📜

नमो तस्स भगवतो अरहतो सम्मासम्बुद्धस्स

अभिधम्मपिटके

पञ्चपकरण-मूलटीका

धातुकथापकरण-मूलटीका

गन्थारम्भवण्णना

धातुकथापकरणं ¶ ¶ देसेन्तो भगवा यस्मिं समये देसेसि, तं समयं दस्सेतुं, विभङ्गानन्तरं देसितस्स पकरणस्स धातुकथाभावं दस्सेतुं वा ‘‘अट्ठारसही’’तिआदिमाह. तत्थ बलविधमनविसयातिक्कमनवसेन देवपुत्तमारस्स, अप्पवत्तिकरणवसेन किलेसाभिसङ्खारमारानं, समुदयप्पहानपरिञ्ञावसेन खन्धमारस्स, मच्चुमारस्स च बोधिमूले एव भञ्जितत्ता परूपनिस्सयरहितं ¶ निरतिसयं तं भञ्जनं उपादाय भगवा एव ‘‘मारभञ्जनो’’ति थोमितो. तत्थ मारे अभञ्जेसि, मारभञ्जनं वा एतस्स, न परराजादिभञ्जनन्ति मारभञ्जनो. महाविक्कन्तो महावीरियोति महावीरो.

खन्धादयो अरणन्ता धम्मा सभावट्ठेन धातुयो, अभिधम्मकथाधिट्ठानट्ठेन वाति कत्वा तेसं कथनतो इमस्स पकरणस्स धातुकथाति अधिवचनं. यदिपि अञ्ञेसु च पकरणेसु ते सभावा कथिता, एत्थ पन तेसं सब्बेसं सङ्गहासङ्गहादीसु चुद्दससु नयेसु एकेकस्मिं कथितत्ता सातिसयं कथनन्ति इदमेव एवंनामकं. एकदेसकथनमेव हि अञ्ञत्थ कतन्ति. खन्धायतनधातूहि वा खन्धादीनं अरणन्तानं सङ्गहासङ्गहादयो नया वुत्ताति तत्थ महाविसयानं धातूनं ¶ वसेन धातूहि कथा धातुकथाति एवं अस्स नामं वुत्तन्ति वेदितब्बं. द्विधा तिधा छधा अट्ठारसधाति अनेकधा धातुभेदं पकासेसीति धातुभेदप्पकासनोति. तस्सत्थन्ति तस्सा धातुकथाय अत्थं. अ-कारे आ-कारस्स लोपो दट्ठब्बो. ‘‘यं धातुकथ’’न्ति वा एत्थ पकरणन्ति वचनसेसो सत्तन्नं पकरणानं कमेन वण्णनाय पवत्तत्ताति तेन योजनं कत्वा तस्स पकरणस्स अत्थं तस्सत्थन्ति अ-कारलोपो वा. तन्ति तं दीपनं सुणाथ, तं वा अत्थं तंदीपनवचनसवनेन उपधारेथाति अत्थो. समाहिताति नानाकिच्चेहि अविक्खित्तचित्ता, अत्तनो चित्ते आहिताति वा अत्थो.

गन्थारम्भवण्णना निट्ठिता.

१. मातिकावण्णना

१. नयमातिकावण्णना

१. को ¶ ¶ पनेतस्स पकरणस्स परिच्छेदोति? न सो इध वत्तब्बो, अट्ठसालिनियं (ध. स. अट्ठ. निदानकथा) पकरणपरिच्छेदो वुत्तो एवाति दस्सेन्तो आह ‘‘चुद्दसविधेन विभत्तन्ति वुत्त’’न्ति. खन्धादीनं देसना नीयति पवत्तीयति एतेहि, खन्धादयो एव वा नीयन्ति ञायन्ति एतेहि पकारेहीति नया, नयानं मातिका उद्देसो, नया एव वा मातिकाति नयमातिका. एतेसं पदानं मूलभूतत्ताति ‘‘मूलमातिका’’ति वत्तब्बानं सङ्गहासङ्गहादीनं चुद्दसन्नं पदानं खन्धादिधम्मविभजनस्स इमस्स पकरणस्स मूलभूतत्ता निस्सयभूतत्ताति अत्थो.

२. अब्भन्तरमातिकावण्णना

२. ‘‘पञ्चक्खन्धा’’तिआदीहि रूपक्खन्धादिपदानि दस्सितानि, पटिच्चसमुप्पादवचनेन च येसु द्वादससु अङ्गेसु पच्चेकं पटिच्चसमुप्पादसद्दो वत्तति, तदत्थानि द्वादस पदानि दस्सितानीति तेसं तथादस्सितानं सरूपेनेव दस्सितानं फस्सादीनञ्च पदानं वसेन आह ‘‘पञ्चवीसाधिकेन पदसतेना’’ति. तत्थ कम्मुपपत्तिकामभवादीनं इध विभत्तानं भावनभवनभावेन भवे विय सोकादीनं जरामरणस्स विय अनिट्ठत्ता तन्निदानदुक्खभावेन च जरामरणे अन्तोगधताय पटिच्चसमुप्पादस्स द्वादसपदता दट्ठब्बा. एत्थ च पाळियं भिन्दित्वा अविस्सज्जितानम्पि सतिपट्ठानादीनं भिन्दित्वा गहणं करोन्तो तेसं भिन्दित्वापि विस्सज्जितब्बतं दस्सेतीति वेदितब्बं.

नयमातिकादिका ¶ लक्खणमातिकन्ता मातिका पकरणन्तरासाधारणताय धातुकथाय मातिका नाम, तस्सा अब्भन्तरे वुत्तो विभजितब्बानं उद्देसो अब्भन्तरमातिका नामाति इममत्थं पकासेन्तो ‘‘अयञ्ही’’तिआदिमाह. तत्थ एवं अवत्वाति यथा ‘‘सब्बापि…पे… मातिका’’ति अयं धातुकथामातिकतो बहिद्धा वुत्ता, एवं अवत्वाति अत्थो. धातुकथाय अब्भन्तरेयेवाति च धातुकथामातिकाय अब्भन्तरेयेवाति अत्थो दट्ठब्बो. तदावेणिकमातिकाअब्भन्तरे हि ठपिता तस्सायेव अब्भन्तरे ठपिताति वुत्ता ¶ . अथ वा एवं अवत्वाति यथा ‘‘सब्बापि…पे… मातिका’’ति एतेन वचनेन धातुकथातो बहिभूता कुसलादिअरणन्ता मातिका पकरणन्तरगता वुत्ता, एवं अवत्वाति अत्थो. धातुकथाय अब्भन्तरेयेवाति च इमस्स पकरणस्स अब्भन्तरे एव सरूपतो दस्सेत्वा ठपितत्ताति अत्थो. सब्बस्स अभिधम्मस्स मातिकाय असङ्गहितत्ता विकिण्णभावेन पकिण्णकता वेदितब्बा.

३. नयमुखमातिकावण्णना

३. नयानं पवत्तिद्वारभूता सङ्गहासङ्गहवियोगीसहयोगीधम्मा नयमुखानीति तेसं उद्देसो नयमुखमातिका. चुद्दसपि हि सङ्गहासङ्गहसम्पयोगविप्पयोगानं वोमिस्सकतावसेन पवत्ताति येहि ते चत्तारोपि होन्ति, ते धम्मा चुद्दसन्नम्पि नयानं मुखानि होन्तीति. तत्थ सङ्गहितेनअसङ्गहितपदादीसु सच्चादीहिपि यथासम्भवं सङ्गहासङ्गहो यदिपि वुत्तो, सो पन सङ्गाहकभूतेहि तेहि वुत्तो, न सङ्गहभूतेहि, सोपि ‘‘चक्खायतनेन ये धम्मा खन्धसङ्गहेन सङ्गहिता आयतनसङ्गहेन असङ्गहिता’’तिआदिना पुच्छितब्बविस्सज्जितब्बधम्मुद्धारे तत्थापि खन्धादीहेव सङ्गहेहि नियमेत्वा वुत्तो, तस्मा ‘‘तीहि सङ्गहो, तीहि असङ्गहो’’ति वुत्तं. पुच्छितब्बविस्सज्जितब्बधम्मुद्धारेपि पन पुच्छाविस्सज्जनेसु च रूपक्खन्धादीनं अरणन्तानं यथासम्भवं सम्पयोगविप्पयोगा चतूहेव खन्धेहि होन्तीति ‘‘चतूहि सम्पयोगो, चतूहि विप्पयोगो’’ति वुत्तं.

ननु च विप्पयोगो रूपनिब्बानेहिपि होति, कस्मा ‘‘चतूहि विप्पयोगो’’ति वुत्तन्ति? रूपनिब्बानेहि भवन्तस्सपि चतूहेव भावतो. न हि रूपं रूपेन निब्बानेन वा विप्पयुत्तं होति, निब्बानं वा रूपेन, चतूहेव पन खन्धेहि होतीति चतुन्नं खन्धानं रूपनिब्बानेहि विप्पयोगोपि विप्पयुज्जमानेहि चतूहि खन्धेहि नियमितो तेहि विना विप्पयोगाभावतो. सो चायं ¶ विप्पयोगो अनारम्मणस्स, अनारम्मणअनारम्मणमिस्सकेहि मिस्सकस्स च न होति, अनारम्मणस्स पन मिस्सकस्स च सारम्मणेन, सारम्मणस्स सारम्मणेन अनारम्मणेन मिस्सकेन च होतीति वेदितब्बो.

४. लक्खणमातिकावण्णना

४. सङ्गहोयेव ¶ सङ्गहनयो. सभागो. विसभागोति एतस्स ‘‘तीहि सङ्गहो, तीहि असङ्गहो’’ति एतेन, ‘‘चतूहि सम्पयोगो, चतूहि विप्पयोगो’’ति एतेनपि विसुं योजना कातब्बा. तेन सङ्गहो असङ्गहो च सभागो विसभागो च भावो, तथा सम्पयोगो विप्पयोगो चाति अयमत्थो विञ्ञायति. यस्स वा सङ्गहो च असङ्गहो च, सो धम्मो सभागो विसभागो च, तथा यस्स सम्पयोगो विप्पयोगो च, सोपि सभागो विसभागो चाति. तत्थ येन रूपक्खन्धो…पे… मनोविञ्ञाणधातूति धम्मा गणनं गच्छन्ति, सो रुप्पनादिको समानभावो सङ्गहे सभागता, एकुप्पादादिको सम्पयोगे वेदितब्बो.

५. बाहिरमातिकावण्णना

५. एवं धातुकथाय मातिकतो बहि ठपितत्ताति ‘‘सब्बापि…पे… मातिका’’ति एतेन ठपनाकारेन बहि पिट्ठितो ठपितत्ताति अत्थो. एतेन वा ठपनाकारेन कुसलादीनं अरणन्तानं इध अट्ठपेत्वा धातुकथाय मातिकतो बहि पकरणन्तरमातिकाय इमस्स पकरणस्स मातिकाभावेन ठपितत्ता तथा पकासितत्ताति अत्थो.

सङ्गहो असङ्गहोतिआदीसु सङ्गहो एकविधोव, सो कस्मा ‘‘चतुब्बिधो’’ति वुत्तोति? सङ्गहोति अत्थं अवत्वा अनिद्धारितत्थस्स सद्दस्सेव वुत्तत्ता. सङ्गहो असङ्गहोतिआदीसु सद्देसु सङ्गहसद्दो ताव अत्तनो अत्थवसेन चतुब्बिधोति अयञ्हेत्थत्थो. अत्थोपि वा अनिद्धारितविसेसो सामञ्ञेन गहेतब्बतं पत्तो ‘‘सङ्गहो असङ्गहो’’तिआदीसु ‘‘सङ्गहो’’ति वुत्तोति न कोचि दोसो. निद्धारिते हि विसेसे तस्स एकविधता सिया, न ततो पुब्बेति. जातिसद्दस्स सापेक्खसद्दत्ता ‘‘जातिया सङ्गहो’’ति वुत्ते ‘‘अत्तनो जातिया’’ति विञ्ञायति सम्बन्धारहस्स अञ्ञस्स अवुत्तत्ताति जातिसङ्गहोति रूपकण्डे वुत्तो सजातिसङ्गहो वुत्तो होति.

एत्थ ¶ ¶ नयमातिकाय ‘‘सङ्गहो असङ्गहो, सम्पयोगो विप्पयोगो’’ति इमे द्वे पुच्छितब्बविस्सज्जितब्बधम्मविसेसं अनिद्धारेत्वा सामञ्ञेन धम्मानं पुच्छनविस्सज्जननयउद्देसा, अवसेसा निद्धारेत्वा. ‘‘सङ्गहितेन असङ्गहित’’न्ति हि ‘‘सङ्गहितेन असङ्गहितं असङ्गहित’’न्ति वत्तब्बे एकस्स असङ्गहितसद्दस्स लोपो दट्ठब्बो. तेन सङ्गहितविसेसविसिट्ठो यो असङ्गहितो धम्मविसेसो, तन्निस्सितो असङ्गहिततासङ्खातो पुच्छाविस्सज्जननयो उद्दिट्ठो होति, ‘‘सङ्गहितेना’’ति च विसेसने करणवचनं दट्ठब्बं. एस नयो ततियादीसु दसमावसानेसु नयुद्देसेसु छट्ठवज्जेसु. तेसुपि हि वुत्तनयेन द्वीहि द्वीहि पदेहि पुच्छितब्बविस्सज्जितब्बधम्मविसेसनिद्धारणं कत्वा तत्थ तत्थ अन्तिमपदसदिसेन ततियपदेन पुच्छनविस्सज्जननया उद्दिट्ठाति. तत्थ चतुत्थपञ्चमेसु कत्तुअत्थे करणनिद्देसो, सत्तमादीसु च चतूसु सहयोगे दट्ठब्बो, न दुतियततियेसु विय समानाधिकरणे विसेसने. तत्थ हि सभावन्तरेन सभावन्तरस्स विसेसनं कतं, एतेसु धम्मन्तरेन धम्मन्तरस्साति. एकादसमादीसु पन चतूसु आदिपदेनेव धम्मविसेसनिद्धारणं कत्वा इतरेहि पुच्छनविस्सज्जननया उद्दिट्ठा. विसेसने एव चेत्थ करणवचनं दट्ठब्बं. पुच्छाविस्सज्जनानञ्हि निस्सयभूता धम्मा सङ्गहिततादिविसेसेन करणभूतेन सम्पयुत्तविप्पयुत्तादिभावं अत्तनो विसेसेन्तीति.

विकप्पतोति विविधकप्पनतो, विभागतोति अत्थो. सन्निट्ठानवसेनाति अधिमोक्खसम्पयोगवसेन. सन्निट्ठानवसेन वुत्ता च सब्बे च चित्तुप्पादा सन्निट्ठानवसेन वुत्तसब्बचित्तुप्पादा, तेसं साधारणवसेनाति एवमेत्थ अत्थो दट्ठब्बो. अधिमोक्खो हि सन्निट्ठानवसेन वुत्तानं चित्तुप्पादानं साधारणवसेन वुत्तो, इतरे सब्बेसन्ति. तत्थ साधारणा पसटा पाकटा चाति आदितो परिग्गहेतब्बा, तस्मा तेसं सङ्गहादिपरिग्गहत्थं उद्देसो कतो, असाधारणापि पन परिग्गहेतब्बावाति तेसु महाविसयेन अञ्ञेसम्पि सङ्गहादिपरिग्गहं दस्सेतुं अधिमोक्खो उद्दिट्ठो. ‘‘सन्निट्ठानवसेन वुत्ता’’ति च धम्मसङ्गहवण्णनायं पटिच्चसमुप्पादविभङ्गे च वचनं सन्धाय वुत्तन्ति वेदितब्बं. सन्निट्ठानवसेन ये वुत्ता, तेसं सब्बेसं साधारणतोति पन अत्थे सति ¶ साधारणासाधारणेसु वत्तब्बेसु यो असाधारणेसु महाविसयो अधिमोक्खो, तस्स वसेन वुत्तसब्बचित्तुप्पादसाधारणतो फस्सादयो सब्बसाधारणाति अधिमोक्खो च असाधारणेसु महाविसयोति कत्वा वुत्तो अञ्ञस्स तादिसस्स अभावाति अयमधिप्पायो दट्ठब्बो.

जीवितिन्द्रियं ¶ पनेत्थ रूपमिस्सकत्ता न वुत्तन्ति वेदितब्बं, चित्तेकग्गता पन असमाधिसभावा सामञ्ञसद्देनेव सामञ्ञविसेससद्देहि च समाधिसभावा विसेससद्दवचनीयं अञ्ञं ब्यापेतब्बं निवत्तेतब्बञ्च नत्थीति अनञ्ञब्यापकनिवत्तकसामञ्ञविसेसदीपनतो तस्सेव धम्मस्स भेददीपकेहि वत्तब्बा, न सुखादिसभावा वेदना विय वुत्तलक्खणविपरीतेहि सामञ्ञविसेससद्देहेव, तस्मा ‘‘चित्तेकग्गता’’ति अयं सामञ्ञसद्दो समाधिसभावे विसेससद्दनिरपेक्खो पवत्तमानो सयमेव विसेससद्दमापज्जित्वा असमाधिसभावमेव पकासेय्य, इतरो च समाधिसभावमेवाति द्विधा भिन्ना चित्तेकग्गता असाधारणा चेव अप्पविसया चाति इध उद्देसं न अरहति. अभिन्नापि वा फस्सादीनं विय पाकटत्ताभावतो अञ्ञधम्मनिस्सयेन वत्तब्बतो च सा जीवितञ्च न अरहतीति न उद्दिट्ठाति.

मातिकावण्णना निट्ठिता.

२. निद्देसवण्णना

१. पठमनयो सङ्गहासङ्गहपदवण्णना

१. खन्धपदवण्णना

६. खन्धायतनधातुयोमहन्तरे ¶ ¶ अभिञ्ञेय्यधम्मभावेन वुत्ता, तेसं पन सभावतो अभिञ्ञातानं धम्मानं परिञ्ञेय्यतादिविसेसदस्सनत्थं सच्चानि, अधिपतियादिकिच्चविसेसदस्सनत्थं इन्द्रियादीनि च वुत्तानीति सच्चादिविसेसो विय सङ्गहासङ्गहविसेसो च अभिञ्ञेय्यनिस्सितो वुच्चमानो सुविञ्ञेय्यो होतीति ‘‘तीहि सङ्गहो. तीहि असङ्गहो’’ति नयमुखमातिका ठपिताति वेदितब्बा. एवञ्च कत्वा ‘‘चतूही’’ति वुत्ता सम्पयोगविप्पयोगा च अभिञ्ञेय्यनिस्सयेन खन्धादीहेव पुच्छित्वा विस्सज्जिताति. रूपक्खन्धो एकेन खन्धेनाति ये धम्मा ‘‘रूपक्खन्धो’’ति वुच्चन्ति, तेसं पञ्चसु खन्धेसु रूपक्खन्धभावेन सभागता होतीति रूपक्खन्धभावसङ्खातेन, रूपक्खन्धवचनसङ्खातेन वा गणनेन सङ्गहं गणनं दस्सेति. तेनाह ‘‘यञ्हि किञ्ची’’तिआदि. रूपक्खन्धोति हि सङ्गहितब्बधम्मो दस्सितो. येन सङ्गहेन सङ्गय्हति, तस्स सङ्गहस्स दस्सनं ‘‘एकेन खन्धेना’’ति वचनं. पञ्चसु खन्धगणनेसु एकेन खन्धगणनेन गणितोति अयञ्हेत्थ अत्थो. यस्मा च खन्धादिवचनेहि सङ्गहो वुच्चति, तस्मा उपरि ‘‘खन्धसङ्गहेन सङ्गहिता’’तिआदिं वक्खतीति.

असङ्गहनयनिद्देसेति इदं ‘‘सङ्गहो असङ्गहो’’ति एतस्सेव नयस्स एकदेसनयभावेन वुत्तं, न नयन्तरतायाति दट्ठब्बं. रूपक्खन्धमूलकायेव चेत्थ दुकतिकचतुक्का दस्सिताति एतेन वेदनाक्खन्धमूलका पुरिमेन योजियमाने विसेसो नत्थीति पच्छिमेहेव योजेत्वा तयो दुका द्वे तिका ¶ एको चतुक्को, सञ्ञाक्खन्धमूलका द्वे दुका एको तिको, सङ्खारक्खन्धमूलको एको दुकोति एते लब्भन्तीति दस्सेति. तेसं पन भेदतो पञ्चकपुच्छाविस्सज्जनानन्तरं पुच्छाविस्सज्जनं कातब्बं संखित्तन्ति दट्ठब्बं, वुत्तनयेन वा सक्का ञातुन्ति पाळिं न आरोपितन्ति.

आयतनपदादिवण्णना

४०. यस्मा ¶ च दुकतिकेसूति यदिपि एककेपि सदिसं विस्सज्जनं, एकके पन सदिसविस्सज्जनानं चक्खुन्द्रियसोतिन्द्रियसुखिन्द्रियादीनं दुकादीसु असदिसविस्सज्जनं दिट्ठं. न हेत्थ चक्खुसोतचक्खुसुखिन्द्रियदुकानं अञ्ञमञ्ञसदिसविस्सज्जनं, नापि दुकेहि तिकस्स, इध पन दुक्खसमुदयदुक्खमग्गदुकानं अञ्ञमञ्ञं तिकेन च सदिसं विस्सज्जनन्ति दुकतिकेस्वेव सदिसविस्सज्जनतं समुदयानन्तरं मग्गसच्चस्स वचने कारणं वदति.

६. पटिच्चसमुप्पादवण्णना

६१. ‘‘पुच्छं अनारभित्वा अविज्जा एकेन खन्धेन, अविज्जापच्चया सङ्खारा एकेन खन्धेना’’ति लिखितब्बेपि पमादवसेन ‘‘अविज्जा एकेन खन्धेना’’ति इदं न लिखितन्ति दट्ठब्बं. सरूपेकसेसं वा कत्वा अविज्जावचनेन अविज्जाविस्सज्जनं दस्सितन्ति. सब्बम्पि विपाकविञ्ञाणन्ति एत्थ विपाकग्गहणेन विसेसनं न कातब्बं. कुसलादीनम्पि हि विञ्ञाणानं धातुकथायं सङ्खारपच्चयाविञ्ञाणादिपदेहि सङ्गहितता विप्पयुत्तेनसङ्गहितासङ्गहितपदनिद्देसे ‘‘विपाका धम्मा’’ति इमस्स विस्सज्जनासदिसेन तेसं विस्सज्जनेन दस्सिता, इध च नामरूपस्स एकादसहायतनेहि सङ्गहवचनेन अकम्मजानम्पि सङ्गहितता विञ्ञायतीति.

७१. जायमानपरिपच्चमानभिज्जमानानं जायमानादिभावमत्तत्ता जातिजरामरणानि परमत्थतो विनिब्भुज्जित्वा अनुपलब्भमानानि परमत्थानं सभावमत्तभूतानि, तानि रूपस्स निब्बत्तिपाकभेदभूतानि रुप्पनभावेन गय्हन्तीति रूपक्खन्धधम्मसभागानि, अरूपानं पन निब्बत्तिआदिभूतानि रूपकलापजातिआदीनि विय सहुप्पज्जमानचतुक्खन्धकलापनिब्बत्तिआदिभावतो एकेकभूतानि वेदियनसञ्जाननविजाननेहि एकन्तपरमत्थकिच्चेहि अगय्हमानानि सङ्खताभिसङ्खरणेन अनेकन्तपरमत्थकिच्चेन गय्हन्तीति सङ्खारक्खन्धधम्मसभागानि, तथा दुविधानिपि ¶ तानि चक्खायतनादीहि एकन्तपरमत्थकिच्चेहि अगय्हमानानि निस्सत्तट्ठेन धम्मायतनधम्मधातुधम्मेहि सभागानि, तेन तेहि खन्धादीहि सङ्गय्हन्तीति ‘‘जाति द्वीहि खन्धेही’’तिआदिमाह.

पठमनयसङ्गहासङ्गहपदवण्णना निट्ठिता.

२. दुतियनयो सङ्गहितेनअसङ्गहितपदवण्णना

१७१. सङ्गहितेनअसङ्गहितपदनिद्देसे ¶ यं तं उद्देसे असङ्गहितताय पुच्छितब्बं विस्सज्जितब्बञ्च सङ्गहितताविसिट्ठं असङ्गहितं धम्मजातं निद्धारितं, तदेव ताव दस्सेन्तो ‘‘चक्खायतनेन ये धम्मा खन्धसङ्गहेन सङ्गहिता आयतनधातुसङ्गहेन असङ्गहिता’’ति आह. सब्बत्थ खन्धादिसङ्गहसामञ्ञानं निच्चं विसेसापेक्खत्ता भेदनिस्सितत्ता च पुच्छाविस्सज्जनानं सविसेसाव खन्धादिगणना सुद्धा. तत्थ सङ्गहितेनअसङ्गहितवचनमत्तेन धम्मविसेसस्स निद्धारितत्ता तीसु सङ्गहेसु एकेन द्वीहि वा ये सङ्गहिता हुत्वा अञ्ञेहि असङ्गहिता, तेयेव धम्मा ‘‘खन्धसङ्गहेन सङ्गहिता आयतनधातुसङ्गहेन असङ्गहिता’’ति एत्तकेनेव दस्सेतब्बा सियुं, तेसं पन एवंविधानं असम्भवा नयमातिकाय च अब्भन्तरबाहिरमातिकापेक्खत्ता उद्देसेपि यं यं रूपक्खन्धादीसु अरणन्तेसु सङ्गाहकं, तं तं अपेक्खित्वा सङ्गहितेनअसङ्गहितं निद्धारितन्ति विञ्ञायतीति तेन तेन सङ्गाहकेन यथानिद्धारितं धम्मं नियमेत्वा दस्सेतुं ‘‘चक्खायतनेना’’तिआदिमाह. यत्थ हि पुच्छितब्बविस्सज्जितब्बधम्मविसेसनिद्धारणं नत्थि, तस्मिं पठमनये छट्ठनये च पुच्छितब्बविस्सज्जितब्बभावेन, इतरेसु च यं यं पुच्छितब्बविस्सज्जितब्बं निद्धारितं, तस्स तस्स नियामकभावेन रूपक्खन्धादयो अरणन्ता उद्दिट्ठाति.

तत्थ ‘‘चक्खायतनेन…पे… फोट्ठब्बधातुया’’ति कत्तुअत्थे करणनिद्देसो दट्ठब्बो, ‘‘खन्धसङ्गहेन आयतनसङ्गहेन धातुसङ्गहेना’’ति करणत्थे. एत्थ च येन येन सङ्गाहकेन खन्धादिसङ्गहेसु तेन तेन सङ्गहेतब्बासङ्गहेतब्बं अञ्ञं अत्थि, तं तदेव सङ्गाहकासङ्गाहकभावेन उद्धटं. रूपक्खन्धेन पन खन्धसङ्गहेन सङ्गहेतब्बो अञ्ञो धम्मो नत्थि, तथा वेदनाक्खन्धादीहि ¶ , न च सो एव तस्स सङ्गाहको असङ्गाहको वा होति. यञ्च ‘‘रूपक्खन्धो एकेन खन्धेन सङ्गहितो’’ति वुत्तं, तञ्च न तस्सेव तेन सङ्गहिततं सन्धाय वुत्तं, रूपक्खन्धभावेन पन रूपक्खन्धवचनेन वा गहिततं सन्धाय वुत्तन्ति पकासितोयमत्थो.

यदि च सो एव तेन सङ्गय्हेय्य, सङ्गहितेनसम्पयुत्तविप्पयुत्तपदनिद्देसे – ‘‘वेदनाक्खन्धेन ये धम्मा खन्धसङ्गहेन सङ्गहिता आयतनसङ्गहेन ¶ सङ्गहिता धातुसङ्गहेन सङ्गहिता, ते धम्मा तीहि खन्धेहि एकेनायतनेन सत्तहि धातूहि सम्पयुत्ता’’तिआदि वत्तब्बं सिया, न च वुत्तं, तस्मा यथा चित्तं चित्तेन सम्पयुत्तं विप्पयुत्तञ्च न होति, एवं रूपक्खन्धो रूपक्खन्धेन सङ्गहितो असङ्गहितो च न होति, तथा वेदनाक्खन्धादयो वेदनाक्खन्धादीहि. न हि सो एव तस्स सभागो विसभागो चाति. तेनेव न एकदेसा विय समुदायस्स, समुदायो एकदेसानं सङ्गाहको असङ्गाहको च. यथा रूपक्खन्धो चक्खायतनादीनं, धम्मायतनं वेदनाक्खन्धादीनं, सरणा धम्मा चतुन्नं खन्धानं. समुदायन्तोगधानञ्हि एकदेसानं न विभागो अत्थि, येन ते समुदायस्स समुदायो च तेसं सभागो विसभागो च सियाति, तथा न समुदायो एकदेससभागविसभागानं सङ्गाहको असङ्गाहको च. यथा धम्मायतनं सुखुमरूपसभागस्स वेदनादिविसभागस्स च रूपक्खन्धेकदेसस्स खन्धसङ्गहेन, जीवितिन्द्रियं रूपारूपजीवितसभागविसभागस्स रूपक्खन्धेकदेसस्स सङ्खारक्खन्धेकदेसस्स च जीवितवज्जस्स खन्धसङ्गहेनेव. न हि एकदेससभागं समुदायसभागं, नापि एकदेसविसभागं समुदायविसभागन्ति, तस्मा सतिपि अत्ततो अत्तनि अन्तोगधतो अत्तेकदेससभागतो च अञ्ञस्स असङ्गाहकत्ते सङ्गाहकत्तमेव एतेसं नत्थि, येन सङ्गहितस्स असङ्गाहका सियुन्ति सङ्गाहकत्ताभावतो एव एवरूपानं अग्गहणं वेदितब्बं.

यं पन ‘‘धम्मायतनं असङ्खतं खन्धतो ठपेत्वा चतूहि खन्धेहि सङ्गहित’’न्ति (धातु. २५), ‘‘चक्खायतनञ्च सोतायतनञ्च एकेन खन्धेन सङ्गहित’’न्ति (धातु. २६) च वुत्तं, न तेन एकदेसानं समुदायसङ्गाहकत्तं, समुदायस्स च एकदेससङ्गाहकत्तं दस्सेति, चतुक्खन्धगणनभेदेहि पन धम्मायतनस्स गणेतब्बागणेतब्बभावेन पञ्चधा भिन्नतं, चक्खायतनादीनं एकक्खन्धगणनेन गणेतब्बताय एकविधतञ्च दस्सेति. सङ्गाहकासङ्गाहकनिरपेक्खानं गणेतब्बागणेतब्बानं तंतंगणनेहि गणनदस्सनमत्तमेव हि पठमनयो कम्मकरणमत्तसब्भावा, दुतियादयो पन सङ्गाहकासङ्गाहकेहि सङ्गहितासङ्गहितानं अगणनादिदस्सनानि कत्तुकरणकम्मत्तयसब्भावा ¶ . तथा पठमनये तथा तथा गणेतब्बागणेतब्बभावसङ्खातो तंतंखन्धादिभावाभावो सभागविसभागता ¶ , दुतियादीसु यथानिद्धारितधम्मदस्सने सङ्गाहकसङ्गहेतब्बानं समानक्खन्धादिभावो सभागता, तदभावो च विसभागता. पुच्छाविस्सज्जनेसु तंतंखन्धादिभावाभावो एवाति अयमेतेसं विसेसोति.

समुदयसच्चसुखिन्द्रियसदिसानि पन तेहि सङ्गहेतब्बमेव अत्थि, न सङ्गहितं असङ्गहेतब्बन्ति असङ्गाहकत्ताभावतो न उद्धटानि. दुक्खसच्चसदिसानि तेहि विसभागसमुदायभूतेहि अनेकक्खन्धेहि खन्धसङ्गहेन सङ्गहेतब्बं, इतरेहि असङ्गहेतब्बञ्च नत्थीति सङ्गाहकत्तासङ्गाहकत्ताभावतो. एवं सङ्गाहकत्ताभावतो असङ्गाहकत्ताभावतो उभयाभावतो च यथावुत्तसदिसानि अनुद्धरित्वा सङ्गाहकत्तासङ्गाहकत्तभावतो चक्खायतनादीनेव उद्धटानीति वेदितब्बानि. तत्थ ‘‘चक्खायतनेन ये धम्मा खन्धसङ्गहेन सङ्गहिता’’ति चक्खायतनवज्जा रूपधम्मा खन्धसङ्गहेन सङ्गहिताति वेदितब्बा, न रूपक्खन्धोति. न हि एकदेसो समुदायसङ्गाहकोति दस्सितमेतन्ति.

अट्ठकथायं पन खन्धपदेनाति खन्धपदसङ्गहेनाति अत्थो, न सङ्गाहकेनाति. ‘‘केनचि सङ्गाहकेना’’ति इदं पन आनेत्वा वत्तब्बं. तं पन रूपक्खन्धादीसु न युज्जतीति तं विस्सज्जनं रूपक्खन्धादीसु सङ्गाहकेसु न युज्जतीति अत्थो. रूपक्खन्धेन हि…पे… सङ्गहितोति एतेन नयेन चक्खायतनेन रूपक्खन्धोव सङ्गहितो, सो च अड्ढेकादसहि आयतनधातूहि असङ्गहितो नाम नत्थीति एवं चक्खायतनादीनिपि न गहेतब्बानीति आपज्जतीति चे? नापज्जति. न हि अञ्ञमत्तनिवारणं एवसद्दस्स अत्थो, अथ खो सङ्गाहकतो अञ्ञनिवारणं. सो चातिआदि च न निरपेक्खवचनं, अथ खो सङ्गाहकापेक्खन्ति. कथं? रूपक्खन्धेन हि रूपक्खन्धोव सङ्गहितोति यथा चक्खायतनेन चक्खायतनतो अञ्ञम्पि खन्धसङ्गहेन सङ्गहितं अत्थि, यं आयतनधातुसङ्गहेहि असङ्गहितं होति, न एवं रूपक्खन्धेन रूपक्खन्धतो अञ्ञं खन्धसङ्गहेन सङ्गहितं अत्थि, यं आयतनधातुसङ्गहेहि असङ्गहितं सिया, रूपक्खन्धेन पन रूपक्खन्धोव खन्धसङ्गहेन सङ्गहितोति अयञ्हेत्थ अधिप्पायो युत्तो. सिया पनेतं ‘‘सो एव रूपक्खन्धो रूपक्खन्धेन आयतनधातुसङ्गहेहि असङ्गहितो होतू’’ति, तं निवारेन्तो आह ‘‘सो च अड्ढेकादसहि आयतनधातूहि असङ्गहितो नाम नत्थी’’ति ¶ . एत्थ च ‘‘रूपक्खन्धेना’’ति आनेत्वा वत्तब्बं. तत्थ ¶ रूपक्खन्धो रूपक्खन्धस्स वा तदेकदेसानं वा चक्खादीनं आयतनधातुसङ्गहेहि सङ्गाहको असङ्गाहको च न होतीति इमिना परियायेन असङ्गहितताय अभावो वुत्तोति युज्जति, न रूपक्खन्धेन रूपक्खन्धस्स तदेकदेसानं वा अड्ढेकादसहि आयतनधातुसङ्गहेहि सङ्गहितताय. न हि सा सङ्गहितता अत्थि. यदि सिया, सङ्गहितेनसम्पयुत्तविप्पयुत्तपदनिद्देसे रूपक्खन्धोपि उद्धरितब्बो सिया. तेन हि तीहिपि सङ्गहेहि रूपक्खन्धो तदेकदेसो वा सङ्गहिता सियुं, अत्थि च तेसं विप्पयुत्तताति.

एवं असङ्गहितताय अभावतो एतानि, अञ्ञानि चाति एत्थापि चक्खायतनादीहि विय एतेहि अञ्ञेहि च सङ्गहितानं असङ्गहितताय अभावतो एतानि अञ्ञानि च यथा वा तथा वा एतानि विय अयुज्जमानविस्सज्जनत्ता एवरूपानि पदानि सङ्गाहकभावेन न गहितानीति अधिप्पायो.

तत्थ यं वुत्तं ‘‘रूपक्खन्धेन हि रूपक्खन्धोव सङ्गहितो’’ति, तं तेनेव तस्स सङ्गहितत्तासङ्गहितत्ताभावदस्सनेन निवारितं. यञ्हेत्थ अग्गहणे कारणं वुत्तं, तञ्च सतिपि सङ्गहितत्ते असङ्गहितताय अभावतोति विञ्ञायमानं समुदयसच्चादीसु युज्जेय्य सति तेहि सङ्गहिते तदसङ्गहितत्ताभावतो. रूपक्खन्धादीहि पन सङ्गहितमेव नत्थि, कुतो तस्स असङ्गहितता भविस्सति, तस्मा सङ्गाहकत्ताभावो एवेत्थ अग्गहणे कारणन्ति युत्तं. सङ्गहितत्ताभावेन असङ्गहितत्तं यदिपि रूपक्खन्धादिना अत्तनो अत्तनि अन्तोगधस्स अत्तेकदेससभागस्स च नत्थि, अञ्ञस्स पन अत्थीति न दुक्खसच्चादीसु विय उभयाभावो चेत्थ अग्गहणे कारणं भवितुं युत्तोति. धम्मायतनजीवितिन्द्रियादीनञ्च खन्धचतुक्कदुकादिसङ्गाहकत्ते सति न तेसं सङ्गहितानं तेहि धम्मायतनजीवितिन्द्रियादीहि आयतनधातुसङ्गहेहि असङ्गहितता नत्थीति असङ्गहितताय अभावो अनेकन्तिको, तस्मा पुब्बे वुत्तनयेनेव अग्गहितानं अग्गहणे, गहितानञ्च गहणे कारणं वेदितब्बन्ति.

अनिदस्सनं पुनदेव सप्पटिघन्ति एत्थ अनिदस्सनन्ति एतेन ‘‘सनिदस्सनसप्पटिघ’’न्ति एत्थ वुत्तेन सप्पटिघसद्देन सद्धिं योजेत्वा अनिदस्सनसप्पटिघा ¶ दस्सिता. पुनदेवाति एतेन तत्थेव अविसिट्ठं सनिदस्सनपदं निवत्तेत्वा गण्हन्तो सनिदस्सनदुकपदं दस्सेति. ‘‘चक्खायतनेन चक्खायतनमेवेकं सङ्गहित’’न्ति इदं न सक्का वत्तुं. न हि ‘‘चक्खायतनेन ¶ चक्खायतनं आयतनसङ्गहेन सङ्गहित’’न्ति च ‘‘असङ्गहित’’न्ति च वत्तब्बन्ति दस्सितोयं नयोति. एवं सब्बत्थ तस्सेव समुदायेकदेसानञ्च सङ्गाहकसङ्गहितन्ति वचनेसु असङ्गाहकअसङ्गहितन्ति वचनेसु च तदवत्तब्बता योजेतब्बा. असङ्गाहकत्ताभावतो एव हि चक्खायतनादीनि चक्खायतनादीहि असङ्गहितानीति न वुच्चन्ति, न सङ्गाहकत्ताभावतोति.

दुतियनयसङ्गहितेनअसङ्गहितपदवण्णना निट्ठिता.

३. ततियनयो असङ्गहितेनसङ्गहितपदवण्णना

१७९. असङ्गहितेनसङ्गहितपदनिद्देसे रूपक्खन्धेन खन्धसङ्गहेन असङ्गहितेसु वेदनादीनं तिण्णं खन्धानं निब्बानस्स च सुखुमरूपेन सह आयतनधातुसभागत्ते सतिपि न सुखुमरूपमेव रूपक्खन्धोति रूपक्खन्धेन आयतनधातुसभागत्तं नत्थि, तस्मा न तेन तानि आयतनधातुसङ्गहेहि सङ्गहितानि. न केवलं सङ्गहितानेव, असङ्गहितानिपि तेन तानि तेहि सङ्गहेहि न होन्तेव तदेकदेसेन सुखुमरूपेन आयतनधातुसभागत्ता, सङ्गहिताभावो एव पन इधाधिप्पेतो, विञ्ञाणक्खन्धचक्खायतनादीहि पन असङ्गहिता न ते तेहि कथञ्चि सम्मिस्साति सब्बथा ते तेहि न सङ्गहिता. दुक्खसच्चादीहि च पञ्चक्खन्धसमुदायभूतेहि खन्धसङ्गहेन असङ्गहितं निब्बानं रूपक्खन्धेन विय आयतनधातुसङ्गहेहि सङ्गहितं तेहि न होति, तस्मा सङ्गाहकत्ताभावतो एव एवरूपानं असङ्गाहकभावेन अग्गहणं वेदितब्बं, सनिब्बानपञ्चक्खन्धसमुदायभूतानं पन अब्याकतधम्मादीनं असङ्गाहकत्ताभावतोव. न हि तं कञ्चि अत्थि, यस्स ते खन्धसङ्गहेन असङ्गाहका सियुं, न च अत्तनो एकदेसो अत्तेकदेससभागो च अत्तना असङ्गहितो होतीति अत्तना असङ्गहितसङ्गाहकत्ता पन वेदनाक्खन्धादीनं गहणं कतन्ति.

यं ¶ पन अट्ठकथायं वुत्तं ‘‘ये धम्मायतनेन सङ्गहिता’’ति, तं न सक्का वत्तुं. धम्मायतनेन हि न कोचि धम्मो केनचि सङ्गहेन सङ्गहितो अत्थि विसभागक्खन्धनिब्बानसमुदायत्ता ¶ , खन्धसङ्गहेन सयमेव अत्तनो सङ्गाहकं न होतीति आयतनधातुसङ्गहेहि च सङ्गाहकत्ताभावतोति दस्सितोयं नयोति एतस्स धम्मायतनगणनेन गणिताति अत्थो. यानि…पे… गहितानीति एतेन विञ्ञाणसम्मिस्सं धम्मायतनेकदेसं दीपेन्तानि इद्धिपादादिपदानि, ओळारिकरूपसम्मिस्सं दीपेन्तानि रूपक्खन्धादिपदानि, सब्बेन सब्बं धम्मायतनं अदीपेन्तानि विञ्ञाणक्खन्धचक्खायतनादिपदानि, सकलधम्मायतनदीपकानि धम्मायतनादिपदानि च वज्जेत्वा धम्मायतनेकदेसं अञ्ञायतनेन असम्मिस्सं दीपेन्तानि गहितानीति दस्सेति.

ततियनयअसङ्गहितेनसङ्गहितपदवण्णना निट्ठिता.

४. चतुत्थनयो सङ्गहितेनसङ्गहितपदवण्णना

१९१. सङ्गहितेनसङ्गहितपदनिद्देसे यस्मा यथा दुतियततियनया तिण्णं सङ्गहानं सङ्गहणासङ्गहणप्पवत्तिविसेसेन ‘‘सङ्गहितेन असङ्गहितं, असङ्गहितेन सङ्गहित’’न्ति च उद्दिट्ठा, नेवं चतुत्थपञ्चमा. सङ्गहणप्पवत्तिया एव हि सङ्गहितेन सङ्गहितं उद्दिट्ठं, असङ्गहणप्पवत्तिया एव च असङ्गहितेन असङ्गहितन्ति, तस्मा सङ्गहणप्पवत्तिविसेसविरहे सङ्गहितधम्मासङ्गहितधम्मविसेसे निस्सिता एते द्वे नयाति एत्थ केनचि सङ्गहितेन धम्मविसेसेन पुन सङ्गहितो धम्मविसेसो सङ्गहितेन सङ्गहितो सङ्गहितताय पुच्छितब्बो विस्सज्जितब्बो च, तमेव ताव यथानिद्धारितं दस्सेन्तो ‘‘समुदयसच्चेन ये धम्मा खन्ध…पे… सङ्गहिता, तेहि धम्मेहि ये धम्मा खन्ध…पे… सङ्गहिता’’ति आह. एत्थ च ये तीहिपि सङ्गहेहि न सङ्गाहका रूपक्खन्धविञ्ञाणक्खन्धधम्मायतनदुक्खसच्चादीनि विय, ये च द्वीहायतनधातुसङ्गहेहि असङ्गाहका चक्खायतनादीनि विय, ये च एकेन खन्धसङ्गहेनेव धातुसङ्गहेनेव च न सङ्गाहका वेदनादिक्खन्धनिरोधसच्चजीवितिन्द्रियादीनि विय चक्खुविञ्ञाणधातादयो विय च, ते धम्मा सङ्गाहकत्ताभावसब्भावा सङ्गाहकभावेन न उद्धटा, तीहिपि पन सङ्गहेहि ¶ ये सङ्गाहका, ते सङ्गाहकत्ताभावाभावतो इध उद्धटा. तेहि सङ्गहितापि हि एकन्तेन ¶ अत्तनो सङ्गाहकस्स सङ्गाहका होन्ति, यस्स पुन सङ्गहो पुच्छितब्बो विस्सज्जितब्बो चाति.

अट्ठकथायं पन सकलेन हि खन्धादिपदेनाति सकलवाचकेन रूपक्खन्धादिपदेनाति अत्थो. यं पनेतं वुत्तं ‘‘यं अत्तनो सङ्गाहकं सङ्गण्हित्वा पुन तेनेव सङ्गहं गच्छेय्या’’ति, तं तेन खन्धादिपदेनाति एवं अयोजेत्वा तं अञ्ञं सङ्गहितं नाम नत्थीति एवं न सक्का वत्तुं. न हि येन यं सङ्गहितं, तेनेव तस्स सङ्गहो पुच्छितो विस्सज्जितो, न च तस्सेव, अथ खो तेन सङ्गहितस्साति. यथा वेदना सद्दो च खन्धो आयतनञ्च, न एवं सुखुमरूपं, तं पन खन्धायतनानं एकदेसोव, तस्मा ‘‘सुखुमरूपेकदेसं वा’’ति अवत्वा ‘‘सुखुमरूपं वा’’ति वुत्तं. सब्बत्थ च अञ्ञेन असम्मिस्सन्ति योजेतब्बं. यम्पि चेतं वुत्तं ‘‘तदेव येहि धम्मेहि खन्धादिवसेन सङ्गहितं, ते धम्मे सन्धाया’’ति, तम्पि तथा न सक्का वत्तुं. न हि सङ्गहितेन सङ्गहितस्स सङ्गहितेन सङ्गहो एत्थ पुच्छितो विस्सज्जितो च, अथ खो सङ्गहोव, तस्मा एकेन खन्धेनाति एकेन खन्धगणनेनाति अयमेवेत्थ अत्थो, न सङ्गाहकेनाति. न हि एको खन्धो अत्तनो एकदेसस्स सङ्गाहकोति.

चतुत्थनयसङ्गहितेनसङ्गहितपदवण्णना निट्ठिता.

५. पञ्चमनयो असङ्गहितेनअसङ्गहितपदवण्णना

१९३. असङ्गहितेनअसङ्गहितपदनिद्देसेपि वुत्तनयेनेव यथानिद्धारितधम्मदस्सनं वेदितब्बं. एत्थ च ससुखुमरूपविञ्ञाणसहितधम्मसमुदाया ये ते दुक्खसच्चअनिदस्सनअप्पटिघअचेतसिकानुपादासदिसा सतिपि एकेन द्वीहि वा सङ्गहेहि केसञ्चि असङ्गाहकत्ते तीहिपि असङ्गहेतब्बस्स अभावतो परिपुण्णसङ्गहासङ्गाहका न होन्ति, अब्याकतधम्मसदिसा केनचि सङ्गहेन असङ्गहेतब्बभावतो असङ्गाहका एव न होन्ति, तेन ते असङ्गाहकभावेन न उद्धटा, इतरे पन तब्बिपरियायेन उद्धटाति.

यं ¶ ¶ पन अट्ठकथायं ‘‘तादिसेन हि पदेन निब्बानं खन्धसङ्गहमत्तं न गच्छेय्या’’ति वुत्तं, तं दुक्खसच्चं सन्धाय वुत्तं. अनिदस्सनअप्पटिघेसु पन असङ्गाहकेसु निब्बानं अन्तोगधं, न च तदेव तस्स असङ्गाहकन्ति. सदिसविस्सज्जनानं वसेन समोधानेत्वा कतेहि सद्धिन्ति एवं कतेहि दुतियपञ्हादीहि सद्धिं पठमपञ्हनामरूपपञ्हादयो सब्बेपि चतुत्तिंस होन्तीति अत्थो. यं पुच्छाय उद्धटं पदं, तदेवाति रूपक्खन्धादिविसेसकपदं वदति, न निद्धारिते पुच्छितब्बधम्मे. ते हि लक्खणतो दस्सिता, न पदेन सरूपतोति. तत्थ तदेवाति एव-सद्देन न तं कदाचि सङ्गहितेन असङ्गहितं न होतीति उद्धटस्सेव असङ्गहितेनअसङ्गहितभावे नियततं अञ्ञस्स च अनियततं दस्सेतीति वेदितब्बं. ‘‘तदेव येहि असङ्गहित’’न्ति एत्थ हि ‘‘नियमतो’’ति सक्का वचनसेसो योजेतुन्ति. अथ वा तदेवाति पुच्छाय उद्धटमेव एवंपकारमेव हुत्वा येहि असङ्गहितन्ति तस्स पुच्छाय उद्धटभावेन एवं असङ्गहितेनअसङ्गहितभावनियमनत्थो एव-सद्दो, न अञ्ञस्स असङ्गहितेनअसङ्गहिततानिवारणत्थोति दट्ठब्बो. पुच्छाय उद्धटञ्हि अञ्ञसहितं असहितञ्च असङ्गहितेन असङ्गहितं होति. रूपक्खन्धादीनि हि अञ्ञसहितानि विञ्ञाणक्खन्धादीनि असहितानीति.

अवसेसा सङ्गहिताति इदं अवसेसा असङ्गहिता न होन्तीति एवं दट्ठब्बं. तेहिपि विञ्ञाणधम्मेहि ते रूपधम्माव तीहि सङ्गहेहि असङ्गहिताति पुच्छाय उद्धटा तीहिपि सङ्गहेहि असङ्गाहका हुत्वा असङ्गहिताति अधिप्पायो. अनुद्धटा वेदनादयोपि हि असङ्गहिता एवाति. एत्थ च पठमे नये वेदनादयोपि विञ्ञाणेन असङ्गहिताति वुत्ता, दुतिये रूपधम्मावाति अयं विसेसो. वेदनादयो हि रूपविञ्ञाणेहेव खन्धादिसङ्गहेन असङ्गहिताति ओळारिकरूपेहि विञ्ञाणेन च तीहिपि सङ्गहेहि असङ्गहिताति अत्थो. रूपेकदेसो हि एत्थ रूपग्गहणेन गहितोति.

१९६. चतुत्थपञ्हे चक्खायतनं वेदनादीहि चतूहीति एत्थ चक्खायतनन्ति एतेन पुच्छाय उद्धटं असङ्गाहकं दस्सेतीति दट्ठब्बं. चक्खायतनेन पन असङ्गहितेन असङ्गहितानि दस ओळारिकायतनानि न चक्खायतनमेवाति. ‘‘रूपञ्च धम्मायतन’’न्तिआदिना येहि धम्मेहि तीहिपि सङ्गहेहि असङ्गहितं तं विञ्ञाणमेव होति, असङ्गहितेन तेन ¶ असङ्गहितञ्च विञ्ञाणवज्जं सब्बं तेव धम्मे उदानेति. सदिसविस्सज्जना हि एकतो उदानेत्वा दस्सेतब्बा. तत्थ पठमेन रूपक्खन्धेन सदिसविस्सज्जनेसु एकतो उदानेत्वा दस्सितेसु अञ्ञे विसदिसविस्सज्जना ¶ नयदानेन दस्सिता होन्ति. तेनाह ‘‘रूपञ्च धम्मायतनन्ति…पे… अञ्ञेनाकारेन सङ्खिपित्वा दस्सिता’’ति. तत्थ द्वे भवाति असञ्ञेकवोकारभवा. द्वेति बाहिरुपादाधम्मे एव सन्धाय वुत्तं. येन असङ्गाहकेन असङ्गहितेन असङ्गहितं पुच्छितब्बं विस्सज्जितब्बञ्च परिच्छिज्जति, सो रूपक्खन्धादिको तस्स पुच्छाविस्सज्जनानञ्च निस्सयभावतो ‘‘विसयो’’ति वुत्तो, यथादस्सितस्स पन उद्दानस्स नयदानमत्तत्ता ‘‘नयो’’ति वुत्तं. ‘‘द्वेवीसनयो चा’’तिपि पाठो, द्वेवीसपदिको एस नयो चाति अत्थो.

पञ्चमनयअसङ्गहितेनअसङ्गहितपदवण्णना निट्ठिता.

६. छट्ठनयो सम्पयोगविप्पयोगपदवण्णना

२२८. सम्पयोगविप्पयोगपदे यं लब्भति, यञ्च न लब्भति, तं सब्बं पुच्छाय गहितन्ति इदं न रूपक्खन्धादीनि पदानि सन्धाय वुत्तं, अथ खो सम्पयोगपदं विप्पयोगपदञ्चाति वेदितब्बं. रूपक्खन्धादीसु हि यं धम्मायतनादिपदं न लब्भति, तं पुच्छायपि न गहितं. सम्पयोगपदं पन रूपक्खन्धादीसु अलब्भमानम्पि ‘‘रूपक्खन्धो कतिहि…पे… सम्पयुत्तो’’ति एवं पुच्छाय गहितं, वेदनाक्खन्धादीसु लब्भमानं, विप्पयोगपदं पन सब्बत्थ लब्भमानमेवाति. रूपधम्मानं पन रूपेन निब्बानेन वा, निब्बानस्स च रूपेन सद्धिं सम्पयोगो नाम नत्थीति एकुप्पादादिसभागताय अभावतो सम्पयोगं निवारेन्तेन सा एव एकुप्पादादिता एतेसं विसभागताति तदभावतो विप्पयोगोपि निवारितो एव होतीति दट्ठब्बो. चतूसु हि खन्धेसु विज्जमाना एकुप्पादादिता तेसं अञ्ञमञ्ञं सभागता होति रूपनिब्बानेहि तेसं तेहि च रूपनिब्बानानं विसभागता च, न च रूपेकदेसस्स निब्बानस्स वा सा एकुप्पादादिता अत्थि, या रूपेकदेसेन रूपेकदेसनिब्बानानं निब्बानेन च रूपस्स विसभागता सिया. तेनेव ‘‘चतूहि विप्पयोगो’’ति वुत्तन्ति.

सत्तसु ¶ विञ्ञाणधातूसु एकायपि अविप्पयुत्तेति यथा रूपभवो तीहि विञ्ञाणधातूहि, नेवविपाकनविपाकधम्मधम्मा पञ्चहि, अवितक्कअविचारा एकाय विप्पयुत्ते अनारम्मणमिस्सके धम्मे ¶ दीपेन्ति, एवं अदीपेत्वा एकायपि विप्पयुत्ते अहोन्ते सत्तहिपि सम्पयुत्ते सत्तपि वा ता दीपेन्तीति अधिप्पायो. अविप्पयुत्तेति हि ये विप्पयुत्ता न होन्ति, ते धम्मेति वुत्तं होति, न सम्पयुत्तेति. तेन यानि ताहि सम्पयुत्ते दीपेन्ति धम्मायतनादिपदानि, यानि च सम्पयुत्तविप्पयुत्तभावेहि नवत्तब्बं दीपेन्ति अचेतसिकादिपदानि, यानि च सम्पयुत्तनवत्तब्बानि दीपेन्ति दुक्खसच्चादिपदानि, तेसं सब्बेसं अनारम्मणमिस्सकधम्मदीपकानं अग्गहणं वुत्तं होति. न हि अनारम्मणमिस्सकसब्बविञ्ञाणधातुतंसम्पयुत्ततदुभयसमुदायानं खन्धायतनधातूसु केनचि सम्पयोगो विप्पयोगो वा अत्थीति.

यदि एवं विप्पयुत्तेनविप्पयुत्तपदनिद्देसे ‘‘कुसलेहि धम्मेहि ये धम्मा विप्पयुत्ता, तेहि धम्मेहि ये धम्मा विप्पयुत्ता’’ति न वत्तब्बं. अकुसलाब्याकता हि अनारम्मणमिस्सोभयधम्माति? न, यथावुत्तसमुदायानं खन्धादीहेव सम्पयोगविप्पयोगाभाववचनतो. खन्धादयो हि तदेकदेसा तदेकदेसञ्ञसमुदाया च, समुदायेकदेसानञ्च विभागाभावतो न सभागविसभागता अत्थि, तेन तेसं खन्धादीहि सम्पयोगविप्पयोगाभावो होति. कुसला पन धम्मा अकुसलाब्याकतेहि विभत्ता, ते च कुसलेहि, न तेसं समुदायेकदेसभावो तदेकदेसञ्ञसमुदायभावो वा, तस्मा खन्धादीनि अनामसित्वा विप्पयुत्ततामत्तेन यथानिद्धारितधम्मदस्सने कुसलेहि इतरेसं, इतरेहि च कुसलानं विप्पयोगो न न होति विसभागतासब्भावतोति तेसं अञ्ञमञ्ञविप्पयुत्तता वुत्ता. एस नयो सब्बेसु एवरूपेसु.

उद्दाने पन अट्ठारस ततो परेति इदं ‘‘सोळसा’’ति वत्तब्बं, तेवीसन्ति इदञ्च ‘‘एकवीस’’न्ति. सब्बत्थ च कालसन्तानभेदरहितारहितबहुधम्मसमोधानानं सङ्खारक्खन्धधम्मायतनधम्मधातूनं एकदेसा समुदयसच्चवेदनाक्खन्धादयो एकदेससम्मिस्सा च इद्धिपादादयो अनारम्मणेहि असम्मिस्सा रूपक्खन्धादयो च सारम्मणेहि असम्मिस्सा सम्पयोगीविप्पयोगीभावेन ¶ समानकालसन्तानेहि च एकदेसन्तरेहि विभत्ता एव गहिताति तेहि ते केहिचि एकदेसन्तरेहि विभत्तेहि यथायोगं सम्पयोगं विप्पयोगञ्च लभन्ति. अत्थि हि तेसं एकुप्पादादिता सभागता विसभागता चाति. तेन तत्थ तत्थ ‘‘एकेन खन्धेन एकेनायतनेन एकाय धातुया केहिचि सम्पयुत्त’’न्ति च, ‘‘एकेनायतनेन एकाय धातुया केहिचि विप्पयुत्त’’न्ति च वुत्तं. भिन्नकालसमुदाया एव पन वेदनासञ्ञाविञ्ञाणक्खन्धा वत्तमाना च एकेकधम्मा एव, तस्मा तेसं समानकालस्स विभजितब्बस्स अभावतो न सुखिन्द्रियादीनि ¶ वेदनाक्खन्धस्स विभागं करोन्ति, चक्खुविञ्ञाणधातादयो च विञ्ञाणक्खन्धस्स मनायतनस्स च. तेन ‘‘सुखिन्द्रियं एकेन खन्धेन केहिचि विप्पयुत्त’’न्ति, ‘‘चक्खुविञ्ञाणधातु एकेन खन्धेन एकेनायतनेन केहिचि विप्पयुत्ता’’ति च एवमादि न वुत्तं, खन्धायतनविभागविरहितम्पि पन विञ्ञाणं धातुविभागेन विभत्तमेव वुत्तन्ति ‘‘चक्खुविञ्ञाणधातु…पे… मनोविञ्ञाणधातु सोळसहि धातूहि विप्पयुत्ता’’ति वुत्तं, एवमेवं इन्द्रियविभागेन विभत्तानं सुखिन्द्रियादीनं ‘‘सुखिन्द्रियेन ये धम्मा विप्पयुत्ता’’तिआदीसु यथायोगं विप्पयोगो दट्ठब्बो, नाविभत्तस्स वेदनाक्खन्धस्साति.

२३५. यथा तंसम्पयोगीभावं सन्धाय ‘‘समुदयसच्चं तीहि खन्धेहि सम्पयुत्त’’न्ति वुत्तं, एवं तंविप्पयोगीभावं सन्धाय ‘‘तीहि खन्धेहि विप्पयुत्त’’न्ति कस्मा न वुत्तन्ति चे? अविभागेहि तेहि विप्पयोगवचनस्स अयुत्तत्ता. विभागे हि सति समुदयसच्चं सुखदुक्खदोमनस्सिन्द्रियेहि मनोविञ्ञाणधातुतो अञ्ञविञ्ञाणधातूहि विप्पयुत्तन्ति युत्तं वत्तुं विभागेनेव विसभागताय सङ्गहितत्ता, विभागरहितेहि पन वेदनाक्खन्धादीहि न युत्तं, तेहि विज्जमानेहि विज्जमानस्स समुदयस्स विसभागभावाभावतो. यञ्हि अनुप्पन्ना धम्मा विय आमट्ठकालभेदं न होति सङ्खतं उद्धरितब्बं, तं पच्चुप्पन्नभावं निस्साय सम्पयोगीविप्पयोगीभावेन उद्धरीयति, तञ्च विभागरहितेहि खन्धादीहि सङ्खतेहि पच्चुप्पन्नभावमेव निस्साय अनामट्ठकालभेदे अत्थिताय एव निस्सितब्बत्ता. अविज्जमानस्स हि अविज्जमानेन, अविज्जमानस्स च विज्जमानेन, विज्जमानस्स च अविज्जमानेन सम्पयोगो नत्थि, विप्पयोगो पन अविज्जमानतादीपके भेदे गहिते तेनेव विसभागतापि गहिता एवाति होति ¶ . भेदे पन अग्गहिते तेन तेन गहणेन विसभागताय अग्गहितत्ता सति सभागत्ते विज्जमानताय एव धम्मानं सभागस्स परिच्छिन्दनतो विज्जमानता दस्सिताति एकुप्पादादिभावसङ्खाता सभागतापि गहिता एव होति. तस्सा च गहितत्ता सम्पयोगोव लब्भति, न विप्पयोगो, तस्मा समुदयसच्चं वेदनाक्खन्धादीहि सम्पयुत्तत्तेन वुत्तं, न विप्पयुत्तत्तेनाति. एस नयो मग्गसच्चादीसुपीति.

२६२. ‘‘दुतियज्झानविचारञ्हि ठपेत्वा सेसा अवितक्कविचारमत्ता’’ति अट्ठकथावचनं ये पधाना वितक्को विय कोट्ठासन्तरचित्तुप्पादेसु अलीना, ते एव इध अवितक्कविचारमत्ताति अधिप्पेताति दस्सेति. तेनेव हि अनन्तरनये समुदयसच्चेन समानगतिका न सवितक्कसविचारेहीति ¶ ते न गहिता. दसमोसाननयेसु च तेहि विप्पयुत्तेहि विप्पयुत्तानं तेहि विप्पयुत्तानञ्च सोळसहि धातूहि विप्पयोगो अट्ठारससङ्गहितो च वुत्तो. वितक्कसहितेसुपि पन तेसु गहितेसु सब्बेपि ते विचारेन सम्पयुत्ताति ‘‘एकेन खन्धेन केहिचि सम्पयुत्ता’’ति सक्का वत्तुं. सो हि समुदायो विचारं वज्जेत्वा अञ्ञेन केनचि सम्पयुत्तो न होति. न हि तदेकदेसस्स वितक्कस्स विचारतो अञ्ञेन सम्पयोगो समुदायस्स होति. यथा नानाचित्तुप्पादेसु उप्पज्जमानानं इद्धिपादानं समुदायस्स इद्धिपादस्स एकदेसानं तीहि खन्धेहि सम्पयोगो समुदायस्स न होति, एवमिधापि दट्ठब्बं. यथा पन तेसु एकोपि वेदनासञ्ञाक्खन्धेहि सङ्खारक्खन्धेकदेसेन च असम्पयुत्तो नाम नत्थीति समुदायस्स तेहि सम्पयुत्तता वुत्ता, एवमिधापि विचारेन असम्पयुत्तस्स अवितक्कविचारमत्तस्स कस्सचि अभावतो समुदायस्स तेन सम्पयुत्तता न न सक्का वत्तुं. न हि अवितक्कविचारमत्तानं दस्सनेनपहातब्बहेतुकादीनं विय सम्पयुत्तता न वत्तब्बा. यथा हि दस्सनेनपहातब्बहेतुकेसु केचि सङ्खारक्खन्धेकदेसेन मोहेन सम्पयुत्ता, केचि असम्पयुत्ताति न समुदायो तेन सम्पयुत्तो, नापि अञ्ञो कोचि धम्मो अत्थि, येन सो समुदायो सम्पयुत्तो सियाति ‘‘दस्सनेनपहातब्बहेतुका धम्मा सम्पयुत्ताति नत्थी’’ति वुत्तं, एवं भावनायपहातब्बहेतुकसहेतुकादयोपि. न पनेवं येन अवितक्कविचारमत्तसमुदायो सम्पयुत्तो सिया, तं नत्थि अवितक्कविचारमत्तेसु कस्सचि विचारेन ¶ असम्पयुत्तस्स अभावा, तस्मा ते ‘‘सम्पयुत्ता’’ति न न वत्तब्बाति. सब्बत्थ च एकधम्मेपि केहिचीति बहुवचननिद्देसो सङ्खाय अनियमितत्ता कतोति वेदितब्बो.

छट्ठनयसम्पयोगविप्पयोगपदवण्णना निट्ठिता.

७. सत्तमनयो सम्पयुत्तेनविप्पयुत्तपदवण्णना

३०६. सम्पयुत्तेनविप्पयुत्तपदनिद्देसे रूपक्खन्धादयो तेहि सम्पयुत्ताभावतो न गहिता. समुदयसच्चादीनि सतिपि तेहि सम्पयुत्ते, सम्पयुत्तेहि च विप्पयुत्ते सम्पयुत्तेनविप्पयुत्तानं खन्धादीहि विप्पयोगाभावतो. न हि समुदयसच्चेन सम्पयुत्तेहि लोभसहगतचित्तुप्पादेहि विप्पयुत्तानं ¶ ततो अञ्ञधम्मानं खन्धादीसु केनचि विप्पयोगो अत्थि. ननु च ते एव चित्तुप्पादा चत्तारो खन्धा अड्ढदुतियानि आयतनानि अड्ढदुतिया धातुयो च होन्तीति तेहि विप्पयोगो वत्तब्बोति? न, तदञ्ञधम्मानं खन्धादिभावतो. न हि ते एव धम्मा चत्तारो खन्धा, अथ खो ते च ततो अञ्ञे च, तथा अड्ढदुतियायतनधातुयोपि. न च तदञ्ञसमुदायेहि अञ्ञे विप्पयुत्ता होन्ति समुदायेकदेसानं एकदेसञ्ञसमुदायानञ्च विप्पयोगाभावतो. एस नयो मग्गसच्चसुखिन्द्रियादीसु. अवितक्कविचारमत्तेसुपि निरवसेसेसु अधिप्पेतेसु तेसं सवितक्कसविचारसमानगतिकत्ता अग्गहणे कारणं न दिस्सति.

अट्ठकथायं पन एवरूपानीति यथा रूपक्खन्धे विस्सज्जनं न युज्जति, एवं येसु अञ्ञेसुपि न युज्जति, तानि विस्सज्जनस्स अयोगेन ‘‘एवरूपानी’’ति वुत्तानि, न सम्पयुत्ताभावेनाति दट्ठब्बं. यानि पन पदानि धम्मधातुया सम्पयुत्ते धम्मे दीपेन्तीति एतेन वेदनाक्खन्धादिपदानि दस्सेति, विञ्ञाणञ्च अञ्ञेन असम्मिस्सन्ति विञ्ञाणक्खन्धमनायतनादिपदानि. तत्थ अञ्ञेन असम्मिस्सन्ति असम्पयुत्तेन असम्मिस्सन्ति अत्थो. अदुक्खमसुखायवेदनायसम्पयुत्तपदानिपि हि सम्पयुत्तेहि सम्मिस्सविञ्ञाणदीपकानि इध गहितानीति. एतेन च लक्खणेन एवरूपानेव गहितानीति दस्सेति, न एवरूपानि गहितानेवाति समुदयसच्चादिइद्धिपादादिपदानं ¶ असङ्गहितत्ता. ‘‘अथ फस्ससत्तकं चित्तं सह युत्तपदेहि सत्ता’’ति पुराणपाठो, अयं पन ऊनोति कत्वा ‘‘अथ फस्ससत्तकं, तिके तयो सत्त महन्तरे चा’’ति पाठो कतो.

३०९. पुच्छाय उद्धटपदेनेव सद्धिं विप्पयुत्तानं वसेनाति इदं पुच्छाय उद्धटपदेन सम्पयुत्तेहि विप्पयुत्ता तेन सद्धिं विप्पयुत्ता होन्तीति कत्वा वुत्तं. पाळिउद्दानगाथायं द्वे च मनेन युत्ता, वितक्कविचारणाति मनोधातुया एकन्तसम्पयुत्ता द्वे वितक्कविचाराति सवितक्कपदं सविचारपदञ्च दस्सेति.

सत्तमनयसम्पयुत्तेनविप्पयुत्तपदवण्णना निट्ठिता.

८. अट्ठमनयो विप्पयुत्तेनसम्पयुत्तपदवण्णना

३१७. विप्पयुत्तेनसम्पयुत्तपदनिद्देसे ¶ रूपक्खन्धादीहि विप्पयुत्तेनसम्पयुत्तमेव यथानिद्धारितं नत्थीति ‘‘रूपक्खन्धेन ये धम्मा विप्पयुत्ता, तेहि धम्मेहि ये धम्मा सम्पयुत्ता’’ति अवत्वा ‘‘रूपक्खन्धेन ये धम्मा विप्पयुत्ता, ते धम्मा कतिहि खन्धेहि…पे… सम्पयुत्ताति नत्थी’’ति वुत्तं. तेन रूपक्खन्धेन विप्पयुत्तानं केनचि खन्धादिना सम्पयोगाभावतो यथानिद्धारितं विप्पयुत्तेनसम्पयुत्तमेव नत्थि, कुतो तस्स पुन खन्धादीहि सम्पयुत्तताति दस्सेति.

अट्ठमनयविप्पयुत्तेनसम्पयुत्तपदवण्णना निट्ठिता.

९. नवमनयो सम्पयुत्तेनसम्पयुत्तपदवण्णना

३१९. सम्पयुत्तेनसम्पयुत्तपदवण्णनायं यंखन्धादिवसेनाति समासपदं इदं दट्ठब्बं, यस्स खन्धादिनो वसेनाति अत्थो. तस्सेवाति च तस्सेव खन्धादिनोति अत्थो. इदं वुत्तं होति – यं इध सम्पयुत्तं वुत्तं, तं रूपक्खन्धादीसु अरणन्तेसु येन वेदनाक्खन्धादिना सम्पयुत्तं, पुन तस्सेव वेदनाक्खन्धादिनो खन्धादीहि सम्पयोगं पुच्छित्वा विस्सज्जनं कतं ¶ . तञ्हि अत्तना सम्पयुत्तेन सम्पयुत्तत्ता ‘‘सम्पयुत्तेन सम्पयुत्त’’न्ति निद्धारितन्ति. रूपेन वाति एतेन निरोधसच्चअप्पच्चयअसङ्खतेहिपि अयोगो वुत्तो होतीति दट्ठब्बो, तथा रूपमिस्सकेहि वाति एतेन अनुपादिन्नअनुपादानियादीहि निब्बानमिस्सकेहिपि. वक्खति हि ‘‘निब्बानं पन सुखुमरूपगतिकमेवा’’ति. सब्बारूपक्खन्धसङ्गाहकेहीति वत्तमानानमेव सम्पयोगो लब्भतीति वत्तमानेसु एकम्पि धम्मं अनपनेत्वा अविकलचतुक्खन्धसङ्गाहकेहि अरूपभवादीहीति अत्थो. अयं पनेत्थ सङ्खेपो – ये सम्पयोगं न लभन्ति रूपक्खन्धादयो, ते सब्बे न गहिता, इतरे च वेदनाक्खन्धादयो सब्बे गहिताति.

नवमनयसम्पयुत्तेनसम्पयुत्तपदवण्णना निट्ठिता.

१०. दसमनयो विप्पयुत्तेनविप्पयुत्तपदवण्णना

३५३. विप्पयुत्तेनविप्पयुत्तपदनिद्देसे ¶ अग्गहितेसु धम्मायतनादिधम्मा अनारम्मणमिस्सकसब्बचित्तुप्पादगतधम्मभावतो तेहि विप्पयुत्तस्स अभावा न गहिता, दुक्खसच्चचतुमहाभवअब्याकतादिधम्मा तेहि विप्पयुत्तेहि विप्पयुत्तानं खन्धादीहि विप्पयोगाभावतोति अयं विसेसो वेदितब्बोति.

दसमनयविप्पयुत्तेनविप्पयुत्तपदवण्णना निट्ठिता.

११. एकादसमनयो सङ्गहितेनसम्पयुत्तविप्पयुत्तपदवण्णना

४०९. एकादसमनयवण्णनायं ‘‘ते च सेसेहि तीहि खन्धेहि एकेन मनायतनेन सत्तहि विञ्ञाणधातूही’’ति एतेसं पदानं ‘‘सम्पयुत्ता नामा’’ति एतेन सह सम्बन्धो. ‘‘केहिची’’ति एतस्स पनत्थं दस्सेतुं ‘‘सङ्खारक्खन्धे धम्मायतनधम्मधातूसु च ठपेत्वा तण्ह’’न्ति एतेन ‘‘ते चा’’ति वुत्ते समुदयसच्चेन खन्धादिसङ्गहेन सङ्गहितधम्मे विसेसेत्वा तेसं एव विसेसितानं अत्तवज्जेहि सेसेहि सङ्खारक्खन्धे तण्हाय धम्मायतनधम्मधातूसु च तण्हाय वेदनासञ्ञाक्खन्धेहि सम्पयोगारहेहि ¶ सम्पयुत्ततं सन्धायाह ‘‘सेसेहि सम्पयुत्तत्ता केहिचि सम्पयुत्ता नामा’’ति.

एकादसमनयसङ्गहितेनसम्पयुत्तविप्पयुत्तपदवण्णना निट्ठिता.

१२. द्वादसमनयो सम्पयुत्तेनसङ्गहितासङ्गहितपदवण्णना

४१७. द्वादसमनये च नवमनये विय सम्पयोगारहाव लब्भन्तीति आह ‘‘तेयेव उद्धटा’’ति.

द्वादसमनयसम्पयुत्तेनसङ्गहितासङ्गहितपदवण्णना निट्ठिता.

१३. तेरसमनयो असङ्गहितेनसम्पयुत्तविप्पयुत्तपदवण्णना

४४८. तेरसमनयवण्णनायं ¶ येहि तीहिपि सङ्गहेहि असङ्गहितं विञ्ञाणमेव होति, ते पाळियं ‘‘रूपञ्च धम्मायतन’’न्तिआदिउद्दानगाथाय दस्सिता बावीस धम्मा ‘‘रूपक्खन्धेन सदिसपञ्हा धम्मा’’ति वुत्ता. येहि पन तीहिपि सङ्गहेहि असङ्गहितानि अरूपभवेन विय ओळारिकायतनानेव होन्ति, ते वुत्तावसेसा सब्बे इध उद्धटा ‘‘अरूपभवेन सदिसा’’ति वुत्ता. सेसाति सेसा पञ्चमनये आगता वेदनाक्खन्धादयो सतिपि असङ्गाहकत्ते इध विस्सज्जनं न रुहन्तीति न उद्धटा. ये पन असङ्गाहका एव न होन्ति दुक्खसच्चादिधम्मा, तेसु वत्तब्बमेव नत्थि. यथा पन वेदनाक्खन्धादयो न रुहन्ति, तं दस्सेतुं ‘‘वेदनाक्खन्धेन ही’’तिआदिमाह. तत्थ तेसञ्च सम्पयोगो नाम नत्थीति रूपारूपधम्मानं असम्पयोगेहि वोमिस्सताय सम्पयोगो नत्थीति अत्थो.

यदि पन ते कदाचि असब्बविञ्ञाणधातुसम्पयुत्ता अरूपधम्मा रूपधम्मा च सियुं, न तेसं विप्पयोगो नत्थीति ‘‘विप्पयोगो च नत्थी’’ति न वुत्तं, न वेदनाक्खन्धेन असङ्गहितानं विप्पयोगस्स अत्थितायाति वेदितब्बं. उभयाभावतो हि वेदनाक्खन्धादयो इध न रुहन्तीति. एवं पनेत्थ सिया ‘‘वेदनाक्खन्धेन हि खन्धादिवसेन अनारम्मणमिस्सका सत्तविञ्ञाणधातुधम्मा असङ्गहिता होन्ति, तेसञ्च सम्पयोगो ¶ विप्पयोगो च नत्थी’’ति. अनारम्मणसहितानञ्हि सब्बविञ्ञाणधातूनं सब्बविञ्ञाणधातुसम्पयुत्तानं तदुभयधम्मानञ्च वेदनाक्खन्धादिविञ्ञाणक्खन्धादिचक्खायतनादीहि तीहिपि सङ्गहेहि असङ्गहितानं सम्पयोगविप्पयोगाभावो अरुहणे कारणं. जातिविप्पयोगभूमिकालसन्तानविप्पयोगतो चतुब्बिधो विप्पयोगो. तत्थ जातिविप्पयोगो ‘‘कुसला धम्मा, अकुसला धम्मा’’तिआदि, भूमिविप्पयोगो ‘‘कामावचरा, रूपावचरा’’तिआदि, कालविप्पयोगो ‘‘अतीता धम्मा, अनागता धम्मा’’तिआदि, सन्तानविप्पयोगो ‘‘अज्झत्ता धम्मा, बहिद्धा धम्मा’’तिआदि. एवं विप्पयोगो चतुधा वेदितब्बो.

तेरसमनयअसङ्गहितेनसम्पयुत्तविप्पयुत्तपदवण्णना निट्ठिता.

