📜

नमो तस्स भगवतो अरहतो सम्मासम्बुद्धस्स

विसुद्धिमग्गो

(दुतियो भागो)

१२. इद्धिविधनिद्देसो

अभिञ्ञाकथा

३६५. इदानि ¶ ¶ यासं लोकिकाभिञ्ञानं वसेन अयं समाधिभावना अभिञ्ञानिसंसाति वुत्ता, ता अभिञ्ञा सम्पादेतुं यस्मा पथवीकसिणादीसु अधिगतचतुत्थज्झानेन योगिना योगो कातब्बो. एवञ्हिस्स सा समाधिभावना अधिगतानिसंसा चेव भविस्सति थिरतरा च, सो अधिगतानिसंसाय थिरतराय समाधिभावनाय समन्नागतो सुखेनेव पञ्ञाभावनं सम्पादेस्सति. तस्मा अभिञ्ञाकथं ताव आरभिस्साम.

भगवता हि अधिगतचतुत्थज्झानसमाधीनं कुलपुत्तानं समाधिभावनानिसंसदस्सनत्थञ्चेव उत्तरुत्तरि पणीतपणीतधम्मदेसनत्थञ्च ¶ ‘‘सो एवं समाहिते चित्ते परिसुद्धे परियोदाते अनङ्गणे विगतूपक्किलेसे मुदुभूते कम्मनिये ठिते आनेञ्जप्पत्ते इद्धिविधाय चित्तं अभिनीहरति अभिनिन्नामेति. सो अनेकविहितं इद्धिविधं पच्चनुभोति एकोपि हुत्वा बहुधा होती’’तिआदिना (दी. नि. १.२३८) नयेन इद्धिविधं, दिब्बसोतधातुञाणं, चेतोपरियञाणं, पुब्बेनिवासानुस्सतिञाणं, सत्तानं चुतूपपाते ञाणन्ति पञ्च लोकिकाभिञ्ञा वुत्ता.

तत्थ ¶ एकोपि हुत्वा बहुधा होतीतिआदिकं इद्धिविकुब्बनं कातुकामेन आदिकम्मिकेन योगिना ओदातकसिणपरियन्तेसु अट्ठसु कसिणेसु अट्ठ अट्ठ समापत्तियो निब्बत्तेत्वा –

कसिणानुलोमतो, कसिणपटिलोमतो, कसिणानुलोमपटिलोमतो, झानानुलोमतो, झानपटिलोमतो, झानानुलोमपटिलोमतो, झानुक्कन्तिकतो, कसिणुक्कन्तिकतो, झानकसिणुक्कन्तिकतो, अङ्गसङ्कन्तितो, आरम्मणसङ्कन्तितो, अङ्गारम्मणसङ्कन्तितो, अङ्गववत्थापनतो, आरम्मणववत्थापनतोति.

इमेहि चुद्दसहि आकारेहि चित्तं परिदमेतब्बं.

३६६. कतमं पनेत्थ कसिणानुलोमं…पे… कतमं आरम्मणववत्थापनन्ति. इध भिक्खु पथवीकसिणे झानं समापज्जति, ततो आपोकसिणेति एवं पटिपाटिया अट्ठसु कसिणेसु सतक्खत्तुम्पि सहस्सक्खत्तुम्पि समापज्जति, इदं कसिणानुलोमं नाम.

ओदातकसिणतो पन पट्ठाय तथेव पटिलोमक्कमेन समापज्जनं कसिणपटिलोमं नाम.

पथवीकसिणतो पट्ठाय याव ओदातकसिणं, ओदातकसिणतोपि पट्ठाय याव पथवीकसिणन्ति एवं अनुलोमपटिलोमवसेन पुनप्पुनं समापज्जनं कसिणानुलोमपटिलोमं नाम.

पठमज्झानतो पन पट्ठाय पटिपाटिया याव नेवसञ्ञानासञ्ञायतनं, ताव पुनप्पुनं समापज्जनं झानानुलोमं नाम.

नेवसञ्ञानासञ्ञायतनतो ¶ पट्ठाय याव पठमज्झानं, ताव पुनप्पुनं समापज्जनं झानपटिलोमं नाम.

पठमज्झानतो पट्ठाय याव नेवसञ्ञानासञ्ञायतनं, नेवसञ्ञानासञ्ञायतनतो पट्ठाय याव पठमज्झानन्ति एवं अनुलोमपटिलोमवसेन पुनप्पुनं समापज्जनं झानानुलोमपटिलोमं नाम.

पथवीकसिणे पन पठमं झानं समापज्जित्वा तत्थेव ततियं समापज्जति, ततो तदेव उग्घाटेत्वा आकासानञ्चायतनं, ततो आकिञ्चञ्ञायतनन्ति ¶ एवं कसिणं अनुक्कमित्वा झानस्सेव एकन्तरिकभावेन उक्कमनं झानुक्कन्तिकं नाम. एवं आपोकसिणादिमूलिकापि योजना कातब्बा.

पथवीकसिणे पठमं झानं समापज्जित्वा पुन तदेव तेजोकसिणे, ततो नीलकसिणे, ततो लोहितकसिणेति इमिना नयेन झानं अनुक्कमित्वा कसिणस्सेव एकन्तरिकभावेन उक्कमनं कसिणुक्कन्तिकं नाम.

पथवीकसिणे पठमं झानं समापज्जित्वा ततो तेजोकसिणे ततियं, नीलकसिणं उग्घाटेत्वा आकासानञ्चायतनं, लोहितकसिणतो आकिञ्चञ्ञायतनन्ति इमिना नयेन झानस्स चेव कसिणस्स च उक्कमनं झानकसिणुक्कन्तिकं नाम.

पथवीकसिणे पन पठमं झानं समापज्जित्वा तत्थेव इतरेसम्पि समापज्जनं अङ्गसङ्कन्तिकं नाम.

पथवीकसिणे पठमं झानं समापज्जित्वा तदेव आपोकसिणे…पे… तदेव ओदातकसिणेति एवं सब्बकसिणेसु एकस्सेव झानस्स समापज्जनं आरम्मणसङ्कन्तिकं नाम.

पथवीकसिणे पठमं झानं समापज्जित्वा आपोकसिणे दुतियं, तेजोकसिणे ततियं, वायोकसिणे चतुत्थं, नीलकसिणं उग्घाटेत्वा आकासानञ्चायतनं, पीतकसिणतो विञ्ञाणञ्चायतनं ¶ , लोहितकसिणतो आकिञ्चञ्ञायतनं, ओदातकसिणतो नेवसञ्ञानासञ्ञायतनन्ति एवं एकन्तरिकवसेन अङ्गानञ्च आरम्मणानञ्च सङ्कमनं अङ्गारम्मणसङ्कन्तिकं नाम.

पठमं झानं पन पञ्चङ्गिकन्ति ववत्थपेत्वा दुतियं तिवङ्गिकं, ततियं दुवङ्गिकं, तथा चतुत्थं आकासानञ्चायतनं…पे… नेवसञ्ञानासञ्ञायतनन्ति एवं झानङ्गमत्तस्सेव ववत्थापनं अङ्गववत्थापनं नाम.

तथा इदं पथवीकसिणन्ति ववत्थपेत्वा इदं आपोकसिणं…पे… इदं ओदातकसिणन्ति एवं आरम्मणमत्तस्सेव ववत्थापनं आरम्मणववत्थापनं नाम ¶ . अङ्गारम्मणववत्थापनम्पि एके इच्छन्ति. अट्ठकथासु पन अनागतत्ता अद्धा तं भावनामुखं न होति.

३६७. इमेहि पन चुद्दसहि आकारेहि चित्तं अपरिदमेत्वा पुब्बे अभावितभावनो आदिकम्मिको योगावचरो इद्धिविकुब्बनं सम्पादेस्सतीति नेतं ठानं विज्जति. आदिकम्मिकस्स हि कसिणपरिकम्मम्पि भारो, सतेसु सहस्सेसु वा एकोव सक्कोति. कतकसिणपरिकम्मस्स निमित्तुप्पादनं भारो, सतेसु सहस्सेसु वा एकोव सक्कोति. उप्पन्ने निमित्ते तं वड्ढेत्वा अप्पनाधिगमो भारो, सतेसु सहस्सेसु वा एकोव सक्कोति. अधिगतप्पनस्स चुद्दसहाकारेहि चित्तपरिदमनं भारो, सतेसु सहस्सेसु वा एकोव सक्कोति. चुद्दसहाकारेहि परिदमितचित्तस्सापि इद्धिविकुब्बनं नाम भारो, सतेसु सहस्सेसु वा एकोव सक्कोति. विकुब्बनप्पत्तस्सापि खिप्पनिसन्तिभावो नाम भारो, सतेसु सहस्सेसु वा एकोव खिप्पनिसन्ती होति. थेरम्बत्थले महारोहणगुत्तत्थेरस्स गिलानुपट्ठानं आगतेसु तिंसमत्तेसु इद्धिमन्तसहस्सेसु उपसम्पदाय अट्ठवस्सिको रक्खितत्थेरो विय. तस्सानुभावो पथवीकसिणनिद्देसे (विसुद्धि. १.७८ आदयो) वुत्तोयेव. तं पनस्सानुभावं दिस्वा थेरो आह ‘‘आवुसो, सचे रक्खितो नाभविस्स सब्बे गरहप्पत्ता अस्साम ‘नागराजानं रक्खितुं नासक्खिंसू’ति. तस्मा अत्तना गहेत्वा विचरितब्बं आवुधं नाम मलं सोधेत्वाव गहेत्वा विचरितुं वट्टती’’ति. ते थेरस्स ओवादे ठत्वा तिंससहस्सापि भिक्खू खिप्पनिसन्तिनो अहेसुं.

खिप्पनिसन्तियापि ¶ च सति परस्स पतिट्ठाभावो भारो, सतेसु सहस्सेसु वा एकोव होति, गिरिभण्डवाहनपूजाय मारेन अङ्गारवस्से पवत्तिते आकासे पथविं मापेत्वा अङ्गारवस्सपरित्तारको थेरो विय.

बलवपुब्बयोगानं पन बुद्धपच्चेकबुद्धअग्गसावकादीनं विनापि इमिना वुत्तप्पकारेन भावनानुक्कमेन अरहत्तपटिलाभेनेव इदञ्च इद्धिविकुब्बनं अञ्ञे ¶ च पटिसम्भिदादिभेदा गुणा इज्झन्ति. तस्मा यथा पिळन्धनविकतिं कत्तुकामो सुवण्णकारो अग्गिधमनादीहि सुवण्णं मुदुं कम्मञ्ञं कत्वाव करोति, यथा च भाजनविकतिं कत्तुकामो कुम्भकारो मत्तिकं सुपरिमद्दितं मुदुं कत्वा करोति, एवमेव आदिकम्मिकेन इमेहि चुद्दसहाकारेहि चित्तं परिदमेत्वा छन्दसीसचित्तसीसवीरियसीसवीमंसासीससमापज्जनवसेन चेव आवज्जनादिवसीभाववसेन च मुदुं कम्मञ्ञं कत्वा इद्धिविधाय योगो करणीयो. पुब्बहेतुसम्पन्नेन पन कसिणेसु चतुत्थज्झानमत्ते चिण्णवसिनापि कातुं वट्टति. यथा पनेत्थ योगो कातब्बो, तं विधिं दस्सेन्तो भगवा ‘‘सो एवं समाहिते चित्ते’’तिआदिमाह.

३६८. तत्रायं पाळिनयानुसारेनेव विनिच्छयकथा. तत्थ सोति सो अधिगतचतुत्थज्झानो योगी. एवन्ति चतुत्थज्झानक्कमनिदस्सनमेतं. इमिना पठमज्झानाधिगमादिना कमेन चतुत्थज्झानं पटिलभित्वाति वुत्तं होति. समाहितेति इमिना चतुत्थज्झानसमाधिना समाहिते. चित्तेति रूपावचरचित्ते. परिसुद्धेतिआदीसु पन उपेक्खासतिपारिसुद्धिभावेन परिसुद्धे. परिसुद्धत्तायेव परियोदाते, पभस्सरेति वुत्तं होति. सुखादीनं पच्चयानं घातेन विहतरागादिअङ्गणत्ता अनङ्गणे. अनङ्गणत्तायेव विगतूपक्किलेसे. अङ्गणेन हि तं चित्तं उपक्किलिस्सति. सुभावितत्ता मुदुभूते, वसीभावप्पत्तेति वुत्तं होति. वसे वत्तमानं हि चित्तं मुदुन्ति वुच्चति. मुदुत्तायेव च कम्मनिये, कम्मक्खमे कम्मयोग्गेति वुत्तं होति. मुदुं हि चित्तं कम्मनियं होति सुदन्तमिव सुवण्णं, तञ्च उभयम्पि सुभावितत्तायेवाति. यथाह ‘‘नाहं, भिक्खवे, अञ्ञं एकधम्मम्पि समनुपस्सामि, यं एवं भावितं बहुलीकतं मुदुञ्च होति कम्मनियञ्च, यथयिदं, भिक्खवे, चित्त’’न्ति (अ. नि. १.२२).

एतेसु परिसुद्धभावादीसु ठितत्ता ठिते. ठितत्तायेव आनेञ्जप्पत्ते, अचले निरिञ्जनेति वुत्तं होति. मुदुकम्मञ्ञभावेन वा अत्तनो वसे ठितत्ता ठिते. सद्धादीहि परिग्गहितत्ता आनेञ्जप्पत्ते ¶ . सद्धापरिग्गहितं हि चित्तं अस्सद्धियेन न इञ्जति. वीरियपरिग्गहितं कोसज्जेन न इञ्जति. सतिपरिग्गहितं पमादेन न इञ्जति. समाधिपरिग्गहितं उद्धच्चेन न इञ्जति ¶ . पञ्ञापरिग्गहितं अविज्जाय न इञ्जति. ओभासगतं किलेसन्धकारेन न इञ्जति. इमेहि छहि धम्मेहि परिग्गहितं आनेञ्जप्पत्तं होति. एवं अट्ठङ्गसमन्नागतं चित्तं अभिनीहारक्खमं होति अभिञ्ञासच्छिकरणीयानं धम्मानं अभिञ्ञासच्छिकिरियाय.

अपरो नयो, चतुत्थज्झानसमाधिना समाहिते. नीवरणदूरभावेन परिसुद्धे. वितक्कादिसमतिक्कमेन परियोदाते. झानपटिलाभपच्चयानं इच्छावचरानं अभावेन अनङ्गणे. अभिज्झादीनं चित्तस्स उपक्किलेसानं विगमेन विगतूपक्किलेसे. उभयम्पि चेतं अनङ्गणसुत्तवत्थसुत्तानुसारेन (म. नि. १.५७ आदयो) वेदितब्बं. वसिप्पत्तिया मुदुभूते. इद्धिपादभावूपगमेन कम्मनिये. भावनापारिपूरिया पणीतभावूपगमेन ठिते आनेञ्जप्पत्ते. यथा आनेञ्जप्पत्तं होति, एवं ठितेति अत्थो. एवम्पि अट्ठङ्गसमन्नागतं चित्तं अभिनीहारक्खमं होति अभिञ्ञासच्छिकरणीयानं धम्मानं अभिञ्ञासच्छिकिरियाय पादकं पदट्ठानभूतन्ति.

दसइद्धिकथा

३६९. इद्धिविधाय चित्तं अभिनीहरति अभिनिन्नामेतीति एत्थ इज्झनट्ठेन इद्धि, निप्फत्तिअत्थेन पटिलाभट्ठेन चाति वुत्तं होति. यञ्हि निप्फज्जति पटिलब्भति च, तं इज्झतीति वुच्चति. यथाह ‘‘कामं कामयमानस्स, तस्स चेतं समिज्झती’’ति (सु. नि. ७७२). तथा ‘‘नेक्खम्मं इज्झतीति इद्धि, पटिहरतीति पाटिहारियं. अरहत्तमग्गो इज्झतीति इद्धि, पटिहरतीति पाटिहारिय’’न्ति (पटि. म. ३.३२).

अपरो नयो, इज्झनट्ठेन इद्धि. उपायसम्पदायेतमधिवचनं. उपायसम्पदा हि इज्झति अधिप्पेतफलप्पसवनतो. यथाह – ‘‘अयं खो चित्तो गहपति सीलवा कल्याणधम्मो, सचे पणिदहिस्सति ‘अनागतमद्धानं राजा अस्सं चक्कवत्ती’ति, तस्स खो अयं इज्झिस्सति सीलवतो चेतोपणिधि विसुद्धत्ता’’ति (सं. नि. ४.३५२).

अपरो नयो, एताय सत्ता इज्झन्तीति इद्धि. इज्झन्तीति इद्धा वुद्धा उक्कंसगता होन्तीति ¶ वुत्तं होति. सा दसविधा. यथाह ‘‘कति इद्धियोति दस इद्धियो’’. पुन चपरं आह ‘‘कतमा दस इद्धियो ¶ ? अधिट्ठाना इद्धि, विकुब्बना इद्धि, मनोमया इद्धि, ञाणविप्फारा इद्धि, समाधिविप्फारा इद्धि, अरिया इद्धि, कम्मविपाकजा इद्धि, पुञ्ञवतो इद्धि, विज्जामया इद्धि, तत्थ तत्थ सम्मापयोगपच्चया इज्झनट्ठेन इद्धी’’ति (पटि. म. ३.९).

३७०. तत्थ ‘‘पकतिया एको बहुकं आवज्जति. सतं वा सहस्सं वा सतसहस्सं वा आवज्जित्वा ञाणेन अधिट्ठाति ‘बहुको होमी’’’ति (पटि. म. ३.१०) एवं विभजित्वा दस्सिता इद्धि अधिट्ठानवसेन निप्फन्नत्ता अधिट्ठाना इद्धि नाम.

३७१. ‘‘सो पकतिवण्णं विजहित्वा कुमारकवण्णं वा दस्सेति नागवण्णं वा…पे… विविधम्पि सेनाब्यूहं दस्सेती’’ति (पटि. म. ३.१३) एवं आगता इद्धि पकतिवण्णविजहनविकारवसेन पवत्तत्ता विकुब्बना इद्धि नाम.

३७२. ‘‘इध भिक्खु इमम्हा काया अञ्ञं कायं अभिनिम्मिनाति रूपिं मनोमय’’न्ति (पटि. म. ३.१४) इमिना नयेन आगता इद्धि सरीरब्भन्तरे अञ्ञस्सेव मनोमयस्स सरीरस्स निप्फत्तिवसेन पवत्तत्ता मनोमया इद्धि नाम.

३७३. ञाणुप्पत्तितो पन पुब्बे वा पच्छा वा तंखणे वा ञाणानुभावनिब्बत्तो विसेसो ञाणविप्फारा इद्धि नाम. वुत्तञ्हेतं – ‘‘अनिच्चानुपस्सनाय निच्चसञ्ञाय पहानट्ठो इज्झतीति ञाणविप्फारा इद्धि…पे… अरहत्तमग्गेन सब्बकिलेसानं पहानट्ठो इज्झतीति ञाणविप्फारा इद्धि. आयस्मतो बाक्कुलस्स ञाणविप्फारा इद्धि. आयस्मतो संकिच्चस्स ञाणविप्फारा इद्धि. आयस्मतो भूतपालस्स ञाणविप्फारा इद्धी’’ति (पटि. म. ३.१५).

तत्थ आयस्मा बाक्कुलो दहरोव मङ्गलदिवसे नदिया न्हापियमानो धातिया पमादेन सोते पतितो. तमेनं मच्छो गिलित्वा बाराणसीतित्थं अगमासि. तत्र तं मच्छबन्धो गहेत्वा सेट्ठिभरियाय विक्किणि. सा मच्छे सिनेहं उप्पादेत्वा अहमेव नं पचिस्सामीति फालेन्ती मच्छकुच्छियं सुवण्णबिम्बं विय दारकं दिस्वा पुत्तो मे लद्धोति सोमनस्सजाता अहोसि. इति मच्छकुच्छियं अरोगभावो आयस्मतो बाक्कुलस्स ¶ पच्छिमभविकस्स तेन अत्तभावेन पटिलभितब्बअरहत्तमग्गञाणानुभावेन ¶ निब्बत्तत्ता ञाणविप्फारा इद्धि नाम. वत्थु पन वित्थारेन कथेतब्बं.

संकिच्चत्थेरस्स पन गब्भगतस्सेव माता कालमकासि. तस्सा चितकं आरोपेत्वा सूलेहि विज्झित्वा झापियमानाय दारको सूलकोटिया अक्खिकूटे पहारं लभित्वा सद्दं अकासि. ततो दारको जीवतीति ओतारेत्वा कुच्छिं फालेत्वा दारकं अय्यिकाय अदंसु. सो ताय पटिजग्गितो वुद्धिमन्वाय पब्बजित्वा सह पटिसम्भिदाहि अरहत्तं पापुणि. इति वुत्तनयेनेव दारुचितकाय अरोगभावो आयस्मतो संकिच्चस्स ञाणविप्फारा इद्धि नाम.

भूतपालदारकस्स पन पिता राजगहे दलिद्दमनुस्सो. सो दारूनं अत्थाय सकटेन अटविं गन्त्वा दारुभारं कत्वा सायं नगरद्वारसमीपं पत्तो. अथस्स गोणा युगं ओस्सज्जित्वा नगरं पविसिंसु. सो सकटमूले पुत्तकं निसीदापेत्वा गोणानं अनुपदं गच्छन्तो नगरमेव पाविसि. तस्स अनिक्खन्तस्सेव द्वारं पिहितं. दारकस्स वाळयक्खानुचरितेपि बहिनगरे तियामरत्तिं अरोगभावो वुत्तनयेनेव ञाणविप्फारा इद्धि नाम. वत्थु पन वित्थारेतब्बं.

३७४. समाधितो पुब्बे वा पच्छा वा तंखणे वा समथानुभावनिब्बत्तो विसेसो समाधिविप्फारा इद्धि. वुत्तञ्हेतं ‘‘पठमज्झानेन नीवरणानं पहानट्ठो इज्झतीति समाधिविप्फारा इद्धि…पे… नेवसञ्ञानासञ्ञायतनसमापत्तिया आकिञ्चञ्ञायतनसञ्ञाय पहानट्ठो इज्झतीति समाधिविप्फारा इद्धि. आयस्मतो सारिपुत्तस्स समाधिविप्फारा इद्धि, आयस्मतो सञ्जीवस्स, आयस्मतो खाणुकोण्डञ्ञस्स, उत्तराय उपासिकाय, सामावतिया उपासिकाय समाधिविप्फारा इद्धी’’ति (पटि. म. ३.१६).

तत्थ यदा आयस्मतो सारिपुत्तस्स महामोग्गल्लानत्थेरेन सद्धिं कपोतकन्दरायं विहरतो जुण्हाय रत्तिया नवोरोपितेहि केसेहि अज्झोकासे निसिन्नस्स एको दुट्ठयक्खो सहायकेन यक्खेन वारियमानोपि सीसे पहारमदासि. यस्स मेघस्स विय गज्जतो ¶ सद्दो अहोसि. तदा थेरो तस्स पहरणसमये समापत्तिं अप्पेसि. अथस्स तेन पहारेन न कोचि आबाधो अहोसि ¶ . अयं तस्सायस्मतो समाधिविप्फारा इद्धि. वत्थु पन उदाने (उदा. ३४) आगतमेव.

सञ्जीवत्थेरं पन निरोधसमापन्नं कालकतोति सल्लक्खेत्वा गोपालकादयो तिणकट्ठगोमयानि सङ्कड्ढेत्वा अग्गिं अदंसु. थेरस्स चीवरे अंसुमत्तम्पि नज्झायित्थ. अयमस्स अनुपुब्बसमापत्तिवसेन पवत्तसमथानुभावनिब्बत्तत्ता समाधिविप्फारा इद्धि. वत्थु पन सुत्ते (म. नि. १.५०७) आगतमेव.

खाणुकोण्डञ्ञत्थेरो पन पकतियाव समापत्तिबहुलो. सो अञ्ञतरस्मिं अरञ्ञे रत्तिं समापत्तिं अप्पेत्वा निसीदि. पञ्चसता चोरा भण्डकं थेनेत्वा गच्छन्ता ‘‘इदानि अम्हाकं अनुपथं आगच्छन्ता नत्थी’’ति विस्समितुकामा भण्डकं ओरोपयमाना ‘‘खाणुको अय’’न्ति मञ्ञमाना थेरस्सेव उपरि सब्बभण्डकानि ठपेसुं. तेसं विस्समित्वा गच्छन्तानं पठमं ठपितभण्डकस्स गहणकाले कालपरिच्छेदवसेन थेरो वुट्ठासि. ते थेरस्स चलनाकारं दिस्वा भीता विरविंसु. थेरो ‘‘मा भायित्थ उपासका, भिक्खु अह’’न्ति आह. ते आगन्त्वा वन्दित्वा थेरगतेन पसादेन पब्बजित्वा सह पटिसम्भिदाहि अरहत्तं पापुणिंसु (ध. प. अट्ठ. १.१). अयमेत्थ पञ्चहि भण्डकसतेहि अज्झोत्थटस्स थेरस्स आबाधाभावो समाधिविप्फारा इद्धि.

उत्तरा पन उपासिका पुण्णसेट्ठिस्स धीता. तस्सा सिरिमा नाम गणिका इस्सापकता तत्ततेलकटाहं सीसे आसिञ्चि. उत्तरा तंखणञ्ञेव मेत्तं समापज्जि. तेलं पोक्खरपत्ततो उदकबिन्दु विय विवट्टमानं अगमासि. अयमस्सा समाधिविप्फारा इद्धि. वत्थु पन वित्थारेतब्बं.

सामावती नाम उदेनस्स रञ्ञो अग्गमहेसी. मागण्डियब्राह्मणो अत्तनो धीताय अग्गमहेसिट्ठानं पत्थयमानो तस्सा वीणाय आसीविसं ¶ पक्खिपापेत्वा राजानं आह ‘‘महाराज, सामावती तं मारेतुकामा वीणाय आसीविसं गहेत्वा परिहरती’’ति. राजा तं दिस्वा कुपितो सामावतिं वधिस्सामीति धनुं आरोपेत्वा विसपीतं खुरप्पं सन्नय्हि. सामावती सपरिवारा राजानं मेत्ताय फरि. राजा नेव सरं खिपितुं न ओरोपेतुं सक्कोन्तो वेधमानो अट्ठासि. ततो नं देवी आह ‘‘किं, महाराज, किलमसी’’ति? ‘‘आम किलमामी’’ति. ‘‘तेन ¶ हि धनुं ओरोपेही’’ति. सरो रञ्ञो पादमूलेयेव पति. ततो नं देवी ‘‘महाराज, अप्पदुट्ठस्स नप्पदुस्सितब्ब’’न्ति ओवदि. इति रञ्ञो सरं मुञ्चितुं अविसहनभावो सामावतिया उपासिकाय समाधिविप्फारा इद्धीति.

३७५. पटिक्कूलादीसु अप्पटिक्कूलसञ्ञिविहारादिका पन अरिया इद्धि नाम. यथाह – ‘‘कतमा अरिया इद्धि? इध – भिक्खु सचे आकङ्खति ‘पटिक्कूले अप्पटिक्कूलसञ्ञी विहरेय्य’न्ति, अप्पटिक्कूलसञ्ञी तत्थ विहरति…पे… उपेक्खको तत्थ विहरति सतो सम्पजानो’’ति (पटि. म. ३.१७). अयञ्हि चेतोवसिप्पत्तानं अरियानंयेव सम्भवतो अरिया इद्धीति वुच्चति.

एताय हि समन्नागतो खीणासवो भिक्खु पटिक्कूले अनिट्ठे वत्थुस्मिं मेत्ताफरणं वा धातुमनसिकारं वा करोन्तो अप्पटिक्कूलसञ्ञी विहरति. अप्पटिक्कूले इट्ठे वत्थुस्मिं असुभफरणं वा अनिच्चन्ति मनसिकारं वा करोन्तो पटिक्कूलसञ्ञी विहरति. तथा पटिक्कूलापटिक्कूलेसु तदेव मेत्ताफरणं वा धातुमनसिकारं वा करोन्तो अप्पटिक्कूलसञ्ञी विहरति. अप्पटिक्कूलपटिक्कूलेसु च तदेव असुभफरणं वा अनिच्चन्ति मनसिकारं वा करोन्तो पटिक्कूलसञ्ञी विहरति. चक्खुना रूपं दिस्वा नेव सुमनो होतीतिआदिना नयेन वुत्तं पन छळङ्गुपेक्खं पवत्तयमानो पटिक्कूले च अप्पटिक्कूले च तदुभयं अभिनिवज्जित्वा उपेक्खको विहरति सतो सम्पजानो. पटिसम्भिदायञ्हि ‘‘कथं पटिक्कूले अप्पटिक्कूलसञ्ञी विहरति? अनिट्ठस्मिं वत्थुस्मिं मेत्ताय वा फरति धातुसो वा उपसंहरती’’तिआदिना (पटि. म. ३.१७) नयेन अयमेव अत्थो विभत्तो. अयं चेतोवसिप्पत्तानं अरियानंयेव सम्भवतो अरिया इद्धीति वुच्चति.

३७६. पक्खीआदीनं पन ¶ वेहासगमनादिका कम्मविपाकजा इद्धि नाम. यथाह – ‘‘कतमा कम्मविपाकजा इद्धि? सब्बेसं पक्खीनं सब्बेसं देवानं एकच्चानं मनुस्सानं एकच्चानञ्च विनिपातिकानं अयं कम्मविपाकजा इद्धी’’ति (पटि. म. ३.१८). एत्थ हि सब्बेसं पक्खीनं झानं वा विपस्सनं वा विनायेव आकासेन गमनं. तथा सब्बेसं देवानं पठमकप्पिकानञ्च एकच्चानं मनुस्सानं. तथा पियङ्करमाता (सं. नि. १.२४०) यक्खिनी ¶ उत्तरमाता फुस्समित्ता धम्मगुत्ताति एवमादीनं एकच्चानं विनिपातिकानं आकासेन गमनं कम्मविपाकजा इद्धीति.

३७७. चक्कवत्तिआदीनं वेहासगमनादिका पन पुञ्ञवतो इद्धि नाम. यथाह ‘‘कतमा पुञ्ञवतो इद्धि? राजा चक्कवत्ती वेहासं गच्छति सद्धिं चतुरङ्गिनिया सेनाय अन्तमसो अस्सबन्धगोबन्धपुरिसे उपादाय. जोतिकस्स गहपतिस्स पुञ्ञवतो इद्धि. जटिलकस्स गहपतिस्स पुञ्ञवतो इद्धि. घोसितस्स गहपतिस्स पुञ्ञवतो इद्धि. मेण्डकस्स गहपतिस्स पुञ्ञवतो इद्धि. पञ्चन्नं महापुञ्ञानं पुञ्ञवतो इद्धी’’ति. सङ्खेपतो पन परिपाकं गते पुञ्ञसम्भारे इज्झनकविसेसो पुञ्ञवतो इद्धि.

एत्थ च जोतिकस्स गहपतिस्स पथविं भिन्दित्वा मणिपासादो उट्ठहि. चतुसट्ठि च कप्परुक्खाति अयमस्स पुञ्ञवतो इद्धि. जटिलकस्स असीतिहत्थो सुवण्णपब्बतो निब्बत्ति. घोसितस्स सत्तसु ठानेसु मारणत्थाय उपक्कमे कतेपि अरोगभावो पुञ्ञवतो इद्धि. मेण्डकस्स एककरीसमत्ते पदेसे सत्तरतनमयानं मेण्डकानं पातुभावो पुञ्ञवतो इद्धि. पञ्च महापुञ्ञा नाम मेण्डकसेट्ठि, तस्स भरिया चन्दपदुमसिरी, पुत्तो धनञ्चयसेट्ठि, सुणिसा सुमनदेवी, दासो पुण्णो नामाति. तेसु सेट्ठिस्स सीसं न्हातस्स आकासं उल्लोकनकाले अड्ढतेळसकोट्ठसहस्सानि आकासतो रत्तसालीनं पूरेन्ति. भरियाय नाळिकोदनमत्तम्पि गहेत्वा सकलजम्बुदीपवासिके परिविसमानाय भत्तं न खीयति. पुत्तस्स सहस्सत्थविकं गहेत्वा सकलजम्बुदीपवासिकानम्पि देन्तस्स कहापणा न खीयन्ति. सुणिसाय एकं ¶ वीहितुम्बं गहेत्वा सकलजम्बुदीपवासिकानम्पि भाजयमानाय धञ्ञं न खीयति. दासस्स एकेन नङ्गलेन कसतो इतो सत्त इतो सत्ताति चुद्दस मग्गा होन्ति. अयं नेसं पुञ्ञवतो इद्धि.

३७८. विज्जाधरादीनं वेहासगमनादिका पन विज्जामया इद्धि. यथाह ‘‘कतमा विज्जामया इद्धि? विज्जाधरा विज्जं परिजपित्वा वेहासं गच्छन्ति. आकासे अन्तलिक्खे हत्थिम्पि दस्सेन्ति…पे… विविधम्पि सेनाब्यूहं दस्सेन्ती’’ति (पटि. म. ३.१८).

३७९. तेन तेन पन सम्मापयोगेन तस्स तस्स कम्मस्स इज्झनं तत्थ तत्थ सम्मापयोगपच्चया इज्झनट्ठेन इद्धि. यथाह – ‘‘नेक्खम्मेन कामच्छन्दस्स पहानट्ठो इज्झतीति तत्थ ¶ तत्थ सम्मापयोगपच्चया इज्झनट्ठेन इद्धि…पे… अरहत्तमग्गेन सब्बकिलेसानं पहानट्ठो इज्झतीति तत्थ तत्थ सम्मापयोगपच्चया इज्झनट्ठेन इद्धी’’ति (पटि. म. ३.१८). एत्थ च पटिपत्तिसङ्खातस्सेव सम्मापयोगस्स दीपनवसेन पुरिमपाळिसदिसाव पाळि आगता. अट्ठकथायं पन सकटब्यूहादिकरणवसेन यंकिञ्चि सिप्पकम्मं यंकिञ्चि वेज्जकम्मं तिण्णं बेदानं उग्गहणं तिण्णं पिटकानं उग्गहणं अन्तमसो कसनवपनादीनि उपादाय तं तं कम्मं कत्वा निब्बत्तविसेसो तत्थ तत्थ सम्मापयोगपच्चया इज्झनट्ठेन इद्धीति आगता. (१०)

इति इमासु दससु इद्धीसु इद्धिविधायाति इमस्मिं पदे अधिट्ठाना इद्धियेव आगता. इमस्मिं पनत्थे विकुब्बनामनोमयाइद्धियोपि इच्छितब्बा एव.

३८०. इद्धिविधायाति इद्धिकोट्ठासाय, इद्धिविकप्पाय वा. चित्तं अभिनीहरति अभिनिन्नामेतीति सो भिक्खु वुत्तप्पकारवसेन तस्मिं चित्ते अभिञ्ञापादके जाते इद्धिविधाधिगमत्थाय परिकम्मचित्तं अभिनीहरति कसिणारम्मणतो अपनेत्वा इद्धिविधाभिमुखं पेसेति. अभिनिन्नामेतीति अधिगन्तब्बइद्धिपोणं इद्धिपब्भारं करोति. सोति सो एवं कतचित्ताभिनीहारो भिक्खु. अनेकविहितन्ति अनेकविधं नानप्पकारकं. इद्धिविधन्ति इद्धिकोट्ठासं. पच्चनुभोतीति पच्चनुभवति, फुसति ¶ सच्छिकरोति पापुणातीति अत्थो. इदानिस्स अनेकविहितभावं दस्सेन्तो ‘‘एकोपि हुत्वा’’तिआदिमाह. तत्थ एकोपि हुत्वाति इद्धिकरणतो पुब्बे पकतिया एकोपि हुत्वा. बहुधा होतीति बहूनं सन्तिके चङ्कमितुकामो वा सज्झायं वा कत्तुकामो पञ्हं वा पुच्छितुकामो हुत्वा सतम्पि सहस्सम्पि होति. कथं पनायमेवं होति? इद्धिया चतस्सो भूमियो चत्तारो पादा अट्ठ पदानि सोळस च मूलानि सम्पादेत्वा ञाणेन अधिट्ठहन्तो.

३८१. तत्थ चतस्सो भूमियोति चत्तारि झानानि वेदितब्बानि. वुत्तञ्हेतं धम्मसेनापतिना ‘‘इद्धिया कतमा चतस्सो भूमियो? विवेकजभूमि पठमं झानं, पीतिसुखभूमि दुतियं झानं, उपेक्खासुखभूमि ततियं झानं, अदुक्खमसुखभूमि चतुत्थं झानं. इद्धिया इमा चतस्सो भूमियो इद्धिलाभाय इद्धिपटिलाभाय इद्धिविकुब्बनताय इद्धिविसविताय इद्धिवसिताय इद्धिवेसारज्जाय संवत्तन्ती’’ति (पटि. म. ३.९). एत्थ च पुरिमानि तीणि झानानि यस्मा पीतिफरणेन च सुखफरणेन च सुखसञ्ञञ्च लहुसञ्ञञ्च ओक्कमित्वा ¶ लहुमुदुकम्मञ्ञकायो इद्धिं पापुणाति, तस्मा इमिना परियायेन इद्धिलाभाय संवत्तनतो सम्भारभूमियोति वेदितब्बानि. चतुत्थज्झानं पन इद्धिलाभाय पकतिभूमियेव.

३८२. चत्तारो पादाति चत्तारो इद्धिपादा वेदितब्बा. वुत्तञ्हेतं ‘‘इद्धिया कतमे चत्तारो पादा? इध भिक्खु छन्दसमाधिपधानसङ्खारसमन्नागतं इद्धिपादं भावेति. वीरिय… चित्त… वीमंसासमाधिपधानसङ्खारसमन्नागतं इद्धिपादं भावेति. इद्धिया इमे चत्तारो पादा इद्धिलाभाय…पे… इद्धिवेसारज्जाय संवत्तन्ती’’ति (पटि. म. ३.९). एत्थ च छन्दहेतुको छन्दाधिको वा समाधि छन्दसमाधि. कत्तुकम्यताछन्दं अधिपतिं करित्वा पटिलद्धसमाधिस्सेतं अधिवचनं. पधानभूता सङ्खारा पधानसङ्खारा. चतुकिच्चसाधकस्स सम्मप्पधानवीरियस्सेतं अधिवचनं. समन्नागतन्ति छन्दसमाधिना च पधानसङ्खारेहि च उपेतं. इद्धिपादन्ति निप्फत्तिपरियायेन वा इज्झनट्ठेन, इज्झन्ति एताय सत्ता इद्धा वुद्धा उक्कंसगता होन्तीति इमिना वा परियायेन इद्धीति सङ्खं गतानं अभिञ्ञाचित्तसम्पयुत्तानं छन्दसमाधिपधानसङ्खारानं ¶ अधिट्ठानट्ठेन पादभूतं सेसचित्तचेतसिकरासिन्ति अत्थो. वुत्तञ्हेतं ‘‘इद्धिपादोति तथाभूतस्स वेदनाक्खन्धो…पे… विञ्ञाणक्खन्धो’’ति (विभ. ४३४).

अथ वा पज्जते अनेनाति पादो. पापुणीयतीति अत्थो. इद्धिया पादो इद्धिपादो. छन्दादीनमेतं अधिवचनं. यथाह – ‘‘छन्दञ्चे, भिक्खवे, भिक्खु निस्साय लभति समाधिं, लभति चित्तस्सेकग्गतं, अयं वुच्चति छन्दसमाधि. सो अनुप्पन्नानं पापकानं…पे… पदहति, इमे वुच्चन्ति पधानसङ्खारा. इति अयञ्च छन्दो अयञ्च छन्दसमाधि इमे च पधानसङ्खारा, अयं वुच्चति, भिक्खवे, छन्दसमाधिपधानसङ्खारसमन्नागतो इद्धिपादो’’ति (सं. नि. ५.८२५). एवं सेसिद्धिपादेसुपि अत्थो वेदितब्बो.

३८३. अट्ठ पदानीति छन्दादीनि अट्ठ वेदितब्बानि. वुत्तञ्हेतं ‘‘इद्धिया कतमानि अट्ठ पदानि? छन्दञ्चे भिक्खु निस्साय लभति समाधिं, लभति चित्तस्सेकग्गतं. छन्दो न समाधि, समाधि न छन्दो. अञ्ञो छन्दो, अञ्ञो समाधि. वीरियञ्चे भिक्खु… चित्तञ्चे भिक्खु… वीमंसञ्चे भिक्खु निस्साय लभति समाधिं, लभति चित्तस्सेकग्गतं. वीमंसा न समाधि, समाधि न वीमंसा. अञ्ञा वीमंसा, अञ्ञो समाधि. इद्धिया इमानि अट्ठ पदानि इद्धिलाभाय…पे… इद्धिवेसारज्जाय संवत्तन्ती’’ति (पटि. म. ३.९). एत्थ हि इद्धिमुप्पादेतुकामताछन्दो ¶ समाधिना एकतो नियुत्तोव इद्धिलाभाय संवत्तति; तथा वीरियादयो. तस्मा इमानि अट्ठ पदानि वुत्तानीति वेदितब्बानि.

३८४. सोळस मूलानीति सोळसहि आकारेहि आनेञ्जता चित्तस्स वेदितब्बा. वुत्तञ्हेतं – ‘‘इद्धिया कति मूलानि? सोळस मूलानि – अनोनतं चित्तं कोसज्जे न इञ्जतीति आनेञ्जं, अनुन्नतं चित्तं उद्धच्चे न इञ्जतीति आनेञ्जं, अनभिनतं चित्तं रागे न इञ्जतीति आनेञ्जं, अनपनतं चित्तं ब्यापादे न इञ्जतीति आनेञ्जं, अनिस्सितं चित्तं दिट्ठिया न इञ्जतीति आनेञ्जं, अप्पटिबद्धं चित्तं छन्दरागे न इञ्जतीति आनेञ्जं, विप्पमुत्तं चित्तं कामरागे न इञ्जतीति आनेञ्जं, विसंयुत्तं चित्तं किलेसे न इञ्जतीति आनेञ्जं, विमरियादिकतं चित्तं किलेसमरियादे न इञ्जतीति आनेञ्जं, एकत्तगतं चित्तं नानत्तकिलेसे न इञ्जतीति आनेञ्जं, सद्धाय परिग्गहितं ¶ चित्तं अस्सद्धिये न इञ्जतीति आनेञ्जं, वीरियेन परिग्गहितं चित्तं कोसज्जे न इञ्जतीति आनेञ्जं, सतिया परिग्गहितं चित्तं पमादे न इञ्जतीति आनेञ्जं, समाधिना परिग्गहितं चित्तं उद्धच्चे न इञ्जतीति आनेञ्जं, पञ्ञाय परिग्गहितं चित्तं अविज्जाय न इञ्जतीति आनेञ्जं, ओभासगतं चित्तं अविज्जन्धकारे न इञ्जतीति आनेञ्जं. इद्धिया इमानि सोळस मूलानि इद्धिलाभाय…पे… इद्धिवेसारज्जाय संवत्तन्ती’’ति (पटि. म. ३.९).

कामञ्च एस अत्थो एवं समाहिते चित्तेतिआदिनापि सिद्धोयेव, पठमज्झानादीनं पन इद्धिया भूमिपादपदमूलभावदस्सनत्थं पुन वुत्तो. पुरिमो च सुत्तेसु आगतनयो. अयं पटिसम्भिदायं. इति उभयत्थ असम्मोहत्थम्पि पुन वुत्तो.

३८५. ञाणेन अधिट्ठहन्तोति स्वायमेते इद्धिया भूमिपादपदभूते धम्मे सम्पादेत्वा अभिञ्ञापादकं झानं समापज्जित्वा वुट्ठाय सचे सतं इच्छति ‘‘सतं होमि सतं होमी’’ति परिकम्मं कत्वा पुन अभिञ्ञापादकं झानं समापज्जित्वा वुट्ठाय अधिट्ठाति, अधिट्ठानचित्तेन सहेव सतं होति. सहस्सादीसुपि एसेव नयो. सचे एवं न इज्झति पुन परिकम्मं कत्वा दुतियम्पि समापज्जित्वा वुट्ठाय अधिट्ठातब्बं. संयुत्तट्ठकथायं हि एकवारं द्वेवारं समापज्जितुं वट्टतीति वुत्तं. तत्थ पादकज्झानचित्तं निमित्तारम्मणं. परिकम्मचित्तानि सतारम्मणानि वा सहस्सारम्मणानि वा, तानि च खो वण्णवसेन, नो पण्णत्तिवसेन. अधिट्ठानचित्तम्पि तथेव सतारम्मणं ¶ वा सहस्सारम्मणं वा. तं पुब्बे वुत्तं अप्पनाचित्तमिव गोत्रभुअनन्तरं एकमेव उप्पज्जति रूपावचरचतुत्थज्झानिकं.

३८६. यम्पि पटिसम्भिदायं वुत्तं ‘‘पकतिया एको बहुकं आवज्जति सतं वा सहस्सं वा सतसहस्सं वा, आवज्जित्वा ञाणेन अधिट्ठाति ‘बहुको होमी’ति, बहुको होति, यथा आयस्मा चूळपन्थको’’ति (पटि. म. ३.१०). तत्रापि आवज्जतीति परिकम्मवसेनेव वुत्तं. आवज्जित्वा ञाणेन अधिट्ठातीति अभिञ्ञाञाणवसेन वुत्तं. तस्मा बहुकं आवज्जति, ततो तेसम्पि परिकम्मचित्तानं अवसाने समापज्जति, समापत्तितो वुट्ठहित्वा पुन बहुको होमीति आवज्जित्वा ततो परं पवत्तानं तिण्णं चतुन्नं वा पुब्बभागचित्तानं अनन्तरा उप्पन्नेन सन्निट्ठापनवसेन अधिट्ठानन्ति ¶ लद्धनामेन एकेनेव अभिञ्ञाञाणेन अधिट्ठातीति एवमेत्थ अत्थो दट्ठब्बो.

यं पन वुत्तं ‘‘यथा आयस्मा चूळपन्थको’’ति, तं बहुधाभावस्स कायसक्खिदस्सनत्थं वुत्तं. तं पन वत्थुना दीपेतब्बं. ते किर द्वेभातरो पन्थे जातत्ता पन्थकाति नामं लभिंसु. तेसं जेट्ठो महापन्थको, सो पब्बजित्वा सह पटिसम्भिदाहि अरहत्तं पापुणि. अरहा हुत्वा चूळपन्थकं पब्बाजेत्वा –

पदुमं यथा कोकनदं सुगन्धं, पातो सिया फुल्लमवीतगन्धं;

अङ्गीरसं पस्स विरोचमानं, तपन्तमादिच्चमिवन्तलिक्खेति. (अ. नि. ५.१९५) –

इमं गाथं अदासि. सो तं चतूहि मासेहि पगुणं कातुं नासक्खि. अथ नं थेरो अभब्बो त्वं सासनेति विहारतो नीहरि. तस्मिञ्च काले थेरो भत्तुद्देसको होति. जीवको थेरं उपसङ्कमित्वा ‘‘स्वे, भन्ते, भगवता सद्धिं पञ्चभिक्खुसतानि गहेत्वा अम्हाकं गेहे भिक्खं गण्हथा’’ति आह. थेरोपि ठपेत्वा चूळपन्थकं सेसानं अधिवासेमीति अधिवासेसि.

चूळपन्थको द्वारकोट्ठके ठत्वा रोदति. भगवा दिब्बचक्खुना दिस्वा तं उपसङ्कमित्वा कस्मा रोदसीति आह. सो तं पवत्तिमाचिक्खि. भगवा न सज्झायं कातुं असक्कोन्तो मम ¶ सासने अभब्बो नाम होति, मा सोचि भिक्खूति तं बाहायं गहेत्वा विहारं पविसित्वा इद्धिया पिलोतिकखण्डं अभिनिम्मिनित्वा अदासि, हन्द भिक्खु इमं परिमज्जन्तो रजोहरणं रजोहरणन्ति पुनप्पुनं सज्झायं करोहीति. तस्स तथा करोतो तं काळवण्णं अहोसि. सो परिसुद्धं वत्थं, नत्थेत्थ दोसो, अत्तभावस्स पनायं दोसोति सञ्ञं पटिलभित्वा पञ्चसु खन्धेसु ञाणं ओतारेत्वा विपस्सनं वड्ढेत्वा अनुलोमतो गोत्रभुसमीपं पापेसि. अथस्स भगवा ओभासगाथा अभासि –

‘‘रागो रजो न च पन रेणु वुच्चति,

रागस्सेतं अधिवचनं रजोति;

एतं रजं विप्पजहित्वा पण्डिता,

विहरन्ति ते विगतरजस्स सासने.

‘‘दोसो ¶ …पे….

‘‘मोहो रजो न च पन रेणु वुच्चति,

मोहस्सेतं अधिवचनं रजोति;

एतं रजं विप्पजहित्वा पण्डिता,

विहरन्ति ते विगतरजस्स सासने’’ति. (महानि. २०९);

तस्स गाथापरियोसाने चतुपटिसम्भिदाछळभिञ्ञापरिवारा नव लोकुत्तरधम्मा हत्थगताव अहेसुं.

सत्था दुतियदिवसे जीवकस्स गेहं अगमासि सद्धिं भिक्खुसङ्घेन. अथ दक्खिणोदकावसाने यागुया दिय्यमानाय हत्थेन पत्तं पिदहि. जीवको किं भन्तेति पुच्छि. विहारे एको भिक्खु अत्थीति. सो पुरिसं पेसेसि ‘‘गच्छ, अय्यं गहेत्वा सीघं एही’’ति. विहारतो निक्खन्ते पन भगवति,

सहस्सक्खत्तुमत्तानं ¶ , निम्मिनित्वान पन्थको;

निसीदम्बवने रम्मे, याव कालप्पवेदनाति. (थेरगा. ५६३);

अथ सो पुरिसो गन्त्वा कासावेहि एकपज्जोतं आरामं दिस्वा आगन्त्वा भिक्खूहि भरितो भन्ते आरामो, नाहं जानामि कतमो सो अय्योति आह. ततो नं भगवा आह ‘‘गच्छ यं पठमं पस्ससि, तं चीवरकण्णे गहेत्वा ‘सत्था तं आमन्तेती’ति वत्वा आनेही’’ति. सो तं गन्त्वा थेरस्सेव चीवरकण्णे अग्गहेसि. तावदेव सब्बेपि निम्मिता अन्तरधायिंसु. थेरो ‘‘गच्छ त्व’’न्ति तं उय्योजेत्वा मुखधोवनादिसरीरकिच्चं निट्ठपेत्वा पठमतरं गन्त्वा पत्तासने निसीदि. इदं सन्धाय वुत्तं ‘‘यथा आयस्मा चूळपन्थको’’ति.

तत्र ये ते बहू निम्मिता ते अनियमेत्वा निम्मितत्ता इद्धिमता सदिसाव होन्ति. ठाननिसज्जादीसु वा भासिततुण्हीभावादीसु वा यं यं इद्धिमा करोति, तं तदेव करोन्ति. सचे पन नानावण्णे कातुकामो होति, केचि पठमवये, केचि मज्झिमवये, केचि पच्छिमवये, तथा ¶ दीघकेसे, उपड्ढमुण्डे, मुण्डे, मिस्सकेसे, उपड्ढरत्तचीवरे, पण्डुकचीवरे, पदभाणधम्मकथासरभञ्ञपञ्हपुच्छनपञ्हविस्सज्जनरजनपचनचीवरसिब्बनधोवनादीनि करोन्ते अपरेपि वा नानप्पकारके कातुकामो होति, तेन पादकज्झानतो वुट्ठाय एत्तका भिक्खू पठमवया होन्तूतिआदिना नयेन परिकम्मं कत्वा पुन समापज्जित्वा वुट्ठाय अधिट्ठातब्बं. अधिट्ठानचित्तेन सद्धिं इच्छितिच्छितप्पकारायेव होन्तीति. एस नयो बहुधापि हुत्वा एको होतीतिआदीसु.

अयं पन विसेसो, इमिना भिक्खुना एवं बहुभावं निम्मिनित्वा पुन ‘‘एकोव हुत्वा चङ्कमिस्सामि, सज्झायं करिस्सामि, पञ्हं पुच्छिस्सामी’’ति चिन्तेत्वा वा, ‘‘अयं विहारो अप्पभिक्खुको, सचे केचि आगमिस्सन्ति ‘कुतो इमे एत्तका एकसदिसा भिक्खू, अद्धा थेरस्स एस आनुभावो’ति मं जानिस्सन्ती’’ति अप्पिच्छताय वा अन्तराव ‘‘एको होमी’’ति इच्छन्तेन पादकज्झानं समापज्जित्वा वुट्ठाय ‘‘एको होमी’’ति परिकम्मं कत्वा पुन समापज्जित्वा वुट्ठाय ‘‘एको होमी’’ति अधिट्ठातब्बं. अधिट्ठानचित्तेन सद्धिंयेव एको होति. एवं अकरोन्तो पन यथा परिच्छिन्नकालवसेन सयमेव एको होति.

३८७. आविभावं तिरोभावन्ति एत्थ आविभावं करोति तिरोभावं करोतीति अयमत्थो ¶ . इदमेव हि सन्धाय पटिसम्भिदायं वुत्तं ‘‘आविभावन्ति केनचि अनावटं होति अप्पटिच्छन्नं विवटं पाकटं. तिरोभावन्ति केनचि आवटं होति पटिच्छन्नं पिहितं पटिकुज्जित’’न्ति (पटि. म. ३.११). तत्रायं इद्धिमा आविभावं कातुकामो अन्धकारं वा आलोकं करोति, पटिच्छन्नं वा विवटं, अनापाथं वा आपाथं करोति. कथं? अयञ्हि यथा पटिच्छन्नोपि दूरे ठितोपि वा दिस्सति, एवं अत्तानं वा परं वा कातुकामो पादकज्झानतो वुट्ठाय इदं अन्धकारट्ठानं आलोकजातं होतूति वा, इदं पटिच्छन्नं विवटं होतूति वा, इदं अनापाथं आपाथं होतूति वा आवज्जित्वा परिकम्मं कत्वा वुत्तनयेनेव अधिट्ठाति, सह अधिट्ठानचित्तेन यथाधिट्ठितमेव होति. परे दूरे ठितापि पस्सन्ति. सयम्पि पस्सितुकामो पस्सति.

३८८. एतं ¶ पन पाटिहारियं केन कतपुब्बन्ति? भगवता. भगवा हि चूळसुभद्दाय निमन्तितो विस्सकम्मुना निम्मितेहि पञ्चहि कूटागारसतेहि सावत्थितो सत्तयोजनब्भन्तरं साकेतं गच्छन्तो यथा साकेतनगरवासिनो सावत्थिवासिके, सावत्थिवासिनो च साकेतवासिके पस्सन्ति, एवं अधिट्ठासि. नगरमज्झे च ओतरित्वा पथविं द्विधा भिन्दित्वा याव अवीचिं आकासञ्च द्विधा वियूहित्वा याव ब्रह्मलोकं दस्सेसि.

देवोरोहणेनपि च अयमत्थो विभावेतब्बो. भगवा किर यमकपाटिहारियं कत्वा चतुरासीतिपाणसहस्सानि बन्धना पमोचेत्वा अतीता बुद्धा यमकपाटिहारियावसाने कुहिं गताति आवज्जित्वा तावतिंसभवनं गताति अद्दस. अथेकेन पादेन पथवीतलं अक्कमित्वा दुतियं युगन्धरपब्बते पतिट्ठपेत्वा पुन पुरिमपादं उद्धरित्वा सिनेरुमत्थकं अक्कमित्वा तत्थ पण्डुकम्बलसिलातले वस्सं उपगन्त्वा सन्निपतितानं दससहस्सचक्कवाळदेवतानं आदितो पट्ठाय अभिधम्मकथं आरभि. भिक्खाचारवेलाय निम्मितबुद्धं मापेसि. सो धम्मं देसेति. भगवा नागलतादन्तकट्ठं खादित्वा अनोतत्तदहे मुखं धोवित्वा उत्तरकुरूसु पिण्डपातं गहेत्वा अनोतत्तदहतीरे परिभुञ्जति. सारिपुत्तत्थेरो तत्थ गन्त्वा भगवन्तं वन्दति. भगवा अज्ज एत्तकं धम्मं देसेसिन्ति थेरस्स नयं देति. एवं तयो मासे अब्बोच्छिन्नं अभिधम्मकथं कथेसि. तं सुत्वा असीतिकोटिदेवतानं धम्माभिसमयो अहोसि.

यमकपाटिहारिये सन्निपतितापि द्वादसयोजना परिसा भगवन्तं पस्सित्वाव गमिस्सामाति ¶ खन्धावारं बन्धित्वा अट्ठासि. तं चूळअनाथपिण्डिकसेट्ठियेव सब्बपच्चयेहि उपट्ठासि. मनुस्सा कुहिं भगवाति जाननत्थाय अनुरुद्धत्थेरं याचिंसु. थेरो आलोकं वड्ढेत्वा अद्दस दिब्बेन चक्खुना तत्थ वस्सूपगतं भगवन्तं दिस्वा आरोचेसि.

ते भगवतो वन्दनत्थाय महामोग्गल्लानत्थेरं याचिंसु. थेरो परिसमज्झेयेव महापथवियं निमुज्जित्वा सिनेरुपब्बतं निब्बिज्झित्वा तथागतपादमूले ¶ भगवतो पादे वन्दमानोव उम्मुज्जित्वा भगवन्तं एतदवोच ‘‘जम्बुदीपवासिनो, भन्ते, भगवतो पादे वन्दित्वा पस्सित्वाव गमिस्सामाति वदन्ती’’ति. भगवा आह ‘‘कुहिं पन ते, मोग्गल्लान, एतरहि जेट्ठभाता धम्मसेनापती’’ति? ‘‘सङ्कस्सनगरे भन्ते’’ति. ‘‘मोग्गल्लान, मं दट्ठुकामा स्वे सङ्कस्सनगरं आगच्छन्तु, अहं स्वे महापवारणपुण्णमासीउपोसथदिवसे सङ्कस्सनगरे ओतरिस्सामी’’ति. ‘‘साधु, भन्ते’’ति थेरो दसबलं वन्दित्वा आगतमग्गेनेव ओरुय्ह मनुस्सानं सन्तिकं सम्पापुणि. गमनागमनकाले च यथा नं मनुस्सा पस्सन्ति, एवं अधिट्ठासि. इदं तावेत्थ महामोग्गल्लानत्थेरो आविभावपाटिहारियं अकासि.

सो एवं आगतो तं पवत्तिं आरोचेत्वा ‘‘दूरन्ति सञ्ञं अकत्वा कतपातरासाव निक्खमथा’’ति आह. भगवा सक्कस्स देवरञ्ञो आरोचेसि ‘‘महाराज, स्वे मनुस्सलोकं गच्छामी’’ति. देवराजा विस्सकम्मं आणापेसि ‘‘तात, स्वे भगवा मनुस्सलोकं गन्तुकामो, तिस्सो सोपानपन्तियो मापेहि एकं कनकमयं, एकं रजतमयं, एकं मणिमय’’न्ति. सो तथा अकासि. भगवा दुतियदिवसे सिनेरुमुद्धनि ठत्वा पुरत्थिमलोकधातुं ओलोकेसि, अनेकानि चक्कवाळसहस्सानि विवटानि हुत्वा एकङ्गणं विय पकासिंसु. यथा च पुरत्थिमेन, एवं पच्छिमेनपि उत्तरेनपि दक्खिणेनपि सब्बं विवटमद्दस. हेट्ठापि याव अवीचि, उपरि याव अकनिट्ठभवनं, ताव अद्दस.

तं दिवसं किर लोकविवरणं नाम अहोसि. मनुस्सापि देवे पस्सन्ति, देवापि मनुस्से. तत्थ नेव मनुस्सा उद्धं उल्लोकेन्ति, न देवा अधो ओलोकेन्ति, सब्बे सम्मुखाव अञ्ञमञ्ञं पस्सन्ति. भगवा मज्झे मणिमयेन सोपानेन ओतरति, छकामावचरदेवा वामपस्से कनकमयेन, सुद्धावासा च महाब्रह्मा च दक्खिणपस्से रजतमयेन. देवराजा पत्तचीवरं अग्गहेसि, महाब्रह्मा तियोजनिकं सेतच्छत्तं, सुयामो वाळबीजनिं, पञ्चसिखो गन्धब्बपुत्तो ¶ तिगावुतमत्तं बेळुवपण्डुवीणं गहेत्वा तथागतस्स पूजं करोन्तो ओतरति. तंदिवसं भगवन्तं दिस्वा बुद्धभावाय पिहं अनुप्पादेत्वा ठितसत्तो नाम नत्थि. इदमेत्थ भगवा आविभावपाटिहारियं अकासि.

अपिच ¶ तम्बपण्णिदीपे तलङ्गरवासी धम्मदिन्नत्थेरोपि तिस्समहाविहारे चेतियङ्गणस्मिं निसीदित्वा ‘‘तीहि, भिक्खवे, धम्मेहि समन्नागतो भिक्खु अपण्णकपटिपदं पटिपन्नो होती’’ति अपण्णकसुत्तं (अ. नि. ३.१६) कथेन्तो हेट्ठामुखं बीजनिं अकासि, याव अवीचितो एकङ्गणं अहोसि. ततो उपरिमुखं अकासि, याव ब्रह्मलोका एकङ्गणं अहोसि. थेरो निरयभयेन तज्जेत्वा सग्गसुखेन च पलोभेत्वा धम्मं देसेसि. केचि सोतापन्ना अहेसुं, केचि सकदागामी अनागामी अरहन्तोति.

३८९. तिरोभावं कातुकामो पन आलोकं वा अन्धकारं करोति, अप्पटिच्छन्नं वा पटिच्छन्नं, आपाथं वा अनापाथं करोति. कथं? अयञ्हि यथा अप्पटिच्छन्नोपि समीपे ठितोपि वा न दिस्सति, एवं अत्तानं वा परं वा कातुकामो पादकज्झानतो वुट्ठाय ‘‘इदं आलोकट्ठानं अन्धकारं होतू’’ति वा, ‘‘इदं अप्पटिच्छन्नं पटिच्छन्नं होतू’’ति वा, ‘‘इदं आपाथं अनापाथं होतू’’ति वा आवज्जित्वा परिकम्मं कत्वा वुत्तनयेनेव अधिट्ठाति. सह अधिट्ठानचित्तेन यथाधिट्ठितमेव होति. परे समीपे ठितापि न पस्सन्ति. सयम्पि अपस्सितुकामो न पस्सति.

३९०. एतं पन पाटिहारियं केन कतपुब्बन्ति? भगवता. भगवा हि यसं कुलपुत्तं समीपे निसिन्नंयेव यथा नं पिता न पस्सति, एवमकासि. तथा वीसयोजनसतं महाकप्पिनस्स पच्चुग्गमनं कत्वा तं अनागामिफले, अमच्चसहस्सञ्चस्स सोतापत्तिफले पतिट्ठापेत्वा, तस्स अनुमग्गं आगता सहस्सित्थिपरिवारा अनोजादेवी आगन्त्वा समीपे निसिन्नापि यथा सपरिसं राजानं न पस्सति, तथा कत्वा ‘‘अपि, भन्ते, राजानं पस्सथा’’ति वुत्ते ‘‘किं पन ते राजानं गवेसितुं वरं, उदाहु अत्तान’’न्ति? ‘‘अत्तानं, भन्ते’’ति वत्वा निसिन्नाय तस्सा तथा धम्मं देसेसि, यथा सा सद्धिं इत्थिसहस्सेन सोतापत्तिफले पतिट्ठासि, अमच्चा अनागामिफले, राजा अरहत्तेति. अपिच तम्बपण्णिदीपं ¶ ¶ आगतदिवसे यथा अत्तना सद्धिं आगते अवसेसे राजा न पस्सति, एवं करोन्तेन महिन्दत्थेरेनापि इदं कतमेव (पारा. अट्ठ. १.ततियसङ्गीतिकथा).

३९१. अपिच सब्बम्पि पाकटं पाटिहारियं आविभावं नाम. अपाकटपाटिहारियं तिरोभावं नाम. तत्थ पाकटपाटिहारिये इद्धिपि पञ्ञायति इद्धिमापि. तं यमकपाटिहारियेन दीपेतब्बं. तत्र हि ‘‘इध तथागतो यमकपाटिहारियं करोति असाधारणं सावकेहि. उपरिमकायतो अग्गिक्खन्धो पवत्तति, हेट्ठिमकायतो उदकधारा पवत्तती’’ति (पटि. म. १.११६) एवं उभयं पञ्ञायित्थ. अपाकटपाटिहारिये इद्धियेव पञ्ञायति, न इद्धिमा. तं महकसुत्तेन (सं. नि. ४.३४६) च ब्रह्मनिमन्तनिकसुत्तेन (म. नि. १.५०१ आदयो) च दीपेतब्बं. तत्र हि आयस्मतो च महकस्स, भगवतो च इद्धियेव पञ्ञायित्थ, न इद्धिमा.

यथाह –

‘‘एकमन्तं निसिन्नो खो चित्तो गहपति आयस्मन्तं महकं एतदवोच ‘साधु मे, भन्ते, अय्यो महको उत्तरिमनुस्सधम्मा इद्धिपाटिहारियं दस्सेतू’ति. तेन हि त्वं गहपति आळिन्दे उत्तरासङ्गं पञ्ञापेत्वा तिणकलापं ओकासेहीति. ‘एवं, भन्ते’ति खो चित्तो गहपति आयस्मतो महकस्स पटिस्सुत्वा आळिन्दे उत्तरासङ्गं पञ्ञापेत्वा तिणकलापं ओकासेसि. अथ खो आयस्मा महको विहारं पविसित्वा तथारूपं इद्धाभिसङ्खारं अभिसङ्खासि, यथा तालच्छिग्गळेन च अग्गळन्तरिकाय च अच्चि निक्खमित्वा तिणानि झापेसि, उत्तरासङ्गं न झापेसी’’ति (सं. नि. ४.३४६).

यथा चाह –

‘‘अथ ख्वाहं, भिक्खवे, तथारूपं इद्धाभिसङ्खारं अभिसङ्खासिं ‘एत्तावता ब्रह्मा च ब्रह्मपरिसा च ब्रह्मपारिसज्जा च सद्दञ्च मे सोस्सन्ति, न च मं दक्खिस्सन्ती’ति अन्तरहितो इमं गाथं अभासिं –

‘भवे ¶ ¶ वाहं भयं दिस्वा, भवञ्च विभवेसिनं;

भवं नाभिवदिं किञ्चि, नन्दिञ्च न उपादियि’’’न्ति. (म. नि. १.५०४);

३९२. तिरोकुट्टं तिरोपाकारं तिरोपब्बतं असज्जमानो गच्छति सेय्यथापि आकासेति एत्थ तिरोकुट्टन्ति परकुट्टं, कुट्टस्स परभागन्ति वुत्तं होति. एस नयो इतरेसु. कुट्टोति च गेहभित्तिया एतमधिवचनं. पाकारोति गेहविहारगामादीनं परिक्खेपपाकारो. पब्बतोति पंसुपब्बतो वा पासाणपब्बतो वा. असज्जमानोति अलग्गमानो. सेय्यथापि आकासेति आकासे विय. एवं गन्तुकामेन पन आकासकसिणं समापज्जित्वा वुट्ठाय कुट्टं वा पाकारं वा सिनेरुचक्कवाळेसुपि अञ्ञतरं पब्बतं वा आवज्जित्वा कतपरिकम्मेन आकासो होतूति अधिट्ठातब्बो. आकासोयेव होति. अधो ओतरितुकामस्स, उद्धं वा आरोहितुकामस्स सुसिरो होति, विनिविज्झित्वा गन्तुकामस्स छिद्दो. सो तत्थ असज्जमानो गच्छति.

तिपिटकचूळाभयत्थेरो पनेत्थाह – ‘‘आकासकसिणसमापज्जनं, आवुसो, किमत्थियं, किं हत्थिअस्सादीनि अभिनिम्मिनितुकामो हत्थिअस्सादि कसिणानि समापज्जति, ननु यत्थ कत्थचि कसिणे परिकम्मं कत्वा अट्ठसमापत्तिवसीभावोयेव पमाणं. यं यं इच्छति, तं तदेव होती’’ति. भिक्खू आहंसु – ‘‘पाळिया, भन्ते, आकासकसिणंयेव आगतं, तस्मा अवस्समेतं वत्तब्ब’’न्ति. तत्रायं पाळि –

‘‘पकतिया आकासकसिणसमापत्तिया लाभी होति. तिरोकुट्टं तिरोपाकारं तिरोपब्बतं आवज्जति. आवज्जित्वा ञाणेन अधिट्ठाति – ‘आकासो होतू’ति. आकासो होति. तिरोकुट्टं तिरोपाकारं तिरोपब्बतं असज्जमानो गच्छति. यथा मनुस्सा पकतिया अनिद्धिमन्तो केनचि अनावटे अपरिक्खित्ते असज्जमाना गच्छन्ति, एवमेव सो इद्धिमा चेतोवसिप्पत्तो तिरोकुट्टं तिरोपाकारं तिरोपब्बतं असज्जमानो गच्छति, सेय्यथापि आकासे’’ति (पटि. म. ३.११).

सचे ¶ पनस्स भिक्खुनो अधिट्ठहित्वा गच्छन्तस्स अन्तरा पब्बतो वा रुक्खो वा उट्ठेति, किं पुन समापज्जित्वा अधिट्ठातब्बन्ति? दोसो नत्थि. पुन समापज्जित्वा अधिट्ठानं हि ¶ उपज्झायस्स सन्तिके निस्सयग्गहणसदिसं होति. इमिना च पन भिक्खुना आकासो होतूति अधिट्ठितत्ता आकासो होतियेव. पुरिमाधिट्ठानबलेनेव चस्स अन्तरा अञ्ञो पब्बतो वा रुक्खो वा उतुमयो उट्ठहिस्सतीति अट्ठानमेवेतं. अञ्ञेन इद्धिमता निम्मिते पन पठमनिम्मानं बलवं होति. इतरेन तस्स उद्धं वा अधो वा गन्तब्बं.

३९३. पथवियापि उम्मुज्जनिमुज्जन्ति एत्थ उम्मुज्जन्ति उट्ठानं वुच्चति. निमुज्जन्ति संसीदनं. उम्मुज्जञ्च निमुज्जञ्च उम्मुज्जनिमुज्जं. एवं कातुकामेन आपोकसिणं समापज्जित्वा उट्ठाय एत्तके ठाने पथवी उदकं होतूति परिच्छिन्दित्वा परिकम्मं कत्वा वुत्तनयेनेव अधिट्ठातब्बं. सह अधिट्ठानेन यथा परिच्छिन्ने ठाने पथवी उदकमेव होति. सो तत्थ उम्मुज्जनिमुज्जं करोति. तत्रायं पाळि –

‘‘पकतिया आपोकसिणसमापत्तिया लाभी होति. पथविं आवज्जति. आवज्जित्वा ञाणेन अधिट्ठाति – ‘उदकं होतू’ति. उदकं होति. सो पथविया उम्मुज्जनिमुज्जं करोति. यथा मनुस्सा पकतिया अनिद्धिमन्तो उदके उम्मुज्जनिमुज्जं करोन्ति, एवमेव सो इद्धिमा चेतोवसिप्पत्तो पथविया उम्मुज्जनिमुज्जं करोति, सेय्यथापि उदके’’ति (पटि. म. ३.११).

न केवलञ्च उम्मुज्जनिमुज्जमेव, न्हानपानमुखधोवनभण्डकधोवनादीसु यं यं इच्छति, तं तं करोति. न केवलञ्च उदकमेव, सप्पितेलमधुफाणितादीसुपि यं यं इच्छति, तं तं इदञ्चिदञ्च एत्तकं होतूति आवज्जित्वा परिकम्मं कत्वा अधिट्ठहन्तस्स यथाधिट्ठितमेव होति. उद्धरित्वा भाजनगतं करोन्तस्स सप्पि सप्पिमेव होति. तेलादीनि तेलादीनियेव. उदकं उदकमेव. सो तत्थ तेमितुकामोव तेमेति, न तेमितुकामो न तेमेति. तस्सेव च सा पथवी उदकं होति सेसजनस्स पथवीयेव. तत्थ मनुस्सा पत्तिकापि गच्छन्ति, यानादीहिपि गच्छन्ति, कसिकम्मादीनिपि करोन्तियेव. सचे पनायं तेसम्पि उदकं होतूति ¶ इच्छति, होतियेव. परिच्छिन्नकालं पन अतिक्कमित्वा यं पकतिया घटतळाकादीसु उदकं, तं ठपेत्वा अवसेसं परिच्छिन्नट्ठानं पथवीयेव होति.

३९४. उदकेपि अभिज्जमानेति एत्थ यं उदकं अक्कमित्वा संसीदति, तं भिज्जमानन्ति ¶ वुच्चति. विपरीतं अभिज्जमानं. एवं गन्तुकामेन पन पथवीकसिणं समापज्जित्वा वुट्ठाय एत्तके ठाने उदकं पथवी होतूति परिच्छिन्दित्वा परिकम्मं कत्वा वुत्तनयेनेव अधिट्ठातब्बं. सह अधिट्ठानेन यथा परिच्छिन्नट्ठाने उदकं पथवीयेव होति. सो तत्थ गच्छति, तत्रायं पाळि –

‘‘पकतिया पथवीकसिणसमापत्तिया लाभी होति. उदकं आवज्जति. आवज्जित्वा ञाणेन अधिट्ठाति – ‘पथवी होतू’ति. पथवी होति. सो अभिज्जमाने उदके गच्छति. यथा मनुस्सा पकतिया अनिद्धिमन्तो अभिज्जमानाय पथविया गच्छन्ति, एवमेव सो इद्धिमा चेतोवसिप्पत्तो अभिज्जमाने उदके गच्छति, सेय्यथापि पथविय’’न्ति (पटि. म. ३.११).

न केवलञ्च गच्छति, यं यं इरियापथं इच्छति, तं तं करोति. न केवलञ्च पथविमेव करोति, मणिसुवण्णपब्बतरुक्खादीसुपि यं यं इच्छति, तं तं वुत्तनयेनेव आवज्जित्वा अधिट्ठाति, यथाधिट्ठितमेव होति. तस्सेव च तं उदकं पथवी होति, सेसजनस्स उदकमेव, मच्छकच्छपा च उदककाकादयो च यथारुचि विचरन्ति. सचे पनायं अञ्ञेसम्पि मनुस्सानं तं पथविं कातुं इच्छति, करोतियेव. परिच्छिन्नकालातिक्कमेन पन उदकमेव होति.

३९५. पल्लङ्केन कमतीति पल्लङ्केन गच्छति. पक्खी सकुणोति पक्खेहि युत्तसकुणो. एवं कातुकामेन पन पथवीकसिणं समापज्जित्वा वुट्ठाय सचे निसिन्नो गन्तुमिच्छति, पल्लङ्कप्पमाणं ठानं परिच्छिन्दित्वा परिकम्मं कत्वा वुत्तनयेनेव अधिट्ठातब्बं. सचे निपन्नो गन्तुकामो होति मञ्चप्पमाणं, सचे पदसा गन्तुकामो होति मग्गप्पमाणन्ति एवं यथानुरूपं ठानं परिच्छिन्दित्वा वुत्तनयेनेव पथवी होतूति अधिट्ठातब्बं, सह अधिट्ठानेन पथवीयेव होति. तत्रायं पाळि –

‘‘आकासेपि ¶ पल्लङ्केन कमति, सेय्यथापि पक्खी सकुणोति. पकतिया पथवीकसिणसमापत्तिया लाभी होति, आकासं आवज्जति. आवज्जित्वा ञाणेन अधिट्ठाति – ‘पथवी होतू’ति. पथवी होति. सो आकासे अन्तलिक्खे चङ्कमतिपि तिट्ठतिपि ¶ निसीदतिपि सेय्यम्पि कप्पेति. यथा मनुस्सा पकतिया अनिद्धिमन्तो पथवियं चङ्कमन्तिपि…पे… सेय्यम्पि कप्पेन्ति, एवमेव सो इद्धिमा चेतोवसिप्पत्तो आकासे अन्तलिक्खे चङ्कमतिपि…पे… सेय्यम्पि कप्पेती’’ति (पटि. म. ३.११).

आकासे गन्तुकामेन च भिक्खुना दिब्बचक्खुलाभिनापि भवितब्बं. कस्मा? अन्तरे उतुसमुट्ठाना वा पब्बतरुक्खादयो होन्ति, नागसुपण्णादयो वा उसूयन्ता मापेन्ति, नेसं दस्सनत्थं. ते पन दिस्वा किं कातब्बन्ति? पादकज्झानं समापज्जित्वा वुट्ठाय आकासो होतूति परिकम्मं कत्वा अधिट्ठातब्बं. थेरो पनाह ‘‘समापत्तिसमापज्जनं, आवुसो, किमत्थियं, ननु समाहितमेवस्स चित्तं, तेन यं यं ठानं आकासो होतूति अधिट्ठाति, आकासोयेव होती’’ति. किञ्चापि एवमाह, अथ खो तिरोकुट्टपारिहारिये वुत्तनयेनेव पटिपज्जितब्बं.

अपिच ओकासे ओरोहणत्थम्पि इमिना दिब्बचक्खुलाभिना भवितब्बं, अयञ्हि सचे अनोकासे न्हानतित्थे वा गामद्वारे वा ओरोहति. महाजनस्स पाकटो होति. तस्मा दिब्बचक्खुना पस्सित्वा अनोकासं वज्जेत्वा ओकासे ओतरतीति.

३९६. इमेपि चन्दिमसूरिये एवंमहिद्धिके एवंमहानुभावे पाणिना परामसति परिमज्जतीति एत्थ चन्दिमसूरियानं द्वाचत्तालीसयोजनसहस्सस्स उपरि चरणेन महिद्धिकता, तीसु दीपेसु एकक्खणे आलोककरणेन महानुभावता वेदितब्बा. एवं उपरि चरणआलोककरणेहि वा महिद्धिके तेनेव महानुभावे. परामसतीति परिग्गण्हति एकदेसे वा छुपति. परिमज्जतीति समन्ततो आदासतलं विय परिमज्जति. अयं पनस्स इद्धि अभिञ्ञापादकज्झानवसेनेव इज्झति, नत्थेत्थ कसिणसमापत्तिनियमो. वुत्तञ्हेतं पटिसम्भिदायं –

‘‘इमेपि ¶ चन्दिमसूरिये…पे… परिमज्जतीति इध सो इद्धिमा चेतोवसिप्पत्तो चन्दिमसूरिये आवज्जति, आवज्जित्वा ञाणेन अधिट्ठाति – ‘हत्थपासे होतू’ति. हत्थपासे होति. सो निसिन्नको वा निपन्नको वा चन्दिमसूरिये पाणिना आमसति परामसति परिमज्जति. यथा मनुस्सा पकतिया अनिद्धिमन्तो किञ्चिदेव रूपगतं हत्थपासे ¶ आमसन्ति परामसन्ति परिमज्जन्ति, एवमेव सो इद्धिमा…पे… परिमज्जती’’ति (पटि. म. ३.१२).

स्वायं यदि इच्छति गन्त्वा परामसितुं, गन्त्वा परामसति, यदि पन इधेव निसिन्नको वा निपन्नको वा परामसितुकामो होति, हत्थपासे होतूति अधिट्ठाति, अधिट्ठानबलेन वण्टा मुत्ततालफलं विय आगन्त्वा हत्थपासे ठिते वा परामसति, हत्थं वा वड्ढेत्वा. वड्ढेन्तस्स पन किं उपादिण्णकं वड्ढति, अनुपादिण्णकन्ति? उपादिण्णकं निस्साय अनुपादिण्णकं वड्ढति.

तत्थ तिपिटकचूळनागत्थेरो आह ‘‘किं पनावुसो, उपादिण्णकं खुद्दकम्पि महन्तम्पि न होति, ननु यदा भिक्खु तालच्छिद्दादीहि निक्खमति, तदा उपादिण्णकं खुद्दकं होति. यदा महन्तं अत्तभावं करोति, तदा महन्तं होति महामोग्गल्लानत्थेरस्स विया’’ति.

नन्दोपनन्दनागदमनकथा

एकस्मिं किर समये अनाथपिण्डिको गहपति भगवतो धम्मदेसनं सुत्वा ‘‘स्वे, भन्ते, पञ्चहि भिक्खुसतेहि सद्धिं अम्हाकं गेहे भिक्खं गण्हथा’’ति निमन्तेत्वा पक्कमि. भगवा अधिवासेत्वा तंदिवसावसेसं रत्तिभागञ्च वीतिनामेत्वा पच्चूससमये दससहस्सिलोकधातुं ओलोकेसि. अथस्स नन्दोपनन्दो नाम नागराजा ञाणमुखे आपाथमागच्छि. भगवा ‘‘अयं नागराजा मय्हं ञाणमुखे आपाथमागच्छि, अत्थि नु खो अस्स उपनिस्सयो’’ति आवज्जेन्तो ‘‘अयं मिच्छादिट्ठिको तीसु रतनेसु अप्पसन्नोति दिस्वा को नु खो इमं मिच्छादिट्ठितो विवेचेय्या’’ति आवज्जेन्तो महामोग्गल्लानत्थेरं अद्दस.

ततो ¶ पभाताय रत्तिया सरीरपटिजग्गनं कत्वा आयस्मन्तं आनन्दं आमन्तेसि – ‘‘आनन्द, पञ्चन्नं भिक्खुसतानं आरोचेहि तथागतो देवचारिकं गच्छती’’ति. तं दिवसञ्च नन्दोपनन्दस्स आपानभूमिं सज्जयिंसु. सो दिब्बरतनपल्लङ्के दिब्बेन सेतच्छत्तेन धारियमानेन तिविधनाटकेहि चेव नागपरिसाय च परिवुतो दिब्बभाजनेसु उपट्ठापितं अन्नपानविधिं ओलोकयमानो निसिन्नो होति. अथ भगवा यथा नागराजा पस्सति, तथा कत्वा तस्स वितानमत्थकेनेव पञ्चहि भिक्खुसतेहि सद्धिं तावतिंसदेवलोकाभिमुखो पायासि.

तेन ¶ खो पन समयेन नन्दोपनन्दस्स नागराजस्स एवरूपं पापकं दिट्ठिगतं उप्पन्नं होति – ‘‘इमे हि नाम मुण्डका समणका अम्हाकं उपरूपरिभवनेन देवानं तावतिंसानं भवनं पविसन्तिपि निक्खमन्तिपि, न दानि इतो पट्ठाय इमेसं अम्हाकं मत्थके पादपंसुं ओकिरन्तानं गन्तुं दस्सामी’’ति उट्ठाय सिनेरुपादं गन्त्वा तं अत्तभावं विजहित्वा सिनेरुं सत्तक्खत्तुं भोगेहि परिक्खिपित्वा उपरि फणं कत्वा तावतिंसभवनं अवकुज्जेन फणेन गहेत्वा अदस्सनं गमेसि.

अथ खो आयस्मा रट्ठपालो भगवन्तं एतदवोच ‘‘पुब्बे, भन्ते, इमस्मिं पदेसे ठितो सिनेरुं पस्सामि, सिनेरुपरिभण्डं पस्सामि, तावतिंसं पस्सामि, वेजयन्तं पस्सामि, वेजयन्तस्स पासादस्स उपरि धजं पस्सामि. को नु खो, भन्ते, हेतु को पच्चयो, यं एतरहि नेव सिनेरुं पस्सामि…पे… न वेजयन्तस्स पासादस्स उपरि धजं पस्सामी’’ति. ‘‘अयं, रट्ठपाल, नन्दोपनन्दो नाम नागराजा तुम्हाकं कुपितो सिनेरुं सत्तक्खत्तुं भोगेहि परिक्खिपित्वा उपरि फणेन पटिच्छादेत्वा अन्धकारं कत्वा ठितो’’ति. ‘‘दमेमि नं, भन्ते’’ति. न भगवा अनुजानि. अथ खो आयस्मा भद्दियो आयस्मा राहुलोति अनुक्कमेन सब्बेपि भिक्खू उट्ठहिंसु. न भगवा अनुजानि.

अवसाने महामोग्गल्लानत्थेरो ‘‘अहं, भन्ते, दमेमि न’’न्ति आह. ‘‘दमेहि मोग्गल्लाना’’ति भगवा अनुजानि. थेरो अत्तभावं विजहित्वा महन्तं नागराजवण्णं अभिनिम्मिनित्वा नन्दोपनन्दं चुद्दसक्खत्तुं भोगेहि परिक्खिपित्वा तस्स फणमत्थके अत्तनो फणं ठपेत्वा सिनेरुना ¶ सद्धिं अभिनिप्पीळेसि. नागराजा पधूमायि. थेरोपि न तुय्हंयेव सरीरे धूमो अत्थि, मय्हम्पि अत्थीति पधूमायि. नागराजस्स धूमो थेरं न बाधति. थेरस्स पन धूमो नागराजानं बाधति. ततो नागराजा पज्जलि. थेरोपि न तुय्हंयेव सरीरे अग्गि अत्थि, मय्हम्पि अत्थीति पज्जलि. नागराजस्स तेजो थेरं न बाधति. थेरस्स पन तेजो नागराजानं बाधति. नागराजा अयं मं सिनेरुना अभिनिप्पीळेत्वा धूमायति चेव पज्जलति चाति चिन्तेत्वा ‘‘भो त्वं कोसी’’ति पटिपुच्छि. ‘‘अहं खो, नन्द, मोग्गल्लानो’’ति. ‘‘भन्ते, अत्तनो भिक्खुभावेन तिट्ठाही’’ति.

थेरो तं अत्तभावं विजहित्वा तस्स दक्खिणकण्णसोतेन पविसित्वा वामकण्णसोतेन निक्खमि ¶ , वामकण्णसोतेन पविसित्वा दक्खिणकण्णसोतेन निक्खमि, तथा दक्खिणनाससोतेन पविसित्वा वामनाससोतेन निक्खमि, वामनाससोतेन पविसित्वा दक्खिणनाससोतेन निक्खमि. ततो नागराजा मुखं विवरि. थेरो मुखेन पविसित्वा अन्तोकुच्छियं पाचीनेन च पच्छिमेन च चङ्कमति. भगवा ‘‘मोग्गल्लान, मनसिकरोहि महिद्धिको एस नागो’’ति आह. थेरो ‘‘मय्हं खो, भन्ते, चत्तारो इद्धिपादा भाविता बहुलीकता यानीकता वत्थुकता अनुट्ठिता परिचिता सुसमारद्धा, तिट्ठतु, भन्ते, नन्दोपनन्दो, अहं नन्दोपनन्दसदिसानं नागराजानं सतम्पि सहस्सम्पि सतसहस्सम्पि दमेय्य’’न्ति आह.

नागराजा चिन्तेसि ‘‘पविसन्तो ताव मे न दिट्ठो, निक्खमनकाले दानि नं दाठन्तरे पक्खिपित्वा सङ्खादिस्सामी’’ति चिन्तेत्वा निक्खम भन्ते, मा मं अन्तोकुच्छियं अपरापरं चङ्कमन्तो बाधयित्थाति आह. थेरो निक्खमित्वा बहि अट्ठासि. नागराजा अयं सोति दिस्वा नासवातं विस्सज्जि. थेरो चतुत्थं झानं समापज्जि. लोमकूपम्पिस्स वातो चालेतुं नासक्खि. अवसेसा भिक्खू किर आदितो पट्ठाय सब्बपाटिहारियानि कातुं सक्कुणेय्युं, इमं पन ठानं पत्वा एवं खिप्पनिसन्तिनो हुत्वा समापज्जितुं न सक्खिस्सन्तीति तेसं भगवा नागराजदमनं नानुजानि.

नागराजा ¶ ‘‘अहं इमस्स समणस्स नासवातेन लोमकूपम्पि चालेतुं नासक्खिं, महिद्धिको समणो’’ति चिन्तेसि. थेरो अत्तभावं विजहित्वा सुपण्णरूपं अभिनिम्मिनित्वा सुपण्णवातं दस्सेन्तो नागराजानं अनुबन्धि. नागराजा तं अत्तभावं विजहित्वा माणवकवण्णं अभिनिम्मिनित्वा ‘‘भन्ते, तुम्हाकं सरणं गच्छामी’’ति वदन्तो थेरस्स पादे वन्दि. थेरो ‘‘सत्था, नन्द, आगतो, एहि गमिस्सामा’’ति नागराजानं दमयित्वा निब्बिसं कत्वा गहेत्वा भगवतो सन्तिकं अगमासि. नागराजा भगवन्तं वन्दित्वा ‘‘भन्ते, तुम्हाकं सरणं गच्छामी’’ति आह. भगवा ‘‘सुखी होहि, नागराजा’’ति वत्वा भिक्खुसङ्घपरिवुतो अनाथपिण्डिकस्स निवेसनं अगमासि.

अनाथपिण्डिको ‘‘किं, भन्ते, अतिदिवा आगतत्था’’ति आह. मोग्गल्लानस्स च नन्दोपनन्दस्स च सङ्गामो अहोसीति. कस्स, भन्ते, जयो, कस्स पराजयोति. मोग्गल्लानस्स जयो, नन्दस्स पराजयोति. अनाथपिण्डिको ‘‘अधिवासेतु मे, भन्ते, भगवा सत्ताहं ¶ एकपटिपाटिया भत्तं, सत्ताहं थेरस्स सक्कारं करिस्सामी’’ति वत्वा सत्ताहं बुद्धपमुखानं पञ्चन्नं भिक्खुसतानं महासक्कारं अकासि. इति इमं इमस्मिं नन्दोपनन्ददमने कतं महन्तं अत्तभावं सन्धायेतं वुत्तं ‘‘यदा महन्तं अत्तभावं करोति, तदा महन्तं होति महामोग्गल्लानत्थेरस्स विया’’ति. एवं वुत्तेपि भिक्खू उपादिण्णकं निस्साय अनुपादिण्णकमेव वड्ढतीति आहंसु. अयमेव चेत्थ युत्ति.

सो एवं कत्वा न केवलं चन्दिमसूरिये परामसति. सचे इच्छति पादकथलिकं कत्वा पादे ठपेति, पीठं कत्वा निसीदति, मञ्चं कत्वा निपज्जति, अपस्सेनफलकं कत्वा अपस्सयति. यथा च एको, एवं अपरोपि. अनेकेसुपि हि भिक्खुसतसहस्सेसु एवं करोन्तेसु तेसञ्च एकमेकस्स तथेव इज्झति. चन्दिमसूरियानञ्च गमनम्पि आलोककरणम्पि तथेव होति. यथा हि पातिसहस्सेसु उदकपूरेसु सब्बपातीसु च चन्दमण्डलानि दिस्सन्ति. पाकतिकमेव च चन्दस्स गमनं आलोककरणञ्च होति. तथूपममेतं पाटिहारियं.

३९७. याव ब्रह्मलोकापीति ब्रह्मलोकम्पि परिच्छेदं कत्वा. कायेन वसं वत्तेतीति तत्थ ब्रह्मलोके कायेन अत्तनो वसं वत्तेति. तस्सत्थो पाळिं अनुगन्त्वा वेदितब्बो. अयञ्हेत्थ पाळि –

‘‘याव ¶ ब्रह्मलोकापि कायेन वसं वत्तेतीति. सचे सो इद्धिमा चेतोवसिप्पत्तो ब्रह्मलोकं गन्तुकामो होति, दूरेपि सन्तिके अधिट्ठाति सन्तिके होतूति, सन्तिके होति. सन्तिकेपि दूरे अधिट्ठाति दूरे होतूति, दूरे होति. बहुकम्पि थोकन्ति अधिट्ठाति थोकं होतूति, थोकं होति. थोकम्पि बहुकन्ति अधिट्ठाति बहुकं होतूति, बहुकं होति. दिब्बेन चक्खुना तस्स ब्रह्मुनो रूपं पस्सति. दिब्बाय सोतधातुया तस्स ब्रह्मुनो सद्दं सुणाति. चेतोपरियञाणेन तस्स ब्रह्मुनो चित्तं पजानाति. सचे सो इद्धिमा चेतोवसिप्पत्तो दिस्समानेन कायेन ब्रह्मलोकं गन्तुकामो होति, कायवसेन चित्तं परिणामेति, कायवसेन चित्तं अधिट्ठाति, कायवसेन चित्तं परिणामेत्वा कायवसेन चित्तं अधिट्ठहित्वा सुखसञ्ञञ्च लहुसञ्ञञ्च ओक्कमित्वा दिस्समानेन कायेन ब्रह्मलोकं गच्छति. सचे सो इद्धिमा चेतोवसिप्पत्तो अदिस्समानेन कायेन ब्रह्मलोकं गन्तुकामो होति, चित्तवसेन कायं परिणामेति, चित्तवसेन ¶ कायं अधिट्ठाति. चित्तवसेन कायं परिणामेत्वा चित्तवसेन कायं अधिट्ठहित्वा सुखसञ्ञञ्च लहुसञ्ञञ्च ओक्कमित्वा अदिस्समानेन कायेन ब्रह्मलोकं गच्छति. सो तस्स ब्रह्मुनो पुरतो रूपं अभिनिम्मिनाति मनोमयं सब्बङ्गपञ्चङ्गिं अहीनिन्द्रियं. सचे सो इद्धिमा चङ्कमति, निम्मितोपि तत्थ चङ्कमति. सचे सो इद्धिमा तिट्ठति, निसीदति, सेय्यं कप्पेति, निम्मितोपि तत्थ सेय्यं कप्पेति. सचे सो इद्धिमा धूमायति, पज्जलति, धम्मं भासति, पञ्हं पुच्छति, पञ्हं पुट्ठो विस्सज्जेति, निम्मितोपि तत्थ पञ्हं पुट्ठो विस्सज्जेति. सचे सो इद्धिमा तेन ब्रह्मुना सद्धिं सन्तिट्ठति, सल्लपति, साकच्छं समापज्जति, निम्मितोपि तत्थ तेन ब्रह्मुना सद्धिं सन्तिट्ठति, सल्लपति, साकच्छं समापज्जति. यं यदेव हि सो इद्धिमा करोति, तं तदेव निम्मितो करोती’’ति (पटि. म. ३.१२).

तत्थ ¶ दूरेपि सन्तिके अधिट्ठातीति पादकज्झानतो वुट्ठाय दूरे देवलोकं वा ब्रह्मलोकं वा आवज्जति सन्तिके होतूति. आवज्जित्वा परिकम्मं कत्वा पुन समापज्जित्वा ञाणेन अधिट्ठाति सन्तिके होतूति, सन्तिके होति. एस नयो सेसपदेसुपि.

तत्थ को दूरं गहेत्वा सन्तिकं अकासीति? भगवा. भगवा हि यमकपाटिहारियावसाने देवलोकं गच्छन्तो युगन्धरञ्च सिनेरुञ्च सन्तिके कत्वा पथवीतलतो एकपादं युगन्धरे पतिट्ठपेत्वा दुतियं सिनेरुमत्थके ठपेसि. अञ्ञो को अकासि? महामोग्गल्लानत्थेरो. थेरो हि सावत्थितो भत्तकिच्चं कत्वा निक्खन्तं द्वादसयोजनिकं परिसं तिंसयोजनं सङ्कस्सनगरमग्गं सङ्खिपित्वा तङ्खणञ्ञेव सम्पापेसि.

अपिच तम्बपण्णिदीपे चूळसमुद्दत्थेरोपि अकासि. दुब्भिक्खसमये किर थेरस्स सन्तिकं पातोव सत्त भिक्खुसतानि आगमंसु. थेरो ‘‘महा भिक्खुसङ्घो कुहिं भिक्खाचारो भविस्सती’’ति चिन्तेन्तो सकलतम्बपण्णिदीपे अदिस्वा ‘‘परतीरे पाटलिपुत्ते भविस्सती’’ति दिस्वा भिक्खू पत्तचीवरं गाहापेत्वा ‘‘एथावुसो, भिक्खाचारं गमिस्सामा’’ति पथविं सङ्खिपित्वा पाटलिपुत्तं गतो. भिक्खू ‘‘कतरं, भन्ते, इमं नगर’’न्ति पुच्छिंसु. पाटलिपुत्तं, आवुसोति. पाटलिपुत्तं नाम दूरे भन्तेति. आवुसो, महल्लकत्थेरा नाम दूरेपि गहेत्वा सन्तिके करोन्तीति. महासमुद्दो कुहिं, भन्तेति? ननु, आवुसो, अन्तरा एकं नीलमातिकं अतिक्कमित्वा ¶ आगतत्थाति? आम, भन्ते. महासमुद्दो पन महन्तोति. आवुसो, महल्लकत्थेरा नाम महन्तम्पि खुद्दकं करोन्तीति.

यथा चायं, एवं तिस्सदत्तत्थेरोपि सायन्हसमये न्हायित्वा कतुत्तरासङ्गो महाबोधिं वन्दिस्सामीति चित्ते उप्पन्ने सन्तिके अकासि.

सन्तिकं पन गहेत्वा को दूरमकासीति? भगवा. भगवा हि अत्तनो च अङ्गुलिमालस्स (म. नि. २.३४८) च अन्तरं सन्तिकम्पि दूरमकासीति.

अथ को बहुकं थोकं अकासीति? महाकस्सपत्थेरो. राजगहे किर नक्खत्तदिवसे पञ्चसता कुमारियो चन्दपूवे गहेत्वा नक्खत्तकीळनत्थाय गच्छन्तियो भगवन्तं दिस्वा किञ्चि नादंसु. पच्छतो आगच्छन्तं पन थेरं दिस्वा अम्हाकं थेरो एति पूवं दस्सामाति सब्बा पूवे ¶ गहेत्वा थेरं उपसङ्कमिंसु. थेरो पत्तं नीहरित्वा सब्बं एकपत्तपूरमत्तमकासि. भगवा थेरं आगमयमानो पुरतो निसीदि. थेरो आहरित्वा भगवतो अदासि.

इल्लिससेट्ठिवत्थुस्मिं पन महामोग्गल्लानत्थेरो थोकं बहुकमकासि, काकवलियवत्थुस्मिञ्च भगवा. महाकस्सपत्थेरो किर सत्ताहं समापत्तिया वीतिनामेत्वा दलिद्दसङ्गहं करोन्तो काकवलियस्स नाम दुग्गतमनुस्सस्स घरद्वारे अट्ठासि. तस्स जाया थेरं दिस्वा पतिनो पक्कं अलोणम्बिलयागुं पत्ते आकिरि. थेरो तं गहेत्वा भगवतो हत्थे ठपेसि. भगवा महाभिक्खुसङ्घस्स पहोनकं कत्वा अधिट्ठासि. एकपत्तेन आभता सब्बेसं पहोसि. काकवलियोपि सत्तमे दिवसे सेट्ठिट्ठानं अलत्थाति.

न केवलञ्च थोकस्स बहुकरणं, मधुरं अमधुरं, अमधुरं मधुरन्तिआदीसुपि यं यं इच्छति, सब्बं इद्धिमतो इज्झति. तथा हि महाअनुळत्थेरो नाम सम्बहुले भिक्खू पिण्डाय चरित्वा सुक्खभत्तमेव लभित्वा गङ्गातीरे निसीदित्वा परिभुञ्जमाने दिस्वा गङ्गाय उदकं सप्पिमण्डन्ति अधिट्ठहित्वा सामणेरानं सञ्ञं अदासि. ते थालकेहि आहरित्वा भिक्खुसङ्घस्स अदंसु. सब्बे मधुरेन सप्पिमण्डेन भुञ्जिंसूति.

दिब्बेन ¶ चक्खुनाति इधेव ठितो आलोकं वड्ढेत्वा तस्स ब्रह्मुनो रूपं पस्सति. इधेव च ठितो सब्बं तस्स भासतो सद्दं सुणाति. चित्तं पजानाति. कायवसेन चित्तं परिणामेतीति करजकायस्स वसेन चित्तं परिणामेति. पादकज्झानचित्तं गहेत्वा काये आरोपेति. कायानुगतिकं करोति दन्धगमनं. कायगमनं हि दन्धं होति. सुखसञ्ञञ्च लहुसञ्ञञ्च ओक्कमतीति पादकज्झानारम्मणेन इद्धिचित्तेन सहजातं सुखसञ्ञञ्च लहुसञ्ञञ्च ओक्कमति पविसति फस्सेति सम्पापुणाति. सुखसञ्ञा नाम उपेक्खासम्पयुत्तसञ्ञा. उपेक्खा हि सन्तं सुखन्ति वुत्ता. सायेव च सञ्ञा नीवरणेहि चेव वितक्कादीहि पच्चनीकेहि च विमुत्तत्ता लहुसञ्ञातिपि वेदितब्बा. तं ओक्कन्तस्स पनस्स करजकायोपि तूलपिचु विय सल्लहुको होति. सो एवं वायुक्खित्ततूलपिचुना ¶ विय सल्लहुकेन दिस्समानेन कायेन ब्रह्मलोकं गच्छति. एवं गच्छन्तो च सचे इच्छति पथवीकसिणवसेन आकासे मग्गं निम्मिनित्वा पदसा गच्छति. सचे इच्छति वायोकसिणवसेन वायुं अधिट्ठहित्वा तूलपिचु विय वायुना गच्छति. अपिच गन्तुकामता एव एत्थ पमाणं. ‘‘सति हि गन्तुकामताय’’ एवं कतचित्ताधिट्ठानो अधिट्ठानवेगुक्खित्तोव सो इस्सासखित्तसरो विय दिस्समानो गच्छति.

चित्तवसेन कायं परिणामेतीति कायं गहेत्वा चित्ते आरोपेति. चित्तानुगतिकं करोति सीघगमनं. चित्तगमनं हि सीघं होति. सुखसञ्ञञ्च लहुसञ्ञञ्च ओक्कमतीति रूपकायारम्मणेन इद्धिचित्तेन सहजातं सुखसञ्ञञ्च लहुसञ्ञञ्च ओक्कमतीति. सेसं वुत्तनयेनेव वेदितब्बं. इदं पन चित्तगमनमेव होति. एवं अदिस्समानेन कायेन गच्छन्तो पनायं किं तस्स अधिट्ठानचित्तस्स उप्पादक्खणे गच्छति, उदाहु ठितिक्खणे भङ्गक्खणे वाति वुत्ते तीसुपि खणेसु गच्छतीति थेरो आह. किं पन सो सयं गच्छति निम्मितं पेसेतीति. यथारुचि करोति. इध पनस्स सयं गमनमेव आगतं.

मनोमयन्ति अधिट्ठानमनेन निम्मितत्ता मनोमयं. अहीनिन्द्रियन्ति इदं चक्खुसोतादीनं सण्ठानवसेन वुत्तं. निम्मितरूपे पन पसादो नाम नत्थि. सचे इद्धिमा चङ्कमति निम्मितोपि तत्थ चङ्कमतीतिआदि सब्बं सावकनिम्मितं सन्धाय वुत्तं. बुद्धनिम्मितो पन यं यं भगवा करोति, तं तम्पि करोति. भगवतो रुचिवसेन अञ्ञम्पि करोतीति. एत्थ च यं सो इद्धिमा इधेव ठितो दिब्बेन चक्खुना रूपं पस्सति, दिब्बाय सोतधातुया सद्दं सुणाति, चेतोपरियञाणेन ¶ चित्तं पजानाति, न एत्तावता कायेन वसं वत्तेति. यम्पि सो इधेव ठितो तेन ब्रह्मुना सद्धिं सन्तिट्ठति सल्लपति साकच्छं समापज्जति, एत्तावतापि न कायेन वसं वत्तेति. यम्पिस्स दूरेपि सन्तिके अधिट्ठातीतिआदिकं अधिट्ठानं, एत्तावतापि न कायेन वसं वत्तेति. यम्पि सो दिस्समानेन वा अदिस्समानेन वा कायेन ब्रह्मलोकं गच्छति, एत्तावतापि न कायेन वसं वत्तेति. यञ्च खो सो तस्स ब्रह्मुनो पुरतो रूपं अभिनिम्मिनातीतिआदिना नयेन ¶ वुत्तविधानं आपज्जति, एत्तावता कायेन वसं वत्तेति नामं. सेसं पनेत्थ कायेन वसं वत्तनाय पुब्बभागदस्सनत्थं वुत्तन्ति अयं ताव अधिट्ठाना इद्धि.

३९८. विकुब्बनाय पन मनोमयाय च इदं नानाकरणं. विकुब्बनं ताव करोन्तेन ‘‘सो पकतिवण्णं विजहित्वा कुमारकवण्णं वा दस्सेति, नागवण्णं वा दस्सेति, सुपण्णवण्णं वा दस्सेति, असुरवण्णं वा दस्सेति, इन्दवण्णं वा दस्सेति, देववण्णं वा दस्सेति, ब्रह्मवण्णं वा दस्सेति, समुद्दवण्णं वा दस्सेति, पब्बतवण्णं वा दस्सेति, सीहवण्णं वा दस्सेति, ब्यग्घवण्णं वा दस्सेति, दीपिवण्णं वा दस्सेति, हत्थिम्पि दस्सेति, अस्सम्पि दस्सेति, रथम्पि दस्सेति, पत्तिम्पि दस्सेति, विविधम्पि सेनाब्यूहं दस्सेती’’ति (पटि. म. ३.१३) एवं वुत्तेसु कुमारकवण्णादीसु यं यं आकङ्खति, तं तं अधिट्ठातब्बं. अधिट्ठहन्तेन च पथवीकसिणादीसु अञ्ञतरारम्मणतो अभिञ्ञापादकज्झानतो वुट्ठाय अत्तनो कुमारकवण्णो आवज्जितब्बो. आवज्जित्वा परिकम्मावसाने पुन समापज्जित्वा वुट्ठाय एवरूपो नाम कुमारको होमीति अधिट्ठातब्बं. सह अधिट्ठानचित्तेन कुमारको होति देवदत्तो विय (चूळव. ३३३). एस नयो सब्बत्थ.

हत्थिम्पि दस्सेतीतिआदि पनेत्थ बहिद्धापि हत्थिआदिदस्सनवसेन वुत्तं. तत्थ हत्थी होमीति अनधिट्ठहित्वा हत्थी होतूति अधिट्ठातब्बं, अस्सादीसुपि एसेव नयोति. अयं विकुब्बना इद्धि.

३९९. मनोमयं कातुकामो पन पादकज्झानतो वुट्ठाय कायं ताव आवज्जित्वा वुत्तनयेनेव सुसिरो होतूति अधिट्ठाति, सुसिरो होति. अथस्स अब्भन्तरे अञ्ञं कायं आवज्जित्वा परिकम्मं कत्वा वुत्तनयेनेव अधिट्ठाति, तस्स अब्भन्तरे अञ्ञो कायो होतूति. सो तं मुञ्जम्हा ईसिकं विय कोसिया असिं विय करण्डाय अहिं विय च अब्बाहति ¶ . तेन वुत्तं ‘‘इध भिक्खु इमम्हा काया अञ्ञं कायं अभिनिम्मिनाति रूपिं मनोमयं सब्बङ्गपच्चङ्गिं अहीनिन्द्रियं. सेय्यथापि पुरिसो मुञ्जम्हा ईसिकं पवाहेय्य, तस्स एवमस्स अयं मुञ्जो अयं ईसिका ¶ , अञ्ञो मुञ्जो अञ्ञा ईसिका, मुञ्जम्हात्वेव ईसिका पवाळ्हा’’तिआदि (पटि. म. ३.१४). एत्थ च यथा ईसिकादयो मुञ्जादीहि सदिसा होन्ति, एवं मनोमयरूपं इद्धिमतासदिसमेव होतीति दस्सनत्थं एता उपमा वुत्ताति. अयं मनोमया इद्धि.

इति साधुजनपामोज्जत्थाय कते विसुद्धिमग्गे

इद्धिविधनिद्देसो नाम

द्वादसमो परिच्छेदो.

१३. अभिञ्ञानिद्देसो

दिब्बसोतधातुकथा

४००. इदानि ¶ ¶ दिब्बसोतधातुया निद्देसक्कमो अनुप्पत्तो. तत्थ ततो परासु च तीसु अभिञ्ञासु सो एवं समाहिते चित्तेतिआदीनं (दी. नि. १.२४० आदयो) अत्थो वुत्तनयेनेव वेदितब्बो. सब्बत्थ पन विसेसमत्तमेव वण्णयिस्साम. तत्र दिब्बाय सोतधातुयाति एत्थ दिब्बसदिसत्ता दिब्बा. देवानं हि सुचरितकम्मनिब्बत्ता पित्तसेम्हरुहिरादीहि अपलिबुद्धा उपक्किलेसविमुत्तताय दूरेपि आरम्मणं सम्पटिच्छनसमत्था दिब्बपसादसोतधातु होति. अयञ्चापि इमस्स भिक्खुनो वीरियभावनाबलनिब्बत्ता ञाणसोतधातु तादिसायेवाति दिब्बसदिसत्ता दिब्बा. अपिच दिब्बविहारवसेन पटिलद्धत्ता अत्तना च दिब्बविहारसन्निस्सितत्तापि दिब्बा. सवनट्ठेन निज्जीवट्ठेन च सोतधातु. सोतधातुकिच्चकरणेन च सोतधातु वियातिपि सोतधातु. ताय दिब्बाय सोतधातुया.

विसुद्धायाति परिसुद्धाय निरुपक्किलेसाय. अतिक्कन्तमानुसिकायाति मनुस्सूपचारं अतिक्कमित्वा सद्दसवनेन मानुसिकं मंससोतधातुं अतिक्कन्ताय वीतिवत्तित्वा ठिताय. उभो सद्दे सुणातीति द्वे सद्दे सुणाति. कतमे द्वे? दिब्बे च मानुसे च, देवानञ्च मनुस्सानञ्च सद्देति वुत्तं होति. एतेन पदेसपरियादानं वेदितब्बं. ये दूरे सन्तिके चाति ये सद्दा दूरे परचक्कवाळेपि ये च सन्तिके अन्तमसो सदेहसन्निस्सितपाणकसद्दापि, ते सुणातीति वुत्तं होति. एतेन निप्पदेसपरियादानं वेदितब्बं.

कथं पनायं उप्पादेतब्बाति? तेन भिक्खुना अभिञ्ञापादकज्झानं समापज्जित्वा वुट्ठाय परिकम्मसमाधिचित्तेन पठमतरं पकतिसोतपथे दूरे ओळारिको अरञ्ञे सीहादीनं सद्दो आवज्जितब्बो. विहारे घण्डिसद्दो, भेरिसद्दो, सङ्खसद्दो, सामणेरदहरभिक्खूनं सब्बथामेन सज्झायन्तानं ¶ सज्झायनसद्दो, पकतिकथं कथेन्तानं ‘‘किं भन्ते, किमावुसो’’तिआदिसद्दो, सकुणसद्दो, वातसद्दो, पदसद्दो, पक्कुथितउदकस्स ¶ चिच्चिटायनसद्दो, आतपे सुस्समानतालपण्णसद्दो, कुन्थकिपिल्लिकादिसद्दोति एवं सब्बोळारिकतो पभुति यथाक्कमेन सुखुमसद्दा आवज्जितब्बा. तेन पुरत्थिमाय दिसाय सद्दानं सद्दनिमित्तं मनसिकातब्बं. पच्छिमाय, उत्तराय, दक्खिणाय, हेट्ठिमाय, उपरिमाय दिसाय, पुरत्थिमाय अनुदिसाय, पच्छिमाय, उत्तराय, दक्खिणाय अनुदिसाय सद्दानं सद्दनिमित्तं मनसिकातब्बं. ओळारिकानम्पि सुखुमानम्पि सद्दानं सद्दनिमित्तं मनसिकातब्बं. तस्स ते सद्दा पाकतिकचित्तस्सापि पाकटा होन्ति. परिकम्मसमाधिचित्तस्स पन अतिविय पाकटा.

तस्सेवं सद्दनिमित्तं मनसिकरोतो इदानि दिब्बसोतधातु उप्पज्जिस्सतीति तेसु सद्देसु अञ्ञतरं आरम्मणं कत्वा मनोद्वारावज्जनं उप्पज्जति. तस्मिं निरुद्धे चत्तारि पञ्च वा जवनानि जवन्ति, येसं पुरिमानि तीणि चत्तारि वा परिकम्मउपचारानुलोमगोत्रभुनामकानि कामावचरानि, चतुत्थं पञ्चमं वा अप्पनाचित्तं रूपावचरं चतुत्थज्झानिकं. तत्थ यं तेन अप्पनाचित्तेन सद्धिं उप्पन्नं ञाणं, अयं दिब्बसोतधातूति वेदितब्बा. ततो परं तस्मिं सोते पतितो होति. तं थामजातं करोन्तेन ‘‘एत्थन्तरे सद्दं सुणामी’’ति एकङ्गुलमत्तं परिच्छिन्दित्वा वड्ढेतब्बं. ततो द्वङ्गुलचतुरङ्गुलअट्ठङ्गुलविदत्थिरतनअन्तोगब्भपमुखपासादपरिवेणसङ्घारामगोचरगामजनपदादिवसेन याव चक्कवाळं ततो वा भिय्योपि परिच्छिन्दित्वा परिच्छिन्दित्वा वड्ढेतब्बं.

एवं अधिगताभिञ्ञो एस पादकज्झानारम्मणेन फुट्ठोकासब्भन्तरगतेपि सद्दे पुन पादकज्झानं असमापज्जित्वापि अभिञ्ञाञाणेन सुणातियेव. एवं सुणन्तो च सचेपि याव ब्रह्मलोका सङ्खभेरिपणवादिसद्देहि एककोलाहलं होति, पाटियेक्कं ववत्थपेतुकामताय सति अयं सङ्खसद्दो अयं भेरिसद्दोति ववत्थपेतुं सक्कोतियेवाति.

दिब्बसोतधातुकथा निट्ठिता.

चेतोपरियञाणकथा

४०१. चेतोपरियञाणकथाय ¶ ¶ चेतोपरियञाणायाति एत्थ परियातीति परियं, परिच्छिन्दतीति अत्थो. चेतसो परियं चेतोपरियं. चेतोपरियञ्च तं ञाणञ्चाति चेतोपरियञाणं. तदत्थायाति वुत्तं होति. परसत्तानन्ति अत्तानं ठपेत्वा सेससत्तानं. परपुग्गलानन्ति इदम्पि इमिना एकत्थमेव. वेनेय्यवसेन पन देसनाविलासेन च ब्यञ्जननानत्तं कतं. चेतसा चेतोति अत्तनो चित्तेन तेसं चित्तं. परिच्च पजानातीति परिच्छिन्दित्वा सरागादिवसेन नानप्पकारतो जानाति.

कथं पनेतं ञाणं उप्पादेतब्बन्ति? एतञ्हि दिब्बचक्खुवसेन इज्झति, तं एतस्स परिकम्मं. तस्मा तेन भिक्खुना आलोकं वड्ढेत्वा दिब्बेन चक्खुना परस्स हदयरूपं निस्साय वत्तमानस्स लोहितस्स वण्णं पस्सित्वा चित्तं परियेसितब्बं. यदा हि सोमनस्सचित्तं वत्तति, तदा रत्तं निग्रोधपक्कसदिसं होति. यदा दोमनस्सचित्तं वत्तति, तदा काळकं जम्बुपक्कसदिसं. यदा उपेक्खाचित्तं वत्तति, तदा पसन्नतिलतेलसदिसं. तस्मा तेन ‘‘इदं रूपं सोमनस्सिन्द्रियसमुट्ठानं, इदं दोमनस्सिन्द्रियसमुट्ठानं, इदं उपेक्खिन्द्रियसमुट्ठान’’न्ति परस्स हदयलोहितवण्णं पस्सित्वा चित्तं परियेसन्तेन चेतोपरियञाणं थामगतं कातब्बं. एवं थामगते हि तस्मिं अनुक्कमेन सब्बम्पि कामावचरचित्तं रूपावचरारूपावचरचित्तञ्च पजानाति चित्ता चित्तमेव सङ्कमन्तो विनापि हदयरूपदस्सनेन. वुत्तम्पि चेतं अट्ठकथायं ‘‘आरुप्पे परस्स चित्तं जानितुकामो कस्स हदयरूपं पस्सति, कस्सिन्द्रियविकारं ओलोकेतीति? न कस्सचि. इद्धिमतो विसयो एस यदिदं यत्थ कत्थचि चित्तं आवज्जन्तो सोळसप्पभेदं चित्तं जानाति. अकताभिनिवेसस्स पन वसेन अयं कथा’’ति.

सरागं वा चित्तन्तिआदीसु पन अट्ठविधं लोभसहगतं चित्तं सरागं चित्तन्ति वेदितब्बं. अवसेसं चतुभूमकं कुसलाब्याकतं चित्तं वीतरागं. द्वे दोमनस्सचित्तानि द्वे विचिकिच्छुद्धच्चचित्तानीति इमानि पन चत्तारि चित्तानि इमस्मिं दुके सङ्गहं न गच्छन्ति. केचि पन थेरा तानिपि सङ्गण्हन्ति. दुविधं पन दोमनस्सचित्तं सदोसं चित्तं नाम. सब्बम्पि चतुभूमकं ¶ कुसलाब्याकतं वीतदोसं. सेसानि दसाकुसलचित्तानि इमस्मिं दुके सङ्गहं न गच्छन्ति. केचि पन थेरा तानिपि सङ्गण्हन्ति.

समोहं ¶ वीतमोहन्ति एत्थ पन पाटिपुग्गलिकनयेन विचिकिच्छुद्धच्चसहगतद्वयमेव समोहं, मोहस्स पन सब्बाकुसलेसु सम्भवतो द्वादसविधम्पि अकुसलचित्तं समोहं चित्तन्ति वेदितब्बं. अवसेसं वीतमोहं. थिनमिद्धानुगतं पन संखित्तं. उद्धच्चानुगतं विक्खित्तं. रूपावचरारूपावचरं महग्गतं. अवसेसं अमहग्गतं. सब्बम्पि तेभूमकं सउत्तरं. लोकुत्तरं अनुत्तरं. उपचारप्पत्तं अप्पनाप्पत्तञ्च समाहितं. उभयमप्पत्तं असमाहितं. तदङ्गविक्खम्भनसमुच्छेदपटिपस्सद्धिनिस्सरणविमुत्तिप्पत्तं विमुत्तं. पञ्चविधम्पि एतं विमुत्तिमप्पत्तं अविमुत्तन्ति वेदितब्बं. इति चेतोपरियञाणलाभी भिक्खु सब्बप्पकारम्पि इदं सरागं वा चित्तं…पे… अविमुत्तं वा चित्तं अविमुत्तं चित्तन्ति पजानातीति.

चेतोपरियञाणकथा निट्ठिता.

पुब्बेनिवासानुस्सतिञाणकथा

४०२. पुब्बेनिवासानुस्सतिञाणकथायं पुब्बेनिवासानुस्सतिञाणायाति (दी. नि. १.२४४) पुब्बेनिवासानुस्सतिम्हि यं ञाणं, तदत्थाय. पुब्बेनिवासोति पुब्बे अतीतजातीसु निवुत्थक्खन्धा. निवुत्थाति अज्झावुत्था अनुभूता अत्तनो सन्ताने उप्पज्जित्वा निरुद्धा. निवुत्थधम्मा वा. निवुत्थाति गोचरनिवासेन निवुत्था अत्तनो विञ्ञाणेन विञ्ञाता परिच्छिन्ना, परविञ्ञाणविञ्ञातापि वा छिन्नवटुमकानुस्सरणादीसु, ते बुद्धानंयेव लब्भन्ति. पुब्बेनिवासानुस्सतीति याय सतिया पुब्बेनिवासं अनुस्सरति, सा पुब्बेनिवासानुस्सति. ञाणन्ति ताय सतिया सम्पयुत्तञाणं. एवमिमस्स पुब्बेनिवासानुस्सतिञाणस्स अत्थाय पुब्बेनिवासानुस्सतिञाणाय एतस्स ञाणस्स अधिगमाय पत्तियाति वुत्तं होति.

अनेकविहितन्ति अनेकविधं, अनेकेहि वा पकारेहि पवत्तितं, संवण्णितन्ति अत्थो. पुब्बेनिवासन्ति समनन्तरातीतभवं आदिं कत्वा तत्थ तत्थ निवुत्थसन्तानं. अनुस्सरतीति खन्धपटिपाटिवसेन ¶ चुतिपटिसन्धिवसेन वा अनुगन्त्वा अनुगन्त्वा सरति. इमञ्हि पुब्बेनिवासं छ जना अनुस्सरन्ति – तित्थिया, पकतिसावका, महासावका, अग्गसावका, पच्चेकबुद्धा, बुद्धाति.

तत्थ ¶ तित्थिया चत्तालीसंयेव कप्पे अनुस्सरन्ति, न ततो परं. कस्मा, दुब्बलपञ्ञत्ता. तेसञ्हि नामरूपपरिच्छेदविरहितत्ता दुब्बला पञ्ञा होति. पकतिसावका कप्पसतम्पि कप्पसहस्सम्पि अनुस्सरन्तियेव, बलवपञ्ञत्ता. असीतिमहासावका सतसहस्सकप्पे अनुस्सरन्ति. द्वे अग्गसावका एकं असङ्ख्येय्यं सतसहस्सञ्च. पच्चेकबुद्धा द्वे असङ्ख्येय्यानि सतसहस्सञ्च. एत्तको हि एतेसं अभिनीहारो. बुद्धानं पन परिच्छेदो नाम नत्थि.

तित्थिया च खन्धपटिपाटिमेव सरन्ति, पटिपाटिं मुञ्चित्वा चुतिपटिसन्धिवसेन सरितुं न सक्कोन्ति. तेसञ्हि अन्धानं विय इच्छितपदेसोक्कमनं नत्थि. यथा पन अन्धा यट्ठिं अमुञ्चित्वाव गच्छन्ति, एवं ते खन्धानं पटिपाटिं अमुञ्चित्वाव सरन्ति. पकतिसावका खन्धपटिपाटियापि अनुस्सरन्ति चुतिपटिसन्धिवसेनपि सङ्कमन्ति. तथा असीतिमहासावका. द्विन्नं पन अग्गसावकानं खन्धपटिपाटिकिच्चं नत्थि. एकस्स अत्तभावस्स चुतिं दिस्वा पटिसन्धिं पस्सन्ति, पुन अपरस्स चुतिं दिस्वा पटिसन्धिन्ति एवं चुतिपटिसन्धिवसेनेव सङ्कमन्ता गच्छन्ति. तथा पच्चेकबुद्धा.

