ਬਨ੍ਧੋ. ਕਿਞ੍ਚਿ ਜੀਵਿਤਂ ਨਾਮਾਤਿ ਯੋਜਨਾ. ਅਯਂ ਪਨੇਤ੍ਥ ਅਤ੍ਥਸਮ੍ਬਨ੍ਧੋ – ਸੀਸਾਲਙ੍ਕਾਰੇ ਸੀਸਤੋ ਵਿਯੋਜਿਤੇ ਸੀਸਂ ਅਲਙ੍ਕਾਰਤੋ ਵਿਸੁਂ ਤਿਟ੍ਠਤਿ ਯਥਾ, ਏਵਂ ਜੀਵਿਤੇ ਪਾਣਤੋ ਵਿਯੋਜਿਤੇ ਜੀਵਿਤਂ ਪਾਣਤੋ ਵਿਸੁਂ ਨ ਤਿਟ੍ਠਤਿ ਨਾਮਾਤਿ. ਅਞ੍ਞਦਤ੍ਥੂਤਿ ਏਕਂਸੇਨ. ‘‘ਪਾਣ’’ਨ੍ਤਿ ਸਾਮਞ੍ਞਤੋ ਵੁਤ੍ਤੋਪਿ ਮਨੁਸ੍ਸਪਾਣਸ੍ਸ ਪਾਰਾਜਿਕਟ੍ਠਾਨੇ ਗਹਿਤਤ੍ਤਾ ਇਧ ਪਾਰਿਸੇਸਞਾਯੇਨ ਤਿਰਚ੍ਛਾਨਪਾਣੋਵ ਗਹੇਤਬ੍ਬੋਤਿ ਆਹ ‘‘ਤਿਰਚ੍ਛਾਨਗਤੋਯੇਵ ਪਾਣੋ’’ਤਿ. ਤਨ੍ਤਿ ਪਾਣਂ. ਮਹਨ੍ਤੇ ਪਨ ਪਾਣੇਤਿ ਸਮ੍ਬਨ੍ਧੋ.

੩੮੫. ਸੋਧੇਨ੍ਤੋ ਅਪਨੇਤੀਤਿ ਯੋਜਨਾ. ਮਙ੍ਗੁਲੋਤਿ ਮਨੁਸ੍ਸਰਤ੍ਤਪੋ ਏਕੋ ਕਿਮਿਵਿਸੇਸੋ. ਸੋ ਹਿ ਰਤ੍ਤਪਿਵਨਤ੍ਥਾਯ ਮਙ੍ਗਤਿ ਇਤੋ ਚਿਤੋ ਚ ਇਮਂ ਚਿਮਞ੍ਚ ਠਾਨਂ ਗਚ੍ਛਤੀਤਿ ‘‘ਮਙ੍ਗੁਲੋ’’ਤਿ ਵੁਚ੍ਚਤਿ. ਪਦਕ੍ਖਰਾਨਞ੍ਹਿ ਅਵਿਪਰਿਤਤ੍ਥਂ, ਸੋਤੂਨਞ੍ਚ ਸਜ੍ਝਾਯੋਪਦੇਸਲਭਨਤ੍ਥਂ ਕਤ੍ਥਚਿ ਠਾਨੇ ਵਚਨਤ੍ਥੋ ਵੁਤ੍ਤੋਤਿ ਦਟ੍ਠਬ੍ਬਂ. ਤਸ੍ਸ ਬੀਜਮੇਵ ਖੁਦ੍ਦਕਟ੍ਠੇਨ ਮਙ੍ਗੁਲਬੀਜਕਂ, ਤਸ੍ਮਿਂ. ਤਨ੍ਤਿ ਮਙ੍ਗੁਲਬੀਜਕਂ. ਭਿਨ੍ਦਨ੍ਤੋ ਹੁਤ੍ਵਾਤਿ ਯੋਜਨਾਤਿ. ਪਠਮਂ.

੨. ਸਪ੍ਪਾਣਕਸਿਕ੍ਖਾਪਦਂ

੩੮੭. ਦੁਤਿਯੇ ¶ ਸਹ ਪਾਣੇਹੀਤਿ ਸਪ੍ਪਾਣਕਂ ਉਦਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਯੇ ਪਾਣਕਾ’’ਤਿਆਦਿ. ਹੀਤਿ ਸਚ੍ਚਂ. ਪਤ੍ਤਪੂਰਮ੍ਪਿ ਉਦਕਨ੍ਤਿ ਸਮ੍ਬਨ੍ਧੋ ¶ . ਤਾਦਿਸੇਨਾਤਿ ਸਪ੍ਪਾਣਕੇਨ. ਧੋਵਤੋਪਿ ਪਾਚਿਤ੍ਤਿਯਨ੍ਤਿ ਯੋਜਨਾ. ਉਦਕਸੋਣ੍ਡਿਨ੍ਤਿ ਸਿਲਾਮਯਂ ਉਦਕਸੋਣ੍ਡਿਂ. ਪੋਕ੍ਖਰਣਿਨ੍ਤਿ ਸਿਲਾਮਯਂ ਪੋਕ੍ਖਰਣਿਂ. ਉਟ੍ਠਾਪਯਤੋਪਿ ਪਾਚਿਤ੍ਤਿਯਨ੍ਤਿ ਸਮ੍ਬਨ੍ਧੋ. ਤਤੋਤਿ ਸੋਣ੍ਡਿਪੋਕ੍ਖਰਣੀਹਿ. ਉਦਕਸ੍ਸਾਤਿ ਉਦਕੇਨ, ਪੂਰੇ ਘਟੇ ਆਸਿਞ੍ਚਿਤ੍ਵਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਉਦਕੇ. ਉਦਕੇਤਿ ਉਦਕਸਣ੍ਠਾਨਕਪਦੇਸੇ ਆਸਿਞ੍ਚਿਤਉਦਕੇ. ਪਤਿਸ੍ਸਤੀਤਿ ਸੋਣ੍ਡਿਪੋਕ੍ਖਰਣੀਹਿ ਗਹਿਤਉਦਕਂ ਪਤਿਸ੍ਸਤੀਤਿ. ਦੁਤਿਯਂ.

੩. ਉਕ੍ਕੋਟਨਸਿਕ੍ਖਾਪਦਂ

੩੯੨. ਤਤਿਯੇ ‘‘ਉਚ੍ਚਾਲੇਨ੍ਤੀ’’ਤਿਇਮਿਨਾ ਉਕ੍ਕੋਟੇਨ੍ਤੀਤਿ ਏਤ੍ਥ ਉਪੁਬ੍ਬਸ੍ਸ ਕੁਟਧਾਤੁਸ੍ਸ ਉਚ੍ਚਾਲਨਤ੍ਥਂ ਦਸ੍ਸੇਤਿ ਧਾਤੂਨ, ਮਨੇਕਤ੍ਥਤ੍ਤਾ. ਯਂ ਯਂ ਪਤਿਟ੍ਠਿਤਂ ਯਥਾਪਤਿਟ੍ਠਿਤਂ, ਤਸ੍ਸ ਭਾਵੋ ਯਥਾਪਤਿਟ੍ਠਿਤਭਾਵੋ, ਤੇਨ.

੩੯੩. ਯੋ ਧਮ੍ਮੋਤਿ ਯੋ ਸਮਥਧਮ੍ਮੋ. ਧਮ੍ਮੇਨਾਤਿ ਏਤ੍ਥ ਏਨਸਦ੍ਦੇਨ ‘‘ਯਥਾਧਮ੍ਮ’’ਨ੍ਤਿ ਏਤ੍ਥ ਅਂਇਤਿਕਾਰਿਯਸ੍ਸ ਕਾਰਿਂ ਦਸ੍ਸੇਤਿ. ਇਮਿਨਾ ‘‘ਯਥਾਧਮ੍ਮ’’ਨ੍ਤਿ ਪਦਸ੍ਸ ‘‘ਨਿਹਤਾਧਿਕਰਣ’’ਨ੍ਤਿ ਏਤ੍ਥ ਨਿਹਤਸਦ੍ਦੇਨ ਸਮ੍ਬਨ੍ਧਿਤਬ੍ਬਭਾਵਂ ਦਸ੍ਸੇਤਿ. ‘‘ਸਤ੍ਥਾਰਾ’’ਤਿਪਦਂ ‘‘ਵੁਤ੍ਤਂ’’ ਇਤਿਪਦੇ ਕਤ੍ਤਾ. ਨਤ੍ਥਿ ਹਤਂ ਹਨਨਂ ਇਮਸ੍ਸਾਤਿ ਨਿਹਤਨ੍ਤਿ ਵੁਤ੍ਤੇ ਅਤ੍ਥਤੋ ਵੂਪਸਮਨਮੇਵਾਤਿ ਆਹ ‘‘ਵੂਪਸਮਿਤ’’ਨ੍ਤਿ.

੩੯੫. ਯਂ ਵਾ ਤਂ ਵਾ ਕਮ੍ਮਂ ਧਮ੍ਮਕਮ੍ਮਂ ਨਾਮ ਨ ਹੋਤਿ, ਅਥ ਖੋ ਅਧਿਕਰਣਵੂਪਸਮਕਮ੍ਮਮੇਵ ਧਮ੍ਮਕਮ੍ਮਂ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਯੇਨ ਕਮ੍ਮੇਨਾ’’ਤਿਆਦਿ. ਅਯਮ੍ਪੀਤਿ ਅਯਮ੍ਪਿ ਭਿਕ੍ਖੁ. ਸੇਸਪਦਾਨਿਪੀਤਿ ‘‘ਧਮ੍ਮਕਮ੍ਮੇ ਵੇਮਤਿਕੋ’’ਤਿਆਦੀਨਿ ਸੇਸਪਦਾਨਿਪਿ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਵਿਤ੍ਥਾਰੋ ਪਨ ਵੁਤ੍ਤੋਤਿ ਸਮ੍ਬਨ੍ਧੋ. ਤਤ੍ਥੇਵਾਤਿ ਪਰਿਵਾਰੇ ਏਵ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ, ਵਿਭਙ੍ਗੇ ਵਾਤਿ. ਤਤਿਯਂ.

੪. ਦੁਟ੍ਠੁਲ੍ਲਸਿਕ੍ਖਾਪਦਂ

੩੯੯. ਚਤੁਤ੍ਥੇ ਅਤ੍ਥੁਦ੍ਧਾਰਵਸੇਨ ਦਸ੍ਸਿਤਾਨਿ ਦੁਟ੍ਠੁਲ੍ਲਸਦ੍ਦਤ੍ਥਭਾਵੇਨ ਸਦਿਸਤ੍ਤਾਤਿ ਅਧਿਪ੍ਪਾਯੋ. ‘‘ਧੁਰ’’ਨ੍ਤਿ ¶ ਏਤ੍ਥ ਲਕ੍ਖਣਵਨ੍ਤਤ੍ਤਾ ਭੁਮ੍ਮਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਧੁਰੇ’’ਤਿ. ਧੁਰੇ ਨਿਕ੍ਖਿਤ੍ਤਮਤ੍ਤੇ ਸਤੀਤਿ ਯੋਜਨਾ.

ਏਵਂ ¶ ਧੁਰਂ ਨਿਕ੍ਖਿਪਿਤ੍ਵਾਤਿ ‘‘ਅਞ੍ਞਸ੍ਸ ਨਾਰੋਚੇਸ੍ਸਾਮੀ’’ਤਿ ਏਵਂ ਧੁਰਂ ਨਿਕ੍ਖਿਪਿਤ੍ਵਾ. ਅਞ੍ਞਸ੍ਸਾਤਿ ਵਤ੍ਥੁ, ਪੁਗ੍ਗਲਤੋ ਅਞ੍ਞਸ੍ਸ ਦੁਤਿਯਸ੍ਸ. ਸੋਪੀਤਿ ਦੁਤਿਯੋਪਿ. ਅਞ੍ਞਸ੍ਸਾਤਿ ਤਤਿਯਸ੍ਸ. ਯਾਵ ਕੋਟਿ ਨ ਛਿਜ੍ਜਤਿ, ਤਾਵ ਆਪਜ੍ਜਤਿਯੇਵਾਤਿ ਯੋਜਨਾ. ਤਸ੍ਸੇਵਾਤਿ ਆਪਤ੍ਤਿਂ ਆਪਨ੍ਨਪੁਗ੍ਗਲਸ੍ਸ. ਵਤ੍ਥੁਪੁਗ੍ਗਲੋਯੇਵਾਤਿ ਆਪਤ੍ਤਿਂ ਆਪਨ੍ਨਪੁਗ੍ਗਲੋਯੇਵ. ਅਯਨ੍ਤਿ ਪਠਮਭਿਕ੍ਖੁ. ਅਞ੍ਞਸ੍ਸਾਤਿ ਦੁਤਿਯਸ੍ਸ. ਸੋਤਿ ਦੁਤਿਯੋ ਆਰੋਚੇਤੀਤਿ ਸਮ੍ਬਨ੍ਧੋ. ਯੇਨਾਤਿ ਪਠਮਭਿਕ੍ਖੁਨਾ. ਅਸ੍ਸਾਤਿ ਦੁਤਿਯਸ੍ਸ. ਤਸ੍ਸੇਵਾਤਿ ਪਠਮਭਿਕ੍ਖੁਸ੍ਸੇਵ. ਵਤ੍ਥੁਪੁਗ੍ਗਲਂ ਉਪਨਿਧਾਯ ‘‘ਤਤਿਯੇਨ ਪੁਗ੍ਗਲੇਨ ਦੁਤਿਯਸ੍ਸਾ’’ਤਿ ਵੁਤ੍ਤਂ.

੪੦੦. ਪਞ੍ਚਾਪਤ੍ਤਿਕ੍ਖਨ੍ਧੇਤਿ ਥੁਲ੍ਲਚ੍ਚਯਾਦਿਕੇ ਪਞ੍ਚ ਆਪਤ੍ਤਿਕ੍ਖਨ੍ਧੇ. ਅਜ੍ਝਾਚਾਰੋ ਨਾਮਾਤਿ ਅਧਿਭਵਿਤ੍ਵਾ ਵੀਤਿਕ੍ਕਮਿਤ੍ਵਾ ਆਚਰਿਤਬ੍ਬਤ੍ਤਾ ਅਜ੍ਝਾਚਾਰੋ ਨਾਮਾਤਿ. ਚਤੁਤ੍ਥਂ.

੫. ਊਨਵੀਸਤਿਵਸ੍ਸਸਿਕ੍ਖਾਪਦਂ

੪੦੨. ਪਞ੍ਚਮੇ ਅਙ੍ਗੁਲਿਯੋਤਿ ਕਰਸਾਖਾਯੋ. ਤਾ ਹਿ ਅਙ੍ਗਨ੍ਤਿ ਹਤ੍ਥਤੋ ਪਞ੍ਚਧਾ ਭਿਜ੍ਜਿਤ੍ਵਾ ਉਗ੍ਗਚ੍ਛਨ੍ਤੀਤਿ ਅਙ੍ਗੁਲਿਯੋਤਿ ਵੁਚ੍ਚਨ੍ਤਿ. ਲਿਖਨ੍ਤਸ੍ਸ ਉਪਾਲਿਸ੍ਸਾਤਿ ਸਮ੍ਬਨ੍ਧੋ. ਤੇਨਾਤਿ ਬਹੁਚਿਨ੍ਤੇਤਬ੍ਬਕਾਰਣੇਨ. ਅਸ੍ਸਾਤਿ ਉਪਾਲਿਸ੍ਸ. ਉਰੋਤਿ ਹਦਯਂ. ਤਞ੍ਹਿ ਉਸਤਿ ਚਿਤ੍ਤਤਾਪੋ ਦਹਤਿ ਏਤ੍ਥਾਤਿ ਉਰੋਤਿ ਵੁਚ੍ਚਤਿ. ਰੂਪਸੁਤ੍ਤਨ੍ਤਿ ਹੇਰਞ੍ਞਿਕਾਨਂ ਰੂਪਸੁਤ੍ਤਂ, ਯਥਾ ਹਤ੍ਥਾਚਰਿਯਾਨਂ ਹਤ੍ਥਿਸੁਤ੍ਤਨ੍ਤਿ. ਅਕ੍ਖੀਨੀਤਿ ਚਕ੍ਖੂਨਿ. ਤਾਨਿ ਹਿ ਅਕ੍ਖਨ੍ਤਿ ਵਿਸਯੇਸੁ ਬ੍ਯਾਪੀਭਵਨ੍ਤਿ, ਰੂਪਂ ਵਾ ਪਸ੍ਸਤਿ ਇਮੇਹੀਤਿ ਅਕ੍ਖੀਨੀਤਿ ਵੁਚ੍ਚਨ੍ਤਿ. ਮਕਸੇਨ ਸੂਚਿਮੁਖਾਨਂ ਗਹਿਤਤ੍ਤਾ ਡਂਸੇਨ ਪਿਙ੍ਗਲਮਕ੍ਖਿਕਾਯੋਵ ਗਹੇਤਬ੍ਬਾਤਿ ਆਹ ‘‘ਡਂਸਾਤਿ ਪਿਙ੍ਗਲਮਕ੍ਖਿਕਾਯੋ’’ਤਿ. ਪਿਙ੍ਗਲਮਕ੍ਖਿਕਾਯੋ ਹਿ ਡਂਸਨਟ੍ਠੇਨ ਖਾਦਨਟ੍ਠੇਨ ਡਂਸਾਤਿ ਵੁਚ੍ਚਨ੍ਤਿ. ਦੁਕ੍ਕਰੋ ਖਮੋ ਏਤਾਸਨ੍ਤਿ ਦੁਕ੍ਖਾਤਿ ਦਸ੍ਸੇਨ੍ਤੋ ਆਹ ‘‘ਦੁਕ੍ਖਮਾਨ’’ਨ੍ਤਿ. ਵੇਦਨਾਨਨ੍ਤਿ ਸਮ੍ਬਨ੍ਧੋ. ਅਸਾਤਸ੍ਸ ਕਾਰਣਂ ਦਸ੍ਸੇਤੁਂ ਵੁਤ੍ਤਂ ‘‘ਅਮਧੁਰਾਨ’’ਨ੍ਤਿ. ਇਮਿਨਾ ਅਮਧੁਰਤ੍ਤਾ ਨ ਸਾਦਿਤਬ੍ਬਾਤਿ ਅਸਾਤਾਤਿ ਅਤ੍ਥਂ ਦਸ੍ਸੇਤਿ. ਪਾਣਸਦ੍ਦਜੀਵਿਤਸਦ੍ਦਾਨਂ ਪਰਿਯਾਯਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਜੀਵਿਤਹਰਾਨ’’ਨ੍ਤਿ. ਪਾਣਂ ਹਰਨ੍ਤਿ ਅਪਨੇਨ੍ਤੀਤਿ ਪਾਣਹਰਾ, ਤਾਸਂ ਵੇਦਨਾਨਨ੍ਤਿ ਸਮ੍ਬਨ੍ਧੋ.

੪੦੪. ਵਿਜਾਯਨਕਾਲਤੋ ¶ ਪਟ੍ਠਾਯ ਪਰਿਪੁਣ੍ਣਵੀਸਤਿਵਸ੍ਸੋ ਨ ਗਹੇਤਬ੍ਬੋ, ਗਬ੍ਭਗਹਣਕਾਲਤੋ ¶ ਪਨ ਪਟ੍ਠਾਯਾਤਿ ਦਸ੍ਸੇਨ੍ਤੋ ਆਹ ‘‘ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯਾ’’ਤਿ. ਗਬ੍ਭੇ ਸਯਿਤਕਾਲੇਨ ਸਦ੍ਧਿਂ ਵੀਸਤਿਮਂ ਵਸ੍ਸਂ ਪਰਿਪੁਣ੍ਣਮਸ੍ਸਾਤਿ ਗਬ੍ਭਵੀਸੋ ਪੁਗ੍ਗਲੋ. ਹੀਤਿ ਸਚ੍ਚਂ. ਯਥਾਹਾਤਿ ਯੇਨਾਕਾਰੇਨ ਸਙ੍ਖ੍ਯਂ ਗਚ੍ਛਤਿ, ਤੇਨਾਕਾਰੇਨ ਭਗਵਾ ਆਹਾਤਿ ਯੋਜਨਾ. ਅਥ ਵਾ ਯਥਾ ਕਿਂ ਵਚਨਂ ਭਗਵਾ ਆਹਾਤਿ ਯੋਜਨਾ.

ਗਬ੍ਭਵੀਸੋ ਹੁਤ੍ਵਾ ਉਪਸਮ੍ਪਨ੍ਨੋਤਿ ਸਮ੍ਬਨ੍ਧੋ. ਅਮ੍ਹੀਤਿ ਅਸ੍ਮਿ. ਨੁਸਦ੍ਦੋ ਪਰਿਵਿਤਕ੍ਕਤ੍ਥੇ ਨਿਪਾਤੋ. ਯਨ੍ਤਿ ਯਾਦਿਸਂ ਪਠਮਂ ਚਿਤ੍ਤਨ੍ਤਿ ਸਮ੍ਬਨ੍ਧੋ. ਇਮਿਨਾ ਪਟਿਸਨ੍ਧਿਚਿਤ੍ਤਂ ਦਸ੍ਸੇਤਿ. ‘‘ਪਠਮਂ ਵਿਞ੍ਞਾਣ’’ਨ੍ਤਿ ਤਸ੍ਸੇਵ ਵੇਵਚਨਂ. ਤਨ੍ਤਿ ਪਠਮਂ ਚਿਤ੍ਤਂ ਪਠਮਂ ਵਿਞ੍ਞਾਣਂ. ਅਸ੍ਸਾਤਿ ਸਤ੍ਤਸ੍ਸ. ਸਾਵ ਜਾਤੀਤਿ ਸਾ ਏਵ ਪਟਿਸਨ੍ਧਿ, ਗਬ੍ਭੋ ਨਾਮ ਹੋਤੀਤਿ ਸਮ੍ਬਨ੍ਧੋ.

ਤਤ੍ਥਾਤਿ ਪਾਲ਼ਿਯਂ, ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਯੋਤਿ ਪੁਗ੍ਗਲੋ. ਮਹਾਪਵਾਰਣਾਯਾਤਿ ਅਸ੍ਸਯੁਜਪੁਣ੍ਣਮਿਯਂ. ਸਾ ਹਿ ਪੂਜਿਤਪਵਾਰਣਤ੍ਤਾ ਮਹਾਪਵਾਰਣਾਤਿ ਵੁਚ੍ਚਤਿ. ਤਤੋਤਿ ਪਵਾਰਣਾਯ ਜਾਤਕਾਲਤੋ. ਤਨ੍ਤਿ ਮਹਾਪਵਾਰਣਂ. ਪਾਟਿਪਦੇ ਚਾਤਿ ਏਤ੍ਥ ਚਸਦ੍ਦੋ ਅਨਿਯਮਵਿਕਪ੍ਪਤ੍ਥੋ, ਪਵਾਰਣਦਿਵਸਪਾਟਿਪਦਦਿਵਸੇਸੁ ਅਞ੍ਞਤਰਸ੍ਮਿਂ ਦਿਵਸੇ ਉਪਸਮ੍ਪਾਦੇਤਬ੍ਬੋਤਿ ਅਤ੍ਥੋ. ਹਾਯਨਵਡ੍ਢਨਨ੍ਤਿ ਕੁਚ੍ਛਿਮ੍ਹਿ ਵਸਿਤਮਾਸੇਸੁ ਅਧਿਕੇਸੁ ਹਾਯਨਞ੍ਚ ਊਨੇਸੁ ਵਡ੍ਢੁਨਞ੍ਚ ਵੇਦਿਤਬ੍ਬਂ.

ਪੋਰਾਣਕਤ੍ਥੇਰਾ ਪਨ ਉਪਸਮ੍ਪਾਦੇਨ੍ਤੀਤਿ ਸਮ੍ਬਨ੍ਧੋ. ਏਕੂਨਵੀਸਤਿਵਸ੍ਸਨ੍ਤਿ ਅਨਨ੍ਤਰੇ ਵੁਤ੍ਤਂ ਏਕੂਨਵੀਸਤਿਵਸ੍ਸਂ. ਨਿਕ੍ਖਮਨੀਯੋਤਿ ਸਾਵਣਮਾਸੋ. ਸੋ ਹਿ ਅਨ੍ਤੋਵੀਥਿਤੋ ਬਾਹਿਰਵੀਥਿਂ ਨਿਕ੍ਖਮਤਿ ਸੂਰਿਯੋ ਅਸ੍ਮਿਨ੍ਤਿ ‘‘ਨਿਕ੍ਖਮਨੀਯੋ’’ਤਿ ਵੁਚ੍ਚਤਿ. ਪਾਟਿਪਦਦਿਵਸੇਤਿ ਪਚ੍ਛਿਮਿਕਾਯ ਵਸ੍ਸੂਪਗਮਨਦਿਵਸੇ. ਤਂ ਉਪਸਮ੍ਪਾਦਨਂ. ਕਸ੍ਮਾਤਿ ਪੁਚ੍ਛਾ. ਏਤ੍ਥ ਠਤ੍ਵਾ ਪਰਿਹਾਰੋ ਵੁਚ੍ਚਤੇ ਮਯਾਤਿ ਯੋਜਨਾ. ਵੀਸਤਿਯਾ ਵਸ੍ਸੇਸੂਤਿ ਉਪਸਮ੍ਪਨ੍ਨਪੁਗ੍ਗਲਸ੍ਸ ਵੀਸਤਿਯਾ ਵਸ੍ਸੇਸੁ. ਤਿਂਸਰਤ੍ਤਿਦਿਵਸ੍ਸ ਏਕਮਾਸਤ੍ਤਾ ‘‘ਚਤ੍ਤਾਰੋ ¶ ਮਾਸਾ ਪਰਿਹਾਯਨ੍ਤੀ’’ਤਿ ਵੁਤ੍ਤਂ. ਉਕ੍ਕਡ੍ਢਨ੍ਤੀਤਿ ਏਕਸ੍ਸ ਅਧਿਕਮਾਸਸ੍ਸ ਨਾਸਨਤ੍ਥਾਯ ਵਸ੍ਸਂ ਉਪਰਿ ਕਡ੍ਢਨ੍ਤਿ. ਤਤੋਤਿ ਛਮਾਸਤੋ ਅਪਨੇਤ੍ਵਾਤਿ ਸਮ੍ਬਨ੍ਧੋ. ਏਤ੍ਥਾਤਿ ‘‘ਏਕੂਨਵੀਸਤਿਵਸ੍ਸ’’ਨ੍ਤਿਆਦਿਵਚਨੇ. ਪਨ-ਸਦ੍ਦੋ ਹਿਸਦ੍ਦਤ੍ਥੋ, ਸਚ੍ਚਨ੍ਤਿ ਅਤ੍ਥੋ. ਯੋਤਿ ਪੁਗ੍ਗਲੋ. ਤਸ੍ਮਾਤਿ ਯਸ੍ਮਾ ਗਬ੍ਭਮਾਸਾਨਮ੍ਪਿ ਗਣਨੂਪਗਤ੍ਤਾ ਗਹੇਤ੍ਵਾ ਉਪਸਮ੍ਪਾਦੇਨ੍ਤਿ, ਤਸ੍ਮਾ ਛ ਮਾਸੇ ਵਸਿਤ੍ਵਾਤਿ ਸਮ੍ਬਨ੍ਧੋ. ਅਟ੍ਠ ਮਾਸੇ ਵਸਿਤ੍ਵਾ ਜਾਤੋਪਿ ਨ ਜੀਵਤੀਤਿ ਸੁਤ੍ਤਨ੍ਤਅਟ੍ਠਕਥਾਸੁ (ਦੀ. ਨਿ. ਅਟ੍ਠ. ੨.੨੪-੨੫; ਮ. ਨਿ. ਅਟ੍ਠ. ੩.੨੦੫) ਵੁਤ੍ਤਂ.

੪੦੬. ਦਸਵਸ੍ਸਚ੍ਚਯੇਨਾਤਿ ਉਪਸਮ੍ਪਦਤੋ ਦਸਵਸ੍ਸਾਤਿਕ੍ਕਮੇਨ. ਉਪਸਮ੍ਪਾਦੇਤੀਤਿ ਉਪਜ੍ਝਾਯੋ ਵਾ ¶ ਕਮ੍ਮਵਾਚਾਚਰਿਯੋ ਵਾ ਹੁਤ੍ਵਾ ਉਪਸਮ੍ਪਾਦੇਤਿ. ਤਨ੍ਤਿ ਉਪਜ੍ਝਾਚਰਿਯਭੂਤਂ ਅਨੁਪਸਮ੍ਪਨ੍ਨਪੁਗ੍ਗਲਂ. ਕਮ੍ਮਵਾਚਾਚਰਿਯੋ ਹੁਤ੍ਵਾ ਉਪਸਮ੍ਪਾਦੇਨ੍ਤੋ ਤਂ ਮੁਞ੍ਚਿਤ੍ਵਾ ਸਚੇ ਅਞ੍ਞੋਪਿ ਕਮ੍ਮਵਾਚਾਚਰਿਯੋ ਅਤ੍ਥਿ, ਸੂਪਸਮ੍ਪਨ੍ਨੋ. ਸੋਵ ਸਚੇ ਕਮ੍ਮਵਾਚਂ ਸਾਵੇਤਿ, ਨੁਪਸਮ੍ਪਨ੍ਨੋ. ਞਤ੍ਵਾ ਪਨ ਪੁਨ ਅਨੁਪਸਮ੍ਪਾਦੇਨ੍ਤੇ ਸਗ੍ਗਨ੍ਤਰਾਯੋਪਿ ਮਗ੍ਗਨ੍ਤਰਾਯੋਪਿ ਹੋਤਿਯੇਵਾਤਿ ਦਟ੍ਠਬ੍ਬਨ੍ਤਿ. ਪਞ੍ਚਮਂ.

੬. ਥੇਯ੍ਯਸਤ੍ਥਸਿਕ੍ਖਾਪਦਂ

੪੦੭. ਛਟ੍ਠੇ ‘‘ਪਟਿਯਾਲੋਕ’’ਨ੍ਤਿ ਏਤ੍ਥ ਆਲੋਕਸਦ੍ਦੇਨ ਸੂਰਿਯੋ ਵੁਤ੍ਤੋ ਉਪਚਾਰੇਨ. ਸੂਰਿਯੋ ਹਿ ਪੁਰਤ੍ਥਿਮਦਿਸਤੋ ਉਗ੍ਗਨ੍ਤ੍ਵਾ ਪਚ੍ਛਿਮਦਿਸਂ ਗਤੋ, ਤਸ੍ਮਾ ਸੂਰਿਯਸਙ੍ਖਾਤਸ੍ਸ ਆਲੋਕਸ੍ਸ ਪਟਿਮੁਖਂ ‘‘ਪਟਿਯਾਲੋਕ’’ਨ੍ਤਿ ਵੁਤ੍ਤੇ ਪਚ੍ਛਿਮਦਿਸਾਯੇਵ ਗਹੇਤਬ੍ਬਾਤਿ ਆਹ ‘‘ਪਚ੍ਛਿਮਂ ਦਿਸਨ੍ਤਿ ਅਤ੍ਥੋ’’ਤਿ. ਕਮ੍ਮਿਕਾਤਿ ਕਮ੍ਮੇ ਯੁਤ੍ਤਾ ਪਯੁਤ੍ਤਾ.

੪੦੯. ਰਾਜਾਨਨ੍ਤਿ ਏਤ੍ਥ ਰਞ੍ਞੋ ਸਨ੍ਤਕਂ ‘‘ਰਾਜਾ’’ਤਿ ਵੁਚ੍ਚਤਿ ਉਪਚਾਰੇਨ, ਅਥ ਵਾ ਰਞ੍ਞੋ ਏਸੋ ‘‘ਰਾਜਾ’’ਤਿ ਕਤ੍ਵਾ ਰਞ੍ਞੋ ਸਨ੍ਤਕਂ ‘‘ਰਾਜਾ’’ਤਿ ਵੁਚ੍ਚਤਿ. ਥੇਯ੍ਯਨ੍ਤਿ ਥੇਨੇਤ੍ਵਾ ‘‘ਸਕ੍ਕਚ੍ਚ’’ਨ੍ਤਿਆਦੀਸੁ (ਪਾਚਿ. ੬੦੬) ਵਿਯ ਨਿਗ੍ਗਹੀਤਾਗਮੋ ਹੋਤਿ. ਰਾਜਾਨਂ, ਰਞ੍ਞੋ ਸਨ੍ਤਕਂ ਵਾ ਥੇਯ੍ਯਂ ਥੇਨੇਤ੍ਵਾ ¶ ਗਚ੍ਛਨ੍ਤੀਤਿ ਅਤ੍ਥੋ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਰਾਜਾਨਂ ਵਾ ਥੇਨੇਤ੍ਵਾ’’ਤਿਆਦਿ.

੪੧੧. ਚਤੂਸੁ ਵਿਸਙ੍ਕੇਤੇਸੁ ਦ੍ਵੀਹਿ ਅਨਾਪਤ੍ਤਿ, ਦ੍ਵੀਹਿ ਆਪਤ੍ਤਿਯੇਵਾਤਿ. ਛਟ੍ਠਂ.

੭. ਸਂਵਿਧਾਨਸਿਕ੍ਖਾਪਦਂ

੪੧੨. ਸਤ੍ਤਮੇ ‘‘ਪਧੂਪੇਨ੍ਤੋ’’ਤਿ ਏਤ੍ਥ ਪਪੁਬ੍ਬ ਧੂਪਧਾਤੁ ਪਰਿਭਾਸਨਤ੍ਥੇ ਵਤ੍ਤਤੀਤਿ ਆਹ ‘‘ਪਰਿਭਾਸਨ੍ਤੋ’’ਤਿ. ਤ੍ਵਂ ਸਮਣੋਪਿ ਮਾਤੁਗਾਮੇਨ ਸਦ੍ਧਿਂ ਗਚ੍ਛਸਿ, ਤੁਯ੍ਹੇਵੇਸੋ ਦੋਸੋ, ਨੇਤਸ੍ਸ ਪੁਰਿਸਸ੍ਸਾਤਿ ਅਤ੍ਤਾਨਂਯੇਵ ਪਰਿਭਾਸਨ੍ਤੋਤਿ ਅਤ੍ਥੋ. ‘‘ਨਿਕ੍ਖਾਮੇਸੀ’’ਤਿਇਮਿਨਾ ‘‘ਨਿਪ੍ਪਾਤੇਸੀ’’ਤਿਏਤ੍ਥ ਨਿਪੁਬ੍ਬ ਪਤਧਾਤੁ ਗਤ੍ਯਤ੍ਥੋਤਿ ਦਸ੍ਸੇਤੀਤਿ. ਸਤ੍ਤਮਂ.

੮. ਅਰਿਟ੍ਠਸਿਕ੍ਖਾਪਦਂ

੪੧੭. ਅਟ੍ਠਮੇ ਗਨ੍ਧੇਤਿ ਗਿਜ੍ਝੇ. ਤੇ ਹਿ ਗਿਧਨ੍ਤਿ ਕੁਣਪਂ ਅਭਿਕਙ੍ਖਨ੍ਤੀਤਿ ‘‘ਗਨ੍ਧਾ’’ਤਿ ਵੁਚ੍ਚਨ੍ਤਿ ¶ . ਗਦ੍ਧੇਤਿਪਿ ਪਾਠੋ, ਸੋਪਿ ਯੁਜ੍ਜਤਿ ਯਥਾ ‘‘ਯੁਗਨਨ੍ਧੋ, ਯੁਗਨਦ੍ਧੋ’’ਤਿ ਚ ‘‘ਪਟਿਬਨ੍ਧੋ ਪਟਿਬਦ੍ਧੋ’’ਤਿ ਚ. ਬਾਧਯਿਂਸੂਤਿ ਹਨਿਂਸੁ. ਅਸ੍ਸਾਤਿ ਅਰਿਟ੍ਠਸ੍ਸ.

ਤਦ੍ਧਿਤੇਨ ਵੁਤ੍ਤਸ੍ਸ ਅਤ੍ਥਸ੍ਸ ਦਸ੍ਸੇਤੁਮਾਹ ‘‘ਤੇ’’ਤਿਆਦਿ. ਤੇਤਿ ਅਨ੍ਤਰਾਯਿਕਾ. ਤਤ੍ਥਾਤਿ ਪਞ੍ਚਵਿਧੇਸੁ ਅਨ੍ਤਰਾਯਿਕੇਸੁ. ‘‘ਤਥਾ’’ਤਿਪਦੇਨ ‘‘ਕਮ੍ਮਨ੍ਤਰਾਯਿਕਂ ਨਾਮਾ’’ਤਿ ਪਦਂ ਅਤਿਦਿਸਤਿ. ਤਂ ਪਨਾਤਿ ਭਿਕ੍ਖੁਨਿਦੂਸਕਕਮ੍ਮਂ ਪਨ. ਮੋਕ੍ਖਸ੍ਸੇਵਾਤਿ ਮਗ੍ਗਨਿਬ੍ਬਾਨਸ੍ਸੇਵ. ਮਗ੍ਗੋ ਹਿ ਕਿਲੇਸੇਹਿ ਮੁਚ੍ਚਤੀਤਿ ਅਤ੍ਥੇਨ ਮੋਕ੍ਖੋ ਨਾਮ. ਝਾਨਮ੍ਪੇਤ੍ਥ ਸਙ੍ਗਹਿਤਂ ਨੀਵਰਣੇਹਿ ਵਿਮੁਚ੍ਚਨਤ੍ਤਾ. ਨਿਬ੍ਬਾਨਂ ਵਿਮੁਚ੍ਚੀਤਿ ਅਤ੍ਥੇਨ ਮੋਕ੍ਖੋ ਨਾਮ. ਫਲਮ੍ਪੇਤ੍ਥ ਸਙ੍ਗਹਿਤਂ ਵਿਮੁਚ੍ਚਿਤਤ੍ਤਾ. ਨਿਯਤਮਿਚ੍ਛਾਦਿਟ੍ਠਿਧਮ੍ਮਾਤਿ ਨਿਯਤਭਾਵਂ ਪਤ੍ਤਾ, ਨਿਯਤਵਸੇਨ ਵਾ ਪਵਤ੍ਤਾ ਮਿਚ੍ਛਾਦਿਟ੍ਠਿਸਙ੍ਖਾਤਾ ਧਮ੍ਮਾ. ਤੇ ਪਨ ਨਤ੍ਥਿਕਅਹੇਤੁਕ ਅਕਿਰਿਯਵਸੇਨ ਤਿਵਿਧਾ. ਪਣ੍ਡਕਾਦਿਗਹਣਸ੍ਸ ਨਿਦਸ੍ਸਨਮਤ੍ਤਤ੍ਤਾ ‘ਪਟਿਸਨ੍ਧਿਧਮ੍ਮਾ’’ਤਿਪਦੇਨ ਅਹੇਤੁਕਦ੍ਵਿਹੇਤੁਕਪਟਿਸਨ੍ਧਿਧਮ੍ਮਾ ਗਹੇਤਬ੍ਬਾ ਸਬ੍ਬੇਸਮ੍ਪਿ ਵਿਪਾਕਨ੍ਤਰਾਯਿਕਭਾਵਤੋ. ਤੇਪਿ ਮੋਕ੍ਖਸ੍ਸੇਵ ਅਨ੍ਤਰਾਯਂ ਕਰੋਨ੍ਤਿ, ਨ ਸਗ੍ਗਸ੍ਸ. ਤੇ ਪਨਾਤਿ ਅਰਿਯੂਪਵਾਦਾ ਪਨ. ਤਾਵਦੇਵ ਉਪਵਾਦਨ੍ਤਰਾਯਿਕਾ ¶ ਨਾਮਾਤਿ ਯੋਜਨਾ. ਤਾਪੀਤਿ ਸਞ੍ਚਿਚ੍ਚ ਆਪਨ੍ਨਾ ਆਪਤ੍ਤਿਯੋਪਿ. ਪਾਰਾਜਿਕਾਪਤ੍ਤਿਂ ਸਨ੍ਧਾਯ ਵੁਤ੍ਤਂ ‘‘ਭਿਕ੍ਖੁਭਾਵਂ ਵਾ ਪਟਿਜਾਨਾਤੀ’’ਤਿ. ਸਙ੍ਘਾਦਿਸੇਸਾਪਤ੍ਤਿਂ ਸਨ੍ਧਾਯ ਵੁਤ੍ਤਂ ‘‘ਨ ਵੁਟ੍ਠਾਤਿ ਵਾ’’ਤਿ. ਲਹੁਕਾਪਤ੍ਤਿਂ ਸਨ੍ਧਾਯ ਵੁਤ੍ਤਂ ‘‘ਨ ਦੇਸੇਤਿ ਵਾ’’ਤਿ.

ਤਤ੍ਰਾਤਿ ਪਞ੍ਚਵਿਧੇਸੁ ਅਨ੍ਤਰਾਯਿਕੇਸੁ. ਅਯਂ ਭਿਕ੍ਖੂਤਿ ਅਰਿਟ੍ਠੋ ਗਨ੍ਧਬਾਧਿਪੁਬ੍ਬੋ ਭਿਕ੍ਖੁ. ਸੇਸਨ੍ਤਰਾਯਿਕੇਤਿ ਆਣਾਵੀਤਿਕ੍ਕਮਨ੍ਤਰਾਯਿਕਤੋ ਸੇਸੇ ਚਤੁਬ੍ਬਿਧੇ ਅਨ੍ਤਰਾਯਿਕੇ. ਇਮੇ ਆਗਾਰਿਕਾਤਿ ਅਗਾਰੇ ਵਸਨਸੀਲਾ ਇਮੇ ਮਨੁਸ੍ਸਾ. ਭਿਕ੍ਖੂਪਿ ਪਸ੍ਸਨ੍ਤਿ ਫੁਸਨ੍ਤਿ ਪਰਿਭੁਞ੍ਜਨ੍ਤੀਤਿ ਸਮ੍ਬਨ੍ਧੋ. ਕਸ੍ਮਾ ਨ ਵਟ੍ਟਨ੍ਤਿ, ਵਟ੍ਟਨ੍ਤਿਯੇਵਾਤਿ ਅਧਿਪ੍ਪਾਯੋ. ਰਸੇਨ ਰਸਂ ਸਂਸਨ੍ਦਿਤ੍ਵਾਤਿ ਉਪਾਦਿਣ੍ਣਕਰਸੇਨ ਅਨੁਪਾਦਿਣ੍ਣਕਰਸਂ, ਅਨੁਪਾਦਿਣ੍ਣਕਰਸੇਨ ਵਾ ਉਪਾਦਿਣ੍ਣਕਰਸਂ ਸਮਾਨੇਤ੍ਵਾ. ਯੋਨਿਸੋ ਪਚ੍ਚਵੇਕ੍ਖਣਸ੍ਸ ਅਭਾਵਤੋ ਸਂਵਿਜ੍ਜਤਿ ਛਨ੍ਦਰਾਗੋ ਏਤ੍ਥਾਤਿ ਸਚ੍ਛਨ੍ਦਰਾਗੋ, ਸੋਯੇਵ ਪਰਿਭੋਗੋ ਸਚ੍ਛਨ੍ਦਰਾਗਪਰਿਭੋਗੋ, ਤਂ. ਏਕਂ ਕਤ੍ਵਾਤਿ ਸਮਾਨਂ ਕਤ੍ਵਾ. ਘਟੇਨ੍ਤੋ ਵਿਯ ਪਾਪਕਂ ਦਿਟ੍ਠਿਗਤਂ ਉਪ੍ਪਾਦੇਤ੍ਵਾਤਿ ਯੋਜਨਾ. ਕਿਂਸਦ੍ਦੋ ਗਰਹਤ੍ਥੋ, ਕਸ੍ਮਾ ਭਗਵਤਾ ਪਠਮਪਾਰਾਜਿਕਂ ਪਞ੍ਞਤ੍ਤਂ, ਨ ਪਞ੍ਞਾਪੇਤਬ੍ਬਨ੍ਤਿ ਅਤ੍ਥੋ. ਮਹਾਸਮੁਦ੍ਦਂ ਬਨ੍ਧਨ੍ਤੋ ਯਥਾ ਅਕਤ੍ਤਬ੍ਬਂ ਕਰੋਤਿ, ਤਥਾ ਪਠਮਪਾਰਾਜਿਕਂ ਪਞ੍ਞਪੇਨ੍ਤੋ ਭਗਵਾ ਅਪਞ੍ਞਤ੍ਤਂ ਪਞ੍ਞਪੇਤੀਤਿ ਅਧਿਪ੍ਪਾਯੋ. ਏਤ੍ਥਾਤਿ ਪਠਮਪਾਰਾਜਿਕੇ. ਆਸਨ੍ਤਿ ਭਬ੍ਬਾਸਂ. ਆਣਾਚਕ੍ਕੇਤਿ ਆਣਾਸਙ੍ਖਾਤੇ ਚਕ੍ਕੇ.

ਅਟ੍ਠਿਯੇਵ ਅਟ੍ਠਿਕਂ ਕੁਚ੍ਛਿਤਤ੍ਥੇਨ, ਕੁਚ੍ਛਿਤਤ੍ਥੇ ਹਿ ਕੋ. ਅਟ੍ਠਿਕਮੇਵ ਖਲੋ ਨੀਚਟ੍ਠੇਨ ਲਾਮਕਟ੍ਠੇਨਾਤਿ ਅਟ੍ਠਿਕਙ੍ਖਲੋ ਨਿਗ੍ਗਹੀਤਾਗਮਂ ਕਤ੍ਵਾ. ਤੇਨ ਉਪਮਾ ਸਦਿਸਾਤਿ ਅਟ੍ਠਿਕਙ੍ਖਲੂਪਮਾ. ‘‘ਅਟ੍ਠੀ’’ਤਿ ¶ ਚ ‘‘ਕਙ੍ਖਲ’’ਨ੍ਤਿ ਚ ਪਦਂ ਗਹੇਤ੍ਵਾ ਵਣ੍ਣੇਨ੍ਤਿ ਆਚਰਿਯਾ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੪੧੭; ਵਿ. ਵਿ. ਟੀ. ਪਾਚਿਤ੍ਤਿਯ ੨.੪੧੭; ਮ. ਨਿ. ਅਟ੍ਠ. ੨.੪੨; ਮ. ਨਿ. ਟੀ. ੩.੪੨). ਅਙ੍ਗਾਰਕਾਸੂਪਮਾਤਿ ਅਙ੍ਗਾਰਰਾਸਿਸਦਿਸਾ, ਅਙ੍ਗਾਰੇਹਿ ਵਾ ਪਰਿਪੁਣ੍ਣਾ ਆਵਾਟਸਦਿਸਾ. ਅਸਿਸੂਨੂਪਮਾਤਿ ਏਤ੍ਥ ਅਸੀਤਿ ਖਗ੍ਗੋ. ਸੋ ਹਿ ਅਸਤੇ ਖਿਪਤੇ ਅਨੇਨਾਤਿ ‘‘ਅਸੀ’’ਤਿ ਵੁਚ੍ਚਤਿ. ਸੂਨਾਤਿ ਅਧਿਕੋਟ੍ਟਨਂ. ਤਞ੍ਹਿ ਸੁਨਤਿ ਸਞ੍ਚੁਣ੍ਣਭਾਵਂ ਗਚ੍ਛਤਿ ਏਤ੍ਥਾਤਿ ‘‘ਸੂਨਾ’’ਤਿ ਵੁਚ੍ਚਤਿ. ਅਸਿਨਾ ਸੂਨਾਤਿ ਅਸਿਸੂਨਾ, ਤਾਯ ਉਪਮਾ ਸਦਿਸਾਤਿ ਅਸਿਸੂਨੂਪਮਾ. ਸਤ੍ਤਿਸੂਲੂਪਮਾਤਿ ਸਤ੍ਤਿਯਾ ਚ ਸੂਲੇਨ ¶ ਚ ਸਦਿਸਾ. ਏਤ੍ਥਾਤਿ ਇਮਿਸ੍ਸਂ ਅਟ੍ਠਕਥਾਯਂ. ਮਜ੍ਝਿਮਟ੍ਠਕਥਾਯਂ ਅਲਗਦ੍ਦੂਪਮਸੁਤ੍ਤੇ (ਮ. ਨਿ. ਅਟ੍ਠ. ੧.੨੩੪ ਆਦਯੋ) ਗਹੇਤਬ੍ਬੋ. ਏਵਂਸਦ੍ਦਖੋਸਦ੍ਦਾਨਮਨ੍ਤਰੇ ਵਿਯਸਦ੍ਦਸ੍ਸ ਬ੍ਯਾਦੇਸਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਏਵਂ ਵਿਯ ਖੋ’’ਤਿ. ਅਟ੍ਠਮਂ.

੯. ਉਕ੍ਖਿਤ੍ਤਸਮ੍ਭੋਗਸਿਕ੍ਖਾਪਦਂ

੪੨੪. ਨਵਮੇ ਅਨੁਧਮ੍ਮਸ੍ਸ ਸਰੂਪਂ ਦਸ੍ਸੇਤੁਂ ਵੁਤ੍ਤਂ ‘‘ਅਨੁਲੋਮਵਤ੍ਤਂ ਦਿਸ੍ਵਾ ਕਤਾ ਓਸਾਰਣਾ’’ਤਿ. ਇਮਿਨਾ ਅਨੁਲੋਮਵਤ੍ਤਂ ਦਿਸ੍ਵਾ ਕਤੋ ਓਸਾਰਣਸਙ੍ਖਾਤੋ ਧਮ੍ਮੋ ਅਨੁਧਮ੍ਮੋਤਿ ਦਸ੍ਸੇਤਿ. ਓਸਾਰਣਾਤਿ ਪਵੇਸਨਾ. ਤੇਨੇਵਾਤਿ ਉਕ੍ਖਿਤ੍ਤਕਸ੍ਸ ਅਕਟਾਨੁਧਮ੍ਮਤ੍ਤਾ ਏਵ. ਅਸ੍ਸਾਤਿ ‘‘ਅਕਟਾਨੁਧਮ੍ਮੇਨਾ’’ਤਿ ਪਦਸ੍ਸ.

ਦਦਤੋ ਵਾ ਗਣ੍ਹਤੋ ਵਾਤਿ ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋਤਿ. ਨਵਮਂ.

੧੦. ਕਣ੍ਟਕਸਿਕ੍ਖਾਪਦਂ

੪੨੮. ਦਸਮੇ ਅਰਿਟ੍ਠਸ੍ਸ ਉਪ੍ਪਨ੍ਨਂ ਵਿਯ ਏਤਸ੍ਸਾਪਿ ਉਪ੍ਪਨ੍ਨਨ੍ਤਿ ਯੋਜਨਾ. ਉਮ੍ਮਜ੍ਜਨ੍ਤਸ੍ਸਾਤਿ ਮਨਸਿਕਰੋਨ੍ਤਸ੍ਸ. ਸਂਵਾਸਸ੍ਸ ਨਾਸਨਾ ਸਂਵਾਸਨਾਸਨਾ. ਲਿਙ੍ਗਸ੍ਸ ਨਾਸਨਾ ਲਿਙ੍ਗਨਾਸਨਾ. ਦਣ੍ਡਕਮ੍ਮੇਨ ਨਾਸਨਾ ਦਣ੍ਡਕਮ੍ਮਨਾਸਨਾ. ਤਤ੍ਥਾਤਿ ਤਿਵਿਧਾਸੁ ਨਾਸਨਾਸੁ. ਦੂਸਕੋ…ਪੇ… ਨਾਸੇਥਾਤਿ ਏਤ੍ਥ ਅਯਂ ਨਾਸਨਾ ਲਿਙ੍ਗਨਾਸਨਾ ਨਾਮਾਤਿ ਯੋਜਨਾ. ਅਯਨ੍ਤਿ ਦਣ੍ਡਕਮ੍ਮਨਾਸਨਾ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ, ‘‘ਨਾਸੇਤੂ’’ਤਿ ਪਦੇ ਵਾ. ਤਤ੍ਥਾਤਿ ਪੁਰਿਮਵਚਨਾਪੇਕ੍ਖਂ, ‘‘ਏਵਞ੍ਚ ਪਨ ਭਿਕ੍ਖਵੇ’’ਤਿ ਆਦਿਵਚਨੇਤਿ ਅਤ੍ਥੋ. ਪਿਰੇਤਿ ਆਮਨ੍ਤਨਪਦਂ ਪਰਸਦ੍ਦੇਨ ਸਮਾਨਤ੍ਥਨ੍ਤਿ ਆਹ ‘‘ਪਰਾ’’ਤਿ. ‘‘ਅਮ੍ਹਾਕਂ ਅਨਜ੍ਝਤ੍ਤਿਕਭੂਤ’’ਇਤਿ ਵਾ ‘‘ਅਮ੍ਹਾਕਂ ਪਚ੍ਚਨੀਕਭੂਤ’’ ਇਤਿ ਵਾ ਅਤ੍ਥੋ ਦਟ੍ਠਬ੍ਬੋ. ‘‘ਅਮਾਮਕ’’ਇਤਿਪਦੇਨ ‘‘ਪਰ’’ਇਤਿਪਦਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਅਮ੍ਹੇ ਨਮਮਾਯਕ, ਅਮ੍ਹੇਹਿ ਵਾ ਨਮਮਾਯਿਤਬ੍ਬ ਇਤਿ ਅਤ੍ਥੋ. ‘‘ਅਮ੍ਹਾਮਕ’’ਇਤਿਪਿ ਹਕਾਰਯੁਤ੍ਤੋ ਪਾਠੋ. ਅਮ੍ਹੇਹਿ ਆਮਕਇਤਿ ¶ ਅਤ੍ਥੋ. ਯਤ੍ਥਾਤਿ ਯਸ੍ਮਿਂ ਠਾਨੇ. ਤੇਤਿ ਉਪਯੋਗਤ੍ਥੇ ਸਾਮਿਵਚਨਂ, ਤਨ੍ਤਿ ¶ ਅਤ੍ਥੋ. ਤਵ ਰੂਪਸਦ੍ਦੇ ਵਾਤਿ ਸਮ੍ਬਨ੍ਧੋ. ਨ ਪਸ੍ਸਾਮਾਤਿ ਨ ਪਸ੍ਸਾਮ, ਨ ਸੁਣਾਮ.

੪੨੯. ਤੇਨਾਤਿ ਸਾਮਣੇਰੇਨ. ‘‘ਕਾਰਾਪੇਯ੍ਯਾ’’ਤਿ ਪਦੇ ਕਾਰਿਤਕਮ੍ਮਨ੍ਤਿ. ਦਸਮਂ.

ਸਪ੍ਪਾਣਕਵਗ੍ਗੋ ਸਤ੍ਤਮੋ.

੮. ਸਹਧਮ੍ਮਿਕਵਗ੍ਗੋ

੧. ਸਹਧਮ੍ਮਿਕਸਿਕ੍ਖਾਪਦ-ਅਤ੍ਥਯੋਜਨਾ

੪੩੪. ਸਹਧਮ੍ਮਿਕਵਗ੍ਗਸ੍ਸ ਪਠਮੇ ਯਨ੍ਤਿ ਯਂ ਪਞ੍ਞਤ੍ਤਂ. ‘‘ਸਿਕ੍ਖਮਾਨੇਨਾ’’ਤਿ ਏਤ੍ਥ ਮਾਨਪਚ੍ਚਯਸ੍ਸ ਅਨਾਗਤਤ੍ਥਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਸਿਕ੍ਖਿਤੁਕਾਮੇਨਾ’’ਤਿ. ‘‘ਸਿਕ੍ਖਮਾਨੇਨਾ’’ਤਿਪਦਂ ‘‘ਭਿਕ੍ਖੁਨਾ’’ਤਿਪਦੇ ਏਵ ਨ ਕੇਵਲਂ ਕਾਰਕਵਿਸੇਸਨਂ ਹੋਤਿ, ਅਥ ਖੋ ‘‘ਅਞ੍ਞਾਤਬ੍ਬ’’ਨ੍ਤਿਆਦਿਪਦੇਸੁਪਿ ਕਿਰਿਯਾਵਿਸੇਸਨਂ ਹੋਤੀਤਿ ਦਸ੍ਸੇਨ੍ਤੋ ਆਹ ‘‘ਹੁਤ੍ਵਾ’’ਤਿ. ਪਦਤ੍ਥਤੋਤਿ ਪਦਤੋ ਚ ਅਤ੍ਥਤੋ ਚ, ਪਦਾਨਂ ਅਤ੍ਥਤੋ ਵਾਤਿ. ਪਠਮਂ.

੨. ਵਿਲੇਖਨਸਿਕ੍ਖਾਪਦਂ

੪੩੮. ਦੁਤਿਯੇ ਵਿਨਯੇ ਪਟਿਸਂਯੁਤ੍ਤਾ ਕਥਾ ਵਿਨਯਕਥਾਤਿ ਦਸ੍ਸੇਨ੍ਤੋ ਆਹ ‘‘ਵਿਨਯਕਥਾ ਨਾਮਾ’’ਤਿਆਦਿ. ਤਨ੍ਤਿ ਵਿਨਯਕਥਂ. ਪਦਭਾਜਨੇਨ ਵਣ੍ਣਨਾ ਵਿਨਯਸ੍ਸ ਵਣ੍ਣੋ ਨਾਮਾਤਿ ਯੋਜਨਾ. ਤਨ੍ਤਿ ਵਿਨਯਸ੍ਸ ਵਣ੍ਣਂ. ਪਰਿਯਾਪੁਣਨਂ ਪਰਿਯਤ੍ਤਿ, ਵਿਨਯਸ੍ਸ ਪਰਿਯਤ੍ਤਿ ਵਿਨਯਪਰਿਯਤ੍ਤਿ, ਵਿਨਯਪਰਿਯਤ੍ਤਿਸਙ੍ਖਾਤਂ ਮੂਲਮਸ੍ਸ ਵਣ੍ਣਸ੍ਸਾਤਿ ਵਿਨਯਪਰਿਯਤ੍ਤਿਮੂਲਕੋ, ਤਂ. ਵਿਨਯਧਰੋ ਲਭਤੀਤਿ ਸਮ੍ਬਨ੍ਧੋ. ਹੀਤਿ ਵਿਤ੍ਥਾਰੋ. ਤੇ ਸਬ੍ਬੇ ਭਗਵਾ ਭਾਸਤੀਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ.

ਅਸ੍ਸਾਤਿ ਵਿਨਯਧਰਸ੍ਸ. ਇਧਾਤਿ ਇਮਸ੍ਮਿਂ ਸਾਸਨੇ. ਅਲਜ੍ਜਿਤਾਤਿਆਦੀਸੁ ਕਰਣਤ੍ਥੇ ਪਚ੍ਚਤ੍ਤਵਚਨਂ. ਅਲਜ੍ਜਿਤਾਯਾਤਿ ਹਿ ਅਤ੍ਥੋ. ਤੇਨ ਵੁਤ੍ਤਂ ‘‘ਕਥਂ ਅਲਜ੍ਜਿਤਾਯਾ’’ਤਿਆਦਿ. ਚਾਤਿ ਸਚ੍ਚਂ ¶ . ‘‘ਸਞ੍ਚਿਚ੍ਚਾ’’ਤਿ ਪਦਂ ਤੀਸੁ ਵਾਕ੍ਯੇਸੁ ¶ ਯੋਜੇਤਬ੍ਬਂ. ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤਿ, ਸਞ੍ਚਿਚ੍ਚ ਆਪਤ੍ਤਿਂ ਪਰਿਗੂਹਤਿ, ਸਞ੍ਚਿਚ੍ਚ ਅਗਤਿਗਮਨਞ੍ਚ ਗਚ੍ਛਤੀਤਿ ਅਤ੍ਥੋ. ਮਨ੍ਦੋਤਿ ਬਾਲੋ. ਮੋਮੂਹੋਤਿ ਅਤਿਸਮ੍ਮੂਲ਼੍ਹੋ. ਵਿਰਾਧੇਤੀਤਿ ਵਿਰਜ੍ਝਾਪੇਤਿ. ਕੁਕ੍ਕੁਚ੍ਚੇ ਉਪ੍ਪਨ੍ਨੇਤਿ ‘‘ਕਪ੍ਪਤਿ ਨੁ ਖੋ, ਨੋ’’ਤਿ ਵਿਨਯਕੁਕ੍ਕੁਚ੍ਚੇ ਉਪ੍ਪਨ੍ਨੇ. ਅਯਂ ਪਨਾਤਿ ਅਯਂ ਪੁਗ੍ਗਲੋ ਪਨ ਵੀਤਿਕ੍ਕਮਤਿਯੇਵਾਤਿ ਸਮ੍ਬਨ੍ਧੋ. ਅਚ੍ਛਮਂਸੇਨ ਸੂਕਰਮਂਸਸ੍ਸ ਵਣ੍ਣਸਣ੍ਠਾਨੇਨ ਸਦਿਸਤ੍ਤਾ, ਦੀਪਿਮਂਸੇਨ ਚ ਮਿਗਮਂਸਸ੍ਸ ਸਦਿਸਤ੍ਤਾ ਵੁਤ੍ਤਂ ‘‘ਅਚ੍ਛਮਂਸਂ ਸੂਕਰਮਂਸ’’ਨ੍ਤਿਆਦਿ.

ਆਪਤ੍ਤਿਂਚ ਸਤਿਸਮ੍ਮੋਸਾਯਾਤਿ ਏਤ੍ਥ ਚਸਦ੍ਦੋ ਅਵੁਤ੍ਤਵਾਕ੍ਯਸਮ੍ਪਿਣ੍ਡਨਤ੍ਥੋ, ਕਤ੍ਤਬ੍ਬਞ੍ਚ ਨ ਹਿ ਕਰੋਤੀਤਿ ਅਤ੍ਥੋ. ਏਵਨ੍ਤਿਆਦਿ ਨਿਗਮਨਂ.

ਏਵਂ ਅਵਿਨਯਧਰਸ੍ਸ ਦੋਸਂ ਦਸ੍ਸੇਤ੍ਵਾ ਵਿਨਯਧਰਸ੍ਸ ਗੁਣਂ ਦਸ੍ਸੇਨ੍ਤੋ ਆਹ ‘‘ਵਿਨਯਧਰੋ ਪਨਾ’’ਤਿਆਦਿ. ਸੋਤਿ ਵਿਨਯਧਰੋ. ਹੀਤਿ ਵਿਤ੍ਥਾਰੋ. ਪਰੂਪਵਾਦਨ੍ਤਿ ਪਰੇਸਂ ਉਪਵਾਦਂ. ਸੁਦ੍ਧਨ੍ਤੇਤਿ ਸੁਦ੍ਧਸ੍ਸ ਕੋਟ੍ਠਾਸੇ. ਤਤੋਤਿ ਪਤਿਟ੍ਠਾਨਤੋ ਪਰਨ੍ਤਿ ਸਮ੍ਬਨ੍ਧੋ. ਅਸ੍ਸਾਤਿ ਵਿਨਯਧਰਸ੍ਸ. ਏਵਨ੍ਤਿਆਦਿ ਨਿਗਮਨਂ. ਅਸ੍ਸਾਤਿ ਵਿਨਯਧਰਸ੍ਸ. ਕੁਕ੍ਕੁਚ੍ਚਪਕਤਾਨਨ੍ਤਿ ਕੁਕ੍ਕੁਚ੍ਚੇਨ ਅਭਿਭੂਤਾਨਂ. ਸੋਤਿ ਵਿਨਯਧਰੋ. ਤੇਹੀਤਿ ਕੁਕ੍ਕੁਚ੍ਚਪਕਤੇਹਿ. ਸਙ੍ਘਮਜ੍ਝੇ ਕਥੇਨ੍ਤਸ੍ਸ ਅਵਿਨਯਧਰਸ੍ਸਾਤਿ ਯੋਜਨਾ. ਤਨ੍ਤਿ ਭਯਂ ਸਾਰਜ੍ਜਂ.

ਪਟਿਪਕ੍ਖਂ, ਪਟਿਵਿਰੁਦ੍ਧਂ ਵਾ ਅਤ੍ਥਯਨ੍ਤਿ ਇਚ੍ਛਨ੍ਤੀਤਿ ਪਚ੍ਚਤ੍ਥੀਕਾ, ਣ੍ਯਸਦ੍ਦੋ ਬਹੁਲਂ ਕਤ੍ਤਾਭਿਧਾਯਕੋ, ਅਤ੍ਤਨੋ ਪਚ੍ਚਤ੍ਥਿਕਾ ਅਤ੍ਤਪਚ੍ਚਤ੍ਥਿਕਾ. ਤਤ੍ਥਾਤਿ ਦੁਵਿਧੇਸੁ ਪਚ੍ਚਤ੍ਥਿਕੇਸੁ. ਇਮੇਤਿ ਮੇਤ੍ਤਿਯਭੁਮ੍ਮਜਕਵਡ੍ਢਲਿਚ੍ਛਵਿਨੋ. ਅਞ੍ਞੇਪਿ ਯੇ ਵਾ ਪਨ ਭਿਕ੍ਖੂਤਿ ਸਮ੍ਬਨ੍ਧੋ. ਅਰਿਟ੍ਠਭਿਕ੍ਖੁ ਚ ਕਣ੍ਟਕਸਾਮਣੇਰੋ ਚ ਵੇਸਾਲਿਕਵਜ੍ਜਿਪੁਤ੍ਤਕਾ ਚ ਅਰਿਟ੍ਠ…ਪੇ… ਵਜ੍ਜੀਪੁਤ੍ਤਕਾ. ਤੇ ਚ ਸਾਸਨਪਚ੍ਚਤ੍ਥਿਕਾ ਨਾਮਾਤਿ ਸਮ੍ਬਨ੍ਧੋ. ਪਰੂਪਹਾਰੋ ਚ ਅਞ੍ਞਾਣੋ ਚ ਕਙ੍ਖਾਪਰਵਿਤਰਣੋ ਚ ਪਰੂ…ਪੇ… ਵਿਤਰਣਾ. ਤੇ ਆਦਯੋ ਯੇਸਂ ਵਾਦਾਨਨ੍ਤਿ ਪਰੂ…ਪੇ… ਵਿਤਰਣਾਦਯੋ. ਤੇ ਏਵ ਵਾਦਾ ਏਤੇਸਨ੍ਤਿ ਪਰੂ…ਪੇ… ਵਿਤਰਣਾਦਿਵਾਦਾ. ਤੇ ਚ ਸਾਸਨਪਚ੍ਚਤ੍ਥਿਕਾ ਨਾਮਾਤਿ ਸਮ੍ਬਨ੍ਧੋ. ਅਬੁਦ੍ਧਸਾਸਨਂ ਬੁਦ੍ਧਸਾਸਨਨ੍ਤਿ ਵਤ੍ਵਾ ਕਤਪਗ੍ਗਹਾ ਮਹਾਸਙ੍ਘਿਕਾਦਯੋ ਚ ਸਾਸਨਪਚ੍ਚਤ੍ਥਿਕਾ ਨਾਮਾਤਿ ਯੋਜਨਾ. ਕਙ੍ਖਾਪਰਵਿਤਰਣਾਦੀਤਿ ਏਤ੍ਥ ¶ ਆਦਿਸਦ੍ਦੇਨ ਕਥਾਵਤ੍ਥੁਪਕਰਣੇ ਆਗਤਾ ਵਾਦਾ ਸਙ੍ਗਯ੍ਹਨ੍ਤਿ. ਮਹਾਸਙ੍ਘਿਕਾਦਯੋਤਿ ਏਤ੍ਥ ਆਦਿਸਦ੍ਦੇਨ ਦੀਪਵਂਸੇ ਆਗਤਾ ਗਣਾ ਸਙ੍ਗਯ੍ਹਨ੍ਤਿ. ਆਦਿਮ੍ਹਿ ‘‘ਵਿਪਰੀਤਦਸ੍ਸਨਾ’’ਤਿ ਪਦਂ ਸਬ੍ਬਪਦੇਹਿ ਯੋਜੇਤਬ੍ਬਂ. ‘‘ਸਹਧਮ੍ਮੇਨਾ’’ਤਿ ਪਦਸ੍ਸਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸਹ ਕਾਰਣੇਨਾ’’ਤਿ. ਯਥਾਤਿ ਯੇਨਾਕਾਰੇਨ ਨਿਗ੍ਗਯ੍ਹਮਾਨੇਤਿ ਸਮ੍ਬਨ੍ਧੋ.

ਤਤ੍ਥਾਤਿ ¶ ਤਿਵਿਧੇਸੁ ਸਦ੍ਧਮ੍ਮੇਸੁ. ਮਹਾਵਤ੍ਤਾਨਿ ਸਨ੍ਤਿ, ਅਯਂ ਸਬ੍ਬੋਤਿ ਯੋਜਨਾ. ਚਤ੍ਤਾਰਿ ਫਲਾਨਿ ਚਾਤਿ ਲਿਙ੍ਗਵਿਪਲ੍ਲਾਸੇਨ ਯੋਜੇਤਬ੍ਬਂ. ਏਤ੍ਥ ਚਕਾਰੇਨ ਅਭਿਞ੍ਞਾਪਟਿਸਮ੍ਭਿਦਾ ਸਙ੍ਗਹਿਤਾ ਤਾਸਮ੍ਪਿ ਅਧਿਗਮਸਾਸਨਭਾਵਤੋ.

ਤਤ੍ਥਾਤਿ ਤਿਵਿਧੇਸੁ ਸਦ੍ਧਮ੍ਮੇਸੁ. ਕੇਚਿ ਥੇਰਾਤਿ ਧਮ੍ਮਕਥਿਕਾ ਕੇਚਿ ਥੇਰਾ. ‘‘ਯੋ ਖੋ’’ਤਿ ਕਣ੍ਠਜਦੁਤਿਯਕ੍ਖਰੇਨ ਪਠਿਤਬ੍ਬੋ. ਪੋਤ੍ਥਕੇਸੁ ਪਨ ‘‘ਯੋ ਵੋ’’ਤਿ ਵਕਾਰੇਨ ਪਾਠੋ ਅਤ੍ਥਿ, ਸੋ ਅਯੁਤ੍ਤੋ. ਕਸ੍ਮਾ? ‘‘ਸੋ ਵੋ’’ਤਿ ਪਰਤੋ ਵੁਤ੍ਤਤ੍ਤਾ, ਏਕਸ੍ਮਿਂ ਵਾਕ੍ਯੇ ਦ੍ਵਿਨ੍ਨਂ ਸਮਾਨਸੁਤਿਸਦ੍ਦਾਨਂ ਅਯੁਤ੍ਤਤ੍ਤਾ ਚ. ਕੇਚਿ ਥੇਰਾਤਿ ਪਂਸੁਕੂਲਿਕਾ ਕੇਚਿ ਥੇਰਾ ਆਹਂਸੂਤਿ ਸਮ੍ਬਨ੍ਧੋ. ਇਤਰੇ ਪਨ ਥੇਰਾਤਿ ਧਮ੍ਮਕਥਿਕਥੇਰੇਹਿ ਚ ਪਂਸੁਕੂਲਿਕਥੇਰੇਹਿ ਚ ਅਞ੍ਞੇ ਥੇਰਾ. ਤੇਤਿ ਪਞ੍ਚ ਭਿਕ੍ਖੂ ਕਰਿਸ੍ਸਨ੍ਤੀਤਿ ਸਮ੍ਬਨ੍ਧੋ. ਜਮ੍ਬੁਦੀਪਸ੍ਸ ਪਚ੍ਚਨ੍ਤੇ ਤਿਟ੍ਠਤੀਤਿ ਪਚ੍ਚਨ੍ਤਿਮੋ, ਤਸ੍ਮਿਂ. ਜਮ੍ਬੁਦੀਪਸ੍ਸ ਮਜ੍ਝੇ ਵੇਮਜ੍ਝੇ ਤਿਟ੍ਠਤੀਤਿ ਮਜ੍ਝਿਮੋ. ਅਥ ਵਾ ਮਜ੍ਝਾਨਂ ਸੁਦ੍ਧਾਨਂ ਬੁਦ੍ਧਾਦੀਨਂ ਨਿਵਾਸੋ ਮਜ੍ਝਿਮੋ, ਤਸ੍ਮਿਂ. ਵੀਸਤਿ ਵਗ੍ਗਾ ਇਮਸ੍ਸਾਤਿ ਵੀਸਤਿਵਗ੍ਗੋ, ਸੋਯੇਵ ਗਣੋ ਵੀਸਤਿਵਗ੍ਗਗਣੋ, ਤਂ. ਏਵਨ੍ਤਿਆਦਿ ਨਿਗਮਨਂ.

ਤਸ੍ਸਾਧੇਯ੍ਯੋਤਿ ਤਸ੍ਸਾਯਤ੍ਤੋ, ਤਸ੍ਸ ਸਨ੍ਤਕੋਤਿ ਵੁਤ੍ਤਂ ਹੋਤਿ. ਪਵਾਰਣਾ ਆਧੇਯ੍ਯਾ, ਸਙ੍ਘਕਮ੍ਮਂ ਆਧੇਯ੍ਯਂ, ਪਬ੍ਬਜ੍ਜਾ ਆਧੇਯ੍ਯਾ, ਉਪਸਮ੍ਪਦਾ ਆਧੇਯ੍ਯਾਤਿ ਯੋਜਨਾ.

ਯੇਪਿ ਇਮੇ ਨਵ ਉਪੋਸਥਾਤਿ ਸਮ੍ਬਨ੍ਧੋ. ਯਾਪਿ ਚ ਇਮਾ ਨਵ ਪਵਾਰਣਾਯੋਤਿ ਯੋਜਨਾ. ਤਸ੍ਸਾਤਿ ਵਿਨਯਧਰਸ੍ਸ. ਤਾਸਨ੍ਤਿ ਨਵਪਵਾਰਣਾਨਂ.

ਯਾਨਿਪਿ ¶ ਇਮਾਨਿ ਚਤ੍ਤਾਰਿ ਸਙ੍ਘਕਮ੍ਮਾਨੀਤਿ ਯੋਜੇਤਬ੍ਬਂ. ਏਤ੍ਥ ਚ ਤਾਨਿ ਵਿਨਯਧਰਾਯਤ੍ਤਾਨੇਵਾਤਿ ਪਾਠਸੇਸੋ ਅਜ੍ਝਾਹਰਿਤਬ੍ਬੋ.

ਯਾਪਿ ਚ ਅਯਂ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਕਾਤਬ੍ਬਾਤਿ ਯੋਜਨਾ. ਹੀਤਿ ਸਚ੍ਚਂ. ਅਞ੍ਞੋਤਿ ਵਿਨਯਧਰਤੋ ਪਰੋ. ਸੋ ਏਵਾਤਿ ਵਿਨਯਧਰੋ ਏਵ. ‘‘ਉਪਜ੍ਝ’’ਨ੍ਤਿ ਧਾਤੁਕਮ੍ਮਂ, ‘‘ਸਾਮਣੇਰੇਨਾ’’ਤਿ ਕਾਰਿਤਕਮ੍ਮਂ ਉਪਨੇਤਬ੍ਬਂ. ਏਤ੍ਥ ਚਾਤਿ ਉਪੋਸਥਾਦੀਸੁ ਚ. ਨਿਸ੍ਸਯਦਾਨਞ੍ਚ ਸਾਮਣੇਰੂਪਟ੍ਠਾਨਞ੍ਚ ਵਿਸੁਂ ਕਤ੍ਵਾ ਦ੍ਵਾਦਸਾਨਿਸਂਸੇ ਲਭਤੀਤਿਪਿ ਸਕ੍ਕਾ ਵਤ੍ਤੁਂ.

ਵਿਸੁਂ ਵਿਸੁਂ ਕਤ੍ਵਾਤਿ ‘‘ਪਞ੍ਚਾਤਿ ਚ…ਪੇ… ਏਕਾਦਸਾ’’ਤਿ ਚ ਕੋਟ੍ਠਾਸਂ ਕੋਟ੍ਠਾਸਂ ਕਤ੍ਵਾ, ਸਤ੍ਤ ਕੋਟ੍ਠਾਸੇ ਕਤ੍ਵਾ ਭਾਸਤੀਤਿ ਅਧਿਪ੍ਪਾਯੋ. ਥੋਮੇਤੀਤਿ ਸਮ੍ਮੁਖਾ ਥੋਮੇਤਿ. ਪਸਂਸਤੀਤਿ ਪਰਮ੍ਮੁਖਾ ਪਸਂਸਤਿ. ‘‘ਉਗ੍ਗਹੇਤਬ੍ਬ’’ਨ੍ਤਿਪਦਸ੍ਸਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਪਰਿਯਾਪੁਣਿਤਬ੍ਬ’’ਨ੍ਤਿ. ਅਦ੍ਧਨਿ ਦੀਘੇ ¶ ਸਾਧੂਤਿ ਅਦ੍ਧਨਿਯਂ ਅਦ੍ਧਕ੍ਖਮਂ ਅਦ੍ਧਯੋਗ੍ਯਨ੍ਤਿ ਅਤ੍ਥੋ ਸਾਧੁਅਤ੍ਥੇ ਨਿਯਪਚ੍ਚਯੋ (ਮੋਗ੍ਗਲ੍ਲਾਨੇ ੪.੩੩.੭੩).

ਥੇਰਾ ਚ ਨਵਾ ਚ ਮਜ੍ਝਿਮਾ ਚ ਬਹੂ ਤੇ ਭਿਕ੍ਖੂ ਪਰਿਯਾਪੁਣਨ੍ਤੀਤਿ ਯੋਜਨਾ.

੪੩੯. ‘‘ਉਦ੍ਦਿਸ੍ਸਮਾਨੇ’’ਤਿ ਪਦਸ੍ਸ ਕਮ੍ਮਰੂਪਤ੍ਤਂ ਦਸ੍ਸੇਤੁਂ ਵੁਤ੍ਤਂ ‘‘ਉਦ੍ਦਿਸਿਯਮਾਨੇ’’ਤਿ. ਸੋ ਪਨਾਤਿ ਪਾਤਿਮੋਕ੍ਖੋ ਪਨ. ਯਸ੍ਮਾ ਉਦ੍ਦਿਸ੍ਸਮਾਨੋ ਨਾਮ ਹੋਤਿ, ਤਸ੍ਮਾਤਿ ਯੋਜਨਾ. ਉਦ੍ਦਿਸਨ੍ਤੇ ਵਾਤਿ ਉਦ੍ਦਿਸਿਯਮਾਨੇ ਵਾ. ਉਦ੍ਦਿਸਾਪੇਨ੍ਤੇ ਵਾਤਿ ਉਦ੍ਦਿਸਾਪਿਯਮਾਨੇ ਵਾ. ਅਨ੍ਤਸਦ੍ਦੋ ਹਿ ਮਾਨਸਦ੍ਦਕਾਰਿਯੋ. ਯੋਤਿ ਭਿਕ੍ਖੁ. ਨਨ੍ਤਿ ਤਂ ਪਾਤਿਮੋਕ੍ਖਂ. ਚਸਦ੍ਦੋ ਖੁਦ੍ਦਾਨੁਖੁਦ੍ਦਕਪਦਸ੍ਸ ਦ੍ਵਨ੍ਨਵਾਕ੍ਯਂ ਦਸ੍ਸੇਤਿ, ਪੁਬ੍ਬਪਦੇ ਕਕਾਰਲੋਪੋ ਦਟ੍ਠਬ੍ਬੋ. ਤੇਸਨ੍ਤਿ ਖੁਦ੍ਦਾਨੁਖੁਦ੍ਦਾਕਾਨਂ. ਹੀਤਿ ਸਚ੍ਚਂ. ਏਤਾਨੀਤਿ ਖੁਦ੍ਦਾਨੁਖੁਦ੍ਦਕਾਨਿ. ਯੇਤਿ ਭਿਕ੍ਖੂ. ‘‘ਯਾਵ ਉਪ੍ਪਜ੍ਜਤਿਯੇਵ, ਤਾਵ ਸਂਵਤ੍ਤਨ੍ਤਿ ਇਤਿ ਵੁਤ੍ਤਂ ਹੋਤੀਤਿ ਯੋਜਨਾ ਇਮਸ੍ਸ ਨਯਸ੍ਸ ਪਾਠਸੇਸੇਹਿ ਯੋਜੇਤਬ੍ਬਤ੍ਤਾ. ਗਰੁਕਭਾਵਂ ਸਲ੍ਲਕ੍ਖੇਨ੍ਤੋ ਲਹੁਕਭਾਵਂ ਦਸ੍ਸੇਨ੍ਤੋ ਆਹ ‘‘ਅਥ ਵਾ’’ਤਿਆਦਿ. ਅਤਿਵਿਯਾਤਿ ਅਤਿ ਇ ਏਵ. ਇਕਾਰੋ ਹਿ ਸਨ੍ਧਿਵਸੇਨ ਅਦਸ੍ਸਨਂ ਗਤੋ. ਵਿਯਸਦ੍ਦੋ ਏਵਕਾਰਤ੍ਥਵਾਚਕੋ ‘‘ਵਰਮ੍ਹਾਕਂ ਭੁਸਾਮਿਵਾ’’ਤਿ ਏਤ੍ਥ ¶ (ਜਾ. ੧.੩.੧੦੮) ਇਵਸਦ੍ਦੋ ਵਿਯ, ਅਤਿ ਹੁਤ੍ਵਾ ਏਵਾਤਿ ਅਤ੍ਥੋ ਦਟ੍ਠਬ੍ਬੋ. ‘‘ਉਪਸਮ੍ਪਨ੍ਨਸ੍ਸਾ’’ਤਿ ਏਤ੍ਥ ਸਮੀਪੇ ਸਾਮਿਵਚਨਨ੍ਤਿ (ਰੁਪਸਿਦ੍ਧਿਯਂ ੩੧੬ ਸੁਤ੍ਤੇ) ਆਹ ‘‘ਉਪਸਮ੍ਪਨ੍ਨਸ੍ਸ ਸਨ੍ਤਿਕੇ’’ਤਿ. ਤਸ੍ਸਾਤਿ ਉਪਸਮ੍ਪਨ੍ਨਸ੍ਸ. ਤਸ੍ਮਿਨ੍ਤਿ ਵਿਨਯੇ. ਵਿਵਣ੍ਣੇਤੀਤਿ ਨ ਕੇਵਲਂ ਤਸ੍ਸੇਵ ਵਿਵਣ੍ਣਮਤ੍ਤਮੇਵ, ਅਥ ਖੋ ਨਿਨ੍ਦਤਿਯੇਵਾਤਿ ਆਹ ‘‘ਨਿਨ੍ਦਤੀ’’ਤਿ. ਗਰਹਤੀਤਿ ਤਸ੍ਸੇਵ ਵੇਵਚਨਂ. ਅਥ ਵਾ ਨਿਨ੍ਦਤੀਤਿ ਉਪਸਮ੍ਪਨ੍ਨਸ੍ਸ ਸਮ੍ਮੁਖਾ ਨਿਨ੍ਦਤਿ. ਗਰਹਤੀਤਿ ਪਰਮ੍ਮੁਖਾ ਗਰਹਤੀਤਿ. ਦੁਤਿਯਂ.

੩. ਮੋਹਨਸਿਕ੍ਖਾਪਦਂ

੪੪੪. ਤਤਿਯੇ ਅਨੁਸਦ੍ਦੋ ਪਟਿਪਾਟਿਅਤ੍ਥਂ ਅਨ੍ਤੋਕਤ੍ਵਾ ਵਿਚ੍ਛਤ੍ਥਵਾਚਕੋਤਿ ਆਹ ‘‘ਅਨੁਪਟਿਪਾਟਿਯਾ ਅਦ੍ਧਮਾਸੇ ਅਦ੍ਧਮਾਸੇ’’ਤਿ. ਸੋਤਿ ਪਾਤਿਮੋਕ੍ਖੋ. ਉਪੋਸਥੇ ਉਪੋਸਥੇ ਉਦ੍ਦਿਸਿਤਬ੍ਬਨ੍ਤਿ ਅਨੁਪੋਸਥਿਕਂ. ਏਤ੍ਥਾਪਿ ਹਿ ਅਨੁਸਦ੍ਦੋ ਵਿਚ੍ਛਤ੍ਥਵਾਚਕੋ. ਸੋਤਿ ਪਾਤਿਮੋਕ੍ਖੋ. ਉਦ੍ਦਿਸਿਯਮਾਨੋ ਨਾਮ ਹੋਤੀਤਿ ਯੋਜਨਾ. ‘‘ਤਸ੍ਮਿਂ ਅਨਾਚਾਰੇ’’ਤਿ ਪਦੇਨ ‘‘ਤਤ੍ਥਾ’’ਤਿ ਪਦਸ੍ਸਤ੍ਥਂ ਦਸ੍ਸੇਤਿ. ‘‘ਯਂ ਆਪਤ੍ਤਿ’’ਨ੍ਤਿ ਪਦੇਨ ਯਂਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਯਥਾਧਮ੍ਮੋਤਿ ਏਤ੍ਥ ਧਮ੍ਮਸਦ੍ਦੇਨ ਧਮ੍ਮੋ ਚ ਵਿਨਯੋ ਚ ਅਧਿਪ੍ਪੇਤੋਤਿ ਆਹ ‘‘ਧਮ੍ਮੋ ਚ ਵਿਨਯੋ ਚਾ’’ਤਿ. ਯਥਾਤਿ ਯੇਨਾਕਾਰੇਨ. ਸਾਧੁਸਦ੍ਦੋ ਸੁਨ੍ਦਰਤ੍ਥੋ, ਕਸਦ੍ਦੋ ਪਦਪੂਰਣੋਤਿ ਆਹ ‘‘ਸੁਟ੍ਠੂ’’ਤਿ. ਅਟ੍ਠਿਨ੍ਤਿ ਚ ‘‘ਕਤ੍ਵਾ’’ਤਿ ਚ ਦ੍ਵੇ ਪਦਾਨਿ ਦਟ੍ਠਬ੍ਬਾਨਿ. ‘‘ਅਟ੍ਠਿਕਤ੍ਵਾ’’ਤਿ ਵਾ ਏਕਂ ਪਦਂ. ਤਤ੍ਥ ਪੁਬ੍ਬਨਯੇ ਅਤ੍ਥੋ ਯਸ੍ਸਤ੍ਥੀਤਿ ਅਟ੍ਠਿ ਤ੍ਥਕਾਰਸ੍ਸ ¶ ਟ੍ਠਕਾਰਂ ਕਤ੍ਵਾ, ਤਂ ਅਟ੍ਠਿਂ. ਕਤ੍ਵਾਤਿ ਤ੍ਵਾਪਚ੍ਚਯਨ੍ਤਉਤ੍ਤਰਪਦੇਨ ਸਮਾਸੋ ਨ ਹੋਤਿ. ਅਟ੍ਠਿਕਭਾਵਨ੍ਤਿ ਏਤ੍ਥ ਇਕਸਦ੍ਦੇਨ ‘‘ਅਟ੍ਠੀ’’ਤਿ ਏਤ੍ਥ ਈਪਚ੍ਚਯਂ ਦਸ੍ਸੇਤਿ. ‘‘ਭਾਵ’’ਨ੍ਤਿਪਦੇਨ ਭਾਵਪਚ੍ਚਯੇਨ ਵਿਨਾ ਭਾਵਤ੍ਥਸ੍ਸ ਞਾਪੇਤਬ੍ਬਤਂ ਦਸ੍ਸੇਤਿ. ਅਤ੍ਥੋ ਪਨੇਵਂ ਦਟ੍ਠਬ੍ਬੋ – ਅਟ੍ਠਿਭਾਵਂ ਕਤ੍ਵਾਤਿ. ਪਚ੍ਛਿਮਨਯੇ ਅਤ੍ਥੋ ਯਸ੍ਸਤ੍ਥੀਤਿ ਅਟ੍ਠਿਕੋ ਪੁਰਿਮਨਯੇਨੇਵ ਤ੍ਥਕਾਰਸ੍ਸ ਟ੍ਠਕਾਰਂ ਕਤ੍ਵਾ. ਅਤ੍ਥਯਿਤਬ੍ਬੋ ਇਚ੍ਛਿਤਬ੍ਬੋਤਿ ਵਾ ਅਟ੍ਠਿਕੋ, ਅਟ੍ਠਿਕਇਤਿ ਨਾਮਸਦ੍ਦਤੋ ਤ੍ਵਾਪਚ੍ਚਯੋ ਕਾਤਬ੍ਬੋ. ‘‘ਅਟ੍ਠਿਕਤ੍ਵਾ’’ਤਿ ਇਦਂ ਪਦਂ ਕਿਰਿਯਾਵਿਸੇਸਨਂ. ਕਿਰਿਯਾਵਿਸੇਸਨੇ ਵਤ੍ਤਮਾਨੇ ਕਰਧਾਤੁ ਵਾ ਭੂਧਾਤੁ ਵਾ ਯੋਜੇਤਬ੍ਬਾਤਿ ਦਸ੍ਸੇਭੁਂ ¶ ਵੁਤ੍ਤਂ ‘‘ਕਤ੍ਵਾ ਹੁਤ੍ਵਾ’’ਤਿ. ਤਂ ਸਬ੍ਬਂ ਦਸ੍ਸੇਨ੍ਤੋ ਆਹ ‘‘ਅਟ੍ਠਿਕਤ੍ਵਾਤਿ ਅਟ੍ਠਿਕਭਾਵਂ ਕਤ੍ਵਾ, ਅਟ੍ਠਿਕੋ ਹੁਤ੍ਵਾ’’ਤਿ. ਤਤਿਯਂ.

