तीका > अभिधम्मपिटक (टीका) > अभिधम्मावतारो-नामरूपपरिच्छेदो

तस्मा अनवज्जइट्ठविपाकलक्खणं कुसलं, अकुसलविद्धंसनरसं, वोदानपच्चुपट्ठानं. वज्जपटिपक्खत्ता अनवज्जलक्खणं वा कुसलं, वोदानभावरसं, इट्ठविपाकपच्चुपट्ठानं, योनिसोमनसिकारपदट्ठानं. सावज्जानिट्ठविपाकलक्खणमकुसलं. तदुभयविपरीतलक्खणमब्याकतं, अविपाकारहं वा.

तत्थ ¶ कुसलचित्तं एकवीसतिविधं होति, तदिदं भूमितो चतुब्बिधं होति – कामावचरं, रूपावचरं, अरूपावचरं, लोकुत्तरञ्चेति.

तत्थ कामावचरकुसलचित्तं भूमितो एकविधं, सवत्थुकावत्थुकभेदतो दुविधं, हीनमज्झिमपणीतभेदतो तिविधं, सोमनस्सुपेक्खाञाणप्पयोगभेदतो अट्ठविधं होति. सेय्यथिदं – सोमनस्ससहगतं ञाणसम्पयुत्तं असङ्खारिकमेकं, ससङ्खारिकमेकं, सोमनस्ससहगतं ञाणविप्पयुत्तं असङ्खारिकमेकं, ससङ्खारिकमेकं, उपेक्खासहगतं ञाणसम्पयुत्तं असङ्खारिकमेकं, ससङ्खारिकमेकं, उपेक्खासहगतं ञाणविप्पयुत्तं असङ्खारिकमेकं, ससङ्खारिकमेकन्ति इदं अट्ठविधम्पि कामावचरकुसलचित्तं नाम.

उद्दानतो दुवे कामा, क्लेसवत्थुवसा पन;

किलेसो छन्दरागोव, वत्थु तेभूमवट्टकं.

किलेसकामो ¶ कामेति, वत्थु कामीयतीति च;

सिज्झति दुविधोपेस, कामो वो कारकद्वये.

यस्मिं ¶ पन पदेसे सो, कामोयं दुविधोपि च;

सम्पत्तीनं वसेनाव-चरतीति च सो पन.

पदेसो चतुपायानं, छन्नं देवानमेव च;

मनुस्सानं वसेनेव, एकादसविधो पन.

कामोवचरतीतेत्थ, कामावचरसञ्ञितो;

अस्साभिलक्खितत्ता हि, ससत्थावचरो विय.

स्वायं रूपभवो रूपं, एवं कामोति सञ्ञितो;

उत्तरस्स पदस्सेव, लोपं कत्वा उदीरितो.

तस्मिं ¶ कामे इदं चित्तं, सदावचरतीति च;

कामावचरमिच्चेवं, कथितं कामघातिना.

पटिसन्धिं भवे कामे, अवचारयतीति वा;

कामावचरमिच्चेवं, परियापन्नन्ति तत्र वा.

इदं अट्ठविधं चित्तं, कामावचरसञ्ञितं;

दसपुञ्ञक्रियवत्थु-वसेनेव पवत्तति.

दिट्ठिज्जुत्तं संसुतिच्चापचायो,

ञेय्यो एवं पुञ्ञवत्थुप्पभेदो.

गच्छन्ति सङ्गहं दाने, पत्तिदानानुमोदना;

तथा सीलमये पुञ्ञे, वेय्यावच्चापचायना.

देसना सवनं दिट्ठि-उजुका भावनामये;

पुन तीणेव सम्भोन्ति, दस पुञ्ञक्रियापि च.

सब्बानुस्सतिपुञ्ञञ्च, पसंसा सरणत्तयं;

यन्ति दिट्ठिजुकम्मस्मिं, सङ्गहं नत्थि संसयो.

पुरिमा ¶ मुञ्चना चेव, परा तिस्सोपि चेतना;

होति दानमयं पुञ्ञं, एवं सेसेसु दीपये.

इदानि अस्स पनट्ठविधस्सापि कामावचरकुसलचित्तस्स अयमुप्पत्तिक्कमो वेदितब्बो. यदा हि यो देय्यधम्मप्पटिग्गाहकादिसम्पत्तिं, अञ्ञं वा सोमनस्सहेतुं आगम्म हट्ठपहट्ठो ‘‘अत्थि दिन्न’’न्ति आदिनयप्पवत्तं सम्मादिट्ठिं पुरक्खत्वा परेहि अनुस्साहितो दानादीनि पुञ्ञानि करोति, तदास्स सोमनस्ससहगतं ञाणसम्पयुत्तं ¶ असङ्खारिकं ¶ पठमं महाकुसलचित्तं उप्पज्जति. यदा पन वुत्तनयेनेव हट्ठपहट्ठो सम्मादिट्ठिं पुरक्खत्वा परेहि उस्साहितो करोति, तदास्स तमेव चित्तं ससङ्खारिकं होति. इमस्मिं पनत्थे सङ्खारोति अत्तनो वा परस्स वा पवत्तस्स पुब्बप्पयोगस्साधिवचनं. यदा पन ञातिजनस्स पटिपत्तिदस्सनेन जातपरिचया बालका भिक्खू दिस्वा सोमनस्सजाता सहसा यं किञ्चि हत्थगतं ददन्ति वा वन्दन्ति वा, तदा तेसं ततियचित्तमुप्पज्जति. यदा पन ते ‘‘देथ वन्दथ, अय्ये’’ति वदन्ति, एवं ञातिजनेन उस्साहिता हुत्वा हत्थगतं ददन्ति वा वन्दन्ति वा, तदा तेसं चतुत्थचित्तमुप्पज्जति. यदा पन देय्यधम्मप्पटिग्गाहकादीनं असम्पत्तिं वा अञ्ञेसं वा सोमनस्सहेतूनं अभावं आगम्म चतूसुपि विकप्पेसु सोमनस्सरहिता होन्ति, तदा सेसानि चत्तारि उपेक्खासहगतानि उप्पज्जन्ति. एवं सोमनस्सुपेक्खाञाणप्पयोगभेदतो अट्ठविधं कामावचरकुसलचित्तं वेदितब्बं.

दसपुञ्ञक्रियादीनं, वसेन च बहूनिपि;

एतानि पन चित्तानि, भवन्तीति पकासये.

सत्तरस सहस्सानि, द्वे सतानि असीति च;

कामावचरपुञ्ञानि, भवन्तीति विनिद्दिसे.

तं पन यथानुरूपं कामावचरसुगतियं भवभोगसम्पत्तिं अभिनिप्फादेति.

इतरेसु पन रूपावचरकुसलचित्तं सवत्थुकतो एकविधं, द्वीसु भवेसु उप्पज्जनतो दुविधं, हीनमज्झिमपणीतभेदतो तिविधं, पटिपदादिभेदतो चतुब्बिधं, झानङ्गयोगभेदतो पञ्चविधं. सेय्यथिदं – कामच्छन्दब्यापादथिनमिद्धउद्धच्चकुक्कुच्चविचिकिच्छाविप्पहीनं वितक्कविचारपीतिसुखचित्तेकग्गतासम्पयुत्तं ¶ पठमं, वितक्कविप्पहीनं विचारपीतिसुखचित्तेकग्गतासम्पयुत्तं ¶ दुतियं, वितक्कविचारविप्पहीनं पीतिसुखचित्तेकग्गतासम्पयुत्तं ततियं, वितक्कविचारपीतिविप्पहीनं सुखचित्तेकग्गतासम्पयुत्तं चतुत्थं, वितक्कविचारपीतिसुखविप्पहीनं उपेक्खाचित्तेकग्गतासम्पयुत्तं पञ्चमन्ति इदं पञ्चविधं ¶ रूपावचरकुसलचित्तं नाम.

तं पन यथासम्भवं पथवीकसिणादीसु आरम्मणेसु पवत्तिवसेन अनेकविधं होति. सब्बं पनेतं रूपावचरभावनापुञ्ञवसप्पवत्तं यथानुरूपं रूपावचरूपपत्तिनिप्फादकं होति. एवं ताव रूपावचरकुसलं वेदितब्बं.

सेसेसु पन द्वीसु अरूपावचरकुसलचित्तं ताव उपेक्खावेदनायोगभेदतो एकविधं, सवत्थुकावत्थुकभेदतो दुविधं, हीनमज्झिमपणीतभेदतो तिविधं, आरम्मणभेदतो चतुब्बिधं. कसिणुग्घाटिमाकासं, तत्थ पवत्तविञ्ञाणं, तस्स अपगमो, आकिञ्चञ्ञायतनन्ति इदमस्स चतुब्बिधमारम्मणं. यथापटिपाटिया एतस्सारम्मणस्स भेदतो चतुब्बिधं होति. सेय्यथिदं – सब्बसो रूपसञ्ञानं समतिक्कमा पटिघसञ्ञानं अत्थङ्गमा नानत्तसञ्ञानं अमनसिकारा आकासानञ्चायतनसञ्ञासहगतं, विञ्ञाणञ्चायतनसञ्ञासहगतं, आकिञ्चञ्ञायतनसञ्ञासहगतं, नेवसञ्ञानासञ्ञायतनसञ्ञासहगतन्ति इदं चतुब्बिधं अरूपावचरकुसलचित्तं नाम. सब्बं पनेतं अरूपावचरभावनापुञ्ञवसप्पवत्तं यथानुरूपं अरूपूपपत्तिनिप्फादकं होति. एवं अरूपावचरकुसलचित्तं वेदितब्बं.

इतरं पन लोकुत्तरकुसलचित्तं निब्बानारम्मणतो एकविधं, नियतानियतवत्थुकभेदतो दुविधं, तीहि विमोक्खमुखेहि पत्तब्बतो तिविधं, चतुमग्गयोगभेदतो चतुब्बिधं ¶ . सेय्यथिदं – सक्कायदिट्ठिविचिकिच्छासीलब्बतपरामाससञ्ञोजनप्पहानकरं सोतापत्तिमग्गचित्तं, रागदोसमोहानं तनुत्तकरं सकदागामिमग्गचित्तं, कामरागब्यापादानं निरवसेसप्पहानकरं अनागामिमग्गचित्तं, रूपरागअरूपरागमानउद्धच्चअविज्जापहानकरं अरहत्तमग्गचित्तन्ति इदं चतुब्बिधं लोकुत्तरकुसलचित्तं नाम. एकेकं पनेत्थ झानङ्गयोगभेदतो पञ्चविधं होति, तस्मा वीसतिविधं होति. सब्बं पनेतं लोकुत्तरभावनापुञ्ञवसप्पवत्तं मग्गानुरूपफलप्पवत्तिया चत्तारो अरियपुग्गले अभिनिप्फादेति. एवं लोकुत्तरकुसलं वेदितब्बं.

कामे ¶ ¶ अट्ठेव रूपे च, पञ्च चत्तारिरूपिसु;

चत्तारानुत्तरानेवं, कुसलानेकवीसति.

अकुसलं पन भूमितो एकविधं कामावचरमेव, नियतानियतवत्थुवसेन च एकहेतुकदुहेतुकवसेन च पटिसन्धिजनकाजनकवसेन च दुविधं, तीहि वेदनाहि योगतो च लोभमूलं दोसमूलं मोहमूलन्ति मूलतो च तिविधं होति. तत्थ लोभमूलं पन सोमनस्सुपेक्खादिट्ठिप्पयोगभेदतो अट्ठविधं होति. सेय्यथिदं – सोमनस्ससहगतं दिट्ठिगतसम्पयुत्तं असङ्खारिकमेकं, ससङ्खारिकमेकं, सोमनस्ससहगतं दिट्ठिगतविप्पयुत्तं असङ्खारिकमेकं, ससङ्खारिकमेकं, उपेक्खासहगतं दिट्ठिगतसम्पयुत्तं असङ्खारिकमेकं, ससङ्खारिकमेकं, उपेक्खासहगतं दिट्ठिगतविप्पयुत्तं असङ्खारिकमेकं, ससङ्खारिकमेकन्ति.

यदा ¶ हि ‘‘नत्थि कामेसु आदीनवो’’तिआदिना नयेन मिच्छादिट्ठिं पुरक्खत्वा केवलं हट्ठतुट्ठो कामे वा परिभुञ्जति, दिट्ठमङ्गलादीनि वा सारतो पच्चेति सभावतिक्खेनेव अनुस्साहितेन चित्तेन, तदास्स पठमं अकुसलचित्तं उप्पज्जति. यदा पन मन्देन समुस्साहितेन, तदा दुतियं. यदा मिच्छादिट्ठिं अपुरक्खत्वा केवलं हट्ठतुट्ठो मेथुनं धम्मं वा परिभुञ्जति, परसम्पत्तिं वा अभिज्झायति, परस्स भण्डं वा हरति सभावतिक्खेनेव अनुस्साहितेन चित्तेन, तदा ततियं. यदा मन्देन समुस्साहितेन, तदा चतुत्थं उप्पज्जति. यदा पन कामानं वा असम्पत्तिं आगम्म अञ्ञेसं वा सोमनस्सहेतूनं अभावेन चतूसुपि विकप्पेसु सोमनस्सरहिता होन्ति, तदा सेसानि चत्तारि उपेक्खासहगतानि उप्पज्जन्तीति. एवं सोमनस्सुपेक्खादिट्ठिप्पयोगभेदतो अट्ठविधं लोभमूलं वेदितब्बं.

दोसमूलं पन एकन्तसवत्थुकतो एकविधं, असङ्खारससङ्खारभेदतो दुविधं दोमनस्ससहगतं पटिघसम्पयुत्तं असङ्खारं, ससङ्खारन्ति. अस्स पन पाणातिपातादीसु तिक्खमन्दप्पवत्तिकाले उप्पत्ति वेदितब्बा.

मोहमूलम्पि ¶ ¶ विचिकिच्छुद्धच्चयोगतो दुविधं होति उपेक्खासहगतं विचिकिच्छासम्पयुत्तं, उपेक्खासहगतं उद्धच्चसम्पयुत्तन्ति. तस्स असन्निट्ठानविक्खेपकालेसु पवत्ति वेदितब्बाति.

एवं ताव द्वादसविधं अकुसलचित्तं वेदितब्बं, सब्बं पनेतं यथानुरूपं अपायेसु उपपत्तिया, सुगतियम्पि दुक्खविसेसस्स अभिनिप्फादकं होति.

लोभमूलवसेनट्ठ, दोसमूलवसा दुवे;

मोहमूलवसेन द्वे, एवं द्वादसधा सियुं.

पापापापेस्वपापेन ¶ , यं वुत्तं पापमानसं;

पापापापप्पहीनेन, तं मया समुदाहटं.

इतरं पन अब्याकतमविपाकारहतो एकविधं होति, जातिभेदतो दुविधं विपाकचित्तं किरियचित्तन्ति. तत्थ विपाकचित्तं भूमिभेदतो चतुब्बिधं कामावचरं रूपावचरं अरूपावचरं लोकुत्तरन्ति. तत्थ कामावचरं दुविधं कुसलविपाकं अकुसलविपाकन्ति. कुसलविपाकं दुविधं सहेतुकमहेतुकञ्चेति.

तत्थ सहेतुकविपाकचित्तं सककुसलं विय सोमनस्सुपेक्खाञाणप्पयोगभेदतो अट्ठविधं. सेय्यथिदं – सोमनस्ससहगतं ञाणसम्पयुत्तं असङ्खारं, ससङ्खारं, सोमनस्ससहगतं ञाणविप्पयुत्तं असङ्खारं, ससङ्खारं, उपेक्खासहगतं ञाणसम्पयुत्तं असङ्खारं, ससङ्खारं, उपेक्खासहगतं ञाणविप्पयुत्तं असङ्खारं, ससङ्खारन्ति इदं अट्ठविधं सहेतुकविपाकं नाम.

यथा पनस्स कुसलं दानादिवसेन छसु आरम्मणेसु पवत्तति, न इदं तथा. इदं हि पटिसन्धिभवङ्गचुतितदारम्मणवसेन परित्तधम्मपरियापन्नेसुयेव छसु आरम्मणेसु पवत्तति. सम्पयुत्तधम्मानञ्च विसेसे असतिपि आदासतलादीसु मुखनिमित्तं विय निरुस्साहं विपाकं, मुखं विय सउस्साहं कुसलन्ति वेदितब्बं. इमेसं पन विपच्चनट्ठानं वेदितब्बं. इमानि हि पटिसन्धिभवङ्गचुतितदारम्मणानि हुत्वा विपच्चन्ति.

कामावचरदेवानं ¶ , मनुस्सानं इमे पन;

दुहेतुकतिहेतूनं, भवन्ति पटिसन्धियो.

ततो पवत्तियं हुत्वा, भवङ्गं यावतायुकं;

बलवारम्मणे हुत्वा, तदारम्मणमेव च.

ततो ¶ ¶ मरणकालस्मिं, चुति हुत्वा पवत्तरे;

एवं चतूसु ठानेसु, विपच्चन्तीति निद्दिसे.

सभूमिकुसलेहेव, महापाका समा विना;

कम्मद्वारञ्च कम्मञ्च, पुञ्ञानं क्रियवत्थुकं.

अविञ्ञत्तिजनत्ता हि, अविपाकसभावतो;

अप्पवत्तनतो चेव, पाका पुञ्ञेहि नो समा.

परित्तारम्मणत्ता हि, तेसमेकन्ततो पन;

करुणामुदिता तेसु, न जायन्ति कदाचिपि.