१४. चुद्दसमनयो विप्पयुत्तेनसङ्गहितासङ्गहितपदवण्णना

४५६. चुद्दसमनये ¶ धम्मायतनादीनं अनारम्मणमिस्सकसब्बचित्तुप्पादगतधम्मभावतो विप्पयोगस्स अरुहणं दट्ठब्बं. जातिआदित्तयस्स चेत्थ धम्मसभावमत्तत्ता न कथञ्चि सम्पयोगो विप्पयोगो च रुहति अज्झत्तबहिद्धधम्मानं सब्बधम्मसमोधानत्ता, अनिदस्सनअप्पटिघादीनं अनारम्मणमिस्सकसब्बचित्तुप्पादत्ता. दुक्खसच्चादिधम्माव इध तेहि विप्पयुत्तानं सङ्गहासङ्गहसब्भावा गहिताति.

पाळिउद्दानगाथायं समुच्छेदे न लब्भन्तीति परियोसाने नये न लब्भन्तीति अत्थो. मोघपुच्छकेन चाति अलब्भमाना च ते मोघपुच्छकेन हेतुना न लब्भन्ति तेसं पुच्छाय मोघत्ताति वुत्तं होति. अथ वा मोघपुच्छको अट्ठमो नयो, तेन च सह ओसाननये एते धम्मा विप्पयोगस्सपि अभावा सब्बथापि न लब्भन्तीति अत्थो.

चुद्दसमनयविप्पयुत्तेनसङ्गहितासङ्गहितपदवण्णना निट्ठिता.

धातुकथापकरण-मूलटीका समत्ता.

पुग्गलपञ्ञत्तिपकरण-मूलटीका

१. मातिकावण्णना

१. धम्मसङ्गहे ¶ ¶ तिकदुकवसेन सङ्गहितानं धम्मानं विभङ्गे खन्धादिविभागं दस्सेत्वा तथासङ्गहितविभत्तानं धातुकथाय सङ्गहासङ्गहादिप्पभेदं वत्वा याय पञ्ञत्तिया तेसं सभावतो उपादाय च पञ्ञापनं होति, तं पभेदतो दस्सेतुं ‘‘छ पञ्ञत्तियो’’तिआदिना पुग्गलपञ्ञत्ति आरद्धा. तत्थ ये धम्मे पुब्बापरियभावेन पवत्तमाने असभावसमूहवसेन उपादाय ‘‘पुग्गलो, इत्थी, पुरिसो, देवो, मनुस्सो’’तिआदिका पुग्गलपञ्ञत्ति होति, तेसं अञ्ञेसञ्च बाहिररूपनिब्बानानं ससभावसमूहससभावभेदवसेन पञ्ञापना सभावपञ्ञत्तीति खन्धपञ्ञत्तिआदिका पञ्चविधा वेदितब्बा. ताय धम्मसङ्गहादीसु विभत्ता सभावपञ्ञत्ति सब्बापि सङ्गहिता होति. पुग्गलपञ्ञत्ति पन असभावपञ्ञत्ति. ताय च समयविमुत्तादिप्पभेदाय सत्तसन्तानगते परिञ्ञेय्यादिसभावधम्मे उपादाय पवत्तितो पधानाय ‘‘विहारो मञ्चो’’तिआदिका च सब्बा असभावपञ्ञत्ति सङ्गहिता होति.

एत्तावता ¶ च पञ्ञत्ति नाम विज्जमानपञ्ञत्ति अविज्जमानपञ्ञत्ति च. ता एव हि वोमिस्सा इतरा चतस्सोति. तस्मा तासं दस्सनेन इमस्मिं पकरणे सब्बा पञ्ञत्तियो दस्सिताति वेदितब्बा. खन्धादिपञ्ञत्तीसु पन छसु अञ्ञत्थ अदस्सितप्पभेदं इधेव च दस्सितप्पभेदं पुग्गलपञ्ञत्तिं उपादाय इमस्स पकरणस्स पुग्गलपञ्ञत्तीति नामं वुत्तन्ति वेदितब्बं. ये धम्मे इध पञ्ञपेतुकामोति पञ्ञत्तिया वत्थुभावेन दस्सेतुकामोति अधिप्पायो. न हि एतस्मिं पकरणे पञ्ञापनं करोति, वत्थूहि पन पञ्ञत्तियो दस्सेतीति.

खन्धाति ¶ पञ्ञापनाति इदं खन्धाति रूपं पथवीतिआदिका सब्बापि सामञ्ञप्पभेदपञ्ञापना नाम होति, तं सन्धाय वुत्तन्ति दट्ठब्बं. पञ्ञापनाति एतस्स पन दस्सना ठपनाति एते द्वे अत्था, तेसं पकासना निक्खिपनाति. तत्थ ‘‘रूपक्खन्धो…पे… अञ्ञाताविन्द्रियं समयविमुत्तो’’तिआदिना इदमेवंनामकं इदमेवंनामकन्ति तंतंकोट्ठासिककरणं बोधनमेव निक्खिपना, न पञ्ञपेतब्बानं मञ्चादीनं विय ठानसम्बन्धकरणं. यो पनायं ‘‘नामपञ्ञत्ति हि दस्सेति च ठपेति चा’’ति कत्तुनिद्देसो कतो, सो भावभूताय करणभूताय वा नामपञ्ञत्तिया तेसं तेसं धम्मानं दिट्ठताय ठपितताय च तंनिमित्ततं सन्धाय कतोति वेदितब्बो.

विज्जमानपञ्ञत्तीतिआदिना वचनेन पाळियं अनागततं सन्धाय ‘‘पाळिमुत्तकेना’’तिआदिमाह. कुसलाकुसलस्सेवाति कुसलाकुसलस्स विय. विज्जमानस्साति एतस्स अत्थो सतोति, तस्स अत्थो सम्भूतस्साति. विज्जमानस्स सतोति वा विज्जमानभूतस्साति अत्थो. तमेवत्थं दस्सेन्तो आह ‘‘सम्भूतस्सा’’ति. तेन अविज्जमानभावं पटिक्खिपति. तथा अविज्जमानस्साति यथा कुसलादीनि अकुसलादिसभावतो, फस्सादयो च वेदनादिसभावतो विनिवत्तसभावानि विज्जन्ति, तथा अविज्जमानस्स ये धम्मे उपादाय ‘‘इत्थी, पुरिसो’’ति उपलद्धि होति, ते अपनेत्वा तेहि विनिवत्तस्स इत्थिआदिसभावस्स अभावतो असम्भूतस्साति अत्थो. यं पनेतस्स ‘‘तेनाकारेन अविज्जमानस्स अञ्ञेनाकारेन विज्जमानस्सा’’ति अत्थं केचि वदन्ति, तत्थ यं वत्तब्बं, तं पञ्ञत्तिदुके वुत्तमेव. अविज्जमानेपि सभावे लोकनिरुत्तिं अनुगन्त्वा अनभिनिवेसेन चित्तेन ‘‘इत्थी, पुरिसो’’ति गहणसब्भावा ‘‘लोकनिरुत्तिमत्तसिद्धस्सा’’ति आह. साभिनिवेसेन पन चित्तेन गय्हमानं पञ्चमसच्चादिकं न सभावतो, नापि सङ्केतेन सिद्धन्ति ‘‘सब्बाकारेनपि ¶ अनुपलब्भनेय्य’’न्ति वुत्तं. तासु इमस्मिं…पे… लब्भन्तीति इमस्मिं पकरणे सरूपतो तिस्सन्नं आगततं सन्धाय वुत्तं.

यथावुत्तस्स पन अट्ठकथानयस्स अविरोधेन आचरियवादा योजेतब्बा, तस्मा पञ्ञपेतब्बट्ठेन चेसा पञ्ञत्तीति एतस्स सभावतो अविज्जमानत्ता पञ्ञपेतब्बमत्तट्ठेन पञ्ञत्तीति अत्थो. पञ्ञपेतब्बम्पि हि ससभावं तज्जपरमत्थनामलाभतो न परतो लभितब्बं ¶ पञ्ञत्तिनामं लभति, निसभावं पन सभावाभावतो न अत्तनो सभावेन नामं लभतीति. सत्तोतिआदिकेन नामेन पञ्ञपितब्बमत्तट्ठेन पञ्ञत्तीति नामं लभति, निसभावा च सत्तादयो. न हि ससभावस्स रूपादीहि एकत्तेन अञ्ञत्तेन वा अनुपलब्भसभावता अत्थीति.

किरीटं मकुटं, तं अस्स अत्थीति किरीटी. एतस्मिञ्च आचरियवादे अनूनेन लक्खणेन भवितब्बन्ति सब्बसमोरोधो कातब्बो. दुतियं ततियन्ति एवंपकारा हि उपनिधापञ्ञत्ति उपनिक्खित्तकपञ्ञत्ति च सङ्खातब्बप्पधानत्ता छपि पञ्ञत्तियो भजतीति युत्तं वत्तुं, इतरा च यथायोगं तं तं पञ्ञत्तिन्ति. दुतियं ततियं द्वे तीणीतिआदि पन सङ्खा नाम काचि नत्थीति तासं उपादासन्ततिपञ्ञत्तीनं अविज्जमानपञ्ञत्तिभावं, इतरासञ्च उपनिधापञ्ञत्तीनं यथानिदस्सितानं अविज्जमानेनअविज्जमानपञ्ञत्तिभावं मञ्ञमानो आह ‘‘सेसा अविज्जमानपक्खञ्चेव अविज्जमानेनअविज्जमानपक्खञ्च भजन्ती’’ति. दुतियं ततियं द्वे तीणीतिआदीनं उपनिधाउपनिक्खित्तकपञ्ञत्तीनं अविज्जमानेनअविज्जमानपञ्ञत्तिभावमेव मञ्ञति. यञ्हि पठमादिकं अपेक्खित्वा यस्स चेकादिकस्स उपनिक्खिपित्वा पञ्ञापीयति, तञ्च सङ्खानं किञ्चि नत्थीति. तथा सन्ततिपञ्ञत्तिया च. न हि असीति आसीतिको च विज्जमानोति.

एकच्चा भूमिपञ्ञत्तीति कामावचरादिपञ्ञत्तिं सन्धायाह. कामावचरादी हि सभावधम्माति अधिप्पायो. कामोति पन ओकासे गहिते अविज्जमानेनविज्जमानपञ्ञत्ति एसा भवितुं अरहति, कम्मनिब्बत्तक्खन्धेसु गहितेसु विज्जमानेनविज्जमानपञ्ञत्ति. यथा पन वचनसङ्खाताय वचनसमुट्ठापकचेतनासङ्खाताय वा किरियाय भाणकोति पुग्गलस्स पञ्ञत्ति विज्जमानेनअविज्जमानपञ्ञत्तिपक्खं भजति, एवं किसो थूलोति रूपायतनसङ्खातेन सण्ठानेन पुग्गलादीनं पञ्ञापना विज्जमानेनअविज्जमानपञ्ञत्ति भवितुं अरहति. सण्ठानन्ति ¶ वा रूपायतने अग्गहिते अविज्जमानेनअविज्जमानपञ्ञत्ति. रूपं फस्सोतिआदिका पन विज्जमानपञ्ञत्ति रुप्पनादिकिच्चवसेन किच्चपञ्ञत्तियं, पच्चत्तधम्मनामवसेन पच्चत्तपञ्ञत्तियं वा अवरोधेतब्बा. विज्जमानाविज्जमानपञ्ञत्तीसु च वुत्तासु तासं वोमिस्सतावसेन ¶ पवत्ता इतरापि वुत्तायेव होन्तीति अयम्पि आचरियवादो सब्बसङ्गाहकोति दट्ठब्बो.

२. ‘‘यावता पञ्चक्खन्धा’’तिआदिकस्स अत्थं दस्सेन्तो ‘‘यत्तकेन पञ्ञापनेना’’तिआदिमाह. तत्थ यावता पञ्चक्खन्धाति यावता रूपक्खन्धो…पे… विञ्ञाणक्खन्धोति खन्धानं खन्धपञ्ञत्ति, एत्तावता खन्धानं खन्धपञ्ञत्ति, एवं पाळियोजनं कत्वा सङ्खेपप्पभेदवसेन अयं अत्थो वुत्तोति वेदितब्बो. ‘‘यावता पञ्चक्खन्धा’’ति, ‘‘खन्धानं खन्धपञ्ञत्ती’’ति हि इमस्स अत्थो ‘‘यत्तकेन पञ्ञापनेन सङ्खेपतो पञ्चक्खन्धाति वा’’ति एतेन दस्सितो, ‘‘यावता रूपक्खन्धो’’तिआदिकस्स पन ‘‘पभेदतो रूपक्खन्धो’’तिआदिकेनाति. तत्थ रूपक्खन्धो…पे… विञ्ञाणक्खन्धोति पभेदनिदस्सनमत्तमेतं. तेन अवुत्तोपि सब्बो सङ्गहितो होतीति ‘‘तत्रापि रूपक्खन्धो कामावचरो’’तिआदि वुत्तं. अयं वा एत्थ पाळिया अत्थयोजना – ‘‘यावता’’ति इदं सब्बेहि पदेहि योजेत्वा यत्तका पञ्चक्खन्धा, तत्तका खन्धानं खन्धपञ्ञत्ति. यत्तको पञ्चन्नं खन्धानं तप्पभेदानञ्च रूपक्खन्धादीनं पभेदो, तत्तको खन्धानं खन्धपञ्ञत्तिया पभेदोति पकरणन्तरे वुत्तेन वत्थुभेदेन खन्धपञ्ञत्तिया पभेदं दस्सेति. एस नयो ‘‘यावता आयतनान’’न्तिआदीसुपि.

७. एकदेसेनेवाति उद्देसमत्तेनेवाति अत्थो.

मातिकावण्णना निट्ठिता.

२. निद्देसवण्णना

१. एककनिद्देसवण्णना

१. झानङ्गानेव ¶ ¶ विमोक्खोति इमिना अधिप्पायेनाह ‘‘विमोक्खसहजातेन नामकायेना’’ति. येन हि सद्धिन्तिआदिना पठमं समङ्गिभावत्थं विवरति. फस्सेनपि फुट्ठायेव नामाति एतेन ‘‘अपिचेसा’’तिआदिना वुत्तं दुतियं सम्फस्सेन फुसनत्थं, इतरेहि इतरे कारणत्थे. समङ्गिभावफुसनकारणभावा हि फुसनाति वुत्ताति. पुनपि पठमत्थमेव दुब्बिञ्ञेय्यत्ता विवरन्तो ‘‘तत्रास्सा’’तिआदिमाह. ठपेत्वा तानि अङ्गानि सेसा अतिरेकपण्णासधम्माति एत्थ वेदनासोमनस्सिन्द्रियानि सङ्गहितानीति आह ‘‘चत्तारो खन्धा होन्ती’’ति. एवं सति वेदनासोमनस्सिन्द्रियेहि सुखस्स फुसितब्बत्ता तिण्णञ्च तेसं अनञ्ञत्ता तेनेव तस्स फुसना आपज्जतीति? नापज्जति, वेदयिताधिपतियट्ठेहि उपनिज्झायनभावपटिलाभस्स वुत्तत्ता. अथ वा ठपेत्वा तानि अङ्गानीति अङ्गानं बहुत्ता बहुवचनं. तेसु पन पच्चेकम्पि योजना कातब्बा ‘‘वितक्कं ठपेत्वा’’तिआदिना. तत्थ ‘‘सुखं ठपेत्वा’’ति इमिस्सा योजनाय सेसा तयो खन्धा होन्ति, इतरासु चत्तारोति. सब्बयोजनासु च तयो अन्तो कत्वा ‘‘चत्तारो खन्धा होन्ती’’ति वुत्तं.

२. यो असमयविमोक्खेन एकच्चेहि आसवेहि विमुत्तो असमयविमोक्खूपनिस्सयलाभेन च सातिसयेन समयविमोक्खेन, सो एव समयविमुत्तो. सो हि तेन विमुत्तो झानलाभी सेक्खो रूपारूपभवतो अपुनरावट्टको कामरागादीहि तथाविमुत्तोव होतीति समयविमुत्तपञ्ञत्तिं लद्धुं अरहति. पुथुज्जनो पन झानलाभी पुनरावट्टकधम्मो पुन कामरागादिसमुदाचारभावतो विमुत्तो नाम न होतीति समयविमुत्तपञ्ञत्तिं नारहति, तेन सो ¶ ‘‘समयविमुत्तो’’ति न वुत्तो. अरहतो पन अपरिक्खीणा आसवा नत्थि, यतो विमुच्चेय्य. दिट्ठधम्मसुखविहारमत्ता हि तस्स अट्ठ विमोक्खाति. तस्मा तस्स न अट्ठ विमोक्खा समयविमुत्तपञ्ञत्तिभावस्स असमयविमुत्तपञ्ञत्तिभावस्स वा कारणं. तदकारणभावमेव दस्सेतुं ¶ ‘‘न हेव खो…पे… विहरती’’ति वुत्तं, न सुक्खविपस्सकस्सेव असमयविमुत्तभावं दस्सेतुन्ति दट्ठब्बं. सब्बोपि हि अरहा असमयविमुत्तोति. बाहिरानन्ति लोकुत्तरतो बहिभूतानं, लोकियानन्ति अत्थो.

३. अरूपक्खन्धनिब्बानमत्तवाचको अरूपसद्दो न होतीति दस्सनत्थं ‘‘रूपतो अञ्ञ’’न्तिआदि वुत्तं. चित्तमञ्जूसन्ति समाधिं. अभिञ्ञादीनञ्हि धम्मानं पादकभावेन समाधि मञ्जूसासदिसो होति. अद्धानं फरितुन्ति दीघकालं ब्यापेतुं, पवत्तेतुन्ति अत्थो. ‘‘सम्मज्जितब्ब’’न्ति चिन्तेत्वा तत्थ आदरस्स अकतत्ता वत्तभेदोति वेदितब्बो. एवं वत्तभेदमत्तेन नट्ठा पन समापत्ति कामच्छन्दादीहि नट्ठा विय न किञ्चेन पच्चाहरितब्बा होति मन्दपारिपन्थकत्ता, तस्मा वत्तसमितकरणमत्तेनेव पच्चाहरितब्बत्ता ‘‘अप्पेन्तोव निसीदी’’ति आह.

४. अत्तनो अनुरूपेन पमादेन वीतिनामेन्तानम्पि समापत्ति न कुप्पतीति परिहीनो नाम न होति, तस्मिं तस्मिं ब्यासङ्गे पटिसंहटमत्ते समापज्जितुं समत्थतायाति अधिप्पायो. ‘‘किस्स पन, भन्ते, खीणासवस्स भिक्खुनो लाभसक्कारसिलोको अन्तरायायाति? या हिस्स सा, आनन्द, अकुप्पा चेतोविमुत्ति, नाहं तस्सा लाभसक्कारसिलोकं अन्तरायाय वदामि. ये च ख्वस्स, आनन्द, अप्पमत्तस्स आतापिनो पहितत्तस्स विहरतो दिट्ठधम्मसुखविहारा अधिगता, तेसाहमस्स लाभसक्कारसिलोकं अन्तरायाय वदामी’’ति सुत्ते (सं. नि. २.१७९) पन समयेन समयं आपज्जनेन परिहरितब्बानं समापत्तिसुखविहारानं तस्मिं तस्मिं ब्यासङ्गकाले अनिप्फत्तितो लाभसक्कारसिलोको अन्तरायोति वुत्तोति अधिप्पायेनस्स तेन अविरोधो वेदितब्बो.

५. धम्मानं…पे… पीति एत्थ ‘‘धम्मेही’’ति वत्तब्बं. इध हि ताहि समापत्तीहि परिहायेय्याति धम्मेहि पुग्गलस्स परिहानम्पि अपरिहानम्पि वुत्तं. तत्थ च पुग्गलस्स पमादमागम्म ता समापत्तियो कुप्पेय्युन्ति धम्मानं कुप्पनं अकुप्पनञ्च वुत्तं, पुग्गलस्स पन परिहानधम्मानमेव ¶ विनासोति वचननानत्तमत्तेन वचनत्थनानत्तमत्तेन वा परियायन्तरता वुत्ताति दट्ठब्बा.

७-८. चेतना ¶ समापत्तिचेतना तदायूहना च. अनुरक्खणा समापत्तिउपकारानुपकारपरिग्गाहिका पञ्ञासहिता सति. ताहि चेतियमानअनुरक्खियमानसमापत्तीनं भब्बा चेतनाभब्बा अनुरक्खणाभब्बा.

१०. पुथुज्जनगोत्तन्ति पुथुज्जनसिक्खं, पुथुज्जनगता तिस्सो सिक्खा अतिक्कन्ताति अत्थो. ता हि संयोजनत्तयानुपच्छेदेन ‘‘पुथुज्जनसिक्खा’’ति वुच्चन्तीति.

११. अरहत्तमग्गट्ठो च वट्टभयतो पञ्ञुब्बेगेन उब्बिज्जन्तो उद्धम्भागियसंयोजनेहि उपरतोति भयूपरतो नामाति आह ‘‘सत्त सेक्खा भयूपरता’’ति.

१२. भवङ्गपञ्ञाविरहिता ‘‘विपाकावरणेन समन्नागता’’ति इमिना गहिताति तिहेतुकपटिसन्धिका केचि ‘‘दुप्पञ्ञा’’ति इमिना गय्हन्तीति दस्सेन्तो आह ‘‘अप्पटिलद्धमग्गफलूपनिस्सया’’ति. पञ्ञाय हि विना न तदुपनिस्सयो अत्थीति.

१४. यत्थ नियतानियतवोमिस्सा पवत्ति अत्थि, तत्थेव नियतधम्मा होन्तीति उत्तरकुरूसु तदभावा नियतो नाम नत्थीति दस्सेन्तो ‘‘या पन उत्तरकुरुकान’’न्तिआदिमाह.

१६. तेरससु सीसेसु पलिबोधसीसादीनि पवत्तसीसञ्च परियादियितब्बानि, अधिमोक्खसीसादीनि परियादकानि, परियादकफलं गोचरसीसं. तञ्हि विसयज्झत्तफलविमोक्खोति. परियादकस्स मग्गस्स फलस्स च आरम्मणं सङ्खारसीसं सङ्खारविवेकभूतो निरोधोति परियादियितब्बानं परियादकफलारम्मणानं सह विय संसिद्धिदस्सनेन समसीसिभावं दस्सेतुं पटिसम्भिदायं (पटि. म. १.८७) तेरस सीसानि वुत्तानि. इध पन ‘‘अपुब्बं अचरिमं आसवपरियादानञ्च होति जीवितपरियादानञ्चा’’ति वचनतो तेसु किलेसपवत्तसीसानमेव वसेन योजनं करोन्तो ‘‘तत्थ किलेससीस’’न्तिआदिमाह. तत्थ पवत्तसीसम्पि वट्टतो वुट्ठहन्तो मग्गो चुतितो उद्धं अप्पवत्तिकरणवसेन यदिपि परियादियति ¶ , याव पन चुति, ताव पवत्तिसब्भावतो ‘‘पवत्तसीसं जीवितिन्द्रियं ¶ चुतिचित्तं परियादियती’’ति आह. किलेसपरियादानेन पन अत्तनो अनन्तरं विय निप्फादेतब्बा पच्चवेक्खणवारा च किलेसपरियादानस्सेव वाराति वत्तब्बतं अरहन्ति. ‘‘विमुत्तस्मिं विमुत्तमिति ञाणं होती’’ति (म. नि. १.७८; सं. नि. ३.१२, १४) वचनतो हि पच्चवेक्खणपरिसमापनेन किलेसपरियादानं समापितं नाम होति. तं पन परिसमापनं यदि चुतिचित्तेन होति, तेनेव जीवितपरिसमापनञ्च होतीति इमाय वारचुतिसमताय किलेसपरियादानजीवितपरियादानानं अपुब्बाचरिमता होतीति आह ‘‘वारसमताया’’ति. भवङ्गं ओतरित्वा परिनिब्बायतीति एत्थ परिनिब्बानचित्तमेव भवङ्गोतरणभावेन वुत्तन्ति दट्ठब्बं.

१७. महापयोगोति महाकिरियो विपत्तिकरणमहामेघुट्ठानाकारविनासो. तिट्ठेय्याति विनासो नप्पवत्तेय्याति अत्थो.

१८. अरणीयत्ताति पयिरुपासितब्बत्ता.

२०. याय कतकिच्चता होति, ताय अग्गविज्जाय अधिगताय तेविज्जताभावो निप्परियायता, सा च आगमनवसेन सिद्धा सातिसया तेविज्जताति आह ‘‘आगमनीयमेव धुर’’न्ति.

२२. तत्थ चाति निमित्तत्थे भुम्मं, सब्बञ्ञुतञ्ञाणप्पत्तिया आधारभावे वा. तत्थेव हि सब्बञ्ञुतं पत्तो नाम होतीति.

२३. अननुस्सुतेसु धम्मेसूति च अननुस्सुतेसु सच्चेसूति अत्थो.

२४. ‘‘रूपी रूपानि पस्सती’’तिआदिके (म. नि. २.२४८; ३.३१२; पटि. म. १.२०९; ध. स. २४८) निरोधसमापत्तिअन्ते अट्ठ विमोक्खे वत्वा ‘‘यतो खो, आनन्द, भिक्खु इमे अट्ठ विमोक्खे कायेन फुसित्वा विहरति, पञ्ञाय चस्स दिस्वा आसवा परिक्खीणा होन्ति. अयं वुच्चति, आनन्द, भिक्खु उभतोभागविमुत्तो’’ति यदिपि महानिदानसुत्ते ¶ वुत्तं, तं पन उभतोभागविमुत्तसेट्ठवसेन वुत्तन्ति इध कीटागिरिसुत्तवसेन सब्बउभतोभागविमुत्तसङ्गहत्थं ‘‘अट्ठ समापत्तियो सहजातनामकायेन पटिलभित्वा विहरती’’ति आह. कीटागिरिसुत्ते ¶ हि ‘‘इध, भिक्खवे, एकच्चो पुग्गलो ये ते सन्ता विमोक्खा अतिक्कम्म रूपे आरुप्पा, ते कायेन फुसित्वा विहरति, पञ्ञाय चस्स दिस्वा आसवा परिक्खीणा होन्ति. अयं वुच्चति, भिक्खवे, पुग्गलो उभतोभागविमुत्तो’’ति (म. नि. २.१८२) अरूपसमापत्तिवसेन चत्तारो उभतोभागविमुत्ता वुत्ता, उभतोभागविमुत्तसेट्ठो च वुत्तलक्खणोपपत्तितोति. कायसक्खिम्हिपि एसेव नयो.

पञ्ञाय चस्स दिस्वा आसवा परिक्खीणा होन्तीति न आसवा पञ्ञाय पस्सन्ति, दस्सनकारणा पन परिक्खीणा दिस्वा परिक्खीणाति वुत्ता. दस्सनायत्तपरिक्खयत्ता एव हि दस्सनं पुरिमकिरिया होतीति. नामनिस्सितको एसोति एसो उभतोभागविमुत्तो रूपतो मुच्चित्वा नामं निस्साय ठितो पुन ततो मुच्चनतो ‘‘नामनिस्सितको’’ति वत्वा तस्स च साधकं सुत्तं वत्वा ‘‘कायद्वयतो सुविमुत्तत्ता उभतोभागविमुत्तो’’ति आहाति अत्थो. सुत्ते हि आकिञ्चञ्ञायतनलाभिनो उपसीवब्राह्मणस्स भगवता नामकाया विमुत्तोति उभतोभागविमुत्तोति मुनि अक्खातोति.

पठमत्थेरवादे द्वीहि भागेहि विमुत्तो उभतोभागविमुत्तो, दुतियत्थेरवादे उभतो भागतो विमुत्तोति उभतोभागविमुत्तोति, ततियत्थेरवादे द्वीहि भागेहि द्वे वारे विमुत्तोति अयमेतेसं विसेसो. तत्थ विमुत्तोति किलेसेहि विमुत्तो, किलेसविक्खम्भनसमुच्छेदनेहि वा कायद्वयतो विमुत्तोति अत्थो दट्ठब्बो. अरूपावचरं पन नामकायतो च विमुत्तन्ति नीवरणसङ्खातनामकायतो विमुत्तन्ति वुत्तं होति. तञ्हि नीवरणदूरीभावेन नामकायतो रूपतण्हाविक्खम्भनेन रूपकायतो च विमुत्तत्ता एकदेसेन उभतोभागविमुत्तं नाम होतीति अरहत्तमग्गस्स पादकभूतं उभतोभागविमुत्तनामलाभस्स कारणं भवितुं युत्तन्ति अधिप्पायो.

२५. एतेसु हि एकोपि अट्ठविमोक्खलाभी न होतीति उभतोभागविमुत्तभावस्स कारणभूतं रूपकायतो विमुत्तं एकम्पि विमोक्खं ¶ अनधिगतोति अधिप्पायो. अरूपावचरेसु हि एकम्पि अधिगतो उभतोभागविमुत्तभावकारणपटिलाभतो अट्ठविमोक्खेकदेसेन तेन तंनामदाने ¶ समत्थेन ‘‘अट्ठविमोक्खलाभी’’त्वेव वुच्चति. तेनाह ‘‘अरूपावचरज्झानेसु पना’’तिआदि.

२६. फुट्ठन्तं सच्छिकरोतीति फुट्ठानं अन्तो फुट्ठन्तो, फुट्ठानं अरूपावचरज्झानानं अनन्तरो कालोति अधिप्पायो. अच्चन्तसंयोगे चेत्थ उपयोगवचनं दट्ठब्बं. फुट्ठानन्तरकालमेव सच्छिकरोति सच्छिकातब्बोपायेनाति वुत्तं होति. ‘‘एकमन्तं निसीदी’’तिआदीसु (दी. नि. १.१६५) विय भावनपुंसकं वा एतं. यो हि अरूपज्झानेन रूपकायतो नामकायेकदेसतो च विक्खम्भनविमोक्खेन विमुत्तो, तेन निरोधसङ्खातो विमोक्खो आलोचितो पकासितो विय होति, न पन कायेन सच्छिकतो. निरोधं पन आरम्मणं कत्वा एकच्चेसु आसवेसु खेपितेसु तेन सो सच्छिकतो होति, तस्मा सो सच्छिकातब्बं निरोधं यथाआलोचितं नामकायेन सच्छिकरोतीति कायसक्खीति वुच्चति, न तु विमुत्तोति एकच्चानं आसवानं अपरिक्खीणत्ता.

२७. दिट्ठत्ता पत्तोति एतेन चतुसच्चदस्सनसङ्खाताय दिट्ठिया निरोधस्स पत्ततं दीपेति. ‘‘दिट्ठन्तं पत्तो’’ति वा पाठो, दस्सनसङ्खातस्स सोतापत्तिमग्गञाणस्स अनन्तरं पत्तोति वुत्तं होति. पठमफलतो पट्ठाय हि याव अग्गमग्गा दिट्ठिप्पत्तोति.

२८. इमं पन नयं ‘‘नो’’ति पटिक्खिपित्वाति एत्थ दिट्ठिप्पत्तसद्धाविमुत्तभावप्पत्तानं पञ्ञानानत्तं वुत्तं, न पन येन विसेसेन सो विसेसो पत्तो, सो वुत्तोति इमं दोसं दिस्वा पटिक्खेपो कतोति दट्ठब्बो. आगमट्ठकथासूति च वचनेन आगमनीयनानत्तसन्निट्ठानमेव थिरं करोतीति वेदितब्बं. सद्दहन्तो विमुत्तोति एतेन सब्बथा अविमुत्तस्सपि सद्धामत्तेन विमुत्तभावं दस्सेति. सद्धाविमुत्तोति वा सद्धाय अधिमुत्तोति अत्थो.

२९. पञ्ञं वाहेतीति पञ्ञं सातिसयं पवत्तेतीति अत्थो. पञ्ञा इमं पुग्गलं वहतीति निब्बानाभिमुखं गमेतीति अत्थो.

३१. एवं ¶ मग्गक्खणेपीति अयं अपि-सद्दो कस्मा वुत्तो, ननु अरियेन अट्ठङ्गिकेन मग्गेन समन्नागतो मग्गक्खणे एव होतीति तदा एव सोतापन्नो नामाति आपन्नन्ति? नापन्नं ¶ . मग्गेन हि अत्तना सदिसस्स अट्ठङ्गिकस्स वा सत्तङ्गिकस्स वा फलस्स सोतोति नामं दिन्नन्ति तेनपि समन्नागतस्स सोतापन्नभावतो, सोतेन वा मग्गेन पवत्तेतुं अपरिहीनेन फलट्ठोपि समन्नागतो एव नाम, न च तेन पठममग्गक्खणे विय सोतो समापज्जियमानो, तस्मा समापन्नसोतत्ता पठमफलतो पट्ठाय ‘‘सोतापन्नो’’ति वत्तुं युत्तो. वुत्तञ्हि ‘‘ये केचि, भिक्खवे, मयि अवेच्चप्पसन्ना, सब्बे ते सोतापन्ना. तेसं सोतापन्नानं पञ्चन्नं इध निट्ठा, पञ्चन्नं इध विहाय निट्ठा’’ति (अ. नि. १०.६४). तत्थ दुतियफलट्ठादीनं विसुं नामं अत्थीति पठमफलट्ठो एव इतरेहि विसेसियमानो ‘‘सोतापन्नो’’ति वत्तुं युत्तोति सो एव इधाधिप्पेतो. पटिलद्धमग्गेन बुज्झतीति एतेन पटिलद्धमग्गस्स चतुसच्चपच्चवेक्खणादीनं उपनिस्सयभावं दस्सेति. सम्बोधि परं अयनं निस्सयो एतस्साति हि सम्बोधिपरायणोति. दुतियेनत्थेन सम्बोधि परं अयनं गति एतस्साति सम्बोधिपरायणो.

३२. केवलेन कुलसद्देन महाकुलमेव वुच्चतीति आह ‘‘महाभोगकुलेसुयेव निब्बत्ततीति अत्थो’’ति.

३३. खन्धबीजं नाम पटिसन्धिविञ्ञाणं. इहट्ठकनिज्झानिकवसेनेव इमस्मिं ठाने कथिताति सज्झानको अज्झत्तसंयोजनसमुच्छेदे अकतेपि अनागामिसभागो अनावत्तिधम्मो इध गणनूपगो न होति, हेट्ठा उपरि च संसरणको कामभवगतो हीनज्झानको इध गणनूपगोति अधिप्पायो.

३४. यं वत्तब्बन्ति ‘‘द्वीहि कारणेहि तनुभावो वेदितब्बो’’तिआदि यं वत्तब्बं सियाति अत्थो.

३६. उपपन्नं वा समनन्तराति उपपन्नं वा एतेन पुग्गलेन होति, अथ समनन्तरा अरियमग्गं सञ्जनेति. अप्पत्तं वा वेमज्झं आयुप्पमाणन्ति आयुप्पमाणं तस्स पुग्गलस्स वेमज्झं अप्पत्तं होति, एत्थन्तरे अरियमग्गं ¶ सञ्जनेतीति अयमेत्थ पाळिअत्थो. अट्ठकथायं पन ‘‘अप्पत्वा पब्बतं नदी’’ति विय आयुप्पमाणं वेमज्झं अप्पत्तं वा हुत्वाति परसद्दयोगे परतो भूतो हुत्वा सद्दो वचनसेसभूतो पयुत्तोति वेदितब्बो.

३७. उपहच्चाति ¶ एतस्स उपगन्त्वाति अत्थो, तेन वेमज्झातिक्कमो कालकिरियोपगमनञ्च सङ्गहितं होति. तेन वुत्तं ‘‘अतिक्कमित्वा वेमज्झ’’न्तिआदि.

४०. उद्धंवाहिभावेनाति उद्धं वहतीति उद्धंवाही, तण्हासोतं वट्टसोतं वा, तस्स भावो, तेन उद्धंवाहिभावेनाति वुत्तं होति. अविहेसु उद्धंसोतो यदिपि तत्थ परिनिब्बायी न होति, यत्थ वा तत्थ वा गन्त्वा परिनिब्बायतु, परिनिब्बायिनो पन तस्स असङ्खारपरिनिब्बायिता ससङ्खारपरिनिब्बायिता च अत्थीति तत्थ दस अनागामिनो वुत्ता, एवं अतप्पादीसुपि. अनुपहच्चतलाति अप्पत्ततला. असङ्खारससङ्खारपरिनिब्बायीनं लहुसालहुसगतिका एव परित्तविपुलतिणकट्ठझापकपप्पटिकासदिसता वेदितब्बा, न उप्पज्जित्वाव निब्बायनकादीहि अधिमत्तता विय समुद्दं पत्वा निब्बायनकतो अनधिमत्तता विय च अन्तरा उपहच्चपरिनिब्बायीहि उद्धंसोततो च अधिमत्तानधिमत्तता. ते एव हि असङ्खारससङ्खारपरिनिब्बायिनोति. ततो महन्ततरेति वचनं तिणकट्ठझापनसमत्थपप्पटिकादस्सनत्थं, न अधिमत्त नाधिमत्तदस्सनत्थन्ति.

नो चस्स नो च मे सियाति अविज्जासङ्खारादिकं हेतुपञ्चकं नो च अस्स, विञ्ञाणादिकं इदं फलपञ्चकं वत्तमानं नो च मे सियाति अत्थो. तेन अतीतभवसंसिद्धितो दुक्खसमुदयतो इमस्स दुक्खस्स पवत्तिदस्सनतो पच्चयसमुदयट्ठेन खन्धानं उदयदस्सनपटिपत्ति वुत्ता होति. न भविस्सति, न मे भविस्सतीति यदि एतरहि हेतुपञ्चकं न भविस्सति, अनागते फलपञ्चकं न मे भविस्सतीति अत्थो. एतेन पच्चयनिरोधट्ठेन वयदस्सनपटिपत्ति वुत्ता होति, एतरहि अनागते च अत्तत्तनियनिवारणवसेन सुञ्ञतापटिपत्ति वा चतूहिपि वुत्ता. यदत्थीति यं अत्थि. भूतन्ति ससभावं निब्बत्तं वा यथादिट्ठउदयब्बयं यथादिट्ठसुञ्ञतं वा खन्धपञ्चकं परिकप्पितइत्थिपुरिससत्तादिभावरहितं नामरूपमत्तन्ति अत्थो. विवट्टानुपस्सनाय विवट्टमानसो तं भूतं पजहामीति ¶ उपेक्खं पटिलभति, सङ्खारुपेक्खाञाणेन उपेक्खको होतीति वुत्तं होति.

भवे न रज्जति, सम्भवे न रज्जतीति अविसिट्ठे विसिट्ठे च भवे न रज्जतीति केचि वदन्ति. पच्चुप्पन्नो पन भवो भवो, अनागतो जातिया गहणेन गहितो सम्भवोति वेदितब्बो. अथ वा भवोति भूतमेव वुच्चति, सम्भवो तदाहारो, तस्मिं द्वये न रज्जतीति सेक्खपटिपत्तिं दस्सेति ¶ . भूते हि ससम्भवे च विरागो सेक्खपटिपत्ति. यथाह ‘‘भूतमिदन्ति, भन्ते, यथाभूतं सम्मप्पञ्ञाय पस्सति, भूतमिदन्ति यथाभूतं सम्मप्पञ्ञाय दिस्वा भूतस्स निब्बिदाय विरागाय निरोधाय पटिपन्नो होति. तदाहारसम्भवन्ति यथाभूतं…पे… दिस्वा तदाहारसम्भवस्स निब्बिदाय…पे… पटिपन्नो होति. तदाहारनिरोधाय यं भूतं, तं निरोधधम्मन्ति यथाभूतं…पे… दिस्वा निरोधधम्मस्स निब्बिदाय विरागाय निरोधाय पटिपन्नो होति. एवं खो, भन्ते, सेक्खो होती’’ति (सं. नि. २.३१). अथुत्तरीति अथ एवं अरज्जमानो उत्तरि सन्तं पदं निब्बानं अनुक्कमेन मग्गपञ्ञाय सम्मा पस्सति, तञ्च ख्वस्स पदं न सब्बेन सब्बं सच्छिकतं चतुत्थमग्गेनेव सच्छिकातब्बस्स तस्स तेन असच्छिकतत्ता.

एककनिद्देसवण्णना निट्ठिता.

२. दुकनिद्देसवण्णना

६३. कस्सचि किलेसस्स अविक्खम्भितत्ता कस्सचि कथञ्चि अविमुत्तो कामभवो अज्झत्तग्गहणस्स विसेसपच्चयोति अज्झत्तं नाम. तत्थ बन्धनं अज्झत्तसंयोजनं, तेन सम्पयुत्तो अज्झत्तसंयोजनो.

८३. कारणेन विना पवत्तहितचित्तो अकारणवच्छलो. अनागतम्पि पयोजनं अपेक्खमानो पुरिमग्गहितं तं कतं उपादाय कतञ्ञू एव नाम होति, न पुब्बकारीति आह ‘‘करिस्सति मे’’तिआदि. तमोजोतिपरायणो पुञ्ञफलं अनुपजीवन्तो एव पुञ्ञानि करोतीति ‘‘पुब्बकारी’’ति वुत्तो. ‘‘इणं देमी’’ति सञ्ञं करोतीति एवंसञ्ञं अकरोन्तोपि करोन्तो विय होतीति अत्थो.

८६. अच्छमंसं ¶ लभित्वा सूकरमंसन्ति न कुक्कुच्चायतीति अच्छमंसन्ति जानन्तोपि सूकरमंसन्ति न कुक्कुच्चायति, मद्दित्वा वीतिक्कमतीति वुत्तं होति.

९०. तित्तोति निट्ठितकिच्चताय निरुस्सुक्को.

दुकनिद्देसवण्णना निट्ठिता.

३. तिकनिद्देसवण्णना

९१. सेससंवरभेदेनाति ¶ मनोसंवरभेदेन, सतिसंवरादिभेदेन वा. अकुसलसीलसमन्नागमेनाति ‘‘कतमे च थपति अकुसला सीला? अकुसलं कायकम्मं अकुसलं वचीकम्मं पापको आजीवो’’ति वुत्तेहि समन्नागमेन. तस्स हि…पे… एवं सासङ्कसमाचारो होतीति एवं सासङ्को समाचारो होतीति अत्थो.

९४. समानविसयानं पुग्गलानं विसेसदस्सनवसेन ‘‘कायसक्खी’’तिआदिकं वुत्तं.

१०७. समाधि वा आदीति लोकुत्तरधम्मा हि परमत्थतो सासनन्ति तदत्थो पादकसमाधि तस्स आदि वुत्तो, तदासन्नत्ता विपस्सना, तस्स मूलेकदेसत्ता मग्गो.

१०८. उच्छङ्गो विय उच्छङ्गपञ्ञो पुग्गलो दट्ठब्बोति उच्छङ्गसदिसपञ्ञताय एव पञ्ञा विय पुग्गलोपि उच्छङ्गो विय होति, तस्मिं धम्मानं अचिरट्ठानतोति अधिप्पायेन वुत्तं. वक्खति हि ‘‘उच्छङ्गसदिसपञ्ञोतिअत्थो’’ति.

१०९. यथा च उच्छङ्गसदिसा पञ्ञा, एवं निक्कुज्जकुम्भसदिसा पञ्ञा एवाति दट्ठब्बो, तत्थ धम्मानं अनवट्ठानतो.

११३. चिरट्ठानतो थिरट्ठानतो च पासाणलेखसदिसा परापराधनिब्बत्ता कोधलेखा यस्स सो पासाणलेखूपमसमन्नागतो पासाणलेखूपमोति वुत्तो, एवं इतरेपि.

११८. सुतादिवत्थुरहितो ¶ तुच्छमानो नळो वियाति ‘‘नळो’’ति वुच्चति, सो उग्गतो नळो एतस्साति उन्नळो.

१२२. ‘‘सीलकथा च नो भविस्सती’’ति एत्थ वुत्तं सीलकथाभवनं पठमारम्भोपि दुस्सीलेन सह न होतीति दस्सेन्तो आह नेव सीलकथा होती’’ति.

१२३. तत्थ ¶ तत्थाति तस्मिं तस्मिं अनुग्गहेतब्बे पञ्ञाय सोधेतब्बे च वड्ढेतब्बे च अधिकसीलं निस्साय उप्पन्नपञ्ञाय अनुग्गण्हाति नामाति अत्थो.

१२४. गूथकूपो विय दुस्सील्यन्ति एतेन दुस्सील्यस्स गूथसदिसत्तमेव दस्सेति.

१३०. नो च सम्मा पञ्ञपेतुं सक्कोन्तीति येभुय्येन न सक्कोन्तीति इममत्थं सन्धाय वुत्तं, उप्पन्ने तथागते तस्मिं अनादरियं कत्वा समापत्तिं उप्पादेतुं वायमन्तस्स असमत्थभावं वा. तित्थिया वा पूरणादयो अधिप्पेता.

तिकनिद्देसवण्णना निट्ठिता.

४. चतुक्कनिद्देसवण्णना

१३३. परेन कतं दुस्सील्यं आणत्तिया अत्तना च पयोगेन कतन्ति आणत्तिया पापस्स दायादो ‘‘ततो उपड्ढस्स दायादो’’ति वुत्तो.

१४५. अयन्ति ‘‘तेसु पठमो’’तिआदिकं नयं वदति.

१४८. देसनाय धम्मानं ञाणस्स आपाथभावसम्पादनं ञाणुग्घाटनं. सह उदाहटवेलायाति उदाहटवेलाय सद्धिं तस्मिं काले अनतिक्कन्ते एवाति अत्थो.

१५२. तन्ति अनन्तरवचनं वदति. ‘‘कतमो लोको’’ति वुत्ते ‘‘पञ्चुपादानक्खन्धा’’ति महन्तं अत्थं सङ्गहित्वा ठितवचनं अत्थयुत्तं. लुज्जतीति लोकोति कारणयुत्तं.

१५६. सहितासहितस्साति ¶ सहितासहितेति अत्थो, सहितासहितस्स परिच्छिन्दनेति वा ¶ . द्वेयेवाति दुतियचतुत्थायेव. देसकसावकसम्पत्तिया बोधेतुं समत्थताय सभावधम्मकथिका, सच्चधम्मकथिकाति अत्थो.

१५७. कुसलधम्मेहि चित्तस्स वासनाभावना वासधुरं. अयं पापपुग्गलोति चतुत्थो वुत्तो, न पठमो. पठमो हि अविसंवादेतुकामो वेरञ्जब्राह्मणसदिसो अधिप्पेतोति.

१५९. पुग्गलेपि अरियानं अभिक्कमनादिसदिसताति पुग्गले अभिक्कमनादीनं अरियानं अभिक्कमनादिसदिसताति अत्थो, अरियानं अभिक्कमनादिना पुग्गलस्स सदिसताति वा सदिसाभिक्कमनादिताति अत्थो.

१६६. दुस्सीलं ‘‘दुस्सीलो’’ति वदन्तो भूतं भासति नाम. पाणातिपातेन दुस्सीलं अदिन्नादानेन दुस्सीलोति अवत्वा पाणातिपातेनेवाति वदन्तो तच्छं भासति नाम. यमिदं ‘‘कालेना’’ति वुत्तं, तत्र तस्मिं वचने, यो ‘‘कालेन भणती’’ति वुत्तो, सो कीदिसोति दस्सनत्थं ‘‘कालञ्ञू होती’’तिआदि वुत्तन्ति दस्सेन्तो ‘‘यमिदं कालेनाति वुत्तं, तत्र यो पुग्गलो’’तिआदिमाह.

१६८. आगमनविपत्ति नाम कम्मं, पुब्बुप्पन्नपच्चयविपत्ति सुक्कसोणितं. पवत्ते, पवत्तस्स वा पच्चया पवत्तपच्चया, आहारादयो. जोतेतीति जोति, आलोको. कुलसम्पत्तियादीहि जोतमानो च जोति वियाति जोति.

१७३. पहीनावसिट्ठकिलेसपच्चवेक्खणापि येहि किलेसेहि विमुत्तो अविमुत्तो च, तेसं दस्सनवसेन विमुत्तिदस्सनमेव होतीति आह ‘‘विमुत्तिञाणदस्सनं एकूनवीसतिविधं पच्चवेक्खणञाण’’न्ति.

१७४. यानि कानिचि तन्तावुतानन्ति तन्तावुतानं वत्थानं यानि कानिचि वत्थानीति वुत्तं होति. सायं ततियं अस्साति सायततियो. अनुयुञ्जनं अनुयोगो. तं अनुयुत्तोति उपयोगवचनं दट्ठब्बं, भावनपुंसकं वा.

१७८. तत्थ ¶ ¶ सिक्खनभावेनाति सिक्खाय साजीवे च सिक्खनभावेन. सिक्खं परिपूरेन्तोति सीलसंवरं परिपूरेन्तो. साजीवञ्च अवीतिक्कमन्तोति ‘‘नामकायो पदकायो निरुत्तिकायो ब्यञ्जनकायो’’ति वुत्तं सिक्खापदं भगवतो वचनं अवीतिक्कमन्तो हुत्वाति अत्थो. इदमेव च द्वयं ‘‘सिक्खन’’न्ति वुत्तं. तत्थ साजीवानतिक्कमो सिक्खापारिपूरिया पच्चयो. ततो हि याव मग्गा संवरपारिपूरी होतीति. विनासनभावतोति हिंसनभावतो. हलिद्दिरागो विय न थिरकथो होतीति एत्थ कथाय अट्ठितभावेन हलिद्दिरागसदिसता वेदितब्बा, न पुग्गलस्स.

१७९. दारुमासकोति ये वोहारं गच्छन्तीति इति-सद्देन एवंपकारे दस्सेति. अञ्ञं दस्सेत्वा अञ्ञस्स परिवत्तनन्ति दसग्घनकं वत्थयुगं दस्सेत्वा तस्स अजानन्तस्स पञ्चग्घनकस्स दानं.

१८१. अविकिण्णसुखन्ति रूपादीसु सुभादिपरिकप्पनवसेन अविसटसुखं.

१८७. खन्धधम्मेसु अनिच्चादिवसेन पवत्ता विपस्सना मग्गफललाभेन पटिलद्धा नाम होति तदलाभेन अनवट्ठानतोति मग्गफललाभी एव ‘‘अधिपञ्ञाधम्मविपस्सनालाभी’’ति वुत्तो, मग्गफलञाणमेव च अधिकपञ्ञाभावतो चतुसच्चधम्मे सब्बधम्मस्स वरे निब्बाने एव वा विसिट्ठदस्सनभावतो च अधिपञ्ञाधम्मविपस्सनाति दट्ठब्बा.

१८९. सुतेन अनुपपन्नोति यथासुतेन वा अत्थेन वा न समन्नागतोति अत्थो.

चतुक्कनिद्देसवण्णना निट्ठिता.

५. पञ्चकनिद्देसवण्णना

१९१. पठमपञ्चके उद्देसेनेव पुग्गलविभागो विञ्ञायतीति यथा तेसु पटिपज्जितब्बं ¶ , ताय पटिपत्तिया ते विभजन्तो ‘‘तत्र य्वाय’’न्तिआदिमाह. आरम्भसद्दोति आरम्भकिरियावाचको सद्दोति अत्थो. फलुप्पत्तिया ¶ मग्गकिच्चं निट्ठितं होतीति ‘‘मग्गकिच्चवसेन फलमेव वुत्त’’न्ति आह. आयाचनसाधूति न पसंसनादिसाधूति अत्थो.

१९२. आदितो धेय्यं ठपेतब्बं आधेय्यं, दस्सनसवनपटिवचनदानवसेन मुखेन विय पवत्तं गहणं मुखन्ति दट्ठब्बं. तं मुखं आधेय्यं, गहणत्थं पकतिमुखमेव वा आधेय्यं यस्स सो आधेय्यमुखो, अविचारेत्वा आदिकथाय एव ठपितगहणोति वुत्तं होति.

१९४. रजग्गस्मिन्ति रजग्गभावे.

१९९. गवा खीरं अग्गमक्खायतीति न एवं सम्बन्धो, उप्पत्तितो पन पञ्च गोरसे दस्सेत्वा तेसु सप्पिमण्डस्स अग्गभावदस्सनत्थं ‘‘गवा खीर’’न्तिआदि वुत्तं. तेनाह ‘‘गावितो खीरं नाम होती’’तिआदि.

पञ्चकनिद्देसवण्णना निट्ठिता.

६. छक्कनिद्देसवण्णना

२०२. छक्के एकन्ततो पाकटा सम्मासम्बुद्धादयो ते यथावुत्तगुणा पुग्गलाति दस्सेन्तो ‘‘सम्मासम्बुद्धो तेन दट्ठब्बो’’तिआदिमाह. तत्थ तेनाति सामं सच्चाभिसमयो तत्थ च सब्बञ्ञुतप्पत्तिबलेसु च वसिभावप्पत्तीति एतेन सब्बेन समुदितेन. ‘‘सब्बञ्ञुतञ्ञाणेना’’ति पन वुत्ते सब्बमिदं सङ्गहितं होति सामं सच्चाभिसमयेन बलेसु च वसिभावप्पत्तिया च विना सब्बञ्ञुतञ्ञाणस्स अभावा, तस्मा अट्ठकथायं ‘‘सब्बञ्ञुतञ्ञाणेना’’ति एत्तकमेव वुत्तं. तत्थ अनाचरियकेन अत्तना उप्पादितेनाति वचनेन सब्बञ्ञुतञ्ञाणस्स साचरियकत्तं परतो उप्पत्तिञ्च पटिसेधेति, न साचरियकं परेहि उप्पादितञ्च सब्बञ्ञुतञ्ञाणं. न हि तं तादिसं निवारेतब्बं अत्थीति.

छक्कनिद्देसवण्णना निट्ठिता.

७. सत्तकनिद्देसवण्णना

२०३. सद्धा ¶ ¶ नाम साधुलद्धिकाति उम्मुज्जतीति एतेन कुसलेसु धम्मेसु अन्तोगधा, बोधिपक्खियधम्मेसु वा अधिमोक्खभूता सद्धा साधूति उम्मुज्जमानं कुसलं दस्सेति, एवं हिरीयादीसु च. कुसलेसु धम्मेसूति एत्थ भुम्मनिद्देसो तदन्तोगधताय तदुपकारताय वा वेदितब्बो. एत्थ च उम्मुज्जति साहु सद्धा कुसलेसु धम्मेसूतिआदिना सद्धादीनं उम्मुज्जनपञ्ञाय सद्धादीनं उप्पत्तिं दस्सेति. तेनेव ‘‘तस्स सा सद्धा नेव तिट्ठती’’तिआदि वुत्तं. ‘‘साहु सद्धा कुसलेसु धम्मेसू’’ति वा उम्मुज्जनस्स उपकारकं आनिसंसदस्सनं वत्वा ‘‘उम्मुज्जती’’ति एतेन सद्धासङ्खातमेव उम्मुज्जनं दस्सितन्ति वेदितब्बं. चङ्कवारेति रजकानं खारपरिसावने. एककम्मनिब्बत्ता पटिसन्धिभवङ्गचुतिसन्तति एको चित्तवारोति चुतितो अनन्तरो यथागहितो दुतियो होतीति आह ‘‘दुतियचित्तवारेना’’ति. उम्मुज्जित्वा ठितादयो चत्तारो ताय ताय जातिया अरहत्तं असच्छिकरोन्ता अनेके पुग्गला वेदितब्बा, सच्छिकरोन्तो पन एकोपि पुब्बभागे ततियपुग्गलादिभावं आपज्जित्वा अन्ते सत्तमपुग्गलो होतीति.

सत्तकनिद्देसवण्णना निट्ठिता.

१०. दसकनिद्देसवण्णना

२०९. पञ्चन्नं इध निट्ठा, पञ्चन्नं इध विहाय निट्ठाति एत्थ ये सोतापन्नादयो रूपारूपभवे उपपज्जित्वा परिनिब्बायिस्सन्ति, ते इध विहाय निट्ठापक्खं भजमानापि अज्झत्तसंयोजनानं असमुच्छिन्नत्ता पुथुज्जनसाधारणे च ठाने उपपत्तिया न गहिता. असाधारणट्ठानुप्पत्तिवसेन पन अन्तरापरिनिब्बायीआदयो एव ‘‘इध विहाय निट्ठा’’ति वुत्ताति वेदितब्बाति.

दसकनिद्देसवण्णना निट्ठिता.

पुग्गलपञ्ञत्तिपकरण-मूलटीका समत्ता.

कथावत्थुपकरण-मूलटीका

गन्थारम्भकथावण्णना

कथानं ¶ ¶ वत्थुभावतोति कथासमुदायस्स पकरणस्स अत्तनो एकदेसानं ओकासभावं वदति. समुदाये हि एकदेसा अन्तोगधाति. येन पकारेन सङ्खेपेन अदेसयि, तं दस्सेन्तो ‘‘मातिकाठपनेनेव ठपितस्सा’’ति आह.

निदानकथावण्णना

अनुपादिसेसाय निब्बानधातुया परिनिब्बायीति परिनिब्बानमेव परिनिब्बानस्स परिनिब्बानन्तरतो विसेसनत्थं करणभावेन वुत्तं. याय वा निब्बानधातुया अधिगताय पच्छिमचित्तं अप्पटिसन्धिकं जातं, सा तस्स अप्पटिसन्धिवूपसमस्स करणभावेन वुत्ताति. दुब्बलपक्खन्ति न काळासोकं विय बलवन्तं, अथ खो एकमण्डलिकन्ति वदन्ति. धम्मवादीअधम्मवादीविसेसजननसमत्थाय पन पञ्ञाय अभावतो दुब्बलता वुत्ता. तेसंयेवाति बाहुलियानमेव ¶ , बहुस्सुतिकातिपि नामं. भिन्नकाति मूलसङ्गीतितो मूलनिकायतो वा भिन्ना, लद्धिया सुत्तन्तेहि लिङ्गाकप्पेहि च विसदिसभावं गताति अत्थो.

मूलसङ्गहन्ति पञ्चसतिकसङ्गीतिं. अञ्ञत्र सङ्गहितातिआदीसु दीघादीसु अञ्ञत्र सङ्गहिततो सुत्तन्तरासितो तं तं सुत्तं निक्कड्ढित्वा अञ्ञत्र अकरिंसूति वुत्तं होति. सङ्गहिततो वा अञ्ञत्र असङ्गहितं सुत्तं अञ्ञत्र कत्थचि अकरिंसु, अञ्ञं वा अकरिंसूति अत्थो. अत्थं धम्मञ्चाति पाळिया अत्थं पाळिञ्च. विनये निकायेसु च पञ्चसूति विनये च अवसेसपञ्चनिकायेसु च.

‘‘द्वेपानन्द ¶ , वेदना वुत्ता मया परियायेना’’तिआदि (म. नि. २.८९) परियायदेसितं. उपेक्खावेदना हि सन्तस्मिं पणीते सुखे वुत्ता भगवताति अयञ्हेत्थ परियायो. ‘‘तिस्सो इमा, भिक्खवे, वेदना सुखा दुक्खा उपेक्खा वेदना’’तिआदि (सं. नि. ४.२४९-२५१) निप्परियायदेसितं. वेदनासभावो हि तिविधोति अयमेत्थ निप्परियायता. ‘‘सुखापि वेदना अनिच्चा सङ्खता’’तिआदि (दी. नि. २.१२३) नीतत्थं. ‘‘यं किञ्चि वेदयितं, सब्बं तं दुक्ख’’न्तिआदि (सं. नि. २.३२) नेय्यत्थं. ‘‘तीहि, भिक्खवे, ठानेहि जम्बुदीपका मनुस्सा उत्तरकुरुके च मनुस्से अधिग्गण्हन्ति देवे च तावतिंसे’’तिआदिकं (अ. नि. ९.२१) अञ्ञं सन्धाय भणितं गहेत्वा अञ्ञं अत्थं ठपयिंसु. ‘‘नत्थि देवेसु ब्रह्मचरियवासो’’तिआदिकं (कथा. २७०) सुत्तञ्च अञ्ञं सन्धाय भणितं अत्थञ्च अञ्ञं ठपयिंसूति एवमेत्थ अत्थो दट्ठब्बो. ‘‘अत्थेकच्चो पुग्गलो अत्तहिताय पटिपन्नो’’तिआदि (पु. प. मातिका ४.२४) ब्यञ्जनच्छायाय सण्हसुखुमं सुञ्ञतादिअत्थं बहुं विनासयुं.

विनयगम्भीरन्ति विनये गम्भीरञ्च एकदेसं छड्डेत्वाति अत्थो. किलेसविनयेन वा गम्भीरं एकदेसं सुत्तं छड्डेत्वाति अत्थो. पतिरूपन्ति अत्तनो अधिप्पायानुरूपं सुत्तं, सुत्तपतिरूपकं वा असुत्तं. एकच्चे अट्ठकथाकण्डमेव विस्सज्जिंसु, एकच्चे सकलं अभिधम्मपिटकन्ति आह ‘‘अत्थुद्धारं अभिधम्मं छप्पकरण’’न्ति. कथावत्थुस्स सविवादत्तेपि अविवादानि छप्पकरणानि पठितब्बानि सियुं, तानि नप्पवत्तन्तीति हि दस्सनत्थं ‘‘छप्पकरण’’न्ति वुत्तन्ति. ततियसङ्गीतितो वा पुब्बे पवत्तमानानं वसेन ‘‘छप्पकरण’’न्ति वुत्तं ¶ . अञ्ञानीति अञ्ञानि अभिधम्मपकरणादीनि. नामन्ति यं बुद्धादिपटिसंयुत्तं न होति मञ्जुसिरीतिआदिकं, तं निकायनामं. लिङ्गन्ति निवासनपारुपनादिविसेसकतं सण्ठानविसेसं. सिक्कादिकं परिक्खारं. आकप्पो ठानादीसु अङ्गट्ठपनविसेसो दट्ठब्बो. करणन्ति चीवरसिब्बनादिकिच्चविसेसो.

सङ्कन्तिकस्सपिकेन निकायेन वादेन वा भिन्ना सङ्कन्तिकाति अत्थो. सङ्कन्तिकानं भेदा सुत्तवादी अनुपुब्बेन भिज्जथ भिज्जिंसूति अत्थो. भिन्नवादेनाति भिन्ना वादा एतस्मिन्ति भिन्नवादो, तेन अभिन्नेन ¶ थेरवादेन सह अट्ठारस होन्तीति वुत्तं होति. भिन्नवादेनाति वा भिन्नाय लद्धिया अट्ठारस होन्ति, ते सब्बेपि सहाति अत्थो. थेरवादानमुत्तमोति एत्थ थेर-इति अविभत्तिको निद्देसो. थेरानं अयन्ति थेरो. को सो? वादो. थेरो वादानमुत्तमोति अयमेत्थ अत्थो.

उप्पन्ने वादे सन्धाय ‘‘परप्पवादमथन’’न्ति आह. आयतिं उप्पज्जनकवादानं पटिसेधनलक्खणभावतो ‘‘आयतिलक्खण’’न्ति वुत्तं.

निदानकथावण्णना निट्ठिता.

महावग्गो

१. पुग्गलकथा

१. सुद्धसच्चिकट्ठो

१. अनुलोमपच्चनीकवण्णना

१. मायाय ¶ ¶ अमणिआदयो मणिआदिआकारेन दिस्समाना ‘‘माया’’ति वुत्ता. अभूतेन मणिउदकादिआकारेन गय्हमाना मायामरीचिआदयो अभूतञ्ञेय्याकारत्ता असच्चिकट्ठा. यो तथा न होति, सो सच्चिकट्ठोति दस्सेन्तो आह ‘‘माया…पे… भूतत्थो’’ति. अनुस्सवादिवसेन गय्हमानो तथापि होति अञ्ञथापीति तादिसो ञेय्यो न परमत्थो, अत्तपच्चक्खो पन परमत्थोति दस्सेन्तो आह ‘‘अनुस्सवा…पे… उत्तमत्थो’’ति.

छलवादस्साति अत्थीति वचनसामञ्ञेन अत्थीति वुत्तेहि रूपादीहि सामञ्ञवचनस्साति अधिप्पायो. ‘‘सो सच्चि…पे… लद्धिं गहेत्वा आमन्ताति पटिजानाती’’ति वचनतो पन ‘‘छलवादस्सा’’ति न सक्का वत्तुं. न हि लद्धि छलन्ति. ओकासं अददमानोति पतिट्ठं पच्छिन्दन्तो. यदि सच्चिकट्ठेन उपलब्भति, रूपादयो विय उपलब्भेय्य, तथा अनुपलब्भनीयतो न तव वादो तिट्ठतीति निवत्तेन्तोति अधिप्पायो. तं सन्धायाति ‘‘यो सच्चिकट्ठो’’ति एत्थ वुत्तो यो सच्चिकट्ठो, सो सप्पच्चयादिभावेन दीपितो ‘‘रूपञ्च उपलब्भती’’तिआदीसु आगतो धम्मप्पभेदोति दस्सेति.

‘‘तेन ¶ सच्चिकट्ठपरमत्थेना’’ति वत्वा ‘‘तेनाकारेना’’ति वदतो अयमधिप्पायो – सच्चिकट्ठपरमत्थाकारेन उपलब्भमानं सच्चिकट्ठपरमत्थेन उपलब्भमानं नाम होतीति. अञ्ञथा ततोति तस्स तेनाकारेनाति वत्तब्बं सिया. को पनेतिस्सा पुरिमपुच्छाय च विसेसोति? पुरिमपुच्छाय सत्तपञ्ञासविधो धम्मप्पभेदो यथा भूतेन सभावत्थेन उपलब्भति, एवं पुग्गलो उपलब्भतीति वुत्तं. इध पन भूतसभावत्थेन उपलब्भमानो सो धम्मप्पभेदो येन रुप्पनादिसप्पच्चयादिआकारेन उपलब्भति, किं तेनाकारेन पुग्गलोपि ¶ उपलब्भतीति एस विसेसो. यथा पन रूपं विय भूतसभावत्थेन उपलब्भमाना वेदना न रुप्पनाकारेन उपलब्भति, एवं धम्मप्पभेदो विय भूतसभावत्थेन उपलब्भमानो पुग्गलो न रुप्पनादिसप्पच्चयादिआकारेन उपलब्भतीति सक्का परवादिना वत्तुन्ति अचोदनीयं एतं सिया. अवजाननञ्च तस्स युत्तन्ति निग्गहो च न कातब्बो. धम्मप्पभेदतो पन अञ्ञस्स सच्चिकट्ठस्स असिद्धत्ता धम्मप्पभेदाकारेनेव चोदेति. अवजाननेनेव निग्गहं दस्सेति. अनुजाननावजाननपक्खा सामञ्ञविसेसेहि पटिञ्ञापटिक्खेपपक्खा अनुलोमपटिलोमपक्खा पठमदुतियनयाति अयमेतेसं विसेसो वेदितब्बो.

‘‘तेन वत रे वत्तब्बे’’ति वदन्तो वत्तब्बस्स अवचने दोसं पापेतीति इमिना अधिप्पायेन ‘‘निग्गहस्स पापितत्ता’’ति वुत्तन्ति दट्ठब्बं. ‘‘एवमेतं निग्गहस्स च अनुलोमपटिलोमतो चतुन्नं पापनारोपनञ्च वुत्तत्ता उपलब्भतीतिआदिकं अनुलोमपञ्चकं नामा’’ति वुत्तं, अनुलोमपटिलोमतो पन द्वीहि ठपनाहि सह सत्तकेन भवितब्बं, तंवज्जने वा कारणं वत्तब्बं. यं पन वक्खति ‘‘ठपना नाम परवादीपक्खस्स ठपनतो ‘अयं तव दोसो’ति दस्सेतुं ठपनमत्तमेव होति, न निग्गहस्स वा पटिकम्मस्स वा पाकटभावकरण’’न्ति (कथा. अट्ठ. २). तेनाधिप्पायेन इधापि ठपनाद्वयं वज्जेति. यथा पन तत्थ पटिकम्मपञ्चकभावं अवत्वा पटिकम्मचतुक्कभावं वक्खति, एवमिधापि निग्गहचतुक्कभावो वत्तब्बो सिया. सुद्धिकनिग्गहस्स पन निग्गहप्पधानत्ता उद्देसभावेन वुत्तो निग्गहोव विसुं वुत्तोति दट्ठब्बो. ये पन ‘‘अयथाभूतनिग्गहत्ता तत्थ पटिकम्मं विसुं न वुत्त’’न्ति वदन्ति, तेसं दुतिये वादमुखे निग्गहचतुक्कभावो पटिकम्मपञ्चकभावो च आपज्जति.

२. अत्तना अधिप्पेतं सच्चिकट्ठमेवाति सम्मुतिसच्चं सन्धायाति अधिप्पायो. वक्खति हि ¶ ‘‘सुद्धसम्मुतिसच्चं वा परमत्थमिस्सकं वा सम्मुतिसच्चं सन्धाय ‘यो सच्चिकट्ठो’ति पुन अनुयोगो परवादिस्सा’’ति (कथा. अट्ठ. ६). तत्थ यदि परवादिना अत्तना अधिप्पेतसच्चिकट्ठो सम्मुतिसच्चं, सम्मुतिसच्चाकारेन पुग्गलो उपलब्भतीति वदन्तेन समानलद्धिको नप्पटिसेधितब्बो, कथा एवायं नारभितब्बा. अथ सकवादिना अत्तना ¶ च अधिप्पेतसच्चिकट्ठंयेव सन्धाय परवादी ‘‘यो सच्चिकट्ठो’’तिआदिमाहाति अयमत्थो. सकवादिना सम्मुतिसच्चंयेव सच्चिकट्ठोति अधिप्पेतन्ति आपज्जति. यदि उभयं अधिप्पेतं, पुन ‘‘सम्मुतिसच्चपरमत्थसच्चानि वा एकतो कत्वापि एवमाहा’’ति न वत्तब्बं सियाति. यदि च द्वेपि सच्चानि सच्चिकट्ठपरमत्था, सच्चिकट्ठेकदेसेन उपलद्धिं इच्छन्तेन ‘‘पुग्गलो उपलब्भति सच्चिकट्ठपरमत्थेना’’तिआदि अनुयोगो न कातब्बो, न च सच्चिकट्ठेकदेसेन अनुयोगो युत्तो. न हि वेदयिताकारेन उपलब्भमाना वेदना रुप्पनाकारेन उपलब्भतीति अनुयुञ्जितब्बा, न च परवादी रुप्पनादिसभावं पुग्गलं इच्छति, अथ खो सच्चिकट्ठपरमत्थमेवाति. परमत्थसच्चतो अञ्ञस्मिं सच्चिकट्ठे विज्जमाने नास्स परमत्थसच्चता अनुयुञ्जितब्बा. असच्चिकट्ठे सच्चिकट्ठवोहारं आरोपेत्वा तं सन्धाय पुच्छतीति वदन्तानं वोहरितसच्चिकट्ठस्स अत्तना अधिप्पेतसच्चिकट्ठता न युत्ता. वोहरितपरमत्थसच्चिकट्ठानञ्च द्विन्नं सच्चिकट्ठभावे वुत्तनयोव दोसो. सम्मुतिसच्चाकारेन उपलब्भमानञ्च भूतसभावत्थेन उपलब्भेय्य वा न वा. यदि भूतसभावत्थेन उपलब्भति, पुग्गलोपि उपलब्भति सच्चिकट्ठपरमत्थेनाति अनुजानन्तो नानुयुञ्जितब्बो. अथ न भूतसभावत्थेन, तंविनिमुत्तो सम्मुतिसच्चस्स सच्चिकट्ठपरमत्थाकारो न वत्तब्बो असिद्धत्ता. वक्खति च ‘‘यथा रूपादयो पच्चत्तलक्खणसामञ्ञलक्खणवसेन अत्थि, न एवं पुग्गलो’’ति. तस्मा मग्गितब्बो एत्थ अधिप्पायो.

द्विन्नं सच्चानन्ति एत्थ सच्चद्वयाकारेन अनुपलब्भनीयतो अनुञ्ञेय्यमेतं सिया, न वा किञ्चि वत्तब्बं. यथा हि एकदेसेन परमत्थाकारेन अनुपलब्भनीयता अनुजाननस्स न कारणं, एवं एकदेसेन सम्मुतियाकारेन उपलब्भनीयता पटिक्खेपस्स चाति मग्गितब्बो एत्थापि अधिप्पायो. नुपलब्भतीति वचनसामञ्ञमत्तन्ति नुपलब्भतीति इदमेव वचनं अनुञ्ञातं पटिक्खित्तञ्चाति एतं छलवादं निस्सायाति अधिप्पायो. यथा उपलब्भतीति एतस्सेव अनुजाननपटिक्खेपेहि अहं निग्गहेतब्बो, एवं नुपलब्भतीति एतस्सेव अनुजाननपटिक्खेपेहि त्वन्ति एवं सम्भवन्तस्स सामञ्ञेन असम्भवन्तस्स कप्पनं पनेत्थ छलवादो ¶ भवितुं अरहति. तेन नुपलब्भतीति वचनसामञ्ञमत्तं छलवादस्स कारणत्ता ‘‘छलवादो’’ति वुत्तन्ति दट्ठब्बं. वचनसामञ्ञमत्तञ्च छलवादञ्च ¶ निस्सायाति वा अत्थो. ठपना निग्गहप्पटिकम्मानं पाकटभावकरणं न होतीति इदं विचारेतब्बं. न हि पक्खट्ठपनेन विना पुरिमं अनुजानित्वा पच्छिमस्स अवजाननं, पच्छिमं वा अवजानन्तस्स पुरिमानुजाननं मिच्छाति सक्का आरोपेतुन्ति.

३. तवाति, पटिजानन्तन्ति च पच्चत्ते सामिउपयोगवचनानीति अधिप्पायेन ‘‘त्वंयेव पटिजानन्तो’’ति आह.

४-५. चतूहि पापनारोपनाहि निग्गहस्स उपनीतत्ताति ‘‘दुन्निग्गहिता च होम, हञ्ची’’तिआदिना तया मम कतो निग्गहो, मया तव कतो निग्गहो विय मिच्छाति एवं तेन अनुलोमपञ्चके चतूहि पापनारोपनाहि कतस्स निग्गहस्स तेन नियामेन दुक्कटभावस्स अत्तना कतनिग्गहेन सह उपनीतत्ता अनिग्गहभावस्स वा उपगमितत्ताति अत्थो दट्ठब्बो. एवमेव तेन हि यं निग्गण्हासि हञ्चि…पे… इदं ते मिच्छाति एतस्स अनिग्गहभावनिगमनस्सेव निग्गमनचतुक्कता वेदितब्बा.

अनुलोमपच्चनीकवण्णना निट्ठिता.

२. पच्चनीकानुलोमवण्णना

७-१०. ‘‘अत्तनो लद्धिं निस्साय पटिञ्ञा परवादिस्सा’’ति वत्वा पुन ‘‘परमत्थवसेन पुग्गलस्स अभावतो पटिक्खेपो परवादिस्सा’’ति वुत्तं. तत्रायं पटिक्खेपो अत्तनो लद्धिया यदि कतो, परमत्थतो अञ्ञेन सच्चिकट्ठपरमत्थेन पुग्गलो उपलब्भतीति अयमस्स लद्धीति आपज्जति. तथा च सति नायं सम्मुतिसच्चवसेन उपलद्धिं इच्छन्तेन निग्गहेतब्बो. अथ अत्तनो लद्धिं निग्गूहित्वा परस्स लद्धिवसेन पटिक्खिपति, पुरिमपटिञ्ञाय अविरोधितत्ता न निग्गहेतब्बो. न हि अत्तनो च परस्स च लद्धिं वदन्तस्स दोसो आपज्जतीति. अत्तनो ¶ पन लद्धिया पटिजानित्वा परलद्धिया पटिक्खिपन्तेन अत्तनो लद्धिं छड्डेत्वा परलद्धि गहिता होतीति निग्गहेतब्बोति अयमेत्थ अधिप्पायो सिया.

पच्चनीकानुलोमवण्णना निट्ठिता.

सुद्धसच्चिकट्ठवण्णना निट्ठिता.

२. ओकाससच्चिकट्ठो

१. अनुलोमपच्चनीकवण्णना

११. सब्बत्थाति ¶ सब्बस्मिं सरीरेति अयमत्थोति दस्सेन्तो आह ‘‘सरीरं सन्धाया’’ति. तत्थाति तस्मिं संखित्तपाठे. यस्मा सरीरं सन्धाय ‘‘सब्बत्थ न उपलब्भती’’ति वुत्ते सरीरतो बहि उपलब्भतीति आपज्जति, तस्मा पच्चनीके पटिक्खेपो सकवादिस्साति एतेन न केनचि सभावेन पुग्गलो उपलब्भतीति अयमत्थो वुत्तो होति. न हि केनचि सभावेन उपलब्भमानस्स सरीरतदञ्ञाविमुत्तो उपलद्धिओकासो अत्थीति.

३. कालसच्चिकट्ठो

१. अनुलोमपच्चनीकवण्णना

१२. पुरिमपच्छिमजातिकालञ्चाति मज्झिमजातिकाले उपलब्भमानस्स तस्सेव पुरिमपच्छिमजातिकालेसु उपलद्धिं सन्धायाति अधिप्पायो. सेसं पठमनये वुत्तसदिसमेवाति इमेसु तीसु पठमे ‘‘सब्बत्था’’ति एतस्मिं नये वुत्तसदिसमेव, किं तं? पाठस्स संखित्तताति अत्थो. इधापि हि यस्मा ‘‘सब्बदा न उपलब्भती’’ति वुत्ते एकदा उपलब्भतीति आपज्जति, तस्मा पच्चनीके पटिक्खेपो सकवादिस्साति योजेतब्बन्ति.

४. अवयवसच्चिकट्ठो

१. अनुलोमपच्चनीकवण्णना

१३. ततियनये ¶ च यस्मा ‘‘सब्बेसु न उपलब्भती’’ति वुत्ते एकस्मिं उपलब्भतीति आपज्जति, तस्मा पच्चनीके पटिक्खेपो सकवादिस्साति योजेतब्बं. तेनाह ‘‘तादिसमेवा’’ति.