੪. ਪਹਾਰਸਿਕ੍ਖਾਪਦਂ

੪੪੯. ਚਤੁਤ੍ਥੇ ਕਸ੍ਮਾ ਛਬ੍ਬਗ੍ਗਿਯਾ ਸਤ੍ਤਰਸਵਗ੍ਗਿਯਾਨਂ ਪਹਾਰਂ ਦੇਨ੍ਤਿ, ਨਨੁ ਅਕਾਰਣੇਨ ਪਹਾਰਂ ਦੇਨ੍ਤੀਤਿ ਆਹ ‘‘ਆਵੁਸੋ’’ਤਿਆਦਿ. ਇਮਿਨਾ ਯਥਾ ਵਦਨ੍ਤਿ, ਤਥਾ ਅਕਤਤ੍ਤਾ ਪਹਾਰਂ ਦੇਨ੍ਤੀਤਿ ਦਸ੍ਸੇਤਿ.

੪੫੧. ਸਚੇਪੀਤਿ ਏਤ੍ਥ ਪਿਸਦ੍ਦੇਨ ਸਚੇ ਅਮਰਤਿ, ਕਾ ਨਾਮ ਕਥਾ, ਪਾਚਿਤ੍ਤਿਯਮੇਵਾਤਿ ਦਸ੍ਸੇਤਿ. ਪਹਾਰੇਨਾਤਿ ਪਹਾਰਹੇਤੁਨਾ. ਯਥਾਤਿ ਯੇਨਾਕਾਰੇਨ. ਅਯਨ੍ਤਿ ਭਿਕ੍ਖੁ. ਨ ਵਿਰੋਚਤੀਤਿ ਨ ਸੋਭਤਿ.

੪੫੨. ‘‘ਅਨੁਪਸਮ੍ਪਨ੍ਨਸ੍ਸਾ’’ਤਿ ਏਤ੍ਥ ਅਕਾਰਸ੍ਸ ਅਞ੍ਞਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਗਹਟ੍ਠਸ੍ਸ ਵਾ’’ਤਿਆਦਿ. ਪਬ੍ਬਜਿਤਸ੍ਸ ਵਾਤਿ ਪਰਿਬ੍ਬਾਜਕਸ੍ਸ ਵਾ ਸਾਮਣੇਰਸ੍ਸ ਵਾ.

੪੫੩. ‘‘ਕੇਨਚੀ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਮਨੁਸ੍ਸੇਨ ਵਾ’’ਤਿਆਦਿ. ਤਤੋਤਿ ਵਿਹੇਠਨਤੋ, ਇਮਿਨਾ ਮੋਕ੍ਖਸ੍ਸ ਅਪਾਦਾਨਂ ਦਸ੍ਸੇਤਿ, ‘‘ਅਤ੍ਤਨੋ’’ਤਿ ਇਮਿਨਾ ਸਮ੍ਬਨ੍ਧਂ ਦਸ੍ਸੇਤਿ. ‘‘ਪਤ੍ਥਯਮਾਨੋ’’ਤਿ ਇਮਿਨਾ ‘‘ਅਧਿਪ੍ਪਾਯੋ’’ਤਿ ਪਦਸ੍ਸਤ੍ਥਂ ਦਸ੍ਸੇਤਿ. ਮੁਗ੍ਗਰੇਨ ਵਾਤਿ ਚਤੁਹਤ੍ਥਦਣ੍ਡਸ੍ਸ ਅਦ੍ਧੇਨ ਦਣ੍ਡੇਨ ਵਾ. ਸੋਤਿ ਚੋਰਾਦਿਕੋਤਿ. ਚਤੁਤ੍ਥਂ.

੫. ਤਲਸਤ੍ਤਿਕਸਿਕ੍ਖਾਪਦਂ

੪੫੪. ਪਞ੍ਚਮੇ ਤਲਨ੍ਤਿ ਹਤ੍ਥਤਲਂ. ਤਞ੍ਹਿ ਤਲਤਿ ਯਂਕਿਞ੍ਚਿ ਗਹਿਤਵਤ੍ਥੁ ਪਤਿਟ੍ਠਾਤਿ ਏਤ੍ਥਾਤਿ ¶ ‘‘ਤਲ’’ਨ੍ਤਿ ਵੁਚ੍ਚਤਿ. ਸਤ੍ਤੀਤਿ ਕੁਨ੍ਤੋ. ਸੋ ਹਿ ਸਕਤਿ ਵਿਜ੍ਝਿਤੁਂ ਸਮਤ੍ਥੇਤੀਤਿ ‘‘ਸਤ੍ਤੀ’’ਤਿ ਵੁਚ੍ਚਤਿ. ਤਲਮੇਵ ਸਤ੍ਤਿਸਦਿਸਤ੍ਤਾ ਤਲਸਤ੍ਤਿਕਂ, ਸਦਿਸਤ੍ਥੇ ਕੋ, ਤਂ ਤਲਸਤ੍ਤਿਕਂ ਉਪਚਾਰੇਨ ਗਹੇਤ੍ਵਾ ‘‘ਕਾਯਮ੍ਪੀ’’ਤਿ ਵੁਤ੍ਤਂ. ਕਾਯਤੋ ਅਞ੍ਞਂ ਵਤ੍ਥੁਮ੍ਪਿ ਤਲਸਤ੍ਤਿਕਸਙ੍ਖਾਤੇਨ ਕਾਯੇਨ ਗਹੇਤ੍ਵਾ ਉਗ੍ਗਿਰਤ੍ਤਾ ਵੁਤ੍ਤਂ ‘‘ਕਾਯਪਟਿਬਦ੍ਧਮ੍ਪੀ’’ਤਿ. ‘‘ਪਹਾਰਸਮੁਚ੍ਚਿਤਾ’’ਤਿ ਏਤ੍ਥ ਸਂਪੁਬ੍ਬੋ ਚ ਉਪੁਬ੍ਬੋ ਚ ਚਿਸਦ੍ਦੋ ਪਗੁਣਨਸਙ੍ਖਾਤੇ ਪਰਿਚਿਤੇ ਵਤ੍ਤਤੀਤਿ ਆਹ ‘‘ਪਹਾਰਪਰਿਚਿਤਾ’’ਤਿ. ਪਹਾਰੇਨ ਸਂ ਪੁਨਪ੍ਪੁਨਂ ਉਚ੍ਚਿਤਾ ਪਰਿਚਿਤਾਤਿ ਅਤ੍ਥੋ. ਇਮਮੇਵਤ੍ਥਂ ਸਨ੍ਧਾਯ ਵੁਤ੍ਤਂ ¶ ‘‘ਪੁਬ੍ਬੇਪਿ…ਪੇ… ਅਤ੍ਥੋ’’ਤਿ. ਅਞ੍ਞਮ੍ਪਿ ਸਜ੍ਝਾਯਨਨਯਂ ਦਸ੍ਸੇਤੁਂ ਵੁਤ੍ਤਂ ‘‘ਪਹਾਰਸ੍ਸ ਉਬ੍ਬਿਗਾ’’ਤਿ. ਤਸ੍ਸਾਤਿ ਤਸ੍ਸ ਪਾਠਸ੍ਸ. ਪਹਾਰਸ੍ਸਾਤਿ ਪਹਾਰਤੋ. ਨਿਸ੍ਸਕ੍ਕਤ੍ਥੇ ਚੇਤਂ ਸਾਮਿਵਚਨਂ. ‘‘ਭੀਤਾ’’ਤਿ ਇਮਿਨਾ ‘‘ਉਬ੍ਬਿਗਾ’’ਤਿ ਏਤ੍ਥ ਉਪੁਬ੍ਬ ਵਿਜਧਾਤੁਸ੍ਸਤ੍ਥਂ ਦਸ੍ਸੇਤਿ.

੪੫੭-੮. ਵਿਰਦ੍ਧੋਤਿ ਪਣ੍ਣਕੋ ਹੁਤ੍ਵਾ. ਪੁਬ੍ਬੇਤਿ ਪੁਰਿਮਸਿਕ੍ਖਾਪਦੇ. ਵੁਤ੍ਤੇਸੁ ਵਤ੍ਥੂਸੂਤਿ ‘‘ਚੋਰਂ ਵਾ ਪਚ੍ਚਤ੍ਥੀਕਂ ਵਾ’’ਤਿਆਦਿਨਾ ਵੁਤ੍ਤੇਸੁ ਵਤ੍ਥੂਸੂਤਿ. ਪਞ੍ਚਮਂ.

੬. ਅਮੂਲਕਸਿਕ੍ਖਾਪਦਂ

੪੫੯. ਛਟ੍ਠੇ ਤੇਤਿ ਛਬ੍ਬਗ੍ਗਿਯਾ. ਚੋਦੇਨ੍ਤਿ ਕਿਰਾਤਿ ਸਮ੍ਬਨ੍ਧੋ. ਆਕਿਣ੍ਣਦੋਸਤ੍ਤਾਤਿ ਤੇਸਂ ਆਕੁਲਆਦੀਨਵਤ੍ਤਾ. ਏਵਨ੍ਤਿ ਚੋਦਿਯਮਾਨੇ. ਅਤ੍ਤਪਰਿਤ੍ਤਾਣਨ੍ਤਿ ਅਤ੍ਤਨੋ ਪਰਿਸਮਨ੍ਤਤੋ ਤਾਣਂ ਰਕ੍ਖਨਂ ਕਰੋਨ੍ਤਾ ਚੋਦੇਨ੍ਤੀਤਿ ਯੋਜਨਾਤਿ. ਛਟ੍ਠਂ.

੭. ਸਞ੍ਚਿਚ੍ਚਸਿਕ੍ਖਾਪਦਂ

੪੬੪. ਸਤ੍ਤਮੇ ਉਪਪੁਬ੍ਬਦਹਧਾਤੁਸ੍ਸ ਸਕਮ੍ਮਿਕਤ੍ਤਾ ਕਾਰਿਤਨ੍ਤੋਗਧਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਉਪ੍ਪਾਦੇਨ੍ਤੀ’’ਤਿ. ‘‘ਅਨੁਪਸਮ੍ਪਨ੍ਨਸ੍ਸਾ’’ਤਿ ਏਤ੍ਥ ਅਕਾਰਸ੍ਸ ਸਦਿਸਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸਾਮਣੇਰਸ੍ਸਾ’’ਤਿ. ਸਾਮਣੇਰੋਪਿ ਹਿ ਉਪਸਮ੍ਪਨ੍ਨੇਨ ਸਦਿਸੋ ਹੋਤਿ ਸਣ੍ਠਾਨੇਨ ਚ ਪੁਰਿਸਭਾਵੇਨ ਚ. ਸਾਮਣੇਰਸ੍ਸ ਕੁਕ੍ਕੁਚ੍ਚਂ ਉਪਦਹਤੀਤਿ ਸਮ੍ਬਨ੍ਧੋ. ਨਿਸਿਨ੍ਨਂ ਮਞ੍ਞੇ, ਨਿਪਨ੍ਨਂ ਮਞ੍ਞੇ, ਭੁਤ੍ਤਂ ਮਞ੍ਞੇ, ਪੀਤਂ ਮਞ੍ਞੇ, ਕਤਂ ਮਞ੍ਞੇਤਿ ਯੋਜਨਾ. ਨਿਸਿਨ੍ਨਨ੍ਤਿ ਨਿਸੀਦਿਤਂ. ਨਿਪਨ੍ਨਨ੍ਤਿ ਨਿਪਜ੍ਜਿਤਨ੍ਤਿ. ਸਤ੍ਤਮਂ.

੮. ਉਪਸ੍ਸੁਤਿਸਿਕ੍ਖਾਪਦਂ

੪੭੧. ਅਟ੍ਠਮੇ ¶ ‘‘ਅਧਿਕਰਣਜਾਤਾਨ’’ਨ੍ਤਿ ਏਤ੍ਥ ਅਧਿਕਰਣਸ੍ਸ ਪਕਰਣਤੋ ਵਿਵਾਦਾਧਿਕਰਣਭਾਵਞ੍ਚ ਵਿਸੇਸਨਪਰਪਦਭਾਵਞ੍ਚ ਦਸ੍ਸੇਨ੍ਤੋ ਆਹ ‘‘ਉਪ੍ਪਨ੍ਨਵਿਵਾਦਾਧਿਕਰਣਾਨ’’ਨ੍ਤਿ. ਤਤ੍ਥ ਉਪ੍ਪਨ੍ਨਸਦ੍ਦੇਨ ਜਾਤਸਦ੍ਦਸ੍ਸਤ੍ਥਂ ਦਸ੍ਸੇਤਿ ¶ . ਵਿਵਾਦਸਦ੍ਦੇਨ ਅਧਿਕਰਣਸ੍ਸ ਸਰੂਪਂ ਦਸ੍ਸੇਤਿ. ਸੁਯ੍ਯਤੀਤਿ ਸੁਤਿ ਵਚਨਂ, ਸੁਤਿਯਾ ਸਮੀਪਂ ਉਪਸ੍ਸੁਤਿ ਠਾਨਨ੍ਤਿ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸੁਤਿਸਮੀਪ’’ਨ੍ਤਿ. ‘‘ਸਮੀਪ’’ਨ੍ਤਿ ਇਮਿਨਾ ਉਪਸਦ੍ਦਸ੍ਸਤ੍ਥਂ ਦਸ੍ਸੇਤਿ. ‘‘ਯਤ੍ਥਾ’’ਤਿਆਦਿਨਾ ‘‘ਉਪਸ੍ਸੁਤੀ’’ਤਿ ਏਤ੍ਥ ਉਪਸਦ੍ਦਸ੍ਸ ਪਧਾਨਤ੍ਤਾ ਤਸ੍ਸ ਸਰੂਪਂ ਦਸ੍ਸੇਤਿ. ਯਤ੍ਥਾਤਿ ਯਸ੍ਮਿਂ ਠਾਨੇ. ਮਨ੍ਤੇਨ੍ਤਨ੍ਤਿ ਏਤ੍ਥ ਉਪਯੋਗਵਚਨਸ੍ਸ ਭੁਮ੍ਮਤ੍ਥੇ ਅਧਿਪ੍ਪੇਤਤ੍ਤਾ ਵੁਤ੍ਤਂ ‘‘ਮਨ੍ਤਯਮਾਨੇ’’ਤਿ.

੪੭੩. ‘‘ਵੂਪਸਮਿਸ੍ਸਾਮੀ’’ਤਿ ਏਤ੍ਥ ਇਧਾਤੁਯਾ ਗਤ੍ਯਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਵੂਪਸਮਂ ਗਮਿਸ੍ਸਾਮੀ’’ਤਿ. ਅਕਾਰਕਭਾਵਨ੍ਤਿ ਨਿਦ੍ਦੋਸਭਾਵਂ. ਸੋਤੁਕਾਮਤਾਯ ਗਮਨਵਸੇਨ ਸਿਯਾ ਕਿਰਿਯਨ੍ਤਿ ਯੋਜਨਾ. ਪਰਤੋਪਿ ਏਸੇਵ ਨਯੋਤਿ. ਅਟ੍ਠਮਂ.

੯. ਕਮ੍ਮਪਟਿਬਾਹਨਸਿਕ੍ਖਾਪਦਂ

੪੭੪. ਨਵਮੇ ਮਯਨ੍ਤਿ ਛਬ੍ਬਗ੍ਗਿਯਨਾਮਕਾ ਅਮ੍ਹੇ. ਕਤਤ੍ਤਾਤਿ ਕਮ੍ਮਾਨਂ ਕਤਤ੍ਤਾ. ਧਮ੍ਮੋਤਿ ਭੂਤੋ ਸਭਾਵੋ. ਏਤੇਸੂਤਿ ਚਤੂਸੁ ਸਙ੍ਘਕਮ੍ਮੇਸੂਤਿ. ਨਵਮਂ.

੧੦. ਛਨ੍ਦਂ ਅਦਤ੍ਵਾਗਮਨਸਿਕ੍ਖਾਪਦਂ

੪੮੧. ਦਸਮੇ ਚੋਦੇਤਿ ਪਰਸ੍ਸ ਦੋਸਂ ਆਰੋਪੇਤੀਤਿ ਚੋਦਕੋ. ਤੇਨ ਚ ਚੋਦਕੇਨ ਚੋਦੇਤਬ੍ਬੋ ਦੋਸਂ ਆਰੋਪੇਤਬ੍ਬੋਤਿ ਚੁਦਿਤੋ, ਸੋਯੇਵ ਚੁਦਿਤਕੋ, ਤੇਨ ਚ. ‘‘ਅਨੁਵਿਜ੍ਜਕੋਤਿ ਚ ਵਿਨਯਧਰੋ. ਸੋ ਹਿ ਚੋਦਕਚੁਦਿਤਕਾਨਂ ਮਤਂ ਅਨੁਮਿਨੇਤ੍ਵਾ ਵਿਦਤਿ ਜਾਨਾਤੀਤਿ ਅਨੁਵਿਜ੍ਜਕੋ. ਏਤ੍ਤਾਵਤਾਪੀਤਿ ਏਤ੍ਤਕੇਨਪਿ ਪਮਾਣੇਨਾਤਿ. ਦਸਮਂ.

੧੧. ਦੁਬ੍ਬਲਸਿਕ੍ਖਾਪਦਂ

੪੮੪. ਏਕਾਦਸਮੇ ‘‘ਅਲਜ੍ਜੀਤਾ’’ਤਿਆਦੀਸੁ (ਪਰਿ. ੨੯੫) ਵਿਯ ਯਕਾਰਲੋਪੇਨ ਨਿਦ੍ਦੇਸੋਤਿ ਆਹ ‘‘ਯਥਾਮਿਤ੍ਤਤਾਯਾ’’ਤਿ. ‘‘ਯੋ ਯੋ’’ਤਿ ਇਮਿਨਾ ਯਥਾਸਦ੍ਦਸ੍ਸ ਵਿਚ੍ਛਤ੍ਥਂ ਦਸ੍ਸੇਤਿ. ਯਥਾਵੁਡ੍ਢਨ੍ਤਿਆਦੀਸੁ ¶ (ਚੂਲ਼ਵ. ੩੧੧ ਆਦਯੋ) ਵਿਯ ਯੋ ਯੋ ¶ ਮਿਤ੍ਤੋ ‘‘ਯਥਾਮਿਤ੍ਤ’’ਨ੍ਤਿ ਵਚਨਤ੍ਥੋ ਕਾਤਬ੍ਬੋ. ਸਬ੍ਬਪਦੇਸੂਤਿ ‘‘ਯਥਾਸਨ੍ਦਿਟ੍ਠਤਾ’’ਤਿਆਦੀਸੁ ਸਬ੍ਬੇਸੁ ਪਦੇਸੂਤਿ. ਏਕਾਦਸਮਂ.

੧੨. ਪਰਿਣਾਮਨਸਿਕ੍ਖਾਪਦਂ

੪੮੯. ਦ੍ਵਾਦਸਮੇ ਯਨ੍ਤਿ ਪਦਤ੍ਥਵਿਨਿਚ੍ਛਯਤ੍ਥਸਙ੍ਖਾਤਂ ਯਂ ਵਚਨਂ. ਤਤ੍ਥਾਤਿ ਤਿਂਸਕਕਣ੍ਡੇ. ਇਧਾਤਿ ਦ੍ਵੇਨਵੁਤਿਕਣ੍ਡੇ, ਸਿਕ੍ਖਾਪਦੇ ਵਾ. ਪੁਗ੍ਗਲਸ੍ਸਾਤਿ ਪਰਪੁਗ੍ਗਲਸ੍ਸਾਤਿ. ਦ੍ਵਾਦਸਮਂ.

ਸਹਧਮ੍ਮਿਕਵਗ੍ਗੋ ਅਟ੍ਠਮੋ.

੯. ਰਤਨਵਗ੍ਗੋ

੧. ਅਨ੍ਤੇਪੁਰਸਿਕ੍ਖਾਪਦ-ਅਤ੍ਥਯੋਜਨਾ

੪੯੪. ਰਾਜਵਗ੍ਗਸ੍ਸ ਪਠਮੇ ਪਰਿਤ੍ਤਕੋਤਿ ਗੁਣੇਨ ਖੁਦ੍ਦਕੋ. ਪਾਸਾਦਵਰਸਦ੍ਦਸ੍ਸ ਉਪਰਿਸਦ੍ਦੇਨ ਸਮ੍ਬਨ੍ਧਿਤਬ੍ਬਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਪਾਸਾਦਵਰਸ੍ਸ ਉਪਰਿ ਗਤੋ’’ਤਿ. ਇਮਿਨਾ ਪਾਸਾਦਵਰਸ੍ਸ ਉਪਰਿ ਉਪਰਿਪਾਸਾਦਵਰਂ, ਤਂ ਗਤੋ ਉਪਗਤੋਤਿ ਉਪਰਿਪਾਸਾਦਵਰਗਤੋਤਿ ਵਚਨਤ੍ਥਂ ਦਸ੍ਸੇਤਿ. ਅਯ੍ਯਾਨਨ੍ਤਿ ਭਿਕ੍ਖੂਨਂ. ‘‘ਕਾਰਣਾ’’ਤਿ ਇਮਿਨਾ ‘‘ਵਾਹਸਾ’’ਤਿ ਪਦਸ੍ਸਤ੍ਥਂ ਦਸ੍ਸੇਤਿ. ਤੇਹੀਤਿ ਅਯ੍ਯੇਹਿ.

੪੯੭. ਅਨ੍ਤਰਨ੍ਤਿ ਖਣਂ, ਓਕਾਸਂ ਵਾ ਵਿਵਰਂ ਵਾ. ਘਾਤੇਤੁਨ੍ਤਿ ਹਨਿਤੁਂ. ਇਚ੍ਛਤੀਤਿ ਇਮਿਨਾ ਪਤ੍ਥਧਾਤੁਯਾ ਯਾਚਨਤ੍ਥਂ ਦਸ੍ਸੇਤਿ. ‘‘ਰਾਜਨ੍ਤੇਪੁਰਂ ਹਤ੍ਥਿਸਮ੍ਮਦ੍ਦ’’ਨ੍ਤਿਆਦੀਸੁ ਵਚਨਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਹਤ੍ਥਿਸਮ੍ਮਦ੍ਦਨ੍ਤਿ ਹਤ੍ਥਿਸਮ੍ਬਾਧਟ੍ਠਾਨਂ. ਅਸ੍ਸੇਹਿ ਸਮ੍ਮਦ੍ਦੋ ਏਤ੍ਥਾਤਿ ਅਸ੍ਸਸਮ੍ਮਦ੍ਦੋ. ਰਥੇਹਿ ਸਮ੍ਮਦ੍ਦੋ ਏਤ੍ਥਾਤਿ ਰਥਸਮ੍ਮਦ੍ਦੋਤਿ ਵਚਨਤ੍ਥਂ ਅਤਿਦਿਸਨ੍ਤੋ ਆਹ ‘‘ਏਸੇਵ ਨਯੋ’’ਤਿ. ‘‘ਸਮ੍ਮਤ੍ਤ’’ਨ੍ਤਿ ਪਠਮਕ੍ਖਰੇਨ ਪਾਠਸ੍ਸ ਸਮ੍ਬਾਧਸ੍ਸ ਅਵਾਚਕਤ੍ਤਾ ਵੁਤ੍ਤਂ ‘‘ਤਂ ਨ ਗਹੇਤਬ੍ਬ’’ਨ੍ਤਿ. ਤਤ੍ਥਾਤਿ ਪਾਠੇ. ‘‘ਹਤ੍ਥੀਨਂ ਸਮ੍ਮਦ੍ਦ’’ਨ੍ਤਿ ਇਮਿਨਾ ਉਤ੍ਤਰਪਦਸ੍ਸ ਸਮ੍ਮਦ੍ਦਨਂ ਸਮ੍ਮਦ੍ਦਨ੍ਤਿ ਭਾਵਤ੍ਥਂ ਦਸ੍ਸੇਤਿ, ਪੁਰਿਮਪਦੇਨ ਛਟ੍ਠੀਸਮਾਸਞ੍ਚ. ਪੁਰਿਮਪਾਠੇ ਪਨ ਉਤ੍ਤਰਪਦਸ੍ਸ ਅਧਿਕਰਣਤ੍ਥਞ੍ਚ ਪੁਬ੍ਬਪਦੇਨ ਤਤਿਯਾਸਮਾਸਞ੍ਚ ਦਸ੍ਸੇਤਿ. ਬਾਹਿਰਤ੍ਥਸਮਾਸੋਤਿਪਿ ਵੁਚ੍ਚਤਿ. ਪਚ੍ਛਿਮਪਾਠੇ ‘‘ਹਤ੍ਥਿਸਮ੍ਮਦ੍ਦ’’ਨ੍ਤਿਆਦਿਪਦਸ੍ਸ ¶ ਲਿਙ੍ਗਵਿਪਲ੍ਲਾਸਞ੍ਚ ¶ ‘‘ਅਤ੍ਥੀ’’ਤਿ ਪਾਠਸੇਸੇਨ ਯੋਜੇਤਬ੍ਬਤਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਹਤ੍ਥਿਸਮ੍ਮਦ੍ਦੋ ਅਤ੍ਥੀ’’ਤਿ. ਰਜਿਤਬ੍ਬਾਨੀਤਿ ਰਜਨੀਯਾਨਿ, ਰਜਿਤੁਂ ਅਰਹਾਨੀਤਿ ਅਤ੍ਥੋ. ਇਮਿਨਾ ਸਮ੍ਬਨ੍ਧਕਾਲੇ ਪੁਰਿਮਪਾਠੇ ਰਞ੍ਞੋ ਅਨ੍ਤੇਪੁਰੇਤਿ ਵਿਭਤ੍ਤਿਵਿਪਲ੍ਲਾਸੋ ਕਾਤਬ੍ਬੋਤਿ. ਪਚ੍ਛਿਮਪਾਠੇ ਪਨ ਮੁਖ੍ਯਤੋਵ ਯੁਜ੍ਜਤਿ. ਤੇਨ ਵੁਤ੍ਤਂ ‘‘ਤਸ੍ਮਿਂ ਅਨ੍ਤੇਪੁਰੇ’’ਤਿ.

੪੯੮. ਅਵਸਿਤ੍ਤਸ੍ਸਾਤਿ ਖਤ੍ਤਿਯਾਭਿਸੇਕੇਨ ਅਭਿਸਿਤ੍ਤਸ੍ਸ. ਇਤੋਤਿ ਸਯਨਿਘਰਤੋ. ਇਮਿਨਾ ਪਞ੍ਚਮੀਬਾਹਿਰਸਮਾਸਂ ਦਸ੍ਸੇਤਿ. ਰਞ੍ਞੋ ਰਤਿਜਨਨਟ੍ਠੇਨ ਰਤਨਂ ਵੁਚ੍ਚਤਿ ਮਹੇਸੀ. ਮਹੇਸੀਤਿ ਚ ਸਾਭਿਸੇਕਾ ਦੇਵੀ. ਨਿਪੁਬ੍ਬ ਗਮੁਧਾਤੁਸ੍ਸ ਨਿਪੁਬ੍ਬਕਮੁਧਾਤੁਯਾ ਪਰਿਯਾਯਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਨਿਗ੍ਗਤਨ੍ਤਿ ਨਿਕ੍ਖਨ੍ਤ’’ਨ੍ਤਿ. ਪਠਮਂ.

੨. ਰਤਨਸਿਕ੍ਖਾਪਦਂ

੫੦੨. ਦੁਤਿਯੇ ਪਮੁਸ੍ਸਿਤ੍ਵਾਤਿ ਸਤਿਵਿਪ੍ਪਵਾਸੇਨ ਪਮੁਸ੍ਸਿਤ੍ਵਾ. ਪੁਣ੍ਣਪਤ੍ਤਨ੍ਤਿ ਤੁਟ੍ਠਿਦਾਯਂ. ਤਞ੍ਹਿ ਮਨੋਰਥਪੁਣ੍ਣੇਨ ਪਤ੍ਤਬ੍ਬਭਾਗਤ੍ਤਾ ‘‘ਪੁਣ੍ਣਪਤ੍ਤ’’ਨ੍ਤਿ ਵੁਚ੍ਚਤਿ. ਤਸ੍ਸ ਸਰੂਪਂ ਦਸ੍ਸੇਤੁਂ ਵੁਤ੍ਤਂ ‘‘ਸਤਤੋ ਪਞ੍ਚ ਕਹਾਪਣਾ’’ਤਿ. ਇਧ ਪਨ ਕਹਾਪਣਾਨਂ ਪਞ੍ਚਸਤਤ੍ਤਾ ਪਞ੍ਚਵੀਸਕਹਾਪਣਾ ਅਧਿਪ੍ਪੇਤਾ. ਆਭਰਣਸਦ੍ਦਸ੍ਸ ਅਲਙ੍ਕਾਰਸਦ੍ਦੇਨ ਪਰਿਯਾਯਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਅਲਙ੍ਕਾਰ’’ਨ੍ਤਿ. ‘‘ਮਹਾਲਤਂ ਨਾਮਾ’’ਤਿ ਇਮਿਨਾ ਨ ਯੋ ਵਾ ਸੋ ਵਾ ਅਲਙ੍ਕਾਰੋ, ਅਥ ਖੋ ਵਿਸੇਸਾਲਙ੍ਕਾਰੋਤਿ ਦਸ੍ਸੇਤਿ. ਮਹਨ੍ਤਾਨਿ ਮਾਲਾਕਮ੍ਮਲਤਾਕਮ੍ਮਾਨਿ ਏਤ੍ਥਾਤਿ ਮਹਾਲਤਾ. ਲਤਾਗਹਣੇਨ ਹਿ ਮਾਲਾਪਿ ਗਹਿਤਾ. ਨਵਹਿ ਕੋਟੀਹਿ ਅਗ੍ਘਂ ਇਮਸ੍ਸਾਤਿ ਨਵਕੋਟਿਅਗ੍ਘਨਕਂ, ਨਵਕੋਟਿਸਙ੍ਖਾਤਂ ਅਗ੍ਘਂ ਅਰਹਤੀਤਿ ਵਾ ਨਵਕੋਟਿਅਗ੍ਘਨਕਂ.

੫੦੪. ਅਨ੍ਤੇ ਸਮੀਪੇ ਵਸਨਸੀਲਤ੍ਤਾ ਪਰਿਚਾਰਿਕੋ ‘‘ਅਨ੍ਤੇਵਾਸੀ’’ਤਿ ਵੁਚ੍ਚਤੀਤਿ ਆਹ ‘‘ਪਰਿਚਾਰਿਕੋ’’ਤਿ.

੫੦੬. ਦ੍ਵੇ ਲੇਡ੍ਡੁਪਾਤਾਤਿ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਦ੍ਵੇ ਲੇਡ੍ਡੁਪਾਤਾ. ਸਙ੍ਘ…ਪੇ… ਨਵਕਮ੍ਮਾਨਂ ਅਤ੍ਥਾਯ ਉਗ੍ਗਣ੍ਹਨ੍ਤਸ੍ਸ ਵਾ ਉਗ੍ਗਣ੍ਹਾਪੇਨ੍ਤਸ੍ਸ ਵਾ ਦੁਕ੍ਕਟਨ੍ਤਿ ¶ ਯੋਜਨਾ. ਅਵਸੇਸਨ੍ਤਿ ਜਾਤਰੂਪਰਜਤਤੋ ਅਵਸੇਸਂ. ਮਾਤੁਕਣ੍ਣਪਿਲ਼ਨ੍ਧਨਤਾਲਪਣ੍ਣਮ੍ਪੀਤਿ ਮਾਤੁਯਾ ਕਣ੍ਣੇ ਪਿਲ਼ਨ੍ਧਿਤਤਾਲਪਣ੍ਣਮ੍ਪਿ, ਪਟਿਸਾਮੇਨ੍ਤਸ੍ਸਾਤਿ ਸਮ੍ਬਨ੍ਧੋ.

‘‘ਕਪ੍ਪਿਯਭਣ੍ਡਂ ਹੋਤੀ’’ਤਿ ਇਮਿਨਾ ਅਕਪ੍ਪਿਯਭਣ੍ਡਂ ਨ ਵਟ੍ਟਤੀਤਿ ਦਸ੍ਸੇਤਿ. ਇਦਨ੍ਤਿ ਭਣ੍ਡਂ. ਪਲਿਬੋਧੋ ¶ ਨਾਮਾਤਿ ਅਤ੍ਤਨੋ ਪਲਿਬੋਧੋ ਨਾਮ. ਛਨ੍ਦੇਨਪੀਤਿ ਵਡ੍ਢਕੀਆਦੀਨਂ ਛਨ੍ਦਹੇਤੁਨਾਪਿ. ਭਯੇਨਪੀਤਿ ਰਾਜਵਲ੍ਲਭਾਨਂ ਭਯਹੇਤੁਨਾਪਿ. ਬਲਕ੍ਕਾਰੇਨਾਤਿ ਕਰਣਂ ਕਾਰੋ, ਬਲੇਨ ਕਾਰੋ ਬਲਕ੍ਕਾਰੋ, ਤੇਨ, ਬਲਕ੍ਕਾਰੋ ਹੁਤ੍ਵਾ ਪਾਤੇਤ੍ਵਾਤਿ ਅਤ੍ਥੋ.

ਤਤ੍ਥਾਤਿ ਮਹਾਰਾਮੇ. ਯਤ੍ਥਾਤਿ ਯਸ੍ਮਿਂ ਠਾਨੇ, ਸਙ੍ਕਾ ਉਪ੍ਪਜ੍ਜਤੀਤਿ ਸਮ੍ਬਨ੍ਧੋ. ਮਹਾਜਨਸਞ੍ਚਰਣਟ੍ਠਾਨੇਸੂਤਿ ਬਹੂਨਂ ਜਨਾਨਂ ਸਞ੍ਚਰਣਸਙ੍ਖਾਤੇਸੁ ਠਾਨੇਸੁ. ਨਗਹੇਤਬ੍ਬਸ੍ਸ ਹੇਤੁਂ ਦਸ੍ਸੇਤੁਂ ਵੁਤ੍ਤਂ ‘‘ਪਲਿਬੋਧੋ ਨ ਹੋਤੀ’’ਤਿ. ਯਸ੍ਮਾ ਪਲਿਬੋਧੋ ਨ ਹੋਤਿ, ਤਸ੍ਮਾ ਨ ਗਹੇਤਬ੍ਬਨ੍ਤਿ ਅਧਿਪ੍ਪਾਯੋ. ਏਕੋਤਿ ਏਕੋ ਭਿਕ੍ਖੁ ਪਸ੍ਸਤੀਤਿ ਸਮ੍ਬਨ੍ਧੋ. ਓਕ੍ਕਮ੍ਮਾਤਿ ਓਕ੍ਕਮਿਤ੍ਵਾ.

ਰੂਪਸਦ੍ਦੋ ਭਣ੍ਡਪਰਿਯਾਯੋਤਿ ਆਹ ‘‘ਭਣ੍ਡ’’ਨ੍ਤਿ. ਭਣ੍ਡਂ ਰੂਪਂ ਨਾਮਾਤਿ ਯੋਜਨਾ. ਭਣ੍ਡਿਕਨ੍ਤਿ ਭਣ੍ਡੇਨ ਨਿਯੁਤ੍ਤਂ ਪੁਟਕਂ. ਗਣੇਤ੍ਵਾਤਿ ਗਣਨਂ ਕਤ੍ਵਾ. ਨਿਮਿਤ੍ਤਨ੍ਤੀਤਿ ਏਤ੍ਥ ਇਤਿਸਦ੍ਦੋ ਨਾਮਪਰਿਯਾਯੋ. ਲਞ੍ਛਨਾਦਿ ਨਿਮਿਤ੍ਤਂ ਨਾਮਾਤਿ ਹਿ ਯੋਜਨਾ. ਲਞ੍ਛਨਾਦੀਤਿ ਆਦਿਸਦ੍ਦੇਨ ਨੀਲਪਿਲੋਤਿਕਾਦਯੋ ਸਙ੍ਗਣ੍ਹਾਤਿ. ਲਾਖਾਯਾਤਿ ਜਤੁਨਾ.

ਪਤਿਰੂਪਾ ਨਾਮ ਇਧ ਲਜ੍ਜਿਕੁਕ੍ਕੁਚ੍ਚਕਾਤਿ ਆਹ ‘‘ਲਜ੍ਜਿਨੋ ਕੁਕ੍ਕੁਚ੍ਚਕਾ’’ਤਿ. ਥਾਵਰਨ੍ਤਿ ਜਙ੍ਗਮਾ ਅਞ੍ਞਂ ਥਾਵਰਂ. ਅਦ੍ਧੁਨੋਤਿ ਕਾਲਸ੍ਸ. ਸਮਾਦਪੇਤ੍ਵਾਤਿ ਅਞ੍ਞੇ ਸਮਾਦਪੇਤ੍ਵਾ. ਉਦ੍ਦਿਸ੍ਸ ਅਰਿਯਾ ਤਿਟ੍ਠਨ੍ਤਿ, ਏਸਾ ਅਰਿਯਾਨ ਯਾਚਨਾ’’ਤਿ (ਜਾ. ੧.੭.੫੯) ਵੁਤ੍ਤਨਯੇਨ ਯਾਚਿਤ੍ਵਾਤਿ ਅਤ੍ਥੋ.

੫੦੭. ਰਤਨਸਮ੍ਮਤਨ੍ਤਿ ਮਨੁਸ੍ਸਾਨਂ ਉਪਭੋਗਪਰਿਭੋਗਨ੍ਤਿ. ਦੁਤਿਯਂ.

੩. ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦਂ

੫੦੮. ਤਤਿਯੇ ¶ ‘‘ਤਿਰਚ੍ਛਾਨਭੂਤਂ ਕਥ’’ਨ੍ਤਿ ਇਮਿਨਾ ‘‘ਤਿਰਚ੍ਛਾਨਕਥ’’ਨ੍ਤਿ ਪਦਸ੍ਸ ਤੁਲ੍ਯਨਿਸ੍ਸਿਤਸਮਾਸਂ ਦਸ੍ਸੇਤਿ. ਰਾਜਪਟਿਸਂਯੁਤ੍ਤਨ੍ਤਿ ਰਾਜੂਹਿ ਪਟਿਸਂਯੁਤ੍ਤਂ.

੫੧੨. ਸਮ੍ਬਹੁਲਾ ਭਿਕ੍ਖੂਤਿ ਸਮ੍ਬਨ੍ਧੋ. ਤਸ੍ਮਿਂ ਗਾਮੇਤਿ ਤਸ੍ਮਿਂ ਪਠਮਪਵਿਸਨਗਾਮੇ. ਤਂ ਕਮ੍ਮਨ੍ਤਿ ਤਂ ਇਚ੍ਛਿਤਕਮ੍ਮਂ. ਅਨ੍ਤਰਾਤਿ ਗਾਮਵਿਹਾਰਾਨਮਨ੍ਤਰੇ. ਭੁਮ੍ਮਤ੍ਥੇ ਚੇਤਂ ਨਿਸ੍ਸਕ੍ਕਵਚਨਂ.

ਕੁਲਘਰੇ ਵਾਤਿ ਞਾਤਿਕੁਲਉਪਟ੍ਠਾਕਕੁਲਘਰੇ ਵਾ. ਤੇਲਭਿਕ੍ਖਾਯ ਵਾਤਿ ਤੇਲਯਾਚਨਤ੍ਥਾਯ ਵਾ. ਪਸ੍ਸੇਤਿ ¶ ਅਤ੍ਤਨੋ ਪਸ੍ਸੇ ਸਮੀਪੇਤਿ ਵੁਤ੍ਤਂ ਹੋਤਿ. ਤੇਨਾਤਿ ਗਾਮਮਜ੍ਝਮਗ੍ਗੇਨ. ਅਨੋਕ੍ਕਮ੍ਮਾਤਿ ਅਨੋਕ੍ਕਮਿਤ੍ਵਾ, ਅਪਕ੍ਕਮਿਤ੍ਵਾਤਿ ਅਤ੍ਥੋਤਿ. ਤਤਿਯਂ.

੪. ਸੂਚਿਘਰਸਿਕ੍ਖਾਪਦਂ

੫੧੭. ਚਤੁਤ੍ਥੇ ਕਕਾਰਸ੍ਸ ਪਦਪੂਰਣਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਭੇਦਨਮੇਵ ਭੇਦਨਕ’’ਨ੍ਤਿ. ਅਸ੍ਸਤ੍ਥਿਅਤ੍ਥੇ ਅਪਚ੍ਚਯੋਤਿ ਆਹ ‘‘ਤਂ ਅਸ੍ਸ ਅਤ੍ਥੀ’’ਤਿ. ਅਸ੍ਸਾਤਿ ਪਾਚਿਤ੍ਤਿਯਸ੍ਸ. ਪਠਮਂ ਸੂਚਿਘਰਂ ਭਿਨ੍ਦਿਤ੍ਵਾ ਪਚ੍ਛਾ ਪਾਚਿਤ੍ਤਿਯਂ ਦੇਸੇਤਬ੍ਬਨ੍ਤਿ ਅਤ੍ਥੋ. ਅਰਣਿਧਨੁਕੇਤਿ ਅਰਣਿਯਾ ਧਨੁਕੇ. ਵੇਧਕੇਤਿ ਕਾਯਬਨ੍ਧਨਵੇਧਕੇਤਿ. ਚਤੁਤ੍ਥਂ.

੫. ਮਞ੍ਚਸਿਕ੍ਖਾਪਦਂ

੫੨੨. ਪਞ੍ਚਮੇ ਛੇਦਨਮੇਵ ਛੇਦਨਕਂ, ਤਮਸ੍ਸਤ੍ਥੀਤਿ ਛੇਦਨਕਨ੍ਤਿ ਅਤ੍ਥਂ ਸਨ੍ਧਾਯ ਵੁਤ੍ਤਂ ‘‘ਵੁਤ੍ਤਨਯਮੇਵਾ’’ਤਿ.

ਨਿਖਣਿਤ੍ਵਾਤਿ ਪਮਾਣਾਤਿਰੇਕਂ ਨਿਖਣਿਤ੍ਵਾ. ਉਤ੍ਤਾਨਂ ਵਾ ਕਤ੍ਵਾਤਿ ਹੇਟ੍ਠੁਪਰਿ ਪਰਿਵਤ੍ਤਨਂ ਵਾ ਕਤ੍ਵਾ. ਠਪੇਤ੍ਵਾਤਿ ਲਮ੍ਬਣਵਸੇਨ ਠਪੇਤ੍ਵਾਤਿ. ਪਞ੍ਚਮਂ.

੬. ਤੂਲੋਨਦ੍ਧਸਿਕ੍ਖਾਪਦਂ

੫੨੬. ਛਟ੍ਠੇ ¶ ਏਤ੍ਥਾਤਿ ਮਞ੍ਚਪੀਠੇ. ਅਵਨਹਿਤਬ੍ਬਨ੍ਤਿ ਓਨਦ੍ਧਂ, ਤੂਲੇਨ ਓਨਦ੍ਧਂ ਤੂਲੋਨਦ੍ਧਨ੍ਤਿ ਅਤ੍ਥੋਪਿ ਯੁਜ੍ਜਤਿ. ਤੂਲਂ ਪਕ੍ਖਿਪਿਤ੍ਵਾਤਿ ਮਞ੍ਚਪੀਠੇ ਚਿਮਿਲਿਕਂ ਪਤ੍ਥਰਿਤ੍ਵਾ ਤਸ੍ਸੁਪਰਿ ਤੂਲਂ ਪਕ੍ਖਿਪਿਤ੍ਵਾਤਿ ਅਤ੍ਥੋਤਿ. ਛਟ੍ਠਂ.

੭. ਨਿਸੀਦਨਸਿਕ੍ਖਾਪਦਂ

੫੩੧. ਸਤ੍ਤਮੇ ਕਤ੍ਥਾਤਿ ਕਿਸ੍ਮਿਂ ਖਨ੍ਧਕੇ, ਕਿਸ੍ਮਿਂ ਵਤ੍ਥੁਸ੍ਮਿਂ ਵਾ. ਹੀਤਿ ਸਚ੍ਚਂ. ਤਤ੍ਥਾਤਿ ਚੀਵਰਕ੍ਖਨ੍ਧਕੇ, ਪਣੀਤਭੋਜਨਵਤ੍ਥੁਸ੍ਮਿਂ ਵਾ. ‘‘ਯਥਾ ਨਾਮਾ’’ਤਿ ਇਮਿਨਾ ‘‘ਸੇਯ੍ਯਥਾਪੀ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ, ‘‘ਪੁਰਾਣੋ ਚਮ੍ਮਕਾਰੋ’’ਤਿ ਇਮਿਨਾ ‘‘ਪੁਰਾਣਾਸਿਕੋਟ੍ਠੋ’’ਤਿ ਪਦਸ੍ਸ. ਚਮ੍ਮਕਾਰੋ ਹਿ ਅਸਿਨਾ ਚਮ੍ਮਂ ਕੁਟਤਿ ਛਿਨ੍ਦਤੀਤਿ ‘‘ਅਸਿਕੋਟ੍ਠੋ’’ਤਿ ਵੁਚ੍ਚਤਿ. ਵਤ੍ਥੁਪ੍ਪਨ੍ਨਕਾਲਮੁਪਨਿਧਾਯ ਵੁਤ੍ਤਂ ‘‘ਪੁਰਾਣੋ’’ਤਿ ¶ . ਤਮੇਵੂਪਮਂ ਪਾਕਟਂ ਕਰੋਨ੍ਤੋ ਆਹ ‘‘ਯਥਾ ਹੀ’’ਤਿ. ਹੀਤਿ ਤਪ੍ਪਾਕਟੀਕਰਣਂ, ਤਂ ਪਾਕਟਂ ਕਰਿਸ੍ਸਾਮੀਤਿ ਹਿ ਅਤ੍ਥੋ. ਚਮ੍ਮਕਾਰੋ ਕਡ੍ਢਤੀਤਿ ਸਮ੍ਬਨ੍ਧੋ. ਵਿਤ੍ਥਤਨ੍ਤਿ ਵਿਸਾਲਂ. ਸੋਪੀਤਿ ਉਦਾਯੀਪਿ. ਤਂ ਨਿਸੀਦਨਂ ਕਡ੍ਢਤੀਤਿ ਯੋਜਨਾ. ਤੇਨਾਤਿ ਕਡ੍ਢਨਹੇਤੁਨਾ. ਤਨ੍ਤਿ ਉਦਾਯਿਂ. ਸਨ੍ਥਤਸਦਿਸਨ੍ਤਿ ਸਨ੍ਥਤੇਨ ਸਦਿਸਂ. ਏਕਸ੍ਮਿਂ ਅਨ੍ਤੇਤਿ ਏਕਸ੍ਮਿਂ ਕੋਟ੍ਠਾਸੇ, ਫਾਲੇਤ੍ਵਾਤਿ ਸਮ੍ਬਨ੍ਧੋਤਿ. ਸਤ੍ਤਮਂ.

੮. ਕਣ੍ਡੁਪਟਿਚ੍ਛਾਦਿਸਿਕ੍ਖਾਪਦਂ

੫੩੭. ਅਟ੍ਠਮੇ ‘‘ਕਤ੍ਥਾ’’ਤਿਆਦੀਨਿ ਵੁਤ੍ਤਨਯਾਨੇਵ.

੫੩੯. ‘‘ਯਸ੍ਸਾ’’ਤਿ ਪਦਸ੍ਸ ਵਿਸਯਂ ਦਸ੍ਸੇਤੁਂ ਵੁਤ੍ਤਂ ‘‘ਭਿਕ੍ਖੁਨੋ’’ਤਿ. ‘‘ਨਾਭਿਯਾ ਹੇਟ੍ਠਾ’’ਤਿ ਇਮਿਨਾ ਨਾਭਿਯਾ ਅਧੋ ਅਧੋਨਾਭੀਤਿ ਵਚਨਤ੍ਥਂ ਦਸ੍ਸੇਤਿ, ‘‘ਜਾਣੁਮਣ੍ਡਲਾਨਂ ਉਪਰੀ’’ਤਿ ਇਮਿਨਾ ਜਾਣੁਮਣ੍ਡਲਾਨਂ ਉਬ੍ਭ ਉਬ੍ਭਜਾਣੁਮਣ੍ਡਲਨ੍ਤਿ. ਉਬ੍ਭਸਦ੍ਦੋ ਹਿ ਉਪਰਿਪਰਿਯਾਯੋ ਸਤ੍ਤਮ੍ਯਨ੍ਤਨਿਪਾਤੋ. ਕਣ੍ਡੁਖਜ੍ਜੁਸਦ੍ਦਾਨਂ ਵੇਵਚਨਤ੍ਤਾ ਵੁਤ੍ਤਂ ‘‘ਕਣ੍ਡੂਤਿ ਖਜ੍ਜੂ’’ਤਿ. ਕਣ੍ਡਤਿ ਭੇਦਨਂ ਕਰੋਤੀਤਿ ਕਣ੍ਡੁ. ਖਜ੍ਜਤਿ ਬ੍ਯਧਨਂ ਕਰੋਤੀਤਿ ਖਜ੍ਜੁ. ਕੇਸੁਚਿ ਪੋਤ੍ਥਕੇਸੁ ‘‘ਕਚ੍ਛੂ’’ਤਿ ਪਾਠੋ ਅਤ੍ਥਿ, ਸੋ ਅਯੁਤ੍ਤੋ.

ਲੋਹਿਤਂ ¶ ਤੁਣ੍ਡਂ ਏਤਿਸ੍ਸਾਤਿ ਲੋਹਿਤਤੁਣ੍ਡਿਕਾ. ਪਿਲ਼ਯਤਿ ਵਿਬਾਧਯਤੀਤਿ ਪਿਲ਼ਕਾ. ਆ ਭੁਸੋ ਅਸੁਚਿਂ ਸਵਤਿ ਪਗ੍ਘਰਾਪੇਤੀਤਿ ਅਸ੍ਸਾਵੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਸੁਚਿਪਗ੍ਘਰਣ’’ਨ੍ਤਿ. ਅਰਿਸਞ੍ਚ ਭਗਨ੍ਦਰਾ ਚ ਮਧੁਮੇਹੋ ਚ. ਆਦਿਸਦ੍ਦੇਨ ਦੁਨ੍ਨਾਮਕਾਦਯੋ ਸਙ੍ਗਣ੍ਹਾਤਿ. ਤਤ੍ਥ ਅਰਿ ਵਿਯ ਈਸਤਿ ਅਭਿਭਵਤੀਤਿ ਅਰਿਸਂ. ਭਗਂ ਵੁਚ੍ਚਤਿ ਵਚ੍ਚਮਗ੍ਗਂ, ਤਂ ਦਰਤਿ ਫਾਲੇਤੀਤਿ ਭਗਨ੍ਦਰਾ, ਗੂਥਸਮੀਪੇ ਜਾਤੋ ਵਣਵਿਸੇਸੋ. ਮਧੁ ਵਿਯ ਮੁਤ੍ਤਾਦਿਂ ਮਿਹਤਿ ਸੇਚਤੀਤਿ ਮਧੁਮੇਹੋ, ਸੋ ਆਬਾਧੋ ਮੁਤ੍ਤਮੇਹੋ ਸੁਕ੍ਕਮੇਹੋ ਰਤ੍ਤਮੇਹੋਤਿ ਅਨੇਕਵਿਧੋ. ਥੁਲ੍ਲਸਦ੍ਦੋ ਮਹਨ੍ਤਪਰਿਯਾਯੋਤਿ ਆਹ ‘‘ਮਹਾ’’ਤਿ. ਅਟ੍ਠਮਂ.

੯. ਵਸ੍ਸਿਕਸਾਟਿਕਸਿਕ੍ਖਾਪਦਂ

੫੪੨. ਨਵਮੇ ਵਸ੍ਸੇ ਵਸ੍ਸਕਾਲੇ ਅਧਿਟ੍ਠਾਤਬ੍ਬਾਤਿ ਵਸ੍ਸਿਕਾ, ਵਸ੍ਸਿਕਾ ਚ ਸਾ ਸਾਟਿਕਾ ਚੇਤਿ ਵਸ੍ਸਿਕਸਾਟਿਕਾਤਿ. ਨਵਮਂ.

੧੦. ਨਨ੍ਦਤ੍ਥੇਰਸਿਕ੍ਖਾਪਦਂ

੫੪੭. ਦਸਮੇ ¶ ‘‘ਚਤੂਹਿ ਅਙ੍ਗੁਲੇਹੀ’’ਤਿ ਇਮਿਨਾ ਚਤੁਰੋ ਅਙ੍ਗੁਲਾ ਚਤੁਰਙ੍ਗੁਲਾਤਿ ਅਸਮਾਹਾਰਦਿਗੁਂ ਦਸ੍ਸੇਤਿ. ਊਨਕਪ੍ਪਮਾਣੋਤਿ ਭਗਵਤੋ ਲਾਮਕਪਮਾਣੋ. ਇਮਿਨਾ ਓਮਕਸਦ੍ਦਸ੍ਸ ਲਾਮਕਤ੍ਥਂ ਦਸ੍ਸੇਤੀਤਿ ਦਟ੍ਠਬ੍ਬਨ੍ਤਿ. ਦਸਮਂ.

ਰਤਨਵਗ੍ਗੋ ਨਵਮੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਖੁਦ੍ਦਕਵਣ੍ਣਨਾਯ ਯੋਜਨਾ ਸਮਤ੍ਤਾ.

੬. ਪਾਟਿਦੇਸਨੀਯਕਣ੍ਡਂ

੧. ਪਠਮਪਾਟਿਦੇਸਨੀਯਸਿਕ੍ਖਾਪਦ-ਅਤ੍ਥਯੋਜਨਾ

ਖੁਦ੍ਦਕਾਨਂ ਅਨਨ੍ਤਰਾ ਪਾਟਿਦੇਸਨੀਯਾ ਯੇ ਧਮ੍ਮਾ ਸਙ੍ਗੀਤਿਕਾਰੇਹਿ ਠਪਿਤਾ, ਇਦਾਨਿ ਤੇਸਂ ਧਮ੍ਮਾਨਂ ਅਯਂ ਵਣ੍ਣਨਾ ਭਵਤੀਤਿ ਯੋਜਨਾ.

੫੫੨. ਪਠਮਪਾਟਿਦੇਸਨੀਯੇ ¶ ਤਾਵ ਅਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਪਟਿਆਗਮਨਕਾਲੇਤਿ ਪਿਣ੍ਡਾਯ ਚਰਣਟ੍ਠਾਨਤੋ ਪਕ੍ਕਮਿਤ੍ਵਾ, ਪਟਿਨਿਵਤ੍ਤਿਤ੍ਵਾ ਵਾ ਆਗਮਨਕਾਲੇ. ਸਬ੍ਬੇਵਾਤਿ ਏਤ੍ਥ ਨਿਗ੍ਗਹੀਤਲੋਪਵਸੇਨ ਸਨ੍ਧਿ ਹੋਤੀਤਿ ਆਹ ‘‘ਸਬ੍ਬਮੇਵਾ’’ਤਿ. ‘‘ਕਮ੍ਪਮਾਨਾ’’ਤਿ ਇਮਿਨਾ ਪਪੁਬ੍ਬਵਿਧਧਾਤੁਯਾ ਕਮ੍ਪਨਤ੍ਥਂ ਦਸ੍ਸੇਤਿ. ਅਪੇਹੀਤਿ ਏਤ੍ਥ ਅਪਪੁਬ੍ਬਇਧਾਤੁ ਗਤ੍ਯਤ੍ਥੋਤਿ ਆਹ ‘‘ਅਪਗਚ੍ਛਾ’’ਤਿ.

੫੫੩. ਪਟਿਦੇਸੇਤਬ੍ਬਾਕਾਰਂ ਦਸ੍ਸੇਤਿ ਅਨੇਨਾਤਿ ਪਟਿਦੇਸੇਤਬ੍ਬਾਕਾਰਦਸ੍ਸਨਂ. ਦ੍ਵਿਨ੍ਨਂ ਸਦ੍ਦਾਨਂ ਪਰਿਯਾਯਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਰਥਿਕਾਤਿ ਰਚ੍ਛਾ’’ਤਿ. ਰਥਸ੍ਸ ਹਿਤਾ ਰਥਿਕਾ. ਣ੍ਯਪਚ੍ਚਯੇ ਕਤੇ ‘‘ਰਚ੍ਛਾ’’ਤਿ (ਮੋਗ੍ਗਲ੍ਲਾਨੇ ੪.੭੨ ਸੁਤ੍ਤੇ) ਵੁਚ੍ਚਤਿ. ਰਚ੍ਛਨ੍ਤਰੇਨ ਅਨਿਬ੍ਬਿਦ੍ਧਾ ਰਚ੍ਛਾ ਬ੍ਯੂਹੋ ਨਾਮਾਤਿ ਆਹ ‘‘ਅਨਿਬ੍ਬਿਜ੍ਝਿਤ੍ਵਾ’’ਤਿਆਦਿ. ਬ੍ਯੂਹੇਤਿ ਸਮ੍ਪਿਣ੍ਡੇਤਿ ਜਨੇ ਅਞ੍ਞਤ੍ਥ ਗਨ੍ਤੁਮਪਦਾਨਵਸੇਨਾਤਿ ¶ ਬ੍ਯੂਹੋ. ਸਿਙ੍ਘਾਟਕਂ ਨਾਮ ਮਗ੍ਗਸਨ੍ਧੀਤਿ ਆਹ ‘‘ਮਗ੍ਗਸਮੋਧਾਨਟ੍ਠਾਨ’’ਨ੍ਤਿ. ਸਿਙ੍ਘਤਿ ਮਗ੍ਗਸਮੋਧਾਨਂ ਕਰੋਤਿ ਏਤ੍ਥਾਤਿ ਸਿਙ੍ਘਾਟਕਂ. ਏਤੇਸੂਤਿ ਰਥਿਕਾਦੀਸੁ. ਏਸੇਵ ਨਯੋਤਿ ਦੁਕ੍ਕਟਪਾਟਿਦੇਸਨੀਯੇ ਅਤਿਦਿਸਤਿ. ਹੀਤਿ ਸਚ੍ਚਂ. ‘‘ਵਚਨਤੋ’’ਤਿ ਪਦਂ ‘‘ਵੇਦਿਤਬ੍ਬੋ’’ਤਿ ਪਦੇ ਞਾਪਕਹੇਤੁ. ਦਦਮਾਨਾਯ ਭਿਕ੍ਖੁਨਿਯਾ ਵਸੇਨਾਤਿ ਯੋਜਨਾ. ਏਤ੍ਥਾਤਿ ਸਿਕ੍ਖਾਪਦੇ. ਤਸ੍ਮਾਤਿ ਯਸ੍ਮਾ ਅਪਮਾਣਂ, ਤਸ੍ਮਾ.

ਇਦਨ੍ਤਿ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸਮ੍ਭਿਨ੍ਨੇ ਏਕਰਸੇ ਕਾਲਿਕਤ੍ਤਯੇਤਿ ਯੋਜਨਾ.

੫੫੬. ‘‘ਦਾਪੇਤੀ’’ਤਿ ਹੇਤੁਤ੍ਥਕਿਰਿਯਾਯ ਕਾਰਿਤਕਤ੍ਤੁਕਾਰਿਤਕਮ੍ਮਾਨਿ ਦਸ੍ਸੇਤੁਂ ਵੁਤ੍ਤਂ ‘‘ਅਞ੍ਞਾਤਿਕਾਯ ਅਞ੍ਞੇਨ ਕੇਨਚੀ’’ਤਿ. ਅਞ੍ਞੇਨਾਤਿ ਅਤ੍ਤਨਾ ਅਞ੍ਞੇਨ. ‘‘ਤਾਯ ਏਵ ਵਾ ਭਿਕ੍ਖੁਨਿਯਾ ਅਞ੍ਞੇਨ ਵਾ ਕੇਨਚੀ’’ਤਿ ਪਦਾਨਿ ‘‘ਪਟਿਗ੍ਗਹਾਪੇਤ੍ਵਾ’’ਤਿਪਦੇ ਕਾਰਿਤਕਮ੍ਮਾਨੀਤਿ. ਪਠਮਂ.

੨. ਦੁਤਿਯਪਾਟਿਦੇਸਨੀਯਸਿਕ੍ਖਾਪਦਂ

੫੫੮. ਦੁਤਿਯੇ ਪੁਰਿਮਸਿਕ੍ਖਾਪਦੇਨ ਆਪਤ੍ਤਿ ਅਨ੍ਤਰਘਰਤ੍ਤਾਤਿ ਅਧਿਪ੍ਪਾਯੋ. ਇਮਿਨਾ ਸਿਕ੍ਖਾਪਦੇਨ ਆਪਤ੍ਤਿ ਭਵੇਯ੍ਯ ਵੋਸਾਸਮਾਨਤ੍ਤਾਤਿ ¶ ਅਧਿਪ੍ਪਾਯੋ. ਦੇਨ੍ਤਿਯਾ ਪਨ ਨੇਵ ਇਮਿਨਾ, ਨ ਪੁਰਿਮੇਨ ਆਪਤ੍ਤਿ ਅਞ੍ਞਸ੍ਸ ਭਤ੍ਤਤ੍ਤਾਤਿ ਅਧਿਪ੍ਪਾਯੋਤਿ. ਦੁਤਿਯਂ.

੩. ਤਤਿਯਪਾਟਿਦੇਸਨੀਯਸਿਕ੍ਖਾਪਦਂ

੫੬੨. ਤਤਿਯੇ ‘‘ਉਭਤੋ’’ਤਿ ਏਤ੍ਥ ਕਰਣਤ੍ਥੇ ਤੋਤਿ ਆਹ ‘‘ਦ੍ਵੀਹੀ’’ਤਿ. ‘‘ਉਭਤੋਪਸਨ੍ਨ’’ਨ੍ਤਿ ਬ੍ਯਾਸੋਪਿ ਸਮਾਸੋਪਿ ਯੁਤ੍ਤੋਯੇਵ, ਸਮਾਸੇ ਤੋਪਚ੍ਚਯਸ੍ਸ ਅਲੋਪੋ ਹੋਤਿ. ‘‘ਉਭਤੋ’’ਤਿਪਦਸ੍ਸ ਸਰੂਪਂ ਦਸ੍ਸੇਤੁਂ ਵੁਤ੍ਤਂ ‘‘ਉਪਾਸਕੇਨਪਿ ਉਪਾਸਿਕਾਯਪੀ’’ਤਿ. ਕਸ੍ਮਾ ਉਭਤੋ ਪਸਨ੍ਨਂ ਹੋਤੀਤਿ ਆਹ ‘‘ਤਸ੍ਮਿਂ ਕਿਰਾ’’ਤਿਆਦਿ. ਯਸ੍ਮਾ ਤਸ੍ਮਿਂ ਕੁਲੇ…ਪੇ… ਸੋਤਾਪਨ੍ਨਾਯੇਵ ਹੋਨ੍ਤਿ ਕਿਰ, ਤਸ੍ਮਾ ‘‘ਉਭਤੋਪਸਨ੍ਨ’’ਨ੍ਤਿ ਵੁਤ੍ਤਂ ਹੋਤਿ. ‘‘ਸਚੇਪੀ’’ਤਿ ਏਤ੍ਥ ਪਿਸਦ੍ਦੇਨ ਅਸੀਤਿਕੋਟਿਧਨਤੋ ਅਧਿਕਮ੍ਪਿ ਸਮ੍ਪਿਣ੍ਡੇਤਿ. ਹਾਯਨਸ੍ਸ ਕਾਰਣਂ ਦਸ੍ਸੇਤਿ ‘‘ਯਸ੍ਮਾ’’ਤਿਆਦਿਨਾ.

੫੬੯. ‘‘ਘਰਤੋ ਨੀਹਰਿਤ੍ਵਾ’’ਤਿ ਏਤ੍ਥ ‘‘ਨੀਹਰਿਤ੍ਵਾ’’ਤਿ ਪਦਸ੍ਸ ਕਮ੍ਮਂ ਦਸ੍ਸੇਤੁਂ ਵੁਤ੍ਤਂ ‘‘ਆਸਨਸਾਲਂ ¶ ਵਾ ਵਿਹਾਰਂ ਵਾ’’ਤਿ. ‘‘ਆਨੇਤ੍ਵਾ’’ਤਿਇਮਿਨਾ ਨੀਪੁਬ੍ਬਹਰਧਾਤੁਯਾ ਅਤ੍ਥਂ ਦਸ੍ਸੇਤਿ. ਦ੍ਵਾਰੇਤਿ ਅਤ੍ਤਨੋ ਗੇਹਦ੍ਵਾਰੇਤਿ. ਤਤਿਯਂ.

੪. ਚਤੁਤ੍ਥਪਾਟਿਦੇਸਨੀਯਸਿਕ੍ਖਾਪਦਂ

੫੭੦. ਚਤੁਤ੍ਥੇ ਅਵਰੁਦ੍ਧਸਦ੍ਦੋ ਪਰਿਰੁਦ੍ਧਸਦ੍ਦਸ੍ਸ ਪਰਿਯਾਯੋਤਿ ਆਹ ‘‘ਪਰਿਰੁਦ੍ਧਾ ਹੋਨ੍ਤੀ’’ਤਿ. ਆਰਞ੍ਞਕਸ੍ਸ ਸੇਨਾਸਨਸ੍ਸ ਪਰਿਸਮਨ੍ਤਤੋ ਰੁਦ੍ਧਾ ਆਵੁਤਾ ਹੋਨ੍ਤੀਤਿ ਅਤ੍ਥੋ.

੫੭੩. ‘‘ਪਞ੍ਚਨ੍ਨ’’ਨ੍ਤਿ ਨਿਦ੍ਧਾਰਣੇ ਸਾਮਿਵਚਨਭਾਵਞ੍ਚ ‘‘ਯਂਕਿਞ੍ਚੀ’’ਤਿ ਨਿਦ੍ਧਾਰਣੀਯੇਨ ਸਮ੍ਬਨ੍ਧਿਤਬ੍ਬਭਾਵਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਪਞ੍ਚਸੁ ਸਹਧਮ੍ਮਿਕੇਸੁ ਯਂ ਕਿਞ੍ਚੀ’’ਤਿ. ‘‘ਪੇਸੇਤ੍ਵਾ ਖਾਦਨੀਯਂ ਭੋਜਨੀਯਂ ਆਹਰਿਸ੍ਸਾਮੀ’’ਤਿਇਮਿਨਾ ਪਟਿਸਂਵਿਦਿਤਾਕਾਰਦਸ੍ਸਨਂ. ‘‘ਆਰਾਮ’’ਨ੍ਤਿ ਸਾਮਞ੍ਞਤੋ ਵੁਤ੍ਤੇਪਿ ਆਰਞ੍ਞਕਸੇਨਾਸਨਸ੍ਸ ¶ ਆਰਾਮੋ ਏਵ ਅਧਿਪ੍ਪੇਤੋਤਿ ਆਹ ‘‘ਆਰਞ੍ਞਕਸੇਨਾਸਨਾਰਾਮਞ੍ਚਾ’’ਤਿ. ਤਸ੍ਸਾਤਿ ਆਰਞ੍ਞਕਸੇਨਾਸਨਾਰਾਮਸ੍ਸ. ‘‘ਕਸ੍ਮਾ’’ਤਿ ਪੁਚ੍ਛਾਯ ‘‘ਪਟਿਮੋਚਨਤ੍ਥ’’ਨ੍ਤਿ ਵਿਸਜ੍ਜਨਾਯ ਸਮੇਤੁਂ ਸਮ੍ਪਦਾਨਤ੍ਥੇ ਨਿਸ੍ਸਕ੍ਕਵਚਨਂ ਕਾਤਬ੍ਬਂ. ਕਿਮਤ੍ਥਨ੍ਤਿ ਹਿ ਅਤ੍ਥੋ. ਪਟਿਮੋਚਨਤ੍ਥਨ੍ਤਿ ਤਦਤ੍ਥੇ ਪਚ੍ਚਤ੍ਤਵਚਨਂ. ਪਟਿਮੋਚਨਸਙ੍ਖਾਤਾਯ ਅਤ੍ਥਾਯਾਤਿ ਹਿ ਅਤ੍ਥੋ. ਅਤ੍ਥਸਦ੍ਦੋ ਚ ਪਯੋਜਨਵਾਚਕੋ. ਪਯੋਜਨਾਯਾਤਿ ਹਿ ਅਤ੍ਥੋ. ਅਥ ਵਾ ‘‘ਪਟਿਮੋਚਨਤ੍ਥ’’ਨ੍ਤਿ ਵਿਸਜ੍ਜਨਾਯਂ. ‘‘ਕਸ੍ਮਾ’’ਤਿ ਪੁਚ੍ਛਾਯ ਸਮੇਤੁਂ ਨਿਸ੍ਸਕ੍ਕਤ੍ਥੇ ਪਚ੍ਚਤ੍ਤਵਚਨਂ ਕਾਤਬ੍ਬਂ. ਪਟਿਮੋਚਨਸਙ੍ਖਾਤਾ ਅਤ੍ਥਾਤਿ ਹਿ ਅਤ੍ਥੋ. ਅਤ੍ਥਸਦ੍ਦੋ ਚ ਕਾਰਣਵਾਚਕੋ. ਕਾਰਣਾਤਿ ਹਿ ਅਤ੍ਥੋ. ਏਵਞ੍ਹਿ ਪੁਚ੍ਛਾਵਿਸਜ੍ਜਨਾਨਂ ਪੁਬ੍ਬਾਪਰਸਮਸਙ੍ਖਾਤੋ ਵਿਚਯੋ ਹਾਰੋ ਪਰਿਪੁਣ੍ਣੋ ਹੋਤੀਤਿ ਦਟ੍ਠਬ੍ਬਂ. ਅਮ੍ਹਾਕਨ੍ਤਿ ਖਾਦਨੀਯਭੋਜਨੀਯਪਟਿਹਰਨ੍ਤਾਨਂ ਅਮ੍ਹਾਕਂ. ਅਮ੍ਹੇਤਿ ਚੋਰਸਙ੍ਖਾਤੇ ਅਮ੍ਹੇ.

‘‘ਤਸ੍ਸਾ’’ਤਿ ਪਦਸ੍ਸਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਏਤਿਸ੍ਸਾ ਯਾਗੁਯਾ’’ਤਿ. ਅਞ੍ਞਾਨਿਪੀਤਿ ਪਟਿਸਂਵਿਦਿਤਕੁਲਤੋ ਅਞ੍ਞਾਨਿਪਿ ਕੁਲਾਨਿ. ਤੇਨਾਤਿ ਪਟਿਸਂਵਿਦਿਤਕੁਲੇਨ. ਕੁਰੁਨ੍ਦਿਵਾਦੇ ਯਾਗੁਯਾ ਪਟਿਸਂਵਿਦਿਤਂ ਕਤ੍ਵਾ ਯਾਗੁਂ ਅਗ੍ਗਹੇਤ੍ਵਾ ਪੂਵਾਦੀਨਿ ਆਹਰਨ੍ਤਿ, ਵਟ੍ਟਤੀਤਿ ਅਧਿਪ੍ਪਾਯੋ.

੫੭੫. ਏਕਸ੍ਸਾਤਿ ਭਿਕ੍ਖੁਸ੍ਸ. ਤਸ੍ਸਾਤਿ ਪਟਿਸਂਵਿਦਿਤਭਿਕ੍ਖੁਸ੍ਸ, ਚਤੁਨ੍ਨਂ ਵਾ ਪਞ੍ਚਨ੍ਨਂ ਵਾ ਭਿਕ੍ਖੂਨਂ ਅਤ੍ਥਾਯਾਤਿ ਯੋਜਨਾ. ਅਞ੍ਞੇਸਮ੍ਪੀਤਿ ਚਤੁਪਞ੍ਚਭਿਕ੍ਖੁਤੋ ਅਞ੍ਞੇਸਮ੍ਪਿ. ਅਧਿਕਮੇਵਾਤਿ ਪਰਿਭੁਤ੍ਤਤੋ ਅਤਿਰੇਕਮੇਵ. ਯਂ ਪਨਾਤਿ ਖਾਦਨੀਯਭੋਜਨੀਯਂ ਪਨ, ਯਮ੍ਪਿ ਖਾਦਨੀਯਭੋਜਨੀਯਂ ਵਨਤੋ ਆਹਰਿਤ੍ਵਾ ਦੇਨ੍ਤੀਤਿ ਯੋਜਨਾ. ‘‘ਤਤ੍ਥਜਾਤਕ’’ਨ੍ਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ¶ ਦਸ੍ਸੇਤੁਂ ਵੁਤ੍ਤਂ ‘‘ਆਰਾਮੇ’’ਤਿ. ਅਞ੍ਞੇਨ ਦਿਨ੍ਨਨ੍ਤਿ ਸਮ੍ਬਨ੍ਧੋ. ਨਨ੍ਤਿ ਮੂਲਖਾਦਨੀਯਾਦਿਂ. ਪਟਿਸਂਵਿਦਿਤਨ੍ਤਿ ਪਟਿਕਚ੍ਚੇਵ ਸੁਟ੍ਠੁ ਜਾਨਾਪਿਤਨ੍ਤਿ ਅਤ੍ਥੋਤਿ. ਚਤੁਤ੍ਥਂ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਪਾਟਿਦੇਸਨੀਯਵਣ੍ਣਨਾਯ

ਯੋਜਨਾ ਸਮਤ੍ਤਾ.

੭. ਸੇਖਿਯਕਣ੍ਡਂ

੧. ਪਰਿਮਣ੍ਡਲਵਗ੍ਗ-ਅਤ੍ਥਯੋਜਨਾ

ਸਿਕ੍ਖਿਤਸਿਕ੍ਖੇਨ ¶ ਤੀਸੁ ਸਿਕ੍ਖਾਸੁ ਚਤੂਹਿ ਮਗ੍ਗੇਹਿ ਸਿਕ੍ਖਿਤਸਿਕ੍ਖੇਨ ਤਾਦਿਨਾ ਅਟ੍ਠਹਿ ਲੋਕਧਮ੍ਮੇਹਿ ਅਕਮ੍ਪਿਯਟ੍ਠੇਨ ਤਾਦਿਨਾ, ਇਟ੍ਠਾਨਿਟ੍ਠੇਸੁ ਵਾ ਅਵਿਕਾਰਟ੍ਠੇਨ ਤਾਦਿਨਾ ਭਗਵਤਾ ਯਾਨਿ ਸਿਕ੍ਖਾਪਦਾਨਿ ‘‘ਸੇਖਿਯਾਨੀ’’ਤਿ ਭਾਸਿਤਾਨਿ, ਦਾਨਿ ਤੇਸਮ੍ਪਿ ਸਿਕ੍ਖਾਪਦਾਨਂ ਅਯਮ੍ਪਿ ਵਣ੍ਣਨਾਕ੍ਕਮੋ ਭਵਤੀਤਿ ਯੋਜਨਾ.

੫੭੬. ਤਤ੍ਥਾਤਿ ਸੇਖਿਯਸਿਕ੍ਖਾਪਦੇਸੁ, ਅਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ‘‘ਸਮਨ੍ਤਤੋ’’ਤਿਇਮਿਨਾ ਪਰਿਤ੍ਯੂਪਸਗ੍ਗਸ੍ਸਤ੍ਥਂ ਦਸ੍ਸੇਤਿ. ‘‘ਨਾਭਿਮਣ੍ਡਲਂ ਜਾਣੁਮਣ੍ਡਲ’’ਨ੍ਤਿ ਏਤ੍ਥ ਉਦ੍ਧਂਸਦ੍ਦੋ ਚ ਅਧੋਸਦ੍ਦੋ ਚ ਅਜ੍ਝਾਹਰਿਤਬ੍ਬੋਤਿ ਆਹ ‘‘ਉਦ੍ਧ’’ਨ੍ਤਿਆਦਿ. ਅਟ੍ਠਙ੍ਗੁਲਮਤ੍ਤਨ੍ਤਿ ਭਾਵਨਪੁਂਸਕਂ, ਨਿਵਾਸੇਤਬ੍ਬਨ੍ਤਿ ਸਮ੍ਬਨ੍ਧੋ. ਤਤੋਤਿ ਅਟ੍ਠਙ੍ਗੁਲਮਤ੍ਤਤੋ. ਯਥਾ ਪਟਿਚ੍ਛਨ੍ਨਂ ਹੋਤਿ, ਏਵਂ ਨਿਵਾਸੇਨ੍ਤਸ੍ਸਾਤਿ ਯੋਜਨਾ. ਤਤ੍ਰਿਦਂ ਪਮਾਣਨ੍ਤਿ ਤਸ੍ਸ ਨਿਵਾਸਨਸ੍ਸ ਇਦਂ ਪਮਾਣਂ. ਤਾਦਿਸਸ੍ਸਾਤਿ ਦੀਘਤੋ ਮੁਟ੍ਠਿਪਞ੍ਚਕਸ੍ਸ ਤਿਰਿਯਂ ਅਡ੍ਢਤੇਯ੍ਯਹਤ੍ਥਸ੍ਸ ਨਿਵਾਸਨਸ੍ਸ. ਜਾਣੁਮਣ੍ਡਲਂ ਪਟਿਚ੍ਛਾਦਨਤ੍ਥਂ ਵਟ੍ਟਤੀਤਿ ਯੋਜਨਾ. ਤਤ੍ਥਾਤਿ ਚੀਵਰੇਸੁ. ਨ ਤਿਟ੍ਠਤੀਤਿ ਵਿਰਲ਼ਤ੍ਤਾ ਨ ਤਿਟ੍ਠਤਿ. ਤਿਟ੍ਠਤੀਤਿ ਘਨਤ੍ਤਾ ਤਿਟ੍ਠਤਿ.

ਨਿਵਾਸੇਨ੍ਤਸ੍ਸ ਚਾਤਿਏਤ੍ਥ ਚਸਦ੍ਦੋ ਅਵਧਾਰਣਤ੍ਥੋ, ਨਿਵਾਸੇਨ੍ਤਸ੍ਸੇਵਾਤਿ ਅਤ੍ਥੋ. ਕੇਵਲਂ ਏਵਂ ਨਿਵਾਸੇਨ੍ਤਸ੍ਸੇਵ ਦੁਕ੍ਕਟਂ ਨ ਹੋਤਿ, ਅਥ ਖੋ ਤਥਾ ਨਿਵਾਸੇਨ੍ਤਸ੍ਸਾਪਿ ਦੁਕ੍ਕਟਮੇਵਾਤਿ ਯੋਜਨਾ. ਯੇ ਪਨ ਨਿਵਾਸਨਦੋਸਾਤਿ ਸਮ੍ਬਨ੍ਧੋ. ਅਞ੍ਞੇਤਿ ਪੁਰਤੋ ਚ ਪਚ੍ਛਤੋ ਚ ਓਲਮ੍ਬੇਤ੍ਵਾ ਨਿਵਸਨਤੋ ਅਞ੍ਞੇ ¶ . ਤੇ ਸਬ੍ਬੇਤਿ ਸਬ੍ਬੇ ਤੇ ਨਿਵਾਸਨਦੋਸਾ. ਏਤ੍ਥਾਤਿ ਇਮਸ੍ਮਿਂ ਵਿਭਙ੍ਗੇ. ਤਤ੍ਥੇਵਾਤਿ ਖਨ੍ਧਕੇਯੇਵ.

ਅਸਞ੍ਚਿਚ੍ਚ ਨਿਵਾਸੇਨ੍ਤਸ੍ਸ ਅਨਾਪਤ੍ਤੀਤਿ ਸਮ੍ਬਨ੍ਧੋ. ਏਸੇਵ ਨਯੋ ‘‘ਅਸਤਿਯਾ’’ਤਿ ਏਤ੍ਥਾਪਿ. ਅਜਾਨਨ੍ਤਸ੍ਸਾਤਿ ਏਤ੍ਥ ਅਜਾਨਨਂ ਦੁਵਿਧਂ ਨਿਵਾਸਨਵਤ੍ਤਸ੍ਸ ਅਜਾਨਨਂ, ਆਰੂਲ਼੍ਹੋਰੂਲ਼੍ਹਭਾਵਸ੍ਸ ਅਜਾਨਨਨ੍ਤਿ. ਤਤ੍ਥ ਆਰੂਲ਼੍ਹੋਰੂਲ਼੍ਹਭਾਵਸ੍ਸ ਅਜਾਨਨਂ ਸਨ੍ਧਾਯ ਵੁਤ੍ਤਂ ‘‘ਅਜਾਨਨ੍ਤਸ੍ਸਾ’’ਤਿ ਦਸ੍ਸੇਨ੍ਤੋ ¶ ਆਹ ‘‘ਅਜਾਨਨ੍ਤਸ੍ਸਾਤਿ ਏਤ੍ਥਾ’’ਤਿਆਦਿ. ਹੀਤਿ ਸਚ੍ਚਂ. ਤਸ੍ਸਾਤਿ ਨਿਵਾਸਨਵਤ੍ਤਸ੍ਸ. ਅਸ੍ਸਾਤਿ ਭਿਕ੍ਖੁਨੋ. ਤਂ ਪਨਾਤਿ ਆਪਤ੍ਤਿਤੋ ਅਮੋਕ੍ਖਨਂ ਪਨ. ਤਸ੍ਮਾਤਿ ਯਸ੍ਮਾ ਯੁਜ੍ਜਤਿ, ਤਸ੍ਮਾ. ਯੋਤਿ ਭਿਕ੍ਖੁ. ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸੁਕ੍ਖਾ ਜਙ੍ਘਾ ਇਮਸ੍ਸਾਤਿ ਸੁਕ੍ਖਜਙ੍ਘੋ. ਮਹਨ੍ਤਂ ਪਿਣ੍ਡਿਕਮਂਸਂ ਇਮਸ੍ਸਾਤਿ ਮਹਾਪਿਣ੍ਡਿਕਮਂਸੋ. ਤਸ੍ਸਾਤਿ ਭਿਕ੍ਖੁਸ੍ਸ.

ਵਣੋਤਿ ਅਰੁ. ਤਞ੍ਹਿ ਵਣਤਿ ਗਤ੍ਤਵਿਚੁਣ੍ਣਨਂ ਕਰੋਤੀਤਿ ਵਣੋਤਿ ਵੁਚ੍ਚਤਿ. ਵਾਲ਼ਮਿਗਾ ਵਾ ਚੋਰਾ ਵਾਤਿ ਏਤ੍ਥ ਵਾਸਦ੍ਦੋ ਅਵੁਤ੍ਤਸਮ੍ਪਿਣ੍ਡਨਤ੍ਥੋ, ਤੇਨ ਅਞ੍ਞਾਪਿ ਉਦਕਚਿਕ੍ਖਲ੍ਲਾਦਯੋ ਆਪਦਾ ਸਙ੍ਗਯ੍ਹਨ੍ਤਿ.

੫੭੭. ਇਧਾਤਿ ਇਮਸ੍ਮਿਂ ਵਿਭਙ੍ਗੇ, ਸਿਕ੍ਖਾਪਦੇ ਵਾ. ਉਭੋ ਕਣ੍ਣੇਤਿ ਪੁਰਤੋ ਚ ਪਚ੍ਛਤੋ ਚ ਨਿਗ੍ਗਤੇ ਦ੍ਵੇ ਕਣ੍ਣੇ. ਅਵਿਸੇਸੇਨਾਤਿ ‘‘ਅਨ੍ਤਰਘਰੇ’’ਤਿ ਚ ‘‘ਆਰਾਮੇ’’ਤਿ ਚ ਵਿਸੇਸਂ ਅਕਤ੍ਵਾ ਸਾਮਞ੍ਞੇਨ. ਵਿਹਾਰੇਪੀਤਿ ਸਙ੍ਘਸਨ੍ਨਿਪਾਤਬੁਦ੍ਧੁਪਟ੍ਠਾਨਥੇਰੁਪਟ੍ਠਾਨਾਦਿਕਾਲਂ ਸਨ੍ਧਾਯ ਵੁਤ੍ਤਂ.

੫੭੮. ਕਾਯੇਕਦੇਸੇ ਕਾਯਸਦ੍ਦੋ ਵਤ੍ਤਤੀਤਿ ਆਹ ‘‘ਜਾਣੁਮ੍ਪਿ ਉਰਮ੍ਪੀ’’ਤਿ. ‘‘ਨ ਸੀਸਂ ਪਾਰੁਤੇਨਾ’’ਤਿਇਮਿਨਾ ‘‘ਸੁਪ੍ਪਟਿਚ੍ਛਨ੍ਨੇਨਾ’’ਤਿਪਦਸ੍ਸ ਅਤਿਬ੍ਯਾਪਿਤਦੋਸਂ ਪਟਿਕ੍ਖਿਪਤਿ. ਗਣ੍ਠਿਕਨ੍ਤਿ ਪਾਸੋ. ਸੋ ਹਿ ਗਨ੍ਥੇਤਿ ਬਨ੍ਧਤੀਤਿ ਵਾ, ਗਨ੍ਥੇਤਿ ਬਨ੍ਧਤਿ ਏਤ੍ਥਾਤਿ ਵਾ ਕਤ੍ਵਾ ਗਨ੍ਥਿਕੋਤਿ ਵੁਚ੍ਚਤਿ. ਨ੍ਥਕਾਰਸ੍ਸ ਵਾਣ੍ਠਕਾਰੇ ਕਤੇ ਗਣ੍ਠਿਕੋ, ਤਂ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ. ਉਭੋ ਕਣ੍ਣੇਤਿ ਚੀਵਰਸ੍ਸ ਦ੍ਵੇ ਕੋਣੇ. ਗਲਵਾਟਕਤੋਤਿ ਏਤ੍ਥ ਗਲੋਤਿ ਕਣ੍ਠੋ. ਸੋ ਹਿ ਖਜ੍ਜਭੋਜ੍ਜਲੇਯ੍ਯਪੇਯ੍ਯਸਙ੍ਖਾਤਂ ਚਤੁਬ੍ਬਿਧਂ ਅਸਨਂ ਗਲਤਿ ਪਨ੍ਨੋ ਹੁਤ੍ਵਾ ਕੁਚ੍ਛਿਯਂ ਪਤਤਿ ਇਤੋਤਿ ਗਲੋਤਿ ਵੁਚ੍ਚਤਿ. ਆਵਾਟੋਯੇਵ ਖੁਦ੍ਦਕਟ੍ਠੇਨ ਆਵਾਟਕੋ, ਖੁਦ੍ਦਕਤ੍ਥੇ ਕੋ. ਗਲੇ ਠਿਤੋ ਆਵਾਟਕੋ ਗਲਵਾਟਕੋ. ਅਕਾਰਤੋ ਹਿ ਆਕਾਰਸ੍ਸ ਲੋਪੋ ‘‘ਪਪ’’ਨ੍ਤਿਆਦੀਸੁ (ਜਾ. ੧.੧.੨) ਵਿਯ. ਏਤ੍ਥ ਹਿ ਪਆਪਨ੍ਤਿ ਪਦਚ੍ਛੇਦੋ, ਅਕਾਰਤੋ ਆਕਾਰਸ੍ਸ ਚ ਲੋਪੋ. ਪਵਦ੍ਧਂ ਆਪਂ ਪਪਂ, ਮਹਨ੍ਤਂ ਉਦਕਨ੍ਤਿ ਅਤ੍ਥੋ. ਸੀਸਂ ਵਿਵਰਿਤ੍ਵਾਤਿ ਸਮ੍ਬਨ੍ਧੋ.

