📜

नमो तस्स भगवतो अरहतो सम्मासम्बुद्धस्स

अभिधम्मपिटके

पञ्चपकरण-अट्ठकथा

धातुकथा-अट्ठकथा

अट्ठारसहि ¶ ¶ ¶ भेदेहि, विभङ्गं मारभञ्जनो;

देसयित्वा महावीरो, यं तस्सेव अनन्तरं.

अदेसयि धातुकथं, धातुभेदप्पकासनो;

तस्सत्थं दीपयिस्सामि, तं सुणाथ समाहिताति.

१. मातिकावण्णना

१. नयमातिकावण्णना

१. सङ्गहो ¶ असङ्गहोतिआदीनञ्हि वसेन इदं पकरणं चुद्दसविधेन विभत्तन्ति वुत्तं. तं सब्बम्पि उद्देसनिद्देसतो द्विधा ठितं. तत्थ मातिका उद्देसो. सा पञ्चविधा – नयमातिका, अब्भन्तरमातिका, नयमुखमातिका, लक्खणमातिका, बाहिरमातिकाति. तत्थ सङ्गहो असङ्गहो…पे… विप्पयुत्तेन सङ्गहितं असङ्गहितन्ति – अयं चुद्दसहि पदेहि निक्खित्ता नयमातिका नाम. अयञ्हि इमिना सङ्गहादिकेन नयेन धातुकथा धम्मा विभत्ताति दस्सेतुं ठपितत्ता नयमातिकाति वुच्चति. एतेसं पदानं मूलभूतत्ता मूलमातिकातिपि वत्तुं वट्टति.

२. अब्भन्तरमातिकावण्णना

२. पञ्चक्खन्धा ¶ …पे… मनसिकारोति अयं पञ्चवीसाधिकेन पदसतेन निक्खित्ता अब्भन्तरमातिका नाम. अयञ्हि ‘‘सब्बापि धम्मसङ्गणी धातुकथाय मातिका’’ति एवं अवत्वा सङ्गहादिना नयेन विभजितब्बे खन्धादिधम्मे सरूपतो दस्सेत्वा धातुकथाय अब्भन्तरेयेव ठपितत्ता अब्भन्तरमातिकाति वुच्चति. खन्धादिपदानं धम्मसङ्गणीमातिकाय ¶ असङ्गहितत्ता पकिण्णकमातिकातिपि वत्तुं वट्टति.

३. नयमुखमातिकावण्णना

३. तीहि सङ्गहो, तीहि असङ्गहो; चतूहि सम्पयोगो, चतूहि विप्पयोगोति अयं चतूहि पदेहि निक्खित्ता नयमुखमातिका नाम. अयञ्हि सब्बेसुपि पञ्चक्खन्धादीसु चेव कुसलत्तिकादीसु च मातिकाधम्मेसु, तीहि खन्धायतनधातुपदेहेव सङ्गहो च असङ्गहो च योजेतब्बो. तथा चतूहि अरूपक्खन्धेहि सम्पयोगो च विप्पयोगो च. एतानि इमेसं सङ्गहासङ्गहादीनं नयानं मुखानीति दस्सेतुं ठपितत्ता नयमुखमातिकाति वुच्चति.

४. लक्खणमातिकावण्णना

४. सभागो ¶ , विसभागोति अयं द्वीहि पदेहि निक्खित्ता लक्खणमातिका नाम. अयञ्हि सभागलक्खणेहि धम्मेहि सङ्गहनयो, विसभागलक्खणेहि असङ्गहनयो, तथा सम्पयोगविप्पयोगनयो योजेतब्बोति सभागविसभागलक्खणवसेन सङ्गहादिलक्खणं दस्सेतुं ठपितत्ता लक्खणमातिकाति वुच्चति.

५. बाहिरमातिकावण्णना

५. सब्बापि धम्मसङ्गणी धातुकथाय मातिकाति अयं छसट्ठि तिकपदानि, द्वे च दुकपदसतानि सङ्खिपित्वा निक्खित्ता बाहिरमातिका नाम. अयञ्हि ‘‘पञ्चक्खन्धा…पे… मनसिकारो’’ति एवं धातुकथाय अब्भन्तरे अवत्वा ‘‘सब्बापि धम्मसङ्गणी’’ति एवं धातुकथाय मातिकतो बहि ठपितत्ता बाहिरमातिकाति वुच्चति.

एवं ¶ मातिकाय पञ्चधा ठितभावं विदित्वा इदानि ‘सङ्गहो असङ्गहो’तिआदीसु सङ्गहो ताव जातिसञ्जातिकिरियागणनवसेन चतुब्बिधो. तत्थ – ‘‘सब्बे खत्तिया आगच्छन्तु, सब्बे ब्राह्मणा, सब्बे वेस्सा, सब्बे सुद्दा आगच्छन्तु’’, ‘‘या चावुसो विसाख, सम्मावाचा, यो च सम्माकम्मन्तो, यो च सम्माआजीवो, इमे धम्मा सीलक्खन्धे सङ्गहिता’’ति अयं जातिसङ्गहो नाम. ‘‘एकजातिका आगच्छन्तू’’ति वुत्तट्ठाने विय हि इध सब्बेपि जातिया एकसङ्गहं गता. ‘‘सब्बे कोसलका आगच्छन्तु, सब्बे मागधका, सब्बे भारुकच्छका आगच्छन्तु’’, ‘‘यो चावुसो विसाख, सम्मावायामो; या च सम्मासति, यो च सम्मासमाधि, इमे धम्मा ¶ समाधिक्खन्धे सङ्गहिता’’ति (म. नि. १.४६२) अयं सञ्जातिसङ्गहो नाम. ‘‘एकट्ठाने जाता संवड्ढा आगच्छन्तू’’ति वुत्तट्ठाने विय हि इध सब्बेपि सञ्जातिठानेन निवुत्थोकासेन एकसङ्गहं गता. ‘‘सब्बे हत्थारोहा आगच्छन्तु, सब्बे अस्सारोहा, सब्बे रथिका आगच्छन्तु’’, ‘‘या चावुसो विसाख, सम्मादिट्ठि, यो च सम्मासङ्कप्पो, इमे धम्मा पञ्ञाक्खन्धे सङ्गहिता’’ति (म. नि. १.४६२) अयं किरियासङ्गहो नाम. सब्बेव हेते अत्तनो किरियाकरणेन एकसङ्गहं गता. ‘‘चक्खायतनं कतमक्खन्धगणनं गच्छतीति? रूपक्खन्धगणनं गच्छती’’ति. हञ्चि चक्खायतनं रूपक्खन्धगणनं गच्छति, तेन वत रे वत्तब्बे – ‘चक्खायतनं रूपक्खन्धेन सङ्गहित’’न्ति (कथा. ४७१), अयं ¶ गणनसङ्गहो नाम. अयमिध अधिप्पेतो. तप्पटिपक्खेन असङ्गहो वेदितब्बो. तेसं विकप्पतो सङ्गहितेन असङ्गहितादीनि. एकुप्पादेकनिरोधएकवत्थुकएकारम्मणतावसेन सम्पयोगो, तप्पटिपक्खतो विप्पयोगो. तेसं विकप्पतो सम्पयुत्तेन विप्पयुत्तादीनि. तदुभयसंसग्गविकप्पतो सङ्गहितेन सम्पयुत्तं विप्पयुत्तन्तिआदीनि. पञ्चक्खन्धातिआदीनि पन खन्धविभङ्गादीसु वुत्तनयेनेव वेदितब्बानि. फस्सादयो पनेत्थ सन्निट्ठानवसेन वुत्तसब्बचित्तुप्पादसाधारणतो वुत्ताति.

मातिकावण्णना.

२. निद्देसवण्णना

१. पठमनयो सङ्गहासङ्गहपदवण्णना

१. खन्धपदवण्णना

६. इदानि ¶ पञ्चक्खन्धादिवसेन निक्खित्तमातिकं ‘सङ्गहो असङ्गहो’तिआदीहि नयमातिकापदेहि सद्धिं योजेत्वा दस्सेतुं रूपक्खन्धो कतिहि खन्धेहीतिआदिना ¶ नयेन निद्देसवारो आरद्धो. तत्थ यस्मा ‘‘सङ्गहो असङ्गहोतिआदिकाय नयमातिकाय ‘‘तीहि सङ्गहो, तीहि असङ्गहो’’ति नयमुखमातिका ठपिता, तस्मा रूपक्खन्धादीनं सङ्गहं दस्सेतुं कतिहि खन्धेहि कतिहायतनेहि कतिहि धातूहीति तीणि खन्धायतनधातुपदानेव उद्धटानि. ‘चत्तारि सच्चानी’तिआदीसु एकम्पि न परामट्ठं. यस्मा च ‘‘सभागो विसभागो’’ति एवं लक्खणमातिका ठपिता, तस्मा इमस्स पञ्हस्स विस्सज्जने रूपक्खन्धो एकेन खन्धेनातिआदि वुत्तं. सभागा हि तस्स एते खन्धादयोति. तत्थ एकेन खन्धेनाति रूपक्खन्धेनेव. यञ्हि किञ्चि रूपं रूपक्खन्धसभागत्ता रूपक्खन्धोत्वेव सङ्गहं गच्छतीति रूपक्खन्धेनेव गणितं, तं रूपक्खन्धेनेव परिच्छिन्नं. एकादसहायतनेहीति मनायतनवज्जेहि. सब्बोपि हि रूपक्खन्धो दसायतनानि धम्मायतनेकदेसो च होति, तस्मा एकादसहायतनेहि गणितो ¶ , परिच्छिन्नो. एकादसहि धातूहीति सत्तविञ्ञाणधातुवज्जाहि एकादसहि एतासु हि अपरियापन्नं रूपं नाम नत्थि.

असङ्गहनयनिद्देसे कतिहि असङ्गहितोति सङ्खेपेनेव पुच्छा कता. विस्सज्जने पनस्स यस्मा रूपक्खन्धस्स विसभागा चत्तारो अरूपक्खन्धा, एकं मनायतनं, सत्त विञ्ञाणधातुयो; तस्मा चतूहि खन्धेहीतिआदि वुत्तं. इमिना नयेन सब्बपदेसु सङ्गहासङ्गहो वेदितब्बो. इमस्मिं पन खन्धनिद्देसे – ‘‘रूपक्खन्धो कतिहि खन्धेही’’तिआदिम्हि ताव एकमूलके सङ्गहनये सरूपेनेव दस्सिता पञ्च पुच्छा, पञ्च विस्सज्जनानि. असङ्गहनये सङ्खेपेन दस्सिता पञ्च पुच्छा, पञ्च विस्सज्जनानि. इमिना उपायेन दुकमूलकादीसुपि पुच्छाविस्सज्जनानि ¶ वेदितब्बानि. रूपक्खन्धमूलकायेव चेत्थ दुकतिकचतुक्का दस्सिता. पञ्चके पन ‘‘रूपक्खन्धो ¶ च…पे… विञ्ञाणक्खन्धो चा’’ति एवं भेदतो च, ‘‘पञ्चक्खन्धा कतिहि खन्धेही’’ति एवं अभेदतो चाति द्विधा पुच्छाविस्सज्जनानि कतानि. एवं पाळिनयो वेदितब्बोति.

२. आयतनपदादिवण्णना

२२. आयतनपदनिद्देसादीसु आयतनपदनिद्देसे ताव चक्खायतनं एकेन खन्धेनाति एकेन रूपक्खन्धेनेव, एकेन चक्खायतनेनेव एकाय चक्खुधातुयाव सङ्गहितन्ति वेदितब्बं. सोतायतनादीसुपि इमिनाव नयेन सङ्गहासङ्गहो वेदितब्बो. असङ्खतं खन्धतो ठपेत्वाति एत्थ पन यस्मा असङ्खतं धम्मायतनं नाम निब्बानं, तञ्च खन्धसङ्गहं न गच्छति; तस्मा ‘खन्धतो ठपेत्वा’ति वुत्तं. चतूहि खन्धेहीति रूपवेदनासञ्ञासङ्खारक्खन्धेहि. निब्बानवज्जञ्हि धम्मायतनं एतेहि सङ्गहितं. विञ्ञाणक्खन्धेन पन ठपेत्वा धम्मायतनधम्मधातुयो सेसायतनधातूहि च तं न सङ्गय्हति. तेन वुत्तं – ‘‘एकेन खन्धेन, एकादसहायतनेहि, सत्तरसहि धातूहि असङ्गहित’’न्ति. यथा च ते हेट्ठा रूपक्खन्धमूलका, एवमिधापि चक्खायतनमूलकाव नया वेदितब्बा. दुकमत्तमेव पन पाळियं दस्सेत्वा ‘‘द्वादसायतनानी’’ति अभेदतोव पुच्छाविस्सज्जनं कतं. धातुनिद्देसेपि एसेव नयो.

४०. सच्चनिद्देसे ¶ – सब्बेपि दुकतिकचतुक्का पाळियं दस्सिता. यस्मा च दुकतिकेसु समुदयसच्चसदिसमेव मग्गसच्चेपि विस्सज्जनं, तस्मा तं समुदयानन्तरं वुत्तं.

५०. इन्द्रियनिद्देसे – जीवितिन्द्रियं द्वीहि खन्धेहीति रूपजीवितिन्द्रियं रूपक्खन्धेन, अरूपजीवितिन्द्रियं ¶ सङ्खारक्खन्धेन सङ्गहितं. सेसं वुत्तनयानुसारेनेव वेदितब्बं. पाळिववत्थानं पनेत्थ आयतनधातुनिद्देससदिसमेव.

६. पटिच्चसमुप्पादवण्णना

६१. पटिच्चसमुप्पादनिद्देसे – ‘‘अविज्जा कतिहि खन्धेही’’ति पुच्छं अनारभित्वा अविज्जा एकेन खन्धेनाति एवं विस्सज्जनमेव दस्सितं. तत्थ सङ्खारपच्चया विञ्ञाणन्ति पटिसन्धियं पवत्ते च सब्बम्पि विपाकविञ्ञाणं. तेनेवाह ¶ – ‘‘सत्तहि धातूहि सङ्गहित’’न्ति. नामरूपम्पि पटिसन्धिपवत्तिवसेनेव वेदितब्बं. तेनेवेत्थ सद्दायतनम्पि सङ्गहेत्वा एकादसहायतनेहि सङ्गहो दस्सितो. फस्सादीसु खन्धभेदो वेदितब्बो. अञ्ञेनेव हि एकेन खन्धेन फस्सो सङ्गहितो, अञ्ञेन वेदना, तण्हाउपादानकम्मभवा पन सङ्खारक्खन्धेनेव सङ्गहिता. भवपदञ्चेत्थ कम्मभवादीनं वसेन एकादसधा विभत्तं. तत्थ कम्मभवो फस्सादीहि सदिसविसज्जनत्ता तेहि सद्धिं एकतो दस्सितो. उपपत्तिभवकामभवसञ्ञाभवपञ्चवोकारभवा अञ्ञमञ्ञसदिसविस्सज्जनत्ता एकतो दस्सिता. यस्मा चेते उपादिन्नकधम्माव तस्मा ‘‘एकादसहायतनेहि सत्तरसहि धातूही’’ति वुत्तं. सद्दायतनञ्हि अनुपादिन्नं, तं एत्थ न गहितं.

६८. रूपभवनिद्देसे – पञ्चहायतनेहीति चक्खुसोतमनरूपधम्मायतनेहि. अट्ठहि धातूहीति चक्खुसोतचक्खुविञ्ञाणसोतविञ्ञाणरूपधम्ममनोधातुमनोविञ्ञाणधातूहि. अरूपभवादयोपि तयो सदिसविस्सज्जनत्ताव एकतो दस्सिता. तथा असञ्ञाभवएकवोकारभवा. तत्थ द्वीहायतनेहीति रूपायतनधम्मायतनेहि. धातूसुपि एसेव नयो. एकतलवासिकानञ्हि सेसब्रह्मानं चक्खुसब्भावतो तस्सारम्मणत्ता तत्थ रूपायतनं उद्धटं.

७१. जाति द्वीहि खन्धेहीति रूपजाति रूपक्खन्धेन, अरूपजाति सङ्खारक्खन्धेन. जरामरणेसुपि ¶ एसेव नयो. सोकादीसुपि ¶ एकेन खन्धेनाति सोकदुक्खदोमनस्सानि वेदनाक्खन्धेन, परिदेवो रूपक्खन्धेन, उपायासादयो सङ्खारक्खन्धेनाति एवं खन्धविसेसो वेदितब्बो.

७३. इद्धिपादो द्वीहीति सङ्खारविञ्ञाणक्खन्धेहि, मनायतनधम्मायतनेहि, धम्मधातुमनोविञ्ञाणधातूहि च. झानं द्वीहीति वेदनाक्खन्धसङ्खारक्खन्धेहि. अप्पमञ्ञादयो सदिसविस्सज्जनत्ता एकतो निद्दिट्ठा. चित्तं पन चेतनानन्तरं निक्खित्तम्पि असदिसविस्सज्जनत्ता पच्छा गहितं. तत्थ अप्पमञ्ञादीसु एकेन खन्धेनाति वेदना वेदनाक्खन्धेन, सञ्ञा सञ्ञाक्खन्धेन, सेसा सङ्खारक्खन्धेन सङ्गहिताति एवं खन्धविसेसो वेदितब्बो.

७. तिकपदवण्णना

७७. एवं ¶ अब्भन्तरमातिकाय सङ्गहं दस्सेत्वा इदानि बाहिरमातिकाय सङ्गहं दस्सेतुं कुसला धम्मातिआदि आरद्धं. तत्थ वेदनात्तिके तीहि धातूहीति कायविञ्ञाणमनोविञ्ञाणधम्मधातूहि. सत्तहि धातूहीति चक्खुसोतघानजिव्हाविञ्ञाणधातूहि चेव मनोधातुधम्मधातुमनोविञ्ञाणधातूहि च. विपाकत्तिके अट्ठहि धातूहीति कायविञ्ञाणधातुया सद्धिं ताहियेव. विपाकधम्मधम्मा पन संकिलिट्ठसंकिलेसिकेहि सद्धिं सदिसविस्सज्जनत्ता एकतो गहिता. यथा चेते, एवं सब्बतिकदुकपदेसु यं यं पदं येन येन पदेन सद्धिं सदिसविस्सज्जनं होति, तं तं उप्पटिपाटियापि तेन तेन सद्धिं गहेत्वा विस्सज्जितं. तत्थ वुत्तानुसारेनेव सङ्गहासङ्गहनयो वेदितब्बोति.

सङ्गहासङ्गहपदवण्णना.

२. दुतियनयो सङ्गहितेनअसङ्गहितपदवण्णना

१७१. इदानि ¶ सङ्गहितेन असङ्गहितपदं भाजेतुं चक्खायतनेनातिआदि आरद्धं. तत्रिदं ¶ लक्खणं – इमस्मिञ्हि वारे यं खन्धपदेन सङ्गहितं हुत्वा आयतनधातुपदेहि असङ्गहितं, खन्धायतनपदेहि वा सङ्गहितं हुत्वा धातुपदेन असङ्गहितं, तस्स खन्धादीहि असङ्गहं पुच्छित्वा विस्सज्जनं कतं. तं पन रूपक्खन्धादीसु न युज्जति. रूपक्खन्धेन हि रूपक्खन्धोव सङ्गहितो. सो च अड्ढेकादसहि आयतनधातूहि असङ्गहितो नाम नत्थि. वेदनाक्खन्धेन च वेदनाक्खन्धोव सङ्गहितो. सोपि धम्मायतनधम्मधातूहि असङ्गहितो नाम नत्थि. एवं असङ्गहितताय अभावतो एतानि अञ्ञानि च एवरूपानि मनायतनधम्मायतनादीनि पदानि इमस्मिं वारे न गहितानि. यानि पन पदानि रूपेकदेसं अरूपेन असम्मिस्सं, विञ्ञाणेकदेसञ्च अञ्ञेन असम्मिस्सं दीपेन्ति, तानि इध गहितानि. परियोसाने च –

‘‘दसायतना ¶ सत्तरस धातुयो,

सत्तिन्द्रिया असञ्ञाभवो एकवोकारभवो;

परिदेवो सनिदस्सनसप्पटिघं,

अनिदस्सनं पुनदेव सप्पटिघं उपादा’’ति.

एवं उद्दानगाथाय दस्सितानेव. तस्मा तेसं वसेनेव सङ्गहासङ्गहो वेदितब्बो. पञ्हवसेन हि इमस्मिं वारे आयतनधातुवसेनेव सदिसविस्सज्जने वीसति धम्मे समोधानेत्वा एको पञ्हो कतो, सत्त विञ्ञाणधातुयो समोधानेत्वा एको, सत्तिन्द्रियानि समोधानेत्वा एको, द्वे भवे समोधानेत्वा एको, परिदेवेन च सनिदस्सनसप्पटिघेहि च एको, अनिदस्सनसप्पटिघेहि एको, सनिदस्सनेहि एको, सप्पटिघेहि च उपादाधम्मेहि च एकोति अट्ठ पञ्हा कता. तेसु खन्धादिविभागो ¶ एवं वेदितब्बो सेय्यथिदं – पठमपञ्हे ताव चतूहि खन्धेहीति अरूपक्खन्धेहि, द्वीहायतनेहीति चक्खायतनादीसु एकेकेन सद्धिं मनायतनेन, अट्ठहि धातूहीति चक्खुधातुआदीसु एकेकाय सद्धिं सत्तहि विञ्ञाणधातूहि.

तत्रायं नयो – चक्खायतनेन हि खन्धसङ्गहेन रूपक्खन्धो सङ्गहितो. तस्मिं सङ्गहिते रूपक्खन्धे आयतनसङ्गहेन चक्खायतनमेवेकं सङ्गहितं. सेसानि दस आयतनानि असङ्गहितानि. धातुसङ्गहेनपि तेन चक्खुधातुयेवेका सङ्गहिता. सेसा दस धातुयो असङ्गहिता. इति यानि तेन असङ्गहितानि दसायतनानि, तानि चक्खायतनमनायतनेहि द्वीहि ¶ असङ्गहितानि. यापि तेन असङ्गहिता दस धातुयो, ता चक्खुधातुया चेव सत्तहि च विञ्ञाणधातूहि असङ्गहिताति. रूपायतनादीसुपि एसेव नयो.

१७२. दुतियपञ्हे – यस्मा याय कायचि विञ्ञाणधातुया सङ्गहितो विञ्ञाणक्खन्धो मनायतनेन असङ्गहितो नाम नत्थि, तस्मा आयतनसङ्गहेन सङ्गहिताति वुत्तं. एत्थ पन चतूहि खन्धेहीति रूपादीहि चतूहि. एकादसहायतनेहीति मनायतनवज्जेहि. द्वादसहि धातूहीति यथानुरूपा छ विञ्ञाणधातुयो अपनेत्वा सेसाहि द्वादसहि. चक्खुविञ्ञाणधातुया हि चक्खुविञ्ञाणधातुयेव सङ्गहिता, इतरा असङ्गहिता. सोतविञ्ञाणधातुआदीसुपि एसेव नयो.

१७३. ततियपञ्हे ¶ – चक्खुन्द्रियादीनं विस्सज्जनं चक्खायतनादिसदिसमेव. इत्थिन्द्रियपुरिसिन्द्रियेसु पन धम्मायतनेन सद्धिं द्वे आयतनानि, धम्मधातुया च सद्धिं अट्ठ धातुयो वेदितब्बा.

१७४. चतुत्थपञ्हे – तीहायतनेहीति रूपायतनधम्मायतनमनायतनेहि. तेसु हि भवेसु रूपायतनधम्मायतनवसेन द्वेव आयतनानि तेहि सङ्गहितानि ¶ . सेसानि नव रूपायतनानि तेहेव च द्वीहि, मनायतनेन चाति तीहि असङ्गहितानि नाम होन्ति. नवहि धातूहीति रूपधातुधम्मधातूहि सद्धिं सत्तहि विञ्ञाणधातूहि.

१७५. पञ्चमपञ्हे – द्वीहायतनेहीति पठमपदं सन्धाय सद्दायतनमनायतनेहि. दुतियपदं सन्धाय रूपायतनमनायतनेहि. धातुयोपि तेसंयेव एकेकेन सद्धिं सत्त विञ्ञाणधातुयो वेदितब्बा.

१७६. छट्ठपञ्हे – दसहायतनेहीति रूपायतनधम्मायतनवज्जेहि. सोळसहि धातूहीति रूपधातुधम्मधातुवज्जेहेव. कथं? अनिदस्सनसप्पटिघा हि धम्मा नाम नव ओळारिकायतनानि. तेहि खन्धसङ्गहेन सङ्गहिते रूपक्खन्धे, आयतनसङ्गहेन तानेव नवायतनानि सङ्गहितानि. रूपायतनधम्मायतनानि असङ्गहितानि. धातुसङ्गहेनपि ता एव नव धातुयो सङ्गहिता. रूपधातुधम्मधातुयो असङ्गहिता. इति यानि तेहि असङ्गहितानि द्वे आयतनानि ¶ , तानि रूपायतनवज्जेहि नवहि ओळारिकायतनेहि, मनायतनेन चाति दसहि असङ्गहितानि. यापि तेहि असङ्गहिता द्वे धातुयो, ता रूपधातुवज्जाहि नवहि ओळारिकधातूहि, सत्तहि च विञ्ञाणधातूहीति सोळसहि असङ्गहिताति वेदितब्बा.

१७७. सत्तमपञ्हे – द्वीहायतनेहीति रूपायतनमनायतनेहि. अट्ठहि धातूहीति रूपधातुया सद्धिं सत्तहि विञ्ञाणधातूहि.

१७८. अट्ठमपञ्हे – एकादसहायतनेहीति सप्पटिघधम्मे सन्धाय धम्मायतनवज्जेहि, उपादाधम्मे सन्धाय फोट्ठब्बायतनवज्जेहि. धातूसुपि एसेव नयो. अत्थयोजना पनेत्थ हेट्ठा वुत्तनयेनेव वेदितब्बाति.

सङ्गहितेनअसङ्गहितपदवण्णना.

३. ततियनयो असङ्गहितेनसङ्गहितपदवण्णना

१७९. इदानि ¶ ¶ असङ्गहितेनसङ्गहितपदं भाजेतुं वेदनाक्खन्धेनातिआदि आरद्धं. तत्रिदं लक्खणं – इमस्मिञ्हि वारे यं खन्धपदेन असङ्गहितं हुत्वा आयतनधातुपदेहि सङ्गहितं, तस्स खन्धादीहि सङ्गहं पुच्छित्वा विस्सज्जनं कतं. तं पन रूपक्खन्धविञ्ञाणक्खन्धचक्खायतनादीसु न युज्जति. रूपक्खन्धेन हि चत्तारो खन्धा खन्धसङ्गहेन असङ्गहिता. तेसु तेन एकधम्मोपि आयतनधातुसङ्गहेन सङ्गहितो नाम नत्थि. ननु च वेदनादयो धम्मायतनेन सङ्गहिताति? सङ्गहिता. न पन रूपक्खन्धोव धम्मायतनं, रूपक्खन्धतो हि सुखुमरूपमत्तं धम्मायतनं भजति. तस्मा ये धम्मायतनेन सङ्गहिता, न ते रूपक्खन्धेन सङ्गहिता नाम. विञ्ञाणक्खन्धेनपि इतरे चत्तारो खन्धा असङ्गहिता. तेसु तेन एकोपि आयतनधातुसङ्गहेन सङ्गहितो नाम नत्थि. एवं सङ्गहितताय अभावतो एतानि अञ्ञानि च एवरूपानि चक्खायतनादीनि पदानि इमस्मिं वारे न गहितानि. यानि पन पदानि ¶ विञ्ञाणेन वा ओळारिकरूपेन वा असम्मिस्सं धम्मायतनेकदेसं दीपेन्ति, तानि इध गहितानि. तेसं इदमुद्दानं –

‘‘तयो खन्धा तथा सच्चा, इन्द्रियानि च सोळस;

पदानि पच्चयाकारे, चुद्दसूपरि चुद्दस.

‘‘समतिंस पदा होन्ति, गोच्छकेसु दसस्वथ;

दुवे चूळन्तरदुका, अट्ठ होन्ति महन्तरा’’ति.

एतेसु पन पदेसु सदिसविस्सज्जनानि पदानि एकतो कत्वा सब्बेपि द्वादस पञ्हा वुत्ता. तेसु एवं खन्धविभागो वेदितब्बो. आयतनधातूसु पन भेदो नत्थि. तत्थ पठमपञ्हे ताव – तीहि खन्धेहीति रूपसञ्ञासङ्खारक्खन्धेहि. आयतनधातुयो पन धम्मायतनधम्मधातुवसेन वेदितब्बा.

तत्रायं नयो – वेदनाक्खन्धेन हि निब्बानञ्च सुखुमरूपसञ्ञासङ्खारा ¶ च खन्धसङ्गहेन असङ्गहिता हुत्वा आयतनधातुसङ्गहेन सङ्गहिता. तेसु निब्बानं खन्धसङ्गहं न गच्छति, सेसा रूपसञ्ञासङ्खारक्खन्धेहि सङ्गहं गच्छन्ति. आयतनधातुसङ्गहं पन निब्बानम्पि गच्छतेव. तेन वुत्तं ¶ – ‘‘असङ्खतं खन्धतो ठपेत्वा तीहि खन्धेहि, एकेनायतनेन, एकाय धातुया सङ्गहिता’’ति. सञ्ञाक्खन्धपक्खे पनेत्थ सञ्ञं अपनेत्वा वेदनाय सद्धिं तयो खन्धा सङ्खारादीसु सङ्खारक्खन्धं अपनेत्वा रूपवेदनासञ्ञावसेन तयो खन्धा वेदितब्बा.

१८०. दुतिये – चतूहि खन्धेहीति विञ्ञाणवज्जेहि. ते हि निरोधेन खन्धसङ्गहेन असङ्गहिता हुत्वा आयतनधातुसङ्गहेन सङ्गहिता.

१८१. ततिये – द्वीहीति वेदनासञ्ञाक्खन्धेहि. रूपारूपजीवितिन्द्रियेन हि वेदनासञ्ञाविञ्ञाणक्खन्धा च खन्धसङ्गहेन असङ्गहिता. तेसु पन वेदनासञ्ञाव आयतनधातुसङ्गहेन सङ्गहिता. तेन वुत्तं – ‘‘वेदनासञ्ञाक्खन्धेही’’ति. इमिना उपायेन सब्बत्थ खन्धभेदो वेदितब्बो. इतो परञ्हि खन्धानं नाममत्तमेव वक्खाम.

१८२. चतुत्थे ¶ – तीहि खन्धेहीति इत्थिन्द्रियपुरिसिन्द्रियेसु वेदनासञ्ञासङ्खारेहि, वेदनापञ्चके रूपसञ्ञासङ्खारेहि; सद्धिन्द्रियादीसु फस्सपरियोसानेसु रूपवेदनासञ्ञाक्खन्धेहि. वेदनाय वेदनाक्खन्धसदिसोव तण्हुपादानकम्मभवेसु सङ्खारक्खन्धसदिसोव विनिच्छयो.

१८३. पञ्चमे – जातिजरामरणेसु जीवितिन्द्रियसदिसोव. झानेन पन निब्बानं सुखुमरूपं सञ्ञा च खन्धसङ्गहेन असङ्गहिता हुत्वा आयतनधातुसङ्गहेन सङ्गहिता. तस्मा तं सन्धाय रूपक्खन्धसञ्ञाक्खन्धानं वसेन द्वे खन्धा वेदितब्बा.

१८४. छट्ठे – सोकादित्तये वेदनाय सदिसो. उपायासादीसु सङ्खारसदिसो. पुन वेदनाय वेदनाक्खन्धसदिसो, सञ्ञाय सञ्ञाक्खन्धसदिसो, चेतनादीसु सङ्खारक्खन्धसदिसो ¶ विनिच्छयो. इमिना उपायेन सत्तमपञ्हादीसुपि सङ्गहासङ्गहो वेदितब्बोति.

असङ्गहितेनसङ्गहितपदवण्णना.

४. चतुत्थनयो सङ्गहितेनसङ्गहितपदवण्णना

१९१. इदानि ¶ सङ्गहितेनसङ्गहितपदं भाजेतुं समुदयसच्चेनातिआदि आरद्धं. तत्थ यं खन्धादीहि सङ्गहितेन खन्धादिवसेन सङ्गहितं, पुन तस्सेव खन्धादीहि सङ्गहं पुच्छित्वा विस्सज्जनं कतं. तं खन्धायतनधातूसु एकम्पि सकलकोट्ठासं गहेत्वा ठितपदेसु न युज्जति. सकलेन हि खन्धादिपदेन अञ्ञं खन्धादिवसेन सङ्गहितं नाम नत्थि, यं अत्तनो सङ्गाहकं सङ्गण्हित्वा पुन तेनेव सङ्गहं गच्छेय्य. तस्मा तथारूपानि पदानि इमस्मिं वारे न गहितानि. यानि पन पदानि सङ्खारेकदेसं वा अञ्ञेन असम्मिस्सं दीपेन्ति – वेदनेकदेसं वा सुखुमरूपं वा सद्देकदेसं वा, तानि इध गहितानि. तेसं इदमुद्दानं –

‘‘द्वे सच्चा पन्नरसिन्द्रिया, एकादस पटिच्चपदा;

उद्धं पुन एकादस, गोच्छकपदमेत्थ तिंसविध’’न्ति.

पञ्हा ¶ पनेत्थ द्वेयेव होन्ति. तत्थ यं पुच्छाय उद्धटं पदं, तदेव येहि धम्मेहि खन्धादिवसेन सङ्गहितं, ते धम्मे सन्धाय सब्बत्थ एकेन खन्धेनातिआदि वुत्तं. तत्रायं नयो – समुदयसच्चेन हि तण्हावज्जा सेसा सङ्खारा खन्धादिसङ्गहेन सङ्गहिता. पुन तेहि तण्हाव सङ्गहिता. सा ¶ तण्हा पुन सङ्खारेहेव खन्धादिसङ्गहेन सङ्गहिताति. एसेव नयो सब्बत्थ. अरूपधम्मपुच्छासु पनेत्थ सङ्खारक्खन्धो वा वेदनाक्खन्धो वा एको खन्धो नाम. रूपधम्मपुच्छासु रूपक्खन्धो. परिदेवपुच्छाय सद्दायतनं एकं आयतनं नाम. सद्दधातु एका धातु नाम, सेसट्ठानेसु धम्मायतनधम्मधातुवसेनेव अत्थो वेदितब्बोति.

सङ्गहितेनसङ्गहितपदवण्णना.

५. पञ्चमनयो असङ्गहितेनअसङ्गहितपदवण्णना

१९३. इदानि असङ्गहितेन असङ्गहितपदं भाजेतुं रूपक्खन्धेनातिआदि आरद्धं. तत्थ यं खन्धादीहि असङ्गहितेन खन्धादिवसेन असङ्गहितं, पुन तस्सेव खन्धादीहि असङ्गहं पुच्छित्वा विस्सज्जनं कतं. तं पञ्चक्खन्धग्गाहकेसु दुक्खसच्चादीसु ¶ विञ्ञाणेन सद्धिं सुखुमरूपग्गाहकेसु अनिदस्सनअप्पटिघादीसु च पदेसु न युज्जति. तादिसेन हि पदेन निब्बानं खन्धसङ्गहमत्तं न गच्छेय्य. सेसा खन्धादीहि असङ्गहितधम्मा नाम नत्थि. तस्मा तथारूपानि पदानि इमस्मिं वारे न गहितानि. यानि पन पञ्चक्खन्धे विञ्ञाणञ्च सुखुमरूपेन सद्धिं एकतो न दीपेन्ति, तानि इध गहितानि. तेसं इदमुद्दानं –

‘‘सब्बे खन्धा तथायतनधातुयो सच्चतो तयो;

इन्द्रियानिपि सब्बानि, तेवीसति पटिच्चतो.

‘‘परतो सोळस पदा, तेचत्तालीसकं तिके;

गोच्छके सत्तति द्वे च, सत्त चूळन्तरे पदा.

‘‘महन्तरे ¶ पदा वुत्ता, अट्ठारस ततो परं;

अट्ठारसेव ञातब्बा, सेसा इध न भासिता’’ति.

पञ्हा पनेत्थ सदिसविस्सज्जनानं वसेन समोधानेत्वा कतिहि सद्धिं सब्बेपि चतुत्तिंस होन्ति. तत्थ यं ¶ पुच्छाय उद्धटं पदं, तदेव येहि खन्धादीहि असङ्गहितं, ते धम्मे सन्धाय एकेन खन्धेनातिआदि वुत्तं.

तत्रायं नयो – रूपक्खन्धेन हि चत्तारो खन्धा निब्बानञ्च खन्धसङ्गहेन असङ्गहिता. आयतनधातुसङ्गहेन पन ठपेत्वा विञ्ञाणं अवसेसा सङ्गहिताति विञ्ञाणमेव तीहिपि खन्धसङ्गहादीहि असङ्गहितं नाम. पुन तेन विञ्ञाणेन सद्धिं निब्बानेन चत्तारो खन्धा खन्धादिसङ्गहेन असङ्गहिता. ते सब्बेपि पुन विञ्ञाणेनेव खन्धादिसङ्गहेन असङ्गहिताति एकेन खन्धेन, एकेनायतनेन, सत्तहि धातूहि असङ्गहिता नाम होन्ति. अथ वा – यदेतं रूपक्खन्धेन विञ्ञाणमेव तीहि खन्धादिसङ्गहेहि असङ्गहितं, तेहिपि विञ्ञाणधम्मेहि ते रूपधम्माव तीहि सङ्गहेहि असङ्गहिता. पुन ते रूपधम्मा विञ्ञाणेनेव तीहि सङ्गहेहि असङ्गहिता. विञ्ञाणञ्च खन्धतो एको विञ्ञाणक्खन्धो होति, आयतनतो एकं मनायतनं, धातुतो सत्त विञ्ञाणधातुयो. तस्मा ‘‘एकेन खन्धेना’’तिआदि वुत्तं. इमिना उपायेन सब्बत्थ यं पुच्छाय उद्धटं पदं, तदेव येहि धम्मेहि खन्धादिवसेन असङ्गहितं, तेसं धम्मानं वसेन खन्धादयो वेदितब्बा. तत्थ दुतियपञ्हे ताव – रूपविञ्ञाणानं वसेन ¶ वेदितब्बा. वेदनादयो हि रूपविञ्ञाणेहेव खन्धादिसङ्गहेन असङ्गहिता. ते च द्वे खन्धा एकादसायतनानि सत्तरस धातुयो होन्ति.

१९५. ततियपञ्हे – विञ्ञाणं रूपादीहि चतूहि असङ्गहितन्ति तेसं वसेन खन्धादयो वेदितब्बा.

१९६. चतुत्थपञ्हे – चक्खायतनं वेदनादीहि चतूहीति इमिना नयेन सब्बत्थ खन्धादयो वेदितब्बा. परियोसाने – रूपञ्च धम्मायतनन्ति उद्दानगाथाय दस्सितधम्मायेव अञ्ञेनाकारेन सङ्खिपित्वा दस्सिताति.

असङ्गहितेनअसङ्गहितपदवण्णना.

६. छट्ठनयो सम्पयोगविप्पयोगपदवण्णना

२२८. इदानि ¶ ¶ सम्पयोगविप्पयोगपदं भाजेतुं रूपक्खन्धोतिआदि आरद्धं. तत्थ यं लब्भति यञ्च न लब्भति तं सब्बं पुच्छाय गहितं. विस्सज्जने पन यं न लब्भति, तं नत्थीति पटिक्खित्तं. चतूहि सम्पयोगो, चतूहि विप्पयोगो; सभागो विसभागोति हि वचनतो चतूहि अरूपक्खन्धेहेव सभागानं एकसन्तानस्मिं एकक्खणे उप्पन्नानं अरूपक्खन्धानंयेव अञ्ञमञ्ञं सम्पयोगो लब्भति. रूपधम्मानं पन रूपेन निब्बानेन वा, निब्बानस्स च रूपेन सद्धिं सम्पयोगो नाम नत्थि. तथा रूपनिब्बानानं अरूपक्खन्धेहि, विसभागा हि ते तेसं. यथा च अरूपक्खन्धानं रूपनिब्बानेहि, एवं भिन्नसन्तानेहि नानाक्खणिकेहि अरूपधम्मेहिपि सद्धिं नत्थियेव. तेपि हि तेसं सन्तानक्खणविसभागताय विसभागायेव. अयं पन विसभागता सङ्गहट्ठेन विरुज्झनतो सङ्गहनये नत्थि. गणनूपगमत्तञ्हि सङ्गहट्ठो. सम्पयोगनये पन अत्थि, एकुप्पादतादिलक्खणञ्हि सम्पयोगट्ठोति. एवमेत्थ यस्स एकधम्मेनपि सम्पयोगलक्खणं न युज्झति, तस्स पुच्छाय सङ्गहं कत्वापि नत्थीति पटिक्खेपो कतो. यस्स विप्पयोगलक्खणं युज्जति, तस्स विप्पयोगो दस्सितो. यानि पन पदानि सत्तसु विञ्ञाणधातूसु एकायपि अविप्पयुत्ते रूपेन निब्बानेन वा मिस्सकधम्मे दीपेन्ति, तानि सब्बथापि इध न युज्जन्तीति न गहितानि. तेसं इदमुद्दानं –

‘‘धम्मायतनं ¶ धम्मधातु, दुक्खसच्चञ्च जीवितं;

सळायतनं नामरूपं, चत्तारो च महाभवा.

‘‘जातिजरा च मरणं, तिकेस्वेकूनवीसति;

गोच्छकेसु च पञ्ञास, अट्ठ चूळन्तरे पदा.

‘‘महन्तरे पन्नरस, अट्ठारस ततो परे;

तेवीस पदसतं एतं, सम्पयोगे न लब्भती’’ति.

धम्मायतनञ्हि ¶ रूपनिब्बानमिस्सकत्ता तस्मिं अपरियापन्नेन विञ्ञाणेनपि न सक्का सम्पयुत्तन्ति ¶ वत्तुं. यस्मा पनेत्थ वेदनादयो विञ्ञाणेन सम्पयुत्ता, तस्मा विप्पयुत्तन्तिपि न सक्का वत्तुं. सेसेसुपि एसेव नयो. एवं सब्बत्थापि एतानि न युज्जन्तीति इध न गहितानि. सेसानि खन्धादीनि युज्जन्तीति तानि गहेत्वा एकेकवसेन च समोधानेन च पञ्हविस्सज्जनं कतं. तेसु पञ्हेसु, पठमे – एकेनायतनेनाति मनायतनेन. केहिचीति धम्मायतनधम्मधातुपरियापन्नेहि वेदनासञ्ञासङ्खारेहि.

२२९. दुतिये – तीहीति पुच्छितं पुच्छितं ठपेत्वा सेसेहि. केहिचि सम्पयुत्तोति वेदनाक्खन्धो सञ्ञासङ्खारेहि. इतरेपि अत्तानं ठपेत्वा इतरेहि. केहिचि विप्पयुत्तोति रूपनिब्बानेहि. एवं सब्बत्थ रूपस्स विप्पयोगे धम्मायतनधम्मधातूसु अरूपं, अरूपस्स विप्पयोगे रूपं दट्ठब्बं. ततियपञ्हो उत्तानत्थोव.

२३१. चतुत्थे – ‘कतिहि खन्धेही’तिआदिं अवत्वा सम्पयुत्तन्ति नत्थीति वुत्तं. तं पन खन्धादीनंयेव वसेन वेदितब्बं. परतोपि एवरूपेसु पञ्हेसु एसेव नयो. आदिपञ्हस्मिञ्हि सरूपतो दस्सेत्वा परतो पाळि संखित्ता. इमिना नयेन सब्बत्थ अत्थयोजना वेदितब्बा. यत्थ पन नातिपाकटा भविस्सति, तत्थ नं पाकटं कत्वाव गमिस्साम.

२३४. सोळसहि धातूहीति चक्खुविञ्ञाणधातु ताव अत्तानं ठपेत्वा छहि विञ्ञाणधातूहि, दसहि च रूपधातूहि. सेसासुपि एसेव नयो.

२३५. तीहि ¶ खन्धेहीति सङ्खारक्खन्धं ठपेत्वा सेसेहि. एकाय धातुयाति मनोविञ्ञाणधातुया. समुदयमग्गानञ्हि अञ्ञाय धातुया सम्पयोगो नत्थि. एकेन खन्धेनाति सङ्खारक्खन्धेन. एकेनायतनेनाति धम्मायतनेन. एकाय ¶ धातुयाति धम्मधातुया. एतेसु हि तं सच्चद्वयं केहिचि सम्पयुत्तं.

२३८. सुखिन्द्रियादिपञ्हे – तीहीति सञ्ञासङ्खारविञ्ञाणेहि. एकाय धातुयाति कायविञ्ञाणधातुया, मनोविञ्ञाणधातुया च. छहि धातूहीति कायविञ्ञाणधातुवज्जाहि.

२४५. रूपभवपञ्हे – सब्बेसम्पि अरूपक्खन्धानं अरूपायतनानञ्च अत्थिताय न केहिचीति ¶ वुत्तं. घानजिव्हाकायविञ्ञाणधातूनं पन नत्थिताय तीहि धातूहि विप्पयुत्तोति वुत्तं.

२५६. अधिमोक्खपञ्हे – द्वीहि धातूहीति मनोधातुमनोविञ्ञाणधातूहि. पन्नरसहीति सेसाहि दसहि रूपधातूहि, पञ्चहि च चक्खुविञ्ञाणादीहि.

२५७. कुसलपञ्हे – कुसलेहि चतुन्नम्पि खन्धानं गहितत्ता सम्पयोगो पटिक्खित्तो.

२५८. वेदनात्तिकपञ्हे – एकेन खन्धेनाति वेदनाक्खन्धेनेव. पन्नरसहीति चक्खुसोतघानजिव्हाविञ्ञाणधातुमनोधातूहि चेव रूपधातूहि च. एकादसहीति कायविञ्ञाणधातुया सद्धिं रूपधातूहि.

२६२. नेवविपाकनविपाकधम्मधम्मपञ्हे – पञ्चहीति चक्खुविञ्ञाणादीहि. अनुपादिन्नअनुपादानियपञ्हे – छहीति मनोविञ्ञाणधातुवज्जाहि. सवितक्कसविचारपञ्हे – पन्नरसहीति पञ्चहि विञ्ञाणेहि सद्धिं रूपधातूहि. अवितक्कविचारमत्तपञ्हे – एकेन खन्धेनातिआदि सङ्खारक्खन्धवसेनेव वेदितब्बं. दुतियज्झानविचारञ्हि ठपेत्वा सेसा अवितक्कविचारमत्ता नाम. पीतिं ठपेत्वा सेसा पीतिसहगता. तत्थ विचारो विचारेन, पीति च पीतिया न सम्पयुत्ताति सङ्खारक्खन्धधम्मायतनधम्मधातूसु केहिचि सम्पयुत्ता नाम. सोळसहीति धम्मधातुमनोविञ्ञाणधातुवज्जाहेव. अवितक्कअविचारपञ्हे ¶ ¶ – एकाय धातुयाति मनोधातुया. सुखसहगता उपेक्खासहगता च वेदनात्तिके वुत्ताव. दस्सनेनपहातब्बादयो कुसलसदिसाव.

२७१. परित्तारम्मणं विपाकधम्मसदिसं. एकाय धातुयाति धम्मधातुया. केहिचीति ये तत्थ परित्तारम्मणा न होन्ति, तेहि. धम्मधातु पन परित्तारम्मणानं छन्नं चित्तुप्पादानं वसेन चतूहि खन्धेहि सङ्गहितत्ता पठमपटिक्खेपमेव भजति. महग्गतारम्मणादयो कुसलसदिसाव.

२७३. अनुप्पन्नेसु – पञ्चहि धातूहीति चक्खुविञ्ञाणादीहि. तानि हि एकन्तेन उप्पादिधम्मभूतानेव, उप्पन्नकोट्ठासम्पि पन भजन्ति. पच्चुप्पन्नारम्मणादयो परित्तारम्मणसदिसाव ¶ . हेतुआदयो समुदयसदिसाव. सहेतुका चेव न च हेतूपि पीतिसहगतसदिसाव. तथा परामाससम्पयुत्ता. अनुपादिन्ना अनुप्पन्नसदिसाव. सेसं सब्बत्थ उत्तानत्थमेवाति.

सम्पयोगविप्पयोगपदवण्णना.

७. सत्तमनयो सम्पयुत्तेनविप्पयुत्तपदवण्णना

३०६. इदानि सम्पयुत्तेनविप्पयुत्तपदं भाजेतुं वेदनाक्खन्धेनातिआदि आरद्धं. तत्रिदं लक्खणं – इमस्मिञ्हि वारे पुच्छाय उद्धटपदेन ये धम्मा सम्पयुत्ता, तेहि ये धम्मा विप्पयुत्ता, तेसं खन्धादीहि विप्पयोगं पुच्छित्वा विस्सज्जनं कतं. तं पन रूपक्खन्धादीसु न युज्जति. रूपक्खन्धेन हि सम्पयुत्ता नाम नत्थि. तस्मा तञ्च अञ्ञानि च एवरूपानि पदानि इमस्मिं वारे न गहितानि. यानि पन पदानि धम्मधातुया ¶ सम्पयुत्ते धम्मे विञ्ञाणञ्च अञ्ञेन असम्मिस्सं दीपेन्ति, तानि इध गहितानि. तेसं इदमुद्दानं –

‘‘चत्तारो ¶ खन्धायतनञ्च एकं,

द्वे इन्द्रिया धातुपदानि सत्त;

तयो पटिच्चा अथ फस्ससत्तकं,

तिके तयो सत्त महन्तरे च.

‘‘एकं सवितक्कं, सविचारमेकं;

युत्तं उपेक्खाय च एकमेवा’’ति.

परियोसाने – खन्धा चतुरोतिआदिनापि अयमेवत्थो सङ्गहितो. तत्थ यानि पदानि सदिसविस्सज्जनानि, तानि उप्पटिपाटियापि समोधानेत्वा तत्थ वेदनाक्खन्धादिका पञ्हा कता. तेसु एवं खन्धादिविभागो वेदितब्बो. वेदनाक्खन्धादिपञ्हे ताव – एकेनाति मनायतनेन. सत्तहीति विञ्ञाणधातूहि. केहिचीति धम्मायतने वेदनादीहि. विञ्ञाणधातुपञ्हे ¶ – ते धम्मा न केहिचीति ते पुच्छाय उद्धटपदं विञ्ञाणधातुं ठपेत्वा सेसा छ विञ्ञाणधातुधम्मा, रूपं, निब्बानञ्च. तेहि सब्बेसं खन्धायतनानं सङ्गहितत्ता न केहिचि खन्धेहि आयतनेहि वा विप्पयुत्ता. एकाय धातुयाति या या पुच्छाय उद्धटा होति ताय ताय.

३०९. उपेक्खिन्द्रियपञ्हे – पञ्चहीति उपेक्खासम्पयुत्ताहि चक्खुविञ्ञाणधातुआदीहि. इमिना नयेन सब्बत्थ पुच्छाय उद्धटपदेनेव सद्धिं विप्पयुत्तानं वसेन अत्थो वेदितब्बोति.

सम्पयुत्तेनविप्पयुत्तपदवण्णना.

८. अट्ठमनयो विप्पयुत्तेनसम्पयुत्तपदवण्णना

३१७. इदानि विप्पयुत्तेनसम्पयुत्तपदं भाजेतुं रूपक्खन्धेनातिआदि आरद्धं. तत्थ सब्बापि पुच्छा मोघपुच्छाव ¶ . रूपक्खन्धेन हि विप्पयुत्ता नाम चत्तारो खन्धा, तेसं अञ्ञेहि सम्पयोगो नत्थि. वेदनाक्खन्धेन विप्पयुत्तं रूपं निब्बानञ्च, तस्स च केनचि सम्पयोगो नत्थि. एवं सब्बपदेसु. विप्पयुत्तानं पन सम्पयोगाभावो वेदितब्बो. इति पुच्छाय मोघत्ता सब्बविस्सज्जनेसु नत्थि नत्थिइच्चेव वुत्तन्ति.

विप्पयुत्तेनसम्पयुत्तपदवण्णना.

९. नवमनयो सम्पयुत्तेनसम्पयुत्तपदवण्णना

३१९. इदानि ¶ सम्पयुत्तेनसम्पयुत्तपदं भाजेतुं वेदनाक्खन्धेनातिआदि आरद्धं. तत्थ यं ¶ खन्धादिवसेन सम्पयुत्तं, पुन तस्सेव खन्धादीहि सम्पयोगं पुच्छित्वा विस्सज्जनं कतं. तं रूपेन वा रूपमिस्सकेहि वा सब्बरूपक्खन्धसङ्गाहकेहि वा पदेहि सद्धिं न युज्जति. रूपेन हि रूपमिस्सकेन वा अञ्ञेसं सम्पयोगो नत्थि. सब्बरूपक्खन्धसङ्गाहकेहि सब्बेसं सम्पयोगारहानं खन्धादीनं गहितत्ता अञ्ञंयेव नत्थि, यं तेन सह सम्पयोगं गच्छेय्य. तस्मा तथारूपानि पदानि इध न गहितानि. यानि पन पदानि रूपेन असम्मिस्सं अरूपेकदेसं दीपेन्ति, तानि इध गहितानि. तेसं इदमुद्दानं –

‘‘अरूपक्खन्धा चत्तारो, मनायतनमेव च;

विञ्ञाणधातुयो सत्त, द्वे सच्चा चुद्दसिन्द्रिया.

‘‘पच्चये द्वादस पदा, ततो उपरि सोळस;

तिकेसु अट्ठ गोच्छके, तेचत्तालीसमेव च.

‘‘महन्तरदुके सत्त, पदा पिट्ठिदुकेसु छ;

नवमस्स पदस्सेते, निद्देसे सङ्गहं गता’’ति.

सब्बपञ्हेसु पन ये धम्मा पुच्छाय उद्धटा, ते येहि सम्पयुत्ता होन्ति, तेसं वसेन खन्धादिभेदो वेदितब्बो ¶ . वेदनाक्खन्धेन हि इतरे तयो खन्धा सम्पयुत्ता, पुन तेहि वेदनाक्खन्धो सम्पयुत्तो. सो तेहि सञ्ञादीहि तीहि खन्धेहि, एकेन मनायतनेन, सत्तहि विञ्ञाणधातूहि, एकस्मिं धम्मायतने, धम्मधातुया च, केहिचि सञ्ञासङ्खारेहेव सम्पयुत्तो. एसेव नयो सब्बत्थाति.

सम्पयुत्तेनसम्पयुत्तपदवण्णना.

१०. दसमनयो विप्पयुत्तेनविप्पयुत्तपदवण्णना

३५३. इदानि ¶ विप्पयुत्तेनविप्पयुत्तपदं भाजेतुं रूपक्खन्धेनातिआदि आरद्धं. तत्थ ये सम्पयोगविप्पयोगपदनिद्देसे रूपक्खन्धादयो धम्मा उद्धटा, सब्बपुच्छासु तेयेव उद्धटा. सदिसविस्सज्जनानं पन एकतो गहितत्ता ¶ पदानि अञ्ञाय पटिपाटिया आगतानि. तत्थ यं पदं पुच्छाय उद्धटं, तं येहि धम्मेहि विप्पयुत्तं, तेसं वसेन खन्धादिविभागो वेदितब्बो. रूपक्खन्धेन हि वेदनादयो विप्पयुत्ता, तेहि च रूपक्खन्धो विप्पयुत्तो. निब्बानं पन सुखुमरूपगतिकमेव. सो रूपक्खन्धो चतूहि खन्धेहि, एकेन मनायतनेन सत्तहि विञ्ञाणधातूहि, धम्मायतनधम्मधातूसु, केहिचि वेदनादीहि धम्मेहेव विप्पयुत्तो. एसेव नयो सब्बत्थाति.

विप्पयुत्तेनविप्पयुत्तपदवण्णना.

११. एकादसमनयो सङ्गहितेनसम्पयुत्तविप्पयुत्तपदवण्णना

४०९. इदानि सङ्गहितेनसम्पयुत्तविप्पयुत्तपदं भाजेतुं समुदयसच्चेनातिआदि आरद्धं. तत्थ ये सङ्गहितेनसङ्गहितपदनिद्देसे समुदयसच्चादयोव धम्मा उद्धटा, सब्बपुच्छासु तेयेव उद्धटा. सदिसविस्सज्जनानं पन एकतो गहितत्ता पदानि अञ्ञाय पटिपाटिया आगतानि. तत्थ ये धम्मा पुच्छाय उद्धटपदेन खन्धादिसङ्गहेन सङ्गहिता, तेसं येहि सम्पयोगो वा विप्पयोगो वा होति, तेसं वसेन ¶ खन्धादिविभागो वेदितब्बो.

तत्रायं नयो – समुदयसच्चेन ताव सङ्खारक्खन्धपरियापन्ना धम्मा खन्धादिसङ्गहेन सङ्गहिता. ते च सेसेहि तीहि खन्धेहि, एकेन मनायतनेन, सत्तहि विञ्ञाणधातूहि, सङ्खारक्खन्धे धम्मायतनधम्मधातूसु च ठपेत्वा तण्हं सेसेहि सम्पयुत्तत्ता केहिचि सम्पयुत्ता नाम. एकेन पन रूपक्खन्धेन, दसहि रूपायतनेहि, रूपधातूहि च विप्पयुत्ता, एकस्मिं धम्मायतने ¶ धम्मधातुया च, रूपनिब्बानेहि विप्पयुत्तत्ता केहिचि विप्पयुत्ता नाम. इमिना उपायेन सब्बत्थ अत्थो वेदितब्बोति.

सङ्गहितेनसम्पयुत्तविप्पयुत्तपदवण्णना.

१२. द्वादसमनयो सम्पयुत्तेनसङ्गहितासङ्गहितपदवण्णना

४१७. इदानि ¶ सम्पयुत्तेनसङ्गहितासङ्गहितपदं भाजेतुं वेदनाक्खन्धेनातिआदि आरद्धं. तत्थ ये सम्पयुत्तेनसम्पयुत्तपदनिद्देसे वेदनाक्खन्धादयो धम्मा उद्धटा, सब्बपुच्छासु तेयेव उद्धटा. तत्थ ये धम्मा पुच्छाय उद्धटपदेन सम्पयुत्ता, तेसं येहि सङ्गहो वा असङ्गहो वा होति, तेसं वसेन खन्धादिभेदो वेदितब्बो.

तत्रायं नयो – वेदनाक्खन्धो हि सञ्ञादीहि सम्पयुत्तो. ते सञ्ञादयो तीहि सञ्ञादिक्खन्धेहि, द्वीहि धम्मायतनमनायतनेहि, धम्मधातुया चेव, सत्तहि च विञ्ञाणधातूहीति अट्ठहि धातूहि सङ्गहिता, सेसाहि खन्धायतनधातूहि असङ्गहिता. इमिना उपायेन सब्बत्थ अत्थो वेदितब्बोति.

सम्पयुत्तेनसङ्गहितासङ्गहितपदवण्णना.

१३. तेरसमनयो असङ्गहितेनसम्पयुत्तविप्पयुत्तपदवण्णना

४४८. इदानि असङ्गहितेनसम्पयुत्तविप्पयुत्तपदं ¶ भाजेतुं रूपक्खन्धेनातिआदि आरद्धं. तत्थ ये पञ्चमे असङ्गहितेनअसङ्गहितपदनिद्देसे रूपक्खन्धेन सदिसपञ्हा धम्मा, ये च अरूपभवेन सदिसा, तेयेव उद्धटा. सेसा पन न रुहन्तीति न उद्धटा. वेदनाक्खन्धेन हि ¶ खन्धादिवसेन पन रूपारूपधम्मा असङ्गहिता होन्ति. तेसञ्च सम्पयोगो नाम नत्थि. तस्मा यानि पदानि रुहन्ति, तानेव सदिसविस्सज्जनेहि सद्धिं समोधानेत्वा उद्धटानि. तत्थ ये धम्मा पुच्छाय उद्धटधम्मेहि खन्धादिवसेन असङ्गहिता, ते येहि सम्पयुत्ता च विप्पयुत्ता च, तेसं वसेन खन्धादिविभागो वेदितब्बो.

तत्रायं नयो – रूपक्खन्धेन ताव विञ्ञाणमेव तीहि सङ्गहेहि असङ्गहितं. तं वेदनादीहि तीहि खन्धेहि, धम्मायतनधम्मधातूसु च वेदनादीहेव सम्पयुत्तं. एकेन रूपक्खन्धेन, दसहि रूपायतनरूपधातूहि, धम्मायतनधम्मधातूसु ¶ च रूपनिब्बानधम्मेहि विप्पयुत्तं. तं सन्धाय ते धम्मा तीहि खन्धेहीतिआदि वुत्तं. इमिना नयेन सब्बत्थ अत्थो वेदितब्बोति.

असङ्गहितेनसम्पयुत्तविप्पयुत्तपदवण्णना.

१४. चुद्दसमनयो विप्पयुत्तेनसङ्गहितासङ्गहितपदवण्णना

४५६. इदानि विप्पयुत्तेनसङ्गहितासङ्गहितपदं भाजेतुं रूपक्खन्धेनातिआदि आरद्धं. तत्थ येसं पदानं विप्पयोगो न रुहति, तानि इमस्मिं वारे न गहितानि. कानि पन तानीति? धम्मायतनादीनि. धम्मायतनस्स हि खन्धादीसु एकेनापि विप्पयोगो न रुहति. धम्मधातुआदीसुपि एसेव नयो. तेसं इदमुद्दानं –

‘‘धम्मायतनं धम्मधातु, जीवितिन्द्रियमेव च;

नामरूपपदञ्चेव, सळायतनमेव च.

‘‘जातिआदित्तयं एकं, पदं वीसतिमे तिके;

तिकावसानिकं एकं, सत्त चूळन्तरे पदा.

‘‘दसेव ¶ गोच्छके होन्ति, महन्तरम्हि चुद्दस;

छ पदानि ततो उद्धं सब्बानिपि समासतो;

पदानि च न लब्भन्ति, चत्तालीसञ्च सत्त चा’’ति.

परियोसाने ¶ च – धम्मायतनं धम्मधातूति गाथापि इममेवत्थं दीपेतुं वुत्ता. इमानि पन ठपेत्वा सेसानि सब्बानिपि लब्भन्ति. तेसु खन्धादिविभागो वुत्तनयानुसारेनेव वेदितब्बोति.

विप्पयुत्तेनसङ्गहितासङ्गहितपदवण्णना.

निगमनकथा

एत्तावता ¶ च –

धातुप्पभेदकुसलो, यं धातुकथं तथागतो आह;

तस्सा नयमुखभेद-प्पकासनं निट्ठितं होति.

इमिना नयमुखभेद-प्पकासनेन हि विभाविना सक्का;

ञातुं सब्बेपि नया, सङ्खेपकथाव इति वुत्ता.

एकेकस्स पन सचे, पदस्स वित्थारमेव भासेय्यं;

वचनञ्च अतिविय बहुं, भवेय्य अत्थो च अविसेसो.

इति ऊनभाणवारद्वयाय, यं तन्तिया मया एतं;

कुरुना पत्तं पुञ्ञं, सुखाय तं होतु लोकस्साति.

धातुकथा-अट्ठकथा निट्ठिता.

नमो तस्स भगवतो अरहतो सम्मासम्बुद्धस्स

अभिधम्मपिटके

पुग्गलपञ्ञत्ति-अट्ठकथा

निपुणत्थं ¶ ¶ ¶ पकरणं, धातुभेदप्पकासनो;

सत्था धातुकथं नाम, देसयित्वा सुरालये.

अनन्तरं तस्स जिनो, पञ्ञत्तिभेददीपनं;

आह पुग्गलपञ्ञत्तिं, यं लोके अग्गपुग्गलो.

तस्सा संवण्णनोकासो, यस्मा दानि उपागतो;

तस्मा नं वण्णयिस्सामि, तं सुणाथ समाहिताति.

१. मातिकावण्णना

१. छ ¶ पञ्ञत्तियो – खन्धपञ्ञत्ति…पे… पुग्गलपञ्ञत्तीति अयं ताव पुग्गलपञ्ञत्तिया उद्देसो. तत्थ छाति गणनपरिच्छेदो. तेन ये धम्मे इध पञ्ञपेतुकामो तेसं गणनवसेन संखेपतो पञ्ञत्तिपरिच्छेदं दस्सेति. पञ्ञत्तियोति परिच्छिन्नधम्मनिदस्सनं. तत्थ ‘‘आचिक्खति देसेति पञ्ञपेति पट्ठपेती’’ति (सं. नि. २.२०) आगतट्ठाने पञ्ञापना दस्सना पकासना पञ्ञत्ति नाम. ‘‘सुपञ्ञत्तं मञ्चपीठ’’न्ति (पारा. २६९) आगतट्ठाने ठपना निक्खिपना पञ्ञत्ति नाम. इध उभयम्पि वट्टति. छ पञ्ञत्तियोति हि छ पञ्ञापना, छ दस्सना पकासनातिपि; छ ठपना निक्खिपनातिपि इध अधिप्पेतमेव. नामपञ्ञत्ति हि ते ते धम्मे दस्सेतिपि, तेन तेन कोट्ठासेन ठपेतिपि.

खन्धपञ्ञत्तीतिआदि पन संखेपतो तासं पञ्ञत्तीनं सरूपदस्सनं. तत्थ खन्धानं ‘खन्धा’ति पञ्ञापना दस्सना पकासना ठपना निक्खिपना खन्धपञ्ञत्ति नाम. आयतनानं आयतनानीति, धातूनं धातुयोति, सच्चानं सच्चानीति, इन्द्रियानं इन्द्रियानीति, पुग्गलानं पुग्गलाति पञ्ञापना दस्सना पकासना ठपना निक्खिपना पुग्गलपञ्ञत्ति नाम.

पाळिमुत्तकेन ¶ पन अट्ठकथानयेन अपरापि छ पञ्ञत्तियो – विज्जमानपञ्ञत्ति, अविज्जमानपञ्ञत्ति, विज्जमानेन ¶ अविज्जमानपञ्ञत्ति, अविज्जमानेन विज्जमानपञ्ञत्ति, विज्जमानेन विज्जमानपञ्ञत्ति, अविज्जमानेन अविज्जमानपञ्ञत्तीति. तत्थ कुसलाकुसलस्सेव सच्चिकट्ठपरमत्थवसेन विज्जमानस्स सतो सम्भूतस्स धम्मस्स पञ्ञापना विज्जमानपञ्ञत्ति नाम. तथा अविज्जमानस्स लोकनिरुत्तिमत्तसिद्धस्स इत्थिपुरिसादिकस्स पञ्ञापना अविज्जमानपञ्ञत्ति नाम. सब्बाकारेनपि अनुपलब्भनेय्यस्स वाचावत्थुमत्तस्सेव पञ्चमसच्चादिकस्स तित्थियानं अणुपकतिपुरिसादिकस्स वा पञ्ञापनापि अविज्जमानपञ्ञत्तियेव. सा पन सासनावचरा न होतीति इध न गहिता. इति इमेसं विज्जमानाविज्जमानानं विकप्पनवसेन सेसा वेदितब्बा. ‘तेविज्जो’, ‘छळभिञ्ञो’तिआदीसु हि तिस्सो विज्जा छ अभिञ्ञा च विज्जमाना, पुग्गलो अविज्जमानो. तस्मा तिस्सो विज्जा अस्साति तेविज्जो, छ अभिञ्ञा अस्साति छळभिञ्ञोति एवं विज्जमानेन अविज्जमानस्स पञ्ञापनतो एवरूपा विज्जमानेन अविज्जमानपञ्ञत्ति नाम. ‘इत्थिरूपं’, ‘पुरिसरूप’न्तिआदीसु ¶ पन इत्थिपुरिसा अविज्जमाना, रूपं विज्जमानं. तस्मा इत्थिया रूपं इत्थिरूपं, पुरिसस्स रूपं पुरिसरूपन्ति एवं अविज्जमानेन विज्जमानस्स पञ्ञापनतो एवरूपा अविज्जमानेन विज्जमानपञ्ञत्ति नाम. चक्खुसम्फस्सो, सोतसम्फस्सोतिआदीसु चक्खुसोतादयोपि फस्सोपि विज्जमानोयेव. तस्मा चक्खुम्हि सम्फस्सो, चक्खुतो जातो सम्फस्सो, चक्खुस्स वा फलभूतो सम्फस्सो चक्खुसम्फस्सोति एवं विज्जमानेन विज्जमानस्स पञ्ञापनतो एवरूपा विज्जमानेन विज्जमानपञ्ञत्ति नाम. खत्तियपुत्तो, ब्राह्मणपुत्तो, सेट्ठिपुत्तोतिआदीसु खत्तियादयोपि अविज्जमाना, पुत्तोपि. तस्मा खत्तियस्स पुत्तो खत्तियपुत्तोति एवं अविज्जमानेन अविज्जमानस्स पञ्ञापनतो एवरूपा अविज्जमानेन अविज्जमानपञ्ञत्ति नाम. तासु इमस्मिं पकरणे पुरिमा तिस्सोव पञ्ञत्तियो लब्भन्ति. ‘‘खन्धपञ्ञत्ति…पे… इन्द्रियपञ्ञत्ती’’ति इमस्मिञ्हि ¶ ठाने विज्जमानस्सेव पञ्ञापितत्ता विज्जमानपञ्ञत्ति लब्भति. ‘‘पुग्गलपञ्ञत्ती’’ति पदे अविज्जमानपञ्ञत्ति. परतो पन ‘तेविज्जो’, ‘छळभिञ्ञो’तिआदीसु विज्जमानेन अविज्जमानपञ्ञत्ति लब्भतीति.

अट्ठकथामुत्तकेन पन आचरियनयेन अपरापि छ पञ्ञत्तियो – उपादापञ्ञत्ति, उपनिधापञ्ञत्ति, समोधानपञ्ञत्ति, उपनिक्खित्तपञ्ञत्ति, तज्जापञ्ञत्ति, सन्ततिपञ्ञत्तीति ¶ . तत्थ यो रूपवेदनादीहि एकत्तेन वा अञ्ञत्तेन वा रूपवेदनादयो विय सच्चिकट्ठपरमत्थेन अनुपलब्भसभावोपि रूपवेदनादिभेदे खन्धे उपादाय निस्साय कारणं कत्वा सम्मतो सत्तो. तानि तानि अङ्गानि उपादाय रथो गेहं मुट्ठि उद्धनन्ति च; ते तेयेव रूपादयो उपादाय घटो पटो; चन्दसूरियपरिवत्तादयो उपादाय कालो, दिसा; तं तं भूतनिमित्तञ्चेव भावनानिसंसञ्च उपादाय निस्साय कारणं कत्वा सम्मतं तेन तेनाकारेन उपट्ठितं उग्गहनिमित्तं पटिभागनिमित्तन्ति अयं एवरूपा उपादापञ्ञत्ति नाम. पञ्ञपेतब्बट्ठेन चेसा पञ्ञत्ति नाम, न पञ्ञापनट्ठेन. या पन तस्सत्थस्स पञ्ञापना, अयं अविज्जमानपञ्ञत्तियेव.

या पठमदुतियादीनि उपनिधाय दुतियं ततियन्तिआदिका, अञ्ञमञ्ञञ्च उपनिधाय दीघं रस्सं, दूरं, सन्तिकन्तिआदिका पञ्ञापना; अयं उपनिधापञ्ञत्ति नाम. अपिचेसा उपनिधापञ्ञत्ति – तदञ्ञापेक्खूपनिधा, हत्थगतूपनिधा, सम्पयुत्तूपनिधा, समारोपितूपनिधा, अविदूरगतूपनिधा ¶ , पटिभागूपनिधा, तब्बहुलूपनिधा, तब्बिसिट्ठूपनिधातिआदिना भेदेन अनेकप्पकारा.

तत्थ दुतियं ततियन्तिआदिकाव तदञ्ञं अपेक्खित्वा वुत्तताय तदञ्ञापेक्खूपनिधा नाम. छत्तपाणि, सत्थपाणीतिआदिका हत्थगतं उपनिधाय वुत्तताय ¶ हत्थगतूपनिधा नाम. कुण्डली, सिखरी, किरिटीतिआदिका सम्पयुत्तं उपनिधाय वुत्तताय सम्पयुत्तूपनिधा नाम. धञ्ञसकटं, सप्पिकुम्भोतिआदिका समारोपितं उपनिधाय वुत्तताय समारोपितूपनिधा नाम. इन्दसालगुहा, पियङ्गुगुहा, सेरीसकन्तिआदिका अविदूरगतं उपनिधाय वुत्तताय अविदूरगतूपनिधा नाम. सुवण्णवण्णो, उसभगामीतिआदिका पटिभागं उपनिधाय वुत्तताय पटिभागूपनिधा नाम. पदुमस्सरो, ब्राह्मणगामोतिआदिका तब्बहुलं उपनिधाय वुत्तताय तब्बहुलूपनिधा नाम. मणिकटकं, वजिरकटकन्तिआदिका तब्बिसिट्ठं उपनिधाय वुत्तताय तब्बिसिट्ठूपनिधा नाम.

या पन तेसं तेसं समोधानमपेक्खित्वा तिदण्डं, अट्ठपदं, धञ्ञरासि, पुप्फरासीतिआदिका पञ्ञापना, अयं समोधानपञ्ञत्ति नाम. या पुरिमस्स पुरिमस्स उपनिक्खिपित्वा द्वे, तीणि, चत्तारीतिआदिका पञ्ञापना, अयं ¶ उपनिक्खित्तपञ्ञत्ति नाम. या तं तं धम्मसभावं अपेक्खित्वा पथवी, तेजो, कक्खळता, उण्हतातिआदिका पञ्ञापना, अयं तज्जापञ्ञत्ति नाम. या पन सन्ततिविच्छेदाभावं अपेक्खित्वा आसीतिको, नावुतिकोतिआदिका पञ्ञापना, अयं सन्ततिपञ्ञत्ति नाम. एतासु पन तज्जापञ्ञत्ति विज्जमानपञ्ञत्तियेव. सेसा अविज्जमानपक्खञ्चेव, अविज्जमानेन अविज्जमानपक्खञ्च भजन्ति.

अट्ठकथामुत्तकेन आचरियनयेनेव अपरापि छ पञ्ञत्तियो – किच्चपञ्ञत्ति, सण्ठानपञ्ञत्ति, लिङ्गपञ्ञत्ति, भूमिपञ्ञत्ति, पच्चत्तपञ्ञत्ति, असङ्खतपञ्ञत्तीति. तत्थ भाणको, धम्मकथिकोतिआदिका किच्चवसेन पञ्ञापना किच्चपञ्ञत्ति नाम. किसो, थूलो, परिमण्डलो, चतुरस्सोतिआदिका सण्ठानवसेन पञ्ञापना सण्ठानपञ्ञत्ति ¶ नाम. इत्थी, पुरिसोतिआदिका लिङ्गवसेन पञ्ञापना लिङ्गपञ्ञति नाम. कामावचरा, रूपावचरा, अरूपावचरा, कोसलका, माधुरातिआदिका भूमिवसेन पञ्ञापना भूमिपञ्ञत्ति नाम. तिस्सो ¶ , नागो, सुमनोतिआदिका पच्चत्तनामकरणमत्तवसेन पञ्ञापना पच्चत्तपञ्ञत्ति नाम. निरोधो, निब्बानन्तिआदिका असङ्खतधम्मस्स पञ्ञापना असङ्खतपञ्ञत्ति नाम. तत्थ एकच्चा भूमिपञ्ञत्ति असङ्खतपञ्ञत्ति च विज्जमानपञ्ञत्तियेव, किच्चपञ्ञत्ति विज्जमानेन अविज्जमानपक्खं भजति. सेसा अविज्जमानपञ्ञत्तियो नाम.

२. इदानि यासं पञ्ञत्तीनं उद्देसवारे सङ्खेपतो सरूपदस्सनं कतं, सङ्खेपतोयेव ताव तासं वत्थुं विभजित्वा दस्सनवसेन ता दस्सेतुं कित्तावतातिआदिमाह. तत्थ पुच्छाय ताव एवमत्थो वेदितब्बो – या अयं खन्धानं ‘खन्धा’ति पञ्ञापना, दस्सना, ठपना, सा कित्तकेन होतीति कथेतुकम्यतापुच्छा. परतो कित्तावता आयतनानन्तिआदीसुपि एसेव नयो. विस्सज्जनेपि एवमत्थो वेदितब्बो – यत्तकेन पञ्ञापनेन सङ्खेपतो पञ्चक्खन्धाति वा पभेदतो ‘‘रूपक्खन्धो…पे… विञ्ञाणक्खन्धो’’ति वा; तत्रापि रूपक्खन्धो कामावचरो, सेसा चतुभूमिकाति वा एवरूपं पञ्ञापनं होति; एत्तकेन खन्धानं ‘खन्धा’ति पञ्ञत्ति होति.

३. तथा यत्तकेन पञ्ञापनेन सङ्खेपतो द्वादसायतनानीति वा, पभेदतो ‘‘चक्खायतनं…पे… धम्मायतन’’न्ति वा; तत्रापि दसायतना कामावचरा ¶ , द्वायतना चतुभूमिकाति वा, एवरूपं पञ्ञापनं होति; एत्तकेन आयतनानं आयतनानीति पञ्ञत्ति होति.

४. यत्तकेन पञ्ञापनेन सङ्खेपतो अट्ठारस धातुयोति वा ¶ , पभेदतो ‘‘चक्खुधातु…पे… मनोविञ्ञाणधातू’’ति वा; तत्रापि सोळस धातुयो कामावचरा, द्वे धातुयो चतुभूमिकाति वा एवरूपं पञ्ञापनं होति; एत्तकेन धातूनं धातूति पञ्ञत्ति होति.

५. यत्तकेन पञ्ञापनेन सङ्खेपतो चत्तारि सच्चानीति वा, पभेदतो ‘‘दुक्खसच्चं…पे… निरोधसच्च’’न्ति वा; तत्रापि द्वे सच्चा लोकिया, द्वे सच्चा लोकुत्तराति वा एवरूपं पञ्ञापनं होति; एत्तकेन सच्चानं ‘सच्चानी’ति पञ्ञत्ति होति.

६. यत्तकेन पञ्ञापनेन सङ्खेपतो बावीसतिन्द्रियानीति वा, पभेदतो ‘‘चक्खुन्द्रियं…पे… अञ्ञाताविन्द्रिय’’न्ति वा; तत्रापि दसिन्द्रियानि कामावचरानि, नविन्द्रियानि ¶ मिस्सकानि, तीणि इन्द्रियानि लोकुत्तरानीति वा एवरूपं पञ्ञापनं होति; एत्तकेन इन्द्रियानं इन्द्रियानीति पञ्ञत्ति होति. एत्तावता सङ्खेपतो वत्थुं विभजित्वा दस्सनवसेन पञ्च पञ्ञत्तियो दस्सिता होन्ति.

७. इदानि वित्थारतो वत्थुं विभजित्वा दस्सनवसेन पुग्गलपञ्ञत्तिं दस्सेतुं समयविमुत्तो असमयविमुत्तोतिआदिमाह. सम्मासम्बुद्धेन हि तिले विसारयमानेन विय, वाके हीरयमानेन विय च, हेट्ठा विभङ्गप्पकरणे इमासं पञ्चन्नं पञ्ञत्तीनं वत्थुभूता खन्धादयो निप्पदेसेन कथिताति तेन ते इध एकदेसेनेव कथेसि. छट्ठा पुग्गलपञ्ञत्ति हेट्ठा अकथिताव. इधापि उद्देसवारे एकदेसेनेव कथिता; तस्मा तं वित्थारतो कथेतुकामो समयविमुत्तो असमयविमुत्तोति एककतो पट्ठाय याव दसका मातिकं ठपेसीति.

मातिकावण्णना.

२. निद्देसवण्णना

१. एककनिद्देसवण्णना

१. इदानि ¶ ¶ यथाठपितं मातिकं आदितो पट्ठाय विभजित्वा दस्सेतुं – कतमो च पुग्गलो समयविमुत्तोतिआदिमाह. तत्थ इधाति इमस्मिं सत्तलोके. एकच्चो पुग्गलोति एको पुग्गलो. कालेन कालन्ति एत्थ भुम्मवसेन अत्थो वेदितब्बो. एकेकस्मिं कालेति वुत्तं होति. समयेन समयन्ति इदं पुरिमस्सेव वेवचनं. अट्ठ विमोक्खेति रूपावचरारूपावचरअट्ठसमापत्तियो. तासञ्हि पच्चनीकधम्मेहि विमुच्चनतो विमोक्खोति नामं. कायेनाति विमोक्खसहजातेन नामकायेन. फुसित्वा विहरतीति पटिलभित्वा इरियति. कतमस्मिं पनेस काले विमोक्खे फुसित्वा विहरतीति? समापत्तिं समापज्जितुकामस्स हि कालो नाम अत्थि, अकालो नाम अत्थि. तत्थ पातोव सरीरपटिजग्गनकालो, वत्तकरणकालो च समापज्जनस्स अकालो नाम. सरीरं पन पटिजग्गित्वा वत्तं कत्वा वसनट्ठानं ¶ पविसित्वा निसिन्नस्स याव पिण्डाय गमनकालो नागच्छति, एतस्मिं अन्तरे समापज्जनस्स कालो नाम.

पिण्डाय गमनकालं पन सल्लक्खेत्वा निक्खन्तस्स चेतियवन्दनकालो, भिक्खुसङ्घपरिवुतस्स वितक्कमाळके ठानकालो पिण्डाय गमनकालो गामे चरणकालो; आसनसालाय यागुपानकालो वत्तकरणकालोति अयम्पि समापज्जनस्स अकालो नाम. आसनसालाय पन विवित्ते ओकासे सति याव भत्तकालो नागच्छति, एतस्मिम्पि अन्तरे समापज्जनस्स कालो नाम. भत्तं पन भुञ्जनकालो, विहारगमनकालो, पत्तचीवरपटिसामनकालो, दिवावत्तकरणकालो, परिपुच्छादानकालोति अयम्पि समापज्जनस्स अकालो नाम. यो अकालो, स्वेव असमयो. तं सब्बम्पि ठपेत्वा अवसेसे काले काले, समये समये वुत्तप्पकारे अट्ठ ¶ विमोक्खे सहजातनामकायेन पटिलभित्वा विहरन्तो, ‘‘इधेकच्चो पुग्गलो…पे… विहरती’’ति वुच्चति.

अपिचेस ¶ सफस्सकेहि सहजातनामधम्मेहि सहजातधम्मे फुसतियेव नाम, उपचारेन अप्पनं फुसतियेव नाम. पुरिमाय अप्पनाय अपरं अप्पनं फुसतियेव. येन हि सद्धिं ये धम्मा सहजाता, तेन ते पटिलद्धा नाम होन्ति. फस्सेनापि फुट्ठायेव नाम होन्ति. उपचारम्पि अप्पनाय पटिलाभकारणमेव, तथा पुरिमा अप्पना अपरअप्पनाय. तत्रास्स एवं सहजातेहि सहजातानं फुसना वेदितब्बा – पठमज्झानञ्हि वितक्कादीहि पञ्चङ्गिकं. तस्मिं ठपेत्वा तानि अङ्गानि सेसा अतिरेकपण्णासधम्मा चत्तारो खन्धा नाम होन्ति. तेन नामकायेन पठमज्झानसमापत्तिविमोक्खं फुसित्वा पटिलभित्वा विहरति. दुतियं झानं पीतिसुखचित्तेकग्गताहि तिवङ्गिकं, ततियं सुखचित्तेकग्गताहि दुवङ्गिकं, चतुत्थं उपेक्खाचित्तेकग्गताहि दुवङ्गिकं, तथा आकासानञ्चायतनं…पे… नेवसञ्ञानासञ्ञायतनञ्च. तत्थ ठपेत्वा तानि अङ्गानि सेसा अतिरेकपण्णासधम्मा चत्तारो खन्धा नाम होन्ति. तेन नामकायेन नेवसञ्ञानासञ्ञायतनसमापत्तिविमोक्खं फुसित्वा पटिलभित्वा विहरति.

पञ्ञाय चस्स दिस्वाति विपस्सनापञ्ञाय सङ्खारगतं, मग्गपञ्ञाय चतुसच्चधम्मे पस्सित्वा. एकच्चे आसवा परिक्खीणा होन्तीति उपड्ढुपड्ढा पठममग्गादिवज्झा आसवा परिक्खीणा होन्ति. अयं वुच्चति पुग्गलो समयविमुत्तोति एत्थ अट्ठसमापत्तिलाभी पुथुज्जनो तेन ¶ नामकायेन फुसित्वा विहरतीति ¶ वत्तुं वट्टति. पाळियं पन ‘‘एकच्चे आसवा परिक्खीणा’’ति वुत्तं. पुथुज्जनस्स च खीणा आसवा नाम नत्थि, तस्मा सो न गहितो. अट्ठसमापत्तिलाभी खीणासवोपि तेन नामकायेन फुसित्वा विहरतीति वत्तुं वट्टति. तस्स पन अपरिक्खीणासवा नाम नत्थि, तस्मा सोपि न गहितो. समयविमुत्तोति पन तिण्णं सोतापन्नसकदागामिअनागामीनंयेवेतं नामन्ति वेदितब्बं.

२. असमयविमुत्तनिद्देसे – पुरिमसदिसं वुत्तनयेनेव वेदितब्बं. असमयविमुत्तोति पनेत्थ सुक्खविपस्सकखीणासवस्सेतं नामं. सुक्खविपस्सका पन सोतापन्नसकदागामिअनागामिनो अट्ठसमापत्तिलाभिनो च खीणासवा पुथुज्जना च इमस्मिं दुके न लब्भन्ति, दुकमुत्तकपुग्गला ¶ नाम होन्ति. तस्मा सत्था अत्तनो बुद्धसुबुद्धताय हेट्ठा गहिते च अग्गहिते च सङ्कड्ढित्वा सद्धिं पिट्ठिवट्टकेहि तन्तिं आरोपेन्तो सब्बेपि अरियपुग्गलातिआदिमाह. तत्थ अरिये विमोक्खेति किलेसेहि आरकत्ता अरियेति सङ्खं गते लोकुत्तरविमोक्खे. इदं वुत्तं होति – बाहिरानञ्हि अट्ठन्नं समापत्तीनं समापज्जन्तस्स समयोपि अत्थि असमयोपि. मग्गविमोक्खेन विमुच्चनस्स समयो वा असमयो वा नत्थि. यस्स सद्धा बलवती, विपस्सना च आरद्धा, तस्स गच्छन्तस्स तिट्ठन्तस्स निसीदन्तस्स निपज्जन्तस्स खादन्तस्स भुञ्जन्तस्स मग्गफलपटिवेधो नाम न होतीति नत्थि. इति मग्गविमोक्खेन विमुच्चनस्स समयो वा असमयो वा नत्थीति हेट्ठा गहिते च अग्गहिते च सङ्कड्ढित्वा इमं पिट्ठिवट्टकं तन्तिं आरोपेसि धम्मराजा. समापत्तिलाभी पुथुज्जनो इमायपि तन्तिया अग्गहितोव. भजापियमानो पन ¶ समापत्तिविक्खम्भितानं किलेसानं वसेन समयविमुत्तभावं भजेय्य.

३. कुप्पधम्माकुप्पधम्मनिद्देसेसु – यस्स अधिगतो समापत्तिधम्मो कुप्पति नस्सति, सो कुप्पधम्मो. रूपसहगतानन्ति रूपनिमित्तसङ्खातेन रूपेन सहगतानं. तेन सद्धिं पवत्तानं न विना रूपारम्मणानं चतुन्नं रूपावचरज्झानानन्ति अत्थो. अरूपसहगतानन्ति रूपतो अञ्ञं, न रूपन्ति अरूपं. अरूपेन सहगतानं तेन सद्धिं पवत्तानं न विना अरूपारम्मणानं चतुन्नं अरूपावचरज्झानानन्ति अत्थो. न निकामलाभीति पञ्चहाकारेहि अचिण्णवसिताय इच्छिताकारेन अलद्धत्ता न निकामलाभी. अप्पगुणसमापत्तिकोति अत्थो. न अकिच्छलाभीति किच्छलाभी दुक्खलाभी. यो आगमनम्हि किलेसे विक्खम्भेन्तो उपचारं पापेन्तो ¶ अप्पनं पापेन्तो चित्तमञ्जूसं लभन्तो दुक्खेन किच्छेन ससङ्खारेन सप्पयोगेन किलमन्तो तं सम्पदं पापुणितुं सक्कोति, सो न अकिच्छलाभी नाम. न अकसिरलाभीति अविपुललाभी. समापत्तिं अप्पेत्वा अद्धानं फरितुं न सक्कोति. एकं द्वे चित्तवारे वत्तेत्वा सहसाव वुट्ठातीति अत्थो.

यत्थिच्छकन्ति यस्मिं ओकासे समापत्तिं अप्पेत्वा निसीदितुं इच्छति. यदिच्छकन्ति कसिणज्झानं वा आनापानज्झानं वा ब्रह्मविहारज्झानं वा असुभज्झानं ¶ वाति यं यं समापत्तिं अप्पेत्वा निसीदितुं इच्छति. यावतिच्छकन्ति अद्धानपरिच्छेदेन यत्तकं कालं इच्छति. इदं वुत्तं होति – यत्थ यत्थ यं यं समापत्तिं यत्तकं अद्धानं समापज्जितुम्पि वुट्ठातुम्पि इच्छति, तत्थ तत्थ तं तं समापत्तिं तत्तकं अद्धानं समापज्जितुम्पि वुट्ठातुम्पि न सक्कोति. चन्दं वा सूरियं वा उल्लोकेत्वा ‘इमस्मिं ¶ चन्दे वा सूरिये वा एत्तकं ठानं गते वुट्ठहिस्सामी’ति परिच्छिन्दित्वा झानं समापन्नो यथापरिच्छेदेन वुट्ठातुं न सक्कोति, अन्तराव वुट्ठाति; समापत्तिया अप्पगुणतायाति.

पमादमागम्माति पमादं पटिच्च. अयं वुच्चतीति अयं एवंविधो पुग्गलो कुप्पधम्मोति वुच्चति. इदं पन अट्ठसमापत्तिलाभिनो पुथुज्जनस्स सोतापन्नस्स सकदागामिनोति तिण्णं पुग्गलानं नामं. एतेसञ्हि समाधिपारिबन्धका विपस्सनापारिबन्धका च धम्मा न सुविक्खम्भिता, न सुविक्खालिता, तेन तेसं समापत्ति नस्सति परिहायति. सा च खो नेव सीलभेदेन, नापत्तिवीतिक्कमेन. न गरुकमोक्खधम्मो पनेस अप्पमत्तकेनपि किच्चकरणीयेन वा वत्तभेदमत्तकेन वा नस्सति.

तत्रिदं वत्थु – एको किर थेरो समापत्तिं वळञ्जेति. तस्मिं पिण्डाय गामं पविट्ठे दारका परिवेणे कीळित्वा पक्कमिंसु. थेरो आगन्त्वा ‘परिवेणं सम्मज्जितब्ब’न्ति चिन्तेत्वा असम्मज्जित्वा विहारं पविसित्वा ‘समापत्तिं अप्पेस्सामी’ति निसीदि. सो अप्पेतुं असक्कोन्तो, ‘किं नु खो आवरण’न्ति सीलं आवज्जन्तो अप्पमत्तकम्पि वीतिक्कमं अदिस्वा ‘वत्तभेदो नु खो अत्थी’ति ओलोकेन्तो परिवेणस्स असम्मट्ठभावं ञत्वा सम्मज्जित्वा पविसित्वा निसीदन्तो समापत्तिं अप्पेन्तोव निसीदि.

४. अकुप्पधम्मनिद्देसो ¶ वुत्तपटिपक्खवसेनेव वेदितब्बो. अकुप्पधम्मोति इदं पन अट्ठसमापत्तिलाभिनो अनागामिस्स चेव खीणासवस्स चाति द्विन्नं पुग्गलानं नामं. तेसञ्हि समाधिपारिबन्धका विपस्सनापारिबन्धका च धम्मा सुविक्खम्भिता सुविक्खालिता; तेन तेसं ¶ भस्ससङ्गणिकारामादिकिच्चेन वा अञ्ञेन वा येन केनचि अत्तनो अनुरूपेन पमादेन वीतिनामेन्तानम्पि समापत्ति न कुप्पति, न नस्सति. सुक्खविपस्सका पन सोतापन्नसकदागामिअनागामिखीणासवा इमस्मिं दुके ¶ न लब्भन्ति; दुकमुत्तकपुग्गला नाम होन्ति. तस्मा सत्था अत्तनो बुद्धसुबुद्धताय हेट्ठा गहिते च अग्गहिते च सङ्कड्ढित्वा इमस्मिम्पि दुके सद्धिं पिट्ठिवट्टकेहि तन्तिं आरोपेन्तो सब्बेपि अरियपुग्गलातिआदिमाह. अट्ठन्नञ्हि समापत्तीनं कुप्पनं नस्सनं भवेय्य, लोकुत्तरधम्मस्स पन सकिं पटिविद्धस्स कुप्पनं नस्सनं नाम नत्थि, तं सन्धायेतं वुत्तं.

५. परिहानधम्मापरिहानधम्मनिद्देसापि कुप्पधम्माकुप्पधम्मनिद्देसवसेनेव वेदितब्बा. केवलञ्हि इध पुग्गलस्स पमादं पटिच्च धम्मानं परिहानम्पि अपरिहानम्पि गहितन्ति इदं परियायदेसनामत्तमेव नानं. सेसं सब्बत्थ तादिसमेव.

७. चेतनाभब्बनिद्देसे – चेतनाभब्बोति चेतनाय अपरिहानिं आपज्जितुं भब्बो. सचे अनुसञ्चेतेतीति, सचे समापज्जति. समापत्तिञ्हि समापज्जन्तो अनुसञ्चेतेति नाम. सो न परिहायति, इतरो परिहायति.

८. अनुरक्खणाभब्बनिद्देसे – अनुरक्खणाभब्बोति अनुरक्खणाय अपरिहानिं आपज्जितुं भब्बो. सचे अनुरक्खतीति सचे अनुपकारधम्मे पहाय उपकारधम्मे सेवन्तो समापज्जति. एवञ्हि पटिपज्जन्तो अनुरक्खति नाम. सो न परिहायति, इतरो परिहायति.

इमे द्वेपि समापत्तिं ठपेतुं थावरं कातुं पटिबला. चेतनाभब्बतो पन अनुरक्खणाभब्बोव बलवतरो. चेतनाभब्बो हि उपकारानुपकारे धम्मे न जानाति. अजानन्तो उपकारधम्मे नुदति नीहरति, अनुपकारधम्मे सेवति. सो ते सेवन्तो समापत्तितो परिहायति ¶ . अनुरक्खणाभब्बो उपकारानुपकारे धम्मे जानाति. जानन्तो अनुपकारधम्मे ¶ नुदति नीहरति, उपकारधम्मे सेवति. सो ते सेवन्तो समापत्तितो न परिहायति.

यथा हि द्वे खेत्तपाला एको पण्डुरोगेन सरोगो अक्खमो सीतादीनं, एको अरोगो सीतादीनं सहो. सरोगो हेट्ठाकुटिं न ओतरति, रत्तारक्खं दिवारक्खं विजहति. तस्स दिवा सुकमोरादयो खेत्तं ओतरित्वा सालिसीसं खादन्ति, रत्तिं मिगसूकरादयो पविसित्वा खलं ¶ तच्छि तं विय छेत्वा गच्छन्ति. सो अत्तनो पमत्तकारणा पुन बीजमत्तम्पि न लभति. इतरो रत्तारक्खं दिवारक्खं न विजहति. सो अत्तनो अप्पमत्तकारणा एककरीसतो चत्तारिपि अट्ठपि सकटानि लभति.

तत्थ सरोगखेत्तपालो विय चेतनाभब्बो, अरोगो विय अनुरक्खणाभब्बो दट्ठब्बो. सरोगस्स अत्तनो पमादेन पुन बीजमत्तस्सपि अलभनं विय चेतनाभब्बस्स उपकारानुपकारे धम्मे अजानित्वा उपकारे पहाय अनुपकारे सेवन्तस्स समापत्तिया परिहानं. इतरस्स अत्तनो अप्पमादेन एककरीसमत्ततो चतुअट्ठसकटउद्धरणं विय अनुरक्खणाभब्बस्स उपकारानुपकारे धम्मे जानित्वा अनुपकारे पहाय उपकारे सेवन्तस्स समापत्तिया अपरिहानं वेदितब्बं. एवं चेतनाभब्बतो अनुरक्खणाभब्बोव समापत्तिं थावरं कातुं बलवतरोति वेदितब्बो.

९. पुथुज्जननिद्देसे – तीणि संयोजनानीति दिट्ठिसंयोजनसीलब्बतपरामाससंयोजनविचिकिच्छासंयोजनानि. एतानि हि फलक्खणे पहीनानि नाम होन्ति. अयं पन फलक्खणेपि न होतीति दस्सेति. तेसं धम्मानन्ति तेसं संयोजनधम्मानं. मग्गक्खणस्मिञ्हि तेसं पहानाय पटिपन्नो नाम होति. अयं पन मग्गक्खणेपि न होति. एत्तावता विस्सट्ठकम्मट्ठानो थूलबालपुथुज्जनोव इध कथितोति वेदितब्बो.

१०. गोत्रभुनिद्देसे ¶ – येसं धम्मानन्ति येसं गोत्रभुञाणेन सद्धिं उप्पन्नानं परोपण्णासकुसलधम्मानं. अरियधम्मस्साति लोकुत्तरमग्गस्स. अवक्कन्ति होतीति ओक्कन्ति निब्बत्ति पातुभावो होति. अयं वुच्चतीति अयं निब्बानारम्मणेन ञाणेन सब्बं पुथुज्जनसङ्खं पुथुज्जनगोत्तं ¶ पुथुज्जनमण्डलं पुथुज्जनपञ्ञत्तिं अतिक्कमित्वा अरियसङ्खं अरियगोत्तं अरियमण्डलं अरियपञ्ञत्तिं ओक्कमनतो गोत्रभूपुग्गलो नाम वुच्चति.

११. भयूपरतनिद्देसे – भयेन उपरतोति भयूपरतो. सत्तपि सेक्खा पुथुज्जना च भायित्वा पापतो ओरमन्ति पापं न करोन्ति ¶ . तत्थ पुथुज्जना दुग्गतिभयं, वट्टभयं, किलेसभयं, उपवादभयन्ति चत्तारि भयानि भायन्ति. तेसु भायितब्बट्ठेन दुग्गतियेव भयं दुग्गतिभयं. सेसेसुपि एसेव नयो. तत्थ पुथुज्जनो ‘सचे त्वं पापं करिस्ससि, चत्तारो अपाया मुखं विवरित्वा ठितच्छातअजगरसदिसा, तेसु दुक्खं अनुभवन्तो कथं भविस्ससी’ति दुग्गतिभयं भायित्वा पापं न करोति. अनमतग्गसंसारवट्टंयेव पन वट्टभयं नाम. सब्बम्पि अकुसलं किलेसभयं नाम. गरहा पन उपवादभयं नाम. तानिपि भायित्वा पुथुज्जनो पापं न करोति. सोतापन्नसकदागामिअनागामिनो पन तयो सेक्खा दुग्गतिं अतीतत्ता सेसानि तीणि भयानि भायित्वा पापं न करोन्ति. मग्गट्ठकसेक्खा आगमनवसेन वा असमुच्छिन्नभयत्ता वा भयूपरता नाम होन्ति. खीणासवो इमेसु चतूसु भयेसु एकम्पि न भायति. सो हि सब्बसो समुच्छिन्नभयो; तस्मा अभयूपरतोति वुच्चति. किं पन सो उपवादम्पि न भायतीति? न भायति. उपवादं पन रक्खतीति वत्तुं वट्टति. दोणुप्पलवापिगामे खीणासवत्थेरो विय.

१२. अभब्बागमननिद्देसे ¶ – सम्मत्तनियामागमनस्स अभब्बोति अभब्बागमनो. कम्मावरणेनाति पञ्चविधेन आनन्तरियकम्मेन. किलेसावरणेनाति नियतमिच्छादिट्ठिया. विपाकावरणेनाति अहेतुकदुहेतुकपटिसन्धिया. अस्सद्धाति बुद्धधम्मसङ्घेसु सद्धारहिता. अच्छन्दिकाति कत्तुकम्यताकुसलच्छन्दरहिता. ते ठपेत्वा जम्बुदीपं इतरदीपत्तयवासिनो वेदितब्बा. तेसु हि मनुस्सा अच्छन्दिकभावं पविट्ठा नाम. दुप्पञ्ञाति भवङ्गपञ्ञारहिता. अभब्बाति अप्पटिलद्धमग्गफलूपनिस्सया. नियामन्ति मग्गनियामं, सम्मत्तनियामं. ओक्कमितुन्ति एतं कुसलेसु धम्मेसु सम्मत्तसङ्खातं नियामं ओक्कमितुं पविसितुं तत्थ पतिट्ठातुं अभब्बा.

१३. भब्बागमननिद्देसो वुत्तपटिपक्खनयेन वेदितब्बो. एवमिमस्मिं दुके ये च पुग्गला पञ्चानन्तरियका, ये च नियतमिच्छादिट्ठिका, येहि च अहेतुकदुहेतुकपटिसन्धि गहिता ¶ , ये च बुद्धादीनं न सद्दहन्ति, येसञ्च कत्तुकम्यताछन्दो नत्थि, ये च अपरिपुण्णभवङ्गपञ्ञा, येसञ्च मग्गफलानं उपनिस्सयो नत्थि, ते सब्बेपि सम्मत्तनियामं ओक्कमितुं अभब्बा, विपरीता भब्बाति वुत्ता.

१४. नियतानियतनिद्देसे ¶ – आनन्तरिकाति आन्तरिककम्मसमङ्गिनो. मिच्छादिट्ठिकाति नियतमिच्छादिट्ठिसमङ्गिनो. सब्बेपि हेते निरयस्स अत्थाय नियतत्ता नियता नाम. अट्ठ पन अरियपुग्गला सम्माभावाय उपरूपरिमग्गफलत्थाय चेव अनुपादापरिनिब्बानत्थाय च नियतत्ता नियता नाम. अवसेसपुग्गला पन अनिबद्धगतिका. यथा आकासे खित्तदण्डो पथवियं पतन्तो ‘अग्गेन वा मज्झेन वा मूलेन वा पतिस्सती’ति न ञायति; एवमेव ‘असुकगतिया नाम निब्बत्तिस्सन्ती’ति नियमाभावा अनियता नामाति वेदितब्बा. या पन उत्तरकुरुकानं नियतगतिकता ¶ वुत्ता, न सा नियतधम्मवसेन. मिच्छत्तसम्मत्तनियतधम्मायेव हि नियता नाम. तेसञ्च वसेनायं पुग्गलनियमो कथितोति.