ओकासादिसच्चिकट्ठो

२. पच्चनीकानुलोमवण्णना

१४. तत्थ अनुलोमपञ्चकस्सातिआदिम्हि अनुलोमपञ्चकन्ति निग्गहपञ्चकं, पच्चनीकन्ति च पटिकम्मं वुत्तन्ति दट्ठब्बं. तत्थ अनुलोमपञ्चकस्स ‘‘सब्बत्थ ¶ पुग्गलो नुपलब्भती’’तिआदिकस्स अत्थो ‘‘सब्बत्थ पुग्गलो नुपलब्भती’’तिआदिपाळिं संखिपित्वा आगते सरूपेन अवुत्ते ‘‘यस्मा सरीरं सन्धाया’’तिआदिना (कथा. अट्ठ. ११) वुत्तनयेन वेदितब्बो, पच्चनीकस्स च ‘‘सब्बत्थ पुग्गलो उपलब्भती’’तिआदिकस्स पटिकम्मकरणवसेन वुत्तस्स अत्थो पटिकम्मादिपाळिं संखिपित्वा आदिमत्तदस्सनेन आगते ‘‘पुग्गलो उपलब्भती’’तिआदिम्हि अनुलोमे ‘‘सब्बत्थाति सरीरं सन्धाय अनुयोगो सकवादिस्सा’’तिआदिना (कथा. अट्ठ. ११) वुत्तनयेन वेदितब्बोति एवमत्थो दट्ठब्बो. अथ वा तत्थाति यं आरद्धं, तस्मिन्ति एवं अत्थं अग्गहेत्वा तत्थ तेसु तीसु मुखेसूति अत्थो गहेतब्बो. अनुलोमपञ्चकमूलका चेत्थ सब्बानुलोमपच्चनीकपञ्चकपाळि अनुलोमपञ्चकस्स पाळीति वुत्ता, तथा पच्चनीकानुलोमपञ्चकपाळि च पच्चनीकस्स पाळीति. तं संखिपित्वा पटिकम्मवसेन आगते सरूपेन अवुत्ते ‘‘पुग्गलो नुपलब्भती’’तिआदिके पच्चनीके ‘‘उपलब्भती’’तिआदिके अनुलोमे च अत्थो हेट्ठा सुद्धिकसच्चिकट्ठे वुत्तनयेनेव वेदितब्बोति वुत्तं होति.

सच्चिकट्ठवण्णना निट्ठिता.

५. सुद्धिकसंसन्दनवण्णना

१७-२७. रूपादीहि ¶ सद्धिं सच्चिकट्ठसंसन्दनन्ति सच्चिकट्ठस्स पुग्गलस्स रूपादीहि सद्धिं संसन्दनं, सच्चिकट्ठे वा रूपादीहि सद्धिं पुग्गलस्स संसन्दनन्ति अधिप्पायो. पुग्गलो रूपञ्चाति च-कारस्स समुच्चयत्थत्ता यथा रूपन्ति एवं निदस्सनवसेन वुत्तो अत्थो विचारेतब्बो. रूपादीहि अञ्ञो अनञ्ञो च पुग्गलो न वत्तब्बोति लद्धि समयो. ‘‘अञ्ञं जीवं अञ्ञं सरीरन्ति अब्याकतमेतं भगवता’’तिआदिकं (सं. नि. ४.४१६) सुत्तं. अनुञ्ञायमाने तदुभयविरोधो आपज्जतीति इममत्थं सन्धायाह ‘‘समयसुत्तविरोधं दिस्वा’’ति.

धम्मतोति पाळितो. ‘‘पटिकम्मचतुक्कादीनि संखित्तानि. परवादी…पे… दस्सितानी’’ति वदन्तेहि पुग्गलो नुपलब्भति…पे… आजानाहि पटिकम्मन्ति ¶ एत्थ आजानाहि निग्गहन्ति पाठो दिट्ठो भविस्सति. अञ्ञत्तं पटिजानापनत्थन्ति यथा मया अञ्ञत्तं वत्तब्बं, तथा च तयापि तं वत्तब्बन्ति अञ्ञत्तपटिञ्ञाय चोदनत्थन्ति अत्थो. सम्मुतिपरमत्थानं एकत्तनानत्तपञ्हस्स ठपनीयत्ताति अब्याकतत्ताति अत्थो. यदि ठपनीयत्ता पटिक्खिपितब्बं, परेनपि ठपनीयत्ता लद्धिमेव निस्साय पटिक्खेपो कतोति सोपि न निग्गहेतब्बो सिया. परो पन पुग्गलोति कञ्चि सभावं गहेत्वा तस्स ठपनीयत्तं इच्छति, सति च सभावे ठपनीयता न युत्ताति निग्गहेतब्बो. सम्मुति पन कोचि सभावो नत्थि. तेनेवस्स एकत्तनानत्तपञ्हस्स ठपनीयतं वदन्तो न निग्गहेतब्बोति सकवादिना पटिक्खेपो कतोति अयमेत्थ अधिप्पायो युत्तो.

सुद्धिकसंसन्दनवण्णना निट्ठिता.

६. ओपम्मसंसन्दनवण्णना

२८-३६. उपलद्धिसामञ्ञेन अञ्ञत्तपुच्छा चाति इदञ्च द्विन्नं समानता नो अञ्ञत्तस्स कारणं युत्तं, अथ खो विसुं अत्तनो सभावेन सच्चिकट्ठपरमत्थेन उपलब्भनीयताति ¶ विचारेतब्बं. ‘‘एकवीसाधिकानी’’ति पुरिमपाठो, वीसाधिकानीति पन पठितब्बं.

३७-४५. ‘‘अत्थि पुग्गलो’’ति सुत्तं अनुजानापेन्तेन उपलद्धि अनुजानिता होतीति मञ्ञमानो आह ‘‘उपलद्धिसामञ्ञं आरोपेत्वा’’ति. वीसाधिकानि नव पटिकम्मपञ्चकसतानि दस्सितानीति एतेन सुद्धिकसंसन्दनेपि ‘‘आजानाहि पटिकम्म’’मिच्चेव पाठोति विञ्ञायति. यञ्च वादमुखेसु सुद्धिकसच्चिकट्ठे ‘‘पटिकम्मचतुक्क’’न्ति वुत्तं, तम्पि ‘‘पटिकम्मपञ्चक’’न्ति.

ओपम्मसंसन्दनवण्णना निट्ठिता.

७. चतुक्कनयसंसन्दनवण्णना

४६-५२. एकधम्मतोपि ¶ अञ्ञत्तं अनिच्छन्तो रूपादिएकेकधम्मवसेन नानुयुञ्जितब्बो. समुदायतो हि अयं अञ्ञत्तं अनिच्छन्तो एकदेसतो अनञ्ञत्तं पटिक्खिपन्तो न निग्गहारहो सियाति एतं वचनोकासं निवत्तेतुं ‘‘अयञ्च अनुयोगो’’तिआदिमाह. सकलन्ति सत्तपञ्ञासविधो धम्मप्पभेदो पुग्गलोति वा परमत्थसच्चं पुग्गलोति वा एवं सकलं सन्धायाति अत्थो. एवं सकलं परमत्थं चिन्तेत्वा तन्तिवसेन अनुयोगलक्खणस्स ठपितत्ता सकलपरमत्थतो च अञ्ञस्स सच्चिकट्ठस्स अभावा सच्चिकट्ठेन पुग्गलेन ततो अञ्ञेन न भवितब्बन्ति ‘‘रूपं पुग्गलो’’ति इमं पञ्हं पटिक्खिपन्तस्स निग्गहारोपनं युत्तन्ति अत्थो.

सभागविनिब्भोगतोति रूपतो अञ्ञसभागत्ताति वुत्तं होति. सब्बधम्माति रूपवज्जे सब्बधम्मे वदति. ‘‘रूपस्मिं पुग्गलो’’ति एत्थ निस्सयविनासे विनासापत्तिभयेन पटिक्खिपतीति अधिप्पायेनाह ‘‘उच्छेददिट्ठिभयेन चेवा’’ति. तीसु पन समयविरोधेन पटिक्खेपो अधिप्पेतो. न हि सो सक्कायदिट्ठिं इच्छति, अपिच सस्सतदिट्ठिभयेन पटिक्खिपतीति युत्तं वत्तुं. सक्कायदिट्ठीसु ¶ हि पञ्चेव उच्छेददिट्ठियो, सेसासस्सतदिट्ठियोति. अञ्ञत्र रूपाति एत्थ च रूपवा पुग्गलोति अयमत्थो सङ्गहितोति वेदितब्बो.

चतुक्कनयसंसन्दनवण्णना निट्ठिता.

निट्ठिता च संसन्दनकथावण्णना.

८. लक्खणयुत्तिवण्णना

५४. पच्चनीकानुलोमेति इदं यं वक्खति ‘‘छलवसेन पन वत्तब्बं ‘आजानाहि पटिकम्म’न्तिआदी’’ति (कथा. अट्ठ. ५४), तेन पन न समेति. पच्चनीकानुलोमे हि पच्चनीके ‘‘आजानाहि निग्गह’’न्ति वत्तब्बं, न पन ‘‘पटिकम्म’’न्ति.

लक्खणयुत्तिवण्णना निट्ठिता.

९. वचनसोधनवण्णना

५५-५९. पुग्गलो ¶ उपलब्भतीति पदद्वयस्स अत्थतो एकत्तेति एत्थ तदेव एकत्तं परेन सम्पटिच्छितं असम्पटिच्छितन्ति विचारेतब्बमेतं. पुग्गलस्स हि अविभजितब्बतं, उपलब्भतीति एतस्स विभजितब्बतं वदन्तो विभजितब्बाविभजितब्बत्थानं उपलब्भतिपुग्गल-सद्दानं कथं अत्थतो एकत्तं सम्पटिच्छेय्याति? यथा च विभजितब्बाविभजितब्बत्थानं उपलब्भति-रूप-सद्दानं तं विभागं वदतो रूपं किञ्चि उपलब्भति, किञ्चि न उपलब्भतीति अयं पसङ्गो नापज्जति, एवं एतस्सपि यथावुत्तविभागं वदतो यथाआपादितेन पसङ्गेन न भवितब्बन्ति मग्गितब्बो एत्थ अधिप्पायो.

६०. ‘‘सुञ्ञतो ¶ लोकं अवेक्खस्सू’’ति (सु. नि. ११२५) एतेन अत्थतो पुग्गलो नत्थीति वुत्तं होतीति आह ‘‘नत्थीतिपि वुत्त’’न्ति.

वचनसोधनवण्णना निट्ठिता.

१०. पञ्ञत्तानुयोगवण्णना

६१-६६. रूपकायाविरहं सन्धाय ‘‘रूपकायसब्भावतो’’ति आह. ‘‘रूपिनो वा अरूपिनो वा’’ति (इतिवु. ९०) सुत्ते आगतपञ्ञत्तिं सन्धाय ‘‘तथारूपाय च पञ्ञत्तिया अत्थिताया’’ति. वीतरागसब्भावतोति कामीभावस्स अनेकन्तिकत्ता कामधातुया आयत्तत्ताभावतो च ‘‘कामी’’ति न वत्तब्बोति पटिक्खिपतीति अधिप्पायो.

६७. कायानुपस्सनायाति कारणवचनमेतं, कायानुपस्सनाय कारणभूताय एवंलद्धिकत्ताति अत्थो. आहच्च भासितन्ति ‘‘अञ्ञं जीवं अञ्ञं सरीरन्ति अब्याकतमेतं मया’’ति (म. नि. २.१२८) आहच्च भासितं.

पञ्ञत्तानुयोगवण्णना निट्ठिता.

११. गतिअनुयोगवण्णना

६९-७२. ‘‘दस्सेन्तो ¶ ‘तेन हि पुग्गलो सन्धावती’तिआदिमाहा’’ति वुत्तं, ‘‘दस्सेन्तो ‘न वत्तब्बं पुग्गलो सन्धावती’तिआदिमाहा’’ति पन भवितब्बं, दस्सेत्वाति वा वत्तब्बं.

९१. येन रूपसङ्खातेन सरीरेन सद्धिं गच्छतीति एत्थ ‘‘रूपेन सद्धिं गच्छती’’ति वदन्तेन ‘‘रूपं पुग्गलो’’ति अननुञ्ञातत्ता येनाकारेन तं जीवं तं सरीरन्ति इदं आपज्जति ¶ , सो वत्तब्बो. असञ्ञूपपत्तिं सन्धायाति निरयूपगस्स पुग्गलस्स असञ्ञूपगस्स अरूपूपगस्स च अन्तराभवं न इच्छतीति चुतितो अनन्तरं उपपत्तिं सन्धायाति अत्थो दट्ठब्बो. ये पन चुतिकाले उपपत्तिकाले च असञ्ञूपपत्तिकाले च असञ्ञसत्तेसु सञ्ञा अत्थीति गहेत्वा असञ्ञूपगस्स च अन्तराभवं इच्छेय्युं, तेसं अन्तराभवभावतो ‘‘असञ्ञूपपत्ति अवेदना’’ति न सक्का वत्तुन्ति.

९२. अवेदनोतिआदीसु तदञ्ञन्ति सञ्ञभवतो अञ्ञं असञ्ञानेवसञ्ञानासञ्ञायतनुपपत्तिं. नेवसञ्ञानासञ्ञायतनेपि हि न वत्तब्बं सञ्ञा अत्थीति इच्छन्ति.

९३. यस्मा रूपादिधम्मे विना पुग्गलो नत्थीति इन्धनुपादानो अग्गि विय इन्धनेन रूपादिउपादानो पुग्गलो रूपादिना विना नत्थीति लद्धिवसेन वदति.

गतिअनुयोगवण्णना निट्ठिता.

१२. उपादापञ्ञत्तानुयोगवण्णना

९७. नीलं रूपं उपादाय नीलोतिआदीसूति ‘‘नीलं रूपं उपादाय नीलकस्स पुग्गलस्स पञ्ञत्ती’’ति एत्थ यो पुट्ठो नीलं उपादाय नीलोति, तदादीसूति अत्थो.

९८. छेकट्ठं सन्धायाति छेकट्ठं सन्धाय वुत्तं, न कुसलपञ्ञत्तिं. ‘‘कुसलं वेदनं उपादाया’’ति मञ्ञमानो पटिजानातीति अत्थो दट्ठब्बो.

११२. इदानि ¶ …पे… दस्सेतुं ‘‘यथा रुक्ख’’न्तिआदिमाहाति पुब्बपक्खं दस्सेत्वा उत्तरमाहाति वुत्तं होति.

११५. ‘‘यस्स ¶ रूपं सो रूपवा’’ति उत्तरपक्खे वुत्तं वचनं उद्धरित्वा ‘‘यस्मा’’तिआदिमाह.

११६. चित्तानुपस्सनावसेनाति चित्तानुपस्सनावसेन परिदीपितस्स सरागादिचित्तयोगस्स वसेनाति अधिप्पायो.

११८. येनाति चक्खुन्ति ‘‘येना’’ति वुत्तं करणं चक्खुन्ति अत्थो. चक्खुमेव रूपं पस्सतीति विञ्ञाणनिस्सयभावूपगमनमेव चक्खुस्स दस्सनं नाम होतीति सन्धाय वदति.

उपादापञ्ञत्तानुयोगवण्णना निट्ठिता.

१३. पुरिसकारानुयोगवण्णना

१२३. करणमत्तन्ति कम्मानं निप्फादकप्पयोजकभावेन पवत्ता खन्धा.

१२४. पुरिमकम्मेन विना पुग्गलस्स जाति, जातस्स च विज्जट्ठानादीसु सम्मा मिच्छा वा पवत्ति नत्थीति सन्धाय ‘‘पुरिमकम्ममेव तस्सा’’तिआदिमाह.

१२५. कम्मवट्टस्साति एत्थ कम्मकारकस्स यो कारको, तेनपि अञ्ञं कम्मं कातब्बं, तस्स कारकेनपि अञ्ञन्ति एवं कम्मवट्टस्स अनुपच्छेदं वदन्ति. पुग्गलस्स कारको कम्मस्स कारको आपज्जतीति विचारेतब्बमेतं. मातापितूहि जनिततादिना तस्स कारकं इच्छन्तस्स कम्मकारकानं कारकपरम्परा आपज्जतीति इदञ्च विचारेतब्बं.

१७०. सुत्तविरोधभयेनाति ‘‘सो करोति सो पटिसंवेदयतीति खो, ब्राह्मण, अयमेको अन्तो’’तिआदीहि (सं. नि. २.४६) विरोधभया.

१७१. ‘‘इध ¶ नन्दति पेच्च नन्दती’’ति (ध. प. १८) वचनतो कम्मकरणकाले विपाकपटिसंवेदनकाले च सोयेवाति पटिजानातीति अधिप्पायो. सयंकतं ¶ सुखदुक्खन्ति च पुट्ठो ‘‘किं नु खो, भो गोतम, सयंकतं सुखं दुक्खन्ति? मा हेवं कस्सपा’’तिआदिसुत्तविरोधा (सं. नि. २.१८) पटिक्खिपति.

१७६. लद्धिमत्तमेवेतन्ति सोयेवेको नेव सो होति न अञ्ञोति इदं पन नत्थेव, तस्मा एवंवादिनो असयंकारन्तिआदि आपज्जतीति अधिप्पायो. अपिचातिआदिना इदं दस्सेति – न परस्स इच्छावसेनेव ‘‘सो करोती’’तिआदि अनुयोगो वुत्तो, अथ खो ‘‘सो करोती’’तिआदीसु एकं अनिच्छन्तस्स इतरं, तञ्च अनिच्छन्तस्स अञ्ञं आपन्नन्ति एवं कारकवेदकिच्छाय ठत्वा ‘‘सो करोती’’तिआदीसु तं तं अनिच्छाय आपन्नवसेनापीति. अथ वा न केवलं ‘‘सो करोती’’तिआदीनं सब्बेसं आपन्नत्ता, अथ खो एकेकस्सेव च आपन्नत्ता अयं अनुयोगो कतोति दस्सेति. पुरिमनयेनेवाति एतेन ‘‘इध नन्दती’’तिआदि सब्बं पटिजाननादिकारणं एकतो योजेतब्बन्ति दस्सेति.

पुरिसकारानुयोगवण्णना निट्ठिता.

कल्याणवग्गो निट्ठितो.

१४. अभिञ्ञानुयोगवण्णना

१९३. अभिञ्ञानुयोगादिवसेन अरहत्तसाधनाति एत्थ ‘‘ननु अत्थि कोचि इद्धिं विकुब्बती’’ति अभिञ्ञाअनुयोगो च ‘‘हञ्चि अत्थि कोचि इद्धिं विकुब्बती’’ति ठपना च ‘‘तेन वत रे’’तिआदि पापना च आदिसद्दसङ्गहितो अत्थोव दट्ठब्बो. आसवक्खयञाणं पनेत्थ अभिञ्ञा वुत्ताति तदभिञ्ञावतो अरहतो साधनं ‘‘अरहत्तसाधना’’ति आह. अरहतो हि साधना तब्भावस्स च साधना होतियेवाति.

अभिञ्ञानुयोगवण्णना निट्ठिता.

१५-१८. ञातकानुयोगादिवण्णना

२०९. तथारूपस्साति ¶ ¶ ततियकोटिभूतस्स सच्चिकट्ठस्स अभावाति अधिप्पायो. एवं पन पटिक्खिपन्तो असच्चिकट्ठं ततियकोटिभूतं पुग्गलं वदेय्याति तादिसं पुग्गलं इच्छन्तो हि सुत्तेन निग्गहेतब्बो सिया. कस्मा? तथारूपस्स सच्चिकट्ठस्स अभावतोति, तथारूपस्स कस्सचि सभावस्स अभावतो पटिक्खेपारहत्ता अत्तनो लद्धिं निगूहित्वा पटिक्खेपो परवादिस्साति अयमत्थो दट्ठब्बो.

ञातकानुयोगादिवण्णना निट्ठिता.

१९. पटिवेधानुयोगादिवण्णना

२१८. परिग्गहितवेदनोति वचनेन अपरिग्गहितवेदनस्स ‘‘सुखितोस्मि, दुक्खितोस्मी’’ति जाननं पजाननं नाम न होतीति दस्सेति योगावचरस्स सुखुमानम्पि वेदनानं परिच्छेदनसमत्थतञ्च.

२२८. लक्खणवचनन्ति रूपब्भन्तरगमनं सहरूपभावो, बहिद्धा निक्खमनं विनारूपभावोति अधिप्पायो.

२३७. इमा खोति ओळारिको अत्तपटिलाभो मनोमयो अत्तपटिलाभो अरूपो अत्तपटिलाभोति इमा लोकस्स समञ्ञा, याहि तथागतो वोहरति अपरामसं, यो सच्चो मोघो वा सिया, तस्मिं अनुपलब्भमानेपि अत्तनि तदनुपलब्भतोयेव परामासं अत्तदिट्ठिं अनुप्पादेन्तो लोके अत्तपटिलाभोति पवत्तवोहारवसेनेव वोहरतीति अयमेत्थ अत्थो. एत्थ च पच्चत्तसामञ्ञलक्खणवसेन पुग्गलस्स अत्थितं पटिक्खिपित्वा लोकवोहारेन अत्थितं वदन्तेन पुग्गलोति कोचि सभावो नत्थीति वुत्तं होति. सति हि तस्मिं अत्तनो सभावेनेव अत्थिता वत्तब्बा सिया, न लोकवोहारेनाति. इमिना पन यथा समेति, यथा च ¶ परामासो न होति, एवं इतो पुरिमा च अत्थवण्णना योजेतब्बा.

लोकसम्मुतिकारणन्ति ¶ यस्मा लोकसम्मुतिवसेन पवत्तं, तस्मा सच्चन्ति वुत्तं होति. तथलक्खणन्ति तथकारणं. यस्मा धम्मानं तथताय पवत्तं, तस्मा सच्चन्ति दस्सेति.

पटिवेधानुयोगादिवण्णना निट्ठिता.

पुग्गलकथावण्णना निट्ठिता.

२. परिहानिकथा

१. वादयुत्तिपरिहानिकथावण्णना

२३९. ‘‘द्वेमे ¶ ¶ , भिक्खवे, धम्मा सेक्खस्स भिक्खुनो परिहानाय संवत्तन्ती’’ति (अ. नि. २.१८५) इदं सुत्तं अरहतो परिहानिलद्धिया न निस्सयो, अथ खो अनागामिआदीनं परिहानिलद्धिया, तस्मा अरहतोपि परिहानिं इच्छन्तीति एत्थ पि-सद्देन अनागामिस्सपि सकदागामिस्सपीति योजेतब्बं.

‘‘ततियस्मिम्पि मुदिन्द्रियाव अधिप्पेता. तेसञ्हि सब्बेसम्पि परिहानि न होतीति तस्स लद्धी’’ति पुरिमपाठो, मुदिन्द्रियेस्वेव पन अधिप्पेतेसु परिक्खेपो न कातब्बो सिया, कतो च, तस्मा ‘‘ततियस्मिम्पि तिक्खिन्द्रियाव अधिप्पेता. तेसञ्हि सब्बेसम्पि परिहानि न होतीति तस्स लद्धी’’ति पठन्ति.

अयोनिसो अत्थं गहेत्वाति सोतापन्नोयेव नियतोति वुत्तोति सोयेव न परिहायति, न इतरेति अत्थं गहेत्वा. ‘‘उपरिमग्गत्थाया’’ति वुत्तं अत्थं अग्गहेत्वा नियतोति सोतापत्तिफला न परिहायतीति एतमत्थं गण्हीति पन वदन्ति.

वादयुत्तिपरिहानिकथावण्णना निट्ठिता.

२. अरियपुग्गलसंसन्दनपरिहानिवण्णना

२४१. यं ¶ पनेत्थातिआदिम्हि दस्सनमग्गफले ठितस्स अनन्तरं अरहत्तप्पत्तिं, ततो परिहायित्वा तत्थ च ठानं इच्छन्तो पुन वायामेन तदनन्तरं अरहत्तप्पत्तिं न इच्छतीति विचारेतब्बमेतं.

२६२. अवसिप्पत्तो झानलाभीति सेक्खो वुत्तोति दट्ठब्बो. पुथुज्जनो पन वसिप्पत्तो अवसिप्पत्तो च समयविमुत्तअसमयविमुत्ततन्तिया अग्गहितो, भजापियमानो पन समापत्तिविक्खम्भितानं किलेसानं वसेन समयविमुत्तभावं भजेय्याति वुत्तोति.

अरियपुग्गलसंसन्दनपरिहानिवण्णना निट्ठिता.

३. सुत्तसाधनपरिहानिवण्णना

२६५. उत्तमहीनभेदो ¶ ‘‘तत्र यायं पटिपदा सुखा खिप्पाभिञ्ञा, सा उभयेनेव पणीता अक्खायती’’तिआदिसुत्तवसेन (दी. नि. ३.१५२) वुत्तो. ‘‘दिट्ठं सुतं मुत’’न्ति एत्थ विय मुतसद्दो पत्तब्बं वदतीति आह ‘‘फुसनारह’’न्ति.

२६७. अप्पत्तपरिहानाय चेव संवत्तन्ति यथाकतसन्निट्ठानस्स समयविमुत्तस्साति अधिप्पायो.

सुत्तसाधनपरिहानिवण्णना निट्ठिता.

परिहानिकथावण्णना निट्ठिता.

३. ब्रह्मचरियकथा

१. सुद्धब्रह्मचरियकथावण्णना

२६९. ‘‘परनिम्मितवसवत्तिदेवे ¶ ¶ उपादाय तदुपरी’’ति वुत्तं, ‘‘तीहि, भिक्खवे, ठानेही’’ति (अ. नि. ९.२१) पन सुत्तस्स वचनेन हेट्ठापि मग्गभावनम्पि न इच्छन्तीति विञ्ञायति.

२७०. ‘‘गिहीनञ्चेव एकच्चानञ्च देवानं मग्गपटिलाभं सन्धाय पटिक्खेपो तस्सेवा’’ति वुत्तं, ‘‘यत्थ नत्थी’’ति पन ओकासवसेन पुट्ठो पुग्गलवसेन तस्स पटिक्खेपो न युत्तो. यदि च तस्सायं अधिप्पायो, सकवादिना समानाधिप्पायत्ता न निग्गहेतब्बो.

२७१. एकन्तरिकपञ्हाति परवादीसकवादीनं अञ्ञमञ्ञं पञ्हन्तरिका पञ्हा.

सुद्धब्रह्मचरियकथावण्णना निट्ठिता.

२. संसन्दनब्रह्मचरियकथावण्णना

२७३. रूपावचरमग्गेन हि सो इधविहायनिट्ठो नाम जातोति इदं ‘‘इध भावितमग्गो हि अनागामी इधविहायनिट्ठो नाम होती’’तिआदिकेन लद्धिकित्तनेन कथं समेतीति विचारेतब्बं. पुब्बे पन अनागामी एव अनागामीति वुत्तो, इध झानानागामिसोतापन्नादिकोति ¶ अधिप्पायो. इध अरहत्तमग्गं भावेत्वा इधेव फलं सच्छिकरोन्तं ‘‘इधपरिनिब्बायी’’ति वदति, इध पन मग्गं भावेत्वा तत्थ फलं सच्छिकरोन्तं ‘‘तत्थपरिनिब्बायी अरहा’’ति.

संसन्दनब्रह्मचरियकथावण्णना निट्ठिता.

ब्रह्मचरियकथावण्णना निट्ठिता.

४. ओधिसोकथावण्णना

२७४. ओधिसो ¶ ओधिसोति एतस्स अत्थं दस्सेन्तो ‘‘एकदेसेन एकदेसेना’’ति आह.

ओधिसोकथावण्णना निट्ठिता.

४. जहतिकथावण्णना

१. नसुत्ताहरणकथावण्णना

२८०. किच्चसब्भावन्ति तीहि पहातब्बस्स पहीनतं. तं पन किच्चं यदि तेनेव मग्गेन सिज्झतीति लद्धि, पुथुज्जनकाले एव कामरागब्यापादा पहीनाति लद्धीति एतं न समेति, तस्मा पुथुज्जनकाले पहीनानम्पि दस्सनमग्गे उप्पन्ने पुन कदाचि अनुप्पत्तितो तिण्णं मग्गानं किच्चं सम्भवतीति अधिप्पायो.

नसुत्ताहरणकथावण्णना निट्ठिता.

जहतिकथावण्णना निट्ठिता.

५. सब्बमत्थीतिकथा

१. वादयुत्तिवण्णना

२८२. सब्बस्मिं ¶ सरीरे सब्बन्ति सिरसि पादा पच्छतो चक्खूनीति एवं सब्बं सब्बत्थ अत्थीति अत्थो. सब्बस्मिं कालेति बालकाले युवता, वुड्ढकाले बालता, एवं सब्बस्मिं काले सब्बं. सब्बेनाकारेनाति नीलाकारेन पीतं, पीताकारेन लोहितन्ति एवं. सब्बेसु धम्मेसूति चक्खुस्मिं सोतं, सोतस्मिं घानन्ति एवं. अयुत्तन्ति योगरहितं वदति, तं पन एकसभावं. कथं पन एकसभावस्स योगरहितताति तं दस्सेन्तो ‘‘नानासभावानञ्ही’’तिआदिमाह. द्विन्नञ्हि नानासभावानं अङ्गुलीनं मेण्डकानं वा अञ्ञमञ्ञयोगो होति, न एकस्सेव सतो, तस्मा यो नानासभावेसु होति योगो, तेन रहितं एकसभावं अयोगन्ति वुत्तं. इदं पुच्छतीति परवादीदिट्ठिया ¶ मिच्छादिट्ठिभावं गहेत्वा उप्पन्नाय अत्तनो दिट्ठिया सम्मादिट्ठिभावो अत्थीति वुत्तं होति.

वादयुत्तिवण्णना निट्ठिता.

२. कालसंसन्दनवण्णना

२८५. अतीतानागतं पहाय पच्चुप्पन्नरूपमेव अप्पियं अविभजितब्बं करित्वाति पच्चुप्पन्नसद्देन रूपसद्देन चाति उभोहिपि पच्चुप्पन्नरूपमेव वत्तब्बं कत्वाति वुत्तं होति. पञ्ञत्तिया अविगतत्ताति एतेन इदं विञ्ञायति ‘‘न रूपपञ्ञत्ति विय वत्थपञ्ञत्ति सभावपरिच्छिन्ने पवत्ता विज्जमानपञ्ञत्ति, अथ खो पुब्बापरियवसेन पवत्तमानं रूपसमूहं उपादाय पवत्ता अविज्जमानपञ्ञत्ति, तस्मा वत्थभावस्स ओदातभावविगमे विगमावत्तब्बता युत्ता, न पन रूपभावस्स पच्चुप्पन्नभावविगमे’’ति.

कालसंसन्दनवण्णना निट्ठिता.

वचनसोधनवण्णना

२८८. अनागतं ¶ वा पच्चुप्पन्नं वा हुत्वा होतीति वुत्तन्ति एत्थ अनागतं अनागतं हुत्वा पुन पच्चुप्पन्नं होन्तं हुत्वा होतीति, तथा पच्चुप्पन्नं पच्चुप्पन्नं होन्तं पुब्बे अनागतं हुत्वा पच्चुप्पन्नं होतीति हुत्वा होतीति वुत्तन्ति दट्ठब्बं. किं ते तम्पि हुत्वा होतीति तब्भावाविगमतो हुत्वाहोतिभावानुपरमं अनुपच्छेदं पुच्छतीति अधिप्पायो युत्तो. हुत्वा भूतस्स पुन हुत्वा अभावतोति अनागतं हुत्वा पच्चुप्पन्नभूतस्स पुन अनागतं हुत्वा पच्चुप्पन्नाभावतो.

यस्मा तन्ति तं हुत्वा भूतं पच्चुप्पन्नं यस्मा अनागतं हुत्वा पच्चुप्पन्नं होन्तं ‘‘हुत्वा होती’’ति सङ्ख्यं गतं, तस्मा दुतियम्पि ‘‘हुत्वा होती’’ति वचनं अरहतीति पटिजानातीति अधिप्पायो. एवं पन धम्मे हुत्वाहोतिभावानुपरमं वदन्तस्स अधम्मे ससविसाणे नहुत्वान होतिभावानुपरमो आपज्जतीति अधिप्पायेन ‘‘अथ न’’न्तिआदिमाह.

पटिक्खित्तनयेनाति ¶ कालनानत्तेन. पटिञ्ञातनयेनाति अत्थानानत्तेन. अत्थानानत्तं इच्छन्तोपि पन अनागतस्स पच्चुप्पन्ने वुत्तं होतिभावं, पच्चुप्पन्नस्स च अनागते वुत्तं हुत्वाभावं कथं पटिजानातीति विचारेतब्बं. अत्थानानत्तमेव हि तेन अनुञ्ञायति, न अनागते पच्चुप्पन्नभावो, पच्चुप्पन्ने वा अनागतभावोति. पुरिमं पटिक्खित्तपञ्हं परिवत्तित्वाति अनुञ्ञातपञ्हस्स हुत्वा होति हुत्वा होतीति दोसो वुत्तोति अवुत्तदोसं अतिक्कम्म पटिक्खित्तपञ्हं पुन गहेत्वा तेन चोदेतीति अत्थो. एत्थ च अत्थानानत्तेन हुत्वाहोतीति अनुजानन्तस्स दोसो कालनानत्तायेव अनागतं पच्चुप्पन्नन्ति पटिक्खेपेन कथं होतीति? तस्सेव अनुजाननपटिक्खेपतोति अधिप्पायो.

एकेकन्ति अनागतम्पि न हुत्वा न होति पच्चुप्पन्नम्पीति तदुभयं गहेत्वा ‘‘एकेकं न हुत्वा न होति न हुत्वा न होती’’ति वुत्तं, न एकेकमेव न हुत्वा न होति न हुत्वा न होतीति. एस नयो पुरिमस्मिं ‘‘एकेकं हुत्वा होति हुत्वा होती’’ति वचनेपि. अनागतस्स हि ‘‘हुत्वा होती’’ति नामं पच्चुप्पन्नस्स चाति द्वेपि नामानि सङ्गहेत्वा ‘‘हुत्वा होति हुत्वा होती’’ति चोदितं, तथा ‘‘न हुत्वा न होति न हुत्वा न होती’’ति चाति अधिप्पायो ¶ . सब्बतो अन्धकारेन परियोनद्धो वियाति एतेन अपरियोनद्धेन पटिजानितब्बं सियाति दस्सेति. एत्थ च पुरिमनये हुत्वा भूतस्स पुन हुत्वाहोतिभावो चोदितो, दुतियनये अनागतादीसु एकेकस्स हुत्वाहोतिनामताति अयं विसेसो.

वचनसोधनवण्णना निट्ठिता.

अतीतञाणादिकथावण्णना

२९०. पुन पुट्ठो…पे… अत्थिताय पटिजानातीति एत्थ पच्चुप्पन्नं ञाणं तेनाति एतेन अनुवत्तमानापेक्खनवचनेन कथं वुच्चतीति विचारेतब्बं.

अतीतञाणादिकथावण्णना निट्ठिता.

अरहन्तादिकथावण्णना

२९१. युत्तिविरोधो ¶ अरहतो सरागादिभावे पुथुज्जनेन अनानत्तं ब्रह्मचरियवासस्स अफलताति एवमादिको दट्ठब्बो.

अरहन्तादिकथावण्णना निट्ठिता.

पदसोधनकथावण्णना

२९५. तेन कारणेनाति अतीतअत्थिसद्दानं एकत्थत्ता अत्थिसद्दत्थस्स च न्वातीतभावतो ‘‘अतीतं ¶ न्वातीतं, न्वातीतञ्च अतीतं होती’’ति वुत्तं होति. एत्थ पन अतीतादीनं अत्थितं वदन्तस्स परवादिस्सेवायं दोसो यथा आपज्जति, न पन ‘‘निब्बानं अत्थी’’ति वदन्तस्स सकवादिस्स, तथा पटिपादेतब्बं.

पदसोधनकथावण्णना निट्ठिता.

सब्बमत्थीतिकथावण्णना निट्ठिता.

७. एकच्चंअत्थीतिकथा

१. अतीतादिएकच्चकथावण्णना

२९९. तिण्णं रासीनन्ति अविपक्कविपाकविपक्कविपाकअविपाकानं. वोहारवसेन अविपक्कविपाकानं अत्थितं वदन्तो कथं चोदेतब्बोति विचारेति ‘‘कम्मुपचयं चित्तविप्पयुत्तं सङ्खारं इच्छन्ती’’ति.

एकच्चंअत्थीतिकथावण्णना निट्ठिता.

८. सतिपट्ठानकथावण्णना

३०१. लोकुत्तरभावं पुच्छनत्थायाति लोकियलोकुत्तराय सम्मासतिया सतिपट्ठानत्ता, लोकुत्तराययेव वा परमत्थसतिपट्ठानत्ता तस्सा वसेन लोकुत्तरभावं पुच्छनत्थायाति अत्थो. पभेदपुच्छावसेनाति ¶ लोकियलोकुत्तरसतिपट्ठानसमुदायभूतस्स सतिपट्ठानस्स पभेदानं पुच्छावसेन.

सतिपट्ठानकथावण्णना निट्ठिता.

९. हेवत्थिकथावण्णना

३०४. अयोनिसो ¶ पतिट्ठापितत्ताति अवत्तब्बुत्तरेन उपेक्खितब्बेन पतिट्ठापितत्ताति अत्थो दट्ठब्बो.

हेवत्थिकथावण्णना निट्ठिता.

महावग्गवण्णना निट्ठिता.

२. दुतियवग्गो

१. परूपहारवण्णना

३०७. अधिमानिकानं सुक्कविस्सट्ठिदस्सनं विचारेतब्बं. ते हि समाधिविपस्सनाहि विक्खम्भितरागाव, बाहिरकानम्पि च कामेसु वीतरागानं सुक्कविस्सट्ठिया अभावो वुत्तोति. अधिमानिकपुब्बा पन अधिप्पेता सियुं.

३०८. वचसायत्थेति निच्छयत्थे, ‘‘किं कारणा’’ति पन कारणस्स पुच्छितत्ता ब्रह्मचरियकथायं विय कारणत्थेति युत्तं.

परूपहारवण्णना निट्ठिता.

५. वचीभेदकथावण्णना

३२६. वचीभेदकथायं लोकुत्तरं पठमज्झानं समापन्नोति पठममग्गं सन्धाय वदति, यस्मा सो दुक्खन्ति विपस्सति, तस्मा दुक्खमिच्चेव वाचं भासति, न समुदयोतिआदीनीति अधिप्पायो.

३२८. येन ¶ ¶ तं सद्दं सुणातीति इदं वचीसमुट्ठापनक्खणे एव एतं सद्दं सुणातीति इच्छिते आरोपिते वा युज्जति.

३३२. लोकुत्तरमग्गक्खणे वचीभेदं इच्छतो परस्स अभिभूसुत्ताहरणे अधिप्पायो वत्तब्बो.

वचीभेदकथावण्णना निट्ठिता.

७. चित्तट्ठितिकथावण्णना

३३५. चित्तट्ठितिकथायं चुल्लासीति…पे… आदिवचनवसेनाति आरुप्पेयेव एवं यावतायुकट्ठानं वुत्तं, न अञ्ञत्थाति कत्वा पटिक्खिपतीति अधिप्पायो. एतेन पन ‘‘न त्वेव तेपि तिट्ठन्ति, द्वीहि चित्तसमोहिता’’ति (महानि. १० थोकं विसदिसं) दुतियापि अड्ढकथा पस्सितब्बा. पुरिमाय च वस्ससतादिट्ठानानुञ्ञाय अविरोधो विभावेतब्बो. मुहुत्तं मुहुत्तन्ति पञ्हो सकवादिना पुच्छितो विय वुत्तो, परवादिना पन पुच्छितोति दट्ठब्बो.

चित्तट्ठितिकथावण्णना निट्ठिता.

९. अनुपुब्बाभिसमयकथावण्णना

३३९. अनुपुब्बाभिसमयकथायं अथवातिआदिना इदं दस्सेति – चतुन्नं ञाणानं एकमग्गभावतो न एकमग्गस्स बहुभावापत्ति, अनुपुब्बेन च सोतापत्तिमग्गं भावेतीति उपपन्नन्ति पटिजानातीति.

३४४. तदाति दस्सने परिनिट्ठिते.

३४५. अट्ठहि ¶ ञाणेहीति एत्थ पटिसम्भिदाञाणेहि सह अट्ठसु गहितेसु निरुत्तिपटिभानपटिसम्भिदाहि सोतापत्तिफलसच्छिकिरिया कथं होतीति विचारेतब्बं.

अनुपुब्बाभिसमयकथावण्णना निट्ठिता.

१०. वोहारकथावण्णना

३४७. वोहारकथायं ¶ उदाहु सोतादीनिपीति एकन्तलोकियेसु विसयविसयीसु विसयस्सेव लोकुत्तरभावो, न विसयीनन्ति नत्थेत्थ कारणं. यथा च विसयीनं लोकुत्तरभावो असिद्धो, तथा विसयस्स सद्दायतनस्स. तत्थ यथा असिद्धलोकुत्तरभावस्स तस्स लोकुत्तरता, एवं सोतादीनं आपन्नाति किन्ति तानिपि लोकुत्तरानीति अत्थो दट्ठब्बो.

यदि लोकुत्तरे पटिहञ्ञेय्य, लोकुत्तरो सियाति अत्थो न गहेतब्बो. न हि लोकुत्तरे पटिहञ्ञतीति परिकप्पितेपि सद्दस्स लोकुत्तरभावो अत्थीति अधिप्पायो. ‘‘लोकियेन ञाणेना’’ति उद्धटं, ‘‘विञ्ञाणेना’’ति पन पाळि, तञ्च विञ्ञाणं सोतसम्बन्धेन सोतविञ्ञाणन्ति विञ्ञायतीति. अनेकन्तताति लोकियेन ञाणेन जानितब्बतो लोकियोति एतस्स हेतुस्स लोकिये लोकुत्तरे च सम्भवतो अनेकन्तभावो सियाति अधिप्पायो.

वोहारकथावण्णना निट्ठिता.

११. निरोधकथावण्णना

३५३. द्वे दुक्खसच्चानि न इच्छतीति येसं द्विन्नं द्वीहि निरोधेहि भवितब्बं, तानि द्वे दुक्खसच्चानि न इच्छतीति वुत्तं होति. ये पटिसङ्खाय लोकुत्तरेन ञाणेन अनिरुद्धातिआदिना पटिसङ्खाय विना निरुद्धा असमुदाचरणसङ्खारा अप्पटिसङ्खानिरुद्धाति दस्सेति ¶ , न उप्पज्जित्वा भङ्गाति. तेन अप्पटिसङ्खानिरोधो च असमुदाचरणनिरोधोति दस्सितं होति.

निरोधकथावण्णना निट्ठिता.

दुतियवग्गवण्णना निट्ठिता.

३. ततियवग्गो

१. बलकथावण्णना

३५४. इन्द्रियपरोपरियत्तं ¶ असाधारणन्ति यथा निद्देसतो वित्थारतो सब्बं सब्बाकारं ठानाट्ठानादिं अजानन्तापि ‘‘अट्ठानमेतं अनवकासो, यं दिट्ठिसम्पन्नो पुग्गलो कञ्चि सङ्खारं निच्चतो उपगच्छेय्या’’तिआदिना (अ. नि. १.२६८) ठानाट्ठानानि उद्देसतो सङ्खेपतो सावका जानन्ति, न एवं ‘‘आसयं जानाति अनुसयं जानाती’’तिआदिना (पटि. म. १.११३) उद्देसमत्तेनपि इन्द्रियपरोपरियत्तं जानन्तीति ‘‘असाधारण’’न्ति आह. थेरेन पन सद्धादीनं इन्द्रियानं तिक्खमुदुभावजाननमत्तं सन्धाय ‘‘सत्तानं इन्द्रियपरोपरियत्तं यथाभूतं पजानामी’’ति (पटि. म. २.४४) वुत्तं, न यथावुत्तं इन्द्रियपरोपरियत्तञाणं तथागतबलन्ति अयमेत्थ अधिप्पायो दट्ठब्बो. ‘‘उद्देसतो ठानाट्ठानादिमत्तजाननवसेन पटिजानाती’’ति वुत्तं, एवं पन पटिजानन्तेन ‘‘तथागतबलं सावकसाधारण’’न्ति इदम्पि एवमेव पटिञ्ञातं सियाति कथमयं चोदेतब्बो सिया.

३५६. सेसेसु पटिक्खेपो सकवादिस्स ठानाट्ठानञाणादीनं साधारणासाधारणत्ता तत्थ साधारणपक्खं सन्धायाति अधिप्पायो.

बलकथावण्णना निट्ठिता.

२. अरियन्तिकथावण्णना

३५७. सङ्खारे ¶ सन्धाय पटिजानन्तस्स द्विन्नं फस्सानं समोधानं कथं आपज्जति यथावुत्तनयेनाति विचारेतब्बं. परिकप्पनवसेन आरोपेत्वा ठपेतब्बताय सत्तो ‘‘पणिधी’’ति वुत्तो. सो पन एकस्मिम्पि आरोपेत्वा न ठपेतब्बोति एकस्मिम्पि आरोपेत्वा ठपेतब्बेन तेन रहितता वुत्ता.

अरियन्तिकथावण्णना निट्ठिता.

४. विमुच्चमानकथावण्णना

३६६. झानेन ¶ विक्खम्भनविमुत्तिया विमुत्तं चित्तं मग्गक्खणे समुच्छेदविमुत्तिया विमुच्चमानं नाम होतीति एतिस्सा लद्धिया को दोसोति विचारेतब्बं. यदि विप्पकतनिद्देसे दोसो, तत्रापि तेन विमुच्चमानताय ‘‘विमुत्तं विमुच्चमान’’न्ति वुत्तं. सति च दोसे उप्पादक्खणे विमुत्तं, वयक्खणे विमुच्चमानन्ति विमुत्तविमुच्चमानवचनस्स न चोदेतब्बं सिया, अथ खो विमुच्चमानवचनमेवाति. एकदेसेन, एकदेसे वा विमुच्चमानस्स च विमुत्तकिरियाय एकदेसो विसेसनं होतीति ‘‘भावनपुंसक’’न्ति वुत्तं. कटादयोति कटपटादयो. एकेनेव चित्तेनाति एकेनेव फलचित्तेनाति अधिप्पायो.

विमुच्चमानकथावण्णना निट्ठिता.

५. अट्ठमककथावण्णना

३६८. अनुलोमगोत्रभुक्खणेपि असमुदाचरन्ता मग्गक्खणेपि पहीना एव नाम भवेय्युन्ति लद्धि उप्पन्नाति अधिप्पायेन अनुलोमगोत्रभुग्गहणं करोति.

अट्ठमककथावण्णना निट्ठिता.

६. अट्ठमकस्स इन्द्रियकथावण्णना

३७१. इन्द्रियानि ¶ पटिलभति अप्पटिलद्धिन्द्रियत्ता अनिन्द्रियभूतानि सद्धादीनि निय्यानिकानि भावेन्तो इन्द्रियानि पटिलभति, न पन इन्द्रियानि भावेन्तोति अधिप्पायो.

अट्ठमकस्स इन्द्रियकथावण्णना निट्ठिता.

७. दिब्बचक्खुकथावण्णना

३७३. उपत्थद्धन्ति ¶ यथा विसयानुभावगोचरेहि विसिट्ठं होति, तथा पच्चयभूतेन कतबलाधानन्ति अत्थो. तंमत्तमेवाति पुरिमं मंसचक्खुमत्तमेव धम्मुपत्थद्धं न होतीति अत्थो. अनापाथगतन्ति मंसचक्खुना गहेतब्बट्ठानं आपाथं नागतं. एत्थ च विसयस्स दीपकं आनुभावगोचरानमेव असदिसतं वदन्तो यादिसो मंसचक्खुस्स विसयोति विसयग्गहणं न विसयविसेसदस्सनत्थं, अथ खो यादिसे विसये आनुभावगोचरविसेसा होन्ति, तादिसस्स रूपविसयस्स दस्सनत्थन्ति दीपेति, सदिसस्स वा विसयस्स आनुभावगोचरविसेसोव विसेसं.

न च मंसचक्खुमेव दिब्बचक्खूति इच्छतीति धम्मुपत्थद्धकाले पुरिमं मंसचक्खुमेवाति न इच्छतीति अधिप्पायो. मंसचक्खुस्स उप्पादो मग्गोति मंसचक्खुपच्चयतादस्सनत्थमेव वुत्तं, न तेन अनुपादिन्नतासाधनत्थं. रूपावचरिकानन्ति रूपावचरज्झानपच्चयेन उप्पन्नानि महाभूतानि रूपावचरिकानीति सो इच्छतीति अधिप्पायो. एस नयो ‘‘अरूपावचरिकान’’न्ति एत्थापि. अरूपावचरक्खणे रूपावचरचित्तस्स अभावा पटिक्खिपतीति तस्मिंयेव खणे रूपावचरं हुत्वा अरूपावचरं न जातन्ति पटिक्खिपतीति अधिप्पायो.

३७४. किञ्चापि दिब्बचक्खुनो धम्मुपत्थद्धस्स पञ्ञाचक्खुभावं न इच्छति, येन तीणि चक्खूनि धम्मुपत्थम्भेन चक्खुन्तरभावं वदतो भवेय्युन्ति अधिप्पायो.

दिब्बचक्खुकथावण्णना निट्ठिता.

९. यथाकम्मूपगतञाणकथावण्णना

३७७. दिब्बेन ¶ चक्खुना यथाकम्मूपगे सत्ते पजानातीति यथाकम्मूपगतञाणस्स उपनिस्सये दिब्बचक्खुम्हि करणनिद्देसो कतो, न यथाकम्मूपगतजाननकिच्चके. तंकिच्चकेयेव पन परो करणनिद्देसं मञ्ञतीति आह ‘‘अयोनिसो गहेत्वा’’ति. यथाकम्मूपगतञाणमेव दिब्बचक्खुन्ति लद्धीति इमिना वचनेन दिब्बचक्खुमेव यथाकम्मूपगतञाणन्ति एवं ¶ भवितब्बं. एव-सद्दो च अट्ठाने ठितो दिब्बचक्खुसद्दस्स परतो योजेतब्बो. यथाकम्मूपगतञाणस्स हि सो दिब्बचक्खुतो अत्थन्तरभावं निवारेति. न हि दिब्बचक्खुस्स यथाकम्मूपगतञाणतोति.

यथाकम्मूपगतञाणकथावण्णना निट्ठिता.

१०. संवरकथावण्णना

३७९. चातुमहाराजिकानं संवरासंवरसब्भावो आटानाटियसुत्तेन पकासितोति ‘‘तावतिंसे देवे उपादाया’’ति आह. एवं सति सुगतिकथायं ‘‘तावतिंसे सङ्गहितानं पुब्बदेवानं सुरापानं, सक्कदेवानं सुरापाननिवारणं सुय्यति, तं तेसं सुरापानं असंवरो न होती’’ति वत्तब्बं होति.

संवरकथावण्णना निट्ठिता.

ततियवग्गवण्णना निट्ठिता.

४. चतुत्थवग्गो

१. गिहिस्स अरहातिकथावण्णना

३८७. गिहिसंयोजनसम्पयुत्ततायाति ¶ एतेन गिहिछन्दरागसम्पयुत्तताय एव ‘‘गिही’’ति वुच्चति, न ब्यञ्जनमत्तेनाति इममत्थं दस्सेति.

गिहिस्स अरहातिकथावण्णना निट्ठिता.

२. उपपत्तिकथावण्णना

३८८. अयोनिसोति ओपपातिको होति, तत्थ तस्सायेवूपपत्तिया परिनिब्बायीति अत्थं गहेत्वाति अधिप्पायो.

उपपत्तिकथावण्णना निट्ठिता.

४. समन्नागतकथावण्णना

३९३. समन्नागतकथायं ¶ पत्तिं सन्धाय पटिजानन्तो चतूहि खन्धेहि विय समन्नागमं न वदतीति तस्स चतूहि फस्सादीहि समन्नागमप्पसङ्गो यथा होति, तं वत्तब्बं.

समन्नागतकथावण्णना निट्ठिता.

५. उपेक्खासमन्नागतकथावण्णना

३९७. इमिनाव ¶ नयेनाति ‘‘तत्थ द्वे समन्नागमा’’तिआदि सब्बं योजेतब्बं. तत्थ पत्तिधम्मो नाम रूपावचरादीसु अञ्ञतरभूमिं पठमज्झानादिवसेन पापुणन्तस्स पठमज्झानादीनं पटिलाभो. निरुद्धेसुपि पठमज्झानादीसु अनिरुज्झनतो चित्तविप्पयुत्तो सङ्खारो, येन सुपन्तो सज्झायादिपसुतो च तेहि समन्नागतोति वुच्चतीति वदन्ति.

उपेक्खासमन्नागतकथावण्णना निट्ठिता.

६. बोधियाबुद्धोतिकथावण्णना

३९८. तस्माति यथावुत्तस्स ञाणद्वयस्स बोधिभावतो. तं अग्गहेत्वा पत्तिधम्मवसेन नत्थिताय बोधिया समन्नागतो बुद्धोति येसं लद्धि, ते सन्धाय पुच्छा च अनुयोगो च सकवादिस्साति योजना दट्ठब्बा.

बोधियाबुद्धोतिकथावण्णना निट्ठिता.

७. लक्खणकथावण्णना

४०२. बोधिसत्तमेव सन्धाय वुत्तन्ति लक्खणसमन्नागतेसु अबोधिसत्ते छड्डेत्वा बोधिसत्तमेव गहेत्वा इदं सुत्तं वुत्तं, न ¶ बोधिसत्ततो अञ्ञो लक्खणसमन्नागतो नत्थीति. नापि सब्बेसं लक्खणसमन्नागतानं बोधिसत्तता, तस्मा असाधकन्ति अधिप्पायो.

लक्खणकथावण्णना निट्ठिता.

८. नियामोक्कन्तिकथावण्णना

४०३. ठपेत्वा ¶ पारमीपूरणन्ति पारमीपूरणेनेव ते ‘‘बोधिया नियता नरा’’ति वुच्चन्तीति दस्सेति. केवलञ्हि नन्तिआदिना च न नियामकस्स नाम कस्सचि उप्पन्नत्ता ब्याकरोन्तीति दस्सेति.

नियामोक्कन्तिकथावण्णना निट्ठिता.

१०. सब्बसंयोजनप्पहानकथावण्णना

४१३. निप्परियायेनेवाति अवसिट्ठस्स पहातब्बस्स अभावा ‘‘सब्बसंयोजनप्पहान’’न्ति इमं परियायं अग्गहेत्वा अरहत्तमग्गेन पजहनतो एवाति गण्हातीति वुत्तं होति. अप्पहीनस्स अभावाति अवसिट्ठस्स पहातब्बस्स अभावा पटिजानातीति वदन्ति, तथा ‘‘अनवसेसप्पहान’’न्ति एत्थापि. एवं सति तेन अत्तनो लद्धिं छड्डेत्वा सकवादिस्स लद्धिया पटिञ्ञातन्ति आपज्जति.

सब्बसंयोजनप्पहानकथावण्णना निट्ठिता.

चतुत्थवग्गवण्णना निट्ठिता.

५. पञ्चमवग्गो

१. विमुत्तिकथावण्णना

४१८. फलञाणं न होतीति ‘‘विमुत्तानी’’ति वा तदङ्गविमुत्तियादिभावतो मग्गेन पहीनानं पुन अनुप्पत्तितो च ‘‘अविमुत्तानी’’ति वा ¶ न वत्तब्बानीति अधिप्पायो. गोत्रभुञाणञ्चेत्थ विपस्सनाग्गहणेन गहितन्ति दट्ठब्बं.

विमुत्तिकथावण्णना निट्ठिता.

२. असेखञाणकथावण्णना

४२१. न ¶ पनेतं असेखन्ति एतेन असेखविसयत्ता असेखमेव ञाणन्ति परस्स लद्धि, न पन असेखस्साति इममत्थं दस्सेति.

असेखञाणकथावण्णना निट्ठिता.

३. विपरीतकथावण्णना

४२४. न पथवीयेवाति लक्खणपथवीयेव, ससम्भारपथवीयेव वा न होतीति अत्थो. अनिच्चे निच्चन्तिआदिविपरियेसो पन विपरीतञाणं नामाति अञ्ञाणेपि ञाणवोहारं आरोपेत्वा वदतीति दट्ठब्बं.

विपरीतकथावण्णना निट्ठिता.

४. नियामकथावण्णना

४२८-४३१. ञाणं अत्थि, यं सच्चानुलोमं मग्गञाणानुगतिकं पस्सन्तो भगवा ‘‘भब्बो’’ति जानातीति लद्धि. पठमपञ्हमेव चतुत्थं कत्वाति एत्थ ‘‘नियतस्स अनियामगमनाया’’ति विपरीतानुयोगतो पभुति गणेत्वा ‘‘चतुत्थ’’न्ति आह.

नियामकथावण्णना निट्ठिता.

५. पटिसम्भिदाकथावण्णना

४३२-४३३. यंकिञ्चि ¶ अरियानं ञाणं, सब्बं लोकुत्तरमेवाति गण्हन्तेनपि सब्बं ञाणं पटिसम्भिदाति न सक्का वत्तुं. अनरियानम्पि हि ञाणं ञाणमेवाति ¶ . तस्स वा ञाणतं न इच्छतीति वत्तब्बं. पथवीकसिणसम्मुतियं समापत्तिञाणं सन्धायाति अनरियस्स एतं ञाणं सन्धायाति अधिप्पायो सिया.

पटिसम्भिदाकथावण्णना निट्ठिता.

६. सम्मुतिञाणकथावण्णना

४३४-४३५. सच्चन्ति वचनसामञ्ञेन उभयस्सपि सच्चसामञ्ञत्तं गहेत्वा वदतीति दस्सेन्तो ‘‘तत्था’’तिआदिमाह.

सम्मुतिञाणकथावण्णना निट्ठिता.

७. चित्तारम्मणकथावण्णना

४३६-४३८. फस्सस्स फुसनलक्खणं मनसिकरोतोति एतेन पुरिमा वत्तब्बपटिञ्ञा अनुपदधम्ममनसिकारतो अञ्ञं समुदायमनसिकारं सन्धाय कताति दस्सेति.

चित्तारम्मणकथावण्णना निट्ठिता.

८. अनागतञाणकथावण्णना

४३९-४४०. सब्बस्मिम्पीति ¶ ‘‘पाटलिपुत्तस्स खो’’तिआदिना अनागते ञाणन्ति वुत्तन्ति अनागतभावसामञ्ञेन अनन्तरानागतेपि ञाणं इच्छन्तीति वुत्तं होति.

अनागतञाणकथावण्णना निट्ठिता.

९. पटुप्पन्नञाणकथावण्णना

४४१-४४२. वचनं ¶ निस्सायाति अत्थतो आपन्नं वचनं, अनुजाननवचनं वा निस्साय. सन्ततिं सन्धायाति भङ्गानुपस्सनानं भङ्गतो अनुपस्सनासन्ततिं सन्धायाति अधिप्पायो.

पटुप्पन्नञाणकथावण्णना निट्ठिता.

१०. फलञाणकथावण्णना

४४३-४४४. बुद्धानं वियाति यथा बुद्धा सब्बप्पकारफलपरोपरियत्तजाननवसेन अत्तनो एव च बलेन फलं जानन्ति, एवन्ति वुत्तं होति.

फलञाणकथावण्णना निट्ठिता.

पञ्चमवग्गवण्णना निट्ठिता.

महापण्णासको समत्तो.

६. छट्ठवग्गो

१. नियामकथावण्णना

४४५-४४७. अनियतो ¶ नाम न होतीति यथा मिच्छत्तनियतस्स भवन्तरे अनियतं नाम होति, एवं एतस्स कदाचिपि अनियतता न होतीति यो नियामो, सो असङ्खतोति अधिप्पायो.

नियामकथावण्णना निट्ठिता.

२. पटिच्चसमुप्पादकथावण्णना

४५१. कारणट्ठेन ठितताति कारणभावोयेव. एतेन च धम्मानं कारणभावो धम्मट्ठितताति एतमत्थं दस्सेति. तथा ‘‘धम्मनियामता’’ति एत्थापि.

पटिच्चसमुप्पादकथावण्णना निट्ठिता.

३. सच्चकथावण्णना

४५२-४५४. वत्थुसच्चन्ति ¶ जातियादि कामतण्हादि सम्मादिट्ठिआदि च. बाधनपभवनिय्यानिकलक्खणेहि लक्खणसच्चं बाधनादि.

सच्चकथावण्णना निट्ठिता.

५. निरोधसमापत्तिकथावण्णना

४५७-४५९. करियमाना ¶ करीयतीति अरूपक्खन्धानं पवत्तमानानं समथविपस्सनानुक्कमेन अप्पवत्ति साधीयतीति अत्थो. सङ्खतासङ्खतलक्खणानं पन अभावेनाति वदन्तो सभावधम्मतं पटिसेधेति. वोदानञ्च वुट्ठानपरियायोव. असङ्खतभावे कारणं न होति सभावधम्मत्तासाधकत्ताति अधिप्पायो.

निरोधसमापत्तिकथावण्णना निट्ठिता.

छट्ठवग्गवण्णना निट्ठिता.

७. सत्तमवग्गो

१. सङ्गहितकथावण्णना

४७१-४७२. सङ्गहिताति सम्बन्धा.

सङ्गहितकथावण्णना निट्ठिता.

२. सम्पयुत्तकथावण्णना

४७३-४७४. नानत्तववत्थानं नत्थीति वदन्तो ‘‘तिलम्हि तेलं अनुपविट्ठ’’न्ति वचनमेव न युज्जतीति ‘‘न हेव’’न्ति पटिक्खित्तन्ति दस्सेति.

सम्पयुत्तकथावण्णना निट्ठिता.

३. चेतसिककथावण्णना

४७५-४७७. फस्सादीनं ¶ ¶ एकुप्पादतादिविरहिता सहजातता नत्थीति आह ‘‘सम्पयुत्तसहजाततं सन्धाया’’ति.

चेतसिककथावण्णना निट्ठिता.

४. दानकथावण्णना

४७८. देय्यधम्मवसेन चोदेतुन्ति यदि चेतसिकोव धम्मो दानं, ‘‘दिय्यतीति दान’’न्ति इमिनापि अत्थेन चेतसिकस्सेव दानभावो आपज्जतीति चोदेतुन्ति अत्थो.

४७९. अनिट्ठफलन्तिआदि अचेतसिकस्स धम्मस्स दानभावदीपनत्थं वुत्तन्ति फलदानभावदीपनत्थं न वुत्तन्ति अत्थो दट्ठब्बो. अनिट्ठफलन्तिआदिना अचेतसिकस्स धम्मस्स फलदानं वुत्तं विय होति, न दानभावो, तन्निवारणत्थञ्चेतमाहाति. एवञ्च कत्वा अनन्तरमेवाह ‘‘न हि अचेतसिको अन्नादिधम्मो आयतिं विपाकं देती’’ति. इट्ठफलभावनियमनत्थन्ति देय्यधम्मो विय केनचि परियायेन अनिट्ठफलता दानस्स नत्थि, एकन्तं पन इट्ठफलमेवाति नियमनत्थन्ति अत्थो.

इतरेनाति ‘‘दिय्यतीति दान’’न्ति इमिना परियायेन. न पन एकेनत्थेनाति ‘‘देय्यधम्मोव दान’’न्ति इमं सकवादीवादं निवत्तेतुं ‘‘सद्धा हिरिय’’न्तिआदिकं सुत्तसाधनं परवादीवादे युज्जति, ‘‘इधेकच्चो अन्नं देती’’तिआदिकञ्च, ‘‘चेतसिकोव धम्मो दान’’न्ति इमं निवत्तेतुं ‘‘चेतसिको धम्मो दान’’न्ति इमं पन साधेतुं ‘‘सद्धा हिरिय’’न्तिआदिकं सकवादीवादे युज्जति, ‘‘इधेकच्चो अन्नं देती’’तिआदिकं वा ‘‘देय्यधम्मो दान’’न्ति साधेतुन्ति एवं निवत्तनसाधनत्थनानत्तं सन्धाय ‘‘न पन एकेनत्थेना’’ति वुत्तन्ति दट्ठब्बं. तत्थ यथा परवादीवादे च सुत्तसाधनत्थं ‘‘न वत्तब्बं चेतसिको धम्मो दान’’न्ति पुच्छायं चेतसिकोवाति अत्थो दट्ठब्बो, तथा ‘‘न वत्तब्बं देय्यधम्मो दान’’न्ति पुच्छाय च देय्यधम्मोवाति ¶ . देय्यधम्मो इट्ठफलोति इट्ठफलाभावमत्तमेव पटिक्खित्तन्ति एत्थ ‘‘इट्ठफलभावमत्तमेव पटिक्खित्त’’न्ति पाठेन भवितब्बन्ति ¶ . ‘‘इट्ठफलाभावमत्तमेव दिस्वा पटिक्खित्त’’न्ति वा वत्तब्बं. सङ्करभावमोचनत्थन्ति चेतसिकस्स दातब्बट्ठेन देय्यधम्मस्स च इट्ठफलट्ठेन दानभावमोचनत्थन्ति वुत्तं होति.

दानकथावण्णना निट्ठिता.

५. परिभोगमयपुञ्ञकथावण्णना

४८३. परिभोगमयं नाम चित्तविप्पयुत्तं पुञ्ञं अत्थीति लद्धि. तञ्हि ते सन्धाय परिभोगमयं पुञ्ञं पवड्ढतीति वदन्तीति अधिप्पायो.

४८५. तस्सापि वसेनाति तस्सापि लद्धिया वसेन. पञ्चविञ्ञाणानं विय एतेसम्पि समोधानं सियाति पटिजानातीति वदन्ति. पञ्चविञ्ञाणफस्सादीनमेव पन समोधानं सन्धाय पटिजानातीति अधिप्पायो.

४८६. अपरिभुत्तेपीति इमिना ‘‘पटिग्गाहको पटिग्गहेत्वा न परिभुञ्जति छड्डेती’’तिआदिकं दस्सेति. अपरिभुत्ते देय्यधम्मे पुञ्ञभावतो परिभोगमयं पुञ्ञं पवड्ढतीति अयं वादो हीयति. तस्मिञ्च हीने सकवादीवादो बलवा. चागचेतनाय एव हि पुञ्ञभावो एवं सिद्धो होतीति अधिप्पायो. अपरिभुत्तेपि देय्यधम्मे पुञ्ञभावे चागचेतनाय एव पुञ्ञभावोति आह ‘‘सकवादीवादोव बलवा’’ति.

परिभोगमयपुञ्ञकथावण्णना निट्ठिता.

६. इतोदिन्नकथावण्णना

४८८-४९१. तेनेव ¶ यापेन्तीति तेनेव चीवरादिना यापेन्ति, तेनेव वा चीवरादिदानेन यापेन्ति, सयंकतेन कम्मुना विनापीति अधिप्पायो. इमिना कारणेनाति यदि यं इतो चीवरादि दिन्नं, न तेन यापेय्युं, कथं अनुमोदेय्युं…पे… सोमनस्सं पटिलभेय्युन्ति लद्धिं पतिट्ठपेन्तस्सपीति वुत्तं होति.

इतोदिन्नकथावण्णना निट्ठिता.

७. पथवीकम्मविपाकोतिकथावण्णना

४९२. फस्सो ¶ सुखवेदनीयादिभेदो होतीति फस्सेन सब्बम्पि कम्मविपाकं दस्सेत्वा पुन अत्तवज्जेहि सम्पयोगदस्सनत्थं ‘‘सो च सञ्ञादयो चा’’तिआदि वुत्तं. अत्थि च नेसन्ति सावज्जने चक्खुविञ्ञाणादिसहजातधम्मे सन्धाय वुत्तं. यो तत्थ इट्ठविपाको, तस्स पत्थनाति इट्ठविपाके एव पत्थनं कत्वा कम्मं करोन्तीति कम्मूपनिस्सयभूतमेव पत्थनं दस्सेति, पच्चुप्पन्नवेदनापच्चयं वा तण्हं उपादानादिनिब्बत्तनवसेन दुक्खस्स पभावितं. मूलतण्हाति पच्चुप्पन्नविपाकवट्टनिब्बत्तककम्मस्स उपनिस्सयभूतं पुरिमतण्हं, कम्मसहायं वा विपाकस्स उपनिस्सयभूतं.

४९३. सकसमयवसेन च चोदनाय पयुज्जमानतं दस्सेतुं ‘‘तेसञ्च लद्धिया’’तिआदिमाह.

४९४. पटिलाभवसेनाति कम्मे सति पथवियादीनं पटिलाभो होतीति कम्मं तंसंवत्तनिकं नाम होतीति दस्सेति.

पथवीकम्मविपाकोतिकथावण्णना निट्ठिता.

८. जरामरणंविपाकोतिकथावण्णना

४९५. सम्पयोगलक्खणाभावाति ¶ ‘‘एकारम्मणा’’ति इमस्स सम्पयोगलक्खणस्स अभावाति अधिप्पायो.

४९६. परियायो नत्थीति सकवादिना अत्तना वत्तब्बताय परियायो नत्थीति अब्याकतानं जरामरणस्स विपाकनिवारणत्थं अब्याकतवसेन पुच्छा न कताति दस्सेति.

४९७. अपरिसुद्धवण्णता जरायेवाति केचि, तं अकुसलकम्मं कम्मसमुट्ठानस्सातिआदिना रूपस्सेव दुब्बण्णतादस्सनेन सममेवाति.

जरामरणंविपाकोतिकथावण्णना निट्ठिता.

९. अरियधम्मविपाककथावण्णना

५००. वट्टन्ति ¶ कम्मादिवट्टं.

अरियधम्मविपाककथावण्णना निट्ठिता.

१०. विपाकोविपाकधम्मधम्मोतिकथावण्णना

५०१. तप्पच्चयापीति यस्स विपाकस्स विपाको अञ्ञमञ्ञपच्चयो होति तप्पच्चयापि अञ्ञमञ्ञपच्चयभूततोपीति अधिप्पायो. सो हीतिआदिना पुरिमपटिञ्ञाय इमस्स चोदनस्स कारणभावं दस्सेति. अञ्ञमञ्ञपच्चयादीसु पच्चयट्ठेनाति आदि-सद्देन सहजातादिपच्चये सङ्गण्हित्वा तेसु तेन तेन पच्चयभावेनाति दस्सेति.

विपाकोविपाकधम्मधम्मोतिकथावण्णना निट्ठिता.

सत्तमवग्गवण्णना निट्ठिता.

८. अट्ठमवग्गो

१. छगतिकथावण्णना

५०३-५०४. वण्णोति ¶ वण्णनिभा सण्ठानञ्च वुच्चतीति आह ‘‘सदिसरूपसण्ठाना’’ति.

छगतिकथावण्णना निट्ठिता.

२. अन्तराभवकथावण्णना

५०५. अतिदूरस्स अन्तरितस्स पत्तब्बस्स देसस्स दस्सनतो दिब्बचक्खुको विय. आकासेन पथवन्तरट्ठानानि भिन्दित्वा गमनतो इद्धिमा विय. न सहधम्मेनाति यदि सो भवानं अन्तरा न सिया, न नाम अन्तराभवोति पटिक्खेपे करणं नत्थीति अधिप्पायो.

५०६. तत्थ ¶ जातिजरामरणानि चेव चुतिपटिसन्धिपरम्परञ्च अनिच्छन्तोति एतेन चुतिअनन्तरं अन्तराभवं खन्धाति, वत्तमाना जातीति, मातुकुच्छिमेव पविट्ठा अन्तरधायमाना मरणन्ति न इच्छति.

५०७. यथा कामभवादीसु तत्थ तत्थेव पुनप्पुनं चवित्वा उपपत्तिवसेन चुतिपटिसन्धिपरम्परा होति, एवं तं तत्थ न इच्छतीति दस्सेति.

अन्तराभवकथावण्णना निट्ठिता.

३. कामगुणकथावण्णना

५१०. कामभवस्स ¶ कमनट्ठेन कामभवभावो सब्बेपि कामावचरा खन्धादयो कामभवोति इमिना अधिप्पायेन दट्ठब्बो. उपादिन्नक्खन्धानमेव पन कामभवभावो धातुकथायं दस्सितो, न कमनट्ठेन कामभवभावो. ‘‘पञ्चिमे, भिक्खवे, कामगुणा’’ति वचनमत्तं निस्सायाति पञ्चेव कामकोट्ठासा ‘‘कामो’’ति वुत्ताति कामधातूतिवचनं न अञ्ञस्स नामन्ति इमिना अधिप्पायेनेवं वचनमत्तं निस्सायाति अत्थो.

कामगुणकथावण्णना निट्ठिता.

५. रूपधातुकथावण्णना

५१५-५१६. रूपधातुकथायं रूपधातूति वचनतो रूपीधम्मेहेव रूपधातुया भवितब्बन्ति लद्धि दट्ठब्बा. सुत्तेसु ‘‘तयोमे भवा’’तिआदिना (दी. नि. ३.३०५) परिच्छिन्नभूमियोव भूमिपरिच्छेदो, ‘‘हेट्ठतो अवीचिनिरयं परियन्तं करित्वा’’तिआदिकम्मपरिच्छिन्दनम्पि (विभ. १८२) वदन्ति.

रूपधातुकथावण्णना निट्ठिता.

६. अरूपधातुकथावण्णना

५१७-५१८. इमिनावुपायेनाति ¶ यथा हि पुरिमकथायं रूपिनो धम्मा अविसेसेन ‘‘रूपधातू’’ति वुत्ता, एवमिधापि अरूपिनो धम्मा अविसेसेन ‘‘अरूपधातू’’ति वुत्ताति तत्थ वुत्तनयो इधापि समानोति अधिप्पायो.

अरूपधातुकथावण्णना निट्ठिता.

७. रूपधातुयाआयतनकथावण्णना

५१९. घाननिमित्तानिपीति ¶ इदं घानादिनिमित्तानिपीति वत्तब्बं. निमित्तन्ति घानादीनं ओकासभावेन उपलक्खितं तथाविधसण्ठानं रूपसमुदायमाह.

रूपधातुयाआयतनकथावण्णना निट्ठिता.

८. अरूपेरूपकथावण्णना

५२४-५२६. सुखुमरूपं अत्थि, यतो निस्सरणं तं आरुप्पन्ति अधिप्पायो.

अरूपेरूपकथावण्णना निट्ठिता.

९. रूपंकम्मन्तिकथावण्णना

५२७-५३७. पकप्पयमानाति आयूहमाना, सम्पयुत्तेसु अधिकं ब्यापारं कुरुमानाति अत्थो. पुरिमवारेति ‘‘यंकिञ्चि अकुसलेन चित्तेन समुट्ठितं रूपं, सब्बं तं अकुसल’’न्ति इमं पञ्हं वदति.

रूपंकम्मन्तिकथावण्णना निट्ठिता.

१०. जीवितिन्द्रियकथावण्णना

५४०. अरूपजीवितिन्द्रियन्तिपञ्हे ¶ ‘‘अत्थि अरूपीनं धम्मानं आयू’’तिआदिकं पञ्हं अन्तं ¶ गहेत्वा वदति. अरूपधम्मानं चित्तविप्पयुत्तं जीवितिन्द्रियसन्तानं नाम अत्थीति इच्छतीति एत्थ रूपारूपधम्मानं तं इच्छन्तो अरूपधम्मानं इच्छतीति वत्तुं युत्तोति ‘‘अरूपधम्मान’’न्ति वुत्तन्ति दट्ठब्बं.

५४१. सत्तसन्ताने रूपिनो वा धम्मा होन्तूतिआदिनापि तमेव जीवितिन्द्रियसन्तानं वदतीति वेदितब्बं.

५४२. पुब्बापरभागं सन्धायाति समापत्तिया आसन्नभावतो तदापि समापन्नोयेवाति अधिप्पायो.

५४४-५४५. द्वे जीवितिन्द्रियानीति ‘‘पुच्छा सकवादिस्स, पटिञ्ञा इतरस्सा’’ति पुरिमपाठो. ‘‘पुच्छा परवादिस्स, पटिञ्ञा सकवादिस्सा’’ति पच्छिमपाठो, सो युत्तो.

जीवितिन्द्रियकथावण्णना निट्ठिता.

११. कम्महेतुकथावण्णना

५४६. सेसन्ति पाणातिपातादिकम्मस्स हेतूति इतो पुरिमं सोतापन्नादिअनुयोगं वदति. हन्द हीति परवादिस्सेवेतं सम्पटिच्छनवचनन्ति सम्पटिच्छापेतुन्ति न सक्का वत्तुं, ‘‘कतमस्स कम्मस्स हेतू’’ति पन सकवादी तं सम्पटिच्छापेतुं वदतीति युज्जेय्य, सम्पटिच्छापेतुन्ति पन पक्खं पटिजानापेतुन्ति अत्थं अग्गहेत्वा परवादी अत्तनो लद्धिं सकवादिं गाहापेतुन्ति अत्थो दट्ठब्बो.

कम्महेतुकथावण्णना निट्ठिता.

अट्ठमवग्गवण्णना निट्ठिता.

९. नवमवग्गो

१. आनिसंसदस्सावीकथावण्णना

५४७. विभागदस्सनत्थन्ति ¶ ¶ विसभागदस्सनत्थन्ति वुत्तं होति. नानाचित्तवसेन पटिजानन्तस्स अधिप्पायमद्दनं कथं युत्तन्ति विचारेतब्बं. आरम्मणवसेन हि दस्सनद्वयं सह वदन्तस्स तदभावदस्सनत्थं इदं आरद्धन्ति युत्तन्ति. अनुस्सववसेनातिआदिना न केवलं अनिच्चादिआरम्मणमेव ञाणं विपस्सना, अथ खो ‘‘अनुप्पादो खेम’’न्तिआदिकं निब्बाने आनिसंसदस्सनञ्चाति दीपेति.

आनिसंसदस्सावीकथावण्णना निट्ठिता.