तथा विरतियो तिस्सो, न पनेतेसु जायरे;

पञ्च सिक्खापदा वुत्ता, कुसलाति हि सत्थुना.

तथाधिपतिनोपेत्थ, न सन्तीति विनिद्दिसे;

छन्दादीनि धुरं कत्वा, अनुप्पज्जनतो पन.

असङ्खारससङ्खार-विधानं पन पुञ्ञतो;

ञेय्यं पच्चयतो चेव, विपाकेसु च विञ्ञुना.

हीनादीनं विपाकत्ता, पुञ्ञानं पुञ्ञवादिना;

हीनादयो भवन्तीति, विपाका परिदीपिता.

इदं अट्ठविधं चित्तं, एकन्तेन सवत्थुकं;

जायते कामलोकस्मिं, न पनञ्ञत्थ जायते.

एवं ताव सहेतुकविपाकचित्तं वेदितब्बं.

अहेतुकविपाकचित्तं ¶ पन अलोभादिहेतुविरहितं उपेक्खासहगतं चक्खुविञ्ञाणं, उपेक्खासहगतं सोतविञ्ञाणं, उपेक्खासहगतं घानविञ्ञाणं, उपेक्खासहगतं जिव्हाविञ्ञाणं, सुखसहगतं कायविञ्ञाणं, उपेक्खासहगतं अहेतुकमनोधातुसम्पटिच्छनं, सोमनस्ससहगतं अहेतुकमनोविञ्ञाणधातुसन्तीरणं ¶ , उपेक्खासहगतं अहेतुकमनोविञ्ञाणधातुसन्तीरणन्ति इदं पन अट्ठविधं अहेतुकविपाकचित्तं नाम.

इदं पन अट्ठविधं नियतवत्थुकतो एकविधं, नियतानियतारम्मणतो दुविधं. तत्थ विञ्ञाणपञ्चकं नियतारम्मणं, सेसत्तयं अनियतारम्मणं. सुखसोमनस्सुपेक्खावेदनायोगतो तिविधं. तत्थ सुखसहगतं कायविञ्ञाणं, द्विट्ठानिकं सन्तीरणं सोमनस्सुपेक्खायुत्तं, सेसमुपेक्खायुत्तन्ति.

दिट्ठारम्मणसुतारम्मणमुतारम्मणदिट्ठसुतमुतारम्मणदिट्ठ-सुतमुतविञ्ञातारम्मणवसेन पञ्चविधं. तत्थ दिट्ठारम्मणं चक्खुविञ्ञाणं, सुतारम्मणं ¶ सोतविञ्ञाणं, मुतारम्मणं घानजिव्हाकायविञ्ञाणत्तयं, दिट्ठसुतमुतारम्मणं मनोधातुसम्पटिच्छनं, दिट्ठसुतमुतविञ्ञातारम्मणं सेसमनोविञ्ञाणधातुद्वयन्ति.

वत्थुतो छब्बिधं. कथं? चक्खुविञ्ञाणस्स चक्खुमेव वत्थु, तथा सोतघानजिव्हाकायविञ्ञाणानं सोतघानजिव्हाकायवत्थु, अवसेसत्तयस्स हदयवत्थुमेवाति.

आरम्मणतो सत्तविधं होति. कथं? रूपारम्मणमेव चक्खुविञ्ञाणं, तथा सद्दगन्धरसफोट्ठब्बारम्मणानि पटिपाटिया सोतघानजिव्हाकायविञ्ञाणानि, रूपादिपञ्चारम्मणा मनोधातु, सेसमनोविञ्ञाणधातुद्वयं छळारम्मणन्ति.

तं सब्बं पन अहेतुकविपाकचित्तं किच्चतो अट्ठविधं होति. कथं? दस्सनकिच्चं चक्खुविञ्ञाणं, सवनघायनसायनफुसनसम्पटिच्छनसन्तीरणतदारम्मणकिच्चानि अवसेसानि.

तत्थ ¶ चक्खुतो पवत्तं विञ्ञाणं, चक्खुम्हि सन्निस्सितं विञ्ञाणन्ति वा चक्खुविञ्ञाणं, तथा सोतविञ्ञाणादीनि. तत्थ चक्खुसन्निस्सितरूपविजाननलक्खणं चक्खुविञ्ञाणं ¶ , रूपमत्तारम्मणरसं, रूपाभिमुखभावपच्चुपट्ठानं, रूपारम्मणाय किरियामनोधातुया अपगमपदट्ठानं. तथा सोतघानजिव्हाकायविञ्ञाणानि सोतादिसन्निस्सितसद्दादिविजाननलक्खणानि, सद्दादिमत्तारम्मणरसानि, सद्दादीसु अभिमुखभावपच्चुपट्ठानानि, सद्दादिआरम्मणानं किरियामनोधातूनं अपगमपदट्ठानानि. मनोधातुसम्पटिच्छनं पन चक्खुविञ्ञाणादीनं अनन्तरा रूपादिविजाननलक्खणं, रूपादिसम्पटिच्छनरसं, तथाभावपच्चुपट्ठानं, चक्खुविञ्ञाणादीनं अपगमपदट्ठानं.

सेसा पन द्वे अहेतुकमनोविञ्ञाणधातुयो छळारम्मणविजाननलक्खणा, सन्तीरणादिरसा, तथाभावपच्चुपट्ठाना, हदयवत्थुपदट्ठानाति वेदितब्बा. तत्थ पठमा एकन्तमिट्ठारम्मणे पवत्तिसब्भावतो सोमनस्सयुत्ताव हुत्वा पञ्चद्वारे सन्तीरणकिच्चं साधयमाना पञ्चसु द्वारेसु ठत्वा विपच्चति, छसु पन द्वारेसु बलवारम्मणे तदारम्मणं हुत्वा विपच्चति. दुतिया ¶ पन इट्ठमज्झत्तारम्मणे पवत्तिसब्भावतो उपेक्खासहगता हुत्वा सन्तीरणतदारम्मणपटिसन्धिभवङ्गचुतिवसेन पवत्तनतो पञ्चसु ठानेसु विपच्चति. कथं? मनुस्सलोके ताव जच्चन्धजच्चबधिरजच्चजळजच्चुम्मत्तकपण्डकउभतोब्यञ्जननपुंसकादीनं पटिसन्धिग्गहणकाले पटिसन्धि हुत्वा विपच्चति. पटिसन्धिया वीतिवत्ताय पवत्तियं यावतायुकं भवङ्गं हुत्वा विपच्चति. इट्ठमज्झत्ते पञ्चारम्मणवीथिया सन्तीरणं हुत्वा, बलवारम्मणे छद्वारे तदारम्मणं हुत्वा, मरणकाले चुति हुत्वाति इमेसु पन पञ्चसु ठानेसु विपच्चतीति. एवं ताव अहेतुकविपाकचित्तानि वेदितब्बानि.

कामावचरपुञ्ञस्स ¶ , विपाका होन्ति सोळस;

तं तिहेतुकपुञ्ञस्स, वसेन परिदीपये.

इदानि रूपावचरविपाकचित्तानि वुच्चन्ति. तानि नियतवत्थुकतो एकविधानि, झानङ्गयोगभेदतो पञ्चविधानि. कथं? वितक्कविचारपीतिसुखचित्तेकग्गतासम्पयुत्तं पठमं, विचारपीतिसुखचित्तेकग्गतासम्पयुत्तं दुतियं, पीतिसुखचित्तेकग्गतासम्पयुत्तं ततियं, सुखचित्तेकग्गतासम्पयुत्तं चतुत्थं, उपेक्खाचित्तेकग्गतासम्पयुत्तं पञ्चमन्ति इमानि पञ्चपि रूपावचरविपाकचित्तानि उपपत्तियं पटिसन्धिभवङ्गचुतिवसेन पवत्तन्ति.

इदानि ¶ अरूपावचरविपाकचित्तानि वुच्चन्ति. तानि सककुसलानि विय आरम्मणभेदतो चतुब्बिधानि होन्ति. कथं? आकासानञ्चायतनसञ्ञासहगतं, विञ्ञाणञ्चायतनसञ्ञासहगतं, आकिञ्चञ्ञायतनसञ्ञासहगतं, नेवसञ्ञानासञ्ञायतनसञ्ञासहगतन्ति इमानि चत्तारि अरूपावचरविपाकचित्तानि.

कुसलानुगतं कत्वा, भाजितं किं महग्गतं;

कामावचरपुञ्ञंव, नासमानफलं यतो.

अत्तनो कुसलेहेव, समानं सब्बथा इदं;

गजादीनं यथा छाया, गजादिसदिसा तथा.

कामावचरपुञ्ञंव, नापरापरियवेदनं;

झाना अपरिहीनस्स, सत्तस्स भवगामिनो.

कुसलानन्तरंयेव ¶ , फलं उप्पज्जतीति च;

ञापनत्थं पनेतस्स, कुसलानुगतं कतं.

पटिप्पदाक्कमो चेव, हीनादीनञ्च भेदतो;

झानागमनतो चेत्थ, वेदितब्बो विभाविना.

अभावोधिपतीनञ्च ¶ , अयमेव विसेसको;

सेसं सब्बं च सेसेन, कुसलेन समं मतं. –

एवं रूपावचरारूपावचरविपाका वेदितब्बा.

इदानि लोकुत्तरविपाकचित्तानि होन्ति. तानि चतुमग्गयुत्तचित्तफलत्ता चतुब्बिधानि होन्ति. कथं? सोतापत्तिमग्गफलचित्तं, सकदागामिमग्गफलचित्तं, अनागामिमग्गफलचित्तं, अरहत्तमग्गफलचित्तन्ति. एवं पनेत्थ एकेकं झानङ्गयोगभेदतो पञ्चविधं, पुन मग्गवीथिफलसमापत्तिवसेन पवत्तितो दुविधं. एवं लोकुत्तरकुसलविपाकचित्तानि वेदितब्बानि.

सुञ्ञतं ¶ अनिमित्तन्ति, तथापणिहितन्तिपि;

एतानि तीणि नामानि, मग्गस्सानन्तरे फले.

लब्भन्ति परभागस्मिं, वळञ्जनफलेसु न;

विपस्सनावसेनेव, तानि नामानि लब्भरे.

होन्ति साधिपतीनेव, लोकुत्तरफलानि तु;

विपाकेधिपती नत्थि, ठपेत्वा तु अनासवे.

अत्तनो मग्गभावेन, मग्गो ‘‘मग्गो’’ति वुच्चति;

फलं मग्गमुपादाय, मग्गो नामाति वुच्चति. –

एवं लोकुत्तरविपाका वेदितब्बा.

इदानि सत्ताकुसलविपाकानि वुच्चन्ति. अकुसलविपाकं उपेक्खासहगतं चक्खुविञ्ञाणं, उपेक्खासहगतं सोतविञ्ञाणं, उपेक्खासहगतं घानविञ्ञाणं, उपेक्खासहगतं जिव्हाविञ्ञाणं, दुक्खसहगतं कायविञ्ञाणं, उपेक्खासहगतं अहेतुकमनोधातुसम्पटिच्छनं, उपेक्खासहगतं अहेतुकमनोविञ्ञाणधातुसन्तीरणन्ति इमानि सत्त अकुसलविपाकचित्तानि.

एत्थ ¶ पन उपेक्खासहगताहेतुकमनोविञ्ञाणधातु एकादसविधेनापि अकुसलचित्तेन कम्मे आयूहिते कम्मकम्मनिमित्तगतिनिमित्तेसु अञ्ञतरं आरम्मणं कत्वा चतूसु अपायेसु पटिसन्धि हुत्वा विपच्चति, पटिसन्धिया वीतिवत्ताय ¶ दुतियचित्तवारं ततो पट्ठाय यावतायुकं भवङ्गं हुत्वा, अनिट्ठमज्झत्तारम्मणाय पञ्चविञ्ञाणवीथिया सन्तीरणं हुत्वा, बलवारम्मणे छसु द्वारेसु तदारम्मणं हुत्वा, मरणकाले चुति हुत्वा विपच्चति. एवं पञ्चसु ठानेसु विपच्चति. केवलं हि तानि कुसलविपाकाहेतुकचित्तानि कुसलकम्मपच्चयानि, इमानि अकुसलकम्मपच्चयानि. अयमिमेसं, तेसञ्च विसेसो.

अनिट्ठानिट्ठमज्झत्तगोचरे वत्तरे इमे;

सुखादित्तययुत्ता ते, दुक्खुपेक्खायुता इमे.

एवं ¶ कामावचरकुसलविपाकसहेतुकमट्ठविधं, अहेतुकमट्ठविधं, झानङ्गयोगभेदतो रूपावचरविपाकं पञ्चविधं, आरम्मणभेदतो अरूपावचरविपाकं चतुब्बिधं, मग्गसम्पयुत्तचित्तफलभेदतो लोकुत्तरविपाकं चतुब्बिधं, चक्खुविञ्ञाणादिभेदतो अकुसलविपाकं सत्तविधन्ति छत्तिंसविधं विपाकचित्तं वेदितब्बं.

एवं छत्तिंसधा पाकं, पाकसासनपूजितो;

सविपाकाविपाकेसु, कुसलो सुगतोब्रवि.

किरियाब्याकतचित्तं पन अविपाकतो एकविधं, परित्तमहग्गततो दुविधं, कामावचररूपावचरअरूपावचरभूमिभेदतो तिविधं. तत्थ कामावचरं दुविधं सहेतुकमहेतुकन्ति. तत्थ सहेतुकं एकविधं अरहतो एव उप्पज्जनतो. सोमनस्सुपेक्खाञाणप्पयोगभेदतो कामावचरकुसलं विय अट्ठविधं होति. सेय्यथिदं – सोमनस्ससहगतं ञाणसम्पयुत्तं असङ्खारिकं, ससङ्खारिकं, सोमनस्ससहगतं ¶ ञाणविप्पयुत्तं असङ्खारिकं, ससङ्खारिकं, उपेक्खासहगतं ञाणसम्पयुत्तं असङ्खारिकं, ससङ्खारिकं, उपेक्खासहगतं ञाणविप्पयुत्तं असङ्खारिकं, ससङ्खारिकन्ति इमानि अट्ठ सहेतुककिरियचित्तानि. एतानि पन यथानुरूपं दानादिवसेन खीणासवानंयेव पवत्तन्ति. एवं सहेतुककिरियचित्तानि वेदितब्बानि.

अहेतुककिरियचित्तं पन तिविधं किरियाहेतुकमनोधातुउपेक्खासहगतावज्जनचित्तं, किरियाहेतुकमनोविञ्ञाणधातुसोमनस्ससहगतं हसितुप्पादचित्तं, किरियाहेतुकमनोविञ्ञाणधातुउपेक्खासहगतं वोट्ठब्बनचित्तन्ति ¶ .

तत्थ किरियाहेतुकमनोधातु उपेक्खासहगता हदयवत्थुं निस्साय चक्खुद्वारे इट्ठइट्ठमज्झत्तअनिट्ठअनिट्ठमज्झत्तेसु रूपारम्मणेसु येन केनचि पसादे घट्टिते तं तं आरम्मणं गहेत्वा आवज्जनवसेन चक्खुविञ्ञाणस्स पुरेचारी हुत्वा भवङ्गं आवट्टयमाना उप्पज्जति. सोतद्वारादीसुपि एसेव नयो. इतरा पन द्वे अहेतुकमनोविञ्ञाणधातुयो साधारणासाधारणाति दुविधा होन्ति. तत्थ असाधारणा पन किरियाहेतुकमनोविञ्ञाणधातु सोमनस्ससहगता खीणासवस्सेव छसु द्वारेसु छसु अनुळारेसु आरम्मणेसु हसितुप्पादकिच्चा नियतवत्थुका उप्पज्जति. साधारणा पन अहेतुकमनोविञ्ञाणधातु उपेक्खासहगता छळारम्मणविजाननलक्खणा ¶ , तथाभावपच्चुपट्ठाना, सा तीसु भवेसु सब्बेसं सचित्तकसत्तानं साधारणा, न कस्सचि पन सचित्तकस्स न उप्पज्जति नाम. उप्पज्जमाना पनायं पञ्चद्वारमनोद्वारेसु वोट्ठब्बनावज्जनकिच्चा उप्पज्जति. छ असाधारणञाणानिपि एताय गहितारम्मणमेव गण्हन्ति. सब्बारम्मणगहणसमत्थताय ¶ सब्बञ्ञुतञ्ञाणगतिकाति वेदितब्बा. इमानि तीणि अहेतुककिरियचित्तानि.

इध ठत्वा हसनचित्तानि परिग्गण्हितब्बानि. तेरस हसनचित्तानि. कुसलतो चतूहि सोमनस्ससहगतेहि, अकुसलतो चतूहीति इमेहि अट्ठहि चित्तेहि पुथुज्जना हसन्ति, सेखा पन कुसलतो चतूहि, अकुसलतो द्वीहि दिट्ठिगतविप्पयुत्तसोमनस्ससहगतेहीति छहि हसन्ति, खीणासवा किरियतो पञ्चहि सोमनस्ससहगतेहि हसन्तीति.

सोमनस्सयुतानट्ठ, कुसलाकुसलानि च;

क्रियतो पन पञ्चेवं, हासचित्तानि तेरस.

पुथुज्जना हसन्तेत्थ, चित्तेहि पन अट्ठहि;

छहि सेखा असेखा च, हसन्ति पन पञ्चहि.