बुद्धानं पन नेव खन्धपटिपाटिकिच्चं, न चुतिपटिसन्धिवसेन सङ्कमनकिच्चं अत्थि. तेसञ्हि अनेकासु कप्पकोटीसु हेट्ठा वा उपरि वा यं यं ठानं इच्छन्ति, तं तं पाकटमेव होति. तस्मा अनेकापि कप्पकोटियो पेय्यालपाळिं विय संखिपित्वा यं यं इच्छन्ति, तत्र तत्रेव ओक्कमन्ता सीहोक्कन्तवसेन गच्छन्ति. एवं गच्छन्तानञ्च नेसं ञाणं यथा नाम कतवालवेधपरिचयस्स सरभङ्गसदिसस्स धनुग्गहस्स खित्तो सरो अन्तरा रुक्खलतादीसु असज्जमानो लक्खेयेव पतति, न सज्जति, न विरज्झति, एवं अन्तरन्तरासु जातीसु न सज्जति, न विरज्झति, असज्जमानं अविरज्झमानं इच्छितिच्छितट्ठानंयेव गण्हाति.

इमेसु च पन पुब्बेनिवासं अनुस्सरणसत्तेसु तित्थियानं पुब्बेनिवासदस्सनं खज्जुपनकपभासदिसं हुत्वा उपट्ठाति. पकतिसावकानं दीपप्पभासदिसं. महासावकानं उक्कापभासदिसं ¶ . अग्गसावकानं ओसधितारकप्पभासदिसं. पच्चेकबुद्धानं चन्दप्पभासदिसं. बुद्धानं रस्मिसहस्सपटिमण्डितसरदसूरियमण्डलसदिसं हुत्वा उपट्ठाति.

तित्थियानञ्च ¶ पुब्बेनिवासानुस्सरणं अन्धानं यट्ठिकोटिगमनं विय होति. पकतिसावकानं दण्डकसेतुगमनं विय. महासावकानं जङ्घसेतुगमनं विय. अग्गसावकानं सकटसेतुगमनं विय. पच्चेकबुद्धानं महाजङ्घमग्गगमनं विय. बुद्धानं महासकटमग्गगमनं विय.

इमस्मिं पन अधिकारे सावकानं पुब्बेनिवासानुस्सरणं अधिप्पेतं. तेन वुत्तं ‘‘अनुस्सरतीति खन्धपटिपाटिवसेन चुतिपटिसन्धिवसेन वा अनुगन्त्वा अनुगन्त्वा सरती’’ति.

४०३. तस्मा एवमनुस्सरितुकामेन आदिकम्मिकेन भिक्खुना पच्छाभत्तं पिण्डपातपटिक्कन्तेन रहोगतेन पटिसल्लिनेन पटिपाटिया चत्तारि झानानि समापज्जित्वा अभिञ्ञापादकचतुत्थज्झानतो वुट्ठाय सब्बपच्छिमा निसज्जा आवज्जितब्बा. ततो आसनपञ्ञापनं, सेनासनप्पवेसनं, पत्तचीवरपटिसामनं, भोजनकालो, गामतो आगमनकालो, गामे पिण्डाय चरितकालो, गामं पिण्डाय पविट्ठकालो, विहारतो निक्खमनकालो, चेतियङ्गणबोधियङ्गणवन्दनकालो, पत्तधोवनकालो, पत्तपटिग्गहणकालो, पत्तपटिग्गहणतो याव मुखधोवना कतकिच्चं, पच्चूसकाले कतकिच्चं, मज्झिमयामे कतकिच्चं, पठमयामे कतकिच्चन्ति एवं पटिलोमक्कमेन सकलं रत्तिन्दिवं कतकिच्चं आवज्जितब्बं. एत्तकं पन पकतिचित्तस्सपि पाकटं होति. परिकम्मसमाधिचित्तस्स पन अतिपाकटमेव.

सचे पनेत्थ किञ्चि न पाकटं होति, पुन पादकज्झानं समापज्जित्वा वुट्ठाय आवज्जितब्बं. एत्तकेन दीपे जलिते विय पाकटं होति. एवं पटिलोमक्कमेनेव दुतियदिवसेपि ततियचतुत्थपञ्चमदिवसेपि दसाहेपि अड्ढमासेपि मासेपि याव संवच्छरापि कतकिच्चं आवज्जितब्बं. एतेनेव उपायेन दसवस्सानि वीसतिवस्सानीति याव इमस्मिं भवे अत्तनो पटिसन्धि, ताव आवज्जन्तेन पुरिमभवे चुतिक्खणे पवत्तितनामरूपं आवज्जितब्बं. पहोति हि पण्डितो भिक्खु पठमवारेनेव पटिसन्धिं उग्घाटेत्वा चुतिक्खणे नामरूपमारम्मणं कातुं.

यस्मा ¶ पन पुरिमभवे नामरूपं असेसं निरुद्धं अञ्ञं उप्पन्नं, तस्मा तं ठानं आहुन्दरिकं अन्धतममिव होति दुद्दसं दुप्पञ्ञेन. तेनापि ‘‘न सक्कोमहं ¶ पटिसन्धिं उग्घाटेत्वा चुतिक्खणे पवत्तितनामरूपमारम्मणं कातु’’न्ति धुरनिक्खेपो न कातब्बो. तदेव पन पादकज्झानं पुनप्पुनं समापज्जितब्बं. ततो च वुट्ठाय वुट्ठाय तं ठानं आवज्जितब्बं.

एवं करोन्तो हि सेय्यथापि नाम बलवा पुरिसो कूटागारकण्णिकत्थाय महारुक्खं छिन्दन्तो साखापलासच्छेदनमत्तेनेव फरसुधाराय विपन्नाय महारुक्खं छिन्दितुं असक्कोन्तोपि धुरनिक्खेपं अकत्वाव कम्मारसालं गन्त्वा तिखिणं फरसुं कारापेत्वा पुन आगन्त्वा छिन्देय्य, पुन विपन्नाय च पुनपि तथेव कारेत्वा छिन्देय्य. सो एवं छिन्दन्तो छिन्नस्स छिन्नस्स पुन छेतब्बाभावतो अच्छिन्नस्स च छेदनतो नचिरस्सेव महारुक्खं पातेय्य, एवमेवं पादकज्झाना वुट्ठाय पुब्बे आवज्जितं अनावज्जित्वा पटिसन्धिमेव आवज्जन्तो नचिरस्सेव पटिसन्धिं उग्घाटेत्वा चुतिक्खणे पवत्तितनामरूपं आरम्मणं करेय्याति. कट्ठफालककेसोहारकादीहिपि अयमत्थो दीपेतब्बो.

तत्थ पच्छिमनिसज्जतो पभुति याव पटिसन्धितो आरम्मणं कत्वा पवत्तं ञाणं पुब्बेनिवासञाणं नाम न होति. तं पन परिकम्मसमाधिञाणं नाम होति. अतीतंसञाणन्तिपि एके वदन्ति. तं रूपावचरं सन्धाय न युज्जति. यदा पनस्स भिक्खुनो पटिसन्धिं अतिक्कम्म चुतिक्खणे पवत्तितनामरूपं आरम्मणं कत्वा मनोद्वारावज्जनं उप्पज्जति, तस्मिञ्च निरुद्धे तदेवारम्मणं कत्वा चत्तारि पञ्च वा जवनानि जवन्ति. सेसं पुब्बे वुत्तनयेनेव पुरिमानि परिकम्मादिनामकानि कामावचरानि होन्ति. पच्छिमं रूपावचरं चतुत्थज्झानिकं अप्पनाचित्तं. तदास्स यं तेन चित्तेन सह ञाणं उप्पज्जति, इदं पुब्बेनिवासानुस्सतिञाणं नाम. तेन ञाणेन सम्पयुत्ताय सतिया अनेकविहितं पुब्बेनिवासं अनुस्सरति. सेय्यथिदं, एकम्पि जातिं द्वेपि जातियो…पे… इति साकारं सउद्देसं अनेकविहितं पुब्बेनिवासं अनुस्सरतीति (दी. नि. १.२४४).

४०४. तत्थ एकम्पि जातिन्ति एकम्पि पटिसन्धिमूलं चुतिपरियोसानं एकभवपरियापन्नं खन्धसन्तानं. एस नयो द्वेपि जातियोतिआदीसुपि. अनेकेपि संवट्टकप्पेतिआदीसु पन परिहायमानो कप्पो संवट्टकप्पो, वड्ढमानो विवट्टकप्पोति वेदितब्बो. तत्थ संवट्टेन संवट्टट्ठायी ¶ गहितो ¶ होति, तंमूलकत्ता. विवट्टेन च विवट्टट्ठायी, एवञ्हि सति यानि तानि ‘‘चत्तारिमानि, भिक्खवे, कप्पस्स असङ्ख्येय्यानि. कतमानि चत्तारि? संवट्टो, संवट्टट्ठायी, विवट्टो, विवट्टट्ठायीति (अ. नि. ४.१५६ थोकं विसदिसं) वुत्तानि, तानि परिग्गहितानि होन्ति.

तत्थ तयो संवट्टा – आपोसंवट्टो, तेजोसंवट्टो, वायोसंवट्टोति. तिस्सो संवट्टसीमा – आभस्सरा, सुभकिण्हा, वेहप्फलाति.

यदा कप्पो तेजेन संवट्टति, आभस्सरतो हेट्ठा अग्गिना डय्हति. यदा आपेन संवट्टति, सुभकिण्हतो हेट्ठा उदकेन विलीयति. यदा वायुना संवट्टति, वेहप्फलतो हेट्ठा वातेन विद्धंसति. वित्थारतो पन सदापि एकं बुद्धखेत्तं विनस्सति.

बुद्धखेत्तं नाम तिविधं होति – जातिखेत्तं, आणाखेत्तं, विसयखेत्तञ्च. तत्थ जातिखेत्तं दससहस्सचक्कवाळपरियन्तं होति. यं तथागतस्स पटिसन्धिगहणादीसु कम्पति. आणाखेत्तं कोटिसतसहस्सचक्कवाळपरियन्तं, यत्थ रतनसुत्तं (खु. पा. ६.१ आदयो) खन्धपरित्तं (चूळव. २५१; अ. नि. ४.६७) धजग्गपरित्तं (सं. नि. १.२४९) आटानाटियपरित्तं (दी. नि. ३.२७५ आदयो) मोरपरित्तन्ति (जा. १.२.१७-१८) इमेसं परित्तानं आनुभावो वत्तति. विसयखेत्तं अनन्तमपरिमाणं. यं ‘‘यावता वा पन आकङ्खेय्या’’ति (अ. नि. ३.८१) वुत्तं, यत्थ यं यं तथागतो आकङ्खति, तं तं जानाति. एवमेतेसु तीसु बुद्धखेत्तेसु एकं आणाखेत्तं विनस्सति. तस्मिं पन विनस्सन्ते जातिखेत्तम्पि विनट्ठमेव होति. विनस्सन्तञ्च एकतोव विनस्सति, सण्ठहन्तम्पि एकतो सण्ठहति. तस्सेवं विनासो च सण्ठहनञ्च वेदितब्बं.

४०५. यस्मिं हि समये कप्पो अग्गिना नस्सति, आदितोव कप्पविनासकमहामेघो वुट्ठहित्वा कोटिसतसहस्सचक्कवाळे एकं महावस्सं वस्सति. मनुस्सा तुट्ठहट्ठा सब्बबीजानि नीहरित्वा वपन्ति. सस्सेसु पन गोखायितकमत्तेसु जातेसु गद्रभरवं रवन्तो एकबिन्दुम्पि न वस्सति, तदा पच्छिन्नं पच्छिन्नमेव वस्सं होति. इदं सन्धाय हि भगवता ‘‘होति खो सो, भिक्खवे, समयो यं बहूनि वस्सानि बहूनि वस्ससतानि ¶ बहूनि वस्ससहस्सानि बहूनि ¶ वस्ससतसहस्सानि देवो न वस्सती’’ति (अ. नि. ७.६६) वुत्तं. वस्सूपजीविनो सत्ता कालङ्कत्वा ब्रह्मलोके निब्बत्तन्ति, पुप्फफलूपजीविनियो च देवता. एवं दीघे अद्धाने वीतिवत्ते तत्थ तत्थ उदकं परिक्खयं गच्छति, अथानुपुब्बेन मच्छकच्छपापि कालङ्कत्वा ब्रह्मलोके निब्बत्तन्ति, नेरयिकसत्तापि. तत्थ नेरयिका सत्तमसूरियपातुभावे विनस्सन्तीति एके.

झानं विना नत्थि ब्रह्मलोके निब्बत्ति, एतेसञ्च केचि दुब्भिक्खपीळिता केचि अभब्बा झानाधिगमाय, ते कथं तत्थ निब्बत्तन्तीति. देवलोके पटिलद्धज्झानवसेन. तदा हि ‘‘वस्ससतसहस्सस्सच्चयेन कप्पुट्ठानं भविस्सती’’ति लोकब्यूहा नाम कामावचरदेवा मुत्तसिरा विकिण्णकेसा रुदमुखा अस्सूनि हत्थेहि पुञ्छमाना रत्तवत्थनिवत्था अतिविय विरूपवेसधारिनो हुत्वा मनुस्सपथे विचरन्ता एवं आरोचेन्ति ‘‘मारिसा इतो वस्ससतसहस्सस्सच्चयेन कप्पवुट्ठानं भविस्सति, अयं लोको विनस्सिस्सति, महासमुद्दोपि उस्सुस्सिस्सति, अयञ्च महापथवी सिनेरु च पब्बतराजा उद्दय्हिस्सन्ति विनस्सिस्सन्ति. याव ब्रह्मलोका लोकविनासो भविस्सति. मेत्तं मारिसा भावेथ, करुणं, मुदितं, उपेक्खं मारिसा भावेथ, मातरं उपट्ठहथ, पितरं उपट्ठहथ, कुले जेट्ठापचायिनो होथा’’ति.

तेसं वचनं सुत्वा येभुय्येन मनुस्सा च भुम्मदेवता च संवेगजाता अञ्ञमञ्ञं मुदुचित्ता हुत्वा मेत्तादीनि पुञ्ञानि करित्वा देवलोके निब्बत्तन्ति. तत्थ दिब्बसुधाभोजनं भुञ्जित्वा वायोकसिणे परिकम्मं कत्वा झानं पटिलभन्ति. तदञ्ञे पन अपरापरियवेदनीयेन कम्मेन देवलोके निब्बत्तन्ति. अपरापरियवेदनीयकम्मरहितो हि संसारे संसरमानो सत्तो नाम नत्थि. तेपि तत्थ तथेव झानं पटिलभन्ति. एवं देवलोके पटिलद्धज्झानवसेन सब्बेपि ब्रह्मलोके निब्बत्तन्तीति.

वस्सूपच्छेदतो पन उद्धं दीघस्स अद्धुनो अच्चयेन दुतियो सूरियो पातुभवति. वुत्तम्पि चेतं भगवता ‘‘होति खो सो, भिक्खवे, समयो’’ति सत्तसूरियं (अ. नि. ७.६६) वित्थारेतब्बं. पातुभूते च पन तस्मिं नेव ¶ रत्तिपरिच्छेदो, न दिवापरिच्छेदो पञ्ञायति. एको सूरियो उट्ठेति, एको अत्थं गच्छति. अविच्छिन्नसूरियसन्तापोव लोको होति. यथा च पकतिसूरिये सूरियदेवपुत्तो होति, एवं कप्पविनासकसूरिये नत्थि. तत्थ पकतिसूरिये ¶ वत्तमाने आकासे वलाहकापि धूमसिखापि चरन्ति. कप्पविनासकसूरिये वत्तमाने विगतधूमवलाहकं आदासमण्डलं विय निम्मलं नभं होति. ठपेत्वा पञ्च महानदियो सेसकुन्नदीआदीसु उदकं सुस्सति.

ततोपि दीघस्स अद्धुनो अच्चयेन ततियो सूरियो पातुभवति. यस्स पातुभावा महानदियोपि सुस्सन्ति.

ततोपि दीघस्स अद्धुनो अच्चयेन चतुत्थो सूरियो पातुभवति. यस्स पातुभावा हिमवति महानदीनं पभवा ‘‘सीहपपातो हंसपातनो कण्णमुण्डको रथकारदहो अनोतत्तदहो छद्दन्तदहो कुणालदहो’’ति इमे सत्त महासरा सुस्सन्ति.

ततोपि दीघस्स अद्धुनो अच्चयेन पञ्चमो सूरियो पातुभवति. यस्स पातुभावा अनुपुब्बेन महासमुद्दे अङ्गुलिपब्बतेमनमत्तम्पि उदकं न सण्ठाति.

ततोपि दीघस्स अद्धुनो अच्चयेन छट्ठो सूरियो पातुभवति. यस्स पातुभावा सकलचक्कवाळं एकधूमं होति. परियादिण्णसिनेहं धूमेन. यथा चिदं, एवं कोटिसतसहस्सचक्कवाळानिपि.

ततोपि दीघस्स अद्धुनो अच्चयेन सत्तमो सूरियो पातुभवति. यस्स पातुभावा सकलचक्कवाळं एकजालं होति सद्धिं कोटिसतसहस्सचक्कवाळेहि. योजनसतिकादिभेदानि सिनेरुकूटानिपि पलुज्जित्वा आकासेयेव अन्तरधायन्ति. सा अग्गिजाला उट्ठहित्वा चातुमहाराजिके गण्हाति. तत्थ कनकविमानरतनविमानमणिविमानानि झापेत्वा तावतिंसभवनं गण्हाति. एतेनेव उपायेन याव पठमज्झानभूमिं गण्हाति. तत्थ तयोपि ब्रह्मलोके झापेत्वा आभस्सरे आहच्च तिट्ठति. सा याव अणुमत्तम्पि सङ्खारगतं अत्थि, ताव न निब्बायति. सब्बसङ्खारपरिक्खया पन सप्पितेलझापनग्गिसिखा विय छारिकम्पि ¶ अनवसेसेत्वा निब्बायति. हेट्ठाआकासेन सह उपरिआकासो एको होति महन्धकारो.

४०६. अथ दीघस्स अद्धुनो अच्चयेन महामेघो उट्ठहित्वा पठमं सुखुमं सुखुमं वस्सति ¶ . अनुपुब्बेन कुमुदनाळयट्ठिमुसलतालक्खन्धादिप्पमाणाहि धाराहि वस्सन्तो कोटिसतसहस्सचक्कवाळेसु सब्बं दड्ढट्ठानं पूरेत्वा अन्तरधायति. तं उदकं हेट्ठा च तिरियञ्च वातो समुट्ठहित्वा घनं करोति परिवटुमं पदुमिनिपत्ते उदकबिन्दुसदिसं. कथं ताव महन्तं उदकरासिं घनं करोतीति चे? विवरसम्पदानतो. तञ्हिस्स तम्हि तम्हि विवरं देति. तं एवं वातेन सम्पिण्डियमानं घनं करियमानं परिक्खयमानं अनुपुब्बेन हेट्ठा ओतरति. ओतिण्णे ओतिण्णे उदके ब्रह्मलोकट्ठाने ब्रह्मलोका, उपरि चतुकामावचरदेवलोकट्ठाने च देवलोका पातुभवन्ति.

पुरिमपथविट्ठानं ओतिण्णे पन बलववाता उप्पज्जन्ति. ते तं पिहितद्वारे धमकरणे ठितउदकमिव निरस्सासं कत्वा रुन्धन्ति. मधुरोदकं परिक्खयं गच्छमानं उपरि रसपथविं समुट्ठापेति. सा वण्णसम्पन्ना चेव होति गन्धरससम्पन्ना च निरुदकपायासस्स उपरि पटलं विय.

तदा च आभस्सरब्रह्मलोके पठमतराभिनिब्बत्ता सत्ता आयुक्खया वा पुञ्ञक्खया वा ततो चवित्वा इधूपपज्जन्ति. ते होन्ति सयंपभा अन्तलिक्खचरा. ते अग्गञ्ञसुत्ते (दी. नि. ३.११९) वुत्तनयेन तं रसपथविं सायित्वा तण्हाभिभूता आलुप्पकारकं परिभुञ्जितुं उपक्कमन्ति. अथ नेसं सयंपभा अन्तरधायति, अन्धकारो होति. ते अन्धकारं दिस्वा भायन्ति.

ततो नेसं भयं नासेत्वा सूरभावं जनयन्तं परिपुण्णपण्णासयोजनं सूरियमण्डलं पातुभवति, ते तं दिस्वा ‘‘आलोकं पटिलभिम्हा’’ति हट्ठतुट्ठा हुत्वा ‘‘अम्हाकं भीतानं भयं नासेत्वा सूरभावं जनयन्तो उट्ठितो, तस्मा ‘‘सूरियो होतू’’ति सूरियोत्वेवस्स नामं करोन्ति.

अथ ¶ सूरिये दिवसं आलोकं कत्वा अत्थङ्गते यम्पि आलोकं लभिम्हा, सोपि नो नट्ठोति पुन भीता होन्ति. तेसं एवं होति ‘‘साधु वतस्स सचे अञ्ञं आलोकं लभेय्यामा’’ति. तेसं चित्तं ञत्वा विय एकूनपण्णासयोजनं चन्दमण्डलं पातुभवति. ते तं दिस्वा भिय्योसो मत्ताय हट्ठतुट्ठा हुत्वा ‘‘अम्हाकं छन्दं ञत्वा विय उट्ठितो, तस्मा चन्दो होतू’’ति ¶ चन्दोत्वेवस्स नामं करोन्ति. एवं चन्दिमसूरियेसु पातुभूतेसु नक्खत्तानि तारकरूपानि पातुभवन्ति.

ततो पभुति रत्तिन्दिवा पञ्ञायन्ति, अनुक्कमेन च मासद्धमासउतुसंवच्छरा. चन्दिमसूरियानं पन पातुभूतदिवसेयेव सिनेरुचक्कवाळहिमवन्तपब्बता पातुभवन्ति. ते च खो अपुब्बं अचरिमं फग्गुणपुण्णमदिवसेयेव पातुभवन्ति. कथं? यथा नाम कङ्गुभत्ते पच्चमाने एकप्पहारेनेव पुप्फुळकानि उट्ठहन्ति. एके पदेसा थूपथूपा होन्ति, एके निन्ननिन्ना, एके समसमा. एवमेवं थूपथूपट्ठाने पब्बता होन्ति, निन्ननिन्नट्ठाने समुद्दा, समसमट्ठाने दीपाति.

अथ तेसं सत्तानं रसपथविं परिभुञ्जन्तानं कमेन एकच्चे वण्णवन्तो, एकच्चे दुब्बण्णा होन्ति. तत्थ वण्णवन्तो दुब्बण्णे अतिमञ्ञन्ति. तेसं अतिमानपच्चया सापि रसपथवी अन्तरधायति. भूमिपप्पटको पातुभवति. अथ नेसं तेनेव नयेन सोपि अन्तरधायति. पदालता पातुभवति. तेनेव नयेन सापि अन्तरधायति. अकट्ठपाको सालि पातुभवति अकणो अथुसो सुद्धो सुगन्धो तण्डुलप्फलो.

ततो नेसं भाजनानि उप्पज्जन्ति. ते सालिं भाजने ठपेत्वा पासाणपिट्ठिया ठपेन्ति, सयमेव जालसिखा उट्ठहित्वा तं पचति. सो होति ओदनो सुमनजातिपुप्फसदिसो, न तस्स सूपेन वा ब्यञ्जनेन वा करणीयं अत्थि. यं यं रसं भुञ्जितुकामा होन्ति, तं तं रसोव होति. तेसं तं ओळारिकं आहारं आहरयतं ततो पभुति मुत्तकरीसं सञ्जायति. अथ नेसं तस्स निक्खमनत्थाय वणमुखानि पभिज्जन्ति, पुरिसस्स पुरिसभावो, इत्थियापि इत्थिभावो पातुभवति.

तत्र ¶ सुदं इत्थी पुरिसं, पुरिसो च इत्थिं अतिवेलं उपनिज्झायति. तेसं अतिवेलं उपनिज्झायनपच्चया कामपरिळाहो उप्पज्जति. ततो मेथुनधम्मं पटिसेवन्ति. ते असद्धम्मपटिसेवनपच्चया विञ्ञूहि गरहियमाना विहेठियमाना तस्स असद्धम्मस्स पटिच्छादनहेतु अगारानि करोन्ति. ते अगारं अज्झावसमाना अनुक्कमेन अञ्ञतरस्स अलसजातिकस्स सत्तस्स दिट्ठानुगतिं आपज्जन्ता सन्निधिं करोन्ति. ततो पभुति कणोपि थुसोपि तण्डुलं परियोनन्धति, लायितट्ठानम्पि न पटिविरूहति.

ते ¶ सन्निपतित्वा अनुत्थुनन्ति ‘‘पापका वत भो धम्मा सत्तेसु पातुभूता, मयं हि पुब्बे मनोमया अहुम्हा’’ति अग्गञ्ञसुत्ते (दी. नि. ३.१२८) वुत्तनयेन वित्थारेतब्बं. ततो मरियादं ठपेन्ति. अथ अञ्ञतरो सत्तो अञ्ञस्स भागं अदिन्नं आदियति. तं द्विक्खत्तुं परिभासेत्वा ततियवारे पाणिलेट्टुदण्डेहि पहरन्ति. ते एवं अदिन्नादानगरहमुसावाददण्डादानेसु उप्पन्नेसु सन्निपतित्वा चिन्तयन्ति ‘‘यंनून मयं एकं सत्तं सम्मन्नेय्याम, यो नो सम्मा खीयितब्बं खीयेय्य, गरहितब्बं गरहेय्य, पब्बाजेतब्बं पब्बाजेय्य, मयं पनस्स सालीनं भागं अनुप्पदस्सामा’’ति.

एवं कतसन्निट्ठानेसु पन सत्तेसु इमस्मिं ताव कप्पे अयमेव भगवा बोधिसत्तभूतो तेन समयेन तेसु सत्तेसु अभिरूपतरो च दस्सनीयतरो च महेसक्खतरो च बुद्धिसम्पन्नो पटिबलो निग्गहपग्गहं कातुं. ते तं उपसङ्कमित्वा याचित्वा सम्मन्निंसु. सो तेन महाजनेन सम्मतोति महासम्मतो, खेत्तानं अधिपतीति खत्तियो, धम्मेन समेन परे रञ्जेतीति राजाति तीहि नामेहि पञ्ञायित्थ. यञ्हि लोके अच्छरियट्ठानं, बोधिसत्तोव तत्थ आदिपुरिसोति एवं बोधिसत्तं आदिं कत्वा खत्तियमण्डले सण्ठिते अनुपुब्बेन ब्राह्मणादयोपि वण्णा सण्ठहिंसु.

तत्थ कप्पविनासकमहामेघतो याव जालुपच्छेदो, इदमेकं असङ्ख्येय्यं संवट्टोति वुच्चति.

कप्पविनासकजालुपच्छेदतो ¶ याव कोटिसतसहस्सचक्कवाळपरिपूरको सम्पत्तिमहामेघो, इदं दुतियं असङ्ख्येय्यं संवट्टट्ठायीति वुच्चति.

सम्पत्तिमहामेघतो याव चन्दिमसूरियपातुभावो, इदं ततियं असङ्ख्येय्यं विवट्टोति वुच्चति.

चन्दिमसूरियपातुभावतो याव पुन कप्पविनासकमहामेघो, इदं चतुत्थं असङ्ख्येय्यं विवट्टट्ठायीति वुच्चति. इमानि चत्तारि असङ्ख्येय्यानि एको महाकप्पो होति. एवं ताव अग्गिना विनासो च सण्ठहनञ्च वेदितब्बं.

४०७. यस्मिं पन समये कप्पो उदकेन नस्सति, आदितोव कप्पविनासकमहामेघो उट्ठहित्वाति ¶ पुब्बे वुत्तनयेनेव वित्थारेतब्बं. अयं पन विसेसो, यथा तत्थ दुतियसूरियो, एवमिध कप्पविनासको खारुदकमहामेघो वुट्ठाति. सो आदितो सुखुमं सुखुमं वस्सन्तो अनुक्कमेन महाधाराहि कोटिसतसहस्सचक्कवाळानं पूरेन्तो वस्सति. खारुदकेन फुट्ठफुट्ठा पथवीपब्बतादयो विलीयन्ति, उदकं समन्ततो वातेहि धारियति. पथवितो याव दुतियज्झानभूमिं उदकं गण्हाति. तत्थ तयोपि ब्रह्मलोके विलीयापेत्वा सुभकिण्हे आहच्च तिट्ठति. तं याव अणुमत्तम्पि सङ्खारगतं अत्थि, ताव न वूपसम्मति. उदकानुगतं पन सब्बसङ्खारगतं अभिभवित्वा सहसा वूपसम्मति अन्तरधानं गच्छति. हेट्ठाआकासेन सह उपरिआकासो एको होति महन्धकारोति सब्बं वुत्तसदिसं. केवलं पनिध आभस्सरब्रह्मलोकं आदिं कत्वा लोको पातुभवति. सुभकिण्हतो च चवित्वा आभस्सरट्ठानादीसु सत्ता निब्बत्तन्ति.

तत्थ कप्पविनासकमहामेघतो याव कप्पविनासकुदकूपच्छेदो, इदमेकं असङ्ख्येय्यं. उदकूपच्छेदतो याव सम्पत्तिमहामेघो, इदं दुतियं असङ्ख्येय्यं. सम्पत्तिमहामेघतो…पे… इमानि चत्तारि असङ्ख्येय्यानि एको महाकप्पो होति. एवं उदकेन विनासो च सण्ठहनञ्च वेदितब्बं.

४०८. यस्मिं ¶ समये कप्पो वातेन विनस्सति, आदितोव कप्पविनासकमहामेघो उट्ठहित्वाति पुब्बे वुत्तनयेनेव वित्थारेतब्बं. अयं पन विसेसो, यथा तत्थ दुतियसूरियो, एवमिध कप्पविनासनत्थं वातो समुट्ठाति. सो पठमं थूलरजं उट्ठापेति. ततो सण्हरजं सुखुमवालिकं थूलवालिकं सक्खरपासाणादयोति याव कूटागारमत्ते पासाणे विसमट्ठाने ठितमहारुक्खे च उट्ठापेति. ते पथवितो नभमुग्गता न च पुन पतन्ति. तत्थेव चुण्णविचुण्णा हुत्वा अभावं गच्छन्ति.

अथानुक्कमेन हेट्ठा महापथविया वातो समुट्ठहित्वा पथविं परिवत्तेत्वा उद्धंमूलं कत्वा आकासे खिपति. योजनसतप्पमाणापि पथविप्पदेसा द्वियोजनतियोजनचतुयोजनपञ्चयोजनसतप्पमाणापि भिज्जित्वा वातवेगेन खित्ता आकासेयेव चुण्णविचुण्णा हुत्वा अभावं गच्छन्ति. चक्कवाळपब्बतम्पि सिनेरुपब्बतम्पि वातो उक्खिपित्वा आकासे खिपति. ते अञ्ञमञ्ञं अभिहन्त्वा चुण्णविचुण्णा हुत्वा विनस्सन्ति. एतेनेव उपायेन भुम्मट्ठकविमानानि च आकासट्ठकविमानानि च विनासेन्तो छकामावचरदेवलोके विनासेत्वा कोटिसतसहस्सचक्कवाळानि ¶ विनासेति. तत्थ चक्कवाळा चक्कवाळेहि हिमवन्ता हिमवन्तेहि सिनेरू सिनेरूहि अञ्ञमञ्ञं समागन्त्वा चुण्णविचुण्णा हुत्वा विनस्सन्ति. पथवितो याव ततियज्झानभूमिं वातो गण्हाति. तत्थ तयोपि ब्रह्मलोके विनासेत्वा वेहप्फलं आहच्च तिट्ठति. एवं सब्बसङ्खारगतं विनासेत्वा सयम्पि विनस्सति. हेट्ठाआकासेन सह उपरिआकासो एको होति महन्धकारोति सब्बं वुत्तसदिसं. इध पन सुभकिण्हब्रह्मलोकं आदिं कत्वा लोको पातुभवति. वेहप्फलतो च चवित्वा सुभकिण्हट्ठानादीसु सत्ता निब्बत्तन्ति.

तत्थ कप्पविनासकमहामेघतो याव कप्पविनासकवातूपच्छेदो, इदमेकं असङ्ख्येय्यं. वातूपच्छेदतो याव सम्पत्तिमहामेघो, इदं दुतियं असङ्ख्येय्यं…पे… इमानि चत्तारि असङ्ख्येय्यानि एको महाकप्पो होति. एवं वातेन विनासो च सण्ठहनञ्च वेदितब्बं.

४०९. किंकारणा ¶ एवं लोको विनस्सति? अकुसलमूलकारणा. अकुसलमूलेसु हि उस्सन्नेसु एवं लोको विनस्सति. सो च खो रागे उस्सन्नतरे अग्गिना विनस्सति. दोसे उस्सन्नतरे उदकेन विनस्सति. केचि पन दोसे उस्सन्नतरे अग्गिना. रागे उस्सन्नतरे उदकेनाति वदन्ति. मोहे उस्सन्नतरे वातेन विनस्सति. एवं विनस्सन्तोपि च निरन्तरमेव सत्तवारे अग्गिना विनस्सति. अट्ठमे वारे उदकेन. पुन सत्तवारे अग्गिना. अट्ठमे वारे उदकेनाति एवं अट्ठमे अट्ठमे वारे विनस्सन्तो सत्तक्खत्तुं उदकेन विनस्सित्वा पुन सत्तवारे अग्गिना नस्सति. एत्तावता तेसट्ठि कप्पा अतीता होन्ति. एत्थन्तरे उदकेन नस्सनवारं सम्पत्तम्पि पटिबाहित्वा लद्धोकासो वातो परिपुण्णचतुसट्ठिकप्पायुके सुभकिण्हे विद्धंसेन्तो लोकं विनासेति.

४१०. पुब्बेनिवासं अनुस्सरन्तोपि च कप्पानुस्सरणको भिक्खु एतेसु कप्पेसु अनेकेपि संवट्टकप्पे अनेकेपि विवट्टकप्पे अनेकेपि संवट्टविवट्टकप्पे अनुस्सरति. कथं? ‘‘अमुत्रासि’’न्तिआदिना (दी. नि. १.२४४) नयेन.

तत्थ अमुत्रासिन्ति अमुम्हि संवट्टकप्पे अहं अमुम्हि भवे वा योनिया वा गतिया वा विञ्ञाणट्ठितिया वा सत्तावासे वा सत्तनिकाये वा आसिं. एवंनामोति तिस्सो वा फुस्सो वा. एवंगोत्तोति कच्चानो वा कस्सपो वा. इदमस्स अतीतभवे अत्तनो नामगोत्तानुस्सरणवसेन ¶ वुत्तं. सचे पन तस्मिं काले अत्तनो वण्णसम्पत्तिं वा लूखपणीतजीविकभावं वा सुखदुक्खबहुलतं वा अप्पायुकदीघायुकभावं वा अनुस्सरितुकामो होति, तम्पि अनुस्सरतियेव. तेनाह ‘‘एवंवण्णो…पे… एवमायुपरियन्तो’’ति.

तत्थ एवंवण्णोति ओदातो वा सामो वा. एवमाहारोति सालिमंसोदनाहारो वा पवत्तफलभोजनो वा. एवं सुखदुक्खपटिसंवेदीति अनेकप्पकारेन कायिकचेतसिकानं सामिसनिरामिसादिप्पभेदानं वा सुखदुक्खानं पटिसंवेदी. एवमायुपरियन्तोति एवं वस्ससतपरिमाणायुपरियन्तो वा चतुरासीतिकप्पसतसहस्सायुपरियन्तो वा. सो ततो चुतो अमुत्र उदपादिन्ति सोहं ततो ¶ भवतो योनितो गतितो विञ्ञाणट्ठितितो सत्तावासतो सत्तनिकायतो वा चुतो पुन अमुकस्मिं नाम भवे योनिया गतिया विञ्ञाणट्ठितिया सत्तावासे सत्तनिकाये वा उदपादिं. तत्रापासिन्ति अथ तत्रापि भवे योनिया गतिया विञ्ञाणट्ठितिया सत्तावासे सत्तनिकाये वा पुन अहोसिं. एवंनामोतिआदि वुत्तनयमेव.

अपिच यस्मा अमुत्रासिन्ति इदं अनुपुब्बेन आरोहन्तस्स यावदिच्छकं अनुस्सरणं. सो ततो चुतोति पटिनिवत्तन्तस्स पच्चवेक्खणं, तस्मा ‘‘इधूपपन्नो’’ति इमिस्सा इधूपपत्तिया अनन्तरमेवस्स उपपत्तिट्ठानं सन्धाय ‘‘अमुत्र उदपादि’’न्ति इदं वुत्तन्ति वेदितब्बं. तत्रापासिन्ति एवमादि पनस्स तत्र इमिस्सा उपपत्तिया अनन्तरे उपपत्तिट्ठाने नामगोत्तादीनं अनुस्सरणदस्सनत्थं वुत्तं. सो ततो चुतो इधूपपन्नोति स्वाहं ततो अनन्तरूपपत्तिट्ठानतो चुतो इध असुकस्मिं नाम खत्तियकुले वा ब्राह्मणकुले वा निब्बत्तोति. इतीति एवं. साकारं सउद्देसन्ति नामगोत्तवसेन सउद्देसं, वण्णादिवसेन साकारं. नामगोत्तेन हि सत्तो तिस्सो कस्सपोति उद्दिसीयति. वण्णादीहि सामो ओदातोति नानत्ततो पञ्ञायति. तस्मा नामगोत्तं उद्देसो, इतरे आकारा. अनेकविहितं पुब्बेनिवासमनुस्सरतीति इदं उत्तानत्थमेवाति.

पुब्बेनिवासानुस्सतिञाणकथा निट्ठिता.

चुतूपपातञाणकथा

४११. सत्तानं ¶ चुतूपपातञाणकथाय चुतूपपातञाणायाति (दी. नि. १.२४७) चुतिया च उपपाते च ञाणाय. येन ञाणेन सत्तानं चुति च उपपातो च ञायति, तदत्थं दिब्बचक्खुञाणत्थन्ति वुत्तं होति. चित्तं अभिनीहरति अभिनिन्नामेतीति परिकम्मचित्तं अभिनीहरति चेव अभिनिन्नामेति च. सोति सो कतचित्ताभिनीहारो भिक्खु. दिब्बेनातिआदीसु पन दिब्बसदिसत्ता दिब्बं. देवतानञ्हि सुचरितकम्मनिब्बत्तं पित्तसेम्हरुहिरादीहि अपलिबुद्धं उपक्किलेसविमुत्तताय दूरेपि आरम्मणं सम्पटिच्छनसमत्थं दिब्बं पसादचक्खु होति. इदञ्चापि वीरियभावनाबलनिब्बत्तं ञाणचक्खु ¶ तादिसमेवाति दिब्बसदिसत्ता दिब्बं. दिब्बविहारवसेन पटिलद्धत्ता अत्तना च दिब्बविहारसन्निस्सितत्तापि दिब्बं. आलोकपरिग्गहेन महाजुतिकत्तापि दिब्बं. तिरोकुट्टादिगतरूपदस्सनेन महागतिकत्तापि दिब्बं. तं सब्बं सद्दसत्थानुसारेनेव वेदितब्बं.

दस्सनट्ठेन चक्खु. चक्खुकिच्चकरणेन चक्खुमिवातिपि चक्खु. चुतूपपातदस्सनेन दिट्ठिविसुद्धिहेतुत्ता विसुद्धं. यो हि चुतिमत्तमेव पस्सति, न उपपातं. सो उच्छेददिट्ठिं गण्हाति. यो उपपातमत्तमेव पस्सति, न चुतिं, सो नवसत्तपातुभावदिट्ठिं गण्हाति. यो पन तदुभयं पस्सति, सो यस्मा दुविधम्पि तं दिट्ठिगतं अतिवत्तति. तस्मास्स तंदस्सनं दिट्ठिविसुद्धिहेतु होति. उभयम्पि चेतं बुद्धपुत्ता पस्सन्ति. तेन वुत्तं ‘‘चुतूपपातदस्सनेन दिट्ठिविसुद्धिहेतुत्ता विसुद्ध’’न्ति.

मनुस्सूपचारं अतिक्कमित्वा रूपदस्सनेन अतिक्कन्तमानुसकं, मानुसकं वा मंसचक्खुं अतिक्कन्तत्ता अतिक्कन्तमानुसकन्ति वेदितब्बं. तेन दिब्बेन चक्खुना विसुद्धेन अतिक्कन्तमानुसकेन. सत्ते पस्सतीति मनुस्सानं मंसचक्खुना विय सत्ते ओलोकेति.

चवमाने उपपज्जमानेति एत्थ चुतिक्खणे उपपत्तिक्खणे वा दिब्बचक्खुना दट्ठुं न सक्का. ये पन आसन्नचुतिका इदानि चविस्सन्ति, ते चवमाना. ये च गहितपटिसन्धिका सम्पतिनिब्बत्ताव, ते उपपज्जमानाति अधिप्पेता. ते एवरूपे चवमाने च उपपज्जमाने च पस्सतीति दस्सेति.

हीनेति ¶ मोहनिस्सन्दयुत्तत्ता हीनानं जातिकुलभोगादीनं वसेन हीळिते ओहीळिते ओञ्ञाते अवञ्ञाते. पणीतेति अमोहनिस्सन्दयुत्तत्ता तब्बिपरीते. सुवण्णेति अदोसनिस्सन्दयुत्तत्ता इट्ठकन्तमनापवण्णयुत्ते. दुब्बण्णेति दोसनिस्सन्दयुत्तत्ता अनिट्ठाकन्तअमनापवण्णयुत्ते. अनभिरूपे विरूपेतिपि अत्थो. सुगतेति सुगतिगते. अलोभनिस्सन्दयुत्तत्ता वा अड्ढे महद्धने. दुग्गतेति दुग्गतिगते. लोभनिस्सन्दयुत्तत्ता वा दलिद्दे अप्पन्नपाने.

यथाकम्मुपगेति यं यं कम्मं उपचितं, तेन तेन उपगते. तत्थ पुरिमेहि चवमानेतिआदीहि दिब्बचक्खुकिच्चं वुत्तं. इमिना पन पदेन यथाकम्मुपगञाणकिच्चं. तस्स च ञाणस्स अयमुप्पत्तिक्कमो, इध भिक्खु हेट्ठा निरयाभिमुखं ¶ आलोकं वड्ढेत्वा नेरयिके सत्ते पस्सति महादुक्खमनुभवमाने. तं दस्सनं दिब्बचक्खुकिच्चमेव. सो एवं मनसिकरोति ‘‘किं नु खो कम्मं कत्वा इमे सत्ता एतं दुक्खं अनुभवन्ती’’ति. अथस्स इदं नाम कत्वाति तंकम्मारम्मणं ञाणं उप्पज्जति. तथा उपरिदेवलोकाभिमुखं आलोकं वड्ढेत्वा नन्दनवनमिस्सकवनफारुसकवनादीसु सत्ते पस्सति महासम्पत्तिं अनुभवमाने. तम्पि दस्सनं दिब्बचक्खुकिच्चमेव. सो एवं मनसिकरोति ‘‘किं नु खो कम्मं कत्वा इमे सत्ता एतं सम्पत्तिं अनुभवन्ती’’ति. अथस्स इदं नाम कत्वाति तंकम्मारम्मणं ञाणं उप्पज्जति. इदं यथाकम्मुपगञाणं नाम. इमस्स विसुं परिकम्मं नाम नत्थि, यथा चिमस्स, एवं अनागतंसञाणस्सापि. दिब्बचक्खुपादकानेव हि इमानि दिब्बचक्खुना सहेव इज्झन्ति.

कायदुच्चरितेनातिआदीसु दुट्ठु चरितं, दुट्ठं वा चरितं किलेसपूतिकत्ताति दुच्चरितं. कायेन दुच्चरितं, कायतो वा उप्पन्नं दुच्चरितन्ति कायदुच्चरितं, इतरेसुपि एसेव नयो. समन्नागताति समङ्गीभूता. अरियानं उपवादकाति बुद्धपच्चेकबुद्धसावकानं अरियानं अन्तमसो गिहिसोतापन्नानम्पि अनत्थकामा हुत्वा अन्तिमवत्थुना वा गुणपरिधंसनेन वा उपवादका अक्कोसका गरहकाति वुत्तं होति. तत्थ नत्थि इमेसं समणधम्मो, अस्समणा एतेति वदन्तो अन्तिमवत्थुना उपवदति. नत्थि इमेसं झानं वा विमोक्खो वा मग्गो वा फलं वातिआदीनि वदन्तो गुणपरिधंसनवसेन उपवदतीति वेदितब्बो. सो च जानं वा उपवदेय्य अजानं वा, उभयथापि अरियूपवादोव होति. भारियं कम्मं आनन्तरियसदिसं सग्गावरणञ्च मग्गावरणञ्च, सतेकिच्छं पन होति. तस्स आविभावत्थं इदं वत्थु वेदितब्बं.

अञ्ञतरस्मिं ¶ किर गामे एको थेरो च दहरभिक्खु च पिण्डाय चरन्ति. ते पठमघरेयेव उळुङ्कमत्तं उण्हयागुं लभिंसु. थेरस्स च कुच्छिवातो रुज्झति. सो चिन्तेसि ‘‘अयं यागु मय्हं सप्पाया, याव न सीतला होति, ताव नं पिवामी’’ति. सो मनुस्सेहि उम्मारत्थाय आहटे दारुखण्डे निसीदित्वा पिवि. इतरो तं जिगुच्छन्तो ‘‘अतिखुद्दाभिभूतो महल्लको, अम्हाकं लज्जितब्बकं अकासी’’ति आह. थेरो ¶ गामे चरित्वा विहारं गन्त्वा दहरभिक्खुं आह ‘‘अत्थि ते, आवुसो, इमस्मिं सासने पतिट्ठा’’ति? आम, भन्ते, सोतापन्नो अहन्ति. तेन हावुसो, उपरिमग्गत्थाय वायामं मा अकासि. खीणासवो तया उपवदितोति. सो तं खमापेसि. तेनस्स तं कम्मं पाकतिकं अहोसि.

तस्मा यो अञ्ञोपि अरियं उपवदति, तेन गन्त्वा सचे अत्तना वुड्ढतरो होति, उक्कुटिकं निसीदित्वा ‘‘अहं आयस्मन्तं इदञ्चिदञ्च अवचं, तं मे खमाही’’ति खमापेतब्बो. सचे नवकतरो होति, वन्दित्वा उक्कुटिकं निसीदित्वा अञ्जलिं पग्गहेत्वा ‘‘अहं, भन्ते, तुम्हे इदञ्चिदञ्च अवचं, तं मे खमथा’’ति खमापेतब्बो. सचे दिसापक्कन्तो होति, सयं वा गन्त्वा सद्धिविहारिकादिके वा पेसेत्वा खमापेतब्बो.

सचे च नापि गन्तुं, न पेसेतुं सक्का होति, ये तस्मिं विहारे भिक्खू वसन्ति, तेसं सन्तिकं गन्त्वा सचे नवकतरा होन्ति, उक्कुटिकं निसीदित्वा, सचे वुड्ढतरा, वुड्ढे वुत्तनयेनेव पटिपज्जित्वा ‘‘अहं, भन्ते, असुकं नाम आयस्मन्तं इदञ्चिदञ्च अवचं, खमतु मे सो आयस्मा’’ति वत्वा खमापेतब्बं. सम्मुखा अखमन्तेपि एतदेव कत्तब्बं.

सचे एकचारिकभिक्खु होति, नेवस्स वसनट्ठानं, न गतट्ठानं पञ्ञायति, एकस्स पण्डितस्स भिक्खुनो सन्तिकं गन्त्वा ‘‘अहं, भन्ते, असुकं नाम आयस्मन्तं इदञ्चिदञ्च अवचं, तं मे अनुस्सरतो विप्पटिसारो होति, किं करोमी’’ति वत्तब्बं. सो वक्खति ‘‘तुम्हे मा चिन्तयित्थ, थेरो तुम्हाकं खमति, चित्तं वूपसमेथा’’ति. तेनापि अरियस्स गतदिसाभिमुखेन अञ्जलिं पग्गहेत्वा खमतूति वत्तब्बं. सचे सो परिनिब्बुतो होति, परिनिब्बुतमञ्चट्ठानं गन्त्वा यावसिवथिकं गन्त्वापि खमापेतब्बं. एवं कते नेव सग्गावरणं, न मग्गावरणं होति, पाकतिकमेव होतीति.

मिच्छादिट्ठिकाति ¶ विपरीतदस्सना. मिच्छादिट्ठिकम्मसमादानाति मिच्छादिट्ठिवसेन समादिन्ननानाविधकम्मा, ये च मिच्छादिट्ठिमूलकेसु कायकम्मादीसु अञ्ञेपि समादपेन्ति. एत्थ च वचीदुच्चरितग्गहणेनेव अरियूपवादे मनोदुच्चरितग्गहणेन च मिच्छादिट्ठिया सङ्गहितायपि इमेसं द्विन्नं पुन वचनं ¶ महासावज्जभावदस्सनत्थन्ति वेदितब्बं. महासावज्जो हि अरियूपवादो, आनन्तरियसदिसत्ता. वुत्तम्पि चेतं ‘‘सेय्यथापि, सारिपुत्त, भिक्खु सीलसम्पन्नो समाधिसम्पन्नो पञ्ञासम्पन्नो दिट्ठेव धम्मे अञ्ञं आराधेय्य, एवंसम्पदमिदं, सारिपुत्त, वदामि तं वाचं अप्पहाय तं चित्तं अप्पहाय तं दिट्ठिं अप्पटिनिस्सज्जित्वा यथाभतं निक्खित्तो, एवं निरये’’ति (म. नि. १.१४९). मिच्छादिट्ठितो च महासावज्जतरं नाम अञ्ञं नत्थि. यथाह ‘‘नाहं, भिक्खवे, अञ्ञं एकधम्मम्पि समनुपस्सामि, यं एवं महासावज्जं, यथयिदं, भिक्खवे, मिच्छादिट्ठि. मिच्छादिट्ठिपरमानि, भिक्खवे, वज्जानी’’ति (अ. नि. १.३१०).

कायस्स भेदाति उपादिण्णक्खन्धपरिच्चागा. परम्मरणाति तदनन्तरं अभिनिब्बत्तिक्खन्धग्गहणे. अथ वा कायस्स भेदाति जीवितिन्द्रियस्स उपच्छेदा. परम्मरणाति चुतिचित्ततो उद्धं. अपायन्ति एवमादि सब्बं निरयवेवचनमेव.

निरयो हि सग्गमोक्खहेतुभूता पुञ्ञसम्मता अया अपेतत्ता, सुखानं वा आयस्स अभावा अपायो. दुक्खस्स गति पटिसरणन्ति दुग्गति, दोसबहुलताय वा दुट्ठेन कम्मुना निब्बत्ता गतीति दुग्गति. विवसा निपतन्ति एत्थ दुक्कटकारिनोति विनिपातो. विनस्सन्ता वा एत्थ पतन्ति संभिज्जमानङ्गपच्चङ्गातिपि विनिपातो. नत्थि एत्थ अस्सादसञ्ञितो अयोति निरयो.

अथ वा अपायग्गहणेन तिरच्छानयोनिं दीपेति. तिरच्छानयोनि हि अपायो सुगतितो अपेतत्ता, न दुग्गति महेसक्खानं नागराजादीनं सम्भवतो. दुग्गतिग्गहणेन पेत्तिविसयं. सो हि अपायो चेव दुग्गति च, सुगतितो अपेतत्ता दुक्खस्स च गतिभूतत्ता. न तु विनिपातो असुरसदिसं अविनिपतितत्ता. विनिपातग्गहणेन असुरकायं. सो हि यथावुत्तेन अत्थेन अपायो चेव दुग्गति च सब्बसमुस्सयेहि च विनिपतितत्ता विनिपातोति वुच्चति. निरयग्गहणेन ¶ अवीचिआदिअनेकप्पकारं निरयमेवाति. उपपन्नाति उपगता, तत्थ अभिनिब्बत्ताति अधिप्पायो. वुत्तविपरियायेन सुक्कपक्खो वेदितब्बो.

अयं ¶ पन विसेसो, तत्थ सुगतिग्गहणेन मनुस्सगतिपि सङ्गय्हति. सग्गग्गहणेन देवगतियेव. तत्थ सुन्दरा गतीति सुगति. रूपादीहि विसयेहि सुट्ठु अग्गोति सग्गो. सो सब्बोपि लुज्जनपलुज्जनट्ठेन लोकोति अयं वचनत्थो.

‘‘इति दिब्बेन चक्खुना’’तिआदि सब्बं निगमनवचनं. एवं दिब्बेन चक्खुना…पे… पस्सतीति अयमेत्थ सङ्खेपत्थो.

४१२. एवं पस्सितुकामेन पन आदिकम्मिकेन कुलपुत्तेन कसिणारम्मणं अभिञ्ञापादकज्झानं सब्बाकारेन अभिनीहारक्खमं कत्वा ‘‘तेजोकसिणं, ओदातकसिणं, आलोककसिण’’न्ति इमेसु तीसु कसिणेसु अञ्ञतरं आसन्नं कातब्बं. उपचारज्झानगोचरं कत्वा वड्ढेत्वा ठपेतब्बं. न तत्थ अप्पना उप्पादेतब्बाति अधिप्पायो. सचे हि उप्पादेति, पादकज्झाननिस्सयं होति, न परिकम्मनिस्सयं. इमेसु च पन तीसु आलोककसिणंयेव सेट्ठतरं. तस्मा तं वा इतरेसं वा अञ्ञतरं कसिणनिद्देसे वुत्तनयेन उप्पादेत्वा उपचारभूमियंयेव ठत्वा वड्ढेतब्बं. वड्ढनानयोपि चस्स तत्थ वुत्तनयेनेव वेदितब्बो.

वड्ढितट्ठानस्स अन्तोयेव रूपगतं पस्सितब्बं. रूपगतं पस्सतो पनस्स परिकम्मस्स वारो अतिक्कमति. ततो आलोको अन्तरधायति. तस्मिं अन्तरहिते रूपगतम्पि न दिस्सति. अथानेन पुनप्पुनं पादकज्झानमेव पविसित्वा ततो वुट्ठाय आलोको फरितब्बो. एवं अनुक्कमेन आलोको थामगतो होतीति एत्थ आलोको होतूति यत्तकं ठानं परिच्छिन्दति, तत्थ आलोको तिट्ठतियेव. दिवसम्पि निसीदित्वा पस्सतो रूपदस्सनं होति. रत्तिं तिणुक्काय मग्गपटिपन्नो चेत्थ पुरिसो ओपम्मं.

एको किर रत्तिं तिणुक्काय मग्गं पटिपज्जि. तस्स सा तिणुक्का विज्झायि. अथस्स समविसमानि न पञ्ञायिंसु. सो तं तिणुक्कं भूमियं घंसित्वा तिणुक्का पुन उज्जालेसि. सा पज्जलित्वा पुरिमालोकतो महन्ततरं आलोकं अकासि. एवं पुनप्पुनं विज्झातं ¶ उज्जालयतो कमेन सूरियो उट्ठासि. सूरिये उट्ठिते उक्काय कम्मं नत्थीति तं छड्डेत्वा दिवसम्पि अगमासि. तत्थ उक्कालोको विय परिकम्मकाले कसिणालोको. उक्काय ¶ विज्झाताय समविसमानं अदस्सनं विय रूपगतं पस्सतो परिकम्मस्स वारातिक्कमेन आलोके अन्तरहिते रूपगतानं अदस्सनं. उक्काय घंसनं विय पुनप्पुनं पवेसनं. उक्काय पुरिमालोकतो महन्ततरालोककरणं विय पुन परिकम्मं करोतो बलवतरालोकफरणं. सूरियुट्ठानं विय थामगतालोकस्स यथापरिच्छेदेन ठानं. तिणुक्कं छड्डेत्वा दिवसम्पि गमनं विय परित्तालोकं छड्डेत्वा थामगतेनालोकेन दिवसम्पि रूपदस्सनं.

तत्थ यदा तस्स भिक्खुनो मंसचक्खुस्स अनापाथगतं अन्तोकुच्छिगतं हदयवत्थुनिस्सितं हेट्ठापथवीतलनिस्सितं तिरोकुट्टपब्बतपाकारगतं परचक्कवाळगतन्ति इदं रूपं ञाणचक्खुस्स आपाथं आगच्छति, मंसचक्खुना दिस्समानं विय होति, तदा दिब्बचक्खु उप्पन्नं होतीति वेदितब्बं. तदेव चेत्थ रूपदस्सनसमत्थं, न पुब्बभागचित्तानि.

तं पनेतं पुथुज्जनस्स परिबन्धो होति. कस्मा? सो हि यस्मा यत्थ यत्थ आलोको होतूति अधिट्ठाति, तं तं पथवीसमुद्दपब्बते विनिविज्झित्वापि एकालोकं होति, अथस्स तत्थ भयानकानि यक्खरक्खसादिरूपानि पस्सतो भयं उप्पज्जति. येन चित्तविक्खेपं पत्वा झानविब्भन्तको होति, तस्मा रूपदस्सने अप्पमत्तेन भवितब्बं.

तत्रायं दिब्बचक्खुनो उप्पत्तिक्कमो. वुत्तप्पकारमेतं रूपमारम्मणं कत्वा मनोद्वारावज्जने उप्पज्जित्वा निरुद्धे तदेव रूपं आरम्मणं कत्वा चत्तारि पञ्च वा जवनानि उप्पज्जन्तीति सब्बं पुरिमनयेनेव वेदितब्बं. इधापि पुब्बभागचित्तानि सवितक्कसविचारानि कामावचरानि. परियोसाने अत्थसाधकचित्तं चतुत्थज्झानिकं रूपावचरं. तेन सहजातं ञाणं सत्तानं चुतूपपाते ञाणन्तिपि दिब्बचक्खुञाणन्तिपि वुच्चतीति.

चुतूपपातञाणकथा निट्ठिता.

पकिण्णककथा

४१३.

इति ¶ पञ्चक्खन्धविदू, पञ्च अभिञ्ञा अवोच या नाथो;

ता ञत्वा तासु अयं, पकिण्णककथापि विञ्ञेय्या.

एतासु ¶ हि यदेतं चुतूपपातञाणसङ्खातं दिब्बचक्खु, तस्स अनागतंसञाणञ्च यथाकम्मुपगञाणञ्चाति द्वेपि परिभण्डञाणानि होन्ति. इति इमानि च द्वे इद्धिविधादीनि च पञ्चाति सत्त अभिञ्ञाञाणानि इधागतानि. इदानि तेसं आरम्मणविभागे असम्मोहत्थं –

आरम्मणत्तिका वुत्ता, ये चत्तारो महेसिना;

सत्तन्नमपि ञाणानं, पवत्तिं तेसु दीपये.

तत्रायं दीपना. चत्तारो हि आरम्मणत्तिका महेसिना वुत्ता. कतमे चत्तारो? परित्तारम्मणत्तिको, मग्गारम्मणत्तिको, अतीतारम्मणत्तिको, अज्झत्तारम्मणत्तिकोति (ध. स. तिकमातिका १३, १६, १९, २१).

४१४. तत्थ इद्धिविधञाणं परित्तमहग्गतअतीतानागतपच्चुप्पन्नअज्झत्तबहिद्धारम्मणवसेन सत्तसु आरम्मणेसु पवत्तति. कथं? तञ्हि यदा कायं चित्तसन्निस्सितं कत्वा अदिस्समानेन कायेन गन्तुकामो चित्तवसेन कायं परिणामेति, महग्गतचित्ते समोदहति समारोपेति, तदा उपयोगलद्धं आरम्मणं होतीति कत्वा रूपकायारम्मणतो परित्तारम्मणं होति. यदा चित्तं कायसन्निस्सितं कत्वा दिस्समानेन कायेन गन्तुकामो कायवसेन चित्तं परिणामेति, पादकज्झानचित्तं रूपकाये समोदहति समारोपेति, तदा उपयोगलद्धं आरम्मणं होतीति कत्वा महग्गतचित्तारम्मणतो महग्गतारम्मणं होति.

यस्मा पन तदेव चित्तं अतीतं निरुद्धं आरम्मणं करोति, तस्मा अतीतारम्मणं होति. महाधातुनिधाने महाकस्सपत्थेरादीनं विय अनागतं अधिट्ठहन्तानं अनागतारम्मणं होति. महाकस्सपत्थेरो किर महाधातुनिधानं करोन्तो ‘‘अनागते अट्ठारसवस्साधिकानि द्वेवस्ससतानि इमे गन्धा मा सुस्सिंसु, पुप्फानि मा मिलायिंसु, दीपा मा निब्बायिंसू’’ति ¶ (ध. स. अट्ठ. १४३४) अधिट्ठहि. सब्बं तथेव अहोसि. अस्सगुत्तत्थेरो वत्तनियसेनासने भिक्खुसङ्घं सुक्खभत्तं भुञ्जमानं दिस्वा उदकसोण्डिं दिवसे दिवसे पुरेभत्ते दधिरसं होतूति अधिट्ठासि. पुरेभत्ते गहितं दधिरसं होति. पच्छाभत्ते पाकतिकउदकमेव (ध. स. अट्ठ. १४३४). कायं पन चित्तसन्निस्सितं ¶ कत्वा अदिस्समानेन कायेन गमनकाले पच्चुप्पन्नारम्मणं होति.

कायवसेन चित्तं, चित्तवसेन वा कायं परिणामनकाले अत्तनो कुमारकवण्णादिनिम्मानकाले च सकायचित्तानं आरम्मणकरणतो अज्झत्तारम्मणं होति. बहिद्धा हत्थिअस्सादिदस्सनकाले पन बहिद्धारम्मणन्ति एवं ताव इद्धिविधञाणस्स सत्तसु आरम्मणेसु पवत्ति वेदितब्बा.

४१५. दिब्बसोतधातुञाणं परित्तपच्चुप्पन्नअज्झत्तबहिद्धारम्मणवसेन चतूसु आरम्मणेसु पवत्तति. कथं? तञ्हि यस्मा सद्दं आरम्मणं करोति, सद्दो च परित्तो, तस्मा परित्तारम्मणं होति. विज्जमानंयेव पन सद्दं आरम्मणं कत्वा पवत्तनतो पच्चुप्पन्नारम्मणं होति. तं अत्तनो कुच्छिसद्दसवनकाले अज्झत्तारम्मणं. परेसं सद्दसवनकाले बहिद्धारम्मणन्ति एवं दिब्बसोतधातुञाणस्स चतूसु आरम्मणेसु पवत्ति वेदितब्बा.

४१६. चेतोपरियञाणं परित्तमहग्गतअप्पमाणमग्गअतीतानागतपच्चुप्पन्नबहिद्धारम्मणवसेन अट्ठसु आरम्मणेसु पवत्तति. कथं? तञ्हि परेसं कामावचरचित्तजाननकाले परित्तारम्मणं होति. रूपावचरअरूपावचरचित्तजाननकाले महग्गतारम्मणं होति. मग्गफलजाननकाले अप्पमाणारम्मणं होति.

एत्थ च पुथुज्जनो सोतापन्नस्स चित्तं न जानाति. सोतापन्नो वा सकदागामिस्साति एवं याव अरहतो नेतब्बं. अरहा पन सब्बेसं चित्तं जानाति. अञ्ञोपि च उपरिमो हेट्ठिमस्साति अयं विसेसो वेदितब्बो. मग्गचित्तारम्मणकाले मग्गारम्मणं होति. यदा पन अतीते सत्तदिवसब्भन्तरे च अनागते सत्तदिवसब्भन्तरे च परेसं चित्तं जानाति, तदा अतीतारम्मणं अनागतारम्मणञ्च होति.

कथं ¶ पच्चुप्पन्नारम्मणं होति. पच्चुप्पन्नं नाम तिविधं – खणपच्चुप्पन्नं, सन्ततिपच्चुप्पन्नं, अद्धापच्चुप्पन्नञ्च. तत्थ उप्पादट्ठितिभङ्गप्पत्तं खणपच्चुप्पन्नं. एकद्वेसन्ततिवारपरियापन्नं सन्ततिपच्चुप्पन्नं. तत्थ अन्धकारे निसीदित्वा आलोकट्ठानं गतस्स न ताव आरम्मणं पाकटं होति, याव पन तं पाकटं होति ¶ , एत्थन्तरे एकद्वेसन्ततिवारा वेदितब्बा. आलोकट्ठाने विचरित्वा ओवरकं पविट्ठस्सापि न ताव सहसा रूपं पाकटं होति, याव पन तं पाकटं होति, एत्थन्तरे एकद्वेसन्ततिवारा वेदितब्बा. दूरे ठत्वा पन रजकानं हत्थविकारं, घण्डिभेरीआकोटनविकारञ्च दिस्वापि न ताव सद्दं सुणाति, याव पन तं सुणाति, एतस्मिम्पि अन्तरे एकद्वेसन्ततिवारा वेदितब्बा. एवं ताव मज्झिमभाणका.

संयुत्तभाणका पन रूपसन्तति अरूपसन्ततीति द्वे सन्ततियो वत्वा उदकं अक्कमित्वा गतस्स याव तीरे अक्कन्तउदकलेखा न विप्पसीदति, अद्धानतो आगतस्स याव काये उसुमभावो न वूपसम्मति, आतपा आगन्त्वा गब्भं पविट्ठस्स याव अन्धकारभावो न विगच्छति, अन्तोगब्भे कम्मट्ठानं मनसि करित्वा दिवा वातपानं विवरित्वा ओलोकेन्तस्स याव अक्खीनं फन्दनभावो न वूपसम्मति, अयं रूपसन्तति नाम. द्वे तयो जवनवारा अरूपसन्तति नामाति वत्वा तदुभयम्पि सन्ततिपच्चुप्पन्नं नामाति वदन्ति.

एकभवपरिच्छिन्नं पन अद्धापच्चुप्पन्नं नाम. यं सन्धाय भद्देकरत्तसुत्ते ‘‘यो चावुसो, मनो ये च धम्मा उभयमेतं पच्चुप्पन्नं, तस्मिं चे पच्चुप्पन्ने छन्दरागप्पटिबद्धं होति विञ्ञाणं, छन्दरागप्पटिबद्धत्ता विञ्ञाणस्स तदभिनन्दति, तदभिनन्दन्तो पच्चुप्पन्नेसु धम्मेसु संहीरती’’ति (म. नि. ३.२८४) वुत्तं. सन्ततिपच्चुप्पन्नञ्चेत्थ अट्ठकथासु आगतं. अद्धापच्चुप्पन्नं सुत्ते.

तत्थ केचि खणपच्चुप्पन्नं चित्तं चेतोपरियञाणस्स आरम्मणं होतीति वदन्ति. किं कारणा? यस्मा इद्धिमतो च परस्स च एकक्खणे चित्तं उप्पज्जतीति. इदञ्च नेसं ओपम्मं, यथा आकासे खित्ते पुप्फमुट्ठिम्हि अवस्सं एकं पुप्फं एकस्स वण्टेन वण्टं पटिविज्झति, एवं परस्स चित्तं जानिस्सामीति रासिवसेन महाजनस्स चित्ते आवज्जिते अवस्सं एकस्स चित्तं एकेन चित्तेन उप्पादक्खणे वा ठितिक्खणे वा भङ्गक्खणे वा पटिविज्झतीति. तं पन वस्ससतम्पि वस्ससहस्सम्पि आवज्जन्तो येन च चित्तेन आवज्जति ¶ , येन च जानाति. तेसं द्विन्नं सहठानाभावतो आवज्जनजवनानञ्च अनिट्ठट्ठाने नानारम्मणभावप्पत्तिदोसतो अयुत्तन्ति अट्ठकथासु पटिक्खित्तं.

सन्ततिपच्चुप्पन्नं ¶ पन अद्धापच्चुप्पन्नञ्च आरम्मणं होतीति वेदितब्बं. तत्थ यं वत्तमानजवनवीथितो अतीतानागतवसेन द्वित्तिजवनवीथिपरिमाणे काले परस्स चित्तं, तं सब्बम्पि सन्ततिपच्चुप्पन्नं नाम. ‘‘अद्धापच्चुप्पन्नं पन जवनवारेन दीपेतब्ब’’न्ति संयुत्तट्ठकथायं वुत्तं. तं सुट्ठु वुत्तं.

तत्रायं दीपना, इद्धिमा परस्स चित्तं जानितुकामो आवज्जति, आवज्जनं खणपच्चुप्पन्नं आरम्मणं कत्वा तेनेव सह निरुज्झति. ततो चत्तारि पञ्च वा जवनानि. येसं पच्छिमं इद्धिचित्तं, सेसानि कामावचरानि, तेसं सब्बेसम्पि तदेव निरुद्धं चित्तमारम्मणं होति, न च तानि नानारम्मणानि होन्ति, अद्धावसेन पच्चुप्पन्नारम्मणत्ता. एकारम्मणत्तेपि च इद्धिचित्तमेव परस्स चित्तं जानाति, न इतरानि. यथा चक्खुद्वारे चक्खुविञ्ञाणमेव रूपं पस्सति, न इतरानीति. इति इदं सन्ततिपच्चुप्पन्नस्स चेव अद्धापच्चुप्पन्नस्स च वसेन पच्चुप्पन्नारम्मणं होति. यस्मा वा सन्ततिपच्चुप्पन्नम्पि अद्धापच्चुप्पन्नेयेव पतति, तस्मा अद्धापच्चुप्पन्नवसेनेवेतं पच्चुप्पन्नारम्मणन्ति वेदितब्बं. परस्स चित्तारम्मणत्तायेव पन बहिद्धारम्मणं होतीति एवं चेतोपरियञाणस्स अट्ठसु आरम्मणेसु पवत्ति वेदितब्बा.

४१७. पुब्बेनिवासञाणं परित्तमहग्गतअप्पमाणमग्गअतीतअज्झत्तबहिद्धानवत्तब्बारम्मणवसेन अट्ठसु आरम्मणेसु पवत्तति. कथं? तञ्हि कामावचरक्खन्धानुस्सरणकाले परित्तारम्मणं होति. रूपावचरारूपावचरक्खन्धानुस्सरणकाले महग्गतारम्मणं. अतीते अत्तना परेहि वा भावितमग्गं सच्छिकतफलञ्च अनुस्सरणकाले अप्पमाणारम्मणं. भावितमग्गमेव अनुस्सरणकाले मग्गारम्मणं. नियमतो पनेतं अतीतारम्मणमेव.

तत्थ किञ्चापि चेतोपरियञाणयथाकम्मुपगञाणानिपि अतीतारम्मणानि होन्ति, अथ खो तेसं चेतोपरियञाणस्स सत्तदिवसब्भन्तरातीतं चित्तमेव आरम्मणं. तञ्हि अञ्ञं खन्धं वा खन्धपटिबद्धं वा न जानाति. मग्गसम्पयुत्तचित्तारम्मणत्ता पन परियायतो मग्गारम्मणन्ति ¶ वुत्तं. यथाकम्मुपगञाणस्स च अतीतं चेतनामत्तमेव आरम्मणं. पुब्बेनिवासञाणस्स पन अतीता खन्धा खन्धपटिबद्धञ्च किञ्चि अनारम्मणं नाम नत्थि ¶ . तञ्हि अतीतक्खन्धखन्धपटिबद्धेसु धम्मेसु सब्बञ्ञुतञ्ञाणगतिकं होतीति अयं विसेसो वेदितब्बो. अयमेत्थ अट्ठकथानयो. यस्मा पन ‘‘कुसला खन्धा इद्धिविधञाणस्स चेतोपरियञाणस्स पुब्बेनिवासानुस्सतिञाणस्स यथाकम्मुपगञाणस्स अनागतंसञाणस्स आरम्मणपच्चयेन पच्चयो’’ति (पट्ठा. १.१.४०४) पट्ठाने वुत्तं. तस्मा चत्तारोपि खन्धा चेतोपरियञाणयथाकम्मुपगञाणानं आरम्मणा होन्ति. तत्रापि यथाकम्मुपगञाणस्स कुसलाकुसला एवाति.

अत्तनो खन्धानुस्सरणकाले पनेतं अज्झत्तारम्मणं. परस्स खन्धानुस्सरणकाले बहिद्धारम्मणं. ‘‘अतीते विपस्सी भगवा अहोसि. तस्स माता बन्धुमती, पिता बन्धुमा’’तिआदिना (दी. नि. २.१२) नयेन नामगोत्तपथवीनिमित्तादिअनुस्सरणकाले नवत्तब्बारम्मणं होति. नामगोत्तन्ति चेत्थ खन्धूपनिबन्धो सम्मुतिसिद्धो ब्यञ्जनत्थो दट्ठब्बो, न ब्यञ्जनं. ब्यञ्जनञ्हि सद्दायतनसङ्गहितत्ता परित्तं होति. यथाह ‘‘निरुत्तिपटिसम्भिदा परित्तारम्मणा’’ति (विभ. ७४९). अयमेत्थ अम्हाकं खन्ति. एवं पुब्बेनिवासञाणस्स अट्ठसु आरम्मणेसु पवत्ति वेदितब्बा.

४१८. दिब्बचक्खुञाणं परित्तपच्चुप्पन्नअज्झत्तबहिद्धारम्मणवसेन चतूसु आरम्मणेसु पवत्तति. कथं? तञ्हि यस्मा रूपं आरम्मणं करोति, रूपञ्च परित्तं, तस्मा परित्तारम्मणं होति. विज्जमानेयेव च रूपे पवत्तत्ता पच्चुप्पन्नारम्मणं. अत्तनो कुच्छिगतादिरूपदस्सनकाले अज्झत्तारम्मणं. परस्स रूपदस्सनकाले बहिद्धारम्मणन्ति एवं दिब्बचक्खुञाणस्स चतूसु आरम्मणेसु पवत्ति वेदितब्बा.

४१९. अनागतंसञाणं परित्तमहग्गतअप्पमाणमग्गअनागतअज्झत्तबहिद्धानवत्तब्बारम्मणवसेन अट्ठसु आरम्मणेसु पवत्तति. कथं? तञ्हि ‘‘अयं अनागते कामावचरे निब्बत्तिस्सती’’ति जाननकाले परित्तारम्मणं होति. ‘‘रूपावचरे अरूपावचरे वा निब्बत्तिस्सती’’ति जाननकाले महग्गतारम्मणं. ‘‘मग्गं भावेस्सति, फलं सच्छिकरिस्सती’’ति जाननकाले ¶ अप्पमाणारम्मणं. ‘‘मग्गं भावेस्सति’’च्चेव जाननकाले मग्गारम्मणं. नियमतो पन तं अनागतारम्मणमेव.

तत्थ ¶ किञ्चापि चेतोपरियञाणम्पि अनागतारम्मणं होति, अथ खो तस्स सत्तदिवसब्भन्तरानागतं चित्तमेव आरम्मणं. तञ्हि अञ्ञं खन्धं वा खन्धपटिबद्धं वा न जानाति. अनागतंसञाणस्स पुब्बेनिवासञाणे वुत्तनयेन अनागते अनारम्मणं नाम नत्थि. ‘‘अहं अमुत्र निब्बत्तिस्सामी’’ति जाननकाले अज्झत्तारम्मणं. ‘‘असुको अमुत्र निब्बत्तिस्सती’’ति जाननकाले बहिद्धारम्मणं. ‘‘अनागते मेत्तेय्यो भगवा उप्पज्जिस्सति (दी. नि. ३.१०७). सुब्रह्मा नामस्स ब्राह्मणो पिता भविस्सति. ब्रह्मवती नाम ब्राह्मणी माता’’तिआदिना पन नयेन नामगोत्तजाननकाले पुब्बेनिवासञाणे वुत्तनयेनेव न वत्तब्बारम्मणं होतीति एवं अनागतंसञाणस्स अट्ठसु आरम्मणेसु पवत्ति वेदितब्बा.

४२०. यथाकम्मुपगञाणं परित्तमहग्गतअतीतअज्झत्तबहिद्धारम्मणवसेन पञ्चसु आरम्मणेसु पवत्तति. कथं? तञ्हि कामावचरकम्मजाननकाले परित्तारम्मणं होति. रूपावचरारूपावचरकम्मजाननकाले महग्गतारम्मणं. अतीतमेव जानातीति अतीतारम्मणं. अत्तनो कम्मं जाननकाले अज्झत्तारम्मणं. परस्स कम्मं जाननकाले बहिद्धारम्मणं होति. एवं यथाकम्मुपगञाणस्स पञ्चसु आरम्मणेसु पवत्ति वेदितब्बा. यञ्चेत्थ अज्झत्तारम्मणञ्चेव बहिद्धारम्मणञ्चाति वुत्तं, तं कालेन अज्झत्तं कालेन बहिद्धा जाननकाले अज्झत्तबहिद्धारम्मणम्पि होतियेवाति.

इति साधुजनपामोज्जत्थाय कते विसुद्धिमग्गे

अभिञ्ञानिद्देसो नाम

तेरसमो परिच्छेदो.

१४. खन्धनिद्देसो

पञ्ञाकथा

४२१. इदानि ¶ ¶ यस्मा एवं अभिञ्ञावसेन अधिगतानिसंसाय थिरतराय समाधिभावनाय समन्नागतेन भिक्खुना सीले पतिट्ठाय नरो सपञ्ञो, चित्तं पञ्ञञ्च भावयन्ति एत्थ चित्तसीसेन निद्दिट्ठो समाधि सब्बाकारेन भावितो होति.

तदनन्तरा पन पञ्ञा भावेतब्बा. सा च अतिसङ्खेपदेसितत्ता विञ्ञातुम्पि ताव न सुकरा, पगेव भावेतुं. तस्मा तस्सा वित्थारं भावनानयञ्च दस्सेतुं इदं पञ्हाकम्मं होति.

का पञ्ञा, केनट्ठेन पञ्ञा, कानस्सा लक्खणरसपच्चुपट्ठानपदट्ठानानि, कतिविधा पञ्ञा, कथं भावेतब्बा, पञ्ञाभावनाय को आनिसंसोति?

४२२. तत्रिदं विस्सज्जनं, का पञ्ञाति पञ्ञा बहुविधा नानप्पकारा. तं सब्बं विभावयितुं आरब्भमानं विस्सज्जनं अधिप्पेतञ्चेव अत्थं न साधेय्य, उत्तरि च विक्खेपाय संवत्तेय्य, तस्मा इध अधिप्पेतमेव सन्धाय वदाम. कुसलचित्तसम्पयुत्तं विपस्सनाञाणं पञ्ञा.

४२३. केनट्ठेन पञ्ञाति पजाननट्ठेन पञ्ञा. किमिदं पजाननं नाम? सञ्जाननविजाननाकारविसिट्ठं नानप्पकारतो जाननं. सञ्ञाविञ्ञाणपञ्ञानं हि समानेपि जाननभावे, सञ्ञा ‘‘नीलं पीतक’’न्ति आरम्मणसञ्जाननमत्तमेव होति. ‘‘अनिच्चं दुक्खमनत्ता’’ति लक्खणपटिवेधं पापेतुं न सक्कोति. विञ्ञाणं ‘‘नीलं पीतक’’न्ति आरम्मणञ्च जानाति, लक्खणपटिवेधञ्च पापेति. उस्सक्कित्वा पन मग्गपातुभावं पापेतुं न ¶ सक्कोति. पञ्ञा वुत्तनयवसेन आरम्मणञ्च जानाति, लक्खणपटिवेधञ्च पापेति, उस्सक्कित्वा मग्गपातुभावञ्च पापेति.

यथा हि हेरञ्ञिकफलके ठपितं कहापणरासिं एको अजातबुद्धिदारको, एको गामिकपुरिसो, एको हेरञ्ञिकोति तीसु जनेसु पस्समानेसु ¶ अजातबुद्धिदारको कहापणानं चित्तविचित्तदीघचतुरस्सपरिमण्डलभावमत्तमेव जानाति, ‘‘इदं मनुस्सानं उपभोगपरिभोगं रतनसम्मत’’न्ति न जानाति. गामिकपुरिसो चित्तविचित्तादिभावं जानाति, ‘‘इदं मनुस्सानं उपभोगपरिभोगं रतनसम्मत’’न्ति च. ‘‘अयं छेको, अयं कूटो, अयं अद्धसारो’’ति इमं पन विभागं न जानाति. हेरञ्ञिको सब्बेपि ते पकारे जानाति, जानन्तो च कहापणं ओलोकेत्वापि जानाति, आकोटितस्स सद्दं सुत्वापि, गन्धं घायित्वापि, रसं सायित्वापि, हत्थेन धारयित्वापि, असुकस्मिं नाम गामे वा निगमे वा नगरे वा पब्बते वा नदीतीरे वा कतोतिपि, असुकाचरियेन कतोतिपि जानाति, एवंसम्पदमिदं वेदितब्बं.

सञ्ञा हि अजातबुद्धिनो दारकस्स कहापणदस्सनं विय होति, नीलादिवसेन आरम्मणस्स उपट्ठानाकारमत्तगहणतो. विञ्ञाणं गामिकस्स पुरिसस्स कहापणदस्सनमिव होति, नीलादिवसेन आरम्मणाकारगहणतो, उद्धंपि च लक्खणपटिवेधसम्पापनतो. पञ्ञा हेरञ्ञिकस्स कहापणदस्सनमिव होति, नीलादिवसेन आरम्मणाकारं गहेत्वा, लक्खणपटिवेधञ्च पापेत्वा, ततो उद्धम्पि मग्गपातुभावपापनतो. तस्मा यदेतं सञ्जाननविजाननाकारविसिट्ठं नानप्पकारतो जाननं. इदं पजाननन्ति वेदितब्बं. इदं सन्धाय हि एतं वुत्तं ‘‘पजाननट्ठेन पञ्ञा’’ति.

सा पनेसा यत्थ सञ्ञाविञ्ञाणानि, न तत्थ एकंसेन होति. यदा पन होति, तदा अविनिब्भुत्ता तेहि धम्मेहि ‘‘अयं सञ्ञा, इदं विञ्ञाणं, अयं पञ्ञा’’ति विनिब्भुज्जित्वा अलब्भनेय्यनानत्ता सुखुमा दुद्दसा. तेनाह आयस्मा नागसेनो ‘‘दुक्करं, महाराज, भगवता कत’’न्ति. किं, भन्ते, नागसेन भगवता दुक्करं कतन्ति? ‘दुक्करं, महाराज, भगवता कतं यं अरूपीनं चित्तचेतसिकानं धम्मानं एकारम्मणे पवत्तमानानं ववत्थानं अक्खातं अयं फस्सो, अयं वेदना, अयं सञ्ञा, अयं चेतना, इदं चित्त’’’न्ति (मि. प. २.७.१६).

४२४. कानस्सा ¶ ¶ लक्खणरसपच्चुपट्ठानपदट्ठानानीति एत्थ पन धम्मसभावपटिवेधलक्खणा पञ्ञा, धम्मानं सभावपटिच्छादकमोहन्धकारविद्धंसनरसा, असम्मोहपच्चुपट्ठाना. ‘‘समाहितो यथाभूतं जानाति पस्सती’’ति (अ. नि. १०.२) वचनतो पन समाधि तस्सा पदट्ठानं.

पञ्ञापभेदकथा

४२५. कतिविधा पञ्ञाति धम्मसभावपटिवेधलक्खणेन ताव एकविधा. लोकियलोकुत्तरवसेन दुविधा. तथा सासवानासवादिवसेन, नामरूपववत्थापनवसेन, सोमनस्सुपेक्खासहगतवसेन, दस्सनभावनाभूमिवसेन च. तिविधा चिन्तासुतभावनामयवसेन. तथा परित्तमहग्गतअप्पमाणारम्मणवसेन, आयापायउपायकोसल्लवसेन, अज्झत्ताभिनिवेसादिवसेन च. चतुब्बिधा चतूसु सच्चेसु ञाणवसेन चतुपटिसम्भिदावसेन चाति.

४२६. तत्थ एकविधकोट्ठासो उत्तानत्थोयेव. दुविधकोट्ठासे लोकियमग्गसम्पयुत्ता लोकिया. लोकुत्तरमग्गसम्पयुत्ता लोकुत्तराति एवं लोकियलोकुत्तरवसेन दुविधा.

दुतियदुके आसवानं आरम्मणभूता सासवा. तेसं अनारम्मणा अनासवा. अत्थतो पनेसा लोकियलोकुत्तराव होति. आसवसम्पयुत्ता सासवा. आसवविप्पयुत्ता अनासवातिआदीसुपि एसेव नयो. एवं सासवानासवादिवसेन दुविधा.

ततियदुके या विपस्सनं आरभितुकामस्स चतुन्नं अरूपक्खन्धानं ववत्थापने पञ्ञा, अयं नामववत्थापनपञ्ञा. या रूपक्खन्धस्स ववत्थापने पञ्ञा, अयं रूपववत्थापनपञ्ञाति एवं नामरूपववत्थापनवसेन दुविधा.

चतुत्थदुके द्वीसु कामावचरकुसलचित्तेसु सोळससु च पञ्चकनयेन चतुक्कज्झानिकेसु मग्गचित्तेसु पञ्ञा सोमनस्ससहगता. द्वीसु कामावचरकुसलचित्तेसु चतूसु च पञ्चमज्झानिकेसु मग्गचित्तेसु पञ्ञा उपेक्खासहगताति एवं सोमनस्सुपेक्खासहगतवसेन दुविधा.

पञ्चमदुके ¶ पठममग्गपञ्ञा ¶ दस्सनभूमि. अवसेसमग्गत्तयपञ्ञा भावनाभूमीति एवं दस्सनभावनाभूमिवसेन दुविधा.

४२७. तिकेसु पठमत्तिके परतो अस्सुत्वा पटिलद्धपञ्ञा अत्तनो चिन्तावसेन निप्फन्नत्ता चिन्तामया. परतो सुत्वा पटिलद्धपञ्ञा सुतवसेन निप्फन्नत्ता सुतमया. यथा तथा वा भावनावसेन निप्फन्ना अप्पनाप्पत्ता पञ्ञा भावनामया. वुत्तञ्हेतं –

‘‘तत्थ कतमा चिन्तामया पञ्ञा? योगविहितेसु वा कम्मायतनेसु योगविहितेसु वा सिप्पायतनेसु योगविहितेसु वा विज्जाट्ठानेसु कम्मस्सकतं वा सच्चानुलोमिकं वा रूपं अनिच्चन्ति वा वेदना…पे… सञ्ञा… सङ्खारा… विञ्ञाणं अनिच्चन्ति वा, यं एवरूपिं अनुलोमिकं खन्तिं दिट्ठिं रुचिं मुतिं पेक्खं धम्मनिज्झानखन्तिं परतो अस्सुत्वा पटिलभति, अयं वुच्चति चिन्तामया पञ्ञा…पे… सुत्वा पटिलभति, अयं वुच्चति सुतमया पञ्ञा. सब्बापि समापन्नस्स पञ्ञा भावनामया पञ्ञा’’ति (विभ. ७६८).

एवं चिन्तासुतभावनामयवसेन तिविधा.

दुतियत्तिके कामावचरधम्मे आरब्भ पवत्ता पञ्ञा परित्तारम्मणा. रूपावचरारूपावचरे आरब्भ पवत्ता महग्गतारम्मणा. सा लोकियविपस्सना. निब्बानं आरब्भ पवत्ता अप्पमाणारम्मणा. सा लोकुत्तरविपस्सनाति एवं परित्तमहग्गताप्पमाणारम्मणवसेन तिविधा.

ततियत्तिके आयो नाम वुद्धि, सा दुविधा अनत्थहानितो अत्थुप्पत्तितो च. तत्थ कोसल्लं आयकोसल्लं. यथाह –

‘‘तत्थ कतमं आयकोसल्लं? इमे मे धम्मे मनसिकरोतो अनुप्पन्ना चेव अकुसला धम्मा न उप्पज्जन्ति, उप्पन्ना च अकुसला धम्मा पहीयन्ति, इमे वा पनिमे धम्मे मनसिकरोतो अनुप्पन्ना चेव कुसला धम्मा उप्पज्जन्ति. उप्पन्ना च कुसला धम्मा भिय्योभावाय वेपुल्लाय भावनाय पारिपूरिया संवत्तन्तीति, या तत्थ पञ्ञा ¶ पजानना…पे… अमोहो धम्मविचयो सम्मादिट्ठि, इदं वुच्चति आयकोसल्ल’’न्ति (विभ. ७७१).

अपायोति ¶ पन अवुद्धि, सापि दुविधा अत्थहानितो च अनत्थुप्पत्तितो च. तत्थ कोसल्लं अपायकोसल्लं. यथाह ‘‘तत्थ कतमं अपायकोसल्लं? इमे धम्मे मनसिकरोतो अनुप्पन्ना चेव कुसला धम्मा न उप्पज्जन्ती’’तिआदि (विभ. ७७१).

सब्बत्थ पन तेसं तेसं धम्मानं उपायेसु निब्बत्तिकारणेसु तंखणप्पवत्तं ठानुप्पत्तिकं कोसल्लं उपायकोसल्लं नाम. यथाह – ‘‘सब्बापि तत्रुपाया पञ्ञा उपायकोसल्ल’’न्ति (विभ. ७७१). एवं आयापायउपायकोसल्लवसेन तिविधा.

चतुत्थत्तिके अत्तनो खन्धे गहेत्वा आरद्धा विपस्सना पञ्ञा अज्झत्ताभिनिवेसा. परस्स खन्धे बाहिरं वा अनिन्द्रियबद्धरूपं गहेत्वा आरद्धा बहिद्धाभिनिवेसा. उभयं गहेत्वा आरद्धा अज्झत्तबहिद्धाभिनिवेसाति एवं अज्झत्ताभिनिवेसादिवसेन तिविधा.

४२८. चतुक्केसु पठमचतुक्के दुक्खसच्चं आरब्भ पवत्तं ञाणं दुक्खे ञाणं. दुक्खसमुदयं आरब्भ पवत्तं ञाणं दुक्खसमुदये ञाणं. दुक्खनिरोधं आरब्भ पवत्तं ञाणं दुक्खनिरोधे ञाणं. दुक्खनिरोधगामिनिं पटिपदं आरब्भ पवत्तं ञाणं दुक्खनिरोधगामिनिया पटिपदाय ञाणन्ति एवं चतूसु सच्चेसु ञाणवसेन चतुब्बिधा.

दुतियचतुक्के चतस्सो पटिसम्भिदा नाम अत्थादीसु पभेदगतानि चत्तारि ञाणानि. वुत्तञ्हेतं – ‘‘अत्थे ञाणं अत्थपटिसम्भिदा. धम्मे ञाणं धम्मपटिसम्भिदा. तत्रधम्मनिरुत्ताभिलापे ञाणं निरुत्तिपटिसम्भिदा. ञाणेसु ञाणं पटिभानपटिसम्भिदा’’ति (विभ. ७१८).

तत्थ अत्थोति सङ्खेपतो हेतुफलस्सेतं अधिवचनं. हेतुफलं हि यस्मा हेतुअनुसारेन अरियति अधिगमियति सम्पापुणियति, तस्मा अत्थोति वुच्चति. पभेदतो पन यं किञ्चि पच्चयसम्भूतं, निब्बानं, भासितत्थो, विपाको, किरियाति इमे पञ्च धम्मा अत्थोति वेदितब्बा ¶ . तं अत्थं पच्चवेक्खन्तस्स तस्मिं अत्थे पभेदगतं ञाणं अत्थपटिसम्भिदा. धम्मोतिपि सङ्खेपतो पच्चयस्सेतं अधिवचनं. पच्चयो हि यस्मा तं तं दहति पवत्तेति वा सम्पापुणितुं वा देति, तस्मा धम्मोति वुच्चति. पभेदतो ¶ पन यो कोचि फलनिब्बत्तको हेतु, अरियमग्गो, भासितं, कुसलं, अकुसलन्ति इमे पञ्च धम्मा धम्मोति वेदितब्बा. तं धम्मं पच्चवेक्खन्तस्स तस्मिं धम्मे पभेदगतं ञाणं धम्मपटिसम्भिदा.

अयमेव हि अत्थो अभिधम्मे –

‘‘दुक्खे ञाणं अत्थपटिसम्भिदा. दुक्खसमुदये ञाणं धम्मपटिसम्भिदा. हेतुम्हि ञाणं धम्मपटिसम्भिदा. हेतुफले ञाणं अत्थपटिसम्भिदा. ये धम्मा जाता भूता सञ्जाता निब्बत्ता अभिनिब्बत्ता पातुभूता. इमेसु धम्मेसु ञाणं अत्थपटिसम्भिदा. यम्हा धम्मा ते धम्मा जाता भूता सञ्जाता निब्बत्ता अभिनिब्बत्ता पातुभूता, तेसु धम्मेसु ञाणं धम्मपटिसम्भिदा. जरामरणे ञाणं अत्थपटिसम्भिदा. जरामरणसमुदये ञाणं धम्मपटिसम्भिदा…पे… सङ्खारनिरोधे ञाणं अत्थपटिसम्भिदा. सङ्खारनिरोधगामिनिया पटिपदाय ञाणं धम्मपटिसम्भिदा. इध भिक्खु धम्मं जानाति सुत्तं गेय्यं…पे… वेदल्लं. अयं वुच्चति धम्मपटिसम्भिदा. सो तस्स तस्सेव भासितस्स अत्थं जानाति ‘अयं इमस्स भासितस्स अत्थो, अयं इमस्स भासितस्स अत्थो’ति. अयं वुच्चति अत्थपटिसम्भिदा. कतमे धम्मा कुसला? यस्मिं समये कामावचरं कुसलं चित्तं उप्पन्नं होति…पे… इमे धम्मा कुसला. इमेसु धम्मेसु ञाणं धम्मपटिसम्भिदा. तेसं विपाके ञाणं अत्थपटिसम्भिदा’’तिआदिना (विभ. ७१९ आदयो) नयेन विभजित्वा दस्सितो.

तत्रधम्मनिरुत्ताभिलापे ञाणन्ति तस्मिं अत्थे च धम्मे च या सभावनिरुत्ति अब्यभिचारी वोहारो. तदभिलापे तस्स भासने उदीरणे तं भासितं लपितं उदीरितं सुत्वाव अयं सभावनिरुत्ति, अयं न सभावनिरुत्तीति एवं तस्सा धम्मनिरुत्तिसञ्ञिताय सभावनिरुत्तिया मागधिकाय सब्बसत्तानं मूलभासाय पभेदगतं ञाणं निरुत्तिपटिसम्भिदा. निरुत्तिपटिसम्भिदाप्पत्तो हि फस्सो वेदनाति एवमादिवचनं सुत्वाव अयं सभावनिरुत्तीति जानाति. फस्सा वेदनोति एवमादिकं पन अयं न सभावनिरुत्तीति.

ञाणेसु ¶ ¶ ञाणन्ति सब्बत्थ ञाणमारम्मणं कत्वा पच्चवेक्खन्तस्स ञाणारम्मणं ञाणं, यथावुत्तेसु वा तेसु ञाणेसु सगोचरकिच्चादिवसेन वित्थारतो ञाणं पटिभानपटिसम्भिदाति अत्थो.

४२९. चतस्सोपि चेता पटिसम्भिदा द्वीसु ठानेसु पभेदं गच्छन्ति सेक्खभूमियञ्च असेक्खभूमियञ्च.

तत्थ अग्गसावकानं महासावकानञ्च असेक्खभूमियं पभेदगता. आनन्दत्थेरचित्तगहपतिधम्मिकउपासकउपालिगहपतिखुज्जुत्तराउपासिकादीनं सेक्खभूमियं. एवं द्वीसु भूमीसु पभेदं गच्छन्तियोपि चेता अधिगमेन परियत्तिया सवनेन परिपुच्छाय पुब्बयोगेन चाति इमेहि पञ्चहाकारेहि विसदा होन्ति.

तत्थ अधिगमो नाम अरहत्तप्पत्ति. परियत्ति नाम बुद्धवचनस्स परियापुणनं. सवनं नाम सक्कच्चं अत्थिं कत्वा धम्मस्सवनं. परिपुच्छा नाम पाळिअट्ठकथादीसु गण्ठिपदअत्थपदविनिच्छयकथा, पुब्बयोगो नाम पुब्बबुद्धानं सासने गतपच्चागतिकभावेन याव अनुलोमं गोत्रभुसमीपं, ताव विपस्सनानुयोगो.

अपरे आहु –

‘‘पुब्बयोगो बाहुसच्चं, देसभासा च आगमो;

परिपुच्छा अधिगमो, गरुसन्निस्सयो तथा;

मित्तसम्पत्ति चेवाति, पटिसम्भिदपच्चया’’ति.

तत्थ पुब्बयोगो वुत्तनयोव. बाहुसच्चं नाम तेसु तेसु सत्थेसु च सिप्पायतनेसु च कुसलता. देसभासा नाम एकसतवोहारकुसलता. विसेसेन पन मागधिके कोसल्लं. आगमो नाम अन्तमसो ओपम्मवग्गमत्तस्सपि बुद्धवचनस्स परियापुणनं. परिपुच्छा नाम एकगाथायपि अत्थविनिच्छयपुच्छनं. अधिगमो नाम सोतापन्नता वा…पे… अरहत्तं वा. गरुसन्निस्सयो ¶ नाम सुतपटिभानबहुलानं गरूनं सन्तिके वासो. मित्तसम्पत्ति नाम तथारूपानंयेव मित्तानं पटिलाभोति.

तत्थ बुद्धा च पच्चेकबुद्धा च पुब्बयोगञ्चेव अधिगमञ्च निस्साय पटिसम्भिदा पापुणन्ति. सावका सब्बानिपि एतानि कारणानि. पटिसम्भिदाप्पत्तिया च पाटियेक्को ¶ कम्मट्ठानभावनानुयोगो नाम नत्थि. सेक्खानं पन सेक्खफलविमोक्खन्तिका. असेक्खानं असेक्खफलविमोक्खन्तिकाव पटिसम्भिदाप्पत्ति होति. तथागतानं हि दसबलानि विय अरियानं अरियफलेनेव पटिसम्भिदा इज्झन्तीति इमा पटिसम्भिदा सन्धाय वुत्तं चतुपटिसम्भिदावसेन चतुब्बिधाति.

पञ्ञाभूमि-मूल-सरीरववत्थानं

४३०. कथं भावेतब्बाति एत्थ पन यस्मा इमाय पञ्ञाय खन्धायतनधातुइन्द्रियसच्चपटिच्चसमुप्पादादिभेदा धम्मा भूमि. सीलविसुद्धि चेव चित्तविसुद्धि चाति इमा द्वे विसुद्धियो मूलं. दिट्ठिविसुद्धि, कङ्खावितरणविसुद्धि, मग्गामग्गञाणदस्सनविसुद्धि, पटिपदाञाणदस्सनविसुद्धि, ञाणदस्सनविसुद्धीति इमा पञ्च विसुद्धियो सरीरं. तस्मा तेसु भूमिभूतेसु धम्मेसु उग्गहपरिपुच्छावसेन ञाणपरिचयं कत्वा मूलभूता द्वे विसुद्धियो सम्पादेत्वा सरीरभूता पञ्च विसुद्धियो सम्पादेन्तेन भावेतब्बा. अयमेत्थ सङ्खेपो.

४३१. अयं पन वित्थारो, यं ताव वुत्तं ‘‘खन्धायतनधातुइन्द्रियसच्चपटिच्चसमुप्पादादिभेदा धम्मा भूमी’’ति, एत्थ खन्धाति पञ्च खन्धा रूपक्खन्धो वेदनाक्खन्धो सञ्ञाक्खन्धो सङ्खारक्खन्धो विञ्ञाणक्खन्धोति.

रूपक्खन्धकथा

४३२. तत्थ यं किञ्चि सीतादीहि रुप्पनलक्खणं धम्मजातं, सब्बं तं एकतो कत्वा रूपक्खन्धोति वेदितब्बं.

तदेतं रुप्पनलक्खणेन एकविधम्पि भूतोपादायभेदतो दुविधं.

तत्थ ¶ भूतरूपं चतुब्बिधं – पथवीधातु आपोधातु तेजोधातु वायोधातूति. तासं लक्खणरसपच्चुपट्ठानानि चतुधातुववत्थाने वुत्तानि. पदट्ठानतो पन ता सब्बापि अवसेसधातुत्तयपदट्ठाना.

उपादारूपं चतुवीसतिविधं – चक्खु, सोतं, घानं, जिव्हा, कायो, रूपं, सद्दो, गन्धो, रसो, इत्थिन्द्रियं, पुरिसिन्द्रियं, जीवितिन्द्रियं, हदयवत्थु, कायविञ्ञत्ति, वचीविञ्ञत्ति, आकासधातु, रूपस्स लहुता, रूपस्स मुदुता ¶ , रूपस्स कम्मञ्ञता, रूपस्स उपचयो, रूपस्स सन्तति, रूपस्स जरता, रूपस्स अनिच्चता, कबळीकारो आहारोति.

४३३. तत्थ रूपाभिघातारहतप्पसादलक्खणं दट्ठुकामतानिदानकम्मसमुट्ठानभूतप्पसादलक्खणं वा चक्खु, रूपेसु आविञ्छनरसं, चक्खुविञ्ञाणस्स आधारभावपच्चुपट्ठानं, दट्ठुकामतानिदानकम्मजभूतपदट्ठानं.

सद्दाभिघातारहभूतप्पसादलक्खणं, सोतुकामतानिदानकम्मसमुट्ठानभूतप्पसादलक्खणं वा सोतं, सद्देसु आविञ्छनरसं, सोतविञ्ञाणस्स आधारभावपच्चुपट्ठानं, सोतुकामतानिदानकम्मजभूतपदट्ठानं.

गन्धाभिघातारहभूतप्पसादलक्खणं, घायितुकामतानिदानकम्मसमुट्ठानभूतप्पसादलक्खणं वा घानं, गन्धेसु आविञ्छनरसं, घानविञ्ञाणस्स आधारभावपच्चुपट्ठानं, घायितुकामतानिदानकम्मजभूतपदट्ठानं.

रसाभिघातारहभूतप्पसादलक्खणा, सायितुकामतानिदानकम्मसमुट्ठानभूतप्पसादलक्खणा वा जिव्हा, रसेसु आविञ्छनरसा, जिव्हाविञ्ञाणस्स आधारभावपच्चुपट्ठाना, सायितुकामतानिदानकम्मजभूतपदट्ठाना.

फोट्ठब्बाभिघातारहभूतप्पसादलक्खणो, फुसितुकामतानिदानकम्मसमुट्ठानभूतप्पसादलक्खणो वा कायो, फोट्ठब्बेसु आविञ्छनरसो, कायविञ्ञाणस्स आधारभावपच्चुपट्ठानो, फुसितुकामतानिदानकम्मजभूतपदट्ठानो.

४३४. केचि ¶ पन ‘‘तेजाधिकानं भूतानं पसादो चक्खु, वायुपथवीआपाधिकानं भूतानं पसादा सोतघानजिव्हा, कायो सब्बेसम्पी’’ति वदन्ति. अपरे ‘‘तेजाधिकानं पसादो चक्खु, विवरवायुआपपथवाधिकानं सोतघानजिव्हाकाया’’ति वदन्ति. ते वत्तब्बा ‘‘सुत्तं आहरथा’’ति. अद्धा सुत्तमेव न दक्खिस्सन्ति. केचि पनेत्थ ‘‘तेजादीनं गुणेहि रूपादीहि अनुगय्हभावतो’’ति कारणं दस्सेन्ति. ते वत्तब्बा ‘‘को पनेवमाहरूपादयो तेजादीनं गुणा’ति. अविनिब्भोगवुत्तीसु हि भूतेसु अयं इमस्स गुणो अयं इमस्स गुणोति न लब्भा वत्तु’’न्ति. अथापि वदेय्युं ‘‘यथा तेसु तेसु सम्भारेसु तस्स तस्स ¶ भूतस्स अधिकताय पथवीआदीनं सन्धारणादीनि किच्चानि इच्छथ, एवं तेजादिअधिकेसु सम्भारेसु रूपादीनं अधिकभावदस्सनतो इच्छितब्बमेतं रूपादयो तेसं गुणा’’ति. ते वत्तब्बा ‘‘इच्छेय्याम, यदि आपाधिकस्स आसवस्स गन्धतो पथवीअधिके कप्पासे गन्धो अधिकतरो सिया, तेजाधिकस्स च उण्होदकस्स वण्णतो सीतुदकस्स वण्णो परिहायेथ’’. यस्मा पनेतं उभयम्पि नत्थि, तस्मा पहायेतं एतेसं निस्सयभूतानं विसेसकप्पनं, ‘‘यथा अविसेसेपि एककलापे भूतानं रूपरसादयो अञ्ञमञ्ञं विसदिसा होन्ति, एवं चक्खुपसादादयो अविज्जमानेपि अञ्ञस्मिं विसेसकारणे’’ति गहेतब्बमेतं.

किं पन तं यं अञ्ञमञ्ञस्स असाधारणं? कम्ममेव नेसं विसेसकारणं. तस्मा कम्मविसेसतो एतेसं विसेसो, न भूतविसेसतो. भूतविसेसे हि सति पसादोव न उप्पज्जति. समानानञ्हि पसादो, न विसमानानन्ति पोराणा.

४३५. एवं कम्मविसेसतो विसेसवन्तेसु च एतेसु चक्खुसोतानि असम्पत्तविसयगाहकानि, अत्तनो निस्सयं अनल्लीननिस्सये एव विसये विञ्ञाणहेतुत्ता. घानजिव्हाकाया सम्पत्तविसयगाहका, निस्सयवसेन चेव, सयञ्च, अत्तनो निस्सयं अल्लीनेयेव विसये विञ्ञाणहेतुत्ता.

४३६. चक्खु चेत्थ यदेतं लोके नीलपखुमसमाकिण्णकण्हसुक्कमण्डलविचित्तं नीलुप्पलदलसन्निभं चक्खूति वुच्चति. तस्स ससम्भारचक्खुनो सेतमण्डलपरिक्खित्तस्स कण्हमण्डलस्स मज्झे अभिमुखे ठितानं सरीरसण्ठानुप्पत्तिपदेसे सत्तसु पिचुपटलेसु आसित्ततेलं पिचुपटलानि विय सत्त अक्खिपटलानिब्यापेत्वा धारणन्हापनमण्डनबीजनकिच्चाहि ¶ चतूहि धातीहि खत्तियकुमारो विय सन्धारणबन्धनपरिपाचनसमुदीरणकिच्चाहि चतूहि धातूहि कतूपकारं उतुचित्ताहारेहि उपत्थम्भियमानं आयुना अनुपालियमानं ¶ वण्णगन्धरसादीहि परिवुतं पमाणतो ऊकासिरमत्तं चक्खुविञ्ञाणादीनं यथारहं वत्थुद्वारभावं साधयमानं तिट्ठति. वुत्तम्पि चेतं धम्मसेनापतिना –

‘‘येन चक्खुपसादेन, रूपानि मनुपस्सति;

परित्तं सुखुमं एतं, ऊकासिरसमूपम’’न्ति.

ससम्भारसोतबिलस्स अन्तो तनुतम्बलोमाचिते अङ्गुलिवेधकसण्ठाने पदेसे सोतं वुत्तप्पकाराहि धातूहि कतूपकारं उतुचित्ताहारेहि उपत्थम्भियमानं आयुना अनुपालियमानं वण्णादीहि परिवुतं सोतविञ्ञाणादीनं यथारहं वत्थुद्वारभावं साधयमानं तिट्ठति.

ससम्भारघानबिलस्स अन्तो अजपदसण्ठाने पदेसे घानं यथावुत्तप्पकारुपकारुपत्थम्भनानुपालनपरिवारं घानविञ्ञाणादीनं यथारहं वत्थुद्वारभावं साधयमानं तिट्ठति.

ससम्भारजिव्हामज्झस्स उपरि उप्पलदलग्गसण्ठाने पदेसे जिव्हा यथावुत्तप्पकारुपकारुपत्थम्भनानुपालनपरिवारा जिव्हाविञ्ञाणादीनं यथारहं वत्थुद्वारभावं साधयमाना तिट्ठति.

यावता पन इमस्मिं काये उपादिण्णरूपं नाम अत्थि. सब्बत्थ कायो कप्पासपटले स्नेहो विय वुत्तप्पकारुपकारुपत्थम्भनानुपालनपरिवारोव हुत्वा कायविञ्ञाणादीनं यथारहं वत्थुद्वारभावं साधयमानो तिट्ठति.

वम्मिकउदकाकासगामसिवथिकसङ्खातसगोचरनिन्ना विय च अहिसुसुमारपक्खीकुक्कुरसिङ्गालारूपादिसगोचरनिन्नाव एते चक्खादयोति दट्ठब्बा.

४३७. ततो परेसु पन रूपादीसु चक्खुपटिहननलक्खणं रूपं, चक्खुविञ्ञाणस्स विसयभावरसं ¶ , तस्सेव गोचरपच्चुपट्ठानं, चतुमहाभूतपदट्ठानं. यथा चेतं तथा सब्बानिपि उपादारूपानि. यत्थ पन विसेसो अत्थि, तत्थ वक्खाम. तयिदं नीलं पीतकन्तिआदिवसेन अनेकविधं.

सोतपटिहननलक्खणो ¶ सद्दो, सोतविञ्ञाणस्स विसयभावरसो, तस्सेव गोचरपच्चुपट्ठानो. भेरिसद्दो मुदिङ्गसद्दोतिआदिना नयेन अनेकविधो.

घानपटिहननलक्खणो गन्धो, घानविञ्ञाणस्स विसयभावरसो, तस्सेव गोचरपच्चुपट्ठानो. मूलगन्धो सारगन्धोतिआदिना नयेन अनेकविधो.

जिव्हापटिहननलक्खणो रसो, जिव्हाविञ्ञाणस्स विसयभावरसो, तस्सेव गोचरपच्चुपट्ठानो. मूलरसो खन्धरसोतिआदिना नयेन अनेकविधो.

४३८. इत्थिभावलक्खणं इत्थिन्द्रियं, इत्थीति पकासनरसं, इत्थिलिङ्गनिमित्तकुत्ताकप्पानं कारणभावपच्चुपट्ठानं. पुरिसभावलक्खणं पुरिसिन्द्रियं, पुरिसोति पकासनरसं, पुरिसलिङ्गनिमित्तकुत्ताकप्पानं कारणभावपच्चुपट्ठानं. तदुभयम्पि कायप्पसादो विय सकलसरीरं ब्यापकमेव, न च कायपसादेन ठितोकासे ठितन्ति वा अट्ठितोकासे ठितन्ति वाति वत्तब्बतं आपज्जति, रूपरसादयो विय अञ्ञमञ्ञं सङ्करो नत्थि.

४३९. सहजरूपानुपालनलक्खणं जीवितिन्द्रियं, तेसं पवत्तनरसं, तेसञ्ञेव ठपनपच्चुपट्ठानं, यापयितब्बभूतपदट्ठानं. सन्तेपि च अनुपालनलक्खणादिम्हि विधाने अत्थिक्खणेयेव तं सहजरूपानि अनुपालेति उदकं विय उप्पलादीनि. यथासकं पच्चयुप्पन्नेपि च धम्मे पालेति धाति विय कुमारं. सयं पवत्तितधम्मसम्बन्धेनेव च पवत्तति नियामको विय. न भङ्गतो उद्धं पवत्तति, अत्तनो च पवत्तयितब्बानञ्च अभावा. न भङ्गक्खणे ठपेति, सयं भिज्जमानत्ता. खीयमानो विय वट्टिस्नेहो दीपसिखं. न च अनुपालनपवत्तनट्ठपनानुभावविरहितं, यथावुत्तक्खणे तस्स तस्स साधनतोति दट्ठब्बं.

४४०. मनोधातुमनोविञ्ञाणधातूनं निस्सयलक्खणं हदयवत्थु, तासञ्ञेव धातूनं आधारणरसं ¶ , उब्बहनपच्चुपट्ठानं. हदयस्स अन्तो कायगतासतिकथायं ¶ वुत्तप्पकारं लोहितं निस्साय सन्धारणादिकिच्चेहि भूतेहि कतूपकारं उतुचित्ताहारेहि उपत्थम्भियमानं आयुना अनुपालियमानं मनोधातुमनोविञ्ञाणधातूनञ्चेव तंसम्पयुत्तधम्मानञ्च वत्थुभावं साधयमानं तिट्ठति.

४४१. अभिक्कमादिपवत्तकचित्तसमुट्ठानवायोधातुया सहजरूपकायथम्भनसन्धारणचलनस्स पच्चयो आकारविकारो कायविञ्ञत्ति, अधिप्पायपकासनरसा, कायविप्फन्दनहेतुभावपच्चुपट्ठाना, चित्तसमुट्ठानवायोधातुपदट्ठाना. सा पनेसा कायविप्फन्दनेन अधिप्पायविञ्ञापनहेतुत्ता, सयञ्च तेन कायविप्फन्दनसङ्खातेन कायेन विञ्ञेय्यत्ता ‘‘कायविञ्ञत्ती’’ति वुच्चति. ताय च पन चलितेहि चित्तजरूपेहि अभिसम्बन्धानं उतुजादीनम्पि चलनतो अभिक्कमादयो पवत्तन्तीति वेदितब्बा.

वचीभेदपवत्तकचित्तसमुट्ठानपथवीधातुया उपादिण्णघट्टनस्स पच्चयो आकारविकारो वचीविञ्ञत्ति, अधिप्पायप्पकासनरसा, वचीघोसहेतुभावपच्चुपट्ठाना, चित्तसमुट्ठानपथवीधातुपदट्ठाना. सा पनेसा वचीघोसेन अधिप्पायविञ्ञापनहेतुत्ता, सयञ्च ताय वचीघोससङ्खाताय वाचाय विञ्ञेय्यत्ता ‘‘वचीविञ्ञत्ती’’ति वुच्चति. यथा हि अरञ्ञे उस्सापेत्वा बन्धगोसीसादिउदकनिमित्तं दिस्वा उदकमेत्थ अत्थीति विञ्ञायति, एवं कायविप्फन्दनञ्चेव वचीघोसञ्च गहेत्वा कायवचीविञ्ञत्तियोपि विञ्ञायन्ति.

४४२. रूपपरिच्छेदलक्खणा आकासधातु, रूपपरियन्तप्पकासनरसा, रूपमरियादापच्चुपट्ठाना, असम्फुट्ठभावच्छिद्दविवरभावपच्चुपट्ठाना वा, परिच्छिन्नरूपपदट्ठाना. याय परिच्छिन्नेसु रूपेसु इदमितो उद्धमधो तिरियन्ति च होति.

४४३. अदन्धतालक्खणा रूपस्स लहुता, रूपानं गरुभावविनोदनरसा, लहुपरिवत्तितापच्चुपट्ठाना, लहुरूपपदट्ठाना. अथद्धतालक्खणा रूपस्स मुदुता, रूपानं थद्धभावविनोदनरसा, सब्बकिरियासु अविरोधितापच्चुपट्ठाना, मुदुरूपपदट्ठाना. सरीरकिरियानुकूलकम्मञ्ञभावलक्खणा रूपस्स ¶ कम्मञ्ञता, अकम्मञ्ञताविनोदनरसा, अदुब्बलभावपच्चुपट्ठाना, कम्मञ्ञरूपपदट्ठाना.

एता ¶ पन तिस्सो न अञ्ञमञ्ञं विजहन्ति, एवं सन्तेपि यो अरोगिनो विय रूपानं लहुभावो अदन्धता लहुपरिवत्तिप्पकारो रूपदन्धत्तकरधातुक्खोभपटिपक्खपच्चयसमुट्ठानो, सो रूपविकारो रूपस्स लहुता. यो पन सुपरिमद्दितचम्मस्सेव रूपानं मुदुभावो सब्बकिरियाविसेसेसु वसवत्तनभावमद्दवप्पकारो रूपत्थद्धत्तकरधातुक्खोभपटिपक्खपच्चयसमुट्ठानो, सो रूपविकारो रूपस्स मुदुता. यो पन सुदन्तसुवण्णस्सेव रूपानं कम्मञ्ञभावो सरीरकिरियानुकूलभावप्पकारो सरीरकिरियानं अननुकूलकरधातुक्खोभपटिपक्खपच्चयसमुट्ठानो, सो रूपविकारो रूपस्स कम्मञ्ञताति एवमेतासं विसेसो वेदितब्बो.

४४४. आचयलक्खणो रूपस्स उपचयो, पुब्बन्ततो रूपानं उम्मुज्जापनरसो, निय्यातनपच्चुपट्ठानो, परिपुण्णभावपच्चुपट्ठानो वा, उपचितरूपपदट्ठानो. पवत्तिलक्खणा रूपस्स सन्तति, अनुप्पबन्धनरसा, अनुपच्छेदपच्चुपट्ठाना, अनुप्पबन्धकरूपपदट्ठाना. उभयम्पेतं जातिरूपस्सेवाधिवचनं, आकारनानत्ततो पन वेनेय्यवसेन च ‘‘उपचयो सन्तती’’ति उद्देसदेसना कता. यस्मा पनेत्थ अत्थतो नानत्तं नत्थि, तस्मा इमेसं पदानं निद्देसे ‘‘यो आयतनानं आचयो, सो रूपस्स उपचयो. यो रूपस्स उपचयो, सा रूपस्स सन्तती’’ति (ध. स. ६४१-६४२) वुत्तं. अट्ठकथायम्पि ‘‘आचयो नाम निब्बत्ति, उपचयो नाम वड्ढि, सन्तति नाम पवत्ती’’ति (ध. स. अट्ठ. ६४१) वत्वा ‘‘नदीतीरे खतकूपकम्हि उदकुग्गमनकालो विय आचयो निब्बत्ति, परिपुण्णकालो विय उपचयो वड्ढि, अज्झोत्थरित्वा गमनकालो विय सन्तति पवत्ती’’ति (ध. स. अट्ठ. ६४१) उपमा कता.

उपमावसाने च ‘‘एवं किं कथितं होति? आयतनेन आचयो कथितो, आचयेन आयतनं कथित’’न्ति वुत्तं. तस्मा या रूपानं पठमाभिनिब्बत्ति, सा आचयो. या तेसं उपरि अञ्ञेसम्पि निब्बत्तमानानं निब्बत्ति, सा वड्ढिआकारेन उपट्ठानतो उपचयो. या तेसम्पि उपरि पुनप्पुनं ¶ अञ्ञेसं निब्बत्तमानानं निब्बत्ति, सा अनुपबन्धाकारेन उपट्ठानतो सन्ततीति च पवुच्चतीति वेदितब्बा.

रूपपरिपाकलक्खणा जरता, उपनयनरसा, सभावानपगमेपि नवभावापगमपच्चुपट्ठाना वीहिपुराणभावो विय, परिपच्चमानरूपपदट्ठाना. खण्डिच्चादिभावेन दन्तादीसु विकारदस्सनतो ¶ इदं पाकटजरं सन्धाय वुत्तं. अरूपधम्मानं पन पटिच्छन्नजरा नाम होति, तस्सा एस विकारो नत्थि, या च पथवी उदकपब्बतचन्दिमसूरियादीसु अवीचिजरा नाम.

परिभेदलक्खणा रूपस्स अनिच्चता, संसीदनरसा, खयवयपच्चुपट्ठाना, परिभिज्जमानरूपपदट्ठाना.

४४५. ओजालक्खणो कबळीकारो आहारो, रूपाहरणरसो, उपत्थम्भनपच्चुपट्ठानो, कबळं कत्वा आहरितब्बवत्थुपदट्ठानो. याय ओजाय सत्ता यापेन्ति, तस्सा एतं अधिवचनं.

४४६. इमानि ताव पाळियं आगतरूपानेव. अट्ठकथायं पन बलरूपं सम्भवरूपं जातिरूपं रोगरूपं एकच्चानं मतेन मिद्धरूपन्ति एवं अञ्ञानिपि रूपानि आहरित्वा ‘‘अद्धा मुनीसि सम्बुद्धो, नत्थि नीवरणा तवा’’तिआदीनि (सु. नि. ५४६) वत्वा मिद्धरूपं ताव नत्थियेवाति पटिक्खित्तं. इतरेसु रोगरूपं जरताअनिच्चताग्गहणेन गहितमेव, जातिरूपं उपचयसन्ततिग्गहणेन, सम्भवरूपं आपोधातुग्गहणेन, बलरूपं वायोधातुग्गहणेन गहितमेव. तस्मा तेसु एकम्पि विसुं नत्थीति सन्निट्ठानं कतं.

इति इदं चतुवीसतिविधं उपादारूपं पुब्बे वुत्तं चतुब्बिधं भूतरूपञ्चाति अट्ठवीसतिविधं रूपं होति अनूनमनधिकं.

४४७. तं सब्बम्पि न हेतु अहेतुकं हेतुविप्पयुत्तं सप्पच्चयं लोकियं सासवमेवातिआदिना नयेन एकविधं.

अज्झत्तिकं बाहिरं, ओळारिकं सुखुमं, दूरे सन्तिके, निप्फन्नं अनिप्फन्नं, पसादरूपं नपसादरूपं, इन्द्रियं अनिन्द्रियं, उपादिण्णं अनुपादिण्णन्तिआदिवसेन दुविधं.

तत्थ ¶ चक्खादिपञ्चविधं अत्तभावं अधिकिच्च पवत्तत्ता अज्झत्तिकं, सेसं ततो बाहिरत्ता बाहिरं. चक्खादीनि नव आपोधातुवज्जिता तिस्सो धातुयो चाति द्वादसविधं घट्टनवसेन गहेतब्बतो ओळारिकं, सेसं ततो विपरीतत्ता सुखुमं. यं सुखुमं तदेव दुप्पटिविज्झसभावत्ता ¶ दूरे, इतरं सुप्पटिविज्झसभावत्ता सन्तिके. चतस्सो धातुयो, चक्खादीनि तेरस, कबळीकाराहारो चाति अट्ठारसविधं रूपं परिच्छेदविकारलक्खणभावं अतिक्कमित्वा सभावेनेव परिग्गहेतब्बतो निप्फन्नं, सेसं तब्बिपरीतताय अनिप्फन्नं. चक्खादिपञ्चविधं रूपादीनं गहणपच्चयभावेन आदासतलं विय विप्पसन्नत्ता पसादरूपं, इतरं ततो विपरीतत्ता नपसादरूपं. पसादरूपमेव इत्थिन्द्रियादित्तयेन सद्धिं अधिपतियट्ठेन इन्द्रियं, सेसं ततो विपरीतत्ता अनिन्द्रियं. यं कम्मजन्ति परतो वक्खाम, तं कम्मेन उपादिण्णत्ता उपादिण्णं, सेसं ततो विपरीतत्ता अनुपादिण्णं.