੫੭੯. ਵਾਸਂ ¶ ¶ ਉਪਗਤੋਤਿ ਵਾ ਵਾਸੇਨ ਉਪਗਤੋਤਿ ਵਾ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਵਾਸਤ੍ਥਾਯ ਉਪਗਤਸ੍ਸਾ’’ਤਿ.

੫੮੦. ਹਤ੍ਥਪਾਦੇ ਅਕੀਲ਼ਨ੍ਤੋ ਸੁਸਂਵੁਤੋ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਹਤ੍ਥਂ ਵਾ ਪਾਦਂ ਵਾ ਅਕੀਲ਼ਾਪੇਨ੍ਤੋ’’ਤਿ.

੫੮੨. ਓਕ੍ਖਿਤ੍ਤਚਕ੍ਖੂਤਿ ਏਤ੍ਥ ਓਸਦ੍ਦੋ ਹੇਟ੍ਠਾਪਰਿਯਾਯੋਤਿ ਆਹ ‘‘ਹੇਟ੍ਠਾ ਖਿਤ੍ਤਚਕ੍ਖੂ’’ਤਿ. ‘‘ਹੁਤ੍ਵਾ’’ਤਿਇਮਿਨਾ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ. ਯੁਗਯੁਤ੍ਤਕੋਤਿ ਯੁਗੇ ਯੁਤ੍ਤਕੋ. ਦਮਿਯਿਤ੍ਥਾਤਿ ਦਨ੍ਤੋ. ਆਭੁਸੋ ਜਾਨਾਤਿ ਕਾਰਣਾਕਾਰਣਨ੍ਤਿ ਆਜਾਨੇਯ੍ਯੋ. ਏਤ੍ਤਕਨ੍ਤਿ ਚਤੁਹਤ੍ਥਪਮਾਣਂ. ਯੋ ਗਚ੍ਛਤਿ, ਅਸ੍ਸ ਭਿਕ੍ਖੁਨੋ ਦੁਕ੍ਕਟਾ ਆਪਤ੍ਤਿ ਹੋਤੀਤਿ ਯੋਜਨਾ. ‘‘ਪਰਿਸ੍ਸਯਭਾਵ’’ਨ੍ਤਿ ਚ ‘‘ਪਰਿਸ੍ਸਯਾਭਾਵ’’ਨ੍ਤਿ ਚ ਦ੍ਵੇ ਪਾਠਾ ਯੁਜ੍ਜਨ੍ਤਿਯੇਵ.

੫੮੪. ਇਤ੍ਥਮ੍ਭੂਤਲਕ੍ਖਣੇਤਿ ਇਮਂ ਪਕਾਰਂ ਇਤ੍ਥਂ ਚੀਵਰੁਕ੍ਖਿਪਨਂ, ਭਵਤਿ ਗਚ੍ਛਤੀਤਿ ਭੂਤੋ, ਭਿਕ੍ਖੁ. ਲਕ੍ਖੀਯਤਿ ਅਨੇਨਾਤਿ ਲਕ੍ਖਣਂ, ਚੀਵਰਂ. ਇਤ੍ਥਂ ਭੂਤੋ ਇਤ੍ਥਮ੍ਭੂਤੋ, ਤਸ੍ਸ ਲਕ੍ਖਣਂ ਇਤ੍ਥਮ੍ਭੂਤਲਕ੍ਖਣਂ, ਤਸ੍ਮਿਂ. ਕਰਣਵਚਨਂ ਦਟ੍ਠਬ੍ਬਨ੍ਤਿ ਯੋਜਨਾ. ਇਤ੍ਥਮ੍ਭੂਤਲਕ੍ਖਣਂ ਨਾਮ ਕਿਰਿਯਾਵਿਸੇਸਨਸ੍ਸ ਸਭਾਵੋਤਿ ਆਹ ‘‘ਏਕਤੋ ਵਾ…ਪੇ… ਹੁਤ੍ਵਾਤਿ ਅਤ੍ਥੋ’’ਤਿ. ਅਨ੍ਤੋਇਨ੍ਦਖੀਲਤੋਤਿ ਗਾਮਸ੍ਸ ਅਨ੍ਤੋਇਨ੍ਦਖੀਲਤੋਤਿ. ਪਠਮੋ ਵਗ੍ਗੋ.

੨. ਉਜ੍ਜਗ੍ਘਿਕਵਗ੍ਗ-ਅਤ੍ਥਯੋਜਨਾ

੫੮੬. ਉਚ੍ਚਾਸਦ੍ਦਂ ਕਤ੍ਵਾ ਜਗ੍ਘਨਂ ਹਸਨਂ ਉਜ੍ਜਗ੍ਘੋ, ਸੋਯੇਵ ਉਜ੍ਜਗ੍ਘਿਕਾ, ਤਾਯ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਮਹਾਹਸਿਤਂ ਹਸਨ੍ਤੋ’’ਤਿ. ਏਤ੍ਥਾਤਿ ‘‘ਉਜ੍ਜਗ੍ਘਿਕਾਯਾ’’ਤਿਪਦੇ.

੫੮੮. ਕਿਤ੍ਤਾਵਤਾਤਿ ਕਿਤ੍ਤਕੇਨ ਪਮਾਣੇਨ, ਏਵਂ ਨਿਸਿਨ੍ਨੇਸੁ ਥੇਰੇਸੂਤਿ ਸਮ੍ਬਨ੍ਧੋ, ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ. ਵਵਤ੍ਥਪੇਤੀਤਿ ਇਦਞ੍ਚੀਦਞ੍ਚ ਕਥੇਤੀਤਿ ਵਵਤ੍ਥਪੇਤਿ. ਏਤ੍ਤਾਵਤਾਤਿ ਏਤ੍ਤਕੇਨ ਪਮਾਣੇਨ.

੫੯੦. ਨਿਚ੍ਚਲਂ ਕਤ੍ਵਾ ਕਾਯਸ੍ਸ ਉਜੁਟ੍ਠਪਨਂ ਕਾਯਪਗ੍ਗਹੋ ਨਾਮਾਤਿ ਆਹ ‘‘ਨਿਚ੍ਚਲਂ ਕਤ੍ਵਾ’’ਤਿਆਦਿ. ਏਸੇਵ ਨਯੋ ਬਾਹੁਪਗ੍ਗਹਸੀਸਪਗ੍ਗਹੇਸੁਪੀਤਿ. ਦੁਤਿਯੋ ਵਗ੍ਗੋ.

੩. ਖਮ੍ਭਕਤਵਗ੍ਗ-ਅਤ੍ਥਯੋਜਨਾ

੫੯੬. ਖਮ੍ਭੋ ¶ ¶ ਕਤੋ ਯੇਨਾਤਿ ਖਮ੍ਭਕਤੋ. ਖਮ੍ਭੋਤਿ ਚ ਪਟਿਬਦ੍ਧੋ. ਕਤ੍ਥ ਪਟਿਬਦ੍ਧੋਤਿ ਆਹ ‘‘ਕਟਿਯਂ ਹਤ੍ਥਂ ਠਪੇਤ੍ਵਾ’’ਤਿ. ਸਸੀਸਂ ਅਵਗੁਣ੍ਠਯਤਿ ਪਰਿਵੇਠਤੀਤਿ ਓਗੁਣ੍ਠਿਤੋਤਿ ਆਹ ‘‘ਸਸੀਸਂ ਪਾਰੁਤੋ’’ਤਿ.

੬੦੦. ਉਦ੍ਧਂ ਏਕਾ ਕੋਟਿ ਇਮਿਸ੍ਸਾ ਗਮਨਾਯਾਤਿ ਉਕ੍ਕੁਟਿਕਾਤਿ ਦਸ੍ਸੇਨ੍ਤੋ ਆਹ ‘‘ਉਕ੍ਕੁਟਿਕਾ ਵੁਚ੍ਚਤੀ’’ਤਿਆਦਿ. ਏਤ੍ਥਾਤਿ ‘‘ਉਕ੍ਕੁਟਿਕਾਯਾ’’ਤਿਪਦੇ.

੬੦੧. ਹਤ੍ਥਪਲ੍ਲਤ੍ਥੀਕਦੁਸ੍ਸਪਲ੍ਲਤ੍ਥੀਕੇਸੁ ਦ੍ਵੀਸੁ ਦੁਸ੍ਸਪਲ੍ਲਤ੍ਥਿਕੇ ਆਯੋਗਪਲ੍ਲਤ੍ਥੀਕਾਪਿ ਸਙ੍ਗਹਂ ਗਚ੍ਛਤੀਤਿ ਆਹ ‘‘ਆਯੋਗਪਲ੍ਲਤ੍ਥਿਕਾਪਿ ਦੁਸ੍ਸਪਲ੍ਲਤ੍ਥਿਕਾ ਏਵਾ’’ਤਿ.

੬੦੨. ਸਤਿਯਾ ਉਪਟ੍ਠਾਨਂ ਸਕ੍ਕਚ੍ਚਨ੍ਤਿ ਆਹ ‘‘ਸਤਿਂਉਪਟ੍ਠਪੇਤ੍ਵਾ’’ਤਿ.

੬੦੩. ਪਿਣ੍ਡਪਾਤਂ ਦੇਨ੍ਤੇਪੀਤਿ ਪਿਣ੍ਡਪਾਤਂ ਪਤ੍ਤੇ ਪਕ੍ਖਿਪਨ੍ਤੇਪਿ. ਪਤ੍ਤੇ ਸਞ੍ਞਾ ਪਤ੍ਤਸਞ੍ਞਾ, ਸਾ ਅਸ੍ਸਤ੍ਥੀਤਿ ਪਤ੍ਤਸਞ੍ਞੀ. ‘‘ਕਤ੍ਵਾ’’ ਤਿਇਮਿਨਾ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ.

੬੦੪. ਸਮਸੂਪਕਂ ਪਿਣ੍ਡਪਾਤਨ੍ਤਿ ਏਤ੍ਥ ਸੂਪਪਿਣ੍ਡਪਾਤਾਨਂ ਸਮਉਪਡ੍ਢਭਾਵਂ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਸਮਸੂਪਕੋ ਨਾਮਾ’’ਤਿਆਦਿ. ਯਤ੍ਥਾਤਿ ਪਿਣ੍ਡਪਾਤੇ. ਭਤ੍ਤਸ੍ਸ ਚਤੁਤ੍ਥਭਾਗਪਮਾਣੋ ਸੂਪੋ ਹੋਤਿ, ਸੋ ਪਿਣ੍ਡਪਾਤੋ ਸਮਸੂਪਕੋ ਨਾਮਾਤਿ ਯੋਜਨਾ. ਓਲੋਣੀ ਚ ਸਾਕਸੂਪੇਯ੍ਯਞ੍ਚ ਮਚ੍ਛਰਸੋ ਚ ਮਂਸਰਸੋ ਚਾਤਿ ਦ੍ਵਨ੍ਦੋ. ਤਤ੍ਥ ਓਲੋਣੀਤਿ ਏਕਾ ਬ੍ਯਞ੍ਜਨਵਿਕਤਿ. ਸਾਕਸੂਪੇਯ੍ਯਨ੍ਤਿ ਸੂਪਸ੍ਸ ਹਿਤਂ ਸੂਪੇਯ੍ਯਂ, ਸਾਕਮੇਵ ਸੂਪੇਯ੍ਯਂ ਸਾਕਸੂਪੇਯ੍ਯਂ. ਇਮਿਨਾ ਸਬ੍ਬਾਪਿ ਸਾਕਸੂਪੇਯ੍ਯਬ੍ਯਞ੍ਜਨਵਿਕਤਿ ਗਹਿਤਾ. ਮਚ੍ਛਰਸਮਂਸਰਸਾਦੀਨੀਤਿ ਏਤ੍ਥ ਆਦਿਸਦ੍ਦੇਨ ਅਵਸੇਸਾ ਸਬ੍ਬਾਪਿ ਬ੍ਯਞ੍ਜਨਵਿਕਤਿ ਸਙ੍ਗਹਿਤਾ. ਤਂ ਸਬ੍ਬਂ ਰਸਾਨਂ ਰਸੋ ਰਸਰਸੋਤਿ ਕਤ੍ਵਾ ‘‘ਰਸਰਸੋ’’ਤਿ ਵੁਚ੍ਚਤਿ.

੬੦੫. ਸਮਪੁਣ੍ਣਂ ਸਮਭਰਿਤਨ੍ਤਿ ਵੇਵਚਨਮੇਵ. ਥੂਪਂ ਕਤੋ ਥੂਪੀਕਤੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਥੂਪੀਕਤੋ ਨਾਮਾ’’ਤਿਆਦਿ.

ਤਤ੍ਥਾਤਿ ¶ ‘‘ਥੂਪੀਕਤ’’ਨ੍ਤਿਆਦਿਵਚਨੇ. ਤੇਸਨ੍ਤਿ ਅਭਯਤ੍ਥੇਰਤਿਪਿਟਕਚੂਲ਼ਨਾਗਤ੍ਥੇਰਾਨਂ. ਇਤਿ ਪੁਚ੍ਛਿਂਸੁ, ਤੇਸਞ੍ਚ ਥੇਰਾਨਂ ਵਾਦਂ ਆਰੋਚੇਸੁਨ੍ਤਿ ਯੋਜਨਾ. ਥੇਰੋਤਿ ਚੂਲ਼ਸੁਮਨਤ੍ਥੇਰੋ. ਏਤਸ੍ਸਾਤਿ ਤਿਪਿਟਕਚੂਲ਼ਨਾਗਤ੍ਥੇਰਸ੍ਸ ¶ . ਸਤ੍ਤਕ੍ਖਤ੍ਤੁਨ੍ਤਿ ਸਤ੍ਤ ਵਾਰੇ. ਕੁਤੋਤਿ ਕਸ੍ਸਾਚਰਿਯਸ੍ਸ ਸਨ੍ਤਿਕਾ. ਤਸ੍ਮਾਤਿ ਯਸ੍ਮਾ ਯਾਵਕਾਲਿਕੇਨ ਪਰਿਚ੍ਛਿਨ੍ਨੋ, ਤਸ੍ਮਾ. ਆਮਿਸਜਾਤਿਕਂ ਯਾਗੁਭਤ੍ਤਂ ਵਾ ਫਲਾਫਲਂ ਵਾਤਿ ਯੋਜਨਾ. ਤਞ੍ਚ ਖੋਤਿ ਤਞ੍ਚ ਸਮਤਿਤ੍ਥਿਕਂ. ਇਤਰੇਨ ਪਨਾਤਿ ਨਾਧਿਟ੍ਠਾਨੁਪਗੇਨ ਪਤ੍ਤੇਨ ਪਨ. ਯਂ ਪੂਵਉਚ੍ਛੁਖਣ੍ਡਫਲਾਫਲਾਦਿ ਹੇਟ੍ਠਾ ਓਰੋਹਤਿ, ਤਂ ਪੂਵਉਚ੍ਛੁਖਣ੍ਡਫਲਾਫਲਾਦੀਤਿ ਯੋਜਨਾ. ਪੂਵਵਟਂਸਕੋਤਿ ਏਤ੍ਥ ਵਟਂਸਕੋਤਿ ਉਤ੍ਤਂਸੋ. ਸੋ ਹਿ ਉਦ੍ਧਂ ਤਸੀਯਤੇ ਅਲਙ੍ਕਰੀਯਤੇਤਿ ਵਟਂਸੋਤਿ ਵੁਚ੍ਚਤਿ ਉਕਾਰਸ੍ਸ ਵਕਾਰਂ, ਤਕਾਰਸ੍ਸ ਚ ਟਕਾਰਂ ਕਤ੍ਵਾ, ਸੋਯੇਵ ਵਟਂਸਕੋ, ਮੁਦ੍ਧਨਿ ਪਿਲਨ੍ਧਿਤੋ ਏਕੋ ਅਲਙ੍ਕਾਰਵਿਸੇਸੋ. ਪੂਵਮੇਵ ਤਂਸਦਿਸਤ੍ਤਾ ਪੂਵਵਟਂਸਕੋ, ਤਂ. ਪੁਪ੍ਫਵਟਂਸਕੋ ਚ ਤਕ੍ਕੋਲਕਟੁਕਫਲਾਦਿਵਟਂਸਕੋ ਚਾਤਿ ਦ੍ਵਨ੍ਦੋ, ਤੇ.

ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਨਨੁ ਸਬ੍ਬਥੂਪੀਕਤੇਸੁ ਪਟਿਗ੍ਗਹਣਸ੍ਸ ਅਕਪ੍ਪਿਯਤ੍ਤਾ ਪਰਿਭੁਞ੍ਜਨਮ੍ਪਿ ਨ ਵਟ੍ਟਤੀਤਿ ਆਹ ‘‘ਸਬ੍ਬਤ੍ਥ ਪਨਾ’’ਤਿਆਦਿ. ਤਤ੍ਥ ਸਬ੍ਬਤ੍ਥਾਤਿ ਸਬ੍ਬੇਸੁ ਥੂਪੀਕਤੇਸੂਤਿ. ਤਤਿਯੋ ਵਗ੍ਗੋ.

੪. ਸਕ੍ਕਚ੍ਚਵਗ੍ਗ-ਅਤ੍ਥਯੋਜਨਾ

੬੦੮. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਾਨੇ. ਓਧਿਨ੍ਤਿ ਅਵਧਿਂ ਮਰਿਯਾਦਂ.

੬੧੦. ਥੂਪਕਤੋਤਿ ਥੂਪਮੇਵ ਥੂਪਕਂ, ਤਤੋ ਥੂਪਕਤੋਤਿ ਦਸ੍ਸੇਨ੍ਤੋ ਆਹ ‘‘ਮਤ੍ਥਕਤੋ’’ਤਿ.

੬੧੧. ਮਾਘਾਤਸਮਯਾਦੀਸੂਤਿ ‘‘ਪਾਣੇ ਮਾ ਘਾਤੇਥਾ’’ਤਿ ਰਾਜਾਨੋ ਭੇਰਿਂ ਚਰਾਪੇਨ੍ਤਿ ਏਤ੍ਥਾਤਿ ਮਾਘਾਤੋ, ਸੋਯੇਵ ਸਮਯੋ ਮਾਘਾਤਸਮਯੋ. ਆਦਿਸਦ੍ਦੇਨ ਅਞ੍ਞਂ ਪਟਿਚ੍ਛਨ੍ਨਕਾਰਣਂ ਗਹੇਤਬ੍ਬਂ.

੬੧੫. ਤੇਸਨ੍ਤਿ ਮਯੂਰਣ੍ਡਕੁਕ੍ਕੁਟਣ੍ਡਾਨਨ੍ਤਿ. ਚਤੁਤ੍ਥੋ ਵਗ੍ਗੋ.

੫. ਕਬਲ਼ਵਗ੍ਗ-ਅਤ੍ਥਯੋਜਨਾ

੬੧੭. ‘‘ਮੁਖਦ੍ਵਾਰ’’ਨ੍ਤਿ ¶ ਕਮ੍ਮਸ੍ਸ ‘‘ਅਨਾਹਟੇ’’ਤਿ ਚ ‘‘ਵਿਵਰਿਸ੍ਸਾਮੀ’’ਤਿ ਚ ਦ੍ਵੀਸੁ ਕਿਰਿਯਾਸੁ ਸਮ੍ਬਨ੍ਧਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਅਨਾਹਰਿਤੇ ਮੁਖਦ੍ਵਾਰ’’ਨ੍ਤਿ.

੬੧੮. ਸਕਲਂ ਹਤ੍ਥਨ੍ਤਿ ਪਞ੍ਚਙ੍ਗੁਲਿਂ ਸਨ੍ਧਾਯ ਵੁਤ੍ਤਂ.

੬੧੯. ਸਕਬਲ਼ੇਨਾਤਿ ¶ ਏਤ੍ਥ ਕਬਲ਼ਸਦ੍ਦੇਨ ਵਚਨਸ੍ਸ ਅਪਰਿਪੁਣ੍ਣਕਾਰਣਂ ਸਬ੍ਬਮ੍ਪਿ ਗਹੇਤਬ੍ਬਂ.

੬੨੦. ਪਿਣ੍ਡੁਕ੍ਖੇਪਕਨ੍ਤਿਆਦੀਸੁ ਵਿਚ੍ਛਤ੍ਥੇ ਕਪਚ੍ਚਯੋਤਿ ਆਹ ‘‘ਪਿਣ੍ਡਂ ਉਕ੍ਖਿਪਿਤ੍ਵਾ ਉਕ੍ਖਿਪਿਤ੍ਵਾ’’ਤਿ. ਤ੍ਵਾਸਦ੍ਦੇਨ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ.

੬੨੪. ‘‘ਅਵਕਿਰਿਤ੍ਵਾ’’ਤਿ ਇਮਿਨਾ ਸਿਤ੍ਥਾਵਕਾਰਕਨ੍ਤਿ ਏਤ੍ਥ ਅਵਪੁਬ੍ਬੋ ਕਿਰਧਾਤੁਯੇਵ, ਨ ਕਰਧਾਤੂਤਿ ਦਸ੍ਸੇਤਿ.

੬੨੬. ‘‘ਚਪੁਚਪੂ’’ਤਿ ਏਵਂ ਸਦ੍ਦਨ੍ਤਿ ‘‘ਚਪੁਚਪੂ’’ਤਿ ਏਵਂ ਅਨੁਕਰਣਰਵਨ੍ਤਿ. ਪਞ੍ਚਮੋ ਵਗ੍ਗੋ.

੬. ਸੁਰੁਸੁਰੁਵਗ੍ਗ-ਅਤ੍ਥਯੋਜਨਾ

੬੨੭. ‘‘ਸੁਰੁਸੁਰੂ’’ਤਿ ਏਵਂ ਸਦ੍ਦਨ੍ਤਿ ‘‘ਸੁਰੁਸੁਰੂ’’ਤਿ ਏਵਂ ਅਨੁਕਰਣਰਵਂ. ਦਵਨਂ ਕੀਲ਼ਨਨ੍ਤਿ ਇਮਿਨਾ ਵਚਨਤ੍ਥੇਨ ਪਰਿਹਾਸੋ ਦਵੋ ਨਾਮਾਤਿ ਆਹ ‘‘ਦਵੋਤਿ ਪਰਿਹਾਸਵਚਨ’’ਨ੍ਤਿ. ਤਨ੍ਤਿ ਸੋ ਦਵੋ. ਲਿਙ੍ਗਵਿਪਲ੍ਲਾਸੋ ਹੇਸ. ਨ ਕਾਤਬ੍ਬਂ ਨ ਕਾਤਬ੍ਬੋਤਿ ਸਮ੍ਬਨ੍ਧੋ. ਸਿਲਕਬੁਦ੍ਧੋਤਿ ਸਿਲਾਯ ਕਤੋ, ਸਿਲੇਨ ਨਿਯੁਤ੍ਤੋ ਵਾ ਬੁਦ੍ਧੋ. ਅਪਟਿਬੁਦ੍ਧੋਤਿ ਅਪਟਿਵਿਦ੍ਧੋ ਬੁਦ੍ਧੋ, ਪਰਿਹਾਸਵਚਨਮੇਤਂ. ਗੋਧਮ੍ਮੋਤਿ ਗੁਨ੍ਨਂ ਧਮ੍ਮੋ. ਅਜਧਮ੍ਮੋਤਿ ਅਜਾਨਂ ਧਮ੍ਮੋ. ਮਿਗਸਙ੍ਘੋਤਿ ਮਿਗਾਨਂ ਸਙ੍ਘੋ. ਪਸੁਸਙ੍ਘੋਤਿ ਪਸੂਨਂ ਸਙ੍ਘੋ.

੬੨੮. ‘‘ਭੁਞ੍ਜਨ੍ਤੇਨਾ’’ਤਿ ਪਦਂ ‘‘ਨਿਲ੍ਲੇਹਿਤੁ’’ਨ੍ਤਿ ਪਦੇ ਭਾਵਕਤ੍ਤਾ.

੬੩੧. ਏਵਂਨਾਮਕੇਤਿ ¶ ‘‘ਕੋਕਨੁਦ’’ਨ੍ਤਿ ਏਵਂ ਨਾਮਂ ਅਸ੍ਸ ਪਾਸਾਦਸ੍ਸਾਤਿ ਏਵਂਨਾਮਕੋ, ਪਾਸਾਦੋ, ਤਸ੍ਮਿਂ. ‘‘ਪਦੁਮਸਣ੍ਠਾਨੋ’’ਤਿ ਇਮਿਨਾ ਪਾਸਾਦਸ੍ਸ ਸਦਿਸੂਪਚਾਰੇਨ ‘‘ਕੋਕਨੁਦੋ’’ਤਿ ਨਾਮਲਭਨਂ ਦਸ੍ਸੇਤਿ. ਤੇਨਾਤਿ ਪਦੁਮਸਣ੍ਠਾਨਤ੍ਤਾ. ਅਸ੍ਸਾਤਿ ਪਾਸਾਦਸ੍ਸ. ਪੁਗ੍ਗਲਿਕਮ੍ਪੀਤਿ ਪਰਪੁਗ੍ਗਲਸਨ੍ਤਕਂ ਗਹੇਤਬ੍ਬਂ ‘‘ਅਤ੍ਤਨੋ ਸਨ੍ਤਕਮ੍ਪੀ’’ਤਿ ਅਤ੍ਤਪੁਗ੍ਗਲਸਨ੍ਤਕਸ੍ਸ ਵਿਸੁਂ ਗਯ੍ਹਮਾਨਤ੍ਤਾ. ਸਙ੍ਖਮ੍ਪੀਤਿ ਪਾਨੀਯਸਙ੍ਖਮ੍ਪਿ. ਸਰਾਵਮ੍ਪੀਤਿ ਪਾਨੀਯਸਰਾਵਮ੍ਪਿ. ਥਾਲਕਮ੍ਪੀਤਿ ਪਾਨੀਯਥਾਲਕਮ੍ਪਿ.

੬੩੨. ‘‘ਉਦ੍ਧਰਿਤ੍ਵਾ’’ਤਿ ਸਾਮਞ੍ਞਤੋ ਵੁਤ੍ਤਵਚਨਸ੍ਸ ਕਮ੍ਮਾਪਾਦਾਨਾਨਿ ਦਸ੍ਸੇਤੁਂ ਵੁਤ੍ਤਂ ‘‘ਸਿਤ੍ਥਾਨਿ ਉਦਕਤੋ’’ਤਿ. ਭਿਨ੍ਦਿਤ੍ਵਾਤਿ ਚੁਣ੍ਣਵਿਚੁਣ੍ਣਾਨਿ ਕਤ੍ਵਾ. ਬਹੀਤਿ ਅਨ੍ਤਰਘਰਤੋ ਬਹਿ.

੬੩੪. ਸੇਤਚ੍ਛਤ੍ਤਨ੍ਤਿ ¶ ਏਤ੍ਥ ਸੇਤਸਦ੍ਦੋ ਪਣ੍ਡਰਪਰਿਯਾਯੋਤਿ ਆਹ ‘‘ਪਣ੍ਡਰਚ੍ਛਤ੍ਤ’’ਨ੍ਤਿ. ਵਤ੍ਥਪਲਿਗੁਣ੍ਠਿਤਨ੍ਤਿ ਵਤ੍ਥੇਹਿ ਸਮਨ੍ਤਤੋ ਵੇਠਿਤਂ. ਸੇਤਂ ਛਤ੍ਤਂ ਸੇਤਚ੍ਛਤ੍ਤਂ. ਕਿਲ਼ਞ੍ਜੇਹਿ ਕਤਂ ਛਤ੍ਤਂ ਕਿਲ਼ਞ੍ਜਚ੍ਛਤ੍ਤਂ. ਪਣ੍ਣੇਹਿ ਕਤਂ ਛਤ੍ਤਂ ਪਣ੍ਣਚ੍ਛਤ੍ਤਂ. ਮਣ੍ਡਲੇਨ ਬਦ੍ਧਂ ਮਣ੍ਡਲਬਦ੍ਧਂ. ਸਲਾਕਾਹਿ ਬਦ੍ਧਂ ਸਲਾਕਬਦ੍ਧਂ. ਤਾਨੀਤਿ ਤੀਣਿ ਛਤ੍ਤਾਨਿ. ਹੀਤਿ ਸਚ੍ਚਂ. ਯਮ੍ਪਿ ਏਕਪਣ੍ਣਚ੍ਛਤ੍ਤਨ੍ਤਿ ਯੋਜਨਾ. ਏਤੇਸੂਤਿ ਤੀਸੁ ਛਤ੍ਤੇਸੁ. ਅਸ੍ਸਾਤਿ ਯਸ੍ਸ ਕਸ੍ਸਚਿ ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ. ਸੋਤਿ ਯੋ ਕੋਚਿ ਗਹਟ੍ਠੋ ਵਾ ਪਬ੍ਬਜਿਤੋ ਵਾ. ਛਤ੍ਤਪਾਦੁਕਾਯ ਵਾਤਿ ਛਤ੍ਤਦਣ੍ਡਨਿਕ੍ਖੇਪਨਾਯ ਪਾਦੁਕਾਯ ਵਾ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ.

੬੩੫. ਮਜ੍ਝਿਮਸ੍ਸਾਤਿ ਪਮਾਣਮਜ੍ਝਿਮਸ੍ਸ. ‘‘ਚਤੁਹਤ੍ਥਪ੍ਪਮਾਣੋ’’ਤਿਇਮਿਨਾ ਚਤੁਹਤ੍ਥਤੋ ਊਨਾਤਿਰੇਕੋ ਦਣ੍ਡੋ ਨ ਦਣ੍ਡੋ ਨਾਮਾਤਿ ਦਸ੍ਸੇਤਿ. ਦਣ੍ਡੋ ਪਾਣਿਮ੍ਹਿ ਅਸ੍ਸਾਤਿ ਵਚਨਤ੍ਥਂ ਅਤਿਦਿਸਨ੍ਤੋ ਆਹ ‘‘ਵੁਤ੍ਤਨਯੇਨੇਵਾ’’ਤਿ.

੬੩੬. ‘‘ਸਤ੍ਥਪਾਣਿਮ੍ਹੀ’’ਤਿ ਏਤ੍ਥ ਅਸਿ ਏਵ ਅਧਿਪ੍ਪੇਤੋਤਿ ਆਹ ‘‘ਅਸਿ’’ਨ੍ਤਿ. ਅਸਿਨ੍ਤਿ ਖਗ੍ਗਂ.

੬੩੭. ‘‘ਆਵੁਧਂ ਨਾਮ ਚਾਪੋ ਕੋਦਣ੍ਡੋ’’ਤਿ ਪਾਲ਼ਿਯਂ ਵੁਤ੍ਤਵਚਨਂ ਉਪਲਕ੍ਖਣਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਆਵੁਧਪਾਣਿਸ੍ਸਾਤਿ ਏਤ੍ਥਾ’’ਤਿਆਦਿ. ਸਬ੍ਬਾਪਿ ਧਨੁਵਿਕਤਿ ਆਵੁਧਨ੍ਤਿ ਵੇਦਿਤਬ੍ਬਾਤਿ ਯੋਜਨਾ. ਯਥਾ ਅਸਿਂ ¶ ਸਨ੍ਨਹਿਤ੍ਵਾ ਠਿਤੋ ਸਤ੍ਥਪਾਣੀਤਿ ਸਙ੍ਖ੍ਯਂ ਨ ਗਚ੍ਛਤਿ, ਏਵਂ ਧਨੁਂ ਕਣ੍ਠੇ ਪਟਿਮੁਕ੍ਕੋ ਆਵੁਧਪਾਣੀਤਿ ਆਹ ‘‘ਸਚੇ ਪਨਾ’’ਤਿਆਦਿ, ਇਮਿਨਾ ਆਵੁਧੋ ਪਾਣਿਨਾ ਗਹਿਤੋਯੇਵ ਆਵੁਧਪਾਣਿ ਨਾਮਾਤਿ ਦਸ੍ਸੇਤੀਤਿ. ਛਟ੍ਠੋ ਵਗ੍ਗੋ.

੭. ਪਾਦੁਕਵਗ੍ਗ-ਅਤ੍ਥਯੋਜਨਾ

੬੩੮. ਅਙ੍ਗੁਲਨ੍ਤਰਨ੍ਤਿ ਪਾਦਙ੍ਗੁਲਵਿਵਰਂ. ਪਾਦੁਕਨ੍ਤਿ ਉਪਾਹਨਵਿਸੇਸੋ. ਸੋ ਹਿ ਪਜ੍ਜਤੇ ਇਮਾਯਾਤਿ ਪਾਦੁਕਾਤਿ ਵੁਚ੍ਚਤਿ, ਸਾ ਬਹੁਪਟਲਾ ਚਮ੍ਮਮਯਾ ਵਾ ਹੋਤਿ ਕਟ੍ਠਮਯਾ ਵਾ. ਪਟਿਮੁਞ੍ਚਿਤ੍ਵਾਤਿ ਪਾਦੁਕਂ ਪਟਿਮੁਞ੍ਚੀਤ੍ਵਾ.

੬੪੦. ਦ੍ਵੀਹਿ ਜਨੇਹਿ ਗਹਿਤੋਤਿ ਸਮ੍ਬਨ੍ਧੋ. ਵਂਸੇਨਾਤਿ ਵੇਣੁਨਾ, ਯਾਨੇ ਨਿਸਿਨ੍ਨੋਤਿ ਸਮ੍ਬਨ੍ਧੋ. ਵਿਸਙ੍ਖਰਿਤ੍ਵਾਤਿ ਵਿਪਤ੍ਤਿਂ ਕਰਿਤ੍ਵਾ. ਦ੍ਵੇਪੀਤਿ ਧਮ੍ਮਕਥਿਕਧਮ੍ਮਪਟਿਗ੍ਗਾਹਕਸਙ੍ਖਾਤਾ ਉਭੋਪਿ ਜਨਾ. ਵਟ੍ਟਤੀਤਿ ਦੇਸੇਤੁਂ ਵਟ੍ਟਤਿ.

੬੪੧. ਸਯਨਗਤਸ੍ਸਾਤਿ ¶ ਸਯਨਂ ਗਤਸ੍ਸ, ਸਯਨੇ ਨਿਪਨ੍ਨਸ੍ਸਾਤਿ ਅਤ੍ਥੋ. ਨਿਪਨ੍ਨਸ੍ਸ ਦੇਸੇਤੁਂ ਨ ਵਟ੍ਟਤੀਤਿ ਸਮ੍ਬਨ੍ਧੋ.

੬੪੨. ਤੀਸੁ ਪਲ੍ਲਤ੍ਥਿਕਾਸੁ ਯਾਯ ਕਾਯਚਿ ਪਲ੍ਲਤ੍ਥਿਕਾਯ ਨਿਸਿਨ੍ਨਸ੍ਸ ਧਮ੍ਮਂ ਦੇਸੇਤੁਂ ਨ ਵਟ੍ਟਤੀਤਿ ਦਸ੍ਸੇਨ੍ਤੋ ਆਹ ‘‘ਪਲ੍ਲਤ੍ਥਿਕਾਯਾ’’ਤਿਆਦਿ.

੬੪੩. ਯਥਾ ਵੇਠਿਯਮਾਨੇ ਕੇਸਨ੍ਤੋ ਨ ਦਿਸ੍ਸਤਿ, ਏਵਂ ਵੇਠਿਤਸੀਸਸ੍ਸਾਤਿ ਯੋਜਨਾ.

੬੪੭. ਛਪਕਸਦ੍ਦਸ੍ਸ ਚ ਚਣ੍ਡਾਲਸਦ੍ਦਸ੍ਸ ਚ ਵੇਵਚਨਤ੍ਤਾ ਵੁਤ੍ਤਂ ‘‘ਚਣ੍ਡਾਲਸ੍ਸਾ’’ਤਿ. ਚਣ੍ਡਾਲੋ ਹਿ ਸਂ ਸੁਨਖਂ ਪਚਤੀਤਿ ਛਪਕੋਤਿ ਵੁਚ੍ਚਤਿ ਸਕਾਰਸ੍ਸ ਛਕਾਰਂ ਕਤ੍ਵਾ. ਛਪਕਸ੍ਸ ਏਸਾ ਛਪਕੀ, ਚਣ੍ਡਾਲਭਰਿਯਾ. ਯਤ੍ਰਾਤਿ ਏਤ੍ਥ ਤ੍ਰਪਚ੍ਚਯੋ ਪਚ੍ਚਤ੍ਤੇ ਹੋਤੀਤਿ ਆਹ ‘‘ਯੋ ਹਿ ਨਾਮਾ’’ਤਿ. ਯੋ ਰਾਜਾ ਉਚ੍ਚੇ ਆਸਨੇ ਨਿਸੀਦਿਤ੍ਵਾ ਮਨ੍ਤਂ ਪਰਿਯਾਪੁਣਿਸ੍ਸਤਿ ਨਾਮ, ਅਯਂ ਰਾਜਾ ਯਾਵ ਅਤਿਵਿਯ ਅਧਮ੍ਮਿਕੋਤਿ ਵੁਤ੍ਤਂ ਹੋਤਿ. ‘‘ਸਬ੍ਬਮਿਦ’’ਨ੍ਤਿ ਅਯਂ ਸਦ੍ਦੋ ਲਿਙ੍ਗਵਿਪਲ੍ਲਾਸੋਤਿ ਆਹ ‘‘ਸਬ੍ਬੋ ਅਯ’’ਨ੍ਤਿ ¶ . ‘‘ਲੋਕੋ’’ਤਿ ਇਮਿਨਾ ਇਧਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਚਰਿਮਸਦ੍ਦੋ ਅਨ੍ਤਿਮਪਰਿਯਾਯੋ. ਅਨ੍ਤਿਮੋਤਿ ਚ ਲਾਮਕੋ. ਲਾਮਕੋਤਿ ਚ ਨਾਮ ਇਧ ਵਿਪਤ੍ਤੀਤਿ ਆਹ ‘‘ਸਙ੍ਕਰ’’ਨ੍ਤਿ. ਸਙ੍ਕਰਨ੍ਤਿ ਵਿਪਤ੍ਤਿਂ. ‘‘ਨਿਮ੍ਮਰਿਯਾਦੋ’’ਤਿ ਇਮਿਨਾ ‘‘ਸਙ੍ਕਰਂ ਗਤੋ’’ਤਿ ਪਦਾਨਂ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਚਰਿਮਂ ਗਤਂ ਚਰਿਮਗਤਂ, ਸਬ੍ਬੋ ਅਯਂ ਲੋਕੋ ਚਰਿਮਗਤੋਤਿ ਅਤ੍ਥੋ. ਇਧ ਚ ਜਾਤਕੇ (ਜਾ. ੧.੪.੩੩) ਚ ਕੇਸੁਚਿ ਪੋਤ੍ਥਕੇਸੁ ‘‘ਚਮਰਿਕਤ’’ਨ੍ਤਿ ਪਾਠੋ ਅਤ੍ਥਿ, ਸੋ ਅਯੁਤ੍ਤੋਯੇਵ. ਤਤ੍ਥੇਵਾਤਿ ਅਮ੍ਬਰੁਕ੍ਖਮੂਲੇਯੇਵ. ਤੇਸਨ੍ਤਿ ਰਾਜਬ੍ਰਾਹ੍ਮਣਾਨਂ.

ਤਤ੍ਥਾਤਿ ਤਿਸ੍ਸਂ ਗਾਥਾਯਂ. ਪਾਲ਼ਿਯਾਤਿ ਅਤ੍ਤਨੋ ਆਚਾਰਪਕਾਸਕਗਨ੍ਥਸਙ੍ਖਾਤਾਯ ਪਾਲ਼ਿਯਾ. ਨ ਪਸ੍ਸਰੇਤਿ ਏਤ੍ਥ ਰੇਸਦ੍ਦੋ ਅਨ੍ਤਿਸ੍ਸ ਕਾਰਿਯੋਤਿ ਆਹ ‘‘ਨ ਪਸ੍ਸਨ੍ਤੀ’’ਤਿ. ਯੋ ਚਾਯਨ੍ਤਿ ਯੋ ਚ ਅਯਂ. ਅਯਂਸਦ੍ਦੋ ਪਦਾਲਙ੍ਕਾਰਮਤ੍ਤੋ, ਬ੍ਰਾਹ੍ਮਣੋਤਿ ਅਤ੍ਥੋ. ਅਧੀਯਤੀਤਿ ਅਜ੍ਝਾਯਤਿ, ਸਿਕ੍ਖਤੀਤਿ ਅਤ੍ਥੋ.

ਤਤੋਤਿ ਬੋਧਿਸਤ੍ਤੇਨ ਵੁਤ੍ਤਗਾਥਾਤੋ ਪਰਨ੍ਤਿ ਸਮ੍ਬਨ੍ਧੋ. ਤਸ੍ਸਾਤਿ ਗਾਥਾਯ. ਭੋਤਿ ਬੋਧਿਸਤ੍ਤਂ ਆਮਨ੍ਤੇਤਿ. ‘‘ਭੁਤ੍ਤੋ’’ਤਿ ਪਦਸ੍ਸ ਕਮ੍ਮਵਾਚਕਭਾਵਮਾਵਿਕਾਤੁਂ ਵੁਤ੍ਤਂ ‘‘ਮਯਾ’’ਤਿ. ਅਸ੍ਸਾਤਿ ਓਦਨਸ੍ਸ. ਇਮਿਨਾ ਸੁਚਿ ਪਰਿਸੁਦ੍ਧਂ ਮਂਸਂ ਸੁਚਿਮਂਸਂ, ਤੇਨ ਉਪਸੇਚਨਮਸ੍ਸਾਤਿ ਸੁਚਿਮਂਸੂਪਸੇਚਨੋਤਿ ਬਾਹਿਰਤ੍ਥਸਮਾਸਂ ਦਸ੍ਸੇਤਿ. ਧਮ੍ਮੇਤਿ ਆਚਾਰਧਮ੍ਮੇ. ਬਦ੍ਧੋ ਹੁਤ੍ਵਾਤਿ ਥਦ੍ਧੋ ਹੁਤ੍ਵਾ, ਅਯਮੇਵ ਵਾ ਪਾਠੋ ¶ . ਵਣ੍ਣਸਦ੍ਦਸ੍ਸ ਸਣ੍ਠਾਨਾਦਿਕੇ ਅਞ੍ਞੇ ਅਤ੍ਥੇ ਪਟਿਕ੍ਖਿਪਿਤੁਂ ਵੁਤ੍ਤਂ ‘‘ਪਸਤ੍ਥੋ’’ਤਿ. ਥੋਮਿਤੋਤਿ ਤਸ੍ਸੇਵ ਵੇਵਚਨਂ.

ਅਥਾਤਿ ਅਨਨ੍ਤਰੇ. ਨਨ੍ਤਿ ਬ੍ਰਾਹ੍ਮਣਂ. ਤਸ੍ਸਾਤਿ ਗਾਥਾਦ੍ਵਯਸ੍ਸ. ਬ੍ਰਾਹ੍ਮਣਾਤਿ ਪੁਰੋਹਿਤਂ ਆਲਪਤਿ. ਸਮ੍ਪਤੀਤਿ ਸਨ੍ਦੀਟ੍ਠਿਕੇ. ‘‘ਯਾ ਵੁਤ੍ਤਿ ਵਿਨਿਪਾਤੇਨ, ਅਧਮ੍ਮਚਰਣੇਨ ਵਾ’’ਤਿ ਪਦਾਨਂ ਸਮ੍ਬਨ੍ਧਂ ਦਸ੍ਸੇਤੁਂ ਵੁਤ੍ਤਂ ‘‘ਨਿਪ੍ਪਜ੍ਜਤੀ’’ਤਿ.

ਮਹਾਬ੍ਰਹ੍ਮੇਤਿ ਏਤ੍ਥ ਬ੍ਰਹ੍ਮਸਦ੍ਦੋ ਬ੍ਰਾਹ੍ਮਣਵਾਚਕੋਤਿ ਆਹ ‘‘ਮਹਾਬ੍ਰਾਹ੍ਮਣਾ’’ਤਿ. ਅਞ੍ਞੇਪੀਤਿ ਰਾਜਬ੍ਰਾਹ੍ਮਣੇਹਿ ਅਪਰੇਪਿ. ‘‘ਪਚਨ੍ਤੀ’’ਤਿ ਵੁਤ੍ਤੇ ¶ ਅਵਿਨਾਭਾਵਤੋ ‘‘ਭੁਞ੍ਜਨ੍ਤੀ’’ਤਿ ਅਤ੍ਥੋਪਿ ਗਹੇਤਬ੍ਬੋਤਿ ਆਹ ‘‘ਪਚਨ੍ਤਿ ਚੇਵ ਭੁਞ੍ਜਨ੍ਤਿ ਚਾ’’ਤਿ. ‘‘ਨ ਕੇਵਲ’’ਨ੍ਤਿਆਦਿਨਾ ਅਞ੍ਞੇਪੀਤਿ ਏਤ੍ਥ ਪਿਸਦ੍ਦਸ੍ਸ ਸਮ੍ਪਿਣ੍ਡਨਤ੍ਥਂ ਦਸ੍ਸੇਤਿ, ਤ੍ਵਂ ਆਚਰਿਸ੍ਸਸੀਤਿ ਸਮ੍ਬਨ੍ਧੋ. ਪੁਨ ਤ੍ਵਨ੍ਤਿ ਤਂ, ਉਪਯੋਗਤ੍ਥੇ ਚੇਤਂ ਪਚ੍ਚਤ੍ਤਵਚਨਂ, ‘‘ਮਾ ਭਿਦਾ’’ਤਿਇਮਿਨਾ ਸਮ੍ਬਨ੍ਧਿਤਬ੍ਬਂ. ‘‘ਪਾਸਾਣੋ’’ਤਿਇਮਿਨਾ ਅਸ੍ਮਸਦ੍ਦੋ ਪਾਸਾਣਪਰਿਯਾਯੋਤਿ ਦਸ੍ਸੇਤਿ. ਤੇਨਾਤਿ ਭਿਨ੍ਦਨਹੇਤੁਨਾ.

੬੪੮. ਅਤ੍ਤਨੋ ਕਙ੍ਖਾਠਾਨਸ੍ਸ ਪੁਚ੍ਛਨਂ ਸਨ੍ਧਾਯ ਵੁਤ੍ਤਂ ‘‘ਨ ਕਥੇਤਬ੍ਬ’’ਨ੍ਤਿ.

੬੪੯. ਸਮਧੁਰੇਨਾਤਿ ਸਮਂ ਧੁਰੇਨ, ਸਮਂ ਮੁਖੇਨਾਤਿ ਅਤ੍ਥੋ.

੬੫੨. ਯਂ ਮੂਲਂ ਵਾ ਯਾ ਸਾਖਾ ਵਾ ਗਚ੍ਛਤੀਤਿ ਯੋਜਨਾ. ਖਨ੍ਧੇਤਿ ਰੁਕ੍ਖਸ੍ਸ ਖਨ੍ਧੇ. ਨਿਕ੍ਖਮਤੀਤਿ ਉਚ੍ਚਾਰਪਸ੍ਸਾਵੋ ਨਿਕ੍ਖਮਤਿ. ਤਿਣਣ੍ਡੁਪਕਨ੍ਤਿ ਤਿਣੇਨ ਕਤਂ, ਤਿਣਮਯਂ ਵਾ ਅਣ੍ਡੁਪਕਂ. ਏਤ੍ਥਾਤਿ ਉਚ੍ਚਾਰਪਸ੍ਸਾਵਖੇਲ਼ੇਸੁ.

੬੫੩. ਅਧਿਪ੍ਪੇਤਉਦਕਂ ਦਸ੍ਸੇਤੁਂ ਵੁਤ੍ਤਂ ‘‘ਪਰਿਭੋਗਉਦਕਮੇਵਾ’’ਤਿ. ਸਤ੍ਤਮੋ ਵਗ੍ਗੋ.

ਏਤ੍ਥਾਤਿ ਸੇਖਿਯੇਸੁ. ਸੂਪਬ੍ਯਞ੍ਜਨਪਟਿਚ੍ਛਾਦਨੇਤਿ ਸੂਪਬ੍ਯਞ੍ਜਨੇ ਓਦਨੇਨ ਪਟਿਚ੍ਛਾਦੇਤਿ. ਸਮਤ੍ਤਾ ਸੇਖਿਯਾ.

੮. ਸਤ੍ਤਾਧਿਕਰਣਸਮਥ-ਅਤ੍ਥਯੋਜਨਾ

੬੫੫. ਸਙ੍ਖ੍ਯਂ ¶ ਪਰਿਚ੍ਛਿਜ੍ਜਤੀਤਿ ਸਙ੍ਖ੍ਯਾਪਰਿਚ੍ਛੇਦੋ. ਤੇਸਨ੍ਤਿ ਚਤੁਬ੍ਬਿਧਾਨਮਧਿਕਰਣਾਨਂ. ਤਸ੍ਸਾਤਿ ਤੇਸਂ ਖਨ੍ਧਕਪਰਿਵਾਰਾਨਂ. ਤਤ੍ਥੇਵਾਤਿ ਤੇਸੁ ਏਵ ਖਨ੍ਧਕਪਰਿਵਾਰੇਸੁ. ਸਬ੍ਬਤ੍ਥਾਤਿ ਸਬ੍ਬੇਸੁ ਸਿਕ੍ਖਾਪਦੇਸੂਤਿ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਭਿਕ੍ਖੁਵਿਭਙ੍ਗਵਣ੍ਣਨਾਯ ਯੋਜਨਾ ਸਮਤ੍ਤਾ.

ਜਾਦਿਲਞ੍ਛਿਤਨਾਮੇਨ ਨੇਕਾਨਂ ਵਾਚਿਤੋ ਮਯਾ.

ਸਾਧੁਂ ਮਹਾਵਿਭਙ੍ਗਸ੍ਸ, ਸਮਤ੍ਤੋ ਯੋਜਨਾਨਯੋਤਿ.

ਭਿਕ੍ਖੁਨੀਵਿਭਙ੍ਗੋ

੧. ਪਾਰਾਜਿਕਕਣ੍ਡਅਤ੍ਥਯੋਜਨਾ

ਏਵਂ ¶ ¶ ਭਿਕ੍ਖੁਵਿਭਙ੍ਗਸ੍ਸ, ਕਤ੍ਵਾਨ ਯੋਜਨਾਨਯਂ;

ਭਿਕ੍ਖੁਨੀਨਂ ਵਿਭਙ੍ਗਸ੍ਸ, ਕਰਿਸ੍ਸਂ ਯੋਜਨਾਨਯਂ.

ਯੋਤਿ ਵਿਭਙ੍ਗੋ. ਵਿਭਙ੍ਗਸ੍ਸਾਤਿ ਵਿਭਙ੍ਗੋ ਅਸ੍ਸ. ਅਸ੍ਸਾਤਿ ਹੋਤਿ. ਤਸ੍ਸਾਤਿ ਭਿਕ੍ਖੁਨੀਨਂ ਵਿਭਙ੍ਗਸ੍ਸ. ਯਤੋਤਿ ਯਸ੍ਮਾ. ਅਯਂ ਪਨੇਤ੍ਥ ਯੋਜਨਾ – ਭਿਕ੍ਖੂਨਂ ਵਿਭਙ੍ਗਸ੍ਸ ਅਨਨ੍ਤਰਂ ਭਿਕ੍ਖੁਨੀਨਂ ਯੋ ਵਿਭਙ੍ਗੋ ਸਙ੍ਗਹਿਤੋ ਅਸ੍ਸ, ਤਸ੍ਸ ਭਿਕ੍ਖੁਨੀਨਂ ਵਿਭਙ੍ਗਸ੍ਸ ਸਂਵਣ੍ਣਨਾਕ੍ਕਮੋ ਪਤ੍ਤੋ ਯਤੋ, ਤਤੋ ਤਸ੍ਸ ਭਿਕ੍ਖੁਨੀਨਂ ਵਿਭਙ੍ਗਸ੍ਸ ਅਪੁਬ੍ਬਪਦਵਣ੍ਣਨਂ ਕਾਤੁਂ ਤਾਵ ਪਾਰਾਜਿਕੇ ਅਯਂ ਸਂਵਣ੍ਣਨਾ ਹੋਤੀਤਿ. ਅਪੁਬ੍ਬਾਨਂ ਪਦਾਨਂ ਵਣ੍ਣਨਾ ਅਪੁਬ੍ਬਪਦਵਣ੍ਣਨਾ, ਤਂ.

੧. ਪਠਮਪਾਰਾਜਿਕਸਿਕ੍ਖਾਪਦਂ

੬੫੬. ‘‘ਤੇਨ…ਪੇ… ਸਾਲ਼੍ਹੋ’’ਤਿ ਏਤ੍ਥ ‘‘ਏਤ੍ਥਾ’’ਤਿ ਪਾਠਸੇਸੋ ਯੋਜੇਤਬ੍ਬੋ. ਦਬ੍ਬਗੁਣਕਿਰਿਯਾਜਾਤਿਨਾਮਸਙ੍ਖਾਤੇਸੁ ਪਞ੍ਚਸੁ ਸਦ੍ਦੇਸੁ ਸਾਲ਼੍ਹਸਦ੍ਦਸ੍ਸ ਨਾਮਸਦ੍ਦਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਸਾਲ਼੍ਹੋਤਿ ਤਸ੍ਸ ਨਾਮ’’ਨ੍ਤਿ. ਮਿਗਾਰਮਾਤੁਯਾਤਿ ਵਿਸਾਖਾਯ. ਸਾ ਹਿ ਮਿਗਾਰਸੇਟ੍ਠਿਨਾ ਮਾਤੁਟ੍ਠਾਨੇ ਠਪਿਤਤ੍ਤਾ ਮਿਗਾਰਮਾਤਾ ਨਾਮ. ਨਵਕਮ੍ਮਂ ਅਧਿਟ੍ਠਾਤੀਤਿ ਨਵਕਮ੍ਮਿਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਨਵਕਮ੍ਮਾਧਿਟ੍ਠਾਯਿਕ’’ਨ੍ਤਿ. ‘‘ਪਣ੍ਡਿਚ੍ਚੇਨ ਸਮਨ੍ਨਾਗਤਾ’’ਤਿਇਮਿਨਾ ਪਣ੍ਡਾ ਵੁਚ੍ਚਤਿ ਪਞ੍ਞਾ, ਸਾ ਸਞ੍ਜਾਤਾ ਇਮਿਸ੍ਸਾਤਿ ਪਣ੍ਡਿਤਾਤਿ ਵਚਨਤ੍ਥਂ ਦਸ੍ਸੇਤਿ. ਵੇਯ੍ਯਤ੍ਤਿਕੇਨਾਤਿ ਵਿਸੇਸੇਨ ਅਞ੍ਜਤਿ ਪਾਕਟਂ ਗਚ੍ਛਤੀਤਿ ਵਿਯਤ੍ਤੋ, ਪੁਗ੍ਗਲੋ, ਤਸ੍ਸ ਇਦਂ ਵੇਯ੍ਯਤ੍ਤਿਕਂ, ਞਾਣਂ, ਤੇਨ. ‘‘ਪਣ੍ਡਾ’’ਤਿ ਵੁਤ੍ਤਪਞ੍ਞਾਯ ‘‘ਮੇਧਾ’’ਤਿ ਵੁਤ੍ਤਪਞ੍ਞਾਯ ਵਿਸੇਸਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਪਾਲ਼ਿਗਹਣੇ’’ਤਿਆਦਿ. ‘‘ਮੇਧਾ’’ਤਿ ਹਿ ਵੁਤ੍ਤਪਞ੍ਞਾ ‘‘ਪਣ੍ਡਾ’’ਤਿ ਵੁਤ੍ਤਪਞ੍ਞਾਯ ਵਿਸੇਸੋ ਹੋਤਿ ਸਤਿਸਹਾਯਤ੍ਤਾ. ਤਤ੍ਰੁਪਾਯਾਯਾਤਿ ਅਲੁਤ੍ਤਸਮਾਸੋ ¶ ‘‘ਤਤ੍ਰਮਜ੍ਝਤ੍ਤਤਾ’’ਤਿਆਦੀਸੁ (ਧ. ਸ. ਅਟ੍ਠ. ਯੇਵਾਪਨਕਵਣ੍ਣਨਾ) ਵਿਯ. ‘‘ਕਮ੍ਮੇਸੂ’’ਤਿ ਇਮਿਨਾ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤਿ ¶ . ਕਤ੍ਤਬ੍ਬਕਮ੍ਮੁਪਪਰਿਕ੍ਖਾਯਾਤਿ ਕਤ੍ਤਬ੍ਬਕਮ੍ਮੇਸੁ ਵਿਚਾਰਣਾਯ. ਚਸਦ੍ਦੇਨ ‘‘ਕਤਾਕਤ’’ਨ੍ਤਿ ਪਦਸ੍ਸ ਦ੍ਵਨ੍ਦਵਾਕ੍ਯਂ ਦਸ੍ਸੇਤਿ. ਪਰਿਵੇਸਨਟ੍ਠਾਨੇਤਿ ਪਰਿਭੁਞ੍ਜਿਤੁਂ ਵਿਸਨ੍ਤਿ ਪਵਿਸਨ੍ਤਿ ਏਤ੍ਥਾਤਿ ਪਰਿਵੇਸਨਂ, ਤਮੇਵ ਠਾਨਂ ਪਰਿਵੇਸਨਟ੍ਠਾਨਂ, ਤਸ੍ਮਿਂ. ਨਿਕੂਟੇਤਿ ਏਤ੍ਥ ਕੂਟਸਙ੍ਖਾਤਸਿਖਰਵਿਰਹਿਤੇ ਓਕਾਸੇਤਿ ਦਸ੍ਸੇਨ੍ਤੋ ਆਹ ‘‘ਕੋਣਸਦਿਸਂ ਕਤ੍ਵਾ ਦਸ੍ਸਿਤੇ ਗਮ੍ਭੀਰੇ’’ਤਿ. ਵਿਤ੍ਯੂਪਸਗ੍ਗੋ ਵਿਕਾਰਵਾਚਕੋ, ਸਰਸਦ੍ਦੋ ਸਦ੍ਦਵਾਚਕੋਤਿ ਆਹ ‘‘ਵਿਪ੍ਪਕਾਰਸਦ੍ਦੋ’’ਤਿ. ਚਰਤਿ ਅਨੇਨਾਤਿ ਚਰਣਂ ਪਾਦੋ, ਤਸ੍ਮਿਂ ਉਟ੍ਠਿਤੋ ਗਿਲਾਨੋ ਏਤਿਸ੍ਸਾਤਿ ਚਰਣਗਿਲਾਨਾਤਿ ਦਸ੍ਸੇਨ੍ਤੋ ਆਹ ‘‘ਪਾਦਰੋਗੇਨ ਸਮਨ੍ਨਾਗਤਾ’’ਤਿ.

੬੫੭. ‘‘ਤਿਨ੍ਤਾ’’ਤਿ ਇਮਿਨਾ ਅਵਸ੍ਸੁਤਸਦ੍ਦੋ ਇਧ ਕਿਲਿਨ੍ਨਤ੍ਥੇ ਏਵ ਵਤ੍ਤਤਿ, ਨ ਅਞ੍ਞਤ੍ਥੇਤਿ ਦਸ੍ਸੇਤਿ. ਅਸ੍ਸਾਤਿ ‘‘ਅਵਸ੍ਸੁਤਾ’’ਤਿਪਦਸ੍ਸ. ਪਦਭਾਜਨੇ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਪਦਭਾਜਨੇ. ਵਤ੍ਥਂ ਰਙ੍ਗਜਾਤੇਨ ਰਤ੍ਤਂ ਵਿਯ, ਤਥਾ ਕਾਯਸਂਸਗ੍ਗਰਾਗੇਨ ਸੁਟ੍ਠੁ ਰਤ੍ਤਾਤਿ ਯੋਜਨਾ. ‘‘ਅਪੇਕ੍ਖਾਯ ਸਮਨ੍ਨਾਗਤਾ’’ਤਿ ਇਮਿਨਾ ਅਪੇਕ੍ਖਾ ਏਤਿਸ੍ਸਮਤ੍ਥੀਤਿ ਅਪੇਕ੍ਖਵਤੀਤਿ ਅਤ੍ਥਂ ਦਸ੍ਸੇਤਿ. ਪਟਿਬਦ੍ਧਂ ਚਿਤ੍ਤਂ ਇਮਿਸ੍ਸਨ੍ਤਿ ਪਟਿਬਦ੍ਧਚਿਤ੍ਤਾਤਿ ਦਸ੍ਸੇਨ੍ਤੋ ਆਹ ‘‘ਪਟਿਬਨ੍ਧਿਤ੍ਵਾ ਠਪਿਤਚਿਤ੍ਤਾ ਵਿਯਾ’’ਤਿ. ਦੁਤਿਯਪਦਵਿਭਙ੍ਗੇਪੀਤਿ ‘‘ਅਵਸ੍ਸੁਤੋ’’ਤਿ ਦੁਤਿਯਪਦਭਾਜਨੇਪਿ. ਪੁਗ੍ਗਲਸਦ੍ਦਸ੍ਸ ਸਤ੍ਤਸਾਮਞ੍ਞਵਾਚਕਤ੍ਤਾ ਪੁਰਿਸਸਦ੍ਦੇਨ ਵਿਸੇਸੇਤਿ. ਅਧੋਉਬ੍ਭਇਤਿ ਨਿਪਾਤਾਨਂ ਛਟ੍ਠਿਯਾ ਸਮਸਿਤਬ੍ਬਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਅਕ੍ਖਕਾਨਂ ਅਧੋ’’ਤਿਆਦਿ. ਨਨੁ ਯਥਾ ਇਧ ‘‘ਅਕ੍ਖਕਾਨਂ ਅਧੋ’’ਤਿ ਵੁਤ੍ਤਂ, ਏਵਂ ਪਦਭਾਜਨੇਪਿ ਵਤ੍ਤਬ੍ਬਂ, ਕਸ੍ਮਾ ਨ ਵੁਤ੍ਤਨ੍ਤਿ ਆਹ ‘‘ਪਦਭਾਜਨੇ’’ਤਿਆਦਿ. ਪਦਪਟਿਪਾਟਿਯਾਤਿ ‘‘ਅਧੋ’’ਤਿ ਚ ‘‘ਅਕ੍ਖਕ’’ਨ੍ਤਿ ਚ ਪਦਾਨਂ ਅਨੁਕ੍ਕਮੇਨ. ਏਤ੍ਥਾਤਿ ਅਧਕ੍ਖਕਉਬ੍ਭਜਾਣੁਮਣ੍ਡਲੇਸੁ. ਸਾਧਾਰਣਪਾਰਾਜਿਕੇਹੀਤਿ ਭਿਕ੍ਖੁਭਿਕ੍ਖੁਨੀਨਂ ਸਾਧਾਰਣੇਹਿ ਪਾਰਾਜਿਕੇਹਿ. ਨਾਮਮਤ੍ਤਨ੍ਤਿ ਨਾਮਮੇਵ.

੬੫੯. ਏਵਨ੍ਤਿ ਇਮਾਯ ਪਾਲ਼ਿਯਾ ਵਿਭਜਿਤ੍ਵਾਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਉਭਤੋਅਵਸ੍ਸੁਤੇ’’ਤਿਆਦਿਵਚਨੇ. ‘‘ਉਭਤੋਅਵਸ੍ਸੁਤੇ’’ਤਿ ਪਾਠੋ ਮੂਲਪਾਠੋਯੇਵ, ਨਾਞ੍ਞੋਤਿ ਦਸ੍ਸੇਨ੍ਤੇਨ ਵਿਸੇਸਮਕਤ੍ਵਾ ‘‘ਉਭਤੋਅਵਸ੍ਸੁਤੇਤਿ ਉਭਤੋ ਅਵਸ੍ਸੁਤੇ’’ਤਿ ਵੁਤ੍ਤਂ. ਉਭਤੋਤਿ ਏਤ੍ਥ ¶ ਉਭਸਰੂਪਞ੍ਚ ਤੋਸਦ੍ਦਸ੍ਸ ਛਟ੍ਠ੍ਯਤ੍ਥੇ ਪਵਤ੍ਤਿਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਭਿਕ੍ਖੁਨਿਯਾ ਚੇਵ ਪੁਰਿਸਸ੍ਸ ਚਾ’’ਤਿ. ਤਤ੍ਥ ਭਿਕ੍ਖੁਨੀਪੁਰਿਸਸਦ੍ਦੇਹਿ ਉਭਸਰੂਪਂ ਦਸ੍ਸੇਤਿ. ‘‘ਯਾ’’ਤਿ ਚ ‘‘ਸ’’ਇਤਿ ਚ ਦ੍ਵੀਹਿ ਸਦ੍ਦੇਹਿ ਤੋਪਚ੍ਚਯਸ੍ਸ ਛਟ੍ਠ੍ਯਤ੍ਥਂ, ਉਭਿਨ੍ਨਂ ਅਵਸ੍ਸੁਤਭਾਵੇ ਸਤੀਤਿ ਅਤ੍ਥੋ. ਭਾਵਪਚ੍ਚਯੇਨ ਵਿਨਾ ਭਾਵਤ੍ਥੋ ਞਾਤਬ੍ਬੋਤਿ ਆਹ ‘‘ਅਵਸ੍ਸੁਤਭਾਵੇ’’ਤਿ. ਯਥਾਪਰਿਚ੍ਛਿਨ੍ਨੇਨਾਤਿ ‘‘ਅਧਕ੍ਖਕਂ, ਉਬ੍ਭਜਾਣੁਮਣ੍ਡਲ’’ਨ੍ਤਿ ¶ ਯੇਨ ਯੇਨ ਪਰਿਚ੍ਛਿਨ੍ਨੇਨ. ਅਤ੍ਤਨੋਤਿ ਭਿਕ੍ਖੁਨਿਯਾ. ਤਸ੍ਸ ਵਾਤਿ ਪੁਰਿਸਸ੍ਸ ਵਾ. ਇਧਾਪੀਤਿ ਕਾਯਪਟਿਬਦ੍ਧੇਨ ਕਾਯਾਮਸਨੇਪਿ.

ਤਤ੍ਰਾਤਿ ਤੇਸੁ ਭਿਕ੍ਖੁਭਿਕ੍ਖੁਨੀਸੁ. ਨ ਕਾਰੇਤਬ੍ਬੋ ‘‘ਕਾਯਸਂਸਗ੍ਗਂ ਸਾਦਿਯੇਯ੍ਯਾ’’ਤਿ ਅਵੁਤ੍ਤਤ੍ਤਾਤਿ ਅਧਿਪ੍ਪਾਯੋ. ਅਚੋਪਯਮਾਨਾਪੀਤਿ ਅਚਾਲਯਮਾਨਾਪਿ, ਪਿਸਦ੍ਦੋ ਸਮ੍ਭਾਵਨਤ੍ਥੋ, ਤੇਨ ਚੋਪਯਮਾਨਾ ਪਗੇਵਾਤਿ ਦਸ੍ਸੇਤਿ. ਏਵਂ ਪਨ ਸਤੀਤਿ ਚਿਤ੍ਤੇਨੇਵ ਅਧਿਵਾਸਯਮਾਨਾਯ ਸਤਿ ਪਨ. ਕਿਰਿਯਸਮੁਟ੍ਠਾਨਤਾਤਿ ਇਮਸ੍ਸ ਸਿਕ੍ਖਾਪਦਸ੍ਸ ਕਿਰਿਯਸਮੁਟ੍ਠਾਨਭਾਵੋ. ਤਬ੍ਬਹੁਲਨਯੇਨਾਤਿ ‘‘ਵਨਚਰਕੋ (ਮ. ਨਿ. ਅਟ੍ਠ. ੨.੨੦੧; ੩.੧੩੩), ਸਙ੍ਗਾਮਾਵਚਰੋ’’ਤਿਆਦੀਸੁ (ਮ. ਨਿ. ੨.੧੦੮) ਵਿਯ ਤਸ੍ਸਂ ਕਿਰਿਯਾਯਂ ਬਹੁਲਤੋ ਸਮੁਟ੍ਠਾਨਨਯੇਨ. ਸਾਤਿ ਕਿਰਿਯਸਮੁਟ੍ਠਾਨਤਾ.

੬੬੦. ਏਤ੍ਥਾਤਿ ਉਬ੍ਭਕ੍ਖਕਅਧੋਜਾਣੁਮਣ੍ਡਲੇਸੁ.

੬੬੨. ‘‘ਏਕਤੋ ਅਵਸ੍ਸੁਤੇ’’ਤਿ ਏਤ੍ਥਾਪਿ ਤੋਪਚ੍ਚਯੋ ਛਟ੍ਠ੍ਯਤ੍ਥੇ ਹੋਤਿ. ਸਾਮਞ੍ਞਵਚਨਸ੍ਸਾਪਿ ਵਿਸੇਸੇ ਅਵਟ੍ਠਾਨਤੋ, ਵਿਸੇਸਤ੍ਥਿਨਾ ਚ ਵਿਸੇਸਸ੍ਸ ਅਨੁਪਯੋਜਿਤਬ੍ਬਤੋ ਆਹ ‘‘ਭਿਕ੍ਖੁਨਿਯਾ ਏਵਾ’’ਤਿ. ਤਤ੍ਰਾਤਿ ‘‘ਏਕਤੋ ਅਵਸ੍ਸੁਤੇ’’ਤਿਆਦਿਵਚਨੇ. ‘‘ਤਥੇਵਾ’’ਤਿਇਮਿਨਾ ਕਾਯਸਂਸਗ੍ਗਰਾਗੇਨ ਅਵਸ੍ਸੁਤੋਤਿ ਅਤ੍ਥਂ ਅਤਿਦਿਸਤਿ. ਚਤੂਸੂਤਿ ਮੇਥੁਨਰਾਗ ਕਾਯਸਂਸਗ੍ਗਰਾਗਗੇਹਸਿਤਪੇਮ ਸੁਦ੍ਧਚਿਤ੍ਤਸਙ੍ਖਾਤੇਸੁ ਚਤੂਸੁ. ਯਤ੍ਥਾਤਿ ਯਸ੍ਮਿਂ ਠਾਨੇ.

੬੬੩. ਅਯਂ ਪੁਰਿਸੋ ਇਤਿ ਵਾ ਇਤ੍ਥੀ ਇਤਿ ਵਾ ਅਜਾਨਨ੍ਤਿਯਾ ਵਾਤਿ ਯੋਜਨਾਤਿ. ਪਠਮਂ.

੨. ਦੁਤਿਯਪਾਰਾਜਿਕਸਿਕ੍ਖਾਪਦਂ

੬੬੪. ਦੁਤਿਯੇ ¶ ਕਚ੍ਚਿ ਨੋ ਸਾਤਿ ਏਤ੍ਥ ਨੋਸਦ੍ਦੋ ਨੁਸਦ੍ਦਤ੍ਥੋਤਿ ਆਹ ‘‘ਕਚ੍ਚਿ ਨੁ ਸਾ’’ਤਿ. ਪਰਿਵਾਰਵਿਪਤ੍ਤੀਤਿ ਪਰਿਜਨਸ੍ਸ ਵਿਨਾਸਨਂ. ‘‘ਅਕਿਤ੍ਤੀ’’ਤਿ ਏਤ੍ਥ ਸਮ੍ਮੁਖਾ ਨਿਨ੍ਦਂ ਗਹੇਤ੍ਵਾ ‘‘ਅਯਸੋ’’ਤਿਇਮਿਨਾ ਪਰਮ੍ਮੁਖਾ ਨਿਨ੍ਦਾ ਗਹੇਤਬ੍ਬਾਤਿ ਦਸ੍ਸੇਤੁਂ ਵੁਤ੍ਤਂ ‘‘ਪਰਮ੍ਮੁਖਗਰਹਾ ਵਾ’’ਤਿ.

੬੬੬. ‘‘ਯਾ ਪਾਰਾਜਿਕਂ ਆਪਨ੍ਨਾ’’ਤਿਇਮਿਨਾ ‘‘ਸਾ ਵਾ’’ਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਚਤੁਨ੍ਨਨ੍ਤਿ ਨਿਦ੍ਧਾਰਣਤ੍ਥੇ ਚੇਤਂ ਸਾਮਿਵਚਨਂ, ਚਤੂਸੂਤਿ ਅਤ੍ਥੋ. ਪਚ੍ਛਾਤਿ ਸਬ੍ਬਪਾਰਾਜਿਕਾਨਂ ਪਚ੍ਛਾ. ਇਮਸ੍ਮਿਂ ਓਕਾਸੇਤਿ ਪਠਮਤਤਿਯਪਾਰਾਜਿਕਾਨਮਨ੍ਤਰੇ ਠਾਨੇ. ਠਪਿਤਨ੍ਤਿ ਸਙ੍ਗੀਤਿਕਾਰੇਹਿ ਨਿਕ੍ਖਿਤ੍ਤਂ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਤਤ੍ਰਾਤਿ ਦੁਟ੍ਠੁਲ੍ਲਸਿਕ੍ਖਾਪਦੇਤਿ. ਦੁਤਿਯਂ.

੩. ਤਤਿਯਪਾਰਾਜਿਕਸਿਕ੍ਖਾਪਦਂ

੬੬੯. ਤਤਿਯੇ ¶ ਅਸ੍ਸਾਤਿ ‘‘ਧਮ੍ਮੇਨ ਵਿਨਯੇਨਾ’’ਤਿ ਪਦਸ੍ਸ. ਪਦਭਾਜਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਞਤ੍ਤਿਸਮ੍ਪਦਾ ਚੇਵ ਅਨੁਸਾਵਨਸਮ੍ਪਦਾ ਚ ਸਤ੍ਥੁਸਾਸਨਂ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਞਤ੍ਤਿ…ਪੇ… ਸਮ੍ਪਦਾਯ ਚਾ’’ਤਿ. ਸਤ੍ਥੁਸਾਸਨੇਨਾਤਿ ਚ ਸਤ੍ਥੁ ਆਣਾਯ. ਕਮ੍ਮਨ੍ਤਿ ਉਕ੍ਖੇਪਨੀਯਕਮ੍ਮਂ. ਤਤ੍ਥਾਤਿ ਸਙ੍ਘੇ. ‘‘ਵਚਨਂ ਨਾਦਿਯਤੀ’’ਤਿਆਦੀਸੁ ਵਿਯ ਸਙ੍ਘਂ ਵਾ ਨਾਦਿਯਤੀਤਿ ਏਤ੍ਥ ਨਾਦਿਯਨਂ ਨਾਮ ਨਾਨੁਵਤ੍ਤਨਮੇਵਾਤਿ ਆਹ ‘‘ਨਾਨੁਵਤ੍ਤਤੀ’’ਤਿ. ਤਤ੍ਥਾਤਿ ਸਙ੍ਘਾਦੀਸੁ. ਅਯਂ ਤਾਵ ਸਂਵਾਸੋਤਿ ਸਹ ਭਿਕ੍ਖੂ ਵਸਨ੍ਤਿ ਏਤ੍ਥਾਤਿ ਸਂਵਾਸੋਤਿ ਅਤ੍ਥੇਨ ਅਯਂ ਏਕਕਮ੍ਮਾਦਿ ਸਂਵਾਸੋ ਨਾਮ. ‘‘ਸਹ ਅਯਨਭਾਵੇਨਾ’’ਤਿਇਮਿਨਾ ਸਹ ਅਯਨ੍ਤਿ ਪਵਤ੍ਤਨ੍ਤੀਤਿ ਸਹਾਯਾਤਿ ਵਚਨਤ੍ਥਂ ਦਸ੍ਸੇਤਿ. ਤੇਤਿ ਭਿਕ੍ਖੂ. ਯੇਹਿ ਚਾਤਿ ਭਿਕ੍ਖੂਹਿ ਚ. ਤਸ੍ਸਾਤਿ ਉਕ੍ਖਿਤ੍ਤਕਸ੍ਸ. ਤੇਨਾਤਿ ਉਕ੍ਖਿਤ੍ਤਕੇਨ. ਅਤ੍ਤਨੋਤਿ ਉਕ੍ਖਿਤ੍ਤਕਸ੍ਸਾਤਿ. ਤਤਿਯਂ.

੪. ਚਤੁਤ੍ਥਪਾਰਾਜਿਕਸਿਕ੍ਖਾਪਦਂ

੬੭੫. ਚਤੁਤ੍ਥੇ ਮੇਥੁਨਰਾਗੇਨ ਅਵਸ੍ਸੁਤਾ ਨਾਧਿਪ੍ਪੇਤਾ, ਕਾਯਸਂਸਗ੍ਗਰਾਗੇਨ ਅਵਸ੍ਸੁਤਾਵਾਧਿਪ੍ਪੇਤਾਤਿ ਆਹ ‘‘ਕਾਯਸਂਸਗ੍ਗਰਾਗੇਨ ਅਵਸ੍ਸੁਤਾ’’ਤਿ ¶ . ‘‘ਪੁਰਿਸਪੁਗ੍ਗਲਸ੍ਸਾ’’ਤਿਪਦਂ ਨ ਹਤ੍ਥਸਦ੍ਦੇਨ ਸਮ੍ਬਨ੍ਧਿਤਬ੍ਬਂ, ਗਹਣਸਦ੍ਦੇਨੇਵ ਸਮ੍ਬਨ੍ਧਿਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਯਂ ਪੁਰਿਸਪੁਗ੍ਗਲੇਨਾ’’ਤਿਆਦਿ. ਤਨ੍ਤਿ ਗਹਣਂ, ‘‘ਹਤ੍ਥਗ੍ਗਹਣ’’ਨ੍ਤਿ ਵੁਤ੍ਤਵਚਨਂ ਉਪਲਕ੍ਖਣਮਤ੍ਤਮੇਵਾਤਿ ਆਹ ‘‘ਅਞ੍ਞਮ੍ਪੀ’’ਤਿਆਦਿ. ਤਤ੍ਥ ‘‘ਅਞ੍ਞਮ੍ਪੀ’’ਤਿ ਹਤ੍ਥਗਹਣਤੋ ਇਤਰਮ੍ਪਿ. ਅਪਾਰਾਜਿਕਕ੍ਖੇਤ੍ਤੇਤਿ ਉਬ੍ਭਕ੍ਖਕੇ ਅਧੋਜਾਣੁਮਣ੍ਡਲੇ. ਅਸ੍ਸਾਤਿ ‘‘ਹਤ੍ਥਗ੍ਗਹਣ’’ਨ੍ਤਿਪਦਸ੍ਸ. ਏਤ੍ਥਾਤਿ ‘‘ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯਾ’’ਤਿਪਦੇ. ਕਾਯਸਂਸਗ੍ਗੋਤਿ ਕਾਯਸਂਸਗ੍ਗੋ ਏਵ. ਤੇਨ ਵੁਤ੍ਤਂ ‘‘ਨ ਮੇਥੁਨਧਮ੍ਮੋ’’ਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤ੍ਥਾਤਿ ਕਾਯਸਂਸਗ੍ਗਗਹਣੇ. ਸਾਧਕਨ੍ਤਿ ਞਾਪਕਂ.

ਤਿਸ੍ਸਿਤ੍ਥਿਯੋਤਿ ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਤੀਸੁ ਇਤ੍ਥੀਸੂਤਿ ਹਿ ਅਤ੍ਥੋ, ਤਿਸ੍ਸੋ ਇਤ੍ਥਿਯੋ ਉਪਗਨ੍ਤ੍ਵਾਤਿ ਵਾ ਯੋਜੇਤਬ੍ਬੋ. ਏਸੇਵ ਨਯੋ ਪਰਤੋਪਿ. ਯਂ ਮੇਥੁਨਂ ਅਤ੍ਥਿ, ਤਂ ਨ ਸੇਵੇਤਿ ਯੋਜਨਾ. ਨ ਸੇਵੇਤਿ ਚ ਨ ਸੇਵਤਿ. ਤਿਕਾਰਸ੍ਸ ਹਿ ਏਕਾਰੋ. ਤਯੋ ਪੁਰਿਸੇਤਿ ਤੀਸੁ ਪੁਰਿਸੇਸੁ, ਤੇ ਵਾ ਉਪਗਨ੍ਤ੍ਵਾ. ਤਯੋ ਚ ਅਨਰਿਯਪਣ੍ਡਕੇਤਿ ਤੀਸੁ ਅਨਰਿਯਸਙ੍ਖਾਤੇਸੁ ਉਭਤੋਬ੍ਯਞ੍ਜਨਕੇਸੁ ਚ ਪਣ੍ਡਕੇਸੁ ਚ, ਤੇ ਵਾ ਉਪਗਨ੍ਤ੍ਵਾਤਿ ਯੋਜਨਾ. ਨ ਚਾਚਰੇ ਮੇਥੁਨਂ ਬ੍ਯਞ੍ਜਨਸ੍ਮਿਨ੍ਤਿ ਅਤ੍ਤਨੋ ਨਿਮਿਤ੍ਤਸ੍ਮਿਂ ਮੇਥੁਨਂ ਨ ਚ ਆਚਰਤਿ. ਇਦਂ ਅਨੁਲੋਮਪਾਰਾਜਿਕਂ ਸਨ੍ਧਾਯ ਵੁਤ੍ਤਂ. ਛੇਜ੍ਜਂ ਸਿਯਾ ਮੇਥੁਨਧਮ੍ਮਪਚ੍ਚਯਾਤਿ ¶ ਮੇਥੁਨਧਮ੍ਮਕਾਰਣਾ ਛੇਜ੍ਜਂ ਸਿਯਾ, ਪਾਰਾਜਿਕਂ ਭਵੇਯ੍ਯਾਤਿ ਅਤ੍ਥੋ. ਕੁਸਲੇਹੀਤਿ ਪਞ੍ਹਾਵਿਸਜ੍ਜਨੇ ਛੇਕੇਹਿ, ਛੇਕਕਾਮੇਹਿ ਵਾ. ਅਯਂ ਪਞ੍ਹੋ ਅਟ੍ਠਵਤ੍ਥੁਕਂ ਸਨ੍ਧਾਯ ਵੁਤ੍ਤੋ.

ਪਞ੍ਹਾਵਿਸਜ੍ਜਨਤ੍ਥਾਯ ਚਿਨ੍ਤੇਨ੍ਤਾਨਂ ਸੇਦਮੋਚਨਕਾਰਣਤ੍ਤਾ ‘‘ਸੇਦਮੋਚਨਗਾਥਾ’’ਤਿ ਵੁਤ੍ਤਾ. ਵਿਰੁਜ੍ਝਤੀਤਿ ‘‘ਨ ਮੇਥੁਨਧਮ੍ਮੋ’’ਤਿ ਵਚਨੇਨ ‘‘ਛੇਜ੍ਜਂ ਸਿਯਾ ਮੇਥੁਨਧਮ੍ਮਪਚ੍ਚਯਾ’’ਤਿ ਵਚਨਂ ਵਿਰੁਜ੍ਝਤਿ, ਨ ਸਮੇਤੀਤਿ ਅਤ੍ਥੋ. ਇਤਿ ਚੇ ਵਦੇਯ੍ਯ, ਨ ਵਿਰੁਜ੍ਝਤਿ. ਕਸ੍ਮਾ? ਮੇਥੁਨਧਮ੍ਮਸ੍ਸ ਪੁਬ੍ਬਭਾਗਤ੍ਤਾਤਿ ਯੋਜਨਾ. ਇਮਿਨਾ ਮੇਥੁਨਧਮ੍ਮਸ੍ਸ ਪੁਬ੍ਬਭਾਗਭੂਤੋ ਕਾਯਸਂਸਗ੍ਗੋਵ ਉਪਚਾਰੇਨ ਤਤ੍ਥ ਮੇਥੁਨਧਮ੍ਮਸਦ੍ਦੇਨ ਵੁਤ੍ਤੋ, ਨ ਦ੍ਵਯਂਦ੍ਵਯਸਮਾਪਤ੍ਤੀਤਿ ਦੀਪੇਤਿ. ਹਿਸਦ੍ਦੋ ਵਿਤ੍ਥਾਰਜੋਤਕੋ. ਪਰਿਵਾਰੇਯੇਵ ਵੁਤ੍ਤਾਨੀਤਿ ਸਮ੍ਬਨ੍ਧੋ. ਵਣ੍ਣਾਵਣ੍ਣੋਤਿ ਸੁਕ੍ਕਵਿਸਟ੍ਠਿ. ਧਨਮਨੁਪ੍ਪਾਦਾਨਨ੍ਤਿ ਸਞ੍ਚਰਿਤ੍ਤਂ ¶ . ‘‘ਇਮਿਨਾ ਪਰਿਯਾਯੇਨਾ’’ਤਿ ਇਮਿਨਾ ਲੇਸੇਨ ਸਮੀਪੂਪਚਾਰੇਨਾਤਿ ਅਤ੍ਥੋ. ਏਤੇਨੁਪਾਯੇਨਾਤਿ ‘‘ਹਤ੍ਥਗ੍ਗਹਣਂ ਸਾਦਿਯੇਯ੍ਯਾ’’ਤਿਪਦੇ ਵੁਤ੍ਤਉਪਾਯੇਨ. ਸਬ੍ਬਪਦੇਸੂਤਿ ਸਬ੍ਬੇਸੁ ‘‘ਸਙ੍ਘਾਟਿਕਣ੍ਣਗ੍ਗਹਣਂ ਸਾਦਿਯੇਯ੍ਯਾ’’ਤਿਆਦੀਸੁ ਪਦੇਸੁ. ਅਪਿ ਚਾਤਿ ਏਕਂਸੇਨ, ਵਿਸੇਸਂ ਵਕ੍ਖਾਮੀਤਿ ਅਧਿਪ੍ਪਾਯੋ. ‘‘ਏਵਂਨਾਮਕਂ ਠਾਨ’’ਨ੍ਤਿ ਇਮਿਨਾ ‘‘ਇਤ੍ਥਂਨਾਮਂ ਇਮਸ੍ਸ ਠਾਨਸ੍ਸਾ’’ਤਿ ਵਚਨਤ੍ਥਂ ਦੀਪੇਤਿ.

੬੭੬. ਏਕਨ੍ਤਰਿਕਾਯ ਵਾਤਿ ਏਤ੍ਥ ਵਾਸਦ੍ਦੇਨ ਦ੍ਵਨ੍ਤਰਿਕਾਦੀਨਿਪਿ ਸਙ੍ਗਯ੍ਹਨ੍ਤਿ. ਯੇਨ ਤੇਨਾਤਿ ਯੇਨ ਵਾ ਤੇਨ ਵਾ. ਦ੍ਵਿਤਿਚਤੁਪ੍ਪਞ੍ਚਛਵਤ੍ਥੂਨਿ ਪੇਯ੍ਯਾਲਵਸੇਨ ਵਾ ਵਾਸਦ੍ਦੇਨ ਵਾ ਗਹੇਤਬ੍ਬਾਨਿ. ਅਪਿ ਚਾਤਿ ਕਿਞ੍ਚ ਭਿਯ੍ਯੋ, ਵਤ੍ਤਬ੍ਬਵਿਸੇਸਂ ਵਕ੍ਖਾਮੀਤਿ ਅਧਿਪ੍ਪਾਯੋ. ਏਤ੍ਥਾਤਿ ‘‘ਆਪਤ੍ਤਿਯੋ ਦੇਸੇਤ੍ਵਾ’’ਤਿ ਵਚਨੇ. ਹੀਤਿ ਸਚ੍ਚਂ. ਵੁਤ੍ਤਨ੍ਤਿ ਪਰਿਵਾਰੇ ਵੁਤ੍ਤਂ. ਤਤ੍ਰਾਤਿ ਪੁਰਿਮਵਚਨਾਪੇਕ੍ਖਂ. ਦੇਸਿਤਾ ਆਪਤ੍ਤਿ ਗਣਨੂਪਿਕਾਤਿ ਯੋਜਨਾ. ਏਕਂ ਵਤ੍ਥੁਂ ਆਪਨ੍ਨਾ ਯਾ ਭਿਕ੍ਖੁਨੀਤਿ ਯੋਜਨਾ. ਧੁਰਨਿਕ੍ਖੇਪਂ ਕਤ੍ਵਾਤਿ ‘‘ਇਮਞ੍ਚ ਵਤ੍ਥੁਂ, ਅਞ੍ਞਮ੍ਪਿ ਚ ਵਤ੍ਥੁਂ ਨਾਪਜ੍ਜਿਸ੍ਸਾਮੀ’’ਤਿ ਧੁਰਨਿਕ੍ਖੇਪਂ ਕਤ੍ਵਾ. ਯਾ ਪਨ ਸਉਸ੍ਸਾਹਾਵ ਦੇਸੇਤੀਤਿ ਯੋਜਨਾਤਿ. ਚਤੁਤ੍ਥਂ.