१५. पटिपन्नकनिद्देसे – मग्गसमङ्गिनोति मग्गट्ठकपुग्गला. ते हि फलत्थाय पटिपन्नत्ता पटिपन्नका नाम. फलसमङ्गिनोति फलपटिलाभसमङ्गिताय फलसमङ्गिनो. फलपटिलाभतो पट्ठाय हि ते फलसमापत्तिं असमापन्नापि फले ठितायेव नाम.

१६. समसीसीनिद्देसे – अपुब्बं अचरिमन्ति अपुरे अपच्छा, एकप्पहारेनेवाति अत्थो. परियादानन्ति परिक्खयो. अयं वुच्चतीति अयं पुग्गलो समसीसी नाम वुच्चति. सो पनेस तिविधो होति – इरियापथसमसीसी, रोगसमसीसी, जीवितसमसीसीति. तत्थ यो चङ्कमन्तोव विपस्सनं पट्ठपेत्वा अरहत्तं पत्वा चङ्कमन्तोव परिनिब्बाति पदुमत्थेरो विय; ठितकोव विपस्सनं पट्ठपेत्वा अरहत्तं पत्वा ठितकोव परिनिब्बाति कोटपब्बतविहारवासीतिस्सत्थेरो विय; निसिन्नोव विपस्सनं पट्ठपेत्वा अरहत्तं पत्वा निसिन्नोव परिनिब्बाति, निपन्नोव विपस्सनं पट्ठपेत्वा अरहत्तं पत्वा निपन्नोव परिनिब्बाति – अयं इरियापथसमसीसी नाम.

यो पन एकं रोगं पत्वा अन्तोरोगेयेव विपस्सनं पट्ठपेत्वा अरहत्तं पत्वा तेनेव रोगेन परिनिब्बाति – अयं रोगसमसीसी नाम.

कतरो ¶ ¶ जीवितसमसीसी नाम? ‘‘सीसन्ति तेरस सीसानि – पलिबोधसीसञ्च तण्हा, विनिबन्धनसीसञ्च मानो, परामाससीसञ्च दिट्ठि, विक्खेपसीसञ्च उद्धच्चं, संकिलेससीसञ्च अविज्जा, अधिमोक्खसीसञ्च सद्धा, पग्गहसीसञ्च वीरियं, उपट्ठानसीसञ्च सति, अविक्खेपसीसञ्च समाधि, दस्सनसीसञ्च पञ्ञा, पवत्तसीसञ्च जीवितिन्द्रियं, गोचरसीसञ्च विमोक्खो, सङ्खारसीसञ्च निरोधो’’ति (पटि. म. १.८७). तत्थ किलेससीसं अविज्जं अरहत्तमग्गो परियादियति. पवत्तसीसं जीवितिन्द्रियं चुतिचित्तं परियादियति. अविज्जापरियादायकं ¶ चित्तं जीवितिन्द्रियं परियादातुं न सक्कोति. जीवितिन्द्रियपरियादायकं चित्तं अविज्जं परियादातुं न सक्कोति. अविज्जापरियादायकं चित्तं अञ्ञं, जीवितिन्द्रियपरियादायकं चित्तं अञ्ञं. यस्स चेतं सीसद्वयं समं परियादानं गच्छति, सो जीवितसमसीसी नाम.

कथमिदं समं होतीति? वारसमताय. यस्मिञ्हि वारे मग्गवुट्ठानं होति – सोतापत्तिमग्गे पञ्च पच्चवेक्खणानि, सकदागामिमग्गे पञ्च, अनागामिमग्गे पञ्च, अरहत्तमग्गे चत्तारीति एकूनवीसतिया पच्चवेक्खणञाणे पतिट्ठाय भवङ्गं ओतरित्वा परिनिब्बायति. इमाय वारसमताय इदं उभयसीसपरियादानं समं होति नाम. तेनायं पुग्गलो जीवितसमसीसीति वुच्चति. अयमेव च इध अधिप्पेतो.

१७. ठितकप्पीनिद्देसे – ठितो कप्पोति ठितकप्पो, ठितकप्पो अस्स अत्थीति ठितकप्पी. कप्पं ठपेतुं समत्थोति अत्थो. उड्डय्हनवेला अस्साति झायनकालो भवेय्य. नेव तावाति याव एस मग्गसमङ्गी पुग्गलो सोतापत्तिफलं न सच्छिकरोति, नेव ताव कप्पो झायेय्य. झायमानोपि अज्झायित्वाव तिट्ठेय्य. कप्पविनासो हि नाम महाविकारो महापयोगो कोटिसतसहस्सचक्कवाळस्स झायनवसेन महालोकविनासो. अयम्पि एवं महाविनासो तिट्ठेय्य वाति वदति. सासने पन धरमाने अयं कप्पविनासो नाम नत्थि. कप्पविनासे सासनं नत्थि. गतकोटिके हि काले कप्पविनासो नाम होति. एवं सन्तेपि सत्था अन्तरायाभावं दीपेतुं इदं कारणं आहरि – ‘‘इदम्पि भवेय्य, मग्गसमङ्गिनो पन फलस्स अन्तरायो न सक्का कातु’’न्ति. अयं पन पुग्गलो कप्पं ठपेन्तो कित्तकं कालं ठपेय्याति? यस्मिं ¶ वारे मग्गवुट्ठानं होति, अथ भवङ्गं आवट्टेन्तं मनोद्वारावज्जनं उप्पज्जति. ततो तीणि अनुलोमानि, एकं गोत्रभुचित्तं, एकं मग्गचित्तं, द्वे फलचित्तानि, पञ्च ¶ पच्चवेक्खणञाणानीति ¶ एत्तकं कालं ठपेय्य. इमं पनत्थं बाहिराय आगन्तुकूपमायपि एवं दीपयिंसु. सचे हि सोतापत्तिमग्गसमङ्गिस्स मत्थकूपरि योजनिकं एकग्घनसेलं तिवट्टाय रज्जुया बन्धित्वा ओलम्बेय्य, एकस्मिं वट्टे छिन्ने द्वीहि ओलम्बेय्य, द्वीसु छिन्नेसु एकेन ओलम्बेय्येव, तस्मिम्पि छिन्ने अब्भकूटं विय आकासे तिट्ठेय्य, न त्वेव तस्स पुग्गलस्स मग्गानन्तरफलस्स अन्तरायं करेय्याति. अयं पन दीपना परित्ता, पुरिमाव महन्ता. न केवलं पन सोतापत्तिमग्गट्ठोव कप्पं ठपेति, इतरे मग्गसमङ्गिनोपि ठपेन्तियेव. तेन भगवा हेट्ठा गहितञ्च अग्गहितञ्च सब्बं सङ्कड्ढित्वा सद्धिं पिट्ठिवट्टकपुग्गलेहि इमं तन्तिं आरोपेसि – ‘‘सब्बेपि मग्गसमङ्गिनो पुग्गला ठितकप्पिनो’’ति.

१८. अरियनिद्देसे – किलेसेहि आरकत्ता अरिया. सदेवकेन लोकेन अरणीयत्ता अरिया. अरियट्ठो नाम परिसुद्धट्ठोति परिसुद्धत्तापि अरिया. सेसा अपरिसुद्धताय अनरिया.

१९. सेक्खनिद्देसे – मग्गसमङ्गिनो मग्गक्खणे, फलसमङ्गिनो च फलक्खणे, अधिसीलसिक्खादिका तिस्सोपि सिक्खा सिक्खन्तियेवाति सेक्खा. अरहता पन अरहत्तफलक्खणे तिस्सो सिक्खा सिक्खिता. पुन तस्स सिक्खनकिच्चं नत्थीति असेक्खा. इति सत्त अरिया सिक्खन्तीति सेक्खा. खीणासवा अञ्ञस्स सन्तिके सीलादीनं सिक्खितत्ता सिक्खितअसेक्खा नाम. बुद्धपच्चेकबुद्धा सयम्भूतताय असिक्खितअसेक्खा नाम. सेसपुग्गला नेव सिक्खन्ति न सिक्खिताति नेवसेक्खानासेक्खा.

२०. तेविज्जनिद्देसे – पठमं पुब्बेनिवासदिब्बचक्खुञाणानि निब्बत्तेत्वा पच्छा अरहत्तं पत्तोपि, पठमं अरहत्तं ¶ पत्वा पच्छा पुब्बेनिवासदिब्बचक्खुञाणनिब्बत्तकोपि तेविज्जोयेव नाम. सुत्तन्तकथा पन परियायदेसना अभिधम्मकथा निप्परियायदेसनाति इमस्मिं ठाने आगमनीयमेव धुरं. तस्मा पठमं द्वे विज्जा निब्बत्तेत्वा पच्छा अरहत्तं पत्तोव इध अधिप्पेतो. छळभिञ्ञेपि एसेव नयो.

२२. सम्मासम्बुद्धनिद्देसे ¶ – पुब्बे अननुस्सुतेसूति पच्छिमभवे सच्चप्पटिवेधतो पुब्बे अञ्ञस्स ¶ कस्सचि सन्तिके अस्सुतपुब्बेसु. ततो पुरिमपुरिमेसु पन भवेसु सब्बञ्ञुबोधिसत्ता बुद्धसासने पब्बजित्वा तीणि पिटकानि उग्गहेत्वा गतपच्चागतवत्तं आरुय्ह कम्मट्ठानं अनुलोमं गोत्रभुं आहच्च ठपेन्ति. तस्मा पच्छिमभवस्मिंयेव अनाचरियकभावं सन्धायेतं वुत्तं. तदा हि तथागतो पूरितपारमित्ता अञ्ञस्स सन्तिके सामं अननुस्सुतेसु सङ्खतासङ्खतधम्मेसु ‘‘इदं दुक्खं…पे… अयं दुक्खनिरोधगामिनी पटिपदा’’ति अत्तपच्चक्खेन ञाणेन चत्तारि सच्चानि अभिसम्बुज्झति.

तत्थ चाति तस्मिञ्च चतुसच्चसम्बोधिसङ्खाते अरहत्तमग्गे. सब्बञ्ञुतं पापुणाति बलेसु च वसीभावन्ति सब्बञ्ञुतञ्ञाणञ्चेव बलेसु च चिण्णवसीभावं पापुणाति. बुद्धानञ्हि सब्बञ्ञुतञ्ञाणस्स चेव दसबलञाणस्स च अधिगमनतो पट्ठाय अञ्ञं कातब्बं नाम नत्थि. यथा पन उभतोसुजातस्स खत्तियकुमारस्स अभिसेकप्पत्तितो पट्ठाय ‘इदं नाम इस्सरियं अनागत’न्ति न वत्तब्बं, सब्बं आगतमेव होति. एवमेव बुद्धानं अरहत्तमग्गस्स आगमनतो पट्ठाय ‘अयं नाम गुणो न आगतो, न पटिविद्धो, न पच्चक्खो’ति न वत्तब्बो, सब्बेपि सब्बञ्ञुगुणा आगता पटिविद्धा पच्चक्खकताव होन्ति. अयं वुच्चतीति अयं एवं पारमीपूरणसिद्धानुभावेन अरियमग्गेन पटिविद्धसब्बञ्ञुगुणो पुग्गलो सम्मासम्बुद्धोति वुच्चति.

२३. पच्चेकबुद्धनिद्देसेपि ¶ – पुब्बे अननुस्सुतेसूति पदे पुब्बे वुत्तनयेनेव अत्थो वेदितब्बो. पच्चेकबुद्धोपि हि पच्छिमभवे अनाचरियको अत्तुक्कंसिकञाणेनेव पटिविद्धसच्चो सब्बञ्ञुतञ्ञाणञ्चेव बलेसु च चिण्णवसीभावं न पापुणाति.

२४. उभतोभागविमुत्तनिद्देसे – अट्ठ विमोक्खे कायेन फुसित्वा विहरतीति अट्ठ समापत्तियो सहजातनामकायेन पटिलभित्वा विहरति. पञ्ञाय चस्स दिस्वाति विपस्सनापञ्ञाय सङ्खारगतं, मग्गपञ्ञाय चत्तारि सच्चानि पस्सित्वा चत्तारोपि आसवा खीणा होन्ति. अयं वुच्चतीति ¶ अयं एवरूपो पुग्गलो उभतोभागविमुत्तो नामाति वुच्चति. अयञ्हि द्वीहि भागेहि द्वे वारे विमुत्तोति उभतोभागविमुत्तो. तत्रायं थेरवादो – तिपिटकचूळनागत्थेरो ताव आह – ‘‘समापत्तिया विक्खम्भनविमोक्खेन, मग्गेन समुच्छेदविमोक्खेन ¶ विमुत्तोति उभतोभागेहि द्वे वारे विमुत्तो’’ति. तिपिटकमहाधम्मरक्खितत्थेरो ‘‘नामनिस्सितको एसो’’ति वत्वा –

‘‘अच्ची यथा वातवेगेन खित्ता, (उपसीवाति भगवा;)

अत्थं पलेति न उपेति सङ्खं;

एवं मुनी नामकाया विमुत्तो,

अत्थं पलेति न उपेति सङ्ख’’न्ति. (सु. नि. १०८०);

वत्वा सुत्तं आहरित्वा ‘‘नामकायतो च रूपकायतो च सुविमुत्तत्ता उभतोभागविमुत्तो’’ति आह. तिपिटकचूळाभयत्थेरो पनाह – ‘‘समापत्तिया विक्खम्भनविमोक्खेन एकवारं विमुत्तो मग्गेन समुच्छेदविमोक्खेन एकवारं विमुत्तोति उभतोभागविमुत्तो’’ति. इमे पन तयोपि थेरा पण्डिता, ‘तिण्णम्पि वादे कारणं दिस्सती’ति तिण्णम्पि ¶ वादं तन्तिं कत्वा ठपयिंसु.

सङ्खेपतो पन अरूपसमापत्तिया रूपकायतो विमुत्तो, मग्गेन नामकायतो विमुत्तोति उभोहि भागेहि विमुत्तत्ता उभतोभागविमुत्तो. सो चतुन्नं अरूपसमापत्तीनं एकेकतो वुट्ठाय सङ्खारे सम्मसित्वा अरहत्तं पत्तानं चतुन्नं, निरोधा वुट्ठाय अरहत्तं पत्तस्स अनागामिनो च वसेन पञ्चविधो होति. तत्थ पुरिमा चत्तारो समापत्तिसीसं निरोधं न समापज्जन्तीति परियायेन उभतोभागविमुत्ता नाम. अट्ठसमापत्तिलाभी अनागामी तं समापज्जित्वा ततो वुट्ठाय विपस्सनं वड्ढेत्वा अरहत्तं पत्तोति निप्परियायेन उभतोभागविमुत्तसेट्ठो नाम. ननु च अरूपावचरज्झानम्पि उपेक्खाचित्तेकग्गताहि दुवङ्गिकं रूपावचरचतुत्थज्झानम्पि, तस्मा तम्पि पदट्ठानं कत्वा अरहत्तं पत्तेन उभतोभागविमुत्तेन भवितब्बन्ति? न भवितब्बं. कस्मा? रूपकायतो अविमुत्तत्ता. तञ्हि किलेसकायतोव विमुत्तं, न रूपकायतो; तस्मा ततो वुट्ठाय अरहत्तं पत्तो उभतोभागविमुत्तो नाम न होति ¶ . अरूपावचरं पन नामकायतो च विमुत्तं रूपकायतो चाति तदेव पादकं कत्वा अरहत्तं पत्तो उभतोभागविमुत्तो होतीति वेदितब्बो.

२५. पञ्ञाविमुत्तनिद्देसे – पञ्ञाय विमुत्तोति पञ्ञाविमुत्तो. सो सुक्खविपस्सको चतूहि ¶ झानेहि वुट्ठाय अरहत्तं पत्ता चत्तारो चाति पञ्चविधो होति. एतेसु हि एकोपि अट्ठविमोक्खलाभी न होति. तेनेव न हेव खो अट्ठ विमोक्खेतिआदिमाह. अरूपावचरज्झानेसु पन एकस्मिं सति उभतोभागविमुत्तोयेव नाम होतीति.

२६. कायसक्खिनिद्देसे – एकच्चे आसवाति हेट्ठिममग्गत्तयवज्झा. अयं वुच्चतीति अयं एवरूपो पुग्गलो कायसक्खीति वुच्चति. सो हि फुट्ठन्तं सच्छिकरोतीति कायसक्खी. झानफस्सं पठमं फुसति, पच्छा निरोधं निब्बानं सच्छिकरोतीतिपि कायसक्खी. सो सोतापत्तिफलट्ठं आदिं कत्वा याव अरहत्तमग्गट्ठा छब्बिधो होति.

२७. दिट्ठिप्पत्तनिद्देसे ¶ – इदं दुक्खन्ति इदं दुक्खं, एत्तकं दुक्खं, न इतो उद्धं दुक्खं. दुक्खसमुदयादीसुपि एसेव नयो. यथाभूतं पजानातीति ठपेत्वा तण्हं पञ्चुपादानक्खन्धे ‘दुक्खसच्च’न्ति याथावसरसतो पजानाति. तण्हा पन दुक्खं जनेति निब्बत्तेति, पभावेति, ततो तं दुक्खं समुदेति; तस्मा नं अयं ‘दुक्खसमुदयो’ति यथाभूतं पजानाति. यस्मा पन इदं दुक्खञ्च समुदयो च निब्बानं पत्वा निरुज्झन्ति वूपसम्मन्ति अप्पवत्तिं गच्छन्ति; तस्मा नं ‘अयं दुक्खनिरोधो’ति यथाभूतं पजानाति. अरियो पन अट्ठङ्गिको मग्गो, तं दुक्खनिरोधं गच्छति; तेन तं ‘अयं दुक्खनिरोधगामिनी पटिपदा’ति यथाभूतं पजानाति. एत्तावता नानाक्खणे सच्चववत्थानं दस्सितं. इदानि एकक्खणे दस्सेतुं तथागतप्पवेदितातिआदिमाह. तत्थ तथागतप्पवेदिताति महाबोधिमण्डे निसीदत्वा तथागतेन पटिविद्धा विदिता पाकटीकता. धम्माति चतुसच्चधम्मा. वोदिट्ठा होन्तीति सुदिट्ठा होन्ति. वोचरिताति सुचरिता. तेसु अनेन पञ्ञा सुट्ठु चरापिता होतीति अत्थो. अयं वुच्चतीति अयं एवरूपो पुग्गलो दिट्ठिप्पत्तोति वुच्चति. अयञ्हि दिट्ठन्तं पत्तो. ‘‘दुक्खा सङ्खारा, सुखो निरोधो’’ति ञाणं होति ¶ . दिट्ठं विदितं सच्छिकतं पस्सितं पञ्ञायाति दिट्ठप्पत्तो. अयम्पि कायसक्खी विय छब्बिधोव होति.

२८. सद्धाविमुत्तनिद्देसे – नो च खो यथा दिट्ठिप्पत्तस्साति यथा दिट्ठिप्पत्तस्स आसवा परिक्खीणा, न एवं सद्धाविमुत्तस्साति अत्थो. किं पन नेसं किलेसप्पहाने नानत्तं अत्थीति? नत्थि. अथ कस्मा सद्धाविमुत्तो दिट्ठिप्पत्तं न पापुणातीति? आगमनीयनानत्तेन. दिट्ठिप्पतो हि आगमनम्हि किलेसे विक्खम्भेन्तो अप्पदुक्खेन अप्पकसिरेन अकिलमन्तोव ¶ विक्खम्भेतुं सक्कोति. सद्धाविमुत्तो ¶ पन दुक्खेन कसिरेन किलमन्तो हुत्वा विक्खम्भेतुं सक्कोति, तस्मा दिट्ठिप्पत्तं न पापुणाति. अपिच नेसं पञ्ञायपि नानत्तं अत्थियेव. दिट्ठिप्पत्तस्स हि उपरि तिण्णं मग्गानं विपस्सनाञाणं तिक्खं सूरं पसन्नं हुत्वा वहति. सद्धाविमुत्तस्स विपस्सनाञाणं नो तिक्खं सूरं पसन्नं हुत्वा वहति, तस्मापि सो दिट्ठिप्पत्तं न पापुणाति.

यथा हि द्वीसु तरुणेसु सिप्पं दस्सेन्तेसु एकस्स हत्थे तिखिणो असि, एकस्स कुण्ठो. तिखिणेन असिना कदली छिज्जमाना सद्दं न करोति. कुण्ठेन असिना छिज्जमाना ‘कटकटा’ति सद्दं करोति. तत्थ तिखिणेन असिना सद्दं अकरोन्तिया एव कदलिया छेदनं विय दिट्ठिप्पत्तस्स तिण्णं मग्गानं विपस्सनाञाणस्स तिखिणसूरविप्पसन्नभावो. कुण्ठेन असिना सद्दं करोन्तियापि कदलिया छेदनं विय सद्धाविमुत्तस्स तिण्णं मग्गानं विपस्सनाञाणस्स अतिखिणअसूरअप्पसन्नभावो वेदितब्बो. इमं पन नयं ‘नो’ति पटिक्खिपित्वा, आगमनीयनानत्तेनेव सद्धाविमुत्तो दिट्ठिप्पत्तं न पापुणातीति सन्निट्ठानं कतं.

आगमट्ठकथासु पन वुत्तं – ‘‘एतेसु हि सद्धाविमुत्तस्स पुब्बभागमग्गक्खणे सद्दहन्तस्स विय ओकप्पेन्तस्स विय अधिमुच्चन्तस्स विय च किलेसक्खयो होति. दिट्ठिप्पत्तस्स पुब्बभागमग्गक्खणे किलेसच्छेदकञाणं अदन्धं तिखिणं सूरं हुत्वा वहति. तस्मा यथा नाम अतिखिणेन असिना कदलिं छिन्दन्तस्स छिन्नट्ठानं न मट्ठं होति, असि न सीघं वहति, सद्दो सुय्यति, बलवतरो वायामो कातब्बो होति ¶ ; एवरूपा सद्धाविमुत्तस्स पुब्बभागमग्गभावना. यथा पन सुनिसितेनेव असिना कदलिं छिन्दन्तस्स छिन्नट्ठानं मट्ठं होति, असि सीघं वहति, सद्दो न सुय्यति, बलववायामकिच्चं न होति; एवरूपा ¶ दिट्ठिप्पत्तस्स पुब्बभागमग्गभावना वेदितब्बा’’ति. अयं वुच्चतीति अयं एवरूपो पुग्गलो सद्धाविमुत्तोति वुच्चति. अयञ्हि सद्दहन्तो विमुत्तोति सद्धाविमुत्तो. अयम्पि कायसक्खी विय छब्बिधोव होति.

२९. धम्मानुसारीनिद्देसे – पटिपन्नस्साति इमिना सोतापत्तिमग्गट्ठो दस्सितो. अधिमत्तन्ति बलवं. पञ्ञं वाहेतीति पञ्ञावाही. पञ्ञा इमं पुग्गलं वहतीति पञ्ञावाहीतिपि ¶ वुत्तं होति. पञ्ञापुब्बङ्गमन्ति पञ्ञं पुरेचारिकं कत्वा. अयं वुच्चतीति अयं एवरूपो पुग्गलो धम्मानुसारीति वुच्चति. सो हि पञ्ञासङ्खातेन धम्मेन सरति अनुस्सरतीति धम्मानुसारी. सोतापत्तिमग्गट्ठस्सेवेतं नामं. फले पन पत्ते दिट्ठिप्पत्तो नाम होति.

३०. सद्धानुसारीनिद्देसेपि – सद्धं वाहेतीति सद्धावाही. सद्धा इमं पुग्गलं वहतीति सद्धावाहीतिपि वुत्तमेव. सद्धापुब्बङ्गमन्ति सद्धं पुरेचारिकं कत्वा. अयं वुच्चतीति अयं एवरूपो पुग्गलो सद्धानुसारीति वुच्चति. सो हि सद्धाय सरति. अनुस्सरतीति सद्धानुसारी. सोतापत्तिमग्गट्ठस्सेवेतं नामं. फले पन पत्ते सद्धाविमुत्तो नाम होति. लोकुत्तरधम्मञ्हि निब्बत्तेन्तानं द्वे धुरानि नाम, द्वे अभिनिवेसा नाम, द्वे सीसानि नाम. तत्थ सद्धाधुरं पञ्ञाधुरन्ति – द्वे धुरानि नाम. एको पन भिक्खु समथाभिनिवेसेन अभिनिविसति, एको विपस्सनाभिनिवेसेनाति – इमे द्वे अभिनिवेसा नाम. एको च मत्थकं पापुणन्तो उभतोभागविमुत्तो होति, एको पञ्ञाविमुत्तोति – इमानि द्वे सीसानि नाम. ये केचि हि लोकुत्तरधम्मं निब्बत्तेन्ति, सब्बे ते इमे द्वे धम्मे धुरं कत्वा इमेसु द्वीसु ठानेसु अभिनिविसित्वा इमेहि द्वीहि ठानेहि विमुच्चन्ति. तेसु यो भिक्खु अट्ठसमापत्तिलाभी पञ्ञं धुरं कत्वा समथवसेन अभिनिविट्ठो अञ्ञतरं अरूपसमापत्तिं पदट्ठानं कत्वा विपस्सनं पट्ठपेत्वा अरहत्तं पापुणाति, सो सोतापत्तिमग्गक्खणे धम्मानुसारी नाम. परतो पन छसु ठानेसु कायसक्खी नाम. अरहत्तफले पत्ते उभतोभागविमुत्तो नाम.

अपरो ¶ पञ्ञमेव ¶ धुरं कत्वा विपस्सनावसेन अभिनिविट्ठो सुद्धसङ्खारे वा रूपावचरज्झानेसु वा अञ्ञतरं सम्मसित्वा अरहत्तं पापुणाति, अयम्पि सोतापत्तिमग्गक्खणेयेव धम्मानुसारी नाम. परतो पन छसु ठानेसु दिट्ठिप्पत्तो नाम. अरहत्ते पत्ते पञ्ञाविमुत्तो नाम. इध द्वे नामानि अपुब्बानि, तानि पुरिमेहि सद्धिं पञ्च होन्ति. अपरो अट्ठसमापत्तिलाभी सद्धं धुरं कत्वा समाधिवसेन अभिनिविट्ठो अञ्ञतरं अरूपसमापत्तिं पदट्ठानं कत्वा विपस्सनं पट्ठपेत्वा अरहत्तं पापुणाति – अयं सोतापत्तिमग्गक्खणे सद्धानुसारी नाम. परतो छसु ठानेसु कायसक्खीयेव नाम. अरहत्ते पत्ते उभतोभागविमुत्तोयेव नाम. इध एकमेव नामं अपुब्बं. तेन सद्धिं पुरिमानि पञ्च छ होन्ति. अपरो सद्धमेव धुरं कत्वा विपस्सनावसेन अभिनिविट्ठो सुद्धसङ्खारे वा रूपावचरज्झानेसु वा अञ्ञतरं सम्मसित्वा अरहत्तं पापुणाति. अयम्पि सोतापत्तिमग्गक्खणे सद्धानुसारी ¶ नाम. परतो छसु ठानेसु सद्धाविमुत्तो नाम. अरहत्ते पत्ते पञ्ञाविमुत्तो नाम. इधापि एकमेव नामं अपुब्बं. तेन सद्धिं पुरिमानि छ सत्त होन्ति. इमे सत्त पुग्गला लोके अग्गदक्खिणेय्या नामाति.

३१. सत्तक्खत्तुपरमनिद्देसे – सत्तक्खत्तुन्ति सत्तवारे. सत्तक्खत्तुपरमा भवूपपत्ति अत्तभावग्गहणं अस्स, ततो परं अट्ठमं भवं नादियतीति सत्तक्खत्तुपरमो. सोतापन्नो होतीति एत्थ सोतोति अरियमग्गो, तेन समन्नागतो सोतापन्नो नाम. यथाह –

‘‘सोतो सोतोति हिदं, सारिपुत्त, वुच्चति. कतमो नु खो, सारिपुत्त, सोतोति? अयमेव हि, भन्ते, अरियो अट्ठङ्गिको मग्गो सोतो, सेय्यथिदं – सम्मादिट्ठि…पे… सम्मासमाधीति. सोतापन्नो सोतापन्नोति, हिदं, सारिपुत्त, वुच्चति. कतमो नु खो, सारिपुत्त, सोतापन्नोति? यो हि, भन्ते, इमिना अरियेन अट्ठङ्गिकेन मग्गेन समन्नागतो अयं वुच्चति सोतापन्नो, स्वायं आयस्मा एवंनामो एवंगोत्तो इति वा’’ति (सं. नि. ५.१००१).

एवं ¶ मग्गक्खणेपि सोतापन्नो नाम होति. इध ¶ पन मग्गेन फलस्स नामं दिन्नन्ति फलक्खणे सोतापन्नो अधिप्पेतो.

अविनिपातधम्मोति विनिपातसङ्खातं अपायं उपपत्तिवसेन अनागमनसभावो. नियतोति मग्गनियामेन नियतो. सम्बोधिपरायणोति बुज्झनकभावपरायणो. सो हि पटिलद्धमग्गेन बुज्झतीति सम्बोधिपरायणो. उपरि तीहि मग्गेहि अवस्सं बुज्झिस्सतीति सम्बोधिपरायणो. देवे च मनुस्से चाति देवलोकञ्च मनुस्सलोकञ्च. सन्धावित्वा संसरित्वाति पटिसन्धिवसेन अपरापरं गन्त्वा. दुक्खस्सन्तं करोतीति वट्टदुक्खस्स परियन्तं परिवटुमं करोति. अयं वुच्चतीति अयं एवरूपो पुग्गलो सत्तक्खत्तुपरमो नाम वुच्चति. अयं पन कालेन देवलोकस्स कालेन मनुस्सलोकस्स वसेन मिस्सकभवेन कथितोति वेदितब्बो.

३२. कोलंकोलनिद्देसे – कुलतो कुलं गच्छतीति कोलंकोलो. सोतापत्तिफलसच्छिकिरियतो हि पट्ठाय नीचे कुले उपपत्ति नाम नत्थि, महाभोगकुलेसुयेव निब्बत्ततीति ¶ अत्थो. द्वे वा तीणि वा कुलानीति देवमनुस्सवसेन द्वे वा तयो वा भवे. इति अयम्पि मिस्सकभवेनेव कथितो. देसनामत्तमेव चेतं – ‘द्वे वा तीणि वा’ति. याव छट्ठभवा संसरन्तोपि पन कोलंकोलोव होति.

३३. एकबीजिनिद्देसे – खन्धबीजं नाम कथितं. यस्स हि सोतापन्नस्स एकंयेव खन्धबीजं अत्थि, एकं अत्तभावग्गहणं, सो एकबीजी नाम. मानुसकं भवन्ति इदं पनेत्थ देसनामत्तमेव. देवभवं निब्बत्तेतीतिपि पन वत्तुं वट्टतियेव. भगवता गहितनामवसेनेव चेतानि एतेसं नामानि. एत्तकं ठानं गतो सत्तक्खत्तुपरमो नाम होति, एत्तकं कोलंकोलो, एत्तकं एकबीजीति भगवता एतेसं नामं गहितं. नियमतो पन अयं सत्तक्खत्तुपरमो, अयं कोलंकोलो, अयं एकबीजीति नत्थि.

को ¶ पन तेसं एतं पभेदं नियमेतीति? केचि ताव थेरा ‘पुब्बहेतु नियमेती’ति वदन्ति, केचि ‘पठममग्गो’, केचि ‘उपरि तयो मग्गा’, केचि ‘तिण्णं मग्गानं विपस्सना’ति. तत्थ ‘पुब्बहेतु नियमेती’ति वादे ‘पठममग्गस्स उपनिस्सयो कतो नाम होति, उपरि तयो मग्गा निरुपनिस्सया उप्पन्ना’ति वचनं आपज्जति. ‘पठममग्गो नियमेती’ति ¶ वादे उपरि तिण्णं मग्गानं निरत्थकता आपज्जति. ‘उपरि तयो मग्गा नियमेन्ती’ति वादे ‘अट्ठममग्गे अनुप्पन्नेयेव उपरि तयो मग्गा उप्पन्ना’ति आपज्जति. ‘तिण्णं मग्गानं विपस्सना नियमेती’ति वादो पन युज्जति. सचे हि उपरि तिण्णं मग्गानं विपस्सना बलवती होति, एकबीजी नाम होति; ततो मन्दतराय कोलंकोलो; ततो मन्दतराय सत्तक्खत्तुपरमोति.

एकच्चो हि सोतापन्नो वट्टज्झासयो होति, वट्टाभिरतो, पुनप्पुनं वट्टस्मिंयेव विचरति सन्दिस्सति. अनाथपिण्डिको सेट्ठि, विसाखा उपासिका, चूळरथमहारथा देवपुत्ता, अनेकवण्णो देवपुत्तो, सक्को देवराजा, नागदत्तो देवपुत्तोति इमे हि एत्तका जना वट्टज्झासया वट्टाभिरता आदितो पट्ठाय छ देवलोके सोधेत्वा अकनिट्ठे ठत्वा परिनिब्बायिस्सन्ति, इमे इध न गहिता. न केवलञ्चिमे; योपि मनुस्सेसुयेव सत्तक्खत्तुं संसरित्वा अरहत्तं पापुणाति, योपि देवलोके निब्बत्तो देवेसुयेव सत्तक्खत्तुं अपरापरं संसरित्वा अरहत्तं पापुणाति, इमेपि इध न गहिता. मिस्सकभववसेनेव पनेत्थ सत्तक्खत्तुपरमकोलंकोला ¶ मानुसकभवनिब्बत्तकोयेव च एकबीजी गहितोति वेदितब्बो. तत्थ एकेको दुक्खापटिपदादिवसेन चतुब्बिधभावं आपज्जति. सद्धाधुरेनेव चत्तारो सत्तक्खत्तुपरमा, चत्तारो कोलंकोला, चत्तारो एकबीजिनोति द्वादस होन्ति. सचे पञ्ञाय सक्का निब्बत्तेतुं, ‘अहं लोकुत्तरं धम्मं निब्बत्तेस्सामी’ति एवं पञ्ञं धुरं कत्वा सत्तक्खत्तुपरमादिभावं पत्तापि पटिपदावसेन द्वादसेवाति इमे चतुवीसति सोतापन्ना इहट्ठकनिज्झानिकवसेनेव इमस्मिं ठाने कथिताति वेदितब्बा.

३४. सकदागामिनिद्देसे – पटिसन्धिवसेन सकिं आगच्छतीति सकदागामी. सकिदेवाति एकवारंयेव. इमं लोकं आगन्त्वाति इमिना पञ्चसु ¶ सकदागामीसु चत्तारो वज्जेत्वा एकोव गहितो. एकच्चो हि इध सकदागामिफलं पत्वा इधेव परिनिब्बायति, एकच्चो इध पत्वा देवलोके परिनिब्बायति, एकच्चो देवलोके पत्वा तत्थेव परिनिब्बायति, एकच्चो देवलोके ¶ पत्वा इधूपपज्जित्वा परिनिब्बायति – इमे चत्तारोपि इध न गहिता. यो पन इध पत्वा देवलोके यावतायुकं वसित्वा पुन इधूपपज्जित्वा परिनिब्बायति – अयं एकोव इध गहितोति वेदितब्बो. सेसमेत्थ यं वत्तब्बं सिया तं सब्बं हेट्ठा धम्मसङ्गहट्ठकथायं लोकुत्तरकुसलनिद्देसे वुत्तमेव. इमस्स पन सकदागामिनो एकबीजिना सद्धिं किं नानाकरणन्ति? एकबीजिस्स एकाव पटिसन्धि, सकदागामिस्स द्वे पटिसन्धियो – इदं नेसं नानाकरणन्ति.

३५. अनागामिनिद्देसे – ओरम्भागियानं संयोजनानन्ति ओरं वुच्चति कामधातु. यस्स इमानि पञ्च बन्धनानि अप्पहीनानि होन्ति, सो भवग्गे निब्बत्तोपि गिलितबळिसो मच्छो विय दीघसुत्तकेन पादे बद्धकाको विय तेहि बन्धनेहि आकड्ढियमानो कामधातुयंयेव पवत्ततीति पञ्च बन्धनानि ओरम्भागियानीति वुच्चन्ति. हेट्ठाभागियानि हेट्ठाकोट्ठासिकानीति अत्थो. परिक्खयाति तेसं बन्धनानं परिक्खयेन. ओपपातिकोति उपपातयोनिको. इमिनास्स गब्भसेय्या पटिक्खित्ता. तत्थ परिनिब्बायीति तत्थ सुद्धावासलोके परिनिब्बायिता. अनावत्तिधम्मो तस्मा लोकाति पटिसन्धिग्गहणवसेन तस्मा लोका इध अनावत्तनसभावो. बुद्धदस्सनथेरदस्सनधम्मस्सवनानं पनत्थायस्स आगमनं अनिवारितं. अयं वुच्चतीति अयं एवंविधो पुग्गलो पटिसन्धिवसेन पुन अनागमनतो अनागामी नाम वुच्चति.

३६. अन्तरापरिनिब्बायिनिद्देसे ¶ – उपपन्नं वा समनन्तराति उपपन्नसमनन्तरा वा हुत्वा. अप्पत्तं वा वेमज्झं आयुप्पमाणन्ति आयुप्पमाणं वेमज्झं अप्पत्तं वा हुत्वा अरियमग्गं सञ्जनेतीति अत्थो. वासद्दविकप्पतो पन वेमज्झं पत्तन्तिपि अत्थो वेदितब्बो. एवं तयो अन्तरापरिनिब्बायिनो सिद्धा होन्ति. उपरिट्ठिमानं संयोजनानन्ति उपरि पञ्चन्नं उद्धम्भागियसंयोजनानं अट्ठन्नं वा किलेसानं. पहानायाति एतेसं पजहनत्थाय ¶ मग्गं सञ्जनेति. अयं वुच्चतीति अयं एवरूपो पुग्गलो आयुवेमज्झस्स अन्तरायेव परिनिब्बायनतो अन्तरापरिनिब्बायीति वुच्चति.

३७. उपहच्चपरिनिब्बायिनिद्देसे ¶ – अतिक्कमित्वा वेमज्झं आयुप्पमाणन्ति आयुप्पमाणं वेमज्झं अतिक्कमित्वा. उपहच्च वा कालकिरियन्ति उपगन्त्वा कालकिरियं. आयुक्खयस्स आसन्ने ठत्वाति अत्थो. अयं वुच्चतीति अयं एवरूपो पुग्गलो अविहेसु ताव कप्पसहस्सप्पमाणस्स आयुनो पञ्चकप्पसतसङ्खातं वेमज्झं अतिक्कमित्वा छट्ठे वा कप्पसते सत्तमट्ठमनवमानं वा अञ्ञतरस्मिं दसमेयेव वा कप्पसते ठत्वा अरहत्तं पत्वा किलेसपरिनिब्बानेन परिनिब्बायनतो उपहच्चपरिनिब्बायीति वुच्चति.

३८. असङ्खारससङ्खारपरिनिब्बायिनिद्देसेसु – असङ्खारेन अप्पदुक्खेन अधिमत्तपयोगं अकत्वाव किलेसपरिनिब्बानेन परिनिब्बानधम्मोति असङ्खारपरिनिब्बायी. ससङ्खारेन दुक्खेन कसिरेन अधिमत्तपयोगं कत्वाव किलेसपरिनिब्बानेन परिनिब्बायनधम्मोति ससङ्खारपरिनिब्बायी.

४०. उद्धंसोतनिद्देसे – उद्धं वाहिभावेन उद्धमस्स तण्हासोतं वट्टसोतं वाति उद्धंसोतो. उद्धं वा गन्त्वा पटिलभितब्बतो उद्धमस्स मग्गसोतन्ति उद्धंसोतो. अकनिट्ठं गच्छतीति अकनिट्ठगामी. अविहा चुतो अतप्पं गच्छतीतिआदीसु अविहे कप्पसहस्सं वसन्तो अरहत्तं पत्तुं असक्कुणित्वा अतप्पं गच्छति. तत्रापि द्वे कप्पसहस्सानि वसन्तो अरहत्तं पत्तुं असक्कुणित्वा सुदस्सं गच्छति. तत्रापि चत्तारि कप्पसहस्सानि वसन्तो अरहत्तं पत्तुं असक्कुणित्वा सुदस्सिं गच्छति. तत्रापि अट्ठ कप्पसहस्सानि वसन्तो अरहत्तं पत्तुं असक्कुणित्वा अकनिट्ठं गच्छति. तत्थ वसन्तो अरियमग्गं सञ्जनेतीति अत्थो.

इमेसं ¶ पन अनागामीनं पभेदजाननत्थं उद्धंसोतो अकनिट्ठगामीचतुक्कं वेदितब्बं. तत्थ यो अविहतो पट्ठाय चत्तारो देवलोके सोधेत्वा अकनिट्ठं गन्त्वा परिनिब्बायति अयं उद्धंसोतो अकनिट्ठगामी नाम. यो पन हेट्ठा तयो देवलोके सोधेत्वा सुदस्सीदेवलोके ठत्वा परिनिब्बायति – अयं उद्धंसोतो, न अकनिट्ठगामी नाम ¶ . यो पन इतो अकनिट्ठमेव गन्त्वा परिनिब्बायति, अयं न उद्धंसोतो, अकनिट्ठगामी नाम ¶ . यो पन हेट्ठा चतूसु देवलोकेसु तत्थ तत्थेव परिनिब्बायति, अयं न उद्धंसोतो, न अकनिट्ठगामी नामाति. एवमेते अट्ठचत्तालीस अनागामिनो होन्ति.

कथं? अविहे ताव तयो अन्तरापरिनिब्बायिनो, एको उपहच्चपरिनिब्बायी, एको उद्धंसोतो ते असङ्खारपरिनिब्बायिनो पञ्च, ससङ्खारपरिनिब्बायिनो पञ्चाति दस होन्ति. तथा अतप्पासुदस्सासुदस्सीसूति चत्तारो दसका चत्तालीसं. अकनिट्ठे पन उद्धंसोतो नत्थि. तयो पन अन्तरापरिनिब्बायिनो, एको उपहच्चपरिनिब्बायी. ते असङ्खारपरिनिब्बायिनो चत्तारो, ससङ्खारपरिनिब्बायिनो चत्तारोति अट्ठ. एवं अट्ठचत्तालीसं होन्ति.

ते सब्बेपि पपटिकोपमाय दीपिता – दिवसं सन्तत्तानम्पि हि आरकण्टकविप्फलिकनखच्छेदनानं अयोमुखे हञ्ञमाने पपटिका उप्पज्जित्वाव निब्बायति – एवरूपो पठमो अन्तरापरिनिब्बायी वेदितब्बो. कस्मा? उप्पन्नसमनन्तराव किलेसपरिनिब्बानेन परिनिब्बायनतो. ततो महन्ततरे अयोमुखे हञ्ञमाने पपटिका आकासं उल्लङ्घित्वा निब्बायति – एवरूपो दुतियो अन्तरापरिनिब्बायी दट्ठब्बो. कस्मा? वेमज्झं अप्पत्वा परिनिब्बायनतो. ततो महन्ततरे अयोमुखे हञ्ञमाने पपटिका आकासं उल्लङ्घित्वा निवत्तमाना पथवियं अनुपहच्चतला हुत्वा परिनिब्बायति – एवरूपो ततियो अन्तरापरिनिब्बायी दट्ठब्बो. कस्मा? वेमज्झं पत्वा अनुपहच्च परिनिब्बायनतो. ततो महन्ततरे अयोमुखे हञ्ञमाने पपटिका आकासं उल्लङ्घित्वा पथवियं पतित्वा उपहच्चतला हुत्वा निब्बायति – एवरूपो उपहच्चपरिनिब्बायी वेदितब्बो. कस्मा? कालकिरियं उपगन्त्वा आयुगतिं खेपेत्वा परिनिब्बायनतो. ततो महन्ततरे अयोमुखे हञ्ञमाने पपटिका परित्ते तिणकट्ठे पतित्वा तं परित्तं तिणकट्ठं झापेत्वा निब्बायति – एवरूपो असङ्खारपरिनिब्बायी वेदितब्बो. कस्मा? अप्पयोगेन लहुसाय गतिया परिनिब्बायनतो. ततो महन्ततरे अयोमुखे हञ्ञमाने पपटिका विपुले तिणकट्ठपुञ्जे ¶ पतित्वा तं विपुलं तिणकट्ठपुञ्जं ¶ झापेत्वा निब्बायति – एवरूपो ससङ्खारपरिनिब्बायी वेदितब्बो. कस्मा? सप्पयोगेन अलहुसाय ¶ गतिया परिनिब्बायनतो. अपरा महन्तेसु तिणकट्ठपुञ्जेसु पतति, तत्थ महन्तेसु तिणकट्ठपुञ्जेसु झायमानेसु वीतच्चितङ्गारो वा जाला वा उप्पतित्वा कम्मारसालं झापेत्वा गामनिगमनगररट्ठं झापेत्वा समुद्दन्तं पत्वा निब्बायति – एवरूपो उद्धंसोतो अकनिट्ठगामी दट्ठब्बो. कस्मा? अनेकभवबीजविप्फारं फुस्स फुस्स ब्यन्तीकत्वा परिनिब्बायनतो. यस्मा पन आरकण्टकादिभेदं खुद्दकम्पि महन्तम्पि अयोकपालमेव, तस्मा सुत्ते सब्बवारेसु अयोकपालन्त्वेव वुत्तं (अ. नि. ७.५५). यथाह –

‘‘इध, भिक्खवे, भिक्खु एवं पटिपन्नो होति – ‘नो चस्स, नो च मे सिया, न भविस्सति, न मे भविस्सति, यदत्थि यं भूतं, तं पजहामी’’’ति उपेक्खं पटिलभति. सो भवे न रज्जति, सम्भवे न रज्जति, अत्थुत्तरि पदं सन्तं सम्मप्पञ्ञाय पस्सति. तञ्च ख्वस्स पदं न सब्बेन सब्बं सच्छिकतं होति. तस्स न सब्बेन सब्बं मानानुसयो पहीनो होति, न सब्बेन सब्बं भवरागानुसयो पहीनो होति, न सब्बेन सब्बं अविज्जानुसयो पहीनो होति. सो पञ्चन्नं ओरम्भागियानं संयोजनानं परिक्खया अन्तरापरिनिब्बायी होति. सेय्यथापि, भिक्खवे, दिवसं सन्तत्ते अयोकपाले हञ्ञमाने पपटिका निब्बत्तित्वा निब्बायेय्य; एवमेव खो ¶ , भिक्खवे, भिक्खु एवं पटिपन्नो होति – नो चस्स…पे… अन्तरापरिनिब्बायी होति.

‘‘इध पन, भिक्खवे, भिक्खु एवं पटिपन्नो होति – नो चस्स…पे… अन्तरापरिनिब्बायी होति. सेय्यथापि, भिक्खवे, दिवसं सन्तत्ते अयोकपाले हञ्ञमाने पपटिका निब्बत्तित्वा उप्पतित्वा निब्बायेय्य; एवमेव खो, भिक्खवे, भिक्खु एवं पटिपन्नो होति – नो चस्स…पे… अन्तरापरिनिब्बायी होति.

‘‘इध पन, भिक्खवे, भिक्खु एवं पटिपन्नो होति – नो चस्स…पे… अन्तरापरिनिब्बायी ¶ होति. सेय्यथापि, भिक्खवे, दिवसं सन्तत्ते अयोकपाले हञ्ञमाने पपटिका निब्बत्तित्वा उप्पतित्वा अनुपहच्च ¶ तलं निब्बायेय्य; एवमेव खो, भिक्खवे, भिक्खु एवं पटिपन्नो होति – नो चस्स…पे… अन्तरापरिनिब्बायी होति.

‘‘इध पन, भिक्खवे, भिक्खु एवं पटिपन्नो होति – नो चस्स…पे… उपहच्चपरिनिब्बायी होति. सेय्यथापि, भिक्खवे, दिवसं सन्तत्ते अयोकपाले हञ्ञमाने पपटिका निब्बत्तित्वा उप्पतित्वा उपहच्च तलं निब्बायेय्य; एवमेव खो, भिक्खवे, भिक्खु एवं पटिपन्नो होति – नो चस्स…पे… उपहच्चपरिनिब्बायी होति.

‘‘इध पन, भिक्खवे, भिक्खु एवं पटिपन्नो होति – नो चस्स…पे… परिक्खया असङ्खारपरिनिब्बायी होति. सेय्यथापि, भिक्खवे, दिवसं सन्तत्ते अयोकपाले हञ्ञमाने पपटिका निब्बत्तित्वा उप्पतित्वा परित्ते तिणपुञ्जे वा कट्ठपुञ्जे वा निपतेय्य, सा तत्थ अग्गिम्पि जनेय्य, धूमम्पि जनेय्य, अग्गिम्पि जनेत्वा धूमम्पि जनेत्वा तमेव परित्तं तिणपुञ्जं वा ¶ कट्ठपुञ्जं वा परियादियित्वा अनाहारा निब्बायेय्य; एवमेव खो, भिक्खवे, भिक्खु एवं पटिपन्नो होति – नो चस्स…पे… परिक्खया असङ्खारपरिनिब्बायी होति.

‘‘इध पन, भिक्खवे, भिक्खु एवं पटिपन्नो होति – नो चस्स…पे… ससङ्खारपरिनिब्बायी होति. सेय्यथापि, भिक्खवे, दिवसं सन्तत्ते अयोकपाले हञ्ञमाने पपटिका निब्बत्तित्वा उप्पतित्वा विपुले तिणपुञ्जे वा कट्ठपुञ्जे वा निपतेय्य, सा तत्थ अग्गिम्पि जनेय्य…पे… तमेव विपुलं तिणपुञ्जं वा कट्ठपुञ्जं वा परियादियित्वा अनाहारा निब्बायेय्य; एवमेव खो, भिक्खवे, भिक्खु एवं पटिपन्नो होति – नो चस्स…पे… ससङ्खारपरिनिब्बायी होति.

‘‘इध पन, भिक्खवे, भिक्खु एवं पटिपन्नो होति – नो चस्स…पे… परिक्खया उद्धंसोतो होति अकनिट्ठगामी. सेय्यथापि, भिक्खवे, दिवसं सन्तत्ते अयोकपाले हञ्ञमाने पपटिका निब्बत्तित्वा उप्पतित्वा महन्ते तिणपुञ्जे वा कट्ठपुञ्जे वा निपतेय्य, सा तत्थ अग्गिम्पि जनेय्य…पे… तमेव महन्तं तिणपुञ्जं वा कट्ठपुञ्जं वा परियादियित्वा गच्छम्पि दहेय्य, दायम्पि दहेय्य ¶ , गच्छम्पि दहित्वा दायम्पि ¶ दहित्वा हरितन्तं वा पथन्तं वा सेलन्तं वा उदकन्तं वा रमणीयं वा भूमिभागं आगम्म अनाहारा निब्बायेय्य; एवमेव खो, भिक्खवे, भिक्खु एवं पटिपन्नो होति – नो चस्स…पे… परिक्खया उद्धंसोतो होति अकनिट्ठगामी’’ति (अ. नि. ७.५५).

४१-४४. सोतापत्तिफलसच्छिकिरियाय पटिपन्नादिनिद्देसा उत्तानत्थाव. अयं वुच्चति पुग्गलो अरहाति एत्थ पन द्वादस अरहन्तो वेदितब्बा. कथं? तयो हि विमोक्खा – सुञ्ञतो, अनिमित्तो, अप्पणिहितोति. तत्थ सुञ्ञतविमोक्खेन विमुत्तखीणासवो पटिपदावसेन चतुब्बिधो होति; तथा अनिमित्तअप्पणिहितविमोक्खेहीति – एवं द्वादस अरहन्तो वेदितब्बा. इति इमे द्वादस अरहन्तो विय द्वादसेव सकदागामिनो, चतुवीसति सोतापन्ना, अट्ठचत्तालीस अनागामिनोति एत्तका पुग्गला इतो मुच्चित्वा बहिद्धा नुप्पज्जन्ति, इमस्मिञ्ञेव सब्बञ्ञुबुद्धसासने उप्पज्जन्तीति.

एककनिद्देसवण्णना.

२. दुकनिद्देसवण्णना

४५. दुकनिद्देसे कोधनोति कुज्झनसीलो महाकोधो. एवं पुग्गलं पुच्छित्वापि धम्मेन पुग्गलं दस्सेतुं तत्थ कतमो कोधोतिआदिमाह. उपनाहीनिद्देसादीसुपि एसेव नयो. कोधो कुज्झनातिआदीनि हेट्ठा वुत्तत्थानेव. तथा उपनाहीनिद्देसादीसु पुब्बकालं कोधोतिआदीनि. अयं कोधो अप्पहीनोति अयं एत्तको कोधो विक्खम्भनप्पहानेन वा तदङ्गप्पहानेन वा समुच्छेदप्पहानेन वा अप्पहीनो. परतो उपनाहादीसुपि एसेव नयो.

५३. अहिरिकनिद्देसादीसु – इमिना अहिरिकेनाति इमिना एवंपकारेन अहिरिकधम्मेन समन्नागतो. इमिना अनोत्तप्पेनातिआदीसुपि एसेव नयो.

६३. अज्झत्तसंयोजनोति ¶ ¶ अज्झत्तबन्धनो. बहिद्धासंयोजनोति बहिद्धाबन्धनो. ते उभोपि वच्छकसालूपमाय दीपेतब्बा. वच्छकसालाय हि अन्तो बद्धो अन्तोयेव ¶ सयितवच्छको विय इधट्ठकसोतापन्नसकदागामिनो. तेसञ्हि बन्धनम्पि इधेव, सयम्पि इधेव. अन्तो बद्धो पन बहि सयितवच्छको विय रूपारूपभवे सोतापन्नसकदागामिनो. तेसञ्हि बन्धनमेव इध, सयं पन ब्रह्मलोके ठिता. बहि बद्धो बहि सयितवच्छको विय रूपारूपभवे अनागामी. तस्स हि बन्धनम्पि बहिद्धा, सयम्पि बहिद्धाव. बहि बद्धो पन अन्तोसयितवच्छको विय इधट्ठकअनागामी. तस्स हि बन्धनं रूपारूपभवेसु, सयं पन इध ठितो.

६५. अक्कोधननिद्देसादीसु – पहीनोति विक्खम्भनप्पहानेन वा, तदङ्गप्पहानेन वा, समुच्छेदप्पहानेन वा पहीनो.

८३. दुल्लभनिद्देसे – दुल्लभाति न सुलभा. पुब्बकारीति पठममेव कारको. कतवेदीति कतं वेदेति, विदितं पाकटं करोति. ते अगारियानगारियेहि दीपेतब्बा. अगारियेसु हि मातापितरो पुब्बकारिनो नाम. पुत्तधीतरो पन मातापितरो पटिजग्गन्ता अभिवादनादीनि तेसं कुरुमाना कतवेदिनो नाम. अनगारियेसु आचरियुपज्झाया पुब्बकारिनो नाम. अन्तेवासिकसद्धिविहारिका आचरियुपज्झाये पटिजग्गन्ता अभिवादनादीनि तेसं कुरुमाना कतवेदिनो नाम. तेसं आविभावत्थाय उपज्झायपोसकसोणत्थेरादीनं वत्थूनि कथेतब्बानि.

अपरो नयो – परेन अकतेयेव उपकारे अत्तनि कतं उपकारं अनपेक्खित्वा कारको पुब्बकारी, सेय्यथापि मातापितरो चेव आचरियुपज्झाया च. सो दुल्लभो; सत्तानं तण्हाभिभूतत्ता. परेन कतस्स उपकारस्स अनुरूपप्पवत्तिं अत्तनि कतं उपकारं उपकारतो जानन्तो, वेदियन्तो, कतञ्ञुकतवेदी. सेय्यथापि मातापितुआचरियुपज्झायेसु सम्मा पटिपन्नो. सोपि दुल्लभो; सत्तानं अविज्जाभिभूतत्ता.

अपिच – अकारणवच्छलो पुब्बकारी, सकारणवच्छलो कतञ्ञुकतवेदी. ‘करिस्सति मे’ति एवमादिकारणनिरपेक्खकिरियो ¶ पुब्बकारी. ‘करिस्सति ¶ मे’ति एवमादिकारणसापेक्खकिरियो कतञ्ञुकतवेदी. तमोजोतिपरायणो पुब्बकारी, जोतिजोतिपरायणो कतञ्ञुकतवेदी. देसेता पुब्बकारी, पटिपज्जिता कतञ्ञुकतवेदी. सदेवके लोके अरहं सम्मासम्बुद्धो ¶ पुब्बकारी, अरियसावको कतञ्ञुकतवेदीति. दुकनिपातट्ठकथायं (अ. नि. अट्ठ. २.२.१२०) पन – ‘‘‘पुब्बकारी’ति पठमं उपकारस्स कारको, ‘कतञ्ञुकतवेदी’ति तेन कतं ञत्वा पच्छा कारको. तेसु पुब्बकारी इणं देमीति सञ्ञं करोति, पच्छाकारको ‘इणं जीरापेमी’ति सञ्ञं करोती’’ति एत्तकमेव वुत्तं.

८४. दुत्तप्पयनिद्देसे – दुत्तप्पयाति अतप्पया, न सक्का केनचि तप्पेतुं. यो हि उपट्ठाककुलं वा ञातिकुलं वा निस्साय वसमानो चीवरे जिण्णे तेहि दिन्नं चीवरं निक्खिपति, न परिभुञ्जति. पुनप्पुनं दिन्नम्पि गहेत्वा निक्खिपतेव. यो च तेनेव नयेन लद्धं लद्धं विस्सज्जेति परस्स देति. पुनप्पुनं लद्धम्पि तथेव करोति. इमे द्वे पुग्गला सकटेहिपि पच्चये उपनेन्तेन तप्पेतुं न सक्काति दुत्तप्पया नाम.

८५. सुतप्पयनिद्देसे – न विस्सज्जेतीति अत्तनो अकत्वा परस्स न देति. अतिरेके पन सति न निक्खिपति परस्स देति. इदं वुत्तं होति – यो पन भिक्खु उपट्ठाककुला वा ञातिकुला वा जिण्णचीवरो साटकं लभित्वा चीवरं कत्वा परिभुञ्जति, न निक्खिपति; अग्गळं दत्वा पारुपन्तोपि पुन दिय्यमाने सहसा न पटिग्गण्हाति. यो च लद्धं लद्धं अत्तना परिभुञ्जति, परेसं न देति. इमे द्वेपि सुखेन सक्का तप्पेतुन्ति सुतप्पया नामाति.

८६. आसवाति किलेसा. न कुक्कुच्चायितब्बं कुक्कुच्चायतीति न कुक्कुच्चायितब्बयुत्तकं कुक्कुच्चायति. सूकरमंसं लभित्वा अच्छमंसन्ति कुक्कुच्चायति, मिगमंसं, लभित्वा दीपिमंसन्ति कुक्कुच्चायति. काले सन्तेयेव ‘कालो नत्थी’ति, अप्पवारेत्वाव ‘पवारितोस्मी’ति, पत्ते रजस्मिं अपतितेयेव ‘पतित’न्ति, अत्तानं उद्दिस्स मच्छमंसे अकतेयेव ‘मं उद्दिस्स कत’न्ति कुक्कुच्चायति. कुक्कुच्चायितब्बं न कुक्कुच्चायतीति कुक्कुच्चायितब्बयुत्तकं न कुक्कुच्चायति. अच्छमंसं लभित्वा सूकरमंसन्ति न ¶ कुक्कुच्चायति…पे… अत्तानं उद्दिस्स मच्छमंसे कते ‘मं उद्दिस्स कत’न्ति न कुक्कुच्चायति ¶ . अङ्गुत्तरट्ठकथायं पन – ‘‘‘न कुक्कुच्चायितब्ब’न्ति सङ्घभोगस्स अपट्ठपनं अविचारणं न कुक्कुच्चायितब्बं ¶ नाम, तं कुक्कुच्चायति. ‘कुक्कुच्चायितब्ब’न्ति तस्सेव पट्ठपनं विचारणं, तं न कुक्कुच्चायती’’ति एत्तकमेव वुत्तं. इमेसन्ति इमेसं द्विन्नं पुग्गलानं सुभूमियं तिणलतादीनि विय रत्तिम्पि दिवापि आसवा वड्ढन्तियेव. सुक्कपक्खे कप्पियमंसं लभित्वा कप्पियमंसन्त्वेव गण्हन्तो न कुक्कुच्चायितब्बं न कुक्कुच्चायति नामाति इमिना नयेन अत्थो वेदितब्बो.

८८. हीनाधिमुत्तोति हीनज्झासयो. दुस्सीलोति निस्सीलो. पापधम्मोति लामकधम्मो.

८९. पणीताधिमुत्तोति पणीतज्झासयो. कल्याणधम्मोति भद्दकधम्मो, सुचिधम्मो, सुन्दरधम्मो.

९०. तित्तोति सुहितो परियोसितो. तप्पेताति अञ्ञेसम्पि तित्तिकरो. पच्चेकसम्बुद्धा ये च तथागतसावकाति एत्थ पच्चेकबुद्धा नवहि लोकुत्तरधम्मेहि सयं तित्ता परिपुण्णा. अञ्ञे पन तप्पेतुं न सक्कोन्ति. तेसञ्हि धम्मकथाय अभिसमयो न होति. सावकानं पन धम्मकथाय अपरिमाणानम्पि देवमनुस्सानं अभिसमयो होति. एवं सन्तेपि यस्मा पन ते धम्मं देसेन्ता न अत्तनो वचनं कत्वा कथेन्ति, बुद्धानं वचनं कत्वा कथेन्ति. सोतुं निसिन्नपरिसापि ‘अयं भिक्खु न अत्तना पटिविद्धधम्मं कथेति, बुद्धेहि पटिविद्धधम्मं कथेती’ति चित्तीकारं करोति. इति सो चित्तीकारो बुद्धानंयेव होति. एवं तत्थ सम्मासम्बुद्धोव तप्पेता नाम. यथा हि ‘असुकस्स नाम इदञ्चिदञ्च देथा’ति रञ्ञा आणत्ता किञ्चापि आनेत्वा देन्ति, अथ खो राजाव तत्थ दायको. येहिपि लद्धं होति, ते ‘रञ्ञा अम्हाकं ठानन्तरं दिन्नं, इस्सरियविभवो दिन्नो’त्वेव गण्हन्ति, न राजपुरिसेहीति. एवंसम्पदमिदं वेदितब्बं. सेसं सब्बत्थ उत्तानत्थमेवाति.

दुकनिद्देसवण्णना.

३. तिकनिद्देसवण्णना

९१. तिकनिद्देसे ¶ ¶ – दुस्सीलोति निस्सीलो. पापधम्मोति लामकधम्मो. सीलविपत्तिया वा दुस्सीलो, दिट्ठिविपत्तिया पापधम्मो ¶ . कायवचीसंवरभेदेन दुस्सीलो, सेससंवरभेदेन पापधम्मो. असुद्धपयोगताय दुस्सीलो, असुद्धासयताय पापधम्मो. कुसलसीलविरहेन दुस्सीलो; अकुसलसीलसमन्नागमेन पापधम्मो. असुचीति असुचीहि कायकम्मादीहि समन्नागतो. सङ्कस्सरसमाचारोति सङ्काय परेहि सरितब्बसमाचारो. किञ्चिदेव असारुप्पं दिस्वा ‘इदं इमिना कतं भविस्सती’ति एवं परेहि आसङ्कनीयसमाचारो, अत्तनोयेव वा सङ्काय सरितब्बसमाचारो – सासङ्कसमाचारोति अत्थो. तस्स हि दिवाट्ठानादीसु सन्निपतित्वा किञ्चिदेव मन्तयन्ते भिक्खू दिस्वा ‘इमे एकतो हुत्वा मन्तेन्ति, कच्चि नु खो मया कतकम्मं जानित्वा मन्तेन्ती’ति एवं सासङ्कसमाचारो होति.

पटिच्छन्नकम्मन्तोति पटिच्छादेतब्बयुत्तकेन पापकम्मेन समन्नागतो. अस्समणो समणपटिञ्ञोति अस्समणो हुत्वाव समणपतिरूपकताय ‘समणो अह’न्ति एवं पटिञ्ञो. अब्रह्मचारी ब्रह्मचारिपटिञ्ञोति अञ्ञे ब्रह्मचारिनो सुनिवत्थे सुपारुते सुम्भकपत्तधरे गामनिगमजनपदराजधानीसु पिण्डाय चरित्वा जीविकं कप्पेन्ते दिस्वा सयम्पि तादिसेन आकारेन तथा पटिपज्जनतो ‘अहं ब्रह्मचारी’ति पटिञ्ञं देन्तो विय होति. ‘अहं भिक्खू’ति वत्वा उपोसथग्गादीनि पविसन्तो पन ब्रह्मचारिपटिञ्ञो होतियेव, तथा सङ्घिकं लाभं गण्हन्तो. अन्तोपूतीति पूतिना कम्मेन अन्तो अनुपविट्ठो, निग्गुणताय वा गुणसारविरहितत्ता अन्तोपूति. अवस्सुतोति रागादीहि तिन्तो. कसम्बुजातोति सञ्जातरागादिकचवरो. अथ वा कसम्बु वुच्चति तिन्तकुणपगतं कसटउदकं. इमस्मिञ्च सासने दुस्सीलो नाम जिगुच्छनीयत्ता तिन्तकुणपकसटउदकसदिसो. तस्मा कसम्बु विय जातोति कसम्बुजातो.

तस्स न एवं होतीति कस्मा न होति? यत्थ पतिट्ठितेन सक्का भवेय्य अरहत्तं लद्धुं, तस्सा पतिट्ठाय भिन्नत्ता. यथा हि चण्डालकुमारकस्स ¶ ‘असुको नाम खत्तियकुमारो ¶ रज्जे अभिसित्तो’ति सुत्वापि, यस्मिं कुले पच्चाजाता अभिसेकं पापुणन्ति, तस्मिं कुले अपच्चाजातत्ता न एवं होति – ‘कुदास्सु नामाहम्पि सो खत्तियकुमारो विय अभिसेकं ¶ पापुणेय्य’न्ति; एवमेव दुस्सीलस्स ‘असुको नाम भिक्खु अरहत्तं पत्तो’ति सुत्वापि, यस्मिं सीले पतिट्ठितेन अरहत्तं पत्तब्बं, तस्स अभावतो ‘कुदास्सु नामाहम्पि सो सीलवा विय अरहत्तं पापुणेय’न्ति न एवं होति. अयं वुच्चतीति अयं एवरूपो पुग्गलो अरहत्तासाय अभावा निरासोति वुच्चति.

९२. तस्स एवं होतीति कस्मा होति? यस्मिं पतिट्ठितेन सक्का भवेय्य अरहत्तं पापुणितुं, तस्सा पतिट्ठाय थिरत्ता. यथा हि सुजातस्स खत्तियकुमारस्स ‘असुको नाम खत्तियकुमारो रज्जे अभिसित्तो’ति सुत्वाव यस्मिं कुले पच्चाजाता अभिसेकं पापुणन्ति, तस्मिं पच्चाजातस्स एवं होति – ‘कुदास्सु नामाहम्पि, सो कुमारो विय अभिसेकं पापुणेय्य’न्ति एवमेव सीलवतो ‘असुको नाम भिक्खु अरहत्तं पत्तो’ति सुत्वाव यस्मिं सीले पतिट्ठितेन अरहत्तं पत्तब्बं, तस्सा पतिट्ठाय थिरत्ता – ‘कुदास्सु नामाहम्पि सो भिक्खु विय अरहत्तं पापुणेय्य’न्ति एवं होति. अयं वुच्चतीति अयं एवरूपो पुग्गलो आसंसो नाम वुच्चति. सो हि अरहत्तं आसंसति पत्थेतीति आसंसो.

९३. या हिस्स पुब्बे अविमुत्तस्साति या तस्स खीणासवस्स पुब्बे अरहत्तविमुत्तिया अविमुत्तस्स विमुत्तासा अहोसि, सा पटिप्पस्सद्धा, तस्मा न एवं होति. यथा हि अभिसित्तस्स खत्तियस्स ‘असुको नाम खत्तियकुमारो रज्जे अभिसित्तो’ति सुत्वा एकस्स रञ्ञो द्विन्नं रज्जाभिसेकानं द्विन्नं सेतच्छत्तानं अभावा न एवं होति – ‘‘कुदास्सु नामाहम्पि सो कुमारो विय अभिसेकं पापुणेय्य’’न्ति; एवमेव खीणासवस्स ‘असुको नाम भिक्खु अरहत्तं पत्तो’ति सुत्वा, द्विन्नं अरहत्तानं अभावा – ‘कुदास्सु नामाहम्पि सो भिक्खु विय अरहत्तं पापुणेय्य’न्ति ¶ न एवं होति. अयं वुच्चतीति अयं एवरूपो पुग्गलो अरहत्तासाय विगतत्ता विगतासोति वुच्चति.

९४. गिलानूपमनिद्देसे – याय उपमाय ते गिलानूपमाति वुच्चन्ति, तं ताव उपमं दस्सेतुं तयो गिलानातिआदि वुत्तं. तत्थ सप्पायानीति हितानि वुद्धिकरानि. पतिरूपन्ति ¶ अनुच्छविकं. नेव वुट्ठाति तम्हा आबाधाति इमिना अतेकिच्छेन वातापमारादिना रोगेन समन्नागतो निट्ठप्पत्तो गिलानो कथितो. वुट्ठाति तम्हा आबाधाति इमिना खिपितकच्छुतिणपुप्फकजरादिप्पभेदो अप्पमत्तकाबाधो कथितो.

लभन्तो ¶ सप्पायानि भोजनानि नो अलभन्तोति इमिना पन येसं पटिजग्गनेन फासुकं होति, सब्बेपि ते आबाधा कथिता. एत्थ च पतिरूपो उपट्ठाको नाम गिलानुपट्ठाकअङ्गेहि समन्नागतो पण्डितो दक्खो अनलसो वेदितब्बो.

गिलानुपट्ठाको अनुञ्ञातोति ‘भिक्खुसङ्घेन दातब्बो’ति अनुञ्ञातो. तस्मिञ्हि गिलाने अत्तनो धम्मताय यापेतुं असक्कोन्ते भिक्खुसङ्घेन तस्स भिक्खुनो ‘एको भिक्खु च सामणेरो च इमं पटिजग्गथा’ति अपलोकेत्वा दातब्बा. याव पन ते तं पटिजग्गन्ति, ताव गिलानस्स च तेसञ्च द्विन्नं येनत्थो सब्बं भिक्खुसङ्घस्सेव भारो. अञ्ञेपि गिलाना उपट्ठातब्बाति इतरेपि द्वे गिलाना उपट्ठातब्बा. किं कारणा? योपि हि निट्ठप्पत्तगिलानो, सो अनुपट्ठियमानो ‘सचे मं पटिजग्गेय्युं, फासुकं मे भवेय्य, न खो पन मं पटिजग्गन्ती’ति मनोपदोसं कत्वा अपाये निब्बत्तेय्य. पटिजग्गियमानस्स पन एवं होति – ‘भिक्खुसङ्घेन यं कत्तब्बं तं सब्बं कतं, मय्हं पन कम्मविपाको ईदिसो’ति सो भिक्खुसङ्घे मेत्तं पच्चुपट्ठपेत्वा सग्गे निब्बत्तति. यो पन अप्पमत्तकेन ब्याधिना समन्नागतो लभन्तोपि अलभन्तोपि वुट्ठातियेव, तस्स विनापि भेसज्जेन वूपसमनकब्याधि भेसज्जे कते खिप्पतरं वूपसम्मति. ततो सो बुद्धवचनं ¶ वा उग्गण्हितुं समणधम्मं वा कातुं सक्खिस्सति. इमिना कारणेन अञ्ञेपि गिलाना उपट्ठातब्बाति वुत्तं.

नेव ओक्कमतीति नेव पविसति. नियामं कुसलेसु धम्मेसु सम्मत्तन्ति कुसलेसु धम्मेसु मग्गनियामसङ्खातं सम्मत्तं. इमिना पदपरमो पुग्गलो कथितो. दुतियवारेन उग्घटितञ्ञू गहितो सासने नाळकत्थेरसदिसो ¶ . बुद्धन्तरे एकवारं पच्चेकबुद्धानं सन्तिके ओवादं लभित्वा पटिविद्धपच्चेकबोधिञाणो च. ततियवारेन विपञ्चितञ्ञू पुग्गलो कथितो. नेय्यो पन तन्निस्सितोव होति.

धम्मदेसना अनुञ्ञाताति मासस्स अट्ठ वारे धम्मकथा अनुञ्ञाता. अञ्ञेसम्पि धम्मो देसेतब्बोति इतरेसम्पि धम्मो कथेतब्बो. किं कारणा? पदपरमस्स हि इमस्मिं अत्तभावे धम्मं पटिविज्झितुं असक्कोन्तस्सापि अनागते पच्चयो भविस्सति. यो पन तथागतस्स रूपदस्सनं लभन्तोपि अलभन्तोपि धम्मविनयञ्च सवनाय लभन्तोपि अलभन्तोपि धम्मं अभिसमेति; सो अलभन्तो न ताव अभिसमेति, लभन्तो पन खिप्पमेव अभिसमेस्सतीति इमिना ¶ कारणेन तेसं धम्मो देसेतब्बो. ततियस्स पन पुनप्पुनं देसेतब्बोव. कायसक्खिदिट्ठप्पत्तसद्धाविमुत्ता हेट्ठा कथितायेव.

९८. गूथभाणीआदीसु – सभग्गतोति सभायं ठितो. परिसग्गतोति गामपरिसाय ठितो. ञातिमज्झगतोति दायादानं मज्झे ठितो. पूगमज्झगतोति सेणीनं मज्झे ठितो. राजकुलमज्झगतोति राजकुलस्स मज्झे महाविनिच्छये ठितो. अभिनीतोति पुच्छनत्थाय नीतो. सक्खिपुट्ठोति सक्खिं कत्वा पुच्छितो. एहम्भो पुरिसाति आलपनमेतं. अत्तहेतु वा परहेतु वाति अत्तनो वा परस्स वा हत्थपादादिहेतु वा धनहेतु वा. आमिसकिञ्चिक्खहेतु वाति एत्थ आमिसन्ति लाभो अधिप्पेतो. किञ्चिक्खन्ति यं वा तं वा अप्पमत्तकं. अन्तमसो तित्तिरवट्टकसप्पिपिण्डनवनीतपिण्डादिअप्पमत्तकस्सापि लञ्जस्स हेतूति अत्थो. सम्पजानमुसा भासिता होतीति जानन्तोयेव मुसावादं कत्ता होति. अयं वुच्चतीति अयं एवरूपो पुग्गलो गूथसदिसवचनत्ता गूथभाणीति वुच्चति. यथा हि गूथं नाम महाजनस्स अनिट्ठं ¶ होति अकन्तं; एवमेव इमस्स पुग्गलस्स वचनं देवमनुस्सानं अनिट्ठं होति अकन्तं.

९९. अयं वुच्चतीति अयं एवरूपो पुग्गलो पुप्फसदिसवचनत्ता पुप्फभाणीति वुच्चति. यथा हि फुल्लानि वस्सिकानि वा अधिमुत्तकानि वा महाजनस्स इट्ठानि कन्तानि होन्ति; एवमेव इमस्स पुग्गलस्स वचनं देवमनुस्सानं इट्ठं ¶ होति कन्तं.

१००. नेलाति एलं वुच्चति दोसो. नास्सा एलन्ति नेला. निद्दोसाति अत्थो, ‘‘नेलङ्गो सेतपच्छादो’’ति (उदा. ६५) एत्थ वुत्तनेलं विय. कण्णसुखाति ब्यञ्जनमधुरताय कण्णानं सुखा. सूचिविज्झनं विय कण्णसूलं न जनेति. अत्थमधुरताय सकलसरीरे कोपं अजनेत्वा पेमं जनेतीति पेमनीया. हदयं गच्छति अप्पटिहञ्ञमाना सुखेन चित्तं पविसतीति हदयङ्गमा. गुणपरिपुण्णताय पुरे भवाति पोरी. पुरे संवड्ढनारी विय सुकुमारातिपि पोरी. पुरस्स एसातिपि पोरी. नगरवासीनं कथाति अत्थो. नगरवासिनो हि युत्तकथा होन्ति. पितिमत्तं पिताति, मातिमत्तं माताति, भातिमत्तं भाताति वदन्ति. एवरूपी कथा बहुनो जनस्स कन्ता होतीति बहुजनकन्ता. बहुजनस्स कन्तभावेनेव बहुनो जनस्स मनापा चित्तवुद्धिकराति बहुजनमनापा. अयं वुच्चतीति अयं एवरूपो पुग्गलो मधुभाणीति ¶ वुच्चति. मुदुभाणीतिपि पाठो. उभयत्थापि मधुरवचनोति अत्थो. यथा हि चतुमधुरं नाम मधुरं पणीतं; एवमेव इमस्स पुग्गलस्स वचनं देवमनुस्सानं मधुरं होति.

१०१. अरुकूपमचित्तादीसु – अभिसज्जतीति लग्गति. कुप्पतीति कोपवसेन कुप्पति. ब्यापज्जतीति पकतिभावं पजहति, पूतिको होति. पतित्थीयतीति थिनभावं थद्धभावञ्च आपज्जति. कोपन्ति दुब्बलकोधं. दोसन्ति दुस्सनवसेन ततो बलवतरं. अप्पच्चयन्ति अतुट्ठाकारं दोमनस्सं. दुट्ठारुकोति पुराणवणो. कट्ठेनाति दण्डककोटिया. कठलायाति कपालेन. आसवं देतीति अपरापरं सवति. पुराणवणो हि अत्तनो धम्मताय एव पुब्बं लोहितं यूसन्ति इमानि तीणि सवति ¶ , घट्टितो पन तानि अधिकतरं सवति. एवमेवं खोति एत्थ इदं ओपम्मसंसन्दनं, दुट्ठारुको विय हि कोधनो पुग्गलो. तस्स अत्तनो धम्मताय सवनं विय कोधनस्सपि अत्तनो धम्मताय उद्धुमातकस्स विय चण्डिकतस्स चरणं. कट्ठेन वा कठलाय वा घट्टनं विय अप्पमत्तकम्पि ¶ वचनं भिय्योसो मत्ताय सवनं विय ‘मादिसं नाम एस एवं वदती’ति भिय्योसो मत्ताय उद्धुमायनभावो दट्ठब्बो. अयं वुच्चतीति अयं एवरूपो पुग्गलो अरुकूपमचित्तोति वुच्चति. पुराणवणसदिसचित्तोति अत्थो.

१०२. रत्तन्धकारतिमिसायाति रत्तिं चक्खुविञ्ञाणुप्पत्तिनिवारणेन अन्धभावकरणे बहलतमे. विज्जन्तरिकायाति विज्जुप्पत्तिक्खणे. इधापि इदं ओपम्मसंसन्दनं – चक्खुमा पुरिसो विय हि योगावचरो दट्ठब्बो. अन्धकारं विय सोतापत्तिमग्गवज्झा किलेसा. विज्जुसञ्चरणं विय सोतापत्तिमग्गञाणस्स उप्पत्तिकालो. विज्जन्तरिकाय चक्खुमतो पुरिसस्स सामन्ता रूपदस्सनं विय सोतापत्तिमग्गक्खणे निब्बानदस्सनं. पुन अन्धकारावत्थरणं विय सकदागामिमग्गवज्झा किलेसा. पुन विज्जुसञ्चरणं विय सकदागामिमग्गञाणस्स उप्पादो. विज्जन्तरिकाय चक्खुमतो पुरिसस्स सामन्ता रूपदस्सनं विय सकदागामिमग्गक्खणे निब्बानदस्सनं. पुन अन्धकारावत्थरणं विय अनागामिमग्गवज्झा किलेसा. पुन विज्जुसञ्चरणं विय अनागामिमग्गञाणस्स उप्पादो. विज्जन्तरिकाय चक्खुमतो पुरिसस्स सामन्ता रूपदस्सनं विय अनागामिमग्गक्खणे निब्बानदस्सनं वेदितब्बं. अयं वुच्चतीति अयं एवरूपो पुग्गलो विज्जूपमचित्तोति वुच्चति. इत्तरकालोभासेन विज्जुसदिसचित्तोति अत्थो.

१०३. वजिरूपमचित्ततायपि ¶ इदं ओपम्मसंसन्दनं – वजिरं विय हि अरहत्तमग्गञाणं दट्ठब्बं. मणिगण्ठिपासाणगण्ठि विय अरहत्तमग्गवज्झा किलेसा. वजिरस्स मणिगण्ठिं वा पासाणगण्ठिं वा विनिविज्झित्वा अगमनभावस्स नत्थिभावो विय अरहत्तमग्गञाणेन अच्छेज्जानं किलेसानं नत्थिभावो. वजिरेन निब्बिद्धवेधस्स पुन अपटिपूरणं विय अरहत्तमग्गेन छिन्नानं किलेसानं पुन अनुप्पादो दट्ठब्बो. अयं वुच्चतीति अयं एवरूपो पुग्गलो ¶ वजिरूपमचित्तोति वुच्चति. किलेसानं मूलघातकरणसमत्थताय वजिरेन सदिसचित्तोति अत्थो.

१०४. अन्धादीसु तथारूपं चक्खु न होतीति तथाजातिकं तथासभावं ¶ पञ्ञाचक्खु न होति. फातिं करेय्याति फीतं वड्ढितं करेय्य. सावज्जानवज्जेति सदोसनिद्दोसे. हीनप्पणीतेति अधमुत्तमे. कण्हसुक्कसप्पटिभागेति कण्हसुक्कायेव अञ्ञमञ्ञपटिबाहनतो पटिपक्खवसेन सप्पटिभागाति वुच्चन्ति. अयं पनेत्थ सङ्खेपो – कुसले धम्मे ‘कुसला धम्मा’ति येन पञ्ञाचक्खुना जानेय्य, अकुसले धम्मे ‘अकुसला धम्मा’ति, सावज्जादीसुपि एसेव नयो. कण्हसुक्कसप्पटिभागेसु पन कण्हधम्मे ‘सुक्कसुप्पटिभागा’ति, सुक्कधम्मे ‘कण्हसप्पटिभागा’ति येन पञ्ञाचक्खुना जानेय्य. तथारूपम्पिस्स चक्खु न होतीति इमिना नयेन सेसट्ठानेसुपि अत्थो वेदितब्बो. अयं वुच्चतीति अयं एवरूपो पुग्गलो दिट्ठधम्मिकभोगसंहरणपञ्ञाचक्खुनो च सम्परायिकत्थसोधनपञ्ञाचक्खुनो च अभावा अन्धोति वुच्चति. दुतियो दिट्ठधम्मिकभोगसंहरणपञ्ञाचक्खुनो भावा, सम्परायिकत्थसोधनपञ्ञाचक्खुनो पन अभावा एकचक्खूति वुच्चति. ततियो द्विन्नम्पि भावा द्विचक्खूति वुच्चति.

१०७. अवकुज्जपञ्ञादीसु धम्मं देसेन्तीति उपासको धम्मस्सवनत्थाय आगतोति अत्तनो कम्मं पहाय धम्मं देसेन्ति. आदिकल्याणन्ति आदिम्हि कल्याणं भद्दकं अनवज्जं निद्दोसं कत्वा देसेन्ति. सेसपदेसुपि एसेव नयो. एत्थ पन आदीति पुब्बपट्ठपना. मज्झन्ति कथावेमज्झं. परियोसानन्ति सन्निट्ठानं. इतिस्स धम्मं कथेन्ता पुब्बपट्ठपनेपि कल्याणं भद्दकं अनवज्जमेव कत्वा कथेन्ति, वेमज्झेपि, परियोसानेपि. एत्थ च अत्थि देसनाय आदिमज्झपरियोसानानि, अत्थि सासनस्स. तत्थ देसनाय ताव – चतुप्पदिकगाथाय पठमपदं आदि, द्वे पदानि मज्झं, अवसानपदं परियोसानं. एकानुसन्धिकसुत्तस्स – निदानं आदि, अनुसन्धि मज्झं, इदमवोचाति अप्पना परियोसानं. अनेकानुसन्धिकस्स – पठमो अनुसन्धि आदि ¶ , ततो परं एको वा अनेका वा मज्झं, पच्छिमो परियोसानं. अयं ताव देसनाय नयो.

सासनस्स ¶ पन सीलं आदि, समाधि मज्झं, विपस्सना परियोसानं. समाधि वा आदि, विपस्सना मज्झं, मग्गो परियोसानं. विपस्सना वा आदि, मग्गो मज्झं, फलं परियोसानं. मग्गो वा आदि, फलं मज्झं, निब्बानं परियोसानं ¶ . द्वे द्वे वा करियमाने सीलसमाधयो आदि, विपस्सनामग्गा मज्झं, फलनिब्बानानि परियोसानं. सात्थन्ति सात्थकं कत्वा देसेन्ति. सब्यञ्जनन्ति अक्खरपारिपूरिं कत्वा देसेन्ति. केवलपरिपुण्णन्ति सकलपरिपुण्णं अनूनं कत्वा देसेन्ति. परिसुद्धन्ति परिसुद्धं निज्जटं निग्गण्ठिं कत्वा देसेन्ति. ब्रह्मचरियं पकासेन्तीति एवं देसेन्ता च सेट्ठचरियभूतं सिक्खत्तयसङ्गहितं अरियं अट्ठङ्गिकं मग्गं पकासेन्ति. नेव आदिं मनसि करोतीति नेव पुब्बपट्ठपनं मनसि करोति. कुम्भोति घटो. निक्कुज्जोति अधोमुखो ठपितो. एवमेवन्ति एत्थ कुम्भो निक्कुज्जो विय अवकुज्जपञ्ञो पुग्गलो दट्ठब्बो. उदकासिञ्चनकालो विय धम्मदेसनाय लद्धकालो. उदकस्स विवट्टनकालो विय तस्मिं आसने निसिन्नस्स उग्गहेतुं असमत्थकालो. उदकस्स असण्ठानकालो विय उट्ठहित्वा असल्लक्खणकालो वेदितब्बो. अयं वुच्चतीति अयं एवरूपो पुग्गलो अवकुज्जपञ्ञोति वुच्चति. अधोमुखपञ्ञोति अत्थो.

१०८. आकिण्णानीति पक्खित्तानि. सतिसम्मोसा पकिरेय्याति मुट्ठस्सतिताय विकिरेय्य. एवमेवन्ति एत्थ उच्छङ्गो विय उच्छङ्गपञ्ञो पुग्गलो दट्ठब्बो. नानाखज्जकानि विय नानप्पकारं बुद्धवचनं. उच्छङ्गे नानाखज्जकानि खादन्तस्स निसिन्नकालो विय तस्मिं आसने निसिन्नस्स उग्गहणकालो. वुट्ठहन्तस्स सतिसम्मोसा विकिरणकालो विय तस्मा आसना वुट्ठाय गच्छन्तस्स असल्लक्खणकालो वेदितब्बो. अयं वुच्चतीति अयं एवरूपो पुग्गलो उच्छङ्गपञ्ञोति वुच्चति. उच्छङ्गसदिसपञ्ञोति अत्थो.

१०९. उक्कुज्जोति उपरिमुखो ठपितो. सण्ठातीति पतिट्ठहति. एवमेव खोति एत्थ उपरिमुखो ठपितो कुम्भो विय पुथुपञ्ञो पुग्गलो दट्ठब्बो. उदकस्स आसित्तकालो विय देसनाय लद्धकालो. उदकस्स सण्ठानकालो विय तत्थ निसिन्नस्स उग्गहणकालो. नो विवट्टनकालो ¶ ¶ विय उट्ठाय गच्छन्तस्स सल्लक्खणकालो वेदितब्बो. अयं वुच्चतीति अयं एवरूपो पुग्गलो पुथुपञ्ञोति वुच्चति. वित्थारिकपञ्ञोति अत्थो.

११०. अवीतरागादीसु – यथा सोतापन्नसकदागामिनो, एवं पुथुज्जनोपि ¶ पञ्चसु कामगुणेसु, तीसु च भवेसु अवीतरागो. अदब्बताय पन न गहितो. यथा हि छेको वड्ढकी दब्बसम्भारत्थं वनं पविट्ठो न आदितो पट्ठाय सम्पत्तसम्पत्तरुक्खे छिन्दति, ये पनस्स दब्बसम्भारूपगा होन्ति, तेयेव छिन्दति; एवमिधापि भगवता दब्बजातिका अरियाव गहिता, पुथुज्जना पन अदब्बताय न गहिताति वेदितब्बा. कामेसु वीतरागोति पञ्चसु कामगुणेसु वीतरागो. भवेसु अवीतरागोति रूपारूपभवेसु अवीतरागो.

११३. पासाणलेखूपमादीसु – अनुसेतीति अप्पहीनताय अनुसेति. न खिप्पं लुज्जतीति न अन्तरा नस्सति, कप्पुट्ठानेनेव नस्सति. एवमेवन्ति एवं तस्सापि पुग्गलस्स कोधो न अन्तरा पुनदिवसे वा अपरदिवसे वा निब्बाति, अद्धनियो पन होति. मरणेनेव निब्बातीति अत्थो. अयं वुच्चतीति अयं एवरूपो पुग्गलो पासाणलेखा विय कुज्झनभावेन चिरट्ठितिकतो पासाणलेखूपमोति वुच्चति.

११४. सो च ख्वस्स कोधोति सो अप्पमत्तकेपि कारणे सहसा कुद्धस्स कोधो. न चिरन्ति अचिरं अप्पहीनताय नानुसेति. यथा पन पथवियं आकड्ढित्वा कतलेखा वातादीहि खिप्पं नस्सति, एवमस्स सहसा उप्पन्नोपि कोधो खिप्पमेव निब्बातीति अत्थो. अयं वुच्चतीति अयं एवरूपो पुग्गलो पथवियं लेखा विय कुज्झनभावेन अचिरट्ठितिकतो पथवीलेखूपमोति वुच्चति.

११५. आगाळ्हेनाति अतिगाळ्हेन मम्मच्छेदकेन थद्धवचनेन. फरुसेनाति न सोतसुखेन. अमनापेनाति न चित्तसुखेन. संसन्दतीति एकीभवति. सन्धियतीति घटयति. सम्मोदतीति निरन्तरो होति. अथ वा – संसन्दतीति चित्तकिरियादीसु चित्तेन समोधानं गच्छति. खीरोदकं विय एकीभावं उपेतीति अत्थो. सन्धियतीति ठानगमनादीसु कायकिरियादीसु ¶ कायेन समोधानं गच्छति. तिलतण्डुला विय मिस्सीभावं उपेतीति अत्थो. सम्मोदतीति उद्देसपरिपुच्छादीसु वचीकिरियासु वाचाय समोधानं गच्छति. विप्पवासगतोपि ¶ पियसहायको विय पियतरभावं उपेतीति अत्थो. अपिच – किच्चकरणीयेसु तेहि सद्धिं आदितोव एककिरियभावं उपगच्छन्तो संसन्दति. याव मज्झा पवत्तन्तो सन्धियति, याव परियोसाना अनिवत्तन्तो सम्मोदतीतिपि वेदितब्बो. अयं वुच्चतीति अयं एवरूपो पुग्गलो उदकलेखा ¶ विय खिप्पं संसन्दनतो उदकलेखूपमोति वुच्चति.

११६. पोत्थकूपमेसु – याय उपमाय ते पोत्थकूपमाति वुच्चन्ति, तं ताव उपमं दस्सेतुं तयो पोत्थकातिआदि वुत्तं. तत्थ नवोति नववायिमो. पोत्थकोति साणवाकसाटको. दुब्बण्णोति विवण्णो. दुक्खसम्फस्सोति खरसम्फस्सो. अप्पग्घोति अतिबहुं अग्घन्तो कहापणग्घनको होति. मज्झिमोति परिभोगमज्झिमो. सो हि नवभावं अतिक्कमित्वा जिण्णभावं अप्पत्तो मज्झे परिभोगकालेपि दुब्बण्णो च दुक्खसम्फस्सो च अप्पग्घोयेव च होति. अतिबहुं अग्घन्तो अड्ढं अग्घति. जिण्णकाले पन अड्ढमासकं वा काकणिकं वा अग्घति. उक्खलिपरिमज्जनन्ति काळुक्खलिपरिपुञ्छनं.

नवोति उपसम्पदाय पञ्चवस्सकालतो हेट्ठा जातिया सट्ठिवस्सोपि नवोयेव. दुब्बण्णतायाति सरीरवण्णेनपि गुणवण्णेनपि दुब्बण्णताय. दुस्सीलस्स हि परिसमज्झे निसिन्नस्स नित्तेजताय सरीरवण्णोपि न सम्पज्जति, गुणवण्णे वत्तब्बमेव नत्थि. ये खो पनस्साति ये खो पन तस्स उपट्ठाका वा ञातिमित्तादयो वा एतं पुग्गलं सेवन्ति. तेसं तन्ति तेसं पुग्गलानं छ सत्थारे सेवन्तानं मिच्छादिट्ठिकानं विय, देवदत्तं सेवन्तानं कोकालिकादीनं विय च तं सेवनं दीघरत्तं अहिताय दुक्खाय होति. मज्झिमोति पञ्चवस्सकालतो पट्ठाय याव नववस्सकाला मज्झिमो नाम. थेरोति दसवस्सकालतो पट्ठाय थेरो नाम. एवमाहंसूति एवं वदन्ति. किं नु खो तुय्हन्ति तुय्हं बालस्स भणितेन को अत्थोति वुत्तं होति. तथारूपन्ति तथाजातिकं तथासभावं उक्खेपनीयकम्मस्स कारणभूतं.

११७. कासिकवत्थूपमेसु ¶ – कासिकवत्थं नाम तयो कप्पासंसू गहेत्वा कन्तितसुत्तेन वायितं सुखुमवत्थं. तं नववायिमं अनग्घं होति. परिभोगमज्झिमं वीसम्पि तिंसम्पि सहस्सानि अग्घति. जिण्णकाले पन अट्ठपि दसपि सहस्सानि अग्घति.

तेसं ¶ तं होतीति तेसं सम्मासम्बुद्धादयो सेवन्तानं विय तं सेवनं दीघरत्तं ¶ हिताय सुखाय होति. सम्मासम्बुद्धञ्हि एकं निस्साय यावज्जकाला मुच्चनकसत्तानं पमाणं नत्थि. तथा सारिपुत्तत्थेरमहामोग्गल्लानत्थेरे अवसेसे च असीतिमहासावके निस्साय सग्गं गतसत्तानं पमाणं नत्थि. यावज्जकाला तेसं दिट्ठानुगतिं पटिपन्नसत्तानम्पि पमाणं नत्थियेव. आधेय्यं गच्छतीति तस्स महाथेरस्स तं अत्थनिस्सितं वचनं यथा गन्धकरण्डके कासिकवत्थं आधातब्बतं ठपेतब्बतं गच्छति, एवं उत्तमङ्गे सिरस्मिं हदये च आधातब्बतं ठपेतब्बतम्पि गच्छति. सेसमेत्थ हेट्ठा वुत्तानुसारेनेव वेदितब्बं.

११८. सुप्पमेय्यादीसु – सुखेन पमेतब्बोति सुप्पमेय्यो. इधाति इमस्मिं सत्तलोके. उद्धतोति उद्धच्चेन समन्नागतो. उन्नळोति उग्गतनळो; तुच्छमानं उक्खिपित्वा ठितोति अत्थो. चपलोति पत्तमण्डनादिना चापल्लेन समन्नागतो. मुखरोति मुखखरो. विकिण्णवाचोति असंयतवचनो. असमाहितोति चित्तेकग्गतारहितो. विब्भन्तचित्तोति भन्तचित्तो, भन्तगावीभन्तमिगीसप्पटिभागो. पाकटिन्द्रियोति विवटिन्द्रियो. अयं वुच्चतीति अयं एवरूपो पुग्गलो ‘सुप्पमेय्यो’ति वुच्चति. यथा हि परित्तस्स उदकस्स सुखेन पमाणं गय्हति; एवमेव इमेहि अगुणङ्गेहि समन्नागतस्स सुखेन पमाणं गय्हति. तेनेस ‘सुप्पमेय्यो’ति वुत्तो.

११९. दुक्खेन पमेतब्बोति दुप्पमेय्यो. अनुद्धतादीनि वुत्तपटिपक्खवसेन वेदितब्बानि. अयं वुच्चतीति अयं एवरूपो पुग्गलो ‘दुप्पमेय्यो’ति वुच्चति. यथा हि महासमुद्दस्स दुक्खेन पमाणं गय्हति; एवमेव इमेहि गुणङ्गेहि समन्नागतस्स दुक्खेन पमाणं गय्हति. तादिसो ‘अनागामी नु खो, खीणासवो नु खो’ति वत्तब्बतं गच्छति, तेनेस ‘दुप्पमेय्यो’ति वुत्तो.

१२०. न ¶ सक्का पमेतुन्ति अप्पमेय्यो. यथा हि आकासस्स न सक्का पमाणं गहेतुं, एवं खीणासवस्स. तेनेस ‘अप्पमेय्यो’ति वुत्तो.

१२१. न सेवितब्बादीसु – न सेवितब्बोति न उपसङ्कमितब्बो. न भजितब्बोति न अल्लीयितब्बो. न पयिरुपासितब्बोति न सन्तिके निसीदनवसेन पुनप्पुनं उपासितब्बो. हीनो ¶ होति सीलेनातिआदीसु उपादायुपादाय हीनता वेदितब्बा ¶ . यो हि पञ्च सीलानि रक्खति, सो दस सीलानि रक्खन्तेन न सेवितब्बो. यो पन दस सीलानि रक्खति, सो चतुपारिसुद्धिसीलं रक्खन्तेन न सेवितब्बो. अञ्ञत्र अनुद्दया अञ्ञत्र अनुकम्पाति ठपेत्वा अनुद्दयञ्च अनुकम्पञ्च. अत्तनो अत्थाय एव हि एवरूपो पुग्गलो न सेवितब्बो. अनुद्दयानुकम्पावसेन पन तं उपसङ्कमितुं वट्टति.

१२२. सदिसो होतीति समानो होति. सीलसामञ्ञगतानं सतन्ति सीलेन समानभावं गतानं सन्तानं. सीलकथा च नो भविस्सतीति एवं समानसीलानं अम्हाकं सीलमेव आरब्भ कथा भविस्सति. सा च नो फासु भविस्सतीति सा च सीलकथा अम्हाकं फासुविहारो सुखविहारो भविस्सति. सा च नो पवत्तिनी भविस्सतीति सा च अम्हाकं कथा दिवसम्पि कथेन्तानं पवत्तिनी भविस्सति, न पटिहञ्ञिस्सति. द्वीसु हि सीलवन्तेसु एकेन सीलस्स वण्णे कथिते इतरो अनुमोदति; तेन तेसं कथा फासु चेव होति, पवत्तिनी च. एकस्मिं पन दुस्सीले सति दुस्सीलस्स सीलकथा दुक्कथाति नेव सीलकथा होति, न फासु होति, न पवत्तिनी. समाधिपञ्ञाकथासुपि एसेव नयो. द्वे हि समाधिलाभिनो समाधिकथं, सप्पञ्ञा च पञ्ञाकथं कथेन्ता, रत्तिं वा दिवसं वा अतिक्कन्तम्पि न जानन्ति.

१२३. सक्कत्वा गरुं कत्वाति सक्कारञ्चेव गरुकारञ्च करित्वा. अधिको होतीति अतिरेको होति. सीलक्खन्धन्ति सीलरासिं. परिपूरेस्सामीति तं अतिरेकसीलं पुग्गलं निस्साय अत्तनो अपरिपूरं सीलरासिं परिपूरं करिस्सामि. तत्थ तत्थ पञ्ञाय अनुग्गहेस्सामीति एत्थ सीलस्स ¶ असप्पाये अनुपकारधम्मे वज्जेत्वा सप्पाये उपकारधम्मे सेवन्तो तस्मिं तस्मिं ठाने सीलक्खन्धं पञ्ञाय अनुग्गण्हाति नाम. समाधिपञ्ञाक्खन्धेसुपि एसेव नयो.

१२४. जिगुच्छितब्बादीसु – जिगुच्छितब्बोति गूथं विय जिगुच्छितब्बो. अथ खो नन्ति अथ खो अस्स. कित्तिसद्दोति कथासद्दो. एवमेवन्ति एत्थ गूथकूपो विय दुस्सील्यं दट्ठब्बं. गूथकूपे पतित्वा ठितो धमनीअहि विय दुस्सीलपुग्गलो. गुथकूपतो उद्धरियमानेन तेन अहिना पुरिसस्स सरीरं आरुळ्हेनापि अदट्ठभावो विय दुस्सीलं सेवमानस्सापि ¶ तस्स किरियाय ¶ कारणभावो सरीरं गूथेन मक्खेत्वा अहिनो गतकालो विय दुस्सीलं सेवमानस्स पापकित्तिसद्दस्स अब्भुग्गमनकालो वेदितब्बो.

१२५. तिन्दुकालातन्ति तिन्दुकरुक्खअलातं. भिय्योसो मत्ताय चिच्चिटायतीति तञ्हि झायमानं पकतियापि पपटिकायो मुञ्चन्तं चिच्चिटायति चिटिचिटाति सद्दं करोति. घट्टितं पन अधिमत्तं करोतीति अत्थो. एवमेवन्ति एवमेवं कोधनो अत्तनो धम्मतायपि उद्धतो चण्डिकतो हुत्वा चरति. अप्पमत्तकं पन वचनं वुत्तकाले ‘मादिसं नाम एवं वदती’ति अतिरेकतरं उद्धतो चण्डिकतो हुत्वा चरति. गूथकूपोति गूथपुण्णकूपो, गूथरासियेव वा. ओपम्मसंसन्दनं पनेत्थ पुरिमनयेनेव वेदितब्बं. तस्मा एवरूपो पुग्गलो अज्झुपेक्खितब्बो, न सेवितब्बोति यस्मा कोधनो अतिसेवियमानोपि अतिउपसङ्कमियमानोपि कुज्झतियेव, ‘किं इमिना’ति पटिक्कमन्तोपि कुज्झतियेव, तस्मा पलालग्गि विय अज्झुपेक्खितब्बो, न सेवितब्बो. किं वुत्तं होति? यो हि पलालग्गिं अतिउपसङ्कमित्वा तप्पति, तस्स सरीरं झायति. यो अतिपटिक्कमित्वा तप्पति, तस्स सीतं न वूपसम्मति. अनुपसङ्कमित्वा अपटिक्कमित्वा पन मज्झत्तभावेन तप्पेन्तस्स सीतं वूपसम्मति, कायोपि न डय्हति. तस्मा पलालग्गि विय कोधनो पुग्गलो मज्झत्तभावेन अज्झुपेक्खितब्बो, न सेवितब्बो, न भजितब्बो, न पयिरुपासितब्बो.

१२६. कल्याणमित्तोति सुचिमित्तो. कल्याणसहायोति सुचिसहायो. सहायोति सहगामी सद्धिंचरो. कल्याणसम्पवङ्कोति कल्याणेसु ¶ सुचिपुग्गलेसु सम्पवङ्को, तन्निन्नतप्पोणतप्पब्भारमानसोति अत्थो.