४४८. पुन सब्बमेव रूपं सनिदस्सनकम्मजादीनं तिकानं वसेन तिविधं होति. तत्थ ओळारिके रूपं सनिदस्सनसप्पटिघं, सेसं अनिदस्सनसप्पटिघं. सब्बम्पि सुखुमं अनिदस्सनअप्पटिघं. एवं ताव सनिदस्सनत्तिकवसेन तिविधं. कम्मजादित्तिकवसेन पन कम्मतो जातं कम्मजं, तदञ्ञपच्चयजातं अकम्मजं, नकुतोचिजातं नेव कम्मजं नाकम्मजं. चित्ततो जातं चित्तजं, तदञ्ञपच्चयजातं अचित्तजं, नकुतोचिजातं नेव चित्तजं नाचित्तजं, आहारतो जातं आहारजं, तदञ्ञपच्चयजातं अनाहारजं, नकुतोचिजातं नेव आहारजं नअनाहारजं. उतुतो जातं उतुजं, तदञ्ञपच्चयजातं अनुतुजं, नकुतोचिजातं नेव उतुजं नअनुतुजन्ति एवं कम्मजादित्तिकवसेन तिविधं.

४४९. पुन दिट्ठादिरूपरूपादिवत्थादिचतुक्कवसेन चतुब्बिधं. तत्थ रूपायतनं दिट्ठं नाम दस्सनविसयत्ता, सद्दायतनं सुतं नाम सवनविसयत्ता, गन्धरसफोट्ठब्बत्तयं मुतं नाम सम्पत्तगाहकइन्द्रियविसयत्ता, सेसं विञ्ञातं नाम विञ्ञाणस्सेव विसयत्ताति एवं ताव दिट्ठादिचतुक्कवसेन चतुब्बिधं.

निप्फन्नरूपं पनेत्थ रूपरूपं नाम, आकासधातु परिच्छेदरूपं नाम, कायविञ्ञत्तिआदि कम्मञ्ञतापरियन्तं विकाररूपं नाम, जातिजराभङ्गं लक्खणरूपं नामाति एवं रूपरूपादिचतुक्कवसेन चतुब्बिधं.

यं ¶ पनेत्थ हदयरूपं नाम, तं वत्थु न द्वारं. विञ्ञत्तिद्वयं द्वारं न वत्थु. पसादरूपं वत्थु चेव द्वारञ्च. सेसं नेव वत्थु न द्वारन्ति एवं वत्थादिचतुक्कवसेन चतुब्बिधं.

४५०. पुन ¶ एकजं, द्विजं, तिजं, चतुजं, नकुतोचिजातन्ति इमेसं वसेन पञ्चविधं. तत्थ कम्मजमेव चित्तजमेव च एकजं नाम. तेसु सद्धिं हदयवत्थुना इन्द्रियरूपं कम्मजमेव. विञ्ञत्तिद्वयं चित्तजमेव. यं पन चित्ततो च उतुतो च जातं, तं द्विजं नाम, तं सद्दायतनमेव. यं उतुचित्ताहारेहि जातं, तं तिजं नाम, तं पन लहुतादित्तयमेव. यं चतूहिपि कम्मादीहि जातं, तं चतुजं नाम, तं लक्खणरूपवज्जं अवसेसं होति. लक्खणरूपं पन नकुतोचिजातं. कस्मा? न हि उप्पादस्स उप्पादो अत्थि, उप्पन्नस्स च परिपाकभेदमत्तं इतरद्वयं. यम्पि ‘‘रूपायतनं सद्दायतनं गन्धायतनं रसायतनं फोट्ठब्बायतनं आकासधातु आपोधातु रूपस्स लहुता, रूपस्स मुदुता, रूपस्स कम्मञ्ञता, रूपस्स उपचयो, रूपस्स सन्तति, कबळीकारो आहारो, इमे धम्मा चित्तसमुट्ठाना’’तिआदीसु (ध. स. १२०१) जातिया कुतोचिजातत्तं अनुञ्ञातं, तं पन रूपजनकपच्चयानं किच्चानुभावक्खणे दिट्ठत्ताति वेदितब्बं.

इदं ताव रूपक्खन्धे वित्थारकथामुखं.

विञ्ञाणक्खन्धकथा

४५१. इतरेसु पन यंकिञ्चि वेदयितलक्खणं, सब्बं तं एकतो कत्वा वेदनाक्खन्धो; यंकिञ्चि सञ्जाननलक्खणं, सब्बं तं एकतो कत्वा सञ्ञाक्खन्धो; यंकिञ्चि अभिसङ्खरणलक्खणं, सब्बं तं एकतो कत्वा सङ्खारक्खन्धो; यंकिञ्चि विजाननलक्खणं, सब्बं तं एकतो कत्वा विञ्ञाणक्खन्धो वेदितब्बो. तत्थ यस्मा विञ्ञाणक्खन्धे विञ्ञाते इतरे सुविञ्ञेय्या होन्ति, तस्मा विञ्ञाणक्खन्धं आदिं कत्वा वण्णनं करिस्साम.

यंकिञ्चि विजाननलक्खणं, सब्बं तं एकतो कत्वा विञ्ञाणक्खन्धो वेदितब्बोति हि वुत्तं. किञ्च विजाननलक्खणं विञ्ञाणं? यथाह ‘‘विजानाति विजानातीति खो, आवुसो, तस्मा विञ्ञाणन्ति वुच्चती’’ति (म. नि. १.४४९). विञ्ञाणं चित्तं मनोति अत्थतो एकं. तदेतं विजाननलक्खणेन सभावतो ¶ एकविधम्पि जातिवसेन तिविधं कुसलं, अकुसलं, अब्याकतञ्च.

४५२. तत्थ ¶ कुसलं भूमिभेदतो चतुब्बिधं कामावचरं रूपावचरं अरूपावचरं लोकुत्तरञ्च. तत्थ कामावचरं सोमनस्सुपेक्खाञाणसङ्खारभेदतो अट्ठविधं. सेय्यथिदं – सोमनस्ससहगतं ञाणसम्पयुत्तं असङ्खारं ससङ्खारञ्च, तथा ञाणविप्पयुत्तं. उपेक्खासहगतं ञाणसम्पयुत्तं असङ्खारं ससङ्खारञ्च, तथा ञाणविप्पयुत्तं.

यदा हि देय्यधम्मपटिग्गाहकादिसम्पत्तिं अञ्ञं वा सोमनस्सहेतुं आगम्म हट्ठपहट्ठो ‘‘अत्थि दिन्न’’न्तिआदिनयप्पवत्तं (म. नि. १.४४१) सम्मादिट्ठिं पुरक्खत्वा असंसीदन्तो अनुस्साहितो परेहि दानादीनि पुञ्ञानि करोति, तदास्स सोमनस्ससहगतं ञाणसम्पयुत्तं चित्तं असङ्खारं होति. यदा पन वुत्तनयेन हट्ठतुट्ठो सम्मादिट्ठिं पुरक्खत्वा अमुत्तचागतादिवसेन संसीदमानो वा परेहि वा उस्साहितो करोति, तदास्स तदेव चित्तं ससङ्खारं होति. इमस्मिञ्हि अत्थे सङ्खारोति एतं अत्तनो वा परेसं वा वसेन पवत्तस्स पुब्बपयोगस्साधिवचनं. यदा पन ञातिजनस्स पटिपत्तिदस्सनेन जातपरिचया बालदारका भिक्खू दिस्वा सोमनस्सजाता सहसा किञ्चिदेव हत्थगतं ददन्ति वा वन्दन्ति वा, तदा ततियं चित्तं उप्पज्जति. यदा पन ‘‘देथ वन्दथाति’’ ञातीहि उस्साहिता एवं पटिपज्जन्ति, तदा चतुत्थं चित्तं उप्पज्जति. यदा पन देय्यधम्मपटिग्गाहकादीनं असम्पत्तिं अञ्ञेसं वा सोमनस्सहेतूनं अभावं आगम्म चतूसुपि विकप्पेसु सोमनस्सरहिता होन्ति, तदा सेसानि चत्तारि उपेक्खासहगतानि उप्पज्जन्तीति. एवं सोमनस्सुपेक्खाञाणसङ्खारभेदतो अट्ठविधं कामावचरकुसलं वेदितब्बं.

रूपावचरं पन झानङ्गयोगभेदतो पञ्चविधं होति. सेय्यथिदं, वितक्कविचारपीतिसुखसमाधियुत्तं पठमं, अतिक्कन्तवितक्कं दुतियं, ततो अतिक्कन्तविचारं ततियं, ततो विरत्तपीतिकं चतुत्थं, अत्थङ्गतसुखं उपेक्खासमाधियुत्तं पञ्चमन्ति.

अरूपावचरं चतुन्नं आरुप्पानं योगवसेन चतुब्बिधं. वुत्तप्पकारेन हि आकासानञ्चायतनज्झानेन सम्पयुत्तं पठमं, विञ्ञाणञ्चायतनादीहि दुतियततियचतुत्थानि ¶ . लोकुत्तरं चतुमग्गसम्पयोगतो चतुब्बिधन्ति एवं ताव कुसलविञ्ञाणमेव एकवीसतिविधं होति.

४५३. अकुसलं ¶ पन भूमितो एकविधं कामावचरमेव, मूलतो तिविधं लोभमूलं दोसमूलं मोहमूलञ्च.

तत्थ लोभमूलं सोमनस्सुपेक्खादिट्ठिगतसङ्खारभेदतो अट्ठविधं. सेय्यथिदं, सोमनस्ससहगतं दिट्ठिगतसम्पयुत्तं असङ्खारं ससङ्खारञ्च, तथा दिट्ठिगतविप्पयुत्तं. उपेक्खासहगतं दिट्ठिगतसम्पयुत्तं असङ्खारं ससङ्खारञ्च, तथा दिट्ठिगतविप्पयुत्तं.

यदा हि ‘‘नत्थि कामेसु आदीनवो’’ति (म. नि. १.४६९) आदिना नयेन मिच्छादिट्ठिं पुरक्खत्वा हट्ठतुट्ठो कामे वा परिभुञ्जति, दिट्ठमङ्गलादीनि वा सारतो पच्चेति सभावतिक्खेनेव अनुस्साहितेन चित्तेन, तदा पठमं अकुसलचित्तं उप्पज्जति. यदा मन्देन समुस्साहितेन चित्तेन, तदा दुतियं. यदा मिच्छादिट्ठिं अपुरक्खत्वा केवलं हट्ठतुट्ठो मेथुनं वा सेवति, परसम्पत्तिं वा अभिज्झायति, परभण्डं वा हरति सभावतिक्खेनेव अनुस्साहितेन चित्तेन, तदा ततियं. यदा मन्देन समुस्साहितेन चित्तेन, तदा चतुत्थं. यदा पन कामानं वा असम्पत्तिं आगम्म अञ्ञेसं वा सोमनस्सहेतूनं अभावेन चतूसुपि विकप्पेसु सोमनस्सरहिता होन्ति, तदा सेसानि चत्तारि उपेक्खासहगतानि उप्पज्जन्तीति एवं सोमनस्सुपेक्खादिट्ठिगतसङ्खारभेदतो अट्ठविधं लोभमूलं वेदितब्बं.

दोसमूलं पन दोमनस्ससहगतं पटिघसम्पयुत्तं असङ्खारं ससङ्खारन्ति दुविधमेव होति, तस्स पाणातिपातादीसु तिक्खमन्दप्पवत्तिकाले पवत्ति वेदितब्बा.

मोहमूलं उपेक्खासहगतं विचिकिच्छासम्पयुत्तं उद्धच्चसम्पयुत्तञ्चाति दुविधं. तस्स सन्निट्ठानविक्खेपकाले पवत्ति वेदितब्बाति एवं अकुसलविञ्ञाणं द्वादसविधं होति.

४५४. अब्याकतं जातिभेदतो दुविधं विपाकं किरियञ्च. तत्थ विपाकं भूमितो चतुब्बिधं कामावचरं रूपावचरं अरूपावचरं लोकुत्तरञ्च. तत्थ ¶ कामावचरं दुविधं कुसलविपाकं अकुसलविपाकञ्च. कुसलविपाकम्पि दुविधं अहेतुकं सहेतुकञ्च.

तत्थ अलोभादिविपाकहेतुविरहितं अहेतुकं, तं चक्खुविञ्ञाणं, सोतघानजिव्हाकायविञ्ञाणं ¶ , सम्पटिच्छनकिच्चा मनोधातु, सन्तीरणादिकिच्चा द्वे मनोविञ्ञाणधातुयो चाति अट्ठविधं.

तत्थ चक्खुसन्निस्सितरूपविजाननलक्खणं चक्खुविञ्ञाणं, रूपमत्तारम्मणरसं, रूपाभिमुखभावपच्चुपट्ठानं, रूपारम्मणाय किरियमनोधातुया अपगमपदट्ठानं. सोतादिसन्निस्सितसद्दादिविजाननलक्खणानि सोतघानजिव्हाकायविञ्ञाणानि, सद्दादिमत्तारम्मणरसानि, सद्दादिअभिमुखभावपच्चुपट्ठानानि, सद्दारम्मणादीनं किरियमनोधातूनं अपगमपदट्ठानानि.

चक्खुविञ्ञाणादीनं अनन्तरं रूपादिविजाननलक्खणा मनोधातु, रूपादिसम्पटिच्छनरसा, तथाभावपच्चुपट्ठाना, चक्खुविञ्ञाणादिअपगमपदट्ठाना.

अहेतुकविपाका सळारम्मणविजाननलक्खणा दुविधापि सन्तीरणादिकिच्चा मनोविञ्ञाणधातु, सन्तीरणादिरसा, तथाभावपच्चुपट्ठाना, हदयवत्थुपदट्ठाना. सोमनस्सुपेक्खायोगतो पन द्विपञ्चट्ठानभेदतो च तस्सा भेदो. एतासु हि एका एकन्तमिट्ठारम्मणे पवत्तिसब्भावतो सोमनस्ससम्पयुत्ता हुत्वा सन्तीरणतदारम्मणवसेन पञ्चद्वारे चेव जवनावसाने च पवत्तनतो द्विट्ठाना होति. एका इट्ठमज्झत्तारम्मणे पवत्तिसब्भावतो उपेक्खासम्पयुत्ता हुत्वा सन्तीरणतदारम्मणपटिसन्धिभवङ्गचुतिवसेन पवत्तनतो पञ्चट्ठाना होति.

अट्ठविधम्पि चेतं अहेतुकविपाकविञ्ञाणं नियतानियतारम्मणत्ता दुविधं. उपेक्खासुखसोमनस्सभेदतो तिविधं. विञ्ञाणपञ्चकं हेत्थ नियतारम्मणं यथाक्कमं रूपादीसुयेव पवत्तितो, सेसं अनियतारम्मणं. तत्र हि मनोधातु पञ्चसुपि रूपादीसु पवत्तति, मनोविञ्ञाणधातुद्वयं छसूति. कायविञ्ञाणं पनेत्थ सुखयुत्तं, द्विट्ठाना मनोविञ्ञाणधातु सोमनस्सयुत्ता, सेसं उपेक्खायुत्तन्ति. एवं ताव कुसलविपाकाहेतुकं अट्ठविधं वेदितब्बं.

अलोभादिविपाकहेतुसम्पयुत्तं पन सहेतुकं, तं कामावचरकुसलं विय सोमनस्सादि भेदतो अट्ठविधं. यथा पन कुसलं दानादिवसेन ¶ छसु आरम्मणेसु पवत्तति, न इदं तथा. इदञ्हि पटिसन्धिभवङ्गचुतितदारम्मणवसेन परित्तधम्मपरियापन्नेसुयेव छसु आरम्मणेसु पवत्तति ¶ . सङ्खारासङ्खारभावो पनेत्थ आगमनादिवसेन वेदितब्बो. सम्पयुत्तधम्मानञ्च विसेसे असतिपि आदासतलादीसु मुखनिमित्तं विय निरुस्साहं विपाकं, मुखं विय सउस्साहं कुसलन्ति वेदितब्बं.

केवलं हि अकुसलविपाकं अहेतुकमेव, तं चक्खुविञ्ञाणं, सोतघानजिव्हाकायविञ्ञाणं, सम्पटिच्छनकिच्चा मनोधातु, सन्तीरणादिकिच्चा पञ्चट्ठाना मनोविञ्ञाणधातूति सत्तविधं. तं लक्खणादितो कुसलाहेतुकविपाके वुत्तनयेनेव वेदितब्बं.

केवलञ्हि कुसलविपाकानि इट्ठइट्ठमज्झत्तारम्मणानि, इमानि अनिट्ठअनिट्ठमज्झत्तारम्मणानि. तानि च उपेक्खासुखसोमनस्सभेदतो तिविधानि, इमानि दुक्खउपेक्खावसेन दुविधानि. एत्थ हि कायविञ्ञाणं दुक्खसहगतमेव, सेसानि उपेक्खासहगतानि. सा च तेसु उपेक्खा हीना दुक्खं विय नातितिखिणा, इतरेसु उपेक्खा पणीता सुखं विय नातितिखिणा. इति इमेसं सत्तन्नं अकुसलविपाकानं पुरिमानञ्च सोळसन्नं कुसलविपाकानं वसेन कामावचरं विपाकविञ्ञाणं तेवीसतिविधं.

रूपावचरं पन कुसलं विय पञ्चविधं. कुसलं पन समापत्तिवसेन जवनवीथियं पवत्तति. इदं उपपत्तियं पटिसन्धिभवङ्गचुतिवसेन. यथा च रूपावचरं, एवं अरूपावचरम्पि कुसलं विय चतुब्बिधं. पवत्तिभेदोपिस्स रूपावचरे वुत्तनयो एव. लोकुत्तरविपाकं चतुमग्गयुत्तचित्तफलत्ता चतुब्बिधं, तं मग्गवीथिवसेन चेव समापत्तिवसेन च द्विधा पवत्तति. एवं सब्बम्पि चतूसु भूमीसु छत्तिंसविधं विपाकविञ्ञाणं होति.

किरियं पन भूमिभेदतो तिविधं कामावचरं रूपावचरं अरूपावचरञ्च. तत्थ कामावचरं दुविधं अहेतुकं सहेतुकञ्च. तत्थ अलोभादिकिरियहेतुविरहितं अहेतुकं, तं मनोधातुमनोविञ्ञाणधातुभेदतो दुविधं.

तत्थ चक्खुविञ्ञाणादिपुरेचररूपादिविजाननलक्खणा मनोधातु, आवज्जनरसा, रूपादिअभिमुखभावपच्चुपट्ठाना, भवङ्गविच्छेदपदट्ठाना, सा उपेक्खायुत्ताव होति.

मनोविञ्ञाणधातु ¶ ¶ पन दुविधा साधारणा असाधारणा च. तत्थ साधारणा उपेक्खासहगताहेतुककिरिया सळारम्मणविजाननलक्खणा, किच्चवसेन पञ्चद्वारमनोद्वारेसु वोट्ठब्बनावज्जनरसा, तथाभावपच्चुपट्ठाना, अहेतुकविपाकमनोविञ्ञाणधातु भवङ्गानं अञ्ञतरापगमपदट्ठाना.

असाधारणा सोमनस्ससहगताहेतुककिरिया सळारम्मणविजाननलक्खणा, किच्चवसेन अरहतं अनुळारेसु वत्थूसु हसितुप्पादनरसा, तथाभावपच्चुपट्ठाना, एकन्ततो हदयवत्थुपदट्ठानाति. इति कामावचरकिरियं अहेतुकं तिविधं.

सहेतुकं पन सोमनस्सादिभेदतो कुसलं विय अट्ठविधं. केवलञ्हि कुसलं सेक्खपुथुज्जनानं उप्पज्जति, इदं अरहतंयेवाति अयमेत्थ विसेसो. एवं ताव कामावचरं एकादसविधं.

रूपावचरं पन अरूपावचरञ्च कुसलं विय पञ्चविधं चतुब्बिधञ्च होति. अरहतं उप्पत्तिवसेनेव चस्स कुसलतो विसेसो वेदितब्बोति. एवं सब्बम्पि तीसु भूमीसु वीसतिविधं किरियविञ्ञाणं होति.

४५५. इति एकवीसति कुसलानि द्वादसाकुसलानि छत्तिंस विपाकानि वीसति किरियानीति सब्बानिपि एकूननवुति विञ्ञाणानि होन्ति. यानि पटिसन्धिभवङ्गावज्जनदस्सनसवनघायनसायनफुसनसम्पटिच्छनसन्तीरणवोट्ठब्बनजवनतदारम्मणचुतिवसेन चुद्दसहि आकारेहि पवत्तन्ति.

कथं? यदा हि अट्ठन्नं कामावचरकुसलानं आनुभावेन देवमनुस्सेसु सत्ता निब्बत्तन्ति, तदा नेसं मरणकाले पच्चुपट्ठितं कम्मकम्मनिमित्तगतिनिमित्तानं अञ्ञतरं आरम्मणं कत्वा अट्ठ सहेतुककामावचरविपाकानि, मनुस्सेसु पण्डकादिभावं आपज्जमानानं दुब्बलद्विहेतुककुसलविपाकउपेक्खासहगताहेतुकविपाकमनोविञ्ञाणधातु चाति पटिसन्धिवसेन नव विपाकचित्तानि पवत्तन्ति. यदा रूपावचरारूपावचरकुसलानुभावेन रूपारूपभवेसु निब्बत्तन्ति ¶ , तदा नेसं मरणकाले पच्चुपट्ठितं कम्मनिमित्तमेव आरम्मणं कत्वा नव रूपारूपावचरविपाकानि पटिसन्धिवसेन पवत्तन्ति.

यदा ¶ पन अकुसलानुभावेन अपाये निब्बत्तन्ति, तदा नेसं मरणकाले पच्चुपट्ठितं कम्मकम्मनिमित्तगतिनिमित्तानं अञ्ञतरं आरम्मणं कत्वा एका अकुसलविपाकाहेतुकमनोविञ्ञाणधातु पटिसन्धिवसेन पवत्ततीति एवं तावेत्थ एकूनवीसतिया विपाकविञ्ञाणानं पटिसन्धिवसेन पवत्ति वेदितब्बा.

पटिसन्धिविञ्ञाणे पन निरुद्धे तं तं पटिसन्धिविञ्ञाणमनुबन्धमानं तस्स तस्सेव कम्मस्स विपाकभूतं तस्मिञ्ञेव आरम्मणे तादिसमेव भवङ्गविञ्ञाणं नाम पवत्तति, पुनपि तादिसन्ति एवं असति सन्तानविनिवत्तके अञ्ञस्मिं चित्तुप्पादे नदीसोतं विय सुपिनं अपस्सतो निद्दोक्कमनकालादीसु अपरिमाणसङ्ख्यम्पि पवत्ततियेवाति एवं तेसञ्ञेव विञ्ञाणानं भवङ्गवसेनापि पवत्ति वेदितब्बा.

एवं पवत्ते पन भवङ्गसन्ताने यदा सत्तानं इन्द्रियानि आरम्मणगहणक्खमानि होन्ति, तदा चक्खुस्सापाथगते रूपे रूपं पटिच्च चक्खुपसादस्स घट्टना होति, ततो घट्टनानुभावेन भवङ्गचलनं होति, अथ निरुद्धे भवङ्गे तदेव रूपं आरम्मणं कत्वा भवङ्गं विच्छिन्दमाना विय आवज्जनकिच्चं साधयमाना किरियमनोधातु उप्पज्जति. सोतद्वारादीसुपि एसेव नयो. मनोद्वारे पन छब्बिधेपि आरम्मणे आपाथगते भवङ्गचलनानन्तरं भवङ्गं विच्छिन्दमाना विय आवज्जनकिच्चं साधयमाना अहेतुककिरियमनोविञ्ञाणधातु उप्पज्जति उपेक्खासहगताति एवं द्विन्नं किरियविञ्ञाणानं आवज्जनवसेन पवत्ति वेदितब्बा.

आवज्जनानन्तरं पन चक्खुद्वारे ताव दस्सनकिच्चं साधयमानं चक्खुपसादवत्थुकं चक्खुविञ्ञाणं, सोतद्वारादीसु सवनादिकिच्चं साधयमानानि सोतघानजिव्हाकायविञ्ञाणानि पवत्तन्ति. तानि इट्ठइट्ठमज्झत्तेसु विसयेसु कुसलविपाकानि, अनिट्ठअनिट्ठमज्झत्तेसु विसयेसु अकुसलविपाकानीति एवं दसन्नं विपाकविञ्ञाणानं दस्सनसवनघायनसायनफुसनवसेन पवत्ति वेदितब्बा.

‘‘चक्खुविञ्ञाणधातुया ¶ उप्पज्जित्वा निरुद्धसमनन्तरा उप्पज्जति चित्तं मनो मानसं तज्जा मनोधातू’’तिआदिवचनतो (विभ. १८४) पन चक्खुविञ्ञाणादीनं अनन्तरा ¶ तेसञ्ञेव विसयं सम्पटिच्छमाना कुसलविपाकानन्तरं कुसलविपाका, अकुसलविपाकानन्तरं अकुसलविपाका मनोधातु उप्पज्जति. एवं द्विन्नं विपाकविञ्ञाणानं सम्पटिच्छनवसेन पवत्ति वेदितब्बा.

‘‘मनोधातुयापि उप्पज्जित्वा निरुद्धसमनन्तरा उप्पज्जति चित्तं मनो मानसं तज्जामनोविञ्ञाणधातू’’ति (विभ. १८४) वचनतो पन मनोधातुया सम्पटिच्छितमेव विसयं सन्तीरयमाना अकुसलविपाकमनोधातुया अनन्तरा अकुसलविपाका, कुसलविपाकाय अनन्तरा इट्ठारम्मणे सोमनस्ससहगता, इट्ठमज्झत्ते उपेक्खासहगता उप्पज्जति विपाकाहेतुकमनोविञ्ञाणधातूति एवं तिण्णं विपाकविञ्ञाणानं सन्तीरणवसेन पवत्ति वेदितब्बा.

सन्तीरणानन्तरं पन तमेव विसयं ववत्थापयमाना उप्पज्जति किरियाहेतुकमनोविञ्ञाणधातु उपेक्खासहगताति एवं एकस्सेव किरियविञ्ञाणस्स वोट्ठब्बनवसेन पवत्ति वेदितब्बा.

वोट्ठब्बनानन्तरं पन सचे महन्तं होति रूपादिआरम्मणं, अथ यथाववत्थापिते विसये अट्ठन्नं वा कामावचरकुसलानं द्वादसन्नं वा अकुसलानं नवन्नं वा अवसेसकामावचरकिरियानं अञ्ञतरवसेन छ सत्त वा जवनानि जवन्ति, एसो ताव पञ्चद्वारे नयो.

मनोद्वारे पन मनोद्वारावज्जनानन्तरं तानियेव. गोत्रभुतो उद्धं रूपावचरतो पञ्च कुसलानि पञ्च किरियानि, अरूपावचरतो चत्तारि कुसलानि चत्तारि किरियानि, लोकुत्तरतो चत्तारि मग्गचित्तानि चत्तारि फलचित्तानीति इमेसु यं यं लद्धपच्चयं होति, तं तं जवतीति एवं पञ्चपञ्ञासाय कुसलाकुसलकिरियविपाकविञ्ञाणानं जवनवसेन पवत्ति वेदितब्बा.

जवनावसाने पन सचे पञ्चद्वारे अतिमहन्तं, मनोद्वारे च विभूतमारम्मणं होति, अथ कामावचरसत्तानं कामावचरजवनावसाने इट्ठारम्मणादीनं पुरिमकम्मजवनचित्तादीनञ्च वसेन यो यो पच्चयो लद्धो होति, तस्स तस्स वसेन अट्ठसु सहेतुककामावचरविपाकेसु तीसु ¶ विपाकाहेतुकमनोविञ्ञाणधातूसु च अञ्ञतरं पटिसोतगतं नावं अनुबन्धमानं किञ्चि अन्तरं उदकमिव भवङ्गस्सारम्मणतो अञ्ञस्मिं आरम्मणे ¶ जवितं जवनमनुबन्धं द्विक्खत्तुं सकिं वा विपाकविञ्ञाणं उप्पज्जति. तदेतं जवनावसाने भवङ्गस्स आरम्मणे पवत्तनारहं समानं तस्स जवनस्स आरम्मणं आरम्मणं कत्वा पवत्तत्ता तदारम्मणन्ति वुच्चति. एवं एकादसन्नं विपाकविञ्ञाणानं तदारम्मणवसेन पवत्ति वेदितब्बा.

तदारम्मणावसाने पन पुन भवङ्गमेव पवत्तति, भवङ्गे विच्छिन्ने पुन आवज्जनादीनीति एवं लद्धपच्चयचित्तसन्तानं भवङ्गानन्तरं आवज्जनं आवज्जनानन्तरं दस्सनादीनीति चित्तनियमवसेनेव पुनप्पुनं ताव पवत्तति, याव एकस्मिं भवे भवङ्गस्स परिक्खयो. एकस्मिं हि भवे यं सब्बपच्छिमं भवङ्गचित्तं, तं ततो चवनत्ता चुतीति वुच्चति. तस्मा तम्पि एकूनवीसतिविधमेव होति. एवं एकूनवीसतिया विपाकविञ्ञाणानं चुतिवसेन पवत्ति वेदितब्बा.

चुतितो पन पुन पटिसन्धि, पटिसन्धितो पुन भवङ्गन्ति एवं भवगतिठितिनिवासेसु संसरमानानं सत्तानं अविच्छिन्नं चित्तसन्तानं पवत्ततियेव. यो पनेत्थ अरहत्तं पापुणाति, तस्स चुतिचित्ते निरुद्धे निरुद्धमेव होतीति.

इदं विञ्ञाणक्खन्धे वित्थारकथामुखं.

वेदनाक्खन्धकथा

४५६. इदानि यं वुत्तं ‘‘यंकिञ्चि वेदयितलक्खणं, सब्बं तं एकतो कत्वा वेदनाक्खन्धो वेदितब्बो’’ति, एत्थापि वेदयितलक्खणं नाम वेदनाव. यथाह – ‘‘वेदयति वेदयतीति खो आवुसो, तस्मा वेदनाति वुच्चती’’ति (म. नि. १.४५०). सा पन वेदयितलक्खणेन सभावतो एकविधापि जातिवसेन तिविधा होति कुसला, अकुसला, अब्याकता चाति.

तत्थ कामावचरं सोमनस्सुपेक्खाञाणसङ्खारभेदतो अट्ठविधन्तिआदिना नयेन वुत्तेन कुसलविञ्ञाणेन ¶ सम्पयुत्ता कुसला, अकुसलेन सम्पयुत्ता अकुसला, अब्याकतेन सम्पयुत्ता अब्याकताति वेदितब्बा. सा सभावभेदतो पञ्चविधा होति – सुखं दुक्खं सोमनस्सं दोमनस्सं उपेक्खाति.

तत्थ ¶ कुसलविपाकेन कायविञ्ञाणेन सम्पयुत्तं सुखं. अकुसलविपाकेन दुक्खं. कामावचरतो चतूहि कुसलेहि, चतूहि सहेतुकविपाकेहि, एकेन अहेतुकविपाकेन, चतूहि सहेतुककिरियेहि, एकेन अहेतुककिरियेन, चतूहि अकुसलेहि, रूपावचरतो ठपेत्वा पञ्चमज्झानविञ्ञाणं चतूहि कुसलेहि, चतूहि विपाकेहि, चतूहि किरियेहि, लोकुत्तरं पन यस्मा अझानिकं नाम नत्थि, तस्मा अट्ठ लोकुत्तरानि पञ्चन्नं झानानं वसेन चत्तालीसं होन्ति. तेसु ठपेत्वा अट्ठ पञ्चमज्झानिकानि सेसेहि द्वत्तिंसाय कुसलविपाकेहीति एवं सोमनस्सं द्वासट्ठिया विञ्ञाणेहि सम्पयुत्तं. दोमनस्सं द्वीहि अकुसलेहि. उपेक्खा अवसेसपञ्चपञ्ञासाय विञ्ञाणेहि सम्पयुत्ता.

तत्थ इट्ठफोट्ठब्बानुभवनलक्खणं सुखं, सम्पयुत्तानं उपब्रूहनरसं, कायिकअस्सादपच्चुपट्ठानं, कायिन्द्रियपदट्ठानं.

अनिट्ठफोट्ठब्बानुभवनलक्खणं दुक्खं, सम्पयुत्तानं मिलापनरसं, कायिकाबाधपच्चुपट्ठानं, कायिन्द्रियपदट्ठानं.

इट्ठारम्मणानुभवनलक्खणं सोमनस्सं, यथा तथा वा इट्ठाकारसम्भोगरसं, चेतसिकअस्सादपच्चुपट्ठानं, पस्सद्धिपदट्ठानं.

अनिट्ठारम्मणानुभवनलक्खणं दोमनस्सं, यथा तथा वा अनिट्ठाकारसम्भोगरसं, चेतसिकाबाधपच्चुपट्ठानं, एकन्तेनेव हदयवत्थुपदट्ठानं.

मज्झत्तवेदयितलक्खणा उपेक्खा, सम्पयुत्तानं नातिउपब्रूहनमिलापनरसा, सन्तभावपच्चुपट्ठाना, निप्पीतिकचित्तपदट्ठानाति.

इदं वेदनाक्खन्धे वित्थारकथामुखं.

सञ्ञाक्खन्धकथा

४५७. इदानि ¶ यं वुत्तं ‘‘यंकिञ्चि सञ्जाननलक्खणं, सब्बं तं एकतो कत्वा सञ्ञाक्खन्धो वेदितब्बो’’ति, एत्थापि सञ्जाननलक्खणं नाम सञ्ञाव. यथाह – ‘‘सञ्जानाति सञ्जानातीति खो, आवुसो, तस्मा सञ्ञाति वुच्चती’’ति ¶ (म. नि. १.४५०). सा पनेसा सञ्जाननलक्खणेन सभावतो एकविधापि जातिवसेन तिविधा होति कुसला, अकुसला, अब्याकता च.

तत्थ कुसलविञ्ञाणसम्पयुत्ता कुसला, अकुसलसम्पयुत्ता अकुसला, अब्याकतसम्पयुत्ता अब्याकता. न हि तं विञ्ञाणं अत्थि, यं सञ्ञाय विप्पयुत्तं, तस्मा यत्तको विञ्ञाणस्स भेदो, तत्तको सञ्ञायाति.

सा पनेसा एवं विञ्ञाणेन समप्पभेदापि लक्खणादितो सब्बाव सञ्जाननलक्खणा, तदेवेतन्ति पुन सञ्जाननपच्चयनिमित्तकरणरसा दारुआदीसु तच्छकादयो विय, यथागहितनिमित्तवसेन अभिनिवेसकरणपच्चुपट्ठाना हत्थिदस्सकअन्धा (उदा. ५४) विय, यथाउपट्ठितविसयपदट्ठाना तिणपुरिसकेसु मिगपोतकानं पुरिसाति उप्पन्नसञ्ञा वियाति.

इदं सञ्ञाक्खन्धे वित्थारकथामुखं.

सङ्खारक्खन्धकथा

४५८. यं पन वुत्तं ‘‘यंकिञ्चि अभिसङ्खरणलक्खणं, सब्बं तं एकतो कत्वा सङ्खारक्खन्धो वेदितब्बो’’ति, एत्थ अभिसङ्खरणलक्खणं नाम रासिकरणलक्खणं. किं पन तन्ति, सङ्खारायेव. यथाह – ‘‘सङ्खतमभिसङ्खरोन्तीति खो, भिक्खवे, तस्मा सङ्खाराति वुच्चन्ती’’ति (सं. नि. ३.७९). ते अभिसङ्खरणलक्खणा, आयूहनरसा, विप्फारपच्चुपट्ठाना, सेसखन्धत्तयपदट्ठाना.

एवं लक्खणादितो एकविधापि च जातिवसेन तिविधा कुसला, अकुसला, अब्याकताति ¶ . तेसु कुसलविञ्ञाणसम्पयुत्ता कुसला. अकुसलसम्पयुत्ता अकुसला. अब्याकतसम्पयुत्ता अब्याकता.

तत्थ कामावचरपठमकुसलविञ्ञाणसम्पयुत्ता ताव नियता सरूपेन आगता सत्तवीसति, येवापनका चत्तारो, अनियता पञ्चाति छत्तिंस. तत्थ फस्सो, चेतना, वितक्को, विचारो, पीति, वीरियं, जीवितं, समाधि, सद्धा, सति, हिरी, ओत्तप्पं, अलोभो, अदोसो, अमोहो, कायपस्सद्धि, चित्तपस्सद्धि, कायलहुता, चित्तलहुता, कायमुदुता, चित्तमुदुता, कायकम्मञ्ञता, चित्तकम्मञ्ञता, कायपागुञ्ञता, चित्तपागुञ्ञता, कायुजुकता, चित्तुजुकताति इमे सरूपेन ¶ आगता सत्तवीसति (ध. स. १; ध. स. अट्ठ. १ येवापनकवण्णना). छन्दो, अधिमोक्खो, मनसिकारो, तत्रमज्झत्तताति इमे येवापनका चत्तारो (ध. स. अट्ठ. १ येवापनकवण्णना). करुणा, मुदिता, कायदुच्चरितविरति, वचीदुच्चरितविरति, मिच्छाजीवविरतीति इमे अनियता पञ्च. एते हि कदाचि उप्पज्जन्ति, उप्पज्जमानापि च न एकतो उप्पज्जन्ति.

४५९. तत्थ फुसतीति फस्सो. स्वायं फुसनलक्खणो. सङ्घट्टनरसो, सन्निपातपच्चुपट्ठानो, आपाथगतविसयपदट्ठानो. अयञ्हि अरूपधम्मोपि समानो आरम्मणे फुसनाकारेनेव पवत्तति. एकदेसेन च अनल्लियमानोपि रूपं विय चक्खु, सद्दो विय च सोतं चित्तं आरम्मणञ्च सङ्घट्टेति, तिकसन्निपातसङ्खातस्स अत्तनो कारणस्स वसेन पवेदितत्ता सन्निपातपच्चुपट्ठानो. तज्जासमन्नाहारेन चेव इन्द्रियेन च परिक्खते विसये अनन्तरायेनेव उप्पज्जनतो आपाथगतविसयपदट्ठानोति वुच्चति. वेदनाधिट्ठानभावतो पन निच्चम्मगावी (सं. नि. २.६३) विय दट्ठब्बो.

४६०. चेतयतीति चेतना. अभिसन्दहतीति अत्थो. सा चेतनाभावलक्खणा, आयूहनरसा, संविदहनपच्चुपट्ठाना सकिच्चपरकिच्चसाधिका जेट्ठसिस्समहावड्ढकीआदयो विय. अच्चायिककम्मानुस्सरणादीसु च पनायं सम्पयुत्तानं उस्सहनभावेन पवत्तमाना पाकटा होति.

वितक्कविचारपीतीसु यं वत्तब्बं सिया, तं सब्बं पथवीकसिणनिद्देसे पठमज्झानवण्णनायं (विसुद्धि. १.७१) वुत्तमेव.

४६१. वीरभावो ¶ वीरियं. तं उस्सहनलक्खणं, सहजातानं उपत्थम्भनरसं, असंसीदनभावपच्चुपट्ठानं. ‘‘संविग्गो योनिसो पदहती’’ति (अ. नि. ४.११३) वचनतो संवेगपदट्ठानं, वीरियारम्भवत्थुपदट्ठानं वा, सम्मा आरद्धं सब्बसम्पत्तीनं मूलं होतीति दट्ठब्बं.

४६२. जीवन्ति तेन, सयं वा जीवति, जीवनमत्तमेव वा तन्ति जीवितं. लक्खणादीनि पनस्स रूपजीविते वुत्तनयेनेव वेदितब्बानि. तञ्हि रूपधम्मानं जीवितं, इदं अरूपधम्मानन्ति इदमेवेत्थ नानाकरणं.

४६३. आरम्मणे ¶ चित्तं समं आधियति, सम्मा वा आधियति, समाधानमत्तमेव वा एतं चित्तस्साति समाधि. सो अविसारलक्खणो, अविक्खेपलक्खणो वा, सहजातानं सम्पिण्डनरसो न्हानियचुण्णानं उदकं विय, उपसमपच्चुपट्ठानो, विसेसतो सुखपदट्ठानो, निवाते दीपच्चीनं ठिति विय चेतसो ठितीति दट्ठब्बो.

४६४. सद्दहन्ति एताय, सयं वा सद्दहति, सद्दहनमत्तमेव वा एसाति सद्धा. सा सद्दहनलक्खणा, ओकप्पनलक्खणा वा, पसादनरसा उदकप्पसादकमणि विय, पक्खन्दनरसा वा ओघुत्तरणो विय. अकालुस्सियपच्चुपट्ठाना, अधिमुत्तिपच्चुपट्ठाना वा, सद्धेय्यवत्थुपदट्ठाना, सद्धम्मस्सवनादिसोतापत्तियङ्ग(दी. नि. ३.३११; सं. नि. ५.१००१) पदट्ठाना वा, हत्थवित्तबीजानि विय दट्ठब्बा.

४६५. सरन्ति ताय, सयं वा सरति सरणमत्तमेव वा एसाति सति. सा अपिलापनलक्खणा, असम्मोसरसा, आरक्खपच्चुपट्ठाना, विसयाभिमुखभावपच्चुपट्ठाना वा, थिरसञ्ञापदट्ठाना, कायादिसतिपट्ठानपदट्ठाना वा. आरम्मणे दळ्हपतिट्ठितत्ता पन एसिका विय, चक्खुद्वारादिरक्खणतो दोवारिको विय च दट्ठब्बा.

४६६. कायदुच्चरितादीहि हिरियतीति हिरी. लज्जायेतं अधिवचनं. तेहियेव ओत्तप्पतीति ओत्तप्पं. पापतो उब्बेगस्सेतं अधिवचनं. तत्थ पापतो जिगुच्छनलक्खणा हिरी. उत्तासनलक्खणं ओत्तप्पं. लज्जाकारेन पापानं अकरणरसा हिरी. उत्तासाकारेन ओत्तप्पं. वुत्तप्पकारेनेव ¶ च पापतो सङ्कोचनपच्चुपट्ठाना एता, अत्तगारवपरगारवपदट्ठाना. अत्तानं गरुं कत्वा हिरिया पापं जहाति कुलवधू विय. परं गरुं कत्वा ओत्तप्पेन पापं जहाति वेसिया विय. इमे च पन द्वे धम्मा लोकपालकाति (अ. नि. २.९) दट्ठब्बा.

४६७. न लुब्भन्ति तेन, सयं वा न लुब्भति, अलुब्भनमत्तमेव वा तन्ति अलोभो. अदोसामोहेसुपि एसेव नयो. तेसु अलोभो आरम्मणे चित्तस्स अगेधलक्खणो, अलग्गभावलक्खणो वा कमलदले जलबिन्दु विय. अपरिग्गहरसो मुत्तभिक्खु विय, अनल्लीनभावपच्चुपट्ठानो असुचिम्हि पतितपुरिसो विय.

४६८. अदोसो ¶ अचण्डिक्कलक्खणो, अविरोधलक्खणो वा अनुकूलमित्तो विय, आघातविनयरसो, परिळाहविनयरसो वा चन्दनं विय, सोम्मभावपच्चुपट्ठानो पुण्णचन्दो विय.

४६९. अमोहो यथासभावपटिवेधलक्खणो, अक्खलितपटिवेधलक्खणो वा कुसलिस्सासखित्तउसुपटिवेधो विय, विसयोभासनरसो पदीपो विय. असम्मोहपच्चुपट्ठानो अरञ्ञगतसुदेसको विय. तयोपि चेते सब्बकुसलानं मूलभूताति दट्ठब्बा.

४७०. कायस्स पस्सम्भनं कायपस्सद्धि. चित्तस्स पस्सम्भनं चित्तपस्सद्धि. कायोति चेत्थ वेदनादयो तयो खन्धा. उभोपि पनेता एकतो कत्वा कायचित्तदरथवूपसमलक्खणा कायचित्तपस्सद्धियो, कायचित्तदरथनिमद्दनरसा, कायचित्तानं अपरिप्फन्दनसीतिभावपच्चुपट्ठाना, कायचित्तपदट्ठाना. कायचित्तानं अवूपसमकरउद्धच्चादिकिलेसपटिपक्खभूताति दट्ठब्बा.

कायस्स लहुभावो कायलहुता. चित्तस्स लहुभावो चित्तलहुता. ता कायचित्तगरुभाववूपसमलक्खणा, कायचित्तगरुभावनिमद्दनरसा, कायचित्तानं अदन्धतापच्चुपट्ठाना, कायचित्तपदट्ठाना. कायचित्तानं गरुभावकरथिनमिद्धादिकिलेसपटिपक्खभूताति दट्ठब्बा.

कायस्स मुदुभावो कायमुदुता. चित्तस्स मुदुभावो चित्तमुदुता. ता कायचित्तत्थम्भवूपसमलक्खणा ¶ , कायचित्तथद्धभावनिमद्दनरसा, अप्पटिघातपच्चुपट्ठाना, कायचित्तपदट्ठाना. कायचित्तानं थद्धभावकरदिट्ठिमानादिकिलेसपटिपक्खभूताति दट्ठब्बा.

कायस्स कम्मञ्ञभावो कायकम्मञ्ञता. चित्तस्स कम्मञ्ञभावो चित्तकम्मञ्ञता. ता कायचित्ताकम्मञ्ञभाववूपसमलक्खणा, कायचित्ताकम्मञ्ञभावनिमद्दनरसा, कायचित्तानं आरम्मणकरणसम्पत्तिपच्चुपट्ठाना, कायचित्तपदट्ठाना. कायचित्तानं अकम्मञ्ञभावकरावसेसनीवरणादिपटिपक्खभूता, पसादनीयवत्थूसु पसादावहा, हितकिरियासु विनियोगक्खमभावावहा सुवण्णविसुद्धि वियाति दट्ठब्बा.

कायस्स ¶ पागुञ्ञभावो कायपागुञ्ञता. चित्तस्स पागुञ्ञभावो चित्तपागुञ्ञता. ता कायचित्तानं अगेलञ्ञभावलक्खणा, कायचित्तगेलञ्ञनिमद्दनरसा, निरादीनवपच्चुपट्ठाना, कायचित्तपदट्ठाना. कायचित्तानं गेलञ्ञकरअसद्धियादिपटिपक्खभूताति दट्ठब्बा.

कायस्स उजुकभावो कायुजुकता. चित्तस्स उजुकभावो चित्तुजुकता. ता कायचित्तअज्जवलक्खणा, कायचित्तकुटिलभावनिमद्दनरसा, अजिम्हतापच्चुपट्ठाना, कायचित्तपदट्ठाना. कायचित्तानं कुटिलभावकरमायासाठेय्यादिपटिपक्खभूताति दट्ठब्बा.

४७१. छन्दोति कत्तुकामतायेतं अधिवचनं. तस्मा सो कत्तुकामतालक्खणो छन्दो, आरम्मणपरियेसनरसो, आरम्मणेन अत्थिकतापच्चुपट्ठानो, तदेवस्स पदट्ठानं. आरम्मणग्गहणे अयं चेतसो हत्थप्पसारणं विय दट्ठब्बो.

४७२. अधिमुच्चनं अधिमोक्खो. सो सन्निट्ठानलक्खणो, असंसप्पनरसो, निच्छयपच्चुपट्ठानो, सन्निट्ठेय्यधम्मपदट्ठानो, आरम्मणे निच्चलभावेन इन्दखीलो विय दट्ठब्बो.

४७३. किरिया कारो. मनम्हि कारो मनसिकारो. पुरिममनतो विसदिसमनं करोतीतिपि मनसिकारो. स्वायं आरम्मणपटिपादको, वीथिपटिपादको, जवनपटिपादकोति तिप्पकारो.

तत्थ ¶ आरम्मणपटिपादको मनम्हि कारोति मनसिकारो. सो सारणलक्खणो, सम्पयुत्तानं आरम्मणे संयोजनरसो, आरम्मणाभिमुखभावपच्चुपट्ठानो, आरम्मणपदट्ठानो. सङ्खारक्खन्धपरियापन्नो, आरम्मणपटिपादकत्तेन सम्पयुत्तानं सारथि विय दट्ठब्बो. वीथिपटिपादकोति पन पञ्चद्वारावज्जनस्सेतं अधिवचनं. जवनपटिपादकोति मनोद्वारावज्जनस्सेतं अधिवचनं. न ते इध अधिप्पेता.

४७४. तेसु धम्मेसु मज्झत्तता तत्रमज्झत्तता. सा चित्तचेतसिकानं समवाहितलक्खणा, ऊनाधिकतानिवारणरसा, पक्खपातुपच्छेदनरसा वा, मज्झत्तभावपच्चुपट्ठाना, चित्तचेतसिकानं अज्झुपेक्खनभावेन समप्पवत्तानं आजानीयानं अज्झुपेक्खकसारथि विय दट्ठब्बा.

करुणामुदिता ¶ च ब्रह्मविहारनिद्देसे (विसुद्धि. १.२६२) वुत्तनयेनेव वेदितब्बा. केवलञ्हि ता अप्पनाप्पत्ता रूपावचरा, इमा कामावचराति अयमेव विसेसो.

केचि पन मेत्तुपेक्खायोपि अनियतेसु इच्छन्ति, तं न गहेतब्बं. अत्थतो हि अदोसोयेव मेत्ता, तत्रमज्झत्तुपेक्खायेव उपेक्खाति.

४७५. कायदुच्चरिततो विरति कायदुच्चरितविरति. एस नयो सेसासुपि. लक्खणादितो पनेता तिस्सोपि कायदुच्चरितादिवत्थूनं अवीतिक्कमलक्खणा, अमद्दनलक्खणाति वुत्तं होति. कायदुच्चरितादिवत्थुतो सङ्कोचनरसा, अकिरियपच्चुपट्ठाना, सद्धाहिरोत्तप्पअप्पिच्छतादिगुणपदट्ठाना, पापकिरियतो चित्तस्स विमुखभावभूताति दट्ठब्बा.

४७६. इति इमेव छत्तिंस सङ्खारा पठमेन कामावचरकुसलविञ्ञाणेन सम्पयोगं गच्छन्तीति वेदितब्बा. यथा च पठमेन, एवं दुतियेनापि. ससङ्खारभावमत्तमेव हेत्थ विसेसो.

ततियेन पन ठपेत्वा अमोहं अवसेसा वेदितब्बा. तथा चतुत्थेन. ससङ्खारभावमत्तमेव हेत्थ विसेसो.

पठमे ¶ वुत्तेसु पन ठपेत्वा पीतिं अवसेसा पञ्चमेन सम्पयोगं गच्छन्ति. यथा च पञ्चमेन, एवं छट्ठेनापि. ससङ्खारभावमत्तमेव हेत्थ विसेसो. सत्तमेन च पन ठपेत्वा अमोहं अवसेसा वेदितब्बा. तथा अट्ठमेन. ससङ्खारभावमत्तमेव हेत्थ विसेसो.

पठमे वुत्तेसु ठपेत्वा विरतित्तयं सेसा रूपावचरकुसलेसु पठमेन सम्पयोगं गच्छन्ति. दुतियेन ततो वितक्कवज्जा. ततियेन ततो विचारवज्जा. चतुत्थेन ततो पीतिवज्जा. पञ्चमेन ततो अनियतेसु करुणामुदितावज्जा. तेयेव चतूसु आरुप्पकुसलेसु. अरूपावचरभावोयेव हि एत्थ विसेसो.

लोकुत्तरेसु पठमज्झानिके ताव मग्गविञ्ञाणे पठमरूपावचरविञ्ञाणे वुत्तनयेन, दुतियज्झानिकादिभेदे दुतियरूपावचरविञ्ञाणादीसु वुत्तनयेनेव वेदितब्बा. करुणामुदितानं पन अभावो, नियतविरतिता ¶ , लोकुत्तरता चाति अयमेत्थ विसेसो. एवं ताव कुसलायेव सङ्खारा वेदितब्बा.

४७७. अकुसलेसु लोभमूले पठमाकुसलसम्पयुत्ता ताव नियता सरूपेन आगता तेरस, येवापनका चत्तारोति सत्तरस. तत्थ फस्सो, चेतना, वितक्को, विचारो, पीति, वीरियं, जीवितं, समाधि, अहिरिकं, अनोत्तप्पं, लोभो, मोहो, मिच्छादिट्ठीति इमे सरूपेन आगता तेरस (ध. स. ३६५; ध. स. अट्ठ. ३६५). छन्दो, अधिमोक्खो, उद्धच्चं, मनसिकारोति इमे येवापनका चत्तारो (ध. स. अट्ठ. ३६५).

४७८. तत्थ न हिरियतीति अहिरिको. अहिरिकस्स भावो अहिरिकं. न ओतप्पतीति अनोत्तप्पं. तेसु अहिरिकं कायदुच्चरितादीहि अजिगुच्छनलक्खणं, अलज्जालक्खणं वा. अनोत्तप्पं तेहेव असारज्जलक्खणं, अनुत्तासलक्खणं वा. अयमेत्थ सङ्खेपो. वित्थारो पन हिरोत्तप्पानं वुत्तपटिपक्खवसेन वेदितब्बो.

४७९. लुब्भन्ति तेन, सयं वा लुब्भति, लुब्भनमत्तमेव वा तन्ति लोभो. मुय्हन्ति तेन, सयं वा मुय्हति, मुय्हनमत्तमेव वा तन्ति मोहो. तेसु लोभो आरम्मणग्गहणलक्खणो मक्कटालेपो विय, अभिसङ्गरसो तत्तकपाले खित्तमंसपेसि विय. अपरिच्चागपच्चुपट्ठानो तेलञ्जनरागो ¶ विय. संयोजनियधम्मेसु अस्साददस्सनपदट्ठानो. तण्हानदीभावेन वड्ढमानो सीघसोता नदी इव महासमुद्दं अपायमेव गहेत्वा गच्छतीति दट्ठब्बो.

४८०. मोहो चित्तस्स अन्धभावलक्खणो, अञ्ञाणलक्खणो वा, असम्पटिवेधरसो, आरम्मणसभावच्छादनरसो वा, असम्मापटिपत्तिपच्चुपट्ठानो, अन्धकारपच्चुपट्ठानो वा, अयोनिसोमनसिकारपदट्ठानो, सब्बाकुसलानं मूलन्ति दट्ठब्बो.

४८१. मिच्छा पस्सन्ति ताय, सयं वा मिच्छा पस्सति, मिच्छादस्सनमत्तं वा एसाति मिच्छादिट्ठि. सा अयोनिसो अभिनिवेसलक्खणा, परामासरसा, मिच्छाभिनिवेसपच्चुपट्ठाना, अरियानं अदस्सनकामतादिपदट्ठाना, परमं वज्जन्ति दट्ठब्बा.

४८२. उद्धतभावो ¶ उद्धच्चं. तं अवूपसमलक्खणं वाताभिघातचलजलं विय, अनवट्ठानरसं वाताभिघातचलधजपटाका विय, भन्तत्तपच्चुपट्ठानं पासाणाभिघातसमुद्धतभस्मं विय, चेतसो अवूपसमे अयोनिसोमनसिकारपदट्ठानं, चित्तविक्खेपोति दट्ठब्बं. सेसा कुसले वुत्तनयेनेव वेदितब्बा. अकुसलभावोयेव हि अकुसलभावेन च लामकत्तं एतेसं तेहि विसेसो.

४८३. इति इमे सत्तरस सङ्खारा पठमेन अकुसलविञ्ञाणेन सम्पयोगं गच्छन्तीति वेदितब्बा. यथा च पठमेन, एवं दुतियेनापि. ससङ्खारता पनेत्थ थिनमिद्धस्स च अनियतता विसेसो.

तत्थ थिननता थिनं. मिद्धनता मिद्धं. अनुस्साहसंहननता असत्तिविघातो चाति अत्थो. थिनञ्च मिद्धञ्च थिनमिद्धं. तत्थ थिनं अनुस्साहलक्खणं, वीरियविनोदनरसं, संसीदनपच्चुपट्ठानं. मिद्धं अकम्मञ्ञतालक्खणं, ओनहनरसं, लीनतापच्चुपट्ठानं, पचलायिकानिद्दापच्चुपट्ठानं वा. उभयम्पि अरतिविजम्भिकादीसु अयोनिसोमनसिकारपदट्ठानं.

ततियेन पठमे वुत्तेसु ठपेत्वा मिच्छादिट्ठिं अवसेसा वेदितब्बा. मानो पनेत्थ अनियतो ¶ होति. अयं विसेसो, सो उण्णतिलक्खणो, सम्पग्गहरसो, केतुकम्यतापच्चुपट्ठानो, दिट्ठिविप्पयुत्तलोभपदट्ठानो, उम्मादो विय दट्ठब्बो.

चतुत्थेन दुतिये वुत्तेसु ठपेत्वा मिच्छादिट्ठिं अवसेसा वेदितब्बा. एत्थापि च मानो अनियतेसु होतियेव. पठमे वुत्तेसु पन ठपेत्वा पीतिं अवसेसा पञ्चमेन सम्पयोगं गच्छन्ति. यथा च पञ्चमेन, एवं छट्ठेनापि. ससङ्खारता पनेत्थ थिनमिद्धस्स च अनियतभावो विसेसो. सत्तमेन पञ्चमे वुत्तेसु ठपेत्वा दिट्ठिं अवसेसा वेदितब्बा. मानो पनेत्थ अनियतो होति. अट्ठमेन छट्ठे वुत्तेसु ठपेत्वा दिट्ठिं अवसेसा वेदितब्बा. एत्थापि च मानो अनियतेसु होतियेवाति.

४८४. दोसमूलेसु पन द्वीसु पठमसम्पयुत्ता ताव नियता सरूपेन आगता एकादस, येवापनका चत्तारो, अनियता तयोति अट्ठारस ¶ . तत्थ फस्सो, चेतना, वितक्को, विचारो, वीरियं, जीवितं, समाधि, अहिरिकं, अनोप्पत्तं, दोसो, मोहोति इमे सरूपेन आगता एकादस (ध. स. ४१३; ध. स. अट्ठ. ४१३). छन्दो, अधिमोक्खो, उद्धच्चं, मनसिकारोति इमे येवापनका चत्तारो (ध. स. अट्ठ. ४१३). इस्सा, मच्छरियं, कुक्कुच्चन्ति इमे अनियता तयो (ध. स. अट्ठ. ४१३).

४८५. तत्थ दुस्सन्ति तेन, सयं वा दुस्सति, दुस्सनमत्तमेव वा तन्ति दोसो. सो चण्डिक्कलक्खणो पहटासीविसो विय, विसप्पनरसो विसनिपातो विय, अत्तनो निस्सयदहनरसो वा दावग्गि विय. दूसनपच्चुपट्ठानो लद्धोकासो विय सपत्तो, आघातवत्थुपदट्ठानो, विससंसट्ठपूतिमुत्तं विय दट्ठब्बो.

४८६. इस्सायना इस्सा. सा परसम्पत्तीनं उसूयनलक्खणा. तत्थेव अनभिरतिरसा, ततो विमुखभावपच्चुपट्ठाना, परसम्पत्तिपदट्ठाना, संयोजनन्ति दट्ठब्बा.

४८७. मच्छरभावो मच्छरियं. तं लद्धानं वा लभितब्बानं वा अत्तनो सम्पत्तीनं निगूहनलक्खणं, तासंयेव परेहि साधारणभावअक्खमनरसं, सङ्कोचनपच्चुपट्ठानं, कटुकञ्चुकतापच्चुपट्ठानं वा, अत्तसम्पत्तिपदट्ठानं, चेतसो विरूपभावोति दट्ठब्बं.

४८८. कुच्छितं ¶ कतं कुकतं. तस्स भावो कुक्कुच्चं. तं पच्छानुतापलक्खणं, कताकतानुसोचनरसं, विप्पटिसारपच्चुपट्ठानं, कताकतपदट्ठानं, दासब्यमिव दट्ठब्बं. सेसा वुत्तप्पकारायेवाति.

इति इमे अट्ठारस सङ्खारा पठमेन दोसमूलेन सम्पयोगं गच्छन्तीति वेदितब्बा. यथा च पठमेन, एवं दुतियेनापि. ससङ्खारता पन अनियतेसु च थिनमिद्धसम्भवोव विसेसो.

४८९. मोहमूलेसु द्वीसु विचिकिच्छासम्पयुत्तेन ताव फस्सो, चेतना, वितक्को, विचारो, वीरियं, जीवितं, चित्तट्ठिति, अहिरिकं, अनोत्तप्पं ¶ , मोहो, विचिकिच्छाति सरूपेन आगता एकादस (ध. स. ४२२; ध. स. अट्ठ. ४२२), उद्धच्चं, मनसिकारोति येवापनका द्वे चाति तेरस.

४९०. तत्थ चित्तट्ठितीति पवत्तिट्ठितिमत्तो दुब्बलो समाधि. विगता चिकिच्छाति विचिकिच्छा. सा संसयलक्खणा, कम्पनरसा, अनिच्छयपच्चुपट्ठाना, अनेकंसगाहपच्चुपट्ठाना वा, विचिकिच्छायं अयोनिसोमनसिकारपदट्ठाना, पटिपत्तिअन्तरायकराति दट्ठब्बा. सेसा वुत्तप्पकारायेव.

उद्धच्चसम्पयुत्तेन विचिकिच्छासम्पयुत्ते वुत्तेसु ठपेत्वा विचिकिच्छं सेसा द्वादस. विचिकिच्छाय अभावेन पनेत्थ अधिमोक्खो उप्पज्जति. तेन सद्धिं तेरसेव, अधिमोक्खसब्भावतो च बलवतरो समाधि होति. यञ्चेत्थ उद्धच्चं, तं सरूपेनेव आगतं. अधिमोक्खमनसिकारा येवापनकवसेनाति एवं अकुसलसङ्खारा वेदितब्बा.

४९१. अब्याकतेसु विपाकाब्याकता ताव अहेतुकसहेतुकभेदतो दुविधा. तेसु अहेतुकविपाकविञ्ञाणसम्पयुत्ता अहेतुका. तत्थ कुसलाकुसलविपाकचक्खुविञ्ञाणसम्पयुत्ता ताव फस्सो, चेतना, जीवितं, चित्तट्ठितीति सरूपेन आगता चत्तारो (ध. स. ४३१; ध. स. अट्ठ. ४३१), येवापनको मनसिकारोयेवाति पञ्च. सोतघानजिव्हाकायविञ्ञाणसम्पयुत्तापि एतेयेव. उभयविपाकमनोधातुया एते चेव वितक्कविचाराधिमोक्खा चाति ¶ अट्ठ, तथा तिविधायपि अहेतुकमनोविञ्ञाणधातुया. या पनेत्थ सोमनस्ससहगता, ताय सद्धिं पीति अधिका होतीति वेदितब्बा.

सहेतुकविपाकविञ्ञाणसम्पयुत्ता पन सहेतुका. तेसु अट्ठकामावचरविपाकसम्पयुत्ता ताव अट्ठहि कामावचरकुसलेहि सम्पयुत्तसङ्खारसदिसायेव. या पन ता अनियतेसु करुणामुदिता, ता सत्तारम्मणत्ता विपाकेसु न सन्ति. एकन्तपरित्तारम्मणा हि कामावचरविपाका. न केवलञ्च करुणामुदिता, विरतियोपि विपाकेसु न सन्ति. ‘‘पञ्च सिक्खापदा कुसलायेवा’’ति हि वुत्तं.

रूपावचरारूपावचरलोकुत्तरविपाकविञ्ञाणसम्पयुत्ता ¶ पन तेसं कुसलविञ्ञाणसम्पयुत्तसङ्खारेहि सदिसा एव.

४९२. किरियाब्याकतापि अहेतुकसहेतुकभेदतो दुविधा. तेसु अहेतुककिरियविञ्ञाणसम्पयुत्ता अहेतुका. ते च कुसलविपाकमनोधातुअहेतुकमनोविञ्ञाणधातुद्वययुत्तेहि समाना. मनोविञ्ञाणधातुद्वये पन वीरियं अधिकं. वीरियसब्भावतो बलप्पत्तो समाधि होति. अयमेत्थ विसेसो.

सहेतुककिरियविञ्ञाणसम्पयुत्ता पन सहेतुका. तेसु अट्ठकामावचरकिरियविञ्ञाणसम्पयुत्ता ताव ठपेत्वा विरतियो अट्ठहि कामावचरकुसलेहि सम्पयुत्तसङ्खारसदिसा. रूपावचरारूपावचरकिरियसम्पयुत्ता पन सब्बाकारेनपि तेसं कुसलविञ्ञाणसम्पयुत्तसदिसायेवाति एवं अब्याकतापि सङ्खारा वेदितब्बाति.

इदं सङ्खारक्खन्धे वित्थारकथामुखं.

इदं ताव अभिधम्मे पदभाजनीयनयेन खन्धेसु वित्थारकथामुखं.

अतीतादिविभागकथा

४९३. भगवता ¶ पन –

‘‘यंकिञ्चि रूपं अतीतानागतपच्चुप्पन्नं अज्झत्तं वा बहिद्धा वा ओळारिकं वा सुखुमं वा हीनं वा पणीतं वा यं दूरे सन्तिके वा, तदेकज्झं अभिसंयूहित्वा अभिसङ्खिपित्वा अयं वुच्चति रूपक्खन्धो. या काचि वेदना… या काचि सञ्ञा… ये केचि सङ्खारा… यंकिञ्चि विञ्ञाणं अतीतानागतपच्चुप्पन्नं…पे… अभिसङ्खिपित्वा अयं वुच्चति विञ्ञाणक्खन्धो’’ति (विभ. २,२६) –

एवं खन्धा वित्थारिता.

तत्थ यंकिञ्चीति अनवसेसपरियादानं. रूपन्ति अतिप्पसङ्गनियमनं. एवं पदद्वयेनापि रूपस्स अनवसेसपरिग्गहो कतो होति. अथस्स अतीतादिना ¶ विभागं आरभति. तञ्हि किञ्चि अतीतं, किञ्चि अनागतादिभेदन्ति. एस नयो वेदनादीसु.

४९४. तत्थ रूपं ताव अद्धासन्ततिसमयखणवसेन चतुधा अतीतं नाम होति. तथा अनागतपच्चुप्पन्नं.

तत्थ अद्धावसेन ताव एकस्स एकस्मिं भवे पटिसन्धितो पुब्बे अतीतं, चुतितो उद्धं अनागतं, उभिन्नमन्तरे पच्चुप्पन्नं.

सन्ततिवसेन सभागएकउतुसमुट्ठानं एकाहारसमुट्ठानञ्च पुब्बापरियवसेन वत्तमानम्पि पच्चुप्पन्नं, ततो पुब्बे विसभागउतुआहारसमुट्ठानं अतीतं, पच्छा अनागतं. चित्तजं एकवीथिएकजवनएकसमापत्तिसमुट्ठानं पच्चुप्पन्नं, ततो पुब्बे अतीतं, पच्छा अनागतं. कम्मसमुट्ठानस्स पाटियेक्कं सन्ततिवसेन अतीतादिभेदो नत्थि, तेसञ्ञेव पन उतुआहारचित्तसमुट्ठानानं उपत्थम्भकवसेन तस्स अतीतादिभावो वेदितब्बो.

समयवसेन ¶ एकमुहुत्तपुब्बण्हसायन्हरत्तिन्दिवादीसु समयेसु सन्तानवसेन पवत्तमानं तं तं समयं पच्चुप्पन्नं नाम, ततो पुब्बे अतीतं, पच्छा अनागतं.

खणवसेन उप्पादादिखणत्तयपरियापन्नं पच्चुप्पन्नं, ततो पुब्बे अनागतं, पच्छा अतीतं. अपिच अतिक्कन्तहेतुपच्चयकिच्चं अतीतं, निट्ठितहेतुकिच्चं अनिट्ठितपच्चयकिच्चं पच्चुप्पन्नं, उभयकिच्चं असम्पत्तं अनागतं. सकिच्चक्खणे वा पच्चुप्पन्नं, ततो पुब्बे अनागतं, पच्छा अतीतं. एत्थ च खणादिकथाव निप्परियाया. सेसा सपरियाया.

४९५. अज्झत्तबहिद्धाभेदो वुत्तनयो एव. अपिच इध नियकज्झत्तम्पि अज्झत्तं परपुग्गलिकम्पि च बहिद्धाति वेदितब्बं. ओळारिकसुखुमभेदो वुत्तनयोव.

४९६. हीनपणीतभेदो दुविधो परियायतो निप्परियायतो च. तत्थ अकनिट्ठानं रूपतो सुदस्सीनं रूपं हीनं. तदेव सुदस्सानं रूपतो पणीतं. एवं याव नरकसत्तानं रूपं, ताव परियायतो हीनपणीतता वेदितब्बा. निप्परियायतो पन यत्थ अकुसलविपाकं उप्पज्जति, तं हीनं. यत्थ कुसलविपाकं, तं पणीतं.

दूरे ¶ सन्तिकेति इदम्पि वुत्तनयमेव. अपिच ओकासतोपेत्थ उपादायुपादाय दूरसन्तिकता वेदितब्बा.

४९७. तदेकज्झं अभिसंयूहित्वा अभिसङ्खिपित्वाति तं अतीतादीहि पदेहि विसुं विसुं निद्दिट्ठं रूपं सब्बं रुप्पनलक्खणसङ्खाते एकविधभावे पञ्ञाय रासिं कत्वा रूपक्खन्धोति वुच्चतीति अयमेत्थ अत्थो. एतेन सब्बम्पि रूपं रुप्पनलक्खणे रासिभावूपगमनेन रूपक्खन्धोति दस्सितं होति. न हि रूपतो अञ्ञो रूपक्खन्धो नाम अत्थि.

४९८. यथा च रूपं, एवं वेदनादयोपि वेदयितलक्खणादीसु रासिभावूपगमनेन. न हि वेदनादीहि अञ्ञे वेदनाक्खन्धादयो नाम अत्थि.

अतीतादिविभागे ¶ पनेत्थ सन्ततिवसेन खणादिवसेन च वेदनाय अतीतानागतपच्चुप्पन्नभावो वेदितब्बो. तत्थ सन्ततिवसेन एकवीथिएकजवनएकसमापत्तिपरियापन्ना एकवीथिविसयसमायोगप्पवत्ता च पच्चुप्पन्ना, ततो पुब्बे अतीता, पच्छा अनागता. खणादिवसेन खणत्तयपरियापन्ना पुब्बन्तापरन्तमज्झत्तगता सकिच्चञ्च कुरुमाना वेदना पच्चुप्पन्ना, ततो पुब्बे अतीता, पच्छा अनागता. अज्झत्तबहिद्धाभेदो नियकज्झत्तवसेन वेदितब्बो.

४९९. ओळारिकसुखुमभेदो ‘‘अकुसला वेदना ओळारिका, कुसलाब्याकता वेदना सुखुमा’’तिआदिना (विभ. ११) नयेन विभङ्गे वुत्तेन जातिसभावपुग्गललोकियलोकुत्तरवसेन वेदितब्बो. जातिवसेन ताव अकुसला वेदना सावज्जकिरियहेतुतो, किलेससन्तापभावतो च अवूपसन्तवुत्तीति कुसलवेदनाय ओळारिका, सब्यापारतो, सउस्साहतो, सविपाकतो, किलेससन्तापभावतो, सावज्जतो च विपाकाब्याकताय ओळारिका, सविपाकतो, किलेससन्तापभावतो, सब्याबज्झतो, सावज्जतो च किरियाब्याकताय ओळारिका. कुसलाब्याकता पन वुत्तविपरियायतो अकुसलाय सुखुमा. द्वेपि कुसलाकुसलवेदना सब्यापारतो, सउस्साहतो, सविपाकतो च यथायोगं दुविधायपि अब्याकताय ओळारिका ¶ , वुत्तविपरियायेन दुविधापि अब्याकता ताहि सुखुमा. एवं ताव जातिवसेन ओळारिकसुखुमता वेदितब्बा.

५००. सभाववसेन पन दुक्खा वेदना निरस्सादतो, सविप्फारतो, खोभकरणतो, उब्बेजनीयतो, अभिभवनतो च इतराहि द्वीहि ओळारिका, इतरा पन द्वे साततो, सन्ततो, पणीततो, मनापतो, मज्झत्ततो च यथायोगं दुक्खाय सुखुमा. उभो पन सुखदुक्खा सविप्फारतो, खोभकरणतो, पाकटतो च अदुक्खमसुखाय ओळारिका, सा वुत्तविपरियायेन तदुभयतो सुखुमा. एवं सभाववसेन ओळारिकसुखुमता वेदितब्बा.

५०१. पुग्गलवसेन पन असमापन्नस्स वेदना नानारम्मणे विक्खित्तभावतो समापन्नस्स वेदनाय ओळारिका, विपरियायेन इतरा सुखुमा. एवं पुग्गलवसेन ओळारिकसुखुमता वेदितब्बा.

लोकियलोकुत्तरवसेन ¶ पन सासवा वेदना लोकिया, सा आसवुप्पत्तिहेतुतो, ओघनियतो, योगनियतो, गन्थनियतो, नीवरणियतो, उपादानियतो, संकिलेसिकतो, पुथुज्जनसाधारणतो च अनासवाय ओळारिका. सा विपरियायेन सासवाय सुखुमा. एवं लोकियलोकुत्तरवसेन ओळारिकसुखुमता वेदितब्बा.

५०२. तत्थ जातिआदिवसेन सम्भेदो परिहरितब्बो. अकुसलविपाककआयविञ्ञाणसम्पयुत्ता हि वेदना जातिवसेन अब्याकतत्ता सुखुमापि समाना सभावादिवसेन ओळारिका होति. वुत्तञ्हेतं ‘‘अब्याकता वेदना सुखुमा. दुक्खा वेदना ओळारिका. समापन्नस्स वेदना सुखुमा. असमापन्नस्स वेदना ओळारिका. सासवा वेदना ओळारिका. अनासवा वेदना सुखुमा’’ति (विभ. ११). यथा च दुक्खा वेदना, एवं सुखादयोपि जातिवसेन ओळारिका सभावादिवसेन सुखुमा होन्ति. तस्मा यथा जातिआदिवसेन सम्भेदो न होति, तथा वेदनानं ओळारिकसुखुमता वेदितब्बा. सेय्यथिदं – अब्याकता जातिवसेन कुसलाकुसलाहि सुखुमा. तत्थ कतमा अब्याकता? किं दुक्खा? किं सुखा? किं समापन्नस्स? किं असमापन्नस्स? किं सासवा ¶ ? किं अनासवाति? एवं सभावादिभेदो न परामसितब्बो. एस नयो सब्बत्थ.

अपिच तं तं वा पन वेदनं उपादायुपादाय वेदना ओळारिकसुखुमा दट्ठब्बाति वचनतो अकुसलादीसुपि लोभसहगताय दोससहगता वेदना अग्गि विय अत्तनो निस्सयदहनतो ओळारिका, लोभसहगता सुखुमा. दोससहगतापि नियता ओळारिका, अनियता सुखुमा. नियतापि कप्पट्ठितिका ओळारिका, इतरा सुखुमा. कप्पट्ठितिकासुपि असङ्खारिका ओळारिका, इतरा सुखुमा. लोभसहगता पन दिट्ठिसम्पयुत्ता ओळारिका, इतरा सुखुमा. सापि नियता कप्पट्ठितिका असङ्खारिका ओळारिका, इतरा सुखुमा. अविसेसेन च अकुसला बहुविपाका ओळारिका, अप्पविपाका सुखुमा. कुसला पन अप्पविपाका ओळारिका, बहुविपाका सुखुमा.

अपिच कामावचरकुसला ओळारिका. रूपावचरा सुखुमा. ततो अरूपावचरा. ततो लोकुत्तरा. कामावचरा दानमया ओळारिका. सीलमया सुखुमा. ततो भावनामया. भावनामयापि दुहेतुका ओळारिका. तिहेतुका सुखुमा. तिहेतुकापि ससङ्खारिका ओळारिका. असङ्खारिका सुखुमा. रूपावचरा च पठमज्झानिका ओळारिका…पे… पञ्चमज्झानिका ¶ सुखुमा. अरूपावचरा च आकासानञ्चायतनसम्पयुत्ता ओळारिका…पे… नेवसञ्ञानासञ्ञायतनसम्पयुत्ता सुखुमाव. लोकुत्तरा च सोतापत्तिमग्गसम्पयुत्ता ओळारिका…पे… अरहत्तमग्गसम्पयुत्ता सुखुमाव. एस नयो तं तं भूमिविपाककिरियवेदनासु च दुक्खादिअसमापन्नादिसासवादिवसेन वुत्तवेदनासु च.

ओकासवसेन चापि निरये दुक्खा ओळारिका. तिरच्छानयोनियं सुखुमा…पे… परनिम्मितवसवत्तीसु सुखुमाव. यथा च दुक्खा, एवं सुखापि सब्बत्थ यथानुरूपं योजेतब्बा. वत्थुवसेन चापि हीनवत्थुका या काचि वेदना ओळारिका, पणीतवत्थुका सुखुमा.

हीनपणीतभेदे या ओळारिका, सा हीना. या च सुखुमा, सा पणीताति दट्ठब्बा.

५०३. दूरपदं पन ‘‘अकुसला वेदना कुसलाब्याकताहि वेदनाहि दूरे’’. सन्तिकेपदं ‘‘अकुसला वेदना अकुसलाय वेदनाय सन्तिके’’तिआदिना ¶ नयेन विभङ्गे विभत्तं. तस्मा अकुसला वेदना विसभागतो, असंसट्ठतो, असरिक्खतो च कुसलाब्याकताहि दूरे, तथा कुसलाब्याकता अकुसलाय. एस नयो सब्बवारेसु. अकुसला पन वेदना सभागतो, सरिक्खतो च अकुसलाय सन्तिकेति. इदं वेदनाक्खन्धस्स अतीतादिविभागे वित्थारकथामुखं. तंतंवेदनासम्पयुत्तानं पन सञ्ञादीनम्पि एवमेव वेदितब्बं.

कमादिविनिच्छयकथा

५०४. एवं विदित्वा च पुन एतेस्वेव –

खन्धेसु ञाणभेदत्थं, कमतोथ विसेसतो;

अनूनाधिकतो चेव, उपमातो तथेव च.

दट्ठब्बतो द्विधा एवं, पस्सन्तस्सत्थसिद्धितो;

विनिच्छयनयो सम्मा, विञ्ञातब्बो विभाविना.

तत्थ ¶ कमतोति इध उप्पत्तिक्कमो, पहानक्कमो, पटिपत्तिक्कमो, भूमिक्कमो, देसनाक्कमोति बहुविधो कमो.

तत्थ ‘‘पठमं कललं होति, कलला होति अब्बुद’’न्ति (सं. नि. १.२३५) एवमादि उप्पत्तिक्कमो. ‘‘दस्सनेन पहातब्बा धम्मा, भावनाय पहातब्बा धम्मा’’ति (ध. स. तिकमातिका ८) एवमादि पहानक्कमो. ‘‘सीलविसुद्धि, चित्तविसुद्धी’’ति (म. नि. १.२५९; पटि. म. ३.४१) एवमादि पटिपत्तिक्कमो. ‘‘कामावचरा, रूपावचरा’’ति (ध. स. ९८७) एवमादि भूमिक्कमो. ‘‘चत्तारो सतिपट्ठाना, चत्तारो सम्मप्पधाना’’ति (दी. नि. ३.१४५) वा, ‘‘दानकथं, सीलकथ’’न्ति (दी. नि. १.२९८) वा एवमादि देसनाक्कमो. तेसु इध उप्पत्तिक्कमो ताव न युज्जति, कललादीनं विय खन्धानं पुब्बापरियववत्थानेन अनुप्पत्तितो. न पहानक्कमो, कुसलाब्याकतानं अप्पहातब्बतो. नपटिपत्तिक्कमो, अकुसलानं अप्पटिपज्जनीयतो. न भूमिक्कमो, वेदनादीनं चतुभूमिपरियापन्नत्ता. देसनाक्कमो पन युज्जति.

अभेदेन हि पञ्चसु खन्धेसु अत्तगाहपतितं वेनेय्यजनं समूहघनविनिब्भोगदस्सनेन अत्तगाहतो मोचेतुकामो भगवा हितकामो ¶ तस्स तस्स जनस्स सुखगहणत्थं चक्खुआदीनम्पि विसयभूतं ओळारिकं पठमं रूपक्खन्धं देसेसि. ततो इट्ठानिट्ठरूपसंवेदनिकं वेदनं. ‘‘यं वेदयति, तं सञ्जानाती’’ति एवं वेदनाविसयस्स आकारगाहिकं सञ्ञं. सञ्ञावसेन अभिसङ्खारके सङ्खारे. तेसं वेदनादीनं निस्सयं अधिपतिभूतञ्च नेसं विञ्ञाणन्ति एवं ताव कमतो विनिच्छयनयो विञ्ञातब्बो.

५०५. विसेसतोति खन्धानञ्च उपादानक्खन्धानञ्च विसेसतो. को पन नेसं विसेसो, खन्धा ताव अविसेसतो वुत्ता. उपादानक्खन्धा सासवउपादानियभावेन विसेसेत्वा. यथाह –

‘‘पञ्च चेव वो, भिक्खवे, खन्धे देसेस्सामि पञ्चुपादानक्खन्धे च, तं सुणाथ. कतमे च, भिक्खवे, पञ्चक्खन्धा, यंकिञ्चि, भिक्खवे, रूपं अतीतानागतपच्चुप्पन्नं…पे… सन्तिके वा, अयं वुच्चति, भिक्खवे, रूपक्खन्धो. या ¶ काचि वेदना…पे… यंकिञ्चि विञ्ञाणं…पे… सन्तिके वा, अयं वुच्चति, भिक्खवे, विञ्ञाणक्खन्धो. इमे वुच्चन्ति, भिक्खवे, पञ्चक्खन्धा. कतमे च, भिक्खवे, पञ्चुपादानक्खन्धा. यंकिञ्चि, भिक्खवे, रूपं…पे… सन्तिके वा सासवं उपादानियं, अयं वुच्चति, भिक्खवे, रूपुपादानक्खन्धो. या काचि वेदना…पे… यंकिञ्चि विञ्ञाणं…पे… सन्तिके वा सासवं उपादानियं, अयं वुच्चति, भिक्खवे, विञ्ञाणुपादानक्खन्धो. इमे वुच्चन्ति, भिक्खवे, पञ्चुपादानक्खन्धा’’ति (सं. नि. ३.४८).

एत्थ च यथा वेदनादयो अनासवापि अत्थि, न एवं रूपं. यस्मा पनस्स रासट्ठेन खन्धभावो युज्जति, तस्मा खन्धेसु वुत्तं. यस्मा रासट्ठेन च सासवट्ठेन च उपादानक्खन्धभावो युज्जति, तस्मा उपादानक्खन्धेसु वुत्तं. वेदनादयो पन अनासवाव खन्धेसु वुत्ता. सासवा उपादानक्खन्धेसु. उपादानक्खन्धाति चेत्थ उपादानगोचरा खन्धा उपादानक्खन्धाति एवमत्थो दट्ठब्बो. इध पन सब्बेपेते एकज्झं कत्वा खन्धाति अधिप्पेता.

५०६. अनूनाधिकतोति कस्मा पन भगवता पञ्चेव खन्धा वुत्ता अनूना अनधिकाति. सब्बसङ्खतसभागेकसङ्गहतो अत्तत्तनियगाहवत्थुस्स एतपरमतो अञ्ञेसञ्च तदवरोधतो. अनेकप्पभेदेसु हि सङ्खतधम्मेसु ¶ सभागवसेन सङ्गय्हमानेसु रूपम्पि रूपसभागेकसङ्गहवसेन एको खन्धो होति. वेदना वेदनासभागेकसङ्गहवसेन एको खन्धो होति. एस नयो सञ्ञादीसु. तस्मा सब्बसङ्खतसभागेकसङ्गहतो पञ्चेव वुत्ता. एतपरमञ्चेतं अत्तत्तनियगाहवत्थु यदिदं रूपादयो पञ्च. वुत्तञ्हेतं ‘‘रूपे खो, भिक्खवे, सति रूपं उपादाय रूपं अभिनिविस्स एवं दिट्ठि उप्पज्जति ‘एतं मम, एसोहमस्मि, एसो मे अत्ता’ति. वेदनाय, सञ्ञाय, सङ्खारेसु, विञ्ञाणे सति विञ्ञाणं उपादाय विञ्ञाणं अभिनिविस्स एवं दिट्ठि उप्पज्जति ‘एतं मम, एसोहमस्मि, एसो मे अत्ता’’ति (सं. नि. ३.२०७). तस्मा अत्तत्तनियगाहवत्थुस्स एतपरमतोपि पञ्चेव वुत्ता. येपि चञ्ञे सीलादयो पञ्च धम्मक्खन्धा वुत्ता, तेपि सङ्खारक्खन्धे परियापन्नत्ता एत्थेव अवरोधं गच्छन्ति. तस्मा अञ्ञेसं तदवरोधतोपि पञ्चेव वुत्ताति एवं अनूनाधिकतो विनिच्छयनयो विञ्ञातब्बो.

५०७. उपमातोति एत्थ हि गिलानसालुपमो रूपुपादानक्खन्धो, गिलानुपमस्स विञ्ञाणुपादानक्खन्धस्स ¶ वत्थुद्वारारम्मणवसेन निवासट्ठानतो. गेलञ्ञुपमो वेदनुपादानक्खन्धो, आबाधकत्ता. गेलञ्ञसमुट्ठानुपमो सञ्ञुपादानक्खन्धो, कामसञ्ञादिवसेन रागादिसम्पयुत्तवेदनासब्भावा. असप्पायसेवनुपमो सङ्खारुपादानक्खन्धो, वेदनागेलञ्ञस्स निदानत्ता. ‘‘वेदनं वेदनत्थाय अभिसङ्खरोन्ती’’ति (सं. नि. ३.७९) हि वुत्तं. तथा ‘‘अकुसलस्स कम्मस्स कतत्ता उपचितत्ता विपाकं कायविञ्ञाणं उप्पन्नं होति दुक्खसहगत’’न्ति (ध. स. ५५६). गिलानुपमो विञ्ञाणुपादानक्खन्धो, वेदनागेलञ्ञेन अपरिमुत्तत्ता. अपिच चारककारणअपराधकारणकारकअपराधिकुपमा एते भाजनभोजनब्यञ्जनपरिवेसकभुञ्जकूपमा चाति एवं उपमातो विनिच्छयनयो विञ्ञातब्बो.

५०८. दट्ठब्बतो द्विधाति सङ्खेपतो वित्थारतो चाति एवं द्विधा दट्ठब्बतोपेत्थ विनिच्छयनयो विञ्ञातब्बो. सङ्खेपतो हि पञ्चुपादानक्खन्धा आसीविसूपमे (सं. नि. ४.२३८) वुत्तनयेन उक्खित्तासिकपच्चत्थिकतो, भारसुत्तवसेन (सं. नि. ३.२२) भारतो, खज्जनीयपरियायवसेन (सं. नि. ३.७९) खादकतो, यमकसुत्तवसेन (सं. नि. ३.८५) अनिच्चदुक्खानत्तसङ्खतवधकतो दट्ठब्बा. वित्थारतो पनेत्थ फेणपिण्डो विय रूपं दट्ठब्बं, परिमद्दनासहनतो. उदकपुब्बुळं विय ¶ वेदना, मुहुत्तरमणीयतो. मरीचिका विय सञ्ञा, विप्पलम्भनतो. कदलिक्खन्धो विय सङ्खारा, असारकतो. माया विय विञ्ञाणं, वञ्चकतो. विसेसतो च सुळारम्पि अज्झत्तिकं रूपं असुभन्ति दट्ठब्बं. वेदना तीहि दुक्खताहि अविनिमुत्ततो दुक्खाति. सञ्ञासङ्खारा अविधेय्यतो अनत्ताति. विञ्ञाणं उदयब्बयधम्मतो अनिच्चन्ति दट्ठब्बं.

५०९. एवं पस्सन्तस्सत्थसिद्धितोति एवञ्च सङ्खेपवित्थारवसेन द्विधा पस्सतो या अत्थसिद्धि होति, ततोपि विनिच्छयनयो विञ्ञातब्बो. सेय्यथिदं – सङ्खेपतो ताव पञ्चुपादानक्खन्धे उक्खित्तासिकपच्चत्थिकादिभावेन पस्सन्तो खन्धेहि न विहञ्ञति. वित्थारतो पन रूपादीनि फेणपिण्डादिसदिसभावेन पस्सन्तो न असारेसु सारदस्सी होति.

विसेसतो च अज्झत्तिकरूपं असुभतो पस्सन्तो कबळीकाराहारं परिजानाति, असुभे सुभन्ति विपल्लासं पजहति. कामोघं उत्तरति, कामयोगेन विसंयुज्जति, कामासवेन अनासवो होति, अभिज्झाकायगन्थं भिन्दति, कामुपादानं न उपादियति.

वेदनं ¶ दुक्खतो पस्सन्तो फस्साहारं परिजानाति, दुक्खे सुखन्ति विपल्लासं पजहति, भवोघं उत्तरति, भवयोगेन विसंयुज्जति, भवासवेन अनासवो होति, ब्यापादकायगन्थं भिन्दति, सीलब्बतुपादानं न उपादियति.

सञ्ञं सङ्खारे च अनत्ततो पस्सन्तो मनोसञ्चेतनाहारं परिजानाति, अनत्तनि अत्ताति विपल्लासं पजहति, दिट्ठोघं उत्तरति, दिट्ठियोगेन विसंयुज्जति, दिट्ठासवेन अनासवो होति. इदंसच्चाभिनिवेसकायगन्थं भिन्दति, अत्तवादुपादानं न उपादियति.

विञ्ञाणं अनिच्चतो पस्सन्तो विञ्ञाणाहारं परिजानाति, अनिच्चे निच्चन्ति विपल्लासं पजहति, अविज्जोघं उत्तरति, अविज्जायोगेन विसंयुज्जति, अविज्जासवेन अनासवो होति, सीलब्बतपरामासकायगन्थं भिन्दति, दिट्ठुपादानं न उपादियति.

एवं ¶ महानिसंसं, वधकादिवसेन दस्सनं यस्मा;

तस्मा खन्धे धीरो, वधकादिवसेन पस्सेय्याति.

इति साधुजनपामोज्जत्थाय कते विसुद्धिमग्गे

पञ्ञाभावनाधिकारे

खन्धनिद्देसो नाम

चुद्दसमो परिच्छेदो.

१५. आयतनधातुनिद्देसो

आयतनवित्थारकथा

५१०. आयतनानीति ¶ ¶ द्वादसायतनानि – चक्खायतनं, रूपायतनं, सोतायतनं, सद्दायतनं, घानायतनं, गन्धायतनं, जिव्हायतनं, रसायतनं, कायायतनं, फोट्ठब्बायतनं, मनायतनं, धम्मायतनन्ति. तत्थ –

अत्थ लक्खण तावत्व, कम सङ्खेप वित्थारा;

तथा दट्ठब्बतो चेव, विञ्ञातब्बो विनिच्छयो.

तत्थ विसेसतो ताव चक्खतीति चक्खु, रूपं अस्सादेति विभावेति चाति अत्थो. रूपयतीति रूपं, वण्णविकारं आपज्जमानं हदयङ्गतभावं पकासेतीति अत्थो. सुणातीति सोतं. सप्पतीति सद्दो, उदाहरियतीति अत्थो. घायतीति घानं. गन्धयतीति गन्धो. अत्तनो वत्थुं सूचयतीति अत्थो. जीवितं अव्हयतीति जिव्हा. रसन्ति तं सत्ताति रसो, अस्सादेन्तीति अत्थो. कुच्छितानं सासवधम्मानं आयोति कायो. आयोति उप्पत्तिदेसो. फुसियतीति फोट्ठब्बं. मुनातीति मनो. अत्तनो लक्खणं धारेन्तीति धम्मा.

५११. अविसेसतो पन आयतनतो, आयानं तननतो, आयतस्स च नयनतो आयतनन्ति वेदितब्बं. चक्खुरूपादीसु हि तंतंद्वारारम्मणा चित्तचेतसिका धम्मा सेन सेन अनुभवनादिना किच्चेन आयतन्ति उट्ठहन्ति घटन्ति, वायमन्तीति वुत्तं होति. ते च आयभूते धम्मे एतानि तनोन्ति, वित्थारेन्तीति वुत्तं होति, इदञ्च अनमतग्गे संसारे पवत्तं अतीव आयतं संसारदुक्खं याव न निवत्तति, ताव नयन्तेव, पवत्तयन्तीति वुत्तं होति. इति ¶ सब्बेपिमे धम्मा आयतनतो, आयानं तननतो, आयतस्स च नयनतो आयतनं आयतनन्ति वुच्चन्ति.

५१२. अपिच निवासट्ठानट्ठेन आकरट्ठेन समोसरणट्ठानट्ठेन सञ्जातिदेसट्ठेन कारणट्ठेन च आयतनं वेदितब्बं. तथा हि लोके ‘‘इस्सरायतनं वासुदेवायतन’’न्तिआदीसु निवासट्ठानं आयतनन्ति ¶ वुच्चति. ‘‘सुवण्णायतनं रजतायतन’’न्तिआदीसु आकरो. सासने पन ‘‘मनोरम्मे आयतने सेवन्ति नं विहङ्गमा’’तिआदीसु (अ. नि. ५.३८) समोसरणट्ठानं. ‘‘दक्खिणापथो गुन्नं आयतन’’न्तिआदीसु सञ्जातिदेसो. ‘‘तत्र तत्रेव सक्खिभब्बतं पापुणाति सति सतिआयतने’’तिआदीसु (अ. नि. ३.१०२) कारणं.

चक्खुआदीसु चापि ते ते चित्तचेतसिका धम्मा निवसन्ति तदायत्तवुत्तितायाति चक्खादयो च नेसं निवासट्ठानं. चक्खादीसु च ते आकिण्णा तन्निस्सितत्ता तदारम्मणत्ता चाति चक्खादयो नेसं आकरो. चक्खादयो च नेसं समोसरणट्ठानं, तत्थ तत्थ वत्थुद्वारारम्मणवसेन समोसरणतो. चक्खादयो च नेसं सञ्जातिदेसो, तन्निस्सयारम्मणभावेन तत्थेव उप्पत्तितो. चक्खादयो च नेसं कारणं, तेसं अभावे अभावतोति. इति निवासट्ठानट्ठेन, आकरट्ठेन, समोसरणट्ठानट्ठेन, सञ्जातिदेसट्ठेन, कारणट्ठेनचाति इमेहिपि कारणेहि एते धम्मा आयतनं आयतनन्ति वुच्चन्ति.

तस्मा यथावुत्तेन अत्थेन चक्खु च तं आयतनञ्चाति चक्खायतनं…पे… धम्मा च ते आयतनञ्चाति धम्मायतनन्ति एवं तावेत्थ अत्थतो विञ्ञातब्बो विनिच्छयो.

५१३. लक्खणाति चक्खादीनं लक्खणतोपेत्थ विञ्ञातब्बो विनिच्छयो. तानि च पन तेसं लक्खणानि खन्धनिद्देसे वुत्तनयेनेव वेदितब्बानि.

तावत्वतोति तावभावतो. इदं वुत्तं होति – चक्खादयोपि हि धम्मा एव, एवं सति धम्मायतनमिच्चेव अवत्वा कस्मा द्वादसायतनानीति वुत्तानीति चे. छविञ्ञाणकायुप्पत्तिद्वारारम्मणववत्थानतो इध छन्नं विञ्ञाणकायानं द्वारभावेन आरम्मणभावेन च ववत्थानतो अयमेतेसं भेदो होतीति द्वादस वुत्तानि, चक्खुविञ्ञाणवीथिपरियापन्नस्स हि विञ्ञाणकायस्स ¶ चक्खायतनमेव उप्पत्तिद्वारं, रूपायतनमेव चारम्मणं, तथा इतरानि इतरेसं. छट्ठस्स पन भवङ्गमनसङ्खातो मनायतनेकदेसोव उप्पत्तिद्वारं, असाधारणमेव च धम्मायतनं आरम्मणन्ति ¶ . इति छन्नं विञ्ञाणकायानं उप्पत्तिद्वारारम्मणववत्थानतो द्वादस वुत्तानीति एवमेत्थ तावत्वतो विञ्ञातब्बो विनिच्छयो.

५१४. कमतोति इधापि पुब्बे वुत्तेसु उप्पत्तिक्कमादीसु देसनाक्कमोव युज्जति. अज्झत्तिकेसु हि आयतनेसु सनिदस्सनसप्पटिघविसयत्ता चक्खायतनं पाकटन्ति पठमं देसितं, ततो अनिदस्सनसप्पटिघविसयानि सोतायतनादीनि. अथ वा दस्सनानुत्तरियसवनानुत्तरियहेतुभावेन बहूपकारत्ता अज्झत्तिकेसु चक्खायतनसोतायतनानि पठमं देसितानि, ततो घानायतनादीनि तीणि, पञ्चन्नम्पि गोचरविसयत्ता अन्ते मनायतनं, चक्खायतनादीनं पन गोचरत्ता तस्स तस्स अन्तरन्तरानि बाहिरेसु रूपायतनादीनि. अपिच विञ्ञाणुप्पत्तिकारणववत्थानतोपि अयमेतेसं कमो वेदितब्बो. वुत्तञ्हेतं ‘‘चक्खुञ्च पटिच्च रूपे च उप्पज्जति चक्खुविञ्ञाणं…पे… मनञ्च पटिच्च धम्मे च उप्पज्जति मनोविञ्ञाण’’न्ति (म. नि. ३.४२१; सं. नि. २.४३). एवं कमतोपेत्थ विञ्ञातब्बो विनिच्छयो.

५१५. सङ्खेपवित्थाराति सङ्खेपतो हि मनायतनस्स चेव धम्मायतनेकदेसस्स च नामेन तदवसेसानञ्च आयतनानं रूपेन सङ्गहितत्ता द्वादसापि आयतनानि नामरूपमत्तमेव होन्ति. वित्थारतो पन अज्झत्तिकेसु ताव चक्खायतनं जातिवसेन चक्खुपसादमत्तमेव, पच्चयगतिनिकायपुग्गलभेदतो पन अनन्तप्पभेदं. तथा सोतायतनादीनि चत्तारि. मनायतनं कुसलाकुसलविपाककिरियविञ्ञाणभेदेन एकूननवुतिप्पभेदं एकवीसुत्तरसतप्पभेदञ्च. वत्थुपटिपदादिभेदतो पन अनन्तप्पभेदं. रूपसद्दगन्धरसायतनानि विसभागपच्चयादिभेदतो अनन्तप्पभेदानि. फोट्ठब्बायतनं पथवीधातुतेजोधातुवायोधातुवसेन तिप्पभेदं. पच्चयादिभेदतो अनेकप्पभेदं. धम्मायतनं वेदनासञ्ञासङ्खारक्खन्धसुखुमरूपनिब्बानानं सभावनानत्तभेदतो अनेकप्पभेदन्ति. एवं सङ्खेपवित्थारा विञ्ञातब्बो विनिच्छयो.

५१६. दट्ठब्बतोति एत्थ पन सब्बानेव सङ्खतानि आयतनानि अनागमनतो अनिग्गमनतो च दट्ठब्बानि. न हि तानि पुब्बे उदया कुतोचि आगच्छन्ति, नपि उद्धं वया ¶ कुहिञ्चि गच्छन्ति, अथ खो पुब्बे उदया अप्पटिलद्धसभावानि ¶ , उद्धं वया परिभिन्नसभावानि, पुब्बन्तापरन्तवेमज्झे पच्चयायत्तवुत्तिताय अवसानि पवत्तन्ति. तस्मा अनागमनतो अनिग्गमनतो च दट्ठब्बानि. तथा निरीहकतो अब्यापारतो च. न हि चक्खुरूपादीनं एवं होति ‘‘अहो वत अम्हाकं सामग्गियं विञ्ञाणं नाम उप्पज्जेय्या’’ति, न च तानि विञ्ञाणुप्पादनत्थं द्वारभावेन वत्थुभावेन आरम्मणभावेन वा ईहन्ति, न ब्यापारमापज्जन्ति, अथ खो धम्मतावेसा, यं चक्खुरूपादिसामग्गियं चक्खुविञ्ञाणादीनि सम्भवन्तीति. तस्मा निरीहकतो अब्यापारतो च दट्ठब्बानि. अपिच अज्झत्तिकानि सुञ्ञगामो विय दट्ठब्बानि, धुवसुभसुखत्तभावविरहितत्ता. बाहिरानि गामघातकचोरा विय, अज्झत्तिकानं अभिघातकत्ता. वुत्तञ्हेतं ‘‘चक्खु, भिक्खवे, हञ्ञति मनापामनापेहि रूपेही’’ति वित्थारो. अपिच अज्झत्तिकानि छ पाणका विय दट्ठब्बानि, बाहिरानि तेसं गोचरा वियाति. एवमेत्थ दट्ठब्बतो विञ्ञातब्बो विनिच्छयो.

इदं ताव आयतनानं वित्थारकथामुखं.

धातुवित्थारकथा

५१७. तदनन्तरा पन धातुयोति अट्ठारस धातुयो – चक्खुधातु, रूपधातु, चक्खुविञ्ञाणधातु, सोतधातु, सद्दधातु, सोतविञ्ञाणधातु, घानधातु, गन्धधातु, घानविञ्ञाणधातु, जिव्हाधातु, रसधातु, जिव्हाविञ्ञाणधातु, कायधातु, फोट्ठब्बधातु, कायविञ्ञाणधातु, मनोधातु, धम्मधातु, मनोविञ्ञाणधातूति. तत्थ –

अत्थतो लक्खणादीहि, कम तावत्वसङ्खतो;

पच्चया अथ दट्ठब्बा, वेदितब्बो विनिच्छयो.

तत्थ अत्थतोति चक्खतीति चक्खु. रूपयतीति रूपं. चक्खुस्स विञ्ञाणं चक्खुविञ्ञाणन्ति एवमादिना ताव नयेन चक्खादीनं विसेसत्थतो वेदितब्बो विनिच्छयो. अविसेसेन पन विदहति, धीयते, विधानं, विधीयते एताय, एत्थ वा धीयतीति धातु. लोकिया हि धातुयो कारणभावेन ववत्थिता हुत्वा सुवण्णरजतादिधातुयो विय सुवण्णरजतादिं ¶ , अनेकप्पकारं संसारदुक्खं विदहन्ति. भारहारेहि च भारो विय, सत्तेहि ¶ धीयन्ते, धारियन्तीति अत्थो. दुक्खविधानमत्तमेव चेसा, अवसवत्तनतो. एताहि च करणभूताहि संसारदुक्खं सत्तेहि अनुविधीयति. तथाविहितञ्च तं एतास्वेव धीयति, ठपियतीति अत्थो. इति चक्खादीसु एकेको धम्मो यथासम्भवं विदहति, धीयतीतिआदिना अत्थवसेन धातूति वुच्चति.

५१८. अपिच यथा तित्थियानं अत्ता नाम सभावतो नत्थि, न एवमेता, एता पन अत्तनो सभावं धारेन्तीति धातुयो. यथा लोके विचित्ता हरितालमनोसिलादयो सेलावयवा धातुयोति वुच्चन्ति, एवमेतापि धातुयो विय धातुयो. विचित्ता हेते ञाणञेय्यावयवाति. यथा वा सरीरसङ्खातस्स समुदायस्स अवयवभूतेसु रससोणितादीसु अञ्ञमञ्ञविसभागलक्खणपरिच्छिन्नेसु धातुसमञ्ञा, एवमेतेसुपि पञ्चक्खन्धसङ्खातस्स अत्तभावस्स अवयवेसु धातुसमञ्ञा वेदितब्बा. अञ्ञमञ्ञविसभागलक्खणपरिच्छिन्ना हेते चक्खादयोति. अपिच धातूति निज्जीवमत्तस्सेवेतं अधिवचनं. तथा हि भगवा ‘‘छ धातुरो अयं भिक्खु पुरिसो’’तिआदीसु (म. नि. ३.३४४) जीवसञ्ञासमूहननत्थं धातुदेसनं अकासीति.

तस्मा यथावुत्तेन अत्थेन चक्खु च तं धातु च चक्खुधातु…पे… मनोविञ्ञाणञ्च तं धातु च मनोविञ्ञाणधातूति. एवं तावेत्थ अत्थतो वेदितब्बो विनिच्छयो.

५१९. लक्खणादितोति चक्खादीनं लक्खणादितोपेत्थ वेदितब्बो विनिच्छयो. तानि च पन नेसं लक्खणादीनि खन्धनिद्देसे वुत्तनयेनेव वेदितब्बानि.

कमतोति इधापि पुब्बे वुत्तेसु उप्पत्तिक्कमादीसु देसनाक्कमोव युज्जति. सो च पनायं हेतुफलानुपुब्बववत्थानवसेन वुत्तो. चक्खुधातु रूपधातूति इदञ्हि द्वयं हेतु, चक्खुविञ्ञाणधातूति फलं. एवं सब्बत्थ.

५२०. तावत्वतोति ¶ तावभावतो. इदं वुत्तं होति – तेसु तेसु हि सुत्ताभिधम्मप्पदेसेसु ‘‘आभाधातु, सुभधातु, आकासानञ्चायतनधातु, विञ्ञाणञ्चायतनधातु, आकिञ्चञ्ञायतनधातु, नेवसञ्ञानासञ्ञायतनधातु, सञ्ञावेदयितनिरोधधातु’’ (सं. नि. २.९५), ‘‘कामधातु ¶ , ब्यापादधातु, विहिंसाधातु, नेक्खम्मधातु, अब्यापादधातु, अविहिंसाधातु’’ (विभ. १८२; दी. नि. ३.३०५; म. नि. ३.१२५), ‘‘सुखधातु, दुक्खधातु, सोमनस्सधातु, दोमनस्सधातु, उपेक्खाधातु, अविज्जाधातु’’ (विभ. १८०; म. नि. ३.१२५), ‘‘आरम्भधातु, निक्कमधातु, परक्कमधातु’’ (सं. नि. ५.१८३), ‘‘हीनधातु, मज्झिमधातु, पणीतधातु’’ (दी. नि. ३.३०५), ‘‘पथवीधातु, आपोधातु, तेजोधातु, वायोधातु (दी. नि. ३.३११), आकासधातु, विञ्ञाणधातु’’ (म. नि. ३.१२५; विभ. १७२), ‘‘सङ्खतधातु, असङ्खतधातु’’ (म. नि. ३.१२५), ‘‘अनेकधातु नानाधातु लोको’’ति (दी. नि. २.३६६; म. नि. १.१४८) एवमादयो अञ्ञापि धातुयो दिस्सन्ति. एवं सति सब्बासं वसेन परिच्छेदं अकत्वा कस्मा अट्ठारसाति अयमेव परिच्छेदो कतोति चे. सभावतो विज्जमानानं सब्बधातूनं तदन्तोगधत्ता.

रूपधातुयेव हि आभाधातु, सुभधातु पन रूपादिपटिबद्धा. कस्मा, सुभनिमित्तत्ता. सुभनिमित्तञ्हि सुभधातु. तञ्च रूपादिविनिमुत्तं न विज्जति. कुसलविपाकारम्मणा वा रूपादयो एव सुभधातूति रूपादिमत्तमेवेसा. आकासानञ्चायतनधातुआदीसु चित्तं मनोविञ्ञाणधातुयेव, सेसा धम्मधातु. सञ्ञावेदयितनिरोधधातु पन सभावतो नत्थि. धातुद्वयनिरोधमत्तमेव हि सा.

कामधातु धम्मधातुमत्तं वा होति. यथाह – ‘‘तत्थ कतमा कामधातु? कामपटिसंयुत्तो तक्को वितक्को मिच्छासङ्कप्पो’’ति (विभ. १८२). अट्ठारसापि वा धातुयो. यथाह – ‘‘हेट्ठतो अवीचिनिरयं परियन्तं करित्वा उपरितो परनिम्मितवसवत्ती देवे अन्तोकरित्वा यं एतस्मिं अन्तरे एत्थावचरा एत्थ परियापन्ना खन्धधातुआयतना रूपा वेदना सञ्ञा सङ्खारा विञ्ञाणं, अयं वुच्चति कामधातू’’ति (विभ. १८२).

नेक्खम्मधातु ¶ धम्मधातु एव, ‘‘सब्बेपि कुसला धम्मा नेक्खम्मधातू’’ति (विभ. १८२) वचनतो मनोविञ्ञाणधातुपि होतियेव. ब्यापादविहिंसा-अब्यापाद-अविहिंसासुख-दुक्ख-सोमनस्स-दोमनस्सुपेक्खा-अविज्जाआरम्भ-निक्कम-परक्कमधातुयो धम्मधातुयेव.

हीनमज्झिमपणीतधातुयो अट्ठारस धातुमत्तमेव. हीना हि चक्खादयो हीना धातु, मज्झिमपणीता ¶ मज्झिमा चेव पणीता च. निप्परियायेन पन अकुसला धम्मधातुमनोविञ्ञाणधातुयो हीनधातु, लोकिया कुसलाब्याकता उभोपि चक्खुधातुआदयो च मज्झिमधातु, लोकुत्तरा पन धम्मधातुमनोविञ्ञाणधातुयो पणीतधातु.

पथवीतेजोवायोधातुयो फोट्ठब्बधातुयेव, आपोधातु आकासधातु च धम्मधातुयेव. विञ्ञाणधातु चक्खुविञ्ञाणादिसत्तविञ्ञाणधातुसङ्खेपोयेव.

सत्तरस धातुयो धम्मधातुएकदेसो च सङ्खतधातु, असङ्खता पन धातु धम्मधातुएकदेसोव. अनेकधातुनानाधातुलोको पन अट्ठारस धातुप्पभेदमत्तमेवाति. इति सभावतो विज्जमानानं सब्बधातूनं तदन्तोगधत्ता अट्ठारसेव वुत्ताति.

५२१. अपिच विजाननसभावे विञ्ञाणे जीवसञ्ञीनं सञ्ञासमूहननत्थम्पि अट्ठारसेव वुत्ता. सन्ति हि सत्ता विजाननसभावे विञ्ञाणे जीवसञ्ञिनो, तेसं चक्खुसोतघानजिव्हाकायमनोधातुमनोविञ्ञाणधातुभेदेन तस्स अनेकतं चक्खुरूपादिपच्चयायत्तवुत्तिताय अनिच्चतञ्च पकासेत्वा दीघरत्तानुसयितं जीवसञ्ञं समूहनितुकामेन भगवता अट्ठारस धातुयो पकासिता. किञ्च भिय्यो तथा वेनेय्यज्झासयवसेन च. ये च इमाय अनतिसङ्खेपवित्थाराय देसनाय वेनेय्यसत्ता, तदज्झासयवसेन च अट्ठारसेव पकासिता.

सङ्खेपवित्थारनयेन तथा तथा हि,

धम्मं पकासयति एस यथा यथास्स;

सद्धम्मतेजविहतं विलयं खणेन,

वेनेय्यसत्तहदयेसु तमो पयातीति.

एवमेत्थ तावत्वतो वेदितब्बो विनिच्छयो.

५२२. सङ्खतोति ¶ चक्खुधातु ताव जातितो एको धम्मोत्वेव सङ्खं गच्छति चक्खुपसादवसेन, तथा सोतघानजिव्हाकायरूपसद्दगन्धरसधातुयो सोतप्पसादादिवसेन, फोट्ठब्बधातु पन पथवीतेजोवायोवसेन तयो धम्माति सङ्खं गच्छति. चक्खुविञ्ञाणधातु कुसलाकुसलविपाकवसेन ¶ द्वे धम्माति सङ्खं गच्छति, तथा सोतघानजिव्हाकायविञ्ञाणधातुयो. मनोधातु पन पञ्चद्वारावज्जनकुसलाकुसलविपाकसम्पटिच्छनवसेन तयो धम्माति सङ्खं गच्छति. धम्मधातु तिण्णं अरूपक्खन्धानं सोळसन्नं सुखुमरूपानं असङ्खताय च धातुया वसेन वीसति धम्माति सङ्खं गच्छति. मनोविञ्ञाणधातु सेसकुसलाकुसलाब्याकतविञ्ञाणवसेन छसत्तति धम्माति सङ्खं गच्छति. एवमेत्थ सङ्खतोपि वेदितब्बो विनिच्छयो.

५२३. पच्चयाति एत्थ च चक्खुधातु ताव चक्खुविञ्ञाणधातुया विप्पयुत्तपुरेजातअत्थिअविगतनिस्सयिन्द्रियपच्चयानं वसेन छहि पच्चयेहि पच्चयो होति, रूपधातु पुरेजातअत्थिअविगतारम्मणपच्चयानं वसेन चतूहि पच्चयेहि पच्चयो होति. एवं सोतविञ्ञाणधातुआदीनं सोतधातुसद्दधातुआदयो. पञ्चन्नं पन नेसं आवज्जनमनोधातु अनन्तरसमनन्तरनत्थिविगतानन्तरूपनिस्सयवसेन पञ्चहि पच्चयेहि पच्चयो होति, ता च पञ्चपि सम्पटिच्छनमनोधातुया. तथा सम्पटिच्छनमनोधातु सन्तीरणमनोविञ्ञाणधातुया, सा च वोट्ठब्बनमनोविञ्ञाणधातुया, वोट्ठब्बनमनोविञ्ञाणधातु च जवनमनोविञ्ञाणधातुया. जवनमनोविञ्ञाणधातु पन अनन्तराय जवनमनोविञ्ञाणधातुया तेहि चेव पञ्चहि आसेवनपच्चयेन चाति छहि पच्चयेहि पच्चयो होति. एस ताव पञ्चद्वारे नयो.

मनोद्वारे पन भवङ्गमनोविञ्ञाणधातु आवज्जनमनोविञ्ञाणधातुया. आवज्जनमनोविञ्ञाणधातु च जवनमनोविञ्ञाणधातुया पुरिमेहि पञ्चहि पच्चयेहि पच्चयो होति. धम्मधातु पन सत्तन्नम्पि विञ्ञाणधातूनं सहजातअञ्ञमञ्ञनिस्सयसम्पयुत्तअत्थिअविगतादीहि बहुधा पच्चयो होति. चक्खुधातुआदयो पन एकच्चा च धम्मधातु एकच्चाय मनोविञ्ञाणधातुया आरम्मणपच्चयादीहिपि पच्चया होन्ति. चक्खुविञ्ञाणधातुआदीनञ्च न केवलं चक्खुरूपादयो पच्चया होन्ति, अथ खो आलोकादयोपि. तेनाहु पुब्बाचरिया –

‘‘चक्खुरूपालोकमनसिकारे ¶ पटिच्च उप्पज्जति चक्खुविञ्ञाणं. सोतसद्दविवरमनसिकारे पटिच्च उप्पज्जति सोतविञ्ञाणं. घानगन्धवायुमनसिकारे पटिच्च उप्पज्जति घानविञ्ञाणं. जिव्हारसआपमनसिकारे पटिच्च उप्पज्जति जिव्हाविञ्ञाणं. कायफोट्ठब्बपथवीमनसिकारे पटिच्च उप्पज्जति कायविञ्ञाणं. भवङ्गमनधम्ममनसिकारे पटिच्च उप्पज्जति मनोविञ्ञाण’’न्ति.

अयमेत्थ ¶ सङ्खेपो. वित्थारतो पन पच्चयप्पभेदो पटिच्चसमुप्पादनिद्देसे आविभविस्सतीति एवमेत्थ पच्चयतोपि वेदितब्बो विनिच्छयो.

५२४. दट्ठब्बतोति दट्ठब्बतोपेत्थ विनिच्छयो वेदितब्बोति अत्थो. सब्बा एव हि सङ्खतधातुयो पुब्बन्तापरन्तविवित्ततो धुवसुभसुखत्तभावसुञ्ञतो पच्चयायत्तवुत्तितो च दट्ठब्बा.

विसेसतो पनेत्थ भेरितलं विय चक्खुधातु दट्ठब्बा, दण्डो विय रूपधातु, सद्दो विय चक्खुविञ्ञाणधातु. तथा आदासतलं विय चक्खुधातु, मुखं विय रूपधातु, मुखनिमित्तं विय चक्खुविञ्ञाणधातु. अथ वा उच्छुतिला विय चक्खुधातु, यन्तचक्कयट्ठि विय रूपधातु, उच्छुरसतेलानि विय चक्खुविञ्ञाणधातु. तथा अधरारणी विय चक्खुधातु, उत्तरारणी विय रूपधातु, अग्गि विय चक्खुविञ्ञाणधातु. एस नयो सोतधातुआदीसु.

मनोधातु पन यथासम्भवतो चक्खुविञ्ञाणधातुआदीनं पुरेचरानुचरा विय दट्ठब्बा.

धम्मधातुया वेदनाक्खन्धो सल्लमिव सूलमिव च दट्ठब्बो. सञ्ञासङ्खारक्खन्धा वेदनासल्लसूलयोगाआतुरा विय, पुथुज्जनानं वा सञ्ञा आसादुक्खजननतो रित्तमुट्ठि विय. अयथाभुच्चनिमित्तगाहकतो वनमिगो विय. सङ्खारा पटिसन्धियं पक्खिपनतो अङ्गारकासुयं खिपनकपुरिसा विय. जाति दुक्खानुबन्धतो राजपुरिसानुबन्धचोरा विय. सब्बानत्थावहस्स खन्धसन्तानस्स हेतुतो विसरुक्खबीजानि विय. रूपं नानाविधुपद्दवनिमित्ततो खुरचक्कं विय दट्ठब्बं. असङ्खता पन धातु अमततो सन्ततो खेमतो च दट्ठब्बा. कस्मा? सब्बानत्थावहस्स पटिपक्खभूतत्ता.

मनोविञ्ञाणधातु ¶ आरम्मणेसु ववत्थानाभावतो अरञ्ञमक्कटो विय, दुद्दमनतो अस्सखळुङ्को विय, यत्थकामनिपातितो वेहासक्खित्तदण्डो विय, लोभदोसादिनानप्पकारकिलेसवेसयोगतो रङ्गनटो विय दट्ठब्बाति.

इति साधुजनपामोज्जत्थाय कते विसुद्धिमग्गे

पञ्ञाभावनाधिकारे

आयतनधातुनिद्देसो नाम

पन्नरसमो परिच्छेदो.

१६. इन्द्रियसच्चनिद्देसो

इन्द्रियवित्थारकथा

५२५. धातूनं ¶ ¶ अनन्तरं उद्दिट्ठानि पन इन्द्रियानीति बावीसतिन्द्रियानि – चक्खुन्द्रियं सोतिन्द्रियं घानिन्द्रियं जिव्हिन्द्रियं कायिन्द्रियं मनिन्द्रियं इत्थिन्द्रियं पुरिसिन्द्रियं जीवितिन्द्रियं सुखिन्द्रियं दुक्खिन्द्रियं सोमनस्सिन्द्रियं दोमनस्सिन्द्रियं उपेक्खिन्द्रियं सद्धिन्द्रियं वीरियिन्द्रियं सतिन्द्रियं समाधिन्द्रियं पञ्ञिन्द्रियं अनञ्ञातञ्ञस्सामीतिन्द्रियं अञ्ञिन्द्रियं अञ्ञाताविन्द्रियन्ति. तत्थ –

अत्थतो लक्खणादीहि, कमतो च विजानिया;

भेदाभेदा तथा किच्चा, भूमितो च विनिच्छयं.

तत्थ चक्खादीनं ताव चक्खतीति चक्खूतिआदिना नयेन अत्थो पकासितो. पच्छिमेसु पन तीसु पठमं पुब्बभागे अनञ्ञातं अमतं पदं चतुसच्चधम्मं वा जानिस्सामीति एवं पटिपन्नस्स उप्पज्जनतो इन्द्रियट्ठसम्भवतो च अनञ्ञातञ्ञस्सामीतिन्द्रियन्ति वुत्तं. दुतियं आजाननतो इन्द्रियट्ठसम्भवतो च अञ्ञिन्द्रियं. ततियं अञ्ञाताविनो चतूसु सच्चेसु निट्ठितञ्ञाणकिच्चस्स खीणासवस्स उप्पज्जनतो इन्द्रियट्ठसम्भवतो च अञ्ञाताविन्द्रियं.

को पन नेसं इन्द्रियट्ठो नामाति? इन्दलिङ्गट्ठो इन्द्रियट्ठो. इन्ददेसितट्ठो इन्द्रियट्ठो. इन्ददिट्ठट्ठो इन्द्रियट्ठो. इन्दसिट्ठट्ठो इन्द्रियट्ठो. इन्दजुट्ठट्ठो इन्द्रियट्ठो. सो सब्बोपि इध यथायोगं युज्जति. भगवा हि सम्मासम्बुद्धो परमिस्सरियभावतो इन्दो. कुसलाकुसलञ्च कम्मं, कम्मेसु कस्सचि इस्सरियाभावतो. तेनेवेत्थ कम्मसञ्जनितानि ताव इन्द्रियानि कुसलाकुसलकम्मं ¶ उल्लिङ्गेन्ति. तेन च सिट्ठानीति इन्दलिङ्गट्ठेन इन्दसिट्ठट्ठेन च इन्द्रियानि. सब्बानेव पनेतानि भगवता यथाभूततो पकासितानि अभिसम्बुद्धानि चाति इन्ददेसितट्ठेन इन्ददिट्ठट्ठेन च इन्द्रियानि. तेनेव भगवता मुनिन्देन कानिचि गोचरासेवनाय कानिचि भावनासेवनाय सेवितानीति इन्दजुट्ठट्ठेनापि इन्द्रियानि.

अपिच ¶ आधिपच्चसङ्खातेन इस्सरियट्ठेनापि एतानि इन्द्रियानि. चक्खुविञ्ञाणादिप्पवत्तियञ्हि चक्खादीनं सिद्धं आधिपच्चं, तस्मिं तिक्खे तिक्खत्ता मन्दे च मन्दत्ताति. अयं तावेत्थ अत्थतो विनिच्छयो.

लक्खणादीहीति लक्खणरसपच्चुपट्ठानपदट्ठानेहिपि चक्खादीनं विनिच्छयं विजानियाति अत्थो. तानि च नेसं लक्खणादीनि खन्धनिद्देसे वुत्तानेव. पञ्ञिन्द्रियादीनि हि चत्तारि अत्थतो अमोहोयेव. सेसानि तत्थ सरूपेनेव आगतानि.