ਸਾਧਾਰਣਾਤਿ ਭਿਕ੍ਖੁਨੀਹਿ ਸਾਧਾਰਣਾ. ਏਤ੍ਥਾਤਿ ‘‘ਉਦ੍ਦਿਟ੍ਠਾ ਖੋ ਅਯ੍ਯਾਯੋ’’ਤਿਆਦਿਵਚਨੇ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਭਿਕ੍ਖੁਨਿਵਿਭਙ੍ਗੇ ਪਾਰਾਜਿਕਕਣ੍ਡਵਣ੍ਣਨਾਯ ਯੋਜਨਾ ਸਮਤ੍ਤਾ.

੨. ਸਙ੍ਘਾਦਿਸੇਸਕਣ੍ਡਂ

੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦ-ਅਤ੍ਥਯੋਜਨਾ

ਪਾਰਾਜਿਕਾਨਨ੍ਤਰਸ੍ਸਾਤਿ ¶ ਪਾਰਾਜਿਕਾਨਂ ਅਨਨ੍ਤਰੇ ਠਪਿਤਸ੍ਸ, ਸਙ੍ਗੀਤਸ੍ਸ ਵਾ, ਸਙ੍ਘਾਦਿਸੇਸਕਣ੍ਡਸ੍ਸਾਤਿ ਸਮ੍ਬਨ੍ਧੋ. ਅਯਂ ਈਦਿਸਾ ਅਨੁਤ੍ਤਾਨਤ੍ਥਵਣ੍ਣਨਾ ਅਨੁਤ੍ਤਾਨਾਨਂ ਪਦਾਨਂ ਅਤ੍ਥਸ੍ਸ ਵਣ੍ਣਨਾ ਦਾਨਿ ਇਮਸ੍ਮਿਂਕਾਲੇ ਭਵਿਸ੍ਸਤੀਤਿ ਯੋਜਨਾ.

੬੭੮. ਪਠਮੇ ¶ ਉਦਕਂ ਵਸਿਤਂ ਅਚ੍ਛਾਦਨਂ ਅਨੇਨ ਕਤਨ੍ਤਿ ਉਦੋਸਿਤੋਤਿ ਵਚਨਤ੍ਥੇਨ ਭਣ੍ਡਸਾਲਾ ਉਦੋਸਿਤਂ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਉਦੋਸਿਤਨ੍ਤਿ ਭਣ੍ਡਸਾਲਾ’’ਤਿ. ਏਤ੍ਥ ਹਿ ਉਦਸਦ੍ਦੋ ਉਦਕਪਰਿਯਾਯੋ. ਸਂਯੋਗੋ ਨ ਯੁਤ੍ਤੋਯੇਵ. ਭਣ੍ਡਸਾਲਾਤਿ ਯਾਨਾਦੀਨਂ ਭਣ੍ਡਾਨਂ ਠਪਨਸਾਲਾ. ਅਚ੍ਚਾਵਦਥਾਤਿ ਏਤ੍ਥ ਅਤੀਤ੍ਯੂਪਸਗ੍ਗੋ ਅਤਿਕ੍ਕਮਨਤ੍ਥੋ, ਆਤ੍ਯੂਪਸਗ੍ਗੋ ਧਾਤ੍ਵਤ੍ਥਾਨੁਵਤ੍ਤਕੋਤਿ ਆਹ ‘‘ਅਤਿਕ੍ਕਮਿਤ੍ਵਾ ਵਦਥਾ’’ਤਿ.

੬੭੯. ਉਸ੍ਸਯਵਸੇਨ ਵਦਨਂ ਉਸ੍ਸਯਵਾਦੋ, ਸੋਯੇਵ ਉਸ੍ਸਯਵਾਦਿਕਾਤਿ ਦਸ੍ਸੇਨ੍ਤੋ ਆਹ ‘‘ਉਸ੍ਸਯਵਾਦਿਕਾ’’ਤਿਆਦਿ. ‘‘ਮਾਨੁਸ੍ਸਯਵਸੇਨ ਕੋਧੁਸ੍ਸਯਵਸੇਨਾ’’ਤਿ ਇਮਿਨਾ ਉਸ੍ਸਯਭੇਦਂ ਦਸ੍ਸੇਤਿ. ਸਾਤਿ ਉਸ੍ਸਯਵਾਦਿਕਾ. ਅਤ੍ਥਤੋਤਿ ਸਰੂਪਤੋ. ਏਤ੍ਥਾਤਿ ਪਦਭਾਜਨੇ. ਅਡ੍ਡਨਂ ਅਭਿਯੁਞ੍ਜਨਂ ਅਡ੍ਡੋਤਿ ਕਤ੍ਵਾ ਦ੍ਵਿਨ੍ਨਂ ਜਨਾਨਂ ਅਡ੍ਡੋ ਵੋਹਾਰਿਕਾਨਂ ਵਿਨਿਚ੍ਛਯਕਾਰਣਂ ਹੋਤਿ, ਤਸ੍ਮਾ ਵੁਤ੍ਤਂ ‘‘ਅਡ੍ਡੋਤਿ ਵੋਹਾਰਿਕਵਿਨਿਚ੍ਛਯੋ ਵੁਚ੍ਚਤੀ’’ਤਿ, ਮੁਦ੍ਧਜਤਤਿਯਕ੍ਖਰੋਯੇਵ. ਯਨ੍ਤਿ ਅਡ੍ਡਂ. ਯਤ੍ਥਾਤਿ ਯਸ੍ਮਿਂ ਕਿਸ੍ਮਿਂਚਿ ਠਾਨੇ. ਦ੍ਵਿਨ੍ਨਂ ਅਡ੍ਡਕਾਰਕਾਨਂ ਵੋਹਾਰਂ ਜਾਨਨ੍ਤੀਤਿ ਵੋਹਾਰਿਕਾ, ਅਕ੍ਖਦਸ੍ਸਾ, ਤੇਸਂ. ਦ੍ਵੀਸੁ ਜਨੇਸੂਤਿ ਅਡ੍ਡਕਾਰਕੇਸੁ ਜਨੇਸੁ ਦ੍ਵੀਸੁ. ਯੋ ਕੋਚੀਤਿ ਅਡ੍ਡਕਾਰਕੋ ਵਾ ਅਞ੍ਞੋ ਵਾ ਯੋ ਕੋਚਿ.

ਏਤ੍ਥਾਤਿ ‘‘ਏਕਸ੍ਸ ਆਰੋਚੇਤੀ’’ਤਿਆਦਿਵਚਨੇ. ਯਤ੍ਥ ਕਤ੍ਥਚੀਤਿ ਯਂਕਿਞ੍ਚਿ ਠਾਨਂ ਆਗਤੇਪੀਤਿ ਸਮ੍ਬਨ੍ਧੋ. ਅਥਾਤਿ ਪਚ੍ਛਾ. ਸਾਤਿ ਭਿਕ੍ਖੁਨੀ. ਸੋਤਿ ਉਪਾਸਕੋ.

‘‘ਕਪ੍ਪਿਯਕਾਰਕੇਨਾ’’ਤਿਪਦਂ ‘‘ਕਥਾਪੇਤੀ’’ਤਿਪਦੇ ਕਾਰਿਤਕਮ੍ਮਂ. ਤਤ੍ਥਾਤਿ ਕਪ੍ਪਿਯਕਾਰਕਇਤਰੇਸੁ ¶ . ਵੋਹਾਰਿਕੇਹਿ ਕਤੇਤਿ ਸਮ੍ਬਨ੍ਧੋ. ਗਤਿਗਤਨ੍ਤਿ ਚਿਰਕਾਲਪਤ੍ਤਂ. ਸੁਤਪੁਬ੍ਬਨ੍ਤਿ ਪੁਬ੍ਬੇ ਸੁਤਂ. ਅਥਾਤਿ ਸੁਤਪੁਬ੍ਬਤ੍ਤਾ ਏਵ. ਤੇਤਿ ਵੋਹਾਰਿਕਾ, ਦੇਨ੍ਤੀਤਿ ਸਮ੍ਬਨ੍ਧੋ.

ਪਠਮਨ੍ਤਿ ਸਮਨੁਭਾਸਨਤੋ ਪੁਬ੍ਬਂ. ਆਪਤ੍ਤੀਤਿ ਆਪਜ੍ਜਨਂ. ਏਤਸ੍ਸਾਤਿ ਸਙ੍ਘਾਦਿਸੇਸਸ੍ਸ. ਅਯਂ ਹੀਤਿ ਅਯਂ ਏਵ, ਵਕ੍ਖਮਾਨੋ ਏਵਾਤਿ ਅਤ੍ਥੋ. ਏਤ੍ਥਾਤਿ ਪਦਭਾਜਨੇ. ਸਹ ਵਤ੍ਥੁਜ੍ਝਾਚਾਰਾਤਿ ਵਤ੍ਥੁਜ੍ਝਾਚਾਰੇਨ ਸਹ, ਵਾਕ੍ਯਮੇਵ, ਨ ਸਮਾਸੋ. ਵਤ੍ਥੁਜ੍ਝਾਚਾਰਾਤਿ ਕਰਣਤ੍ਥੇ ਨਿਸ੍ਸਕ੍ਕਵਚਨਂ ਦਟ੍ਠਬ੍ਬਂ ¶ . ਤੇਨ ਵੁਤ੍ਤਂ ‘‘ਸਹ ਵਤ੍ਥੁਜ੍ਝਾਚਾਰੇਨਾ’’ਤਿ. ਭਿਕ੍ਖੁਨਿਨ੍ਤਿ ਆਪਤ੍ਤਿਮਾਪਨ੍ਨਂ ਭਿਕ੍ਖੁਨਿਂ. ਸਙ੍ਘਤੋਤਿ ਭਿਕ੍ਖੁਨਿਸਙ੍ਘਮ੍ਹਾ. ਅਨੀਯਸਦ੍ਦੋ ਹੇਤੁਕਤ੍ਤਾਭਿਧਾਯਕੋਤਿ ਆਹ ‘‘ਨਿਸ੍ਸਾਰੇਤੀਤਿ ਨਿਸ੍ਸਾਰਣੀਯੋ’’ਤਿ. ਭਿਕ੍ਖੁਨਿਸਙ੍ਘਤੋ ਨਿਸ੍ਸਰਤਿ, ਨਿਸ੍ਸਾਰਿਯਤਿ ਵਾ ਅਨੇਨਾਤਿ ਨਿਸ੍ਸਾਰਣੀਯੋਤਿ ਕਰਣਤ੍ਥੋਪਿ ਯੁਤ੍ਤੋਯੇਵ. ਤਤ੍ਥਾਤਿ ਪਦਭਾਜਨੇ. ਯਨ੍ਤਿ ਸਙ੍ਘਾਦਿਸੇਸਂ. ਸੋਤਿ ਸਙ੍ਘਾਦਿਸੇਸੋ. ਪਦਭਾਜਨਸ੍ਸ ਅਤ੍ਥੋ ਕਾਰਣੋਪਚਾਰੇਨ ਦਟ੍ਠਬ੍ਬੋ. ਹੀਤਿ ਸਚ੍ਚਂ. ਕੇਨਚੀਤਿ ਪੁਗ੍ਗਲੇਨ, ਨ ਨਿਸ੍ਸਾਰੀਯਤੀਤਿ ਸਮ੍ਬਨ੍ਧੋ. ਤੇਨ ਧਮ੍ਮੇਨ ਕਰਣਭੂਤੇਨ, ਹੇਤੁਭੂਤੇਨ ਵਾ. ਸੋਤਿ ਧਮ੍ਮੋ.

ਅਡ੍ਡਕਾਰਕਮਨੁਸ੍ਸੇਹਿ ਵੁਚ੍ਚਮਾਨਾਤਿ ਯੋਜਨਾ. ਸਯਨ੍ਤਿ ਸਾਮਂ. ਤਤੋਤਿ ਗਮਨਤੋ, ਪਰਨ੍ਤਿ ਸਮ੍ਬਨ੍ਧੋ. ਭਿਕ੍ਖੁਨਿਯਾ ਵਾ ਕਤਂ ਆਰੋਚੇਤੂਤਿ ਯੋਜਨਾ.

ਧਮ੍ਮਿਕਨ੍ਤਿ ਧਮ੍ਮੇਨ ਸਭਾਵੇਨ ਯੁਤ੍ਤਂ. ਯਥਾਤਿ ਯੇਨਾਕਾਰੇਨ. ਤਨ੍ਤਿ ਆਕਾਰਂ. ਤਤ੍ਥਾਤਿ ‘‘ਅਨੋਦਿਸ੍ਸ ਆਚਿਕ੍ਖਤੀ’’ਤਿ ਵਚਨੇ.

ਧੁਤ੍ਤਾਦਯੋਤਿ ਆਦਿਸਦ੍ਦੇਨ ਚੋਰਾਦਯੋ ਸਙ੍ਗਣ੍ਹਾਤਿ. ਸਾਤਿ ਆਚਿਕ੍ਖਨਾ. ਤਨ੍ਤਿ ਆਚਿਕ੍ਖਨਂ. ਤੇਸਨ੍ਤਿ ਗਾਮਦਾਰਕਾਦੀਨਂ. ਦਣ੍ਡਨ੍ਤਿ ਧਨਦਣ੍ਡਂ. ਗੀਵਾ ਹੋਤੀਤਿ ਇਣਂ ਹੋਤਿ. ਅਧਿਪ੍ਪਾਯੇ ਸਤਿਪੀਤਿ ਯੋਜਨਾ. ਤਸ੍ਸਾਤਿ ਅਨਾਚਾਰਂ ਚਰਨ੍ਤਸ੍ਸ.

ਕੇਵਲਂ ਹੀਤਿ ਕੇਵਲਮੇਵ. ਤਨ੍ਤਿ ਰਕ੍ਖਂ. ਕਾਰਕੇਤਿ ਅਨਾਚਾਰਸ੍ਸ ਕਾਰਕੇ. ਤੇਸ+?ਨ੍ਤਿ ਕਾਰਕਾਨਂ.

ਤੇਸਨ੍ਤਿ ਹਰਨ੍ਤਾਨਂ. ‘‘ਅਨਤ੍ਥਕਾਮਤਾਯਾ’’ਤਿ ਇਮਿਨਾ ਭਯਾਦਿਨਾ ਵੁਤ੍ਤੇ ਨਤ੍ਥਿ ਦੋਸੋਤਿ ਦਸ੍ਸੇਤਿ. ਹੀਤਿ ਲਦ੍ਧਦੋਸਜੋਤਕੋ. ਅਤ੍ਤਨੋ ਵਚਨਕਰਂ…ਪੇ… ਵਤ੍ਤੁਂ ਵਟ੍ਟਤੀਤਿ ਅਤ੍ਤਨੋ ਵਚਨਂ ਆਦਿਯਿਸ੍ਸਤੀਤਿ ਵੁਤ੍ਤੇ ਵਚਨਂ ਅਨਾਦਿਯਿਤ੍ਵਾ ਦਣ੍ਡੇ ਗਹਿਤੇਪਿ ਨਤ੍ਥਿ ਦੋਸੋ ਦਣ੍ਡਗਹਣਸ੍ਸ ਪਟਿਕ੍ਖਿਤ੍ਤਤ੍ਤਾ. ਦਾਸਦਾਸੀਵਾਪਿਆਦੀਨਨ੍ਤਿ ਆਦਿਸਦ੍ਦੇਨ ਖੇਤ੍ਤਾਦਯੋ ਸਙ੍ਗਯ੍ਹਨ੍ਤਿ.

ਵੁਤ੍ਤਨਯੇਨੇਵਾਤਿ ¶ ਅਤੀਤਂ ਆਰਬ੍ਭ ਆਚਿਕ੍ਖਨੇ ਵੁਤ੍ਤਨਯੇਨ ਏਵ. ‘‘ਆਯਤਿਂ ਅਕਰਣਤ੍ਥਾਯਾ’’ਤਿ ਇਮਿਨਾ ਅਨਾਗਤਂ ਆਰਬ੍ਭ ਓਦਿਸ੍ਸ ਆਚਿਕ੍ਖਨਂ ¶ ਦਸ੍ਸੇਤਿ. ‘‘ਕੇਨ ਏਵਂ ਕਤ’’ਨ੍ਤਿ ਪੁਚ੍ਛਾਯ ਅਤੀਤੇ ਕਤਪੁਬ੍ਬਂ ਪੁਚ੍ਛਤਿ. ਸਾਪੀਤਿ ਪਿਸਦ੍ਦੋ ਵੁਤ੍ਤਸਮ੍ਪਿਣ੍ਡਨਤ੍ਥੋ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਵੋਹਾਰਿਕਾ ਦਣ੍ਡੇਨ੍ਤੀਤਿ ਸਮ੍ਬਨ੍ਧੋ. ਦਣ੍ਡੇਨ੍ਤੀਤਿ ਵਧਦਣ੍ਡੇਨ ਚ ਧਨਦਣ੍ਡੇਨ ਚ ਆਣਂ ਕਰੋਨ੍ਤਿ.

ਯੋ ਚਾਯਨ੍ਤਿ ਯੋ ਚ ਅਯਂ. ਭਿਕ੍ਖੁਨੀਨਂ ਯੋ ਅਯਂ ਨਯੋ ਵੁਤ੍ਤੋ, ਏਸੇਵ ਨਯੋ ਭਿਕ੍ਖੂਨਮ੍ਪਿ ਨਯੋਤਿ ਯੋਜਨਾ. ‘‘ਏਸੇਵ ਨਯੋ’’ਤਿ ਵੁਤ੍ਤਵਚਨਮੇਵ ਵਿਤ੍ਥਾਰੇਨ੍ਤੋ ਆਹ ‘‘ਭਿਕ੍ਖੁਨੋਪਿ ਹੀ’’ਤਿਆਦਿ. ‘‘ਤਥਾ’’ਤਿਇਮਿਨਾ ‘‘ਓਦਿਸ੍ਸਾ’’ਤਿਪਦਂ ਅਤਿਦਿਸਤਿ. ਤੇ ਚਾਤਿ ਤੇ ਚ ਵੋਹਾਰਿਕਾ. ਹੀਤਿ ਸਚ੍ਚਂ, ਯਸ੍ਮਾ ਵਾਤਿ. ਪਠਮਂ.

੨. ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਂ

੬੮੨. ਦੁਤਿਯੇ ਵਰਿਤਬ੍ਬਂ ਇਚ੍ਛਿਤਬ੍ਬਨ੍ਤਿ ਵਰਂ, ਤਮੇਵ ਭਣ੍ਡਨ੍ਤਿ ਵਰਭਣ੍ਡਨ੍ਤਿ ਦਸ੍ਸੇਨ੍ਤੋ ਆਹ ‘‘ਮਹਗ੍ਘਭਣ੍ਡ’’ਨ੍ਤਿ. ‘‘ਮੁਤ੍ਤਾ’’ਤਿਆਦਿਨਾ ਤਸ੍ਸ ਸਰੂਪਂ ਦਸ੍ਸੇਤਿ.

੬੮੩. ਆਪੁਬ੍ਬੋ ਲੋਕਸਦ੍ਦੋ ਅਭਿਮੁਖਂ ਲੋਕਨਤ੍ਥੋ ਹੋਤਿ, ਉਪੁਬ੍ਬੋ ਉਦ੍ਧਂ ਲੋਕਨਤ੍ਥੋ, ਓਪੁਬ੍ਬੋ ਅਧੋ ਲੋਕਨਤ੍ਥੋ, ਵਿਪੁਬ੍ਬੋ ਇਤੋ ਚਿਤੋ ਚ ਵੀਤਿਹਰਣਲੋਕਨਤ੍ਥੋ, ਅਪਪੁਬ੍ਬੋ ਆਪੁਚ੍ਛਨਤ੍ਥੋ. ਇਧ ਪਨ ਅਪਪੁਬ੍ਬਤ੍ਤਾ ਆਪੁਚ੍ਛਨਤ੍ਥੋਤਿ ਆਹ ‘‘ਅਨਾਪੁਚ੍ਛਿਤ੍ਵਾ’’ਤਿ. ਮਲ੍ਲਗਣ ਭਟਿਪੁਤ੍ਤ ਗਣਾਦਿਕਨ੍ਤਿਆਦੀਸੁ ਮਲ੍ਲਗਣੋ ਨਾਮ ਨਾਰਾਯਨਭਤ੍ਤਿਕੋ ਗਣੋ. ਭਟਿਪੁਤ੍ਤਗਣੋ ਨਾਮ ਕੁਮਾਰਭਤ੍ਤਿਕੋ ਗਣੋ. ਆਦਿਸਦ੍ਦੇਨ ਅਞ੍ਞਮ੍ਪਿ ਗਾਮਨਿਗਮੇ ਅਨੁਸਾਸਿਤੁਂ ਸਮਤ੍ਥਂ ਗਣਂ ਸਙ੍ਗਣ੍ਹਾਤਿ. ਅਥ ਵਾ ਮਲ੍ਲਗਣੋਤਿ ਮਲ੍ਲਰਾਜੂਨਂ ਗਣੋ. ਤੇ ਹਿ ਗਣਂ ਕਤ੍ਵਾ ਕੁਸਿਨਾਰਾਯਂ ਰਜ੍ਜਂ ਅਨੁਸਾਸਨ੍ਤਿ, ਤੇ ਸਨ੍ਧਾਯ ਵੁਤ੍ਤਂ ‘‘ਮਲ੍ਲਗਣੋ’’ਤਿ. ਭਟਿਪੁਤ੍ਤਗਣੋਤਿ ਲਿਚ੍ਛਵਿਗਣੋ ਪਰਿਯਾਯਨ੍ਤਰੇਨ ਵੁਤ੍ਤੋ. ਲਿਚ੍ਛਵਿਰਾਜੂਨਞ੍ਹਿ ਪੁਬ੍ਬਰਾਜਾਨੋ ਭਟਿਨਾਮਕਸ੍ਸ ਜਟਿਲਸ੍ਸ ਪੁਤ੍ਤਾ ਹੋਨ੍ਤਿ, ਤੇਸਂ ਵਂਸੇ ਪਵਤ੍ਤਾ ਏਤਰਹਿ ਲਿਚ੍ਛਵਿਰਾਜਾਨੋਪਿ ਭਟਿਪੁਤ੍ਤਾਤਿ ਵੁਚ੍ਚਨ੍ਤਿ. ਜਟਿਲੋ ਪਨ ਬਾਰਾਣਸਿਰਞ੍ਞੋ ਪੁਤ੍ਤੇ ਨਦਿਸੋਤੇਨ ਵੁਯ੍ਹਮਾਨੇ ਨਦਿਤੋ ਉਦ੍ਧਰਿਤ੍ਵਾ ਅਤ੍ਤਨੋ ¶ ਅਸ੍ਸਮੇ ਪੁਤ੍ਤਂ ਕਤ੍ਵਾ ਭਰਣਤ੍ਤਾ ਪੋਸਨਤ੍ਤਾ ਭਟੀਤਿ ਵੁਚ੍ਚਤਿ, ਤਸ੍ਸ ਪੁਤ੍ਤਤ੍ਤਾ ਲਿਚ੍ਛਵਿਗਣੋ ਭਟਿਪੁਤ੍ਤੋਤਿ ਵੁਚ੍ਚਤਿ. ਤੇਪਿ ਗਣਂ ਕਤ੍ਵਾ ਵੇਸਾਲਿਯਂ ਰਜ੍ਜਂ ਅਨੁਸਾਸਨ੍ਤਿ, ਤਂ ਸਨ੍ਧਾਯ ਵੁਤ੍ਤਂ ‘‘ਭਟਿਪੁਤ੍ਤਗਣੋ’’ਤਿ. ਧਮ੍ਮਗਣੋ ਨਾਮ ਸਾਸਨਧਮ੍ਮਭਤ੍ਤਿਕੋ ¶ ਗਣੋ. ਗਨ੍ਧਿਕਸੇਣੀਤਿ ਗਨ੍ਧਕਾਰਾਨਂ ਸਮਜਾਤਿਕਾਨਂ ਸਿਪ੍ਪਿਕਾਨਂ ਗਣੋ. ਦੁਸ੍ਸਿਕਸੇਣੀਤਿ ਦੁਸ੍ਸਕਾਰਾਨਂ ਸਮਜਾਤਿਕਾਨਂ ਪੇਸਕਾਰਾਨਂ ਗਣੋ. ਆਦਿਸਦ੍ਦੇਨ ਤਚ੍ਛਕਸੇਣਿਰਜਕਸੇਣਿਆਦਯੋ ਸਙ੍ਗਯ੍ਹਨ੍ਤਿ. ਯਤ੍ਥ ਯਤ੍ਥਾਤਿ ਯਸ੍ਮਿਂ ਯਸ੍ਮਿਂ ਠਾਨੇ. ਹੀਤਿ ਸਚ੍ਚਂ. ਤੇ ਏਵਾਤਿ ਗਣਾਦਯੋ ਏਵ. ਪੁਨ ਤੇਤਿ ਗਣਾਦਯੋ. ਇਦਨ੍ਤਿ ‘‘ਗਣਂ ਵਾ’’ਤਿਆਦਿਵਚਨਂ. ਏਤ੍ਥਾਤਿ ਰਾਜਾਦੀਸੁ. ਸਙ੍ਘਾਪੁਚ੍ਛਨਮੇਵ ਪਧਾਨਕਾਰਣਨ੍ਤਿ ਆਹ ‘‘ਭਿਕ੍ਖੁਨਿਸਙ੍ਘੋ ਆਪੁਚ੍ਛਿਤਬ੍ਬੋਵਾ’’ਤਿ. ਕਪ੍ਪਗਤਿਕਨ੍ਤਿ ਕਪ੍ਪਂ ਗਚ੍ਛਤੀਤਿ ਕਪ੍ਪਗਤਾ, ਸਾ ਏਵ ਕਪ੍ਪਗਤਿਕਾ, ਤਂ.

ਕੇਨਚਿ ਕਰਣੀਯੇਨ ਖਣ੍ਡਸੀਮਂ ਅਗਨ੍ਤ੍ਵਾ ਕੇਨਚਿ ਕਰਣੀਯੇਨ ਭਿਕ੍ਖੁਨੀਸੁ ਪਕ੍ਕਨ੍ਤਾਸੂਤਿ ਯੋਜਨਾ. ਨਿਸ੍ਸਿਤਕਪਰਿਸਾਯਾਤਿ ਅਨ੍ਤੇਵਾਸਿਕਪਰਿਸਾਯ. ਵੁਟ੍ਠਾਪੇਨ੍ਤਿਯਾਤਿ ਉਪਸਮ੍ਪਾਦੇਨ੍ਤਿਯਾਤਿ. ਦੁਤਿਯਂ.

੩. ਤਤਿਯਸਙ੍ਘਾਦਿਸੇਸਸਿਕ੍ਖਾਪਦਂ

੬੯੨. ਤਤਿਯੇ ਦੁਤਿਯੇਨ ਪਾਦੇਨ ਅਤਿਕ੍ਕਨ੍ਤਮਤ੍ਤੇਤਿ ਸਮ੍ਬਨ੍ਧੋ. ਪਰਿਕ੍ਖੇਪਾਰਹਟ੍ਠਾਨਂ ਨਾਮ ਘਰੂਪਚਾਰਤੋ ਪਠਮਲੇਡ੍ਡੁਪਾਤੋ. ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਨ੍ਤੋ ਆਹ ‘‘ਅਪਿ ਚੇਤ੍ਥਾ’’ਤਿਆਦਿ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਉਪਚਾਰੇ ਵਾਤਿ ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਾਰਹਟ੍ਠਾਨੇ ਵਾ. ਤਤੋਤਿ ਗਾਮਨ੍ਤਰਤੋ, ਖਣ੍ਡਪਾਕਾਰੇਨ ਵਾ ਵਤਿਛਿਦ੍ਦੇਨ ਵਾ ਪਵਿਸਿਤੁਨ੍ਤਿ ਸਮ੍ਬਨ੍ਧੋ.

ਸਮ੍ਬਦ੍ਧਾ ਵਤਿ ਏਤੇਸਨ੍ਤਿ ਸਮ੍ਬਦ੍ਧਵਤਿਕਾ, ਦ੍ਵੇ ਗਾਮਾ. ਵਿਹਾਰਨ੍ਤਿ ਭਿਕ੍ਖੁਨਿਵਿਹਾਰਂ. ਤਤੋ ਪਨ ਗਾਮਤੋਤਿ ਤਤੋ ਇਤਰਗਾਮਤੋ ਪਨ, ਨਿਕ੍ਖਨ੍ਤਾਯ ਭਿਕ੍ਖੁਨਿਯਾ ਠਾਤਬ੍ਬਨ੍ਤਿ ਸਮ੍ਬਨ੍ਧੋ. ਉਸ੍ਸਾਰਣਾ ਵਾਤਿ ਮਨੁਸ੍ਸਾਨਂ ਉਸ੍ਸਾਰਣਾ ਵਾ.

ਜਨਾਤਿ ¶ ਗਾਮਭੋਜਕਾ ਜਨਾ. ਏਕਂ ਗਾਮਨ੍ਤਿ ਯਂਕਿਞ੍ਚਿ ਇਚ੍ਛਿਤਂ ਏਕਂ ਗਾਮਂ. ਤਤੋਤਿ ਗਾਮਤੋ. ‘‘ਕਸ੍ਮਾ’’ਤਿ ਇਮਾਯ ਪੁਚ੍ਛਾਯ ‘‘ਵਿਹਰਤੋ ਏਕਂ ਗਾਮਂ ਗਨ੍ਤੁਂ ਵਟ੍ਟਤੀ’’ਤਿ ਵਚਨਸ੍ਸ ਕਾਰਣਂ ਪੁਚ੍ਛਤਿ. ‘‘ਵਿਹਾਰਸ੍ਸ ਚਤੁਗਾਮਸਾਧਾਰਣਤ੍ਤਾ’’ਤਿਇਮਿਨਾ ਵਿਸਜ੍ਜਨੇਨ ਤਂ ਪੁਚ੍ਛਂ ਵਿਸਜ੍ਜੇਤਿ.

ਯਤ੍ਥਾਤਿ ਯਸ੍ਸਂ ਨਦਿਯਂ. ਉਤ੍ਤਰਨ੍ਤਿਯਾ ਏਕਦ੍ਵਙ੍ਗੁਲਮਤ੍ਤਮ੍ਪਿ ਅਨ੍ਤਰਵਾਸਕੋ ਤੇਮਿਯਤਿ, ਸਾ ਨਦੀ ਨਾਮਾਤਿ ਯੋਜਨਾ. ਯਥਾ ਨਿਵਸਿਯਮਾਨਾਯ ਤਿਮਣ੍ਡਲਪਟਿਚ੍ਛਾਦਨਂ ਹੋਤਿ, ਏਵਂ ਨਿਵਤ੍ਥਾਯਾਤਿ ਯੋਜਨਾ ¶ . ਭਿਕ੍ਖੁਨਿਯਾ ਉਤ੍ਤਰਨ੍ਤਿਯਾ ਅਨ੍ਤਰਵਾਸਕੋਤਿ ਸਮ੍ਬਨ੍ਧੋ. ਯਤ੍ਥ ਕਤ੍ਥਚੀਤਿ ਯਸ੍ਮਿਂ ਕਿਸ੍ਮਿਂਚਿ ਠਾਨੇ. ‘‘ਸੇਤੁਨਾ ਗਚ੍ਛਤਿ, ਅਨਾਪਤ੍ਤੀ’’ਤਿਇਮਿਨਾ ਪਦਸਾ ਉਤ੍ਤਰਨ੍ਤਿਯਾ ਏਵ ਆਪਤ੍ਤੀਤਿ ਦਸ੍ਸੇਤਿ. ਉਤ੍ਤਰਣਕਾਲੇਤਿ ਨਦਿਤੋ ਉਤ੍ਤਰਣਕਾਲੇ. ਆਕਾਸਗਮਨਨ੍ਤਿ ਇਦ੍ਧਿਯਾ ਗਮਨਂ. ਆਦਿਸਦ੍ਦੇਨ ਹਤ੍ਥਿਪਿਟ੍ਠਿਆਦਯੋ ਸਙ੍ਗਣ੍ਹਾਤਿ. ਅਕ੍ਕਮਨ੍ਤਿਯਾਤਿ ਅਤਿਕ੍ਕਮਨ੍ਤਿਯਾ. ਏਤ੍ਥਾਤਿ ਦ੍ਵੀਸੁ ਤੀਸੁ ਭਿਕ੍ਖੁਨੀਸੁ. ਓਰਿਮਤੀਰਮੇਵਾਤਿ ਅਪਾਰਤੀਰਮੇਵ. ਤਮੇਵ ਤੀਰਨ੍ਤਿ ਓਰਿਮਤੀਰਮੇਵ. ਪਚ੍ਚੁਤ੍ਤਰਤੀਤਿ ਪਟਿਨਿਵਤ੍ਤਿਤ੍ਵਾ ਉਤ੍ਤਰਤਿ.

ਕੁਰੁਮਾਨਾ ਭਿਕ੍ਖੁਨੀ ਕਰੋਤੀਤਿ ਯੋਜਨਾ. ਅਸ੍ਸਾਤਿ ਭਿਕ੍ਖੁਨਿਯਾ ਅਜਾਨਨ੍ਤਿਯਾ ਏਵ ਚਾਤਿ ਸਮ੍ਬਨ੍ਧੋ, ਅਨਾਦਰੇ ਚੇਤਂ ਸਾਮਿਵਚਨਂ. ਅਥ ਪਨਾਤਿ ਅਥਸਦ੍ਦੋ ਯਦਿਪਰਿਯਾਯੋ, ਕਿਰਿਯਾਪਦੇਨ ਯੋਜੇਤਬ੍ਬੋ. ਅਥ ਅਚ੍ਛਤਿ, ਅਥ ਨ ਓਤਰਤੀਤਿ ਅਤ੍ਥੋ. ਅਚ੍ਛਤੀਤਿ ਵਸਤਿ. ਹੀਤਿ ਸਚ੍ਚਂ. ਇਧਾਤਿ ‘‘ਏਕਾ ਵਾ ਰਤ੍ਤਿਂ ਵਿਪ੍ਪਵਸੇਯ੍ਯਾ’’ਤਿਪਦੇ.

ਏਵਂ ਵੁਤ੍ਤਲਕ੍ਖਣਮੇਵਾਤਿ ਏਵਂ ਅਭਿਧਮ੍ਮਪਰਿਯਾਯੇਨ ਵੁਤ੍ਤਲਕ੍ਖਣਮੇਵ. ਤਂ ਪਨੇਤਨ੍ਤਿ ਤਂ ਪਨ ਅਰਞ੍ਞਂ. ਤੇਨੇਵਾਤਿ ਆਪਨ੍ਨਹੇਤੁਨਾ ਏਵ. ਅਟ੍ਠਕਥਾਯਨ੍ਤਿ ਮਹਾਅਟ੍ਠਕਥਾਯਂ. ਭਿਕ੍ਖੁਨੀਸੁ ਪਵਿਸਨ੍ਤੀਸੂਤਿ ਸਮ੍ਬਨ੍ਧੋ, ਨਿਦ੍ਧਾਰਣਤ੍ਥੇ ਚੇਤਂ ਭੁਮ੍ਮਵਚਨਂ. ਏਤ੍ਥਾਤਿ ਦਸ੍ਸਨੂਪਚਾਰਸਵਨੂਪਚਾਰੇਸੁ. ਯਤ੍ਥ ਓਕਾਸੇ ਠਿਤਂ ਦੁਤਿਯਿਕਾ ਪਸ੍ਸਤਿ, ਸੋ ਓਕਾਸੋ ਦਸ੍ਸਨੂਪਚਾਰੋ ਨਾਮਾਤਿ ਯੋਜਨਾ. ਸਾਣਿਪਾਕਾਰਨ੍ਤਰਿਕਾਪੀਤਿ ਸਾਣਿਪਾਕਾਰੇਨ ਬ੍ਯਵਹਿਕਾਪਿ. ਯਤ੍ਥ ਓਕਾਸੇ ਠਿਤਾ…ਪੇ… ਸਦ੍ਦਂ ਸੁਣਾਤਿ, ਸੋ ਓਕਾਸੋ ਸਵਨੂਪਚਾਰੋ ਨਾਮਾਤਿ ਯੋਜਨਾ. ਮਗ੍ਗਮੂਲ਼੍ਹਸਦ੍ਦੇਨਾਤਿ ਮਗ੍ਗੇ ਮੂਲ਼੍ਹਾਨਂ ਸਦ੍ਦੇਨ. ਧਮ੍ਮਸ੍ਸਵਨਾਰੋਚਨਸਦ੍ਦੇਨਾਤਿ ਧਮ੍ਮਸ੍ਸਵਨਤ੍ਥਾਯ ਆਰੋਚਨਾਨਂ ਸਦ੍ਦੇਨ. ਮਗ੍ਗਮੂਲ਼੍ਹਸਦ੍ਦੇਨ ਸਦ੍ਦਾਯਨ੍ਤਿਯਾ ਸਦ੍ਦਂ ਸੁਣਾਤਿ ਵਿਯ ¶ ਚ ਧਮ੍ਮਸ੍ਸਵਨਾਰੋਚਨਸਦ੍ਦੇਨ ਸਦ੍ਦਾਯਨ੍ਤਿਯਾ ਸਦ੍ਦਂ ਸੁਣਾਤਿ ਵਿਯ ਚ ‘‘ਅਯ੍ਯੇ’’ਤਿ ਸਦ੍ਦਾਯਨ੍ਤਿਯਾ ਸਦ੍ਦਂ ਸੁਣਾਤੀਤਿ ਯੋਜਨਾ. ਸਦ੍ਦਾਯਨ੍ਤਿਯਾਤਿ ਸਦ੍ਦਂ ਕਰੋਨ੍ਤਿਯਾ. ਨਾਮਧਾਤੁ ਹੇਸਾ. ਏਵਰੂਪੇਤਿ ‘‘ਮਗ੍ਗਮੂਲ਼੍ਹਸਦ੍ਦੇਨ ਵਿਯਾ’’ਤਿਆਦਿਨਾ ਵੁਤ੍ਤੇ ਏਵਰੂਪੇ.

ਤਿਤ੍ਥਾਯਤਨਂ ਸਙ੍ਕਨ੍ਤਾ ਵਾਤਿ ਤਿਤ੍ਥੀਨਂ ਵਾਸਟ੍ਠਾਨਂ ਸਙ੍ਕਨ੍ਤਾ ਵਾ. ਇਮਿਨਾ ‘‘ਪਕ੍ਖਸਙ੍ਕਨ੍ਤਾ’’ਤਿ ਏਤ੍ਥ ਪਕ੍ਖਸਦ੍ਦਸ੍ਸ ਪਟਿਪਕ੍ਖਵਾਚਕਤ੍ਤਾ ਤੇਨ ਸਾਸਨਪਟਿਪਕ੍ਖਾ ਤਿਤ੍ਥਿਯਾ ਏਵ ਗਹੇਤਬ੍ਬਾਤਿ ਦਸ੍ਸੇਤਿ. ਤਿਤ੍ਥਿਯਾ ਹਿ ਸਾਸਨਸ੍ਸ ਪਟਿਪਕ੍ਖਾ ਹੋਨ੍ਤੀਤਿ. ਤਤਿਯਂ.

੪. ਚਤੁਤ੍ਥਸਙ੍ਘਾਦਿਸੇਸਸਿਕ੍ਖਾਪਦਂ

੬੯੪. ਚਤੁਤ੍ਥੇ ਪਾਦਸ੍ਸ ਠਪਨਕਂ ਪੀਠਂ ਪਾਦਪੀਠਂ. ਪਾਦਸ੍ਸ ਠਪਨਕਾ ਕਥਲਿਕਾ ਪਾਦਕਥਲਿਕਾਤਿ ¶ ਦਸ੍ਸੇਨ੍ਤੋ ਆਹ ‘‘ਪਾਦਪੀਠਂ ਨਾਮਾ’’ਤਿਆਦਿ. ਅਨਞ੍ਞਾਯਾਤਿ ਏਤ੍ਥ ਯਕਾਰੋ ਤ੍ਵਾਪਚ੍ਚਯਸ੍ਸ ਕਾਰਿਯੋਤਿ ਆਹ ‘‘ਅਜਾਨਿਤ੍ਵਾ’’ਤਿ. ਨੇਤ੍ਥਾਰਵਤ੍ਤੇਤਿ ਉਕ੍ਖੇਪਨੀਯਕਮ੍ਮਤੋ ਨਿਤ੍ਥਰਣਕਾਰਣੇ ਵਤ੍ਤੇ. ‘‘ਵਤ੍ਤਮਾਨ’’ਨ੍ਤਿਇਮਿਨਾ ‘‘ਵਤ੍ਤਨ੍ਤਿ’’ਨ੍ਤਿ ਏਤ੍ਥ ਅਨ੍ਤਪਚ੍ਚਯਂ ਨਯੇਨ ਦਸ੍ਸੇਤੀਤਿ. ਚਤੁਤ੍ਥਂ.

੫. ਪਞ੍ਚਮਸਙ੍ਘਾਦਿਸੇਸਸਿਕ੍ਖਾਪਦਂ

੭੦੧. ਪਞ੍ਚਮੇ ‘‘ਏਕਤੋ ਅਵਸ੍ਸੁਤੇ’’ਤਿ ਏਤ੍ਥ ਹੇਟ੍ਠਾ ਵੁਤ੍ਤਨਯੇਨ ‘‘ਏਕਤੋ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ਭਿਕ੍ਖੁਨਿਯਾ ਏਵ ਗਹੇਤਬ੍ਬਭਾਵਞ੍ਚ ਤੋਪਚ੍ਚਯਸ੍ਸ ਛਟ੍ਠੁਤ੍ਥੇ ਪਵਤ੍ਤਭਾਵਞ੍ਚ ਅਵਸ੍ਸੁਭਪਦੇ ਭਾਵਤ੍ਥਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਭਿਕ੍ਖੁਨਿਯਾ ਅਵਸ੍ਸੁਤਭਾਵੋ ਦਟ੍ਠਬ੍ਬੋ’’ਤਿ. ਏਤਨ੍ਤਿ ‘‘ਭਿਕ੍ਖੁਨਿਯਾ ਅਵਸ੍ਸੁਤਭਾਵੋ’’ਤਿ ਵਚਨਂ. ਤਨ੍ਤਿ ਅਵਚਨਂ. ਪਾਲ਼ਿਯਾਤਿ ਇਮਾਯ ਸਿਕ੍ਖਾਪਦਪਾਲ਼ਿਯਾਤਿ. ਪਞ੍ਚਮਂ.

੬. ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਂ

੭੦੫. ਛਟ੍ਠੇ ਯਤੋ ਤ੍ਵਨ੍ਤਿ ਏਤ੍ਥ ਕਾਰਣਤ੍ਥੇ ਤੋਪਚ੍ਚਯੋਤਿ ਆਹ ‘‘ਯਸ੍ਮਾ’’ਤਿ. ਕਸ੍ਸਾ ਹੋਨ੍ਤੀਤਿ ਉਯ੍ਯੋਜਿਕਾਉਯ੍ਯੋਜਿਤਾਸੁ ਕਸ੍ਸਾ ਭਿਕ੍ਖੁਨਿਯਾ ਹੋਨ੍ਤੀਤਿ ਯੋਜਨਾ. ਨ ¶ ਦੇਤੀਤਿ ਉਯ੍ਯੋਜਿਕਾ ਉਯ੍ਯੋਜਿਤਾਯ ਨ ਦੇਤਿ. ਨ ਪਟਿਗ੍ਗਣ੍ਹਾਤੀਤਿ ਉਯ੍ਯੋਜਿਤਾ ਉਯ੍ਯੋਜਿਕਾਯ ਹਤ੍ਥਤੋ ਨ ਪਟਿਗ੍ਗਣ੍ਹਾਤਿ. ਪਟਿਗ੍ਗਹੋ ਤੇਨ ਨ ਵਿਜ੍ਜਤੀਤਿ ਤੇਨੇਵ ਕਾਰਣੇਨ ਉਯ੍ਯੋਜਿਕਾਯ ਹਤ੍ਥਤੋ ਉਯ੍ਯੋਜਿਤਾਯ ਪਟਿਗ੍ਗਹੋ ਨ ਵਿਜ੍ਜਤਿ. ਆਪਜ੍ਜਤਿ ਗਰੁਕਂ, ਨ ਲਹੁਕਨ੍ਤਿ ਏਵਂ ਸਨ੍ਤੇਪਿ ਉਯ੍ਯੋਜਿਕਾ ਗਰੁਕਮੇਵ ਸਙ੍ਘਾਦਿਸੇਸਾਪਤ੍ਤਿਂ ਆਪਜ੍ਜਤਿ, ਨ ਲਹੁਕਂ. ਤਞ੍ਚਾਤਿ ਤਂ ਆਪਜ੍ਜਨਞ੍ਚ. ਪਰਿਭੋਗਪਚ੍ਚਯਾਤਿ ਉਯ੍ਯੋਜਿਕਾਯ ਪਰਿਭੋਗਸਙ੍ਖਾਤਾ ਕਾਰਣਾਤਿ ਅਯਂ ਗਾਥਾਯਤ੍ਥੋ.

ਇਤਰਿਸ੍ਸਾ ਪਨਾਤਿ ਉਯ੍ਯੋਜਿਤਾਯ ਪਨ ਭਿਕ੍ਖੁਨਿਯਾ. ਪਠਮਸਿਕ੍ਖਾਪਦੇਤਿ ਪਞ੍ਚਮਸਿਕ੍ਖਾਪਦੇ. ਪਞ੍ਚਮਸਿਕ੍ਖਾਪਦਞ੍ਹਿ ਇਮਿਨਾ ਸਿਕ੍ਖਾਪਦੇਨ ਯੁਗਲ਼ਭਾਵੇਨ ਸਦਿਸਤ੍ਤਾ ਇਮਂ ਉਪਾਦਾਯ ਪਠਮਨ੍ਤਿ ਵੁਤ੍ਤਨ੍ਤਿ. ਛਟ੍ਠਂ.

੭. ਸਤ੍ਤਮਸਙ੍ਘਾਦਿਸੇਸਸਿਕ੍ਖਾਪਦਂ

੭੦੯. ਸਤ੍ਤਮੇ ¶ ਯਾਵਤਤਿਯਕਪਦਤ੍ਥੋਤਿ ‘‘ਯਾਵਤਤਿਯਕ’’ਨ੍ਤਿ ਉਚ੍ਚਾਰਿਤਸ੍ਸ ਪਦਸ੍ਸ ਅਤ੍ਥੋ ਵੇਦਿਤਬ੍ਬੋਤਿ ਸਮ੍ਬਨ੍ਧੋਤਿ. ਸਤ੍ਤਮਂ.

੮. ਅਟ੍ਠਮਸਙ੍ਘਾਦਿਸੇਸਸਿਕ੍ਖਾਪਦਂ

੭੧੫. ਅਟ੍ਠਮੇ ਕਿਸ੍ਮਿਂਚਿਦੇਵ ਅਧਿਕਰਣੇਤਿ ਨਿਦ੍ਧਾਰਣੀਯਸ੍ਸ ਨਿਦ੍ਧਾਰਣਸਮੁਦਾਯੇਨ ਅਵਿਨਾਭਾਵਤੋ ਆਹ ‘‘ਚਤੁਨ੍ਨ’’ਨ੍ਤਿ. ਕਸ੍ਮਾ ਪਨ ਨਿਦ੍ਧਾਰਣਸਮੁਦਾਯਨਿਦ੍ਧਾਰਣੀਯਭਾਵੇਨ ਵੁਤ੍ਤਂ, ਨਨੁ ਪਦਭਾਜਨੇ ਚਤ੍ਤਾਰਿਪਿ ਅਧਿਕਰਣਾਨਿ ਵੁਤ੍ਤਾਨੀਤਿ ਆਹ ‘‘ਪਦਭਾਜਨੇ ਪਨਾ’’ਤਿਆਦੀਤਿ. ਅਟ੍ਠਮਂ.

੯. ਨਵਮਸਙ੍ਘਾਦਿਸੇਸਸਿਕ੍ਖਾਪਦਂ

੭੨੩. ਨਵਮੇ ਸਂਸਟ੍ਠਸਦ੍ਦੋ ਮਿਸ੍ਸਪਰਿਯਾਯੋਤਿ ਆਹ ‘‘ਮਿਸ੍ਸੀਭੂਤਾ’’ਤਿ. ‘‘ਅਨਨੁਲੋਮੇਨਾ’’ਤਿਇਮਿਨਾ ‘‘ਅਨਨੁਲੋਮਿਕੇਨਾ’’ਤਿ ਏਤ੍ਥ ਇਕਸਦ੍ਦੋ ਸ੍ਵਤ੍ਥੋਤਿ ਦਸ੍ਸੇਤਿ. ਕੋਟ੍ਟਨਞ੍ਚ ਪਚਨਞ੍ਚ ਗਨ੍ਧਪਿਸਨਞ੍ਚ ਮਾਲਾਗਨ੍ਥਨਞ੍ਚ. ਆਦਿਸਦ੍ਦੇਨ ਅਞ੍ਞੇਪਿ ਅਨਨੁਲੋਮਿਕੇ ਕਾਯਿਕੇ ਸਙ੍ਗਣ੍ਹਾਤਿ. ਸਾਸਨਾਹਰਣਞ੍ਚ ਪਟਿਸਾਸਨਹਰਣਞ੍ਚ ਸਞ੍ਚਰਿਤ੍ਤਞ੍ਚ. ਆਦਿਸਦ੍ਦੇਨ ਅਞ੍ਞੇਪਿ ਅਨਨੁਲੋਮਿਕੇ ਵਾਚਸਿਕੇ ਸਙ੍ਗਣ੍ਹਾਤਿ. ਏਤਾਸਨ੍ਤਿ ਭਿਕ੍ਖੁਨੀਨਂ. ਸਿਲੋਕੋਤਿ ਯਸੋਤਿ. ਨਵਮਂ.

੧੦. ਦਸਮਸਙ੍ਘਾਦਿਸੇਸਸਿਕ੍ਖਾਪਦਂ

੭੨੭. ਦਸਮੇ ¶ ਏਵਾਚਾਰਾਤਿ ਏਤ੍ਥ ਨਿਗ੍ਗਹਿਤਲੋਪਵਸੇਨ ਸਨ੍ਧੀਤਿ ਆਹ ‘‘ਏਵਂਆਚਾਰਾ’’ਤਿ. ‘‘ਯਾਦਿਸੋ’’ਤਿਆਦਿਨਾ ਏਵਂਸਦ੍ਦਸ੍ਸ ਨਿਦਸ੍ਸਨਾਦੀਸੁ (ਅਭਿਧਾਨਪ੍ਪਦੀਪਿਕਾਯਂ ੧੧੮੬ ਗਾਥਾਯਂ) ਏਕਾਦਸਸੁ ਅਤ੍ਥੇਸੁ ਉਪਮਤ੍ਥਂ ਦਸ੍ਸੇਤਿ. ਸਬ੍ਬਤ੍ਥਾਤਿ ‘‘ਏਵਂਸਦ੍ਦਾ ਏਵਂਸਿਲੋਕਾ’’ਤਿ ਸਬ੍ਬੇਸੁ ਪਦੇਸੁ. ਉਞ੍ਞਾਯਾਤਿ ਏਤ੍ਥ ਓਕਾਰਵਿਪਰੀਤੋ ਉਕਾਰੋਤਿ ਆਹ ‘‘ਅਵਞ੍ਞਾਯਾ’’ਤਿ. ‘‘ਨੀਚਂ ਕਤ੍ਵਾ ਜਾਨਨਾਯਾ’’ਤਿ ਇਮਿਨਾ ਅਵਸਦ੍ਦੋ ਨੀਚਤ੍ਥੋ, ਞਾਧਾਤੁ ਅਵਬੋਧਨਤ੍ਥੋਤਿ ਦਸ੍ਸੇਤਿ. ‘‘ਪਰਿਭਵਞ੍ਞਾਯਾ’’ਤਿ ਵਤ੍ਤਬ੍ਬੇ ਉਤ੍ਤਰਪਦਲੋਪਵਸੇਨ ‘‘ਪਰਿਭਵੇਨਾ’’ਤਿ ਵੁਤ੍ਤਨ੍ਤਿ ਆਹ ‘‘ਪਰਿਭਵਿਤ੍ਵਾ ਜਾਨਨੇਨਾ’’ਤਿ. ਅਕ੍ਖਨ੍ਤਿਯਾਤਿ ਏਤ੍ਥ ਸਹਨਖਨ੍ਤਿਯੇਵਾਧਿਪ੍ਪੇਤਾ, ਨੇਵ ਅਨੁਲੋਮਖਨ੍ਤਿ, ਨ ਦਿਟ੍ਠਿਨਿਜ੍ਝਾਨਕ੍ਖਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਅਸਹਨਤਾਯਾ’’ਤਿ. ਵੇਭਸ੍ਸਿਯਾਤਿ ਏਤ੍ਥ ਵਿਸੇਸੇਨ ਭਾਸੇਤਿ ¶ ਓਭਾਸੇਤੀਤਿ ਵਿਭਾਸੋ ਆਨੁਭਾਵੋ, ਵਿਭਾਸੋ ਇਮਸ੍ਸ ਸਙ੍ਘਸ੍ਸ ਅਤ੍ਥੀਤਿ ਵਿਭਸ੍ਸੋ ਸਙ੍ਘੋ, ਬਹ੍ਵਤ੍ਥੇ ਚ ਅਤਿਸਯਤ੍ਥੇ ਚ ਸਪਚ੍ਚਯੋ ਹੋਤਿ. ਕਸ੍ਮਾ? ਮਨ੍ਤੁਪਚ੍ਚਯਤ੍ਥਤ੍ਤਾ ‘‘ਲੋਮਸੋ’’ਤਿਆਦੀਸੁ (ਜਾ. ੧.੧੪.੫੭) ਵਿਯ, ਬਹੁਆਨੁਭਾਵੋ ਅਤਿਸਯਆਨੁਭਾਵੋ ਸਙ੍ਘੋਤਿ ਵੁਤ੍ਤਂ ਹੋਤਿ, ਸਂਯੋਗਪਰਤ੍ਤਾ ਆਕਾਰਸ੍ਸ ਰਸ੍ਸੋ. ਵਿਭਸ੍ਸਸ੍ਸ ਭਾਵੋ ਵੇਭਸ੍ਸਿਯਂ, ਬਹੁਆਨੁਭਾਵੋ ਅਤਿਸਯਆਨੁਭਾਵੋਯੇਵ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਬਲਵਭਸ੍ਸਭਾਵੇਨਾ’’ਤਿ. ਤਤ੍ਥ ਬਲਵਇਤਿ ਪਦੇਨ ਮਨ੍ਤੁਅਤ੍ਥੇ ਪਵਤ੍ਤਸ੍ਸ ਸਪ੍ਪਚ੍ਚਯਸ੍ਸ ਬਹ੍ਵਤ੍ਥਞ੍ਚ ਅਤਿਸਯਤ੍ਥਞ੍ਚ ਦਸ੍ਸੇਤਿ, ਭਾਵਇਤਿ ਪਦੇਨ ਣਿਯਪਚ੍ਚਯਸ੍ਸ ਭਾਵਤ੍ਥਂ, ਏਨਇਤਿ ਪਦੇਨ ਨਿਸ੍ਸਕ੍ਕਵਚਨਸ੍ਸ ਕਰਣਤ੍ਥੇ ਪਵਤ੍ਤਭਾਵਂ ਦਸ੍ਸੇਤਿ. ਤਮੇਵਤ੍ਥਮਾਵਿਕਰੋਨ੍ਤੋ ਆਹ ‘‘ਅਤ੍ਤਨੋ ਬਲਵਪ੍ਪਕਾਸਨੇਨਾ’’ਤਿ. ਤਤ੍ਥ ਅਤ੍ਤਨੋਤਿ ਅਤ੍ਤਸਙ੍ਖਾਤਸ੍ਸ ਸਙ੍ਘਸ੍ਸ. ਬਲਵਪ੍ਪਕਾਸਨੇਨਾਤਿ ਬਹੁਆਨੁਭਾਵਪ੍ਪਕਾਸਨੇਨ, ਅਤਿਸਯਆਨੁਭਾਵਪ੍ਪਕਾਸਨੇਨ ਵਾ. ਬਲਵਪ੍ਪਕਾਸਨਂ ਨਾਮ ਅਤ੍ਥਤੋ ਪਰੇਸਂ ਸਮੁਤ੍ਰਾਸਨਮੇਵਾਤਿ ਆਹ ‘‘ਸਮੁਤ੍ਰਾਸਨੇਨਾਤਿ ਅਤ੍ਥੋ’’ਤਿ. ਦੁਬ੍ਬਲਭਾਵੇਨਾਤਿ ਏਤ੍ਥ ਭਾਵਇਤਿਪਦੇਨ ਣ੍ਯਪਚ੍ਚਯਸ੍ਸ ਭਾਵਤ੍ਥਂ, ਏਨਇਤਿਪਦੇਨ ¶ ਨਿਸ੍ਸਕ੍ਕਵਚਨਸ੍ਸ ਕਰਣਤ੍ਥਂ ਦਸ੍ਸੇਤੀਤਿ ਦਟ੍ਠਬ੍ਬਂ. ਸਬ੍ਬਤ੍ਥਾਤਿ ‘‘ਉਞ੍ਞਾਯਾ’’ਤਿਆਦੀਸੁ ਸਬ੍ਬੇਸੁ ਪਦੇਸੁ. ਚਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋਤਿ ਆਹ ‘‘ਏਵਂ ਸਮੁਚ੍ਚਯਤ੍ਥੋ ਦਟ੍ਠਬ੍ਬੋ’’ਤਿ. ਵਿਵਿਚ੍ਚਥਾਤਿ ਏਤ੍ਥ ਵੀਤ੍ਯੂਪਸਗ੍ਗੋ ਵਿਨਾਸਦ੍ਦਤ੍ਥੋ, ਵਿਚਧਾਤੁ ਸਤ੍ਤਤ੍ਥੋਤਿ ਆਹ ‘‘ਵਿਨਾ ਹੋਥਾ’’ਤਿ. ਦਸਮਂ.

ਅਨਨ੍ਤਰਾ ਪਕ੍ਖਿਪਿਤ੍ਵਾਤਿ ਸਮ੍ਬਨ੍ਧੋ. ਮਹਾਵਿਭਙ੍ਗਤੋ ਆਹਰਿਤਾਨਿ ਇਮਾਨਿ ਤੀਣਿ ਸਿਕ੍ਖਾਪਦਾਨੀਤਿ ਯੋਜਨਾ. ਨਵ ਪਠਮਾਪਤ੍ਤਿਕਾ ਵੇਦਿਤਬ੍ਬਾਤਿ ਸਮ੍ਬਨ੍ਧੋ. ਸਬ੍ਬੇਪਿ ਧਮ੍ਮਾਤਿ ਯੋਜਨਾ. ਏਤ੍ਥਾਤਿ ‘‘ਉਦ੍ਦਿਟ੍ਠਾ ਖੋ’’ਤਿਆਦਿਪਾਠੇ. ਤਂ ਪਨਾਤਿ ਪਕ੍ਖਮਾਨਤ੍ਤਂ ਪਨਾਤਿ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਭਿਕ੍ਖੁਨਿਵਿਭਙ੍ਗੇ

ਸਤ੍ਤਰਸਕਵਣ੍ਣਨਾਯ ਯੋਜਨਾ ਸਮਤ੍ਤਾ.

੩. ਨਿਸ੍ਸਗ੍ਗਿਯਕਣ੍ਡਂ

੧. ਪਠਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦ-ਅਤ੍ਥਯੋਜਨਾ

ਤਿਂਸ ਨਿਸ੍ਸਗ੍ਗਿਯਾ ਯੇ ਧਮ੍ਮਾ ਭਿਕ੍ਖੁਨੀਨਂ ਭਗਵਤਾ ਪਕਾਸਿਤਾ, ਤੇਸਂ ਧਮ੍ਮਾਨਂ ਦਾਨਿ ਇਮਸ੍ਮਿਂ ਕਾਲੇ ਅਯਂ ਸਂਵਣ੍ਣਨਾਕ੍ਕਮੋ ਭਵਤੀਤਿ ਯੋਜਨਾ.

੭੩੩. ਪਠਮੇ ¶ ਆਮਤ੍ਤਿਕਾਪਣਨ੍ਤਿ ਏਤ੍ਥ ਆਮਤ੍ਤਸਦ੍ਦੋ ਭਾਜਨਪਰਿਯਾਯੋਤਿ ਆਹ ‘‘ਭਾਜਨਾਨੀ’’ਤਿ. ਭਾਜਨਾਨਿ ਹਿ ਅਮਨ੍ਤਿ ਪਰਿਭੁਞ੍ਜਿਤਬ੍ਬਭਾਵਂ ਗਚ੍ਛਨ੍ਤੀਤਿ ‘‘ਅਮਤ੍ਤਾਨੀ’’ਤਿ ਵੁਚ੍ਚਨ੍ਤਿ. ਅਮਤ੍ਤਾਨਿ ਵਿਕ੍ਕਿਣਨ੍ਤੀਤਿ ‘‘ਆਮਤ੍ਤਿਕਾ’’ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਤਾਨੀ’’ਤਿਆਦਿ. ਤੇਸਨ੍ਤਿ ਆਮਤ੍ਤਿਕਾਨਂ. ਤਂ ਵਾਤਿ ਆਮਤ੍ਤਿਕਾਪਣਂ ਵਾ.

੭੩੪. ‘‘ਸਨ੍ਨਿਧਿ’’ਨ੍ਤਿ ਇਮਿਨਾ ਸਂਨਿਪੁਬ੍ਬੋ ਚਿਸਦ੍ਦੋ ਉਚਿਨਨਤ੍ਥੋਤਿ ਦਸ੍ਸੇਤਿ. ਹਿਸਦ੍ਦੋ ਵਿਸੇਸਜੋਤਕੋ. ਤਤ੍ਥਾਤਿ ਮਹਾਵਿਭਙ੍ਗੇ. ਇਧਾਤਿ ਭਿਕ੍ਖੁਨਿਵਿਭਙ੍ਗੇ.

ਇਦਮ੍ਪੀਤਿ ਇਦਂ ਸਿਕ੍ਖਾਪਦਮ੍ਪਿ. ਪਿਸਦ੍ਦੋ ਮਹਾਵਿਭਙ੍ਗਸਿਕ੍ਖਾਪਦਂ ਅਪੇਕ੍ਖਤੀਤਿ. ਪਠਮਂ.

੨. ਦੁਤਿਯਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੩੮. ਦੁਤਿਯੇ ¶ ਅਹਤਚੋਲ਼ਾਨਮ੍ਪਿ ਸੇਦਮਲਾਦਿਕਿਲਿਨ੍ਨੇ ਵਿਰੂਪਤ੍ਤਾ ‘‘ਜਿਣ੍ਣਚੋਲ਼ਾ’’ਤਿ ਵੁਤ੍ਤਂ. ‘‘ਅਪਿ ਅਯ੍ਯਾਹੀ’’ਤਿਇਮਿਨਾ ‘‘ਅਪ ਅਯ੍ਯਾਹੀ’’ਤਿਪਦਵਿਭਾਗਂ ਨਿਵਤ੍ਤੇਤਿ.

੭੪੦. ਸਬ੍ਬਮ੍ਪਿ ਏਤਂ ਚੀਵਰਨ੍ਤਿ ਯੋਜਨਾ. ਏਵਂ ਪਟਿਲਦ੍ਧਨ੍ਤਿ ਏਵਂ ਨਿਸ੍ਸਜ੍ਜਿਤ੍ਵਾ ਲਦ੍ਧਂ. ਯਥਾਦਾਨੇਯੇਵਾਤਿ ਯਥਾ ਦਾਯਕੇਹਿ ਦਿਨ੍ਨਂ, ਤਸ੍ਮਿਂ ਦਾਨੇਯੇਵ ਉਪਨੇਤਬ੍ਬਂ, ਅਕਾਲਚੀਵਰੇਯੇਵ ਪਕ੍ਖਿਪਿਤਬ੍ਬਨ੍ਤਿ ਅਤ੍ਥੋਤਿ. ਦੁਤਿਯਂ.

੩. ਤਤਿਯਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੪੩. ਤਤਿਯੇ ਹਨ੍ਦਸਦ੍ਦੋ ਵਵਸ੍ਸਗ੍ਗਤ੍ਥੇ ਨਿਪਾਤੋਤਿ ਆਹ ‘‘ਹਨ੍ਦਾਤਿ ਗਣ੍ਹਾ’’ਤਿ. ਬਹੂਨਿ ਨਿਸ੍ਸਗ੍ਗਿਯਾਨੀਤਿ ਸਮ੍ਬਨ੍ਧੋ. ਸਂਹਰਿਤ੍ਵਾਤਿ ਵਿਸੁਂ ਵਿਸੁਂ ਸਙ੍ਘਰਿਤ੍ਵਾਤਿ. ਤਤਿਯਂ.

੪. ਚਤੁਤ੍ਥਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੪੮. ਚਤੁਤ੍ਥੇ ਕਿਣਾਤਿ ਅਨੇਨਾਤਿ ਕਯਨ੍ਤਿ ਵਚਨਤ੍ਥੇਨ ਮੂਲਂ ਕਯਂ ਨਾਮਾਤਿ ਆਹ ‘‘ਮੂਲੇਨਾ’’ਤਿ. ਸਾਤਿ ਥੁਲ੍ਲਨਨ੍ਦਾ, ਆਹ ਕਿਰਾਤਿ ਸਮ੍ਬਨ੍ਧੋ. ਞਾਧਾਤੁਯਾ ਅਵਬੋਧਨਤ੍ਥਤੋ ਅਞ੍ਞਮ੍ਪਿ ਞਾਧਾਤੁਯਾ ਯਾਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਾਚਿਤ੍ਵਾ ਵਾ’’ਤਿ.

੭੫੨. ਯਨ੍ਤਿ ¶ ਸਬ੍ਬਿਤੇਲਾਦਿ. ਤਞ੍ਞੇਵਾਤਿ ਸਬ੍ਬਿਤੇਲਾਦਿਮੇਵ. ਯਮਕਨ੍ਤਿ ਸਬ੍ਬਿਂ ਸਹ ਤੇਲੇਨ ਯੁਗਲ਼ਂ ਕਤ੍ਵਾ. ਵੇਜ੍ਜੇਨਾਤਿ ਭਿਸਕ੍ਕੇਨ. ਸੋ ਹਿ ਆਯੁਬ੍ਬੇਦਸਙ੍ਖਾਤਂ ਵਿਜ੍ਜਂ ਜਾਨਾਤੀਤਿ ਵੇਜ੍ਜੋਤਿ ਚ ਰੋਗਞ੍ਚ ਤਸ੍ਸ ਨਿਦਾਨਞ੍ਚ ਭੇਸਜ੍ਜਞ੍ਚ ਵਿਦਤਿ ਜਾਨਾਤੀਤਿਪਿ ਵੇਜ੍ਜੋਤਿ ਚ ਵੁਚ੍ਚਤਿ. ਤਤੋਤਿ ਵੇਜ੍ਜੇਨ ਵੁਤ੍ਤਕਾਰਣਾ. ਕਹਾਪਣਸ੍ਸਾਤਿ ਕਹਾਪਣੇਨ, ਆਭਤਨ੍ਤਿ ਸਮ੍ਬਨ੍ਧੋਤਿ. ਚਤੁਤ੍ਥਂ.

੫. ਪਞ੍ਚਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੫੩. ਪਞ੍ਚਮੇ ਸਾਤਿ ਸਿਕ੍ਖਮਾਨਾ. ਅਯਨ੍ਤਿ ਸਿਕ੍ਖਮਾਨਾ. ਅਦ੍ਧਾਤਿ ਏਕਂਸੇਨ. ‘‘ਚੇਤਾਪੇਤ੍ਵਾ’’ਤਿ ਏਤ੍ਥ ਚਿਤਿਸਦ੍ਦੋ ਜਾਨਨਤ੍ਥੋਤਿ ਆਹ ‘‘ਜਾਨਾਪੇਤ੍ਵਾ’’ਤਿ. ਪਞ੍ਚਮਂ.

੬. ਛਟ੍ਠਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੫੮. ਛਟ੍ਠੇ ¶ ਛਨ੍ਦਂ ਉਪ੍ਪਾਦੇਤ੍ਵਾ ਗਹਿਤਂ ਛਨ੍ਦਕਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਛਨ੍ਦਕ’’ਨ੍ਤਿਆਦਿ. ਧਮ੍ਮਕਿਚ੍ਚਨ੍ਤਿ ਪੁਞ੍ਞਕਰਣੀਯਂ. ਧਮ੍ਮਸਦ੍ਦੋ ਹੇਤ੍ਥ ਪੁਞ੍ਞਵਾਚਕੋ. ਯਨ੍ਤਿ ਵਤ੍ਥੁਂ. ਪਰੇਸਨ੍ਤਿ ਅਤ੍ਤਨਾ ਅਞ੍ਞੇਸਂ. ‘‘ਏਤ’’ਨ੍ਤਿ ‘‘ਛਨ੍ਦਕ’’ਨ੍ਤਿ ਏਤਂ ਨਾਮਂ. ‘‘ਅਞ੍ਞਸ੍ਸਤ੍ਥਾਯ ਦਿਨ੍ਨੇਨਾ’’ਤਿਇਮਿਨਾ ਅਞ੍ਞਸ੍ਸ ਅਤ੍ਥੋ ਅਞ੍ਞਦਤ੍ਥੋ, ਦਕਾਰੋ ਪਦਸਨ੍ਧਿਕਰੋ, ਤਦਤ੍ਥਾਯ ਦਿਨ੍ਨੋ ਅਞ੍ਞਦਤ੍ਥਿਕੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਅਞ੍ਞਂ ਉਦ੍ਦਿਸਿਤ੍ਵਾ ਦਿਨ੍ਨੇਨਾ’’ਤਿਇਮਿਨਾ ਅਞ੍ਞਂ ਉਦ੍ਦਿਸਿਤ੍ਵਾ ਦਿਨ੍ਨਂ ਅਞ੍ਞੁਦ੍ਦਿਸਿਕਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਸਙ੍ਘਸ੍ਸ ਪਰਿਚ੍ਚਤ੍ਤੇਨਾ’’ਤਿ ਇਮਿਨਾ ਸਙ੍ਘਸ੍ਸ ਪਰਿਚ੍ਚਤ੍ਤੋ ਸਙ੍ਘਿਕੋਤਿ ਵਚਨਤ੍ਥਂ ਦਸ੍ਸੇਤਿ.

੭੬੨. ਯਦਤ੍ਥਾਯਾਤਿ ਯੇਸਂ ਚੀਵਰਾਦੀਨਂ ਅਤ੍ਥਾਯ. ਯਸਦ੍ਦੇਨ ਸਮਾਸਭਾਵਤੋ ਪੁਬ੍ਬੇ ਨਿਗ੍ਗਹਿਤਾਗਮੋ ਹੋਤਿ. ਤਨ੍ਤਿ ਚੀਵਰਾਦਿਕਂ. ਤੁਮ੍ਹੇਹੀਤਿ ਦਾਯਕੇ ਸਨ੍ਧਾਯ ਵੁਤ੍ਤਂ. ਉਪਦ੍ਦਵੇਸੂਤਿ ਦੁਬ੍ਭਿਕ੍ਖਾਦਿਉਪਸਗ੍ਗੇਸੁ. ਯਂ ਵਾ ਤਂ ਵਾਤਿ ਚੀਵਰਂ ਵਾ ਅਞ੍ਞੇ ਵਾ ਪਿਣ੍ਡਪਾਤਾਦਿਕੇਤਿ ਯਂ ਵਾ ਤਂ ਵਾਤਿ. ਛਟ੍ਠਂ.

੭. ਸਤ੍ਤਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੬੪. ਸਤ੍ਤਮੇ ਸਞ੍ਞਾਚਿਕੇਨਾਤਿ ਏਤ੍ਥ ਸਂਸਦ੍ਦਸ੍ਸ ਸਯਮਤ੍ਥੇ ਪਵਤ੍ਤਿਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਸਯਂ ਯਾਚਿਤਕੇਨਾ’’ਤਿ. ਏਤਦੇਵਾਤਿ ‘‘ਸਞ੍ਞਾਚਿਕੇਨਾ’’ਤਿ ਪਦਮੇਵ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇਤਿ. ਸਤ੍ਤਮਂ.

੮. ਅਟ੍ਠਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੬੯. ਅਟ੍ਠਮੇ ¶ ਗਣਸ੍ਸਾਤਿ ਭਿਕ੍ਖੁਨਿਗਣਸ੍ਸ. ਇਮਿਨਾ ‘‘ਮਹਾਜਨਿਕੇਨਾ’’ਤਿ ਏਤ੍ਥ ਭਿਕ੍ਖੁਨਿਗਣੋਵ ਮਹਾਜਨੋਤਿ ਅਧਿਪ੍ਪੇਤੋਤਿ ਦੀਪੇਤੀਤਿ. ਅਟ੍ਠਮਂ.

੯. ਨਵਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੭੪. ਨਵਮੇ ਇਤੋਤਿ ਇਮਸ੍ਮਾ ਅਟ੍ਠਮਸਿਕ੍ਖਾਪਦਤੋ. ਅਧਿਕਤਰਨ੍ਤਿ ਅਤਿਰੇਕਤਰਨ੍ਤਿ. ਨਵਮਂ.

੧੦. ਦਸਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੭੮. ਦਸਮੇ ¶ ‘‘ਵਿਨਸ੍ਸਤੀ’’ਤਿਇਮਿਨਾ ‘‘ਉਨ੍ਦ੍ਰਿਯਤੀ’’ਤਿ ਏਤ੍ਥ ਉਦਿਧਾਤੁਯਾ ਨਸ੍ਸਨਤ੍ਥਂ ਦਸ੍ਸੇਤਿ ਧਾਤੂਨਮਨੇਕਤ੍ਥਤ੍ਤਾ. ਪਰਿਪਤਤੀਤਿ ਪਰਿਗਲਿਤ੍ਵਾ ਪਤਤਿ. ਇਮਿਨਾ ਨਸ੍ਸਨਾਕਾਰਂ ਦਸ੍ਸੇਤਿ. ਏਤ੍ਤਕਮੇਵਾਤਿ ਏਤਂ ਪਰਿਮਾਣਂ ਦ੍ਵਿਪਦਮੇਵਾਤਿ. ਦਸਮਂ.

੧੧. ਏਕਾਦਸਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੮੪. ਏਕਾਦਸਮੇ ਗਰੁਪਾਵੁਰਣਂ ਨਾਮ ਸੀਤਕਾਲੇ ਪਾਵੁਰਣਵਤ੍ਥਨ੍ਤਿ ਦਸ੍ਸੇਨ੍ਤੋ ਆਹ ‘‘ਸੀਤਕਾਲੇ ਪਾਵੁਰਣ’’ਨ੍ਤਿ. ਸੀਤਕਾਲੇ ਹਿ ਮਨੁਸ੍ਸਾ ਥੂਲਪਾਵੁਰਣਂ ਪਾਰੁਪਨ੍ਤਿ. ‘‘ਚਤੁਕ੍ਕਂਸਪਰਮ’’ਨ੍ਤਿ ਏਤ੍ਥ ਕਂਸਸਦ੍ਦੋ ਭੁਞ੍ਜਨਪਤ੍ਤੇ ਚ ਸੁਵਣ੍ਣਾਦਿਲੋਹਵਿਸੇਸੇ ਚ ਚਤੁਕਹਾਪਣੇ ਚਾਤਿ ਤੀਸੁ ਅਤ੍ਥੇਸੁ ਦਿਸ੍ਸਤਿ, ਇਧ ਪਨ ਚਤੁਕਹਾਪਣੇ ਵਤ੍ਤਤੀਤਿ ਦਸ੍ਸੇਨ੍ਤੋ ਆਹ ‘‘ਕਂਸੋ ਨਾਮ ਚਤੁਕ੍ਕਹਾਪਣਿਕੋ ਹੋਤੀ’’ਤਿ. ਚਤੁਕ੍ਕਂਸਸਙ੍ਖਾਤਂ ਪਰਮਂ ਇਮਸ੍ਸਾਤਿ ਚਤੁਕ੍ਕਂਸਪਰਮਂ, ਸੋਲ਼ਸਕਹਾਪਣਗ੍ਘਨਕਂ ਪਾਵੁਰਣਨ੍ਤਿ ਅਤ੍ਥੋਤਿ. ਏਕਾਦਸਮਂ.

੧੨. ਦ੍ਵਾਦਸਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੮੯. ਦ੍ਵਾਦਸਮੇ ਲਹੁਪਾਵੁਰਣਂ ਨਾਮ ਉਣ੍ਹਕਾਲੇ ਪਾਵੁਰਣਵਤ੍ਥਨ੍ਤਿ ਦਸ੍ਸੇਨ੍ਤੋ ਆਹ ‘‘ਉਣ੍ਹਕਾਲੇ ਪਾਵੁਰਣ’’ਨ੍ਤਿ. ਉਣ੍ਹਕਾਲੇ ਹਿ ਮਨੁਸ੍ਸਾ ਸੁਖੁਮਪਾਵੁਰਣਂ ਪਾਰੁਪਨ੍ਤੀਤਿ. ਦ੍ਵਾਦਸਮਂ.

ਨਿਸ੍ਸਗ੍ਗਿਯਾਨਂ ¶ ਤਿਂਸਭਾਵਂ ਦਸ੍ਸੇਨ੍ਤੋ ਆਹ ‘‘ਮਹਾਵਿਭਙ੍ਗੇ’’ਤਿਆਦਿ. ਚੀਵਰਵਗ੍ਗਤੋ ਅਪਨੇਤ੍ਵਾਤਿ ਸਮ੍ਬਨ੍ਧੋ. ਅਞ੍ਞਦਤ੍ਥਿਕਾਨੀਤਿ ਅਞ੍ਞਦਤ੍ਥਿਕਪਦੇਨ ਵੁਤ੍ਤਾਨਿ ਸਿਕ੍ਖਾਪਦਾਨਿ. ਇਤੀਤਿ ਏਵਂ. ਏਕਤੋਪਞ੍ਞਤ੍ਤਾਨੀਤਿ ਏਕਸ੍ਸੇਵ ਪਞ੍ਞਤ੍ਤਾਨਿ, ਉਭਤੋਪਞ੍ਞਤ੍ਤਾਨੀਤਿ ਉਭਯੇਸਂ ਪਞ੍ਞਤ੍ਤਾਨਿ. ਏਤ੍ਥਾਤਿ ‘‘ਉਦ੍ਦਿਟ੍ਠਾ ਖੋ’’ਤਿਆਦਿਵਚਨੇਤਿ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਭਿਕ੍ਖੁਨਿਵਿਭਙ੍ਗੇ

ਤਿਂਸਕਵਣ੍ਣਨਾਯ ਯੋਜਨਾ ਸਮਤ੍ਤਾ.

੪. ਪਾਚਿਤ੍ਤਿਯਕਣ੍ਡਂ

੧. ਲਸੁਣਵਗ੍ਗੋ

੧. ਪਠਮਸਿਕ੍ਖਾਪਦ-ਅਤ੍ਥਯੋਜਨਾ

ਤਿਂਸਕਾਨਨ੍ਤਰਂ ¶ ਤਿਂਸਕਾਨਂ ਅਨਨ੍ਤਰੇ ਕਾਲੇ ਛਸਟ੍ਠਿਸਤਸਙ੍ਗਹਾ ਛਉਤ੍ਤਰਸਟ੍ਠਿਅਧਿਕਸਤੇਹਿ ਸਿਕ੍ਖਾਪਦੇਹਿ ਸਙ੍ਗਹਿਤਾ ਯੇ ਧਮ੍ਮਾ ਸਙ੍ਗੀਤਿਕਾਰੇਹਿ ਸਙ੍ਗੀਤਾ, ਦਾਨਿ ਇਮਸ੍ਮਿਂ ਕਾਲੇ ਤੇਸਮ੍ਪਿ ਧਮ੍ਮਾਨਂ ਅਯਂ ਵਣ੍ਣਨਾ ਹੋਤੀਤਿ ਯੋਜਨਾ.

੭੯੩. ਤਤ੍ਥਾਤਿ ਤੇਸੁ ਛਸਟ੍ਠਿਸਤਸਙ੍ਗਹੇਸੁ ਸਿਕ੍ਖਾਪਦੇਸੁ, ਪਠਮਸਿਕ੍ਖਾਪਦੇਤਿ ਸਮ੍ਬਨ੍ਧੋ. ‘‘ਦ੍ਵੇ ਤਯੋ’’ਤਿ ਏਤ੍ਥ ਵਾਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋਤਿ ਆਹ ‘‘ਦ੍ਵੇ ਵਾ ਤਯੋ ਵਾ’’ਤਿ. ਫੋਟਲਕੇਤਿ ਕਨ੍ਦੇ, ਮਿਞ੍ਜੇ ਵਾ. ਏਤਨ੍ਤਿ ‘‘ਗਣ੍ਡਿਕੇ’’ਤਿ ਏਤਂ ਨਾਮਂ. ‘‘ਪਮਾਣ’’ਨ੍ਤਿਇਮਿਨਾ ਮਤ੍ਤਸਦ੍ਦੋ ਪਮਾਣਤ੍ਥੋਵ, ਨ ਅਪ੍ਪਤ੍ਥੋ, ਨਾਪਿ ਅਵਧਾਰਣਤ੍ਥੋਤਿ ਦਸ੍ਸੇਤਿ. ਲਸੁਣਨ੍ਤਿ ਸੇਤਵਣ੍ਣਮੂਲਂ ਮਹਾਕਨ੍ਦਂ. ਮਹਾਕਨ੍ਦੋ ਹਿ ਬ੍ਯਞ੍ਜਨਸਮ੍ਪਾਕਾਦੀਸੁ ਆਮਗਨ੍ਧਾਨਂ ਅਭਿਭਵਨਤ੍ਤਾ ਲਸੀਯਤਿ ਕਨ੍ਤੀਯਤੀਤਿ ਲਸੁਣਨ੍ਤਿ ਵੁਚ੍ਚਤਿ.

ਸੁਵਣ੍ਣਹਂਸਯੋਨਿਨ੍ਤਿ ਸੁਵਣ੍ਣਮਯੇਨ ਪਤ੍ਤੇਨ ਯੁਤ੍ਤਂ ਹਂਸਯੋਨਿਂ. ਜਾਤਿਸ੍ਸਰੋਤਿ ਜਾਤਿਂ ਭਵਂ ਸਰਤਿ ¶ ਜਾਨਾਤੀਤਿ ਜਾਤਿਸ੍ਸਰੋ. ਅਥਾਤਿ ਜਾਤਿਸ੍ਸਰਸ੍ਸ ਨਿਪ੍ਫਨ੍ਨਤ੍ਤਾ. ਨਿਪ੍ਫਨ੍ਨਤ੍ਥੋ ਹਿ ਅਥਸਦ੍ਦੋ. ਪੁਬ੍ਬਸਿਨੇਹੇਨਾਤਿ ਪੁਬ੍ਬੇ ਮਨੁਸ੍ਸਭਵੇ ਭਾਵਿਤੇਨ ਸਿਨੇਹੇਨ. ਤਾਸਨ੍ਤਿ ਪਜਾਪਤਿਯਾ ਚ ਤਿਸ੍ਸਨ੍ਨਂ ਧੀਤਰਾਨਞ੍ਚ. ਤਂ ਪਨਾਤਿ ਪਤ੍ਤਂ ਪਨ.

੭੯੫. ਮਗਧੇਸੂਤਿ ਮਗਧਰਟ੍ਠੇ ਠਿਤੇਸੁ ਜਨਪਦੇਸੁ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਇਧਾਤਿ ‘‘ਲਸੁਣਂ ਖਾਦੇਯ੍ਯਾ’’ਤਿਪਦੇ. ਤਮ੍ਪੀਤਿ ਮਾਗਧਕਮ੍ਪਿ. ਗਣ੍ਡਿਕਲਸੁਣਮੇਵਾਤਿ ਗਣ੍ਡੋ ਫੋਟੋ ਏਤਸ੍ਸਤ੍ਥੀਤਿ ਗਣ੍ਡਿਕਂ. ਗਣ੍ਡਸਦ੍ਦੋ ਹਿ ਫੋਟਪਰਿਯਾਯੋ, ਬਹੁਤ੍ਥੇ ਇਕਪਚ੍ਚਯੋ. ਬਹੁਗਣ੍ਡਿਕਲਸੁਣਨ੍ਤਿ ਹਿ ਵੁਤ੍ਤਂ ਹੋਤਿ. ਗਣ੍ਡਸਦ੍ਦੋ ਹਿ ਫੋਟੇ ਚ ਕਪੋਲੇ ਚਾਤਿ ਦ੍ਵੀਸੁ ਅਤ੍ਥੇਸੁ ਵਤ੍ਤਤਿ, ਇਧ ਪਨ ਫੋਟੇ ਵਤ੍ਤਤੀਤਿ ਦਟ੍ਠਬ੍ਬਂ. ਪੋਤ੍ਥਕੇਸੁ ਪਨ ਓਟ੍ਠਜੇਨ ਚਤੁਤ੍ਥਕ੍ਖਰੇਨ ਪਾਠੋ ਅਤ੍ਥਿ, ਸੋ ਵੀਮਂਸਿਤ੍ਵਾ ਗਹੇਤਬ੍ਬੋ. ਬਹੂਸੁ ਹਿ ਪੁਬ੍ਬਪੋਤ੍ਥਕੇਸੁ ¶ ਕਣ੍ਠਜੋ ਤਤਿਯਕ੍ਖਰੋ ਚ ਓਟ੍ਠਜੋ ਚਤੁਤ੍ਥਕ੍ਖਰੋ ਚਾਤਿ ਦ੍ਵੇ ਅਕ੍ਖਰਾ ਅਞ੍ਞਮਞ੍ਞਂ ਪਰਿਵਤ੍ਤਿਤ੍ਵਾ ਤਿਟ੍ਠਨ੍ਤਿ. ਨ ਏਕਦ੍ਵਿਤਿਮਿਞ੍ਜਕਨ੍ਤਿ ਏਕਮਿਞ੍ਜੋ ਪਲਣ੍ਡੁਕੋ ਨ ਹੋਤਿ, ਦ੍ਵਿਮਿਞ੍ਜੋ ਭਞ੍ਜਨਕੋ ਨ ਹੋਤਿ, ਤਿਮਿਞ੍ਜੋ ਹਰਿਤਕੋ ਨ ਹੋਤੀਤਿ ਅਤ੍ਥੋ. ਕੁਰੁਨ੍ਦਿਯਂ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸਙ੍ਖਾਦਿਤ੍ਵਾਤਿ ਦਨ੍ਤੇਹਿ ਚੁਣ੍ਣਵਿਚੁਣ੍ਣਂ ਕਤ੍ਵਾ.