१२७. सीलेसु परिपूरकारीतिआदीसु – सीलेसु परिपूरकारिनोति एते अरियसावका यानि तानि मग्गब्रह्मचरियस्स आदिभूतानि, आदिब्रह्मचरियकानि, पाराजिकसङ्खातानि चत्तारि महासीलसिक्खापदानि, तेसं अवीतिक्कमनतो यानि खुद्दानुखुद्दकानि आपज्जन्ति, तेहि च वुट्ठानतो सीलेसु यं कत्तब्बं, तं परिपूरं समत्तं करोन्तीति ‘सीलेसु परिपूरकारिनो’ति वुच्चन्ति. समाधिपारिबन्धकानं पन कामरागब्यापादानं, पञ्ञापारिबन्धकस्स च सच्चपटिच्छादकस्स मोहस्स ¶ असमूहतत्ता, समाधिं पञ्ञञ्च भावेन्तापि समाधिपञ्ञासु यं ¶ कत्तब्बं तं मत्तसो पमाणेन पदेसमत्तमेव करोन्तीति समाधिस्मिं पञ्ञाय च मत्तसो कारिनोति वुच्चन्ति. इमिना उपायेन इतरेसुपि द्वीसु नयेसु अत्थो वेदितब्बो.

तत्रायं अपरोपि सुत्तन्तनयो –

‘‘इध, भिक्खवे, भिक्खु सीलेसु परिपूरकारी होति, समाधिस्मिं मत्तसो कारी, पञ्ञाय मत्तसो कारी. सो यानि तानि खुद्दानुखुद्दकानि सिक्खापदानि तानि आपज्जतिपि, वुट्ठातिपि. तं किस्स हेतु? न हि मेत्थ, भिक्खवे, अभब्बता वुत्ता. यानि च खो तानि सिक्खापदानि आदिब्रह्मचरियकानि ब्रह्मचरियसारुप्पानि, तत्थ धुवसीलो च होति, ठितसीलो च, समादाय सिक्खति सिक्खापदेसु. सो तिण्णं संयोजनानं परिक्खया सोतापन्नो होति, अविनिपातधम्मो नियतो सम्बोधिपरायणो. इध पन, भिक्खवे, भिक्खु सीलेसु…पे… सो तिण्णं संयोजनानं परिक्खया, रागदोसमोहानं तनुत्ता, सकदागामी होति; सकिदेव इमं लोकं आगन्त्वा दुक्खस्सन्तं करोति. इध पन, भिक्खवे, भिक्खु सीलेसु परिपूरकारी होति, समाधिस्मिं परिपूरकारी, पञ्ञाय मत्तसो कारी. सो यानि तानि…पे… सिक्खति सिक्खापदेसु. सो पञ्चन्नं ओरम्भागियानं…पे… अनावत्तिधम्मो तस्मा लोका. इध पन, भिक्खवे ¶ , भिक्खु सीलेसु परिपूरकारी, समाधिस्मिं परिपूरकारी, पञ्ञाय परिपूरकारी. सो यानि तानि खुद्दानुखुद्दकानि…पे… सिक्खति सिक्खापदेसु. सो आसवानं खया…पे… उपसम्पज्ज विहरती’’ति (अ. नि. ३.८७).

१३०. सत्थारनिद्देसे – परिञ्ञं पञ्ञपेतीति पहानं समतिक्कमं पञ्ञपेति. तत्राति तेसु तीसु जनेसु. तेन दट्ठब्बोति तेन पञ्ञापनेन सो सत्था रूपावचरसमापत्तिया लाभीति दट्ठब्बोति अत्थो. दुतियवारेपि एसेव नयो. सम्मासम्बुद्धो सत्था तेन दट्ठब्बोति तेन तित्थियेहि असाधारणेन पञ्ञापनेन अयं ततियो सत्था सब्बञ्ञुबुद्धो दट्ठब्बो. तित्थिया हि कामानं परिञ्ञं पञ्ञपेन्ता रूपभवं वक्खन्ति. रूपानं परिञ्ञं पञ्ञपेन्ता ¶ अरूपभवं वक्खन्ति. वेदनानं परिञ्ञं पञ्ञपेन्ता असञ्ञभवं वक्खन्ति. सम्मा पञ्ञपेन्ता ‘एवं पञ्ञपेय्युं’, नो च सम्मा पञ्ञपेतुं सक्कोन्ति. सम्मासम्बुद्धो पन कामानं परिञ्ञं पहानं अनागामिमग्गेन पञ्ञपेति ¶ . रूपवेदनानं परिञ्ञं पहानं अरहत्तमग्गेन पञ्ञपेति. इमे तयो सत्थारोति इमे द्वे जना बाहिरका, एको सम्मासम्बुद्धोति – इमस्मिं लोके तयो सत्थारो नाम.

१३१. दुतिये सत्थारनिद्देसे – दिट्ठे चेव धम्मेति इमस्मिं अत्तभावे. अत्तानं सच्चतो थेततो पञ्ञपेतीति ‘‘अत्ता नामेको अत्थि निच्चो धुवो सस्सतो’’ति भूततो थिरतो पञ्ञपेति. अभिसम्परायञ्चाति अपरस्मिं अत्तभावे एवमेव पञ्ञपेति. सेसमेत्थ वुत्तनयेनेव वेदितब्बन्ति.

तिकनिद्देसवण्णना.

४. चतुक्कनिद्देसवण्णना

१३२. चतुक्कनिद्देसे – असप्पुरिसोति लामकपुरिसो. पाणं अतिपातेतीति पाणातिपाती. अदिन्नं आदियतीति अदिन्नादायी. कामेसु मिच्छा चरतीति कामेसुमिच्छाचारी. मुसा वदतीति मुसावादी. सुरामेरयमज्जपमादे तिट्ठतीति सुरामेरयमज्जपमादट्ठायी.

१३३. पाणातिपाते ¶ समादपेतीति यथा पाणं अतिपातेति, तथा नं तत्थ गहणं गण्हापेति. सेसेसुपि एसेव नयो. अयं वुच्चतीति अयं एवरूपो पुग्गलो यस्मा सयं कतेन च दुस्सील्येन समन्नागतो यञ्च समादपितेन कतं, ततो उपड्ढस्स दायादो, तस्मा असप्पुरिसेन असप्पुरिसतरोति वुच्चति. सप्पुरिसोति उत्तमपुरिसो.

१३५. सप्पुरिसेन सप्पुरिसतरोति अत्तना कतेन सुसील्येन समन्नागतत्ता यञ्च समादपितो करोति. ततो उपड्ढस्स दायादत्ता उत्तमपुरिसेन उत्तमपुरिसतरो.

१३६. पापोति अकुसलकम्मपथसङ्खातेन दसविधेन पापेन समन्नागतो.

१३८. कल्याणोति ¶ कुसलकम्मपथसङ्खातेन दसविधेन कल्याणधम्मेन समन्नागतो सुद्धको ¶ भद्रको. सेसमेत्थ हेट्ठा वुत्तनयत्ता उत्तानत्थमेव.

१४०. पापधम्मादीसु – पापो धम्मो अस्साति पापधम्मो. कल्याणो धम्मो अस्साति कल्याणधम्मो. सेसमेत्थ उत्तानत्थमेव.

१४४. सावज्जादीसु – सावज्जोति सदोसो. सावज्जेन कायकम्मेनाति सदोसेन पाणातिपातादिना कायकम्मेन. इतरेसुपि एसेव नयो. अयं वुच्चतीति अयं एवरूपो पुग्गलो तीहि द्वारेहि आयूहनकम्मस्स सदोसत्ता, गूथकुणपादिभरितो पदेसो विय सावज्जोति वुच्चति.

१४५. सावज्जेन बहुलन्ति यस्स सावज्जमेव कायकम्मं बहु होति, अप्पं अनवज्जं; सो सावज्जेन बहुलं कायकम्मेन समन्नागतो, अप्पं अनवज्जेनाति वुच्चति. इतरेसुपि एसेव नयो. को पन एवरूपो होतीति? यो गामधम्मताय वा निगमधम्मताय वा कदाचि करहचि उपोसथं समादियति, सीलानि पूरेति. अयं वुच्चतीति अयं एवरूपो पुग्गलो ¶ तीहि द्वारेहि आयूहनकम्मेसु सावज्जस्सेव बहुलताय अनवज्जस्स अप्पताय वज्जबहुलोति वुच्चति.

यथा हि एकस्मिं पदेसे दुब्बण्णानि दुग्गन्धानि पुप्फानि रासिकतानस्सु, तेसं उपरि तहं तहं अतिमुत्तकवस्सिकपाटलानि पतितानि भवेय्युं. एवरूपो अयं पुग्गलो वेदितब्बो. यथा पन एकस्मिं पदेसे अतिमुत्तकवस्सिकपाटलानि रासिकतानस्सु, तेसं उपरि तहं तहं दुब्बण्णदुग्गन्धानि बदरपुप्फादीनि पतितानि भवेय्युं. एवरूपो ततियो पुग्गलो वेदितब्बो. चतुत्थो पन तीहिपि द्वारेहि आयूहनकम्मस्स निद्दोसत्ता, चतुमधुरभरितसुवण्णपाति विय दट्ठब्बो. तेसु पठमो अन्धबालपुथुज्जनो. दुतियो अन्तरन्तरा कुसलस्स कारको लोकियपुथुज्जनो. ततियो सोतापन्नो सकदागामिअनागामिनोपि एतेनेव सङ्गहिता. चतुत्थो खीणासवो. सो हि एकन्तेन अनवज्जोयेव. अयं अङ्गुत्तरट्ठकथायो.

१४८. उग्घटितञ्ञूआदीसु – उग्घटितञ्ञूति एत्थ उग्घटितं नाम ¶ ञाणुग्घाटनं, ञाणे उग्घटितमत्तेयेव ¶ जानातीति अत्थो. सह उदाहटवेलायाति उदाहारे उदाहटमत्तेयेव. धम्माभिसमयोति चतुसच्चधम्मस्स ञाणेन सद्धिं अभिसमयो. अयं वुच्चतीति अयं ‘चत्तारो सतिपट्ठाना’तिआदिना नयेन संखित्तेन मातिकाय ठपियमानाय देसनानुसारेन ञाणं पेसेत्वा अरहत्तं गण्हितुं समत्थो पुग्गलो उग्घटितञ्ञूति वुच्चति.

१४९. विपञ्चितं वित्थारितमेव अत्थं जानातीति विपञ्चितञ्ञू. अयं वुच्चतीति अयं सङ्खित्तेन मातिकं ठपेत्वा वित्थारेन अत्थे भाजियमाने अरहत्तं पापुणितुं समत्थो पुग्गलो विपञ्चितञ्ञूति वुच्चति.

१५०. उद्देसादीहि नेतब्बोति नेय्यो. अनुपुब्बेन धम्माभिसमयो होतीति अनुक्कमेन अरहत्तप्पत्ति.

१५१. ब्यञ्जनपदमेव ¶ परमं अस्साति पदपरमो. न ताय जातिया धम्माभिसमयो होतीति न तेन अत्तभावेन झानं वा विपस्सनं वा मग्गं वा फलं वा निब्बत्तेतुं सक्कोतीति अत्थो.

१५२. युत्तपटिभानादीसु – पटिभानं वुच्चति ञाणम्पि, ञाणस्स उपट्ठितवचनम्पि. तं इध अधिप्पेतं. अत्थयुत्तं कारणयुत्तञ्च पटिभानमस्साति युत्तप्पटिभानो. पुच्छितानन्तरमेव सीघं ब्याकातुं असमत्थताय नो मुत्तं पटिभानमस्साति नो मुत्तप्पटिभानो. इमिना नयेन सेसा वेदितब्बा. एत्थ पन पठमो – किञ्चि कालं वीमंसित्वा युत्तमेव पेक्खति, तिपिटकचूळनागत्थेरो विय. सो किर पञ्हं पुट्ठो परिग्गहेत्वा युत्तपयुत्तकारणमेव कथेति.

दुतियो – पुच्छानन्तरमेव येन वा तेन वा वचनेन पटिबाहति, वीमंसित्वापि च युत्तं न पेक्खति चतुनिकायिकपण्डिततिस्सत्थेरो विय. सो किर पञ्हं पुट्ठो पञ्हपरियोसानम्पि नागमेति, यं वा तं वा कथेतियेव. वचनत्थं पनस्स वीमंसियमानं कत्थचि न लग्गति.

ततियो – पुच्छासमकालमेव युत्तं पेक्खति, तङ्खणञ्ञेव वचनं ब्याकरोति तिपिटकचूळाभयत्थेरो ¶ विय. सो किर पञ्हं पुट्ठो सीघमेव कथेति, युत्तपयुत्तकारणो च होति.

चतुत्थो – पुट्ठो समानो नेव युत्तं पेक्खति ¶ , न येन वा तेन वा पटिबाहितुं सक्कोति तिब्बन्धकारनिमुग्गो विय होति लाळुदायित्थेरो विय.

१५६. धम्मकथिकेसु – अप्पञ्च भासतीति सम्पत्तपरिसाय थोकमेव कथेति. असहितञ्चाति कथेन्तो च पन न अत्थयुत्तं कारणयुत्तं कथेति. परिसा चस्स न कुसला होतीति सोतुं निसिन्नपरिसा चस्स युत्तायुत्तं कारणाकारणं सिलिट्ठासिलिट्ठं न जानातीति अत्थो. एवरूपोति अयं एवंजातिको बालधम्मकथिको. एवंजातिकाय बालपरिसाय धम्मकथिकोत्वेव नामं लभति. इमिना नयेन सब्बत्थ अत्थो वेदितब्बो. एत्थ च द्वेयेव जना सभावधम्मकथिका, इतरे पन धम्मकथिकानं अन्तरे पविट्ठत्ता एवं वुत्ता.

१५७. वलाहकूपमेसु ¶ वलाहकाति मेघा. गज्जिताति थनिता. तत्थ गज्जित्वा नो वस्सनभावो नाम पापको. मनुस्सा हि यथा देवो गज्जति ‘सुवुट्ठिका भविस्सती’ति बीजानि नीहरित्वा वपन्ति. अथ देवे अवस्सन्ते खेत्ते बीजानि खेत्तेयेव नस्सन्ति, गेहे बीजानि गेहेयेव नस्सन्तीति दुब्भिक्खं होति. नो गज्जित्वा वस्सनभावोपि पापकोव. मनुस्सा हि ‘इमस्मिं काले दुब्बुट्ठिका भविस्सती’ति निन्नट्ठानेसुयेव वप्पं करोन्ति. अथ देवो वस्सित्वा सब्बबीजानि महासमुद्दं पापेति, दुब्भिक्खमेव होति. गज्जित्वा वस्सनभावो पन भद्दको. तदा हि सुभिक्खं होति. नो गज्जित्वा नो वस्सनभावो एकन्तपापकोव.

भासिता होति नो कत्ताति ‘इदानि गन्थधुरं पूरेस्सामि, वासधुरं पूरेस्सामी’ति कथेतियेव, न पन उद्देसं गण्हाति, न कम्मट्ठानं भावेति.

कत्ता होति नो भासिताति ‘गन्थधुरं वा पूरेस्सामि वासधुरं वा’ति न भासति. सम्पत्ते पन काले तमत्थं सम्पादेति. इमिना नयेन इतरेपि वेदितब्बा. सब्बं पनेतं पच्चयदायकेनेव कथितं. एको हि ‘असुकदिवसे नाम दानं दस्सामी’ति सङ्घं निमन्तेति, सम्पत्तकाले नो करोति. अयं पुग्गलो पुञ्ञेन परिहायति, भिक्खुसङ्घोपि लाभेन परिहायति ¶ . अपरो सङ्घं अनिमन्तेत्वाव सक्कारं कत्वा ‘भिक्खू आनेस्सामी’ति न लभति, सब्बे अञ्ञत्थ निमन्तिता होन्ति. अयम्पि पुञ्ञेन परिहायति ¶ , सङ्घोपि तेन लाभेन परिहायति. अपरो पठमं सङ्घं निमन्तेत्वा, पच्छा सक्कारं कत्वा दानं देति, अयं किच्चकारी होति. अपरो नेव सङ्घं निमन्तेति, न दानं देति, अयं ‘पापपुग्गलो’ति वेदितब्बो.

१५८. मूसिकूपमेसु – गाधं कत्ता नो वसिताति अत्तनो आसयं बिलं कूपं खणति, नो तत्थ वसति, किस्मिञ्चिदेव ठाने वसति, एवं बिळारादिअमित्तवसं गच्छति. खत्तातिपि पाठो. वसिता नो गाधं कत्ताति सयं न खणति, परेन खते बिले वसति, एवं जीवितं रक्खति. ततिया द्वेपि करोन्ती, जीवितं रक्खति. चतुत्था द्वेपि अकरोन्ती अमित्तवसं गच्छति. इमाय पन उपमाय उपमितेसु पुग्गलेसु ¶ पठमो यथा सा मूसिका गाधं खणति, एवं नवङ्गं सत्थुसासनं उग्गण्हाति. यथा पन सा तत्थ न वसति, किस्मिञ्चिदेव ठाने वसन्ती, अमित्तवसं गच्छति; तथा अयम्पि परियत्तिवसेन ञाणं पेसेत्वा चतुसच्चधम्मं न पटिविज्झति, लोकामिसट्ठानेसुयेव चरन्तो मच्चुमारकिलेसमारदेवपुत्तमारसङ्खातानं अमित्तानं वसं गच्छति. दुतियो यथा सा मूसिका गाधं न खणति, एवं नवङ्गं सत्थुसासनं न उग्गण्हाति. यथा पन परेन खतबिले वसन्ती जीवितं रक्खति; एवं परस्स कथं सुत्वा चतुसच्चधम्मं पटिविज्झित्वा तिण्णं मारानं वसं अतिक्कमति. इमिना नयेन ततियचतुत्थेसुपि ओपम्मसंसन्दनं वेदितब्बं.

१५९. अम्बूपमेसु – आमं पक्कवण्णीति अन्तो आमं बहि पक्कसदिसं. पक्कं आमवण्णीति अन्तो पक्कं बहि आमसदिसं. सेसद्वयेसुपि एसेव नयो. तत्थ यथा अम्बे अपक्कभावो आमता होति, एवं पुग्गलेपि पुथुज्जनभावो आमता, अरियभावो पक्कता. यथा च तत्थ पक्कसदिसता पक्कवण्णिता; एवं पुग्गलेपि अरियानं अभिक्कमनादिसदिसता पक्कवण्णिताति – इमिना नयेन उपमितपुग्गलेसु ओपम्मसंसन्दनं वेदितब्बं.

१६०. कुम्भूपमेसु ¶ – कुम्भोति घटो. तुच्छोति अन्तो रित्तो. पिहितोति पिदहित्वा ठपितो. पुरोति अन्तो पुण्णो. विवटोति विवरित्वा ठपितो. उपमितपुग्गलेसु पनेत्थ अन्तो गुणसारविरहितो ¶ तुच्छो बाहिरसोभनताय पिहितो पुग्गलो वेदितब्बो. सेसेसुपि एसेव नयो.

१६१. उदकरहदूपमेसु – उदकरहदो ताव जण्णुमत्तेपि उदके सति पण्णरससम्भिन्नवण्णत्ता वा बहलत्ता वा उदकस्स अपञ्ञायमानतलो उत्तानो गम्भीरोभासो नाम होति. तिपोरिस चतुपोरिसेपि पन उदके सति अच्छत्ता उदकस्स पञ्ञायमानतलो गम्भीरो उत्तानोभासो नाम होति. उभयकारणसम्भावतो पन इतरे द्वे वेदितब्बा. पुग्गलोपि किलेसुस्सदभावतो गुणगम्भीरताय च अभावतो गुणगम्भीरानं सदिसेहि अभिक्कमादीहि युत्तो उत्तानो गम्भीरोभासो नाम. इमिना नयेन सेसापि वेदितब्बा.

१६२. बलीबद्दूपमेसु ¶ – बलीबद्दो ताव यो अत्तनो गोगणं घट्टेति उब्बेजेति, परगोगणे पन सोरतो सुखसीलो होति – अयं सकगवचण्डो नो परगवचण्डो नाम. पुग्गलोपि अत्तनो परिसं घट्टेन्तो विज्झन्तो फरुसेन समुदाचरन्तो, परपरिसाय पन सोरच्चं निवातवुत्तितं आपज्जन्तो सकगवचण्डो होति नो परगवचण्डो नामाति. इमिना नयेन सेसापि वेदितब्बा. निद्देसवारे पनेत्थ उब्बेजिता होतीति घट्टेत्वा विज्झित्वा उब्बेगप्पत्तं करोतिच्चेव अत्थो.

१६३. आसीविसूपमेसु – आसीविसो ताव यस्स विसं आसुं आगच्छति सीघं फरति; घोरं पन न होति, चिरकालं न पीळेति – अयं आगतविसो नो घोरविसो. सेसपदेसुपि एसेव नयो. पुग्गलविभाजनं पन उत्तानत्थमेव.

१६४. अननुविच्च अपरियोगाहेत्वा अवण्णारहस्स वण्णं भासिता होतीतिआदीसु अननुविच्चाति अतुलयित्वा, अपरिग्गण्हित्वा. अपरियोगाहेत्वाति पञ्ञाय गुणे अनोगाहेत्वा.

१६६. भूतं तच्छन्ति विज्जमानतो भूतं, अविपरीततो तच्छं. कालेनाति युत्तपयुत्तकालेन. तत्र कालञ्ञू होतीति यमिदं ¶ कालेनाति वुत्तं. तत्र यो पुग्गलो कालञ्ञू होति, कालं जानाति, तस्स पञ्हस्स वेय्याकरणत्थाय ‘‘इमस्मिं काले पुच्छितेनापि मया ¶ न कथेतब्बा, इमस्मिं काले कथेतब्बा’’ति – अयं कालेन भणति नाम. उपेक्खको विहरतीति मज्झत्तभूताय उपेक्खाय ठितो हुत्वा विहरति. सेसं सब्बत्थ उत्तानत्थमेव.

१६७. उट्ठानफलूपजीवीतिआदीसु – यो उट्ठानवीरियेनेव दिवसं वीतिनामेत्वा तस्स निस्सन्दफलमत्तं किञ्चिदेव लभित्वा जीविकं कप्पेति, तं पन उट्ठानं आगम्म किञ्चि पुञ्ञफलं न पटिलभति, तं सन्धाय यस्स पुग्गलस्स उट्ठहतोतिआदि वुत्तं. ततूपरि देवाति ततो उपरि ब्रह्मकायिकादयो देवा. तेसञ्हि उट्ठानवीरियेन किच्चं नाम नत्थि. पुञ्ञफलमेव उपजीवन्ति. पुञ्ञवतो चाति इदं पुञ्ञवन्ते खत्तियब्राह्मणादयो चेव भुम्मदेवे आदिं कत्वा निम्मानरतिपरियोसाने देवे च सन्धाय ¶ वुत्तं. सब्बेपि हेते वायामफलञ्चेव पुञ्ञफलञ्च अनुभवन्ति. नेरयिका पन नेव उट्ठानेन आजीवं उप्पादेतुं सक्कोन्ति, नापि नेसं पुञ्ञफलेन कोचि आजीवो उप्पज्जति.

१६८. तमादीसु – ‘‘नीचे कुले पच्चाजातो’’तिआदिकेन तमेन युत्तोति तमो. कायदुच्चरितादीहि पुन निरयतमूपगमनतो तमपरायणो. नेसादकुलेति मिगलुद्दकादीनं कुले. वेनकुलेति विलीवकारकुले. रथकारकुलेति चम्मकारकुले. पुक्कुसकुलेति पुप्फछड्डककुले. कसिरवुत्तिकेति दुक्खवुत्तिके. दुब्बण्णोति पंसुपिसाचको विय झामखाणुवण्णो. दुद्दसिकोति विजातमातुयापि अमनापदस्सनो. ओकोटिमकोति लकुण्डको. काणोति एकक्खिकाणो वा उभयक्खिकाणो वा. कुणीति एकहत्थकुणी वा उभयहत्थकुणी वा. खञ्जोति एकपादखञ्जो वा उभयपादखञ्जो वा. पक्खहतोति हतपक्खो पीठसप्पी. पदीपेय्यस्साति तेलकपल्लकादिनो पदीपूपकरणस्स. एवं पुग्गलो तमो होति तमपरायणोति एत्थ एको पुग्गलो बहिद्धा आलोकं अदिस्वा मातुकुच्छिस्मिञ्ञेव कालं कत्वा अपायेसु निब्बत्तन्तो सकलेपि कप्पे संसरति. सोपि तमो तमपरायणोव. सो पन कुहकपुग्गलो भवेय्य. कुहकस्स हि एवरूपा निब्बत्ति होतीति वुत्तं.

एत्थ च नीचे कुले पच्चाजातो ¶ होति चण्डालकुले वातिआदीहि आगमनविपत्ति चेव पुब्बुप्पन्नपच्चयविपत्ति च दस्सिता. दलिद्देतिआदीहि पवत्तिपच्चयविपत्ति. कसिरवुत्तिकेतिआदीहि आजीवुपायविपत्ति. दुब्बण्णोतिआदीहि रूपविपत्ति. बह्वाबाधोतिआदीहि दुक्खकारणसमायोगो. न लाभीतिआदीहि सुखकारणविपत्ति चेव उपभोगविपत्ति ¶ च. कायेन दुच्चरितन्तिआदीहि तमपरायणभावस्स कारणसमायोगो. कायस्स भेदातिआदीहि सम्परायिकतमूपगमो. सुक्कपक्खो वुत्तपटिपक्खनयेन वेदितब्बो.

अपिचेत्थ तिविधाय कुलसम्पत्तिया पच्चाजातिआदिकेन जोतिना युत्ततो जोति, आलोकभूतोति वुत्तं होति. कायसुचरितादीहि पन सग्गूपपत्तिजोतिभावूपगमनतो जोतिपरायणो. खत्तियमहासालकुले वातिआदीसु खत्तियमहासालाति खत्तिया महासारा ¶ महासारप्पत्ता खत्तिया. येसञ्हि खत्तियानं हेट्ठिमन्तेन कोटिसतं निधानगतं होति, तयो कहापणकुम्भा वळञ्जनत्थाय गेहमज्झे रासिं कत्वा ठपिता होन्ति, ते खत्तियमहासाला नाम. येसं ब्राह्मणानं असीतिकोटिधनं निहितं होति, दियड्ढो कहापणकुम्भो वळञ्जनत्थाय गेहमज्झे रासिं कत्वा ठपितो होति, ते ब्राह्मणमहासाला नाम. येसं गहपतीनं चत्तालीसकोटिधनं निहितं होति, कहापणकुम्भो वळञ्जत्थाय गेहमज्झे रासिं कत्वा ठपितो होति, ते गहपतिमहासाला नाम. तेसं कुलेति अत्थो. अड्ढेति इस्सरे. निधानगतधनस्स महन्तताय महद्धने. सुवण्णरजतभाजनादीनं उपभोगभण्डानं महन्तताय महाभोगे. निधानगतस्स जातरूपरजतस्स पहूतताय पहूतजातरूपरजते. वित्तूपकरणस्स तुट्ठिकरणस्स पहूतताय पहूतवित्तूपकरणे. गोधनादीनञ्च सत्तविधधञ्ञानञ्च पहूतताय पहूतधनधञ्ञे. अभिरूपोति सुन्दररूपो. दस्सनीयोति अञ्ञं कम्मं पहाय दिवसम्पि पस्सितब्बयुत्तो. पासादिकोति दस्सनेनेव चित्तपसादावहो. परमायाति उत्तमाय. वण्णपोक्खरतायाति पोक्खरवण्णताय. पोक्खरं वुच्चति सरीरं. तस्स वण्णसम्पत्तियाति अत्थो. समन्नागतोति उपेतो.

१६९. ओणतोणतादीसु ¶ – दिट्ठधम्मिकाय वा सम्परायिकाय वा सम्पत्तिया विरहितो ओणतो. नीचो, लामकोति अत्थो. तब्बिपक्खतो उण्णतो. उच्चो, उग्गतोति अत्थो. सेसमेत्थ तमादीसु वुत्तनयेनेव वेदितब्बं. अपिच – ओणतोणतोति इदानि नीचो, आयतिम्पि नीचोव भविस्सति. ओणतुण्णतोति इदानि नीचो, आयतिं उच्चो भविस्सति. उण्णतोणतोति इदानि उच्चो, आयतिं नीचो भविस्सति. उण्णतुण्णतोति इदानि उच्चो, आयतिम्पि उच्चोव भविस्सतीति.

१७०. रुक्खूपमेसु – रुक्खो ताव फेग्गुसारपरिवारोति वनजेट्ठकरुक्खो सयं फेग्गु होति ¶ , परिवाररुक्खा पनस्स सारा होन्ति. इमिना नयेन सेसा वेदितब्बा. पुग्गलेसु पन सीलसारविरहतो फेग्गुता, सीलाचारसमन्नागमेन च सारता वेदितब्बा.

१७१. रूपप्पमाणादीसु ¶ – सम्पत्तियुत्तं रूपं पमाणं करोतीति रूपप्पमाणो. तत्थ पसादं जनेतीति रूपप्पसन्नो. कित्तिसद्दभूतं घोसं पमाणं करोतीति घोसप्पमाणो. आरोहं वातिआदीसु पन – आरोहन्ति उच्चत्तनं. परिणाहन्ति किसथूलभावापगतं परिक्खेपसम्पत्तिं. सण्ठानन्ति अङ्गपच्चङ्गानं दीघरस्सवट्टतादियुत्तट्ठानेसु तथाभावं. पारिपूरिन्ति यथावुत्तप्पकारानं अनूनतं, लक्खणपरिपुण्णभावं वा. परवण्णनायाति परेहि परम्मुखा निच्छारिताय गुणवण्णनाय. परथोमनायाति परेहि थुतिवसेन गाथादिउपनिबन्धनेन वुत्ताय थोमनाय. परपसंसनायाति परेहि सम्मुखा वुत्ताय पसंसाय. परवण्णहारिकायाति परम्परथुतिवसेन परेहि पवत्तिताय वण्णहरणाय.

१७२. चीवरलूखन्ति चीवरस्स दुब्बण्णादिभावेन लूखतं. पत्तलूखन्ति भाजनस्स वण्णसण्ठानवत्थूहि लूखतं. सेनासनलूखन्ति नाटकादिसम्पत्तिविरहेन सेनासनस्स लूखतं. विविधन्ति अचेलकादिभावेन अनेकप्पकारं. दुक्करकारिकन्ति सरीरतापनं.

अपरो नयो – इमेसु हि चतूसु पुग्गलेसु रूपे पमाणं गहेत्वा पसन्नो रूपप्पमाणो नाम. रूपप्पसन्नोति तस्सेव अत्थवचनं. घोसे पमाणं गहेत्वा पसन्नो घोसप्पमाणो ¶ नाम. चीवरलूखपत्तलूखेसु पमाणं गहेत्वा पसन्नो लूखप्पमाणो नाम. धम्मे पमाणं गहेत्वा पसन्नो धम्मप्पमाणो नाम. इतरानि तेसंयेव अत्थवचनानि. सब्बसत्ते च तयो कोट्ठासे कत्वा द्वे कोट्ठासा रूपप्पमाणा, एको न रूपप्पमाणो. पञ्च कोट्ठासे कत्वा चत्तारो कोट्ठासा घोसप्पमाणा, एको न घोसप्पमाणो. दस कोट्ठासे कत्वा नव कोट्ठासा लूखप्पमाणा, एको न लूखप्पमाणो. सतसहस्सं कोट्ठासे कत्वा पन एको कोट्ठासोव धम्मप्पमाणो, सेसा न धम्मप्पमाणा. एवमयं चतुप्पमाणो लोकसन्निवासो.

एतस्मिं चतुप्पमाणे लोकसन्निवासे बुद्धेसु अप्पसन्ना मन्दा, पसन्नाव बहुका. रूपप्पमाणस्स हि बुद्धरूपतो उत्तरि पसादावहं रूपं नाम नत्थि. घोसप्पमाणस्स बुद्धानं कित्तिघोसतो उत्तरि पसादावहो घोसो नाम नत्थि. लूखप्पमाणस्स कासिकानि वत्थानि महारहानि ¶ ¶ कञ्चनभाजनानि तिण्णं उतूनं अनुच्छविके सब्बसम्पत्तियुत्ते पासादवरे पहाय पंसुकूलचीवरसेलमयपत्तरुक्खमूलादिसेनासनसेविनो बुद्धस्स भगवतो लूखतो उत्तरि पसादावहं अञ्ञं लूखं नाम नत्थि. धम्मप्पमाणस्स सदेवके लोके असाधारणसीलादिगुणस्स तथागतस्स सीलादिगुणतो उत्तरि पसादावहो अञ्ञो सीलादिगुणो नाम नत्थि. इति भगवा इमं चतुप्पमाणिकं लोकसन्निवासं मुट्ठिना गहेत्वा विय ठितोति.

१७३. अत्तहिताय पटिपन्नादीसु – सीलसम्पन्नोति सीलेन सम्पन्नो समन्नागतो. समाधिसम्पन्नोतिआदीसुपि एसेव नयो. एत्थ च सीलं लोकियलोकुत्तरं कथितं. तथा समाधिपञ्ञा च. विमुत्ति अरहत्तफलविमुत्तियेव. ञाणदस्सनं एकूनवीसतिविधं पच्चवेक्खणञाणं. नो परन्तिआदीसु – परपुग्गलं ‘‘तयापि सीलसम्पन्नेन भवितुं वट्टती’’ति वत्वा यथा सीलं समादियति, एवं न समादपेति, न गण्हापेति. एसेव नयो सब्बत्थ. एतेसु पन चतूसु पठमो वक्कलित्थेरसदिसो होति. दुतियो उपनन्दसक्यपुत्तसदिसो ¶ . ततियो सारिपुत्तमोग्गल्लानत्थेरसदिसो. चतुत्थो देवदत्तसदिसोति वेदितब्बो.

१७४. अत्तन्तपादीसु – अत्तानं तपति दुक्खापेतीति अत्तन्तपो. अत्तनो परितापनानुयोगं अत्तपरितापनानुयोगं. अचेलकोति निच्चेलो, नग्गो. मुत्ताचारोति विसट्ठाचारो. उच्चारकम्मादीसु लोकियकुलपुत्ताचारेन विरहितो ठितकोव उच्चारं करोति, पस्सावं करोति, खादति, भुञ्जति च. हत्थापलेखनोति हत्थे पिण्डम्हि निट्ठिते जिव्हाय हत्थं अपलेखति. उच्चारं वा कत्वा हत्थस्मिञ्ञेव दण्डकसञ्ञी हुत्वा हत्थेन अपलेखतीति दस्सेति. ते किर दण्डकं सत्तोति पञ्ञपेन्ति. तस्मा तेसं पटिपदं पूरेन्तो एवं करोति. भिक्खागहणत्थं ‘एहि भद्दन्ते’ति वुत्तो, न एतीति नएहिभद्दन्तिको. तेन हि ‘तिट्ठ भद्दन्ते’ति वुत्तोपि न तिट्ठतीति नतिट्ठभद्दन्तिको. तदुभयम्पि हेतं तित्थिया ‘‘एतस्स वचनं कतं भविस्सती’’ति न करोन्ति. अभिहटन्ति पुरेतरं गहेत्वा आहटं भिक्खं. उद्दिस्सकतन्ति ‘‘इमं तुम्हे उद्दिस्स कत’’न्ति एवं आरोचितभिक्खं. न निमन्तनन्ति ‘‘असुकं नाम कुलं वा वीथिं वा गामं वा पविसेय्याथा’’ति एवं निमन्तितभिक्खम्पि न सादियति, न गण्हाति.

न ¶ कुम्भिमुखाति कुम्भितो उद्धरित्वा दिय्यमानं भिक्खं न गण्हाति. न कळोपिमुखाति ¶ कळोपीति उक्खलि, पच्छि वा. ततोपि न गण्हाति. कस्मा? कुम्भी कळोपियो कटच्छुना पहारं लभन्तीति. न एळकमन्तरन्ति उम्मारं अन्तरं कत्वा दिय्यमानं न गण्हाति. कस्मा? अयं मं निस्साय अन्तरकरणं लभतीति. दण्डमुसलेसुपि एसेव नयो. द्विन्नन्ति द्वीसु भुञ्जमानेसु एकस्मिं उट्ठाय देन्ते न गण्हति. कस्मा? कबळन्तरायो होतीति. न गब्भिनियातिआदीसु पन गब्भिनिया कुच्छियं दारको किलमति. पायन्तिया दारकस्स खीरन्तरायो होति. पुरिसन्तरगताय रतिअन्तरायो होतीति न गण्हाति न सङ्कित्तीसूति सङ्कित्तेत्वा कतभत्तेसु. दुब्भिक्खसमये किर अचेलकसावका अचेलकानं अत्थाय ततो ततो तण्डुलादीनि समादपेत्वा ¶ भत्तं पचन्ति, उक्कट्ठाचेलको ततो न पटिग्गण्हाति. न यत्थ साति यत्थ सुनखो ‘पिण्डं लभिस्सामी’ति उपट्ठितो होति, तत्थ तस्स अदत्वा आहटं न गण्हाति. कस्मा? एतस्स पिण्डन्तरायो होतीति.

सण्डसण्डचारिनीति समूहसमूहचारिनी. सचे हि अचेलकं दिस्वा ‘इमस्स भिक्खं दस्सामा’ति मानुस्सका भत्तगेहं पविसन्ति, तेसु च पविसन्तेसु कळोपिमुखादीसु निलीना मक्खिका उप्पतित्वा सण्डसण्डा चरन्ति, ततो आहटं भिक्खं न गण्हाति. कस्मा? मं निस्साय मक्खिकानं गोचरन्तरायो जातोति. थुसोदकन्ति सब्बसस्ससम्भारेहि कतं सोवीरकं. एत्थ च सुरापानमेव सावज्जं. अयं पन एतस्मिम्पि सावज्जसञ्ञी. एकागारिकोति यो एकस्मिंयेव गेहे भिक्खं लभित्वा निवत्तति. एकालोपिकोति यो एकेनेव आलोपेन यापेति. द्वागारिकादीसुपि एसेव नयो. एकिस्सापि दत्तियाति एकाय दत्तिया. दत्ति नाम एका खुद्दकपाति होति, यत्थ अग्गभिक्खं पक्खिपित्वा ठपेन्ति.

एकाहिकन्ति एकदिवसन्तरिकं. अड्ढमासिकन्ति अड्ढमासन्तरिकं. परियायभत्तभोजनन्ति वारभत्तभोजनं. एकाहवारेन द्वीहवारेन सत्ताहवारेन अड्ढमासवारेनाति – एवं दिवसवारेन आभतभत्तभोजनं. साकभक्खोति अल्लसाकभक्खो. सामाकभक्खोति सामाकतण्डुलभक्खो. नीवारादीसु – नीवारा नाम ताव अरञ्ञे सयं जाता वीहिजाति. दद्दुलन्ति चम्मकारेहि चम्मं विलिखित्वा छड्डितकसटं. हटं वुच्चति ¶ सिलेसोपि, सेवालोपि कणिकारादिरुक्खनिय्यासोपि. कणन्ति कुण्डकं. आचामोति भत्तउक्खलिकाय लग्गो झामोदनो. तं छड्डितट्ठाने गहेत्वा खादति. ‘‘ओदनकञ्जिय’’न्तिपि वदन्ति. पिञ्ञाकादयो पाकटा एव. पवत्तफलभोजीति पतितफलभोजी.

साणानीति ¶ साणवाकचेलानि. मसाणानीति मिस्सकचेलानि. छवदुस्सानीति मतसरीरतो छड्डितवत्थानि. एरकतिणादीनि वा गन्थेत्वा कतनिवासनानि. पंसुकूलानीति पथवियं छड्डितनन्तकानि. तिरीटानीति रुक्खत्तचवत्थानि. अजिनन्ति ¶ अजिनमिगचम्मं. अजिनक्खिपन्ति तदेव मज्झे फालितं. सखुरकन्तिपि वदन्ति. कुसचीरन्ति कुसतिणानि गन्थेत्वा कतचीरकं. वाकचीरफलकचीरेसुपि एसेव नयो. केसकम्बलन्ति मनुस्सकेसेहि कतकम्बलं. यं सन्धाय वुत्तं – ‘‘सेय्यथापि, भिक्खवे, यानि कानिचि तन्तावुतानं वत्थानं केसकम्बलो तेसं पतिकुट्ठो अक्खायती’’ति (अ. नि. ३.१३८). वाळकम्बलन्ति अस्सवाळादीहि कतकम्बलं. उलूकपक्खन्ति उलूकपत्तानि गन्थेत्वा कतनिवासनं. उब्भट्ठकोति उद्धं ठितको.

उक्कुटिकप्पधानमनुयुत्तोति उक्कुटिकवीरियं अनुयुत्तो. गच्छन्तोपि उक्कुटिकोव हुत्वा उप्पतित्वा उप्पतित्वा गच्छति. कण्टकापस्सयिकोति अयकण्टके वा पकतिकण्टके वा भूमियं कोट्टेत्वा तत्थ चम्मं अत्थरित्वा ठानचङ्कमादीनि करोति. सेय्यन्ति सयन्तोपि तत्थेव सेय्यं कप्पेति. सायं ततियमस्साति सायततियकं. ‘‘पातो, मज्झन्हिके, सायन्ति दिवसस्स तिक्खत्तुं पापं पवाहेस्सामी’’ति उदकोरोहनानुयोगं अनुयुत्तो विहरति.

१७५. परं तपतीति परन्तपो. परेसं परितापनानुयोगं परपरितापनानुयोगं. ओरब्भिकादीसु – उरब्भा वुच्चन्ति एळका. उरब्भे हनतीति ओरब्भिको. सूकरिकादीसुपि – एसेव नयो. लुद्दोति दारुणो कक्खळो. मच्छघातकोति मच्छबन्धो केवट्टो. बन्धनागारिकोति बन्धनागारगोपको. कुरूरकम्मन्ताति दारुणकम्मन्ता.

१७६. मुद्धावसित्तोति खत्तियाभिसेकेन मुद्धनि अभिसित्तो. पुरत्थिमेन नगरस्साति नगरतो पुरत्थिमदिसाय. सन्धागारन्ति यञ्ञसालं ¶ . खराजिनं निवासेत्वाति सखुरं अजिनचम्मं निवासेत्वा. सप्पितेलेनाति सप्पिना च तेलेन च. ठपेत्वा हि सप्पिं अवसेसो यो कोचि स्नेहो तेलन्ति वुच्चति. कण्डुवमानोति नखानं छिन्नत्ता कण्डुवितब्बकाले तेन कण्डुवमानो. अनन्तरहितायाति असन्थताय. सरूपवच्छायाति सदिसवच्छाय. सचे गावी सेता होति, वच्छोपि सेतकोव सचे कबरा वा, रत्ता वा, वच्छोपि तादिसोवाति – एवं सरूपवच्छाय. सो एवमाहाति ¶ सो राजा एवं वदेति. वच्छतराति तरुणवच्छकभावं अतिक्कन्ता ¶ बलववच्छा. वच्छतरीसुपि एसेव नयो. बरिहिसत्थायाति परिक्खेपकरणत्थाय चेव यञ्ञभूमियं अत्थरणत्थाय च.

१७७. दिट्ठेव धम्मेति इमस्मिंयेव अत्तभावे. निच्छातोति छातं वुच्चति तण्हा, सा अस्स नत्थीति निच्छातो. सब्बकिलेसानं निब्बुतत्ता निब्बुतो. अन्तो तापनकिलेसानं अभावा सीतलो जातोति सीतीभूतो. झानमग्गफलनिब्बानसुखानि पटिसंवेदेतीति सुखप्पटिसंवेदी. ब्रह्मभूतेन अत्तनाति सेट्ठभूतेन अत्तना.

इमं पन पुग्गलं बुद्धुप्पादतो पट्ठाय दस्सेतुं – इध तथागतोतिआदिमाह. तत्थ तथागतोति अट्ठहि कारणेहि भगवा तथागतो – तथा आगतोति तथागतो, तथा गतोति तथागतो, तथलक्खणं आगतोति तथागतो, तथधम्मे याथावतो अभिसम्बुद्धोति तथागतो, तथदस्सिताय तथागतो, तथावादिताय तथागतो, तथाकारिताय तथागतो, अभिभवनट्ठेन तथागतोति. अरहं सम्मासम्बुद्धोतिआदीनि विसुद्धिमग्गे वित्थारितानेव. तं धम्मन्ति तं वुत्तप्पकारसम्पदं धम्मं. सुणाति गहपति वाति कस्मा पठमं गहपतिं निद्दिसति? निहतमानत्ता उस्सन्नत्ता च. येभुय्येन हि खत्तियकुलतो पब्बजिता जातिं निस्साय मानं करोन्ति. ब्राह्मणकुला पब्बजिता मन्ते निस्साय मानं करोन्ति. हीनजच्चकुला पब्बजिता अत्तनो विजातिताय पतिट्ठातुं न सक्कोन्ति. गहपतिदारका पन कच्छेहि सेदं मुञ्चन्तेहि पिट्ठिया लोणं पुप्फमानाय भूमिं कसित्वा तादिसस्स मानस्स अभावतो निहतमानदप्पा होन्ति. ते पब्बजित्वा मानं वा दप्पं वा अकत्वा यथाबलं बुद्धवचनं ¶ उग्गहेत्वा विपस्सनाय कम्मं करोन्ता सक्कोन्ति अरहत्ते पतिट्ठातुं. इतरेहि च कुलेहि निक्खमित्वा पब्बजिता नाम न बहुका, गहपतिकाव बहुका. इति निहतमानत्ता उस्सन्नत्ता च पठमं गहपतिं निद्दिसतीति.

अञ्ञतरस्मिं वाति इतरेसं वा कुलानं अञ्ञतरस्मिं. पच्चाजातोति पतिजातो. तथागते सद्धं पटिलभतीति परिसुद्धं ¶ धम्मं सुत्वा धम्मस्सामिम्हि तथागते ‘‘सम्मासम्बुद्धो वत सो भगवा’’ति सद्धं पटिलभति. इति पटिसञ्चिक्खतीति एवं पच्चवेक्खति. सम्बाधो घरावासोति सचेपि सट्ठिहत्थे घरे योजनसतन्तरेपि वा द्वे जायम्पतिका वसन्ति, तथापि नेसं सकिञ्चनसपलिबोधट्ठेन घरावासो सम्बाधोयेव. रजोपथोति रागरजादीनं उट्ठानट्ठानन्ति महाअट्ठकथायं ¶ वुत्तं. आगमनपथोतिपि वत्तुं वट्टति. अलग्गनट्ठेन अब्भोकासो वियाति अब्भोकासो. पब्बजितो हि कूटागाररतनपासादे च देवविमानादीसु च सुपिहितद्वारवातपानेसु पटिच्छन्नेसु वसन्तोपि नेव लग्गति, न सज्जति, न बज्झति. तेन वुत्तं – ‘‘अब्भोकासो पब्बज्जा’’ति.

अपिच – सम्बाधो घरावासो कुसलकिरियाय ओकासाभावतो. रजोपथो असंवुतसङ्कारट्ठानं विय रजानं किलेसरजानं सन्निपातट्ठानतो. अब्भोकासो पब्बज्जा कुसलकिरियाय यथासुखं ओकाससम्भावतो. नयिदं सुकरं…पे… पब्बजेय्यन्ति एत्थ अयं सङ्खेपकथा – यदेतं सिक्खत्तयब्रह्मचरियं एकम्पि दिवसं अखण्डं कत्वा चरिमकचित्तं पापेतब्बताय एकन्तपरिपुण्णं. एकदिवसम्पि च किलेसमलेन अमलिनं कत्वा चरिमकचित्तं पापेतब्बताय एकन्तपरिसुद्धं. सङ्खलिखितं लिखितसङ्खसदिसं धोतसङ्खसप्पटिभागं चरितब्बं. इदं न सुकरं अगारं अज्झावसता अगारमज्झे वसन्तेन एकन्तपरिपुण्णं…पे… चरितुं – ‘‘यंनूनाहं केसे च मस्सुञ्च ओहारेत्वा कसायरसपीतताय कासायानि ब्रह्मचरियं चरन्तानं अनुच्छविकानि वत्थानि अच्छादेत्वा परिदहित्वा अगारस्मा निक्खमित्वा अनगारियं पब्बजेय्य’’न्ति. एत्थ च यस्मा अगारस्स हितं कसिवाणिज्जादिकम्मं ‘‘अगारिय’’न्ति वुच्चति, तञ्च पब्बज्जाय नत्थि, तस्मा पब्बज्जा ‘‘अनगारिय’’न्ति ञातब्बा. तं अनगारियं. पब्बजेय्यन्ति ¶ पटिपज्जेय्यं. अप्पं वाति सहस्सतो हेट्ठा भोगक्खन्धो अप्पो नाम होति, सहस्सतो पट्ठाय ¶ महा. अबन्धनट्ठेन ञातियेव ञातिपरिवट्टो. सोपि वीसतिया हेट्ठा अप्पो होति, वीसतिया पट्ठाय महा.

१७८. भिक्खूनं सिक्खासाजीवसमापन्नोति या भिक्खूनं अधिसीलसङ्खाता सिक्खा, तञ्च. यत्थ चेते सह जीवन्ति, एकजीविका सभागवुत्तिनो होन्ति, तं भगवता पञ्ञत्तसिक्खापदसङ्खातं साजीवञ्च. तत्थ सिक्खनभावेन समापन्नोति भिक्खूनं सिक्खासाजीवसमापन्नो. समापन्नोति सिक्खं परिपूरेन्तो साजीवञ्च अवीतिक्कमन्तो हुत्वा तदुभयं उपगतोति अत्थो. पाणातिपातं पहायातिआदीसु पाणातिपातादिकथा हेट्ठा वित्थारिता एव. पहायाति इमं पाणातिपातचेतनासङ्खातं दुस्सील्यं पजहित्वा. पटिविरतो होतीति पहीनकालतो पट्ठाय ततो दुस्सील्यतो ओरतो विरतोव होति. निहितदण्डो निहितसत्थोति परूपघातत्थाय दण्डं वा सत्थं वा आदाय अवत्तनतो निक्खित्तदण्डो चेव निक्खित्तसत्थो चाति ¶ अत्थो. एत्थ च ठपेत्वा दण्डं, सब्बम्पि अवसेसं उपकरणं सत्तानं विनासनभावतो ‘सत्थ’न्ति वेदितब्बं. यं पन भिक्खू कत्तरदण्डं वा दन्तकट्ठवासिं वा पिप्फलिकं वा गहेत्वा विचरन्ति, न तं परूपघातत्थाय. तस्मा निहितदण्डा निहितसत्थात्वेव सङ्खं गच्छन्ति. लज्जीति पापजिगुच्छनलक्खणाय लज्जाय समन्नागतो. दयापन्नोति दयं मेत्तचित्ततं आपन्नो. सब्बपाणभूतहितानुकम्पीति सब्बे पाणभूते हितेन अनुकम्पको. ताय दयापन्नताय सब्बेसं पाणभूतानं हितचित्तकोति अत्थो. विहरतीति इरियति, पालेति.

दिन्नमेव आदियतीति दिन्नादायी. चित्तेनपि दिन्नमेव पटिकङ्खतीति दिन्नपाटिकङ्खी. थेनेतीति थेनो. न थेनेन अथेनेन. अथेनत्तायेव सुचिभूतेन. अत्तनाति अत्तभावेन. अथेनं सुचिभूतं अत्तभावं कत्वा विहरतीति वुत्तं होति.

अब्रह्मचरियन्ति ¶ असेट्ठचरियं. ब्रह्मं सेट्ठं आचारं चरतीति ब्रह्मचारी. आराचारीति अब्रह्मचरियतो दूरचारी. मेथुनाति रागपरियुट्ठानवसेन सदिसत्ता मेथुनकाति लद्धवोहारेहि पटिसेवितब्बतो मेथुनाति सङ्खं गता असद्धम्मा. गामधम्माति गामवासीनं धम्मा.

सच्चं ¶ वदतीति सच्चवादी. सच्चेन सच्चं सन्दहति घटेतीति सच्चसन्धो. न अन्तरन्तरा मुसा वदतीति अत्थो. यो हि पुरिसो कदाचि मुसा वदति, कदाचि सच्चं, तस्स मुसावादेन अन्तरितत्ता सच्चं सच्चेन न घटीयति, तस्मा न सो सच्चसन्धो. अयं पन न तादिसो. जीवितहेतुपि मुसा अवत्वा सच्चेन सच्चं सन्दहतियेवाति सच्चसन्धो. थेतोति थिरो, थिरकथोति अत्थो. एको हि पुग्गलो हलिद्दिरागो विय, थुसरासिम्हि निखातखाणुको विय, अस्सपिट्ठे ठपितकुम्भण्डमिव च, न थिरकथो होति. एको पासाणलेखा विय, इन्दखीलो विय च थिरकथो होति. असिना सीसे छिन्दन्तेपि द्वे कथा न कथेति. अयं वुच्चति थेतो. पच्चयिकोति पत्तियायितब्बको, सद्धायिकोति अत्थो. एकच्चो हि पुग्गलो न पच्चयिको होति. ‘इदं केन वुत्तं? असुकेना’ति वुत्ते ‘मा तस्स वचनं सद्दहथा’ति वत्तब्बतं आपज्जति. एको पच्चयिको होति. ‘इदं केन वुत्तं? असुकेना’ति वुत्ते ‘यदि तेन वुत्तं, इदमेव पमाणं, इदानि उपपरिक्खितब्बं नत्थि, एवमेव इद’न्ति वत्तब्बतं आपज्जति. अयं वुच्चति पच्चयिको. अविसंवादको लोकस्साति ताय सच्चवादिताय लोकं न विसंवादेतीति अत्थो.

इमेसं ¶ भेदायाति येसं इतो सुत्वाति वुत्तानं सन्तिके सुतं, तेसं भेदाय. भिन्नानं वा सन्धाताति द्विन्नं मित्तानं वा समानुपज्झायकादीनं वा केनचिदेव कारणेन भिन्नानं एकमेकं उपसङ्कमित्वा – ‘तुम्हाकं ईदिसे कुले जातानं, एवं बहुस्सुतानं इदं न युत्त’न्तिआदीनि वत्वा सन्धानं कत्ता. अनुप्पदाताति सन्धानानुप्पदाता. द्वे जने समग्गे दिस्वा – ‘तुम्हाकं एवरूपे कुले जातानं, एवरूपेहि गुणेहि समन्नागतानं ¶ अनुच्छविकमेत’न्तिआदीनि वत्वा दळ्हीकम्मं कत्ताति अत्थो. समग्गो आरामो अस्साति समग्गारामो. यत्थ समग्गा नत्थि, तत्थ वसितुम्पि न इच्छतीति अत्थो. समग्गरामोतिपि पाळि. अयमेव अत्थो. समग्गरतोति समग्गेसु रतो. ते पहाय अञ्ञत्र गन्तुम्पि न इच्छतीति अत्थो. समग्गे दिस्वापि सुत्वापि नन्दतीति समग्गनन्दी. समग्गकरणिं वाचं भासिताति या वाचा सत्ते समग्गेयेव करोति, तं सामग्गीगुणपरिदीपकमेव ¶ वाचं भासति, न इतरन्ति.

कालेन वदतीति कालवादी. वत्तब्बयुत्तकालं सल्लक्खेत्वा वदतीति अत्थो. भूतं तथं तच्छं सभावमेव वदतीति भूतवादी. दिट्ठधम्मिकसम्परायिकत्थसन्निस्सितमेव कत्वा वदतीति अत्थवादी. नवलोकुत्तरधम्मसन्निस्सितं कत्वा वदतीति धम्मवादी. संवरविनयपहानविनयसन्निस्सितं कत्वा वदतीति विनयवादी. निधानं वुच्चति ठपनोकासो. निधानमस्स अत्थीति निधानवती. हदये निधातब्बयुत्तकं वाचं भासिताति अत्थो. कालेनाति एवरूपिं भासमानोपि च ‘‘अहं निधानवतिं वाचं भासिस्सामी’’ति न अकालेन भासति. युत्तकालं पन सल्लक्खेत्वाव भासतीति अत्थो. सापदेसन्ति सउपमं, सकारणन्ति अत्थो. परियन्तवतिन्ति परिच्छेदं दस्सेत्वा. यथास्सा परिच्छेदो पञ्ञायति, एवं भासतीति अत्थो. अत्थसंहितन्ति अनेकेहिपि नयेहि विभजन्तेन परियादातुं असक्कुणेय्यताय अत्थसम्पन्नं भासति. यं वा सो अत्थवादी अत्थं वदति, तेन अत्थेन संहितत्ता अत्थसंहितं वाचं भासति. न अञ्ञं निक्खिपित्वा अञ्ञं भासतीति वुत्तं होति.

१७९. बीजगामभूतगामसमारम्भाति मूलबीजं, खन्धबीजं, फळुबीजं, अग्गबीजं बीजबीजन्ति पञ्चविधस्स बीजगामस्स चेव यस्स कस्सचि नीलतिणरुक्खादिकस्स भूतगामस्स च समारम्भा. छेदनभेदनपचनादिभावेन विकोपना पटिविरतोति अत्थो. एकभत्तिकोति पातरासभत्तं, सायमासभत्तन्ति द्वे भत्तानि. तेसु पातरासभत्तं अन्तोमज्झन्हिकेन परिच्छिन्नं. इतरं मज्झन्हिकतो उद्धं अन्तोअरुणेन. तस्मा अन्तोमज्झन्हिके ¶ दसक्खत्तुं ¶ भुञ्जमानोपि एकभत्तिकोव होति. तं सन्धाय वुत्तं – एकभत्तिकोति. रत्तिया भोजनं रत्ति, ततो उपरतोति रत्तूपरतो. अतिक्कन्ते मज्झन्हिके याव सूरियसत्थङ्गमना भोजनं विकालभोजनं नाम, ततो विरतत्ता विरतो विकालभोजना. सासनस्स अननुलोमत्ता विसूकं पटाणीभूतं दस्सनन्ति विसूकदस्सनं. अत्तना नच्चननच्चापनादिवसेन नच्चा च गीता च वादिता च अन्तमसो मयूरनच्चनापनादिवसेनपि पवत्तानं नच्चादीनं विसूकभूता दस्सना चाति नच्चगीतवादितविसूकदस्सना. नच्चादीनि ¶ हि अत्तना पयोजेतुं वा परेहि पयोजापेतुं वा युत्तानि पस्सितुं वा नेव भिक्खूनं न भिक्खुनीनं वट्टन्ति. मालादीसु – मालाति यंकिञ्चि पुप्फं. गन्धन्ति यंकिञ्चि गन्धजातं. विलेपनन्ति छविरागकरणं. तत्थ पिळन्धन्तो धारेति नाम. ऊनट्ठानं पूरेन्तो मण्डेति नाम. गन्धवसेन छविरागवसेन च सादियन्तो विभूसेति नाम. ठानं वुच्चति कारणं. तस्मा याय दुस्सील्यचेतनाय तानि मालाधारणादीनि महाजनो करोति, ततो पटिविरतोति अत्थो. उच्चासयनं वुच्चति पमाणातिक्कन्तं. महासयनं अकप्पियसन्थतं, ततो पटिविरतोति अत्थो. जातरूपन्ति सुवण्णं. रजतन्ति कहापणो, लोहमासको, जतुमासको, दारुमासकोति ये वोहारं गच्छन्ति. तस्स उभयस्सापि पटिग्गहणा पटिविरतो, नेव नं उग्गण्हाति, न उग्गण्हापेति, न उपनिक्खित्तं सादियतीति अत्थो.

आमकधञ्ञपटिग्गहणाति सालिवीहियवगोधुमकङ्गुवरककुद्रूसकसङ्खातस्स सत्तविधस्सापि आमकधञ्ञस्स पटिग्गहणा. न केवलञ्च एतेसं पटिग्गहणमेव, आमसनम्पि भिक्खूनं न वट्टतियेव. आमकमंसपटिग्गहणाति एत्थ अञ्ञत्र ओदिस्स अनुञ्ञाता आमकमच्छमंसानं पटिग्गहणमेव भिक्खूनं न वट्टति, नो आमसनं. इत्थिकुमारिकपटिग्गहणाति एत्थ इत्थीति पुरिसन्तरगता. इतरा कुमारिका नाम. तासं पटिग्गहणम्पि आमसनम्पि अकप्पियमेव. दासिदासपटिग्गहणाति एत्थ दासिदासवसेनेव तेसं पटिग्गहणं न वट्टति. ‘कप्पियकारकं दम्मि’, ‘आरामिकं दम्मी’ति एवं वुत्ते पन वट्टति. अजेळकादीसुपि खेत्तवत्थुपरियोसानेसु कप्पियाकप्पियनयो विनयवसेन उपपरिक्खितब्बो. तत्थ खेत्तं नाम यस्मिं पुब्बण्णं रुहति. वत्थु नाम यस्मिं अपरण्णं रुहति. यत्थ वा उभयम्पि ¶ रुहति तं खेत्तं. तदत्थाय अकतभूमिभागो वत्थु. खेत्तवत्थुसीसेन चेत्थ वापितळाकादीनिपि सङ्गहितानेव.

दूतेय्यं वुच्चति दूतकम्मं. गिहीनं पहितं पण्णं वा सासनं वा गहेत्वा तत्थ तत्थ गमनं ¶ . पहीणगमनं वुच्चति परघरं पेसितस्स खुद्दकगमनं. अनुयोगो नाम तदुभयकरणं. तस्मा दूतेय्यपहीणगमनानं अनुगोति ¶ एवमेत्थ अत्थो दट्ठब्बो. कयविक्कयाति कया च विक्कया च. तुलाकूटादीसु – कूटन्ति वञ्चनं. तत्थ तुलाकूटं नाम रूपकूटं, अङ्गकूटं गहणकूटं, पटिच्छन्नकूटन्ति चतुब्बिधं होति. तत्थ रूपकूटं नाम द्वे तुला समरूपा कत्वा गण्हन्तो महतिया गण्हाति, ददन्तो खुद्दिकाय देति. अङ्गकूटं नाम गण्हन्तो पच्छाभागे हत्थेन तुलं अक्कमति, ददन्तो पुब्बभागे. गहणकूटं नाम गण्हन्तो मूले रज्जुं गण्हाति, ददन्तो अग्गे. पटिच्छन्नकूटं नाम तुलं सुसिरं कत्वा अन्तो अयचुण्णं पक्खिपित्वा गण्हन्तो तं पच्छाभागे करोति, ददन्तो अग्गभागे.

कंसो वुच्चति सुवण्णपाति. ताय वञ्चनं कंसकूटं. कथं? एकं सुवण्णपातिं कत्वा अञ्ञा द्वे तिस्सो लोहपातियो सुवण्णवण्णा करोन्ति, ततो जनपदं गन्त्वा किञ्चिदेव अड्ढकुलं पविसित्वा सुवण्णभाजनानि किणथा’ति वत्वा अग्घे पुच्छिते समग्घतरं दातुकामा होन्ति. ततो तेहि ‘कथं इमेसं सुवण्णभावो जानितब्बो’ति वुत्ते ‘वीमंसित्वा गण्हथा’ति सुवण्णपातिं पासाणे घंसित्वा सब्बपातियो दत्वा गच्छन्ति.

मानकूटं नाम हदयभेदसिखाभेदरज्जुभेदवसेन तिविधं होति. तत्थ हदयभेदो सप्पितेलादिमिननकाले लब्भति. तानि हि गण्हन्तो हेट्ठा छिद्देन मानेन ‘सणिकं आसिञ्चा’ति वत्वा अन्तोभाजने बहुं पग्घरापेत्वा गण्हाति. ददन्तो छिद्दं पिधाय सीघं पूरेत्वा देति. सिखाभेदो तिलतण्डुलादिमिननकाले लब्भति. तानि हि गण्हन्तो सणिकं सिखं उस्सापेत्वा गण्हाति. ददन्तो वेगेन पूरेत्वा सिखं छिन्दन्तो देति. रज्जुभेदो खेत्तवत्थुमिननकाले लब्भति. लञ्जं अलभन्ता हि खेत्तं अमहन्तम्पि महन्तं कत्वा मिनन्ति.

उक्कोटनादीसु ¶ – उक्कोटनन्ति अस्सामिके सामिके कातुं लञ्जग्गहणं. वञ्चनन्ति तेहि तेहि उपायेहि परेसं वञ्चनं. तत्रिदमेकं वत्थु – एको किर लुद्दको मिगञ्च मिगपोतकञ्च गहेत्वा आगच्छति. तमेको धुत्तो – ‘‘किं भो मिगो अग्घति, किं मिगपोतको’’ति आह. ‘‘मिगो द्वे कहापणे, मिगपोतको एक’’न्ति च वुत्ते कहापणं दत्वा मिगपोतकं गहेत्वा थोकं गन्त्वा निवत्तो ¶ , ‘‘न मे भो मिगपोतकेन अत्थो, मिगं मे देही’’ति आह. तेन हि ‘‘द्वे कहापणे देही’’ति. सो आह – ‘‘ननु ते, भो, मया पठमं ¶ एको कहापणो दिन्नो’’ति? ‘‘आम दिन्नो’’ति. इदम्पि मिगपोतकं गण्ह, एवं सो च कहापणो अयञ्च कहापणग्घणको मिगपोतकोति द्वे कहापणा भविस्सन्तीति. सो ‘‘कारणं वदती’’ति सल्लक्खेत्वा मिगपोतकं गहेत्वा मिगं अदासीति.

निकतीति योगवसेन वा मायावसेन वा अपामङ्गं पामङ्गन्ति, अमणिं मणीति, असुवण्णं सुवण्णन्ति कत्वा पतिरूपकेन वञ्चनं. साचियोगोति कुटिलयोगो. एतेसंयेव उक्कोटनादीनमेतं नामं. तस्मा उक्कोटनसाचियोगो वञ्चनसाचियोगो निकतिसाचियोगोति एवमेत्थ अत्थो दट्ठब्बो. केचि अञ्ञं दस्सेत्वा अञ्ञस्स परिवत्तनं ‘साचियोगो’ति वदन्ति. तं पन वञ्चनेनेव सङ्गहितं.

छेदनादीसु – छेदनन्ति हत्थच्छेदनादि. वधोति मारणं. बन्धोति रज्जुबन्धनादीहि बन्धनं. विपरामोसोति हिमविपरामोसो, गुम्बविपरामोसोति दुविधो. यञ्हि हिमपातसमये हिमेन पटिच्छन्ना हुत्वा मग्गप्पटिपन्नं जनं मुसन्ति, अयं हिमविपरामोसो. यं गुम्बादीहि पटिच्छन्ना मुसन्ति, अयं गुम्बविपरामोसो. आलोपो वुच्चति गामनिगमादीनं विलोपकरणं. सहसाकारोति साहसिककिरिया. गेहं पविसित्वा मनुस्सानं उरे सत्थं ठपेत्वा इच्छितभण्डग्गहणं. एवमेतस्मा छेदन…पे… सहसाकारा पटिविरतो होति.

१८०. सो सन्तुट्ठो होतीति सो चतूसु पच्चयेसु द्वादसविधेन इतरीतरपच्चयसन्तोसेन समन्नागतो होति. कायपरिहारिकेनाति कायं परिहरणमत्तकेन. कुच्छिपरिहारिकेनाति कुच्छिपरिहरणमत्तकेन. समादायेव पक्कमतीति अट्ठविधं भिक्खु परिक्खारमत्तकं सब्बं गहेत्वाव कायपटिबद्धं कत्वाव गच्छति. ‘‘मम ¶ विहारो परिवेणं उपट्ठाको’’ति सङ्गो वा बद्धो वा न होति. सो जिया मुत्तसरो विय यूथा पक्कन्तो, मत्तहत्थी विय इच्छितिच्छितं सेनासनं वनसण्डं रुक्खमूलं वनपत्थं पब्भारं परिभुञ्जन्तो एकोव तिट्ठति, एकोव निसीदति. सब्बिरियापथेसु एकोव अदुतियो.

‘‘चातुद्दिसो ¶ अप्पटिघो च होति,

सन्तुस्समानो इतरीतरेन;

परिस्सयानं ¶ सहिता अछम्भी,

एको चरे खग्गविसाणकप्पो’’ति. (सु. नि. ४२);

एवं वण्णितं खग्गविसाणकप्पतं आपज्जति.

इदानि तमत्थं उपमाय साधेन्तो, ‘‘सेय्यथापी’’तिआदिमाह. तत्थ पक्खी सकुणोति पक्खयुत्तो सकुणो. डेतीति उप्पतति. अयं पनेत्थ सङ्खेपत्थो – सकुणो नाम ‘‘असुकस्मिं पदेसे रुक्खो परिपक्कफलो’’ति ञत्वा नानादिसाहि आगन्त्वा नखपक्खतुण्डादीहि तस्स फलानि विज्झन्ता विधुनन्ता खादन्ति. ‘‘इदं अज्जतनाय, इदं स्वातनाय भविस्सती’’ति तेसं न होति. फले पन खीणे नेव रुक्खस्स आरक्खं ठपेन्ति, न तत्थ पत्तं वा नखं वा तुण्डं वा ठपेन्ति. अथ खो तस्मिं रुक्खे अनपेक्खो हुत्वा यो यं दिसाभागं इच्छति, सो तेन सपत्तभारोव उप्पतित्वा गच्छति. एवमेव अयं भिक्खु निस्सङ्गो निरपेक्खोयेव पक्कमति, तेन वुत्तं समादायेव पक्कमतीति. अरियेनाति निद्दोसेन. अज्झत्तन्ति सके अत्तभावे. अनवज्जसुखन्ति निद्दोससुखं.

१८१. सो चक्खुना रूपं दिस्वाति सो इमिना अरियेन सीलक्खन्धेन समन्नागतो भिक्खु चक्खुविञ्ञाणेन रूपं पस्सित्वाति अत्थो. सेसपदेसुपि यं वत्तब्बं, तं सब्बं हेट्ठा वुत्तमेव. अब्यासेकसुखन्ति किलेसेहि अनवसित्तसुखं. अविकिण्णसुखन्तिपि वुत्तं. इन्द्रियसंवरसुखञ्हि दिट्ठादीसु दिट्ठमत्तादिवसेन पवत्तताय अविकिण्णं होति.

१८२. सो ¶ अभिक्कन्ते पटिक्कन्तेति सो मनच्छट्ठानं इन्द्रियानं संवरेन समन्नागतो भिक्खु इमेसु अभिक्कन्तपटिक्कन्तादीसु सत्तसु ठानेसु सतिसम्पजञ्ञवसेन सम्पजानकारी होति. तत्थ यं वत्तब्बं सिया, तं झानविभङ्गे वुत्तमेव.

सो इमिना चातिआदिना किं दस्सेति? अरञ्ञवासस्स पच्चयसम्पत्तिं दस्सेति. यस्स हि इमे चत्तारो पच्चया नत्थि ¶ , तस्स अरञ्ञवासो न इज्झति, तिरच्छानगतेहि वा वनचरकेहि वा सद्धिं वत्तब्बतं आपज्जति. अरञ्ञे अधिवत्था देवता ‘‘किं एवरूपस्स पापभिक्खुनो अरञ्ञवासेना’’ति भेरवं सद्दं सावेन्ति. हत्थेहि सीसं पहरित्वा पलायनाकारं करोन्ति ¶ . ‘‘असुको भिक्खु अरञ्ञं पविसित्वा इदञ्चिदञ्च पापकम्मं अकासी’’ति अयसो पत्थरति. यस्स पनेते चत्तारो पच्चया अत्थि, तस्स अरञ्ञवासो इज्झति. सो हि अत्तनो सीलं पच्चवेक्खन्तो किञ्चि काळकं वा तिलकं वा अपस्सन्तो पीतिं उप्पादेत्वा तं खयतो वयतो सम्मसन्तो अरियभूमिं ओक्कमति. अरञ्ञे अधिवत्था देवता अत्तमना वण्णं भासन्ति. इतिस्स उदके पक्खित्ततेलबिन्दु विय यसो वित्थारिको होति. विवित्तन्तिआदीनि हेट्ठा वुत्तत्थानेव. सो एवं समाहिते चित्ते…पे… यथाकम्मूपगे सत्ते पजानातीति एत्तके ठाने यं वत्तब्बं सिया, तं सब्बं विसुद्धिमग्गे वुत्तमेव.

१८५. ततियविज्जाय सो एवं समाहिते चित्तेति विपस्सनापादकं चतुत्थज्झानचित्तं वेदितब्बं. आसवानं खयञाणायाति अरहत्तमग्गञाणत्थाय. अरहत्तमग्गो हि आसवानं विनासनतो आसवानं खयोति वुच्चति. तत्र चेतं ञाणं तप्परियापन्नत्ताति. चित्तं अभिनिन्नामेतीति विपस्सनाचित्तं अभिनीहरति. सो इदं दुक्खन्ति एवमादीसु – ‘‘एत्तकं दुक्खं, न इतो भिय्यो’’ति सब्बम्पि दुक्खसच्चं सरसलक्खणप्पटिवेधेन यथाभूतं पजानाति, पटिविज्झति. तस्स च दुक्खस्स निब्बत्तिकं तण्हं – अयं दुक्खसमुदयोति; तदुभयम्पि यं ठानं पत्वा निरुज्झति, तं तेसं अप्पवत्तिं निब्बानं – अयं दुक्खनिरोधोति; तस्स च सम्पापकं अरियमग्गं – अयं दुक्खनिरोधगामिनी पटिपदाति सरसलक्खणपटिवेधेन यथाभूतं पजानाति, पटिविज्झतीति – एवमत्थो वेदितब्बो.

एवं ¶ सरूपतो सच्चानि दस्सेत्वा इदानि किलेसवसेन परियायतो दस्सेन्तो इमे आसवातिआदिमाह. तस्स एवं जानतो एवं ¶ पस्सतोति तस्स एवं जानन्तस्स एवं पस्सन्तस्स सह विपस्सनाय कोटिप्पत्तं मग्गं कथेति. कामासवाति कामासवतो. विमुच्चतीति इमिना मग्गक्खणं दस्सेति. विमुत्तस्मिन्ति इमिना फलक्खणं दस्सेति. मग्गक्खणे हि चित्तं विमुच्चति, फलक्खणे विमुत्तं होति. विमुत्तस्मिं विमुत्तमिति ञाणन्ति इमिना पच्चवेक्खणञाणं दस्सेति. खीणा जातीतिआदीहि तस्स भूमिं. तेन हि ञाणेन सो पच्चवेक्खन्तो ‘खीणा जाती’तिआदीनि पजानाति. वुसितन्ति वुट्ठं परिवुट्ठं कतं चरितं निट्ठितन्ति अत्थो. ब्रह्मचरियन्ति मग्गब्रह्मचरियं. पुथुज्जनकल्याणकेन हि सद्धिं सत्त सेक्खा ब्रह्मचरियवासं वसन्ति नाम. खीणासवो वुट्ठवासो. तस्मा सो अत्तनो ब्रह्मचरियवासं पच्चवेक्खन्तो वुसितं ब्रह्मचरियन्ति पजानाति. कतं करणीयन्ति चतूसु सच्चेसु चतूहि मग्गेहि ¶ परिञ्ञापहानसच्छिकिरियाभावनावसेन सोळसविधम्पि किच्चं निट्ठापितन्ति अत्थो. पुथुज्जनकल्याणकादयो हि तं किच्चं करोन्ति; खीणासवो कतकरणीयो. तस्मा सो अत्तनो करणीयं पच्चवेक्खन्तो. ‘‘कतं करणीय’’न्ति पजानाति. नापरं इत्थत्तायाति ‘‘इदानि पुन एत्थभावाय एवं सोळसकिच्चभावाय किलेसक्खयाय वा मग्गभावनाकिच्चं नत्थी’’ति पजानाति.

१८६. सरागादीसु – अप्पहीनोति विक्खम्भनप्पहानेन वा तदङ्गप्पहानेन वा समुच्छेदप्पहानेन वा अप्पहीनो.

१८७. लाभी होतीतिआदीसु – लाभीति लाभवा पटिलभित्वा ठितो. अज्झत्तं चेतोसमथस्साति नियकज्झत्तसङ्खाते अत्तनो चित्ते उप्पन्नस्स चेतोसमथस्स. अधिपञ्ञाधम्मविपस्सनायाति अधिपञ्ञासङ्खाताय खन्धधम्मेसु अनिच्चादिवसेन पवत्ताय विपस्सनाय. रूपसहगतानन्ति रूपनिमित्तारम्मणानं रूपावचरसमापत्तीनं. अरूपसहगतानन्ति न रूपनिमित्तारम्मणानं अरूपसमापत्तीनं. एत्थ च पठमो अट्ठसमापत्तिलाभी पुथुज्जनो. दुतियो सुक्खविपस्सकअरियसावको. ततियो अट्ठसमापत्तिलाभी ¶ अरियसावको. चतुत्थो लोकियमहाजनो वेदितब्बो.

१८८. अनुसोतगामीआदीसु – अनुसोतगामीति वट्टसोतं अनुगतो, वट्टसोते निमुग्गो पुथुज्जनो वेदितब्बो. पटिसोतगामीति पटिसोतगमनो ¶ . अनुसोतं अगन्त्वा पटिसोतं गच्छन्तस्सेतं अधिवचनं. पापञ्च कम्मं न करोतीति पञ्ञत्तं वीतिक्कमन्तो न करोति. सहापि दुक्खेन सहापि दोमनस्सेनाति किलेसपरियुट्ठाने सति उप्पन्नेन दुक्खदोमनस्सेन सद्धिम्पि. परिपुण्णन्ति तिस्सन्नं सिक्खानं एकायपि अनूनं. परिसुद्धन्ति निरुपक्किलेसं. ब्रह्मचरियन्ति सेट्ठचरियं. इमिना वारेन सोतापन्नसकदागामिनो कथिता. किं पन ते रुदन्ता ब्रह्मचरियं चरन्तीति? आम. किलेसरोदनेन रुदन्ता चरन्ति नाम. सीलसम्पन्नो पुथुज्जनभिक्खुपि एत्थेव सङ्गहितो.

ठितत्तोति ठितसभावो. अनागामीति कामरागब्यापादेहि अकम्पनीयचित्तताय च तम्हा लोका अनावत्तिधम्मताय च ठितसभावो नाम. तिण्णोति तण्हासोतं उत्तिण्णो. पारङ्गतोति निब्बानपारं ¶ गतो. थले तिट्ठतीति अरहत्तफलसमापत्तिथले तिट्ठति. चेतोविमुत्तिन्ति फलसमाधिं. पञ्ञाविमुत्तिन्ति फलञाणं. अयं वुच्चतीति अयं खीणासवो ‘‘तिण्णो पारङ्गतो थले तिट्ठति ब्राह्मणो’’ति वुच्चति. बाहितपापताय हि एस ब्राह्मणो नाम.

१८९. अप्पस्सुतादीसु – अप्पकं सुतं होतीति नवङ्गे सत्थुसासने किञ्चिदेव थोकं सुतं होति. न अत्थमञ्ञाय, न धम्ममञ्ञाय धम्मानुधम्मपटिपन्नो होतीति अट्ठकथञ्च पाळिञ्च जानित्वा लोकुत्तरधम्मस्स अनुरूपधम्मं पुब्बभागपटिपदं पटिपन्नो न होति. इमिना नयेन सब्बत्थ अत्थो वेदितब्बो.

१९०. समणमचलादीसु – समणमचलोति समणअचलो, मकारो पदसन्धिकरो. निच्चलसमणो, थिरसमणोति अत्थो ¶ . अयं वुच्चतीति अयं सोतापन्नो सासने मूलजाताय सद्धाय पतिट्ठितत्ता ‘समणमचलो’ति वुच्चति. सकदागामी पन रज्जनकिलेसस्स अत्थिताय समणपदुमोति वुत्तो. रत्तट्ठो हि इध पदुमट्ठो नामाति वुत्तं. अनागामी कामरागसङ्खातस्स रज्जनकिलेसस्स नत्थिताय समणपुण्डरीकोति वुत्तो. पण्डरट्ठो हि इध पुण्डरीकट्ठो नामाति वुत्तं ¶ . खीणासवो च थद्धभावकरानं किलेसानं अभावेन समणेसु समणसुखुमालो नामाति वुत्तो. अप्पदुक्खट्ठेनपि चेस समणसुखुमालोयेवाति.

चतुक्कनिद्देसवण्णना.

५. पञ्चकनिद्देसवण्णना

१९१. पञ्चके – तत्राति तेसु ‘‘आरभति च विप्पटिसारी च होती’’तिआदिना नयेन हेट्ठा उद्दिट्ठपुग्गलेसु. य्वायन्ति यो अयं. आरभतीति एत्थ आरम्भसद्दो कम्मकिरियाहिंसनवीरियविकोपनापत्तिवीतिक्कमेसु वत्तति. तथा हेस ‘‘यंकिञ्चि दुक्खं सम्भोति, सब्बं आरम्भपच्चया’’ति (सु. नि. ७४८) कम्मे आगतो. ‘‘महायञ्ञा महारम्भा, न ते होन्ति महप्फला’’ति (अ. नि. ४.३९) किरियायं. ‘‘समणं गोतमं उद्दिस्स ¶ पाणं आरभन्ती’’ति (म. नि. २.५१-५२) हिंसने. ‘‘आरभथ, निक्खमथ, युञ्जथ बुद्धसासने’’ति (सं. नि. १.१८५) वीरिये. ‘‘बीजगामभूतगामसमारम्भा पटिविरतो होती’’ति (दी. नि. १.१०, १९४; म. नि. १.२९३) विकोपने. ‘‘आरभति च विप्पटिसारी च होती’’ति (अ. नि. ५.१४२) अयं पन आपत्तिवीतिक्कमे आगतो. तस्मा आपत्तिवीतिक्कमवसेन आरभति चेव तप्पच्चया विप्पटिसारी च होतीति अयमेत्थ अत्थो.

यथाभूतं नप्पजानातीति अनधिगतत्ता यथासभावतो न जानाति. यत्थस्साति यस्मिं अस्स, यं ठानं पत्वा एतस्स पुग्गलस्स उप्पन्ना पापका अकुसला धम्मा अपरिसेसा निरुज्झन्तीति अत्थो. किं पन पत्वा ते निरुज्झन्तीति? अरहत्तमग्गं. फलप्पत्तस्स पन निरुद्धा नाम होन्ति. एवं ¶ सन्तेपि इध मग्गकिच्चवसेन फलमेव वुत्तन्ति वेदितब्बं. आरम्भजाति आपत्तिवीतिक्कमसम्भवा. विप्पटिसारजाति विप्पटिसारतो जाता. पवड्ढन्तीति पुनप्पुनं उप्पज्जनेन वड्ढन्ति. साधूति आयाचनसाधु. इदं वुत्तं होति – याव अपरद्धञ्च वत आयस्मता, एवं सन्तेपि मयं आयस्मन्तं याचाम – ‘‘देसेतब्बयुत्तकस्स देसनाय, वुट्ठातब्बयुत्तकस्स वुट्ठानेन, आविकातब्बयुत्तकस्स आविकिरियाय, आरम्भजे आसवे ¶ पहाय, सुद्धन्ते ठितभावपच्चवेक्खणेन विप्पटिसारजे आसवे पटिविनोदेत्वा नीहरित्वा विपस्सनाचित्तञ्चेव विपस्सनापञ्ञञ्च भावेतू’’ति. अमुना पञ्चमेन पुग्गलेनाति एतेन पञ्चमेन खीणासवपुग्गलेन. समसमो भविस्सतीति लोकुत्तरगुणेहि समभावेनेव समो भविस्सतीति एवं खीणासवेन ओवदितब्बोति अत्थो.

आरभति न विप्पटिसारी होतीति आपत्तिं आपज्जति. तं पन देसेतुं सभागपुग्गलं परियेसति. तस्मा न विप्पटिसारी होति. अङ्गुत्तरट्ठकथायं पन ‘‘वुट्ठितत्ता न विप्पटिसारी होती’’ति वुत्तं. न आरभति विप्पटिसारी होतीति आपत्तिं नापज्जति, विनयपञ्ञत्तियं पन अकोविदत्ता अनापत्तियं आपत्तिसञ्ञी हुत्वा विप्पटिसारी होति. अङ्गुत्तरट्ठकथायं पन ‘‘सकिं आपत्तिं आपज्जित्वा ततो वुट्ठाय पच्छा किञ्चापि नापज्जति, विप्पटिसारं पन विनोदेतुं न सक्कोती’’ति वुत्तं. न आरभति न विप्पटिसारी होतीति नेव आपत्तिं आपज्जति, न विप्पटिसारी होति. कतमो पनेस पुग्गलोति? ओस्सट्ठवीरियपुग्गलो. सो हि ‘‘किं मे इमस्मिं बुद्धकाले परिनिब्बानेन, अनागते मेत्तेय्यसम्मासम्बुद्धकाले परिनिब्बायिस्सामी’’ति ¶ विसुद्धसीलोपि पटिपत्तिं न पूरेति. सोपि ‘‘किमत्थं आयस्मा पमत्तो विहरति पुथुज्जनस्स नाम गति अनिबद्धा. आयस्मा हि मेत्तेय्यसम्मासम्बुद्धस्स सम्मुखभावं लभेय्यपि न लभेय्यापीति अरहत्तत्थाय विपस्सनं भावेही’’ति ओवदितब्बोव. सेसं सब्बत्थ वुत्तनयेनेव वेदितब्बं.

१९२. दत्वा ¶ अवजानातीतिआदीसु – एको भिक्खु महापुञ्ञो चतुपच्चयलाभी होति. सो चीवरादीनि लभित्वा अञ्ञं अप्पपुञ्ञं आपुच्छति. सोपि तस्मिं पुनप्पुनं आपुच्छन्तेपि गण्हातियेव. अथस्स इतरो थोकं कुपितो हुत्वा मङ्कुभावं उप्पादेतुकामो वदति – ‘‘अयं अत्तनो धम्मताय चीवरादीनि न लभति, अम्हे निस्साय लभती’’ति. एवं पुग्गलो दत्वा अवजानाति नाम. एको पन एकेन सद्धिं द्वे तीणि वस्सानि वसन्तो पुब्बे तं पुग्गलं गरुं कत्वा पच्छा गच्छन्ते गच्छन्ते काले चित्तीकारं न करोति, आसनापि न वुट्ठाति, उपट्ठानम्पि न गच्छति. एवं पुग्गलो संवासेन अवजानाति नाम.

आधेय्यमुखोति ¶ आदितो धेय्यमुखो. पठमवचनस्मिंयेव ठपितमुखोति अत्थो. अधिमुच्चिता होतीति सद्धाता होति. तत्रायं नयो – एको पुग्गलो सारुप्पंयेव भिक्खुं ‘असारुप्पो एसो’ति कथेति, तं सुत्वा एस निट्ठं गच्छति. पुन अञ्ञेन सभागेन भिक्खुना ‘सारुप्पो अय’न्ति वुत्तेपि तस्स वचनं न गण्हाति ‘‘असुकेन नाम ‘असारुप्पो अय’न्ति अम्हाकं कथित’’न्ति पुरिमभिक्खुनोव कथं गण्हाति. अपरोपिस्स दुस्सीलं ‘सीलवा’ति कथेति. तस्स वचनं सद्दहित्वा पुन अञ्ञेन ‘‘असारुप्पो एस भिक्खु, नायं तुम्हाकं सन्तिकं उपसङ्कमितुं युत्तो’’ति वुत्तोपि तस्स वचनं अग्गहेत्वा पुरिमस्सेव कथं गण्हाति. अपरो वण्णम्पि कथितं गण्हाति, अवण्णम्पि कथितं गण्हातियेव. अयम्पि आधेय्यमुखोयेव नाम. आधातब्बमुखो यं यं सुणाति, तत्थ तत्थ ठपितमुखोति अत्थो.

लोलोति सद्धादीनं इत्तरकालट्ठितिकत्ता अस्सद्धियादीहि लुलितभावेन लोलो. इत्तरसद्धोति परित्तसद्धो, अपरिपुण्णसद्धो. सेसेसुपि एसेव नयो. एत्थ पन पुनप्पुनं भजनवसेन सद्धाव भत्ति. पेमं सद्धापेमं गेहसितपेमम्पि वट्टति. पसादो सद्धापसादोव. एवं पुग्गलो लोलो होतीति एवं इत्तरसद्धादिताय पुग्गलो लोलो नाम होति. हलिद्दिरागो विय ¶ , थुसरासिम्हि कोट्टितखाणुको विय, अस्सपिट्ठियं ठपितकुम्भण्डं ¶ विय च अनिबद्धट्ठानो मुहुत्तेन पसीदति, मुहुत्तेन कुप्पति.

मन्दो मोमूहोति अञ्ञाणभावेन मन्दो अविसदताय मोमूहो. महामूळ्होति अत्थो.

१९३. योधाजीवूपमेसु – योधाजीवाति युद्धूपजीविनो. रजग्गन्ति हत्थिअस्सादीनं पादप्पहारभिन्नाय भूमिया उग्गतं रजक्खन्धं. न सन्थम्भतीति सन्थम्भित्वा ठातुं न सक्कोति. सहति रजग्गन्ति रजक्खन्धं दिस्वापि अधिवासेति. धजग्गन्ति हत्थिअस्सादिपिट्ठेसु वा रथेसु वा उस्सापितानं धजानं अग्गं. उस्सारणन्ति हत्थिअस्सरथादीनञ्चेव बलकायस्स च उच्चासद्दमहासद्दं. सम्पहारेति समागते अप्पमत्तकेपि पहारे. हञ्ञतीति विहञ्ञति, विघातं आपज्जति. ब्यापज्जतीति विपत्तिं आपज्जति, पकतिभावं जहति. सहति सम्पहारन्ति द्वे तयो पहारे पत्वापि सहति, अधिवासेति ¶ . तमेव सङ्गामसीसन्ति तमेव जयखन्धावारट्ठानं. अज्झावसतीति सत्ताहमत्तं अभिभवित्वा आवसति. किं कारणा? लद्धप्पहारानं पहारजग्गनत्थञ्चेव कतकम्मानं विसेसं ञत्वा ठानन्तरदानत्थञ्च इस्सरियसुखानुभवनत्थञ्च.

१९४. इदानि यस्मा सत्थु योधाजीवेहि किच्चं नत्थि, इमस्मिं पन सासने तथारूपे पञ्च पुग्गले दस्सेतुं इदं ओपम्मं आभतं, तस्मा ते पुग्गले दस्सेन्तो एवमेवन्तिआदिमाह.

तत्थ संसीदतीति मिच्छावितक्कस्मिं विसीदति, अनुपविसति. न सक्कोति ब्रह्मचरियं सन्धारेतुन्ति ब्रह्मचरियवासं अनुपच्छिज्जमानं गोपेतुं न सक्कोति. सिक्खादुब्बल्यं आविकत्वाति सिक्खाय दुब्बलभावं पकासेत्वा. किमस्स रजग्गस्मिन्ति किं तस्स पुग्गलस्स रजग्गं नामाति वदति. अभिरूपाति अभिरूपवती. दस्सनीयाति दस्सनयोग्गा. पासादिकाति दस्सनेनेव चित्तप्पसादावहा. परमायाति उत्तमाय. वण्णपोक्खरतायाति सरीरवण्णेन चेव अङ्गसण्ठानेन च.

१९६. ऊहसतीति अवहसति. उल्लपतीति कथेति. उज्जग्घतीति पाणिं पहरित्वा महाहसितं ¶ हसति. उप्पण्डेतीति उप्पण्डनकथं कथेति.

१९७. अभिनिसीदतीति ¶ अभिभवित्वा सन्तिके वा एकासने वा निसीदति. दुतियपदेपि एसेव नयो. अज्झोत्थरतीति अवत्थरति.

१९८. विनिवेठेत्वा विनिमोचेत्वाति गहितट्ठानतो तस्स हत्थं विनिवेठेत्वा चेव, मोचेत्वा च. सेसमेत्थ उत्तानत्थमेव.

१९९. पिण्डपातिकेसु – मन्दत्ता मोमूहत्ताति नेव समादानं जानाति, न आनिसंसं; अत्तनो पन मन्दत्ता मोमूहत्ता अञ्ञाणेनेव पिण्डपातिको होति. पापिच्छो इच्छापकतोति पिण्डपातिकस्स मे सतो ‘‘अयं पिण्डपातिको’’ति चतुपच्चयसक्कारं करिस्सन्ति. लज्जी, अप्पिच्छोतिआदीहि च गुणेहि सम्भावेस्सन्तीति. एवं पापिकाय इच्छाय ठत्वा ताय पापिच्छाय अभिभूतो हुत्वा पिण्डपातिको होति. उम्मादवसेन पिण्डाय चरन्तो पन उम्मादा चित्तविक्खेपा पिण्डपातिको ¶ नाम होति. वण्णितन्ति इदं पिण्डपातिकङ्गं नाम बुद्धेहि च बुद्धसावकेहि च वण्णितं पसत्थन्ति पिण्डपातिको होति. अप्पिच्छतंयेव निस्सायातिआदीसु – ‘‘इति अप्पिच्छो भविस्सामि, इदं मे पिण्डपातिकङ्गं अप्पिच्छताय संवत्तिस्सति; ‘इति सन्तुट्ठो भविस्सामि इदं मे पिण्डपातिकङ्गं सन्तुट्ठिया संवत्तिस्सति’; ‘इति किलेसे संलिखिस्सामि’, इदं मे पिण्डपातिकङ्गं किलेससल्लेखनत्थाय संवत्तिस्सती’’ति पिण्डपातिको होति. इदमत्थितन्ति इमाय कल्याणाय पटिपत्तिया अत्थिकभावं, इमिना वा पिण्डपातमत्तेन अत्थिकभावं. यं यं लद्धं तेन तेनेव यापनभावं निस्सायाति अत्थो. अग्गोति जेट्ठको. सेसानि तस्सेव वेवचनानि.

गवा खीरन्ति गावितो खीरं नाम होति, न विना गाविया. खीरम्हा दधीतिआदीसुपि एसेव नयो. एवमेवन्ति यथा एतेसु पञ्चसु गोरसेसु सप्पिमण्डो अग्गो; एवमेवं इमेसु पञ्चसु पिण्डपातिकेसु य्वायं अप्पिच्छतादीनि निस्साय पिण्डपातिको होति. अयं अग्गो च सेट्ठो च पामोक्खो च उत्तमो च पवरो च. इमेसु पन पञ्चसु पिण्डपातिकेसु द्वेव जना पिण्डपातिका ¶ , तयो न पिण्डपातिका. नाममत्तेन पन पिण्डपातिकाति वेदितब्बा. खलुपच्छाभत्तिकादीसुपि एसेव नयोति.

पञ्चकनिद्देसवण्णना.

६. छक्कनिद्देसवण्णना

२०२. छक्के ¶ – तत्राति तेसु छसु पुग्गलेसु. सम्मासम्बुद्धो तेन दट्ठब्बोति सो पुग्गलो तेन अनाचरियकेन अत्तना उप्पादितेन सब्बञ्ञुतञ्ञाणेन सब्बञ्ञुबुद्धो दट्ठब्बो.

पच्चेकसम्बुद्धो तेनातिआदीसुपि तेन पच्चेकसम्बोधिञाणेन सो पुग्गलो पच्चेकसम्बुद्धो. तेन सावकपारमीञाणेन ते पुग्गला सारिपुत्तमोग्गल्लाना. तेन दुक्खस्स अन्तकरणेन ते पुग्गला अवसेसा अरहन्तो. तेन इत्थत्तं अनागमनेन सो पुग्गलो अनागामी. तेन इत्थत्तं आगमनेन ते पुग्गला सोतापन्नसकदागामिनो दट्ठब्बाति.

छक्कनिद्देसवण्णना.

७. सत्तकनिद्देसवण्णना

२०३. सत्तके ¶ – सकिं निमुग्गोति एकवारं निमुग्गो. एकन्तकाळकेहीति एकन्तेनेव काळकेहि नत्थिकवादअहेतुकवादअकिरियवादसङ्खातेहि नियतमिच्छादिट्ठिधम्मेहि. एवं पुग्गलोति इमिना कारणेन पुग्गलो एकवारं निमुग्गो तथा निमुग्गोव होति. एतस्स हि पुन भवतो वुट्ठानं नाम नत्थीति वदन्ति. मक्खलिगोसालादयो विय हेट्ठा नरकग्गीनंयेव आहारो होति.

साहु सद्धा कुसलेसु धम्मेसूति कुसलधम्मेसु सद्धा नाम साधुलद्धिकाति उम्मुज्जति. सो तावतकेनेव कुसलेन उम्मुज्जति नाम. साधु हिरीतिआदीसुपि एसेव नयो. हायतियेवाति चङ्कवारे आसित्तउदकं विय एकन्तेन परिहायतेव. एवं पुग्गलोति एवं साहु सद्धाति. इमेसं सद्धादीनं वसेन एकवारं उम्मुज्जित्वा तेसं परिहानिया पुन निमुज्जतियेव, देवदत्तादयो विय. देवदत्तो हि अट्ठ समापत्तियो, पञ्च च अभिञ्ञायो निब्बत्तेत्वापि पुन बुद्धानं पटिकण्टकताय तेहि गुणेहि परिहीनो रुहिरुप्पादकम्मं ¶ सङ्घभेदकम्मञ्च ¶ कत्वा कायस्स भेदा दुतियचित्तवारेन निरये निब्बत्ति. कोकालिको द्वे अग्गसावके उपवदित्वा पदुमनिरये निब्बत्तो.

नेव हायति नो वड्ढतीति अप्पहोनककालेपि न हायति, पहोनककालेपि न वड्ढति. उभयम्पि पनेतं अगारिकेनपि अनगारिकेनपि दीपेतब्बं. एकच्चो हि अगारिको अप्पहोनककाले पक्खिकभत्तं वा सलाकभत्तं वा वस्सावासिकं वा उपनिबन्धापेति. सो पच्छा पहोनककालेपि पक्खिकभत्तादिमत्तमेव पवत्तेति. अनगारिकोपि आदिम्हि अप्पहोनककाले उद्देसं वा धुतङ्गं वा गण्हाति, मेधाबलवीरियसम्पत्तिया पहोनककालेपि ततो उत्तरिं न करोति. एवं पुग्गलोति एवं इमाय सद्धादीनं ठितिया पुग्गलो उम्मुज्जित्वा ठितो नाम होति.

उम्मुज्जित्वा विपस्सति विलोकेतीति सोतापन्नो पुग्गलो उट्ठहित्वा गमनमग्गं गन्तब्बं दिसं वा आलोकेति नाम.

उम्मुज्जित्वा ¶ पतरतीति सकदागामिपुग्गलो किलेसतनुताय उट्ठहित्वा गन्तब्बदिसाभिमुखो पतरति नाम.

पतिगाधप्पत्तो होतीति अनागामिपुग्गलो उट्ठाय विलोकेत्वा पतरित्वा गन्त्वा एकस्मिं ठाने पतिट्ठापत्तो नाम होति, तिट्ठति, न पुनागच्छति.

तिण्णो पारङ्गतो थले तिट्ठतीति सब्बकिलेसोघं तरित्वा परतीरं गन्त्वा निब्बानथले ठितो नाम होति. इमे पन सत्त पुग्गला उदकोपमेन दीपिता.

सत्त किर जङ्घवाणिजा अद्धानमग्गपटिपन्ना अन्तरामग्गे एकं पुण्णनदिं पापुणिंसु. तेसु पठमं ओतिण्णो उदकभीरुको पुरिसो ओतिण्णट्ठानेयेव निमुज्जित्वा पुन उट्ठातुं नासक्खि, अन्तोयेव मच्छकच्छपभक्खो जातो. दुतियो ओतिण्णट्ठाने निमुज्जित्वा सकिं उट्ठहित्वा पुन निमुग्गो उट्ठातुं नासक्खि, अन्तोयेव मच्छकच्छपभक्खो जातो. ततियो निमुज्जित्वा उट्ठहि. सो मज्झे नदिया ठत्वा नेव ओरतो आगन्तुं, न परतो गन्तुं असक्खि ¶ . चतुत्थो उट्ठाय ठितो उत्तरणतित्थं ओलोकेसि. पञ्चमो ओतरणतित्थं ओलोकेत्वा पतरि. छट्ठो तरित्वा पारिमतीरं गन्त्वा कटिप्पमाणे उदके ठितो. सत्तमो पारिमतीरं गन्त्वा गन्धचुण्णादीहि न्हात्वा वरवत्थानि ¶ निवासेत्वा सुरभिविलेपनं विलिम्पित्वा नीलुप्पलादीनि पिळन्धित्वा नानालङ्कारपटिमण्डितो महानगरं पविसित्वा पासादवरमारुय्ह उत्तमभोजनं भुञ्जि.

तत्थ सत्त जङ्घवाणिजा विय इमे सत्त पुग्गला. नदी विय वट्टं. पठमस्स उदकभीरुकस्स पुरिसस्स ओतिण्णट्ठानेयेव निमुज्जनं विय मिच्छादिट्ठिकस्स वट्टे निमुज्जनं. उम्मुज्जित्वा निमुग्गपुरिसो विय सद्धादीनं उप्पत्तिमत्तकेन उम्मुज्जित्वा तेसं परिहानिया निमुग्गपुग्गलो. मज्झे नदिया ठितो विय सद्धादीनं ठितिया ठितपुग्गलो. उत्तरणतित्थं ओलोकेन्तो विय गन्तब्बमग्गं गन्तब्बदिसं वा ओलोकेन्तो सोतापन्नो. पतरितपुरिसो विय किलेसतनुताय पतरन्तो सकदागामी. तरित्वा कटिमत्ते उदके ठितपुरिसो विय अनावत्तितधम्मताय ठितो अनागामी. न्हत्वा पारिमतीरं ¶ उत्तरित्वा थले ठितपुरिसो विय चत्तारो ओघे अतिक्कमित्वा निब्बानथले ठितो खीणासवब्राह्मणो. थले ठितपुरिसस्स नगरं पविसित्वा पासादवरं आरुय्ह उत्तमभोजनभुञ्जनं विय खीणासवस्स निब्बानारम्मणं फलसमापत्तिं अप्पेत्वा वीतिनामनं वेदितब्बं. उभतोभागविमुत्तादयो हेट्ठा पकासितायेवाति.

सत्तकनिद्देसवण्णना.

२०७. अट्ठकनवकनिद्देसापि हेट्ठा वुत्तनयेनेव वेदितब्बा.

१०. दसकनिद्देसवण्णना

२०९. दसकनिद्देसे – इधाति कामावचरभूमियं. कामावचरभूमियञ्हि सत्तक्खत्तुपरमादीनं कामावचरभूमियञ्ञेव निट्ठा होति. कामावचरत्तभावेनेव अरहत्तप्पत्ति च अनुपादिसेसनिब्बानप्पत्ति च होतीति अत्थो.

इध ¶ विहायाति इध कामावचरे अत्तभावे विहाय सुद्धावासत्तभावे ठितानं निट्ठा होतीति अत्थो. अन्तरापरिनिब्बायिआदयो हि इध अनागामिफलं पत्वा इतो चुता सुद्धावासेसु उप्पज्जित्वा तेन अत्तभावेन अरहत्तञ्चेव अनुपादिसेसनिब्बानधातुञ्च ¶ पापुणन्ति. तेन वुत्तं – ‘‘इमेसं पञ्चन्नं इध विहाय निट्ठा’’ति.