२. अमतारम्मणकथावण्णना

५४९. सुत्तभयेनाति ‘‘पारिमं तीरं खेमं अप्पटिभयन्ति खो, भिक्खवे, निब्बानस्सेतं अधिवचन’’न्ति (सं. नि. ४.२३८) असंयोजनियादिभावं सन्धाय खेमादिभावो वुत्तोति एवमादिना सुत्तभयेनाति दट्ठब्बं.

अमतारम्मणकथावण्णना निट्ठिता.

३. रूपंसारम्मणन्तिकथावण्णना

५५२-५५३. आरम्मणत्थस्स विभागदस्सनत्थन्ति पच्चयट्ठो ओलुब्भट्ठोति एवं विभागे विज्जमाने ¶ पच्चयोलुब्भानं विसेसाभावं कप्पेत्वा अकप्पेत्वा वा सप्पच्चयत्ता ओलुब्भारम्मणेनपि सारम्मणमेवाति न गहेतब्बन्ति दस्सनत्थन्ति वुत्तं होति.

रूपंसारम्मणन्तिकथावण्णना निट्ठिता.

४. अनुसयाअनारम्मणातिकथावण्णना

५५४-५५६. अप्पहीनत्ताव ¶ अत्थीति वुच्चति, न पन विज्जमानत्ताति अधिप्पायो.

अनुसयाअनारम्मणातिकथावण्णना निट्ठिता.

५. ञाणंअनारम्मणन्तिकथावण्णना

५५७-८. तस्स ञाणस्साति मग्गञाणस्साति वदन्ति.

ञाणंअनारम्मणन्तिकथावण्णना निट्ठिता.

७. वितक्कानुपतितकथावण्णना

५६२. अविसेसेनेवाति आरम्मणसम्पयोगेहि द्वीहिपीति अत्थो.

वितक्कानुपतितकथावण्णना निट्ठिता.

८. वितक्कविप्फारसद्दकथावण्णना

५६३. सब्बसोति ¶ सवितक्कचित्तेसु सब्बत्थ सब्बदा वाति इममत्थं दस्सेन्तो आह ‘‘अन्तमसो मनोधातुपवत्तिकालेपी’’ति. वितक्कविप्फारमत्तन्ति वितक्कस्स पवत्तिमत्तन्ति अधिप्पायो.

वितक्कविप्फारसद्दकथावण्णना निट्ठिता.

९. नयथाचित्तस्सवाचातिकथावण्णना

५६५. अनापत्तीति विसंवादनाधिप्पायस्स अभावा मुसावादो न होतीति वुत्तं.

नयथाचित्तस्सवाचातिकथावण्णना निट्ठिता.

११. अतीतानागतसमन्नागतकथावण्णना

५६८-५७०. तासूति ¶ तासु पञ्ञत्तीसु. समन्नागमपञ्ञत्तिया समन्नागतोति वुच्चति, पटिलाभपञ्ञत्तिया लाभीति वुच्चति. समन्नागतोति वुच्चति अयं समन्नागमपञ्ञत्ति नाम. लाभीति वुच्चति अयं पटिलाभपञ्ञत्ति नामाति वा अधिप्पायो योजेतब्बो.

अतीतानागतसमन्नागतकथावण्णना निट्ठिता.

नवमवग्गवण्णना निट्ठिता.

१०. दसमवग्गो

१. निरोधकथावण्णना

५७१-२. भवङ्गचित्तस्स ¶ भङ्गक्खणेन सहेवातिआदिं वदन्तेन किरियखन्धानं भङ्गक्खणेन सह उपपत्तेसिया खन्धा उप्पज्जन्तीति च वत्तब्बं, तथा उपपत्तेसियानं भङ्गक्खणेन सह उपपत्तेसिया, किरियानं भङ्गक्खणेन सह किरियाति. चक्खुविञ्ञाणादीनं किरियाचतुक्खन्धग्गहणेन गहणं. ञाणन्ति मग्गञाणं युत्तं.

निरोधकथावण्णना निट्ठिता.

३. पञ्चविञ्ञाणसमङ्गिस्समग्गकथावण्णना

५७६. तं लक्खणन्ति ‘‘छ विञ्ञाणा’’ति अवत्वा ‘‘पञ्चविञ्ञाणा उप्पन्नवत्थुका’’तिआदिना वुत्तं लक्खणं. ‘‘छ विञ्ञाणा’’ति अवचनं पनेत्थ ‘‘नो च वत रे वत्तब्बे’’तिआदिवचनस्स कारणन्ति अधिप्पेतं.

५७७. लोकियोति विपस्सनामग्गमाह. यं तत्थ अनिमित्तन्ति चक्खुविञ्ञाणसमङ्गिक्खणे यं अनिमित्तं गण्हन्तो न निमित्तग्गाहीति वुत्तो, तदेव सुञ्ञतन्ति अधिप्पायो.

पञ्चविञ्ञाणसमङ्गिस्समग्गकथावण्णना निट्ठिता.

५. पञ्चविञ्ञाणासाभोगातिकथावण्णना

५८४-५८६. कुसलाकुसलवसेन ¶ ¶ नमीति कुसलाकुसलभावेन नमित्वा पवत्तीति वुत्तं होति. सा पन आरम्मणप्पकारग्गहणं येन अलोभादीहि लोभादीहि च सम्पयोगो होतीति दट्ठब्बो ‘‘सुखमिति चेतसो अभागो’’तिआदीसु विय.

पञ्चविञ्ञाणासाभोगातिकथावण्णना निट्ठिता.

६. द्वीहिसीलेहीतिकथावण्णना

५८७-५८९. खणभङ्गनिरोधं, न अप्पवत्तिनिरोधं, सीलवीतिक्कमनिरोधं वा. वीतिक्कमं वियाति यथा वीतिक्कमे कते दुस्सीलो, एवं निरुद्धेपीति एवं वीतिक्कमेन निन्नानं सल्लक्खेन्तोति अत्थो.

द्वीहिसीलेहीतिकथावण्णना निट्ठिता.

७. सीलंअचेतसिकन्तिकथावण्णना

५९०-५९४. येन सो सीलवायेव नाम होतीति येन चित्तविप्पयुत्तेन ठितेन उपचयेन अकुसलाब्याकतचित्तसमङ्गी सीलवायेव नाम होतीति अधिप्पायो. सेसमेत्थ ‘‘दानं अचेतसिक’’न्ति कथायं वुत्तनयेनेव वेदितब्बन्ति वुत्तं, सा पन कथा मग्गितब्बा.

सीलंअचेतसिकन्तिकथावण्णना निट्ठिता.

९. समादानहेतुकथावण्णना

५९८-६००. समादानहेतुकथायं \१०० पुरिमकथासदिसमेवाति परिभोगकथेकदेससदिसता दट्ठब्बा.

समादानहेतुकथावण्णना निट्ठिता.

११. अविञ्ञत्तिदुस्सील्यन्तिकथावण्णना

६०३-६०४. आणत्तिया ¶ च पाणातिपातादीसु अङ्गपारिपूरिन्ति एकस्मिं दिवसे आणत्तस्स अपरस्मिं दिवसे पाणातिपातं करोन्तस्स तदा सा आणत्ति विञ्ञत्तिं विनायेव अङ्गं होतीति अविञ्ञत्ति दुस्सील्यन्ति अधिप्पायो.

अविञ्ञत्तिदुस्सील्यन्तिकथावण्णना निट्ठिता.

दसमवग्गवण्णना निट्ठिता.

दुतियो पण्णासको समत्तो.

११. एकादसमवग्गो

४. ञाणकथावण्णना

६१४-६१५. ञाणकथायं सेय्यथापि महासङ्घिकानन्ति पुब्बे ञाणंअनारम्मणन्तिकथायं (कथा. ५५७ आदयो) वुत्तेहि अन्धकेहि अञ्ञे इध महासङ्घिका भवेय्युं. यदि अञ्ञाणे विगतेतिआदिना रागविगमो विय वीतरागपञ्ञत्तिया अञ्ञाणविगमो ञाणीपञ्ञत्तिया कारणन्ति दस्सेति. न हि ञाणं अस्स अत्थीति ञाणी, अथ खो अञ्ञाणीपटिपक्खतो ञाणीति ¶ . यस्मा ञाणपटिलाभेनाति एत्थ च ञाणपटिलाभेन अञ्ञाणस्स विगतत्ता सो ञाणीति वत्तब्बतं आपज्जतीति अत्थो दट्ठब्बो.

ञाणकथावण्णना निट्ठिता.

६. इदंदुक्खन्तिकथावण्णना

६१८-६२०. इतरो पन सकसमयेति परवादी अत्तनो समयेति अत्थो.

इदंदुक्खन्तिकथावण्णना निट्ठिता.

७. इद्धिबलकथावण्णना

६२१-६२४. कम्मस्स ¶ विपाकवसेन वाति निरयंव सन्धाय वुत्तं. तत्थ हि अब्बुदादिपरिच्छेदो तादिसस्स कम्मविपाकस्स वसेन वुत्तो. वस्सगणनाय वाति मनुस्से चातुमहाराजिकादिदेवे च सन्धाय. तेसञ्हि असङ्ख्येयम्पि कालं विपाकदानसमत्थं कम्मं वस्सगणनाय परिच्छिज्जतीति.

इद्धिबलकथावण्णना निट्ठिता.

८. समाधिकथावण्णना

६२५-६२६. समाधानट्ठेनाति समं ठपनट्ठेन समाधि नाम चेतसिकन्तरं अत्थीति अग्गहेत्वाति ¶ अत्थो. छलेनाति एकचित्तक्खणिकत्ते चक्खुविञ्ञाणस्स च झानचित्तस्स च न कोचि विसेसोति एतेन सामञ्ञमत्तेनाति अधिप्पायो.

समाधिकथावण्णना निट्ठिता.

९. धम्मट्ठितताकथावण्णना

६२७. अनन्तरपच्चयतञ्चेवाति अविज्जा सङ्खारानं अनन्तरपच्चयो अविज्जाय या ठितता ततो होति, ताय ठितताय अनन्तरपच्चयभावसङ्खाता ठितता होतीति अधिप्पायो. अनन्तरपच्चयग्गहणञ्चेत्थ अञ्ञमञ्ञपच्चयभावरहितस्स एकस्स पच्चयस्स दस्सनत्थन्ति दट्ठब्बं. तेन हि सब्बो तादिसो पच्चयो दस्सितो होतीति. अञ्ञमञ्ञपच्चयतञ्चाति अविज्जा सङ्खारानं पच्चयो, सङ्खारा च अविज्जाय. तत्थ अविज्जाय सङ्खारानं पच्चयभावसङ्खाताय ठितताय सङ्खारानं अविज्जाय पच्चयभावसङ्खाता ठितता होति, तस्सा च इतराति अधिप्पायो.

धम्मट्ठितताकथावण्णना निट्ठिता.

१०. अनिच्चताकथावण्णना

६२८. रूपादयो ¶ विय परिनिप्फन्नाति रूपादीहि सह उप्पज्जित्वा निरुज्झनतो परिनिप्फन्नाति अत्थो. अनिच्चताविभागानुयुञ्जनवसेनाति तीसु दण्डेसु दण्डवोहारो विय तीसु लक्खणेसु अनिच्चतावोहारो होतीति तस्सा विभागानुयुञ्जनवसेनाति वदन्ति.

अनिच्चताकथावण्णना निट्ठिता.

एकादसमवग्गवण्णना निट्ठिता.

१२. द्वादसमवग्गो

१. संवरोकम्मन्तिकथावण्णना

६३०-६३२. विपाकद्वारन्ति ¶ भवङ्गमनं वदति. कम्मद्वारन्ति कुसलाकुसलमनं.

संवरोकम्मन्तिकथावण्णना निट्ठिता.

२. कम्मकथावण्णना

६३३-६३५. अब्याकतं सन्धाय पटिक्खेपोति सकसमयलक्खणेन पटिक्खेपो कतोति वदन्ति. अविपाकचेतनाय सरूपेन दस्सिताय सविपाकापि दस्सितायेव नाम होतीति मञ्ञमानो आह ‘‘सविपाकाविपाकचेतनं सरूपेन दस्सेतु’’न्ति.

कम्मकथावण्णना निट्ठिता.

३. सद्दोविपाकोतिकथावण्णना

६३६-६३७. कम्मसमुट्ठाना अरूपधम्मावातिआदिना कम्मसमुट्ठानेसु चक्खादीसुपि विपाकवोहारो नत्थि, को पन वादो अकम्मसमुट्ठाने सद्देति दस्सेति.

सद्दोविपाकोतिकथावण्णना निट्ठिता.

४. सळायतनकथावण्णना

६३८-६४०. तस्मा ¶ ¶ विपाकोति अविसेसेन सळायतनं विपाकोति येसं लद्धीति वुत्तं होति.

सळायतनकथावण्णना निट्ठिता.

५. सत्तक्खत्तुपरमकथावण्णना

६४१-६४५. सत्तक्खत्तुपरमतानियतोति सत्तक्खत्तुपरमताय नियतो. इमं विभागन्ति इमं विसेसं. त्वं पनस्स नियामं इच्छसीति अविनिपातधम्मताफलप्पत्तीहि अञ्ञस्मिं सत्तक्खत्तुपरमभावे च नियामं इच्छसीति अत्थो.

आनन्तरियाभावन्ति येन सो धम्माभिसमयेन भब्बो नाम होति, तस्स आनन्तरियकम्मस्स अभावन्ति अत्थो, पुग्गलस्स वा आनन्तरियभावस्स अभावन्ति. किं पन सो अन्तराधम्मं अभिसमिस्सतीति? केचि वदन्ति ‘‘सत्तक्खत्तुपरमो सत्तमं भवं नातिक्कमति, ओरतो पन नत्थि पटिसेधो’’ति. अपरे ‘‘यो भगवता ञाणबलेन ब्याकतो, तस्स अन्तरा अभिसमयो नाम नत्थि, तथापि भवनियामस्स कस्सचि अभावा भब्बोति वुच्चति. यथा कुसला अभिञ्ञाचेतना कदाचि विपाकं अददमानापि सति कारणे दातुं भब्बताय विपाकधम्मधम्मा नाम, तथा इन्द्रियानं मुदुताय सत्तक्खत्तुपरमो, न नियामसब्भावा नापि भगवता ब्याकतत्ता, न च इन्द्रियमुदुता अभब्बताकरो धम्मोति न सो अभब्बो नाम. अभब्बताकरधम्माभावतो चेत्थ अभब्बता पटिसेधिता, न पन अन्तरा अभिसमेतुं भब्बता वुत्ता. यदि च सत्तक्खत्तुपरमो अन्तरा अभिसमेय्य, कोलंकोलो सिया’’ति. विसेसं पन अकत्वा भब्बसभावताय भब्बोति वत्तुं युत्तं. न भवनियामकं किञ्चीति एत्थ पस्सित्वाति वचनसेसो, ब्याकरोतीति वा सम्बन्धो.

सत्तक्खत्तुपरमकथावण्णना निट्ठिता.

द्वादसमवग्गवण्णना निट्ठिता.

१३. तेरसमवग्गो

१. कप्पट्ठकथावण्णना

६५४-६५७. कप्पट्ठकथायं ¶ ¶ हेट्ठाति इद्धिबलकथायं.

कप्पट्ठकथावण्णना निट्ठिता.

३. अनन्तरापयुत्तकथावण्णना

६६०-६६२. अनन्तरापयुत्तकथायं आनन्तरियं पयुत्तं एतेनाति अनन्तरापयुत्तोति आनन्तरिये अनन्तरासद्दं आरोपेत्वा अट्ठकथायं अत्थो वुत्तोति दट्ठब्बो. ‘‘अनन्तरपयुत्तो’’तिपि पाळि दिस्सति.

अनन्तरापयुत्तकथावण्णना निट्ठिता.

४. नियतस्सनियामकथावण्णना

६६३-६६४. सेसा तेभूमकधम्मा अनियता नामाति एत्थ अप्पत्तनियामानं धम्मे सन्धाय ‘‘तेभूमकधम्मा’’ति आह. एतेव हि सन्धाय ‘‘तेहि समन्नागतोपि अनियतोयेवा’’ति वुत्तन्ति. इति इमं वोहारमत्तं गहेत्वा ‘‘नियतो बोधिसत्तो पच्छिमभविको भब्बो धम्मं अभिसमेतुं ओक्कमितु’’न्ति अधिप्पायेन ‘‘नियामं ओक्कमती’’ति येसं लद्धीति अत्थयोजना. एवं पन वोहारमत्तसब्भावो ‘‘नियतो’’ति वचनस्स, धम्मं अभिसमेतुं भब्बता च ‘‘नियामं ओक्कमती’’ति ¶ वचनस्स कारणभावेन वुत्ता होति, भब्बतायेव पन उभयस्सपि कारणन्ति युत्तं. अञ्ञेनाति यदि नियतो नियामं ओक्कमेय्य, मिच्छत्तनियतो सम्मत्तनियामं, सम्मत्तनियतो वा मिच्छत्तनियामं ओक्कमेय्य, न च तं अत्थीति दस्सनत्थन्ति अत्थो.

नियतस्सनियामकथावण्णना निट्ठिता.

८. असातरागकथावण्णना

६७४. असातरागकथायं ¶ ‘‘अहो वत मे एतदेव भवेय्या’’ति रज्जनाति इमिना एवं पवत्तमानोयेव लोभो इध ‘‘रागो’’ति अधिप्पेतो, न अञ्ञथाति दस्सेति.

६७५. सुत्ते पनाति एतस्स ‘‘अधिप्पायो’’ति एतेन सम्बन्धो.

असातरागकथावण्णना निट्ठिता.

९. धम्मतण्हाअब्याकतातिकथावण्णना

६७६-६८०. यस्मा धम्मतण्हाति वुत्ता, तस्मा अब्याकताति कुसलेसु धम्मेसु लोकुत्तरेसु वा सब्बेसु तण्हा ‘‘धम्मतण्हा’’ति गहेत्वा यस्मा सा तण्हा, तस्मा कुसला न होति, यस्मा पन धम्मे पवत्ता, तस्मा अकुसला न होतीति अब्याकताति लद्धीति दस्सेति. तीहि कोट्ठासेहि छपि तण्हा संखिपित्वा दस्सिता, तस्मा धम्मतण्हापि कामतण्हादिभावतो न अब्याकताति अधिप्पायो.

धम्मतण्हाअब्याकतातिकथावण्णना निट्ठिता.

तेरसमवग्गवण्णना निट्ठिता.

१४. चुद्दसमवग्गो

१. कुसलाकुसलपटिसन्दहनकथावण्णना

६८६-६९०. तन्ति ¶ कुसलं अकुसलञ्चाति विसुं सम्बन्धो दट्ठब्बो. तं उभयन्ति वा वचनसेसो. पटिसन्दहतीति घटेति, अनन्तरं उप्पादेतीति वुत्तं होति.

कुसलाकुसलपटिसन्दहनकथावण्णना निट्ठिता.

२. सळायतनुप्पत्तिकथावण्णना

६९१-६९२. केचि ¶ वादिनो ‘‘अङ्कुरे साखाविटपादिसम्पन्नानं रुक्खादीनं बीजमत्तं आविभावं गच्छती’’ति वदन्तीति तेसं वादं निदस्सनं करोन्तो आह ‘‘सम्पन्नसाखाविटपान’’न्तिआदि.

सळायतनुप्पत्तिकथावण्णना निट्ठिता.

३. अनन्तरपच्चयकथावण्णना

६९३-६९७. चक्खुञ्च पटिच्च रूपे च उप्पज्जति सोतविञ्ञाणन्ति एत्थ ‘‘लद्धिवसेन पटिजानाती’’ति अनन्तरुप्पत्तिं सल्लक्खेन्तोपि न सो चक्खुम्हि रूपारम्मणं सोतविञ्ञाणं इच्छति, अथ खो सोतम्हियेव सद्दारम्मणन्ति अनन्तरूपलद्धिवसेन आपन्नत्ता ‘‘पटिजानाती’’ति युत्तं वत्तुं.

अनन्तरपच्चयकथावण्णना निट्ठिता.

४. अरियरूपकथावण्णना

६९८-६९९. सम्मावाचादि ¶ रूपं मग्गो चाति इच्छन्तो ‘‘अरियरूप’’न्तिपि वदति.

अरियरूपकथावण्णना निट्ठिता.

५. अञ्ञोअनुसयोतिकथावण्णना

७००-७०१. ‘‘सरागोतिआदि पन तस्मिं समये रागस्स अप्पहीनत्ता सरागोति वत्तब्बत’’न्ति पुरिमपाठो, ‘‘सानुसयोतिआदि पन तस्मिं समये अनुसयस्स अप्पहीनत्ता सानुसयोति वत्तब्बत’’न्ति पच्छिमपाठो, सो युत्तो. सो हि न अनुसयपरियुट्ठानानं अञ्ञत्तं, तस्मा तं असाधकन्ति एतेन समेतीति.

अञ्ञोअनुसयोतिकथावण्णना निट्ठिता.

६. परियुट्ठानंचित्तविप्पयुत्तन्तिकथावण्णना

७०२. यस्मा ¶ अनिच्चादितो मनसिकरोतोपि रागादयो उप्पज्जन्ति, न च ते विपस्सनाय सम्पयुत्ता, तस्मा परियुट्ठानं चित्तविप्पयुत्तन्ति लद्धीति अधिप्पायो.

परियुट्ठानंचित्तविप्पयुत्तन्तिकथावण्णना निट्ठिता.

७. परियापन्नकथावण्णना

७०३-७०५. तिविधायाति ¶ किलेसवत्थुओकासवसेन, कामरागकामवितक्ककामावचरधम्मवसेन वा तिविधाय. किलेसकामवसेनाति किलेसकामभूतकामधातुभावेनाति वुत्तं होति. अधिप्पायं असल्लक्खेन्तोति रूपधातुसहगतवसेन अनुसेतीति, रूपधातुधम्मेसु अञ्ञतरभावेन रूपधातुपरियापन्नोति च पुच्छितभावं असल्लक्खेन्तोति अत्थो.

परियापन्नकथावण्णना निट्ठिता.

८. अब्याकतकथावण्णना

७०६-७०८. दिट्ठिगतं ‘‘सस्सतो लोकोति खो, वच्छ, अब्याकतमेत’’न्ति सस्सतादिभावेन अकथितत्ता ‘‘अब्याकत’’न्ति वुत्तन्ति सम्बन्धो. एत्थ पन न दिट्ठिगतं ‘‘अब्याकत’’न्ति वुत्तं, अथ खो ‘‘ठपनीयो एसो पञ्हो’’ति दस्सितं, तस्मा सब्बथापि दिट्ठिगतं ‘‘अब्याकत’’न्ति न वत्तब्बन्ति युत्तं.

अब्याकतकथावण्णना निट्ठिता.

९. अपरियापन्नकथावण्णना

७०९-७१०. तस्माति यस्मा दिट्ठिरागानं समाने विक्खम्भनभावेपि ‘‘वीतरागो’’ति वुच्चति, न पन ‘‘विगतदिट्ठिको’’ति, तस्मा दिट्ठि लोकियपरियापन्ना न होतीति अत्थं वदन्ति. रूपदिट्ठिया अभावा पन कामधातुपरियापन्नाय दिट्ठिया भवितब्बं. यदि च परियापन्ना सिया, तथा च ¶ सति कामरागो विय झानलाभिनो दिट्ठिपि विगच्छेय्याति ‘‘विगतदिट्ठिको’’ति वत्तब्बो सिया, न च वुच्चति, तस्मा अपरियापन्ना दिट्ठि. न हि सा ¶ तस्स अविगता दिट्ठि कामरागो विय कामदिट्ठि येन कामधातुया परियापन्ना सियाति वदतीति वेदितब्बं.

अपरियापन्नकथावण्णना निट्ठिता.

चुद्दसमवग्गवण्णना निट्ठिता.

१५. पन्नरसमवग्गो

१. पच्चयताकथावण्णना

७११-७१७. तस्मा पच्चयता ववत्थिताति हेतुपच्चयभूतस्स धम्मस्स आरम्मणपच्चयभावादिना विय अधिपतिपच्चयतादिना च न भवितब्बन्ति हेतुपच्चयभावोयेवेतस्स ववत्थितो होतीति अत्थो.

पच्चयताकथावण्णना निट्ठिता.

२. अञ्ञमञ्ञपच्चयकथावण्णना

७१८-७१९. अपुञ्ञाभिसङ्खारोव गहितो ‘‘ननु अविज्जा सङ्खारेन सहजाता’’ति वुत्तत्ताति अधिप्पायो. सहजातअञ्ञमञ्ञअत्थिअविगतसम्पयुत्तवसेनाति एत्थ निस्सयो कमभेदेन अत्थिग्गहणेन गहितो होतीति न वुत्तो, कम्माहारा असाधारणतायाति वेदितब्बा. वक्खति हि ‘‘तीणि उपादानानि अविज्जाय सङ्खारा विय तण्हाय पच्चया होन्ती’’ति (कथा. अट्ठ. ७१८-७१९), तस्मा उपादानेहि समाना एवेत्थ सङ्खारानं पच्चयता दस्सिताति.

अञ्ञमञ्ञपच्चयकथावण्णना निट्ठिता.

९. ततियसञ्ञावेदयितकथावण्णना

७३२. ततियसञ्ञावेदयितकथायं ¶ ¶ सेससत्ते सन्धायाति निरोधसमापन्नतो अञ्ञे येसं निरोधसमापत्तिया भवितब्बं, ते पञ्चवोकारसत्ते सन्धायाति अधिप्पायो, असञ्ञसत्तानम्पि च सञ्ञुप्पादा चुतिं इच्छन्तीति सेससब्बसत्ते सन्धायाति वा. सरीरपकतिन्ति तथारूपो अयं कायो, यथारूपे काये पाणिसम्फस्सापि कमन्तीतिआदिकं.

७३३-७३४. सुत्तविरोधो सियाति इदं परवादिं सम्पटिच्छापेत्वा वत्तब्बं.

ततियसञ्ञावेदयितकथावण्णना निट्ठिता.

१०. असञ्ञसत्तुपिकाकथावण्णना

७३५. सञ्ञाविरागवसेन पवत्तभावना असञ्ञसमापत्तिपीति लद्धिकित्तने सञ्ञाविरागवसेन पवत्तभावनं चतुत्थज्झानसमापत्तिं ‘‘असञ्ञसमापत्ती’’ति अग्गहेत्वा सापि असञ्ञिता सञ्ञावेदयितनिरोधसमापत्तियेव नामाति परस्स लद्धीति दस्सेति. यस्मा असञ्ञसमापत्तिं समापन्नस्स अलोभादयो अत्थीति एत्थ सकसमयसिद्धा चतुत्थज्झानसमापत्ति ‘‘असञ्ञसमापत्ती’’ति वुत्ता.

७३६. सञ्ञाविरागवसेन समापन्नत्ता असञ्ञिता, न सञ्ञाय अभावतोति चतुत्थज्झानसमापत्तिमेव सन्धाय वदति.

असञ्ञसत्तुपिकाकथावण्णना निट्ठिता.

११. कम्मूपचयकथावण्णना

७३८-७३९. कम्मेन ¶ सहजातोति पञ्हेसु ‘‘कम्मूपचयं सन्धाय पटिक्खिपति, चित्तविप्पयुत्तं सन्धाय पटिजानाती’’ति कत्थचि पाठो, ‘‘चित्तसम्पयुत्तं ¶ सन्धाय पटिक्खिपति, चित्तविप्पयुत्तं सन्धाय पटिजानाती’’ति अञ्ञत्थ. उभयम्पि विचारेतब्बं.

७४१. तस्माति तिण्णम्पि एकक्खणे सब्भावतो तिण्णं फस्सानञ्च समोधाना च एकत्तं पुच्छतीति अधिप्पायो दट्ठब्बो.

कम्मूपचयकथावण्णना निट्ठिता.

पन्नरसमवग्गवण्णना निट्ठिता.

ततियो पण्णासको समत्तो.

१६. सोळसमवग्गो

३. सुखानुप्पदानकथावण्णना

७४७-७४८. सुखानुप्पदानकथायं यं एवरूपन्ति यं नेवत्तनो, न परेसं, न तस्स, एवरूपं नाम अनुप्पदिन्नं भवितुं न अरहति अञ्ञस्स असक्कुणेय्यत्ताति लद्धिमत्तेन पटिजानाति, न युत्तियाति अधिप्पायो.

सुखानुप्पदानकथावण्णना निट्ठिता.

४. अधिगय्हमनसिकारकथावण्णना

७४९-७५३. तंचित्ततायाति ¶ तदेव आरम्मणभूतं चित्तं एतस्साति तंचित्तो, तस्स भावो तंचित्तता, ताय तंचित्तताय. तं वा आलम्बकं आलम्बितब्बञ्च चित्तं तंचित्तं, तस्स भावो तस्सेव आलम्बकआलम्बितब्बता तंचित्तता, ताय चोदेतुन्ति अत्थो.

अधिगय्हमनसिकारकथावण्णना निट्ठिता.

९. रूपंरूपावचरारूपावचरन्तिकथावण्णना

७६८-७७०. रूपंरूपावचरारूपावचरन्तिकथायं हेट्ठाति चुद्दसमवग्गे आगतपरियापन्नकथायं (कथा. अट्ठ. ७०३-७०५). ‘‘समापत्तेसिय’’न्तिआदि वुत्तनयमेव. यञ्चेत्थ ¶ ‘‘अत्थि रूपं अरूपावचर’’न्ति अरूपावचरकम्मस्स कतत्ता रूपं वुत्तं, तत्थ च यं वत्तब्बं, तं अट्ठमवग्गे अरूपेरूपकथायं (कथा. अट्ठ. ५२४-५२६) वुत्तनयमेवाति.

रूपंरूपावचरारूपावचरन्तिकथावण्णना निट्ठिता.

सोळसमवग्गवण्णना निट्ठिता.

१७. सत्तरसमवग्गो

१. अत्थिअरहतोपुञ्ञूपचयकथावण्णना

७७६-७७९. चित्तं अनादियित्वाति ‘‘किरियचित्तेन दानादिपवत्तिसब्भावतो’’ति वुत्तं किरियचित्तं अब्याकतं अनादियित्वाति अत्थो.

अत्थिअरहतोपुञ्ञूपचयकथावण्णना निट्ठिता.

२. नत्थिअरहतोअकालमच्चूतिकथावण्णना

७८०. अयोनिसो ¶ गहेत्वाति अलद्धविपाकवारानम्पि कम्मानं ब्यन्तीभावं न वदामीति अत्थं गहेत्वाति अधिप्पायो. केचि पन ‘‘कम्मानं विपाकं अप्पटिसंविदित्वा पुग्गलस्स ब्यन्तीभावं न वदामीति एवं अयोनिसो अत्थं गहेत्वा’’ति वदन्ति.

७८१. ताव न कमतीति लद्धिया पटिक्खिपतीति ताव न कमति, ततो परं कमतीति लद्धिया पटिक्खिपतीति अधिप्पायो. एत्थ किर ‘‘सति जीविते जीवितावसेसे जीविता वोरोपेती’’ति वचनतो अत्तनो धम्मताय मरन्तं कोट्टेन्तस्स वा सीसं वा छिन्दन्तस्स नत्थि पाणातिपातोति आचरिया वदन्ति. पाणो पाणसञ्ञिता वधकचित्तउपक्कममरणेसु विज्जमानेसुपि न तेन उपक्कमेन मतोति नत्थि पाणातिपातोति अधिप्पायो. एवं पन मरन्तेन तेन एकचित्तवारम्पि धम्मतामरणतो ओरतो न मतोति दुब्बिञ्ञेय्यमेतं.

नत्थिअरहतोअकालमच्चूतिकथावण्णना निट्ठिता.

३. सब्बमिदंकम्मतोतिकथावण्णना

७८४. बीजतो ¶ अङ्कुरस्सेवाति यथा अङ्कुरस्स अबीजतो निब्बत्ति नत्थि, तथा पच्चुप्पन्नपवत्तस्सपि अकम्मतो कम्मविपाकतो निब्बत्ति नत्थि, तं सन्धाय पटिक्खिपतीति अधिप्पायो. देय्यधम्मवसेन दानफलं पुच्छतीति देय्यधम्मवसेन याय चेतनाय तं देति, तस्स दानस्स फलं पुच्छति, न देय्यधम्मस्साति वुत्तं होति.

सब्बमिदंकम्मतोतिकथावण्णना निट्ठिता.

४. इन्द्रियबद्धकथावण्णना

७८८. विनापि ¶ अनिच्चत्तेनाति ‘‘याव दुक्खा निरया’’तिआदीसु (म. नि. ३.२५०) विय दुक्खारम्मणत्तेनपि दुक्खं वत्तब्बन्ति अधिप्पायो.

इन्द्रियबद्धकथावण्णना निट्ठिता.

७. नवत्तब्बंसङ्घोदक्खिणंविसोधेतीतिकथावण्णना

७९३-७९४. नवत्तब्बंसङ्घोदक्खिणंविसोधेतीतिकथायं न च तानि दक्खिणं विसोधेतुं सक्कोन्तीति यथा पुग्गलो सीलपरिसोधनादीनि कत्वा निरोधम्पि समापज्जित्वा विसोधेतुं सक्कोति, न एवं मग्गफलानीति अधिप्पायो, अप्पटिग्गहणतोति वा.

नवत्तब्बंसङ्घोदक्खिणंविसोधेतीतिकथावण्णना निट्ठिता.

११. दक्खिणाविसुद्धिकथावण्णना

८००-८०१. दक्खिणाविसुद्धिकथायं विसुज्झेय्याति एतस्स अत्थं दस्सेन्तो ‘‘महप्फला भवेय्या’’ति आह. दायकस्सेव चित्तविसुद्धि विपाकदायिका होतीति पटिग्गाहकनिरपेक्खा पटिग्गाहकेन पच्चयभूतेन विना दायकेनेव महाविपाकचेतनत्तं आपादिका, पटिग्गाहकनिरपेक्खा विपाकदायिका होतीति अधिप्पायो. अञ्ञो अञ्ञस्स कारकोति ¶ यदि दायकस्स दानचेतना नाम पटिग्गाहकेन कता भवेय्य, युत्तरूपं सियाति कस्मा वुत्तं, ननु लद्धिकित्तने ‘‘दायकेन दानं दिन्नं, पटिग्गाहकेन विपाको निब्बत्तितोति अञ्ञो अञ्ञस्स कारको भवेय्या’’ति वुत्तन्ति? सच्चमेतं, पटिग्गाहकेन विपाकनिब्बत्तनम्पि पन दानचेतनानिब्बत्तनेन ¶ यदि भवेय्य, एवं सति अञ्ञो अञ्ञस्स कारकोति युत्तरूपं सियाति अधिप्पायो.

दक्खिणाविसुद्धिकथावण्णना निट्ठिता.

सत्तरसमवग्गवण्णना निट्ठिता.

१८. अट्ठारसमवग्गो

१. मनुस्सलोककथावण्णना

८०२-८०३. अयोनिसोति ‘‘तुसितपुरं सन्धाया’’तिआदिकं गहणं सन्धायाह.

मनुस्सलोककथावण्णना निट्ठिता.

२. धम्मदेसनाकथावण्णना

८०४-८०६. तस्स च देसनं सम्पटिच्छित्वा सयमेव च आयस्मता आनन्दत्थेरेन देसितोति वदति.

धम्मदेसनाकथावण्णना निट्ठिता.

६. झानसङ्कन्तिकथावण्णना

८१३-८१६. झानसङ्कन्तिकथायं उप्पटिपाटियाति पठमज्झानतो वुट्ठाय वितक्कविचारा आदीनवतो मनसिकातब्बा, ततो दुतियज्झानेन भवितब्बन्ति एवं यो उपचारानं झानानञ्च अनुक्कमो, तेन विनाति अत्थो.

झानसङ्कन्तिकथावण्णना निट्ठिता.

७. झानन्तरिककथावण्णना

८१७-८१९. झानन्तरिका ¶ ¶ नाम एसाति पठमज्झानादीसु अञ्ञतरभावाभावतो न झानं, अथ खो दक्खिणपुब्बादिदिसन्तरिका विय झानन्तरिका नाम एसाति. कतरा? योयं अवितक्कविचारमत्तो समाधीति योजेतब्बं.

झानन्तरिककथावण्णना निट्ठिता.

९. चक्खुनारूपंपस्सतीतिकथावण्णना

८२६-८२७. पटिजाननं सन्धायाति ‘‘चक्खुना रूपं दिस्वा निमित्तग्गाही होती’’तिआदिना (ध. स. १३५२) नयेन वुत्तं मनोविञ्ञाणपटिजाननं किर सन्धायाति अधिप्पायो, तस्मा ‘‘एवं सन्ते रूपं मनोविञ्ञाणं आपज्जतीति मनोविञ्ञाणपटिजाननं पन रूपदस्सनं कथं होती’’ति विचारेतब्बं.

चक्खुनारूपंपस्सतीतिकथावण्णना निट्ठिता.

अट्ठारसमवग्गवण्णना निट्ठिता.

१९. एकूनवीसतिमवग्गो

१. किलेसपजहनकथावण्णना

८२८-८३१. अनुप्पन्नायेव नुप्पज्जन्तीति पहीना नाम होन्ति, तस्मा नत्थि किलेसपजहनाति ¶ पटिक्खिपति. ते पन नेव उप्पज्जित्वा विगता, नापि भविस्सन्ति, न च उप्पन्नाति अतीते किलेसे पजहतीतिआदि न वत्तब्बन्ति दस्सेति.

किलेसपजहनकथावण्णना निट्ठिता.

२. सुञ्ञतकथावण्णना

८३२. अनत्तलक्खणं ¶ ताव एकच्चन्ति अरूपक्खन्धानं अनत्तलक्खणं वदति. एकेन परियायेनाति अनत्तलक्खणस्स जरामरणभावपरियायेनाति वदन्ति. रूपक्खन्धादीनञ्हि मा जीरतु मा मरतूति अलब्भनेय्यो अवसवत्तनाकारो अनत्तता, सा अत्थतो जरामरणमेव, तञ्च ‘‘जरामरणं द्वीहि खन्धेहि सङ्गहित’’न्ति (धातु. ७१) वुत्तत्ता अरूपक्खन्धानं जरामरणं सङ्खारक्खन्धपरियापन्नन्ति अयमेतेसं अधिप्पायो.

सुञ्ञतकथावण्णना निट्ठिता.

३. सामञ्ञफलकथावण्णना

८३५-८३६. फलुप्पत्ति चाति पत्तिधम्मं वदति.

सामञ्ञफलकथावण्णना निट्ठिता.

५. तथताकथावण्णना

८४१-८४३. रूपादिसभावतासङ्खाताति ¶ एत्थ रूपादीनं सभावताति रूपादिसभावताति एवमत्थो दट्ठब्बो. भावं हेस तथताति वदति, न भावयोगन्ति.

तथताकथावण्णना निट्ठिता.

६. कुसलकथावण्णना

८४४-८४६. अनवज्जभावमत्तेनेव निब्बानं कुसलन्ति यंकिञ्चि कुसलं, सब्बं तं अनवज्जभावमत्तेनेव, तस्मा निब्बानं कुसलन्ति वुत्तं होति.

कुसलकथावण्णना निट्ठिता.

७. अच्चन्तनियामकथावण्णना

८४७. ‘‘सकिं ¶ निमुग्गो निमुग्गोव होती’’ति सुत्तं निस्सायाति ताय जातिया लोकुत्तरसद्धादीनं अनुप्पत्तिं सन्धाय कतं अवधारणं संसारखाणुकभावं सन्धाय कतन्ति मञ्ञमानो पुथुज्जनस्सायं अच्चन्तनियामता, यायं नियतमिच्छादिट्ठीति ‘‘अत्थि पुथुज्जनस्स अच्चन्तनियामता’’ति वदति. विचिकिच्छुप्पत्ति नियामन्तरुप्पत्ति च अच्चन्तनियामनिवत्तका विचारेत्वा गहेतब्बा.

अच्चन्तनियामकथावण्णना निट्ठिता.

८. इन्द्रियकथावण्णना

८५३-८५६. लोकियानम्पीति ¶ लोकुत्तरानं विय लोकियानम्पि सद्धादीनंयेव सद्धिन्द्रियादिभावदस्सनेन लोकियसद्धिन्द्रियादिभावं साधेतुं सद्धादीनंयेव सद्धिन्द्रियादिभावदस्सनत्थं वुत्तन्ति अत्थो दट्ठब्बो.

इन्द्रियकथावण्णना निट्ठिता.

एकूनवीसतिमवग्गवण्णना निट्ठिता.

२०. वीसतिमवग्गो

२. ञाणकथावण्णना

८६३-८६५. ञाणकथायं दुक्खं परिजानातीति लोकुत्तरमग्गञाणमेव दीपेतीति ‘‘दुक्खं परिजानाती’’ति वदन्तो इदं तव वचनं लोकुत्तरमग्गञाणमेव दीपेति, न तस्सेव ञाणभावं. कस्मा? यस्मा न लोकुत्तरमेव ञाणं, तस्मा न इदं साधकन्ति वुत्तं होति.

ञाणकथावण्णना निट्ठिता.

३. निरयपालकथावण्णना

८६७-८६८. पणुन्नन्ति ¶ पणुदितं, अनवसेसखित्तन्ति अत्थो.

निरयपालकथावण्णना निट्ठिता.

४. तिरच्छानकथावण्णना

८६९-८७१. तस्स ¶ अत्थिताय पटिञ्ञाति तस्स हत्थिनागस्स च दिब्बयानस्स च अत्थितायाति विसुं योजेतब्बं.

तिरच्छानकथावण्णना निट्ठिता.

६. ञाणकथावण्णना

८७६-८७७. ञाणकथायं सचे तं द्वादसवत्थुकन्ति एत्थ च ‘‘लोकुत्तर’’न्ति वचनसेसो, तं वा लोकुत्तरञाणं सचे द्वादसवत्थुकन्ति अत्थो. परिञ्ञेय्यन्ति पुब्बभागो, परिञ्ञातन्ति अपरभागो, सच्चञाणं पन मग्गक्खणेपि परिजाननादिकिच्चसाधनवसेन होतीति आह ‘‘सद्धिं पुब्बभागपरभागेही’’ति.

ञाणकथावण्णना निट्ठिता.

वीसतिमवग्गवण्णना निट्ठिता.

चतुत्थो पण्णासको समत्तो.

२१. एकवीसतिमवग्गो

१. सासनकथावण्णना

८७८. तीसुपि पुच्छासु चोदनत्थं वुत्तन्ति तीसुपि पुच्छासु ‘‘सासन’’न्तिआदिवचनं वुत्तन्ति समुदाया एकदेसानं अधिकरणभावेन वुत्ताति दट्ठब्बा.

सासनकथावण्णना निट्ठिता.

४. इद्धिकथावण्णना

८८३-८८४. इद्धिकथायं ¶ ¶ अत्थि अधिप्पायइद्धीति अधिप्पायवसेन इज्झनतो अधिप्पायोति एवंनामिका इद्धि अत्थीति अत्थो.

इद्धिकथावण्णना निट्ठिता.

७. धम्मकथावण्णना

८८७-८८८. धम्मकथायं रूपट्ठतो अञ्ञस्स रूपस्स अभावाति यो रूपस्स नियामो वुच्चेय्य, सो रूपट्ठो नाम कोचि रूपतो अञ्ञो नत्थीति रूपट्ठतो अञ्ञं रूपञ्च न होति, तस्मा रूपं रूपमेव, न वेदनादिसभावन्ति अधिप्पायेन ‘‘रूपं रूपट्ठेन नियत’’न्ति वत्तब्बं, न अञ्ञथा रूपट्ठेन नियामेनाति अधिप्पायो. तत्थ रूपतो अञ्ञस्स रूपट्ठस्स अभावे दस्सिते रूपट्ठतो अञ्ञस्स रूपस्स अभावो दस्सितोयेव नाम होतीति तमेव रूपतो अञ्ञस्स रूपट्ठस्स अभावं दस्सेन्तो ‘‘रूपसभावो ही’’तिआदिमाह. एस वोहारोति रूपस्स सभावो रूपसभावो, रूपस्स अत्थो रूपट्ठोति एवं अञ्ञत्तं गहेत्वा विय पवत्तो रूपसभाववोहारो रूपट्ठवोहारो वा वेदनादीहि नानत्तमेव सो सभावोति नानत्तसञ्ञापनत्थं होतीति अत्थो. तस्माति रूपस्स रूपट्ठेन अनञ्ञत्ता. ‘‘रूपं रूपमेव, न वेदनादिसभाव’’न्ति अवत्वा ‘‘रूपं रूपट्ठेन नियत’’न्ति वदतो तञ्च वचनं वुत्तप्पकारेन सदोसं, अथ कस्मा ‘‘रूपञ्हि रूपट्ठेन नियतन्ति रूपं रूपमेव, न वेदनादिसभावन्ति अधिप्पायेन वत्तब्ब’’न्ति वदन्तो ‘‘रूपं रूपट्ठेन नियत’’न्ति पटिजानातीति अत्थो दट्ठब्बो. ननु चेतं अत्तनाव वुत्तं, न परेनाति पटिजानातीति न वत्तब्बन्ति? न, अत्तानम्पि परं विय वचनतो. वत्तब्बन्ति वा सकवादिना वत्तब्बन्ति वुत्तं होति. यदि च तेन वत्तब्बं पटिजानाति च सो एतमत्थन्ति, अथ कस्मा पटिजानाति सकवादीति अयमेत्थ अत्थो. अत्थन्तरवसेनाति तत्थ वुत्तमेव कारणं निगूहित्वा परेन चोदितन्ति तमेव कारणं दस्सेत्वा चोदनं निवत्तेति. इतो अञ्ञथाति रूपादिसभावमत्तं मुञ्चित्वा तेन परिकप्पितं नियतं नत्थीति ¶ तस्स ¶ परिकप्पितस्स निवत्तनत्थं पुन तेनेव नयेन चोदेतुं ‘‘मिच्छत्तनियत’’न्तिआदिमाहाति अत्थो.

धम्मकथावण्णना निट्ठिता.

एकवीसतिमवग्गवण्णना निट्ठिता.

२२. बावीसतिमवग्गो

२. कुसलचित्तकथावण्णना

८९४-८९५. कुसलचित्तकथायं जवनक्खणेति परिनिब्बानचित्ततो पुरिमजवनक्खणे.

कुसलचित्तकथावण्णना निट्ठिता.

३. आनेञ्जकथावण्णना

८९६. भवङ्गचित्तेति भवङ्गपरियोसानत्ता चुतिचित्तं ‘‘भवङ्गचित्त’’न्ति आह.

आनेञ्जकथावण्णना निट्ठिता.

५-७. तिस्सोपिकथावण्णना

८९८-९००. सत्तवस्सिकं ¶ गब्भं दिस्वा ‘‘गब्भेयेव अरहत्तप्पत्तिहेतुभूतो इन्द्रियपरिपाको अत्थी’’ति ‘‘अरहत्तप्पत्तिपि अत्थी’’ति मञ्ञति, आकाससुपिनं दिस्वा ‘‘आकासगमनादिअभिञ्ञा विय धम्माभिसमयो अरहत्तप्पत्ति च अत्थी’’ति मञ्ञतीति अधिप्पायो.

तिस्सोपिकथावण्णना निट्ठिता.

९. आसेवनपच्चयकथावण्णना

९०३-९०५. न ¶ कोचि आसेवनपच्चयं आसेवति नामाति यथा बीजं चतुमधुरभावं न गण्हाति, एवं भावनासङ्खातं आसेवनपच्चयं गण्हन्तो आसेवन्तो नाम कोचि नत्थीति अत्थो.

आसेवनपच्चयकथावण्णना निट्ठिता.

१०. खणिककथावण्णना

९०६-९०७. पथवियादिरूपेसु केसञ्चि उप्पादो केसञ्चि निरोधोति एवं पतिट्ठानं रूपसन्ततिया होति. न हि रूपानं अनन्तरादिपच्चया सन्ति, येहि अरूपसन्ततिया विय रूपसन्ततिया पवत्ति सियाति चित्ते ‘‘चित्ते महापथवी सण्ठाती’’तिआदि चोदितं.

खणिककथावण्णना निट्ठिता.

बावीसतिमवग्गवण्णना निट्ठिता.

२३. तेवीसतिमवग्गो

१. एकाधिप्पायकथावण्णना

९०८. करुणाधिप्पायेन ¶ एकाधिप्पायोति रागाधिप्पायतो अञ्ञाधिप्पायोवाति वुत्तं होति. एको अधिप्पायोति एत्थ एकतोभावे एकसद्दो दट्ठब्बो. समानत्थे हि सति रागाधिप्पायेपि एकाधिप्पायेनाति एकाधिप्पायता अत्थीति.

एकाधिप्पायकथावण्णना निट्ठिता.

३-७. इस्सरियकामकारिकाकथावण्णना

९१०-९१४. इस्सरियेन यथाधिप्पेतस्स करणं इस्सरियकामकारिका. गच्छेय्याति गब्भसेय्योक्कमनं गच्छेय्य. इस्सरियकामकारिकाहेतु ¶ नाम दुक्करकारिका मिच्छादिट्ठिया करीयतीति एत्थ दुक्करकारिका नाम इस्सरियकामकारिकाहेतु करियमाना मिच्छादिट्ठिया करीयतीति अत्थो दट्ठब्बो, इस्सरियकामकारिकाहेतु नाम विना मिच्छादिट्ठिया करियमाना नत्थीति वा.

इस्सरियकामकारिकाकथावण्णना निट्ठिता.

८. पतिरूपकथावण्णना

९१५-९१६. मेत्तादयो सन्धाय ‘‘मेत्तादयो विय न रागो रागपतिरूपको कोचि अत्थीति रागमेव गण्हाति, एवं दोसेपी’’ति वदन्ति.

पतिरूपकथावण्णना निट्ठिता.

९. अपरिनिप्फन्नकथावण्णना

९१७-९१८. न ¶ अनिच्चादिभावन्ति एत्थ अनिच्चादिको भावो एतस्साति अनिच्चादिभावन्ति रूपं वुत्तं. ‘‘न केवलञ्हि पठमसच्चमेव दुक्ख’’न्ति वदन्तेन ‘‘दुक्खञ्ञेव परिनिप्फन्न’’न्ति दुक्खसच्चं सन्धाय पुच्छा कताति दस्सितं होति. एवं सति तेन ‘‘चक्खायतनं अपरिनिप्फन्न’’न्तिआदि न वत्तब्बं सिया. न हि चक्खायतनादीनि अनुपादिन्नानि लोकुत्तरानि वा. तन्ति ‘‘दुक्खञ्ञेव परिनिप्फन्नं, न पन रूप’’न्ति एतं रूपस्स च दुक्खत्ता नो वत रे वत्तब्बेति अत्थो.

अपरिनिप्फन्नकथावण्णना निट्ठिता.

तेवीसतिमवग्गवण्णना निट्ठिता.

कथावत्थुपकरण-मूलटीका समत्ता.

नमो तस्स भगवतो अरहतो सम्मासम्बुद्धस्स

यमकपकरण-मूलटीका

गन्थारम्भवण्णना

कथावत्थुपकरणेन ¶ ¶ सङ्खेपेनेव देसितेन धम्मेसु विपरीतग्गहणं निवारेत्वा तेस्वेव धम्मेसु धम्मसङ्गहादीसु पकासितेसु धम्मपुग्गलोकासादिनिस्सयानं सन्निट्ठानसंसयानं वसेन नानप्पकारकओसल्लत्थं यमकपकरणं आरद्धं, तं समयदेसदेसकवसेनेव दस्सेत्वा संवण्णनाक्कमञ्चस्स अनुप्पत्तं ‘‘आगतो भारो अवस्सं वहितब्बो’’ति संवण्णनमस्स पटिजानन्तो आह ‘‘सङ्खेपेनेवा’’तिआदि.

तत्थ यमस्स विसयातीतोति जातिया सति मरणं होतीति जाति, पञ्च वा उपादानक्खन्धा यमस्स विसयो, तं समुदयप्पहानेन अतीतोति अत्थो. यमस्स वा रञ्ञो विसयं मरणं, तस्स आणापवत्तिट्ठानं देसं वा अतीतो. ‘‘छच्चाभिठानानि अभब्ब कातु’’न्ति (खु. पा. ६.११; सु. नि. २३४) वुत्तानं छन्नं अभब्बट्ठानानं देसकोति छट्ठानदेसको ¶ . अयमा एकेका हुत्वा आवत्ता नीला अमला च तनुरुहा अस्साति अयमावत्तनीलामलतनुरुहो.

गन्थारम्भवण्णना निट्ठिता.

१. मूलयमकं

उद्देसवारवण्णना

१. यमकानं वसेन देसितत्ताति इमिना दससु एकेकस्स यमकसमूहस्स तंसमूहस्स च सकलस्स पकरणस्स यमकानं वसेन लद्धवोहारतं दस्सेति.

कुसलाकुसलमूलसङ्खातानं ¶ द्विन्नं अत्थानं वसेन अत्थयमकन्ति एतेन ‘‘ये केचि कुसला धम्मा, सब्बे ते कुसलमूला’’ति एतस्सेव यमकभावो आपज्जतीति चे? नापज्जति ञातुं इच्छितानं दुतियपठमपुच्छासु वुत्तानं कुसलकुसलमूलविसेसानं, कुसलमूलकुसलविसेसेहि वा ञातुं इच्छितानं पठमदुतियपुच्छासु सन्निट्ठानपदसङ्गहितानं कुसलकुसलमूलानं वसेन अत्थयमकभावस्स वुत्तत्ता. ञातुं इच्छितानञ्हि विसेसानं विसेसवन्तापेक्खानं, तंविसेसवतं वा धम्मानञ्च विसेसापेक्खानं एत्थ पधानभावोति एकेकाय पुच्छाय एकेको एव अत्थो सङ्गहितो होतीति. अत्थसद्दो चेत्थ न धम्मवाचको हेतुफलादिवाचको वा, अथ खो पाळिअत्थवाचको. तेनेवाह ‘‘तेसञ्ञेव अत्थान’’न्तिआदि.

तीणिपि पदानि एकतो कत्वाति इदं नामपदस्स कुसलादीनं सङ्गाहकत्तमत्तमेव सन्धाय वुत्तं, न निरवसेससङ्गाहकत्तं. सब्बकुसलादिसङ्गण्हनत्थमेव च नामपदस्स वुत्तत्ता ‘‘कुसलत्तिकमातिकाय चतूसु पदेसू’’ति वुत्तं.

उद्देसवारवण्णना निट्ठिता.

निद्देसवारवण्णना

५२. अञ्ञमञ्ञयमके ¶ ये केचि कुसलाति अपुच्छित्वाति एत्थ यथा दुतिययमके ‘‘ये केचि कुसलमूला’’ति अपुच्छित्वा ‘‘ये केचि कुसला’’ति पुच्छा कता, एवमिधापि ‘‘ये केचि कुसला’’ति पुच्छा कातब्बा सिया पुरिमयमकविसिट्ठं अपुब्बं गहेत्वा पच्छिमयमकस्स अप्पवत्तत्ताति अधिप्पायो. ‘‘पटिलोमपुच्छानुरूपभावतो’’ति केचि. पुरिमपुच्छाय पन अत्थवसेन कताय तदनुरूपाय पच्छिमपुच्छाय भवितब्बं अनुलोमे विगतसंसयस्स पटिलोमे संसयुप्पत्तितो. तेन न च पच्छिमपुच्छानुरूपाय पुरिमपुच्छाय भवितब्बन्ति पुरिमोवेत्थ अधिप्पायो युत्तो. इमिनापि ब्यञ्जनेन तस्सेवत्थस्स सम्भवतोति इदमेवं न सक्का वत्तुं. न हि कुसलब्यञ्जनत्थो एव कुसलमूलेन एकमूलब्यञ्जनत्थो, तेनेव विस्सज्जनम्पि असमानं होति. कुसलब्यञ्जनेन हि ¶ पुच्छाय कताय ‘‘अवसेसा’’ति इमस्मिं ठाने ‘‘अवसेसा कुसला धम्मा’’ति वत्तब्बं होति, इतरथा अवसेसा कुसलमूलसहजाता धम्माति, न च तानि वचनानि समानत्थानि कुसलकुसलाब्याकतदीपनतोति. अयं पनेत्थ अधिप्पायो सिया – ‘‘ये केचि कुसला’’ति इमिनापि ब्यञ्जनेन ‘‘ये केचि कुसलमूलेन एकमूला’’ति वुत्तब्यञ्जनत्थस्सेव सम्भवतो दुतिययमके विय अपुच्छित्वा ‘‘ये केचि कुसलमूलेन एकमूला’’ति पुच्छा कता. न हि कुसलमूलेहि विय कुसलमूलेन एकमूलेहि अञ्ञे कुसला सन्ति, कुसलेहि पन अञ्ञेपि ते सन्तीति.

पटिलोमपुच्छावण्णनायं ‘‘कुसलमूलेन एकमूला’’ति हि पुच्छाय कताय ‘‘मूलानि यानि एकतो उप्पज्जन्ती’’ति हेट्ठा वुत्तनयेनेव विस्सज्जनं कातब्बं भवेय्याति वुत्तं, तम्पि तथा न सक्का वत्तुं. ‘‘ये वा पन कुसलमूलेन अञ्ञमञ्ञमूला, सब्बे ते धम्मा कुसलमूलेन एकमूला’’ति च पुच्छिते ‘‘आमन्ता’’ इच्चेव विस्सज्जनेन भवितब्बं. न हि कुसलमूलेन अञ्ञमञ्ञमूलेसु किञ्चि एकमूलं न होति, येन अनुलोमपुच्छाय विय विभागो कातब्बो भवेय्य. यत्थ तीणि कुसलमूलानि उप्पज्जन्ति, तत्थ तानि अञ्ञमञ्ञमूलानि एकमूलानि च द्विन्नं द्विन्नं एकेकेन अञ्ञमञ्ञेकमूलत्ता. यत्थ पन द्वे उप्पज्जन्ति, तत्थ तानि अञ्ञमञ्ञमूलानेव, न एकमूलानीति एतस्स गहणस्स निवारणत्थं ‘‘मूलानि यानि एकतो उप्पज्जन्ती’’तिआदिना विस्सज्जनं कातब्बन्ति चे? न, ‘‘आमन्ता’’ति इमिनाव विस्सज्जनेन तंगहणनिवारणतो अनुलोमपुच्छाविस्सज्जनेन च एकतो उप्पज्जमानानं द्विन्नं तिण्णञ्च ¶ मूलानं अञ्ञमञ्ञेकमूलभावस्स निच्छितत्ता. अञ्ञमञ्ञमूलानञ्हि समानमूलता एव एकमूलवचनेन पुच्छीयति, न अञ्ञमञ्ञसमानमूलता, अत्थि च द्विन्नं मूलानं समानमूलता. तेसु हि एकेकं इतरेन मूलेन तंमूलेहि अञ्ञेहि समानमूलन्ति.

अञ्ञमञ्ञमूलत्ते पन निच्छिते एकमूलत्तसंसयाभावतो ‘‘सब्बे ते धम्मा कुसलमूलेन एकमूला’’ति पुच्छा न कताति दट्ठब्बा. ‘‘अञ्ञमञ्ञस्स मूला एतेसन्तिपि अञ्ञमञ्ञमूला, समानत्थेन एकं मूलं एतेसन्ति एकमूला’’ति उभयम्पि वचनं मूलयुत्ततमेव वदति, तेनेव च उभयत्थापि ‘‘कुसलमूलेना’’ति वुत्तं. तत्थ मूलयोगसामञ्ञे एकमूलत्ते निच्छिते तब्बिसेसो अञ्ञमञ्ञमूलभावो न निच्छितो होतीति अनुलोमपुच्छा पवत्ता, मूलयोगविसेसे पन अञ्ञमञ्ञमूलत्ते निच्छिते न विना एकमूलत्तेन ¶ अञ्ञमञ्ञमूलत्तं अत्थीति मूलयोगसामञ्ञं एकमूलत्तं निच्छितमेव होति, तस्मा ‘‘एकमूला’’ति पुच्छं अकत्वा यथा कुसलमूलवचनं एकमूलवचनञ्च कुसलभावदीपकं न होतीति कुसलभावे संसयसब्भावा पठमदुतिययमकेसु ‘‘सब्बे ते धम्मा कुसला’’ति पटिलोमपुच्छा कता, एवं अञ्ञमञ्ञमूलवचनं कुसलभावदीपकं न होतीति कुसलभावे संसयसब्भावा कुसलाधिकारस्स च अनुवत्तमानत्ता ‘‘सब्बे ते धम्मा कुसला’’ति पटिलोमपुच्छा कताति.

५३-६१. मूलनये वुत्ते एव अत्थे कुसलमूलभावेन मूलस्स विसेसनेन समानेन मूलेन अञ्ञमञ्ञस्स च मूलेन मूलयोगदीपनेन चाति इमिना परियायन्तरेन पकासेतुं मूलमूलनयो वुत्तो. अञ्ञपदत्थसमासन्तेन क-कारेन तीसुपि यमकेसु मूलयोगमेव दीपेतुं मूलकनयो वुत्तो. मूलमूलकनयवचनपरियायो वुत्तप्पकारोव.

७४-८५. अब्बोहारिकं कत्वाति न एकमूलभावं लभमानेहि एकतो लब्भमानत्ता सहेतुकवोहाररहितं कत्वा. न वा सहेतुकदुके विय एत्थ हेतुपच्चययोगायोगवसेन अब्बोहारिकं कतं, अथ खो सहेतुकवोहारमेव लभति, न अहेतुकवोहारन्ति अब्बोहारिकं कतं. एकतो लब्भमानकवसेनाति अहेतुकचित्तुप्पादनिब्बानेहि हेतुपच्चयरहितेहि सह लब्भमानकरूपवसेनाति अत्थो.

८६-९७. यस्सं पाळियं ‘‘अहेतुकं नाममूलेन न एकमूलं, सहेतुकं नाममूलेन एकमूल’’न्ति (यम. १.मूलयमक.८७) ¶ पाठो आगतो, तत्थ ‘‘ये केचि नामा धम्मा’’ति नामानं निद्धारितत्ता ‘‘अहेतुकं सहेतुक’’न्ति च वुत्ते ‘‘नाम’’न्ति च इदं विञ्ञायमानमेवाति न वुत्तन्ति वेदितब्बं. यत्थ पन ‘‘अहेतुकं नामं, सहेतुकं नाम’’न्ति (यम. १.मूलयमक.८७) च पाठो, तत्थ सुपाकटभावत्थं ‘‘नाम’’न्ति वुत्तन्ति.

निद्देसवारवण्णना निट्ठिता.

मूलयमकवण्णना निट्ठिता.

२. खन्धयमकं

१. पण्णत्तिवारो

उद्देसवारवण्णना

२-३. खन्धयमके ¶ छसु कालभेदेसु पुग्गलओकासपुग्गलोकासवसेन खन्धानं उप्पादनिरोधा तेसं परिञ्ञा च वत्तब्बा. ते पन खन्धा ‘‘रूपक्खन्धो’’तिआदीहि पञ्चहि पदेहि वुच्चन्ति, तेसं दस अवयवपदानि. तत्थ यो रूपादिअवयवपदाभिहितो धम्मो, किं सो एव समुदायपदस्स अत्थो. यो च समुदायपदेन वुत्तो, सो एव अवयवपदस्साति एतस्मिं संसयट्ठाने रूपादिअवयवपदेहि वुत्तो एकदेसो सकलो वा समुदायपदानं अत्थो, समुदायपदेहि पन वुत्तो एकन्तेन रूपादिअवयवपदानं अत्थोति इममत्थं दस्सेतुं ‘‘रूपं रूपक्खन्धो, रूपक्खन्धो रूप’’न्तिआदिना पदसोधनवारो वुत्तो.

पुन ‘‘रूपक्खन्धो’’तिआदीनं समासपदानं उत्तरपदत्थप्पधानत्ता पधानभूतस्स खन्धपदस्स वेदनादिउपपदत्थस्स च सम्भवतो यथा ‘‘रूपक्खन्धो’’ति एतस्मिं पदे रूपावयवपदेन वुत्तस्स रूपक्खन्धभावो होति रूपसद्दस्स खन्धसद्दस्स च समानाधिकरणभावतोति, एवं तत्थ पधानभूतेन खन्धावयवपदेन वुत्तस्स वेदनाक्खन्धादिभावो होति खन्धपदेन वेदनादिपदानं समानाधिकरणत्ताति ¶ एतस्मिं संसयट्ठाने खन्धावयवपदेन वुत्तो धम्मो कोचि केनचि समुदायपदेन वुच्चति, न सब्बो सब्बेनाति इममत्थं दस्सेतुं ‘‘रूपं रूपक्खन्धो, खन्धा वेदनाक्खन्धो’’तिआदिना पदसोधनमूलचक्कवारो वुत्तो. एवञ्च दस्सेन्तेन रूपादिसद्दस्स विसेसनभावो, खन्धसद्दस्स विसेसितब्बभावो, विसेसनविसेसितब्बानं समानाधिकरणभावो च दस्सितो होति.

तेनेत्थ संसयो होति – किं खन्धतो अञ्ञम्पि रूपं अत्थि, यतो विनिवत्तं रूपं खन्धविसेसनं होति, सब्बेव खन्धा किं खन्धविसेसनभूतेन रूपेन विसेसितब्बाति, किं पन तं खन्धविसेसनभूतं रूपन्ति? भूतुपादायरूपं तस्सेव गहितत्ता. निद्देसे ‘‘खन्धा रूपक्खन्धो’’ति पदं उद्धरित्वा विस्सज्जनं कतन्ति. एवं एतस्मिं संसयट्ठाने न खन्धतो अञ्ञं रूपं अत्थि, तेनेव चेतेन रूपसद्देन वुच्चमानं सुद्धेन खन्धसद्देन वुच्चते, न ¶ च सब्बे खन्धा खन्धविसेसनभूतेन रूपेन विसेसितब्बा, तेनेव ते विभजितब्बा, एस नयो वेदनाक्खन्धादीसुपीति इममत्थं दस्सेतुं ‘‘रूपं खन्धो, खन्धा रूप’’न्तिआदिना सुद्धखन्धवारो वुत्तो.

ततो ‘‘रूपं खन्धो’’ति एतस्मिं अनुञ्ञायमाने ‘‘न केवलं अयं खन्धसद्दो रूपविसेसनोव, अथ खो वेदनादिविसेसनो चा’’ति रूपस्स खन्धभावनिच्छयानन्तरं खन्धानं रूपविसेसनयोगे च संसयो होति. तत्थ न सब्बे खन्धा वेदनादिविसेसनयुत्ता, अथ खो केचि केनचि विसेसनेन युञ्जन्तीति दस्सेतुं सुद्धखन्धमूलचक्कवारो वुत्तोति. एवं येसं उप्पादादयो वत्तब्बा, तेसं खन्धानं पण्णत्तिसोधनवसेन तन्निच्छयत्थं पण्णत्तिवारो वुत्तोति वेदितब्बो.

चत्तारि चत्तारि चक्कानि बन्धित्वाति एत्थ चक्कावयवभावतो चक्कानीति यमकानि वुत्तानि एकेकखन्धमूलानि चत्तारि चत्तारि यमकानि बन्धित्वाति. इमिना हि एत्थ अत्थेन भवितब्बन्ति. चत्तारि चत्तारि यमकानि यथा एकेकखन्धमूलकानि होन्ति, एवं बन्धित्वाति वा अत्थो दट्ठब्बो. तत्थ ‘‘रूपं रूपक्खन्धो’’ति एवमादिकं मूलपदं नाभिं कत्वा ‘‘खन्धा’’ति इदं नेमिं, ‘‘वेदनाक्खन्धो’’तिआदीनि अरे कत्वा चक्कभावो वुत्तोति वेदितब्बो, न मण्डलभावेन सम्बज्झनतो. वेदनाक्खन्धमूलकादीसुपि हि हेट्ठिमं सोधेत्वाव पाठो गतो, न मण्डलसम्बन्धेनाति. तेनेव च कारणेनाति सुद्धखन्धलाभमत्तमेव गहेत्वा खन्धविसेसने रूपादिम्हि सुद्धरूपादिमत्तताय ¶ अट्ठत्वा खन्धविसेसनभावसङ्खातं रूपादिअत्थं दस्सेतुं खन्धसद्देन सह योजेत्वा ‘‘खन्धा रूपक्खन्धो’’तिआदिना नयेन पदं उद्धरित्वा अत्थस्स विभत्तत्ताति अत्थो.

उद्देसवारवण्णना निट्ठिता.

निद्देसवारवण्णना

२६. पियरूपं सातरूपन्ति ‘‘चक्खुं लोके पियरूपं…पे… रूपा लोके…पे… चक्खुविञ्ञाणं…पे… चक्खुसम्फस्सो…पे… चक्खुसम्फस्सजा वेदना…पे… रूपसञ्ञा…पे… रूपसञ्चेतना…पे… रूपतण्हा…पे… रूपवितक्को…पे… रूपविचारो’’ति (दी. नि. २.४००; म. नि. १.१३३; विभ. २०३) एवं वुत्तं तण्हावत्थुभूतं ¶ तेभूमकं वेदितब्बं, तस्मा यं पञ्चक्खन्धसमुदायभूतं पियरूपसातरूपं, तं एकदेसेन रूपक्खन्धो होतीति आह ‘‘पियरूपं सातरूपं रूपं न रूपक्खन्धो’’ति. पियसभावताय वा रूपक्खन्धो पियरूपे पविसति, न रुप्पनसभावेनाति ‘‘पियरूपं सातरूपं रूपं न रूपक्खन्धो’’ति वुत्तं. सञ्ञायमके ताव दिट्ठिसञ्ञाति ‘‘विसेसो’’ति वचनसेसो. तत्थ दिट्ठि एव सञ्ञा दिट्ठिसञ्ञा. ‘‘सयं समादाय वतानि जन्तु, उच्चावचं गच्छति सञ्ञसत्तो’’ति (सु. नि. ७९८), ‘‘सञ्ञाविरत्तस्स न सन्ति गन्था’’ति (सु. नि. ८५३) च एवमादीसु हि दिट्ठि च ‘‘सञ्ञा’’ति वुत्ताति.

२८. ‘‘न खन्धा न वेदनाक्खन्धोति? आमन्ता’’ति एवं खन्धसद्दप्पवत्तिया अभावे वेदनाक्खन्धसद्दप्पवत्तिया च अभावोति पण्णत्तिसोधनमत्तमेव करोतीति दट्ठब्बं, न अञ्ञधम्मसब्भावो एवेत्थ पमाणं. एवञ्च कत्वा ‘‘नायतना न सोतायतनन्ति? आमन्ता’’तिआदिं वक्खतीति.

३९. रूपतो अञ्ञे वेदनादयोति एत्थ लोकुत्तरा वेदनादयो दट्ठब्बा. ते हि पियरूपा च सातरूपा च न होन्ति तण्हाय अनारम्मणत्ताति रूपतो अञ्ञे होन्तीति. रूपञ्च खन्धे च ¶ ठपेत्वा अवसेसाति इदम्पि एतेहि सद्धिं न-सद्दानं अप्पवत्तिमत्तमेव सन्धाय वुत्तन्ति दट्ठब्बं. एवञ्च कत्वा ‘‘चक्खुञ्च आयतने च ठपेत्वा अवसेसा न चेव चक्खु न च आयतना’’तिआदिं (यम. १.आयतनयमक.१५) वक्खति. न हि तत्थ अवसेसग्गहणेन गय्हमानं कञ्चि अत्थि. यदि सिया, धम्मायतनं सिया. वक्खति हि ‘‘धम्मो आयतनन्ति? आमन्ता’’ति (यम. १.आयतनयमक.१६). तण्हावत्थु च न तं सिया. यदि सिया, पियरूपसातरूपभावतो रूपं सिया ‘‘रूपं खन्धोति? आमन्ता’’ति (यम. १.खन्धयमक.४०) वचनतो खन्धो चाति. अट्ठकथायं पन अविज्जमानेपि विज्जमानं उपादाय इत्थिपुरिसादिग्गहणसब्भावं सन्धाय अवसेसाति एत्थ पञ्ञत्तिया गहणं कतन्ति वेदितब्बं.

निद्देसवारवण्णना निट्ठिता.

२. पवत्तिवारवण्णना

५०-२०५. पवत्तिवारे ¶ वेदनाक्खन्धादिमूलकानि पच्छिमेनेव सह योजेत्वा तीणि द्वे एकञ्च यमकानि वुत्तानि, न पुरिमेन. कस्मा? अमिस्सककालभेदेसु वारेसु अत्थविसेसाभावतो. पुरिमस्स हि पच्छिमेन योजितयमकमेव पच्छिमस्स पुरिमेन योजनाय पुच्छानं उप्पटिपाटिया वुच्चेय्य, अत्थे पन न कोचि विसेसोति. पुच्छाविस्सज्जनेसुपि विसेसो नत्थि, तेन तथा योजना न कताति. कालभेदा पनेत्थ छ एव वुत्ता. अतीतेन पच्चुप्पन्नो, अनागतेन पच्चुप्पन्नो, अनागतेनातीतोति एते पन तयो यथादस्सिता मिस्सककालभेदा एव तयो, न विसुं विज्जन्तीति न गहिता. तत्थ तत्थ हि पटिलोमपुच्छाहि अतीतेन पच्चुप्पन्नादयो कालभेदा दस्सिता, तेनेव च नयेन ‘‘यस्स रूपक्खन्धो उप्पज्जित्थ, तस्स वेदनाक्खन्धो उप्पज्जती’’तिआदि सक्का योजेतुं. तेनेव हि मिस्सककालभेदेसु च न पच्छिमपच्छिमस्स खन्धस्स पुरिमपुरिमेन योजनं कत्वा यमकानि वुत्तानि, अमिस्सककालभेदेसु गहितनियामेन सुखग्गहणत्थम्पि पच्छिमपच्छिमेनेव योजेत्वा वुत्तानीति.

इमिनायेव ¶ च लक्खणेनातिआदिना येन कारणेन ‘‘पुरेपञ्हो’’ति च ‘‘पच्छापञ्हो’’ति च नामं वुत्तं, तं दस्सेति. यस्स हि सरूपदस्सनेन विस्सज्जनं होति, सो परिपूरेत्वा विस्सज्जेतब्बत्थसङ्गण्हनतो परिपुण्णपञ्हो नाम. तंविस्सज्जनस्स पन पुरिमकोट्ठासेन सदिसत्थताय पुरेपञ्हो, पच्छिमकोट्ठाससदिसत्थताय ‘‘पच्छापञ्हो’’ति च नामं वुत्तं. सदिसत्थता च सन्निट्ठानसंसयपदविसेसं अविचारेत्वा एकेन पदेन सङ्गहितस्स खन्धस्स उप्पादनिरोधलाभसामञ्ञमत्तेन पुरेपञ्हे दट्ठब्बा. सन्निट्ठानपदसङ्गहितस्स वा खन्धस्स अनुञ्ञातवसेन पुरेपञ्हो वुत्तोति युत्तं.

सन्निट्ठानत्थस्सेव पटिक्खिपनं पटिक्खेपो, संसयत्थनिवारणं पटिसेधोति अयं पटिक्खेपपटिसेधानं विसेसो. पाळिपदमेव हुत्वाति पुच्छापाळिया ‘‘नुप्पज्जती’’ति यं पदं वुत्तं, न-कारविरहितं तदेव पदं हुत्वाति अत्थो. तत्थ उप्पत्तिनिरोधपटिसेधस्स पटिसेधनत्थं पाळिगतिया विस्सज्जनं उप्पत्तिनिरोधानमेव पटिसेधनत्थं पटिसेधेन विस्सज्जनं कतन्ति वेदितब्बं.

चतुन्नं ¶ पञ्हानं पञ्चन्नञ्च विस्सज्जनानं सत्तवीसतिया ठानेसु पक्खेपो तदेकदेसपक्खेपवसेन वुत्तोति वेदितब्बो. परिपुण्णपञ्हो एव हि सरूपदस्सनेन च विस्सज्जनं सत्तवीसतिया ठानेसु पक्खिपितब्बन्ति.

किं नु सक्का इतो परन्ति इतो पाळिववत्थानदस्सनादितो अञ्ञो किं नु सक्का कातुन्ति अञ्ञस्स सक्कुणेय्यस्स अभावं दस्सेति.

‘‘सुद्धावासानं तेसं तत्थ रूपक्खन्धो च नुप्पज्जित्थ वेदनाक्खन्धो च नुप्पज्जित्था’’ति एतेन सुद्धावासभूमीसु एकभूमियम्पि दुतिया उपपत्ति नत्थीति ञापितं होति. पटिसन्धितो पभुति हि याव चुति, ताव पवत्तकम्मजसन्तानं एकत्तेन गहेत्वा तस्स उप्पादनिरोधवसेन अयं देसना पवत्ता. तस्मिञ्हि अब्बोच्छिन्ने कुसलादीनञ्च पवत्ति होति, वोच्छिन्ने च अप्पवत्तीति तेनेव च उप्पादनिरोधा दस्सिता, तस्मा तस्स एकसत्तस्स पटिसन्धिउप्पादतो याव चुतिनिरोधो, ताव अतीतता नत्थि, न च ततो पुब्बे तत्थ पटिसन्धिवसेन कम्मजसन्तानं उप्पन्नपुब्बन्ति खन्धद्वयम्पि ‘‘नुप्पज्जित्था’’ति वुत्तं. कस्मा पन एताय पाळिया ¶ सकलेपि सुद्धावासे दुतिया पटिसन्धि नत्थीति न विञ्ञायतीति? उद्धंसोतपाळिसब्भावा. द्वेपि हि पाळियो संसन्देतब्बाति.