इदानि रूपावचरकिरियचित्तानि होन्ति. वितक्कविचारपीतिसुखचित्तेकग्गतासम्पयुत्तं पठमं, विचारपीतिसुखचित्तेकग्गतासम्पयुत्तं दुतियं, पीतिसुखचित्तेकग्गतासम्पयुत्तं ततियं, सुखचित्तेकग्गतासम्पयुत्तं चतुत्थं, उपेक्खाचित्तेकग्गतासम्पयुत्तं पञ्चमन्ति इमानि पञ्च रूपावचरकिरियचित्तानि.

इदानि ¶ अरूपावचरकिरियचित्तानि वुच्चन्ति. आकासानञ्चायतनसञ्ञासहगतं, विञ्ञाणञ्चायतनसञ्ञासहगतं, आकिञ्चञ्ञायतनसञ्ञासहगतं, नेवसञ्ञानासञ्ञायतनसञ्ञासहगतन्ति इमानि चत्तारि अरूपावचरकिरियचित्तानि. इमानि पन रूपारूपकिरियचित्तानि सकसकभूमिकुसलसदिसानि. केवलं पनेतानि किरियचित्तानि खीणासवानंयेव उप्पज्जन्ति, कुसलानि पन सेखपुथुज्जनानं. इमानि च खीणासवानं भावनाकारवसप्पवत्तानि, तानि पन सेखपुथुज्जनानं भावनापुञ्ञवसप्पवत्तानीति अयमेव इमेसं, तेसञ्च विसेसो.

या ¶ ¶ पुथुज्जनकालस्मिं, अभिनिब्बत्तिता पन;

रूपारूपसमापत्ति, सा खीणासवभिक्खुनो.

याव खीणासवो भिक्खु, न समापज्जतेव नं;

ताव ता कुसला एव, समापन्ना सचे क्रिया.

एवं सोमनस्सादिभेदतो कामावचरसहेतुककिरियचित्तमट्ठविधं, मनोधातुमनोविञ्ञाणधातुद्वयभेदतो अहेतुकं तिविधं, झानङ्गयोगभेदतो रूपावचरं पञ्चविधं, आरम्मणभेदतो अरूपावचरं चतुब्बिधं, एवं भूमिवसेन वीसतिविधं किरियचित्तं वेदितब्बन्ति.

एकादसविधं कामे, रूपे पञ्च अरूपिसु;

चत्तारीति च सब्बानि, क्रियाचित्तानि वीसति.

लोकुत्तरक्रियचित्तं, पन कस्मा न विज्जति;

एकचित्तक्खणत्ता हि, मग्गस्साति न विज्जति.

क्रियाक्रियापत्तिविभागदेसको,

क्रियाक्रियं चित्तमवोच यं जिनो;

हिताहितानं सक्रियाक्रियारतो,

क्रियाक्रियं तन्तु मया समीरितं.

एत्तावता एकवीसतिविधं कुसलं, द्वादसविधं अकुसलं छत्तिंसविधं विपाकं, वीसतिविधं किरियचित्तन्ति आदिम्हि निक्खित्तं चित्तं एकूननवुतिप्पभेदेन विधिना पकासितं होतीति.

एकवीसति ¶ पुञ्ञानि, द्वादसाकुसलानि च;

छत्तिंसेव विपाकानि, क्रियचित्तानि वीसति.

एकूननवुति सब्बे, चित्तुप्पादा महेसिना;

अट्ठ लोकुत्तरे कत्वा, निद्दिट्ठा हि समासतो.

पिटके ¶ ¶ अभिधम्मस्मिं, ये भिक्खू पाटवत्थिनो;

तेहायं उग्गहेतब्बो, चिन्तेतब्बो पुनप्पुनं.

अभिधम्मावतारेन, अभिधम्ममहोदधिं;

ये तरन्ति इमं लोकं, परञ्चेव तरन्ति तेति.

इति अभिधम्मावतारे चित्तनिद्देसो नाम

चित्तानन्तरमुद्दिट्ठा ¶ , ये च चेतसिका मया;

तेसं दानि करिस्सामि, विभाजनमितो परं.

तत्थ चित्तसम्पयुत्ता, चित्ते भवा वा चेतसिका. तेपि चित्तं विय सारम्मणतो एकविधा, सविपाकाविपाकतो दुविधा, कुसलाकुसलाब्याकतभेदतो तिविधा, कामावचरादिभेदतो चतुब्बिधा.

तत्थ कामावचरचित्तसम्पयुत्ता कामावचरा. तेसु कामावचरपठममहाकुसलचित्तसम्पयुत्ता ताव नियता सरूपेन आगता एकूनतिंस धम्मा होन्ति. सेय्यथिदं – फस्सो वेदना सञ्ञा चेतना वितक्को विचारो पीति चित्तेकग्गता सद्धा सति वीरियं पञ्ञा जीवितिन्द्रियं अलोभो अदोसो हिरी ओत्तप्पं कायप्पस्सद्धि चित्तप्पस्सद्धि कायलहुता चित्तलहुता कायमुदुता चित्तमुदुता कायकम्मञ्ञता चित्तकम्मञ्ञता कायपागुञ्ञता चित्तपागुञ्ञता कायुजुकता चित्तुजुकताति. पुन छन्दो, अधिमोक्खो, तत्रमज्झत्तता, मनसिकारो चाति चत्तारो नियतयेवापनका होन्ति. इमेहि चतूहि तेत्तिंस होन्ति ¶ . पुन करुणा मुदिता कायदुच्चरितविरति ¶ वचीदुच्चरितविरति मिच्छाजीवविरति चेति इमे पञ्च अनियता. इमे पन कदाचि उप्पज्जन्ति.

इमेसु पन करुणामुदितावसेन भावनाकाले करुणापुब्बभागो वा मुदितापुब्बभागो वा एता उप्पज्जन्ति, न पनेकतो उप्पज्जन्ति. यदा पन इमिना चित्तेन मिच्छाकम्मन्तादीहि विरमति, तदा सम्माकम्मन्तादीनि परिपूरेन्ति, एका विरति उप्पज्जति, करुणामुदिताहि सह, अञ्ञमञ्ञेन च न उप्पज्जन्ति. तस्मा एतेसु एकेन सह चतुत्तिंसेव धम्मा होन्ति.

आदिना ¶ पुञ्ञचित्तेन, तेत्तिंस नियता मता;

करुणामुदितेकेन, चतुत्तिंस भवन्ति ते.

कस्मा पनेत्थ मेत्ता च, उपेक्खा च न उद्धटा;

येवापनकधम्मेसु, धम्मराजेन सत्थुना.

अब्यापादेन मेत्तापि, तत्रमज्झत्तताय च;

उपेक्खा गहिता यस्मा, तस्मा न गहिता उभो.

कस्मा येवापना धम्मा, बुद्धेनादिच्चबन्धुना;

सरूपेनेव सब्बेते, पाळियं न च उद्धटा.

यस्मा अनियता केचि, यस्मा रासिं भजन्ति न;

यस्मा च दुब्बला केचि, तस्मा वुत्ता न पाळियं.

छन्दाधिमोक्खमुदिता मनसि च कारो,

मज्झत्तता च करुणा विरतित्तयं च;

पुञ्ञेसु तेन नियतानियता च सब्बे,

येवापना मुनिवरेन न चेव वुत्ता.

कस्मा पनेत्थ फस्सोव, पठमं समुदीरितो;

पठमाभिनिपातत्ता, चित्तस्सारम्मणे किर.

फुसित्वा ¶ ¶ पन फस्सेन, वेदनाय च वेदये;

सञ्जानाति च सञ्ञाय, चेतनाय च चेतये.

बलवपच्चयत्ता च, सहजातानमेव हि;

फस्सोव पठमं वुत्तो, तस्मा इध महेसिना.

अकारणमिदं सब्बं, चित्तानं तु सहेव च;

एकुप्पादादिभावेन, चित्तजानं पवत्तितो.

अयं तु पठमुप्पन्नो, अयं पच्छाति नत्थिदं;

बलवपच्चयत्तेपि, कारणञ्च न दिस्सति.

देसनाक्कमतो चेव, पठमं समुदीरितो;

इच्चेवं पन विञ्ञेय्यं, विञ्ञुना न विसेसतो.

न च परियेसितब्बोयं, तस्मा पुब्बापरक्कमो;

वचनत्थलक्खणादीहि, धम्मा एव विजानता.

यस्मा पन इमे धम्मा वचनत्थलक्खणादीहि वुच्चमाना पाकटा होन्ति सुविञ्ञेय्याव, तस्मा तेसं वचनत्थलक्खणादीनि पवक्खामि. सेय्यथिदं – फुसतीति फस्सो. स्वायं फुसनलक्खणो, सङ्घट्टनरसो, सन्निपातपच्चुपट्ठानो, फलट्ठेन वेदनापच्चुपट्ठानो वा, आपाथगतविसयपदट्ठानो. अयं हि अरूपधम्मोपि समानो आरम्मणेसु फुसनाकारेनेव ¶ पवत्तति, सो द्विन्नं मेण्डानं सन्निपातो विय दट्ठब्बो.

सुन्दरं मनोति सुमनो, सुमनस्स भावो सोमनस्सं, सोमनस्समेव वेदना सोमनस्सवेदना. सा वेदयितलक्खणा, इट्ठाकारानुभवनरसा राजा विय सुभोजनरसं, चेतसिकअस्सादपच्चुपट्ठाना, पस्सद्धिपदट्ठाना.

नीलादिभेदं ¶ आरम्मणं सञ्जानातीति सञ्ञा. सा सञ्जाननलक्खणा, पच्चाभिञ्ञाणकरणरसा वड्ढकिस्स अभिञ्ञाणकरणमिव, यथागहितनिमित्तवसेन अभिनिवेसकरणपच्चुपट्ठाना, यथोपट्ठितविसयपदट्ठाना.

चेतयतीति ¶ चेतना. सद्धिं अत्तना सम्पयुत्तधम्मे आरम्मणे अभिसन्दहतीति अत्थो. सा चेतयितलक्खणा, आयूहनरसा, संविदहनपच्चुपट्ठाना सककिच्चपरकिच्चसाधका जेट्ठसिस्समहावड्ढकिआदयो विय.

वितक्केतीति वितक्को. वितक्कनं वा वितक्को. स्वायं आरम्मणे चित्तस्स अभिनिरोपनलक्खणो, आहननपरियाहननरसो, आरम्मणे चित्तस्स आनयनपच्चुपट्ठानो.

आरम्मणे तेन चित्तं विचरतीति विचारो. विचरणं वा विचारो. अनुसञ्चरणन्ति वुत्तं होति. स्वायं आरम्मणानुमज्जनलक्खणो, तत्थ सहजातानुयोजनरसो, चित्तस्स अनुपबन्धपच्चुपट्ठानो.

पिनयतीति पीति. सा सम्पियायनलक्खणा, कायचित्तपीणनरसा, फरणरसा वा, ओदग्यपच्चुपट्ठाना.

चित्तस्स एकग्गभावो चित्तेकग्गता. समाधिस्सेतं नामं. सो अविसारलक्खणो, अविक्खेपलक्खणो वा, सहजातानं सम्पिण्डनरसो न्हानियचुण्णानं उदकं विय, उपसमपच्चुपट्ठानो, विसेसतो सुखपदट्ठानो.

सद्दहन्ति एताय, सयं वा सद्दहति, सद्दहनमत्तमेव वा एसाति सद्धा. सा पनेसा सद्दहनलक्खणा, पसादनरसा उदकप्पसादकमणि विय, अकालुसियपच्चुपट्ठाना, सद्धेय्यवत्थुपदट्ठाना.

सरन्ति ¶ एताय, सयं वा सरति, सरणमत्तमेव वा एसाति सति. सा अपिलापनलक्खणा, असम्मोसरसा, आरक्खपच्चुपट्ठाना, थिरसञ्ञापदट्ठाना.

वीरभावो ¶ वीरियं. वीरानं वा कम्मं वीरियं. तं पनेतं उस्साहनलक्खणं, सहजातानं उपत्थम्भनरसं, असंसीदनभावपच्चुपट्ठानं, संवेगपदट्ठानं.

पजानातीति ¶ पञ्ञा. सा पनेसा विजाननलक्खणा, विसयोभासनरसा पदीपो विय, असम्मोहपच्चुपट्ठाना अरञ्ञगतसुदेसको विय.

जीवन्ति तेन तंसम्पयुत्तधम्माति जीवितं. तं पन अत्तना अविनिब्भुत्तानं धम्मानं अनुपालनलक्खणं, तेसं पवत्तनरसं, तेसंयेव ठपनपच्चुपट्ठानं, यापयितब्बधम्मपदट्ठानं. सन्तेपि च तेसं अनुपालनलक्खणादिम्हि विधाने अत्थिक्खणेयेव तं ते धम्मे अनुपालेति उदकं विय उप्पलादीनि, यथासकं पच्चयुप्पन्नेपि च धम्मे अनुपालेति धाति विय कुमारं, सयंपवत्तितधम्मसम्बन्धेनेव पवत्तति नियामको विय, न भङ्गतो उद्धं पवत्तयति अत्तनो च पवत्तयितब्बानञ्च अभावा, न भङ्गक्खणे ठपेति सयं भिज्जमानत्ता खीयमानो विय वत्तिस्नेहोव पदीपसिखन्ति.

न लुब्भन्ति तेन, सयं वा न लुब्भति, अलुब्भनमत्तमेव वा तन्ति अलोभो. सो आरम्मणे चित्तस्स अलग्गभावलक्खणो कमलदले जलबिन्दु विय, अपरिग्गहरसो मुत्तभिक्खु विय, अनल्लीनभावपच्चुपट्ठानो असुचिम्हि पतितपुरिसो विय.

न दुस्सन्ति तेन, सयं वा न दुस्सति, अदुस्सनमत्तमेव वा तन्ति अदोसो. सो अचण्डिक्कलक्खणो, अविरोधलक्खणो वा अनुकूलमित्तो विय, आघातविनयनरसो, परिळाहविनयनरसो ¶ वा चन्दनं विय, सोम्मभावपच्चुपट्ठानो पुण्णचन्दो विय.

कायदुच्चरितादीहि हिरीयतीति हिरी. लज्जायेतं अधिवचनं. तेहियेव ओत्तप्पतीति ओत्तप्पं. पापतो उब्बेगस्सेतं अधिवचनं. तत्थ पापतो जिगुच्छनलक्खणा हिरी, ओत्तासलक्खणं ओत्तप्पं. उभोपि पापानं अकरणरसा, पापतो सङ्कोचनपच्चुपट्ठाना, अत्तगारवपरगारवपदट्ठाना. इमे धम्मा लोकपालाति दट्ठब्बा.

कायपस्सम्भनं कायपस्सद्धि. चित्तपस्सम्भनं चित्तपस्सद्धि. कायोति चेत्थ वेदनादयो तयो खन्धा. उभोपि पनेता एकतो हुत्वा कायचित्तदरथवूपसमलक्खणा ¶ , कायचित्तदरथनिम्मदनरसा, कायचित्तानं अपरिप्फन्दनसीतिभावपच्चुपट्ठाना, कायचित्तपदट्ठाना, कायचित्तानं अवूपसमताउद्धच्चादिकिलेसप्पटिपक्खभूताति वेदितब्बा.

कायलहुभावो ¶ कायलहुता. चित्तलहुभावो चित्तलहुता. कायचित्तानं गरुभाववूपसमलक्खणा, कायचित्तगरुभावनिम्मदनरसा, कायचित्तानं अदन्धतापच्चुपट्ठाना, कायचित्तपदट्ठाना, कायचित्तानं गरुभावकरथिनमिद्धादिकिलेसप्पटिपक्खभूताति वेदितब्बा.

कायमुदुभावो कायमुदुता. चित्तमुदुभावो चित्तमुदुता. कायचित्तानं थद्धभाववूपसमलक्खणा, कायचित्तानं थद्धभावनिम्मदनरसा, अप्पटिघातपच्चुपट्ठाना, कायचित्तपदट्ठाना, कायचित्तानं थद्धभावकरदिट्ठिमानादिकिलेसप्पटिपक्खभूताति वेदितब्बा.

कायकम्मञ्ञभावो कायकम्मञ्ञता. चित्तकम्मञ्ञभावो चित्तकम्मञ्ञता. कायचित्तानं अकम्मञ्ञभाववूपसमलक्खणा, कायचित्तानं अकम्मञ्ञभावनिम्मदनरसा, कायचित्तानं आरम्मणकरणसम्पत्तिपच्चुपट्ठाना, कायचित्तपदट्ठानं, कायचित्तानं ¶ अकम्मञ्ञभावकरअवसेसनीवरणादिकिलेसप्पटिपक्खभूताति वेदितब्बा.

कायपागुञ्ञभावो कायपागुञ्ञता. चित्तपागुञ्ञभावो चित्तपागुञ्ञता. कायचित्तानं अगेलञ्ञभावलक्खणा, कायचित्तानं गेलञ्ञनिम्मदनरसा, निरादीनवपच्चुपट्ठाना, कायचित्तपदट्ठाना, कायचित्तानं गेलञ्ञभावकरअस्सद्धादिकिलेसप्पटिपक्खभूताति दट्ठब्बा.

कायस्स उजुकभावो कायुजुकता. चित्तस्स उजुकभावो चित्तुजुकता. कायचित्तानं अकुटिलभावलक्खणा, कायचित्तानं अज्जवलक्खणा वा, कायचित्तानं कुटिलभावनिम्मदनरसा, अजिम्हतापच्चुपट्ठाना, कायचित्तपदट्ठाना, कायचित्तानं कुटिलभावकरमायासाठेय्यादिकिलेसप्पटिपक्खभूताति दट्ठब्बा.