दसकनिद्देसवण्णना.

निगमनकथा

एत्तावता च –

यं वे पुग्गलपञ्ञत्तिं, लोके अप्पटिपुग्गलो;

नातिसङ्खेपतो सत्था, देसेसि तिदसालये.

तस्सा अट्ठकथञ्चेव, दीपभासाय सङ्खतं;

आगमट्ठकथायो च, ओगाहेत्वा असेसतो.

सुविभत्तो ¶ असंकिण्णो, यो यो अत्थो यहिं यहिं;

ततो ततो तं गहेत्वा, पहाय अतिवित्थारं.

विसुद्धिमग्गे यं वुत्तं, तं अनादाय सङ्खता;

नातिसङ्खेपवित्थार-नयेनट्ठकथा अयं.

तं एतं सत्तमत्तेहि, भाणवारेहि तन्तिया;

चिरट्ठितत्थं धम्मस्स, सङ्खरोन्तेन यं मया.

सम्पत्तं कुसलं तेन, सद्धम्मं सुखुमं सिवं;

ओलोकेन्तु विसुद्धेन, पाणयो धम्मचक्खुनाति.

पुग्गलपञ्ञत्ति-अट्ठकथा निट्ठिता.

नमो तस्स भगवतो अरहतो सम्मासम्बुद्धस्स

अभिधम्मपिटके

कथावत्थु-अट्ठकथा

निसिन्नो ¶ ¶ ¶ देवलोकस्मिं, देवसङ्घपुरक्खतो;

सदेवकस्स लोकस्स, सत्था अप्पटिपुग्गलो.

सब्बपञ्ञत्तिकुसलो, पञ्ञत्तिपरिदीपनं;

वत्वा पुग्गलपञ्ञत्तिं, लोके उत्तमपुग्गलो.

यं पुग्गलकथादीनं, कथानं वत्थुभावतो;

कथावत्थुप्पकरणं, सङ्खेपेन अदेसयी.

मातिकाठपनेनेव ¶ , ठपितस्स सुरालये;

तस्स मोग्गलिपुत्तेन, विभत्तस्स महीतले.

इदानि यस्मा सम्पत्तो, अत्थसंवण्णनाक्कमो;

तस्मा नं वण्णयिस्सामि, तं सुणाथ समाहिताति.

निदानकथा

यमकपाटिहीरावसानस्मिञ्हि भगवा तिदसपुरे पारिच्छत्तकमूले पण्डुकम्बलसिलायं वस्सं उपगन्त्वा मातरं कायसक्खिं कत्वा देवपरिसाय अभिधम्मकथं कथेन्तो धम्मसङ्गणीविभङ्गधातुकथापुग्गलपञ्ञत्तिप्पकरणानि देसयित्वा कथावत्थुदेसनाय वारे सम्पत्ते ‘‘अनागते मम सावको महापञ्ञो मोग्गलिपुत्ततिस्सत्थेरो नाम उप्पन्नं सासनमलं सोधेत्वा ततियसङ्गीतिं करोन्तो भिक्खुसङ्घस्स मज्झे निसिन्नो सकवादे पञ्च सुत्तसतानि परवादे पञ्चाति सुत्तसहस्सं ¶ समोधानेत्वा इमं पकरणं भाजेस्सती’’ति तस्सोकासं करोन्तो या चेसा पुग्गलवादे ताव चतूसु पञ्हेसु द्विन्नं पञ्चकानं वसेन अट्ठमुखा वादयुत्ति, तं आदिं कत्वा सब्बकथामग्गेसु असम्पुण्णभाणवारमत्ताय तन्तिया मातिकं ठपेसि. अथावसेसं ¶ अभिधम्मकथं वित्थारनयेनेव कथेत्वा वुत्थवस्सो सुवण्णरजतसोपानमज्झे मणिमयेन सोपानेन देवलोकतो सङ्कस्सनगरे ओरुय्ह सत्तहितं सम्पादेन्तो यावतायुकं ठत्वा अनुपादिसेसाय निब्बानधातुया परिनिब्बायि.

अथस्स महाकस्सपप्पमुखो वसीगणो अजातसत्तुराजानं सहायं गहेत्वा धम्मविनयसरीरं सङ्गहं आरोपेसि. ततो वस्ससतस्स अच्चयेन वज्जिपुत्तका भिक्खू दस वत्थूनि दीपयिंसु. तानि सुत्वा काकण्डकस्स ब्राह्मणस्स पुत्तो यसत्थेरो सुसुनागपुत्तं कालासोकं नाम राजानं सहायं गहेत्वा द्वादसन्नं भिक्खुसतसहस्सानं अन्तरे सत्तथेरसतानि उच्चिनित्वा तानि दसवत्थूनि मद्दित्वा धम्मविनयसरीरं सङ्गहं आरोपेसि.

तेहि पन धम्मसङ्गाहकत्थेरेहि निग्गहिता दससहस्सा वज्जिपुत्तका भिक्खू पक्खं परियेसमाना अत्तनो अनुरूपं दुब्बलपक्खं लभित्वा विसुं महासङ्घिकाचरियकुलं नाम अकंसु ¶ . ततो भिज्जित्वा अपरानि द्वे आचरियकुलानि जातानि – गोकुलिका च एकब्योहारिका च. गोकुलिकनिकायतो भिज्जित्वा अपरानि द्वे आचरियकुलानि जातानि – पण्णत्तिवादा च बाहुलिया च. बहुस्सुतिकातिपि तेसंयेव नामं. तेसंयेव अन्तरे चेतियवादा नाम अपरे आचरियवादा उप्पन्ना. एवं महासङ्घिकाचरियकुलतो दुतिये वस्ससते पञ्चाचरियकुलानि उप्पन्नानि. तानि महासङ्घिकेहि सद्धिं छ होन्ति.

तस्मिंयेव ¶ दुतिये वस्ससते थेरवादतो भिज्जित्वा द्वे आचरियवादा उप्पन्ना – महिसासका च वज्जिपुत्तका च. तत्थ वज्जिपुत्तकवादतो भिज्जित्वा अपरे चत्तारो आचरियवादा उप्पन्ना – धम्मुत्तरिया, भद्रयानिका, छन्नागारिका, समितियाति. पुन तस्मिंयेव दुतिये वस्ससते महिसासकवादतो भिज्जित्वा सब्बत्थिवादा धम्मगुत्तिकाति द्वे आचरियवादा उप्पन्ना. पुन सब्बत्थिवादकुलतो भिज्जित्वा कस्सपिका नाम जाता. कस्सपिकेसु भिन्नेसु अपरे सङ्कन्तिका नाम जाता. सङ्कन्तिकेसु भिन्नेसु सुत्तवादा नाम जाताति थेरवादतो भिज्जित्वा इमे एकादस ¶ आचरियवादा उप्पन्ना. ते थेरवादेहि सद्धिं द्वादस होन्ति. इति इमे च द्वादस, महासङ्घिकानञ्च छ आचरियवादाति सब्बेव अट्ठारस आचरियवादा दुतिये वस्ससते उप्पन्ना. अट्ठारस निकायातिपि, अट्ठारसाचरियकुलानीतिपि एतेसंयेव नामं. एतेसु पन सत्तरस वादा भिन्नका, थेरवादो असम्भिन्नकोति वेदितब्बो. वुत्तम्पि चेतं दीपवंसे –

‘‘निक्कड्ढिता पापभिक्खू, थेरेहि वज्जिपुत्तका;

अञ्ञं पक्खं लभित्वान, अधम्मवादी बहू जना.

‘‘दससहस्सा समागन्त्वा, अकंसु धम्मसङ्गहं;

तस्मायं धम्मसङ्गीति, महासङ्गीति वुच्चति.

‘‘महासङ्गीतिका भिक्खू, विलोमं अकंसु सासने;

भिन्दित्वा मूलसङ्गहं, अञ्ञं अकंसु सङ्गहं.

‘‘अञ्ञत्र ¶ ¶ सङ्गहिता सुत्तं, अञ्ञत्र अकरिंसु ते;

अत्थं धम्मञ्च भिन्दिंसु, विनये निकायेसु च पञ्चसु.

‘‘परियायदेसितञ्चापि, अथो निप्परियायदेसितं;

नीतत्थञ्चेव नेय्यत्थं, अजानित्वान भिक्खवो.

‘‘अञ्ञं सन्धाय भणितं, अञ्ञं अत्थं ठपयिंसु ते;

ब्यञ्जनच्छायाय ते भिक्खू, बहुं अत्थं विनासयुं.

‘‘छड्डेत्वान एकदेसं, सुत्तं विनयगम्भीरं;

पतिरूपं सुत्तं विनयं, तञ्च अञ्ञं करिंसु ते.

‘‘परिवारं अत्थुद्धारं, अभिधम्मं छप्पकरणं;

पटिसम्भिदञ्च निद्देसं, एकदेसञ्च जातकं.

‘‘एत्तकं विस्सज्जित्वान, अञ्ञानि अकरिंसु ते;

नामं लिङ्गं परिक्खारं, आकप्पकरणानि च.

‘‘पकतिभावं जहित्वा, तञ्च अञ्ञं अकंसु ते;

पुब्बङ्गमा भिन्नवादा, महासङ्गीतिकारका.

‘‘तेसञ्च ¶ अनुकारेन, भिन्नवादा बहू अहु;

ततो अपरकालम्हि, तस्मिं भेदो अजायथ.

‘‘गोकुलिका एकब्योहारि, द्विधा भिज्जित्थ भिक्खवो;

गोकुलिकानं द्वे भेदा, अपरकालम्हि जायथ.

‘‘बहुस्सुतिका ¶ च पञ्ञत्ति, द्विधा भिज्जित्थ भिक्खवो;

चेतिया च पुनवादी, महासङ्गीतिभेदका.

‘‘पञ्चवादा इमे सब्बे, महासङ्गीतिमूलका;

अत्थं धम्मञ्च भिन्दिंसु, एकदेसञ्च सङ्गहं.

‘‘गन्थञ्च एकदेसञ्हि, छड्डेत्वा अञ्ञं अकंसु ते;

नामं ¶ लिङ्गं परिक्खारं, आकप्पकरणानि च.

‘‘पकतिभावं जहित्वा, तञ्च अञ्ञं अकंसु ते;

विसुद्धत्थेरवादम्हि, पुन भेदो अजायथ.

‘‘महिसासका वज्जिपुत्तका, द्विधा भिज्जित्थ भिक्खवो;

वज्जिपुत्तकवादम्हि, चतुधा भेदो अजायथ.

‘‘धम्मुत्तरिका भद्दयानिका, छन्नागारिका च समिति;

महिसासकानं द्वे भेदा, अपरकालम्हि अजायथ.

‘‘सब्बत्थिवादा धम्मगुत्ता, द्विधा भिज्जित्थ भिक्खवो;

सब्बत्थिवादानं कस्सपिका, सङ्कन्तिकस्सपिकेन च.

‘‘सङ्कन्तिकानं सुत्तवादी, अनुपुब्बेन भिज्जथ;

इमे एकादस वादा, सम्भिन्ना थेरवादतो.

‘‘अत्थं धम्मञ्च भिन्दिंसु, एकदेसञ्च सङ्गहं;

गन्थञ्च एकदेसञ्हि, छड्डेत्वा अञ्ञं अकंसु ते.

‘‘नामं ¶ लिङ्गं परिक्खारं, आकप्पकरणानि च;

पकतिभावं जहित्वा, तञ्च अञ्ञं अकंसु ते.

‘‘सत्तरस भिन्नवादा, एकवादो अभिन्नको;

सब्बेवट्ठारस होन्ति, भिन्नवादेन ते सह.

‘‘निग्रोधोव ¶ महारुक्खो, थेर वादानमुत्तमो;

अनूनं अनधिकञ्च, केवलं जिनसासनं.

‘‘सन्तका विय रुक्खम्हि, निब्बत्ता वादसेसका;

पठमे वस्ससते नत्थि, दुतिये वस्ससतन्तरे;

भिन्ना सत्तरस वादा, उप्पन्ना जिनसासने’’ति.

अपरापरं पन हेमवतिका, राजगिरिका, सिद्धत्थिका, पुब्बसेलिया, अपरसेलिया, वाजिरियाति अञ्ञेपि छ आचरियवादा उप्पन्ना. ते इध अनधिप्पेता. पुरिमकानं ¶ पन अट्ठारसन्नं आचरियवादानं वसेन पवत्तमाने सासने पटिलद्धसद्धो असोको धम्मराजा दिवसे दिवसे बुद्धपूजाय सतसहस्सं, धम्मपूजाय सतसहस्सं, सङ्घपूजाय सतसहस्सं, अत्तनो आचरियस्स निग्रोधत्थेरस्स सतसहस्सं, चतूसु द्वारेसु भेसज्जत्थाय सतसहस्सन्ति पञ्चसतसहस्सानि परिच्चजन्तो सासने उळारं लाभसक्कारं पवत्तेसि.

तित्थिया हतलाभसक्कारा अन्तमसो घासच्छादनमत्तम्पि अलभन्ता लाभसक्कारं पत्थयमाना भिक्खूसु पब्बजित्वा सकानि सकानि दिट्ठिगतानि – ‘‘अयं धम्मो, अयं विनयो, इदं सत्थुसासन’’न्ति दीपेन्ति. पब्बज्जं अलभमानापि सयमेव केसे छिन्दित्वा कासायानि वत्थानि अच्छादेत्वा विहारेसु विचरन्ता उपोसथकम्मादिकरणकाले सङ्घमज्झं पविसन्ति. ते भिक्खुसङ्घेन धम्मेन विनयेन सत्थुसासनेन निग्गय्हमानापि धम्मविनयानुलोमाय पटिपत्तिया असण्ठहन्ता अनेकरूपं सासनस्स अब्बुदञ्च मलञ्च कण्टकञ्च समुट्ठापेन्ति. केचि अग्गिं परिचरन्ति, केचि पञ्चातपे तपन्ति, केचि आदिच्चं अनुपरिवत्तन्ति, केचि ‘‘धम्मञ्च विनयञ्च वोभिन्दिस्सामा’’ति तथा तथा पग्गण्हिंसु. तदा भिक्खुसङ्घो न तेहि सद्धिं ¶ उपोसथं वा पवारणं वा अकासि. असोकारामे सत्त वस्सानि उपोसथो उपच्छिज्जि.

राजा ‘‘आणाय कारेस्सामी’’ति वायमन्तोपि कारेतुं नासक्खि, अञ्ञदत्थु दुग्गहितगाहिना बालेन अमच्चेन अनेकेसु भिक्खूसु जीविता वोरोपितेसु विप्पटिसारी अहोसि. सो तञ्च विप्पटिसारं तञ्च सासने उप्पन्नं अब्बुदं वूपसमेतुकामो ‘‘को नु खो इमस्मिं अत्थे पटिबलो’’ति ¶ सङ्घं पुच्छित्वा ‘‘मोग्गलिपुत्ततिस्सत्थेरो, महाराजा’’ति सुत्वा सङ्घस्स वचनेन अहोगङ्गापब्बततो थेरं पक्कोसापेत्वा इद्धिपाटिहारियदस्सनेन थेरस्स आनुभावे निब्बिचिकिच्छो अत्तनो कुक्कुच्चं पुच्छित्वा विप्पटिसारं वूपसमेसि. थेरोपि तं राजुय्यानेयेव वसन्तो सत्त दिवसानि समयं उग्गण्हापेसि. सो उग्गहितसमयो सत्तमे दिवसे असोकारामे भिक्खुसङ्घं सन्निपातापेत्वा साणिपाकारं परिक्खिपापेत्वा साणिपाकारन्तरे निसिन्नो एकलद्धिके एकलद्धिके भिक्खू ¶ एकतो एकतो कारेत्वा एकमेकं भिक्खुसमूहं पक्कोसापेत्वा पुच्छि – ‘‘भन्ते, किंवादी सम्मासम्बुद्धो’’ति? ततो सस्सतवादिनो – ‘‘सस्सतवादी’’ति आहंसु. एकच्चसस्सतिका, अन्तानन्तिका, अमराविक्खेपिका, अधिच्चसमुप्पन्निका, सञ्ञीवादा, असञ्ञीवादा, नेवसञ्ञीनासञ्ञीवादा, उच्छेदवादा, दिट्ठधम्मनिब्बानवादा – ‘‘दिट्ठधम्मनिब्बानवादी’’ति आहंसु. राजा पठममेव समयस्स उग्गहितत्ता नयिमे भिक्खू अञ्ञतित्थिया इमेति ञत्वा तेसं सेतकानि वत्थानि दत्वा उप्पब्बाजेसि. ते सब्बेपि सट्ठिसहस्सा अहेसुं.

अथञ्ञे भिक्खू पक्कोसापेत्वा पुच्छि – ‘‘किंवादी, भन्ते, सम्मासम्बुद्धो’’ति? ‘‘विभज्जवादी, महाराजा’’ति. एवं वुत्ते राजा थेरं पुच्छि – ‘‘विभज्जवादी, भन्ते, सम्मासम्बुद्धो’’ति? ‘‘आम, महाराजा’’ति. ततो राजा ‘सुद्धं दानि, भन्ते, सासनं, करोतु भिक्खुसङ्घो उपोसथ’न्ति आरक्खं दत्वा नगरं पाविसि. समग्गो सङ्घो सन्निपतित्वा उपोसथं अकासि. तस्मिं सन्निपाते सट्ठिभिक्खुसतसहस्सानि अहेसुं. तस्मिं समागमे मोग्गलिपुत्ततिस्सत्थेरो यानि च तदा उप्पन्नानि वत्थूनि, यानि च आयतिं उप्पज्जिस्सन्ति, सब्बेसम्पि तेसं पटिबाहनत्थं सत्थारा दिन्ननयवसेनेव तथागतेन ठपितमातिकं विभजन्तो सकवादे पञ्च सुत्तसतानि परवादे पञ्चाति सुत्तसहस्सं आहरित्वा इमं परप्पवादमथनं आयतिलक्खणं कथावत्थुप्पकरणं अभासि.

ततो ¶ सट्ठिसतसहस्ससङ्ख्येसु भिक्खू उच्चिनित्वा तिपिटकपरियत्तिधरानं पभिन्नपटिसम्भिदानं भिक्खूनं सहस्समेकं गहेत्वा यथा महाकस्सपत्थेरो च यसत्थेरो च धम्मञ्च विनयञ्च सङ्गायिंसु; एवमेव सङ्गायन्तो ¶ सासनमलं विसोधेत्वा ततियसङ्गीतिं अकासि. तत्थ अभिधम्मं सङ्गायन्तो इमं यथाभासितं पकरणं सङ्गहं आरोपेसि. तेन वुत्तं –

‘‘यं ¶ पुग्गलकथादीनं, कथानं वत्थुभावतो;

कथावत्थुप्पकरणं, सङ्खेपेन अदेसयी.

‘‘मातिकाठपनेनेव, ठपितस्स सुरालये;

तस्स मोग्गलिपुत्तेन, विभत्तस्स महीतले.

‘‘इदानि यस्मा सम्पत्तो, अत्थसंवण्णनाक्कमो;

तस्मा नं वण्णयिस्सामि, तं सुणाथ समाहिता’’ति.

निदानकथा निट्ठिता.

महावग्गो

१. पुग्गलकथा

१. सुद्धसच्चिकट्ठो

१. अनुलोमपच्चनीकवण्णना

१. तत्थ ¶ ¶ ¶ पुग्गलो उपलब्भति सच्चिकट्ठपरमत्थेनाति अयं पुच्छा. आमन्ताति अयं पटिजानना. कस्स पनायं पुच्छा, कस्स पटिजाननाति? असुकस्साति न वत्तब्बा. भगवता हि इमस्मिं पकरणे नानप्पकारानं लद्धीनं विसोधनत्थं तन्तिवसेन मातिका ठपिता. सा थेरेन सत्थारा दिन्ननये ठत्वा तन्तिवसेन विभत्ता. न हि थेरो यत्तका एत्थ वादमग्गा दस्सिता, तत्तकेहि वादीहि सद्धिं वादेन विग्गाहिककथं कथेसि. एवं सन्तेपि पन तासं तासं कथानं अत्थस्स सुखावधारणत्थं सकवादीपुच्छा, परवादीपुच्छा, सकवादीपटिञ्ञा, परवादीपटिञ्ञाति एवं विभागं दस्सेत्वाव अत्थवण्णनं करिस्साम.

पुग्गलो उपलब्भति सच्चिकट्ठपरमत्थेनाति हि अयं सकवादीपुच्छा. ताय ‘‘ये अत्थि पुग्गलोति एवंलद्धिका पुग्गलवादिनो, ते एवं पुच्छितब्बा’’ति दीपेति. के पन पुग्गलवादिनोति? सासने वज्जिपुत्तका चेव समितिया च बहिद्धा च बहू अञ्ञतित्थिया. तत्थ पुग्गलोति अत्ता, सत्तो जीवो. उपलब्भतीति पञ्ञाय उपगन्त्वा लब्भति, ञायतीति अत्थो. सच्चिकट्ठपरमत्थेनाति एत्थ सच्चिकट्ठोति मायामरीचिआदयो विय अभूताकारेन अग्गहेतब्बो भूतट्ठो. परमत्थोति अनुस्सवादिवसेन अग्गहेतब्बो उत्तमत्थो. उभयेनापि यो परतो ¶ ‘‘पुग्गलो उपलब्भति सच्चिकट्ठपरमत्थेन, रूपञ्च उपलब्भती’’तिआदिना खन्धायतनधातुइन्द्रियवसेन सत्तपञ्ञासविधो धम्मप्पभेदो दस्सितो ¶ . यथा सो भूतेन सभावट्ठेन उपलब्भति, एवं तव पुग्गलो उपलब्भतीति पुच्छति. परवादी आमन्ताति पटिजानाति. पटिजाननञ्हि कत्थचि ‘‘आम, भन्ते’’ति आगच्छति, कत्थचि ‘‘आमो’’ति पटिजाननं आगच्छति. इध पन ‘‘आमन्ता’’ति आगतं. तत्रायं अधिप्पायो – सो हि यं तं परतो वुत्तं भगवता – ‘‘अत्थि पुग्गलो अत्तहिताय पटिपन्नो’’ति सुत्तं ¶ आगतं, तं गहेत्वा यस्मा पन भगवा सच्चवादी न विसंवादनपुरेक्खारो वाचं भासति, नापि अनुस्सवादिवसेन धम्मं देसेति, सदेवकं पन लोकं सयं अभिञ्ञा सच्छिकत्वा पवेदेति, तस्मा यो तेन वुत्तो ‘‘अत्थि पुग्गलो अत्तहिताय पटिपन्नो’’ति, सो सच्चिकट्ठपरमत्थेनेव अत्थीति लद्धिं गहेत्वा ‘‘आमन्ता’’ति पटिजानाति.

अथस्स तादिसस्स लेसवचनस्स छलवादस्स ओकासं अददमानो सकवादी यो सच्चिकट्ठोतिआदिमाह. तत्रायं अधिप्पायो – य्वायं परतो ‘‘सप्पच्चयो अप्पच्चयो, सङ्खतो असङ्खतो, सस्सतो, असस्सतो सनिमित्तो अनिमित्तो’’ति एवं परिदीपितो रूपादिसत्तपञ्ञासविधो धम्मप्पभेदो आगतो; न सम्मुतिसच्चवसेन, नापि अनुस्सवादिवसेन गहेतब्बो. अत्तनो पन भूतताय एव सच्चिकट्ठो, अत्तपच्चक्खताय च परमत्थो. तं सन्धायाह – ‘‘यो सच्चिकट्ठो परमत्थो, ततो सो पुग्गलो उपलब्भति सच्चिकट्ठपरमत्थेना’’ति.

ततोति करणवचनमेतं, तस्मा तेन सच्चिकट्ठपरमत्थेन सो पुग्गलो उपलब्भतीति अयमेत्थ अत्थो. इदं वुत्तं होति – रुप्पनादिभेदेन वा सप्पच्चयादिभेदेन वा आकारेन यो सच्चिकट्ठपरमत्थो उपलब्भति, किं ते पुग्गलोपि तेनाकारेन उपलब्भतीति? न हेवं वत्तब्बेति अवजानना परवादिस्स. सो हि तथारूपं पुग्गलं अनिच्छन्तो अवजानाति. तत्रायं पदच्छेदो – ‘न हि एवं वत्तब्बे’ति, न हि एवन्तिपि वट्टति. द्विन्नम्पि एवं न वत्तब्बोति अत्थो.

आजानाहि निग्गहन्ति सकवादिवचनं. यस्मा ते पुरिमाय वत्तब्बपटिञ्ञाय पच्छिमा नवत्तब्बपटिञ्ञा, पच्छिमाय च पुरिमा न सन्धियति, तस्मापि निग्गहं पत्तो. तं निग्गहं दोसं ¶ अपराधं सम्पटिच्छाहीति अत्थो. एवं ¶ निग्गहं आजानापेत्वा इदानि तं ठपनाय चेव अनुलोमपटिलोमतो पापनारोपनानञ्च वसेन पाकटं करोन्तो हञ्चि पुग्गलोतिआदिमाह. तत्थ हञ्चि पुग्गलो उपलब्भतीति यदि पुग्गलो उपलब्भति, सचे पुग्गलो उपलब्भति सच्चिकट्ठपरमत्थेनाति अत्थो. अयं ताव परवादीपक्खस्स ठपनतो निग्गहपापनारोपनानं लक्खणभूता ¶ अनुलोमठपना नाम. तेन वत रेतिआदि अनुलोमपक्खे निग्गहस्स पापितत्ता अनुलोमपापना नाम. तत्थ तेनाति कारणवचनं. वताति ओकप्पनवचनं. रेति आमन्तनवचनं. इदं वुत्तं होति – तेन, रे वत्तब्बे वत, रे हम्भो, भद्रमुख, तेन कारणेन वत्तब्बोयेवाति. यं तत्थ वदेसीतिआदि अनुलोमपक्खे निग्गहस्स आरोपितत्ता अनुलोमरोपना नाम. यं तस्स परियोसाने मिच्छातिपदं तस्स पुरतो इदं ते’ति आहरितब्बं. इदं ते मिच्छाति अयञ्हेत्थ अत्थो. परतो च पाळियं एतं आगतमेव.

नो चे पन वत्तब्बेतिआदि ‘‘न हेवं वत्तब्बे’’ति पटिक्खित्तपक्खस्स ठपितत्ता पटिलोमतो निग्गहपापनारोपनानं लक्खणभूता पटिलोमठपना नाम. नो च वत रेतिआदि पटिलोमपक्खे निग्गहस्स पापितत्ता पटिलोमपापना नाम. पुन यं तत्थ वदेसीतिआदि पटिलोमपक्खे निग्गहस्स आरोपितत्ता पटिलोमरोपना नाम. इधापि परियोसाने मिच्छातिपदस्स पुरतो इदं तेति आहरितब्बमेव. परतोपि एवरूपेसु ठानेसु एसेव नयो.

तत्रायं आदितो पट्ठाय सङ्खेपत्थो – यदि पुग्गलो उपलब्भति सच्चिकट्ठपरमत्थेन, तेन वत भो सो उपलब्भतीति वत्तब्बो. यं पन तत्थ वदेसि ‘‘वत्तब्बो खो पुरिमपञ्हे ‘सच्चिकट्ठपरमत्थेन उपलब्भती’ति, नो च वत्तब्बो दुतियपञ्हे ‘ततो सो पुग्गलो उपलब्भती’’’ति, इदं ते मिच्छाति एवं ताव अनुलोमतो ठपनापापनारोपना होन्ति. अथ न वत्तब्बो दुतियपञ्हे ‘‘ततो सो उपलब्भती’’ति, पुरिमपञ्हेपि न वत्तब्बोव. यं पनेत्थ वदेसि ‘‘वत्तब्बो खो पुरिमपञ्हे ‘सच्चिकट्ठपरमत्थेन उपलब्भती’ति, नो ¶ च वत्तब्बो दुतियपञ्हे ‘ततो सो पुग्गलो उपलब्भती’’’ति, इदं ते मिच्छाति एवं पटिलोमतो ठपनापापनारोपना होन्ति. एवमेतं निग्गहस्स च अनुलोमपटिलोमतो चतुन्नं पापनारोपनानञ्च वुत्तत्ता उपलब्भतीतिआदिकं अनुलोमपञ्चकं नाम. एत्थ च किञ्चापि अनुलोमतो पापनारोपनाहि एको, पटिलोमतो पापनारोपनाहि एकोति द्वे निग्गहा कता. ‘आजानाहि ¶ निग्गह’न्ति एतस्सेव पनेत्थ ¶ पुग्गलो उपलब्भतीति पठमं वादं निस्साय पठमस्स निग्गहस्स द्वीहाकारेहि आरोपितत्ता एकोवायं निग्गहोति पठमो निग्गहो.

२. इदानि पच्चनीकनयो होति. तत्थ पुच्छा परवादिस्स. सो हि ‘‘अत्थि पुग्गलो अत्तहिताय पटिपन्नो’’ति गहितत्ता ‘‘नुपलब्भती’’ति असम्पटिच्छन्तो एवं पुच्छति. सकवादी यथा रूपादिधम्मा उपलब्भन्ति, एवं अनुपलब्भनीयतो आमन्ताति पटिजानाति. पुन इतरो अत्तना अधिप्पेतं सच्चिकट्ठंयेव सन्धाय यो सच्चिकट्ठोतिआदिमाह. सम्मुतिसच्चपरमत्थसच्चानि वा एकतो कत्वापि एवमाह. सकवादी ‘पुग्गलो’ति उपादापञ्ञत्तिसब्भावतोपि द्विन्नं सच्चानं एकतो कत्वा पुच्छितत्तापि न हेवन्ति पटिक्खिपति.

इदानि किञ्चापि तेन पठमं परमत्थसच्चवसेन नुपलब्भनीयता सम्पटिच्छिता, पच्छा सम्मुतिसच्चवसेन वोमिस्सकवसेन वा पटिक्खित्ता. परवादी पन ‘नुपलब्भती’ति वचनसामञ्ञमत्तं छलवादं निस्साय यं तया पठमं पटिञ्ञातं, तं पच्छा पटिक्खित्तन्ति भण्डनस्स पटिभण्डनं विय अत्तनो कतस्स निग्गहकम्मस्स पटिकम्मं करोन्तो आजानाहि पटिकम्मन्ति आह. इदानि यथास्स अनुलोमपञ्चके सकवादिना वादट्ठपनं कत्वा अनुलोमपटिलोमतो पापनारोपनाहि निग्गहो पाकटो कतो, एवं पटिकम्मं पाकटं करोन्तो हञ्चि पुग्गलोतिआदिमाह. तं हेट्ठा वुत्तनयेनेव अत्थतो वेदितब्बं. यस्मा पनेत्थ ठपना नाम परवादीपक्खस्स ठपनतो ¶ ‘‘अयं तव दोसो’’ति दस्सेतुं ठपनमत्तमेव होति, न निग्गहस्स वा पटिकम्मस्स वा पाकटभावकरणं, पापनारोपनाहि पनस्स पाकटकरणं होति. तस्मा इदं अनुलोमपटिलोमतो पापनारोपनानं वसेन चतूहाकारेहि. पटिकम्मस्स कतत्ता पटिकम्मचतुक्कं नामाति एकं चतुक्कं वेदितब्बं.

३. एवं पटिकम्मं कत्वा इदानि य्वास्स अनुलोमपञ्चके सकवादिना निग्गहो कतो, तस्स तमेव छलवादं निस्साय दुक्कटभावं दस्सेन्तो त्वञ्चे पन मञ्ञसीतिआदिमाह. तत्थ त्वं चे पन मञ्ञसीति यदि त्वं मञ्ञसि. वत्तब्बे खोति इदं पच्चनीके आमन्ताति पटिञ्ञं सन्धाय वुत्तं ¶ . नो च वत्तब्बेति इदं पन न हेवाति अवजाननं सन्धाय वुत्तं. तेन तव तत्थाति तेन कारणेन त्वंयेव तस्मिं नुपलब्भतीति पक्खे – ‘‘हेवं पटिजानन्तन्ति आमन्ता’’ति ¶ एवं पटिजानन्तो. हेवं निग्गहेतब्बेति पुन न हेवाति अवजानन्तो एवं निग्गहेतब्बो. अथ तं निग्गण्हामाति अथेवं निग्गहारहं तं निग्गण्हाम. सुनिग्गहितो च होसीति सकेन मतेन निग्गहितत्ता सुनिग्गहितो च भवसि.

एवमस्स निग्गहेतब्बभावं दस्सेत्वा इदानि तं निग्गण्हन्तो हञ्चीतिआदिमाह. तत्थ ठपनापापनारोपना हेट्ठा वुत्तनयेनेव वेदितब्बा. परियोसाने पन इदं ते मिच्छाति इदं तव वचनं मिच्छा होतीति अत्थो. इदं छलवादेन चतूहि आकारेहि निग्गहस्स कतत्ता निग्गहचतुक्कं नाम.

४. एवं निग्गहं कत्वापि इदानि ‘‘यदि अयं मया तव मतेन कतो ¶ निग्गहो दुन्निग्गहो, यो मम तया हेट्ठा अनुलोमपञ्चके कतो निग्गहो, सोपि दुन्निग्गहो’’ति दस्सेन्तो एसे चे दुन्निग्गहितेतिआदिमाह. तत्थ एसे चे दुन्निग्गहितेति एसो चे तव वादो मया दुन्निग्गहितो. अथ वा एसो चे तव मया कतो निग्गहो दुन्निग्गहो. हेवमेवं तत्थ दक्खाति तत्थापि तया मम हेट्ठा कते निग्गहे एवमेवं पस्स. इदानि य्वास्स हेट्ठा सकवादिना निग्गहो कतो, तं ‘‘वत्तब्बे खो’’तिआदिवचनेन दस्सेत्वा पुन तं निग्गहं अनिग्गहभावं उपनेन्तो नो च मयं तयातिआदिमाह. तत्थ नो च मयं तया तत्थ हेताय पटिञ्ञायातिआदीसु अयमत्थो – यस्मा सो तया मम कतो निग्गहो दुन्निग्गहो, तस्मा मयं तया तत्थ अनुलोमपञ्चके आमन्ताति एताय पटिञ्ञाय एवं पटिजानन्ता पुन न हेवाति पटिक्खेपे कतेपि ‘‘आजानाहि निग्गह’’न्ति एवं न निग्गहेतब्बोयेव. एवं अनिग्गहेतब्बम्पि मं निग्गण्हासि, ईदिसेन पन निग्गहेन दुन्निग्गहिता मयं होम.

इदानि यं निग्गहं सन्धाय ‘‘दुन्निग्गहिता च होमा’’ति अवोच, तं दस्सेतुं हञ्चि पुग्गलो…पे… इदं ते मिच्छातिआह. एवमिदं अनुलोमपटिलोमतो ¶ चतूहि पापनारोपनाहि निग्गहस्स उपनीतत्ता उपनयनचतुक्कं नाम होति.

५. इदानि ‘‘न हेवं निग्गहेतब्बे’’तिआदिकं निग्गमनचतुक्कं नाम होति. तत्थ न हेवं निग्गहेतब्बेति यथाहं तया निग्गहितो, न हि एवं निग्गहेतब्बो. एतस्स हि निग्गहस्स दुन्निग्गहभावो मया साधितो. तेन हीति तेन कारणेन, यस्मा एस निग्गहो दुन्निग्गहो, तस्मा ¶ यं मं निग्गण्हासि हञ्चि पुग्गलो…पे… इदं ते मिच्छाति, इदं निग्गण्हनं तव मिच्छाति अत्थो. तेन हि ये कते निग्गहेति येन कारणेन इदं मिच्छा, तेन कारणेन यो तया निग्गहो कतो, सो दुक्कटो. यं मया पटिकम्मं कतं, तदेव सुकतं. यापि ¶ चेसा पटिकम्मचतुक्कादिवसेन कथामग्गसम्पटिपादना कता, सापि सुकता. एवमेतं पुग्गलो उपलब्भतीतिआदिकस्स अनुलोमपञ्चकस्स नुपलब्भतीतिआदिकानं पटिकम्मनिग्गहोपनयननिग्गमनचतुक्कानं वसेन अनुलोमपच्चनीकपञ्चकं नाम निद्दिट्ठन्ति वेदितब्बं. एत्तावता सकवादिनो पुब्बपक्खे सति परवादिनो वचनसामञ्ञमत्तेन छलवादेन जयो होति.

२. पच्चनीकानुलोमवण्णना

६. इदानि यथा परवादिनो पुब्बपक्खे सति सकवादिनो धम्मेनेव तथेन सुजयो होति, तथा वादुप्पत्तिं दस्सेतुं पुग्गलो नुपलब्भतीति पच्चनीकानुलोमपञ्चकं आरद्धं. तत्थ पच्चनीके पुच्छा परवादिस्स, रूपादिभेदं सच्चिकट्ठपरमत्थं सन्धाय पटिञ्ञा सकवादिस्स. सुद्धसम्मुतिसच्चं वा परमत्थमिस्सकं वा सम्मुतिसच्चं सन्धाय यो सच्चिकट्ठोति पुन अनुयोगो परवादिस्स, सम्मुतिवसेन नुपलब्भतीति नवत्तब्बत्ता मिस्सकवसेन वा अनुयोगस्स संकिण्णत्ता न हेवन्ति पटिक्खेपो सकवादिस्स. पटिञ्ञातं पटिक्खिपतीति वचनसामञ्ञमत्तेन आजानाहि निग्गहन्तिआदिवचनं परवादिस्स. एवमयं पुग्गलो नुपलब्भतीति दुतियवादं निस्साय दुतियो निग्गहो होतीति वेदितब्बो. एवं तेन छलेन निग्गहो आरोपितो.

७-१०. इदानि ¶ धम्मेन समेन अत्तनो वादे जयं ¶ दस्सेतुं अनुलोमनये पुच्छा सकवादिस्स, अत्तनो लद्धिं निस्साय पटिञ्ञा परवादिस्स. लद्धिया ओकासं अदत्वा परमत्थवसेन पुन अनुयोगो सकवादिस्स, परमत्थवसेन पुग्गलस्स अभावतो पटिक्खेपो परवादिस्स. ततो परं धम्मेन समेन अत्तनो जयदस्सनत्थं आजानाहि पटिकम्मन्तिआदि सब्बं सकवादीवचनमेव होति. तत्थ सब्बेसं पटिकम्मनिग्गहोपनयननिग्गमनचतुक्कानं हेट्ठा वुत्तनयेनेव अत्थो वेदितब्बो. एवमिदं पुग्गलो नुपलब्भतीतिआदिकस्स पच्चनीकपञ्चकस्स उपलब्भतीतिआदीनं पटिकम्मनिग्गहोपनयननिग्गमनचतुक्कानञ्च वसेन पच्चनीकानुलोमपञ्चकं नाम निद्दिट्ठं होति. एवमेतानि पठमसच्चिकट्ठे द्वे पञ्चकानि निद्दिट्ठानि. तत्थ पुरिमपञ्चके ¶ परवादिस्स सकवादिना कतो निग्गहो सुनिग्गहो. सकवादिस्स पन परवादिना छलवादं निस्साय पटिकम्मं कत्वा अत्तना साधितो जयो दुज्जयो. दुतियपञ्चके सकवादिस्स परवादिना कतो निग्गहो दुन्निग्गहो. परवादिस्स पन सकवादिना धम्मवादं निस्साय पटिकम्मं कत्वा अत्तना साधितो जयो सुजयोति पठमसच्चिकट्ठो. तत्थेतं वुच्चति –

‘‘निग्गहो परवादिस्स, सुद्धो पठमपञ्चके;

असुद्धो पन तस्सेव, पटिकम्मजयो तहिं.

‘‘निग्गहो सकवादिस्स, असुद्धो दुतियपञ्चके;

विसुद्धो पन तस्सेव, पटिकम्मजयो तहिं.

‘‘तस्मा द्वीसुपि ठानेसु, जयोव सकवादिनो;

धम्मेन हि जयो नाम, अधम्मेन कुतो जयो.

‘‘सच्चिकट्ठे यथा चेत्थ, पञ्चकद्वयमण्डिते;

धम्माधम्मवसेनेव, वुत्तो जयपराजयो.

‘‘इतो परेसु सब्बेसु, सच्चिकट्ठेसु पण्डितो;

एवमेव विभावेय्य, उभो जयपराजये’’ति.

२. ओकाससच्चिकट्ठो

१. अनुलोमपच्चनीकवण्णना

११. एवं ¶ ¶ सुद्धिकसच्चिकट्ठं वित्थारेत्वा इदानि तमेव अपरेहि ओकासादीहि नयेहि वित्थारेतुं पुन पुग्गलो उपलब्भतीतिआदि आरद्धं. तत्थ पुच्छा सकवादिस्स, पटिञ्ञा परवादिस्स. पुन सब्बत्थाति सरीरं सन्धाय अनुयोगो सकवादिस्स, रूपस्मिं अत्तानं समनुपस्सनादोसञ्च ‘अञ्ञं जीवं अञ्ञं सरीर’न्ति आपज्जनदोसञ्च दिस्वा पटिक्खेपो परवादिस्स. सेसमेत्थ अनुलोमपच्चनीकपञ्चके हेट्ठा वुत्तनयेनेव वेदितब्बं. पाठो पन सङ्खित्तो ¶ . तत्थ यस्मा सरीरं सन्धाय ‘‘सब्बत्थ न उपलब्भती’’ति वुत्ते सरीरतो बहि उपलब्भतीति आपज्जति. तस्मा पच्चनीके पटिक्खेपो सकवादिस्स, पठमं अनुजानित्वा पच्छा अवजानातीति छलवादस्स वसेन पटिकम्मं परवादिस्स. सेसं पाकटमेव.

३. कालसच्चिकट्ठो

१. अनुलोमपच्चनीकवण्णना

१२. दुतियनये सब्बदाति पुरिमपच्छिमजातिकालञ्च धरमानपरिनिब्बुतकालञ्च सन्धाय अनुयोगो सकवादिस्स, स्वेव खत्तियो सो ब्राह्मणोतिआदीनं आपत्तिदोसञ्च धरमानपरिनिब्बुतानं विसेसाभावदोसञ्च दिस्वा पटिक्खेपो परवादिस्स. सेसं पठमनये वुत्तसदिसमेव.

४. अवयवसच्चिकट्ठो

१. अनुलोमपच्चनीकवण्णना

१३. ततियनये सब्बेसूति खन्धायतनादीनि सन्धाय अनुयोगो सकवादिस्स, रूपस्मिं अत्ता, चक्खुस्मिं अत्तातिआदिदोसभयेन पटिक्खेपो परवादिस्स. सेसं तादिसमेवाति.

ओकासदिसच्चिकट्ठादि

२. पच्चनीकानुलोमवण्णना

१४. एवमेतानि ¶ ¶ तीणि अनुलोमपच्चनीकपञ्चके अनुलोममत्तवसेनेव ताव पटिपाटिया भाजेत्वा पुन पच्चनीकानुलोमपञ्चके पच्चनीकमत्तवसेनेव भाजेतुं पुग्गलो नुपलब्भतीतिआदि आरद्धं. तत्थ अनुलोमपञ्चकस्स पाळियं सङ्खिपित्वा आगते पच्चनीके वुत्तनयेनेव पच्चनीकस्स च पाळियं सङ्खिपित्वा आगते अनुलोमे वुत्तनयेनेव अत्थो वेदितब्बो. एत्तावता सुद्धिकस्स चेव इमेसञ्च तिण्णन्ति चतुन्नं सच्चिकट्ठानं एकेकस्मिं सच्चिकट्ठे ¶ अनुलोमपच्चनीकस्स पच्चनीकानुलोमस्स चाति द्विन्नं द्विन्नं पच्चनीकानं वसेन अयं अट्ठमुखा नाम वादयुत्ति निद्दिट्ठा होतीति वेदितब्बा. या एकेकस्मिं मुखे एकेकस्स निग्गहस्स वसेन अट्ठकनिग्गहोति पाळियं लिखियति. तत्थेतं वुच्चति –

‘‘एवं चतुब्बिधे पञ्हे, पञ्चकद्वयभेदतो;

एसा अट्ठमुखा नाम, वादयुत्ति पकासिता.

‘‘अट्ठेव निग्गहा तत्थ, चत्तारो तेसु धम्मिका;

अधम्मिका च चत्तारो, सब्बत्थ सकवादिनो;

जयो पराजयो चेव, सब्बत्थ परवादिनो’’ति.

सच्चिकट्ठवण्णना निट्ठिता.

५. सुद्धिकसंसन्दनवण्णना

१७-२७. इदानि रूपादीहि सद्धिं सच्चिकट्ठसंसन्दनं होति. तत्थ रूपञ्चाति यथा रूपं परमत्थतो उपलब्भति, किं ते पुग्गलोपि तथेव उपलब्भतीति सन्धाय पुच्छा सकवादिस्स, अत्थि पुग्गलोति वचनमत्तं गहेत्वा पटिञ्ञा परवादिस्स. यदि ते रूपं विय परमत्थतो पुग्गलो अत्थि, रूपतो वेदनादीनं विय ¶ पुग्गलस्सापि अञ्ञत्तं आपज्जतीति अनुयोगो सकवादिस्स, समयसुत्तविरोधं दिस्वा पटिक्खेपो परवादिस्स. सेसं अत्थतो ¶ पाकटमेव. धम्मतो पनेत्थ सत्तपञ्ञासभेदस्स सच्चिकट्ठपरमत्थस्स वसेन सकवादीपक्खमूलके अनुलोमपच्चनीके सत्तपञ्ञास अनुलोमपञ्चकानि दस्सितानि. पटिकम्मचतुक्कादीनि सङ्खित्तानि. परवादीपक्खमूलकेपि पच्चनीकानुलोमे सत्तपञ्ञास पटिलोमपञ्चकानि दस्सितानि. पटिकम्मचतुक्कादीनि सङ्खित्तानि. तत्थ ‘‘वुत्तं भगवता’’ति वचनमत्तेन पुग्गलस्स अत्थितं रूपस्स च सच्चिकट्ठपरमत्थवसेन उपलब्भनीयतं दस्सेत्वा उभिन्नं अञ्ञत्तं पटिजानापनत्थं ¶ वुत्तं भगवताति अनुयोगो परवादिस्स, सम्मुतिपरमत्थानं एकत्तनानत्तपञ्हस्स ठपनीयत्ता पटिक्खेपो सकवादिस्स. सेसमिधापि अत्थतो पाकटमेवाति.

सुद्धिकसंसन्दनवण्णना.

६. ओपम्मसंसन्दनवण्णना

२८-३६. इदानि रूपादीहेव सद्धिं ओपम्मवसेन सच्चिकट्ठसंसन्दनं होति. तत्थ रूपवेदनानं उपलद्धिसामञ्ञेन अञ्ञत्तपुच्छा च पुग्गलरूपानं उपलद्धिसामञ्ञपुच्छा चाति पुच्छाद्वयम्पि सकवादिस्स, उभोपि पटिञ्ञा परवादिस्स. परवादिना अनुञ्ञातेन उपलद्धिसामञ्ञेन रूपवेदनानं विय रूपपुग्गलानं अञ्ञत्तानुयोगो सकवादिस्स, पटिक्खेपो इतरस्स. सेसमिधापि अत्थतो पाकटमेव. धम्मतो पनेत्थ रूपमूलकादीनं चक्कानञ्च वसेन सकवादीपक्खे वीसाधिकानि नव निग्गहपञ्चकसतानि दस्सितानि. कथं? खन्धेसु ताव रूपमूलके चक्के चत्तारि, तथा वेदनादिमूलकेसूति वीसति. आयतनेसु चक्खायतनमूलके चक्के एकादस, तथा सेसेसूति द्वत्तिंससतं. धातूसु चक्खुधातुमूलके चक्के सत्तरस, तथा सेसेसूति छाधिकानि तीणि सतानि. इन्द्रियेसु चक्खुन्द्रियमूलके ¶ चक्के एकवीसति, तथा सेसेसूति द्वासट्ठाधिकानि चत्तारि सतानि. एवं सब्बानिपि वीसाधिकानि नव निग्गहपञ्चकसतानि होन्ति.

३७-४५. परवादीपक्खेपि रूपं उपलब्भतीति अनुलोमवसेनेव रूपवेदनादीनं अञ्ञत्तपटिञ्ञं कारेत्वा पुन अत्थि पुग्गलोति सुत्तं निस्साय छलवसेन ¶ पुग्गलस्स रूपादीहि उपलद्धिसामञ्ञं आरोपेत्वा अञ्ञत्तानुयोगो कतो. सेसमिधापि अत्थतो उत्तानमेव. धम्मतोपि सकवादीपक्खे वुत्तनयेन वीसाधिकानि नव पटिकम्मपञ्चकसतानि दस्सितानि.

रूपादीहि सद्धिं ओपम्मवसेन सच्चिकट्ठसंसन्दनं.

७. चतुक्कनयसंसन्दनवण्णना

४६-५२. इदानि ¶ यं सच्चिकट्ठपरमत्थेन उपलब्भति, तेन यस्मा रूपादीसु सत्तपञ्ञासाय सच्चिकट्ठपरमत्थेसु अञ्ञतरेन भवितब्बं; रूपादिनिस्सितेन वा, अञ्ञत्र वा रूपादीहि, रूपादीनं वा निस्सयेन, तस्मा इमिना चतुक्कनयेन सच्चिकट्ठसंसन्दनं आरद्धं. तत्थ रूपं पुग्गलोति अनुयोगो सकवादिस्स, उच्छेददिट्ठिभयेन न हेवाति पटिक्खेपो परवादिस्स, निग्गहारोपनं सकवादिस्स. किं पनेतं युत्तं, ननु रूपं वेदनाति वुत्तम्पि पटिक्खिपितब्बमेवाति? आम पटिक्खिपितब्बं. तं पन रूपतो वेदनाय अञ्ञसभावसब्भावतो, न अञ्ञत्ताभावतो. अयञ्च रूपादीसु एकधम्मतोपि पुग्गलस्स अञ्ञत्तं न इच्छति, तस्मा युत्तं. अयञ्च अनुयोगो रूपं पुग्गलो…पे… अञ्ञाताविन्द्रियं पुग्गलोति सकलं परमत्थसच्चं सन्धाय आरद्धो. सकलं पन पच्चत्तलक्खणवसेन एकतो वत्तुं न सक्काति तन्तिवसेन अनुयोगलक्खणमत्तमेतं ठपितं. तेन विञ्ञू अत्थं विभावेन्ति. वादकामेन पन इमं लक्खणं गहेत्वा यथा यथा परवादिस्स ओकासो न होति, तथा तथा ¶ वत्तब्बं. इति तन्तिवसेन अनुयोगलक्खणस्स ठपितत्तापि युत्तमेव. इमिना नयेन सब्बानुयोगेसु अत्थो वेदितब्बो.

अयं पन विसेसो – रूपस्मिं पुग्गलोतिआदीसु यथा एकं महाभूतं निस्साय तयो महाभूता, वत्थुरूपं निस्साय विञ्ञाणं रूपस्मिन्ति वत्तुं वट्टति, किं ते एवं रूपस्मिं पुग्गलो? यथा च सभागविनिब्भोगतो वेदनादयो सब्बधम्मा, अरूपा वा पन चत्तारो खन्धा, निब्बानमेव वा ‘‘अञ्ञत्र रूपा’’ति वत्तुं वट्टति, किं ते एवं पुग्गलो? यथा ¶ च चित्तसमुट्ठानानं रूपानं निस्सयवसेन ‘‘वेदनाय रूपं…पे… विञ्ञाणस्मिं रूप’’न्ति वत्तुं वट्टति, किं ते एवं पुग्गलोति? सब्बानुयोगेसु पन उच्छेददिट्ठिभयेन चेव समयविरोधेन च पटिक्खेपो परवादिस्स. सेसमेत्थ अत्थतो पाकटमेव. धम्मतो पनेत्थ सत्तपञ्ञासाय सच्चिकट्ठेसु एकेकस्मिं चत्तारि चत्तारि कत्वा निग्गहवसेन अट्ठवीसाधिकानि द्वे पञ्चकसतानि दस्सितानि. परवादीपक्खेपि पटिकम्मवसेन तत्तकानेव. या पनेत्थ अत्थि पुग्गलोति वुत्ते सकवादिस्स पटिञ्ञा, सा सुत्ते आगतेन सम्मुतिवसेन. यो रूपं पुग्गलोतिआदीसु पटिक्खेपो, सो सक्कायदिट्ठिपञ्हस्स ठपनीयत्ता. परवादिस्स पटिकम्मं छलवसेनेवाति.

चतुक्कनयसंसन्दनं.

निट्ठिता च संसन्दनकथा.

८. लक्खणयुत्तिवण्णना

५३. इदानि ¶ लक्खणयुत्ति नाम होति. तत्थ यस्मा ठपेत्वा निब्बानं सेसो सच्चिकट्ठपरमत्थो पच्चयपटिबद्धताय सप्पच्चयो, पच्चयेहि समागम्म कतत्ता सङ्खतो, उप्पज्जित्वा निरुज्झनतो सदा अभावतो असस्सतो, उप्पत्तिकारणसङ्खातस्स निमित्तस्स अत्थिताय सनिमित्तो, निब्बानं वुत्तप्पकाराभावतो अप्पच्चयं असङ्खतं सस्सतं अनिमित्तन्ति इदं सच्चिकट्ठस्स लक्खणं. तस्मा यदि पुग्गलोपि सच्चिकट्ठपरमत्थोव तस्सापि इमिना लक्खणेन भवितब्बन्ति सन्धाय पुग्गलो सप्पच्चयोतिआदयो अट्ठपि अनुयोगा सकवादिस्स ¶ , पटिक्खेपो परवादिस्स. आजानाहि निग्गहन्तिआदि पनेत्थ सङ्खित्तं. एवमेतानि सकवादीपक्खे अनुलोमपच्चनीके अनुलोममत्तवसेन अट्ठ पञ्चकानि वेदितब्बानि.

५४. परवादीपक्खेपि पच्चनीकानुलोमे पच्चनीकमत्तवसेन अट्ठेव. तत्थ यस्मा परवादिना सुत्तवसेन सम्मुतिसच्चं साधितं, सम्मुतिया च सप्पच्चयादिभावो ¶ नत्थि, तस्मा याथावतो च पटिक्खेपो सकवादिस्स. छलवसेन पन वत्तब्बं ‘‘आजानाहि पटिकम्म’’न्तिआदि सब्बं इधापि सङ्खित्तमेव.

लक्खणयुत्तिकथावण्णना निट्ठिता.

९. वचनसोधनवण्णना

५५-५९. इदानि वचनसोधनं होति. तत्थ यदेतं पुग्गलो उपलब्भतीति वचनं, तं सोधेतुं पुग्गलो उपलब्भति, उपलब्भति पुग्गलोति. पुच्छा सकवादिस्स. तस्सत्थो – यदेतं पुग्गलो उपलब्भतीति पदद्वयं, तं एकत्थं वा भवेय्य नानत्थं वा. यदि ताव नानत्थं, यथा अञ्ञं रूपं, अञ्ञा वेदना, एवं अञ्ञो पुग्गलो, अञ्ञो उपलब्भतीति आपज्जति. अथेकत्थं, यथा यं चित्तं तं मनो, एवं स्वेव पुग्गलो, सो उपलब्भतीति आपज्जति. तेन तं वदामि ‘‘यदि ते यो पुग्गलो, सो उपलब्भति, एवं सन्ते यो यो उपलब्भति, सो सो पुग्गलोति आपज्जति, किं सम्पटिच्छसि एत’’न्ति? ततो पुग्गलवादी यस्मा पुग्गलस्स उपलब्भतं ¶ इच्छति, न उपलब्भमानानम्पि रूपादीनं पुग्गलभावं, तस्मा पुग्गलो उपलब्भति, उपलब्भति के हि चि पुग्गलो के हि चि न पुग्गलोतिआदिमाह. तस्सत्थो – मम पुग्गलो अत्थि पुग्गलोति सत्थु वचनतो उपलब्भति. यो पन उपलब्भति, न सो सब्बो पुग्गलो, अथ खो के हि चि पुग्गलो के हि चि न पुग्गलोति. तत्थ को-कारत्थे के-कारो, हि-कारो च निपातमत्तो. कोचि पुग्गलो, कोचि न पुग्गलोति अयं पनेत्थ अत्थो. इदं वुत्तं होति – पुग्गलोपि हि रूपादीसुपि यो कोचि धम्मो उपलब्भतियेव, तत्थ पुग्गलोव पुग्गलो. रूपादीसु ¶ पन कोचिपि न पुग्गलोति. ततो तं सकवादी आह – पुग्गलो के हि चि उपलब्भति के हि चि न उपलब्भतीति. तस्सत्थो – पुग्गलो उपलब्भतीति पदद्वयस्स अत्थतो एकत्ते यदि उपलब्भतीति अनुञ्ञातो धम्मो पुग्गलतो अनञ्ञोपि कोचि पुग्गलो कोचि न पुग्गलो, पुग्गलोपि ¶ ते कोचि उपलब्भति, कोचि न उपलब्भतीति आपज्जति, किं सम्पटिच्छसि एतन्ति? सो पुग्गलस्स अनुपलद्धिं अनिच्छन्तो न हेवन्ति पटिक्खिपति. इतो परं ‘‘आजानाहि निग्गह’’न्तिआदि सब्बं सङ्खित्तं. वित्थारतो पन वेदितब्बं. पुग्गलो सच्चिकट्ठोतिआदीसुपि एसेव नयो. सब्बानि हेतानि उपलब्भतिवेवचनानेव, अपिच यस्मा ‘‘पुग्गलो उपलब्भतिसच्चिकट्ठपरमत्थेना’’ति अयं पुग्गलवादिनो पटिञ्ञा, तस्मास्स यथेव पुग्गलो उपलब्भतीति लद्धि, एवमेवं पुग्गलो सच्चिकट्ठोतिपि आपज्जति. या पनस्स पुग्गलो अत्थीति लद्धि, तस्सा विज्जमानोतिवेवचनमेव, तस्मा सब्बानिपेतानि वचनानि सोधितानि.

६०. तत्थ यं अवसाने ‘‘पुग्गलो अत्थि, अत्थि न सब्बो पुग्गलो’’तिआदि वुत्तं, तत्रायमधिप्पायो – यञ्हेतं परवादिना ‘‘पुग्गलो अत्थि, अत्थि केहिचि पुग्गलो, केहिचि न पुग्गलो’’ति वुत्तं, तं यस्मा अत्थतो पुग्गलो अत्थि, अत्थि न सब्बो पुग्गलोति एत्तकं होति, तस्मा नं सकवादी सम्पटिच्छापेत्वा इदानि नं एवं अनुयुञ्जति. तया हि ‘‘अत्थि पुग्गलो अत्तहिताय पटिपन्नो’’ति वचनमत्तं निस्साय ‘‘पुग्गलो अत्थी’’ति लद्धि गहिता, यथा च भगवता एतं वुत्तं, तथा ‘‘सुञ्ञतो लोकं अवेक्खस्सु, मोघराजा, सदा सतो’’तिआदिना (सु. नि. ११२५) नयेन ‘‘नत्थी’’तिपि वुत्तं, तस्मा यथेव ते ‘‘पुग्गलो अत्थि, अत्थि न सब्बो पुग्गलो’’ति लद्धि, तथा पुग्गलो नत्थि, नत्थि न सब्बो पुग्गलोतिपि आपज्जति, किं एतं सम्पटिच्छसीति? अथ नं असम्पटिच्छन्तो न हेवाति पटिक्खिपति. सेसमेत्थ निग्गहादिविधानं वुत्तनयेनेव वेदितब्बन्ति.

वचनसोधनवण्णना निट्ठिता.

१०. पञ्ञत्तानुयोगवण्णना

६१-६६. इदानि ¶ पञ्ञत्तानुयोगो नाम होति. रूपधातुया हि पुग्गलवादी ¶ रूपिं पुग्गलं पञ्ञपेति, तथा अरूपधातुया अरूपिं. तस्स तं लद्धिं भिन्दितुं सब्बापि पुच्छा सकवादिस्स, पटिञ्ञा च पटिक्खेपो च इतरस्स ¶ . सो हि रूपीति वुत्ते रूपकायसब्भावतो चेव तथारूपाय च पञ्ञत्तिया अत्थिताय पटिजानाति. कामीति वुत्ते वीतरागसब्भावतो चेव तथारूपाय च पञ्ञत्तिया नत्थिताय पटिक्खिपति. अरूपीति वुत्तेपि अरूपक्खन्धसब्भावतो चेव तथारूपाय च पञ्ञत्तिया अत्थिताय पटिजानाति. द्वीसुपि नयेसु सत्तोति पुग्गलस्स वेवचनवसेन वुत्तं.

६७. इदानि यस्मा सो ‘‘काये कायानुपस्सी’’ति आगतट्ठाने अञ्ञो कायो अञ्ञो पुग्गलोति इच्छति, तस्मा तं लद्धिं भिन्दितुं कायोति वा सरीरन्ति वातिआदि सकवादीपुच्छा होति. तत्थ कायं अप्पियं करित्वाति कायं अप्पेतब्बं अल्लीयापेतब्बं एकीभावं उपनेतब्बं अविभजितब्बं कत्वा पुच्छामीति अत्थो. एसेसेति एसो सोयेव. एसे एसेतिपि पाठो. एसो एसोयेवाति अत्थो. एकट्ठेति एकट्ठो. समे समभागे तज्जातेति समो समभागो तज्जातिको. वचनमत्तेयेवेत्थ भेदो. अत्थतो पन कायोव एसोति पुच्छति. परवादी नानत्तं अपस्सन्तो आमन्ताति पटिजानाति. पुग्गलोति वा जीवोति वाति पुच्छायपि एसेव नयो. अञ्ञो कायोति पुट्ठो पन कायानुपस्सनाय एवंलद्धिकत्ता पटिजानाति. अञ्ञं जीवन्ति पुट्ठो पन आहच्च भासितं सुत्तं पटिक्खिपितुं असक्कोन्तो अवजानाति. ततो परं ‘‘आजानाहि निग्गह’’न्तिआदि उत्तानत्थमेव.

६८. परवादीपक्खे पन अञ्ञो कायो अञ्ञो पुग्गलोति पुट्ठो सकवादी ठपनीयपञ्हत्ता पटिक्खिपति, परवादी छलवसेन पटिकम्मं करोति. तम्पि उत्तानत्थमेवाति.

पञ्ञत्तानुयोगवण्णना निट्ठिता.

११. गतिअनुयोगवण्णना

६९-७२. इदानि ¶ गतिपरिवत्तनमुखेन चुतिपटिसन्धिअनुयोगो होति. तत्थ यस्मा पुग्गलवादी ‘‘स सत्तक्खत्तुपरमं सन्धावित्वान ¶ पुग्गलो’’तिआदीनि (सं. नि. २.१३३; इतिवु. २४) सुत्तानि निस्साय पुग्गलो सन्धावतीति लद्धिं गहेत्वा वोहरति ¶ , तस्मास्स तं लद्धिं भिन्दितुं सन्धावतीति पुच्छा सकवादिस्स. तत्थ सन्धावतीति संसरति गमनागमनं करोति. अत्तनो लद्धिवसेन पटिञ्ञा परवादिस्स. सो पुग्गलोतिआदयो अनुयोगोपि सकवादिस्स, पटिक्खेपो इतरस्स. तत्थ सोति सोयेवाति अत्थो. एवं पन अनुयुत्तो सस्सतदिट्ठिभयेन पटिक्खिपति. अञ्ञोति पुट्ठो उच्छेददिट्ठिभयेन. सो च अञ्ञो चाति पुट्ठो एकच्चसस्सतदिट्ठिभयेन. नेव सो न अञ्ञोति पुट्ठो अमराविक्खेपदिट्ठिभयेन. पुन चत्तारोपि पञ्हे एकतो पुट्ठो चतुन्नम्पि दिट्ठीनं भयेन पटिक्खिपित्वा पुन यानिस्स सुत्तानि निस्साय लद्धि उप्पन्ना तानि दस्सेन्तो तेन हि पुग्गलो सन्धावतीतिआदिमाह.

७६. पुन सकवादिना ‘‘य्वायं तव लद्धिया सन्धावति, किं सो अस्मिञ्च परस्मिञ्च लोके एकोयेवा’’ति अधिप्पायेन स्वेवाति नियमेत्वा पुट्ठो सस्सतभया पटिक्खिपित्वा पुन दळ्हं कत्वा तथेव पुट्ठो यस्मा सो पुग्गलोव न अञ्ञो भावो, ‘‘सो ततो चुतो इधूपपन्नो’’तिआदिसुत्तम्पि (पारा. १२; दी. नि. १.२४५) अत्थि, तस्मा पटिजानाति. स्वेव मनुस्सोति पुट्ठो मनुस्सस्सेव देवत्ताभावतो पटिक्खिपति.

७७. पुन पुट्ठो ‘‘अहं तेन समयेन सुनेत्तो नाम सत्था अहोसि’’न्तिआदिसुत्तवसेन (अ. नि. ७.६६ अत्थतो समानं) पटिजानाति. अथस्स सकवादी देवमनुस्सुपपत्तीनं नानत्ततो वचनं मिच्छाति पकासेन्तो मनुस्सो हुत्वातिआदिमाह.

७८. तत्थ हेवं मरणं न हेहितीति एवं सन्ते मरणं न भविस्सतीति अत्थो. इतो परं यक्खो पेतोति अत्तभावनानत्तवसेन अनुयोगनानत्तं वेदितब्बं.

८२. खत्तियोतिआदीनि जातिवसेन चेव अङ्गवेकल्लादिवसेन च वुत्तानि.

८७. पुन ¶ ¶ न वत्तब्बन्ति परवादिना पुट्ठो इधट्ठकस्स उपपत्तिवसेन परलोकस्स गमनाभावतो पटिञ्ञा सकवादिस्स पुन सोतापन्नस्स भवन्तरेपि सोतापन्नभावाविजहनतो दुतियपटिञ्ञापि तस्सेव. हञ्चीतिआदिवचनं परवादिस्स.

८८. पुन देवलोके उपपन्नस्स मनुस्सत्ताभावदस्सनेन अनुयोगो सकवादिस्स.

८९. ततो परं अनञ्ञो अविगतोति एत्थ अनञ्ञोति सब्बाकारेन एकसदिसो. अविगतोति एकेनापि आकारेन अविगतोति अत्थो. न हेवन्ति देवलोके उपपन्नस्स मनुस्सभावाभावतो एवमाह.

९०. पुन ¶ दळ्हं कत्वा अनुयुत्तो ‘‘स्वेव पुग्गलो सन्धावती’’ति लद्धिया अनुजानाति. हत्थच्छिन्नोतिआदि आकारविगमनदस्सनेन अविगतो सन्धावतीति लद्धिभिन्दनत्थं वुत्तं. तत्थ अळच्छिन्नोति यस्स अङ्गुट्ठका छिन्ना. कण्डरच्छिन्नोति यस्स महान्हारू छिन्ना.

९१. सरूपोतिआदीसु पठमे पञ्हे इमिना रूपकायेन सद्धिं अगमनं सन्धाय पटिक्खिपति. दुतिये अन्तराभवपुग्गलं सन्धाय पटिजानाति. सो हि तस्स लद्धिया सरूपोव गन्त्वा मातुकुच्छिं पविसति. अथस्स तं रूपं भिज्जति. तं जीवन्ति येन रूपसङ्खातेन सरीरेन सद्धिं गच्छति, किमस्स तदेव जीवं तं सरीरन्ति पुच्छति. परवादी इध सरीरनिक्खेपा सुत्तविरोधा च पटिक्खिपति.

सवेदनोतिआदीसु असञ्ञूपपत्तिं सन्धाय पटिक्खिपति, तदञ्ञं उपपत्तिं सन्धाय पटिजानाति. तं जीवन्ति येन वेदनादिसङ्खातेन सरीरेन सद्धिं गच्छति. किमस्स तदेव जीवं तं सरीरन्ति पुच्छति. तं जीवं तं सरीरं, अञ्ञं जीवं अञ्ञं सरीरन्ति एतिस्सा हि लद्धिया पञ्चपि खन्धा सरीरन्ति अधिप्पेता. परवादी सुत्तविरोधा पटिक्खिपति.

९२. अरूपोतिआदीसु पठमे पञ्हे अन्तराभवं सन्धाय पटिक्खिपति. दुतिये अरूपा रूपं उपपज्जमानं सन्धाय पटिजानाति. अञ्ञं, जीवन्ति यं ¶ रूपसङ्खातं सरीरं पहाय अरूपो ¶ सन्धावति, किं ते तं सरीरं अञ्ञं, अञ्ञं जीवन्ति पुच्छति. इतरो सुत्तविरोधा पटिक्खिपति.

अवेदनोतिआदीसु सञ्ञीभवं सन्धाय पटिक्खिपति, तदञ्ञं उपपत्तिं सन्धाय पटिजानाति. अञ्ञं जीवन्ति यं वेदनादिसङ्खातं सरीरं पहाय अवेदनो अविञ्ञाणो सन्धावति, किं ते तं अञ्ञं सरीरं, अञ्ञं जीवन्ति पुच्छति. इतरो सुत्तविरोधा पटिक्खिपति.

९३. रूपं सन्धावतीतिआदीसु ये रूपादयो खन्धे उपादाय पुग्गलं पञ्ञपेति, किं ते तस्मिं पुग्गले सन्धावन्ते तम्पि रूपं सन्धावतीति पुच्छति. परवादी ‘‘अविज्जानीवरणानं सत्तानं तण्हासंयोजनानं सन्धावतं संसरत’’न्ति सत्तस्सेव सन्धावनवचनतो ¶ पटिक्खिपति. पुन पुट्ठो यस्मा रूपादिधम्मे विना पुग्गलो नत्थि, तस्मा तस्मिं सन्धावन्ते तेनपि रूपेन सन्धावितब्बन्ति सञ्ञाय पटिजानाति. वेदनादीसुपि एसेव नयो.

९४. रूपं न सन्धावतीतिआदीसु यस्मा ते रूपं पुग्गलो न होति, स्वेव च सन्धावतीति वदेसि, तस्मा तं पुच्छामि, किं ते रूपं न सन्धावतीति अत्थो. इतरो पुग्गले सन्धावन्ते न सक्का तस्स उपादानभूतेन रूपेन सन्धावितुन्ति सञ्ञाय पटिक्खिपति. पुन पुट्ठो सत्तानञ्ञेव सन्धावनवचनतो पटिजानाति. सेसमेत्थ उत्तानमेव.

गाथानं पन अयमत्थो – आयस्मतो मतेन रुक्खं उपादाय छाया विय, इन्धनं उपादाय अग्गि विय च, खन्धे उपादाय पुग्गलो; रूपादीनं सन्धावने असति तेसु खन्धेसु भिज्जमानेसु सो तव पुग्गलो भिज्जति चे, एवं सन्ते उच्छेदा भवति दिट्ठि, उच्छेददिट्ठि ते आपज्जति. कतरा या बुद्धेन विवज्जिता अकुसलदिट्ठि. या पन ‘‘उच्छेदवादी समणो गोतमो’’ति परियायभासिता, न तं वदामाति दस्सेति. अथापि तेसु खन्धेसु भिज्जमानेसु सो पुग्गलो न भिज्जति, एवं सन्ते सस्सतो पुग्गलो होति. ततो सो निब्बानेन समसमो आपज्जति ¶ . समसमोति अतिविय समो, समेन वा समो, समभावेनेव समो. यथेव निब्बानं नुप्पज्जति न भिज्जति, एवं ते पुग्गलोपि तेन समसमोति.

गतिपरिवत्तनमुखेन चुतिपटिसन्धानुयोगो निट्ठितो.

अनुयोगवण्णना.

१२. उपादापञ्ञत्तानुयोगवण्णना

९५. इदानि ¶ उपादापञ्ञत्तानुयोगो होति. तत्थ पुच्छा सकवादिस्स, पटिञ्ञापटिक्खेपो परवादिस्स. सो हि रुक्खं उपादाय छायाय विय, इन्धनं उपादाय अग्गिस्स विय च, रूपादीनि उपादाय ¶ पुग्गलस्स पञ्ञत्तिं पञ्ञापनं अवबोधनं इच्छति, तस्मा ‘‘रूपं उपादाया’’ति पुट्ठो पटिजानाति. पुन यथा रुक्खुपादाना छाया रुक्खो विय, इन्धनुपादानो च अग्गि इन्धनं विय अनिच्चादिधम्मो, एवं ते रूपादिउपादानो पुग्गलो रूपादयो विय अनिच्चोति इममत्थं पुट्ठो अत्तनो लद्धियं ठत्वा पटिक्खिपति.

९७. नीलं रूपं उपादाय नीलोतिआदीसु नीलरूपेन सद्धिं पुग्गलस्स एकत्तं, एकसरीरे नीलादीनं बहूनं वसेन बहुभावञ्च अनिच्छन्तो पटिक्खिपति.

९८. कुसलं वेदनन्ति एत्थापि वेदनाय सद्धिं एकत्तं एकसन्ताने बहूनं कुसलवेदनानं वसेन बहुभावञ्च अनिच्छन्तो पटिक्खिपति. दुतियनये मग्गकुसलोतिआदिवचनसब्भावतो छेकट्ठं सन्धाय पटिजानाति. सफलोतिआदीनि पुट्ठो तथारूपस्स वोहारस्स अभावतो पटिक्खिपति.

९९. अकुसलपक्खे अछेकट्ठं सन्धाय पटिजानाति.

१००. अब्याकतपक्खे सस्सतादिवसेन अब्याकतभावं सन्धाय पटिजानाति. सेसमेत्थ हेट्ठा वुत्तनयेनेव वेदितब्बं.

१०४. चक्खुं ¶ उपादायातिआदीसु ‘‘चक्खुमा विसमानीव…पे… पापानि परिवज्जये’’ति(उदा. ४३) आदिवोहारसब्भावतो पटिजानाति. चक्खुमत्तादिनिरोधेन पुग्गलनिरोधं अनिच्छन्तो पटिक्खिपति.

१०७. रूपं उपादाय वेदनं उपादायाति एत्थ अञ्ञेपि रूपमूलका दुकतिकचतुक्का वेदितब्बा. यस्मा पन खन्धे उपादाय पुग्गलस्स पञ्ञत्ति, तस्मा द्वेपि तयोपि चत्तारोपि पञ्चपि ¶ उपादाय पञ्ञत्तिं पटिजानाति. एकसन्ताने पन द्विन्नं पञ्चन्नं वा अभावा पटिक्खिपति. आयतनादीसुपि एसेव नयो.

११२. इदानि यं उपादाय यस्स पञ्ञत्ति, यथा तस्स अनिच्चताय तस्सापि अनिच्चता, ततो च अञ्ञत्तं सिद्धं, एवं तस्स पुग्गलस्सापि आपज्जतीति दस्सेतुं यथा रुक्खन्तिआदिमाह. तत्थ उपादायाति पटिच्च आगम्म, न विना तन्ति अत्थो. परवादी पन तथा अनिच्छन्तो लद्धियं ठत्वा पटिक्खिपति.

११५. निगळोति सङ्खलिकबन्धनं. नेगळिकोति तेन बन्धको यस्स रूपं सो रूपवाति यस्मा यस्स रूपं सो रूपवा होति, तस्मा यथा न निगळो ¶ …पे… अञ्ञो रूपवाति अत्थो.

११६. चित्ते चित्तेतिआदीसु सरागादिचित्तवसेन सरागादितं सन्धाय चित्तानुपस्सनावसेन पटिजानाति. जायतीतिआदिना नयेन पुट्ठो पुग्गलस्स खणिकभावं अनिच्छन्तो पटिक्खिपति. ‘‘सो’’ति वा ‘‘अञ्ञो’’ति वा पुट्ठो सस्सतुच्छेदभयेन पटिक्खिपति. पुन न वत्तब्बं ‘‘कुमारको’’ति वा ‘‘कुमारिका’’ति वा पुट्ठो लोकवोहारसमुच्छेदभयेन वत्तब्बन्ति पटिजानाति. सेसमेत्थ पाकटमेव.

११८. इदानि परवादी अञ्ञेनाकारेन लद्धिं पतिट्ठापेतुकामो न वत्तब्बं पुग्गलो उपलब्भतीतिआदिमाह. तत्थ न वत्तब्बन्ति किं ते इमिना एवं बहुना उपादापञ्ञत्तानुयोगेन, इदं ताव वदेहि, किं न वत्तब्बं ‘‘पुग्गलो उपलब्भति सच्चिकट्ठपरमत्थेना’’ति. ततो सकवादिना आमन्ताति वुत्ते ननु यो पस्सतीतिआदिमाह. तत्थ योति पुग्गलो ¶ . यन्ति रूपं. येनाति चक्खुना. सोति पुग्गलो. तन्ति रूपं. तेनाति चक्खुना. इदं वुत्तं होति – ननु यो यं रूपं येन चक्खुना पस्सति, सो तं रूपं तेन चक्खुना पस्सन्तो पुग्गलोति. सकवादी किञ्चापि चक्खुविञ्ञाणस्स निस्सयभावं गच्छन्तं चक्खुमेव रूपं पस्सति, तथा सोतमेव सद्दं सुणाति…पे… विञ्ञाणमेव धम्मं विजानाति, ‘‘अत्थि अरहतो चक्खु, पस्सति अरहा चक्खुना रूप’’न्तिआदिसम्मुतिवसेन पन आमन्ताति पटिजानाति.

१२०. ततो ¶ छलवादं निस्साय परवादिना पुग्गलस्स वत्तब्बताय साधिताय तमेव वादं परिवत्तेत्वा पुग्गलो उपलब्भतीतिआदिमाह. तत्थ यो न पस्सतीति अन्धो असञ्ञसत्तो अरूपं उपपन्नो निरोधं समापन्नो, अनन्धोपि च अञ्ञत्र दस्सनसमया न पस्सति नाम. सेसवारेसुपि एसेव नयो. सेसं पाळिवसेनेव अत्थतो वेदितब्बं.

१२२. सुत्तसंसन्दनायं दिब्बस्स चक्खुनो रूपगोचरत्ता रूपं पस्सतीति आह. दुतियवारे ‘‘सत्ते पस्सामी’’तिवचनतो पुग्गलं पस्सतीति आह. ततियवारे ‘‘रूपं दिस्वा पुग्गलं विभावेती’’ति लद्धितो उभो पस्सतीति आह. यस्मा पन पस्सितब्बं नाम दिट्ठं सुतं मुतं विञ्ञातन्ति चतुब्बिधे रूपसङ्गहे रूपायतनमेव सङ्गहितं, तस्मा सकवादी ‘‘रूपं पुग्गलो, पुग्गलो रूपं, उभो रूप’’न्ति अनुयोगं करोति. तस्सत्थो पाकटोयेवाति.

उपादापञ्ञत्तानुयोगवण्णना.

१३. पुरिसकारानुयोगवण्णना

१२३. इदानि ¶ पुरिसकारानुयोगो होति. तत्थ कम्मे सति नियमतो तस्स कारकेनपि भवितब्बन्ति लद्धिया पुच्छा परवादिस्स, तथारूपानं कम्मानं अत्थिताय पटिञ्ञा सकवादिस्स. पुन कत्ता कारेताति पुच्छा परवादिस्स. तत्थ कत्ताति तेसं कम्मानं कारको. कारेताति आणत्तिदेसनादीहि उपायेहि कारापको. इदानि यस्मा ¶ परवादी पुग्गलं सन्धाय कत्ताति पुच्छति, न करणमत्तं, तस्मा पटिक्खेपो सकवादिस्स.

१२४. तस्स कत्ता कारेताति एत्थ यदि यं यं उपलब्भति, तस्स तस्स कत्ता पुग्गलो ते उपलब्भति, किं तस्सापि कारको च कारापको च अञ्ञो पुग्गलो उपलब्भतीति अत्थो. परवादी तथा अनिच्छन्तो इस्सरनिम्मानवादभयेन पटिक्खिपति. पुन पुट्ठो यस्मा पुग्गलं मातापितरो जनेन्ति नामं करोन्ति पोसेन्ति, तस्मास्स ते कारका. ये च पन तं कल्याणमित्ता वा आचरिया वा तानि तानि विज्जाट्ठानसिप्पायतनानि सिक्खापेन्ति ¶ , ते कारापका नामाति इममत्थं सन्धाय पटिजानाति. पुरिमकम्ममेव तस्स कत्ता चेव कारापेता चाति अधिप्पेतं.

१२५. तस्स तस्सेवाति इमिना इदं पुच्छति – यदि कम्मानं कारकस्स कत्ता तस्सापि कत्ता तस्सापि कत्ता अत्थेव, एवं सन्ते पुरिमेन पुरिमेन अवस्सं पच्छा पच्छा पुग्गलो कातब्बोति इमिनापि ते कम्मानं कारकेन पुग्गलेन आयतिं अञ्ञो पुग्गलो कातब्बो, तेनापि अञ्ञोति नत्थि दुक्खस्स अन्तकिरिया, नत्थि वट्टस्स उपच्छेदो, नत्थि अप्पच्चयपरिनिब्बानं. पच्चयाभावेन पच्चयपटिबद्धस्स दुक्खस्स अभावा यं निब्बानं वुत्तं, नत्थि ते तन्ति. अथ वा तस्स तस्सेवाति यदि कम्मं कम्ममत्तं न होति, तस्स पन कारको पुग्गलो, तस्सापि कारको, तस्सापि कारकोति एवं पुग्गलपरम्परा अत्थि. एवं सन्ते या एसा कम्मवट्टस्स अप्पवत्तिकरणेन दुक्खस्स अन्तकिरिया वुत्ता, सा नत्थीति अत्थो. परवादी तं अनिच्छन्तो पटिक्खिपति. इतो अपरासुपि उपलब्भति सामञ्ञेन कारकपुच्छासु पुग्गलंयेव सन्धाय ‘‘कत्ता कारेता’’ति ¶ वुत्तं, न पच्चये. न हि महापथवीआदीनं पच्चया नत्थि.

१३५. अञ्ञो कल्याणपापकानं कम्मानं कत्ताति पञ्हो ‘‘सङ्खारवन्तं वा अत्तान’’न्तिआदिदिट्ठिभया पटिक्खित्तो.

१३६. विपाको उपलब्भतीतिआदि विपाकपटिसंवेदीवसेन पुग्गलं दस्सेन्तस्स लद्धिभिन्दनत्थं वुत्तं. तत्थ विपाकपटिसंवेदीति अनुयोगो परवादिस्स ¶ , विपाकपवत्तितो अञ्ञस्स वेदकस्स अभावा पटिक्खेपो सकवादिस्स. पुन पुच्छा सकवादिस्स, पटिञ्ञा इतरस्स.

१३८. तस्स पटिसंवेदीति तस्स विपाकपटिसंवेदकस्स पटिसंवेदी यस्मा पन पटिसंवेदितब्बो नाम विपाको, न च पुग्गलो विपाको, तस्मा पटिक्खेपो परवादिस्स. पुन पुट्ठो यस्मा पुञ्ञविपाके ठितत्ता विपाकपटिसंवेदी पुत्तं वा पतिं वा माता वा जाया वा परिचुम्बति परिसज्जति, तस्मा तथारूपं पटिसंवेदितं सन्धाय पटिजानाति परवादी.

तस्स ¶ तस्सेवाति यदि विपाको विपाकमत्तं न होति, तस्स पन पटिसंवेदी पुग्गलो, तस्सापि पटिसंवेदी तस्सापि पटिसंवेदीति एवं पुग्गलपरम्परा अत्थि. एवं सन्ते या एसा विपाकवट्टस्स अप्पवत्तिकरणेन दुक्खस्स अन्तकिरिया वुत्ता, सा नत्थीति अत्थो. इतो परं उपलब्भतिसामञ्ञेन पटिसंवेदीपुच्छासु हेट्ठा वुत्तनयेनेव अत्थो वेदितब्बो.

१४२. अञ्ञो कल्याणपापकानं कम्मानं विपाकपटिसंवेदीति पञ्हो ‘‘वेदनवन्तं वा अत्तान’’न्तिआदिदिट्ठिभया पटिक्खित्तो.

१४३. दिब्बं सुखन्तिआदि कल्याणपापकानं कम्मानं विपाकं भाजेत्वा दस्सनवसेन आरद्धं. तं सब्बं हेट्ठा वुत्तनयेनेव वेदितब्बं. सकवादिनो चेत्थ पुग्गलवसेनेव पटिसंवेदीपटिक्खेपो वेदितब्बो, न वेदयितवसेन.

१४८. महापथवीआदीनि हि आरम्मणं कत्वा वेदयितानं उप्पत्ति अप्पटिसिद्धा.

१७०. कत्ता कारेता विपाकपटिसंवेदीतिआदि वोमिस्सकनयवसेन आरद्धं. तत्थ सो करोतीति यं त्वं कत्ताति च पटिसंवेदीति च वदेसि, किं सोयेव करोति, सो पटिसंवेदेति. अयमनुयोगो सकवादिस्स, सुत्तविरोधभयेन पटिक्खेपो परवादिस्स.

१७१. पुन ¶ पुट्ठो ‘‘इध नन्दति पेच्च नन्दती’’तिआदिसुत्तवसेन (ध. प. १८) पटिञ्ञा तस्सेव. अथस्स वचनोकासं पटिबाहन्तो सकवादी सयंकतं सुखदुक्खन्ति ¶ आह.

१७२. तत्थ अञ्ञो करोतीति कारकवेदकानं अञ्ञत्तपुच्छावसेन वुत्तं. ततो परवादी सुत्तविरोधभयेन पटिक्खिपित्वा पुन पुट्ठो ‘‘मनुस्सभूतो कत्वा देवभूतो पटिसंवेदेती’’ति मञ्ञमानो पटिजानाति ¶ . एवंवादिनो पन परंकतं सुखदुक्खं आपज्जतीति तस्स वसेन पुट्ठो पुन पटिक्खिपति.

१७४. सो च अञ्ञो चाति कारकवेदकानं एकत्तअञ्ञत्तपुच्छावसेन वुत्तं. ततो परवादी सुत्तविरोधभयेनेव पटिक्खिपित्वा पुन पुट्ठो पुरिमे द्वेपि नये एकतो कत्वा पटिजानाति. एवंवादिनो पन सयंकतञ्च परंकतञ्च सुखदुक्खं आपज्जतीति तस्स वसेन पुट्ठो पुन पटिक्खिपति.

१७६. नेव सो करोतीति कारकवेदकानं एकत्तअञ्ञत्तपटिक्खेपवसेन वुत्तं. ततो परवादी सुत्तविरोधवसेनेव पटिक्खिपित्वा पुन पुट्ठो यस्मा मनुस्सो देवलोकूपपत्तिया कम्मं कत्वा न मनुस्सभूतोव पटिसंवेदेति, नापि येन कम्मं कतं, ततो अञ्ञोव पटिसंवेदेति, तस्मा कारकतो वेदको नेव सो होति, न अञ्ञोति मञ्ञमानो पटिजानाति. लद्धिमत्तमेवेतं? एवंवादिनो पन असयंकारं अपरंकारं अधिच्चसमुप्पन्नं सुखदुक्खं आपज्जतीति तस्स वसेन पुट्ठो पुन पटिक्खिपति. अपिच इमस्मिं वोमिस्सकनये आदितो पट्ठाय इमिनापि नयेन अत्थो वेदितब्बो. यस्मा हि अयं पुग्गलवादी कम्मानं कारकञ्चेव वेदकञ्च इच्छति, तस्मास्स यो कारको, तेनेव वा वेदकेन भवितब्बं, अञ्ञेन वा उभोहि वा भवितब्बं, उभोहि वापि न भवितब्बन्ति इदमापन्नं होति. एवमापन्नमेव अनुयोगं अनुयुञ्जन्तो सकवादी ‘‘सो करोती’’तिआदयो चत्तारोपि विकप्पे आह. सेसं वुत्तप्पकारमेव.

परियोसाने पन चत्तारोपि पञ्हा एकतो पुट्ठा. तत्थ पटिक्खेपो च पटिजानना च सयंकतादिदोसप्पत्ति च पुरिमनयेनेव वेदितब्बा. इतो ¶ परं ‘‘कल्याणपापकानी’’ति अवत्वा हेट्ठा वुत्तनया एव ‘‘कम्मं अत्थी’’तिआदिना विकप्पेन दस्सिता. तेसम्पि हेट्ठा वुत्तनयेनेव अत्थो वेदितब्बो.

पुरिसकारानुयोगवण्णना.

कल्याणवग्गोतिपि एतस्सेव नामं.

१४. अभिञ्ञानुयोगवण्णना

१९३. इतो ¶ परं अभिञ्ञानुयोगादिवसेन अरहत्तसाधना होति. तत्थ आमन्ताति सकवादिना पटिञ्ञाते परवादी ‘‘बहिद्धा अनिन्द्रियबद्धरूपे इद्धिविधादिविसेसाधिगमो नत्थि, अज्झत्तं ¶ अत्थि, तस्मा इद्धादिनिब्बत्तकेन पुग्गलेन भवितब्ब’’न्ति मञ्ञमानो ननु अत्थि कोचि इद्धिं विकुब्बतीतिआदिमाह. तं सब्बं उत्तानत्थमेव.

अभिञ्ञानुयोगवण्णना.

१५-१८. ञातकानुयोगादिवण्णना

१९७. इदानि मातातिआदिको ञातकानुयोगो. खत्तियोतिआदिको जातिअनुयोगो. गहट्ठो पब्बजितोति पटिपत्तिअनुयोगो. देवो मनुस्सोति उपपत्तिअनुयोगो. सोतापन्नोतिआदिको पटिवेधानुयोगो, अरियानुयोगोतिपि वुच्चति. ते सब्बे उत्तानत्थायेव. ‘‘अरहा हुत्वा न अरहा’’ति पनेत्थ मोघपञ्हत्ता न वुत्तं.

२०६. चत्तारो पुरिसयुगातिआदि संघानुयोगो, सोपि उत्तानत्थोयेव.

२०९. सङ्खतोतिआदि सच्चिकट्ठसभावानुयोगो. तत्थ ततिया कोटीति पुच्छा सकवादिस्स. तथारूपस्स सच्चिकट्ठस्स अभावतो पटिक्खेपो परवादिस्स. पुन पुट्ठो पुग्गलं सन्धाय पटिञ्ञा तस्सेव.

२११. अञ्ञो ¶ पुग्गलोतिपञ्हेपि सङ्खतेहि खन्धेहि अञ्ञत्तं अनिच्छन्तो पटिक्खेपो तस्सेव.

२१२. खन्धा सङ्खतातिआदि सङ्खतासङ्खतानि सरूपेन दस्सेत्वा अञ्ञत्तपुच्छनत्थं वुत्तं.

२१३. रूपं सङ्खतन्तिआदि खन्धे विभागतो दस्सेत्वा अञ्ञत्तपुच्छनत्थं वुत्तं.

२१४. पुग्गलस्स उप्पादोति पुच्छा सकवादिस्स, ‘‘जातिधम्मा जराधम्मा, अथो मरणधम्मिनो’’तिआदिसुत्तवसेन ¶ पटिञ्ञा परवादिस्स. सङ्खतभावं पनस्स सो न इच्छति, तस्मा पटिक्खिपति.

२१५. पुन न उप्पादो पञ्ञायतीतिआदिना नयेन पुट्ठो ‘‘दुक्खमेव हि सम्भोति ¶ , दुक्खं तिट्ठति वेति चा’’तिआदिवचनतो (सं. नि. १.१७१) पुग्गलस्स उप्पादादयो नाम न युज्जन्तीति पटिजानाति.

२१६. अत्थत्थम्हीति अत्थं वुच्चति निब्बानं. तत्थ अत्थीति पुच्छति. तस्स अत्थिताय सस्सतं, नत्थिताय. उच्छेदो आपज्जति. तदुभयम्पि अनिच्छन्तो पच्छा पटिक्खिपति.

ञातकानुयोगादिवण्णना.

१९. पटिवेधानुयोगादिवण्णना

२१७. भवं निस्साय पञ्हे भवन्ति उपपत्तिभवं.

२१८. वेदनं वेदियमानपञ्हे वेदनं वेदियमानो परिग्गहितवेदनो योगावचरोव पजानाति, बालपुथुज्जनो नप्पजानाति.

२२४. कायानुपस्सनादिपञ्हा उत्तानत्थायेव.

२२६. पारायनगाथाय ¶ सुञ्ञतो लोकं अवेक्खस्सूति सत्तसुञ्ञतवसेन खन्धलोकं ओलोकेहीति अत्थो.

२२८. पुग्गलो अवेक्खतीति सकवादिपुच्छा. परवादिस्स हि ‘‘सुञ्ञतो लोकं अवेक्खस्सू’’ति गाथाय यो अवेक्खति, सो पुग्गलोति लद्धि, तस्मा नं एवं पुच्छति. सह रूपेनाति ¶ रूपकायेन सद्धिं. ततो अनिस्सटो हुत्वाति अत्थो. इदं पञ्चवोकारवसेन अनुजानित्वा पुन तं जीवन्ति पुट्ठो सुत्तविरोधभयेन पटिक्खिपति. विना रूपेनाति इदं चतुवोकारवसेन अनुजानित्वा पुन अञ्ञं जीवन्ति पुट्ठो सुत्तविरोधभयेनेव पटिक्खिपति. ‘‘अब्भन्तरगतो’’ति च ‘‘बहिद्धा निक्खमित्वा’’ति च इदं ‘‘सह रूपेन विना रूपेना’’ति हेट्ठा वुत्तस्स लक्खणवचनं. तत्थ अब्भन्तरगतोति रूपस्स अन्तोगतो, इतो वा एत्तो वा अनिक्खमित्वा रूपपरिच्छेदवसेनेव ठितो हुत्वाति अत्थो. निक्खमित्वाति रूपपरिच्छेदं अतिक्कमित्वा. रूपं अनिस्सितो हुत्वाति अत्थो.

२३१. अनत्ताति अत्तना जीवेन पुग्गलेन रहितो. एकधम्मेपि पुग्गलो नत्थीति अत्थो. एवं सब्बसुत्तानं आगमट्ठकथासु वुत्तनयेनेव ¶ अत्थो वेदितब्बो. इध पन सन्धायभासितमत्तमेव वक्खाम.

२३७. वुत्तं भगवता सप्पिकुम्भोतिआदि ‘‘सब्बाव देसना यथारुतवसेनेव अत्थतो न गहेतब्बा’’ति दस्सनत्थं आभतं. यथा हि सुवण्णं गहेत्वा कतो सुवण्णविकारो कुम्भो सुवण्णकुम्भोति वुच्चति, न एवं सप्पिं गहेत्वा कतो सप्पिस्स विकारो सप्पिकुम्भो नाम अत्थि. यस्मिं पन कुम्भे सप्पि पक्खित्तं, सो सप्पिकुम्भो नामाति अयमेत्थ अत्थो. तेलकुम्भादीसुपि एसेव नयो. यथा च निब्बानं निच्चं धुवं, न एवं भत्तं वा यागु वा अत्थि. कालपरिच्छेदं पन अकत्वा दिवसे दिवसे दस्सामाति पञ्ञत्तवसेन ‘‘निच्चभत्तं धुवयागू’’ति वुच्चतीति अयमेत्थ अत्थो.

‘‘अत्थि पुग्गलो अत्तहिताय पटिपन्नो’’तिआदीसुपि यथा रूपादयो धम्मा पच्चत्तलक्खणसामञ्ञलक्खणवसेन अत्थि, न एवं पुग्गलो ¶ . रूपादीसु पन सति ‘एवंनामो’‘एवंगोत्तो’ति वोहारो होति. इति इमिना लोकवोहारेन लोकसम्मुतिया लोकनिरुत्तिया अत्थि पुग्गलोति अयमेत्थ अत्थो. वुत्तम्पि चेतं भगवता – ‘‘इमा खो चित्त, लोकसमञ्ञा लोकनिरुत्तियो लोकवोहारा लोकपञ्ञत्तियो’’ति (दी. नि. १.४४०). रूपादिधम्मा पन विनापि लोकसम्मुतिं पच्चत्तसामञ्ञलक्खणवसेन पञ्ञापनतो अत्थीति अयमेत्थ अत्थो.

बुद्धानं ¶ पन द्वे कथा सम्मुतिकथा च परमत्थकथा च. तत्थ सत्तो, पुग्गलो, देवो, ब्रह्मातिआदिका सम्मुतिकथा नाम. अनिच्चं, दुक्खं, अनत्ता, खन्धा, धातुयो, आयतनानि, सतिपट्ठाना, सम्मप्पधानातिआदिका परमत्थकथा नाम.

तत्थ यो सम्मुतिदेसनाय सत्तोति वा…पे… ब्रह्माति वाति वुत्ते जानितुं पटिविज्झितुं निय्यातुं अरहत्तजयग्गाहं गहेतुं सक्कोति, तस्स भगवा आदितोव सत्तोति वा पुग्गलोति वा पोसोति वा देवोति वा ब्रह्माति वा कथेति. यो परमत्थदेसनाय अनिच्चन्ति वा दुक्खन्ति वातिआदीसु अञ्ञतरं सुत्वाव जानितुं पटिविज्झितुं निय्यातुं अरहत्तजयग्गाहं गहेतुं सक्कोति. तस्स अनिच्चन्तिआदीसु अञ्ञतरं कथेति. तथा सम्मुतिकथाय बुज्झनकसत्तस्स न पठमं परमत्थकथं कथेति. सम्मुतिकथाय पन बोधेत्वा पच्छा परमत्थकथं कथेति ¶ . परमत्थकथाय बुज्झनकसत्तस्सापि न पठमं सम्मुतिकथं कथेति. परमत्थकथाय पन बोधेत्वा पच्छा सम्मुतिकथं कथेति. पकतिया पन पठममेव परमत्थकथं कथेन्तस्स देसना लूखाकारा होति. तस्मा बुद्धा पठमं सम्मुतिकथं कथेत्वा पच्छा परमत्थकथं कथेन्ति. ते सम्मुतिकथं कथेन्तापि सच्चमेव सभावमेव अमुसाव कथेन्ति. परमत्थकथं कथेन्तापि सच्चमेव सभावमेव अमुसाव कथेन्ति. अयञ्हि –

‘‘दुवे सच्चानि अक्खासि, सम्बुद्धो वदतं वरो;

सम्मुतिं परमत्थञ्च, ततियं नुपलब्भति’’.

तत्थ ¶ –

‘‘सङ्केतवचनं सच्चं, लोकसम्मुतिकारणं;

परमत्थवचनं सच्चं, धम्मानं तथलक्खण’’न्ति.

अपरो नयो – द्वे भगवतो देसना परमत्थदेसना च खन्धादिवसेन, सम्मुतिदेसना च सप्पिकुम्भादिवसेन. न हि भगवा समञ्ञं अतिधावति. तस्मा ‘‘अत्थि पुग्गलो’’ति वचनमत्ततो अभिनिवेसो न कातब्बो. सत्थारा हि –

‘‘पञ्ञत्तिं ¶ अनतिक्कम्म, परमत्थो पकासितो;

समञ्ञं नातिधावेय्य, तस्मा अञ्ञोपि पण्डितो;

परमत्थं पकासेन्तो, समञ्ञं नातिधावये’’.

सेसं सब्बत्थ उत्तानत्थमेवाति.

पुग्गलकथा निट्ठिता.

२. परिहानिकथा

१. वादयुत्तिपरिहानिवण्णना

२३९. इदानि ¶ ¶ परिहानिकथा होति. परिहानिधम्मो अपरिहानिधम्मो, ‘‘द्वेमे, भिक्खवे, धम्मा सेक्खस्स, भिक्खुनो परिहानाय संवत्तन्ति’’ (अ. नि. २.१८५), ‘‘पञ्चिमे, भिक्खवे, धम्मा ¶ समयविमुत्तस्स भिक्खुनो परिहानाय संवत्तन्ती’’ति (अ. नि. ५.१४९) एवमादीनि हि सुत्तानि निस्साय सम्मितिया वज्जिपुत्तका सब्बत्थिवादिनो एकच्चे च महासङ्घिका अरहतोपि परिहानिं इच्छन्ति, तस्मा ते वा होन्तु अञ्ञेयेव वा, येसं अयं लद्धि, तेसं लद्धिभिन्दनत्थं परिहायति अरहा अरहत्ताति पुच्छा सकवादिस्स. तत्र परिहायतीति द्वे परिहानियो पत्तपरिहानि च अप्पत्तपरिहानि च. तत्थ ‘‘दुतियम्पि खो आयस्मा गोधिको तम्हा सामयिकाय चेतोविमुत्तिया परिहायी’’ति (सं. नि. १.१५९) अयं पत्तपरिहानि नाम. ‘‘मा वो सामञ्ञत्थिकानं सतं सामञ्ञत्थो परिहायी’’ति (म. नि. १.४१६-४१८) अयं अप्पत्तपरिहानि. तासु इध पत्तपरिहानि अधिप्पेता. तञ्हि सन्धाय आमन्ताति पटिञ्ञा परवादिस्स. सकसमये पन इमं पत्तपरिहानिं नाम लोकियसमापत्तियाव इच्छन्ति, न अरहत्तादीहि सामञ्ञफलेहि. परसमयेपि नं सब्बसामञ्ञफलेसु सब्बभवेसु सब्बकालेसु सब्बेसञ्च पुग्गलानं न इच्छन्ति. तं पन तेसं लद्धिमत्तमेवाति सब्बं लद्धिजालं भिन्दितुं पुन सब्बत्थातिआदिना नयेन देसना वड्ढिता.

तत्थ यस्मा परवादी कमेन परिहायित्वा सोतापत्तिफले ठितस्स अरहतो परिहानिं न इच्छति, उपरिफलेसु ठितस्सेव इच्छति. यस्मा च रूपारूपभवेसु ठितस्स न इच्छति, कम्मारामतादीनं पन परिहानियधम्मानं भावतो कामभवे ठितस्सेव इच्छति, तस्मा ‘‘सब्बत्था’’ति ¶ पुट्ठो पटिक्खिपति. पुन दळ्हं कत्वा पुट्ठो कामभवं सन्धाय पटिजानाति. सब्बस्मिम्पि हि कामभवे परिहानिकरा कामगुणा अत्थि, तस्मा तत्थ परिहायतीति तस्स लद्धि.

ततियपुच्छाय ¶ परिहानीति परिहानिकरे धम्मे पुच्छति. तत्थ यस्मा परिहानि नाम कम्मारामतादिधम्मा, विसेसतो वा कामरागब्यापादा एव, ते च रूपारूपभवे नत्थि, तस्मा ‘‘न हेव’’न्ति पटिक्खेपो परवादिस्स.

सब्बदाति कालपुच्छा. तत्थ पठमपञ्हे योनिसोमनसिकारकाले अपरिहायनतो पटिक्खिपति. दुतिये अयोनिसोमनसिकरोतो रत्तिभागे वा दिवसभागे वा सब्बदा परिहायनतो पटिजानाति. ततिये परिहानिकरधम्मसमायोगे ¶ सति मुहुत्तमेव परिहानि नाम होति, ततो पुब्बे अपरिहीनस्स पच्छा परिहीनस्स च परिहानि नाम नत्थीति पटिक्खिपति.