‘‘असञ्ञसत्तानं तेसं तत्थ रूपक्खन्धो उप्पज्जिस्सती’’ति एत्थ ‘‘यस्स यत्थ रूपक्खन्धो उप्पज्जिस्सती’’ति एतेन सन्निट्ठानेन विसेसिता असञ्ञसत्तापि सन्तीति ते एव गहेत्वा ‘‘असञ्ञसत्तान’’न्ति वुत्तं. तेन ये सन्निट्ठानेन वज्जिता, ते ततो पञ्चवोकारं गन्त्वा परिनिब्बायिस्सन्ति, न तेसं पुन असञ्ञे उपपत्तिप्पसङ्गो अत्थीति ते सन्धायाह – ‘‘पच्छिमभविकानं तेसं तत्थ रूपक्खन्धो च नुप्पज्जिस्सति वेदनाक्खन्धो च नुप्पज्जिस्सती’’ति (यम. १.खन्धयमक.६५). एत्थ किं पञ्चवोकारादिभावो विय पच्छिमभवोपि कोचि अत्थि, यत्थ तेसमनुप्पत्ति भविस्सतीति? नत्थि पञ्चवोकारादिभवेस्वेव यत्थ वा तत्थ वा ठितानं पच्छिमभविकानं ‘‘यस्स यत्थ रूपक्खन्धो नुप्पज्जिस्सती’’ति एतेन सन्निट्ठानेन सङ्गहितत्ता. तेसं तत्थ इतरानुप्पत्तिभावञ्च अनुजानन्तो ‘‘वेदनाक्खन्धो च नुप्पज्जिस्सती’’ति आहाति.

‘‘सुद्धावासे ¶ परिनिब्बन्तान’’न्ति इदं सप्पटिसन्धिकानं अप्पटिसन्धिकानञ्च सुद्धावासानं तंतंभूमियं खन्धपरिनिब्बानवसेन वुत्तन्ति वेदितब्बं. सब्बेसञ्हि तेसं तत्थ वेदनाक्खन्धो नुप्पज्जित्थाति. यथा पन ‘‘निरुज्झिस्सती’’ति वचनं पच्चुप्पन्नेपि उप्पादक्खणसमङ्गिम्हि पवत्तति, न एवं ‘‘उप्पज्जित्था’’ति वचनं पच्चुप्पन्ने पवत्तति, अथ खो उप्पज्जित्वा विगते अतीते एव, तस्मा ‘‘परिनिब्बन्तानं नुप्पज्जित्था’’ति वुत्तं उप्पन्नसन्तानस्स अविगतत्ता. अनन्ता लोकधातुयोति ओकासस्स अपरिच्छिन्नत्ता ओकासवसेन वुच्चमानानं उप्पादनिरोधानम्पि परिच्छेदाभावतो संकिण्णता होतीति ‘‘यत्थ वेदनाक्खन्धो उप्पज्जति, तत्थ सञ्ञाक्खन्धो निरुज्झतीति? आमन्ता’’ति वुत्तं.

पवत्तिवारवण्णना निट्ठिता.

३. परिञ्ञावारवण्णना

२०६-२०८. पुग्गलोकासवारो ¶ लब्भमानोपीति कस्मा वुत्तं, ननु ओकासवारस्स अलाभे तस्सपि अलाभेन भवितब्बन्ति? न, तत्थ पुग्गलस्सेव परिञ्ञावचनतो. पुग्गलोकासवारेपि हि ओकासे पुग्गलस्सेव परिञ्ञा वुच्चति, न ओकासस्स. ओकासवारोपि च यदि वुच्चेय्य, ‘‘यत्थ रूपक्खन्धं परिजानाती’’ति ओकासे पुग्गलस्सेव परिजाननवसेन वुच्चेय्य, तस्मा पुग्गलोकासवारस्सेव लब्भमानता वुत्ता, न ओकासवारस्साति. तेनाह – ‘‘आमन्ता…पे… सिया’’ति.

तेनेवाति पवत्ते चित्तक्खणवसेन तिण्णं अद्धानं लाभतो एव, अञ्ञथा चुतिपटिसन्धिक्खणे रूपक्खन्धपरिजाननस्स अभावा ‘‘यो रूपक्खन्धं परिजानाति, सो वेदनाक्खन्धं परिजानाती’’ति एत्थ ‘‘नत्थी’’ति विस्सज्जनेन भवितब्बं सिया, ‘‘आमन्ता’’ति च कतन्ति. सन्निट्ठानसंसयपदसङ्गहितानं परिञ्ञानं पवत्ते चित्तक्खणे एव लाभं दस्सेन्तो ‘‘लोकुत्तरमग्गक्खणस्मिञ्ही’’तिआदिमाह. न परिजानातीति पञ्हे पुथुज्जनं सन्धाय आमन्ताति वुत्तन्ति इदं पुथुज्जनस्स सब्बथा परिञ्ञाकिच्चस्स अभावतो वुत्तं. ‘‘अरहा रूपक्खन्धं न परिजानाति नो च वेदनाक्खन्धं न परिजानित्थ, अग्गमग्गसमङ्गिञ्च अरहन्तञ्च ठपेत्वा अवसेसा पुग्गला रूपक्खन्धञ्च न परिजानन्ति ¶ वेदनाक्खन्धञ्च न परिजानित्था’’ति पन वचनेन ‘‘अग्गमग्गसमङ्गिं ठपेत्वा अञ्ञो कोचि परिजानाती’’ति वत्तब्बो नत्थीति दस्सितं होति, तेन तदवसेसपुग्गले सन्धाय ‘‘आमन्ता’’ति वुत्तन्ति विञ्ञायतीति.

परिञ्ञावारवण्णना निट्ठिता.

खन्धयमकवण्णना निट्ठिता.

३. आयतनयमकं

१. पण्णत्तिवारो

उद्देसवारवण्णना

१-९. आयतनयमकादीसु ¶ च पण्णत्तिवारे पदसोधनवारादीनं वचने कारणं खन्धयमके वुत्तनयेनेव वेदितब्बं. ‘‘एकादस एकादस कत्वा तेत्तिंससतं यमकानी’’तिआदिना केसुचि पोत्थकेसु गणना लिखिता, सा तथा न होति. ‘‘द्वत्तिंससत’’न्तिआदिना अञ्ञत्थ लिखिता.

उद्देसवारवण्णना निट्ठिता.

निद्देसवारवण्णना

१०-१७. वायनट्ठेनाति पसारणट्ठेन, पाकटभावट्ठेन वा. ‘‘कायो धम्मो’’ति च वुच्चमानं सब्बं ससभावं आयतनमेवाति ‘‘कायो आयतन’’न्ति, ‘‘धम्मो आयतन’’न्ति च एत्थ ‘‘आमन्ता’’ति वुत्तं. कायवचनेन पन धम्मवचनेन च अवुच्चमानं कञ्चि ससभावं नत्थीति ‘‘न कायो नायतनं, न धम्मो नायतन’’न्ति एत्थ ‘‘आमन्ता’’इच्चेव वुत्तं.

निद्देसवारवण्णना निट्ठिता.

२. पवत्तिवारो

१. उप्पादवारवण्णना

१८-२१. पवत्तिवारे ¶ चक्खायतनमूलकानि एकादसाति पटिसन्धिचुतिवसेन उपादिन्नपवत्तस्स ¶ उप्पादनिरोधवचने एतस्मिं अलब्भमानविस्सज्जनम्पि सद्दायतनेन सद्धिं यमकं पुच्छामत्तलाभेन सङ्गण्हित्वा वदतीति दट्ठब्बं. छसट्ठि यमकानीति एत्थ चक्खुसोतघानजिव्हाकायरूपायतनमूलकेसु एकेकं सद्दायतनमूलकानि पञ्चाति एकादस यमकानि विस्सज्जनवसेन हापेतब्बानि. वक्खति हि ‘‘सद्दायतनस्स पटिसन्धिक्खणे अनुप्पत्तितो तेन सद्धिं यमकस्स विस्सज्जनमेव नत्थी’’ति (यम. अट्ठ. आयतनयमक १८-२१).

दुतियं किञ्चापि पठमेन सदिसविस्सज्जनन्तिआदि पुग्गलवारमेव सन्धाय वुत्तन्ति दट्ठब्बं. ओकासवारे पन असदिसविस्सज्जनत्ता वुत्तं, न तं सब्बत्थ सदिसविस्सज्जनन्ति ञापेतुं पुग्गलवारेपि विस्सज्जितन्ति. गन्धरसफोट्ठब्बायतनेहि सद्धिं तीणि यमकानि सदिसविस्सज्जनानीति रूपावचरसत्ते सन्धाय ‘‘सचक्खुकानं अगन्धकान’’न्तिआदिना विस्सज्जितब्बत्ता वुत्तं. तेसञ्हि विरत्तकामकम्मनिब्बत्तस्स पटिसन्धिबीजस्स एवंसभावत्ता घानादीनि गन्धादयो च न सन्तीति. घानायतनयमकेन सदिसविस्सज्जनत्ताति चक्खायतनमूलकेसु घानायतनयमकेन सद्धिं सदिसविस्सज्जनत्ताति अत्थो. ननु तत्थ ‘‘सचक्खुकानं अघानकानं उपपज्जन्तान’’न्तिआदिना विस्सज्जनं पवत्तं, इध पन घानायतनमूलकेसु ‘‘यस्स घानायतनं उप्पज्जति, तस्स जिव्हायतनं उप्पज्जतीति? आमन्ता’’ति विस्सज्जनेन भवितब्बन्ति नत्थि सदिसविस्सज्जनताति? सच्चं, यथा पन तत्थ घानायतनयमकेन जिव्हाकायायतनयमकानि सदिसविस्सज्जनानि, एवमिधापि जिव्हाकआयायतनयमकानि सदिसविस्सज्जनानि, तस्मा तत्थ तत्थेव सदिसविस्सज्जनता पाळियं अनारुळ्हताय कारणन्ति. निदस्सनभावेन पन गहितं चक्खायतनमूलकानं सदिसविस्सज्जनकानं सदिसविस्सज्जनं निदस्सनभावेनेव कारणन्ति दस्सेन्तो ‘‘घानायतनयमकेन सदिसविस्सज्जनत्ता’’ति आह. सदिसविस्सज्जनता चेत्थ घानायतनमूलकेसु येभुय्यताय दट्ठब्बा. तेसु हि जिव्हाकायायतनयमकेसु तिण्णं पुच्छानं ‘‘आमन्ता’’ति विस्सज्जनेन भवितब्बं ¶ , पच्छिमपुच्छाय ‘‘सकायकानं अघानकानं उपपज्जन्तान’’न्तिआदिनाति.

अथ वा यथा वेदनाक्खन्धादिमूलकानं सञ्ञाक्खन्धादियमकानं अमिस्सककालभेदेसु तीसु ‘‘आमन्ता’’ति पटिवचनविस्सज्जनेन यथावुत्तवचनस्स विस्सज्जनभावानुजाननं कत्तब्बन्ति अपुब्बस्स वत्तब्बस्स अभावा विस्सज्जनं न कतं, एवमिधापि घानायतनमूलकं जिव्हायतनयमकं ¶ अपुब्बस्स वत्तब्बस्स अभावा पाळिं अनारुळ्हन्ति पाकटोयमत्थो. कायायतनयमकं पन दुतियपुच्छाय वसेन विस्सज्जितब्बं सिया, सा च चक्खायतनमूलकेसु घानायतनयमकेन सदिसविस्सज्जना, तस्मा यस्सा पुच्छाय विस्सज्जना कातब्बा, तस्सा घानायतनयमकेन सदिसविस्सज्जनत्ता तंसेसानि पाळिं अनारुळ्हानीति एवमेत्थ अत्थो दट्ठब्बो. तथाति इदं पाळिअनारुळ्हतासामञ्ञेनेव वुत्तं, न कारणसामञ्ञेन. घानजिव्हाकायायतनानं पन अगब्भसेय्यकेसु पवत्तमानानं गब्भसेय्यकेसु च आयतनपारिपूरिकाले सहचारिताय अविसेसत्ता च अप्पविसेसत्ता च एकस्मिं घानायतनयमके विस्सज्जिते इतरानि द्वे, घानायतनमूलकेसु च विस्सज्जितेसु इतरद्वयमूलकानि न विस्सज्जीयन्तीति वेदितब्बानि. रूपायतनमनायतनेहि सद्धिन्ति ‘‘यस्स रूपायतनं उप्पज्जति, तस्स मनायतनं उप्पज्जती’’ति एतिस्सा पुच्छाय वुत्तेहि रूपायतनमनायतनेहि सद्धिन्ति अधिप्पायो. रूपायतनमूलकेसु हि मनायतनयमके आदिपुच्छाय गन्धरसफोट्ठब्बयमकेसु आदिपुच्छानं सदिसविस्सज्जनता यमकानं अविस्सज्जने कारणभावेन वुत्ता. दुतियपुच्छानञ्हि पटिवचनविस्सज्जनेन भवितब्बन्ति पुब्बे वुत्तनयेन विस्सज्जनं न कातब्बं, आदिपुच्छानञ्च न कातब्बन्ति.

हेट्ठिमेहि सदिसविस्सज्जनत्ताति एत्थ गन्धायतनमूलकानं रसफोट्ठब्बयमकानं रसायतनमूलकस्स च फोट्ठब्बयमकस्स पटिवचनविस्सज्जनेनेव भवितब्बन्ति पुब्बे वुत्तनयेनेव विस्सज्जनं न कातब्बन्ति येसं कातब्बं, तेसं गन्धरसफोट्ठब्बमूलकानं मनायतनधम्मायतनयमकानं चक्खादिपञ्चायतनमूलकेहि मनायतनधम्मायतनयमकेहि सदिसविस्सज्जनत्ताति अत्थो. चक्खायतनादिमूलकानि सद्दायतनयमकानि सद्दायतनमूलकानि सब्बानि अविस्सज्जनेनेव अलब्भमानविस्सज्जनतादस्सनेन ¶ विस्सज्जितानि नाम होन्तीति आह ‘‘छसट्ठि यमकानि विस्सज्जितानि नाम होन्ती’’ति.

जच्चन्धम्पि जच्चबधिरम्पीति एत्थ च जच्चबधिरग्गहणेन जच्चन्धबधिरो गहितोति वेदितब्बो. सघानकानं सचक्खुकानन्ति परिपुण्णायतनमेव ओपपातिकं सन्धाय वुत्तन्ति एत्थ एव-सद्दं वुत्तन्ति-एतस्स परतो योजेत्वा यथा ‘‘सघानकानं अचक्खुकान’’न्ति इदं अपरिपुण्णायतनं सन्धाय वुत्तं, न एवं ‘‘सघानकानं सचक्खुकान’’न्ति एतं. एतं पन परिपुण्णायतनं ¶ सन्धाय वुत्तमेवाति अत्थो दट्ठब्बो. तेन जच्चबधिरम्पि सन्धाय वुत्तता न वारिता होतीति.

२२-२५४. यत्थ चक्खायतनन्ति रूपीब्रह्मलोकं पुच्छतीति नियमतो तत्थ चक्खुसोतानं सहुप्पत्तिमत्तं पस्सन्तो वदति, ओकासवारे पन तस्मिं पुग्गलस्स अनामट्ठत्ता यत्थ कामधातुयं रूपधातुयञ्च चक्खायतनं उप्पज्जति, तत्थ सोतायतनम्पि एकन्तेन उप्पज्जतीति ‘‘आमन्ता’’ति (यम. १.आयतनयमक.२२) वुत्तं.

‘‘यस्स वा पन रूपायतनं उप्पज्जिस्सति, तस्स चक्खायतनं उप्पज्जिस्सतीति? आमन्ता’’ति कस्मा पटिञ्ञातं, ननु यो गब्भसेय्यकभावं गन्त्वा परिनिब्बायिस्सति, तस्स रूपायतनं पटिसन्धियं उप्पज्जिस्सति, न पन चक्खायतनन्ति? यस्स रूपायतनं उप्पज्जिस्सति, तस्स तदवत्थस्स पुग्गलस्स रूपायतनुप्पादतो उद्धं चक्खायतनसन्तानुप्पादस्स पवत्तियम्पि भविस्सन्तस्स पटिञ्ञातब्बत्ता. अथ कस्मा ‘‘यस्स वा पन रूपायतनं नुप्पज्जिस्सति, तस्स चक्खायतनं नुप्पज्जिस्सतीति? आमन्ता’’ति पटिञ्ञातं, ननु गब्भसेय्यकस्स पच्छिमभविकस्स उपपज्जन्तस्स एकादसमसत्ताहा ओरतो ठितस्स रूपायतनं नुप्पज्जिस्सति नो च चक्खायतनं नुप्पज्जिस्सतीति? तस्मिं भवे भविस्सन्तस्स उप्पादस्स अनागतभावेन अवचनतो. भवन्तरे हि तस्स तस्स आयतनसन्तानस्स यो आदिउप्पादो पटिसन्धियं पवत्ते च भविस्सति, सो अनागतुप्पादो तब्भावेन वुच्चति अद्धापच्चुप्पन्नानन्तोगधत्ता. न पन यो तस्मिंयेव भवे पवत्ते भविस्सति, सो अनागतुप्पादभावेन वुच्चति अद्धापच्चुप्पन्नन्तोगधत्ता. अद्धावसेन हेत्थ कम्मजपवत्तस्स पच्चुप्पन्नादिकालभेदो अधिप्पेतो. एवञ्च कत्वा इन्द्रिययमके (यम. ३.इन्द्रिययमक.३६८) ‘‘यस्स इत्थिन्द्रियं उप्पज्जति ¶ , तस्स पुरिसिन्द्रियं उप्पज्जिस्सतीति? पच्छिमभविकानं इत्थीनं उपपज्जन्तीनं, या च इत्थियो रूपावचरं अरूपावचरं उपपज्जित्वा परिनिब्बायिस्सन्ति, या च इत्थियो एतेनेव भावेन कतिचि भवे दस्सेत्वा परिनिब्बायिस्सन्ति, तासं उपपज्जन्तीनं तासं इत्थिन्द्रियं उप्पज्जति, नो च तासं पुरिसिन्द्रियं उप्पज्जिस्सती’’ति वुत्तं. न हि तासं सब्बासं तस्मिं भवे पवत्ते पुरिसिन्द्रियं न उप्पज्जिस्सति लिङ्गपरिवत्तनसब्भावा, भवन्तरे पन आदिउप्पादस्स अभावं सन्धाय ‘‘नो च ¶ तासं पुरिसिन्द्रियं उप्पज्जिस्सती’’ति वुत्तं. भवन्तरे हि आदिउप्पादस्स अनागतत्तं अधिप्पेतन्ति. एवञ्च कत्वा ‘‘कतिचि भवे दस्सेत्वा’’ति भवग्गहणं कतन्ति.

‘‘आयतनानं पटिलाभो जाती’’ति (दी. नि. २.३८८; विभ. २३५) वचनतो तंतंआयतननिब्बत्तककम्मेन गहितपटिसन्धिकस्स अवस्संभावीआयतनस्स याव आयतनपारिपूरि, ताव उप्पज्जतीति पन अत्थे गय्हमाने पुच्छाद्वयविस्सज्जनं सूपपन्नं होति. एवञ्च सति ‘‘यस्स वा पन सोतायतनं नुप्पज्जिस्सति, तस्स चक्खायतनं नुप्पज्जतीति? पच्छिमभविकानं पञ्चवोकारं उपपज्जन्तानं, ये च अरूपं उपपज्जित्वा परिनिब्बायिस्सन्ति, तेसं उपपज्जन्तानं तेसं सोतायतनं नुप्पज्जिस्सति, नो च तेसं चक्खायतनं नुप्पज्जती’’ति एवमादीसु (यम. १.आयतनयमक.९५) गब्भसेय्यकापि पच्छिमभविकादयो उपपज्जन्ता गहिता होन्ति. एवञ्च कत्वा इन्द्रिययमके (यम. ३.इन्द्रिययमक.१८६) ‘‘यस्स वा पन सोमनस्सिन्द्रियं उप्पज्जति, तस्स चक्खुन्द्रियं उप्पज्जतीति? आमन्ता’’ति इदम्पि उपपन्नं होति. सोमनस्सिन्द्रियुप्पादकस्स कम्मस्स एकन्तेन चक्खुन्द्रियुप्पादनतो गब्भेपि याव चक्खुन्द्रियुप्पत्ति, ताव उप्पज्जमानताय तस्सा अभिनन्दितब्बत्ता.

यं पन ‘‘यस्स वा पन यत्थ रूपायतनं उप्पज्जित्थ, तस्स तत्थ घानायतनं उप्पज्जतीति? कामावचरा चवन्तानं, अघानकानं कामावचरं उपपज्जन्तानं, रूपावचरानं तेसं तत्थ रूपायतनं उप्पज्जित्थ, नो च तेसं तत्थ घानायतनं उप्पज्जती’’ति एत्थ ‘‘अघानकानं कामावचरं उपपज्जन्तान’’न्ति (यम. १.आयतनयमक.७६) वुत्तं, तं ये एकादसमसत्ताहा ओरतो कालं करिस्सन्ति, तेसं घानायतनानिब्बत्तककम्मेन गहितपटिसन्धिकानं वसेन वुत्तन्ति वेदितब्बं. ‘‘यस्स यत्थ घानायतनं न निरुज्झति, तस्स ¶ तत्थ रूपायतनं न निरुज्झिस्सतीति? कामावचरं उपपज्जन्तानं, अघानकानं कामावचरा चवन्तानं, रूपावचरानं तेसं तत्थ घानायतनं न निरुज्झति, नो च तेसं तत्थ रूपायतनं न निरुज्झिस्सती’’ति हि एत्थ ‘‘अघानकानं कामावचरा चवन्तान’’न्ति (यम. १.आयतनयमक.१८१) वचनं अनुप्पन्नेयेव घानायतने गब्भसेय्यकानं चुति अत्थीति दीपेति. न हि कामावचरे गब्भसेय्यकतो अञ्ञो अघानको अत्थि धम्महदयविभङ्गे (विभ. ९७८ आदयो) ‘‘कामधातुया उपपत्तिक्खणे कस्सचि अट्ठायतनानि पातुभवन्ती’’ति अवुत्तत्ताति. अथ कस्मा ओपपातिके एव सन्धाय इध, इन्द्रिययमके च यथादस्सितासु पुच्छासु ¶ ‘‘आमन्ता’’ति वुत्तन्ति न विञ्ञायतीति? यमके सन्निट्ठानेन गहितत्थस्स एकदेसे संसयत्थसम्भवेन पटिवचनस्स अकरणतो. भिन्दितब्बे हि न पटिवचनविस्सज्जनं होति. यदि सिया, परिपुण्णविस्सज्जनमेव न सियाति. अथ कस्मा ‘‘यस्स वा पन सोमनस्सिन्द्रियं उप्पज्जति, तस्स चक्खुन्द्रियं उप्पज्जतीति? आमन्ता’’ति (यम. ३.इन्द्रिययमक.१८६) इमिना ‘‘गब्भसेय्यकानं सोमनस्सपटिसन्धि नत्थी’’ति न विञ्ञायतीति? ‘‘कामधातुया उपपत्तिक्खणे कस्स दसिन्द्रियानि पातुभवन्ति? गब्भसेय्यकानं सत्तानं सहेतुकानं ञाणसम्पयुत्तानं उपपत्तिक्खणे दसिन्द्रियानि पातुभवन्ति कायिन्द्रियं मनिन्द्रियं इत्थिन्द्रियं वा पुरिसिन्द्रियं वा जीवितिन्द्रियं सोमनस्सिन्द्रियं वा उपेक्खिन्द्रियं वा सद्धिन्द्रिय’’न्तिआदिवचनतो (विभ. १०१२).

निरोधवारे अनागतकालभेदे यथा तस्सेव चित्तस्स निरोधो अनागतभावेन तस्स उप्पत्तिक्खणे वुत्तो, एवं तस्सेव कम्मजसन्तानस्स निरोधो अनागतभावेन तस्स उप्पादे वत्तब्बोति सब्बत्थ उपपज्जन्तानं एव सो तथा वुत्तो, न उप्पन्नानं. उप्पन्नानं पन अञ्ञस्स अनागतस्स सन्तानस्स निरोधो अनागतभावेन वत्तब्बो, न तस्सेव. तस्स हि उप्पादानन्तरं निरोधो आरद्धो नाम होतीति. तस्मा अरहतं पवत्ते सोतस्स चक्खुस्स च भेदे सतिपि अनागतकालामसनवसेनेव ‘‘यस्स चक्खायतनं निरुज्झिस्सति, तस्स सोतायतनं निरुज्झिस्सतीति? आमन्ता. यस्स वा पन सोतायतनं निरुज्झिस्सति, तस्स चक्खायतनं निरुज्झिस्सतीति? आमन्ता’’ति विस्सज्जनद्वयं उपपन्नमेव होतीति. यस्मा च उपपत्तिअनन्तरं निरोधो ¶ आरद्धो नाम होति, तंनिट्ठानभावतो पन चुतिया निरोधवचनं, तस्मा पवत्ते निरुद्धेपि सन्तानेकदेसे अनिरुद्धं उपादाय अनिट्ठितनिरोधोति चुतियाव तस्स निरोधोति वुच्चति. वक्खति हि ‘‘यस्स वा पन सोमनस्सिन्द्रियं निरुज्झति, तस्स चक्खुन्द्रियं निरुज्झतीति? आमन्ता’’ति, तेनेत्थापि चुतिनिरोधे एव च अधिप्पेते यञ्च पवत्ते निरुज्झिस्सति, तञ्च निट्ठानवसेन चुतिया एव निरुज्झिस्सतीति वुत्तन्ति ‘‘आमन्ता’’ति युत्तं पटिवचनं. ‘‘सचक्खुकान’’न्तिआदीसु च ‘‘पटिलद्धचक्खुकान’’न्तिआदिना अत्थो विञ्ञायतीति.

‘‘यस्स चक्खायतनं न निरुज्झति, तस्स सोतायतनं न निरुज्झिस्सतीति? सब्बेसं उपपज्जन्तानं, अचक्खुकानं चवन्तानं तेसं चक्खायतनं न निरुज्झति, नो च तेसं सोतायतनं ¶ न निरुज्झिस्सती’’ति एत्थ आरुप्पे पच्छिमभविके ठपेत्वा सब्बे उपपज्जन्ता, अचक्खुका चवन्ता च गहिताति दट्ठब्बा. ते हि दुतियकोट्ठासेन सङ्गय्हन्तीति तदपेक्खत्ता सावसेसमिदं सब्बवचनं अचक्खुकवचनञ्चाति. ‘‘आरुप्पे पच्छिमभविकान’’न्ति एत्थ च अरूपतो पञ्चवोकारं अगच्छन्ता अनञ्ञूपपत्तिकापि ‘‘अरूपे पच्छिमभविका’’इच्चेव सङ्गय्हन्तीति वेदितब्बा. एस नयो अञ्ञेसुपि एवरूपेसूति.

पवत्तिवारवण्णना निट्ठिता.

आयतनयमकवण्णना निट्ठिता.

४. धातुयमकं

१-१९. लब्भमानानन्ति इदं पवत्तिवारे सद्दधातुसम्बन्धानं यमकानं चक्खुविञ्ञाणधातादिसम्बन्धानञ्च चुतिपटिसन्धिवसेन अलब्भमानतं सन्धाय वुत्तं.

धातुयमकवण्णना निट्ठिता.

५. सच्चयमकं

१. पण्णत्तिवारो

निद्देसवारवण्णना

१०-२६. ‘‘दुक्खं ¶ दुक्खसच्चन्ति? आमन्ता’’ति एत्थ किञ्चापि दुक्खदुक्खं सङ्खारदुक्खं विपरिणामदुक्खन्ति तीसुपि दुक्खसद्दो पवत्तति, ‘‘जातिपि दुक्खा’’तिआदिना (महाव. १४; विभ. १९०) जातिआदीसु च, सो पन दुक्खदुक्खतो अञ्ञत्थ पवत्तमानो ¶ अञ्ञनिरपेक्खो नप्पवत्तति. सुद्धञ्चेत्थ दुक्खपदं अञ्ञनिरपेक्खं गहेत्वा पण्णत्तिसोधनं करोति, तेन निप्परियायतो दुक्खसभावत्ता एव यं दुक्खदुक्खं, तस्मिं दुक्खदुक्खे एस दुक्खसद्दो, तञ्च एकन्तेन दुक्खसच्चमेवाति ‘‘आमन्ता’’ति वुत्तं. सुद्धसच्चवारे सच्चविभङ्गे वुत्तेसु समुदयेसु कोचि फलधम्मेसु नत्थि, न च फलधम्मेसु कोचि निरोधोति वुच्चमानो अत्थि, मग्गसद्दो च फलफलङ्गेसु मग्गफलत्ता पवत्तति, न मग्गकिच्चसब्भावा. परिनिट्ठितनिय्यानकिच्चानि हि तानि. निय्यानवाचको चेत्थ मग्गसद्दो, न निय्यानफलवाचको, तस्मा समुदयो सच्चं, निरोधो सच्चं, मग्गो सच्चन्ति एतेसुपि ‘‘आमन्ता’’इच्चेव विस्सज्जनं कतं.

अथ वा पदसोधनेन पदेसु सोधितेसु सच्चविसेसनभूता एव दुक्खादिसद्दा इध गहिताति विञ्ञायन्ति. तेसं पन एकन्तेन सच्चविसेसनभावं, सच्चानञ्च तब्बिसेसनयोगविसेसं दीपेतुं सुद्धसच्चवारो वुत्तोति सच्चविसेसनानं दुक्खादीनं एकन्तसच्चत्ता ‘‘दुक्खं सच्चं…पे… मग्गो सच्चन्ति? आमन्ता’’ति वुत्तन्ति. यथा चेत्थ, एवं खन्धयमकादीसुपि सुद्धखन्धादिवारेसु खन्धादिविसेसनभूतानमेव रूपादीनं गहणं युत्तं. अट्ठकथायं (यम. अट्ठ. खन्धयमक ३८) पन ‘‘यस्मा पियरूपसातरूपसङ्खातं वा रूपं होतु भूतुपादारूपं वा, सब्बं पञ्चसु खन्धेसु सङ्गहं गच्छतेव, तस्मा आमन्ताति पटिजानाती’’ति वचनेन रूपादिचक्खादिदुक्खादिग्गहणेहि सुद्धखन्धादिवारेसुपि खन्धादिविसेसनतो अञ्ञेपि गहिताति अयमत्थो दीपितो होति, तेन तदनुरूपतावसेन इतरो अत्थो वुत्तो.

निद्देसवारवण्णना निट्ठिता.

२. पवत्तिवारवण्णना

२७-१६४. अन्तमसो ¶ सुद्धावासानम्पीति इदं तेसं अरियत्ता दुक्खसच्चेन उपपज्जने आसङ्का सियाति कत्वा वुत्तं. तण्हाविप्पयुत्तचित्तस्साति इदं पञ्चवोकारवसेनेव गहेतब्बन्ति वुत्तं. यस्स दुक्खसच्चं उप्पज्जतीति एतेन पन सन्निट्ठानेन सब्बे उपपज्जन्ता पवत्तियं चतुवोकारे ¶ मग्गफलतो अञ्ञचित्तानं उप्पादक्खणसमङ्गिनो पञ्चवोकारे च सब्बचित्तानं उप्पादक्खणसमङ्गिनो सङ्गहिताति तेस्वेव सन्निट्ठानेन निच्छितेसु केचि ‘‘पवत्ते तण्हाविप्पयुत्तचित्तस्स उप्पादक्खणे’’ति एतेन दुक्खसमुदयेसु एककोट्ठासप्पवत्तिसमङ्गिनो दस्सीयन्ति सन्निट्ठानेन गहितस्सेव विभागदस्सनतो, तेन चतुवोकारानम्पि गहणं उपपन्नमेव. न हि तेसु मग्गफलुप्पादसमङ्गीसु पसङ्गता अत्थि तंसमङ्गीनं तेसं सन्निट्ठानेन अग्गहितत्ताति. इदं इध न गहेतब्बन्ति इदं चतुवोकारे फलसमापत्तिचित्तं इध सच्चानं उप्पादवचने न गहेतब्बन्ति वुत्तं होति.

एत्थ च सब्बेसं उपपज्जन्तानन्ति इदं कम्मजपवत्तस्स पठमुप्पाददस्सनेन वुत्तं, असञ्ञसत्तापेत्थ सङ्गहिता. पवत्ते तण्हाविप्पयुत्तचित्तस्स उप्पादक्खणेति इदं पन समुदयसच्चुप्पादवोमिस्सस्स दुक्खसच्चुप्पादस्स तंरहितस्स दस्सनवसेन वुत्तं. तण्हाय उप्पादक्खणेति तंसहितस्स समुदयसच्चुप्पादवोमिस्सस्स. तेसं पन असञ्ञसत्तानं पवत्तियं दुक्खसच्चस्स उप्पादो सब्बत्थ न गहितो, तथा निरोधो चाति. मग्गसच्चयमकेपि एसेव नयो. तेसं तस्मिं उपपत्तिक्खणे च तण्हाविप्पयुत्तचित्तुप्पत्तिक्खणे चाति एवमेत्थ खणवसेन ओकासो वेदितब्बोति वुत्तं, एवञ्च सति ‘‘यस्स यत्थ दुक्खसच्चं उप्पज्जति, तस्स तत्थ समुदयसच्चं उप्पज्जिस्सती’’ति (यम. १.सच्चयमक.७१) एतस्स विस्सज्जने पच्छिमकोट्ठासे ‘‘इतरेसं चतुवोकारं पञ्चवोकारं उपपज्जन्तानं, पवत्ते चित्तस्स उप्पादक्खणे तेसं तत्थ दुक्खसच्चञ्च उप्पज्जति समुदयसच्चञ्च उप्पज्जिस्सती’’ति इदं न युज्जेय्य. न हि उपपत्तिक्खणे चित्तुप्पत्तिक्खणे च समुदयसच्चं उप्पज्जिस्सतीति. तस्मा उपपत्तिक्खणतण्हाविप्पयुत्तचित्तुप्पत्तिक्खणसमङ्गीनं पुग्गलानं यस्मिं कामावचरादिओकासे सा उपपत्ति चित्तुप्पत्ति च पवत्तमाना, तत्थ तेसन्ति ओकासवसेनेवेत्थ ¶ तत्थ-सद्दस्स अत्थो युज्जति. पुग्गलोकासवारो हेस. तत्थ पुग्गलविसेसदस्सनत्थं ‘‘सब्बेसं उपपज्जन्तान’’न्तिआदि वुत्तं, ओकासो पन यत्थ ते, सो एवाति.

‘‘सब्बेसं चवन्तानं पवत्ते चित्तस्स भङ्गक्खणे आरुप्पे मग्गस्स च फलस्स च उप्पादक्खणे तेसं समुदयसच्चञ्च नुप्पज्जति दुक्खसच्चञ्च नुप्पज्जती’’ति एत्थ पन ‘‘पवत्ते चित्तस्स भङ्गक्खणे दुक्खसच्चं नुप्पज्जती’’ति चित्तपटिबद्धवुत्तित्ता चित्तजरूपमेव इधाधिप्पेतं, न कम्मजादिरूपं चित्तं अनपेक्खित्वाव उप्पज्जनतोति केचि वदन्ति. ‘‘यस्स वा ¶ पन समुदयसच्चं नुप्पज्जती’’ति एतेन पन सन्निट्ठानेन गहितो पुग्गलो न चित्तं अपेक्खित्वाव गहितो, अथ खो यो कोचि एवंपकारो, तस्मा ‘‘तस्स दुक्खसच्चं नुप्पज्जती’’ति एतेन च न चित्तापेक्खमेव दुक्खसच्चं वुत्तं, अथ खो यं किञ्चीति चित्तस्स भङ्गक्खणे यं किञ्चि दुक्खसच्चं नुप्पज्जतीति अयमत्थो विञ्ञायतीति. न हि यमके विभजितब्बे अविभत्ता नाम पुच्छा अत्थीति.

‘‘सुद्धावासानं दुतिये चित्तेवत्तमाने’’ति इदं सब्बन्तिमेन परिच्छेदेन यस्स यत्थ दुक्खसच्चं उप्पज्जित्थ, नो च समुदयसच्चं, तंदस्सनवसेन वुत्तं. तस्मिं पन दस्सिते तेन समानगतिकत्ता दुतियाकुसलचित्ततो पुरिमसब्बचित्तसमङ्गिनो तेनेव दस्सिता होन्ति. तेसम्पि हि तत्थ दुक्खसच्चं उप्पज्जित्थ नो च तेसं तत्थ समुदयसच्चं उप्पज्जित्थाति. एवञ्च कत्वा ‘‘इतरेसं चतुवोकारपञ्चवोकारान’’न्ति एत्थ यथावुत्ता सुद्धावासा अग्गहिता होन्ति. यथा ‘‘यस्स यत्थ दुक्खसच्चं उप्पज्जति, तस्स तत्थ समुदयसच्चं उप्पज्जित्था’’ति (यम. १.सच्चयमक.६१) एतस्स विस्सज्जने ‘‘सुद्धावासानं उपपत्तिचित्तस्स उप्पादक्खणे’’ति (यम. १.सच्चयमक.६१) एतेनेव उपपत्तिचित्तुप्पादक्खणसमङ्गिसमानगतिका दुतियाकुसलतो पुरिमसब्बचित्तुप्पादक्खणसमङ्गिनो दस्सिता होन्तीति न ते ‘‘इतरेस’’न्ति एतेन गय्हन्ति, एवमिधापि दट्ठब्बन्ति. ‘‘इतरेस’’न्ति वचनं पञ्चवोकारानं विसेसनत्थं, न चतुवोकारानं. न हि ते पुब्बे वुत्ता वज्जेतब्बा सन्ति पञ्चवोकारा विय यथावुत्ता सुद्धावासाति. ‘‘अभिसमेतावीनं तेसं तत्थ दुक्खसच्चञ्च उप्पज्जित्थ मग्गसच्चञ्च उप्पज्जित्था’’ति (यम. १.सच्चयमक.४१) एतेन सन्निट्ठानेन पुग्गलोकासा अञ्ञमञ्ञपरिच्छिन्ना गहिताति यस्मिं ओकासे अभिसमेताविनो, ते एवं ‘‘अभिसमेतावीन’’न्ति एतेन गहिताति दट्ठब्बा ¶ . तेन ये कामावचरे रूपावचरे अरूपावचरे वा अभिसमेताविनो रूपावचरं अरूपावचरं वा उपपन्ना, याव तत्थाभिसमयो उप्पन्नो भविस्सति, ताव ते एत्थ न गय्हन्ति, ते पन पुरिमकोट्ठासे ‘‘सुद्धावासानं दुतिये चित्ते वत्तमाने’’ति एवं दस्सितेहि सुद्धावासे अनुप्पन्नाभिसमयेहि समानगतिकाति विसुं न दस्सिता. ‘‘अनभिसमेतावीन’’न्ति गहिता ये सब्बत्थ तत्थ च अनभिसमेताविनो, तेसु सुद्धावासानं गहणकालविसेसनत्थं ‘‘सुद्धावासानं दुतिये चित्ते वत्तमाने’’ति (यम. १.सच्चयमक.४२) वुत्तन्ति.

यस्स चित्तस्स अनन्तरा अग्गमग्गं पटिलभिस्सन्तीति एतेन वोदानचित्तसमङ्गिना समानगतिका ¶ ततो पुरिमतरचित्तसमङ्गिनोपि याव सब्बन्तिमतण्हासम्पयुत्तचित्तसमङ्गी, ताव दस्सिताति वेदितब्बा. एस नयो अञ्ञेसु एवरूपेसूति.

पवत्ते चित्तस्स भङ्गक्खणेति आगतट्ठाने पटिसन्धिचित्तस्सपि भङ्गक्खणग्गहणं दट्ठब्बं, तथा ‘‘पवत्ते चित्तस्स उप्पादक्खणे’’ति आगतट्ठाने च चुतिचित्तस्सपि उप्पादक्खणस्साति. ‘‘यस्स दुक्खसच्चं न निरुज्झति, तस्स समुदयसच्चं न निरुज्झिस्सती’’ति (यम. १.सच्चयमक.११६) एतस्स विस्सज्जने द्वीसुपि कोट्ठासेसु ‘‘अरूपे मग्गस्स च फलस्स च भङ्गक्खणे’’इच्चेव (यम. १.सच्चयमक.११६) वुत्तं, न विसेसितं. कस्मा? एकस्सपि मग्गस्स च फलस्स च भङ्गक्खणसमङ्गिनो उभयकोट्ठासभजनतो. यस्स दुक्खसच्चं न निरुज्झतीति एतेन सन्निट्ठानेन गहितेसु हि अरुपे मग्गफलभङ्गक्खणसमङ्गीसु केसञ्चि तिण्णं फलानं द्विन्नञ्च मग्गानं भङ्गक्खणसमङ्गीनं निरन्तरं अनुप्पादेत्वा अन्तरन्तरा विपस्सनानिकन्तिं भवनिकन्तिं उप्पादेत्वा ये उपरिमग्गे उप्पादेस्सन्ति, तेसं समुदयसच्चं निरुज्झिस्सतीति तेसंयेव पन केसञ्चि अन्तरा तण्हं अनुप्पादेत्वा उपरिमग्गउप्पादेन्तानं मग्गफलभङ्गक्खणसमङ्गीनं समुदयसच्चं न निरुज्झिस्सतीति. सामञ्ञवचनेनपि च पुरिमकोट्ठासे वुच्चमानेन पच्छिमकोट्ठासे वक्खमाने वज्जेत्वाव गहणं होतीति दस्सितोयं नयोति.

पवत्तिवारवण्णना निट्ठिता.

३. परिञ्ञावारवण्णना

१६५-१७०. परिञ्ञावारे ¶ …पे… तिस्सोपेत्थ परिञ्ञा लब्भन्तीति एत्थेव विसेसनं खन्धयमकादीसु सब्बखन्धादीनं विय सब्बसच्चानं अपरिञ्ञेय्यतादस्सनत्थं सच्छिकरणभावनावसेन इमस्स वारस्स अप्पवत्तिदस्सनत्थञ्च. दुक्खस्स परिञ्ञत्थं समुदयस्स च पहानत्थं भगवति ब्रह्मचरियं वुस्सतीति परिञ्ञापहानं सच्चेसु दस्सेतुं दुक्खे तीरणपरिञ्ञा वुत्ता, न पहानपरिञ्ञा. समुदये च पहानपरिञ्ञा, न तीरणपरिञ्ञा. ञातपरिञ्ञा पन साधारणाति उभयत्थ वुत्ता. मग्गञाणञ्हि दुक्खसमुदयानि विभावेतीति ञातपरिञ्ञा च होति ¶ , दुक्खतीरणकिच्चानं निप्फादनतो तीरणपरिञ्ञा च, समुदयस्स अप्पवत्तिकरणतोव पहानपरिञ्ञा चाति तिस्सोपि परिञ्ञा मग्गक्खणे एव योजेतब्बाति.

परिञ्ञावारवण्णना निट्ठिता.

सच्चयमकवण्णना निट्ठिता.

६. सङ्खारयमकं

१. पण्णत्तिवारवण्णना

१. खन्धादयो विय पुब्बे अविभत्ता कायसङ्खारादयोति तेसं अविञ्ञातत्ता ‘‘अस्सासपस्सासा कायसङ्खारो’’तिआदिना (सं. नि. ४.३४८) तयो सङ्खारे विभजति. कायस्स सङ्खारोति पठमे अत्थे सामिअत्थे एव सामिवचनं, दुतिये अत्थे कत्तुअत्थे. वचिया सङ्खारोति कम्मत्थे सामिवचनं. चित्तस्स सङ्खारोति च कत्तुअत्थेयेव. सो पन करणवचनस्स अत्थोति कत्वा ‘‘करणत्थे सामिवचनं कत्वा’’ति वुत्तं.

२-७. सुद्धिकएकेकपदवसेन अत्थाभावतोति पदसोधनतंमूलकचक्कवारेहि योपि अत्थो दस्सितो द्वीहि पदेहि लब्भमानो एको अस्सासपस्सासादिको, तस्स सुद्धिकेहि कायादिपदेहि सुद्धिकेन ¶ च सङ्खारपदेन अवचनीयत्ता यथा रूपपदस्स खन्धेकदेसो खन्धपदस्स खन्धसमुदायो पदसोधने दस्सितो यथाधिप्पेतो अत्थो अत्थि, एवं एकेकपदस्स यथाधिप्पेतत्थाभावतोति अधिप्पायो. कायो कायसङ्खारोतिआदि पन वत्तब्बं सियाति यदि विसुं अदीपेत्वा समुदितो कायसङ्खारसद्दो एकत्थ दीपेति, कायसङ्खारसद्दो कायसङ्खारत्थे वत्तमानो खन्धसद्दो विय रूपसद्देन कायसद्देन विसेसितब्बोति अधिप्पायेन वदति. सुद्धसङ्खारवारो हेसाति एतेन इमस्स वारस्स पदसोधनेन दस्सितानं यथाधिप्पेतानमेव गहणतो तेसञ्च कायादिपदेहि अग्गहितत्ता ‘‘कायो कायसङ्खारो’’तिआदिवचनस्स अयुत्तिं दस्सेति. इध पन सङ्खारयमके कायादिपदानं सङ्खारपदस्स च असमानाधिकरणत्ता ‘‘कायो सङ्खारो, सङ्खारा कायो’’तिआदिम्हि ¶ वुच्चमाने अधिप्पेतत्थपरिच्चागो अनधिप्पेतत्थपरिग्गहो च कतो सियाति सुद्धसङ्खारतंमूलचक्कवारा न वुत्ता. पदसोधनवारतंमूलचक्कवारेहि पन असमानाधिकरणेहि कायादिपदेहि सङ्खारसद्दस्स विसेसनीयताय दस्सिताय संसयो होति ‘‘यो अत्थन्तरप्पवत्तिना कायसद्देन विसेसितो कायसङ्खारो, एसो अत्थन्तरप्पवत्तीहि वचीचित्तेहि विसेसितो उदाहु अञ्ञो’’ति. एवं सेसेसुपि. एत्थ तेसं अञ्ञत्थ दस्सनत्थं ‘‘कायसङ्खारो वचीसङ्खारो’’तिआदिना अनुलोमपटिलोमवसेन छ यमकानि वुत्तानीति दट्ठब्बं. अट्ठकथायं पन सुद्धसङ्खारवारट्ठाने वुत्तत्ता अयं नयो सुद्धसङ्खारवारोति वुत्तो.

पण्णत्तिवारवण्णना निट्ठिता.

२. पवत्तिवारवण्णना

१९. पवत्तिवारे सङ्खारानं पुग्गलानञ्च ओकासत्ता झानं भूमि च विसुं ओकासभावेन गहिताति पुग्गलवारे च ओकासवसेन पुग्गलग्गहणेन तेसं द्विन्नं ओकासानं वसेन गहणं होति, तस्मा ‘‘विना वितक्कविचारेहि अस्सासपस्सासानं उप्पादक्खणे’’ति दुतियततियज्झानोकासवसेन गहिता पुग्गला विसेसेत्वा दस्सिताति दट्ठब्बा ¶ . पुन पठमज्झानं समापन्नानन्ति झानोकासवसेन पुग्गलं दस्सेति, कामावचरानन्ति भूमोकासवसेन. द्विप्पकारानम्पि पन तेसं विसेसनत्थमाह ‘‘अस्सासपस्सासानं उप्पादक्खणे’’ति. तेन रूपारूपावचरेसु पठमज्झानसमापन्नके कामावचरे गब्भगतादिके च निवत्तेति. कामावचरानम्पि हि गब्भगतादीनं विना अस्सासपस्सासेहि वितक्कविचारानं उप्पत्ति अत्थि. अट्ठकथायं पन एकन्तिकत्ता रूपारूपावचरा निदस्सिता. विना अस्सासपस्सासेहि वितक्कविचारानं उप्पादक्खणेति एतेन पन दस्सिता पुग्गला पठमज्झानोकासा कामावचरादिओकासा च अस्सासपस्सासविरहविसिट्ठा दट्ठब्बा. इमिना नयेन सब्बत्थ पुग्गलविभागो वेदितब्बो.

२१. ‘‘पठमज्झाने कामावचरेति कामावचरभूमियं उप्पन्ने पठमज्झाने’’ति अट्ठकथायं वुत्तं ¶ , एतस्मिं पन अत्थे सति ‘‘चतुत्थज्झाने रूपावचरे अरूपावचरे तत्थ चित्तसङ्खारो उप्पज्जति, नो च तत्थ कायसङ्खारो उप्पज्जती’’ति एत्थापि रूपारूपावचरभूमीसु उप्पन्ने चतुत्थज्झानेति अत्थो भवेय्य, सो च अनिट्ठो भूमीनं ओकासभावस्सेव अग्गहिततापत्तितो, सब्बचतुत्थज्झानस्स ओकासवसेन अग्गहिततापत्तितो च, तस्मा झानभूमोकासानं सङ्करं अकत्वा विसुं एव ओकासभावो योजेतब्बो. पठमज्झानोकासेपि हि कायसङ्खारो च उप्पज्जति वचीसङ्खारो च उप्पज्जति कामावचरोकासे च. यदिपि न सब्बम्हि पठमज्झाने सब्बम्हि च कामावचरे द्वयं उप्पज्जति, तत्थ पन तंद्वयुप्पत्ति अत्थीति कत्वा एवं वुत्तन्ति दट्ठब्बं. विसुं ओकासत्ता च ‘‘अङ्गमत्तवसेन चेत्था’’तिआदिवचनं न वत्तब्बं होतीति. इमम्हि च यमके अवितक्कविचारमत्तं दुतियज्झानं विचारवसेन पठमज्झाने सङ्गहं गच्छतीति दट्ठब्बं. मुद्धभूतं दुतियज्झानं गहेत्वा इतरं असङ्गहितन्ति वा. यस्सयत्थके ‘‘निरोधसमापन्नान’’न्ति न लब्भति. न हि ते असञ्ञसत्ता विय ओकासे होन्तीति.

३७. सुद्धावासानं दुतिये चित्ते वत्तमानेति तेसं पठमतो अवितक्कअविचारतो दुतिये सवितक्कसविचारेपि भवनिकन्तिआवज्जने वत्तमाने उभयं नुप्पज्जित्थाति दस्सेन्तेन ततो पुरिमचित्तक्खणेसुपि नुप्पज्जित्थाति ¶ दस्सितमेव होति. यथा पन चित्तसङ्खारस्स आदिदस्सनत्थं ‘‘सुद्धावासं उपपज्जन्तान’’न्ति वुत्तं, एवं वचीसङ्खारस्स आदिदस्सनत्थं ‘‘दुतिये चित्ते वत्तमाने’’ति वुत्तन्ति दट्ठब्बं.

पवत्तिवारवण्णना निट्ठिता.

सङ्खारयमकवण्णना निट्ठिता.

७. अनुसययमकं

परिच्छेदपरिच्छिन्नुद्देसवारवण्णना

१. पच्चयपरिग्गहपरियोसाना ञातपरिञ्ञाति पच्चयदीपकेन मूलयमकेन ञातपरिञ्ञं ¶ , खन्धादीसु तीरणबाहुल्लतो खन्धादियमकेहि तीरणपरिञ्ञञ्च विभावेत्वा अनुसयपहानन्ता पहानपरिञ्ञाति पहातब्बमुद्धभूतेहि अनुसयेहि पहानपरिञ्ञं विभावेतुं अनुसययमकं आरद्धं. लब्भमानवसेनाति अनुसयभावेन लब्भमानानं वसेनाति अत्थो. तीहाकारेहि अनुसयानं गाहापनं तेसु तथा अग्गहितेसु अनुसयवारादिपाळिया दुरवबोधत्ता.

अयं पनेत्थ पुरिमेसूति एतेसु सानुसयवारादीसु पुरिमेसूति अत्थो. अत्थविसेसाभावतो ‘‘कामधातुं वा पन उपपज्जन्तस्स कामधातुया चुतस्स, रूपधातुं वा पन उपपज्जन्तस्स कामधातुया चुतस्सा’’ति एवमादीहि अवुच्चमाने कथमयं यमकदेसना सियाति? नायं यमकदेसना, पुरिमवारेहि पन यमकवसेन देसितानं अनुसयानं चुतिउपपत्तिवसेन अनुसयट्ठानपरिच्छेददस्सनं. यमकदेसनाबाहुल्लतो पन सब्बवारसमुदायस्स अनुसययमकन्ति नामं दट्ठब्बं. अथ वा पटिलोमपुच्छापि अत्थवसेन लब्भन्ति, अत्थविसेसाभावतो पन न वुत्ताति लब्भमानतावसेन एतिस्सापि देसनाय यमकदेसनता वेदितब्बा.

अनुरूपं कारणं लभित्वा उप्पज्जन्तीति एतेन कारणलाभे उप्पत्तिअरहतं दस्सेति. अप्पहीना हि अनुसया कारणलाभे सति उप्पज्जन्ति. याव च मग्गेन तेसं अनुप्पत्तिअरहता न कता होति, ताव ¶ ते एवंपकारा एवाति ‘‘अनुसया’’ति वुच्चन्ति. सो एवंपकारो उप्पज्जति-सद्देन गहितो, न खन्धयमकादीसु विय उप्पज्जमानता. तेनेव ‘‘यस्स कामरागानुसयो उप्पज्जति, तस्स पटिघानुसयो उप्पज्जतीति? आमन्ता’’तिआदिना उप्पज्जनवारो अनुसयवारेन निन्नानाकरणो विभत्तो. अनुरूपं कारणं पन लभित्वा ये उप्पज्जिंसु उप्पज्जमाना च, तेपि अप्पहीनट्ठेन थामगता अहेसुं भवन्ति च. उप्पत्तिअरहताय एव च ते उप्पज्जिंसु उप्पज्जन्ति च, न च अतीतानागतपच्चुप्पन्नतो अञ्ञे उप्पत्तिअरहा नाम अत्थि, तस्मा सब्बे अतीतानागतपच्चुप्पन्ना कामरागादयो ‘‘अनुसया’’ति वुच्चन्ति. अप्पहीनट्ठेनेव हि अनुसया, अप्पहीना च अतीतादयो एव, मग्गस्स पन तादिसानं अनुप्पत्तिअरहतापादनेन अनुसयप्पहानं होतीति. अप्पहीनाकारो नाम धम्माकारो, न धम्मो, धम्मो एव च उप्पज्जतीति इमिना अधिप्पायेनाह ‘‘अप्पहीनाकारो च उप्पज्जतीति वत्तुं न युज्जती’’ति. सत्तानुसयाति एत्थ यदि अप्पहीनट्ठेन सन्ताने अनुसेन्तीति अनुसया, अथ कस्मा सत्तेव वुत्ता, ननु सत्तानुसयतो अञ्ञेसम्पि किलेसानं अप्पहीनत्ता अनुसयभावो आपज्जतीति चे? नापज्जति, अप्पहीनमत्तस्सेव अनुसयभावस्स अवुत्तत्ता. वुत्तञ्हि ¶ ‘‘अनुसयोति पन अप्पहीनट्ठेन थामगतकिलेसो वुच्चती’’ति (यम. अट्ठ. अनुसययमक १), तस्मा अप्पहीनट्ठेन थामगतो किलेसोयेव अनुसयो नामाति युत्तं. थामगतन्ति च अञ्ञेहि असाधारणो सभावो दट्ठब्बो. तथा हि धम्मसभावबोधिना तथागतेन इमेयेव ‘‘अनुसया’’ति वुत्ता. थामगतोति अनुसयसमङ्गीति अत्थो.

अनुसयउप्पज्जनवारानं समानगतिकत्ता यथा ‘‘अनुसेती’’ति वचनं अप्पहीनाकारदीपकं, एवं ‘‘उप्पज्जती’’ति वचनं सियाति उप्पज्जनवारेन ‘‘उप्पज्जती’’ति वचनस्स अवुत्तता सक्का वत्तुन्ति चे? तं न, वचनत्थविसेसेन तंद्वयस्स वुत्तत्ता. ‘‘अनुरूपं कारणं लभित्वा उप्पज्जती’’ति हि एतस्मिं अत्थे अविसिट्ठेपि ‘‘अनुसेती’’ति वचनं सन्ताने अनुसयिततं थामगतभावं दीपेति. यदि तमेव ‘‘उप्पज्जती’’ति वचनं दीपेय्य, कस्सचि विसेसस्स अभावा उप्पज्जनवारो न वत्तब्बो सिया, ‘‘उप्पज्जती’’ति वचनं पन उप्पत्तियोग्गं दीपेति. कस्मा? उप्पज्जनवारेन उप्पत्तियोग्गस्स ¶ दस्सितत्ता, अनुसयसद्दस्स सब्बदा विज्जमानानं अपरिनिप्फन्नसयनत्थताय निवारणत्थं उप्पत्तिअरहताय थामगतभावसङ्खातस्स यथाधिप्पेतसयनत्थस्स दस्सनत्थं ‘‘अनुसेन्तीति अनुरूपं कारणं लभित्वा उप्पज्जन्ती’’ति यं उप्पत्तियोग्गवचनं वुत्तं, तं सुवुत्तमेवाति अधिप्पायो. तम्पि सुवुत्तमेव इमिना तन्तिप्पमाणेनाति सम्बन्धो. तन्तित्तयेनपि हि चित्तसम्पयुत्तता दीपिता होति.

परिच्छेदपरिच्छिन्नुद्देसवारवण्णना निट्ठिता.

उप्पत्तिट्ठानवारवण्णना

२. कामधातुया द्वीसु वेदनासूति कामावचरभूमियं सुखाय च उपेक्खाय चाति अट्ठकथायं कामधातुग्गहणं द्विन्नं वेदनानं विसेसनभावेन वुत्तं, एवं सति कामधातुया कामरागानुसयस्स अनुसयट्ठानता न वुत्ता होति. द्वीसु पन रागेसु भवरागस्स तीसु धातूसु रूपारूपधातूनं अनुसयट्ठानता वुत्ताति कामधातुया कामरागस्स अनुसयट्ठानता वत्तब्बा. धातुवेदनासब्बसक्कायपरियापन्नवसेन ¶ हि तिप्पकारं अनुसयानं अनुसयट्ठानं वुत्तन्ति. तस्मा तीसु धातूसु कामधातुया तीसु वेदनासु द्वीसु वेदनासु एत्थ कामरागानुसयो अनुसेतीति विसुं अनुसयट्ठानता धातुया वेदनानञ्च योजेतब्बा. द्वीसु वेदनासूति इदञ्च वेदनासु अनुसयमानो कामरागानुसयो द्वीस्वेव अनुसेति, न तीसूति तिण्णम्पि ठानतानिवारणत्थमेव वुत्तन्ति न सब्बासु द्वीसु अनुसयनप्पत्तो अत्थि, तेन वेदनाविसेसनत्थं न कामधातुग्गहणेन कोचि अत्थो. भवरागानुसयनट्ठानञ्हि अट्ठानञ्च अनुसयानं अपरियापन्नं सक्काये कामरागानुसयस्स अनुसयट्ठानं न होतीति पाकटमेतं. यथा च ‘‘द्वीसु वेदनासू’’ति वुत्ते पटिघानुसयानुसयट्ठानतो अञ्ञा द्वे वेदना गय्हन्ति, एवं भवरागानुसयानुसयनट्ठानतो च अञ्ञा ता गय्हन्तीति.

एत्थ च द्वीहि वेदनाहि सम्पयुत्तेसु अञ्ञेसु च पियरूपसातरूपेसु इट्ठरूपादीसु उप्पज्जमानो कामरागानुसयो सातसन्तसुखगिद्धिया पवत्ततीति द्वीसु वेदनासु तस्स अनुसयनं वुत्तं. अञ्ञत्थ उप्पज्जमानोपि ¶ हि सो इमासु द्वीसु वेदनासु अनुगतो हुत्वा सेति सुखमिच्चेव अभिलभतीति. एवं पटिघानुसयो च दुक्खवेदनासम्पयुत्तेसु अञ्ञेसु च अप्पियरूपासातरूपेसु अनिट्ठरूपादीसु उप्पज्जमानो दुक्खपटिकूलतो दुक्खमिच्चेव पटिहञ्ञतीति दुक्खवेदनमेव अनुगतो हुत्वा सेति, तेन पन तस्मिं अनुसयनं वुत्तं. एवं कामरागपटिघानं तीसु वेदनासु अनुसयवचनेन इट्ठइट्ठमज्झत्तअनिट्ठेसु आरम्मणपकतिया विपरीतसञ्ञाय च वसेन इट्ठादिभावेन गहितेसु कामरागपटिघानं उप्पत्ति दस्सिता होति. तत्थ उप्पज्जमाना हि ते तीसु वेदनासु अनुसेन्ति नाम. वेदनात्तयमुखेन वा एत्थ इट्ठादीनं आरम्मणानं गहणं वेदितब्बं, कामधातुआदिग्गहणेन कामस्सादादिवत्थुभूतानं कामभवादीनं. तत्थ कामरागानुसयो भवस्सादवसेन अनुसयमानो कामधातुया अनुसेति, कामसुखस्सादवसेन अनुसयमानो सुखोपेक्खावेदनासु. पटिघो दुक्खपटिघातवसेनेव पवत्ततीति यत्थ तत्थ पटिहञ्ञमानोपि दुक्खवेदनाय एव अनुसेति. रूपारूपभवेसु पन रूपारूपावचरधम्मेसु च कामस्सादस्स पवत्ति नत्थीति तत्थ अनुसयमानो रागो भवरागोइच्चेव वेदितब्बो. धातुत्तयवेदनात्तयग्गहणेन च सब्बसक्कायपरियापन्नानं गहितत्ता ‘‘यत्थ कामरागानुसयो नानुसेति, तत्थ दिट्ठानुसयो नानुसेती’’ति (यम. २.अनुसययमक.४६) एवमादीनं विस्सज्जनेसु धातुत्तयवेदनात्तयविनिमुत्तं दिट्ठानुसयादीनं अनुसयट्ठानं न वुत्तन्ति दट्ठब्बं. ननु च अनुत्तरेसु विमोक्खेसु पिहं उपट्ठापयतो पिहपच्चया ¶ उप्पन्नदोमनस्से पटिघानुसयो नानुसेति, तथा नेक्खम्मस्सितसोमनस्सुपेक्खासु कामरागेन नानुसयितब्बन्ति तदनुसयनट्ठानतो अञ्ञापि दिट्ठानुसयानुसयनट्ठानभूता कामावचरवेदना सन्तीति? होन्तु, न पन धातुत्तयवेदनात्तयतो अञ्ञं तदनुसयनट्ठानं अत्थि, तस्मा तं न वुत्तं. यस्मा पन ‘‘यत्थ कामरागानुसयो च पटिघानुसयो च मानानुसयो च नानुसेन्ति, तत्थ दिट्ठानुसयो विचिकिच्छानुसयो नानुसेतीति? आमन्ता’’ति (यम. २.अनुसययमक.५२) वुत्तं, तस्मा अविसेसेन दुक्खं पटिघानुसयस्स अनुसयनट्ठानन्ति समुदायवसेन गहेत्वा वुत्तन्ति वेदितब्बं. तथा लोकियसुखोपेक्खा कामरागमानानुसयनट्ठानन्ति.

अपिच ¶ सुत्ते ‘‘इधावुसो विसाख, भिक्खु इति पटिसञ्चिक्खति ‘कुदास्सु नामाहं दोमनस्सं पजहेय्य’न्ति, सो इति पटिसञ्चिक्खित्वा पटिघं तेन पजहति, न तत्थ पटिघानुसयो अनुसेती’’ति नेक्खम्मस्सितं दोमनस्सं उप्पादेत्वा तं विक्खम्भेत्वा वीरियं कत्वा अनागामिमग्गेन पटिघस्स समुग्घातनं सन्धाय वुत्तं. न हि पटिघेनेव पटिघप्पहानं, दोमनस्सेन वा दोमनस्सप्पहानं अत्थीति. पटिघुप्पत्तिरहट्ठानताय पन इध सब्बं दुक्खं ‘‘पटिघानुसयस्स अनुसयनट्ठान’’न्ति वुत्तन्ति दट्ठब्बं. निप्परियायदेसना हेसा, सा पन परियायदेसना. एवञ्च कत्वा पठमज्झानविक्खम्भितं कामरागानुसयं तथा विक्खम्भितमेव कत्वा अनागामिमग्गेन समुग्घातनं सन्धाय ‘‘विविच्चेव…पे… पठमं झानं उपसम्पज्ज विहरति, रागं तेन पजहति, न तत्थ रागानुसयो अनुसेती’’ति वुत्तं. एवं चतुत्थज्झानविक्खम्भितं अविज्जानुसयं तथा विक्खम्भितमेव कत्वा अरहत्तमग्गेन समुग्घातनं सन्धाय ‘‘सुखस्स च पहाना…पे… चतुत्थं झानं उपसम्पज्ज विहरति, अविज्जं तेन पजहति, न तत्थ अविज्जानुसयो अनुसेती’’ति (म. नि. १.४६५) वुत्तं. न हि लोकियचतुत्थज्झानुपेक्खाय अविज्जानुसयो सब्बथा नानुसेतीति सक्का वत्तुं ‘‘सब्बसक्कायपरियापन्नेसु धम्मेसु एत्थ अविज्जानुसयो अनुसेती’’ति (यम. अट्ठ. अनुसययमक २) वुत्तत्ता, तस्मा अविज्जानुसयस्सेव वत्थु चतुत्थज्झानुपेक्खा, नेक्खम्मस्सितदोमनस्सञ्च पटिघानुसयस्स वत्थु न न होतीति तत्थापि तस्स अनुसयनं वेदितब्बं. अवत्थुभावतो हि इध अनुसयनं न वुच्चति, न सुत्तन्तेसु विय वुत्तनयेन तंपटिपक्खभावतो तंसमुग्घातकमग्गस्स बलवूपनिस्सयभावतो चाति.

एत्थ ¶ च आरम्मणे अनुसयट्ठाने सति भवरागवज्जो सब्बो लोभो कामरागानुसयोति न सक्का वत्तुं. दुक्खाय हि वेदनाय रूपारूपधातूसु च अनुसयमानेन दिट्ठानुसयेन सम्पयुत्तोपि लोभो लोभो एव, न कामरागानुसयो. यदि सिया, दिट्ठानुसयस्स विय एतस्सपि ठानं वत्तब्बं सियाति. अथ पन अज्झासयवसेन तन्निन्नताय अनुसयनट्ठानं वुत्तं. यथा इट्ठानं रूपादीनं सुखाय च वेदनाय अप्पटिलद्धं वा अप्पटिलाभतो समनुपस्सतो, पटिलद्धपुब्बं वा अतीतं निरुद्धं विगतं परिणतं समनुपस्सतो उप्पज्जमानो पटिघो दुक्खे पटिहञ्ञनवसेनेव पवत्ततीति दुक्खमेव तस्स अनुसयनट्ठानं वुत्तं, नालम्बितं, एवं दुक्खादीसु अभिनिवेसनवसेन ¶ उप्पज्जमानेन दिट्ठानुसयेन सम्पयुत्तोपि लोभो सुखाभिसङ्गवसेनेव पवत्ततीति सातसन्तसुखद्वयमेवस्स अनुसयट्ठानं वुत्तन्ति भवरागवज्जस्स सब्बलोभस्स कामरागानुसयता न विरुज्झति, एकस्मिंयेव च आरम्मणे रज्जन्ति दुस्सन्ति च. तत्थ रागो सुखज्झासयो पटिघो दुक्खज्झासयोति तेसं नानानुसयट्ठानता होति.

एवञ्च कत्वा ‘‘यत्थ कामरागानुसयो अनुसेति, तत्थ पटिघानुसयो अनुसेतीति? नो’’ति (यम. २.अनुसययमक.१४) वुत्तन्ति. अट्ठकथायं पन द्वीसु वेदनासु इट्ठारम्मणे च दोमनस्सुप्पत्तिं वत्वा ‘‘दोमनस्समत्तमेव पन तं होति, न पटिघानुसयो’’ति (यम. अट्ठ. अनुसययमक २) वुत्तत्ता यथा तत्थ पटिघो पटिघानुसयो न होति, एवं दुक्खादीसु उप्पज्जमानेन दिट्ठानुसयेन सहजातो लोभो कामरागानुसयो न होतिच्चेव विञ्ञायतीति. यं पनेतं वुत्तं ‘‘दोमनस्समत्तमेव पन तं होति, न पटिघानुसयो’’ति, एत्थ न पटिघानुसयोति नत्थि पटिघानुसयोति अत्थो दट्ठब्बो. न हि दोमनस्सस्स पटिघानुसयभावासङ्का अत्थीति.

देसना संकिण्णा विय भवेय्याति भवरागस्सपि कामधातुया द्वीसु वेदनासु आरम्मणकरणवसेनेव उप्पत्ति वुत्ता विय भवेय्य, तस्मा आरम्मणविसेसेन विसेसदस्सनत्थं एवं देसना कता सहजातवेदनाविसेसाभावतोति अधिप्पायो.

उप्पत्तिट्ठानवारवण्णना निट्ठिता.

महावारो

१. अनुसयवारवण्णना

३. अनुसेति ¶ उप्पज्जतीति पच्चुप्पन्नवोहारा पवत्ताविरामवसेन वेदितब्बा. मग्गेनेव हि अनुसयानं विरामो विच्छेदो होति, न ततो पुब्बेति.

२०. नापि एकस्मिं ठाने उप्पज्जन्ति, न एकं धम्मं आरम्मणं करोन्तीति एत्थ पुरिमेन एकस्मिं चित्तुप्पादे उप्पत्ति निवारिता, पच्छिमेन एकस्मिं आरम्मणेति अयं विसेसो. पुग्गलोकासवारस्स पटिलोमे तेसं तेसं पुग्गलानं ¶ तस्स तस्स अनुसयस्स अननुसयनट्ठानं पकतिया पहानेन च वेदितब्बं, ‘‘तिण्णं पुग्गलानं दुक्खाय वेदनाय तेसं तत्थ कामरागानुसयो नानुसेति, नो च तेसं तत्थ पटिघानुसयो नानुसेति, तेसञ्ञेव पुग्गलानं रूपधातुया अरूपधातुया अपरियापन्ने तेसं तत्थ कामरागानुसयो च नानुसेति, पटिघानुसयो च नानुसेती’’ति पकतिया दुक्खादीनं कामरागादीनं अननुसयट्ठानतं सन्धाय वुत्तं, ‘‘द्विन्नं पुग्गलानं सब्बत्थ कामरागानुसयो च नानुसेति, पटिघानुसयो च नानुसेती’’ति (यम. २.अनुसययमक.५६) अनुसयप्पहानेन. एत्थ पुरिमनयेन ओकासं अवेक्खित्वा पुग्गलस्स विज्जमानानं अनुसयानं अननुसयनं वुत्तं, पच्छिमनयेन पुग्गलं अवेक्खित्वा ओकासस्स कामधातुआदिकस्स अनोकासताति.

अनुसयवारवण्णना निट्ठिता.

२. सानुसयवारवण्णना

६६-१३१. सानुसयपजहनपरिञ्ञावारेसु ‘‘सानुसयो, पजहति, परिजानाती’’ति पुग्गलो वुत्तो. पुग्गलस्स च इमस्मिं भवे सानुसयोति एवं भवविसेसेन वा, इमस्मिं कामरागानुसयेन सानुसयो इमस्मिं इतरेसु केनचीति एवं भवानुसयविसेसेन वा सानुसयतानिरनुसयतादिका ¶ नत्थि. तथा द्वीसु वेदनासु कामरागानुसयेन सानुसयो, दुक्खाय वेदनाय निरनुसयोति इदम्पि नत्थि. न हि पुग्गलस्स वेदना ओकासो, अथ खो अनुसयानन्ति. अनुसयस्स पन तस्स तस्स सो सो अनुसयनोकासो पुग्गलस्स तेन तेन अनुसयेन सानुसयताय, तस्स तस्स पजहनपरिजाननानञ्च निमित्तं होति, अननुसयनोकासो च निरनुसयतादीनं, तस्मा ओकासवारेसु भुम्मनिद्देसं अकत्वा ‘‘यतो ततो’’ति निमित्तत्थे निस्सक्कवचनं कतं, पजहनपरिञ्ञावारेसु अपादानत्थे एव वा. ततो ततो हि ओकासतो अपगमकरणं विनासनं पजहनं परिजाननञ्चाति.

तत्थ यतोति यतो अनुसयट्ठानतो अनुलोमे, पटिलोमे अननुसयट्ठानतोति अत्थो. अनुसयानानुसयस्सेव हि निमित्तापादानभावदस्सनत्थं ¶ ‘‘रूपधातुया अरूपधातुया ततो मानानुसयेन सानुसयोति (यम.२.अनुसययमक.७७), पजहती’’ति (यम. २.अनुसययमक.१४३) च ‘‘दुक्खाय वेदनाय ततो कामरागानुसयेन निरनुसयोति (यम. २.अनुसययमक.११०), न पजहती’’ति (यम. २.अनुसययमक.१७४-१७६) च एवमादीसु रूपधातुआदयो एव भुम्मनिद्देसेनेव निद्दिट्ठाति. अट्ठकथायं पन चतुत्थपञ्हविस्सज्जनेन सरूपतो अनुसयनट्ठानस्स दस्सितत्ता तदत्थे आदिपञ्हेपि ‘‘यतो’’ति अनुसयनट्ठानं वुत्तन्ति इममत्थं विभावेत्वा पुन ‘‘यतो’’ति एतस्स वचनत्थं दस्सेतुं ‘‘उप्पन्नेन कामरागानुसयेन सानुसयो’’ति वुत्तं, तं पमादलिखितं विय दिस्सति. न हि उप्पन्नेनेव अनुसयेन सानुसयो, उप्पत्तिरहट्ठानतञ्च सन्धायेव निस्सक्कवचनं न सक्का वत्तुं. न हि अपरियापन्नानं अनुसयुप्पत्तिरहट्ठानताति तं तथेव दिस्सति. एवं पनेत्थ अत्थो दट्ठब्बो – यतो उप्पन्नेनाति यतो उप्पन्नेन भवितब्बं, तेनाति उप्पत्तिरहट्ठाने निस्सक्कवचनं कतन्ति. तथा सब्बधम्मेसु उप्पज्जनकेनाति. उप्पत्तिपटिसेधे अकते अनुप्पत्तिया अनिच्छितत्ता सब्बधम्मेसु उप्पज्जनकभावं आपन्नेन अनुप्पज्जनभावं अपनेति नाम. सब्बत्थाति एतस्स पन सब्बट्ठानतोति अयमत्थो न न सम्भवति. त्थ-कारञ्हि भुम्मतो अञ्ञत्थापि सद्दविदू इच्छन्तीति.

सानुसयवारवण्णना निट्ठिता.

३. पजहनवारवण्णना

१३२-१९७. पजहनवारे ¶ येन कामरागानुसयादयो सावसेसा पहीयन्ति, सो ते पजहतीति सन्निट्ठानं कत्वा वत्तब्बो न होति अपजहनसब्भावा, तस्मा सन्निट्ठाने निरवसेसप्पजहनकोयेव पजहतीति वुत्तो, तस्मा ‘‘यो वा पन मानानुसयं पजहति, सो कामरागानुसयं पजहतीति? नो’’ति (यम. २.अनुसययमक.१३२) वुत्तं. यस्मा पन संसयपदेन पहानकरणमत्तमेव पुच्छति, न सन्निट्ठानं करोति, तस्मा यथाविज्जमानं पहानं सन्धाय ‘‘यो कामरागानुसयं पजहति, सो मानानुसयं पजहतीति? तदेकट्ठं पजहती’’ति वुत्तं. पटिलोमे पन ‘‘नप्पजहती’’ति पजहनाभावो एव सन्निट्ठानपदेन संसयपदेन च विनिच्छितो ¶ पुच्छितो च, तस्मा येसं पजहनं नत्थि निरवसेसवसेन पजहनकानं, ते ठपेत्वा अवसेसा अप्पजहनसब्भावेनेव नप्पजहन्तीति वुत्ता, न च यथाविज्जमानेन पहानेनेव वज्जिताति दट्ठब्बाति. ‘‘अनागामिमग्गसमङ्गिञ्च अट्ठमकञ्च ठपेत्वा अवसेसा पुग्गला कामरागानुसयञ्च नप्पजहन्ति विचिकिच्छानुसयञ्च नप्पजहन्ती’’ति (यम. २.अनुसययमक.१६५) एत्थ अट्ठकथायं ‘‘पुथुज्जनो पहानपरिञ्ञाय अभावेन नप्पजहति, सेसा तेसं अनुसयानं पहीनत्ता’’ति (यम. अट्ठ. अनुसययमक १३२-१९७) वुत्तं.

तत्थ किञ्चापि केसञ्चि विचिकिच्छानुसयो केसञ्चि उभयन्ति सेसानं तेसं पहीनता अत्थि, तथापि सोतापन्नादीनं विचिकिच्छानुसयस्स पहीनता उभयापजहनस्स कारणं न होतीति तेसं पहीनत्ता ‘‘नप्पजहन्ती’’ति न सक्का वत्तुं, अथ पन कामरागानुसयञ्च नप्पजहन्तीति इमं सन्निट्ठानेन तेसं पुग्गलानं सङ्गहिततादस्सनत्थं वुत्तन्ति न तत्थ कारणं वत्तब्बं, पुच्छितस्स पन संसयत्थस्स कारणं वत्तब्बं. एवं सति ‘‘सेसा तस्स अनुसयस्स पहीनत्ता’’ति वत्तब्बन्ति? न वत्तब्बं ‘‘यो कामरागानुसयं नप्पजहति, सो दिट्ठानुसयं विचिकिच्छानुसयं नप्पजहती’’ति पटिक्खिपित्वा पुच्छिते सदिसविस्सज्जनके दिट्ठिविचिकिच्छानुसये सन्धाय कारणस्स वत्तब्बत्ता, तस्मा तेसं अनुसयानं पहीनत्ताति तेसं दिट्ठिविचिकिच्छानुसयानं पहीनत्ता ते संसयत्थसङ्गहिते अनुसये नप्पजहन्तीति अत्थो दट्ठब्बो.

पजहनवारवण्णना निट्ठिता.