छन्दोति कत्तुकम्यतायेतं अधिवचनं. तस्मा सो कत्तुकम्यतालक्खणो छन्दो, आरम्मणपरियेसनरसो, आरम्मणेन अत्थिकतापच्चुपट्ठानो, तदेवस्स पदट्ठानो.

अधिमुच्चनं ¶ अधिमोक्खो. सो सन्निट्ठानलक्खणो, असंसप्पनरसो, निच्छयपच्चुपट्ठानो, सन्निट्ठेय्यधम्मपदट्ठानो, आरम्मणे निच्चलभावेन इन्दखीलो विय दट्ठब्बो.

तेसु ¶ तेसु धम्मेसु मज्झत्तभावो तत्रमज्झत्तता. सा चित्तचेतसिकानं समवाहितलक्खणा, ऊनाधिकतानिवारणरसा, पक्खपातुपच्छेदनरसा वा, मज्झत्तभावपच्चुपट्ठाना.

किरिया कारो, मनस्मिं कारो मनसिकारो. पुरिममनतो विसदिसं मनं करोतीति च मनसिकारो.

स्वायं ¶ आरम्मणपटिपादको, वीथिपटिपादको, जवनपटिपादकोति तिप्पकारो. तत्थ आरम्मणपटिपादको मनस्मिं कारो मनसिकारो. सो सारणलक्खणो, सम्पयुत्तानं आरम्मणे संयोजनरसो, आरम्मणाभिमुखभावपच्चुपट्ठानो, आरम्मणपदट्ठानो, सङ्खारक्खन्धपरियापन्नो आरम्मणपटिपादकत्तेन सम्पयुत्तानं सारथी विय दट्ठब्बो. वीथिपटिपादकोति पञ्चद्वारावज्जनस्सेतं अधिवचनं, जवनपटिपादकोति मनोद्वारावज्जनस्सेतं अधिवचनं, न ते इध अधिप्पेता.

करुणाति परदुक्खे सति साधूनं हदयकम्पनं करोतीति करुणा, किनाति विनासेति वा परदुक्खन्ति करुणा. सा परदुक्खापनयनाकारप्पवत्तिलक्खणा, परदुक्खासहनरसा, अविहिंसापच्चुपट्ठाना, दुक्खाभिभूतानं अनाथभावदस्सनपदट्ठाना.

मोदन्ति ताय, सयं वा मोदतीति मुदिता. सा पमोदनलक्खणा, अनिस्सायनरसा, अरतिविघातपच्चुपट्ठाना, सत्तानं सम्पत्तिदस्सनपदट्ठाना. केचि पन मेत्तुपेक्खायोपि अनियते इच्छन्ति, तं न गहेतब्बं. अत्थतो हि अदोसो एव मेत्ता, तत्रमज्झत्तुपेक्खायेव उपेक्खाति.

कायदुच्चरिततो विरति कायदुच्चरितविरति. एसेव नयो सेसेसुपि द्वीसु. लक्खणादितो पन एता तिस्सोपि विरतियो कायदुच्चरितादिवत्थूनं अवीतिक्कमलक्खणा, कायदुच्चरितादिवत्थुतो सङ्कोचनरसा, अकिरियपच्चुपट्ठाना, सद्धाहिरिओत्तप्पअप्पिच्छतादिगुणपदट्ठाना. केचि पन इमासु एकेकं नियतं विरतिं इच्छन्ति. एवं कामावचरपठममहाकुसलचित्तेन इमे तेत्तिंस वा चतुत्तिंस वा धम्मा सम्पयोगं गच्छन्तीति वेदितब्बा.

यथा ¶ ¶ ¶ च पठमेन, एवं दुतियचित्तेनापि. ससङ्खारभावमत्तमेव हि एत्थ विसेसो. पुन ततियेन ञाणविप्पयोगतो ठपेत्वा अमोहं अवसेसा द्वत्तिंस वा तेत्तिंस वा वेदितब्बा. तथा चतुत्थेनापि ससङ्खारभावमत्तमेव विसेसो, पठमे वुत्तेसु पन ठपेत्वा पीतिं अवसेसा पञ्चमेन सम्पयोगं गच्छन्ति. सोमनस्सट्ठाने चेत्थ उपेक्खावेदना पविट्ठा. सा पन इट्ठानिट्ठविपरीतानुभवनलक्खणा, पक्खपातुपच्छेदनरसा. यथा च पञ्चमेन, एवं छट्ठेनापि. ससङ्खारमत्तमेव होति विसेसो. सत्तमेन पन ठपेत्वा पञ्ञं अवसेसा एकतिंस वा द्वत्तिंस वा धम्मा होन्ति, तथा अट्ठमेनापि. ससङ्खारमत्तमेव विसेसो. एवं ताव कामावचरकुसलचेतसिका वेदितब्बा.

उपेक्खायुत्तचित्तेसु, न दुक्खसुखपीतियो;

जायन्तेव विसुं पञ्च, करुणामुदितादयो.

अवसेसेसु पन रूपावचरचित्तसम्पयुत्ता रूपावचरा, तत्थ पठमचित्तसम्पयुत्ता ताव कामावचरपठमचित्ते वुत्तेसु ठपेत्वा विरतित्तयं अवसेसा वेदितब्बा. विरतियो पन कामावचरकुसललोकुत्तरेस्वेव उप्पज्जन्ति, न अञ्ञेसु. दुतियेन वितक्कवज्जा द्वत्तिंस वा तेत्तिंस वा. ततियेन विचारवज्जा एकतिंस वा द्वत्तिंस वा. चतुत्थेन ततो पीतिवज्जा तिंस वा एकतिंस वा. पञ्चमेन ततो करुणामुदितावज्जा तिंस होन्ति, सोमनस्सट्ठाने उपेक्खा पविट्ठा. एवं रूपावचरकुसलचेतसिका वेदितब्बा.

अरूपावचरचित्तसम्पयुत्ता अरूपावचरा, ते पन रूपावचरपञ्चमे वुत्तनयेन वेदितब्बा. अरूपावचरभावोवेत्थ विसेसो.

लोकुत्तरचित्तसम्पयुत्ता ¶ लोकुत्तरा, ते पन पठमज्झानिके मग्गचित्ते पठमरूपावचरचित्ते वुत्तनयेन दुतियज्झानिकादिभेदेपि मग्गचित्ते दुतियरूपावचरचित्तादीसु वुत्तनयेनेव वेदितब्बा. करुणामुदितानमभावो च नियतविरतिभावो च लोकुत्तरभावो चेत्थ विसेसो. एवं ताव कुसलचित्तसम्पयुत्तचेतसिका वेदितब्बा.

अकुसला पन चेतसिका भूमितो एकविधा कामावचरायेव, तेसु लोभमूलपठमाकुसलचित्तसम्पयुत्ता ¶ ताव नियता सरूपेनागता पन्नरस, येवापनका नियता चत्तारोति ¶ एकूनवीसति होन्ति. अनियता छ येवापनकाति सब्बे पञ्चवीसति होन्ति. सेय्यथिदं – फस्सो सोमनस्सवेदना सञ्ञा चेतना वितक्को विचारो पीति चित्तस्सेकग्गता वीरियं जीवितं अहिरिकं अनोत्तप्पं लोभो मोहो मिच्छादिट्ठीति इमे सरूपेनागता पन्नरस, छन्दो अधिमोक्खो उद्धच्चं मनसिकारोति इमे चत्तारो नियतयेवापनका, इमे पन पटिपाटिया दससु चित्तेसु नियता होन्ति, मानो इस्सा मच्छरियं कुक्कुच्चं थिनमिद्धन्ति इमे छयेव अनियतयेवापनका.

एवं येवापना सब्बे, नियतानियता दस;

निद्दिट्ठा पापचित्तेसु, हतपापेन तादिना.

तत्थ फस्सोति अकुसलचित्तसहजातो फस्सो. एस नयो सेसेसुपि. न हिरीयतीति अहिरिको, अहिरिकस्स भावो अहिरिकं. कायदुच्चरितादीहि ओत्तप्पतीति ओत्तप्पं, न ओत्तप्पं अनोत्तप्पं. तत्थ कायदुच्चरितादीहि अजिगुच्छनलक्खणं, अलज्जालक्खणं वा अहिरिकं, अनोत्तप्पं तेहेव असारज्जनलक्खणं, अनुत्तासलक्खणं वा.

लुब्भन्ति ¶ तेन, सयं वा लुब्भति, लुब्भनमत्तमेव वा तन्ति लोभो. सो आरम्मणगहणलक्खणो मक्कटालेपो विय, अभिसङ्गरसो तत्तकपाले पक्खित्तमंसपेसि विय, अपरिच्चागपच्चुपट्ठानो तेलञ्जनरागो विय, संयोजनियेसु धम्मेसु अस्साददस्सनपदट्ठानो.

मुय्हन्ति तेन, सयं वा मुय्हति, मुय्हनमत्तमेव वा तन्ति मोहो. सो चित्तस्स अन्धभावलक्खणो, अञ्ञाणलक्खणो वा, असम्पटिवेधरसो, आरम्मणसभावच्छादनरसो वा, अन्धकारपच्चुपट्ठानो, अयोनिसोमनसिकारपदट्ठानो.

मिच्छा पस्सन्ति ताय, सयं वा मिच्छा पस्सति, मिच्छादस्सनमत्तमेव वा एसाति मिच्छादिट्ठि. सा अयोनिसोअभिनिवेसलक्खणा, परामासरसा, मिच्छाभिनिवेसपच्चुपट्ठाना, अरियानं अदस्सनकामतादिपदट्ठाना.

उद्धतभावो ¶ उद्धच्चं. तं अवूपसमलक्खणं वाताभिघातचलजलं विय, अनवट्ठानरसं वाताभिघातचलधजपटाका विय, भन्तत्तपच्चुपट्ठानं पासाणाभिघातसमुद्धतभस्मं विय, अयोनिसोमनसिकारपदट्ठानं.

मञ्ञतीति ¶ मानो. सो उण्णतिलक्खणो, सम्पग्गहणरसो, केतुकम्यतापच्चुपट्ठानो, दिट्ठिविप्पयुत्तलोभपदट्ठानो.

इस्सतीति इस्सा. सा परसम्पत्तीनं उसूयनलक्खणा, तत्थेव अनभिरतिरसा, ततो विमुखभावपच्चुपट्ठाना, परसम्पत्तिपदट्ठाना.

मच्छरभावो मच्छरियं. तं अत्तनो सम्पत्तीनं निगुहणलक्खणं, तासंयेव परेहि साधारणभावअक्खमनरसं, सङ्कोचनपच्चुपट्ठानं, अत्तसम्पत्तिपदट्ठानं.

कुच्छितं ¶ कतं कुकतं, तस्स भावो कुक्कुच्चं. तं पच्छानुतापलक्खणं, कताकतानुसोचनरसं, विप्पटिसारपच्चुपट्ठानं, कताकतपदट्ठानं.

थिनता थिनं. मिद्धता मिद्धं. अनुस्साहनसंसीदनता, असत्तिविघातो चाति अत्थो. थिनञ्च मिद्धञ्च थिनमिद्धं. तत्थ थिनं अनुस्साहनलक्खणं, वीरियविनोदनरसं, संसीदनभावपच्चुपट्ठानं. मिद्धं अकम्मञ्ञतालक्खणं, ओनहनरसं, लीनतापच्चुपट्ठानं, उभयम्पि अयोनिसोमनसिकारपदट्ठानं. सेसा कुसले वुत्तनयेन वेदितब्बा.

एत्थ पन वितक्कवीरियसमाधीनं मिच्छासङ्कप्पमिच्छावायाममिच्छासमाधयो विसेसका. इति इमे एकूनवीसति चेतसिका पठमाकुसलचित्तेन सम्पयोगं गच्छन्तीति वेदितब्बा. यथा च पठमेन, एवं दुतियेनापि. ससङ्खारभावो चेत्थ थिनमिद्धस्स नियतभावो च विसेसो. ततियेन पठमे वुत्तेसु ठपेत्वा दिट्ठिं सेसा अट्ठारस वेदितब्बा. मानो पनेत्थ अनियतो होति, दिट्ठिया सह न उप्पज्जतीति. चतुत्थेन दुतिये वुत्तेसु ठपेत्वा दिट्ठिं अवसेसा वेदितब्बा. एत्थापि च मानो अनियतो होति. पञ्चमेन पठमे वुत्तेसु ठपेत्वा पीतिं अवसेसा सम्पयोगं गच्छन्तीति. सोमनस्सट्ठाने पनेत्थ उपेक्खा पविट्ठा. छट्ठेनापि पञ्चमे वुत्तसदिसा एव. ससङ्खारता ¶ , थिनमिद्धस्स नियतभावो च विसेसो. सत्तमेन पञ्चमे वुत्तेसु ठपेत्वा दिट्ठिं अवसेसा वेदितब्बा. मानो पनेत्थ अनियतो. अट्ठमेन छट्ठे वुत्तेसु ठपेत्वा दिट्ठिं अवसेसा वेदितब्बा. एत्थापि मानो ¶ अनियतो होति. एवं लोभमूलचेतसिका वेदितब्बा.

दोमनस्ससहगतेसु पटिघसम्पयुत्तेसु दोसमूलेसु द्वीसु पठमेन असङ्खारिकेन सम्पयुत्ता नियता सरूपेनागता ¶ तेरस. सेय्यथिदं – फस्सो दोमनस्सवेदना सञ्ञा चेतना चित्तेकग्गता वितक्को विचारो वीरियं जीवितं अहिरिकं अनोत्तप्पं दोसो मोहो चेति इमे तेरस धम्मा छन्दादीहि चतूहि नियतयेवापनकेहि सत्तरस होन्ति इस्सामच्छरियकुक्कुच्चेसु अनियतेसु तीसु एकेन सह अट्ठारस होन्ति, एतेपि तयो न एकतो उप्पज्जन्ति.

तत्थ दुट्ठु मनोति दुमनो, दुमनस्स भावो दोमनस्सं, दोमनस्सवेदनायेतं अधिवचनं. तेन सहगतं दोमनस्ससहगतं. तं अनिट्ठारम्मणानुभवनलक्खणं, अनिट्ठाकारसम्भोगरसं, चेतसिकाबाधपच्चुपट्ठानं, एकन्तेनेव हदयवत्थुपदट्ठानं.

दुस्सन्ति तेन, सयं वा दुस्सति, दुस्सनमत्तमेव वा तन्ति दोसो. सो चण्डिक्कलक्खणो पहतासीविसो विय, विसप्पनरसो विसनिपातो विय, अत्तनो निस्सयदहनरसो वा दावग्गि विय, दुस्सनपच्चुपट्ठानो लद्धोकासो विय सपत्तो, आघातवत्थुपदट्ठानो. अवसेसा हेट्ठा वुत्तप्पकाराव. इति इमे सत्तरस वा अट्ठारस वा नवमेन सम्पयोगं गच्छन्तीति वेदितब्बा. यथा च नवमेन, एवं दसमेनापि. ससङ्खारता, पनेत्थ थिनमिद्धसम्भवो च विसेसो.

द्वीसु पन मोहमूलेसु विचिकिच्छासम्पयुत्तेन एकादसमेन सम्पयुत्ता ताव फस्सो उपेक्खावेदना सञ्ञा चेतना वितक्को विचारो वीरियं जीवितं चित्तट्ठिति अहिरिकं अनोत्तप्पं मोहो विचिकिच्छाति सरूपेनागता तेरस, उद्धच्चं मनसिकारोति द्वे येवापनका नियता. तेहि सद्धिं पन्नरस होन्ति.

तत्थ ¶ पवत्तट्ठितिमत्ता एकग्गता. विगता चिकिच्छाति विचिकिच्छा. सभावं विचिनन्तो ¶ एताय किच्छति किलमतीति विचिकिच्छा. सा संसयलक्खणा, कम्पनरसा, अनिच्छयपच्चुपट्ठाना, अयोनिसोमनसिकारपदट्ठाना. सेसा वुत्तनया एव.

द्वादसमेन उद्धच्चसम्पयुत्तेन सम्पयुत्ता सरूपेनागता ¶ विचिकिच्छासहगते वुत्तेसु विचिकिच्छाहीना उद्धच्चं सरूपेन आगतं, तस्मा तेरसेव होन्ति. विचिकिच्छाय अभावेन पनेत्थ अधिमोक्खो उप्पज्जति, तेन सद्धिं चुद्दस होन्ति. अधिमोक्खसम्भवतो समाधि बलवा होति, अधिमोक्खमनसिकारा द्वे येवापनका, तेहि सह पन्नरसेव होन्ति. एवं ताव अकुसलचेतसिका वेदितब्बा.

इदानि अब्याकता वुच्चन्ति, अब्याकता पन दुविधा विपाककिरियभेदतो. तत्थ विपाका कुसला विय भूमिवसेन चतुब्बिधा कामावचरं रूपावचरं अरूपावचरं लोकुत्तरञ्चेति. तत्थ कामावचरविपाका सहेतुकाहेतुकवसेन दुविधा. तत्थ सहेतुकविपाकसम्पयुत्ता सहेतुका. ते सहेतुककामावचरकुसलसम्पयुत्तसदिसा. या पन करुणामुदिता अनियता, ता सत्तारम्मणत्ता विपाकेसु नुप्पज्जन्ति. कामावचरविपाकानं एकन्तपरित्तारम्मणत्ता विरतियो पनेत्थ एकन्तकुसलत्ता न लब्भन्ति. विभङ्गे ‘‘पञ्च सिक्खापदा कुसलायेवा’’ति हि वुत्तं. एवं कामावचरसहेतुकविपाकचेतसिका वेदितब्बा.