सब्बेव अरहन्तोति पञ्हानं पठमस्मिं तिक्खिन्द्रिये सन्धाय पटिक्खिपति. दुतियस्मिं मुदिन्द्रिये सन्धाय पटिजानाति. ततियस्मिम्पि तिक्खिन्द्रियाव अधिप्पेता. तेसञ्हि सब्बेसम्पि परिहानि न होतीति तस्स लद्धि.

सेट्ठिउदाहरणे पठमपुच्छा परवादिस्स, दुतिया सकवादिस्स. तत्रायं अधिप्पायो – यं मं तुम्हे पुच्छथ – ‘‘अरहा अरहत्ता परिहायन्तो चतूहि फलेहि परिहायती’’ति, तत्र वो पटिपुच्छामि – ‘‘चतूहि सतसहस्सेहि सेट्ठी सेट्ठित्तं करोन्तो सतसहस्सेहि परिहीने सेट्ठी सेट्ठित्ता परिहीनो होती’’ति. ततो सकवादिना एकदेसेन परिहानिं सन्धाय ‘‘आमन्ता’’ति वुत्ते सब्बसापतेय्या परिहीनो होतीति पुच्छति. तथा अपरिहीनत्ता सकवादी न हेवाति वत्वा अथ नं ‘‘एवमेव अरहापि परिहायति च. न च चतूहि फलेही’’ति उप्पन्नलद्धिकं दुतियं भब्बपञ्हं पुच्छति. परवादी सेट्ठिनो अभब्बताय नियमं अपस्सन्तो पटिजानित्वा अरहतो चतूहि फलेहि परिहानिभब्बतं पुट्ठो ‘‘नियतो सम्बोधिपरायणो’’ति (अ. नि. ३.८७) वचनस्स अयोनिसो अत्थं गहेत्वा लद्धियं ठितो सोतापत्तिफलतो परिहायितुं अभब्बतं सन्धाय पटिक्खिपति. तं पनस्स लद्धिमत्तमेवाति.

एत्तावता वादयुत्ति नाम निट्ठिता होति.

२. अरियपुग्गलसंसन्दनपरिहानिवण्णना

२४०. इदानि ¶ ¶ अरियपुग्गलसंसन्दना आरद्धा. तत्थ यस्मा केचि अरहतोव परिहानिं इच्छन्ति, केचि अनागामिनोपि, केचि सकदागामिस्सपि. सोतापन्नस्स पन सब्बेपि न इच्छन्तियेव. ये अरहत्ता परिहायित्वा अनागामिसकदागामिभावे ठिता, तेसं परिहानिं इच्छन्ति, न इतरेसं अनागामिसकदागामीनं. सोतापन्नस्स ¶ पन तेपि सब्बथापि न इच्छन्तियेव, तस्मा पेय्यालमुखेन पुच्छा कता. तत्थ तेसं लद्धिवसेन पटिञ्ञा च पटिक्खेपो च वेदितब्बा. ‘‘परिहायति अनागामी अनागामिफला’’ति हि पञ्हस्मिं ये अनागामिनो परिहानिं न इच्छन्ति, तेसं वसेन पटिक्खेपो. ये पकतिअनागामिनो वा अरहत्ता परिहायित्वा ठितअनागामिनो वा परिहानिं इच्छन्ति, तेसं वसेन पटिञ्ञाति इदमेत्थ नयमुखं. तस्सानुसारेन सब्बपेय्याला अत्थतो वेदितब्बा.

२४१. यं पनेत्थ ‘‘सोतापत्तिफलस्स अनन्तरा अरहत्तंयेव सच्छिकरोती’’ति वुत्तं, तं परिहीनस्स पुन वायमतो अरहत्तप्पत्तिं सन्धाय वुत्तं. इतरो सोतापत्तिफलानन्तरं अरहत्तस्स अभावा पटिक्खिपति.

२४२. ततो परं ‘‘परिहानि नामेसा किलेसप्पहानस्स वा मन्दताय भवेय्य, मग्गभावनादीनं वा अनधिमत्तताय, सच्चानं वा अदस्सनेना’’ति एवमादीनं वसेन अनुयुञ्जितुं कस्स बहुतरा किलेसा पहीनातिआदि वुत्तं. तं सब्बं उत्तानाधिप्पायमेव सुत्तानं पनत्थो आगमट्ठकथासु वुत्तनयेनेव वेदितब्बो.

२६२. समयविमुत्तो अरहा अरहत्ता परिहायतीति एत्थ मुदिन्द्रियो समयविमुत्तो, तिक्खिन्द्रियो असमयविमुत्तोति तेसं लद्धि. सकसमये पन अवसिप्पत्तो झानलाभी समयविमुत्तो, वसिप्पत्तो झानलाभी चेव सब्बे च अरियपुग्गला अरिये विमोक्खे असमयविमुत्ताति सन्निट्ठानं. सो पन तं अत्तनो लद्धिं गहेत्वा समयविमुत्तो ¶ परिहायति, इतरो न परिहायती’’ति आह. सेसमेत्थ उत्तानत्थमेव.

अरियपुग्गलसंसन्दनपरिहानिवण्णना.

३. सुत्तसाधनपरिहानिवण्णना

२६५. इदानि ¶ सुत्तसाधना होति. तत्थ उच्चावचाति उत्तमहीनभेदतो उच्चा च अवचा च. पटिपादाति पटिपदा. समणेन पकासिताति बुद्धसमणेन जोतिता. सुखापटिपदा हि खिप्पाभिञ्ञा उच्चा. दुक्खापटिपदा दन्धाभिञ्ञा अवचा. इतरा द्वे एकेनङ्गेन ¶ उच्चा, एकेन अवचा. पठमं वुत्ता एव वा उच्चा, इतरो तिस्सोपि अवचा. ताय चेताय उच्चावचाय पटिपदाय न पारं दिगुणं यन्ति, एकमग्गेन द्विक्खत्तुं निब्बानं न गच्छन्तीति अत्थो. कस्मा? येन मग्गेन ये किलेसा पहीना, तेन तेसं पुन अप्पहातब्बतो. एतेन परिहानिधम्माभावं दीपेति. नयिदं एकगुणं मुतन्ति तञ्च इदं पारं एकवारंयेव फुसनारहं न होति. कस्मा? एकेन मग्गेन सब्बकिलेसानं अप्पहानतो. एतेन एकमग्गेनेव अरहत्ताभावं दीपेति.

अत्थि छिन्नस्स छेदियन्ति छिन्नस्स किलेसवट्टस्स पुन छिन्दितब्बं किञ्चि अत्थीति पुच्छति. इतरो तिक्खिन्द्रियं सन्धाय पटिक्खिपित्वा पुन पुट्ठो मुदिन्द्रियं सन्धाय पटिजानाति. सकवादी सुत्तं आहरित्वा नत्थिभावं दस्सेति. तत्थ ओघपासोति किलेसोघो चेव किलेसपासो च.

२६६. कतस्स पटिचयोति भावितस्स मग्गस्स पुन भावना. इधापि पटिक्खेपपटिजाननानि पुरिमनयेनेव वेदितब्बानि.

२६७. परिहानाय संवत्तन्तीति परवादिना आभते सुत्ते पञ्च धम्मा अप्पत्तपरिहानाय चेव लोकियसमापत्तिपरिहानाय च संवत्तन्ति. सो पन पत्तस्स अरहत्तफलस्स परिहानाय सल्लक्खेति. तेनेव अत्थि अरहतो कम्मारामताति आह. इतरोपि असमयविमुत्तं ¶ सन्धाय पटिक्खिपित्वा इतरं सन्धाय पटिजानाति. कामरागवसेन वा पवत्तमानं तं पटिक्खिपित्वा इतरथा पवत्तमानं पटिजानाति. रागादीनं पन अत्थितं पुट्ठो पटिजानितुं न सक्कोति.

२६८. किं परियुट्ठितोति केन परियुट्ठितो अनुबद्धो अज्झोत्थतो वा हुत्वाति अत्थो. अनुसयपुच्छायपि तिक्खिन्द्रियमुदिन्द्रियवसेनेव पटिक्खेपपटिजाननानि वेदितब्बानि. कल्याणानुसयोति ¶ वचनमत्तसामञ्ञेन वा पटिजानाति. रागो उपचयं गच्छतीति भावनाय पहीनं सन्धायाह. परतो दोसमोहेसुपि एसेव नयो. सक्कायदिट्ठिआदीनं पन दस्सनेन पहीनत्ता उपचयं न इच्छति. सेसं सब्बत्थ उत्तानत्थमेवाति.

सुत्तसाधना.

परिहानिकथा निट्ठिता.

३. ब्रह्मचरियकथा

१. सुद्धब्रह्मचरियकथावण्णना

२६९. इदानि ¶ ¶ ¶ ब्रह्मचरियकथा होति. तत्थ द्वे ब्रह्मचरियवासा, मग्गभावना च पब्बज्जा च. पब्बज्जा सब्बदेवेसु नत्थि. मग्गभावना ठपेत्वा असञ्ञसत्ते सेसेसु अप्पटिसिद्धा. तत्थ ये परनिम्मितवसवत्तिदेवे उपादाय तदुपरिदेवेसु मग्गभावनम्पि न इच्छन्ति सेय्यथापि सम्मितिया, ते सन्धाय नत्थि देवेसूति पुच्छा सकवादिस्स. ‘‘तीहि, भिक्खवे, ठानेहि जम्बुदीपका मनुस्सा उत्तरकुरुके च मनुस्से अधिग्गण्हन्ति देवे च तावतिंसे. कतमेहि तीहि? सूरा सतिमन्तो इध ब्रह्मचरियवासो’’ति (अ. नि. ९.२१) इदं सुत्तं निस्साय द्वेपि ब्रह्मचरियवासा नत्थि देवेसूति उप्पन्नलद्धिवसेन पटिञ्ञा परवादिस्स. पुन द्विन्नम्पि ब्रह्मचरियानं अन्तरायिकधम्मवसेनेव सब्बे देवा जळाति पुच्छा सकवादिस्स. तत्थ हत्थसंवाचिकाति मूगा विय हत्थमुद्धाय वत्तारो. परतो अत्थि देवेसूति पुच्छा परवादिस्स, मग्गभावनं सन्धाय पटिञ्ञा सकवादिस्स. पटिञ्ञाय अधिप्पायं असल्लक्खेत्वा पब्बज्जावसेन अनुयोगो परवादिस्स.

२७०. यत्थ नत्थि पब्बज्जाति पञ्हे गिहीनञ्चेव एकच्चानञ्च देवानं मग्गपटिलाभं सन्धाय पटिक्खेपो तस्सेव. पुन पुट्ठो पच्चन्तवासिनो चेव असञ्ञसत्ते च सन्धाय पटिञ्ञा तस्सेव. यो पब्बजतीतिआदीसु पुच्छासुपि एसेव नयो. पुन ‘‘अत्थि देवेसू’’ति पञ्हेपि मग्गभावनं सन्धायेव पटिञ्ञा सकवादिस्स, ‘‘सब्बदेवेसू’’ति वुत्ते असञ्ञसत्ते सन्धाय पटिक्खेपो तस्सेव.

२७१. मनुस्सेसूति ¶ पञ्हद्वये जम्बुदीपके सन्धाय पटिञ्ञा. पच्चन्तवासिनो सन्धाय पटिक्खेपो वेदितब्बो.

अत्थि यत्थ अत्थीति अत्थि ते देवा, अत्थि वा सो पदेसो, यत्थ अत्थीति एवं सत्तपदेसविभागमुखेन विस्सज्जनं सकवादिस्स. इमिना नयेन सब्बे एकन्तरिकपञ्हा वेदितब्बा.

२७२. सुत्तानुयोगे ¶ कुहिं फलुप्पत्तीति तस्स अनागामिनो अरहत्तफलुप्पत्ति कुहिन्ति पुच्छा सकवादिस्स. तत्थेवाति सुद्धावासेसूति अत्थो.

हन्द हीति कारणत्थे निपातो. इदं वुत्तं होति – यस्मा अनागामिपुग्गलो इध लोके भावितेन मग्गेन तत्थ सुद्धावासेसु फलं सच्छिकरोति, न तत्थ अञ्ञं मग्गं भावेति, तस्मा नत्थि देवेसु ब्रह्मचरियवासोति.

२. संसन्दनब्रह्मचरियवण्णना

२७३. इदानि ¶ यदि अञ्ञत्थ भावितेन मग्गेन अञ्ञत्थ फलसच्छिकिरिया होति, सोतापन्नादीनम्पि सियाति एतमत्थं दस्सेतुं पुन अनागामीतिआदीनं संसन्दनपुच्छा सकवादिस्स. तत्थ अनागामिस्स फलसच्छिकिरियाय पटिञ्ञा, सेसानं फलसच्छिकिरियाय पटिक्खेपो परवादिस्स. इध भावितमग्गो हि अनागामी इधविहायनिट्ठो नाम होति. सो इध अनागामिमग्गं भावेत्वा ‘‘ओपपातिको तत्थपरिनिब्बायी’’ति वचनतो ‘‘पुन मग्गभावनं विना उपपत्तिवसेनेव अरहत्तफलं सच्छिकरोती’’ति तस्स लद्धि. सोतापन्नसकदागामिनो पन तत्थ मग्गं भावेत्वा तत्रुपपत्तिका नाम होन्तीति तेसं इधागमनञ्ञेव नत्थि. इति सो अनागामिस्स फलसच्छिकिरियं पुट्ठो पटिजानाति. इतरेसं पटिक्खिपति.

अनागामी पुग्गलो तत्थ भावितेन मग्गेनाति पञ्हे ‘‘अनागामिनो तत्थ मग्गभावनाव नत्थी’’ति लद्धिया पटिक्खिपति. मग्गो च भावीयति, न च किलेसा पहीयन्तीति पुच्छा सकवादिस्स ¶ , रूपावचरमग्गं सन्धाय पटिञ्ञा इतरस्स. रूपावचरमग्गेन हि सो इधविहायनिट्ठो नाम जातो.

अनागामी पुग्गलो कतकरणीयोति पञ्हे ‘‘ओपपातिको तत्थपरिनिब्बायी’’ति वचनतो उपपत्तियावस्स कतकरणीयादिभावं सन्धाय पटिजानाति. अरहाति पञ्हे इधपरिनिब्बायिनो अरहतो वसेनेव पटिक्खिपति. पुन पुट्ठो तत्थपरिनिब्बायिनो वसेन पटिजानाति.

अत्थि अरहतो पुनब्भवोतिआदीसुपि तत्थपरिनिब्बायी इधपरिनिब्बायीनं वसेनेव अत्थो वेदितब्बो. अप्पटिविद्धाकुप्पोव तत्थपरिनिब्बायतीति पुट्ठो ¶ इधेव भावितेन मग्गेन तस्स अकुप्पपटिवेधं इच्छन्तो पटिक्खिपति.

यथा मिगोति पठमं उदाहरणं परवादिस्स, दुतियं सकवादिस्स. सेसं सब्बत्थ उत्तानत्थमेवाति.

ब्रह्मचरियकथा निट्ठिता.

३. ओधिसोकथावण्णना

२७४. इदानि ओधिसोकथा नाम होति. तत्थ ये सोतापन्नादीनं नानाभिसमयवसेन दुक्खदस्सनादीहि ओधिसो ओधिसो ¶ एकदेसेन एकदेसेन किलेसप्पहानं इच्छन्ति सेय्यथापि एतरहि सम्मितियादयो, तेसं तं लद्धिं भिन्दितुं ओधिसोति पुच्छा सकवादिस्स, पटिञ्ञा परवादिस्स. पुन अनुयोगो सकवादिस्स, एकदेसेन सोतापन्नादिभावस्स अभावतो पटिक्खेपो परवादिस्स. इमिना उपायेन सब्बवारेसु अत्थो वेदितब्बोति.

ओधिसोकथावण्णना.

४. जहतिकथा

१. नसुत्ताहरणकथावण्णना

२७९. इदानि ¶ जहतिकथा नाम होति. तत्थ येसं ‘‘झानलाभी पुथुज्जनो सह सच्चाभिसमया अनागामी नाम होति, तस्स पुथुज्जनकालेयेव कामरागब्यापादा पहीना’’ति लद्धि सेय्यथापि एतरहि सम्मितियानं, तेसं तं लद्धिं भिन्दितुं जहति पुथुज्जनोति पुच्छा सकवादिस्स, झानविक्खम्भितानं पन तेसं परियुट्ठानं अपस्सन्तस्स पटिञ्ञा परवादिस्स. यस्मा पन तेसं झानविक्खम्भितानम्पि अनागामिमग्गेनेव अच्चन्तं ¶ पहानं होति, तस्मा पुन अच्चन्तन्तिआदिअनुयोगो सकवादिस्स, तथारूपस्स पहानस्स अभावतो पटिक्खेपो इतरस्स. विक्खम्भेतीति अच्चन्तविक्खम्भनमेव सन्धाय पुच्छा सकवादिस्स. ततो परं अनागामिमग्गट्ठेन सद्धिं पुथुज्जनसंसन्दनं होति. तं उत्तानत्थमेव.

२८०. ततो परं अनागामिफले सण्ठातीति पुट्ठो झानानागामितं सन्धाय पटिजानाति. अरहत्ते सण्ठातीति पुट्ठो दस्सनमग्गेन उद्धम्भागियानं पहानाभावतो पटिक्खिपति.

अपुब्बं अचरिमं तयो मग्गेति पुट्ठो तथारूपाय भावनाय अभावा पटिक्खिपति. पुन पुट्ठो तिण्णं मग्गानं किच्चसब्भावं सन्धाय पटिजानाति. सामञ्ञफलपुच्छासुपि एसेव नयो. कतमेन मग्गेनाति पुट्ठो अनागामिमग्गेनाति झानानागामितं सन्धाय वदति. पुन संयोजनप्पहानं पुट्ठो तिण्णं अनागामिमग्गेन तेसं किलेसानं अप्पहेय्यत्ता पटिक्खिपति. दुतियं पुट्ठो पठममग्गस्सेव ¶ झानानागामिमग्गभावं सन्धाय पटिजानाति. सेसमेत्थ उत्तानत्थमेवाति.

जहतिकथा.

५. सब्बमत्थीतिकथा

१. वादयुत्तिवण्णना

२८२. इदानि ¶ सब्बमत्थीतिवादकथा नाम होति. तत्थ येसं ‘‘यं किञ्चि रूपं अतीतानागतपच्चुप्पन्नं…पे… अयं वुच्चति रूपक्खन्धो’’तिआदिवचनतो (विभ. २) ‘‘सब्बेपि अतीतादिभेदा धम्मा खन्धसभावं न विजहन्ति, तस्मा सब्बं अत्थियेव नामा’’ति लद्धि, सेय्यथापि एतरहि सब्बमत्थिवादानं, तेसं लद्धिविसोधनत्थं सब्बमत्थीति पुच्छा सकवादिस्स, वुत्तप्पकाराय लद्धिया ठत्वा पटिञ्ञा इतरस्स. सब्बथाति सब्बस्मिं सरीरे सब्बमत्थीति पुच्छति. सब्बदाति सब्बस्मिं काले सब्बमत्थीति पुच्छति. सब्बेन सब्बन्ति सब्बेनाकारेन सब्बमत्थीति पुच्छति. सब्बेसूति सब्बेसु धम्मेसु सब्बमत्थीति पुच्छति. अयोगन्ति ¶ अयुत्तं. नानासभावानञ्हि योगो होति, न एकसभावस्स. इति इमस्मिं पञ्हे रूपं वेदनाय, वेदनं वा रूपेन अनानं एकलक्खणमेव कत्वा सब्बमत्थीति पुच्छति. यम्पि नत्थि तम्पत्थीति यम्पि छट्ठखन्धादिकं ससविसाणादिकं वा किञ्चि नत्थीति सिद्धं, तम्पि ते अत्थीति पुच्छति. सब्बमत्थीति या दिट्ठि सा दिट्ठि मिच्छादिट्ठीति, या दिट्ठि सा दिट्ठि सम्मादिट्ठीति हेवमत्थीति इमिना इदं पुच्छति – या ते एसा सब्बमत्थीति दिट्ठि, सा दिट्ठि अयाथावकत्ता मिच्छादिट्ठीति एवं या अम्हाकं दिट्ठि, सा दिट्ठि याथावकत्ता सम्मादिट्ठीति एवं तव समये अत्थीति पुच्छति. इतरो सब्बेसुपि एतेसु नयेसु वुत्तप्पकाराय अत्थिताय अभावतो पटिक्खिपति. इमेसु पन सब्बेसुपि नयेसु ‘‘आजानाहि निग्गह’’न्ति आदिं कत्वा सब्बो कथामग्गभेदो वित्थारतो वेदितब्बोति अयं तावेत्थ वादयुत्ति.

२. कालसंसन्दनवण्णना

२८३-२८४. इदानि ¶ अतीतं अत्थीति कालसंसन्दनं होति. तत्थ अतीतं अत्थीतिआदिकं सुद्धिकसंसन्दनं. अतीतं रूपं अत्थीतिआदिकं खन्धवसेन कालसंसन्दनं.

२८५. पच्चुप्पन्नं रूपं अप्पियं करित्वाति अतीतानागतं पहाय पच्चुप्पन्नरूपमेव अप्पियं ¶ अविभजितब्बं करित्वा. रूपभावं जहतीतिपञ्हे निरुद्धस्सापि रूपस्स रूपक्खन्धसङ्गहितत्ता पटिक्खिपति. रूपभावं न जहतीति पटिलोमपञ्हेपि रूपक्खन्धेन सङ्गहितत्ताव पटिजानाति. ओदातं वत्थं अप्पियं करित्वाति एत्थ किञ्चापि न सब्बं वत्थं ओदातं, इमिना पन वत्थन्ति अवत्वा ‘‘ओदातं वत्थं अप्पियं करित्वा’’ति वुत्ते सकवादिना एकत्थता अनुञ्ञाता. ओदातभावं जहतीति पञ्हे वण्णविगमं सन्धाय पटिञ्ञा सकवादिस्स. वत्थभावं जहतीति एत्थ पन पञ्ञत्तिया अविगतत्ता पटिक्खेपो तस्सेव. पटिलोमेपि एसेव नयो.

२८६. अतीतं अतीतभावं न जहतीति पुट्ठो ‘‘यदि जहेय्य, अनागतं वा पच्चुप्पन्नं वा सिया’’ति मञ्ञमानो पटिजानाति. अनागतं अनागतभावं न जहतीति पुट्ठो पन ‘‘यदि न जहेय्य, अनागतमेवस्स ¶ , पच्चुप्पन्नभावं न पापुणेय्या’’ति मञ्ञमानो पटिक्खिपति. पच्चुप्पन्नपञ्हेपि अतीतभावं अनापज्जनदोसो सियाति पटिक्खिपति. अनुलोमपञ्हेसुपि इमिनाव नयेन अत्थो वेदितब्बो.

२८७. एवं सुद्धिकनयं वत्वा पुन खन्धवसेन दस्सेतुं अतीतं रूपन्तिआदि वुत्तं. तं सब्बं पाळिअनुसारेनेव सक्का जानितुं.

वचनसोधनवण्णना

२८८. इदानि ‘‘अतीतं न्वत्थी’’तिआदि वचनसोधना होति. तत्थ हञ्चि अतीतं न्वत्थीति यदि अतीतं नो अत्थीति अत्थो. अतीतं ¶ अत्थीति मिच्छाति अतीतञ्च तं अत्थि चाति मिच्छा एव. तञ्ञेव अनागतं तं पच्चुप्पन्नन्ति पुट्ठो अनागतक्खणेयेवस्स पच्चुप्पन्नताय अभावं सन्धाय कालनानत्तेन पटिक्खिपति.

दुतियं पुट्ठो यं उप्पादतो पुब्बे अनागतं अहोसि, तस्स उप्पन्नकाले पच्चुप्पन्नत्ता पटिजानाति. हुत्वा होति हुत्वा होतीति यदेतं तया ‘‘अनागतं हुत्वा पच्चुप्पन्नं होती’’ति वदता तञ्ञेव अनागतं तं पच्चुप्पन्नन्ति लद्धिवसेन ‘‘अनागतं वा पच्चुप्पन्नं वा हुत्वा होती’’ति ¶ वुत्तं. किं ते तम्पि हुत्वा होतीति? इतरो हुत्वा भूतस्स पुन हुत्वा अभावतो न हेवन्ति पटिक्खिपति.

दुतियं पुट्ठो यस्मा तं अनागतं हुत्वा पच्चुप्पन्नं होन्तं ‘‘हुत्वा होती’’ति सङ्खं गतं, तस्मा पटिजानाति. अथ नं सकवादी ‘‘यदि ते तं अनागतं हुत्वा पच्चुप्पन्नं होन्तं ‘हुत्वा होती’ति सङ्खं गतं, पुन हुत्वा होति, यं अनागतं न हुत्वा पच्चुप्पन्नं न होन्तं ‘न हुत्वा न होती’ति सङ्खं गतं ससविसाणं, किं ते तम्पि पुन न हुत्वा न होती’’तिअधिप्पायेन न हुत्वा न होति न हुत्वा न होतीति पञ्हं पुच्छति. इतरो ‘‘यं नत्थि, तं नत्थिताय, एव अनागतं न हुत्वा पच्चुप्पन्नं न होतीति नहुत्वानहोति नाम ताव होतु, पुन नहुत्वानहोतिभावो पनस्स कुतो’’ति मञ्ञमानो पटिक्खिपति. तञ्ञेव पच्चुप्पन्नं तं अतीतन्ति पञ्हेपि पच्चुप्पन्नक्खणेयेवस्स अतीतताय अभावं सन्धाय कालनानत्ता पटिक्खिपति.

दुतियपञ्हे ¶ पुट्ठो यं अतीतभावतो पुब्बे पच्चुप्पन्नं अहोसि, तस्सेव अतीतत्ता पटिजानाति. हुत्वा होति हुत्वा होतीति यदेतं तया ‘‘पच्चुप्पन्नं हुत्वा अतीतं होती’’ति वदता ‘‘तञ्ञेव पच्चुप्पन्नं तं अतीत’’न्ति लद्धिवसेन ‘‘पच्चुप्पन्नं वा अतीतं वा हुत्वा होती’’ति वुत्तं, किं ते तम्पि हुत्वा होतीति? इतरो हुत्वा भूतस्स पुन हुत्वा अभावतो न हेवन्ति पटिक्खिपति.

दुतियपञ्हे यस्मा तं पच्चुप्पन्नं हुत्वा अतीतं होन्तं ‘‘हुत्वा होती’’ति सङ्खं गतं, तस्मा पटिजानाति ¶ . अथ नं सकवादी ‘‘यदि ते तञ्ञेव पच्चुप्पन्नं हुत्वा अतीतं होन्तं ‘हुत्वा होती’ति सङ्खं गतं, पुन हुत्वा होति, यं पच्चुप्पन्नं न हुत्वा अतीतं न होन्तं ‘न हुत्वा न होती’ति सङ्खं गतं ससविसाणं, किं ते तम्पि पुन न हुत्वा न होती’’ति अधिप्पायेन न हुत्वा न होति न हुत्वा न होतीति पञ्हं पुच्छति. इतरो ‘‘यं नत्थि, तं नत्थिताय एव पच्चुप्पन्नं न हुत्वा अतीतं न होतीति नहुत्वानहोति नाम ताव होतु. पुन नहुत्वानहोतिभावो पनस्स कुतो’’ति मञ्ञमानो पटिक्खिपति. उभयं एकतो कत्वा आगते ततियपञ्हेपि इमिनावुपायेन योजना कातब्बा.

अपरो ¶ नयो – यदि तञ्ञेव अनागतं तं पच्चुप्पन्नं, अनागतस्स पच्चुप्पन्ने वुत्तो होतिभावो, पच्चुप्पन्नस्स च अनागते वुत्तो हुत्वाभावो आपज्जति. एवं सन्ते अनागतम्पि हुत्वाहोति नाम. पच्चुप्पन्नम्पि हुत्वाहोतियेव नाम. तेन तं पुच्छाम – ‘‘किं ते एतेसु एकेकं हुत्वा होति हुत्वा होती’’ति? इतरो – ‘‘तञ्ञेव अनागतं तं पच्चुप्पन्न’’न्ति पञ्हे पटिक्खित्तनयेनेव पटिक्खिपित्वा पुन पुट्ठो दुतिये पञ्हे पटिञ्ञातनयेनेव पटिजानाति. अथ नं सकवादी ‘‘तञ्ञेव अनागतं तं पच्चुप्पन्न’’न्ति पञ्हावसेन तेसु एकेकं हुत्वा होति हुत्वा होतीति पटिजानन्तं पुरिमं पटिक्खित्तपञ्हं परिवत्तित्वा पुच्छन्तो न हुत्वा न होति न हुत्वा न होतीति पुच्छति. तस्सत्थो – ननु ‘‘तया तञ्ञेव अनागतं तं पच्चुप्पन्न’’न्ति वुत्ते पठमपञ्हं पटिक्खिपन्तेन अनागतस्स होतिभावो पच्चुप्पन्नस्स च हुत्वाभावो पटिक्खित्तोति. तेन अनागतं न होति नाम, पच्चुप्पन्नं न हुत्वा नाम.

दुतियपञ्हे ¶ च तञ्ञेव अनागतं तं पच्चुप्पन्नन्ति पटिञ्ञातं. एवं सन्ते अनागतम्पि न हुत्वा न होति नाम. पच्चुप्पन्नम्पि न हुत्वा न होतियेव नाम. तेन तं पुच्छाम – ‘‘किं ते एतेसु एकेकं न हुत्वा न होति न हुत्वा न होती’’ति? परवादी सब्बतो अन्धकारेन परियोनद्धो विय तेसं नहुत्वानहोतिभावं अपस्सन्तो न हेवन्ति पटिक्खिपति.

दुतियवारेपि यदि तञ्ञेव ¶ पच्चुप्पन्नं तं अतीतं, पच्चुप्पन्नस्स अतीते वुत्तो होतिभावो, अतीतस्स च पच्चुप्पन्ने वुत्तो हुत्वाभावो आपज्जति, एवं सन्ते पच्चुप्पन्नम्पि हुत्वाहोति नाम, अतीतम्पि हुत्वाहोतियेव नाम. तेन तं पुच्छाम – ‘‘किं ते एतेसु एकेकं हुत्वा होति हुत्वा होती’’ति? इतरो तञ्ञेव पच्चुप्पन्नं तं अतीतन्तिपञ्हे पटिक्खित्तनयेनेव पटिक्खिपित्वा पुन पुट्ठो दुतियपञ्हे पटिञ्ञातनयेनेव पटिजानाति. अथ नं सकवादी ‘‘तञ्ञेव पच्चुप्पन्नं तं अतीत’’न्ति पञ्हावसेन तेसु एकेकं हुत्वा होति हुत्वा होतीति पटिजानन्तं पुरिमं पटिक्खित्तपञ्हं परिवत्तित्वा पुच्छन्तो न हुत्वा न होति न हुत्वा न होतीति पुच्छति. तस्सत्थो – ननु तया तञ्ञेव पच्चुप्पन्नं तं अतीतन्ति वुत्ते पठमपञ्हं पटिक्खिपन्तेन पच्चुप्पन्नस्स होतिभावो, अतीतस्स च हुत्वाभावो पटिक्खित्तोति. तेन पच्चुप्पन्नं नहोति नाम. अतीतं नहुत्वा नाम.

दुतियपञ्हे च ते ‘‘तञ्ञेव पच्चुप्पन्नं तं अतीत’’न्ति पटिञ्ञातं. एवं सन्ते पच्चुप्पन्नम्पि ¶ न हुत्वा न होति नाम, अतीतम्पि न हुत्वा न होतियेव नाम. तेन तं पुच्छाम – ‘‘किं ते एतेसु एकेकं न हुत्वा न होति, न हुत्वा न होती’’ति. परवादी सब्बतो अन्धकारेन परियोनद्धो विय तेसं नहुत्वानहोतिभावं अपस्सन्तो न हेवन्ति पटिक्खिपति.

ततियवारेपि यदि तञ्ञेव अनागतं तं पच्चुप्पन्नं तं अतीतं; अनागतपच्चुप्पन्नानं पच्चुप्पन्नातीतेसु वुत्तो होतिभावो, पच्चुप्पन्नातीतानञ्च अनागतपच्चुप्पन्नेसु वुत्तो हुत्वाभावो आपज्जति. एवं सन्ते अनागतम्पि हुत्वाहोति नाम. पच्चुप्पन्नम्पि अतीतम्पि हुत्वा होतियेव नाम. तेन तं पुच्छाम – ‘‘किं ते तीसुपि एतेसु एकेकं हुत्वा होति ¶ हुत्वा होती’’ति? इतरो ‘‘तञ्ञेव अनागतं, तं पच्चुप्पन्नं, तं अतीत’’न्तिपञ्हे पटिक्खित्तनयेनेव पटिक्खिपित्वा पुन पुट्ठो दुतियपञ्हे पटिञ्ञातनयेनेव पटिजानाति. अथ नं सकवादी ‘‘तञ्ञेव अनागतं, तं पच्चुप्पन्नं, तं अतीत’’न्ति पञ्हावसेन तेसु एकेकं हुत्वा होति, हुत्वा होतीति पटिजानन्तं पुरिमं पटिक्खित्तपञ्हं परिवत्तित्वा पुच्छन्तो न हुत्वा न होति न हुत्वा न होतीति पुच्छति. तस्सत्थो ¶ – ननु तया तञ्ञेव अनागतं, तं पच्चुप्पन्नं, तं अतीतन्ति वुत्ते पठमपञ्हं पटिक्खिपन्तेन अनागतपच्चुप्पन्नानं होतिभावो; पच्चुप्पन्नातीतानञ्च हुत्वाभावो पटिक्खित्तोति? तेन अनागतं पच्चुप्पन्नञ्च न होति नाम. पच्चुप्पन्नञ्च अतीतञ्च न हुत्वा नाम.

दुतियपञ्हे च ते ‘‘तञ्ञेव अनागतं, तं पच्चुप्पन्नं, तं अतीत’’न्ति पटिञ्ञातं. एवं सन्ते अनागतम्पि न हुत्वा न होति नाम, पच्चुप्पन्नम्पि अतीतम्पि न हुत्वा न होतियेव नाम. तेन तं पुच्छाम – ‘‘किं ते एतेसु एकेकं न हुत्वा न होति न हुत्वा न होती’’ति? परवादी सब्बतो अन्धकारेन परियोनद्धो विय तेसं न हुत्वा न होतिभावं अपस्सन्तो न हेवन्ति पटिक्खिपतीति. निग्गहादीनि पनेत्थ हेट्ठा वुत्तनयेनेव योजेतब्बानि.

वचनसोधनवण्णना निट्ठिता.

अतीतचक्खुरूपादिकथावण्णना

२८९. अतीतं ¶ चक्खु अत्थीतिआदीसुपि चक्खादिभावाविजहनेनेव अत्थितं पटिजानाति. पस्सतीतिआदीनि पुट्ठो पन तेसं विञ्ञाणानं किच्चाभाववसेन पटिक्खिपति.

अतीतञाणादिकथावण्णना

२९०. तेन ञाणेन ञाणकरणीयं करोतीति पञ्हे तस्स ञाणस्स निरुद्धत्ता किच्चभावमस्स अपस्सन्तो पटिक्खिपति. पुन पुट्ठो अतीतारम्मणं पच्चुप्पन्नं ञाणं अतीतानं धम्मानं जाननतो अतीतं ञाणन्ति ¶ लेसेन पच्चुप्पन्नमेव ‘‘अतीतं ञाण’’न्ति कत्वा तेन ञाणेन ञाणकरणीयस्स अत्थिताय पटिजानाति. अथस्स सकवादी लेसोकासं अदत्वा तेन ञाणेन दुक्खं परिजानातीतिआदिमाह. इतरो अतीतारम्मणेनेव ञाणेन इमेसं चतुन्नं किच्चानं अभावा ¶ पटिक्खिपति. अनागतपञ्हेपि एसेव नयो. पच्चुप्पन्नपञ्हो चेव संसन्दनपञ्हो च उत्तानत्थायेव.

अरहन्तादिकथावण्णना

२९१. अरहतो अतीतो रागो अत्थीतिआदीसुपि रागादिभावाविजहन्तो एवं पटिजानाति. सरागोतिआदीसु सुत्तविरोधभयेन चेव युत्तिविरोधभयेन च पटिक्खिपति.

पदसोधनकथावण्णना

२९५. एवं सब्बम्पि पाळिअनुसारेनेव विदित्वा परतो अत्थि सिया अतीतं, सिया न्वातीतन्ति एत्थ एवमत्थो वेदितब्बो. यं अतीतमेव अत्थि, तं अतीतं. यं पच्चुप्पन्नानागतं अत्थि, तं नो अत्थि, तं नो अतीतं. तेनातीतं न्वातीतं, न्वातीतं अतीतन्ति तेन कारणेन अतीतं नो अतीतं, नो अतीतं अतीतन्ति. अनागतपच्चुप्पन्नपुच्छासुपि एसेव नयो.

सुत्तसाधनवण्णना

२९६. न ¶ वत्तब्बं ‘‘अतीतं अत्थि अनागतं अत्थी’’ति सुत्तसाधनाय पुच्छा परवादिस्स, पटिञ्ञा सकवादिस्स. पुन अत्तनो लद्धिं निस्साय यंकिञ्चि, भिक्खवे, रूपन्ति अनुयोगो परवादिस्सेव. दुतियनये पुच्छा सकवादिस्स, पटिञ्ञा इतरस्स. एवं सब्बत्थ पुच्छा च पटिञ्ञा च वेदितब्बा. यं पनेतं परवादिना अनागतस्स अत्थिभावसाधनत्थं ‘‘ननु वुत्तं भगवता कबळीकारे, चे, भिक्खवे’’ति सुत्तस्स परियोसाने अत्थि तत्थ आयतिं पुनब्भवाभिनिब्बत्तीतिआदि दस्सितं न तं अनागतस्स अत्थिभावसाधकं ¶ . तञ्हि हेतूनं परिनिट्ठितत्ता अवस्सं भावितं सन्धाय तत्थ वुत्तं. अयं सुत्ताधिप्पायो. सेसं सब्बत्थ उत्तानत्थमेवाति.

सब्बमत्थीतिकथावण्णना निट्ठिता.

६. अतीतक्खन्धादिकथा

१. नसुत्तसाधनकथावण्णना

२९७. इदानि ‘‘अतीतं खन्धा’’तिआदिकथा होति. तत्थ खन्धादिभावाविजहनतो अतीतानागतानं अत्थितं इच्छन्तस्स अतीतं खन्धाति पुच्छा परवादिस्स, अतीतस्स खन्धसङ्गहितत्ता आमन्ताति पटिञ्ञा सकवादिस्स. पुन अतीतं ¶ नत्थीति पुच्छा परवादिस्स, तस्स निरुत्तिपथसुत्तेन अत्थिताय वारितत्ता पटिक्खेपो सकवादिस्स. आयतनधातुपुच्छासुपि अनागतपञ्हेसुपि पच्चुप्पन्नेन सद्धिं संसन्दित्वा अनुलोमपटिलोमतो आगतपञ्हेसुपि ‘‘अतीतं रूप’’न्तिआदिपञ्हेसुपि इमिनावुपायेन अत्थो वेदितब्बो.

२. सुत्तसाधनवण्णना

२९८. सुत्तसाधने ¶ पन न वत्तब्बन्ति पुच्छा सकवादिस्स. तत्थ नत्थि चेतेति नत्थि च एते धम्माति अत्थो. खन्धादिभावे सति नत्थितं अनिच्छन्तस्स आमन्ताति पटिञ्ञा परवादिस्स, अथ नेसं नत्थिभावसाधनत्थं सुत्ताहरणं सकवादिस्स. दुतियपुच्छापि परवादिस्स, पटिञ्ञा सकवादिस्स, सुत्ताहरणं परवादिस्स. तं पन नेसं खन्धादिभावमेव साधेति, न अत्थिभावन्ति आहटम्पि अनाहटसदिसमेवाति.

अतीतं खन्धातिआदिकथावण्णना.

७. एकच्चंअत्थीतिकथा

१. अतीतादिएकच्चकथावण्णना

२९९. इदानि ¶ एकच्चं अत्थीति कथा होति. तत्थ ये ‘‘एकच्चं अतीतं अत्थी’’ति मञ्ञन्ति, सेय्यथापि कस्सपिका; तेसं लद्धिभिन्दनत्थं अतीतं अत्थीति पुच्छा सकवादिस्स, एकच्चं अत्थीति विस्सज्जनं परवादिस्स. अयञ्हि अधिप्पायो – अविपक्कविपाकं अत्थि, विपक्कविपाकं नत्थीति. एकच्चं निरुद्धन्ति अनुयोगो सकवादिस्स. तस्सत्थो – यदि ते अतीतं एकच्चं अत्थि एकच्चं नत्थि, एवं सन्ते एकच्चं अतीतं निरुद्धं, एकच्चं अतीतं अनिरुद्धं, तथेव ठितन्ति आपज्जति. विगतन्तिआदीसुपि एसेव नयो.

अविपक्कविपाकधम्मा एकच्चेति इदं यस्मा येसं सो अविपक्कविपाकानं अत्थितं इच्छति, तेपि अतीतायेव. तस्मा यथा ते अतीतं एकच्चं अत्थि, किं तथा अविपक्कविपाकापि धम्मा ¶ एकच्चे अत्थी एकच्चे नत्थीति चोदेतुं वुत्तं. विपक्कविपाकाति इदं येसं सो नत्थितं इच्छति, तेसं वसेन चोदेतुं वुत्तं. अविपाकाति इदं अब्याकतानं वसेन चोदेतुं वुत्तं. इति इमेसं तिण्णं रासीनं वसेन सब्बेसु अनुलोमपटिलोमेसु पटिञ्ञा च ¶ पटिक्खेपो च वेदितब्बा. अतीता एकदेसं विपक्कविपाका, एकदेसं अविपक्कविपाकाति विप्पकतविपाका वुच्चन्ति. येन हि कम्मेन पटिसन्धि निब्बत्तिता, भवङ्गम्पि चुतिपि तस्सेव विपाको. तस्मा पटिसन्धितो याव चुति, ताव तं विप्पकतविपाकं नाम होति. तथारूपे धम्मे सन्धायेतं वुत्तं.

विपच्चिस्सन्तीति कत्वा ते अत्थीति पुच्छा सकवादिस्स. यथा धम्मधरस्स पुग्गलस्स निद्दायन्तस्सापि बहुपवत्तिनो धम्मा अत्थीति वुच्चन्ति, एवं लोकवोहारवसेन अत्थितं सन्धाय पटिञ्ञा परवादिस्स. विपच्चिस्सन्तीति कत्वा पच्चुपन्नाति दुतियपञ्हे ‘‘कम्मानं अविनाससङ्खातो कम्मूपचयो नामेको अत्थी’’ति लद्धियं ठत्वा पटिञ्ञा परवादिस्स.

२. अनागतादिएकच्चकथावण्णना

३००. अनागतं ¶ अत्थीतिआदीसुपि एकच्चं अत्थीति उप्पादिनो धम्मे सन्धाय वदति. सेसं सब्बत्थ हेट्ठा वुत्तनयत्ता उत्तानत्थमेवाति.

एकच्चंअत्थीतिकथावण्णना.

८. सतिपट्ठानकथावण्णना

३०१. इदानि सतिपट्ठानकथा होति. ‘‘तत्थ – चतुन्नं, भिक्खवे, सतिपट्ठानानं समुदयञ्च अत्थङ्गमञ्च देसेस्सामी’’ति (सं. नि. ५.४०८) सतिपट्ठानसंयुत्ते वुत्तनयेनेव येसं कायादयो सतिया आरम्मणधम्मे गहेत्वा ‘‘सब्बे धम्मा सतिपट्ठाना’’ति लद्धि, सेय्यथापि एतरहि अन्धकानं. अन्धका नाम पुब्बसेलिया, अपरसेलिया, राजगिरिया, सिद्धत्थिकाति इमे पच्छा उप्पन्ननिकाया. तेसं लद्धिविवेचनत्थं पुच्छा सकवादिस्स, पटिञ्ञा परवादिस्स. तत्थ यस्मा ‘‘पतिट्ठाति एतेसूति पट्ठाना ¶ . का पतिट्ठाति? सति. सतिया पट्ठाना सतिपट्ठाना’’ति इमिना अत्थेन सतिगोचरापि सतिपट्ठाना. ‘‘पतिट्ठहन्तीति पट्ठाना. का ¶ पतिट्ठहन्ति? सतियो. सतियोव पट्ठाना सतिपट्ठाना’’ति इमिना अत्थेन सतियोव सतिपट्ठाना. तस्मा द्वेपि वादा परियायेन युज्जन्ति. ये पन तं परियायं पहाय एकन्तेनेव ‘‘सब्बे धम्मा सतिपट्ठाना’’ति वदन्ति, ते सन्धाय पुच्छा सकवादिस्स, आरम्मणवसेन पटिञ्ञा परवादिस्स. सब्बे धम्मा सतीति अनुयुत्तस्स पन सब्बेसं सतिसभावाभावतो पटिक्खेपो तस्सेव. तत्थ खयगामीतिआदीनि मग्गविसेसनानि. एकायनमग्गो हि किलेसानं खयभूतं निब्बानं गच्छतीति खयगामी. चत्तारि सच्चानि बुज्झन्तो गच्छतीति बोधगामी. वट्टं अपचिनन्तो गच्छतीति अपचयगामी. एवमेतेहि पदेहि ‘‘किं ते सब्बे धम्मा एवरूपो ते एकायनो मग्गो होती’’ति पुच्छति. अनासवा असंयोजनियातिआदीनिपि लोकुत्तरभावं पुच्छनत्थाय वुत्तानि. बुद्धानुस्सतीतिआदीनि पभेदपुच्छावसेन वुत्तानि.

चक्खायतनं ¶ सतिपट्ठानन्तिआदि सब्बधम्मानं पभेदपुच्छावसेन वुत्तं. तत्थापि सतिवसेन पटिक्खेपो, आरम्मणवसेन पटिञ्ञाति. एवं सब्बपञ्हेसु अत्थो वेदितब्बो. सुत्तसाधना उत्तानत्थायेवाति.

सतिपट्ठानकथावण्णना निट्ठिता.

९. हेवत्थिकथावण्णना

३०४. इदानि हेवत्थिकथा नाम होति. तत्थ येसं ‘‘सब्बेपि अतीतादिभेदा धम्मा रूपादिवसेन अत्थि, अतीतं अनागतपच्चुप्पन्नवसेन, अनागतपच्चुप्पन्नानि वा अतीतादिवसेन नत्थि; तस्मा सब्बमेविदं एवं अत्थि एवं नत्थी’’ति लद्धि, सेय्यथापि एतरहि वुत्तप्पभेदानं अन्धकानं; ते सन्धाय अतीतं अत्थीति पुच्छा सकवादिस्स. हेवत्थि हेव नत्थीति विस्सज्जनं परवादिस्स. तत्थ हेवाति एवं ¶ . अथ नं सकवादी ‘‘यदि अतीतोव एवं अत्थि, एवं नत्थीति लद्धि, एवं सन्ते सोयेव अत्थि, सोयेव नत्थि नामा’’ति पुच्छन्तो सेवत्थि, सेव नत्थीति आह. इतरो तेनेव सभावेन अत्थितं, तेनेव नत्थितं सन्धाय पटिक्खिपति. दुतियं पुट्ठो ¶ सकभावेनेव अत्थितं, परभावेनेव नत्थितं सन्धाय पटिजानाति. ततो परं अत्थट्ठो नत्थट्ठोति अत्थिसभावो नत्थिसभावो नाम होतीति पुच्छति. इमिनावुपायेन सब्बवारेसु अत्थो वेदितब्बो. परियोसाने पन ‘‘तेन हि अतीतं हेवत्थि, हेव नत्थी’’ति च ‘‘तेन हि रूपं हेवत्थि, हेव नत्थी’’ति चातिआदीनि वत्वा किञ्चापि परवादिना लद्धि पतिट्ठापिता, अयोनिसो पतिट्ठापितत्ता पनेसा अप्पतिट्ठापितायेवाति.

हेवत्थिकथावण्णना.

महावग्गो निट्ठितो.

२. दुतियवग्गो

१. परूपहारवण्णना

३०७. इदानि ¶ ¶ परूपहारकथा नाम होति. तत्थ ये अरहत्तं पटिजानन्तानं अप्पत्ते पत्तसञ्ञीनं अधिमानिकानं कुहकानं वा अरहत्तं पटिजानन्तानं सुक्कविस्सट्ठिं दिस्वा ‘‘मारकायिका देवता अरहतो असुचिं उपसंहरन्ती’’ति मञ्ञन्ति; सेय्यथापि एतरहि पुब्बसेलिया च अपरसेलिया च; ते सन्धाय अत्थि अरहतोति पुच्छा सकवादिस्स, पटिञ्ञा इतरस्स. इदानि यस्मा सुक्कविस्सट्ठि नाम रागसमुट्ठाना होति, तस्मा अत्थि अरहतो रागोति अनुयोगो आरद्धो. सो सब्बोपि उत्तानत्थोयेव.

मारकायिका देवता अत्तनोतिआदिपञ्हे यस्मा तासं देवतानं सुक्कविस्सट्ठि नाम नत्थि, अञ्ञेसम्पि सुक्कं गहेत्वा न उपसंहरन्ति, अरहतो पन सुक्कमेव नत्थि, तस्मा न हेवन्ति पटिक्खिपति.

नेव अत्तनोतिपञ्हे पन निम्मिनित्वा उपसंहरन्तीति लद्धिया पटिजानाति. लोमकूपेहीतिपञ्हे सप्पितेलानं विय लोमकूपेहि उपसंहरणाभावं दिस्वा पटिक्खिपति.

३०८. हन्द ¶ हीति वचसायत्थे निपातो. ‘‘अरहा नु खो अहं, नो’’ति एवं विमतिं गाहयिस्सामाति एवं वचसायं कत्वा उपसंहरन्तीति अत्थो. अत्थि अरहतो विमतीति पुट्ठो अट्ठवत्थुकं विचिकिच्छं सन्धाय पटिक्खिपति, दुतियं पुट्ठो इत्थिपुरिसानं नामगोत्तादीसु सन्निट्ठानाभावं सन्धाय पटिजानाति.

३०९. अत्थि तस्स आसयोति तस्स सुक्कस्स उच्चारपस्सावानं विय पतिट्ठानोकासो अत्थीति पुच्छति.

३१२. सधम्मकुसलस्साति अत्तनो अरहत्तधम्ममत्तेयेव कुसलस्स. पञ्ञाविमुत्तं सन्धायेवं ¶ वदति. परधम्मकुसलस्साति सधम्मतो परस्मिं ¶ अट्ठसमापत्तिधम्मेपि कुसलस्स. उभतोभागविमुत्तं सन्धायेवं वदति. सेसमेत्थ पाळिअनुसारेनेव वेदितब्बन्ति.

परूपहारकथावण्णना.

२-३-४. अञ्ञाणादिकथावण्णना

३१४. इदानि अञ्ञाणं, कङ्खा, परवितरणाति तिस्सो कथा नाम होन्ति. तत्थ येसं ‘‘अरहतो इत्थिपुरिसादीनं नामगोत्तादीसु ञाणप्पवत्तिया अभावेन अत्थि अञ्ञाणं, तत्थेव सन्निट्ठानाभावेन अत्थि कङ्खा. यस्मा च नेसं तानि वत्थूनि परे वितरन्ति पकासेन्ति आचिक्खन्ति, तस्मा नेसं अत्थि परवितरणा’’ति इमा लद्धियो, सेय्यथापि एतरहि पुब्बसेलियादीनं; तेसं ता लद्धियो भिन्दितुं तीसुपि कथासु पुच्छा सकवादिस्स, पटिञ्ञा च पटिक्खेपो च इतरस्स. तत्थ सब्बेसुपि पञ्हेसु चेव विस्सज्जनेसु च पाळिं अनुगन्त्वाव अत्थो वेदितब्बोति.

अञ्ञाणादिकथावण्णना.

५. वचीभेदकथावण्णना

३२६. इदानि ¶ वचीभेदकथा नाम होति. तत्थ येसं ‘‘सोतापत्तिमग्गक्खणे पठमं झानं समापन्नस्स दुक्खन्ति वाचा भिज्जती’’ति लद्धि, सेय्यथापि एतरहि पुब्बसेलियादीनं; ते सन्धाय समापन्नस्स अत्थि वचीभेदोति पुच्छा सकवादिस्स, लद्धियं ठत्वा पटिञ्ञा परवादिस्स. पुन सब्बत्थाति तयो भवे सन्धाय पुट्ठो अरूपं सन्धाय पटिक्खिपति. सब्बदाति ¶ कालवसेन पुट्ठो पठममग्गक्खणे पठमज्झानिकसमापत्तितो अञ्ञं सब्बं समापत्तिकालं सन्धाय पटिक्खिपति. सब्बेसं समापन्नानन्ति पुट्ठो लोकियसमापत्तियो समापन्ने सन्धाय पटिक्खिपति. सब्बसमापत्तीसूति पुट्ठो दुतियज्झानादिकं लोकुत्तरं सब्बञ्च लोकियसमापत्तिं सन्धाय पटिक्खिपति.

कायभेदोति ¶ अभिक्कमादिवसेन पवत्तकायविञ्ञत्ति. इदं ‘‘यानि चित्तानि वचीविञ्ञत्तिं समुट्ठापेन्ति, तानेव कायविञ्ञत्तिं. एवं सन्ते कस्मा कायभेदोपि न होती’’ति चोदनत्थं पुच्छति. इतरो लद्धिवसेन पटिक्खिपति चेव पटिजानाति च. इदानि यदि सो मग्गक्खणे ‘‘दुक्ख’’न्ति वाचं भासति, ‘‘समुदयो’’तिआदिकम्पि भासेय्य. यदि वा तं न भासति, इतरम्पि न भासेय्याति चोदनत्थं दुक्खन्ति जानन्तोतिआदयो पञ्हा वुत्ता. इतरो पन अत्तनो लद्धिवसेनेव पटिजानाति चेव पटिक्खिपति च. लोकुत्तरं पठमज्झानं समापन्नो दुक्खदुक्खन्ति विपस्सतीति हिस्स लद्धि.

३२८. ञाणन्ति लोकुत्तरं चतुसच्चञाणं. सोतन्ति सोतविञ्ञाणं अधिप्पेतं, येन तं सद्दं सुणाति. द्विन्नं फस्सानन्ति सोतसम्फस्समनोसम्फस्सानं.

३२९. नो वत रे वत्तब्बेति यदि अविसेसेन यंकिञ्चि समापन्नस्स नत्थि वचीभेदो, न अविसेसेन वत्तब्बं ‘‘समापन्नस्स अत्थि वचीभेदो’’ति. सेसमेत्थ उत्तानत्थमेव सद्धिं सुत्तसाधनाय. यं पनेतेन ‘‘सिखिस्स आनन्द, भगवतो’’ति परियोसाने सुत्तं आभतं, तत्थ येन समापत्तिचित्तेन सो वचीभेदो समुट्ठितो, कायभेदोपि तेन समुट्ठातियेव, न च तं लोकुत्तरं पठमज्झानचित्तं, तस्मा असाधकन्ति.

वचीभेदकथावण्णना.

६. दुक्खाहारकथावण्णना

३३४. इदानि ¶ दुक्खाहारकथा नाम होति. तत्थ ‘‘दुक्खं दुक्खन्ति वाचं भासन्तो दुक्खे ञाणं आहरति, तं दुक्खाहारो नाम वुच्चति ¶ . तञ्च पनेतं मग्गङ्गं मग्गपरियापन्न’’न्ति येसं लद्धि, सेय्यथापि एतरहि पुब्बसेलियानं; ते सन्धाय दुक्खाहारोति पुच्छा सकवादिस्स, पटिञ्ञा परवादिस्स. ये केचीति पठमपञ्हे अविपस्सके सन्धाय पटिक्खिपति, दुतियपञ्हे ¶ विपस्सके सन्धाय पटिजानाति, तं पनस्स लद्धिमत्तमेव. तस्मा ‘‘सब्बे ते’’ति वादस्स भिन्दनत्थं बालपुथुज्जनातिआदिमाह. तं उत्तानत्थमेवाति.

दुक्खाहारकथावण्णना.

७. चित्तट्ठितिकथावण्णना

३३५. इदानि चित्तट्ठितिकथा नाम होति. तत्थ येसं समापत्तिचित्तञ्चेव भवङ्गचित्तञ्च अनुप्पबन्धेन पवत्तमानं दिस्वा ‘‘एकमेव चित्तं चिरं तिट्ठती’’ति लद्धि सेय्यथापि एतरहि हेट्ठा वुत्तप्पभेदानं अन्धकानं, तंलद्धिविसोधनत्थं एकं, चित्तं दिवसं तिट्ठतीति पुच्छा सकवादिस्स, पटिञ्ञा परवादिस्स. उपड्ढदिवसो उप्पादक्खणोति एत्थ ठितिक्खणं अनामसित्वा ‘‘अनिच्चा वत सङ्खारा, उप्पादवयधम्मिनो’’ति (सं. नि. १.१८६; २.१४३) देसनानयेन उप्पादवयवसेनेव पुच्छा कता.

ते धम्मा चित्तेन लहुपरिवत्ताति पुट्ठो चित्ततो लहुतरपरिवत्तिनो धम्मे अपस्सन्तो पटिक्खिपति. दुतियं पुट्ठो यस्स चित्तस्स दीघट्ठितिं इच्छति, तं सन्धाय पटिजानाति. यावतायुकं तिट्ठतीति पञ्हे ‘‘चुल्लासीतिसहस्सानि, कप्पा तिट्ठन्ति ये मरू’’तिआदिवचनवसेन (महानि. १०) आरुप्पतो अञ्ञत्र पटिक्खिपति, आरुप्पे पटिजानाति. मुहुत्तं मुहुत्तं उप्पज्जतीति पञ्हे परवादिस्स ‘‘उप्पादवयधम्मिनो’’तिआदिसुत्तविरोधभयेन पटिजानाति. ठितिं पनस्स लद्धिवसेन इच्छति. सेसमेत्थ उत्तानत्थमेवाति.

चित्तट्ठितिकथावण्णना.

८. कुक्कुळकथावण्णना

३३८. इदानि ¶ ¶ कुक्कुळकथा नाम होति. तत्थ येसं ‘‘सब्बं, भिक्खवे, आदित्तं (सं. नि. ४.२८; महाव. ५४) सब्बे सङ्खारा दुक्खा’’तिआदीनि (ध. प. २७८) सुत्तानि अयोनिसो गहेत्वा ¶ ‘‘निप्परियायेनेव सब्बे सङ्खारा कुक्कुळा वीतच्चितङ्गारसम्मिस्सा छारिकनिरयसदिसा’’ति लद्धि, सेय्यथापि एतरहि गोकुलिकानं; तेसं नानप्पकारसुखसन्दस्सनेन तं लद्धिं विवेचेतुं पुच्छा सकवादिस्स, पटिञ्ञा परवादिस्स. तत्थ अनोधिं कत्वाति ओधिं मरियादं कोट्ठासं अकरित्वा, अविसेसेन सब्बेयेवाति अत्थो. सेसं सब्बं पाळिनयेनेव वेदितब्बं सद्धिं सुत्तसाधनायाति.

कुक्कुळकथावण्णना.

९. अनुपुब्बाभिसमयकथावण्णना

३३९. इदानि अनुपुब्बाभिसमयकथा नाम होति. तत्थ येसं –

‘‘अनुपुब्बेन मेधावी, थोकं थोकं खणे खणे;

कम्मारो रजतस्सेव, निद्धमे मलमत्तनो’’ति. (ध. प. २३९) –

आदीनि सुत्तानि अयोनिसो गहेत्वा ‘‘सोतापत्तिफलसच्छिकिरियाय पटिपन्नो एकच्चे किलेसे दुक्खदस्सनेन पजहति, एकच्चे समुदयनिरोधमग्गदस्सनेन, तथा सेसापीति एवं सोळसहि कोट्ठासेहि अनुपुब्बेन किलेसप्पहानं कत्वा अरहत्तपटिलाभो होती’’ति एवरूपा नानाभिसमयलद्धि उप्पन्ना, सेय्यथापि एतरहि अन्धकसब्बत्थिकसम्मितियभद्रयानिकानं; तेसं लद्धिविवेचनत्थं अनुपुब्बाभिसमयोति पुच्छा सकवादिस्स, पटिञ्ञा इतरस्स. अनुपुब्बेन सोतापत्तिमग्गन्ति पुट्ठो पन एकस्स मग्गस्स बहुभावापत्तिभयेन पटिक्खिपति. दुतियं पुट्ठो दुक्खदस्सनादिवसेन पटिजानाति. तानि वा चत्तारिपि ञाणानि एको सोतापत्तिमग्गोयेवाति ¶ पटिजानाति, फलं पन एकमेव इच्छति, तस्मा पटिक्खिपति. सकदागामिमग्गादीसुपि ¶ एसेव नयो.

३४४. मग्गे दिट्ठे फले ठितोति पञ्हे यस्मा दुक्खदस्सनादीहि दस्सनं अपरिनिट्ठितं, मग्गदस्सनेन परिनिट्ठितं नाम होति, तदा सो फले ठितोति सङ्खं गच्छति, तस्मा पटिजानाति.

३४५. दुक्खे ¶ दिट्ठे चत्तारि सच्चानीति पुच्छा परवादिस्स, एकाभिसमयवसेन पटिञ्ञा सकवादिस्स. पुन दुक्खसच्चं चत्तारि सच्चानीति अनुयोगे चतुन्नम्पि नानासभावत्ता पटिक्खेपो तस्सेव.

रूपक्खन्धे अनिच्चतो दिट्ठेति पुच्छा सकवादिस्स, समुद्दतो एकबिन्दुस्स रसे पटिविद्धे सेसउदकस्स पटिवेधो विय एकधम्मे अनिच्चादितो पटिविद्धे सब्बेपि पटिविद्धा होन्तीति लद्धिया पटिञ्ञा परवादिस्स.

चतूहि ञाणेहीति दुक्खे ञाणादीहि. अट्ठहि ञाणेहीति सावकानं साधारणेहि सच्चञाणेहि चेव पटिसम्भिदाञाणेहि च. द्वादसहि ञाणेहीति द्वादसङ्गपटिच्चसमुप्पादञाणेहि. चतुचत्तारीसाय ञाणेहीति ‘‘जरामरणे ञाणं, जरामरणसमुदये ञाण’’न्ति एवं निदानवग्गे वुत्तञाणेहि. सत्तसत्ततिया ञाणेहीति ‘‘जरामरणं, भिक्खवे, अनिच्चं सङ्खतं पटिच्चसमुप्पन्नं खयधम्मं वयधम्मं विरागधम्मं निरोधधम्म’’न्ति (सं. नि. २.२०) एवं तत्थेव वुत्तञाणेहि. सेसमेत्थ पाळिनयेनेव वेदितब्बं सद्धिं सुत्तसाधनेनाति.

अनुपुब्बाभिसमयकथावण्णना.

१०. वोहारकथावण्णना

३४७. इदानि ¶ वोहारकथा नाम होति. तत्थ बुद्धो भगवा लोकुत्तरेन वोहारेन वोहरतीति येसं लद्धि, सेय्यथापि एतरहि अन्धकानं; ते सन्धाय पुच्छा सकवादिस्स, लद्धिवसेन पटिञ्ञा परवादिस्स. लोकुत्तरे सोतेतिआदीनि तस्स अयुत्तवादीभावदीपनत्थं वुत्तानि. अयञ्हेत्थ अधिप्पायो – ‘‘सद्दायतनमेव ते लोकुत्तरं, उदाहु सोतादीनिपी’’ति.

हञ्चि बुद्धस्स भगवतो वोहारो लोकिये सोते पटिहञ्ञतीति एत्थ यदि सो लोकुत्तरे पटिहञ्ञेय्य. लोकुत्तरो सियाति एवमत्थो न गहेतब्बो. लोकिये ¶ पटिहञ्ञमानस्स पन लोकुत्तरता नाम नत्थीति अयमेत्थाधिप्पायो. लोकियेन विञ्ञाणेनाति एत्थापि लोकियेनेवाति ¶ अत्थो. इतरथा अनेकन्तता सिया. लोकुत्तरञ्हि लोकियेनपि ञाणेन ञायती. एवं सब्बं यथानुरूपतो वेदितब्बं. सब्बे ते मग्गं भावेन्तीति पञ्हेसु ये मग्गं नप्पटिलभन्ति, ते सन्धाय पटिक्खिपति. ये पटिलभन्ति, ते सन्धाय पटिजानाति.

३५१. सोवण्णमयायाति सुवण्णमयाय. इदं परवादिस्स उदाहरणं.

एळण्डियायाति एळण्डमयाय. इदं सकवादिस्स उदाहरणं. लोकियं वोहरन्तस्स लोकियोति अयम्पि एका लद्धि. सा एतरहि एकच्चानं अन्धकानं लद्धि. सेसमेत्थ उत्तानत्थमेवाति.

वोहारकथावण्णना.

११. निरोधकथावण्णना

३५३. इदानि निरोधकथा नाम होति. तत्थ येसं अप्पटिसङ्खानिरोधञ्च पटिसङ्खानिरोधञ्च द्वेपि एकतो कत्वा निरोधसच्चन्ति लद्धि, सेय्यथापि एतरहि महिसासकानञ्चेव अन्धकानञ्च; ते सन्धाय द्वे निरोधाति पुच्छा सकवादिस्स, पटिञ्ञा परवादिस्स ¶ . द्वे दुक्खनिरोधाति पञ्हेसु यस्मा द्वे दुक्खसच्चानि न इच्छति, तस्मा पटिक्खिपति. यस्मा द्वीहाकारेहि दुक्खं निरुज्झतीति इच्छति, तस्मा पटिजानाति. द्वे निरोधसच्चानीतिपञ्हेसु द्विन्नं दुक्खसच्चानं निरोधवसेनअनिच्छन्तो पटिक्खिपति. द्वीहाकारेहि दुक्खस्स निरुज्झनतो पटिजानाति. द्वे ताणानीतिआदीसुपि एसेव नयो.

अत्थि द्विन्नं निब्बानानन्तिआदीसु पुच्छासु उच्चनीचतादीनि अपस्सन्तो पटिक्खिपति.

अप्पटिसङ्खानिरुद्धेति ये पटिसङ्खाय लोकुत्तरेन ञाणेन अनिरुद्धा सुद्धपकतिकत्ता वा उद्देसपरिपुच्छादीनं वा वसेन न समुदाचरणतो निरुद्धाति वुच्चन्ति, ते सङ्खारे. पटिसङ्खा निरोधेन्तीति. लोकुत्तरञाणेन निरोधेन्ति अनुप्पत्तिभावं गमेन्ति. ननु अप्पटिसङ्खानिरुद्धा सङ्खाराति ¶ पुच्छा परवादिस्स ¶ . तत्थ भग्गानं पुन अभञ्जनतो अप्पटिसङ्खानिरुद्धानं वा अरियमग्गे उप्पन्ने तथा निरुज्झनतोव सकवादी अच्चन्तभग्गतं पटिजानाति. सेसमेत्थ उत्तानत्थमेवाति.

निरोधकथावण्णना.

दुतियो वग्गो.

३. ततियवग्गो

१. बलकथावण्णना

३५४. इदानि ¶ बलकथा नाम होति. तत्थ येसं अनुरुद्धसंयुत्ते ‘‘इमेसञ्च पनाहं, आवुसो, चतुन्नं सतिपट्ठानानं भावितत्ता बहुलीकतत्ता ठानञ्च ठानतो अट्ठानञ्च अट्ठानतो यथाभूतं पजानामी’’तिआदीनि (सं. नि. ५.९१३) दससुत्तानि अयोनिसो गहेत्वा ‘‘तथागतबलं सावकसाधारण’’न्ति लद्धि, सेय्यथापि एतरहि अन्धकानं; ते सन्धाय पुच्छा सकवादिस्स, लद्धियं ठत्वा पटिञ्ञा परवादिस्स. तथागतबलञ्च नामेतं सावकेहि साधारणम्पि अत्थि असाधारणम्पि साधारणासाधारणम्पि. तत्थ आसवानं खये ञाणं साधारणं. इन्द्रियपरोपरियत्तिञाणं ¶ असाधारणं. सेसं साधारणञ्च असाधारणञ्च. ठानाट्ठानादीनि हि सावका पदेसेन जानन्ति, तथागता निप्पदेसेन. इति तानि उद्देसतो साधारणानि, न निद्देसतो. अयं पन अविसेसेन सब्बम्पि साधारणन्ति आह. तमेनं ततो विवेचेतुं तथागतबलं सावकबलन्ति पुन अनुयोगो आरद्धो. तत्थ पठमपञ्हे निद्देसतो सब्बाकारविसयतं सन्धाय पटिक्खिपति. दुतियपञ्हे उद्देसतो ठानाट्ठानमत्तादिजाननवसेन पटिजानाति. तञ्ञेवातिआदिपञ्हेसु सब्बाकारेन निन्नानाकरणताय अभावेन पटिक्खिपति. पुब्बयोगो च पुब्बचरिया च अत्थतो एकं, तथा धम्मक्खानञ्च धम्मदेसना च.

इन्द्रियपरोपरियत्तिपञ्हे एकदेसेन साधारणतं सन्धाय सावकविसये पटिजानाति.

३५५. इदानि ¶ यस्मा उद्देसतो ठानाट्ठानादीनि सावको जानाति, तस्मा सावकस्स तथा जाननं पकासेत्वा तेन जाननमत्तसामञ्ञेन तेसं सावकसाधारणत्तं पतिट्ठापेतुं सावको ठानाट्ठानं ¶ जानातीतिआदयो परवादिपञ्हा होन्ति. तत्थ इन्द्रियपरोपरियत्तिञाणं छन्नं असाधारणञाणानं अञ्ञतरन्ति न गहितं. आसवक्खयेन वा आसवक्खयन्ति यं तथागतस्स आसवक्खयेन सद्धिं सावकस्स आसवक्खयं पटिच्च वत्तब्बं सिया नानाकरणं, तं नत्थि. विमुत्तिया वा विमुत्तिन्ति पदेपि एसेव नयो. सेसमेत्थ उत्तानत्थमेव.

३५६. इदानि यं सकवादिना ‘‘आसवानं खये ञाणं साधारण’’न्ति अनुञ्ञातं, तेन सद्धिं संसन्दित्वा सेसानम्पि साधारणभावं पुच्छितुं पुन आसवानं खयेतिआदयो परवादिपञ्हाव होन्ति. तेसं विस्सज्जने सकवादिना आसवक्खये विसेसाभावेन तं ञाणं साधारणन्ति अनुञ्ञातं. इतरेसुपि विसेसाभावेन साधारणता पटिक्खित्ता. पुन ठानाट्ठानादीनं आसवक्खयेनेव सद्धिं संसन्दित्वा असाधारणपुच्छा परवादिस्सेव. तत्थ आसवक्खयञाणे पटिक्खेपो, सेसेसु च पटिञ्ञा सकवादिस्स. ततो इन्द्रियपरोपरियत्तेन सद्धिं संसन्दित्वा असाधारणपुच्छा परवादिस्स. सा सङ्खिपित्वा दस्सिता. तथापि इन्द्रियपरोपरियत्ते पटिञ्ञा, सेसेसु च पटिक्खेपो सकवादिस्स. ततो ठानाट्ठानादीहि सद्धिं संसन्दित्वा इन्द्रियपरोपरियत्तस्स साधारणपुच्छा परवादिस्स. सापि सङ्खिपित्वाव दस्सिता. तत्थ इन्द्रियपरोपरियत्ते पटिक्खेपो. सेसेसु च पटिञ्ञा सकवादिस्साति.

बलकथावण्णना.

२. अरियन्तिकथावण्णना

३५७. इदानि ¶ अरियन्तिकथा नाम होति. तत्थ येसं ‘‘न केवलं आसवक्खयञाणमेव अरियं, अथ खो पुरिमानिपि नव बलानि अरियानि’’च्चेव लद्धि, सेय्यथापि एतरहि अन्धकानं; ते सन्धाय अरियन्ति पुच्छा सकवादिस्स, पटिञ्ञा इतरस्स. पुन यदि तं अरियं, मग्गादीसु तेन अञ्ञतरेन ¶ भवितब्बन्ति मग्गादिवसेन पुच्छा सकवादिस्स, पटिक्खेपो इतरस्स.

पुन सुञ्ञतारम्मणादिवसेन पुच्छा सकवादिस्स. तत्थ द्वे सुञ्ञता – सत्तसुञ्ञता च सङ्खारसुञ्ञता च. सत्तसुञ्ञता नाम दिट्ठिया ¶ परिकप्पितेन सत्तेन सुञ्ञा पञ्चक्खन्धा. सङ्खारसुञ्ञता नाम सब्बसङ्खारेहि सुञ्ञं विवित्तं निस्सटं निब्बानं. तत्थ परवादी निब्बानारम्मणतं सन्धाय पटिक्खिपति, सङ्खारारम्मणतं सन्धाय पटिजानाति. मनसि करोतीति पुट्ठोपि निब्बानमेव सन्धाय पटिक्खिपति, सङ्खारे सन्धाय पटिजानाति. ततो सकवादिना ‘‘ठानाट्ठानादिमनसिकारो सङ्खारारम्मणो, सुञ्ञतमनसिकारो निब्बानारम्मणो’’ति इमं नयं गहेत्वा ‘‘द्विन्नं फस्सानं द्विन्नं चित्तानं समोधानं होती’’ति पुट्ठो लेसोकासं अलभन्तो पटिक्खिपति. अनिमित्तापणिहितेसुपि एसेव नयो. सत्तनिमित्ताभावतो हि खन्धा अनिमित्ता. सङ्खारनिमित्ताभावतो निब्बानं. एकधम्मस्मिम्पि आरोपेत्वा ठपेतब्बसङ्खातेन च पणिदहितब्बट्ठेन पणिहितसङ्खं गतेन सत्तपणिधिना अप्पणिहिता खन्धा. तण्हापणिधिना तण्हाय वा आरम्मणभूतेन सब्बसङ्खारपणिधिना अप्पणिहितं निब्बानं. तस्मा इधापि पटिक्खेपो च पटिञ्ञा च पुरिमनयेनेव वेदितब्बा.

३५८. ततो ‘‘यथा सतिपट्ठानादयो लोकुत्तरधम्मा अरिया चेव सुञ्ञतादिआरम्मणा च, किं ते एवं ठानाट्ठानञाण’’न्ति अनुलोमपटिलोमपुच्छा होन्ति. तत्थ सब्बापि पटिञ्ञा सब्बे च पटिक्खेपा परवादिस्सेव. इमिनावुपायेन सेसञाणेसुपि पुच्छाविस्सज्जनं वेदितब्बं. पाळियं पन सेसानि सङ्खिपित्वा अवसाने चुतूपपातञाणमेव विभत्तं. ततो परं सकसमयेपि ‘‘अरिय’’न्ति सिद्धेन आसवानं खयञाणेन सद्धिं संसन्दित्वा सेसञाणानं अनुलोमतो च पटिलोमतो च अरियभावपुच्छा होन्ति. ता सब्बा परवादिस्स, पटिञ्ञा पटिक्खेपो च सकवादिस्स ¶ . ते उत्तानत्थायेव. पाळियं पनेत्थ पठमनवमानेव दस्सेत्वा सत्त ञाणानि सङ्खित्तानीति.

अरियन्तिकथावण्णना.

३. विमुत्तिकथावण्णना

३६३. इदानि ¶ ¶ विमुत्तिकथा नाम होति. तत्थ येसं ‘‘वीतरागचित्तानं विमुत्तिपयोजनं नाम नत्थि. यथा पन मलीनं वत्थं धोवियमानं मला विमुच्चति, एवं सरागं चित्तं रागतो विमुच्चती’’ति लद्धि, सेय्यथापि एतरहि अन्धकानं; ते सन्धाय सरागन्ति पुच्छा सकवादिस्स, पटिञ्ञा इतरस्स. ततो रागसहगतन्तिआदिना नयेन पुट्ठो मग्गक्खणे चित्तं विमुच्चति नाम. तदा च एवरूपं चित्तं नत्थीति पटिक्खिपति.

सफस्सन्तिआदिना नयेन पुट्ठोपि यथा फस्सो च चित्तञ्च उभो रागतो विमुच्चन्ति, एवं रागस्स विमुत्तिं अपस्समानो पटिक्खिपति. सदोसादीसुपि इमिनावुपायेन अत्थो वेदितब्बो.

विमुत्तिकथावण्णना.

४. विमुच्चमानकथावण्णना

३६६. इदानि विमुच्चमानकथा नाम होति. तत्थ येसं ‘‘झानेन विक्खम्भनविमुत्तिया विमुत्तं, मग्गक्खणे समुच्छेदविमुत्तिया विमुच्चमानं नाम होती’’ति लद्धि, ते सन्धाय विमुत्तं विमुच्चमानन्ति पुच्छा सकवादिस्स, पटिञ्ञा इतरस.

पुन एकदेसन्ति पुच्छा सकवादिस्स. तत्थ एकदेसन्ति भावनपुंसकं. यथा विमुत्तं, एकदेसेन ¶ वा एकदेसे वा अविमुत्तं होति किं एवं एकदेसं विमुत्तं, एकदेसं अविमुत्तन्ति पुच्छति. किं कारणा एवं पुच्छतीति? ‘‘विमुत्तं विमुच्चमान’’न्ति विप्पकतभावेन वुत्तत्ता. यथा हि करियमाना कटादयो विप्पकतत्ता एकदेसेन कता एकदेसेन अकता होन्ति, तथा इदम्पि एकदेसं विमुत्तं एकदेसं अविमुत्तन्ति आपज्जति. ततो परवादी कटादीनं विय चित्तस्स एकदेसाभावा पठमपञ्हे पटिक्खिपित्वा दुतिये विमुच्चमानस्स अपरिनिट्ठितविमुत्तिताय पटिजानाति. लोकियज्झानक्खणं वा सन्धाय पटिक्खिपति. न हि तं तदा समुच्छेदविमुत्तिया विमुच्चमानं. लोकुत्तरज्झानक्खणं सन्धाय पटिजानाति. तञ्हि तदा समुच्छेदविमुत्तिया विमुत्तेकदेसेन ¶ विमुच्चमानन्तिस्स लद्धि. ततो सकवादी ‘‘यदि ते एकमेव ¶ चित्तं एकदेसं विमुत्तं एकदेसं अविमुत्तं, एवं सन्ते यो एकेनेव चित्तेन सोतापन्नो होति, सोपि ते एकदेसं सोतापन्नो, एकदेसं न सोतापन्नो आपज्जती’’ति चोदनत्थं एकदेसं सोतापन्नोतिआदिमाह. इतरो तं विधानं अपस्सन्तो पटिक्खिपति. सेसवारेसुपि एसेव नयो.

उप्पादक्खणपञ्हे यदि एकमेव चित्तं विमुत्तञ्च विमुच्चमानञ्च, एकस्मिं खणे विमुत्तं एकस्मिं विमुच्चमानं आपज्जति. किं ते एवरूपं चित्तन्ति अत्थो.

३६७. सुत्तसाधने पठमसुत्तं परवादिस्स. तत्रास्सायमधिप्पायो – विमुच्चतीति विप्पकतनिद्देसो. तस्मा यं तस्स योगिनो एवं जानतो एवं पस्सतो एतेहि आसवेहि चित्तं विमुच्चति, तं विमुच्चमानं नाम होतीति. दुतियसुत्तं सकवादिस्स. तत्रास्सायमधिप्पायो – यदि ते विमुच्चतीति वचनतो विमुत्तं विमुच्चमानं, इध विमुच्चतीति वचनाभावतो विमुत्तमेव सिया, न विमुच्चमानन्ति.

इदानि ‘‘यथा ते विप्पकतविमुत्तिताय विमुच्चमानं, किं एवं विप्पकतरागादिताय रज्जमानादीनिपि अत्थी’’ति चोदनत्थं पुन अत्थि चित्तन्तिआदि आरद्धं. परवादिनापि तथारूपं चित्तं अपस्सन्तेन सब्बं पटिक्खित्तं. अथ नं सकवादी ‘‘द्वेयेव कोटियो, ततिया नत्थी’’ति अनुबोधेन्तो ननु रत्तञ्चेव अरत्तञ्चातिआदिमाह. तस्सत्थो – ननु भद्रमुख, रागसम्पयुत्तं चित्तं रत्तं विप्पयुत्तं अरत्तन्ति द्वेव कोटियो, रज्जमानं नाम ततिया कोटि नत्थीति? दुट्ठादीसुपि एसेव नयो. अथ नं आमन्ताति पटिजानित्वा ठितं. विमुत्तिपक्खेपि द्वेयेव ¶ कोटियो दस्सेतुं हञ्चि रत्तञ्चेवातिआदिमाह. तस्सत्थो – यदि एता द्वे कोटियो सम्पटिच्छसि, अविमुत्तञ्चेव विमुत्तञ्चा ति इमापि सम्पटिच्छ. किलेससम्पयुत्तञ्हि चित्तं अविमुत्तं, विप्पयुत्तं विमुत्तं. विमुच्चमानं नामाति परमत्थतो ततिया कोटि नत्थीति.

विमुच्चमानकथावण्णना.

५. अट्ठमककथावण्णना

३६८. इदानि ¶ ¶ अट्ठमककथा नाम होति. तत्थ येसं अनुलोमगोत्रभुमग्गक्खणे किलेसानं समुदाचाराभावतो अट्ठमकस्स सोतापत्तिमग्गट्ठपुग्गलस्स द्वे परियुट्ठाना पहीनाति लद्धि, सेय्यथापि एतरहि अन्धकानञ्चेव सम्मितियानञ्च; तेसं अञ्ञतरं सन्धाय पुच्छा सकवादिस्स, मग्गक्खणतो पट्ठाय दिट्ठिया अनुप्पत्तिं सन्धाय पटिञ्ञा इतरस्स. ततो यस्मा दिट्ठि नामेसा सोतापन्नस्सेव पहीना, न मग्गट्ठस्स, तस्मा अट्ठमको पुग्गलो सोतापन्नोति अनुयोगो सकवादिस्स. विचिकिच्छापञ्हेपि एसेव नयो. अनुसयपञ्हे परियुट्ठानतो अञ्ञो अनुसयोति तेसं लद्धि, तस्मा ‘‘न हेव’’न्ति पटिक्खित्तं.

सीलब्बतपरामासपञ्हेपि सीलब्बतपरामासपरियुट्ठानन्ति वोहारं न पस्सति, तस्मा पटिक्खिपति. परियुट्ठानमेवस्स पहीनन्ति लद्धि.

३६९. मग्गो भावितोति पञ्हे तस्मिं खणे भावेति, न भावितो. तस्मा पटिक्खिपति. अमग्गेनातिआदिअनुयोगे पठममग्गेनेव पहीनभावं सन्धाय पटिक्खिपति. यदि हि अमग्गेन पहीयेथ, गोत्रभुपुग्गलादीनम्पि पहीयेथाति आपज्जनतो. उप्पज्जिस्सतीति पुच्छा परवादिस्स, विस्सज्जनं सकवादिस्स. सेसं सब्बत्थ उत्तानत्थमेवाति.

अट्ठमककथावण्णना.

६. अट्ठमकस्स इन्द्रियकथावण्णना

३७१. इदानि ¶ अट्ठमकस्स इन्द्रियकथा नाम होति. तत्थ येसं ‘‘अट्ठमको मग्गक्खणे इन्द्रियानि पटिलभति नाम, नो चस्स पटिलद्धानि होन्ती’’ति लद्धि, सेय्यथापि एतरहि अन्धकानं; ते सन्धाय नत्थि सद्धिन्द्रियन्ति पुच्छा सकवादिस्स, पटिञ्ञा इतरस्स. नत्थि सद्धाति पुट्ठो पन सद्धिन्द्रियतो सद्धाय नानत्तं सल्लक्खेत्वा पटिक्खिपति. सेसेसुपि एसेव नयो. यथा पन यस्स अत्थि मनो, तस्स मनिन्द्रियम्पि अत्थि; एवं यस्स ¶ सद्धादयो अत्थि, तस्स अत्थि सद्धिन्द्रियादीनिपीति दीपनत्थं ¶ अत्थि मनो अत्थि मनिन्द्रियन्तिआदि आरद्धं. तं सब्बं उत्तानत्थमेव सद्धिं सुत्तसाधनेनाति.

अट्ठमकस्स इन्द्रियकथावण्णना.

७. दिब्बचक्खुकथावण्णना

३७३. इदानि दिब्बचक्खुकथा नाम होति. तत्थ येसं चतुत्थज्झानधम्मूपत्थद्धं मंसचक्खुमेव दिब्बचक्खु नाम होतीति लद्धि, सेय्यथापि एतरहि अन्धकानञ्चेव सम्मितियानञ्च; ते सन्धाय मंसचक्खुन्ति पुच्छा सकवादिस्स, पटिञ्ञा इतरस्स.

पुन ‘‘मंसचक्खु दिब्बचक्खु, दिब्बचक्खु मंसचक्खू’’ति पुट्ठो तं मत्तमेव तं न होतीति पटिक्खिपति. यादिसन्तिआदिपुच्छासुपि उभिन्नं एकसभावाभावेनेव पटिक्खिपति.

विसयोतिआदीसु उभिन्नम्पि रूपायतनमेव विसयो. मंसचक्खु पन आपाथगतमेव पस्सति. इतरं अनापाथगतं तिरोपब्बतादिगतम्पि. दिब्बचक्खुस्स च अतिसुखुमम्पि रूपं गोचरो, न तादिसं इतरस्साति एवमेतेसं आनुभावगोचरा असदिसा.

उपादिण्णं हुत्वा अनुपादिण्णं होतीति पुट्ठो यस्मा मंसचक्खु उपादिण्णं, दिब्बचक्खु अनुपादिण्णं, न च मंसचक्खुमेव दिब्बचक्खूति इच्छति, तस्मा पटिक्खिपति. दुतियं पुट्ठो यस्मा ¶ ‘‘मंसचक्खुस्स उप्पादो, मग्गो दिब्बस्स चक्खुनो’’ति वचनं निस्साय मंसचक्खुपच्चया दिब्बचक्खु उप्पज्जति, तञ्च रूपावचरिकानं चतुन्नं महाभूतानं पसादोति इच्छति, तस्मा पटिजानाति. कामावचरं हुत्वाति पुट्ठोपि यस्मा न मंसचक्खुमेव दिब्बचक्खूति इच्छति, तस्मा पटिक्खिपति. दुतियं पुट्ठो रूपावचरज्झानपच्चयेन उप्पन्नत्ता रूपावचरं नाम जातन्ति पटिजानाति.

रूपावचरं हुत्वा अरूपावचरन्ति पुट्ठोपि ततो परं भावनाय अरूपावचरक्खणे रूपावचरचित्तस्स अभावा पटिक्खिपति. दुतियं पुट्ठो अरूपावचरिकानं ¶ चतुन्नं महाभूतानं पसादो हुत्वा उप्पज्जतीति लद्धिया ¶ पटिजानाति. अपरियापन्नभावं पनस्स न इच्छति, तस्मा पटिक्खिपतियेव.

३७४. दिब्बचक्खुं धम्मुपत्थद्धन्ति कामावचरधम्मेन उपत्थम्भितं हुत्वा. पुन धम्मुपत्थद्धन्ति लोकुत्तरधम्मेन उपत्थद्धं. द्वेव चक्खूनीति पुट्ठो किञ्चापि दिब्बचक्खुनो धम्मुपत्थद्धस्स पञ्ञाचक्खुभावं न इच्छति, पञ्ञाचक्खुस्स पन अत्थिताय पटिक्खिपति. पुन पुट्ठो मंसचक्खु धम्मुपत्थद्धं दिब्बचक्खु होतीति लद्धिवसेन पटिजानाति. सेसमेत्थ उत्तानत्थमेवाति.

दिब्बचक्खुकथावण्णना.

८. दिब्बसोतकथावण्णना

३७५. इदानि दिब्बसोतकथा नाम होति. तत्थ एकंयेव सोतन्ति पुट्ठो द्विन्नं अत्थिताय पटिक्खिपति. पुन पुट्ठो यस्मा तदेव धम्मुपत्थद्धं दिब्बसोतं नाम होति, तस्मा पटिजानाति. सेसं हेट्ठा वुत्तनयमेवाति.

दिब्बसोतकथावण्णना.

९. यथाकम्मूपगतञाणकथावण्णना

३७७. इदानि ¶ यथाकम्मूपगतञाणकथा नाम होति. तत्थ येसं ‘‘इति दिब्बेन चक्खुना विसुद्धेन…पे… यथाकम्मूपगे सत्ते पजानाती’’ति (दी. नि. १.२४६; पटि. म. १.१०६) सुत्तं अयोनिसो गहेत्वा यथाकम्मूपगतञाणमेव दिब्बचक्खुन्ति लद्धि, ते सन्धाय पुच्छा सकवादिस्स, पटिञ्ञा इतरस्स. पुन यथाकम्मूपगतञ्च मनसि करोतीति पुट्ठो एकचित्तस्स आरम्मणद्वयाभावा पटिक्खिपति. दुतियं पुट्ठो नानाचित्तवसेन पटिजानाति. पुन लेसोकासं अदत्वा द्विन्नं फस्सानन्ति पुट्ठो पटिक्खिपति. इति यथा इमिना यथाकम्मूपगतपदेन, एवमेव इमे वत भोन्तो ¶ , सत्तातिआदिपदेहिपि सद्धिं योजनासु अत्थो वेदितब्बो.

३७८. आयस्मा ¶ सारिपुत्तो यथाकम्मूपगतं ञाणं जानातीति इदं सकवादी यस्मा थेरो अप्पिच्छताय अभिञ्ञाञाणानि न वळञ्जेतीति एकच्चे न जानन्ति, तानि पनस्स नेव अत्थीति मञ्ञन्ति, तस्मा तं ‘‘दिब्बचक्खुनो अलाभी थेरो’’ति मञ्ञमानं पुच्छति. तेनेव कारणेन ‘‘अत्थायस्मतो सारिपुत्तस्स दिब्बचक्खू’’ति परतो पुट्ठो पटिक्खिपति. दुतियं पुट्ठो यंकिञ्चि सावकेन पत्तब्बं, सब्बं तं थेरेन अनुप्पत्तन्ति पटिजानाति. इदानिस्स विक्खेपं करोन्तो सकवादी ननु आयस्मा सारिपुत्तोतिआदिमाह. इमञ्हि गाथं थेरो वळञ्जनपणिधिया एव अभावेन आह, न अभिञ्ञाञाणस्स अभावेन. परवादी पन अभावेनेवाति अत्थं सल्लक्खेति. तस्मा तस्स लद्धिया थेरस्स यथाकम्मूपगतञाणमेव अत्थि, नो दिब्बचक्खु. तेन वुत्तं ‘‘तेन हि न वत्तब्बं यथाकम्मूपगतञाणं दिब्बचक्खू’’ति.

यथाकम्मूपगतञाणकथावण्णना.

१०. संवरकथावण्णना

३७९. इदानि संवरकथा नाम होति. तत्थ येसं तावतिंसे देवे उपादाय ततुत्तरि देवेसु यस्मा ते पञ्च वेरानि न समाचरन्ति, तस्मा संवरो अत्थीति लद्धि, ते सन्धाय पुच्छा ¶ सकवादिस्स, वेरसमुदाचारं अपस्सतो पटिञ्ञा इतरस्स. ततो यस्मा संवरो नाम संवरितब्बे असंवरे सति होति, तस्मा असंवरपुच्छा सकवादिस्स, देवेसु पाणातिपातादीनं अभावेन पटिक्खेपो इतरस्स.

अत्थि मनुस्सेसूतिआदि संवरे सति असंवरस्स असंवरे च सति संवरस्स पवत्तिदस्सनत्थं वुत्तं.

३८०. पाणातिपाता वेरमणीति आदिपञ्हेसु पाणातिपातादीनं असमाचरणवसेन पटिञ्ञा, पाणातिपातादीनं नत्थिताय पटिक्खेपो वेदितब्बो. पटिलोमपञ्हा उत्तानत्थायेव.

अवसाने नत्थि देवेसु संवरोतिपञ्हे ¶ पाणातिपातादीनि कत्वा पुन ततो संवराभावं सन्धाय पटिञ्ञा सकवादिस्स. ततो छलवसेन ¶ यदि संवरो नत्थि, सब्बे देवा पाणातिपातिनोतिआदिपुच्छा परवादिस्स. देवानं वेरसमुदाचारस्स अभावेन पटिक्खेपो सकवादिस्स. नहेवन्ति वचनमत्तं गहेत्वा लद्धिपतिट्ठापनं परवादिस्स. एवं पतिट्ठिता पन लद्धि अप्पतिट्ठिताव होतीति.

संवरकथावण्णना.

११. असञ्ञकथावण्णना

३८१. इदानि असञ्ञकथा नाम होति. तत्थ येसं ‘‘सङ्खारपच्चया विञ्ञाण’’न्ति वचनतो विना विञ्ञाणेन पटिसन्धि नाम नत्थि. ‘‘सञ्ञुप्पादा च पन ते देवा तम्हा काया चवन्ती’’ति वचनतो असञ्ञसत्तानम्पि चुतिपटिसन्धिक्खणे सञ्ञा अत्थीति लद्धि, सेय्यथापि एतरहि अन्धकानं; ते सन्धाय पुच्छा सकवादिस्स, पटिञ्ञा इतरस्स. ततो नं सकवादी ‘‘किं ते तं ठानं सञ्ञाभवो’’तिआदीहि चोदेतुं सञ्ञाभवो सञ्ञागतीतिआदिमाह. तं सब्बं ततो परञ्च पाळिनयेनेव वेदितब्बन्ति.

असञ्ञकथावण्णना.

१२. नेवसञ्ञानासञ्ञायतनकथावण्णना

३८४. इदानि ¶ नेवसञ्ञानासञ्ञायतनकथा नाम होति. तत्थ येसं ‘‘नेवसञ्ञानासञ्ञायतन’’न्ति वचनतो न वत्तब्बं ‘‘तस्मिं भवे सञ्ञा अत्थी’’ति लद्धि, सेय्यथापि एतरहि अन्धकानं; ते सन्धाय पुच्छा सकवादिस्स, पटिञ्ञा इतरस्स. सेसमेत्थ सब्बं पाळिनयेनेव वेदितब्बन्ति.

नेवसञ्ञानासञ्ञायतनकथावण्णना.

ततियो वग्गो.

४. चतुत्थवग्गो

१. गिहिस्स अरहातिकथावण्णना

३८७. इदानि ¶ ¶ गिहिस्स अरहाति कथा नाम होति. तत्थ येसं यसकुलपुत्तादीनं गिहिब्यञ्जने ठितानं अरहत्तप्पत्तिं दिस्वा ‘‘गिहि अस्स अरहा’’ति लद्धि, सेय्यथापि एतरहि उत्तरापथकानं; ते सन्धाय पुच्छा सकवादिस्स. तत्थ गिहिस्साति यो गिहिसंयोजनसम्पयुत्तताय गिहि, सो अरहं अस्साति अत्थो. परवादी पन अधिप्पायं असल्लक्खेत्वा गिहिब्यञ्जनमत्तमेव पस्सन्तो पटिजानाति. इदानिस्स ‘‘गिहि नाम गिहिसंयोजनेन होति, न ब्यञ्जनमत्तेन. यथाह भगवा –

‘अलङ्कतो चेपि समं चरेय्य,

सन्तो दन्तो नियतो ब्रह्मचारी;

सब्बेसु भूतेसु निधाय दण्डं,

सो ब्राह्मणो सो समणो स भिक्खू’’’ति. (ध. प. १४२);

इमं ¶ नयं दस्सेतुं अत्थि अरहतोतिआदि आरद्धं. तं सब्बं उत्तानत्थमेवाति.

गिहिस्स अरहातिकथावण्णना.

२. उपपत्तिकथावण्णना

३८८. इदानि उपपत्तिकथा नाम होति. तत्थ येसं ‘‘ओपपातिको होति तत्थपरिनिब्बायी’’तिवचनानि (पु. प. ३५-४०) अयोनिसो गहेत्वा सुद्धावासेसु उपपत्तिया अरहाति लद्धि, ‘‘येसं वा उपहच्चपरिनिब्बायी’’ति ¶ पदं परिवत्तित्वा ‘‘उपपज्जपरिनिब्बायी’’ति परियापुणन्तानं सह उपपत्तिया अरहा होतीति लद्धि, सेय्यथापि एतरहि उत्तरापथकानं; ते सन्धाय पुच्छा सकवादिस्स, पटिञ्ञा इतरस्स. तत्थ यस्मा उपपत्तिचित्तं नाम लोकियं, तेन सोतापन्नादयोपि न होन्ति, पगेव अरहा. तस्मास्स ¶ इमं नयं दस्सेतुं सह उपपत्तिया सोतापन्नोतिआदि आरद्धं.

३८९. सारिपुत्तोतिआदि इमेसु महाथेरेसु को एकोपि सह उपपत्तिया अरहा नामाति चोदनत्थं वुत्तं.

३९०. उपपत्तेसियेनाति पटिसन्धिचित्तेन. तञ्हि उपपत्तिं एसति गवेसति, तस्मा उपपत्तेसियन्ति वुच्चति. सेसमेत्थ उत्तानत्थमेवाति.

उपपत्तिकथावण्णना.

३. अनासवकथावण्णना

३९१. इदानि अनासवकथा नाम होति. तत्थ ये धम्मा अनासवस्स अरहतो, सब्बे ते ¶ अनासवाति येसं लद्धि, सेय्यथापि एतरहि उत्तरापथकानं; ते सन्धाय अरहतोति पुच्छा सकवादिस्स, पटिञ्ञा इतरस्स. अथ नं अनासवा नाम मग्गादयो, किं तस्स तेयेव उप्पज्जन्तीति चोदनत्थं मग्गो फलन्तिआदि आरद्धं. चक्खु अनासवन्ति पुट्ठो तस्स सासवत्ता पटिक्खिपति. दुतियं पुट्ठो अनासवस्सेतन्ति पटिजानाति.

३९२. चीवरपञ्हे एकोव धम्मो अनासवो सासवो च होतीति लक्खणविरोधभया पटिक्खिपति. दुतियं पुट्ठो अनासवस्स हुत्वा सासवस्स होतीति पटिजानाति. तञ्ञेव अनासवन्ति पञ्हाद्वयेपि एसेव नयो. सकवादी पन तञ्ञेवाति अनुञ्ञातत्ता ‘‘मग्गो अनासवो हुत्वा’’तिआदीहि चोदेति. इमिना उपायेन सब्बत्थ अत्थो वेदितब्बोति.

अनासवकथावण्णना.

४. समन्नागतकथावण्णना

३९३. इदानि ¶ ¶ समन्नागतकथा नाम होति. तत्थ द्वे समन्नागमा पच्चुप्पन्नक्खणे समङ्गीभावसमन्नागमो च रूपावचरादीसु अञ्ञतरभूमिप्पत्तितो पटिलाभसमन्नागमो च. सो याव अधिगतविसेसा न परिहायति, तावदेव लब्भति. येसं पन ठपेत्वा इमे द्वे समन्नागमे अञ्ञो उपपत्तिधम्मवसेन एको समन्नागमो नाम होतीति लद्धि, सेय्यथापि एतरहि उत्तरापथकानं, तेसं पत्तिधम्मो नाम कोचि नत्थीति अनुबोधनत्थं अरहा चतूहि फलेहि समन्नागतोति पुच्छा सकवादिस्स, पत्तिं सन्धाय पटिञ्ञा इतरस्स. अथस्स ‘‘यदि ते अरहा चतूहि खन्धेहि विय चतूहि फलेहि समन्नागतो, एवं सन्ते ये चतूसु फलेसु चत्तारो फस्सादयो, तेहि ते अरहतो समन्नागतता पापुणाती’’ति चोदनत्थं अरहा चतूहि फस्सेहीतिआदि आरद्धं. तं सब्बं परवादिना एकक्खणे चतुन्नं फस्सादीनं अभावा पटिक्खित्तं. अनागामिपञ्हादीसुपि एसेव नयो.

३९५. सोतापत्तिफलं वीतिवत्तोति न पठमज्झानं विय दुतियज्झानलाभी; पुन अनुप्पत्तिया ¶ पन वीतिवत्तोति पुच्छति. सोतापत्तिमग्गन्तिआदि यं वीतिवत्तो, तेनस्स पुन असमन्नागमं दस्सेतुं आरद्धं.

३९६. तेहि च अपरिहीनोति पञ्हे यस्मा यथा पच्चनीकसमुदाचारेन लोकियज्झानधम्मा परिहायन्ति, न एवं लोकुत्तरा. मग्गेन हि ये किलेसा पहीयन्ति, फलेन च पटिप्पस्सम्भन्ति, ते तथा पहीनाव तथा पटिप्पस्सद्धायेव च होन्ति, तस्मा सकवादिना आमन्ताति पटिञ्ञातं. स्वायमत्थो परतो ‘‘अरहता चत्तारो मग्गा पटिलद्धा’’तिआदीसु पकासितोयेव. सेसं उत्तानत्थमेवाति.

समन्नागतकथावण्णना.

५. उपेक्खासमन्नागतकथावण्णना

३९७. अरहा ¶ छहि उपेक्खाहीति कथायपि इमिनाव नयेन अत्थो वेदितब्बो. अरहा हि छसु द्वारेसु उपेक्खानं उप्पत्तिभब्बताय ¶ ताहि समन्नागतोति वुच्चति, न एकक्खणे सब्बासं उप्पत्तिभावेनाति.

उपेक्खासमन्नागतकथावण्णना.

६. बोधियाबुद्धोतिकथावण्णना

३९८. इदानि बोधिया बुद्धोतिकथा नाम होति. तत्थ बोधीति चतुमग्गञाणस्सापि सब्बञ्ञुतञ्ञाणस्सापि अधिवचनं. तस्मा येसं यथा ओदातेन वण्णेन ओदातो, सामेन वण्णेन सामो, एवं बोधिया बुद्धोति लद्धि, सेय्यथापि एतरहि उत्तरापथकानंयेव; ते सन्धाय पुच्छा च अनुयोगो च सकवादिस्स, पटिञ्ञा च पटिक्खेपो च इतरस्स.

अतीतायाति ¶ पञ्हे तस्मिं खणे अभावतो पटिक्खिपति. दुतियं पुट्ठो पटिलाभं सन्धाय पटिजानाति. पुन किच्चवसेन पुट्ठो किच्चाभावतो पटिक्खिपति. दुतियं पुट्ठो यं तेन ताय करणीयं कतं, तत्थ सम्मोहाभावं पटिजानाति. लेसोकासं पन अदत्वा दुक्खं परिजानातीतिआदिना नयेन पुट्ठो तस्स किच्चस्स अभावा पटिक्खिपति.