५२६. कमतोति अयम्पि देसनाक्कमोव. तत्थ अज्झत्तधम्मे परिञ्ञाय अरियभूमिपटिलाभो होतीति अत्तभावपरियापन्नानि चक्खुन्द्रियादीनि पठमं देसितानि. सो पन अत्तभावो यं धम्मं उपादाय इत्थीति वा पुरिसोति वा सङ्खं गच्छति, अयं सोति निदस्सनत्थं ततो इत्थिन्द्रियं पुरिसिन्द्रियञ्च. सो दुविधोपि जीवितिन्द्रियपटिबद्धवुत्तीति ञापनत्थं ततो जीवितिन्द्रियं. याव तस्स पवत्ति, ताव एतेसं वेदयितानं अनिवत्ति. यञ्च किञ्चि वेदयितं, सब्बं तं दुक्खन्ति ञापनत्थं ततो सुखिन्द्रियादीनि. तंनिरोधत्थं पन एते धम्मा भावेतब्बाति पटिपत्तिदस्सनत्थं ततो सद्धादीनि. इमाय पटिपत्तिया एस धम्मो पठमं अत्तनि पातुभवतीति पटिपत्तिया अमोघभावदस्सनत्थं ततो अनञ्ञातञ्ञस्सामीतिन्द्रियं. तस्सेव फलत्ता ततो अनन्तरं भावेतब्बतो च ततो अञ्ञिन्द्रियं. ततो परं भावनाय इमस्स अधिगमो, अधिगते च पन इमस्मिं नत्थि किञ्चि उत्तरि करणीयन्ति ञापनत्थं अन्ते परमस्सासभूतं अञ्ञाताविन्द्रियं देसितन्ति अयमेत्थ कमो.

भेदाभेदाति जीवितिन्द्रियस्सेव चेत्थ भेदो. तञ्हि रूपजीवितिन्द्रियं अरूपजीवितिन्द्रियन्ति दुविधं होति. सेसानं अभेदोति एवमेत्थ भेदाभेदतो विनिच्छयं विजानिया.

५२७. किच्चाति ¶ किं इन्द्रियानं किच्चन्ति चे. चक्खुन्द्रियस्स ताव ‘‘चक्खायतनं चक्खुविञ्ञाणधातुया तंसम्पयुत्तकानञ्च धम्मानं इन्द्रियपच्चयेन पच्चयो’’ति वचनतो यं तं इन्द्रियपच्चयभावेन साधेतब्बं अत्तनो तिक्खमन्दादिभावेन चक्खुविञ्ञाणादिधम्मानं तिक्खमन्दादिसङ्खातं अत्ताकारानुवत्तापनं, इदं किच्चं. एवं सोतघानजिव्हाकायानं. मनिन्द्रियस्स पन ¶ सहजातधम्मानं अत्तनो वसवत्तापनं. जीवितिन्द्रियस्स सहजातधम्मानुपालनं. इत्थिन्द्रियपुरिसिन्द्रियानं इत्थिपुरिसलिङ्गनिमित्तकुत्ताकप्पाकारानुविधानं. सुखदुक्खसोमनस्सदोमनस्सिन्द्रियानं सहजातधम्मे अभिभवित्वा यथासकं ओळारिकाकारानुपापनं. उपेक्खिन्द्रियस्स सन्तपणीतमज्झत्ताकारानुपापनं. सद्धादीनं पटिपक्खाभिभवनं सम्पयुत्तधम्मानञ्च पसन्नाकारादिभावसम्पापनं. अनञ्ञातञ्ञस्सामीतिन्द्रियस्स संयोजनत्तयप्पहानञ्चेव सम्पयुत्तानञ्च तप्पहानाभिमुखभावकरणं. अञ्ञिन्द्रियस्स कामरागब्यापादादितनुकरणप्पहानञ्चेव सहजातानञ्च अत्तनो वसानुवत्तापनं. अञ्ञाताविन्द्रियस्स सब्बकिच्चेसु उस्सुक्कप्पहानञ्चेव अमताभिमुखभावपच्चयता च सम्पयुत्तानन्ति एवमेत्थ किच्चतो विनिच्छयं विजानिया.

५२८. भूमितोति चक्खुसोतघानजिव्हाकायइत्थिपुरिससुखदुक्खदोमनस्सिन्द्रियानि चेत्थ कामावचरानेव. मनिन्द्रियजीवितिन्द्रियउपेक्खिन्द्रियानि सद्धावीरियसतिसमाधिपञ्ञिन्द्रियानि च चतुभूमिपरियापन्नानि. सोमनस्सिन्द्रियं कामावचररूपावचरलोकुत्तरवसेन भूमित्तयपरियापन्नं. अवसाने तीणि लोकुत्तरानेवाति एवमेत्थ भूमितोपि विनिच्छयं विजानेय्य. एवं हि विजानन्तो –

संवेगबहुलो भिक्खु, ठितो इन्द्रियसंवरे;

इन्द्रियानि परिञ्ञाय, दुक्खस्सन्तं करिस्सतीति.

इदं इन्द्रियानं वित्थारकथामुखं.

सच्चवित्थारकथा

५२९. तदनन्तरानि पन सच्चानीति चत्तारि अरियसच्चानि – दुक्खं अरियसच्चं, दुक्खसमुदयो ¶ अरियसच्चं, दुक्खनिरोधो अरियसच्चं, दुक्खनिरोधगामिनी पटिपदा अरियसच्चन्ति. तत्थ –

विभागतो ¶ निब्बचन, लक्खणादिप्पभेदतो;

अत्थत्थुद्धारतो चेव, अनूनाधिकतो तथा.

कमतो जातिआदीनं, निच्छया ञाणकिच्चतो;

अन्तोगधानं पभेदा, उपमातो चतुक्कतो.

सुञ्ञतेकविधादीहि, सभागविसभागतो;

विनिच्छयो वेदितब्बो, विञ्ञुना सासनक्कमे.

तत्थ विभागतोति दुक्खादीनं हि चत्तारो चत्तारो अत्था विभत्ता तथा अवितथा अनञ्ञथा, ये दुक्खादीनि अभिसमेन्तेहि अभिसमेतब्बा. यथाह – ‘‘दुक्खस्स पीळनट्ठो सङ्खतट्ठो सन्तापट्ठो विपरिणामट्ठो, इमे चत्तारो दुक्खस्स दुक्खट्ठा तथा अवितथा अनञ्ञथा. समुदयस्स आयूहनट्ठो निदानट्ठो संयोगट्ठो पलिबोधट्ठो. निरोधस्स निस्सरणट्ठो विवेकट्ठो असङ्खतट्ठो अमतट्ठो. मग्गस्स निय्यानट्ठो हेतुट्ठो दस्सनट्ठो अधिपतेय्यट्ठो. इमे चत्तारो मग्गस्स मग्गट्ठा तथा अवितथा अनञ्ञथा’’ति (पटि. म. २.८). तथा ‘‘दुक्खस्स पीळनट्ठो सङ्खतट्ठो सन्तापट्ठो विपरिणामट्ठो अभिसमयट्ठो’’ति (पटि. म. २.११) एवमादि. इति एवं विभत्तानं चतुन्नं चतुन्नं अत्थानं वसेन दुक्खादीनि वेदितब्बानीति. अयं तावेत्थ विभागतो विनिच्छयो.

५३०. निब्बचनलक्खणादिप्पभेदतोति एत्थ पन निब्बचनतो ताव इध दु-इति अयं सद्दो कुच्छिते दिस्सति. कुच्छितं हि पुत्तं दुप्पुत्तोति वदन्ति. खं-सद्दो पन तुच्छे. तुच्छं हि आकासं ‘‘ख’’न्ति वुच्चति. इदञ्च पठमसच्चं कुच्छितं अनेकउपद्दवाधिट्ठानतो. तुच्छं बालजनपरिकप्पितधुवसुभसुखत्तभावविरहिततो. तस्मा कुच्छितत्ता तुच्छत्ता च दुक्खन्ति वुच्चति.

सं-इति ¶ च अयं सद्दो ‘‘समागमो समेत’’न्तिआदीसु (दी. नि. २.३९६; विभ. १९९) संयोगं दीपेति. उ-इति अयं ‘‘उप्पन्नं उदित’’न्तिआदीसु (ध. स. १; महाव. ८४) उप्पत्तिं. अय-सद्दो कारणं दीपेति. इदञ्चापि दुतियसच्चं अवसेसपच्चयसमायोगे सति दुक्खस्सुप्पत्तिकारणं. इति दुक्खस्स संयोगे उप्पत्तिकारणत्ता दुक्खसमुदयन्ति वुच्चति.

ततियसच्चं ¶ पन यस्मा नि-सद्दो अभावं, रोध-सद्दो च चारकं दीपेति. तस्मा अभावो एत्थ संसारचारकसङ्खातस्स दुक्खरोधस्स सब्बगतिसुञ्ञत्ता, समधिगते वा तस्मिं संसारचारकसङ्खातस्स दुक्खरोधस्स अभावो होति, तप्पटिपक्खत्तातिपि दुक्खनिरोधन्ति वुच्चति. दुक्खस्स वा अनुप्पादनिरोधपच्चयत्ता दुक्खनिरोधन्ति.

चतुत्थसच्चं पन यस्मा एतं दुक्खनिरोधं गच्छति आरम्मणवसेन तदभिमुखभूतत्ता, पटिपदा च होति दुक्खनिरोधप्पत्तिया. तस्मा दुक्खनिरोधगामिनी पटिपदाति वुच्चति.

५३१. यस्मा पनेतानि बुद्धादयो अरिया पटिविज्झन्ति, तस्मा अरियसच्चानीति वुच्चन्ति. यथाह ‘‘चत्तारिमानि, भिक्खवे, अरियसच्चानि. कतमानि…पे… इमानि खो, भिक्खवे, चत्तारि अरियसच्चानि. अरिया इमानि पटिविज्झन्ति, तस्मा अरियसच्चानीति वुच्चन्ती’’ति. अपिच अरियस्स सच्चानीतिपि अरियसच्चानि. यथाह ‘‘सदेवके, भिक्खवे, लोके…पे… मनुस्साय तथागतो अरियो, तस्मा अरियसच्चानीति वुच्चन्ती’’ति (सं. नि. ५.१०९८). अथ वा एतेसं अभिसम्बुद्धत्ता अरियभावसिद्धितोपि अरियसच्चानि. यथाह – ‘‘इमेसं खो, भिक्खवे, चतुन्नं अरियसच्चानं यथाभूतं अभिसम्बुद्धत्ता तथागतो अरहं सम्मासम्बुद्धो अरियोति वुच्चती’’ति. अपिच खो पन अरियानि सच्चानीतिपि अरियसच्चानि. अरियानीति तथानि अवितथानि अविसंवादकानीति अत्थो. यथाह – ‘‘इमानि खो, भिक्खवे, चत्तारि अरियसच्चानि तथानि अवितथानि अनञ्ञथानि, तस्मा अरियसच्चानीति वुच्चन्ती’’ति (सं. नि. ५.१०९७) एवमेत्थ निब्बचनतो विनिच्छयो वेदितब्बो.

५३२. कथं लक्खणादिप्पभेदतो? एत्थ हि बाधनलक्खणं दुक्खसच्चं, सन्तापनरसं, पवत्तिपच्चुपट्ठानं. पभवलक्खणं समुदयसच्चं, अनुपच्छेदकरणरसं, पलिबोधपच्चुपट्ठानं. सन्तिलक्खणं ¶ निरोधसच्चं, अच्चुतिरसं, अनिमित्तपच्चुपट्ठानं. निय्यानलक्खणं मग्गसच्चं, किलेसप्पहानरसं, वुट्ठानपच्चुपट्ठानं. अपिच पवत्तिपवत्तननिवत्तिनिवत्तनलक्खणानि पटिपाटिया. तथा सङ्खततण्हा असङ्खतदस्सनलक्खणानि चाति एवमेत्थ लक्खणादिप्पभेदतो विनिच्छयो वेदितब्बो.

५३३. अत्थत्थुद्धारतो ¶ चेवाति एत्थ पन अत्थतो ताव को सच्चट्ठोति चे? यो पञ्ञाचक्खुना उपपरिक्खमानानं मायाव विपरीतो, मरीचिव विसंवादको, तित्थियानं अत्ताव अनुपलब्भसभावो च न होति, अथ खो बाधनप्पभवसन्तिनिय्यानप्पकारेन तच्छाविपरीतभूतभावेन अरियञाणस्स गोचरो होतियेव. एस अग्गिलक्खणं विय, लोकपकति विय च तच्छाविपरीतभूतभावो सच्चट्ठोति वेदितब्बो. यथाह – ‘‘इदं दुक्खन्ति, भिक्खवे, तथमेतं अवितथमेतं अनञ्ञथमेत’’न्ति (सं. नि. ५.१०९०) वित्थारो. अपिच –

नाबाधकं यतो दुक्खं, दुक्खा अञ्ञं न बाधकं;

बाधकत्तनियामेन, ततो सच्चमिदं मतं.

तं विना नाञ्ञतो दुक्खं, न होति न च तं ततो;

दुक्खहेतुनियामेन, इति सच्चं विसत्तिका.

नाञ्ञा निब्बानतो सन्ति, सन्तं न च न तं यतो;

सन्तभावनियामेन, ततो सच्चमिदं मतं.

मग्गा अञ्ञं न निय्यानं, अनिय्यानो न चापि सो;

तच्छनिय्यानभावत्ता, इति सो सच्चसम्मतो.

इति तच्छाविपल्लास, भूतभावं चतूस्वपि;

दुक्खादीस्वविसेसेन, सच्चट्ठं आहु पण्डिताति.

एवं अत्थतो विनिच्छयो वेदितब्बो.

५३४. कथं ¶ अत्थुद्धारतो? इधायं सच्च-सद्दो अनेकेसु अत्थेसु दिस्सति. सेय्यथिदं – ‘‘सच्चं भणे न कुज्झेय्या’’तिआदीसु (ध. प. २२४) वाचासच्चे. ‘‘सच्चे ठिता समणब्राह्मणा चा’’तिआदीसु (जा. २.२१.४३३) विरतिसच्चे. ‘‘कस्मा नु सच्चानि वदन्ति नाना पवादियासे कुसलावदाना’’तिआदीसु (सु. नि. ८९१) दिट्ठिसच्चे. ‘‘एकं हि सच्चं न दुतिय’’न्तिआदीसु (सु. नि. ८९०) परमत्थसच्चे निब्बाने चेव मग्गे च. ‘‘चतुन्नं अरियसच्चानं कति कुसला’’तिआदीसु (विभ. २१६) अरियसच्चे. स्वायमिधापि अरियसच्चे वत्ततीति एवमेत्थ अत्थुद्धारतोपि विनिच्छयो वेदितब्बो.

५३५. अनूनाधिकतोति ¶ कस्मा पन चत्तारेव अरियसच्चानि वुत्तानि अनूनानि अनधिकानीति चे? अञ्ञस्सासम्भवतो अञ्ञतरस्स च अपनेय्याभावतो. न हि एतेहि अञ्ञं अधिकं वा, एतेसं वा एकम्पि अपनेतब्बं सम्भोति. यथाह – ‘‘इध, भिक्खवे, आगच्छेय्य समणो वा ब्राह्मणो वा ‘नेतं दुक्खं अरियसच्चं, अञ्ञं दुक्खं अरियसच्चं. अहमेतं दुक्खं अरियसच्चं ठपेत्वा अञ्ञं दुक्खं अरियसच्चं पञ्ञपेस्सामी’ति नेतं ठानं विज्जती’’तिआदि. यथा चाह – ‘‘यो हि कोचि, भिक्खवे, समणो वा ब्राह्मणो वा एवं वदेय्य ‘नेतं दुक्खं पठमं अरियसच्चं यं समणेन गोतमेन देसितं, अहमेतं दुक्खं पठमं अरियसच्चं पच्चक्खाय अञ्ञं दुक्खं पठमं अरियसच्चं पञ्ञपेस्सामी’ति नेतं ठानं विज्जती’’तिआदि (सं. नि. ५.१०८६).

अपिच पवत्तिमाचिक्खन्तो भगवा सहेतुकं आचिक्खि, निवत्तिञ्च सउपायं. इति पवत्तिनिवत्तितदुभयहेतूनं एतपरमतो चत्तारेव वुत्तानि. तथा परिञ्ञेय्यपहातब्बसच्छिकातब्बभावेतब्बानं, तण्हावत्थुतण्हातण्हानिरोधतण्हानिरोधुपायानं, आलयआलयारामताआलयसमुग्घातआलयसमुग्घातुपायानञ्च वसेनापि चत्तारेव वुत्तानीति एवमेत्थ अनूनाधिकतो विनिच्छयो वेदितब्बो.

५३६. कमतोति अयम्पि देसनाक्कमोव. एत्थ च ओळारिकत्ता, सब्बसत्तसाधारणत्ता च सुविञ्ञेय्यन्ति दुक्खसच्चं पठमं वुत्तं. तस्सेव हेतुदस्सनत्थं तदनन्तरं समुदयसच्चं. हेतुनिरोधा फलनिरोधोति ञापनत्थं ततो निरोधसच्चं. तदधिगमुपायदस्सनत्थं अन्ते मग्गसच्चं. भवसुखस्सादगधितानं वा सत्तानं संवेगजननत्थं पठमं दुक्खमाह. तं नेव अकतं आगच्छति ¶ , न इस्सरनिम्मानादितो होति, इतो पन होतीति ञापनत्थं तदनन्तरं समुदयं. ततो सहेतुकेन दुक्खेन अभिभूतत्ता संविग्गमानसानं दुक्खनिस्सरणगवेसीनं निस्सरणदस्सनेन अस्सासजननत्थं निरोधं. ततो निरोधाधिगमत्थं निरोधसम्पापकं मग्गन्ति एवमेत्थ कमतो विनिच्छयो वेदितब्बो.

५३७. जातिआदीनं निच्छयाति ये ते अरियसच्चानि निद्दिसन्तेन भगवता ‘‘जातिपि दुक्खा, जरापि दुक्खा, मरणम्पि दुक्खं, सोकपरिदेवदुक्खदोमनस्सुपायासापि दुक्खा, अप्पियेहि सम्पयोगो दुक्खो, पियेहि ¶ विप्पयोगो दुक्खो, यम्पिच्छं न लभति तम्पि दुक्खं, संखित्तेन पञ्चुपादानक्खन्धा दुक्खा’’ति (विभ. १९०) दुक्खनिद्देसे द्वादस धम्मा, ‘‘यायं तण्हा पोनोब्भविका नन्दीरागसहगता तत्रतत्राभिनन्दिनी. सेय्यथिदं, कामतण्हा, भवतण्हा, विभवतण्हा’’ति (विभ. २०३) समुदयनिद्देसे तिविधा तण्हा, ‘‘यो तस्सायेव तण्हाय असेसविरागनिरोधो चागो पटिनिस्सग्गो मुत्ति अनालयो’’ति (विभ. २०४) एवं निरोधनिद्देसे अत्थतो एकमेव निब्बानं, ‘‘कतमं दुक्खनिरोधगामिनीपटिपदा अरियसच्चं, अयमेव अरियो अट्ठङ्गिको मग्गो. सेय्यथिदं – सम्मादिट्ठि…पे… सम्मासमाधी’’ति (विभ. २०५) एवं मग्गनिद्देसे अट्ठ धम्माति इति चतुन्नं सच्चानं निद्देसे जातिआदयो धम्मा वुत्ता, तेसं जातिआदीनं निच्छयापि एत्थ विनिच्छयो वेदितब्बो.

दुक्खनिद्देसकथा

जातिनिद्देसो

सेय्यथिदं, अयञ्हि जाति-सद्दो अनेकत्थो. तथा हेस ‘‘एकम्पि जातिं द्वेपि जातियो’’ति (दी. नि. १.२४४; पारा. १२) एत्थ भवे आगतो. ‘‘अत्थि, विसाखे, निगण्ठा नाम समणजाती’’ति (अ. नि. ३.७१) एत्थ निकाये. ‘‘जाति द्वीहि खन्धेहि सङ्गहिता’’ति (धातु. ७१) एत्थ सङ्खतलक्खणे. ‘‘यं मातुकुच्छिस्मिं पठमं चित्तं उप्पन्नं, पठमं विञ्ञाणं पातुभूतं, तदुपादाय सावस्स जाती’’ति (महाव. १२४) एत्थ पटिसन्धियं. ‘‘सम्पतिजातो, आनन्द, बोधिसत्तो’’ति (म. नि. ३.२०७) एत्थ पसूतियं. ‘‘अक्खित्तो अनुपकुट्ठो जातिवादेना’’ति (दी. नि. १.३३१) एत्थ कुले. ‘‘यतोहं, भगिनि, अरियाय जातिया जातो’’ति (म. नि. २.३५१) एत्थ अरियसीले.

५३८. स्वायमिध ¶ गब्भसेय्यकानं पटिसन्धितो पट्ठाय याव मातुकुच्छिम्हा निक्खमनं, ताव पवत्तेसु खन्धेसु. इतरेसं पटिसन्धिखन्धेस्वेवाति दट्ठब्बो. अयम्पि च परियायकथाव. निप्परियायतो पन तत्थ तत्थ निब्बत्तमानानं सत्तानं ये ये खन्धा पातुभवन्ति, तेसं तेसं पठमपातुभावो जाति नाम.

सा ¶ पनेसा तत्थ तत्थ भवे पठमाभिनिब्बत्तिलक्खणा, निय्यातनरसा, अतीतभवतो इध उम्मुज्जनपच्चुपट्ठाना, दुक्खविचित्ततापच्चुपट्ठाना वा.

५३९. कस्मा पनेसा दुक्खाति चे? अनेकेसं दुक्खानं वत्थुभावतो. अनेकानि हि दुक्खानि. सेय्यथिदं – दुक्खदुक्खं, विपरिणामदुक्खं, सङ्खारदुक्खं, पटिच्छन्नदुक्खं, अप्पटिच्छन्नदुक्खं, परियायदुक्खं, निप्परियायदुक्खन्ति.

तत्थ कायिकचेतसिका दुक्खा वेदनासभावतो च नामतो च दुक्खत्ता दुक्खदुक्खन्ति वुच्चति.

सुखा वेदना विपरिणामेन दुक्खुप्पत्तिहेतुतो विपरिणामदुक्खं.

उपेक्खा वेदना चेव अवसेसा च तेभूमका सङ्खारा उदयब्बयप्पटिपीळितत्ता सङ्खारदुक्खं. कण्णसूलदन्तसूलरागजपरिळाहदोसजपरिळाहादि कायिकचेतसिको आबाधो पुच्छित्वा जानितब्बतो उपक्कमस्स च अपाकटभावतो पटिच्छन्नदुक्खं नाम. अपाकटदुक्खन्तिपि वुच्चति.

द्वत्तिंसकम्मकारणादिसमुट्ठानो आबाधो अपुच्छित्वाव जानितब्बतो उपक्कमस्स च पाकटभावतो अप्पटिच्छन्नदुक्खं नाम. पाकटदुक्खन्तिपि वुच्चति.

ठपेत्वा दुक्खदुक्खं सेसं दुक्खसच्चविभङ्गे आगतं जातिआदि सब्बम्पि तस्स तस्स दुक्खस्स वत्थुभावतो परियायदुक्खं. दुक्खदुक्खं पन निप्परियायदुक्खन्ति वुच्चति.

तत्रायं ¶ जाति यं तं बालपण्डितसुत्तादीसु (म. नि. ३.२४६ आदयो) भगवतापि उपमावसेन पकासितं आपायिकं दुक्खं, यञ्च सुगतियम्पि मनुस्सलोके गब्भोक्कन्तिमूलकादिभेदं दुक्खं उप्पज्जति, तस्स वत्थुभावतो दुक्खा.

५४०. तत्रिदं गब्भोक्कन्तिमूलकादिभेदं दुक्खं – अयं हि सत्तो मातुकुच्छिम्हि निब्बत्तमानो न उप्पलपदुमपुण्डरीकादीसु निब्बत्तति, अथ खो हेट्ठा आमासयस्स उपरि पक्कासयस्स उदरपटलपिट्ठिकण्टकानं वेमज्झे परमसम्बाधे तिब्बन्धकारेनानाकुणपगन्धपरिभावितपरमदुग्गन्धपवनविचरिते अधिमत्तजेगुच्छे कुच्छिपदेसे पूतिमच्छपूतिकुम्मासचन्दनिकादीसु किमि विय निब्बत्तति. सो तत्थ निब्बत्तो दस मासे मातुकुच्छिसम्भवेन उस्मना पुटपाकं विय पच्चमानो पिट्ठपिण्डि विय सेदियमानो समिञ्जनपसारणादिरहितो अधिमत्तं दुक्खमनुभोतीति, इदं ताव गब्भोक्कन्तिमूलकं दुक्खं.

यं ¶ पन सो मातु सहसा उपक्खलनगमननिसीदनवुट्ठानपरिवत्तनादीसु सुराधुत्तहत्थगतो एळको विय अहितुण्डिकहत्थगतो सप्पपोतको विय च आकड्ढनपरिकड्ढनओधूनननिद्धूननादिना उपक्कमेन अधिमत्तं दुक्खमनुभवति, यञ्च मातु सीतूदकपानकाले सीतनरकुपपन्नो विय, उण्हयागुभत्तादिअज्झोहरणकाले अङ्गारवुट्ठिसम्परिकिण्णो विय, लोणम्बिलादिअज्झोहरणकाले खारापटिच्छकादिकम्मकारणपत्तो विय तिब्बं दुक्खमनुभोति, इदं गब्भपरिहरणमूलकं दुक्खं.

यं पनस्स मूळ्हगब्भाय मातुया मित्तामच्चसुहज्जादीहिपि अदस्सनारहे दुक्खुप्पत्तिट्ठाने छेदनफालनादीहि दुक्खं उप्पज्जति, इदं गब्भविपत्तिमूलकं दुक्खं.

यं विजायमानाय मातुया कम्मजेहि वातेहि परिवत्तेत्वा नरकपपातं विय अतिभयानकं योनिमग्गं पटिपातियमानस्स परमसम्बाधेन योनिमुखेन ताळच्छिग्गळेन विय निक्कड्ढियमानस्स महानागस्स नरकसत्तस्स विय च सङ्घातपब्बतेहि विचुण्णियमानस्स दुक्खं उप्पज्जति, इदं विजायनमूलकं दुक्खं.

यं पन जातस्स तरुणवणसदिससुखुमालसरीरस्स हत्थगहणनहापनधोवनचोळपरिमज्जनादिकाले ¶ सूचिमुखखुरधाराहि विज्झनफालनसदिसं दुक्खं उप्पज्जति, इदं मातुकुच्छितो बहिनिक्खमनमूलकं दुक्खं.

यं ततो परं पवत्तियं अत्तनाव अत्तानं वधेन्तस्स अचेलकवतादिवसेन आतापनपरितापनानुयोगमनुयुत्तस्स, कोधवसेन अभुञ्जन्तस्स, उब्बन्धन्तस्स च दुक्खं उप्पज्जति, इदं अत्तूपक्कममूलकं दुक्खं. यं पन परतो वधबन्धनादीनि अनुभवन्तस्स उप्पज्जति, इदं परूपक्कममूलकं दुक्खन्ति.

इति इमस्स सब्बस्सापि दुक्खस्स अयं जाति वत्थुमेव होति.

५४१. तेनेतं वुच्चति –

जायेथ नो चे नरकेसु सत्तो,

तत्तग्गिदाहादिकमप्पसय्हं;

लभेथ दुक्खं नु कुहिं पतिट्ठं,

इच्चाह दुक्खाति मुनीध जातिं.

दुक्खं ¶ तिरच्छेसु कसापतोद-

दण्डाभिघातादिभवं अनेकं;

यं तं कथं तत्थ भवेय्य जातिं,

विना तहिं जाति ततोपि दुक्खा.

पेतेसु दुक्खं पन खुप्पिपासा-

वातातपादिप्पभवं विचित्तं;

यस्मा अजातस्स न तत्थ अत्थि,

तस्मापि दुक्खं मुनि जातिमाह.

तिब्बन्धकारे ¶ च असय्हसीते,

लोकन्तरे यं असुरेसु दुक्खं;

न तं भवे तत्थ न चस्स जाति,

यतो अयं जाति ततोपि दुक्खा.

यञ्चापि गूथनरके विय मातुगब्भे,

सत्तो वसं चिरमतो बहि निक्खमञ्च;

पप्पोति दुक्खमतिघोरमिदम्पि नत्थि,

जातिं विना इतिपि जाति अयञ्हि दुक्खा.

किं भासितेन बहुना ननु यं कुहिञ्चि,

अत्थीध किञ्चिदपि दुक्खमिदं कदाचि;

नेवत्थि जातिविरहेन यतो महेसि,

दुक्खाति सब्बपठमं इममाह जातिन्ति.

अयं ताव जातियं विनिच्छयो.

जरानिद्देसो

५४२. जरापि दुक्खाति एत्थ दुविधा जरा सङ्खतलक्खणञ्च, खण्डिच्चादिसम्मतो सन्ततियं एकभवपरियापन्नखन्धपुराणभावो च, सा इध अधिप्पेता. सा पनेसा जरा खन्धपरिपाकलक्खणा, मरणूपनयनरसा, योब्बनविनासपच्चुपट्ठाना. दुक्खा सङ्खारदुक्खभावतो चेव दुक्खवत्थुतो च ¶ . यं हि अङ्गपच्चङ्गसिथिलीभावइन्द्रियविकारविरूपतायोब्बनविनासबलूपघातसतिमतिविप्पवासपरपरिभवादिअनेकपच्चयं कायिकचेतसिकदुक्खं उप्पज्जति, जरा तस्स वत्थु. तेनेतं वुच्चति –

‘‘अङ्गानं सिथिलीभावा, इन्द्रियानं विकारतो;

योब्बनस्स विनासेन, बलस्स उपघाततो.

‘‘विप्पवासा ¶ सतादीनं, पुत्तदारेहि अत्तनो;

अपसादनीयतो चेव, भिय्यो बालत्तपत्तिया.

‘‘पप्पोति दुक्खं यं मच्चो, कायिकं मानसं तथा;

सब्बमेतं जराहेतु, यस्मा तस्मा जरा दुखा’’ति.

अयं जरायं विनिच्छयो.

मरणनिद्देसो

५४३. मरणम्पि दुक्खन्ति एत्थापि दुविधं मरणं सङ्खतलक्खणञ्च, यं सन्धाय वुत्तं ‘‘जरामरणं द्वीहि खन्धेहि सङ्गहित’’न्ति (धातु. ७१). एकभवपरियापन्नजीवितिन्द्रियप्पबन्धविच्छेदो च, यं सन्धाय वुत्तं ‘‘निच्चं मरणतो भय’’न्ति (सु. नि. ५८१). तं इध अधिप्पेतं. जातिपच्चया मरणं उपक्कममरणं सरसमरणं आयुक्खयमरणं पुञ्ञक्खयमरणन्तिपि तस्सेव नामं. तयिदं चुतिलक्खणं, वियोगरसं, गतिविप्पवासपच्चुपट्ठानं. दुक्खस्स पन वत्थुभावतो दुक्खन्ति वेदितब्बं. तेनेतं वुच्चति –

‘‘पापस्स पापकम्मादि-निमित्तमनुपस्सतो;

भद्दस्सापसहन्तस्स, वियोगं पियवत्थुकं;

मीयमानस्स यं दुक्खं, मानसं अविसेसतो.

सब्बेसञ्चापि यं सन्धि-बन्धनच्छेदनादिकं;

वितुज्जमानमम्मानं, होति दुक्खं सरीरजं.

असय्हमप्पतिकारं, दुक्खस्सेतस्सिदं यतो;

मरणं वत्थु तेनेतं, दुक्खमिच्चेव भासित’’न्ति.

अयं मरणे विनिच्छयो.

सोकादिनिद्देसा

५४४. सोकादीसु ¶ ¶ सोको नाम ञातिब्यसनादीहि फुट्ठस्स चित्तसन्तापो. सो किञ्चापि अत्थतो दोमनस्समेव होति. एवं सन्तेपि अन्तोनिज्झानलक्खणो, चेतसो परिज्झापनरसो, अनुसोचनपच्चुपट्ठानो. दुक्खो पन दुक्खदुक्खतो दुक्खवत्थुतो च. तेनेतं वुच्चति –

‘‘सत्तानं हदयं सोको, विससल्लंव तुज्जति;

अग्गितत्तोव नाराचो, भुसंव दहते पुन.

‘‘समावहति च ब्याधि-जरामरणभेदनं;

दुक्खम्पि विविधं यस्मा, तस्मा दुक्खोति वुच्चती’’ति.

अयं सोके विनिच्छयो.

परिदेवो

५४५. परिदेवो नाम ञातिब्यसनादीहि फुट्ठस्स वचीपलापो. सो लालप्पनलक्खणो, गुणदोसकित्तनरसो, सम्भमपच्चुपट्ठानो. दुक्खो पन सङ्खारदुक्खभावतो दुक्खवत्थुतो च. तेनेतं वुच्चति –

‘‘यं सोकसल्लविहतो परिदेवमानो,

कण्ठोट्ठतालुतलसोसजमप्पसय्हं;

भिय्योधिमत्तमधिगच्छतियेव दुक्खं,

दुक्खोति तेन भगवा परिदेवमाहा’’ति.

अयं परिदेवे विनिच्छयो.

दुक्खं

५४६. दुक्खं ¶ नाम कायिकं दुक्खं, तं कायपीळनलक्खणं, दुप्पञ्ञानं दोमनस्सकरणरसं, कायिकाबाधपच्चुपट्ठानं. दुक्खं पन दुक्खदुक्खतो मानसदुक्खावहनतो च. तेनेतं वुच्चति –

‘‘पीळेति कायिकमिदं, दुक्खञ्च मानसं भिय्यो;

जनयति यस्मा तस्मा, दुक्खन्ति विसेसतो वुत्त’’न्ति.

अयं दुक्खे विनिच्छयो.

दोमनस्सं

५४७. दोमनस्सं ¶ नाम मानसं दुक्खं. तं चित्तपीळनलक्खणं, मनोविघातरसं, मानसब्याधिपच्चुपट्ठानं. दुक्खं पन दुक्खदुक्खतो कायिकदुक्खावहनतो च. चेतोदुक्खसमप्पिता हि केसे पकिरिय कन्दन्ति, उरानि पटिपिसन्ति, आवट्टन्ति, विवट्टन्ति, उद्धंपादं पपतन्ति, सत्थं आहरन्ति, विसं खादन्ति, रज्जुया उब्बन्धन्ति, अग्गिं पविसन्तीति तं नानप्पकारकं दुक्खमनुभवन्ति. तेनेतं वुच्चति –

‘‘पीळेति यतो चित्तं, कायस्स च पीळनं समावहति;

दुक्खन्ति दोमनस्सं, विदोमनस्सा ततो आहू’’ति.

अयं दोमनस्से विनिच्छयो.

उपायासो

५४८. उपायासो नाम ञातिब्यसनादीहि फुट्ठस्स अधिमत्तचेतोदुक्खप्पभावितो दोसोयेव. सङ्खारक्खन्धपरियापन्नो एको धम्मोति एके. सो चित्तपरिदहनलक्खणो, नित्थुननरसो ¶ , विसादपच्चुपट्ठानो. दुक्खो पन सङ्खारदुक्खभावतो चित्तपरिदहनतो कायविसादनतो च. तेनेतं वुच्चति –

‘‘चित्तस्स च परिदहना, कायस्स विसादना च अधिमत्तं;

यं दुक्खमुपायासो, जनेति दुक्खो ततो वुत्तो’’ति.

अयं उपायासे विनिच्छयो.

एत्थ च मन्दग्गिना अन्तोभाजने पाको विय सोको. तिक्खग्गिना पच्चमानस्स भाजनतो बहिनिक्खमनं विय परिदेवो. बहिनिक्खन्तावसेसस्स निक्खमितुं अप्पहोन्तस्स अन्तोभाजनेयेव याव परिक्खया पाको विय उपायासो दट्ठब्बो.

अप्पियसम्पयोगो

५४९. अप्पियसम्पयोगो नाम अमनापेहि सत्तसङ्खारेहि समोधानं. सो अनिट्ठसमोधानलक्खणो, चित्तविघातकरणरसो, अनत्थभावपच्चुपट्ठानो. दुक्खो पन दुक्खवत्थुतो. तेनेतं वुच्चति –

‘‘दिस्वाव ¶ अप्पिये दुक्खं, पठमं होति चेतसि;

तदुपक्कमसम्भूत-मथकाये यतो इध.

‘‘ततो दुक्खद्वयस्सापि, वत्थुतो सो महेसिना;

दुक्खो वुत्तोति विञ्ञेय्यो, अप्पियेहि समागमो’’ति.

अयं अप्पियसम्पयोगे विनिच्छयो.

पियविप्पयोगो

५५०. पियविप्पयोगो नाम मनापेहि सत्तसङ्खारेहि विनाभावो. सो इट्ठवत्थुवियोगलक्खणो ¶ , सोकुप्पादनरसो, ब्यसनपच्चुपट्ठानो. दुक्खो पन सोकदुक्खस्स वत्थुतो. तेनेतं वुच्चति –

‘‘ञातिधनादिवियोगा,

सोकसरसमप्पिता वितुज्जन्ति;

बाला यतो ततो यं,

दुक्खोति मतो पियविप्पयोगो’’ति.

अयं पियविप्पयोगे विनिच्छयो.

इच्छितालाभो

५५१. यम्पिच्छं न लभतीति एत्थ ‘‘अहो वत मयं न जातिधम्मा अस्सामा’’तिआदीसु (दी. नि. २.३९८; विभ. २०१) अलब्भनेय्यवत्थूसु इच्छाव यम्पिच्छं न लभति, तम्पि दुक्खन्ति वुत्ता. सा अलब्भनेय्यवत्थुइच्छनलक्खणा, तप्परियेसनरसा, तेसं अप्पत्तिपच्चुपट्ठाना. दुक्खा पन दुक्खवत्थुतो. तेनेतं वुच्चति –

‘‘तं तं पत्थयमानानं, तस्स तस्स अलाभतो;

यं विघातमयं दुक्खं, सत्तानं इध जायति.

‘‘अलब्भनेय्यवत्थूनं, पत्थना तस्स कारणं;

यस्मा तस्मा जिनो दुक्खं, इच्छितालाभमब्रवी’’ति.

अयं इच्छितालाभे विनिच्छयो.

पञ्चुपादानक्खन्धा

५५२. संखित्तेन ¶ पञ्चुपादानक्खन्धा दुक्खाति एत्थ पन –

जातिप्पभुतिकं ¶ दुक्खं, यं वुत्तमिध तादिना;

अवुत्तं यञ्च तं सब्बं, विना एते न विज्जति.

यस्मा तस्मा उपादान-क्खन्धा सङ्खेपतो इमे;

दुक्खाति वुत्ता दुक्खन्त-देसकेन महेसिना.

तथा हि इन्धनमिव पावको, लक्खमिव पहरणानि, गोरूपं विय डंसमकसादयो, खेत्तमिव लायका, गामं विय गामघातका उपादानक्खन्धपञ्चकमेव जातिआदयो नानप्पकारेहि विबाधेन्ता तिणलतादीनि विय भूमियं, पुप्फफलपल्लवानि विय रुक्खेसु उपादानक्खन्धेसुयेव निब्बत्तन्ति. उपादानक्खन्धानञ्च आदिदुक्खं जाति, मज्झेदुक्खं जरा, परियोसानदुक्खं मरणं, मारणन्तिकदुक्खाभिघातेन परिडय्हनदुक्खं सोको, तदसहनतो लालप्पनदुक्खं परिदेवो, ततो धातुक्खोभसङ्खातअनिट्ठफोट्ठब्बसमायोगतो कायस्स आबाधनदुक्खं दुक्खं, तेन बाधियमानानं पुथुज्जनानं तत्थ पटिघुप्पत्तितो चेतोबाधनदुक्खं दोमनस्सं, सोकादिवुद्धिया जनितविसादानं अनुत्थुननदुक्खं उपायासो, मनोरथविघातप्पत्तानं इच्छाविघातदुक्खं इच्छितालाभोति एवं नानप्पकारतो उपपरिक्खियमाना उपादानक्खन्धाव दुक्खाति. यदेतं एकमेकं दस्सेत्वा वुच्चमानं अनेकेहिपि कप्पेहि न सक्का असेसतो वत्तुं, तस्मा तं सब्बम्पि दुक्खं एकजलबिन्दुम्हि सकलसमुद्दजलरसं विय येसु केसुचि पञ्चसु उपादानक्खन्धेसु संखिपित्वा दस्सेतुं ‘‘संखित्तेन पञ्चुपादानक्खन्धा दुक्खा’’ति भगवा अवोचाति. अयं उपादानक्खन्धेसु विनिच्छयो.

अयं ताव दुक्खनिद्देसे नयो.

समुदयनिद्देसकथा

५५३. समुदयनिद्देसे पन यायं तण्हाति या अयं तण्हा. पोनोब्भविकाति पुनब्भवकरणं पुनोब्भवो, पुनोब्भवो सीलमेतिस्साति ¶ पोनोब्भविका. नन्दीरागेन सहगताति नन्दीरागसहगता, नन्दीरागेन सद्धिं अत्थतो एकत्तमेव गताति वुत्तं होति. तत्र तत्राभिनन्दिनीति यत्र यत्र अत्तभावो निब्बत्तति, तत्र तत्राभिनन्दिनी. सेय्यथिदन्ति निपातो ¶ , तस्स सा कतमाति चेति अत्थो. कामतण्हा भवतण्हा विभवतण्हाति इमा पटिच्चसमुप्पादनिद्देसे आविभविस्सन्ति. इध पनायं तिविधापि दुक्खसच्चस्स निब्बत्तकट्ठेन एकत्तं उपनेत्वा दुक्खसमुदयं अरियसच्चन्ति वुत्ताति वेदितब्बा.

अयं समुदयनिद्देसे नयो.

निरोधनिद्देसकथा

५५४. दुक्खनिरोधनिद्देसे यो तस्सायेव तण्हायातिआदिना नयेन समुदयनिरोधो वुत्तो, सो कस्माति चे? समुदयनिरोधेन दुक्खनिरोधो. समुदयनिरोधेन हि दुक्खं निरुज्झति, न अञ्ञथा. तेनाह –

‘‘यथापि मूले अनुपद्दवे दळ्हे,

छिन्नोपि रुक्खो पुनदेव रूहति;

एवम्पि तण्हानुसये अनूहते,

निब्बत्तती दुक्खमिदं पुनप्पुन’’न्ति. (ध. प. ३३८);

इति यस्मा समुदयनिरोधेनेव दुक्खं निरुज्झति, तस्मा भगवा दुक्खनिरोधं देसेन्तो समुदयनिरोधेनेव देसेसि. सीहसमानवुत्तिनो हि तथागता. ते दुक्खं निरोधेन्ता दुक्खनिरोधञ्च देसेन्ता हेतुम्हि पटिपज्जन्ति, न फले. सुवानवुत्तिनो पन तित्थिया. ते दुक्खं निरोधेन्ता दुक्खनिरोधञ्च देसेन्ता अत्तकिलमथानुयोगदेसनादीहि फले पटिपज्जन्ति, न हेतुम्हीति. एवं ताव दुक्खनिरोधस्स समुदयनिरोधवसेन देसनाय पयोजनं वेदितब्बं.

५५५. अयं पनत्थो – तस्सायेव तण्हायाति तस्सा ‘‘पोनोब्भविका’’ति वत्वा कामतण्हादिवसेन विभत्ततण्हाय. विरागो वुच्चति मग्गो. ‘‘विरागा विमुच्चती’’ति (म. नि. १.२४५; सं. नि. ३.१४) हि वुत्तं. विरागेन निरोधो विरागनिरोधो. अनुसयसमुग्घाततो असेसो विरागनिरोधो असेसविरागनिरोधो. अथ वा विरागोति पहानं वुच्चति, तस्मा असेसो ¶ विरागो असेसो निरोधोति एवम्पेत्थ योजना दट्ठब्बा. अत्थतो पन सब्बानेव ¶ एतानि निब्बानस्स वेवचनानि. परमत्थतो हि दुक्खनिरोधो अरियसच्चन्ति निब्बानं वुच्चति. यस्मा पन तं आगम्म तण्हा विरज्जति चेव निरुज्झति च, तस्मा विरागोति च निरोधोति च वुच्चति. यस्मा च तदेव आगम्म तस्सा चागादयो होन्ति, कामगुणालयेसु चेत्थ एकोपि आलयो नत्थि, तस्मा ‘‘चागो पटिनिस्सग्गो मुत्ति अनालयो’’ति वुच्चति.

५५६. तयिदं सन्तिलक्खणं, अच्चुतिरसं, अस्सासकरणरसं वा, अनिमित्तपच्चुपट्ठानं, निप्पपञ्चपच्चुपट्ठानं वा.

निब्बानकथा

५५७. नत्थेव निब्बानं, ससविसाणं विय अनुपलब्भनीयतोति चे? न, उपायेन उपलब्भनीयतो. उपलब्भति हि तं तदनुरूपपटिपत्तिसङ्खातेन उपायेन, चेतोपरियञाणेन परेसं लोकुत्तरचित्तं विय, तस्मा ‘‘अनुपलब्भनीयतो नत्थी’’ति न वत्तब्बं. न हि ‘‘यं बालपुथुज्जना न उपलभन्ति, तं नत्थी’’ति वत्तब्बं.

५५८. अपिच निब्बानं नत्थीति न वत्तब्बं, कस्मा? पटिपत्तिया वञ्झभावापज्जनतो. असति हि निब्बाने सम्मादिट्ठिपुरेजवाय सीलादिखन्धत्तयसङ्गहाय सम्मापटिपत्तिया वञ्झभावो आपज्जति. न चायं वञ्झा, निब्बानपापनतोति. न पटिपत्तिया वञ्झभावापत्ति, अभावपापकत्ताति चे. न, अतीतानागताभावेपि निब्बानपत्तिया अभावतो. वत्तमानानम्पि अभावो निब्बानन्ति चे. न, तेसं अभावासम्भवतो, अभावे च अवत्तमानभावापज्जनतो, वत्तमानक्खन्धनिस्सितमग्गक्खणे च सोपादिसेसनिब्बानधातुप्पत्तिया अभावदोसतो. तदा किलेसानं अवत्तमानत्ता न दोसोति चे. न, अरियमग्गस्स निरत्थकभावापज्जनतो. एवञ्हि सति अरियमग्गक्खणतो पुब्बेपि किलेसा न सन्तीति अरियमग्गस्स निरत्थकभावो आपज्जति. तस्मा अकारणमेतं.

५५९. ‘‘यो खो, आवुसो, रागक्खयो’’तिआदिवचनतो (सं. नि. ४.३१५) ‘‘खयो निब्बान’’न्ति चे. न, अरहत्तस्सापि खयमत्तापज्जनतो. तम्पि हि ¶ ‘‘यो खो, आवुसो ¶ , रागक्खयो’’तिआदिना (स. नि. ४.३१५) नयेन निद्दिट्ठं. किञ्च भिय्यो निब्बानस्स इत्तरकालादिप्पत्तिदोसतो. एवञ्हि सति निब्बानं इत्तरकालं, सङ्खतलक्खणं, सम्मावायामनिरपेक्खाधिगमनीयभावञ्च आपज्जति. सङ्खतलक्खणत्तायेव च सङ्खतपरियापन्नं, सङ्खतपरियापन्नत्ता रागादीहि अग्गीहि आदित्तं, आदित्तत्ता दुक्खञ्चातिपि आपज्जति. यस्मा खया पट्ठाय न भिय्यो पवत्ति नाम होति, तस्स निब्बानभावतो न दोसोति चे. न, तादिसस्स खयस्स अभावतो. भावेपि चस्स वुत्तप्पकारदोसानतिवत्तनतो, अरियमग्गस्स च निब्बानभावापज्जनतो. अरियमग्गो हि दोसे खीणेति, तस्मा खयोति वुच्चति. ततो च पट्ठाय न भिय्यो दोसानं पवत्तीति.

अनुप्पत्तिनिरोधसङ्खातस्स पन खयस्स परियायेन उपनिस्सयत्ता, यस्स उपनिस्सयो होति तदुपचारेन ‘‘खयो’’ति वुत्तं. सरूपेनेव कस्मा न वुत्तन्ति चे. अतिसुखुमत्ता. अतिसुखुमता चस्स भगवतो अप्पोसुक्कभावावहनतो, अरियेन चक्खुना पस्सितब्बतो च सिद्धाति.

५६०. तयिदं मग्गसमङ्गिना पत्तब्बतो असाधारणं, पुरिमकोटिया अभावतो अप्पभवं. मग्गभावे भावतो न अप्पभवन्ति चे. न, मग्गेन अनुप्पादनीयतो. पत्तब्बमेव हेतं मग्गेन, न उप्पादेतब्बं. तस्मा अप्पभवमेव. अप्पभवत्ता अजरामरणं. पभवजरामरणानं अभावतो निच्चं.

निब्बानस्सेव अणुआदीनम्पि निच्चभावापत्तीति चे. न, हेतुनो अभावा. निब्बानस्स निच्चत्ता ते निच्चाति चे. न, हेतुलक्खणस्स अनुपपत्तितो. निच्चा उप्पादादीनं अभावतो निब्बानं वियाति चे. न, अणुआदीनं असिद्धत्ता.

५६१. यथावुत्तयुत्तिसब्भावतो पन इदमेव निच्चं, रूपसभावातिक्कमतो अरूपं. बुद्धादीनं निट्ठाय विसेसाभावतो एकाव निट्ठा. येन भावनाय पत्तं, तस्स किलेसवूपसमं, उपादिसेसञ्च उपादाय पञ्ञापनीयत्ता सह उपादिसेसेन पञ्ञापियतीति सउपादिसेसं. यो चस्स समुदयप्पहानेन उपहतायतिकम्मफलस्स चरिमचित्ततो च उद्धं पवत्तिखन्धानं अनुप्पादनतो, उप्पन्नानञ्च अन्तरधानतो उपादिसेसाभावो ¶ , तं उपादाय पञ्ञापनीयतो नत्थि एत्थ उपादिसेसोति अनुपादिसेसं.

असिथिलपरक्कमसिद्धेन ¶ ञाणविसेसेन अधिगमनीयतो, सब्बञ्ञुवचनतो च परमत्थेन सभावतो निब्बानं नाविज्जमानं. वुत्तञ्हेतं ‘‘अत्थि, भिक्खवे, अजातं अभूतं अकतं असङ्खत’’न्ति.

इदं दुक्खनिरोधनिद्देसे विनिच्छयकथामुखं.

मग्गनिद्देसकथा

५६२. दुक्खनिरोधगामिनिपटिपदानिद्देसे वुत्ता पन अट्ठ धम्मा कामं खन्धनिद्देसेपि अत्थतो पकासितायेव, इध पन नेसं एकक्खणे पवत्तमानानं विसेसावबोधनत्थं वदाम. सङ्खेपतो हि चतुसच्चपटिवेधाय पटिपन्नस्स योगिनो निब्बानारम्मणं अविज्जानुसयसमुग्घातकं पञ्ञाचक्खु सम्मादिट्ठि. सा सम्मा दस्सनलक्खणा, धातुप्पकासनरसा, अविज्जन्धकारविद्धंसनपच्चुपट्ठाना. तथा सम्पन्नदिट्ठिनो तंसम्पयुत्तं मिच्छासङ्कप्पनिघातकं चेतसो निब्बानपदाभिनिरोपनं सम्मासङ्कप्पो. सो सम्मा चित्ताभिनिरोपनलक्खणो, अप्पनारसो, मिच्छासङ्कप्पप्पहानपच्चुपट्ठानो.

तथा पस्सतो वितक्कयतो च तंसम्पयुत्ताव वचीदुच्चरितसमुग्घातिका मिच्छावाचाय विरति सम्मावाचा नाम. सा परिग्गहलक्खणा, विरमणरसा, मिच्छावाचाप्पहानपच्चुपट्ठाना. तथा विरमतो तंसम्पयुत्ताव मिच्छाकम्मन्तसमुच्छेदिका पाणातिपातादिविरति सम्माकम्मन्तो नाम. सो समुट्ठापनलक्खणो, विरमणरसो, मिच्छाकम्मन्तप्पहानपच्चुपट्ठानो. या पनस्स तेसं सम्मावाचाकम्मन्तानं विसुद्धिभूता तंसम्पयुत्ताव कुहनादिउपच्छेदिका मिच्छाजीवविरति, सो सम्माआजीवो नाम. सो वोदानलक्खणो, ञायाजीवपवत्तिरसो, मिच्छाजीवप्पहानपच्चुपट्ठानो.

अथस्स यो तस्सा सम्मावाचाकम्मन्ताजीवसङ्खाताय सीलभूमियं पतिट्ठितस्स तदनुरूपो तंसम्पयुत्तोव कोसज्जसमुच्छेदको वीरियारम्भो, एस सम्मावायामो नाम. सो पग्गहलक्खणो, अनुप्पन्नअकुसलानुप्पादनादिरसो, मिच्छावायामप्पहानपच्चुपट्ठानो. तस्सेवं वायमतो तंसम्पयुत्तोव मिच्छासतिविनिद्धुननो चेतसो असम्मोसो ¶ सम्मासति नाम. सा उपट्ठानलक्खणा, असम्मुस्सनरसा, मिच्छासतिप्पहानपच्चुपट्ठाना. एवं अनुत्तराय सतिया संरक्खियमानचित्तस्स ¶ तंसम्पयुत्ताव मिच्छासमाधिविद्धंसिका चित्तेकग्गता सम्मासमाधि नाम. सो अविक्खेपलक्खणो, समाधानरसो, मिच्छासमाधिप्पहानपच्चुपट्ठानोति. अयं दुक्खनिरोधगामिनिपटिपदानिद्देसे नयो. एवमेत्थ जातिआदीनं विनिच्छयो वेदितब्बो.

५६३. ञाणकिच्चतोति सच्चञाणस्स किच्चतोपि विनिच्छयो वेदितब्बो. दुविधं हि सच्चञाणं – अनुबोधञाणं पटिवेधञाणञ्च. तत्थ अनुबोधञाणं लोकियं अनुस्सवादिवसेन निरोधे मग्गे च पवत्तति. पटिवेधञाणं लोकुत्तरं निरोधमारम्मणं कत्वा किच्चतो चत्तारि सच्चानि पटिविज्झति. यथाह – ‘‘यो, भिक्खवे, दुक्खं पस्सति, दुक्खसमुदयम्पि सो पस्सति, दुक्खनिरोधम्पि पस्सति, दुक्खनिरोधगामिनिं पटिपदम्पि पस्सती’’ति (सं. नि. ५.११००) सब्बं वत्तब्बं. तं पनस्स किच्चं ञाणदस्सनविसुद्धियं आविभविस्सति.

यं पनेतं लोकियं, तत्थ दुक्खञाणं परियुट्ठानाभिभववसेन पवत्तमानं सक्कायदिट्ठिं निवत्तेति. समुदयञाणं उच्छेददिट्ठिं. निरोधञाणं सस्सतदिट्ठिं. मग्गञाणं अकिरियदिट्ठिं. दुक्खञाणं वा धुवसुभसुखत्तभावविरहितेसु खन्धेसु धुवसुभसुखत्तभावसञ्ञासङ्खातं फले विप्पटिपत्तिं. समुदयञाणं इस्सरपधानकालसभावादीहि लोको पवत्ततीति अकारणे कारणाभिमानप्पवत्तं हेतुम्हि विप्पटिपत्तिं. निरोधञाणं अरूपलोकलोकथूपिकादीसु अपवग्गगाहभूतं निरोधे विप्पटिपत्तिं. मग्गञाणं कामसुखल्लिकअत्तकिलमथानुयोगप्पभेदे अविसुद्धिमग्गे विसुद्धिमग्गगाहवसेन पवत्तं उपाये विप्पटिपत्तिं निवत्तेति. तेनेतं वुच्चति –

‘‘लोके लोकप्पभवे, लोकत्थगमे सिवे च तदुपाये;

सम्मुय्हति ताव नरो, न विजानाति याव सच्चानी’’ति.

एवमेत्थ ञाणकिच्चतोपि विनिच्छयो वेदितब्बो.

५६४. अन्तोगधानं पभेदाति दुक्खसच्चस्मिं हि ठपेत्वा तण्हञ्चेव अनासवधम्मे च सेसा सब्बधम्मा अन्तोगधा. समुदयसच्चे छत्तिंस तण्हाविचरितानि. निरोधसच्चं असम्मिस्सं. मग्गसच्चे सम्मादिट्ठिमुखेन वीमंसिद्धिपादपञ्ञिन्द्रियपञ्ञाबलधम्मविचयसम्बोज्झङ्गानि. सम्मासङ्कप्पापदेसेन तयो ¶ नेक्खम्मवितक्कादयो. सम्मावाचापदेसेन चत्तारि वचीसुचरितानि ¶ . सम्माकम्मन्तापदेसेन तीणि कायसुचरितानि. सम्माजीवमुखेन अप्पिच्छता सन्तुट्ठिता च. सब्बेसंयेव वा एतेसं सम्मावाचाकम्मन्ताजीवानं अरियकन्तसीलत्ता अरियकन्तसीलस्स च सद्धाहत्थेन पटिग्गहेतब्बत्ता तेसं अत्थिताय अत्थिभावतो सद्धिन्द्रियसद्धाबलछन्दिद्धिपादा. सम्मावायामापदेसेन चतुब्बिधसम्मप्पधानवीरियिन्द्रियवीरियबलवीरियसम्बोज्झङ्गानि. सम्मासतिअपदेसेन चतुब्बिधसतिपट्ठानसतिन्द्रियसतिबलसतिसम्बोज्झङ्गानि. सम्मासमाधिअपदेसेन सवितक्कसविचारादयो तयो समाधी चित्तसमाधि समाधिन्द्रियसमाधिबलपीतिपस्सद्धिसमाधिउपेक्खासम्बोज्झङ्गानि अन्तोगधानीति एवमेत्थ अन्तोगधानं पभेदतोपि विनिच्छयो वेदितब्बो.

५६५. उपमातोति भारो विय हि दुक्खसच्चं दट्ठब्बं, भारादानमिव समुदयसच्चं, भारनिक्खेपनमिव निरोधसच्चं, भारनिक्खेपनुपायो विय मग्गसच्चं. रोगो विय च दुक्खसच्चं, रोगनिदानमिव समुदयसच्चं, रोगवूपसमो विय निरोधसच्चं, भेसज्जमिव मग्गसच्चं. दुब्भिक्खमिव वा दुक्खसच्चं, दुब्बुट्ठि विय समुदयसच्चं, सुभिक्खमिव निरोधसच्चं, सुवुट्ठि विय मग्गसच्चं. अपिच वेरी-वेरमूल-वेरसमुग्घात-वेरसमुग्घातुपायेहि, विसरुक्ख-रुक्खमूल-मूलुपच्छेद-तदुपच्छेदुपायेहि, भय-भयमूल-निब्भय-तदधिगमुपायेहि, ओरिमतीर-महोघपारिमतीर-तंसम्पापकवायामेहि च योजेत्वापेतानि उपमातो वेदितब्बानीति एवमेत्थ उपमातो विनिच्छयो वेदितब्बो.

५६६. चतुक्कतोति अत्थि चेत्थ दुक्खं न अरियसच्चं, अत्थि अरियसच्चं न दुक्खं, अत्थि दुक्खञ्चेव अरियसच्चञ्च, अत्थि नेव दुक्खं न अरियसच्चं. एस नयो समुदयादीसु. तत्थ मग्गसम्पयुत्ता धम्मा सामञ्ञफलानि च ‘‘यदनिच्चं तं दुक्ख’’न्ति (सं. नि. ३.१५) वचनतो सङ्खारदुक्खताय दुक्खं, न अरियसच्चं. निरोधो अरियसच्चं, न दुक्खं. इतरं पन अरियसच्चद्वयं सिया दुक्खं अनिच्चतो, न पन यस्स परिञ्ञाय भगवति ब्रह्मचरियं वुस्सति तथत्तेन. सब्बाकारेन पन उपादानक्खन्धपञ्चकं दुक्खञ्चेव अरियसच्चञ्च अञ्ञत्र तण्हाय. मग्गसम्पयुत्ता धम्मा सामञ्ञफलानि च यस्स परिञ्ञत्थं भगवति ब्रह्मचरियं वुस्सति तथत्तेन नेव दुक्खं न अरियसच्चं. एवं समुदयादीसुपि यथायोगं योजेत्वा चतुक्कतोपेत्थ विनिच्छयो वेदितब्बो.

५६७. सुञ्ञतेकविधादीहीतिएत्थ ¶ ¶ सुञ्ञतो ताव परमत्थेन हि सब्बानेव सच्चानि वेदककारकनिब्बुतगमकाभावतो सुञ्ञानीति वेदितब्बानि. तेनेतं वुच्चति –

‘‘दुक्खमेव हि, न कोचि दुक्खितो;

कारको न, किरियाव विज्जति.

अत्थि निब्बुति, न निब्बुतो पुमा;

मग्गमत्थि, गमको न विज्जती’’ति.

अथ वा,

धुवसुभसुखत्तसुञ्ञं, पुरिमद्वयमत्तसुञ्ञममतपदं;

धुवसुखअत्तविरहितो, मग्गोइति सुञ्ञता तेसु.

निरोधसुञ्ञानि वा तीणि, निरोधो च सेसत्तयसुञ्ञो. फलसुञ्ञो वा एत्थ हेतु समुदये दुक्खस्साभावतो, मग्गे च निरोधस्स, न फलेन सगब्भो पकतिवादीनं पकति विय. हेतुसुञ्ञञ्च फलं दुक्खसमुदयानं निरोधमग्गानञ्च असमवाया, न हेतुसमवेतं हेतुफलं समवायवादीनं द्विअणुकादि विय. तेनेतं वुच्चति –

‘‘तयमिध निरोधसुञ्ञं, तयेन तेनापि निब्बुति सुञ्ञा;

सुञ्ञो फलेन हेतु, फलम्पि तंहेतुना सुञ्ञ’’न्ति.

एवं ताव सुञ्ञतो विनिच्छयो वेदितब्बो.

एकविधादिविनिच्छयकथा

५६८. एकविधादीहीति सब्बमेव चेत्थ दुक्खं एकविधं पवत्तिभावतो. दुविधं नामरूपतो. तिविधं कामरूपारूपूपपत्तिभवभेदतो. चतुब्बिधं चतुआहारभेदतो. पञ्चविधं पञ्चुपादानक्खन्धभेदतो.

समुदयोपि ¶ एकविधो पवत्तकभावतो. दुविधो दिट्ठिसम्पयुत्तासम्पयुत्ततो. तिविधो कामभवविभवतण्हाभेदतो. चतुब्बिधो चतुमग्गप्पहेय्यतो. पञ्चविधो रूपाभिनन्दनादिभेदतो. छब्बिधो छतण्हाकायभेदतो.

निरोधोपि ¶ एकविधो असङ्खतधातुभावतो. परियायेन पन दुविधो सउपादिसेसअनुपादिसेसभेदतो. तिविधो भवत्तयवूपसमतो. चतुब्बिधो चतुमग्गाधिगमनीयतो. पञ्चविधो पञ्चाभिनन्दनवूपसमतो. छब्बिधो छतण्हाकायक्खयभेदतो.

मग्गोपि एकविधो भावेतब्बतो. दुविधो समथविपस्सनाभेदतो, दस्सनभावनाभेदतो वा. तिविधो खन्धत्तयभेदतो. अयञ्हि सप्पदेसत्ता नगरं विय रज्जेन निप्पदेसेहि तीहि खन्धेहि सङ्गहितो. यथाह –

‘‘न खो, आवुसो विसाख, अरियेन अट्ठङ्गिकेन मग्गेन तयो खन्धा सङ्गहिता, तीहि च खो, आवुसो विसाख, खन्धेहि अरियो अट्ठङ्गिको मग्गो सङ्गहितो. या चावुसो विसाख, सम्मावाचा, यो च सम्माकम्मन्तो, यो च सम्माआजीवो, इमे धम्मा सीलक्खन्धे सङ्गहिता. यो च सम्मावायामो, या च सम्मासति, यो च सम्मासमाधि, इमे धम्मा समाधिक्खन्धे सङ्गहिता. या च सम्मादिट्ठि, यो च सम्मासङ्कप्पो, इमे धम्मा पञ्ञाक्खन्धे सङ्गहिता’’ति (म. नि. १.४६२).

एत्थ हि सम्मावाचादयो तयो सीलमेव, तस्मा ते सजातितो सीलक्खन्धेन सङ्गहिता. किञ्चापि हि पाळियं सीलक्खन्धेति भुम्मेन निद्देसो कतो, अत्थो पन करणवसेनेव वेदितब्बो. सम्मावायामादीसु पन तीसु समाधि अत्तनो धम्मताय आरम्मणे एकग्गभावेन अप्पेतुं न सक्कोति, वीरिये पन पग्गहकिच्चं साधेन्ते सतिया च अपिलापनकिच्चं साधेन्तिया लद्धुपकारो हुत्वा सक्कोति.

तत्रायं उपमा – यथा हि नक्खत्तं कीळिस्सामाति उय्यानं पविट्ठेसु तीसु सहायेसु एको सुपुप्फितं चम्पकरुक्खं दिस्वा हत्थं उक्खिपित्वा गहेतुम्पि न सक्कुणेय्य. अथस्स दुतियो ओनमित्वा ¶ पिट्ठिं ददेय्य, सो तस्स पिट्ठियं ठत्वापि कम्पमानो गहेतुं न सक्कुणेय्य. अथस्स इतरो अंसकूटं उपनामेय्य. सो एकस्स पिट्ठियं ठत्वा एकस्स अंसकूटं ओलुब्भ यथारुचि पुप्फानि ओचिनित्वा पिळन्धित्वा नक्खत्तं कीळेय्य. एवंसम्पदमिदं दट्ठब्बं.

एकतो ¶ उय्यानं पविट्ठा तयो सहाया विय हि एकतो जाता सम्मावायामादयो तयो धम्मा. सुपुप्फितचम्पको विय आरम्मणं. हत्थं उक्खिपित्वापि गहेतुं असक्कोन्तो विय अत्तनो धम्मताय आरम्मणे एकग्गभावेन अप्पेतुं असक्कोन्तो समाधि. पिट्ठिं दत्वा ओनतसहायो विय वायामो. अंसकूटं दत्वा ठितसहायो विय सति. यथा तेसु एकस्स पिट्ठियं ठत्वा एकस्स अंसकूटं ओलुब्भ इतरो यथारुचि पुप्फं गहेतुं सक्कोति, एवमेव वीरिये पग्गहकिच्चं साधेन्ते सतिया च अपिलापनकिच्चं साधेन्तिया लद्धुपकारो समाधि सक्कोति आरम्मणे एकग्गभावेन अप्पेतुं. तस्मा समाधियेवेत्थ सजातितो समाधिक्खन्धेन सङ्गहितो, वायामसतियो पन किरियतो सङ्गहिता होन्ति.

सम्मादिट्ठिसम्मासङ्कप्पेसुपि पञ्ञा अत्तनो धम्मताय अनिच्चं दुक्खमनत्ताति आरम्मणं निच्छेतुं न सक्कोति. वितक्के पन आकोटेत्वा आकोटेत्वा देन्ते सक्कोति. कथं? यथा हि हेरञ्ञिको कहापणं हत्थे ठपेत्वा सब्बभागेसु ओलोकेतुकामो समानोपि न चक्खुतलेनेव परिवत्तेतुं सक्कोति. अङ्गुलिपब्बेहि पन परिवत्तेत्वा परिवत्तेत्वा इतो चितो च ओलोकेतुं सक्कोति, एवमेव न पञ्ञा अत्तनो धम्मताय अनिच्चादिवसेन आरम्मणं निच्छेतुं सक्कोति. अभिनिरोपनलक्खणेन पन आहननपरियाहननरसेन वितक्केन आकोटेन्तेन विय परिवत्तेन्तेन विय च आदायादाय दिन्नमेव निच्छेतुं सक्कोति. तस्मा इधापि सम्मादिट्ठियेव सजातितो पञ्ञाक्खन्धेन सङ्गहिता, सम्मासङ्कप्पो पन किरियवसेन सङ्गहितो होति.

इति इमेहि तीहि खन्धेहि मग्गो सङ्गहं गच्छति. तेन वुत्तं ‘‘तिविधो खन्धत्तयभेदतो’’ति. चतुब्बिधो सोतापत्तिमग्गादिवसेनेव.

अपिच सब्बानेव सच्चानि एकविधानि अवितथत्ता, अभिञ्ञेय्यत्ता वा. दुविधानि लोकियलोकुत्तरतो, सङ्खतासङ्खततो वा. तिविधानि दस्सन-भावनाहि पहातब्बतो, अप्पहातब्बतो च. चतुब्बिधानि परिञ्ञेय्यादिभेदतोति एवमेत्थ एकविधादीहि विनिच्छयो वेदितब्बो.

५६९. सभागविसभागतोति ¶ ¶ सब्बानेव सच्चानि अञ्ञमञ्ञं सभागानि अवितथतो अत्तसुञ्ञतो दुक्करपटिवेधतो च. यथाह –

‘‘तं किं मञ्ञसि, आनन्द, कतमं नु खो दुक्करतरं वा दुरभिसम्भवतरं वा, यो वा दूरतोव सुखुमेन ताळच्छिग्गळेन असनं अतिपातेय्य पोङ्खानुपोङ्खं अविराधितं, यो वा सतधा भिन्नस्स वालस्स कोटिया कोटिं पटिविज्झेय्याति? एतदेव, भन्ते, दुक्करतरञ्चेव दुरभिसम्भवतरञ्च, यो वा सतधा भिन्नस्स वालस्स कोटिया कोटिं पटिविज्झेय्याति. ततो खो ते, आनन्द, दुप्पटिविज्झतरं पटिविज्झन्ति. ये इदं दुक्खन्ति यथाभूतं पटिविज्झन्ति…पे… अयं दुक्खनिरोधगामिनी पटिपदाति यथाभूतं पटिविज्झन्ती’’ति (सं. नि. ५.१११५).

विसभागानि सलक्खणववत्थानतो. पुरिमानि च द्वे सभागानि दुरवगाहत्थेन गम्भीरत्ता लोकियत्ता सासवत्ता च. विसभागानि फलहेतुभेदतो परिञ्ञेय्यप्पहातब्बतो च. पच्छिमानिपि द्वे सभागानि गम्भीरत्तेन दुरवगाहत्ता लोकुत्तरत्ता अनासवत्ता च. विसभागानि विसयविसयीभेदतो सच्छिकातब्बभावेतब्बतो च. पठमततियानि चापि सभागानि फलापदेसतो. विसभागानि सङ्खतासङ्खततो. दुतियचतुत्थानि चापि सभागानि हेतुअपदेसतो. विसभागानि एकन्तकुसलाकुसलतो. पठमचतुत्थानि चापि सभागानि सङ्खततो. विसभागानि लोकियलोकुत्तरतो. दुतियततियानि चापि सभागानि नेवसेक्खानासेक्खभावतो. विसभागानि सारम्मणानारम्मणतो.

इति एवं पकारेहि, नयेहि च विचक्खणो;

विजञ्ञा अरियसच्चानं, सभागविसभागतन्ति.

इति साधुजनपामोज्जत्थाय कते विसुद्धिमग्गे

पञ्ञाभावनाधिकारे

इन्द्रियसच्चनिद्देसो नाम

सोळसमो परिच्छेदो.

१७. पञ्ञाभूमिनिद्देसो

पटिच्चसमुप्पादकथा

५७०. इदानि ¶ ¶ ‘‘खन्धायतनधातुइन्द्रियसच्चपटिच्चसमुप्पादादिभेदा धम्मा भूमी’’ति एवं वुत्तेसु इमिस्सा पञ्ञाय भूमिभूतेसु धम्मेसु यस्मा पटिच्चसमुप्पादोचेव, आदिसद्देन सङ्गहिता पटिच्चसमुप्पन्ना धम्मा च अवसेसा होन्ति, तस्मा तेसं वण्णनाक्कमो अनुप्पत्तो.

तत्थ अविज्जादयो ताव धम्मा पटिच्चसमुप्पादोति वेदितब्बा. वुत्तञ्हेतं भगवता –

‘‘कतमो च, भिक्खवे, पटिच्चसमुप्पादो? अविज्जापच्चया, भिक्खवे, सङ्खारा, सङ्खारपच्चया विञ्ञाणं, विञ्ञाणपच्चया नामरूपं, नामरूपपच्चया सळायतनं, सळायतनपच्चया फस्सो, फस्सपच्चया वेदना, वेदनापच्चया तण्हा, तण्हापच्चया उपादानं, उपादानपच्चया भवो, भवपच्चया जाति, जातिपच्चया जरामरणं सोकपरिदेवदुक्खदोमनस्सुपायासा सम्भवन्ति. एवमेतस्स केवलस्स दुक्खक्खन्धस्स समुदयो होति. अयं वुच्चति, भिक्खवे, पटिच्चसमुप्पादो’’ति (सं. नि. २.१).

जरामरणादयो पन पटिच्चसमुप्पन्ना धम्माति वेदितब्बा. वुत्तञ्हेतं भगवता –

‘‘कतमे च, भिक्खवे, पटिच्चसमुप्पन्ना धम्मा? जरामरणं, भिक्खवे, अनिच्चं सङ्खतं पटिच्चसमुप्पन्नं खयधम्मं वयधम्मं विरागधम्मं निरोधधम्मं. जाति, भिक्खवे…पे… भवो… उपादानं… तण्हा… वेदना… फस्सो… सळायतनं… नामरूपं… विञ्ञाणं… सङ्खारा… अविज्जा, भिक्खवे, अनिच्चा सङ्खता पटिच्चसमुप्पन्ना ¶ खयधम्मा वयधम्मा विरागधम्मा निरोधधम्मा. इमे वुच्चन्ति, भिक्खवे, पटिच्चसमुप्पन्ना धम्मा’’ति (सं. नि. २.२०).

५७१. अयं पनेत्थ सङ्खेपो. पटिच्चसमुप्पादोति पच्चयधम्मा वेदितब्बा. पटिच्चसमुप्पन्ना धम्माति तेहि तेहि पच्चयेहि निब्बत्तधम्मा. कथमिदं जानितब्बन्ति ¶ चे? भगवतो वचनेन. भगवता हि पटिच्चसमुप्पादपटिच्चसमुप्पन्नधम्मदेसनासुत्ते –

‘‘कतमो च, भिक्खवे, पटिच्चसमुप्पादो? जातिपच्चया, भिक्खवे, जरामरणं, उप्पादा वा तथागतानं अनुप्पादा वा तथागतानं ठिताव सा धातु धम्मट्ठितता धम्मनियामता इदप्पच्चयता. तं तथागतो अभिसम्बुज्झति अभिसमेति, अभिसम्बुज्झित्वा अभिसमेत्वा आचिक्खति देसेति पञ्ञपेति पट्ठपेति विवरति विभजति उत्तानीकरोति, पस्सथाति चाह. जातिपच्चया, भिक्खवे, जरामरणं. भवपच्चया, भिक्खवे, जाति…पे… अविज्जापच्चया, भिक्खवे, सङ्खारा उप्पादा वा तथागतानं…पे… उत्तानीकरोति पस्सथाति चाह. अविज्जापच्चया, भिक्खवे, सङ्खारा. इति खो, भिक्खवे, या तत्र तथता अवितथता अनञ्ञथता इदप्पच्चयता. अयं वुच्चति, भिक्खवे, पटिच्चसमुप्पादो’’ति (सं. नि. २.२०).

५७२. एवं पटिच्चसमुप्पादं देसेन्तेन तथतादीहि वेवचनेहि पच्चयधम्माव पटिच्चसमुप्पादोति वुत्ता. तस्मा जरामरणादीनं धम्मानं पच्चयलक्खणो पटिच्चसमुप्पादो, दुक्खानुबन्धनरसो, कुम्मग्गपच्चुपट्ठानोति वेदितब्बो.

सो पनायं तेहि तेहि पच्चयेहि अनूनाधिकेहेव तस्स तस्स धम्मस्स सम्भवतो तथताति, सामग्गिं उपगतेसु पच्चयेसु मुहुत्तम्पि ततो निब्बत्तधम्मानं असम्भवाभावतो अवितथताति, अञ्ञधम्मपच्चयेहि अञ्ञधम्मानुप्पत्तितो अनञ्ञथताति, यथावुत्तानं एतेसं जरामरणादीनं पच्चयतो वा पच्चयसमूहतो वा इदप्पच्चयताति वुत्तो.

५७३. तत्रायं वचनत्थो, इमेसं पच्चया इदप्पच्चया. इदप्पच्चया एव इदप्पच्चयता. इदप्पच्चयानं वा समूहो इदप्पच्चयता. लक्खणं पनेत्थ सद्दसत्थतो परियेसितब्बं.

५७४. केचि ¶ पन पटिच्च सम्मा च तित्थियपरिकप्पितपकतिपुरिसादिकारणनिरपेक्खो उप्पादो पटिच्चसमुप्पादोति एवं उप्पादमत्तं पटिच्चसमुप्पादोति वदन्ति ¶ , तं न युज्जति. कस्मा? सुत्ताभावतो, सुत्तविरोधतो, गम्भीरनयासम्भवतो, सद्दभेदतो च. ‘‘उप्पादमत्तं पटिच्चसमुप्पादो’’ति हि सुत्तं नत्थि. तं ‘‘पटिच्चसमुप्पादो’’ति च वदन्तस्स पदेसविहारसुत्तविरोधो आपज्जति. कथं? भगवतो हि ‘‘अथ खो भगवा रत्तिया पठमं यामं पटिच्चसमुप्पादं अनुलोमपटिलोमं मनसाकासी’’ति (महाव. १) आदिवचनतो पटिच्चसमुप्पादमनसिकारो पठमाभिसम्बुद्धविहारो, पदेसविहारो च तस्सेकदेसविहारो. यथाह ‘‘येन स्वाहं, भिक्खवे, विहारेन पठमाभिसम्बुद्धो विहरामि, तस्स पदेसेन विहासि’’न्ति (सं. नि. ५.११). तत्र च पच्चयाकारदस्सनेन विहासि, न उप्पादमत्तदस्सनेनाति. यथाह ‘‘सो एवं पजानामि मिच्छादिट्ठिपच्चयापि वेदयितं सम्मादिट्ठिपच्चयापि वेदयितं मिच्छासङ्कप्पपच्चयापि वेदयित’’न्ति (सं. नि. ५.११) सब्बं वित्थारेतब्बं. एवं उप्पादमत्तं ‘‘पटिच्चसमुप्पादो’’ति वदन्तस्स पदेसविहारसुत्तविरोधो आपज्जति. तथा कच्चानसुत्तविरोधो.

कच्चानसुत्तेपि हि ‘‘लोकसमुदयं खो, कच्चान, यथाभूतं सम्मप्पञ्ञाय पस्सतो या लोके नत्थिता, सा न होती’’ति (सं. नि. २.१५) अनुलोमपटिच्चसमुप्पादो लोकपच्चयतो ‘‘लोकसमुदयो’’ति उच्छेददिट्ठिसमुग्घातत्थं पकासितो, न उप्पादमत्तं. न हि उप्पादमत्तदस्सनेन उच्छेददिट्ठिया समुग्घातो होति. पच्चयानुपरमदस्सनेन पन होति. पच्चयानुपरमे फलानुपरमतोति. एवं उप्पादमत्तं ‘‘पटिच्चसमुप्पादो’’ति वदन्तस्स कच्चानसुत्तविरोधोपि आपज्जति.

गम्भीरनयासम्भवतोति वुत्तं खो पनेतं भगवता ‘‘गम्भीरो चायं, आनन्द, पटिच्चसमुप्पादो गम्भीरावभासो चा’’ति (दी. नि. २.९५; सं. नि. २.६०). गम्भीरत्तञ्च नाम चतुब्बिधं, तं परतो वण्णयिस्साम. तं उप्पादमत्ते नत्थि. चतुब्बिधनयपटिमण्डितञ्चेतं पटिच्चसमुप्पादं वण्णयन्ति, तम्पि नयचतुक्कं उप्पादमत्ते नत्थीति गम्भीरनयासम्भवतोपि न उप्पादमत्तं पटिच्चसमुप्पादो.

५७५. सद्दभेदतोति पटिच्चसद्दो च पनायं समाने कत्तरि पुब्बकाले पयुज्जमानो अत्थसिद्धिकरो ¶ होति. सेय्यथिदं, ‘‘चक्खुञ्च पटिच्च रूपे च उप्पज्जति चक्खुविञ्ञाण’’न्ति (सं. नि. २.४३). इध पन भावसाधनेन उप्पादसद्देन ¶ सद्धिं पयुज्जमानो समानस्स कत्तु अभावतो सद्दभेदं गच्छति, न च किञ्चि अत्थं साधेतीति सद्दभेदतोपि न उप्पादमत्तं पटिच्चसमुप्पादोति.

तत्थ सिया – ‘‘होति-सद्देन सद्धिं योजयिस्साम ‘पटिच्चसमुप्पादो होती’ति’’, तं न युत्तं. कस्मा? योगाभावतो चेव, उप्पादस्स च उप्पादपत्तिदोसतो. ‘‘पटिच्चसमुप्पादं वो, भिक्खवे, देसेस्सामि. कतमो च, भिक्खवे, पटिच्चसमुप्पादो…पे… अयं वुच्चति, भिक्खवे, पटिच्चसमुप्पादो’’ति (सं. नि. २.१). इमेसु हि पदेसु एकेनपि सद्धिं होति-सद्दो योगं न गच्छति, न च उप्पादो होति. सचे भवेय्य, उप्पादस्सापि उप्पादो पापुणेय्याति.

५७६. येपि मञ्ञन्ति ‘‘इदप्पच्चयानं भावो इदप्पच्चयता, भावो च नाम यो आकारो अविज्जादीनं सङ्खारादिपातुभावे हेतु, सो. तस्मिञ्च सङ्खारविकारे पटिच्चसमुप्पादसञ्ञा’’ति, तेसं तं न युज्जति. कस्मा? अविज्जादीनं हेतुवचनतो. भगवता हि ‘‘तस्मातिह, आनन्द, एसेव हेतु, एतं निदानं, एस समुदयो, एस पच्चयो जरामरणस्स यदिदं जाति…पे… सङ्खारानं, यदिदं अविज्जा’’ति (दी. नि. २.९८ आदयो) एवं अविज्जादयोव हेतूति वुत्ता, न तेसं विकारो. तस्मा ‘‘पटिच्चसमुप्पादोति पच्चयधम्मा वेदितब्बा’’ति इति यं तं वुत्तं, तं सम्मा वुत्तन्ति वेदितब्बं.

५७७. या पनेत्थ ‘‘पटिच्चसमुप्पादो’’ति इमाय ब्यञ्जनच्छायाय उप्पादोयेवायं वुत्तोति सञ्ञा उप्पज्जति, सा इमस्स पदस्स एवमत्थं गहेत्वा वूपसमेतब्बा. भगवता हि,

द्वेधा ततो पवत्ते, धम्मसमूहे यतो इदं वचनं;

तप्पच्चयो ततोयं, फलोपचारेन इति वुत्तो.

यो हि अयं पच्चयताय पवत्तो धम्मसमूहो, तत्थ पटिच्चसमुप्पादोति इदं वचनं द्विधा इच्छन्ति. सो हि यस्मा पतीयमानो हिताय सुखाय च संवत्तति, तस्मा पच्चेतुमरहन्ति ¶ नं पण्डिताति पटिच्चो. उप्पज्जमानो च सह सम्मा च उप्पज्जति, न एकेकतो, नापि अहेतुतोति समुप्पादो. एवं पटिच्चो च सो समुप्पादो चाति पटिच्चसमुप्पादो ¶ . अपिच सह उप्पज्जतीति समुप्पादो, पच्चयसामग्गिं पन पटिच्च अपच्चक्खायाति एवम्पि पटिच्चसमुप्पादो. तस्स चायं हेतुसमूहो पच्चयोति तप्पच्चयत्ता अयम्पि, यथा लोके सेम्हस्स पच्चयो गुळो सेम्हो गुळोति वुच्चति, यथा च सासने सुखप्पच्चयो बुद्धानं उप्पादो ‘‘सुखो बुद्धानं उप्पादो’’ति वुच्चति, तथा पटिच्चसमुप्पादो इच्चेव फलवोहारेन वुत्तोति वेदितब्बो.

५७८. अथ वा,

पटिमुखमितोति वुत्तो, हेतुसमूहो अयं पटिच्चोति;

सहिते उप्पादेति च, इति वुत्तो सो समुप्पादो.

यो हि एस सङ्खारादीनं पातुभावाय अविज्जादिएकेकहेतुसीसेन निद्दिट्ठो हेतुसमूहो, सो साधारणफलनिप्फादकट्ठेन अवेकल्लट्ठेन च सामग्गिअङ्गानं अञ्ञमञ्ञेन पटिमुखं इतो गतोति कत्वा पटिच्चोति वुच्चति. स्वायं सहितेयेव अञ्ञमञ्ञं अविनिब्भोगवुत्तिधम्मे उप्पादेतीति समुप्पादोतिपि वुत्तो. एवम्पि पटिच्चो च सो समुप्पादो चाति पटिच्चसमुप्पादो.

५७९. अपरो नयो –

पच्चयता अञ्ञोञ्ञं, पटिच्च यस्मा समं सह च धम्मे;

अयमुप्पादेति ततोपि, एवमिध भासिता मुनिना.

अविज्जादिसीसेन निद्दिट्ठपच्चयेसु हि ये पच्चया यं सङ्खारादिकं धम्मं उप्पादेन्ति, न ते अञ्ञमञ्ञं अपटिच्च अञ्ञमञ्ञवेकल्ले सति उप्पादेतुं समत्थाति. तस्मा पटिच्च समं सह च न एकेकदेसं, नापि पुब्बापरभावेन अयं पच्चयता धम्मे उप्पादेतीति अत्थानुसारवोहारकुसलेन मुनिना एवमिध भासिता, पटिच्चसमुप्पादोत्वेव भासिताति अत्थो.

५८०. एवं ¶ भासमानेन च,

पुरिमेन सस्सतादीन, मभावो पच्छिमेन च पदेन;

उच्छेदादिविघातो, द्वयेन परिदीपितो ञायो.

पुरिमेनाति ¶ पच्चयसामग्गिपरिदीपकेन पटिच्चपदेन पवत्तिधम्मानं पच्चयसामग्गियं आयत्तवुत्तित्ता सस्सताहेतुविसमहेतुवसवत्तिवादप्पभेदानं सस्सतादीनं अभावो परिदीपितो होति? किं हि सस्सतानं, अहेतुआदिवसेन वा पवत्तानं पच्चयसामग्गियाति? पच्छिमेन च पदेनाति धम्मानं उप्पादपरिदीपकेन समुप्पादपदेन पच्चयसामग्गियं धम्मानं उप्पत्तितो विहता उच्छेदनत्थिकअकिरियवादाति उच्छेदादिविघातो परिदीपितो होति. पुरिमपुरिमपच्चयवसेन हि पुनप्पुनं उप्पज्जमानेसु धम्मेसु कुतो उच्छेदो, नत्थिकाकिरियवादा चाति. द्वयेनाति सकलेन पटिच्चसमुप्पादवचनेन तस्सा तस्सा पच्चयसामग्गिया सन्ततिं अविच्छिन्दित्वा तेसं तेसं धम्मानं सम्भवतो मज्झिमा पटिपदा, ‘‘सो करोति सो पटिसंवेदेति, अञ्ञो करोति अञ्ञो पटिसंवेदेती’’ति वादप्पहानं, जनपदनिरुत्तिया अनभिनिवेसो, समञ्ञाय अनतिधावनन्ति अयं ञायो परिदीपितो होतीति अयं ताव पटिच्चसमुप्पादोति वचनमत्तस्स अत्थो.

५८१. या पनायं भगवता पटिच्चसमुप्पादं देसेन्तेन ‘‘अविज्जापच्चया सङ्खारा’’तिआदिना नयेन निक्खित्ता तन्ति, तस्सा अत्थसंवण्णनं करोन्तेन विभज्जवादिमण्डलं ओतरित्वा आचरिये अनब्भाचिक्खन्तेन सकसमयं अवोक्कमन्तेन परसमयं अनायूहन्तेन सुत्तं अप्पटिबाहन्तेन विनयं अनुलोमेन्तेन महापदेसे ओलोकेन्तेन धम्मं दीपेन्तेन अत्थं सङ्गाहेन्तेन तमेवत्थं पुनरावत्तेत्वा अपरेहिपि परियायन्तरेहि निद्दिसन्तेन च यस्मा अत्थसंवण्णना कातब्बा होति, पकतियापि च दुक्कराव पटिच्चसमुप्पादस्स अत्थसंवण्णना. यथाहु पोराणा –

‘‘सच्चं सत्तो पटिसन्धि, पच्चयाकारमेव च;

दुद्दसा चतुरो धम्मा, देसेतुं च सुदुक्करा’’ति.

तस्मा ¶ अञ्ञत्र आगमाधिगमप्पत्तेहि न सुकरा पटिच्चसमुप्पादस्सत्थवण्णनाति परितुलयित्वा,

वत्तुकामो ¶ अहं अज्ज, पच्चयाकारवण्णनं;

पतिट्ठं नाधिगच्छामि, अज्झोगाळ्होव सागरं.

सासनं पनिदं नाना, देसनानयमण्डितं;

पुब्बाचरियमग्गो च, अब्बोच्छिन्नो पवत्तति.

यस्मा तस्मा तदुभयं, सन्निस्सायत्थवण्णनं;

आरभिस्सामि एतस्स, तं सुणाथ समाहिता.

वुत्तञ्हेतं पुब्बाचरियेहि –

‘‘यो कोचि मं अट्ठिकत्वा सुणेय्य,

लभेथ पुब्बापरियं विसेसं;

लद्धान पुब्बापरियं विसेसं,

अदस्सनं मच्चुराजस्स गच्छे’’ति.

५८२. इति अविज्जापच्चया सङ्खारातिआदीसु हि आदितोयेव ताव,

देसनाभेदतो अत्थ, लक्खणेकविधादितो. अङ्गानञ्च ववत्थाना, विञ्ञातब्बो विनिच्छयो.

तत्थ देसनाभेदतोति भगवतो हि वल्लिहारकानं चतुन्नं पुरिसानं वल्लिगहणं विय आदितो वा मज्झतो वा पट्ठाय याव परियोसानं, तथा परियोसानतो वा मज्झतो वा पट्ठाय याव आदीति चतुब्बिधा पटिच्चसमुप्पाददेसना.

यथा हि वल्लिहारकेसु चतूसु पुरिसेसु एको वल्लिया मूलमेव पठमं पस्सति, सो तं मूले ¶ छेत्वा सब्बं आकड्ढित्वा आदाय कम्मे उपनेति, एवं भगवा ‘‘इति खो, भिक्खवे, अविज्जापच्चया सङ्खारा…पे… जातिपच्चया जरामरण’’न्ति (म. नि. १.४०२; सं. नि. २.२) आदितो पट्ठाय याव परियोसानापि पटिच्चसमुप्पादं देसेति.

यथा पन तेसु पुरिसेसु एको वल्लिया मज्झं पठमं पस्सति, सो मज्झे छिन्दित्वा उपरिभागञ्ञेव आकड्ढित्वा आदाय कम्मे उपनेति, एवं भगवा ‘‘तस्स तं वेदनं अभिनन्दतो अभिवदतो अज्झोसाय तिट्ठतो ¶ उप्पज्जति नन्दी. या वेदनासु नन्दी, तदुपादानं. तस्सुपादानपच्चया भवो, भवपच्चया जाती’’ति (म. नि. १.४०९; सं. नि. ३.५) मज्झतो पट्ठाय याव परियोसानापि देसेति.

यथा च तेसु पुरिसेसु एको वल्लिया अग्गं पठमं पस्सति, सो अग्गे गहेत्वा अग्गानुसारेन याव मूला सब्बं आदाय कम्मे उपनेति, एवं भगवा ‘‘जातिपच्चया जरामरणन्ति इति खो पनेतं वुत्तं, जातिपच्चया नु खो, भिक्खवे, जरामरणं नो वा कथं वो एत्थ होतीति? जातिपच्चया, भन्ते, जरामरणं. एवं नो एत्थ होति जातिपच्चया जरामरणन्ति. भवपच्चया जाति…पे… अविज्जापच्चया सङ्खाराति इति खो पनेतं वुत्तं, अविज्जापच्चया नु खो, भिक्खवे, सङ्खारा नो वा कथं वो एत्थ होती’’ति (म. नि. १.४०३) परियोसानतो पट्ठाय याव आदितोपि पटिच्चसमुप्पादं देसेति.

यथा पनेतेसु पुरिसेसु एको वल्लिया मज्झमेव पठमं पस्सति, सो मज्झे छिन्दित्वा हेट्ठा ओतरन्तो याव मूला आदाय कम्मे उपनेति, एवं भगवा ‘‘इमे च, भिक्खवे, चत्तारो आहारा किन्निदाना, किंसमुदया, किंजातिका, किंपभवा? इमे चत्तारो आहारा तण्हानिदाना, तण्हासमुदया, तण्हाजातिका, तण्हापभवा. तण्हा किन्निदाना… वेदना… फस्सो… सळायतनं… नामरूपं… विञ्ञाणं… सङ्खारा किन्निदाना…पे… सङ्खारा अविज्जानिदाना…पे… अविज्जापभवा’’ति (सं. नि. २.११) मज्झतो पट्ठाय याव आदितो देसेति.

५८३. कस्मा पनेवं देसेतीति? पटिच्चसमुप्पादस्स समन्तभद्दकत्ता सयञ्च देसनाविलासप्पत्तत्ता. समन्तभद्दको हि पटिच्चसमुप्पादो, ततो ततो ञायपटिवेधाय संवत्ततियेव ¶ . देसनाविलासप्पत्तो च भगवा चतुवेसारज्जपटिसम्भिदायोगेन चतुब्बिधगम्भीरभावप्पत्तिया च. सो देसनाविलासप्पत्तत्ता नानानयेहेव धम्मं देसेति.

विसेसतो पनस्स या आदितो पट्ठाय अनुलोमदेसना, सा पवत्तिकारणविभागसंमूळ्हं वेनेय्यजनं समनुपस्सतो यथासकेहि कारणेहि पवत्तिसन्दस्सनत्थं उप्पत्तिक्कमसन्दस्सनत्थञ्च पवत्ताति विञ्ञातब्बा. या परियोसानतो पट्ठाय पटिलोमदेसना, सा ‘‘किच्छं वतायं लोको ¶ आपन्नो जायति च जीयति च मीयति च चवति च उपपज्जति चा’’तिआदिना (दी. नि. २.५७; सं. नि. २.४) नयेन किच्छापन्नं लोकं अनुविलोकयतो पुब्बभागपटिवेधानुसारेन तस्स तस्स जरामरणादिकस्स दुक्खस्स अत्तना अधिगतकारणसन्दस्सनत्थं. या मज्झतो पट्ठाय याव आदि पवत्ता, सा आहारनिदानववत्थापनानुसारेन याव अतीतं अद्धानं अतिहरित्वा पुन अतीतद्धतो पभुति हेतुफलपटिपाटिसन्दस्सनत्थं. या पन मज्झतो पट्ठाय याव परियोसानं पवत्ता, सा पच्चुप्पन्ने अद्धाने अनागतद्धहेतुसमुट्ठानतो पभुति अनागतद्धसन्दस्सनत्थं. तासु या पवत्तिकारणसम्मूळ्हस्स वेनेय्यजनस्स यथासकेहि कारणेहि पवत्तिसन्दस्सनत्थं उप्पत्तिक्कमसन्दस्सनत्थञ्च आदितो पट्ठाय अनुलोमदेसना वुत्ता, सा इध निक्खित्ताति वेदितब्बा.

५८४. कस्मा पनेत्थ अविज्जा आदितो वुत्ता, किं पकतिवादीनं पकति विय अविज्जापि अकारणं मूलकारणं लोकस्साति? न अकारणं. ‘‘आसवसमुदया अविज्जासमुदयो’’ति (म. नि. १.१०३) हि अविज्जाय कारणं वुत्तं. अत्थि पन परियायो येन मूलकारणं सिया, को पन सोति? वट्टकथाय सीसभावो.

भगवा हि वट्टकथं कथेन्तो द्वे धम्मे सीसं कत्वा कथेति, अविज्जं वा. यथाह – ‘‘पुरिमा, भिक्खवे, कोटि न पञ्ञायति अविज्जाय ‘इतो पुब्बे अविज्जा नाहोसि, अथ पच्छा समभवी’ति, एवञ्चेतं, भिक्खवे, वुच्चति, अथ च पन पञ्ञायति इदप्पच्चया अविज्जा’’ति (अ. नि. १०.६१). भवतण्हं वा. यथाह – ‘‘पुरिमा, भिक्खवे, कोटि न पञ्ञायति भवतण्हाय ‘इतो पुब्बे भवतण्हा नाहोसि, अथ पच्छा समभवी’ति, एवञ्चेतं, भिक्खवे, वुच्चति, अथ च पन पञ्ञायति इदप्पच्चया भवतण्हा’’ति (अ. नि. १०.६२).

५८५. कस्मा ¶ पन भगवा वट्टकथं कथेन्तो इमे द्वे धम्मे सीसं कत्वा कथेतीति? सुगतिदुग्गतिगामिनो कम्मस्स विसेसहेतुभूतत्ता. दुग्गतिगामिनो हि कम्मस्स विसेसहेतु अविज्जा. कस्मा? यस्मा अविज्जाभिभूतो पुथुज्जनो अग्गिसन्तापलगुळाभिघातपरिस्समाभिभूता वज्झगावी ताय परिस्समातुरताय निरस्सादम्पि अत्तनो अनत्थावहम्पि च उण्होदकपानं ¶ विय किलेससन्तापतो निरस्सादम्पि दुग्गतिनिपातनतो च अत्तनो अनत्थावहम्पि पाणातिपातादिं अनेकप्पकारं दुग्गतिगामिकम्मं आरभति. सुगतिगामिनो पन कम्मस्स विसेसहेतु भवतण्हा. कस्मा? यस्मा भवतण्हाभिभूतो पुथुज्जनो सा वुत्तप्पकारा गावी सीतूदकतण्हाय सअस्सादं अत्तनो परिस्समविनोदनञ्च सीतूदकपानं विय किलेससन्तापविरहतो सअस्सादं सुगतिसम्पापनेन अत्तनो दुग्गतिदुक्खपरिस्समविनोदनञ्च पाणातिपाता वेरमणिआदिं अनेकप्पकारं सुगतिगामिकम्मं आरभति.

५८६. एतेसु पन वट्टकथाय सीसभूतेसु धम्मेसु कत्थचि भगवा एकधम्ममूलिकं देसनं देसेति. सेय्यथिदं, ‘‘इति खो, भिक्खवे, अविज्जूपनिसा सङ्खारा, सङ्खारूपनिसं विञ्ञाण’’न्तिआदि (सं. नि. २.२३). तथा ‘‘उपादानियेसु, भिक्खवे, धम्मेसु अस्सादानुपस्सिनो विहरतो तण्हा पवड्ढति, तण्हापच्चया उपादान’’न्तिआदि (सं. नि. २.५२). कत्थचि उभयमूलिकम्पि. सेय्यथिदं, ‘‘अविज्जानीवरणस्स, भिक्खवे, बालस्स तण्हाय सम्पयुत्तस्स एवमयं कायो समुदागतो. इति अयञ्चेव कायो बहिद्धा च नामरूपं इत्थेतं द्वयं. द्वयं पटिच्च फस्सो सळेवायतनानि, येहि फुट्ठो बालो सुखदुक्खं पटिसंवेदेती’’तिआदि (सं. नि. २.१९). तासु देसनासु ‘‘अविज्जापच्चया सङ्खारा’’ति अयमिध अविज्जावसेन एकधम्ममूलिका देसनाति वेदितब्बा. एवं तावेत्थ देसनाभेदतो विञ्ञातब्बो विनिच्छयो.

५८७. अत्थतोति अविज्जादीनं पदानं अत्थतो. सेय्यथिदं, पूरेतुं अयुत्तट्ठेन कायदुच्चरितादि अविन्दियं नाम, अलद्धब्बन्ति अत्थो. तं अविन्दियं विन्दतीति अविज्जा. तब्बिपरीततो कायसुचरितादि विन्दियं नाम, तं विन्दियं न विन्दतीति अविज्जा. खन्धानं रासट्ठं, आयतनानं आयतनट्ठं, धातूनं सुञ्ञट्ठं, इन्द्रियानं अधिपतियट्ठं, सच्चानं तथट्ठं अविदितं करोतीतिपि अविज्जा. दुक्खादीनं पीळनादिवसेन वुत्तं चतुब्बिधं अत्थं अविदितं करोतीतिपि अविज्जा. अन्तविरहिते संसारे सब्बयोनिगतिभवविञ्ञाणट्ठितिसत्तावासेसु सत्ते जवापेतीति ¶ अविज्जा. परमत्थतो अविज्जमानेसु इत्थिपुरिसादीसु जवति, विज्जमानेसुपि खन्धादीसु न जवतीति अविज्जा. अपिच चक्खुविञ्ञाणादीनं ¶ वत्थारम्मणानं पटिच्चसमुप्पादपटिच्चसमुप्पन्नानञ्च धम्मानं छादनतोपि अविज्जा.

यं पटिच्च फलमेति, सो पच्चयो. पटिच्चाति न विना अपच्चक्खत्वाति अत्थो. एतीति उप्पज्जति चेव पवत्तति चाति अत्थो. अपिच उपकारकट्ठो पच्चयट्ठो. अविज्जा च सा पच्चयो चाति अविज्जापच्चयो. तस्मा अविज्जापच्चया.

सङ्खतमभिसङ्खरोन्तीति सङ्खारा. अपिच अविज्जापच्चया सङ्खारा, सङ्खारसद्देन आगतसङ्खाराति दुविधा सङ्खारा. तत्थ पुञ्ञापुञ्ञानेञ्जाभिसङ्खारा तयो, कायवचीचित्तसङ्खारा तयोति इमे छ अविज्जापच्चया सङ्खारा. ते सब्बेपि लोकियकुसलाकुसलचेतनामत्तमेव होन्ति.

सङ्खतसङ्खारो, अभिसङ्खतसङ्खारो, अभिसङ्खरणकसङ्खारो, पयोगाभिसङ्खारोति इमे पन चत्तारो सङ्खार-सद्देन आगतसङ्खारा. तत्थ ‘‘अनिच्चा वत सङ्खारा’’तिआदीसु (दी. नि. २.२२१, २७२; सं. नि. १.१८६) वुत्ता सब्बेपि सप्पच्चया धम्मा सङ्खतसङ्खारा नाम. कम्मनिब्बत्ता तेभूमका रूपारूपधम्मा अभिसङ्खतसङ्खाराति अट्ठकथासु वुत्ता, तेपि ‘‘अनिच्चा वत सङ्खारा’’ति (दी. नि. २.२२१; २७२; सं. नि. १.१८६) एत्थेव सङ्गहं गच्छन्ति. विसुं पन नेसं आगतट्ठानं न पञ्ञायति. तेभूमिककुसलाकुसलचेतना पन अभिसङ्खरणकसङ्खारोति वुच्चति, तस्स ‘‘अविज्जागतोयं, भिक्खवे, पुरिसपुग्गलो पुञ्ञञ्चेव सङ्खारं अभिसङ्खरोती’’तिआदीसु (सं. नि. २.५१) आगतट्ठानं पञ्ञायति. कायिकचेतसिकं पन वीरियं पयोगाभिसङ्खारोति वुच्चति, सो ‘‘यावतिका अभिसङ्खारस्स गति, तावतिका गन्त्वा अक्खाहतं मञ्ञे अट्ठासी’’तिआदीसु (अ. नि. ३.१५) आगतो.

न केवलञ्च एतेयेव, अञ्ञेपि ‘‘सञ्ञावेदयितनिरोधं समापज्जन्तस्स खो, आवुसो विसाख, भिक्खुनो पठमं निरुज्झति वचीसङ्खारो, ततो कायसङ्खारो, ततो चित्तसङ्खारो’’तिआदिना (म. नि. १.४६४) नयेन सङ्खार-सद्देन आगता अनेके सङ्खारा. तेसु नत्थि सो सङ्खारो, यो सङ्खतसङ्खारेहि सङ्गहं न गच्छेय्य, इतो परं सङ्खारपच्चया विञ्ञाणन्तिआदीसु वुत्तं वुत्तनयेनेव वेदितब्बं.

अवुत्ते ¶ ¶ पन विजानातीति विञ्ञाणं. नमतीति नामं. रुप्पतीति रूपं. आये तनोति आयतञ्च नयतीति आयतनं. फुसतीति फस्सो. वेदयतीति वेदना. परितस्सतीति तण्हा. उपादियतीति उपादानं. भवति भावयति चाति भवो. जननं जाति. जिरणं जरा. मरन्ति एतेनाति मरणं. सोचनं सोको. परिदेवनं परिदेवो. दुक्खयतीति दुक्खं. उप्पादट्ठितिवसेन वा द्विधा खणतीतिपि दुक्खं. दुम्मनभावो दोमनस्सं. भुसो आयासो उपायासो.

सम्भवन्तीति अभिनिब्बत्तन्ति. न केवलञ्च सोकादीहेव, अथ खो सब्बपदेहि सम्भवन्ति-सद्दस्स योजना कातब्बा. इतरथा हि ‘‘अविज्जापच्चया सङ्खारा’’ति वुत्ते किं करोन्तीति न पञ्ञायेय्य, सम्भवन्तीति पन योजनाय सति अविज्जा च सा पच्चयो चाति अविज्जापच्चयो. तस्मा अविज्जापच्चया सङ्खारा सम्भवन्तीति पच्चयपच्चयुप्पन्नववत्थानं कतं होति. एस नयो सब्बत्थ.

एवन्ति निद्दिट्ठनयनिदस्सनं. तेन अविज्जादीहेव कारणेहि, न इस्सरनिम्मानादीहीति दस्सेति. एतस्साति यथावुत्तस्स. केवलस्साति असम्मिस्सस्स, सकलस्स वा. दुक्खक्खन्धस्साति दुक्खसमूहस्स, न सत्तस्स, न सुखसुभादीनं. समुदयोति निब्बत्ति. होतीति सम्भवति. एवमेत्थ अत्थतो विञ्ञातब्बो विनिच्छयो.

५८८. लक्खणादितोति अविज्जादीनं लक्खणादितो. सेय्यथिदं – अञ्ञाणलक्खणा अविज्जा, सम्मोहनरसा, छादनपच्चुपट्ठाना, आसवपदट्ठाना. अभिसङ्खरणलक्खणा सङ्खारा, आयूहनरसा, चेतनापच्चुपट्ठाना, अविज्जापदट्ठाना. विजाननलक्खणं विञ्ञाणं, पुब्बङ्गमरसं, पटिसन्धिपच्चुपट्ठानं, सङ्खारपदट्ठानं, वत्थारम्मणपदट्ठानं वा. नमनलक्खणं नामं, सम्पयोगरसं, अविनिब्भोगपच्चुपट्ठानं, विञ्ञाणपदट्ठानं. रुप्पनलक्खणं रूपं, विकिरणरसं, अब्याकतपच्चुपट्ठानं, विञ्ञाणपदट्ठानं. आयतनलक्खणं सळायतनं, दस्सनादिरसं, वत्थुद्वारभावपच्चुपट्ठानं, नामरूपपदट्ठानं. फुसनलक्खणो फस्सो, सङ्घट्टनरसो, सङ्गतिपच्चुपट्ठानो, सळायतनपदट्ठानो. अनुभवनलक्खणा वेदना, विसयरससम्भोगरसा, सुखदुक्खपच्चुपट्ठाना, फस्सपदट्ठाना. हेतुलक्खणा तण्हा, अभिनन्दनरसा, अतित्तभावपच्चुपट्ठाना, वेदनापदट्ठाना. गहणलक्खणं ¶ उपादानं, अमुञ्चनरसं, तण्हादळ्हत्तदिट्ठिपच्चुपट्ठानं, तण्हापदट्ठानं. कम्मकम्मफललक्खणो भवो, भावनभवनरसो, कुसलाकुसलाब्याकतपच्चुपट्ठानो ¶ , उपादानपदट्ठानो. जातिआदीनं लक्खणादीनि सच्चनिद्देसे वुत्तनयेनेव वेदितब्बानि. एवमेत्थ लक्खणादितोपि विञ्ञातब्बो विनिच्छयो.

५८९. एकविधादितोति एत्थ अविज्जा अञ्ञाणादस्सनमोहादिभावतो एकविधा. अप्पटिपत्तिमिच्छापटिपत्तितो दुविधा. तथा ससङ्खारासङ्खारतो. वेदनत्तयसम्पयोगतो तिविधा. चतुसच्चपटिवेधतो चतुब्बिधा. गतिपञ्चकादीनवच्छादनतो पञ्चविधा. द्वारारम्मणतो पन सब्बेसुपि अरूपधम्मेसु छब्बिधता वेदितब्बा.

सङ्खारा सासवविपाकधम्मधम्मादिभावतो एकविधा. कुसलाकुसलतो दुविधा. तथा परित्तमहग्गतहीनमज्झिममिच्छत्तनियतानियततो. तिविधा पुञ्ञाभिसङ्खारादिभावतो. चतुब्बिधा चतुयोनिसंवत्तनतो. पञ्चविधा पञ्चगतिगामितो.

विञ्ञाणं लोकियविपाकादिभावतो एकविधं. सहेतुकाहेतुकादितो दुविधं. भवत्तयपरियापन्नतो, वेदनत्तयसम्पयोगतो, अहेतुकद्विहेतुकतिहेतुकतो च तिविधं. योनिगतिवसेन चतुब्बिधं, पञ्चविधञ्च.

नामरूपं विञ्ञाणसन्निस्सयतो कम्मपच्चयतो च एकविधं. सारम्मणनारम्मणतो दुविधं. अतीतादितो तिविधं. योनिगतिवसेन चतुब्बिधं, पञ्चविधञ्च.

सळायतनं सञ्जातिसमोसरणट्ठानतो एकविधं. भूतप्पसादविञ्ञाणादितो दुविधं. सम्पत्तासम्पत्तनोभयगोचरतो तिविधं. योनिगतिपरियापन्नतो चतुब्बिधं पञ्चविधञ्चाति इमिना नयेन फस्सादीनम्पि एकविधादिभावो वेदितब्बोति एवमेत्थ एकविधादितोपि विञ्ञातब्बो विनिच्छयो.

५९०. अङ्गानञ्च ववत्थानाति सोकादयो चेत्थ भवचक्कस्स अविच्छेददस्सनत्थं वुत्ता. जरामरणब्भाहतस्स हि बालस्स ते सम्भवन्ति. यथाह ¶ – ‘‘अस्सुतवा, भिक्खवे, पुथुज्जनो सारीरिकाय दुक्खाय वेदनाय फुट्ठो समानो सोचति किलमति परिदेवति उरत्ताळिं कन्दति सम्मोहमापज्जती’’ति (सं. नि. ४.२५२). याव च तेसं पवत्ति, ताव अविज्जायाति पुनपि ¶ अविज्जापच्चया सङ्खाराति सम्बन्धमेव होति भवचक्कं. तस्मा तेसं जरामरणेनेव एकसङ्खेपं कत्वा द्वादसेव पटिच्चसमुप्पादङ्गानीति वेदितब्बानि. एवमेत्थ अङ्गानं ववत्थानतोपि विञ्ञातब्बो विनिच्छयो.

अयं तावेत्थ सङ्खेपकथा.

अविज्जापच्चयासङ्खारपदकथा

५६१. अयं पन वित्थारनयो – अविज्जाति सुत्तन्तपरियायेन दुक्खादीसु चतूसु ठानेसु अञ्ञाणं, अभिधम्मपरियायेन पुब्बन्तादीहि सद्धिं अट्ठसु. वुत्तञ्हेतं ‘‘तत्थ कतमा अविज्जा, दुक्खे अञ्ञाणं…पे… दुक्खनिरोधगामिनिया पटिपदाय अञ्ञाणं, पुब्बन्ते अञ्ञाणं, अपरन्ते, पुब्बन्तापरन्ते, इदप्पच्चयतापटिच्चसमुप्पन्नेसु धम्मेसु अञ्ञाण’’न्ति (ध. स. ११०६). तत्थ किञ्चापि ठपेत्वा लोकुत्तरं सच्चद्वयं सेसट्ठानेसु आरम्मणवसेन अविज्जा उप्पज्जति, एवं सन्तेपि पटिच्छादनवसेनेव इध अधिप्पेता. सा हि उप्पन्ना दुक्खसच्चं पटिच्छादेत्वा तिट्ठति, याथावसरसलक्खणं पटिविज्झितुं न देति, तथा समुदयं, निरोधं, मग्गं, पुब्बन्तसङ्खातं अतीतं खन्धपञ्चकं, अपरन्तसङ्खातं अनागतं खन्धपञ्चकं, पुब्बन्तापरन्तसङ्खातं तदुभयं, इदप्पच्चयतापटिच्चसमुप्पन्नधम्मसङ्खातं इदप्पच्चयतञ्चेव पटिच्चसमुप्पन्नधम्मे च पटिच्छादेत्वा तिट्ठति. ‘‘अयं अविज्जा, इमे सङ्खारा’’ति एवं याथावसरसलक्खणमेत्थ पटिविज्झितुं न देति. तस्मा दुक्खे अञ्ञाणं…पे… इदप्पच्चयतापटिच्चसमुप्पन्नेसु धम्मेसु अञ्ञाणन्ति वुच्चति.

५९२. सङ्खाराति पुञ्ञादयो तयो कायसङ्खारादयो तयोति एवं पुब्बे सङ्खेपतो वुत्ता छ, वित्थारतो पनेत्थ पुञ्ञाभिसङ्खारो दानसीलादिवसेन पवत्ता अट्ठ कामावचरकुसलचेतना चेव भावनावसेन पवत्ता पञ्च रूपावचरकुसलचेतना चाति तेरस चेतना होन्ति. अपुञ्ञाभिसङ्खारो पाणातिपातादिवसेन पवत्ता द्वादस अकुसलचेतना ¶ . आनेञ्जाभिसङ्खारो भावनावसेनेव पवत्ता चतस्सो अरूपावचरकुसलचेतना चाति तयोपि सङ्खारा एकूनतिंस चेतना होन्ति.

इतरेसु ¶ पन तीसु कायसञ्चेतना कायसङ्खारो, वचीसञ्चेतना वचीसङ्खारो, मनोसञ्चेतना चित्तसङ्खारो. अयं तिको कम्मायूहनक्खणे पुञ्ञाभिसङ्खारादीनं द्वारतो पवत्तिदस्सनत्थं वुत्तो. कायविञ्ञत्तिं समुट्ठापेत्वा हि कायद्वारतो पवत्ता अट्ठ कामावचरकुसलचेतना, द्वादस अकुसलचेतनाति समवीसति चेतना कायसङ्खारो नाम. ता एव वचीविञ्ञत्तिं समुट्ठापेत्वा वचीद्वारतो पवत्ता वचीसङ्खारो नाम. अभिञ्ञाचेतना पनेत्थ परतो विञ्ञाणस्स पच्चयो न होतीति न गहिता. यथा च अभिञ्ञाचेतना, एवं उद्धच्चचेतनापि न होति. तस्मा सापि विञ्ञाणस्स पच्चयभावे अपनेतब्बा, अविज्जापच्चया पन सब्बापेता होन्ति. उभोपि विञ्ञत्तियो असमुट्ठापेत्वा मनोद्वारे उप्पन्ना पन सब्बापि एकूनतिंसति चेतना चित्तसङ्खारोति. इति अयं तिको पुरिमत्तिकमेव पविसतीति अत्थतो पुञ्ञाभिसङ्खारादीनंयेव वसेन अविज्जाय पच्चयभावो वेदितब्बो.

५९३. तत्थ सिया – कथं पनेतं जानितब्बं ‘‘इमे सङ्खारा अविज्जा पच्चया होन्ती’’ति? अविज्जाभावे भावतो. यस्स हि दुक्खादीसु अविज्जासङ्खातं अञ्ञाणं अप्पहीनं होति, सो दुक्खे ताव पुब्बन्तादीसु च अञ्ञाणेन संसारदुक्खं सुखसञ्ञाय गहेत्वा तस्सेव हेतुभूते तिविधेपि सङ्खारे आरभति. समुदये अञ्ञाणेन दुक्खहेतुभूतेपि तण्हापरिक्खारे सङ्खारे सुखहेतुतो मञ्ञमानो आरभति. निरोधे पन मग्गे च अञ्ञाणेन दुक्खस्स अनिरोधभूतेपि गतिविसेसे दुक्खनिरोधसञ्ञी हुत्वा निरोधस्स च अमग्गभूतेसुपि यञ्ञामरतपादीसु निरोधमग्गसञ्ञी हुत्वा दुक्खनिरोधं पत्थयमानो यञ्ञामरतपादिमुखेन तिविधेपि सङ्खारे आरभति.

अपिच सो ताय चतूसु सच्चेसु अप्पहीनाविज्जताय विसेसतो जातिजरारोगमरणादिअनेकादीनववोकिण्णम्पि पुञ्ञफलसङ्खातं दुक्खं दुक्खतो अजानन्तो तस्स अधिगमाय कायवचीचित्तसङ्खारभेदं पुञ्ञाभिसङ्खारं ¶ आरभति देवच्छरकामको विय मरुप्पपातं. सुखसम्मतस्सापि च तस्स पुञ्ञफलस्स अन्ते महापरिळाहजनिकं विपरिणामदुक्खतं अप्पस्सादतञ्च अपस्सन्तोपि तप्पच्चयं वुत्तप्पकारमेव पुञ्ञाभिसङ्खारं आरभति सलभो विय दीपसिखाभिनिपातं, मधुबिन्दुगिद्धो विय च मधुलित्तसत्थधारालेहनं. कामुपसेवनादीसु च सविपाकेसु आदीनवं अपस्सन्तो सुखसञ्ञाय चेव किलेसाभिभूतताय च द्वारत्तयप्पवत्तम्पि अपुञ्ञाभिसङ्खारं आरभति, बालो विय गूथकीळनं, मरितुकामो विय च विसखादनं. आरुप्पविपाकेसु ¶ चापि सङ्खारविपरिणामदुक्खतं अनवबुज्झमानो सस्सतादिविपल्लासेन चित्तसङ्खारभूतं आनेञ्जाभिसङ्खारं आरभति, दिसामूळ्हो विय पिसाचनगराभिमुखमग्गगमनं.

एवं यस्मा अविज्जाभावतोव सङ्खारभावो, न अभावतो. तस्मा जानितब्बमेतं ‘‘इमे सङ्खारा अविज्जापच्चया होन्ती’’ति. वुत्तम्पि चेतं ‘‘अविद्वा, भिक्खवे, अविज्जागतो पुञ्ञाभिसङ्खारम्पि अभिसङ्खरोति, अपुञ्ञाभिसङ्खारम्पि अभिसङ्खरोति, आनेञ्जाभिसङ्खारम्पि अभिसङ्खरोति. यतो च खो, भिक्खवे, भिक्खुनो अविज्जा पहीना, विज्जा उप्पन्ना; सो अविज्जाविरागा विज्जुप्पादा नेव पुञ्ञाभिसङ्खारं अभिसङ्खरोती’’ति.

पट्ठानपच्चयकथा

५९४. एत्थाह – गण्हाम ताव एतं अविज्जा सङ्खारानं पच्चयोति, इदं पन वत्तब्बं कतमेसं सङ्खारानं कथं पच्चयो होतीति? तत्रिदं वुच्चति, भगवता हि ‘‘हेतुपच्चयो, आरम्मणपच्चयो, अधिपतिपच्चयो, अनन्तरपच्चयो, समनन्तरपच्चयो, सहजातपच्चयो, अञ्ञमञ्ञपच्चयो, निस्सयपच्चयो, उपनिस्सयपच्चयो, पुरेजातपच्चयो, पच्छाजातपच्चयो, आसेवनपच्चयो, कम्मपच्चयो, विपाकपच्चयो, आहारपच्चयो, इन्द्रियपच्चयो, झानपच्चयो, मग्गपच्चयो, सम्पयुत्तपच्चयो, विप्पयुत्तपच्चयो, अत्थिपच्चयो, नत्थिपच्चयो, विगतपच्चयो, अविगतपच्चयो’’ति (पट्ठा. १.१.पच्चयुद्देस) चतुवीसति पच्चया वुत्ता.

तत्थ ¶ हेतु च सो पच्चयो चाति हेतुपच्चयो, हेतु हुत्वा पच्चयो, हेतुभावेन पच्चयोति वुत्तं होति. आरम्मणपच्चयादीसुपि एसेव नयो.

५९५. तत्थ हेतूति वचनावयवकारणमूलानमेतं अधिवचनं. ‘‘पटिञ्ञा, हेतू’’तिआदीसु हि लोके वचनावयवो हेतूति वुच्चति. सासने पन ‘‘ये धम्मा हेतुप्पभवा’’तिआदीसु (महाव. ६०) कारणं. ‘‘तयो कुसलहेतू, तयो अकुसलहेतू’’तिआदीसु (ध. स. १०५९) मूलं हेतूति वुच्चति, तं इध अधिप्पेतं. पच्चयोति एत्थ पन अयं वचनत्थो, पटिच्च एतस्मा एतीति पच्चयो. अपच्चक्खाय नं वत्ततीति अत्थो. यो हि धम्मो यं धम्मं अपच्चक्खाय तिट्ठति वा उप्पज्जति वा, सो तस्स ¶ पच्चयोति वुत्तं होति. लक्खणतो पन उपकारकलक्खणो पच्चयो. यो हि धम्मो यस्स धम्मस्स ठितिया वा उप्पत्तिया वा उपकारको होति, सो तस्स पच्चयोति वुच्चति. पच्चयो, हेतु, कारणं, निदानं, सम्भवो, पभवोतिआदि अत्थतो एकं, ब्यञ्जनतो नानं. इति मूलट्ठेन हेतु, उपकारकट्ठेन पच्चयोति सङ्खेपतो मूलट्ठेन उपकारको धम्मो हेतुपच्चयो.