तेत्तिंसादिद्वये धम्मा, द्वत्तिंसेव ततो परे;

बात्तिंस पञ्चमे छट्ठे, एकतिंस ततो परे.

अहेतुकचित्तसम्पयुत्ता ¶ पन अहेतुका. तेसु चक्खुविञ्ञाणसम्पयुत्ता ताव फस्सो उपेक्खावेदना सञ्ञा चेतना जीवितं चित्तट्ठितीति सरूपेनागता छ, मनसिकारेन च सत्त होन्ति. सोतघानजिव्हाकायविञ्ञाणसम्पयुत्तापि सत्त सत्तेव चेतसिका. तत्थ कायविञ्ञाणसम्पयुत्तेसु पन उपेक्खाठाने सुखवेदना पविट्ठा. सा कायिकसातलक्खणा, पीणनरसा, सेसा वुत्तनया एव.

इट्ठारम्मणयोगस्मिं, चक्खुविञ्ञाणकादिसु;

सति कस्मा उपेक्खाव, वुत्ता चतूसु सत्थुना.

उपादाय ¶ च रूपेन, उपादारूपके पन;

सङ्घट्टनानिघंसस्स, दुब्बलत्ताति दीपये.

पसादं पनतिक्कम्म, कूटंव पिचुपिण्डकं;

भूतरूपेन भूतानं, घट्टनाय सुखादिकं.

तस्मा ¶ कायविञ्ञाणं सुखादिसम्पयुत्तन्ति वेदितब्बं. मनोधातुना सम्पयुत्ता सरूपेनागता चक्खुविञ्ञाणेन सद्धिं वुत्ता छ, वितक्कविचारेहि सह अट्ठ, अधिमोक्खमनसिकारेहि द्वीहि येवापनकेहि दस धम्मा होन्ति. तथा मनोविञ्ञाणधातुउपेक्खासहगतेन. सोमनस्ससहगतेन पीतिअधिका वेदनापरिवत्तनञ्च नानत्तं. तस्मावेत्थ एकादस धम्मा होन्ति. एवं अहेतुकापि कामावचरविपाकचेतसिका वेदितब्बा.

रूपावचरविपाकचित्तसम्पयुत्ता पन रूपावचरा. अरूपावचरविपाकचित्तसम्पयुत्ता अरूपावचरा. ते सब्बेपि अत्तनो अत्तनो कुसलचित्तसम्पयुत्तचेतसिकेहि सदिसायेवाति.

लोकुत्तरविपाकचित्तसम्पयुत्ता ¶ लोकुत्तरा. ते सब्बे तेसंयेव लोकुत्तरविपाकचित्तानं सदिसा कुसलचित्तसम्पयुत्तेहि चेतसिकेहि सदिसा. एवं रूपावचरारूपावचरलोकुत्तरविपाकचेतसिका वेदितब्बा.

अकुसलविपाकचित्तसम्पयुत्ता पन अकुसलविपाकचेतसिका नाम. ते पन कुसलविपाकाहेतुकचित्तेसु चक्खुविञ्ञाणादीसु वुत्तचेतसिकसदिसा. एत्थ पन कायविञ्ञाणे दुक्खवेदना पविट्ठा. सा कायिकाबाधलक्खणा. सेसा वुत्तनयायेवाति. एवं छत्तिंस विपाकचित्तसम्पयुत्तचेतसिका वेदितब्बा.

किरियाब्याकता च चेतसिका भूमितो तिविधा होन्ति कामावचरा रूपावचरा अरूपावचराति. तत्थ कामावचरा सहेतुकाहेतुकतो दुविधा होन्ति. तेसु सहेतुककिरियचित्तसम्पयुत्ता सहेतुका, ते पन अट्ठहि कामावचरकुसलचित्तसम्पयुत्तेहि समाना ठपेत्वा विरतित्तयं अनियतयेवापनकेसु करुणामुदितायेव उप्पज्जन्ति. अहेतुककिरियचित्तसम्पयुत्ता अहेतुका, ते कुसलविपाकाहेतुकमनोधातुमनोविञ्ञाणधातुचित्तसम्पयुत्तेहि समाना. मनोविञ्ञाणधातुद्वये ¶ पन वीरियिन्द्रियं अधिकं. वीरियिन्द्रियसम्भवतो पनेत्थ बलप्पत्तो समाधि होति. हसितुप्पादचित्तेन सम्पयुत्ता द्वादस धम्मा होन्ति पीतिया सह. अयमेत्थ विसेसो.

रूपावचरकिरियचित्तसम्पयुत्ता पन रूपावचरा. अरूपावचरकिरियचित्तसम्पयुत्ता अरूपावचरा. ते सब्बेपि सकसकभूमिकुसलचित्तसम्पयुत्तेहि समानाति. एवं वीसति किरियचित्तसम्पयुत्ता च चेतसिका वेदितब्बा.

एत्तावता ¶ ¶ कुसलाकुसलविपाककिरियभेदभिन्नेन एकूननवुतिया चित्तेन सम्पयुत्ता चेतसिका निद्दिट्ठा होन्ति.

इति अभिधम्मावतारे चेतसिकनिद्देसो नाम

सब्बे ¶ ¶ चेतसिका वुत्ता, बुद्धेनादिच्चबन्धुना;

नामसामञ्ञतोयेव, द्वेपञ्ञास भवन्ति ते.

सेय्यथिदं – फस्सो वेदना सञ्ञा चेतना वितक्को विचारो पीति चित्तेकग्गता वीरियं जीवितं छन्दो अधिमोक्खो मनसिकारो तत्रमज्झत्तता सद्धा सति हिरी ओत्तप्पं अलोभो अदोसो अमोहो कायप्पस्सद्धिआदीनि छ युगानि, तिस्सो विरतियो, करुणा मुदिता लोभो दोसो मोहो उद्धच्चं मानो दिट्ठि इस्सा मच्छरियं कुक्कुच्चं थिनं मिद्धं विचिकिच्छा अहिरिकं अनोत्तप्पञ्चाति.

चतुपञ्ञासधा ¶ कामे, रूपे पञ्चदसेरिता;

ते होन्ति द्वादसारूपे, चत्तालीसमनासवा.

एकवीससतं सब्बे, चित्तुप्पादा समासतो;

एतेसु तेसमुप्पत्तिं, उद्धरित्वा पनेककं.

फस्सादीनं तु धम्मानं, पवक्खामि इतो परं;

पाटवत्थाय भिक्खूनं, चित्तचेतसिकेस्वहं.

एकग्गता मनक्कारो, जीवितं फस्सपञ्चकं;

अट्ठेते अविनिब्भोगा, एकुप्पादा सहक्खया.

फस्सो च वेदना सञ्ञा, चेतना जीवितिन्द्रियं;

एकग्गता मनक्कारो, सब्बसाधारणा इमे.

वितक्को पञ्चपञ्ञास-चित्तेसु समुदीरितो;

चारो छसट्ठिचित्तेसु, जायते नत्थि संसयो.

एकपञ्ञासचित्तेसु ¶ , पीति तेसट्ठिया सुखं;

उपेक्खा पञ्चपञ्ञास-चित्ते दुक्खं तु तीसु हि.

होति द्वासट्ठिचित्तेसु, सोमनस्सिन्द्रियं पन;

दुक्खिन्द्रियं पनेकस्मिं, तथेकम्हि सुखिन्द्रियं.

पञ्चुत्तरसते ¶ चित्ते, वीरियं आह नायको;

चतुत्तरसते चित्ते, समाधिन्द्रियमब्रवि.

सब्बाहेतुकचित्तानि, ठपेत्वा चेकहेतुके;

एकुत्तरसते चित्ते, छन्दस्सुप्पत्तिमुद्दिसे.

ठपेत्वा दस विञ्ञाणे, विचिकिच्छायुतम्पि च;

दसुत्तरसते चित्ते, अधिमोक्खो उदीरितो.

सद्धा ¶ सति हिरोत्तप्पं, अलोभादोसमज्झता;

छळेव युगळा चाति, धम्मा एकूनवीसति.

एकनवुतिया चित्ते, जायन्ति नियता इमे;

अहेतुकेसु चित्तेसु, अपुञ्ञेसु न जायरे.

एकूनासीतिया चित्ते, पञ्ञा जायति सब्बदा;

अट्ठवीसतिया चित्ते, करुणामुदिता सियुं.

कामावचरपुञ्ञेसु, सब्बलोकुत्तरेसु च;

चत्तालीसविधे चित्ते, साट्ठके विरतित्तयं.

सद्धा सति हिरोत्तप्पं, अलोभादित्तयम्पि च;

युगळानि छ मज्झत्तं, करुणामुदितापि च.

तथा विरतियो तिस्सो, सब्बे ते पञ्चवीसति;

कुसलाब्याकता चापि, कुसलेन पकासिता.

अहिरीकमनोत्तप्पं, मोहो उद्धच्चमेव च;

द्वादसापुञ्ञचित्तेसु, नियतायेव जायरे.

लोभो ¶ दोसो च मोहो च, मानो दिट्ठि च संसयो;

मिद्धमुद्धच्चकुक्कुच्चं, थिनं मच्छरियम्पि च.

अहिरीकमनोत्तप्पं, इस्सा च दोमनस्सकं;

एते अकुसला वुत्ता, एकन्तेन महेसिना.

लोभो अट्ठसु निद्दिट्ठो, वुत्ता चतूसु दिट्ठितु;

मानो दिट्ठिवियुत्तेसु, दोसोद्वीस्वेव जायते.

इस्सामच्छेरकुक्कुच्चा, द्वीसु जायन्ति नो सह;

विचिकिच्छा पनेकस्मिं, थिनमिद्धं तु पञ्चसु.

फस्सो ¶ च वेदना सञ्ञा, चेतना जीवितं मनो;

वितक्को च विचारो च, पीति वीरियसमाधि च.

छन्दो चेवाधिमोक्खो च, मनसिकारो च चुद्दस;

कुसलाकुसला चेव, होन्ति अब्याकतापि च.

एकूनतिंसचित्तेसु, झानं पञ्चङ्गिकं मतं;

चतुझानङ्गयुत्तानि, सत्ततिंसाति निद्दिसे.

एकादसविधं चित्तं, तिवङ्गिकमुदीरितं;

चतुतिंसविधं चित्तं, दुवङ्गिकमुदीरितं.

सभावेनावितक्केसु ¶ , झानङ्गानि न उद्धरे;

सब्बाहेतुकचित्तेसु, मग्गङ्गानि न उद्धरे.

तीणि सोळसचित्तेसु, इन्द्रियानि वदे बुधो;

एकस्मिं पन चत्तारि, पञ्च तेरससुद्धरे.

सत्त द्वादसचित्तेसु, इन्द्रियानि जिनोब्रवि;

एकेनूनेसु अट्ठेव, चत्तालीसमनेसु च.

चत्तालीसाय ¶ चित्तेसु, नवकं नायकोब्रवि;

एवं इन्द्रिययोगोपि, वेदितब्बो विभाविना.

अमग्गङ्गानि नामेत्थ, अट्ठारस अहेतुका;

झानङ्गानि न विज्जन्ति, विञ्ञाणेसु द्विपञ्चसु.

एकं चित्तं दुमग्गङ्गं, तिमग्गङ्गानि सत्तसु;

चत्तालीसाय चित्तेसु, मग्गो सो चतुरङ्गिको.

पञ्चद्दससु चित्तेसु, मग्गो पञ्चङ्गिको मतो;

वुत्तो द्वत्तिंसचित्तेसु, मग्गो सत्तङ्गिकोपि च.

मग्गो ¶ अट्ठसु चित्तेसु, मतो अट्ठङ्गिकोति हि;

एवं तु सब्बचित्तेसु, मग्गङ्गानि समुद्धरे.

बलानि द्वे द्विचित्तेसु, एकस्मिं तीणि दीपये;

एकादससु चत्तारि, छ द्वादससु निद्दिसे.

एकूनासीतिया सत्त, सोळसेवाबलानि तु;

चित्तमेवं तु विञ्ञेय्यं, सबलं अबलम्पि च.

चित्तेसु जायन्ति हि येसु यानि;

इति अभिधम्मावतारे चेतसिकविभागनिद्देसो नाम

इतो ¶ ¶ परं पवक्खामि, नयमेकविधादिकं;

आभिधम्मिकभिक्खूनं, बुद्धिया पन वुद्धिया.

सब्बमेकविधं चित्तं, विजाननसभावतो;

दुविधञ्च भवे चित्तं, अहेतुकसहेतुतो.

पुञ्ञापुञ्ञविपाका हि, कामे दस च पञ्च च;

क्रिया तिस्सोति सब्बेपि, अट्ठारस अहेतुका.

एकसत्तति सेसानि, चित्तुप्पादा महेसिना;

सहेतुकाति निद्दिट्ठा, तादिना हेतुवादिना.

सवत्थुकावत्थुकतो ¶ , तथोभयवसेन च;

सब्बं वुत्तपकारं तु, तिविधं होति मानसं.

सब्बो कामविपाको च, रूपे पञ्चदसापि च;

आदिमग्गो सितुप्पादो, मनोधातु क्रियापि च.

दोमनस्सद्वयञ्चापि, तेचत्तालीस मानसा;

नुप्पज्जन्ति विना वत्थुं, एकन्तेन सवत्थुका.

अरूपावचरपाका च, एकन्तेन अवत्थुका;

द्वाचत्तालीस सेसानि, चित्तानुभयथा सियुं.

एकेकारम्मणं चित्तं, पञ्चारम्मणमेव च;

छळारम्मणकञ्चेति, एवम्पि तिविधं सिया.

विञ्ञाणानि च द्वेपञ्च, अट्ठ लोकुत्तरानि च;

सब्बं महग्गतञ्चेव, ठपेत्वाभिञ्ञमानसं.

तेचत्तालीस ¶ विञ्ञेय्या, एकेकारम्मणा पन;

मनोधातुत्तयं तत्थ, पञ्चारम्मणमीरितं.

तेचत्तालीस सेसानि, छळारम्मणिका मता;

तथा च तिविधं चित्तं, कुसलाकुसलादितो.

अहेतुं एकहेतुञ्च, द्विहेतुञ्च तिहेतुकं;

एवं चतुब्बिधं चित्तं, विञ्ञातब्बं विभाविना.

हेट्ठा मयापि निद्दिट्ठा, अट्ठारस अहेतुका;

विचिकिच्छुद्धच्चसंयुत्तं, एकहेतुमुदीरितं.

कामे ¶ द्वादसधा पुञ्ञ-विपाकक्रियतो पन;

दसधाकुसला चाति, बावीसति दुहेतुका.

कामे ¶ द्वादसधा पुञ्ञ-विपाकक्रियतो पन;

सब्बं महग्गतञ्चेव, अप्पमाणं तिहेतुकं.

रूपीरियापथविञ्ञत्ति-जनकाजनकादितो;

एवञ्चापि हि तं चित्तं, होति सब्बं चतुब्बिधं.

द्वादसाकुसला तत्थ, कुसला कामधातुया;

तथा दस क्रिया कामे, अभिञ्ञामानसं द्वयं.

समुट्ठापेन्ति रूपानि, कप्पेन्ति इरियापथं;

जनयन्ति च विञ्ञत्तिं, इमे द्वत्तिंस मानसा.

कुसला च क्रिया चेव, ते महग्गतमानसा;

अट्ठानासवचित्तानि, छब्बीसति च मानसा.

समुट्ठापेन्ति रूपानि, कप्पेन्ति इरियापथं;

चोपनं न च पापेन्ति, द्विकिच्चा नियता इमे.

ठपेत्वा दस विञ्ञाणे, विपाका द्वीसु भूमिसु;

क्रिया चेव मनोधातु, इमानेकूनवीसति.

समुट्ठापेन्ति ¶ रूपानि, न करोन्तितरद्वयं;

पुन द्वेपञ्चविञ्ञाणा, विपाका च अरूपिसु.

सब्बेसं सन्धिचित्तञ्च, चुतिचित्तञ्चारहतो;

न करोन्ति तिकिच्चानि, इमे सोळस मानसा.

एकद्वितिचतुट्ठान-पञ्चट्ठानपभेदतो;

पञ्चधा चित्तमक्खासि, पञ्चनिम्मललोचनो.

कुसलाकुसला सब्बे, चित्तुप्पादा महाक्रिया;

महग्गता क्रिया चेव, चत्तारो फलमानसा.

सब्बेव ¶ पञ्चपञ्ञास, निप्पपञ्चेन सत्थुना;

जवनट्ठानतोयेव, एकट्ठाने नियामिता.

पुन द्वेपञ्चविञ्ञाणा, दस्सने सवने तथा;

घायने सायने ठाने, फुसने पटिपाटिया.

मनोधातुत्तिकं ठाने, आवज्जने पटिच्छने;

अट्ठसट्ठि भवन्तेते, एकट्ठानिकतं गता.

पुन द्विट्ठानिकं नाम, चित्तद्वयमुदीरितं;

सोमनस्सयुतं पञ्च-द्वारे सन्तीरणं सिया.

तदारम्मणं छद्वारे, बलवारम्मणे सति;

तथा वोट्ठब्बनं होति, पञ्चद्वारेसु वोट्ठबो.

मनोद्वारेसु सब्बेसं, होति आवज्जनं पन;

इदं द्विट्ठानिकं नाम, होति चित्तद्वयं पन.

पटिसन्धिभवङ्गस्स, चुतिया ठानतो पन;

महग्गतविपाका ते, नव तिट्ठानिका मता.

अट्ठ ¶ कामा महापाका, पटिसन्धिभवङ्गतो;

तदारम्मणतो चेव, चुतिट्ठानवसेन च.