੭੯੭. ਪਲਣ੍ਡੁਕੋਤਿ ਸੁਕਨ੍ਦਕੋ ਏਕੋ ਲਸੁਣਵਿਸੇਸੋ. ਭਞ੍ਜਨਕਾਦੀਨਿ ਲੋਕਸਙ੍ਕੇਤੋਪਦੇਸਤੋ ਦਟ੍ਠਬ੍ਬਾਨਿ. ਹੀਤਿ ਸਚ੍ਚਂ. ਤਸ੍ਸਾਤਿ ਚਾਪਲਸੁਣਸ੍ਸ. ਸਭਾਵੇਨੇਵਾਤਿ ਸੂਪਸਮ੍ਪਾਕਾਦਿਂ ਵਿਨਾ ਅਤ੍ਤਨੋ ਸਭਾਵਤੋ ਏਵ. ਤਨ੍ਤਿ ਮਾਗਧਕਂ, ਪਕ੍ਖਿਪਿਤੁਨ੍ਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਯਤ੍ਥ ਕਤ੍ਥਚੀਤਿ ਯੇਸੁ ਕੇਸੁਚੀਤਿ. ਪਠਮਂ.

੨. ਦੁਤਿਯਸਿਕ੍ਖਾਪਦਂ

੭੯੯. ਦੁਤਿਯੇ ਸਂਦਸ੍ਸਨਂ ਬਾਧਤਿ ਨਿਸੇਧੇਤਿ ਅਸ੍ਮਿਂ ਠਾਨੇਤਿ ਸਮ੍ਬਾਧਨ੍ਤਿ ਵਚਨਤ੍ਥੇਨ ਪਟਿਚ੍ਛਨ੍ਨੋਕਾਸੋ ਸਮ੍ਬਾਧੋ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਪਟਿਚ੍ਛਨ੍ਨੋਕਾਸੇ’’ਤਿ. ਉਭੋ ਉਪਕਚ੍ਛਕਾਤਿ ਦ੍ਵੇ ਬਾਹੁਮੂਲਾ. ਤੇ ਹਿ ਉਪਰਿ ਯਂਕਿਞ੍ਚਿ ਵਤ੍ਥੁਂ ਕਚਤਿ ਬਨ੍ਧਤਿ ਏਤ੍ਥਾਤਿ ਉਪਕਚ੍ਛਕਾਤਿ ਵੁਚ੍ਚਨ੍ਤਿ. ਮੁਤ੍ਤਕਰਣਨ੍ਤਿ ਪਸ੍ਸਾਵਮਗ੍ਗੋ. ਸੋ ਹਿ ਮੁਤ੍ਤਂ ਕਰੋਤਿ ਅਨੇਨਾਤਿ ਮੁਤ੍ਤਕਰਣਨ੍ਤਿ ਵੁਚ੍ਚਤਿ. ਲੋਮੋ ਕਤ੍ਤੀਯਤਿ ਛਿਨ੍ਦੀਯਤਿ ਇਮਾਯਾਤਿ ਕਤ੍ਤਰਿ, ਤਾਯ ਵਾ, ਸੁਟ੍ਠੁ ਦਲ਼੍ਹਂ ਲੋਮਂ ਡਂਸਤੀਤਿ ਸਣ੍ਡਾਸੋ, ਸੋਯੇਵ ਸਣ੍ਡਾਸਕੋ, ਤੇਨ ਵਾ, ਖੁਰਤਿ ਲੋਮਂ ਛਿਨ੍ਦਤੀਤਿ ਖੁਰੋ, ਤੇਨ ਵਾ ਸਂਹਰਾਪੇਨ੍ਤਿਯਾਤਿ ਸਮ੍ਬਨ੍ਧੋ. ਸਂਹਰਾਪੇਨ੍ਤਿਯਾਤਿ ਅਪਨੇਨ੍ਤਿਯਾਤਿ. ਦੁਤਿਯਂ.

੩. ਤਤਿਯਸਿਕ੍ਖਾਪਦਂ

੮੦੩. ਤਤਿਯੇ ¶ ਮੁਤ੍ਤਕਰਣਤਲਘਾਤਨੇਤਿ ਮੁਤ੍ਤਕਰਣਸ੍ਸ ਤਲਂ ਹਨਨਂ ਪਹਰਣਂ ਮੁਤ੍ਤਕਰਣਤਲਘਾਤਨਂ, ਤਸ੍ਮਿਂ ਮੁਤ੍ਤਕਰਣਤਲਘਾਤਨੇ ਨਿਮਿਤ੍ਤਭੂਤੇ. ਤਾਵ ਮਹਨ੍ਤਨ੍ਤਿ ਅਤਿਵਿਯ ਮਹਨ੍ਤਂ. ਕੇਸਰੇਨਾਪੀਤਿ ਕਿਞ੍ਜਕ੍ਖੇਨਾਪਿ. ਸੋ ਹਿ ਕੇ ਜਲੇ ਸਰਤਿ ਪਵਤ੍ਤਤੀਤਿ ਕੇਸਰੋਤਿ ਵੁਚ੍ਚਤਿ.

੮੦੫. ਗਣ੍ਡਂ ਵਾਤਿ ਪੀਲ਼ਕਂ ਵਾ. ਵਣਂ ਵਾਤਿ ਅਰੁਂ ਵਾਤਿ. ਤਤਿਯਂ.

੪. ਚਤੁਤ੍ਥਸਿਕ੍ਖਾਪਦਂ

੮੦੬. ਚਤੁਤ੍ਥੇ ¶ ਰਞ੍ਞੋ ਓਰੋਧਾ ਰਾਜੋਰੋਧਾ, ਪੁਰਾਣੇ ਰਾਜੋਰੋਧਾ ਪੁਰਾਣਰਾਜੋਰੋਧਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਪੁਰਾਣੇ’’ਤਿਆਦਿ. ‘‘ਗਿਹਿਭਾਵੇ’’ਤਿ ਇਮਿਨਾ ਪੁਰਾਣੇਤਿ ਏਤ੍ਥ ਣਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਚਿਰਾਚਿਰਨ੍ਤਿ ਨਿਪਾਤਪਟਿਰੂਪਕਂ. ਤੇਨ ਵੁਤ੍ਤਂ ‘‘ਚਿਰੇਨ ਚਿਰੇਨਾ’’ਤਿ. ‘‘ਸਕ੍ਕੋਥਾ’’ਤਿ ਇਮਿਨਾ ਕਥਂ ਤੁਮ੍ਹੇ ਰਾਗਚਿਤ੍ਤਂ ਪਟਿਹਨਿਤ੍ਵਾ ਅਤ੍ਤਾਨਂ ਧਾਰੇਥ ਧਾਰੇਤੁਂ ਸਕ੍ਕੋਥਾਤਿ ਅਤ੍ਥਂ ਦਸ੍ਸੇਤਿ. ਅਨਾਰੋਚਿਤੇਪੀਤਿ ਭੂਤਤੋ ਅਨਾਰੋਚਿਤੇਪਿ.

੮੦੭. ਜਤੁਨਾਤਿ ਲਾਖਾਯ. ਪਟ੍ਠਦਣ੍ਡਕੇਤਿ ਪਟੁਭਾਵੇਨ ਠਾਤਿ ਪਵਤ੍ਤਤੀਤਿ ਪਟ੍ਠੋ, ਸੋਯੇਵ ਦਣ੍ਡੋ ਪਟ੍ਠਦਣ੍ਡੋ, ਤਸ੍ਸ ਪਵੇਸਨਂ ਪਟ੍ਠਦਣ੍ਡਕਂ, ਤਸ੍ਮਿਂ ਨਿਮਿਤ੍ਤਭੂਤੇ. ਏਤਨ੍ਤਿ ‘‘ਜਤੁਮਟ੍ਠਕੇ’’ਤਿ ਏਤਂ ਵਚਨਨ੍ਤਿ. ਚਤੁਤ੍ਥਂ.

੫. ਪਞ੍ਚਮਸਿਕ੍ਖਾਪਦਂ

੮੧੦. ਪਞ੍ਚਮੇ ‘‘ਅਤਿਗਮ੍ਭੀਰ’’ਨ੍ਤਿਪਦਂ ਕਿਰਿਯਾਵਿਸੇਸਨਨ੍ਤਿ ਆਹ ‘‘ਅਤਿਅਨ੍ਤੋ ਪਵੇਸੇਤ੍ਵਾ’’ਤਿ. ‘‘ਉਦਕੇਨ ਧੋਵਨਂ ਕੁਰੁਮਾਨਾ’’ਤਿ ਇਮਿਨਾ ‘‘ਉਦਕਸੁਦ੍ਧਿਕ’’ਨ੍ਤਿਪਦਸ੍ਸ ਉਦਕੇਨ ਸੁਦ੍ਧਿਯਾ ਕਰਣਨ੍ਤਿ ਅਤ੍ਥਂ ਦਸ੍ਸੇਤਿ.

੮੧੨. ਦ੍ਵਙ੍ਗੁਲਪਬ੍ਬਪਰਮਨ੍ਤਿ ਏਤ੍ਥ ਦ੍ਵੇ ਅਙ੍ਗੁਲਾਨਿ ਚ ਦ੍ਵੇ ਪਬ੍ਬਾਨਿ ਚ ਦ੍ਵਙ੍ਗੁਲਪਬ੍ਬਂ, ਉਤ੍ਤਰਪਦੇ ਪੁਬ੍ਬਪਦਲੋਪੋ. ਦ੍ਵਙ੍ਗੁਲਪਬ੍ਬਂ ਪਰਮਂ ਪਮਾਣਂ ਏਤਸ੍ਸ ਉਦਕਸੁਦ੍ਧਿਕਸ੍ਸਾਤਿ ਦ੍ਵਙ੍ਗੁਲਪਬ੍ਬਪਰਮਂ. ਵਿਤ੍ਥਾਰਤੋ ਦ੍ਵਙ੍ਗੁਲਪਰਮਂ, ਗਮ੍ਭੀਰਤੋ ਦ੍ਵਿਪਬ੍ਬਪਰਮਨ੍ਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਵਿਤ੍ਥਾਰਤੋ’’ਤਿਆਦਿ. ਅਙ੍ਗੁਲਂ ¶ ਪਵੇਸੇਨ੍ਤਿਯਾਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ‘‘ਚਤੁਨ੍ਨਂ ਵਾ’’ਤਿ ਇਦਂ ਉਕ੍ਕਟ੍ਠਵਸੇਨ ਵੁਤ੍ਤਂ, ਤਿਣ੍ਣਮ੍ਪਿ ਪਬ੍ਬਂ ਨ ਵਟ੍ਟਤਿ, ਚਤੁਨ੍ਨਂ ਪਨ ਪਗੇਵਾਤਿ ਅਤ੍ਥੋਤਿ. ਪਞ੍ਚਮਂ.

੬. ਛਟ੍ਠਸਿਕ੍ਖਾਪਦਂ

੮੧੫. ਛਟ੍ਠੇ ਭਤ੍ਤਸ੍ਸ ਵਿਸ੍ਸਜ੍ਜਨਂ ਭਤ੍ਤਵਿਸ੍ਸਗ੍ਗੋਤਿ ਵੁਤ੍ਤੇ ਭਤ੍ਤਕਿਚ੍ਚਨ੍ਤਿ ਦਸ੍ਸੇਨ੍ਤੋ ਆਹ ‘‘ਭਤ੍ਤਕਿਚ੍ਚ’’ਨ੍ਤਿ. ਪਾਨੀਯਸਦ੍ਦੇਨ ਪਾਨੀਯਥਾਲਕਂ ਗਹੇਤਬ੍ਬਂ ¶ , ਵਿਧੂਪਨਸਦ੍ਦੇਨ ਬੀਜਨੀ ਗਹੇਤਬ੍ਬਾ, ਉਪਸਦ੍ਦੋ ਸਮੀਪਤ੍ਥੋਤਿ ਸਬ੍ਬਂ ਦਸ੍ਸੇਨ੍ਤੋ ਆਹ ‘‘ਏਕੇਨ ਹਤ੍ਥੇਨਾ’’ਤਿਆਦਿ. ‘‘ਅਚ੍ਚਾਵਦਤੀ’’ਤਿਪਦਸ੍ਸ ਅਤਿਕ੍ਕਮਿਤ੍ਵਾ ਵਦਨਾਕਾਰਂ ਦਸ੍ਸੇਤਿ ‘‘ਪੁਬ੍ਬੇਪੀ’’ਤਿਆਦਿਨਾ.

੮੧੭. ‘‘ਸੁਦ੍ਧਉਦਕਂ ਵਾ ਹੋਤੂ’’ਤਿਆਦਿਨਾ ‘‘ਪਾਨੀਯੇਨਾ’’ਤਿ ਵਚਨਂ ਉਪਲਕ੍ਖਣਂ ਨਾਮਾਤਿ ਦਸ੍ਸੇਤਿ. ਦਧਿਮਤ੍ਥੂਤਿ ਦਧਿਮਣ੍ਡਂ ਦਧਿਨੋ ਸਾਰੋ, ਦਧਿਮ੍ਹਿ ਪਸਨ੍ਨੋਦਕਨ੍ਤਿ ਵੁਤ੍ਤਂ ਹੋਤਿ. ਰਸੋਤਿ ਮਚ੍ਛਰਸੋ ਮਂਸਰਸੋ. ‘‘ਅਨ੍ਤਮਸੋ ਚੀਵਰਕਣ੍ਣੋਪੀ’’ਤਿ ਇਮਿਨਾ ‘‘ਵਿਧੂਪਨੇਨਾ’’ਤਿ ਵਚਨਂ ਨਿਦਸ੍ਸਨਂ ਨਾਮਾਤਿ ਦਸ੍ਸੇਤਿ.

੮੧੯. ਦੇਤੀਤਿ ਸਯਂ ਦੇਤਿ. ਦਾਪੇਤੀਤਿ ਅਞ੍ਞੇਨ ਦਾਪੇਤਿ. ਉਭਯਮ੍ਪੀਤਿ ਪਾਨੀਯਵਿਧੂਪਨਦ੍ਵਯਮ੍ਪੀਤਿ. ਛਟ੍ਠਂ.

੭. ਸਤ੍ਤਮਸਿਕ੍ਖਾਪਦਂ

੮੨੨. ਸਤ੍ਤਮੇ ‘‘ਪਯੋਗਦੁਕ੍ਕਟਂ ਨਾਮਾ’’ਤਿ ਇਮਿਨਾ ਹੇਟ੍ਠਾ ਵੁਤ੍ਤੇਸੁ ਅਟ੍ਠਸੁ ਦੁਕ੍ਕਟੇਸੁ ਪੁਬ੍ਬਪਯੋਗਦੁਕ੍ਕਟਂ ਦਸ੍ਸੇਤਿ. ਨ ਕੇਵਲਂ ਪੁਬ੍ਬਪਯੋਗਦੁਕ੍ਕਟਂ ਏਤ੍ਤਕਮੇਵ, ਅਥ ਖੋ ਅਞ੍ਞਮ੍ਪਿ ਬਹੁ ਹੋਤੀਤਿ ਦਸ੍ਸੇਨ੍ਤੋ ਆਹ ‘‘ਤਸ੍ਮਾ’’ਤਿਆਦਿ. ਸਙ੍ਘਟ੍ਟਨੇਸੁਪੀਤਿ ਵਿਲੋਲ਼ਨੇਸੁਪਿ. ਦਨ੍ਤੇਹਿ ਸਙ੍ਖਾਦਤੀਤਿ ਦਨ੍ਤੇਹਿ ਚੁਣ੍ਣਵਿਚੁਣ੍ਣਂ ਕਰੋਤਿ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ, ਅਞ੍ਞਾਯ ਭਿਕ੍ਖੁਨਿਯਾ ਕਾਰਾਪੇਤ੍ਵਾਤਿ ਸਮ੍ਬਨ੍ਧੋ. ‘‘ਅਞ੍ਞਾਯਾ’’ਤਿਪਦਂ ‘‘ਵਿਞ੍ਞਾਪੇਤ੍ਵਾ’’ਤਿ ਪਦੇ ਕਾਰਿਤਕਮ੍ਮਂ. ਮਾਤਰਮ੍ਪੀਤਿ ਏਤ੍ਥ ਪਿਸਦ੍ਦੋ ਅਞ੍ਞਂ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤਿਯਾ ਪਗੇਵਾਤਿ ਦਸ੍ਸੇਤਿ. ਤਾਯ ਵਾਤਿ ਵਿਞ੍ਞਾਪਿਤਭਿਕ੍ਖੁਨਿਯਾ ਵਾ. ਤਨ੍ਤਿ ਆਮਕਧਞ੍ਞਂ. ਤਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਵਚਨਂ. ਪੁਬ੍ਬਾਪਰਵਿਰੁਦ੍ਧਨ੍ਤਿ ਪੁਬ੍ਬਾਪਰਤੋ ਵਿਰੁਦ੍ਧਂ. ‘‘ਅਞ੍ਞਾਯ…ਪੇ… ਦੁਕ੍ਕਟਮੇਵਾ’’ਤਿ ਪੁਬ੍ਬਵਚਨੇ ਦੁਕ੍ਕਟਮੇਵ ਵੁਤ੍ਤਂ, ਪੁਨ ‘‘ਅਞ੍ਞਾਯ…ਪੇ… ਦੁਕ੍ਕਟ’’ਨ੍ਤਿ ਚ ਪਚ੍ਛਿਮਵਚਨੇ ਪਾਚਿਤ੍ਤਿਯਞ੍ਚ ਦੁਕ੍ਕਟਞ੍ਚ ਵੁਤ੍ਤਂ, ਤਸ੍ਮਾ ਪੁਬ੍ਬਾਪਰਵਿਰੁਦ੍ਧਨ੍ਤਿ ਵੁਤ੍ਤਂ ਹੋਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ.

੮੨੩. ਲਬ੍ਭਮਾਨਂ ¶ ਆਮਕਧਞ੍ਞਨ੍ਤਿ ਸਮ੍ਬਨ੍ਧੋ. ਅਞ੍ਞਂ ਵਾ ਯਂਕਿਞ੍ਚੀਤਿ ਮੁਗ੍ਗਮਾਸਾਦੀਹਿ ਵਾ ਲਾਬੁਕੁਮ੍ਭਣ੍ਡਾਦੀਹਿ ਵਾ ਅਞ੍ਞਂ ਯਂਕਿਞ੍ਚਿ ਤਿਲਾਦਿਂ ਵਾਤਿ. ਸਤ੍ਤਮਂ.

੮. ਅਟ੍ਠਮਸਿਕ੍ਖਾਪਦਂ

੮੨੪. ਅਟ੍ਠਮੇ ¶ ਨਿਬ੍ਬਿਟ੍ਠਰਾਜਭਟੋਤਿ ਏਤ੍ਥ ਉਤ੍ਤਰਪਦਸ੍ਸ ਛਟ੍ਠੀਸਮਾਸਞ੍ਚ ਪੁਬ੍ਬਪਦੇਨ ਬਾਹਿਰਤ੍ਥਸਮਾਸਞ੍ਚ ਦਸ੍ਸੇਨ੍ਤੋ ਆਹ ‘‘ਨਿਬ੍ਬਿਟ੍ਠੋ’’ਤਿਆਦਿ. ਤਤ੍ਥ ‘‘ਰਞ੍ਞੋ ਭਤੀ’’ਤਿ ਇਮਿਨਾ ਰਞ੍ਞੋ ਭਟੋ ਰਾਜਭਟੋਤਿ ਛਟ੍ਠੀਸਮਾਸਂ ਦਸ੍ਸੇਤਿ, ‘‘ਏਤੇਨਾ’’ਤਿ ਇਮਿਨਾ ਬਾਹਿਰਤ੍ਥਸਮਾਸਂ. ਨਿਬ੍ਬਿਟ੍ਠੋਤਿ ਨਿਵਿਟ੍ਠੋ ਪਤਿਟ੍ਠਾਪਿਤੋਤਿ ਅਤ੍ਥੋ. ਕੇਣੀਤਿ ਰਞ੍ਞੋ ਦਾਤਬ੍ਬਸ੍ਸ ਆਯਸ੍ਸੇਤਮਧਿਵਚਨਂ. ਏਤੇਨਾਤਿ ਬ੍ਰਾਹ੍ਮਣੇਨ. ਤਤੋਤਿ ਠਾਨਨ੍ਤਰਤੋ. ਭਟਸਙ੍ਖਾਤਾਯ ਕੇਣਿਯਾ ਪਥਤ੍ਤਾ ਕਾਰਣਤ੍ਤਾ ਠਾਨਨ੍ਤਰਂ ਭਟਪਥਨ੍ਤਿ ਆਹ ‘‘ਤਂਯੇਵ ਠਾਨਨ੍ਤਰ’’ਨ੍ਤਿ.

੮੨੬. ਚਤ੍ਤਾਰਿਪਿ ਵਤ੍ਥੂਨੀਤਿ ਉਚ੍ਚਾਰਾਦੀਨਿ. ਪਾਟੇਕ੍ਕਨ੍ਤਿ ਪਟਿਵਿਸੁਂ ਏਕੇਕਮੇਵ. ਉਚ੍ਚਾਰਂ ਵਾਤਿਆਦੀਸੁ ਵਾਸਦ੍ਦੇਨ ਦਨ੍ਤਕਟ੍ਠਾਦਯੋਪਿ ਗਹੇਤਬ੍ਬਾਤਿ ਆਹ ‘‘ਦਨ੍ਤਕਟ੍ਠ…ਪੇ… ਪਾਚਿਤ੍ਤਿਯਮੇਵਾ’’ਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਉਚ੍ਚਾਰਾਦੀਸੂਤਿ. ਅਟ੍ਠਮਂ.

੯. ਨਵਮਸਿਕ੍ਖਾਪਦਂ

੮੩੦. ਨਵਮੇ ਰੋਪਿਮਹਰਿਤਟ੍ਠਾਨੇਤਿ ਰੋਪਿਮਟ੍ਠਾਨੇ ਚ ਹਰਿਤਟ੍ਠਾਨੇ ਚ. ਰੋਪਿਯਤਿ ਅਸ੍ਮਿਨ੍ਤਿ ਰੋਪਿਯਂ, ਤਂਯੇਵ ਰੋਪਿਮਂ ਯਕਾਰਸ੍ਸ ਮਕਾਰਂ ਕਤ੍ਵਾ. ਏਤਾਨੀਤਿ ਉਚ੍ਚਾਰਾਦੀਨਿ. ਸਬ੍ਬੇਸਨ੍ਤਿ ਭਿਕ੍ਖੁਭਿਕ੍ਖੁਨੀਨਂ. ਯਤ੍ਥ ਪਨਾਤਿ ਯਸ੍ਮਿਂ ਖੇਤ੍ਤੇਤਿ. ਨਵਮਂ.

੧੦. ਦਸਮਸਿਕ੍ਖਾਪਦਂ

੮੩੫. ਦਸਮੇ ਸੋਣ੍ਡਾ ਵਾਤਿ ਸੁਰਾਸੋਣ੍ਡਾ ਵਾ. ਮੋਰੋਤਿ ਮਯੂਰੋ. ਸੁਵੋਤਿ ਸੁਕੋ. ਮਕ੍ਕਟੋਤਿ ਵਾਨਰੋ. ਆਦਿਸਦ੍ਦੇਨ ਸਪ੍ਪਾਦਯੋ ਸਙ੍ਗਣ੍ਹਾਤਿ, ਮਕ੍ਕਟਾਦਯੋਪਿ ਨਚ੍ਚਨ੍ਤੂਤਿ ਸਮ੍ਬਨ੍ਧੋ. ਅਸਂਯਤਭਿਕ੍ਖੂਨਨ੍ਤਿ ਵਾਚਸਿਕਕਮ੍ਮੇ ਅਸਂਯਤਾਨਂ ਭਿਕ੍ਖੂਨਂ, ਧਮ੍ਮਭਾਣਕਗੀਤਂ ਵਾ ਹੋਤੂਤਿ ਯੋਜਨਾ. ਤਨ੍ਤਿਯਾ ਗੁਣੇਨ ਬਦ੍ਧਾ ਤਨ੍ਤਿਬਦ੍ਧਾ. ‘‘ਭਿ’’ਨ੍ਤਿਸਙ੍ਖਾਤੋ ਰਾਸਦ੍ਦੋ ਏਤਿਸ੍ਸਾਤਿ ਭੇਰਿ. ਕੁਟੇਨ ਕਤਾ ਭੇਰਿ ਕੁਟਭੇਰਿ, ਤਾਯ ਵਾਦਿਤਂ ਕੁਟਭੇਰਿਵਾਦਿਤਂ, ਤਂ ਵਾ. ਉਦਕਭੇਰੀਤਿ ¶ ਉਦਕੇਨ ਪਕ੍ਖਿਤ੍ਤਾ ਭੇਰਿ, ਤਾਯ ਵਾਦਿਤਮ੍ਪਿ ਹੋਤੂਤਿ ਸਮ੍ਬਨ੍ਧੋ.

੮੩੬. ਤੇਸਂਯੇਵਾਤਿ ¶ ਯੇਸਂ ਨਚ੍ਚਂ ਪਸ੍ਸਤਿ, ਤੇਸਂਯੇਵ. ਯਦਿ ਪਨ ਨਚ੍ਚਗੀਤਵਾਦਿਤੇ ਵਿਸੁਂ ਵਿਸੁਂ ਪਸ੍ਸਤਿ ਸੁਣਾਤਿ, ਪਾਟੇਕ੍ਕਾ ਆਪਤ੍ਤਿਯੋਤਿ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਅਞ੍ਞਤੋਤਿ ਅਞ੍ਞਤੋ ਦੇਸਤੋ, ਪਸ੍ਸਤੀਤਿ ਸਮ੍ਬਨ੍ਧੋ. ‘‘ਓਲੋਕੇਤ੍ਵਾ’’ਤਿ ਪਦੇ ਅਪੇਕ੍ਖਿਤੇ ਉਪਯੋਗਤ੍ਥੇ ਤੋਪਚ੍ਚਯੋ ਹੋਤਿ. ਅਞ੍ਞਂ ਓਲੋਕੇਤ੍ਵਾਤਿ ਹਿ ਅਤ੍ਥੋ. ਅਞ੍ਞਤੋ ਵਾਦੇਨ੍ਤੇ ਪਸ੍ਸਤੀਤਿ ਯੋਜਨਾ. ਭਿਕ੍ਖੁਨੀ ਨ ਲਭਤੀਤਿ ਸਮ੍ਬਨ੍ਧੋ. ਅਞ੍ਞੇ ਵਤ੍ਤੁਮ੍ਪੀਤਿ ਸਮ੍ਬਨ੍ਧੋ. ਉਪਹਾਰਨ੍ਤਿ ਪੂਜਂ. ਉਪਟ੍ਠਾਨਨ੍ਤਿ ਪਾਰਿਚਰਿਯਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਸਯਂ ਨਚ੍ਚਾਦੀਸੁ.

੮੩੭. ਅਨ੍ਤਰਾਰਾਮੇ ਵਾਤਿ ਆਰਾਮਸ੍ਸ ਅਨ੍ਤਰੇ ਵਾ. ਬਹਿਆਰਾਮੇ ਵਾਤਿ ਆਰਾਮਸ੍ਸ ਬਹਿ ਵਾ. ਅਞ੍ਞੇਨ ਵਾਤਿ ਸਲਾਕਭਤ੍ਤਾਦੀਹਿ ਅਞ੍ਞੇਨ ਵਾ. ਤਾਦਿਸੇਨਾਤਿ ਯਾਦਿਸੋ ਚੋਰਾਦਿਉਪਦ੍ਦਵੋ, ਤਾਦਿਸੇਨਾਤਿ. ਦਸਮਂ.

ਲਸੁਣਵਗ੍ਗੋ ਪਠਮੋ.

੨. ਅਨ੍ਧਕਾਰਵਗ੍ਗੋ

੧. ਪਠਮਸਿਕ੍ਖਾਪਦ-ਅਤ੍ਥਯੋਜਨਾ

੮੩੯. ਅਨ੍ਧਕਾਰਵਗ੍ਗਸ੍ਸ ਪਠਮੇ ਅਪ੍ਪਦੀਪੇਤਿ ਉਪਲਕ੍ਖਣਵਸੇਨ ਵੁਤ੍ਤਤ੍ਤਾ ਅਞ੍ਞੇਪਿ ਆਲੋਕਾ ਗਹੇਤਬ੍ਬਾਤਿ ਦਸ੍ਸੇਨ੍ਤੋ ਆਹ ‘‘ਪਦੀਪਚਨ੍ਦਸੂਰਿਯਅਗ੍ਗੀਸੂ’’ਤਿਆਦਿ. ਅਸ੍ਸਾਤਿ ‘‘ਅਪ੍ਪਦੀਪੇ’’ਤਿਪਦਸ੍ਸ.

੮੪੧. ਨਰਹੋਅਸ੍ਸਾਦਾਪੇਕ੍ਖਾ ਹੁਤ੍ਵਾ ਚ ਰਸ੍ਸਾਦਤੋ ਅਞ੍ਞਵਿਹਿਤਾਵ ਹੁਤ੍ਵਾ ਚਾਤਿ ਯੋਜਨਾ. ਇਮਿਨਾ ‘‘ਸਨ੍ਤਿਟ੍ਠਤਿ ਵਾ ਸਲ੍ਲਪਤਿ ਵਾ’’ਤਿ ਪਦੇ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ. ਦਾਨੇਨ ਵਾ ਨਿਮਿਤ੍ਤਭੂਤੇਨ, ਪੂਜਾਯ ਵਾ ਨਿਮਿਤ੍ਤਭੂਤਾਯ ਮਨ੍ਤੇਤੀਤਿ ਯੋਜਨਾਤਿ. ਪਠਮਂ.

੨. ਦੁਤਿਯਸਿਕ੍ਖਾਪਦਂ

੮੪੨. ਦੁਤਿਯੇ ¶ ¶ ਇਦਮੇਵ ਪਦਂ ਨਾਨਨ੍ਤਿ ਸਮ੍ਬਨ੍ਧੋਤਿ. ਦੁਤਿਯਂ.

੩. ਤਤਿਯਸਿਕ੍ਖਾਪਦਂ

੮੪੬. ਤਤਿਯੇ ‘‘ਇਦਮੇਵਾ’’ਤਿ ਪਦਂ ਅਨੁਵਤ੍ਤੇਤਬ੍ਬਂ. ਤਾਦਿਸਮੇਵਾਤਿ ਪਠਮਸਦਿਸਮੇਵਾਤਿ ਅਤ੍ਥੋਤਿ. ਤਤਿਯਂ.

੪. ਚਤੁਤ੍ਥਸਿਕ੍ਖਾਪਦਂ

੮੫੦. ਚਤੁਤ੍ਥੇ ਕਣ੍ਣਸ੍ਸ ਸਮੀਪਂ ਨਿਕਣ੍ਣਂ, ਤਮੇਵ ਨਿਕਣ੍ਣਿਕਨ੍ਤਿ ਵੁਤ੍ਤੇ ਕਣ੍ਣਮੂਲਨ੍ਤਿ ਆਹ ‘‘ਕਣ੍ਣਮੂਲਂ ਵੁਚ੍ਚਤੀ’’ਤਿ. ‘‘ਕਣ੍ਣਮੂਲੇ’’ਤਿ ਇਮਿਨਾ ‘‘ਨਿਕਣ੍ਣਿਕ’’ਨ੍ਤਿ ਏਤ੍ਥ ਭੁਮ੍ਮਤ੍ਥੇ ਉਪਯੋਗਵਚਨਨ੍ਤਿ ਦਸ੍ਸੇਤਿ. ਆਹਰਣਤ੍ਥਾਯਾਤਿ ਆਹਰਾਪਨਤ੍ਥਾਯਾਤਿ. ਚਤੁਤ੍ਥਂ.

੫. ਪਞ੍ਚਮਸਿਕ੍ਖਾਪਦਂ

੮੫੪. ਪਞ੍ਚਮੇ ਤੇਸਨ੍ਤਿ ਘਰਸਾਮਿਕਾਨਂ. ਘਰਮ੍ਪੀਤਿ ਨ ਕੇਵਲਂ ਆਸਨਮੇਵ, ਘਰਮ੍ਪਿ ਸੋਧੇਮਾਤਿ ਅਤ੍ਥੋ. ਤਤੋਤਿ ਪਰਿਵਿਤਕ੍ਕਨਤੋ, ਪਰਨ੍ਤਿ ਸਮ੍ਬਨ੍ਧੋ.

੮੫੮. ਚੋਰਾ ਵਾ ਉਟ੍ਠਿਤਾ ਹੋਨ੍ਤੀਤਿ ਯੋਜਨਾਤਿ. ਪਞ੍ਚਮਂ.

੬. ਛਟ੍ਠਸਿਕ੍ਖਾਪਦਂ

੮੬੦. ਛਟ੍ਠੇ ਅਭਿਨਿਸੀਦੇਯ੍ਯਾਤਿ ਏਤ੍ਥ ਅਭਿਸਦ੍ਦੋ ਉਪਸਗ੍ਗਮਤ੍ਤੋਵਾਤਿ ਦਸ੍ਸੇਨ੍ਤੋ ਆਹ ‘‘ਨਿਸੀਦੇਯ੍ਯਾ’’ਤਿ. ਏਸੇਵ ਨਯੋ ਅਭਿਨਿਪਜ੍ਜੇਯ੍ਯਾਤਿ ਏਤ੍ਥਾਪਿ. ਦ੍ਵੇ ਆਪਤ੍ਤਿਯੋਤਿ ਸਮ੍ਬਨ੍ਧੋਤਿ. ਛਟ੍ਠਂ.

੭. ਸਤ੍ਤਮਸਿਕ੍ਖਾਪਦਂ

੮੬੪. ਸਤ੍ਤਮੇ ¶ ਸਬ੍ਬਨ੍ਤਿ ਸਕਲਂ ਵਤ੍ਤਬ੍ਬਵਚਨਨ੍ਤਿ. ਸਤ੍ਤਮਂ.

੮. ਅਟ੍ਠਮਸਿਕ੍ਖਾਪਦਂ

੮੬੯. ਅਟ੍ਠਮੇ ਅਨੁਤ੍ਤਾਨਵਚਨਂ ਨਤ੍ਥੀਤਿ. ਅਟ੍ਠਮਂ.

੯. ਨਵਮਸਿਕ੍ਖਾਪਦਂ

੮੭੫. ਨਵਮੇ ¶ ਅਭਿਸਪੇਯ੍ਯਾਤਿ ਏਤ੍ਥ ਸਪਧਾਤੁਸ੍ਸ ਅਕ੍ਕੋਸਨਤ੍ਥਂ ਅਨ੍ਤੋਕਤ੍ਵਾ ਕਰਧਾਤੁਯਾ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਪਥਂ ਕਰੇਯ੍ਯਾ’’ਤਿ. ਨਿਰਯੇ ਨਿਬ੍ਬਤ੍ਤਾਮ੍ਹੀਤਿ ਅਹਂ ਨਿਰਯੇ ਨਿਬ੍ਬਤ੍ਤਾ ਅਮ੍ਹੀਤਿ ਯੋਜਨਾ. ਨਿਰਯੇ ਨਿਬ੍ਬਤ੍ਤਤੂਤਿ ਏਸਾ ਭਿਕ੍ਖੁਨੀ ਨਿਰਯੇ ਨਿਬ੍ਬਤ੍ਤਤੂਤਿ ਯੋਜਨਾ. ਈਦਿਸਾ ਹੋਤੂਤਿ ਮਮ ਸਦਿਸਾ ਹੋਤੂਤਿ ਅਤ੍ਥੋ. ਕਾਣਾਤਿ ਏਕਕ੍ਖਿਕਾਣਾ, ਦ੍ਵਕ੍ਖਿਕਾਣਾ ਵਾ. ਕੁਣੀਤਿ ਹਤ੍ਥਪਾਦਾਦਿਵਙ੍ਕਾ.

੮੭੮. ਏਦਿਸਾਤਿ ਵਿਰੂਪਾਦਿਜਾਤਿਕਾ. ਵਿਰਮਸ੍ਸੂਤਿ ਵਿਰਮਾਹਿ. ਅਦ੍ਧਾਤਿ ਧੁਵਨ੍ਤਿ. ਨਵਮਂ.

੧੦. ਦਸਮਸਿਕ੍ਖਾਪਦਂ

੮੭੯. ਦਸਮੇ ਅਨੁਤ੍ਤਾਨਟ੍ਠਾਨਂ ਨਤ੍ਥੀਤਿ. ਦਸਮਂ.

ਅਨ੍ਧਕਾਰਵਗ੍ਗੋ ਦੁਤਿਯੋ.

੩. ਨਗ੍ਗਵਗ੍ਗੋ

੧. ਪਠਮਸਿਕ੍ਖਾਪਦ-ਅਤ੍ਥਯੋਜਨਾ

੮੮੩. ਨਗ੍ਗਵਗ੍ਗਸ੍ਸ ¶ ਪਠਮੇ ਬ੍ਰਹ੍ਮਚਰਿਯੇਨ ਚਿਣ੍ਣੇਨਾਤਿ ਚਿਣ੍ਣੇਨ ਬ੍ਰਹ੍ਮਚਰਿਯੇਨ ਕਿਂ ਨੁ ਖੋ ਨਾਮਾਤਿ ਅਤ੍ਥੋ. ‘‘ਬ੍ਰਹ੍ਮਚਰਿਯਸ੍ਸ ਚਰਣੇਨਾ’’ਤਿ ਇਮਿਨਾ ਚਿਣ੍ਣਸਦ੍ਦਸ੍ਸ ਚਰਣਂ ਚਿਣ੍ਣਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਨ ਅਞ੍ਞਂ ਚੀਵਰ’’ਨ੍ਤਿ ਇਮਿਨਾ ਏਵਤ੍ਥਂ ਦਸ੍ਸੇਤਿ, ਅਞ੍ਞਤ੍ਥਾਪੋਹਨਂ ਵਾਤਿ. ਪਠਮਂ.

੨. ਦੁਤਿਯਸਿਕ੍ਖਾਪਦਂ

੮੮੭. ਦੁਤਿਯੇ ਅਨੁਤ੍ਤਾਨਟ੍ਠਾਨਂ ਨਤ੍ਥੀਤਿ. ਦੁਤਿਯਂ.

੩. ਤਤਿਯਸਿਕ੍ਖਾਪਦਂ

੮੯੩. ਤਤਿਯੇ ¶ ਅਨਨ੍ਤਰਾਯਿਕਿਨੀਤਿ ਏਤ੍ਥ ਨਤ੍ਥਿ ਅਨ੍ਤਰਾਯੋ ਏਤਿਸ੍ਸਾਤਿ ਅਨਨ੍ਤਰਾਯਾ, ਸਾ ਏਵ ਅਨਨ੍ਤਰਾਯਿਕਿਨੀਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਨਨ੍ਤਰਾਯਾ’’ਤਿ. ਤਤਿਯਂ.

੪. ਚਤੁਤ੍ਥਸਿਕ੍ਖਾਪਦਂ

੮੯੮. ਚਤੁਤ੍ਥੇ ਪਞ੍ਚਾਹਨ੍ਤਿ ਸਮਾਹਾਰਦਿਗੁ, ਣਿਕਪਚ੍ਚਯੋ ਸ੍ਵਤ੍ਥੋ. ਸਙ੍ਘਾਟਿਚਾਰੋਤਿਏਤ੍ਥ ਕੇਨਟ੍ਠੇਨ ਸਙ੍ਘਾਟਿ ਨਾਮ, ਚਾਰਸਦ੍ਦੋ ਕਿਮਤ੍ਥੋਤਿ ਆਹ ‘‘ਪਰਿਭੋਗਵਸੇਨ ਵਾ’’ਤਿਆਦਿ. ਤਤ੍ਥ ਸਙ੍ਘਟਿਤਟ੍ਠੇਨਾਤਿ ਸਂਹਰਿਤਟ੍ਠੇਨ. ਇਮਿਨਾ ‘‘ਕੇਨਟ੍ਠੇਨ ਸਙ੍ਘਾਟਿ ਨਾਮਾ’’ਤਿ ਪੁਚ੍ਛਂ ਵਿਸਜ੍ਜੇਤਿ. ‘‘ਪਰਿਵਤ੍ਤਨ’’ਨ੍ਤਿ ਇਮਿਨਾ ‘‘ਚਾਰਸਦ੍ਦੋ ਕਿਮਤ੍ਥੋ’’ਤਿ ਚੋਦਨਂ ਪਰਿਹਰਤਿ. ਪਞ੍ਚਸੂਤਿ ਤਿਚੀਵਰਂ ਉਦਕਸਾਟਿਕਾ ਸਂਕਚ੍ਚਿਕਾਤਿ ਪਞ੍ਚਸੂਤਿ. ਚਤੁਤ੍ਥਂ.

੫. ਪਞ੍ਚਮਸਿਕ੍ਖਾਪਦਂ

੯੦੩. ਪਞ੍ਚਮੇ ‘‘ਚੀਵਰਸਙ੍ਕਮਨੀਯ’’ਨ੍ਤਿਏਤ੍ਥ ਸਙ੍ਕਮੇਤਬ੍ਬਂ ਪਟਿਦਾਤਬ੍ਬਨ੍ਤਿ ਸਙ੍ਕਮਨੀਯਨ੍ਤਿ ਕਮੁਧਾਤੁਸ੍ਸ ਪਟਿਦਾਨਤ੍ਥਞ੍ਚ ਅਨੀਯਸਦ੍ਦਸ੍ਸ ਕਮ੍ਮਤ੍ਥਞ੍ਚ, ‘ਚੀਵਰਞ੍ਚ ਤਂ ਸਙ੍ਕਮਨੀਯਞ੍ਚੇ’ਤਿ ਚੀਵਰਸਙ੍ਕਮਨੀਯਨ੍ਤਿ ¶ ਵਿਸੇਸਨਪਰਪਦਭਾਵਞ੍ਚ ਦਸ੍ਸੇਨ੍ਤੋ ਆਹ ‘‘ਸਙ੍ਕਮੇਤਬ੍ਬਂ ਚੀਵਰ’’ਨ੍ਤਿ. ਤਤ੍ਥ ‘‘ਸਙ੍ਕਮੇਤਬ੍ਬਂ ਚੀਵਰ’’ਨ੍ਤਿ ਇਮਿਨਾ ਕਮ੍ਮਤ੍ਥਞ੍ਚ ਵਿਸੇਸਨਪਰਪਦਭਾਵਞ੍ਚ ਦਸ੍ਸੇਤਿ. ‘‘ਪਟਿਦਾਤਬ੍ਬਚੀਵਰ’’ਨ੍ਤਿ ਇਮਿਨਾ ਕਮੁਧਾਤੁਯਾ ਅਤ੍ਥਂ ਦਸ੍ਸੇਤਿ ਅਧਿਪ੍ਪਾਯਵਸੇਨਾਤਿ. ਪਞ੍ਚਮਂ.

੬. ਛਟ੍ਠਸਿਕ੍ਖਾਪਦਂ

੯੦੯. ਛਟ੍ਠੇ ‘‘ਅਞ੍ਞਂ ਪਰਿਕ੍ਖਾਰ’’ਨ੍ਤਿਏਤ੍ਥ ਪਰਿਕ੍ਖਾਰਸ੍ਸ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਯਂਕਿਞ੍ਚੀ’’ਤਿਆਦਿ. ਯਂਕਿਞ੍ਚਿ ਅਞ੍ਞਤਰਨ੍ਤਿ ਸਮ੍ਬਨ੍ਧੋ. ਕਿਤ੍ਤਕਂਅਗ੍ਘਨਕਨ੍ਤਿ ਕਿਂ ਪਮਾਣੇਨ ਅਗ੍ਘੇਨ ਅਰਹਂ ਚੀਵਰਂ. ਦਾਤੁਕਾਮਤ੍ਥਾਤਿ ਤੁਮ੍ਹੇ ਦਾਤੁਕਾਮਾ ਭਵਥਾਤਿ ਅਤ੍ਥੋ. ਕਤਿਪਾਹੇਨਾਤਿ ਕਤਿਪਯਾਨਿ ਅਹਾਨਿ ਕਤਿਪਾਹਂ, ਯਕਾਰਲੋਪੋ. ਕਤਿਪਯਸਦ੍ਦੋਹਿ ਦ੍ਵਿਤਿਵਾਚਕੋ ਰੂਲ਼੍ਹੀਸਦ੍ਦੋ ¶ , ਤੇਨ ਕਤਿਪਾਹੇਨ. ਸਮਗ੍ਘਨ੍ਤਿ ਅਪ੍ਪਗ੍ਘਂ. ਸਂਸਦ੍ਦੋ ਹਿ ਅਪ੍ਪਤ੍ਥਵਾਚਕੋਤਿ. ਛਟ੍ਠਂ.

੭. ਸਤ੍ਤਮਸਿਕ੍ਖਾਪਦਂ

੯੧੧. ਸਤ੍ਤਮੇ ‘‘ਵਿਪਕ੍ਕਮਿਂਸੂ’’ਤਿ ਏਤ੍ਥ ਵਿਵਿਧਂ ਠਾਨਂ ਪਕ੍ਕਮਿਂਸੂਤਿ ਦਸ੍ਸੇਨ੍ਤੋ ਆਹ ‘‘ਤਤ੍ਥ ਤਤ੍ਥ ਅਗਮਂਸੂ’’ਤਿ. ਅਮ੍ਹਾਕਮ੍ਪਿ ਆਗਮਨਨ੍ਤਿ ਸਮ੍ਬਨ੍ਧੋ.

੯੧੫. ਕਤਿਪਾਹੇਨ ਉਪ੍ਪਜ੍ਜਿਸ੍ਸਤੀਤਿ ਕਤਿਪਾਹੇਨ ਚੀਵਰਂ ਉਪ੍ਪਜ੍ਜਿਸ੍ਸਤਿ. ਤਤੋਤਿ ਤਸ੍ਮਿਂ ਚੀਵਰੁਪ੍ਪਜ੍ਜਨਕਾਲੇਤਿ. ਸਤ੍ਤਮਂ.

੮. ਅਟ੍ਠਮਸਿਕ੍ਖਾਪਦਂ

੯੧੬. ਅਟ੍ਠਮੇ ਯੇ ਨਾਟਕਂ ਨਾਟੇਨ੍ਤਿ, ਤੇ ਨਟਾ ਨਾਮਾਤਿ ਯੋਜਨਾ. ਇਮਿਨਾ ਨਟਕਂ ਨਾਟੇਨ੍ਤੀਤਿ ਨਟਾਤਿ ਵਚਨਤ੍ਥਂ ਦਸ੍ਸੇਤਿ. ਯੇ ਨਚ੍ਚਨ੍ਤਿ, ਤੇ ਨਾਟਕਾ ਨਾਮਾਤਿ ਯੋਜਨਾ. ਇਮਿਨਾ ਸਯਂ ਨਟਨ੍ਤੀਤਿ ਨਾਟਕਾਤਿ ਵਚਨਤ੍ਥਂ ਦੀਪੇਤਿ. ਵਂਸਵਰਤ੍ਤਾਦੀਸੂਤਿ ਏਤ੍ਥ ਵਂਸੋ ਨਾਮ ਵੇਣੁ. ਵਰਤ੍ਤਾ ਨਾਮ ਨਦ੍ਧਿਕਾ. ਆਦਿਸਦ੍ਦੇਨ ਰਜ੍ਜੁਆਦਯੋ ਸਙ੍ਗਣ੍ਹਾਤਿ. ਯੇ ਲਙ੍ਘਨਕਮ੍ਮਂ ਕਰੋਨ੍ਤਿ, ਤੇ ਲਙ੍ਘਕਾ ਨਾਮਾਤਿ ਯੋਜਨਾ. ਮਾਯਾਕਾਰਾਤਿ ਏਤ੍ਥ ਮਾਯਾ ਨਾਮ ਮਯਨਾਮਕੇਨ ਅਸੁਰੇਨ ਸੁਰੇ ਚਲਯਿਤੁਂ ਕਤਤ੍ਤਾ ਮਯਸ੍ਸ ਏਸਾਤਿ ਮਾਯਾ, ਤਂ ਕਰੋਤੀਤਿ ਮਾਯਾਕਾਰੋ, ਮਯਨਾਮਕੋ ਅਸੁਰੋਯੇਵ. ਅਞ੍ਞੇ ਪਨ ਰੂਲ਼੍ਹੀਵਸੇਨ ‘‘ਮਾਯਾਕਾਰਾ’’ਤਿ ਵੁਚ੍ਚਨ੍ਤਿ. ਸੋਕੇਨ ਝਾਯਨਂ ਡਯ੍ਹਨਂ ਸੋਕਜ੍ਝਾਯਂ, ਸੁਰਾਨਂ ਸੋਕਜ੍ਝਾਯਂ ਕਰੋਤੀਤਿ ਸੋਕਜ੍ਝਾਯਿਕੋ, ਮਯਨਾਮਕੋ ਅਸੁਰੋਯੇਵ. ਅਞ੍ਞੇ ਪਨ ਰੂਲ਼੍ਹੀਵਸੇਨ ‘‘ਸੋਕਜ੍ਝਾਯਿਕਾ’’ਤਿ ¶ ਵੁਚ੍ਚਨ੍ਤਿ. ਇਤਿ ਇਮਮਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸੋਕਜ੍ਝਾਯਿਕਾ ਨਾਮ ਮਾਯਾਕਾਰਾ’’ਤਿ. ਕੁਮ੍ਭਥੁਣਿਕਾ ਨਾਮਾਤਿ ਏਤ੍ਥ ਵਿਸ੍ਸਟ੍ਠਤ੍ਤਾ ਥਵੀਯਤੀਤਿ ਥੁਣੋ, ਸਦ੍ਦੋ. ਕੁਮ੍ਭਸ੍ਸ ਥੁਣੋ ਕੁਮ੍ਭਥੁਣੋ. ਤੇਨ ਕੀਲ਼ਨ੍ਤੀਤਿ ਕੁਮ੍ਭਥੁਣਿਕਾ, ਇਤਿ ਇਮਮਤ੍ਥਂ ਦਸ੍ਸੇਤਿ ‘‘ਘਟਕੇਨ ਕੀਲ਼ਨਕਾ’’ਤਿ ਇਮਿਨਾ. ਬਿਮ੍ਬਿਸਕਨ੍ਤਿ ਚਤੁਰਸ੍ਸਅਮ੍ਬਣਤਾਲ਼ਨਂ, ਤਂ ਵਾਦੇਨ੍ਤੀਤਿ ਬਿਮ੍ਬਿਸਕਵਾਦਕਾਤਿ. ਅਟ੍ਠਮਂ.

੯. ਨਵਮਸਿਕ੍ਖਾਪਦਂ

੯੨੧. ਨਵਮੇ ¶ ਤੇਸਨ੍ਤਿ ਯੇ ‘‘ਨ ਮਯਂ ਅਯ੍ਯੇ ਸਕ੍ਕੋਮਾ’’ਤਿ ਵਦਨ੍ਤਿ, ਤੇਸਂ. ਦਸ੍ਸਤੀਤਿ ਅਚ੍ਛਾਦੇਸ੍ਸਤੀਤਿ. ਨਵਮਂ.

੧੦. ਦਸਮਸਿਕ੍ਖਾਪਦਂ

੯੨੭. ਦਸਮੇ ਯਸ੍ਸਾਤਿ ਕਥਿਨਸ੍ਸ. ਉਬ੍ਭਾਰਮੂਲਕੋਤਿ ਉਦ੍ਧਾਰਮੂਲਕੋ. ਸਦ੍ਧਾਪਰਿਪਾਲਨਤ੍ਥਨ੍ਤਿ ਕਥਿਨੁਦ੍ਧਾਰਂ ਯਾਚਨ੍ਤਸ੍ਸ ਸਦ੍ਧਾਯ ਪਰਿਪਾਲਨਤ੍ਥਨ੍ਤਿ. ਦਸਮਂ.

ਨਗ੍ਗਵਗ੍ਗੋ ਤਤਿਯੋ.

੪. ਤੁਵਟ੍ਟਵਗ੍ਗੋ

੧. ਪਠਮਸਿਕ੍ਖਾਪਦ-ਅਤ੍ਥਯੋਜਨਾ

੯੩੩. ਤੁਵਟ੍ਟਵਗ੍ਗਸ੍ਸ ਪਠਮੇ ‘‘ਤੁਵਟ੍ਟ ਨਿਪਜ੍ਜਾਯ’’ਨ੍ਤਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੮ ਟਕਾਰਨ੍ਤਧਾਤੁ) ਵੁਤ੍ਤਤ੍ਤਾ ‘‘ਤੁਵਟ੍ਟੇਯ੍ਯੁਨ੍ਤਿ ਨਿਪਜ੍ਜੇਯ੍ਯੁ’’ਨ੍ਤਿ ਵੁਤ੍ਤਨ੍ਤਿ. ਪਠਮਂ.

੨. ਦੁਤਿਯਸਿਕ੍ਖਾਪਦਂ

੯੩੭. ਦੁਤਿਯੇ ¶ ਏਕਤ੍ਥਰਣਪਾਵੁਰਣਨ੍ਤਿਏਤ੍ਥ ਉਤ੍ਤਰਪਦਾਨਂ ਦ੍ਵਨ੍ਦਭਾਵਂ, ਪੁਬ੍ਬਪਦੇਨ ਚ ਬਾਹਿਰਤ੍ਥਸਮਾਸਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਏਕ’’ਨ੍ਤਿਆਦਿ. ਤਤ੍ਥ ਚੇਵ, ਚਸਦ੍ਦੇਹਿ ਦ੍ਵਨ੍ਦਭਾਵਂ ਦੀਪੇਤਿ, ‘‘ਏਤਾਸ’’ਨ੍ਤਿਇਮਿਨਾ ਬਾਹਿਰਤ੍ਥਸਮਾਸਭਾਵਂ. ਏਤਨ੍ਤਿ ‘‘ਏਕਤ੍ਥਰਣਪਾਵੁਰਣਾ’’ਤਿ ਏਤਂ ਨਾਮਨ੍ਤਿ. ਦੁਤਿਯਂ.

੩. ਤਤਿਯਸਿਕ੍ਖਾਪਦਂ

੯੪੧. ਤਤਿਯੇ ਉਲ਼ਾਰਕੁਲਾਤਿ ਜਾਤਿਸੇਟ੍ਠਕੁਲਾ, ਇਸ੍ਸਰਿਯਭੋਗਾਦੀਹਿ ਵਾ ਵਿਪੁਲਕੁਲਾ. ਗੁਣੇਹੀਤਿ ਸੀਲਾਦਿਗੁਣੇਹਿ. ‘‘ਉਲ਼ਾਰਾਤਿ ਸਮ੍ਭਾਵਿਤਾ’’ਤਿ ਇਮਿਨਾ ਇਤਿਲੋਪਤੁਲ੍ਯਾਧਿਕਰਣਸਮਾਸਂ ਦਸ੍ਸੇਤਿ.

‘‘ਅਭਿਭੂਤਾ’’ਤਿ ¶ ਇਮਿਨਾ ‘‘ਅਪਕਤਾ’’ਤਿ ਏਤ੍ਥ ਕਰਧਾਤੁ ਸਬ੍ਬਧਾਤ੍ਵਤ੍ਥਵਾਚੀਪਿ ਇਧ ਅਪਪੁਬ੍ਬਤ੍ਤਾ ਵਿਸੇਸਤੋ ਅਭਿਭਵਨਤ੍ਥੇ ਵਤ੍ਤਤੀਤਿ ਦਸ੍ਸੇਤਿ. ਏਤਾਸਨ੍ਤਿ ਭਿਕ੍ਖੁਨੀਨਂ. ‘‘ਸਞ੍ਞਾਪਯਮਾਨਾ’’ਤਿ ਇਮਿਨਾ ਸਞ੍ਞਾਪਨਂ ਸਞ੍ਞਤ੍ਤੀਤਿ ਵਚਨਤ੍ਥਂ ਦਸ੍ਸੇਤਿ. ਹੇਤੂਦਾਹਰਣਾਦੀਹੀਤਿ ਏਤ੍ਥ ਆਦਿਸਦ੍ਦੇਨ ਉਪਮਾਦਯੋ ਸਙ੍ਗਣ੍ਹਾਤਿ. ‘‘ਵਿਵਿਧੇਹਿ ਨਯੇਹਿ ਞਾਪਨਾ’’ਤਿ ਇਮਿਨਾ ਵਿਵਿਧੇਹਿ ਞਾਪਨਂ ਵਿਞ੍ਞਤ੍ਤੀਤਿ ਵਚਨਤ੍ਥਂ ਦਸ੍ਸੇਤਿ.

੯੪੩. ਚਙ੍ਕਮਨੇ ਪਦਵਾਰਗਣਨਾਯ ਆਪਤ੍ਤਿਯਾ ਨ ਕਾਰੇਤਬ੍ਬੋਤਿ ਆਹ ‘‘ਨਿਵਤ੍ਤਨਗਣਨਾਯਾ’’ਤਿ. ਪਦਾਦਿਗਣਨਾਯਾਤਿ ਪਦਅਨੁਪਦਾਦਿਗਣਨਾਯਾਤਿ. ਤਤਿਯਂ.

੪. ਚਤੁਤ੍ਥਸਿਕ੍ਖਾਪਦਂ

੯੪੯. ਚਤੁਤ੍ਥੇ ਅਨੁਤ੍ਤਾਨਟ੍ਠਾਨਂ ਨਤ੍ਥੀਤਿ. ਚਤੁਤ੍ਥਂ.

੫. ਪਞ੍ਚਮਸਿਕ੍ਖਾਪਦਂ

੯੫੨. ਪਞ੍ਚਮੇ ਆਣਤ੍ਤਾ ਭਿਕ੍ਖੁਨੀਤਿ ਯੋਜਨਾ. ਇਦਞ੍ਚ ਪਚ੍ਚਾਸਨ੍ਨਵਸੇਨ ਵੁਤ੍ਤਂ ਯਂਕਿਞ੍ਚਿਪਿ ਆਣਾਪੇਤੁਂ ਸਕ੍ਕੁਣੇਯ੍ਯਤ੍ਤਾਤਿ. ਪਞ੍ਚਮਂ.

੬-੯. ਛਟ੍ਠਾਦਿਸਿਕ੍ਖਾਪਦਂ

੯੫੫. ਛਟ੍ਠ-ਸਤ੍ਤਮ-ਅਟ੍ਠਮ-ਨਵਮੇਸੁ ¶ ਅਨੁਤ੍ਤਾਨਵਚਨਂ ਨਤ੍ਥੀਤਿ. ਛਟ੍ਠ ਸਤ੍ਤਮ ਅਟ੍ਠਮ ਨਵਮਾਨਿ.

੧੦. ਦਸਮਸਿਕ੍ਖਾਪਦਂ

੯੭੩. ਦਸਮੇ ਅਹੁਨ੍ਦਰਿਕਾਤਿ ਤਸ੍ਮਿਂ ਕਾਲੇ, ਦੇਸੇ ਵਾ ਸਮ੍ਬਾਧਸ੍ਸ ਨਾਮਮੇਤਨ੍ਤਿ ਆਹ ‘‘ਅਹੁਨ੍ਦਰਿਕਾਤਿ ਸਮ੍ਬਾਧਾ’’ਤਿ.

੯੭੫. ਯਥਾ ‘‘ਉਤ੍ਤਰਿਛਪ੍ਪਞ੍ਚਵਾਚਾਹੀ’’ਤਿ (ਪਾਚਿ. ੬੨-੬੫) ਏਤ੍ਥ ਪਞ੍ਚਸਦ੍ਦੋ ਨ ਕੋਚਿ ਅਤ੍ਥੋ, ਵਾਚਾਸਿਲਿਟ੍ਠਤ੍ਥਂ ਲੋਕਵੋਹਾਰਵਸੇਨ ਵੁਤ੍ਤੋ, ਨ ਏਵਮਿਧ, ਇਧ ਪਨ ਅਤ੍ਥੋ ਅਤ੍ਥਿ, ਪਞ੍ਚ ਯੋਜਨਾਨਿ ਗਚ੍ਛਨ੍ਤਿਯਾਪਿ ਅਨਾਪਤ੍ਤਿਯੇਵਾਤਿ ਆਹ ¶ ‘‘ਪਵਾਰੇਤ੍ਵਾ…ਪੇ… ਅਨਾਪਤ੍ਤੀ’’ਤਿ. ਪਚ੍ਚਾਗਚ੍ਛਤੀਤਿ ਪਟਿਨਿਵਤ੍ਤੇਤ੍ਵਾ ਆਗਚ੍ਛਤੀਤਿ. ਦਸਮਂ.

ਤੁਵਟ੍ਟਵਗ੍ਗੋ ਚਤੁਤ੍ਥੋ.

੫. ਚਿਤ੍ਤਾਗਾਰਵਗ੍ਗੋ

੧. ਪਠਮਸਿਕ੍ਖਾਪਦ-ਅਤ੍ਥਯੋਜਨਾ

੯੭੮. ਚਿਤ੍ਤਾਗਾਰਵਗ੍ਗਸ੍ਸ ਪਠਮੇ ਰਞ੍ਞੋ ਕੀਲ਼ਨਟ੍ਠਾਨਂ ਅਗਾਰਂ ਰਾਜਾਗਾਰਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਰਞ੍ਞੋ ਕੀਲ਼ਨਘਰ’’ਨ੍ਤਿ. ਚਿਤ੍ਤਂ ਅਗਾਰਂ ਚਿਤ੍ਤਾਗਾਰਂ. ਆਰਾਮਨ੍ਤਿ ਨਗਰਤੋ ਨਾਤਿਦੂਰਆਰਾਮੋਤਿ ਆਹ ‘‘ਉਪਵਨ’’ਨ੍ਤਿ. ਉਯ੍ਯਾਨਨ੍ਤਿ ਸਮ੍ਪਨ੍ਨਪੁਪ੍ਫਫਲਤਾਯ ਉਦ੍ਧਂ ਉਲ੍ਲੋਕੇਤ੍ਵਾ ਮਨੁਸ੍ਸਾ ਯਨ੍ਤਿ ਗਚ੍ਛਨ੍ਤਿ ਏਤ੍ਥਾਤਿ ਉਯ੍ਯਾਨਂ. ਪੋਕ੍ਖਰਣਿਨ੍ਤਿ ਪੋਕ੍ਖਰਂ ਪਦੁਮਂ ਨੇਤੀਤਿ ਪੋਕ੍ਖਰਣੀ. ਪਞ੍ਚਪੀਤਿ ਰਾਜਾਗਾਰਾਦੀਨਿ ਪਞ੍ਚਪਿ. ਸਬ੍ਬਤ੍ਥਾਤਿ ਦਸ੍ਸਨਤ੍ਥਾਯ ਗਮਨੇ ਚ ਗਨ੍ਤ੍ਵਾ ਪਸ੍ਸਨੇ ਚਾਤਿ ਸਬ੍ਬੇਸੁ.

੯੮੧. ‘‘ਅਜ੍ਝਾਰਾਮੇ’’ਤਿਆਦਿਨਾ ¶ ਆਰਾਮੇ ਠਿਤਾਯ ਆਰਾਮਤੋ ਬਹਿ ਕਤੇ ਰਾਜਾਗਾਰਾਦਿਕੇ ਪਸ੍ਸਨ੍ਤਿਯਾਪਿ ਅਨਾਪਤ੍ਤੀਤਿ ਦਸ੍ਸੇਤਿ. ਤਾਨੀਤਿ ਰਾਜਾਗਾਰਾਦੀਨੀਤਿ. ਪਠਮਂ.

੨. ਦੁਤਿਯਸਿਕ੍ਖਾਪਦਂ

੯੮੨. ਦੁਤਿਯੇ ਅਨੁਤ੍ਤਾਨਟ੍ਠਾਨਂ ਨਤ੍ਥੀਤਿ. ਦੁਤਿਯਂ.

੩. ਤਤਿਯਸਿਕ੍ਖਾਪਦਂ

੯੮੮. ਤਤਿਯੇ ਯਤ੍ਤਕਨ੍ਤਿ ਯਤ੍ਤਕਂ ਸੁਤ੍ਤਨ੍ਤਿ ਸਮ੍ਬਨ੍ਧੋ. ਅਞ੍ਛਿਤਨ੍ਤਿ ਕਡ੍ਢਿਤਂ. ਤਸ੍ਮਿਨ੍ਤਿ ਤਤ੍ਤਕੇ ਸੁਤ੍ਤੇਤਿ ਸਮ੍ਬਨ੍ਧੋ. ਤਕ੍ਕਮ੍ਹੀਤਿ ਏਤ੍ਥ ਤਕ੍ਕੋਤਿ ਏਕੋ ਅਯੋਮਯੋ ਸੁਤ੍ਤਕਨ੍ਤਨਸ੍ਸ ਉਪਕਰਣਵਿਸੇਸੋ. ਸੋ ਹਿ ਤਕੀਯਤਿ ਸੁਤ੍ਤਂ ਬਨ੍ਧੀਯਤਿ ਏਤ੍ਥ, ਏਤੇਨਾਤਿ ਵਾ ਤਕ੍ਕੋਤਿ ਵੁਚ੍ਚਤਿ, ਤਸ੍ਮਿਂ. ਕਨ੍ਤਨਤੋਤਿ ਕਨ੍ਤੀਯਤੇ ਕਪ੍ਪਾਸਾਦਿਭਾਵਸ੍ਸ ਛਿਨ੍ਦੀਯਤੇ ਕਨ੍ਤਨਂ, ਤਤੋ.

੯੮੯. ਦਸਿਕਸੁਤ੍ਤਾਦਿਨ੍ਤਿ ¶ ਏਤ੍ਥ ਦਸਾਤਿ ਵਤ੍ਥਸ੍ਸਾਵਯਵੋ. ਸੋ ਹਿ ਦਿਯ੍ਯਤਿ ਅਵਖਣ੍ਡੀਯਤੀਤਿ ਦਸਾਤਿ ਵੁਚ੍ਚਤਿ, ਤਸ੍ਸਂ ਦਸਾਯਂ ਪਵਤ੍ਤਂ ਦਸਿਕਂ, ਤਮੇਵ ਸੁਤ੍ਤਂ ਦਸਿਕਸੁਤ੍ਤਂ. ਆਦਿਸਦ੍ਦੇਨ ਵਕ੍ਖਮਾਨਂ ਦੁਕ੍ਕਨ੍ਤਿਤਸੁਤ੍ਤਾਦਿਂ ਸਙ੍ਗਣ੍ਹਾਤੀਤਿ. ਤਤਿਯਂ.

੪. ਚਤੁਤ੍ਥਸਿਕ੍ਖਾਪਦਂ

੯੯੨. ਚਤੁਤ੍ਥੇ ਆਦਿਂ ਕਤ੍ਵਾਤਿ ਧੋਵਨਾਦੀਨਿ ਆਦਿਂ ਕਤ੍ਵਾ. ਖਾਦਨੀਯਾਦੀਸੂਤਿ ਪੂਵਖਾਦਨੀਯਾਦੀਸੁ. ਰੂਪਗਣਨਾਯਾਤਿ ਪੂਵਾਦੀਨਂ ਸਣ੍ਠਾਨਗਣਨਾਯ.

੯੯੩. ਯਾਗੁਪਾਨੇਤ੍ਤ ਯਾਗੁਸਙ੍ਖਾਤੇ ਪਾਨੇ. ਤੇਸਨ੍ਤਿ ਮਨੁਸ੍ਸਾਨਂ. ਵੇਯ੍ਯਾਵਚ੍ਚਕਰਟ੍ਠਾਨੇ ਠਪੇਤ੍ਵਾਤਿ ਮਾਤਾਪਿਤਰੋ ਅਤ੍ਤਨੋ ਵੇਯ੍ਯਾਵਚ੍ਚਕਰਟ੍ਠਾਨੇ ਠਪੇਤ੍ਵਾਤਿ. ਚਤੁਤ੍ਥਂ.

੫. ਪਞ੍ਚਮਸਿਕ੍ਖਾਪਦਂ

੯੯੬. ਪਞ੍ਚਮੇ ਵਿਨਿਚ੍ਛਿਨਨ੍ਤੀਤਿ ਅਧਿਕਰਣਂ ਵਿਨਿਚ੍ਛਿਨਨ੍ਤੀ ਭਿਕ੍ਖੁਨੀਤਿ ਯੋਜਨਾਤਿ. ਪਞ੍ਚਮਂ.

੬. ਛਟ੍ਠਸਿਕ੍ਖਾਪਦਂ

੯੯੯. ਛਟ੍ਠੇ ¶ ਅਨੁਤ੍ਤਾਨਵਚਨਂ ਨਤ੍ਥੀਤਿ.

੭. ਸਤ੍ਤਮਸਿਕ੍ਖਾਪਦਂ

੧੦੦੭. ਸਤ੍ਤਮੇ ‘‘ਪੁਨ ਪਰਿਯਾਯੇ’’ਤਿ ਏਤ੍ਥ ਪਰਿਯਾਯਸਦ੍ਦੋ ਵਾਰਵੇਵਚਨੋਤਿ ਆਹ ‘‘ਪੁਨ ਵਾਰੇ’’ਤਿ. ਮਹਗ੍ਘਚੀਵਰਨ੍ਤਿ ਮਹਗ੍ਘਂ ਆਵਸਥਚੀਵਰਨ੍ਤਿ. ਸਤ੍ਤਮਂ.

੮. ਅਟ੍ਠਮਸਿਕ੍ਖਾਪਦਂ

੧੦੦੮. ਅਟ੍ਠਮੇ ਅਨਿਸ੍ਸਜ੍ਜਿਤ੍ਵਾਤਿ ਏਤ੍ਥ ਬ੍ਰਹ੍ਮਦੇਯ੍ਯੇਨ ਨ ਅਨਿਸ੍ਸਜ੍ਜਨਂ, ਅਥ ਖੋ ਤਾਵਕਾਲਿਕਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਰਕ੍ਖਨਤ੍ਥਾਯਾ’’ਤਿਆਦਿ.

੧੦੧੨. ਪਟਿਜਗ੍ਗਿਕਨ੍ਤਿ ¶ ਰਕ੍ਖਣਕਂ. ਵਚੀਭੇਦਨ੍ਤਿ ‘‘ਪਟਿਜਗ੍ਗਾਹੀ’’ਤਿ ਵਚੀਭੇਦਂ. ਰਟ੍ਠੇਤਿ ਵਿਜਿਤੇ. ਤਞ੍ਹਿ ਰਠਨ੍ਤਿ ਗਾਮਨਿਗਮਾਦਯੋ ਤਿਟ੍ਠਨ੍ਤਿ ਏਤ੍ਥਾਤਿ ਰਟ੍ਠਨ੍ਤਿ ਵੁਚ੍ਚਤੀਤਿ. ਅਟ੍ਠਮਂ.

੯. ਨਵਮਸਿਕ੍ਖਾਪਦਂ

੧੦੧੫. ਨਵਮੇ ਸਿਪ੍ਪਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ ‘‘ਹਤ੍ਥਿਸਿਪ੍ਪਞ੍ਚ ਅਸ੍ਸਸਿਪ੍ਪਞ੍ਚ ਰਥਸਿਪ੍ਪਞ੍ਚ ਧਨੁਸਿਪ੍ਪਞ੍ਚ ਥਰੁਸਿਪ੍ਪਞ੍ਚਾ’’ਤਿ. ਤਤ੍ਥ ਥਰੁਸਿਪ੍ਪਨ੍ਤਿ ਅਸਿਕੀਲ਼ਨਸਿਪ੍ਪਂ. ਮਨ੍ਤਸਦ੍ਦੋਪਿ ਪਚ੍ਚੇਕਂ ਯੋਜੇਤਬ੍ਬੋ ‘‘ਆਥਬ੍ਬਣਮਨ੍ਤੋ ਚ ਖੀਲਨਮਨ੍ਤੋ ਚ ਵਸੀਕਰਣਮਨ੍ਤੋ ਚ ਸੋਸਾਪਨਮਨ੍ਤੋ ਚਾ’’ਤਿ. ਤਤ੍ਥ ਆਥਬ੍ਬਣਮਨ੍ਤੋਤਿ ਆਥਬ੍ਬਣਵੇਦੇਨ ਵਿਹਿਤੋ ਪਰੂਪਘਾਤਕਰੋ ਮਨ੍ਤੋ. ਖੀਲਨਮਨ੍ਤੋਤਿ ਸਾਰਦਾਰੁਖੀਲਂ ਮਨ੍ਤੇਨ ਜਪ੍ਪਿਤ੍ਵਾ ਪਥਵਿਯਂ ਨਿਖਣਿਤ੍ਵਾ ਧਾਰਣਮਨ੍ਤੋ. ਵਸੀਕਰਣਮਨ੍ਤੋਤਿ ਮਨ੍ਤੇਨ ਜਪ੍ਪਿਤ੍ਵਾ ਪਰਸ੍ਸ ਉਮ੍ਮਤ੍ਤਭਾਵਮਾਪਨ੍ਨਕਰਣੋ ਮਨ੍ਤੋ. ਸੋਸਾਪਨਮਨ੍ਤੋਤਿ ਪਰਸ੍ਸ ਮਂਸਲੋਹਿਤਾਦਿਸੋਸਾਪਨਮਨ੍ਤੋ. ਅਗਦਪਯੋਗੋਤਿ ਭੁਸਵਿਸਸ੍ਸ ਪਯੋਜਨਂ. ਆਦਿਸਦ੍ਦੇਨ ਅਞ੍ਞੇਪਿ ਪਰੂਪਘਾਤਕਰਣੇ ਸਿਪ੍ਪੇ ਸਙ੍ਗਣ੍ਹਾਤਿ. ਯਕ੍ਖਪਰਿਤ੍ਤਨ੍ਤਿ ਯਕ੍ਖੇਹਿ ਸਮਨ੍ਤਤੋ ਤਾਣਂ. ਨਾਗਮਣ੍ਡਲਨ੍ਤਿ ਸਪ੍ਪਾਨਂ ਪਵੇਸਨਨਿਵਾਰਣਤ੍ਥਂ ਮਣ੍ਡਲਬਨ੍ਧਮਨ੍ਤੋ. ਆਦਿਸਦ੍ਦੇਨ ਵਿਸਪਟਿਹਨਨਮਨ੍ਤਾਦਯੋ ਸਙ੍ਗਣ੍ਹਾਤੀਤਿ. ਨਵਮਂ.

੧੦. ਦਸਮਸਿਕ੍ਖਾਪਦਂ

੧੦੧੮. ਦਸਮੇ ¶ ਅਨੁਤ੍ਤਾਨਵਚਨਂ ਨਤ੍ਥੀਤਿ. ਦਸਮਂ.

ਚਿਤ੍ਤਾਗਾਰਵਗ੍ਗੋ ਪਞ੍ਚਮੋ.

੬. ਆਰਾਮਵਗ੍ਗੋ

੧. ਪਠਮਸਿਕ੍ਖਾਪਦ-ਅਤ੍ਥਯੋਜਨਾ

੧੦੨੫. ਆਰਾਮਵਗ੍ਗਸ੍ਸ ਪਠਮੇ ਉਪਚਾਰਨ੍ਤਿ ਅਪਰਿਕ੍ਖਿਤ੍ਤਸ੍ਸ ਆਰਾਮਸ੍ਸ ਪਰਿਕ੍ਖੇਪਾਰਹਟ੍ਠਾਨਂ ਉਪਚਾਰਂ.

੧੦੨੭. ‘‘ਸੀਸਾਨੁਲੋਕਿਕਾ’’ਤਿ ¶ ਸਾਮਞ੍ਞਤੋ ਵੁਤ੍ਤੇਪਿ ਭਿਕ੍ਖੁਨੀਨਮੇਵ ਸੀਸਨ੍ਤਿ ਆਹ ‘‘ਭਿਕ੍ਖੁਨੀਨ’’ਨ੍ਤਿ. ਯਤ੍ਥਾਤਿ ਯਸ੍ਮਿਂ ਠਾਨੇਤਿ. ਪਠਮਂ.

੨. ਦੁਤਿਯਸਿਕ੍ਖਾਪਦਂ

੧੦੨੮. ਦੁਤਿਯੇ ਅਬ੍ਭਨ੍ਤਰੋਤਿ ਅਬ੍ਭਨ੍ਤਰੇ ਪਰਿਯਾਪਨ੍ਨੋ, ਜਾਤੋ ਵਾ. ‘‘ਸਙ੍ਕਾਮੇਸੀ’’ਤਿ ਇਮਿਨਾ ਸਂਹਰੀਤਿ ਏਤ੍ਥ ਹਰਧਾਤੁਯਾ ਸਙ੍ਕਮਨਤ੍ਥਂ ਦਸ੍ਸੇਤਿ. ਨ੍ਹਾਪਿਤਾਤਿ ਕਪ੍ਪਕਾ. ਤੇ ਹਿ ਨਹਾਪੇਨ੍ਤਿ ਸੋਚਾਪੇਨ੍ਤੀਤਿ ਨ੍ਹਾਪਿਤਾਤਿ ਵੁਚ੍ਚਨ੍ਤਿ. ਤਨ੍ਤਿ ਕਾਸਾਵਨਿਵਾਸਨਨ੍ਤਿ. ਦੁਤਿਯਂ.

੩-੪. ਤਤਿਯ-ਚਤੁਤ੍ਥਸਿਕ੍ਖਾਪਦਂ

੧੦੩੬. ਤਤਿਯਚਤੁਤ੍ਥੇਸੁ ਅਨੁਤ੍ਤਾਨਟ੍ਠਾਨਂ ਨਤ੍ਥੀਤਿ. ਤਤਿਯਚਤੁਤ੍ਥਾਨਿ.

੫. ਪਞ੍ਚਮਸਿਕ੍ਖਾਪਦਂ

੧੦੪੩. ਪਞ੍ਚਮੇ ¶ ‘‘ਕੁਲੇ ਮਚ੍ਛਰੋ’’ਤਿ ਏਤ੍ਥ ਮਚ੍ਛਰਨਂ ਮਚ੍ਛਰੋਤਿ ਵਚਨਤ੍ਥੋ ਕਾਤਬ੍ਬੋ. ‘‘ਤਂ ਕੁਲਂ ਅਸ੍ਸਦ੍ਧਂ ਅਪ੍ਪਸਨ੍ਨ’’ਨ੍ਤਿ ਕੁਲਸ੍ਸ ਅਵਣ੍ਣਂ ਭਾਸਤੀਤਿ ਯੋਜਨਾ. ‘‘ਭਿਕ੍ਖੁਨਿਯੋ ਦੁਸ੍ਸੀਲਾ ਪਾਪਧਮ੍ਮਾ’’ਤਿ ਭਿਕ੍ਖੁਨੀਨਂ ਅਵਣ੍ਣਂ ਭਾਸਤੀਤਿ ਯੋਜਨਾ.

੧੦੪੫. ‘‘ਸਨ੍ਤਂਯੇਵ ਆਦੀਨਵ’’ਨ੍ਤਿ ਸਮ੍ਬਨ੍ਧਿਯਾ ਸਮ੍ਬਨ੍ਧਂ ਦਸ੍ਸੇਤੁਂ ਵੁਤ੍ਤਂ ‘‘ਕੁਲਸ੍ਸ ਵਾ ਭਿਕ੍ਖੁਨੀਨਂ ਵਾ’’ਤਿ ਇਮਿਨਾ ਦ੍ਵੀਸੁ ਅਞ੍ਞਤਰਮੇਵ ਨ ਸਮ੍ਬਨ੍ਧੋ ਹੋਤਿ, ਅਥ ਖੋ ਦ੍ਵਯਮ੍ਪੀਤਿ ਦਸ੍ਸੇਤੀਤਿ. ਪਞ੍ਚਮਂ.

੬. ਛਟ੍ਠਸਿਕ੍ਖਾਪਦਂ

੧੦੪੮. ਛਟ੍ਠੇ ਓਵਾਦਾਯਾਤਿ ਏਤ੍ਥ ਨ ਯੋ ਵਾ ਸੋ ਵਾ ਓਵਾਦੋ ਹੋਤਿ, ਅਥ ਖੋ ਗਰੁਧਮ੍ਮੋਯੇਵਾਤਿ ਆਹ ‘‘ਗਰੁਧਮ੍ਮਤ੍ਥਾਯਾ’’ਤਿ. ਸਹ ਵਸਤਿ ਏਤ੍ਥ, ਏਤੇਨਾਤਿ ਵਾ ਸਂਵਾਸੋਤਿ ਵਚਨਤ੍ਥੇਨ ਉਪੋਸਥਪਵਾਰਣਾ ਸਂਵਾਸੋ ਨਾਮਾਤਿ ਆਹ ‘‘ਉਪੋਸਥਪਵਾਰਣਾਪੁਚ੍ਛਨਤ੍ਥਾਯਾ’’ਤਿ. ‘‘ਪੁਚ੍ਛਨਤ੍ਥਾਯਾ’’ਤਿ ਇਮਿਨਾ ‘‘ਸਂਵਾਸਾਯਾ’’ਤਿ ਏਤ੍ਥ ਉਤ੍ਤਰਪਦਲੋਪਭਾਵਂ ਦਸ੍ਸੇਤਿ. ਏਤ੍ਥਾਤਿ ਭਿਕ੍ਖੁਨਿਵਿਭਙ੍ਗੇ, ਸਿਕ੍ਖਾਪਦੇ ਵਾ ਪਾਲ਼ਿਯਂ ਵਾਤਿ. ਛਟ੍ਠਂ.

੭-੯. ਸਤ੍ਤਮ-ਅਟ੍ਠਮ-ਨਵਮਸਿਕ੍ਖਾਪਦਂ

੧੦੫੩. ਸਤ੍ਤਮਟ੍ਠਮਨਵਮੇਸੁ ¶ ਅਨੁਤ੍ਤਾਨਵਚਨਂ ਨਤ੍ਥਿ. ਕੇਵਲਂ ਪਨ ‘‘ਇਮਿਸ੍ਸਾਪੀ’’ਤਿ ਪਦਂ ਵਿਸੇਸੋ, ਇਮਿਸ੍ਸਾਪਿ ਪਾਲ਼ਿਯਾਤਿ ਅਤ੍ਥੋਤਿ. ਸਤ੍ਤਮਟ੍ਠਮਨਵਮਾਨਿ.

੧੦. ਦਸਮਸਿਕ੍ਖਾਪਦਂ

੧੦੬੨. ਦਸਮੇ ਦ੍ਵੇ ਕਾਯਾ ਉਪਰਿਮਕਾਯੋ ਹੇਟ੍ਠਿਮਕਾਯੋਤਿ. ਤਤ੍ਥ ਕਟਿਤੋ ਉਦ੍ਧਂ ਉਪਰਿਮਕਾਯੋ, ਹੇਟ੍ਠਾ ਹੇਟ੍ਠਿਮਕਾਯੋ. ਤਤ੍ਥ ‘‘ਪਸਾਖੇ’’ਤਿ ਇਦਂ ਹੇਟ੍ਠਿਮਕਾਯਸ੍ਸ ਨਾਮਨ੍ਤਿ ਆਹ ‘‘ਅਧੋਕਾਯੇ’’ਤਿ. ਹੀਤਿ ਸਚ੍ਚਂ. ਤਤੋਤਿ ਅਧੋਕਾਯਤੋ. ਇਮਿਨਾ ਪਞ੍ਚਮੀਬਾਹਿਰਤ੍ਥਸਮਾਸਂ ਦਸ੍ਸੇਤਿ. ਰੁਕ੍ਖਸ੍ਸ ਸਾਖਾ ਪਭਿਜ੍ਜਿਤ੍ਵਾ ਗਤਾ ਵਿਯ ਉਭੋ ਊਰੂ ਪਭਿਜ੍ਜਿਤ੍ਵਾ ਗਤਾਤਿ ਯੋਜਨਾ.

੧੦੬੫. ਫਾਲੇਹੀਤਿ ¶ ਏਤ੍ਥ ਇਤਿਸਦ੍ਦੋ ਆਦ੍ਯਤ੍ਥੋ. ਤੇਨ ‘‘ਧੋਵਾ’’ਤਿਆਦੀਨਿ ਚਤ੍ਤਾਰਿ ਪਦਾਨਿ ਸਙ੍ਗਣ੍ਹਾਤਿ. ਆਣਤ੍ਤਿਦੁਕ੍ਕਟਾਨੀਤਿ ਹੇਟ੍ਠਾ ਵੁਤ੍ਤੇਸੁ ਅਟ੍ਠਸੁ ਦੁਕ੍ਕਟੇਸੁ ਵਿਨਯਦੁਕ੍ਕਟਮੇਵ. ਸੇਸੇਸੂਤਿ ਭਿਨ੍ਦਨਤੋ ਸੇਸੇਸੁ ਫਾਲਨਾਦੀਸੂਤਿ. ਦਸਮਂ.

ਆਰਾਮਵਗ੍ਗੋ ਛਟ੍ਠੋ.

੭. ਗਬ੍ਭਿਨਿਵਗ੍ਗੋ

੧. ਪਠਮਸਿਕ੍ਖਾਪਦ-ਅਤ੍ਥਯੋਜਨਾ

੧੦੬੯. ਗਬ੍ਭਿਨਿਵਗ੍ਗਸ੍ਸ ਪਠਮੇ ਕੁਚ੍ਛਿਂ ਪਵਿਟ੍ਠੋ ਸਤ੍ਤੋ ਏਤਿਸ੍ਸਾ ਅਤ੍ਥੀਤਿ ਕੁਚ੍ਛਿਪਵਿਟ੍ਠਸਤ੍ਤਾ. ‘‘ਕੁਚ੍ਛਿ’’ਨ੍ਤਿਪਿ ਪਾਠੋ. ਇਮਿਨਾ ਗਬ੍ਭਿਨੀਤਿ ਏਤ੍ਥ ਗਬ੍ਭਸਦ੍ਦੋ ਕੁਚ੍ਛਿਟ੍ਠਸਤ੍ਤਵਾਚਕੋਤਿ ਦਸ੍ਸੇਤਿ. ਗਬ੍ਭਸਦ੍ਦੋ (ਅਭਿਧਾਨਪ੍ਪਦੀਪਿਕਾਯਂ ੯੪੪ ਗਾਥਾਯਂ) ਹਿ ਕੁਚ੍ਛਿਟ੍ਠਸਤ੍ਤੇ ਚ ਕੁਚ੍ਛਿਮ੍ਹਿ ਚ ਓਵਰਕੇ ਚ ਵਤ੍ਤਤੀਤਿ. ਪਠਮਂ.

੨. ਦੁਤਿਯਸਿਕ੍ਖਾਪਦਂ

੧੦੭੩. ਦੁਤਿਯੇ ¶ ਥਞ੍ਞਂ ਪਿਵਤੀਤਿ ਪਾਯਨ੍ਤੋ, ਦਾਰਕੋ, ਸੋ ਏਤਿਸ੍ਸਾ ਅਤ੍ਥੀਤਿ ਪਾਯਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਥਞ੍ਞਂ ਪਾਯਮਾਨਿ’’ਨ੍ਤਿ. ਦੁਤਿਯਂ.

੩. ਤਤਿਯਸਿਕ੍ਖਾਪਦਂ

੧੦੭੭. ਤਤਿਯੇ ਨਿਤ੍ਥਰਿਸ੍ਸਤੀਤਿ ਵਟ੍ਟਦੁਕ੍ਖਤੋ ਨਿਤ੍ਥਰਿਸ੍ਸਤਿ.