अनागतपञ्हे तस्मिं खणे मग्गञाणस्स अभावा पटिक्खिपति. दुतियं पुट्ठो ‘‘अगमा राजगहं बुद्धो’’ति (सु. नि. ४१०) अनागताय बोधिया बुद्धभावं मञ्ञमानो पटिजानाति. बोधिकरणीयं करोतीति पुट्ठो तस्मिं खणे किच्चाभावेन पटिक्खिपति. दुतियं पुट्ठो यदि न करेय्य, बुद्धोति न वुच्चेय्य. यस्मा अवस्सं करिस्सति, तस्मा करोतियेव नामाति पटिजानाति. पुन लेसोकासं अदत्वा पुट्ठो पटिक्खिपति. पच्चुप्पन्नपञ्हो सद्धिं संसन्दनाय उत्तानत्थोव.

३९९. तिस्सो बोधियो एकतो कत्वा पुट्ठो सब्बञ्ञुतञ्ञाणं सन्धाय तीहिपि बुद्धोति वत्तब्बभावतो पटिजानाति. पुन तीहिति पुट्ठो सब्बासं ¶ एकक्खणे अभावा पटिक्खिपति. दुतियं पुट्ठो अतीतानागतपच्चुप्पन्नस्स सब्बञ्ञुतञ्ञाणस्स वसेन पटिजानाति. पुन लेसोकासं अदत्वा सततं समितन्ति पुट्ठो पटिक्खिपति.

न बत्तब्बं बोधियाति पुच्छा परवादिस्स, बोधिया अभावक्खणे अबुद्धभावापत्तितो पटिञ्ञा सकवादिस्स. ननु बोधिपटिलाभाति पञ्हे पन यस्मिं सन्ताने बोधिसङ्खातं ¶ मग्गञाणं उप्पन्नं, तत्थ बुद्धोति सम्मुतिसब्भावतो पटिञ्ञा तस्सेव. तस्स अधिप्पायं अजानित्वा हञ्चीति लद्धिट्ठपना परवादिस्स. इदानिस्स असल्लक्खणं पाकटं कातुं बोधिपटिलाभा बुद्धोति बोधिया बुद्धोति पुच्छा सकवादिस्स. तस्सत्थो – ‘‘किं ते यस्मा बोधिपटिलाभा बुद्धो, तस्मा बोधिया बुद्धो’’ति. इतरो ‘‘बोधिपटिलाभो नाम बोधिया उप्पज्जित्वा निरुद्धायपि सन्ताने उप्पन्नभावोयेव. बोधि नाम मग्गक्खणे ञाण’’न्ति इमं विभागं असल्लक्खेन्तोव पुन पटिजानाति. ततो सकवादिना बोधिपटिलाभा बोधीति पुट्ठो वचनोकासं अलभन्तो पटिक्खिपतीति.

बोधियाबुद्धोतिकथावण्णना.

इति इमा तिस्सोपि कथा उत्तरापथकानंयेव.

७. लक्खणकथावण्णना

४००. इदानि ¶ लक्खणकथा नाम होति. तत्थ ‘‘येहि समन्नागतस्स महापुरिसस्स द्वेव गतियो भवन्ती’’ति (दी. नि. १.२५८) इमं सुत्तं अयोनिसो गहेत्वा लक्खणसमन्नागतो बोधिसत्तोव होतीति येसं लद्धि, सेय्यथापि एतरहि उत्तरापथकानं; ते सन्धाय पुच्छा सकवादिस्स, पटिञ्ञा इतरस्स.

चक्कवत्तिसत्तोति पञ्हेसु यस्मा चक्कवत्ती सत्तोपि च बोधिसत्तोपि, तस्मा अबोधिसत्तं सन्धाय पटिक्खिपति. बोधिसत्तं सन्धाय पटिजानाति.

४०२. द्वत्तिंसिमानीतिसुत्तं ¶ बोधिसत्तमेव सन्धाय वुत्तं. सो हि पच्छिमे भवे बुद्धो होति, इतरेसु चक्कवत्ती, तस्मा आभतम्पि अनाभतसदिसमेवाति.

लक्खणकथावण्णना.

८. नियामोक्कन्तिकथावण्णना

४०३. इदानि ¶ नियामोक्कन्तिकथा नाम होति. तत्थ येसं घटिकारसुत्ते जोतिपालस्स पब्बज्जं सन्धाय ‘‘बोधिसत्तो कस्सपभगवतो पावचने ओक्कन्तनियामो चरितब्रह्मचरियो’’ति लद्धि, सेय्यथापि एतरहि अन्धकानं; ते सन्धाय बोधिसत्तोति पुच्छा सकवादिस्स, लद्धियं ठत्वा पटिञ्ञा इतरस्स. ततो यस्मा नियामोति वा ब्रह्मचरियन्ति वा अरियमग्गस्स नामं, बोधिसत्तानञ्च ठपेत्वा पारमीपूरणं अञ्ञा नियामोक्कन्ति नाम नत्थि. यदि भवेय्य, बोधिसत्तो सोतापन्नो सावको भवेय्य. न चेतमेवं. केवलञ्हि नं बुद्धा अत्तनो ञाणबले ठत्वा – ‘‘अयं बुद्धो भविस्सती’’ति ब्याकरोन्ति, तस्मा पुन बोधिसत्तोति अनुयोगो सकवादिस्स. पच्छिमभवं सन्धाय पटिक्खेपो इतरस्स. दुतियपञ्हे जोतिपालकालं सन्धाय पटिञ्ञा तस्सेव. सावको हुत्वातिआदीसुपि एसेव नयो. अनुस्सवियोति ¶ अनुस्सवेन पटिविद्धधम्मो. पच्छिमभवं सन्धाय पटिक्खिपित्वा जोतिपालकाले अनुस्सवं सन्धाय पटिजानाति.

४०४. अञ्ञं सत्थारन्तिआळारञ्च रामपुत्तञ्च सन्धाय वुत्तं. आयस्मा आनन्दोतिआदि ‘‘ओक्कन्तनियामाव सावका होन्ति, न इतरे ओक्कन्तनियामा एवरूपा होन्ती’’ति दस्सेतुं वुत्तं.

सावको जातिं वीतिवत्तोति याय जातिया सावको, तं वीतिवत्तो अञ्ञस्मिं भवे असावको होतीति पुच्छति. इतरो सोतापन्नादीनं सोतापन्नादिसावकभावतो पटिक्खिपति. सेसमेत्थ उत्तानत्थमेवाति.

नियामोक्कन्तिकथावण्णना.

९. अपरापि समन्नागतकथावण्णना

४०६. इदानि ¶ अपरापि समन्नागतकथा नाम होति. तत्थ येसं ‘‘चतुत्थमग्गट्ठो पुग्गलो पत्तिधम्मवसेन तीहि फलेहि समन्नागतो’’ति लद्धि, सेय्यथापि एतरहि अन्धकानं ¶ ; ते सन्धाय पुच्छा सकवादिस्स, पटिञ्ञा इतरस्स. सेसमेत्थ हेट्ठा चतूहि फलेहि समन्नागतकथायं वुत्तनयेनेव वेदितब्बन्ति.

अपरापि समन्नागतकथावण्णना.

१०. सब्बसंयोजनप्पहानकथावण्णना

४१३. इदानि संयोजनप्पहानकथा नाम होति. तत्थ येसं ‘‘निप्परियायेनेव सब्बसंयोजनप्पहानं ¶ अरहत्त’’न्ति लद्धि, सेय्यथापि एतरहि अन्धकानं; ते सन्धाय पुच्छा सकवादिस्स, पटिञ्ञा इतरस्स. पुन सब्बे संयोजनाति पुट्ठो हेट्ठा वुत्तमग्गत्तयेन पहीने सन्धाय पटिक्खिपति. दुतियं पुट्ठो तेन मग्गेन अप्पहीनस्स अभावा पटिजानाति. सक्कायदिट्ठिआदीसुपि पठममग्गेन पहीनभावं सन्धाय पटिक्खिपति, चतुत्थमग्गेन अनवसेसप्पहानं सन्धाय पटिजानाति. एसेव नयो सब्बत्थाति.

सब्बसंयोजनप्पहानकथावण्णना.

चतुत्थो वग्गो.

५. पञ्चमवग्गो

१. विमुत्तिकथावण्णना

४१८. इदानि ¶ विमुत्तिकथा नाम होति. तत्थ विपस्सना, मग्गो, फलं, पच्चवेक्खणन्ति चतुन्नं ञाणानं विमुत्तिञाणन्ति नामं. तेसु विपस्सनाञाणं निच्चनिमित्तादीहि विमुत्तत्ता, तदङ्गविमुत्तिभावेन वा विमुत्तत्ता विमुत्तिञाणं. मग्गो ¶ समुच्छेदविमुत्ति, फलं पटिप्पस्सद्धिविमुत्ति, पच्चवेक्खणञाणं पन विमुत्तिं जानातीति विमुत्तिञाणं. एवं चतुब्बिधे विमुत्तिञाणे निप्परियायेन फलञाणमेव विमुत्ति. सेसानि ‘‘विमुत्तानी’’ति वा ‘‘अविमुत्तानी’’ति वा न वत्तब्बानि. तस्मा ‘‘इदं नाम विमुत्तिञाणं विमुत्त’’न्ति अवत्वा अविसेसेनेव ‘‘विमुत्तिञाणं विमुत्त’’न्ति येसं लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा परवादिस्स. पुन यंकिञ्चीति पुट्ठो पच्चवेक्खणादीनि सन्धाय पटिक्खिपति. पटिपन्नस्साति पुट्ठो मग्गञाणस्स अनासवतं सन्धाय पटिजानाति. यस्मा पन तं सोतापन्नस्स फले ठितस्स ञाणं न होति, तस्मा विमुत्तं नाम न होतीति चोदनत्थं पुन सकवादी सोतापन्नस्सातिआदिमाह. इमिना उपायेन सब्बत्थ अत्थो वेदितब्बो.

विमुत्तिकथावण्णना.

२. असेखञाणकथावण्णना

४२१. इदानि ¶ असेखकथा नाम होति. तत्थ यस्मा आनन्दत्थेरादयो सेखा ‘‘उळारो भगवा’’तिआदिना नयेन असेखे जानन्ति, तस्मा ¶ ‘‘सेखस्स असेखञाणं अत्थी’’ति येसं लद्धि, सेय्यथापि उत्तरापथकानं; ते सन्धाय पुच्छा सकवादिस्स, पटिञ्ञा इतरस्स. जानाति पस्सतीति इदं अत्तना अधिगतस्स जाननवसेन वुत्तं. गोत्रभुनोतिआदि हेट्ठिमाय भूमियं ठितस्स उपरूपरिञाणस्स अभावदस्सनत्थं वुत्तं. ननु आयस्मा आनन्दो सेखो ‘‘उळारो भगवा’’ति जानातीति परवादी असेखे भगवति पवत्तत्ता तं असेखञाणन्ति इच्छति, न पनेतं असेखं. तस्मा एवं पतिट्ठापितापि लद्धि अप्पतिट्ठापिताव होतीति.

असेखञाणकथावण्णना.

३. विपरीतकथावण्णना

४२४. इदानि विपरीतकथा नाम होति. तत्थ ‘‘य्वायं पथवीकसिणे पथवीसञ्ञी समापज्जति, तस्स तं ञाणं विपरीतञाण’’न्ति येसं लद्धि, सेय्यथापि ¶ अन्धकानं, ते सन्धाय पुच्छा सकवादिस्स, पटिञ्ञा इतरस्स. पथविं निस्साय उप्पन्ननिमित्तञ्हि न पथवीयेव, तत्र चायं पथवीसञ्ञी. तस्मा विपरीतञाणन्ति अयमेतस्स अधिप्पायो. ततो सकवादी ‘‘लक्खणपथवीपि ससम्भारपथवीपि निमित्तपथवीपि पथवीदेवतापि सब्बा पथवीयेव, तासु पथवीति ञाणं विपरीतं न होति. अनिच्चे निच्चन्तिआदिविपरियेसो पन विपरीतञाणं नाम. किं ते इदं एतेसु अञ्ञतर’’न्ति चोदेतुं अनिच्चे निच्चन्तिआदिमाह. इतरो विपल्लासलक्खणाभावं सन्धाय पटिक्खिपति, पथवीनिमित्तं सन्धाय पटिजानाति.

कुसलन्ति सेक्खपुथुज्जनानं ञाणं सन्धाय वुत्तं. अत्थि अरहतोति पञ्हेसुपि विपल्लासलक्खणाभावेन पटिक्खिपति. पथवीनिमित्तं सन्धाय पटिजानाति. सब्बेव पथवीति सब्बं तं पथवीकसिणं लक्खणपथवीयेव ¶ होतीति पुच्छति. सकवादी तथा अभावतो पटिक्खिपति. ननु पथवी अत्थि, अत्थि च कोचि पथविं पथवितो समापज्जतीति पुच्छा सकवादिस्स ¶ . तस्सत्थो – ननु निमित्तपथवी अत्थि, अत्थि च कोचि तं पथविं पथवितोयेव समापज्जति, न आपतो वा तेजतो वाति. पथवी अत्थीतिआदि ‘‘यदि यं यथा अत्थि, तं तथा समापज्जन्तस्स ञाणं विपरीतं होति, निब्बानं अत्थि, तम्पि समापज्जन्तस्स सब्बविपरियेससमुग्घातनं मग्गञाणम्पि ते विपरीतं होतू’’ति दस्सनत्थं वुत्तन्ति.

विपरीतकथावण्णना.

४. नियामकथावण्णना

४२८-४३१. इदानि नियामकथा नाम होति. तत्थ यो पुग्गलो सम्मत्तनियामं ओक्कमिस्सति, तं ‘‘भब्बो एस धम्मं अभिसमेतु’’न्ति यस्मा भगवा जानाति, तस्मा ‘‘अनियतस्स पुथुज्जनस्सेव सतो पुग्गलस्स नियामगमनाय ञाणं अत्थी’’ति येसं लद्धि, सेय्यथापि एतरहि उत्तरापथकानं; ते सन्धाय अनियतस्साति पुच्छा सकवादिस्स. तत्थ नियामगमनायाति नियामो वुच्चति मग्गो, मग्गगमनाय मग्गोक्कमनायाति अत्थो. यं पनस्स ञाणं दिस्वा भगवा ‘‘भब्बो अय’’न्ति जानाति, तं सन्धाय पटिञ्ञा परवादिस्स.

अथस्स ¶ सकवादी अयुत्तवादितं दीपेतुं नियतस्साति विपरीतानुयोगमाह. तत्थ पठमपञ्हे मग्गेन नियतस्स अनियामगमनाय ञाणं नाम नत्थीति पटिक्खिपति. दुतिये नत्थिभावेन पटिजानाति. ततिये अनियतस्स नत्थीति पुट्ठत्ता लद्धिविरोधेन पटिक्खिपति. पुन पठमपञ्हमेव चतुत्थं कत्वा नियतस्स नियामगमनादिवसेन तयो पञ्हा कता. तेसु पठमे यस्मा आदिमग्गेन नियतस्स पुन तदत्थाय ञाणं नत्थि, तस्मा पटिक्खिपति. दुतिये ¶ नत्थिभावेनेव पटिजानाति. ततिये लद्धिविरोधेनेव पटिक्खिपति. पुन पठमपञ्हं अट्ठमं कत्वा अनियतस्स अनियामगमनादिवसेन तयो पञ्हा कता. तेसं अत्थो वुत्तनयेनेव वेदितब्बो. पुन पठमपञ्हमेव द्वादसमं कत्वा तंमूलका अत्थि नियामोतिआदयो पञ्हा कता. तत्थ यस्मा नियामगमनाय ञाणं नाम मग्गञाणमेव होति, तस्मा तं सन्धाय अत्थि नियामोति वुत्तं. इतरो पन नियामोति वुत्ते पटिक्खिपति, ञाणन्ति वुत्ते पटिजानाति. सतिपट्ठानादीसुपि ¶ एसेव नयो. पच्चनीकं उत्तानत्थमेव. गोत्रभुनोतिआदि येन यं अप्पत्तं, तस्स तं नत्थीति दस्सनत्थं वुत्तं. भगवा जानातीति अत्तनो ञाणबलेन जानाति, न तस्स नियामगमनञाणसब्भावतो. तस्मा इमिना कारणेन पतिट्ठितापिस्स लद्धि अप्पतिट्ठितायेवाति.

नियामकथावण्णना.

५. पटिसम्भिदाकथावण्णना

४३२-४३३. इदानि पटिसम्भिदाकथा नाम होति. तत्थ येसं ‘‘यंकिञ्चि अरियानं ञाणं, सब्बं लोकुत्तरमेवा’’ति गहेत्वा ‘‘सब्बं ञाणं पटिसम्भिदा’’ति लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. सम्मुतिञाणपञ्हेसु पथवीकसिणसम्मुतियं समापत्तिञाणं सन्धाय पटिक्खिपति, निरुत्तिञाणं सन्धाय पटिजानाति. ये केचि सम्मुतिन्ति पञ्हे पुथुज्जने सन्धाय पटिक्खिपति. चेतोपरियायपञ्हेसु पुथुज्जनस्स ञाणं सन्धाय पटिक्खिपति, अरियस्स ञाणं सन्धाय पटिजानाति. सब्बा पञ्ञातिपञ्हेसु कसिणसमापत्तिपञ्हं सन्धाय पटिक्खिपति, लोकुत्तरं सन्धाय पटिजानाति. पथवीकसिणसमापत्तिन्तिआदि ‘‘या एतेसु एत्तकेसु ठानेसु पञ्ञा, किं सब्बा सा पटिसम्भिदा’’ति पुच्छनत्थं वुत्तं. तेन ¶ हि सब्बं ञाणन्ति यस्मा सब्बा लोकुत्तरपञ्ञा पटिसम्भिदा ¶ , तस्मा सब्बन्ति वचनं सामञ्ञफलेन सद्धिं पतिट्ठापेतीति.

पटिसम्भिदाकथावण्णना.

६. सम्मुतिञाणकथावण्णना

४३४-४३५. इदानि सम्मुतिञाणकथा नाम होति. तत्थ सम्मुतिसच्चं परमत्थसच्चन्ति द्वे ¶ सच्चानि. ये पन एवं विभागं अकत्वा सच्चन्ति वचनसामञ्ञेन सम्मुतिञाणम्पि ‘‘सच्चारम्मणमेवा’’ति वदन्ति, सेय्यथापि अन्धका; ते अयुत्तवादिनोति तेसं वादविसोधनत्थं अयं कथा आरद्धा. तत्थ न वत्तब्बन्ति पुच्छा परवादिस्स, परमत्थसच्चं सन्धाय पटिञ्ञा सकवादिस्स. सम्मुतिसच्चम्हीति सम्मुतिं अनुपविट्ठे सच्चम्हि. पच्चत्ते वा भुम्मवचनं, सम्मुतिसच्चन्ति अत्थो. सम्मुतिञाणं सच्चारम्मणञ्ञेवाति पुच्छा सकवादिस्स, पटिञ्ञा इतरस्स. ततो नं ‘‘यदि तं अविसेसेन सच्चारम्मणञ्ञेव, तेन ञाणेन दुक्खपरिञ्ञादीनि करेय्या’’ति चोदेतुं तेन ञाणेनातिआदिमाह.

सम्मुतिञाणकथावण्णना.

७. चित्तारम्मणकथावण्णना

४३६-४३८. इदानि चित्तारम्मणकथा नाम होति. तत्थ चेतोपरियाये ञाणन्ति वचनमत्तमेव गहेत्वा ‘‘तं ञाणं चित्तारम्मणमेवा’’ति येसं लद्धि, सेय्यथापि एतरहि अन्धकानं; ते सन्धाय पुच्छा सकवादिस्स, पटिञ्ञा इतरस्स. अथस्स ‘‘यो सरागादिवसेन चित्तं जानाति, तस्स रागादयोपि आरम्मणा होन्ति, तस्मा न वत्तब्बं तं चित्तारम्मणञ्ञेवा’’ति चोदनत्थं ननु अत्थि कोचीतिआदि आरद्धं. फस्सारम्मणेति ¶ फस्ससङ्खाते आरम्मणे. वेदनारम्मणेतिआदीसुपि एसेव नयो. पुन फस्सारम्मणे ञाणं न वत्तब्बन्ति पुट्ठो फस्सस्स फुसनलक्खणं ¶ मनसिकरोतो फस्सोवारम्मणं होतीति पटिजानाति. किं पनेतं फस्सपरियाये ञाणन्ति पुट्ठो पन तादिसस्स सुत्तपदस्स अभावा पटिक्खिपति. वेदनादीसुपि एसेव नयो. इदानि यं निस्साय लद्धि, तदेव दस्सेत्वा लद्धिं पतिट्ठापेतुं ननु चेतोपरियाये ञाणन्तिआदिमाह. सा पनेसा वचनमत्ताभिनिवेसेन पतिट्ठापितापि अप्पतिट्ठापिताव होतीति.

चित्तारम्मणकथावण्णना.

८. अनागतञाणकथावण्णना

४३९-४४०. इदानि ¶ अनागतञाणकथा नाम होति. तत्थ अनागतं नाम अन्तरम्पि अत्थि, अनन्तरम्पि. तेसु अनन्तरे एकन्तेनेव ञाणं नत्थि. यथा च अनन्तरे, तथा एकवीथिएकजवनपरियापन्नेपि. तत्थ ये सब्बस्मिम्पि अनागते ञाणं इच्छन्ति, सेय्यथापि अन्धका; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यं ते अनागते ञाणं, किं तेन अनन्तरं अनागतं मूलादिवसेन जानाती’’ति चोदेतुं अनागतं मूलतोतिआदिमाह. तत्थ मूलतोतिआदीनि सब्बानि कारणवेवचनानेव. कारणञ्हि यं अत्तनो फलं करोति, तं तत्थ मूलयति पतिट्ठातीति मूलं. ततो च तं हिनोति पवत्तयतीति हेतु. तदेव तं निदेति ‘‘हन्द नं गण्हथा’’ति. निय्यातेति वियाति निदानं. ततो तं सम्भवतीति सम्भवो. पभवतीति पभवो. तत्थ च तं समुट्ठाति, तं वा नं समुट्ठापेतीति समुट्ठानं. तदेव नं आहरतीति आहारो. तञ्चस्स अपरिच्चजितब्बट्ठेन आरम्मणं. तदेव चेतं पटिच्च एतीति पच्चयो. ततो नं समुदेतीति समुदयोति वुच्चति. यस्मा ¶ पन अनन्तरं चित्तं एतेहाकारेहि न सक्का जानितुं, तस्मा न हेवन्ति पटिक्खिपति. अनागतं हेतुपच्चयतन्ति या अनन्तरानागते चित्ते हेतुपच्चयता, तं जानाति. ये तत्थ धम्मा हेतुपच्चया होन्ति, ते जानातीति अत्थो. सेसपदेसुपि एसेव नयो. गोत्रभुनोतिआदि यस्मिं अनागते ञाणं न उप्पज्जति, तं सरूपतो दस्सेतुं वुत्तं. पाटलिपुत्तस्साति ¶ सुत्तं यस्मिं अनागते ञाणं उप्पज्जति, तं दस्सेतुं आहटं. यस्मा पनेतं न सब्बस्मिं अनागते ञाणस्स साधकं; तस्मा अनाहटमेवाति.

अनागतञाणकथावण्णना.

९. पटुप्पन्नञाणकथावण्णना

४४१-४४२. इदानि पटुप्पन्नञाणकथा नाम होति. तत्थ येसं ‘‘सब्बसङ्खारेसु अनिच्चतो दिट्ठेसु तम्पि ञाणं अनिच्चतो दिट्ठं होती’’ति वचनं निस्साय ‘‘अविसेसेन सब्बस्मिं पच्चुप्पन्ने ञाणं अत्थी’’ति लद्धि, सेय्यथापि अन्धकानं; ते सन्धाय पटुप्पन्नेति पुच्छा ¶ सकवादिस्स, पटिञ्ञा इतरस्स. अथ नं ‘‘यदि अविसेसेन पटुप्पन्ने ञाणं अत्थि, खणपच्चुप्पन्नेपि तेन भवितब्बं. एवं सन्ते द्विन्नं ञाणानं एकतो अभावा तेनेव ञाणेन तं जानितब्बं होती’’ति चोदनत्थं तेनाति अनुयोगो सकवादिस्स. तत्थ पठमपञ्हे तेनेव तं जानितुं न सक्काति पटिक्खेपो इतरस्स. दुतियपञ्हे सन्ततिं सन्धाय पटिञ्ञा तस्सेव. पटिपाटितो भङ्गं पस्सन्तो भङ्गानुपस्सनेनेव भङ्गानुपस्सनाञाणं पस्सतीति अधिप्पायो. तेन ञाणेन तं ञाणं जानातीतिआदीसुपि एसेव नयो. तेन फस्सेन तं फस्सन्तिआदीनिस्स लेसोकासनिवारणत्थं वुत्तानि ¶ . यं पनेतेन लद्धिपतिट्ठापनत्थं ननु सब्बसङ्खारेतिआदि वुत्तं. तत्थ नयतो तं ञाणं दिट्ठं होति, न आरम्मणतोति अधिप्पायेन पटिञ्ञा सकवादिस्स. तस्मा एवं पतिट्ठितापिस्स लद्धि अप्पतिट्ठिताव होति.

पटुप्पन्नञाणकथावण्णना.

१०. फलञाणकथावण्णना

४४३-४४४. इदानि फले ञाणकथा नाम होति. तत्थ ‘‘बुद्धापि सत्तानं अरियफलप्पत्तिया धम्मं देसेन्ति सावकापि, इति इमिना सामञ्ञेन ¶ बुद्धानं विय सावकानम्पि तेन तेन सत्तेन पत्तब्बे फले ञाणं अत्थी’’ति येसं लद्धि, सेय्यथापि अन्धकानं; ते सन्धाय सावकस्साति पुच्छा सकवादिस्स, पटिञ्ञा इतरस्स. अथ नं ‘‘यदि सावकस्स फले ञाणं अत्थि, यथा बुद्धा समानेपि सोतापत्तिफले अत्तनो ञाणबलेन ‘अयं एकबीजी, अयं कोलंकोलो, अयं सत्तक्खत्तुपरमो’ति फलस्सकतं पञ्ञपेन्ति, किं ते एवं सावकोपी’’ति चोदेतुं सावको फलस्स कतं पञ्ञपेतीति आह. इतरो पटिक्खिपति.

अत्थि सावकस्स फलपरोपरियत्तीतिआदि फले ञाणस्स अत्थिताय पच्चयपुच्छनत्थं वुत्तं. अयञ्हेत्थ अधिप्पायो – बुद्धानं ‘‘इदं फलं परं, इदं ओपर’’न्ति एवं फलानं उच्चावचभावजाननसङ्खाता फले परोपरियत्ति नाम अत्थि. तथा इन्द्रियपुग्गलपरोपरियत्तियो, तासं ¶ अत्थिताय तस्स तस्स पुग्गलस्स तेसं तेसं इन्द्रियानं वसेन तं तं फलं जानन्ति, किं ते सावकस्सापि एता परोपरियत्तियो अत्थीति.

अत्थि सावकस्स खन्धपञ्ञत्तीतिआदीनिपि ‘‘यदि ते सावकस्स बुद्धानं विय फले ञाणं अत्थि, इमा हि पिस्स पञ्ञत्तीहि ¶ भवितब्बं. किमस्स ता अत्थि, सक्कोति सो एता पञ्ञत्तियो अत्तनो बलेन जानितुं वा पञ्ञपेतुं वा’’ति चोदनत्थं वुत्तानि. सावको जिनोतिआदि ‘‘यदि सावकस्स बुद्धानं विय फले ञाणं अत्थि, एवं सन्ते स्वेव जिनो’’ति चोदनत्थं वुत्तं. सावको अनुप्पन्नस्साति पञ्हेपि अयमेव नयो. अञ्ञाणीति पञ्हे अविज्जासङ्खातस्स अञ्ञाणस्स विहतत्ता पटिक्खित्तो, न पनस्स बुद्धानं विय फले ञाणं अत्थि. तस्मा अप्पतिट्ठितोव परवादीवादोति.

फलञाणकथावण्णना.

पञ्चमो वग्गो.

महापण्णासको समत्तो.

६. छट्ठवग्गो

१. नियामकथावण्णना

४४५-४४७. इदानि ¶ ¶ नियामकथा नाम होति. तत्थ नियामोति ‘‘भब्बो नियामं ओक्कमितुं कुसलेसु धम्मेसु सम्मत्त’’न्ति (पु. प. १३) वचनतो अरियमग्गो वुच्चति. यस्मा पन तस्मिं उप्पज्जित्वा निरुद्धेपि पुग्गलो अनियतो नाम न होति, तस्मा ‘‘सो नियामो निच्चट्ठेन असङ्खतो’’ति येसं लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. ततो ‘‘यदि सो असङ्खतो, एवरूपेन तेन भवितब्ब’’न्ति दीपेन्तो निब्बानन्तिआदिमाह. संसन्दनपुच्छा उत्तानत्थायेव.

अत्थि ¶ केचीतिआदि नियामस्स सङ्खतभावदीपनत्थं वुत्तं. मग्गो असङ्खतोतिपञ्हे तस्स उप्पादनिरोधभावतो पटिक्खिपतीति. नियामो सङ्खतोतिपञ्हे निरुद्धेपि मग्गे नियामस्स अत्थितं सन्धाय पटिक्खिपति. सोतापत्तिनियामोतिआदिपञ्हेसुपि अनुलोमतो च पटिलोमतो च इमिनाव नयेन अत्थो वेदितब्बो. पञ्च असङ्खतानीति पुट्ठो पञ्चन्नं असङ्खतानं आगतट्ठानं अपस्सन्तो पटिक्खिपति. दुतियं पुट्ठो चतुन्नं सम्मत्तनियामानं नियामवचनतो निब्बानस्स च असङ्खतभावतो पटिजानाति. मिच्छत्तनियामपञ्हो नियामवचनमत्तेन असङ्खतताय अयुत्तभावदीपनत्थं वुत्तोति.

नियामकथावण्णना.

२. पटिच्चसमुप्पादकथावण्णना

४४८. इदानि पटिच्चसमुप्पादकथा नाम होति. तत्थ येसं निदानवग्गे ‘‘उप्पादा वा तथागतानं अनुप्पादा वा तथागतानं ¶ ठिताव सा धातु धम्मट्ठितता’’तिआदिवचनतो (सं. नि. २.२०) ‘‘पटिच्चसमुप्पादो असङ्खतो’’ति लद्धि, सेय्यथापि पुब्बसेलियानञ्च महिसासकानञ्च; ते सन्धाय पुच्छा सकवादिस्स, पटिञ्ञा इतरस्स.

४४९. अविज्जा ¶ असङ्खताति आदयो पञ्हा अविज्जादीनंयेव पटिच्चसमुप्पादभावदस्सनत्थं वुत्ता. येन पनत्थेन तत्थ एकेकं अङ्गं ‘‘पटिच्चसमुप्पादो’’ति वुच्चति, सो पटिच्चसमुप्पादविभङ्गे वुत्तोयेव.

४५१. अविज्जापच्चया सङ्खाराति या तत्थ धम्मट्ठिततातिआदि येन सुत्तेन लद्धि पतिट्ठापिता, तस्सेव अत्थदस्सनेन लद्धिभिन्दनत्थं वुत्तं. अयञ्हेत्थ अत्थो – या अयं हेट्ठा ‘‘ठिताव सा धातु धम्मट्ठितता धम्मनियामता’’ति वुत्ता न सा अञ्ञत्र अविज्जादीहि विसुं एका अत्थि. अविज्जादीनं पन पच्चयानंयेवेतं नामं. उप्पन्नेपि हि तथागते अनुप्पन्नेपि अविज्जातो सङ्खारा सम्भवन्ति, सङ्खारादीहि च विञ्ञाणादीनि, तस्मा ‘‘अविज्जापच्चया सङ्खारा’’ति ¶ या एतस्मिं पदे सङ्खारधम्मानं कारणट्ठेन ठितताति धम्मट्ठितता. तेसंयेव च धम्मानं कारणट्ठेनेव नियामताति धम्मनियामताति अविज्जा वुच्चति. सा च असङ्खता, निब्बानञ्च असङ्खतन्ति पुच्छति. परवादी लद्धिवसेन पटिजानित्वा पुन द्वे असङ्खतानीति पुट्ठो सुत्ताभावेन पटिक्खिपित्वा लद्धिवसेनेव पटिजानाति. सेसपदेसुपि एसेव नयो. हेट्ठा वुत्तसदिसं पन तत्थ वुत्तनयेनेव वेदितब्बन्ति.

पटिच्चसमुप्पादकथावण्णना.

३. सच्चकथावण्णना

४५२-४५४. इदानि सच्चकथा नाम होति. तत्थ येसं ‘‘चत्तारिमानि, भिक्खवे, तथानि अवितथानी’’ति (सं. नि. ५.१०९०) सुत्तं निस्साय ‘‘चत्तारि सच्चानि निच्चानि असङ्खतानी’’ति लद्धि, सेय्यथापि पुब्बसेलियानं; ते सन्धाय पुच्छा सकवादिस्स, पटिञ्ञा इतरस्स. अयञ्हिस्स अधिप्पायो – दुक्खसमुदयमग्गेसु वत्थुसच्चं सङ्खतं, लक्खणसच्चं ¶ असङ्खतं. निरोधे वत्थुसच्चं नाम नत्थि असङ्खतमेव तन्ति. तस्मा आमन्ताति आह. तं पनस्स लद्धिमत्तमेव. सो हि दुक्खं वत्थुसच्चं इच्छति, तथा समुदयं मग्गञ्च. यानि पन नेसं बाधनपभवनिय्यानिकलक्खणानि, तानि लक्खणसच्चं नामाति, न च बाधनलक्खणादीहि अञ्ञानि दुक्खादीनि नाम अत्थीति. ताणानीतिआदीसु अधिप्पायो वुत्तनयेनेव वेदितब्बो.

दुक्खसच्चन्ति ¶ पञ्हे लद्धिवसेन लक्खणं सन्धाय पटिजानाति. दुक्खन्ति पञ्हे वत्थुं सन्धाय पटिक्खिपति. इतो परं सुद्धिकपञ्हा च संसन्दनपञ्हा च सब्बे पाळिअनुसारेनेव वेदितब्बा. अवसाने लद्धिपतिट्ठापनत्थं आहटसुत्तं अत्थस्स मिच्छा गहितत्ता अनाहटसदिसमेवाति.

सच्चकथावण्णना.

४. आरुप्पकथावण्णना

४५५-४५६. इदानि ¶ आरुप्पकथा नाम होति. तत्थ येसं ‘‘चत्तारो आरुप्पा आनेञ्जा’’ति वचनं निस्साय ‘‘सब्बेपि ते धम्मा असङ्खता’’ति लद्धि, ते सन्धाय आकासानञ्चायतनन्ति पुच्छा सकवादिस्स, पटिञ्ञा इतरस्स. सेसमेत्थ उत्तानत्थमेवाति. साधकसुत्तम्पि अत्थं अजानित्वा आहटत्ता अनाहटसदिसमेवाति.

आरुप्पकथावण्णना.

५. निरोधसमापत्तिकथावण्णना

४५७-४५९. इदानि निरोधसमापत्तिकथा नाम होति. तत्थ निरोधसमापत्तीति चतुन्नं खन्धानं अप्पवत्ति. यस्मा पन सा करियमाना करियति, समापज्जियमाना समापज्जियति, तस्मा निप्फन्नाति वुच्चति. सङ्खतासङ्खतलक्खणानं पन ¶ अभावेन न वत्तब्बा ‘‘सङ्खताति वा असङ्खता’’ति वा. तत्थ येसं ‘‘यस्मा सङ्खता न होति, तस्मा असङ्खता’’ति लद्धि, सेय्यथापि अन्धकानञ्चेव उत्तरापथकानञ्च; ते सन्धाय निरोधसमापत्तीति पुच्छा सकवादिस्स, पटिञ्ञा इतरस्स. उप्पादेन्तीतिआदि समापज्जनपटिलाभवसेनेव वुत्तं. यथा पन रूपादयो असङ्खतधम्मे उप्पादेन्ति; न तथा तं केचि उप्पादेन्ति नाम. निरोधा वोदानं वुट्ठानन्ति फलसमापत्ति वेदितब्बा. असङ्खता पन तं ¶ नत्थियेव, तस्मा पटिक्खिपति. तेन हीति यस्मा सङ्खता न होति, तस्मा असङ्खताति लद्धि. इदं पन असङ्खतभावे कारणं न होतीति वुत्तम्पि अवुत्तसदिसमेवाति.

निरोधसमापत्तिकथावण्णना.

६. आकासकथावण्णना

४६०-४६२. इदानि आकासकथा नाम होति. तत्थ तिविधो आकासो – परिच्छेदाकासो ¶ , कसिणुग्घाटिमाकासो, अजटाकासो. ‘‘तुच्छाकासो’’तिपि तस्सेव नामं. तेसु परिच्छेदाकासो सङ्खतो, इतरे द्वे पञ्ञत्तिमत्ता. येसं पन ‘‘दुविधोपि यस्मा सङ्खतो न होति, तस्मा असङ्खतो’’ति लद्धि, सेय्यथापि उत्तरापथकानं महिसासकानञ्च; ते सन्धाय आकासोति पुच्छा सकवादिस्स, पटिञ्ञा इतरस्स. सेसमेत्थ उत्तानत्थमेवाति.

आकासकथावण्णना.

७. आकासो सनिदस्सनोतिकथावण्णना

४६३-४६४. इदानि आकासो सनिदस्सनोतिकथा नाम होति. तत्थ येसं ताळच्छिद्दादीसु ञाणप्पवत्तिं निस्साय ‘‘सब्बोपि अजटाकासो ¶ सनिदस्सनो’’ति लद्धि, सेय्यथापि अन्धकानं ¶ ; ते सन्धाय आकासो सनिदस्सनोति पुच्छा सकवादिस्स, पटिञ्ञा इतरस्स. अथ नं ‘‘यदि सनिदस्सनो, एवंविधो भवेय्या’’ति चोदनत्थं रूपन्तिआदि वुत्तं. चक्खुञ्च पटिच्चातिपञ्हेसु एवरूपस्स सुत्तस्स अभावेन पटिक्खिपित्वा तुलन्तरिकादीनं उपलद्धिं निस्साय पटिजानाति. द्विन्नं रुक्खानं अन्तरन्ति एत्थ रुक्खरूपं चक्खुना दिस्वा अन्तरे रूपाभावतो आकासन्ति मनोद्वारविञ्ञाणं उप्पज्जति, न चक्खुविञ्ञाणं. सेसेसुपि एसेव नयो. तस्मा असाधकमेतन्ति.

आकासो सनिदस्सनोतिकथावण्णना.

१०. पथवीधातुसनिदस्सनातिआदिकथावण्णना

४६५-४७०. इदानि ¶ पथवीधातु सनिदस्सनातिआदिकथा नाम होति. तत्थ येसं पासाणउदकजालरुक्खचलनानञ्चेव पञ्चिन्द्रियपतिट्ठोकासानञ्च वण्णायतनं कायविञ्ञत्तिकाले हत्थपादादिरूपञ्च दिस्वा ‘‘पथवीधातुआदयो सनिदस्सना’’ति लद्धि, सेय्यथापि अन्धकानं; ते सन्धाय सब्बकथासु आदिपुच्छा सकवादिस्स, पटिञ्ञा इतरस्स. सेसं सब्बत्थ पाळिअनुसारेन चेव हेट्ठा वुत्तनयेन च वेदितब्बन्ति. पथवीधातु सनिदस्सनाति आदिं कत्वा कायकम्मं सनिदस्सनन्ति परियोसानकथा निट्ठिता.

छट्ठो वग्गो.

७. सत्तमवग्गो

१. सङ्गहितकथावण्णना

४७१-४७२. इदानि ¶ सङ्गहितकथा नाम होति. तत्थ यस्मा दामादीहि बलिबद्दादयो विय केचि धम्मा केहिचि धम्मेहि सङ्गहिता नाम नत्थि, तस्मा ‘‘नत्थि केचि धम्मा केहिचि धम्मेहि सङ्गहिता, एवं सन्ते एकविधेन रूपसङ्गहोतिआदि निरत्थक’’न्ति येसं लद्धि, सेय्यथापि राजगिरिकानञ्चेव सिद्धत्थिकानञ्च; ते सन्धाय अञ्ञेनत्थेन सङ्गहभावं दस्सेतुं पुच्छा सकवादिस्स, अत्तनो लद्धिवसेन पटिञ्ञा इतरस्स. इदानि येनत्थेन सङ्गहो लब्भति, तं दस्सेतुं ननु अत्थि केचि धम्मातिआदि आरद्धं. तं सब्बं हेट्ठा वुत्तनयत्ता उत्तानत्थमेव. या पनेसा परवादिना लद्धिपतिट्ठापनत्थं यथा दामेन वातिआदिका उपमा आहटा, सकवादिना तं अनभिनन्दित्वा अप्पटिक्कोसित्वा ‘‘हञ्चि दामेन वा’’ति तस्स लद्धि भिन्नाति वेदितब्बा. अयञ्हेत्थ अत्थो – यदि ते दामादीहि बलिबद्दादयो सङ्गहिता नाम, अत्थि केचि धम्मा केहिचि धम्मेहि सङ्गहिताति.

सङ्गहितकथावण्णना.

२. सम्पयुत्तकथावण्णना

४७३-४७४. इदानि ¶ सम्पयुत्तकथा नाम होति. तत्थ यस्मा तिलम्हि तेलं विय न वेदनादयो सञ्ञादीसु अनुपविट्ठा, तस्मा ‘‘नत्थि केचि धम्मा केहिचि धम्मेहि सम्पयुत्ता, एवं सन्ते ¶ ञाणसम्पयुत्तन्तिआदि निरत्थकं होती’’ति येसं लद्धि, सेय्यथापि ¶ राजगिरिकसिद्धत्थिकानञ्ञेव; ते सन्धाय अञ्ञेनेवत्थेन सम्पयुत्ततं दस्सेतुं पुच्छा सकवादिस्स, अत्तनो लद्धिवसेन पटिञ्ञा इतरस्स. सेसमिधापि हेट्ठा वुत्तनयत्ता उत्तानत्थमेव. यो पनेस परवादिना ‘‘यथा तिलम्हि तेल’’न्तिआदिको उपमापञ्हो आहटो, सो यस्मा वेदनासञ्ञानं विय तिलतेलानं लक्खणतो नानत्तववत्थानं नत्थि. सब्बेसुपि हि तिलअट्ठितचेसु तिलोति वोहारमत्तं, तेनेव तिलं निब्बत्तेत्वा गहिते पुरिमसण्ठानेन तिलो नाम न पञ्ञायति, तस्मा अनाहटसदिसोव होतीति.

सम्पयुत्तकथावण्णना.

३. चेतसिककथावण्णना

४७५-४७७. इदानि चेतसिककथा नाम होति. तत्थ यस्मा फस्सिकादयो नाम नत्थि, तस्मा ‘‘चेतसिकेनापि न भवितब्बं, इति नत्थि चेतसिको धम्मो’’ति येसं लद्धि, सेय्यथापि राजगिरिकसिद्धत्थिकानं; ते सन्धाय पुच्छा सकवादिस्स, पटिञ्ञा इतरस्स. सहजातोति सम्पयुत्तसहजातं सन्धाय वुत्तं. फस्सिकाति तादिसं वोहारं अपस्सन्तस्स पुच्छा परवादिस्स. किं वोहारेन, यथा चित्तनिस्सितकोति चेतसिको, एवं सोपि फस्सनिस्सितत्ता फस्सिकोति वुत्ते दोसो नत्थीति पटिञ्ञा सकवादिस्स. सेसं उत्तानत्थमेवाति.

चेतसिककथावण्णना.

४. दानकथावण्णना

४७८. इदानि ¶ दानकथा नाम होति. तत्थ दानं नाम तिविधं – चागचेतनापि, विरतिपि, देय्यधम्मोपि. ‘‘सद्धा हिरियं कुसलञ्च ¶ दान’’न्ति (अ. नि. ८.३०) आगतट्ठाने चागचेतना दानं. ‘‘अभयं देती’’ति (अ. नि. ८.३९) आगतट्ठाने विरति. ‘‘दानं देति अन्नं पान’’न्ति आगतट्ठाने देय्यधम्मो. तत्थ चागचेतना ‘‘देति वा देय्यधम्मं, देन्ति ¶ वा एताय देय्यधम्म’’न्ति दानं. विरति अवखण्डनट्ठेन लवनट्ठेन वा दानं. सा हि उप्पज्जमाना भयभेरवादिसङ्खातं दुस्सील्यचेतनं दाति खण्डेति लुनाति वाति दानं. देय्यधम्मो दिय्यतीति दानं. एवमेतं तिविधम्पि अत्थतो चेतसिको चेव धम्मो देय्यधम्मो चाति दुविधं होति. तत्थ येसं ‘‘चेतसिकोव धम्मो दानं, न देय्यधम्मो’’ति लद्धि, सेय्यथापि राजगिरिकसिद्धत्थिकानं; ते सन्धाय चेतसिकोति पुच्छा सकवादिस्स, पटिञ्ञा इतरस्स. अथ नं देय्यधम्मवसेन चोदेतुं लब्भाति पुच्छा सकवादिस्स, अन्नादीनि विय सो न सक्का दातुन्ति पटिक्खेपो इतरस्स. पुन दळ्हं कत्वा पुट्ठे ‘‘अभयं देती’’ति सुत्तवसेन पटिञ्ञा तस्सेव. फस्सपञ्हादीसु पन फस्सं देतीतिआदिवोहारं अपस्सन्तो पटिक्खिपतेव.

४७९. अनिट्ठफलन्तिआदि अचेतसिकस्स धम्मस्स दानभावदीपनत्थं वुत्तं. न हि अचेतसिको अन्नादिधम्मो आयतिं विपाकं देति, इट्ठफलभावनियमनत्थं पनेतं वुत्तन्ति वेदितब्बं. अयम्पि हेत्थ अधिप्पायो – यदि अचेतसिको अन्नादिधम्मो दानं भवेय्य, हितचित्तेन अनिट्ठं अकन्तं भेसज्जं देन्तस्स निम्बबीजादीहि विय निम्बादयो अनिट्ठमेव फलं निब्बत्तेय्य. यस्मा पनेत्थ हितफरणचागचेतना दानं, तस्मा अनिट्ठेपि देय्यधम्मे दानं इट्ठफलमेव होतीति.

एवं परवादिना चेतसिकधम्मस्स दानभावे पतिट्ठापिते सकवादी इतरेन परियायेन देय्यधम्मस्स दानभावं साधेतुं दानं इट्ठफलं वुत्तं भगवतातिआदिमाह. परवादी पन चीवरादीनं इट्ठविपाकतं अपस्सन्तो पटिक्खिपति. सुत्तसाधनं परवादीवादेपि युज्जति सकवादीवादेपि, न पन एकेनत्थेन. देय्यधम्मो इट्ठफलोति इट्ठफलभावमत्तमेव पटिक्खित्तं. तस्मा तेन हि न वत्तब्बन्ति इट्ठफलभावेनेव न वत्तब्बता युज्जति ¶ . दातब्बट्ठेन ¶ पन देय्यधम्मो दानमेव. दिन्नञ्हि दानानं सङ्करभावमोचनत्थमेव अयं कथाति.

दानकथावण्णना.

५. परिभोगमयपुञ्ञकथावण्णना

४८३. इदानि परिभोगमयपुञ्ञकथा नाम होति. तत्थ ‘‘तेसं दिवा च रत्तो च, सदा पुञ्ञं पवड्ढती’’ति (सं. नि. १.४७) च ‘‘यस्स भिक्खवे, भिक्खु चीवरं परिभुञ्जमानो’’ति (अ. नि. ४.५१) च एवमादीनि सुत्तानि अयोनिसो गहेत्वा येसं परिभोगमयं ¶ नाम पुञ्ञं अत्थी’’ति लद्धि, सेय्यथापि राजगिरिकसिद्धत्थिकसम्मितियानं; ते सन्धाय परिभोगमयन्ति पुच्छा सकवादिस्स, पटिञ्ञा इतरस्स. अथ नं ‘‘पुञ्ञं नाम फस्सादयो कुसला धम्मा, न ततो परं, तस्मा फस्सादीहि ते वड्ढितब्ब’’न्ति चोदेतुं परिभोगमयो फस्सोतिआदि आरद्धं. तं सब्बं इतरेन तेसं अवड्ढनतो पटिक्खित्तं. लतावियातिआदीनि ‘‘किरियाय वा भावनाय वा विनापि यथा लतादीनि सयमेव वड्ढन्ति, किं ते एवं वड्ढन्ती’’ति चोदनत्थं वुत्तानि. तथा पनस्स अवड्ढनतो न हेवाति पटिक्खित्तं.

४८४. न समन्नाहरतीति पञ्हे पटिग्गाहकानं परिभोगेन पुरिमचेतना वड्ढति, एवं तं होति पुञ्ञन्ति लद्धिवसेन पटिजानाति. ततो अनावट्टेन्तस्सातिआदीहि पुट्ठो दायकस्स चागचेतनं सन्धाय पटिक्खिपति. तत्थ अनावट्टेन्तस्साति दानचेतनाय पुरेचारिकेन आवज्जनेन भवङ्गं अनावट्टेन्तस्स अपरिवट्टेन्तस्स. अनाभोगस्साति निराभोगस्स. असमन्नाहरन्तस्साति न समन्नाहरन्तस्स. आवज्जनञ्हि भवङ्गं विच्छिन्दित्वा अत्तनो गतमग्गे उप्पज्जमानं दानचेतनं समन्नाहरति नाम. एवंकिच्चेन इमिना चित्तेन असमन्नाहरन्तस्स पुञ्ञं होतीति पुच्छति. अमनसिकरोन्तस्साति ¶ मनं अकरोन्तस्स. आवज्जनेन हि तदनन्तरं उप्पज्जमानं मनं करोति नाम. एवं अकरोन्तस्साति अत्थो. उपयोगवचनस्मिञ्हि एतं भुम्मं. अचेतयन्तस्साति चेतनं अनुप्पादेन्तस्स. अपत्थेन्तस्साति ¶ पत्थनासङ्खातं कुसलच्छन्दं अकरोन्तस्स. अप्पणिदहन्तस्साति दानचेतनावसेन चित्तं अट्ठपेन्तस्साति अत्थो. ननु आवट्टेन्तस्साति वारे आभोगस्साति आभोगवतो. अथ वा आभोगा अस्स, आभोगस्स वा अनन्तरं तं पुञ्ञं होतीति अत्थो.

४८५. द्विन्नं फस्सानन्तिआदीसुपि एकक्खणे दायकस्स द्विन्नं फस्सादीनं अभावा पटिक्खिपति, दायकस्स च परिभुञ्जन्तस्स चाति उभिन्नं फस्सादयो सन्धाय पटिजानाति. अपिचस्स पञ्चन्नं विञ्ञाणानं समोधानं होतीति लद्धि, तस्सापि वसेन पटिजानाति. अथ नं सकवादी परियायस्स द्वारंपिदहित्वा उजुविपच्चनीकवसेन चोदेतुं कुसलादिपञ्हं पुच्छति. तत्रापि कुसलाकुसलानं एकस्सेकक्खणे सम्पयोगाभावं सन्धाय पटिक्खिपति. परिभोगमयं पन चित्तविप्पयुत्तं उप्पज्जतीति लद्धिया पटिजानाति. अथ नं सकवादी सुत्तेन निग्गण्हाति.

४८६. सुत्तसाधने आरामरोपकादीनं अनुस्सरणपटिसङ्खरणादिवसेन अन्तरन्तरा उप्पज्जमानं ¶ पुञ्ञं सन्धाय सदा पुञ्ञं पवड्ढतीति वुत्तं. अप्पमाणो तस्स पुञ्ञाभिसन्दोति इदं अप्पमाणविहारिनो दिन्नपच्चयत्ता च ‘‘एवरूपो मे चीवरं परिभुञ्जती’’ति अनुमोदनवसेन च वुत्तं. तं सो परिभोगमयन्ति सल्लक्खेति. यस्मा पन पटिग्गाहकेन पटिग्गहेत्वा अपरिभुत्तेपि देय्यधम्मे पुञ्ञं होतियेव, तस्मा सकवादीवादोव बलवा, तत्थ पटिग्गाहकेन पटिग्गहितेति अत्थो दट्ठब्बो. सेसं उत्तानत्थमेवाति.

परिभोगमयपुञ्ञकथावण्णना.

६. इतोदिन्नकथावण्णना

४८८-४९१. इदानि ¶ इतो दिन्नकथा नाम होति. तत्थ येसं ‘‘इतो दिन्नेन यापेन्ति, पेता कालङ्कता तहि’’न्ति (पे. व. १९) वचनं निस्साय ‘‘यं इतो चीवरादि दिन्नं तेनेव यापेन्ती’’ति लद्धि, सेय्यथापि राजगिरिकसिद्धत्थिकानं; ते सन्धाय इतो दिन्नेनाति पुच्छा सकवादिस्स, पटिञ्ञा इतरस्स ¶ . पुन चीवरादिवसेन अनुयुत्तो पटिक्खिपति. अञ्ञो अञ्ञस्स कारकोति अञ्ञस्स विपाकदायकानं कम्मानं अञ्ञो कारको, न अत्तनाव अत्तनो कम्मं करोतीति वुत्तं होति. एवं पुट्ठो पन इतरो सुत्तविरोधभयेन पटिक्खिपति. दानं देन्तन्ति दानं ददमानं दिस्वाति अत्थो. तत्थ यस्मा अत्तनो अनुमोदितत्ता च तेसं तत्थ भोगा उप्पज्जन्ति, तस्मास्स इमिना कारणेन लद्धिं पतिट्ठपेन्तस्सापि अप्पतिट्ठिताव होति. न हि ते इतो दिन्नेनेव वत्थुना यापेन्ति. सेसेसुपि सुत्तसाधनेसु एसेव नयोति.

इतो दिन्नकथावण्णना.

७. पथवीकम्मविपाकोतिकथावण्णना

४९२. इदानि पथवी कम्मविपाकोतिकथा नाम होति. तत्थ यस्मा ‘‘अत्थि इस्सरियसंवत्तनियं कम्मं, आधिपच्चसंवत्तनियं कम्म’’न्ति एत्थ इस्सरानं भावो इस्सरियं नाम ¶ , अधिपतीनञ्च भावो आधिपच्चं नाम, पथविस्सरियआधिपच्चसंवत्तनिकञ्च कम्मं अत्थीति वुत्तं. तस्मा येसं ‘‘पथवी कम्मविपाको’’ति लद्धि, सेय्यथापि अन्धकानं; ते सन्धाय पथवीति पुच्छा सकवादिस्स, पटिञ्ञा इतरस्स. सुखवेदनीयातिआदि कम्मविपाकसभावदस्सनवसेन वुत्तं. ‘‘फस्सो होती’’तिआदिना नयेन निद्दिट्ठेसु विपाकेसु फस्सो सुखवेदनीयादिभेदो ¶ होति. सो च सञ्ञादयो च सुखवेदनादीहि सम्पयुत्ता, वेदनादयो सञ्ञादीहि, सब्बेपि सारम्मणा, अत्थि च नेसं पुरेचारिकआवट्टनादिसङ्खातं आवज्जनं, कम्मपच्चयभूता चेतना, यो तत्थ इट्ठविपाको, तस्स पत्थना, पणिधानवसेन पवत्ता मूलतण्हा, किं ते एवरूपा पथवीति पुच्छति. इतरो पटिक्खिपति. पटिलोमपुच्छादीनि उत्तानत्थानेव.

४९३. कम्मविपाको परेसं साधारणोति पञ्हे फस्सादयो सन्धाय पटिक्खिपति, कम्मसमुट्ठानं रूपञ्च पथवीआदीनंयेव च साधारणभावं सन्धाय पटिजानाति. असाधारणमञ्ञेसन्ति सुत्तं परसमयतो आहरित्वा ¶ दस्सितं. सब्बे सत्ता पथविं परिभुञ्जन्तीति पञ्हे पथविं अनिस्सिते सन्धाय पटिक्खिपति, निस्सिते सन्धाय पटिजानाति. पथविं अपरिभुञ्जित्वा परिनिब्बायन्तीति पञ्हे आरुप्पे परिनिब्बायन्तानं वसेन पटिजानाति. कम्मविपाकं अखेपेत्वाति इदं परसमयवसेन वुत्तं. कम्मविपाकञ्हि खेपेत्वाव परिनिब्बायन्तीति तेसं लद्धि. सकसमये पन कतोकासस्स कम्मस्स उप्पन्नं विपाकं अखेपेत्वा परिनिब्बानं नत्थि. तेसञ्च लद्धिया पथवी साधारणविपाकत्ता उप्पन्नविपाकोयेव होति. तं विपाकभावेन ठितं अखेपेत्वा परिनिब्बानं न युज्जतीति चोदेतुं वट्टति. इतरो लद्धिवसेन पटिक्खिपति. चक्कवत्तिसत्तस्स कम्मविपाकन्ति पञ्हे असाधारणं फस्सादिं सन्धाय पटिक्खिपति, साधारणं सन्धाय पटिजानाति. पथवीसमुद्दसूरियचन्दिमादयो हि सब्बेसं साधारणकम्मविपाकोति तेसं लद्धि.

४९४. इस्सरियसंवत्तनियन्ति एत्थ इस्सरियं नाम बहुधनता. आधिपच्चं नाम सेसजने अत्तनो वसे वत्तेत्वा तेहि गरुकातब्बट्ठेन अधिपतिभावो. तत्थ कम्मं पटिलाभवसेन तंसंवत्तनिकं नाम होति, न जनकवसेन. तस्मा विपाकभावे असाधकमेतन्ति.

पथवी कम्मविपाकोतिकथावण्णना.

८. जरामरणं विपाकोतिकथावण्णना

४९५. इदानि ¶ ¶ जरामरणं विपाकोतिकथा नाम होति. तत्थ येसं ‘‘अत्थि दुब्बण्णसंवत्तनियं कम्मं अप्पायुकसंवत्तनियं कम्म’’न्ति एत्थ दुब्बण्णता नाम जरा. अप्पायुकता नाम मरणं. तंसंवत्तनियञ्च कम्मं अत्थि. तस्मा जरामरणं विपाकोति लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. पटिलोमपञ्हे अनारम्मणन्ति रूपधम्मानं ताव अनारम्मणमेव, अरूपानं पन जरामरणं सम्पयोगलक्खणाभावा अनारम्मणमेव.

४९६. अकुसलानं धम्मानं जरामरणं अकुसलानं धम्मानं विपाकोति पञ्हे जरामरणेन नाम अनिट्ठविपाकेन भवितब्बन्ति लद्धिया पटिजानाति ¶ . तेनेव कारणेन कुसलानं धम्मानं जरामरणस्स कुसलविपाकतं पटिक्खिपति. परतो चस्स अकुसलविपाकतञ्ञेव पटिजानाति.

कुसलानञ्च अकुसलानञ्चाति पुच्छावसेन एकतो कतं, एकक्खणे पन तं नत्थि. अब्याकतानं अविपाकानं जरामरणं विपाकोति वत्तब्बताय परियायो नत्थि, तस्मा अब्याकतवसेन पुच्छा न कता.

४९७. दुब्बण्णसंवत्तनियन्ति एत्थ दुब्बण्णियं नाम अपरिसुद्धवण्णता. अप्पायुकता नाम आयुनो चिरं पवत्तितुं असमत्थता. तत्थ अकुसलकम्मं कम्मसमुट्ठानस्स दुब्बण्णरूपस्स कम्मपच्चयो होति, असदिसत्ता पनस्स तंविपाको न होति. उतुसमुट्ठानादिनो पन तंपटिलाभवसेन आयुनो च उपच्छेदकवसेन पच्चयो होति. एवमेतं परियायेन तंसंवत्तनिकं नाम होति, न विपाकफस्सादीनं विय जनकवसेन, तस्मा विपाकभावे असाधकं. सेसमेत्थ हेट्ठा वुत्तसदिसमेवाति.

जरामरणं विपाकोतिकथावण्णना.

९. अरियधम्मविपाककथावण्णना

४९८. इदानि ¶ ¶ अरियधम्मविपाककथा नाम होति. तत्थ येसं किलेसप्पहानमत्तमेव सामञ्ञफलं, न चित्तचेतसिका धम्माति लद्धि, सेय्यथापि अन्धकानं; ते सन्धाय नत्थि अरियधम्मविपाकोति पुच्छा सकवादिस्स. तत्थ अरियधम्मविपाकोति मग्गसङ्खातस्स अरियधम्मस्स विपाको. किलेसक्खयमत्तं अरियफलन्ति लद्धिया पटिञ्ञा इतरस्स. सामञ्ञन्ति समणभावो, मग्गस्सेतं नामं. ‘‘सामञ्ञञ्च वो, भिक्खवे, देसेस्सामि सामञ्ञफलञ्चा’’ति हि वुत्तं. ब्रह्मञ्ञेपि एसेव नयो.

सोतापत्तिफलं न विपाकोतिआदीसु सोतापत्तिमग्गादीनं अपचयगामितं सन्धाय अरियफलानं नविपाकभावं पटिजानाति, दानफलादीनं पटिक्खिपति ¶ . सो हि आचयगामित्तिकस्स एवं अत्थं धारेति – विपाकसङ्खातं आचयं गच्छन्ति, तं वा आचिनन्ता गच्छन्तीति आचयगामिनो, विपाकं अपचिनन्ता गच्छन्तीति अपचयगामिनोति. तस्मा एवं पटिजानाति च पटिक्खिपति च.

५००. कामावचरं कुसलं सविपाकं आचयगामीतिआदिका पुच्छा परवादिस्स, पटिञ्ञा च पटिक्खेपो च सकवादिस्स. लोकियञ्हि कुसलं विपाकचुतिपटिसन्धियो चेव वट्टञ्च आचिनन्तं गच्छतीति आचयगामि. लोकुत्तरकुसलं चुतिपटिसन्धियो चेव वट्टञ्च अपचिनन्तं गच्छतीति अपचयगामि. एवमेतं सविपाकमेव होति, न अपचयगामिवचनमत्तेन अविपाकं. इममत्थं सन्धायेत्थ सकवादिनो पटिञ्ञा च पटिक्खेपो च वेदितब्बाति.

अरियधम्मविपाककथावण्णना.

१०. विपाको विपाकधम्मधम्मोतिकथावण्णना

५०१. इदानि विपाको विपाकधम्मधम्मोतिकथा नाम ¶ होति. तत्थ यस्मा विपाको विपाकस्स अञ्ञमञ्ञादिपच्चयवसेन पच्चयो होति, तस्मा विपाकोपि विपाकधम्मधम्मोति येसं लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. तस्स विपाकोति तस्स विपाकधम्मधम्मस्स विपाकस्स यो विपाको, सोपि ते विपाकधम्मधम्मो होतीति ¶ पुच्छति. इतरो आयतिं विपाकदानाभावं सन्धाय पटिक्खिपति. दुतियं पुट्ठो तप्पच्चयापि अञ्ञस्स विपाकस्स उप्पत्तिं सन्धाय पटिजानाति. एवं सन्ते पनस्स कुसलाकुसलस्स विय तस्सापि विपाकस्स विपाको, तस्सापि विपाकोति वट्टानुपच्छेदो आपज्जतीति पुट्ठो समयविरोधभयेन पटिक्खिपति.

विपाकोति वातिआदिम्हि वचनसाधने पन यदि विपाकस्स विपाकधम्मधम्मेन एकत्थता भवेय्य, कुसलाकुसलब्याकतानं एकत्थतं आपज्जेय्याति पटिक्खिपति. विपाको च विपाकधम्मधम्मो चाति एत्थ ¶ अयं अधिप्पायो – सो हि चतूसु विपाकक्खन्धेसु एकेकं अञ्ञमञ्ञपच्चयादीसु पच्चयट्ठेन विपाकधम्मधम्मतं पच्चयुप्पन्नट्ठेन च विपाकं मञ्ञमानो ‘‘विपाको विपाकधम्मधम्मो’’ति पुट्ठो आमन्ताति पटिजानाति. अथ नं सकवादी ‘‘यस्मा तया एकक्खणे चतूसु खन्धेसु विपाको विपाकधम्मधम्मोपि अनुञ्ञातो, तस्मा तेसं सहगतादिभावो आपज्जती’’ति चोदेतुं एवमाह. इतरो कुसलाकुसलसङ्खातं विपाकधम्मधम्मं सन्धाय पटिक्खिपति. तञ्ञेव अकुसलन्ति यदि ते विपाको विपाकधम्मधम्मो, यो अकुसलविपाको, सो अकुसलं आपज्जति. कस्मा? विपाकधम्मधम्मेन एकत्ता. तञ्ञेव कुसलन्तिआदीसुपि एसेव नयो.

५०२. अञ्ञमञ्ञपच्चयाति इदं सहजातानं पच्चयमत्तवसेन वुत्तं, तस्मा असाधकं. महाभूतानम्पि च अञ्ञमञ्ञपच्चयता वुत्ता, न च तानि विपाकानि, न च विपाकधम्मधम्मानीति.

विपाको विपाकधम्मधम्मोतिकथावण्णना.

सत्तमो वग्गो.

८. अट्ठमवग्गो

१. छगतिकथावण्णना

५०३-५०४. इदानि ¶ ¶ छगतिकथा नाम होति. तत्थ असुरकायेन सद्धिं छगतियोति येसं लद्धि, सेय्यथापि अन्धकानञ्चेव उत्तरापथकानञ्च; ते सन्धाय पुच्छा सकवादिस्स, पटिञ्ञा इतरस्स. अथ नं सकवादी ‘‘पञ्च खो पनिमा, सारिपुत्त, गतियो’’ति (म. नि. १.१५३) लोमहंसनपरियाये परिच्छिन्नानं गतीनं वसेन चोदेतुं ननु पञ्च गतियोतिआदिमाह. इतरो सुत्तविरोधभयेन पटिजानाति. कस्मा पन सकवादी छ गतियो न सम्पटिच्छति, ननु ‘‘चतूहापायेहि च विप्पमुत्तो’’ति एत्थ असुरकायोपि गहितोति. सच्चं गहितो, न पनेसा गति. कस्मा? विसुं अभावतो. असुरकायस्मिञ्हि कालकञ्चिका असुरा पेतगतिया सङ्गहिता ¶ , वेपचित्तिपरिसा देवगतिया, असुरकायोति विसुं एका गति नाम नत्थि.

इदानि एतमेव अत्थं दस्सेतुं ननु कालकञ्चिकातिआदि आरद्धं. तत्थ समानवण्णाति सदिसरूपसण्ठाना बीभच्छा विरूपा दुद्दस्सिका. समानभोगाति सदिसमेथुनसमाचारा. समानाहाराति सदिसखेळसिङ्घाणिकपुब्बलोहितादिआहारा. समानायुकाति सदिसआयुपरिच्छेदा. आवाहविवाहन्ति कञ्ञागहणञ्चेव कञ्ञादानञ्च. सुक्कपक्खे समानवण्णाति सदिसरूपसण्ठाना अभिरूपा पासादिका दस्सनीया पभासम्पन्ना. समानभोगाति सदिसपञ्चकआमगुणभोगा. समानाहाराति सदिससुधाभोजनादिआहारा. सेसं वुत्तनयमेव. ननु अत्थि असुरकायोति इदं असुरकायस्सेव साधकं. तस्स पन विसुं गतिपरिच्छेदाभावेन न गतिसाधकन्ति.

छगतिकथावण्णना.

२. अन्तराभवकथावण्णना

५०५. इदानि ¶ ¶ अन्तराभवकथा नाम होति. तत्थ येसं ‘‘अन्तरा परिनिब्बायी’’ति सुत्तपदं अयोनिसो गहेत्वा ‘‘अन्तराभवो नाम अत्थि, यत्थ सत्तो दिब्बचक्खुको विय अदिब्बचक्खुको, इद्धिमा विय अनिद्धिमा मातापितिसमागमञ्चेव उतुसमयञ्च ओलोकयमानो सत्ताहं वा अतिरेकसत्ताहं वा तिट्ठती’’ति लद्धि, सेय्यथापि पुब्बसेलियानञ्चेव सम्मितियानञ्च; ते सन्धाय अत्थीति पुच्छा सकवादिस्स, लद्धियं ठत्वा पटिञ्ञा इतरस्स. अथ नं ये च भगवता तयो भवा वुत्ता, तेसं वसेन चोदेतुं कामभवोतिआदिमाह. तत्रायं अधिप्पायो – यदि ते अन्तराभवो नाम कोचि भवो अत्थि, तेन कामभवादीनंयेव अञ्ञतरेन भवितब्बं पञ्चवोकारभवादिना विय, तेन तं पुच्छामि – ‘‘किं ते अयं अन्तराभवो नाम कामभवो, उदाहु रूपभवो अरूपभवो वा’’ति? इतरो तथा अनिच्छन्तो सब्बं पटिक्खिपति. कामभवस्स चातिआदि यदि अन्तराभवो नाम अत्थि, इमेसं भवानं अन्तरा द्विन्नं सीमानं सीमन्तरिका ¶ विय भवेय्याति चोदेतुं आरद्धं. परवादी पन तथा अनिच्छन्तो सब्बपञ्हे पटिक्खिपति केवलं लद्धिया, न सहधम्मेन. तेनेव नं सकवादी ‘नो वत रे’ति पटिसेधेति.

५०६. पञ्चमी सा योनीतिआदीनिपि यथापरिच्छिन्नयोनिआदीसु सो समोधानं न गच्छति, अथ तेन ततो ततो अतिरेकेन भवितब्बन्ति चोदेतुं वुत्तानि. अन्तराभवूपगं कम्मन्ति यदि सोपि एको भवो, यथा कामभवूपगादीनि कम्मानि अत्थीति सत्थारा विभजित्वा दस्सितानि, एवं तदुपगेनापि कम्मेन भवितब्बन्ति चोदनत्थं वुत्तं. यस्मा पन परसमये अन्तराभवूपगं नाम पाटियेक्कं कम्मं नत्थि, यं यं भवं उपपज्जिस्सति, तदुपगेनेव कम्मेन अन्तराभवे निब्बत्ततीति तेसं लद्धि, तस्मा ‘नहेव’न्ति पटिक्खित्तं. अत्थि अन्तराभवूपगा सत्ताति पुट्ठोपि कामभवूपगायेव नाम तेति लद्धिया पटिक्खिपति. जायन्तीतिआदीनि पुट्ठोपि तत्थ जातिजरामरणानि चेव चुतिपटिसन्धिपरम्परञ्च ¶ अनिच्छन्तो पटिक्खिपति. रूपादिवसेन पुट्ठोपि यस्मा अन्तराभवसत्तस्स अनिदस्सनं रूपं, वेदनादयोपि अञ्ञेसं विय न ओळारिकाति तस्स लद्धि, तस्मा पटिक्खिपति. इमिनाव कारणेन पञ्चवोकारभवभावेपि पटिक्खेपो वेदितब्बो.

५०७. इदानि ¶ कामभवो भवो गतीतिआदि भवसंसन्दनं नाम होति. तत्रायं अधिप्पायो – यदि ते अन्तराभवो नाम कोचि भवो भवेय्य, यथा कामभवादीसु भवगतिआदिभेदो लब्भति, तथा तत्रापि लब्भेथ. यथा वा तत्थ न लब्भति, तथा इमेसुपि न लब्भेथ. समानस्मिञ्हि भवभावे एतेस्वेवेस विभागो अत्थि, न इतरस्मिन्ति को एत्थ विसेसहेतूति. इतरो पुन लद्धिमत्तवसेन तं तं पटिजानाति चेव पटिक्खिपति च.

५०८. सब्बेसञ्ञेव सत्तानं अत्थि अन्तराभवोति पुट्ठो यस्मा निरयूपगअसञ्ञसत्तूपगअरूपूपगानं अन्तराभवं न इच्छति, तस्मा पटिक्खिपति. तेनेव कारणेन पटिलोमे पटिजानाति. आनन्तरियस्सातिआदि येसं सो अन्तराभवं न इच्छति, ते ताव विभजित्वा ¶ दस्सेतुं वुत्तं. तं सब्बं पाळिअनुसारेनेव वेदितब्बं सद्धिं सुत्तसाधनेनाति.

अन्तराभवकथावण्णना.

३. कामगुणकथावण्णना

५१०. इदानि कामगुणकथा नाम होति. तत्थ सकसमये ताव कामधातूति वत्थुकामापि वुच्चन्ति – किलेसकामापि कामभवोपि. एतेसु हि वत्थुकामा कमनीयट्ठेन कामा, सभावनिस्सत्तसुञ्ञतट्ठेन धातूति कामधातु. किलेसकामा कमनीयट्ठेन चेव कमनट्ठेन च कामा, यथावुत्तेनेवत्थेन धातूति कामधातु. कामभवो कमनीयट्ठेन ¶ कमनट्ठेन वत्थुकामपवत्तिदेसट्ठेनाति तीहि कारणेहि कामो, यथावुत्तेनेवत्थेन धातूति कामधातु. परसमये पन – ‘‘पञ्चिमे, भिक्खवे, कामगुणा’’ति वचनमत्तं निस्साय पञ्चेव कामगुणा कामधातूति गहितं. तस्मा येसं अयं लद्धि, सेय्यथापि एतरहि पुब्बसेलियानं; ते सन्धाय कामधातुनानत्तं बोधेतुं पञ्चेवाति पुच्छा सकवादिस्स, लद्धिवसेन पटिञ्ञा इतरस्स. ननु अत्थीतिआदि किलेसकामदस्सनत्थं वुत्तं. तत्थ तप्पटिसंयुत्तोति कामगुणपटिसंयुत्तो, कामगुणारम्मणोति अत्थो. नो च वत रे वत्तब्बे पञ्चेवाति इमेसु तप्पटिसंयुत्तछन्दादीसु सति ¶ पञ्चेव कामगुणा कामधातूति न वत्तब्बं. एतेपि हि छन्दादयो कमनीयट्ठेन कामा च धातु चातिपि कामधातु. कमनट्ठेन कामसङ्खाता धातूतिपि कामधातूति अत्थो.

मनुस्सानं चक्खुन्तिआदि वत्थुकामदस्सनत्थं वुत्तं. तत्थ परवादी छन्नम्पि आयतनानं वत्थुकामभावेन नकामधातुभावं पटिक्खिपित्वा पुन मनोति पुट्ठो महग्गतलोकुत्तरं सन्धाय नकामधातुभावं पटिजानाति. यस्मा पन सब्बोपि तेभूमकमनो कामधातुयेव, तस्मा नं सकवादी सुत्तेन निग्गण्हाति.

५११. कामगुणा ¶ भवोतिआदि भवस्स कामधातुभावदस्सनत्थं वुत्तं. यस्मा पन कामगुणमत्ते भवोति वोहारो नत्थि, तस्मा परवादी नहेवाति पटिक्खिपति. कामगुणूपगं कम्मन्तिआदि सब्बं कामगुणमत्तस्स नकामधातुभावदस्सनत्थं वुत्तं. कामधातुसङ्खातकामभवूपगमेव हि कम्मं अत्थि, कामभवूपगा एव च सत्ता होन्ति. तत्थ जायन्ति जियन्ति मियन्ति चवन्ति उपपज्जन्ति, न कामगुणेसूति इमिना उपायेन सब्बत्थ अत्थो वेदितब्बोति.

कामगुणकथावण्णना.

४. कामकथावण्णना

५१३-५१४. इदानि ¶ कामकथा नाम होति. तत्थ येसं ‘‘पञ्चिमे, भिक्खवे, कामगुणा’’ति वचनमत्तं निस्साय रूपायतनादीनि पञ्चेवायतनानि कामाति लद्धि, सेय्यथापि पुब्बसेलियानं; तेसं किलेसकामस्सेव निप्परियायेन कामभावं दस्सेतुं पञ्चेवाति पुच्छा सकवादिस्स, पटिञ्ञा इतरस्स. सेसमेत्थ उत्तानत्थमेवाति.

कामकथावण्णना.

५. रूपधातुकथावण्णना

५१५-५१६. इदानि ¶ रूपधातुकथा नाम होति. तत्थ ‘‘रूपिनो धम्मा रूपधातु नामा’’ति येसं लद्धि, सेय्यथापि अन्धकानं; ते सन्धाय रूपिनोति पुच्छा सकवादिस्स, पटिञ्ञा इतरस्स. अथ नं सकवादी यस्मा रूपधातु नाम रूपभवो, न रूपमत्तमेव, तस्मा तेनत्थेन चोदेतुं रूपधातूतिआदिमाह. तं सब्बं कामगुणकथायं वुत्तनयेनेव वेदितब्बं. साव कामधातूति पुट्ठो भूमिपरिच्छेदेन विरोधं पस्समानो पटिक्खिपति. पुन दळ्हं कत्वा पुट्ठो अत्तनो लद्धिवसेन पटिजानाति. एवं सन्ते पन द्वीहि भवेहि समन्नागतता आपज्जति, तेन तं सकवादी कामभवेन चाति आदिमाह. इतरो एकस्स द्वीहि समन्नागताभावतो पटिक्खिपतीति.

रूपधातुकथावण्णना.

६. अरूपधातुकथावण्णना

५१७-५१८. अरूपधातुकथायपि ¶ इमिनावुपायेन अत्थो वेदितब्बो. अरूपधम्मेसु पन वेदनाक्खन्धमेव गहेत्वा वेदना ¶ भवोतिआदिना नयेनेत्थ देसना कता. तत्थ किं ते अरूपिनो धम्माति सङ्खं गता वेदनादीसु अञ्ञतरा होतीति एवमत्थो दट्ठब्बो. सेसं हेट्ठा वुत्तनयेनेव वेदितब्बन्ति.

अरूपधातुकथावण्णना.

७. रूपधातुया आयतनकथावण्णना

५१९. इदानि रूपधातुया आयतनकथा नाम होति. तत्थ येसं ‘‘रूपी मनोमयो सब्बङ्गपच्चङ्गी अहीनिन्द्रियो’’ति (दी. नि. १.८७) सुत्तं निस्साय ब्रह्मकायिकानं घानादिनिमित्तानिपि आयतनानेवाति कप्पेत्वा सळायतनिको तेसं अत्तभावोति लद्धि, सेय्यथापि ¶ अन्धकानञ्चेव सम्मितियानञ्च; ते सन्धाय सळायतनिकोति पुच्छा सकवादिस्स, लद्धिवसेन पटिञ्ञा इतरस्स. अथ नं यं तत्थ आयतनं नत्थि, तस्स वसेन चोदेतुं अत्थि तत्थ घानायतनन्तिआदि आरद्धं. ततो परवादी यं तत्थ अज्झत्तिकानं तिण्णं आयतनानं घानादिकं सण्ठाननिमित्तं तदेव आयतनन्ति लद्धिया पटिजानाति. बाहिरानं गन्धायतनादीनं वसेन पुट्ठो घानप्पसादादयो तत्थ न इच्छति, तस्मा तेसं गोचरं पटिसेधेन्तो पटिक्खिपति. पटिलोमपञ्हसंसन्दनपञ्हेसुपि इमिनावुपायेन अत्थो वेदितब्बो.

५२१. अत्थि तत्थ घानायतनं अत्थि गन्धायतनं तेन घानेन तं गन्धं घायतीति तस्मिंयेव परसमये एकच्चे आचरिये सन्धाय वुत्तं. ते किर तत्थ छ अज्झत्तिकानि आयतनानि परिपुण्णानि इच्छन्ति, आयतनेन च नाम सकिच्चकेन भवितब्बन्ति तेहि घानादीहि ते गन्धादयो घायन्ति सायन्ति फुसन्तीतिपि इच्छन्ति. तं लद्धिं सन्धाय परवादी आमन्ताति पटिजानाति.

५२२. अत्थि ¶ तत्थ मूलगन्धोतिआदीनि पन पुट्ठो अत्थिभावं साधेतुं असक्कोन्तो पटिक्खिपति. ननु अत्थि तत्थ ¶ घाननिमित्तन्तिआदि सण्ठानमत्तस्सेव साधकं, न आयतनस्स, तस्मा उदाहटम्पि अनुदाहटसदिसमेवाति.

रूपधातुया आयतनकथावण्णना.

८. अरूपे रूपकथावण्णना

५२४-५२६. इदानि अरूपे रूपकथा नाम होति. तत्थ येसं ‘‘विञ्ञाणपच्चया नामरूप’’न्ति वचनतो आरुप्पभवेपि ओळारिकरूपा निस्सटं सुखुमरूपं अत्थीति लद्धि, सेय्यथापि अन्धकानं; ते सन्धाय अत्थि रूपन्ति पुच्छा सकवादिस्स, पटिञ्ञा इतरस्स. सेसमेत्थ उत्तानत्थमेवाति.

अरूपे रूपकथावण्णना.

९. रूपं कम्मन्तिकथावण्णना

५२७-५३७. इदानि ¶ रूपं कम्मन्तिकथा नाम होति. तत्थ येसं कायवचीविञ्ञत्तिसङ्खातं रूपमेव कायकम्मं वचीकम्मं नाम, तञ्च कुसलसमुट्ठानं कुसलं, अकुसलसमुट्ठानं अकुसलन्ति लद्धि, सेय्यथापि महिसासकानञ्चेव सम्मितियानञ्च; ते सन्धाय कुसलेन चित्तेन समुट्ठितन्ति पुच्छा सकवादिस्स, पटिञ्ञा इतरस्स. अथ नं सचे तं कुसलं, य्वायं सारम्मणादिभेदो कुसलस्स लब्भति, अत्थि ते सो तस्साति चोदेतुं सारम्मणन्तिआदि आरद्धं. तत्थ पत्थना पणिधीति चेतनायेवेतं वेवचनं. कुसलचेतनायेव हि पकप्पयमाना पत्थनाति. पकप्पनवसेन ठितत्ता पणिधीति च वुच्चति. परतो पन कुसलेन चित्तेन समुट्ठिता वेदना सञ्ञा चेतना सद्धातिआदीसु वेदनादीनञ्ञेव चेत्थ पत्थना पणिधीति लब्भति, न चेतनाय. कस्मा? द्विन्नं चेतनानं एकतो अभावा, सोतपतितत्ता पन एवं तन्ति गताति वेदितब्बा. रूपायतनन्तिआदि ¶ पुरिमवारे ‘‘सब्बन्तं कुसल’’न्ति संखित्तस्स पभेददस्सनत्थं वुत्तं ¶ . सेसा संसन्दननया, वचीकम्मकथा ‘‘अकुसलेन चित्तेन समुट्ठित’’न्तिआदिविधानञ्च सब्बं पाळिअनुसारेनेव वेदितब्बं. असुचीति पनेत्थ सुक्कं अधिप्पेतं. सुत्तसाधनं उत्तानत्थमेव.

रूपं कम्मन्तिकथावण्णना.

१०. जीवितिन्द्रियकथावण्णना

५४०. इदानि जीवितिन्द्रियकथा नाम होति. तत्थ येसं जीवितिन्द्रियं नाम चित्तविप्पयुत्तो अरूपधम्मो, तस्मा रूपजीवितिन्द्रियं नत्थीति लद्धि, सेय्यथापि पुब्बसेलियानञ्चेव सम्मितियानञ्च; ते सन्धाय पुच्छा सकवादिस्स, पटिञ्ञा इतरस्स. नत्थि रूपीनं धम्मानं आयूति पञ्हे उपादिन्नरूपानम्पि तिणकट्ठादीनम्पि सन्तानवसेन पवत्तिमेव आयु ठिति यपना यापना इरियना वत्तना पालनाति इच्छति, तस्मा पटिक्खिपति. अत्थीति पञ्हेपि इमिना कारणेन पटिजानाति. अत्थि अरूपजीवितिन्द्रियन्ति पञ्हे ¶ अरूपधम्मानं चित्तविप्पयुत्तं जीवितिन्द्रियसन्तानं नाम अत्थीति इच्छति, तस्मा पटिजानाति.

५४१. रूपीनं धम्मानं आयु अरूपजीवितिन्द्रियन्ति पञ्हे सत्तसन्ताने रूपिनो वा होन्तु अरूपिनो वा, सब्बेसं चित्तविप्पयुत्तं अरूपजीवितिन्द्रियमेव इच्छति, तस्मा पटिजानाति.

५४२. निरोधसमापन्नपञ्हेसुपि चित्तविप्पयुत्तं अरूपजीवितमेव सन्धाय पटिक्खिपति च पटिजानाति च. सकवादी पन तं असम्पटिच्छन्तो यं अरूपपवत्ते असति अत्थि, रूपेन तेन भवितब्बन्ति चोदेतुं हञ्चीतिआदिमाह. सङ्खारक्खन्धपञ्हे फस्सादिसङ्खारक्खन्धं सन्धाय पटिक्खिपति, कायकम्मादिसङ्खारक्खन्धं सन्धाय पटिजानाति. कायविञ्ञत्ति ¶ वचीविञ्ञत्ति सम्मावाचा सम्माकम्मन्तो जीवितिन्द्रियन्ति एवमादयोपि धम्मा सङ्खारक्खन्धपरियापन्नातिस्स लद्धि. सकवादी पन तं असम्पटिच्छन्तो यदि निरुद्धेपि अरूपपवत्ते सङ्खारक्खन्धो अत्थि, चतुन्नम्पि खन्धानं अत्थिता होतूति चोदेतुं अत्थि वेदनाक्खन्धोति आदिमाह. इतरो अन्तोसमापत्तिं सन्धाय पटिक्खिपति, समापज्जन्तस्स च वुट्ठहन्तस्स च पुब्बापरभागं सन्धाय पटिजानाति.

५४३. असञ्ञसत्तवारेपि ¶ एसेव नयो. तस्स हि लद्धिया असञ्ञसत्तानं पटिसन्धिकाले चित्तं उप्पज्जित्वा निरुज्झति, तेन सह चित्तविप्पयुत्तअरूपजीवितिन्द्रियं उप्पज्जित्वा यावतायुकं पवत्तति. तस्मा तेसं जीवितिन्द्रियं नत्थीति पुट्ठो पटिक्खिपति, अत्थीति पुट्ठो पटिजानाति. वेदनाक्खन्धादयोपि तेसं पवत्तिवसेन पटिक्खिपति, चुतिपटिसन्धिवसेन पटिजानाति. सकवादी पन तं अनिच्छन्तो ‘‘सचे तत्थ एकक्खणेपि वेदनादयो अत्थि, पञ्चवोकारभवत्तं पापुणाती’’ति चोदेतुं पञ्चवोकारभवोति आह. इतरो सुत्तविरोधभया पटिक्खिपति.

५४४-५४५. एकदेसं भिज्जतीति पञ्हे सम्पयुत्तं भिज्जति, विप्पयुत्तं तिट्ठतीति तस्स लद्धि, तस्मा पटिजानाति. द्वे जीवितिन्द्रियानीति पुच्छा परवादिस्स, पटिञ्ञा सकवादिस्स. रूपारूपवसेन हि द्वे जीवितिन्द्रियानि, तेहियेव सत्तो जीवति, तेसं भङ्गेन मरतीति वुच्चति. चुतिक्खणस्मिञ्हि द्वेपि जीवितानि सहेव भिज्जन्ति.

जीवितिन्द्रियकथावण्णना.

११. कम्महेतुकथावण्णना

५४६. इदानि ¶ कम्महेतुकथा नाम होति. तत्थ येन अरहता पुरिमभवे अरहा अब्भाचिक्खितपुब्बो, सो तस्स कम्मस्स हेतु अरहत्ता परिहायतीति येसं लद्धि, सेय्यथापि पुब्बसेलियानञ्चेव सम्मितियानञ्च; ते सन्धाय कम्महेतूति पुच्छा सकवादिस्स, पटिञ्ञा इतरस्स. सेसं परिहानिकथायं वुत्तनयमेव ¶ .

हन्द हि अरहन्तानं अब्भाचिक्खतीति इदं यस्स कम्मस्स हेतु परिहायति, तं सम्पटिच्छापेतुं वदति. अथ नं सकवादी तं पक्खं पटिजानापेत्वा ‘‘यदि एवं येहि अरहन्तो न अब्भाचिक्खितपुब्बा, ते सब्बे अरहत्तं पापुणेय्यु’’न्ति चोदेतुं ये केचीतिआदिमाह. इतरो तस्स कम्मस्स अरहत्तं सम्पापुणने नियामं अपस्सन्तो पटिक्खिपति.

कम्महेतुकथावण्णना.

अट्ठमो वग्गो.

९. नवमवग्गो

१. आनिसंसदस्सावीकथावण्णना

५४७. इदानि ¶ ¶ आनिसंसदस्सावीकथा नाम होति. तत्थ सकसमये सङ्खारे आदीनवतो निब्बानञ्च आनिसंसतो पस्सन्तस्स संयोजनप्पहानं होतीति निच्छयो. येसं पन तेसु द्वीसुपि एकंसिकवादं गहेत्वा ‘‘आनिसंसदस्साविनोव संयोजनप्पहानं होती’’ति लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. अथस्स ‘‘एकंसिकवादो तया गहितो, आदीनवोपि दट्ठब्बोयेवा’’ति विभागदस्सनत्थं सकवादी सङ्खारेतिआदिमाह.

सङ्खारे ¶ च अनिच्चतो मनसिकरोति, निब्बाने च आनिसंसदस्सावी होतीति पञ्हस्मिं अयमधिप्पायो – आनिसंसदस्साविस्स संयोजनानं पहानं होतीति तेसं लद्धि. ननु सङ्खारे अनिच्चतो मनसिकरोतो संयोजना पहीयन्तीति च पुट्ठो आमन्ताति पटिजानाति. तेन ते सङ्खारे च अनिच्चतो मनसिकरोति, निब्बाने च आनिसंसदस्सावी होतीति इदं आपज्जति, किं सम्पटिच्छसि एतन्ति. ततो परवादी एकचित्तक्खणं सन्धाय पटिक्खिपति, दुतियं पुट्ठो नानाचित्तवसेन पटिजानाति. सकवादी पनस्स अधिप्पायं मद्दित्वा अनिच्चमनसिकारस्स आनिसंसदस्साविताय च एकतो पटिञ्ञातत्ता द्विन्नं फस्सानं द्विन्नं चित्तानं समोधानं होतीति पुच्छति. इतरो द्विन्नं समोधानं अपस्सन्तो पटिक्खिपति. दुक्खतोतिआदिपञ्हेसुपि एसेव नयो. किं पनेत्थ सन्निट्ठानं, किं अनिच्चादितो मनसिकरोतो संयोजना पहीयन्ति, उदाहु निब्बाने आनिसंसदस्साविस्स, उदाहु द्वेपि एकतो करोन्तस्साति. यदि ताव अनिच्चादितो मनसिकरोतो पहानं ¶ भवेय्य, विपस्सनाचित्तेनेव भवेय्य. अथ आनिसंसदस्साविनो, अनुस्सववसेन निब्बाने आनिसंसं पस्सन्तस्स विपस्सनाचित्तेनेव भवेय्य, अथ द्वेपि एकतो करोन्तस्स भवेय्य, द्विन्नं फस्सादीनं समोधानं भवेय्य. यस्मा पन अरियमग्गक्खणे अनिच्चादिमनसिकारस्स किच्चं निप्फत्तिं गच्छति पुन निच्चतोतिआदिगहणस्स अनुप्पत्तिधम्मभावतो, निब्बाने च पच्चक्खतोव आनिसंसदस्सनं इज्झति, तस्मा किच्चनिप्फत्तिवसेन अनिच्चादितो ¶ मनसिकरोतो आरम्मणं कत्वा पवत्तिवसेन च निब्बाने आनिसंसदस्साविस्स संयोजनानं पहानं होतीति वेदितब्बं.

५४८. निब्बाने सुखानुपस्सीति सुत्तं निब्बाने सुखानुपस्सनादिभावमेव साधेति, न आनिसंसदस्सावितामत्तेन संयोजनानं पहानं. तस्मा आभतम्पि अनाभतसदिसमेवाति.

आनिसंसदस्सावीकथावण्णना.

२. अमतारम्मणकथावण्णना

५४९. इदानि अमतारम्मणकथा नाम होति. तत्थ येसं ‘‘निब्बानं मञ्ञती’’तिआदीनं ¶ अयोनिसो अत्थं गहेत्वा अमतारम्मणं संयोजनं होतीति लद्धि, सेय्यथापि पुब्बसेलियानं, ते सन्धाय पुच्छा सकवादिस्स, पटिञ्ञा इतरस्स. अथ नं सचे अमतारम्मणं संयोजनं, अमतस्स संयोजनियादिभावो आपज्जतीति चोदेतुं अमतं संयोजनियन्तिआदिमाह. इतरो सुत्तविरोधभयेन सब्बं पटिक्खिपति. इमिना उपायेन सब्बवारेसु अत्थो वेदितब्बो. निब्बानं निब्बानतोति आहटसुत्तं पन दिट्ठधम्मनिब्बानं सन्धाय भासितं, तस्मा असाधकन्ति.

अमतारम्मणकथावण्णना.

३. रूपं सारम्मणन्तिकथावण्णना

५५२-५५३. इदानि ¶ रूपं सारम्मणन्तिकथा नाम होति. तत्थ रूपं सप्पच्चयट्ठेन सारम्मणं नाम होति, न अञ्ञं आरम्मणं करोतीति आरम्मणपच्चयवसेन. येसं पन अविसेसेन रूपं सारम्मणन्ति लद्धि, सेय्यथापि उत्तरापथकानं; ते सन्धाय आरम्मणत्थस्स विभागदस्सनत्थं पुच्छा सकवादिस्स, पटिञ्ञा इतरस्स. सेसमेत्थ पाळिअनुसारेनेव वेदितब्बं. न वत्तब्बन्ति पञ्हे ओलुब्भारम्मणं सन्धाय पटिञ्ञा सकवादिस्स. दुतियपञ्हेपि पच्चयारम्मणं सन्धाय पटिञ्ञा तस्सेव. इति सप्पच्चयट्ठेनेवेत्थ सारम्मणता सिद्धाति.

रूपं सारम्मणन्तिकथावण्णना.

४. अनुसया अनारम्मणकथावण्णना

५५४-५५६. इदानि ¶ अनुसया अनारम्मणातिकथा नाम होति. तत्थ येसं अनुसया नाम चित्तविप्पयुत्ता अहेतुका अब्याकता, तेनेव च अनारम्मणाति लद्धि, सेय्यथापि अन्धकानञ्चेव एकच्चानञ्च उत्तरापथकानं; ते सन्धाय अनुसयाति पुच्छा सकवादिस्स, पटिञ्ञा ¶ इतरस्स. अथ नं अनारम्मणेन नाम एवंविधेन भवितब्बन्ति चोदेतुं रूपन्तिआदिमाह. कामरागोतिआदि कामरागानुसयतो अनञ्ञत्ता दस्सितं. सङ्खारक्खन्धो अनारम्मणोति पञ्हे चित्तसम्पयुत्तसङ्खारक्खन्धं सन्धाय पटिक्खिपति. अनुसयं जीवितिन्द्रियं कायकम्मादिरूपञ्च सङ्खारक्खन्धपरियापन्नं, तं सन्धाय पटिजानाति. इमिनावुपायेन सब्बवारेसु अत्थो वेदितब्बो. सानुसयोति पञ्हे पन अप्पहीनानुसयत्ता सानुसयता अनुञ्ञाता. न अनुसयानं पवत्तिसब्भावा. यो हि अप्पहीनो, न सो अतीतो, नानागतो, न पच्चुप्पन्नो च. मग्गवज्झकिलेसो पनेस अप्पहीनत्ताव अत्थीति ¶ वुच्चति. एवरूपस्स च इदं नाम आरम्मणन्ति न वत्तब्बं. तस्मा तं पटिक्खित्तं. तं पनेतं न केवलं अनुसयस्स, रागादीनम्पि तादिसमेव, तस्मा अनुसयानं अनारम्मणतासाधकं न होतीति.

अनुसया अनारम्मणातिकथावण्णना.

५. ञाणं अनारम्मणन्तिकथावण्णना

५५७-५५८. इदानि ञाणं अनारम्मणन्तिकथा नाम होति. तत्थ यस्मा अरहा चक्खुविञ्ञाणसमङ्गी ञाणीति वुच्चति, तस्स ञाणस्स तस्मिं खणे आरम्मणं नत्थि, तस्मा ञाणं अनारम्मणन्ति येसं लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. सेसमेत्थ अनुसयकथायं वुत्तनयेनेव वेदितब्बन्ति.

ञाणं अनारम्मणन्तिकथावण्णना.

६. अतीतानागतारम्मणकथावण्णना

५५९-५६१. इदानि अतीतानागतारम्मणकथा नाम होति. तत्थ यस्मा अतीतानागतारम्मणं नाम नत्थि, तस्मा तदारम्मणेन चित्तेन आरम्मणस्स ¶ नत्थिताय अनारम्मणेन ¶ भवितब्बन्ति अतीतं अनारम्मणन्ति येसं लद्धि, सेय्यथापि उत्तरापथकानं, ते सन्धाय अतीतारम्मणन्ति पुच्छा सकवादिस्स, पटिञ्ञा इतरस्स. सेसमेत्थ यथापाळिमेव निय्यातीति.

अतीतानागतारम्मणकथावण्णना.

७. वितक्कानुपतितकथावण्णना

५६२. इदानि ¶ वितक्कानुपतितकथा नाम होति. तत्थ वितक्कानुपतिता नाम दुविधा – आरम्मणतो च सम्पयोगतो च. तत्थ असुकचित्तं नाम वितक्कस्सारम्मणं न होतीति नियमाभावतो सिया सब्बं चित्तं वितक्कानुपतितं, वितक्कविप्पयुत्तचित्तसब्भावतो पन न सब्बं चित्तं वितक्कानुपतितं. इति इमं विभागं अकत्वा अविसेसेनेव सब्बं चित्तं वितक्कानुपतितन्ति येसं लद्धि, सेय्यथापि उत्तरापथकानं, ते सन्धाय पुच्छा सकवादिस्स, पटिञ्ञा इतरस्स. सेसमेत्थ पाळिवसेनेव निय्यातीति.

वितक्कानुपतितकथावण्णना.

८. वितक्कविप्फारसद्दकथावण्णना

५६३. इदानि वितक्कविप्फारसद्दकथा नाम होति. तत्थ यस्मा ‘‘वितक्कविचारा वचीसङ्खारा’’ति वुत्ता, तस्मा सब्बसो वितक्कयतो विचारयतो अन्तमसो मनोधातुपवत्तिकालेपि वितक्कविप्फारो सद्दोयेवाति येसं लद्धि, सेय्यथापि पुब्बसेलियानं; ते सन्धाय सब्बसोति पुच्छा सकवादिस्स पटिञ्ञा इतरस्स. अथ नं यदि वितक्कविप्फारमत्तं सद्दो, फस्सादिविप्फारोपि सद्दो भवेय्याति चोदेतुं सब्बसो फुसयतोतिआदिमाह. इतरो तादिसं सुत्तलेसं अपस्सन्तो पटिक्खिपति. वितक्कविप्फारो सद्दो सोतविञ्ञेय्योति वितक्कस्स विप्फारमत्तमेव ¶ सद्दोति कत्वा पुच्छति, न वितक्कविप्फारसमुट्ठितं सुत्तपमत्तानं ¶ सद्दं, इतरो पटिक्खिपति. ननु वितक्कविप्फारसद्दो न सोतविञ्ञेय्योति इदं तस्सेव लद्धिया दस्सेति. सो हि वितक्कविप्फारमत्तमेव सद्दं वदति, सो न सोतविञ्ञेय्योति. इतरो पन ‘‘वितक्कविप्फारसद्दं सुत्वा आदिसती’’ ति (दी. नि. ३.१४८) वचनतो सोतविञ्ञेय्योवाति वदति.

वितक्कविप्फारसद्दकथावण्णना.

९. नयथाचित्तस्स वाचातिकथावण्णना

५६४. इदानि ¶ नयथाचित्तस्स वाचातिकथा नाम होति. तत्थ यस्मा कोचि अञ्ञं भणिस्सामीति अञ्ञं भणति, तस्मा नयथाचित्तस्स वाचा चित्तानुरूपा चित्तानुगतिका न होति, विनापि चित्तेन पवत्ततीति येसं लद्धि; सेय्यथापि पुब्बसेलियानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि तंसमुट्ठापकं चित्तं न सिया, फस्सादयोपि तस्मिं खणे न सियु’’न्ति चोदेतुं अफस्सकस्सातिआदिमाह. न भणितुकामोतिआदीसु यस्मा अञ्ञं भणिस्सामीति अञ्ञं भणन्तोपि भणितुकामोयेव नाम होति, तस्मा न हेवाति पटिक्खिपति.

५६५. ननु अत्थि कोचि अञ्ञं भणिस्सामीतिआदीसु चीवरन्ति भणितुकामो चीरन्ति भणेय्य. तत्थ अञ्ञं भणितुकामताचित्तं, अञ्ञं भणनचित्तं, इति पुब्बभागेन चित्तेन असदिसत्ता अयथाचित्तो नाम होति, तेनस्स केवलं अनापत्ति नाम होति, न पन चीरन्ति वचनसमुट्ठापकचित्तं नत्थि, इति अचित्तका सा वाचाति अत्थं सन्धाय इमिना उदाहरणेन ‘‘नयथाचित्तस्स वाचा’’ति पतिट्ठापितापि अप्पतिट्ठापिताव होतीति.

नयथाचित्तस्स वाचातिकथावण्णना.

१०. नयथाचित्तस्स कायकम्मन्तिकथावण्णना

५६६-५६७. इदानि ¶ ¶ नयथाचित्तस्स कायकम्मन्तिकथा नाम होति. तत्थ यस्मा कोचि अञ्ञत्र गच्छिस्सामीति अञ्ञत्र गच्छति, तस्मा नयथाचित्तस्स कायकम्मं चित्तानुरूपं चित्तानुगतिकं न होति, विनापि चित्तेन पवत्ततीति येसं लद्धि, सेय्यथापि पुब्बसेलियानंयेव, ते सन्धाय पुच्छा सकवादिस्स, पटिञ्ञा इतरस्स. सेसमेत्थ हेट्ठा वुत्तनयेनेव वेदितब्बन्ति.

नयथाचित्तस्स कायकम्मन्तिकथावण्णना.

११. अतीतानागतसमन्नागतकथावण्णना

५६८-५७०. इदानि ¶ अतीतानागतेहि समन्नागतकथा नाम होति. तत्थ समन्नागतपञ्ञत्ति पटिलाभपञ्ञत्तीति द्वे पञ्ञत्तियो वेदितब्बा. तासु पच्चुप्पन्नधम्मसमङ्गी समन्नागतोति वुच्चति. अट्ठ समापत्तिलाभिनो पन समापत्तियो किञ्चापि न एकक्खणे पवत्तन्ति, अञ्ञा अतीता होन्ति, अञ्ञा अनागता, अञ्ञा पच्चुप्पन्ना, पटिविज्झित्वा अपरिहीनताय पन लाभीति वुच्चति. तत्थ येसं इमं विभागं अग्गहेत्वा यस्मा झानलाभीनं अतीतानागतानि झानानिपि अत्थि, तस्मा ‘‘ते अतीतेनपि अनागतेनपि समन्नागता’’ति लद्धि, सेय्यथापि अन्धकानं. ते सन्धाय पुच्छा सकवादिस्स, पटिञ्ञा इतरस्स. सेसमेत्थ उत्तानत्थमेवाति. ‘‘अट्ठविमोक्खझायी’’तिआदि पन लाभीभावस्स साधकं, न समन्नागतभावस्साति.