५. पहीनवारवण्णना

२६४-२७४. पहीनवारे ¶ फलट्ठवसेनेव देसना आरद्धाति अनुलोमं सन्धाय वुत्तं. पटिलोमे हि पुथुज्जनवसेनपि देसना गहिताति. ‘‘फलट्ठवसेनेवा’’ति च साधारणवचनेन मग्गसमङ्गीनं अग्गहिततं दीपेति. अनुसयच्चन्तपटिपक्खेकचित्तक्खणिकानञ्हि मग्गसमङ्गीनं न कोचि अनुसयो उप्पत्तिरहो, नापि अनुप्पत्तिरहतं आपादितो, तस्मा ते न अनुसयसानुसयपहीनउप्पज्जनवारेसु गहिताति.

२७५-२९६. ओकासवारे ¶ सो सो अनुसयो अत्तनो अत्तनो ओकासे एव अनुप्पत्तिधम्मतं आपादितो पहीनो, अनापादितो च अप्पहीनोति पहीनाप्पहीनवचनानि तदोकासमेव दीपेन्ति, तस्मा अनोकासे तदुभयावत्तब्बता वुत्ताति. साधारणट्ठाने तेन सद्धिं पहीनो नाम होतीति तेन सद्धिं समानोकासे पहीनो नामाति अत्थो, न समानकाले पहीनोति.

पहीनवारवण्णना निट्ठिता.

७. धातुवारवण्णना

३३२-३४०. धातुवारे सन्तानं अनुगता हुत्वा सयन्तीति यस्मिं सन्ताने अप्पहीना, तंसन्ताने अप्पहीनभावेन अनुगन्त्वा उप्पत्तिअरहभावेन सयन्तीति अत्थो. उप्पत्तिरहता एव हि अनुरूपं कारणं लभित्वा उप्पज्जन्तीति इधापि युत्ताति. एत्थ च न कामधातुआदीनि छ पटिनिसेधवचनानि धातुविसेसनिद्धारणानि न होन्तीति ‘‘न कामधातुया चुतस्स न कामधातुं उपपज्जन्तस्सा’’तिआदिम्हि वुच्चमाने इमं नाम उपपज्जन्तस्साति न विञ्ञायेय्य, तस्मा तंमूलिकासु योजनासु ‘‘न कामधातुया चुतस्स कामधातुं रूपधातुं अरूपधातुं उपपज्जन्तस्सा’’ति पठमं योजेत्वा पुन अनुक्कमेन ‘‘न कामधातुं उपपज्जन्तस्सा’’तिआदिका योजना कता. एवञ्हि न कामधातुआदिपदेहि यथावुत्तधातुयोयेव गहिता, न कञ्चीति विञ्ञायति. यथा अनुसयवारे ‘‘अनुसेन्तीति पदस्स उप्पज्जन्तीति अत्थो गहितो’’ति वुत्तं, तत्थापि उप्पज्जमानमेव सन्धाय उप्पज्जन्तीति गहेतुं न सक्का ‘‘यस्स ¶ कामरागानुसयो अनुसेति, तस्स पटिघानुसयो अनुसेतीति? आमन्ता’’तिआदिवचनतो. अथापि अप्पहीनतं सन्धाय उप्पज्जन्तीति अत्थो तत्थ गहितो, इधापि सो न न युज्जतीति. भङ्गाति भञ्जितब्बा, द्विधा कातब्बाति अत्थो. ननु न कोचि अनुसयो यत्थ उप्पज्जन्तस्स अनुसेति नानुसेति चाति द्विधा कातब्बा, तत्थेव कस्मा ‘‘कति अनुसया भङ्गा? अनुसया भङ्गा नत्थी’’ति पुच्छाविस्सज्जनानि कतानि. न हि पकारन्तराभावे संसयो युत्तोति ¶ ? न न युत्तो, ‘‘अनुसया भङ्गा नत्थी’’ति अवुत्ते भङ्गाभावस्स अविञ्ञातत्ताति.

धातुवारवण्णना निट्ठिता.

अनुसययमकवण्णना निट्ठिता.

८. चित्तयमकं

उद्देसवारवण्णना

१-६२. चित्तयमकवण्णनायं आदितोव तयो सुद्धिकमहावारा होन्तीति इमे तयो महावारा सरागादिकुसलादीहि मिस्सका सुद्धिका च, तेसु आदितो सुद्धिका होन्तीति अत्थो. मिस्सकेसु च एकेकस्मिं सरागादिमिस्सकचित्ते तयो तयो महावारा, ते तत्थ तत्थ पन वुत्ते सम्पिण्डेत्वा ‘‘सोळस पुग्गलवारा’’तिआदि वुत्तं, न निरन्तरं वुत्तेति. ‘‘यस्स चित्तं उप्पज्जति न निरुज्झति, तस्स चित्तं निरुज्झिस्सति नुप्पज्जिस्सती’’तिआदिना उप्पादनिरोधानं पच्चुप्पन्नानागतकालानञ्च संसग्गवसेन एकेकाय पुच्छाय पवत्तत्ता ‘‘उप्पादनिरोधकालसम्भेदवारो’’ति वुत्तो. एवं सेसानम्पि वारानं तंतंनामता पाळिअनुसारेन वेदितब्बा.

उद्देसवारवण्णना निट्ठिता.

निद्देसवारवण्णना

६३. तथारूपस्सेव ¶ खीणासवस्स चित्तं सन्धायाति इदं उप्पादक्खणसमङ्गिपच्छिमचित्तसमङ्गिम्हि पुग्गले अधिप्पेते तञ्च चित्तं अधिप्पेतमेव होतीति कत्वा वुत्तन्ति दट्ठब्बं. अरहतो पच्छिमचित्तम्पीति नुप्पज्जति निरुज्झतीति एवंपकारं भङ्गक्खणसमङ्गिमेव सन्धाय वुत्तं.

६५-८२. उप्पादवारस्स दुतियपुच्छाविस्सज्जने चित्तस्स भङ्गक्खणे, निरोधसमापन्नानं, असञ्ञसत्तानं तेसं चित्तं उप्पज्जित्थ, नो च तेसं चित्तं उप्पज्जतीति ¶ एत्थ ‘‘चित्तस्स भङ्गक्खणे तेसं चित्तं उप्पज्जित्था’’ति एतस्स ‘‘सब्बेसं चित्तं खणपच्चुप्पन्नमेव हुत्वा उप्पादक्खणं अतीतत्ता उप्पज्जित्थ नामा’’ति अत्थो वुत्तो. चित्तस्स उप्पादक्खणे तेसं चित्तं उप्पज्जित्थ चेव उप्पज्जति चाति एतस्सपि उप्पादं पत्तत्ता उप्पज्जित्थ, अनतीतत्ता उप्पज्जति नामाति द्वयमेतं एवं न सक्का वत्तुं. न हि खणपच्चुप्पन्ने ‘‘उप्पज्जित्था’’ति अतीतवोहारो अत्थि. यदि सिया, यं वा पन चित्तं उप्पज्जित्थ, तं चित्तं उप्पज्जतीति एत्थ ‘‘नो’’ति अवत्वा विभजितब्बं सिया. तथा ‘‘यं चित्तं उप्पज्जति, तं चित्तं उप्पज्जित्था’’ति एत्थ च ‘‘नो’’ति अवत्वा ‘‘आमन्ता’’ति वत्तब्बं सिया. ‘‘चित्तस्स भङ्गक्खणे’’ति पन भिज्जमानचित्तसमङ्गी पुग्गलो वुत्तो, तस्स अतीतं चित्तं उप्पज्जित्थ, न च किञ्चि चित्तं उप्पज्जति. चित्तस्स उप्पादक्खणेति च उप्पज्जमानचित्तसमङ्गी पुग्गलो वुत्तो, तस्सपि अतीतं चित्तं उप्पज्जित्थ, तं पन चित्तं उप्पज्जतीति एवमेत्थ अत्थो दट्ठब्बो. चित्तन्ति हि सामञ्ञवचनं एकस्मिं अनेकस्मिञ्च यथागहितविसेसे तिट्ठतीति. ‘‘यस्स वा पन चित्तं उप्पज्जिस्सति, तस्स चित्तं उप्पज्जतीति? चित्तस्स भङ्गक्खणे’’ति एत्थ यस्स वा पन चित्तं उप्पज्जिस्सतीति एतेन सन्निट्ठानेन गहितपुग्गलस्सेव चित्तस्स भङ्गक्खणेति एवं सब्बत्थ सन्निट्ठानवसेन नियमो वेदितब्बो. उप्पन्नुप्पज्जमानवारो निरुद्धनिरुज्झमानवारो च पुग्गलवारादीसु तीसुपि निन्नानाकरणा उद्दिट्ठा निद्दिट्ठा च. तत्थ पुग्गलवारे अविसेसेन यं कञ्चि तादिसं पुग्गलं सन्धाय ‘‘उप्पन्नं उप्पज्जमान’’न्तिआदि वुत्तं, धम्मवारे चित्तमेव, पुग्गलधम्मवारे पुग्गलं चित्तञ्चाति अयमेत्थ विसेसो दट्ठब्बो.

८३. अतिक्कन्तकालवारे इमस्स पुग्गलवारत्ता पुग्गलो पुच्छितोति पुग्गलस्सेव विस्सज्जनेन ¶ भवितब्बं. यथा यस्स चित्तं उप्पज्जित्थाति एतेन न कोचि पुग्गलो न गहितो, एवं यस्स चित्तं उप्पज्जमानं खणं खणं वीतिक्कन्तं अतिक्कन्तकालन्ति एतेन सन्निट्ठानेन न कोचि न गहितो. न हि सो पुग्गलो अत्थि, यस्स चित्तं उप्पादक्खणं अतीतं नत्थि, ते च पन निरुज्झमानक्खणातीतचित्ता न न होन्तीति पठमो पञ्हो ‘‘आमन्ता’’ति विस्सज्जितब्बो सिया, तथा दुतियततिया. चतुत्थो पन ‘‘पच्छिमचित्तस्स भङ्गक्खणे तेसं चित्तं भङ्गक्खणं अवीतिक्कन्तं, नो च तेसं चित्तं उप्पादक्खणं अवीतिक्कन्तं, इतरेसं चित्तं भङ्गक्खणञ्च अवीतिक्कन्तं उप्पादक्खणञ्च अवीतिक्कन्त’’न्ति विस्सज्जितब्बो भवेय्य, तथा अविस्सज्जेत्वा कस्मा सब्बत्थ चित्तमेव विभत्तन्ति ¶ ? चित्तवसेन पुग्गलववत्थानतो. खणस्स हि वीतिक्कन्तताय अतिक्कन्तकालतावचनेन वत्तमानस्स च चित्तस्स वसेन पुग्गलो उप्पादक्खणातीतचित्तो वुत्तो अतीतस्स च, तत्थ पुरिमस्स चित्तं न भङ्गक्खणं वीतिक्कन्तं पच्छिमस्स वीतिक्कन्तन्ति एवमादिको पुग्गलविभागो यस्स चित्तस्स वसेन पुग्गलववत्थानं होति, तस्स चित्तस्स तंतंखणवीतिक्कमावीतिक्कमदस्सनवसेन दस्सितो होतीति सब्बविस्सज्जनेसु चित्तमेव विभत्तं. अथ वा नयिध धम्ममत्तविसिट्ठो पुग्गलो पुच्छितो, अथ खो पुग्गलविसिट्ठं चित्तं, तस्मा चित्तमेव विस्सज्जितन्ति वेदितब्बं. यदिपि पुग्गलप्पधाना पुच्छा, अथापि चित्तप्पधाना, उभयथापि दुतियपुच्छाय ‘‘आमन्ता’’ति वत्तब्बं सिया, तथा पन अवत्वा निरोधक्खणवीतिक्कमेन अतिक्कन्तकालता न उप्पादक्खणवीतिक्कमेन अतिक्कन्तकालता विय वत्तमानस्स अत्थीति दस्सनत्थं ‘‘अतीतं चित्त’’न्ति वुत्तन्ति दट्ठब्बं. यस्स चित्तं न उप्पज्जमानन्ति एत्थ उप्पज्जमानं खणं खणं वीतिक्कन्तं अतिक्कन्तकालं यस्स चित्तं न होतीति अत्थो. एस नयो ‘‘न निरुज्झमान’’न्ति एत्थापि.

११४-११६. मिस्सकवारेसु यस्स सरागं चित्तं उप्पज्जति न निरुज्झति, तस्स चित्तं निरुज्झिस्सति नुप्पज्जिस्सतीति पुच्छा, नोति विस्सज्जनञ्च अट्ठकथायं दस्सितं. पाळियं पन ‘‘यस्स सरागं चित्तं उप्पज्जति न निरुज्झति, तस्स सरागं चित्तं निरुज्झिस्सति नुप्पज्जिस्सती’’ति मातिकाठपनायं वुत्तत्ता विस्सज्जनेपि तथेव सन्निट्ठानसंसयत्थेसु सरागादिमिस्सकचित्तवसेनेव पुच्छा उद्धरित्वा ‘‘सरागपच्छिमचित्तस्स उप्पादक्खणे तेसं सरागं चित्तं उप्पज्जति न निरुज्झति निरुज्झिस्सति नुप्पज्जिस्सति, इतरेसं सरागचित्तस्स उप्पादक्खणे तेसं सरागं चित्तं उप्पज्जति न निरुज्झति निरुज्झिस्सति चेव उप्पज्जिस्सति चा’’ति एवमादिना ¶ नयेन येभुय्येन सुद्धिकवारसदिसमेव विस्सज्जनं कातब्बन्ति कत्वा संखित्तन्ति विञ्ञायति.

निद्देसवारवण्णना निट्ठिता.

चित्तयमकवण्णना निट्ठिता.

९. धम्मयमकं

१. पण्णत्तिवारो

उद्देसवारवण्णना

१-१६. धम्मयमकवण्णनायं ¶ कुसलादिधम्मानं मातिकं ठपेत्वाति यथा मूलयमके कुसलादिधम्मा देसिता, यथा च खन्धयमकादीसु ‘‘पञ्चक्खन्धा’’तिआदिना अञ्ञथा सङ्गहेत्वा देसिता, तथा अदेसेत्वा या कुसलादीनं धम्मानं ‘‘कुसलाकुसला धम्मा’’तिआदिका मातिका, तं इध आदिम्हि ठपेत्वा देसितस्साति अत्थो.

उद्देसवारवण्णना निट्ठिता.

२. पवत्तिवारवण्णना

३३-३४. ‘‘यस्स कुसला धम्मा उप्पज्जन्ति, तस्स अब्याकता धम्मा उप्पज्जन्ती’’ति एतस्स विस्सज्जने ‘‘अब्याकता चाति चित्तसमुट्ठानरूपवसेन वुत्त’’न्ति अट्ठकथायं वुत्तं, इमस्मिं पन पञ्हे कम्मसमुट्ठानादिरूपञ्च लब्भति, तं पन पटिलोमवारस्स विस्सज्जने सब्बेसं चवन्तानं, पवत्ते चित्तस्स भङ्गक्खणे, आरुप्पे अकुसलानं उप्पादक्खणे तेसं कुसला च धम्मा न उप्पज्जन्ति अब्याकता च धम्मा न उप्पज्जन्तीति एत्थ पवत्ते चित्तस्स भङ्गक्खणे उप्पज्जमानम्पि ¶ कम्मसमुट्ठानादिरूपं अग्गहेत्वा ‘‘अब्याकता च धम्मा न उप्पज्जन्ती’’ति वुत्तत्ता चित्तसमुट्ठानरूपमेव इधाधिप्पेतं. कम्मसमुट्ठानादिरूपे न विधानं, नापि पटिसेधोति केचि वदन्ति, तथा चित्तसमुट्ठानरूपमेव सन्धाय ‘‘यस्स कुसला धम्मा उप्पज्जन्ति, तस्स अब्याकता धम्मा निरुज्झन्तीति? नो’’ति (यम. ३.धम्मयमक.१६३) वुत्तन्ति. तं पनेतं एवं न सक्का वत्तुं चित्तस्स भङ्गक्खणे कम्मसमुट्ठानरूपादीनम्पि उप्पादस्स उप्पादक्खणे च निरोधस्स एवमादीहि एव पाळीहि पटिसेधसिद्धितो.

ये च वदन्ति ‘‘यथा पटिसम्भिदामग्गे निरोधकथायं ‘सोतापत्तिमग्गक्खणे जाता धम्मा ठपेत्वा चित्तसमुट्ठानरूपं सब्बेपि विरागा चेव होन्ति विरागारम्मणा विरागगोचरा विरागसमुदागता विरागपतिट्ठा’तिआदीसु ‘ठपेत्वा रूप’न्ति अवत्वा चित्तपटिबद्धत्ता चित्तजरूपानं ¶ ‘ठपेत्वा चित्तसमुट्ठानरूप’न्ति वुत्तं, एवमिधापि चित्तपटिबद्धत्ता चित्तजरूपमेव कथित’’न्ति, तञ्च तथा न होति. येसञ्हि सोतापत्तिमग्गो सहजातपच्चयो होति, येसु च विरागादिआसङ्का होति, ते सोतापत्तिमग्गसहजाता धम्मा सोतापत्तिमग्गक्खणे जाता धम्माति तत्थ वुत्ता. सोतापत्तिमग्गक्खणे जाताति हि वचनं मग्गे जाततं दीपेति, न च कम्मजादीनि अमग्गे जायमानानि मग्गक्खणे जातवोहारं अरहन्ति तेसं तस्स सोतापत्तिमग्गक्खणे सहजातपच्चयत्ताभावतो, तस्मा मग्गक्खणे तंसहजातधम्मेसु ठपेतब्बं ठपेतुं ‘‘ठपेत्वा चित्तसमुट्ठानरूप’’न्ति वुत्तं, इध पन कुसलादिधम्मा यस्स यत्थ उप्पज्जन्ति निरुज्झन्ति च, तस्स पुग्गलस्स तस्मिञ्च ओकासे अब्याकतधम्मानं उप्पादनिरोधानं कुसलादिपटिबद्धता अप्पटिबद्धता च आमट्ठा, न च कम्मजादिरूपं अब्याकतं न होति, तस्मा सन्निट्ठानेन गहितस्स पुग्गलस्स ओकासे वा उप्पादनिरोधेसु विज्जमानेसु अब्याकतानं ते वेदितब्बा, अविज्जमानेसु च पटिसेधेतब्बा, न च अचित्तपटिबद्धा अब्याकताति एत्थ न गहिताति सक्का वत्तुं निरोधसमापन्नानं असञ्ञसत्तानञ्च उप्पादनिरोधवचनतोति.

चतुत्थपञ्हे पवत्ते अकुसलाब्याकतचित्तस्स उप्पादक्खणेति इदं ‘‘यस्स वा पन अब्याकता धम्मा उप्पज्जन्ती’’ति एतेन सन्निट्ठानेन गहितेसु पञ्चवोकारे अकुसलाब्याकतचित्तानं चतुवोकारे च अब्याकतचित्तस्सेव उप्पादक्खणसमङ्गिनो सन्धाय वुत्तं. एवं सब्बत्थ सन्निट्ठानवसेन विसेसो वेदितब्बो.

७९. ‘‘एकावज्जनेन १६६ उप्पन्नस्सा’’ति वुत्तं, नानावज्जनेनपि पन ततो पुरिमतरजवनवीथीसु उप्पन्नस्स ‘‘उप्पादक्खणे तेसं अकुसला धम्मा नुप्पज्जिस्सन्ति, नो च तेसं कुसला धम्मा नुप्पज्जन्ती’’ति इदं लक्खणं लब्भतेव, तस्मा एतेन लक्खणेन समानलक्खणं सब्बं यस्स चित्तस्स अनन्तरा अग्गमग्गं पटिलभिस्सन्ति, तस्स चित्तस्स उप्पादक्खणेति एतेनेव कुसलानागतभावपरियोसानेन ताय एव समानलक्खणताय दीपितं होतीति दट्ठब्बं. एस नयो अकुसलातीतभावस्स अब्याकतातीतभावस्स च आदिम्हि ‘‘दुतिये अकुसले’’ति, ‘‘दुतिये चित्ते’’ति च वुत्तट्ठाने. यथा हि भावनावारे भावनापहानानं परियोसानेन ¶ अग्गमग्गेन ततो पुरिमतरानिपि भावनापहानानि दस्सितानि होन्ति, एवमिधापि तं तं तेन तेन आदिना अन्तेन च दस्सितन्ति.

१००. पञ्चवोकारे अकुसलानं भङ्गक्खणे तेसं अकुसला च धम्मा निरुज्झन्ति अब्याकता च धम्मा निरुज्झन्तीति वचनेन पटिसन्धिचित्ततो सोळसमं, ततो परम्पि वा भवनिकन्तिचित्तं होति, न ततो ओरन्ति विञ्ञायतीति.

पवत्तिवारवण्णना निट्ठिता.

धम्मयमकवण्णना निट्ठिता.

१०. इन्द्रिययमकं

१. पण्णत्तिवारो

उद्देसवारवण्णना

१. इन्द्रिययमके विभङ्गे विय जीवितिन्द्रियं मनिन्द्रियानन्तरं अनिद्दिसित्वा पुरिसिन्द्रियानन्तरं उद्दिट्ठं ‘‘तीणिमानि, भिक्खवे, इन्द्रियानि. कतमानि तीणि? इत्थिन्द्रियं पुरिसिन्द्रियं जीवितिन्द्रिय’’न्ति (सं. नि. ५.४९२) सुत्ते देसितक्कमेन. पवत्तिवारे हि एकन्तं पवत्तियं एव उप्पज्जमानानं सुखिन्द्रियादीनं कम्मजानं अकम्मजानञ्च अनुपालकं जीवितिन्द्रियं ¶ चुतिपटिसन्धीसु च पवत्तमानानं कम्मजानन्ति तंमूलकानि यमकानि चुतिपटिसन्धिपवत्तिवसेन वत्तब्बानीति वेदितब्बानि. चक्खुन्द्रियादीसु पन पुरिसिन्द्रियावसानेसु यं मूलकमेव न होति मनिन्द्रियं, तं ठपेत्वा अवसेसमूलकानि चुतिउपपत्तिवसेनेव वत्तब्बानि आयतनयमके विय, तस्मा जीवितिन्द्रियं तेसं मज्झे अनुद्दिसित्वा अन्ते उद्दिट्ठन्ति.

उद्देसवारवण्णना निट्ठिता.

निद्देसवारवण्णना

९४. इत्थी इत्थिन्द्रियन्ति एत्थ यस्मा इत्थीति कोचि सभावो नत्थि, न च रूपादिधम्मे उपादाय इत्थिग्गहणं न होति, तस्मा इत्थिग्गहणस्स अविज्जमानम्पि ¶ विज्जमानमिव गहेत्वा पवत्तितो तथागहितस्स वसेन ‘‘नत्थी’’ति अवत्वा ‘‘नो’’ति वुत्तं. सुखस्स च भेदं कत्वा ‘‘सुखं सोमनस्स’’न्ति, दुक्खस्स च ‘‘दुक्खं दोमनस्स’’न्ति वचनेनेव सोमनस्सतो अञ्ञा सुखा वेदना सुखं, दोमनस्सतो च अञ्ञा दुक्खा वेदना दुक्खन्ति अयं विसेसो गहितोयेवाति ‘‘सुखं सुखिन्द्रियं दुक्खं दुक्खिन्द्रिय’’न्ति एत्थ ‘‘आमन्ता’’ति वुत्तं.

१४०. सुद्धिन्द्रियवारे चक्खु इन्द्रियन्ति एत्थ दिब्बचक्खुपञ्ञाचक्खूनि पञ्ञिन्द्रियानि होन्तीति ‘‘आमन्ता’’ति वुत्तं. अवसेसं सोतन्ति तण्हासोतमेवाह.

निद्देसवारवण्णना निट्ठिता.

२.पवत्तिवारवण्णना

१८६. पवत्तिवारे ‘‘छयिमानि, भिक्खवे, इन्द्रियानि. कतमानि छ? चक्खुन्द्रियं…पे… कायिन्द्रियं मनिन्द्रिय’’न्ति (सं. नि. ५.४९५) सुत्ते वुत्तनयेन इध उद्दिट्ठं ¶ मनिन्द्रियं चुतिपटिसन्धिपवत्तीसु पवत्तमानेहि कम्मजाकम्मजेहि सब्बेहिपि योगं गच्छति, न च जीवितिन्द्रियं विय अञ्ञधम्मनिस्सयेन गहेतब्बं, पुब्बङ्गमत्ताव पधानं, तस्मा कूटं विय गोपानसीनं सब्बिन्द्रियानं समोसरणट्ठानं अन्ते ठपेत्वा योजितं. जीवितिन्द्रियादिमूलकेसु पवत्तिञ्च गहेत्वा गतेसु ‘‘यस्स जीवितिन्द्रियं उप्पज्जति, तस्स सुखिन्द्रियं उप्पज्जतीति? सब्बेसं उपपज्जन्तानं, पवत्ते सुखिन्द्रियविप्पयुत्तचित्तस्स उप्पादक्खणे तेसं जीवितिन्द्रियं उप्पज्जति, नो च तेसं सुखिन्द्रियं उप्पज्जति, सुखिन्द्रियसम्पयुत्तचित्तस्स उप्पादक्खणे तेसं जीवितिन्द्रियञ्च उप्पज्जति सुखिन्द्रियञ्च उप्पज्जती’’तिआदिना सुखदुक्खदोमनस्सिन्द्रियेहि लोकुत्तरिन्द्रियेहि च योजना लब्भति, तथा ‘‘यस्स सुखिन्द्रियं उप्पज्जति, तस्स दुक्खिन्द्रियं उप्पज्जतीति? नो’’तिआदिना तंमूलका च नया. तेहि पन पवत्तियंयेव उप्पज्जमानेहि योजना तंमूलका च चुतिपटिसन्धिपवत्तीसु पवत्तमानेहि सोमनस्सिन्द्रियादीहि योजनाय जीवितिन्द्रियमूलकेहि च नयेहि पाकटायेवाति कत्वा न वुत्ताति दट्ठब्बा.

‘‘सचक्खुकानं ¶ विना सोमनस्सेनाति उपेक्खासहगतानं चतुन्नं महाविपाकपटिसन्धीनं वसेन वुत्त’’न्ति अट्ठकथायं वुत्तं, तं सोमनस्सविरहितसचक्खुकपटिसन्धिनिदस्सनवसेन वुत्तन्ति दट्ठब्बं. न हि ‘‘चतुन्नंयेवा’’ति नियमो कतो, तेन तंसमानलक्खणा परित्तविपाकरूपावचरपटिसन्धियोपि दस्सिता होन्ति. तत्थ कामावचरेसु सोमनस्सपटिसन्धिसमानताय महाविपाकेहि चतूहि निदस्सनं कतं, तेन यथा ससोमनस्सपटिसन्धिका अचक्खुका न होन्ति, एवं इतरमहाविपाकपटिसन्धिकापीति अयमत्थो दस्सितो होति. गब्भसेय्यकानञ्च अनुप्पन्नेसु चक्खादीसु चवन्तानं अहेतुकपटिसन्धिकता सहेतुकपटिसन्धिकानं कामावचरानं नियमतो सचक्खुकादिभावदस्सनेन दस्सिता होति. गब्भसेय्यकेपि हि सन्धाय ‘‘यस्स वा पन सोमनस्सिन्द्रियं उप्पज्जति, तस्स चक्खुन्द्रियं उप्पज्जतीति? आमन्ता’’ति इदं वचनं यथा युज्जति, तथा आयतनयमके दस्सितं. न हि सन्निट्ठानेन सङ्गहितानं गब्भसेय्यकानं वज्जने कारणं अत्थि, ‘‘इत्थीनं अघानकानं उपपज्जन्तीन’’न्तिआदीसु (यम. ३.इन्द्रिययमक.१८७) च ते एव वुत्ताति.

उपेक्खाय अचक्खुकानन्ति अहेतुकपटिसन्धिवसेन वुत्तन्ति एत्थ च कामावचरे सोपेक्खअचक्खुकपटिसन्धिया ¶ तंसमानलक्खणं अरूपपटिसन्धिञ्च निदस्सेतीति दट्ठब्बं. केसुचि पन पोत्थकेसु ‘‘अहेतुकारूपपटिसन्धिवसेना’’ति पाठो दिस्सति, सो एव सेय्यो.

‘‘तत्थ हि एकन्तेनेव सद्धासतिपञ्ञायो नत्थि, समाधिवीरियानि पन इन्द्रियप्पत्तानि न होन्ती’’ति वुत्तं, यदि पन समाधिवीरियानि सन्ति, ‘‘इन्द्रियप्पत्तानि न होन्ती’’ति न सक्का वत्तुं ‘‘समाधि समाधिन्द्रियन्ति? आमन्ता’’ति (यम. ३.इन्द्रिययमक.११३) ‘‘वीरियं वीरियिन्द्रियन्ति? आमन्ता’’ति (यम. ३.इन्द्रिययमक.१११) वचनतो. अहेतुकपटिसन्धिचित्ते च यथा समाधिलेसो एकग्गता अत्थि, न एवं वीरियलेसो अत्थि, तस्मा एवमेत्थ वत्तब्बं सिया ‘‘तत्थ हि एकन्तेनेव सद्धावीरियसतिपञ्ञायो नत्थि, एकग्गता पन समाधिलेसो एव होती’’ति. अयं पनेत्थ अधिप्पायो सिया – यथा अञ्ञेसु केसुचि अहेतुकचित्तेसु समाधिवीरियानि होन्ति इन्द्रियप्पत्तानि च, एवमिध समाधिवीरियानि इन्द्रियप्पत्तानि न होन्तीति. समाधिवीरियिन्द्रियानमेव अभावं दस्सेन्तो अहेतुकन्तरतो विसेसेति ¶ . तत्थ ‘‘समाधिवीरियानि पन न होन्ती’’ति वत्तब्बे ‘‘इन्द्रियप्पत्तानी’’ति समाधिलेसस्स समाधिन्द्रियभावं अप्पत्तस्स सब्भावतो वुत्तं, न वीरियलेसस्स. विसेसनञ्हि विसेसितब्बे पवत्तति. येसु पन पोत्थकेसु ‘‘तत्थ एकन्तेनेव सद्धावीरियसतिपञ्ञायो नत्थी’’ति पाठो, सो एव सुन्दरतरो.

याव चक्खुन्द्रियं नुप्पज्जति, ताव गब्भगतानं अचक्खुकानं भावो अत्थीति इमिना अधिप्पायेनाह ‘‘सहेतुकानं अचक्खुकानन्ति गब्भसेय्यकवसेन चेव अरूपीवसेन च वुत्त’’न्ति. गब्भसेय्यकापि पन अवस्सं उप्पज्जनकचक्खुका न लब्भन्तीति दट्ठब्बा. सचक्खुकानं ञाणविप्पयुत्तानन्ति कामधातुयं दुहेतुकपटिसन्धिकानं वसेन वुत्तन्ति इधापि अहेतुकपटिसन्धिका च अचक्खुका लब्भन्तेव. इत्थिपुरिसिन्द्रियसन्तानानम्पि उपपत्तिवसेन उप्पादो, चुतिवसेन निरोधो बाहुल्लवसेन दस्सितो. कदाचि हि तेसं पठमकप्पिकादीनं विय पवत्तियम्पि उप्पादनिरोधा होन्तीति. एत्थ पुरिसिन्द्रियावसानेसु इन्द्रियमूलयमकेसु पठमपुच्छासु सन्निट्ठानेहि गहितेहि उपपत्तिचुतिवसेन गच्छन्तेहि चक्खुन्द्रियादीहि नियमितत्ता जीवितिन्द्रियादीनं पवत्तिवसेनपि लब्भमानानं उपपत्तिचुतिवसेनेव दुतियपुच्छासु सन्निट्ठानेहि गहणं वेदितब्बं.

१९०. रूपजीवितिन्द्रियं ¶ चक्खुन्द्रियादिसमानगतिकं चुतिपटिसन्धिवसेनेव गच्छति सन्तानुप्पत्तिनिरोधदस्सनतोति आह ‘‘पवत्ते सोमनस्सविप्पयुत्तचित्तस्स उप्पादक्खणेति अरूपजीवितिन्द्रियं सन्धाय वुत्त’’न्ति. एतेसञ्चेव अञ्ञेसञ्च पञ्चिन्द्रियानं यथालाभवसेनाति एत्थ एतेसं जीवितिन्द्रियादीनं चुतिपटिसन्धिपवत्तेसु, अञ्ञेसञ्च चक्खुन्द्रियादीनं चुतिपटिसन्धीसूति एवं यथालाभो दट्ठब्बो. अयं पन छेदेयेवाति एत्थ तस्स तस्स परिपुण्णपञ्हस्स तस्मिं तस्मिं सरूपदस्सनेन विस्सज्जने विस्सज्जिते पच्छिमकोट्ठासस्स छेदोति नामं दट्ठब्बं.

यस्स वा पन सोमनस्सिन्द्रियं न उप्पज्जति, तस्स जीवितिन्द्रियं न उप्पज्जतीति? विना सोमनस्सेन उपपज्जन्तानं पवत्ते सोमनस्सविप्पयुत्तचित्तस्स उप्पादक्खणे तेसं सोमनस्सिन्द्रियं न उप्पज्जति, नो च तेसं ¶ जीवितिन्द्रियं न उप्पज्जतीति एत्थ ‘‘निरोधसमापन्नानं असञ्ञसत्तान’’न्ति अवचनं रूपजीवितिन्द्रियस्स चक्खुन्द्रियादिसमानगतिकतं दीपेति. तस्स हि उपपत्तियंयेव उप्पादो वत्तब्बोति. ‘‘विना सोमनस्सेन उपपज्जन्तान’’न्ति एत्थ असञ्ञसत्ते सङ्गहेत्वा पवत्तिवसेन ते च निरोधसमापन्ना च न वुत्ता, अनुप्पादोपि पनेतस्स चुतिउपपत्तीस्वेव वत्तब्बो, न पवत्तेति. पच्छिमकोट्ठासेपि ‘‘सब्बेसं चवन्तानं, पवत्ते चित्तस्स भङ्गक्खणे तेसं सोमनस्सिन्द्रियञ्च न उप्पज्जति जीवितिन्द्रियञ्च न उप्पज्जती’’ति एवं ‘‘सब्बेसं चवन्तान’’न्ति एत्थेव असञ्ञसत्ते सङ्गण्हित्वा पवत्तिवसेन ते च निरोधसमापन्ना न च वुत्ता. यस्सयत्थके च निरोधसमापन्ना न दस्सेतब्बा न गहेतब्बाति अत्थो. न हि ‘‘निरोधसमापन्नान’’न्ति वचनं ‘‘असञ्ञसत्तान’’न्ति वचनं विय ओकासदीपकं, नापि ‘‘उपेक्खासम्पयुत्तचित्तस्स उप्पादक्खणे, सब्बेसं चित्तस्स भङ्गक्खणे’’तिआदिवचनं विय सोमनस्सिन्द्रियादीनं अनुप्पादक्खणदीपकं, अथ खो पुग्गलदीपकमेवाति.

अतीतकालभेदे सुद्धावासानं उपपत्तिचित्तस्स उप्पादक्खणे तेसं तत्थ सोमनस्सिन्द्रियञ्च न उप्पज्जित्थ जीवितिन्द्रियञ्च न उप्पज्जित्थाति एत्थ ‘‘उपपत्तिचित्तस्स उप्पादक्खणे’’ति कस्मा वुत्तं, ननु ‘‘सुद्धावासं उपपज्जन्तानं, असञ्ञसत्तानं तेसं तत्थ सोमनस्सिन्द्रियञ्च न उप्पज्जित्थ मनिन्द्रियञ्च न उप्पज्जित्था’’ति (यम. ३.इन्द्रिययमक.२७७) एत्थ विय ‘‘उपपज्जन्तान’’न्ति वत्तब्बन्ति? न वत्तब्बं. यथा हि सोमनस्समनिन्द्रियानं वसेन उपपज्जन्ता पुग्गला उपपत्तिचित्तसमङ्गिनो होन्ति, न एवं सोमनस्सजीवितिन्द्रियानं वसेन उपपत्तिसमङ्गिनोयेव होन्ति. जीवितिन्द्रियस्स हि वसेन याव पठमरूपजीवितिन्द्रियं धरति, ताव ¶ उपपज्जन्ता नाम होन्ति. तदा च दुतियचित्ततो पट्ठाय ‘‘जीवितिन्द्रियञ्च न उप्पज्जित्था’’ति न सक्का वत्तुं अरूपजीवितिन्द्रियस्स उप्पज्जित्वा निरुद्धत्ता, तस्मा उभयं उप्पादक्खणेन निदस्सितं. यथा हि ‘‘न निरुज्झित्था’’ति इदं लक्खणं उपपत्तिचित्तस्स द्वीसु खणेसु लब्भमानं सब्बपठमेन उपपत्तिचित्तस्स भङ्गक्खणेन निदस्सितं, एवमिधापि दट्ठब्बं.

अनागतकालभेदे उप्पज्जिस्समाने सन्निट्ठानं कत्वा अञ्ञस्स च उप्पज्जिस्समानताव पुच्छिता. तत्थ यथा पच्चुप्पन्नकालभेदे सन्निट्ठानसंसयभेदेहि उप्पज्जमानस्सेव गहितत्ता ‘‘यस्स चक्खुन्द्रियादीनि उप्पज्जन्ति ¶ , उपपज्जन्तस्स तस्स जीवितिन्द्रियादीनि उप्पज्जन्ती’’ति उपपज्जन्तस्सेव पुच्छितानं उपपत्तियंयेव तेसं उप्पादो सम्भवति, न अञ्ञत्थ, न एवमिध ‘‘यस्स चक्खुन्द्रियादीनि उप्पज्जिस्सन्ति, उपपज्जन्तस्स तस्स जीवितिन्द्रियादीनि उप्पज्जिस्सन्ती’’ति उपपज्जन्तस्सेव पुच्छितानं तेसं उपपत्तितो अञ्ञत्थ उप्पादो न सम्भवति, तस्मा ‘‘यस्स चक्खुन्द्रियं उप्पज्जिस्सति, तस्स सोमनस्सिन्द्रियं उप्पज्जिस्सतीति? आमन्ता’’ति वुत्तं. एवञ्च कत्वा निरोधवारेपि ‘‘यस्स चक्खुन्द्रियं निरुज्झिस्सति, तस्स सोमनस्सिन्द्रियं निरुज्झिस्सतीति? आमन्ता’’ति वुत्तं. न हि यस्स चक्खुन्द्रियं निरुज्झिस्सति, तस्स सोमनस्सिन्द्रियं न निरुज्झिस्सति, अपि पच्छिमभविकस्स उपेक्खासहगतपटिसन्धिकस्स. न हि उपपज्जन्तस्स तस्स चुतितो पुब्बेव सोमनस्सिन्द्रियनिरोधो न सम्भवतीति. एत्थ हि पठमपुच्छासु सन्निट्ठानत्थो पुच्छितब्बत्थनिस्सयो मादिसोव उपपत्तिउप्पादिन्द्रियवा उभयुप्पादिन्द्रियवा अत्थो पटिनिवत्तित्वापि पुच्छितब्बत्थस्स निस्सयोति एवं विय दुतियपुच्छासु सन्निट्ठानत्थमेव नियमेति, न तत्थेव पुच्छितब्बं अनागतभावमत्तेन सरूपतो गहितं उप्पादं वा निरोधं वा संसयत्थन्ति. यस्मा चेवं सन्निट्ठानत्थस्स नियमो होति, तस्मा ‘‘यस्स वा पन सोमनस्सिन्द्रियं उप्पज्जिस्सति, तस्स चक्खुन्द्रियं उप्पज्जिस्सतीति? आमन्ता’’ति (यम. ३.इन्द्रिययमक.२८१) वुत्तं. एस नयो निरोधवारेपि.

पटिलोमे पन यथा अनुलोमे ‘‘उप्पज्जिस्सति निरुज्झिस्सती’’ति उप्पादनिरोधा अनागता सरूपवसेन वुत्ता, एवं अवुत्तत्ता यथा तत्थ संसयपदेन गहितस्स इन्द्रियस्स पवत्तियम्पि उप्पादनिरोधा चक्खुन्द्रियादिमूलकेसु योजिता, न एवं योजेतब्बा. यथा हि उप्पादनिरोधे अतिक्कमित्वा अप्पत्वा च उप्पादनिरोधा सम्भवन्ति योजेतुं, न एवं अनुप्पादानिरोधे ¶ अतिक्कमित्वा अप्पत्वा च अनुप्पादानिरोधा सम्भवन्ति अभूताभावस्स अभूताभावं अतिक्कमित्वा अप्पत्वा च सम्भवानुप्पत्तितो, अभूतुप्पादनिरोधाभावो च पटिलोमे पुच्छितो, तस्मास्स विसेसरहितस्स अभूताभावस्स वत्तमानानं उप्पादस्स विय कालन्तरयोगाभावतो यादिसानं चक्खादीनं उप्पादनिरोधाभावेन पुच्छितब्बस्स निस्सयो सन्निट्ठानेन सन्निच्छितो, तन्निस्सया तादिसानंयेव उपपत्तिचुतिउप्पादनिरोधानं जीवितादीनम्पि अनुप्पादानिरोधा संसयपदेन ¶ पुच्छिता होन्तीति ‘‘यस्स चक्खुन्द्रियं नुप्पज्जिस्सति, तस्स सोमनस्सिन्द्रियं नुप्पज्जिस्सतीति? आमन्ता’’ति (यम. ३.इन्द्रिययमक.३०८) च, ‘‘यस्स चक्खुन्द्रियं न निरुज्झिस्सति, तस्स सोमनस्सिन्द्रियं न निरुज्झिस्सतीति? आमन्ता’’ति च वुत्तं, न वुत्तं ‘‘ये अरूपं उपपज्जित्वा परिनिब्बायिस्सन्ती’’तिआदिना जीवितिन्द्रियउपेक्खिन्द्रियादीसु विय विस्सज्जनन्ति.

ये रूपावचरं उपपज्जित्वा परिनिब्बायिस्सन्ति, तेसं घानिन्द्रियं न उप्पज्जिस्सति, नो च तेसं सोमनस्सिन्द्रियं न उप्पज्जिस्सती’’ति एत्थ ये सोपेक्खपटिसन्धिका भविस्सन्ति, ते ‘‘ये च अरूपं उपपज्जित्वा परिनिब्बायिस्सन्ती’’ति एतेन पच्छिमकोट्ठासवचनेन तंसमानलक्खणताय सङ्गहिताति ये सोमनस्सपटिसन्धिका भविस्सन्ति, ते एव वुत्ताति दट्ठब्बा.

अट्ठकथायं येसु आदिमपोत्थकेसु ‘‘अतीतानागतवारे सुद्धावासानं उपपत्तिचित्तस्स भङ्गक्खणे मनिन्द्रियञ्च नुप्पज्जित्थाति धम्मयमके विय उप्पादक्खणातिक्कमवसेन अत्थं अग्गहेत्वा’’ति लिखितं, तं पमादलिखितं. येसु पन पोत्थकेसु ‘‘पच्चुप्पन्नातीतवारे सुद्धावासानं उपपत्तिचित्तस्स भङ्गक्खणे मनिन्द्रियञ्च नुप्पज्जित्थाति…पे… तस्मिं भवे अनुप्पन्नपुब्बवसेन अत्थो गहेतब्बो’’ति पाठो दिस्सति, सो एव सुन्दरतरोति.

पवत्तिवारवण्णना निट्ठिता.

३. परिञ्ञावारवण्णना

४३५-४८२. परिञ्ञावारे ¶ लोकियअब्याकतमिस्सकानि चाति दुक्खसच्चपरियापन्नेहि एकन्तपरिञ्ञेय्येहि लोकियअब्याकतेहि मिस्सकत्ता तानि उपादाय मनिन्द्रियादीनं वेदनाक्खन्धादीनं विय परिञ्ञेय्यता च वुत्ता. यदि परिञ्ञेय्यमिस्सकत्ता परिञ्ञेय्यता होति, कस्मा धम्मयमके ‘‘यो कुसलं धम्मं भावेति, सो अब्याकतं धम्मं परिजानाती’’तिआदिना अब्याकतपदेन योजेत्वा यमकानि न वुत्तानीति? यथा ‘‘कुसलं भावेमि, अकुसलं पजहामी’’ति कुसलाकुसलेसु ¶ भावनापहानाभिनिवेसो होति, तथा ‘‘वेदनाक्खन्धो अनिच्चो, धम्मायतनं अनिच्च’’न्तिआदिना खन्धादीसु परिजानाभिनिवेसो होति, तत्थ वेदनाक्खन्धादयो ‘‘अनिच्च’’न्तिआदिना परिजानितब्बा, ते च वेदनाक्खन्धादिभावं गहेत्वा परिजानितब्बा, न अब्याकतभावन्ति.

कस्मा पनेत्थ दुक्खसच्चभाजनीये आगतस्स दोमनस्सस्स पहातब्बताव वुत्ता, न परिञ्ञेय्यता, ननु दुक्खसच्चपरियापन्ना वेदनाक्खन्धादयो कुसलाकुसलभावेन अग्गहिता कुसलाकुसलापि परिञ्ञेय्याति? सच्चं, यथा पन वेदनाक्खन्धादिभावो भावेतब्बपहातब्बभावेहि विनापि होति, न एवं दोमनस्सिन्द्रियभावो पहातब्बभावेन विना होतीति इमं विसेसं दस्सेतुं दोमनस्सिन्द्रियस्स पहातब्बताव इध वुत्ता, न परिञ्ञेय्यभावस्स अभावतोति दट्ठब्बो. अकुसलं एकन्ततो पहातब्बमेवाति एतेन पहातब्बमेव, न अप्पहातब्बन्ति अप्पहातब्बमेव निवारेति, न परिञ्ञेय्यभावन्ति दट्ठब्बं. अञ्ञिन्द्रियं भावेतब्बनिट्ठं, न पन सच्छिकातब्बनिट्ठन्ति भावेतब्बभावो एव तस्स गहितोति. ‘‘द्वे पुग्गला’’तिआदि ‘‘चक्खुन्द्रियं न परिजानाती’’तिआदिकस्स परतो लिखितब्बं उप्पटिपाटिया लिखितन्ति दट्ठब्बं. चक्खुन्द्रियमूलकञ्हि अतिक्कमित्वा दोमनस्सिन्द्रियमूलके इदं वुत्तं ‘‘द्वे पुग्गला दोमनस्सिन्द्रियं न पजहन्ति नो च अञ्ञिन्द्रियं न भावेन्ती’’ति (यम. ३.इन्द्रिययमक.४४०).

एत्थ च पुथुज्जनो, अट्ठ च अरियाति नव पुग्गला. तेसु पुथुज्जनो भब्बाभब्बवसेन दुविधो, सो ‘‘पुथुज्जनो’’ति आगतट्ठानेसु ‘‘छ पुग्गला चक्खुन्द्रियञ्च न परिजानित्थ दोमनस्सिन्द्रियञ्च न पजहित्था’’तिआदीसु च अभिन्दित्वा गहितो. ‘‘ये पुथुज्जना मग्गं पटिलभिस्सन्ती’’ति (यम. १.सच्चयमक.४९, ५१-५२) ¶ आगतट्ठानेसु ‘‘पञ्च पुग्गला चक्खुन्द्रियञ्च परिजानिस्सन्ति दोमनस्सिन्द्रियञ्च पजहिस्सन्ती’’तिआदीसु (यम. ३.इन्द्रिययमक.४५१) च भब्बो एव भिन्दित्वा गहितो. ‘‘ये च पुथुज्जना मग्गं न पटिलभिस्सन्ती’’ति (यम. १.सच्चयमक.५१) आगतट्ठानेसु ‘‘तयो पुग्गला दोमनस्सिन्द्रियञ्च नप्पजहिस्सन्ति चक्खुन्द्रियञ्च न परिजानिस्सन्ती’’तिआदीसु (यम. ३.इन्द्रिययमक.४५५) च अभब्बो एव. अग्गफलसमङ्गी च पठमफलसमङ्गी अरहा चाति दुविधो. सोपि ‘‘अरहा’’ति आगतट्ठानेसु ‘‘तयो पुग्गला अनञ्ञातञ्ञस्सामीतिन्द्रियञ्च भावित्थ ¶ दोमनस्सिन्द्रियञ्च पजहित्था’’तिआदीसु (यम. ३.इन्द्रिययमक.४४४) च अभिन्दित्वा गहितो. ‘‘यो अग्गफलं सच्छिकरोती’’ति (यम. ३.इन्द्रिययमक.४४६) आगतट्ठानेसु ‘‘तयो पुग्गला दोमनस्सिन्द्रियं पजहित्थ, नो च अञ्ञाताविन्द्रियं सच्छिकरित्था’’तिआदीसु (यम. ३.इन्द्रिययमक.४४४) च पठमफलसमङ्गी च भिन्दित्वा गहितो. ‘‘यो अग्गफलं सच्छाकासी’’ति (यम. ३.इन्द्रिययमक.४४३, ४४६) आगतट्ठानेसु इतरोवाति एवं पुग्गलभेदं ञत्वा तत्थ तत्थ सन्निट्ठानेन गहितपुग्गले निद्धारेत्वा विस्सज्जनं योजेतब्बन्ति.

परिञ्ञावारवण्णना निट्ठिता.

इन्द्रिययमकवण्णना निट्ठिता.

यमकपकरण-मूलटीका समत्ता.

पट्ठानपकरण-मूलटीका

गन्थारम्भवण्णना

दिब्बन्ति ¶ ¶ कामगुणादीहि कीळन्ति लळन्ति, तेसु वा विहरन्ति, विजयसमत्थतायोगेन पच्चत्थिके विजेतुं इच्छन्ति, इस्सरियट्ठानादिसक्कारदानग्गहणं तंतंअत्थानुसासनञ्च करोन्ता वोहरन्ति, पुञ्ञयोगानुभावप्पत्ताय जुतिया जोतन्ति, यथाभिलासितञ्च विसयं अप्पटिघातेन गच्छन्ति, यथिच्छितनिप्फादने सक्कोन्तीति वा देवा, देवनीया वा तंतंब्यसननित्थरणत्थिकेहि सरणं परायणन्ति गमनीया, अभित्थवनीया वा. सोभाविसेसयोगेन कमनीयाति वा देवा. ते तिविधा – सम्मुतिदेवा उपपत्तिदेवा विसुद्धिदेवाति. भगवा पन निरतिसयाय अभिञ्ञाकीळाय, उत्तमेहि दिब्बब्रह्मअरियविहारेहि, सपरसन्तानसिद्धाय पञ्चविधमारविजयिच्छानिप्फत्तिया, चित्तिस्सरियसत्तधनादिसम्मापटिपत्तिअवेच्चप्पसादसक्कारदानग्गहणसङ्खातेन धम्मसभावपुग्गलज्झासयानुरूपानुसासनीसङ्खातेन च वोहारातिसयेन, परमाय पञ्ञासरीरप्पभासङ्खाताय जुतिया, अनोपमाय च ञाणसरीरगतिया, मारविजयसब्बञ्ञुगुणपरहितनिप्फादनेसु ¶ अप्पटिहताय सत्तिया च समन्नागतत्ता सदेवकेन लोकेन सरणन्ति गमनीयतो, अभित्थवनीयतो, भत्तिवसेन कमनीयतो च सब्बे ते देवे तेहि गुणेहि अतिक्कन्तो अतिसयो वा देवोति देवातिदेवो. सब्बदेवेहि पूजनीयतरो देवोति वा देवातिदेवो, विसुद्धिदेवभावं वा सब्बञ्ञुगुणालङ्कारं पत्तत्ता अञ्ञदेवेहि अतिरेकतरो वा देवो देवातिदेवो. देवानन्ति उपपत्तिदेवानं तदा धम्मपटिग्गाहकानं. सक्कादीहि देवेहि पहारादअसुरिन्दादीहि दानवेहि च पूजितो. कायवचीसंयमस्स सीलस्स इन्द्रियसंवरस्स चित्तसंयमस्स समाधिस्स च पटिपक्खानं अच्चन्तपटिप्पस्सद्धिया सुद्धसंयमो.

इसिसत्तमोति ¶ चतुसच्चावबोधगतिया इसयोति सङ्ख्यं गतानं सतं पसत्थानं इसीनं अतिसयेन सन्तो पसत्थोति अत्थो. विपस्सीआदयो च उपादाय भगवा ‘‘सत्तमो’’ति वुत्तो. यतो विञ्ञाणं पच्चुदावत्तति, तं नामरूपं समुदयनिरोधनेन निरोधेसीति नामरूपनिरोधनो. अतिगम्भीरनयमण्डितदेसनं पट्ठानं नाम देसेसि पकरणन्ति सम्बन्धो.

गन्थारम्भवण्णना निट्ठिता.

पच्चयुद्देसवण्णना

‘‘के पन ते नया, किञ्च तं पट्ठानं नामा’’ति नयिदं पुच्छितब्बं. कस्मा? निदानकथायं पट्ठानसमानने अनुलोमादीनं नयानं पट्ठानस्स च दस्सितत्ताति इममत्थं विभावेन्तो ‘‘सम्मासम्बुद्धेन हि…पे… नामाति हि वुत्त’’न्ति तत्थ वुत्तं अट्ठकथापाळिं आहरि. तत्थ गाथात्थं अट्ठकथाधिप्पायञ्च परतो वण्णयिस्सामाति.

पट्ठाननामत्थो पन तिकपट्ठानादीनं तिकपट्ठानादिनामत्थो, इमस्स पकरणस्स चतुवीसतिसमन्तपट्ठानसमोधानता चेत्थ वत्तब्बा. एवञ्हि सङ्खेपतो पट्ठाने ञाते वित्थारो सुखविञ्ञेय्यो होतीति. तत्थ च नामत्थो पठमं वत्तब्बोति ‘‘तत्थ येसं…पे… नामत्थो ताव एवं वेदितब्बो’’ति वत्वा सब्बसाधारणस्स पट्ठाननामस्सेव ताव अत्थं दस्सेन्तो ‘‘केनट्ठेन पट्ठान’’न्तिआदिमाह ¶ . प-कारो हीति उपसग्गपदं दस्सेति. सो ‘‘पविभत्तेसु धम्मेसु, यं सेट्ठं तदुपागमुन्तिआदीसु विय नानप्पकारत्थं दीपेति. ननु पकारेहि विभत्ता पविभत्ताति प-इति उपसग्गो पकारत्थमेव दीपेति, न नानप्पकारत्थन्ति? न, तेसं पकारानं नानाविधभावतो. अत्थतो हि आपन्नं नानाविधभावं दस्सेतुं नाना-सद्दो वुत्तोति. तत्थ एकस्सपि धम्मस्स हेतुआदीहि अनेकपच्चयभावतो च एकेकस्स पच्चयस्स अनेकधम्मभावतो च नानप्पकारपच्चयता वेदितब्बा.

हेतुपच्चयादिवसेन विभत्तत्ताति एतेन धम्मसङ्गहादीसु वुत्ततो कुसलादिविभागतो सातिसयविभागतं पट्ठाननामलाभस्स कारणं ¶ दस्सेति. गोट्ठाति वजा. पट्ठितगावोति गतगावो. आगतट्ठानस्मिन्ति महासीहनादसुत्तं वदति. पवत्तगमनत्ता एत्थाति वचनसेसो. अथ वा गच्छति एत्थाति गमनं, सब्बञ्ञुतञ्ञाणस्स निस्सङ्गवसेन पवत्तस्स गमनत्ता गमनदेसभावतो एकेकं पट्ठानं नामाति अत्थो. तत्थ अञ्ञेहि गतिमन्तेहि अतिसययुत्तस्स गतिमतो गमनट्ठानभावदस्सनत्थं ‘‘सब्बञ्ञुतञ्ञाणस्सा’’ति वुत्तं. तस्स महावेगस्स पुरिसस्स पपातट्ठानं विय धम्मसङ्गणीआदीनं सासङ्गगमनट्ठानभावं इमस्स च महापथो विय निरासङ्गगमनट्ठानभावं दस्सेन्तो अतिसययुत्तगमनट्ठानभावो पट्ठाननामलाभस्स कारणन्ति दस्सेति.

तिकानन्ति तिकवसेन वुत्तधम्मानं. समन्ताति अनुलोमादीहि सब्बाकारेहिपि गतानि चतुवीसति होन्तीति अत्थो. एतस्मिं अत्थे चतुवीसतिसमन्तपट्ठानानीति ‘‘समन्तचतुवीसतिपट्ठानानी’’ति वत्तब्बे समन्तसद्दस्स परयोगं कत्वा वुत्तन्ति दट्ठब्बं. अथ वा समन्ता छ छ हुत्वाति एतेन अनुलोमादिसब्बकोट्ठासतो तिकादिछछभावं दस्सेति. तेन समन्तसद्दो तिकादिछछपट्ठानविसेसनं होति, न चतुवीसतिविसेसनं, तस्मा समन्ततो पट्ठानानि तानि चतुवीसतीति कत्वा ‘‘चतुवीसतिसमन्तपट्ठानानी’’ति वुत्तं. समन्ततो वा धम्मानुलोमादितिकादिपटिच्चवारादिपच्चयानुलोमादिहेतुमूलकादिप्पकारेहि पवत्तानि पट्ठानानि समन्तपट्ठानानि, अनूनेहि नयेहि पवत्तानीति वुत्तं होति. तानि पन चतुवीसति होन्ति. तेनेवाह ‘‘इमेसं चतुवीसतिया खुद्दकपट्ठानसङ्खातानं समन्तपट्ठानानं समोधानवसेना’’ति.

हेतु च सो पच्चयो चाति इमिना वचनेन हेतुनो अधिपतिपच्चयादिभूतस्स च गहणं सियाति ¶ तं निवारेन्तो आह ‘‘हेतु हुत्वा पच्चयो’’ति. एतेनपि सो एव दोसो आपज्जतीति पुनाह ‘‘हेतुभावेन पच्चयोति वुत्तं होती’’ति. तेन इध हेतु-सद्देन धम्मग्गहणं न कतं, अथ खो धम्मसत्तिविसेसो गहितोति दस्सेति. तस्स हि पच्चयसद्दस्स च समानाधिकरणतं सन्धाय ‘‘हेतु च सो पच्चयो चा’’ति, ‘‘हेतु हुत्वा पच्चयो’’ति च वुत्तं. एवञ्च कत्वा परतो पाळियं ‘‘हेतू हेतुसम्पयुत्त…पे… हेतुपच्चयेन पच्चयो’’तिआदिना (पट्ठा. १.१.१) तेन ¶ तेन हेतुभावादिउपकारेन तस्स तस्स धम्मस्स उपकारत्तं वुत्तं. अट्ठकथायं पन ‘‘यो हि धम्मो यं धम्मं अप्पच्चक्खाय तिट्ठति वा उप्पज्जति वा, सो तस्स पच्चयो’’ति ‘‘मूलट्ठेन उपकारको धम्मो हेतुपच्चयो’’तिच्चेवमादिना धम्मप्पधाननिद्देसेन धम्मतो अञ्ञा धम्मसत्ति नाम नत्थीति धम्मेहेव धम्मसत्तिविभावनं कतन्ति दट्ठब्बं. इधापि वा हेतु च सो पच्चयो चाति धम्मेनेव धम्मसत्तिं दस्सेति. न हि हेतुपच्चयोतिआदिको उद्देसो कुसलादिउद्देसो विय धम्मप्पधानो, अथ खो धम्मानं उपकारप्पधानोति. एतीति एतस्स अत्थो वत्ततीति, तञ्च उप्पत्तिट्ठितीनं साधारणवचनं. तेनेवाह – ‘‘तिट्ठति वा उप्पज्जति वा’’ति. कोचि हि पच्चयो ठितिया एव होति यथा पच्छाजातपच्चयो, कोचि उप्पत्तियायेव यथा अनन्तरादयो, कोचि उभयस्स यथा हेतुआदयोति.

उपकारकलक्खणोति च धम्मेन धम्मसत्तिउपकारं दस्सेतीति दट्ठब्बं. हिनोति पतिट्ठाति एत्थाति हेतु. अनेकत्थत्ता धातुसद्दानं हि-सद्दो मूल-सद्दो विय पतिट्ठत्थोति दट्ठब्बोति. हिनोति वा एतेन कम्मनिदानभूतेन उद्धं ओजं अभिहरन्तेन मूलेन विय पादपो तप्पच्चयं फलं गच्छति पवत्तति वुड्ढिं विरूळ्हिं आपज्जतीति हेतु. आचरियानन्ति रेवतत्थेरं वदति.

‘‘योनिसो, भिक्खवे, मनसिकरोतो अनुप्पन्ना चेव कुसला धम्मा उप्पज्जन्ति, उप्पन्ना च कुसला धम्मा अभिवड्ढन्ती’’तिआदीहि (अ. नि. १.६६-६७) कुसलभावस्स योनिसोमनसिकारपटिबद्धता सिद्धा होतीति आह ‘‘योनिसोमनसिकारपटिबद्धो कुसलभावो’’ति. एतेनेव अकुसलाब्याकतभावा कुसलभावो विय न हेतुपटिबद्धाति दस्सितं होति. यं पनेके मञ्ञेय्युं ‘‘अहेतुकहेतुस्स अकुसलभावो विय सहेतुकहेतूनं सभावतोव कुसलादिभावो अञ्ञेसं तंसम्पयुत्तानं हेतुपटिबद्धो’’ति, तस्स उत्तरं वत्तुं ‘‘यदि चा’’तिआदिमाह. अलोभो कुसलो वा सिया अब्याकतो वा, यदि अलोभो सभावतो कुसलो, कुसलत्ता अब्याकतो न सिया. अथ अब्याकतो, तंसभावत्ता कुसलो न सिया अलोभसभावस्स ¶ अदोसत्ताभावो विय. यस्मा पन उभयथापि सो ¶ होति, तस्मा यथा उभयथा होन्तेसु फस्सादीसु सम्पयुत्तेसु हेतुपटिबद्धकुसलादिभावं परियेसथ, न सभावतो, एवं हेतूसुपि कुसलादिता अञ्ञपटिबद्धा परियेसितब्बा, न सभावतोति. यं वुत्तं ‘‘सम्पयुत्तहेतूसु सभावतोव कुसलादिभावो’’ति, तं न युज्जति, सा पन परियेसियमाना योनिसोमनसिकारादिपटिबद्धा होतीति हेतूसु विय सम्पयुत्तेसुपि योनिसोमनसिकारादिपटिबद्धो कुसलादिभावो, न हेतुपटिबद्धोति सिद्धं होतीति अधिप्पायो.

आरभित्वापीति एत्थ पि-सद्देन इममत्थं दस्सेति – रूपायतनादिमत्ते यस्मिं किस्मिञ्चि एकस्मिं अट्ठत्वा ‘‘यं यं धम्मं आरब्भा’’ति अनियमेन सब्बरूपायतन…पे… धम्मायतनानञ्च आरम्मणपच्चयभावस्स वुत्तत्ता न कोचि धम्मो न होतीति.

‘‘छन्दवतो किं नाम न सिज्झती’’तिआदिकं पुरिमाभिसङ्खारूपनिस्सयं लभित्वा उप्पज्जमाने चित्ते छन्दादयो धुरभूता जेट्ठकभूता सयं सम्पयुत्तधम्मे साधयमाना हुत्वा पवत्तन्ति, तंसम्पयुत्तधम्मा च तेसं वसे वत्तन्ति हीनादिभावेन तदनुवत्तनतो, तेन ते अधिपतिपच्चया होन्ति. गरुकातब्बम्पि आरम्मणं तन्निन्नपोणपब्भारानं पच्चवेक्खणअस्सादमग्गफलानं अत्तनो वसे वत्तयमानं विय पच्चयो होति, तस्मायं अत्ताधीनानं पतिभावेन उपकारकता अधिपतिपच्चयताति दट्ठब्बा.

मनोविञ्ञाणधातूतिआदि चित्तनियमोति एत्थ आदि-सद्देन सन्तीरणानन्तरं वोट्ठब्बनं, चुतिअनन्तरा पटिसन्धीति यस्स यस्स चित्तस्स अनन्तरा यं यं चित्तं उप्पज्जति, तस्स तस्स तदनन्तरुप्पादनियमो तंतंसहकारीपच्चयविसिट्ठस्स पुरिमपुरिमचित्तस्सेव वसेन इज्झतीति दस्सेति. भावनाबलेन पन वारितत्ताति एत्थ यथा रुक्खस्स वेखे दिन्ने पुप्फितुं समत्थस्सेव पुप्फनं न होति, अगदवेखे पन अपनीते ताययेव समत्थताय पुप्फनं होति, एवमिधापि भावनाबलेन वारितत्ता समुट्ठापनसमत्थस्सेव असमुट्ठापनं, तस्मिञ्च अपगते ताययेव समत्थताय समुट्ठापनं होतीति अधिप्पायो.

ब्यञ्जनमत्ततोवेत्थ नानाकरणं पच्चेतब्बं, न अत्थतोति उपचयसन्ततिअधिवचननिरुत्तिपदानं विय सद्दत्थमत्ततो नानाकरणं, न वचनीयत्थतोति ¶ अधिप्पायो. तेनेव ¶ सद्दत्थविसेसं दस्सेतुं ‘‘कथ’’न्तिआदिमाह. तत्थ पुरिमपच्छिमानं निरोधुप्पादन्तराभावतो निरन्तरुप्पादनसमत्थता अनन्तरपच्चयभावो. रूपधम्मानं विय सण्ठानाभावतो पच्चयपच्चयुप्पन्नानं सहावट्ठानाभावतो च ‘‘इदमितो हेट्ठा उद्धं तिरिय’’न्ति विभागाभावा अत्तना एकत्तमिव उपनेत्वा सुट्ठु अनन्तरभावेन उप्पादनसमत्थता समनन्तरपच्चयता.

उप्पादनसमत्थताति च अब्यापारत्ता धम्मानं यस्मिं यदाकारे निरुद्धे वत्तमाने वा सति तंतंविसेसवन्ता धम्मा होन्ति, तस्स सोव आकारो वुच्चतीति दट्ठब्बो. धम्मानं पवत्तिमेव च उपादाय कालवोहारोति निरोधा वुट्ठहन्तस्स नेवसञ्ञानासञ्ञायतनफलसमापत्तीनं असञ्ञसत्ता चवन्तस्स पुरिमचुतिपच्छिमपटिसन्धीनञ्च निरोधुप्पादनिरन्तरताय कालन्तरता नत्थीति दट्ठब्बा. न हि तेसं अन्तरा अरूपधम्मानं पवत्ति अत्थि, यं उपादाय कालन्तरता वुच्चेय्य, न च रूपधम्मप्पवत्ति अरूपधम्मप्पवत्तिया अन्तरं करोति अञ्ञसन्तानत्ता. रूपारूपधम्मसन्ततियो हि द्वे अञ्ञमञ्ञं विसदिससभावत्ता अञ्ञमञ्ञोपकारभावेन वत्तमानापि विसुंयेव होन्ति. एकसन्ततियञ्च पुरिमपच्छिमानं मज्झे वत्तमानं तंसन्ततिपरियापन्नताय अन्तरकारकं होति. तादिसञ्च कञ्चि नेवसञ्ञानासञ्ञायतनफलसमापत्तीनं मज्झे नत्थि, न च अभावो अन्तरकारको होति अभावत्तायेव, तस्मा जवनानन्तरस्स जवनस्स विय, भवङ्गानन्तरस्स भवङ्गस्स विय च निरन्तरता सुट्ठु च अनन्तरता होतीति तथा उप्पादनसमत्थता नेवसञ्ञानासञ्ञायतनचुतीनम्पि दट्ठब्बा. उप्पत्तिया पच्चयभावो चेत्थ अनन्तरपच्चयादीनं पाकटोति उप्पादनसमत्थताव वुत्ता. पच्चुप्पन्नानं पन धम्मानं पुब्बन्तापरन्तपरिच्छेदेन गहितानं ‘‘उप्पज्जती’’ति वचनं अलभन्तानं ‘‘अतीतो धम्मो पच्चुप्पन्नस्स धम्मस्स अनन्तरपच्चयेन पच्चयो’’तिआदिना (पट्ठा. २.१८.५) अनन्तरादिपच्चयभावो वुत्तोति न सो उप्पत्तियंयेवाति विञ्ञायति. न हि कुसलादिग्गहणं विय पच्चुप्पन्नग्गहणं अपरिच्छेदं, यतो उप्पत्तिमत्तसमङ्गिनोयेव च गहणं सिया, तेनेव च अतीतत्तिके पटिच्चवारादयो न सन्तीति.

उप्पज्जमानोव ¶ सहुप्पादभावेनाति एत्थापि उप्पत्तिया पच्चयभावेन पाकटेन ठितियापि पच्चयभावं निदस्सेतीति दट्ठब्बं, पच्चयुप्पन्नानं पन सहजातभावेन उपकारकता सहजातपच्चयताति.

अत्तनो उपकारकस्स उपकारकता अञ्ञमञ्ञपच्चयता, उपकारकता च अञ्ञमञ्ञतावसेनेव ¶ दट्ठब्बा, न सहजातादिवसेन. सहजातादिपच्चयो होन्तोयेव हि कोचि अञ्ञमञ्ञपच्चयो न होति, न च पुरेजातपच्छाजातभावेहि उपकारकस्स उपकारका वत्थुखन्धा अञ्ञमञ्ञपच्चया होन्तीति.

तरुआदीनं पथवी विय अधिट्ठानाकारेन पथवीधातु सेसधातूनं, चक्खादयो च चक्खुविञ्ञाणादीनं उपकारका चित्तकम्मस्स पटादयो विय निस्सयाकारेन खन्धादयो तंतंनिस्सयानं खन्धादीनं.

तदधीनवुत्तिताय अत्तनो फलेन निस्सितोति यं किञ्चि कारणं निस्सयोति वदति. तत्थ यो भुसो, तं उपनिस्सयोति निद्धारेति.

पकतोति एत्थ प-कारो उपसग्गो, सो अत्तनो फलस्स उप्पादने समत्थभावेन सुट्ठुकततं दीपेति. तथा च कतं अत्तनो सन्ताने कतं होतीति आह ‘‘अत्तनो सन्ताने’’ति. करणञ्च दुविधं निप्फादनं उपसेवनञ्चाति दस्सेतुं ‘‘निप्फादितो वा’’तिआदिमाह. तत्थ उपसेवितो वाति एतेन कायअल्लीयापनवसेन उपभोगूपसेवनं विजाननादिवसेन आरम्मणूपसेवनञ्च दस्सेतीति दट्ठब्बं. तेन अनागतानम्पि चक्खुसम्पदादीनं आरम्मणूपसेवनेन यथापटिसेवितानं पकतूपनिस्सयता वुत्ता होति.

यथा पच्छाजातेन विना सन्तानाविच्छेदहेतुभावं अगच्छन्तानं धम्मानं ये पच्छाजाताकारेन उपकारका, तेसं सा विप्पयुत्ताकारादीहि विसिट्ठा उपकारकता पच्छाजातपच्चयता, तथा निस्सयारम्मणाकारादीहि विसिट्ठा पुरेजातभावेन विना उपकारकभावं अगच्छन्तानं वत्थारम्मणानं पुरेजाताकारेन उपकारकता पुरेजातपच्चयता, एवं सब्बत्थ पच्चयानं पच्चयन्तराकारविसिट्ठा उपकारकता योजेतब्बा.

गिज्झपोतकसरीरानं ¶ आहारासाचेतना वियाति एतेन मनोसञ्चेतनाहारवसेन पवत्तमानेहि अरूपधम्मेहि रूपकायस्स उपत्थम्भितभावं दस्सेति. तेनेव ‘‘आहारासा विया’’ति अवत्वा चेतनागहणं करोति.

कुसलादिभावेन ¶ अत्तना सदिसस्स पयोगेन करणीयस्स पुनप्पुनं करणं पवत्तनं आसेवनट्ठो, अत्तसदिससभावतापादनं वासनं वा. गन्थादीसु पुरिमापुरिमाभियोगो वियाति पुरिमा पुरिमा आसेवना वियाति अधिप्पायो.

चित्तप्पयोगो चित्तकिरिया, आयूहनन्ति अत्थो. यथा हि कायवचीपयोगो विञ्ञत्ति, एवं चित्तप्पयोगो चेतना. सा ताय उप्पन्नकिरियताविसिट्ठे सन्ताने सेसपच्चयसमागमे पवत्तमानानं विपाककटत्तारूपानम्पि तेनेव किरियभावेन उपकारिका होति. तस्स हि किरियभावस्स पवत्तत्ता तेसं पवत्ति, न अञ्ञथाति. सहजातानं पन तेन उपकारिकाति किं वत्तब्बन्ति.

निरुस्साहसन्तभावेनाति एतेन सउस्साहेहि विपाकधम्मधम्मेहि कुसलाकुसलेहि सारम्मणादिभावेन सदिसविपाकभावं दस्सेति. सो हि विपाकानं पयोगेन असाधेतब्बताय पयोगेन अञ्ञथा वा सेसपच्चयेसु सिद्धेसु कम्मस्स कटत्तायेव सिद्धितो निरुस्साहो सन्तभावो होति, न किलेसवूपसमसन्तभावो, तथासन्तसभावतोयेव भवङ्गादयो दुविञ्ञेय्या. पञ्चद्वारेपि हि जवनप्पवत्तिया रूपादीनं गहितता विञ्ञायति, अभिनिपातसम्पटिच्छनसन्तीरणमत्ता पन विपाका दुविञ्ञेय्यायेव. निरुस्साहसन्तभावायाति निरुस्साहसन्तभावत्थाय. एतेन तप्पच्चयवतं अविपाकानम्पि विपाकानुकुलं पवत्तिं दस्सेति.

सतिपि जनकत्ते उपत्थम्भकत्तं आहारानं पधानकिच्चन्ति आह ‘‘रूपारूपानं उपत्थम्भकत्तेना’’ति. उपत्थम्भकत्तञ्हि सतिपि जनकत्ते अरूपीनं आहारानं आहारजरूपसमुट्ठापकरूपाहारस्स च होति, असतिपि चतुसमुट्ठानिकरूपूपत्थम्भकरूपाहारस्स, असति पन उपत्थम्भकत्ते आहारानं जनकत्तं नत्थीति उपत्थम्भकत्तं पधानं. जनयमानोपि हि ¶ आहारो अविच्छेदवसेन उपत्थम्भयमानोयेव जनेतीति उपत्थम्भनभावो आहारभावोति.

अधिपतियट्ठेनाति एत्थ न अधिपतिपच्चयधम्मानं विय पवत्तिनिवारके अभिभवित्वा पवत्तनेन गरुभावो अधिपतियट्ठो, अथ खो दस्सनादिकिच्चेसु चक्खुविञ्ञाणादीहि जीवने जीवन्तेहि सुखितादिभावे सुखितादीहि अधिमोक्खपग्गहुपट्ठानाविक्खेपजाननेसु अनञ्ञातञ्ञस्सामीति पवत्तियं आजानने अञ्ञातावीभावे च सद्धादिसहजातेहीति एवं तंतंकिच्चेसु ¶ चक्खादिपच्चयेहि चक्खादीनं अनुवत्तनीयता. तेसु तेसु हि किच्चेसु चक्खादीनं इस्सरियं तप्पच्चयानञ्च तदनुवत्तनेन तत्थ पवत्तीति. इत्थिपुरिसिन्द्रियानं पन यदिपि लिङ्गादीहि अनुवत्तनीयता अत्थि, सा पन न पच्चयभावतो. यथा हि जीविताहारा येसं पच्चया होन्ति, ते तेसं अनुपालकउपत्थम्भका अत्थि, अविगतपच्चयभूता च होन्ति, न एवं इत्थिपुरिसभावा लिङ्गादीनं केनचि पकारेन उपकारका होन्ति, केवलं पन यथासकेहेव पच्चयेहि पवत्तमानानं लिङ्गादीनं यथा इत्थादिग्गहणस्स पच्चयभावो होति, ततो अञ्ञेनाकारेन तंसहितसन्ताने अप्पवत्तितो लिङ्गादीहि अनुवत्तनीयता इन्द्रियता च तेसं वुच्चति, तस्मा न तेसं इन्द्रियपच्चयभावो वुत्तो. चक्खादयो अरूपधम्मानंयेवाति एत्थ सुखदुक्खिन्द्रियानिपि चक्खादिग्गहणेन गहितानीति दट्ठब्बानि.

लक्खणारम्मणूपनिज्झानभूतानं वितक्कादीनं वितक्कनादिवसेन आरम्मणं उपगन्त्वा निज्झानं पेक्खनं, चिन्तनं वा वितक्कादीनंयेव साधारणो ब्यापारो उपनिज्झायनट्ठो. ठपेत्वा सुखदुक्खवेदनाद्वयन्ति सुखिन्द्रियदुक्खिन्द्रियद्वयं ठपेत्वाति अधिप्पायो. ‘‘सब्बानिपी’’ति वत्वा ‘‘सत्तझानङ्गानी’’ति वचनेन अझानङ्गानं उपेक्खाचित्तेकग्गतानं निवत्तनं कतन्ति दट्ठब्बं. यदि एवं ‘‘सत्त झानङ्गानी’’ति एतेनेव सिद्धे ‘‘ठपेत्वा सुखदुक्खवेदनाद्वय’’न्ति कस्मा वुत्तं? वेदनाभेदेसु पञ्चसु सुखदुक्खद्वयस्स एकन्तेन अझानङ्गत्तदस्सनत्थं झानङ्गट्ठाने निद्दिट्ठत्ता. सतिपि वा झानङ्गवोहारे वेदनाभेदद्वयस्स एकन्तेन झानपच्चयत्ताभावदस्सनत्थं. उपेक्खाचित्तेकग्गतानं पन यदिपि झानपच्चयत्ताभावो अत्थि, झानपच्चयभावो पन न नत्थीति ‘‘सब्बानिपि सत्त झानङ्गानी’’ति एत्थ गहणं ¶ कतं. तत्थ ‘‘सब्बानिपी’’ति वचनं सब्बकुसलादिभेदसङ्गण्हनत्थं, न पन सब्बचित्तुप्पादगतसङ्गण्हनत्थन्ति दट्ठब्बं.