੧੦੭੯. ਪਾਣਾਤਿਪਾਤਾ ਵੇਰਮਣਿਨ੍ਤਿ ਏਤ੍ਥ ਪਾਣਾਤਿਪਾਤਾ ਵਿਰਮਤਿ ਇਮਾਯਾਤਿ ਵੇਰਮਣੀਤਿ ਅਤ੍ਥੇਨ ਸਿਕ੍ਖਾਪਦਂ ਵੇਰਮਣਿ ਨਾਮਾਤਿ ਆਹ ‘‘ਪਾਣਾਤਿਪਾਤਾ ਵੇਰਮਣਿਸਿਕ੍ਖਾਪਦ’’ਨ੍ਤਿ. ਯਂ ਤਂ ਸਿਕ੍ਖਾਪਦਨ੍ਤਿ ¶ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ‘‘ਅਦਿਨ੍ਨਾਦਾਨਾ ਵੇਰਮਣਿ’’ਨ੍ਤਿਆਦੀਸੁ ਸਬ੍ਬੇਸੁ ਵਾਕ੍ਯੇਸੁ. ਪਬ੍ਬਜਿਤਾਯ ਸਾਮਣੇਰਿਯਾਤਿ ਸਮ੍ਬਨ੍ਧੋ. ਏਤਾਸੂਤਿ ਛਸੁ ਸਿਕ੍ਖਾਸੂਤਿ. ਤਤਿਯਂ.

੪. ਚਤੁਤ੍ਥਸਿਕ੍ਖਾਪਦਂ

੧੦੮੪. ਚਤੁਤ੍ਥੇ ‘‘ਵੁਟ੍ਠਾਨਸਮ੍ਮੁਤੀ’’ਤਿ ਪਦਂ ‘‘ਹੋਤੀ’’ਤਿ ਪਦੇ ਕਤ੍ਤਾ, ‘‘ਦਾਤਬ੍ਬਾਯੇਵਾ’’ਤਿ ਪਦੇ ਕਮ੍ਮਨ੍ਤਿ. ਚਤੁਤ੍ਥਂ.

੫-੯. ਪਞ੍ਚਮਾਦਿਸਿਕ੍ਖਾਪਦਂ

੧੦੯੫. ਪਞ੍ਚਮਾਦੀਸੁ ਨਵਮਪਰਿਯੋਸਾਨੇਸੁ ਸਿਕ੍ਖਾਪਦੇਸੁ ਅਨੁਤ੍ਤਾਨਟ੍ਠਾਨਂ ਨਤ੍ਥੀਤਿ. ਪਞ੍ਚਮਛਟ੍ਠਸਤ੍ਤਮਟ੍ਠਮਨਵਮਾਨਿ.

੧੦. ਦਸਮਸਿਕ੍ਖਾਪਦਂ

੧੧੧੬. ਦਸਮੇ ਵੂਪਕਾਸੇਯ੍ਯਾਤਿ ਏਤ੍ਥ ਕਾਸਧਾਤੁਯਾ ਗਤ੍ਯਤ੍ਥਂ ਦਸ੍ਸੇਨ੍ਤੋ ਆਹ ‘‘ਗਚ੍ਛੇਯ੍ਯਾ’’ਤਿ. ਦਸਮਂ.

ਗਬ੍ਭਿਨਿਵਗ੍ਗੋ ਸਤ੍ਤਮੋ.

੮. ਕੁਮਾਰਿਭੂਤਵਗ੍ਗੋ

੧-੨-੩. ਪਠਮ-ਦੁਤਿਯ-ਤਤਿਯਸਿਕ੍ਖਾਪਦ-ਅਤ੍ਥਯੋਜਨਾ

੧੧੧੯. ਕੁਮਾਰਿਭੂਤਵਗ੍ਗਸ੍ਸ ¶ ਪਠਮਦੁਤਿਯਤਤਿਯੇਸੁ ਯਾ ਪਨ ਤਾ ਮਹਾਸਿਕ੍ਖਮਾਨਾਤਿ ਸਮ੍ਬਨ੍ਧੋ. ਸਬ੍ਬਪਠਮਾ ਦ੍ਵੇ ਮਹਾਸਿਕ੍ਖਮਾਨਾਤਿ ਗਬ੍ਭਿਨਿਵਗ੍ਗੇ ਸਬ੍ਬਾਸਂ ਸਿਕ੍ਖਮਾਨਾਨਂ ਪਠਮਂ ਵੁਤ੍ਤਾ ਦ੍ਵੇ ਮਹਾਸਿਕ੍ਖਮਾਨਾ. ਤਾ ਪਨਾਤਿ ਮਹਾਸਿਕ੍ਖਮਾਨਾ ਪਨ. ਸਿਕ੍ਖਮਾਨਾਇਚ੍ਚੇਵ ਵਤ੍ਤਬ੍ਬਾਤਿ ਸਮ੍ਮੁਤਿਕਮ੍ਮੇਸੁ ¶ ਸਾਮਞ੍ਞਤੋ ਵਤ੍ਤਬ੍ਬਾ. ‘‘ਗਿਹਿਗਤਾ’’ਤਿ ਵਾ ‘‘ਕੁਮਾਰਿਭੂਤਾ’’ਤਿ ਵਾ ਨ ਵਤ੍ਤਬ੍ਬਾ, ਵਦਨ੍ਤਿ ਚੇ, ਸਮ੍ਮੁਤਿਕਮ੍ਮਂ ਕੁਪ੍ਪਤੀਤਿ ਅਧਿਪ੍ਪਾਯੋ. ਗਿਹਿਗਤਾਯਾਤਿ ਏਤ੍ਥ ਗਿਹਿਗਤਾ ਨਾਮ ਪੁਰਿਸਨ੍ਤਰਗਤਾ ਵੁਚ੍ਚਤਿ. ਸਾ ਹਿ ਯਸ੍ਮਾ ਪੁਰਿਸਸਙ੍ਖਾਤੇਨ ਗਿਹਿਨਾ ਗਮਿਯਿਤ੍ਥ, ਅਜ੍ਝਾਚਾਰਵਸੇਨ, ਗਿਹਿਂ ਵਾ ਗਮਿਤ੍ਥ, ਤਸ੍ਮਾ ਗਿਹਿਗਤਾਤਿ ਵੁਚ੍ਚਤਿ. ਅਯਂ ਸਿਕ੍ਖਮਾਨਾਤਿ ਸਮ੍ਬਨ੍ਧੋ. ਕੁਮਾਰਿਭੂਤਾ ਨਾਮ ਸਾਮਣੇਰਾ ਵੁਚ੍ਚਤਿ. ਸਾ ਹਿ ਯਸ੍ਮਾ ਅਗਿਹਿਗਤਤ੍ਤਾ ਕੁਮਾਰੀ ਹੁਤ੍ਵਾ ਭੂਤਾ, ਕੁਮਾਰਿਭਾਵਂ ਵਾ ਭੂਤਾ ਗਤਾ, ਤਸ੍ਮਾ ਕੁਮਾਰਿਭੂਤਾਤਿ ਵੁਚ੍ਚਤਿ. ਤਿਸ੍ਸੋਪੀਤਿ ਗਿਹਿਗਤਾ ਕੁਮਾਰਿਭੂਤਾ ਮਹਾਸਿਕ੍ਖਮਾਨਾਤਿ ਤਿਸ੍ਸੋਪਿ. ਸਿਕ੍ਖਮਾਨਾਤਿ ਸਿਕ੍ਖਂ ਮਾਨੇਤੀਤਿ ਸਿਕ੍ਖਮਾਨਾਤਿ. ਪਠਮ ਦੁਤਿਯ ਤਤਿਯਾਨਿ.

੪. ਚਤੁਤ੍ਥਸਿਕ੍ਖਾਪਦਂ

੧੧੩੬. ਚਤੁਤ੍ਥੇ ਅਨੁਤ੍ਤਾਨਵਚਨਂ ਨਤ੍ਥੀਤਿ. ਚਤੁਤ੍ਥਂ.

੫. ਪਞ੍ਚਮਸਿਕ੍ਖਾਪਦਂ

ਪਞ੍ਚਮੇ ਏਤ੍ਥ ਸਿਕ੍ਖਾਪਦੇ ‘‘ਸਙ੍ਘੇਨ ਪਰਿਚ੍ਛਿਨ੍ਦਿਤਬ੍ਬਾ’’ਤਿ ਯਂ ਵਚਨਂ ਵੁਤ੍ਤਂ, ਤਸ੍ਸਾਤਿ ਯੋਜਨਾਤਿ. ਪਞ੍ਚਮਂ.

੬-੭-੮. ਛਟ੍ਠ-ਸਤ੍ਤਮ-ਅਟ੍ਠਮਸਿਕ੍ਖਾਪਦਂ

ਛਟ੍ਠਸਤ੍ਤਮਟ੍ਠਮੇਸੁ ਅਨੁਤ੍ਤਾਨਟ੍ਠਾਨਂ ਨਤ੍ਥੀਤਿ. ਛਟ੍ਠਸਤ੍ਤਮਟ੍ਠਮਾਨਿ.

੯. ਨਵਮਸਿਕ੍ਖਾਪਦਂ

੧੧੫੮. ਨਵਮੇ ਅਨ੍ਤੋਤਿ ਅਬ੍ਭਨ੍ਤਰੇ. ਇਮਿਨਾ ਆਤ੍ਯੂਪਸਗ੍ਗਸ੍ਸਤ੍ਥਂ ਦਸ੍ਸੇਤਿ. ‘‘ਸੋਕ’’ਨ੍ਤਿਆਦਿਨਾ ਅਨ੍ਤੋ ਵਾਸੇਤਿ ਪਵੇਸੇਤੀਤਿ ਆਵਾਸਾ ¶ . ਸੋਕਂ ਆਵਾਸਾ ਸੋਕਾਵਾਸਾਤਿ ਵਚਨਤ੍ਥਂ ਦਸ੍ਸੇਤਿ. ਘਰਂ ਘਰਸਾਮਿਕਾ ਆਵਿਸਨ੍ਤਿ ਵਿਯ, ਏਵਂ ਅਯਮ੍ਪਿ ਸੋਕਂ ਆਵਿਸਤੀਤਿ ਯੋਜਨਾ. ਇਤੀਤਿ ਏਵਂ. ਯਨ੍ਤਿ ਸੋਕਂ. ਸ੍ਵਾਸ੍ਸਾਤਿ ਸੋ ਅਸ੍ਸਾ. ਸੋਤਿ ਸੋਕੋ. ਅਸ੍ਸਾਤਿ ਸਿਕ੍ਖਮਾਨਾਯ. ਆਵਾਸੋਤਿ ਆਵਾਸੋਕਾਸੋ. ‘‘ਏਦਿਸਾ ਅਯ’’ਨ੍ਤਿ ਇਮਿਨਾ ‘‘ਅਜਾਨਨ੍ਤੀ’’ਤਿ ਏਤ੍ਥ ਅਜਾਨਨਾਕਾਰਂ ਦਸ੍ਸੇਤੀਤਿ. ਨਵਮਂ.

੧੦. ਦਸਮਸਿਕ੍ਖਾਪਦਂ

੧੧੬੨. ਦਸਮੇ ¶ ਅਨਾਪੁਚ੍ਛਾਤਿ ਏਤ੍ਥ ਤ੍ਵਾਪਚ੍ਚਯੋ ਲੋਪੋਤਿ ਆਹ ‘‘ਅਨਾਪੁਚ੍ਛਿਤ੍ਵਾ’’ਤਿ. ਦ੍ਵਿਕ੍ਖਤ੍ਤੁਨ੍ਤਿ ਦ੍ਵੇ ਵਾਰੇ. ਸਕਿਨ੍ਤਿ ਏਕਵਾਰਂ.

੧੧੬੩. ਅਪੁਬ੍ਬਂ ਸਮੁਟ੍ਠਾਨਸੀਸਂ ਇਮਸ੍ਸਾਤਿ ਅਪੁਬ੍ਬਸਮੁਟ੍ਠਾਨਸੀਸਂ. ਦ੍ਵੀਸੁਪਿ ਠਾਨੇਸੂਤਿ ਵਾਚਾਤੋ ਚ ਕਾਯਵਾਚਾਤੋ ਚਾਤਿ ਦ੍ਵੀਸੁ ਠਾਨੇਸੁਪਿ. ਅਨਨੁਜਾਨਾਪੇਤ੍ਵਾਤਿ ਮਾਤਾਪਿਤੂਹਿ ਚ ਸਾਮਿਕੇਨ ਚ ਨ ਅਨੁਜਾਨਾਪੇਤ੍ਵਾਤਿ. ਦਸਮਂ.

੧੧. ਏਕਾਦਸਮਸਿਕ੍ਖਾਪਦਂ

੧੧੬੭. ਏਕਾਦਸਮੇ ਤਤ੍ਥਾਤਿ ‘‘ਪਾਰਿਵਾਸਿਯਛਨ੍ਦਦਾਨੇਨਾ’’ਤਿ ਵਚਨੇ. ਅਞ੍ਞਤ੍ਰਾਤਿ ਅਞ੍ਞਂ ਠਾਨਂ.

ਏਕਂ ਅਜ੍ਝੇਸਨ੍ਤੀਤਿ ਏਕਂ ਭਿਕ੍ਖੁਂ ਧਮ੍ਮਕਥਨਤ੍ਥਾਯ ਨਿਯ੍ਯੋਜੇਨ੍ਤਿ. ਅਞ੍ਞਂ ਪਨਾਤਿ ਉਪੋਸਥਿਕਤੋ ਅਞ੍ਞਂ ਪਨ.

ਤਤ੍ਰਾਤਿ ਤੇਸੁ ਭਿਕ੍ਖੂਸੁ. ਸੁਭਾਸੁਭਂ ਨਕ੍ਖਤ੍ਤਂ ਪਠਤੀਤਿ ਨਕ੍ਖਤ੍ਤਪਾਠਕੋ. ਦਾਰੁਣਨ੍ਤਿ ਕਕ੍ਖਲ਼ਂ. ਤੇਤਿ ਭਿਕ੍ਖੂ. ਤਸ੍ਸਾਤਿ ਨਕ੍ਖਤ੍ਤਪਾਠਕਸ੍ਸ ਭਿਕ੍ਖੁਸ੍ਸ. ‘‘ਨਕ੍ਖਤ੍ਤਂ ਪਟਿਮਾਨੇਨ੍ਤਂ, ਅਤ੍ਥੋ ਬਾਲਂ ਉਪਚ੍ਚਗਾ’’ਤਿਜਾਤਕਪਾਲ਼ਿ (ਜਾ. ੧.੧.੪੯). ਅਯਂ ਪਨੇਤ੍ਥ ਯੋਜਨਾ – ਨਕ੍ਖਤ੍ਤਂ ਪਟਿਮਾਨੇਨ੍ਤਂ ਬਾਲਂ ਅਤ੍ਥੋ ਹਿਤਂ ਉਪਚ੍ਚਗਾ ਉਪਸਮੀਪੇ ਅਤਿਕ੍ਕਮਿਤ੍ਵਾ ਅਗਾਤਿ. ਏਕਾਦਸਮਂ.

੧੨. ਦ੍ਵਾਦਸਮਸਿਕ੍ਖਾਪਦਂ

੧੧੭੦. ਦ੍ਵਾਦਸਮੇ ¶ ਨਪ੍ਪਹੋਤੀਤਿ ਭਿਕ੍ਖੁਨਿਯੋ ਨਿਵਾਸਾਪੇਤੁਂ ਨ ਸਕ੍ਕੋਤੀਤਿ. ਦ੍ਵਾਦਸਮਂ.

੧੩. ਤੇਰਸਮਸਿਕ੍ਖਾਪਦਂ

੧੧੭੫. ਤੇਰਸਮੇ ਏਕਂ ਵਸ੍ਸਨ੍ਤਿ ਏਤ੍ਥ ਵਸ੍ਸਸਦ੍ਦੋ ਸਂਵਚ੍ਛਰਪਰਿਯਾਯੋ, ਉਪਯੋਗਵਚਨਞ੍ਚ ਭੁਮ੍ਮਤ੍ਥੇ ਹੋਤੀਤਿ ਆਹ ‘‘ਏਕਸ੍ਮਿਂ ਸਂਵਚ੍ਛਰੇ’’ਤਿ. ਤੇਰਸਮਂ.

ਕੁਮਾਰਿਭੂਤਵਗ੍ਗੋ ਅਟ੍ਠਮੋ.

੯. ਛਤ੍ਤੁਪਾਹਨਵਗ੍ਗੋ

੧. ਪਠਮਸਿਕ੍ਖਾਪਦ-ਅਤ੍ਥਯੋਜਨਾ

੧੧੮੧. ਛਤ੍ਤਵਗ੍ਗਸ੍ਸ ¶ ਪਠਮੇ ਕਦ੍ਦਮਾਦੀਨੀਤਿ ਚਿਕ੍ਖਲ੍ਲਾਦੀਨਿ. ਆਦਿਸਦ੍ਦੇਨ ਉਦਕਾਦੀਨਿ ਸਙ੍ਗਣ੍ਹਾਤਿ. ਗਚ੍ਛਾਦੀਨੀਤਿ ਖੁਦ੍ਦਪਾਦਪਾਦੀਨਿ. ਆਦਿਸਦ੍ਦੇਨ ਅਞ੍ਞਾਨਿਪਿ ਛਤ੍ਤਂ ਧਾਰੇਤੁਂ ਅਸਕ੍ਕੁਣੇਯ੍ਯਾਨਿ ਸਮ੍ਬਾਧਟ੍ਠਾਨਾਨਿ ਸਙ੍ਗਣ੍ਹਾਤੀਤਿ. ਪਠਮਂ.

੨. ਦੁਤਿਯਸਿਕ੍ਖਾਪਦਂ

੧੧੮੪. ਦੁਤਿਯੇ ਯਾਨੇਨਾਤਿ ਯਨ੍ਤਿ ਇਚ੍ਛਿਤਟ੍ਠਾਨਂ ਸੁਖੇਨ ਗਚ੍ਛਨ੍ਤਿ ਅਨੇਨਾਤਿ ਯਾਨਨ੍ਤਿ. ਦੁਤਿਯਂ.

੩. ਤਤਿਯਸਿਕ੍ਖਾਪਦਂ

੧੧੯੧. ਤਤਿਯੇ ‘‘ਵਿਪ੍ਪਕਿਰਿਯਿਂਸੂ’’ਤਿ ਕਿਰਿਯਾਪਦਸ੍ਸ ਕਤ੍ਤੁਨਾ ਅਵਿਨਾਭਾਵਤੋ ਕਤ੍ਤਾਰਂ ਦਸ੍ਸੇਤੁਂ ਵੁਤ੍ਤਂ ‘‘ਮਣਯੋ’’ਤਿ. ਮਣਯੋਤਿ ਚ ਰਤਨਾਨੀਤਿ. ਤਤਿਯਂ.

੪. ਚਤੁਤ੍ਥਸਿਕ੍ਖਾਪਦਂ

੧੧੯੪. ਚਤੁਤ੍ਥੇ ਸੀਸੂਪਗਾਦੀਸੂਤਿ ਆਦਿਸਦ੍ਦੇਨ ਗੀਵੂਪਗਾਦਯੋ ਸਙ੍ਗਣ੍ਹਾਤਿ. ਯਂ ਯਨ੍ਤਿ ਅਲਙ੍ਕਾਰਨ੍ਤਿ. ਚਤੁਤ੍ਥਂ.

੫. ਪਞ੍ਚਮਸਿਕ੍ਖਾਪਦਂ

੧੧੯੯. ਪਞ੍ਚਮੇ ¶ ਗਨ੍ਧੇਨ ਚਾਤਿ ਗਨ੍ਧੇਤਿ ਅਤ੍ਤਨੋ ਵਤ੍ਥੁਂ ਸੂਚੇਤਿ ਪਕਾਸੇਤੀਤਿ ਗਨ੍ਧੋ. ਵਣ੍ਣਕੇਨ ਚਾਤਿ ਵਿਲੇਪਨੇਨ ਚ. ਤਞ੍ਹਿ ਵਣ੍ਣਯਤਿ ਛਵਿਸੋਭਂ ਪਕਾਸੇਤੀਤਿ ਵਣ੍ਣਕਨ੍ਤਿ ਵੁਚ੍ਚਤਿ. ਚਸਦ੍ਦੇਨ ਸਮਾਹਾਰਦ੍ਵਨ੍ਦਵਾਕ੍ਯਂ ਦੀਪੇਤੀਤਿ. ਪਞ੍ਚਮਂ.

੬. ਛਟ੍ਠਸਿਕ੍ਖਾਪਦਂ

੧੨੦੨. ਛਟ੍ਠੇ ¶ ਅਨੁਤ੍ਤਾਨਵਚਨਂ ਨਤ੍ਥੀਤਿ. ਛਟ੍ਠਂ.

੭. ਸਤ੍ਤਮਸਿਕ੍ਖਾਪਦਂ

੧੨੦੮. ਸਤ੍ਤਮੇ ਉਮ੍ਮਦ੍ਦਨੇਤਿ ਉਪ੍ਪੀਲ਼ਿਤ੍ਵਾ ਮਦ੍ਦਨੇ. ਸਂਬਾਹਨੇਪੀਤਿ ਪੁਨਪ੍ਪੁਨਂ ਬਾਹਨੇਪੀਤਿ. ਸਤ੍ਤਮਂ.

੮-੧੦. ਅਟ੍ਠਮਾਦਿਸਿਕ੍ਖਾਪਦਂ

੧੨੧੦. ਅਟ੍ਠਮਾਦੀਸੁ ਤੀਸੁ ਅਨੁਤ੍ਤਾਨਵਚਨਂ ਨਤ੍ਥੀਤਿ. ਅਟ੍ਠਮਨਵਮਦਸਮਾਨਿ.

੧੧. ਏਕਾਦਸਮਸਿਕ੍ਖਾਪਦਂ

੧੨੧੪. ਏਕਾਦਸਮੇ ਅਭਿਮੁਖਮੇਵਾਤਿ ਅਭਿਮੁਖੇ ਏਵ. ਮੁਖਸ੍ਸ ਹਿ ਅਭਿ ਅਭਿਮੁਖਨ੍ਤਿ ਵਚਨਤ੍ਥੋ ਕਾਤਬ੍ਬੋ, ਸਤ੍ਤਮਿਯਾ ਅਂਕਾਰੋ. ਇਮਿਨਾ ਪੁਰਤੋਤਿ ਏਤ੍ਥ ਤੋਪਚ੍ਚਯੋ ਭੁਮ੍ਮਤ੍ਥੇ ਹੋਤੀਤਿ ਦਸ੍ਸੇਤਿ. ਉਪਚਾਰਨ੍ਤਿ ਦ੍ਵਾਦਸਹਤ੍ਥੂਪਚਾਰਨ੍ਤਿ. ਏਕਾਦਸਮਂ.

੧੨. ਦ੍ਵਾਦਸਮਸਿਕ੍ਖਾਪਦਂ

੧੨੧੯. ਦ੍ਵਾਦਸਮੇ ‘‘ਅਨੋਕਾਸਕਤ’’ਨ੍ਤਿਪਦਸ੍ਸ ਅਯੁਤ੍ਤਸਮਾਸਭਾਵਞ੍ਚ ਵਿਸੇਸਨਪਰਪਦਬਾਹਿਰਸਮਾਸਭਾਵਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਅਕਤਓਕਾਸ’’ਨ੍ਤਿ. ਓਕਾਸੋ ਨ ਕਤੋ ਯੇਨਾਤਿ ਅਨੋਕਾਸਕਤੋ, ਭਿਕ੍ਖੁ, ਤਂ. ‘‘ਅਨਿਯਮੇਤ੍ਵਾ’’ਤਿ ਇਮਿਨਾ ‘‘ਅਨੋਦਿਸ੍ਸਾ’’ਤਿ ਪਦਸ੍ਸ ਤ੍ਵਾਪਚ੍ਚਯਨ੍ਤਭਾਵਂ ਦਸ੍ਸੇਤੀਤਿ. ਦ੍ਵਾਦਸਮਂ.

੧੩. ਤੇਰਸਮਸਿਕ੍ਖਾਪਦਂ

੧੨੨੬. ਤੇਰਸਮੇ ¶ ਉਪਚਾਰੇਪੀਤਿ ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਾਰਹਟ੍ਠਾਨਸਙ੍ਖਾਤੇ ਉਪਚਾਰੇਪਿ.

੧੨੨੭. ‘‘ਅਚ੍ਛਿਨ੍ਨਚੀਵਰਿਕਾਯਾ’’ਤਿ ¶ ਸਾਮਞ੍ਞਤੋ ਵੁਤ੍ਤੇਪਿ ਵਿਸੇਸੋਯੇਵਾਧਿਪ੍ਪੇਤੋਤਿ ਆਹ ‘‘ਸਙ੍ਕਚ੍ਚਿਕਚੀਵਰਮੇਵਾ’’ਤਿ. ਸਮਨ੍ਤਤੋ ਪੁਰਿਸਾਨਂ ਦਸ੍ਸਨਂ ਕਨ੍ਤੀਯਤਿ ਛਿਨ੍ਦੀਯਤਿ ਏਤ੍ਥਾਤਿ ਸਙ੍ਕਚ੍ਚਿ, ਅਧਕ੍ਖਕਉਬ੍ਭਨਾਭਿਟ੍ਠਾਨਂ, ਸਙ੍ਕਚ੍ਚੇ ਨਿਵਸਿਤਬ੍ਬਨ੍ਤਿ ਸਂਕਚ੍ਚਿਕਂ, ਤਮੇਵ ਚੀਵਰਨ੍ਤਿ ਸਙ੍ਕਚ੍ਚਿਕਚੀਵਰਨ੍ਤਿ. ਤੇਰਸਮਂ.

ਛਤ੍ਤੁਪਾਹਨਵਗ੍ਗੋ ਨਵਮੋ.

ਸਬ੍ਬਾਨੇਵ ਸਿਕ੍ਖਾਪਦਾਨੀਤਿ ਸਮ੍ਬਨ੍ਧੋ. ਤਤੋਤਿ ਤੇਹਿ ਅਟ੍ਠਾਸੀਤਿਸਤਸਿਕ੍ਖਾਪਦੇਹਿ, ਅਪਨੇਤ੍ਵਾਤਿ ਸਮ੍ਬਨ੍ਧੋ.

ਤਤ੍ਰਾਤਿ ਤੇਸੁ ਖੁਦ੍ਦਕੇਸੁ. ਏਤ੍ਥਾਤਿ ਦਸਸੁ ਸਿਕ੍ਖਾਪਦੇਸੂਤਿ.

ਭਿਕ੍ਖੁਨਿਵਿਭਙ੍ਗੇ ਖੁਦ੍ਦਕਵਣ੍ਣਨਾਯ

ਯੋਜਨਾ ਸਮਤ੍ਤਾ.

੫. ਪਾਟਿਦੇਸਨੀਯਸਿਕ੍ਖਾਪਦ-ਅਤ੍ਥਯੋਜਨਾ

ਖੁਦ੍ਦਕਾਨਂ ਅਨਨ੍ਤਰਾ ਪਾਟਿਦੇਸਨੀਯਾ ਨਾਮ ਅਟ੍ਠ ਯੇ ਧਮ੍ਮਾ ਸਙ੍ਖੇਪੇਨੇਵ ਸਙ੍ਗਹਂ ਆਰੂਲ਼੍ਹਾ ਸਙ੍ਗੀਤਿਕਾਰੇਹਿ, ਤੇਸਂ ਅਟ੍ਠਨ੍ਨਂ ਪਾਟਿਦੇਸਨੀਯਨਾਮਕਾਨਂ ਧਮ੍ਮਾਨਂ ਸਙ੍ਖੇਪੇਨੇਵ ਏਸਾ ਵਣ੍ਣਨਾ ਪਵਤ੍ਤਤੇਤਿ ਯੋਜਨਾ.

੧੨੨੮. ਯਾਨਿ ਸਬ੍ਬਿਤੇਲਾਦੀਨੀਤਿ ਸਮ੍ਬਨ੍ਧੋ. ਹੀਤਿ ਵਿਤ੍ਥਾਰੋ. ਏਤ੍ਥਾਤਿ ਅਟ੍ਠਸੁ ਪਾਟਿਦੇਸਨੀਯੇਸੁ. ਪਾਲ਼ਿਵਿਨਿਮੁਤ੍ਤਕੇਸੂਤਿ ਪਾਲ਼ਿਤੋ ਵਿਨਿਮੁਤ੍ਤਕੇਸੁ. ਸਬ੍ਬੇਸੂਤਿ ਅਖਿਲੇਸੁ ਸਬ੍ਬਿਤੇਲਾਦੀਸੂਤਿ.

ਭਿਕ੍ਖੁਨਿਵਿਭਙ੍ਗੇ ਪਾਟਿਦੇਸਨੀਯਵਣ੍ਣਨਾਯ ਯੋਜਨਾ ਸਮਤ੍ਤਾ.

ਪਨਾਤਿ ਪਕ੍ਖਨ੍ਤਰਜੋਤਕੋ. ਯੇ ਧਮ੍ਮਾ ਉਦ੍ਦਿਟ੍ਠਾਤਿ ਸਮ੍ਬਨ੍ਧੋ. ਤੇਸਨ੍ਤਿ ਪਾਟਿਦੇਸਨੀਯਾਨਂ. ਪੁਨ ਤੇਸਨ੍ਤਿ ਸੇਖਿਯਅਧਿਕਰਣਸਮਥਧਮ੍ਮਾਨਂ.

ਤਨ੍ਤਿ ¶ ¶ ਅਤ੍ਥਵਿਨਿਚ੍ਛਯਂ, ਵਿਦੂ ਵਦਨ੍ਤੀਤਿ ਸਮ੍ਬਨ੍ਧੋ. ਯਕਾਰੋ ਪਦਸਨ੍ਧਿਕਰੋ. ਅਯਂ ਪਨੇਤ੍ਥ ਯੋਜਨਾ – ਤੇਸਂ ਪਾਟਿਦੇਸਨੀਯਾਨਂ ਅਨਨ੍ਤਰਾ ਯੇ ਚ ਸੇਖਿਯਾ ਪਞ੍ਚਸਤ੍ਤਤਿ ਯੇ ਚ ਧਮ੍ਮਾ, ਚਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ, ਅਧਿਕਰਣਵ੍ਹਯਾ ਅਧਿਕਰਣਸਮਥਨਾਮਕਾ ਸਤ੍ਤ ਯੇ ਚ ਧਮ੍ਮਾ ਭਗਵਤਾ ਉਦ੍ਦਿਟ੍ਠਾ, ਤੇਸਂ ਸੇਖਿਯਅਧਿਕਰਣਸਮਥਧਮ੍ਮਾਨਂ ਯੋ ਅਤ੍ਥਵਿਨਿਚ੍ਛਯੋ ਵਿਭਙ੍ਗੇ ਮਯਾ ਵੁਤ੍ਤੋ, ਤਾਦਿਸਮੇਵ ਤਂ ਅਤ੍ਥਵਿਨਿਚ੍ਛਯਂ ਭਿਕ੍ਖੁਨੀਨਂ ਵਿਭਙ੍ਗੇਪਿ ਵਿਦੂ ਵਦਨ੍ਤਿ ਯਸ੍ਮਾ, ਤਸ੍ਮਾ ਤੇਸਂ ਧਮ੍ਮਾਨਂ ਸੇਖਿਯਅਧਿਕਰਣਸਮਥਧਮ੍ਮਾਨਂ ਯਾ ਅਤ੍ਥਵਣ੍ਣਨਾ ਤਤ੍ਥ ਮਹਾਵਿਭਙ੍ਗੇ ਵਿਸੁਂ ਮਯਾ ਨ ਵੁਤ੍ਤਾ. ਇਮਾ ਅਤ੍ਥਵਣ੍ਣਨਾ ਇਧਾਪਿ ਭਿਕ੍ਖੁਨੀਨਂ ਵਿਭਙ੍ਗੇਪਿ, ਪਿਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ, ਮਯਾ ਨ ਵੁਤ੍ਤਾਯੇਵਾਤਿ. ਨਕਾਰੋ ਦ੍ਵੀਸੁ ਕਿਰਿਯਾਸੁ ਯੋਜੇਤਬ੍ਬੋ.

‘‘ਸਬ੍ਬਾਸਵਪਹਂ ਮਗ੍ਗਂ, ਪੁਞ੍ਞਕਮ੍ਮੇਨ ਚਿਮਿਨਾ;

ਉਪ੍ਪਾਦੇਤ੍ਵਾ ਸਸਨ੍ਤਾਨੇ, ਸਤ੍ਤਾ ਪਸ੍ਸਨ੍ਤੁ ਨਿਬ੍ਬੁਤਿ’’ਨ੍ਤਿ.

ਅਯਂ ਗਾਥਾ ਏਤਰਹਿ ਪੋਤ੍ਥਕੇਸੁ ਨਤ੍ਥਿ, ਟੀਕਾਸੁ ਪਨ ਅਤ੍ਥਿ. ਤਸ੍ਮਾ ਏਵਮੇਤ੍ਥ ਯੋਜਨਾ ਵੇਦਿਤਬ੍ਬਾ – ਇਮਿਨਾ ਪੁਞ੍ਞਕਮ੍ਮੇਨ ਚ ਵਿਭਙ੍ਗਵਣ੍ਣਨਾਯ ਕਤੇਨ ਇਮਿਨਾ ਪੁਞ੍ਞਕਮ੍ਮੇਨ ਚ ਅਞ੍ਞੇਨ ਪੁਞ੍ਞਕਮ੍ਮੇਨ ਚ. ਚਸਦ੍ਦੋ ਹਿ ਅਵੁਤ੍ਤਸਮ੍ਪਿਣ੍ਡਨਤ੍ਥੋ. ਸਤ੍ਤਾ ਸਬ੍ਬੇ ਸਤ੍ਤਾ ਸਬ੍ਬਾਸਵਪਹਂ ਸਬ੍ਬੇਸਂ ਆਸਵਾਨਂ ਵਿਘਾਤਕਂ ਮਗ੍ਗਂ ਅਰਹਤ੍ਤਮਗ੍ਗਂ ਸਸਨ੍ਤਾਨੇ ਅਤ੍ਤਨੋ ਨਿਯਕਜ੍ਝਤ੍ਤੇ ਉਪ੍ਪਾਦੇਤ੍ਵਾ ਜਨੇਤ੍ਵਾ ਨਿਬ੍ਬੁਤਿਂ ਖਨ੍ਧਪਰਿਨਿਬ੍ਬਾਨਂ ਞਾਣਾਲੋਚਨੇਨ ਪਸ੍ਸਨ੍ਤੂਤਿ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਭਿਕ੍ਖੁਨਿਵਿਭਙ੍ਗਵਣ੍ਣਨਾਯ

ਯੋਜਨਾ ਸਮਤ੍ਤਾ.

ਜਾਦਿਲਞ੍ਛਿਤਨਾਮੇਨ, ਨੇਕਾਨਂ ਵਾਚਿਤੋ ਮਯਾ;

ਭਿਕ੍ਖੁਨੀਨਂ ਵਿਭਙ੍ਗਸ੍ਸ, ਸਮਤ੍ਤੋ ਯੋਜਨਾਨਯੋਤਿ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਮਹਾਵਗ੍ਗਯੋਜਨਾ

੧. ਮਹਾਖਨ੍ਧਕਂ

੧. ਬੋਧਿਕਥਾ

ਏਵੂਭਤੋਵਿਭਙ੍ਗਸ੍ਸ ¶ ¶ , ਕਤ੍ਵਾਨ ਯੋਜਨਾਨਯਂ;

ਮਹਾਵਗ੍ਗਖਨ੍ਧਕਸ੍ਸ, ਕਰਿਸ੍ਸਂ ਯੋਜਨਾਨਯਂ.

ਉਭਿਨ੍ਨਨ੍ਤਿ ਉਭਯੇਸਂ. ਪਾਤਿਮੋਕ੍ਖਾਨਨ੍ਤਿ ਪਾਤਿਮੋਕ੍ਖਵਿਭਙ੍ਗਾਨਂ. ਪਾਤਿਮੋਕ੍ਖਗਹਣੇਨ ਹੇਤ੍ਥ ਤੇਸਂ ਵਿਭਙ੍ਗੋਪਿ ਗਹਿਤੋ ਅਭੇਦੇਨ ਵਾ ਉਤ੍ਤਰਪਦਲੋਪਵਸੇਨ ਵਾ. ਖਨ੍ਧਕਨ੍ਤਿ ਪਞ੍ਞਤ੍ਤਿਸਮੂਹਂ. ਖਨ੍ਧਸਦ੍ਦੋ ਹੇਤ੍ਥ ਪਞ੍ਞਤ੍ਤਿਵਾਚਕੋ. ਵਿਨਯਪਞ੍ਞਤ੍ਤਿਯੋ ਵੁਚ੍ਚਨ੍ਤਿ ‘‘ਖਨ੍ਧੋ’’ਤਿ. ਤੇਸਂ ਸਮੂਹੋ ਖਨ੍ਧਕੋ. ਅਥਵਾ ਖਨ੍ਧੋਤਿ ਰਾਸਿ. ਖਨ੍ਧਸਦ੍ਦੋ ਹਿ ਰਾਸਤ੍ਥਵਾਚਕੋ. ਵਿਨਯਪਞ੍ਞਤ੍ਤਿਰਾਸਿ ਵੁਚ੍ਚਤਿ ‘‘ਖਨ੍ਧੋ’’ਤਿ. ਕਕਾਰੋ ਪਕਾਸਕਵਾਚਕੋ. ਖਨ੍ਧਾਨਂ ਵਿਨਯਪਞ੍ਞਤ੍ਤਿਰਾਸੀਨਂ ਕੋ ਪਕਾਸਕੋਤਿ ਖਨ੍ਧਕੋ, ¶ ਤਂ ਖਨ੍ਧਕਂ. ਅਯਂ ਪਨੇਤ੍ਥ ਯੋਜਨਾ – ਉਭਿਨ੍ਨਂ ਪਾਤਿਮੋਕ੍ਖਾਨਂ ਸਙ੍ਗੀਤਿਸਮਨਨ੍ਤਰਂ ਖਨ੍ਧਕੋਵਿਦਾ ਖਨ੍ਧਕੇਸੁ ਕੁਸਲਾ ਮਹਾਥੇਰਾ ਯਂ ਖਨ੍ਧਕਂ ਸਙ੍ਗਾਯਿਂਸੁ, ਤਸ੍ਸ ਖਨ੍ਧਕਸ੍ਸ ਦਾਨਿ ਸਂਵਣ੍ਣਨਾਕ੍ਕਮੋ ਯਸ੍ਮਾ ਸਮ੍ਪਤ੍ਤੋ, ਤਸ੍ਮਾ ਤਸ੍ਸ ਖਨ੍ਧਕਸ੍ਸ ਅਯਂ ਅਨੁਤ੍ਤਾਨਤ੍ਥਵਣ੍ਣਨਾ ਹੋਤੀਤਿ.

ਯੇ ਅਤ੍ਥਾਤਿ ਸਮ੍ਬਨ੍ਧੋ. ਹਿਸਦ੍ਦੋ ਪਦਾਲਙ੍ਕਾਰੋ. ਯੇਸਨ੍ਤਿ ਪਦਾਨਂ. ਤੇਤਿ ਤੇ ਅਤ੍ਥੇ. ਭਵੇਤਿ ਭਵੇਯ੍ਯ, ਭਵਿਤੁਂ ਸਕ੍ਕੁਣੇਯ੍ਯਾਤਿ ਅਤ੍ਥੋ. ਤੇਸਨ੍ਤਿ ਅਤ੍ਥਾਨਂ. ਕਿਨ੍ਤਿ ਕਿਂ ਪਯੋਜਨਂ. ਤੇਤਿ ਅਤ੍ਥੇ, ਞਾਤੁਨ੍ਤਿ ਸਮ੍ਬਨ੍ਧੋ. ਅਥਵਾ ਤੇਤਿ ਅਤ੍ਥਾ, ਅਵਣ੍ਣਿਤਾਤਿ ਸਮ੍ਬਨ੍ਧੋ. ਤੇਸਂਯੇਵਾਤਿ ਅਤ੍ਥਾਨਮੇਵ. ਅਯਂ ਪਨੇਤ੍ਥ ਯੋਜਨਾ – ਪਦਭਾਜਨੀਯੇ ਯੇਸਂ ਪਦਾਨਂ ਯੇ ਅਤ੍ਥਾ ਭਗਵਤਾ ਪਕਾਸਿਤਾ, ਤੇਸਂ ਪਦਾਨਨ੍ਤਿ ਪਾਠਸੇਸੋ, ਤੇ ਅਤ੍ਥੇ ਪੁਨ ਵਦੇਯ੍ਯਾਮ ਚੇ, ਕਦਾ ਪਰਿਯੋਸਾਨਂ ਸਂਵਣ੍ਣਨਾਯ ਪਰਿਨਿਟ੍ਠਾਨਂ ਭਵੇ, ਨ ਭਵੇਯ੍ਯਾਤਿ ਅਧਿਪ੍ਪਾਯੋ. ਯੇ ਚੇਵ ਅਤ੍ਥਾ ਉਤ੍ਤਾਨਾ, ਤੇਸਂ ਸਂਵਣ੍ਣਨਾਯ ਕਿਂ ਪਯੋਜਨਂ, ਨ ਪਯੋਜਨਨ੍ਤਿ ਅਧਿਪ੍ਪਾਯੋ. ਅਧਿਪ੍ਪਾਯਾਨੁਸਨ੍ਧੀਹਿ ਚ ਅਧਿਪ੍ਪਾਯੇਨ ਚ ਅਨੁਸਨ੍ਧਿਨਾ ਚ ਬ੍ਯਞ੍ਜਨੇਨ ਚ ਯੇ ਪਨ ਅਤ੍ਥਾ ਅਨੁਤ੍ਤਾਨਾ, ਤੇ ਅਤ੍ਥੇ, ਅਤ੍ਥਾ ਵਾ ਅਵਣ੍ਣਿਤਾ ¶ ਯਸ੍ਮਾ ਞਾਤੁਂ ਨ ਸਕ੍ਕਾ, ਤਸ੍ਮਾ ਤੇਸਂਯੇਵ ਅਤ੍ਥਾਨਂ ਅਯਂ ਸਂਵਣ੍ਣਨਾਨਯੋ ਹੋਤੀਤਿ. ਇਤਿਸਦ੍ਦੋ ਪਰਿਸਮਾਪਨਤ੍ਥੋ.

੧. ‘‘ਤੇਨ…ਪੇ… ਵੇਰਞ੍ਜਾਯ’’ਨ੍ਤਿਆਦੀਸੁ (ਪਾਰਾ. ੧) ਕਰਣਵਚਨੇ ਵਿਸੇਸਕਾਰਣਮਤ੍ਥਿ ਵਿਯ, ‘‘ਤੇਨ…ਪੇ… ਪਠਮਾਭਿਸਮ੍ਬੁਦ੍ਧੋ’’ਤਿ ਏਤ੍ਥ ਕਿਞ੍ਚਾਪਿ ਨਤ੍ਥੀਤਿ ਯੋਜਨਾ. ਅਸਦਿਸੋਪਮਾਯਂ. ਕਿਞ੍ਚਾਪਿਸਦ੍ਦੋ ਗਰਹਤ੍ਥਜੋਤਕੋ, ਪਨ-ਸਦ੍ਦੋ ਸਮ੍ਭਾਵਨਤ੍ਥਜੋਤਕੋ. ‘‘ਕਰਣਵਚਨੇਨੇਵਾ’’ਤਿ ਏਤ੍ਥ ਏਵਕਾਰੇਨ ਉਪਯੋਗਵਚਨਂ ਵਾ ਭੁਮ੍ਮਵਚਨਂ ਵਾ ਨਿਵਾਰੇਤਿ. ਅਭਿਲਾਪੋਤਿ ਅਭਿਮੁਖਂ ਅਤ੍ਥਂ ਲਪਤੀਤਿ ਅਭਿਲਾਪੋ, ਸਦ੍ਦੋ. ਆਦਿਤੋਤਿ ਵੇਰਞ੍ਜਕਣ੍ਡਤੋ. ਏਤਨ੍ਤਿ ‘‘ਤੇਨ ਸਮਯੇਨ ਬੁਦ੍ਧੋ ਭਗਵਾ ਉਰੁਵੇਲਾਯ’’ਨ੍ਤਿਆਦਿਵਚਨਂ. ‘‘ਅਞ੍ਞੇਸੁਪੀ’’ਤਿ ਵਤ੍ਵਾ ਤਮੇਵਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਇਤੋ ਪਰੇਸੂ’’ਤਿ.

ਯਦਿ ਵਿਸੇਸਕਾਰਣਂ ਨਤ੍ਥਿ, ਕਿਂ ਪਨੇਤਸ੍ਸ ਵਚਨੇ ਪਯੋਜਨਨ੍ਤਿ ਚੋਦੇਨ੍ਤੋ ਆਹ ‘‘ਕਿਂ ਪਨੇਤਸ੍ਸਾ’’ਤਿਆਦਿ. ਏਤਸ੍ਸਾਤਿ ‘‘ਤੇਨ ਸਮਯੇਨ ਬੁਦ੍ਧੋ ਭਗਵਾ ਉਰੁਵੇਲਾਯ’’ਨ੍ਤਿਆਦਿਵਚਨਸ੍ਸ. ਨਿਦਾਨਦਸ੍ਸਨਂ ਪਯੋਜਨਂ ਨਾਮਾਤਿ ਯੋਜਨਾ. ਤਮੇਵਤ੍ਥਂ ਵਿਭਾਵੇਤੁਮਾਹ ‘‘ਯਾ ਹੀ’’ਤਿਆਦਿ. ਯਾ ਪਬ੍ਬਜ੍ਜਾ ਚੇਵ ਯਾ ਉਪਸਮ੍ਪਦਾ ਚ ਭਗਵਤੋ ਅਨੁਞ੍ਞਾਤਾਤਿ ਯੋਜਨਾ. ਯਾਨਿ ਚ ਅਨੁਞ੍ਞਾਤਾਨੀਤਿ ਸਮ੍ਬਨ੍ਧੋ. ਤਾਨੀਤਿ ਪਬ੍ਬਜ੍ਜਾਦੀਨਿ. ਅਭਿਸਮ੍ਬੋਧਿਨ੍ਤਿ ਅਰਹਤ੍ਤਮਗ੍ਗਞਾਣਪਦਟ੍ਠਾਨਂ ਸਬ੍ਬਞ੍ਞੁਤਞ੍ਞਾਣਞ੍ਚ ਸਬ੍ਬਞ੍ਞੁਤਞ੍ਞਾਣਪਦਟ੍ਠਾਨਂ ਅਰਹਤ੍ਤਮਗ੍ਗਞਾਣਞ੍ਚ. ਬੋਧਿਮਹਾਮਣ੍ਡੇਤਿ ਮਹਨ੍ਤਾਨਂ ਮਗ੍ਗਞਾਣਸਬ੍ਬਞ੍ਞੁਤਞ੍ਞਾਣਾਨਂ ਪਸਨ੍ਨਟ੍ਠਾਨੇ ਬੋਧਿਰੁਕ੍ਖਮੂਲੇਤਿ ਅਤ੍ਥੋ. ਏਵਨ੍ਤਿਆਦਿ ਨਿਗਮਨਂ.

ਤਤ੍ਥਾਤਿ ¶ ਯਂ ‘‘ਤੇਨ ਸਮਯੇਨ ਉਰੁਵੇਲਾਯ’’ਨ੍ਤਿਆਦਿਵਚਨਂ ਵੁਤ੍ਤਂ, ਤਤ੍ਥ. ਉਰੁਵੇਲਾਯਨ੍ਤਿ ਏਤ੍ਥ ਉਰੁਸਦ੍ਦੋ ਮਹਨ੍ਤਪਰਿਯਾਯੋਤਿ ਆਹ ‘‘ਮਹਾਵੇਲਾਯ’’ਨ੍ਤਿ. ‘‘ਵਾਲਿਕਰਾਸਿਮ੍ਹੀ’’ਤਿ ਇਮਿਨਾ ਵੇਲਾਸਦ੍ਦਸ੍ਸ ਰਾਸਤ੍ਥਂ ਦਸ੍ਸੇਤਿ, ਕਾਲਸੀਮਾਦਯੋ ਨਿਵਤ੍ਤੇਤਿ. ਯਦਿ ਪਨ ‘‘ਉਰੂ’’ਤਿ ਵਾਲਿਕਾਯ ਨਾਮਂ, ‘‘ਵੇਲਾ’’ਤਿ ਮਰਿਯਾਦਾਯ, ਏਵਞ੍ਹਿ ਸਤਿ ਨਨੁ ਉਰੁਯਾ ਵੇਲਾਤਿ ਅਤ੍ਥੋ ਦਟ੍ਠਬ੍ਬੋਤਿ ਆਹ ‘‘ਵੇਲਾਤਿਕ੍ਕਮਨਹੇਤੁ ਆਹਟਾ ਉਰੁ ਉਰੁਵੇਲਾ’’ਤਿ. ਇਮਿਨਾ ¶ ਵੇਲਾਯ ਅਤਿਕ੍ਕਮੋ ਵੇਲਾ ਉਤ੍ਤਰਪਦਲੋਪਵਸੇਨ, ਵੇਲਾਯ ਆਹਟਾ ਉਰੁ ਉਰੁਵੇਲਾ ਪਦਵਿਪਰਿਯਾਯਵਸੇਨਾਤਿ ਦਸ੍ਸੇਤਿ. ਏਤ੍ਥਾਤਿ ‘‘ਉਰੁਵੇਲਾਯ’’ਨ੍ਤਿਪਦੇ. ਤਮੇਵਤ੍ਥਂ ਵਿਭਾਵੇਨ੍ਤੋ ਆਹ ‘‘ਅਤੀਤੇ ਕਿਰਾ’’ਤਿਆਦਿ. ਅਨੁਪ੍ਪਨ੍ਨੇ ਬੁਦ੍ਧੇ ਪਬ੍ਬਜਿਤ੍ਵਾਤਿ ਸਮ੍ਬਨ੍ਧੋ. ਤਾਪਸਪਬ੍ਬਜ੍ਜਨ੍ਤਿ ਇਸਿਪਬ੍ਬਜ੍ਜਂ, ਨ ਸਮਣਪਬ੍ਬਜ੍ਜਂ. ਕਤਿਕਵਤ੍ਤਨ੍ਤਿ ਕਰਣਂ ਕਤਂ, ਕਤੇਨ ਪਵਤ੍ਤਂ ਕਤਿਕਂ, ਤਮੇਵ ਵਤ੍ਤਂ ਕਤਿਕਵਤ੍ਤਂ. ਅਕਂਸੁ ਕਿਰਾਤਿ ਸਮ੍ਬਨ੍ਧੋ. ਯੋਤਿ ਯੋ ਕੋਚਿ. ਅਞ੍ਞੋਤਿ ਅਤ੍ਤਨਾ ਅਪਰੋ. ਸੋ ਆਕਿਰਤੂਤਿ ਸਮ੍ਬਨ੍ਧੋ. ਪਤ੍ਤਪੁਟੇਨਾਤਿ ਪਣ੍ਣੇਨ ਕਤੇਨ ਪੁਟੇਨ. ਤਤੋਤਿ ਕਤਿਕਵਤ੍ਤਕਰਣਤੋ. ਤਤ੍ਥਾਤਿ ਤਸ੍ਮਿਂ ਪਦੇਸੇ. ਤਤੋਤਿ ਮਹਾਵਾਲਿਕਰਾਸਿਜਨਨਤੋ, ਪਰਨ੍ਤਿ ਸਮ੍ਬਨ੍ਧੋ. ਨਨ੍ਤਿ ਤਂ ਪਦੇਸਂ. ਤਨ੍ਤਿ ਮਹਾਵਾਲਿਕਰਾਸਿਂ.

‘‘ਬੋਧਿਰੁਕ੍ਖਮੂਲੇ’’ਤਿ ਏਤ੍ਥ ਅਸ੍ਸਤ੍ਥਰੁਕ੍ਖਸ੍ਸ ਉਪਚਾਰਵਸੇਨ ਬੋਧੀਤਿ ਨਾਮਲਭਨਂ ਦਸ੍ਸੇਨ੍ਤੋ ਆਹ ‘‘ਬੋਧਿ ਵੁਚ੍ਚਤਿ ਚਤੂਸੁ ਮਗ੍ਗੇਸੁ ਞਾਣ’’ਨ੍ਤਿਆਦਿ. ਇਮਿਨਾ ਚਤ੍ਤਾਰਿ ਸਚ੍ਚਾਨਿ ਬੁਜ੍ਝਤੀਤਿ ਬੋਧੀਤਿ ਵਚਨਤ੍ਥੇਨ ਚਤੂਸੁ ਮਗ੍ਗੇਸੁ ਞਾਣਂ ਬੋਧਿ ਨਾਮਾਤਿ ਦਸ੍ਸੇਤਿ. ਏਤ੍ਥਾਤਿ ਬੋਧਿਮ੍ਹਿ, ਬੋਧਿਯਂ ਵਾ. ਸਮੀਪਤ੍ਥੇ ਚੇਤਂ ਭੁਮ੍ਮਵਚਨਂ. ਰੁਕ੍ਖੋਪੀਤਿ ਪਿਸਦ੍ਦੇਨ ਨ ਮਗ੍ਗਞਾਣਮੇਵਾਤਿ ਦਸ੍ਸੇਤਿ. ਮੂਲੇਤਿ ਆਸਨ੍ਨੇ. ਪਠਮਾਭਿਸਮ੍ਬੁਦ੍ਧੋਤਿ ਅਨੁਨਾਸਿਕਲੋਪਵਸੇਨ ਸਨ੍ਧੀਤਿ ਆਹ ‘‘ਪਠਮਂ ਅਭਿਸਮ੍ਬੁਦ੍ਧੋ’’ਤਿ. ‘‘ਹੁਤ੍ਵਾ’’ਤਿ ਇਮਿਨਾ ‘‘ਪਠਮ’’ਨ੍ਤਿਪਦਸ੍ਸ ਭਾਵਨਪੁਂਸਕਂ ਦਸ੍ਸੇਤਿ. ਸਬ੍ਬਪਠਮਂਯੇਵਾਤਿ ਸਬ੍ਬੇਸਂ ਜਨਾਨਂ ਪਠਮਮੇਵ ਅਭਿਸਮ੍ਬੁਦ੍ਧੋ ਹੁਤ੍ਵਾਤਿ ਸਮ੍ਬਨ੍ਧੋ. ਏਕੋ ਏਵ ਪਲ੍ਲਙ੍ਕੋ ਏਕਪਲ੍ਲਙ੍ਕੋਤਿ ਅਵਧਾਰਣਸਮਾਸਂ ਦਸ੍ਸੇਨ੍ਤੋ ਆਹ ‘‘ਏਕੇਨੇਵ ਪਲ੍ਲਙ੍ਕੇਨਾ’’ਤਿ. ‘‘ਸਕਿਂ…ਪੇ… ਆਭੁਜਿਤੇਨਾ’’ਤਿ ਇਮਿਨਾ ਅਵਧਾਰਣਫਲਂ ਦਸ੍ਸੇਤਿ. ਪਲ੍ਲਙ੍ਕੋਤਿ ਚ ਊਰੁਬਦ੍ਧਾਸਨਂ. ਵਿਮੁਤ੍ਤਿਸੁਖਂ ਪਟਿਸਂਵੇਦੀਤਿ ਏਤ੍ਥ ਤਦਙ੍ਗਾਦੀਸੁ (ਪਟਿ. ਮ. ਅਟ੍ਠ. ੧.੧.੧੦੪) ਪਞ੍ਚਸੁ ਵਿਮੁਤ੍ਤੀਸੁ ਪਟਿਪ੍ਪਸ੍ਸਦ੍ਧਿਸਙ੍ਖਾਤਾ ਫਲਸਮਾਪਤ੍ਤਿ ਏਵਾਧਿਪ੍ਪੇਤਾਤਿ ਆਹ ‘‘ਫਲਸਮਾਪਤ੍ਤਿਸੁਖ’’ਨ੍ਤਿ. ਫਲਸਮਾਪਤ੍ਤੀਤਿ ਅਰਹਤ੍ਤਫਲਸਮਾਪਤ੍ਤਿ. ਸਾ ਹਿ ਵਿਰੁਦ੍ਧੇਹਿ ਉਪਕ੍ਕਿਲੇਸੇਹਿ ਮੁਚ੍ਚਿਤਟ੍ਠੇਨ ਵਿਮੁਤ੍ਤੀਤਿ ਵੁਚ੍ਚਤਿ, ਤਾਯ ਸਮ੍ਪਯੁਤ੍ਤਂ ਸੁਖਂ ਵਿਮੁਤ੍ਤਿਸੁਖਂ, ਚਤੁਤ੍ਥਜ੍ਝਾਨਿਕਂ ਅਰਹਤ੍ਤਫਲਸਮਾਪਤ੍ਤਿਸੁਖਂ. ਅਥਵਾ ਤਾਯ ਜਾਤਂ ਸੁਖਂ ਵਿਮੁਤ੍ਤਿਸੁਖਂ, ਸਕਲਕਿਲੇਸਦੁਕ੍ਖੂਪਸਮਸੁਖਂ ¶ . ‘‘ਪਟਿਸਂਵੇਦਯਮਾਨੋ’’ਤਿਇਮਿਨਾ ‘‘ਪਟਿਸਂਵੇਦੀ’’ਤਿ ਏਤ੍ਥ ਣੀਪਚ੍ਚਯਸ੍ਸ ਕਤ੍ਤੁਤ੍ਥਂ ਦਸ੍ਸੇਤਿ. ਪੁਨਪ੍ਪੁਨਂ ਸੁਟ੍ਠੁ ਵਦਤਿ ਅਨੁਭਵਤੀਤਿ ਪਟਿਸਂਵੇਦੀ. ਪਟਿਸਂਵੇਦੀ ਹੁਤ੍ਵਾ ਨਿਸੀਦੀਤਿ ਸਮ੍ਬਨ੍ਧੋ.

ਪਚ੍ਚਯਾਕਾਰਨ੍ਤਿ ¶ ਅਵਿਜ੍ਜਾਦਿਪਚ੍ਚਯਾਨਂ ਉਪ੍ਪਾਦਾਕਾਰਂ. ਕਸ੍ਮਾ ਪਚ੍ਚਯਾਕਾਰੋ ਪਟਿਚ੍ਚਸਮੁਪ੍ਪਾਦੋ ਨਾਮਾਤਿ ਆਹ ‘‘ਪਚ੍ਚਯਾਕਾਰੋ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ‘‘ਅਞ੍ਞਮਞ੍ਞ’’ਨ੍ਤਿਇਮਿਨਾ ‘‘ਪਟਿਚ੍ਚਾ’’ਤਿਪਦਸ੍ਸ ਕਮ੍ਮਂ ਦਸ੍ਸੇਤਿ, ‘‘ਸਹਿਤੇ’’ਤਿਇਮਿਨਾ ਸਂਸਦ੍ਦਸ੍ਸਤ੍ਥਂ. ‘‘ਧਮ੍ਮੇ’’ਤਿਇਮਿਨਾ ਤਸ੍ਸ ਸਰੂਪਂ. ਏਤ੍ਥਾਤਿ ਇਮਿਸ੍ਸਂ ਵਿਨਯਟ੍ਠਕਥਾਯਂ. ਤਤ੍ਥਾਤਿ ‘‘ਅਨੁਲੋਮਪਟਿਲੋਮ’’ਨ੍ਤਿਪਦੇ, ਅਨੁਲੋਮਪਟਿਲੋਮੇਸੁ ਵਾ. ਸ੍ਵੇਵ ਪਚ੍ਚਯਾਕਾਰੋ ਵੁਚ੍ਚਤੀਤਿ ਯੋਜਨਾ. ‘‘ਅਤ੍ਤਨਾ ਕਤ੍ਤਬ੍ਬਕਿਚ੍ਚਕਰਣਤੋ’’ਤਿਇਮਿਨਾ ਅਨੁਲੋਮਸਦ੍ਦਸ੍ਸ ਸਭਾਵਤ੍ਥਂ ਦਸ੍ਸੇਤਿ. ਸ੍ਵੇਵਾਤਿ ਪਚ੍ਚਯਾਕਾਰੋ ਏਵ. ਤਂ ਕਿਚ੍ਚਨ੍ਤਿ ਅਤ੍ਤਨਾ ਕਤ੍ਤਬ੍ਬਂ ਤਂ ਕਿਚ੍ਚਂ. ਤਸ੍ਸ ਅਕਰਣਤੋਤਿ ਅਤ੍ਤਨਾ ਕਤ੍ਤਬ੍ਬਕਿਚ੍ਚਸ੍ਸ ਅਕਰਣਤੋ. ਇਮਿਨਾ ਪਟਿਲੋਮਸਦ੍ਦਸ੍ਸ ਸਭਾਵਤ੍ਥਂ ਦਸ੍ਸੇਤਿ. ਪੁਰਿਮਨਯੇਨੇਵਾਤਿ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿਆਦਿਨਾ ਪੁਰਿਮਨਯੇਨੇਵ. ਵਾਤਿ ਅਥਵਾ. ਪਵਤ੍ਤਿਯਾਤਿ ਸਂਸਾਰਪਵਤ੍ਤਿਯਾ. ਅਨੁਲੋਮੋਤਿ ਅਨੁਕੂਲੋ, ਅਨੁਰੂਪੋ ਵਾ. ਇਤਰੋਤਿ ‘‘ਅਵਿਜ੍ਜਾਯਤ੍ਵੇਵਾ’’ਤਿਆਦਿਨਾ ਵੁਤ੍ਤੋ ਪਚ੍ਚਯਾਕਾਰੋ. ਤਸ੍ਸਾਤਿ ਪਵਤ੍ਤਿਯਾ. ਪਟਿਲੋਮੋਤਿ ਪਟਿਵਿਰੁਦ੍ਧੋ, ਏਤ੍ਥਾਤਿ ‘‘ਅਨੁਲੋਮਪਟਿਲੋਮ’’ਨ੍ਤਿਪਦੇ. ਅਤ੍ਥੋ ਦਟ੍ਠਬ੍ਬੋਤਿ ਏਤ੍ਥ ਅਤ੍ਥੋ ਏਵਾਤਿ ਸਮ੍ਭਵਤੋ ਤਸ੍ਸ ਫਲਂ ਵਾ ‘‘ਸਦ੍ਦਨ੍ਤਰਤ੍ਥਾਪੋਹਨੇਨ ਸਦ੍ਦੋ ਅਤ੍ਥਂ ਵਦਤੀ’’ਤਿ ਵਚਨਤੋ (ਉਦਾ. ਅਟ੍ਠ. ੧; ਦੀ. ਨਿ. ਟੀ. ੧.੧; ਮ. ਨਿ. ਟੀ. ੧.ਮੁਲਪਰਿਯਾਯਸੁਤ੍ਤਵਣ੍ਣਨਾ; ਸਂ. ਨਿ. ਟੀ. ੧.੧.ਓਘਤਰਯਸੁਤ੍ਤਵਣ੍ਣਨਾ; ਅ. ਨਿ. ਟੀ. ੧.੧.ਰੁਪਾਦਿਵਗ੍ਗਵਣ੍ਣਨਾ) ਸਦ੍ਦਨ੍ਤਰਤ੍ਥਾਪੋਹਨਂ ਵਾ ਦਸ੍ਸੇਨ੍ਤੋ ਆਹ ‘‘ਆਦਿਤੋ ਪਨਾ’’ਤਿਆਦਿ. ਯਾਵਸਦ੍ਦੋ ਅਵਧਿਵਚਨੋ. ਯਾਵ ਅਨ੍ਤਂ ਪਾਪੇਤ੍ਵਾਤਿ ਸਮ੍ਬਨ੍ਧੋ. ਇਤੋਤਿ ਇਮੇਹਿ ਵੁਤ੍ਤੇਹਿ ਦ੍ਵੀਹਿ ਅਤ੍ਥੇਹਿ. ‘‘ਮਨਸਾਕਾਸੀ’’ਤਿ ਏਤ੍ਥ ਇਕਾਰਲੋਪਵਸੇਨ ਸਨ੍ਧੀਤਿ ਆਹ ‘‘ਮਨਸਿ ਅਕਾਸੀ’’ਤਿ. ਤਤ੍ਥਾਤਿ ‘‘ਮਨਸਾਕਾਸੀ’’ਤਿਪਦੇ. ਯਥਾਤਿ ਯੇਨਾਕਾਰੇਨ. ਇਦਨ੍ਤਿ ਇਮਂ ਆਕਾਰਂ. ਤਤ੍ਥਾਤਿ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿਆਦਿਪਾਠੇ ਅਵਯਵਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਸਮਾਸਮਜ੍ਝੇ ਤਸਦ੍ਦੇਨ ਪੁਬ੍ਬਪਦਸ੍ਸੇਵ ਲਿਙ੍ਗਵਚਨਾਨਿ ਗਹੇਤਬ੍ਬਾਨੀਤਿ ਆਹ ‘‘ਅਵਿਜ੍ਜਾ ਚ ਸਾ ਪਚ੍ਚਯੋ ਚਾ’’ਤਿ ¶ . ਵਾਕ੍ਯੇ ਪਨ ਤਸਦ੍ਦੇਨ ਪਰਪਦਸ੍ਸੇਵ ਲਿਙ੍ਗਵਚਨਾਨਿ ਗਹੇਤਬ੍ਬਾਨਿ. ‘‘ਅਵਿਜ੍ਜਾਪਚ੍ਚਯਾ’’ਤਿਪਦਂ ‘‘ਸਮ੍ਭਵਨ੍ਤੀ’’ਤਿਪਦੇਨ ਸਮ੍ਬਨ੍ਧਿਤਬ੍ਬਨ੍ਤਿ ਆਹ ‘‘ਤਸ੍ਮਾ ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ ਸਮ੍ਭਵਨ੍ਤੀ’’ਤਿ. ਸਬ੍ਬਪਦੇਸੂਤਿ ‘‘ਸਙ੍ਖਾਰਪਚ੍ਚਯਾ ਵਿਞ੍ਞਾਣ’’ਨ੍ਤਿਆਦੀਸੁ ਸਬ੍ਬੇਸੁ ਪਦੇਸੁ.

ਯਥਾ ਪਨਾਤਿ ਯੇਨਾਕਾਰੇਨ ਪਨ. ਇਦਨ੍ਤਿ ਇਮਂ ਆਕਾਰਂ. ਤਤ੍ਥਾਤਿ ‘‘ਅਵਿਜ੍ਜਾਯ…ਪੇ… ਨਿਰੋਧੋ’’ਤਿਆਦਿਵਾਕ੍ਯੇ. ਅਵਿਜ੍ਜਾਯਤ੍ਵੇਵਾਤਿ ਏਤ੍ਥ ‘‘ਭਦ੍ਦਿਯੋਤ੍ਵੇਵਾ’’ਤਿਆਦੀਸੁ ਵਿਯ ‘‘ਭਦ੍ਦਿਯੋ ਇਤਿ ਏਵਾ’’ਤਿ ਪਦਚ੍ਛੇਦੋ ਕਤ੍ਤਬ੍ਬੋ, ਨ ਏਵਂ ‘‘ਅਵਿਜ੍ਜਾਯ ਇਤਿ ਏਵਾ’’ਤਿ, ਅਥ ਖੋ ‘‘ਅਵਿਜ੍ਜਾਯ ਤੁ ਏਵਾ’’ਤਿ ਕਾਤਬ੍ਬੋਤਿ ਆਹ ‘‘ਅਵਿਜ੍ਜਾਯ ਤੁ ਏਵਾ’’ਤਿ. ‘‘ਪ ਅਤਿਮੋਕ੍ਖਂ ਅਤਿਪਮੋਕ੍ਖ’’ਨ੍ਤਿਆਦੀਸੁ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਵਿਯ ਉਪਸਗ੍ਗਬ੍ਯਤ੍ਤਯੇਨ ਵੁਤ੍ਤਂ, ਏਵਮਿਧ ¶ ਨਿਪਾਤਬ੍ਯਤ੍ਤਯੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਤ੍ਥ ਏਵਸਦ੍ਦੇਨ ਸਤ੍ਤਜੀਵਾਦਯੋ ਨਿਵਤ੍ਤੇਤਿ. ਤੁਸਦ੍ਦੋ ਪਕ੍ਖਨ੍ਤਰਤ੍ਥਜੋਤਕੋ. ਅਨੁਲੋਮਪਕ੍ਖਤੋ ਪਟਿਲੋਮਸਙ੍ਖਾਤਂ ਪਕ੍ਖਨ੍ਤਰਂ ਮਨਸਾਕਾਸੀਤਿ ਅਤ੍ਥੋ. ਅਸੇਸਵਿਰਾਗਨਿਰੋਧਸਦ੍ਦੋ ਅਯੁਤ੍ਤਸਮਾਸੋ, ਉਤ੍ਤਰਪਦੇਨ ਚ ਤਤਿਯਾਸਮਾਸੋਤਿ ਆਹ ‘‘ਵਿਰਾਗਸਙ੍ਖਾਤੇਨ ਮਗ੍ਗੇਨ ਅਸੇਸਨਿਰੋਧਾ’’ਤਿ. ਤਤ੍ਥ ਅਸੇਸਸਦ੍ਦਂ ਵਿਰਾਗਸਦ੍ਦੇਨ ਸਮ੍ਬਨ੍ਧਮਕਤ੍ਵਾ ਨਿਰੋਧਸਦ੍ਦੇਨ ਸਮ੍ਬਨ੍ਧਂ ਕਤ੍ਵਾ ਅਤ੍ਥਸ੍ਸ ਗਹਣਂ ਅਯੁਤ੍ਤਸਮਾਸੋ ਨਾਮ. ‘‘ਮਗ੍ਗੇਨਾ’’ਤਿਇਮਿਨਾ ਵਿਰਾਗਸਦ੍ਦਸ੍ਸਤ੍ਥਂ ਦਸ੍ਸੇਤਿ. ਮਗ੍ਗੋ ਹਿ ਵਿਰਜ੍ਜਨਟ੍ਠੇਨ ਵਿਰਾਗੋਤਿ ਵੁਚ੍ਚਤਿ. ਸਙ੍ਖਾਰਨਿਰੋਧੋਤਿ ਏਤ੍ਥ ਮਗ੍ਗੇਨ ਨਿਰੋਧਤ੍ਤਾ ਅਨੁਪ੍ਪਾਦਨਿਰੋਧੋ ਹੋਤੀਤਿ ਆਹ ‘‘ਸਙ੍ਖਾਰਾਨਂ ਅਨੁਪ੍ਪਾਦਨਿਰੋਧੋ ਹੋਤੀ’’ਤਿ. ਅਨੁਪ੍ਪਾਦਨਿਰੋਧੋਤਿ ਚ ਅਨੁਪ੍ਪਾਦੇਨ ਨਿਰੋਧੋ ਸਮੁਚ੍ਛੇਦਵਸੇਨ ਨਿਰੁਦ੍ਧਤ੍ਤਾ. ਏਵਨ੍ਤਿ ਯਥਾ ਅਵਿਜ੍ਜਾਯਤ੍ਵੇਵ ਅਸੇਸਵਿਰਾਗਨਿਰੋਧਾ ਸਙ੍ਖਾਰਨਿਰੋਧੋ, ਏਵਂ ਤਥਾਤਿ ਅਤ੍ਥੋ. ਤਤ੍ਥਾਤਿ ‘‘ਏਵਮੇਤਸ੍ਸਾ’’ਤਿਆਦਿਵਚਨੇ. ਕੇਵਲਸਦ੍ਦੋ ਸਕਲਪਰਿਯਾਯੋਤਿ ਆਹ ‘‘ਸਕਲਸ੍ਸਾ’’ਤਿ, ਅਨਵਸੇਸਸ੍ਸਾਤਿ ਅਤ੍ਥੋ. ਅਥਵਾ ਸਤ੍ਤਜੀਵਾਦੀਹਿ ਅਮਿਸ੍ਸਿਤਤ੍ਤਾ ਅਮਿਸ੍ਸਤ੍ਥੋਤਿ ਆਹ ‘‘ਸੁਦ੍ਧਸ੍ਸ ਵਾ’’ਤਿ. ‘‘ਸਤ੍ਤਵਿਰਹਿਤਸ੍ਸਾ’’ਤਿ ਇਮਿਨਾ ਸੁਦ੍ਧਭਾਵਂ ਦਸ੍ਸੇਤਿ. ਦੁਕ੍ਖਕ੍ਖਨ੍ਧਸ੍ਸਾਤਿ ਏਤ੍ਥ ਖਨ੍ਧਸਦ੍ਦੋ ਰਾਸਤ੍ਥਵਾਚਕੋਤਿ ਆਹ ‘‘ਦੁਕ੍ਖਰਾਸਿਸ੍ਸਾ’’ਤਿ.

ਏਤਮਤ੍ਥਂ ¶ ਵਿਦਿਤ੍ਵਾਤਿ ਏਤ੍ਥ ਏਤਸਦ੍ਦਸ੍ਸ ਵਿਸਯਂ ਦਸ੍ਸੇਤੁਂ ਵੁਤ੍ਤਂ ‘‘ਯ੍ਵਾਯ’’ਨ੍ਤਿਆਦਿ. ਤਤ੍ਥ ‘‘ਅਵਿਜ੍ਜਾਦਿਵਸੇਨ…ਪੇ… ਨਿਰੋਧੋ ਹੋਤੀ’’ਤਿ ਯ੍ਵਾਯਂ ਅਤ੍ਥੋ ਵੁਤ੍ਤੋਤਿ ਯੋਜਨਾ. ਸਮੁਦਯੋ ਚ ਹੋਤੀਤਿ ਸਮ੍ਬਨ੍ਧੋ. ਵਿਦਿਤਵੇਲਾਯਨ੍ਤਿ ਪਾਕਟਵੇਲਾਯਂ ਪਸਿਦ੍ਧਕਾਲੇਤਿ ਅਤ੍ਥੋ. ਇਮਂ ਉਦਾਨਨ੍ਤਿ ਏਤ੍ਥ ਇਮਸਦ੍ਦੋ ਵੁਚ੍ਚਮਾਨਾਪੇਕ੍ਖੋ. ਤਸ੍ਮਿਂ ਅਤ੍ਥੇ ਵਿਦਿਤੇ ਸਤੀਤਿ ਯੋਜਨਾ. ਪਜਾਨਨਤਾਯਾਤਿ ਪਕਾਰੇਨ ਜਾਨਨਭਾਵਸ੍ਸ. ਸੋਮਨਸ੍ਸਯੁਤ੍ਤਞਾਣਸਮੁਟ੍ਠਾਨਨ੍ਤਿ ਸੋਮਨਸ੍ਸੇਨ ਏਕੁਪ੍ਪਾਦਾਦਿਵਸੇਨ ਯੁਤ੍ਤੇਨ ਞਾਣੇਨ ਸਮੁਟ੍ਠਾਨਂ, ਯੁਤ੍ਤਂ ਵਾ ਞਾਣਸਙ੍ਖਾਤਂ ਸਮੁਟ੍ਠਾਨਂ ਉਦਾਨਨ੍ਤਿ ਸਮ੍ਬਨ੍ਧੋ. ਤਤ੍ਥ ਉਦਾਨਨ੍ਤਿ ਕੇਨਟ੍ਠੇਨ ਉਦਾਨਂ? ਉਦਾਨਟ੍ਠੇਨ, ਮੋਦਨਟ੍ਠੇਨ, ਕੀਲ਼ਨਟ੍ਠੇਨ ਚਾਤਿ ਅਤ੍ਥੋ. ਕਿਮਿਦਂ ਉਦਾਨਂ ਨਾਮ? ਪੀਤਿਵੇਗਸਮੁਟ੍ਠਾਪਿਤੋ ਉਦਾਹਾਰੋ. ਯਥਾ (ਉਦਾ. ਅਟ੍ਠ. ਗਨ੍ਥਾਰਮ੍ਭਕਥਾ) ਹਿ ਯਂ ਤੇਲਾਦਿਮਿਨਿਤਬ੍ਬਵਤ੍ਥੁ ਮਾਨਂ ਗਹੇਤੁਂ ਨ ਸਕ੍ਕੋਤਿ ਵਿਸਨ੍ਦਿਤ੍ਵਾ ਗਚ੍ਛਤਿ, ਤਂ ‘‘ਅਵਸੇਕੋ’’ਤਿ ਵੁਚ੍ਚਤਿ. ਯਞ੍ਚ ਜਲਂ ਤਲ਼ਾਕਂ ਗਹੇਤੁਂ ਨ ਸਕ੍ਕੋਤਿ, ਅਜ੍ਝੋਤ੍ਥਰਿਤ੍ਵਾ ਗਚ੍ਛਤਿ, ਤਂ ‘‘ਓਘੋ’’ਤਿ ਵੁਚ੍ਚਤਿ. ਏਵਮੇਵਂ ਯਂ ਪੀਤਿਵੇਗਸਮੁਟ੍ਠਾਪਿਤਂ ਵਿਤਕ੍ਕਵਿਪ੍ਫਾਰਂ ਹਦਯਂ ਸਨ੍ਧਾਰੇਤੁਂ ਨ ਸਕ੍ਕੋਤਿ, ਸੋ ਅਧਿਕੋ ਹੁਤ੍ਵਾ ਅਨ੍ਤੋ ਅਸਣ੍ਠਹਿਤ੍ਵਾ ਵਚੀਦ੍ਵਾਰੇਨ ਨਿਕ੍ਖਮਨ੍ਤੋ ਪਟਿਗ੍ਗਾਹਕਨਿਰਪੇਕ੍ਖੋ ਉਦਾਹਾਰਵਿਸੇਸੋ ‘‘ਉਦਾਨ’’ਨ੍ਤਿ ਵੁਚ੍ਚਤਿ. ‘‘ਅਤ੍ਤਮਨਵਾਚਂ ਨਿਚ੍ਛਾਰੇਸੀ’’ਤਿ ਇਮਿਨਾ ਉਦਧਾਤੁਸ੍ਸ ਉਦਾਹਾਰਤ੍ਥਂ ਦਸ੍ਸੇਤਿ.

ਤਸ੍ਸਾਤਿ ਉਦਾਨਸ੍ਸ ਅਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਯਦਾਤਿ ਏਤ੍ਥ ਦਾਪਚ੍ਚਯਸ੍ਸ ਅਤ੍ਥਵਾਕ੍ਯਂ ¶ ਦਸ੍ਸੇਨ੍ਤੋ ਆਹ ‘‘ਯਸ੍ਮਿਂ ਕਾਲੇ’’ਤਿ. ਹਵੇਤਿ ‘‘ਬ੍ਯਤ੍ਤ’’ਨ੍ਤਿ ਇਮਸ੍ਮਿਂ ਅਤ੍ਥੇ ਨਿਪਾਤੋ. ਬ੍ਯਤ੍ਤਂ ਪਾਕਟਨ੍ਤਿ ਹਿ ਅਤ੍ਥੋ. ਪਾਤੁਭਵਨ੍ਤੀਤਿ ਏਤ੍ਥ ਪਾਤੁਨਿਪਾਤਸ੍ਸ ਅਤ੍ਥਸ੍ਸ ‘‘ਹਵੇ’’ਤਿ ਨਿਪਾਤੇਨ ਵੁਤ੍ਤਤ੍ਤਾ ਭੂਧਾਤੁਸ੍ਸੇਵ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਉਪ੍ਪਜ੍ਜਨ੍ਤੀ’’ਤਿ. ਅਨੁਲੋਮ ਪਟਿਲੋਮ ਪਚ੍ਚਯਾਕਾਰ ਪਟਿਵੇਧਸਾਧਕਾਤਿ ਅਨੁਲੋਮਤੋ ਚ ਪਟਿਲੋਮਤੋ ਚ ਪਚ੍ਚਯਾਕਾਰਸ੍ਸ ਪਟਿਵਿਜ੍ਝਨਸ੍ਸ ਸਾਧਕਾ. ਬੋਧਿਪਕ੍ਖਿਯਧਮ੍ਮਾਤਿ ਬੋਧਿਯਾ ਮਗ੍ਗਞਾਣਸ੍ਸ ਪਕ੍ਖੇ ਭਵਾ ਸਤ੍ਤਤਿਂਸ ਧਮ੍ਮਾ. ਅਥਵਾ ਪਾਤੁਨਿਪਾਤੇਨ ਸਹ ‘‘ਭਵਨ੍ਤੀ’’ਤਿਪਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਕਾਸਨ੍ਤੀ’’ਤਿ. ਇਮਸ੍ਮਿਂ ਨਯੇ ਹਵੇਸਦ੍ਦੋ ਏਕਂਸਤ੍ਥਵਾਚਕੋ. ਹਵੇ ਏਕਂਸੇਨਾਤਿ ਹਿ ਅਤ੍ਥੋ. ਅਭਿਸਮਯਵਸੇਨਾਤਿ ਮਗ੍ਗਞਾਣਵਸੇਨ ¶ . ਮਗ੍ਗਞਾਣਞ੍ਹਿ ਯਸ੍ਮਾ ਅਭਿਮੁਖਂ ਚਤ੍ਤਾਰਿ ਸਚ੍ਚਾਨਿ ਸਮੇਚ੍ਚ ਅਯਤਿ ਜਾਨਾਤਿ, ਤਸ੍ਮਾ ਅਭਿਸਮਯੋਤਿ ਵੁਚ੍ਚਤਿ.

‘‘ਕਿਲੇਸਸਨ੍ਤਾਪਨਟ੍ਠੇਨਾ’’ਤਿ ਇਮਿਨਾ ਆਭੁਸੋ ਕਿਲੇਸੇ ਤਾਪੇਤੀਤਿ ਆਤਾਪੋਤਿ ਵਚਨਤ੍ਥਂ ਦਸ੍ਸੇਤਿ. ਨ ਵੀਰਿਯਸਾਮਞ੍ਞਂ ਹੋਤਿ, ਅਥ ਖੋ ਸਮ੍ਮਪ੍ਪਧਾਨਵੀਰਿਯਮੇਵਾਤਿ ਆਹ ‘‘ਸਮ੍ਮਪ੍ਪਧਾਨਵੀਰਿਯਵਤੋ’’ਤਿ. ਇਮਿਨਾ ਆਤਾਪੀਤਿ ਏਤ੍ਥ ਈਪਚ੍ਚਯਸ੍ਸ ਵਨ੍ਤੁਅਤ੍ਥਂ ਦਸ੍ਸੇਤਿ. ਆਰਮ੍ਮਣੂਪਨਿਜ੍ਝਾਨਲਕ੍ਖਣੇਨ ਚਾਤਿ ਕਸਿਣਾਦਿਆਰਮ੍ਮਣਂ ਉਪਗਨ੍ਤ੍ਵਾ ਨਿਜ੍ਝਾਨਸਭਾਵੇਨ ਅਟ੍ਠਸਮਾਪਤ੍ਤਿਸਙ੍ਖਾਤੇਨ ਝਾਨੇਨ ਚ. ਲਕ੍ਖਣੂਪਨਿਜ੍ਝਾਨਲਕ੍ਖਣੇਨ ਚਾਤਿ ਅਨਿਚ੍ਚਾਦਿਲਕ੍ਖਣਂ ਉਪਗਨ੍ਤ੍ਵਾ ਨਿਜ੍ਝਾਨਸਭਾਵੇਨ ਵਿਪਸ੍ਸਨਾਮਗ੍ਗਫਲਸਙ੍ਖਾਤੇਨ ਝਾਨੇਨ ਚ. ‘‘ਬਾਹਿਤਪਾਪਸ੍ਸਾ’’ਤਿ ਇਮਿਨਾ ਬਾਹਿਤੋ ਅਣੋ ਪਾਪੋ ਅਨੇਨਾਤਿ ਬ੍ਰਾਹ੍ਮਣੋਤਿ ਵਚਨਤ੍ਥਂ ਦਸ੍ਸੇਤਿ. ਅਣਸਦ੍ਦੋ ਹਿ ਪਾਪਪਰਿਯਾਯੋ. ‘‘ਖੀਣਾਸਵਸ੍ਸਾ’’ਤਿ ਇਮਿਨਾ ਤਸ੍ਸ ਸਰੂਪਂ ਦਸ੍ਸੇਤਿ. ਅਥਸ੍ਸਾਤਿ ਅਥ ਅਸ੍ਸ, ਤਸ੍ਮਿਂ ਕਾਲੇ ਬ੍ਰਾਹ੍ਮਣਸ੍ਸਾਤਿ ਅਤ੍ਥੋ. ਯਾ ਏਤਾ ਕਙ੍ਖਾ ਵੁਤ੍ਤਾਤਿ ਸਮ੍ਬਨ੍ਧੋ. ‘‘ਕੋ ਨੁ ਖੋ…ਪੇ… ਅਵੋਚਾ’’ਤਿਆਦਿਨਾ (ਸਂ. ਨਿ. ੨.੧੨) ਨਯੇਨ ਚ ਤਥਾ ‘‘ਕਤਮਂ ਨੁ ਖੋ…ਪੇ… ਅਵੋਚਾ’’ਤਿਆਦਿਨਾ (ਸਂ. ਨਿ. ੨.੩੫) ਨਯੇਨ ਚ ਪਚ੍ਚਯਾਕਾਰੇ ਵੁਤ੍ਤਾਤਿ ਯੋਜਨਾ. ਨੋ ਕਲ੍ਲੋ ਪਞ੍ਹੋਤਿ ਅਯੁਤ੍ਤੋ ਪਞ੍ਹੋ, ਦੁਪ੍ਪਞ੍ਹੋ ਏਸੋਤਿ ਅਤ੍ਥੋ. ਤਥਾਤਿ ਏਵਂ, ਤਤੋ ਅਞ੍ਞਥਾ ਵਾ. ਯਾ ਚ ਸੋਲ਼ਸ ਕਙ੍ਖਾ (ਮ. ਨਿ. ੧.੧੮; ਸਂ. ਨਿ. ੨.੨੦) ਆਗਤਾਤਿ ਸਮ੍ਬਨ੍ਧੋ. ਅਪਟਿਵਿਦ੍ਧਤ੍ਤਾ ਕਙ੍ਖਾਤਿ ਯੋਜਨਾ. ਸੋਲ਼ਸ ਕਙ੍ਖਾਤਿ ਅਤੀਤਵਿਸਯਾ ਪਞ੍ਚ, ਅਨਾਗਤਵਿਸਯਾ ਪਞ੍ਚ, ਪਚ੍ਚੁਪ੍ਪਨ੍ਨਵਿਸਯਾ ਛਾਤਿ ਸੋਲ਼ਸਵਿਧਾ ਕਙ੍ਖਾ. ਵਪਯਨ੍ਤੀਤਿ ਵਿ ਅਪਯਨ੍ਤਿ, ਇਕਾਰਲੋਪੇਨਾਯਂ ਸਨ੍ਧਿ. ਵਿਤ੍ਯੂਪਸਗ੍ਗੋ ਧਾਤ੍ਵਤ੍ਥਾਨੁਵਤ੍ਤਕੋ, ਅਪਯਨ੍ਤਿ – ਸਦ੍ਦੋ ਅਪਗਮਨਤ੍ਥੋਤਿ ਆਹ ‘‘ਅਪਗਚ੍ਛਨ੍ਤੀ’’ਤਿ. ‘‘ਨਿਰੁਜ੍ਝਨ੍ਤੀ’’ਤਿਇਮਿਨਾ ਅਪਗਮਨਤ੍ਥਮੇਵ ਪਰਿਯਾਯਨ੍ਤਰੇਨ ਦੀਪੇਤਿ. ‘‘ਕਸ੍ਮਾ’’ਤਿ ਇਮਿਨਾ ‘‘ਯਤੋ ਪਜਾਨਾਤਿ ਸਹੇਤੁਧਮ੍ਮ’’ਨ੍ਤਿ ਵਾਕ੍ਯਸ੍ਸ ਪੁਬ੍ਬਵਾਕ੍ਯਕਾਰਣਭਾਵਂ ਦਸ੍ਸੇਤਿ. ਸਹੇਤੁਧਮ੍ਮਨ੍ਤਿ ਏਤ੍ਥ ਸਹ ਅਵਿਜ੍ਜਾਦਿਹੇਤੁਨਾਤਿ ਸਹੇਤੁ, ਸਙ੍ਖਾਰਾਦਿਕੋ ਪਚ੍ਚਯੁਪ੍ਪਨ੍ਨਧਮ੍ਮੋ. ਸਹੇਤੁ ਚ ਸੋ ਧਮ੍ਮੋ ਚਾਤਿ ਸਹੇਤੁਧਮ੍ਮੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਵਿਜ੍ਜਾਦਿਕੇਨਾ’’ਤਿਆਦਿ ¶ . ‘‘ਪਟਿਵਿਜ੍ਝਤੀ’’ਤਿ ਇਮਿਨਾ ਪਜਾਨਾ ਤੀਤਿ ¶ ਏਤ੍ਥ ਞਾਧਾਤੁਯਾ ਅਵਬੋਧਨਤ੍ਥਂ ਦਸ੍ਸੇਤਿ, ਮਾਰਣਤੋਸਨਾਦਿਕੇ ਅਤ੍ਥੇ ਨਿਵਤ੍ਤੇਤਿ. ਇਤੀਤਿ ਤਸ੍ਮਾ, ਵਪਯਨ੍ਤੀਤਿ ਯੋਜਨਾ.