अतीतानागतसमन्नागतकथावण्णना.

नवमो वग्गो.

१०. दसमवग्गो

१. निरोधकथावण्णना

५७१-५७२. इदानि ¶ ¶ निरोधकथा नाम होति. तत्थ येसं ‘‘उपपत्तेसियन्ति सङ्खं गतस्स भवङ्गचित्तस्स भङ्गक्खणेन सहेव किरियाति सङ्खं गता ¶ कुसला वा अकुसला वा चत्तारो खन्धा चित्तसमुट्ठानरूपञ्चाति पञ्चक्खन्धा उप्पज्जन्ति. तेसु हि अनुप्पन्नेसु भवङ्गे निरुद्धे सन्ततिविच्छेदो भवेय्या’’ति लद्धि, सेय्यथापि अन्धकानं; ते सन्धाय उपपत्तेसियेति पुच्छा सकवादिस्स, पटिञ्ञा इतरस्स. तत्थ उपपत्तेसियेति चतूसुपि पदेसु बहुवचनभुम्मत्थे एकवचनभुम्मं. उपपत्तेसियेसु पञ्चसु खन्धेसु अनिरुद्धेसूति अयञ्हेत्थ अत्थो. दसन्नन्ति उपपत्तेसियखन्धानञ्च किरियखन्धानञ्च वसेन वुत्तं. तत्थ पठमपञ्हे खन्धलक्खणवसेन किरियवसेन च पञ्चेव नाम ते खन्धाति पटिक्खिपति. दुतियपञ्हे पुरिमपच्छिमवसेन उपपत्तेसियकिरियवसेन च नानत्तं सन्धाय पटिजानाति. द्विन्नं पन फस्सानं चित्तानञ्च समोधानं पुट्ठो सुत्तलेसाभावेन पटिक्खिपति.

किरिया चत्तारोति रूपेन विना कुसला अकुसला वा चत्तारो गहिता. किरियाञाणन्ति परवादिना चक्खुविञ्ञाणसमङ्गिक्खणे अरहतो अनुञ्ञातं अनारम्मणञाणं. निरुद्धे मग्गो उप्पज्जतीति पुच्छा परवादिस्स, अनिरुद्धे अनुप्पज्जनतो पटिञ्ञा सकवादिस्स. मतो मग्गं भावेतीति ¶ छलेन पुच्छा परवादिस्स. यस्मा पन पटिसन्धितो याव चुतिचित्ता सत्तो जीवतियेव नाम, तस्मा सकवादी न हेवन्ति पटिक्खिपति.

निरोधकथावण्णना.

२. रूपंमग्गोतिकथावण्णना

५७३-५७५. इदानि ¶ रूपं मग्गोतिकथा नाम होति. तत्थ येसं ‘‘सम्मावाचाकम्मन्ताजीवा रूप’’न्ति लद्धि, सेय्यथापि महिसासकसम्मितियमहासंघिकानं; ते सन्धाय मग्गसमङ्गिस्साति पुच्छा सकवादिस्स, पटिञ्ञा इतरस्स. अथ नं ‘‘यदि ते सम्मावाचादयो रूपं, न विरतियो, यथा सम्मादिट्ठादिमग्गो सारम्मणादिसभावो, एवं तम्पि रूपं सिया’’ति चोदेतुं सारम्मणोतिआदिमाह. तत्थ पटिक्खेपो च पटिञ्ञा च परवादिनो लद्धिअनुरूपेन वेदितब्बा. सेसमेत्थ उत्तानत्थमेवाति.

रूपं मग्गोतिकथावण्णना.

३. पञ्चविञ्ञाणसमङ्गिस्स मग्गकथावण्णना

५७६. इदानि ¶ पञ्चविञ्ञाणसमङ्गिस्स मग्गकथा नाम होति. तत्थ येसं ‘‘चक्खुना रूपं दिस्वा न निमित्तग्गाही होती’’ति सुत्तं निस्साय ‘‘पञ्चविञ्ञाणसमङ्गिस्स अत्थि मग्गभावना’’ति लद्धि, सेय्यथापि महासंघिकानं, ते सन्धाय पुच्छा सकवादिस्स, पटिञ्ञा इतरस्स. अथ नं ‘‘सचे तस्स मग्गभावना अत्थि, पञ्चविञ्ञाणगतिकेन वा मग्गेन, मग्गगतिकेहि वा पञ्चविञ्ञाणेहि भवितब्बं, न च तानि मग्गगतिकानि अनिब्बानारम्मणत्ता अलोकुत्तरत्ता च, न मग्गो पञ्चविञ्ञाणगतिको तेसं लक्खणेन असङ्गहितत्ता’’ति चोदेतुं ननु पञ्चविञ्ञाणा उप्पन्नवत्थुकातिआदिमाह. तत्रायं अधिप्पायो – यदि ¶ पञ्चविञ्ञाणसमङ्गिस्स मग्गभावना सिया, येन मनोविञ्ञाणेन मग्गो सम्पयुत्तो, तम्पि पञ्चविञ्ञाणसमङ्गिस्स सिया. एवं सन्ते यदिदं ‘‘पञ्चविञ्ञाणा उप्पन्नवत्थुका’’तिआदि लक्खणं वुत्तं, तं एवं अवत्वा ‘‘छ विञ्ञाणा’’ति वत्तब्बं सिया. तथा पन अवत्वा ‘‘पञ्चविञ्ञाणा’’त्वेव वुत्तं, तस्मा न वतब्बं ‘‘पञ्चविञ्ञाणसमङ्गिस्स अत्थि मग्गभावना’’ति. यस्मा चेत्थ अयमेव अधिप्पायो, तस्मा सकवादी तं लक्खणं परवादिं सम्पटिच्छापेत्वा नो च वत रे वत्तब्बे पञ्चविञ्ञाणसमङ्गिस्स अत्थि मग्गभावनाति आह.

अपरो ¶ नयो – पञ्चविञ्ञाणा उप्पन्नवत्थुका, मग्गो अवत्थुकोपि होति. ते च उप्पन्नारम्मणा, मग्गो नवत्तब्बारम्मणो. ते पुरेजातवत्थुकाव मग्गो अवत्थुकोपि. ते पुरेजातारम्मणा, मग्गो अपुरेजातारम्मणो. ते अज्झत्तिकवत्थुकाव मग्गो अवत्थुकोपि होति. ते च रूपादिवसेन बाहिरारम्मणा, मग्गो निब्बानारम्मणो. ते अनिरुद्धं वत्थुं निस्सयं कत्वा पवत्तनतो असम्भिन्नवत्थुका, मग्गो अवत्थुकोपि. ते अनिरुद्धानेव रूपादीनि आरब्भ पवत्तनतो असम्भिन्नारम्मणा, मग्गो निब्बानारम्मणो. ते नानावत्थुका, मग्गो अवत्थुको वा एकवत्थुको वा. ते नानारम्मणा मग्गो एकारम्मणो. ते अत्तनो अत्तनोव रूपादिगोचरे पवत्तनतो न अञ्ञमञ्ञस्स गोचरविसयं पच्चनुभोन्ति, मग्गो रूपादीसु एकम्पि गोचरं न करोति. ते किरियमनोधातुं पुरेचारिकं कत्वा उप्पज्जनतो न असमन्नाहारा न अमनसिकारा उप्पज्जन्ति, मग्गो निरावज्जनोव. ते सम्पटिच्छनादीहि वोकिण्णा उप्पज्जन्ति, मग्गस्स वोकारोयेव नत्थि. ते अञ्ञमञ्ञं पुब्बचरिमभावेन ¶ उप्पज्जन्ति, मग्गस्स तेहि सद्धिं पुरिमपच्छिमताव नत्थि, तेसं अनुप्पत्तिकाले तिक्खविपस्सनासमये, तेसं अनुप्पत्तिदेसे आरुप्पेपि च उप्पज्जनतो. ते सम्पटिच्छनादीहि अन्तरितत्ता न अञ्ञमञ्ञस्स समनन्तरा उप्पज्जन्ति, मग्गस्स सम्पटिच्छनादीहि अन्तरितभावोव नत्थि. तेसं अञ्ञत्र अभिनिपाता आभोगमत्तम्पि किच्चं नत्थि, मग्गस्स किलेससमुग्घातनं किच्चन्ति. यस्मा चेत्थ अयम्पि ¶ अधिप्पायो, तस्मा सकवादी इमेहाकारेहि परवादिं मग्गस्स अपञ्चविञ्ञाणगतिकभावं सम्पटिच्छापेत्वा नो च वत रे वत्तब्बे पञ्चविञ्ञाणसमङ्गिस्स अत्थि मग्गभावनाति आह.

५७७. सुञ्ञतं आरब्भाति ‘‘यथा लोकुत्तरमग्गो सुञ्ञतं निब्बानं आरब्भ, लोकियो सुद्धसङ्खारपुञ्जं आरब्भ उप्पज्जति, किं ते एवं चक्खुविञ्ञाण’’न्ति पुच्छति. इतरो ‘‘चक्खुञ्च पटिच्च रूपे चा’’ति वचनतो पटिक्खिपति. दुतियं पुट्ठो ‘‘न निमित्तग्गाही’’ति वचनतो यं तत्थ अनिमित्तं, तदेव सुञ्ञतन्ति सन्धाय पटिजानाति. चक्खुञ्च पटिच्चाति पञ्हद्वयेपि एसेव नयो.

५७८-५७९. चक्खुविञ्ञाणं अतीतानागतं आरब्भाति एत्थ अयमधिप्पायो – मनोविञ्ञाणसमङ्गिस्स अत्थि मग्गभावना, मनोविञ्ञाणञ्च अतीतानागतम्पि आरब्भ उप्पज्जति, किं ते एवं चक्खुविञ्ञाणम्पीति. फस्सं आरब्भातिआदीसुपि एसेव नयो. चक्खुना ¶ रूपं दिस्वा न निमित्तग्गाहीति एत्थ जवनक्खणे न निमित्तग्गाहिता वुत्ता, न चक्खुविञ्ञाणक्खणे. तस्मा लोकियमग्गम्पि सन्धायेतं असाधकन्ति.

पञ्चविञ्ञाणसमङ्गिस्स मग्गकथावण्णना.

४. पञ्चविञ्ञाणा कुसलापीतिकथावण्णना

५८०-५८३. इदानि पञ्चविञ्ञाणा कुसलापीतिकथा नाम होति. सा हेट्ठा वुत्तनयेनेव अत्थतो वेदितब्बाति.

पञ्चविञ्ञाणा कुसलापीतिकथावण्णना.

५. पञ्चविञ्ञाणा साभोगातिकथावण्णना

५८४-५८६. इदानि ¶ पञ्चविञ्ञाणा साभोगातिकथा नाम होति. तत्थ आभोगो नाम कुसलाकुसलवसेन होति सत्थारा ¶ च ‘‘चक्खुना रूपं दिस्वा निमित्तग्गाही होति, न निमित्तग्गाही होती’’तिआदि वुत्तं, तं अयोनिसो गहेत्वा ‘‘पञ्चविञ्ञाणा साभोगा’’ति येसं लद्धि, सेय्यथापि महासंघिकानं, ते सन्धाय पुच्छा सकवादिस्स, पटिञ्ञा इतरस्स. सेसमेत्थ पुरिमकथासदिसमेवाति.

पञ्चविञ्ञाणा साभोगातिकथावण्णना.

६. द्वीहि सीलेहीतिकथावण्णना

५८७-५८९. इदानि ¶ द्वीहि सीलेहीतिकथा नाम होति. तत्थ ‘‘सीले पतिट्ठाय नरो सपञ्ञो’’तिआदिवचनतो (सं. नि. १.२३) यस्मा लोकियेन सीलेन सीलवा लोकुत्तरं मग्गं भावेति, तस्मा ‘‘पुरिमेन च लोकियेन मग्गक्खणे लोकुत्तरेन चाति द्वीहि सीलेहि समन्नागतो नाम होती’’ति येसं लद्धि, सेय्यथापि महासंघिकानंयेव, ते सन्धाय मग्गसमङ्गीति पुच्छा सकवादिस्स, पटिञ्ञा इतरस्स. अथ नं ‘‘यदि सो एकक्खणे लोकियलोकुत्तरेहि द्वीहि सीलेहि समन्नागतो, द्वीहि फस्सादीहिपि तेन समन्नागतेन भवितब्ब’’न्ति चोदेतुं द्वीहि फस्सेहीतिआदिमाह. इतरो तथारूपं नयं अपस्सन्तो पटिक्खिपति. लोकियेन च लोकुत्तरेन चाति पञ्हे पुब्बे समादिन्नञ्च मग्गक्खणे उप्पन्नसम्मावाचादीनि च सन्धाय पटिजानाति.

लोकिये सीले निरुद्धेति पुच्छा परवादिस्स, खणभङ्गनिरोधं सन्धाय पटिञ्ञा सकवादिस्स. इतरो पन तं वीतिक्कमं विय सल्लक्खेन्तो दुस्सीलोतिआदिमाह. लद्धिपतिट्ठापनं पनस्स पुब्बे अभिन्नसीलतंयेव दीपेति, न द्वीहि समन्नागततं. तस्मा अप्पतिट्ठिताव लद्धीति.

द्वीहि सीलेहीतिकथावण्णना.

७. सीलं अचेतसिकन्तिकथावण्णना

५९०-५९४. इदानि ¶ ¶ सीलं अचेतसिकन्तिकथा नाम होति. तत्थ यस्मा सीले उप्पज्जित्वा निरुद्धेपि समादानहेतुको सीलोपचयो नाम अत्थि, येन सो सीलवायेव नाम होति, तस्मा ‘‘सीलं अचेतसिक’’न्ति येसं लद्धि, सेय्यथापि महासंघिकानं, ते सन्धाय पुच्छा सकवादिस्स, पटिञ्ञा इतरस्स. सेसमेत्थ ‘‘दानं अचेतसिक’’न्तिकथायं वुत्तनयेनेव वेदितब्बं. लद्धिपतिट्ठापनम्पि अयोनिसो गहितत्ता अप्पतिट्ठापनमेवाति.

सीलं अचेतसिकन्तिकथावण्णना.

८. सीलं न चित्तानुपरिवत्तीतिकथावण्णना

५९५-५९७. इदानि ¶ सीलं न चित्तानुपरिवत्तीतिकथा नाम होति. तत्थ न चित्तानुपरिवत्तीति भासन्तरमेव नानं, सेसं पुरिमकथासदिसमेवाति.

सीलं न चित्तानुपरिवत्तीतिकथावण्णना.

९. समादानहेतुकथावण्णना

५९८-६००. इदानि समादानहेतुकथा नाम होति. तत्थ ‘‘आरामरोपा’’ति गाथाय अत्थं अयोनिसो गहेत्वा ‘‘सदा पुञ्ञं पवड्ढती’’ति वचनतो ‘‘समादानहेतुकं सीलं वड्ढती’’ति येसं लद्धि, सेय्यथापि महासंघिकानञ्ञेव, ते सन्धाय पुच्छा सकवादिस्स, चित्तविप्पयुत्तं सीलोपचयं सन्धाय पटिञ्ञा परवादिस्स. सेसं पुरिमकथासदिसमेवाति.

समादानहेतुकथावण्णना.

१०. विञ्ञत्ति सीलन्तिकथावण्णना

६०१-६०२. इदानि ¶ विञ्ञत्ति सीलन्तिकथा नाम होति. तत्थ कायविञ्ञत्ति कायकम्मं, वचीविञ्ञत्ति वचीकम्मन्ति गहितत्ता ‘‘विञ्ञत्ति सील’’न्ति येसं लद्धि, सेय्यथापि महासंघिकानञ्चेव सम्मितियानञ्च; ते सन्धाय विञ्ञत्तीति ¶ पुच्छा सकवादिस्स, पटिञ्ञा इतरस्स. अथ नं यस्मा सीलं नाम विरति, न रूपधम्मो, तस्मा तेनत्थेन चोदेतुं पाणातिपाता वेरमणीतिआदिमाह. अभिवादनं सीलन्तिआदि यथारूपं विञ्ञत्तिं सो ‘‘सील’’न्ति मञ्ञति तं उद्धरित्वा दस्सेतुं वुत्तं. यस्मा पन सा विरति न होति, तस्मा पुन पाणातिपातातिआदिमाह. लद्धि पनस्स छलेन पतिट्ठितत्ता अप्पतिट्ठितायेवाति.

विञ्ञत्ति सीलन्तिकथावण्णना.

११. अविञ्ञत्ति दुस्सील्यन्तिकथावण्णना

६०३-६०४. इदानि ¶ अविञ्ञत्ति दुस्सील्यन्तिकथा नाम होति. तत्थ चित्तविप्पयुत्तं अपुञ्ञूपचयञ्चेव आणत्तिया च पाणातिपातादीसु अङ्गपारिपूरिं सन्धाय ‘‘अविञ्ञत्ति दुस्सील्य’’न्ति येसं लद्धि, सेय्यथापि महासंघिकानं, ते सन्धाय पुच्छा सकवादिस्स, पटिञ्ञा इतरस्स. अथ नं ‘‘सचे सा दुस्सील्यं, पाणातिपातादीसु अञ्ञतरा सिया’’ति चोदेतुं पाणातिपातोतिआदिमाह. पापकम्मं समादियित्वाति ‘‘असुकं नाम घातेस्सामि, असुकं भण्डं अवहरिस्सामी’’ति एवं पापसमादानं कत्वा. उभो वड्ढन्तीति पुट्ठो दानक्खणे पापस्स अनुप्पत्तिं सन्धाय पटिक्खिपति. दुतियं पुट्ठो चित्तविप्पयुत्तं पापूपचयं सन्धाय पटिजानाति. सेसमेत्थ परिभोगमयकथायं वुत्तनयेनेव ¶ वेदितब्बं. लद्धिपतिट्ठापनम्पिस्स पापसमादिन्नपुब्बभागमेव साधेति; न अविञ्ञत्तिया दुस्सीलभावन्ति.

अविञ्ञत्ति दुस्सील्यन्तिकथावण्णना.

दसमो वग्गो.

दुतियपण्णासको समत्तो.

११. एकादसमवग्गो

१-३. तिस्सोपि अनुसयकथावण्णना

६०५-६१३. इदानि ¶ ¶ अनुसया अब्याकता, अहेतुका, चित्तविप्पयुत्ताति तिस्सोपि अनुसयकथा नाम होन्ति. तत्थ यस्मा पुथुज्जनो कुसलाब्याकते चित्ते वत्तमाने ‘‘सानुसयो’’ति वत्तब्बो, यो चस्स तस्मिं खणे हेतु, न तेन हेतुना अनुसया सहेतुका, न तेन चित्तेन सम्पयुत्ता, तस्मा ‘‘ते अब्याकता, अहेतुका, चित्तविप्पयुत्ता’’ति येसं लद्धि, सेय्यथापि महासंघिकानञ्चेव सम्मितियानञ्च; ते सन्धाय तीसुपि कथासु पुच्छा सकवादिस्स, पटिञ्ञा इतरस्स. सेसं हेट्ठा वुत्तनयत्ता सक्का पाळिमग्गेनेव जानितुन्ति, तस्मा न वित्थारितन्ति.

तिस्सोपि अनुसयकथावण्णना.

४. ञाणकथावण्णना

६१४-६१५. इदानि ¶ ञाणकथा नाम होति. तत्थ मग्गञाणेन अञ्ञाणे विगतेपि पुन चक्खुविञ्ञाणादिवसेन ञाणविप्पयुत्तचित्ते वत्तमाने यस्मा तं मग्गचित्तं न पवत्तति, तस्मा ‘‘न वत्तब्बं ञाणी’’ति येसं लद्धि, सेय्यथापि महासंघिकानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि अञ्ञाणे विगते ‘ञाणी’ति पञ्ञत्ति न सिया, रागादीसु विगतेसु वीतरागादिपञ्ञत्तिपि न सियाति पुग्गलपञ्ञत्तियं अकोविदोसी’’ति चोदेतुं रागे विगतेतिआदिमाह. इतरो तेसु विगतेसु सरागादिभावे युत्तिं ¶ अपस्सन्तो पटिक्खिपति. परियोसाने यस्मा ञाणपटिलाभेन सो ञाणीति वत्तब्बतं अरहति, तस्मा न हेवन्ति पटिक्खेपो सकवादिस्साति.

ञाणकथावण्णना.

५. ञाणं चित्तविप्पयुत्तन्तिकथावण्णना

६१६-६१७. इदानि ¶ ञाणं चित्तविप्पयुत्तन्तिकथा नाम होति. तत्थ यस्मा अरहा चक्खुविञ्ञाणादिसमङ्गी पटिलद्धं मग्गञाणं सन्धाय ‘‘ञाणी’’ति वुच्चति, न चस्स तं तेन चित्तेन सम्पयुत्तं, तस्मा ‘‘ञाणं चित्तविप्पयुत्त’’न्ति येसं लद्धि, सेय्यथापि पुब्बसेलियानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि ते ञाणं चित्तविप्पयुत्तं चित्तविप्पयुत्तेसु रूपादीसु अञ्ञतरं सिया’’ति चोदेतुं रूपन्तिआदिमाह. इतरो पटिक्खिपति. सेसं हेट्ठा वुत्तनयमेव. परियोसाने पन पञ्ञवाति पुट्ठो पटिलाभवसेन तं पवत्तिं इच्छति, तस्मा पटिजानातीति.

ञाणं चित्तविप्पयुत्तन्तिकथावण्णना.

६. इदं दुक्खन्तिकथावण्णना

६१८-८२०. इदानि ¶ इदं दुक्खन्तिकथा नाम होति. तत्थ येसं ‘‘लोकुत्तरमग्गक्खणे योगावचरो इदं दुक्खन्ति वाचं भासति, एवमस्स इदं दुक्खन्ति वाचं भासतो च इदं दुक्खन्ति ञाणं पवत्तती’’ति लद्धि, सेय्यथापि अन्धकानं; ते सन्धाय पुच्छा सकवादिस्स, मग्गक्खणे तथा वाचाभासनं ञाणप्पवत्तिञ्च सन्धाय पटिञ्ञा इतरस्स. यस्मा पन सो सेससच्चपटिसंयुत्तं वाचं पुथुज्जनोव भासति ¶ , न च तस्स तथा ञाणप्पवत्तीति इच्छति, तस्मा समुदयादिपञ्हेसु पटिक्खिपति. रूपं अनिच्चन्तिआदि दुक्खपरियायदस्सनवसेन वुत्तं. इतरो पन सकसमये तादिसं वोहारं अपस्सन्तो पटिक्खिपति. इति च दन्ति चातिआदि यदि तस्स दुक्खे ञाणं पवत्तति, इ-कार दं-कार दु-कार ख-कारेसु पटिपाटिया चतूहि ञाणेहि पवत्तितब्बन्ति दस्सेतुं वुत्तं. इतरो पन तथा न इच्छति, तस्मा पटिक्खिपति.

इदं दुक्खन्तिकथावण्णना.

७. इद्धिबलकथावण्णना

६२१-६२४. इदानि ¶ इद्धिबलकथा नाम होति. तत्थ इद्धिपादभावनानिसंसस्स अत्थं अयोनिसो गहेत्वा ‘‘इद्धिबलेन समन्नागतो कप्पं तिट्ठेय्या’’ति येसं लद्धि, सेय्यथापि महासंघिकानं; ते सन्धाय इद्धिबलेन समन्नागतो कप्पं तिट्ठेय्याति पुच्छा सकवादिस्स. तत्थ कप्पो नाम महाकप्पो, कप्पेकदेसो, आयुकप्पोति तिविधो. ‘‘चत्तारिमानि, भिक्खवे, कप्पस्स असङ्ख्येय्यानी’’ति (अ. नि. ४.१५६) एत्थ हि महाकप्पोव कप्पोति वुत्तो. ‘‘ब्रह्मकायिकानं देवानं कप्पो आयुप्पमाण’’न्ति (अ. नि. ४.१२३) एत्थ कप्पेकदेसा. ‘‘कप्पं निरयम्हि पच्चति, कप्पं सग्गम्हि मोदती’’ति (चूळव. ३५४) एत्थ आयुकप्पो. आयुकप्पनं आयुविधानं कम्मस्स विपाकवसेन वा वस्सगणनाय वा आयुपरिच्छेदोति अत्थो. तेसु महाकप्पं सन्धाय पुच्छति, इतरो पटिजानाति.

अथ नं सकवादी ‘‘सचे ते इद्धिबलेन समन्नागतो, ‘यो चिरं जीवति, सो वस्ससतं अप्पं ¶ वा भिय्यो’ति (सं. नि. २.१४३) एवं परिच्छिन्ना आयुकप्पा उद्धं महाकप्पं वा महाकप्पेकदेसं वा जीवेय्य इद्धिमयिकेनस्स आयुना भवितब्ब’’न्ति चोदेतुं इद्धिमयिको सो आयूतिआदिमाह. इतरो ‘‘जीवितिन्द्रियं नाम इद्धिमयिकं नत्थि, कम्मसमुट्ठानमेवा’’ति वुत्तत्ता पटिक्खिपति. को पनेत्थ इद्धिमतो विसेसो, ननु अनिद्धिमापि आयुकप्पं ¶ तिट्ठेय्याति? अयं विसेसो – इद्धिमा हि यावतायुकं जीवितप्पवत्तिया अन्तरायकरे धम्मे इद्धिबलेन पटिबाहित्वा अन्तरा अकालमरणं निवारेतुं सक्कोति, अनिद्धिमतो एतं बलं नत्थि. अयमेतेसं विसेसो.

अतीतं अनागतन्ति इदं अविसेसेन कप्पं तिट्ठेय्याति पटिञ्ञातत्ता चोदेति. द्वे कप्पेतिआदि ‘‘यदि इद्धिमा जीवितपरिच्छेदं अतिक्कमितुं सक्कोति, न केवलं एकं अनेकेपि कप्पे तिट्ठेय्या’’ति चोदनत्थं वुत्तं. उप्पन्नो फस्सोतिआदि न सब्बं इद्धिया लब्भति, इद्धिया अविसयोपि अत्थीति दस्सेतुं वुत्तं. सेसमेत्थ उत्तानत्थमेवाति.

इद्धिबलकथावण्णना.

८. समाधिकथावण्णना

६२५-६२६. इदानि ¶ समाधिकथा नाम होति. तत्थ येसं एकचित्तक्खणे उप्पन्नापि एकग्गता समाधानट्ठेन समाधीति अग्गहेत्वा ‘‘सत्त रत्तिन्दिवानि एकन्तसुखपटिसंवेदी विहरितु’’न्तिआदिवचनं (म. नि. १.१८०) निस्साय ‘‘चित्तसन्तति समाधी’’ति लद्धि, सेय्यथापि सब्बत्थिवादानञ्चेव उत्तरापथकानञ्च; ते सन्धाय चित्तसन्ततीति पुच्छा सकवादिस्स, पटिञ्ञा इतरस्स. अथ नं ‘‘यदि चित्तसन्तति समाधि, चित्तसन्तति नाम अतीतापि अत्थि, अनागतापि अत्थि. न हि एकं पच्चुप्पन्नचित्तमेव चित्तसन्तति नाम होति, किं ते सब्बापि सा समाधी’’ति चोदेतुं अतीतातिआदिमाह, इतरो तथा अनिच्छन्तो पटिक्खिपति.

ननु ¶ अतीतं निरुद्धन्तिआदि ‘‘चित्तसन्ततियं पच्चुप्पन्नमेव चित्तं किच्चकरं, अतीतानागतं निरुद्धत्ता अनुप्पन्नत्ता च नत्थि, कथं तं समाधि नाम होती’’ति दस्सेतुं वुत्तं. एकचित्तक्खणिकोति पुच्छा परवादिस्स. ततो या सकसमये ‘‘समाधिं, भिक्खवे, भावेथा’’तिआदीसु पच्चुप्पन्नकुसलचित्तसम्पयुत्ता एकग्गता समाधीति वुत्ता, तं सन्धाय पटिञ्ञा सकवादिस्स. चक्खुविञ्ञाणसमङ्गीतिआदि ‘‘एकचित्तक्खणिको’’ति वचनमत्तं गहेत्वा छलेन वुत्तं, तेनेव सकवादिना पटिक्खित्तं. ननु वुत्तं भगवताति सुत्तं पुरिमपच्छिमवसेन पवत्तमानस्स ¶ समाधिस्स अब्बोकिण्णतं साधेति, न सन्ततिया समाधिभावं, तस्मा असाधकन्ति.

समाधिकथावण्णना.

९. धम्मट्ठितताकथावण्णना

६२७. इदानि धम्मट्ठितताकथा नाम होति. तत्थ ‘‘ठिताव सा धातू’’ति वचनं निस्साय ‘‘पटिच्चसमुप्पादसङ्खाता धम्मट्ठितता नाम एका अत्थि, सा च परिनिप्फन्ना’’ति येसं लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि परिनिप्फन्नानं अविज्जादीनं अञ्ञा ¶ धम्मट्ठितता नाम परिनिप्फन्ना अत्थि, तायपि च ते धम्मट्ठितताय अञ्ञा ठितता परिनिप्फन्ना आपज्जती’’ति चोदेतुं ताय ठिततातिआदिमाह. परवादी एवरूपाय लद्धिया अभावेन पटिक्खिपति. दुतियं पुट्ठो अनन्तरपच्चयतञ्चेव अञ्ञमञ्ञपच्चयतञ्च सन्धाय पटिजानाति. सेसं हेट्ठा वुत्तनयत्ता उत्तानत्थमेवाति.

धम्मट्ठितताकथावण्णना.

१०. अनिच्चताकथावण्णना

६२८. इदानि ¶ अनिच्चताकथा नाम होति. तत्थ ‘‘अनिच्चानं रूपादीनं अनिच्चतापि रूपादयो विय परिनिप्फन्ना’’ति येसं लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि ते रूपादयो विय अनिच्चता परिनिप्फन्ना, तस्सापि अञ्ञाय परिनिप्फन्नाय अनिच्चताय भवितब्ब’’न्ति चोदेतुं ताय अनिच्चतायातिआदिमाह. इतरो द्विन्नं अनिच्चताय एकतो अभावेन पटिक्खिपित्वा पुन यस्मा सा अनिच्चता निच्चा न होति, तेनेव अनिच्चेन सद्धिं अन्तरधायति, तस्मा पटिजानाति. अथस्स सकवादी लेसोकासं अदत्वा या तेन दुतिया अनिच्चता पटिञ्ञाता ¶ , तायपि ततो परायपीति परम्परवसेन अनुपच्छेददोसं आरोपेन्तो ताय तायेवातिआदिमाह. जरा परिनिप्फन्नातिआदि यस्मा उप्पन्नस्स जरामरणतो अञ्ञा अनिच्चता नाम नत्थि, तस्मा अनिच्चताविभागानुयुञ्जनवसेन वुत्तं. तत्रापि परवादिनो पुरिमनयेनेव पटिञ्ञा च पटिक्खेपो च वेदितब्बो.

६२९. रूपं परिनिप्फन्नन्तिआदि येसं सा अनिच्चता, तेहि सद्धिं संसन्दनत्थं वुत्तं. तत्थ ‘‘यथा परिनिप्फन्नानं रूपादीनं अनिच्चताजरामरणानि अत्थि, एवं परिनिप्फन्नानं अनिच्चतादीनं तानि नत्थी’’ति मञ्ञमानो एकन्तेन पटिक्खिपतियेवाति.

अनिच्चताकथावण्णना.

एकादसमो वग्गो.

१२. द्वादसमवग्गो

१. संवरो कम्मन्तिकथावण्णना

६३०-६३२. इदानि ¶ ¶ संवरो कम्मन्तिकथा नाम होति. तत्थ ‘‘चक्खुना रूपं दिस्वा निमित्तग्गाही ¶ होति, न निमित्तग्गाही होती’’ति सुत्तं निस्साय ‘‘संवरोपि असंवरोपि कम्म’’न्ति येसं लद्धि, सेय्यथापि महासंघिकानं; ते सन्धाय पुच्छा सकवादिस्स, पटिञ्ञा इतरस्स.

अथ नं या सकसमये चेतना ‘‘कम्म’’न्ति वुत्ता यथा सा कायवचीमनोद्वारेसु पवत्तमाना कायकम्मादिनामं लभति, तथा ‘‘यदि ते संवरो कम्मं, सोपि चक्खुन्द्रियादीसु पवत्तमानो चक्खुकम्मादिनामं लभेय्या’’ति चोदेतुं चक्खुन्द्रियसंवरो चक्खुकम्मन्तिआदिमाह. इतरो तादिसं सुत्तपदं अपस्सन्तो चतूसु द्वारेसु पटिक्खिपित्वा पञ्चमे कायद्वारे पसादकायं सन्धाय पटिक्खिपति, विञ्ञत्तिकायं सन्धाय पटिजानाति. सो हि पसादकायम्पि विञ्ञत्तिकायम्पि कायिन्द्रियन्त्वेव इच्छति. मनोद्वारेपि विपाकद्वारं सन्धाय पटिक्खिपति, कम्मद्वारं सन्धाय पटिजानाति. असंवरेपि एसेव नयो. ‘‘चक्खुना रूपं दिस्वा’’ति सुत्तं तेसु द्वारेसु संवरासंवरमेव दीपेति, न तस्स कम्मभावं, तस्मा असाधकन्ति.

संवरो कम्मन्तिकथावण्णना.

२. कम्मकथावण्णना

६३३-६३५. इदानि कम्मकथा नाम होति. तत्थ ‘‘नाहं, भिक्खवे, सञ्चेतनिकानं ¶ कम्मान’’न्ति (अ. नि. १०.२१७) सुत्तपदं निस्साय ‘‘सब्बं कम्मं सविपाक’’न्ति येसं लद्धि, सेय्यथापि महासंघिकानं; तेसं ‘‘चेतनाहं, भिक्खवे, कम्मं वदामी’’ति (अ. नि. ६.६३) सत्थारा अविसेसेन चेतना ‘‘कम्म’’न्ति वुत्ता; सा च कुसलाकुसलाव सविपाका, अब्याकता अविपाकाति इमं विभागं दस्सेतुं सब्बं कम्मन्ति पुच्छा सकवादिस्स, पटिञ्ञा इतरस्स. पुन सब्बा चेतनाति पञ्हेसु अब्याकतं सन्धाय पटिक्खेपो, कुसलाकुसले सन्धाय पटिञ्ञा वेदितब्बा ¶ . विपाकाब्याकतातिआदि सविपाकाविपाकचेतनं सरूपेन दस्सेतुं वुत्तं. सेसमेत्थ उत्तानत्थमेव. ‘‘नाहं, भिक्खवे’’ति सुत्तं सति पच्चये दिट्ठधम्मादीसु विपाकपटिसंवेदनं सन्धाय वुत्तं, तस्मा असाधकन्ति.

कम्मकथावण्णना.

३. सद्दो विपाकोतिकथावण्णना

६३६-६३७. इदानि ¶ सद्दो विपाकोतिकथा नाम होति. तत्थ ‘‘सो तस्स कम्मस्स कतत्ता उपचितत्ता उस्सन्नत्ता विपुलत्ता ब्रह्मस्सरो होती’’तिआदीनि (दी. नि. ३.२३६) अयोनिसो गहेत्वा ‘‘सद्दो विपाको’’ति येसं लद्धि, सेय्यथापि महासंघिकानं; तेसं ‘‘कम्मसमुट्ठाना अरूपधम्माव विपाकाति नामं लभन्ति. रूपधम्मेसु पनायं वोहारो नत्थी’’ति दस्सेतुं पुच्छा सकवादिस्स, पटिञ्ञा इतरस्स. सुखवेदनीयोतिआदि ‘‘विपाको नाम एवरूपो होती’’ति दस्सनत्थं वुत्तं. ‘‘सो तस्स कम्मस्सा’’ति सुत्तं लक्खणपटिलाभदस्सनत्थं वुत्तं. महापुरिसो हि कम्मस्स कतत्ता सुचिपरिवारोपि होति, न च परिवारो विपाको, तस्मा असाधकमेतन्ति.

सद्दो विपाकोतिकथावण्णना.

४. सळायतनकथावण्णना

६३८-६४०. इदानि ¶ सळायतनकथा नाम होति. तत्थ यस्मा सळायतनं कम्मस्स कतत्ता उप्पन्नं, तस्मा ‘‘विपाको’’ति येसं लद्धि, सेय्यथापि महासंघिकानं; ते सन्धाय चक्खायतनं विपाकोति पुच्छा सकवादिस्स, पटिञ्ञा इतरस्स. सेसं हेट्ठा वुत्तनयमेव. सळायतनं विपाकोति एत्थ मनायतनं सिया विपाको. सेसानि केवलं कम्मसमुट्ठानानि, न विपाको. तस्मा असाधकमेतन्ति.

सळायतनकथावण्णना.

५. सत्तक्खत्तुपरमकथावण्णना

५४१-५४५. इदानि ¶ सत्तक्खत्तुपरमकथा नाम होति, तत्थ यस्मा ‘‘सत्तक्खत्तुपरमो’’ति ¶ वुत्तं, तस्मा ‘‘सत्तक्खत्तुपरमो पुग्गलो सत्तक्खत्तुपरमताय नियतो’’ति येसं लद्धि, सेय्यथापि उत्तरापथकानं; तेसं ठपेत्वा ‘‘अरियमग्गं अञ्ञो तस्स नियमो नत्थि, येन सो सत्तक्खत्तुपरमताय नियतो भवेय्या’’ति इमं विभागं दस्सेतुं पुच्छा सकवादिस्स, पटिञ्ञा इतरस्स.

माता जीवितातिआदीसु अयमधिप्पायो – द्वे नियामा सम्मत्तनियामो च मिच्छत्तनियामो च. सम्मत्तनियामो अरियमग्गो. सो अविनिपातधम्मतञ्चेव फलुप्पत्तिञ्च नियमेति. मिच्छत्तनियामो आनन्तरियकम्मं. तं अनन्तरा निरयूपपत्तिं नियमेति. तत्थ सत्तक्खत्तुपरमो सोतापत्तिमग्गेन अविनिपातधम्मताय च फलुप्पत्तिया च नियमितो. सेसमग्गनियामो पनस्स नत्थि अनधिगतत्ता, आनन्तरियम्पि कातुं सो अभब्बो. त्वं पनस्स नियामं इच्छसि, तेन तं वदाम – ‘‘किं ते सो इमिना मिच्छत्तनियामेन नियमितो’’ति.

अभब्बो अन्तराति पञ्हेसु आनन्तरियाभावं ¶ सन्धाय पटिक्खिपति, सत्तक्खत्तुपरमं सन्धाय पटिजानाति. अत्थि सो नियामोति पञ्हे सत्तक्खत्तुपरमताय नियामं अपस्सन्तो पटिक्खिपति. अत्थि ते सतिपट्ठानातिआदि नियामसङ्खाते मग्गधम्मे दस्सेतुं वुत्तं. तस्स पन पुन पठममग्गानुप्पत्तितो तेपि नत्थि, तस्मा पटिक्खिपति. सेसमेत्थ उत्तानत्थमेव. ननु सो सत्तक्खत्तुपरमोति एत्थ भगवा ‘‘अयं पुग्गलो एत्तके भवे सन्धावित्वा परिनिब्बायिस्सति, अयं एत्तके’’ति अत्तनो ञाणबलेन ब्याकरोति, न भवनियामं नाम किञ्चि तेन सत्तक्खत्तुपरमो, कोलंकोलो, एकबीजी वाति वुत्तं, तस्मा असाधकमेतन्ति.

सत्तक्खत्तुपरमकथावण्णना.

६४६-६४७. कोलंकोलएकबीजिकथायोपि इमिनावुपायेन वेदितब्बा.

कोलंकोलएकबीजिकथावण्णना.

८. जीवितावोरोपनकथावण्णना

६४८-६४९. इदानि ¶ ¶ जीवितावोरोपनकथा नाम होति. तत्थ यस्मा दोससम्पयुत्तेन चित्तेन पाणातिपातो होति, दोसो च दिट्ठिसम्पन्नस्स अप्पहीनो, तस्मा ‘‘दिट्ठिसम्पन्नो सञ्चिच्च पाणं जीविता वोरोपेय्या’’ति येसं लद्धि, सेय्यथापि पुब्बसेलियापरसेलियानं; ते सन्धाय दिट्ठिसम्पन्नोति पुच्छा सकवादिस्स, पटिञ्ञा इतरस्स. सञ्चिच्च मातरन्तिआदिपञ्हेसु पन ‘‘अट्ठानमेतं अनवकासो’’ति सुत्तभयेन पटिक्खिपति. सत्थरि अगारवोतिआदि सत्थारादीसु सगारवस्स सिक्खापदस्स वीतिक्कमाभावदस्सनत्थं वुत्तं. इतरो पन अकुसलवसेन तस्स अगारवो नाम ¶ नत्थीति पटिक्खिपित्वा सगारवभावञ्च सम्पटिच्छित्वा पुन अगारवोति पुट्ठो तेसु तेसु किच्चेसु पसुतताय विक्खित्तानं असतिया अमनसिकारेन चेतिये अभिवादनपदक्खिणकरणाभावं सन्धाय पटिजानाति. पुन ओहदेय्यातिआदिना नयेन पुट्ठो तादिसाय किरियाय सञ्चिच्च अकरणतो पटिक्खिपति. सेसमेत्थ उत्तानत्थमेवाति.

जीवितावोरोपनकथावण्णना.

९. दुग्गतिकथावण्णना

६५०-६५२. इदानि दुग्गतिकथा नाम होति. तत्थ ये दुग्गतिञ्च दुग्गतिसत्तानं रूपादिआरम्मणं तण्हञ्चाति उभयम्पि दुग्गतीति गहेत्वा पुन तथा अविभजित्वा अविसेसेनेव ‘‘दिट्ठिसम्पन्नस्स पहीना दुग्गती’’ति वदन्ति, सेय्यथापि उत्तरापथका; ते सन्धाय पुच्छा सकवादिस्स, पटिञ्ञा इतरस्स. आपायिके रूपे रज्जेय्यातिआदि परवादिनो लद्धिया दिट्ठिसम्पन्नस्स दुग्गति अप्पहीना, तस्स वसेन चोदेतुं वुत्तं. सेसमेत्थ उत्तानत्थमेव. निरयं उपपज्जेय्यातिआदि दुग्गतिपहानमेव दुग्गतिगामिनितण्हापहानं वा दीपेति, न दुग्गतिसत्तानं रूपादिआरम्मणाय तण्हाय पहानं, तस्मा असाधकन्ति.

दुग्गतिकथावण्णना.

६५३. सत्तमभविककथायपि ¶ ¶ एसेव नयोति.

द्वादसमो वग्गो.

१३. तेरसमवग्गो

१. कप्पट्ठकथावण्णना

६५४-६५७. इदानि ¶ कप्पट्ठकथा नाम होति. तत्थ येसं ‘‘सङ्घं समग्गं भेत्वान, कप्पं निरयम्हि पच्चती’’ति ‘‘सकलम्पि कप्पं सङ्घभेदको निरये तिट्ठती’’ति लद्धि, सेय्यथापि राजगिरिकानं; ते सन्धाय कप्पट्ठोति पुच्छा सकवादिस्स, पटिञ्ञा इतरस्स. बुद्धो च लोकेति इदं विना बुद्धुप्पादेन सङ्घभेदस्स अभावदस्सनत्थं वुत्तं. कप्पो च सण्ठाति सङ्घो च भिज्जतीतिआदि ‘‘यदि सो सकलं कप्पं तिट्ठति, सण्ठहनतो पट्ठाय तं कम्मं कत्वा तत्थ उप्पज्जित्वा तिट्ठेय्या’’ति दस्सेतुं वुत्तं. अतीतन्तिआदि हेट्ठा वुत्ताधिप्पायमेव. कप्पट्ठो इद्धिमाति पञ्हे भावनामयं सन्धाय पटिक्खिपति, परसमये पनस्स जातिमयं इद्धिं इच्छन्ति, तं सन्धाय पटिजानाति. छन्दिद्धिपादोतिआदि ‘‘जातिमयाय इद्धिया इद्धिमाति लद्धिमत्तमेतं, किं तेन, यदि पनस्स इद्धि अत्थि, इमिना नयेन इद्धिपादा भाविता भवेय्यु’’न्ति चोदनत्थं वुत्तं. आपायिको नेरयिकोति सुत्तं यं सो एकं कप्पं असीतिभागे कत्वा ततो एकभागमत्तं कालं तिट्ठेय्य, तं आयुकप्पं सन्धाय वुत्तं, तस्मा असाधकन्ति.

कप्पट्ठकथावण्णना.

२. कुसलपटिलाभकथावण्णना

६५८-६५९. इदानि ¶ कुसलपटिलाभकथा नाम होति. तत्थ कप्पट्ठो सकसमये कामावचरकुसलमेव ¶ पटिलभति. येन पन तं उपपत्तिं पटिबाहेय्य, तं महग्गतं लोकुत्तरं वा न पटिलभति. येसं पन इमं विभागं अकत्वा अविसेसेनेव ‘‘सो कुसलचित्तं न पटिलभती’’ति ¶ लद्धि, सेय्यथापि उत्तरापथकानं; तेसं विभागदस्सनेन तं लद्धिं भिन्दितुं पुच्छा सकवादिस्स, पटिञ्ञा इतरस्स. सेसमेत्थ उत्तानत्थमेवाति.

कुसलपटिलाभकथावण्णना.

३. अनन्तरापयुत्तकथावण्णना

६६०-६६२. इदानि अनन्तरापयुत्तकथा नाम होति. तत्थ अनन्तरापयुत्तो नाम येन खन्धभेदतो अनन्तरा विपाकदायकं मातुघातादि आनन्तरियकम्मं आणत्तं. तत्थ यस्स नियताय आणत्तिया आणत्तो तं कम्मं करिस्सति, सो अत्थसाधिकाय चेतनाय उप्पादितत्ता मिच्छत्तनियतो होति, अभब्बो सम्मत्तनियामं ओक्कमितुं. यस्स अनियताय आणत्तिया आणत्तो तं कम्मं करिस्सति, सो अत्थसाधिकाय चेतनाय अनुप्पादितत्ता न मिच्छत्तनियतो, भब्बो सम्मत्तनियामं ओक्कमितुन्ति इदं सकसमये सन्निट्ठानं. येसं पन ‘‘अनियतायपि आणत्तिया अभब्बोयेव सम्मत्तनियामं ओक्कमितु’’न्ति लद्धि, सेय्यथापि उत्तरापथकानं; तेसं तं लद्धिं भिन्दितुं सकवादी पुब्बपक्खं दत्वा अनन्तरापयुत्तोति परवादिना अत्तानं पुच्छापेति. तेनेत्थ पठमपुच्छा परवादिस्स, अत्थसाधिकचेतनाय अभावं सन्धाय पटिञ्ञा सकवादिस्स. ततो परवादी मातुघातादिकम्मस्स आणत्तत्ताव ‘‘सो मिच्छत्तनियतो’’ति मञ्ञति. तस्मा मिच्छत्तनियामञ्चाति ¶ पञ्हं पुच्छति. सकवादी पन एकस्स पुग्गलस्स द्विन्नं नियामानं अनोक्कन्तिमत्तमेव सन्धाय न हेवन्ति पटिक्खिपति.

ननु तं कम्मन्ति मातुघातादिकम्मं. तत्थ अनियताणत्तिं सन्धाय ‘‘आमन्ता’’ति पटिञ्ञा सकवादिस्स. अनियतम्पि हि आणत्तिं पयोजेत्वा ठितस्स ‘‘अननुच्छविकं मया कत’’न्ति कुक्कुच्चं उप्पज्जतेव, विप्पटिसारो जायतेव. हञ्चीतिआदि कुक्कुच्चुप्पत्तिमत्तं गहेत्वा परवादिना लद्धिपतिट्ठापनत्थं वुत्तं.

६६१. इदानि ¶ यस्स अनियताणत्तिकस्सापि अनन्तरापयुत्तस्स परवादिना सम्मत्तनियामोक्कमनं पटिसिद्धं, तमेव पुग्गलं गहेत्वा अनन्तरापयुत्तो ¶ पुग्गलो अभब्बोति पुच्छा सकवादिस्स, अत्तनो लद्धिवसेन पटिञ्ञा इतरस्स. अथ नं सकवादी ‘‘अभब्बो नाम मातुघातादिकम्मानं कारको, किं ते तेन तानि कम्मानि कतानी’’ति चोदेतुं माता जीविता वोरोपितातिआदिमाह. इतरो तेसं वत्थूनं अरोगताय तथारूपं किरियं अपस्सन्तो ‘‘न हेव’’न्ति पटिक्खिपति.

तं कम्मं पटिसंहरित्वाति अनियताणत्तिकम्मं सन्धाय वुत्तं. तञ्हि ‘‘मा खो मया आणत्तं आकासी’’ति आणत्तं निवारेन्तेन पटिसंहटं नाम होति. पटिसंहटत्तायेव चेत्थ कुक्कुच्चं पटिविनोदितं, विप्पटिसारो पटिविनीतो नाम होति. एवं सन्तेपि पनेत्थ पुरिमाणत्तियायेव नियतभावं मञ्ञमानो परवादी ‘‘आमन्ता’’ति पटिजानाति. अथ नं सकवादी तस्स कम्मस्स पटिसंहटभावं सम्पटिच्छापेत्वा अत्तनो लद्धिं पतिट्ठापेत्वा हञ्चीतिआदिमाह.

६६२. पुन अनन्तरापयुत्तोति परियोसानपञ्हे पठमपञ्हे विय पुच्छा परवादिस्स, पटिञ्ञा सकवादिस्स. ननु तं कम्मन्ति अनुयोगो परवादिस्स, पटिसंहटकालतो पुब्बे पयुत्तकालं सन्धाय पटिञ्ञा सकवादिस्स. पयुत्तपुब्बतामत्तं गहेत्वा अनियताणत्तिवसेन हञ्चीति लद्धिपतिट्ठापनं परवादिस्स. अयं पन लद्धि अयोनिसो पतिट्ठितत्ता अप्पतिट्ठिताव होतीति.

अनन्तरापयुत्तकथावण्णना.

४. नियतस्स नियामकथावण्णना

६६३-६६४. इदानि ¶ नियतस्स नियामकथा नाम होति. तत्थ दुविधो नियामो – मिच्छत्तनियामो च आनन्तरियकम्मं, सम्मत्तनियामो च अरियमग्गो. इमे द्वे नियामे ठपेत्वा अञ्ञो नियामो नाम नत्थि. सब्बेपि हि सेसा तेभूमकधम्मा अनियता नाम. तेहि समन्नागतोपि ¶ अनियतोयेव. बुद्धेहि पन अत्तनो ञाणबलेन ‘‘अयं सत्तो अनागते बोधिं पापुणिस्सती’’ति ब्याकतो बोधिसत्तो पुञ्ञुस्सदत्ता नियतोति वुच्चति. इति इमं वोहारमत्तं गहेत्वा ‘‘पच्छिमभविको बोधिसत्तो ¶ ताय जातिया भब्बो धम्मं अभिसमेतु’’न्ति अधिप्पायेन ‘‘नियतो नियामं ओक्कमती’’ति येसं लद्धि, सेय्यथापि पुब्बसेलियापरसेलियानं; ते सन्धाय पुच्छा सकवादिस्स, पटिञ्ञा इतरस्स. मिच्छत्तनियतोतिआदि अञ्ञेन नियामेन नियतस्स अञ्ञनियामाभावदस्सनत्थं वुत्तं. पुब्बे मग्गं भावेत्वातिआदि नियामप्पभेददस्सनत्थं वुत्तं. सतिपट्ठानन्तिआदि एकस्मिम्पि नियामे धम्मप्पभेददस्सनत्थं वुत्तं. भब्बो बोधिसत्तोति वचनं केवलं बोधिसत्तस्स भब्बतं दीपेति, न नियतस्स नियामोक्कमनं, तस्मा असाधकं. सो हि पुब्बे एकेनपि नियतधम्मेन अनियतो बोधिमूले सच्चदस्सनेन नियामं ओक्कन्तोति.

नियतस्स नियामकथावण्णना.

५. निवुतकथावण्णना

६६५-६६७. इदानि निवुतकथा नाम होति. तत्थ सुद्धस्स सुद्धकिच्चाभावतो नीवरणेहि निवुतो ओफुटो परियोनद्धो च नीवरणं जहतीति येसं लद्धि, सेय्यथापि उत्तरापथकानं; ते सन्धाय निवुतोतिपुच्छा सकवादिस्स, पटिञ्ञा इतरस्स. रत्तो रागन्तिआदि निवुतस्स नीवरणजहने दोसदस्सनत्थं वुत्तं. परिसुद्धे परियोदातेतिआदि विक्खम्भनविसुद्धिया विसुद्धस्स ¶ समुच्छेदविसुद्धिदस्सनत्थं वुत्तं. तस्स एवं जानतोतिआदि जानतो पस्सतो आसवक्खयं दीपेति, न निवुतस्स नीवरणजहनं, तस्मा असाधकन्ति.

निवुतकथावण्णना.

६. सम्मुखीभूतकथावण्णना

६६८-६७०. इदानि ¶ सम्मुखीभूतकथा नाम होति. तत्थ सम्मुखीभूतोति संयोजनानं सम्मुखीभावं तेहि समङ्गीभावं उपगतो. सेसमेत्थ निवुतकथासदिसमेवाति.

सम्मुखीभूतकथावण्णना.

७. समापन्नो अस्सादेतीतिकथावण्णना

६७१-६७३. इदानि ¶ समापन्नो अस्सादेतीतिकथा नाम होति. तत्थ ‘‘पठमं झानं उपसम्पज्ज विहरति, सो तदस्सादेती’’तिआदिवचनं (अ. नि. ४.१२३) निस्साय ‘‘समापन्नो अस्सादेति, सा चस्स झाननिकन्ति झानारम्मणा होती’’ति येसं लद्धि, सेय्यथापि अन्धकानं, ते सन्धाय समापन्नोति पुच्छा सकवादिस्स, पटिञ्ञा इतरस्स. तं झानं तस्स झानस्स आरम्मणन्ति पञ्हेसु तस्सेव तदारम्मणतं अपस्सन्तो सुत्तविरोधभयेन पटिक्खिपति, ‘‘तदस्सादेती’’तिवचनमत्तेन पटिजानाति. सो तदस्सादेतीति सुत्तं झानलाभिनो झाना वुट्ठाय झानस्सादं साधेति, न अन्तोसमापत्तियंयेव झाननिकन्तिया झानारम्मणतं, तस्मा असाधकन्ति.

समापन्नो अस्सादेतीतिकथावण्णना.

८. असातरागकथावण्णना

६७४. इदानि ¶ असातरागकथा नाम होति. तत्थ ‘‘यंकिञ्चि वेदनं वेदेति सुखं वा दुक्खं वा अदुक्खमसुखं वा, सो तं वेदनं अभिनन्दति अभिवदती’’ति (म. नि. १.४०९) सुत्ते दिट्ठाभिनन्दनवसेन वुत्तं. ‘‘अभिनन्दती’’तिवचनं निस्साय ‘‘दुक्खवेदनायपि रागस्सादवसेन ¶ अभिनन्दना होति. तस्मा अत्थि असातरागो’’ति येसं लद्धि, सेय्यथापि उत्तरापथकानं; ते सन्धाय अत्थि असातरागोति पुच्छा सकवादिस्स. तत्थ असातरागोति असाते दुक्खवेदयिते ‘‘अहो वत मे एतदेव भवेय्या’’ति रज्जना. आमन्ताति लद्धिवसेन पटिञ्ञा इतरस्स. सेसमेत्थ उत्तानत्थमेव.

६७५. सो तं वेदनं अभिनन्दतीति सुत्ते पन विनिवट्टेत्वा दुक्खवेदनमेव आरब्भ रागुप्पत्ति नाम नत्थि, समूहग्गहणेन पन वेदयितलक्खणं धम्मं दुक्खवेदनमेव वा अत्ततो समनुपस्सन्तो दिट्ठिमञ्ञनासङ्खाताय दिट्ठाभिनन्दनाय वेदनं अभिनन्दति, दुक्खाय वेदनाय विपरिणामं अभिनन्दति, दुक्खाय वेदनाय अभिभूतो तस्सा पटिपक्खं कामसुखं पत्थयन्तोपि ¶ दुक्खवेदनं अभिनन्दति नाम. एवं दुक्खवेदनाय अभिनन्दना होतीति अधिप्पायो. तस्मा असाधकमेतं असातरागस्साति.

असातरागकथावण्णना.

९. धम्मतण्हाअब्याकतातिकथावण्णना

६७६-६८०. इदानि धम्मतण्हा अब्याकतातिकथा नाम होति. तत्थ रूपतण्हा…पे… धम्मतण्हाति इमासु छसु तण्हासु यस्मा सब्बपच्छिमा तण्हा धम्मतण्हाति वुत्ता, तस्मा सा अब्याकताति येसं लद्धि, सेय्यथापि पुब्बसेलियानं; ते सन्धाय पुच्छा सकवादिस्स, पटिञ्ञा इतरस्स. सेसपञ्हानं ¶ पाळिया अत्थो निय्याति. कामतण्हातिआदीहि तीहि कोट्ठासेहि छपि तण्हा सङ्खिपित्वा दस्सिता. रूपादीसु हि छसु आरम्मणेसु कामस्सादवसेन पवत्ता तण्हा कामतण्हा. ‘‘भविस्सति अत्ता च लोको चा’’ति सस्सतदिट्ठिसहगता तण्हा भवतण्हा. ‘‘न भविस्सती’’ति उच्छेददिट्ठिसहगता तण्हा विभवतण्हाति. ननु सा धम्मतण्हाति पदं तण्हाय धम्मारम्मणं आरब्भ पवत्तिं दीपेति, न अब्याकतभावं तस्मा असाधकन्ति.

धम्मतण्हा अब्याकतातिकथावण्णना.

१०. धम्मतण्हानदुक्खसमुदयोतिकथावण्णना

६८१-६८५. इदानि ¶ धम्मतण्हा नदुक्खसमुदयोतिकथा नाम होति. तत्रापि यस्मा सा धम्मतण्हाति वुत्ता, तस्मा न दुक्खसमुदयोति येसं लद्धि, सेय्यथापि पुब्बसेलियानंयेव; ते सन्धाय पुच्छा सकवादिस्स, पटिञ्ञा इतरस्स. सेसं पुरिमकथासदिसमेवाति.

धम्मतण्हा नदुक्खसमुदयोतिकथावण्णना.

तेरसमो वग्गो.

१४. चुद्दसमवग्गो

१. कुसलाकुसलपटिसन्दहनकथावण्णना

६८६-६९०. इदानि ¶ ¶ कुसलाकुसलपटिसन्दहनकथा नाम होति. तत्थ कुसलं वा अकुसलस्स, अकुसलं वा कुसलस्स अनन्तरा उप्पज्जनकं नाम नत्थीति तेसं अञ्ञमञ्ञं पटिसन्धानं न युज्जति. ये पन यस्मा एकवत्थुस्मिञ्ञेव रज्जति विरज्जति च, तस्मा तं अञ्ञमञ्ञं पटिसन्दहतीति लद्धिं गहेत्वा ठिता, सेय्यथापि महासङ्घिका; ते सन्धाय पुच्छा सकवादिस्स; पटिञ्ञा इतरस्स. आवट्टना पणिधीति उभयं आवज्जनस्सेव नामं. तञ्हि भवङ्गं आवट्टेतीति आवट्टना. भवङ्गारम्मणतो अञ्ञस्मिं आरम्मणे चित्तं पणिदहति ठपेतीति पणिधि. कुसलं अनावट्टेन्तस्साति यं तं अकुसलानन्तरं पटिसन्दहन्तं कुसलं उप्पज्जति, तं अनावट्टेन्तस्स उप्पज्जतीति पुच्छति. इतरो पन विना आवज्जनेन कुसलस्स उप्पत्तिं अपस्सन्तो पटिक्खिपति. कुसलं अयोनिसो मनसिकरोतोति इदं यदि अकुसलानन्तरं कुसलं उप्पज्जेय्य, अकुसलस्सेव आवज्जनेन अयोनिसो मनसिकरोतो उप्पज्जेय्याति चोदनत्थं वुत्तं. सेसं यथापाळिमेव निय्याति. ननु यस्मिंयेव वत्थुस्मिन्ति वचनं एकारम्मणे सरागविरागुप्पत्तिं दीपेति, न कुसलाकुसलानं अनन्तरतं, तस्मा असाधकन्ति.

कुसलाकुसलपटिसन्दहनकथावण्णना.

२. सळायतनुप्पत्तिकथावण्णना

६९१-६९२. इदानि ¶ ¶ सळायतनुप्पत्तिकथा नाम होति. तत्थ उपपत्तेसियेन पटिसन्धिचित्तेन सहेव ओपपातिकानं सळायतनं उप्पज्जति. गब्भसेय्यकानं अज्झत्तिकायतनेसु मनायतनकायायतनानेव पटिसन्धिक्खणे उप्पज्जन्ति. सेसानि चत्तारि सत्तसत्ततिरत्तिम्हि. तानि च खो येन कम्मुना पटिसन्धि गहिता, तस्सेव अञ्ञस्स वा कतत्ताति अयं सकसमये वादो. येसं पन एककम्मसम्भवत्ता सम्पन्नसाखाविटपानं रुक्खादीनं अंकुरो विय बीजमत्तं सळायतनं मातुकुच्छिस्मिं पटिसन्धिक्खणेयेव उप्पज्जतीति लद्धि, सेय्यथापि पुब्बसेलियानं; ते सन्धाय सळायतनन्ति पुच्छा सकवादिस्स, पटिञ्ञा इतरस्स. सब्बङ्गपच्चङ्गीतिआदि सळायतने ¶ सति एवरूपो हुत्वा ओक्कमेय्याति चोदनत्थं वुत्तं. मातुकुच्छिगतस्साति पुच्छा परवादिस्स. परतो मातुकुच्छिगतस्स पच्छा केसाति पुच्छा सकवादिस्स. सेसमेत्थ उत्तानत्थमेवाति.

सळायतनुप्पत्तिकथावण्णना.

३. अनन्तरपच्चयकथावण्णना

६९३-६९७. इदानि अनन्तरपच्चयकथा नाम होति. तत्थ नच्चगीतादीसु रूपदस्सनसद्दसवनादीनं लहुपरिवत्तितं दिस्वा ‘‘इमानि विञ्ञाणानि अञ्ञमञ्ञस्स अनन्तरा उप्पज्जन्ती’’ति येसं लद्धि, सेय्यथापि उत्तरापथकानं; ते सन्धाय चक्खुविञ्ञाणस्साति पुच्छा सकवादिस्स, पटिञ्ञा इतरस्स. सोतविञ्ञाणं रूपारम्मणंयेवाति यदि चक्खुविञ्ञाणस्स अनन्तरा उप्पज्जेय्य, विपाकमनोधातु विय रूपारम्मणं सियाति चोदेतुं वुत्तं. चक्खुञ्च पटिच्च रूपे च उप्पज्जति सोतविञ्ञाणन्ति पञ्हेसु सुत्ताभावेन पटिक्खिपित्वा अनन्तरुप्पत्तिं सल्लक्खेन्तो लद्धिवसेन पटिजानाति. तञ्ञेव चक्खुविञ्ञाणं ¶ तं सोतविञ्ञाणन्ति यथा पठमजवनानन्तरं दुतियजवनं मनोविञ्ञाणभावेन तञ्ञेव होति, किं ते तथा एतम्पि द्वयं एकमेवाति पुच्छति. इमिना नयेन सब्बवारेसु अत्थो वेदितब्बो. नच्चति गायतीतिआदिवचनं ¶ आरम्मणसमोधाने लहुपरिवत्तिताय वोकिण्णभावं दीपेति, न अनन्तरपच्चयतं, तस्मा असाधकन्ति.

अनन्तरपच्चयकथावण्णना.

४. अरियरूपकथावण्णना

६९८-६९९. इदानि अरियरूपकथा नाम होति. तत्थ सम्मावाचाकम्मन्ता रूपं, तञ्च खो ‘‘सब्बं रूपं चत्तारि च महाभूतानि चतुन्नञ्च महाभूतानं उपादायरूप’’न्ति (म. नि. ३.६७) वचनतो उपादायरूपन्ति येसं लद्धि, सेय्यथापि उत्तरापथकानं; ते सन्धाय अरियरूपं महाभूतानं उपादायाति पुच्छा ¶ सकवादिस्स. तत्थ अरियानं रूपं, अरियं वा रूपन्ति अरियरूपं. आमन्ताति लद्धियं ठत्वा पटिञ्ञा इतरस्स. कुसलन्ति पुट्ठो लद्धिवसेनेव पटिजानाति. अनासवपुच्छादीसुपि एसेव नयो. यं किञ्चि रूपन्ति सुत्तं ठपेत्वा भूतानि सेसरूपस्स उपादाभावं दीपेति, न सम्मावाचाकम्मन्तानं. तेसञ्हि रूपमत्तञ्ञेव असिद्धं, कुतो उपादारूपता; तस्मा असाधकन्ति.

अरियरूपकथावण्णना.

५. अञ्ञो अनुसयोतिकथावण्णना

७००-७०१. इदानि अञ्ञो अनुसयोतिकथा नाम होति. तत्थ यस्मा पुथुज्जनो कुसलाब्याकते चित्ते वत्तमाने सानुसयोति वत्तब्बो, न परियुट्ठितोति तस्मा अञ्ञो अनुसयो, अञ्ञं परियुट्ठानन्ति ¶ येसं लद्धि, सेय्यथापि अन्धकानं; ते सन्धाय अञ्ञो कामरागानुसयोति पुच्छा सकवादिस्स पटिञ्ञा इतरस्स. सेसं हेट्ठा अनुसयकथायं वुत्तनयेनेव वेदितब्बं. सानुसयोतिआदि पन तस्मिं समये अनुसयस्स अप्पहीनत्ता सानुसयोति ¶ वत्तब्बतं, अनुप्पन्नत्ता च परियुट्ठितोति अवत्तब्बतं दीपेति, न अनुसयपरियुट्ठानानं अञ्ञत्तं, तस्मा असाधकन्ति.

अञ्ञो अनुसयोतिकथावण्णना.

६. परियुट्ठानं चित्तविप्पयुत्तन्तिकथावण्णना

७०२. इदानि परियुट्ठानं चित्तविप्पयुत्तन्तिकथा नाम होति. तत्थ यस्मा अनिच्चादितो मनसिकरोतोपि रागादयो उप्पज्जन्ति. वुत्तम्पि चेतं – ‘‘अप्पेकदा, भो भारद्वाज, असुभतो मनसिकरिस्सामीति सुभतोव मनसिकरोती’’ति (सं. नि. ४.१२७). तस्मा परियुट्ठानं चित्तविप्पयुत्तन्ति येसं लद्धि, सेय्यथापि अन्धकानंयेव; ते सन्धाय पुच्छा सकवादिस्स, पटिञ्ञा इतरस्स. सेसमेत्थ उत्तानत्थमेवाति.

परियुट्ठानं चित्तविप्पयुत्तन्तिकथावण्णना.

७. परियापन्नकथावण्णना

७०३-७०५. इदानि ¶ परियापन्नकथा नाम होति. तत्थ यस्मा कामरागो कामधातुं अनुसेति, कामधातुपरियापन्नोति च वुच्चति, तस्मा रूपरागारूपरागापि रूपधातुअरूपधातुयो अनुसेन्ति. रूपधातुअरूपधातुपरियापन्नायेव च नाम होन्तीति येसं लद्धि, सेय्यथापि अन्धकानञ्चेव सम्मितियानञ्च; ते सन्धाय रूपरागोति पुच्छा सकवादिस्स, पटिञ्ञा इतरस्स ¶ . तत्थ अनुसेतीति यथा कामरागो कामवितक्कसङ्खातं कामधातुं सहजातवसेन अनुसेति, किं ते एवं रूपरागो रूपधातुन्ति पुच्छति. परियापन्नोति यथा च सो तिविधाय कामधातुया किलेसकामवसेन परियापन्नत्ता कामधातुपरियापन्नो, किं ते एवं रूपरागोपि रूपधातुपरियापन्नोति पुच्छति. इतरो पनस्स अधिप्पायं असल्लक्खेन्तो केवलं लद्धिवसेन आमन्ताति ¶ पटिजानाति. अथ नं तमत्थं सल्लक्खापेतुं कुसलविपाककिरियसङ्खातेहि समापत्तेसियादीहि संसन्दित्वा पुच्छितुं समापत्तेसियोतिआदिमाह. सेसमेत्थ यथापाळिमेव निय्याति. ननु कामरागोतिआदिवचनम्पि कामरागस्सेव कामधातुयं अनुसयभावं परियापन्नतञ्च दीपेति, न इतरेसं इतरधातूसूति.

परियापन्नकथावण्णना.

८. अब्याकतकथावण्णना

७०६-७०८. इदानि अब्याकतकथा नाम होति. तत्थ विपाककिरियरूपनिब्बानसङ्खातं चतुब्बिधं अब्याकतं अविपाकत्ता अब्याकतन्ति वुत्तं. दिट्ठिगतं ‘‘सस्सतो लोकोति खो, वच्छ, अब्याकतमेत’’न्ति (सं. नि. ४.४१६ थोकं विसदिसं) सस्सतादिभावेन अकथितत्ता. येसं पन इमं विभागं अग्गहेत्वा पुरिमाब्याकतं विय दिट्ठिगतम्पि अब्याकतन्ति लद्धि, सेय्यथापि अन्धकानञ्चेव उत्तरापथकानञ्च; तेसं तं विभागं दस्सेतुं दिट्ठिगतं अब्याकतन्ति पुच्छा सकवादिस्स, पटिञ्ञा इतरस्स. सेसमेत्थ यथापाळिमेव निय्यातीति.

अब्याकतकथावण्णना.

९. अपरियापन्नकथावण्णना

७०९-७१०. इदानि ¶ अपरियापन्नकथा नाम होति. तत्थ यस्मा पुथुज्जनो झानलाभी कामेसु वीतरागोति वत्तब्बो होति, न पन विगतदिट्ठिकोति ¶ , तस्मा दिट्ठिगतं अपरियापन्नन्ति येसं लद्धि, सेय्यथापि पुब्बसेलियानं; ते सन्धाय पुच्छा सकवादिस्स, पटिञ्ञा इतरस्स. सेसमेत्थ यथापाळिमेव निय्यातीति.

अपरियापन्नकथावण्णना.

चुद्दसमो वग्गो.

१५. पन्नरसमवग्गो

१. पच्चयताकथावण्णना

७११-७१७. इदानि ¶ ¶ पच्चयताकथा नाम होति. तत्थ यो धम्मो हेतुपच्चयेन पच्चयो, सो येसं हेतुपच्चयेन पच्चयो, तेसञ्ञेव यस्मा आरम्मणानन्तरसमनन्तरपच्चयेन पच्चयो न होति, यो वा आरम्मणपच्चयेन पच्चयो, सो यस्मा तेसंयेव अनन्तरसमनन्तरपच्चयेन पच्चयो न होति, तस्मा पच्चयता ववत्थिताति येसं लद्धि, सेय्यथापि महासङ्घिकानं; ते सन्धाय पुच्छा सकवादिस्स, पटिञ्ञा इतरस्स. सेसमेत्थ यथापाळिमेव निय्यातीति.

पच्चयताकथावण्णना.

२. अञ्ञमञ्ञपच्चयकथावण्णना

७१८-७१९. इदानि अञ्ञमञ्ञपच्चयकथा नाम होति. तत्थ येसं समये ‘‘अविज्जापच्चया सङ्खारा’’ति अयमेव तन्ति, ‘‘सङ्खारपच्चयापि अविज्जा’’ति अयं नत्थि, तस्मा अविज्जाव सङ्खारानं पच्चयो, न पन सङ्खारा अविज्जायाति लद्धि, सेय्यथापि महासङ्घिकानं; ते सन्धाय अविज्जासङ्खारादीनं अञ्ञमञ्ञपच्चयतापि अत्थीति दस्सेतुं पुच्छा सकवादिस्स, पटिञ्ञा इतरस्स ¶ . अविज्जा सङ्खारेनाति एत्थ अपुञ्ञाभिसङ्खारोव गहितो. तस्मा सङ्खारपच्चयापि अविज्जाति एत्थ सहजातअञ्ञमञ्ञअत्थिअविगतसम्पयुत्तवसेन पच्चयता वेदितब्बा. उपादानपच्चयापि तण्हाति एत्थ ठपेत्वा कामुपादानं सेसानि तीणि उपादानानि अविज्जाय सङ्खारा विय तण्हाय पच्चया होन्तीति वेदितब्बानि. सेसं ¶ यथापाळिमेव निय्याति. जरामरणपच्चयाति पुच्छा परवादिस्स, नामरूपं विञ्ञाणपच्चयाति सकवादिस्साति.

अञ्ञमञ्ञपच्चयकथावण्णना.

३. अद्धाकथावण्णना

७२०-७२१. इदानि ¶ अद्धाकथा नाम होति. तत्थ ‘‘तीणिमानि, भिक्खवे, कथावत्थूनी’’ति (अ. नि. ३.६८) सुत्तं निस्साय कालसङ्खातो अद्धा नाम परिनिप्फन्नो अत्थीति येसं लद्धि; तेसं ‘‘अद्धा नाम कोचि परिनिप्फन्नो नत्थि अञ्ञत्र कालपञ्ञत्तिमत्ता. रूपादयो पन खन्धाव परिनिप्फन्ना’’ति विभागं दस्सेतुं अद्धा परिनिप्फन्नोति पुच्छा सकवादिस्स, पटिञ्ञा इतरस्स. अथ नं ‘‘सचे सो परिनिप्फन्नो, रूपादीसु अनेन अञ्ञतरेन भवितब्ब’’न्ति चोदेतुं रूपन्तिआदिमाह. इतरो पटिक्खिपति. सेसं यथापाळिमेव निय्यातीति.

अद्धाकथावण्णना.

४. खणलयमुहुत्तकथावण्णना

७२२-७२३. खणलयमुहुत्तकथासुपि एसेव नयो. सब्बेपि हेते खणादयो अद्धापरियाया एवाति.

खणलयमुहुत्तकथावण्णना.

५. आसवकथावण्णना

७२४-७२५. इदानि आसवकथा नाम होति. तत्थ यस्मा चतूहि आसवेहि उत्तरि अञ्ञो आसवो नाम नत्थि, येन चत्तारो आसवा ¶ सासवा सियुं, तस्मा ¶ चत्तारो आसवा अनासवाति येसं लद्धि, सेय्यथापि हेतुवादानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि ते आसवा अनासवा, एवं सन्ते तेहि मग्गादिलक्खणप्पत्तेहि भवितब्ब’’न्ति चोदेतुं मग्गोतिआदिमाह. सेसमेत्थ उत्तानत्थमेवाति.

आसवकथावण्णना.

६. जरामरणकथावण्णना

७२६-७२७. इदानि ¶ जरामरणकथा नाम होति. तत्थ जरामरणं नाम अपरिनिप्फन्नत्ता लोकियन्ति वा लोकुत्तरन्ति वा न वत्तब्बं. ‘‘लोकिया धम्मा लोकुत्तरा धम्मा’’ति हि दुके जरामरणं नेव लोकियपदे, न लोकुत्तरपदे निद्दिट्ठं. तत्थ येसं इमं लक्खणं अनादियित्वा लोकुत्तरानं धम्मानं जरामरणं लोकुत्तरन्ति लद्धि, सेय्यथापि महासङ्घिकानं, ते सन्धाय पुच्छा सकवादिस्स, पटिञ्ञा इतरस्स. सेसमेत्थ यथापाळिमेव निय्यातीति.

जरामरणकथावण्णना.

७. सञ्ञावेदयितकथावण्णना

७२८-७२९. इदानि सञ्ञावेदयितकथा नाम होति. तत्थ सञ्ञावेदयितनिरोधसमापत्ति नाम न कोचि धम्मो, चतुन्नं पन खन्धानं निरोधो. इति सा नेव लोकिया न लोकुत्तरा. यस्मा पन लोकिया न होति, तस्मा लोकुत्तराति येसं लद्धि, सेय्यथापि हेतुवादानंयेव; ते सन्धाय पुच्छा सकवादिस्स, पटिञ्ञा इतरस्स. सेसं पुरिमकथासदिसमेवाति.

सञ्ञावेदयितकथावण्णना.

८. दुतियसञ्ञावेदयितकथावण्णना

७३०-७३१. इदानि ¶ ¶ यस्मा सा लोकुत्तरा न होति, तस्मा लोकियाति येसं लद्धि, सेय्यथापि हेतुवादानं, ते सन्धाय पुच्छा सकवादिस्स, पटिञ्ञा इतरस्स. सेसं पुरिमसदिसमेवाति.

दुतियसञ्ञावेदयितकथावण्णना.

९. ततियसञ्ञावेदयितकथावण्णना

७३२. इदानि ¶ यस्मा ‘‘असुको मरणधम्मो, असुको न मरणधम्मो’’ति सत्तानं मरणधम्मताय नियामो नत्थीति सञ्ञावेदयितनिरोधं समापन्नोपि कालं करेय्याति येसं लद्धि, सेय्यथापि राजगिरिकानं; तेसं समापन्नायपि मरणधम्मताय मरणसमयञ्च अमरणसमयञ्च दस्सेतुं पुच्छा सकवादिस्स, पटिञ्ञा इतरस्स. अथ नं यस्मा कालं करोन्तस्स नाम मरणन्तिकेहि फस्सादीहि भवितब्बं, तस्मा तेनाकारेन चोदेतुं अत्थीतिआदिमाह.

अफस्सकस्स कालकिरियातिआदीनि पुट्ठो सेससत्ते सन्धाय पटिक्खिपति विसं कमेय्यातिआदीनि पुट्ठो समापत्तिआनुभावं सन्धाय पटिक्खिपति. दुतियवारे सरीरपकतिं सन्धाय पटिजानाति. एवं सन्ते पन समापत्तिआनुभावो नाम न होति, तेनेव न निरोधसमापन्नोति अनुयुञ्जति.

७३३-७३४. न कालं करेय्याति पुच्छा परवादिस्स. अत्थि सो नियामोति परवादिस्स पञ्हे पन यस्मा एवरूपो नियामो नाम नत्थि, तस्मा पटिक्खिपति. चक्खुविञ्ञाणसमङ्गीतिआदि सकवादिना ‘‘नियामे असन्तेपि मरणसमयेनेव मरति, नासमयेना’’ति दस्सेतुं वुत्तं. तत्रायमधिप्पायो – यदि नियामाभावेन कालकिरिया भवेय्य, चक्खुविञ्ञाणसमङ्गिनोपि भवेय्य. ततो ‘‘पञ्चहि विञ्ञाणेहि न चवति, न उपपज्जती’’ति ¶ सुत्तविरोधो सिया. यथा पन चक्खुविञ्ञाणसमङ्गिस्स कालकिरिया न होति, तथा निरोधसमापन्नस्सापीति.

ततियसञ्ञावेदयितकथावण्णना.

१०. असञ्ञसत्तुपिकाकथावण्णना

७३५. इदानि ¶ असञ्ञसत्तुपिकाकथा नाम होति. तत्थ सञ्ञाविरागवसेन पवत्तभावना असञ्ञसमापत्तिपि निरोधसमापत्तिपि सञ्ञावेदयितनिरोधसमापत्ति नाम. इति द्वे ¶ सञ्ञावेदयितनिरोधसमापत्तियो लोकिया च लोकुत्तरा च. तत्थ लोकिया पुथुज्जनस्स असञ्ञसत्तुपिका होति, लोकुत्तरा अरियानं, सा च नासञ्ञसत्तुपिका. इमं पन विभागं अकत्वा अविसेसेन सञ्ञावेदयितनिरोधसमापत्ति असञ्ञसत्तुपिकाति येसं लद्धि, सेय्यथापि हेतुवादानं; ते सन्धाय पुच्छा सकवादिस्स, पटिञ्ञा इतरस्स. अथ नं यस्मा असञ्ञसमापत्तिं समापन्नस्स अलोभादयो अत्थि, न निरोधसमापत्तिं, तस्मा तेसं वसेन चोदेतुं अत्थीतिआदिमाह.

७३६. इधापि असञ्ञीति पञ्हे इध सञ्ञाविरागवसेन समापन्नत्ता असञ्ञिता अनुञ्ञाता, तत्रापि असञ्ञसत्तेनेव. तस्मा इमं पटिञ्ञं गहेत्वा लद्धिं पतिट्ठपेन्तेन छलेन पतिट्ठापिता होति. इध वा निरोधसमापत्तिं सन्धाय असञ्ञिता अनुञ्ञाता. तत्रापि इतो चुतस्स अनागामिनो निरोधसमापत्तिमेव तस्मापि इमाय पटिञ्ञाय पतिट्ठापिता लद्धि अप्पतिट्ठितायेवाति.

असञ्ञसत्तुपिकाकथावण्णना.

११. कम्मूपचयकथावण्णना

७३७. इदानि कम्मूपचयकथा नाम होति. तत्थ येसं कम्मूपचयो ¶ नाम कम्मतो अञ्ञो चित्तविप्पयुत्तो अब्याकतो अनारम्मणोति लद्धि, सेय्यथापि अन्धकानञ्चेव सम्मितियानञ्च; ते सन्धाय अञ्ञं कम्मन्ति पुच्छा सकवादिस्स, पटिञ्ञा इतरस्स. अथ नं ‘‘यदि कम्मतो अञ्ञो कम्मूपचयो, फस्सादितोपि अञ्ञेन फस्सूपचयादिना भवितब्ब’’न्ति चोदेतुं अञ्ञो फस्सोतिआदिमाह. इतरो लद्धिया अभावेन पटिक्खिपति.

७३८-७३९. कम्मेन ¶ सहजातोति पञ्हेसु चित्तविप्पयुत्तं सन्धाय पटिक्खिपति, चित्तसम्पयुत्तं सन्धाय पटिजानाति. कुसलोति पञ्हेसुपि चित्तविप्पयुत्तं सन्धाय पटिजानाति. परतो अकुसलोतिपञ्हेसुपि एसेव नयो.

७४०. सारम्मणोति ¶ पुट्ठो पन एकन्तं अनारम्मणमेव इच्छति, तस्मा पटिक्खिपति. चित्तं भिज्जमानन्ति यदा चित्तं भिज्जमानं होति, तदा कम्मं भिज्जतीति अत्थो. भुम्मत्थे वा पच्चत्तं, चित्ते भिज्जमानेति अत्थो. अयमेव वा पाठो. तत्थ यस्मा सम्पयुत्तो भिज्जति, विप्पयुत्तो न भिज्जति, तस्मा पटिजानाति चेव पटिक्खिपति च.

७४१. कम्मम्हि कम्मूपचयोति कम्मे सति कम्मूपचयो, कम्मे वा पतिट्ठिते कम्मूपचयो, कम्मूपचयतोव विपाको निब्बत्तति. तस्मिं पन कम्मे निरुद्धे याव अंकुरुप्पादा बीजं विय याव विपाकुप्पादा कम्मूपचयो तिट्ठतीतिस्स लद्धि, तस्मा पटिजानाति. तञ्ञेव कम्मं, सो कम्मूपचयो, सो कम्मविपाकोति यस्मा कम्मम्हि कम्मूपचयो, सो च याव विपाकुप्पादा तिट्ठतीतिस्स लद्धि, तस्मा नं तेसं तिण्णम्पि एकत्तं पुच्छति विपाको सारम्मणोति इदं विपाको विय विपाकधम्मधम्मोपि आरम्मणपटिबद्धोयेवाति चोदनत्थं पुच्छति. इतरो पन लद्धिवसेनेकं पटिजानाति, एकं पटिक्खिपति. पटिलोमेपि एसेव नयो. सेसमेत्थ यथापाळिमेव निय्यातीति.

कम्मूपचयकथावण्णना.

पन्नरसमो वग्गो.

ततियपण्णासको समत्तो.

१६. सोळसमवग्गो

१. निग्गहकथावण्णना

७४३-७४४. इदानि ¶ ¶ निग्गहकथा नाम होति. तत्थ ये लोके बलप्पत्ता वसीभूता, ते यदि परस्स चित्तं निग्गण्हितुं न सक्कुणेय्युं, का तेसं बलप्पत्ति, को वसीभावो. बलप्पत्तिया पन वसीभावेन च अद्धा ते परस्स चित्तं निग्गण्हन्तीति येसं लद्धि, सेय्यथापि महासङ्घिकानं; ते सन्धाय परो परस्साति पुच्छा सकवादिस्स, पटिञ्ञा इतरस्स. तत्थ ¶ निग्गण्हातीति संकिलेसापत्तितो निवारेति. सेसमेत्थ यथापाळिमेव निय्यातीति. पग्गहकथायपि एसेव नयो.

निग्गहकथावण्णना.

३. सुखानुप्पदानकथावण्णना

७४७-७४८. इदानि सुखानुप्पदानकथा नाम होति. तत्थ ‘‘बहूनं वत नो भगवा सुखधम्मानं उपहत्ता’’ति (म. नि. २.१४८) सुत्तं निस्साय परो परस्स सुखं अनुप्पदेतीति येसं लद्धि, सेय्यथापि हेतुवादानं; ते सन्धाय पुच्छा सकवादिस्स, पटिञ्ञा इतरस्स. दुक्खं अनुप्पदेतीति पुट्ठो पन तादिसं सुत्तपदं अपस्सन्तो पटिक्खिपति. अत्तनो सुखन्तिआदिपञ्हे यं ¶ अत्तनो परस्स वा, तं अनुप्पदातुं न सक्का. यं तस्सेव, किं तत्थ अनुप्पदानं नामाति पटिक्खिपति. नेवत्तनोतिआदिपञ्हे पन यं एवरूपं, न तं अनुप्पदिन्नं नाम भवितुमरहतीति लद्धियापटिजानाति. नो च वत रेतितादिसस्स सुखस्स अभावा वुत्तं. सुखधम्मानं उपहत्तातिवचनं भगवतो परेसं सुखुप्पत्तिया पच्चयभावं दीपेति, न अन्नादीनं विय सुखस्स अनुप्पदानं, तस्मा असाधकन्ति.

सुखानुप्पदानकथावण्णना.

४. अधिगय्हमनसिकारकथावण्णना

७४९-७५३. इदानि ¶ अधिगय्ह मनसिकारकथा नाम होति. तत्थ दुविधो मनसिकारो नयतो च आरम्मणतो च. तत्थ एकसङ्खारस्सापि अनिच्चताय दिट्ठाय सब्बे सङ्खारा अनिच्चाति अवसेसेसु नयतो मनसिकारो होति. अतीते पन सङ्खारे मनसिकरोन्तो न अनागते मनसिकातुं सक्कोति. अतीतादीसु अञ्ञतरं मनसिकरोतो आरम्मणतो मनसिकारो होति ¶ . तत्थ पच्चुप्पन्ने मनसिकरोन्तो येन चित्तेन ते मनसिकरोति, तं पच्चुप्पन्नक्खणे मनसिकातुं न सक्कोति. तत्थ येसं ‘‘सब्बे सङ्खारा अनिच्चा’’तिआदिवचनं निस्साय ‘‘मनसिकरोन्तो नाम अधिगय्ह अधिगण्हित्वा सङ्गण्हित्वा सब्बे सङ्खारे एकतो मनसिकरोती’’ति लद्धि, सेय्यथापि पुब्बसेलियापरसेलियानं; ते सन्धाय पुच्छा सकवादिस्स, पटिञ्ञा इतरस्स.

अथ नं यस्मा सब्बे एकतो मनसिकरोन्तेन येन चित्तेन ते मनसिकरोति, तम्पि मनसिकातब्बं होति. तस्मा तंचित्तताय चोदेतुं तेन चित्तेनाति आह. इतरो आरम्मणं कत्वा न सक्का जानितुन्ति सन्धाय पटिक्खिपति. एवंलक्खणं चित्तन्ति ञातत्ता पन तम्पि चित्तं ञातमेव होतीति सन्धाय पटिजानाति. अथ वा तञ्ञेव तस्स आरम्मणं न होतीति पटिक्खिपति. ‘‘सब्बे सङ्खारा अनिच्चा, यदा पञ्ञाय पस्सती’’तिआदीनि निस्साय उप्पन्नलद्धिवसेन ¶ पटिजानाति. सेसपञ्हद्वयेपि एसेव नयो. तेन फस्सेनातिआदीसु पन तथारूपं सुत्तं अपस्सन्तो पटिक्खिपतेव. अतीतादिपञ्हेसु हेट्ठा वुत्तनयेनेव पटिक्खेपपटिञ्ञा वेदितब्बा. सेसं यथापाळिमेव निय्यातीति. सब्बे सङ्खारातिआदिवचनं नयतो दस्सनं सन्धाय वुत्तं, न एकक्खणे आरम्मणतो, तस्मा असाधकन्ति.

अधिगय्हमनसिकारकथावण्णना.

५. रूपं हेतूतिकथावण्णना

७५४-७५६. इदानि रूपं हेतूति कथानाम होति. तत्थ हेतूति कुसलमूलादिनो हेतुहेतुस्सापि नामं, यस्स कस्सचि पच्चयस्सापि. इमं ¶ पन विभागं अकत्वा ‘‘चत्तारो महाभूता हेतू’’ति वचनमत्तं निस्साय अविसेसेनेव रूपं हेतूति येसं लद्धि, सेय्यथापि उत्तरापथकानं; ते सन्धाय पुच्छा सकवादिस्स, पटिञ्ञा इतरस्स. अलोभो हेतूति किं ते रूपं अलोभसङ्खातो हेतूति पुच्छति, इतरो पटिक्खिपति. सेसेसुपि एसेव नयो. महाभूता उपादायरूपानं उपादायहेतूति एत्थ पच्चयट्ठेन हेतुभावो वुत्तो, न मूलट्ठेन, तस्मा असाधकन्ति.

रूपं हेतूतिकथावण्णना.

७५७-७५९. सहेतुककथायम्पि ¶ इमिनाव नयेन अत्थो वेदितब्बोति.

रूपं सहेतुकन्तिकथावण्णना.

७. रूपं कुसलाकुसलन्तिकथावण्णना

७६०-७६४. इदानि रूपं कुसलाकुसलन्तिकथा नाम होति. तत्थ ‘‘कायकम्मं वचीकम्मं कुसलम्पि अकुसलम्पी’’तिवचनं ¶ निस्साय कायवचीकम्मसङ्खातं कायविञ्ञत्तिवचीविञ्ञत्तिरूपं कुसलम्पि अकुसलम्पीति येसं लद्धि, सेय्यथापि महिसासकानञ्चेव सम्मितियानञ्च; ते सन्धाय रूपं कुसलन्ति पुच्छा सकवादिस्स पटिञ्ञा इतरस्स. अथ नं ‘‘यदि ते रूपं कुसलं, एवंविधेन अनेन भवितब्ब’’न्ति चोदेतुं सारम्मणन्ति आदिमाह. परतो अकुसलपञ्हेपि एसेव नयो. सेसमेत्थ उत्तानत्थमेवाति.

रूपं कुसलाकुसलन्तिकथावण्णना.

८. रूपं विपाकोतिकथावण्णना

७६५-७६७. इदानि रूपं विपाकोतिकथा नाम होति. तत्थ यं कम्मस्स कतत्ता उप्पन्ना चित्तचेतसिका विय कम्मस्स कतत्ता उप्पन्नं तं रूपम्पि विपाकोति येसं लद्धि, सेय्यथापि अन्धकानञ्चेव सम्मितियानञ्च; ते ¶ सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि ते रूपं विपाको, एवंविधेन अनेन भवितब्ब’’न्ति चोदेतुं सुखवेदनीयन्तिआदिमाह. सेसं यथापाळिमेव निय्यातीति.

रूपं विपाकोतिकथावण्णना.

९. रूपं रूपावचरारूपावचरन्तिकथावण्णना

७६८-७७०. इदानि ¶ रूपं रूपावचरारूपावचरन्तिकथा नाम होति. तत्थ यं कामावचरकम्मस्स कतत्ता रूपं, तं यस्मा कामावचरं, तस्मा रूपावचरारूपावचरकम्मानम्पि कतत्ता रूपेन रूपावचरारूपावचरेन भवितब्बन्ति ¶ येसं लद्धि, सेय्यथापि अन्धकानं; ते सन्धाय अत्थि रूपं रूपावचरारूपावचरन्ति पुच्छा सकवादिस्स, पटिञ्ञा इतरस्स. सेसमेत्थ हेट्ठा वुत्तनयमेवाति.

रूपं रूपावचरारूपावचरन्तिकथावण्णना.

१०. रूपारूपधातुपरियापन्नकथावण्णना

७७१-७७५. इदानि रूपरागो रूपधातुपरियापन्नो अरूपरागो अरूपधातुपरियापन्नोति कथा नाम होति. तत्थ यस्मा कामरागो कामधातुपरियापन्नो, तस्मा रूपरागारूपरागेहिपि रूपधातुअरूपधातुपरियापन्नेहि भवितब्बन्ति येसं लद्धि, सेय्यथापि अन्धकानं, ते सन्धाय पुच्छा सकवादिस्स, पटिञ्ञा इतरस्स. सेसं हेट्ठा वुत्तनयेनेव वेदितब्बं. केवलञ्हि तत्थ ‘‘रूपधातुं अनुसेति, अरूपधातुं अनुसेती’’ति पदं विसेसो. सा च लद्धि अन्धकानञ्चेव सम्मितियानञ्च. अयं अन्धकानंयेवाति.

रूपरागो रूपधातुपरियापन्नो अरूपरागो अरूपधातुपरियापन्नोतिकथावण्णना.

रूपारूपधातुपरियापन्नकथावण्णना.

सोळसमो वग्गो.

१७. सत्तरसमवग्गो

१. अत्थि अरहतो पुञ्ञूपचयकथावण्णना

७७६-७७९. इदानि ¶ ¶ ¶ अत्थि अरहतो पुञ्ञूपचयोतिकथा नाम होति. तत्थ येसं अरहतो दानसंविभागचेतियवन्दनादीनि कम्मानि दिस्वा अत्थि अरहतो पुञ्ञूपचयोति लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘अरहा नाम पहीनपुञ्ञपापो, सो यदि पुञ्ञं करेय्य, पापम्पि करेय्या’’ति चोदेतुं अपुञ्ञूपचयोति आह. इतरो पाणातिपातादिकिरियं अपस्सन्तो पटिक्खिपति. पुञ्ञाभिसङ्खारन्तिआदीसु भवगामिकम्मं अरहतो नत्थीति पटिक्खिपति. दानं ददेय्यातिआदीसु किरियचित्तेन दानादिपवत्तिसब्भावतो सकवादी पटिजानाति. इतरो चित्तं अनादियित्वा किरियापवत्तिमत्तदस्सनेनेव लद्धिं पतिट्ठपेति. सा पन अयोनिसो पतिट्ठापितत्ता अप्पतिट्ठापिता होतीति.

अत्थि अरहतो पुञ्ञूपचयोतिकथावण्णना.

२. नत्थि अरहतो अकालमच्चूतिकथावण्णना

७८०. इदानि नत्थि अरहतो अकालमच्चूतिकथा नाम होति. तत्थ ‘‘नाहं, भिक्खवे, सञ्चेतनिकानं कम्मानं कतानं उपचितानं अपटिसंवेदित्वा ब्यन्तीभावं वदामी’’ति (अ. नि. १०.२१७) सुत्तस्स अत्थं अयोनिसो गहेत्वा ‘‘अरहता नाम ¶ सब्बकम्मविपाकं पटिसंवेदयित्वाव परिनिब्बायितब्बं, तस्मा नत्थि, अरहतो अकालमच्चू’’ति येसं लद्धि, सेय्यथापि राजगिरिकानञ्चेव सिद्धत्थिकानञ्च; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘सचे तस्स नत्थि अकालमच्चु, अरहन्तघातकेन नाम न भवितब्ब’’न्ति ¶ चोदेतुं नत्थि अरहन्तघातकोति आह. इतरो आनन्तरियकम्मस्स चेव तादिसानञ्च पुग्गलानं सब्भावतो पटिक्खिपति.

७८१. विसं न कमेय्याति पञ्हे ‘‘याव पुब्बे कतकम्मं परिक्खयं न गच्छति, ताव न कमती’’ति लद्धिया पटिक्खिपति. सेसमेत्थ यथापाळिमेव निय्याति.

७८२. नाहं, ¶ भिक्खवेति सुत्तं इदं सन्धाय वुत्तं – सञ्चेतनिकानं कम्मानं कतानं विपाकं अपटिसंवेदित्वा अविन्दित्वा अननुभवित्वा ब्यन्तीभावं तेसं कम्मानं परिवटुमपरिच्छिन्नभावं न वदामि, तञ्च खो दिट्ठधम्मवेदनीयानं दिट्ठेव धम्मे, न ततो परं, उपपज्जवेदनीयानं अनन्तरं उपपत्तिं उपपज्जित्वाव न ततो परं, अपरापरियवेदनीयानं यदा विपाकोकासं लभन्ति, तथारूपे अपरापरे वा परियाये. एवं सब्बथापि संसारपवत्ते सति लद्धविपाकवारे कम्मे न विज्जतेसो जगतिप्पदेसो, यत्थट्ठितो मुच्चेय्य पापकम्माति. एवं सन्ते यदेतं ‘‘अलद्धविपाकवारम्पि कम्मं अवस्सं अरहतो पटिसंवेदितब्ब’’न्ति कप्पनावसेन ‘‘नत्थि अरहतो अकालमच्चू’’ति लद्धिपतिट्ठापनं कतं, तं दुक्कटमेवाति.

नत्थि अरहतो अकालमच्चूतिकथावण्णना.

३. सब्बमिदं कम्मतोतिकथावण्णना

७८३. इदानि सब्बमिदं कम्मतोतिकथा नाम होति. तत्थ ‘‘कम्मुना वत्तति लोको’’ति सुत्तं निस्साय ‘‘सब्बमिदं कम्मकिलेसविपाकवट्टं कम्मतोव होती’’ति येसं लद्धि ¶ , सेय्यथापि राजगिरिकानञ्चेव सिद्धत्थिकानञ्च; ते सन्धाय सब्बमिदन्ति पुच्छा सकवादिस्स, पटिञ्ञा इतरस्स. अथ नं ‘‘एवं सन्ते कम्मम्पि कम्मतो आपज्जती’’ति चोदेतुं कम्मम्पि कम्मतोति आह. इतरो यदि कम्मम्पि कम्मतोव नाम तं कम्मं विपाकोयेव सियाति पटिक्खिपति. पुब्बेकतहेतूति ‘‘यदि सब्बमिदं कम्मतो, पुब्बेकतहेतुना तेन भवितब्ब’’न्ति चोदेतुं पुच्छति, इतरो पुब्बेकतहेतुवादभयेन पटिक्खिपति.

७८४. कम्मविपाकतोति ¶ ‘‘यदि सब्बमिदं कम्मतो, यं अतीतभवे पवत्तस्स हेतुभूतं कम्मं, तम्पि पुरिमतरे भवे कम्मतोति कम्मविपाको सम्पज्जति, तेन ते सब्बमिदं कम्मविपाकतो आपज्जती’’ति चोदेतुं पुच्छति. इतरो बीजतो अंकुरस्सेव पच्चुप्पन्नपवत्तस्स कम्मतो निब्बत्तिं सन्धाय पटिक्खिपति. दुतियं पुट्ठो तस्सापि कम्मस्स बीजस्स पुरिमबीजतो विय ¶ पुरिमकम्मतो पवत्तत्ता पटिजानाति. पाणं हनेय्यातिआदि ‘‘यदि सब्बं कम्मविपाकतो, पाणातिपातादीनि कम्मविपाकेनेव करेय्या’’ति चोदेतुं वुत्तं. इतरो दुस्सील्यचेतनापि पुरिमकम्मनिब्बत्ता एकेन परियायेन विपाकोयेवाति लद्धिया पटिजानाति. अथ नं ‘‘यदि ते पाणातिपातो कम्मविपाकतो निब्बत्तति, पाणातिपातो विय विपाकोपि सफलो आपज्जती’’ति चोदेतुं सफलोति आह. इतरो पाणातिपातस्स निरयसंवत्तनिकादिभावतो सफलतं पस्सन्तो पटिजानाति. कम्मविपाकस्स पन इदं नाम फलन्ति वुत्तट्ठानं अपस्सन्तो पटिक्खिपति. अदिन्नादानादीसुपि एसेव नयो. गिलानपच्चयभेसज्जपरिक्खारो सफलोति देय्यधम्मवसेन दानफलं पुच्छति. कम्मुना वत्ततीति सुत्तं ‘‘नत्थि कम्म’’न्ति अकम्मवादितं पटिक्खिपित्वा ‘‘अत्थि कम्म’’न्ति कम्मवादितं कम्मस्सकतं दीपेति. न सब्बस्सेव कम्मतो निब्बत्तिं, तस्मा असाधकन्ति.

सब्बमिदं कम्मतोतिकथावण्णना.

४. इन्द्रियबद्धकथावण्णना

७८६-७८७. इदानि ¶ इन्द्रियबद्धकथा नाम होति. तत्थ दुविधं दुक्खं – इन्द्रियबद्धं, अनिन्द्रियबद्धञ्च. इन्द्रियबद्धं दुक्खवत्थुताय दुक्खं, अनिन्द्रियबद्धं उदयब्बयपटिपीळनट्ठेन ‘‘यदनिच्चं तं दुक्ख’’न्ति सङ्गहितत्ता दुक्खं. इमं विभागं अग्गहेत्वा ‘‘यस्स परिञ्ञाय भगवति ब्रह्मचरियं वुस्सति, तं इन्द्रियबद्धमेव दुक्खं, न इतर’’न्ति येसं लद्धि, सेय्यथापि हेतुवादानं, तेसं इतरस्सापि दुक्खभावं दस्सेतुं इन्द्रियबद्धञ्ञेवाति पुच्छा सकवादिस्स, पटिञ्ञा इतरस्स. अथ नं ‘‘यस्मा भगवता ‘यदनिच्चं तं दुक्ख’न्ति वुत्तं, तस्मा इन्द्रियबद्धेनेव तेन अनिच्चेन भवितब्ब’’न्ति चोदेतुं इन्द्रियबद्धञ्ञेव अनिच्चन्तिआदिमाह. ननु ¶ अनिन्द्रियबद्धं अनिच्चन्ति ननु पथवीपब्बतपासाणादि अनिन्द्रियबद्धम्पि अनिच्चन्ति अत्थो.