सो सालिआदीनं सालिबीजादीनि विय, मणिपभादीनं विय च मणिवण्णादयो कुसलादीनं कुसलादिभावसाधकोति आचरियानं अधिप्पायो. एवं सन्ते पन तंसमुट्ठानरूपेसु हेतुपच्चयता न सम्पज्जति. न हि सो तेसं कुसलादिभावं साधेति, न च पच्चयो न होति. वुत्तञ्हेतं ‘‘हेतू हेतुसम्पयुत्तकानं धम्मानं तंसमुट्ठानानञ्च रूपानं हेतुपच्चयेन पच्चयो’’ति (पट्ठा. १.१.१). अहेतुकचित्तानञ्च विना एतेन अब्याकतभावो सिद्धो, सहेतुकानम्पि च योनिसोमनसिकारादिपटिबद्धो कुसलादिभावो, न सम्पयुत्तहेतुपटिबद्धो. यदि च सम्पयुत्तहेतूसु सभावतोव कुसलादिभावो सिया, सम्पयुत्तेसु हेतुपटिबद्धो अलोभो कुसलो वा सिया अब्याकतो वा. यस्मा पन उभयथापि होति, तस्मा यथा सम्पयुत्तेसु, एवं हेतूसुपि कुसलादिता परियेसितब्बा.

कुसलादिभावसाधनवसेन ¶ पन हेतूनं मूलट्ठं अगहेत्वा सुप्पतिट्ठितभावसाधनवसेन गय्हमाने न किञ्चि विरुज्झति. लद्धहेतुपच्चया हि धम्मा विरूळ्हमूला विय पादपा थिरा होन्ति सुप्पतिट्ठिता, अहेतुका तिलबीजकादिसेवाला विय न सुप्पतिट्ठिता. इति मूलट्ठेन उपकारकोति सुप्पतिट्ठितभावसाधनेन उपकारको धम्मो हेतुपच्चयोति वेदितब्बो.

५९६. ततो परेसु आरम्मणभावेन उपकारको धम्मो आरम्मणपच्चयो. सो ‘‘रूपायतनं चक्खुविञ्ञाणधातुया’’ति (पट्ठा. १.१.२) आरभित्वापि ‘‘यं यं धम्मं आरब्भ ये ये धम्मा उप्पज्जन्ति चित्तचेतसिका धम्मा, ते ते धम्मा तेसं तेसं धम्मानं आरम्मणपच्चयेन पच्चयो’’ति (पट्ठा. १.१.२) ओसापितत्ता न कोचि धम्मो न होति. यथा हि दुब्बलो पुरिसो दण्डं वा रज्जुं वा आलम्बित्वाव उट्ठहति चेव तिट्ठति च, एवं चित्तचेतसिका धम्मा रूपादिआरम्मणं आरब्भेव उप्पज्जन्ति चेव तिट्ठन्ति च. तस्मा सब्बेपि चित्तचेतसिकानं आरम्मणभूता धम्मा आरम्मणपच्चयोति वेदितब्बा.

५९७. जेट्ठकट्ठेन ¶ उपकारको धम्मो अधिपतिपच्चयो, सो सहजातारम्मणवसेन दुविधो. तत्थ ‘‘छन्दाधिपति छन्दसम्पयुत्तकानं धम्मानं तंसमुट्ठानानञ्च रूपानं अधिपतिपच्चयेन पच्चयो’’तिआदिवचनतो (पट्ठा. १.३.३) छन्दवीरियचित्तवीमंसासङ्खाता चत्तारो धम्मा अधिपतिपच्चयोति वेदितब्बा, नो च खो एकतो. यदा हि छन्दं धुरं छन्दं जेट्ठकं कत्वा चित्तं पवत्तति, तदा छन्दोव अधिपति, न इतरे. एस नयो सेसेसुपि.

यं पन धम्मं गरुं कत्वा अरूपधम्मा पवत्तन्ति, सो नेसं आरम्मणाधिपति. तेन वुत्तं ‘‘यं यं धम्मं गरुं कत्वा ये ये धम्मा उप्पज्जन्ति चित्तचेतसिका धम्मा, ते ते धम्मा तेसं तेसं धम्मानं अधिपतिपच्चयेन पच्चयो’’ति (पट्ठा. १.१.३).

५९८. अनन्तरभावेन उपकारको धम्मो अनन्तरपच्चयो. समनन्तरभावेन उपकारको धम्मो समनन्तरपच्चयो. इदञ्च पच्चयद्वयं ¶ बहुधा पपञ्चयन्ति. अयं पनेत्थ सारो, यो हि एस चक्खुविञ्ञाणानन्तरा मनोधातु, मनोधातुअनन्तरा मनोविञ्ञाणधातूतिआदि चित्तनियमो, सो यस्मा पुरिमपुरिमचित्तवसेनेव इज्झति, न अञ्ञथा, तस्मा अत्तनो अत्तनो अनन्तरं अनुरूपस्स चित्तुप्पादस्स उप्पादनसमत्थो धम्मो अनन्तरपच्चयो. तेनेवाह – ‘‘अनन्तरपच्चयोति चक्खुविञ्ञाणधातु तंसम्पयुत्तका च धम्मा मनोधातुया तंसम्पयुत्तकानञ्च धम्मानं अनन्तरपच्चयेन पच्चयो’’तिआदि (पट्ठा. १.१.४). यो अनन्तरपच्चयो, स्वेव समनन्तरपच्चयो. ब्यञ्जनमत्तमेव हेत्थ नानं, उपचयसन्ततीसु विय अधिवचननिरुत्तिदुकादीसु विय च. अत्थतो पन नानं नत्थि.

यम्पि ‘‘अत्थानन्तरताय अनन्तरपच्चयो, कालानन्तरताय समनन्तरपच्चयो’’ति आचरियानं मतं, तं ‘‘निरोधा वुट्ठहन्तस्स नेवसञ्ञानासञ्ञायतनकुसलं फलसमापत्तिया समनन्तरपच्चयेन पच्चयो’’तिआदीहि (पट्ठा. १.१.४१८) विरुज्झति. यम्पि तत्थ वदन्ति ‘‘धम्मानं समुट्ठापनसमत्थता न परिहायति, भावनाबलेन पन वारितत्ता धम्मा समनन्तरा नुप्पज्जन्ती’’ति, तम्पि कालानन्तरताय अभावमेव साधेति. भावनाबलेन हि तत्थ कालानन्तरता नत्थीति, मयम्पि एतदेव वदाम. यस्मा च कालानन्तरता नत्थि, तस्मा समनन्तरपच्चयता न युज्जति. कालानन्तरताय हि तेसं समनन्तरपच्चयो होतीति लद्धि. तस्मा ¶ अभिनिवेसं अकत्वा ब्यञ्जनमत्ततोवेत्थ नानाकरणं पच्चेतब्बं, न अत्थतो. कथं? नत्थि एतेसं अन्तरन्ति हि अनन्तरा. सण्ठानाभावतो सुट्ठु अनन्तराति समनन्तरा.

५९९. उप्पज्जमानोव सह उप्पादनभावेन उपकारको धम्मो सहजातपच्चयो पकासस्स पदीपो विय. सो अरूपक्खन्धादिवसेन छब्बिधो होति. यथाह – ‘‘चत्तारो खन्धा अरूपिनो अञ्ञमञ्ञं सहजातपच्चयेन पच्चयो. चत्तारो महाभूता अञ्ञमञ्ञं, ओक्कन्तिक्खणे नामरूपं अञ्ञमञ्ञं, चित्तचेतसिका धम्मा चित्तसमुट्ठानानं रूपानं, महाभूता उपादारूपानं, रूपिनो धम्मा अरूपीनं धम्मानं किञ्चिकाले सहजातपच्चयेन पच्चयो, किञ्चिकाले न सहजातपच्चयेन पच्चयो’’ति (पट्ठा. १.१.६). इदं हदयवत्थुमेव सन्धाय वुत्तं.

६००. अञ्ञमञ्ञं ¶ उप्पादनुपत्थम्भनभावेन उपकारको धम्मो अञ्ञमञ्ञपच्चयो अञ्ञमञ्ञूपत्थम्भकं तिदण्डकं विय. सो अरूपक्खन्धादिवसेन तिविधो होति. यथाह – ‘‘चत्तारो खन्धा अरूपिनो अञ्ञमञ्ञपच्चयेन पच्चयो. चत्तारो महाभूता ओक्कन्तिक्खणे नामरूपं अञ्ञमञ्ञपच्चयेन पच्चयो’’ति (पट्ठा. १.१.७).

६०१. अधिट्ठानाकारेन निस्सयाकारेन च उपकारको धम्मो निस्सयपच्चयो तरुचित्तकम्मादीनं पथवीपटादयो विय. सो ‘‘चत्तारो खन्धा अरूपिनो अञ्ञमञ्ञं निस्सयपच्चयेन पच्चयो’’ति एवं सहजाते वुत्तनयेनेव वेदितब्बो. छट्ठो पनेत्थ कोट्ठासो ‘‘चक्खायतनं चक्खुविञ्ञाणधातुया…पे… सोत… घान… जिव्हा… कायायतनं कायविञ्ञाणधातुया तंसम्पयुत्तकानञ्च धम्मानं निस्सयपच्चयेन पच्चयो. यं रूपं निस्साय मनोधातु च मनोविञ्ञाणधातु च वत्तन्ति, तं रूपं मनोधातुया च मनोविञ्ञाणधातुया च तंसम्पयुत्तकानञ्च धम्मानं निस्सयपच्चयेन पच्चयो’’ति (पट्ठा. १.१.८) एवं विभत्तो.

६०२. उपनिस्सयपच्चयोति एत्थ पन अयं ताव वचनत्थो, तदधीनवुत्तिताय अत्तनो फलेन निस्सितो न पटिक्खित्तोति निस्सयो. यथा पन भुसो आयासो उपायासो, एवं भुसो निस्सयो उपनिस्सयो, बलवकारणस्सेतं अधिवचनं. तस्मा बलवकारणभावेन उपकारको धम्मो उपनिस्सयपच्चयोति वेदितब्बो.

सो ¶ आरम्मणूपनिस्सयो अनन्तरूपनिस्सयो पकतूपनिस्सयोति तिविधो होति. तत्थ ‘‘दानं दत्वा सीलं समादियित्वा उपोसथकम्मं कत्वा तं गरुंकत्वा पच्चवेक्खति, पुब्बे सुचिण्णानि गरुंकत्वा पच्चवेक्खति, झाना वुट्ठहित्वा झानं गरुंकत्वा पच्चवेक्खति, सेक्खा गोत्रभुं गरुंकत्वा पच्चवेक्खन्ति, वोदानं गरुंकत्वा पच्चवेक्खन्ति. सेक्खा मग्गा वुट्ठहित्वा मग्गं गरुंकत्वा पच्चवेक्खन्ती’’ति (पट्ठा. १.१.४२३) एवमादिना नयेन आरम्मणूपनिस्सयो ताव आरम्मणाधिपतिना सद्धिं नानत्तं अकत्वाव विभत्तो. तत्थ यं आरम्मणं गरुंकत्वा चित्तचेतसिका उप्पज्जन्ति, तं नियमतो तेसु आरम्मणेसु बलवारम्मणं होति. इति गरुकत्तब्बमत्तट्ठेन ¶ आरम्मणाधिपति, बलवकारणट्ठेन आरम्मणूपनिस्सयोति एवमेतेसं नानत्तं वेदितब्बं.

अनन्तरूपनिस्सयोपि ‘‘पुरिमा पुरिमा कुसला खन्धा पच्छिमानं पच्छिमानं कुसलानं खन्धानं उपनिस्सयपच्चयेन पच्चयो’’तिआदिना (पट्ठा. १.१.९) नयेन अनन्तरपच्चयेन सद्धिं नानत्तं अकत्वाव विभत्तो. मातिकानिक्खेपे पन नेसं ‘‘चक्खुविञ्ञाणधातु तंसम्पयुत्तका च धम्मा मनोधातुया तंसम्पयुत्तकानञ्च धम्मानं अनन्तरपच्चयेन पच्चयो’’तिआदिना (पट्ठा. १.१.४) नयेन अनन्तरस्स, ‘‘पुरिमा पुरिमा कुसला धम्मा पच्छिमानं पच्छिमानं कुसलानं धम्मानं उपनिस्सयपच्चयेन पच्चयो’’तिआदिना (पट्ठा. १.१.९) नयेन उपनिस्सयस्स आगतत्ता निक्खेपे विसेसो अत्थि. सोपि अत्थतो एकीभावमेव गच्छति. एवं सन्तेपि अत्तनो अत्तनो अनन्तरा अनुरूपस्स चित्तुप्पादस्स पवत्तनसमत्थताय अनन्तरता, पुरिमचित्तस्स पच्छिमचित्तुप्पादने बलवताय अनन्तरूपनिस्सयता वेदितब्बा. यथा हि हेतुपच्चयादीसु किञ्चि धम्मं विनापि चित्तं उप्पज्जति, न एवं अनन्तरचित्तं विना चित्तस्स उप्पत्ति नाम अत्थि. तस्मा बलवपच्चयो होति. इति अत्तनो अत्तनो अनन्तरा अनुरूपचित्तुप्पादनवसेन अनन्तरपच्चयो, बलवकारणवसेन अनन्तरूपनिस्सयोति एवमेतेसं नानत्तं वेदितब्बं.

पकतूपनिस्सयो पन पकतो उपनिस्सयो पकतूपनिस्सयो. पकतो नाम अत्तनो सन्ताने निप्फादितो वा सद्धासीलादि उपसेवितो वा उतुभोजनादि. पकतिया एव वा उपनिस्सयो पकतूपनिस्सयो, आरम्मणानन्तरेहि असम्मिस्सोति अत्थो. तस्स पकतूपनिस्सयो ‘‘सद्धं उपनिस्साय दानं देति, सीलं समादियति, उपोसथकम्मं करोति, झानं उप्पादेति, विपस्सनं ¶ उप्पादेति, मग्गं उप्पादेति, अभिञ्ञं उप्पादेति, समापत्तिं उप्पादेति. सीलं, सुतं, चागं, पञ्ञं उपनिस्साय दानं देति…पे… समापत्तिं उप्पादेति. सद्धा, सीलं, सुतं, चागो, पञ्ञा सद्धाय, सीलस्स, सुतस्स, चागस्स, पञ्ञाय, उपनिस्सयपच्चयेन पच्चयो’’तिआदिना (पट्ठा. १.१.४२३) नयेन अनेकप्पकारतो पभेदो वेदितब्बो. इति इमे सद्धादयो पकता चेव बलवकारणट्ठेन उपनिस्सया चाति पकतूपनिस्सयोति.

६०३. पठमतरं ¶ उप्पज्जित्वा वत्तमानभावेन उपकारको धम्मो पुरेजातपच्चयो. सो पञ्चद्वारे वत्थारम्मणहदयवत्थुवसेन एकादसविधो होति. यथाह – ‘‘चक्खायतनं चक्खुविञ्ञाणधातुया तंसम्पयुत्तकानञ्च धम्मानं पुरेजातपच्चयेन पच्चयो. सोत…पे… घान, जिव्हा, कायायतनं, रूप, सद्द, गन्ध, रस, फोट्ठब्बायतनं कायविञ्ञाणधातुया तंसम्पयुत्तकानञ्च धम्मानं पुरेजातपच्चयेन पच्चयो. रूप, सद्द, गन्ध, रस, फोट्ठब्बायतनं मनोधातुया. यं रूपं निस्साय मनोधातु च मनोविञ्ञाणधातु च वत्तन्ति, तं रूपं मनोधातुया तंसम्पयुत्तकानञ्च धम्मानं पुरेजातपच्चयेन पच्चयो. मनोविञ्ञाणधातुया तंसम्पयुत्तकानञ्च धम्मानं किञ्चिकाले पुरेजातपच्चयेन पच्चयो. किञ्चिकाले न पुरेजातपच्चयेन पच्चयो’’ति (पट्ठा. १.१.१०).

६०४. पुरेजातानं रूपधम्मानं उपत्थम्भकत्तेन उपकारको अरूपधम्मो पच्छाजातपच्चयो गिज्झपोतकसरीरानं आहारासाचेतना विय. तेन वुत्तं ‘‘पच्छाजाता चित्तचेतसिका धम्मा पुरेजातस्स इमस्स कायस्स पच्छाजातपच्चयेन पच्चयो’’ति (पट्ठा. १.१.११).

६०५. आसेवनट्ठेन अनन्तरानं पगुणबलवभावाय उपकारको धम्मो आसेवनपच्चयो गन्थादीसु पुरिमपुरिमाभियोगो विय. सो कुसलाकुसलकिरियजवनवसेन तिविधो होति. यथाह – ‘‘पुरिमा पुरिमा कुसला धम्मा पच्छिमानं पच्छिमानं कुसलानं धम्मानं आसेवनपच्चयेन पच्चयो. पुरिमा पुरिमा अकुसला…पे… किरियाब्याकता धम्मा पच्छिमानं पच्छिमानं किरियाब्याकतानं धम्मानं आसेवनपच्चयेन पच्चयो’’ति (पट्ठा. १.१.१२).

६०६. चित्तपयोगसङ्खातेन किरियभावेन उपकारको धम्मो कम्मपच्चयो. सो नानक्खणिकाय चेव कुसलाकुसलचेतनाय सहजाताय च सब्बायपि चेतनाय वसेन दुविधो होति ¶ . यथाह – ‘‘कुसलाकुसलं कम्मं विपाकानं खन्धानं कटत्ता च रूपानं कम्मपच्चयेन पच्चयो. चेतना सम्पयुत्तकानं धम्मानं तंसमुट्ठानानञ्च रूपानं कम्मपच्चयेन पच्चयो’’ति (पट्ठा. १.१.१३).

६०७. निरुस्साहसन्तभावेन ¶ निरुस्साहसन्तभावाय उपकारको विपाकधम्मो विपाकपच्चयो. सो पवत्ते तंसमुट्ठानानं, पटिसन्धियं कटत्ता च रूपानं, सब्बत्थ च सम्पयुत्तधम्मानं पच्चयो होति. यथाह –‘‘विपाकाब्याकतो एको खन्धो तिण्णन्नं खन्धानं चित्तसमुट्ठानानञ्च रूपानं विपाकपच्चयेन पच्चयो…पे… पटिसन्धिक्खणे विपाकाब्याकतो एको खन्धो तिण्णन्नं खन्धानं कटत्ता च रूपानं. तयो खन्धा एकस्स खन्धस्स. द्वे खन्धा द्विन्नं खन्धानं कटत्ता च रूपानं विपाकपच्चयेन पच्चयो. खन्धा वत्थुस्स विपाकपच्चयेन पच्चयो’’ति.

६०८. रूपारूपानं उपत्थम्भकट्ठेन उपकारका चत्तारो आहारा आहारपच्चयो. यथाह –‘‘कबळीकारो आहारो इमस्स कायस्स आहारपच्चयेन पच्चयो. अरूपिनो आहारा सम्पयुत्तकानं धम्मानं तंसमुट्ठानानञ्च रूपानं आहारपच्चयेन पच्चयो’’ति (पट्ठा. १.१.१५). पञ्हावारे पन ‘‘पटिसन्धिक्खणे विपाकाब्याकता आहारा सम्पयुत्तकानं खन्धानं कटत्ता च रूपानं आहारपच्चयेन पच्चयो’’तिपि (पट्ठा. १.१.४२९) वुत्तं.

६०९. अधिपतियट्ठेन उपकारका इत्थिन्द्रियपुरिसिन्द्रियवज्जा वीसतिन्द्रिया इन्द्रियपच्चयो. तत्थ चक्खुन्द्रियादयो अरूपधम्मानंयेव, सेसा रूपारूपानं पच्चया होन्ति. यथाह – ‘‘चक्खुन्द्रियं चक्खुविञ्ञाणधातुया…पे… सोत… घान… जिव्हा… कायिन्द्रियं कायविञ्ञाणधातुया तंसम्पयुत्तकानञ्च धम्मानं इन्द्रियपच्चयेन पच्चयो. रूपजीवितिन्द्रियं कटत्तारूपानं इन्द्रियपच्चयेन पच्चयो. अरूपिनो इन्द्रिया सम्पयुत्तकानं धम्मानं तंसमुट्ठानानञ्च रूपानं इन्द्रियपच्चयेन पच्चयो’’ति (पट्ठा. १.१.१६). पञ्हावारे पन ‘‘पटिसन्धिक्खणे विपाकाब्याकता इन्द्रिया सम्पयुत्तकानं खन्धानं कटत्ता च रूपानं इन्द्रियपच्चयेन पच्चयो’’तिपि (पट्ठा. १.१.४३०) वुत्तं.

६१०. उपनिज्झायनट्ठेन उपकारकानि ठपेत्वा द्विपञ्चविञ्ञाणे सुखदुक्खवेदनाद्वयं सब्बानिपि ¶ कुसलादिभेदानि सत्त झानङ्गानि झानपच्चयो. यथाह –‘‘झानङ्गानि झानसम्पयुत्तकानं धम्मानं तंसमुट्ठानानञ्च रूपानं झानपच्चयेन ¶ पच्चयो’’ति (पट्ठा. १.१.१७). पञ्हावारे पन ‘‘पटिसन्धिक्खणे विपाकाब्याकतानि झानङ्गानि सम्पयुत्तकानं खन्धानं कटत्ता च रूपानं झानपच्चयेन पच्चयो’’तिपि (पट्ठा. १.१.४३१) वुत्तं.

६११. यतो ततो वा निय्यानट्ठेन उपकारकानि कुसलादिभेदानि द्वादस मग्गङ्गानि मग्गपच्चयो. यथाह – ‘‘मग्गङ्गानि मग्गसम्पयुत्तकानं धम्मानं तंसमुट्ठानानञ्च रूपानं मग्गपच्चयेन पच्चयो’’ति (पट्ठा. १.१.१८). पञ्हावारे पन ‘‘पटिसन्धिक्खणे विपाकाब्याकतानि मग्गङ्गानि सम्पयुत्तकानं खन्धानं कटत्ता च रूपानं मग्गपच्चयेन पच्चयो’’तिपि (पट्ठा. १.१.४३२) वुत्तं. एते पन द्वेपि झानमग्गपच्चया द्विपञ्चविञ्ञाणाहेतुकचित्तेसु न लब्भन्तीति वेदितब्बा.

६१२. एकवत्थुकएकारम्मणएकुप्पादेकनिरोधसङ्खातेन सम्पयुत्तभावेन उपकारका अरूपधम्मा सम्पयुत्तपच्चयो. यथाह – ‘‘चत्तारो खन्धा अरूपिनो अञ्ञमञ्ञं सम्पयुत्तपच्चयेन पच्चयो’’ति (पट्ठा. १.१.१९).

६१३. एकवत्थुकादिभावानुपगमेन उपकारका रूपिनो धम्मा अरूपीनं धम्मानं, अरूपिनोपि रूपीनं विप्पयुत्तपच्चयो. सो सहजातपच्छाजातपुरेजातवसेन तिविधो होति. वुत्तञ्हेतं ‘‘सहजाता कुसला खन्धा चित्तसमुट्ठानानं रूपानं विप्पयुत्तपच्चयेन पच्चयो. पच्छाजाता कुसला खन्धा पुरेजातस्स इमस्स कायस्स विप्पयुत्तपच्चयेन पच्चयो’’ति (पट्ठा. १.१.४३४). अब्याकतपदस्स पन सहजातविभङ्गे ‘‘पटिसन्धिक्खणे विपाकाब्याकता खन्धा कटत्तारूपानं विप्पयुत्तपच्चयेन पच्चयो. खन्धा वत्थुस्स. वत्थु खन्धानं विप्पयुत्तपच्चयेन पच्चयो’’तिपि (पट्ठा. १.१.४३४) वुत्तं. पुरेजातं पन चक्खुन्द्रियादिवत्थुवसेनेव वेदितब्बं. यथाह – ‘‘पुरेजातं चक्खायतनं चक्खुविञ्ञाणस्स…पे… कायायतनं कायविञ्ञाणस्स विप्पयुत्तपच्चयेन पच्चयो. वत्थु विपाकाब्याकतानं किरियाब्याकतानं खन्धानं…पे… वत्थु कुसलानं खन्धानं…पे… वत्थु अकुसलानं खन्धानं विप्पयुत्तपच्चयेन पच्चयो’’ति (पट्ठा. १.१.४३४).

६१४. पच्चुप्पन्नलक्खणेन ¶ अत्थिभावेन तादिसस्सेव धम्मस्स उपत्थम्भकत्तेन उपकारको धम्मो अत्थिपच्चयो. तस्स अरूपक्खन्धमहाभूतनामरूपचित्तचेतसिकमहाभूतआयतनवत्थुवसेन सत्तधा मातिका ¶ निक्खित्ता. यथाह –‘‘चत्तारो खन्धा अरूपिनो अञ्ञमञ्ञं अत्थिपच्चयेन पच्चयो, चत्तारो महाभूता, ओक्कन्तिक्खणे नामरूपं अञ्ञमञ्ञं. चित्तचेतसिका धम्मा चित्तसमुट्ठानानं रूपानं. महाभूता उपादारूपानं. चक्खायतनं चक्खुविञ्ञाणधातुया…पे… कायायतनं…पे… रूपायतनं…पे… फोट्ठब्बायतनं कायविञ्ञाणधातुया तंसम्पयुत्तकानञ्च धम्मानं अत्थिपच्चयेन पच्चयो. रूपायतनं…पे… फोट्ठब्बायतनं मनोधातुया तंसम्पयुत्तकानञ्च धम्मानं. यं रूपं निस्साय मनोधातु च मनोविञ्ञाणधातु च वत्तन्ति, तं रूपं मनोधातुया च मनोविञ्ञाणधातुया च तंसम्पयुत्तकानञ्च धम्मानं अत्थिपच्चयेन पच्चयो’’ति (पट्ठा. १.१.२१).

पञ्हावारे पन सहजातं पुरेजातं पच्छाजातं आहारं इन्द्रियन्तिपि निक्खिपित्वा सहजाते ताव ‘‘एको खन्धो तिण्णन्नं खन्धानं तंसमुट्ठानानञ्च रूपानं अत्थिपच्चयेन पच्चयो’’तिआदिना (पट्ठा. १.१.४३५) नयेन निद्देसो कतो, पुरेजाते पुरेजातानं चक्खादीनं वसेन निद्देसो कतो. पच्छाजाते पुरेजातस्स इमस्स कायस्स पच्छाजातानं चित्तचेतसिकानं पच्चयवसेन निद्देसो कतो. आहारिन्द्रियेसु ‘‘कबळीकारो आहारो इमस्स कायस्स अत्थिपच्चयेन पच्चयो. रूपजीवितिन्द्रियं कटत्तारूपानं अत्थिपच्चयेन पच्चयो’’ति (पट्ठा. १.१.४३५) एवं निद्देसो कतोति.

६१५. अत्तनो अनन्तरा उप्पज्जमानानं अरूपधम्मानं पवत्तिओकासदानेन उपकारका समनन्तरनिरुद्धा अरूपधम्मा नत्थिपच्चयो. यथाह –‘‘समनन्तरनिरुद्धा चित्तचेतसिका धम्मा पटुप्पन्नानं चित्तचेतसिकानं धम्मानं नत्थिपच्चयेन पच्चयो’’ति.

ते एव विगतभावेन उपकारकत्ता विगतपच्चयो. यथाह – ‘‘समनन्तरविगता चित्तचेतसिका धम्मा पटुप्पन्नानं चित्तचेतसिकानं धम्मानं विगतपच्चयेन पच्चयो’’ति.

अत्थि पच्चयधम्मा एव च अविगतभावेन उपकारकत्ता अविगतपच्चयोति वेदितब्बा. देसनाविलासेन ¶ पन तथा विनेतब्बवेनेय्यवसेन वा अयं दुको वुत्तो, अहेतुकदुकं वत्वापि हेतुविप्पयुत्तदुको वियाति.

अविज्जापच्चयासङ्खारपदवित्थारकथा

६१६. एवमिमेसु ¶ चतुवीसतिया पच्चयेसु अयं अविज्जा,

पच्चयो होति पुञ्ञानं, दुविधानेकधा पन;

परेसं पच्छिमानं सा, एकधा पच्चयो मताति.

तत्थ पुञ्ञानं दुविधाति आरम्मणपच्चयेन च उपनिस्सयपच्चयेन चाति द्वेधा पच्चयो होति. सा हि अविज्जं खयतो वयतो सम्मसनकाले कामावचरानं पुञ्ञाभिसङ्खारानं आरम्मणपच्चयेन पच्चयो होति. अभिञ्ञाचित्तेन समोहचित्तं जाननकाले रूपावचरानं. अविज्जासमतिक्कमत्थाय पन दानादीनि चेव कामावचरपुञ्ञकिरियवत्थूनि पूरेन्तस्स, रूपावचरज्झानानि च उप्पादेन्तस्स द्विन्नम्पि तेसं उपनिस्सयपच्चयेन पच्चयो होति. तथा अविज्जासम्मूळ्हत्ता कामभवरूपभवसम्पत्तियो पत्थेत्वा तानेव पुञ्ञानि करोन्तस्स.

अनेकधा पन परेसन्ति अपुञ्ञाभिसङ्खारानं अनेकधा पच्चयो होति. कथं? एसा हि अविज्जं आरब्भ रागादीनं उप्पज्जनकाले आरम्मणपच्चयेन, गरुंकत्वा अस्सादनकाले आरम्मणाधिपतिआरम्मणूपनिस्सयेहि, अविज्जासम्मूळ्हस्स अनादीनवदस्साविनो पाणातिपातादीनि करोन्तस्स उपनिस्सयपच्चयेन, दुतियजवनादीनं अनन्तरसमनन्तरअनन्तरूपनिस्सयासेवननत्थिविगतपच्चयेहि, यंकिञ्चि अकुसलं करोन्तस्स हेतु सहजात अञ्ञमञ्ञ निस्सय सम्पयुत्त अत्थि अविगतपच्चयेहीति अनेकधा पच्चयो होति.

पच्छिमानं सा एकधा पच्चयो मताति आनेञ्जाभिसङ्खारानं उपनिस्सयपच्चयेनेव एकधा पच्चयो मता. सो पनस्सा उपनिस्सयभावो पुञ्ञाभिसङ्खारे वुत्तनयेनेव वेदितब्बोति.

६१७. एत्थाह – किं पनायमेकाव अविज्जा सङ्खारानं पच्चयो, उदाहु अञ्ञेपि पच्चया ¶ सन्तीति? किं पनेत्थ, यदि ताव एकाव, एककारणवादो आपज्जति. अथञ्ञेपि सन्ति, ‘‘अविज्जापच्चया सङ्खारा’’ति एककारणनिद्देसो नुपपज्जतीति? न नुपपज्जति. कस्मा? यस्मा –

एकं न एकतो इध, नानेकमनेकतोपि नो एकं;

फलमत्थि अत्थि पन एक-हेतुफलदीपने अत्थो.

एकतो ¶ हि कारणतो न इध किञ्चि एकं फलमत्थि, न अनेकं. नापि अनेकेहि कारणेहि एकं. अनेकेहि पन कारणेहि अनेकमेव होति. तथा हि अनेकेहि उतुपथवीबीजसलिलसङ्खातेहि कारणेहि अनेकमेव रूपगन्धरसादिकं अङ्कुरसङ्खातं फलं उप्पज्जमानं दिस्सति. यं पनेतं ‘‘अविज्जापच्चया सङ्खारा, सङ्खारपच्चया विञ्ञाण’’न्ति एकेकहेतुफलदीपनं कतं, तत्थ अत्थो अत्थि, पयोजनं विज्जति.

भगवा हि कत्थचि पधानत्ता, कत्थचि पाकटत्ता, कत्थचि असाधारणत्ता देसनाविलासस्स च वेनेय्यानञ्च अनुरूपतो एकमेव हेतुं वा फलं वा दीपेति. ‘‘फस्सपच्चया वेदना’’ति हि पधानत्ता एकमेव हेतुफलमाह. फस्सो हि वेदनाय पधानहेतु यथाफस्सं वेदना ववत्थानतो. वेदना च फस्सस्स पधानफलं यथावेदनं फस्सववत्थानतो. ‘‘सेम्हसमुट्ठाना आबाधा’’ति (अ. नि. १०.६०) पाकटत्ता एकं हेतुमाह. पाकटो हि एत्थ सेम्हो, न कम्मादयो. ‘‘ये केचि, भिक्खवे, अकुसला धम्मा, सब्बे ते अयोनिसोमनसिकारमूलका’’ति असाधारणत्ता एकं हेतुमाह. असाधारणो हि अयोनिसोमनसिकारो अकुसलानं, साधारणानि वत्थारम्मणादीनीति. तस्मा अयमिध अविज्जा विज्जमानेसुपि अञ्ञेसु वत्थारम्मणसहजातधम्मादीसु सङ्खारकारणेसु ‘‘अस्सादानुपस्सिनो तण्हा पवड्ढती’’ति (सं. नि. २.५२) च ‘‘अविज्जासमुदया आसवसमुदयो’’ति (म. नि. १.१०४) च वचनतो अञ्ञेसम्पि तण्हादीनं सङ्खारहेतूनं हेतूति पधानत्ता, ‘‘अविद्वा, भिक्खवे, अविज्जागतो पुञ्ञाभिसङ्खारम्पि अभिसङ्खरोती’’ति पाकटत्ता, असाधारणत्ता च सङ्खारानं हेतुभावेन दीपिताति वेदितब्बा. एतेनेव च एकेकहेतुफलदीपनपरिहारवचनेन सब्बत्थ एकेकहेतुफलदीपने पयोजनं वेदितब्बन्ति.

६१८. एत्थाह ¶ – एवं सन्तेपि एकन्तानिट्ठफलाय सावज्जाय अविज्जाय कथं पुञ्ञानेञ्जाभिसङ्खारपच्चयत्तं युज्जति? न हि निम्बबीजतो उच्छु उप्पज्जतीति. कथं न युज्जिस्सति? लोकस्मिञ्हि –

विरुद्धो ¶ चाविरुद्धो च, सदिसासदिसो तथा;

धम्मानं पच्चयो सिद्धो, विपाका एव ते च न.

धम्मानं हि ठानसभावकिच्चादिविरुद्धो चाविरुद्धो च पच्चयो लोके सिद्धो. पुरिमचित्तं हि अपरचित्तस्स ठानविरुद्धो पच्चयो, पुरिमसिप्पादिसिक्खा च पच्छा पवत्तमानानं सिप्पादिकिरियानं. कम्मं रूपस्स सभावविरुद्धो पच्चयो, खीरादीनि च दधिआदीनं. आलोको चक्खुविञ्ञाणस्स किच्चविरुद्धो, गुळादयो च आसवादीनं. चक्खुरूपादयो पन चक्खुविञ्ञाणादीनं ठानाविरुद्धा पच्चया. पुरिमजवनादयो पच्छिमजवनादीनं सभावाविरुद्धा किच्चाविरुद्धा च.

यथा च विरुद्धाविरुद्धा पच्चया सिद्धा, एवं सदिसासदिसापि. सदिसमेव हि उतुआहारसङ्खातं रूपं रूपस्स पच्चयो, सालिबीजादीनि च सालिफलादीनं. असदिसम्पि रूपं अरूपस्स, अरूपञ्च रूपस्स पच्चयो होति, गोलोमाविलोम-विसाण-दधितिलपिट्ठादीनि च दुब्बा-सरभूतिणकादीनं. येसञ्च धम्मानं ते विरुद्धाविरुद्धसदिसासदिसपच्चया, न ते धम्मा तेसं धम्मानं विपाका एव.

इति अयं अविज्जा विपाकवसेन एकन्तानिट्ठफला, सभाववसेन च सावज्जापि समाना सब्बेसम्पि एतेसं पुञ्ञाभिसङ्खारादीनं यथानुरूपं ठानकिच्चसभावविरुद्धाविरुद्धपच्चयवसेन, सदिसासदिसपच्चयवसेन च पच्चयो होतीति वेदितब्बा. सो चस्सा पच्चयभावो ‘‘यस्स हि दुक्खादीसु अविज्जासङ्खातं अञ्ञाणं अप्पहीनं होति, सो दुक्खे ताव पुब्बन्तादीसु च अञ्ञाणेन संसारदुक्खं सुखसञ्ञाय गहेत्वा तस्स हेतुभूते तिविधेपि सङ्खारे आरभती’’तिआदिना नयेन वुत्तो एव.

६१९. अपिच अयं अञ्ञोपि परियायो –

चुतूपपाते ¶ संसारे, सङ्खारानञ्च लक्खणे;

यो पटिच्चसमुप्पन्न-धम्मेसु च विमुय्हति.

अभिसङ्खरोति सो एते, सङ्खारे तिविधे यतो;

अविज्जा पच्चयो तेसं, तिविधानम्पयं ततोति.

कथं ¶ पन यो एतेसु विमुय्हति, सो तिविधेपेते सङ्खारे करोतीति चे. चुतिया ताव विमूळ्हो ‘‘सब्बत्थ खन्धानं भेदो मरण’’न्ति चुतिं अगण्हन्तो ‘‘सत्तो मरति, सत्तस्स देहन्तरसङ्कमन’’न्तिआदीनि विकप्पेति.

उपपाते विमूळ्हो ‘‘सब्बत्थ खन्धानं पातुभावो जाती’’ति उपपातं अगण्हन्तो ‘‘सत्तो उपपज्जति, सत्तस्स नवसरीरपातुभावो’’तिआदीनि विकप्पेति.

संसारे विमूळ्हो यो एस,

‘‘खन्धानञ्च पटिपाटि, धातुआयतनान च;

अब्बोच्छिन्नं वत्तमाना, संसारोति पवुच्चती’’ति. –

एवं वण्णितो संसारो, तं एवं अगण्हन्तो ‘‘अयं सत्तो अस्मा लोका परं लोकं गच्छति, परस्मा लोका इमं लोकं आगच्छती’’तिआदीनि विकप्पेति.

सङ्खारानं लक्खणे विमूळ्हो सङ्खारानं सभावलक्खणं सामञ्ञलक्खणञ्च अगण्हन्तो सङ्खारे अत्ततो अत्तनियतो धुवतो सुखतो सुभतो विकप्पेति.

पटिच्चसमुप्पन्नधम्मेसु विमूळ्हो अविज्जादीहि सङ्खारादीनं पवत्तिं अगण्हन्तो ‘‘अत्ता जानाति वा न जानाति वा, सो एव करोति च कारेति च. सो पटिसन्धियं उपपज्जति, तस्स अणुइस्सरादयो कललादिभावेन सरीरं सण्ठपेन्तो इन्द्रियानि सम्पादेन्ति. सो इन्द्रियसम्पन्नो फुसति, वेदियति, तण्हीयति, उपादियति, घटियति. सो पुन भवन्तरे भवती’’ति ¶ वा, ‘‘सब्बे सत्ता नियतिसङ्गतिभावपरिणता’’ति (दी. नि. १.१६८) वा विकप्पेति.

सो अविज्जाय अन्धीकतो एवं विकप्पेन्तो यथा नाम अन्धो पथवियं विचरन्तो मग्गम्पि अमग्गम्पि थलम्पि निन्नम्पि समम्पि विसमम्पि पटिपज्जति, एवं पुञ्ञम्पि अपुञ्ञम्पि आनेञ्जाभिसङ्खारम्पि अभिसङ्खरोतीति.

तेनेतं वुच्चति –

‘‘यथापि ¶ नाम जच्चन्धो, नरो अपरिणायको;

एकदा याति मग्गेन, उम्मग्गेनापि एकदा.

‘‘संसारे संसरं बालो, तथा अपरिणायको;

करोति एकदा पुञ्ञं, अपुञ्ञमपि एकदा.

‘‘यदा च ञत्वा सो धम्मं, सच्चानि अभिसमेस्सति;

तदा अविज्जूपसमा, उपसन्तो चरिस्सती’’ति.

अयं ‘‘अविज्जापच्चया सङ्खारा’’ति पदस्मिं वित्थारकथा.

सङ्खारपच्चयाविञ्ञाणपदवित्थारकथा

६२०. सङ्खारपच्चया विञ्ञाणपदे – विञ्ञाणन्ति चक्खुविञ्ञाणादि छब्बिधं. तत्थ चक्खुविञ्ञाणं कुसलविपाकं अकुसलविपाकन्ति दुविधं होति. तथा सोतघानजिव्हाकआयविञ्ञाणानि. मनोविञ्ञाणं कुसलाकुसलविपाका द्वे मनोधातुयो, तिस्सो अहेतुकमनोविञ्ञाणधातुयो, अट्ठ सहेतुकानि कामावचरविपाकचित्तानि, पञ्च रूपावचरानि, चत्तारि अरूपावचरानीति बावीसतिविधं होति. इति इमेहि छहि विञ्ञाणेहि सब्बानिपि बात्तिंस लोकियविपाकविञ्ञाणानि ¶ सङ्गहितानि होन्ति. लोकुत्तरानि पन वट्टकथाय न युज्जन्तीति न गहितानि.

तत्थ सिया ‘‘कथं पनेतं जानितब्बं इदं वुत्तप्पकारं विञ्ञाणं सङ्खारपच्चया होती’’ति? उपचितकम्माभावे विपाकाभावतो. विपाकं हेतं, विपाकञ्च न उपचितकम्माभावे उप्पज्जति. यदि उप्पज्जेय्य सब्बेसं सब्बविपाकानि उप्पज्जेय्युं, न च उप्पज्जन्तीति जानितब्बमेतं सङ्खारपच्चया इदं विञ्ञाणं होतीति.

कतरसङ्खारपच्चया कतरं विञ्ञाणन्ति चे. कामावचरपुञ्ञाभिसङ्खारपच्चया ताव कुसलविपाकानि पञ्च चक्खुविञ्ञाणादीनि, मनोविञ्ञाणे एका मनोधातु, द्वे मनोविञ्ञाणधातुयो, अट्ठ कामावचरमहाविपाकानीति सोळस. यथाह –

‘‘कामावचरस्स कुसलस्स कम्मस्स कटत्ता उपचितत्ता विपाकं चक्खुविञ्ञाणं उप्पन्नं होति… सोत… घान… जिव्हा… कायविञ्ञाणं ¶ … विपाका मनोधातु उप्पन्ना होति. सोमनस्ससहगता मनोविञ्ञाणधातु उप्पन्ना होति. उपेक्खासहगता मनोविञ्ञाणधातु उप्पन्ना होति. सोमनस्ससहगता ञाणसम्पयुत्ता. सोमनस्ससहगता ञाणसम्पयुत्ता ससङ्खारेन. सोमनस्ससहगता ञाणविप्पयुत्ता. सोमनस्ससहगता ञाणविप्पयुत्ता ससङ्खारेन. उपेक्खासहगता ञाणसम्पयुत्ता. उपेक्खासहगता ञाणसम्पयुत्ता ससङ्खारेन. उपेक्खासहगता ञाणविप्पयुत्ता. उपेक्खासहगता ञाणविप्पयुत्ता ससङ्खारेना’’ति (ध. स. ४३१, ४९८).

रूपावचरपुञ्ञाभिसङ्खारपच्चया पन पञ्च रूपावचरविपाकानि. यथाह –

‘‘तस्सेव रूपावचरस्स कुसलस्स कम्मस्स कटत्ता उपचितत्ता विपाकं विविच्चेव कामेहि पठमं झानं…पे… पञ्चमं झानं उपसम्पज्ज विहरती’’ति (ध. स. ४९९). एवं पुञ्ञाभिसङ्खारपच्चया एकवीसतिविधं विञ्ञाणं होति.

अपुञ्ञाभिसङ्खारपच्चया ¶ पन अकुसलविपाकानि पञ्च चक्खुविञ्ञाणादीनि, एका मनोधातु, एका मनोविञ्ञाणधातूति एवं सत्तविधं विञ्ञाणं होति. यथाह –

‘‘अकुसलस्स कम्मस्स कटत्ता उपचितत्ता विपाकं चक्खुविञ्ञाणं उप्पन्नं होति… सोत… घान… जिव्हा… कायविञ्ञाणं… विपाका मनोधातु विपाका मनोविञ्ञाणधातु उप्पन्ना होती’’ति (ध. स. ५५६).

आनेञ्जाभिसङ्खारपच्चया पन चत्तारि अरूपविपाकानीति एवं चतुब्बिधं विञ्ञाणं होति. यथाह –

‘‘तस्सेव अरूपावचरस्स कुसलस्स कम्मस्स कटत्ता उपचितत्ता विपाकं सब्बसो रूपसञ्ञानं समतिक्कमा आकासानञ्चायतनसञ्ञासहगतं…पे… विञ्ञाणञ्चा…पे… आकिञ्चञ्ञा…पे… नेवसञ्ञानासञ्ञायतनसहगतं सुखस्स च दुक्खस्स च पहाना चतुत्थं झानं उपसम्पज्ज विहरती’’ति (ध. स. ५०१).

६२१. एवं ¶ यं सङ्खारपच्चया यं विञ्ञाणं होति, तं ञत्वा इदानिस्स एवं पवत्ति वेदितब्बा – सब्बमेव हि इदं पवत्तिपटिसन्धिवसेन द्वेधा पवत्तति. तत्थ द्वे पञ्चविञ्ञाणानि, द्वे मनोधातुयो, सोमनस्ससहगता अहेतुकमनोविञ्ञाणधातूति इमानि तेरस पञ्चवोकारभवे पवत्तियञ्ञेव पवत्तन्ति. सेसानि एकूनवीसति तीसु भवेसु यथानुरूपं पवत्तियम्पि पटिसन्धियम्पि पवत्तन्ति.

कथं? कुसलविपाकानि ताव चक्खुविञ्ञाणादीनि पञ्च कुसलविपाकेन अकुसलविपाकेन वा निब्बत्तस्स यथाक्कमं परिपाकं उपगतिन्द्रियस्स चक्खादीनं आपाथगतं इट्ठं इट्ठमज्झत्तं वा रूपादिआरम्मणं आरब्भ चक्खादिपसादं निस्साय दस्सनसवनघायनसायनफुसनकिच्चं साधयमानानि पवत्तन्ति. तथा अकुसलविपाकानि पञ्च. केवलञ्हि तेसं अनिट्ठं अनिट्ठमज्झत्तं वा आरम्मणं होति. अयमेव विसेसो. दसपि चेतानि नियतद्वारारम्मणवत्थुट्ठानानि नियतकिच्चानेव च भवन्ति.

ततो ¶ कुसलविपाकानं चक्खुविञ्ञाणादीनं अनन्तरा कुसलविपाका मनोधातु तेसंयेव आरम्मणं आरब्भ हदयवत्थुं निस्साय सम्पटिच्छनकिच्चं साधयमाना पवत्तति. तथा अकुसलविपाकानं अनन्तरा अकुसलविपाका. इदञ्च पन द्वयं अनियतद्वारारम्मणं नियतवत्थुट्ठानं नियतकिच्चञ्च होति.

सोमनस्ससहगता पन अहेतुकमनोविञ्ञाणधातु कुसलविपाकमनोधातुया अनन्तरा तस्सा एव आरम्मणं आरब्भ हदयवत्थुं निस्साय सन्तीरणकिच्चं साधयमाना छसु द्वारेसु बलवारम्मणे कामावचरसत्तानं येभुय्येन लोभसम्पयुत्तजवनावसाने भवङ्गवीथिं पच्छिन्दित्वा जवनेन गहितारम्मणे तदारम्मणवसेन च सकिं वा द्विक्खत्तुं वा पवत्ततीति मज्झिमट्ठकथायं वुत्तं. अभिधम्मट्ठकथायं पन तदारम्मणे द्वे चित्तवारा आगता. इदं पन चित्तं तदारम्मणन्ति च पिट्ठिभवङ्गन्ति चाति द्वे नामानि लभति. अनियतद्वारारम्मणं नियतवत्थुकं अनियतट्ठानकिच्चञ्च होतीति. एवं ताव तेरस पञ्चवोकारभवे पवत्तियञ्ञेव पवत्तन्तीति वेदितब्बानि.

सेसेसु ¶ एकूनवीसतिया न किञ्चि अत्तनो अनुरूपाय पटिसन्धिया न पवत्तति. पवत्तियं पन कुसलाकुसलविपाका ताव द्वे अहेतुकमनोविञ्ञाणधातुयो पञ्चद्वारे कुसलाकुसलविपाकमनोधातूनं अनन्तरा सन्तीरणकिच्चं, छसु द्वारेसु पुब्बे वुत्तनयेनेव तदारम्मणकिच्चं, अत्तना दिन्नपटिसन्धितो उद्धं असति भवङ्गुपच्छेदके चित्तुप्पादे भवङ्गकिच्चं, अन्ते चुतिकिच्चञ्चाति चत्तारि किच्चानि साधयमाना नियतवत्थुका अनियतद्वारारम्मणट्ठानकिच्चा हुत्वा पवत्तन्ति.

अट्ठ कामावचरसहेतुकचित्तानि वुत्तनयेनेव छसु द्वारेसु तदारम्मणकिच्चं, अत्तना दिन्नपटिसन्धितो उद्धं असति भवङ्गुपच्छेदके चित्तुप्पादे भवङ्गकिच्चं, अन्ते चुतिकिच्चञ्चाति तीणि किच्चानि साधयमानानि नियतवत्थुकानि अनियतद्वारारम्मणट्ठानकिच्चानि हुत्वा पवत्तन्ति.

पञ्च रूपावचरानि चत्तारि च आरुप्पानि अत्तना दिन्नपटिसन्धितो उद्धं असति भवङ्गुपच्छेदके चित्तुप्पादे भवङ्गकिच्चं, अन्ते चुतिकिच्चञ्चाति किच्चद्वयं साधयमानानि पवत्तन्ति ¶ . तेसु रूपावचरानि नियतवत्थारम्मणानि अनियतट्ठानकिच्चानि, इतरानि नियतवत्थुकानि नियतारम्मणानि अनियतट्ठानकिच्चानि हुत्वा पवत्तन्तीति एवं ताव बात्तिंसविधम्पि विञ्ञाणं पवत्तियं सङ्खारपच्चया पवत्तति. तत्रास्स ते ते सङ्खारा कम्मपच्चयेन च उपनिस्सयपच्चयेन च पच्चया होन्ति.

६२२. यं पन वुत्तं ‘‘सेसेसु एकूनवीसतिया न किञ्चि अत्तनो अनुरूपाय पटिसन्धिया न पवत्तती’’ति, तं अतिसंखित्तत्ता दुब्बिजानं. तेनस्स वित्थारनयदस्सनत्थं वुच्चति – कति पटिसन्धियो, कति पटिसन्धिचित्तानि, केन कत्थ पटिसन्धि होति, किं पटिसन्धिया आरम्मणन्ति?

असञ्ञपटिसन्धिया सद्धिं वीसति पटिसन्धियो. वुत्तप्पकारानेव एकूनवीसति पटिसन्धिचित्तानि. तत्थ अकुसलविपाकाय अहेतुकमनोविञ्ञाणधातुया अपायेसु पटिसन्धि होति. कुसलविपाकाय मनुस्सलोके जच्चन्धजातिबधिरजातिउम्मत्तकजातिएळमूगनपुंसकादीनं. अट्ठहि सहेतुककामावचरविपाकेहि कामावचरदेवेसु चेव मनुस्सेसु च पुञ्ञवन्तानं पटिसन्धि होति. पञ्चहि रूपावचरविपाकेहि रूपीब्रह्मलोके. चतूहि अरूपावचरविपाकेहि अरूपलोकेति. येन च यत्थ पटिसन्धि होति ¶ , सा एव तस्स अनुरूपा पटिसन्धि नाम. सङ्खेपतो पन पटिसन्धिया तीणि आरम्मणानि होन्ति अतीतं पच्चुप्पन्नं नवत्तब्बञ्च. असञ्ञा पटिसन्धि अनारम्मणाति.

तत्थ विञ्ञाणञ्चायतननेवसञ्ञानासञ्ञायतनपटिसन्धीनं अतीतमेव आरम्मणं. दसन्नं कामावचरानं अतीतं वा पच्चुप्पन्नं वा. सेसानं नवत्तब्बमेव. एवं तीसु आरम्मणेसु पवत्तमाना पन पटिसन्धि यस्मा अतीतारम्मणस्स वा नवत्तब्बारम्मणस्स वा चुतिचित्तस्स अनन्तरमेव पवत्तति. पच्चुप्पन्नारम्मणं पन चुतिचित्तं नाम नत्थि. तस्मा द्वीसु आरम्मणेसु अञ्ञतरारम्मणाय चुतिया अनन्तरा तीसु आरम्मणेसु अञ्ञतरारम्मणाय पटिसन्धिया सुगतिदुग्गतिवसेन पवत्तनाकारो वेदितब्बो.

६२३. सेय्यथिदं – कामावचरसुगतियं ताव ठितस्स पापकम्मिनो पुग्गलस्स ‘‘तानिस्स तस्मिं समये ओलम्बन्ती’’तिआदिवचनतो (म. नि. ३.२४८) मरणमञ्चे निपन्नस्स ¶ यथूपचितं पापकम्मं वा कम्मनिमित्तं वा मनोद्वारे आपाथमागच्छति. तं आरब्भ उप्पन्नाय तदारम्मणपरियोसानाय जवनवीथिया अनन्तरं भवङ्गविसयं आरम्मणं कत्वा चुतिचित्तं उप्पज्जति. तस्मिं निरुद्धे तदेव आपाथगतं कम्मं वा कम्मनिमित्तं वा आरब्भ अनुपच्छिन्नकिलेसबलविनामितं दुग्गतिपरियापन्नं पटिसन्धिचित्तं उप्पज्जति. अयं अतीतारम्मणाय चुतिया अनन्तरा अतीतारम्मणा पटिसन्धि.

अपरस्स मरणसमये वुत्तप्पकारकम्मवसेन नरकादीसु अग्गिजालवण्णादिकं दुग्गतिनिमित्तं मनोद्वारे आपाथमागच्छति, तस्स द्विक्खत्तुं भवङ्गे उप्पज्जित्वा निरुद्धे तं आरम्मणं आरब्भ एकं आवज्जनं, मरणस्स आसन्नभावेन मन्दीभूतवेगत्ता पञ्च जवनानि, द्वे तदारम्मणानीति तीणि वीथिचित्तानि उप्पज्जन्ति. ततो भवङ्गविसयं आरम्मणं कत्वा एकं चुतिचित्तं. एत्तावता एकादस चित्तक्खणा अतीता होन्ति. अथस्स अवसेसपञ्चचित्तक्खणायुके तस्मिञ्ञेव आरम्मणे पटिसन्धिचित्तं उप्पज्जति. अयं अतीतारम्मणाय चुतिया अनन्तरा पच्चुप्पन्नारम्मणा पटिसन्धि.

अपरस्स ¶ मरणसमये पञ्चन्नं द्वारानं अञ्ञतरस्मिं रागादिहेतुभूतं हीनमारम्मणं आपाथमागच्छति. तस्स यथाक्कमेन उप्पन्ने वोट्ठब्बनावसाने मरणस्स आसन्नभावेन मन्दीभूतवेगत्ता पञ्च जवनानि, द्वे तदारम्मणानि च उप्पज्जन्ति. ततो भवङ्गविसयं आरम्मणं कत्वा एकं चुतिचित्तं. एत्तावता च द्वे भवङ्गानि, आवज्जनं, दस्सनं, सम्पटिच्छनं, सन्तीरणं, वोट्ठब्बनं, पञ्च जवनानि, द्वे तदारम्मणानि, एकं चुतिचित्तन्ति पञ्चदस चित्तक्खणा अतीता होन्ति. अथावसेसएकचित्तक्खणायुके तस्मिञ्ञेव आरम्मणे पटिसन्धिचित्तं उप्पज्जति. अयम्पि अतीतारम्मणाय चुतिया अनन्तरा पच्चुप्पन्नारम्मणा पटिसन्धि. एस ताव अतीतारम्मणाय सुगतिचुतिया अनन्तरा अतीतपच्चुप्पन्नारम्मणाय दुग्गतिपटिसन्धिया पवत्तनाकारो.

६२४. दुग्गतियं ठितस्स पन उपचितानवज्जकम्मस्स वुत्तनयेनेव तं अनवज्जकम्मं वा कम्मनिमित्तं वा मनोद्वारे आपाथमागच्छतीति कण्हपक्खे सुक्कपक्खं ठपेत्वा सब्बं पुरिमनयेनेव वेदितब्बं. अयं अतीतारम्मणाय दुग्गतिचुतिया अनन्तरा अतीतपच्चुप्पन्नारम्मणाय सुगतिपटिसन्धिया पवत्तनाकारो.

६२५. सुगतियं ¶ ठितस्स पन उपचितानवज्जकम्मस्स ‘‘तानिस्स तस्मिं समये ओलम्बन्ती’’तिआदिवचनतो मरणमञ्चे निपन्नस्स यथूपचितं अनवज्जकम्मं वा कम्मनिमित्तं वा मनोद्वारे आपाथमागच्छति. तञ्च खो उपचितकामावचरानवज्जकम्मस्सेव. उपचितमहग्गतकम्मस्स पन कम्मनिमित्तमेव आपाथमागच्छति. तं आरब्भ उप्पन्नाय तदारम्मणपरियोसानाय सुद्धाय वा जवनवीथिया अनन्तरं भवङ्गविसयं आरम्मणं कत्वा चुतिचित्तं उप्पज्जति. तस्मिं निरुद्धे तमेव आपाथगतं कम्मं वा कम्मनिमित्तं वा आरब्भ अनुपच्छिन्नकिलेसबलविनामितं सुगतिपरियापन्नं पटिसन्धिचित्तं उप्पज्जति. अयं अतीतारम्मणाय चुतिया अनन्तरा अतीतारम्मणा वा नवत्तब्बारम्मणा वा पटिसन्धि.

अपरस्स मरणसमये कामावचरअनवज्जकम्मवसेन मनुस्सलोके मातुकुच्छिवण्णसङ्खातं वा देवलोके उय्यानविमानकप्परुक्खादिवण्णसङ्खातं वा सुगतिनिमित्तं मनोद्वारे आपाथमागच्छति, तस्स दुग्गतिनिमित्ते ¶ दस्सितानुक्कमेनेव चुतिचित्तानन्तरं पटिसन्धिचित्तं उप्पज्जति. अयं अतीतारम्मणाय चुतिया अनन्तरा पच्चुप्पन्नारम्मणा पटिसन्धि.

अपरस्स मरणसमये ञातका ‘‘अयं तात तवत्थाय बुद्धपूजा करीयति चित्तं पसादेही’’ति वत्वा पुप्फदामपटाकादिवसेन रूपारम्मणं वा, धम्मस्सवनतूरियपूजादिवसेन सद्दारम्मणं वा, धूमवासगन्धादिवसेन गन्धारम्मणं वा, ‘‘इदं तात सायस्सु तवत्थाय दातब्बदेय्यधम्म’’न्ति वत्वा मधुफाणितादिवसेन रसारम्मणं वा, ‘‘इदं तात फुसस्सु तवत्थाय दातब्बदेय्यधम्म’’न्ति वत्वा चीनपट्टसोमारपट्टादिवसेन फोट्ठब्बारम्मणं वा पञ्चद्वारे उपसंहरन्ति, तस्स तस्मिं आपाथगते रूपादिआरम्मणे यथाक्कमेन उप्पन्नवोट्ठब्बनावसाने मरणस्स आसन्नभावेन मन्दीभूतवेगत्ता पञ्च जवनानि, द्वे तदारम्मणानि च उप्पज्जन्ति. ततो भवङ्गविसयं आरम्मणं कत्वा एकं चुतिचित्तं, तदवसाने तस्मिञ्ञेव एकचित्तक्खणट्ठितिके आरम्मणे पटिसन्धिचित्तं उप्पज्जति. अयम्पि अतीतारम्मणाय चुतिया अनन्तरा पच्चुप्पन्नारम्मणा पटिसन्धि.

६२६. अपरस्स पन पथवीकसिणज्झानादिवसेन पटिलद्धमहग्गतस्स सुगतियं ठितस्स मरणसमये कामावचरकुसलकम्म-कम्मनिमित्त-गतिनिमित्तानं वा अञ्ञतरं, पथवीकसिणादिकं वा निमित्तं, महग्गतचित्तं वा मनोद्वारे आपाथमागच्छति, चक्खुसोतानं वा अञ्ञतरस्मिं कुसलुप्पत्तिहेतुभूतं ¶ पणीतमारम्मणं आपाथमागच्छति, तस्स यथाक्कमेन उप्पन्नवोट्ठब्बनावसाने मरणस्स आसन्नभावेन मन्दीभूतवेगत्ता पञ्च जवनानि उप्पज्जन्ति. महग्गतगतिकानं पन तदारम्मणं नत्थि, तस्मा जवनानन्तरंयेव भवङ्गविसयं आरम्मणं कत्वा एकं चुतिचित्तं उप्पज्जति. तस्सावसाने कामावचरमहग्गतसुगतीनं अञ्ञतरसुगतिपरियापन्नं यथूपट्ठितेसु आरम्मणेसु अञ्ञतरारम्मणं पटिसन्धिचित्तं उप्पज्जति. अयं नवत्तब्बारम्मणाय सुगतिचुतिया अनन्तरा अतीतपच्चुप्पन्ननवत्तब्बारम्मणानं अञ्ञतरारम्मणा पटिसन्धि.

एतेनानुसारेन आरुप्पचुतियापि अनन्तरा पटिसन्धि वेदितब्बा. अयं अतीतनवत्तब्बारम्मणाय सुगतिचुतिया अनन्तरा अतीतनवत्तब्बपच्चुप्पन्नारम्मणाय पटिसन्धिया पवत्तनाकारो.

६२७. दुग्गतियं ¶ ठितस्स पन पापकम्मिनो वुत्तनयेनेव तं कम्मं कम्मनिमित्तं गतिनिमित्तं वा मनोद्वारे. पञ्चद्वारे वा पन अकुसलुप्पत्ति हेतुभूतं आरम्मणं आपाथमागच्छति, अथस्स यथाक्कमेन चुतिचित्तावसाने दुग्गतिपरियापन्नं तेसु आरम्मणेसु अञ्ञतरारम्मणं पटिसन्धिचित्तं उप्पज्जति. अयं अतीतारम्मणाय दुग्गतिचुतिया अनन्तरा अतीतपच्चुप्पन्नारम्मणाय पटिसन्धिया पवत्तनाकारोति. एत्तावता एकूनवीसतिविधस्सापि विञ्ञाणस्स पटिसन्धिवसेन पवत्ति दीपिता होति.

६२८. तयिदं सब्बम्पि एवं,

पवत्तमानं सन्धिम्हि, द्वेधा कम्मेन वत्तति;

मिस्सादीहि च भेदेहि, भेदस्स दुविधादिको.

इदञ्हि एकूनवीसतिविधम्पि विपाकविञ्ञाणं पटिसन्धिम्हि पवत्तमाना द्वेधा कम्मेन वत्तति. यथासकञ्हि एकस्स जनककम्मं नानाक्खणिककम्मपच्चयेन चेव उपनिस्सयपच्चयेन च पच्चयो होति. वुत्तञ्हेतं ‘‘कुसलाकुसलं कम्मं विपाकस्स उपनिस्सयपच्चयेन पच्चयो’’ति (पट्ठा. १.१.४२३). एवं वत्तमानस्स पनस्स मिस्सादीहि भेदेहि दुविधादिकोपि भेदो वेदितब्बो.

सेय्यथिदं ¶ – इदञ्हि पटिसन्धिवसेन एकधा पवत्तमानम्पि रूपेन सह मिस्सामिस्सभेदतो दुविधं. कामरूपारूपभवभेदतो तिविधं. अण्डजजलाबुज-संसेदज-ओपपातिकयोनिवसेन चतुब्बिधं. गतिवसेन पञ्चविधं. विञ्ञाणट्ठितिवसेन सत्तविधं. सत्तावासवसेन अट्ठविधं होति.

६२९. तत्थ,

मिस्सं द्विधा भावभेदा, सभावं तत्थ च द्विधा;

द्वे वा तयो वा दसका, ओमतो आदिना सह.

मिस्सं द्विधा भावभेदाति यं हेतं एत्थ अञ्ञत्र अरूपभवा रूपमिस्सं पटिसन्धिविञ्ञाणं उप्पज्जति, तं रूपभवे इत्थिन्द्रियपुरिसिन्द्रियसङ्खातेन भावेन विना उप्पत्तितो. कामभवे अञ्ञत्र जातिपण्डकपटिसन्धिया भावेन सह उप्पत्तितो स-भावं, अ-भावन्ति दुविधं होति.

सभावं ¶ तत्थ च द्विधाति तत्थापि च यं स-भावं, तं इत्थिपुरिसभावानं अञ्ञतरेन सह उप्पत्तितो दुविधमेव होति.

द्वे वा तयो वा दसका ओमतो आदिना सहाति यं हेतमेत्थ ‘‘मिस्सं अमिस्स’’न्ति दुके आदिभूतं रूपमिस्सं पटिसन्धिविञ्ञाणं, तेन सह वत्थुकायदसकवसेन द्वे वा, वत्थुकायभावदसकवसेन तयो वा दसका ओमतो उप्पज्जन्ति, नत्थि इतो परं रूपपरिहानीति. तं पनेतं एवं ओमकपरिमाणं उप्पज्जमानं अण्डजजलाबुजनामिकासु द्वीसु योनीसु जातिउण्णाय एकेन अंसुना उद्धटसप्पिमण्डप्पमाणं कललन्ति लद्धसङ्खं हुत्वा उप्पज्जति. तत्थ योनीनं गतिवसेन सम्भवभेदो वेदितब्बो.

६३०. एतासु हि,

निरये भुम्मवज्जेसु, देवेसु च न योनियो;

तिस्सो पुरिमिका होन्ति, चतस्सोपि गतित्तये.

तत्थ ¶ देवेसु चाति चसद्देन यथा निरये च भुम्मवज्जेसु च देवेसु, एवं निज्झामतण्हिकपेतेसु च पुरिमिका तिस्सो योनियो न सन्तीति वेदितब्बा. ओपपातिका एव हि ते होन्ति. सेसे पन तिरच्छानपेत्तिविसयमनुस्ससङ्खाते गतित्तये पुब्बे वज्जितभुम्मदेवेसु च चतस्सोपि योनियो होन्ति. तत्थ,

तिंस नव चेव रूपीसु, सत्तति उक्कंसतोथ रूपानि;

संसेदुपपातयोनिसु, अथ वा अवकंसतो तिंस.

रूपीब्रह्मेसु ताव ओपपातिकयोनिकेसु चक्खुसोतवत्थुदसकानं जीवितनवकस्स चाति चतुन्नं कलापानं वसेन तिंस च नव च पटिसन्धिविञ्ञाणेन सह रूपानि उप्पज्जन्ति. रूपी ब्रह्मे पन ठपेत्वा अञ्ञेसु संसेदजओपपातिकयोनिकेसु उक्कंसतो चक्खुसोतघानजिव्हाकायवत्थुभावदसकानं वसेन सत्तति, तानि च निच्चं देवेसु. तत्थ वण्णो गन्धो रसो ओजा चतस्सो चापि धातुयो चक्खुपसादो जीवितन्ति अयं दसरूपपरिमाणो रूपपुञ्जो चक्खुदसको नाम. एवं सेसा वेदितब्बा ¶ . अवकंसतो पन जच्चन्धबधिरअघानकनपुंसकस्स जिव्हाकायवत्थुदसकानं वसेन तिंस रूपानि उप्पज्जन्ति. उक्कंसावकंसानं पन अन्तरे अनुरूपतो विकप्पो वेदितब्बो.

६३१. एवं विदित्वा पुन,

खन्धारम्मणगतिहेतु-वेदनापीतिवितक्कविचारेहि;

भेदाभेदविसेसो, चुतिसन्धीनं परिञ्ञेय्यो.

या हेसा मिस्सामिस्सतो दुविधा पटिसन्धि, या चस्सा अतीतानन्तरा चुति, तासं इमेहि खन्धादीहि भेदाभेदविसेसो ञातब्बोति अत्थो.

कथं? कदाचि हि चतुक्खन्धाय आरुप्पचुतिया अनन्तरा चतुक्खन्धाव आरम्मणतोपि अभिन्ना पटिसन्धि होति. कदाचि अमहग्गतबहिद्धारम्मणाय महग्गतअज्झत्तारम्मणा. अयं ताव अरूपभूमीसुयेव नयो. कदाचि पन चतुक्खन्धाय अरूपचुतिया अनन्तरा पञ्चक्खन्धा कामावचरपटिसन्धि ¶ . कदाचि पञ्चक्खन्धाय कामावचरचुतिया रूपावचरचुतिया वा अनन्तरा चतुक्खन्धा अरूपपटिसन्धि. एवं अतीतारम्मणाय चुतिया पच्चुप्पन्नारम्मणा पटिसन्धि. एकच्चसुगतिचुतिया एकच्चदुग्गतिपटिसन्धि. अहेतुकचुतिया सहेतुकपटिसन्धि. दुहेतुकचुतिया तिहेतुकपटिसन्धि. उपेक्खासहगतचुतिया सोमनस्ससहगतपटिसन्धि. अप्पीतिकचुतिया सप्पीतिकपटिसन्धि. अवितक्कचुतिया सवितक्कपटिसन्धि. अविचारचुतिया सविचारपटिसन्धि. अवितक्काविचारचुतिया सवितक्कसविचारपटिसन्धीति तस्स तस्स विपरीततो च यथायोगं योजेतब्बं.

६३२.

लद्धपच्चयमिति धम्ममत्तमेतं भवन्तरमुपेति;

नास्स ततो सङ्कन्ति, न ततो हेतुं विना होति.

इति हेतं लद्धपच्चयं रूपारूपधम्ममत्तं उप्पज्जमानं भवन्तरमुपेतीति वुच्चति, न सत्तो, न जीवो. तस्स च नापि अतीतभवतो इध सङ्कन्ति अत्थि. नापि ततो हेतुं विना इध पातुभावो. तयिदं पाकटेन मनुस्सचुतिपटिसन्धिक्कमेन पकासयिस्साम.

अतीतभवस्मिं ¶ हि सरसेन उपक्कमेन वा समासन्नमरणस्स असय्हानं सब्बङ्गपच्चङ्गसन्धिबन्धनच्छेदकानं मारणन्तिकवेदनासत्थानं सन्निपातं असहन्तस्स आतपे पक्खित्तहरिततालपण्णमिव कमेन उपसुस्समाने सरीरे निरुद्धेसु चक्खादीसु इन्द्रियेसु हदयवत्थुमत्ते पतिट्ठितेसु कायिन्द्रियमनिन्द्रियजीवितिन्द्रियेसु तङ्खणावसेसहदयवत्थुसन्निस्सितं विञ्ञाणं गरुकसमासेवितासन्नपुब्बकतानं अञ्ञतरं लद्धावसेसपच्चयसङ्खारसङ्खातं कम्मं, तदुपट्ठापितं वा कम्मनिमित्तगतिनिमित्तसङ्खातं विसयं आरब्भ पवत्तति. तदेवं पवत्तमानं तण्हाविज्जानं अप्पहीनत्ता अविज्जापटिच्छादितादीनवे तस्मिं विसये तण्हा नामेति, सहजातसङ्खारा खिपन्ति. तं सन्ततिवसेन तण्हाय नामियमानं सङ्खारेहि खिप्पमानं ओरिमतीररुक्खविनिबद्धरज्जुमालम्बित्वा मातिकातिक्कमको विय पुरिमञ्च निस्सयं जहति, अपरञ्च कम्मसमुट्ठापितं निस्सयं अस्सादयमानं वा अनस्सादयमानं वा आरम्मणादीहियेव पच्चयेहि पवत्ततीति.

एत्थ च पुरिमं चवनतो चुति. पच्छिमं भवन्तरादिपटिसन्धानतो पटिसन्धीति वुच्चति ¶ . तदेतं नापि पुरिमभवा इधागतं, नापि ततो कम्मसङ्खारनतिविसयादिहेतुं विना पातुभूतन्ति वेदितब्बं.

६३३.

सियुं निदस्सनानेत्थ, पटिघोसादिका अथ;

सन्तानबन्धतो नत्थि, एकता नापि नानता.

एत्थ चेतस्स विञ्ञाणस्स पुरिमभवतो इध अनागमने, अतीतभवपरियापन्नहेतूति च उप्पादे पटिघोस-पदीप-मुद्दा-पटिबिम्बप्पकारा धम्मा निदस्सनानि सियुं. यथा हि पटिघोस-पदीप-मुद्दा-छाया सद्दादिहेतुका होन्ति अञ्ञत्र अगन्त्वा एवमेवं इदं चित्तं.

एत्थ च सन्तानबन्धतो नत्थि एकता नापि नानता. यदि हि सन्तानबन्धे सति एकन्तमेकता भवेय्य, न खीरतो दधि सम्भूतं सिया. अथापि एकन्तनानता भवेय्य, न खीरस्साधीनो दधि सिया. एस नयो सब्बहेतुहेतुसमुप्पन्नेसु. एवञ्च सति सब्बलोकवोहारलोपो ¶ सिया, सो च अनिट्ठो. तस्मा एत्थ न एकन्तमेकता वा नानता वा उपगन्तब्बाति.

६३४. एत्थाह – ननु एवं असङ्कन्तिपातुभावे सति ये इमस्मिं मनुस्सत्तभावे खन्धा, तेसं निरुद्धत्ता, फलपच्चयस्स च कम्मस्स तत्थ अगमनतो अञ्ञस्स अञ्ञतो च तं फलं सिया, उपभुञ्जके च असति कस्स तं फलं सिया, तस्मा न सुन्दरमिदं विधानन्ति. तत्रिदं वुच्चति –

सन्ताने यं फलं एतं, नाञ्ञस्स न च अञ्ञतो;

बीजानं अभिसङ्खारो, एतस्सत्थस्स साधको.

एकसन्तानस्मिं हि फलं उप्पज्जमानं तत्थ एकन्तएकत्तनानत्तानं पटिसिद्धत्ता अञ्ञस्साति वा अञ्ञतोति वा न होति. एतस्स च पनत्थस्स बीजानं अभिसङ्खारो साधको. अम्बबीजादीनं हि अभिसङ्खारेसु कतेसु तस्स बीजस्स सन्ताने लद्धपच्चयो कालन्तरे फलविसेसो उप्पज्जमानो न अञ्ञबीजानं, नापि अञ्ञाभिसङ्खारपच्चया उप्पज्जति ¶ , न च तानि बीजानि, ते अभिसङ्खारा वा फलट्ठानं पापुणन्ति, एवं सम्पदमिदं वेदितब्बं. विज्जासिप्पोसधादीहि चापि बालसरीरे उपयुत्तेहि कालन्तरे वुड्ढसरीरादीसु फलदेहि अयमत्थो वेदितब्बो.

यम्पि वुत्तं ‘‘उपभुञ्जके च असति कस्स तं फलं सिया’’ति, तत्थ,

फलस्सुप्पत्तिया एव, सिद्धा भुञ्जकसम्मुति;

फलुप्पादेन रुक्खस्स, यथा फलति सम्मुति.

यथा हि रुक्खसङ्खातानं धम्मानं एकदेसभूतस्स रुक्खफलस्स उप्पत्तिया एव रुक्खो फलतीति वा फलितोति वा वुच्चति, तथा देवमनुस्ससङ्खातानं खन्धानं एकदेसभूतस्स उपभोगसङ्खातस्स सुखदुक्खफलस्स उप्पादेनेव देवो, मनुस्सो वा उपभुञ्जतीति वा, सुखितो, दुक्खितोति वा वुच्चति. तस्मा न एत्थ अञ्ञेन उपभुञ्जकेन नाम कोचि अत्थो अत्थीति.

६३५. योपि ¶ वदेय्य ‘‘एवं सन्तेपि एते सङ्खारा विज्जमाना वा फलस्स पच्चया सियुं, अविज्जमाना वा, यदि च विज्जमाना पवत्तिक्खणेयेव नेसं विपाकेन भवितब्बं, अथ अविज्जमाना पवत्तितो पुब्बे पच्छा च निच्चं फलावहा सियु’’न्ति, सो एवं वत्तब्बो –

कतत्ता पच्चया एते, न च निच्चं फलावहा;

पाटिभोगादिकं तत्थ, वेदितब्बं निदस्सनं.

कतत्तायेव हि सङ्खारा अत्तनो फलस्स पच्चया होन्ति, न विज्जमानत्ता, अविज्जमानत्ता वा. यथाह – ‘‘कामावचरस्स कुसलस्स कम्मस्स कतत्ता उपचितत्ता विपाकं चक्खुविञ्ञाणं उप्पन्नं होती’’तिआदि (ध. स. ४३१). यथारहस्स च अत्तनो फलस्स पच्चया हुत्वा न पुन फलावहा होन्ति विपाकत्ता. एतस्स चत्थस्स विभावने इदं पाटिभोगादिकं निदस्सनं वेदितब्बं. यथा हि लोके यो कस्सचि अत्थस्स निय्यातनत्थं पाटिभोगो होति, भण्डं वा किणाति, इणं वा गण्हाति, तस्स तं किरियाकरणमत्तमेव तदत्थनिय्यातनादिम्हि ¶ पच्चयो होति, न किरियाय विज्जमानत्तं, अविज्जमानत्तं वा, न च तदत्थनिय्यातनादितो परम्पि धारकोव होति. कस्मा? निय्यातनादीनं कतत्ता. एवं कतत्ताव सङ्खारापि अत्तनो फलस्स पच्चया होन्ति, न च यथारहं फलदानतो परम्पि फलावहा होन्तीति. एत्तावता मिस्सामिस्सवसेन द्वेधापि वत्तमानस्स पटिसन्धिविञ्ञाणस्स सङ्खारपच्चया पवत्ति दीपिता होति.

६३६. इदानि सब्बेस्वेव तेसु बात्तिंसविपाकविञ्ञाणेसु सम्मोहविघातत्थं,

पटिसन्धिपवत्तीनं, वसेनेते भवादिसु;

विजानितब्बा सङ्खारा, यथा येसञ्च पच्चया.

तत्थ तयो भवा, चतस्सो योनियो, पञ्च गतियो, सत्त विञ्ञाणट्ठितियो, नव सत्तावासाति एते भवादयो नाम. एतेसु भवादीसु पटिसन्धियं पवत्ते च एते येसं विपाकविञ्ञाणानं पच्चया, यथा च पच्चया होन्ति, तथा विजानितब्बाति अत्थो.

तत्थ ¶ पुञ्ञाभिसङ्खारे ताव कामावचरअट्ठचेतनाभेदो पुञ्ञाभिसङ्खारो अविसेसेन कामभवे सुगतियं नवन्नं विपाकविञ्ञाणानं पटिसन्धियं नानक्खणिककम्मपच्चयेन चेव उपनिस्सयपच्चयेन चाति द्वेधा पच्चयो. रूपावचरपञ्चकुसलचेतनाभेदो पुञ्ञाभिसङ्खारो रूपभवे पटिसन्धियं एव पञ्चन्नं.

वुत्तप्पभेदकामावचरो पन कामभवे सुगतियं उपेक्खासहगताहेतुमनोविञ्ञाणधातुवज्जानं सत्तन्नं परित्तविपाकविञ्ञाणानं वुत्तनयेनेव द्वेधा पच्चयो पवत्ते, नो पटिसन्धियं. स्वेव रूपभवे पञ्चन्नं विपाकविञ्ञाणानं तथेव पच्चयो पवत्ते, नो पटिसन्धियं. कामभवे पन दुग्गतियं अट्ठन्नम्पि परित्तविपाकविञ्ञाणानं तथेव पच्चयो पवत्ते, नो पटिसन्धियं. तत्थ निरये महामोग्गल्लानत्थेरस्स नरकचारिकादीसु इट्ठारम्मणसमायोगे सो पच्चयो होति, तिरच्छानेसु पन पेतमहिद्धिकेसु च इट्ठारम्मणं लब्भतियेव.

स्वेव कामभवे सुगतियं सोळसन्नम्पि कुसलविपाकविञ्ञाणानं तथेव पच्चयो पवत्ते च ¶ पटिसन्धियञ्च. अविसेसेन पन पुञ्ञाभिसङ्खारो रूपभवे दसन्नं विपाकविञ्ञाणानं तथेव पच्चयो पवत्ते च पटिसन्धियञ्च.

द्वादसाकुसलचेतनाभेदो अपुञ्ञाभिसङ्खारो कामभवे दुग्गतियं एकस्स विञ्ञाणस्स तथेव पच्चयो पटिसन्धियं, नो पवत्ते. छन्नं पवत्ते, नो पटिसन्धियं. सत्तन्नम्पि अकुसलविपाकविञ्ञाणानं पवत्ते च पटिसन्धियञ्च.

कामभवे पन सुगतियं तेसंयेव सत्तन्नं तथेव पच्चयो पवत्ते, नो पटिसन्धियं. रूपभवे चतुन्नं विपाकविञ्ञाणानं तथेव पच्चयो पवत्ते, नो पटिसन्धियं. सो च खो कामावचरे अनिट्ठरूपदस्सनसद्दसवनवसेन, ब्रह्मलोके पन अनिट्ठरूपादयो नाम नत्थि. तथा कामावचरदेवलोकेपि.

आनेञ्जाभिसङ्खारो अरूपभवे चतुन्नं विपाकविञ्ञाणानं तथेव पच्चयो पवत्ते च पटिसन्धियञ्च.

एवं ¶ ताव भवेसु पटिसन्धिपवत्तीनं वसेन एते सङ्खारा येसं पच्चया, यथा च पच्चया होन्ति, तथा विजानितब्बा. एतेनेव नयेन योनिआदीसुपि वेदितब्बा.

६३७. तत्रिदं आदितो पट्ठाय मुखमत्तपकासनं – इमेसु हि सङ्खारेसु यस्मा पुञ्ञाभिसङ्खारो ताव द्वीसु भवेसु पटिसन्धिं दत्वा सब्बमत्तनो विपाकं जनेति. तथा अण्डजादीसु चतूसु योनीसु, देवमनुस्ससङ्खातासु द्वीसु गतीसु, नानत्तकायनानत्तसञ्ञीनानत्तकायएकत्तसञ्ञी-एकत्तकायनानत्तसञ्ञी-एकत्तकायएकत्तसञ्ञीसङ्खातासु चतूसु विञ्ञाणट्ठितीसु. असञ्ञसत्तावासे पनेस रूपमत्तमेवाभिसङ्खरोतीति चतूसुयेव सत्तावासेसु च पटिसन्धिं दत्वा सब्बमत्तनो विपाकं जनेति. तस्मा एस एतेसु द्वीसु भवेसु, चतूसु योनीसु, द्वीसु गतीसु, चतूसु विञ्ञाणट्ठितीसु, चतूसु सत्तावासेसु च एकवीसतिया विपाकविञ्ञाणानं वुत्तनयेनेव पच्चयो होति यथासम्भवं पटिसन्धियं पवत्ते च.

अपुञ्ञाभिसङ्खारो पन यस्मा एकस्मिंयेव कामभवे चतूसु योनीसु, अवसेसासु तीसु गतीसु ¶ , नानत्तकायएकत्तसञ्ञीसङ्खाताय एकिस्सा विञ्ञाणट्ठितिया, तादिसेयेव च एकस्मिं सत्तावासे पटिसन्धिवसेन विपच्चति, तस्मा एस एकस्मिं भवे, चतूसु योनीसु, तीसु गतीसु, एकिस्सा विञ्ञाणट्ठितिया, एकम्हि च सत्तावासे सत्तन्नं विपाकविञ्ञाणानं वुत्तनयेनेव पच्चयो पटिसन्धियं पवत्ते च.

आनेञ्जाभिसङ्खारो पन यस्मा एकस्मिंयेव अरूपभवे, एकिस्सा ओपपातिकयोनिया, एकिस्सा देवगतिया, आकासानञ्चायतनादिकासु तीसु विञ्ञाणट्ठितीसु, आकासानञ्चायतनादिकेसु च चतूसु सत्तावासेसु पटिसन्धिवसेन विपच्चति, तस्मा एस एकस्मिं भवे, एकिस्सा योनिया, एकिस्सा गतिया, तीसु विञ्ञाणट्ठितीसु, चतूसु सत्तावासेसु चतुन्नं विञ्ञाणानं वुत्तनयेनेव पच्चयो होति पटिसन्धियं पवत्ते चाति. एवं,

पटिसन्धिपवत्तीनं ¶ , वसेनेते भवादिसु;

विजानितब्बा सङ्खारा, यथा येसञ्च पच्चयाति.

अयं ‘‘सङ्खारपच्चया विञ्ञाण’’न्ति पदस्मिं वित्थारकथा.

विञ्ञाणपच्चयानामरूपपदवित्थारकथा

६३८. विञ्ञाणपच्चया नामरूपपदे –

विभागा नामरूपानं, भवादीसु पवत्तितो;

सङ्गहा पच्चयनया, विञ्ञातब्बो विनिच्छयो.

विभागा नामरूपानन्ति एत्थ हि नामन्ति आरम्मणाभिमुखं नमनतो वेदनादयो तयो खन्धा, रूपन्ति चत्तारि महाभूतानि चतुन्नञ्च महाभूतानं उपादायरूपं. तेसं विभागो खन्धनिद्देसे वुत्तोयेवाति. एवं तावेत्थ विभागा नामरूपानं विञ्ञातब्बो विनिच्छयो.

भवादीसु पवत्तितोति एत्थ च नामं एकं सत्तावासं ठपेत्वा सब्बभवयोनिगतिविञ्ञाणट्ठितिसेससत्तावासेसु ¶ पवत्तति, रूपं द्वीसु भवेसु, चतूसु योनीसु, पञ्चसु गतीसु, पुरिमासु चतूसु विञ्ञाणट्ठितीसु, पञ्चसु सत्तावासेसु पवत्तति.

एवं पवत्तमाने च एतस्मिं नामरूपे यस्मा अभावकगब्भसेय्यकानं अण्डजानञ्च पटिसन्धिक्खणे वत्थुकायदसकवसेन रूपतो द्वेसन्ततिसीसानि, तयो च अरूपिनो खन्धा पातुभवन्ति, तस्मा तेसं वित्थारेन रूपरूपतो वीसति धम्मा, तयो च अरूपिनो खन्धाति एते तेवीसति धम्मा विञ्ञाणपच्चया नामरूपन्ति वेदितब्बा. अग्गहितग्गहणेन पन एकसन्ततिसीसतो नव रूपधम्मे अपनेत्वा चुद्दस. सभावकानं भावदसकं पक्खिपित्वा तेत्तिंस, तेसम्पि अग्गहितग्गहणेन सन्ततिसीसद्वयतो अट्ठारस रूपधम्मे अपनेत्वा पन्नरस.

यस्मा च ओपपातिकसत्तेसु ब्रह्मकायिकादीनं पटिसन्धिक्खणे चक्खुसोतवत्थुदसकानं, जीवितिन्द्रियनवकस्स च वसेन रूपतो चत्तारि सन्ततिसीसानि, तयो च अरूपिनो खन्धा पातुभवन्ति, तस्मा तेसं वित्थारेन रूपरूपतो एकूनचत्तालीस धम्मा, तयो च अरूपिनो खन्धाति ¶ एते बाचत्तालीस धम्मा विञ्ञाणपच्चया नामरूपन्ति वेदितब्बा. अग्गहितग्गहणेन पन सन्ततिसीसत्तयतो सत्तवीसति धम्मे अपनेत्वा पन्नरस.

कामभवे पन यस्मा सेसओपपातिकानं, संसेदजानं वा सभावकपरिपुण्णायतनानं पटिसन्धिक्खणे रूपतो सत्त सन्ततिसीसानि, तयो च अरूपिनो खन्धा पातुभवन्ति, तस्मा तेसं वित्थारेन रूपरूपतो सत्तति धम्मा, तयो च अरूपिनो खन्धाति एते तेसत्तति धम्मा विञ्ञाणपच्चया नामरूपन्ति वेदितब्बा. अग्गहितग्गहणेन पन रूपसन्ततिसीसछक्कतो चतुपञ्ञास धम्मे अपनेत्वा एकूनवीसति. एस उक्कंसो. अवकंसेन पन तंतंरूपसन्ततिसीसविकलानं तस्स तस्स वसेन हापेत्वा हापेत्वा सङ्खेपतो वित्थारतो च पटिसन्धियं विञ्ञाणपच्चया नामरूपसङ्खा वेदितब्बा.

अरूपीनं पन तयोव अरूपिनो खन्धा. असञ्ञीनं रूपतो जीवितिन्द्रियनवकमेवाति. एस ताव पटिसन्धियं नयो.

पवत्ते पन सब्बत्थ रूपप्पवत्तिदेसे पटिसन्धिचित्तस्स ठितिक्खणे पटिसन्धिचित्तेन सह पवत्तउतुतो ¶ उतुसमुट्ठानं सुद्धट्ठकं पातुभवति. पटिसन्धिचित्तं पन रूपं न समुट्ठापेति. तञ्हि यथा पपाते पतितपुरिसो परस्स पच्चयो होतुं न सक्कोति, एवं वत्थुदुब्बलताय दुब्बलत्ता रूपं समुट्ठापेतुं न सक्कोति. पटिसन्धिचित्ततो पन उद्धं पठमभवङ्गतो पभुति चित्तसमुट्ठानं सुद्धट्ठकं, सद्दपातुभावकाले पटिसन्धिक्खणतो उद्धं पवत्तउतुतो चेव चित्ततो च सद्दनवकं, ये पन कबळीकाराहारूपजीविनो गब्भसेय्यकसत्ता, तेसं,

‘‘यञ्चस्स भुञ्जति माता, अन्नं पानञ्च भोजनं;

तेन सो तत्थ यापेति, मातुकुच्छिगतो नरो’’ति. –

वचनतो मातरा अज्झोहरिताहारेन अनुगते सरीरे, ओपपातिकानं सब्बपठमं अत्तनो मुखगतं खेळं अज्झोहरणकाले आहारसमुट्ठानं सुद्धट्ठकन्ति इदं आहारसमुट्ठानस्स सुद्धट्ठकस्स, उतुचित्तसमुट्ठानानञ्च उक्कंसतो द्विन्नं नवकानं वसेन छब्बीसतिविधं, पुब्बे एकेकचित्तक्खणे ¶ तिक्खत्तुं उप्पज्जमानं वुत्तं कम्मसमुट्ठानञ्च सत्ततिविधन्ति छन्नवुतिविधं रूपं, तयो च अरूपिनो खन्धाति समासतो नवनवुति धम्मा. यस्मा वा सद्दो अनियतो कदाचिदेव पातुभावतो, तस्मा दुविधम्पि तं अपनेत्वा इमे सत्तनवुति धम्मा यथासम्भवं सब्बसत्तानं विञ्ञाणपच्चया नामरूपन्ति वेदितब्बं. तेसं हि सुत्तानम्पि पमत्तानम्पि खादन्तानम्पि पिवन्तानम्पि दिवा च रत्तिञ्च एते विञ्ञाणपच्चया पवत्तन्ति. तञ्च नेसं विञ्ञाणपच्चयभावं परतो वण्णयिस्साम.

यम्पनेतमेत्थ कम्मजरूपं, तं भवयोनिगतिठितिसत्तावासेसु सब्बपठमं पतिट्ठहन्तम्पि तिसमुट्ठानिकरूपेन अनुपत्थद्धं न सक्कोति सण्ठातुं, नापि तिसमुट्ठानिकं तेन अनुपत्थद्धं. अथ खो वातब्भाहतापि चतुद्दिसा ववत्थापिता नळकलापियो विय, ऊमिवेगब्भाहतापि महासमुद्दे कत्थचि लद्धपतिट्ठा भिन्नवाहनिका विय च अञ्ञमञ्ञुपत्थद्धानेवेतानि अपतमानानि सण्ठहित्वा एकम्पि वस्सं द्वेपि वस्सानि…पे… वस्ससतम्पि याव तेसं सत्तानं आयुक्खयो वा पुञ्ञक्खयो वा, ताव पवत्तन्तीति. एवं भवादीसु पवत्तितोपेत्थ विञ्ञातब्बो विनिच्छयो.

६३९. सङ्गहाति एत्थ च यं आरुप्पे पवत्तिपटिसन्धीसु, पञ्चवोकारभवे च पवत्तियं विञ्ञाणपच्चया ¶ नाममेव, यञ्च असञ्ञेसु सब्बत्थ, पञ्चवोकारभवे च पवत्तियं विञ्ञाणपच्चया रूपमेव, यञ्च पञ्चवोकारभवे सब्बत्थ विञ्ञाणपच्चया नामरूपं, तं सब्बं नामञ्च रूपञ्च नामरूपञ्च नामरूपन्ति एवं एकदेससरूपेकसेसनयेन सङ्गहेत्वा विञ्ञाणपच्चया नामरूपन्ति वेदितब्बं.

असञ्ञेसु विञ्ञाणाभावा अयुत्तन्ति चे, नायुत्तं. इदम्पि,

नामरूपस्स यं हेतु, विञ्ञाणं तं द्विधा मतं;

विपाकमविपाकञ्च, युत्तमेव यतो इदं.

यञ्हि नामरूपस्स हेतु विञ्ञाणं, तं विपाकाविपाकभेदतो द्वेधा मतं. इदञ्च असञ्ञसत्तेसु कम्मसमुट्ठानत्ता पञ्चवोकारभवे पवत्तअभिसङ्खारविञ्ञाणपच्चया रूपं. तथा पञ्चवोकारे पवत्तियं कुसलादिचित्तक्खणे कम्मसमुट्ठानन्ति युत्तमेव इदं. एवं सङ्गहतोपेत्थ विञ्ञातब्बो विनिच्छयो.

६४०. पच्चयनयाति ¶ एत्थ हि,

नामस्स पाकविञ्ञाणं, नवधा होति पच्चयो;

वत्थुरूपस्स नवधा, सेसरूपस्स अट्ठधा.

अभिसङ्खारविञ्ञाणं, होति रूपस्स एकधा;

तदञ्ञं पन विञ्ञाणं, तस्स तस्स यथारहं.

यञ्हेतं पटिसन्धियं पवत्तियं वा विपाकसङ्खातं नामं, तस्स रूपमिस्सस्स वा अमिस्सस्स वा पटिसन्धिकं वा अञ्ञं वा विपाकविञ्ञाणं सहजातअञ्ञमञ्ञनिस्सयसम्पयुत्तविपाकाहारिन्द्रियअत्थिअविगतपच्चयेहि नवधा पच्चयो होति.

वत्थुरूपस्स पटिसन्धियं सहजातअञ्ञमञ्ञनिस्सयविपाकाहारिन्द्रियविप्पयुत्तअत्थिअविगतपच्चयेहि ¶ नवधा पच्चयो होति. ठपेत्वा पन वत्थुरूपं सेसरूपस्स इमेसु नवसु अञ्ञमञ्ञपच्चयं अपनेत्वा सेसेहि अट्ठहि पच्चयेहि पच्चयो होति.

अभिसङ्खारविञ्ञाणं पन असञ्ञसत्तरूपस्स वा पञ्चवोकारभवे वा कम्मजस्स रूपस्स सुत्तन्तिकपरियायतो उपनिस्सयवसेन एकधाव पच्चयो होति. अवसेसं पठमभवङ्गतो पभुति सब्बम्पि विञ्ञाणं तस्स तस्स नामरूपस्स यथारहं पच्चयो होतीति वेदितब्बं. वित्थारतो पन तस्स पच्चयनये दस्सियमाने सब्बापि पट्ठानकथा वित्थारेतब्बा होतीति न नं आरभाम.

तत्थ सिया – कथं पनेतं जानितब्बं ‘‘पटिसन्धिनामरूपं विञ्ञाणपच्चया होती’’ति? सुत्ततो युत्तितो च. सुत्ते हि ‘‘चित्तानुपरिवत्तिनो धम्मा’’तिआदिना (ध. स. दुकमातिका ६२) नयेन बहुधा वेदनादीनं विञ्ञाणपच्चयता सिद्धा. युत्तितो पन,

चित्तजेन हि रूपेन, इध दिट्ठेन सिज्झति;

अदिट्ठस्सापि रूपस्स, विञ्ञाणं पच्चयो इति.

चित्ते हि पसन्ने अप्पसन्ने वा तदनुरूपानि रूपानि उप्पज्जमानानि दिट्ठानि. दिट्ठेन च अदिट्ठस्स अनुमानं होतीति इमिना इध दिट्ठेन चित्तजरूपेन अदिट्ठस्सापि पटिसन्धिरूपस्स विञ्ञाणं पच्चयो होतीति जानितब्बमेतं. कम्मसमुट्ठानस्सापि ¶ हि तस्स चित्तसमुट्ठानस्सेव विञ्ञाणपच्चयता पट्ठाने आगताति. एवं पच्चयनयतोपेत्थ विञ्ञातब्बो विनिच्छयोति.

अयं ‘‘विञ्ञाणपच्चया नामरूप’’न्ति पदस्मिं वित्थारकथा.

नामरूपपच्चयासळायतनपदवित्थारकथा

६४१. नामरूपपच्चया सळायतनपदे –

नामं खन्धत्तयं रूपं, भूतवत्थादिकं मतं;

कतेकसेसं तं तस्स, तादिसस्सेव पच्चयो.

यञ्हेतं ¶ सळायतनस्सेव पच्चयभूतं नामरूपं, तत्थ नामन्ति वेदनादिक्खन्धत्तयं, रूपं पन ससन्ततिपरियापन्नं नियमतो चत्तारि भूतानि छ वत्थूनि जीवितिन्द्रियन्ति एवं भूतवत्थादिकं मतन्ति वेदितब्बं. तं पन नामञ्च रूपञ्च नामरूपञ्च नामरूपन्ति एवं कतेकसेसं छट्ठायतनञ्च सळायतनञ्च सळायतनन्ति एवं कतेकसेसस्सेव सळायतनस्स पच्चयोति वेदितब्बं. कस्मा? यस्मा आरुप्पे नाममेव पच्चयो, तञ्च छट्ठायतनस्सेव न अञ्ञस्स. ‘‘नामपच्चया छट्ठायतन’’न्ति (विभ. ३२२) हि विभङ्गे वुत्तं.

तत्थ सिया – कथं पनेतं जानितब्बं ‘‘नामरूपं सळायतनस्स पच्चयो’’ति? नामरूपभावे भावतो. तस्स तस्स हि नामस्स रूपस्स च भावे तं तं आयतनं होति, न अञ्ञथा. सा पनस्स तब्भावभाविता पच्चयनयस्मिं येव आविभविस्सति. तस्मा,

पटिसन्धिया पवत्ते वा, होति यं यस्स पच्चयो;

यथा च पच्चयो होति, तथा नेय्यं विभाविना.

तत्रायमत्थदीपना –

नाममेव हि आरुप्पे, पटिसन्धिपवत्तिसु;

पच्चयो सत्तधा छधा, होति तं अवकंसतो.

कथं? पटिसन्धियं ताव अवकंसतो सहजातअञ्ञमञ्ञनिस्सयसम्पयुत्तविपाकअत्थिअविगतपच्चयेहि सत्तधा नामं छट्ठायतनस्स पच्चयो होति. किञ्चि पनेत्थ हेतुपच्चयेन, किञ्चि आहारपच्चयेनाति एवं ¶ अञ्ञथापि पच्चयो होति, तस्स वसेन उक्कंसावकंसो वेदितब्बो.

पवत्तेपि विपाकं वुत्तनयेनेव पच्चयो होति, इतरं पन अवकंसतो वुत्तप्पकारेसु पच्चयेसु विपाकपच्चयवज्जेहि छहि पच्चयेहि पच्चयो होति. किञ्चि पनेत्थ हेतुपच्चयेन, किञ्चि आहारपच्चयेनाति एवं अञ्ञथापि पच्चयो होति, तस्स वसेन उक्कंसावकंसो वेदितब्बो.

अञ्ञस्मिम्पि ¶ भवे नामं, तथेव पटिसन्धियं;

छट्ठस्स इतरेसं तं, छहाकारेहि पच्चयो.

आरुप्पतो हि अञ्ञस्मिम्पि पञ्चवोकारभवे तं विपाकनामं हदयवत्थुनो सहायं हुत्वा छट्ठस्स मनायतनस्स यथा आरुप्पे वुत्तं, तथेव अवकंसतो सत्तधा पच्चयो होति. इतरेसं पन तं पञ्चन्नं चक्खायतनादीनं चतुमहाभूतसहायं हुत्वा सहजातनिस्सयविपाकविप्पयुत्तअत्थिअविगतवसेन छहाकारेहि पच्चयो होति. किञ्चि पनेत्थ हेतुपच्चयेन, किञ्चि आहारपच्चयेनाति एवं अञ्ञथापि पच्चयो होति, तस्स वसेन उक्कंसावकंसो वेदितब्बो.

पवत्तेपि तथा होति, पाकं पाकस्स पच्चयो;

अपाकं अविपाकस्स, छधा छट्ठस्स पच्चयो.

पवत्तेपि हि पञ्चवोकारभवे यथा पटिसन्धियं, तथेव विपाकनामं विपाकस्स छट्ठायतनस्स अवकंसतो सत्तधा पच्चयो होति. अविपाकं पन अविपाकस्स छट्ठस्स अवकंसतोव ततो विपाकपच्चयं अपनेत्वा छधा पच्चयो होति. वुत्तनयेनेव पनेत्थ उक्कंसावकंसो वेदितब्बो.

तत्थेव सेसपञ्चन्नं, विपाकं पच्चयो भवे;

चतुधा अविपाकम्पि, एवमेव पकासितं.

तत्थेव हि पवत्ते सेसानं चक्खायतनादीनं पञ्चन्नं चक्खुपसादादिवत्थुकं इतरम्पि विपाकनामं पच्छाजातविप्पयुत्तअत्थिअविगतपच्चयेहि चतुधा पच्चयो होति. यथा च विपाकं, अविपाकम्पि एवमेव पकासितं. तस्मा कुसलादिभेदम्पि तेसं चतुधा पच्चयो होतीति वेदितब्बं. एवं ¶ ताव नाममेव पटिसन्धियं पवत्ते वा यस्स यस्स आयतनस्स पच्चयो होति, यथा च पच्चयो होति, तथा वेदितब्बं.

रूपं पनेत्थ आरुप्पे, भवे भवति पच्चयो;

न एकायतनस्सापि, पञ्चक्खन्धभवे पन.

रूपतो ¶ सन्धियं वत्थु, छधा छट्ठस्स पच्चयो;

भूतानि चतुधा होन्ति, पञ्चन्नं अविसेसतो.

रूपतो हि पटिसन्धियं वत्थुरूपं छट्ठस्स मनायतनस्स सहजातअञ्ञमञ्ञनिस्सयविप्पयुत्तअत्थिअविगतपच्चयेहि छधा पच्चयो होति. चत्तारि पन भूतानि अविसेसतो पटिसन्धियं पवत्ते च यं यं आयतनं उप्पज्जति, तस्स तस्स वसेन पञ्चन्नम्पि चक्खायतनादीनं सहजातनिस्सयअत्थिअविगतपच्चयेहि चतुधा पच्चया होन्ति.

तिधा जीवितमेतेसं, आहारो च पवत्तियं;

तानेव छधा छट्ठस्स, वत्थु तस्सेव पञ्चधा.

एतेसं पन चक्खादीनं पञ्चन्नं पटिसन्धियं पवत्ते च अत्थि अविगतइन्द्रियवसेन रूपजीवितं तिधा पच्चयो होति. आहारो च अत्थिअविगताहारवसेन तिविधा पच्चयो होति, सो च खो ये सत्ता आहारूपजीविनो, तेसं आहारानुगते काये पवत्तियंयेव, नो पटिसन्धियं. तानि पन पञ्च चक्खायतनादीनि छट्ठस्स चक्खु सोतघानजिव्हाकायविञ्ञाणसङ्खातस्स मनायतनस्स निस्सयपुरेजातइन्द्रियविप्पयुत्तअत्थिअविगतवसेन छहाकारेहि पच्चया होन्ति पवत्ते, नो पटिसन्धियं. ठपेत्वा पन पञ्चविञ्ञाणानि तस्सेव अवसेसमनायतनस्स वत्थुरूपं निस्सयपुरेजातविप्पयुत्तअत्थिअविगतवसेन पञ्चधा पच्चयो होति पवत्तेयेव, नो पटिसन्धियं. एवं रूपमेव पटिसन्धियं पवत्ते वा यस्स यस्स आयतनस्स पच्चयो होति, यथा च पच्चयो होति, तथा वेदितब्बं.

नामरूपं पनुभयं, होति यं यस्स पच्चयो;

यथा च तम्पि सब्बत्थ, विञ्ञातब्बं विभाविना.

सेय्यथिदं ¶ . पटिसन्धियं ताव पञ्चवोकारभवे खन्धत्तयवत्थुरूपसङ्खातं नामरूपं छट्ठायतनस्स सहजातअञ्ञमञ्ञनिस्सयविपाकसम्पयुत्तविप्पयुत्तअत्थिअविगतपच्चयादीहि पच्चयो होतीति. इदमेत्थ मुखमत्तं. वुत्तनयानुसारेन पन सक्का सब्बं योजेतुन्ति न एत्थ वित्थारो दस्सितोति.

अयं ‘‘नामरूपपच्चया सळायतन’’न्ति पदस्मिं वित्थारकथा.

सळायतनपच्चयाफस्सपदवित्थारकथा

६४२. सळायतनपच्चया ¶ फस्सपदे –

सळेव फस्सा सङ्खेपा, चक्खुसम्फस्सआदयो;

विञ्ञाणमिव बात्तिंस, वित्थारेन भवन्ति ते.

सङ्खेपेन हि सळायतनपच्चया फस्सोति चक्खुसम्फस्सो, सोतसम्फस्सो, घानसम्फस्सो, जिव्हासम्फस्सो, कायसम्फस्सो, मनोसम्फस्सोति इमे चक्खुसम्फस्सादयो छ एव फस्सा भवन्ति. वित्थारेन पन चक्खुसम्फस्सादयो पञ्च कुसलविपाका, पञ्च अकुसलविपाकाति दस, सेसा बावीसति-लोकियविपाकविञ्ञाणसम्पयुत्ता च बावीसतीति एवं सब्बेपि सङ्खारपच्चया वुत्तविञ्ञाणमिव बात्तिंस होन्ति.

यं पनेतस्स बात्तिंसविधस्सापि फस्सस्स पच्चयो सळायतनं, तत्थ,

छट्ठेन सह अज्झत्तं, चक्खादिं बाहिरेहिपि;

सळायतनमिच्छन्ति, छहि सद्धिं विचक्खणा.

तत्थ ये ताव ‘‘उपादिण्णकपवत्तिकथा अय’’न्ति सकसन्ततिपरियापन्नमेव पच्चयं पच्चयुप्पन्नञ्च दीपेन्ति, ते ‘‘छट्ठायतनपच्चया फस्सो’’ति (विभ. ३२२) पाळिअनुसारतो आरुप्पे छट्ठायतनञ्च, अञ्ञत्थ सब्बसङ्गहतो सळायतनञ्च फस्सस्स पच्चयोति एकदेससरूपेकसेसं कत्वा छट्ठेन सह अज्झत्तं चक्खादिं सळायतनन्ति इच्छन्ति. तञ्हि छट्ठायतनञ्च सळायतनञ्च सळायतनन्त्वेव सङ्खं गच्छति.

ये पन पच्चयुप्पन्नमेव एकसन्ततिपरियापन्नं दीपेन्ति, पच्चयं पन भिन्नसन्तानम्पि, ते यं यं आयतनं फस्सस्स पच्चयो होति, तं सब्बम्पि ¶ दीपेन्ता बाहिरम्पि परिग्गहेत्वा तदेव छट्ठेन सह अज्झत्तं बाहिरेहिपि रूपायतनादीहि सद्धिं सळायतनन्ति इच्छन्ति. तम्पि हि छट्ठायतनञ्च सळायतनञ्च सळायतनन्ति एतेसं एकसेसे कते सळायतनन्त्वेव सङ्खं गच्छति.

एत्थाह ¶ – न सब्बायतनेहि एको फस्सो सम्भोति, नापि एकम्हा आयतना सब्बे फस्सा, अयञ्च सळायतनपच्चया फस्सोति एकोव वुत्तो, सो कस्माति. तत्रिदं विस्सज्जनं – सच्चमेतं, सब्बेहि एको, एकम्हा वा सब्बे न सम्भोन्ति, सम्भोति पन अनेकेहि एको. यथा चक्खुसम्फस्सो चक्खायतना रूपायतना चक्खुविञ्ञाणसङ्खाता मनायतना अवसेससम्पयुत्तधम्मायतना चाति एवं सब्बत्थ यथानुरूपं योजेतब्बं. तस्मा एव हि,

एकोपनेकायतनप्पभवो इति दीपितो;

फस्सोयं एकवचननिद्देसेनीध तादिना.

एकवचननिद्देसेनाति सळायतनपच्चया फस्सोति इमिना एकवचननिद्देसेन अनेकेहि आयतनेहि एको फस्सो होतीति तादिना दीपितोति अत्थो. आयतनेसु पन,

छधा पञ्च ततो एकं, नवधा बाहिरानि छ;

यथासम्भवमेतस्स, पच्चयत्ते विभावये.

तत्रायं विभावना – चक्खायतनादीनि ताव पञ्च चक्खुसम्फस्सादिभेदतो पञ्चविधस्स फस्सस्स निस्सयपुरेजातिन्द्रियविप्पयुत्तअत्थिअविगतवसेन छधा पच्चया होन्ति. ततो परं एकं विपाकमनायतनं अनेकभेदस्स विपाकमनोसम्फस्सस्स सहजातअञ्ञमञ्ञनिस्सयविपाकाहारइन्द्रियसम्पयुत्तअत्थिअविगतवसेन नवधा पच्चयो होति. बाहिरेसु पन रूपायतनं चक्खुसम्फस्सस्स आरम्मणपुरेजातअत्थिअविगतवसेन चतुधा पच्चयो होति. तथा सद्दायतनादीनि सोतसम्फस्सादीनं. मनोसम्फस्सस्स पन तानि च धम्मायतनञ्च तथा च ¶ आरम्मणपच्चयमत्तेनेव चाति एवं बाहिरानि छ यथासम्भवमेतस्स पच्चयत्ते विभावयेति.

अयं ‘‘सळायतनपच्चया फस्सो’’ति पदस्मिं वित्थारकथा.

फस्सपच्चयावेदनापदवित्थारकथा

६४३. फस्सपच्चया वेदनापदे –

द्वारतो ¶ वेदना वुत्ता, चक्खुसम्फस्सजादिका;

सळेव ता पभेदेन, एकूननवुती मता.

एतस्सपि पदस्स विभङ्गे ‘‘चक्खुसम्फस्सजा वेदना. सोत… घान… जिव्हा… काय… मनोसम्फस्सजा वेदना’’ति (विभ. २३१) एवं द्वारतो सळेव वेदना वुत्ता, ता पन पभेदेन एकूननवुतिया चित्तेहि सम्पयुत्तत्ता एकूननवुति मता.

वेदनासु पनेतासु, इध बात्तिंस वेदना;

विपाकचित्तयुत्ताव, अधिप्पेताति भासिता.

अट्ठधा तत्थ पञ्चन्नं, पञ्चद्वारम्हि पच्चयो;

सेसानं एकधा फस्सो, मनोद्वारेपि सो तथा.

तत्थ हि पञ्चद्वारे चक्खुपसादादिवत्थुकानं पञ्चन्नं वेदनानं चक्खुसम्फस्सादिको फस्सो सहजातअञ्ञमञ्ञनिस्सयविपाकआहारसम्पयुत्तअत्थिअविगतवसेन अट्ठधा पच्चयो होति. सेसानं पन एकेकस्मिं द्वारे सम्पटिच्छनसन्तीरणतदारम्मणवसेन पवत्तानं कामावचरविपाकवेदनानं सो चक्खुसम्फस्सादिको फस्सो उपनिस्सयवसेन एकधाव पच्चयो होति.

मनोद्वारेपि सो तथाति मनोद्वारेपि हि तदारम्मणवसेन पवत्तानं कामावचरविपाकवेदनानं सो सहजातमनोसम्फस्ससङ्खातो फस्सो तथेव अट्ठधा पच्चयो होति, पटिसन्धिभवङ्गचुतिवसेन पवत्तानं तेभूमकविपाकवेदनानम्पि. या पन ता मनोद्वारे तदारम्मणवसेन ¶ पवत्ता कामावचरवेदना, तासं मनोद्वारावज्जनसम्पयुत्तो मनोसम्फस्सो उपनिस्सयवसेन एकधाव पच्चयो होतीति.

अयं ‘‘फस्सपच्चया वेदना’’ति पदस्मिं वित्थारकथा.

वेदनापच्चयातण्हापदवित्थारकथा

६४४. वेदनापच्चया ¶ तण्हापदे –

रूपतण्हादिभेदेन, छ तण्हा इध दीपिता;

एकेका तिविधा तत्थ, पवत्ताकारतो मता.

इमस्मिं हि पदे सेट्ठिपुत्तो ब्राह्मणपुत्तोति पितितो नामवसेन पुत्तो विय ‘‘रूपतण्हा. सद्द… गन्ध… रस… फोट्ठब्ब… धम्मतण्हा’’ति (विभ. २३२) आरम्मणतो नामवसेन विभङ्गे छ तण्हा दीपिता.

तासु पन तण्हासु एकेका तण्हा पवत्तिआकारतो कामतण्हा, भवतण्हा, विभवतण्हाति एवं तिविधा मता. रूपतण्हायेव हि यदा चक्खुस्स आपाथमागतं रूपारम्मणं कामस्सादवसेन अस्सादयमाना पवत्तति, तदा कामतण्हा नाम होति. यदा तदेवारम्मणं ‘‘धुवं सस्सत’’न्ति पवत्ताय सस्सतदिट्ठिया सद्धिं पवत्तति, तदा भवतण्हा नाम होति. सस्सतदिट्ठिसहगतो हि रागो भवतण्हाति वुच्चति. यदा पन तदेवारम्मणं ‘‘उच्छिज्जति विनस्सती’’ति पवत्ताय उच्छेददिट्ठिया सद्धिं पवत्तति, तदा विभवतण्हा नाम होति. उच्छेददिट्ठिसहगतो हि रागो विभवतण्हाति वुच्चति. एस नयो सद्दतण्हादीसुपीति. एता अट्ठारस तण्हा होन्ति.

ता अज्झत्तरूपादीसु अट्ठारस, बहिद्धा अट्ठारसाति छत्तिंस. इति अतीता छत्तिंस, अनागता छत्तिंस, पच्चुप्पन्ना छत्तिंसाति अट्ठसतं तण्हा होन्ति. ता पुन सङ्खेप्पमाणा रूपादिआरम्मणवसेन छ, कामतण्हादिवसेन वा तिस्सोव तण्हा होन्तीति वेदितब्बा.

यस्मा पनिमे सत्ता पुत्तं अस्सादेत्वा पुत्ते ममत्तेन धातिया विय रूपादिआरम्मणवसेन उप्पज्जमानं वेदनं अस्सादेत्वा वेदनाय ममत्तेन ¶ रूपादिआरम्मणदायकानं चित्तकार-गन्धब्ब-गन्धिक-सूद-तन्तवायरसायनविधायकवेज्जादीनं महासक्कारं करोन्ति. तस्मा सब्बापेसा वेदनापच्चया तण्हा होतीति वेदितब्बा.

यस्मा ¶ चेत्थ अधिप्पेता, विपाकसुखवेदना;

एकाव एकधावेसा, तस्मा तण्हाय पच्चयो.

एकधाति उपनिस्सयपच्चयेनेव पच्चयो होति. यस्मा वा,

दुक्खी सुखं पत्थयति, सुखी भिय्योपि इच्छति;

उपेक्खा पन सन्तत्ता, सुखमिच्चेव भासिता.

तण्हाय पच्चया तस्मा, होन्ति तिस्सोपि वेदना;

वेदनापच्चया तण्हा, इति वुत्ता महेसिना.

वेदनापच्चया चापि, यस्मा नानुसयं विना;

होति तस्मा न सा होति, ब्राह्मणस्स वुसीमतोति.

अयं ‘‘वेदनापच्चया तण्हा’’ति पदस्मिं वित्थारकथा.

तण्हापच्चयाउपादानपदवित्थारकथा

६४५. तण्हापच्चया उपादानपदे –

उपादानानि चत्तारि, तानि अत्थविभागतो;

धम्मसङ्खेपवित्थारा, कमतो च विभावये.

तत्रायं विभावना – कामुपादानं, दिट्ठुपादानं, सीलब्बतुपादानं, अत्तवादुपादानन्ति इमानि तावेत्थ चत्तारि उपादानानि. तेसं अयं अत्थविभागो – वत्थुसङ्खातं कामं उपादियतीति कामुपादानं, कामो च सो उपादानञ्चातिपि कामुपादानं. उपादानन्ति दळ्हग्गहणं. दळ्हत्थो हेत्थ उपसद्दो उपायासउपकट्ठादीसु विय. तथा दिट्ठि च सा उपादानञ्चाति दिट्ठुपादानं. दिट्ठिं उपादियतीति वा दिट्ठुपादानं. ‘‘सस्सतो अत्ता च लोको चा’’तिआदीसु ¶ (दी. नि. १.३१) हि पुरिमदिट्ठिं उत्तरदिट्ठि उपादियति. तथा सीलब्बतं उपादियतीति सीलब्बतुपादानं. सीलब्बतञ्च तं उपादानञ्चातिपि सीलब्बतुपादानं. गोसीलगोवतादीनि हि ‘‘एवं सुद्धी’’ति अभिनिवेसतो सयमेव उपादानानि. तथा वदन्ति एतेनाति वादो. उपादियन्ति ¶ एतेनाति उपादानं. किं वदन्ति, उपादियन्ति वा? अत्तानं. अत्तनो वादुपादानं अत्तवादुपादानं. अत्तवादमत्तमेव वा अत्ताति उपादियन्ति एतेनाति अत्तवादुपादानं. अयं ताव तेसं अत्थविभागो.

धम्मसङ्खेपवित्थारे पन कामुपादानं ताव ‘‘तत्थ कतमं कामुपादानं? यो कामेसु कामच्छन्दो कामरागो कामनन्दी कामतण्हा कामस्नेहो कामपरिळाहो काममुच्छा कामज्झोसानं, इदं वुच्चति कामुपादान’’न्ति (ध. स. १२२०; विभ. ९३८) आगतत्ता सङ्खेपतो तण्हादळ्हत्तं वुच्चति. तण्हादळ्हत्तं नाम पुरिमतण्हाउपनिस्सयपच्चयेन दळ्हसम्भूता उत्तरतण्हाव. केचि पनाहु ‘‘अप्पत्तविसयपत्थना तण्हा अन्धकारे चोरस्स हत्थप्पसारणं विय, सम्पत्तविसयग्गहणं उपादानं तस्सेव भण्डग्गहणं विय. अप्पिच्छतासन्तुट्ठितापटिपक्खा च ते धम्मा. तथा परियेसनारक्खदुक्खमूला’’ति. सेसुपादानत्तयं पन सङ्खेपतो दिट्ठिमत्तमेव.

वित्थारतो पन पुब्बे रूपादीसु वुत्तअट्ठसतप्पभेदायपि तण्हाय दळ्हभावो कामुपादानं. दसवत्थुका मिच्छादिट्ठि दिट्ठुपादानं. यथाह – ‘‘तत्थ कतमं दिट्ठुपादानं? नत्थि दिन्नं, नत्थि यिट्ठं…पे… सच्छिकत्वा पवेदेन्तीति या एवरूपा दिट्ठि…पे… विपरियेसग्गाहो. इदं वुच्चति दिट्ठुपादान’’न्ति (ध. स. १२२१; विभ. ९३८). सीलब्बतेहि सुद्धीति परामसनं पन सीलब्बतुपादानं. यथाह – ‘‘तत्थ कतमं सीलब्बतुपादानं? सीलेन सुद्धि, वतेन सुद्धि, सीलब्बतेन सुद्धीति या एवरूपा दिट्ठि…पे… विपरियेसग्गाहो. इदं वुच्चति सीलब्बतुपादान’’न्ति (ध. स. १२२२; विभ. ९३८). वीसतिवत्थुका सक्कायदिट्ठि अत्तवादुपादानं. यथाह – ‘‘तत्थ कतमं अत्तवादुपादानं? इध अस्सुतवा पुथुज्जनो…पे… सप्पुरिसधम्मे अविनीतो रूपं अत्ततो समनुपस्सति…पे… विपरियेसग्गाहो, इदं वुच्चति अत्तवादुपादान’’न्ति (ध. स. १२२३; विभ. ९३८). अयमेत्थ धम्मसङ्खेपवित्थारो.

कमतोति एत्थ पन तिविधो कमो उप्पत्तिक्कमो पहानक्कमो देसनाक्कमो च. तत्थ अनमतग्गे ¶ संसारे इमस्स पठमं उप्पत्तीति अभावतो किलेसानं निप्परियायेन उप्पत्तिक्कमो न वुच्चति. परियायेन पन येभुय्येन एकस्मिं भवे अत्तग्गाहपुब्बङ्गमो सस्सतुच्छेदाभिनिवेसो, ततो ‘‘सस्सतो अयं अत्ता’’ति गण्हतो अत्तविसुद्धत्थं सीलब्बतुपादानं, ‘‘उच्छिज्जती’’ति गण्हतो परलोकनिरपेक्खस्स कामुपादानन्ति ¶ एवं पठमं अत्तवादुपादानं, ततो दिट्ठिसीलब्बतकामुपादानानीति अयमेतेसं एकस्मिं भवे उप्पत्तिक्कमो.

दिट्ठुपादानादीनि चेत्थ पठमं पहीयन्ति सोतापत्तिमग्गवज्झत्ता. कामुपादानं पच्छा, अरहत्तमग्गवज्झत्ताति अयमेतेसं पहानक्कमो.

महाविसयत्ता पन पाकटत्ता च एतेसु कामुपादानं पठमं देसितं. महाविसयं हि तं अट्ठचित्तसम्पयोगा, अप्पविसयानि इतरानि चतुचित्तसम्पयोगा, येभुय्येन च आलयरामत्ता पजाय पाकटं कामुपादानं, न इतरानि. कामुपादान वा कामानं समधिगमत्थं कोतूहलमङ्गलादिबहुलो होति, सास्स दिट्ठीति तदनन्तरं दिट्ठुपादानं, तं पभिज्जमानं सीलब्बतअत्तवादुपादानवसेन दुविधं होति. तस्मिं द्वये गोकिरियं कुक्कुरकिरियं वा दिस्वापि वेदितब्बतो ओळारिकन्ति सीलब्बतुपादानं पठमं देसितं. सुखुमत्ता अन्ते अत्तवादुपादानन्ति अयमेतेसं देसनाक्कमो.