चतुट्ठानिकचित्तानि ¶ , अट्ठ होन्तीति निद्दिसे;

कुसलाकुसलपाकं तु-पेक्खासहगतद्वयं.

सन्तीरणं भवे पञ्च-द्वारे छद्वारिकेसु च;

तदारम्मणतं याति, बलवारम्मणे सति.

पटिसन्धिभवङ्गानं, चुतिट्ठानवसेन च;

पञ्चट्ठानिकचित्तन्ति, इदं द्वयमुदीरितं.

पञ्चकिच्चं ¶ द्वयं चित्तं, चतुकिच्चं पनट्ठकं;

तिकिच्चं नवकं द्वे तु, द्विकिच्चा सेसमेककं.

भवङ्गावज्जनञ्चेव, दस्सनं सम्पटिच्छनं;

सन्तीरणं वोट्ठब्बनं, जवनं भवति सत्तमं.

छब्बिधं होति तं छन्नं, विञ्ञाणानं पभेदतो;

सत्तधा सत्तविञ्ञाण-धातूनं तु पभेदतो.

एकेकारम्मणं छक्कं, पञ्चारम्मणभेदतो;

छळारम्मणतो चेव, होति अट्ठविधं मनो.

तत्थ द्वेपञ्चविञ्ञाणा, होन्ति एकेकगोचरा;

रूपारम्मणिका द्वे तु, द्वे द्वे सद्दादिगोचरा.

सब्बं महग्गतं चित्तं, पञ्चाभिञ्ञाविवज्जितं;

सब्बं लोकुत्तरञ्चेति, एकेकारम्मणं भवे.

एकेकारम्मणं छक्क-मिदं ञेय्यं विभाविना;

पञ्चारम्मणिकं नाम, मनोधातुत्तयं भवे.

कामावचरचित्तानि, चत्तालीसं तथेककं;

अभिञ्ञानि च सब्बानि, छळारम्मणिकानिति.

चित्तं नवविधं होति, सत्तविञ्ञाणधातुसु;

पच्छिमञ्च तिधा कत्वा, कुसलाकुसलादितो.

पुञ्ञापुञ्ञवसेनेव ¶ , विपाकक्रियभेदतो;

छसत्ततिविधो भेदो, मनोविञ्ञाणधातुया.

मनोधातुं द्विधा कत्वा, विपाकक्रियभेदतो;

नवधा पुब्बवुत्तेहि, दसधा होति मानसं.

धातुद्वयं ¶ तिधा कत्वा, पच्छिमं पुन पण्डितो;

एकादसविधं चित्तं, होतीति परिदीपये.

मनोविञ्ञाणधातुम्पि, कुसलाकुसलादितो;

चतुधा विभजित्वान, वदे द्वादसधा ठितं.

भवे ¶ चुद्दसधा चित्तं, चुद्दसट्ठानभेदतो;

पटिसन्धिभवङ्गस्स, चुतियावज्जनस्स च.

पञ्चन्नं दस्सनादीनं, सम्पटिच्छनचेतसो;

सन्तीरणस्स वोट्ठब्ब-जवनानं वसेन च.

तदारम्मणचित्तस्स, तथेव ठानभेदतो;

एवं चुद्दसधा चित्तं, होतीति परिदीपये.

भूमिपुग्गलनानात्त-वसेन च पवत्तितो;

बहुधा पनिदं चित्तं, होतीति च विभावये.

इति अभिधम्मावतारे एकविधादिनिद्देसो नाम

भूमिपुग्गलचित्तुप्पत्तिनिद्देसो

इतो ¶ ¶ परं पवक्खामि, बुद्धिवुद्धिकरं नयं;

चित्तानं भूमीसुप्पत्तिं, पुग्गलानं वसेन च.

देवाचेव ¶ मनुस्सा च, तिस्सो वापायभूमियो;

गतियो पञ्च निद्दिट्ठा, सत्थुना तु तयो भवा.

भूमियो तत्थ तिंसेव, तासु तिंसेव पुग्गला;

भूमीस्वेतासु उप्पन्ना, सब्बे च पन पुग्गला.

पटिसन्धिकचित्तानं, वसेनेकूनवीसति;

पटिसन्धि च नामेसा, दुविधा समुदीरिता.

अचित्तका सचित्ता च, असञ्ञीनमचित्तका;

सेसा सचित्तका ञेय्या, सा पनेकूनवीसति.

पटिसन्धिवसेनेव, होन्ति वीसति पुग्गला;

इध चित्ताधिकारत्ता, अचित्ता न च उद्धटा.

अहेतुद्वितिहेतूति, पुग्गला तिविधा सियुं;

अरिया पन अट्ठाति, सब्बे एकादसेरिता.

एतेसं पन सब्बेसं, पुग्गलानं पभेदतो;

चित्तानं भूमीसुप्पत्तिं, भणतो मे निबोधथ.

तिंसभूमीसु चित्तानि, कति जायन्ति मे वद;

चुद्दसेव तु चित्तानि, होन्ति सब्बासु भूमिसु.

सदा वीसति चित्तानि, कामेयेव भवे सियुं;

पञ्च रूपभवेयेव, चत्तारेव अरूपिसु.

कामरूपभवेस्वेव ¶ , अट्ठारस भवन्ति हि;

द्वेचत्तालीस चित्तानि, होन्ति तीसु भवेसुपि.

ठपेत्वा पन सब्बासं, चतस्सोपायभूमियो;

तेरसेव च चित्तानि, होन्ति छब्बीसभूमिसु.

अपरानि ¶ चतस्सोपि, ठपेत्वारुप्पभूमियो;

चित्तानि पन जायन्ति, छ च छब्बीसभूमिसु.

सुद्धावासिकदेवानं ¶ , ठपेत्वा पञ्च भूमियो;

पञ्च चित्तानि जायन्ते, पञ्चवीसतिभूमिसु.

अपरानि दुवे होन्ति, पञ्चवीसतिभूमिसु;

ठपेत्वा नेवसञ्ञञ्च, चतस्सोपायभूमियो.

द्वेपि चित्तानि जायन्ति, चतुवीसतिभूमिसु;

आकिञ्चञ्ञं नेवसञ्ञञ्च, ठपेत्वापायभूमियो.

अपायभूमियो हित्वा, तिस्सो आरुप्पभूमियो;

द्वेयेव पन चित्तानि, होन्ति तेवीसभूमिसु.

अरूपे च अपाये च, ठपेत्वा अट्ठ भूमियो;

एकादसविधं चित्तं, होन्ति द्वावीसभूमिसु.

सुद्धावासे अपाये च, ठपेत्वा नव भूमियो;

एकवीसासु निच्चम्पि, चत्तारोव भवन्ति हि.

एकं सत्तरसस्वेव, चित्तं जायति भूमिसु;

सुद्धावासे ठपेत्वा तु, अपायारुप्पभूमियो.

द्वादसेव तु जायन्ते, एकादससु भूमिसु;

ठपेत्वा पन सब्बापि, भूमियो हि महग्गता.

कामावचरदेवानं, मनुस्सानं वसेन तु;

अट्ठ चित्तानि जायन्ते, सदा सत्तसु भूमिसु.

पञ्चमज्झानपाकेको ¶ , जायते छसु भूमिसु;

चत्तारि पन चित्तानि, तीसु तीस्वेव भूमिसु.

चत्तारि ¶ पन चित्तानि, होन्ति एकेकभूमिसु;

अरूपावचरपाकानं, वसेन परिदीपये.

नरकादीस्वपायेसु, चतूसुपि च जायरे;

द्वेपञ्ञासावसेसानि, नुप्पज्जन्ति कदाचिपि.

कामे देवमनुस्सानं, नव पाका महग्गता;

नेव जायन्ति जायन्ति, असीति हदया सदा.

कामे अट्ठ महापाका, दोमनस्सद्वयम्पि च;

तथा घानादिविञ्ञाण-त्तयं पाका अपुञ्ञजा.

नत्थि आरुप्पपाका च, रूपावचरभूमियं;

इमेहि सह चित्तेहि, तयो मग्गा फलद्वयं.

चत्तारो दिट्ठिसंयुत्ता, विचिकिच्छायुतम्पि च;

चत्तारो हेट्ठिमा पाका, सुद्धावासे न लब्भरे.

सेसानि एकपञ्ञास, चित्तानि पन लब्भरे;

रूपावचरिका सब्बे, विपाका कामधातुया.

दोमनस्सादिमग्गो च, क्रिया च द्वे अहेतुका;

तेचत्तालीस चित्तानि, नत्थि आरुप्पभूमियं.

एवं ¶ भूमिवसेनेव, चित्तुप्पत्तिं विभावये;

तथा एकादसन्नम्पि, पुग्गलानं वसेन च.

अहेतुकस्स सत्तस्स, जायन्ते पञ्चभूमिसु;

द्वेपञ्ञासावसेसानि, न जायन्ति कदाचिपि.

अहेतुकस्स वुत्तेहि, कामपाका दुहेतुका;

दुहेतुकस्स जायन्ते, चत्तालीसं तथेककं.

सब्बे महग्गता चेव, सब्बेपि च अनासवा;

तिहेतुका विपाका च, कामे नव क्रियापि च.

दुहेतुनो न जायन्ति, चत्तालीसं तथाट्ठ च;

कामावचरसत्तस्स, तिहेतुपटिसन्धिनो.

पुथुज्जनस्स जायन्ते, चतुपञ्ञास मानसा;

द्विहेतुकस्स वुत्तानि, चत्तालीसं तथेककं.

चत्तारो ञाणसंयुत्ता, विपाका कामधातुया;

रूपारूपेसु पुञ्ञानि, चतुपञ्ञास मानसा.

पुथुज्जनस्स जायन्ते, पञ्चतिंस न जायरे;

छदेवेसु मनुस्सेसु, सोतापन्नस्स देहिनो.

पञ्ञासेवस्स चित्तानि, जायन्तीति विनिद्दिसे;

नवतिंसेव चित्तानि, नुप्पज्जन्तीति दीपये.

सोतापन्नस्स वुत्तानि, ठपेत्वा पठमं फलं;

अत्तनोव फलेनस्स, सकदागामिनो सियुं.

सोतापन्नस्स ¶ ¶ वुत्तानि, ठपेत्वा पटिघद्वयं;

दुतियं च फलं हित्वा, यानि चित्तानि तानिति;

अनागामिस्स सत्तस्स, जायन्तीति विनिद्दिसे.

कति चित्तानि जायन्ते, कामे अरहतो पन;

चत्तारीसञ्च चत्तारि, कामे अरहतो सियुं.

मग्गट्ठानं चतुन्नम्पि, पुग्गलानं सकं सकं;

मग्गचित्तं सिया तेसं, एकचित्तक्खणा हि ते.

पुथुज्जनस्स तीस्वेव, पठमज्झानभूमिसु;

पञ्चतिंसेव चित्तानि, जायन्तेति विनिद्दिसे.

घानादीसु च विञ्ञाण-त्तयं सत्त अपुञ्ञजा;

महापाका तथा पाका, उपरिज्झानभूमिका.

विपाकापि च आरुप्पा, दोमनस्सद्वयम्पि च;

अट्ठारस क्रिया चेव, अट्ठ लोकुत्तरानि च.

पठमज्झाननिब्बत्त-पुथुज्जनसरीरिनो;

एतानि चतुपञ्ञास, चित्तानि न च लब्भरे.

सोतापन्नस्स ¶ चित्तानि, तत्थेकतिंस जायरे;

पुथुज्जनस्स वुत्तेसु, हित्वा चापुञ्ञपञ्चकं.

सकदागामिनो तत्थ, ठपेत्वा पठमं फलं;

एकतिंसेव जायन्ते, पक्खिपित्वा सकं फलं.

अनागामिस्स तत्थेव, ठपेत्वा दुतियं फलं;

एकतिंसेव जायन्ते, फलचित्तेन अत्तनो.

विञ्ञाणं चक्खुसोतानं, पुञ्ञजं सम्पटिच्छनं;

सन्तीरणद्वयञ्चेव, क्रियचित्तानि वीसति.

अरहत्तफलं ¶ ¶ पाको, पठमज्झानसम्भवो;

सत्तवीसति चित्तानि, अरहन्तस्स जायरे.

पुथुज्जनस्स तीस्वेव, दुतियज्झानभूमिसु;

छत्तिंस दुतियज्झान-ततियज्झानपाकतो.

पुथुज्जनस्स वुत्तेसु, हित्वा वापुञ्ञपञ्चकं;

सोतापन्नस्स बात्तिंस, फलेन सह अत्तनो.

सोतापन्नस्स वुत्तेसु, ठपेत्वा पठमं फलं;

बात्तिंस फलचित्तेन, सकदागामिस्स अत्तनो.

सकदागामीसु वुत्तेसु, ठपेत्वा दुतियं फलं;

अनागामिफलेनस्स, बात्तिंसेव भवन्ति हि.

अरहन्तस्स तीस्वेव, अट्ठवीसति अत्तनो;

फलेन दुतियज्झान-ततियज्झानपाकतो.

परित्तकसुभादीनं, देवानं तीसु भूमिसु;

पञ्चतिंसेव जायन्ते, चतुत्थज्झानपाकतो.

सोतापन्नस्स तत्थेक-तिंस चित्तानि जायरे;

सकदागामिनो एवं, तथानागामिनोपि च.

खीणासवस्स तत्थेव, सत्तवीसति मानसा;

तथा वेहप्फले चापि, सब्बेसं होन्ति मानसा.

एकतिंसेव चित्तानि, सुद्धावासिकभूमिसु;

अनागामिकसत्तस्स, होन्तीति परिदीपये.

अरहतो पन तत्थेव, मानसा सत्तवीसति;

एवं रूपीसु चित्तानि, विञ्ञेय्यानि विभाविना.

चतुवीसति ¶ चित्तानि, पठमारुप्पभूमियं;

पुथुज्जनस्स सत्तस्स, जायन्तीति विनिद्दिसे.

सोतापन्नस्स ¶ तत्थेव, ठपेत्वापुञ्ञपञ्चकं;

समवीसति चित्तानि, फलेन सह अत्तनो.

सकदागामिनो तत्थ, तथानागामिनोपि च;

जायन्ति वीस चित्तानि, पुब्बपुब्बफलं विना.

खीणासवस्स तत्थेव, दसपञ्च च मानसा;

पुथुज्जनस्स सत्तस्स, दुतियारुप्पभूमियं.

होन्ति ¶ तेवीस चित्तानि, इति वत्वा विभावये;

तिण्णन्नम्पेत्थ सेखानं, चित्तानेकूनवीसति.

चुद्दसेव तु चित्तानि, दुतियारुप्पभूमियं;

क्रियाद्वादस पाकेको, फलं खीणासवस्स तु.

पुथुज्जनस्स सत्तस्स, ततियारुप्पभूमियं;

बावीसति च चित्तानि, भवन्तीति पकासये.

अट्ठारसेव चित्तानि, सोतापन्नस्स जायरे;

सकदागामिनो तानि, ठपेत्वा पठमं फलं.

सकदागामिवुत्तेसु, ठपेत्वा दुतियं फलं;

अट्ठारसेव चित्तानि, अनागामिस्स जायरे.

तेरसेव च चित्तानि, ततियारुप्पभूमियं;

खीणासवस्स सत्तस्स, भवन्तीति विनिद्दिसे.

एकवीसति चित्तानि, चतुत्थारुप्पभूमियं;

पुथुज्जनस्स सत्तस्स, जायन्तीति विनिद्दिसे.

सोतापन्नस्स ¶ सत्तस्स, सत्तरस पकासये;

सकदागामिनो तानि, ठपेत्वा पठमं फलं.

सकदागामिवुत्तेसु, ठपेत्वा दुतियं फलं;

होन्ति सत्तरसेवस्स, अनागामिस्स मानसा.

द्वादसेव ¶ तु चित्तानि, चतुत्थारुप्पभूमियं;

जायन्ति अरहन्तस्स, इति वत्वा विभावये.

हेट्ठिमानं अरूपीनं, ब्रह्मानं उपरूपरि;

अरूपकुसला चेव, उप्पज्जन्ति क्रियापि च.

उद्धमुद्धमरूपीनं, हेट्ठिमा हेट्ठिमा पन;

आरुप्पानेव जायन्ते, दिट्ठादीनवतो किर.

ठपेत्वा पठमं मग्गं, कुसलानुत्तरा तयो;

कामावचरपुञ्ञानि, अपुञ्ञानि तथा दस.

चत्तारारुप्पपुञ्ञानि, सब्बे पाका अनुत्तरा;

पठमारुप्पपाको च, नव कामक्रियापि च.

आरुप्पापि क्रिया सब्बा, तेचत्तालीस मानसा;

उप्पज्जन्ति पनेतानि, पठमारुप्पभूमियं.

सब्बो कामविपाको च, सब्बो रूपोमहग्गतो;

चित्तुप्पादो मनोधातु, दोमनस्सद्वयम्पि च.

आदिमग्गो तयो पाका, आरुप्पा च तथूपरि;

छचत्तालीस नत्थेत्थ, पठमारुप्पभूमियं.

वुत्तेसु पन चित्तेसु, पठमारुप्पभूमियं;

ठपेत्वा पठमारुप्प-त्तयं पाको च अत्तनो.

तालीसेतानि ¶ जायन्ते, दुतियारुप्पभूमियं;

एवं सेसद्वये ञेय्या, हित्वा हेट्ठिमहेट्ठिमं.