੨. ਪਚ੍ਚਯਕ੍ਖਯਸ੍ਸਾਤਿ ਪਚ੍ਚਯਾਨਂ ਖਯਟ੍ਠਾਨਸ੍ਸ ਅਸਙ੍ਖਤਸ੍ਸਾਤਿ ਯੋਜਨਾ. ਤਤ੍ਰਾਤਿ ਦੁਤਿਯਉਦਾਨੇ. ਖੀਯਨ੍ਤਿ ਪਚ੍ਚਯਾ ਏਤ੍ਥਾਤਿ ਖਯਂ, ਨਿਬ੍ਬਾਨਨ੍ਤਿ ਆਹ ‘‘ਪਚ੍ਚਯਾਨਂ ਖਯਸਙ੍ਖਾਤਂ ਨਿਬ੍ਬਾਨ’’ਨ੍ਤਿ. ‘‘ਅਞ੍ਞਾਸੀ’’ਤਿ ਇਮਿਨਾ ਅਵੇਦੀਤਿ ਏਤ੍ਥ ਵਿਦਧਾਤੁਯਾ ਞਾਣਤ੍ਥਂ ਦਸ੍ਸੇਤਿ, ਅਨੁਭਵਨਲਾਭਾਦਿਕੇ ਨਿਵਤ੍ਤੇਤਿ. ਤਸ੍ਮਾ ਵਪਯਨ੍ਤੀਤਿ ਸਮ੍ਬਨ੍ਧੋ. ਵੁਤ੍ਤਪ੍ਪਕਾਰਾਤਿ ਪਠਮਉਦਾਨੇ ਵੁਤ੍ਤਸਦਿਸਾ. ਧਮ੍ਮਾਤਿ ਬੋਧਿਪਕ੍ਖਿਯਧਮ੍ਮਾ, ਚਤੁਅਰਿਯਸਚ੍ਚਧਮ੍ਮਾ ਵਾ.

੩. ਇਮਂ ਉਦਾਨਂ ਉਦਾਨੇਸੀਤਿ ਸਮ੍ਬਨ੍ਧੋ. ਯੇਨ ਮਗ੍ਗੇਨ ਵਿਦਿਤੋਤਿ ਯੋਜਨਾ. ਤਤ੍ਰਾਤਿ ਤਤਿਯਉਦਾਨੇ. ਸੋ ਬ੍ਰਾਹ੍ਮਣੋ ਤਿਟ੍ਠਤੀਤਿ ਸਮ੍ਬਨ੍ਧੋ. ਤੇਹਿ ਉਪ੍ਪਨ੍ਨੇਹਿ ਬੋਧਿਪਕ੍ਖਿਯਧਮ੍ਮੇਹਿ ਵਾ ਯਸ੍ਸ ਅਰਿਯਮਗ੍ਗਸ੍ਸ ਚਤੁਸਚ੍ਚਧਮ੍ਮਾ ਪਾਤੁਭੂਤਾ, ਤੇਨ ਅਰਿਯਮਗ੍ਗੇਨ ਵਾ ਵਿਧੂਪਯਨ੍ਤਿ ਯੋਜਨਾ. ਵੁਤ੍ਤਪ੍ਪਕਾਰਨ੍ਤਿ ਸੁਤ੍ਤਨਿਪਾਤੇ ਵੁਤ੍ਤਪ੍ਪਕਾਰਂ. ਮਾਰਸੇਨਨ੍ਤਿ ਕਾਮਾਦਿਕਂ ਦਸਵਿਧਂ ਮਾਰਸੇਨਂ. ‘‘ਵਿਧਮੇਨ੍ਤੋ’’ਤਿਇਮਿਨਾ ਵਿਧੂਪਯਨ੍ਤਿ ਏਤ੍ਥ ਧੂਪਧਾਤੁਯਾ ਵਿਧਮਨਤ੍ਥਂ ਦਸ੍ਸੇਤਿ, ਲਿਮ੍ਪਨਤ੍ਥਾਦਯੋ ਨਿਵਤ੍ਤੇਤਿ. ‘‘ਵਿਦ੍ਧਂ ਸੇਨ੍ਤੋ’’ਤਿਇਮਿਨਾ ਵਿਧਮੇਨ੍ਤੋਤਿ ਏਤ੍ਥ ਧਮੁਧਾਤੁਯਾ ਧਂਸਨਤ੍ਥਂ ਦਸ੍ਸੇਤਿ, ਸਦ੍ਦਤ੍ਥਾਦਯੋ ਨਿਵਤ੍ਤੇਤਿ. ‘‘ਸੂਰਿਯੋਵ ਓਭਾਸਯ’’ਨ੍ਤਿਪਦਸ੍ਸ ‘‘ਸੂਰਿਯੋ ਇਵਾ’’ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਥਾ’’ਤਿਆਦਿ. ਸੂਰਿਯੋਤਿ ਆਦਿਚ੍ਚੋ. ਸੋ ਹਿ ਯਸ੍ਮਾ ਪਠਮਕਪ੍ਪਿਕਾਨਂ ਸੂਰਂ ਜਨੇਤਿ, ਤਸ੍ਮਾ ਸੂਰਿਯੋਤਿ ਵੁਚ੍ਚਤਿ. ਅਬ੍ਭੁਗ੍ਗਤੋਤਿ ਅਭਿਮੁਖਂ ਉਦ੍ਧਂ ਆਕਾਸਂ ਗਤੋ, ਅਬ੍ਭਂ ਵਾ ਆਕਾਸਂ ਉਗ੍ਗਤੋ. ਅਬ੍ਭਸਦ੍ਦੋ ਹਿ ਆਕਾਸਪਰਿਯਾਯੋ. ਆਕਾਸੋ ਹਿ ਯਸ੍ਮਾ ਆਭੁਸੋ ਭਾਤਿ ਦਿਪ੍ਪਤਿ, ਤਸ੍ਮਾ ‘‘ਅਬ੍ਭ’’ਨ੍ਤਿ ਵੁਚ੍ਚਤਿ. ਅਯਂ ਪਨੇਤ੍ਥ ਓਪਮ੍ਮਸਂਸਨ੍ਦਨਂ – ਯਥਾ ਸੂਰਿਯੋ ਓਭਾਸਯਨ੍ਤੋ ਤਿਟ੍ਠਤਿ, ਏਵਂ ਬ੍ਰਾਹ੍ਮਣੋ ਸਚ੍ਚਾਨਿ ਪਟਿਵਿਜ੍ਝਨ੍ਤੋ. ਯਥਾ ਸੂਰਿਯੋ ਅਨ੍ਧਕਾਰਂ ਵਿਧਮੇਨ੍ਤੋ ਤਿਟ੍ਠਤਿ, ਏਵਂ ਬ੍ਰਾਹ੍ਮਣੋ ਮਾਰਸੇਨਮ੍ਪਿ ਵਿਧੂਪਯਨ੍ਤੋਤਿ.

ਏਤ੍ਥਾਤਿ ਏਤੇਸੁ ਤੀਸੁ ਉਦਾਨੇਸੁ. ਪਠਮਂ ਉਦਾਨਂ ਉਪ੍ਪਨ੍ਨਨ੍ਤਿ ਸਮ੍ਬਨ੍ਧੋ. ਇਮਿਸ੍ਸਾ ਖਨ੍ਧਕਪਾਲ਼ਿਯਾ ਉਦਾਨਪਾਲ਼ਿਂ ਸਂਸਨ੍ਦਨ੍ਤੋ ਆਹ ‘‘ਉਦਾਨੇ ਪਨਾ’’ਤਿਆਦਿ ¶ . ਉਦਾਨੇ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਨ੍ਤਿ ਉਦਾਨੇ ਵੁਤ੍ਤਵਚਨਂ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਅਚ੍ਚਯੇਨਾਤਿ ਅਤਿਕ੍ਕਮੇਨ, ਤਮੇਵਤ੍ਥਂ ਵਿਭਾਵੇਨ੍ਤੋ ਆਹ ‘‘ਤਦਾ ਹੀ’’ਤਿਆਦਿ. ਤਦਾਤਿ ‘‘ਸ੍ਵੇ ਆਸਨਾ ਵੁਟ੍ਠਹਿਸ੍ਸਾਮੀ’’ਤਿ ਰਤ੍ਤਿਂ ਉਪ੍ਪਾਦਿਤਮਨਸਿਕਾਰਕਾਲੇ. ਭਗਵਾ ਮਨਸਾਕਾਸੀਤਿ ਸਮ੍ਬਨ੍ਧੋ. ਪੁਰਿਮਾ ਦ੍ਵੇ ਉਦਾਨਗਾਥਾ ਆਨੁਭਾਵਦੀਪਿਕਾ ਹੋਨ੍ਤੀਤਿ ਯੋਜਨਾ. ਤਸ੍ਸਾਤਿ ਪਚ੍ਚਯਾਕਾਰਪਜਾਨਨਪਚ੍ਚਯਕ੍ਖਯਾਧਿਗਮਸ੍ਸ. ਏਕੇਕਮੇਵਾਤਿ ¶ ਅਨੁਲੋਮਪਟਿਲੋਮੇਸੁ ਏਕੇਕਮੇਵ. ਪਠਮਯਾਮਞ੍ਚਾਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ, ਨਿਰਨ੍ਤਰਂ ਪਠਮਯਾਮਕਾਲਨ੍ਤਿ ਅਤ੍ਥੋ. ਇਧ ਪਨਾਤਿ ਇਮਸ੍ਮਿਂ ਖਨ੍ਧਕੇ ਪਨ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਭਗਵਾ ਹੀ’’ਤਿਆਦਿ. ਤਤ੍ਥ ਭਗਵਾ ਉਦਾਨੇਸੀਤਿ ਸਮ੍ਬਨ੍ਧੋ. ਵਿਸਾਖਪੁਣ੍ਣਮਾਯਾਤਿ ਵਿਸਾਖਾਯ ਯੁਤ੍ਤਾਯ ਪੁਣ੍ਣਮਾਯ. ‘‘ਅਰੁਣੋ ਉਗ੍ਗਮਿਸ੍ਸਤੀ’’ਤਿ ਵਤ੍ਤਬ੍ਬਸਮਯੇਤਿ ਸਮ੍ਬਨ੍ਧੋ. ਸਬ੍ਬਞ੍ਞੁਤਨ੍ਤਿ ਸਬ੍ਬਞ੍ਞੁਭਾਵਂ, ਅਨਾਵਰਣਞਾਣਨ੍ਤਿ ਅਤ੍ਥੋ. ਤਤੋਤਿ ਅਰੁਣੁਗ੍ਗਮਨਤੋ. ਤਂ ਦਿਵਸਨ੍ਤਿ ਭੁਮ੍ਮਤ੍ਥੇ ਉਪਯੋਗਵਚਨਂ, ਤਸ੍ਮਿਂ ਦਿਵਸੇਤਿ ਹਿ ਅਤ੍ਥੋ. ਅਚ੍ਚਨ੍ਤਸਂਯੋਗੇ ਵਾ, ਤਂ ਦਿਵਸਂ ਕਾਲਨ੍ਤਿ ਹਿ ਅਤ੍ਥੋ. ਏਵਂ ਮਨਸਿ ਕਤ੍ਵਾਤਿ ਯਥਾ ਤਂ ਦਿਵਸਂ ਅਨੁਲੋਮਪਟਿਲੋਮਂ ਮਨਸਾਕਾਸਿ, ਏਵਂ ਮਨਸਿ ਕਤ੍ਵਾਤਿ ਅਤ੍ਥੋ. ਇਤੀਤਿ ਏਵਂ. ‘‘ਬੋਧਿਰੁਕ੍ਖਮੂਲੇ…ਪੇ… ਨਿਸੀਦੀ’’ਤਿ ਏਵਂ ਵੁਤ੍ਤਂ ਤਂ ਸਤ੍ਤਾਹਨ੍ਤਿ ਯੋਜਨਾ. ਤਤ੍ਥੇਵਾਤਿ ਬੋਧਿਰੁਕ੍ਖਮੂਲੇਯੇਵ.

੨. ਅਜਪਾਲਕਥਾ

੪. ਨ ਭਗਵਾਤਿ ਏਤ੍ਥ ਨਕਾਰੋ ‘‘ਉਪਸਙ੍ਕਮੀ’’ਤਿ ਪਦੇਨ ਯੋਜੇਤਬ੍ਬੋ, ਨ ਉਪਸਙ੍ਖਮੀਤਿ ਹਿ ਅਤ੍ਥੋ. ਤਮ੍ਹਾ ਸਮਾਧਿਮ੍ਹਾਤਿ ਤਤੋ ਅਰਹਤ੍ਤਫਲਸਮਾਪਤ੍ਤਿਸਮਾਧਿਤੋ. ਅਨਨ੍ਤਰਮੇਵ ਅਨੁਪਸਙ੍ਕਮਨਂ ਉਪਮਾਯ ਆਵਿਕਰੋਨ੍ਤੋ ਆਹ ‘‘ਯਥਾ ਪਨਾ’’ਤਿਆਦਿ. ਇਚ੍ਚੇਵਂ ਵੁਤ੍ਤਂ ਨ ਹੋਤੀਤਿ ਯੋਜਨਾ. ਇਦਨ੍ਤਿ ਇਦਂ ਅਤ੍ਥਜਾਤਂ. ਏਤ੍ਥਾਤਿ ‘‘ਭੁਤ੍ਵਾ ਸਯਤੀ’’ਤਿ ਵਾਕ੍ਯੇ. ਏਵਨ੍ਤਿ ਉਪਮੇਯ੍ਯਜੋਤਕੋ. ਇਧਾਪੀਤਿ ਇਮਿਸ੍ਸਂ ‘‘ਅਥ ਖੋ ਭਗਵਾ’’ਤਿਆਦਿਪਾਲ਼ਿਯਮ੍ਪਿ. ਇਦਨ੍ਤਿ ਅਯਮਤ੍ਥੋ ਦੀਪਿਤੋ ਹੋਤੀਤਿ ਯੋਜਨਾ. ਏਤ੍ਥਾਤਿ ‘‘ਅਥ ਖੋ ਭਗਵਾ’’ਤਿਆਦਿਪਾਠੇ.

ਅਪਰਾਨਿਪੀਤਿ ਪਲ੍ਲਙ੍ਕਸਤ੍ਤਾਹਤੋ ਅਞ੍ਞਾਨਿਪਿ. ਤਤ੍ਰਾਤਿ ‘‘ਅਪਰਾਨਿਪੀ’’ਤਿਆਦਿਵਚਨੇ. ਭਗਵਤਿ ਨਿਸਿਨ੍ਨੇ ਸਤੀਤਿ ਯੋਜਨਾ. ਕਿਰਸਦ੍ਦੋ ਵਿਤ੍ਥਾਰਜੋਤਕੋ ¶ . ਕਿਂ ਨੁ ਖੋਤਿ ਪਰਿਵਿਤਕ੍ਕਨਤ੍ਥੇ ਨਿਪਾਤੋ. ਏਕਚ੍ਚਾਨਨ੍ਤਿ ਅਪ੍ਪੇਸਕ੍ਖਾਨਂ ਏਕਚ੍ਚਾਨਂ. ਤਾਸਨ੍ਤਿ ਦੇਵਤਾਨਂ. ਬਲਾਧਿਗਮਟ੍ਠਾਨਨ੍ਤਿ ਬਲੇਨ ਤੇਜਸਾ ਅਧਿਗਮਟ੍ਠਾਨਂ. ਅਨਿਮਿਸੇਹੀਤਿ ਉਮ੍ਮਿਸੇਹਿ. ਸਤ੍ਤਾਹਨ੍ਤਿ ਕਮ੍ਮਤ੍ਥੇ ਚੇਤਂ ਉਪਯੋਗਵਚਨਂ, ਅਚ੍ਚਨ੍ਤਸਂਯੋਗੇ ਵਾ. ਏਵਞ੍ਹਿ ਸਤਿ ‘‘ਕਾਲ’’ਨ੍ਤਿ ਕਮ੍ਮਂ ਵੇਦਿਤਬ੍ਬਂ. ਤਂ ਠਾਨਨ੍ਤਿ ਅਨਿਮਿਸੇਹਿ ਅਕ੍ਖੀਹਿ ਓਲੋਕਿਯਮਾਨਟ੍ਠਾਨਂ. ਅਥਾਤਿ ਅਨਿਮਿਸਸਤ੍ਤਾਹਸ੍ਸ ਅਨਨ੍ਤਰੇ. ਰਤਨਚਙ੍ਕਮੇਤਿ ਰਤਨਮਯੇ ਚਙ੍ਕਮੇ. ਤਂ ਠਾਨਨ੍ਤਿ ਚਙ੍ਕਮਟ੍ਠਾਨਂ. ਤਤੋਤਿ ਚਙ੍ਕਮਸਤ੍ਤਾਹਤੋ. ਰਤਨਘਰਨ੍ਤਿ ਰਤਨਮਯਂ ਗੇਹਂ. ਤਤ੍ਥਾਤਿ ਰਤਨਘਰੇ ਅਭਿਧਮ੍ਮਪਿਟਕਂ ਵਿਚਿਨਨ੍ਤੋਤਿ ਸਮ੍ਬਨ੍ਧੋ. ਏਤ੍ਥਾਤਿ ਰਤਨਘਰੇ, ਅਭਿਧਮ੍ਮਪਿਟਕੇ ਵਾ, ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ. ਤਂ ਠਾਨਨ੍ਤਿ ਅਭਿਧਮ੍ਮਪਿਟਕਵਿਚਿਨਨਟ੍ਠਾਨਂ.

ਏਵਨ੍ਤਿਆਦਿ ਪੁਬ੍ਬਵਚਨਸ੍ਸ ਨਿਗਮਵਸੇਨ ਪਚ੍ਛਿਮਵਚਨਸ੍ਸ ਅਨੁਸਨ੍ਧਿਨਿਦਸ੍ਸਨਂ. ਤੇਨਾਤਿ ਅਜਪਾਲਾਨਂ ¶ ਨਿਸੀਦਨਕਾਰਣੇਨ. ਅਸ੍ਸਾਤਿ ਨਿਗ੍ਰੋਧਸ੍ਸ. ‘‘ਅਜਪਾਲਨਿਗ੍ਰੋਧੋਤ੍ਵੇਵ ਨਾਮ’’ਨ੍ਤਿ ਇਮਿਨਾ ਉਪਚਾਰਵਸੇਨ ਨਾਮਲਭਨਂ ਦਸ੍ਸੇਤਿ. ਅਜਪਾ ਬ੍ਰਾਹ੍ਮਣਾ ਲਨ੍ਤਿ ਨਿਵਾਸਂ ਗਣ੍ਹਨ੍ਤਿ ਏਤ੍ਥਾਤਿ ਅਜਪਾਲੋ, ਉਣ੍ਹਕਾਲੇ ਵਾ ਅਨ੍ਤੋਪਵਿਟ੍ਠੇ ਅਜੇ ਅਤ੍ਤਨੋ ਛਾਯਾਯ ਪਾਲੇਤੀਤਿ ਅਜਪਾਲੋ, ਅਜਪਾਲੋ ਚ ਸੋ ਨਿਗ੍ਰੋਧੋ ਚੇਤਿ ਅਜਪਾਲਨਿਗ੍ਰੋਧੋਤਿ ਵਚਨਤ੍ਥਾਨਿਪਿ ਪਕਰਣਨ੍ਤਰੇਸੁ (ਉਦਾ. ਅਟ੍ਠ. ੪) ਦਸ੍ਸਿਤਾਨਿ. ਤਤ੍ਰਾਪੀਤਿ ਅਜਪਾਲਨਿਗ੍ਰੋਧੇਪਿ. ਬੋਧਿਤੋਤਿ ਬੋਧਿਰੁਕ੍ਖਤੋ. ਏਤ੍ਥਾਤਿ ਅਜਪਾਲਨਿਗ੍ਰੋਧੇ. ਭਗਵਤਿ ਨਿਸਿਨ੍ਨੇਤਿ ਯੋਜਨਾ. ਤਤ੍ਥਾਤਿ ‘‘ਅਥ ਖੋ ਅਞ੍ਞਤਰੋ’’ਤਿਆਦਿਵਚਨੇ. ਸੋਤਿ ਬ੍ਰਾਹ੍ਮਣੋ. ਦਿਟ੍ਠਮਙ੍ਗਲਿਕੋ ਨਾਮਾਤਿ ਦਿਟ੍ਠਸੁਤਮੁਤਸਙ੍ਖਾਤੇਸੁ ਤੀਸੁ ਮਙ੍ਗਲਿਕੇਸੁ ਦਿਟ੍ਠਮਙ੍ਗਲਿਕੋ ਨਾਮ ਕਿਰਾਤਿ ਅਤ੍ਥੋ. ‘‘ਮਾਨਵਸੇਨ…ਪੇ… ਵੁਚ੍ਚਤੀ’’ਤਿ ਇਮਿਨਾ ‘‘ਹੁਂਹੁ’’ਨ੍ਤਿ ਕਰੋਤੀਤਿ ਹੁਂਹੁਙ੍ਕੋ, ਹੁਂਹੁਙ੍ਕੋ ਜਾਤਿ ਸਭਾਵੋ ਇਮਸ੍ਸਾਤਿ ਹੁਂਹੁਙ੍ਕਜਾਤਿਕੋਤਿ ਵਚਨਤ੍ਥਂ ਦਸ੍ਸੇਤਿ.

ਤੇਨਾਤਿ ਬ੍ਰਾਹ੍ਮਣੇਨ. ਸਿਖਾਪ੍ਪਤ੍ਤਨ੍ਤਿ ਅਗ੍ਗਪ੍ਪਤ੍ਤਂ. ਤਸ੍ਸਾਤਿ ਉਦਾਨਸ੍ਸ. ਯੋਤਿ ਪੁਗ੍ਗਲੋ, ਪਟਿਜਾਨਾਤੀਤਿ ਸਮ੍ਬਨ੍ਧੋ. ‘‘ਨ ਦਿਟ੍ਠਮਙ੍ਗਲਿਕਤਾਯਾ’’ਤਿ ਇਮਿਨਾ ਅਵਧਾਰਣਫਲਂ ਦਸ੍ਸੇਤਿ. ‘‘ਬਾਹਿਤਪਾਪਧਮ੍ਮਤ੍ਤਾ’’ਤਿ ਇਮਿਨਾ ਬਾਹਿਤੋ ¶ ਪਾਪੋ ਧਮ੍ਮੋ ਅਨੇਨਾਤਿ ਬਾਹਿਤਪਾਪਧਮ੍ਮੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਹੁਂਹੁਙ੍ਕਾਰਪਹਾਨੇਨਾ’’ਤਿ ਇਮਿਨਾ ਨਤ੍ਥਿ ਹੁਂਹੁਙ੍ਕਾਰੋ ਇਮਸ੍ਸਾਤਿ ਨਿਹੁਂਹੁਙ੍ਕੋਤਿ ਵਚਨਤ੍ਥਂ ਦਸ੍ਸੇਤਿ. ਰਾਗਾਦਿਕਸਾਵਾਭਾਵੇਨਾਤਿ ਇਮਿਨਾ ਨਤ੍ਥਿ ਰਾਗਾਦਿਕਸਾਵੋ ਇਮਸ੍ਸਾਤਿ ਨਿਕ੍ਕਸਾਵੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਭਾਵਨਾਨੁਯੋਗਯੁਤ੍ਤਚਿਤ੍ਤਤਾਯਾ’’ਤਿ ਇਮਿਨਾ ਯਤਂ ਅਨੁਯੁਤ੍ਤਂ ਅਤ੍ਤਂ ਚਿਤ੍ਤਂ ਇਮਸ੍ਸਾਤਿ ਯਤਤ੍ਤੋਤਿ ਵਚਨਤ੍ਥਂ ਦਸ੍ਸੇਤਿ. ਏਤ੍ਥ ਹਿ ਯਤਸਦ੍ਦੋ ਵੀਰਿਯਵਾਚਕੋ, ਯਤਧਾਤੁਯਾ ਨਿਪ੍ਫਨ੍ਨੋ, ਅਤ੍ਤਸਦ੍ਦੋ ਚਿਤ੍ਤਪਰਿਯਾਯੋ. ਯਤਸਦ੍ਦਸ੍ਸ ਯਮੁਧਾਤੁਯਾ ਚ ਨਿਪ੍ਫਨ੍ਨਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਸੀਲਸਂਵਰੇਨ ਵਾ’’ਤਿਆਦਿ. ‘‘ਸਞ੍ਞਤਚਿਤ੍ਤਤਾਯਾ’’ਤਿ ਇਮਿਨਾ ਯਮਤਿ ਸਂਯਮਤੀਤਿ ਯਤਂ, ਯਤਂ ਅਤ੍ਤਂ ਚਿਤ੍ਤਂ ਇਮਸ੍ਸਾਤਿ ਯਤਤ੍ਤੋਤਿ ਵਚਨਤ੍ਥਂ ਦਸ੍ਸੇਤਿ. ਸਚ੍ਚਾਨਿ ਵਿਦਨ੍ਤਿ ਜਾਨਨ੍ਤੀਤਿ ਵੇਦਾਨੀਤਿ ਵਚਨਤ੍ਥੇਨ ਮਗ੍ਗਞਾਣਾਨਿ ਵੇਦਾਨਿ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਚਤੁਮਗ੍ਗਞਾਣਸਙ੍ਖਾਤੇਹਿ ਵੇਦੇਹੀ’’ਤਿ. ‘‘ਚਤੁਮਗ੍ਗਞਾਣਸਙ੍ਖਾਤਾਨ’’ਨ੍ਤਿ ਵਿਭਤ੍ਤਿਪਰਿਣਾਮਂ ਕਤ੍ਵਾ ‘‘ਵੇਦਾਨ’’ਨ੍ਤਿਪਦੇਨ ਯੋਜੇਤਬ੍ਬੋ. ਅਨ੍ਤਨ੍ਤਿ ਨਿਬ੍ਬਾਨਂ. ਤਞ੍ਹਿ ਯਸ੍ਮਾ ਸਙ੍ਖਾਰਾਨਂ ਅਵਸਾਨੇ ਜਾਤਂ, ਤਸ੍ਮਾ ਅਨ੍ਤਨ੍ਤਿ ਵੁਚ੍ਚਤਿ. ਪੁਨ ਅਨ੍ਤਨ੍ਤਿ ਅਰਹਤ੍ਤਫਲਂ. ਤਞ੍ਹਿ ਯਸ੍ਮਾ ਮਗ੍ਗਸ੍ਸ ਪਰਿਯੋਸਾਨੇ ਪਵਤ੍ਤਂ, ਤਸ੍ਮਾ ਅਨ੍ਤਨ੍ਤਿ ਵੁਚ੍ਚਤਿ. ‘‘ਮਗ੍ਗਬ੍ਰਹ੍ਮਚਰਿਯਸ੍ਸ ਵੁਸਿਤਤ੍ਤਾ’’ਤਿ ਇਮਿਨਾ ਵੁਸਿਤਂ ਮਗ੍ਗਸਙ੍ਖਾਤਂ ਬ੍ਰਹ੍ਮਚਰਿਯਂ ਅਨੇਨਾਤਿ ਵੁਸਿਤਬ੍ਰਹ੍ਮਚਰਿਯੋਤਿ ਵਚਨਤ੍ਥਂ ਦਸ੍ਸੇਤਿ. ਧਮ੍ਮੇਨ ਬ੍ਰਹ੍ਮਵਾਦਂ ਵਦੇਯ੍ਯਾਤਿ ਵੁਤ੍ਤਵਚਨਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਬ੍ਰਾਹ੍ਮਣੋ ਅਹਨ੍ਤਿ ਏਤਂ ਵਾਦਂ ਧਮ੍ਮੇਨ ਵਦੇਯ੍ਯਾ’’ਤਿ. ਧਮ੍ਮੇਨਾਤਿ ਭੂਤੇਨ ਸਭਾਵੇਨ. ਲੋਕੇਤਿ ਏਤ੍ਥ ਸਤ੍ਤਲੋਕੋਵਾਧਿਪ੍ਪੇਤੋਤਿ ਆਹ ‘‘ਸਕਲੇ ਲੋਕਸਨ੍ਨਿਵਾਸੇ’’ਤਿ.

੩. ਮੁਚਲਿਨ੍ਦਕਥਾ

੫. ਅਕਾਲਮੇਘੋਤਿ ¶ ਏਤ੍ਥ ਵਪ੍ਪਾਦਿਕਾਲਸ੍ਸ ਅਭਾਵਾ ਨ ਅਕਾਲੋ ਹੋਤਿ, ਅਥ ਖੋ ਵਸ੍ਸਕਾਲੇ ਅਸਮ੍ਪਤ੍ਤਤ੍ਤਾ ਅਕਾਲੋਤਿ ਆਹ ‘‘ਅਸਮ੍ਪਤ੍ਤੇ ਵਸ੍ਸਕਾਲੇ’’ਤਿ. ‘‘ਉਪ੍ਪਨ੍ਨਮੇਘੋ’’ਤਿ ਇਮਿਨਾ ਅਕਾਲੇ ਉਪ੍ਪਨ੍ਨੋ ਮੇਘੋ ਅਕਾਲਮੇਘੋਤਿ ਵਚਨਤ੍ਥਂ ਦਸ੍ਸੇਤਿ. ਗਿਮ੍ਹਾਨਂ ਪਚ੍ਛਿਮੇ ਮਾਸੇਤਿ ਜੇਟ੍ਠਮੂਲਮਾਸੇ. ਤਸ੍ਮਿਨ੍ਤਿ ਮੇਘੇ. ਸੀਤਵਾਤਦੁਦ੍ਦਿਨੀਤਿ ਏਤ੍ਥ ਸੀਤੇਨ ਵਾਤੇਨ ਦੂਸਿਤਂ ਦਿਨਂ ਇਮਿਸ੍ਸਾ ਵਟ੍ਟਲਿਕਾਯਾਤਿ ਸੀਤਵਾਤਦੁਦ੍ਦਿਨੀਤਿ ਵਚਨਤ੍ਥਂ ¶ ਦਸ੍ਸੇਨ੍ਤੋ ਆਹ ‘‘ਸਾ ਚ ਪਨਾ’’ਤਿਆਦਿ. ਸਾ ਚ ਪਨ ਸਤ੍ਤਾਹਵਟ੍ਟਲਿਕਾ ਸੀਤਵਾਤਦੁਦ੍ਦਿਨੀ ਨਾਮ ਅਹੋਸੀਤਿ ਸਮ੍ਬਨ੍ਧੋ. ‘‘ਸਮੀਪੇ ਪੋਕ੍ਖਰਣਿਯਾ ਨਿਬ੍ਬਤ੍ਤੋ’’ਤਿ ਇਮਿਨਾ ਮੁਚਲਿਨ੍ਦਸ੍ਸ ਸਮੀਪੇ ਨਿਬ੍ਬਤ੍ਤੋ ਮੁਚਲਿਨ੍ਦੋਤਿ ਵਚਨਤ੍ਥਂ ਦਸ੍ਸੇਤਿ. ਮੁਚਲਿਨ੍ਦੋਤਿ ਚ ਨਿਚੁਲੋ. ਸੋ ਨੀਪੋਤਿ ਚ ਪਿਯਕੋਤਿ ਚ ਵੁਚ੍ਚਤਿ. ਨਾਗਸ੍ਸ ਭੋਗੋ ਏਕੋਪਿ ਸਤ੍ਤਾਭੁਜਤ੍ਤਾ ‘‘ਭੋਗੇਹੀ’’ਤਿ ਬਹੁਵਚਨਵਸੇਨ ਵੁਤ੍ਤਂ. ਤਸ੍ਮਿਨ੍ਤਿ ਨਾਗਰਾਜੇ ਠਿਤੇ ਸਤੀਤਿ ਯੋਜਨਾ. ਤਸ੍ਸਾਤਿ ਨਾਗਰਾਜਸ੍ਸ. ਤਸ੍ਮਾਤਿ ਯਸ੍ਮਾ ਭਣ੍ਡਾਗਾਰਗਬ੍ਭਪਮਾਣਂ ਅਹੋਸਿ, ਤਸ੍ਮਾ. ਠਾਨਸ੍ਸ ਕਾਰਣਂ ਪਰਿਦੀਪੇਤਿ ਅਨੇਨਾਤਿ ਠਾਨਕਾਰਣਪਰਿਦੀਪਨਂ ‘‘ਮਾ ਭਗਵਨ੍ਤਂ ਸੀਤ’’ਨ੍ਤਿਆਦਿਵਚਨਂ. ਸੋਤਿ ਨਾਗਰਾਜਾ. ਹੀਤਿ ਸਚ੍ਚਂ. ਪਾਲ਼ਿਯਂ ‘‘ਬਾਧਯਿਤ੍ਥਾ’’ਤਿ ਕਿਰਿਯਾਪਦਂ ਅਜ੍ਝਾਹਰਿਤਬ੍ਬਨ੍ਤਿ ਆਹ ‘‘ਮਾ ਸੀਤਂ ਭਗਵਨ੍ਤਂ ਬਾਧਯਿਤ੍ਥਾ’’ਤਿ. ਤਤ੍ਥਾਤਿ ‘‘ਮਾ ਭਗਵਨ੍ਤਂ ਸੀਤ’’ਨ੍ਤਿਆਦਿਵਚਨੇ. ਸਤ੍ਤਾਹਵਟ੍ਟਲਿਕਾਯ ਸਤੀਤਿ ਸਮ੍ਬਨ੍ਧੋ. ਤਮ੍ਪੀਤਿ ਉਣ੍ਹਮ੍ਪਿ. ਨਨ੍ਤਿ ਭਗਵਨ੍ਤਂ. ਤਸ੍ਸਾਤਿ ਨਾਗਰਾਜਸ੍ਸ. ਉਬ੍ਬਿਦ੍ਧਨ੍ਤਿ ਉਦ੍ਧਂ ਛਿਦ੍ਦਂ. ਵਿਦ੍ਧਛਿਦ੍ਦਸਦ੍ਦਾ ਹਿ ਪਰਿਯਾਯਾ. ਆਕਾਸਂ ਮੇਘਪਟਲਪਟਿਚ੍ਛਨ੍ਨਂ ਆਸਨ੍ਨਂ ਵਿਯ ਹੋਤਿ, ਮੇਘਪਟਲਵਿਗਮੇ ਦੂਰਂ ਵਿਯ ਉਪਟ੍ਠਾਤਿ, ਤਸ੍ਮਾ ਵੁਤ੍ਤਂ ‘‘ਮੇਘਵਿਗਮੇਨ ਦੂਰੀਭੂਤ’’ਨ੍ਤਿ. ਵਿਗਤਵਲਾਹਕਨ੍ਤਿ ਏਤ੍ਥ ਵਿਗਤਸਦ੍ਦੋ ਅਪਗਤਤ੍ਥਵਾਚਕੋ, ਵਲਾਹਕਸਦ੍ਦੋ ਮੇਘਪਰਿਯਾਯੋਤਿ ਆਹ ‘‘ਅਪਗਤਮੇਘ’’ਨ੍ਤਿ. ਇਨ੍ਦਨੀਲਮਣਿ ਵਿਯ ਦਿਬ੍ਬਤੀਤਿ ਦੇਵੋਤਿ ਵਚਨਤ੍ਥੇਨ ਆਕਾਸੋ ਦੇਵੋ ਨਾਮਾਤਿ ਆਹ ‘‘ਦੇਵਨ੍ਤਿ ਆਕਾਸ’’ਨ੍ਤਿ. ਅਤ੍ਤਨੋ ਰੂਪਨ੍ਤਿ ਅਤ੍ਤਨੋ ਨਾਗਸਣ੍ਠਾਨਂ. ਇਮਿਨਾ ਸਕਵਣ੍ਣਨ੍ਤਿ ਏਤ੍ਥ ਸਕਸਦ੍ਦੋ ਅਤ੍ਤਵਾਚਕੋ, ਵਣ੍ਣਸਦ੍ਦੋ ਸਣ੍ਠਾਨਵੇਵਚਨੋਤਿ ਦਸ੍ਸੇਤਿ.

ਸੁਖੋ ਵਿਵੇਕੋਤਿ ਏਤ੍ਥ ਤਦਙ੍ਗ ਵਿਕ੍ਖਮ੍ਭਨ ਸਮੁਚ੍ਛੇਦ ਪਟਿਪ੍ਪਸ੍ਸਦ੍ਧਿਨਿਸ੍ਸਰਣਵਿਵੇਕਸਙ੍ਖਾਤੇਸੁ ਪਞ੍ਚਸੁ ਵਿਵੇਕੇਸੁ ਨਿਬ੍ਬਾਨਸਙ੍ਖਾਤੋ ਨਿਸ੍ਸਰਣਵਿਵੇਕੋ ਚ ਕਾਯਚਿਤ੍ਤਉਪਧਿਵਿਵੇਕਸਙ੍ਖਾਤੇਸੁ ਤੀਸੁ ਵਿਵੇਕੇਸੁ ਨਿਬ੍ਬਾਨਸਙ੍ਖਾਤੋ ਉਪਧਿਵਿਵੇਕੋ ਚ ਗਹੇਤਬ੍ਬੋਤਿ ਆਹ ‘‘ਨਿਬ੍ਬਾਨਸਙ੍ਖਾਤੋ ਉਪਧਿਵਿਵੇਕੋ’’ਤਿ. ‘‘ਚਤੁਮਗ੍ਗਞਾਣਸਨ੍ਤੋਸੇਨਾ’’ਤਿ ਇਮਿਨਾ ਤੁਟ੍ਠਸ੍ਸਾਤਿ ਏਤ੍ਥ ਪਿਣ੍ਡਪਾਤਸਨ੍ਤੋਸਾਦਿਕੇ ਨਿਵਤ੍ਤੇਤਿ. ਸੁਤਧਮ੍ਮਸ੍ਸਾਤਿ ਏਤ੍ਥ ਸੁਤਸਦ੍ਦੋ ਵਿਸ੍ਸੁਤਪਰਿਯਾਯੋਤਿ ਆਹ ‘‘ਪਕਾਸਿਤਧਮ੍ਮਸ੍ਸਾ’’ਤਿ, ਪਾਕਟਸਚ੍ਚਧਮ੍ਮਸ੍ਸਾਤਿ ਅਤ੍ਥੋ. ਪਸ੍ਸਤੋਤਿ ਏਤ੍ਥ ਮਂਸਚਕ੍ਖੁਸ੍ਸ ਕਰਣਭਾਵੇਨ ¶ ¶ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਞਾਣਚਕ੍ਖੁਨਾ’’ਤਿ. ‘‘ਅਕੁਪ੍ਪਨਭਾਵੋ’’ਤਿ ਇਮਿਨਾ ਅਬ੍ਯਾਪਜ੍ਜਨ੍ਤਿ ਏਤ੍ਥ ਬ੍ਯਾਪਾਦਸਦ੍ਦਸ੍ਸ ਦੋਸਵਾਚਕਭਾਵੋ ਚ ਣ੍ਯਪਚ੍ਚਯਸ੍ਸ ਭਾਵਤ੍ਥੋ ਚ ਦਸ੍ਸਿਤੋ. ਏਤੇਨਾਤਿ ‘‘ਅਬ੍ਯਾਪਜ੍ਜ’’ਨ੍ਤਿਪਦੇਨ. ਮੇਤ੍ਤਾਪੁਬ੍ਬਭਾਗੋਤਿ ਅਬ੍ਯਾਪਜ੍ਜਸ੍ਸ ਪੁਬ੍ਬਭਾਗੇ ਮੇਤ੍ਤਾਯ ਉਪ੍ਪਨ੍ਨਭਾਵੋ. ਪਾਣਭੂਤੇਸੁ ਸਂਯਮੋਤਿ ਏਤ੍ਥ ਪਾਣਭੂਤਸਦ੍ਦਾ ਵੇਵਚਨਭਾਵੇਨ ਸਤ੍ਤੇਸੁ ਏਵ ਵਤ੍ਤਨ੍ਤੀਤਿ ਆਹ ‘‘ਸਤ੍ਤੇਸੁ ਚਾ’’ਤਿ. ਕਰੁਣਾਪੁਬ੍ਬਭਾਗੋਤਿ ਸਂਯਮਸ੍ਸ ਪੁਬ੍ਬਭਾਗੇ ਕਰੁਣਾਯ ਉਪ੍ਪਨ੍ਨਭਾਵੋ. ਯਾਤਿ ਯਾ ਵਿਰਾਗਤਾ. ਅਨਾਗਾਮਿਮਗ੍ਗਸ੍ਸ ਕਾਮਰਾਗਸ੍ਸ ਅਨਵਸੇਸਪਹਾਨਤ੍ਤਾ ਵੁਤ੍ਤਂ ‘‘ਏਤੇਨ ਅਨਾਗਾਮਿਮਗ੍ਗੋ ਕਥਿਤੋ’’ਤਿ. ਯਾਥਾਵਮਾਨਸ੍ਸ ਅਰਹਤ੍ਤਮਗ੍ਗੇਨ ਨਿਰੁਦ੍ਧਤ੍ਤਾ ਵੁਤ੍ਤਂ ‘‘ਅਸ੍ਮਿ…ਪੇ… ਕਥਿਤ’’ਨ੍ਤਿ. ਇਤੋਤਿ ਅਰਹਤ੍ਤਤੋ.

੪. ਰਾਜਾਯਤਨਕਥਾ

੬. ਪਾਚੀਨਕੋਣੇਤਿ ਪੁਰਤ੍ਥਿਮਅਸ੍ਸੇ, ਪੁਬ੍ਬਦਕ੍ਖਿਣਦਿਸਾਭਾਗੇਤਿ ਅਤ੍ਥੋ. ਰਾਜਾਯਤਨਰੁਕ੍ਖਨ੍ਤਿ ਖੀਰਿਕਾਰੁਕ੍ਖਂ. ਤੇਨ ਖੋ ਪਨ ਸਮਯੇਨਾਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਪੁਚ੍ਛਿਤ੍ਵਾ ਦਸ੍ਸੇਨ੍ਤੋ ਆਹ ‘‘ਕਤਰੇਨ ਸਮਯੇਨਾ’’ਤਿ. ਨਿਸਿਨ੍ਨਸ੍ਸ ਭਗਵਤੋਤਿ ਯੋਜਨਾ. ਦੇਵਰਾਜਸਦ੍ਦਸ੍ਸ ਅਞ੍ਞੇ ਪਜਾਪਤਿਆਦਯੋ ਦੇਵਰਾਜਾਨੋ ਨਿਵਤ੍ਤੇਤੁਂ ‘‘ਸਕ੍ਕੋ’’ਤਿ ਵੁਤ੍ਤਂ. ਤਨ੍ਤਿ ਹਰੀਤਕਂ. ਪਰਿਭੁਤ੍ਤਮਤ੍ਤਸ੍ਸੇਵ ਭਗਵਤੋਤਿ ਸਮ੍ਬਨ੍ਧੋ. ਨਿਸਿਨ੍ਨੇ ਭਗਵਤਿ.

‘‘ਤੇਨ ਖੋ ਪਨ ਸਮਯੇਨਾ’’ਤਿ ਇਮਿਨਾ ਯੇਨ ਸਮਯੇਨ ਭਗਵਾ ਰਾਜਾਯਤਨਮੂਲੇ ਨਿਸੀਦਿ, ਤੇਨ ਖੋ ਪਨ ਸਮਯੇਨਾਤਿ ਅਤ੍ਥਂ ਦਸ੍ਸੇਤਿ. ਉਕ੍ਕਲਜਨਪਦਤੋਤਿ ਉਕ੍ਕਲਨਾਮਕਾ ਜਨਪਦਮ੍ਹਾ. ਯਸ੍ਮਿਂ ਦੇਸੇ ਭਗਵਾ ਵਿਹਰਤਿ, ਤਂ ਦੇਸਨ੍ਤਿ ਯੋਜਨਾ. ਏਤ੍ਥਾਤਿ ‘‘ਤਂ ਦੇਸਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ’’ਤਿਪਦੇ. ਤੇਸਨ੍ਤਿ ਵਾਣਿਜਾਨਂ. ਞਾਤਿਸਾਲੋਹਿਤਸਦ੍ਦਾਨਂ ਅਞ੍ਞਮਞ੍ਞਵੇਵਚਨਤ੍ਤਾ ‘‘ਞਾਤੀ’’ਤਿ ਵੁਤ੍ਤੇ ਸਾਲੋਹਿਤਸਦ੍ਦਸ੍ਸ ਅਤ੍ਥੋ ਸਿਦ੍ਧੋਤਿ ਦਸ੍ਸੇਤੁਂ ਵੁਤ੍ਤਂ ‘‘ਞਾਤਿਭੂਤਪੁਬ੍ਬਾ ਦੇਵਤਾ’’ਤਿ. ਸਾਤਿ ਦੇਵਤਾ. ਨੇਸਨ੍ਤਿ ਵਾਣਿਜਾਨਂ. ਤਤੋਤਿ ਅਪਵਤ੍ਤਨਕਾਰਣਾ. ਤੇਤਿ ਵਾਣਿਜਾ ¶ . ਇਦਨ੍ਤਿ ਅਪਵਤ੍ਤਨਂ. ਬਲਿਨ੍ਤਿ ਉਪਹਾਰਂ. ਤੇਸਨ੍ਤਿ ਵਾਣਿਜਾਨਂ. ‘‘ਸਬ੍ਬਿਮਧੁਫਾਣਿਤਾਦੀਹਿ ਯੋਜੇਤ੍ਵਾ’’ਤਿ ਪਦਂ ਪੁਬ੍ਬਾਪਰਾਪੇਕ੍ਖਂ, ਤਸ੍ਮਾ ਮਜ੍ਝੇ ਵੁਤ੍ਤਂ. ਪਤਿਮਾਨੇਥਾਤਿ ਏਤ੍ਥ ਮਾਨ ਪੂਜਾਯਂ ਪੇਮਨੇਤਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੮ ਨਕਾਰਨ੍ਤਧਾਤੁ) ਵੁਤ੍ਤਤ੍ਤਾ ਪੂਜਨਪੇਮਨਂ ਨਾਮ ਅਤ੍ਥਤੋ ਉਪਟ੍ਠਹਨਨ੍ਤਿ ਆਹ ‘‘ਉਪਟ੍ਠਹਥਾ’’ਤਿ. ਤਂ ਵੋਤਿ ਏਤ੍ਥ ਤਂਸਦ੍ਦੋ ਪਤਿਮਾਨਨਵਿਸਯੋ, ਵੋਸਦ੍ਦੋ ਤੀਸੁ ਵੋਸਦ੍ਦੇਸੁ ਤੁਮ੍ਹਸਦ੍ਦਸ੍ਸ ਕਾਰਿਯੋ ਵੋਸਦ੍ਦੋ, ਸੋ ਚ ਚਤੁਤ੍ਥ੍ਯਤ੍ਥੋਤਿ ਆਹ ‘‘ਤਂ ਪਤਿਮਾਨਂ ਤੁਮ੍ਹਾਕ’’ਨ੍ਤਿ. ਵੋਕਾਰੋ ਹਿ ਤਿਵਿਧੋ ਤੁਮ੍ਹਸਦ੍ਦਸ੍ਸ ਕਾਰਿਯੋ, ਯੋਵਚਨਸ੍ਸ ਕਾਰਿਯੋ, ਪਦਪੂਰਣੋਤਿ. ਤਤ੍ਥ ਤੁਮ੍ਹਸਦ੍ਦਸ੍ਸ ਕਾਰਿਯੋ ਪਞ੍ਚਵਿਧੋ ਪਚ੍ਚਤ੍ਤਉਪਯੋਗਕਰਣਸਮ੍ਪਦਾਨਸਾਮਿਵਚਨਵਸੇਨਾਤਿ. ਤਤ੍ਥ ਤੁਮ੍ਹਸਦ੍ਦਕਾਰਿਯੋ ਸਮ੍ਪਦਾਨਵਚਨੋ ¶ ਇਧਾਧਿਪ੍ਪੇਤੋ. ਤੇਨਾਹ ‘‘ਤੁਮ੍ਹਾਕ’’ਨ੍ਤਿ. ‘‘ਯ’’ਨ੍ਤਿਸਦ੍ਦਸ੍ਸ ਵਿਸਯੋ ਪਟਿਗ੍ਗਹਣਤ੍ਥੋਤਿ ਆਹ ‘‘ਯਂ ਪਟਿਗ੍ਗਹਣ’’ਨ੍ਤਿ. ਅਸ੍ਸਾਤਿ ਭਵੇਯ੍ਯ. ਯੋ ਪਤ੍ਤੋ ਅਹੋਸੀਤਿ ਯੋਜਨਾ. ਅਸ੍ਸਾਤਿ ਭਗਵਤੋ. ਸੋਤਿ ਪਤ੍ਤੋ. ਸੁਜਾਤਾਯ ਆਗਚ੍ਛਨ੍ਤਿਯਾ ਏਵਾਤਿ ਸਮ੍ਬਨ੍ਧੋ. ਅਨਾਦਰੇ ਚੇਤਂ ਸਾਮਿਵਚਨਂ. ਤੇਨਾਤਿ ਅਨ੍ਤਰਧਾਯਹੇਤੁਨਾ. ਅਸ੍ਸਾਤਿ ਭਗਵਤੋ. ਹਤ੍ਥੇਸੂਤਿ ਕਰਣਤ੍ਥੇ ਚੇਤਂ ਭੁਮ੍ਮਵਚਨਂ. ਹਤ੍ਥੇਹੀਤਿ ਹਿ ਅਤ੍ਥੋ. ਕਿਮ੍ਹੀਤਿ ਕੇਨ.

ਇਤੋਤਿ ਆਸਲ਼੍ਹੀਮਾਸਜੁਣ੍ਹਪਕ੍ਖਪਞ੍ਚਮਿਤੋ. ਏਤ੍ਤਕਂ ਕਾਲਨ੍ਤਿ ਏਤਂ ਪਮਾਣਂ ਏਕੂਨਪਞ੍ਞਾਸਦਿਵਸਕਾਲਂ. ਜਿਘਚ੍ਛਾਤਿ ਘਸਿਤੁਮਿਚ੍ਛਾ. ਪਿਪਾਸਾਤਿ ਪਾਤੁਮਿਚ੍ਛਾ. ਅਸ੍ਸਾਤਿ ਭਗਵਤੋ. ਚੇਤਸਾ-ਚੇਤੋਸਦ੍ਦਾਨਂ ਸਮ੍ਬਨ੍ਧਾਪੇਕ੍ਖਤ੍ਤਾ ਤੇਸਂ ਸਮ੍ਬਨ੍ਧਂ ਦਸ੍ਸੇਤੁਂ ਵੁਤ੍ਤਂ ‘‘ਅਤ੍ਤਨੋ’’ਤਿ ਚ ‘‘ਭਗਵਤੋ’’ਤਿ ਚ. ਇਮੇਹਿ ਸਮ੍ਬਨ੍ਧਿਸਦ੍ਦਾਨਮਸਦਿਸਤ੍ਤਾ ਸਮ੍ਬਨ੍ਧੋਪਿ ਅਸਦਿਸੋਤਿ ਦਸ੍ਸੇਤਿ. ਅਤ੍ਤਨੋਤਿ ਚਤੁਨ੍ਨਂ ਮਹਾਰਾਜਾਨਂ. ਸਮਾਸੋਯੇਵ ਅਵਯਵੀਪਧਾਨੋ ਹੋਤਿ, ਵਾਕ੍ਯਂ ਪਨ ਅਵਯਵਪਧਾਨੋਯੇਵਾਤਿ ਦਸ੍ਸੇਨ੍ਤੋ ਆਹ ‘‘ਚਤੂਹਿ ਦਿਸਾਹੀ’’ਤਿ. ਪਾਲ਼ਿਯਂ ‘‘ਆਗਨ੍ਤ੍ਵਾ’’ਤਿ ਪਾਠਸੇਸੋ ਯੋਜੇਤਬ੍ਬੋ. ‘‘ਸਿਲਾਮਯੇ’’ਤਿ ਇਮਿਨਾ ਸਿਲਾਮਯਮੇਵ ਸੇਲਾਮਯਨ੍ਤਿ ਅਤ੍ਥਂ ਦਸ੍ਸੇਤਿ. ਇਦਨ੍ਤਿ ‘‘ਸੇਲਾਮਯੇ ਪਤ੍ਤੇ’’ਤਿ ਵਚਨਂ. ਯੇਤਿ ਮੁਗ੍ਗਵਣ੍ਣਸਿਲਾਮਯੇ ਪਤ੍ਤੇ. ਤਤੋਤਿ ਇਨ੍ਦਨੀਲਮਣਿਮਯਪਤ੍ਤਉਪਨਾਮਨਤੋ, ਪਰਨ੍ਤਿ ਸਮ੍ਬਨ੍ਧੋ. ਤੇਸਨ੍ਤਿ ਚਤੁਨ੍ਨਂ ਮਹਾਰਾਜਾਨਂ. ਚਤ੍ਤਾਰੋਪਿ ਅਧਿਟ੍ਠਹੀਤਿ ਸਮ੍ਬਨ੍ਧੋ ¶ . ਯਥਾਤਿ ਯੇਨਾਕਾਰੇਨ, ਅਧਿਟ੍ਠਿਯਮਾਨੇਤਿ ਯੋਜਨਾ. ਏਕਸਦਿਸੋਤਿ ਏਕਂਸੇਨ ਸਦਿਸੋ. ਅਧਿਟ੍ਠਿਤੇ ਪਤ੍ਤੇਤਿ ਸਮ੍ਬਨ੍ਧੋ. ਪਤ੍ਤੇਤਿ ਚ ਕਰਣਤ੍ਥੇ ਭੁਮ੍ਮਵਚਨਂ. ਪਤ੍ਤੇਨ ਪਟਿਗ੍ਗਹੇਸੀਤਿ ਹਿ ਅਤ੍ਥੋ. ਪਚ੍ਚਗ੍ਘੇਤਿ ਏਤ੍ਥ ਏਕਾਰੋ ਸ੍ਮਿਂਵਚਨਸ੍ਸ ਕਾਰਿਯੋਤਿ ਆਹ ‘‘ਪਚ੍ਚਗ੍ਘਸ੍ਮਿ’’ਨ੍ਤਿ. ਪਟਿ ਅਗ੍ਘਨ੍ਤਿ ਪਦਵਿਭਾਗਂ ਕਤ੍ਵਾ ਪਟਿਸਦ੍ਦੋ ਪਾਟੇਕ੍ਕਤ੍ਥੋ, ‘‘ਅਗ੍ਘ’’ਨ੍ਤਿ ਸਾਮਞ੍ਞਤੋ ਵੁਤ੍ਤੇਪਿ ਮਹਗ੍ਘਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਪਾਟੇਕ੍ਕਂ ਮਹਗ੍ਘਸ੍ਮਿ’’ਨ੍ਤਿ. ਇਮਿਨਾ ਚਤ੍ਤਾਰੋ ਏਕਤੋ ਹੁਤ੍ਵਾ ਨ ਮਹਗ੍ਘਾ ਹੋਨ੍ਤਿ, ਪਾਟੇਕ੍ਕਂ ਪਨ ਮਹਗ੍ਘਾ ਹੋਨ੍ਤੀਤਿ ਦਸ੍ਸੇਤਿ. ਅਥ ਵਾ ਸਉਪਸਗ੍ਗੋ ਪਚ੍ਚਗ੍ਘਸਦ੍ਦੋ ਅਭਿਨਵਪਰਿਯਾਯੋਤਿ ਆਹ ‘‘ਅਭਿਨਵੇ’’ਤਿ. ਅਭਿਨਵੋਤਿ ਚ ਅਚਿਰਤਨਵਤ੍ਥੁਸ੍ਸ ਨਾਮਂ. ਅਚਿਰਤਨਵਤ੍ਥੁ ਅਚਿਰਤਨਤ੍ਤਾ ਅਬ੍ਭੁਣ੍ਹਂ ਵਿਯ ਹੋਤਿ, ਤਸ੍ਮਾ ਵੁਤ੍ਤਂ ‘‘ਅਬ੍ਭੁਣ੍ਹੇ’’ਤਿ. ‘‘ਤਙ੍ਖਣੇ ਨਿਬ੍ਬਤ੍ਤਸ੍ਮਿ’’ਨ੍ਤਿ ਇਮਿਨਾ ਤਮੇਵਤ੍ਥਂ ਵਿਭਾਵੇਤਿ. ਦ੍ਵੇਵਾਚਿਕਾਤਿਪਦਸ੍ਸ ਸਮਾਸਵਸੇਨ ਚ ਤਦ੍ਧਿਤਵਸੇਨ ਚ ਨਿਪ੍ਫਨ੍ਨਭਾਵਂ ਦਸ੍ਸੇਨ੍ਤੋ ਆਹ ‘‘ਦ੍ਵੇ ਵਾਚਾ’’ਤਿਆਦਿ. ਪਤ੍ਤਾਤਿ ਏਤ੍ਥ ਏਕੋ ਇਤਿਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਇਤਿ ਤਸ੍ਮਾ ਦ੍ਵੇਵਾਚਿਕਾਇਤਿ ਅਤ੍ਥੋਤਿ ਯੋਜਨਾ. ਤੇਤਿ ਵਾਣਿਜਾ. ਅਥਾਤਿ ਤਸ੍ਮਿਂ ਕਾਲੇ. ਤੇਤਿ ਕੇਸੇ. ਤੇਸਨ੍ਤਿ ਵਾਣਿਜਾਨਂ. ਪਰਿਹਰਥਾਤਿ ਅਤ੍ਤਨੋ ਅਭਿਵਾਦਨਪਚ੍ਚੁਟ੍ਠਾਨਟ੍ਠਾਨਨ੍ਤਿ ਪਟਿਗ੍ਗਹੇਤ੍ਵਾ, ਪਰਿਚ੍ਛਿਨ੍ਦਿਤ੍ਵਾ ਵਾ ਹਰਥਾਤਿ ਅਤ੍ਥੋ. ਤੇਤਿ ਵਾਣਿਜਾ. ਅਮਤੇਨੇਵਾਤਿ ਅਮਤੇਨ ਇਵ, ਅਭਿਸਿਤ੍ਤਾ ਇਵਾਤਿ ਯੋਜਨਾ.

੫. ਬ੍ਰਹ੍ਮਯਾਚਨਕਥਾ

੭. ਭਗਵਾ ¶ ਉਪਸਙ੍ਕਮੀਤਿ ਸਮ੍ਬਨ੍ਧੋ. ਤਸ੍ਮਿਨ੍ਤਿ ਅਜਪਾਲਨਿਗ੍ਰੋਧੇ. ਆਚਿਣ੍ਣਸਮਾਚਿਣ੍ਣੋਤਿ ਆਚਰਿਤੋ ਸਮ੍ਮਾਚਰਿਤੋ, ਨ ਏਕਸ੍ਸ ਬੁਦ੍ਧਸ੍ਸ ਆਚਿਣ੍ਣੋ, ਅਥ ਖੋ ਸਬ੍ਬਬੁਦ੍ਧਾਨਂ ਆਚਿਣ੍ਣਸਮਾਚਿਣ੍ਣੋ, ਅਤਿਆਚਿਣ੍ਣੋ ਨਿਚ੍ਚਾਚਿਣ੍ਣੋਤਿ ਅਤ੍ਥੋ. ਸਙ੍ਖੇਪੇਨ ਵੁਤ੍ਤਮਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਜਾਨਨ੍ਤਿ ਹੀ’’ਤਿਆਦਿ. ਧਮ੍ਮਦੇਸਨਨ੍ਤਿ ਭਗਵਤੋ ਧਮ੍ਮਦੇਸਨਂ, ਧਮ੍ਮਦੇਸਨਤ੍ਥਾਯ ਵਾ ਭਗਵਨ੍ਤਂ, ਭਗਵਨ੍ਤਂ ਵਾ ਧਮ੍ਮਦੇਸਨਂ. ਤਤੋਤਿ ਯਾਚਨਕਾਰਣਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਲੋਕਸਨ੍ਨਿਵਾਸੋ ਬ੍ਰਹ੍ਮਗਰੁਕੋ ਯਸ੍ਮਾ, ਇਤਿ ਤਸ੍ਮਾ ਉਪ੍ਪਾਦੇਸ੍ਸਨ੍ਤੀਤਿ ਯੋਜਨਾ. ਇਤੀਤਿਆਦਿ ਨਿਗਮਨਂ.

ਤਤ੍ਥਾਤਿ ¶ ਪਰਿਵਿਤਕ੍ਕਨਾਕਾਰਪਾਠੇ. ‘‘ਪਞ੍ਚਕਾਮਗੁਣੇਸੁ ਅਲ੍ਲੀਯ’’ਨ੍ਤੀਤਿ ਇਮਿਨਾ ਅਲ੍ਲੀਯਨ੍ਤਿ ਅਭਿਰਮਿਤਬ੍ਬਟ੍ਠੇਨ ਲਗ੍ਗਨ੍ਤਿ ਏਤ੍ਥਾਤਿ ਆਲਯਾ ਪਞ੍ਚ ਕਾਮਗੁਣਾਤਿ ਵਚਨਤ੍ਥਂ ਦਸ੍ਸੇਤਿ. ਅਲ੍ਲੀਯਨ੍ਤੀਤਿ ਲਗ੍ਗਨ੍ਤਿ. ‘‘ਪਞ੍ਚ ਕਾਮਗੁਣੇ ਅਲ੍ਲੀਯਨ੍ਤੀ’’ਤਿਪਿ ਪਾਠੋ, ਏਵਂ ਸਤਿ ਅਲ੍ਲੀਯਨ੍ਤਿ ਅਭਿਰਮਿਤਬ੍ਬਟ੍ਠੇਨ ਸੇਵਿਯਨ੍ਤੀਤਿ ਆਲਯਾ ਪਞ੍ਚ ਕਾਮਗੁਣਾਤਿ ਵਚਨਤ੍ਥੋ ਕਾਤਬ੍ਬੋ. ਅਲ੍ਲੀਯਨ੍ਤੀਤਿ ਸੇਵਨ੍ਤਿ. ਤੇਤਿ ਪਞ੍ਚ ਕਾਮਗੁਣਾ. ‘‘ਯਦਿਦ’’ਨ੍ਤਿਪਦਸ੍ਸ ਯਂ ਇਦਨ੍ਤਿ ਪਦਵਿਭਾਗਂ ਕਤ੍ਵਾ ‘‘ਯ’’ਨ੍ਤਿ ਚ ‘‘ਇਦ’’ਨ੍ਤਿ ਚ ਸਬ੍ਬਨਾਮਪਦਨ੍ਤਿ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਯਦਿਦਨ੍ਤਿ ਨਿਪਾਤੋ’’ਤਿ. ਇਮਿਨਾ ਤੀਸੁ ਲਿਙ੍ਗੇਸੁ ਦ੍ਵੀਸੁ ਚ ਵਚਨੇਸੁ ਵਿਨਾਸਂ, ਵਿਕਾਰਂ ਵਾ ਵਿਸਦਿਸਂ ਵਾ ਨਅਯਨਤ੍ਤਾ ਨਗਮਨਤ੍ਤਾ ਅਬ੍ਯਯਂ ਨਾਮਾਤਿ ਦਸ੍ਸੇਤਿ, ਅਤ੍ਥੋ ਪਨ ਸਬ੍ਬਨਾਮਤ੍ਥੋਯੇਵਾਤਿ ਦਟ੍ਠਬ੍ਬਂ. ਤਸ੍ਸਾਤਿ ‘‘ਯਦਿਦ’’ਨ੍ਤਿਨਿਪਾਤਸ੍ਸ, ਅਤ੍ਥੋਤਿ ਸਮ੍ਬਨ੍ਧੋ. ਠਾਨਨ੍ਤਿ ‘‘ਠਾਨਂ’’ਇਤਿਪਦਂ. ਪਟਿਚ੍ਚਸਮੁਪ੍ਪਾਦਨ੍ਤਿ ‘‘ਪਟਿਚ੍ਚਸਮੁਪ੍ਪਾਦੋ’’ਇਤਿਪਦਂ. ਅਤ੍ਥੋਪਿ ਯੁਤ੍ਤੋਯੇਵਾਤਿ ਦਟ੍ਠਬ੍ਬਂ. ਇਮੇਸਨ੍ਤਿ ਸਙ੍ਖਾਰਾਦੀਨਂ ਪਚ੍ਚਯੁਪ੍ਪਨ੍ਨਾਨਂ. ਪਚ੍ਚਯਾਤਿ ਅਵਿਜ੍ਜਾਦਿਕਾਰਣਾ. ‘‘ਇਦਪ੍ਪਚ੍ਚਯਾ ਏਵਾ’’ਤਿ ਇਮਿਨਾ ਇਦਪ੍ਪਚ੍ਚਯਤਾਤਿ ਏਤ੍ਥ ਤਾਪਚ੍ਚਯਸ੍ਸ ਸ੍ਵਤ੍ਥਂ ਦੀਪੇਤਿ ‘‘ਦੇਵਤਾ’’ਤਿਆਦੀਸੁ (ਖੁ. ਪਾ. ਅਟ੍ਠ. ਏਵਮਿਚ੍ਚਾਦਿਪਾਠਵਣ੍ਣਨਾ) ਵਿਯ.

ਸੋ ਮਮਸ੍ਸ ਕਿਲਮਥੋਤਿ ਏਤ੍ਥ ਤਂਸਦ੍ਦਸ੍ਸ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਯਾ ਅਜਾਨਨ੍ਤਾਨਂ ਦੇਸਨਾ ਨਾਮਾ’’ਤਿ, ਇਮਿਨਾ ‘‘ਦੇਸੇਯ੍ਯਂ, ਨ ਆਜਾਨੇਯ੍ਯੁ’’ਨ੍ਤਿ ਦ੍ਵਿਨ੍ਨਮੇਵ ਕਿਰਿਯਾਪਦਾਨਂ ਤਸਦ੍ਦਸ੍ਸ ਵਿਸਯਭਾਵਂ ਦਸ੍ਸੇਤਿ, ਨ ਏਕਸ੍ਸ ਕਿਰਿਯਾਪਦਸ੍ਸ. ਸੋਤਿ ਦੇਸਨਾਸਙ੍ਖਾਤੋ ਕਾਯਵਚੀਪਯੋਗੋ, ਇਮਿਨਾ ਵਾਕ੍ਯਵਿਸਯੇ ਤਸਦ੍ਦੋ ਉਤ੍ਤਰਪਦਸ੍ਸੇਵ ਲਿਙ੍ਗਵਚਨਾਨਿ ਗਣ੍ਹਾਤੀਤਿ ਦਸ੍ਸੇਤਿ, ਸਮਾਸਮਜ੍ਝੇ ਪਨ ਤਸਦ੍ਦੋ ਪੁਬ੍ਬਪਦਸ੍ਸੇਵ ਲਿਙ੍ਗਵਚਨਾਨਿ ਗਣ੍ਹਾਤਿ. ਤੇਨ ਵੁਤ੍ਤਂ ‘‘ਅਵਿਜ੍ਜਾ ਚ ਸਾ ਪਚ੍ਚਯੋ ਚਾ’’ਤਿ (ਉਦਾ. ਅਟ੍ਠ. ਪਠਮਬੋਧਿਸੁਤ੍ਤਵਣ੍ਣਨਾ) ਚ ‘‘ਅਭਿਧਮ੍ਮੋ ਚ ਸੋ ਪਿਟਕਞ੍ਚਾ’’ਤਿ ਚ (ਪਾਰਾ. ਅਟ੍ਠ. ੧.ਪਠਮਮਹਾਸਙ੍ਗੀਤਿਕਥਾ; ਧ. ਸ. ਅਟ੍ਠ. ਨਿਦਾਨਕਥਾ) ਆਦਿ ¶ . ਕਿਲਮਥੋਤਿ ਕਾਯਕਿਲਮਨਹੇਤੁ. ਕਿਲਮਤਿ ਅਨੇਨਾਤਿ ਕਿਲਮਥੋ. ਅਸ੍ਸਾਤਿ ਭਵੇਯ੍ਯ. ਸਾਤਿ ਕਾਯਵਚੀਪਯੋਗਸਙ੍ਖਾਤਾ ਦੇਸਨਾ. ਵਿਹੇਸਾਤਿ ਕਾਯਵਿਹਿਂਸਾਹੇਤੁ. ਵਿਹਿਂਸਤਿ ਇਮਾਯਾਤਿ ਵਿਹੇਸਾ. ਚਿਤ੍ਤੇਨ ਪਨ ਬੁਦ੍ਧਾਨਂ ਕਿਲਮਥੋ ਵਾ ਵਿਹੇਸਾ ਵਾ ਨਤ੍ਥਿ ਅਰਹਤ੍ਤਮਗ੍ਗੇਨ ਸਮੁਚ੍ਛਿਨ੍ਨਤ੍ਤਾ ¶ . ‘‘ਪਟਿਭਂਸੂ’’ਤਿ ਏਤ੍ਥ ਪਟੀਤਿ ਕਮ੍ਮਪ੍ਪਵਚਨੀਯਯੋਗਤ੍ਤਾ ‘‘ਭਗਵਨ੍ਤ’’ਨ੍ਤਿ ਏਤ੍ਥ ਸਾਮ੍ਯਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਭਗਵਤੋ’’ਤਿ. ‘‘ਅਨੁ ਅਚ੍ਛਰਿਯਾ’’ਤਿ ਇਮਿਨਾ ‘‘ਨ ਅਚ੍ਛਰਿਯਾ’’ਤਿ ਪਦਵਿਭਾਗਂ ਨਿਵਤ੍ਤੇਤਿ, ਪੁਨਪ੍ਪੁਨਂ ਅਚ੍ਛਰਿਯਾਤਿ ਅਤ੍ਥੋ. ਪਟਿਭਂਸੂਤਿ ਏਤ੍ਥ ਪਟਿਸਦ੍ਦੋ ਪਟਿਭਾਨਤ੍ਥੋ, ਭਾਧਾਤੁ ਖਾਯਨਤ੍ਥੋਤਿ ਆਹ ‘‘ਪਟਿਭਾਨਸਙ੍ਖਾਤਸ੍ਸ ਞਾਣਸ੍ਸ ਗੋਚਰਾ ਅਹੇਸੁ’’ਨ੍ਤਿ. ‘‘ਗੋਚਰਾ ਅਹੇਸੁ’’ਨ੍ਤਿ ਇਮਿਨਾ ਖਾਯਨਂ ਨਾਮ ਅਤ੍ਥਤੋ ਗੋਚਰਭਾਵੇਨ ਭਵਨਨ੍ਤਿ ਦਸ੍ਸੇਤਿ.

ਮੇਤਿ ਮਮ, ਮਯਾ ਵਾ, ਅਧਿਗਤਂ ਧਮ੍ਮਂ ਪਕਾਸਿਤੁਨ੍ਤਿ ਸਮ੍ਬਨ੍ਧੋ. ਅਰਿਯਮਗ੍ਗਸੋਤਸ੍ਸ ਪਟਿ ਪਟਿਸੋਤਨ੍ਤਿ ਵੁਤ੍ਤੇ ਨਿਬ੍ਬਾਨਮੇਵਾਤਿ ਆਹ ‘‘ਪਟਿਸੋਤਂ ਵੁਚ੍ਚਤਿ ਨਿਬ੍ਬਾਨ’’ਨ੍ਤਿ. ਨਿਬ੍ਬਾਨਗਾਮਿਨ੍ਤਿ ਅਰਿਯਮਗ੍ਗਂ. ਅਰਿਯਮਗ੍ਗੋ ਹਿ ਯਸ੍ਮਾ ਨਿਬ੍ਬਾਨਂ ਗਮਯਤਿ, ਤਸ੍ਮਾ ਨਿਬ੍ਬਾਨਗਾਮੀਤਿ ਵੁਚ੍ਚਤਿ. ਤਮੋਖਨ੍ਧੇਨਾਤਿ ਏਤ੍ਥ ਤਮਸਦ੍ਦੋ ਅਵਿਜ੍ਜਾਪਰਿਯਾਯੋ, ਖਨ੍ਧਸਦ੍ਦੋ ਰਾਸਤ੍ਥੋਤਿ ਆਹ ‘‘ਅਵਿਜ੍ਜਾਰਾਸਿਨਾ’’ਤਿ. ‘‘ਅਜ੍ਝੋਤ੍ਥਟਾ’’ਤਿ ਇਮਿਨਾ ਆਵੁਟਾਤਿ ਏਤ੍ਥ ਵੁਧਾਤੁ ਆਵਰਣਤ੍ਥੋਤਿ ਦਸ੍ਸੇਤਿ. ਅਪ੍ਪੋਸ੍ਸੁਕ੍ਕਤਾਯਾਤਿ ਏਤ੍ਥ ਅਪਤ੍ਯੂਪਸਗ੍ਗੋ ਅਭਾਵਤ੍ਥੋ, ਤਾਪਚ੍ਚਯੋ ਭਾਵਤ੍ਥੋਤਿ ਆਹ ‘‘ਨਿਰੁਸ੍ਸੁਕ੍ਕਭਾਵੇਨਾ’’ਤਿ.

੮. ਲੋਕੇਤਿ ਸਤ੍ਤਲੋਕੇ. ਮਹਾਬ੍ਰਹ੍ਮੇਤਿ ਮਹਾਬ੍ਰਹ੍ਮਾਨੋ. ਅਪ੍ਪਰਜਕ੍ਖਜਾਤਿਕਾਤਿ ਏਤ੍ਥ ਅਪ੍ਪਂ ਰਜਂ ਅਕ੍ਖਿਮ੍ਹਿ ਏਤੇਸਨ੍ਤਿ ਅਪ੍ਪਰਜਕ੍ਖਾ, ਅਪ੍ਪਰਜਕ੍ਖਾ ਜਾਤਿ ਸਭਾਵੋ ਏਤੇਸਨ੍ਤਿ ਅਪ੍ਪਰਜਕ੍ਖਜਾਤਿਕਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਞ੍ਞਾਮਯੇ’’ਤਿਆਦਿ. ‘‘ਪਞ੍ਞਾਮਯੇ’’ਤਿ ਇਮਿਨਾ ਮਂਸਮਯੇਤਿ ਅਤ੍ਥਂ ਨਿਵਤ੍ਤੇਤਿ. ਏਤੇਸਨ੍ਤਿ ਸਤ੍ਤਾਨਂ. ਧਮ੍ਮਸ੍ਸਾਤਿ ਤੁਪਚ੍ਚਯਯੋਗੇ ਛਟ੍ਠੀਕਮ੍ਮਂ. ਆਪੁਬ੍ਬੋ ਞਾਧਾਤੁ ਪਟਿਵਿਜ੍ਝਨਤ੍ਥੋਤਿ ਆਹ ‘‘ਪਟਿਵਿਜ੍ਝਿਤਾਰੋ’’ਤਿ.

ਸਂਵਿਜ੍ਜਤਿ ਮਲਂ ਏਤੇਸਨ੍ਤਿ ਸਮਲਾ, ਪੂਰਣਕਸ੍ਸਪਾਦਿਕਾ ਛ ਸਤ੍ਥਾਰੋ, ਤੇਹਿ. ‘‘ਰਾਗਾਦੀਹੀ’’ਤਿ ਇਮਿਨਾ ਮਲਸਰੂਪਂ ਦਸ੍ਸੇਤਿ. ਅਵਾਪੁਰੇਤਨ੍ਤਿ ਏਤ੍ਥ ਅਵਪੁਬ੍ਬੋ ਚ ਆਪੁਬ੍ਬੋ ਚ ਪੁਰਧਾਤੁ ਵਿਵਰਣਤ੍ਥੋਤਿ ਆਹ ‘‘ਵਿਵਰ ਏਤ’’ਨ੍ਤਿ. ਵਕਾਰਸ੍ਸ ਪਕਾਰਂ ਕਤ੍ਵਾ ‘‘ਅਪਾਪੁਰੇਤ’’ਨ੍ਤਿਪਿ ਪਾਠੋ ¶ . ਅਮਤਸਦ੍ਦਸ੍ਸ ਸਲਿਲਾਦਯੋ ਨਿਵਤ੍ਤੇਤੁਂ ਵੁਤ੍ਤਂ ‘‘ਨਿਬ੍ਬਾਨਸ੍ਸਾ’’ਤਿ. ਇਮੇ ਸਤ੍ਤਾ ਸੁਣਨ੍ਤੂਤਿ ਸਮ੍ਬਨ੍ਧੋ. ਵਿਮਲੇਨਾਤਿ ਏਤ੍ਥ ਵਿਸਦ੍ਦੋ ਅਭਾਵਤ੍ਥੋਤਿ ਆਹ ‘‘ਅਭਾਵਤੋ’’ਤਿ. ਇਮਿਨਾ ਨਤ੍ਥਿ ਮਲਂ ਏਤਸ੍ਸਾਤਿ ਵਿਮਲੋਤਿ ਵਚਨਤ੍ਥਂ ਦਸ੍ਸੇਤਿ ¶ . ‘‘ਸਮ੍ਮਾਸਮ੍ਬੁਦ੍ਧੇਨਾ’’ਤਿ ਇਮਿਨਾ ਅਞ੍ਞਪਦਤ੍ਥਸਰੂਪਂ ਦਸ੍ਸੇਤਿ. ਅਨੁਕ੍ਕਮੇਨ ਮਗ੍ਗੇਨ ਬੁਜ੍ਝਿਤਬ੍ਬਨ੍ਤਿ ਅਨੁਬੁਦ੍ਧਨ੍ਤਿ ਵੁਤ੍ਤੇ ਚਤੁਸਚ੍ਚਧਮ੍ਮੋ ਗਹੇਤਬ੍ਬੋਤਿ ਆਹ ‘‘ਚਤੁਸਚ੍ਚਧਮ੍ਮ’’ਨ੍ਤਿ.

‘‘ਸੇਲਮਯੇ’’ਤਿ ਇਮਿਨਾ ਸਿਲਾਯ ਨਿਬ੍ਬਤ੍ਤੋ ਸੇਲੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਸਬ੍ਬਞ੍ਞੁਤਞ੍ਞਾਣੇਨਾ’’ਤਿ ਇਮਿਨਾ ਸਮਨ੍ਤਚਕ੍ਖੁਸਰੂਪਂ ਦਸ੍ਸੇਤਿ. ਭਗਵਾ ਤ੍ਵਮ੍ਪੀਤਿ ਯੋਜਨਾ. ਧਮ੍ਮਸਦ੍ਦੋ ਪਞ੍ਞਾਪਰਿਯਾਯੋਤਿ ਆਹ ‘‘ਧਮ੍ਮਮਯਂ ਪਞ੍ਞਾਮਯ’’ਨ੍ਤਿ. ਅਪੇਤੋ ਸੋਕੋ ਇਮਸ੍ਸਾਤਿ ਅਪੇਤਸੋਕੋ, ਭਗਵਾ. ਸੋਕਂ ਅਵਤਰਤੀਤਿ ਸੋਕਾਵਤਿਣ੍ਣਾ, ਜਨਤਾ. ਸੋਕਾਵਤਿਣ੍ਣਞ੍ਚ ਜਾਤਿਜਰਾਭਿਭੂਤਞ੍ਚਾਤਿ ਚਸਦ੍ਦੋ ਯੋਜੇਤਬ੍ਬੋ. ਇਮਿਨਾ ਚਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋਤਿ ਦਸ੍ਸੇਤਿ.

‘‘ਭਗਵਾ’’ਤਿਪਦਂ ‘‘ਵੀਰੋ’’ਤਿਆਦੀਸੁ ਯੋਜੇਤਬ੍ਬਂ. ‘‘ਵੀਰਿਯਵਨ੍ਤਤਾਯਾ’’ਤਿ ਇਮਿਨਾ ਵੀਰਂ ਯਸ੍ਸਤ੍ਥੀਤਿ ਵੀਰੋਤਿ ਵਚਨਤ੍ਥਂ ਦਸ੍ਸੇਤਿ. ਸਦ੍ਦਸਤ੍ਥੇਸੁ ਆਲਪਨਪਦੇਸੁ ਵਿਗ੍ਗਹੋ ਨ ਕਾਤਬ੍ਬੋਤਿ ਇਦਂ ਆਲਪਨਾਵਤ੍ਥਂ ਸਨ੍ਧਾਯ ਵੁਤ੍ਤਂ, ਇਧ ਪਨ ਤੇਸਮਤ੍ਥਦਸ੍ਸਨਤ੍ਥਾਯ ਵਿਗ੍ਗਹੋ ਵੁਤ੍ਤੋਤਿ ਦਟ੍ਠਬ੍ਬਂ. ‘‘ਦੇਵਪੁਤ੍ਤ…ਪੇ… ਵਿਜਿਤਤ੍ਤਾ’’ਤਿ ਇਮਿਨਾ ਵਿਜਿਤੋ ਮਾਰੇਹਿ ਸਂਗਾਮੋ ਅਨੇਨਾਤਿ ਵਿਜਿਤਸਙ੍ਗਾਮੋਤਿ ਵਚਨਤ੍ਥਂ ਦਸ੍ਸੇਤਿ. ਏਤ੍ਥ ਚ ਖਨ੍ਧਮਾਰੋ ਮਚ੍ਚੁਮਾਰੇਨ ਸਙ੍ਗਹਿਤੋ ਦ੍ਵਿਨ੍ਨਂ ਮਾਰਾਨਂ ਏਕਤੋ ਵਿਜਿਤਤ੍ਤਾ. ‘‘ਸਤ੍ਤਵਾਹੋ’’ਤਿ ਪਠਮਕ੍ਖਰੇਨ ਚ ‘‘ਸਤ੍ਥਵਾਹੋ’’ਤਿ ਦੁਤਿਯਕ੍ਖਰੇਨ ਚ ਯੁਤ੍ਤੋ. ਤਤ੍ਥ ਸਤ੍ਥਵਾਹੋ ਵਿਯਾਤਿ ‘‘ਸਤ੍ਥਵਾਹੋ’’ਤਿ ਉਪਚਾਰੇਨ ਵੁਤ੍ਤੇ ਦੁਤਿਯਕ੍ਖਰੇਨ ਯੁਤ੍ਤੋ, ਸਤ੍ਤੇ ਵਹਹੀਤਿ ਸਤ੍ਤਵਾਹੋਤਿ ਮੁਖ੍ਯਤੋ ਵੁਤ੍ਤੇ ਪਠਮਕ੍ਖਰੇਨ ਯੁਤ੍ਤੋ. ਇਧ ਪਨ ਪਠਮਕ੍ਖਰੇਨ ਯੁਤ੍ਤੋਤਿ ਆਹ ‘‘ਸਤ੍ਤੇ ਵਹਤੀਤਿ ਸਤ੍ਤਵਾਹੋ’’ਤਿ. ਨਤ੍ਥਿ ਇਣਂ ਇਮਸ੍ਸਾਤਿ ਅਣਣੋ ਭਗਵਾ.

੯. ਬੁਦ੍ਧਚਕ੍ਖੁਨਾਤਿ ¶ ਏਤ੍ਥ ਚਕ੍ਖੁ ਦੁਵਿਧਂ ਮਂਸਚਕ੍ਖੁਞਾਣਚਕ੍ਖੁਵਸੇਨ. ਤਤ੍ਥਾਪਿ ਮਂਸਚਕ੍ਖੁ ਦੁਵਿਧਂ ਪਸਾਦਚਕ੍ਖੁਸਸਮ੍ਭਾਰਚਕ੍ਖੁਵਸੇਨ. ਤਤ੍ਥ ਪਸਾਦਰੂਪਂ ਪਸਾਦਚਕ੍ਖੁ ਨਾਮ, ਭਮੁਕਟ੍ਠਿਪਰਿਚ੍ਛਿਨ੍ਨੋ ਮਂਸਪਿਣ੍ਡੋ ਸਸਮ੍ਭਾਰਚਕ੍ਖੁ ਨਾਮ. ਞਾਣਚਕ੍ਖੁ ਪਨ ਪਞ੍ਚਵਿਧਂ (ਪਟਿ. ਮ. ਅਟ੍ਠ. ੧.੧.੩) ਦਿਬ੍ਬਧਮ੍ਮਪਞ੍ਞਾਬੁਦ੍ਧਸਮਨ੍ਤਚਕ੍ਖੁਵਸੇਨ. ਤਤ੍ਥ ਦਿਬ੍ਬਚਕ੍ਖੁਅਭਿਞ੍ਞਾਞਾਣਂ ਦਿਬ੍ਬਚਕ੍ਖੁ ਨਾਮ, ਹੇਟ੍ਠਿਮਮਗ੍ਗਤ੍ਤਯਂ ਧਮ੍ਮਚਕ੍ਖੁ ਨਾਮ, ਅਰਹਤ੍ਤਮਗ੍ਗਞਾਣਂ ਪਞ੍ਞਾਚਕ੍ਖੁ ਨਾਮ, ਇਨ੍ਦ੍ਰਿਯਪਰੋਪਰਿਯਤ੍ਤਞਾਣਞ੍ਚ ਆਸਯਾਨੁਸਯਞਾਣਞ੍ਚ ਬੁਦ੍ਧਚਕ੍ਖੁ ਨਾਮ, ਸਬ੍ਬਞ੍ਞੁਤਞ੍ਞਾਣਂ ਸਮਨ੍ਤਚਕ੍ਖੁ ਨਾਮ. ਇਧ ਪਨ ‘‘ਬੁਦ੍ਧਚਕ੍ਖੁਨਾ’’ਤਿ ਵੁਤ੍ਤਤ੍ਤਾ ਯਥਾਵੁਤ੍ਤਦ੍ਵੇਞਾਣਾਨਿਯੇਵਾਤਿ ਆਹ ‘‘ਇਨ੍ਦ੍ਰਿਯ…ਪੇ… ਞਾਣੇਨ ਚਾ’’ਤਿ. ਹੀਤਿ ਸਚ੍ਚਂ. ਯੇਸਨ੍ਤਿ ਸਤ੍ਤਾਨਂ. ਸਦ੍ਧਾਦੀਨੀਤਿ ਆਦਿਸਦ੍ਦੇਨ ਵੀਰਿਯਸਤਿਸਮਾਧਿਪਞ੍ਞਿਨ੍ਦ੍ਰਿਯਾਨਿ ਸਙ੍ਗਣ੍ਹਾਤਿ. ਤਿਕ੍ਖਾਨੀਤਿ ਤਿਖਿਣਾਨਿ. ਮੁਦੂਨੀਤਿ ਸੁਖੁਮਤਰਾਨਿ. ਆਕਾਰਾਤਿ ਕਾਰਣਾ. ਇਮਾਨਿ ਤੀਣਿ ਦੁਕਾਨਿ ਬਾਹਿਰਤ੍ਥਸਮਾਸਵਸੇਨ ਵੁਤ੍ਤਾਨਿ. ਸੁਖੇਨ ਵਿਞ੍ਞਾਪੇਤਬ੍ਬਾਤਿ ਸੁਵਿਞ੍ਞਾਪਯਾ, ਤਥਾ ਦੁਵਿਞ੍ਞਾਪਯਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯੇ ਕਥਿਤਕਾਰਣ’’ਨ੍ਤਿਆਦਿ ¶ . ਪਰਲੋਕੋ ਚ ਵਜ੍ਜਞ੍ਚ ਪਰਲੋਕਵਜ੍ਜਾਨਿ, ਤਾਨਿ ਭਯਤੋ ਪਸ੍ਸਨ੍ਤੀਤਿ ਪਰਲੋਕਵਜ੍ਜਭਯਦਸ੍ਸਾਵਿਨੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯੇ’’ਤਿਆਦਿ. ਇਮਾਨਿ ਦ੍ਵੇ ਦੁਕਾਨਿ ਕਿਤਵਸੇਨ ਵੁਤ੍ਤਾਨਿ, ਇਧ ਪਚ੍ਛਿਮਦੁਕੇ ‘‘ਨ ਅਪ੍ਪੇਕਚ੍ਚੇ ਪਰਲੋਕਵਜ੍ਜਭਯਦਸ੍ਸਾਵਿਨੋ’’ਤਿ ਦੁਤਿਯਪਦਂ ਨ ਵੁਤ੍ਤਂ, ਪਟਿਸਮ੍ਭਿਦਾਮਗ੍ਗਪਾਲ਼ਿਯਂ (ਪਟਿ. ਮ. ੧.੧੧੧) ਪਨ ਯੁਗਲ਼ਵਸੇਨ ਵੁਤ੍ਤਂ. ਉਪ੍ਪਲਾਨਿ ਏਤ੍ਥ ਸਨ੍ਤੀਤਿ ਉਪ੍ਪਲਿਨੀਤਿ ਵਚਨਤ੍ਥੇਨ ਗਚ੍ਛੋ ਵਾ ਲਤਾ ਵਾ ਪੋਕ੍ਖਰਣੀ ਵਾ ਵਨਂ ਵਾ ‘‘ਉਪ੍ਪਲਿਨੀ’’ਤਿ ਵੁਚ੍ਚਤਿ, ਇਧ ਪਨ ‘‘ਵਨ’’ਨ੍ਤਿ ਆਹ ‘‘ਉਪ੍ਪਲਵਨੇ’’ਤਿ. ਨਿਮੁਗ੍ਗਾਨੇਵ ਹੁਤ੍ਵਾਤਿ ਸਮ੍ਬਨ੍ਧੋ. ਪੋਸਯਨ੍ਤੀਤਿ ਵਡ੍ਢਨ੍ਤਿ, ਇਮਿਨਾ ਅਨ੍ਤੋਨਿਮੁਗ੍ਗਾਨੇਵ ਹੁਤ੍ਵਾ ਪੋਸਯਨ੍ਤੀਤਿ ਅਨ੍ਤੋਨਿਮੁਗ੍ਗਪੋਸੀਨੀਤਿ ਵਚਨਤ੍ਥਂ ਦਸ੍ਸੇਤਿ. ‘‘ਉਦਕੇਨ ਸਮ’’ਨ੍ਤਿ ਇਮਿਨਾ ਉਦਕੇਨ ਸਮਂ ਸਮੋਦਕਂ, ਸਮੋਦਕਂ ਹੁਤ੍ਵਾ ਠਿਤਾਨੀਤਿ ਅਤ੍ਥਂ ਦਸ੍ਸੇਤਿ. ‘‘ਅਤਿਕ੍ਕਮਿਤ੍ਵਾ’’ਤਿ ਇਮਿਨਾ ਅਚ੍ਚੁਗ੍ਗਮ੍ਮਾਤਿਪਦਸ੍ਸ ਅਤਿਉਗ੍ਗਨ੍ਤ੍ਵਾਤਿ ਅਤ੍ਥਂ ਦਸ੍ਸੇਤਿ.