७८८. न वत्तब्बं इन्द्रियबद्धञ्ञेव दुक्खन्ति पञ्हे आमन्ताति पटिञ्ञा सकवादिस्स. अनिन्द्रियबद्धञ्हि दुक्खदोमनस्सानं आरम्मणं होति. उण्हकालस्मिञ्हि अग्गि सीतकाले च वातो दुक्खस्स आरम्मणं, निच्चम्पि ¶ भोगविनासादयो दोमनस्सस्स. तस्मा विनापि अनिच्चट्ठेन अनिन्द्रियबद्धं दुक्खन्ति वत्तब्बं. कम्मकिलेसेहि पन अनिब्बत्तत्ता दुक्खं अरियसच्चन्ति न वत्तब्बं, तथा मग्गेन अपरिञ्ञेय्यत्ता. यस्मा पन तिणकट्ठादिनिरोधो वा उतुबीजादिनिरोधो वा दुक्खनिरोधं अरियसच्चं नाम न होति, तस्मा इन्द्रियबद्धं दुक्खञ्चेव अरियसच्चञ्च, इतरं पन दुक्खमेवाति इदं नानत्तं दस्सेतुं पटिजानाति. यथा इन्द्रियबद्धस्सातिआदिवचनं इन्द्रियबद्धस्स परिञ्ञाय ब्रह्मचरियवासं परिञ्ञातस्स पुन अनुप्पत्तिं दीपेति. तेनेवेत्थ सकवादिना पटिक्खेपो कतो. ‘‘यदनिच्चं तं दुक्ख’’न्ति वचनेन पन सङ्गहितस्स अनिन्द्रियबद्धस्स दुक्खभावं पटिसेधेतुं न सक्काति, तस्मा असाधकन्ति.

इन्द्रियबद्धकथावण्णना.

५. ठपेत्वा अरियमग्गन्तिकथावण्णना

७८९-७९०. इदानि ¶ ठपेत्वा अरियमग्गन्तिकथा नाम होति. तत्थ ‘‘यस्मा अरियमग्गो ‘दुक्खनिरोधगामिनिपटिपदा’ति वुत्तो, तस्मा ठपेत्वा अरियमग्गं अवसेसा सङ्खारा दुक्खा’’ति येसं लद्धि, सेय्यथापि हेतुवादानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि एवं समुदयस्सापि दुक्खभावो आपज्जती’’ति चोदेतुं दुक्खसमुदयोपीति आह. इतरो हेतुलक्खणं सन्धाय पटिक्खिपति. पुन पुट्ठो पवत्तपरियापन्नभावं सन्धाय पटिजानाति. तीणेवाति पञ्हेसु सुत्तविरोधभयेन पटिक्खिपति, लद्धिवसेन पटिजानाति. सेसमेत्थ उत्तानत्थमेवाति.

ठपेत्वा अरियमग्गन्तिकथावण्णना.

६. न वत्तब्बं सङ्घो दक्खिणं पटिग्गण्हातीतिकथावण्णना

७९१-७९२. इदानि ¶ न वत्तब्बं सङ्घो दक्खिणं पटिग्गण्हातीतिकथा नाम होति. तत्थ ‘‘परमत्थतो मग्गफलानेव सङ्घो, मग्गफलेहि अञ्ञो ¶ सङ्घो नाम नत्थि, मग्गफलानि च न किञ्चि पटिग्गण्हन्ति, तस्मा न वत्तब्बं सङ्घो दक्खिणं पटिग्गण्हाती’’ति येसं लद्धि, सेय्यथापि एतरहि महापुञ्ञवादीसङ्खातानं वेतुल्लकानं; ते सन्धाय न वत्तब्बन्ति पुच्छा सकवादिस्स, पटिञ्ञा इतरस्स. अथ नं ‘‘यदि सङ्घो न पटिग्गण्हेय्य, न नं सत्था आहुनेय्यातिआदीहि थोमेय्या’’ति चोदेतुं ननु सङ्घो आहुनेय्योतिआदिमाह. सङ्घस्स दानं देन्तीति ‘‘ये ते सङ्घस्स देन्ति, ते पटिग्गाहकेसु असति कस्स ददेय्यु’’न्ति चोदनत्थं वुत्तं. आहुतिं जातवेदो वाति सुत्तं परसमयतो आगतं. तत्थ महामेघन्ति मेघवुट्ठिं सन्धाय वुत्तं. वुट्ठिञ्हि मेदनी पटिग्गण्हाति, न मेघमेव. मग्गो पटिग्गण्हातीति ‘‘मग्गफलानि सङ्घो’’ति लद्धिया ¶ वदति, न च मग्गफलानेव सङ्घो. मग्गफलपातुभावपरिसुद्धे पन खन्धे उपादाय पञ्ञत्ता अट्ठ पुग्गला सङ्घो, तस्मा असाधकमेतन्ति.

न वत्तब्बं सङ्घो दक्खिणं पटिग्गण्हातीतिकथावण्णना.

७. न वत्तब्बं सङ्घो दक्खिणं विसोधेतीतिकथावण्णना

७९३-७९४. इदानि न वत्तब्बं सङ्घो दक्खिणं विसोधेतीतिकथा नाम होति. तत्थ ‘‘मग्गफलानेव सङ्घो नाम, न च तानि दक्खिणं विसोधेतुं सक्कोन्ति, तस्मा न वत्तब्बं सङ्घो दक्खिणं विसोधेती’’ति येसं लद्धि, सेय्यथापि तेसञ्ञेव; ते सन्धाय पुच्छा सकवादिस्स, पटिञ्ञा इतरस्स. आहुनेय्योतिआदि ‘‘यदि सङ्घो दक्खिणं विसोधेतुं न सक्कुणेय्य, न नं सत्था एवं थोमेय्या’’ति दस्सनत्थं वुत्तं. विसोधेतीति महप्फलं करोति. सङ्घस्मिञ्हि अप्पं दिन्नं बहु होति, बहु दिन्नं बहुतरं. दक्खिणेय्याति दक्खिणारहा दक्खिणाय अनुच्छविका, दक्खिणं विसोधेतुं समत्थाति अत्थो. दक्खिणं आराधेन्तीति सम्पादेन्ति, अप्पमत्तिकायपि दक्खिणाय महन्तं फलं पापुणन्तीति अत्थो. सेसं हेट्ठा वुत्तनयमेवाति.

न वत्तब्बं सङ्घो दक्खिणं विसोधेतीतिकथावण्णना.

८. न वत्तब्बं सङ्घो भुञ्जतीतिकथावण्णना

७९५-७९६. इदानि ¶ ¶ न वत्तब्बं सङ्घो भुञ्जतीतिकथा नाम होति. तत्रापि ‘‘मग्गफलानेव सङ्घो नाम, न च तानि किञ्चि भुञ्जन्ति, तस्मा न वत्तब्बं सङ्घो भुञ्जति, पिवति, खादति, सायती’’ति ¶ येसं लद्धि, सेय्यथापि तेसंयेव; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि सङ्घो न भुञ्जेय्य, सङ्घभत्तादिकरणं निरत्थकं भवेय्या’’ति चोदेतुं ननु अत्थि केचि सङ्घभत्तानि करोन्तीतिआदिमाह. गणभोजनन्तिआदि ‘‘यदि सङ्घो न भुञ्जेय्य, कस्स गणभोजनादीनि सियु’’न्ति चोदनत्थं वुत्तं. अट्ठ पानानीति इदम्पि ‘‘यदि सङ्घो न पिवेय्य, कस्सेतानि पानानि सत्था अनुजानेय्या’’ति चोदनत्थं वुत्तं. सेसमिधापि हेट्ठा वुत्तनयेनेव वेदितब्बन्ति.

न वत्तब्बं सङ्घो भुञ्जतीतिकथावण्णना.

९. न वत्तब्बं सङ्घस्स दिन्नं महप्फलन्तिकथावण्णना

७९७-७९८. इदानि न वत्तब्बं सङ्घस्स दिन्नं महप्फलन्तिकथा नाम होति. तत्रापि ‘‘मग्गफलानेव सङ्घो नाम, न च सक्का तेसं किञ्चि दातुं, न च तेहि पटिग्गण्हितुं, नापि तेसं दानेन कोचि उपकारो इज्झति, तस्मा न वत्तब्बं सङ्घस्स दिन्नं महप्फल’’न्ति येसं लद्धि, सेय्यथापि तेसंयेव; ते सन्धाय पुच्छा सकवादिस्स, पटिञ्ञा इतरस्स. आहुनेय्योतिआदि ‘‘यदि सङ्घस्स दिन्नं महप्फलं न भवेय्य, न नं सत्था एवं थोमेय्या’’ति दस्सनत्थं वुत्तं. सेसं यथापाळिमेव निय्यातीति.

न वत्तब्बं सङ्घस्स दिन्नं महप्फलन्तिकथावण्णना.

१०. न वत्तब्बं बुद्धस्स दिन्नं महप्फलन्तिकथावण्णना

७९९. इदानि ¶ न वत्तब्बं बुद्धस्स दिन्नं महप्फलन्तिकथा नाम होति. तत्थ ‘‘बुद्धो भगवा न किञ्चि परिभुञ्जति, लोकानुवत्तनत्थं पन परिभुञ्जमानं विय ¶ अत्तानं दस्सेति, तस्मा निरुपकारत्ता न वत्तब्बं तस्मिं दिन्नं महप्फल’’न्ति येसं ¶ लद्धि, सेय्यथापि तेसंयेव; ते सन्धाय पुच्छा सकवादिस्स, पटिञ्ञा इतरस्स. द्विपदानं अग्गोतिआदि ‘‘मनुस्सदुस्सीलेपि दानं सहस्सगुणं होति, किमङ्गं पन एवरूपे अग्गपुग्गले’’ति दस्सनत्थं वुत्तं. सेसमेत्थ यथापाळिमेव निय्यातीति.

न वत्तब्बं बुद्धस्स दिन्नं महप्फलन्तिकथावण्णना.

११. दक्खिणाविसुद्धिकथावण्णना

८००-८०१. इदानि दक्खिणाविसुद्धिकथा नाम होति. तत्थ ‘‘यदि पटिग्गाहकतो दक्खिणा विसुज्झेय्य, महप्फला भवेय्य. दायकेन दानं दिन्नं, पटिग्गाहकेन विपाको निब्बत्तितोति अञ्ञो अञ्ञस्स कारको भवेय्य, परंकतं सुखदुक्खं आपज्जेय्य, अञ्ञो करेय्य, अञ्ञो पटिसंवेदेय्य. तस्मा दायकतोव दानं विसुज्झति, नो पटिग्गाहकतो, दायकस्सेव चित्तविसुद्धि विपाकदायिका होती’’ति येसं लद्धि, सेय्यथापि उत्तरापथकानं; ते सन्धाय पुच्छा सकवादिस्स, पटिञ्ञा इतरस्स. आहुनेय्यातिआदि ‘‘यदि पटिग्गाहकतो दानं न विसुज्झेय्य, किमस्स आहुनेय्यादिभावो करेय्या’’ति दस्सनत्थं वुत्तं. अञ्ञो अञ्ञस्स कारकोति यदि दायकस्स दानचेतना पटिग्गाहकेन कता भवेय्य, युत्तरूपं सिया. तस्स पन दानचेतना परिसुद्धा पटिग्गाहकसङ्खातं वत्थुं पटिच्च महाविपाकट्ठेन विसुज्झति, तस्मा अचोदना एसा ‘‘पटिग्गाहकतो दानं विसुज्झती’’ति.

दक्खिणाविसुद्धिकथावण्णना.

सत्तरसमो वग्गो.

१८. अट्ठारसमवग्गो

१. मनुस्सलोककथावण्णना

८०२-८०३. इदानि ¶ ¶ मनुस्सलोककथा नाम होति. तत्थ ‘‘तथागतो लोके, जातो लोके संवड्ढो, लोकं अभिभुय्य विहरति ¶ अनुपलित्तो लोकेना’’ति (सं. नि. ३.९४) सुत्तं अयोनिसो गहेत्वा ‘‘भगवा तुसितभवने निब्बत्तो तत्थेव वसति, न मनुस्सलोकं आगच्छति, निम्मितरूपमत्तकं पनेत्थ दस्सेती’’ति येसं लद्धि, सेय्यथापि एतरहि वेतुल्लकानंयेव, ते सन्धाय पुच्छा सकवादिस्स, पटिञ्ञा इतरस्स. अथ नं पुट्ठोकासेन चेव सुत्तसाधनेन च सञ्ञापेतुं ननु अत्थीतिआदिमाह. लोके जातोति परवादी तुसितपुरं सन्धाय वदति. सत्थारा पनेतं मनुस्सलोकञ्ञेव सन्धाय लोकं वुत्तं. लोकं अभिभुय्याति परवादी मनुस्सलोकं अभिभवित्वाति दिट्ठिया वदति, सत्था पन आरम्मणलोकं अभिभवित्वा विहासि. अनुपलित्तो लोकेनाति परवादी मनुस्सलोकेन अनुपलित्ततंव सन्धाय वदति, सत्था पन लोकधम्मेसु किलेसेहि अनुपलित्तो विहासि. तस्मा असाधकमेतन्ति.

मनुस्सलोककथावण्णना.

२. धम्मदेसनाकथावण्णना

८०४-८०६. इदानि धम्मदेसनाकथा नाम होति. तत्थ ‘‘तुसितपुरे ठितो भगवा धम्मदेसनत्थाय अभिनिम्मितं पेसेसि, तेन चेव तस्स च देसनं सम्पटिच्छित्वा आयस्मता आनन्देन धम्मो ¶ देसितो, न बुद्धेन भगवता’’ति येसं लद्धि, सेय्यथापि वेतुल्लकानञ्ञेव; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि तेन धम्मो देसितो, स्वेव सत्था भवेय्या’’ति चोदेतुं अभिनिम्मितो जिनोतिआदिमाह. इतरो तथा असम्पटिच्छन्तो पटिक्खिपति. सेसमेत्थ उत्तानत्थमेवाति.

धम्मदेसनाकथावण्णना.

३. करुणाकथावण्णना

८०७-८०८. इदानि ¶ करुणाकथा नाम होति. तत्थ पियायितानं वत्थूनं विपत्तिया सरागानं रागवसेन करुणापतिरूपिकं पवत्तिं दिस्वा ‘‘रागोव ¶ करुणा नाम, सो च भगवतो नत्थि, तस्मा नत्थि बुद्धस्स भगवतो करुणा’’ति येसं लद्धि, सेय्यथापि उत्तरापथकानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘करुणा नामेसा निक्किलेसताय चेव सत्तारम्मणताय च चेतोविमुत्तिताय च एकादसानिसंसताय च मेत्तादीहि समानजातिका, तस्मा यदि भगवतो करुणा नत्थि, मेत्तादयोपिस्स न सियु’’न्ति चोदनत्थं नत्थि बुद्धस्स भगवतो मेत्तातिआदिमाह. आकारुणिकोति पञ्हे तथारूपं वोहारं अपस्सन्तो पटिक्खिपति. सेसमेत्थ उत्तानत्थमेवाति.

करुणाकथावण्णना.

४. गन्धजातकथावण्णना

८०९. इदानि गन्धजातकथा नाम होति. तत्थ येसं बुद्धे भगवति अयोनिसो पेमवसेन ‘‘भगवतो उच्चारपस्सावो अञ्ञे गन्धजाते अतिविय अधिगण्हाति, नत्थि ततो च सुगन्धतरं गन्धजात’’न्ति लद्धि, सेय्यथापि एकच्चानं अन्धकानञ्चेव ¶ उत्तरापथकानञ्च; ते सन्धाय पुच्छा सकवादिस्स, पटिञ्ञा इतरस्स. सेसमेत्थ यथापाळिमेव निय्यातीति.

गन्धजातकथावण्णना.

५. एकमग्गकथावण्णना

८१०-८११. इदानि एकमग्गकथा नाम होति. तत्थ येसं बुद्धे भगवति अयोनिसो पेमवसेनेव ¶ ‘‘भगवा सोतापन्नो हुत्वा सकदागामी, सकदागामी हुत्वा अनागामी, अनागामी हुत्वा अरहत्तं सच्छाकासि, एकेनेव पन अरियमग्गेन चत्तारि फलानि सच्छाकासी’’ति लद्धि, सेय्यथापि तेसञ्ञेव; ते सन्धाय पुच्छा सकवादिस्स, पटिञ्ञा इतरस्स. अथ नं चतूहि फलेहि सद्धिं उप्पन्नानं चतुन्नं फस्सादीनं एकतो ¶ समोधानवसेन चोदेतुं चतुन्नं फस्सानन्तिआदिमाह. सोतापत्तिमग्गेनातिआदि ‘‘कतरमग्गेन सच्छिकरोती’’ति पुच्छनत्थं वुत्तं. अरहत्तमग्गेनाति च वुत्ते तेन सक्कायदिट्ठिआदीनं पहानाभाववसेन चोदेति. भगवा सोतापन्नोति बुद्धभूतस्स सोतापन्नभावो नत्थीति पटिक्खिपति. परतो पञ्हद्वयेपि एसेव नयो. सेसमेत्थ यथापाळिमेव निय्यातीति.

एकमग्गकथावण्णना.

६. झानसङ्कन्तिकथावण्णना

८१३-८१६. इदानि झानसङ्कन्तिकथा नाम होति. तत्थ येसं ‘‘इध, भिक्खवे, भिक्खु विविच्चेव कामेहि पठमं झानं उपसम्पज्ज विहरति, वितक्कविचारानं वूपसमा दुतियं झानं, ततियं झानं, चतुत्थं झानं उपसम्पज्ज विहरती’’ति (सं. नि. ५.९२३-९३४) इमं पटिपाटिदेसनं ¶ निस्साय ‘‘तस्स तस्स झानस्स उपचारप्पवत्तिं विनाव झाना झानं सङ्कमती’’ति लद्धि, सेय्यथापि महिसासकानञ्चेव एकच्चानञ्च अन्धकानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि ते दुतियज्झानूपचारं अप्पत्वा उप्पटिपाटिया पठमज्झाना दुतियज्झानमेव सङ्कमति, पठमतो ततियं, दुतियतो चतुत्थम्पि सङ्कमेय्या’’ति चोदेतुं पठमा झानातिआदिमाह. या पठमस्सातिआदि ‘‘यदि पठमतो अनन्तरं दुतियं, दुतियादीहि वा ततियादीनि समापज्जति, एकावज्जनेन समापज्जेय्या’’ति चोदनत्थं वुत्तं. कामे आदीनवतोति पठमं कामे आदीनवतो मनसि करोतो पच्छा उप्पज्जति. झानक्खणे पनेस निमित्तमेव मनसि करोति. तञ्ञेव पठमन्ति ‘‘यदि पुरिमजवनतो पच्छिमजवनं विय अनन्तरं उप्पज्जेय्य, ठपेत्वा पुरिमपच्छिमभावं लक्खणतो तञ्ञेव तं भवेय्या’’ति चोदेतुं पुच्छति. इमिना उपायेन ¶ सब्बत्थ अत्थो वेदितब्बो. विविच्चेव कामेहीतिआदीहि पटिपाटिया झानानं देसितभावं दीपेति, न अनन्तरुप्पत्तिं, तस्मा असाधकन्ति.

झानसङ्कन्तिकथावण्णना.

७. झानन्तरिककथावण्णना

८१७-८१८. इदानि ¶ झानन्तरिककथा नाम होति. तत्थ येसं समये ‘‘पञ्चकनये पञ्च झानानि विभत्तानि, केवलं तयो समाधी उद्दिट्ठा’’ति अवितक्कविचारमत्तस्स समाधिनो ओकासं अजानन्तानं ‘‘पठमस्स च दुतियस्स च झानस्स अन्तरे झानन्तरिका नाम एसा’’ति लद्धि, सेय्यथापि सम्मितियानञ्चेव एकच्चानञ्च अन्धकानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘झानम्पि चेतसिका धम्मा, फस्सादयोपि, तस्मा यदि झानन्तरिका नाम भवेय्य, फस्सन्तरिकादीहिपि भवितब्ब’’न्ति चोदनत्थं अत्थि फस्सन्तरिकातिआदिमाह ¶ .

दुतियस्स च झानस्साति ‘‘यदि झानन्तरिका नाम भवेय्य, दुतियततियादीनिपि झानानेव, तेसम्पि अन्तरिकाय भवितब्ब’’न्ति चोदनत्थं वुत्तं. सो केवलं लद्धिया अभावेन पटिक्खिपति चेव पटिजानाति च. पठमस्स चाति पुट्ठो लद्धिवसेन पटिजानाति.

८१९. सवितक्को सविचारोतिआदि ‘‘तिण्णम्पि समाधीनं समाधिभावे समाने अवितक्को विचारमत्तोव समाधि झानन्तरिको, न इतरोति को एत्थ विसेसहेतू’’ति चोदनत्थं वुत्तं.

८२०-८२२. द्विन्नं झानानं पटुप्पन्नानन्ति पठमदुतियानि सन्धाय पुच्छति. इतरो ‘‘तेसं पच्चुप्पन्नानंयेव अन्तरे अवितक्को विचारमत्तो समाधि झानन्तरिको नाम होती’’ति लद्धिया पटिजानाति. पठमं झानं निरुद्धन्ति पुट्ठो तिण्णं एकक्खणे पवत्ति न युत्ताति पटिजानाति ¶ . अवितक्को विचारमत्तो समाधि पठमं झानन्ति चतुक्कनयवसेन पुच्छति. सकवादी तस्मिं नये तस्स अभावा पटिक्खिपति. ननु तयो समाधीति एत्थायमधिप्पायो – यथा तेसु तीसु समाधीसु द्वे समाधी झानानेव, न झानन्तरिका, एवं इतरेनपि झानेनेव भवितब्बं, न झानन्तरिकायाति.

झानन्तरिककथावण्णना.

८. समापन्नो सद्दं सुणातीतिकथावण्णना

८२३-८२५. इदानि ¶ समापन्नो सद्दं सुणातीतिकथा नाम होति. तत्थ ‘‘यस्मा पठमस्स झानस्स सद्दो कण्डको वुत्तो भगवता, यदि च समापन्नो तं न सुणेय्य, कथं कण्डको सिया. तस्मा समापन्नो सद्दं, सुणाती’’ति येसं लद्धि, सेय्यथापि पुब्बसेलियानं; ते सन्धाय पुच्छा सकवादिस्स, पटिञ्ञा इतरस्स. चक्खुना रूपं पस्सतीतिआदि ‘‘समापन्नस्स ताव पञ्चद्वारप्पवत्तं नत्थि, तस्मिं असति ¶ यदि सो सद्दं सुणेय्य, रूपम्पि पस्सेय्या’’ति चोदनत्थं वुत्तं. सद्दो कण्डकोति विक्खेपकरत्ता वुत्तं. ओळारिकेन हि सद्देन सोते घट्टिते पठमज्झानतो वुट्ठानं होति, तेनेतं वुत्तं, तस्मा असाधकं. दुतियस्स झानस्सातिआदि ‘‘यथा अञ्ञोपि कण्डको अन्तोसमापत्तियं नत्थि, एवं सद्दस्सवनम्पी’’ति बोधनत्थं वुत्तं, तं सब्बं उत्तानत्थमेवाति.

समापन्नो सद्दं सुणातीतिकथावण्णना.

९. चक्खुनारूपंपस्सतीतिकथावण्णना

८२६-८२७. इदानि चक्खुना रूपं पस्सतीतिकथा नाम होति. तत्थ ‘‘चक्खुना रूपं दिस्वा’’ति वचनं निस्साय ‘‘पसादचक्खुमेव रूपं पस्सती’’ति येसं लद्धि, सेय्यथापि महासङ्घिकानं ¶ , ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि चक्खुना रूपं पस्सेय्य, रूपेन रूपं पस्सेय्याती’’ति चोदेतुं रूपेन रूपं पस्सतीति आह. इतरो रूपायतनं सन्धाय पटिक्खिपित्वा पुन पुट्ठो चक्खुमेव सन्धाय पटिजानाति. पटिविजानातीति एत्थ अयमधिप्पायो – पस्सतीति हि मयं पटिजाननं सन्धाय पुच्छाम, न चक्खूपसंहारमत्तं. तस्मा वदेहि ताव ‘‘किं ते चक्खुमा रूपेन रूपं पटिविजानाती’’ति. इतरो पुरिमनयेनेव पटिक्खिपति चेव पटिजानाति च. अथ नं ‘‘एवं सन्ते रूपं मनोविञ्ञाणं आपज्जति, तञ्हि पटिविजानाति नामा’’ति चोदेतुं रूपं मनोविञ्ञाणन्ति आह. इतरो लेसं अलभन्तो पटिक्खिपतेव. अत्थि चक्खुस्स आवट्टनातिआदि ‘‘यदि चक्खु पटिविजाननट्ठेन पस्सति, चक्खुविञ्ञाणस्स विय तस्सापि आवज्जनाय ¶ भवितब्ब’’न्ति चोदेतुं पुच्छति. इतरो यस्मा न आवज्जनपटिबद्धं चक्खु, न तं आवज्जनानन्तरं उप्पज्जति, तस्मा न हेवन्ति पटिक्खिपति. सोतेन सद्दन्तिआदीसुपि ¶ एसेव नयो. इध, भिक्खवे, भिक्खु चक्खुना रूपं पस्सतीति ससम्भारकथानयेन वुत्तं. यथा हि उसुना विज्झन्तोपि ‘‘धनुना विज्झती’’ति वुच्चति, एवं चक्खुविञ्ञाणेन पस्सन्तोपि ‘‘चक्खुना पस्सती’’ति वुत्तो, तस्मा असाधकमेतं. सेसेसुपि एसेव नयोपि.

चक्खुना रूपं पस्सतीतिकथावण्णना.

अट्ठारसमो वग्गो.

१९. एकूनवीसतिमवग्गो

१. किलेसपजहनकथावण्णना

८२८-८३१. इदानि ¶ किलेसपजहनकथा नाम होति. तत्थ ‘‘यस्मा किलेसपहानं नाम अत्थि, पहीनकिलेसस्स च अतीतापि किलेसा पहीनाव होन्ति, अनागतापि, पच्चुप्पन्नापि, तस्मा अतीतेपि किलेसे पजहति, अनागतेपि, पच्चुप्पन्नेपी’’ति येसं लद्धि, सेय्यथापि एकच्चानं उत्तरापथकानं; ते सन्धाय अतीतेतिआदिपुच्छा सकवादिस्स, पटिञ्ञा इतरस्स ¶ . सेसं यथापाळिमेव निय्याति. नत्थि किलेसे जहतीति इमस्मिं पन परवादिस्स पञ्हे यस्मा कचवरं पजहन्तस्स कचवरे छड्डनवायामो विय किलेसे पजहन्तस्स न अतीतादिभेदेसु किलेसेसु वायामो अत्थि, निब्बानारम्मणे पन अरियमग्गे पवत्तिते किलेसा अनुप्पन्नायेव नुप्पज्जन्तीति पहीना नाम होन्ति, तस्मा न हेवन्ति पटिक्खिपति. तेन हि अतीते किलेसे पजहतीतिआदि पन यस्मा ‘‘नत्थि किलेसपजहना’’ति न वत्तब्बं, तस्मा अतीतादिभेदे पजहतीति छलेन वुत्तं.

किलेसपजहनकथावण्णना.

२. सुञ्ञतकथावण्णना

८३२. इदानि ¶ सुञ्ञतकथा नाम होति. तत्थ सुञ्ञताति द्वे सुञ्ञता खन्धानञ्च अनत्तलक्खणं निब्बानञ्च. तेसु अनत्तलक्खणं ¶ ताव एकच्चं एकेन परियायेन सिया सङ्खारक्खन्धपरियापन्नं, निब्बानं, अपरियापन्नमेव. इमं पन विभागं अग्गहेत्वा ‘‘सुञ्ञता सङ्खारक्खन्धपरियापन्ना’’ति येसं लद्धि, सेय्यथापि अन्धकानं, ते सन्धाय पुच्छा सकवादिस्स, पटिञ्ञा इतरस्स. अनिमित्तन्ति सब्बनिमित्तरहितं निब्बानं. ‘‘अप्पणिहितो’’तिपि तस्सेव नामं. कस्मा पनेतं आभतन्ति? अविभज्जवादीवादे दोसारोपनत्थं. यस्स हि अविभजित्वा ‘‘एकदेसेनेव सुञ्ञता सङ्खारक्खन्धपरियापन्ना’’ति लद्धि, तस्स निब्बानम्पि सङ्खारक्खन्धपरियापन्नन्ति आपज्जति. इमस्स दोसस्सारोपनत्थं ‘‘अनिमित्तं अप्पणिहित’’न्ति आभतं. इतरो तस्स परियापन्नभावं अनिच्छन्तो पटिक्खिपति. सङ्खारक्खन्धो न अनिच्चोतिआदि निब्बानसङ्खाताय सुञ्ञताय अनिच्चभावापत्तिदोसदस्सनत्थं वुत्तं.

८३३. सङ्खारक्खन्धस्स सुञ्ञताति ‘‘यदि अञ्ञस्स खन्धस्स सुञ्ञता अञ्ञक्खन्धपरियापन्ना, सङ्खारक्खन्धसुञ्ञतायपि सेसक्खन्धपरियापन्नाय भवितब्ब’’न्ति चोदनत्थं वुत्तं. सङ्खारक्खन्धस्स सुञ्ञता न वत्तब्बातिआदि ‘‘यदि सङ्खारक्खन्धसुञ्ञता सेसक्खन्धपरियापन्ना ¶ न होति, सेसक्खन्धसुञ्ञतापि सङ्खारक्खन्धपरियापन्ना न होती’’ति पटिलोमदस्सनत्थं वुत्तं.

८३४. सुञ्ञमिदं, भिक्खवे, सङ्खाराति सुत्तं परसमयतो आभतं. तत्थ सङ्खाराति ‘‘सब्बे सङ्खारा अनिच्चा’’ति आगतट्ठाने विय पञ्चक्खन्धा, ते च अत्तत्तनियसुञ्ञत्ता सुञ्ञताति सासनावचरं होति, न विरुज्झति, तस्मा अनुञ्ञातं. यस्मा पनेतं न सुञ्ञताय सङ्खारक्खन्धपरियापन्नभावं दीपेति, तस्मा असाधकन्ति.

सुञ्ञतकथावण्णना.

३. सामञ्ञफलकथावण्णना

८३५-८३६. इदानि सामञ्ञफलकथा नाम होति. तत्थ मग्गवीथियम्पि फलसमापत्तिवीथियम्पि अरियमग्गस्स विपाकचित्तं ¶ सामञ्ञफलं नामाति ¶ सकसमये सन्निट्ठानं. येसं पन तथा अग्गहेत्वा ‘‘किलेसपहानञ्चेव फलुप्पत्ति च सामञ्ञफलं, तस्मा असङ्खत’’न्ति लद्धि, सेय्यथापि पुब्बसेलियानं; ते सन्धाय पुच्छा सकवादिस्स, पटिञ्ञा इतरस्स. सेसमेत्थ हेट्ठा वुत्तनयत्ता यथा पाळिमेव निय्यातीति.

सामञ्ञफलकथावण्णना.

४. पत्तिकथावण्णना

८३७-८४०. इदानि पत्तिकथा नाम होति. तत्थ ‘‘यं यं पटिलब्भति, तस्स तस्स पटिलाभो पत्ति नाम. सा च असङ्खता’’ति येसं लद्धि, सेय्यथापि पुब्बसेलियानञ्ञेव; ते सन्धाय पुच्छा सकवादिस्स, पटिञ्ञा इतरस्स. सेसमिधापि हेट्ठा वुत्तनयत्ता यथापाळिमेव निय्यातीति ¶ . न वत्तब्बन्तिआदि याय लद्धिया पत्ति असङ्खताति मञ्ञति, तं पकासेतुं वुत्तं. तत्थ सकवादी ‘‘न हेवं वत्तब्बे’’ति पटिक्खिपन्तो केवलं पत्तिया रूपादिभावं न सम्पटिच्छति. न हि पत्ति नाम कोचि धम्मो अत्थि, न पन असङ्खतभावं अनुजानाति. इतरो पन पटिक्खेपमत्तेनेव असङ्खताति लद्धिं पतिट्ठपेति, सा अयोनिसो पतिट्ठापितत्ता अप्पतिट्ठितायेवाति.

पत्तिकथावण्णना.

५. तथताकथावण्णना

८४१-८४३. इदानि तथताकथा नाम होति. तत्थ येसं ‘‘रूपादीनं सब्बधम्मानं रूपादिसभावतासङ्खाता तथता नाम अत्थि, सा च सङ्खतेसु रूपादीसु अपरियापन्नत्ता असङ्खता’’ति लद्धि, सेय्यथापि एकच्चानं उत्तरापथकानं, ते सन्धाय पुच्छा सकवादिस्स ¶ , पटिञ्ञा इतरस्स. सेसमिधापि हेट्ठा वुत्तनयत्ता पाकटमेवाति.

तथताकथावण्णना.

६. कुसलकथावण्णना

८४४-८४६. इदानि ¶ कुसलकथा नाम होति. तत्थ अनवज्जम्पि कुसलं इट्ठपाकम्पि. अनवज्जं नाम किलेसविप्पयुत्तं. अयं नयो ठपेत्वा अकुसलं सब्बधम्मे भजति. इट्ठविपाकं नाम आयतिं उपपत्तिपवत्तेसु इट्ठफलनिप्फादकं पुञ्ञं. अयं नयो कुसलत्तिके आदिपदमेव भजति. येसं पन इमं विभागं अग्गहेत्वा अनवज्जभावमत्तेनेव निब्बानं कुसलन्ति लद्धि, सेय्यथापि अन्धकानं, तेसं इट्ठविपाकट्ठेन निब्बानस्स कुसलताभावं दीपेतुं ¶ पुच्छा सकवादिस्स, अत्तनो लद्धिवसेन पटिञ्ञा इतरस्स. सेसमिधापि हेट्ठा वुत्तनयत्ता उत्तानत्थमेवाति.

कुसलकथावण्णना.

७. अच्चन्तनियामकथावण्णना

८४७. इदानि अच्चन्तनियामकथा नाम होति. तत्थ येसं ‘‘सकिं निमुग्गो निमुग्गोव होती’’ति (अ. नि. ७.१५) सुत्तं निस्साय ‘‘अत्थि पुथुज्जनस्स अच्चन्तनियामता’’ति लद्धि, सेय्यथापि एकच्चानं उत्तरापथकानं, ते सन्धाय पुच्छा सकवादिस्स, पटिञ्ञा इतरस्स. मातुघातकोतिआदि ‘‘नियतमिच्छादिट्ठिकस्स च मातुघातकादीनञ्च समाने मिच्छत्तनियामे मातुघातकादीहिपि ते अच्चन्तनियतेहि भवितब्ब’’न्ति चोदनत्थं वुत्तं. इतरो ‘‘नियतमिच्छादिट्ठिको संसारखाणुको भवन्तरेपि नियतोव इमे पन एकस्मिञ्ञेव अत्तभावे’’ति लद्धिया न हेवन्ति पटिक्खिपति ¶ .

८४८. विचिकिच्छा उप्पज्जेय्याति ‘‘अयं नियतो वा नो वा’’ति एवं उप्पज्जेय्याति पुच्छति. इतरो अनुप्पत्तिकारणं अपस्सन्तो पटिजानाति. नुप्पज्जेय्याति पुट्ठो पन यं दिट्ठिं आसेवन्तो नियामं ओक्कन्तो, तत्थ अनुप्पत्तिं सन्धाय पटिजानाति. ततो पहीनाति पुट्ठो मग्गेन अप्पहीनत्ता पटिक्खिपति, तं दिट्ठिं आरब्भ असमुदाचारतो पटिजानाति. अथ नं यस्मा पहानं नाम विना अरियमग्गेन नत्थि, तस्मा तस्स वसेन चोदेतुं सोतापत्तिमग्गेनातिआदिमाह. सो एकमग्गेनापि अप्पहीनत्ता ¶ पटिक्खिपति. पुन कतमेनाति पुट्ठो मिच्छामग्गं सन्धाय अकुसलेनातिआदिमाह.

८४९. उच्छेददिट्ठि उप्पज्जेय्याति दुतियनियामुप्पत्तिं पुच्छति. इतरो यस्मा ‘‘येपि ते ओक्कला वयभिञ्ञा नत्थिकवादा अकिरियवादा अहेतुकवादा’’ति (म. नि. ३.१४३) वचनतो तिस्सोपि नियतमिच्छादिट्ठियो एकस्स उप्पज्जन्ति, तस्मा पटिजानाति.

८५०. अथ ¶ नं ‘‘न च नाम सो अच्चन्तनियामो’’ति चोदेतुं हञ्चीतिआदिमाह. अच्चन्तनियतस्स हि दुतियनियामो निरत्थको. नुप्पज्जेय्याति पञ्हे यं सस्सतदिट्ठिया सस्सतन्ति गहितं, तदेव उच्छिज्जिस्सतीति गहेत्वा अनुप्पत्तिं सन्धाय पटिजानाति. पहीनाति पुट्ठो मग्गेन अप्पहीनत्ता पटिक्खिपति, वुत्तनयेन अनुप्पज्जनतो पटिजानाति. सस्सतदिट्ठि उप्पज्जेय्यातिआदीसुपि एसेव नयो. सेसं विचिकिच्छावारे वुत्तनयमेव.

८५१-८५२. न वत्तब्बन्ति पुच्छा परवादिस्स, सुत्तस्स अत्थिताय पटिञ्ञा सकवादिस्स. न पन सो भवन्तरेपि निमुग्गोव. इमस्मिञ्ञेव हि भवे अभब्बो सो तं दिट्ठिं पजहितुन्ति अयमेत्थ अधिप्पायो, तस्मा असाधकमेतन्ति. सब्बकालं उम्मुज्जित्वा निमुज्जतीतिआदि वचनमत्ते अभिनिवेसं अकत्वा अत्थो परियेसितब्बोति दस्सनत्थं वुत्तन्ति.

अच्चन्तनियामकथावण्णना.

८. इन्द्रियकथावण्णना

८५३-८५६. इदानि इन्द्रियकथा नाम होति. तत्थ लोकिया सद्धा सद्धा ¶ एव नाम, न सद्धिन्द्रियं. तथा लोकियं वीरियं…पे… सति… समाधि… पञ्ञा पञ्ञायेव नाम, न पञ्ञिन्द्रियन्ति येसं लद्धि, सेय्यथापि हेतुवादानञ्चेव महिसासकानञ्च; ते सन्धाय पुच्छा सकवादिस्स, पटिञ्ञा इतरस्स ¶ . नत्थि लोकिया सद्धातिआदि यस्मा लोकियापि सद्धादयोव धम्मा अधिपतियट्ठेन इन्द्रियं, न सद्धादीहि अञ्ञं सद्धिन्द्रियादि नाम अत्थि, तस्मा लोकियानम्पि सद्धादीनञ्ञेव सद्धिन्द्रियादिभावदस्सनत्थं वुत्तं. अत्थि लोकियो मनोतिआदि यथा ते लोकियापि मनादयो धम्मा मनिन्द्रियादीनि, एवं लोकिया सद्धादयोपि सद्धिन्द्रियानीति उपमाय तस्सत्थस्स विभावनत्थं वुत्तं. सेसमेत्थ यथापाळिमेव निय्यातीति.

इन्द्रियकथावण्णना.

एकूनवीसतिमो वग्गो.

२०. वीसतिमवग्गो

१. असञ्चिच्चकथावण्णना

८५७-८६२. इदानि ¶ ¶ असञ्चिच्चकथा नाम होति. तत्थ ‘‘आनन्तरियवत्थूनि नाम गरूनि भारियानि, तस्मा असञ्चिच्चापि तेसु वत्थूसु विकोपितेसु आनन्तरिको होती’’ति येसं लद्धि, सेय्यथापि एकच्चानं उत्तरापथकानं; ते सन्धाय असञ्चिच्चाति पुच्छा सकवादिस्स, लद्धिवसेन पटिञ्ञा इतरस्स. अथ नं ‘‘यस्मा आनन्तरियकम्मं नाम कम्मपथप्पत्तं. यदि च असञ्चिच्च कम्मपथभेदो सिया, अवसेसा पाणातिपातादयोपि असञ्चिच्च भवेय्यु’’न्ति चोदनत्थं असञ्चिच्चपाणं हन्त्वातिआदिमाह. इतरो तथारूपाय लद्धिया अभावेन पटिक्खिपति. सेसं यथापाळिमेव निय्याति. न वत्तब्बं मातुघातकोति पुच्छा परवादिस्स, रोगपटिकारादिकाले असञ्चिच्च घातं सन्धाय पटिञ्ञा सकवादिस्स. ननु माता जीविता वोरोपिताति पञ्हेपि असञ्चिच्च वोरोपितं सन्धाय पटिञ्ञा सकवादिस्सेव. एवं अधिप्पायं पन अग्गहेत्वा हञ्चीति लद्धिपतिट्ठापनं इतरस्स. तं अयोनिसो पतिट्ठापितत्ता अप्पतिट्ठितमेव. पितुघातकादीसुपि एसेव नयो. सङ्घभेदके पन धम्मसञ्ञिं सन्धाय सङ्घभेदो आनन्तरिकोति पुच्छा सकवादिस्स, ‘‘सङ्घं समग्गं भेत्वान, कप्पं ¶ निरयम्हि पच्चती’’ति वचनं अयोनिसो गहेत्वा पटिञ्ञा परवादिस्स. पुन सब्बेति पुट्ठो सकपक्खे धम्मसञ्ञिं सन्धाय पटिक्खिपति, परपक्खे धम्मसञ्ञिं सन्धाय पटिजानाति. धम्मसञ्ञीति ¶ पञ्हद्वयेपि एसेव नयो. ननु वुत्तं भगवताति सुत्तं एकन्तेनेव धम्मवादिस्स आनन्तरिकभावदस्सनत्थं वुत्तं. आपायिको नेरयिकोति गाथायपि अधम्मवादीयेव अधिप्पेतो. इतरो पन अधिप्पायं अग्गहेत्वा लद्धिं पतिट्ठपेति. सा अयोनिसो पतिट्ठापितत्ता अप्पतिट्ठितायेवाति.

असञ्चिच्चकथावण्णना.

२. ञाणकथावण्णना

८६३-८६५. इदानि ¶ ञाणकथा नाम होति. तत्थ दुविधं ञाणं – लोकियञ्च लोकुत्तरञ्च. लोकियं समापत्तिञाणम्पि होति दानादिवसेन पवत्तं कम्मस्सकतञाणम्पि; लोकुत्तरं सच्चपरिच्छेदकं मग्गञाणम्पि फलञाणम्पि. इमं पन विभागं अकत्वा ‘‘सच्चपरिच्छेदकमेव ञाणं न इतरं, तस्मा नत्थि पुथुज्जनस्स ञाण’’न्ति येसं लद्धि, सेय्यथापि हेतुवादानं, ते सन्धाय पुच्छा सकवादिस्स, पटिञ्ञा इतरस्स. पञ्ञातिआदि ञाणवेवचनदस्सनत्थं वुत्तं. तेनेतं दीपेति – यदि तस्स ञाणं नत्थि, पञ्ञादयोपि नत्थि. अथ पञ्ञादयो अत्थि, ञाणम्पि अत्थि. कस्मा? पञ्ञादीनं ञाणतो अनञ्ञत्ताति. पठमं झानन्तिआदि समापत्तिञाणस्स दस्सनत्थं वुत्तं. दानं ददेय्यातिआदि कम्मस्सकतञाणस्स. दुक्खं परिजानातीति लोकुत्तरमग्गञाणमेव दीपेति, न च लोकुत्तरमेव ञाणन्ति.

ञाणकथावण्णना.

३. निरयपालकथावण्णना

८६६. इदानि ¶ निरयपालकथा नाम होति. तत्थ ‘‘निरये नेरयिककम्मानेव निरयपालरूपवसेन वधेन्ति, नत्थि निरयपाला नाम सत्ता’’ति ¶ येसं लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि तत्थ निरयपाला न सियुं, कम्मकारणापि न भवेय्युं. कारणिकेसु हि सति कारणा’’ति चोदेतुं नत्थि निरयेसूतिआदिमाह.

८६७-८६८. अत्थि मनुस्सेसूति पच्चक्खेन ञापनत्थं. यथा हि मनुस्सेसु सति कारणिकेसु कारणा, एवं तत्थापीति अयमेत्थ अधिप्पायो. अत्थि निरयेसूति पुच्छा परवादिस्स, पटिञ्ञा इतरस्स. न वेस्सभू नोपि च पेत्तिराजाति परवादिना सकसमयतो सुत्तं आभतं. तं पन सासनावचरिकन्ति सकवादिना अनुञ्ञातं. तत्थ वेस्सभूति एको देवो. पेत्तिराजाति पेत्तिविसये पेतमहिद्धिको. सोमादयो पाकटा एव. इदं वुत्तं होति – अत्तनो कम्मेहि इतो पणुन्नं ¶ परलोकं पत्तं पुरिसं न एते वेस्सभूआदयो हनन्ति. येहि पन सो कम्मेहि तत्थ पणुन्नो, तानि सकानि कम्मानियेव नं तत्थ हनन्तीति कम्मस्सकतं दीपेति, न निरयपालानं अभावं. सकवादिना पन तमेनं, भिक्खवेति आभतानि सुत्तपदानि नीतत्थानेवाति.

निरयपालकथावण्णना.

४. तिरच्छानकथावण्णना

८६९-८७१. इदानि तिरच्छानकथा नाम होति. तत्थ देवेसु एरावणादयो देवपुत्ता हत्थिवण्णं अस्सवण्णं विकुब्बन्ति, नत्थि तत्थ तिरच्छानगता. येसं पन तिरच्छानवण्णिनो देवपुत्ते दिस्वा ‘‘अत्थि देवेसु तिरच्छानगता’’ति लद्धि, सेय्यथापि अन्धकानं ¶ ; ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि देवयोनियं तिरच्छानगता सियुं, तिरच्छानयोनियम्पि देवा सियु’’न्ति चोदेतुं अत्थि तिरच्छानगतेसूतिआदिमाह. कीटातिआदि येसं सो अभावं इच्छति, ते दस्सेतुं वुत्तं. एरावणोति पञ्हे तस्स अत्थिताय पटिञ्ञा सकवादिस्स ¶ , न तिरच्छानगतस्स. हत्थिबन्धातिआदि ‘‘यदि तत्थ हत्थिआदयो सियुं, हत्थिबन्धादयोपि सियु’’न्ति चोदनत्थं वुत्तं. तत्थ यावसिकाति यवस्स दायका. कारणिकाति हत्थाचरियादयो, येहि ते नानाविधं कारणं करेय्युं. भत्तकारकाति हत्थिआदीनं भत्तरन्धका. न हेवन्ति तथा अनिच्छन्तो पटिक्खिपतीति.

तिरच्छानकथावण्णना.

५. मग्गकथावण्णना

८७२-८७५. इदानि मग्गकथा नाम होति. तत्थ येसं ‘‘पुब्बेव खो पनस्स कायकम्मं वचीकम्मं आजीवो सुपरिसुद्धो होती’’ति (अ. नि. ३.४३१) इदञ्चेव सुत्तं सम्मावाचाकम्मन्ताजीवानञ्च ¶ चित्तविप्पयुत्ततं निस्साय ‘‘निप्परियायेन पञ्चङ्गिकोव मग्गो’’ति लद्धि, सेय्यथापि महिसासकानं, ते सन्धाय पञ्चङ्गिकोति पुच्छा सकवादिस्स, पटिञ्ञा इतरस्स. सम्मावाचा मग्गङ्गं, सा च न मग्गोतिआदि परसमयवसेन वुत्तं. परसमयस्मिञ्हि सम्मावाचादयो मग्गङ्गन्ति आगता. रूपत्ता पन मग्गो न होतीति वण्णिता. सम्मादिट्ठि मग्गङ्गन्तिआदि मग्गङ्गस्स अमग्गता नाम नत्थीति दस्सनत्थं वुत्तं. पुब्बेव खो पनस्साति सुत्ते परिसुद्धसीलस्स मग्गभावना नाम होति, न इतरस्साति आगमनियपटिपदाय विसुद्धिभावदस्सनत्थं ‘‘कायकम्मं वचीकम्मं आजीवो सुपरिसुद्धो होती’’ति वुत्तं, न इमेहि विना पञ्चङ्गिकभावदस्सनत्थं. तेनेवाह ¶ ‘‘एवमस्सायं अरियो अट्ठङ्गिको मग्गो भावनापारिपूरिं गच्छती’’ति. सकवादिना आभतसुत्तं नीतत्थमेवाति.

मग्गकथावण्णना.

६. ञाणकथावण्णना

८७६-८७७. इदानि ञाणकथा नाम होति. तत्थ धम्मचक्कप्पवत्तने द्वादसाकारञाणं सन्धाय ‘‘द्वादसवत्थुकं ञाणं लोकुत्तर’’न्ति येसं लद्धि, सेय्यथापि ¶ पुब्बसेलियानं, ते सन्धाय पुच्छा सकवादिस्स, पटिञ्ञा इतरस्स. अथ नं ‘‘सचे तं द्वादसवत्थुकं, द्वादसहि मग्गञाणेहि भवितब्ब’’न्ति चोदेतुं द्वादसातिआदिमाह. इतरो मग्गस्स एकत्तं सन्धाय पटिक्खिपति, एकेकस्मिं सच्चे सच्चञाणकिच्चञाणकतञाणानं वसेन ञाणनानत्तं सन्धाय पटिजानाति. द्वादस सोतापत्तिमग्गातिआदीसुपि एसेव नयो. ननु वुत्तं भगवताति सुत्तं सद्धिं पुब्बभागपरभागेहि ञाणनानत्तं दीपेति, न अरियमग्गस्स द्वादस ञाणतं. तस्मा असाधकन्ति.

ञाणकथावण्णना.

वीसतिमो वग्गो.

चतुत्थपण्णासको समत्तो.

२१. एकवीसतिमवग्गो

१. सासनकथावण्णना

८७८. इदानि ¶ ¶ सासनकथा नाम होति. तत्थ तिस्सो सङ्गीतियो सन्धाय ‘‘सासनं नवं कत’’न्ति च ‘‘अत्थि कोचि तथागतस्स सासनं नवं करोती’’ति च ‘‘लब्भा तथागतस्स सासनं नवं कातु’’न्ति च येसं लद्धि, सेय्यथापि एकच्चानं उत्तरापथकानं; ते सन्धाय तीसुपि कथासु पुच्छा सकवादिस्स, पटिञ्ञा इतरस्स. सतिपट्ठानातिआदि सासनं नाम सतिपट्ठानादयो चेव अरियधम्मा, कुसलादीनञ्च देसना. तत्थ येसं भगवता देसिता सतिपट्ठानादयो, ठपेत्वा ते अञ्ञेसं वा सतिपट्ठानादीनं करणेन अकुसलादीनं वा कुसलादिभावकरणेन सासनं नवंकतं नाम भवेय्य, किं तं एवं कतं केनचि, अत्थि वा कोचि एवं करोति, लब्भा वा एवं कातुन्ति तीसुपि पुच्छासु चोदनत्थं वुत्तं. सेसं सब्बत्थ यथापाळिमेव निय्यातीति.

सासनकथावण्णना.

२. अविवित्तकथावण्णना

८७९-८८०. इदानि ¶ अविवित्तकथा नाम होति. तत्थ यस्स पुग्गलस्स यो धम्मो पच्चुप्पन्नो, सो तेन अविवित्तो नामाति इदं सकसमये सन्निट्ठानं. यस्मा पन पुथुज्जनेन तेधातुका धम्मा अपरिञ्ञाता, तस्मा सो एकक्खणेयेव सब्बेहिपि तेधातुकेहि धम्मेहि अविवित्तोति येसं लद्धि, सेय्यथापि तेसञ्ञेव, ते ¶ सन्धाय पुच्छा सकवादिस्स, पटिञ्ञा इतरस्स. फस्सेहीतिआदि सब्बेसं फस्सादीनं एकक्खणे पवत्तिदोसदस्सनत्थं वुत्तं. सेसं सब्बत्थ उत्तानत्थमेवाति.

अविवित्तकथावण्णना.

३. सञ्ञोजनकथावण्णना

८८१-८८२. इदानि ¶ सञ्ञोजनकथा नाम होति. तत्थ यस्मा अरहा सब्बं बुद्धविसयं न जानाति, तस्मा तस्स तत्थ अविज्जाविचिकिच्छाहि अप्पहीनाहि भवितब्बन्ति सञ्ञाय ‘‘अत्थि किञ्चि सञ्ञोजनं अप्पहाय अरहत्तप्पत्ती’’ति येसं लद्धि, सेय्यथापि महासङ्घिकानं, ते सन्धाय पुच्छा सकवादिस्स, पटिञ्ञा इतरस्स. अत्थि किञ्चि सक्कायदिट्ठीतिआदि अरहतो सब्बसंयोजनप्पहानदस्सनत्थं वुत्तं. सब्बं बुद्धविसयन्ति पञ्हद्वये अरहतो सब्बञ्ञुतञ्ञाणाभावेन पटिसेधो कतो, न अविज्जाविचिकिच्छानं अप्पहानेन. इतरो पन तेसं अप्पहीनतं सन्धाय तेन हीति लद्धिं पतिट्ठपेति. सा अयोनिसो पतिट्ठापितत्ता अप्पतिट्ठिताव होतीति.

सञ्ञोजनकथावण्णना.

४. इद्धिकथावण्णना

८८३-८८४. इदानि इद्धिकथा नाम होति. तत्थ इद्धि नामेसा कत्थचि इज्झति, कत्थचि न इज्झति, अनिच्चादीनं निच्चादिकरणे एकन्तेनेव न इज्झति. सभागसन्ततिं पन परिवत्तेत्वा विसभागसन्ततिकरणे वा सभागसन्ततिवसेनेव ¶ चिरतरप्पवत्तने वा येसं अत्थाय करियति, तेसं पुञ्ञादीनि कारणानि निस्साय कत्थचि इज्झति, भिक्खूनं अत्थाय पानीयस्स सप्पिखीरादिकरणे विय महाधातुनिधाने दीपादीनं चिरसन्तानप्पवत्तने विय चाति इदं सकसमये सन्निट्ठानं. यं ¶ पन आयस्मा पिलिन्दवच्छो रञ्ञो पासादं सुवण्णन्त्वेव अधिमुच्चि, तं निस्साय येसं ‘‘अत्थि अधिप्पायइद्धी’’ति लद्धि, सेय्यथापि अन्धकानं; ते सन्धाय अत्थि अधिप्पायइद्धीति पुच्छा सकवादिस्स. तत्थ अधिप्पायइद्धीति अधिप्पायइद्धि, यथाधिप्पायं इज्झनइद्धीति अत्थो. आमन्ताति लद्धिमत्ते ठत्वा पटिञ्ञा परवादिस्स. अथ नं अनिच्चादीनं निच्चादिताय अनुयुञ्जितुं निच्चपण्णा रुक्खा होन्तूतिआदिमाह. सेसमेत्थ उत्तानत्थमेव. लद्धिपतिट्ठापने सुवण्णो च पनासीति रञ्ञो पुञ्ञूपनिस्सयेन आसि, न केवलं थेरस्स अधिप्पायेनेव. तस्मा असाधकमेतन्ति.

इद्धिकथावण्णना.

५. बुद्धकथावण्णना

८८५. इदानि ¶ बुद्धकथा नाम होति. तत्थ ठपेत्वा तस्मिं तस्मिं काले सरीरवेमत्ततं आयुवेमत्ततं पभावेमत्ततञ्च सेसेहि बुद्धधम्मेहि बुद्धानं बुद्धेहि हीनातिरेकता नाम नत्थि. येसं पन अविसेसेनेव अत्थीति लद्धि, सेय्यथापि अन्धकानं; ते सन्धाय अत्थि बुद्धानन्ति पुच्छा सकवादिस्स, पटिञ्ञा इतरस्स. अथ नं बुद्धधम्मेहि अनुयुञ्जितुं सतिपट्ठानतोतिआदिमाह. इतरो तेसं वसेन हीनातिरेकतं अपस्सन्तो पटिक्खिपतियेवाति.

बुद्धकथावण्णना.

६. सब्बदिसाकथावण्णना

८८६. इदानि सब्बदिसाकथा नाम होति. तत्थ चतूसु दिसासु हेट्ठा ¶ उपरीति समन्ततो लोकधातुसन्निवासं, सब्बलोकधातूसु च ¶ बुद्धा अत्थीति अत्तनो विकप्पसिप्पं उप्पादेत्वा ‘‘सब्बदिसासु बुद्धा तिट्ठन्ती’’ति येसं लद्धि, सेय्यथापि महासङ्घिकानं; ते सन्धाय पुच्छा सकवादिस्स, पटिञ्ञा इतरस्स. पुरत्थिमायाति पुट्ठो सक्यमुनिं सन्धाय पटिक्खिपति. पुन पुट्ठो लद्धिवसेन अञ्ञलोकधातुयं ठितं सन्धाय पटिजानाति. किन्नामो सो भगवातिआदि ‘‘सचे त्वं जानासि, नामादिवसेन नं कथेही’’ति चोदनत्थं वुत्तं. इमिना उपायेन सब्बत्थ अत्थो वेदितब्बोति.

सब्बदिसाकथावण्णना.

७. धम्मकथावण्णना

८८७-८८८. इदानि धम्मकथा नाम होति. तत्थ यस्मा रूपादयो रूपादिसभावेन नियता ¶ न तं सभावं विजहन्ति, तस्मा सब्बधम्मा नियताति येसं लद्धि, सेय्यथापि अन्धकानञ्चेव एकच्चानञ्च उत्तरापथकानं; ते सन्धाय सब्बे धम्माति पुच्छा सकवादिस्स, पटिञ्ञा इतरस्स. अथ नं ‘‘सचे ते नियता, मिच्छत्तनियता वा सियुं सम्मत्तनियता वा, इतो अञ्ञो नियामो नाम नत्थी’’ति चोदेतुं मिच्छत्तनियतातिआदिमाह. तत्थ पटिक्खेपो च पटिञ्ञा च परवादिस्स. रूपं रूपट्ठेनातिआदि येनत्थेन नियताति वदति, तस्स वसेन चोदेतुं वुत्तं. तत्रायं अधिप्पायो – रूपञ्हि रूपट्ठेन नियतन्ति रूपं रूपमेव, न वेदनादिसभावन्ति अधिप्पायेन वत्तब्बं, इतो अञ्ञथा न वत्तब्बं. कस्मा? रूपट्ठतो अञ्ञस्स रूपस्स अभावा. रूपसभावो हि रूपट्ठो, रूपसभावो च रूपमेव, न रूपतो अञ्ञो. वेदनादीहि पनस्स नानत्तपञ्ञापनत्थं एस वोहारो होतीति. तस्मा ‘‘रूपं रूपट्ठेन नियत’’न्ति वदन्तेन रूपं नियतन्ति वुत्तं होति. नियतञ्च नाम मिच्छत्तनियतं ¶ वा सिया सम्मत्तनियतं वा, इतो अञ्ञो नियामो नाम नत्थीति. अथ कस्मा पटिजानातीति? अत्थन्तरवसेन. रूपं रूपट्ठेन नियतन्ति एत्थ हि रूपं रूपमेव, न वेदनादिसभावन्ति अयमत्थो. तस्मा पटिजानाति. इतो अञ्ञथा पनस्स नियतत्तं नत्थीति पुन तेनेव नयेन चोदेतुं मिच्छत्तनियतन्तिआदिमाह ¶ . तं सब्बं उत्तानत्थमेव. तेन हि रूपन्ति लद्धिपि अयोनिसो पतिट्ठापितत्ता अप्पतिट्ठिताव होतीति.

धम्मकथावण्णना.

८. कम्मकथावण्णना

८८९-८९१. इदानि कम्मकथा नाम होति. तत्थ ‘‘यस्मा दिट्ठधम्मवेदनीयादीनि दिट्ठधम्मवेदनीयट्ठादीहि नियतानि, तस्मा सब्बे कम्मा नियता’’ति येसं लद्धि, सेय्यथापि तेसञ्ञेव; ते सन्धाय पुच्छा सकवादिस्स, पटिञ्ञा इतरस्स. दिट्ठधम्मवेदनीयट्ठेन नियतन्ति एत्थ दिट्ठधम्मवेदनीयं दिट्ठधम्मवेदनीयट्ठमेव. सचे दिट्ठेव धम्मे विपाकं दातुं सक्कोति देति, नो चे अहोसिकम्मं नाम होतीति इममत्थं सन्धाय पटिञ्ञा सकवादिस्स. मिच्छत्तसम्मत्तनियामवसेन पनेतं अनियतमेवाति सब्बं हेट्ठा वुत्तनयेनेव वेदितब्बन्ति.

कम्मकथावण्णना.

एकवीसतिमो वग्गो.

२२. बावीसतिमवग्गो

१. परिनिब्बानकथावण्णना

८९२. इदानि ¶ ¶ परिनिब्बानकथा नाम होति. तत्थ ‘‘यस्मा अरहा सब्बञ्ञुविसये अप्पहीनसंयोजनोव परिनिब्बायति, तस्मा अत्थि किञ्चि संयोजनं अप्पहाय परिनिब्बान’’न्ति येसं लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. सेसमेत्थ हेट्ठा वुत्तनयमेवाति.

परिनिब्बानकथावण्णना.

२. कुसलचित्तकथावण्णना

८९४-८९५. इदानि ¶ कुसलचित्तकथा नाम होति. तत्थ यस्मा अरहा सतिवेपुल्लप्पत्तो परिनिब्बायन्तोपि सतो सम्पजानोव परिनिब्बाति, तस्मा कुसलचित्तो परिनिब्बायतीति येसं लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. अथ नं यस्मा कुसलचित्तो नाम पुञ्ञाभिसङ्खाराभिसङ्खरणादिवसेन होति, तस्मा तेनत्थेन चोदेतुं अरहा पुञ्ञाभिसङ्खारन्तिआदिमाह. सेसमेत्थ यथापाळिमेव निय्याति. सतो सम्पजानोति इदं जवनक्खणे किरियसतिसम्पजञ्ञानं वसेन असम्मोहमरणदीपनत्थं वुत्तं, न कुसलचित्तदीपनत्थं. तस्मा असाधकन्ति.

कुसलचित्तकथावण्णना.

३. आनेञ्जकथावण्णना

८९६. इदानि ¶ ¶ आनेञ्जकथा नाम होति. तत्थ भगवा चतुत्थज्झाने ठितो परिनिब्बायीति सल्लक्खेत्वा ‘‘अरहा आनेञ्जे ठितो परिनिब्बायती’’ति येसं लद्धि, सेय्यथापि एकच्चानं उत्तरापथकानं, ते सन्धाय पुच्छा सकवादिस्स, पटिञ्ञा इतरस्स. पकतिचित्तेति भवङ्गचित्ते. सब्बे हि सञ्ञिनो सत्ता भवङ्गचित्ते ठत्वा भवङ्गपरियोसानेन चुतिचित्तेन कालं करोन्ति. इति नं इमिना अत्थेन चोदेतुं एवमाह. तत्थ किञ्चापि चतुवोकारभवे अरहतो पकतिचित्तम्पि आनेञ्जं होति, अयं पन पञ्हो पञ्चवोकारभववसेन उद्धटो. तस्मा नो च वत रे वत्तब्बेति आह. सेसमेत्थ उत्तानत्थमेवाति.

आनेञ्जकथावण्णना.

४. धम्माभिसमयकथावण्णना

८९७. इदानि धम्माभिसमयकथा नाम होति. तत्थ अतीतभवे सोतापन्नं मातुकुच्छियं वसित्वा निक्खन्तं दिस्वा ‘‘अत्थि गब्भसेय्याय धम्माभिसमयो’’ति ¶ येसं लद्धि, सेय्यथापि एकच्चानं उत्तरापथकानं, ते सन्धाय पुच्छा सकवादिस्स, पटिञ्ञा इतरस्स. अथ नं ‘‘यदि तत्थ धम्माभिसमयो अत्थि, धम्माभिसमयस्स कारणेहि धम्मदेसनादीहि भवितब्ब’’न्ति चोदेतुं अत्थि गब्भसेय्याय धम्मदेसनातिआदिमाह. सुत्तस्सातिआदि भवङ्गवारं सन्धाय वुत्तं. गब्भसेय्याय हि येभुय्येन भवङ्गमेव पवत्तति. तेनेव सत्तो किरियमयप्पवत्ताभावा सुत्तो, भावनानुयोगस्स अभावा पमत्तो, कम्मट्ठानपरिग्गाहकानं सतिसम्पजञ्ञानं अभावा मुट्ठस्सति असम्पजानो नाम होति, तथारूपस्स कुतो धम्माभिसमयोति?

धम्माभिसमयकथावण्णना.

५-७. तिस्सोपिकथावण्णना

८९८-९००. इदानि ¶ ¶ तिस्सोपिकथा नाम होन्ति. तत्थ अचिरजातानं पन सोतापन्नानं अरहत्तप्पत्तिं सुप्पवासाय च उपासिकाय सत्तवस्सिकं गब्भं दिस्वा ‘‘अत्थि गब्भसेय्याय अरहत्तप्पत्ती’’ति च सुपिने आकासगमनादीनि दिस्वा ‘‘अत्थि धम्माभिसमयो’’ति च ‘‘अत्थि तत्थ अरहत्तप्पत्ती’’ति च इधापि येसं लद्धियो, सेय्यथापि तेसञ्ञेव; ते सन्धाय पुच्छा सकवादिस्स, पटिञ्ञा इतरस्स. सेसमेत्थ पुरिमकथा सदिसमेवाति.

तिस्सोपिकथावण्णना.

८. अब्याकतकथावण्णना

९०१-९०२. इदानि अब्याकतकथा नाम होति. तत्थ ‘‘अत्थेसा, भिक्खवे, चेतना, सा च खो अब्बोहारिका’’ति (पारा. २३५) वचनतो ‘‘सब्बं सुपिनगतस्स चित्तं अब्याकत’’न्ति येसं लद्धि, सेय्यथापि एकच्चानं उत्तरापथकानञ्ञेव, ते सन्धाय पुच्छा सकवादिस्स, पटिञ्ञा इतरस्स. सेसमेत्थ यथा पाळिमेव निय्याति. सुपिनगतस्स चित्तं अब्बोहारिकन्ति इदं ¶ आपत्तिं सन्धाय वुत्तं. सुपिनगतस्स हि पाणातिपातादिवसेन किञ्चापि अकुसलचित्तं पवत्तति, वत्थुविकोपनं पन नत्थीति न सक्का तत्थ आपत्तिं पञ्ञपेतुं. इमिना कारणेन तं अब्बोहारिकं, न अब्याकतत्ताति.

अब्याकतकथावण्णना.

९. आसेवनपच्चयकथावण्णना

९०३-९०५. इदानि आसेवनपच्चयकथा नाम होति. तत्थ यस्मा सब्बे ¶ धम्मा खणिका ¶ , न कोचि मुहुत्तम्पि ठत्वा आसेवनपच्चयं आसेवति नाम. तस्मा नत्थि किञ्चि आसेवनपच्चयता. आसेवनपच्चयताय उप्पन्नं पन न किञ्चि अत्थीति येसं लद्धि, सेय्यथापि तेसञ्ञेव; ते सन्धाय पुच्छा सकवादिस्स, पटिञ्ञा इतरस्स. अथ नं सुत्तवसेनेव पञ्ञापेतुं ननु वुत्तं भगवता पाणातिपातोतिआदि आभतं. तं सब्बं उत्तानत्थमेवाति.

आसेवनपच्चयकथावण्णना.

१०. खणिककथावण्णना

९०६-९०७. इदानि खणिककथा नाम होति. तत्थ यस्मा सब्बसङ्खतधम्मा अनिच्चा, तस्मा एकचित्तक्खणिकायेव. समानाय हि अनिच्चताय एको लहुं भिज्जति, एको चिरेनाति को एत्थ नियामोति येसं लद्धि, सेय्यथापि पुब्बसेलियापरसेलियानं; ते सन्धाय एकचित्तक्खणिकाति पुच्छा सकवादिस्स, पटिञ्ञा इतरस्स. चित्ते महापथवीतिआदीसु तेसं तथा सण्ठानं अपस्सन्तो पटिक्खिपति. चक्खायतनन्तिआदि ‘‘यदि सब्बे एकचित्तक्खणिका भवेय्युं, चक्खायतनादीनि चक्खुविञ्ञाणादीहि सद्धिंयेव उप्पज्जित्वा निरुज्झेय्यु’’न्ति चोदनत्थं वुत्तं. इतरो पन अन्तोमातुकुच्छिगतस्स विञ्ञाणुप्पत्तिं सन्धाय पटिक्खिपति ¶ , पवत्तं सन्धाय लद्धिवसेन पटिजानाति. सेसमेत्थ उत्तानत्थमेवाति. तेन हि एकचित्तक्खणिकाति यस्मा निच्चा न होन्ति, तस्मा एकचित्तक्खणिकाति अत्तनो रुचिया कारणं वदति. तं अवुत्तसदिसमेवाति.

खणिककथावण्णना.

बावीसतिमो वग्गो.

२३. तेवीसतिमवग्गो

१. एकाधिप्पायकथावण्णना

९०८. इदानि ¶ ¶ एकाधिप्पायकथा नाम होति. तत्थ कारुञ्ञेन वा एकेन अधिप्पायेन एकाधिप्पायो, संसारे वा एकतो भविस्सामाति इत्थिया सद्धिं बुद्धपूजादीनि कत्वा पणिधिवसेन एको अधिप्पायो अस्साति एकाधिप्पायो. एवरूपो द्विन्नम्पि जनानं एकाधिप्पायो मेथुनो धम्मो पटिसेवितब्बोति येसं लद्धि, सेय्यथापि अन्धकानञ्चेव वेतुल्लकानञ्च; ते सन्धाय पुच्छा सकवादिस्स, पटिञ्ञा इतरस्स. सेसमेत्थ यथापाळिमेव निय्यातीति.

एकाधिप्पायकथावण्णना.

२. अरहन्तवण्णकथावण्णना

९०९. इदानि अरहन्तवण्णकथा नाम होति. तत्थ इरियापथसम्पन्ने आकप्पसम्पन्ने पापभिक्खू दिस्वा ‘‘अरहन्तानं वण्णेन अमनुस्सा मेथुनं धम्मं पटिसेवन्ती’’ति येसं लद्धि, सेय्यथापि एकच्चानं उत्तरापथकानं; ते सन्धाय पुच्छा सकवादिस्स, पटिञ्ञा इतरस्स. सेसमेत्थ उत्तानत्थमेवाति.

अरहन्तवण्णकथावण्णना.

३-७. इस्सरियकामकारिकाकथावण्णना

९१०-९१४. इदानि ¶ इस्सरियकामकारिकाकथा नाम होति. छद्दन्तजातकादीनि सन्धाय ¶ ‘‘बोधिसत्तो इस्सरियकामकारिकाहेतु विनिपातं ¶ गच्छति, गब्भसेय्यं ओक्कमति, दुक्करकारिकं अकासि, अपरन्तपं अकासि, अञ्ञं सत्थारं उद्दिसी’’ति येसं लद्धि, सेय्यथापि अन्धकानं, ते सन्धाय पुच्छा सकवादिस्स, पटिञ्ञा इतरस्स. सेसं पठमकथायं उत्तानत्थमेव. दुतियकथायं इद्धिमाति यदि इस्सरियकामकारिकाहेतु गच्छेय्य, इद्धिया गच्छेय्य, न कम्मवसेनाति चोदनत्थं वुत्तं. इतरो पन पठमपञ्हे भावनामयं सन्धाय पटिक्खिपति. दुतियपञ्हे पुञ्ञिद्धिं सन्धाय पटिजानाति. ततियकथायं इस्सरियकामकारिकाहेतु नाम दुक्करकारिका मिच्छादिट्ठिया करियति. यदि च सो तं करेय्य, सस्सतादीनिपि गण्हेय्याति चोदनत्थं सस्सतो लोकोतिआदि वुत्तं. चतुत्थकथायम्पि एसेव नयोति.

इस्सरियकामकारिकाकथावण्णना.

८. पतिरूपकथावण्णना

९१५-९१६. इदानि रागपतिरूपकथा नाम होति. तत्थ मेत्ताकरुणामुदितायो सन्धाय ‘‘न रागो रागपतिरूपको’’ति च इस्सामच्छरियकुक्कुच्चानि सन्धाय ‘‘न दोसो दोसपतिरूपको’’ति च हसितुप्पादं सन्धाय ‘‘न मोहो मोहपतिरूपको’’ति च दुम्मङ्कूनं पुग्गलानं निग्गहं पेसलानं भिक्खूनं अनुग्गहं पापगरहितं कल्याणपसंसं आयस्मतो पिलिन्दवच्छस्स वसलवादं भगवतो खेळासकवादं मोघपुरिसवादञ्च सन्धाय ‘‘न किलेसो किलेसपतिरूपको’’ति च येसं लद्धि, सेय्यथापि अन्धकानं; ते सन्धाय सब्बकथासु पुच्छा सकवादिस्स, पटिञ्ञा इतरस्स. अथ नं यस्मा फस्सादिपतिरूपका नफस्सादयो नाम नत्थि, तस्मा रागादिपतिरूपका नरागादयोपि नत्थीति ¶ चोदेतुं अत्थि न फस्सोतिआदिमाह ¶ . इतरो तेसं अभावा पटिक्खिपति. सेसं सब्बत्थ उत्तानत्थमेवाति.

पतिरूपकथावण्णना.

९. अपरिनिप्फन्नकथावण्णना

९१७-९१८. इदानि ¶ अपरिनिप्फन्नकथा नाम होति. तत्थ –

‘‘दुक्खमेव हि सम्भोति, दुक्खं तिट्ठति वेति च;

नाञ्ञत्र दुक्खा सम्भोति, नाञ्ञं दुक्खा निरुज्झती’’ति. (सं. नि. १.१७१) –

वचनं निस्साय दुक्खञ्ञेव परिनिप्फन्नं, सेसा खन्धायतनधातुइन्द्रियधम्मा अपरिनिप्फन्नाति येसं लद्धि, सेय्यथापि एकच्चानं उत्तरपथकानञ्चेव हेतुवादानञ्च; ते सन्धाय रूपं अपरिनिप्फन्नन्ति पुच्छा सकवादिस्स, पटिञ्ञा इतरस्स. अथ नं ‘‘सचे रूपं अपरिनिप्फन्नं, न अनिच्चादिसभावं सिया’’ति चोदेतुं रूपं न अनिच्चन्तिआदिमाह. इतरो तथारूपं रूपं अपस्सन्तो पटिक्खिपति. सकवादी ननु रूपं अनिच्चन्तिआदि वचनेन तस्स एकं लद्धिं पटिसेधेत्वा दुतियं पुच्छन्तो दुक्खञ्ञेव परिनिप्फन्नन्तिआदिमाह. अथस्स तम्पि लद्धिं पटिसेधेतुं न यदनिच्चन्तिआदिमाह. तत्रायं अधिप्पायो – न केवलञ्हि पठमसच्चमेव दुक्खं. यं पन किञ्चि अनिच्चं, तं दुक्खमेव. रूपञ्च अनिच्चं, तस्मा तम्पि परिनिप्फन्नं. इति यं त्वं वदेसि ‘‘रूपं अपरिनिप्फन्नं, दुक्खञ्ञेव परिनिप्फन्न’’न्ति, तं नो वत रे वत्तब्बे ‘‘दुक्खञ्ञेव परिनिप्फन्न’’न्ति. वेदनादिमूलिकादीसुपि योजनासु एसेव नयो. धम्मायतनधम्मधातूसु पन ठपेत्वा निब्बानं सेसधम्मानं वसेन अनिच्चता वेदितब्बा. इन्द्रियानि अनिच्चानेवाति.

अपरिनिप्फन्नकथावण्णना.

तेवीसतिमो वग्गो.

निगमनकथा

एत्तावता ¶ ¶ ¶ च –

पण्णासकेहि चतूहि, तीहि वग्गेहि चेव च;

सङ्गहेत्वा कथा सब्बा, ऊनतिसतभेदना.

कथावत्थुप्पकरणं, कथामग्गेसु कोविदो;

यं जिनो देसयि तस्स, निट्ठिता अत्थवण्णना.

इमं तेरसमत्तेहि, भाणवारेहि तन्तिया;

चिरट्ठितत्थं धम्मस्स, सङ्खरोन्तेन यं मया.

यं पत्तं कुसलं तेन, लोकोयं सनरामरो;

धम्मराजस्स सद्धम्म-रसमेवाधिगच्छतूति.

कथावत्थु-अट्ठकथा निट्ठिता.

नमो तस्स भगवतो अरहतो सम्मासम्बुद्धस्स

अभिधम्मपिटके

यमकप्पकरण-अट्ठकथा

सङ्खेपेनेव ¶ ¶ ¶ देवानं, देवदेवो सुरालये;

कथावत्थुप्पकरणं, देसयित्वा रणञ्जहो.

यमस्स विसयातीतो, नानायमकमण्डितं;

अभिधम्मप्पकरणं, छट्ठं छट्ठान देसको.

यमकं अयमावत्त-नीलामलतनूरुहो;

यं देसयि अनुप्पत्तो, तस्स संवण्णनाक्कमो;

इदानि यस्मा तस्मास्स, होति संवण्णना अयन्ति.

१. मूलयमकं

उद्देसवारवण्णना

१. मूलयमकं ¶ , खन्धयमकं, आयतनयमकं, धातुयमकं, सच्चयमकं, सङ्खारयमकं, अनुसययमकं, चित्तयमकं, धम्मयमकं, इन्द्रिययमकन्ति इमेसं दसन्नं यमकानं वसेन इदं पकरणं दसविधेन विभत्तन्ति हि वुत्तं. तत्थ येसं दसन्नं यमकानं वसेन इदं पकरणं दसविधेन विभत्तं, तेसञ्चेव इमस्स च पकरणस्स नामत्थो ताव एवं वेदितब्बो – केनट्ठेन यमकन्ति? युगळट्ठेन. युगळञ्हि यमकन्ति वुच्चति – ‘यमकपाटिहारियं, यमकसाला’तिआदीसु विय. इति युगळसङ्खातानं यमकानं वसेन देसितत्ता इमेसु दससु एकेकं यमकं नाम. इमेसं पन यमकानं समूहभावतो सब्बम्पेतं पकरणं यमकन्ति वेदितब्बं.

तत्थ मूलवसेन पुच्छाविस्सज्जनं कत्वा देसितत्ता दसन्नं ताव सब्बपठमं मूलयमकन्ति वुत्तं. तस्स उद्देसवारो, निद्देसवारोति द्वे वारा होन्ति ¶ . तेसु उद्दिट्ठानुक्कमेन निद्दिसितब्बत्ता उद्देसवारो पठमो. तस्स ये केचि कुसला धम्मा, सब्बे ते कुसलमूला; ये वा पन कुसलमूला, सब्बे ते धम्मा कुसलाति इदं यमकं आदि ¶ . तस्स कुसलाकुसलमूलसङ्खातानं द्विन्नं अत्थानं वसेन अत्थयमकन्ति वा, तेसञ्ञेव अत्थानं वसेन अनुलोमपटिलोमतो पवत्तपाळिधम्मवसेन धम्मयमकन्ति वा, अनुलोमपटिलोमतो पवत्तपुच्छावसेन पुच्छायमकन्ति वा तिधा यमकभावो वेदितब्बो. सेसेसुपि एसेव नयो.

इदानि इमेसं यमकानं वसेन देसिते इमस्मिं मूलयमके उद्देसवारस्स ताव नययमकपुच्छाअत्थवारप्पभेदवसेन पाळिववत्थानमेव एवं वेदितब्बं – कुसलत्तिकमातिकाय हि ‘कुसला धम्मा’ति इदं आदिपदं निस्साय मूलनयो, मूलमूलनयो, मूलकनयो, मूलमूलकनयोति इमे चत्तारो नया होन्ति. तेसं एकेकस्मिं नये मूलयमकं, एकमूलयमकं, अञ्ञमञ्ञमूलयमकन्ति तीणि तीणि यमकानि. एवं चतूसु नयेसु द्वादस यमकानि, एकेकस्मिं ¶ यमके अनुलोमपटिलोमवसेन द्वे द्वे पुच्छाति चतुवीसति पुच्छा, एकेकाय पुच्छाय सन्निट्ठानसंसयवसेन द्वे द्वे अत्थाति अट्ठचत्तालीस अत्थाति.

तत्थ ये केचि कुसला धम्माति कुसलेसु ‘‘कुसला नु खो, न कुसला नु खो’’ति सन्देहाभावतो इमस्मिं पदे सन्निट्ठानत्थो वेदितब्बो. सब्बे ते कुसलमूलाति ‘‘सब्बे ते कुसला धम्मा कुसलमूला नु खो, ननु खो’’ति एवं विमतिवसेन पुच्छितत्ता इमस्मिं पदे संसयत्थो वेदितब्बो. सो च खो वेनेय्यानं संसयट्ठाने संसयदीपनत्थं वुत्तो, तथागतस्स पन संसयो नाम नत्थि. इतो परेसुपि पुच्छापदेसु एसेव नयो.

यथा च कुसलपदं निस्साय इमे चत्तारो नया, एकेकस्मिं नये तिण्णं तिण्णं यमकानं वसेन द्वादस यमकानि, एकेकस्मिं यमके द्विन्नं द्विन्नं पुच्छानं वसेन चतुवीसति पुच्छा; एकेकाय पुच्छाय द्विन्नं द्विन्नं अत्थानं वसेन अट्ठचत्तालीस अत्था च होन्ति. अकुसलपदं निस्सायपि तथेव. अब्याकतपदं निस्सायपि तथेव. तीणिपि पदानि एकतो कत्वा निद्दिट्ठं नामपदं निस्सायपि तथेवाति कुसलत्तिकमातिकाय चतूसु पदेसु सब्बेपि सोळस नया, अट्ठचत्तालीस यमकानि ¶ , छन्नवुति ¶ पुच्छा, द्वेनवुतिसतं अत्था च उद्देसवसेन वुत्ताति वेदितब्बा. एत्तावता मूलवारो नाम पठमं उद्दिट्ठो होति.

ततो परं ये केचि कुसला धम्मा, सब्बे ते कुसलहेतूतिआदयो तस्सेव मूलवारस्स वेवचनवसेन नव वारा उद्दिट्ठा. इति मूलवारो, हेतुवारो, निदानवारो, सम्भववारो, पभववारो, समुट्ठानवारो, आहारवारो, आरम्मणवारो, पच्चयवारो, समुदयवारोति सब्बेपि दस वारा होन्ति. तत्थ मूलवारे आगतपरिच्छेदेनेव सेसेसुपि नयादयो वेदितब्बाति सब्बेसुपि दससु वारेसु सट्ठिसतनया, असीतिअधिकानि चत्तारि यमकसतानि, सट्ठिअधिकानि नवपुच्छासतानि, वीसाधिकानि एकूनवीसति अत्थसतानि च उद्दिट्ठानीति वेदितब्बानि. एवं ताव उद्देसवारे नययमकपुच्छाअत्थवारप्पभेदवसेन पाळिववत्थानमेव वेदितब्बं.

मूलं हेतु निदानञ्चाति गाथा दसन्नम्पि वारानं उद्दानगाथा नाम. तत्थ मूलादीनि सब्बानिपि कारणवेवचनानेव. कारणञ्हि पतिट्ठानट्ठेन मूलं. अत्तनो फलनिप्फादनत्थं हिनोति पवत्ततीति हेतु. ‘हन्द, नं गण्हाथा’ति दस्सेन्तं विय अत्तनो फलं निदेतीति निदानं. एतस्मा फलं सम्भोतीति सम्भवो. पभवतीति पभवो. समुट्ठाति एत्थ फलं, एतेन वा समुट्ठातीति समुट्ठानं. अत्तनो फलं आहरतीति आहारो. अप्पटिक्खिपितब्बेन अत्तनो फलेन आलम्बियतीति आलम्बणं. एतं पटिच्च अप्पटिक्खिपित्वा फलं एति पवत्ततीति पच्चयो. एतस्मा फलं समुदेतीति समुदयो. एवमेतेसं पदानं वचनत्थो वेदितब्बो.

उद्देसवारवण्णना.

निद्देसवारवण्णना

५०. इदानि येकेचि कुसला धम्मातिआदिना नयेन निद्देसवारो आरद्धो. तत्थ ये केचीति अनवसेसवचनं. कुसला धम्माति कुसलत्तिकस्स पदभाजने वुत्तलक्खणा अनवज्जसुखविपाका ¶ कुसलसभावा. सब्बे ते कुसलमूलाति किं ते सब्बेयेव कुसलमूलाति पुच्छति. तीणेव ¶ कुसलमूलानीति न ते सब्बे कुसलमूलानि, अलोभादीनि पन तीणि एव कुसलमूलानीति अत्थो. अवसेसा कुसला धम्मा न कुसलमूलाति अवसेसा फस्सादयो कुसला धम्मा कुसलमूलानि नाम न होन्ति. अथ वा अवसेसा फस्सादयो कुसला धम्मायेव नाम, न कुसलमूलानीतिपि अत्थो. ये वा पन कुसलमूलाति ये वा पन पठमपुच्छाय दुतियपदेन कुसलमूलाति तयो अलोभादयो गहिता. सब्बे ते धम्मा कुसलाति किं ते सब्बे तयोपि धम्मा कुसलाति पुच्छति. आमन्ताति सब्बेसम्पि कुसलमूलानं कुसलभावं सम्पटिच्छन्तो आह. अयं ताव मूलनये मूलयमकस्स अत्थो. इमिना उपायेन सब्बपुच्छासु विस्सज्जननयो वेदितब्बो. यं पन यत्थ विसेसमत्तं अत्थि, तदेव वण्णयिस्साम.

५१. एकमूलयमके ताव सब्बे ते कुसलमूलेन एकमूलाति गणनट्ठेन एकमूलकं अग्गहेत्वा समानट्ठेन गहेतब्बा. अयञ्हेत्थ अत्थो – सब्बे ते कुसलमूलेन समानमूला. यं फस्सस्स मूलं, तदेव वेदनादीनन्ति. अथ नेसं तथाभावं सम्पटिच्छन्तो आमन्ताति आह. कुसलसमुट्ठानन्ति कुसलचित्तसमुट्ठानरूपं दस्सितं. एकमूलन्ति अलोभादिना कुसलमूलेन समानमूलं ¶ . यथेव हि फस्सादीनं अलोभादयो हेतुपच्चयत्ता मूलं, तथा तं समुट्ठानरूपस्सापि, कुसललक्खणाभावेन पन तं न कुसलं.

५२. अञ्ञमञ्ञयमके ‘येकेचि कुसला’ति अपुच्छित्वा येकेचि कुसलमूलेन एकमूलाति पुच्छा कता. कस्मा? इमिनापि ब्यञ्जनेन तस्सेवत्थस्स सम्भवतो. कुसलमूलानीति इदं पुरिमस्स विसेसनं. ‘मूलानि यानि एकतो उप्पज्जन्ती’ति हि वुत्तं, तानि पन कुसलमूलानिपि होन्ति अकुसलअब्याकतमूलानिपि, इध कुसलमूलानीति विसेसदस्सनत्थमिदं वुत्तं. अञ्ञमञ्ञमूलानि चाति अञ्ञमञ्ञं हेतुपच्चयेन पच्चया होन्तीति अत्थो. तस्सेव पटिलोमपुच्छाय ‘सब्बे ते धम्मा ¶ कुसलमूलेन एकमूला’ति अवत्वा सब्बे ते धम्मा कुसलाति वुत्तं. कस्मा? अत्थविसेसाभावतो. कुसलमूलेन एकमूलाति हि पुच्छाय कताय ‘मूलानि यानि एकतो उप्पज्जन्ती’ति हेट्ठा वुत्तनयेनेव विस्सज्जनं कातब्बं भवेय्य, एवञ्च सति अत्थविसेसाभावो होति. तस्मा तथा अकत्वा ¶ एवं पुच्छा कता. इमिना उपायेन मूलमूलनयादीसुपि अञ्ञमञ्ञमूलयमके पुच्छाविसेसो वेदितब्बो.

५३-५५. मूलमूलनये सब्बे ते कुसलमूलमूलाति सब्बे ते कुसलमूलसङ्खाता मूलाति पुच्छति. एकमूलमूलाति समानट्ठेन एकमेव मूलमूलं एतेसन्ति एकमूलमूला. अञ्ञमञ्ञमूलमूलाति अञ्ञमञ्ञस्स मूलं अञ्ञमञ्ञमूलं, अञ्ञमञ्ञमूलं हेतुपच्चयट्ठेन मूलं एतेसन्ति अञ्ञमञ्ञमूलमूला.

५६. मूलकनये कुसलमूलकाति हेतुपच्चयट्ठेन कुसलं मूलं एतेसन्ति कुसलमूलका.

५७-६१. मूलमूलकनये कुसलमूलमूलकाति कुसलानं मूलं कुसलमूलं. हेतुपच्चयट्ठेनेव कुसलमूलं मूलं एतेसन्ति कुसलमूलमूलकाति. अयं ताव कुसलपदं निस्साय नययमकपुच्छासु विसेसत्थो.

६२-७३. अकुसलपदादीसुपि एसेव नयो. अयं पन विसेसो, अहेतुकं अकुसलन्ति विचिकिच्छाय चेव उद्धच्चेन च सम्पयुत्तं मोहं सन्धाय वुत्तं.

७४-८५. अहेतुकं ¶ अब्याकतन्ति अट्ठारस चित्तुप्पादा रूपं, निब्बानञ्च. अब्याकतमूलेन न एकमूलन्ति इध पन ठपेत्वा सहेतुकअब्याकतसमुट्ठानं रूपं, सेसं लब्भति. सहेतुकअब्याकतसमुट्ठानं रूपं अब्याकतमूलेन एकमूलं होति, तं अब्बोहारिकं कत्वा एकतो लब्भमानकवसेनेव चेतं विस्सज्जनं कतं.

८६-९७. नामा धम्माति नामसङ्खाता धम्मा. ते अत्थतो चत्तारो अरूपिनो खन्धा, निब्बानञ्च. नवेव नाममूलानीति कुसलाकुसलअब्याकतमूलवसेन नव मूलानि. अहेतुकं नामं नाममूलेन न एकमूलन्ति अहेतुकं सब्बम्पि अट्ठारस चित्तुप्पादविचिकिच्छुद्धच्चसम्पयुत्तमोहनिब्बानसङ्खातं नामं नाममूलेन न एकमूलं ¶ . न हि तं तेन सद्धिं उप्पज्जति. सहेतुकं ¶ नामं नाममूलेनाति पदेपि सहेतुकं नामं नाममूलेनाति अत्थो. सेसं सब्बत्थ उत्तानत्थमेवाति.

मूलवारवण्णना.

९८-९९. हेतुवारादीसुपि इमिनावुपायेन अत्थो वेदितब्बो. मूलं हेतु निदानञ्चातिगाथा यथानिद्दिट्ठानं दसन्नम्पि वारानं पुन उद्दानवसेनेव वुत्ताति.

मूलयमकवण्णना.

२. खन्धयमकं

१. पण्णत्तिउद्देसवारवण्णना

१. इदानि मूलयमके देसितेयेव कुसलादिधम्मे खन्धवसेन सङ्गण्हित्वा मूलयमकानन्तरं देसितस्स खन्धयमकस्स वण्णना होति. तत्थ पाळिववत्थानं ताव एवं वेदितब्बं – इमस्मिञ्हि खन्धयमके तयो महावारा होन्ति – पण्णत्तिवारो, पवत्तिवारो, परिञ्ञावारोति. तेसु ¶ पण्णत्तिवारो खन्धानं नामाभिधानसोधनवसेनेव गतत्ता पण्णत्तिवारोति वुच्चति. पवत्तिवारो तेन सोधितनामाभिधानानं खन्धानं उप्पादनिरोधवसेन पवत्तिं सोधयमानो गतो, तस्मा पवत्तिवारोति वुच्चति. परिञ्ञावारो इमिनानुक्कमेन पवत्तानं खन्धानं सङ्खेपेनेव तिस्सो परिञ्ञा दीपयमानो गतो, तस्मा परिञ्ञावारोति वुच्चति. तत्थ पण्णत्तिवारो उद्देसनिद्देसवसेन द्वीहाकारेहि ववत्थितो. इतरेसु विसुं उद्देसवारो नत्थि. आदितो पट्ठाय पुच्छाविस्सज्जनवसेन एकधा ववत्थिता. तत्थ पञ्चक्खन्धातिपदं आदिं कत्वा याव न खन्धा, न सङ्खाराति पदं ताव पण्णत्तिवारस्स उद्देसवारो वेदितब्बो. पुच्छावारोतिपि तस्सेव नामं. तत्थ पञ्चक्खन्धाति अयं यमकवसेन पुच्छितब्बानं खन्धानं उद्देसो. रूपक्खन्धो…पे… विञ्ञाणक्खन्धोति तेसञ्ञेव पभेदतो नामववत्थानं.

२-३. इदानि ¶ इमेसं खन्धानं ¶ वसेन पदसोधनवारो, पदसोधनमूलचक्कवारो, सुद्धखन्धवारो, सुद्धखन्धमूलचक्कवारोति चत्तारो नयवारा होन्ति. तत्थ रूपं रूपक्खन्धो, रूपक्खन्धो रूपन्तिआदिना नयेन पदमेव सोधेत्वा गतो पदसोधनवारो नाम. सो अनुलोमपटिलोमवसेन दुविधो होति. तत्थ अनुलोमवारे ‘रूपं रूपक्खन्धो, रूपक्खन्धो रूप’न्तिआदीनि पञ्च यमकानि. पटिलोमवारेपि ‘न रूपं, न रूपक्खन्धो; न रूपक्खन्धो न रूप’न्तिआदीनि पञ्चेव. ततो परं तेसञ्ञेव पदसोधनवारे सोधितानं खन्धानं ‘रूपं रूपक्खन्धो, खन्धा वेदनाक्खन्धो’तिआदिना नयेन एकेकखन्धमूलकानि चत्तारि चत्तारि चक्कानि बन्धित्वा गतो पदसोधनमूलकानं चक्कानं अत्थिताय पदसोधनमूलचक्कवारो नाम. सोपि अनुलोमपटिलोमवसेन दुविधो होति. तत्थ अनुलोमवारे ‘रूपं रूपक्खन्धो, खन्धा वेदनाक्खन्धो’तिआदीनि एकेकखन्धमूलकानि चत्तारि चत्तारि कत्वा वीसति यमकानि. पटिलोमवारेपि ‘न रूपं, न रूपक्खन्धो; न खन्धा न वेदनाक्खन्धो’तिआदीनि वीसतिमेव.

ततो परं रूपं खन्धो खन्धा रूपन्तिआदिना नयेन सुद्धखन्धवसेनेव गतो सुद्धखन्धवारो नाम. तत्थ खन्धा रूपन्तिआदीसु खन्धा रूपक्खन्धो, खन्धा वेदनाक्खन्धोति अत्थो गहेतब्बो. कस्मा? निद्देसवारे एवं भाजितत्ता. तत्थ हि ‘रूपं खन्धोति आमन्ता. खन्धा रूपक्खन्धोति रूपक्खन्धो खन्धो चेव रूपक्खन्धो च, अवसेसा खन्धा न रूपक्खन्धो’ति एवं ‘खन्धा रूप’न्तिआदीनं खन्धा रूपक्खन्धोतिआदिना नयेन पदं उद्धरित्वा अत्थो विभत्तो. तेनेव च कारणेनेसे सुद्धखन्धवारोति वुत्तो. वचनसोधने विय हि एत्थ ¶ न वचनं पमाणं. यथा यथा पन सुद्धखन्धा लब्भन्ति, तथा तथा अत्थोव पमाणं. परतो आयतनयमकादीसुपि एसेव नयो. एसोपि च सुद्धखन्धवारो अनुलोमपटिलोमवसेन दुविधो ¶ होति. तत्थ अनुलोमवारे ‘रूपं खन्धो खन्धा रूप’न्तिआदीनि पञ्च यमकानि. पटिलोमवारेपि ‘न रूपं न खन्धो, न खन्धा न रूप’न्तिआदीनि पञ्चेव.

ततो परं तेसञ्ञेव सुद्धखन्धानं रूपं खन्धो, खन्धा वेदनातिआदिना नयेन एकेकखन्धमूलकानि चत्तारि चत्तारि चक्कानि बन्धित्वा गतो सुद्धखन्धमूलकानं चक्कानं अत्थिताय सुद्धखन्धमूलचक्कवारो नाम. तत्थ ¶ खन्धा वेदनातिआदीसु खन्धा वेदनाक्खन्धोतिआदिना नयेन अत्थो वेदितब्बो. इतरथा निद्देसवारेन सद्धिं विरोधो होति. सोपि अनुलोमपटिलोमवसेन दुविधो होति. तत्थ अनुलोमवारे ‘रूपं खन्धो, खन्धा वेदना’तिआदीनि एकेकखन्धमूलकानि चत्तारि चत्तारि कत्वा वीसति यमकानि. पटिलोमवारेपि ‘न रूपं, न खन्धो, न खन्धा न वेदना’तिआदीनि वीसतिमेव. एवं ताव एकेन यमकसतेन द्वीहि पुच्छासतेहि एकेकपुच्छाय सन्निट्ठानसंसयवसेन द्वे द्वे अत्थे कत्वा चतूहि च अत्थसतेहि पटिमण्डितो पण्णत्तिवारस्स उद्देसवारो वेदितब्बोति.

पण्णत्तिउद्देसवारवण्णना.

१. पण्णत्तिनिद्देसवारवण्णना

२६. इदानि रूपं रूपक्खन्धोतिआदिना नयेन निद्देसवारो आरद्धो. तत्थ रूपं रूपक्खन्धोति यंकिञ्चि रूपन्ति वुच्चति. सब्बं तं रूपं रूपक्खन्धोति वचनसोधनत्थं पुच्छति. पियरूपं सातरूपं, रूपं, न रूपक्खन्धोति यं ‘पियरूपं सातरूप’न्ति एत्थ रूपन्ति वुत्तं, तं रूपमेव, न रूपक्खन्धोति अत्थो. रूपक्खन्धो रूपञ्चेव रूपक्खन्धो चाति यो पन रूपक्खन्धो, सो रूपन्तिपि रूपक्खन्धोतिपि वत्तुं वट्टतीति अत्थो. रूपक्खन्धो रूपन्ति एत्थ पन यस्मा रूपक्खन्धो नियमेनेव रूपन्ति वत्तब्बो. तस्मा आमन्ताति आह. इमिना उपायेन सब्बविस्सज्जनेसु अत्थो वेदितब्बो. यो पन यत्थ विसेसो भविस्सति, तथेव तं वण्णयिस्साम ¶ . सञ्ञायमके ताव दिट्ठिसञ्ञाति ‘पपञ्चसञ्ञा’तिआदीसु आगता दिट्ठिसञ्ञा. सङ्खारयमके अवसेसा सङ्खाराति ‘अनिच्चा वत सङ्खारा’तिआदीसु आगता सङ्खारक्खन्धतो अवसेसा ¶ सङ्खतधम्मा. पटिलोमवारेपि एसेव नयोति.

पदसोधनवारो निट्ठितो.

२८. पदसोधनमूलचक्कवारे खन्धा वेदनाक्खन्धोति येकेचि खन्धा, सब्बे ते वेदनाक्खन्धोति पुच्छति. सेसपुच्छासुपि एसेव नयो. पटिलोमे न खन्धा न वेदनाक्खन्धोति एत्थ ये पञ्ञत्तिनिब्बानसङ्खाता धम्मा ¶ खन्धा न होन्ति, ते यस्मा वेदनाक्खन्धोपि न होन्ति, तस्मा आमन्ताति आह. सेसविस्सज्जनेसुपि एसेव नयोति.

पदसोधनमूलचक्कवारो निट्ठितो.

३८. सुद्धखन्धवारे रूपं खन्धोति यंकिञ्चि रूपन्ति वुत्तं, सब्बं तं खन्धोति पुच्छति. तत्थ यस्मा पियरूपसातरूपसङ्खातं वा रूपं होतु, भूतुपादारूपं वा, सब्बं पञ्चसु खन्धेसु सङ्गहं गच्छतेव. तस्मा आमन्ताति पटिजानाति. दुतियपदे ‘खन्धा रूप’न्ति पुच्छितब्बे यस्मा रूपन्तिवचनेन रूपक्खन्धोव अधिप्पेतो, तस्मा वचनं अनादियित्वा अत्थवसेन पुच्छन्तो खन्धा रूपक्खन्धोति आह. इमिना नयेन सब्बपदेसु अत्थो वेदितब्बो. परतो आयतनयमकादीनं निद्देसवारेपि एसेव नयो. सञ्ञा खन्धोति एत्थापि दिट्ठिसञ्ञा वा होतु, सञ्ञा एव वा, सब्बायपि खन्धभावतो आमन्ताति वुत्तं. सङ्खारा खन्धोति पदेपि एसेव नयो. खन्धविनिमुत्तको हि सङ्खारो नाम नत्थि.

३९. पटिलोमे न रूपं न खन्धोति यं धम्मजातं रूपं न होति, तं खन्धोपि न होतीति पुच्छति. विस्सज्जने पनस्स रूपं ठपेत्वा अवसेसा खन्धा न रूपं, खन्धाति रूपतो अञ्ञे वेदनादयो खन्धा रूपमेव न होन्ति, खन्धा पन होन्तीति अत्थो. रूपञ्च खन्धे च ठपेत्वा अवसेसाति पञ्चक्खन्धविनिमुत्तं निब्बानञ्चेव ¶ पञ्ञत्ति च. इतो परेसुपि ‘अवसेसा’ति पदेसु एसेव नयोति.

सुद्धखन्धवारो निट्ठितो.

४०-४४. सुद्धखन्धमूलचक्कवारे ¶ रूपं खन्धोतिआदीनं हेट्ठा वुत्तनयेनेव अत्थो वेदितब्बोति.

सुद्धखन्धमूलचक्कवारो निट्ठितो.

पण्णत्तिनिद्देसवारवण्णना.

२. पवत्तिवारवण्णना

५०-२०५. इदानि ¶ यस्स रूपक्खन्धोतिआदिना नयेन पवत्तिवारो आरद्धो. कस्मा पनेत्थ उद्देसवारो न वुत्तोति? हेट्ठा दस्सितनयत्ता. पण्णत्तिवारस्मिञ्हि उद्देसवारे नयो दस्सितो. तेन पन नयेन सक्का सो इध अवुत्तोपि जानितुन्ति तं अवत्वा निद्देसवारोव आरद्धो. इमस्मिं पन पवत्तिवारसङ्खाते महावारे उप्पादवारो, निरोधवारो, उप्पादनिरोधवारोति तयो अन्तरवारा होन्ति. तेसु पठमो धम्मानं उप्पादलक्खणस्स दीपितत्ता उप्पादवारोति वुच्चति. दुतियो तेसञ्ञेव निरोधलक्खणस्स दीपितत्ता निरोधवारोति वुच्चति. ततियो उभिन्नम्पि लक्खणानं दीपितत्ता उप्पादनिरोधवारोति वुच्चति. उप्पादवारेन चेत्थ धम्मानं उप्पज्जनाकारोव दीपितो. निरोधवारेन ‘उप्पन्नं नाम निच्चं नत्थी’ति तेसञ्ञेव अनिच्चता दीपिता. उप्पादनिरोधवारेन तदुभयं.