अत्तनो ¶ अत्तनो पाका, चत्तारो च अनासवा;

विपाका होन्ति सब्बेव, चतूस्वारुप्पभूमिसु.

वोट्ठब्बनेन चित्तेन, कामे अट्ठ महाक्रिया;

चतस्सोपि च आरुप्पा, तेरसेव क्रिया सियुं.

खीणासवस्स ¶ जायन्ते, पठमारुप्पभूमियं;

द्वादसेव क्रिया होन्ति, दुतियारुप्पभूमियं.

एकादस क्रिया होन्ति, ततियारुप्पभूमियं;

दसेव च क्रिया ञेय्या, चतुत्थारुप्पभूमियं.

अरहतो पन चित्तानि, होन्ति एकूनवीसति;

अरहत्तं क्रिया सब्बा, ठपेत्वावज्जनद्वयं.

चतुन्नञ्च फलट्ठानं, तिहेतुकपुथुज्जने;

तेरसेव च चित्तानि, भवन्तीति पकासये.

चत्तारो ञाणसंयुत्ता, महापाका तथा नव;

रूपारूपविपाका च, तेरसेव भवन्तिमे.

चतुन्नञ्च फलट्ठानं, दुहेतुकपुथुज्जने;

ञाणहीनानि चत्तारि, विपाका एव जायरे.

पुथुज्जनानं तिण्णम्पि, चतुन्नं अरियदेहिनं;

सत्तरसेव चित्तानि, सत्तन्नम्पि भवन्ति हि.

विञ्ञाणानि दुवे पञ्च, मनोधातुत्तयम्पि च;

सन्तीरणानि वोट्ठब्बं, होन्ति सत्तरसेविमे.

हेट्ठा तिण्णं फलट्ठानं, तिहेतुकपुथुज्जने;

नवेव कुसला होन्ति, चतुन्नम्पि महग्गता.

तिण्णं ¶ पुथुज्जनानञ्च, तिण्णमरियानमादितो;

तेरसेव तु चित्तानि, उप्पज्जन्तीति निद्दिसे.

अट्ठेव कामपुञ्ञानि, दिट्ठिहीना अपुञ्ञतो;

चत्तारोपि च उद्धच्च-संयुत्तञ्चाति तेरस.

हेट्ठा द्विन्नं फलट्ठानं, तथा सब्बपुथुज्जने;

दोमनस्सयुत्तं चित्तं, द्वयमेव तु जायते.

तिण्णं ¶ पुथुज्जनानं तु, पञ्चेव पन जायरे;

चत्तारि दिट्ठियुत्तानि, विचिकिच्छायुतम्पि च.

मग्गट्ठानं चतुन्नम्पि, मग्गचित्तं सकं सकं;

एकमेव भवे तेसं, इति वत्वा विभावये.

मया भवेसु चित्तानं, पुग्गलानं वसेन च;

भिक्खूनं पाटवत्थाय, चित्तुप्पत्ति पकासिता.

एवं सब्बमिदं चित्तं, भूमिपुग्गलभेदतो;

बहुधापि च होतीति, विञ्ञातब्बं विभाविना.

सक्का ¶ वुत्तानुसारेन, भेदो ञातुं विभाविना;

गन्थवित्थारभीतेन, संखित्तं पनिदं मया.

पुब्बापरं विलोकेत्वा, चिन्तेत्वा च पुनप्पुनं;

अत्थं उपपरिक्खित्वा, गहेतब्बं विभाविना.

सदा साधु चिन्तेति वाचेति यो तं,

इति अभिधम्मावतारे भूमिपुग्गलवसेन चित्तुप्पत्तिनिद्देसो नाम

एतेसं ¶ ¶ ¶ पन चित्तानं, आरम्मणमितो परं;

दस्सयिस्सामहं तेन, विना नत्थि हि सम्भवो.

रूपं सद्दं गन्धं रसं, फोट्ठब्बं धम्ममेव च;

छधा आरम्मणं आहु, छळारम्मणकोविदा.

तत्थ भूते उपादाय, वण्णो चतुसमुट्ठितो;

सनिदस्सनपटिघो, रूपारम्मणसञ्ञितो.

दुविधो हि समुद्दिट्ठो, सद्दो चित्तोतुसम्भवो;

सविञ्ञाणकसद्दोव, होति चित्तसमुट्ठितो.

धरीयतीति गच्छन्तो, गन्धो सूचनतोपि वा;

अयं चतुसमुट्ठानो, गन्धारम्मणसम्मतो.

रसमाना रसन्तीति, रसोति परिकित्तितो;

सोव चतुसमुट्ठानो, रसारम्मणनामको.

फुसीयतीति फोट्ठब्बं, पथवीतेजवायवो;

फोट्ठब्बं चतुसम्भूतं, फोट्ठब्बारम्मणं मतं.

सब्बं नामञ्च रूपञ्च, हित्वा रूपादिपञ्चकं;

लक्खणानि च पञ्ञत्ति-धम्मारम्मणसञ्ञितं.

छारम्मणानि ¶ लब्भन्ति, कामावचरभूमियं;

तीणि रूपे पनारूपे, धम्मारम्मणमेककं.

खणवत्थुपरित्तत्ता ¶ , आपाथं न वजन्ति ये;

ते धम्मारम्मणा होन्ति, येसं रूपादयो किर.

ते पटिक्खिपितब्बाव, अञ्ञमञ्ञस्स गोचरं;

नेव पच्चनुभोन्तानं, मनो तेसं तु गोचरं.

तञ्च ¶ ‘‘पच्चनुभोती’’ति, वुत्तत्ता पन सत्थुना;

रूपादारम्मणानेव, होन्ति रूपादयो पन.

दिब्बचक्खादिञाणानं, रूपादीनेव गोचरा;

अनापाथगतानेव, तानीतिपि न युज्जति.

यं रूपारम्मणं होन्तं, तं धम्मारम्मणं कथं;

एवं सति पनेतेसं, नियमोति कथं भवे.

सब्बं आरम्मणं एतं, छब्बिधं समुदीरितं;

तं परित्तत्तिकादीनं, वसेन बहुधा मतं.

सब्बो कामविपाको च, क्रियाहेतुद्वयम्पि च;

पञ्चवीसति एकन्तं, परित्तारम्मणा सियुं.

इट्ठादिभेदा पञ्चेव, रूपसद्दादयो पन;

विञ्ञाणानं द्विपञ्चन्नं, गोचरा पटिपाटिया.

रूपादिपञ्चकं सब्बं, मनोधातुत्तयस्स तु;

तेरसन्नं पनेतेसं, रूपक्खन्धोव गोचरो.

नारूपं न च पञ्ञत्तिं, नातीतं न चनागतं;

आरम्मणं करोन्ते च, वत्तमानो हि गोचरो.

तेरसेतानि चित्तानि, जायन्ते कामधातुयं;

चत्तारि रूपावचरे, नेव किञ्चि अरूपिसु.

महापाकानमट्ठन्नं ¶ ¶ , सन्तीरणत्तयस्सपि;

छसु द्वारेसु रूपादिछपरित्तानि गोचरा.

रूपादयो परित्ता छ, हसितुप्पादगोचरा;

पञ्चद्वारे पटुप्पन्ना, मनोद्वारे तिकालिका.

दुतियारुप्पचित्तञ्च, चतुत्थारुप्पमानसं;

छब्बिधं नियतं होति, तं महग्गतगोचरं.

निब्बानारम्मणत्ता हि, एकन्तेन अनञ्ञतो;

अट्ठानासवचित्तानं, अप्पमाणोव गोचरो.

चत्तारो ञाणहीना च, कामावचरपुञ्ञतो;

क्रियतोपि च चत्तारो, द्वादसाकुसलानि च.

परित्तारम्मणा चेव, ते महग्गतगोचरा;

पञ्ञत्तारम्मणत्ता हि, नवत्तब्बाव होन्ति ते.

चत्तारो ञाणसंयुत्ता, पुञ्ञतो क्रियतोपि च;

तथाभिञ्ञाद्वयञ्चेव, क्रियावोट्ठब्बनम्पि च.

एकादसन्नमेतेसं, तिविधो होति गोचरो;

पञ्ञत्तारम्मणत्ता हि, नवत्तब्बापि होन्तिमे.

यानि वुत्तावसेसानि, चित्तानि पन तानि हि;

नवत्तब्बारम्मणानीति, विञ्ञेय्यानि विभाविना.

दुतियारुप्पचित्तञ्च ¶ , चतुत्थारुप्पमानसं;

छब्बिधं पन एकन्त-अतीतारम्मणं सिया.

विञ्ञाणानं द्विपञ्चन्नं, मनोधातुत्तयस्स च;

पञ्च रूपादयो धम्मा, पच्चुप्पन्नाव गोचरा.

अट्ठ ¶ ¶ काममहापाका, सन्तीरणत्तयम्पि च;

हसितुप्पादचित्तन्ति, द्वादसेते तु मानसा.

सियातीतारम्मणा पच्चु-प्पन्नानागतगोचरा;

कुसलाकुसला कामे, क्रियतो नव मानसा.

अभिञ्ञामानसा द्वेपि, सियातीतादिगोचरा;

सन्तपञ्ञत्तिकालेपि, नवत्तब्बा भवन्तिमे.

सेसानि पन सब्बानि, रूपारूपभवेसुपि;

नवत्तब्बानि होन्तेव, अतीतारम्मणादिना.

कामतो च क्रिया पञ्च, रूपतो पञ्चमी क्रिया;

चित्तानं छन्नमेतेसं, नत्थि किञ्चि अगोचरं.

निब्बानञ्च फलं मग्गं, रूपञ्चारूपमेव च;

सक्कोन्ति गोचरं कातुं, कति चित्तानि मे वद.

सक्कोन्ति गोचरं कातुं, चित्तानेकादसापि च;

निब्बानञ्च फलं मग्गं, रूपञ्चारूपमेव च.

चित्तेसु पन सब्बेसु, कति चित्तानि मे वद;

अरहत्तफलं मग्गं, कातुं सक्कोन्ति गोचरं.

सब्बेसु पन चित्तेसु, छ च चित्तानि मे सुण;

अरहत्तफलं मग्गं, कातुं सक्कोन्ति गोचरं.

चत्तारो ञाणसंयुत्ता, क्रिया वोट्ठब्बनम्पि च;

क्रियाभिञ्ञा मनोधातु, छ च सक्कोन्ति गोचरं.

चत्तारो ¶ ¶ ञाणसंयुत्ता-भिञ्ञाचित्तञ्च पुञ्ञतो;

नारहत्तं फलं मग्गं, कातुं सक्कोन्ति गोचरं.

कस्मा अरहतो मग्ग-चित्तं वा फलमानसं;

पुथुज्जना वा सेक्खा वा, न सक्कोन्ति हि जानितुं.

सकदागामी न जानाति, अनागामिस्स मानसं;

अनागामी न जानाति, अरहन्तस्स मानसं.

हेट्ठिमो ¶ हेट्ठिमो नेव, जानाति उपरूपरि;

उपरूपरि जानाति, हेट्ठिमस्स च मानसं.

कुसलारम्मणं कामे, कुसलाकुसलस्स च;

अभिञ्ञामानसस्सापि, कुसलस्स क्रियस्स च.

कामावचरपाकस्स, तथा कामक्रियस्स च;

एतेसं पन रासीनं, छन्नं आरम्मणं सिया.

रूपावचरपुञ्ञानि, कामपाकं ततो विना;

पञ्चन्नं पन रासीनं, होन्ति आरम्मणानि हि.

आरुप्पकुसलञ्चापि, तेभूमकुसलस्स च;

तेभूमकक्रियस्सापि, तथेवाकुसलस्सपि.

अरूपावचरपाकानं ¶ ¶ , द्विन्नं पन चतुत्थदु;

इमेसं अट्ठरासीनं, होतारम्मणपच्चयो.

अपरियापन्नपुञ्ञम्पि, कामावचरतोपि च;

रूपतो पञ्चमस्सापि, कुसलस्स क्रियस्स च.

चतुन्नं पन रासीनं, होति आरम्मणं सदा;

कुसलस्स क्रियस्सापि, तथेवाकुसलस्स च;

कामावचरपाकानं, छन्नं रासीनमीरितं.

विपाकारम्मणं कामे, कामावचरतोपि च;

रूपावचरतो चेव, कुसलस्स क्रियस्स च.

कामावचरपाकानं, तथेवाकुसलस्स च;

छन्नञ्च पन रासीनं, होतारम्मणपच्चयो.

विपाकारम्मणं रूपे, कामावचरतोपि च;

रूपावचरतो चेव, कुसलस्स क्रियस्स च.

अपुञ्ञस्साति पञ्चन्नं, रासीनं होति गोचरो;

अरूपावचरपाकेसु, अयमेव नयो मतो.

अपरियापन्नपाकम्पि, कामतो रूपतोपि च;

कुसलस्स क्रियस्सापि, होति आरम्मणं पन.

क्रियचित्तमिदं कामे, कामावचरतोपि च;

रूपावचरतो चेव, कुसलस्स क्रियस्स च.

कामावचरपाकस्स, तथेवाकुसलस्स च;

छन्नं रासीनमेतेसं, होतारम्मणपच्चयो.

यं ¶ क्रियामानसं रूपे, कामपाकं ततो विना;

पञ्चन्नं पन रासीनं, होति आरम्मणं पन.

क्रियाचित्तं ¶ ¶ पनारुप्पे, तेसं पञ्चन्नमेव च;

आरुप्पस्स क्रियस्सापि, छन्नं होतेव गोचरो.

रूपं चतुसमुट्ठानं, रूपारम्मणसञ्ञितं;

कामावचरपुञ्ञस्स, तथेव कुसलस्स च.

अभिञ्ञाद्वयचित्तस्स, कामपाकक्रियस्स च;

छन्नं रासीनमेतेसं, होतारम्मणपच्चयो.

निब्बानारम्मणं काम-रूपावचरतो पन;

कुसलस्सुभयस्सापि, कामरूपक्रियस्स च.

अपरियापन्नतो चेव, फलस्स कुसलस्स च;

छन्नं रासीनमेतेसं, होतारम्मणपच्चयो.

नानप्पकारकं सब्बं, पञ्ञत्तारम्मणं पन;

तेभूमकस्स पुञ्ञस्स, तथेवाकुसलस्स च.

रूपारूपविपाकस्स, तेभूमकक्रियस्स च;

नवन्नं पन रासीनं, होतारम्मणपच्चयो.

रूपारम्मणिका द्वे तु, द्वे द्वे सद्धादिगोचरा;

पञ्चारम्मणिका नाम, चित्तुप्पादा तयो मता.

इधेकचत्तालीसेव, छळारम्मणिका मता;

कामावचरचित्तान-मयमारम्मणक्कमो.

पञ्चाभिञ्ञा विवज्जेत्वा, रूपारूपा अनासवा;

चित्तुप्पादा इमे सब्बे, धम्मारम्मणगोचरा.

पठमारुप्पकुसलं, दुतियारुप्पचेतसो;

कुसलस्स विपाकस्स, क्रियस्सारम्मणं भवे.

पठमारुप्पपाकोयं ¶ , दुतियारुप्पचेतसो;

कुसलस्स विपाकस्स, क्रियस्सारम्मणं न हि.

पठमं ¶ तु क्रियाचित्तं, दुतियारुप्पचेतसो;

न पुञ्ञस्स न पाकस्स, होति आरम्मणं पन.

पठमं तु क्रियाचित्तं, दुतियारुप्पचेतसो;

क्रियस्सारम्मणं होति, इति ञेय्यं विभाविना.

पुथुज्जनस्स सेक्खस्स, अरूपारम्मणं द्विधा;

कुसलं कुसलस्सापि, विपाकस्स च तं सिया.

खीणासवस्स भिक्खुस्स, पठमारुप्पमानसं;

आरम्मणं तिधा होति, इति वुत्तं महेसिना.

क्रियस्सापि क्रिया होति, कुसलम्पि क्रियस्स च;

कुसलं तु विपाकस्स, एवं होति तिधा पन.

ततियारुप्पचित्तम्पि, चतुत्थारुप्पचेतसो;

एवमेव द्विधा चेव, तिधा चारम्मणं सिया.

इति अभिधम्मावतारे आरम्मणविभागो नाम

एकूनतिंस कम्मानि, पाका द्वत्तिंस दस्सिता;

तीसु द्वारेसु कम्मानि, विपाका छसु दिस्सरे.

कुसलं कामलोकस्मिं, पवत्ते पटिसन्धियं;

तं तं पच्चयमागम्म, ददाति विविधं फलं.

एकाय चेतनायेका, पटिसन्धि पकासिता;

नानाकम्मेहि नाना च, भवन्ति पटिसन्धियो.

तिहेतुकं तु यं कम्मं, कामावचरसञ्ञितं;

तिहेतुकं दुहेतुञ्च, विपाकं देत्यहेतुकं.

दुहेतुकं तु यं कम्मं, तं न देति तिहेतुकं;

दुहेतुकमहेतुञ्च, विपाकं देति अत्तनो.

असङ्खारमसङ्खारं ¶ , ससङ्खारम्पि देति हि;

ससङ्खारमसङ्खारं, ससङ्खारं फलं तथा.

एकाय चेतनायेत्थ, कुसलस्स च सोळस;

विधा विपाकचित्तानि, भवन्तीति पकासये.

आरम्मणेन होतेव, वेदनापरिवत्तनं;

तदारम्मणचित्तम्पि, जवनेन नियामितं.

कामावचरचित्तेन, कुसलेनादिना पन;

तुल्येन पाकचित्तेन, गहिता पटिसन्धि चे.