यतो ततो वाति सम्मा वा मिच्छा वाति अत्थो. एते पन द्वेपि झानमग्गपच्चया अहेतुकचित्तेसु न लब्भन्तीति इदं अहेतुकचित्तेसु न लब्भन्ति, न सहेतुकचित्तेसूति सहेतुकचित्तेसु अलाभाभावदस्सनत्थं वुत्तं, न अहेतुकचित्तेसु लाभाभावदस्सनत्थन्ति. एवं अत्थे गय्हमाने अहेतुकचित्तेसु कत्थचि कस्सचि लाभो न वारितोति एत्तकमेव विञ्ञायेय्य, न सवितक्काहेतुकचित्तेसु झानपच्चयस्सेव अलाभाभावदस्सनत्थं कतन्ति. अहेतुकचित्तेसु वा लाभाभावदस्सनत्थे पन इमस्मिं वचने सवितक्काहेतुकचित्तेसु झानपच्चयस्स लाभाभावो आपज्जति, तस्मा येन अलाभेन धम्मसङ्गणियं मनोधातुआदीनं सङ्गहसुञ्ञतवारेसु झानं न उद्धटं ¶ , तं अलाभं सन्धाय एस झानपच्चयस्सपि अहेतुकचित्तेसु अलाभो वुत्तोति वेदितब्बो. यथा हि सहेतुकेसु वितक्कादीनं सहजाते संकड्ढित्वा एकत्तगतभावकरणं उपनिज्झायनब्यापारो बलवा, न तथा अहेतुकचित्तेसु होति. इमस्मिं पन पकरणे दुब्बलम्पि उपनिज्झायनं यदिपि किञ्चिमत्तम्पि अत्थि, तेन उपकारकता होतीति सवितक्काहेतुकचित्तेसुपि झानपच्चयो वुत्तोव, तस्मा ये एवं पठन्ति ‘‘न एते पन द्वेपि झानमग्गपच्चया यथासङ्ख्यं द्विपञ्चविञ्ञाणअहेतुकचित्तेसु लब्भन्ती’’ति, तेसं सो पाठो सुन्दरतरो, इमस्स पकरणस्सायं अत्थवण्णना, न धम्मसङ्गणियाति.

समं पकारेहि युत्तताय एकीभावोपगमेन विय उपकारकता सम्पयुत्तपच्चयता.

युत्तानम्पि सतं विप्पयुत्तभावेन नानत्तूपगमेन उपकारकता विप्पयुत्तपच्चयता. न हि वत्थुसहजातपच्छाजातवसेन अयुत्तानं रूपादीनं आरम्मणादिभावेन उपकारकानं विप्पयुत्तानं विप्पयुत्तपच्चयता अत्थीति. रूपानं पन रूपेहि सतिपि अविनिब्भोगे विप्पयोगोयेव नत्थीति न तेसं विप्पयुत्तपच्चयता. वुत्तञ्हि ‘‘चतूहि सम्पयोगो चतूहि विप्पयोगो’’ति (धातु. ३).

पच्चुप्पन्नलक्खणेनाति ¶ पच्चुप्पन्नसभावेन. तेन ‘‘अत्थि मे पापकम्मं कत’’न्ति (पारा. ३८), ‘‘अत्थेकच्चो पुग्गलो अत्तहिताय पटिपन्नो’’ति (पु. प. मातिका ४.२४) च एवमादीसु वुत्तं निब्बत्तउपलब्भमानतालक्खणं अत्थिभावं निवारेति. सतिपि जनकत्ते उपत्थम्भकप्पधाना अत्थिभावेन उपकारकताति आह ‘‘उपत्थम्भकत्तेना’’ति. इदञ्च उपत्थम्भकत्तं वत्थारम्मणसहजातादीनं साधारणं अत्थिभावेन उपकारकत्तं दट्ठब्बं.

आरम्मणे फुसनादिवसेन वत्तमानानं फस्सादीनं अनेकेसं सहभावो नत्थीति एकस्मिं फस्सादिसमुदाये सति दुतियो न होति, असति पन होति, तेन नत्थिभावेन उपकारकता नत्थिपच्चयता. सतिपि पुरिमतरचित्तानं नत्थिभावे न तानि नत्थिभावेन उपकारकानि, अनन्तरमेव पन अत्तनो अत्थिभावेन पवत्तिओकासं अलभमानानं नत्थिभावेन पवत्तिओकासं ददमानं विय उपकारकं होतीति ‘‘पवत्तिओकासदानेन उपकारकता’’ति आह.

एत्थ च अभावमत्तेन उपकारकता ओकासदानं नत्थिपच्चयता, सभावाविगमेन अप्पवत्तमानानं ¶ सभावविगमेन उपकारकता विगतपच्चयता, नत्थिता च निरोधानन्तरसुञ्ञता, विगतता निरोधप्पत्तता, अयमेतेसं विसेसो, तथा अत्थिताय ससभावतो उपकारकता अत्थिपच्चयता, सभावाविगमेन निरोधस्स अप्पत्तिया उपकारकता अविगतपच्चयताति पच्चयभावविसेसो धम्माविसेसेपि वेदितब्बो. धम्मानञ्हि सत्तिविसेसं सब्बं याथावतो अभिसम्बुज्झित्वा तथागतेन चतुवीसतिपच्चयविसेसा वुत्ताति भगवति सद्धाय ‘‘एवंविसेसा एते धम्मा’’ति सुतमयञाणं उप्पादेत्वा चिन्ताभावनामयेहि तदभिसमयाय योगो कातब्बो.

चतूसु खन्धेसु एकस्सपि असङ्गहितत्ताभावतो नामधम्मेकदेसता अनन्तरादीनं नत्थीति ‘‘नामधम्मावा’’ति वत्वा न केवलं पच्चयपच्चयुप्पन्नभावे भजन्तानं चतुन्नंयेव खन्धानं नामता, अथ खो निब्बानञ्च नाममेवाति दस्सेन्तो ‘‘निब्बानस्स असङ्गहितत्ता’’तिआदिमाह. पुरेजातपच्चयो रूपेकदेसोति एत्थ एकदेसवचनेन रूपरूपतो ¶ अञ्ञं वज्जेति, रूपरूपं पन कुसलत्तिके अनागतम्पि पुरेजातपच्चयभावेन अञ्ञत्थ आगतमेव. वुत्तञ्हि ‘‘अनिदस्सनअप्पटिघो धम्मो अनिदस्सनअप्पटिघस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं वत्थुं इत्थिन्द्रियं पुरिसिन्द्रियं आपोधातुं कबळीकारं आहारं अनिच्चतो…पे… दोमनस्सं उप्पज्जती’’ति (पट्ठा. २.२२.३९).

पच्चयुद्देसवण्णना निट्ठिता.

पच्चयनिद्देसो

१. हेतुपच्चयनिद्देसवण्णना

१. यो हेतुपच्चयोति उद्दिट्ठो, सो एवं वेदितब्बोति एतेन हेतुसङ्खातस्स पच्चयधम्मस्स हेतुसम्पयुत्तकतंसमुट्ठानरूपसङ्खातानं पच्चयुप्पन्नानं हेतुपच्चयेन पच्चयभावो हेतुपच्चयोति उद्दिट्ठोति. यो पन हेतुभावेन यथावुत्तो पच्चयधम्मो यथावुत्तानं पच्चयुप्पन्नानं पच्चयो होति, सो हेतुपच्चयोति उद्दिट्ठोति वेदितब्बोति दस्सेति. उभयथापि हेतुभावेन उपकारकता हेतुपच्चयोति उद्दिट्ठोति दस्सितं होति. एस नयो सेसपच्चयेसुपि. उपकारकता पन धम्मसभावो ¶ एव, न धम्मतो अञ्ञा अत्थीति. तथा तथा उपकारकं तं तं धम्मं दस्सेन्तो हि भगवा तं तं उपकारकतं दस्सेतीति.

हेतू हेतुसम्पयुत्तकानन्ति एत्थ पठमो हेतु-सद्दो पच्चत्तनिद्दिट्ठो पच्चयनिद्देसो. तेन एतस्स हेतुभावेन उपकारकता हेतुपच्चयताति दस्सेति. दुतियो पच्चयुप्पन्नविसेसनं. तेन न येसं केसञ्चि सम्पयुत्तकानं हेतुपच्चयभावेन पच्चयो होति, अथ खो हेतुना सम्पयुत्तानमेवाति दस्सेति. ननु च सम्पयुत्तसद्दस्स सापेक्खत्ता दुतिये हेतुसद्दे अविज्जमानेपि अञ्ञस्स अपेक्खितब्बस्स अनिद्दिट्ठत्ता अत्तनाव सम्पयुत्तकानं हेतुपच्चयेन पच्चयोति अयमत्थो विञ्ञायतीति? नायं एकन्तो. हेतुसद्दो हि पच्चत्तनिद्दिट्ठो ‘‘हेतुपच्चयेन पच्चयो’’ति एत्थेव ब्यावटो यदा गय्हति ¶ , तदा सम्पयुत्तविसेसनं न होतीति सम्पयुत्ता अविसिट्ठा ये केचि गहिता भवेय्युन्ति एवं सम्पयुत्तसद्देन अत्तनि एव ब्यावटेन हेतुसद्देन विसेसनेन विना येसं केसञ्चि सम्पयुत्तानं गहणं होतीति तं सन्धाय ‘‘अथापि…पे… अत्थो भवेय्या’’ति आह. ननु यथा ‘‘अरूपिनो आहारा सम्पयुत्तकानं धम्मान’’न्ति (पट्ठा. १.१.१५), ‘‘अरूपिनो इन्द्रिया सम्पयुत्तकान’’न्ति (पट्ठा. १.१.१६) च वुत्ते दुतियेन आहारग्गहणेन इन्द्रियग्गहणेन च विनापि आहारिन्द्रियसम्पयुत्तकाव गय्हन्ति, एवमिधापि सियाति? न, आहारिन्द्रियासम्पयुत्तस्स अभावतो. वज्जेतब्बाभावतो हि तत्थ दुतियआहारिन्द्रियग्गहणे असतिपि तंसम्पयुत्तकाव गय्हन्तीति तं न कतं, इध पन वज्जेतब्बं अत्थीति वत्तब्बं दुतियं हेतुग्गहणन्ति.

एवम्पि हेतू हेतुसम्पयुत्तकानन्ति एत्थ हेतुसम्पयुत्तकानं सो एव सम्पयुत्तकहेतूति विसेसनस्स अकतत्ता यो कोचि हेतु यस्स कस्सचि हेतुसम्पयुत्तकस्स हेतुपच्चयेन पच्चयोति आपज्जतीति? नापज्जति, पच्चत्तनिद्दिट्ठस्सेव हेतुस्स पुन सम्पयुत्तविसेसनभावेन वुत्तत्ता, एतदत्थमेव च विनापि दुतियेन हेतुसद्देन हेतुसम्पयुत्तभावे सिद्धेपि तस्स गहणं कतं. अथ वा असति दुतिये हेतुसद्दे हेतुसम्पयुत्तकानं हेतुपच्चयेन पच्चयो, न पन हेतूनन्ति एवम्पि गहणं सियाति तन्निवारणत्थं सो वुत्तो, तेन हेतुसम्पयुत्तभावं ये लभन्ति, तेसं सब्बेसं हेतूनं अञ्ञेसम्पि हेतुपच्चयेन पच्चयोति दस्सितं होति. यस्मा पन हेतुझानमग्गा पतिट्ठामत्तादिभावेन निरपेक्खा, न आहारिन्द्रिया विय सापेक्खा एव, तस्मा एतेस्वेव दुतियं हेतादिग्गहणं कतं. आहारिन्द्रिया पन आहरितब्बइसितब्बापेक्खा एव, तस्मा ¶ ते विनापि दुतियेन आहारिन्द्रियग्गहणेन अत्तना एव आहरितब्बे च इसितब्बे च आहारिन्द्रियभूते अञ्ञे च सम्पयुत्तके परिच्छिन्दन्तीति तं तत्थ न कतं, इध च दुतियेन हेतुग्गहणेन पच्चयुप्पन्नानं हेतुना पच्चयभूतेनेव सम्पयुत्तानं हेतूनं अञ्ञेसञ्च परिच्छिन्नत्ता पुन विसेसनकिच्चं नत्थीति पञ्हावारे ‘‘कुसला हेतू सम्पयुत्तकानं खन्धान’’न्तिआदीसु (पट्ठा. १.१.४०१) दुतियं हेतुग्गहणं न कतन्ति दट्ठब्बं.

निद्दिसितब्बस्स ¶ अपाकटत्ताति तं-सद्दो पुरिमवचनापेक्खो वुत्तस्सेव निद्देसो ‘‘रूपायतनं चक्खुविञ्ञाणधातुया तंसम्पयुत्तकान’’न्तिआदीसु (पट्ठा. १.१.२) पुरिमवचनेन निद्दिसितब्बे पाकटीभूते एव पवत्तति. एत्थ च पच्चत्तनिद्दिट्ठो हेतुसद्दो ‘‘हेतुपच्चयेन पच्चयो’’ति एत्थ ब्यावटो सम्पयुत्तसद्देन विय तं-सद्देनपि अनपेक्खनीयो अञ्ञो च कोचि निद्दिसितब्बप्पकासको वुत्तो नत्थि, तस्मा ‘‘तंसम्पयुत्तकान’’न्ति च न वुत्तन्ति अधिप्पायो.

‘‘हेतुसम्पयुत्तकान’’न्ति इमिना पन पच्चयुप्पन्नवचनेन असमत्तेन पच्चयुप्पन्नवचनन्तरापेक्खेन पुब्बे वुत्तेन तं-सद्देन निद्दिसितब्बं पाकटीकतं, तेन ‘‘तंसमुट्ठानान’’न्ति एत्थ तंगहणं कतन्ति. किं पन तस्मिं हेतुसम्पयुत्तकसद्दे तं-सद्देन निद्दिसितब्बं पाकटीभूतन्ति? येहि हेतूहि सम्पयुत्ता ‘‘हेतुसम्पयुत्तका’’ति वुत्ता, ते हेतू चेव सम्पयुत्तकविसेसनभूता तब्बिसेसिता च हेतुसम्पयुत्तका. तेनाह ‘‘ते हेतू चेवा’’तिआदि. अञ्ञथा ‘‘ते हेतू चेवा’’ति एतस्स पच्चत्तनिद्दिट्ठेन हेतुसद्देन सम्बन्धे सति यथा इध तेनेव तं-सद्देन निद्दिसितब्बा पाकटा, एवं पुब्बेपि भवितुं अरहन्तीति ‘‘निद्दिसितब्बस्स अपाकटत्ता ‘तंसम्पयुत्तकान’न्ति न वुत्त’’न्ति इदं न युज्जेय्याति. दुविधम्पि वा हेतुग्गहणं अपनेत्वा तंसद्दवचनीयतं चोदेति परिहरति च. तंसमुट्ठानानन्ति च हेतुसमुट्ठानानन्ति युत्तं. हेतू हि पच्चयाति.

चित्तजरूपं अजनयमानापीति पि-सद्देन जनयमानापि. यदि ‘‘चित्तसमुट्ठानान’’न्ति वचनेन पटिसन्धिक्खणे कटत्तारूपस्स अग्गहणतो तं न वुत्तं, सहजातपच्चयविभङ्गे चित्तचेतसिकानं तस्स कटत्तारूपस्स पच्चयभावो न वुत्तो भवेय्य. यदि च तत्थ चित्तसमुट्ठानानं पच्चयभावेन तंसमानलक्खणानं कटत्तारूपानम्पि पच्चयभावो निदस्सितो, एवमिधापि भवितब्बं. ‘‘चित्तसमुट्ठानान’’न्ति पन अवत्वा ‘‘तंसमुट्ठानान’’न्ति वचनं चित्तसमुट्ठानानं ¶ सब्बचित्तचेतसिकसमुट्ठानतादस्सनत्थं. एवंपकारेन हि तंसमुट्ठानवचनेन तत्थ तत्थ वुत्तं समुट्ठानवचनं विसेसितं होति. ननु ‘‘चित्तचेतसिका धम्मा चित्तसमुट्ठानान’’न्ति वचनेन चित्तसमुट्ठानानं चित्तचेतसिकसमुट्ठानता वुत्ताति? न वुत्ता. चित्तचेतसिकानं पच्चयभावो एव हि तत्थ वुत्तोति.

चित्तपटिबद्धवुत्तितायाति ¶ एतेनेव हेतुआदिपटिबद्धतञ्च दस्सेति. ‘‘यञ्च, भिक्खवे, चेतेति, यञ्च पकप्पेति, यञ्च अनुसेति, आरम्मणमेतं होति, विञ्ञाणस्स ठितिया आरम्मणे सति पतिट्ठा विञ्ञाणस्स होति, तस्मिं पतिट्ठिते विञ्ञाणे विरुळ्हे नामरूपस्स अवक्कन्ति होति, नामरूपपच्चया सळायतन’’न्ति (सं. नि. २.३९) इमस्मिम्पि सुत्ते पटिसन्धिनामरूपस्स विञ्ञाणपच्चयता वुत्ताति आह ‘‘तस्मिं पतिट्ठिते’’तिआदि.

पुरिमतरसिद्धाय पथविया बीजपतिट्ठानं विय पुरिमतरसिद्धे कम्मे तन्निब्बत्तस्सेव विञ्ञाणबीजस्स पतिट्ठानं कम्मस्स कटत्ता उप्पत्तीति वुत्तं होति. तेनाह – ‘‘कम्मं खेत्तं, विञ्ञाणं बीज’’न्ति. कस्स पन तं खेत्तं बीजञ्चाति? नामरूपङ्कुरस्स.

अयञ्च पनत्थोति पटिसन्धियं कम्मजरूपानं चित्तपटिबद्धवुत्तिता. ओकासवसेनेवाति नामरूपोकासवसेनेव. सो हि तस्स अत्थस्स ओकासोति. वत्थुरूपमत्तम्पीति वदन्तो वत्थुरूपस्स उपत्थम्भकानं सेसरूपानम्पि तदुपत्थम्भकभावेनेव अरूपधम्मानं पच्चयभावं दस्सेति, सहभवनमत्तं वा. तत्थ कायभावादिकलापानं कत्थचि अभावतो कत्थचि अभावाभावतो ‘‘वत्थुरूपमत्तम्पि विना’’ति आह. सस्सामिकेति एतस्सेव विसेसनत्थं ‘‘सराजके’’ति वुत्तं.

पवत्तियं कटत्तारूपादीनं पच्चयभावपटिबाहनतोति इदं कस्मा वुत्तं, ननु तेसं पच्चयभावप्पसङ्गोयेव नत्थि ‘‘हेतू सहजातान’’न्ति (पट्ठा. अट्ठ. १.१) वचनतो. न हि येसं हेतू सहजातपच्चयो न होन्ति, तानि हेतुसहजातानि नाम होन्ति. यदि सियुं, ‘‘कुसलं धम्मं सहजातो अब्याकतो धम्मो उप्पज्जति न हेतुपच्चया’’तिआदि च लब्भेय्य, न पन लब्भति, तस्मा न तानि हेतुसहजातानीति? सच्चमेतं, यो पन हेतूहि समानकालुप्पत्तिमत्तं गहेत्वा हेतुसहजातभावं मञ्ञेय्य, तस्सायं पसङ्गो अत्थीति इदं वुत्तन्ति दट्ठब्बं. भगवा पन वचनानं लहुगरुभावं न गणेति, बोधनेय्यानं पन अज्झासयानुरूपतो धम्मसभावं ¶ अविलोमेन्तो तथा तथा देसनं नियामेतीति न कत्थचि अक्खरानं बहुता वा अप्पता वा चोदेतब्बाति.

हेतुपच्चयनिद्देसवण्णना निट्ठिता.

२. आरम्मणपच्चयनिद्देसवण्णना

२. उप्पज्जनक्खणेयेवाति ¶ एतेन वत्तमानक्खणेकदेसेन सब्बं वत्तमानक्खणं गय्हतीति दट्ठब्बं. न हि उप्पज्जनक्खणेयेव चक्खुविञ्ञाणादीनं रूपादीनि आरम्मणपच्चयो, अथ खो सब्बस्मिं वत्तमानक्खणेति. तेन आलम्बियमानानम्पि रूपादीनं चक्खुविञ्ञाणादिवत्तमानताय पुरे पच्छा च विज्जमानानं आरम्मणपच्चयत्ताभावं दस्सेति, को पन वादो अनालम्बियमानानं. न एकतो होन्तीति नीलादीनि सब्बरूपानि सह न होन्ति, तथा सद्दादयोपीति अत्थो. ‘‘यं य’’न्ति हि वचनं रूपादीनि भिन्दतीति. तत्थ पुरिमेनत्थेन ‘‘उप्पज्जन्ती’’ति वचनेन आरम्मणपच्चयभावलक्खणदीपनत्थं ‘‘यं यं धम्म’’न्तिआदि वुत्तन्ति दस्सेति, पच्छिमेन ‘‘यं य’’न्ति वचनेन रूपादिभेददीपनत्थन्ति. ‘‘यं यं वा पनारब्भा’’ति एतस्स वण्णनायं दस्सितसब्बारम्मणादिवसेन वा इधापि अत्थो गहेतब्बोति.

एवं वुत्तन्ति यथा नदीपब्बतानं सन्दनं ठानञ्च पवत्तं अविरतं अविच्छिन्नन्ति सन्दन्ति तिट्ठन्तीति वत्तमानवचनं वुत्तं, एवं ‘‘ये ये धम्मा’’ति अतीतानागतपच्चुप्पन्नानं सब्बसङ्गहसमुदायवसेन गहितत्ता तेसं उप्पज्जनं पवत्तनं अविरतन्ति उप्पज्जन्तीति वत्तमानवचनं वुत्तन्ति अधिप्पायो. इमे पन न हेतादिपच्चया सब्बेपि अतीतानागतानं होन्ति. न हि अतीतो च अनागतो च अत्थि, यस्सेते पच्चया सियुं. एवञ्च कत्वा अतीतत्तिके अतीतानागतानं न कोचि पच्चयो वुत्तो, तस्मा इधापि ‘‘उप्पज्जन्ती’’ति वचनेन येसं रूपादयो आरम्मणधम्मा आरम्मणपच्चया होन्ति, ते पच्चुप्पन्नाव दस्सिताति दट्ठब्बा. तेसु हि दस्सितेसु अतीतानागतेसु तंतंपच्चया अहेसुं भविस्सन्ति चाति अयमत्थो दस्सितो होति, न पन तंतंपच्चयवन्तता. पच्चयवन्तो हि पच्चुप्पन्नायेवाति.

एत्थ ¶ च ‘‘यं यं धम्मं आरब्भा’’ति एकवचननिद्देसं कत्वा पुन ‘‘ते ते धम्मा’’ति बहुवचननिद्देसो ‘‘यं य’’न्ति वुत्तस्स आरम्मणधम्मस्स अनेकभावोपि अत्थीति दस्सनत्थो. चत्तारो हि खन्धा सहेव आरम्मणपच्चया होन्ति, ते सब्बेपि आरब्भ उप्पज्जमानम्पि तेसु एकेकं आरब्भ उप्पज्जमानं न न होति, तस्मा वेदनादीसु फस्सादीसु च एकेकस्सपि आरम्मणपच्चयभावदस्सनत्थं ‘‘यं य’’न्ति वुत्तं, सब्बेसं एकचित्तुप्पादपरियापन्नानं ¶ आरम्मणपच्चयभावदस्सनत्थं ‘‘ते ते’’ति. तत्थ यो च रूपादिको एकेकोव यंयं-सद्देन वुत्तो, ये च अनेके फस्सादयो एकेकवसेन यंयं-सद्देन वुत्ता, ते सब्बे गहेत्वा ‘‘ते ते’’ति वुत्तन्ति दट्ठब्बं. अथ वा यस्मिं काले आरब्भ उप्पज्जन्ति, तस्मिं काले नीलादीसु चित्तुप्पादेसु च एकेकमेव आरब्भ उप्पज्जन्तीति दस्सनत्थं ‘‘यं य’’न्ति वुत्तं, ते पन आलम्बियमाना रूपारम्मणधम्मा च अनेके, तथा सद्दादिआरम्मणधम्मा चाति दस्सनत्थं ‘‘ते ते’’ति.

निब्बानारम्मणं कामावचररूपावचरकुसलस्स अपरियापन्नतो कुसलविपाकस्स कामावचररूपावचरकिरियस्स चाति इमेसं छन्नं रासीनं आरम्मणपच्चयो होतीति इदं पुब्बेनिवासानुस्सतिञाणेन खन्धपटिबद्धानुस्सरणकाले निब्बानम्पि रूपावचरकुसलकिरियानं आरम्मणं होतीति इमिना अधिप्पायेन वुत्तं. एवं सति यथा ‘‘अप्पमाणा खन्धा पुब्बेनिवासानुस्सतिञाणस्स आरम्मणपच्चयेन पच्चयो’’ति (पट्ठा. २.१२.५८) वुत्तं, एवं ‘‘निब्बान’’न्ति च वत्तब्बं सिया, न च तं वुत्तं. न हि निब्बानं पुब्बे निवुट्ठं असङ्खतत्ता, न च पुब्बेनिवासानुस्सतिञाणेन पुब्बे निवुट्ठेसु अप्पमाणक्खन्धेसु ञातेसु निब्बानजानने न तेन पयोजनं अत्थि. यथा हि चेतोपरियञाणं चित्तं विभावेन्तमेव चित्तारम्मणजाननस्स कामावचरस्स पच्चयो होति, एवमिदम्पि अप्पमाणक्खन्धे विभावेन्तमेव तदारम्मणजाननस्स कामावचरस्स पच्चयो होतीति. दिट्ठनिब्बानोयेव च पुब्बे निवुट्ठे अप्पमाणक्खन्धे अनुस्सरति, तेन यथादिट्ठमेव निब्बानं तेसं खन्धानं आरम्मणन्ति दट्ठब्बं, न पन पुब्बेनिवासानुस्सतिञाणेन तदारम्मणविभावनं कातब्बं. विभूतमेव हि तं तस्साति. एवं अनागतंसञाणेपि यथारहं योजेतब्बं, तस्मा निब्बानं न कस्सचि रूपावचरस्स आरम्मणन्ति ‘‘चतुन्नं रासीन’’न्ति वत्तुं युत्तं.

आरम्मणपच्चयनिद्देसवण्णना निट्ठिता.

३. अधिपतिपच्चयनिद्देसवण्णना

३. धुरन्ति ¶ ¶ धुरग्गाहं. जेट्ठकन्ति सेट्ठं. छन्दाधिपति छन्दसम्पयुत्तकानन्ति एत्थ पुरिमछन्दस्स समानरूपेन तदनन्तरं निद्दिट्ठेन तंसम्बन्धेन छन्दसद्देनेव पच्चयभूतस्स छन्दस्स सम्पयुत्तकविसेसनभावो दस्सितो होतीति ‘‘छन्दाधिपति सम्पयुत्तकान’’न्ति अवत्वा ‘‘छन्दसम्पयुत्तकान’’न्ति वुत्तन्ति दट्ठब्बं. एस नयो इतरेसुपि.

गरुकारचित्तीकारवसेन वाति कुसलाब्याकतानं पवत्तिं दस्सेति. अलद्धं लद्धब्बं, लद्धं अविजहितब्बं. येन वा विना न भवितब्बं, तं लद्धब्बं, तस्सेवत्थो अविजहितब्बन्ति. अनवञ्ञातन्ति अवञ्ञातम्पि अदोसदस्सिताय अस्सादनेन अनवञ्ञातं कत्वा.

मिच्छत्तनियता अप्पनासदिसा महाबला विना अधिपतिना नुप्पज्जन्तीति ‘‘एकन्तेनेवा’’ति आह. कम्मकिलेसावरणभूता च ते सग्गावरणा च मग्गावरणा च पच्चक्खसग्गानं कामावचरदेवानम्पि उप्पज्जितुं न अरहन्ति, को पन वादो रूपारूपीनन्ति.

कामावचरादिभेदतो पन तिविधो किरियारम्मणाधिपति लोभसहगताकुसलस्सेव आरम्मणाधिपतिपच्चयो होतीति इदं परसन्तानगतानं सारम्मणधम्मानं ‘‘अज्झत्तारम्मणो धम्मो बहिद्धारम्मणस्स धम्मस्स अधिपतिपच्चयेन पच्चयो’’ति एतस्स अभावतो ‘‘बहिद्धारम्मणो धम्मो बहिद्धारम्मणस्सा’’ति एत्थ च आरम्मणाधिपतिनो अनुद्धटत्ता अधिपतिपच्चयता नत्थीति विञ्ञायमानेपि ‘‘बहिद्धा खन्धे गरुं कत्वा अस्सादेती’’तिआदिवचनं (पट्ठा. २.२०.३१) निस्साय अरहतो किरियधम्मा पुथुज्जनादीहि गरुं कत्वा अस्सादियन्तीति इमिना अधिप्पायेन वुत्तन्ति दट्ठब्बं. ‘‘सनिदस्सनसप्पटिघा खन्धा’’तिआदीसु (पट्ठा. २.२२.३०) विय खन्धसद्दो रूपे एव भवितुं अरहतीति विचारितमेतं. पुथुज्जनादिकाले वा अनागते किरियधम्मे गरुं कत्वा अस्सादनं सन्धायेतं वुत्तं. ‘‘नेवविपाकनविपाकधम्मधम्मे खन्धे गरुं कत्वा अस्सादेति अभिनन्दती’’तिआदिवचनतो (पट्ठा. १.३.९६) किरियधम्मा रागदिट्ठीनं अधिपतिपच्चयो होन्तेव, ते च ‘‘अतीतारम्मणे अनागते खन्धे गरुं कत्वा अस्सादेती’’तिआदिवचनतो ¶ (पट्ठा. २.१९.२३) अनागता तेभूमकापि अधिपतिपच्चयो होन्तीति. आवज्जनकिरियसब्भावतो पन इदम्पि विचारेतब्बं.

अधिपतिपच्चयनिद्देसवण्णना निट्ठिता.

४. अनन्तरपच्चयनिद्देसवण्णना

४. यथा ¶ ओकासदानविसेसभावेन नत्थिविगता वुत्ता, न एवं अनन्तरसमनन्तरा, एते पन चित्तनियामहेतुविसेसभावेन वुत्ता, तस्मा तं चित्तनियामहेतुविसेसभावं दस्सेन्तो ‘‘चक्खुविञ्ञाणधातू’’तिआदिना धातुवसेन कुसलादिवसेन च निद्देसमाह. तत्थ ‘‘मनोविञ्ञाणधातु मनोविञ्ञाणधातुया’’ति वुत्ते पच्चयपच्चयुप्पन्नविसेसो न विञ्ञायतीति ‘‘पुरिमा पुरिमा पच्छिमाय पच्छिमाया’’ति वत्तब्बं सिया. तथा च सति धातुविसेसेन चित्तविसेसे दस्सनं यं कातुं आरद्धो, तं वोच्छिज्जेय्य. ‘‘मनोविञ्ञाणधातु मनोधातुया’’ति इदम्पि न सक्का वत्तुं नियामाभावतो, ‘‘मनोधातु चक्खुविञ्ञाणधातुया’’ति च तथेव न सक्का. न हि मनोधातु चक्खुविञ्ञाणधातुयायेव अनन्तरपच्चयोति नियामो अत्थि, तस्मा पाकटा पञ्चविञ्ञाणधातुयो आदिं कत्वा याव धातुविसेसनियामो अत्थि, ताव निदस्सनेन नयं दस्सेत्वा पुन निरवसेसदस्सनत्थं ‘‘पुरिमा पुरिमा कुसला’’तिआदिमाह. सदिसकुसलानन्ति वेदनाय वा हेतूहि वा सदिसकुसलानं अनुरूपकुसलानन्ति वा अत्थो. तेन भूमिभिन्नानम्पि पच्चयभावो वुत्तो होति. भवङ्गग्गहणेन कुसलाकुसलमूलकेसु चुतिपि गहिताति दट्ठब्बं, अब्याकतमूलके तदारम्मणम्पि.

कामावचरकिरियावज्जनस्साति कामावचरकिरियाय आवज्जनस्साति आवज्जनग्गहणेन कामावचरकिरियं विसेसेतीति दट्ठब्बं. कामावचरविपाको कामावचरकिरियरासिस्स च अनन्तरपच्चयो होति, होन्तो च आवज्जनस्सेवाति अयञ्हेत्थ अधिप्पायो. आवज्जनग्गहणेनेव चेत्थ वोट्ठब्बनम्पि गहितन्ति दट्ठब्बं.

अनन्तरपच्चयनिद्देसवण्णना निट्ठिता.

६. सहजातपच्चयनिद्देसवण्णना

६. ‘‘अञ्ञमञ्ञस्साति ¶ अञ्ञो अञ्ञस्सा’’ति पोराणपाठो. पाळियं पन ‘‘अञ्ञमञ्ञं सहजातपच्चयेन पच्चयो’’ति एत्थ वुत्तस्स ‘‘अञ्ञमञ्ञ’’न्ति इमस्स अत्थो वत्तब्बो ¶ , न अवुत्तस्स ‘‘अञ्ञमञ्ञस्सा’’ति इमस्स, न च समानत्थस्सपि सद्दन्तरस्स अत्थे वुत्ते सद्दन्तरस्स अत्थो वुत्तो होति, तस्मा ‘‘अञ्ञमञ्ञन्ति अञ्ञो अञ्ञस्सा’’ति पठन्ति. ओक्कन्तीति पञ्चवोकारपटिसन्धियेव वुच्चति, न इतराति इमिना अधिप्पायेनाह ‘‘पञ्चवोकारभवे पटिसन्धिक्खणे’’ति. रूपिनो धम्मा अरूपीनं धम्मानन्ति इदं यदिपि पुब्बे ‘‘ओक्कन्तिक्खणे नामरूप’’न्ति वुत्तं, तथापि न तेन खणन्तरे पच्चयभावो रूपीनं निवारितोति तन्निवारणत्थं वुत्तं. कञ्चि कालेति केचि किस्मिञ्चि कालेति वा अत्थो. तेन रूपिनो धम्मा केचि वत्थुभूता किस्मिञ्चि पटिसन्धिकालेति रूपन्तरानं वत्थुस्स च कालन्तरे अरूपीनं सहजातपच्चयं पुब्बे अनिवारितं निवारेति. एवञ्च कत्वा ‘‘कञ्चि काल’’न्ति वा ‘‘किस्मिञ्चि काले’’ति वा वत्तब्बे विभत्तिविपल्लासो कतो. तेन हि ‘‘कञ्ची’’ति उपयोगेकवचनं ‘‘रूपिनो धम्मा’’ति एतेन सह सम्बन्धेन पच्चत्तबहुवचनस्स आदेसो, ‘‘काले’’ति इमिना सम्बन्धेन भुम्मेकवचनस्साति विञ्ञायति. पुरिमेन च ‘‘एको खन्धो वत्थु च तिण्णन्नं खन्धान’’न्तिआदिना नामसहितस्सेव वत्थुस्स ‘‘नामस्स पच्चयो’’ति वत्तब्बत्ते आपन्ने एतेन केवलस्सेव तथा वत्तब्बतं दस्सेति.

तयो न अञ्ञमञ्ञवसेनाति लब्भमानेपि कत्थचि अञ्ञमञ्ञसहजातपच्चयभावे वचनेन असङ्गहितत्ता तस्स एवं वुत्तन्ति दट्ठब्बं. चतुसमुट्ठानिकस्स रूपस्स एकदेसभूते कम्मसमुट्ठानरूपे समुदायेकदेसवसेन सामिवचनं दट्ठब्बं, निद्धारणे वा.

सहजातपच्चयनिद्देसवण्णना निट्ठिता.

८. निस्सयपच्चयनिद्देसवण्णना

८. निस्सयपच्चयनिद्देसे ‘‘रूपिनो धम्मा अरूपीनं धम्मानं किस्मिञ्चि काले’’ति इदं न लब्भति. यं पनेत्थ लब्भति ‘‘रूपिनो धम्मा केची’’ति, तत्थ ¶ ते एव धम्मे दस्सेतुं ‘‘चक्खायतन’’न्तिआदि वुत्तन्ति. ‘‘वत्थुरूपं पञ्चवोकारभवे’’ति वुत्तत्ता ‘‘ठपेत्वा आरुप्पविपाक’’न्ति ¶ इदं न वत्तब्बन्ति चे? न, ‘‘तेभूमकविपाकस्सा’’ति वुत्ते पञ्चवोकारभवे अनुप्पज्जनकं ठपेतब्बं अजानन्तस्स तस्स पकासेतब्बत्ता.

निस्सयपच्चयनिद्देसवण्णना निट्ठिता.

९. उपनिस्सयपच्चयनिद्देसवण्णना

९. ते तयोपि रासयोति उपनिस्सये तयो अनेकसङ्गाहकताय रासयोति वदति. एतस्मिं पन उपनिस्सयनिद्देसे ये पुरिमा येसं पच्छिमानं अनन्तरूपनिस्सया होन्ति, ते तेसं सब्बेसं एकन्तेनेव होन्ति, न केसञ्चि कदाचि, तस्मा येसु पदेसु अनन्तरूपनिस्सयो सङ्गहितो, तेसु ‘‘केसञ्ची’’ति न सक्का वत्तुन्ति न वुत्तं. ये पन पुरिमा येसं पच्छिमानं आरम्मणपकतूपनिस्सया होन्ति, ते तेसं न सब्बेसं एकन्तेन होन्ति, येसं उप्पत्तिपटिबाहिका पच्चया बलवन्तो होन्ति, तेसं न होन्ति, इतरेसं होन्ति. तस्मा येसु पदेसु अनन्तरूपनिस्सयो न लब्भति, तेसु ‘‘केसञ्ची’’ति वुत्तं. सिद्धानं पच्चयधम्मानं येहि पच्चयुप्पन्नेहि अकुसलादीहि भवितब्बं, तेसं केसञ्चीति अयञ्चेत्थ अत्थो, न पन अविसेसेन अकुसलादीसु केसञ्चीति.

पुरिमा पुरिमा कुसला…पे… अब्याकतानं धम्मानन्ति येसं उपनिस्सयपच्चयेन भवितब्बं, तेसं अब्याकतानं पच्छिमानन्ति दट्ठब्बं. न हि रूपाब्याकतं उपनिस्सयं लभतीति. कथं? आरम्मणानन्तरूपनिस्सये ताव न लभति अनारम्मणत्ता पुब्बापरनियमेन अप्पवत्तितो च, पकतूपनिस्सयञ्च न लभति अचेतनेन रूपसन्तानेन पकतस्स अभावतो. यथा हि अरूपसन्तानेन सद्धादयो निप्फादिता उतुभोजनादयो च उपसेविता, न एवं रूपसन्तानेन. यस्मिञ्च उतुबीजादिके कम्मादिके च सति रूपं पवत्तति, न तं तेन पकतं होति. सचेतनस्सेव हि उप्पादनुपत्थम्भनुपयोगादिवसेन चेतनं पकप्पनं पकरणं, रूपञ्च अचेतनन्ति. यथा च निरीहकेसु पच्चयायत्तेसु धम्मेसु केसञ्चि सारम्मणसभावता होति, केसञ्चि न, एवं ¶ सप्पकरणसभावता निप्पकरणसभावता च दट्ठब्बा. उतुबीजादयो पन ¶ अङ्कुरादीनं तेसु असन्तेसु अभावतो एव पच्चया, न पन उपनिस्सयादिभावतोति. पुरिमपुरिमानंयेव पनेत्थ उपनिस्सयपच्चयभावो बाहुल्लवसेन पाकटवसेन च वुत्तो. ‘‘अनागते खन्धे पत्थयमानो दानं देती’’तिआदिवचनतो (पट्ठा. २.१८.८) पन अनागतापि उपनिस्सयपच्चया होन्ति, ते पुरिमेहि आरम्मणपकतूपनिस्सयेहि तंसमानलक्खणताय इध सङ्गय्हन्तीति दट्ठब्बा.

पुग्गलोपि सेनासनम्पीति पुग्गलसेनासनग्गहणवसेन उपनिस्सयभावं भजन्ते धम्मे दस्सेति, पि-सद्देन चीवरारञ्ञरुक्खपब्बतादिग्गहणवसेन उपनिस्सयभावं भजन्ते सब्बे सङ्गण्हाति. ‘‘अब्याकतो धम्मो अब्याकतस्स धम्मस्स उपनिस्सयपच्चयेन पच्चयो’’तिआदीसु हि ‘‘सेनासनं कायिकस्स सुखस्सा’’तिआदिवचनेन सेनासनग्गहणेन उपनिस्सयभावं भजन्ताव धम्मा उपनिस्सयपच्चयेन पच्चयोति इममत्थं दस्सेन्तेन पुग्गलादीसुपि अयं नयो दस्सितो होतीति. पच्चुप्पन्नापि आरम्मणपकतूपनिस्सया पच्चुप्पन्नताय सेनासनसमानलक्खणत्ता एत्थेव सङ्गहिताति दट्ठब्बा. वक्खति हि ‘‘पच्चुप्पन्नं उतुं भोजनं सेनासनं उपनिस्साय झानं उप्पादेती’’तिआदिना सेनासनस्स पच्चुप्पन्नभावं विय पच्चुप्पन्नानं उतुआदीनं पकतूपनिस्सयभावं, ‘‘पच्चुप्पन्नं चक्खुं…पे… वत्थुं पच्चुप्पन्ने खन्धे गरुं कत्वा अस्सादेती’’तिआदिना (पट्ठा. २.१८.४) चक्खादीनं आरम्मणूपनिस्सयभावञ्चाति. पच्चुप्पन्नानम्पि च तादिसानं पुब्बे पकतत्ता पकतूपनिस्सयता दट्ठब्बा.

कसिणारम्मणादीनि आरम्मणमेव होन्ति, न उपनिस्सयोति इमिना अधिप्पायेन ‘‘एकच्चाया’’ति आह.

अरूपावचरकुसलम्पि यस्मिं कसिणादिम्हि झानं अनुप्पादितं, तस्मिं अनुप्पन्नझानुप्पादने सब्बस्स च उप्पन्नझानस्स समापज्जने इद्धिविधादीनं अभिञ्ञानञ्च उपनिस्सयोति इममत्थं सन्धायाह ‘‘तेभूमककुसलो चतुभूमकस्सपि कुसलस्सा’’ति. वुत्तम्पि चेतं ‘‘अरूपावचरं सद्धं उपनिस्साय रूपावचरं झानं विपस्सनं मग्गं अभिञ्ञं समापत्तिं उप्पादेती’’ति (पट्ठा. ४.१३.२८५). कामावचरकुसलं रूपावचरारूपावचरविपाकानम्पि तदुप्पादककुसलानं उपनिस्सयभाववसेन ¶ , पटिसन्धिनियामकस्स चुतितो पुरिमजवनस्स च वसेन उपनिस्सयो, रूपावचरकुसलं अरूपावचरविपाकस्स, अरूपावचरकुसलञ्च रूपावचरविपाकस्स ¶ तदुप्पादककुसलूपनिस्सयभावेनाति एवं पच्चेकं तेभूमककुसलानं चतुभूमकविपाकस्स तेभूमककिरियस्स च यथायोगं पच्चयभावो वेदितब्बो. पाळियम्पि हि पकतूपनिस्सयो नयदस्सनमत्तेनेव पञ्हावारेसु विस्सज्जितोति.

इमिना पन नयेनाति लोकुत्तरनिब्बत्तनं उपनिस्साय सिनेहुप्पादनलेसेनाति अत्थो. लोकुत्तरा पन धम्मा अकुसलानं न केनचि पच्चयेन पच्चयो होन्तीति न इदं सारतो दट्ठब्बन्ति अधिप्पायो. कामावचरादितिहेतुकभवङ्गं कायिकसुखादि च रूपावचरादिकुसलानं उपनिस्सयो, अरूपावचरविपाको रूपावचरकुसलस्स तं पत्थेत्वा तन्निब्बत्तककुसलुप्पादनत्थं उप्पादियमानस्स, रूपावचरकिरियस्स च पुब्बे निवुट्ठादीसु अरूपावचरविपाकजाननत्थं झानाभिञ्ञायो उप्पादेन्तस्स अरहतो, चतुभूमकविपाकानं पन तदुप्पादककुसलूपनिस्सयभाववसेन सो सो विपाको उपनिस्सयो. तेनाह ‘‘तथा तेभूमकविपाको’’ति. यदिपि अरहत्तफलत्तं झानविपस्सना उप्पादेति अनागामी, न पन तेन तं कदाचि दिट्ठपुब्बं पुथुज्जनादीहि सोतापत्तिफलादीनि विय, तस्मा तानि विय तेसं झानादीनं इमस्स च अग्गफलं न झानादीनं उपनिस्सयो. उपलद्धपुब्बसदिसमेव हि अनागतम्पि उपनिस्सयोति. तेनाह ‘‘उपरिट्ठिमं कुसलस्सपी’’ति.

किरियअत्थपटिसम्भिदादिम्पि पत्थेत्वा दानादिकुसलं करोन्तस्स तेभूमककिरियापि चतुभूमकस्सपि कुसलस्स उपनिस्सयपच्चयेन पच्चयो. योनिसोमनसिकारे वत्तब्बमेव नत्थि, तं उपनिस्साय रागादिउप्पादने अकुसलस्स, कुसलाकुसलूपनिस्सयभावमुखेन चतुभूमकविपाकस्स. एवं किरियस्सपि योजेतब्बं. तेनाह ‘‘किरियसङ्खातोपि पकतूपनिस्सयो चतुभूमकानं कुसलादिखन्धानं होतियेवा’’ति. नेवविपाकनविपाकधम्मधम्मेसु पन उतुभोजनसेनासनानमेव तिण्णं रासीनं पकतूपनिस्सयभावदस्सनं नयदस्सनमेवाति. इमस्मिं पट्ठानमहापकरणे आगतनयेनाति इदं ‘‘कुसलं धम्मं पटिच्च अब्याकतो धम्मो उप्पज्जति न उपनिस्सयपच्चया, कुसले खन्धे पटिच्च चित्तसमुट्ठानं रूप’’न्ति ¶ (पट्ठा. १.१.९१) एवमादिकं उपनिस्सयपटिक्खेपं, अनुलोमे च अनागमनं सन्धाय वुत्तं. सुत्तन्तिकपरियायेनाति ‘‘विञ्ञाणूपनिसं नामरूपं, नामरूपनिसं सळायतन’’न्तिआदिकेन (सं. नि. २.२३),

‘‘यथापि ¶ पब्बतो सेलो, अरञ्ञस्मिं ब्रहावने;

तं रुक्खा उपनिस्साय, वड्ढन्ते ते वनप्पती’’ति (अ. नि. ३.४९). –

आदिकेन च.

उपनिस्सयपच्चयनिद्देसवण्णना निट्ठिता.

१०. पुरेजातपच्चयनिद्देसवण्णना

१०. नयदस्सनवसेन यानि विना आरम्मणपुरेजातेन न वत्तन्ति, तेसं चक्खुविञ्ञाणादीनं आरम्मणपुरेजातदस्सनेन मनोद्वारेपि यं यदारम्मणपुरेजातेन वत्तति, तस्स तदालम्बितं सब्बम्पि रूपरूपं आरम्मणपुरेजातन्ति दस्सितमेव होति, सरूपेन पन अदस्सितत्ता ‘‘सावसेसवसेन देसना कता’’ति आह. चित्तवसेन कायं परिणामयतो इद्धिविधाभिञ्ञाय च अट्ठारससु यंकिञ्चि आरम्मणपुरेजातं होतीति दट्ठब्बं.

तदारम्मणभाविनोति एत्थ पटिसन्धिभाविनो वत्थुपुरेजाताभावेन इतरस्सपि अभावा अग्गहणं. भवङ्गभाविनो पन गहणं कातब्बं न वा कातब्बं पटिसन्धिया विय अपरिब्यत्तस्स आरम्मणस्स आरम्मणमत्तभावतो, ‘‘मनोधातूनञ्चा’’ति एत्थ सन्तीरणभाविनो मनोविञ्ञाणधातुयापि.

पुरेजातपच्चयनिद्देसवण्णना निट्ठिता.

११. पच्छाजातपच्चयनिद्देसवण्णना

११. तस्सेवाति ¶ ¶ इदं कामावचररूपावचरविपाकानं निरवसेसदस्सितपुरेजातदस्सनवसेन वुत्तं, रूपावचरविपाको पन आहारसमुट्ठानस्स न होतीति.

पच्छाजातपच्चयनिद्देसवण्णना निट्ठिता.

१२. आसेवनपच्चयनिद्देसवण्णना

१२. पगुणतरबलवतरभावविसिट्ठन्ति एतेन विपाकाब्याकततो विसेसेति.

आसेवनपच्चयनिद्देसवण्णना निट्ठिता.

१३. कम्मपच्चयनिद्देसवण्णना

१३. चेतनासम्पयुत्तकम्मं अभिज्झादि कम्मपच्चयो न होतीति ‘‘चेतनाकम्ममेवा’’ति आह. सतिपि हि विपाकधम्मधम्मत्ते न चेतनावज्जा एवंसभावाति. अत्तनो फलं उप्पादेतुं समत्थेनाति कम्मस्स समत्थता तस्स कम्मपच्चयभावो वुत्ताति दट्ठब्बा.

पञ्चवोकारेयेव, न अञ्ञत्थाति एतेन कामावचरचेतना एकवोकारे रूपम्पि न जनेतीति दस्सेति.

कम्मपच्चयनिद्देसवण्णना निट्ठिता.

१४. विपाकपच्चयनिद्देसवण्णना

१४. विपाकपच्चयनिद्देसे ¶ येसं एकन्तेन विपाको विपाकपच्चयो होति, तेसं वसेन नयदस्सनं कतं. न हि आरुप्पे भूमिद्वयविपाको रूपस्स पच्चयो होति.

विपाकपच्चयनिद्देसवण्णना निट्ठिता.

१५. आहारपच्चयनिद्देसवण्णना

१५. कबळं ¶ करित्वा अज्झोहरितोवाति असितपीतादिवत्थूहि सह अज्झोहरितोवाति वुत्तं होति. पातब्बसायितब्बानिपि हि सभाववसेन कबळायेव होन्तीति.

सेसतिसन्ततिसमुट्ठानस्स अनुपालकोव हुत्वाति एत्थ चित्तसमुट्ठानस्स आहारपच्चयभावो विचारेत्वा गहेतब्बो. न हि चित्तसमुट्ठानो कबळीकारो आहारो नोचित्तसमुट्ठानो तदुभयञ्च चित्तसमुट्ठानकायस्स आहारपच्चयो वुत्तो, तिविधोपि पन सो नोचित्तसमुट्ठानकायस्स वुत्तोति.

आहारपच्चयनिद्देसवण्णना निट्ठिता.

१६. इन्द्रियपच्चयनिद्देसवण्णना

१६. अरूपजीवितिन्द्रियम्पि सङ्गहितन्ति मिस्सकत्ता जीवितिन्द्रियं न सब्बेन सब्बं वज्जितब्बन्ति अधिप्पायो.

अविनिब्भुत्तधम्मानन्ति एत्थ अयं अधिप्पायो – रूपारूपानं अञ्ञमञ्ञं अविनिब्भुत्तवोहारो नत्थीति अरूपानं इन्द्रियपच्चयभूतानि पच्चयन्तरापेक्खानि चक्खादीनि अत्तनो ¶ विज्जमानक्खणे अविनिब्भुत्तधम्मानं इन्द्रियपच्चयतं अफरन्तानिपि इन्द्रियपच्चया सियुं. यो पन निरपेक्खो इन्द्रियपच्चयो अविनिब्भुत्तधम्मानं होति, सो अत्तनो विज्जमानक्खणे तेसं इन्द्रियपच्चयतं अफरन्तो नाम नत्थि. यदि च इत्थिन्द्रियपुरिसिन्द्रियानि इन्द्रियपच्चयो लिङ्गादीनं सियुं, अविनिब्भुत्तानं तेसम्पि सियुं. न हि रूपं रूपस्स, अरूपं वा अरूपस्स विनिब्भुत्तस्स इन्द्रियपच्चयो अत्थीति. सति चेवं इत्थिपुरिसिन्द्रियेहि अविनिब्भुत्तत्ता कललादिकाले च लिङ्गादीनि सियुं, येसं तानि इन्द्रियपच्चयतं फरेय्युं, न च फरन्ति. तस्मा न तेहि तानि अविनिब्भुत्तकानि, अविनिब्भुत्तत्ताभावतो च तेसं इन्द्रियपच्चयतं न फरन्ति. अञ्ञेसं पन येहि तानि सहजातानि, तेसं अबीजभावतोयेव न फरन्ति, तस्मा आपन्नविनिब्भुत्तभावानं तेसं लिङ्गादीनं अविनिब्भुत्तानं अञ्ञेसञ्च समानकलापधम्मानं इन्द्रियपच्चयताय ¶ अफरणतो तानि इन्द्रियपच्चयो न होन्तीति. येसं बीजभूतानि इत्थिपुरिसिन्द्रियानि, तेसं लिङ्गादीनं अपरमत्थभावतोति केचि, ते पन कललादिकालेपि लिङ्गादीनं तदनुरूपानं अत्थितं इच्छन्ति.

जातिभूमिवसेन वुत्तेसु भेदेसु कुसलजातियं रूपावचरकुसलमेव आरुप्पे ठपेतब्बन्ति ‘‘ठपेत्वा पन रूपावचरकुसलं अवसेसा कुसलाकुसला’’ति वुत्तं. पठमलोकुत्तरं पन दोमनस्सयुत्तञ्च विसुं एका जाति भूमि वा न होतीति आरुप्पे अलब्भमानम्पि न ठपितं. हेतुआदीसुपि ‘‘तथा अपरियापन्नकुसलहेतु, तथा अकुसलहेतू’’तिआदीसु (पट्ठा. अट्ठ. १.१) एस नयो योजेतब्बो.

ठितिक्खणेति इदं रूपजीवितिन्द्रियस्स सहजातपच्चयत्ताभावं सन्धाय वुत्तं. उप्पादक्खणेपि पन तस्स इन्द्रियपच्चयता न सक्का निवारेतुं. वक्खति हि ‘‘अब्याकतं धम्मं पटिच्च…पे… असञ्ञसत्तानं एकं महाभूतं पटिच्च…पे… इन्द्रियपच्चयं कम्मपच्चयसदिस’’न्ति (पट्ठा. १.१.६६). न हि असञ्ञसत्तानं इन्द्रियपच्चया उप्पज्जमानस्स रूपस्स रूपजीवितिन्द्रियतो अञ्ञो इन्द्रियपच्चयो अत्थि, पञ्चवोकारे पवत्ते च कटत्तारूपस्स. पटिच्चवारादयो च छ उप्पादक्खणमेव गहेत्वा पवत्ता, एवञ्च कत्वा पच्छाजातपच्चयो एतेसु अनुलोमतो न तिट्ठतीति.

इन्द्रियपच्चयनिद्देसवण्णना निट्ठिता.

१७. झानपच्चयनिद्देसवण्णना

१७. वितक्कविचारपीतिसोमनस्सदोमनस्सुपेक्खाचित्तेकग्गतासङ्खातानीति ¶ एत्थ यदिपि सोमनस्सदोमनस्ससङ्खातानि झानङ्गानि नत्थि, सुखदुक्खसङ्खातानि पन सोमनस्सदोमनस्सभूतानेव झानङ्गानि, न कायिकसुखदुक्खभूतानीति इमस्स दस्सनत्थं सोमनस्सदोमनस्सग्गहणं कतं. ननु च ‘‘द्विपञ्चविञ्ञाणवज्जेसू’’ति वचनेनेव कायिकसुखदुक्खानि वज्जितानीति सुखदुक्खग्गहणमेव कत्तब्बन्ति? न, झानङ्गसुखदुक्खानं झानङ्गभावविसेसनतो. ‘‘द्विपञ्चविञ्ञाणवज्जेसु सुखदुक्खुपेक्खाचित्तेकग्गतासङ्खातानी’’ति हि वुत्ते द्विपञ्चविञ्ञाणेसु उपेक्खाचित्तेकग्गताहि सद्धिं कायिकसुखदुक्खानिपि ¶ वज्जितानीति एत्तकमेव विञ्ञायति, न पन यानि सुखदुक्खानि झानङ्गानि होन्ति, तेसं झानङ्गभूतो सुखभावो दुक्खभावो च विसेसितो, तस्मा सोमनस्सदोमनस्सभावविसिट्ठोयेव सुखदुक्खभावो सुखदुक्खानं झानङ्गभावोति दस्सनत्थं सोमनस्सदोमनस्सग्गहणं करोति. तेन ‘‘द्विपञ्चविञ्ञाणवज्जेसू’’ति वचनेन वज्जियमानानम्पि सुखदुक्खानं सोमनस्सदोमनस्सभावाभावतो झानङ्गभावाभावोति दस्सितं होति. यथावज्जिता पन सुखदुक्खोपेक्खेकग्गता कस्मा वज्जिताति? यत्थ झानङ्गानि उद्धरीयन्ति चित्तुप्पादकण्डे, तत्थ च झानङ्गन्ति अनुद्धटत्ता. कस्मा पन न उद्धटाति तं दस्सेतुं ‘‘पञ्चन्नं पन विञ्ञाणकायान’’न्तिआदिमाह.

अभिनिपातमत्तत्ताति एतेन आवज्जनसम्पटिच्छनमत्तायपि चिन्तनापवत्तिया अभावं दस्सेति. ‘‘तेसु विज्जमानानिपि उपेक्खासुखदुक्खानी’’ति पोराणपाठो. तत्थ उपेक्खासुखदुक्खेहेव तंसमानलक्खणाय चित्तेकग्गतायपि यथावुत्तेनेव कारणेन अनुद्धटभावो दस्सितोति दट्ठब्बो. पुब्बे पन सत्त अङ्गानि दस्सेन्तेन चत्तारि अङ्गानि वज्जितानीति तेसं वज्जने कारणं दस्सेन्तेन न समानलक्खणेन लेसेन दस्सेतब्बं. अट्ठकथा हेसाति. यदि च लेसेन दस्सेतब्बं, यथावुत्तेसुपि तीसु एकमेव वत्तब्बं सिया, तिण्णं पन वचनेन ततो अञ्ञस्स झानङ्गन्ति उद्धटभावो आपज्जति, यथावुत्तकारणतो अञ्ञेन कारणेन अनुद्धटभावो वा, तस्मा तंदोसपरिहरणत्थं ‘‘उपेक्खाचित्तेकग्गतासुखदुक्खानी’’ति पठन्ति. ये पन ‘‘झानङ्गभूतेहि सोमनस्सादीहि सुखदुक्खेन अविभूतभावेन पाकटताय इन्द्रियकिच्चयुत्तताय च समानानं सुखादीनं झानङ्गन्ति अनुद्धटभावे कारणं वत्तब्बं, न चित्तेकग्गतायाति ¶ सा एत्थ न गहिता’’ति वदन्ति, तेसं तं रुचिमत्तं. यदि झानङ्गसमानानं झानङ्गन्ति अनुद्धटभावे कारणं वत्तब्बं, चित्तेकग्गता चेत्थ झानङ्गभूताय विचिकिच्छायुत्तमनोधातुआदीसु चित्तेकग्गताय समानाति तस्सा अनुद्धटभावे कारणं वत्तब्बमेवाति. सेसाहेतुकेसुपि झानङ्गं उद्धटमेव उद्धरणट्ठाने चित्तुप्पादकण्डेति अधिप्पायो.

झानपच्चयनिद्देसवण्णना निट्ठिता.

१८. मग्गपच्चयनिद्देसवण्णना

१८. पञ्ञा ¶ वितक्को सम्मावाचाकम्मन्ताजीवा वीरियं सति समाधि मिच्छादिट्ठि मिच्छावाचाकम्मन्ताजीवाति इमानि द्वादसङ्गानीति एत्थ दुविधम्पि सङ्कप्पं वीरियं समाधिञ्च वितक्कवीरियसमाधिवचनेहि सङ्गण्हित्वा ‘‘अयमेव खो, आवुसो, अट्ठङ्गिको मिच्छामग्गो अब्रह्मचरियं. सेय्यथिदं – मिच्छादिट्ठि…पे… मिच्छासमाधी’’तिआदीहि (सं. नि. ५.१८) सुत्तवचनेहि मिच्छावाचाकम्मन्ताजीवेसुपि मग्गङ्गवोहारसिद्धितो तेहि सह द्वादसङ्गानि इध लब्भमानानि च अलब्भमानानि च मग्गङ्गवचनसामञ्ञेन सङ्गण्हित्वा वुत्तानि. एवञ्हि सुत्तन्तवोहारोपि दस्सितो होति, एवं पन दस्सेन्तेन ‘‘मग्गपच्चयनिद्देसे मग्गङ्गानी’’ति एवं उद्धरित्वा तस्स पाठगतस्स मग्गङ्गसद्दस्स अत्थभावेन इमानि द्वादसङ्गानि न दस्सेतब्बानि. न हि पाळियं मग्गङ्गसद्दस्स मिच्छावाचाकम्मन्ताजीवोति अत्थो वत्तब्बो. तेहि सम्मावाचादीहि पटिपक्खा चेतनाधम्मा तप्पटिपक्खभावतोयेव ‘‘मिच्छामग्गङ्गानी’’ति सुत्ते वुत्तानि, न पन मग्गपच्चयभावेन. मग्गङ्गानि मग्गपच्चयभूतानि च इध पाळियं ‘‘मग्गङ्गानी’’ति वुत्तानि, न च अञ्ञं उद्धरित्वा अञ्ञस्स अत्थो वत्तब्बो. परियायनिप्परियायमग्गङ्गदस्सनत्थं पन इच्छन्तेन पाळिगतमग्गङ्गसद्दपतिरूपको अञ्ञो मग्गङ्गसद्दो उभयपदत्थो उद्धरितब्बो यथा ‘‘अधिकरणं नाम चत्तारि अधिकरणानी’’ति (पारा. ३८६, ४०५). इध पन ‘‘मग्गपच्चयनिद्देसे मग्गङ्गानी’’ति पाळिगतोयेव मग्गङ्गसद्दो उद्धटो, न च अत्थुद्धरणवसेन दस्सेत्वा अधिप्पेतत्थनियमनं कतं, तस्मा पाळियं मग्गङ्गसद्दस्स मिच्छावाचादीनं अत्थभावो मा होतूति ‘‘सम्मादिट्ठिसङ्कप्पवाचाकम्मन्ताजीववायामसतिसमाधिमिच्छादिट्ठिसङ्कप्पवायामसमाधयोति ¶ इमानि द्वादसङ्गानी’’ति पठन्ति. ननु एवं ‘‘अहेतुकचित्तुप्पादवज्जेसू’’ति न वत्तब्बं. न हि तेसु सम्मादिट्ठिआदयो यथावुत्ता सन्ति, ये वज्जेतब्बा सियुन्ति? न, उप्पत्तिट्ठाननियमनत्थत्ता. अहेतुकचित्तुप्पादवज्जेस्वेव एतानि उप्पज्जन्ति, नाहेतुकचित्तुप्पादेसु. तत्थुप्पन्नानि द्वादसङ्गानीति अयञ्हेत्थ अत्थो.

मग्गपच्चयनिद्देसवण्णना निट्ठिता.

२०. विप्पयुत्तपच्चयनिद्देसवण्णना

२०. सम्पयोगासङ्काय ¶ अभावतोति एतेन सम्पयोगासङ्कावत्थुभूतो उपकारकभावो विप्पयुत्तपच्चयताति दस्सेति.

विप्पयुत्तपच्चयनिद्देसवण्णना निट्ठिता.

२१. अत्थिपच्चयनिद्देसवण्णना

२१. कुसलादिवसेन पञ्चविधो अत्थिपच्चयो वुत्तो, न निब्बानं. यो हि अत्थिभावाभावेन अनुपकारको अत्थिभावं लभित्वा उपकारको होति, सो अत्थिपच्चयो होति. निब्बानञ्च निब्बानारम्मणानं न अत्तनो अत्थिभावाभावेन अनुपकारकं हुत्वा अत्थिभावलाभेन उपकारकं होति. उप्पादादियुत्तानं वा नत्थिभावोपकारकताविरुद्धो उपकारकभावो अत्थिपच्चयताति न निब्बानं अत्थिपच्चयो.

सति च येसं पच्चया होन्ति, तेहि एकतो पुरेतरं पच्छा च उप्पन्नत्ते सहजातादिपच्चयत्ताभावतो आह ‘‘आहारो इन्द्रियञ्च सहजातादिभेदं न लभती’’ति. तदभावो च एतेसं धम्मसभाववसेन दट्ठब्बो.

अत्थिपच्चयनिद्देसवण्णना निट्ठिता.

२२-२३-२४. नत्थिविगतअविगतपच्चयनिद्देसवण्णना

२२-२३. पच्चयलक्खणमेव ¶ हेत्थ नानन्ति एतेन नत्थिविगतपच्चयेसु अत्थिअविगतपच्चयेसु च ब्यञ्जनमत्तेयेव नानत्तं, न अत्थेति इदं यो पच्चयोति अत्थो, तस्मिं नानत्तं नत्थि, ब्यञ्जनसङ्गहिते पच्चयलक्खणमत्तेयेव नानत्तन्ति इममत्थं सन्धाय वुत्तन्ति विञ्ञायति.

नत्थिविगतअविगतपच्चयनिद्देसवण्णना निट्ठिता.

पच्चयनिद्देसवण्णना निट्ठिता.

पच्चयनिद्देसपकिण्णकविनिच्छयकथावण्णना

‘‘लोभदोसमोहा ¶ विपाकपच्चयापि न होन्ति, सेसानं सत्तरसन्नं पच्चयानं वसेन पच्चया होन्ती’’तिआदिमपाठो. एत्थ च लोभदोसमोहानं पच्चेकं सत्तरसहि पच्चयेहि पच्चयभावो वुत्तो, सब्बे हेतू सह अग्गहेत्वा एकधम्मस्स अनेकपच्चयभावदस्सनत्थं अमोहादीनं विसुं गहितत्ताति दोसस्सपि सत्तरसहि पच्चयभावो आपज्जति, तथा च सति दोसस्सपि गरुकरणं पाळियं वत्तब्बं सिया. ‘‘अकुसलो पन आरम्मणाधिपति नाम लोभसहगतचित्तुप्पादो वुच्चती’’ति (पट्ठा. अट्ठ. १.४) एत्थापि लोभदोससहगतचित्तुप्पादाति वत्तब्बं सिया, न पन वुत्तं, तस्मा दोसस्स अधिपतिपच्चयतापि निवारेतब्बा. न च ‘‘सेसान’’न्ति वचनेन अधिपतिपच्चयो निवारितो, अथ खो सङ्गहितो पुरेजातादीहि यथावुत्तेहि सेसत्ताति तन्निवारणत्थं दोसं लोभमोहेहि सह अग्गहेत्वा विसुञ्च अग्गहेत्वा ‘‘दोसो अधिपतिपच्चयोपि न होति, सेसानं पच्चयानं वसेन पच्चयो होती’’ति पठन्ति. इमिना नयेनाति एतेन फोट्ठब्बायतनस्स सहजातादिपच्चयभावं, सब्बधम्मानं यथायोगं हेतादिपच्चयभावञ्च दस्सेति. न हि एतं एकपच्चयस्स अनेकपच्चयभावदस्सनन्ति रूपादीनं पकतूपनिस्सयभावो च एतेन दस्सितोति दट्ठब्बो.

चतुन्नं खन्धानं भेदा चक्खुविञ्ञाणधातुआदयोति भेदं अनामसित्वा ते एव गहेत्वा आह ¶ ‘‘चतूसु खन्धेसू’’ति. मिच्छावाचाकम्मन्ताजीवा तेहि चेव कम्माहारपच्चयेहि चाति एकूनवीसतिधाति इदमेवं न सक्का वत्तुं. न हि मिच्छावाचादयो मिच्छादिट्ठि विय मग्गपच्चया होन्ति चेतनाय मग्गपच्चयत्ताभावतो. यदि च भवेय्य, पञ्हावारे ‘‘कम्मपच्चया मग्गे तीणी’’ति वत्तब्बं सिया, तस्मा मिच्छावाचादीनं मग्गपच्चयभावो न वत्तब्बो. पट्ठानसंवण्णना हेसा. सेसपच्चयभावो च चेतनाय अनेकपच्चयभाववचनेन वुत्तोयेवाति न इदं पठितब्बन्ति न पठन्ति. ‘‘अहिरिकं…पे… मिद्धं उद्धच्चं विचिकिच्छा’’तिआदिमपाठो, विचिकिच्छा पन अधिपतिपच्चयो न होतीति तं तत्थ अपठित्वा ‘‘विचिकिच्छाइस्सामच्छरियकुक्कुच्चानि ततो अधिपतिपच्चयं अपनेत्वा’’ति एवमेत्थ पठन्ति.

‘‘चत्तारि ¶ महाभूतानि आरम्मण…पे… पुरेजातविप्पयुत्तअत्थिअविगतवसेन दसधा पच्चया होन्ति, पुन तथा हदयवत्थू’’ति पुरिमपाठो, महाभूतानि पन विप्पयुत्तपच्चया न होन्तीति ‘‘पुरेजातअत्थिअविगतवसेन नवधा पच्चया होन्ति, विप्पयुत्तपच्चयं पक्खिपित्वा दसधा वत्थु’’न्ति पठन्ति. एत्तकमेवेत्थ अपुब्बन्ति एतस्मिं पुरेजातपच्चये सहजातनिस्सयेहि अपुब्बं रूपसद्दगन्धरसायतनमत्तमेवाति अत्थो, आरम्मणानि पनेतानि आरम्मणपच्चयधम्मानं अनेकपच्चयभावे वुत्तानीति सब्बातिक्कन्तपच्चयापेक्खा एतेसं अपुब्बता नत्थीति. इन्द्रियादीसु अपुब्बं नत्थीति रूपजीवितिन्द्रियस्सपि अरूपजीवितिन्द्रियतो अपुब्बस्स पच्चयभावस्स अभावं मञ्ञमानेन अपुब्बता न वुत्ता. तस्स पन पुरेजातपच्चयभावतो अपुब्बता. कबळीकाराहारस्स च पुरेजातेन सद्धिं सत्तधा पच्चयभावो योजेतब्बो.

आकारोति मूलादिआकारो. अत्थोति तेनाकारेन उपकारकता. ‘‘येनाकारेना’’ति एतस्स वा अत्थवचनं ‘‘येनत्थेना’’ति. विपाकहेतूसुयेव लब्भतीति एत्थ अमोहविपाकहेतुस्स अधिपतिपच्चयभावो च लोकुत्तरविपाकेयेव लब्भतीति. एवं सब्बत्थ लब्भमानालब्भमानं सल्लक्खेतब्बं. विप्पयुत्तं अपठित्वा ‘‘छहाकारेही’’ति पुरिमपाठो, तं पन पठित्वा ‘‘सत्तहाकारेही’’ति पठन्ति. उक्कट्ठपरिच्छेदो हेत्थ वुच्चति, न च यं आरम्मणं निस्सयो होति, तं विप्पयुत्तं न होतीति.

अनन्तरसमनन्तरेसु यं कम्मपच्चयो होति, तं न आसेवनपच्चयो. यञ्च आसेवनपच्चयो होति, न तं कम्मपच्चयोति दट्ठब्बं. ‘‘पकतूपनिस्सयो पकतूपनिस्सयोवा’’ति वुत्तं ¶ , कम्मपच्चयोपि पन सो होति, तस्मा ‘‘कम्मपच्चयो चा’’ति पठन्ति. अयं पनेत्थ अत्थो – पकतूपनिस्सयो येभुय्येन पकतूपनिस्सयोव होति, कोचि पनेत्थ कम्मपच्चयो च होतीति. ‘‘आरम्मणपुरेजाते पनेत्थ इन्द्रियविप्पयुत्तपच्चयता न लब्भती’’ति वुत्तं. तत्थ आरम्मणपुरेजातन्ति यदि कञ्चि आरम्मणभूतं पुरेजातं वुत्तं, आरम्मणभूतस्स वत्थुस्स विप्पयुत्तपच्चयता लब्भतीति सा न लब्भतीति न वत्तब्बा. अथ पन ¶ वत्थुपुरेजाततो अञ्ञं वत्थुभावरहितारम्मणमेव ‘‘आरम्मणपुरेजात’’न्ति वुत्तं, तस्स निस्सयपच्चयता न लब्भतीति ‘‘निस्सयिन्द्रियविप्पयुत्तपच्चयता न लब्भती’’ति वत्तब्बं. इतो उत्तरिपीति पुरेजाततो परतोपीति अत्थो, इतो वा इन्द्रियविप्पयुत्ततो निस्सयिन्द्रियविप्पयुत्ततो वा उत्तरि आरम्मणाधिपतिआदि च लब्भमानालब्भमानं वेदितब्बन्ति अत्थो वत्तब्बो. कम्मादीसु पन लब्भमानालब्भमानं न वक्खतीति पुरिमोयेवेत्थ अत्थो अधिप्पेतो.

‘‘कबळीकारो आहारो आहारपच्चयोवा’’ति पुरिमपाठो, अत्थिअविगतपच्चयोपि पन सो होति, तेन ‘‘कबळीकारो आहारो आहारपच्चयत्तं अविजहन्तोव अत्थिअविगतानं वसेन अपरेहिपि द्वीहाकारेहि अनेकपच्चयभावं गच्छती’’ति पठन्ति.

‘‘यथानुरूपं झानपच्चये वुत्तानं दसन्नं हेतुअधिपतीनञ्चाति इमेसं वसेना’’ति पुरिमपाठो, ‘‘यथानुरूपं झानपच्चये वुत्तानं मग्गवज्जानं नवन्नं हेतुअधिपतिझानानञ्चाति इमेसं वसेना’’ति पच्छिमपाठो, तेसु विचारेत्वा युत्तो गहेतब्बो.

समनन्तरनिरुद्धताय आरम्मणभावेन च सदिसो पच्चयभावो पच्चयसभागता, विरुद्धपच्चयता पच्चयविसभागता. ‘‘इमिना उपायेना’’ति वचनतो हेतुआदीनं सहजातानं सहजातभावेन सभागता, सहजातासहजातानं हेतुआरम्मणादीनं अञ्ञमञ्ञविसभागताति एवमादिना उपायेन सभागता विसभागता योजेतब्बा.

जनकायेव, न अजनकाति जनकभावप्पधानायेव हुत्वा पच्चया होन्ति, न उपत्थम्भकभावप्पधानाति अत्थो दट्ठब्बो. येसं हेतुआदयो पच्चया होन्ति, ते तेहि विना नेव उप्पज्जन्ति, न च पवत्तन्तीति तेसं उभयप्पधानता वुत्ता. न हि ते अनन्तरादयो विय जननेनेव पवत्तिं करोन्तीति.

सब्बेसं ¶ ठानं कारणभावो सब्बट्ठानं, तं एतेसं अत्थीति सब्बट्ठानिका. उपनिस्सयं भिन्दन्तेन तयोपि उपनिस्सया वत्तब्बा, अभिन्दित्वा ¶ वा उपनिस्सयग्गहणमेव कातब्बं. तत्थ भिन्दनं पकतूपनिस्सयस्स रूपानं पच्चयत्ताभावदस्सनत्थं, आरम्मणानन्तरूपनिस्सयानं पन पुब्बे आरम्मणाधिपतिअनन्तरग्गहणेहि गहितत्ता तेसु एकदेसेन अनन्तरूपनिस्सयेन इतरम्पि दस्सेतीति दट्ठब्बं. पुरेजातपच्छाजातापि असब्बट्ठानिका अरूपरूपानञ्ञेव यथाक्कमेन पच्चयभावतोति एत्थ पुरेजातपच्चयो अनन्तरादीसु एव वत्तब्बो तंसमानगतिकत्ता, न च युगळभावो पच्छाजातेन सह कथने कारणं असब्बट्ठानिकदस्सनमत्तस्स अधिप्पेतत्ताति तं तत्थ पठित्वा ‘‘पच्छाजातोपि असब्बट्ठानिको रूपानंयेव पच्चयभावतो’’ति पठन्ति.

पच्चयनिद्देसपकिण्णकविनिच्छयकथावण्णना निट्ठिता.

पुच्छावारो

१. पच्चयानुलोमवण्णना

एकेकं तिकदुकन्ति एकेकं तिकं दुकञ्चाति अत्थो, न तिकदुकन्ति.

पच्चया चेवाति ये कुसलादिधम्मे पटिच्चाति वुत्ता, ते पटिच्चत्थं फरन्ता कुसलादिपच्चया चेवाति अत्थो. तेनेवाह ‘‘ते च खो सहजातावा’’ति. येहि पन हेतादिपच्चयेहि उप्पत्ति वुत्ता, ते सहजातापि होन्ति असहजातापीति. एत्थ पटिच्चसहजातवारेहि समानत्थेहि पटिच्चसहजाताभिधानेहि समानत्थं बोधेन्तेन भगवता पच्छिमवारेन पुरिमवारो, पुरिमवारेन च पच्छिमवारो च बोधितोति वेदितब्बो. एस नयो पच्चयनिस्सयवारेसु संसट्ठसम्पयुत्तवारेसु च, एवञ्च निरुत्तिकोसल्लं जनितं होतीति.