तण्हा च पुरिमस्सेत्थ, एकधा होति पच्चयो;

सत्तधा अट्ठधा वापि, होति सेसत्तयस्स सा.

एत्थ च एवं देसिते उपादानचतुक्के पुरिमस्स कामुपादानस्स कामतण्हा उपनिस्सयवसेन एकधाव पच्चयो होति, तण्हाभिनन्दितेसु विसयेसु उप्पत्तितो. सेसत्तयस्स पन सहजातअञ्ञमञ्ञनिस्सयसम्पयुत्तअत्थिअविगतहेतुवसेन सत्तधा वा, उपनिस्सयेन सह अट्ठधा वापि पच्चयो होति. यदा च सा उपनिस्सयवसेन पच्चयो होति, तदा असहजाताव होतीति.

अयं ‘‘तण्हापच्चया उपादान’’न्ति पदस्मिं वित्थारकथा.

उपादानपच्चयाभवपदवित्थारकथा

६४६. उपादानपच्चया ¶ भवपदे –

अत्थतो धम्मतो चेव, सात्थतो भेदसङ्गहा;

यं यस्स पच्चयो चेव, विञ्ञातब्बो विनिच्छयो.

तत्थ ¶ भवतीति भवो. सो कम्मभवो उपपत्तिभवो चाति दुविधो होति. यथाह – ‘‘भवो दुविधेन अत्थि कम्मभवो, अत्थि उपपत्तिभवो’’ति (विभ. २३४). तत्थ कम्ममेव भवो कम्मभवो, तथा उपपत्तियेव भवो उपपत्तिभवो. एत्थ च उपपत्ति भवतीति भवो. कम्मं पन यथा सुखकारणत्ता ‘‘सुखो बुद्धानं उप्पादो’’ति (ध. प. १९४) वुत्तो, एवं भवकारणत्ता फलवोहारेन भवोति वेदितब्बन्ति. एवं तावेत्थ अत्थतो विञ्ञातब्बो विनिच्छयो.

६४७. धम्मतो पन कम्मभवो ताव सङ्खेपतो चेतना चेव चेतनासम्पयुत्ता च अभिज्झादयो कम्मसङ्खाता धम्मा. यथाह – ‘‘तत्थ कतमो कम्मभवो? पुञ्ञाभिसङ्खारो अपुञ्ञाभिसङ्खारो आनेञ्जाभिसङ्खारो (विभ. २३४) परित्तभूमको वा महाभूमको वा, अयं वुच्चति कम्मभवो. सब्बम्पि भवगामिकम्मं कम्मभवो’’ति (विभ. २३४). एत्थ हि पुञ्ञाभिसङ्खारोति तेरस चेतना. अपुञ्ञाभिसङ्खारोति द्वादस. आनेञ्जाभिसङ्खारोति चतस्सो चेतना. एवं परित्तभूमको वा महाभूमको वाति एतेन तासंयेव चेतनानं मन्दबहुविपाकता वुत्ता. सब्बम्पि भवगामिकम्मन्ति इमिना पन चेतनासम्पयुत्ता अभिज्झादयो वुत्ता.

उपपत्तिभवो पन सङ्खेपतो कम्माभिनिब्बत्ता खन्धा, पभेदतो नवविधो होति. यथाह – ‘‘तत्थ कतमो उपपत्तिभवो? कामभवो रूपभवो अरूपभवो सञ्ञाभवो असञ्ञाभवो नेवसञ्ञानासञ्ञाभवो, एकवोकारभवो चतुवोकारभवो पञ्चवोकारभवो, अयं वुच्चति उपपत्तिभवो’’ति (विभ. २३४). तत्थ कामसङ्खातो भवो कामभवो. एस नयो रूपारूपभवेसु. सञ्ञावतं भवो, सञ्ञा वा एत्थ भवे अत्थीति सञ्ञाभवो. विपरियायेन असञ्ञाभवो. ओळारिकाय सञ्ञाय अभावा सुखुमाय च भावा नेवसञ्ञा, नासञ्ञा अस्मिं ¶ भवेति नेवसञ्ञानासञ्ञाभवो. एकेन रूपक्खन्धेन वोकिण्णो भवो एकवोकारभवो. एको वा वोकारो अस्स भवस्साति एकवोकारभवो. एस नयो चतुवोकारपञ्चवोकारभवेसु. तत्थ कामभवो पञ्च उपादिण्णक्खन्धा. तथा रूपभवो. अरूपभवो चत्तारो ¶ , सञ्ञाभवो पञ्च. असञ्ञाभवो एको उपादिण्णक्खन्धो. नेवसञ्ञानासञ्ञाभवो चत्तारो. एकवोकारभवादयो एकचतुपञ्चक्खन्धा उपादिण्णक्खन्धेहीति एवमेत्थ धम्मतोपि विञ्ञातब्बो विनिच्छयो.

६४८. सात्थतोति यथा च भवनिद्देसे, तथेव कामं सङ्खारनिद्देसेपि पुञ्ञाभिसङ्खारादयोव वुत्ता, एवं सन्तेपि पुरिमे अतीतकम्मवसेन इध पटिसन्धिया पच्चयत्ता, इमे पच्चुप्पन्नकम्मवसेन आयतिं पटिसन्धिया पच्चयत्ताति पुनवचनं सात्थकमेव, पुब्बे वा ‘‘तत्थ कतमो पुञ्ञाभिसङ्खारो? कुसला चेतना कामावचरा’’ति (विभ. २२६) एवमादिना नयेन चेतनाव सङ्खाराति वुत्ता. इध पन ‘‘सब्बम्पि भवगामिकम्म’’न्ति (विभ. २३४) वचनतो चेतनासम्पयुत्तापि. पुब्बे च विञ्ञाणपच्चयमेव कम्मं ‘‘सङ्खारा’’ति वुत्तं. इदानि असञ्ञाभवनिब्बत्तकम्पि. किं वा बहुना, ‘‘अविज्जापच्चया सङ्खारा’’ति एत्थ पुञ्ञाभिसङ्खारादयोव कुसलाकुसला धम्मा वुत्ता. ‘‘उपादानपच्चया भवो’’ति इध पन उपपत्तिभवस्सापि सङ्गहितत्ता कुसलाकुसलाब्याकता धम्मा वुत्ता. तस्मा सब्बथापि सात्थकमेविदं पुनवचनन्ति एवमेत्थ सात्थतोपि विञ्ञातब्बो विनिच्छयो.

६४९. भेदसङ्गहाति उपादानपच्चया भवस्स भेदतो चेव सङ्गहतो च. यञ्हि कामुपादानपच्चया कामभवनिब्बत्तकं कम्मं करीयति, सो कम्मभवो. तदभिनिब्बत्ता खन्धा उपपत्तिभवो. एस नयो रूपारूपभवेसु. एवं कामुपादानपच्चया द्वे कामभवा, तदन्तोगधा च सञ्ञाभवपञ्चवोकारभवा, द्वे रूपभवा, तदन्तोगधा च सञ्ञाभवअसञ्ञाभवएकवोकारभवपञ्चवोकारभवा, द्वे अरूपभवा, तदन्तोगधा च सञ्ञाभवनेवसञ्ञानासञ्ञाभवचतुवोकारभवाति सद्धिं अन्तोगधेहि छ भवा. यथा च कामुपादानपच्चया सद्धिं अन्तोगधेहि छ भवा. तथा सेसुपादानपच्चयापीति एवं उपादानपच्चया भेदतो सद्धिं अन्तोगधेहि चतुवीसति भवा.

सङ्गहतो पन कम्मभवं उपपत्तिभवञ्च एकतो कत्वा कामुपादानपच्चया सद्धिं अन्तोगधेहि ¶ एको कामभवो. तथा रूपारूपभवाति तयो भवा. तथा सेसुपादानपच्चया पीति. एवं उपादानपच्चया सङ्गहतो सद्धिं अन्तोगधेहि द्वादस भवा. अपिच ¶ अविसेसेन उपादानपच्चया कामभवूपगं कम्मं कम्मभवो. तदभिनिब्बत्ता खन्धा उपपत्तिभवो. एस नयो रूपारूपभवेसु. एवं उपादानपच्चया सद्धिं अन्तोगधेहि द्वे कामभवा, द्वे रूपभवा, द्वे अरूपभवाति अपरेन परियायेन सङ्गहतो छ भवा. कम्मभवउपपत्तिभवभेदं वा अनुपगम्म सद्धिं अन्तोगधेहि कामभवादिवसेन तयो भवा होन्ति. कामभवादिभेदम्पि अनुपगम्म कम्मभवउपपत्तिभववसेन द्वे भवा होन्ति. कम्मुपपत्तिभेदञ्चापि अनुपगम्म उपादानपच्चया भवोति भववसेन एकोव भवो होतीति एवमेत्थ उपादानपच्चयस्स भवस्स भेदसङ्गहापि विञ्ञातब्बो विनिच्छयो.

६५०. यं यस्स पच्चयो चेवाति यञ्चेत्थ उपादानं यस्स पच्चयो होति, ततोपि विञ्ञातब्बो विनिच्छयोति अत्थो. किं पनेत्थ कस्स पच्चयो होति? यंकिञ्चि यस्स कस्सचि पच्चयो होतियेव. उम्मत्तको विय हि पुथुज्जनो. सो इदं युत्तं इदं अयुत्तन्ति अविचारेत्वा यस्स कस्सचि उपादानस्स वसेन यंकिञ्चि भवं पत्थेत्वा यंकिञ्चि कम्मं करोतियेव. तस्मा यदेकच्चे सीलब्बतुपादानेन रूपारूपभवा न होन्तीति वदन्ति, तं न गहेतब्बं. सब्बेन पन सब्बो होतीति गहेतब्बं.

सेय्यथिदं – इधेकच्चो अनुस्सववसेन वा दिट्ठानुसारेन वा ‘‘कामा नामेते मनुस्सलोके चेव खत्तियमहासालकुलादीसु, छ कामावचरदेवलोके च समिद्धा’’ति चिन्तेत्वा तेसं अधिगमत्थं असद्धम्मस्सवनादीहि वञ्चितो ‘‘इमिना कम्मेन कामा सम्पज्जन्ती’’ति मञ्ञमानो कामुपादानवसेन कायदुच्चरितादीनिपि करोति, सो दुच्चरितपारिपूरिया अपाये उपपज्जति. सन्दिट्ठिके वा पन कामे पत्थयमानो पटिलद्धे च गोपयमानो कामुपादानवसेन कायदुच्चरितादीनि करोति, सो दुच्चरितपारिपूरिया अपाये उपपज्जति. तत्रास्स उपपत्तिहेतुभूतं कम्मं कम्मभवो. कम्माभिनिब्बत्ता खन्धा उपपत्तिभवो. सञ्ञाभवपञ्चवोकारभवा पन तदन्तोगधा एव.

अपरो ¶ पन सद्धम्मस्सवनादीहि उपब्रूहितञाणो ‘‘इमिना कम्मेन कामा सम्पज्जन्ती’’ति मञ्ञमानो कामुपादानवसेन कायसुचरितादीनि करोति. सो सुचरितपारिपूरिया ¶ देवेसु वा मनुस्सेसु वा उपपज्जति. तत्रास्स उपपत्तिहेतुभूतं कम्मं कम्मभवो. कम्माभिनिब्बत्ता खन्धा उपपत्तिभवो. सञ्ञाभवपञ्चवोकारभवा पन तदन्तोगधा एव. इति कामुपादानं सप्पभेदस्स सान्तोगधस्स कामभवस्स पच्चयो होति.

अपरो ‘‘रूपारूपभवेसु ततो समिद्धतरा कामा’’ति सुत्वा परिकप्पेत्वा वा कामुपादानवसेनेव रूपारूपसमापत्तियो निब्बत्तेत्वा समापत्तिबलेन रूपारूपब्रह्मलोके उपपज्जति. तत्रास्स उपपत्तिहेतुभूतं कम्मं कम्मभवो. कम्माभिनिब्बत्ता खन्धा उपपत्तिभवो. सञ्ञा-असञ्ञा-नेवसञ्ञानासञ्ञा-एक-चतु-पञ्चवोकारभवा पन तदन्तोगधा एव. इति कामुपादानं सप्पभेदानं सान्तोगधानं रूपारूपभवानम्पि पच्चयो होति.

अपरो ‘‘अयं अत्ता नाम कामावचरसम्पत्तिभवे वा रूपारूपभवानं वा अञ्ञतरस्मिं उच्छिन्ने सुउच्छिन्नो होती’’ति उच्छेददिट्ठिं उपादाय तदुपगं कम्मं करोति, तस्स तं कम्मं कम्मभवो. कम्माभिनिब्बत्ता खन्धा उपपत्तिभवो. सञ्ञाभवादयो पन तदन्तोगधा एव. इति दिट्ठुपादानं सप्पभेदानं सान्तोगधानं तिण्णम्पि कामरूपारूपभवानं पच्चयो होति.

अपरो ‘‘अयं अत्ता नाम कामावचरसम्पत्तिभवे वा रूपारूपभवानं वा अञ्ञतरस्मिं सुखी होति विगतपरिळाहो’’ति अत्तवादुपादानेन तदुपगं कम्मं करोति, तस्स तं कम्मं कम्मभवो. तदभिनिब्बत्ता खन्धा उपपत्तिभवो. सञ्ञाभवादयो पन तदन्तोगधा एव. इति अत्तवादुपादानं सप्पभेदानं सान्तोगधानं तिण्णं भवानं पच्चयो होति.

अपरो ‘‘इदं सीलब्बतं नाम कामावचरसम्पत्तिभवे वा रूपारूपभवानं वा अञ्ञतरस्मिं परिपूरेन्तस्स सुखं पारिपूरिं गच्छती’’ति सीलब्बतुपादानवसेन तदुपगं कम्मं करोति, तस्स तं कम्मं कम्मभवो. तदभिनिब्बत्ता खन्धा उपपत्तिभवो. सञ्ञाभवादयो पन तदन्तोगधा एव. इति सीलब्बतुपादानं सप्पभेदानं सान्तोगधानं तिण्णं भवानं पच्चयो होति. एवमेत्थ यं यस्स पच्चयो होति, ततोपि विञ्ञातब्बो विनिच्छयो.

किं पनेत्थ ¶ कस्स भवस्स कथं पच्चयो होतीति चे?

रूपारूपभवानं ¶ , उपनिस्सयपच्चयो उपादानं;

सहजातादीहिपि तं, कामभवस्साति विञ्ञेय्यं.

रूपारूपभवानं हि, कामभवपरियापन्नस्स च कम्मभवे कुसलकम्मस्सेव, उपपत्तिभवस्स चेतं चतुब्बिधम्पि उपादानं उपनिस्सयपच्चयवसेन एकधाव पच्चयो होति. कामभवे अत्तना सम्पयुत्ताकुसलकम्मभवस्स सहजातअञ्ञमञ्ञनिस्सयसम्पयुत्तअत्थिअविगतहेतुपच्चयप्पभेदेहि सहजातादीहि पच्चयो होति. विप्पयुत्तस्स पन उपनिस्सयपच्चयेनेवाति.

अयं ‘‘उपादानपच्चया भवो’’ति पदस्मिं वित्थारकथा.

भवपच्चयाजातिआदिवित्थारकथा

६५१. भवपच्चया जातीतिआदीसु जातिआदीनं विनिच्छयो सच्चनिद्देसे वुत्तनयेनेव वेदितब्बो. भवोति पनेत्थ कम्मभवोव अधिप्पेतो. सो हि जातिया पच्चयो, न उपपत्तिभवो. सो च पन कम्मपच्चयउपनिस्सयपच्चयवसेन द्वेधा पच्चयो होतीति.

तत्थ सिया – कथं पनेतं जानितब्बं भवो जातिया पच्चयोति चे? बाहिरपच्चयसमत्तेपि हीनपणीततादिविसेसदस्सनतो. बाहिरानं हि जनकजननीसुक्कसोणिताहारादीनं पच्चयानं समत्तेपि सत्तानं यमकानम्पि सतं हीनपणीततादिविसेसो दिस्सति. सो च न अहेतुको सब्बदा च सब्बेसञ्च अभावतो, न कम्मभवतो अञ्ञहेतुको तदभिनिब्बत्तकसत्तानं अज्झत्तसन्ताने अञ्ञस्स कारणस्स अभावतोति कम्मभवहेतुकोव. कम्मं हि सत्तानं हीनपणीततादिविसेसस्स हेतु. तेनाह भगवा ‘‘कम्मं सत्ते विभजति यदिदं हीनप्पणीतताया’’ति (म. नि. ३.२८९). तस्मा जानितब्बमेतं ‘‘भवो जातिया पच्चयो’’ति.

यस्मा च असति जातिया जरामरणं नाम, सोकादयो वा धम्मा न होन्ति. जातिया पन सति जरामरणञ्चेव, जरामरणसङ्खातदुक्खधम्मफुट्ठस्स च बालजनस्स जरामरणाभिसम्बन्धा ¶ वा तेन तेन दुक्खधम्मेन फुट्ठस्स ¶ अनभिसम्बन्धा वा सोकादयो च धम्मा होन्ति. तस्मा अयम्पि जाति जरामरणस्स चेव सोकादीनञ्च पच्चयो होतीति वेदितब्बा. सा पन उपनिस्सयकोटिया एकधाव पच्चयो होतीति.

अयं ‘‘भवपच्चया जाती’’तिआदीसु वित्थारकथा.

भवचक्ककथा

६५२. यस्मा पनेत्थ सोकादयो अवसाने वुत्ता, तस्मा या सा अविज्जापच्चया सङ्खाराति एवमेतस्स भवचक्कस्स आदिम्हि वुत्ता, सा,

सोकादीहि अविज्जा, सिद्धा भवचक्कमविदितादिमिदं;

कारकवेदकरहितं, द्वादसविधसुञ्ञतासुञ्ञं.

सततं समितं पवत्ततीति वेदितब्बं.

कथं पनेत्थ सोकादीहि अविज्जा सिद्धा, कथमिदं भवचक्कं अविदितादि, कथं कारकवेदकरहितं, कथं द्वादसविधसुञ्ञतासुञ्ञन्ति चे? एत्थ हि सोकदोमनस्सुपायासा अविज्जाय अवियोगिनो, परिदेवो च नाम मूळ्हस्साति तेसु ताव सिद्धेसु सिद्धा होति अविज्जा. अपिच ‘‘आसवसमुदया अविज्जासमुदयो’’ति (म. नि. १.१०३) वुत्तं. आसवसमुदया चेते सोकादयो होन्ति.

कथं? वत्थुकामवियोगे ताव सोको कामासवसमुदया होति. यथाह –

‘‘तस्स चे कामयानस्स, छन्दजातस्स जन्तुनो;

ते कामा परिहायन्ति, सल्लविद्धोव रुप्पती’’ति. (सु. नि. ७७३);

यथा चाह – ‘‘कामतो जायति सोको’’ति. (ध. प. २१५).

सब्बेपि ¶ चेते दिट्ठासवसमुदया होन्ति. यथाह –

‘‘तस्स ‘अहं रूपं मम रूप’न्ति परियुट्ठट्ठायिनो रूपविपरिणामञ्ञथाभावा उप्पज्जन्ति सोकपरिदेवदुक्खदोमनस्सुपायासा’’ति (सं. नि. ३.१).

यथा च दिट्ठासवसमुदया, एवं भवासवसमुदयापि. यथाह –

‘‘येपि ¶ ते देवा दीघायुका वण्णवन्तो सुखबहुला उच्चेसु विमानेसु चिरट्ठितिका, तेपि तथागतस्स धम्मदेसनं सुत्वा भयं सन्तासं संवेगमापज्जन्ती’’ति (सं. नि. ३.७८). पञ्च पुब्बनिमित्तानि दिस्वा मरणभयेन सन्तज्जितानं देवानं विय.

यथा च भवासवसमुदया, एवं अविज्जासवसमुदयापि. यथाह –

‘‘स खो सो, भिक्खवे, बालो तिविधं दिट्ठेव धम्मे दुक्खं दोमनस्सं पटिसंवेदेती’’ति (म. नि. ३.२४६).

इति यस्मा आसवसमुदया एते धम्मा होन्ति, तस्मा एते सिज्झमाना अविज्जाय हेतुभूते आसवे साधेन्ति. आसवेसु च सिद्धेसु पच्चयभावे भावतो अविज्जापि सिद्धाव होतीति. एवं तावेत्थ सोकादीहि अविज्जा सिद्धा होतीति वेदितब्बा.

यस्मा पन एवं पच्चयभावे भावतो अविज्जाय सिद्धाय पुन अविज्जापच्चया सङ्खारा, सङ्खारपच्चया विञ्ञाणन्ति एवं हेतुफलपरम्पराय परियोसानं नत्थि. तस्मा तं हेतुफलसम्बन्धवसेन पवत्तं द्वादसङ्गं भवचक्कं अविदितादीति सिद्धं होति.

एवं सति अविज्जापच्चया सङ्खाराति इदं आदिमत्तकथनं विरुज्झतीति चे. नयिदं आदिमत्तकथनं. पधानधम्मकथनं पनेतं. तिण्णन्नं हि वट्टानं अविज्जा पधाना. अविज्जाग्गहणेन हि अवसेसकिलेसवट्टञ्च कम्मादीनि च बालं पलिबोधेन्ति. सप्पसिरग्गहणेन सेससप्पसरीरं विय बाहं. अविज्जासमुच्छेदे पन कते तेहि विमोक्खो होति ¶ . सप्पसिरच्छेदे कते पलिबोधितबाहाविमोक्खो विय. यथाह – ‘‘अविज्जायत्वेव असेसविरागनिरोधा सङ्खारनिरोधो’’तिआदि (सं. नि. २.१; महाव. १). इति यं गण्हतो बन्धो, मुच्चतो च मोक्खो होति, तस्स पधानधम्मस्स कथनमिदं, न आदिमत्तकथनन्ति. एवमिदं भवचक्कं अविदितादीति वेदितब्बं.

तयिदं ¶ यस्मा अविज्जादीहि कारणेहि सङ्खारादीनं पवत्ति, तस्मा ततो अञ्ञेन ‘‘ब्रह्मा महाब्रह्मा सेट्ठो सजिता’’ति (दी. नि. १.४२) एवं परिकप्पितेन ब्रह्मादिना वा संसारस्स कारकेन, ‘‘सो खो पन मे अयं अत्ता वदो वेदेय्यो’’ति एवं परिकप्पितेन अत्तना वा सुखदुक्खानं वेदकेन रहितं. इति कारकवेदकरहितन्ति वेदितब्बं.

यस्मा पनेत्थ अविज्जा उदयब्बयधम्मकत्ता धुवभावेन, संकिलिट्ठत्ता संकिलेसिकत्ता च सुभभावेन, उदयब्बयपटिपीळितत्ता सुखभावेन, पच्चयायत्तवुत्तित्ता वसवत्तनभूतेन अत्तभावेन च सुञ्ञा. तथा सङ्खारादीनिपि अङ्गानि. यस्मा वा अविज्जा न अत्ता, न अत्तनो, न अत्तनि, न अत्तवती. तथा सङ्खारादीनिपि अङ्गानि. तस्मा द्वादसविधसुञ्ञतासुञ्ञमेतं भवचक्कन्ति वेदितब्बं.

६५३. एवञ्च विदित्वा पुन,

तस्साविज्जातण्हा, मूलमतीतादयो तयो काला;

द्वे अट्ठ द्वे एव च, सरूपतो तेसु अङ्गानि.

तस्स खो पनेतस्स भवचक्कस्स अविज्जा तण्हा चाति द्वे धम्मा मूलन्ति वेदितब्बा. तदेतं पुब्बन्ताहरणतो अविज्जामूलं वेदनावसानं, अपरन्तसन्तानतो तण्हामूलं जरामरणावसानन्ति दुविधं होति. तत्थ पुरिमं दिट्ठिचरितवसेन वुत्तं, पच्छिमं तण्हाचरितवसेन. दिट्ठिचरितानं हि अविज्जा, तण्हाचरितानञ्च तण्हा संसारनायिका. उच्छेददिट्ठिसमुग्घाताय वा पठमं, फलुप्पत्तिया हेतूनं अनुपच्छेदप्पकासनतो, सस्सतदिट्ठिसमुग्घाताय दुतियं, उप्पन्नानं जरामरणप्पकासनतो. गब्भसेय्यकवसेन वा पुरिमं, अनुपुब्बपवत्तिदीपनतो, ओपपातिकवसेन पच्छिमं, सहुप्पत्तिदीपनतो.

अतीतपच्चुप्पन्नानागता ¶ चस्स तयो काला. तेसु पाळियं सरूपतो आगतवसेन ‘‘अविज्जा, सङ्खारा चा’’ति द्वे अङ्गानि अतीतकालानि. विञ्ञाणादीनि भवावसानानि अट्ठ पच्चुप्पन्नकालानि. जाति चेव जरामरणञ्च द्वे अनागतकालानीति वेदितब्बानि.

६५४. पुन ¶ ,

‘‘हेतुफलहेतुपुब्बक-तिसन्धिचतुभेदसङ्गहञ्चेतं;

वीसति आकारारं, तिवट्टमनवट्ठितं भमति’’.

इतिपि वेदितब्बं.

तत्थ सङ्खारानञ्च पटिसन्धिविञ्ञाणस्स च अन्तरा एको हेतुफलसन्धि नाम. वेदनाय च तण्हाय च अन्तरा एको फलहेतुसन्धि नाम. भवस्स च जातिया च अन्तरा एको हेतुफलसन्धीति एवमिदं हेतुफलहेतुपुब्बकतिसन्धीति वेदितब्बं.

सन्धीनं आदिपरियोसानववत्थिता पनस्स चत्तारो सङ्गहा होन्ति. सेय्यथिदं – अविज्जासङ्खारा एको सङ्गहो. विञ्ञाणनामरूपसळायतनफस्सवेदना दुतियो. तण्हुपादानभवा ततियो. जातिजरामरणं चतुत्थोति. एवमिदं चतुभेदसङ्गहन्ति वेदितब्बं.

अतीते हेतवो पञ्च, इदानि फलपञ्चकं;

इदानि हेतवो पञ्च, आयतिं फलपञ्चकन्ति.

एतेहि पन वीसतिया आकारसङ्खातेहि अरेहि वीसतिआकारारन्ति वेदितब्बं. तत्थ अतीते हेतवो पञ्चाति अविज्जा सङ्खारा चाति इमे ताव द्वे वुत्ता एव. यस्मा पन अविद्वा परितस्सति, परितस्सितो उपादियति, तस्सुपादानपच्चया भवो. तस्मा तण्हुपादानभवापि गहिता होन्ति. तेनाह ‘‘पुरिमकम्मभवस्मिं मोहो अविज्जा, आयूहना सङ्खारा, निकन्ति तण्हा, उपगमनं उपादानं, चेतना भवोति इमे पञ्च धम्मा पुरिमकम्मभवस्मिं इध पटिसन्धिया पच्चया’’ति (पटि. म. १.४७).

तत्थ ¶ पुरिमकम्मभवस्मिन्ति पुरिमे कम्मभवे, अतीतजातियं कम्मभवे करियमानेति अत्थो. मोहो अविज्जाति यो तदा दुक्खादीसु मोहो, येन मूळ्हो कम्मं करोति, सा अविज्जा. आयूहना सङ्खाराति तं कम्मं करोतो या पुरिमचेतनायो, यथा ‘‘दानं दस्सामी’’ति चित्तं उप्पादेत्वा मासम्पि संवच्छरम्पि दानुपकरणानि सज्जेन्तस्स उप्पन्ना पुरिमचेतनायो. पटिग्गाहकानं पन हत्थे दक्खिणं पतिट्ठापयतो चेतना भवोति वुच्चति. एकावज्जनेसु वा छसु जवनेसु चेतना आयूहना सङ्खारा नाम ¶ . सत्तमे भवो. या काचि वा पन चेतना भवो. सम्पयुत्ता आयूहना सङ्खारा नाम. निकन्ति तण्हाति या कम्मं करोन्तस्स फले उपपत्तिभवे निकामना पत्थना, सा तण्हा नाम. उपगमनं उपादानन्ति यं कम्मभवस्स पच्चयभूतं ‘‘इदं कत्वा असुकस्मिं नाम ठाने कामे सेविस्सामि उच्छिज्जिस्सामी’’तिआदिना नयेन पवत्तं उपगमनं गहणं परामसनं, इदं उपादानं नाम. चेतना भवोति आयूहनावसाने वुत्ता चेतना भवोति एवमत्थो वेदितब्बो.

इदानि फलपञ्चकन्ति विञ्ञाणादिवेदनावसानं पाळियं आगतमेव. यथाह – ‘‘इध पटिसन्धि विञ्ञाणं, ओक्कन्ति नामरूपं, पसादो आयतनं, फुट्ठो फस्सो, वेदयितं वेदना, इमे पञ्च धम्मा इधूपपत्तिभवस्मिं पुरेकतस्स कम्मस्स पच्चया’’ति (पटि. १.४७). तत्थ पटिसन्धि विञ्ञाणन्ति यं भवन्तरपटिसन्धानवसेन उप्पन्नत्ता पटिसन्धीति वुच्चति, तं विञ्ञाणं. ओक्कन्ति नामरूपन्ति या गब्भे रूपारूपधम्मानं ओक्कन्ति आगन्त्वा पविसनं विय, इदं नामरूपं. पसादो आयतनन्ति इदं चक्खादिपञ्चायतनवसेन वुत्तं. फुट्ठो फस्सोति यो आरम्मणं फुट्ठो फुसन्तो उप्पन्नो, अयं फस्सो. वेदयितं वेदनाति यं पटिसन्धिविञ्ञाणेन वा सळायतनपच्चयेन वा फस्सेन सह उप्पन्नं विपाकवेदयितं, सा वेदनाति एवमत्थो वेदितब्बो.

इदानि हेतवो पञ्चाति तण्हादयो पाळियं आगता तण्हुपादानभवा. भवे पन गहिते तस्स पुब्बभागा तंसम्पयुत्ता वा सङ्खारा गहिताव होन्ति. तण्हुपादानग्गहणेन च तंसम्पयुत्ता, याय वा मूळ्हो कम्मं करोति, सा अविज्जा गहिताव होतीति. एवं पञ्च. तेनाह ‘‘इध परिपक्कत्ता आयतनानं मोहो अविज्जा, आयूहना सङ्खारा, निकन्ति तण्हा, उपगमनं उपादानं, चेतना भवोति इमे पञ्च धम्मा इध कम्मभवस्मिं आयतिं पटिसन्धिया पच्चया’’ति ¶ (पटि. म. १.४७). तत्थ इध परिपक्कत्ता आयतनानन्ति परिपक्कायतनस्स कम्मकरणकाले सम्मोहो दस्सितो. सेसं उत्तानत्थमेव.

आयतिं फलपञ्चकन्ति विञ्ञाणादीनि पञ्च. तानि जातिग्गहणेन वुत्तानि. जरामरणं पन तेसंयेव जरामरणं. तेनाह – ‘‘आयतिं पटिसन्धि विञ्ञाणं ¶ , ओक्कन्ति नामरूपं, पसादो आयतनं, फुट्ठो फस्सो, वेदयितं वेदना, इमे पञ्च धम्मा आयतिं उपपत्तिभवस्मिं इध कतस्स कम्मस्स पच्चया’’ति (पटि. म. १.४७). एवमिदं वीसति आकारारं होति.

तिवट्टमनवट्ठितं भमतीति एत्थ पन सङ्खारभवा कम्मवट्टं, अविज्जातण्हुपादानानि किलेसवट्टं, विञ्ञाणनामरूपसळायतनफस्सवेदना विपाकवट्टन्ति इमेहि तीहि वट्टेहि तिवट्टमिदं भवचक्कं याव किलेसवट्टं न उपच्छिज्जति, ताव अनुपच्छिन्नपच्चयत्ता अनवट्ठितं पुनप्पुनं परिवत्तनतो भमतियेवाति वेदितब्बं.

६५५. तयिदमेवं भममानं,

सच्चप्पभवतो किच्चा, वारणा उपमाहि च;

गम्भीरनयभेदा च, विञ्ञातब्बं यथारहं.

तत्थ यस्मा कुसलाकुसलं कम्मं अविसेसेन समुदयसच्चन्ति सच्चविभङ्गे वुत्तं, तस्मा अविज्जापच्चया सङ्खाराति अविज्जाय सङ्खारा दुतियसच्चप्पभवं दुतियसच्चं. सङ्खारेहि विञ्ञाणं दुतियसच्चप्पभवं पठमसच्चं. विञ्ञाणादीहि ¶ नामरूपादीनि विपाकवेदनापरियोसानानि पठमसच्चप्पभवं पठमसच्चं. वेदनाय तण्हा पठमसच्चप्पभवं दुतियसच्चं. तण्हाय उपादानं दुतियसच्चप्पभवं दुतियसच्चं. उपादानतो भवो दुतियसच्चप्पभवं पठमदुतियसच्चद्वयं. भवतो जाति दुतियसच्चप्पभवं पठमसच्चं. जातिया जरामरणं पठमसच्चप्पभवं पठमसच्चन्ति एवं ताविदं सच्चप्पभवतो विञ्ञातब्बं यथारहं.

६५६. यस्मा पनेत्थ अविज्जा वत्थूसु च सत्ते सम्मोहेति, पच्चयो च होति सङ्खारानं ¶ पातुभावाय. तथा सङ्खारा सङ्खतञ्च अभिसङ्खरोन्ति, पच्चया च होन्ति विञ्ञाणस्स. विञ्ञाणम्पि वत्थुञ्च पटिविजानाति, पच्चयो च होति नामरूपस्स. नामरूपम्पि अञ्ञमञ्ञञ्च उपत्थम्भेति, पच्चयो च होति सळायतनस्स. सळायतनम्पि सविसये च पवत्तति, पच्चयो च होति फस्सस्स. फस्सोपि आरम्मणञ्च फुसति, पच्चयो च होति वेदनाय. वेदनापि आरम्मणरसञ्च अनुभवति, पच्चयो च होति तण्हाय. तण्हापि रज्जनीये च धम्मे रज्जति, पच्चयो च होति उपादानस्स. उपादानम्पि उपादानिये च धम्मे उपादियति, पच्चयो च होति भवस्स. भवोपि नानागतीसु च विक्खिपति, पच्चयो च होति जातिया. जातिपि खन्धे च जनेति तेसं अभिनिब्बत्तिभावेन पवत्तत्ता, पच्चयो च होति जरामरणस्स. जरामरणम्पि खन्धानं पाकभेदभावञ्च अधितिट्ठति, पच्चयो च होति भवन्तरपातुभावाय सोकादीनं अधिट्ठानत्ता. तस्मा सब्बपदेसु द्वेधा पवत्तिकिच्चतोपि इदं विञ्ञातब्बं यथारहं.

६५७. यस्मा चेत्थ अविज्जापच्चया सङ्खाराति इदं कारकदस्सननिवारणं. सङ्खारपच्चया विञ्ञाणन्ति अत्तसङ्कन्तिदस्सननिवारणं. विञ्ञाणपच्चया नामरूपन्ति ‘‘अत्ता’’तिपरिकप्पितवत्थुभेददस्सनतो घनसञ्ञानिवारणं. नामरूपपच्चया सळायतनन्तिआदि अत्ता पस्सति…पे… विजानाति, फुसति, वेदयति, तण्हियति, उपादियति, भवति, जायति, जीयति, मीयतीतिएवमादिदस्सननिवारणं. तस्मा मिच्छादस्सननिवारणतोपेतं भवचक्कं विञ्ञातब्बं यथारहं.

६५८. यस्मा ¶ पनेत्थ सलक्खणसामञ्ञलक्खणवसेन धम्मानं अदस्सनतो अन्धो विय अविज्जा. अन्धस्स उपक्खलनं विय अविज्जापच्चया सङ्खारा. उपक्खलितस्स पतनं विय सङ्खारपच्चया विञ्ञाणं. पतितस्स गण्डपातुभावो विय विञ्ञाणपच्चया नामरूपं. गण्डभेदपीळका विय नामरूपपच्चया सळायतनं. गण्डपीळकाघट्टनं विय सळायतनपच्चया फस्सो. घट्टनदुक्खं विय फस्सपच्चया वेदना, दुक्खस्स पटिकाराभिलासो विय वेदनापच्चया तण्हा. पटिकाराभिलासेन असप्पायग्गहणं विय तण्हापच्चया उपादानं. उपादिण्णअसप्पायालेपनं विय उपादानपच्चया भवो. असप्पायालेपनेन गण्डविकारपातुभावो विय भवपच्चया जाति. गण्डविकारतो गण्डभेदो विय जातिपच्चया जरामरणं. यस्मा वा पनेत्थ अविज्जा अप्पटिपत्तिमिच्छापटिपत्तिभावेन सत्ते अभिभवति पटलं विय अक्खीनि ¶ . तदभिभूतो च बालो पुनब्भविकेहि सङ्खारेहि अत्तानं वेठेति कोसकारकिमि विय कोसप्पदेसेहि. सङ्खारपरिग्गहितं विञ्ञाणं गतीसु पतिट्ठं लभति परिणायकपरिग्गहितो विय राजकुमारो रज्जे. उपपत्तिनिमित्तपरिकप्पनतो विञ्ञाणं पटिसन्धियं अनेकप्पकारं नामरूपं अभिनिब्बत्तेति मायाकारो विय मायं. नामरूपे पतिट्ठितं सळायतनं वुद्धिं विरूळ्हिं वेपुल्लं पापुणाति सुभूमियं पतिट्ठितो वनप्पगुम्बो विय. आयतनघट्टनतो फस्सो जायति अरणिसहिताभिमन्थनतो अग्गि विय. फस्सेन फुट्ठस्स वेदना पातुभवति अग्गिना फुट्ठस्स दाहो विय. वेदयमानस्स तण्हा पवड्ढति लोणूदकं पिवतो पिपासा विय. तसितो भवेसु अभिलासं करोति पिपासितो विय पानीये. तदस्सुपादानं, उपादानेन भवं उपादियति आमिसलोभेन मच्छो बळिसं विय. भवे सति जाति होति बीजे सति अङ्कुरो विय. जातस्स अवस्सं जरामरणं उप्पन्नस्स रुक्खस्स पतनं विय. तस्मा एवं उपमाहिपेतं भवचक्कं विञ्ञातब्बं यथारहं.

६५९. यस्मा च भगवता अत्थतोपि धम्मतोपि देसनतोपि पटिवेधतोपि गम्भीरभावं सन्धाय ‘‘गम्भीरो चायं, आनन्द, पटिच्चसमुप्पादो गम्भीरावभासो चा’’ति (दी. नि. २.९५; सं. नि. २.६०) वुत्तं, तस्मा गम्भीरभेदतोपेतं भवचक्कं विञ्ञातब्बं यथारहं.

तत्थ ¶ यस्मा न जातितो जरामरणं न होति, न च जातिं विना अञ्ञतो होति, इत्थञ्च जातितो समुदागच्छतीति एवं जातिपच्चयसमुदागतट्ठस्स दुरवबोधनीयतो जरामरणस्स जातिपच्चयसम्भूतसमुदागतट्ठो गम्भीरो. तथा जातिया भवपच्चय…पे… सङ्खारानं अविज्जापच्चयसम्भूतसमुदागतट्ठो गम्भीरो. तस्मा इदं भवचक्कं अत्थगम्भीरन्ति अयं तावेत्थ अत्थगम्भीरता. हेतुफलञ्हि अत्थोति वुच्चति. यथाह – ‘‘हेतुफले ञाणं अत्थपटिसम्भिदा’’ति (विभ. ७२०).

यस्मा पन येनाकारेन यदवत्था च अविज्जा तेसं तेसं सङ्खारानं पच्चयो होति, तस्स दुरवबोधनीयतो अविज्जाय सङ्खारानं पच्चयट्ठो गम्भीरो. तथा सङ्खारानं…पे… जातिया जरामरणस्स पच्चयट्ठो गम्भीरो, तस्मा इदं भवचक्कं धम्मगम्भीरन्ति अयमेत्थ धम्मगम्भीरता. हेतुनो हि धम्मोति नामं. यथाह – ‘‘हेतुम्हि ञाणं धम्मपटिसम्भिदा’’ति (विभ. ७२०).

यस्मा ¶ चस्स तेन तेन कारणेन तथा तथा पवत्तेतब्बत्ता देसनापि गम्भीरा, न तत्थ सब्बञ्ञुतञ्ञाणतो अञ्ञं ञाणं पतिट्ठं लभति. तथाहेतं कत्थचि सुत्ते अनुलोमतो, कत्थचि पटिलोमतो, कत्थचि अनुलोमपटिलोमतो, कत्थचि वेमज्झतो पट्ठाय अनुलोमतो वा पटिलोमतो वा, कत्थचि तिसन्धिचतुसङ्खेपं, कत्थचि द्विसन्धितिसङ्खेपं, कत्थचि एकसन्धिद्विसङ्खेपं देसितं, तस्मा इदं भवचक्कं देसनागम्भीरन्ति अयं देसनागम्भीरता.

यस्मा चेत्थ यो सो अविज्जादीनं सभावो, येन पटिविद्धेन अविज्जादयो सम्मा सलक्खणतो पटिविद्धा होन्ति, सो दुप्परियोगाहत्ता गम्भीरो, तस्मा इदं भवचक्कं पटिवेधगम्भीरं. तथा हेत्थ अविज्जाय अञ्ञाणादस्सनसच्चासम्पटिवेधट्ठो गम्भीरो, सङ्खारानं अभिसङ्खरणायूहनसरागविरागट्ठो, विञ्ञाणस्स सुञ्ञतअब्यापारअसङ्कन्तिपटिसन्धिपातुभावट्ठो, नामरूपस्स एकुप्पादविनिब्भोगाविनिब्भोगनमनरुप्पनट्ठो, सळायतनस्स अधिपतिलोकद्वारखेत्तविसयिभावट्ठो, फस्सस्स फुसनसङ्घट्टनसङ्गतिसन्निपातट्ठो ¶ , वेदनाय आरम्मणरसानुभवनसुखदुक्खमज्झत्तभावनिज्जीववेदयितट्ठो. तण्हाय अभिनन्दितज्झोसानसरितालतानदीतण्हासमुद्ददुप्पूरट्ठो, उपादानस्स आदानग्गहणाभिनिवेसपरामासदुरतिक्कमट्ठो, भवस्स आयूहनाभिसङ्खरणयोनिगतिठितिनिवासेसुखिपनट्ठो, जातिया जाति सञ्जाति ओक्कन्ति निब्बत्ति पातुभावट्ठो, जरामरणस्स खयवयभेदविपरिणामट्ठो गम्भीरोति अयमेत्थ पटिवेधगम्भीरता.

६६०. यस्मा पनेत्थ एकत्तनयो, नानत्तनयो, अब्यापारनयो, एवंधम्मतानयोति चत्तारो अत्थनया होन्ति, तस्मा नयभेदतोपेतं भवचक्कं विञ्ञातब्बं यथारहं.

तत्थ अविज्जापच्चया सङ्खारा, सङ्खारपच्चया विञ्ञाणन्ति एवं बीजस्स अङ्कुरादिभावेन रुक्खभावप्पत्ति विय सन्तानानुपच्छेदो एकत्तनयो नाम. यं सम्मा पस्सन्तो हेतुफलसम्बन्धेन सन्तानस्स अनुपच्छेदावबोधतो उच्छेददिट्ठिं पजहति. मिच्छा पस्सन्तो हेतुफलसम्बन्धेन पवत्तमानस्स सन्तानानुपच्छेदस्स एकत्तगहणतो सस्सतदिट्ठिं उपादियति.

अविज्जादीनं पन यथासकंलक्खणववत्थानं नानत्तनयो नाम. यं सम्मा पस्सन्तो नवनवानं ¶ उप्पाददस्सनतो सस्सतदिट्ठिं पजहति. मिच्छा पस्सन्तो एकसन्तानपतितस्स भिन्नसन्तानस्सेव नानत्तग्गहणतो उच्छेददिट्ठिं उपादियति.

अविज्जाय सङ्खारा मया उप्पादेतब्बा, सङ्खारानं वा विञ्ञाणं अम्हेहीति एवमादिब्यापाराभावो अब्यापारनयो नाम. यं सम्मा पस्सन्तो कारकस्स अभावावबोधतो अत्तदिट्ठिं पजहति. मिच्छा पस्सन्तो यो असतिपि ब्यापारे अविज्जादीनं सभावनियमसिद्धो हेतुभावो, तस्स अग्गहणतो अकिरियदिट्ठिं उपादियति.

अविज्जादीहि पन कारणेहि सङ्खारादीनंयेव सम्भवो खीरादीहि दधिआदीनं विय, न अञ्ञेसन्ति अयं एवंधम्मतानयो नाम. यं सम्मा पस्सन्तो पच्चयानुरूपतो फलावबोधा अहेतुकदिट्ठिं अकिरियदिट्ठिञ्च पजहति. मिच्छा पस्सन्तो पच्चयानुरूपं फलप्पवत्तिं अग्गहेत्वा यतो कुतोचि ¶ यस्स कस्सचि असम्भवग्गहणतो अहेतुकदिट्ठिञ्चेव नियतवादञ्च उपादियतीति एवमिदं भवचक्कं,

सच्चप्पभवतो किच्चा, वारणाउपमाहि च;

गम्भीरनयभेदा च, विञ्ञातब्बं यथारहं.

६६१. इदञ्हि अतिगम्भीरतो अगाधं. नानानयगहनतो दुरतियानं. ञाणासिना समाधिपवरसिलायं सुनिसितेन,

भवचक्कमपदालेत्वा, असनिविचक्कमिव निच्चनिम्मथनं;

संसारभयमतीतो, न कोचि सुपिनन्तरेप्यत्थि.

वुत्तम्पि हेतं भगवता – ‘‘गम्भीरो चायं, आनन्द, पटिच्चसमुप्पादो गम्भीरावभासो च. एतस्स चानन्द, धम्मस्स अननुबोधा अप्पटिवेधा एवमयं पजा तन्ताकुलकजाता कुलागण्ठिकजाता मुञ्जपब्बजभूता अपायं दुग्गतिं विनिपातं संसारं नातिवत्तती’’ति (महाव. ९५; सं. नि. २.६०). तस्मा अत्तनो वा परेसं वा हिताय च सुखाय च पटिपन्नो अवसेसकिच्चानि पहाय,

गम्भीरे ¶ पच्चयाकारप्पभेदे इध पण्डितो;

यथा गाधं लभेथेवमनुयुञ्जे सदा सतोति.

इति साधुजनपामोज्जत्थाय कते विसुद्धिमग्गे

पञ्ञाभावनाधिकारे

पञ्ञाभूमिनिद्देसो नाम

सत्तरसमो परिच्छेदो.

१८. दिट्ठिविसुद्धिनिद्देसो

नामरूपपरिग्गहकथा

६६२. इदानि ¶ ¶ या ‘‘इमेसु भूमिभूतेसु धम्मेसु उग्गहपरिपुच्छावसेन ञाणपरिचयं कत्वा ‘सीलविसुद्धि चेव चित्तविसुद्धि चा’ति द्वे मूलभूता विसुद्धियो सम्पादेतब्बा’’ति वुत्ता. तत्थ सीलविसुद्धि नाम सुपरिसुद्धं पातिमोक्खसंवरादिचतुब्बिधं सीलं, तञ्च सीलनिद्देसे वित्थारितमेव. चित्तविसुद्धि नाम सउपचारा अट्ठ समापत्तियो, तापि चित्तसीसेन वुत्तसमाधिनिद्देसे सब्बाकारेन वित्थारिता एव. तस्मा ता तत्थ वित्थारितनयेनेव वेदितब्बा.

यं पन वुत्तं ‘‘दिट्ठिविसुद्धि, कङ्खावितरणविसुद्धि, मग्गामग्गञाणदस्सनविसुद्धि, पटिपदाञाणदस्सनविसुद्धि, ञाणदस्सनविसुद्धीति इमा पन पञ्च विसुद्धियो सरीर’’न्ति, तत्थ नामरूपानं याथावदस्सनं दिट्ठिविसुद्धि नाम.

६६३. तं सम्पादेतुकामेन समथयानिकेन ताव ठपेत्वा नेवसञ्ञानासञ्ञायतनं अवसेसरूपारूपावचरज्झानानं अञ्ञतरतो वुट्ठाय वितक्कादीनि झानङ्गानि, तंसम्पयुत्ता च धम्मा लक्खणरसादिवसेन परिग्गहेतब्बा. परिग्गहेत्वा सब्बम्पेतं आरम्मणाभिमुखं नमनतो नमनट्ठेन नामन्ति ववत्थपेतब्बं.

ततो यथा नाम पुरिसो अन्तोगेहे सप्पं दिस्वा तं अनुबन्धमानो तस्स आसयं पस्सति, एवमेव अयम्पि योगावचरो तं नामं उपपरिक्खन्तो ‘‘इदं नामं किं निस्साय पवत्तती’’ति परियेसमानो तस्स निस्सयं हदयरूपं पस्सति. ततो हदयरूपस्स निस्सयभूतानि, भूतनिस्सितानि च सेसुपादायरूपानीति रूपं परिग्गण्हाति. सो सब्बम्पेतं रुप्पनतो ¶ रूपन्ति ववत्थपेति. ततो नमनलक्खणं नामं, रुप्पनलक्खणं रूपन्ति सङ्खेपतो नामरूपं ववत्थपेति.

६६४. सुद्धविपस्सनायानिको पन अयमेव वा समथयानिको चतुधातुववत्थाने वुत्तानं तेसं तेसं धातुपरिग्गहमुखानं अञ्ञतरमुखवसेन सङ्खेपतो वा वित्थारतो वा चतस्सो धातुयो परिग्गण्हाति. अथस्स याथावसरसलक्खणतो आविभूतासु धातूसु कम्मसमुट्ठानम्हि ¶ ताव केसे ‘‘चतस्सो धातुयो, वण्णो, गन्धो, रसो, ओजा, जीवितं, कायप्पसादो’’ति एवं कायदसकवसेन दस रूपानि, तत्थेव भावस्स अत्थिताय भावदसकवसेन दस, तत्थेव आहारसमुट्ठानं ओजट्ठमकं, उतुसमुट्ठानं, चित्तसमुट्ठानन्ति अपरानिपि चतुवीसतीति एवं चतुसमुट्ठानेसु चतुवीसतिकोट्ठासेसु चतुचत्तालीस चतुचत्तालीस रूपानि, सेदो, अस्सु, खेळो, सिङ्घाणिकाति इमेसु पन चतूसु उतुचित्तसमुट्ठानेसु द्विन्नं ओजट्ठमकानं वसेन सोळस सोळस रूपानि, उदरियं, करीसं, पुब्बो, मुत्तन्ति इमेसु चतूसु उतुसमुट्ठानेसु उतुसमुट्ठानस्सेव ओजट्ठमकस्स वसेन अट्ठ अट्ठ रूपानि पाकटानि होन्तीति. एस ताव द्वत्तिंसाकारे नयो.

ये पन इमस्मिं द्वत्तिंसाकारे आविभूते अपरे दस आकारा आविभवन्ति. तत्थ असितादिपरिपाचके ताव कम्मजे तेजोकोट्ठासम्हि ओजट्ठमकञ्चेव जीवितञ्चाति नव रूपानि, तथा चित्तजे अस्सासपस्सासकोट्ठासेपि ओजट्ठमकञ्चेव सद्दो चाति नव, सेसेसु चतुसमुट्ठानेसु अट्ठसु जीवितनवकञ्चेव तीणि च ओजट्ठमकानीति तेत्तिंस रूपानि पाकटानि होन्ति.

तस्सेवं वित्थारतो द्वाचत्तालीसाकारवसेन इमेसु भूतुपादायरूपेसु पाकटेसु जातेसु वत्थुद्वारवसेन पञ्च चक्खुदसकादयो, हदयवत्थुदसकञ्चाति अपरानिपि सट्ठिरूपानि पाकटानि होन्ति. सो सब्बानिपि तानि रुप्पनलक्खणेन एकतो कत्वा ‘‘एतं रूप’’न्ति पस्सति.

तस्सेवं परिग्गहितरूपस्स द्वारवसेन अरूपधम्मा पाकटा होन्ति. सेय्यथिदं – द्वेपञ्चविञ्ञाणानि, तिस्सो मनोधातुयो, अट्ठसट्ठि मनोविञ्ञाणधातुयोति एकासीति लोकियचित्तानि, अविसेसेन च तेहि चित्तेहि सहजातो फस्सो, वेदना, सञ्ञा, चेतना, जीवितं, चित्तट्ठिति, मनसिकारोति इमे सत्त सत्त चेतसिकाति. लोकुत्तरचित्तानि पन नेव सुद्धविपस्सकस्स ¶ , न समथयानिकस्स परिग्गहं गच्छन्ति अनधिगतत्ताति. सो सब्बेपि ते अरूपधम्मे नमनलक्खणेन एकतो कत्वा ‘‘एतं नाम’’न्ति पस्सति. एवमेको चतुधातुववत्थानमुखेन वित्थारतो नामरूपं ववत्थपेति.

६६५. अपरो ¶ अट्ठारसधातुवसेन. कथं? इध भिक्खु अत्थि इमस्मिं अत्तभावे चक्खुधातु…पे… मनोविञ्ञाणधातूति धातुयो आवज्जित्वा यं लोको सेतकण्हमण्डलविचित्तं आयतवित्थतं अक्खिकूपके न्हारुसुत्तकेन आबद्धं मंसपिण्डं ‘‘चक्खू’’ति सञ्जानाति, तं अग्गहेत्वा खन्धनिद्देसे उपादारूपेसु वुत्तप्पकारं चक्खुपसादं ‘‘चक्खुधातू’’ति ववत्थपेति.

यानि पनस्स निस्सयभूता चतस्सो धातुयो, परिवारकानि चत्तारि वण्ण-गन्ध-रस-ओजा-रूपानि, अनुपालकं जीवितिन्द्रियन्ति नव सहजातरूपानि, तत्थेव ठितानि कायदसकभावदसकवसेन वीसति कम्मजरूपानि, आहारसमुट्ठानादीनं तिण्णं ओजट्ठमकानं वसेन चतुवीसति अनुपादिन्नरूपानीति एवं सेसानि तेपण्णास रूपानि होन्ति, न तानि च ‘‘चक्खुधातू’’ति ववत्थपेति. एस नयो सोतधातुआदीसुपि. कायधातुयं पन अवसेसानि तेचत्तालीस रूपानि होन्ति. केचि पन उतुचित्तसमुट्ठानानि सद्देन सह नव नव कत्वा पञ्चचत्तालीसाति वदन्ति.

इति इमे पञ्च पसादा, तेसञ्च विसया रूपसद्दगन्धरसफोट्ठब्बा पञ्चाति दस रूपानि दस धातुयो होन्ति. अवसेसरूपानि धम्मधातुयेव होन्ति. चक्खुं पन निस्साय रूपं आरब्भ पवत्तं चित्तं चक्खुविञ्ञाणधातु नामाति एवं द्वेपञ्चविञ्ञाणानि पञ्च विञ्ञाणधातुयो होन्ति. तीणि मनोधातुचित्तानि एका मनोधातु, अट्ठसट्ठि मनोविञ्ञाणधातुचित्तानि मनोविञ्ञाणधातूति सब्बानिपि एकासीति लोकियचित्तानि सत्त विञ्ञाणधातुयो. तंसम्पयुत्ता फस्सादयो धम्मधातूति एवमेत्थ अड्ढेकादस धातुयो रूपं, अड्ढट्ठमा धातुयो नामन्ति एवमेको अट्ठारसधातुवसेन नामरूपं ववत्थपेति.

६६६. अपरो द्वादसायतनवसेन. कथं? चक्खुधातुयं वुत्तनयेनेव ठपेत्वा तेपण्णास रूपानि चक्खुपसादमत्तं ‘‘चक्खायतन’’न्ति ववत्थपेति. तत्थ वुत्तनयेनेव च सोतघानजिव्हाकायधातुयो ‘‘सोतघानजिव्हाकायायतनानी’’ति, तेसं विसयभूते पञ्चधम्मे ‘‘रूपसद्दगन्धरसफोट्ठब्बायतनानी’’ति ¶ , लोकियसत्तविञ्ञाणधातुयो ‘‘मनायतन’’न्ति, तंसम्पयुत्ता फस्सादयो सेसरूपञ्च ‘‘धम्मायतन’’न्ति एवमेत्थ ¶ अड्ढेकादस आयतनानि रूपं, दियड्ढआयतनानि नामन्ति एवमेको द्वादसायतनवसेन नामरूपं ववत्थपेति.

६६७. अपरो ततो संखित्ततरं खन्धवसेन ववत्थपेति. कथं? इध भिक्खु इमस्मिं सरीरे चतुसमुट्ठाना चतस्सो धातुयो, तंनिस्सितो वण्णो, गन्धो, रसो, ओजा, चक्खुपसादादयो पञ्च पसादा, वत्थुरूपं, भावो, जीवितिन्द्रियं, द्विसमुट्ठानो सद्दोति इमानि सत्तरस रूपानि सम्मसनुपगानि निप्फन्नानि रूपरूपानि. कायविञ्ञत्ति, वचीविञ्ञत्ति, आकासधातु, रूपस्स लहुता, मुदुता, कम्मञ्ञता, उपचयो, सन्तति, जरता, अनिच्चताति इमानि पन दस रूपानि न सम्मसनुपगानि, आकारविकारअन्तरपरिच्छेदमत्तकानि, न निप्फन्नरूपानि, न रूपरूपानि. अपिच खो रूपानं आकारविकारअन्तरपरिच्छेदमत्ततो रूपन्ति सङ्खं गतानि. इति सब्बानि पेतानि सत्तवीसति रूपानि रूपक्खन्धो, एकासीतिया लोकियचित्तेहि सद्धिं उप्पन्ना वेदना वेदनाक्खन्धो, तंसम्पयुत्ता सञ्ञा सञ्ञाक्खन्धो, सङ्खारा सङ्खारक्खन्धो, विञ्ञाणं विञ्ञाणक्खन्धोति. इति रूपक्खन्धो रूपं, चत्तारो अरूपिनो खन्धा नामन्ति एवमेको पञ्चक्खन्धवसेन नामरूपं ववत्थपेति.

६६८. अपरो ‘‘यंकिञ्चि रूपं सब्बं रूपं चत्तारि महाभूतानि चतुन्नञ्च महाभूतानं उपादायरूप’’न्ति (म. नि. १.३४७; अ. नि. ११.१७) एवं संखित्तेनेव इमस्मिं अत्तभावे रूपं परिग्गहेत्वा, तथा मनायतनञ्चेव धम्मायतनेकदेसञ्च नामन्ति परिग्गहेत्वा ‘‘इति इदञ्च नामं इदञ्च रूपं, इदं वुच्चति नामरूप’’न्ति सङ्खेपतो नामरूपं ववत्थपेति.

६६९. सचे पनस्स तेन तेन मुखेन रूपं परिग्गहेत्वा अरूपं परिग्गण्हतो सुखुमत्ता अरूपं न उपट्ठाति, तेन धुरनिक्खेपं अकत्वा रूपमेव पुनप्पुनं सम्मसितब्बं मनसिकातब्बं परिग्गहेतब्बं ववत्थपेतब्बं. यथा यथा हिस्स रूपं सुविक्खालितं होति निज्जटं सुपरिसुद्धं, तथा तथा तदारम्मणा अरूपधम्मा सयमेव पाकटा होन्ति.

यथा हि चक्खुमतो पुरिसस्स अपरिसुद्धे आदासे मुखनिमित्तं ओलोकेन्तस्स निमित्तं न पञ्ञायति, सो ‘‘निमित्तं न पञ्ञायती’’ति न आदासं ¶ छड्डेति, अथ खो नं पुनप्पुनं परिमज्जति ¶ . तस्स परिसुद्धे आदासे निमित्तं सयमेव पाकटं होति. यथा च तेलत्थिको तिलपिट्ठं दोणियं आकिरित्वा उदकेन परिप्फोसेत्वा एकवारं द्वेवारं पीळनमत्तेन तेले अनिक्खमन्ते न तिलपिट्ठं छड्डेति, अथ खो नं पुनप्पुनं उण्होदकेन परिप्फोसेत्वा मद्दित्वा पीळेति. तस्सेवं करोतो विप्पसन्नं तिलतेलं निक्खमति. यथा वा पन उदकं पसादेतुकामो कतकट्ठिं गहेत्वा अन्तोघटे हत्थं ओतारेत्वा एकद्वेवारे घंसनमत्तेन उदके अविप्पसीदन्ते न कतकट्ठिं छड्डेति, अथ खो नं पुनप्पुनं घंसति. तस्सेवं करोन्तस्स कललकद्दमं सन्निसीदति. उदकं अच्छं होति विप्पसन्नं, एवमेवं तेन भिक्खुना धुरनिक्खेपं अकत्वा रूपमेव पुनप्पुनं सम्मसितब्बं मनसिकातब्बं परिग्गहेतब्बं ववत्थपेतब्बं.

यथा यथा हिस्स रूपं सुविक्खालितं होति निज्जटं सुपरिसुद्धं, तथा तथा तप्पच्चनीककिलेसा सन्निसीदन्ति, कद्दमुपरि उदकं विय चित्तं पसन्नं होति. तदारम्मणा अरूपधम्मा सयमेव पाकटा होन्ति. एवं अञ्ञाहिपि उच्छुचोरगोणदधिमच्छादीहि उपमाहि अयमत्थो पकासेतब्बो.

अरूपधम्मानं उपट्ठानाकारकथा

६७०. एवं सुविसुद्धरूपपरिग्गहस्स पनस्स अरूपधम्मा तीहि आकारेहि उपट्ठहन्ति फस्सवसेन वा वेदनावसेन वा विञ्ञाणवसेन वा. कथं? एकस्स ताव ‘‘पथवीधातु कक्खळलक्खणा’’तिआदिना नयेन धातुयो परिग्गण्हन्तस्स पठमाभिनिपातो फस्सो, तंसम्पयुत्ता वेदना वेदनाक्खन्धो, सञ्ञा सञ्ञाक्खन्धो, सद्धिं फस्सेन चेतना सङ्खारक्खन्धो, चित्तं विञ्ञाणक्खन्धोति उपट्ठाति. तथा ‘‘केसे पथवीधातु कक्खळलक्खणा…पे… अस्सासपस्सासे पथवीधातु कक्खळलक्खणा’’ति (विसुद्धि. १.३०७) पठमाभिनिपातो फस्सो, तंसम्पयुत्ता वेदना वेदनाक्खन्धो…पे… चित्तं विञ्ञाणक्खन्धोति उपट्ठाति. एवं अरूपधम्मा फस्सवसेन उपट्ठहन्ति.

एकस्स ‘‘पथवीधातु कक्खळलक्खणा’’ति तदारम्मणरसानुभवनकवेदना वेदनाक्खन्धो, तंसम्पयुत्ता सञ्ञा सञ्ञाक्खन्धो, तंसम्पयुत्तो फस्सो ¶ च चेतना च सङ्खारक्खन्धो, तंसम्पयुत्तं चित्तं विञ्ञाणक्खन्धोति उपट्ठाति. तथा ‘‘केसे पथवीधातु कक्खळलक्खणा ¶ …पे… अस्सासपस्सासे पथवीधातु कक्खळलक्खणा’’ति तदारम्मणरसानुभवनकवेदना वेदनाक्खन्धो…पे… तंसम्पयुत्तं चित्तं विञ्ञाणक्खन्धोति उपट्ठाति. एवं वेदनावसेन अरूपधम्मा उपट्ठहन्ति.

अपरस्स ‘‘पथवीधातु कक्खळलक्खणा’’ति आरम्मणपटिविजाननं विञ्ञाणं विञ्ञाणक्खन्धो, तंसम्पयुत्ता वेदना वेदनाक्खन्धो, सञ्ञा सञ्ञाक्खन्धो, फस्सो च चेतना च सङ्खारक्खन्धोति उपट्ठाति. तथा ‘‘केसे पथवीधातु कक्खळलक्खणा…पे… अस्सासपस्सासे पथवीधातु कक्खळलक्खणा’’ति आरम्मणपटिविजाननं विञ्ञाणं विञ्ञाणक्खन्धो, तंसम्पयुत्ता वेदना वेदनाक्खन्धो, सञ्ञा सञ्ञाक्खन्धो, फस्सो च चेतना च सङ्खारक्खन्धोति उपट्ठाति. एवं विञ्ञाणवसेन अरूपधम्मा उपट्ठहन्ति.

एतेनेव उपायेन ‘‘कम्मसमुट्ठाने केसे पथवीधातु कक्खळलक्खणा’’तिआदिना नयेन द्वाचत्तालीसाय धातुकोट्ठासेसु चतुन्नं चतुन्नं धातूनं वसेन, सेसेसु च चक्खुधातुआदीसु रूपपरिग्गहमुखेसु सब्बं नयभेदं अनुगन्त्वा योजना कातब्बा.

६७१. यस्मा च एवं सुविसुद्धरूपपरिग्गहस्सेव तस्स अरूपधम्मा तीहाकारेहि पाकटा होन्ति. तस्मा सुविसुद्धरूपपरिग्गहेनेव अरूपपरिग्गहाय योगो कातब्बो, न इतरेन. सचे हि एकस्मिं वा रूपधम्मे उपट्ठिते द्वीसु वा रूपं पहाय अरूपपरिग्गहं आरभति कम्मट्ठानतो परिहायति, पथवीकसिणभावनाय वुत्तप्पकारा पब्बतेय्या गावी विय. सुविसुद्धरूपपरिग्गहस्स पन अरूपपरिग्गहाय योगं करोतो कम्मट्ठानं वुद्धिं विरूळ्हिं वेपुल्लं पापुणाति.

सो एवं फस्सादीनं वसेन उपट्ठिते चत्तारो अरूपिनो खन्धे नामन्ति, तेसं आरम्मणभूतानि चत्तारि महाभूतानि, चतुन्नञ्च महाभूतानं उपादायरूपं रूपन्ति ववत्थपेति. इति अट्ठारस धातुयो द्वादसायतनानि पञ्चक्खन्धाति सब्बेपि तेभूमके धम्मे खग्गेन समुग्गं विवरमानो ¶ विय यमकतालकन्दं फालयमानो विय च नामञ्च रूपञ्चाति द्वेधा ववत्थपेति. नामरूपमत्ततो उद्धं अञ्ञो सत्तो वा पुग्गलो वा देवो वा ब्रह्मा वा नत्थीति निट्ठं गच्छति.

सम्बहुलसुत्तन्तसंसन्दना

६७२. सो ¶ एवं याथावसरसतो नामरूपं ववत्थपेत्वा सुट्ठुतरं ‘‘सत्तो पुग्गलो’’ति इमिस्सा लोकसमञ्ञाय पहानत्थाय सत्तसम्मोहस्स समतिक्कमत्थाय असम्मोहभूमियं चित्तं ठपनत्थाय सम्बहुलसुत्तन्तवसेन ‘‘नामरूपमत्तमेविदं, न सत्तो, न पुग्गलो अत्थी’’ति एतमत्थं संसन्देत्वा ववत्थपेति. वुत्तञ्हेतं –

‘‘यथापि अङ्गसम्भारा, होति सद्दो रथो इति;

एवं खन्धेसु सन्तेसु, होति सत्तोति सम्मुती’’ति. (सं. नि. १.१७१);

अपरम्पि वुत्तं, ‘‘सेय्यथापि, आवुसो, कट्ठञ्च पटिच्च वल्लिञ्च पटिच्च मत्तिकञ्च पटिच्च तिणञ्च पटिच्च आकासो परिवारितो अगारन्त्वेव सङ्खं गच्छति, एवमेव खो, आवुसो, अट्ठिञ्च पटिच्च न्हारुञ्च पटिच्च मंसञ्च पटिच्च चम्मञ्च पटिच्च आकासो परिवारितो रूपन्त्वेव सङ्खं गच्छती’’ति (म. नि. १.३०६).

अपरम्पि वुत्तं –

‘‘दुक्खमेव हि सम्भोति, दुक्खं तिट्ठति वेति च;

नाञ्ञत्र दुक्खा सम्भोति, नाञ्ञं दुक्खा निरुज्झती’’ति. (सं. नि. १.१७१);

उपमाहि नामरूपविभावना

६७३. एवं अनेकसतेहि सुत्तन्तेहि नामरूपमेव दीपितं, न सत्तो न पुग्गलो. तस्मा यथा अक्खचक्कपञ्जरईसादीसु अङ्गसम्भारेसु एकेनाकारेन सण्ठितेसु रथोति वोहारमत्तं होति, परमत्थतो एकेकस्मिं अङ्गे उपपरिक्खियमाने रथो नाम नत्थि. यथा च कट्ठादीसु गेहसम्भारेसु एकेनाकारेन आकासं परिवारेत्वा ठितेसु गेहन्ति वोहारमत्तं होति, परमत्थतो गेहं नाम नत्थि. यथा च अङ्गुलिअङ्गुट्ठादीसु एकेनाकारेन ठितेसु मुट्ठीति वोहारमत्तं ¶ होति. दोणितन्तिआदीसु वीणाति. हत्थिअस्सादीसु सेनाति. पाकारगेहगोपुरादीसु ¶ नगरन्ति. खन्धसाखापलासादीसु एकेनाकारेन ठितेसु रुक्खोति वोहारमत्तं होति, परमत्थतो एकेकस्मिं अवयवे उपपरिक्खियमाने रुक्खो नाम नत्थि. एवमेवं पञ्चसु उपादानक्खन्धेसु सति ‘‘सत्तो, पुग्गलो’’ति वोहारमत्तं होति, परमत्थतो एकेकस्मिं धम्मे उपपरिक्खियमाने ‘‘अस्मीति वा अहन्ति वा’’ति गाहस्स वत्थुभूतो सत्तो नाम नत्थि. परमत्थतो पन नामरूपमत्तमेव अत्थीति. एवं पस्सतो हि दस्सनं यथाभूतदस्सनं नाम होति.

६७४. यो पनेतं यथाभूतदस्सनं पहाय ‘‘सत्तो अत्थी’’ति गण्हाति. सो तस्स विनासं अनुजानेय्य अविनासं वा. अविनासं अनुजानन्तो सस्सते पतति. विनासं अनुजानन्तो उच्छेदे पतति. कस्मा? खीरन्वयस्स दधिनो विय तदन्वयस्स अञ्ञस्स अभावतो. सो ‘‘सस्सतो सत्तो’’ति गण्हन्तो ओलीयति नाम. ‘‘उच्छिज्जती’’ति गण्हन्तो अतिधावति नाम. तेनाह भगवा –

‘‘द्वीहि, भिक्खवे, दिट्ठिगतेहि परियुट्ठिता देवमनुस्सा ओलीयन्ति एके, अतिधावन्ति एके, चक्खुमन्तो च पस्सन्ति.

‘‘कथञ्च, भिक्खवे, ओलीयन्ति एके? भवारामा, भिक्खवे, देवमनुस्सा भवरता भवसमुदिता. तेसं भवनिरोधाय धम्मे देसियमाने चित्तं न पक्खन्दति नप्पसीदति न सन्तिट्ठति नाधिमुच्चति. एवं खो, भिक्खवे, ओलीयन्ति एके.

‘‘कथञ्च, भिक्खवे, अतिधावन्ति एके? भवेनेव खो पनेके अट्टीयमाना हरायमाना जिगुच्छमाना विभवं अभिनन्दन्ति, यतो किर भो अयं अत्ता कायस्स भेदा उच्छिज्जति विनस्सति, न होति परंमरणा, एतं सन्तं, एतं पणीतं, एतं याथावन्ति. एवं खो, भिक्खवे, अतिधावन्ति एके.

‘‘कथञ्च, भिक्खवे, चक्खुमन्तो पस्सन्ति? इध, भिक्खवे, भिक्खु भूतं भूततो ¶ पस्सति, भूतं भूततो दिस्वा भूतस्स निब्बिदाय विरागाय निरोधाय पटिपन्नो होति. एवं खो, भिक्खवे, चक्खुमन्तो पस्सन्ती’’ति (इतिवु. ४९).

६७५. तस्मा ¶ यथा दारुयन्तं सुञ्ञं निज्जीवं निरीहकं, अथ च पन दारुरज्जुकसमायोगवसेन गच्छतिपि तिट्ठतिपि. सईहकं सब्यापारं विय खायति, एवमिदं नामरूपम्पि सुञ्ञं निज्जीवं निरीहकं, अथ च पन अञ्ञमञ्ञसमायोगवसेन गच्छतिपि तिट्ठतिपि. सईहकं सब्यापारं विय खायतीति दट्ठब्बं. तेनाहु पोराणा –

‘‘नामञ्च रूपञ्च इधत्थि सच्चतो,

न हेत्थ सत्तो मनुजो च विज्जति;

सुञ्ञं इदं यन्तमिवाभिसङ्खतं,

दुक्खस्स पुञ्जो तिणकट्ठसादिसो’’ति.

न केवलञ्चेतं दारुयन्तुपमाय, अञ्ञाहिपि नळकलापीआदीहि उपमाहि विभावेतब्बं – यथा हि द्वीसु नळकलापीसु अञ्ञमञ्ञं निस्साय ठपितासु एका एकिस्सा उपत्थम्भो होति, एकिस्सा पतमानाय इतरापि पतति, एवमेवं पञ्चवोकारभवे नामरूपं अञ्ञमञ्ञं निस्साय पवत्तति, एकं एकस्स उपत्थम्भो होति. मरणवसेन एकस्मिं पतमाने इतरम्पि पतति. तेनाहु पोराणा –

‘‘यमकं नामरूपञ्च, उभो अञ्ञोञ्ञनिस्सिता;

एकस्मिं भिज्जमानस्मिं, उभो भिज्जन्ति पच्चया’’ति.

६७६. यथा च दण्डाभिहतं भेरिं निस्साय सद्दे पवत्तमाने अञ्ञा भेरी, अञ्ञो सद्दो, भेरिसद्दा असम्मिस्सा, भेरी सद्देन सुञ्ञा, सद्दो भेरिया सुञ्ञो, एवमेवं वत्थुद्वारारम्मणसङ्खातं रूपं निस्साय नामे पवत्तमाने अञ्ञं रूपं, अञ्ञं नामं, नामरूपा असम्मिस्सा, नामं रूपेन सुञ्ञं, रूपं नामेन सुञ्ञं, अपिच खो भेरिं पटिच्च सद्दो विय रूपं पटिच्च नामं पवत्तति. तेनाहु पोराणा –

‘‘न ¶ चक्खुतो जायरे फस्सपञ्चमा,

न रूपतो नो च उभिन्नमन्तरा;

हेतुं पटिच्चप्पभवन्ति सङ्खता,

यथापि सद्दो पहटाय भेरिया.

‘‘न ¶ सोततो जायरे फस्सपञ्चमा,

न सद्दतो नो च उभिन्नमन्तरा…पे….

‘‘न घानतो जायरे फस्सपञ्चमा,

न गन्धतो नो च उभिन्नमन्तरा…पे….

‘‘न जिव्हातो जायरे फस्सपञ्चमा,

न रसतो नो च उभिन्नमन्तरा…पे….

‘‘न कायतो जायरे फस्सपञ्चमा,

न फस्सतो नो च उभिन्नमन्तरा…पे….

‘‘न वत्थुरूपा पभवन्ति सङ्खता,

न चापि धम्मायतनेहि निग्गता;

हेतुं पटिच्चप्पभवन्ति सङ्खता,

यथापि सद्दो पहटाय भेरिया’’ति.

६७७. अपिचेत्थ नामं नित्तेजं न सकेन तेजेन पवत्तितुं सक्कोति, न खादति, न पिवति, न ब्याहरति, न इरियापथं कप्पेति. रूपम्पि नित्तेजं न सकेन तेजेन पवत्तितुं सक्कोति. न हि तस्सा खादितुकामता, नापि पिवितुकामता, न ब्याहरितुकामता, न इरियापथं कप्पेतुकामता, अथ खो नामं निस्साय रूपं पवत्तति, रूपं निस्साय नामं पवत्तति, नामस्स खादितुकामताय पिवितुकामताय ब्याहरितुकामताय इरियापथं कप्पेतुकामताय सति रूपं खादति, पिवति, ब्याहरति, इरियापथं कप्पेति.

इमस्स ¶ पनत्थस्स विभावनत्थाय इमं उपमं उदाहरन्ति – यथा जच्चन्धो च पीठसप्पी च दिसापक्कमितुकामा अस्सु, जच्चन्धो पीठसप्पिं एवमाह ‘‘अहं खो भणे, सक्कोमि पादेहि पादकरणीयं कातुं, नत्थि च मे चक्खूनि येहि समविसमं पस्सेय्य’’न्ति. पीठसप्पीपि जच्चन्धं एवमाह ‘‘अहं खो भणे, सक्कोमि चक्खुना चक्खुकरणीयं कातुं, नत्थि च मे पादानि येहि अभिक्कमेय्यं वा पटिक्कमेय्यं वा’’ति. सो तुट्ठहट्ठो जच्चन्धो पीठसप्पिं अंसकूटं आरोपेसि. पीठसप्पी जच्चन्धस्स अंसकूटे निसीदित्वा एवमाह ‘‘वामं मुञ्च दक्खिणं गण्ह, दक्खिणं मुञ्च वामं गण्हा’’ति. तत्थ जच्चन्धोपि नित्तेजो ¶ दुब्बलो न सकेन तेजेन सकेन बलेन गच्छति, पीठसप्पीपि नित्तेजो दुब्बलो न सकेन तेजेन सकेन बलेन गच्छति, न च तेसं अञ्ञमञ्ञं निस्साय गमनं नप्पवत्तति, एवमेवं नामम्पि नित्तेजं न सकेन तेजेन उप्पज्जति, न तासु तासु किरियासु पवत्तति. रूपम्पि नित्तेजं न सकेन तेजेन उप्पज्जति, न तासु तासु किरियासु पवत्तति, न च तेसं अञ्ञमञ्ञं निस्साय उप्पत्ति वा पवत्ति वा न होति. तेनेतं वुच्चति –

‘‘न सकेन बलेन जायरे,

नोपि सकेन बलेन तिट्ठरे;

परधम्मवसानुवत्तिनो,

जायरे सङ्खता अत्तदुब्बला.

‘‘परपच्चयतो च जायरे,

परआरम्मणतो समुट्ठिता;

आरम्मणपच्चयेहि च,

परधम्मेहि चिमे पभाविता.

‘‘यथापि नावं निस्साय, मनुस्सा यन्ति अण्णवे;

एवमेव रूपं निस्साय, नामकायो पवत्तति.

‘‘यथा च मनुस्से निस्साय, नावा गच्छति अण्णवे;

एवमेव नामं निस्साय, रूपकायो पवत्तति.

‘‘उभो ¶ निस्साय गच्छन्ति, मनुस्सा नावा च अण्णवे;

एवं नामञ्च रूपञ्च, उभो अञ्ञोञ्ञनिस्सिता’’ति.

एवं नानानयेहि नामरूपं ववत्थापयतो सत्तसञ्ञं अभिभवित्वा असम्मोहभूमियं ठितं नामरूपानं याथावदस्सनं दिट्ठिविसुद्धीति वेदितब्बं. नामरूपववत्थानन्तिपि सङ्खारपरिच्छेदोतिपि एतस्सेव अधिवचनं.

इति साधुजनपामोज्जत्थाय कते विसुद्धिमग्गे

पञ्ञाभावनाधिकारे

दिट्ठिविसुद्धिनिद्देसो नाम

अट्ठारसमो परिच्छेदो.

१९. कङ्खावितरणविसुद्धिनिद्देसो

पच्चयपरिग्गहकथा

६७८. एतस्सेव ¶ ¶ पन नामरूपस्स पच्चयपरिग्गहणेन तीसु अद्धासु कङ्खं वितरित्वा ठितं ञाणं कङ्खावितरणविसुद्धि नाम.

तं सम्पादेतुकामो भिक्खु यथा नाम कुसलो भिसक्को रोगं दिस्वा तस्स समुट्ठानं परियेसति. यथा वा पन अनुकम्पको पुरिसो दहरं कुमारं मन्दं उत्तानसेय्यकं रथिकाय निपन्नं दिस्वा ‘‘कस्स नु खो अयं पुत्तको’’ति तस्स मातापितरो आवज्जति, एवमेव तस्स नामरूपस्स हेतुपच्चयपरियेसनं आपज्जति.

सो आदितोव इति पटिसञ्चिक्खति ‘‘न ताविधं नामरूपं अहेतुकं, सब्बत्थ सब्बदा सब्बेसञ्च एकसदिसभावापत्तितो, न इस्सरादिहेतुकं, नामरूपतो उद्धं इस्सरादीनं अभावतो. येपि नामरूपमत्तमेव इस्सरादयोति वदन्ति, तेसं इस्सरादिसङ्खातनामरूपस्स अहेतुकभावप्पत्तितो. तस्मा भवितब्बमस्स हेतुपच्चयेहि, के नु खो ते’’ति.

६७९. सो एवं नामरूपस्स हेतुपच्चये आवज्जेत्वा इमस्स ताव रूपकायस्स एवं हेतुपच्चये परिग्गण्हाति – ‘‘अयं कायो निब्बत्तमानो नेव उप्पलपदुमपुण्डरीकसोगन्धिकादीनं अब्भन्तरे निब्बत्तति, न मणिमुत्ताहारादीनं, अथ खो आमासयपक्कासयानं अन्तरे उदरपटलं पच्छतो पिट्ठिकण्टकं पुरतो कत्वा अन्तअन्तगुणपरिवारितो सयम्पि दुग्गन्धजेगुच्छपटिक्कूलो दुग्गन्धजेगुच्छपटिक्कूले परमसम्बाधे ओकासे पूतिमच्छपूतिकुम्मासओळिगल्लचन्दनिकादीसु किमिव निब्बत्तति. तस्सेवं निब्बत्तमानस्स ‘अविज्जा तण्हा उपादानं कम्म’न्ति इमे चत्तारो धम्मा निब्बत्तकत्ता हेतु, आहारो उपत्थम्भकत्ता पच्चयोति पञ्च ¶ धम्मा हेतुपच्चया होन्ति. तेसुपि अविज्जादयो तयो इमस्स कायस्स माता विय दारकस्स उपनिस्सया होन्ति. कम्मं पिता विय पुत्तस्स जनकं ¶ . आहारो धाति विय दारकस्स सन्धारको’’ति. एवं रूपकायस्स पच्चयपरिग्गहं कत्वा, पुन ‘‘चक्खुञ्च पटिच्च रूपे च उप्पज्जति चक्खुविञ्ञाण’’न्तिआदिना (सं. नि. २.४३) नयेन नामकायस्स पच्चयपरिग्गहं करोति.

सो एवं पच्चयतो नामरूपस्स पवत्तिं दिस्वा यथा इदं एतरहि, एवं अतीतेपि अद्धाने पच्चयतो पवत्तित्थ, अनागतेपि पच्चयतो पवत्तिस्सतीति समनुपस्सति.

६८०. तस्सेवं समनुपस्सतो या सा पुब्बन्तं आरब्भ ‘‘अहोसिं नु खो अहं अतीतमद्धानं, न नु खो अहोसिं अतीतमद्धानं, किं नु खो अहोसिं अतीतमद्धानं, कथं नु खो अहोसिं अतीतमद्धानं, किं हुत्वा किं अहोसिं नु खो अहं अतीतमद्धान’’न्ति (म. नि. १.१८; सं. नि. २.२०) पञ्चविधा विचिकिच्छा वुत्ता, यापि अपरन्तं आरब्भ ‘‘भविस्सामि नु खो अहं अनागतमद्धानं, न नु खो भविस्सामि अनागतमद्धानं, किं नु खो भविस्सामि अनागतमद्धानं, कथं नु खो भविस्सामि अनागतमद्धानं, किं हुत्वा किं भविस्सामि नु खो अहं अनागतमद्धान’’न्ति पञ्चविधा विचिकिच्छा वुत्ता, यापि पच्चुप्पन्नं आरब्भ ‘‘एतरहि वा पन पच्चुप्पन्नं अद्धानं अज्झत्तं कथंकथी होति – अहं नु खोस्मि, नो नु खोस्मि, किं नु खोस्मि, कथं नु खोस्मि, अयं नु खो सत्तो कुतो आगतो, सो कुहिं गामी भविस्सती’’ति (म. नि. १.१८) छब्बिधा विचिकिच्छा वुत्ता, सा सब्बापि पहीयति.

६८१. अपरो साधारणासाधारणवसेन दुविधं नामस्स पच्चयं पस्सति, कम्मादिवसेन चतुब्बिधं रूपस्स. दुविधो हि नामस्स पच्चयो साधारणो असाधारणो च. तत्थ चक्खादीनि छ द्वारानि, रूपादीनि छ आरम्मणानि नामस्स साधारणो पच्चयो, कुसलादिभेदतो सब्बप्पकारस्सापि ततो पवत्तितो. मनसिकारादिको असाधारणो. योनिसो मनसिकारसद्धम्मस्सवनादिको हि कुसलस्सेव होति, विपरीतो अकुसलस्स, कम्मादिको विपाकस्स, भवङ्गादिको किरियस्साति.

रूपस्स ¶ पन कम्मं चित्तं उतु आहारोति अयं कम्मादिको चतुब्बिधो पच्चयो. तत्थ कम्मं अतीतमेव कम्मसमुट्ठानस्स रूपस्स पच्चयो होति ¶ . चित्तं चित्तसमुट्ठानस्स उप्पज्जमानं. उतुआहारा उतुआहारसमुट्ठानस्स ठितिक्खणे पच्चया होन्तीति. एवमेवेको नामरूपस्स पच्चयपरिग्गहं करोति.

सो एवं पच्चयतो नामरूपस्स पवत्तिं दिस्वा यथा इदं एतरहि, एवं अतीतेपि अद्धाने पच्चयतो पवत्तित्थ, अनागतेपि पच्चयतो पवत्तिस्सतीति समनुपस्सति. तस्सेवं समनुपस्सतो वुत्तनयेनेव तीसुपि अद्धासु विचिकिच्छा पहीयति.

६८२. अपरो तेसंयेव नामरूपसङ्खातानं सङ्खारानं जरापत्तिं जिण्णानञ्च भङ्गं दिस्वा इदं सङ्खारानं जरामरणं नाम जातिया सति होति, जाति भवे सति, भवो उपादाने सति, उपादानं तण्हाय सति, तण्हा वेदनाय सति, वेदना फस्से सति, फस्सो सळायतने सति, सळायतनं नामरूपे सति, नामरूपं विञ्ञाणे सति, विञ्ञाणं सङ्खारेसु सति, सङ्खारा अविज्जाय सतीति एवं पटिलोमपटिच्चसमुप्पादवसेन नामरूपस्स पच्चयपरिग्गहं करोति. अथस्स वुत्तनयेनेव विचिकिच्छा पहीयति.

६८३. अपरो ‘‘इति खो अविज्जापच्चया सङ्खारा’’ति (सं. नि. २.२) पुब्बे वित्थारेत्वा दस्सितअनुलोमपटिच्चसमुप्पादवसेनेव नामरूपस्स पच्चयपरिग्गहं करोति. अथस्स वुत्तनयेनेव कङ्खा पहीयति.

६८४. अपरो ‘‘पुरिमकम्मभवस्मिं मोहो अविज्जा, आयूहना सङ्खारा, निकन्ति तण्हा, उपगमनं उपादानं, चेतना भवोति इमे पञ्च धम्मा पुरिमकम्मभवस्मिं इध पटिसन्धिया पच्चया, इध पटिसन्धि विञ्ञाणं, ओक्कन्ति नामरूपं, पसादो आयतनं, फुट्ठो फस्सो, वेदयितं वेदनाति इमे पञ्च धम्मा इधूपपत्तिभवस्मिं पुरेकतस्स कम्मस्स पच्चया. इध परिपक्कत्ता आयतनानं मोहो अविज्जा…पे… चेतना भवोति इमे पञ्च धम्मा इध कम्मभवस्मिं आयतिं पटिसन्धिया पच्चया’’ति (पटि. म. १.४७) एवं कम्मवट्टविपाकवट्टवसेन नामरूपस्स पच्चयपरिग्गहं करोति.

६८५. तत्थ ¶ चतुब्बिधं कम्मं – दिट्ठधम्मवेदनीयं, उपपज्जवेदनीयं, अपरापरियवेदनीयं, अहोसिकम्मन्ति. तेसु एकजवनवीथियं सत्तसु चित्तेसु कुसला ¶ वा अकुसला वा पठमजवनचेतना दिट्ठिधम्मवेदनीयकम्मं नाम. तं इमस्मिञ्ञेव अत्तभावे विपाकं देति. तथा असक्कोन्तं पन ‘‘अहोसिकम्मं नाहोसि कम्मविपाको, न भविस्सति कम्मविपाको, नत्थि कम्मविपाको’’ति (पटि. म. १.२३४) इमस्स तिकस्स वसेन अहोसिकम्मं नाम होति. अत्थसाधिका पन सत्तमजवनचेतना उपपज्जवेदनीयकम्मं नाम. तं अनन्तरे अत्तभावे विपाकं देति. तथा असक्कोन्तं वुत्तनयेनेव अहोसिकम्मं नाम होति. उभिन्नं अन्तरे पञ्च जवनचेतना अपरापरियवेदनीयकम्मं नाम. तं अनागते यदा ओकासं लभति, तदा विपाकं देति. सति संसारप्पवत्तिया अहोसिकम्मं नाम न होति.

६८६. अपरम्पि चतुब्बिधं कम्मं – यं गरुकं, यं बहुलं, यदासन्नं, कटत्ता वा पन कम्मन्ति. तत्थ कुसलं वा होतु अकुसलं वा, गरुकागरुकेसु यं गरुकं मातुघातादिकम्मं वा महग्गतकम्मं वा, तदेव पठमं विपच्चति. तथा बहुलाबहुलेसुपि यं बहुलं होति सुसील्यं वा दुस्सील्यं वा, तदेव पठमं विपच्चति. यदासन्नं नाम मरणकाले अनुस्सरितकम्मं. यञ्हि आसन्नमरणो अनुस्सरितुं सक्कोति, तेनेव उपपज्जति. एतेहि पन तीहि मुत्तं पुनप्पुनं लद्धासेवनं कटत्ता वा पन कम्मं नाम होति, तेसं अभावे तं पटिसन्धिं आकड्ढति.

६८७. अपरम्पि चतुब्बिधं कम्मं – जनकं, उपत्थम्भकं, उपपीळकं, उपघातकन्ति. तत्थ जनकं नाम कुसलम्पि होति अकुसलम्पि. तं पटिसन्धियम्पि पवत्तेपि रूपारूपविपाकक्खन्धे जनेति. उपत्थम्भकं पन विपाकं जनेतुं न सक्कोति, अञ्ञेन कम्मेन दिन्नाय पटिसन्धिया जनिते विपाके उप्पज्जमानकसुखदुक्खं उपत्थम्भेति, अद्धानं पवत्तेति. उपपीळकं अञ्ञेन कम्मेन दिन्नाय पटिसन्धिया जनिते विपाके उप्पज्जमानकसुखदुक्खं पीळेति बाधति, अद्धानं पवत्तितुं न देति. उपघातकं पन सयं कुसलम्पि अकुसलम्पि समानं अञ्ञं दुब्बलकम्मं घातेत्वा तस्स विपाकं पटिबाहित्वा अत्तनो विपाकस्स ओकासं करोति. एवं पन कम्मेन कते ओकासे तं विपाकं उप्पन्नं नाम वुच्चति.

इति ¶ इमेसं द्वादसन्नं कम्मानं कम्मन्तरञ्चेव विपाकन्तरञ्च बुद्धानं कम्मविपाकञाणस्सेव ¶ याथावसरसतो पाकटं होति, असाधारणं सावकेहि. विपस्सकेन पन कम्मन्तरञ्च विपाकन्तरञ्च एकदेसतो जानितब्बं. तस्मा अयं मुखमत्तदस्सनेन कम्मविसेसो पकासितोति.

६८८. इति इमं द्वादसविधं कम्मं कम्मवट्टे पक्खिपित्वा एवं एको कम्मवट्टविपाकवट्टवसेन नामरूपस्स पच्चयपरिग्गहं करोति. सो एवं कम्मवट्टविपाकवट्टवसेन पच्चयतो नामरूपस्स पवत्तिं दिस्वा ‘‘यथा इदं एतरहि, एवं अतीतेपि अद्धाने कम्मवट्टविपाकवट्टवसेन पच्चयतो पवत्तित्थ, अनागतेपि कम्मवट्टविपाकवट्टवसेनेव पच्चयतो पवत्तिस्सती’’ति. इति कम्मञ्चेव कम्मविपाको च, कम्मवट्टञ्च विपाकवट्टञ्च, कम्मपवत्तञ्च विपाकपवत्तञ्च, कम्मसन्तति च विपाकसन्तति च, किरिया च किरियाफलञ्च.

कम्मा विपाका वत्तन्ति, विपाको कम्मसम्भवो;

कम्मा पुनब्भवो होति, एवं लोको पवत्ततीति. –

समनुपस्सति. तस्सेवं समनुपस्सतो या सा पुब्बन्तादयो आरब्भ ‘‘अहोसिं नु खो अह’’न्तिआदिना नयेन वुत्ता सोळसविधा विचिकिच्छा, सा सब्बा पहीयति. सब्बभवयोनिगतिट्ठितिनिवासेसु हेतुफलसम्बन्धवसेन पवत्तमानं नामरूपमत्तमेव खायति. सो नेव कारणतो उद्धं कारकं पस्सति, न विपाकप्पवत्तितो उद्धं विपाकपटिसंवेदकं. कारणे पन सति ‘‘कारको’’ति, विपाकप्पवत्तिया सति ‘‘पटिसंवेदको’’ति समञ्ञामत्तेन पण्डिता वोहरन्तिच्चेवस्स सम्मप्पञ्ञाय सुदिट्ठं होति.

६८९. तेनाहु पोराणा –

‘‘कम्मस्स कारको नत्थि, विपाकस्स च वेदको;

सुद्धधम्मा पवत्तन्ति, एवेतं सम्मदस्सनं.

‘‘एवं कम्मे विपाके च, वत्तमाने सहेतुके;

बीजरुक्खादिकानंव, पुब्बा कोटि न नायति;

अनागतेपि संसारे, अप्पवत्तं न दिस्सति.

‘‘एतमत्थं ¶ ¶ अनञ्ञाय, तित्थिया असयंवसी;

सत्तसञ्ञं गहेत्वान, सस्सतुच्छेददस्सिनो;

द्वासट्ठिदिट्ठिं गण्हन्ति, अञ्ञमञ्ञविरोधिता.

‘‘दिट्ठिबन्धनबद्धा ते, तण्हासोतेन वुय्हरे;

तण्हासोतेन वुय्हन्ता, न ते दुक्खा पमुच्चरे.

‘‘एवमेतं अभिञ्ञाय, भिक्खु बुद्धस्स सावको;

गम्भीरं निपुणं सुञ्ञं, पच्चयं पटिविज्झति.

‘‘कम्मं नत्थि विपाकम्हि, पाको कम्मे न विज्जति;

अञ्ञमञ्ञं उभो सुञ्ञा, न च कम्मं विना फलं.

‘‘यथा न सूरिये अग्गि, न मणिम्हि न गोमये;

न तेसं बहि सो अत्थि, सम्भारेहि च जायति.

‘‘तथा न अन्तो कम्मस्स, विपाको उपलब्भति;

बहिद्धापि न कम्मस्स, न कम्मं तत्थ विज्जति.

‘‘फलेन सुञ्ञं तं कम्मं, फलं कम्मे न विज्जति;

कम्मञ्च खो उपादाय, ततो निब्बत्तते फलं.

‘‘न हेत्थ देवो ब्रह्मा वा, संसारस्सत्थिकारको;

सुद्धधम्मा पवत्तन्ति, हेतुसम्भारपच्चया’’ति.

६९०. तस्सेवं कम्मवट्टविपाकवट्टवसेन नामरूपस्स पच्चयपरिग्गहं कत्वा तीसु अद्धासु पहीनविचिकिच्छस्स सब्बे अतीतानागतपच्चुप्पन्नधम्मा चुतिपटिसन्धिवसेन विदिता होन्ति, सास्स होति ञातपरिञ्ञा.

सो ¶ एवं पजानाति – ये अतीते कम्मपच्चया निब्बत्ता खन्धा, ते तत्थेव निरुद्धा, अतीतकम्मपच्चया पन इमस्मिं भवे अञ्ञे निब्बत्ता, अतीतभवतो इमं भवं आगतो एकधम्मोपि नत्थि, इमस्मिम्पि भवे कम्मपच्चयेन निब्बत्ता खन्धा निरुज्झिस्सन्ति, पुनब्भवे अञ्ञे निब्बत्तिस्सन्ति, इमम्हा भवा पुनब्भवं एकधम्मोपि न गमिस्सति. अपिच खो यथा न आचरियमुखतो सज्झायो अन्तेवासिकस्स मुखं पविसति, न च तप्पच्चया तस्स ¶ मुखे सज्झायो न वत्तति, न दूतेन मन्तोदकं पीतं रोगिनो उदरं पविसति, न च तस्स तप्पच्चया रोगो न वूपसम्मति, न मुखे मण्डनविधानं आदासतलादीसु मुखनिमित्तं गच्छति, न च तत्थ तप्पच्चया मण्डनविधानं न पञ्ञायति, न एकिस्सा वट्टिया दीपसिखा अञ्ञं वट्टिं सङ्कमति, न च तत्थ तप्पच्चया दीपसिखा न निब्बत्तति, एवमेव न अतीतभवतो इमं भवं, इतो वा पुनब्भवं कोचि धम्मो सङ्कमति, न च अतीतभवे खन्धायतनधातुपच्चया इध, इध वा खन्धायतनधातुपच्चया पुनब्भवे खन्धायतनधातुयो न निब्बत्तन्तीति.

यथेव चक्खुविञ्ञाणं, मनोधातुअनन्तरं;

न चेव आगतं नापि, न निब्बत्तं अनन्तरं.

तथेव पटिसन्धिम्हि, वत्तते चित्तसन्तति;

पुरिमं भिज्जते चित्तं, पच्छिमं जायते ततो.

तेसं अन्तरिका नत्थि, वीचि तेसं न विज्जति;

न चितो गच्छति किञ्चि, पटिसन्धि च जायतीति.

६९१. एवं चुतिपटिसन्धिवसेन विदितसब्बधम्मस्स सब्बाकारेन नामरूपस्स पच्चयपरिग्गहञाणं थामगतं होति, सोळसविधा कङ्खा सुट्ठुतरं पहीयति. न केवलञ्च सा एव, ‘‘सत्थरि कङ्खती’’ति (ध. स. १००८) आदिनयप्पवत्ता अट्ठविधापि कङ्खा पहीयतियेव, द्वासट्ठि दिट्ठिगतानि विक्खम्भन्ति. एवं नानानयेहि नामरूपपच्चयपरिग्गहणेन तीसु अद्धासु कङ्खं वितरित्वा ठितं ञाणं कङ्खावितरणविसुद्धीति वेदितब्बं. धम्मट्ठितिञाणन्तिपि यथाभूतञाणन्तिपि सम्मादस्सनन्तिपि एतस्सेवाधिवचनं. वुत्तञ्हेतं –

‘‘अविज्जा ¶ पच्चयो, सङ्खारा पच्चयसमुप्पन्ना. उभोपेते धम्मा पच्चयसमुप्पन्नाति पच्चयपरिग्गहे पञ्ञा धम्मट्ठितिञाण’’न्ति (पटि. म. १.४६).

‘‘अनिच्चतो मनसिकरोन्तो कतमे धम्मे यथाभूतं जानाति पस्सति, कथं सम्मादस्सनं होति, कथं तदन्वयेन सब्बे सङ्खारा अनिच्चतो सुदिट्ठा होन्ति, कत्थ कङ्खा पहीयति? दुक्खतो…पे… अनत्ततो मनसिकरोन्तो कतमे धम्मे यथाभूतं जानाति पस्सति…पे… कत्थ कङ्खा पहीयतीति?

‘‘अनिच्चतो ¶ मनसिकरोन्तो निमित्तं यथाभूतं जानाति पस्सति, तेन वुच्चति सम्मादस्सनं. एवं तदन्वयेन सब्बे सङ्खारा अनिच्चतो सुदिट्ठा होन्ति. एत्थ कङ्खा पहीयति. दुक्खतो मनसिकरोन्तो पवत्तं यथाभूतं जानाति पस्सति…पे… अनत्ततो मनसिकरोन्तो निमित्तञ्च पवत्तञ्च यथाभूतं जानाति पस्सति, तेन वुच्चति सम्मादस्सनं. एवं तदन्वयेन सब्बे धम्मा अनत्ततो सुदिट्ठा होन्ति. एत्थ कङ्खा पहीयति.

‘‘यञ्च यथाभूतञाणं यञ्च सम्मादस्सनं या च कङ्खावितरणा, इमे धम्मा नानत्था चेव नानाब्यञ्जना च, उदाहु एकत्था ब्यञ्जनमेव नानन्ति? यञ्च यथाभूतञाणं यञ्च सम्मादस्सनं या च कङ्खावितरणा, इमे धम्मा एकत्था, ब्यञ्जनमेव नान’’न्ति (पटि. म. १.२२७).

इमिना पन ञाणेन समन्नागतो विपस्सको बुद्धसासने लद्धस्सासो लद्धपतिट्ठो नियतगतिको चूळसोतापन्नो नाम होति.

तस्मा भिक्खु सदा सतो, नामरूपस्स सब्बसो;

पच्चये परिग्गण्हेय्य, कङ्खावितरणत्थिकोति.

इति साधुजनपामोज्जत्थाय कते विसुद्धिमग्गे

पञ्ञाभावनाधिकारे

कङ्खावितरणविसुद्धिनिद्देसो नाम

एकूनवीसतिमो परिच्छेदो.

२०. मग्गामग्गञाणदस्सनविसुद्धिनिद्देसो

सम्मसनञाणकथा

६९२. अयं ¶ ¶ मग्गो, अयं न मग्गोति एवं मग्गञ्च अमग्गञ्च ञत्वा ठितं ञाणं पन मग्गामग्गञाणदस्सनविसुद्धि नाम.

तं सम्पादेतुकामेन कलापसम्मसनसङ्खाताय नयविपस्सनाय ताव योगो करणीयो. कस्मा? आरद्धविपस्सकस्स ओभासादिसम्भवे मग्गामग्गञाणसम्भवतो. आरद्धविपस्सकस्स हि ओभासादीसु सम्भूतेसु मग्गामग्गञाणं होति, विपस्सनाय च कलापसम्मसनं आदि. तस्मा एतं कङ्खावितरणानन्तरं उद्दिट्ठं. अपिच यस्मा तीरणपरिञ्ञाय वत्तमानाय मग्गामग्गञाणं उप्पज्जति, तीरणपरिञ्ञा च ञातपरिञ्ञानन्तरा, तस्मापि तं मग्गामग्गञाणदस्सनविसुद्धिं सम्पादेतुकामेन कलापसम्मसने ताव योगो कातब्बो.

६९३. तत्रायं विनिच्छयो – तिस्सो हि लोकियपरिञ्ञा ञातपरिञ्ञा तीरणपरिञ्ञा पहानपरिञ्ञा च. या सन्धाय वुत्तं ‘‘अभिञ्ञापञ्ञा ञातट्ठे ञाणं. परिञ्ञापञ्ञा तीरणट्ठे ञाणं. पहानपञ्ञा परिच्चागट्ठे ञाण’’न्ति (पटि. म. १.७५). तत्थ ‘‘रुप्पनलक्खणं रूपं, वेदयितलक्खणा वेदना’’ति एवं तेसं तेसं धम्मानं पच्चत्तलक्खणसल्लक्खणवसेन पवत्ता पञ्ञा ञातपरिञ्ञा नाम. ‘‘रूपं अनिच्चं, वेदना अनिच्चा’’तिआदिना नयेन तेसंयेव धम्मानं सामञ्ञलक्खणं आरोपेत्वा पवत्ता लक्खणारम्मणिकविपस्सना पञ्ञा तीरणपरिञ्ञा नाम. तेसुयेव पन धम्मेसु निच्चसञ्ञादिपजहनवसेन पवत्ता लक्खणारम्मणिकविपस्सना पञ्ञा पहानपरिञ्ञा नाम.

तत्थ सङ्खारपरिच्छेदतो पट्ठाय याव पच्चयपरिग्गहा ञातपरिञ्ञाय भूमि. एतस्मिं हि अन्तरे ¶ धम्मानं पच्चत्तलक्खणपटिवेधस्सेव आधिपच्चं होति. कलापसम्मसनतो पन पट्ठाय याव उदयब्बयानुपस्सना तीरणपरिञ्ञाय भूमि. एतस्मिं हि अन्तरे सामञ्ञलक्खणपटिवेधस्सेव आधिपच्चं होति. भङ्गानुपस्सनं आदिं कत्वा उपरि पहानपरिञ्ञाय भूमि ¶ . ततो पट्ठाय हि अनिच्चतो अनुपस्सन्तो निच्चसञ्ञं पजहति, दुक्खतो अनुपस्सन्तो सुखसञ्ञं, अनत्ततो अनुपस्सन्तो अत्तसञ्ञं, निब्बिन्दन्तो नन्दिं, विरज्जन्तो रागं, निरोधेन्तो समुदयं, पटिनिस्सज्जन्तो आदानं पजहतीति (पटि. म. १.५२) एवं निच्चसञ्ञादिपहानसाधिकानं सत्तन्नं अनुपस्सनानं आधिपच्चं. इति इमासु तीसु परिञ्ञासु सङ्खारपरिच्छेदस्स चेव पच्चयपरिग्गहस्स च साधितत्ता इमिना योगिना ञातपरिञ्ञाव अधिगता होति, इतरा च अधिगन्तब्बा. तेन वुत्तं ‘‘यस्मा तीरणपरिञ्ञाय वत्तमानाय मग्गामग्गञाणं उप्पज्जति, तीरणपरिञ्ञा च ञातपरिञ्ञानन्तरा, तस्मापि तं मग्गामग्गञाणदस्सनविसुद्धिं सम्पादेतुकामेन कलापसम्मसने ताव योगो कातब्बो’’ति.

६९४. तत्रायं पाळि –

‘‘कथं अतीतानागतपच्चुप्पन्नानं धम्मानं सङ्खिपित्वा ववत्थाने पञ्ञा सम्मसने ञाणं? यंकिञ्चि रूपं अतीतानागतपच्चुप्पन्नं अज्झत्तं वा…पे… यं दूरे सन्तिके वा, सब्बं रूपं अनिच्चतो ववत्थपेति, एकं सम्मसनं. दुक्खतो ववत्थपेति, एकं सम्मसनं. अनत्ततो ववत्थपेति, एकं सम्मसनं. या काचि वेदना…पे… यंकिञ्चि विञ्ञाणं…पे… अनत्ततो ववत्थपेति, एकं सम्मसनं.

‘‘चक्खुं…पे… जरामरणं अतीतानागतपच्चुप्पन्नं अनिच्चतो ववत्थपेति, एकं सम्मसनं. दुक्खतो अनत्ततो ववत्थपेति, एकं सम्मसनं.

‘‘रूपं अतीतानागतपच्चुप्पन्नं अनिच्चं खयट्ठेन, दुक्खं भयट्ठेन, अनत्ता असारकट्ठेनाति सङ्खिपित्वा ववत्थाने पञ्ञा सम्मसने ञाणं. वेदनं… विञ्ञाणं… चक्खुं…पे… जरामरणं…पे… सम्मसने ञाणं.

‘‘रूपं अतीतानागतपच्चुप्पन्नं अनिच्चं सङ्खतं पटिच्चसमुप्पन्नं खयधम्मं वयधम्मं विरागधम्मं ¶ निरोधधम्मन्ति सङ्खिपित्वा ववत्थाने पञ्ञा सम्मसने ञाणं. वेदनं… विञ्ञाणं… चक्खुं… जरामरणं अतीतानागतपच्चुप्पन्नं अनिच्चं सङ्खतं…पे… निरोधधम्मन्ति सङ्खिपित्वा ववत्थाने पञ्ञा सम्मसने ञाणं.

‘‘जातिपच्चया ¶ जरामरणं, असति जातिया नत्थि जरामरणन्ति सङ्खिपित्वा ववत्थाने पञ्ञा सम्मसने ञाणं. अतीतम्पि अद्धानं, अनागतम्पि अद्धानं जातिपच्चया जरामरणं, असति जातिया नत्थि जरामरणन्ति सङ्खिपित्वा ववत्थाने पञ्ञा सम्मसने ञाणं. भवपच्चया जाति…पे… अविज्जापच्चया सङ्खारा, असति अविज्जाय नत्थि सङ्खाराति सङ्खिपित्वा ववत्थाने पञ्ञा सम्मसने ञाणं. अतीतम्पि अद्धानं, अनागतम्पि अद्धानं अविज्जापच्चया सङ्खारा, असति अविज्जाय नत्थि सङ्खाराति सङ्खिपित्वा ववत्थाने पञ्ञा सम्मसने ञाणं.

‘‘तं ञातट्ठेन ञाणं. पजाननट्ठेन पञ्ञा. तेन वुच्चति अतीतानागतपच्चुप्पन्नानं धम्मानं सङ्खिपित्वा ववत्थाने पञ्ञा सम्मसने ञाण’’न्ति (पटि. म. १.४८).

एत्थ च चक्खुं…पे… जरामरणन्ति इमिना पेय्यालेन द्वारारम्मणेहि सद्धिं द्वारप्पवत्ता धम्मा, पञ्चक्खन्धा, छ द्वारानि, छ आरम्मणानि, छ विञ्ञाणानि, छ फस्सा, छ वेदना, छ सञ्ञा, छ चेतना, छ तण्हा, छ वितक्का, छ विचारा, छ धातुयो, दस कसिणानि, द्वत्तिंसकोट्ठासा, द्वादसायतनानि, अट्ठारस धातुयो, बावीसति इन्द्रियानि, तिस्सो धातुयो, नव भवा, चत्तारि झानानि, चतस्सो अप्पमञ्ञा, चतस्सो समापत्तियो, द्वादस पटिच्चसमुप्पादङ्गानीति इमे धम्मरासयो संखित्ताति वेदितब्बा.

वुत्तं हेतं अभिञ्ञेय्यनिद्देसे –

‘‘सब्बं, भिक्खवे, अभिञ्ञेय्यं. किञ्च, भिक्खवे, सब्बं अभिञ्ञेय्यं? चक्खु, भिक्खवे, अभिञ्ञेय्यं. रूपा… चक्खुविञ्ञाणं… चक्खुसम्फस्सो… यम्पिदं चक्खुसम्फस्सपच्चया उप्पज्जति वेदयितं सुखं वा दुक्खं वा अदुक्खमसुखं वा, तम्पि ¶ अभिञ्ञेय्यं. सोतं…पे… यम्पिदं मनोसम्फस्सपच्चया उप्पज्जति वेदयितं सुखं वा दुक्खं वा अदुक्खमसुखं वा, तम्पि अभिञ्ञेय्यं.

‘‘रूपं…पे… विञ्ञाणं… चक्खु…पे… मनो… रूपा…पे… धम्मा… चक्खुविञ्ञाणं…पे… मनोविञ्ञाणं… चक्खुसम्फस्सो…पे… मनोसम्फस्सो….

‘‘चक्खुसम्फस्सजा ¶ वेदना…पे… मनोसम्फस्सजा वेदना… रूपसञ्ञा…पे… धम्मसञ्ञा… रूपसञ्चेतना…पे… धम्मसञ्चेतना… रूपतण्हा…पे… धम्मतण्हा… रूपवितक्को…पे… धम्मवितक्को… रूपविचारो…पे… धम्मविचारो….

‘‘पथवीधातु…पे… विञ्ञाणधातु… पथवीकसिणं…पे… विञ्ञाणकसिणं… केसा…पे… मुत्तं… मत्थलुङ्गं….

‘‘चक्खायतनं…पे… धम्मायतनं… चक्खुधातु…पे… मनोधातु… मनोविञ्ञाणधातु… चक्खुन्द्रियं…पे… अञ्ञाताविन्द्रियं….

‘‘कामधातु… रूपधातु… अरूपधातु… कामभवो… रूपभवो… अरूपभवो… सञ्ञाभवो… असञ्ञाभवो… नेवसञ्ञानासञ्ञाभवो… एकवोकारभवो… चतुवोकारभवो… पञ्चवोकारभवो….

‘‘पठमं झानं…पे… चतुत्थं झानं… मेत्ताचेतोविमुत्ति…पे… उपेक्खाचेतोविमुत्ति… आकासानञ्चायतनसमापत्ति…पे… नेवसञ्ञानासञ्ञायतनसमापत्ति… अविज्जा अभिञ्ञेय्या…पे… जरामरणं अभिञ्ञेय्य’’न्ति (पटि. म. १.३; सं. नि. ४.४६).

तं तत्थ एवं वित्थारेन वुत्तत्ता इध सब्बं पेय्यालेन संखित्तं. एवं संखित्ते पनेत्थ ये लोकुत्तरा धम्मा आगता, ते असम्मसनुपगत्ता इमस्मिं अधिकारे न गहेतब्बा. येपि च सम्मसनुपगा ¶ , तेसु ये यस्स पाकटा होन्ति सुखेन परिग्गहं गच्छन्ति, तेसु तेन सम्मसनं आरभितब्बं.

६९५. तत्रायं खन्धवसेन आरब्भविधानयोजना – यंकिञ्चि रूपं…पे… सब्बं रूपं अनिच्चतो ववत्थपेति, एकं सम्मसनं. दुक्खतो अनत्ततो ववत्थपेति, एकं सम्मसनन्ति. एत्तावता अयं भिक्खु ‘‘यंकिञ्चि रूप’’न्ति एवं अनियमनिद्दिट्ठं सब्बम्पि रूपं अतीतत्तिकेन चेव चतूहि च अज्झत्तादिदुकेहीति एकादसहि ओकासेहि परिच्छिन्दित्वा सब्बं रूपं अनिच्चतो ववत्थपेति, अनिच्चन्ति सम्मसति.

कथं ¶ ? परतो वुत्तनयेन. वुत्तञ्हेतं – ‘‘रूपं अतीतानागतपच्चुप्पन्नं अनिच्चं खयट्ठेना’’ति (पटि. म. १.४८).

तस्मा एस यं अतीतं रूपं, तं यस्मा अतीतेयेव खीणं, नयिमं भवं सम्पत्तन्ति अनिच्चं खयट्ठेन.

यं अनागतं अनन्तरभवे निब्बत्तिस्सति, तम्पि तत्थेव खीयिस्सति, न ततो परं भवं गमिस्सतीति अनिच्चं खयट्ठेन.

यं पच्चुप्पन्नं रूपं, तम्पि इधेव खीयति, न इतो गच्छतीति अनिच्चं खयट्ठेन.

यं अज्झत्तं, तम्पि अज्झत्तमेव खीयति, न बहिद्धाभावं गच्छतीति अनिच्चं खयट्ठेन.

यं बहिद्धा…पे… ओळारिकं…पे… सुखुमं…पे… हीनं…पे… पणीतं…पे… दूरे…पे… सन्तिके, तम्पि तत्थेव खीयति, न दूरभावं गच्छतीति अनिच्चं खयट्ठेनाति सम्मसति.

इदं सब्बम्पि ‘‘अनिच्चं खयट्ठेना’’ति एतस्स वसेन एकं सम्मसनं. भेदतो पन एकादसविधं होति.

सब्बमेव च तं दुक्खं भयट्ठेन. भयट्ठेनाति सप्पटिभयताय. यञ्हि अनिच्चं, तं भयावहं होति सीहोपमसुत्ते (सं. नि. ३.७८; अ. नि. ४.३३) देवानं विय. इति ¶ इदम्पि ‘‘दुक्खं भयट्ठेना’’ति एतस्स वसेन एकं सम्मसनं. भेदतो पन एकादसविधं होति.

यथा च दुक्खं, एवं सब्बम्पि तं अनत्ता असारकट्ठेन. असारकट्ठेनाति ‘‘अत्ता निवासी कारको वेदको सयंवसी’’ति एवं परिकप्पितस्स अत्तसारस्स अभावेन. यञ्हि अनिच्चं, दुक्खं, तं अत्तनोपि अनिच्चतं वा उदयब्बयपीळनं वा वारेतुं न सक्कोति, कुतो तस्स कारकादिभावो. तेनाह – ‘‘रूपञ्च हिदं, भिक्खवे, अत्ता अभविस्स. नयिदं रूपं आबाधाय संवत्तेय्या’’तिआदि (सं. नि. ३.५९). इति इदम्पि ‘‘अनत्ता असारकट्ठेना’’ति ¶ एतस्स वसेन एकं सम्मसनं. भेदतो पन एकादसविधं होति. एस नयो वेदनादीसु.

६९६. यं पन अनिच्चं, तं यस्मा नियमतो सङ्खतादिभेदं होति. तेनस्स परियायदस्सनत्थं, नानाकारेहि वा मनसिकारप्पवत्तिदस्सनत्थं ‘‘रूपं अतीतानागतपच्चुप्पन्नं अनिच्चं सङ्खतं पटिच्चसमुप्पन्नं खयधम्मं वयधम्मं विरागधम्मं निरोधधम्म’’न्ति पुन पाळि वुत्ता. एस नयो वेदनादीसूति.

चत्तारीसाकारअनुपस्सनाकथा

६९७. सो तस्सेव पञ्चसु खन्धेसु अनिच्चदुक्खानत्तसम्मसनस्स थिरभावत्थाय, यं तं भगवता ‘‘कतमेहि चत्तारीसाय आकारेहि अनुलोमिकं खन्तिं पटिलभति, कतमेहि चत्तारीसाय आकारेहि सम्मत्तनियामं ओक्कमती’’ति एतस्स विभङ्गे –

‘‘पञ्चक्खन्धे अनिच्चतो, दुक्खतो, रोगतो, गण्डतो, सल्लतो, अघतो, आबाधतो, परतो, पलोकतो, ईतितो, उपद्दवतो, भयतो, उपसग्गतो, चलतो, पभङ्गुतो, अद्धुवतो, अताणतो, अलेणतो, असरणतो, रित्ततो, तुच्छतो, सुञ्ञतो, अनत्ततो, आदीनवतो, विपरिणामधम्मतो, असारकतो, अघमूलतो, वधकतो, विभवतो, सासवतो, सङ्खततो, मारामिसतो, जातिधम्मतो, जराधम्मतो, ब्याधिधम्मतो, मरणधम्मतो ¶ , सोकधम्मतो, परिदेवधम्मतो, उपायासधम्मतो, संकिलेसिकधम्मतो’’ति (पटि. म. ३.३७) –

चत्तारीसाय आकारेहि,

‘‘पञ्चक्खन्धे अनिच्चतो पस्सन्तो अनुलोमिकं खन्तिं पटिलभति. पञ्चन्नं खन्धानं निरोधो निच्चं निब्बानन्ति पस्सन्तो सम्मत्तनियामं ओक्कमती’’तिआदिना (पटि. म. ३.३८) नयेन,

अनुलोमञाणं विभजन्तेन पभेदतो अनिच्चादिसम्मसनं वुत्तं. तस्सापि वसेन इमे पञ्चक्खन्धे सम्मसति.

६९८. कथं ¶ ? सो हि एकेकं खन्धं अनच्चन्तिकताय, आदिअन्तवन्तताय च अनिच्चतो. उप्पादवयपटिपीळनताय, दुक्खवत्थुताय च दुक्खतो. पच्चययापनीयताय, रोगमूलताय च रोगतो. दुक्खतासूलयोगिताय, किलेसासुचिपग्घरणताय, उप्पादजराभङ्गेहि उद्धुमातपरिपक्कपभिन्नताय च गण्डतो. पीळाजनकताय, अन्तोतुदनताय, दुन्नीहरणीयताय च सल्लतो. विगरहणीयताय, अवड्ढिआवहनताय, अघवत्थुताय च अघतो. असेरिभावजनकताय, आबाधपदट्ठानताय च आबाधतो. अवसताय, अविधेय्यताय च परतो. ब्याधिजरामरणेहि पलुज्जनताय पलोकतो. अनेकब्यसनावहनताय ईतितो. अविदितानंयेव विपुलानं अनत्थानं आवहनतो, सब्बुपद्दववत्थुताय च उपद्दवतो. सब्बभयानं आकरताय, दुक्खवूपसमसङ्खातस्स परमस्सासस्स पटिपक्खभूतताय च भयतो. अनेकेहि अनत्थेहि अनुबद्धताय, दोसूपसट्ठताय, उपसग्गो विय अनधिवासनारहताय च उपसग्गतो. ब्याधिजरामरणेहि चेव लाभालाभादीहि च लोकधम्मेहि पचलितताय चलतो. उपक्कमेन चेव सरसेन च पभङ्गुपगमनसीलताय पभङ्गुतो. सब्बावत्थनिपातिताय, थिरभावस्स च अभावताय अद्धुवतो. अतायनताय चेव, अलब्भनेय्यखेमताय च अताणतो. अल्लीयितुं अनरहताय, अल्लीनानम्पि च लेणकिच्चाकारिताय अलेणतो. निस्सितानं भयसारकत्ताभावेन असरणतो. यथापरिकप्पितेहि धुवसुभसुखत्तभावेहि रित्तताय रित्ततो. रित्ततायेव तुच्छतो अप्पकत्ता वा, अप्पकम्पि हि लोके तुच्छन्ति वुच्चति. सामि-निवासि-कारक-वेदकाधिट्ठायकविरहितताय ¶ सुञ्ञतो. सयञ्च अस्सामिकभावादिताय अनत्ततो. पवत्तिदुक्खताय, दुक्खस्स च आदीनवताय आदीनवतो, अथ वा आदीनं वाति गच्छति पवत्ततीति आदीनवो, कपणमनुस्सस्सेतं अधिवचनं, खन्धापि च कपणायेवाति आदीनवसदिसताय आदीनवतो. जराय चेव मरणेन चाति द्वेधा परिणामपकतिताय विपरिणामधम्मतो. दुब्बलताय, फेग्गु विय सुखभञ्जनीयताय च असारकतो. अघहेतुताय अघमूलतो. मित्तमुखसपत्तो ¶ विय विस्सासघातिताय वधकतो. विगतभवताय, विभवसम्भूतताय च विभवतो. आसवपदट्ठानताय सासवतो. हेतुपच्चयेहि अभिसङ्खतताय सङ्खततो. मच्चुमारकिलेसमारानं आमिसभूतताय मारामिसतो. जाति-जरा-ब्याधिमरणपकतिताय जाति-जरा-ब्याधि-मरणधम्मतो. सोक-परिदेव-उपायासहेतुताय सोक-परिदेवउपायासधम्मतो. तण्हादिट्ठिदुच्चरितसंकिलेसानं विसयधम्मताय संकिलेसिकधम्मतोति एवं पभेदतो वुत्तस्स अनिच्चादिसम्मसनस्स वसेन सम्मसति.