बलवारम्मणे ¶ इट्ठे, चक्खुस्सापाथमागते;

मनोधातु भवङ्गस्मिं, ताय आवट्टिते पन.

वीथिचित्तेसु जातेसु, चक्खुविञ्ञाणकादिसु;

जायते जवनं हुत्वा, पठमं काममानसं.

सत्तक्खत्तुं जवित्वान, पठमे कुसले गते;

तदेवारम्मणं कत्वा, तेनेव सदिसं पुन.

विपाकं जायते चित्तं, तदारम्मणसञ्ञितं;

सन्धिया तुल्यतो मूल-भवङ्गन्ति पवुच्चते.

तञ्च सन्तीरणं एत्थ, दस्सनं सम्पटिच्छनं;

गणनूपगचित्तानि, चत्तारेव भवन्ति हि.

यदा हि दुतियं चित्तं, कुसलं जवनं तदा;

तेन तुल्यविपाकम्पि, तदारम्मणकं सिया.

सन्धिया असमानत्ता, द्वे नामानिस्स लब्भरे;

‘‘आगन्तुकभवङ्ग’’न्ति, ‘‘तदारम्मणक’’न्ति च.

यदा ¶ ¶ हि ततियं पुञ्ञं, जवनं होति तेन च;

सदिसं ततियं पाकं, तदारम्मणकं सिया.

‘‘आगन्तुकभवङ्ग’’न्ति, इदम्पि च पवुच्चति;

इमिना पन सद्धिं छ, पुरिमानि च पञ्चपि.

यदा चतुत्थं कुसलं, जवनं होति तेन च;

तुल्यं चतुत्थं पाकं तु, तदारम्मणतं वजे.

आगन्तुकभवङ्गं तु, तदारम्मणनामकं;

पुरिमानि छ पाकानि, इमिना होन्ति सत्त तु.

तस्मिं द्वारे यदा इट्ठ-मज्झत्तारम्मणं पन;

आगच्छति तदापाथं, तदा वुत्तनयेनिध.

आरम्मणवसेनेव, वेदना परिवत्तति;

उपेक्खासहितं तस्मा, होति सन्तीरणं मनो.

उपेक्खासहितेस्वेव, जवनेसु चतूसुपि;

तेहि तुल्यानि चत्तारि, पाकचित्तानि जायरे.

वेदनायासमानत्ता, अच्चन्तं पुरिमेहि तु;

होन्ति पिट्ठिभवङ्गानि, चत्तारीति च नामतो.

पञ्चिमानि विपाकानि, पुरिमेहि च सत्तहि;

सद्धिं द्वादस पाकानि, भवन्तीति विनिद्दिसे.

चक्खुद्वारे तथा एवं, सोतादीस्वपि निद्दिसे;

द्वादस द्वादस पाका, समसट्ठि भवन्तिमे.

एकाय चेतनायेव, कम्मे आयूहिते पन;

समसट्ठि विपाकानि, उप्पज्जन्ति न संसयो.

गहितागहणेनेत्थ ¶ ¶ , चक्खुद्वारेसु द्वादस;

सोतविञ्ञाणकादीनि, चत्तारीति च सोळस.

एवमेव ¶ ससङ्खार-तिहेतुकुसलेनपि;

असङ्खारससङ्खारु-पेक्खासहगतेहिपि.

कम्मे आयूहिते तेसं, विपाकेहि च तीहिपि;

एसेव च नयो तेहि, दिन्नाय पटिसन्धिया.

पठमं इट्ठमज्झत्त-गोचरस्स वसेनिध;

पवत्तिं पन दस्सेत्वा, उपेक्खासहितद्वये.

दस्सेतब्बा तप्पच्छा तु, इट्ठस्मिं गोचरे इध;

एकेकस्मिं पन द्वारे, द्वादस द्वादसेव तु.

गहितागहणेनेत्थ, पाकचित्तानि सोळस;

पुब्बे वुत्तनयेनेव, ञेय्यं सब्बमसेसतो.

तिहेतुकेन कम्मेन, पटिसन्धि तिहेतुका;

भवतीति अयं वारो, वुत्तो एत्तावता मया.

सन्धिमेकं तु कम्मेकं, जनेति न ततो परं;

अनेकानि विपाकानि, सञ्जनेति पवत्तियं.

एकस्मा हि यथा बीजा, जायते एकमङ्कुरं;

सुबहूनि फलानिस्स, होन्ति हेतुपवत्तितो.

दुहेतुकेन कम्मेन, पटिसन्धि दुहेतुका;

होतीति हि अयं वारो, अनुपुब्बेन आगतो.

दुहेतुकेन कम्मेन, सोमनस्सयुतेनिध;

असङ्खारिकचित्तेन, कम्मे आयूहिते पन.

तेन ¶ तुल्येन पाकेन, गहिता पटिसन्धि चे;

इट्ठे आरम्मणे चक्खु-द्वारे आपाथमागते.

सोमनस्सयुते ञाण-हीने कुसलमानसे;

सत्तक्खत्तुं जवित्वान, गते तस्मिं दुहेतुके.

तदेवारम्मणं ¶ कत्वा, जायते तदनन्तरं;

तंसरिक्खकमेकं तु, असङ्खारिकमानसं.

तं हि मूलभवङ्गन्ति, तदारम्मणमिच्चपि;

उभयम्पि च तस्सेव, नामन्ति परिदीपितं.

दुहेतुकससङ्खारे, जवितेपि च तंसमं;

होतागन्तुकसङ्खातं, तदारम्मणमानसं.

तथेव च दुहेतूनं, इट्ठमज्झत्तगोचरे;

द्विन्नं उपेक्खायुत्तानं, जवनानमनन्तरं.

द्वे तादिसानि जायन्ते, तदारम्मणमानसा;

तेसं ‘‘पिट्ठिभवङ्ग’’न्ति, नामं ‘‘आगन्तुक’’न्ति च.

सन्तीरणद्वयञ्चेव, दस्सनं सम्पटिच्छनं;

इमानि च भवङ्गानि, चक्खुद्वारे पनट्ठ हि.

एवमट्ठट्ठ ¶ कत्वान, द्वारेसुपि च पञ्चसु;

चत्तालीस विपाकानि, भवन्तीति पवत्तियं.

गहितागहणेनेत्थ, चक्खुद्वारे पनट्ठ च;

सोतघानादिना सद्धिं, द्वादसेव भवन्ति हि.

एकाय चेतनायेवं, कम्मे आयूहिते पन;

द्वादसेव विपाकानि, भवन्तीति पकासितं.

दुहेतुकत्तयेनापि ¶ , सेसेन सदिसेन तु;

पाकेनादिन्नसन्धिया, अयमेव नयो मतो.

दुहेतुकेन कम्मेन, पटिसन्धि दुहेतुका;

होतीतिपि अयं वारो, वुत्तो एत्तावता मया.

दुहेतुकेन कम्मेन, पटिसन्धि अहेतुका;

होतीति च अयं वारो, अनुपुब्बेन आगतो.

दुहेतुकेसु ¶ चित्तेसु, कुसलेसु चतूसुपि;

तेसु अञ्ञतरेनेव, कम्मे आयूहिते पन.

तस्सेव पाकभूताय, आदिन्नपटिसन्धिनो;

उपेक्खासहिताहेतु, मनोविञ्ञाणधातुया.

पटिसन्धि न वत्तब्बा, सा कम्मसदिसाति हि;

कम्मं दुहेतुकं होति, पटिसन्धि अहेतुका.

तस्स बुद्धिमुपेतस्स, इट्ठमज्झत्तगोचरे;

आपाथमागते चक्खु-द्वारे पुन च देहिनो.

दुहेतूनं चतुन्नम्पि, पुञ्ञानं यस्स कस्सचि;

जवनस्सावसानस्मिं, अहेतुकमिदं मनो.

तदारम्मणभावेन, जायते नत्थि संसयो;

तं तु मूलभवङ्गञ्च, तदारम्मणमेव च.

वीथिचित्तेसु जातेसु, चक्खुविञ्ञाणकादिसु;

उपेक्खासहितंयेव, होति सन्तीरणम्पि च.

तेसु एकं ठपेत्वान, गहितागहणेनिध;

गणनूपगचित्तानि, तीणियेव भवन्ति हि.

इट्ठे ¶ आरम्मणे चक्खु-द्वारे आपाथमागते;

तदा सन्तीरणञ्चेव, तदारम्मणमानसं.

सोमनस्सयुतंयेव, गहेत्वा तेसु एककं;

पुरिमानि च तीणीति, चत्तारोव भवन्ति हि.

एवं चत्तारि चित्तानि, द्वारेसुपि च पञ्चसु;

होन्ति वीसति चित्तानि, विपाकानि पवत्तियं.

चक्खुद्वारे तु चत्तारि, गहितागहणेनिध;

सोतघानादिना सद्धिं, होतेवाहेतुकट्ठकं.

अहेतुपटिसन्धिस्स ¶ , न तदारम्मणं भवे;

दुहेतुकं तिहेतुं वा, दुहेतुपटिसन्धिनो.

जाता ¶ सुगतियं येन, पाकेन पटिसन्धि तु;

तेन तुल्यम्पि हीनं वा, तदारम्मणकं भवे.

मनुस्सलोकं सन्धाय, वुत्तञ्चाहेतुकट्ठकं;

चतूसुपि अपायेसु, पवत्ते पन लब्भति.

थेरो नेरयिकानं तु, धम्मं देसेति वस्सति;

गन्धं वायुञ्च मापेति, यदा तेसं तदा पन.

थेरं दिस्वा च सुत्वा च, धम्मं गन्धञ्च घायतं;

पिवतञ्च जलं वायुं, फुसतं मुदुमेव च.

चक्खुविञ्ञाणकादीनि, पुञ्ञजानेव पञ्चपि;

सन्तीरणद्वयं एका, मनोधातूति अट्ठकं.

अयं ताव कथा इट्ठ-इट्ठमज्झत्तगोचरे;

कामावचरपुञ्ञानं, जवनानं वसेनिध.

नियमत्थं ¶ तु यं वुत्तं, तदारम्मणचेतसो;

कुसलं पन सन्धाय, तं वुत्तन्ति हि दीपितं.

इधाकुसलचित्तेसु, सोमनस्सयुतेसुपि;

इट्ठे आरम्मणे तेसु, जवितेसु चतूसुपि.

सोमनस्सयुताहेतु-मनोविञ्ञाणधातु हि;

तदारम्मणभावेन, जायते तदनन्तरं.

छस्वाकुसलचित्तेसु, उपेक्खाय युतेसु हि;

गोचरे इट्ठमज्झत्ते, जवितेसु अनन्तरं.

उपेक्खासहिताहेतु-मनोविञ्ञाणधातु हि;

तदारम्मणभावेन, जायते पन पुञ्ञजा.

इट्ठारम्मणयोगस्मिं ¶ , कङ्खतो उद्धतस्स वा;

सोमनस्सयुतं होति, तदारम्मणमानसं.

सोमनस्सयुते चित्ते, जवने जविते पन;

गवेसितब्बा पञ्चेव, तदारम्मणमानसा.

उपेक्खासहिते चित्ते, जवने जविते पन;

छळेव गवेसितब्बा, तदारम्मणमानसा.

तिहेतुसोमनस्सेन, आदिन्नपटिसन्धिनो;

झानतो परिहीनस्स, तं झानं पच्चवेक्खतो.

दोमनस्सयुतं चित्तं, होति विप्पटिसारिनो;

तस्स किं जायते ब्रूहि, तदारम्मणमानसं.

पट्ठाने पटिसिद्धा हि, दोमनस्सअनन्तरं;

सोमनस्सस्स उप्पत्ति, दोमनस्सस्स चस्स वा.

महग्गतं ¶ पनारब्भ, जवने जवितेपि च;

तत्थेव पटिसिद्धं तु, तदारम्मणमानसं.

तस्मा ¶ भवङ्गपातोव, तदारम्मणमेव वा;

न होति किं नु कातब्बं, वद त्वं आभिधम्मिक.

उपेक्खासहिताहेतु-मनोविञ्ञाणधातु तु;

पुञ्ञापुञ्ञविपाका हि, तदारम्मणिका सिया.

आवज्जनं किमस्साति, नत्थि तं जायते कथं;

भवङ्गावज्जनानं किं, मग्गस्सानन्तरस्स च.

फलस्सपि निरोधा च, वुट्ठहन्तस्स भिक्खुनो;

फलचित्तस्स वा एवं, नत्थि आवज्जनं किर.

विना आवज्जनेनापि, होति जायतु मानसं;

किमस्सारम्मणं ब्रूहि, यदि जानासि पण्डित.

विना ¶ आरम्मणेनेव, न हि जायति मानसं;

रूपादीसु परित्तेसु, यं किञ्चारब्भ जायते.

उतुबीजनियामो च, कम्मधम्मनियामता;

चित्तस्स च नियामोति, ञेय्या पञ्च नियामता.

तत्थ एकप्पहारेन, फलपुप्फादिधारणं;

रुक्खानं पन सब्बेसं, अयं उतुनियामता.

तेसं तेसं तु बीजानं, तंतंतुल्यफलुब्भवो;

मत्थके नाळिकेरस्स, छिद्दत्तं बीजजो अयं.

तिहेतुकं तिहेतुञ्च, दुहेतुञ्च अहेतुकं;

विपाकं तु यतो देति, अयं कम्मनियामता.

जातियं ¶ बोधिसत्तस्स, मेदनीकम्पनादिकं;

विसेसत्तमनेकम्पि, अयं धम्मनियामता.

गोचरेन पसादस्मिं, घट्टिते पन तेनिध;

उप्पत्तावज्जनादीनं, अयं चित्तनियामता.

इति अभिधम्मावतारे विपाकचित्तप्पवत्तिनिद्देसो नाम

इदानि ¶ ¶ पन सब्बेसं, एतेसं मानसं मया;

पाटवत्थाय भिक्खूनं, कथीयति पकिण्णकं.

पन्थमक्कटको नाम, दिसासु पन पञ्चसु;

तत्थ सुत्तं पसारेत्वा, जालमज्झे निपज्जति.

पठमाय दिसायेत्थ, सुत्ते पन पसारिते;

पाणकेन पटङ्गेन, घट्टिते मक्खिकाय वा.

निपन्नट्ठानतो किञ्चि, चलित्वा उण्णनाभि तु;

गन्त्वा सुत्तानुसारेन, यूसं पिवति तस्स सा.

पुनागन्त्वान तत्थेव, निपज्जति यथासुखं;

एवमेव करोतेव, दिसासु दुतियादिसु.

पसादा ¶ पञ्च दट्ठब्बा, सुत्तं पञ्चदिसास्विव;

चित्तं पन च दट्ठब्बं, मज्झे मक्कटको विय.

पाणकादीहि सुत्तस्स, तस्स सङ्घट्टना विय;

पसादानं तु दट्ठब्बा, घट्टनारम्मणेन हि.

चलनं विय तंमज्झे, निपन्नायुण्णनाभिया;

पसादघट्टनं तत्थ, गहेत्वारम्मणं पन.

मनोधातुक्रियाचित्तं, भवङ्गावट्टनं मतं;

तस्सा सुत्तानुसारंव, वीथिचित्तपवत्तनं.

सीसे पनस्स विज्झित्वा, यूसपानंव चेतसो;

आरम्मणेसु दट्ठब्बं, जवनस्स पवत्तनं.

पुनागन्त्वा ¶ यथा सुत्त-जालमज्झे निपज्जनं;

वत्थुंयेव च निस्साय, चित्तस्स परिवत्तनं.

इदं तु पन ओपम्मं, अत्थं दीपेति किं तु हि;

आरम्मणेन पठमं, पसादे घट्टिते पन.

पसादवत्थुतो चित्ता, वत्थुसन्निस्सितं मनो;

ततो हि पठमंयेव, जायतीति हि दीपितं.

एकेकारम्मणं ¶ द्वीसु, द्वीसु द्वारेसु सब्बसो;

आगच्छति तेनापाथं, अयमत्थोपि दीपितो.

रूपं चक्खुपसादम्हि, घट्टित्वा तङ्खणे पन;

मनोद्वारे तथापाथ-मागच्छति निसंसयो.

खगो यथा हि रुक्खग्गे, निलीयन्तोव साखिनो;

साखं घट्टेति तस्सीध, छाया फरति भूमियं.

साखाय ¶ घट्टनच्छाया, फरणानि च सब्बसो;

अपुब्बाचरिमं एक-क्खणस्मिंयेव जायरे.

एवमेव च रूपस्स, पसादस्स च घट्टनं;

भवङ्गचलनस्सापि, पच्चयत्तेन अत्थतो.

तथेव च मनोद्वारे, आपाथगमनम्पि च;

अपुब्बाचरिमं एक-क्खणस्मिंयेव होतिति.

ततो भवङ्गं छिन्दित्वा, चक्खुद्वारे यथाक्कमं;

आवज्जने समुप्पन्ने, दस्सने सम्पटिच्छने.

सन्तीरणे समुप्पन्ने, ततो वोट्ठब्बनेपि च;

कुसलं जवनं चित्तं, तथाकुसलमेव वा.

एसो एव नयो सोत-द्वारादीसुपि विञ्ञुना;

अविसेसेन विञ्ञेय्यो, सद्दादीनं तु घट्टने.

दोवारिकोपमादीनि ¶ , एतस्सत्थस्स दीपने;

उद्धरित्वान तानेत्थ, दस्सेतब्बानि विञ्ञुना.

असम्भेदेन चक्खुस्स, रूपापाथगमेन च;

आलोकनिस्सयेनापि, समनक्कारहेतुना.