‘‘ते ते पन पञ्हे उद्धरित्वा पुन कुसलो हेतु हेतुसम्पयुत्तकानं धम्मान’’न्ति लिखितं. ‘‘कुसला हेतू सम्पयुत्तकानं खन्धान’’न्ति (पट्ठा. १.१.४०१) पञ्हावारपाठोति पमादलेखा ¶ एसाति पाळियं आगतपाठमेव पठन्ति. पुरिमवारेसु सहजातनिस्सयसम्पयुत्तपच्चयभावेहि कुसलादिधम्मे नियमेत्वा तस्मिं नियमे कुसलादीनं हेतुपच्चयादीहि उप्पत्तिं पुच्छित्वा विस्सज्जनं कतं, न तत्थ ‘‘इमे नाम ते धम्मा हेतादिपच्चयभूता’’ति विञ्ञायन्ति, तस्मा तत्थ ‘‘सिया कुसलं धम्मं पटिच्च कुसलो धम्मो उप्पज्जेय्य ¶ हेतुपच्चया’’ति (पट्ठा. १.१.२५) एवमादीहि सङ्गहिते पटिच्चत्थादिफरणकभावे हेतादिपच्चयपच्चयुप्पन्नेसु हेतादिपच्चयानं निच्छयाभावतो पञ्हा निज्जटा निग्गुम्बा च कत्वा न विभत्ता, इध पन ‘‘सिया कुसलो धम्मो कुसलस्स धम्मस्स हेतुपच्चयेन पच्चयो’’ति एवमादीहि सङ्गहिता हेतादिपच्चयभूता कुसलादयो पच्चयुप्पन्ना च निच्छिता, न कोचि पुच्छासङ्गहितो अत्थो अनिच्छितो नाम अत्थीति आह ‘‘सब्बेपि ते पञ्हा निज्जटा निग्गुम्बा च कत्वा विभत्ता’’ति. पञ्हा पन उद्धरित्वा विस्सज्जनं सब्बत्थ समानन्ति न तं सन्धाय निज्जटता वुत्ताति दट्ठब्बा.

उप्पत्तिया पञ्ञापितत्ताति पुच्छामत्तेनेव उप्पत्तिया ठपितत्ता पकासितत्ता, नानप्पकारेहि वा ञापितत्ताति अत्थो.

२५-३४. परिकप्पपुच्छाति विधिपुच्छा. किं सियाति एसो विधि किं अत्थीति अत्थो. किं सिया, अथ न सियाति सम्पुच्छनं वा परिकप्पपुच्छाति वदति. किमिदं सम्पुच्छनं नाम? समेच्च पुच्छनं, ‘‘किं सुत्तन्तं परियापुणेय्य, अथ अभिधम्म’’न्ति अञ्ञेन सह सम्पधारणन्ति अत्थो. यो कुसलो धम्मो उप्पज्जेय्य हेतुपच्चया, सो कुसलं धम्मं पटिच्च सियाति एतस्मिं अत्थे सति पच्छाजातविपाकपच्चयेसुपि सब्बपुच्छानं पवत्तितो ‘‘यो कुसलो धम्मो उप्पज्जेय्य पच्छाजातपच्चया विपाकपच्चया, सो कुसलं धम्मं पटिच्च सिया’’ति अयमत्थो विञ्ञायेय्य, तथा च सति पच्छाजातपच्चया विपाकपच्चयाति उप्पज्जमानं निद्धारेत्वा तस्स कुसलं धम्मं पटिच्च भवनस्स पुच्छनतो कुसलानं तेहि पच्चयेहि उप्पत्ति अनुञ्ञाताति आपज्जति, न च तंतंपच्चया उप्पज्जमानानं कुसलादीनं कुसलादिधम्मे पटिच्च भवनमत्थिता एत्थ पुच्छिता, अथ खो उप्पत्ति, एवञ्च कत्वा विस्सज्जने ‘‘कुसलं धम्मं पटिच्च कुसलो धम्मो उप्पज्जती’’ति उप्पत्तियेव विस्सज्जिताति, तस्मा अयमत्थो सदोसोति ‘‘अथ वा’’ति अत्थन्तरवचनं वुत्तं.

तत्थ ¶ ‘‘कुसलो धम्मो उप्पज्जेय्या’’ति उप्पत्तिं अनुजानित्वा ‘‘हेतुपच्चया सिया एत’’न्ति तस्सा हेतुपच्चया भवनपुच्छनं, ‘‘उप्पज्जेय्य हेतुपच्चया’’ति हेतुपच्चया उप्पत्तिं अनुजानित्वा तस्सा ‘‘सिया एत’’न्ति भवनपुच्छनञ्च न युत्तं. अनुञ्ञातञ्हि निच्छितमेवाति. तस्मा अननुजानित्वा ¶ ‘‘कुसलं धम्मं पटिच्च कुसलो धम्मो उप्पज्जेय्य हेतुपच्चया’’ति एवं यथावुत्तं उप्पज्जनं किं सियाति पुच्छतीति दट्ठब्बं. उप्पज्जेय्याति वा इदम्पि सम्पुच्छनमेव, कुसलं धम्मं पटिच्च कुसलो धम्मो किं उप्पज्जेय्य हेतुपच्चयाति अत्थो. सियाति यथापुच्छितस्सेव उप्पज्जनस्स सम्भवं पुच्छति ‘‘किं एवं उप्पज्जनं सिया सम्भवेय्या’’ति, अयं नयो सियासद्दस्स पच्छायोजने. यथाठानेयेव पन ठिता ‘‘सिया’’ति एसा सामञ्ञपुच्छा, ताय पन पुच्छाय ‘‘इदं नाम पुच्छित’’न्ति न विञ्ञायतीति तस्सायेव पुच्छाय विसेसनत्थं ‘‘कुसलं धम्मं पटिच्च कुसलो धम्मो उप्पज्जेय्य हेतुपच्चया’’ति पुच्छति, एवं विसेसितब्बविसेसनभावेन द्वेपि पुच्छा एकायेव पुच्छाति दट्ठब्बा.

गमनुस्सुक्कवचनन्ति गमनस्स समानकत्तुकपच्छिमकालकिरियापेक्खवचनन्ति अत्थो. यदिपि पटिगमनुप्पत्तीनं पुरिमपच्छिमकालता नत्थि, पच्चयपच्चयुप्पन्नानं पन सहजातानम्पि पच्चयपच्चयुप्पन्नभावेन गहणं पुरिमपच्छिमभावेनेव होतीति गहणप्पवत्तिआकारवसेन पच्चयायत्तताअत्तपटिलाभसङ्खातानं पटिगमनुप्पत्तिकिरियानम्पि पुरिमपच्छिमकालवोहारो होतीति दट्ठब्बो. गमनं वा उप्पत्ति एवाति गच्छन्तस्स पटिगमनं उप्पज्जन्तस्स पटिउप्पज्जनं समानकिरिया. पटिकरणञ्हि पटिसद्दत्थोति. तस्मा ‘‘कुसलं धम्म’’न्ति उपयोगनिद्दिट्ठं पच्चयं उप्पज्जमानं पटिच्च तदायत्तुप्पत्तिया पटिगन्त्वाति अयमेत्थ अत्थो, तेन पटिच्चाति सहजातपच्चयं कत्वाति वुत्तं होति. सहजातपच्चयकरणञ्हि उप्पज्जमानाभिमुखउप्पज्जमानं पटिगमनं, तं कत्वाति पटिच्चसद्दस्स अत्थोति.

३५-३८. तासु पाळियं द्वेयेव दस्सिताति हेतारम्मणदुके द्विन्नं पुच्छानं दस्सितत्ता वुत्तं. एत्थ च एकमूलकादिभावो पुच्छानं वुत्तोति वेदितब्बो, पच्चयानं पन वसेन सब्बपठमो पच्चयन्तरेन अवोमिस्सकत्ता सुद्धिकनयो, दुतियो आरम्मणादीसु एकेकस्स हेतु एव एकमूलकन्ति कत्वा एकमूलकनयो. एवं हेतारम्मणदुकादीनं अधिपतिआदीनं मूलभावतो दुकमूलकादयो नया वेदितब्बा. तेवीसतिमूलकनयो च ततो परं मूलस्स अभावतो ‘‘सब्बमूलक’’न्ति पाळियं वुत्तो. तत्थ नपुंसकनिद्देसेन एक…पे… सब्बमूलकं पच्चयगमनं ¶ पाळिगमनं वाति विञ्ञायति, एक…पे… सब्बमूलकं नयं असम्मुय्हन्तेनाति उपयोगो वा ¶ , इध च सब्बमूलकन्ति च तेवीसतिमूलकस्सेव वुत्तत्ता पच्चनीये वक्खति ‘‘यथा अनुलोमे एकेकस्स पदस्स एकमूलकं…पे… याव तेवीसतिमूलकं, एवं पच्चनीयेपि वित्थारेतब्ब’’न्ति (पट्ठा. अट्ठ. १.४२-४४).

३९-४०. ‘‘आरम्मणपच्चया हेतुपच्चयाति एत्तावता आरम्मणपच्चयं आदिं कत्वा हेतुपच्चयपरियोसानो एकमूलकनयो दस्सितो’’ति वुत्तं, एवं सति विनये विय चक्कबन्धनवसेन पाळिगति आपज्जति, न हेट्ठिमसोधनवसेन. हेट्ठिमसोधनवसेन च इध अभिधम्मे पाळि गता, एवञ्च कत्वा विस्सज्जने ‘‘आरम्मणपच्चया हेतुया तीणि, अधिपतिपच्चया तीणि, अधिपतिपच्चया हेतुया नव, आरम्मणे तीणी’’तिआदिना हेट्ठिमं सोधेत्वाव पाळि पवत्ता. यो चेत्थ ‘‘एकमूलकनयो’’ति वुत्तो, सो सुद्धिकनयोव. सो च विसेसाभावतो आरम्मणमूलकादीसु न लब्भति. न हि आरम्मणादीसु तस्मिं तस्मिं आदिम्हि ठपितेपि पच्चयन्तरेन सम्बन्धाभावेन आदिम्हि वुत्तसुद्धिकतो विसेसत्थो लब्भति, तेनेव विस्सज्जनेपि आरम्मणमूलकादीसु सुद्धिकनयो न दस्सितोति, तस्मा ‘‘आरम्मणपच्चया हेतुपच्चया आरम्मणपच्चया अधिपतिपच्चया…पे… आरम्मणपच्चया अविगतपच्चया’’ति (पट्ठा. १.१.३९) अयं हेट्ठिमसोधनवसेन एकस्मिं आरम्मणपच्चये हेतुपच्चयादिके योजेत्वा वुत्तो एकमूलकनयो दट्ठब्बो. ‘‘आरम्मणपच्चया…पे… अविगतपच्चया’’ति वा एकमूलकेसु अनन्तरपच्चयस्स मूलकं आरम्मणं दस्सेत्वा एकमूलकादीनि संखिपित्वा सब्बमूलकस्सावसानेन अविगतपच्चयेन निट्ठापितन्ति दट्ठब्बं. अधिपतिपच्चया अनन्तरपच्चया समनन्तरपच्चया सहजातपच्चया अञ्ञमञ्ञपच्चयाति इदं मूलमेव दस्सेत्वा एकमूलकादीनं संखिपनं दट्ठब्बं, न सुद्धिकदस्सनं, नापि सब्बमूलके कतिपयपच्चयदस्सनं.

४१. ततो निस्सयादीनि मूलानिपि संखिपित्वा अविगतमूलकनयं दस्सेतुं ‘‘अविगतपच्चया हेतुपच्चया’’तिआदि आरद्धं. एतस्मिञ्च सुद्धिकस्स अदस्सनेन आरम्मणमूलकादीसु विसुं विसुं सुद्धिकनयो न लब्भतीति ञापितो होति. न हि आदि कत्थचि संखेपन्तरगतो होति. आदिअन्तेहि मज्झिमानं दस्सनञ्हि सङ्खेपो, आदितो पभुति कतिचि ¶ वत्वा गतिदस्सनं वाति. दुतियचतुक्कं वत्वा ‘‘विगतपच्चया’’ति पदं उद्धरित्वा ठपितं ¶ . तेन ओसानचतुक्कं दस्सेति. ततियचतुक्कतो पभुति वा पञ्चकमूलानि संखिपित्वा सब्बमूलकस्स अवसानेन निट्ठपेति.

एत्थ च दुकमूलकादीसु यथा हेतुआरम्मणदुकेन सद्धिं अवसेसा पच्चया योजिता, हेतारम्मणाधिपतितिकादीहि च अवसेसावसेसा, एवं हेतुअधिपतिदुकादीहि हेतुअधिपतिअनन्तरतिकादीहि च अवसेसावसेसा योजेतब्बा सियुं. यदि च सब्बेसं पच्चयानं मूलभावेन योजितत्ता हेतुमूलके हेतुअधिपतिआदिदुकानं अधिपतिमूलकादीसु अधिपतिहेतुआदिदुकेहि विसेसो नत्थि. ते एव हि पच्चया उप्पटिपाटिया वुत्ता, तथापि आरम्मणमूलकादीसु आरम्मणाधिपतिदुकादीनं अवसेसावसेसेहि, हेतुमूलके च हेतुअधिपतिअनन्तरतिकादीनं अवसेसावसेसेहि योजने अत्थि विसेसोति. यस्मा पन एवं योजियमानेसुपि सुखग्गहणं न होति, न च यथावुत्ताय योजनाय सब्बा सा योजना पञ्ञवता न सक्का विञ्ञातुं, तस्मा तथा अयोजेत्वा अनुपुब्बेनेव योजना कताति दट्ठब्बा. धम्मानं देसनाविधाने हि भगवाव पमाणन्ति. गणनागाथा आदिमपाठे काचि विरुद्धा, तस्मा सुट्ठु गणेत्वा गहेतब्बा.

‘‘द्वावीसतिया तिकेसु एकेकं तिकं दुकानं सतेन सतेन सद्धिं योजेत्वा’’ति वुत्तं, तं दुकतिकपट्ठाने केसञ्चि पोत्थकानं वसेन वुत्तं. केसुचि पन एकेको दुको द्वावीसतिया द्वावीसतिया तिकेहि योजितो, तञ्च गमनं युत्तं. न हि तत्थ तिकस्स योजना अत्थि, अथ खो तिकानं एकेकेन पदेन दुकस्साति. तत्थ छसट्ठिया तिकपदेसु एकेकेन संसन्दित्वा छसट्ठि हेतुदुका, तथा सहेतुकदुकादयो चाति दुकानं छसताधिकानि छसहस्सानि होन्ति. तेसु एकेकस्मिं पटिच्चवारादयो सत्त वारा नया पुच्छा च सब्बा दुकपट्ठाने हेतुदुकेन समाना.

‘‘दुकसते एकेकं दुकं द्वावीसतिया तिकेहि सद्धिं योजेत्वा’’ति च वुत्तं, तम्पि तिकदुकपट्ठाने केसञ्चि पोत्थकानं वसेन वुत्तं. वुत्तनयेन पन युत्तगमनेसु एकेको तिको दुकसतेन योजितो. तत्थ हेतुपदं पक्खिपित्वा वुत्तो एको कुसलत्तिको, तथा नहेतुपदं…पे… अरणपदन्ति कुसलत्तिकानं द्वे ¶ सतानि होन्ति, तथा वेदनात्तिकादीनम्पीति सब्बेसं चतुसताधिकानि चत्तारि सहस्सानि होन्ति. तेसु एकेकस्मिं वारनयपुच्छा तिकपट्ठाने कुसलत्तिकेन समाना.

‘‘छ ¶ अनुलोमम्हि नया सुगम्भीरा’’ति वचनतो पनाति एतेन इदं दस्सेति – ‘‘अनुलोमम्ही’’ति ‘‘तिकादयो छनया’’ति च अविसेसेन वुत्तत्ता पटिच्चवारादिवसेन सत्तविधम्पि अनुलोमं सह गहेत्वा ‘‘छ अनुलोमम्ही’’ति वुत्तं, अनुलोमादिवसेन चतुब्बिधं तिकपट्ठानं सह गहेत्वा ‘‘तिकञ्च पट्ठानवर’’न्ति, तथा चतुब्बिधानि दुकपट्ठानादीनि सह गहेत्वा ‘‘दुकुत्तम’’न्तिआदिं वत्वा ‘‘छ नया सुगम्भीरा’’ति वुत्तन्ति इममत्थं गहेत्वा इमस्मिं पच्चयानुलोमे सत्तप्पभेदे छपि एते पट्ठाना पट्ठाननया चतुप्पभेदा पुच्छावसेन उद्धरितब्बाति. एवञ्हि सब्बस्मिं पट्ठाने सब्बो पच्चयानुलोमो दस्सितो होतीति. पच्चनीयगाथादीसुपि एसेव नयो. एत्थ च दुकतिकपट्ठानादीसु विसेसितब्बेहि तिकेहि पट्ठानं तिकपट्ठानं. दुकानं तिकपट्ठानं दुकतिकपट्ठानं. दुकविसेसिता वा तिका दुकतिका, दुकतिकानं पट्ठानं दुकतिकपट्ठानन्ति इमिना नयेन वचनत्थो वेदितब्बो. दुकादिविसेसितस्स चेत्थ तिकादिपदस्स दुकादिभावो दट्ठब्बो. दुकपट्ठानमेव हि तिकपदसंसन्दनवसेन दुकपदसंसन्दनवसेन च पवत्तं दुकतिकपट्ठानं दुकदुकपट्ठानञ्च, तथा तिकपट्ठानमेव दुकपदसंसन्दनवसेन तिकपदसंसन्दनवसेन च पवत्तं तिकदुकपट्ठानं तिकतिकपट्ठानञ्चाति.

पच्चयानुलोमवण्णना निट्ठिता.

२. पच्चयपच्चनीयवण्णना

४२-४४. तेवीसतिमूलकन्ति इदञ्चेत्थ दुमूलकंयेव सन्धाय वुत्तन्ति इदं दुकमूलके पुच्छानं मूलभूता तेवीसति दुका सम्भवन्तीति तस्स ‘‘तेवीसतिमूलक’’न्ति नामं कत्वा याव यत्तको पभेदो अत्थि, ताव तत्तकं तेवीसतिमूलकं यथानुलोमे वित्थारितं. एवं पच्चनीयेपि वित्थारेतब्बन्ति दुकमूलकेन तिकमूलकादीसु नयं दस्सेतीति इमिना अधिप्पायेन वुत्तं सिया. यदि पन याव तेवीसतिमं मूलं यथा वित्थारितन्ति अयमत्थो अधिप्पेतो, ‘‘याव तेवीसतिमं मूल’’न्त्वेव पाठेन भवितब्बं ¶ सिया. न हि ‘‘तेवीसतिमूलक’’न्ति एतस्स ब्यञ्जनस्स तेवीसतिमं मूलकन्ति अयमत्थो सम्भवति. यथा अनुलोमे ‘‘एकेकपदस्सा’’तिआदिना पन एकमूलादिसब्बमूलकपरियोसानं तत्थ नयदस्सनवसेन दस्सितं एकेकस्स पदस्स वित्थारं दस्सेतीति ¶ सब्बमूलकमेव चेत्थ ‘‘तेवीसतिमूलक’’न्ति वुत्तन्ति वेदितब्बं. तञ्हि तेवीसतिया पच्चयानं अवसेसस्स पच्चयस्स मूलभावतो ‘‘तेवीसतिमूलक’’न्ति च ततो परं मूलस्स अञ्ञस्स अभावतो ‘‘सब्बमूलक’’न्ति च वुच्चति.

पच्चयपच्चनीयवण्णना निट्ठिता.

३. अनुलोमपच्चनीयवण्णना

४५-४८. अनुलोमे वुत्तेसु सब्बेसु एकमूलकादीसु एकेकं पदं परिहापेत्वाति तत्थ एकमूलके चतुवीसति पच्चयपदानि इध एकमूलके तेवीसति, एको पन पच्चयो मूलभावेन ठितो अपुब्बताभावतो अगणनूपगो. तत्थ दुमूलके तेवीसति पच्चयपदानि गणनूपगानि, इध दुमूलके द्वावीसतीति एवं परिहापेत्वाति अत्थो.

अनुलोमतो ठितस्स पच्चनीयतो अलब्भमानानं सुद्धिकपच्चयानञ्च अलब्भमानतं सन्धाय ‘‘लब्भमानपदान’’न्ति वुत्तं. न हि अञ्ञथा पुच्छावसेन कोचि पच्चयो अलब्भमानो नाम अत्थीति. विस्सज्जनावसेनेव वा पवत्तं अनुलोमपच्चनीयदेसनं सन्धाय ‘‘लब्भमानपदान’’न्ति वुत्तं.

अनुलोमपच्चनीयवण्णना निट्ठिता.

पुच्छावारवण्णना निट्ठिता.

१. कुसलत्तिकं

१. पटिच्चवारवण्णना

१. पच्चयानुलोमं

(१) विभङ्गवारो

५३. या ¶ कुसलत्तिके लभन्ति, न तायेव वेदनात्तिकादीसूति तिकपदनानत्तमत्तेन विना मूलावसानवसेन सदिसतं सन्धाय ‘‘न ¶ तायेवा’’ति वुत्तं, न च केवलं तिकन्तरेयेव, कुसलत्तिकेपि पन या पटिच्चवारे लभन्ति, न तायेव पच्चयवारादीसूति सब्बपुच्छासमाहरणं इध कत्तब्बमेव. धम्मानुलोमपच्चनीये च तिकपट्ठाने वितक्कत्तिकपीतित्तिकानं विस्सज्जने सब्बापेता विस्सज्जनं लभन्तीति एत्थ पीतित्तिकग्गहणं न कातब्बं. न हि तत्थ एकूनपञ्ञास पुच्छा विस्सज्जनं लभन्तीति.

तेन सद्धिन्ति तेन सहजातपच्चयभूतेन सद्धिन्ति अत्थो दट्ठब्बो. ‘‘याव निरोधगमना उद्धं पज्जती’’ति च ‘‘उप्पादादयो वा पापुणाती’’ति च वचनेहि खणत्तयसमङ्गी उप्पज्जतीति वुच्चतीति अनुञ्ञातं विय होति, उप्पादक्खणसमङ्गीयेव पन एवं वुत्तोति दट्ठब्बो.

यस्मा पन एको खन्धो एकस्सातिआदि इध कुसलवचनेन गहिते खन्धे सन्धाय वुत्तं. वेदनात्तिकादीसु पन एकं खन्धं पटिच्च द्विन्नं, द्वे पटिच्च एकस्सपि, हेतुदुकादीसु च सङ्खारक्खन्धेकदेसं पटिच्च सङ्खारक्खन्धेकदेसस्सपि उप्पत्ति वुत्ताति सह उप्पज्जमानानं सब्बेसं धम्मानं पच्चयो होन्तो एकेकस्सपि दुकतिकादिभेदानञ्च पच्चयो नाम होतियेव, तथा दुकादिभेदानञ्चाति.

‘‘रूपेन सद्धिं अनुप्पत्तितो आरुप्पविपाकञ्च न गहेतब्ब’’न्ति वुत्तं, तं पन न सब्बस्मिं एतस्मिं वचने गहेतब्बं, अथ खो ‘‘चित्तसमुट्ठानञ्च रूप’’न्ति एत्थेव. न केवलञ्च ¶ आरुप्पविपाकोव, अथ खो लोकुत्तरविपाककिरियाब्याकतम्पि आरुप्पे उप्पज्जमानं एत्थ न गहेतब्बं. ‘‘विपाकाब्याकतं किरियाब्याकतं एकं खन्धं पटिच्च तयो खन्धा’’ति एत्थ पन न किञ्चि रूपेन विना सह वा उप्पज्जमानं सहेतुकं विपाककिरियाब्याकतं अग्गहितं नाम अत्थि. तत्थ पन यं रूपेन सह उप्पज्जति, तस्स पच्चयुप्पन्नविसेसं दस्सेतुं ‘‘चित्तसमुट्ठानञ्च रूप’’न्ति वुत्तं.

‘‘वत्थुं पटिच्च खन्धा’’ति एत्तके वत्तब्बे पच्चयभूतस्स वत्थुस्स ‘‘कटत्ता च रूप’’न्ति एतस्मिं सामञ्ञवचने पच्चयुप्पन्नभावेन अग्गहिततापत्तिं निवारेतुं ‘‘खन्धे पटिच्च वत्थू’’ति वुत्तं. खन्धे पटिच्च वत्थु, वत्थुं पटिच्च खन्धाति वा वत्थुखन्धानं अञ्ञमञ्ञपच्चयभूतानं पच्चयभावविसेसदस्सनत्थं अञ्ञमञ्ञापेक्खं वचनद्वयं वुत्तं सामञ्ञेन गहितम्पि विसुं उद्धटं.

महाभूतेपि ¶ पटिच्च उप्पत्तिदस्सनत्तन्ति यं चित्तसमुट्ठानरूपं कटत्तारूपञ्च उपादारूपं उपादारूपग्गहणेन विना ‘‘खन्धे पटिच्च उप्पज्जती’’ति वुत्तं, तस्स महाभूतेपि पटिच्च उप्पत्तिदस्सनत्थन्ति अत्थो. एतस्मिं पन दस्सने खन्धपच्चयसहितासहितञ्च सब्बं उपादारूपं इतो परेसु सहजातपच्चयादीसु सङ्गहितन्ति इममत्थं सन्धाय ‘‘कटत्तारूपं पटिसन्धियम्पी’’ति पि-सद्दो वुत्तोति दट्ठब्बो.

महाभूते पटिच्च उपादारूपन्ति वुत्तनयेनाति ‘‘महाभूते पटिच्च चित्तसमुट्ठानं रूपं कटत्तारूपं उपादारूप’’न्ति एत्थ अत्थतो अयं नयो वुत्तोति सन्धायाह.

५४. रूपमिस्सका पहायाति यासु पुच्छासु रूपेन विना पच्चयुप्पन्नं न लब्भति, अथ खो रूपमिस्सकमेव लब्भति, ता पहायाति अधिप्पायो.

५७. ‘‘तिण्णं सन्निपाता गब्भस्स अवक्कन्ति होती’’ति वचनतोति गब्भसेय्यकपटिसन्धिया पञ्चक्खन्धसब्भावेन ताय समानलक्खणा सब्बापि पञ्चवोकारपटिसन्धि ओक्कन्तिनामकाति साधेति. परिपुण्णधम्मानं विस्सज्जनं एत्थ अत्थीति परिपुण्णविस्सज्जना.

एत्थ ¶ च ‘‘एकं महाभूतं पटिच्च तयो…पे… महाभूते पटिच्च चित्तसमुट्ठानं रूपं कटत्तारूपं उपादारूप’’न्ति (पट्ठा. १.१.५३) एत्तावता पञ्चवोकारे सब्बं चित्तकम्मसमुट्ठानरूपं दस्सितं. अवसेसं पन दस्सेतुं ‘‘बाहिर’’न्तिआदि वुत्तं. तत्थ बाहिरन्ति एतेन अनिन्द्रियबद्धरूपं दस्सेति, पुन आहारसमुट्ठानं उतुसमुट्ठानन्ति एतेहि सब्बं इन्द्रियबद्धं आहारउतुसमुट्ठानरूपं. तत्थ ‘‘उतुसमुट्ठानं एक’’न्तिआदिना असञ्ञसत्तानम्पि उतुसमुट्ठानं वुत्तमेवाति दट्ठब्बं. न हि तत्थ तस्स वज्जने कारणं अत्थीति. आदिम्हि पन ‘‘एकं महाभूतं पटिच्चा’’तिआदि अविसेसवचनं सहजातं अरूपम्पि पच्चयं हेतादिके च पच्चये बहुतरे लभन्तं चित्तसमुट्ठानकटत्तारूपद्वयं सह सङ्गण्हित्वा वुत्तं, एवञ्च कत्वा तस्स परियोसाने ‘‘महाभूते पटिच्च चित्तसमुट्ठानरूपं कटत्तारूपं उपादारूप’’न्ति वुत्तं, तस्मा तत्थ कटत्तारूपं चित्तसमुट्ठानसम्बन्धं तंसमानगतिकं पञ्चवोकारे वत्तमानमेव गहितन्ति अग्गहितं कटत्तारूपं दस्सेतुं ‘‘असञ्ञसत्तानं एकं महाभूतं पटिच्चा’’तिआदि वुत्तं, तस्मा उपादारूपं इधपि ¶ कम्मपच्चयविभङ्गे विय ‘‘महाभूते पटिच्च कटत्तारूपं उपादारूप’’न्ति (पट्ठा. १.१.६३) कटत्तारूपभावविसिट्ठं उपादारूपं गहितन्ति दट्ठब्बं. न हि वुत्तस्स उतुसमुट्ठानस्स पुनवचने पयोजनं अत्थीति.

कस्मा पन यथा बाहिरादीसु ‘‘महाभूते पटिच्च उपादारूप’’न्ति अविसेसेत्वा उपादारूपं वुत्तं, एवं अवत्वा चित्तकम्मजउपादारूपानि ‘‘चित्तसमुट्ठानं रूपं कटत्तारूपं उपादारूप’’न्ति हेतुपच्चयादीसु सह ‘‘चित्तसमुट्ठानं रूपं उपादारूपं असञ्ञसत्तानं…पे… कटत्तारूपं उपादारूप’’न्ति अधिपतिपच्चयादीसु विसुं चित्तसमुट्ठानरूपभावकटत्तारूपभावेहि विसेसेत्वाव वुत्तानीति? तत्थ बाहिरग्गहणादीहि विय एत्थ महाभूतानं केनचि अविसेसितत्ता. अपिच इद्धिचित्तनिब्बत्तानं कम्मपच्चयानञ्च इट्ठानिट्ठानं बाहिररूपायतनादीनं चित्तं कम्मञ्च हेतादीसु न कोचि पच्चयो, आहारउतुसमुट्ठानानं पन चित्तं पच्छाजातभावेन उपत्थम्भकमेव, न जनकं, महाभूतानेव पन तेसं सहजातादिभावेन जनकानि, तस्मा सतिपि चित्तेन कम्मेन च विना अभावे हेतादिपच्चयभूतेहि अरूपेहि उप्पज्जमानानि चित्तसमुट्ठानरूपकटत्तारूपभूतानेव उपादारूपानि होन्ति, न अञ्ञानीति इमं विसेसं दस्सेतुं चित्तकम्मजेस्वेव उपादारूपेसु विसेसनं कतं. अञ्ञानि वा समानजातिकेन रूपेन समुट्ठानानि पाकटविसेसनानेवाति न विसेसनं अरहन्ति, एतानि पन असमानजातिकेहि अरूपेहि समुट्ठितानि विसेसनं अरहन्तीति विसेसितानीति वेदितब्बानि. यथा वा चित्तकम्मानि चित्तकम्मसमुट्ठानानं सविसेसेन पच्चयभावेन ¶ पच्चया होन्ति सहजातादिपच्चयभावतो मूलकरणभावतो च, न एवं उतुआहारा तंसमुट्ठानानन्ति चित्तकम्मजानेव विसुं विसेसनं अरहन्ति. इतरानि पन महाभूतविसेसेनेव विसेसितानि, इध उपादारूपविसेसनेन महाभूतानि विय. न हि अञ्ञतरविसेसनं उभयविसेसनं न होतीति.

५८. अञ्ञमञ्ञपच्चये खन्धे पटिच्च वत्थु, वत्थुं पटिच्च खन्धाति खन्धवत्थूनं अञ्ञमञ्ञपच्चयतादस्सनेन पुब्बे विसुं पच्चयभावेन दस्सितानं खन्धानं एकतो पच्चयभावो दस्सितो होतीति इमिना अधिप्पायेनाह ‘‘चतुन्नम्पि खन्धानं एकतो वत्थुना अञ्ञमञ्ञपच्चयतं दस्सेतुं वुत्त’’न्ति. ‘‘खन्धे ¶ पटिच्च वत्थू’’ति इदं पन चतुन्नम्पि खन्धानं एकतो पटिच्चत्थफरणतादस्सनत्थं, ‘‘वत्थुं पटिच्च खन्धा’’ति वत्थुस्स. न केवलञ्च खन्धानं इधेव, हेतुपच्चयादीसुपि अयमेव नयो. तत्थ सब्बेसं खन्धानं विसुं पटिच्चत्थफरणतं दस्सेत्वा पुन ‘‘वत्थुं पटिच्च खन्धा’’ति वत्थुस्सपि दस्सिताय ‘‘एकं खन्धञ्च वत्थुञ्च पटिच्च तयो खन्धा’’तिआदिना खन्धवत्थूनञ्च दस्सितायेव होतीति दट्ठब्बा.

कस्मा पनेत्थ ‘‘कुसलं धम्मं पटिच्च अब्याकतो धम्मो उप्पज्जति अञ्ञमञ्ञपच्चया, कुसले खन्धे पटिच्च चित्तसमुट्ठाना महाभूता’’ति एवमादि न वुत्तं, ननु यदेव पटिच्चत्थं फरति, न तेनेव अञ्ञमञ्ञपच्चयेन भवितब्बं हेतुपच्चयादीहि विय. न हि यं ‘‘एकं तयो द्वे च खन्धे पटिच्चा’’ति वुत्तं, ते हेतुपच्चयभूता एव होन्ति. एस नयो आरम्मणपच्चयादीसुपि. पच्चयवारे च ‘‘अब्याकतं धम्मं पच्चया कुसलो धम्मो उप्पज्जति अञ्ञमञ्ञपच्चया’’ति (पट्ठा. १.१.२५६) वुत्तं, न वत्थु कुसलानं अञ्ञमञ्ञपच्चयो होति, अथ च पन तंपच्चया खन्धानं अञ्ञमञ्ञपच्चया उप्पत्ति वुत्ता एव. यदिपि कुसला खन्धा महाभूतानं अञ्ञमञ्ञपच्चया न होन्ति, तथापि ते पटिच्च तेसं उप्पत्ति वत्तब्बा सियाति? न वत्तब्बा खन्धसहजातानं महाभूतानं खन्धानं पच्चयभावाभावतो. अञ्ञमञ्ञसद्दो हि न हेतादिसद्दो विय निरपेक्खो, सहजातादिसद्दो विय वा अञ्ञतरापेक्खो, अथ खो यथावुत्तेतरेतरापेक्खो. पच्चयपच्चयुप्पन्ना च खन्धा महाभूता इध यथावुत्ता भवेय्युं, तेसु च महाभूता खन्धानं न कोचि पच्चयो. यस्स च सयं पच्चयो, ततो तेन तन्निस्सितेन वा अञ्ञमञ्ञपच्चयेन उप्पज्जमानं अञ्ञमञ्ञपच्चया उप्पज्जतीति वत्तब्बतं अरहति, यथा खन्धे पटिच्च खन्धा, वत्थुं पच्चया खन्धा. तस्मा अत्तनो पच्चयस्स ¶ पच्चयत्ताभावतो तदपेक्खत्ता च अञ्ञमञ्ञसद्दस्स खन्धे पटिच्च पच्चया च महाभूतानं अञ्ञमञ्ञपच्चया उप्पत्ति न वुत्ता, न अञ्ञमञ्ञपच्चया च वुत्ता. खन्धा पन वत्थुं पच्चया उप्पज्जमाना वत्थुस्स पच्छाजातपच्चया होन्ति, तन्निस्सितेन च अञ्ञमञ्ञपच्चयेन उप्पज्जन्ति. तस्मा वत्थुं पच्चया खन्धानं कुसलादीनं अञ्ञमञ्ञपच्चया उप्पत्ति वुत्ताति.

५९. न ¶ सा गहिताति चक्खायतनादीनि निस्सयभूतानि पटिच्चाति न वुत्तन्ति अधिप्पायो. निस्सयपच्चयभावेन पन न चक्खायतनादीनि आरम्मणपच्चयभावेन रूपायतनादीनि विय न गहितानीति.

६०. द्वीसु उपनिस्सयेसु वत्तब्बमेव नत्थि, आरम्मणूपनिस्सयम्पि पन ये लभन्ति, तेसं वसेन आरम्मणपच्चयसदिसन्ति एवं वुत्तन्ति दस्सेतुं ‘‘तत्थ किञ्चापी’’ति आह. तत्थ ‘‘न सब्बे अकुसला अब्याकता आरम्मणूपनिस्सयं लभन्ती’’ति पुरिमपाठो. कुसलापि पन महग्गता एकन्तेन, कामावचरा च कदाचि न लभन्तीति ‘‘न सब्बे कुसलाकुसलाब्याकता’’ति पठन्ति.

६१. पुरेजातपच्चये यथा अञ्ञत्थ पच्चयं अनिद्दिसित्वाव देसना कता, एवं अकत्वा कस्मा ‘‘वत्थुं पुरेजातपच्चया’’ति वुत्तन्ति? नियमसब्भावा. हेतुआदीसु हि नियमो नत्थि. न हि तेहि उप्पज्जमानानं अलोभादीसु कुसलादीसु रूपादीसु च अयमेव पच्चयोति नियमो अत्थि, इध पन वत्थु न वत्थुधम्मेसु पुरेजातपच्चया उप्पज्जमानानं धम्मानं नियमतो छब्बिधं वत्थु पुरेजातपच्चयो होतीति इममत्थं दस्सेतुं इदं वुत्तं. आरम्मणपुरेजातम्पि हि वत्थुपुरेजाते अविज्जमाने न लब्भति, एवञ्च कत्वा पटिसन्धिविपाकस्स नपुरेजातपच्चया एव उप्पत्ति वुत्ता, पच्चुप्पन्नारम्मणस्सपि तस्स पुरेजातपच्चयो न उद्धटो. ‘‘नेवविपाकनविपाकधम्मधम्मं पटिच्च विपाको धम्मो उप्पज्जति पुरेजातपच्चया’’ति एतस्सपि अलाभतो तत्थ ‘‘पुरेजाते तीणी’’ति (पट्ठा. १.३.१२४) वुत्तन्ति.

६३. तथा पटिसन्धिक्खणे महाभूतानन्ति महाभूतानं एकक्खणिकनानाक्खणिककम्मपच्चयवसेनेव ¶ तदुपादारूपानम्पि वदतीति च दट्ठब्बं. कटत्तारूपानन्ति पवत्तियं कटत्तारूपानन्ति अधिप्पायो.

६४. यथालाभवसेनाति इन्द्रियरूपेसु यं यं पटिसन्धियं लब्भति, तस्स तस्स वसेन.

६९. विप्पयुत्तपच्चया उप्पज्जमानानम्पि केसञ्चि नियमतो वत्थु विप्पयुत्तपच्चयो, केसञ्चि खन्धा, न च समानविप्पयुत्तपच्चया एव कुसलादिके पटिच्च उप्पज्जमाना उप्पज्जन्ति, अथ खो नानाविप्पयुत्तपच्चयापि, तस्मा तं ¶ विसेसं दस्सेतुं ‘‘वत्थुं विप्पयुत्तपच्चया, खन्धे विप्पयुत्तपच्चया’’ति तत्थ तत्थ वुत्तं. तत्थ तदायत्तवुत्तिताय पच्चयुप्पन्नो पच्चयं पच्चयं करोतीति इमस्सत्थस्स वसेन उपयोगवचनं दट्ठब्बं. वत्थुं खन्धे विप्पयुत्तपच्चयकरणतोति अयञ्हेत्थ अत्थो. अट्ठकथायं पन ‘‘वत्थुं पटिच्च विप्पयुत्तपच्चया, वत्थुना विप्पयुत्तपच्चयतं साधेन्तेना’’ति अत्थो वुत्तो, तत्थ कुसलानं खन्धानं वत्थुं पटिच्च उप्पत्ति नत्थीति ‘‘वत्थुं पटिच्चा’’ति न सक्का वत्तुन्ति, इदं पन पटिच्चसद्देन अयोजेत्वा ‘‘पटिच्च उप्पज्जन्ति वत्थुं विप्पयुत्तपच्चया’’ति योजेत्वा तस्सत्थो ‘‘वत्थुना विप्पयुत्तपच्चयतं साधेन्तेना’’ति वुत्तोति दट्ठब्बो. किं पन पटिच्चाति? यं ‘‘एकं खन्ध’’न्तिआदिकं पाळियं पटिच्चाति वुत्तं. तमेव अत्थं पाकटं कत्वा ‘‘वत्थुं विप्पयुत्तपच्चयाति खन्धे पटिच्च खन्धा, वत्थुना विप्पयुत्तपच्चयतं साधेन्तेना’’ति पठन्ति. अनन्तरत्ता पाकटस्स अब्याकतचित्तसमुट्ठानस्सेव गहणं मा होतूति ‘‘अब्याकतचित्तसमुट्ठानम्पि कुसलाकुसलचित्तसमुट्ठानम्पी’’ति आह. आसन्नम्पि दूरम्पि सब्बन्ति वुत्तं होतीति.

७१-७२. ‘‘इमे वीसति पच्चयाति संखिपित्वा दस्सितानं वसेनेतं वुत्त’’न्ति वुत्तं. तत्थ यदि एकेनपि देसनं संखित्तं संखित्तमेव, आदिम्हि पन तयो पच्चया विप्पयुत्तपच्चयो एकम्पि पदं अपरिहापेत्वा वित्थारिताति ते चत्तारो पच्छाजातञ्च वज्जेत्वा ‘‘इमे एकूनवीसति पच्चया’’ति वत्तब्बं सिया. एत्तका हि संखिपित्वा दस्सिताति. ये पन पाळियं वित्थारितं अवित्थारितञ्च सब्बं सङ्गहेत्वा वुत्तन्ति वदन्ति, तेसं ‘‘इमे तेवीसति पच्चया’’ति पाठेन भवितब्बं. आदिम्हि पन तयो पच्चये वित्थारिते वज्जेत्वा यतो पभुति सङ्खेपो आरद्धो, ततो चतुत्थतो पभुति संखित्तं वित्थारितञ्च सह गहेत्वा ‘‘इमे तेवीसति पच्चया’’ति वुत्तन्ति दट्ठब्बं.

विभङ्गवारवण्णना निट्ठिता.

(२) सङ्ख्यावारो

७३. तथा ¶ पुरेजातपच्चयेति यथा अञ्ञमञ्ञपच्चये विसेसो विभङ्गे अत्थि, तथा पुरेजातपच्चयेपि अत्थीति अत्थो. ‘‘वत्थुं पुरेजातपच्चया’’ति हि तत्थ विसेसो पटिसन्धिअभावो चाति. विपाकानि चेव ¶ वीथिचित्तानि च न लब्भन्तीति एतेन ‘‘किरियाब्याकतं एकं खन्धं पटिच्चा’’तिआदिके (पट्ठा. १.१.५३) विभङ्गे विपाकाब्याकताभावं किरियाब्याकते च अजवनस्स सब्बेन सब्बं अलब्भमानतं विसेसं दस्सेति.

७४. एकमूलके दस्सिताय देसनाय लब्भमानगणनञ्ञेव आदायाति इदं एतस्मिं अनुलोमे सुद्धिकनये दस्सितगणनतो ततो परेसु नयेसु अञ्ञिस्सा अभावं सन्धाय वुत्तं. अबहुगणनेन युत्तस्स तेन समानगणनता च इमस्मिं अनुलोमेयेव दट्ठब्बा. पच्चनीये पन ‘‘नहेतुपच्चया नारम्मणे एक’’न्तिआदिं (पट्ठा. १.१.१०४) वक्खतीति.

७६-७९. ते पन सङ्खिपित्वा तेवीसतिमूलकोवेत्थ दस्सितोति एत्थ पच्छाजातविपाकानं परिहीनत्ता ‘‘द्वावीसतिमूलको’’ति वत्तब्बं सिया सासेवनसविपाकानं वसेन. दुविधम्पि पन द्वावीसतिमूलकं सह गहेत्वा सङ्गहिते तस्मिं उभयसब्भावतो ‘‘तेवीसतिमूलको’’ति आहाति दट्ठब्बं. आसेवनविपाकानं वा विरोधाभावे सति पुच्छाय दस्सितनयेन तेवीसतिमूलकेन भवितब्बं, तस्स च नामं द्वावीसतिमूलके आरोपेत्वा ‘‘तेवीसतिमूलको’’ति वुत्तन्ति अयमेत्थ रुळ्ही.

आरम्मणपदे चेवाति एतेन एकमूलके अञ्ञपदानि वज्जेति. न हि एकमूलके हेतादीसु तयोवाति अधिप्पायो. सुद्धिकनयो पन आरम्मणमूलकादीसु न लब्भतीति आरम्मणमूलके ‘‘नवा’’ति एताय अधिकगणनाय अभावदस्सनत्थं ‘‘आरम्मणे ठितेन सब्बत्थ तीणेव पञ्हा’’ति वुत्तं. तत्थ कातब्बाति वचनसेसो. तीणेवाति च ततो उद्धं गणनं निवारेति, न अधो पटिक्खिपति. तेन ‘‘विपाके एक’’न्ति गणना न निवारिताति दट्ठब्बा. तीसु एकस्स अन्तोगधताय च ‘‘तीणेवा’’ति वुत्तन्ति. इतीतिआदिना ‘‘सब्बत्थ तीणेवा’’ति वचनेन अत्तनो वचनं दळ्हं करोति.

८०-८५. ये ¶ …पे… तं दस्सेतुन्ति एत्थायमधिप्पायो – यदिपि अविगतानन्तरं ‘‘आरम्मणपच्चया हेतुया तीणी’’ति वुत्तेपि ऊनतरगणनेन सद्धिं संसन्दने या गणना लब्भति, सा दस्सिता होति, तथापि ¶ ऊनतरगणनेहि समानगणनेहि च सद्धिं संसन्दने ऊनतरा समाना च होति, न एवं आविकरणवसेन दस्सिता होति, विपल्लासयोजनाय पन तथा दस्सेति. वचनेन वा हि लिङ्गेन वा अत्थविसेसाविकरणं होतीति. तेनेतं आविकरोतीति एत्थापि एवमेव अधिप्पायो योजेतब्बो. पच्चनीयादीसुपि पन ‘‘नारम्मणपच्चया नहेतुया एकं…पे… नोविगतपच्चया नहेतुया एक’’न्तिआदिना (पट्ठा. १.१.१०७) मूलपदं आदिम्हियेव ठपेत्वा योजना कता, न च तत्थ एतं लक्खणं लब्भति, तस्मा मूलपदस्स आदिम्हि ठपेत्वा योजनमेव कमो, न चक्कबन्धनन्ति ‘‘आरम्मणपच्चया हेतुया तीणी’’तिआदि योजितं, न च विञ्ञाते अत्थे वचनेन लिङ्गेन च पयोजनमत्थीति.

पच्चयानुलोमवण्णना निट्ठिता.

पटिच्चवारो

पच्चयपच्चनीयवण्णना

८६-८७. ‘‘अहेतुकं विपाकाब्याकतन्ति इदं रूपसमुट्ठापकवसेनेव वेदितब्ब’’न्ति वुत्तं, सब्बसङ्गाहकवसेन पनेतं न न सक्का योजेतुं.

९३. सहजातपुरेजातपच्चया सङ्गहं गच्छन्तीति एत्थ च सहजाता च हेतादयो पुरेजाता च आरम्मणादयो पच्चया सङ्गहं गच्छन्तीति अत्थो दट्ठब्बो. न हि नपच्छाजातपच्चया उप्पज्जमाना द्वीहेव सहजातपुरेजातपच्चयेहि उप्पज्जन्ति, अथ खो पच्छाजातवज्जेहि सब्बेहीति.

९४-९७. नाहारपच्चये एकच्चं रूपमेव पच्चयपच्चयुप्पन्नन्ति यं पटिच्च उप्पज्जति, सो पच्चयो ¶ रूपमेवाति कत्वा वुत्तं. यस्मा पन पच्चया उप्पज्जति, सो अरूपम्पि होति यथा कम्मं कटत्तारूपस्स.

९९-१०२. नमग्गपच्चये यदिपि चित्तसमुट्ठानादयो सब्बे रूपकोट्ठासा लब्भन्ति, तथापि यं मग्गपच्चयं लभति, तस्स पहीनत्ता ‘‘एकच्चं रूपं ¶ पच्चयुप्पन्न’’न्ति वुत्तं, एवमेव पन नहेतुपच्चयादीसुपि एकच्चरूपस्स पच्चयुप्पन्नता दट्ठब्बा.

१०७-१३०. नाहारनइन्द्रियनझाननमग्गपच्चया सब्बत्थ सदिसविस्सज्जनाति इदं एतेसु मूलभावेन ठितेसु गणनाय समानतं सन्धाय वुत्तं. मूलानञ्हि इध विस्सज्जनं गणनायेव, न सरूपदस्सनन्ति. नसहजातादिचतुक्कं इधापि परिहीनमेवाति सुद्धिकनये विय मूलेसुपि परिहीनमेवाति अत्थो.

पच्चयपच्चनीयवण्णना निट्ठिता.

पच्चयानुलोमपच्चनीयवण्णना

१३१-१८९. हेताधिपतिमग्गपच्चयेसु अनुलोमतो ठितेसु…पे… अट्ठ पच्चनीयतो न लब्भन्तीति तिण्णम्पि साधारणानं पच्चनीयतो अलब्भमानानं सब्बेसं सङ्गहवसेन वुत्तं, तस्मा मग्गपच्चये इतरेहि साधारणा सत्तेव योजेतब्बा. अधिपतिपच्चये अनुलोमतो ठिते हेतुपच्चयोपि पच्चनीयतो न लब्भति, सो पन मग्गेन असाधारणोति कत्वा न वुत्तोति दट्ठब्बो. येहि विना अरूपं न उप्पज्जति, ते एकन्तिकत्ता अरूपट्ठानिकाति इध वुत्ताति दट्ठब्बा, तेन पुरेजातासेवनपच्चया तेहि विनापि अरूपस्स उप्पत्तितो वज्जिता होन्ति. सब्बट्ठानिका अञ्ञमञ्ञआहारिन्द्रिया च तेहि विना अरूपस्स अनुप्पत्तितो सङ्गहिताति. ऊनतरगणनानंयेव वसेनाति यदि अनुलोमतो ठिता एककादयो द्वावीसतिपरियोसाना ऊनतरगणना होन्ति, तेसं वसेन पच्चनीयतो योजितस्स तस्स तस्स गणना वेदितब्बा. अथ पच्चनीयतो योजितो ऊनतरगणनो, तस्स वसेन अनुलोमतो ठितस्सपि गणना वेदितब्बाति ¶ अत्थो. ‘‘अञ्ञमञ्ञपच्चया नारम्मणे एक’’न्तिआदिवचनतो (पट्ठा. १.१.१४६) पन न इदं लक्खणं एकन्तिकं.

पच्चयानुलोमपच्चनीयवण्णना निट्ठिता.

पच्चयपच्चनीयानुलोमवण्णना

१९०. सब्बत्थेवाति ¶ न केवलं हेतुम्हियेव, अथ खो सब्बेसु पच्चयेसु पच्चनीकतो ठितेसूति अत्थो. पुरेजातं आसेवनञ्च अलभन्तं कञ्चि निदस्सनवसेन दस्सेन्तो ‘‘पटिसन्धिविपाको पना’’तिआदिमाह.

‘‘पुरेजातपच्छाजातासेवनविपाकविप्पयुत्तेसु पच्चनीकतो ठितेसु एकं ठपेत्वा अवसेसा अनुलोमतो लब्भन्ती’’ति इदं अवसेसानं लाभमत्तं सन्धाय वुत्तं. न सब्बेसं अवसेसानं लाभन्ति दट्ठब्बं. यदिपि हि पच्छाजाते पसङ्गो नत्थि ‘‘अनुलोमतो सब्बत्थेव न लब्भती’’ति अपवादस्स कतत्ता, पुरेजातो पन विप्पयुत्ते पच्चनीकतो ठिते अनुलोमतो लब्भतीति इदम्पि अवसेसा सब्बेति अत्थे गय्हमाने आपज्जेय्य. यम्पि केचि ‘‘विप्पयुत्तपच्चयरहिते आरुप्पेपि आरम्मणपुरेजातस्स सम्भवं ञापेतुं एवं वुत्त’’न्ति वदन्ति, तम्पि तेसं रुचिमत्तमेव. न हि यत्थ वत्थुपुरेजातं न लब्भति, तत्थ आरम्मणपुरेजातभावेन उपकारकं होतीति दस्सितोयं नयोति. युज्जमानकवसेनाति पच्चनीकतो ठितस्स ठपेतब्बत्ता वुत्तं, युज्जमानकपच्चयुप्पन्नवसेन वाति अत्थो. ‘‘मग्गपच्चये पच्चनीकतो ठिते हेतुपच्चयो अनुलोमतो न लब्भती’’ति पुरिमपाठो, अधिपतिपच्चयोपि पन न लब्भतीति ‘‘हेताधिपतिपच्चया अनुलोमतो न लब्भन्ती’’ति पठन्ति. अधिपतिपच्चये पच्चनीकतो ठिते पच्छाजाततो अञ्ञो अनुलोमतो अलब्भमानो नाम नत्थीति न विचारितं. अञ्ञमञ्ञे पच्चनीकतो ठिते ‘‘अरूपानंयेवा’’ति वुत्ता नव अनुलोमतो न लब्भन्ति, तम्पि पच्चनीकतो ठितेहि आरम्मणपच्चयादीहि सदिसताय सुविञ्ञेय्यन्ति न विचारितं भविस्सतीति.

१९१-१९५. याव ¶ आसेवना सब्बं सदिसन्ति न अञ्ञमञ्ञेन घटितस्स मूलस्स वित्थारितत्ता ततो परानि मूलानि सन्धाय वुत्तं. तेसु हि अनुलोमतो योजेतब्बपच्चया च पञ्हा चाति सब्बं सदिसन्ति.

इमस्मिं पच्चनीयानुलोमेति एतस्स ‘‘इमेसम्पि पकिण्णकानं वसेनेत्थ गणनवारो असम्मोहतो वेदितब्बो’’ति एतेन सह सम्बन्धो ¶ . तत्थ एत्थाति एतेसु पच्चयेसूति अत्थो वेदितब्बो. इमस्मिं पच्चनीयानुलोमे लब्भमानेसु पच्चयुप्पन्नधम्मेसुपीति वा योजेतब्बं. तत्थ पि-सद्देन इममत्थं दीपेति – न केवलं पच्चयेस्वेव किस्मिञ्चि पच्चनीकतो ठिते केचि अनुलोमतो न लब्भन्ति, अथ खो पच्चयुप्पन्नधम्मेसुपि कोचि एकच्चं पच्चयं लभमानो कञ्चि पच्चयं न लभतीति. तत्थ कम्मपच्चयं लभमानो येभुय्येन इन्द्रियपच्चयं लभति, मग्गपच्चयं लभमानो येभुय्येन हेतुपच्चयं, तथा च झानपच्चयं लभमानो मग्गपच्चयन्ति एतेस्वेव लाभालाभा विचारिता. यत्थाति पञ्चवोकारपवत्ते असञ्ञेसु च. रूपधम्माति यथावुत्तानि कटत्तारूपानेव सन्धाय वदति. न हि पञ्चवोकारपवत्ते सब्बे रूपधम्मा हेतादीनि न लभन्तीति. ‘‘हेताधिपतिविपाकिन्द्रियपच्चये न लभन्ती’’ति पुरिमपाठो, झानमग्गेपि पन न लभन्तीति ‘‘हेताधिपतिविपाकिन्द्रियझानमग्गपच्चये न लभन्ती’’ति पठन्ति. ये रूपधम्मानं पच्चया होन्ति, तेसु अरूपट्ठानिकवज्जेसु एतेयेव न लभन्तीति अधिप्पायो. पच्छाजाताहारविप्पयुत्तपच्चयेपि हि पवत्ते कटत्तारूपं लभतीति. लब्भमानालब्भमानपच्चयदस्सनमत्तञ्चेतं, न तेहि पच्चयेहि उप्पत्तिअनुप्पत्तिदस्सनन्ति. एवं इन्द्रियपच्चयालाभो जीवितिन्द्रियं सन्धाय वुत्तो सिया. यथावुत्तेसु हि धम्मवसेन पच्छाजातादित्तयम्पि अलभन्तं नाम कटत्तारूपं नत्थि. को पन वादो सब्बट्ठानिककम्मेसु. इन्द्रियं पन अलभन्तं अत्थि, किन्तं? जीवितिन्द्रियन्ति. यदि एवं उपादारूपानि सन्धाय अञ्ञमञ्ञपच्चयम्पि न लभन्तीति वत्तब्बं, तं पन पाकटन्ति न वुत्तं सिया. अरूपिन्द्रियालाभं वा सन्धाय इन्द्रियपच्चयालाभो वुत्तोति दट्ठब्बो.

१९६-१९७. नारम्मणमूलकेसु दुकादीसु हेतुया पञ्चाति यदिपि तिकादीसु ‘‘हेतुया पञ्चा’’ति इदं नत्थि, तथापि दुकादीसु सब्बत्थ अनुत्तानं वत्तुकामो ‘‘दुकादीसू’’ति सब्बसङ्गहवसेन वत्वा तत्थ यं आदिदुके वुत्तं ‘‘हेतुया पञ्चा’’ति, तं निद्धारेति. केचि पन ‘‘नारम्मणमूलके हेतुया पञ्चा’’ति पाठं वदन्ति. ‘‘अञ्ञमञ्ञे एकन्ति भूतरूपमेव सन्धाय ¶ वुत्त’’न्ति पुरिमपाठो, वत्थुपि पन लब्भतीति ‘‘भूतरूपानि चेव वत्थुञ्च सन्धाय वुत्त’’न्ति पठन्ति. तिमूलकेति इधापि दुमूलकं तिमूलकन्ति वदन्ति.

२०३-२३३. नकम्ममूलके ¶ हेतुया तीणीतिआदीसु चेतनाव पच्चयुप्पन्नाति इदं ‘‘हेतुया तीणी’’ति एवंपकारे चेतनामत्तसङ्गाहके सन्धाय वुत्तन्ति दट्ठब्बं. आदि-सद्दो हि पकारत्थोव होतीति. सहजातअञ्ञमञ्ञनिस्सयाहारअत्थिअविगतेसु पन रूपम्पि लब्भतीति.

पच्चयपच्चनीयानुलोमवण्णना निट्ठिता.

पटिच्चवारवण्णना निट्ठिता.

२. सहजातवारवण्णना

२३४-२४२. कुसलं धम्मं सहजातो, कुसलं एकं खन्धं सहजातोतिआदीसु सहजातसद्देन सहजातपच्चयकरणं सहजातायत्तभावगमनं वा वुत्तन्ति तस्स करणस्स गमनस्स वा कुसलादीनं कम्मभावतो उपयोगवचनं कतन्ति दट्ठब्बं. एस नयो पच्चयवारादीसुपि. तत्रापि हि पच्चयसद्देन च निस्सयपच्चयकरणं निस्सयायत्तभावगमनं वा वुत्तं, संसट्ठसद्देन च सम्पयुत्तपच्चयकरणं सम्पयुत्तायत्तभावगमनं वाति तंकम्मभावतो उपयोगवचनं कुसलादीसु कतन्ति. सहजातम्पि च उपादारूपं भूतरूपस्स पच्चयो न होतीति ‘‘पटिच्चा’’ति इमिना वचनेन दीपितो पच्चयो न होतीति अत्थो. ‘‘उपादारूपं भूतरूपस्सा’’ति च निदस्सनवसेन वुत्तं. उपादारूपस्सपि हि उपादारूपं यथावुत्तो पच्चयो न होति, वत्थुवज्जानि रूपानि च अरूपानन्ति.

सहजातवारवण्णना निट्ठिता.

३. पच्चयवारवण्णना

२४३. पच्चयाति ¶ एत्थ पति अयो पच्चयो. पति-सद्दो पतिट्ठत्थं दीपेति, अय-सद्दो गतिं, पतिट्ठाभूता गति निस्सयो पच्चयोति वुत्तं होति, ततो पच्चया, पच्चयकरणतो तदायत्तभावगमनतो वाति अत्थो.

‘‘महाभूते ¶ पच्चया चित्तसमुट्ठानं रूप’’न्ति (पट्ठा. १.१.२४५) भूतुपादारूपानि सह सङ्गण्हित्वा वुत्तं. अट्ठकथायं पन चित्तसमुट्ठाने च महाभूते निस्साय चित्तसमुट्ठानं उपादारूपन्ति सयं निस्सयो अहुत्वा निस्सये उप्पज्जमानेन उपादारूपेन निदस्सनं कतन्ति दट्ठब्बं.

२५५. असञ्ञ…पे… कटत्तारूपं उपादारूपन्ति एत्थ यो पटिच्चवारे सहजाते कम्मउतुजानं, कम्मे च एकन्तानेकन्तकम्मजानं वसेन अत्थो वुत्तो, सो नाधिप्पेतो एव ‘‘कटत्तारूप’’न्ति कम्मसमुट्ठानरूपस्सेव सब्बस्स च गहितत्ताति तं पहाय यथागहितस्स कटत्तारूपस्स विसेसनवसेन ‘‘उपादारूपसङ्खातं कटत्तारूप’’न्ति अत्थमाह. महाभूते पन पटिच्च पच्चया च महाभूतानं उप्पत्ति न निवारेतब्बाति उपादारूपग्गहणेन कटत्तारूपग्गहणं अविसेसेत्वा उपादारूपानं निवत्तेतब्बानं अत्थिताय कटत्तारूपग्गहणेनेव उपादारूपग्गहणस्स विसेसनं दट्ठब्बं.

२६९-२७६. ‘‘अब्याकतेन अब्याकतं, कुसलं, अकुसल’’न्ति वत्तब्बे ‘‘अब्याकतेन कुसलं, अकुसलं, अब्याकत’’न्ति, ‘‘कुसलं धम्मं पटिच्च कुसलो च अकुसलो च धम्मा कुसलस्साति अनामसित्वा’’ति च पुरिमपाठे पमादलेखा दट्ठब्बा.

२८६-२८७. नहेतुपच्चया नपुरेजाते द्वेति एत्थ अट्ठकथायं ‘‘आरुप्पे पन अहेतुकमोहस्स अहेतुककिरियस्स च वसेन द्वेति वुत्ता, नविप्पयुत्ते द्वेति आरुप्पे अहेतुकाकुसलकिरियवसेना’’ति वुत्तं, तं लब्भमानेसु एकदेसेन निदस्सनवसेन वुत्तन्ति दट्ठब्बं. आरुप्पे पन अहेतुकमोहस्स अहेतुककिरियाय अहेतुकपटिसन्धिया एकच्चस्स च रूपस्स वसेन द्वे वुत्ताति, नविप्पयुत्ते द्वेति आरुप्पे अहेतुकाकुसलकिरियाएकच्चरूपानं वसेनाति वुत्तन्ति. ‘‘नोनत्थिनोविगतेसु एकन्ति सब्बरूपस्स वसेना’’ति वुत्तं, नहेतुमूलकत्ता इमस्स ¶ नयस्स हेतुपच्चयं लभन्तं न लब्भतीति ‘‘एकच्चस्स रूपस्स वसेना’’ति भवितब्बं. चक्खादिधम्मवसेन पन चित्तसमुट्ठानादिकोट्ठासवसेन वा सब्बं लब्भतीति ‘‘सब्बरूपस्सा’’ति वुत्तं सिया.

२८९-२९६. आगतानागतन्ति ¶ पञ्हवसेन वुत्तं, लब्भमानालब्भमानन्ति आगते च पञ्हे लब्भमानालब्भमानधम्मवसेन.

पच्चयवारवण्णना निट्ठिता.

४. निस्सयवारवण्णना

३२९-३३७. पच्चयवारेन निस्सयपच्चयभावन्ति निस्सयवारे वुत्तस्स निस्सयपच्चयभावं नियमेतुन्ति अत्थो.

निस्सयवारवण्णना निट्ठिता.

५. संसट्ठवारवण्णना

३५१-३६८. संसट्ठवारे पच्चनीये ‘‘नविप्पयुत्ते पटिसन्धि नत्थी’’ति इदं वत्थुविरहिताय पटिसन्धिया विसुं अनुद्धरणतो वुत्तं. पटिच्चवारादीसु हि सहजातस्स पच्चयभावदस्सनत्थं सवत्थुका पटिसन्धि उद्धटा, सा इधापि अधिपतिपुरेजातासेवनेसु नकम्मनविपाकनझाननविप्पयुत्तेसु न लब्भति, अञ्ञेसु च अनुलोमतो पच्चनीयतो च लब्भमानपच्चयेसु लब्भतीति इमस्स विसेसस्स दस्सनत्थं उद्धटाति. सेसा तेरस न लब्भन्तीति एत्थ ‘‘सेसा चुद्दसा’’ति भवितब्बं. न झाने एकन्ति अहेतुकपञ्चविञ्ञाणवसेनाति पञ्चविञ्ञाणानं हेतुपच्चयविरहितमत्तदस्सनत्थं अहेतुकग्गहणं कतन्ति दट्ठब्बं, ‘‘नमग्गे एकन्ति अहेतुककिरियवसेना’’ति वुत्तं, ‘‘अहेतुकविपाककिरियवसेना’’ति भवितब्बं.

३६९-३९१. हेट्ठा ¶ वुत्तनयेनेवाति पटिच्चवारे अनुलोमपच्चनीये वुत्तनयेन. ‘‘नहेतुपच्चयुप्पन्नेसु अहेतुकमोहोव झानमग्गपच्चयं लभति, सेसा न लभन्ती’’ति वुत्तं, सेसेसु पन पञ्चविञ्ञाणवज्जाहेतुकक्खन्धा तंसमुट्ठाना पच्चयुप्पन्नधम्मा झानपच्चयं लभन्ति, न पच्चनीयानुलोमे द्विन्नं पच्चयानं अनुलोमेन सह योजना अत्थीति झानमग्गपच्चयं सहितं लभतीति च न सक्का वत्तुं, तस्मा ‘‘अहेतुकमोहोव मग्गपच्चयं लभती’’ति वत्तब्बं.

संसट्ठवारवण्णना निट्ठिता.

६. सम्पयुत्तवारवण्णना

३९२-४००. सदिसं ¶ सम्पयुत्तं संसट्ठं वोकिण्णञ्च संसट्ठं न होतीति उभयं अञ्ञमञ्ञापेक्खं वुच्चमानं अञ्ञमञ्ञस्स नियामकं होतीति.

सम्पयुत्तवारवण्णना निट्ठिता.

७. पञ्हावारविभङ्गवण्णना

४०१-४०३. येहि पच्चयेहि कुसलो कुसलस्स पच्चयो होति, ते पच्चये पटिपाटिया दस्सेतुन्ति यथाक्कमेन आगतागतपटिपाटिया दस्सेतुन्ति अत्थो. कुसलो कुसलस्साति निदस्सनमत्तमेतं, तेन कुसलो कुसलादीनं, अकुसलो अकुसलादीनं, अब्याकतो अब्याकतादीनं, कुसलाब्याकता कुसलादीनन्तिआदिको सब्बो पभेदो निदस्सितो होतीति यथानिदस्सिते सब्बे गहेत्वा आह ‘‘ते पच्चये पटिपाटिया दस्सेतु’’न्ति.

४०४. दत्वाति एत्थ दा-सद्दो सोधनत्थोपि होतीति मन्त्वा आह ‘‘विसुद्धं कत्वा’’ति. तेसञ्हि तं चित्तन्ति तेसन्ति वत्तब्बतारहं सकदागामिमग्गादिपुरेचारिकं तं गोत्रभुचित्तन्ति अधिप्पायो ¶ . विपस्सनाकुसलं पन कामावचरमेवाति पच्चयुप्पन्नं भूमितो ववत्थपेति. तेनेवाति धम्मवसेनेव दस्सनतो, देसनन्तरत्ताति अधिप्पायो.

४०५. अस्सादनं सरागस्स सोमनस्सस्स ससोमनस्सस्स रागस्स च किच्चन्ति आह ‘‘अनुभवति चेव रज्जति चा’’ति. अभिनन्दनं पीतिकिच्चसहिताय तण्हाय किच्चन्ति आह ‘‘सप्पीतिकतण्हावसेना’’ति. दिट्ठाभिनन्दना दिट्ठियेव. एत्थ पन पच्छिमत्थमेव गहेत्वा ‘‘अभिनन्दन्तस्स अत्ता अत्तनियन्तिआदिवसेन…पे… दिट्ठि उप्पज्जती’’ति वुत्तं. अभिनन्दना पन दिट्ठाभिनन्दनायेवाति न सक्का वत्तुं ‘‘भावनाय पहातब्बो धम्मो भावनाय पहातब्बस्स धम्मस्स आरम्मण…पे… भावनाय पहातब्बं रागं अस्सादेति अभिनन्दती’’ति (पट्ठा. २.८.७२) वचनतो, तस्मा पुरिमोपि अत्थो वुत्तोति दट्ठब्बो. द्वीसु पन सोमनस्ससहगतचित्तेसु यथावुत्तेन सोमनस्सेन ¶ रागेन च अस्सादेन्तस्स तेसुयेव सप्पीतिकतण्हाय चतूसुपि दिट्ठाभिनन्दनाय अभिनन्दन्तस्स च दिट्ठि उप्पज्जतीतिपि सक्का योजेतुं. जातिवसेनाति सुचिण्णसामञ्ञवसेनाति अत्थो.

४०६. तदारम्मणताति तदारम्मणभावेन. विभत्तिलोपो हेत्थ कतोति. भाववन्ततो वा अञ्ञो भावो नत्थीति भावेनेव विपाकं विसेसेति, विपाको तदारम्मणभावभूतोति अत्थो. विञ्ञाणञ्चायतननेवसञ्ञानासञ्ञायतनविपाकानं विय न कामावचरविपाकानं नियोगतो ववत्थितं इदञ्च कम्मं आरम्मणन्ति तं लब्भमानम्पि न वुत्तं. तदारम्मणेन पन कुसलारम्मणभावेन समानलक्खणताय कम्मारम्मणा पटिसन्धिआदयोपि दस्सितायेवाति दट्ठब्बा. पटिलोमतो वा एकन्तरिकवसेन वाति वदन्तेन अनुलोमतो समापज्जने येभुय्येन आसन्नसमापत्तिया आरम्मणभावो दस्सितोति दट्ठब्बो. यथा पन पटिलोमतो एकन्तरिकवसेन च समापज्जन्तस्स अनासन्नापि समापत्ति आरम्मणं होति, एवं अनुलोमतो समापज्जन्तस्सपि भवेय्याति. ‘‘चेतोपरियञाणस्सातिआदीनि परतो आवज्जनाय योजेतब्बानी’’ति वत्वा ‘‘या एतेसं आवज्जना, तस्सा’’ति अत्थो वुत्तो, एवं सति ‘‘इद्धिविधञाणस्सा’’तिपि वत्तब्बं सिया. यस्मा पन कुसला खन्धा अब्याकतस्स इद्धिविधञाणस्स आरम्मणं न होन्तीति तं न वुत्तं, चेतोपरियञाणादीनञ्च होन्तीति तानि वुत्तानि, तस्मा किरियानं चेतोपरियञाणादीनं याय कायचि आवज्जनाय च कुसलारम्मणाय कुसला खन्धा आरम्मणपच्चयेन पच्चयोति एवमत्थो दट्ठब्बो.

४०७-४०९. विप्पटिसारादिवसेन ¶ वाति आदि-सद्देन आदीनवदस्सनेन सभावतो च अनिट्ठतामत्तं सङ्गण्हाति, अक्खन्तिभेदा वा.

४१०. रूपायतनं चक्खुविञ्ञाणस्सातिआदिना विञ्ञाणकायेहि नियतारम्मणेहि अब्याकतस्स अब्याकतानं आरम्मणपच्चयभावं निदस्सेति. सब्बस्स हि वत्तुं असक्कुणेय्यत्ता एकस्मिं सन्ताने धम्मानं एकदेसेन निदस्सनं करोतीति.

४१३-४१६. चतुभूमकं ¶ कुसलं आरम्मणाधिपतिपच्चयभावेन दस्सितं, पच्चयुप्पन्नं पन कामावचरमेव.

४१७. अपुब्बतो चित्तसन्तानतो वुट्ठानं भवङ्गमेव, तं पन मूलागन्तुकभवङ्गसङ्खातं तदारम्मणं पकतिभवङ्गञ्च. अनुलोमं सेक्खाय फलसमापत्तियाति एत्थ कायचि सेक्खफलसमापत्तिया अवज्जेतब्बत्ता वत्तब्बं नत्थीति नेवसञ्ञानासञ्ञायतनकुसलं फलसमापत्तियाति इमं निब्बिसेसनं फलसमापत्तिं उद्धरित्वा दस्सेन्तो आह ‘‘फलसमापत्तियाति अनागामिफलसमापत्तिया’’ति. कामावचरकिरिया दुविधस्सपि वुट्ठानस्साति एत्थ किरियानन्तरं तदारम्मणवुट्ठाने यं वत्तब्बं, तं चित्तुप्पादकण्डे वुत्तमेव.

ता उभोपि…पे… द्वादसन्नन्ति इदं सोमनस्ससहगतमनोविञ्ञाणधातुवसेन वुत्तं, उपेक्खासहगता पन यथावुत्तानं दसन्नं विञ्ञाणधातूनं वोट्ठब्बनकिरियस्स मनोधातुकिरियस्स चाति द्वादसन्नं होतीति दट्ठब्बं.

४२३. दानादिपुञ्ञकिरियायत्ता सब्बसम्पत्तियो पटिविज्झित्वाति सम्बन्धो. न पनेतं एकन्तेन गहेतब्बन्ति ‘‘बलवचेतनाव लब्भति, न दुब्बला’’ति एतं एकन्तं न गहेतब्बं, दळ्हं वा न गहेतब्बन्ति अधिप्पायो. किं कारणन्ति? बलवतो दुब्बलस्स वा कतोकासस्स अन्तरायं पटिबाहित्वा विपच्चनतो ‘‘यंकञ्चि यदि विपाकं जनेति, उपनिस्सयो न होती’’ति नवत्तब्बत्ता चाति दस्सेन्तो ‘‘कतोकासञ्ही’’तिआदिमाह. विपाकत्तिके पन पञ्हावारपच्चनीये ‘‘विपाकधम्मधम्मो विपाकस्स धम्मस्स आरम्मणपच्चयेन पच्चयो, उपनिस्सयपच्चयेन पच्चयो, कम्मपच्चयेन पच्चयो’’ति (पट्ठा. १.३.९३) कम्मपच्चयस्स विसुं ¶ उद्धटत्ता, वेदनात्तिके च पञ्हावारपच्चनीये ‘‘नहेतुपच्चया नआरम्मणपच्चया नउपनिस्सये अट्ठा’’ति (पट्ठा. १.२.८७) वुत्तत्ता ‘‘विपाकजनकम्पि किञ्चि कम्मं उपनिस्सयपच्चयो न होती’’ति सक्का वत्तुन्ति.

तस्मिं वा विरुद्धोति तंनिमित्तं विरुद्धो, विरुद्धन्ति वा पाठो. ओमानन्ति परस्स पवत्तओमानं. रागो रञ्जनवसेन पवत्ता कामरागतण्हा, ‘‘इति मे चक्खुं सिया अनागतमद्धानं, इति रूपा’’ति अप्पटिलद्धस्स पटिलाभाय चित्तपणिदहनतण्हा पत्थनाति अयमेतेसं विसेसो.

तेसु ¶ अञ्ञम्पीति तेसु यंकिञ्चि पुब्बे हनिततो अञ्ञम्पि पाणं हनतीति अत्थो.

पुनप्पुनं आणापनवसेन वाति मातुघातकम्मेन सदिसताय पुब्बे पवत्तायपि आणत्तचेतनाय मातुघातकम्मनामं आरोपेत्वा वदन्ति. एस नयो द्वीहि पहारेहीति एत्थापि.

यथेव हि…पे… उप्पादेति नामाति रागं उपनिस्साय दानं देतीति रागं उपनिस्साय दानवसेन सद्धं उप्पादेतीति अयमत्थो वुत्तो होतीति इमिना अधिप्पायेन वदति. यथा रागं उपनिस्साय दानं देतीतिएवमादि होति, एवं रागादयो सद्धादीनं उपनिस्सयपच्चयोति इदम्पि होतीति दस्सेति. कायिकं सुखन्तिआदीनं एकतो दस्सनेन विसुंयेव न एतेसं पच्चयभावो, अथ खो एकतोपीति दस्सितं होतीति दट्ठब्बं.

४२५. उपत्थम्भकत्तेन पच्चयत्तायेवाति एतेन इदं दस्सेति – न पुरिमवारेसु विय इमस्मिं पच्चयेन उप्पत्ति वुच्चति, अथ खो तस्स तस्स पच्चयुप्पन्नस्स तेसं तेसं धम्मानं तंतंपच्चयभावो, न च पच्छाजातक्खन्धा उपत्थम्भकत्तेन पच्चया न होन्ति, तेनेस पच्छाजातपच्चयो इध अनुलोमतो आगतोति.

४२७. चेतना वत्थुस्सपि पच्चयोति अत्तनो पतिट्ठाभूतस्सपि कम्मपच्चयोति अधिप्पायो.

कस्मा ¶ पनेत्थ पच्चयवारे विय निस्सयअत्थिअविगतेसु दुमूलकदुकावसाना पञ्हा न उद्धटाति? अलब्भमानत्ता. तत्थ हि पच्चयुप्पन्नप्पधानत्ता देसनाय कुसलो च अब्याकतो च धम्मा एकतो उप्पज्जमाना कुसलाब्याकतपच्चया लब्भन्तीति ‘‘कुसलञ्च अब्याकतञ्च धम्मं पच्चया कुसलो च अब्याकतो च धम्मा उप्पज्जन्ती’’ति (पट्ठा. १.१.२४६) वुत्तं. यतो ततो वा उभयपच्चयतो पच्चयुप्पन्नस्स उप्पत्तिमत्तंयेव हि तत्थ अधिप्पेतं, न उभयस्स उभिन्नं पच्चयभावोति. इध पन पच्चयप्पधानत्ता देसनाय कुसलाब्याकता कुसलाब्याकतानं उभिन्नं निस्सयादिभूता न लब्भन्तीति ¶ ‘‘कुसलो च अब्याकतो च धम्मा कुसलस्स च अब्याकतस्स च धम्मस्स निस्सयपच्चयेन पच्चयो’’तिआदि न वुत्तं.

पञ्हावारविभङ्गवण्णना निट्ठिता.

पञ्हावारस्स घटने अनुलोमगणना

४३९. ‘‘एत्थ पन पुरेजातम्पि लब्भती’’ति वुत्तं, यदि एवं कस्मा ‘‘तथा’’ति वुत्तन्ति? ‘‘तीणी’’ति गणनमत्तसामञ्ञतो.

४४०. ‘‘अधिपतिपच्चये ठ