एत्थ हि अनिच्चतो, पलोकतो, चलतो, पभङ्गुतो, अद्धुवतो, विपरिणामधम्मतो, असारकतो, विभवतो, सङ्खततो, मरणधम्मतोति एकेकस्मिं खन्धे दस दस कत्वा पञ्ञास अनिच्चानुपस्सनानि. परतो, रित्ततो, तुच्छतो, सुञ्ञतो, अनत्ततोति एकेकस्मिं खन्धे पञ्च पञ्च कत्वा पञ्चवीसति अनत्तानुपस्सनानि. सेसानि दुक्खतो, रोगतोतिआदीनि एकेकस्मिं खन्धे पञ्चवीसति पञ्चवीसति कत्वा पञ्चवीसतिसतं दुक्खानुपस्सनानीति.

इच्चस्स इमिना द्विसतभेदेन अनिच्चादिसम्मसनेन पञ्चक्खन्धे सम्मसतो तं नयविपस्सनासङ्खातं अनिच्चदुक्खानत्तसम्मसनं थिरं होति. इदं तावेत्थ पाळिनयानुसारेन सम्मसनारम्भविधानं.

इन्द्रियतिक्खकारणनवककथा

६९९. यस्स पन एवं नयविपस्सनाय योगं करोतोपि नयविपस्सना न सम्पज्जति, तेन ‘‘नवहाकारेहि इन्द्रियानि तिक्खानि भवन्ति – उप्पन्नुप्पन्नानं सङ्खारानं खयमेव पस्सति, तत्थ च सक्कच्चकिरियाय सम्पादेति, सातच्चकिरियाय सम्पादेति, सप्पायकिरियाय सम्पादेति, समाधिस्स च निमित्तग्गाहेन, बोज्झङ्गानञ्च अनुपवत्तनताय, काये च जीविते च ¶ अनपेक्खतं उपट्ठापेति, तत्थ च अभिभुय्य नेक्खम्मेन, अन्तरा च अब्योसानेना’’ति एवं वुत्तानं नवन्नं आकारानं वसेन इन्द्रियानि तिक्खानि कत्वा पथवीकसिणनिद्देसे वुत्तनयेन सत्त असप्पायानि वज्जेत्वा सत्त सप्पायानि सेवमानेन कालेन रूपं सम्मसितब्बं, कालेन अरूपं. रूपं सम्मसन्तेन रूपस्स निब्बत्ति पस्सितब्बा.

रूपनिब्बत्तिपस्सनाकारकथा

७००. सेय्यथिदं ¶ – इदं रूपं नाम कम्मादिवसेन चतूहि कारणेहि निब्बत्तति. तत्थ सब्बेसं सत्तानं रूपं निब्बत्तमानं पठमं कम्मतो निब्बत्तति. पटिसन्धिक्खणेयेव हि गब्भसेय्यकानं ताव तिसन्ततिवसेन वत्थु-काय-भावदसकसङ्खातानि तिंस रूपानि निब्बत्तन्ति, तानि च खो पटिसन्धिचित्तस्स उप्पादक्खणेयेव. यथा च उप्पादक्खणे, तथा ठितिक्खणेपि भङ्गक्खणेपि.

तत्थ रूपं दन्धनिरोधं गरुपरिवत्ति, चित्तं खिप्पनिरोधं लहुपरिवत्ति. तेनाह – ‘‘नाहं, भिक्खवे, अञ्ञं एकधम्मम्पि समनुपस्सामि, यं एवं लहुपरिवत्तं यथयिदं, भिक्खवे, चित्त’’न्ति (अ. नि. १.४८). रूपे धरन्तेयेव हि सोळसवारे भवङ्गचित्तं उप्पज्जित्वा निरुज्झति. चित्तस्स उप्पादक्खणोपि ठितिक्खणोपि भङ्गक्खणोपि एकसदिसा. रूपस्स पन उप्पादभङ्गक्खणायेव लहुका, तेहि सदिसा. ठितिक्खणो पन महा, याव सोळस चित्तानि उप्पज्जित्वा निरुज्झन्ति, ताव वत्तति. पटिसन्धिचित्तस्स उप्पादक्खणे उप्पन्नं ठानप्पत्तं पुरेजातं वत्थुं निस्साय दुतियं भवङ्गं उप्पज्जति. तेन सद्धिं उप्पन्नं ठानप्पत्तं पुरेजातं वत्थुं निस्साय ततियं भवङ्गं उप्पज्जति. इमिना नयेन यावतायुकं चित्तप्पवत्ति वेदितब्बा. आसन्नमरणस्स पन एकमेव ठानप्पत्तं पुरेजातं वत्थुं निस्साय सोळस चित्तानि उप्पज्जन्ति.

पटिसन्धिचित्तस्स उप्पादक्खणे उप्पन्नं रूपं पटिसन्धिचित्ततो उद्धं सोळसमेन चित्तेन सद्धिं निरुज्झति. ठानक्खणे उप्पन्नं सत्तरसमस्स उप्पादक्खणेन सद्धिं निरुज्झति. भङ्गक्खणे उप्पन्नं सत्तरसमस्स ठानक्खणं पत्वा निरुज्झति. याव पवत्ति नाम अत्थि, एवमेव पवत्तति. ओपपातिकानम्पि सत्तसन्ततिवसेन सत्तति रूपानि एवमेव पवत्तन्ति.

७०१. तत्थ ¶ कम्मं, कम्मसमुट्ठानं, कम्मपच्चयं, कम्मपच्चयचित्तसमुट्ठानं, कम्मपच्चयआहारसमुट्ठानं, कम्मपच्चयउतुसमुट्ठानन्ति एस विभागो वेदितब्बो. तत्थ कम्मं नाम कुसलाकुसलचेतना. कम्मसमुट्ठानं नाम विपाकक्खन्धा च, चक्खुदसकादि समसत्ततिरूपञ्च. कम्मपच्चयं नाम तदेव, कम्मं हि कम्मसमुट्ठानस्स उपत्थम्भकपच्चयोपि होति. कम्मपच्चयचित्तसमुट्ठानं नाम विपाकचित्तसमुट्ठानं रूपं. कम्मपच्चयआहारसमुट्ठानं नाम कम्मसमुट्ठानरूपेसु ¶ ठानप्पत्ता ओजा अञ्ञं ओजट्ठमकं समुट्ठापेति, तत्रापि ओजा ठानं पत्वा अञ्ञन्ति एवं चतस्सो वा पञ्च वा पवत्तियो घटेति. कम्मपच्चयउतुसमुट्ठानं नाम कम्मजतेजोधातु ठानप्पत्ता उतुसमुट्ठानं ओजट्ठमकं समुट्ठापेति, तत्रापि उतु अञ्ञं ओजट्ठमकन्ति एवं चतस्सो वा पञ्च वा पवत्तियो घटेति. एवं ताव कम्मजरूपस्स निब्बत्ति पस्सितब्बा.

७०२. चित्तजेसुपि चित्तं, चित्तसमुट्ठानं, चित्तपच्चयं, चित्तपच्चयआहारसमुट्ठानं, चित्तपच्चयउतुसमुट्ठानन्ति एस विभागो वेदितब्बो. तत्थ चित्तं नाम एकूननवुतिचित्तानि.

तेसु द्वत्तिंस चित्तानि, छब्बीसेकूनवीसति;

सोळस रूपिरियापथविञ्ञत्तिजनका मता.

कामावचरतो हि अट्ठ कुसलानि, द्वादसाकुसलानि, मनोधातुवज्जा दस किरिया, कुसलकिरियतो द्वे अभिञ्ञाचित्तानीति द्वत्तिंस चित्तानि रूपं, इरियापथं, विञ्ञत्तिञ्च जनेन्ति. विपाकवज्जानि सेसदसरूपावचरानि, अट्ठ अरूपावचरानि, अट्ठ लोकुत्तरचित्तानीति छब्बीसति चित्तानि रूपं, इरियापथञ्च जनयन्ति, न विञ्ञत्तिं. कामावचरे दस भवङ्गचित्तानि, रूपावचरे पञ्च, तिस्सो मनोधातुयो, एका विपाकाहेतुकमनोविञ्ञाणधातुसोमनस्ससहगताति एकूनवीसति चित्तानि रूपमेव जनयन्ति, न इरियापथं, न विञ्ञत्तिं. द्वेपञ्चविञ्ञाणानि, सब्बसत्तानं पटिसन्धिचित्तं, खीणासवानं चुतिचित्तं, चत्तारि आरुप्पविपाकानीति सोळस चित्तानि नेव रूपं जनयन्ति, न इरियापथं, न विञ्ञत्तिं. यानि चेत्थ रूपं जनेन्ति, तानि न ठितिक्खणे, भङ्गक्खणे वा, तदा हि चित्तं दुब्बलं होति. उप्पादक्खणे पन बलवं, तस्मा तं तदा पुरेजातं वत्थुं निस्साय रूपं समुट्ठापेति.

चित्तसमुट्ठानं ¶ नाम तयो अरूपिनो खन्धा, ‘‘सद्दनवकं, कायविञ्ञत्ति, वचीविञ्ञत्ति, आकासधातु, लहुता, मुदुता, कम्मञ्ञता, उपचयो, सन्तती’’ति सत्तरसविधं रूपञ्च. चित्तपच्चयं नाम ‘‘पच्छाजाता चित्तचेतसिका धम्मा पुरेजातस्स इमस्स कायस्सा’’ति (पट्ठा. १.१.११) एवं वुत्तं चतुसमुट्ठानरूपं. चित्तपच्चयआहारसमुट्ठानं नाम चित्तसमुट्ठानरूपेसु ठानप्पत्ता ¶ ओजा अञ्ञं ओजट्ठमकं समुट्ठापेति, एवं द्वे तिस्सो पवत्तियो घटेति. चित्तपच्चयउतुसमुट्ठानं नाम चित्तसमुट्ठानो उतु ठानप्पत्तो अञ्ञं ओजट्ठमकं समुट्ठापेति, एवं द्वे तिस्सो पवत्तियो घटेति. एवं चित्तजरूपस्स निब्बत्ति पस्सितब्बा.

७०३. आहारजेसुपि आहारो, आहारसमुट्ठानं, आहारपच्चयं, आहारपच्चयआहारसमुट्ठानं, आहारपच्चयउतुसमुट्ठानन्ति एस विभागो वेदितब्बो. तत्थ आहारो नाम कबळीकारो आहारो. आहारसमुट्ठानं नाम उपादिण्णं कम्मजरूपं पच्चयं लभित्वा तत्थ पतिट्ठाय ठानप्पत्ताय ओजाय समुट्ठापितं ओजट्ठमकं, आकासधातु, लहुता, मुदुता, कम्मञ्ञता, उपचयो, सन्ततीति चुद्दसविधं रूपं. आहारपच्चयं नाम ‘‘कबळीकारो आहारो इमस्स कायस्स आहारपच्चयेन पच्चयो’’ति (पट्ठा. १.१.१५) एवं वुत्तं चतुसमुट्ठानरूपं. आहारपच्चयआहारसमुट्ठानं नाम आहारसमुट्ठानेसु रूपेसु ठानप्पत्ता ओजा अञ्ञं ओजट्ठमकं समुट्ठापेति, तत्रापि ओजा अञ्ञन्ति एवं दसद्वादसवारे पवत्तिं घटेति. एकदिवसं परिभुत्ताहारो सत्ताहम्पि उपत्थम्भेति. दिब्बा पन ओजा एकमासं द्वेमासम्पि उपत्थम्भेति. मातरा परिभुत्ताहारोपि दारकस्स सरीरं फरित्वा रूपं समुट्ठापेति. सरीरे मक्खिताहारोपि रूपं समुट्ठापेति. कम्मजाहारो उपादिण्णकाहारो नाम. सोपि ठानप्पत्तो रूपं समुट्ठापेति, तत्रापि ओजा अञ्ञं समुट्ठापेतीति एवं चतस्सो वा पञ्च वा पवत्तियो घटेति. आहारपच्चयउतुसमुट्ठानं नाम आहारसमुट्ठाना तेजोधातु ठानप्पत्ता उतुसमुट्ठानं ओजट्ठमकं समुट्ठापेति. तत्रायं आहारो आहारसमुट्ठानानं जनको हुत्वा पच्चयो होति, सेसानं निस्सयाहारअत्थिअविगतवसेनाति एवं आहारजरूपस्स निब्बत्ति पस्सितब्बा.

७०४. उतुजेसुपि उतु, उतुसमुट्ठानं, उतुपच्चयं, उतुपच्चयउतुसमुट्ठानं, उतुपच्चयआहारसमुट्ठानन्ति एस विभागो वेदितब्बो. तत्थ उतु नाम चतुसमुट्ठाना तेजोधातु, उण्हउतु सीतउतूति एवं पनेस दुविधो होति. उतुसमुट्ठानं नाम चतुसमुट्ठानो उतु उपादिण्णकं पच्चयं लभित्वा ठानप्पत्तो सरीरे रूपं समुट्ठापेति. तं सद्दनवकं, आकासधातु ¶ ¶ , लहुता, मुदुता, कम्मञ्ञता, उपचयो, सन्ततीति पन्नरसविधं होति. उतुपच्चयं नाम उतु चतुसमुट्ठानिकरूपानं पवत्तिया च विनासस्स च पच्चयो होति. उतुपच्चयउतुसमुट्ठानं नाम उतुसमुट्ठाना तेजोधातु ठानप्पत्ता अञ्ञं ओजट्ठमकं समुट्ठापेति, तत्रापि उतु अञ्ञन्ति एवं दीघम्पि अद्धानं अनुपादिण्णपक्खे ठत्वापि उतुसमुट्ठानं पवत्ततियेव. उतुपच्चयआहारसमुट्ठानं नाम उतुसमुट्ठाना ठानप्पत्ता ओजा अञ्ञं ओजट्ठमकं समुट्ठापेति, तत्रापि ओजा अञ्ञन्ति एवं दसद्वादसवारे पवत्तिं घटेति. तत्रायं उतु उतुसमुट्ठानानं जनको हुत्वा पच्चयो होति, सेसानं निस्सयअत्थिअविगतवसेनाति एवं उतुजरूपस्स निब्बत्ति पस्सितब्बा. एवञ्हि रूपस्स निब्बत्तिं पस्सन्तो कालेन रूपं सम्मसति नाम.

अरूपनिब्बत्तिपस्सनाकारकथा

७०५. यथा च रूपं सम्मसन्तेन रूपस्स, एवं अरूपं सम्मसन्तेनपि अरूपस्स निब्बत्ति पस्सितब्बा. सा च खो एकासीति लोकियचित्तुप्पादवसेनेव.

सेय्यथिदं – इदञ्हि अरूपं नाम पुरिमभवे आयूहितकम्मवसेन पटिसन्धियं ताव एकूनवीसतिचित्तुप्पादप्पभेदं निब्बत्तति. निब्बत्तनाकारो पनस्स पटिच्चसमुप्पादनिद्देसे वुत्तनयेनेव वेदितब्बो. तदेव पटिसन्धिचित्तस्स अनन्तरचित्ततो पट्ठाय भवङ्गवसेन, आयुपरियोसाने चुतिवसेन. यं तत्थ कामावचरं, तं छसु द्वारेसु बलवारम्मणे तदारम्मणवसेन.

पवत्ते पन असम्भिन्नत्ता चक्खुस्स आपाथगतत्ता रूपानं आलोकसन्निस्सितं मनसिकारहेतुकं चक्खुविञ्ञाणं निब्बत्तति सद्धिं सम्पयुत्तधम्मेहि. चक्खुपसादस्स हि ठितिक्खणे ठितिप्पत्तमेव रूपं चक्खुं घट्टेति. तस्मिं घट्टिते द्विक्खत्तुं भवङ्गं उप्पज्जित्वा निरुज्झति. ततो तस्मिंयेव आरम्मणे किरियमनोधातु आवज्जनकिच्चं साधयमाना उप्पज्जति. तदनन्तरं तदेव रूपं पस्समानं कुसलविपाकं अकुसलविपाकं वा चक्खुविञ्ञाणं. ततो तदेव रूपं सम्पटिच्छमाना विपाकमनोधातु. ततो तदेव रूपं सन्तीरयमाना विपाकाहेतुकमनोविञ्ञाणधातु. ततो तदेव रूपं ववत्थापयमाना किरियाहेतुकमनोविञ्ञाणधातु ¶ उपेक्खासहगता ¶ . ततो परं कामावचरकुसलाकुसलकिरियचित्तेसु एकं वा उपेक्खासहगताहेतुकं चित्तं पञ्च सत्त वा जवनानि. ततो कामावचरसत्तानं एकादससु तदारम्मणचित्तेसु जवनानुरूपं यंकिञ्चि तदारम्मणन्ति. एस नयो सेसद्वारेसुपि. मनोद्वारे पन महग्गतचित्तानिपि उप्पज्जन्तीति. एवं छसु द्वारेसु अरूपस्स निब्बत्ति पस्सितब्बा. एवञ्हि अरूपस्स निब्बत्तिं पस्सन्तो कालेन अरूपं सम्मसति नाम.

एवं कालेन रूपं कालेन अरूपं सम्मसित्वापि तिलक्खणं आरोपेत्वा अनुक्कमेन पटिपज्जमानो एको पञ्ञाभावनं सम्पादेति.

रूपसत्तकसम्मसनकथा

७०६. अपरो रूपसत्तकअरूपसत्तकवसेन तिलक्खणं आरोपेत्वा सङ्खारे सम्मसति. तत्थ आदाननिक्खेपनतो, वयोवुड्ढत्थङ्गमतो, आहारमयतो, उतुमयतो, कम्मजतो, चित्तसमुट्ठानतो, धम्मतारूपतोति इमेहि आकारेहि आरोपेत्वा सम्मसन्तो रूपसत्तकवसेन आरोपेत्वा सम्मसति नाम. तेनाहु पोराणा –

‘‘आदाननिक्खेपनतो, वयोवुड्ढत्थगामितो;

आहारतो च उतुतो, कम्मतो चापि चित्ततो;

धम्मतारूपतो सत्त, वित्थारेन विपस्सती’’ति.

तत्थ आदानन्ति पटिसन्धि. निक्खेपनन्ति चुति. इति योगावचरो इमेहि आदाननिक्खेपेहि एकं वस्ससतं परिच्छिन्दित्वा सङ्खारेसु तिलक्खणं आरोपेति. कथं? एत्थन्तरे सब्बे सङ्खारा अनिच्चा. कस्मा? उप्पादवयवत्तितो, विपरिणामतो, तावकालिकतो, निच्चपटिक्खेपतो च. यस्मा पन उप्पन्ना सङ्खारा ठितिं पापुणन्ति, ठितियं जराय किलमन्ति, जरं पत्वा अवस्सं भिज्जन्ति, तस्मा अभिण्हसम्पटिपीळनतो, दुक्खमतो दुक्खवत्थुतो, सुखपटिक्खेपतो च दुक्खा. यस्मा च ‘‘उप्पन्ना सङ्खारा ठितिं मा पापुणन्तु, ठानप्पत्ता मा जीरन्तु, जरप्पत्ता मा भिज्जन्तू’’ति इमेसु तीसु ¶ ठानेसु कस्सचि वसवत्तिभावो ¶ नत्थि, सुञ्ञा तेन वसवत्तनाकारेन, तस्मा सुञ्ञतो, अस्सामिकतो, अवसवत्तितो, अत्तपटिक्खेपतो च अनत्ताति.

७०७. एवं आदाननिक्खेपनवसेन वस्ससतपरिच्छिन्ने रूपे तिलक्खणं आरोपेत्वा ततो परं वयोवुड्ढत्थङ्गमतो आरोपेति. तत्थ वयोवुड्ढत्थङ्गमो नाम वयवसेन वुड्ढस्स वड्ढितस्स रूपस्स अत्थङ्गमो. तस्स वसेन तिलक्खणं आरोपेतीति अत्थो.

कथं? सो तमेव वस्ससतं पठमवयेन मज्झिमवयेन पच्छिमवयेनाति तीहि वयेहि परिच्छिन्दति. तत्थ आदितो तेत्तिंस वस्सानि पठमवयो नाम. ततो चतुत्तिंस मज्झिमवयो नाम. ततो तेत्तिंस पच्छिमवयो नामाति. इति इमेहि तीहि वयेहि परिच्छिन्दित्वा, ‘‘पठमवये पवत्तं रूपं मज्झिमवयं अप्पत्वा तत्थेव निरुज्झति, तस्मा तं अनिच्चं. यदनिच्चं, तं दुक्खं. यं दुक्खं, तदनत्ता. मज्झिमवये पवत्तरूपम्पि पच्छिमवयं अप्पत्वा तत्थेव निरुज्झति, तस्मा तम्पि अनिच्चं दुक्खमनत्ता. पच्छिमवये तेत्तिंस वस्सानि पवत्तरूपम्पि मरणतो परं गमनसमत्थं नाम नत्थि, तस्मा तम्पि अनिच्चं दुक्खमनत्ता’’ति तिलक्खणं आरोपेति.

७०८. एवं पठमवयादिवसेन वयोवुड्ढत्थङ्गमतो तिलक्खणं आरोपेत्वा पुन ‘‘मन्ददसकं, खिड्डादसकं, वण्णदसकं, बलदसकं, पञ्ञादसकं, हानिदसकं, पब्भारदसकं, वङ्कदसकं, मोमूहदसकं, सयनदसक’’न्ति इमेसं दसन्नं दसकानं वसेन वयोवुड्ढत्थङ्गमतो तिलक्खणं आरोपेति.

तत्थ दसकेसु ताव वस्ससतजीविनो पुग्गलस्स पठमानि दस वस्सानि मन्ददसकं नाम, तदा हि सो मन्दो होति चपलो कुमारको. ततो परानि दस खिड्डादसकं नाम, तदा हि सो खिड्डारतिबहुलो होति. ततो परानि दस वण्णदसकं नाम, तदा हिस्स वण्णायतनं वेपुल्लं पापुणाति. ततो परानि दस बलदसकं नाम, तदा हिस्स बलञ्च थामो च वेपुल्लं पापुणाति. ततो परानि दस पञ्ञादसकं नाम, तदा हिस्स पञ्ञा सुप्पतिट्ठिता होति, पकतिया किर दुब्बलपञ्ञस्सापि ¶ तस्मिं काले अप्पमत्तका पञ्ञा उप्पज्जतियेव. ततो परानि दस हानिदसकं नाम, तदा हिस्स खिड्डारतिवण्णबलपञ्ञा परिहायन्ति. ततो परानि ¶ दस पब्भारदसकं नाम, तदा हिस्स अत्तभावो पुरतो पब्भारो होति. ततो परानि दस वङ्कदसकं नाम, तदा हिस्स अत्तभावो नङ्गलकोटि विय वङ्को होति. ततो परानि दस मोमूहदसकं नाम. तदा हि सो मोमूहो होति, कतं कतं पमुस्सति. ततो परानि दस सयनदसकं नाम, वस्ससतिको हि सयनबहुलोव होति.

तत्रायं योगी एतेसं दसकानं वसेन वयोवुड्ढत्थङ्गमतो तिलक्खणं आरोपेतुं इति पटिसञ्चिक्खति – ‘‘पठमदसके पवत्तरूपं दुतियदसकं अप्पत्वा तत्थेव निरुज्झति, तस्मा तं अनिच्चं दुक्खमनत्ता. दुतियदसके…पे… नवमदसके पवत्तरूपं दसमदसकं अप्पत्वा तत्थेव निरुज्झति. दसमदसके पवत्तरूपं पुनब्भवं अप्पत्वा इधेव निरुज्झति, तस्मा तम्पि अनिच्चं दुक्खमनत्ता’’ति तिलक्खणं आरोपेति.

७०९. एवं दसकवसेन वयोवुड्ढत्थङ्गमतो तिलक्खणं आरोपेत्वा पुन तदेव वस्ससतं पञ्चपञ्चवस्सवसेन वीसतिकोट्ठासे कत्वा वयोवुड्ढत्थङ्गमतो तिलक्खणं आरोपेति. कथं? सो हि इति पटिसञ्चिक्खति – ‘‘पठमे वस्सपञ्चके पवत्तरूपं दुतियं वस्सपञ्चकं अप्पत्वा तत्थेव निरुज्झति, तस्मा तं अनिच्चं दुक्खमनत्ता. दुतिये वस्सपञ्चके पवत्तरूपं ततियं…पे… एकूनवीसतिमे वस्सपञ्चके पवत्तरूपं वीसतिमं वस्सपञ्चकं अप्पत्वा तत्थेव निरुज्झति. वीसतिमे वस्सपञ्चके पवत्तरूपं मरणतो परं गमनसमत्थं नाम नत्थि, तस्मा तम्पि अनिच्चं दुक्खमनत्ता’’ति.

एवं वीसतिकोट्ठासवसेन वयोवुड्ढत्थङ्गमतो तिलक्खणं आरोपेत्वा पुन पञ्चवीसति कोट्ठासे कत्वा चतुन्नं चतुन्नं वस्सानं वसेन आरोपेति. ततो तेत्तिंस कोट्ठासे कत्वा तिण्णं तिण्णं वस्सानं वसेन, पञ्ञास कोट्ठासे कत्वा द्विन्नं द्विन्नं वस्सानं वसेन, सतं कोट्ठासे कत्वा एकेकवस्सवसेन. ततो एकं वस्सं तयो ¶ कोट्ठासे कत्वा वस्सानहेमन्तगिम्हेसु तीसु उतूसु एकेकउतुवसेन तस्मिं वयोवुड्ढत्थङ्गमरूपे तिलक्खणं आरोपेति.

कथं? ‘‘वस्साने चतुमासं पवत्तरूपं हेमन्तं अप्पत्वा तत्थेव निरुद्धं. हेमन्ते पवत्तरूपं गिम्हं अप्पत्वा तत्थेव निरुद्धं. गिम्हे पवत्तरूपं पुन वस्सानं अप्पत्वा तत्थेव निरुद्धं, तस्मा तं अनिच्चं दुक्खमनत्ता’’ति. एवं आरोपेत्वा पुन एकं वस्सं छ कोट्ठासे कत्वा – ‘‘वस्साने ¶ द्वेमासं पवत्तरूपं सरदं अप्पत्वा तत्थेव निरुद्धं. सरदे पवत्तरूपं हेमन्तं. हेमन्ते पवत्तरूपं सिसिरं. सिसिरे पवत्तरूपं वसन्तं. वसन्ते पवत्तरूपं गिम्हं. गिम्हे पवत्तरूपं पुन वस्सानं अप्पत्वा तत्थेव निरुद्धं, तस्मा अनिच्चं दुक्खमनत्ता’’ति एवं तस्मिं वयोवुड्ढत्थङ्गमरूपे तिलक्खणं आरोपेति.

एवं आरोपेत्वा ततो काळजुण्हवसेन – ‘‘काळे पवत्तरूपं जुण्हं अप्पत्वा. जुण्हे पवत्तरूपं काळं अप्पत्वा तत्थेव निरुद्धं, तस्मा अनिच्चं दुक्खमनत्ता’’ति तिलक्खणं आरोपेति. ततो रत्तिन्दिववसेन – ‘‘रत्तिं पवत्तरूपं दिवसं अप्पत्वा तत्थेव निरुद्धं. दिवसं पवत्तरूपम्पि रत्तिं अप्पत्वा तत्थेव निरुद्धं, तस्मा अनिच्चं दुक्खमनत्ता’’ति तिलक्खणं आरोपेति. ततो तदेव रत्तिन्दिवं पुब्बण्हादिवसेन छ कोट्ठासे कत्वा – ‘‘पुब्बण्हे पवत्तरूपं मज्झन्हं अप्पत्वा. मज्झन्हे पवत्तरूपं सायन्हं. सायन्हे पवत्तरूपं पठमयामं. पठमयामे पवत्तरूपं मज्झिमयामं. मज्झिमयामे पवत्तरूपं पच्छिमयामं अप्पत्वा तत्थेव निरुद्धं. पच्छिमयामे पवत्तरूपं पुन पुब्बण्हं अप्पत्वा तत्थेव निरुद्धं, तस्मा अनिच्चं दुक्खमनत्ता’’ति तिलक्खणं आरोपेति.

७१०. एवं आरोपेत्वा पुन तस्मिंयेव रूपे अभिक्कमपटिक्कमआलोकनविलोकनसमिञ्जनपसारणवसेन – ‘‘अभिक्कमे पवत्तरूपं पटिक्कमं अप्पत्वा तत्थेव निरुज्झति. पटिक्कमे पवत्तरूपं आलोकनं. आलोकने पवत्तरूपं विलोकनं. विलोकने पवत्तरूपं समिञ्जनं. समिञ्जने पवत्तरूपं पसारणं अप्पत्वा तत्थेव निरुज्झति. तस्मा अनिच्चं दुक्खमनत्ता’’ति तिलक्खणं आरोपेति.

ततो एकपदवारं उद्धरण अतिहरणवीतिहरणवोस्सज्जनसन्निक्खेपनसन्निरुम्भनवसेन छ कोट्ठासे करोति.

तत्थ ¶ उद्धरणं नाम पादस्स भूमितो उक्खिपनं. अतिहरणं नाम पुरतो हरणं. वीतिहरणं नाम खाणुकण्टकदीघजातिआदीसु किञ्चिदेव दिस्वा इतो चितो च पादसञ्चारणं. वोस्सज्जनं नाम पादस्स हेट्ठा ओरोपनं. सन्निक्खेपनं नाम पथवीतले ठपनं. सन्निरुम्भनं नाम पुन पादुद्धरणकाले पादस्स पथविया सद्धिं अभिनिप्पीळनं. तत्थ उद्धरणे पथवीधातु ¶ आपोधातूति द्वे धातुयो ओमत्ता होन्ति मन्दा, इतरा द्वे अधिमत्ता होन्ति बलवतियो. तथा अतिहरणवीतिहरणेसु. वोस्सज्जने तेजोधातु वायोधातूति द्वे धातुयो ओमत्ता होन्ति मन्दा, इतरा द्वे अधिमत्ता होन्ति बलवतियो. तथा सन्निक्खेपनसन्निरुम्भनेसु. एवं छ कोट्ठासे कत्वा तेसं वसेन तस्मिं वयोवुड्ढत्थङ्गमरूपे तिलक्खणं आरोपेति.

कथं? सो इति पटिसञ्चिक्खति – ‘‘या उद्धरणे पवत्ता धातुयो, यानि च तदुपादायरूपानि, सब्बे ते धम्मा अतिहरणं अप्पत्वा एत्थेव निरुज्झन्ति, तस्मा अनिच्चा दुक्खा अनत्ता. तथा अतिहरणे पवत्ता वीतिहरणं. वीतिहरणे पवत्ता वोस्सज्जनं. वोस्सज्जने पवत्ता सन्निक्खेपनं. सन्निक्खेपने पवत्ता सन्निरुम्भनं अप्पत्वा एत्थेव निरुज्झन्ति. इति तत्थ तत्थ उप्पन्ना इतरं इतरं कोट्ठासं अप्पत्वा तत्थ तत्थेव पब्बं पब्बं सन्धि सन्धि ओधि ओधि हुत्वा तत्तकपाले पक्खित्ततिला विय तटतटायन्ता सङ्खारा भिज्जन्ति. तस्मा अनिच्चा दुक्खा अनत्ता’’ति. तस्सेवं पब्बपब्बगते सङ्खारे विपस्सतो रूपसम्मसनं सुखुमं होति.

७११. सुखुमत्ते च पनस्स इदं ओपम्मं. एको किर दारुतिणुक्कादीसु कतपरिचयो अदिट्ठपुब्बपदीपो पच्चन्तवासिको नगरमागम्म अन्तरापणे जलमानं पदीपं दिस्वा एकं पुरिसं पुच्छि अम्भो ‘‘किं नामेतं एवं मनाप’’न्ति? तमेनं सो आह ‘‘किमेत्थ मनापं, पदीपो नामेस तेलक्खयेन वट्टिक्खयेन च गतमग्गोपिस्स न पञ्ञायिस्सती’’ति. तमञ्ञो एवमाह ‘‘इदं ओळारिकं, इमिस्सा हि वट्टिया अनुपुब्बेन डय्हमानाय ततियभागे ततियभागे जाला इतरीतरं पदेसं अप्पत्वाव निरुज्झिस्सती’’ति. तमञ्ञो एवमाह ‘‘इदम्पि ओळारिकं, इमिस्सा हि अङ्गुलङ्गुलन्तरे अड्ढङ्गुलड्ढङ्गुलन्तरे ¶ तन्तुम्हि तन्तुम्हि अंसुम्हि अंसुम्हि जाला इतरीतरं अंसुं अप्पत्वाव निरुज्झिस्सति. अंसुं पन मुञ्चित्वा न सक्का जालं पञ्ञापेतु’’न्ति.

तत्थ ‘‘तेलक्खयेन वट्टिक्खयेन च पदीपस्स गतमग्गोपि न पञ्ञायिस्सती’’ति पुरिसस्स ञाणं विय योगिनो आदाननिक्खेपनतो वस्ससतेन परिच्छिन्नरूपे तिलक्खणारोपनं. ‘‘वट्टिया ततियभागे ततियभागे जाला इतरीतरं पदेसं अप्पत्वाव निरुज्झिस्सती’’ति ¶ पुरिसस्स ञाणं विय योगिनो वस्ससतस्स ततियकोट्ठासपरिच्छिन्ने वयोवुड्ढत्थङ्गमरूपे तिलक्खणारोपनं. ‘‘अङ्गुलङ्गुलन्तरे जाला इतरीतरं अप्पत्वाव निरुज्झिस्सती’’ति पुरिसस्स ञाणं विय योगिनो दसवस्स पञ्चवस्स चतुवस्स तिवस्स द्विवस्स एकवस्स परिच्छिन्ने रूपे तिलक्खणारोपनं. ‘‘अड्ढङ्गुलड्ढङ्गुलन्तरे जाला इतरीतरं अप्पत्वाव निरुज्झिस्सती’’ति पुरिसस्स ञाणं विय योगिनो एकेकउतुवसेन एकं वस्सं तिधा, छधा च विभजित्वा चतुमास-द्विमासपरिच्छिन्ने रूपे तिलक्खणारोपनं. ‘‘तन्तुम्हि तन्तुम्हि जाला इतरीतरं अप्पत्वाव निरुज्झिस्सती’’ति पुरिसस्स ञाणं विय योगिनो काळजुण्हवसेन, रत्तिन्दिववसेन, एकरत्तिन्दिवं छ कोट्ठासे कत्वा पुब्बण्हादिवसेन च परिच्छिन्ने रूपे तिलक्खणारोपनं. ‘‘अंसुम्हि अंसुम्हि जाला इतरीतरं अप्पत्वाव निरुज्झिस्सती’’ति पुरिसस्स ञाणं विय योगिनो अभिक्कमादिवसेन चेव उद्धरणादीसु च एकेककोट्ठासवसेन परिच्छिन्ने रूपे तिलक्खणारोपनन्ति.

७१२. सो एवं नानाकारेहि वयोवुड्ढत्थङ्गमरूपे तिलक्खणं आरोपेत्वा पुन तदेव रूपं विसङ्खरित्वा आहारमयादिवसेन चत्तारो कोट्ठासे कत्वा एकेककोट्ठासे तिलक्खणं आरोपेति. तत्रास्स आहारमयं रूपं छातसुहितवसेन पाकटं होति. छातकाले समुट्ठितं रूपं हि झत्तं होति किलन्तं, झामखाणुको विय, अङ्गारपच्छियं निलीनकाको विय च दुब्बण्णं दुस्सण्ठितं. सुहितकाले समुट्ठितं धातं पीणितं मुदु सिनिद्धं फस्सवन्तं होति. सो तं परिग्गहेत्वा ‘‘छातकाले ¶ पवत्तरूपं सुहितकालं अप्पत्वा एत्थेव निरुज्झति. सुहितकाले समुट्ठितम्पि छातकालं अप्पत्वा एत्थेव निरुज्झति, तस्मा तं अनिच्चं दुक्खमनत्ता’’ति एवं तत्थ तिलक्खणं आरोपेति.

७१३. उतुमयं सीतुण्हवसेन पाकटं होति. उण्हकाले समुट्ठितं रूपं हि झत्तं होति किलन्तं दुब्बण्णं. सीतउतुना समुट्ठितं रूपं धातं पीणितं सिनिद्धं होति. सो तं परिग्गहेत्वा ‘‘उण्हकाले पवत्तरूपं सीतकालं अप्पत्वा एत्थेव निरुज्झति. सीतकाले पवत्तरूपं उण्हकालं अप्पत्वा एत्थेव निरुज्झति, तस्मा तं अनिच्चं दुक्खमनत्ता’’ति एवं तत्थ तिलक्खणं आरोपेति.

७१४. कम्मजं आयतनद्वारवसेन पाकटं होति. चक्खुद्वारस्मिं हि चक्खुकायभावदसकवसेन ¶ तिंस कम्मजरूपानि, उपत्थम्भकानि पन तेसं उतुचित्ताहारसमुट्ठानानि चतुवीसतीति चतुपण्णास होन्ति. तथा सोतघानजिव्हाद्वारेसु. कायद्वारे कायभावदसकवसेन चेव उतुसमुट्ठानादिवसेन च चतुचत्तालीस. मनोद्वारे हदयवत्थुकायभावदसकवसेन चेव उतुसमुट्ठानादिवसेन च चतुपण्णासमेव.

सो सब्बम्पि तं रूपं परिग्गहेत्वा ‘‘चक्खुद्वारे पवत्तरूपं सोतद्वारं अप्पत्वा एत्थेव निरुज्झति. सोतद्वारे पवत्तरूपं घानद्वारं. घानद्वारे पवत्तरूपं जिव्हाद्वारं. जिव्हाद्वारे पवत्तरूपं कायद्वारं. कायद्वारे पवत्तरूपं मनोद्वारं अप्पत्वा एत्थेव निरुज्झति, तस्मा तं अनिच्चं दुक्खमनत्ता’’ति एवं तत्थ तिलक्खणं आरोपेति.

७१५. चित्तसमुट्ठानं सोमनस्सितदोमनस्सितवसेन पाकटं होति, सोमनस्सितकाले उप्पन्नं हि रूपं सिनिद्धं मुदु पीणितं फस्सवन्तं होति. दोमनस्सितकाले उप्पन्नं झत्तं किलन्तं दुब्बण्णं होति. सो तं परिग्गहेत्वा ‘‘सोमनस्सितकाले पवत्तरूपं दोमनस्सितकालं अप्पत्वा एत्थेव निरुज्झति. दोमनस्सितकाले पवत्तरूपं सोमनस्सितकालं अप्पत्वा एत्थेव निरुज्झति, तस्मा तं अनिच्चं दुक्खमनत्ता’’ति एवं तत्थ तिलक्खणं आरोपेति.

तस्सेवं ¶ चित्तसमुट्ठानरूपं परिग्गहेत्वा तत्थ तिलक्खणं आरोपयतो अयमत्थो पाकटो होति –

जीवितं अत्तभावो च, सुखदुक्खा च केवला;

एकचित्तसमायुत्ता, लहुसो वत्तते खणो.

चुल्लासीति सहस्सानि, कप्पं तिट्ठन्ति ये मरू;

न त्वेव तेपि तिट्ठन्ति, द्वीहि चित्तेहि समोहिता.

ये निरुद्धा मरन्तस्स, तिट्ठमानस्स वा इध;

सब्बेव सदिसा खन्धा, गता अप्पटिसन्धिका.

अनन्तरा ¶ च ये भग्गा, ये च भग्गा अनागते;

तदन्तरा निरुद्धानं, वेसमं नत्थि लक्खणे.

अनिब्बत्तेन न जातो, पच्चुप्पन्नेन जीवति;

चित्तभङ्गा मतो लोको, पञ्ञत्ति परमत्थिया.

अनिधानगता भग्गा, पुञ्जो नत्थि अनागते;

निब्बत्ता येपि तिट्ठन्ति, आरग्गे सासपूपमा.

निब्बत्तानञ्च धम्मानं, भङ्गो नेसं पुरक्खतो;

पलोकधम्मा तिट्ठन्ति, पुराणेहि अमिस्सिता.

अदस्सनतो आयन्ति, भग्गा गच्छन्तुदस्सनं;

विज्जुप्पादोव आकासे, उप्पज्जन्ति वयन्ति चाति. (महानि. १०);

७१६. एवं आहारमयादीसु तिलक्खणं आरोपेत्वा पुन धम्मतारूपे तिलक्खणं आरोपेति. धम्मतारूपं नाम बहिद्धा अनिन्द्रियबद्धं अयलोहतिपुसीससुवण्णरजतमुत्तामणिवेळुरियसङ्खसिलापवाळलोहितङ्गमसारगल्लभूमिपासाणपब्बततिणरुक्खलतादिभेदं विवट्टकप्पतो पट्ठाय उप्पज्जनकरूपं. तदस्स असोकङ्कुरादिवसेन पाकटं होति.

असोकङ्कुरं हि आदितोव तनुरत्तं होति, ततो द्वीहतीहच्चयेन घनरत्तं, पुन द्वीहतीहच्चयेन मन्दरत्तं, ततो तरुणपल्लववण्णं, ततो ¶ परिणतपल्लववण्णं, ततो हरितपण्णवण्णं. ततो नीलपण्णवण्णं. ततो नीलपण्णवण्णकालतो पट्ठाय सभागरूपसन्ततिमनुप्पबन्धापयमानं संवच्छरमत्तेन पण्डुपलासं हुत्वा वण्टतो छिज्जित्वा पतति.

सो तं परिग्गहेत्वा ‘‘तनुरत्तकाले पवत्तरूपं घनरत्तकालं अप्पत्वा निरुज्झति. घनरत्तकाले पवत्तरूपं मन्दरत्तकालं. मन्दरत्तकाले पवत्तरूपं तरुणपल्लववण्णकालं. तरुणपल्लववण्णकाले पवत्तं परिणतपल्लववण्णकालं. परिणतपल्लववण्णकाले पवत्तं हरितपण्णवण्णकालं ¶ . हरितपण्णकाले पवत्तं नीलपण्णवण्णकालं. नीलपण्णवण्णकाले पवत्तं पण्डुपलासकालं. पण्डुपलासकाले पवत्तं वण्टतो छिज्जित्वा पतनकालं अप्पत्वाव निरुज्झति, तस्मा तं अनिच्चं दुक्खमनत्ता’’ति तिलक्खणं आरोपेति, एवं तत्थ तिलक्खणं आरोपेत्वा इमिना नयेन सब्बम्पि धम्मतारूपं सम्मसति.

एवं ताव रूपसत्तकवसेन तिलक्खणं आरोपेत्वा सङ्खारे सम्मसति.

अरूपसत्तकसम्मसनकथा

७१७. यं पन वुत्तं ‘‘अरूपसत्तकवसेना’’ति, तत्थ अयं मातिका – कलापतो, यमकतो, खणिकतो, पटिपाटितो, दिट्ठिउग्घाटनतो, मानसमुग्घाटनतो, निकन्तिपरियादानतोति.

तत्थ कलापतोति फस्सपञ्चमका धम्मा. कथं कलापतो सम्मसतीति? इध भिक्खु इति पटिसञ्चिक्खति – ‘‘ये इमे ‘केसा अनिच्चा दुक्खा अनत्ता’ति सम्मसने उप्पन्ना फस्सपञ्चमका धम्मा, ये च ‘लोमा…पे… मत्थलुङ्गं अनिच्चं दुक्खमनत्ता’ति सम्मसने उप्पन्ना फस्सपञ्चमका धम्मा, सब्बे ते इतरीतरं अप्पत्वा पब्बंपब्बं ओधिओधि हुत्वा तत्तकपाले पक्खित्ततिला विय तटतटायन्ता विनट्ठा, तस्मा अनिच्चा दुक्खा अनत्ता’’ति. अयं ताव विसुद्धिकथायं नयो.

अरियवंसकथायं पन ‘‘हेट्ठा रूपसत्तके सत्तसु ठानेसु ‘रूपं अनिच्चं दुक्खमनत्ता’ति पवत्तं चित्तं अपरेन चित्तेन ‘अनिच्चं दुक्खमनत्ता’ति सम्मसन्तो ‘कलापतो ¶ सम्मसती’ति’’ वुत्तं, तं युत्ततरं. तस्मा सेसानिपि तेनेव नयेन विभजिस्साम.

७१८. यमकतोति इध भिक्खु आदाननिक्खेपरूपं ‘‘अनिच्चं दुक्खमनत्ता’’ति सम्मसित्वा तम्पि चित्तं अपरेन चित्तेन ‘‘अनिच्चं दुक्खमनत्ता’’ति सम्मसति. वयोवुड्ढत्थङ्गमरूपं, आहारमयं, उतुमयं, कम्मजं, चित्तसमुट्ठानं, धम्मतारूपं ‘‘अनिच्चं दुक्खमनत्ता’’ति ¶ सम्मसित्वा तम्पि चित्तं अपरेन चित्तेन ‘‘अनिच्चं दुक्खमनत्ता’’ति सम्मसति. एवं यमकतो सम्मसति नाम.

७१९. खणिकतोति इध भिक्खु आदाननिक्खेपरूपं ‘‘अनिच्चं दुक्खमनत्ता’’ति सम्मसित्वा तं पठमचित्तं दुतियचित्तेन, दुतियं ततियेन, ततियं चतुत्थेन, चतुत्थं पञ्चमेन ‘‘एतम्पि अनिच्चं दुक्खमनत्ता’’ति सम्मसति. वयोवुड्ढत्थङ्गमरूपं, आहारमयं, उतुमयं, कम्मजं, चित्तसमुट्ठानं, धम्मतारूपं ‘‘अनिच्चं दुक्खमनत्ता’’ति सम्मसित्वा तं पठमचित्तं दुतियचित्तेन, दुतियं ततियेन, ततियं चतुत्थेन, चतुत्थं पञ्चमेन ‘‘एतम्पि अनिच्चं दुक्खमनत्ता’’ति सम्मसति. एवं रूपपरिग्गाहकचित्ततो पट्ठाय चत्तारि चत्तारि चित्तानि सम्मसन्तो खणिकतो सम्मसति नाम.

७२०. पटिपाटितोति आदाननिक्खेपरूपं ‘‘अनिच्चं दुक्खमनत्ता’’ति सम्मसित्वा तं पठमचित्तं दुतियचित्तेन, दुतियं ततियेन, ततियं चतुत्थेन…पे… दसमं एकादसमेन ‘‘एतम्पि अनिच्चं दुक्खमनत्ता’’ति सम्मसति. वयोवुड्ढत्थङ्गमरूपं, आहारमयं, उतुमयं, कम्मजं, चित्तसमुट्ठानं, धम्मतारूपं ‘‘अनिच्चं दुक्खमनत्ता’’ति सम्मसित्वा तं पठमचित्तं दुतियचित्तेन, दुतियं ततियेन, ततियं चतुत्थेन…पे… दसमं एकादसमेन ‘‘एतम्पि अनिच्चं दुक्खमनत्ता’’ति एवं विपस्सना पटिपाटिया सकलम्पि दिवसभागं सम्मसितुं वट्टेय्य. याव दसमचित्तसम्मसना पन रूपकम्मट्ठानम्पि अरूपकम्मट्ठानम्पि पगुणं होति. तस्मा दसमेयेव ठपेतब्बन्ति वुत्तं. एवं सम्मसन्तो पटिपाटितो सम्मसति नाम.

७२१. दिट्ठिउग्घाटनतो मानउग्घाटनतो निकन्तिपरियादानतोति इमेसु तीसु विसुं सम्मसननयो नाम नत्थि. यं पनेतं हेट्ठा ¶ रूपं, इध च अरूपं परिग्गहितं, तं पस्सन्तो रूपारूपतो उद्धं अञ्ञं सत्तं नाम न पस्सति. सत्तस्स अदस्सनतो पट्ठाय सत्तसञ्ञा उग्घाटिता होति. सत्तसञ्ञं उग्घाटितचित्तेन सङ्खारे परिग्गण्हतो दिट्ठि नुप्पज्जति. दिट्ठिया अनुप्पज्जमानाय दिट्ठि उग्घाटिता नाम होति. दिट्ठिउग्घाटितचित्तेन सङ्खारे परिग्गण्हतो मानो नुप्पज्जति. माने अनुप्पज्जन्ते मानो समुग्घाटितो नाम होति. मानसमुग्घाटितचित्तेन सङ्खारे परिग्गण्हतो तण्हा नुप्पज्जति. तण्हाय अनुप्पज्जन्तिया निकन्ति परियादिण्णा नाम होतीति इदं ताव विसुद्धिकथायं वुत्तं.

अरियवंसकथायं ¶ पन ‘‘दिट्ठिउग्घाटनतो मानसमुग्घाटनतो निकन्तिपरियादानतो’’ति मातिकं ठपेत्वा अयं नयो दस्सितो.

‘‘अहं विपस्सामि, मम विपस्सना’’ति गण्हतो हि दिट्ठिसमुग्घाटनं नाम न होति. ‘‘सङ्खाराव सङ्खारे विपस्सन्ति सम्मसन्ति ववत्थपेन्ति परिग्गण्हन्ति परिच्छिन्दन्ती’’ति गण्हतो पन दिट्ठिउग्घाटनं नाम होति.

‘‘सुट्ठु विपस्सामि, मनापं विपस्सामी’’ति गण्हतो मानसमुग्घाटो नाम न होति. ‘‘सङ्खाराव सङ्खारे विपस्सन्ति सम्मसन्ति ववत्थपेन्ति परिग्गण्हन्ति परिच्छिन्दन्ती’’ति गण्हतो पन मानसमुग्घाटो नाम होति.

‘‘विपस्सितुं सक्कोमी’’ति विपस्सनं अस्सादेन्तस्स निकन्तिपरियादानं नाम न होति. ‘‘सङ्खाराव सङ्खारे विपस्सन्ति सम्मसन्ति ववत्थपेन्ति परिग्गण्हन्ति परिच्छिन्दन्ती’’ति गण्हतो पन निकन्तिपरियादानं नाम होति.

सचे सङ्खारा अत्ता भवेय्युं, अत्ताति गहेतुं वट्टेय्युं, अनत्ता च पन अत्ताति गहिता, तस्मा ते अवसवत्तनट्ठेन अनत्ता, हुत्वा अभावट्ठेन अनिच्चा, उप्पादवयपटिपीळनट्ठेन दुक्खाति पस्सतो दिट्ठिउग्घाटनं नाम होति.

सचे सङ्खारा निच्चा भवेय्युं, निच्चाति गहेतुं वट्टेय्युं, अनिच्चा च पन निच्चाति गहिता, तस्मा ते हुत्वा अभावट्ठेन अनिच्चा, उप्पादवयपटिपीळनट्ठेन दुक्खा, अवसवत्तनट्ठेन अनत्ताति पस्सतो मानसमुग्घाटो नाम होति.

सचे ¶ सङ्खारा सुखा भवेय्युं, सुखाति गहेतुं वट्टेय्युं, दुक्खा च पन सुखाति गहिता, तस्मा ते उप्पादवयपटिपीळनट्ठेन दुक्खा, हुत्वा अभावट्ठेन अनिच्चा, अवसवत्तनट्ठेन अनत्ताति पस्सतो निकन्तिपरियादानं नाम होति.

एवं सङ्खारे अनत्ततो पस्सन्तस्स दिट्ठिसमुग्घाटनं नाम होति. अनिच्चतो पस्सन्तस्स मानसमुग्घाटनं ¶ नाम होति. दुक्खतो पस्सन्तस्स निकन्तिपरियादानं नाम होति. इति अयं विपस्सना अत्तनो अत्तनो ठानेयेव तिट्ठतीति.

एवं अरूपसत्तकवसेनापि तिलक्खणं आरोपेत्वा सङ्खारे सम्मसति. एत्तावता पनस्स रूपकम्मट्ठानम्पि अरूपकम्मट्ठानम्पि पगुणं होति.

७२२. सो एवं पगुणरूपारूपकम्मट्ठानो या उपरि भङ्गानुपस्सनतो पट्ठाय पहानपरिञ्ञावसेन सब्बाकारतो पत्तब्बा अट्ठारस महाविपस्सना, तासं इधेव ताव एकदेसं पटिविज्झन्तो तप्पटिपक्खे धम्मे पजहति.

अट्ठारस महाविपस्सना नाम अनिच्चानुपस्सनादिका पञ्ञा. यासु अनिच्चानुपस्सनं भावेन्तो निच्चसञ्ञं पजहति, दुक्खानुपस्सनं भावेन्तो सुखसञ्ञं पजहति, अनत्तानुपस्सनं भावेन्तो अत्तसञ्ञं पजहति, निब्बिदानुपस्सनं भावेन्तो नन्दिं पजहति, विरागानुपस्सनं भावेन्तो रागं पजहति, निरोधानुपस्सनं भावेन्तो समुदयं पजहति, पटिनिस्सग्गानुपस्सनं भावेन्तो आदानं पजहति, खयानुपस्सनं भावेन्तो घनसञ्ञं पजहति, वयानुपस्सनं भावेन्तो आयूहनं पजहति, विपरिणामानुपस्सनं भावेन्तो धुवसञ्ञं पजहति, अनिमित्तानुपस्सनं भावेन्तो निमित्तं पजहति, अप्पणिहितानुपस्सनं भावेन्तो पणिधिं पजहति, सुञ्ञतानुपस्सनं भावेन्तो अभिनिवेसं पजहति, अधिपञ्ञाधम्मविपस्सनं भावेन्तो सारादानाभिनिवेसं पजहति, यथाभूतञाणदस्सनं भावेन्तो सम्मोहाभिनिवेसं पजहति, आदीनवानुपस्सनं भावेन्तो आलयाभिनिवेसं पजहति, पटिसङ्खानुपस्सनं भावेन्तो अप्पटिसङ्खं पजहति, विवट्टानुपस्सनं भावेन्तो संयोगाभिनिवेसं पजहति.

तासु ¶ यस्मा इमिना अनिच्चादिलक्खणत्तयवसेन सङ्खारा दिट्ठा, तस्मा अनिच्च-दुक्ख-अनत्तानुपस्सना पटिविद्धा होन्ति. यस्मा च ‘‘या च अनिच्चानुपस्सना या च अनिमित्तानुपस्सना, इमे धम्मा एकत्था, ब्यञ्जनमेव नानं’’. तथा ‘‘या च दुक्खानुपस्सना या च अप्पणिहितानुपस्सना, इमे धम्मा एकत्था, ब्यञ्जनमेव नानं’’. ‘‘या च अनत्तानुपस्सना या च सुञ्ञतानुपस्सना, इमे धम्मा एकत्था, ब्यञ्जनमेव नान’’न्ति (पटि. म. १.२२७) वुत्तं. तस्मा तापि पटिविद्धा होन्ति.

अधिपञ्ञाधम्मविपस्सना ¶ पन सब्बापि विपस्सना. यथाभूतञाणदस्सनं कङ्खावितरणविसुद्धिया एव सङ्गहितं. इति इदम्पि द्वयं पटिविद्धमेव होति. सेसेसु विपस्सनाञाणेसु किञ्चि पटिविद्धं, किञ्चि अप्पटिविद्धं, तेसं विभागं परतो आविकरिस्साम.

यदेव हि पटिविद्धं, तं सन्धाय इदं वुत्तं ‘‘एवं पगुणरूपारूपकम्मट्ठानो या उपरि भङ्गानुपस्सनतो पट्ठाय पहानपरिञ्ञावसेन सब्बाकारतो पत्तब्बा अट्ठारस महाविपस्सना. तासं इधेव ताव एकदेसं पटिविज्झन्तो तप्पटिपक्खे धम्मे पजहती’’ति.

उदयब्बयञाणकथा

७२३. सो एवं अनिच्चानुपस्सनादिपटिपक्खानं निच्चसञ्ञादीनं पहानेन विसुद्धञाणो सम्मसनञाणस्स पारं गन्त्वा, यं तं सम्मसनञाणानन्तरं ‘‘पच्चुप्पन्नानं धम्मानं विपरिणामानुपस्सने पञ्ञा उदयब्बयानुपस्सने ञाण’’न्ति (पटि. म. मातिका १.६) उदयब्बयानुपस्सनं वुत्तं, तस्स अधिगमाय योगं आरभति. आरभमानो च सङ्खेपतो ताव आरभति. तत्रायं पाळि –

‘‘कथं पच्चुप्पन्नानं धम्मानं विपरिणामानुपस्सने पञ्ञा उदयब्बयानुपस्सने ञाणं? जातं रूपं पच्चुप्पन्नं, तस्स निब्बत्तिलक्खणं उदयो, विपरिणामलक्खणं वयो, अनुपस्सना ञाणं. जाता वेदना… सञ्ञा… सङ्खारा… विञ्ञाणं… जातं चक्खु…पे… जातो भवो पच्चुप्पन्नो, तस्स निब्बत्तिलक्खणं उदयो, विपरिणामलक्खणं वयो, अनुपस्सना ञाण’’न्ति (पटि. म. १.४९).

सो ¶ इमिना पाळिनयेन जातस्स नामरूपस्स निब्बत्तिलक्खणं जातिं उप्पादं अभिनवाकारं ‘‘उदयो’’ति, विपरिणामलक्खणं खयं भङ्गं ‘‘वयो’’ति समनुपस्सति. सो एवं पजानाति ‘‘इमस्स नामरूपस्स उप्पत्तितो पुब्बे अनुप्पन्नस्स रासि वा निचयो वा नत्थि, उप्पज्जमानस्सापि रासितो वा निचयतो वा आगमनं नाम नत्थि, निरुज्झमानस्सापि दिसाविदिसागमनं नाम नत्थि, निरुद्धस्सापि एकस्मिं ठाने रासितो निचयतो निधानतो अवट्ठानं ¶ नाम नत्थि. यथा पन वीणाय वादियमानाय उप्पन्नसद्दस्स नेव उप्पत्तितो पुब्बे सन्निचयो अत्थि, न उप्पज्जमानो सन्निचयतो आगतो, न निरुज्झमानस्स दिसाविदिसागमनं अत्थि, न निरुद्धो कत्थचि सन्निचितो तिट्ठति, अथ खो वीणञ्च उपवीणञ्च पुरिसस्स च तज्जं वायामं पटिच्च अहुत्वा सम्भोति, हुत्वा पटिवेति. एवं सब्बेपि रूपारूपिनो धम्मा अहुत्वा सम्भोन्ति, हुत्वा पटिवेन्ती’’ति.

७२४. एवं सङ्खेपतो उदयब्बयमनसिकारं कत्वा पुन यानि एतस्सेव उदयब्बयञाणस्स विभङ्गे –

‘‘अविज्जासमुदया रूपसमुदयोति पच्चयसमुदयट्ठेन रूपक्खन्धस्स उदयं पस्सति. तण्हासमुदया… कम्मसमुदया… आहारसमुदया रूपसमुदयोति पच्चयसमुदयट्ठेन रूपक्खन्धस्स उदयं पस्सति. निब्बत्तिलक्खणं पस्सन्तोपि रूपक्खन्धस्स उदयं पस्सति. रूपक्खन्धस्स उदयं पस्सन्तो इमानि पञ्च लक्खणानि पस्सति.

‘‘अविज्जानिरोधा रूपनिरोधोति पच्चयनिरोधट्ठेन रूपक्खन्धस्स वयं पस्सति. तण्हानिरोधा… कम्मनिरोधा… आहारनिरोधा रूपनिरोधोति पच्चयनिरोधट्ठेन रूपक्खन्धस्स वयं पस्सति. विपरिणामलक्खणं पस्सन्तोपि रूपक्खन्धस्स वयं पस्सति. रूपक्खन्धस्स वयं पस्सन्तोपि इमानि पञ्च लक्खणानि पस्सति’’ (पटि. म. १.५०).

तथा ‘‘अविज्जासमुदया वेदनासमुदयोति पच्चयसमुदयट्ठेन वेदनाक्खन्धस्स उदयं पस्सति. तण्हासमुदया… कम्मसमुदया… फस्ससमुदया वेदनासमुदयोति पच्चयसमुदयट्ठेन वेदनाक्खन्धस्स उदयं पस्सति. निब्बत्तिलक्खणं पस्सन्तोपि वेदनाक्खन्धस्स ¶ उदयं पस्सति. वेदनाक्खन्धस्स उदयं पस्सन्तो इमानि पञ्च लक्खणानि पस्सति. अविज्जानिरोधा… तण्हानिरोधा… कम्मनिरोधा… फस्सनिरोधा वेदनानिरोधोति पच्चयनिरोधट्ठेन वेदनाक्खन्धस्स वयं पस्सति. विपरिणामलक्खणं पस्सन्तोपि वेदनाक्खन्धस्स वयं पस्सति. वेदनाक्खन्धस्स वयं पस्सन्तो इमानि पञ्च लक्खणानि पस्सति’’ (पटि. म. १.५०).

वेदनाक्खन्धस्स ¶ विय च सञ्ञासङ्खारविञ्ञाणक्खन्धानं. अयं पन विसेसो, विञ्ञाणक्खन्धस्स फस्सट्ठाने ‘‘नामरूपसमुदया, नामरूपनिरोधा’’ति –

एवं एकेकस्स खन्धस्स उदयब्बयदस्सने दस दस कत्वा पञ्ञास लक्खणानि वुत्तानि. तेसं वसेन एवम्पि रूपस्स उदयो एवम्पि रूपस्स वयो, एवम्पि रूपं उदेति, एवम्पि रूपं वेतीति पच्चयतो चेव खणतो च वित्थारेन मनसिकारं करोति.

७२५. तस्सेवं मनसिकरोतो ‘‘इति किरिमे धम्मा अहुत्वा सम्भोन्ति, हुत्वा पटिवेन्ती’’ति ञाणं विसदतरं होति. तस्सेवं पच्चयतो चेव खणतो च द्वेधा उदयब्बयं पस्सतो सच्चपटिच्चसमुप्पादनयलक्खणभेदा पाकटा होन्ति.

७२६. यञ्हि सो अविज्जादिसमुदया खन्धानं समुदयं, अविज्जादिनिरोधा च खन्धानं निरोधं पस्सति, इदमस्स पच्चयतो उदयब्बयदस्सनं. यं पन निब्बत्तिलक्खणविपरिणामलक्खणानि पस्सन्तो खन्धानं उदयब्बयं पस्सति, इदमस्स खणतो उदयब्बयदस्सनं, उप्पत्तिक्खणेयेव हि निब्बत्तिलक्खणं. भङ्गक्खणे च विपरिणामलक्खणं.

७२७. इच्चस्सेवं पच्चयतो चेव खणतो च द्वेधा उदयब्बयं पस्सतो पच्चयतो उदयदस्सनेन समुदयसच्चं पाकटं होति जनकावबोधतो. खणतो उदयदस्सनेन दुक्खसच्चं पाकटं होति जातिदुक्खावबोधतो. पच्चयतो वयदस्सनेन निरोधसच्चं पाकटं होति पच्चयानुप्पादेन पच्चयवतं अनुप्पादावबोधतो. खणतो वयदस्सनेन दुक्खसच्चमेव पाकटं होति मरणदुक्खावबोधतो. यञ्चस्स ¶ उदयब्बयदस्सनं, मग्गोवायं लोकिकोति मग्गसच्चं पाकटं होति तत्र सम्मोहविघाततो.

७२८. पच्चयतो चस्स उदयदस्सनेन अनुलोमो पटिच्चसमुप्पादो पाकटो होति, ‘‘इमस्मिं सति इदं होती’’ति (म. नि. १.४०४; सं. नि. २.२१; उदा. १) अवबोधतो. पच्चयतो वयदस्सनेन पटिलोमो पटिच्चसमुप्पादो पाकटो होति, ‘‘इमस्स निरोधा इदं निरुज्झती’’ति (म. नि. १.४०६; सं. नि. २.२१; उदा. २) अवबोधतो ¶ . खणतो पन उदयब्बयदस्सनेन पटिच्चसमुप्पन्ना धम्मा पाकटा होन्ति सङ्खतलक्खणावबोधतो. उदयब्बयवन्तो हि सङ्खता, ते च पटिच्चसमुप्पन्नाति.

७२९. पच्चयतो चस्स उदयदस्सनेन एकत्तनयो पाकटो होति हेतुफलसम्बन्धेन सन्तानस्स अनुपच्छेदावबोधतो. अथ सुट्ठुतरं उच्छेददिट्ठिं पजहति. खणतो उदयदस्सनेन नानत्तनयो पाकटो होति नवनवानं उप्पादावबोधतो. अथ सुट्ठुतरं सस्सतदिट्ठिं पजहति. पच्चयतो चस्स उदयब्बयदस्सनेन अब्यापारनयो पाकटो होति धम्मानं अवसवत्तिभावावबोधतो. अथ सुट्ठुतरं अत्तदिट्ठिं पजहति. पच्चयतो पन उदयदस्सनेन एवंधम्मतानयो पाकटो होति पच्चयानुरूपेन फलस्स उप्पादावबोधतो. अथ सुट्ठुतरं अकिरियदिट्ठिं पजहति.

७३०. पच्चयतो चस्स उदयदस्सनेन अनत्तलक्खणं पाकटं होति धम्मानं निरीहकत्तपच्चयपटिबद्धवुत्तितावबोधतो. खणतो उदयब्बयदस्सनेन अनिच्चलक्खणं पाकटं होति हुत्वा अभावावबोधतो, पुब्बन्तापरन्तविवेकावबोधतो च. दुक्खलक्खणम्पि पाकटं होति उदयब्बयेहि पटिपीळनावबोधतो. सभावलक्खणम्पि पाकटं होति उदयब्बयपरिच्छिन्नावबोधतो. सभावलक्खणे सङ्खतलक्खणस्स तावकालिकत्तम्पि पाकटं होति उदयक्खणे वयस्स, वयक्खणे च उदयस्स अभावावबोधतोति.

७३१. तस्सेवं पाकटीभूतसच्चपटिच्चसमुप्पादनयलक्खणभेदस्स ‘‘एवं किर नामिमे धम्मा अनुप्पन्नपुब्बा उप्पज्जन्ति, उप्पन्ना निरुज्झन्ती’’ति निच्चनवाव हुत्वा सङ्खारा ¶ उपट्ठहन्ति. न केवलञ्च निच्चनवा, सूरियुग्गमने उस्सावबिन्दु विय उदकबुब्बुळो विय उदके दण्डराजि विय आरग्गे सासपो विय विज्जुप्पादो विय च परित्तट्ठायिनो. मायामरीचिसुपिनन्तअलातचक्कगन्धब्बनगरफेणकदलिआदयो विय अस्सारा निस्साराति चापि उपट्ठहन्ति.

एत्तावतानेन ‘‘वयधम्ममेव उप्पज्जति, उप्पन्नञ्च वयं उपेती’’ति इमिना आकारेन समपञ्ञास लक्खणानि पटिविज्झित्वा ठितं उदयब्बयानुपस्सनं नाम तरुणविपस्सनाञाणं अधिगतं होति, यस्साधिगमा आरद्धविपस्सकोति सङ्खं गच्छति.

विपस्सनुपक्किलेसकथा

७३२. अथस्स ¶ इमाय तरुणविपस्सनाय आरद्धविपस्सकस्स दस विपस्सनुपक्किलेसा उप्पज्जन्ति. विपस्सनुपक्किलेसा हि पटिवेधप्पत्तस्स अरियसावकस्स चेव विप्पटिपन्नकस्स च निक्खित्तकम्मट्ठानस्स कुसीतपुग्गलस्स नुप्पज्जन्ति. सम्मापटिपन्नकस्स पन युत्तपयुत्तस्स आरद्धविपस्सकस्स कुलपुत्तस्स उप्पज्जन्तियेव.

कतमे पन ते दस उपक्किलेसाति? ओभासो, ञाणं, पीति, पस्सद्धि, सुखं, अधिमोक्खो, पग्गहो, उपट्ठानं, उपेक्खा, निकन्तीति. वुत्तञ्हेतं –

‘‘कथं धम्मुद्धच्चविग्गहितमानसं होति? अनिच्चतो मनसिकरोतो ओभासो उप्पज्जति, ‘ओभासो धम्मो’ति ओभासं आवज्जति, ततो विक्खेपो उद्धच्चं. तेन उद्धच्चेन विग्गहितमानसो अनिच्चतो उपट्ठानं यथाभूतं नप्पजानाति. दुक्खतो… अनत्ततो उपट्ठानं यथाभूतं नप्पजानाति’’.

तथा ‘‘अनिच्चतो मनसिकरोतो ञाणं उप्पज्जति…पे… पीति… पस्सद्धि… सुखं… अधिमोक्खो… पग्गहो… उपट्ठानं… उपेक्खा… निकन्ति उप्पज्जति, ‘निकन्ति धम्मो’ति निकन्तिं आवज्जति, ततो विक्खेपो उद्धच्चं. तेन उद्धच्चेन विग्गहितमानसो अनिच्चतो उपट्ठानं यथाभूतं नप्पजानाति. दुक्खतो… अनत्ततो उपट्ठानं यथाभूतं नप्पजानाती’’ति (पटि. म. २.६).

७३३. तत्थ ¶ ओभासोति विपस्सनोभासो. तस्मिं उप्पन्ने योगावचरो ‘‘न वत मे इतो पुब्बे एवरूपो ओभासो उप्पन्नपुब्बो, अद्धा मग्गप्पत्तोस्मि फलपत्तोस्मी’’ति अमग्गमेव ‘‘मग्गो’’ति, अफलमेव च ‘‘फल’’न्ति गण्हाति. तस्स अमग्गं ‘‘मग्गो’’ति अफलं ‘‘फल’’न्ति गण्हतो विपस्सनावीथि उक्कन्ता नाम होति. सो अत्तनो मूलकम्मट्ठानं विस्सज्जेत्वा ओभासमेव अस्सादेन्तो निसीदति.

सो खो पनायं ओभासो कस्सचि भिक्खुनो पल्लङ्कट्ठानमत्तमेव ओभासेन्तो उप्पज्जति. कस्सचि ¶ अन्तोगब्भं. कस्सचि बहिगब्भम्पि. कस्सचि सकलविहारं, गावुतं, अड्ढयोजनं, योजनं, द्वियोजनं, तियोजनं…पे… कस्सचि पथवीतलतो याव अकनिट्ठब्रह्मलोका एकालोकं कुरुमानो. भगवतो पन दससहस्सिलोकधातुं ओभासेन्तो उदपादि.

एवं वेमत्तताय चस्स इदं वत्थु – चित्तलपब्बते किर द्विकुट्टगेहस्स अन्तो द्वे थेरा निसीदिंसु. तंदिवसञ्च काळपक्खुपोसथो होति, मेघपटलच्छन्ना दिसा, रत्तिभागे चतुरङ्गसमन्नागतं तमं पवत्तति. अथेको थेरो आह – ‘‘भन्ते, मय्हं इदानि चेतियङ्गणम्हि सीहासने पञ्चवण्णानि कुसुमानि पञ्ञायन्ती’’ति. तं इतरो आह – ‘‘अनच्छरियं, आवुसो, कथेसि, मय्हं पनेतरहि महासमुद्दम्हि योजनट्ठाने मच्छकच्छपा पञ्ञायन्ती’’ति.

अयं पन विपस्सनुपक्किलेसो येभुय्येन समथविपस्सनालाभिनो उप्पज्जति. सो समापत्तिविक्खम्भितानं किलेसानं असमुदाचारतो ‘‘अरहा अह’’न्ति चित्तं उप्पादेति उच्चवालिकवासी महानागत्थेरो विय हंकनकवासी महादत्तत्थेरो विय चित्तलपब्बते निङ्कपेण्णकपधानघरवासी चूळसुमनत्थेरो विय च.

तत्रिदं एकवत्थुपरिदीपनं – तलङ्गरवासी धम्मदिन्नत्थेरो किर नाम एको पभिन्नपटिसम्भिदो महाखीणासवो महतो भिक्खुसङ्घस्स ओवाददायको ¶ अहोसि. सो एकदिवसं अत्तनो दिवाट्ठाने निसीदित्वा ‘‘किन्नु खो अम्हाकं आचरियस्स उच्चवालिकवासीमहानागत्थेरस्स समणभावकिच्चं मत्थकं पत्तं, नो’’ति आवज्जन्तो पुथुज्जनभावमेवस्स दिस्वा ‘‘मयि अगच्छन्ते पुथुज्जनकालकिरियमेव करिस्सती’’ति च ञत्वा इद्धिया वेहासं उप्पतित्वा दिवाट्ठाने निसिन्नस्स थेरस्स समीपे ओरोहित्वा वन्दित्वा वत्तं दस्सेत्वा एकमन्तं निसीदि. ‘‘किं, आवुसो धम्मदिन्न, अकाले आगतोसी’’ति च वुत्ते ‘‘पञ्हं, भन्ते, पुच्छितुं आगतोम्ही’’ति आह. ततो ‘‘पुच्छावुसो, जानमाना कथयिस्सामा’’ति वुत्ते पञ्हसहस्सं पुच्छि.

थेरो पुच्छितपुच्छितं असज्जमानोव कथेसि. ततो ‘‘अतितिक्खं वो, भन्ते, ञाणं, कदा तुम्हेहि अयं धम्मो अधिगतो’’ति वुत्ते ‘‘इतो सट्ठिवस्सकाले, आवुसो’’ति आह. समाधिम्पि, भन्ते, वळञ्जेथाति, न यिदं, आवुसो, भारियन्ति. तेन हि, भन्ते, एकं हत्थिं मापेथाति ¶ . थेरो सब्बसेतं हत्थिं मापेसि. इदानि, भन्ते, यथा अयं हत्थी अञ्चितकण्णो पसारितनङ्गुट्ठो सोण्डं मुखे पक्खिपित्वा भेरवं कोञ्चनादं करोन्तो तुम्हाकं अभिमुखो आगच्छति, तथा नं करोथाति. थेरो तथा कत्वा वेगेन आगच्छतो हत्थिस्स भेरवं आकारं दिस्वा उट्ठाय पलायितुं आरद्धो. तमेनं खीणासवत्थेरो हत्थं पसारेत्वा चीवरकण्णे गहेत्वा ‘‘भन्ते, खीणासवस्स सारज्जं नाम होती’’ति आह.

सो तम्हि काले अत्तनो पुथुज्जनभावं ञत्वा ‘‘अवस्सयो मे, आवुसो, धम्मदिन्न होही’’ति वत्वा पादमूले उक्कुटिकं निसीदि. ‘‘भन्ते, तुम्हाकं अवस्सयो भविस्सामिच्चेवाहं आगतो, मा चिन्तयित्था’’ति कम्मट्ठानं कथेसि. थेरो कम्मट्ठानं गहेत्वा चङ्कमं आरुय्ह ततिये पदवारे अग्गफलं अरहत्तं पापुणि. थेरो किर दोसचरितो अहोसि. एवरूपा भिक्खू ओभासे कम्पन्ति.

७३४. ञाणन्ति विपस्सनाञाणं. तस्स किर रूपारूपधम्मे तुलयन्तस्स तीरेन्तस्स विस्सट्ठइन्दवजिरमिव अविहतवेगं तिखिणं सूरं अतिविसदं ञाणं उप्पज्जति.

पीतीति ¶ विपस्सनापीति. तस्स किर तस्मिं समये खुद्दकापीति, खणिकापीति, ओक्कन्तिकापीति, उब्बेगापीति, फरणापीतीति अयं पञ्चविधा पीति सकलसरीरं पूरयमाना उप्पज्जति.

पस्सद्धीति विपस्सनापस्सद्धि. तस्स किर तस्मिं समये रत्तिट्ठाने वा दिवाट्ठाने वा निसिन्नस्स कायचित्तानं नेव दरथो, न गारवं, न कक्खळता, न अकम्मञ्ञता, न गेलञ्ञं, न वङ्कता होति, अथ खो पनस्स कायचित्तानि पस्सद्धानि लहूनि मुदूनि कम्मञ्ञानि सुविसदानि उजुकानियेव होन्ति. सो इमेहि पस्सद्धादीहि अनुग्गहितकायचित्तो तस्मिं समये अमानुसिं नाम रतिं अनुभवति. यं सन्धाय वुत्तं –

‘‘सुञ्ञागारं पविट्ठस्स, सन्तचित्तस्स भिक्खुनो;

अमानुसी रति होति, सम्मा धम्मं विपस्सतो.

‘‘यतो ¶ यतो सम्मसति, खन्धानं उदयब्बयं;

लभती पीतिपामोज्जं, अमतं तं विजानत’’न्ति. (ध. प. ३७३-३७४);

एवमस्स इमं अमानुसिं रतिं साधयमाना लहुतादिसम्पयुत्ता पस्सद्धि उप्पज्जति.

सुखन्ति विपस्सनासुखं. तस्स किर तस्मिं समये सकलसरीरं अभिसन्दयमानं अतिपणीतं सुखं उप्पज्जति.

अधिमोक्खोति सद्धा. विपस्सनासम्पयुत्तायेव हिस्स चित्तचेतसिकानं अतिसयपसादभूता बलवती सद्धा उप्पज्जति.

पग्गहोति वीरियं. विपस्सनासम्पयुत्तमेव हिस्स असिथिलं अनच्चारद्धं सुपग्गहितं वीरियं उप्पज्जति.

उपट्ठानन्ति सति. विपस्सनासम्पयुत्तायेव हिस्स सुपट्ठिता सुपतिट्ठिता निखाता अचला पब्बतराजसदिसा सति उप्पज्जति. सो यं यं ठानं आवज्जति समन्नाहरति मनसिकरोति पच्चवेक्खति, तं तं ठानमस्स ओक्खन्दित्वा पक्खन्दित्वा दिब्बचक्खुनो परलोको विय सतिया उपट्ठाति.

उपेक्खाति ¶ विपस्सनुपेक्खा चेव आवज्जनुपेक्खा च. तस्मिं हिस्स समये सब्बसङ्खारेसु मज्झत्तभूता विपस्सनुपेक्खापि बलवती उप्पज्जति. मनोद्वारे आवज्जनुपेक्खापि. सा हिस्स तं तं ठानं आवज्जन्तस्स विस्सट्ठइन्दवजिरमिव पत्तपुटे पक्खित्त तत्तनाराचो विय च सूरा तिखिणा हुत्वा वहति.

निकन्तीति विपस्सनानिकन्ति. एवं ओभासादिपटिमण्डिताय हिस्स विपस्सनाय आलयं कुरुमाना सुखुमा सन्ताकारा निकन्ति उप्पज्जति. या निकन्ति किलेसोति परिग्गहेतुम्पि न सक्का होति.

यथा ¶ च ओभासे, एवं एतेसुपि अञ्ञतरस्मिं उप्पन्ने योगावचरो ‘‘न वत मे इतो पुब्बे एवरूपं ञाणं उप्पन्नपुब्बं, एवरूपा पीति, पस्सद्धि, सुखं, अधिमोक्खो, पग्गहो, उपट्ठानं, उपेक्खा, निकन्ति उप्पन्नपुब्बा, अद्धा मग्गप्पत्तोस्मि फलप्पत्तोस्मी’’ति अमग्गमेव ‘‘मग्गो’’ति अफलमेव च ‘‘फल’’न्ति गण्हाति. तस्स अमग्गं ‘‘मग्गो’’ति अफलं ‘‘फल’’न्ति गण्हतो विपस्सनावीथि उक्कन्ता नाम होति. सो अत्तनो मूलकम्मट्ठानं विस्सज्जेत्वा निकन्तिमेव अस्सादेन्तो निसीदतीति.

७३५. एत्थ च ओभासादयो उपक्किलेसवत्थुताय उपक्किलेसाति वुत्ता, न अकुसलत्ता. निकन्ति पन उपक्किलेसो चेव उपक्किलेसवत्थु च. वत्थुवसेनेव चेते दस. गाहवसेन पन समतिंस होन्ति. कथं? ‘‘मम ओभासो उप्पन्नो’’ति गण्हतो हि दिट्ठिगाहो होति, ‘‘मनापो वत ओभासो उप्पन्नो’’ति गण्हतो मानगाहो, ओभासं अस्सादयतो तण्हागाहो, इति ओभासे दिट्ठिमानतण्हावसेन तयो गाहा. तथा सेसेसुपीति एवं गाहवसेन समतिंस उपक्किलेसा होन्ति. तेसं वसेन अकुसलो अब्यत्तो योगावचरो ओभासादीसु कम्पति विक्खिपति. ओभासादीसु एकेकं ‘‘एतं मम, एसोहमस्मि, एसो मे अत्ता’’ति (म. नि. १.२४१) समनुपस्सति. तेनाहु पोराणा –

‘‘ओभासे चेव ञाणे च, पीतिया च विकम्पति;

पस्सद्धिया सुखे चेव, येहि चित्तं पवेधति.

‘‘अधिमोक्खे ¶ च पग्गाहे, उपट्ठाने च कम्पति;

उपेक्खावज्जनायञ्च, उपेक्खाय निकन्तिया’’ति. (पटि. म. २.७);

मग्गामग्गववत्थानकथा

७३६. कुसलो पन पण्डितो ब्यत्तो बुद्धिसम्पन्नो योगावचरो ओभासादीसु उप्पन्नेसु ‘‘अयं खो मे ओभासो उप्पन्नो, सो खो पनायं अनिच्चो सङ्खतो पटिच्चसमुप्पन्नो खयधम्मो वयधम्मो विरागधम्मो निरोधधम्मो’’ति इति वा तं पञ्ञाय परिच्छिन्दति उपपरिक्खति. अथ वा पनस्स एवं होति, ‘‘सचे ओभासो अत्ता भवेय्य, ‘अत्ता’ति गहेतुं ¶ वट्टेय्य. अनत्ता च पनायं ‘अत्ता’ति गहितो. तस्मा सो अवसवत्तनट्ठेन अनत्ता, हुत्वा अभावट्ठेन अनिच्चो, उप्पादवयपटिपीळनट्ठेन दुक्खो’’ति सब्बं अरूपसत्तके वुत्तनयेन वित्थारेतब्बं. यथा च ओभासे, एवं सेसेसुपि.

सो एवं उपपरिक्खित्वा ओभासं ‘‘नेतं मम, नेसोहमस्मि, न मेसो अत्ता’’ति (म. नि. १.२४१) समनुपस्सति. ञाणं…पे… निकन्तिं ‘‘नेतं मम, नेसोहमस्मि, न मेसो अत्ता’’ति (म. नि. १.२४१) समनुपस्सति. एवं समनुपस्सन्तो ओभासादीसु न कम्पति न वेधति. तेनाहु पोराणा –

‘‘इमानि दस ठानानि, पञ्ञायस्स परिच्चिता;

धम्मुद्धच्चकुसलो होति, न च विक्खेपं गच्छती’’ति. (पटि. म. २.७);

सो एवं विक्खेपं अगच्छन्तो तं समतिंसविधं उपक्किलेसजटं विजटेत्वा ओभासादयो धम्मा न मग्गो. उपक्किलेसविमुत्तं पन वीथिपटिपन्नं विपस्सनाञाणं मग्गोति मग्गञ्च अमग्गञ्च ववत्थपेति. तस्सेवं ‘‘अयं मग्गो, अयं न मग्गो’’ति मग्गञ्च अमग्गञ्च ञत्वा ठितं ञाणं मग्गामग्गञाणदस्सनविसुद्धीति वेदितब्बं.

एत्तावता च पन तेन तिण्णं सच्चानं ववत्थानं कतं होति. कथं? दिट्ठिविसुद्धियं ताव नामरूपस्स ववत्थापनेन दुक्खसच्चस्स ववत्थानं कतं. कङ्खावितरणविसुद्धियं पच्चयपरिग्गहणेन समुदयसच्चस्स ववत्थानं. इमिस्सं मग्गामग्गञाणदस्सनविसुद्धियं सम्मामग्गस्स अवधारणेन मग्गसच्चस्स ववत्थानं ¶ कतन्ति, एवं लोकियेनेव ताव ञाणेन तिण्णं सच्चानं ववत्थानं कतं होति.

इति साधुजनपामोज्जत्थाय कते विसुद्धिमग्गे

पञ्ञाभावनाधिकारे

मग्गामग्गञाणदस्सनविसुद्धिनिद्देसो नाम

वीसतिमो परिच्छेदो.

२१. पटिपदाञाणदस्सनविसुद्धिनिद्देसो

उपक्किलेसविमुत्तउदयब्बयञाणकथा

७३७. अट्ठन्नं ¶ ¶ पन ञाणानं वसेन सिखाप्पत्ता विपस्सना, नवमञ्च सच्चानुलोमिकञाणन्ति अयं पटिपदाञाणदस्सनविसुद्धि नाम. अट्ठन्नन्ति चेत्थ उपक्किलेसविमुत्तं वीथिपटिपन्नविपस्सनासङ्खातं उदयब्बयानुपस्सनाञाणं, भङ्गानुपस्सनाञाणं, भयतुपट्ठानञाणं, आदीनवानुपस्सनाञाणं, निब्बिदानुपस्सनाञाणं, मुञ्चितुकम्यताञाणं, पटिसङ्खानुपस्सनाञाणं, सङ्खारुपेक्खाञाणन्ति इमानि अट्ठ ञाणानि वेदितब्बानि. नवमं सच्चानुलोमिकञाणन्ति अनुलोमस्सेतं अधिवचनं. तस्मा तं सम्पादेतुकामेन उपक्किलेसविमुत्तं उदयब्बयञाणं आदिं कत्वा एतेसु ञाणेसु योगो करणीयो.

७३८. पुन उदयब्बयञाणे योगो किमत्थियोति चे? लक्खणसल्लक्खणत्थो. उदयब्बयञाणं हि हेट्ठा दसहि उपक्किलेसेहि उपक्किलिट्ठं हुत्वा याथावसरसतो तिलक्खणं सल्लक्खेतुं नासक्खि. उपक्किलेसविमुत्तं पन सक्कोति. तस्मा लक्खणसल्लक्खणत्थमेत्थ पुन योगो करणीयो.

७३९. लक्खणानि पन किस्स अमनसिकारा केन पटिच्छन्नत्ता न उपट्ठहन्ति? अनिच्चलक्खणं ताव उदयब्बयानं अमनसिकारा सन्ततिया पटिच्छन्नत्ता न उपट्ठाति. दुक्खलक्खणं अभिण्हसम्पटिपीळनस्स अमनसिकारा इरियापथेहि पटिच्छन्नत्ता न उपट्ठाति. अनत्तलक्खणं नानाधातुविनिब्भोगस्स अमनसिकारा घनेन पटिच्छन्नत्ता न उपट्ठाति. उदयब्बयम्पन परिग्गहेत्वा सन्ततिया विकोपिताय अनिच्चलक्खणं याथावसरसतो उपट्ठाति. अभिण्हसम्पटिपीळनं मनसिकत्वा इरियापथे उग्घाटिते दुक्खलक्खणं याथावसरसतो उपट्ठाति. नानाधातुयो विनिब्भुजित्वा घनविनिब्भोगे कते अनत्तलक्खणं याथावसरसतो उपट्ठाति.

७४०. एत्थ ¶ च अनिच्चं, अनिच्चलक्खणं, दुक्खं, दुक्खलक्खणं, अनत्ता, अनत्तलक्खणन्ति अयं विभागो वेदितब्बो. तत्थ अनिच्चन्ति खन्धपञ्चकं. कस्मा? उप्पादवयञ्ञथत्तभावा ¶ , हुत्वा अभावतो वा. उप्पादवयञ्ञथत्तं अनिच्चलक्खणं हुत्वा अभावसङ्खातो वा आकारविकारो.

‘‘यदनिच्चं तं दुक्ख’’न्ति (सं. नि. ३.१५) वचनतो पन तदेव खन्धपञ्चकं दुक्खं. कस्मा? अभिण्हपटिपीळना, अभिण्हपटिपीळनाकारो दुक्खलक्खणं.

‘‘यं दुक्खं तदनत्ता’’ति (सं. नि. ३.१५) पन वचनतो तदेव खन्धपञ्चकं अनत्ता. कस्मा? अवसवत्तनतो, अवसवत्तनाकारो अनत्तलक्खणं.

तयिदं सब्बम्पि अयं योगावचरो उपक्किलेसविमुत्तेन वीथिपटिपन्नविपस्सनासङ्खातेन उदयब्बयानुपस्सनाञाणेन याथावसरसतो सल्लक्खेति.

उपक्किलेसविमुत्तउदयब्बयञाणं निट्ठितं.

भङ्गानुपस्सनाञाणकथा

७४१. तस्सेवं सल्लक्खेत्वा पुनप्पुनं ‘‘अनिच्चं दुक्खमनत्ता’’ति रूपारूपधम्मे तुलयतो तीरयतो तं ञाणं तिक्खं हुत्वा वहति, सङ्खारा लहुं उपट्ठहन्ति, ञाणे तिक्खे वहन्ते सङ्खारेसु लहुं उपट्ठहन्तेसु उप्पादं वा ठितिं वा पवत्तं वा निमित्तं वा न सम्पापुणाति. खयवयभेदनिरोधेयेव सति सन्तिट्ठति. तस्स ‘‘एवं उप्पज्जित्वा एवं नाम सङ्खारगतं निरुज्झती’’ति पस्सतो एतस्मिं ठाने भङ्गानुपस्सनं नाम विपस्सनाञाणं उप्पज्जति. यं सन्धाय वुत्तं –

‘‘कथं आरम्मणपटिसङ्खा भङ्गानुपस्सने पञ्ञा विपस्सने ञाणं? रूपारम्मणता चित्तं उप्पज्जित्वा भिज्जति, तं आरम्मणं पटिसङ्खा तस्स चित्तस्स भङ्गं अनुपस्सति ¶ . अनुपस्सतीति कथं अनुपस्सति? अनिच्चतो अनुपस्सति नो निच्चतो, दुक्खतो अनुपस्सति नो सुखतो, अनत्ततो अनुपस्सति नो अत्ततो, निब्बिन्दति नो नन्दति, विरज्जति नो रज्जति, निरोधेति नो समुदेति, पटिनिस्सज्जति नो आदियति.

‘‘अनिच्चतो अनुपस्सन्तो निच्चसञ्ञं पजहति. दुक्खतो अनुपस्सन्तो सुखसञ्ञं, अनत्ततो अनुपस्सन्तो अत्तसञ्ञं, निब्बिन्दन्तो ¶ नन्दिं, विरज्जन्तो रागं, निरोधेन्तो समुदयं पटिनिस्सज्जन्तो आदानं पजहति.

‘‘वेदनारम्मणता…पे… सञ्ञारम्मणता… सङ्खारारम्मणता… विञ्ञाणारम्मणता… चक्खारम्मणता…पे… जरामरणारम्मणता चित्तं उप्पज्जित्वा भिज्जति…पे… पटिनिस्सज्जन्तो आदानं पजहति.

‘‘वत्थुसङ्कमना चेव, पञ्ञाय च विवट्टना;

आवज्जनाबलञ्चेव, पटिसङ्खाविपस्सना.

‘‘आरम्मणअन्वयेन, उभो एकववत्थना;

निरोधे अधिमुत्तता, वयलक्खणविपस्सना.

‘‘आरम्मणञ्च पटिसङ्खा, भङ्गञ्च अनुपस्सति;

सुञ्ञतो च उपट्ठानं, अधिपञ्ञाविपस्सना.

‘‘कुसलो तीसु अनुपस्सनासु, चतस्सो च विपस्सनासु;

तयो उपट्ठाने कुसलता, नानादिट्ठीसु न कम्पती’’ति.

‘‘तं ञातट्ठेन ञाणं, पजाननट्ठेन पञ्ञा, तेन वुच्चति ‘आरम्मणपटिसङ्खा भङ्गानुपस्सने पञ्ञा विपस्सने ञाण’’’न्ति (पटि. म. १.५१-५२).

७४२. तत्थ ¶ आरम्मणपटिसङ्खाति यंकिञ्चि आरम्मणं पटिसङ्खाय जानित्वा, खयतो वयतो दिस्वाति अत्थो. भङ्गानुपस्सने पञ्ञाति तस्स, आरम्मणं खयतो वयतो पटिसङ्खाय उप्पन्नस्स ञाणस्स भङ्गं अनुपस्सने या पञ्ञा, इदं विपस्सने ञाणन्ति वुत्तं. तं कथं होतीति अयं ताव कथेतुकम्यतापुच्छाय अत्थो. ततो यथा तं होति, तं दस्सेतुं ‘‘रूपारम्मणता’’तिआदि वुत्तं.

तत्थ रूपारम्मणता चित्तं उप्पज्जित्वा भिज्जतीति रूपारम्मणं चित्तं उप्पज्जित्वा भिज्जति. अथ वा रूपारम्मणभावे चित्तं उप्पज्जित्वा भिज्जतीति अत्थो. तं आरम्मणं पटिसङ्खाति तं रूपारम्मणं पटिसङ्खाय जानित्वा, खयतो वयतो दिस्वाति अत्थो. तस्स चित्तस्स भङ्गं अनुपस्सतीति येन चित्तेन तं रूपारम्मणं खयतो वयतो दिट्ठं, तस्स चित्तस्स अपरेन चित्तेन भङ्गं अनुपस्सतीति अत्थो. तेनाहु पोराणा ‘‘ञातञ्च ञाणञ्च उभोपि विपस्सती’’ति.

एत्थ ¶ च अनुपस्सतीति अनु अनु पस्सति, अनेकेहि आकारेहि पुनप्पुनं पस्सतीति अत्थो. तेनाह – ‘‘अनुपस्सतीति कथं अनुपस्सति. अनिच्चतो अनुपस्सती’’तिआदि.

तत्थ यस्मा भङ्गो नाम अनिच्चताय परमा कोटि, तस्मा सो भङ्गानुपस्सको योगावचरो सब्बं सङ्खारगतं अनिच्चतो अनुपस्सति, नो निच्चतो. ततो अनिच्चस्स दुक्खत्ता, दुक्खस्स च अनत्तत्ता तदेव दुक्खतो अनुपस्सति, नो सुखतो. अनत्ततो अनुपस्सति नो अत्ततो.

यस्मा पन यं अनिच्चं दुक्खमनत्ता, न तं अभिनन्दितब्बं. यञ्च अनभिनन्दितब्बं, न तत्थ रज्जितब्बं. तस्मा एतस्मिं भङ्गानुपस्सनानुसारेन ‘‘अनिच्चं दुक्खमनत्ता’’ति दिट्ठे सङ्खारगते निब्बिन्दति, नो नन्दति. विरज्जति, नो रज्जति. सो एवं अरज्जन्तो लोकिकेनेव ताव ञाणेन रागं निरोधेति, नो समुदेति. समुदयं न करोतीति अत्थो.

अथ वा सो एवं विरत्तो यथा दिट्ठं सङ्खारगतं, तथा अदिट्ठम्पि अन्वयञाणवसेन निरोधेति ¶ , नो समुदेति. निरोधतोव मनसिकरोति. निरोधमेवस्स पस्सति, नो समुदयन्ति अत्थो.

सो एवं पटिपन्नो पटिनिस्सज्जति, नो आदियति. किं वुत्तं होति? अयम्पि अनिच्चादिअनुपस्सना तदङ्गवसेन सद्धिं खन्धाभिसङ्खारेहि किलेसानं परिच्चजनतो, सङ्खतदोसदस्सनेन च तब्बिपरीते निब्बाने तन्निन्नताय पक्खन्दनतो परिच्चागपटिनिस्सग्गो चेव पक्खन्दनपटिनिस्सग्गो चाति वुच्चति. तस्मा ताय समन्नागतो भिक्खु यथावुत्तेन नयेन किलेसे परिच्चजति, निब्बाने च पक्खन्दति. नापि निब्बत्तनवसेन किलेसे आदियति, न अदोसदस्सितावसेन सङ्खतारम्मणं. तेन वुच्चति ‘‘पटिनिस्सज्जति नो आदियती’’ति.

७४३. इदानिस्स तेहि ञाणेहि येसं धम्मानं पहानं होति, तं दस्सेतुं ‘‘अनिच्चतो अनुपस्सन्तो निच्चसञ्ञं पजहती’’तिआदि वुत्तं. तत्थ नन्दिन्ति सप्पीतिकं तण्हं. सेसं वुत्तनयमेव.

७४४. गाथासु ¶ पन वत्थुसङ्कमनाति रूपस्स भङ्गं दिस्वा पुन येन चित्तेन भङ्गो दिट्ठो, तस्सापि भङ्गदस्सनवसेन पुरिमवत्थुतो अञ्ञवत्थुसङ्कमना. पञ्ञाय च विवट्टनाति उदयं पहाय वये सन्तिट्ठना. आवज्जनाबलञ्चेवाति रूपस्स भङ्गं दिस्वा पुन भङ्गारम्मणस्स चित्तस्स भङ्गदस्सनत्थं अनन्तरमेव आवज्जनसमत्थता. पटिसङ्खाविपस्सनाति एसा आरम्मणपटिसङ्खाभङ्गानुपस्सना नाम.

७४५. आरम्मणअन्वयेन उभो एकववत्थनाति पच्चक्खतो दिट्ठस्स आरम्मणस्स अन्वयेन अनुगमनेन यथा इदं, तथा अतीतेपि सङ्खारगतं भिज्जित्थ, अनागतेपि भिज्जिस्सतीति एवं उभिन्नं एकसभावेनेव ववत्थापनन्ति अत्थो.

वुत्तम्पि चेतं पोराणेहि –

‘‘संविज्जमानम्हि विसुद्धदस्सनो,

तदन्वयं नेति अतीतनागते;

सब्बेपि ¶ सङ्खारगता पलोकिनो,

उस्सावबिन्दू सूरियेव उग्गते’’ति.

निरोधे अधिमुत्तताति एवं उभिन्नं भङ्गवसेन एकववत्थानं कत्वा तस्मिञ्ञेव भङ्गसङ्खाते निरोधे अधिमुत्तता तग्गरुता तन्निन्नता तप्पोणता तप्पब्भारताति अत्थो. वयलक्खणविपस्सनाति एसा वयलक्खणविपस्सना नामाति वुत्तं होति.

७४६. आरम्मणञ्च पटिसङ्खाति पुरिमञ्च रूपादिआरम्मणं जानित्वा. भङ्गञ्च अनुपस्सतीति तस्सारम्मणस्स भङ्गं दिस्वा तदारम्मणस्स चित्तस्स भङ्गं अनुपस्सति. सुञ्ञतो च उपट्ठानन्ति तस्सेवं भङ्गं अनुपस्सतो ‘‘सङ्खाराव भिज्जन्ति, तेसं भेदो मरणं, न अञ्ञो कोचि अत्थी’’ति सुञ्ञतो उपट्ठानं इज्झति.

तेनाहु ¶ पोराणा –

‘‘खन्धा निरुज्झन्ति न चत्थि अञ्ञो,

खन्धान भेदो मरणन्ति वुच्चति;

तेसं खयं पस्सति अप्पमत्तो,

मणिंव विज्झं वजिरेन योनिसो’’ति.

अधिपञ्ञाविपस्सनाति या च आरम्मणपटिसङ्खा या च भङ्गानुपस्सना यञ्च सुञ्ञतो उपट्ठानं, अयं अधिपञ्ञाविपस्सना नामाति वुत्तं होति.

७४७. कुसलो तीसु अनुपस्सनासूति अनिच्चानुपस्सनादीसु तीसु छेको भिक्खु. चतस्सो च विपस्सनासूति निब्बिदादीसु च चतूसु विपस्सनासु. तयो उपट्ठाने कुसलताति खयतो वयतो सुञ्ञतोति इमस्मिञ्च तिविधे उपट्ठाने कुसलताय. नानादिट्ठीसु न कम्पतीति सस्सतदिट्ठिआदीसु नानप्पकारासु दिट्ठीसु न वेधति.

७४८. सो एवं अवेधमानो ‘‘अनिरुद्धमेव निरुज्झति, अभिन्नमेव भिज्जती’’ति पवत्तमनसिकारो ¶ दुब्बलभाजनस्स विय भिज्जमानस्स, सुखुमरजस्सेव विप्पकिरियमानस्स, तिलानं विय भज्जियमानानं सब्बसङ्खारानं उप्पादट्ठितिपवत्तनिमित्तं विस्सज्जेत्वा भेदमेव पस्सति. सो यथा नाम चक्खुमा पुरिसो पोक्खरणीतीरे वा नदीतीरे वा ठितो थूलफुसितके देवे वस्सन्ते उदकपिट्ठे महन्तमहन्तानि उदकबुब्बुळकानि उप्पज्जित्वा उप्पज्जित्वा सीघं सीघं भिज्जमानानि पस्सेय्य, एवमेव सब्बे सङ्खारा भिज्जन्ति भिज्जन्तीति पस्सति. एवरूपं हि योगावचरं सन्धाय वुत्तं भगवता –

‘‘यथा बुब्बुळकं पस्से, यथा पस्से मरीचिकं;

एवं लोकं अवेक्खन्तं, मच्चुराजा न पस्सती’’ति. (ध. प. १७०);

७४९. तस्सेवं ‘‘सब्बे सङ्खारा भिज्जन्ति भिज्जन्ती’’ति अभिण्हं पस्सतो अट्ठानिसंसपरिवारं भङ्गानुपस्सनाञाणं बलप्पत्तं होति. तत्रिमे अट्ठानिसंसा – भवदिट्ठिप्पहानं, जीवितनिकन्तिपरिच्चागो, सदायुत्तपयुत्तता, विसुद्धाजीविता, उस्सुक्कप्पहानं, विगतभयता, खन्तिसोरच्चपटिलाभो, अरतिरतिसहनताति.

तेनाहु ¶ पोराणा –

‘‘इमानि अट्ठग्गुणमुत्तमानि,

दिस्वा तहिं सम्मसते पुनप्पुनं;

आदित्तचेलस्सिरसूपमो मुनि,

भङ्गानुपस्सी अमतस्स पत्तिया’’ति.

भङ्गानुपस्सनाञाणं निट्ठितं.

भयतुपट्ठानञाणकथा

७५०. तस्सेवं सब्बसङ्खारानं खयवयभेदनिरोधारम्मणं भङ्गानुपस्सनं आसेवन्तस्स भावेन्तस्स ¶ बहुलीकरोन्तस्स सब्बभवयोनिगतिठितिसत्तावासेसु पभेदका सङ्खारा सुखेन जीवितुकामस्स भीरुकपुरिसस्स सीहब्यग्घदीपिअच्छतरच्छयक्खरक्खसचण्डगोणचण्डकुक्कुरपभिन्नमदचण्डहत्थिघोरआसीविसअसनिविचक्कसुसानरणभूमिजलितअङ्गारकासुआदयो विय महाभयं हुत्वा उपट्ठहन्ति. तस्स ‘‘अतीता सङ्खारा निरुद्धा, पच्चुप्पन्ना निरुज्झन्ति, अनागते निब्बत्तनकसङ्खारापि एवमेव निरुज्झिस्सन्ती’’ति पस्सतो एतस्मिं ठाने भयतुपट्ठानञाणं नाम उप्पज्जति.

तत्रायं उपमा – एकिस्सा किर इत्थिया तयो पुत्ता राजपराधिका, तेसं राजा सीसच्छेदं आणापेसि. सा पुत्तेहि सद्धिं आघातनं अगमासि. अथस्सा जेट्ठपुत्तस्स सीसं छिन्दित्वा मज्झिमस्स छिन्दितुं आरभिंसु. सा जेट्ठस्स सीसं छिन्नं मज्झिमस्स च छिज्जमानं दिस्वा कनिट्ठम्हि आलयं विस्सज्जि ‘‘अयम्पि एतेसञ्ञेव सदिसो भविस्सती’’ति. तत्थ तस्सा इत्थिया जेट्ठपुत्तस्स छिन्नसीसदस्सनं विय योगिनो अतीतसङ्खारानं निरोधदस्सनं, मज्झिमस्स छिज्जमानसीसदस्सनं विय पच्चुप्पन्नानं निरोधदस्सनं, ‘‘अयम्पि एतेसञ्ञेव सदिसो भविस्सती’’ति कनिट्ठपुत्तम्हि आलयविस्सज्जनं विय ‘‘अनागतेपि निब्बत्तनकसङ्खारा भिज्जिस्सन्ती’’ति अनागतानं निरोधदस्सनं. तस्सेवं पस्सतो एतस्मिं ठाने उप्पज्जति भयतुपट्ठानञाणं.

अपरापि उपमा – एका किर पूतिपजा इत्थी दस दारके विजायि. तेसु नव मता, एको हत्थगतो मरति, अपरो कुच्छियं. सा नव दारके ¶ मते दसमञ्च मीयमानं दिस्वा कुच्छिगते आलयं विस्सज्जि ‘‘अयम्पि एतेसञ्ञेव सदिसो भविस्सती’’ति. तत्थ तस्सा इत्थिया नवन्नं दारकानं मरणानुस्सरणं विय योगिनो अतीतसङ्खारानं निरोधदस्सनं, हत्थगतस्स मीयमानभावदस्सनं विय योगिनो पच्चुप्पन्नानं निरोधदस्सनं, कुच्छिगते आलयविस्सज्जनं विय अनागतानं निरोधदस्सनं. तस्सेवं पस्सतो एतस्मिं खणे उप्पज्जति भयतुपट्ठानञाणं.

७५१. भयतुपट्ठानञाणं पन भायति न भायतीति? न भायति. तञ्हि अतीता सङ्खारा निरुद्धा, पच्चुप्पन्ना निरुज्झन्ति, अनागता निरुज्झिस्सन्तीति तीरणमत्तमेव होति. तस्मा यथा नाम चक्खुमा पुरिसो नगरद्वारे तिस्सो अङ्गारकासुयो ओलोकयमानो सयं न भायति, केवलं हिस्स ‘‘ये ये एत्थ निपतिस्सन्ति, सब्बे अनप्पकं दुक्खमनुभविस्सन्ती’’ति तीरणमत्तमेव होति. यथा वा पन चक्खुमा पुरिसो खदिरसूलं अयोसूलं सुवण्णसूलन्ति पटिपाटिया ¶ ठपितं सूलत्तयं ओलोकयमानो सयं न भायति, केवलं हिस्स ‘‘ये ये इमेसु सूलेसु निपतिस्सन्ति, सब्बे अनप्पकं दुक्खमनुभविस्सन्ती’’ति तीरणमत्तमेव होति, एवमेव भयतुपट्ठानञाणं सयं न भायति, केवलं हिस्स अङ्गारकासुत्तयसदिसेसु, सूलत्तयसदिसेसु च तीसु भवेसु ‘‘अतीता सङ्खारा निरुद्धा, पच्चुप्पन्ना निरुज्झन्ति, अनागता निरुज्झिस्सन्ती’’ति तीरणमत्तमेव होति. यस्मा पनस्स केवलं सब्बभवयोनिगतिठितिनिवासगता सङ्खारा ब्यसनापन्ना सप्पटिभया हुत्वा भयतो उपट्ठहन्ति, तस्मा भयतुपट्ठानन्ति वुच्चति.

एवं भयतो उपट्ठाने पनस्स अयं पाळि –

‘‘अनिच्चतो मनसिकरोतो किं भयतो उपट्ठाति? दुक्खतो. अनत्ततो मनसिकरोतो किं भयतो उपट्ठातीति? अनिच्चतो मनसिकरोतो निमित्तं भयतो उपट्ठाति. दुक्खतो मनसिकरोतो पवत्तं भयतो उपट्ठाति. अनत्ततो मनसिकरोतो निमित्तञ्च पवत्तञ्च भयतो उपट्ठाती’’ति (पटि. म. १.२२७).

तत्थ ¶ निमित्तन्ति सङ्खारनिमित्तं. अतीतानागतपच्चुप्पन्नानं सङ्खारानमेवेतं अधिवचनं. अनिच्चतो मनसिकरोन्तो हि सङ्खारानं मरणमेव पस्सति, तेनस्स निमित्तं भयतो उपट्ठाति. पवत्तन्ति रूपारूपभवपवत्ति. दुक्खतो मनसिकरोन्तो हि सुखसम्मतायपि पवत्तिया अभिण्हपटिपीळनभावमेव पस्सति, तेनस्स पवत्तं भयतो उपट्ठाति. अनत्ततो मनसिकरोन्तो पन उभयम्पेतं सुञ्ञगामं विय मरीचिगन्धब्बनगरादीनि विय च रित्तं तुच्छं सुञ्ञं अस्सामिकं अपरिणायकं पस्सति. तेनस्स निमित्तञ्च पवत्तञ्च उभयं भयतो उपट्ठातीति.

भयतुपट्ठानञाणं निट्ठितं.

आदीनवानुपस्सनाञाणकथा

७५२. तस्स तं भयतुपट्ठानञाणं आसेवन्तस्स भावेन्तस्स बहुलीकरोन्तस्स सब्बभवयोनिगतिठितिसत्तावासेसु ¶ नेव ताणं, न लेणं, न गति, नप्पटिसरणं पञ्ञायति. सब्बभवयोनिगतिठितिनिवासगतेसु सङ्खारेसु एकसङ्खारेपि पत्थना वा परामासो वा न होति. तयो भवा वीतच्चिकङ्गारपुण्णअङ्गारकासुयो विय, चत्तारो महाभूता घोरविसआसीविसा विय, पञ्चक्खन्धा उक्खित्तासिकवधका विय, छ अज्झत्तिकायतनानि सुञ्ञगामो विय, छ बाहिरायतनानि गामघातकचोरा विय, सत्त विञ्ञाणट्ठितियो, नव च सत्तावासा एकादसहि अग्गीहि आदित्ता सम्पज्जलिता सजोतिभूता विय च, सब्बे सङ्खारा गण्डभूता रोगभूता सल्लभूता अघभूता आबाधभूता विय च निरस्सादा निरसा महाआदीनवरासिभूता हुत्वा उपट्ठहन्ति.

कथं? सुखेन जीवितुकामस्स भीरुकपुरिसस्स रमणीयाकारसण्ठितम्पि सवाळकमिव वनगहनं, ससद्दूला विय गुहा, सगाहरक्खसं विय उदकं, समुस्सितखग्गा विय पच्चत्थिका, सविसं विय भोजनं, सचोरो विय मग्गो, आदित्तमिव अगारं, उय्युत्तसेना विय रणभूमि. यथा हि सो पुरिसो एतानि सवाळकवनगहनादीनि आगम्म भीतो संविग्गो लोमहट्ठजातो समन्ततो आदीनवमेव पस्सति, एवमेवायं योगावचरो ¶ भङ्गानुपस्सनावसेन सब्बसङ्खारेसु भयतो उपट्ठितेसु समन्ततो निरसं निरस्सादं आदीनवमेव पस्सति. तस्सेवं पस्सतो आदीनवञाणं नाम उप्पन्नं होति. यं सन्धाय इदं वुत्तं –

‘‘कथं भयतुपट्ठाने पञ्ञा आदीनवे ञाणं? उप्पादो भयन्ति भयतुपट्ठाने पञ्ञा आदीनवे ञाणं. पवत्तं भयन्ति… निमित्तं भयन्ति… आयूहना भयन्ति… पटिसन्धि भयन्ति… गति भयन्ति… निब्बत्ति भयन्ति… उपपत्ति भयन्ति… जाति भयन्ति… जरा भयन्ति… ब्याधि भयन्ति… मरणं भयन्ति… सोको भयन्ति… परिदेवो भयन्ति… उपायासो भयन्ति भयतुपट्ठाने पञ्ञा आदीनवे ञाणं. अनुप्पादो खेमन्ति सन्तिपदे ञाणं. अप्पवत्तं…पे… अनुपायासो खेमन्ति सन्तिपदे ञाणं. उप्पादो भयं, अनुप्पादो खेमन्ति सन्तिपदे ञाणं. पवत्तं…पे… उपायासो भयं, अनुपायासो खेमन्ति सन्तिपदे ञाणं.

‘‘उप्पादो दुक्खन्ति भयतुपट्ठाने पञ्ञा आदीनवे ञाणं. पवत्तं…पे… उपायासो दुक्खन्ति भयतुपट्ठाने पञ्ञा आदीनवे ञाणं. अनुप्पादो सुखन्ति सन्तिपदे ¶ ञाणं. अप्पवत्तं…पे… अनुपायासो सुखन्ति सन्तिपदे ञाणं. उप्पादो दुक्खं, अनुप्पादो सुखन्ति सन्तिपदे ञाणं. पवत्तं…पे… उपायासो दुक्खं, अनुपायासो सुखन्ति सन्तिपदे ञाणं.

‘‘उप्पादो सामिसन्ति भयतुपट्ठाने पञ्ञा आदीनवे ञाणं. पवत्तं…पे… उपायासो सामिसन्ति भयतुपट्ठाने पञ्ञा आदीनवे ञाणं. अनुप्पादो निरामिसन्ति सन्तिपदे ञाणं. अप्पवत्तं…पे… अनुपायासो निरामिसन्ति सन्तिपदे ञाणं. उप्पादो सामिसं, अनुप्पादो निरामिसन्ति सन्तिपदे ञाणं. पवत्तं…पे… उपायासो सामिसं, अनुपायासो निरामिसन्ति सन्तिपदे ञाणं.

उप्पादो ¶ ‘‘सङ्खाराति भयतुपट्ठाने पञ्ञा आदीनवे ञाणं. पवत्तं…पे… उपायासो सङ्खाराति भयतुपट्ठाने पञ्ञा आदीनवे ञाणं. अनुप्पादो निब्बानन्ति सन्तिपदे ञाणं. अप्पवत्तं…पे… अनुपायासो निब्बानन्ति सन्तिपदे ञाणं. उप्पादो सङ्खारा, अनुप्पादो निब्बानन्ति सन्तिपदे ञाणं. पवत्तं…पे… उपायासो सङ्खारा, अनुपायासो निब्बानन्ति सन्तिपदे ञाणं.

‘‘उप्पादञ्च पवत्तञ्च, निमित्तं दुक्खन्ति पस्सति;

आयूहनं पटिसन्धिं, ञाणं आदीनवे इदं.

‘‘अनुप्पादं अप्पवत्तं, अनिमित्तं सुखन्ति च;

अनायूहना अप्पटिसन्धि, ञाणं सन्तिपदे इदं.

‘‘इदं आदीनवे ञाणं, पञ्चठानेसु जायति;

पञ्चठाने सन्तिपदे, दस ञाणे पजानाति;

द्विन्नं ञाणानं कुसलता, नानादिट्ठीसु न कम्पती’’ति.

‘‘तं ञातट्ठेन ञाणं. पजाननट्ठेन पञ्ञा. तेन वुच्चति ‘‘भयतुपट्ठाने पञ्ञा आदीनवे ञाण’’न्ति (पटि. म. १.५३).

७५३. तत्थ ¶ उप्पादोति पुरिमकम्मपच्चया इध उप्पत्ति. पवत्तन्ति तथा उप्पन्नस्स पवत्ति. निमित्तन्ति सब्बम्पि सङ्खारनिमित्तं. आयूहनाति आयतिं पटिसन्धिहेतुभूतं कम्मं. पटिसन्धीति आयतिं उप्पत्ति. गतीति याय गतिया सा पटिसन्धि होति. निब्बत्तीति खन्धानं निब्बत्तनं. उपपत्तीति ‘‘समापन्नस्स वा उपपन्नस्स वा’’ति (ध. स. १२८९, १२९१) एवं वुत्ता विपाकप्पवत्ति. जातीति जरादीनं पच्चयभूता भवपच्चया जाति. जरामरणादयो पाकटा एव. एत्थ च उप्पादादयो पञ्चेव आदीनवञाणस्स वत्थुवसेन वुत्ता. सेसा तेसं वेवचनवसेन. निब्बत्ति जातीति इदञ्हि द्वयं उप्पादस्स चेव पटिसन्धिया च वेवचनं. गति उपपत्तीति इदं द्वयं पवत्तस्स. जरादयो निमित्तस्साति. तेनाह –

‘‘उप्पादञ्च पवत्तञ्च, निमित्तं दुक्खन्ति पस्सति;

आयूहनं पटिसन्धिं, ञाणं आदीनवे इद’’न्ति च.

‘‘इदं आदीनवे ञाणं, पञ्चठानेसु जायती’’ति च.

अनुप्पादो ¶ खेमन्ति सन्तिपदे ञाणन्तिआदि पन आदीनवञाणस्स पटिपक्खञाणदस्सनत्थं वुत्तं. भयतुपट्ठानेन वा आदीनवं दिस्वा उब्बिग्गहदयानं अभयम्पि अत्थि खेमं निरादीनवन्ति अस्सासजननत्थम्पि एतं वुत्तं. यस्मा वा पनस्स उप्पादादयो भयतो सूपट्ठिता होन्ति, तस्स तप्पटिपक्खनिन्नं चित्तं होति, तस्मा भयतुपट्ठानवसेन सिद्धस्स आदीनवञाणस्स आनिसंसदस्सनत्थम्पेतं वुत्तन्ति वेदितब्बं.

एत्थ च यं भयं, तं यस्मा नियमतो दुक्खं. तं वट्टामिसलोकामिसकिलेसामिसेहि अविप्पमुत्तत्ता सामिसमेव. यञ्च सामिसं, तं सङ्खारमत्तमेव. तस्मा ‘‘उप्पादो दुक्खन्ति भयतुपट्ठाने पञ्ञा आदीनवे ञाण’’न्तिआदि वुत्तं. एवं सन्तेपि भयाकारेन दुक्खाकारेन सामिसाकारेनाति एवं आकारनानत्ततो पवत्तिवसेनेवेत्थ नानत्तं वेदितब्बं.

दसञाणे पजानातीति आदीनवञाणं पजानन्तो उप्पादादिवत्थुकानि पञ्च, अनुप्पादादिवत्थुकानि पञ्चाति दस ञाणानि पजानाति पटिविज्झति सच्छिकरोति. द्विन्नं ञाणानं कुसलताति आदीनवञाणस्स चेव सन्तिपदञाणस्स चाति इमेसं द्विन्नं कुसलताय. नानादिट्ठीसु ¶ न कम्पतीति परमदिट्ठधम्मनिब्बानादिवसेन पवत्तासु दिट्ठीसु न वेधति. सेसमेत्थ उत्तानमेवाति.

आदीनवानुपस्सनाञाणं निट्ठितं.

निब्बिदानुपस्सनाञाणकथा

७५४. सो एवं सब्बसङ्खारे आदीनवतो पस्सन्तो सब्बभवयोनिगतिविञ्ञाणट्ठितिसत्तावासगते सभेदके सङ्खारगते निब्बिन्दति उक्कण्ठति नाभिरमति.

सेय्यथापि नाम, चित्तकूटपब्बतपादाभिरतो सुवण्णराजहंसो असुचिम्हि चण्डालगामद्वारआवाटे नाभिरमति, सत्तसु महासरेसुयेव अभिरमति, एवमेव अयम्पि योगीराजहंसो सुपरिदिट्ठादीनवे सभेदके सङ्खारगते नाभिरमति. भावनारामताय पन भावनारतिया समन्नागतत्ता सत्तसु अनुपस्सनासुयेव रमति.

यथा ¶ च सुवण्णपञ्जरे पक्खित्तो सीहो मिगराजा नाभिरमति, तियोजनसहस्सवित्थते पन हिमवन्तेयेव रमति, एवमयं योगीसीहो तिविधे सुगतिभवेपि नाभिरमति, तीसु पन अनुपस्सनासुयेव रमति.

यथा च सब्बसेतो सत्तपतिट्ठो इद्धिमा वेहासङ्गमो छद्दन्तो नागराजा नगरमज्झे नाभिरमति, हिमवति छद्दन्तदहगहनेयेव अभिरमति, एवमयं योगीवरवारणो सब्बस्मिम्पि सङ्खारगते नाभिरमति, अनुप्पादो खेमन्तिआदिना नयेन दिट्ठे सन्तिपदेयेव अभिरमति, तन्निन्नतप्पोणतप्पब्भारमानसो होतीति.

निब्बिदानुपस्सनाञाणं निट्ठितं.

७५५. तं पनेतं पुरिमेन ञाणद्वयेन अत्थतो एकं. तेनाहु पोराणा –

‘‘भयतुपट्ठानं ¶ एकमेव तीणि नामानि लभति, सब्बसङ्खारे भयतो अद्दसाति भयतुपट्ठानं नाम जातं. तेसुयेव सङ्खारेसु आदीनवं उप्पादेतीति आदीनवानुपस्सना नाम जातं. तेसुयेव सङ्खारेसु निब्बिन्दमानं उप्पन्नन्ति निब्बिदानुपस्सना नाम जात’’न्ति.

पाळियम्पि वुत्तं – ‘‘या च भयतुपट्ठाने पञ्ञा, यञ्च आदीनवे ञाणं, या च निब्बिदा, इमे धम्मा एकत्था, ब्यञ्जनमेव नान’’न्ति (पटि. म. १.२२७).

मुञ्चितुकम्यताञाणकथा

७५६. इमिना पन निब्बिदाञाणेन इमस्स कुलपुत्तस्स निब्बिन्दन्तस्स उक्कण्ठन्तस्स अनभिरमन्तस्स सब्बभवयोनिगतिविञ्ञाणट्ठितिसत्तावासगतेसु सभेदकेसु सङ्खारेसु एकसङ्खारेपि चित्तं न सज्जति, न लग्गति, न बज्झति, सब्बस्मा सङ्खारगता मुच्चितुकामं निस्सरितुकामं होति. यथा किं? यथा नाम जालब्भन्तरगतो मच्छो, सप्पमुखगतो मण्डूको, पञ्जरपक्खित्तो वनकुक्कुटो, दळ्हपासवसगतो मिगो, अहितुण्डिकहत्थगतो सप्पो, महापङ्कपक्खन्दो कुञ्जरो, सुपण्णमुखगतो ¶ नागराजा, राहुमुखप्पविट्ठो चन्दो, सपत्तपरिवारितो पुरिसोति एवमादयो ततो ततो मुच्चितुकामा निस्सरितुकामाव होन्ति, एवं तस्स योगिनो चित्तं सब्बस्मा सङ्खारगता मुच्चितुकामं निस्सरितुकामं होति. अथस्स एवं सब्बसङ्खारेसु विगतालयस्स सब्बस्मा सङ्खारगता मुच्चितुकामस्स उप्पज्जति मुञ्चितुकम्यता ञाणन्ति.

मुञ्चितुकम्यताञाणं निट्ठितं.