ਪਟਿਚ੍ਛਨ੍ਨੇਨ ਆਰੋਪਿਤਾਤਿ ਪਾਰੁਤਾ, ਨ ਪਾਰੁਤਾ ਅਪਾਰੁਤਾ. ਅਪਾਰੁਤਾ ਨਾਮ ਅਤ੍ਥਤੋ ਵਿਵਰਣਾਤਿ ਆਹ ‘‘ਵਿਵਟਾ’’ਤਿ ਸੋਤਿ ਅਰਿਯਮਗ੍ਗੋ ¶ . ਹੀਤਿ ਸਚ੍ਚਂ. ਪਚ੍ਛਿਮਪਦਦ੍ਵਯੇਤਿ ਗਾਥਾਯ ਉਤ੍ਤਮਪਦਦ੍ਵਯੇ. ਅਯਮੇਵਤ੍ਥੋਤਿ ਅਯਂ ਵਕ੍ਖਮਾਨੋ ਏਵਂ ਅਤ੍ਥੋ ਦਟ੍ਠਬ੍ਬੋਤਿ ਯੋਜਨਾ. ਹੀਤਿ ਵਿਤ੍ਥਾਰੋ. ਨ ਭਾਸਿਨ੍ਤਿ ਏਤ੍ਥ ਉਤ੍ਤਮਪੁਰਿਸਤ੍ਤਾ ‘‘ਅਹ’’ਨ੍ਤਿ ਵੁਤ੍ਤਂ. ‘‘ਦੇਵਮਨੁਜੇਸੁ’’ਤਿ ਵਤ੍ਤਬ੍ਬੇ ਏਕਸੇਸਵਸੇਨ ‘‘ਮਨੁਜੇਸੂ’’ਤਿ ਵੁਤ੍ਤਨ੍ਤਿ ਆਹ ‘‘ਦੇਵਮਨੁਸ੍ਸੇਸੂ’’ਤਿ.

੬. ਪਞ੍ਚਵਗ੍ਗਿਯਕਥਾ

੧੦. ਠਾਨੁਪ੍ਪਤ੍ਤਿਯਾਤਿ ਕਾਰਣੇਨ ਉਪ੍ਪਤ੍ਤਿਯਾ. ਨਿਕ੍ਕਿਲੇਸੋ ਜਾਤਿ ਸਭਾਵੋ ਇਮਸ੍ਸਾਤਿ ਨਿਕ੍ਕਿਲੇਸਜਾਤਿਕੋ. ‘‘ਞਾਣ’’ਨ੍ਤਿ ਅਵਿਸੇਸੇਨ ਵੁਤ੍ਤੇਪਿ ਅਤ੍ਥਤੋ ਅਨਾਵਰਣਞਾਣਮੇਵਾਤਿ ਆਹ ‘‘ਸਬ੍ਬਞ੍ਞੁਤਞ੍ਞਾਣ’’ਨ੍ਤਿ. ਇਤੋਤਿ ‘‘ਧਮ੍ਮਂ ਦੇਸੇਸ੍ਸਾਮੀ’’ਤਿ ਪਰਿਵਿਤਕ੍ਕਦਿਵਸਤੋ, ਹੇਟ੍ਠਾਤਿ ਸਮ੍ਬਨ੍ਧੋ. ਦੇਵਤਾ ਪਨ ਆਲ਼ਾਰਸ੍ਸ ਕਾਲਙ੍ਕਰਣਮੇਵ ਜਾਨਾਤਿ, ਨ ਆਕਿਞ੍ਚਞ੍ਞਾਯਤਨੇ ਨਿਬ੍ਬਤ੍ਤਭਾਵਂ. ਭਗਵਾ ਪਨ ਸਬ੍ਬਂ ਜਾਨਾਤਿ, ਤੇਨ ਵੁਤ੍ਤਂ ‘‘ਆਕਿਞ੍ਚਞ੍ਞਾਯਤਨੇ ਨਿਬ੍ਬਤ੍ਤੋ’’ਤਿ. ‘‘ਪਰਿਹੀਨਤ੍ਤਾ’’ਤਿ ਇਮਿਨਾ ਮਹਾਜਾਨਿਯੋਤਿ ਏਤ੍ਥ ਹਾਧਾਤੁਯਾ ਅਤ੍ਥਂ ਦਸ੍ਸੇਤਿ. ਅਸ੍ਸਾਤਿ ਆਲ਼ਾਰਸ੍ਸ. ਮਹਤੀ ਜਾਨਿਅਸ੍ਸਾਤਿ ‘‘ਮਹਾਜਾਨਿਕੋ’’ਤਿ ਵਤ੍ਤਬ੍ਬੇ ਕਕਾਰਸ੍ਸ ਯਕਾਰਂ ਕਤ੍ਵਾ ‘‘ਮਹਾਜਾਨਿਯੋ’’ਤਿ ਵੁਤ੍ਤਂ. ਅਕ੍ਖਣੇਤਿ ਬ੍ਰਹ੍ਮਚਰਿਯਵਾਸਾਯ ਅਨੋਕਾਸੇ, ਆਕਿਞ੍ਚਞ੍ਞਾਯਤਨੇਤਿ ਅਤ੍ਥੋ. ਹਿਯ੍ਯੋਤਿ ਅਨਨ੍ਤਰਾਤੀਤਾਹੇ. ਸੋਪੀਤਿ ਉਦਕੋ ਰਾਮਪੁਤ੍ਤੋਪਿ. ਪਿਸਦ੍ਦੋ ਆਲ਼ਾਰਾਪੇਕ੍ਖੋ. ਤਤ੍ਥ ਆਲ਼ਾਰੋ ਕਾਲਾਮੋ ਯਾਵਆਕਿਞ੍ਚਞ੍ਞਾਯਤਨਝਾਨਲਾਭੀ ਹੋਤਿ, ਤਸ੍ਮਾ ਆਕਿਞ੍ਚਞ੍ਞਾਯਤਨੇ ਨਿਬ੍ਬਤ੍ਤੋ. ਉਦਕੋ ਰਾਮਪੁਤ੍ਤੋ ਯਾਵਨੇਵਸਞ੍ਞਾਨਾਸਞ੍ਞਾਯਤਨਝਾਨਲਾਭੀ ਹੋਤਿ, ਤਸ੍ਮਾ ਨੇਵਸਞ੍ਞਾਨਾਸਞ੍ਞਾਯਤਨੇ ਨਿਬ੍ਬਤ੍ਤੋਤਿ ¶ ਦਟ੍ਠਬ੍ਬਂ. ‘‘ਬਹੁਕਾਰਾ’’ਤਿ ਚ ‘‘ਬਹੂਪਕਾਰਾ’’ਤਿ ਚ ਪਾਠਸ੍ਸ ਦ੍ਵਿਧਾ ਯੁਤ੍ਤਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਬਹੁਕਾਰਾਤਿ ਬਹੂਪਕਾਰਾ’’ਤਿ. ਪੇਸਿਤਤ੍ਤਭਾਵਂ ਮਨ੍ਤਿ ਯੋਜਨਾ. ਇਮਿਨਾ ਪਹਿਤਤ੍ਤਨ੍ਤਿ ਏਤ੍ਥ ਅਤ੍ਤਸਦ੍ਦੋ ਕਾਯਵਾਚਕੋਤਿ ਦਸ੍ਸੇਤਿ.

੧੧. ਅਨ੍ਤਰਾਸਦ੍ਦੇਨ ਯੁਤ੍ਤਤ੍ਤਾ ‘‘ਗਯਂ, ਬੋਧਿ’’ਨ੍ਤਿ ਏਤ੍ਥ ਸਾਮ੍ਯਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਗਯਾਯ ਚ ਬੋਧਿਮਣ੍ਡਸ੍ਸ ਚਾ’’ਤਿ.

ਗਾਥਾਯ ¶ ਚਤੂਸੁ ਸਬ੍ਬਸਦ੍ਦੇਸੁ ਦੁਤਿਯੋ ਸਬ੍ਬਸਦ੍ਦੋ ਅਨਵਸੇਸਤ੍ਥੋ, ਸੇਸਾ ਸਾਵਸੇਸਤ੍ਥਾਤਿ ਦਸ੍ਸੇਨ੍ਤੋ ਆਹ ‘‘ਸਬ੍ਬਂ ਤੇਭੂਮਕਧਮ੍ਮ’’ਨ੍ਤਿਆਦਿ. ਵਚਨਤ੍ਥੋ ਸੁਵਿਞ੍ਞੇਯ੍ਯੋਵ. ਅਰਹਤ੍ਤਫਲਸ੍ਸਾਪਿ ਤਣ੍ਹਾਕ੍ਖਯਤ੍ਤਾ ਵੁਤ੍ਤਂ ‘‘ਤਣ੍ਹਾਕ੍ਖਯੇ ਨਿਬ੍ਬਾਨੇ’’ਤਿ. ਸਯਂਸਦ੍ਦੋ ਅਤ੍ਤਪਰਿਯਾਯੋ, ਅਭਿਞ੍ਞਾਯਸਦ੍ਦੋ ਤੁ ਤ੍ਵਾਪਚ੍ਚਯਨ੍ਤੋਤਿ ਆਹ ‘‘ਅਤ੍ਤਨਾਵ ਜਾਨਿਤ੍ਵਾ’’ਤਿ. ‘‘ਸਬ੍ਬਂ ਚਤੁਭੂਮਕਧਮ੍ਮ’’ਨ੍ਤਿ ਇਮਿਨਾ ਞਾਧਾਤੁਯਾ ਕਮ੍ਮਂ ਦਸ੍ਸੇਤਿ. ‘‘ਅਯਂ ਮੇ ਆਚਰਿਯੋ’’ਤਿ ਉਦ੍ਦਿਸਨਾਕਾਰਦਸ੍ਸਨਂ.

‘‘ਲੋਕੁਤ੍ਤਰਧਮ੍ਮੇ’’ਤਿ ਇਮਿਨਾ ਲੋਕਿਯਧਮ੍ਮੇ ਪਨ ਆਚਰਿਯੋ (ਮਿ. ਪ. ੪.੫.੧੧) ਅਤ੍ਥੀਤਿ ਦਸ੍ਸੇਤਿ. ਪਟਿਪੁਗ੍ਗਲੋਤਿ ਏਤ੍ਥ ਪਟਿਸਦ੍ਦੋ ਪਟਿਭਾਗਤ੍ਥੋਤਿ ਆਹ ‘‘ਪਟਿਭਾਗਪੁਗ੍ਗਲੋ’’ਤਿ. ਸਦਿਸਪੁਗ੍ਗਲੋ ਨਾਮ ਨਤ੍ਥੀਤਿ ਅਤ੍ਥੋ. ਸੀਤਿਭੂਤੋਤਿ ਸੀਤਿ ਹੁਤ੍ਵਾ ਭੂਤੋ, ਸੀਤਿਭਾਵਂ ਵਾ ਪਤ੍ਤੋ.

ਕਾਸੀਨਨ੍ਤਿ ਬਹੁਵਚਨਵਸੇਨ ਵੁਤ੍ਤਤ੍ਤਾ ਜਨਪਦਾਨਂ ਨਾਮਂ. ਜਨਪਦਸਮੂਹਸ੍ਸ ਰਟ੍ਠਨਾਮਤ੍ਤਾ ਵੁਤ੍ਤਂ ‘‘ਕਾਸਿਰਟ੍ਠੇ’’ਤਿ. ‘‘ਨਗਰ’’ਨ੍ਤਿ ਇਮਿਨਾ ਪੁਰਸਦ੍ਦੋ ਨਗਰਪਰਿਯਾਯੋਤਿ ਦਸ੍ਸੇਤਿ. ਪਟਿਲਾਭਾਯਾਤਿ ਪਟਿਲਾਭਾਪਨਤ੍ਥਾਯ. ‘‘ਭੇਰਿ’’ਨ੍ਤਿ ਇਮਿਨਾ ਦੁਨ੍ਦੁਭਿਸਦ੍ਦੋ ਭੇਰਿਵਾਚਕੋਤਿ ਦਸ੍ਸੇਤਿ. ਭੇਰਿ ਹਿ ‘‘ਦੁਂਦੁ’’ਨ੍ਤਿਸਦ੍ਦੇਨ ਉਭਿ ਪੂਰਣਮੇਤ੍ਥਾਤਿ ਦੁਨ੍ਦੁਭੀਤਿ ਵੁਚ੍ਚਤਿ. ਦਕਾਰਰਕਾਰਾਨਂ ਸਂਯੋਗਂ ਕਤ੍ਵਾ ਦੁਨ੍ਦ੍ਰੁਭੀਤਿਪਿ ਪਾਠੋ ਅਤ੍ਥਿ, ਸੋ ਅਪਾਠੋਯੇਵ. ‘‘ਪਹਰਿਸ੍ਸਾਮੀ’’ਤਿ ਏਤ੍ਥ ਪਹਾਰਸਦ੍ਦੇਨ ਆਹਞ੍ਞਿਨ੍ਤਿ ਏਤ੍ਥ ਆਪੁਬ੍ਬਹਨਧਾਤੁਯਾ ਅਤ੍ਥਂ ਦਸ੍ਸੇਤਿ, ਸ੍ਸਾਮਿਸਦ੍ਦੇਨ ਅਜ੍ਜਤਨਿਇਂਵਿਭਤ੍ਤਿਯਾ ਅਨਾਗਤਕਾਲੇ ਪਵਤ੍ਤਭਾਵਂ, ਇਤਿਸਦ੍ਦੇਨ ਗਮਨਾਕਾਰਵਾਚਕਸ੍ਸ ਇਤਿਸਦ੍ਦਸ੍ਸ ਲੋਪਭਾਵਂ ਦਸ੍ਸੇਤਿ.

ਅਨਨ੍ਤਜਿਨੋਤਿ ਅਨਨ੍ਤਸਙ੍ਖਾਤਸ੍ਸ ਸਬ੍ਬਞ੍ਞੁਤਞ੍ਞਾਣਸ੍ਸ ਪਦਟ੍ਠਾਨਭੂਤੇਨ ਅਰਹਤ੍ਤਮਗ੍ਗਞਾਣੇਨ ਸਬ੍ਬਕਿਲੇਸਾਰੀਨਂ ਜਿਤਵਾ, ਏਤੇਨ ਫਲੂਪਚਾਰੇਨ ਅਨਨ੍ਤਜਿਨਭਾਵਂ ਦਸ੍ਸੇਤਿ. ਹੁਵੇਯ੍ਯ ਪਾਵੁਸੋਤਿ ਏਤ੍ਥ ‘‘ਹੁਵੇਯ੍ਯ ਅਪਿ ਆਵੁਸੋ’’ਤਿ ਪਦਵਿਭਾਗਂ ਕਤ੍ਵਾ ਹੁਧਾਤੁ ਸਤ੍ਤਤ੍ਥਵਾਚਕੋ, ਅਪਿਸਦ੍ਦੋ ਏਵਂਨਾਮਵਾਚਕੋਤਿ ਦਸ੍ਸੇਨ੍ਤੋ ਆਹ ਆਵੁਸੋ ‘‘ਏਵਂ ਨਾਮ ਭਵੇਯ੍ਯਾ’’ਤਿ. ਵਕਾਰਸ੍ਸ ਪਕਾਰਂ ਕਤ੍ਵਾ ‘‘ਹੁਪੇਯ੍ਯਾ’’ਤਿ ਪਾਠੋਪਿ ਯੁਜ੍ਜਤਿਯੇਵ.

੧੨. ‘‘ਅਤ੍ਥਾਯ ¶ ¶ ਪਟਿਪਨ੍ਨੋ’’ਤਿ ਇਮਿਨਾ ਬਾਹੁਲ੍ਲਸ੍ਸ ਅਤ੍ਥਾਯ ਪਟਿਪਨ੍ਨੋ ਬਾਹੁਲ੍ਲਿਕੋਤਿ ਵਚਨਤ੍ਥਂ ਦਸ੍ਸੇਤਿ. ਪਧਾਨਤੋਤਿ ਦੁਕ੍ਕਰਚਰਿਯਾਯ ਪਦਹਨਤੋ. ‘‘ਭਟ੍ਠੋ’’ਤਿ ਇਮਿਨਾ ਵਿਬ੍ਭਨ੍ਤੋਤਿ ਏਤ੍ਥ ਵਿਪੁਬ੍ਬਭਮੁਧਾਤੁਯਾ ਅਨਵਟ੍ਠਾਨਤ੍ਥੋ ਨਾਮ ਅਤ੍ਥਤੋ ਭਟ੍ਠੋਤਿ ਦਸ੍ਸੇਤਿ. ਸੋਤਨ੍ਤਿ ਏਤ੍ਥ ਸੋਤਸਦ੍ਦਸ੍ਸ ਸੋਤਵਿਞ੍ਞਾਣਾਦਿਵਾਚਕਤ੍ਤਾ ‘‘ਸੋਤਿਨ੍ਦ੍ਰਿਯ’’ਨ੍ਤਿ ਵੁਤ੍ਤਂ. ਇਰਿਯਾਯਾਤਿ ਏਤ੍ਥ ਇਰਿਯਨਂ ਚਰਣਂ ਇਰਿਯਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਦੁਕ੍ਕਰਚਰਿਯਾਯਾ’’ਤਿ. ਅਭਿਜਾਨਾਥ ਨੋਤਿ ਏਤ੍ਥ ਨੋਸਦ੍ਦੋ ਨੁਸਦ੍ਦਤ੍ਥੋਤਿ ਆਹ ‘‘ਅਭਿਜਾਨਾਥ ਨੂ’’ਤਿ. ਵਾਕ੍ਯਨ੍ਤਿ ਵਾਚਕਂ. ਸਞ੍ਞਾਪੇਤੁਨ੍ਤਿਪਦਸ੍ਸ ਸਞ੍ਞਾਪਨਾਕਾਰਂ ਦਸ੍ਸੇਤੁਂ ਵੁਤ੍ਤਂ ‘‘ਅਹਂ ਬੁਦ੍ਧੋ’’ਤਿ.

੧੩. ਇਤੋਤਿ ‘‘ਚਕ੍ਖੁਕਰਣੀ’’ਤਿਆਦਿਤੋ. ਪਦਤ੍ਥਤੋਤਿ ਪਦਤੋ ਚ ਅਤ੍ਥਤੋ ਚ, ਪਦਾਨਂ ਅਤ੍ਥਤੋ ਵਾ. ਇਤੋਤਿ ਯਥਾਵੁਤ੍ਤਤੋ. ਹੀਤਿ ਸਚ੍ਚਂ. ਸੁਤ੍ਤਨ੍ਤਕਥਨ੍ਤਿ ਸੁਤ੍ਤਨ੍ਤਵਸੇਨ ਵੁਤ੍ਤਵਚਨਂ.

੧੮. ਦੇਵਤਾਕੋਟੀਹੀਤਿ ਬ੍ਰਹ੍ਮਸਙ੍ਖਾਤਾਹਿ ਦੇਵਤਾਕੋਟੀਹਿ. ਪਤਿਟ੍ਠਿਤਸ੍ਸ ਤਸ੍ਸ ਆਯਸ੍ਮਤੋਤਿ ਸਮ੍ਬਨ੍ਧੋ. ਸਾਵ ਏਹਿਭਿਕ੍ਖੁਉਪਸਮ੍ਪਦਾਤਿ ਯੋਜਨਾ.

੧੯. ਦੁਤਿਯਦਿਵਸੇ ਧਮ੍ਮਚਕ੍ਖੁਂ ਉਦਪਾਦੀਤਿ ਸਮ੍ਬਨ੍ਧੋ. ‘‘ਦੁਤਿਯਦਿਵਸੇ’’ਤਿਆਦਿ ਪਾਟਿਪਦਦਿਵਸਂ ਉਪਨਿਧਾਯ ਵੁਤ੍ਤਂ. ਪਕ੍ਖਸ੍ਸਾਤਿ ਆਸਲ਼੍ਹੀਮਾਸਕਾਲ਼ਪਕ੍ਖਸ੍ਸ. ਸਬ੍ਬੇਵ ਤੇ ਭਿਕ੍ਖੂਤਿ ਯੋਜਨਾ. ਅਨਤ੍ਤਸੁਤ੍ਤੇਨਾਤਿ ਅਨਤ੍ਤਲਕ੍ਖਣਸੁਤ੍ਤਨ੍ਤੇਨ (ਮਹਾਵ. ੨੦; ਸਂ. ਨਿ. ੩.੫੯).

ਪਞ੍ਚਮਿਯਾ ਪਕ੍ਖਸ੍ਸਾਤਿ ਪਕ੍ਖਸ੍ਸ ਪਞ੍ਚਮਿਯਾ. ਲੋਕਸ੍ਮਿਨ੍ਤਿ ਸਤ੍ਤਲੋਕੇ. ‘‘ਮਨੁਸ੍ਸਅਰਹਨ੍ਤੋਤਿ ਇਮਿਨਾ ਦੇਵਅਰਹਨ੍ਤੋ ਬਹੂਤਿ ਦਸ੍ਸੇਤਿ.

੭. ਪਬ੍ਬਜ੍ਜਾਕਥਾ

੩੧. ਪੋਰਾਣਾਨੁਪੋਰਾਣਾਨਨ੍ਤਿ ਪੁਰਾਣੇ ਚ ਅਨੁਪੁਰਾਣੇ ਚ ਭਵਾਨਂ. ਏਕਸਟ੍ਠੀਤਿ ਏਕੋ ਚ ਸਟ੍ਠਿ ਚ, ਏਕੇਨ ਵਾ ਅਧਿਕਾ ਸਟ੍ਠਿ ਏਕਸਟ੍ਠਿ.

ਤਤ੍ਰਾਤਿ ¶ ਤੇਸੁ ਏਕਸਟ੍ਠਿਮਨੁਸ੍ਸਅਰਹਨ੍ਤੇਸੁ. ਪੁਬ੍ਬਯੋਗੋਤਿ ਪੁਬ੍ਬੇ ਕਤੋ ਉਪਾਯੋ, ਪੁਬ੍ਬੂਪਨਿਸ੍ਸਯੋਤਿ ਅਤ੍ਥੋ. ਵਗ੍ਗਬਨ੍ਧੇਨਾਤਿ ਸਮੂਹਂ ਕਤ੍ਵਾ ਬਨ੍ਧੇਨ. ਤੇਤਿ ਪਞ੍ਚਪਞ੍ਞਾਸ ਜਨਾ. ਝਾਪੇਸ੍ਸਾਮਾਤਿ ਡਯ੍ਹਿਸ੍ਸਾਮ. ਨੀਹਰਿਂਸੂਤਿ ਗਾਮਤੋ ਨੀਹਰਿਂਸੁ. ਤੇਸੂਤਿ ਪਞ੍ਚਪਞ੍ਞਾਸਜਨੇਸੁ. ਪਞ੍ਚ ਜਨੇ ¶ ਠਪੇਤ੍ਵਾਤਿ ਸਮ੍ਬਨ੍ਧੋ. ਸੇਸਾਤਿ ਪਞ੍ਚਹਿ ਜਨੇਹਿ ਅਵਸੇਸਾ. ਸੋਤਿ ਯਸੋ ਦਾਰਕੋ. ਤੇਪੀਤਿ ਚਤ੍ਤਾਰੋਪਿ ਜਨਾ. ਤਤ੍ਥਾਤਿ ਸਰੀਰੇ. ਤੇ ਸਬ੍ਬੇਪੀਤਿ ਯਸਸ੍ਸ ਮਾਤਾਪਿਤੁਭਰਿਯਾਹਿ ਸਦ੍ਧਿਂ ਸਬ੍ਬੇਪਿ ਤੇ ਸਹਾਯਕਾ. ਤੇਨਾਤਿ ਪੁਬ੍ਬਯੋਗੇਨ.

ਆਮਨ੍ਤੇਸੀਤਿ ਕਥੇਸਿ.

੩੨. ਦਿਬ੍ਬੇਸੁ ਵਿਸਯੇਸੁ ਭਵਾ ਦਿਬ੍ਬਾ ਲੋਭਪਾਸਾਤਿ ਦਸ੍ਸੇਨ੍ਤੋ ਆਹ ‘‘ਦਿਬ੍ਬਾ ਨਾਮਾ’’ਤਿਆਦਿ. ਲੋਭਪਾਸਾਤਿ ਲੋਭਸਙ੍ਖਾਤਾ ਬਨ੍ਧਨਾ. ਅਸਵਨਤਾਤਿ ਏਤ੍ਥ ਕਰਣਤ੍ਥੇ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਅਸਵਨਤਾਯਾ’’ਤਿ. ਪਰਿਹਾਯਨ੍ਤੀਤਿ ਏਤ੍ਥ ਕੇਨ ਪਰਿਹਾਯਨ੍ਤੀਤਿ ਆਹ ‘‘ਵਿਸੇਸਾਧਿਗਮਤੋ’’ਤਿ. ਵਿਸੇਸਾਧਿਗਮਤੋਤਿ ਮਗ੍ਗਫਲਸਙ੍ਖਾਤਸ੍ਸ ਵਿਸੇਸਸ੍ਸ ਅਧਿਗਮਤੋ.

੩੩. ਅਨ੍ਤਂ ਲਾਮਕਂ ਕਰੋਤੀਤਿ ਅਨ੍ਤਕੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਲਾਮਕਾ’’ਤਿ. ‘‘ਹੀਨਸਤ੍ਤਾ’’ਤਿ ਇਮਿਨਾ ਅਨ੍ਤਕਸ੍ਸ ਸਰੂਪਂ ਦਸ੍ਸੇਤਿ. ਆਮਨ੍ਤਨਪਦਮੇਤਂ. ਤਨ੍ਤਿ ਰਾਗਪਾਸਂ. ਹੀਤਿ ਸਚ੍ਚਂ. ਸੋਤਿ ਮਾਰੋ ਪਾਪਿਮਾ. ਅਨ੍ਤਲਿਕ੍ਖੇ ਚਰਨ੍ਤਾਨਂ ਪਞ੍ਚਾਭਿਞ੍ਞਾਨਮ੍ਪਿ ਬਨ੍ਧਨਤ੍ਤਾ ਅਨ੍ਤਲਿਕ੍ਖੇ ਚਰਤਿ ਪਵਤ੍ਤਤੀਤਿ ਅਨ੍ਤਲਿਕ੍ਖਚਰੋਤਿ ਵਚਨਤ੍ਥੇਨ ਰਾਗਪਾਸੋ ‘‘ਅਨ੍ਤਲਿਕ੍ਖਚਰੋ’’ਤਿ ਮਾਰੇਨ ਪਾਪਿਮਤਾ ਵੁਤ੍ਤੋ.

੩੪. ਨਾਨਾਜਨਪਦਤੋਤਿ ਏਕਿਸ੍ਸਾਪਿ ਦਿਸਾਯ ਨਾਨਾਜਨਪਦਤੋ. ‘‘ਅਨੁਜਾਨਾਮਿ…ਪੇ… ਪਬ੍ਬਾਜੇਥਾ’’ਤਿਆਦਿਮ੍ਹਿ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਪਬ੍ਬਾਜੇਨ੍ਤੇਨ ਭਿਕ੍ਖੁਨਾ ਪਬ੍ਬਾਜੇਤਬ੍ਬੋਤਿ ਸਮ੍ਬਨ੍ਧੋ. ਯੇ ਪਟਿਕ੍ਖਿਤ੍ਤਾ ਪੁਗ੍ਗਲਾਤਿ ਯੋਜਨਾ. ਪਰਤੋਤਿ ਪਰਸ੍ਮਿਂ. ‘‘ਨ ਭਿਕ੍ਖਵੇ…ਪੇ… ਪਬ੍ਬਾਜੇਤਬ੍ਬੋ’’ਤਿ ਪਾਲ਼ਿਂ (ਮਹਾਵ. ੮੯) ਆਦਿਂ ਕਤ੍ਵਾਤਿ ਯੋਜਨਾ. ਤੇਤਿ ਪਟਿਕ੍ਖਿਤ੍ਤਪੁਗ੍ਗਲੇ. ਸੋਪਿ ਚਾਤਿ ਸੋਪਿ ਚ ਪੁਗ੍ਗਲੋ. ਅਨੁਞ੍ਞਾਤੋਯੇਵ ਪਬ੍ਬਾਜੇਤਬ੍ਬੋਤਿ ¶ ਸਮ੍ਬਨ੍ਧੋ. ਤਸ੍ਸ ਚਾਤਿ ਪੁਗ੍ਗਲਸ੍ਸ ਚ, ਅਥ ਵਾ ਤੇਸਞ੍ਚ ਮਾਤਾਪਿਤੂਨਂ. ਵਚਨਵਿਪਲ੍ਲਾਸੋ ਹੇਸ. ਅਨੁਜਾਨਨਲਕ੍ਖਣਂ ਵਣ੍ਣਯਿਸ੍ਸਾਮਾਤਿ ਸਮ੍ਬਨ੍ਧੋ.

ਏਵਨ੍ਤਿ ਇਮਿਨਾ ਵੁਤ੍ਤਨਯੇਨ. ਚਸਦ੍ਦੋ ਵਾਕ੍ਯਸਮ੍ਪਿਣ੍ਡਨਤ੍ਥੋ. ਸਚੇ ਅਚ੍ਛਿਨ੍ਨਕੇਸੋ ਹੋਤਿ ਚ, ਸਚੇ ਏਕਸੀਮਾਯ ਅਞ੍ਞੇਪਿ ਭਿਕ੍ਖੂ ਅਤ੍ਥਿ ਚਾਤਿ ਅਤ੍ਥੋ. ਅਞ੍ਞੇਪੀਤਿ ਅਤ੍ਤਨਾ ਅਪਰੇਪਿ. ਭਣ੍ਡੂਤਿ ਮੁਣ੍ਡੋ, ਸੋਯੇਵ ਕਮ੍ਮਂ ਭਣ੍ਡੁਕਮ੍ਮਂ. ਤਸ੍ਸਾਤਿ ਭਣ੍ਡੁਕਮ੍ਮਸ੍ਸ. ਓਕਾਸੋਤਿ ਪਬ੍ਬਜ੍ਜਾਯ ਖਣੋ. ‘‘ਓਕਾਸਂ ਨ ਲਭਤੀ’’ਤਿ ਵਤ੍ਵਾ ਤਸ੍ਸ ਕਾਰਣਂ ਦਸ੍ਸੇਤੁਂ ਵੁਤ੍ਤਂ ‘‘ਸਚੇ’’ਤਿਆਦਿ.

ਅਵੁਤ੍ਤੋਪੀਤਿ ¶ ਏਤ੍ਥ ਪਿਸਦ੍ਦੋ ਵੁਤ੍ਤੋ ਪਨ ਕਾ ਨਾਮ ਕਥਾਤਿ ਦਸ੍ਸੇਤਿ. ਉਪਜ੍ਝਾਯਂ ਉਦ੍ਦਿਸ੍ਸ ਪਬ੍ਬਾਜੇਤੀਤਿ ਏਤ੍ਥ ਪਬ੍ਬਜ੍ਜਾ ਚਤੁਬ੍ਬਿਧਾ ਤਾਪਸਪਬ੍ਬਜ੍ਜਾ ਪਰਿਬ੍ਬਾਜਕਪਬ੍ਬਜ੍ਜਾ ਸਾਮਣੇਰਪਬ੍ਬਜ੍ਜਾ ਉਪਸਮ੍ਪਦਪਬ੍ਬਜ੍ਜਾਤਿ. ਤਤ੍ਥ ਕੇਸਮਸ੍ਸੁਹਰਣਂ ਤਾਪਸਪਬ੍ਬਜ੍ਜਾ ਨਾਮ ਵਕ੍ਕਲਾਦਿਗਹਣਤੋ ਪਠਮਮੇਵ ਵਜਿਤਬ੍ਬਤ੍ਤਾ. ਇਸਿਪਬ੍ਬਜ੍ਜਾਤਿਪਿ ਤਸ੍ਸਾਯੇਵ ਨਾਮਂ. ਕੇਸਮਸ੍ਸੁਹਰਣਮੇਵ ਪਰਿਬ੍ਬਾਜਕਪਬ੍ਬਜ੍ਜਾ ਨਾਮ ਕਾਸਾਯਾਦਿਗਹਣਤੋ ਪਠਮਮੇਵ ਵਜਿਤਬ੍ਬਤ੍ਤਾ. ਕੇਸਮਸ੍ਸੁਹਰਣਞ੍ਚ ਕਾਸਾਯਚ੍ਛਾਦਨਞ੍ਚ ਸਾਮਣੇਰਪਬ੍ਬਜ੍ਜਾ ਨਾਮ ਸਰਣਗਹਣਤੋ ਪਠਮਮੇਵ ਵਜਿਤਬ੍ਬਤ੍ਤਾ. ਉਪਸਮ੍ਪਦਪਬ੍ਬਜ੍ਜਾ ਤਿਵਿਧਾ ਏਹਿਭਿਕ੍ਖੁਉਪਸਮ੍ਪਦਪਬ੍ਬਜ੍ਜਾ ਸਰਣਗਹਣੂਪਸਮ੍ਪਦਪਬ੍ਬਜ੍ਜਾ ਞਤ੍ਤਿਚਤੁਤ੍ਥਵਾਚਿਕੂਪਸਮ੍ਪਦਪਬ੍ਬਜ੍ਜਾਤਿ. ਤਤ੍ਥ ਏਹਿਭਿਕ੍ਖੂਪਸਮ੍ਪਦਪਬ੍ਬਜ੍ਜਾਯਂ ਕੇਸਮਸ੍ਸੁਹਰਣਾਦਿ ਸਬ੍ਬਂ ਏਕਤੋਵ ਸਮ੍ਪਜ੍ਜਤਿ ‘‘ਏਹਿ ਭਿਕ੍ਖੂ’’ਤਿ ਭਗਵਤੋ ਵਚਨੇਨ ਅਭਿਨਿਪ੍ਫਨ੍ਨਤ੍ਤਾ. ਸਰਣਗਹਣੂਪਸਮ੍ਪਦਪਬ੍ਬਜ੍ਜਾ ਸਾਮਣੇਰਪਬ੍ਬਜ੍ਜਸਦਿਸਾਯੇਵ. ਕੇਸਮਸ੍ਸੁਹਰਣਞ੍ਚ ਕਾਸਾਯਚ੍ਛਾਦਨਞ੍ਚ ਸਰਣਗਹਣਞ੍ਚ ਞਤ੍ਤਿਚਤੁਤ੍ਥਵਾਚਿਕੂਪਸਮ੍ਪਦਪਬ੍ਬਜ੍ਜਾ ਨਾਮ ਕਮ੍ਮਵਾਚਾਗਹਣਤੋ ਪਠਮਮੇਵ ਵਜਿਤਬ੍ਬਤ੍ਤਾ. ਤਤ੍ਥ ਸਾਮਣੇਰਪਬ੍ਬਜ੍ਜਂ ਸਨ੍ਧਾਯ ਵੁਤ੍ਤਂ ‘‘ਉਪਜ੍ਝਾਯਂ ਉਦ੍ਦਿਸ੍ਸ ਪਬ੍ਬਾਜੇਤੀ’’ਤਿ. ਉਪਜ੍ਝਾਯਂ ਉਦ੍ਦਿਸ੍ਸਾਤਿ ਉਪਜ੍ਝਾਯਸ੍ਸ ਵੇਯ੍ਯਾਵਚ੍ਚਕਰਟ੍ਠਾਨਨਿਯਮਂ ਕਤ੍ਵਾ. ਪਬ੍ਬਜ੍ਜਾਕਮ੍ਮੇ ਅਤ੍ਤਨੋ ਇਸ੍ਸਰਿਯਮਕਤ੍ਵਾਤਿ ਅਤ੍ਥੋ. ਦਹਰੇਨ ਭਿਕ੍ਖੁਨਾ ਕੇਸਚ੍ਛੇਦਨਂ ਕਾਸਾਯਚ੍ਛਾਦਨਂ ਸਰਣਦਾਨਨ੍ਤਿ ਤੀਣਿ ਕਿਚ੍ਚਾਨਿ ਕਾਤਬ੍ਬਾਨਿਯੇਵ. ਕੇਚਿ ‘‘ਸਰਣਾਨਿ ਪਨ ਸਯਂ ਦਾਤਬ੍ਬਾਨੀ’’ਤਿ ਪਾਠਂ ਇਧਾਨੇਤ੍ਵਾ ਦਹਰੇਨ ਭਿਕ੍ਖੁਨਾ ਸਰਣਾਨਿ ਨ ਦਾਤਬ੍ਬਾਨੀਤਿ ¶ ਵਦਨ੍ਤਿ, ਤਂ ਨ ਗਹੇਤਬ੍ਬਂ ਦਹਰਸ੍ਸ ਭਿਕ੍ਖੁਤ੍ਤਾ, ਭਿਕ੍ਖੂਨਂ ਪਬ੍ਬਾਜੇਤੁਂ ਲਭਨਤ੍ਤਾ ਚ. ਉਪਜ੍ਝਾਯੋ ਚੇ ਕੇਸਚ੍ਛੇਦਨਞ੍ਚ ਕਾਸਾਯਚ੍ਛਾਦਨਞ੍ਚ ਅਕਤ੍ਵਾ ਪਬ੍ਬਜ੍ਜਤ੍ਥਂ ਸਰਣਾਨਿਯੇਵ ਦੇਤਿ, ਨ ਰੁਹਤਿ ਪਬ੍ਬਜ੍ਜਾ ਪਬ੍ਬਜ੍ਜਾਯ ਅਕਤ੍ਤਬ੍ਬਤ੍ਤਾ. ਕਮ੍ਮਵਾਚਂ ਸਾਵੇਤ੍ਵਾ ਉਪਸਮ੍ਪਾਦੇਤਿ, ਰੁਹਤਿ ਉਪਸਮ੍ਪਦਾ ਅਪਤ੍ਤਚੀਵਰਾਨਂ ਉਪਸਮ੍ਪਦਸਿਦ੍ਧਿਤੋ, ਕਮ੍ਮਵਿਪਤ੍ਤਿਯਾ ਅਭਾਵਤੋ ਚ. ਖਣ੍ਡਸੀਮਨ੍ਤਿ ਉਪਚਾਰਸੀਮਟ੍ਠਂ ਬਦ੍ਧਸੀਮਂ. ਪਬ੍ਬਾਜੇਤ੍ਵਾਤਿ ਕੇਸਚ੍ਛੇਦਨਂ ਸਨ੍ਧਾਯ ਵੁਤ੍ਤਂ ‘‘ਕਾਸਾਯਾਨਿ ਅਚ੍ਛਾਦੇਤ੍ਵਾ’’ਤਿ ਕਾਸਾਯਚ੍ਛਾਦਨਸ੍ਸ ਵਿਸੁਂ ਵੁਤ੍ਤਤ੍ਤਾ. ਸਾਮਣੇਰਸ੍ਸ ਸਰਣਦਾਨਸ੍ਸ ਅਰੁਹਤ੍ਤਾ ‘‘ਸਰਣਾਨਿ ਪਨ ਸਯਂ ਦਾਤਬ੍ਬਾਨੀ’’ਤਿ ਵੁਤ੍ਤਂ. ਪੁਰਿਸਂ ਪਬ੍ਬਾਜੇਤੁਨ੍ਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਆਣਤ੍ਤਿਯਾਤਿ ਭਿਕ੍ਖੂਨਂ ਆਣਤ੍ਤਿਯਾ. ਯੇਨ ਕੇਨਚੀਤਿ ਗਹਟ੍ਠਪਬ੍ਬਜਿਤੇਸੁ ਯੇਨ ਕੇਨਚਿ.

‘‘ਭਬ੍ਬਰੂਪੋ’’ਤਿ ਵਤ੍ਵਾ ਤਸ੍ਸ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸਹੇਤੁਕੋ’’ਤਿ. ਸਹੇਤੁਕੋਤਿ ਮਗ੍ਗਫਲਾਨਂ ਉਪਨਿਸ੍ਸਯੇਹਿ ਸਹ ਪਵਤ੍ਤੋ. ਯਸਸ੍ਸੀਤਿ ਪਰਿਵਾਰਯਸੇਨ ਚ ਕਿਤ੍ਤਿਯਸੇਨ ਚ ਸਮਨ੍ਨਾਗਤੋ. ਓਕਾਸਂ ਕਤ੍ਵਾਪੀਤਿ ਓਕਾਸਂ ਕਤ੍ਵਾ ਏਵ. ਸਯਮੇਵਾਤਿ ਨ ਅਞ੍ਞੋ ਆਣਾਪੇਤਬ੍ਬੋ. ਏਤ੍ਤੋਯੇਵਾਤਿ ਦਸ੍ਸਨਟ੍ਠਾਨਤੋਯੇਵ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ. ਖਜ੍ਜੁ ਵਾਤਿ ਕਣ੍ਡੁਵਨਂ ਵਾ. ‘‘ਕਚ੍ਛੁ ਵਾ’’ਤਿਪਿ ਪਾਠੋ, ਪਾਮਂ ਵਾਤਿ ਅਤ੍ਥੋ. ਪਿਲ਼ਕਾ ਵਾਤਿ ਫੋਟਾ ਵਾ. ਏਤ੍ਤਕੇਨਾਤਿ ਏਤਪਮਾਣੇਨ ¶ ਘਂਸਿਤ੍ਵਾ ਨ੍ਹਾਪਨਮਤ੍ਤੇਨ. ਅਨਿਵਤ੍ਤਿਧਮ੍ਮਾਤਿ ਗਿਹਿਭਾਵਂ ਅਨਿਵਤ੍ਤਨਸਭਾਵਾ. ਕਤਞ੍ਞੂਤਿ ਕਤਸ੍ਸੂਪਕਾਰਸ੍ਸ ਜਾਨਨਸੀਲਾ. ਕਤਵੇਦਿਨੋਤਿ ਕਤਞ੍ਞੂਪਕਾਰਸ੍ਸ ਵੇਦਂ ਪਾਕਟਂ ਕਰੋਨ੍ਤੋ.

ਅਨਿਯ੍ਯਾਨਿਕਕਥਾਤਿ ਯਾਵਦਤ੍ਥਂ ਸੁਪਿਤ੍ਵਾ ਯਾਵਦਤ੍ਥਂ ਭੁਞ੍ਜੀਤ੍ਵਾ ਚਿਤ੍ਤਕੇਲ਼ਿਂ ਕਰੋਨ੍ਤੋ ਅਨੁਕ੍ਕਣ੍ਠਿਤੋ ਵਿਹਰਾਹੀਤਿਆਦਿਕਾ ਕਥਾ. ਨਕਥੇਤਬ੍ਬਂ ਦਸ੍ਸੇਤ੍ਵਾ ਕਥੇਤਬ੍ਬਂ ਦਸ੍ਸੇਨ੍ਤੋ ਆਹ ‘‘ਅਥਖ੍ਵਸ੍ਸਾ’’ਤਿ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ. ਆਚਿਕ੍ਖਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਆਚਿਕ੍ਖਨ੍ਤੇਨ ਚਾ’’ਤਿਆਦਿ. ਵਣ੍ਣ…ਪੇ… ਵਸੇਨਾਤਿ ਵਣ੍ਣੋ ਚ ਸਣ੍ਠਾਨਞ੍ਚ ਗਨ੍ਧੋ ਚ ਆਸਯੋ ਚ ਓਕਾਸੋ ਚ, ਤੇਸਂ ਵਸੇਨ, ਆਚਿਕ੍ਖਿਤਬ੍ਬਨ੍ਤਿ ਸਮ੍ਬਨ੍ਧੋ. ਹੀਤਿ ਫਲਜੋਤਕੋ, ਆਚਿਕ੍ਖਨਸ੍ਸ ਫਲਂ ਵਕ੍ਖਾਮੀਤਿ ਅਤ੍ਥੋ. ਸੋਤਿ ਪਬ੍ਬਜ੍ਜਾਪੇਕ੍ਖੋ. ਪੁਬ੍ਬੇਤਿ ਪੁਬ੍ਬਭਵੇ, ਪਬ੍ਬਜਨਤੋ ¶ ਪੁਬ੍ਬੇ ਵਾ. ਕਣ੍ਟਕਵੇਧਾਪੇਕ੍ਖੋ ਪਰਿਪਕ੍ਕਗਣ੍ਡੋ ਵਿਯ ਞਾਣਂ ਪਵਤ੍ਤਤੀਤਿ ਯੋਜਨਾ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ. ਇਨ੍ਦਾਸਨੀਤਿ ਸਕ੍ਕਸ੍ਸ ਵਜਿਰਾਵੁਧੋ. ਸੋ ਹਿ ਇਨ੍ਦੇਨ ਅਸੀਯਤਿ ਖਿਪੀਯਤੀਤਿ ਇਨ੍ਦਾਸਨੀਤਿ ਵੁਚ੍ਚਤਿ. ਇਨ੍ਦਾਸਨਿ ਪਬ੍ਬਤੇ ਚੁਣ੍ਣਯਮਾਨਾ ਵਿਯ ਸਬ੍ਬੇ ਕਿਲੇਸੇ ਚੁਣ੍ਣਯਮਾਨਂਯੇਵਾਤਿ ਯੋਜਨਾ. ਖੁਰਗ੍ਗੇਯੇਵਾਤਿ ਖੁਰਸ੍ਸ ਕੋਟਿਯਮੇਵ. ਖੁਰਕਮ੍ਮਪਰਿਯੋਸਾਨੇਯੇਵਾਤਿ ਅਤ੍ਥੋ. ਹੀਤਿ ਸਚ੍ਚਂ. ਤਸ੍ਮਾਤਿ ਯਸ੍ਮਾ ਪਤ੍ਤਾ, ਤਸ੍ਮਾ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ.

ਗਿਹਿਗਨ੍ਧਨ੍ਤਿ ਗੇਹੇ ਠਿਤਸ੍ਸ ਜਨਸ੍ਸ ਗਨ੍ਧਂ. ਅਥਾਪੀਤਿ ਯਦਿਪਿ ਅਚ੍ਛਾਦੇਤੀਤਿ ਸਮ੍ਬਨ੍ਧੋ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ. ਆਚਰਿਯੋ ਵਾਤਿ ਸਰਣਦਾਨਾਚਰਿਯੋ ਵਾ ਕਮ੍ਮਵਾਚਾਚਰਿਯੋ ਵਾ ਓਵਾਦਾਚਰਿਯੋ ਵਾ. ਤਂਯੇਵ ਵਾਤਿ ਪਬ੍ਬਜ੍ਜਾਪੇਕ੍ਖਮੇਵ ਵਾ. ਤੇਨ ਭਿਕ੍ਖੁਨਾਵਾਤਿ ਆਚਰਿਯੁਪਜ੍ਝਾਯਭਿਕ੍ਖੁਨਾ ਏਵ.

ਅਨਾਣਤ੍ਤਿਯਾਤਿ ਆਚਰਿਯੁਪਜ੍ਝਾਯੇਹਿ ਅਨਾਣਤ੍ਤਿਯਾ. ਇਮਿਨਾ ਆਚਰਿਯੁਪਜ੍ਝਾਯੇਹਿ ਅਨਾਣਤ੍ਤੇਨ ਯੇਨ ਕੇਨਚਿ ਨਿਵਾਸਨਾਦੀਨਿ ਨ ਕਾਤਬ੍ਬਾਨੀਤਿ ਦਸ੍ਸੇਤਿ. ਭਿਕ੍ਖੁਨਾਤਿ ਆਚਰਿਯੁਪਜ੍ਝਾਯਭਿਕ੍ਖੁਨਾ. ਤਸ੍ਸੇਵਾਤਿ ਪਬ੍ਬਜ੍ਜਾਪੇਕ੍ਖਸ੍ਸੇਵ. ਉਪਜ੍ਝਾਯਮੂਲਕੇਤਿ ਉਪਜ੍ਝਾਯਮੂਲਕੇ ਨਿਵਾਸਨਪਾਰੁਪਨੇ. ਅਯਨ੍ਤਿ ਵਿਨਿਚ੍ਛਯੋ.

ਤਤ੍ਥਾਤਿ ਪਬ੍ਬਜ੍ਜੂਪਸਮ੍ਪਦਟ੍ਠਾਨੇ. ਤੇਸਨ੍ਤਿ ਭਿਕ੍ਖੂਨਂ. ਅਥਾਤਿ ਵਨ੍ਦਾਪਨਤੋ ਪਚ੍ਛਾ, ਵਨ੍ਦਾਪਨਸ੍ਸ ਅਨਨ੍ਤਰਾ ਵਾ. ‘‘ਏਵਂ ਵਦੇਹੀ’’ਤਿ ਪਾਲ਼ਿਨਯਨਿਦਸ੍ਸਨਮੁਖੇਨ ‘‘ਯਮਹਂ ਵਦਾਮਿ, ਤਂ ਵਦੇਹੀ’’ਤਿ ਅਟ੍ਠਕਥਾਨਯਂ ਨਿਦਸ੍ਸੇਤਿ. ਅਥਾਤਿ ਤਦਨਨ੍ਤਰਂ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ, ਦਾਤਬ੍ਬਾਨੀਤਿ ਸਮ੍ਬਨ੍ਧੋ. ਏਕਪਦਮ੍ਪੀਤਿ ਤੀਸੁ ਵਾਕ੍ਯਪਦੇਸੁ ਏਕਂ ਵਾਕ੍ਯਪਦਮ੍ਪਿ, ਨਵਸੁ ਵਾ ਵਿਭਤ੍ਯਨ੍ਤਪਦੇਸੁ ਏਕਪਦਮ੍ਪਿ. ਏਕਕ੍ਖਰਮ੍ਪੀਤਿ ਚਤੁਵੀਸਤਕ੍ਖਰੇਸੁ ਏਕਕ੍ਖਰਮ੍ਪਿ.

ਏਕਤੋ ¶ ਸੁਦ੍ਧਿਯਾਤਿ ਏਕਸ੍ਸੇਵ ਕਮ੍ਮਵਾਚਾਚਰਿਯਸ੍ਸ ਠਾਨਕਰਣਸਮ੍ਪਤ੍ਤਿਯਾ ਸੁਜ੍ਝਨੇਨ. ਉਭਤੋ ਸੁਦ੍ਧਿਯਾਵਾਤਿ ਉਭਯੇਸਂ ਸਰਣਦਾਨਾਚਰਿਯਸਾਮਣੇਰਾਨਂ ਸੁਜ੍ਝਨੇਨ ਏਵ. ਠਾਨਕਰਣਸਮ੍ਪਦਨ੍ਤਿ ਉਰਆਦਿਟ੍ਠਾਨਾਨਞ੍ਚ ਸਂਵੁਤਾਦਿਕਰਣਾਨਞ੍ਚ ਸਮ੍ਪਦਂ. ਵਤ੍ਤੁਨ੍ਤਿ ਠਾਨਕਰਣਸਮ੍ਪਦਂ ਵਤ੍ਤੁਂ. ਨ ਸਕ੍ਕੋਤੀਤਿ ਵਤ੍ਤੁਂ ਨ ਸਕ੍ਕੋਤੀਤਿ ਯੋਜਨਾ.

ਇਮਾਨੀਤਿ ¶ ਸਰਣਾਨਿ. ਚਸਦ੍ਦੋ ਉਪਨ੍ਯਾਸੋ, ਪਨਸਦ੍ਦੋ ਪਦਾਲਙ੍ਕਾਰੋ. ਏਕਸਮ੍ਬਨ੍ਧਾਨੀਤਿ ਏਕਤੋ ਸਮ੍ਬਨ੍ਧਾਨਿ. ਅਨੁਨਾਸਿਕਨ੍ਤਂ ਕਤ੍ਵਾ ਦਾਨਕਾਲੇ ‘‘ਬੁਦ੍ਧਂ’’ਇਤਿ ‘‘ਸਰਣਂ’’ਇਤਿ ਪਦਾਨਞ੍ਚ ‘‘ਸਰਣਂ’’ਇਤਿ ‘‘ਗਚ੍ਛਾਮਿ’’ਇਤਿ ਪਦਾਨਞ੍ਚ ਅਨ੍ਤਰਾ ਵਿਚ੍ਛੇਦਮਕਤ੍ਵਾ ਏਕਸਮ੍ਬਨ੍ਧਮੇਵ ਕਤ੍ਵਾ ਦਾਤਬ੍ਬਾਨੀਤਿ ਵੁਤ੍ਤਂ ਹੋਤਿ. ਕਸ੍ਮਾ ਤਿਣ੍ਣਂ ਪਦਾਨਮਨ੍ਤਰਾ ਬ੍ਯਵਧਾਨਸ੍ਸ ਕਸ੍ਸਚਿ ਅਕ੍ਖਰਸ੍ਸ ਅਭਾਵਤੋ. ਵਿਚ੍ਛਿਨ੍ਦਿਤ੍ਵਾਤਿ ਵਿਚ੍ਛੇਦਂ ਕਤ੍ਵਾ. ਮਕਾਰਨ੍ਤਂ ਕਤ੍ਵਾ ਦਾਨਕਾਲੇ ਤਿਣ੍ਣਂ ਪਦਾਨਮਨ੍ਤਰਾ ਏਕਸਮ੍ਬਨ੍ਧਮਕਤ੍ਵਾ ਵਿਚ੍ਛਿਨ੍ਦਿਤ੍ਵਾ ਏਵ ਕਤ੍ਵਾ ਦਾਤਬ੍ਬਾਨੀਤਿ ਵੁਤ੍ਤਂ ਹੋਤਿ. ਕਸ੍ਮਾ? ਤਿਣ੍ਣਂ ਪਦਾਨਮਨ੍ਤਰਾ ਬ੍ਯਵਧਾਨਸ੍ਸ ਨਿਸ੍ਸਰਸ੍ਸ ਮਕਾਰਸ੍ਸ ਅਤ੍ਥਿਭਾਵਤੋ. ਅਨ੍ਧਕਟ੍ਠਕਥਾਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਨ੍ਤਿ ਵਚਨਂ, ‘‘ਨਤ੍ਥੀ’’ਤਿਪਦੇ ਕਤ੍ਤਾ, ‘‘ਨ ਵੁਤ੍ਤ’’ਨ੍ਤਿਪਦੇ ਕਮ੍ਮਂ. ਤਥਾਤਿ ‘‘ਅਹਂ ਭਨ੍ਤੇ ਬੁਦ੍ਧਰਕ੍ਖਿਤੋ’’ਤਿਆਦਿਨਾ ਆਕਾਰੇਨ, ਅਵਦਨ੍ਤਸ੍ਸ ਸਰਣਂ ਨ ਕੁਪ੍ਪਤਿ, ਬੁਕਾਰਦਕਾਰਾਦੀਨਂ ਬ੍ਯਞ੍ਜਨਾਨਂ ਠਾਨਕਰਣਸਮ੍ਪਦਂ ਹਾਪੇਨ੍ਤਸ੍ਸੇਵ ਸਰਣਂ ਕੁਪ੍ਪਤੀਤਿ ਅਧਿਪ੍ਪਾਯੋ.

‘‘ਤਿਕ੍ਖਤ੍ਤੁ’’ਨ੍ਤਿ ਇਮਿਨਾ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਨ ਵਟ੍ਟਤੀਤਿ ਦੀਪੇਤਿ. ਤਿਕ੍ਖਤ੍ਤੁਤੋ ਅਧਿਕਂ ਪਨ ਸਹਸ੍ਸਕ੍ਖਤ੍ਤੁਮ੍ਪਿ ਵਟ੍ਟਤਿਯੇਵ. ਤਤ੍ਥਾਤਿ ਤਾਸੁ ਪਬ੍ਬਜ੍ਜਾਉਪਸਮ੍ਪਦਾਸੁ. ਪਰਤੋਤਿ ਪਰਸ੍ਮਿਂ. ਸਾਤਿ ਉਪਸਮ੍ਪਦਾ. ਪਬ੍ਬਜ੍ਜਾ ਪਨ ਅਨੁਞ੍ਞਾਤਾ ਏਵਾਤਿ ਸਮ੍ਬਨ੍ਧੋ. ਪਰਤੋਪੀਤਿ ਪਿਸਦ੍ਦੋ ਪੁਬ੍ਬਾਪੇਕ੍ਖੋ. ਸਾਤਿ ਪਬ੍ਬਜ੍ਜਾ. ਏਤ੍ਤਾਵਤਾਤਿ ਏਤ੍ਤਕੇਨ ਕੇਸਚ੍ਛੇਦਨਕਾਸਾਯਚ੍ਛਾਦਨਸਰਣਦਾਨੇਨ. ਹੀਤਿ ਫਲਜੋਤਕੋ.

ਏਸਾਤਿ ਏਸੋ ਸਾਮਣੇਰੋਤਿ ਅਤ੍ਥੋ. ‘‘ਗਤਿਮਾ’’ਤਿ ਵਤ੍ਵਾ ਤਸ੍ਸਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਣ੍ਡਿਤਜਾਤਿਕੋ’’ਤਿ. ਅਥਾਤਿ ਏਵਂ ਸਤਿ. ਅਸ੍ਸਾਤਿ ਸਾਮਣੇਰਸ੍ਸ. ਤਸ੍ਮਿਂਯੇਵ ਠਾਨੇਤਿ ਸਾਮਣੇਰਭੂਮਿਯਂ ਠਿਤਟ੍ਠਾਨੇਯੇਵ. ਯਥਾ ਭਗਵਤਾ ਉਦ੍ਦਿਟ੍ਠਾਨਿ, ਤਥਾ ਉਦ੍ਦਿਸਿਤਬ੍ਬਾਨੀਤਿ ਯੋਜਨਾ. ਏਤਨ੍ਤਿ ‘‘ਅਨੁਜਾਨਾਮਿ…ਪੇ… ਜਾਤਰੂਪ ਰਜਤਪਟਿਗ੍ਗਹਣਾ ਵੇਰਮਣੀ’’ਤਿ ਵਚਨਂ.

ਤਨ੍ਤਿ ਅਨ੍ਧਕਟ੍ਠਕਥਾਯਂ ਵੁਤ੍ਤਵਚਨਂ. ਯਥਾਪਾਲ਼ਿਯਾਵਾਤਿ ਏਵਸਦ੍ਦੋ ਸਨ੍ਨਿਟ੍ਠਾਨਤ੍ਥੋ, ਤੇਨ ਯਥਾਪਾਲ਼ਿਯਾਵ ਉਦ੍ਦਿਸਿਤਬ੍ਬਾਨਿ. ਯਥਾਪਾਲ਼ਿਂ ਵਿਸਜ੍ਜੇਤ੍ਵਾ ਅਞ੍ਞਥਾ ਏਵ ਉਦ੍ਦਿਸਿਤਬ੍ਬਾਨੀਤਿ ਵਾਦਂ ਨਿਵਾਰੇਤਿ. ਯਥਾਪਾਲ਼ਿਂ ਵਿਸਜ੍ਜੇਤ੍ਵਾ ¶ ਅਞ੍ਞਥਾ ‘‘ਪਾਣਾਤਿਪਾਤਾ ਵੇਰਮਣਿਂ ਸਿਕ੍ਖਾਪਦਂ ਸਮਾਦਿਯਾਮੀ’’ਤਿ ¶ ਉਦ੍ਦਿਸਨ੍ਤੋਪਿ ਨਿਦ੍ਦੋਸੋਯੇਵ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਾਨੀਤਿ ਸਿਕ੍ਖਾਪਦਾਨਿ. ਯਾਵਾਤਿ ਯਤ੍ਤਕਂ ਕਾਲਂ ਨ ਜਾਨਾਤਿ, ਨ ਕੁਸਲੋ ਹੋਤੀਤਿ ਸਮ੍ਬਨ੍ਧੋ. ਸਨ੍ਤਿਕਾਵਚਰੋਯੇਵਾਤਿ ਆਚਰਿਯੁਪਜ੍ਝਾਯਾਨਂ ਸਮੀਪੇ ਅਵਚਾਰੋਵ. ਅਸ੍ਸਾਤਿ ਸਾਮਣੇਰਸ੍ਸ. ਕਪ੍ਪਿਯਾਕਪ੍ਪਿਯਨ੍ਤਿ ਦਸਸਿਕ੍ਖਾਪਦਵਿਨਿਮੁਤ੍ਤਂ ਕਪ੍ਪਿਯਂ ਪਰਾਮਾਸਾਦਿਞ੍ਚ ਅਕਪ੍ਪਿਯਂ ਅਪਰਾਮਾਸਾਦਿਞ੍ਚ. ਤੇਨਾਪੀਤਿ ਸਾਮਣੇਰੇਨਾਪਿ. ਨਾਸਨਙ੍ਗਾਨੀਤਿ ਲਿਙ੍ਗਨਾਸਨਅਙ੍ਗਾਨਿ. ਸਾਧੁਕਂ ਸਿਕ੍ਖਿਤਬ੍ਬਨ੍ਤਿ ਸਾਧੁਕਂ ਅਸਿਕ੍ਖਨ੍ਤਸ੍ਸ ਲਿਙ੍ਗਨਾਸਨਞ੍ਚ ਦਣ੍ਡਕਮ੍ਮਨਾਸਨਞ੍ਚ ਹੋਤੀਤਿ ਅਧਿਪ੍ਪਾਯੋ.

੧੦. ਦੁਤਿਯਮਾਰਕਥਾ

੩੫. ਮਯ੍ਹਨ੍ਤਿਪਦਸ੍ਸ ‘‘ਅਨੁਪ੍ਪਤ੍ਤਾ ਸਚ੍ਛਿਕਤਾ’’ਤਿਪਦੇਸੁ ਛਟ੍ਠੀਕਤ੍ਤੁਭਾਵਂ ਦਸ੍ਸੇਨ੍ਤੋ ਆਹ ‘‘ਮਯਾ ਖੋਤਿ ਅਤ੍ਥੋ’’ਤਿ. ‘‘ਅਥ ਵਾ’’ਤਿਆਦਿਨਾ ‘‘ਮਯ੍ਹ’’ਨ੍ਤਿਪਦਸ੍ਸ ‘‘ਯੋਨਿਸੋ ਮਨਸਿਕਾਰਾ, ਯੋਨਿਸੋ ਸਮ੍ਮਪ੍ਪਧਾਨਾ’’ਤਿਪਦੇਸੁ ਸਮ੍ਬਨ੍ਧਭਾਵਂ ਦਸ੍ਸੇਤਿ. ‘‘ਯੋਨਿਸੋ ਮਨਸਿਕਾਰਾ, ਯੋਨਿਸੋ ਸਮ੍ਮਪ੍ਪਧਾਨਾ’’ਤਿ ਏਤ੍ਥ ਕਾਰਣਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਆਹ ‘‘ਤੇਨ ਹੇਤੁਨਾ’’ਤਿ. ‘‘ਪੁਨਾ’’ਤਿਆਦਿਨਾ ‘‘ਮਯ੍ਹ’’ਨ੍ਤਿਪਦਂ ‘‘ਯੋਨਿਸੋ ਮਨਸਿਕਾਰਾ, ਯੋਨਿਸੋ ਸਮ੍ਮਪ੍ਪਧਾਨਾ’’ਤਿਪਦੇਸੁ ਸਾਮ੍ਯਤ੍ਥੇ ਸਾਮਿਭਾਵੇਨ ਯੋਜੇਤ੍ਵਾ ਪੁਨ ‘‘ਅਨੁਪ੍ਪਤ੍ਤਾ, ਸਚ੍ਛਿਕਤਾ’’ਤਿ ਪਦੇਸੁ ਕਤ੍ਤੁਤ੍ਥੇ ਸਾਮਿਭਾਵੇਨ ਵਿਭਤ੍ਤਿਵਿਪਲ੍ਲਾਸੋ ਕਾਤਬ੍ਬੋਤਿ ਦਸ੍ਸੇਤਿ.

੧੧. ਭਦ੍ਦਵਗ੍ਗਿਯਕਥਾ

੩੬. ਭਦ੍ਦਂ ਰੂਪਞ੍ਚ ਚਿਤ੍ਤਞ੍ਚ ਏਤੇਸਮਤ੍ਥੀਤਿ ਭਦ੍ਦਕਾ. ਵਗ੍ਗਬਨ੍ਧਨਂ ਵਗ੍ਗੋ ਉਤ੍ਤਰਪਦਲੋਪੇਨ, ਵਗ੍ਗੇਨ ਚਰਨ੍ਤੀਤਿ ਵਗ੍ਗਿਯਾ. ਭਦ੍ਦਕਾ ਚ ਤੇ ਵਗ੍ਗਿਯਾ ਚਾਤਿ ਭਦ੍ਦਵਗ੍ਗਿਯਾ ਕਕਾਰਲੋਪੇਨਾਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਭਦ੍ਦਵਗ੍ਗਿਯਾ’’ਤਿਆਦਿ. ‘‘ਵੋਕਾਰੋ ਨਿਪਾਤਮਤ੍ਤੋ’’ਤਿ ਇਮਿਨਾ ਤੁਮ੍ਹਸਦ੍ਦਸ੍ਸ ਚ ਯੋਵਚਨਸ੍ਸ ਚ ਕਾਰਿਯਭਾਵਂ ਨਿਵਤ੍ਤੇਤਿ. ਹੀਤਿ ਸਚ੍ਚਂ. ਤੇਤਿ ਭਦ੍ਦਵਗ੍ਗਿਯਾ. ਇਦਨ੍ਤਿ ਪਞ੍ਚਸੀਲਰਕ੍ਖਨਂ. ਪੁਬ੍ਬਕਮ੍ਮਨ੍ਤਿ ਪੁਬ੍ਬੇ ਉਪਚਿਤਂ ਕੁਸਲਕਮ੍ਮਂ.

੧੨. ਉਰੁਵੇਲਪਾਟਿਹਾਰਿਯਕਥਾ

੩੮. ਪਰਿਯਾਦਿਯੇਯ੍ਯਨ੍ਤਿ ¶ ਏਤ੍ਥ ਦਾਧਾਤੁਸ੍ਸ ਪਰੀਤਿ ਚ ਆਤਿ ਚ ਉਪਸਗ੍ਗਵਸੇਨ ਅਭਿਭਵਨਤ੍ਥੋਤਿ ਆਹ ‘‘ਅਭਿਭਵੇਯ੍ਯ’’ਨ੍ਤਿ.

੩੯. ਪਚ੍ਛਾ ¶ ਪਕ੍ਖਿਤ੍ਤਾਤਿ ਸਙ੍ਗੀਤਿਤੋ ਪਰਂ ਪੋਤ੍ਥਕਾਰੂਲ਼੍ਹੇਹਿ ਠਪਿਤਾਤਿ ਅਤ੍ਥੋ.

੪੪. ‘‘ਏਵਂ ਵਦਨ੍ਤੋ ਵਿਯ ਓਣਤੋ’’ਤਿ ਇਮਿਨਾ ‘‘ਆਹਰਹਤ੍ਥੋ’’ਤਿਪਦਸ੍ਸ ਤਦ੍ਧਿਤਭਾਵਂ ਦਸ੍ਸੇਤਿ. ਵਿਤ੍ਥਿਣ੍ਣਮੁਖਤ੍ਤਾ ਮਨ੍ਦਂ ਹੀਨਂ ਅਤਿਮੁਖਮੇਤਾਸਨ੍ਤਿ ਵਚਨਤ੍ਥੇਨ ਅਗ੍ਗਿਕਪਾਲਾ ਮਨ੍ਦਾਮੁਖਿਯੋਤਿ ਵੁਚ੍ਚਨ੍ਤੀਤਿ ਆਹ ‘‘ਅਗ੍ਗਿਭਾਜਨਾਨਿ ਵੁਚ੍ਚਨ੍ਤੀ’’ਤਿ.

੫੧. ਯਸ੍ਮਾ ਯੋ ਨਾਗਦਮਨਕਾਲੋ ਚਿਰਂ ਪਤਤਿ ਪਵਤ੍ਤਤਿ, ਤਸ੍ਮਾ ਸੋ ਚਿਰਪਤਿਕੋਤਿ ਵੁਚ੍ਚਤਿ, ਤਸ੍ਮਾ ਚਿਰਪਤਿਕਾ ਪਟ੍ਠਾਯ ਅਭਿਪ੍ਪਸਨ੍ਨਾਤਿ ਯੋਜਨਾ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਚਿਰਕਾਲਤੋ ਪਟ੍ਠਾਯਾ’’ਤਿ.

੫੨. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਜਟਾਮਿਸ੍ਸ’’ਨ੍ਤਿਆਦਿਪਦੇਸੁ. ਖਾਰਿਕਾਜਨ੍ਤਿ ਏਤ੍ਥ ਕਮਣ੍ਡਲੁਆਦਿਕਾ ਤਾਪਸਪਰਿਕ੍ਖਾਰਾ ਖਾਰੀਤਿ ਵੁਚ੍ਚਨ੍ਤਿ, ਖਾਰਿਸਙ੍ਖਾਤੇਨ ਭਾਰੇਨ ਪੂਰਿਤੋ ਕਾਜੋ ਖਾਰਿਕਾਜੋਤਿ ਅਤ੍ਥਂ ਏਕਦੇਸੇਨ ਦਸ੍ਸੇਨ੍ਤੋ ਆਹ ‘‘ਖਾਰਿਭਾਰੋ’’ਤਿ.

੧੩. ਬਿਮ੍ਬਿਸਾਰਸਮਾਗਮਕਥਾ

੫੫. ਲਟ੍ਠਿਸਦ੍ਦੋ ਤਰੁਣਰੁਕ੍ਖਵਾਚਕੋ ‘‘ਅਮ੍ਬਲਟ੍ਠਿਕਾਯ’’ਨ੍ਤਿਆਦੀਸੁ (ਦੀ. ਨਿ. ੧.੨), ਇਧਾਪਿ ਤਰੁਣਤਾਲਰੁਕ੍ਖੋ ਲਟ੍ਠਿ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਤਾਲੁਯ੍ਯਾਨੇ’’ਤਿ. ਵਟਰੁਕ੍ਖੇਤਿ ਨਿਗ੍ਰੋਧਰੁਕ੍ਖੇ. ਏਤ੍ਥ ‘‘ਵਟ’’ਇਤਿ ਇਮਿਨਾ ਵਟਰੁਕ੍ਖੋ ਬਹੁਮੂਲਤ੍ਤਾ ਸੁਟ੍ਠੁਂ ਪਤਿਟ੍ਠਾਤੀਤਿ ਅਤ੍ਥੇਨ ਸੁਪ੍ਪਤਿਟ੍ਠੋ ਨਾਮਾਤਿ ਦਸ੍ਸੇਤਿ. ‘‘ਰੁਕ੍ਖੇ’’ਇਤਿ ਇਮਿਨਾ ਚੇਤਿਯਸਦ੍ਦੋ ਚੇਤਿਯਰੁਕ੍ਖੇ ਵਤ੍ਤਤੀਤਿ ਦਸ੍ਸੇਤਿ, ਦੇਵਾਲਯਞ੍ਚ ਥੂਪਞ੍ਚ ਨਿਵਤ੍ਤੇਤਿ. ਤਸ੍ਸਾਤਿ ਵਟਰੁਕ੍ਖਸ੍ਸ. ਏਤਨ੍ਤਿ ‘‘ਸੁਪ੍ਪਤਿਟ੍ਠੇ ਚੇਤਿਯੇ’’ਤਿ ਏਤਂ ਨਾਮਂ. ਲੋਕਵੋਹਾਰਵਸੇਨ ਦਸਸਹਸ੍ਸਸਙ੍ਖਾਤੇ ਸਙ੍ਖ੍ਯਾਵਿਸੇਸੇ ਨੀਹਰਿਤ੍ਵਾ ਯੁਜ੍ਜਿਤਬ੍ਬਨ੍ਤਿ ਨਿਯੁਤਨ੍ਤਿ ਵਚਨਤ੍ਥੇਨ ¶ ਦਸਸਹਸ੍ਸਂ ਨਿਯੁਤਂ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਏਕਨਿਯੁਤਂ ਦਸਸਹਸ੍ਸਾਨੀ’’ਤਿ. ‘‘ਨਹੁਤ’’ਨ੍ਤਿਪਿ ਪਾਠੋ, ਸੋ ਅਯੁਤ੍ਤੋ ਨਹੁਤਸਙ੍ਖਾਤੇਨ ਸਙ੍ਖ੍ਯਾਵਿਸੇਸੇਨ ਮਿਸ੍ਸੀਭਾਵੇਨ ਪਸਙ੍ਗਤ੍ਤਾ. ਤੇਸਨ੍ਤਿ ਦ੍ਵਾਦਸਨਿਯੁਤਾਨਂ ਬ੍ਰਾਹ੍ਮਣਗਹਪਤਿਕਾਨਂ.

‘‘ਕਿਸਸਰੀਰਤ੍ਤਾ’’ਤਿ ਇਮਿਨਾ ਕਿਸੋ ਕੋ ਅਤ੍ਤਾ ਏਤੇਸਨ੍ਤਿ ਕਿਸਕਾਤਿ ਵਚਨਤ੍ਥਂ ਦਸ੍ਸੇਤਿ. ਕਕਾਰੋ ਹੇਤ੍ਥ ਅਤ੍ਤਵਾਚਕੋ. ‘‘ਓਵਾਦਕੋ’’ਤਿ ਇਮਿਨਾ ਓਵਦਾਨੋਤਿ ਏਤ੍ਥ ਯੁਪਚ੍ਚਯੋ ਕਤ੍ਤੁਤ੍ਥੋਤਿ ਦਸ੍ਸੇਤਿ. ਗਾਥਾਬਨ੍ਧਤ੍ਤਾ ਅਕਾਰਸ੍ਸ ਦੀਘੋ. ‘‘ਅਥ ਵਾ’’ਤਿਆਦਿਨਾ ਕਿਸਕੋ ਹੁਤ੍ਵਾ ਅਞ੍ਞੇ ਓਵਦਾਨੋ ¶ ਕਿਸਕੋਵਦਾਨੋਤਿ ਵਚਨਤ੍ਥਂ ਦਸ੍ਸੇਤਿ. ਇਦਨ੍ਤਿ ਇਦਂ ਅਤ੍ਥਜਾਤਂ, ਅਯਮਤ੍ਥੋ ਵਾ. ਤ੍ਵਂ ਪਹਾਸੀਤਿ ਸਮ੍ਬਨ੍ਧੋ. ਤਨ੍ਤਿ ਤੁਵਂ. ਇਤਿ ਵੁਤ੍ਤਂ ਹੋਤੀਤਿ ਯੋਜਨਾ.

ਕਾਮਿਤ੍ਥਿਯੋਤਿ ਏਕਾਰਲੋਪਵਸੇਨ ਸਨ੍ਧੀਤਿ ਆਹ ‘‘ਕਾਮੇ ਇਤ੍ਥਿਯੋ ਚਾ’’ਤਿ. ਉਪਚੀਸੂਤਿ ਏਤ੍ਥ ਕਾਮਖਨ੍ਧਕਿਲੇਸਅਭਿਸਙ੍ਖਾਰਸਙ੍ਖਾਤੇਸੁ ਚਤੂਸੁ ਉਪਧੀਸੁ ਖਨ੍ਧੁਪਧਿ ਅਧਿਪ੍ਪੇਤੋਤਿ ਆਹ ‘‘ਖਨ੍ਧੁਪਧੀਸੂ’’ਤਿ.

ਕੋਚਰਹੀਤਿ ਏਤ੍ਥ ਕੋਸਦ੍ਦੋ ‘‘ਕੋ ਤੇ ਬਲਂ ਮਹਾਰਾਜਾ’’ਤਿਆਦੀਸੁ (ਜਾ. ੨.੨੨.੧੮੮੦) ਵਿਯ ਕ੍ਵਸਦ੍ਦਤ੍ਥੋਤਿ ਆਹ ‘‘ਕ੍ਵਚਰਹੀ’’ਤਿ. ਨਿਪਾਤੋਯੇਵੇਸ.

ਪਦਸਦ੍ਦਸ੍ਸ ਚਰਣਪਦਾਦਯੋ ਨਿਵਤ੍ਤੇਤੁਂ ਵੁਤ੍ਤਂ ‘‘ਨਿਬ੍ਬਾਨਪਦ’’ਨ੍ਤਿ. ‘‘ਸਨ੍ਤਸਭਾਵਤਾਯਾ’’ਤਿਆਦਿਨਾ ਸਨ੍ਤੋ ਸਭਾਵੋ ਇਮਸ੍ਸ ਪਦਸ੍ਸਾਤਿ ਸਨ੍ਤਂ. ਨਤ੍ਥਿ ਉਪਧਯੋ ਏਤ੍ਥਾਤਿ ਅਨੁਪਧਿਕਂ. ਨਤ੍ਥਿ ਕਿਞ੍ਚਨਮੇਤ੍ਥਾਤਿ ਅਕਿਞ੍ਚਨਂ. ਤੀਸੁ ਭਵੇਸੁ ਨ ਸਞ੍ਜਤੀਤਿ ਅਸਤ੍ਤਂ. ਅਞ੍ਞਥਾ ਨ ਭਵਤੀਤਿ ਅਨਞ੍ਞਥਾਭਾਵਿ. ਅਞ੍ਞੇਨ ਕੇਨਚਿ ਨ ਨੇਤਬ੍ਬਨ੍ਤਿ ਅਨਞ੍ਞਨੇਯ੍ਯਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਤੇਨਾਤਿ ‘‘ਸਨ੍ਤ’’ਨ੍ਤਿਆਦਿਪਦੇਨ. ਮੇਤਿ ਮਮ, ਮਨੋਤਿ ਸਮ੍ਬਨ੍ਧੋ. ਏਤ੍ਥ ਦੇਵਮਨੁਸ੍ਸਲੋਕੇ ਮੇ ਮਨੋ ਰਤੋ ਨਾਮਾਤਿ ਕਿਂ ਵਕ੍ਖਾਮਿ. ਇਤਿ ਇਮਮਤ੍ਥਂ ਦਸ੍ਸੇਤੀਤਿ ਯੋਜਨਾ.

੫੬. ਤਞ੍ਚਾਤਿ ਸਾਵਕਭਾਵਞ੍ਚ.

੫੭. ਅਸ੍ਸਾਸਕਾਤਿ ਏਤ੍ਥ ਆਪੁਬ੍ਬੋ ਸਾਸਧਾਤੁ ਆਪੁਬ੍ਬ ਸਿਸਧਾਤੁਨਾ ਸਦਿਸੋ, ‘‘ਮੇ’’ਤਿ ਛਟ੍ਠੀਯੋਗਤ੍ਤਾ ਣ੍ਵੁਪਚ੍ਚਯੋ ਚ ਭਾਵਤ੍ਥੋਤਿ ¶ ਆਹ ‘‘ਆਸਿਸਨਾ’’ਤਿ. ‘‘ਪਤ੍ਥਨਾ’’ਤਿ ਇਮਿਨਾ ਆਪੁਬ੍ਬਸਿਸਧਾਤੁਯਾ ਅਤ੍ਥਂ ਦਸ੍ਸੇਤਿ. ਅਸ੍ਸਾਤਿ ਬਿਮ੍ਬਿਸਾਰਰਞ੍ਞੋ. ਤਤ੍ਥਾਤਿ ਰਤਨਤ੍ਤਯੇ. ਨਿਚ੍ਛਯਗਮਨਮੇਵਾਤਿ ‘‘ਸਰਣ’’ਇਤਿਨਿਚ੍ਛਯੇਨ ਜਾਨਨਮੇਵ ਗਤੋ. ਅਤ੍ਤਸਨ੍ਨਿਯ੍ਯਾਤਨਨ੍ਤਿ ਅਤ੍ਤਨੋ ਅਤ੍ਤਾਨਂ ਰਤਨਤ੍ਤਯੇ ਸਨ੍ਨਿਯ੍ਯਾਤਨਂ. ਇਮਿਨਾ ਅਤ੍ਤਸਨ੍ਨਿਯ੍ਯਾਤਨ, ਪਣਿਪਾਤ, ਤਪ੍ਪਰਾਯਨ, ਸਿਸ੍ਸਭਾਵੂਪਗਮਨਸਙ੍ਖਾਤੇਸੁ ਚਤੂਸੁ ਸਰਣਗਮਨੇਸੁ (ਦੀ. ਨਿ. ਅਟ੍ਠ. ੧.੨੫੦; ਮ. ਨਿ. ਅਟ੍ਠ. ੧.੫੬; ਖੁ. ਪਾ. ਅਟ੍ਠ. ੧.ਸਰਣਗਮਨਗਮਕਵਿਭਾਵਨਾ) ਅਤ੍ਤਸਨ੍ਨਿਯ੍ਯਾਤਨਸਰਣਗਮਨਂ ਦੀਪੇਤਿ. ਅਯਨ੍ਤਿ ਬਿਮ੍ਬਿਸਾਰੋ ਰਾਜਾ. ਤਨ੍ਤਿ ਨਿਯਤਸਰਣਤਂ. ਪਣਿਪਾਤਗਮਨਞ੍ਚਾਤਿ ਏਤ੍ਥ ਪਣੀਤਿ ਕਰੋ. ਯਥਾ ਹਿ ਪਾਦਪਦਸਦ੍ਦਾ ਦੀਘਰਸ੍ਸਵਸੇਨ ਹੁਤ੍ਵਾ ਚਰਣਂ ਵਦਨ੍ਤਿ, ਏਵਂ ਪਾਣਿਪਣਿਸਦ੍ਦਾ ਕਰਂ ਵਦਨ੍ਤਿ. ਤਸ੍ਮਾ ਵੁਤ੍ਤਂ ‘‘ਪਣੀਤਿ ਕਰੋ’’ਤਿ. ਪਤਨਂ ਪਾਤੋ, ਪਣਿਨੋ ਪਾਤੋ ਪਣਿਪਾਤੋ. ਅਤ੍ਥਤੋ ਅਞ੍ਜਲਿਪਣਮਨਨ੍ਤਿ ਵੁਤ੍ਤਂ ਹੋਤਿ. ਤਸ੍ਸ ਗਮਨਞ੍ਚ ਗਚ੍ਛਨ੍ਤੋਤਿ ਅਤ੍ਥੋ. ਇਮਿਨਾ ਪਣਿਪਾਤਸਰਣਗਮਨਂ ¶ ਦੀਪੇਤਿ. ਚਸਦ੍ਦੋ ‘‘ਪਾਕਟ’’ਨ੍ਤਿ ਏਤ੍ਥਾਪਿ ਯੋਜੇਤਬ੍ਬੋ. ਪਾਕਟਞ੍ਚ ਕਰੋਨ੍ਤੋਤਿ ਹਿ ਅਤ੍ਥੋ.

੫੮. ਸਿਙ੍ਗੀਨਿਕ੍ਖਸਵਣ੍ਣੋਤਿ ਏਤ੍ਥ ਸਿਙ੍ਗੀਸਙ੍ਖਾਤੋ ਨਿਕ੍ਖੋ ਸਿਙ੍ਗੀਨਿਕ੍ਖੋ, ਤੇਨ ਸਮਾਨੋ ਵਣ੍ਣੋ ਏਤਸ੍ਸਾਤਿ ਸਿਙ੍ਗੀਨਿਕ੍ਖਸਵਣ੍ਣੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਿਙ੍ਗੀਸੁਵਣ੍ਣਨਿਕ੍ਖੇਨ ਸਮਾਨਵਣ੍ਣੋ’’ਤਿ. ਤਤ੍ਥ ‘‘ਸੁਵਣ੍ਣ’’ਇਤਿਪਦੇਨ ਨਿਕ੍ਖਸਦ੍ਦਸ੍ਸ ਸੁਵਣ੍ਣਤ੍ਥਂ ਦਸ੍ਸੇਤਿ, ਪਞ੍ਚਸੁਵਣ੍ਣਾਦਯੋ ਅਤ੍ਥੇ ਨਿਵਤ੍ਤੇਤਿ. ‘‘ਸਮਾਨ’’ਇਤਿਪਦੇਨ ਸਵਣ੍ਣੋਤਿ ਏਤ੍ਥ ਸਕਾਰੋ ਸਮਾਨਸਦ੍ਦਸ੍ਸੇਵ ਕਾਰਿਯੋਤਿ ਦਸ੍ਸੇਤਿ. ਸਬ੍ਬੇਸੂਤਿ ਅਖਿਲੇਸੁ ਚਕ੍ਖਾਦਿਇਨ੍ਦ੍ਰਿਯੇਸੁ. ਦਨ੍ਤੋਤਿ ਦਮਿਤੋ. ਇਨ੍ਦ੍ਰਿਯਸਂਵਰੋਤਿ ਵੁਤ੍ਤਂ ਹੋਤਿ. ਤਮੇਵਤ੍ਥਂ ਪਾਕਟਂ ਕਰੋਨ੍ਤੋ ਆਹ ‘‘ਭਗਵਤੋ ਹੀ’’ਤਿਆਦਿ.

੫੯. ਓਣੀਤੋ ਪਤ੍ਤਤੋ ਪਾਣਿ ਯੇਨਾਤਿ ਓਣੀਤਪਤ੍ਤਪਾਣ