पटिसङ्खानुपस्सनाञाणकथा

७५७. सो एवं सब्बभवयोनिगतिट्ठितिनिवासगतेहि सभेदकेहि सङ्खारेहि मुच्चितुकामो सब्बस्मा सङ्खारगता मुच्चितुं पुन ते एवं सङ्खारे पटिसङ्खानुपस्सनाञाणेन तिलक्खणं आरोपेत्वा परिग्गण्हाति.

सो ¶ सब्बसङ्खारे अनच्चन्तिकतो, तावकालिकतो, उप्पादवयपरिच्छिन्नतो, पलोकतो, चलतो, पभङ्गुतो, अद्धुवतो, विपरिणामधम्मतो, अस्सारकतो, विभवतो, सङ्खततो, मरणधम्मतोतिआदीहि कारणेहि अनिच्चाति पस्सति.

अभिण्हपटिपीळनतो, दुक्खमतो, दुक्खवत्थुतो, रोगतो, गण्डतो, सल्लतो, अघतो, आबाधतो, ईतितो, उपद्दवतो, भयतो, उपसग्गतो, अताणतो, अलेणतो, असरणतो, आदीनवतो, अघमूलतो, वधकतो, सासवतो, मारामिसतो, जातिधम्मतो, जराधम्मतो, ब्याधिधम्मतो, सोकधम्मतो, परिदेवधम्मतो, उपायासधम्मतो, संकिलेसिकधम्मतोतिआदीहि कारणेहि दुक्खाति पस्सति.

अजञ्ञतो, दुग्गन्धतो, जेगुच्छतो, पटिक्कूलतो, अमण्डनारहतो, विरूपतो, बीभच्छतोतिआदीहि कारणेहि दुक्खलक्खणस्स परिवारभूततो असुभतो पस्सति.

परतो, रित्ततो, तुच्छतो, सुञ्ञतो, अस्सामिकतो, अनिस्सरतो, अवसवत्तितोतिआदीहि कारणेहि अनत्ततो पस्सति.

७५८. एवञ्हि ¶ पस्सतानेन तिलक्खणं आरोपेत्वा सङ्खारा परिग्गहिता नाम होन्ति. कस्मा पनायमेते एवं परिग्गण्हातीति? मुञ्चनस्स उपायसम्पादनत्थं.

तत्रायं उपमा – एको किर पुरिसो ‘‘मच्छे गहेस्सामी’’ति मच्छखिप्पं गहेत्वा उदके ओड्डापेसि सो खिप्पमुखेन हत्थं ओतारेत्वा अन्तोउदके सप्पं गीवाय गहेत्वा ‘‘मच्छो मे गहितो’’ति अत्तमनो अहोसि. सो ‘‘महा वत मया मच्छो लद्धो’’ति उक्खिपित्वा पस्सन्तो सोवत्थिकत्तयदस्सनेन सप्पोति सञ्जानित्वा भीतो आदीनवं दिस्वा गहणे निब्बिन्नो मुञ्चितुकामो हुत्वा मुञ्चनस्स उपायं करोन्तो अग्गनङ्गुट्ठतो पट्ठाय हत्थं निब्बेठेत्वा बाहुं उक्खिपित्वा उपरिसीसे द्वे तयो वारे आविज्झित्वा सप्पं दुब्बलं कत्वा ‘‘गच्छ दुट्ठ सप्पा’’ति निस्सज्जित्वा वेगेन तळाकपाळिं आरुय्ह ‘‘महन्तस्स वत भो सप्पस्स मुखतो मुत्तोम्ही’’ति आगतमग्गं ओलोकयमानो अट्ठासि.

तत्थ ¶ तस्स पुरिसस्स ‘‘मच्छो’’ति सप्पं गीवाय गहेत्वा तुट्ठकालो विय इमस्सापि योगिनो आदितोव अत्तभावं पटिलभित्वा तुट्ठकालो, तस्स खिप्पमुखतो सीसं नीहरित्वा सोवत्थिकत्तयदस्सनं विय इमस्स घनविनिब्भोगं कत्वा सङ्खारेसु तिलक्खणदस्सनं, तस्स भीतकालो विय इमस्स भयतुपट्ठानञाणं. ततो आदीनवदस्सनं विय आदीनवानुपस्सनाञाणं, गहणे निब्बिन्दनं विय निब्बिदानुपस्सनाञाणं. सप्पं मुञ्चितुकामता विय मुञ्चितुकम्यताञाणं, मुञ्चनस्स उपायकरणं विय पटिसङ्खानुपस्सनाञाणेन सङ्खारेसु तिलक्खणारोपनं. यथा हि सो पुरिसो सप्पं आविज्झित्वा दुब्बलं कत्वा निवत्तेत्वा डंसितुं असमत्थभावं पापेत्वा सुमुत्तं मुञ्चति, एवमयं योगावचरो तिलक्खणारोपनेन सङ्खारे आविज्झित्वा दुब्बले कत्वा पुन निच्चसुखसुभअत्ताकारेन उपट्ठातुं असमत्थतं पापेत्वा सुमुत्तं मुञ्चति. तेन वुत्तं ‘‘मुञ्चनस्स उपायसम्पादनत्थं एवं परिग्गण्हाती’’ति.

७५९. एत्तावता तस्स उप्पन्नं होति पटिसङ्खाञाणं. यं सन्धाय वुत्तं –

‘‘अनिच्चतो ¶ मनसिकरोतो किं पटिसङ्खा ञाणं उप्पज्जति? दुक्खतो. अनत्ततो मनसिकरोतो किं पटिसङ्खा ञाणं उप्पज्जति? अनिच्चतो मनसिकरोतो निमित्तं पटिसङ्खा ञाणं उप्पज्जति. दुक्खतो मनसिकरोतो पवत्तं पटिसङ्खा ञाणं उप्पज्जति. अनत्ततो मनसिकरोतो निमित्तञ्च पवत्तञ्च पटिसङ्खा ञाणं उप्पज्जती’’ति (पटि. म. १.२२७).

एत्थ च निमित्तं पटिसङ्खाति सङ्खारनिमित्तं ‘‘अद्धुवं तावकालिक’’न्ति अनिच्चलक्खणवसेन जानित्वा. कामञ्च न पठमं जानित्वा पच्छा ञाणं उप्पज्जति, वोहारवसेन पन ‘‘मनञ्च पटिच्च धम्मे च उप्पज्जति मनोविञ्ञाण’’न्तिआदीनि (म. नि. ३.४२१) विय एवं वुच्चति. एकत्तनयेन वा पुरिमञ्च पच्छिमञ्च एकं कत्वा एवं वुत्तन्ति वेदितब्बं. इमिना नयेन इतरस्मिम्पि पदद्वये अत्थो वेदितब्बोति.

पटिसङ्खानुपस्सनाञाणं निट्ठितं.

सङ्खारुपेक्खाञाणकथा

७६०. सो ¶ एवं पटिसङ्खानुपस्सनाञाणेन ‘‘सब्बे सङ्खारा सुञ्ञा’’ति परिग्गहेत्वा पुन ‘‘सुञ्ञमिदं अत्तेन वा अत्तनियेन वा’’ति (म. नि. ३.६९) द्विकोटिकं सुञ्ञतं परिग्गण्हाति. सो एवं नेव अत्तानं, न परं किञ्चि अत्तनो परिक्खारभावे ठितं दिस्वा पुन ‘‘नाहं क्वचनि, कस्सचि किञ्चनतस्मिं, न च मम क्वचनि, किस्मिञ्चि किञ्चनतत्थी’’ति या एत्थ चतुकोटिका सुञ्ञता कथिता, तं परिग्गण्हाति.

कथं? अयञ्हि नाहं क्वचनीति क्वचि अत्तानं न पस्सति. कस्सचि किञ्चनतस्मिन्ति अत्तनो अत्तानं कस्सचि परस्स किञ्चनभावे उपनेतब्बं न पस्सति. भातिट्ठानेवा भातरं, सहायट्ठाने वा सहायं, परिक्खारट्ठाने वा परिक्खारं मञ्ञित्वा उपनेतब्बं न पस्सतीति अत्थो. न च मम क्वचनीति एत्थ मम-सद्दं ताव ठपेत्वा न च क्वचनीति परस्स च अत्तानं क्वचि नपस्सतीति ¶ अयमत्थो. इदानि मम-सद्दं आहरित्वा मम किस्मिञ्चि किञ्चनतत्थीति सो परस्स अत्ता मम किस्मिञ्चि किञ्चनभावे अत्थीति न पस्सतीति. अत्तनो भातिट्ठाने वा भातरं, सहायट्ठाने वा सहायं परिक्खारट्ठाने वा परिक्खारन्ति किस्मिञ्चि ठाने परस्स अत्तानं इमिना किञ्चनभावेन उपनेतब्बं न पस्सतीति अत्थो. एवमयं यस्मा नेव कत्थचि अत्तानं पस्सति, न तं परस्स किञ्चनभावे उपनेतब्बं पस्सति, न परस्स अत्तानं पस्सति, न परस्स अत्तानं अत्तनो किञ्चनभावे उपनेतब्बं पस्सति. तस्मानेन चतुकोटिका सुञ्ञता परिग्गहिता होतीति.

७६१. एवं चतुकोटिकं सुञ्ञतं परिग्गहेत्वा पुन छहाकारेहि सुञ्ञतं परिग्गण्हाति. कथं? चक्खु सुञ्ञं अत्तेन वा अत्तनियेन वा निच्चेन वा धुवेन वा सस्सतेन वा अविपरिणामधम्मेन वा…पे… मनो सुञ्ञो. रूपा सुञ्ञा…पे… धम्मा सुञ्ञा. चक्खुविञ्ञाणं…पे… मनोविञ्ञाणं. चक्खुसम्फस्सोति एवं याव जरामरणा नयो नेतब्बो.

७६२. एवं छहाकारेहि सुञ्ञतं परिग्गहेत्वा पुन अट्ठहाकारेहि परिग्गण्हाति. सेय्यथिदं – रूपं असारं निस्सारं सारापगतं निच्चसारसारेन वा धुवसारसारेन वा सुखसारसारेन ¶ वा अत्तसारसारेन वा निच्चेन वा धुवेन वा सस्सतेन वा अविपरिणामधम्मेन वा. वेदना… सञ्ञा… सङ्खारा… विञ्ञाणं… चक्खु…पे… जरामरणं असारं निस्सारं सारापगतं निच्चसारसारेन वा धुवसारसारेन वा सुखसारसारेन वा अत्तसारसारेन वा निच्चेन वा धुवेन वा सस्सतेन वा अविपरिणामधम्मेन वा. यथा नळो असारो निस्सारो सारापगतो. यथा एरण्डो… यथा उदुम्बरो… यथा सेतवच्छो… यथा पाळिभद्दको… यथा फेणपिण्डो… यथा उदकबुब्बुळं… यथा मरीचि… यथा कदलिक्खन्धो… यथा माया असारा निस्सारा सारापगता, एवमेव रूपं…पे… जरामरणं असारं निस्सारं सारापगतं निच्चसारसारेन वा…पे… अविपरिणामधम्मेन वाति (चूळनि. मोघराजमाणवपुच्छानिद्देस ८८).

७६३. सो ¶ एवं अट्ठहाकारेहि सुञ्ञतं परिग्गहेत्वा पुन दसहाकारेहि परिग्गण्हाति, रूपं रित्ततो पस्सति. तुच्छतो… सुञ्ञतो… अनत्ततो… अनिस्सरियतो… अकामकारियतो… अलब्भनीयतो… अवसवत्तकतो… परतो… विवित्ततो पस्सति. वेदनं…पे… विञ्ञाणं रित्ततो…पे… विवित्ततो पस्सतीति.

७६४. एवं दसहाकारेहि सुञ्ञतं परिग्गहेत्वा पुन द्वादसहाकारेहि परिग्गण्हाति. सेय्यथिदं – रूपं न सत्तो, न जीवो, न नरो, न माणवो, न इत्थी, न पुरिसो, न अत्ता, न अत्तनियं. नाहं, न मम, न अञ्ञस्स, न कस्सचि. वेदना…पे… विञ्ञाणं न कस्सचीति (चूळनि. मोघराजमाणवपुच्छानिद्देस ८८).

७६५. एवं द्वादसहाकारेहि सुञ्ञतं परिग्गण्हित्वा पुन तीरणपरिञ्ञावसेन द्वाचत्तालीसाय आकारेहि सुञ्ञतं परिग्गण्हाति, रूपं अनिच्चतो… दुक्खतो… रोगतो… गण्डतो… सल्लतो… अघतो… आबाधतो… परतो… पलोकतो… ईतितो… उपद्दवतो… भयतो… उपसग्गतो… चलतो… पभङ्गुतो… अद्धुवतो… अताणतो… अलेणतो… असरणतो… असरणीभूततो… रित्ततो… तुच्छतो… सुञ्ञतो… अनत्ततो… अनस्सादतो… आदीनवतो… विपरिणामधम्मतो… अस्सारकतो… अघमूलतो… वधकतो… विभवतो… सासवतो… सङ्खततो… मारामिसतो… जातिधम्मतो… जराधम्मतो… ब्याधिधम्मतो… मरणधम्मतो… सोकपरिदेवदुक्खदोमनस्सउपायासधम्मतो… समुदयतो… अत्थङ्गमतो… अनस्सादतो ¶ … आदीनवतो… निस्सरणतो पस्सति. वेदनं…पे… विञ्ञाणं अनिच्चतो…पे… निस्सरणतो पस्सति.

वुत्तम्पि चेतं – ‘‘रूपं अनिच्चतो…पे… निस्सरणतो पस्सन्तो सुञ्ञतो लोकं अवेक्खति. वेदनं…पे… विञ्ञाणं अनिच्चतो…पे… निस्सरणतो पस्सन्तो सुञ्ञतो लोकं अवेक्खति’’.

‘‘सुञ्ञतो लोकं अवेक्खस्सु, मोघराज सदा सतो;

अत्तानुदिट्ठिं ऊहच्च, एवं मच्चुतरो सिया;

एवं लोकं अवेक्खन्तं, मच्चुराजा न पस्सती’’ति. (सु. नि. ११२५; चूळनि. मोघराजमाणवपुच्छानिद्देस ८८);

७६६. एवं ¶ सुञ्ञतो दिस्वा तिलक्खणं आरोपेत्वा सङ्खारे परिग्गण्हन्तो भयञ्च नन्दिञ्च विप्पहाय सङ्खारेसु उदासीनो अहोसि मज्झत्तो, अहन्ति वा ममन्ति वा न गण्हाति विस्सट्ठभरियो विय पुरिसो.

यथा नाम पुरिसस्स भरिया भवेय्य इट्ठा कन्ता मनापा, सो ताय विना मुहुत्तम्पि अधिवासेतुं न सक्कुणेय्य, अतिविय नं ममायेय्य, सो तं इत्थिं अञ्ञेन पुरिसेन सद्धिं ठितं वा निसिन्नं वा कथेन्तिं वा हसन्तिं वा दिस्वा कुपितो अस्स अनत्तमनो, अधिमत्तं दोमनस्सं पटिसंवेदेय्य. सो अपरेन समयेन तस्सा इत्थिया दोसं दिस्वा मुञ्चितुकामो हुत्वा तं विस्सज्जेय्य, न नं ममाति गण्हेय्य. ततो पट्ठाय तं येनकेनचि सद्धिं यंकिञ्चि कुरुमानं दिस्वापि नेव कुप्पेय्य, न दोमनस्सं आपज्जेय्य, अञ्ञदत्थु उदासीनोव भवेय्य मज्झत्तो. एवमेवायं सब्बसङ्खारेहि मुञ्चितुकामो हुत्वा पटिसङ्खानुपस्सनाय सङ्खारे परिग्गण्हन्तो अहं ममाति गहेतब्बं अदिस्वा भयञ्च नन्दिञ्च विप्पहाय सब्बसङ्खारेसु उदासीनो होति मज्झत्तो.

तस्स एवं जानतो एवं पस्सतो तीसु भवेसु चतूसु योनीसु पञ्चसु गतीसु सत्तसु विञ्ञाणट्ठितीसु ¶ नवसु सत्तावासेसु चित्तं पतिलीयति पतिकुटति पतिवत्तति न सम्पसारियति, उपेक्खा वा पाटिकुल्यता वा सण्ठाति.

सेय्यथापि नाम पदुमपलासे ईसकपोणे उदकफुसितानि पतिलीयन्ति पतिकुटन्ति पतिवत्तन्ति न सम्पसारियन्ति, एवमेव…पे… सेय्यथापि नाम कुक्कुटपत्तं वा नहारुदद्दुलं वा अग्गिम्हि पक्खित्तं पतिलीयति पतिकुटति पतिवत्तति न सम्पसारियति (अ. नि. ७.४९), एवमेव तस्स तीसु भवेसु चित्तं…पे… उपेक्खा वा पाटिकुल्यता वा सण्ठाति. इच्चस्स सङ्खारुपेक्खाञाणं नाम उप्पन्नं होति.

७६७. तं पनेतं सचे सन्तिपदं निब्बानं सन्ततो पस्सति, सब्बं सङ्खारप्पवत्तं विस्सज्जेत्वा निब्बानमेव पक्खन्दति. नो चे निब्बानं सन्ततो ¶ पस्सति, पुनप्पुनं सङ्खारारम्मणमेव हुत्वा पवत्तति सामुद्दिकानं दिसाकाको विय. सामुद्दिका किर वाणिजका नावं आरोहन्ता दिसाकाकं नाम गण्हन्ति, ते यदा नावा वातक्खित्ता विदेसं पक्खन्दति, तीरं न पञ्ञायति, तदा दिसाकाकं विस्सज्जेन्ति. सो कूपकयट्ठितो आकासं लङ्घित्वा सब्बा दिसा च विदिसा च अनुगन्त्वा सचे तीरं पस्सति, तदभिमुखोव गच्छति. नो चे पस्सति, पुनप्पुनं आगन्त्वा कूपकयट्ठिंयेव अल्लीयति. एवमेव सचे सङ्खारुपेक्खाञाणं सन्तिपदं निब्बानं सन्ततो पस्सति, सब्बं सङ्खारप्पवत्तं विस्सज्जेत्वा निब्बानमेव पक्खन्दति. नो चे पस्सति, पुनप्पुनं सङ्खारारम्मणमेव हुत्वा पवत्तति.

तदिदं सुप्पग्गे पिट्ठं वट्टयमानं विय. निब्बट्टितकप्पासं विहनमानं विय नानप्पकारतो सङ्खारे परिग्गहेत्वा भयञ्च नन्दिञ्च पहाय सङ्खारविचिनने मज्झत्तं हुत्वा तिविधानुपस्सनावसेन तिट्ठति. एवं तिट्ठमानं तिविधविमोक्खमुखभावं आपज्जित्वा सत्तअरियपुग्गलविभागाय पच्चयो होति.

७६८. तत्रिदं तिविधानुपस्सनावसेन पवत्तनतो तिण्णं इन्द्रियानं आधिपतेय्यवसेन तिविधविमोक्खमुखभावं आपज्जति नाम. तिस्सो हि अनुपस्सना तीणि विमोक्खमुखानीति वुच्चन्ति. यथाह –

‘‘तीणि ¶ खो पनिमानि विमोक्खमुखानि लोकनिय्यानाय संवत्तन्ति, सब्बसङ्खारे परिच्छेदपरिवटुमतो समनुपस्सनताय, अनिमित्ताय च धातुया चित्तसम्पक्खन्दनताय, सब्बसङ्खारेसु मनोसमुत्तेजनताय, अप्पणिहिताय च धातुया चित्तसम्पक्खन्दनताय, सब्बधम्मे परतो समनुपस्सनताय, सुञ्ञताय च धातुया चित्तसम्पक्खन्दनताय, इमानि तीणि विमोक्खमुखानि लोकनिय्यानाय संवत्तन्ती’’ति (पटि. म. १.२१९).

तत्थ परिच्छेदपरिवटुमतोति उदयब्बयवसेन परिच्छेदतो चेव परिवटुमतो च. अनिच्चानुपस्सनं हि ‘‘उदयतो पुब्बे सङ्खारा नत्थी’’ति परिच्छिन्दित्वा तेसं गतिं समन्नेसमानं ‘‘वयतो परं न गच्छन्ति, एत्थेव अन्तरधायन्ती’’ति परिवटुमतो समनुपस्सति. मनोसमुत्तेजनतायाति चित्तसंवेजनताय ¶ . दुक्खानुपस्सनेन हि सङ्खारेसु चित्तं संवेजेति. परतो समनुपस्सनतायाति ‘‘नाहं, न ममा’’ति एवं अनत्ततो समनुपस्सनताय. इति इमानि तीणि पदानि अनिच्चानुपस्सनादीनं वसेन वुत्तानीति वेदितब्बानि. तेनेव तदनन्तरे पञ्हविस्सज्जने वुत्तं – ‘‘अनिच्चतो मनसिकरोतो खयतो सङ्खारा उपट्ठहन्ति. दुक्खतो मनसिकरोतो भयतो सङ्खारा उपट्ठहन्ति. अनत्ततो मनसिकरोतो सुञ्ञतो सङ्खारा उपट्ठहन्ती’’ति (पटि. म. १.२१९).

७६९. कतमे पन ते विमोक्खा, येसं इमानि अनुपस्सनानि मुखानीति? अनिमित्तो, अप्पणिहितो, सुञ्ञतोति एते तयो. वुत्तं हेतं ‘‘अनिच्चतो मनसिकरोन्तो अधिमोक्खबहुलो अनिमित्तं विमोक्खं पटिलभति. दुक्खतो मनसिकरोन्तो पस्सद्धिबहुलो अप्पणिहितं विमोक्खं पटिलभति. अनत्ततो मनसिकरोन्तो वेदबहुलो सुञ्ञतविमोक्खं पटिलभती’’ति (पटि. म. १.२२३).

एत्थ च अनिमित्तो विमोक्खोति अनिमित्ताकारेन निब्बानं आरम्मणं कत्वा पवत्तो अरियमग्गो. सो हि अनिमित्ताय धातुया उप्पन्नत्ता अनिमित्तो. किलेसेहि च विमुत्तत्ता विमोक्खो. एतेनेव नयेन अप्पणिहिताकारेन निब्बानं आरम्मणं कत्वा पवत्तो अप्पणिहितो. सुञ्ञताकारेन निब्बानं आरम्मणं कत्वा पवत्तो सुञ्ञतोति वेदितब्बो.

७७०. यं पन अभिधम्मे ‘‘यस्मिं समये लोकुत्तरं झानं भावेति निय्यानिकं अपचयगामिं ¶ दिट्ठिगतानं पहानाय पठमाय भूमिया पत्तिया विविच्चेव कामेहि पठमं झानं उपसम्पज्ज विहरति अप्पणिहितं सुञ्ञत’’न्ति (ध. स. ३४३ आदयो) एवं विमोक्खद्वयमेव वुत्तं, तं निप्परियायतो विपस्सनागमनं सन्धाय. विपस्सनाञाणं हि किञ्चापि पटिसम्भिदामग्गे –

‘‘अनिच्चानुपस्सनाञाणं निच्चतो अभिनिवेसं मुञ्चतीति सुञ्ञतो विमोक्खो. दुक्खानुपस्सनाञाणं सुखतो अभिनिवेसं. अनत्तानुपस्सनाञाणं अत्ततो अभिनिवेसं मुञ्चतीति ¶ सुञ्ञतो विमोक्खो’’ति (पटि. म. १.२२९) एवं अभिनिवेसं मुञ्चनवसेन सुञ्ञतो विमोक्खोति च,

‘‘अनिच्चानुपस्सनाञाणं निच्चतो निमित्तं मुञ्चतीति अनिमित्तो विमोक्खो. दुक्खानुपस्सनाञाणं सुखतो निमित्तं, अनत्तानुपस्सनाञाणं अत्ततो निमित्तं मुञ्चतीति अनिमित्तो विमोक्खो’’ति (पटि. म. १.२२९) एवं निमित्तं मुञ्चनवसेन अनिमित्तो विमोक्खोति च,

‘‘अनिच्चानुपस्सनाञाणं निच्चतो पणिधिं मुञ्चतीति अप्पणिहितो विमोक्खो. दुक्खानुपस्सनाञाणं सुखतो पणिधिं. अनत्तानुपस्सनाञाणं अत्ततो पणिधिं मुञ्चतीति अप्पणिहितो विमोक्खो’’ति (पटि. म. १.२२९) एवं पणिधिं मुञ्चनवसेन अप्पणिहितो विमोक्खोति च –

वुत्तं. तथापि तं सङ्खारनिमित्तस्स अविजहनतो न निप्परियायेन अनिमित्तं. निप्परियायेन पन सुञ्ञतञ्चेव अप्पणिहितञ्च. तस्स च आगमनवसेन अरियमग्गक्खणे विमोक्खो उद्धटो. तस्मा अप्पणिहितं सुञ्ञतन्ति विमोक्खद्वयमेव वुत्तन्ति वेदितब्बं. अयं तावेत्थ विमोक्खकथा.

७७१. यं पन वुत्तं ‘‘सत्तअरियपुग्गलविभागाय पच्चयो होती’’ति, तत्थ सद्धानुसारी, सद्धाविमुत्तो, कायसक्खि, उभतोभागविमुत्तो, धम्मानुसारी, दिट्ठिप्पत्तो, पञ्ञाविमुत्तोति ¶ इमे ताव सत्त अरियपुग्गला, तेसं विभागाय इदं सङ्खारुपेक्खाञाणं पच्चयो होति.

७७२. यो हि अनिच्चतो मनसिकरोन्तो अधिमोक्खबहुलो सद्धिन्द्रियं पटिलभति, सो सोतापत्तिमग्गक्खणे सद्धानुसारी होति. सेसेसु सत्तसु ठानेसु सद्धाविमुत्तो.

७७३. यो पन दुक्खतो मनसिकरोन्तो पस्सद्धिबहुलो समाधिन्द्रियं पटिलभति, सो सब्बत्थ कायसक्खि नाम होति. अरूपज्झानं पन पत्वा अग्गफलप्पत्तो उभतोभागविमुत्तो नाम होति.

७७४. यो ¶ पन अनत्ततो मनसिकरोन्तो वेदबहुलो पञ्ञिन्द्रियं पटिलभति, सो सोतापत्तिमग्गक्खणे धम्मानुसारी होति. छसु ठानेसु दिट्ठिप्पत्तो अग्गफले पञ्ञाविमुत्तोति.

७७५. वुत्तं हेतं –

‘‘अनिच्चतो मनसिकरोतो सद्धिन्द्रियं अधिमत्तं होति. सद्धिन्द्रियस्स अधिमत्तत्ता सोतापत्तिमग्गं पटिलभति, तेन वुच्चति सद्धानुसारी’’ति.

तथा ‘‘अनिच्चतो मनसिकरोतो सद्धिन्द्रियं अधिमत्तं होति, सद्धिन्द्रियस्स अधिमत्तत्ता सोतापत्तिफलं सच्छिकतं होति, तेन वुच्चति सद्धाविमुत्तो’’तिआदि (पटि. म. १.२२१).

७७६. अपरम्पि वुत्तं –

‘‘सद्दहन्तो विमुत्तोति सद्धाविमुत्तो. फुट्ठन्तं सच्छिकतोति कायसक्खि. दिट्ठन्तं पत्तोति दिट्ठिप्पत्तो. सद्दहन्तो विमुच्चतीति सद्धाविमुत्तो. झानफस्सं पठमं फुसति पच्छा निरोधं निब्बानं सच्छिकरोतीति कायसक्खि. ‘दुक्खा सङ्खारा, सुखो निरोधो’ति ञातं होति दिट्ठं विदितं सच्छिकतं फुसितं पञ्ञायाति दिट्ठिप्पत्तो’’ति (पटि. म. १.२२१).

७७७. इतरेसु ¶ पन चतूसु सद्धं अनुसरति, सद्धाय वा अनुसरति गच्छतीति सद्धानुसारी. तथा पञ्ञासङ्खातं धम्मं अनुसरति, धम्मेन वा अनुसरतीति धम्मानुसारी. अरूपज्झानेन चेव अरियमग्गेन चाति उभतोभागेन विमुत्तोति उभतोभागविमुत्तो. पजानन्तो विमुत्तोति पञ्ञाविमुत्तोति एवं वचनत्थो वेदितब्बोति.

सङ्खारुपेक्खाञाणं.

७७८. तं पनेतं पुरिमेन ञाणद्वयेन अत्थतो एकं. तेनाहु पोराणा – ‘‘इदं सङ्खारुपेक्खाञाणं एकमेव तीणि नामानि लभति, हेट्ठा ¶ मुञ्चितुकम्यताञाणं नाम जातं, मज्झे पटिसङ्खानुपस्सनाञाणं नाम, अन्ते च सिखाप्पत्तं सङ्खारुपेक्खाञाणं नाम’’.

७७९. पाळियम्पि वुत्तं –

‘‘कथं मुञ्चितुकम्यता-पटिसङ्खा-सन्तिट्ठना पञ्ञा सङ्खारुपेक्खासु ञाणं? उप्पादं मुञ्चितुकम्यता-पटिसङ्खा-सन्तिट्ठना पञ्ञा सङ्खारुपेक्खासु ञाणं. पवत्तं…पे… निमित्तं…पे… उपायासं मुञ्चितुकम्यतापटिसङ्खा-सन्तिट्ठना पञ्ञा सङ्खारुपेक्खासु ञाणं. उप्पादो दुक्खन्ति…पे… भयन्ति…पे… सामिसन्ति…पे… उप्पादो सङ्खाराति…पे… उपायासो सङ्खाराति मुञ्चितुकम्यता-पटिसङ्खा-सन्तिट्ठना पञ्ञा सङ्खारुपेक्खासु ञाण’’न्ति (पटि. म. १.५४).

७८०. तत्थ मुञ्चितुकम्यता च सा पटिसङ्खा च सन्तिट्ठना चाति मुञ्चितुकम्यता-पटिसङ्खा-सन्तिट्ठना. इति पुब्बभागे निब्बिदाञाणेन निब्बिन्नस्स उप्पादादीनि परिच्चजितुकामता मुञ्चितुकामता. मुञ्चनस्स उपायकरणत्थं मज्झे पटिसङ्खानं पटिसङ्खा. मुञ्चित्वा अवसाने अज्झुपेक्खनं सन्तिट्ठना. यं सन्धाय ‘‘उप्पादो सङ्खारा, ते सङ्खारे अज्झुपेक्खतीति सङ्खारुपेक्खा’’तिआदि (पटि. म. १.५४) वुत्तं. एवं एकमेविदं ञाणं.

७८१. अपिच इमायपि पाळिया इदं एकमेवाति वेदितब्बं. वुत्तं हेतं – ‘‘या च मुञ्चितुकम्यता, या च पटिसङ्खानुपस्सना, या च सङ्खारुपेक्खा, इमे धम्मा एकत्था, ब्यञ्जनमेव नान’’न्ति (पटि. म. १.२२७).

७८२. एवं ¶ अधिगतसङ्खारुपेक्खस्स पन इमस्स कुलपुत्तस्स विपस्सना सिखाप्पत्ता वुट्ठानगामिनी होति. सिखाप्पत्ता विपस्सनाति वा वुट्ठानगामिनीति वा सङ्खारुपेक्खादिञाणत्तयस्सेव एतं नामं. सा हि सिखं उत्तमभावं पत्तत्ता सिखाप्पत्ता. वुट्ठानं गच्छतीति वुट्ठानगामिनी. वुट्ठानं वुच्चति बहिद्धानिमित्तभूततो अभिनिविट्ठवत्थुतो चेव अज्झत्तपवत्ततो च वुट्ठहनतो मग्गो, तं गच्छतीति वुट्ठानगामिनी, मग्गेन सद्धिं घटियतीति अत्थो.

७८३. तत्रायं अभिनिवेसवुट्ठानानं आविभावत्थाय मातिका – अज्झत्तं अभिनिविसित्वा अज्झत्ता वुट्ठाति, अज्झत्तं अभिनिविसित्वा बहिद्धा वुट्ठाति ¶ , बहिद्धा अभिनिविसित्वा बहिद्धा वुट्ठाति, बहिद्धा अभिनिविसित्वा अज्झत्ता वुट्ठाति, रूपे अभिनिविसित्वा रूपा वुट्ठाति, रूपे अभिनिविसित्वा अरूपा वुट्ठाति, अरूपे अभिनिविसित्वा अरूपा वुट्ठाति, अरूपे अभिनिविसित्वा रूपा वुट्ठाति, एकप्पहारेन पञ्चहि खन्धेहि वुट्ठाति, अनिच्चतो अभिनिविसित्वा अनिच्चतो वुट्ठाति, अनिच्चतो अभिनिविसित्वा दुक्खतो, अनत्ततो वुट्ठाति, दुक्खतो अभिनिविसित्वा दुक्खतो, अनिच्चतो, अनत्ततो वुट्ठाति, अनत्ततो अभिनिविसित्वा अनत्ततो, अनिच्चतो, दुक्खतो वुट्ठाति.

७८४. कथं? इधेकच्चो आदितोव अज्झत्तसङ्खारेसु अभिनिविसति, अभिनिविसित्वा ते पस्सति. यस्मा पन न सुद्धअज्झत्तदस्सनमत्तेनेव मग्गवुट्ठानं होति, बहिद्धापि दट्ठब्बमेव, तस्मा परस्स खन्धेपि अनुपादिण्णसङ्खारेपि अनिच्चं दुक्खमनत्ताति पस्सति. सो कालेन अज्झत्तं सम्मसति, कालेन बहिद्धा. तस्सेवं सम्मसतो अज्झत्तं सम्मसनकाले विपस्सना मग्गेन सद्धिं घटियति. अयं अज्झत्तं अभिनिविसित्वा अज्झत्ता वुट्ठाति नाम.

सचे पनस्स बहिद्धा सम्मसनकाले विपस्सना मग्गेन सद्धिं घटियति, अयं अज्झत्तं अभिनिविसित्वा बहिद्धा वुट्ठाति नाम. एस नयो बहिद्धा अभिनिविसित्वा बहिद्धा च अज्झत्ता च वुट्ठानेपि.

७८५. अपरो आदितोव रूपे अभिनिविसति, अभिनिविसित्वा भूतरूपञ्च उपादारूपञ्च रासिं कत्वा पस्सति. यस्मा पन न सुद्धरूपदस्सनमत्तेनेव वुट्ठानं होति, अरूपम्पि दट्ठब्बमेव. तस्मा तं रूपं आरम्मणं कत्वा उप्पन्नं वेदनं सञ्ञं सङ्खारे विञ्ञाणञ्च ‘‘इदं अरूप’’न्ति अरूपं पस्सति. सो कालेन रूपं सम्मसति, कालेन अरूपं ¶ . तस्सेवं सम्मसतो रूपसम्मसनकाले विपस्सना मग्गेन सद्धिं घटियति, अयं रूपे अभिनिविसित्वा रूपा वुट्ठाति नाम.

सचे पनस्स अरूपसम्मसनकाले विपस्सना मग्गेन सद्धिं घटियति, अयं अरूपे अभिनिविसित्वा अरूपा वुट्ठाति नाम. एस नयो अरूपे अभिनिविसित्वा अरूपा च रूपा च वुट्ठानेपि.

७८६. ‘‘यंकिञ्चि समुदयधम्मं, सब्बं तं निरोधधम्म’’न्ति (दी. नि. १.२९८) एवं अभिनिविसित्वा एवमेव वुट्ठानकाले पन एकप्पहारेन पञ्चहि खन्धेहि वुट्ठाति नाम.

७८७. एको ¶ आदितोव अनिच्चतो सङ्खारे सम्मसति. यस्मा पन न अनिच्चतो सम्मसनमत्तेनेव वुट्ठानं होति, दुक्खतोपि अनत्ततोपि सम्मसितब्बमेव, तस्मा दुक्खतोपि अनत्ततोपि सम्मसति. तस्सेवं पटिपन्नस्स अनिच्चतो सम्मसनकाले वुट्ठानं होति, अयं अनिच्चतो अभिनिविसित्वा अनिच्चतो वुट्ठाति नाम.

सचे पनस्स दुक्खतो अनत्ततो सम्मसनकाले वुट्ठानं होति, अयं अनिच्चतो अभिनिविसित्वा दुक्खतो, अनत्ततो वुट्ठाति नाम. एस नयो दुक्खतो अनत्ततो अभिनिविसित्वा सेसवुट्ठानेसुपि.

७८८. एत्थ च योपि अनिच्चतो अभिनिविट्ठो, योपि दुक्खतो, योपि अनत्ततो, वुट्ठानकाले च अनिच्चतो वुट्ठानं होति. तयोपि जना अधिमोक्खबहुला होन्ति, सद्धिन्द्रियं पटिलभन्ति, अनिमित्तविमोक्खेन विमुच्चन्ति, पठममग्गक्खणे सद्धानुसारिनो होन्ति, सत्तसु ठानेसु सद्धाविमुत्ता. सचे पन दुक्खतो वुट्ठानं होति, तयोपि जना पस्सद्धिबहुला होन्ति, समाधिन्द्रियं पटिलभन्ति, अप्पणिहितविमोक्खेन विमुच्चन्ति, सब्बत्थ कायसक्खिनो होन्ति. यस्स पनेत्थ अरूपज्झानं पादकं, सो अग्गफले उभतोभागविमुत्तो होति. अथ नेसं अनत्ततो वुट्ठानं होति, तयोपि जना वेदबहुला होन्ति, पञ्ञिन्द्रियं पटिलभन्ति, सुञ्ञतविमोक्खेन विमुच्चन्ति, पठममग्गक्खणे धम्मानुसारिनो होन्ति, छसु ठानेसु दिट्ठिप्पत्ता अग्गफले पञ्ञाविमुत्ताति.

७८९. इदानि ¶ सद्धिं पुरिमपच्छिमञाणेहि इमिस्सा वुट्ठानगामिनिया विपस्सनाय आविभावत्थं द्वादस उपमा वेदितब्बा. तासं इदं उद्दानं –

‘‘वग्गुली कण्हसप्पो च, घरं गो यक्खि दारको;

खुद्दं पिपासं सीतुण्हं, अन्धकारं विसेन चा’’ति.

इमा च उपमा भयतुपट्ठानतो पभुति यत्थ कत्थचि ञाणे ठत्वा आहरितुं वट्टेय्युं. इमस्मिं पन ठाने आहरियमानासु भयतुपट्ठानतो याव फलञाणं सब्बं पाकटं होति, तस्मा इधेव आहरितब्बाति वुत्ता.

७९०. वग्गुलीति ¶ एका किर वग्गुली ‘‘एत्थ पुप्फं वा फलं वा लभिस्सामी’’ति पञ्चसाखे मधुकरुक्खे निलीयित्वा एकं साखं परामसित्वा न तत्थ किञ्चि पुप्फं फलं वा गय्हुपगं अद्दस. यथा च एकं, एवं दुतियं, ततियं, चतुत्थं. पञ्चमम्पि साखं परामसित्वा नाद्दस. सा ‘‘अफलो वतायं रुक्खो, नत्थेत्थ किञ्चि गय्हुपग’’न्ति तस्मिं रुक्खे आलयं विस्सज्जेत्वा उजुकाय साखाय आरुय्ह विटपन्तरेन सीसं नीहरित्वा उद्धं उल्लोकेत्वा आकासे उप्पतित्वा अञ्ञस्मिं फलरुक्खे निलीयति.

तत्थ वग्गुलि विय योगावचरो दट्ठब्बो, पञ्चसाखो मधुकरुक्खो विय पञ्चुपादानक्खन्धा, तत्थ वग्गुलिया निलीयनं विय योगिनो खन्धपञ्चके अभिनिवेसो, तस्सा एकेकं साखं परामसित्वा किञ्चि गय्हुपगं अदिस्वा अवसेससाखापरामसनं विय योगिनो रूपक्खन्धं सम्मसित्वा तत्थ किञ्चि गय्हुपगं अदिस्वा अवसेसक्खन्धसम्मसनं, तस्सा ‘‘अफलो वतायं रुक्खो’’ति रुक्खे आलयविस्सज्जनं विय योगिनो पञ्चसुपि खन्धेसु अनिच्चलक्खणादिदस्सनवसेन निब्बिन्नस्स मुञ्चितुकम्यतादिञाणत्तयं, तस्सा उजुकाय साखाय उपरि आरोहनं विय योगिनो अनुलोमं, सीसं नीहरित्वा उद्धं उल्लोकनं विय गोत्रभुञाणं, आकासे उप्पतनं विय मग्गञाणं, अञ्ञस्मिं फलरुक्खे निलीयनं विय फलञाणं.

७९१. कण्हसप्पुपमा पटिसङ्खाञाणे वुत्ताव. उपमासंसन्दने पनेत्थ सप्पविस्सज्जनं विय ¶ गोत्रभुञाणं, मुञ्चित्वा आगतमग्गं ओलोकेन्तस्स ठानं विय मग्गञाणं, गन्त्वा अभयट्ठाने ठानं विय फलञाणन्ति अयं विसेसो.

७९२. घरन्ति घरसामिके किर सायं भुञ्जित्वा सयनं आरुय्ह निद्दं ओक्कन्ते घरं आदित्तं, सो पबुज्झित्वा अग्गिं दिस्वा ‘‘भीतो साधु वतस्स सचे अडय्हमानो निक्खमेय्य’’न्ति ओलोकयमानो मग्गं दिस्वा निक्खमित्वा वेगेन खेमट्ठानं गन्त्वा ठितो. तत्थ घरसामिकस्स भुञ्जित्वा सयनं आरुय्ह निद्दोक्कमनं विय बालपुथुज्जनस्स खन्धपञ्चके ‘‘अहं ममा’’ति गहणं. पबुज्झित्वा अग्गिं दिस्वा भीतकालो विय सम्मापटिपदं पटिपज्जित्वा लक्खणं दिस्वा भयतुपट्ठानञाणं, निक्खमनमग्गं ओलोकनं विय मुञ्चितुकम्यताञाणं ¶ , मग्गदस्सनं विय अनुलोमं, निक्खमनं विय गोत्रभुञाणं, वेगेन गमनं विय मग्गञाणं, खेमट्ठाने ठानं विय फलञाणं.

७९३. गोति एकस्स किर कस्सकस्स रत्तिभागे निद्दं ओक्कन्तस्स वजं भिन्दित्वा गोणा पलाता, सो पच्चूससमये तत्थ गन्त्वा ओलोकेन्तो तेसं पलातभावं ञत्वा अनुपदं गन्त्वा रञ्ञो गोणे अद्दस. ते ‘‘मय्हं गोणा’’ति सल्लक्खेत्वा आहरन्तो पभातकाले ‘‘न इमे मय्हं गोणा, रञ्ञो गोणा’’ति सञ्जानित्वा ‘‘याव मं ‘चोरो अय’न्ति गहेत्वा राजपुरिसा न अनयब्यसनं पापेन्ति, तावदेव पलायिस्सामी’’ति भीतो गोणे पहाय वेगेन पलायित्वा निब्भयट्ठाने अट्ठासि. तत्थ ‘‘मय्हं गोणा’’ति राजगोणानं गहणं विय बालपुथुज्जनस्स ‘‘अहं ममा’’ति खन्धानं गहणं, पभाते ‘‘राजगोणा’’ति सञ्जाननं विय योगिनो तिलक्खणवसेन खन्धानं ‘‘अनिच्चा दुक्खा अनत्ता’’ति सञ्जाननं, भीतकालो विय भयतुपट्ठानञाणं, विस्सज्जित्वा गन्तुकामता विय मुञ्चितुकम्यता, विस्सज्जनं विय गोत्रभु, पलायनं विय मग्गो, पलायित्वा अभयदेसे ठानं विय फलं.

७९४. यक्खीति एको किर पुरिसो यक्खिनिया सद्धिं संवासं कप्पेसि, सा रत्तिभागे ‘‘सुत्तो अय’’न्ति मन्त्वा आमकसुसानं गन्त्वा मनुस्समंसं खादति. सो ‘‘कुहिं एसा गच्छती’’ति अनुबन्धित्वा मनुस्समंसं खादमानं दिस्वा तस्सा अमनुस्सिभावं ञत्वा ‘‘याव मं न खादति, ताव पलायिस्सामी’’ति भीतो वेगेन पलायित्वा खेमट्ठाने अट्ठासि. तत्थ यक्खिनिया सद्धिं संवासो विय खन्धानं ‘‘अहं ममा’’ति गहणं, सुसाने मनुस्समंसं खादमानं ¶ दिस्वा ‘‘यक्खिनी अय’’न्ति जाननं विय खन्धानं तिलक्खणं दिस्वा अनिच्चादिभावजाननं, भीतकालो विय भयतुपट्ठानं, पलायितुकामता विय मुञ्चितुकम्यता, सुसानविजहनं विय गोत्रभु, वेगेन पलायनं विय मग्गो, अभयदेसे ठानं विय फलं.

७९५. दारकोति एका किर पुत्तगिद्धिनी इत्थी, सा उपरिपासादे निसिन्नाव अन्तरवीथियं दारकसद्दं सुत्वा ‘‘पुत्तो नु खो मे केनचि विहेठियती’’ति वेगसा गन्त्वा ‘‘अत्तनो पुत्तो’’ति सञ्ञाय परपुत्तं अग्गहेसि. सा ‘‘परपुत्तो अय’’न्ति सञ्जानित्वा ओत्तप्पमाना इतो चितो ¶ च ओलोकेत्वा ‘‘मा हेव मं कोचि ‘दारकचोरी अय’न्ति वदेय्या’’ति दारकं तत्थेव ओरोपेत्वा पुन वेगसा पासादं आरुय्ह निसीदि. तत्थ अत्तनो पुत्तसञ्ञाय परपुत्तस्स गहणं विय ‘‘अहं ममा’’ति पञ्चक्खन्धगहणं, ‘‘परपुत्तो अय’’न्ति सञ्जाननं विय तिलक्खणवसेन ‘‘नाहं, न ममा’’ति सञ्जाननं, ओत्तप्पनं विय भयतुपट्ठानं, इतो चितो च ओलोकनं विय मुञ्चितुकम्यताञाणं, तत्थेव दारकस्स ओरोपनं विय अनुलोमं, ओरोपेत्वा अन्तरवीथियं ठितकालो विय गोत्रभु, पासादारूहनं विय मग्गो, आरुय्ह निसीदनं विय फलं.

७९६. खुद्दं पिपासं सीतुण्हं, अन्धकारं विसेन चाति इमा पन छ उपमा वुट्ठानगामिनिया विपस्सनाय ठितस्स लोकुत्तरधम्माभिमुखनिन्नपोणपब्भारभावदस्सनत्थं वुत्ता. यथा हि खुद्दाय अभिभूतो सुजिघच्छितो पुरिसो सादुरसं भोजनं पत्थेति, एवमेवायं संसारवट्टजिघच्छाय फुट्ठो योगावचरो अमतरसं कायगतासतिभोजनं पत्थेति.

यथा च पिपासितो पुरिसो परिसुस्समानकण्ठमुखो अनेकङ्गसम्भारं पानकं पत्थेति, एवमेवायं संसारवट्टपिपासाय फुट्ठो योगावचरो अरियं अट्ठङ्गिकमग्गपानकं पत्थेति.

यथा पन सीतसम्फुट्ठो पुरिसो उण्हं पत्थेति, एवमेवायं संसारवट्टे तण्हासिनेहसीतेन फुट्ठो योगावचरो किलेससन्तापकं मग्गतेजं पत्थेति.

यथा च उण्हसम्फुट्ठो पुरिसो सीतं पत्थेति, एवमेवायं संसारवट्टे एकादसग्गिसन्तापसन्तत्तो योगावचरो एकादसग्गिवूपसमं निब्बानं पत्थेति.

यथा ¶ पन अन्धकारपरेतो पुरिसो आलोकं पत्थेति, एवमेवायं अविज्जन्धकारेन ओनद्धपरियोनद्धो योगावचरो ञाणालोकं मग्गभावनं पत्थेति.

यथा च विससम्फुट्ठो पुरिसो विसघातनं भेसज्जं पत्थेति, एवमेवायं किलेसविससम्फुट्ठो योगावचरो किलेसविसनिम्मथनं अमतोसधं निब्बानं पत्थेति. तेन वुत्तं – ‘‘तस्सेवं जानतो एवं पस्सतो ¶ तीसु भवेसु…पे… नवसु सत्तावासेसु चित्तं पतिलीयति पतिकुटति पतिवत्तति न सम्पसारियति. उपेक्खा वा पाटिकुल्यता वा सण्ठाति. सेय्यथापि नाम पदुमपलासे ईसकपोणे’’ति सब्बं पुब्बे वुत्तनयेनेव वेदितब्बं.

७९७. एत्तावता च पनेस पतिलीनचरो नाम होति, यं सन्धाय वुत्तं –

‘‘पतिलीनचरस्स भिक्खुनो,

भजमानस्स विवित्तमासनं;

सामग्गियमाहु तस्स तं,

यो अत्तानं भवने न दस्सये’’ति. (सु. नि. ८१६; महानि. ४५);

एवमिदं सङ्खारुपेक्खाञाणं योगिनो पतिलीनचरभावं नियमेत्वा उत्तरि अरियमग्गस्सापि बोज्झङ्गमग्गङ्गझानङ्गपटिपदाविमोक्खविसेसं नियमेति. केचि हि थेरा बोज्झङ्गमग्गङ्गझानङ्गानं विसेसं पादकज्झानं नियमेतीति वदन्ति. केचि विपस्सनाय आरम्मणभूता खन्धा नियमेन्तीति वदन्ति. केचि पुग्गलज्झासयो नियमेतीति वदन्ति. तेसम्पि वादेसु अयं पुब्बभागवुट्ठानगामिनिविपस्सनाव नियमेतीति वेदितब्बा.

७९८. तत्रायं अनुपुब्बिकथा – विपस्सनानियमेन हि सुक्खविपस्सकस्स उप्पन्नमग्गोपि, समापत्तिलाभिनो झानं पादकं अकत्वा उप्पन्नमग्गोपि, पठमज्झानं पादकं कत्वा पकिण्णकसङ्खारे सम्मसित्वा उप्पादितमग्गोपि पठमज्झानिकाव होन्ति. सब्बेसु सत्त बोज्झङ्गानि अट्ठ मग्गङ्गानि पञ्च झानङ्गानि होन्ति. तेसं हि पुब्बभागविपस्सना सोमनस्ससहगतापि उपेक्खासहगतापि हुत्वा वुट्ठानकाले सङ्खारुपेक्खाभावं पत्वा सोमनस्ससहगता ¶ होति. पञ्चकनये दुतियततियचतुत्थज्झानानि पादकानि कत्वा उप्पादितमग्गेसु यथाक्कमेनेव झानं चतुरङ्गिकं तिवङ्गिकं दुवङ्गिकञ्च होति. सब्बेसु पन सत्त मग्गङ्गानि होन्ति. चतुत्थे छ बोज्झङ्गानि. अयं विसेसो पादकज्झाननियमेन चेव विपस्सनानियमेन च होति. तेसम्पि हि पुब्बभागविपस्सना सोमनस्ससहगतापि उपेक्खासहगतापि होति. वुट्ठानगामिनी सोमनस्ससहगताव. पञ्चमज्झानं ¶ पादकं कत्वा निब्बत्तितमग्गे पन उपेक्खाचित्तेकग्गतावसेन द्वे झानङ्गानि बोज्झङ्गमग्गङ्गानि छ सत्त चेव. अयम्पि विसेसो उभयनियमवसेन होति. इमस्मिं हि नये पुब्बभागविपस्सना सोमनस्ससहगता वा उपेक्खासहगता वा होति. वुट्ठानगामिनी उपेक्खासहगताव. अरूपज्झानानि पादकं कत्वा उप्पादितमग्गेपि एसेव नयो. एवं पादकज्झानतो वुट्ठाय येकेचि सङ्खारे सम्मसित्वा निब्बत्तितमग्गस्स आसन्नपदेसे वुट्ठितसमापत्ति अत्तनो सदिसभावं करोति भूमिवण्णो विय गोधावण्णस्स.

७९९. दुतियत्थेरवादे पन यतो यतो समापत्तितो वुट्ठाय ये ये समापत्तिधम्मे सम्मसित्वा मग्गो निब्बत्तितो होति, तंतंसमापत्तिसदिसोव होति. तत्रापि च विपस्सनानियमो वुत्तनयेनेव वेदितब्बो.

८००. ततियत्थेरवादे अत्तनो अत्तनो अज्झासयानुरूपेन यं यं झानं पादकं कत्वा ये ये झानधम्मे सम्मसित्वा मग्गो निब्बत्तितो, तंतंझानसदिसोव होति. पादकज्झानं पन सम्मसितज्झानं वा विना अज्झासयमत्तेनेव तं न इज्झति. स्वायमत्थो नन्दकोवादसुत्तेन (म. नि. ३.३९८ आदयो) दीपेतब्बो. एत्थापि च विपस्सनानियमो वुत्तनयेनेव वेदितब्बो. एवं ताव सङ्खारुपेक्खा बोज्झङ्गमग्गङ्गझानङ्गानि नियमेतीति वेदितब्बा.

८०१. सचे पनायं आदितो किलेसे विक्खम्भयमाना दुक्खेन सप्पयोगेन ससङ्खारेन विक्खम्भेतुं असक्खि, दुक्खापटिपदा नाम होति. विपरियायेन सुखापटिपदा. किलेसे पन विक्खम्भेत्वा विपस्सनापरिवासं मग्गपातुभावं सणिकं कुरुमाना दन्धाभिञ्ञा नाम होति. विपरियायेन खिप्पाभिञ्ञा. इति अयं सङ्खारुपेक्खा आगमनीयट्ठाने ठत्वा अत्तनो अत्तनो मग्गस्स नामं देति. तेन मग्गो चत्तारि नामानि लभति.

सा ¶ ¶ पनायं पटिपदा कस्सचि भिक्खुनो नाना होति, कस्सचि चतूसुपि मग्गेसु एकाव. बुद्धानं पन चत्तारोपि मग्गा सुखापटिपदा खिप्पाभिञ्ञाव अहेसुं. तथा धम्मसेनापतिस्स. महामोग्गल्लानत्थेरस्स पन पठममग्गो सुखापटिपदो खिप्पाभिञ्ञो अहोसि. उपरि तयो दुक्खापटिपदा दन्धाभिञ्ञा. यथा च पटिपदा, एवं अधिपतयोपि कस्सचि भिक्खुनो चतूसु मग्गेसु नाना होन्ति. कस्सचि चतूसुपि एकाव. एवं सङ्खारुपेक्खा पटिपदाविसेसं नियमेति. यथा पन विमोक्खविसेसं नियमेति, तं पुब्बे वुत्तमेव.

८०२. अपिच मग्गो नाम पञ्चहि कारणेहि नामं लभति सरसेन वा पच्चनीकेन वा सगुणेन वा आरम्मणेन वा आगमनेन वा. सचे हि सङ्खारुपेक्खा अनिच्चतो सङ्खारे सम्मसित्वा वुट्ठाति, अनिमित्तविमोक्खेन विमुच्चति. सचे दुक्खतो सम्मसित्वा वुट्ठाति, अप्पणिहितविमोक्खेन विमुच्चति. सचे अनत्ततो सम्मसित्वा वुट्ठाति, सुञ्ञतविमोक्खेन विमुच्चति. इदं सरसतो नामं नाम.

यस्मा पनेस अनिच्चानुपस्सनाय सङ्खारानं घनविनिब्भोगं कत्वा निच्चनिमित्तधुवनिमित्तसस्सतनिमित्तानि पजहन्तो आगतो, तस्मा अनिमित्तो. दुक्खानुपस्सनाय पन सुखसञ्ञं पहाय पणिधिं पत्थनं सुक्खापेत्वा आगतत्ता अप्पणिहितो. अनत्तानुपस्सनाय अत्तसत्तपुग्गलसञ्ञं पहाय सङ्खारानं सुञ्ञतो दिट्ठत्ता सुञ्ञतोति इदं पच्चनीकतो नामं नाम.

रागादीहि पनेस सुञ्ञत्ता सुञ्ञतो, रूपनिमित्तादीनं रागनिमित्तादीनञ्ञेव वा अभावेन अनिमित्तो, रागपणिधिआदीनं अभावतो अप्पणिहितोति इदमस्स सगुणतो नामं.

स्वायं सुञ्ञं अनिमित्तं अप्पणिहितञ्च निब्बानं आरम्मणं करोतीतिपि सुञ्ञतो अनिमित्तो अप्पणिहितोति वुच्चति. इदमस्स आरम्मणतो नामं.

८०३. आगमनं पन दुविधं विपस्सनागमनं मग्गागमनञ्च. तत्थ मग्गे विपस्सनागमनं लभति, फले मग्गागमनं. अनत्तानुपस्सना हि सुञ्ञता नाम, सुञ्ञतविपस्सनाय मग्गो सुञ्ञतो, अनिच्चानुपस्सना अनिमित्ता नाम ¶ , अनिमित्तविपस्सनाय ¶ मग्गो अनिमित्तो. इदं पन नामं न अभिधम्मपरियायेन लब्भति, सुत्तन्तपरियायेन लब्भति. तत्र हि गोत्रभुञाणं अनिमित्तं निब्बानं आरम्मणं कत्वा अनिमित्तनामकं हुत्वा सयं आगमनीयट्ठाने ठत्वा मग्गस्स नामं देतीति वदन्ति. तेन मग्गो अनिमित्तोति वुत्तो. मग्गागमनेन पन फलं अनिमित्तन्ति युज्जतियेव. दुक्खानुपस्सना सङ्खारेसु पणिधिं सुक्खापेत्वा आगतत्ता अप्पणिहिता नाम, अप्पणिहितविपस्सनाय मग्गो अप्पणिहितो, अप्पणिहितमग्गस्स फलं अप्पणिहितं. एवं विपस्सना अत्तनो नामं मग्गस्स देति, मग्गो फलस्साति इदं आगमनतो नामं. एवमयं सङ्खारुपेक्खा विमोक्खविसेसं नियमेतीति.

सङ्खारुपेक्खाञाणं निट्ठितं.

अनुलोमञाणकथा

८०४. तस्स तं सङ्खारुपेक्खाञाणं आसेवन्तस्स भावेन्तस्स बहुलीकरोन्तस्स अधिमोक्खसद्धा बलवतरा निब्बत्तति, वीरियं सुपग्गहितं होति, सति सूपट्ठिता, चित्तं सुसमाहितं, तिक्खतरा सङ्खारुपेक्खा उप्पज्जति. तस्स ‘‘दानि मग्गो उप्पज्जिस्सती’’ति सङ्खारुपेक्खा सङ्खारे अनिच्चाति वा दुक्खाति वा अनत्ताति वा सम्मसित्वा भवङ्गं ओतरति. भवङ्गानन्तरं सङ्खारुपेक्खाय कतनयेनेव सङ्खारे अनिच्चाति वा दुक्खाति वा अनत्ताति वा आरम्मणं कुरुमानं उप्पज्जति मनोद्वारावज्जनं. ततो भवङ्गं आवट्टेत्वा उप्पन्नस्स तस्स किरियचित्तस्सानन्तरं अवीचिकं चित्तसन्ततिं अनुप्पबन्धमानं तथेव सङ्खारे आरम्मणं कत्वा उप्पज्जति पठमं जवनचित्तं, यं परिकम्मन्ति वुच्चति. तदनन्तरं तथेव सङ्खारे आरम्मणं कत्वा उप्पज्जति दुतियं जवनचित्तं, यं उपचारन्ति वुच्चति. तदनन्तरम्पि तथेव सङ्खारे आरम्मणं कत्वा उप्पज्जति ततियं जवनचित्तं, यं अनुलोमन्ति वुच्चति. इदं नेसं पाटियेक्कं नामं.

अविसेसेन पन तिविधम्पेतं आसेवनन्तिपि परिकम्मन्तिपि उपचारन्तिपि अनुलोमन्तिपि वत्तुं वट्टति. किस्सानुलोमं? पुरिमभागपच्छिमभागानं. तञ्हि पुरिमानं अट्ठन्नं ¶ विपस्सनाञाणानं तथकिच्चताय च अनुलोमेति, उपरि च सत्ततिंसाय बोधिपक्खियधम्मानं. तञ्हि अनिच्चलक्खणादिवसेन सङ्खारे आरब्भ ¶ पवत्तत्ता, ‘‘उदयब्बयवन्तानंयेव वत धम्मानं उदयब्बयञाणं उप्पादवये अद्दसा’’ति च, ‘‘भङ्गवन्तानंयेव वत भङ्गानुपस्सनं भङ्गं अद्दसा’’ति च, ‘‘सभयंयेव वत भयतुपट्ठानस्स भयतो उपट्ठित’’न्ति च, ‘‘सादीनवेयेव वत आदीनवानुपस्सनं आदीनवं अद्दसा’’ति च, ‘‘निब्बिन्दितब्बेयेव वत निब्बिदाञाणं निब्बिन्न’’न्ति च, ‘‘मुञ्चितब्बम्हियेव वत मुञ्चितुकम्यताञाणं मुञ्चितुकामं जात’’न्ति च, ‘‘पटिसङ्खातब्बंयेव वत पटिसङ्खाञाणेन पटिसङ्खात’’न्ति च, ‘‘उपेक्खितब्बंयेव वत सङ्खारुपेक्खाय उपेक्खित’’न्ति च अत्थतो वदमानं विय इमेसञ्च अट्ठन्नं ञाणानं तथकिच्चताय अनुलोमेति, उपरि च सत्ततिंसाय बोधिपक्खियधम्मानं ताय पटिपत्तिया पत्तब्बत्ता.

यथा हि धम्मिको राजा विनिच्छयट्ठाने निसिन्नो वोहारिकमहामत्तानं विनिच्छयं सुत्वा अगतिगमनं पहाय मज्झत्तो हुत्वा ‘‘एवं होतू’’ति अनुमोदमानो तेसञ्च विनिच्छयस्स अनुलोमेति, पोराणस्स च राजधम्मस्स, एवंसम्पदमिदं वेदितब्बं. राजा विय हि अनुलोमञाणं, अट्ठ वोहारिकमहामत्ता विय अट्ठ ञाणानि, पोराणो राजधम्मो विय सत्ततिंस बोधिपक्खिया. तत्थ यथा राजा ‘‘एवं होतू’’ति वदमानो वोहारिकानञ्च विनिच्छयस्स, राजधम्मस्स च अनुलोमेति, एवमिदं अनिच्चादिवसेन सङ्खारे आरब्भ उप्पज्जमानं अट्ठन्नञ्च ञाणानं तथकिच्चताय अनुलोमेति, उपरि च सत्ततिंसाय बोधिपक्खियधम्मानं. तेनेव सच्चानुलोमिकञाणन्ति वुच्चतीति.

अनुलोमञाणं निट्ठितं.

वुट्ठानगामिनीविपस्सनाकथा

८०५. इदञ्च पन अनुलोमञाणं सङ्खारारम्मणाय वुट्ठानगामिनिया विपस्सनाय परियोसानं होति. सब्बेन सब्बं पन गोत्रभुञाणं वुट्ठानगामिनिया विपस्सनाय परियोसानं. इदानि तस्सायेव वुट्ठानगामिनिया विपस्सनाय असम्मोहत्थं अयं सुत्तसंसन्दना वेदितब्बा.

सेय्यथिदं ¶ ¶ –

अयञ्हि वुट्ठानगामिनी विपस्सना सळायतनविभङ्गसुत्ते ‘‘अतम्मयतं, भिक्खवे, निस्साय अतम्मयतं आगम्म यायं उपेक्खा एकत्ता एकत्तसिता, तं पजहथ तं समतिक्कमथा’’ति (म. नि. ३.३१०) एवं अतम्मयताति वुत्ता.

अलगद्दसुत्तन्ते ‘‘निब्बिन्दं विरज्जति, विरागा विमुच्चती’’ति (म. नि. १.२४५) एवं निब्बिदाति वुत्ता.

सुसिमसुत्तन्ते ‘‘पुब्बे खो, सुसिम, धम्मट्ठितिञाणं, पच्छा निब्बाने ञाण’’न्ति (सं. नि. २.७०) एवं धम्मट्ठितिञाणन्ति वुत्ता.

पोट्ठपादसुत्तन्ते ‘‘सञ्ञा खो, पोट्ठपाद, पठमं उप्पज्जति, पच्छा ञाण’’न्ति (दी. नि. १.४१६) एवं सञ्ञग्गन्ति वुत्ता.

दसुत्तरसुत्तन्ते ‘‘पटिपदाञाणदस्सनविसुद्धि पारिसुद्धिपधानियङ्ग’’न्ति (दी. नि. ३.३५९) एवं पारिसुद्धिपधानियङ्गन्ति वुत्ता.

पटिसम्भिदामग्गे ‘‘या च मुञ्चितुकम्यता या च पटिसङ्खानुपस्सना या च सङ्खारुपेक्खा, इमे धम्मा एकत्था ब्यञ्जनमेव नान’’न्ति (पटि. म. १.२२७) एवं तीहि नामेहि वुत्ता.

पट्ठाने ‘‘अनुलोमं गोत्रभुस्स, अनुलोमं वोदानस्सा’’ति (पट्ठा. १.१.४१७) एवं तीहि नामेहि वुत्ता.

रथविनीतसुत्तन्ते ‘‘किं पनावुसो, पटिपदाञाणदस्सनविसुद्धत्थं भगवति ब्रह्मचरियं वुस्सती’’ति (म. नि. १.२५७) एवं पटिपदाञाणदस्सनविसुद्धीति वुत्ता.

इतिनेकेहि ¶ ¶ नामेहि, कित्तिता या महेसिना;

वुट्ठानगामिनी सन्ता, परिसुद्धा विपस्सना.

वुट्ठातुकामो संसार-दुक्खपङ्का महब्भया;

करेय्य सततं तत्थ, योगं पण्डितजातिकोति.

इति साधुजनपामोज्जत्थाय कते विसुद्धिमग्गे

पञ्ञाभावनाधिकारे

पटिपदाञाणदस्सनविसुद्धिनिद्देसो नाम

एकवीसतिमो परिच्छेदो.

२२. ञाणदस्सनविसुद्धिनिद्देसो

पठममग्गञाणकथा

८०६. इतो ¶ ¶ परं गोत्रभुञाणं होति, तं मग्गस्स आवज्जनट्ठानियत्ता नेव पटिपदाञाणदस्सनविसुद्धिं न ञाणदस्सनविसुद्धिं भजति, अन्तरा अब्बोहारिकमेव होति. विपस्सनासोते पतितत्ता पन विपस्सनाति सङ्खं गच्छति. सोतापत्तिमग्गो सकदागामिमग्गो अनागामिमग्गो अरहत्तमग्गोति इमेसु पन चतूसु मग्गेसु ञाणं ञाणदस्सनविसुद्धि नाम.

तत्थ पठममग्गञाणं ताव सम्पादेतुकामेन अञ्ञं किञ्चि कातब्बं नाम नत्थि. यञ्हि अनेन कातब्बं सिया, तं अनुलोमावसानं विपस्सनं उप्पादेन्तेन कतमेव. एवं उप्पन्नअनुलोमञाणस्स पनस्स तेहि तीहिपि अनुलोमञाणेहि अत्तनो बलानुरूपेन थूलथूले सच्चपटिच्छादके तमम्हि अन्तरधापिते सब्बसङ्खारगतेसु चित्तं न पक्खन्दति, न सन्तिट्ठति, नाधिमुच्चति, न सज्जति, न लग्गति, न बज्झति. पदुमपलासतो उदकं विय पतिलीयति पतिकुटति पतिवत्तति. सब्बं निमित्तारम्मणम्पि सब्बं पवत्तारम्मणम्पि पलिबोधतो उपट्ठाति. अथस्स सब्बस्मिं निमित्तपवत्तारम्मणे पलिबोधतो उपट्ठिते अनुलोमञाणस्स आसेवनन्ते अनिमित्तं अप्पवत्तं विसङ्खारं निरोधं निब्बानं आरम्मणं कुरुमानं पुथुज्जनगोत्तं पुथुज्जनसङ्खं पुथुज्जनभूमिं अतिक्कममानं अरियगोत्तं अरियसङ्खं अरियभूमिं ओक्कममानं निब्बानारम्मणे पठमावट्टनपठमाभोगपठमसमन्नाहारभूतं मग्गस्स अनन्तरसमनन्तरासेवनउपनिस्सयनत्थिविगतवसेन छहि आकारेहि पच्चयभावं साधयमानं सिखाप्पत्तं विपस्सनाय मुद्धभूतं अपुनरावट्टकं उप्पज्जति गोत्रभुञाणं.

यं सन्धाय वुत्तं –

‘‘कथं ¶ बहिद्धा वुट्ठानविवट्टने पञ्ञा गोत्रभुञाणं? उप्पादं अभिभुय्यतीति गोत्रभु. पवत्तं…पे… उपायासं अभिभुय्यतीति गोत्रभु. बहिद्धा सङ्खारनिमित्तं अभिभुय्यतीति गोत्रभु. अनुप्पादं पक्खन्दतीति गोत्रभु. अप्पवत्तं…पे… अनुपायासं निरोधं निब्बानं पक्खन्दतीति ¶ गोत्रभु. उप्पादं अभिभुय्यित्वा अनुप्पादं पक्खन्दतीति गोत्रभू’’ति (पटि. म. १.५९) सब्बं वित्थारेतब्बं.

८०७. तत्रायं एकावज्जनेन एकवीथियं पवत्तमानानम्पि अनुलोमगोत्रभूनं नानारम्मणे पवत्तनाकारदीपिका उपमा – यथा हि महामातिकं लङ्घित्वा परतीरे पतिट्ठातुकामो पुरिसो वेगेन धावित्वा मातिकाय ओरिमतीरे रुक्खसाखाय बन्धित्वा ओलम्बितं रज्जुं वा यट्ठिं वा गहेत्वा उल्लङ्घित्वा परतीरनिन्नपोणपब्भारकायो हुत्वा परतीरस्स उपरिभागं पत्तो तं मुञ्चित्वा वेधमानो परतीरे पतित्वा सणिकं पतिट्ठाति, एवमेवायं योगावचरोपि भवयोनिगतिट्ठितिनिवासानं परतीरभूते निब्बाने पतिट्ठातुकामो उदयब्बयानुपस्सनादिना वेगेन धावित्वा अत्तभावरुक्खसाखाय बन्धित्वा ओलम्बितं रूपरज्जुं वा वेदनादीसु अञ्ञतरदण्डं वा अनिच्चन्ति वा दुक्खन्ति वा अनत्ताति वाति अनुलोमावज्जनेन गहेत्वा तं अमुञ्चमानोव पठमेन अनुलोमचित्तेन उल्लङ्घित्वा दुतियेन परतीरनिन्नपोणपब्भारकायो विय निब्बाननिन्नपोणपब्भारमानसो हुत्वा ततियेन परतीरस्स उपरिभागं पत्तो विय इदानि पत्तब्बस्स निब्बानस्स आसन्नो हुत्वा तस्स चित्तस्स निरोधेन तं सङ्खारारम्मणं मुञ्चित्वा गोत्रभुचित्तेन विसङ्खारे परतीरभूते निब्बाने पतति. एकारम्मणे पन अलद्धासेवनताय वेधमानो सो पुरिसो विय न ताव सुप्पतिट्ठितो होति, ततो मग्गञाणेन पतिट्ठातीति.

८०८. तत्थ अनुलोमं सच्चपटिच्छादकं किलेसतमं विनोदेतुं सक्कोति, न निब्बानमारम्मणं कातुं. गोत्रभु निब्बानमेव आरम्मणं कातुं सक्कोति, न सच्चपटिच्छादकं तमं विनोदेतुं. तत्रायं उपमा – एको किर चक्खुमा पुरिसो ‘‘नक्खत्तयोगं जानिस्सामी’’ति रत्तिभागे निक्खमित्वा चन्दं पस्सितुं उद्धं उल्लोकेसि, तस्स वलाहकेहि पटिच्छन्नत्ता चन्दो न पञ्ञायित्थ. अथेको वातो उट्ठहित्वा थूलथूले वलाहके विद्धंसेति. अपरो मज्झिमे, अपरो सुखुमेति. ततो सो पुरिसो विगतवलाहके नभे चन्दं दिस्वा नक्खत्तयोगं अञ्ञासि.

तत्थ ¶ ¶ तयो वलाहका विय सच्चपटिच्छादकथूलमज्झिमसुखुमं किलेसन्धकारं, तयो वाता विय तीणि अनुलोमचित्तानि, चक्खुमा पुरिसो विय गोत्रभुञाणं, चन्दो विय निब्बानं, एकेकस्स वातस्स यथाक्कमेन वलाहकविद्धंसनं विय एकेकस्स अनुलोमचित्तस्स सच्चपटिच्छादकतमविनोदनं, विगतवलाहके नभे तस्स पुरिसस्स विसुद्धचन्ददस्सनं विय विगते सच्चपटिच्छादके तमे गोत्रभुञाणस्स विसुद्धनिब्बानदस्सनं.

यथेव हि तयो वाता चन्दपटिच्छादके वलाहकेयेव विद्धंसेतुं सक्कोन्ति, न चन्दं दट्ठुं, एवं अनुलोमानि सच्चपटिच्छादकं तमञ्ञेव विनोदेतुं सक्कोन्ति, न निब्बानं दट्ठुं. यथा सो पुरिसो चन्दमेव दट्ठुं सक्कोति, न वलाहके विद्धंसेतुं, एवं गोत्रभुञाणं निब्बानमेव दट्ठुं सक्कोति, न किलेसतमं विनोदेतुं. तेनेव चेतं मग्गस्स आवज्जनन्ति वुच्चति. तञ्हि अनावज्जनम्पि समानं आवज्जनट्ठाने ठत्वा ‘‘एवं निब्बत्ताही’’ति मग्गस्स सञ्ञं दत्वा विय निरुज्झति. मग्गोपि तेन दिन्नसञ्ञं अमुञ्चित्वाव अवीचिसन्ततिवसेन तं ञाणं अनुप्पबन्धमानो अनिब्बिद्धपुब्बं अपदालितपुब्बं लोभक्खन्धं दोसक्खन्धं मोहक्खन्धं निब्बिज्झमानोव पदालयमानोव निब्बत्तति.

८०९. तत्रायं उपमा – एको किर इस्सासो अट्ठउसभमत्ते पदेसे फलकसतं ठपापेत्वा वत्थेन मुखं वेठेत्वा सरं सन्नहित्वा चक्कयन्ते अट्ठासि. अञ्ञो पुरिसो चक्कयन्तं आविज्झित्वा यदा इस्सासस्स फलकं अभिमुखं होति, तदा तत्थ दण्डकेन सञ्ञं देति. इस्सासो दण्डकसञ्ञं अमुञ्चित्वाव सरं खिपित्वा फलकसतं निब्बिज्झति. तत्थ दण्डकसञ्ञं विय गोत्रभुञाणं, इस्सासो विय मग्गञाणं. इस्सासस्स दण्डकसञ्ञं अमुञ्चित्वाव फलकसतनिब्बिज्झनं विय मग्गञाणस्स गोत्रभुञाणेन दिन्नसञ्ञं अमुञ्चित्वाव निब्बानं आरम्मणं कत्वा अनिब्बिद्धपुब्बानं अपदालितपुब्बानं लोभदोसमोहक्खन्धानं निब्बिज्झनपदालनं.

८१०. न केवलञ्चेस मग्गो लोभक्खन्धादीनं निब्बिज्झनमेव करोति, अपिच खो अनमतग्गसंसारवट्टदुक्खसमुद्दं सोसेति, सब्बअपायद्वारानि पिदहति, सत्तन्नं अरियधनानं सम्मुखीभावं करोति, अट्ठङ्गिकं मिच्छामग्गं पजहति, सब्बवेरभयानि वूपसमेति, सम्मासम्बुद्धस्स ओरसपुत्तभावं उपनेति ¶ ¶ , अञ्ञेसञ्च अनेकसतानं आनिसंसानं पटिलाभाय संवत्ततीति एवं अनेकानिसंसदायकेन सोतापत्तिमग्गेन सम्पयुत्तं ञाणं सोतापत्तिमग्गे ञाणन्ति.

पठममग्गञाणं निट्ठितं.

सोतापन्नपुग्गलकथा

८११. इमस्स पन ञाणस्स अनन्तरं तस्सेव विपाकभूतानि द्वे तीणि वा फलचित्तानि उप्पज्जन्ति. अनन्तरविपाकत्तायेव हि लोकुत्तरकुसलानं ‘‘समाधिमानन्तरिकञ्ञमाहू’’ति (खु. पा. ६.५) च ‘‘दन्धं आनन्तरिकं पापुणाति आसवानं खयाया’’ति (अ. नि. ४.१६२) च आदि वुत्तं. केचि पन एकं द्वे तीणि चत्तारि वा फलचित्तानीति वदन्ति, तं न गहेतब्बं.

अनुलोमस्स हि आसेवनन्ते गोत्रभुञाणं उप्पज्जति. तस्मा सब्बन्तिमेन परिच्छेदेन द्वीहि अनुलोमचित्तेहि भवितब्बं. न हि एकं आसेवनपच्चयं लभति, सत्तचित्तपरमा च एकावज्जनवीथि. तस्मा यस्स द्वे अनुलोमानि, तस्स ततियं गोत्रभु चतुत्थं मग्गचित्तं तीणि फलचित्तानि होन्ति. यस्स तीणि अनुलोमानि, तस्स चतुत्थं गोत्रभु पञ्चमं मग्गचित्तं द्वे फलचित्तानि होन्ति. तेन वुत्तं ‘‘द्वे तीणि वा फलचित्तानि उप्पज्जन्ती’’ति.

केचि पन यस्स चत्तारि अनुलोमानि, तस्स पञ्चमं गोत्रभु छट्ठं मग्गचित्तं एकं फलचित्तन्ति वदन्ति, तं पन यस्मा चतुत्थं पञ्चमं वा अप्पेति, न ततो परं आसन्नभवङ्गत्ताति पटिक्खित्तं. तस्मा न सारतो पच्चेतब्बं.

८१२. एत्तावता च पनेस सोतापन्नो नाम दुतियो अरियपुग्गलो होति. भुसं पमत्तोपि हुत्वा सत्तक्खत्तुं देवेसु च मनुस्सेसु च सन्धावित्वा संसरित्वा दुक्खस्सन्तस्स करणसमत्थो होति. फलपरियोसाने पनस्स चित्तं भवङ्गं ओतरति, ततो भवङ्गं उपच्छिन्दित्वा मग्गपच्चवेक्खणत्थाय उप्पज्जति मनोद्वारावज्जनं, तस्मिं निरुद्धे पटिपाटिया सत्त मग्गपच्चवेक्खणजवनानीति. पुन भवङ्गं ओतरित्वा तेनेव नयेन ¶ फलादीनं पच्चवेक्खणत्थाय आवज्जनादीनि ¶ उप्पज्जन्ति. येसं उप्पत्तिया एस मग्गं पच्चवेक्खति, फलं पच्चवेक्खति, पहीनकिलेसे पच्चवेक्खति, अवसिट्ठकिलेसे पच्चवेक्खति, निब्बानं पच्चवेक्खति.

सो हि ‘‘इमिना वताहं मग्गेन आगतो’’ति मग्गं पच्चवेक्खति, ततो ‘‘अयं मे आनिसंसो लद्धो’’ति फलं पच्चवेक्खति. ततो ‘‘इमे नाम मे किलेसा पहीना’’ति पहीनकिलेसे पच्चवेक्खति. ततो ‘‘इमे नाम मे किलेसा अवसिट्ठा’’ति उपरिमग्गत्तयवज्झे किलेसे पच्चवेक्खति. अवसाने च ‘‘अयं मे धम्मो आरम्मणतो पटिविद्धो’’ति अमतं निब्बानं पच्चवेक्खति. इति सोतापन्नस्स अरियसावकस्स पञ्च पच्चवेक्खणानि होन्ति. यथा च सोतापन्नस्स, एवं सकदागामिअनागामीनम्पि. अरहतो पन अवसिट्ठकिलेसपच्चवेक्खणं नाम नत्थीति. एवं सब्बानिपि एकूनवीसति पच्चवेक्खणानि नाम.

उक्कट्ठपरिच्छेदोयेव चेसो. पहीनावसिट्ठकिलेसपच्चवेक्खणञ्हि सेक्खानम्पि होति वा न वा. तस्स हि पच्चवेक्खणस्स अभावेनेव महानामो भगवन्तं पुच्छि ‘‘कोसु नाम मे धम्मो अज्झत्तं अप्पहीनो, येन मे एकदा लोभधम्मापि चित्तं परियादाय तिट्ठन्ती’’ति (म. नि. १.१७५) सब्बं वित्थारतो वेदितब्बं.

दुतियमग्गञाणकथा

८१३. एवं पच्चवेक्खित्वा पन सो सोतापन्नो अरियसावको तस्मिञ्ञेव वा आसने निसिन्नो, अपरेन वा समयेन कामरागब्यापादानं तनुभावाय दुतियाय भूमिया पत्तिया योगं करोति. सो इन्द्रियबलबोज्झङ्गानि समोधानेत्वा तदेव रूपवेदनासञ्ञासङ्खारविञ्ञाणभेदं सङ्खारगतं अनिच्चं दुक्खमनत्ताति ञाणेन परिमद्दति, परिवत्तेति, विपस्सनावीथिं ओगाहति. तस्सेवं पटिपन्नस्स वुत्तनयेनेव सङ्खारुपेक्खावसाने एकावज्जनेन अनुलोमगोत्रभुञाणेसु उप्पन्नेसु गोत्रभुअनन्तरं सकदागामिमग्गो उप्पज्जति. तेन सम्पयुत्तं ञाणं सकदागामिमग्गे ञाणन्ति.

दुतियञाणं निट्ठितं.

ततियमग्गञाणकथा

८१४. इमस्सापि ¶ ¶ ञाणस्स अनन्तरं वुत्तनयेनेव फलचित्तानि वेदितब्बानि. एत्तावता चेस सकदागामी नाम चतुत्थो अरियपुग्गलो होति सकिंदेव इमं लोकं आगन्त्वा दुक्खस्सन्तकरणसमत्थो. ततो परं पच्चवेक्खणं वुत्तनयमेव.

एवं पच्चवेक्खित्वा च सो सकदागामी अरियसावको तस्मिञ्ञेव वा आसने निसिन्नो अपरेन वा समयेन कामरागब्यापादानं अनवसेसप्पहानाय ततियाय भूमिया पत्तिया योगं करोति, सो इन्द्रियबलबोज्झङ्गानि समोधानेत्वा तदेव सङ्खारगतं अनिच्चं दुक्खमनत्ताति ञाणेन परिमद्दति, परिवत्तेति, विपस्सनावीथिं ओगाहति. तस्सेवं पटिपन्नस्स वुत्तनयेनेव सङ्खारुपेक्खावसाने एकावज्जनेन अनुलोमगोत्रभुञाणेसु उप्पन्नेसु गोत्रभुअनन्तरं अनागामिमग्गो उप्पज्जति, तेन सम्पयुत्तं ञाणं अनागामिमग्गे ञाणन्ति.

ततियञाणं निट्ठितं.

चतुत्थमग्गञाणकथा

८१५. इमस्सपि ञाणस्स अनन्तरं वुत्तनयेनेव फलचित्तानि वेदितब्बानि. एत्तावता चेस अनागामी नाम छट्ठो अरियपुग्गलो होति ओपपातिको तत्थपरिनिब्बायी अनावत्तिधम्मो पटिसन्धिवसेन इमं लोकं पुन अनागन्ता. ततो परं पच्चवेक्खणं वुत्तनयमेव.

एवं पच्चवेक्खित्वा च सो अनागामी अरियसावको तस्मिञ्ञेव वा आसने निसिन्नो, अपरेन वा समयेन रूपारूपरागमानउद्धच्चअविज्जानं अनवसेसप्पहानाय चतुत्थाय भूमिया पत्तिया योगं करोति, सो इन्द्रियबलबोज्झङ्गानि समोधानेत्वा तदेव सङ्खारगतं अनिच्चं दुक्खमनत्ताति ञाणेन परिमद्दति, परिवत्तेति, विपस्सनावीथिं ओगाहति. तस्सेवं पटिपन्नस्स वुत्तनयेनेव सङ्खारुपेक्खावसाने एकावज्जनेन अनुलोमगोत्रभुञाणेसु ¶ उप्पन्नेसु गोत्रभुअनन्तरं अरहत्तमग्गो उप्पज्जति, तेन सम्पयुत्तं ञाणं अरहत्तमग्गे ञाणन्ति.

चतुत्थञाणं निट्ठितं.

अरहन्तपुग्गलकथा

८१६. इमस्सपि ¶ ञाणस्स अनन्तरं वुत्तनयेनेव फलचित्तानि वेदितब्बानि. एत्तावता चेस अरहा नाम अट्ठमो अरियपुग्गलो होति महाखीणासवो अन्तिमदेहधारी ओहितभारो अनुप्पत्तसदत्थो परिक्खीणभवसंयोजनो सम्मादञ्ञा विमुत्तो सदेवकस्स लोकस्स अग्गदक्खिणेय्योति.

इति यं तं वुत्तं ‘‘सोतापत्तिमग्गो सकदागामिमग्गो अनागामिमग्गो अरहत्तमग्गोति इमेसु पन चतूसु मग्गेसु ञाणं ञाणदस्सनविसुद्धि नामा’’ति, तं इमानि इमिना अनुक्कमेन पत्तब्बानि चत्तारि ञाणानि सन्धाय वुत्तं.

बोधिपक्खियकथा

८१७. इदानि इमिस्सायेव चतुञाणाय ञाणदस्सनविसुद्धिया आनुभावविजाननत्थं –

परिपुण्णबोधिपक्खिय, भावो वुट्ठानबलसमायोगो;

ये येन पहातब्बा, धम्मा तेसं पहानञ्च.

किच्चानि परिञ्ञादीनि, यानि वुत्तानि अभिसमयकाले;

तानि च यथासभावेन, जानितब्बानि सब्बानीति.

८१८. तत्थ परिपुण्णबोधिपक्खिय, भावोति बोधिपक्खियानं परिपुण्णभावो. चत्तारो सतिपट्ठाना, चत्तारो सम्मप्पधाना, चत्तारो इद्धिपादा, पञ्चिन्द्रियानि, पञ्च बलानि, सत्त बोज्झङ्गा, अरियो अट्ठङ्गिको मग्गोति हि इमे सत्ततिंस धम्मा बुज्झनट्ठेन बोधोति लद्धनामस्स अरियमग्गस्स पक्खे भवत्ता बोधिपक्खिया नाम. पक्खे भवत्ताति उपकारभावे ठितत्ता.

८१९. तेसु ¶ तेसु आरम्मणेसु ओक्खन्दित्वा पक्खन्दित्वा उपट्ठानतो पट्ठानं. सतियेव पट्ठानं सतिपट्ठानं. कायवेदनाचित्तधम्मेसु पनस्सा असुभ-दुक्ख-अनिच्च-अनत्ताकारगहणवसेन ¶ सुभ-सुख-निच्च-अत्त-सञ्ञापहानकिच्चसाधनवसेन च पवत्तितो चतुधा भेदो होति. तस्मा चत्तारो सतिपट्ठानाति वुच्चन्ति.

८२०. पदहन्ति एतेनाति पधानं. सोभनं पधानं सम्मप्पधानं. सम्मा वा पदहन्ति एतेनाति सम्मप्पधानं. सोभनं वा तं किलेसविरूपत्तविरहतो पधानञ्च हितसुखनिप्फादकत्तेन सेट्ठभावावहनतो पधानभावकारणतो चाति सम्मप्पधानं. वीरियस्सेतं अधिवचनं. तयिदं उप्पन्नानुप्पन्नानं अकुसलानं पहानानुप्पत्तिकिच्चं अनुप्पन्नुप्पन्नानञ्च कुसलानं उप्पत्तिट्ठितिकिच्चं साधयतीति चतुब्बिधं होति, तस्मा चत्तारो सम्मप्पधानाति वुच्चन्ति.

८२१. पुब्बे वुत्तेन इज्झनट्ठेन इद्धि. तस्सा सम्पयुत्ताय पुब्बङ्गमट्ठेन फलभूताय पुब्बभागकारणट्ठेन च इद्धिया पादोति इद्धिपादो. सो छन्दादिवसेन चतुब्बिधो होति, तस्मा चत्तारो इद्धिपादाति वुच्चन्ति. यथाह – ‘‘चत्तारो इद्धिपादा छन्दिद्धिपादो चित्तिद्धिपादो वीरियिद्धिपादो वीमंसिद्धिपादो’’ति (विभ. ४५७). इमे लोकुत्तराव. लोकिया पन ‘‘छन्दञ्चे भिक्खु अधिपतिं करित्वा लभति समाधिं, लभति चित्तस्स एकग्गतं. अयं वुच्चति छन्दसमाधी’’तिआदिवचनतो (विभ. ४३२) छन्दादिअधिपतिवसेन पटिलद्धधम्मापि होन्ति.

८२२. अस्सद्धियकोसज्जपमादविक्खेपसम्मोहानं अभिभवनतो अभिभवनसङ्खातेन अधिपतियट्ठेन इन्द्रियं. अस्सद्धियादीहि च अनभिभवनीयतो अकम्पियट्ठेन बलं. तदुभयम्पि सद्धादिवसेन पञ्चविधं होति, तस्मा पञ्चिन्द्रियानि पञ्च बलानीति वुच्चन्ति.

८२३. बुज्झनकसत्तस्स पन अङ्गभावेन सतिआदयो सत्त बोज्झङ्गा. निय्यानिकट्ठेन च सम्मादिट्ठिआदयो अट्ठ मग्गङ्गा होन्ति. तेन वुत्तं ‘‘सत्त बोज्झङ्गा अरियो अट्ठङ्गिको मग्गो’’ति.

८२४. इति ¶ इमे सत्ततिंस बोधिपक्खियधम्मा पुब्बभागे लोकियविपस्सनाय वत्तमानाय चुद्दसविधेन कायं परिग्गण्हतो च कायानुपस्सनासतिपट्ठानं, नवविधेन वेदनं परिग्गण्हतो च वेदनानुपस्सनासतिपट्ठानं, सोळसविधेन चित्तं परिग्गण्हतो च चित्तानुपस्सनासतिपट्ठानं, पञ्चविधेन धम्मे परिग्गण्हतो च धम्मानुपस्सनासतिपट्ठानं. इमस्मिं अत्तभावे ¶ अनुप्पन्नपुब्बं परस्स उप्पन्नं अकुसलं दिस्वा ‘‘यथा पटिपन्नस्सेतं उप्पन्नं, न तथा पटिपज्जिस्सामि एवं मे एतं नुप्पज्जिस्सती’’ति, तस्स अनुप्पादाय वायमनकाले पठमं सम्मप्पधानं. अत्तनो समुदाचारप्पत्तं अकुसलं दिस्वा तस्स पहानाय वायमनकाले दुतियं. इमस्मिं अत्तभावे अनुप्पन्नपुब्बं झानं वा विपस्सनं वा उप्पादेतुं वायमन्तस्स ततियं. उप्पन्नं यथा न परिहायति, एवं पुनप्पुनं उप्पादेन्तस्स चतुत्थं सम्मप्पधानं. छन्दं धुरं कत्वा कुसलुप्पादनकाले छन्दिद्धिपादो. मिच्छावाचाय विरमणकाले सम्मावाचाति एवं नानाचित्तेसु लब्भन्ति. इमेसं पन चतुन्नं ञाणानं उप्पत्तिकाले एकचित्ते लब्भन्ति. फलक्खणे ठपेत्वा चत्तारो सम्मप्पधाने अवसेसा तेत्तिंस लब्भन्ति.

८२५. एवं एकचित्ते लब्भमानेसु चेतेसु एकाव निब्बानारम्मणा सति कायादीसु सुभसञ्ञादिप्पहानकिच्चसाधनवसेन चत्तारो सतिपट्ठानाति वुच्चति. एकमेव च वीरियं अनुप्पन्नानं अनुप्पादादिकिच्चसाधनवसेन चत्तारो सम्मप्पधानाति वुच्चति. सेसेसु पन हापनवड्ढनं नत्थि.

८२६. अपिच तेसु –

नव एकविधा एको, द्वेधाथ चतु पञ्चधा;

अट्ठधा नवधा चेव, इति छद्धा भवन्ति ते.

नव एकविधाति छन्दो, चित्तं, पीति, पस्सद्धि, उपेक्खा, सङ्कप्पो, वाचा, कम्मन्तो, आजीवोति इमे नव छन्दिद्धिपादादिवसेन एकविधाव होन्ति, न अञ्ञं कोट्ठासं भजन्ति. एको द्वेधाति सद्धा इन्द्रिय, बलवसेन द्वेधा ठिता. अथ चतु पञ्चधाति अथञ्ञो एको चतुधा, अञ्ञो पञ्चधा ठितोति अत्थो. तत्थ समाधि एको इन्द्रिय, बल, बोज्झङ्ग, मग्गङ्गवसेन चतुधा ठितो. पञ्ञा तेसञ्च चतुन्नं इद्धिपादकोट्ठासस्स च ¶ वसेन पञ्चधा. अट्ठधा नवधा चेवाति अपरो एको अट्ठधा, एको नवधा ठितोति अत्थो. चतुसतिपट्ठान, इन्द्रिय, बल, बोज्झङ्ग, मग्गङ्गवसेन सति अट्ठधा ठिता. चतुसम्मप्पधान, इद्धिपाद, इन्द्रिय, बल, बोज्झङ्ग, मग्गङ्गवसेन वीरियं नवधाति. एवं –

चुद्दसेव ¶ असम्भिन्ना, होन्तेते बोधिपक्खिया;

कोट्ठासतो सत्तविधा, सत्ततिंसप्पभेदतो.

सकिच्चनिप्फादनतो, सरूपेन च वुत्तितो;

सब्बेव अरियमग्गस्स, सम्भवे सम्भवन्ति तेति.

एवं तावेत्थ परिपुण्णबोधिपक्खियभावो जानितब्बो.

वुट्ठानबलसमायोगकथा

८२७. वुट्ठानबलसमायोगोति वुट्ठानञ्चेव बलसमायोगो च. लोकियविपस्सना हि निमित्तारम्मणत्ता चेव पवत्तिकारणस्स च समुदयस्स असमुच्छिन्दनतो नेव निमित्ता न पवत्ता वुट्ठाति. गोत्रभुञाणं समुदयस्स असमुच्छिन्दनतो पवत्ता न वुट्ठाति. निब्बानारम्मणतो पन निमित्ता वुट्ठातीति एकतो वुट्ठानं होति. तेनाह ‘‘बहिद्धावुट्ठानविवट्टने पञ्ञा गोत्रभुञाण’’न्ति (पटि. म. मातिका १.१०). तथा ‘‘उप्पादा विवट्टित्वा अनुप्पादं पक्खन्दतीति गोत्रभु, पवत्ता विवट्टित्वा’’ति (पटि. म. १.५९) सब्बं वेदितब्बं. इमानि पन चत्तारिपि ञाणानि अनिमित्तारम्मणत्ता निमित्ततो वुट्ठहन्ति, समुदयस्स समुच्छिन्दनतो पवत्ता वुट्ठहन्तीति दुभतो वुट्ठानानि होन्ति.

तेन वुत्तं –

‘‘कथं दुभतो वुट्ठानविवट्टने पञ्ञा मग्गे ञाणं?

‘‘सोतापत्तिमग्गक्खणे दस्सनट्ठेन सम्मादिट्ठि मिच्छादिट्ठिया वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तेन वुच्चति दुभतो वुट्ठानविवट्टने पञ्ञा मग्गे ञाणं. अभिनिरोपनट्ठेन सम्मासङ्कप्पो मिच्छासङ्कप्पा…पे… परिग्गहट्ठेन सम्मावाचा मिच्छावाचाय. समुट्ठानट्ठेन सम्माकम्मन्तो. वोदानट्ठेन सम्माआजीवो. पग्गहट्ठेन सम्मावायामो ¶ . उपट्ठानट्ठेन सम्मासति. अविक्खेपट्ठेन सम्मासमाधि मिच्छासमाधितो वुट्ठाति, तदनुवत्तककिलेसेहि च ¶ खन्धेहि च वुट्ठाति, बहिद्धा च सब्बनिमित्तेहि वुट्ठाति. तेन वुच्चति ‘दुभतो वुट्ठानविवट्टने पञ्ञा मग्गे ञाण’न्ति.

‘‘सकदागामिमग्गक्खणे दस्सनट्ठेन सम्मादिट्ठि…पे… अविक्खेपट्ठेन सम्मासमाधि ओळारिका कामरागसंयोजना पटिघसंयोजना ओळारिका कामरागानुसया पटिघानुसया वुट्ठाति…पे….

‘‘अनागामिमग्गक्खणे दस्सनट्ठेन सम्मादिट्ठि…पे… अविक्खेपट्ठेन सम्मासमाधि अनुसहगता कामरागसंयोजना पटिघसंयोजना अनुसहगता कामरागानुसया पटिघानुसया वुट्ठाति…पे….

‘‘अरहत्तमग्गक्खणे दस्सनट्ठेन सम्मादिट्ठि…पे… अविक्खेपट्ठेन सम्मासमाधि रूपरागा अरूपरागा माना उद्धच्चा अविज्जाय मानानुसया भवरागानुसया अविज्जानुसया वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तेन वुच्चति ‘दुभतो वुट्ठानविवट्टने पञ्ञा मग्गे ञाण’’’न्ति (पटि. म. १.६१).

८२८. लोकियानञ्च अट्ठन्नं समापत्तीनं भावनाकाले समथबलं अधिकं होति. अनिच्चानुपस्सनादीनं भावनाकाले विपस्सनाबलं. अरियमग्गक्खणे पन युगनद्धा ते धम्मा पवत्तन्ति अञ्ञमञ्ञं अनतिवत्तनट्ठेन. तस्मा इमेसु चतूसुपि ञाणेसु उभयबलसमायोगो होति. यथाह –

‘‘उद्धच्चसहगतकिलेसेहि च खन्धेहि च वुट्ठहतो चित्तस्स एकग्गता अविक्खेपो समाधि निरोधगोचरो, अविज्जासहगतकिलेसेहि च खन्धेहि च वुट्ठहतो अनुपस्सनट्ठेन विपस्सना निरोधगोचरा. इति वुट्ठानट्ठेन समथविपस्सना एकरसा ¶ होन्ति, युगनद्धा होन्ति, अञ्ञमञ्ञं नातिवत्तन्तीति. तेन वुच्चति वुट्ठानट्ठेन समथविपस्सनं युगनद्धं भावेती’’ति (पटि. म. २.५).

एवमेत्थ वुट्ठानबलसमायोगो वेदितब्बो.

पहातब्बधम्मपहानकथा

८२९. ये ¶ येन पहातब्बा धम्मा, तेसं पहानञ्चाति इमेसु पन चतूसु ञाणेसु ये धम्मा येन ञाणेन पहातब्बा, तेसं पहानञ्च जानितब्बं. एतानि हि यथायोगं संयोजनकिलेसमिच्छत्तलोकधम्ममच्छरियविपल्लासगन्थअगतिआसवओघयोगनीवरणपरामासउपादानअनुसयमलअकुसलकम्मपथचित्तुप्पादसङ्खातानं धम्मानं पहानकरानि.

तत्थ संयोजनानीति खन्धेहि खन्धानं फलेन कम्मस्स दुक्खेन वा सत्तानं संयोजकत्ता रूपरागादयो दस धम्मा वुच्चन्ति. यावञ्हि ते, ताव एतेसं अनुपरमोति. तत्रापि रूपरागो अरूपरागो मानो उद्धच्चं अविज्जाति इमे पञ्च उद्धंनिब्बत्तनकखन्धादिसंयोजकत्ता उद्धंभागियसंयोजनानि नाम. सक्कायदिट्ठि विचिकिच्छा सीलब्बतपरामासो कामरागो पटिघोति इमे पञ्च अधोनिब्बत्तनकखन्धादिसंयोजकत्ता अधोभागियसंयोजनानि नाम.

किलेसाति सयं संकिलिट्ठत्ता सम्पयुत्तधम्मानञ्च संकिलेसिकत्ता लोभो दोसो मोहो मानो दिट्ठि विचिकिच्छा थिनं उद्धच्चं अहिरिकं अनोत्तप्पन्ति इमे दस धम्मा.

मिच्छत्ताति मिच्छापवत्तनतो मिच्छादिट्ठि मिच्छासङ्कप्पो मिच्छावाचा मिच्छाकम्मन्तो मिच्छाआजीवो मिच्छावायामो मिच्छासति मिच्छासमाधीति इमे अट्ठ धम्मा. मिच्छाविमुत्तिमिच्छाञाणेहि वा सद्धिं दस.

लोकधम्माति लोकप्पवत्तिया सति अनुपरमधम्मकत्ता लाभो अलाभो यसो अयसो सुखं दुक्खं निन्दा पसंसाति इमे अट्ठ. इध पन कारणोपचारेन लाभादिवत्थुकस्स अनुनयस्स अलाभादिवत्थुकस्स पटिघस्स चेतं लोकधम्मग्गहणेन गहणं कतन्ति वेदितब्बं.

मच्छरियानीति ¶ आवासमच्छरियं कुलमच्छरियं लाभमच्छरियं धम्ममच्छरियं वण्णमच्छरियन्ति इमासु आवासादीसु अञ्ञेसं साधारणभावं असहनाकारेन पवत्तानि पञ्च मच्छरियानि.

विपल्लासाति ¶ अनिच्चदुक्खअनत्तअसुभेसुयेव वत्थूसु ‘‘निच्चं सुखं अत्ता सुभ’’न्ति एवं पवत्तो सञ्ञाविपल्लासो चित्तविपल्लासो दिट्ठिविपल्लासोति इमे तयो.

गन्थाति नामकायस्स चेव रूपकायस्स च गन्थनतो अभिज्झादयो चत्तारो. तथा हि ते अभिज्झा कायगन्थो, ब्यापादो कायगन्थो, सीलब्बतपरामासो कायगन्थो, इदंसच्चाभिनिवेसो कायगन्थो इच्चेव वुत्ता.

अगतीति छन्ददोसमोहभयेहि अकत्तब्बकरणस्स, कत्तब्बाकरणस्स च अधिवचनं. तञ्हि अरियेहि अगन्तब्बत्ता अगतीति वुच्चति.

आसवाति आरम्मणवसेन आगोत्रभुतो, आभवग्गतो च सवना, असंवुतेहि वा द्वारेहि घटछिद्देहि उदकं विय सवनतो निच्चपग्घरणट्ठेन संसारदुक्खस्स वा सवनतो कामरागभवरागमिच्छादिट्ठिअविज्जानमेतं अधिवचनं.

भवसागरे आकड्ढनट्ठेन दुरुत्तरणट्ठेन च ओघातिपि, आरम्मणवियोगस्स चेव दुक्खवियोगस्स च अप्पदानतो योगातिपि तेसञ्ञेव अधिवचनं.

नीवरणानीति चित्तस्स आवरणनीवरणपटिच्छादनट्ठेन कामच्छन्दादयो पञ्च.

परामासोति तस्स तस्स धम्मस्स सभावं अतिक्कम्म परतो अभूतं सभावं आमसनाकारेन पवत्तनतो मिच्छादिट्ठिया एतं अधिवचनं.

उपादानानीति सब्बाकारेन पटिच्चसमुप्पादनिद्देसे वुत्तानि कामुपादानादीनि चत्तारि.

अनुसयाति थामगतट्ठेन कामरागानुसयो, पटिघ, मान, दिट्ठि, विचिकिच्छा, भवराग, अविज्जानुसयोति एवं वुत्ता कामरागादयो सत्त ¶ . ते हि थामगतत्ता पुनप्पुनं कामरागादीनं उप्पत्तिहेतुभावेन अनुसेन्तियेवाति अनुसया.

मलाति ¶ तेलञ्जनकललं विय सयञ्च असुद्धत्ता, अञ्ञेसञ्च असुद्धभावकरणतो लोभदोसमोहा तयो.

अकुसलकम्मपथाति अकुसलकम्मभावेन चेव दुग्गतीनञ्च पथभावेन पाणातिपातो अदिन्नादानं कामेसुमिच्छाचारो मुसावादो पिसुणवाचा फरुसवाचा सम्फप्पलापो अभिज्झा ब्यापादो मिच्छादिट्ठीति इमे दस.

अकुसलचित्तुप्पादाति लोभमूला अट्ठ दोसमूला द्वे मोहमूला द्वेति इमे द्वादस.

८३०. इति एतेसं संयोजनादीनं धम्मानं एतानि यथायोगं पहानकरानि. कथं? संयोजनेसु ताव सक्कायदिट्ठि विचिकिच्छा सीलब्बतपरामासो अपायगमनीया च कामरागपटिघाति एते पञ्च धम्मा पठमञाणवज्झा, सेसा कामरागपटिघा ओळारिका दुतियञाणवज्झा, सुखुमा ततियञाणवज्झा, रूपरागादयो पञ्चपि चतुत्थञाणवज्झा एव. परतोपि च यत्थ यत्थ एवसद्देन नियमं न करिस्साम. तत्थ तत्थ यं यं ‘‘उपरिञाणवज्झो’’ति वक्खाम, सो सो पुरिमञाणेहि हतापायगमनीयादिभावोव हुत्वा उपरिञाणवज्झो होतीति वेदितब्बो.

किलेसेसु दिट्ठिविचिकिच्छा पठमञाणवज्झा, दोसो ततियञाणवज्झो, लोभमोहमानथिनउद्धच्चअहिरिकअनोत्तप्पानि चतुत्थञाणवज्झानि.

मिच्छत्तेसु मिच्छादिट्ठि मुसावादो मिच्छाकम्मन्तो मिच्छाआजीवोति इमे पठमञाणवज्झा, मिच्छासङ्कप्पो पिसुणवाचा फरुसवाचाति इमे ततियञाणवज्झा, चेतनायेव चेत्थ वाचाति वेदितब्बा. सम्फप्पलापमिच्छावायामसतिसमाधिविमुत्तिञाणानि चतुत्थञाणवज्झानि.

लोकधम्मेसु पटिघो ततियञाणवज्झो, अनुनयो चतुत्थञाणवज्झो, यसे च पसंसाय च अनुनयो चतुत्थञाणवज्झोति एके. मच्छरियानि पठमञाणवज्झानेव.

विपल्लासेसु ¶ ¶ अनिच्चे निच्चं, अनत्तनि अत्ताति च सञ्ञाचित्तदिट्ठिविपल्लासा, दुक्खे सुखं, असुभे सुभन्ति दिट्ठिविपल्लासो चाति इमे पठमञाणवज्झा, असुभे सुभन्ति सञ्ञाचित्तविपल्लासा ततियञाणवज्झा, दुक्खे सुखन्ति सञ्ञाचित्तविपल्लासा चतुत्थञाणवज्झा.

गन्थेसु सीलब्बतपरामसइदंसच्चाभिनिवेसकायगन्था पठमञाणवज्झा, ब्यापादकायगन्थो ततियञाणवज्झो, इतरो चतुत्थञाणवज्झो.

अगति पठमञाणवज्झाव.

आसवेसु दिट्ठासवो पठमञाणवज्झो, कामासवो ततियञाणवज्झो, इतरे द्वे चतुत्थञाणवज्झा. ओघयोगेसुपि एसेव नयो.

नीवरणेसु विचिकिच्छानीवरणं पठमञाणवज्झं, कामच्छन्दो ब्यापादो कुक्कुच्चन्ति तीणि ततियञाणवज्झानि, थिनमिद्धउद्धच्चानि चतुत्थञाणवज्झानि.

परामासो पठमञाणवज्झोव.

उपादानेसु सब्बेसम्पि लोकियधम्मानं वत्थुकामवसेन कामाति आगतत्ता रूपारूपरागोपि कामुपादाने पतति, तस्मा तं चतुत्थञाणवज्झं, सेसानि पठमञाणवज्झानि.

अनुसयेसु दिट्ठिविचिकिच्छानुसया पठमञाणवज्झाव, कामरागपटिघानुसया ततियञाणवज्झा, मानभवरागाविज्जानुसया चतुत्थञाणवज्झा.

मलेसु दोसमलं ततियञाणवज्झं, इतरानि चतुत्थञाणवज्झानि.

अकुसलकम्मपथेसु पाणातिपातो अदिन्नादानं मिच्छाचारो मुसावादो मिच्छादिट्ठीति इमे पठमञाणवज्झा ¶ , पिसुणवाचा फरुसवाचा ब्यापादोति तयो ततियञाणवज्झा, सम्फप्पलापाभिज्झा चतुत्थञाणवज्झा.

अकुसलचित्तुप्पादेसु चत्तारो दिट्ठिगतसम्पयुत्ता विचिकिच्छासम्पयुत्तो चाति पञ्च पठमञाणवज्झाव, द्वे पटिघसम्पयुत्ता ततियञाणवज्झा, सेसा चतुत्थञाणवज्झाति.

यञ्च येन वज्झं, तं तेन पहातब्बं नाम. तेन वुत्तं ‘‘इति एतेसं संयोजनादीनं धम्मानं एतानि यथायोगं पहानकरानी’’ति.

८३१. किं ¶ पनेतानि एते धम्मे अतीतानागते पजहन्ति उदाहु पच्चुप्पन्नेति. किं पनेत्थ यदि ताव अतीतानागते, अफलो वायामो आपज्जति. कस्मा? पहातब्बानं नत्थिताय. अथ पच्चुप्पन्ने, तथापि अफलो, वायामेन सद्धिं पहातब्बानं अत्थिताय, संकिलेसिका च मग्गभावना आपज्जति, विप्पयुत्तता वा किलेसानं, न च पच्चुप्पन्नकिलेसो चित्तविप्पयुत्तो नाम अत्थीति. नायं आवेणिका चोदना. पाळियंयेव हि ‘‘स्वायं किलेसे पजहति, अतीते किलेसे पजहति, अनागते किलेसे पजहति, पच्चुप्पन्ने किलेसे पजहती’’ति वत्वा, पुन ‘‘हञ्चि अतीते किलेसे पजहति, तेनहि खीणं खेपेति, निरुद्धं निरोधेति, विगतं विगमेति, अत्थङ्गतं अत्थङ्गमेति. अतीतं यं नत्थि, तं पजहती’’ति (पटि. म. ३.२१) च वत्वा, ‘‘न अतीते किलेसे पजहती’’ति पटिक्खित्तं.

तथा ‘‘हञ्चि अनागते किलेसे पजहति, तेनहि अजातं पजहति, अनिब्बत्तं पजहति, अनुप्पन्नं पजहति, अपातुभूतं पजहति. अनागतं यं नत्थि, तं पजहती’’ति च वत्वा, ‘‘न अनागते किलेसे पजहती’’ति पटिक्खित्तं.

तथा ‘‘हञ्चि पच्चुप्पन्ने किलेसे पजहति, तेनहि रत्तो रागं पजहति. दुट्ठो दोसं, मूळ्हो मोहं, विनिबद्धो मानं, परामट्ठो दिट्ठिं, विक्खेपगतो उद्धच्चं, अनिट्ठङ्गतो विचिकिच्छं, थामगतो अनुसयं पजहति. कण्हसुक्का धम्मा युगनद्धाव वत्तन्ति. संकिलेसिका मग्गभावना होती’’ति च वत्वा, ‘‘न अतीते किलेसे पजहति, न अनागते, न पच्चुप्पन्ने किलेसे पजहती’’ति सब्बं पटिक्खिपित्वा, ‘‘तेनहि नत्थि मग्गभावना, नत्थि फलसच्छिकिरिया ¶ , नत्थि किलेसप्पहानं, नत्थि धम्माभिसमयो’’ति पञ्हापरियोसाने ‘‘न हि नत्थि मग्गभावना…पे… नत्थि धम्माभिसमयो’’ति पटिजानित्वा ‘‘यथा कथं विया’’ति वुत्ते इदं वुत्तं –

‘‘सेय्यथापि तरुणो रुक्खो अजातफलो, तमेनं पुरिसो मूले छिन्देय्य, ये तस्स रुक्खस्स अजातफला, ते अजातायेव न जायन्ति, अनिब्बत्तायेव न निब्बत्तन्ति, अनुप्पन्नायेव न उप्पज्जन्ति, अपातुभूतायेव न पातुभवन्ति, एवमेव ¶ उप्पादो हेतु उप्पादो पच्चयो किलेसानं निब्बत्तियाति उप्पादे आदीनवं दिस्वा अनुप्पादे चित्तं पक्खन्दति, अनुप्पादे चित्तस्स पक्खन्दत्ता ये आयूहनपच्चया किलेसा निब्बत्तेय्युं, ते अजातायेव न जायन्ति…पे… अपातुभूतायेव न पातुभवन्ति, एवं हेतुनिरोधा दुक्खनिरोधो. पवत्तं हेतु…पे… निमित्तं हेतु…पे… आयूहना हेतु…पे… अनायूहने चित्तस्स पक्खन्दत्ता ये आयूहनपच्चया किलेसा निब्बत्तेय्युं, ते अजातायेव…पे… अपातुभूतायेव न पातुभवन्ति, एवं हेतुनिरोधा दुक्खनिरोधो. एवं अत्थि मग्गभावना, अत्थि फलसच्छिकिरिया, अत्थि किलेसप्पहानं, अत्थि धम्माभिसमयो’’ति (पटि. म. ३.२१).

८३२. एतेन किं दीपितं होति? भूमिलद्धानं किलेसानं पहानं दीपितं होति. भूमिलद्धा पन किं अतीतानागता उदाहु पच्चुप्पन्नाति. भूमिलद्धुप्पन्ना एव नाम ते.

८३३. उप्पन्नं हि वत्तमानभूतापगतोकासकतभूमिलद्धवसेन अनेकप्पभेदं. तत्थ सब्बम्पि उप्पादजराभङ्गसमङ्गिसङ्खातं वत्तमानुप्पन्नं नाम. आरम्मणरसं अनुभवित्वा निरुद्धं अनुभूतापगतसङ्खातं कुसलाकुसलं उप्पादादित्तयं अनुप्पत्वा निरुद्धं भूतापगतसङ्खातं सेससङ्खतञ्च भूतापगतुप्पन्नं नाम. ‘‘यानिस्स तानि पुब्बेकतानि कम्मानी’’ति (म. नि. ३.२४८) एवमादिना नयेन वुत्तं कम्मं अतीतम्पि समानं अञ्ञं विपाकं पटिबाहित्वा अत्तनो विपाकस्सोकासं कत्वा ठितत्ता तथा कतोकासञ्च विपाकं अनुप्पन्नम्पि समानं एवं कते ओकासे एकन्तेन उप्पज्जनतो ओकासकतुप्पन्नं नाम. तासु तासु भूमीसु असमूहतं अकुसलं भूमिलद्धुप्पन्नं नाम.

८३४. एत्थ ¶ च भूमिया भूमिलद्धस्स च नानत्तं वेदितब्बं. भूमीति हि विपस्सनाय आरम्मणभूता तेभूमका पञ्चक्खन्धा. भूमिलद्धं नाम तेसु खन्धेसु उप्पत्तिरहं किलेसजातं. तेनहि सा भूमि लद्धा नाम होतीति तस्मा भूमिलद्धन्ति वुच्चति, सा च खो न आरम्मणवसेन. आरम्मणवसेन ¶ हि सब्बेपि अतीतानागते परिञ्ञातेपि च खीणासवानं खन्धे आरब्भ किलेसा उप्पज्जन्ति महाकच्चानउप्पलवण्णादीनं खन्धे आरब्भ सोरेय्यसेट्ठि नन्दमाणवकादीनं विय. यदि च तं भूमिलद्धं नाम सिया, तस्स अप्पहेय्यतो न कोचि भवमूलं पजहेय्य. वत्थुवसेन पन भूमिलद्धं वेदितब्बं. यत्थ यत्थ हि विपस्सनाय अपरिञ्ञाता खन्धा उप्पज्जन्ति, तत्थ तत्थ उप्पादतो पभुति तेसु वट्टमूलं किलेसजातं अनुसेति. तं अप्पहीनट्ठेन भूमिलद्धन्ति वेदितब्बं.

८३५. तत्थ च यस्स येसु खन्धेसु अप्पहीनट्ठेन अनुसयिता किलेसा, तस्स ते एव खन्धा तेसं किलेसानं वत्थु, न अञ्ञेसं सन्तका खन्धा. अतीतक्खन्धेसु च अप्पहीनानुसयितानं किलेसानं अतीतक्खन्धाव वत्थु, न इतरे. एस नयो अनागतादीसु. तथा कामावचरक्खन्धेसु अप्पहीनानुसयितानं किलेसानं कामावचरक्खन्धाव वत्थु, न इतरे. एस नयो रूपारूपावचरेसु. सोतापन्नादीसु पन यस्स यस्स अरियपुग्गलस्स खन्धेसु तं तं वट्टमूलं किलेसजातं तेन तेन मग्गेन पहीनं, तस्स तस्स ते ते खन्धा पहीनानं तेसं तेसं वट्टमूलकिलेसानं अवत्थुतो भूमीति सङ्खं न लभन्ति. पुथुज्जनस्स सब्बसोव वट्टमूलकिलेसानं अप्पहीनत्ता यंकिञ्चि करियमानं कम्मं कुसलं अकुसलं वा होति. इच्चस्स कम्मकिलेसपच्चया वट्टं वट्टति. तस्सेतं वट्टमूलं रूपक्खन्धेयेव, न वेदनाक्खन्धादीसु. विञ्ञाणक्खन्धेयेव वा, न रूपक्खन्धादीसूति न वत्तब्बं. कस्मा? अविसेसेन पञ्चसुपि खन्धेसु अनुसयितत्ता.

८३६. कथं? पथवीरसादि विय रुक्खे. यथा हि महारुक्खे पथवीतलं अधिट्ठाय पथवीरसञ्च आपोरसञ्च निस्साय तप्पच्चया मूलखन्धसाखपसाखपल्लवपलासपुप्फफलेहि वड्ढित्वा नभं पूरेत्वा याव कप्पावसाना बीजपरम्पराय रुक्खपवेणिं सन्तानयमाने ठिते तं पथवीरसादि मूलेयेव, न खन्धादीसु…पे… फलेयेव वा, न मूलादीसूति न वत्तब्बं. कस्मा? अविसेसेन सब्बेसु मूलादीसु अनुगतत्ताति.

यथा ¶ पन तस्सेव रुक्खस्स पुप्फफलादीसु निब्बिन्नो कोचि पुरिसो चतूसु दिसासु मण्डूककण्टकं नाम विसकण्टकं आकोटेय्य, अथ सो ¶ रुक्खो तेन विससम्फस्सेन फुट्ठो पथवीरसआपोरसानं परियादिण्णत्ता अप्पसवनधम्मतं आगम्म पुन सन्तानं निब्बत्तेतुं न सक्कुणेय्य, एवमेव खन्धपवत्तियं निब्बिन्नो कुलपुत्तो तस्स पुरिसस्स चतूसु दिसासु रुक्खे विसयोजनं विय अत्तनो सन्ताने चतुमग्गभावनं आरभति. अथस्स सो खन्धसन्तानो तेन चतुमग्गविससम्फस्सेन सब्बसो वट्टमूलककिलेसानं परियादिण्णत्ता किरियभावमत्तउपगतकायकम्मादिसब्बकम्मप्पभेदो हुत्वा आयतिं पुनब्भवानभिनिब्बत्तनधम्मतं आगम्म भवन्तरसन्तानं निब्बत्तेतुं न सक्कोति. केवलं चरिमविञ्ञाणनिरोधेन निरिन्धनो विय जातवेदो अनुपादानो परिनिब्बायति, एवं भूमिया भूमिलद्धस्स च नानत्तं वेदितब्बं.

८३७. अपिच अपरम्पि समुदाचारआरम्मणाधिग्गहितअविक्खम्भितअसमूहतवसेन चतुब्बिधं उप्पन्नं. तत्थ वत्तमानुप्पन्नमेव समुदाचारुप्पन्नं. चक्खादीनं पन आपाथगते आरम्मणे पुब्बभागे अनुप्पज्जमानम्पि किलेसजातं आरम्मणस्स अधिग्गहितत्ता एव अपरभागे एकन्तेन उप्पत्तितो आरम्मणाधिग्गहितुप्पन्नन्ति वुच्चति, कल्याणिगामे पिण्डाय चरतो महातिस्सत्थेरस्स विसभागरूपदस्सनेन उप्पन्नकिलेसजातं विय. समथविपस्सनानं अञ्ञतरवसेन अविक्खम्भितं किलेसजातं चित्तसन्ततिमनारूळ्हम्पि उप्पत्तिनिवारकस्स हेतुनो अभावा अविक्खम्भितुप्पन्नं नाम. समथविपस्सनावसेन पन विक्खम्भितम्पि अरियमग्गेन असमूहतत्ता उप्पत्तिधम्मतं अनतीतताय असमूहतुप्पन्नन्ति वुच्चति, आकासेन गच्छन्तस्स अट्ठसमापत्तिलाभिनो थेरस्स कुसुमितरुक्खे उपवने पुप्फानि उच्चिनन्तस्स मधुरेन सरेन गायतो मातुगामस्स गीतसवनेन उप्पन्नकिलेसजातं विय. तिविधम्पि चेतं आरम्मणाधिग्गहिताविक्खम्भितअसमूहतुप्पन्नं भूमिलद्धेनेव सङ्गहं गच्छतीति वेदितब्बं.

८३८. इच्चेतस्मिं वुत्तप्पभेदे उप्पन्ने यदेतं वत्तमानभूतापगतोकासकतसमुदाचारसङ्खातं चतुब्बिधं उप्पन्नं, तं अमग्गवज्झत्ता केनचिपि ञाणेन पहातब्बं न होति. यं पनेतं भूमिलद्धारम्मणाधिग्गहितअविक्खम्भितअसमूहतसङ्खातं उप्पन्नं, तस्स तं उप्पन्नभावं विनासयमानं यस्मा तं तं लोकियलोकुत्तरञाणं उप्पज्जति, तस्मा तं सब्बम्पि पहातब्बं होतीति. एवमेत्थ ये येन पहातब्बा धम्मा, तेसं पहानञ्च जानितब्बं.

परिञ्ञादिकिच्चकथा

८३९.

किच्चानि ¶ ¶ परिञ्ञादीनि, यानि वुत्तानि अभिसमयकाले;

तानि च यथासभावेन, जानितब्बानि सब्बानीति.

सच्चाभिसमयकालं हि एतेसु चतूसु ञाणेसु एकेकस्स एकक्खणे परिञ्ञा पहानं सच्छिकिरिया भावनाति एतानि परिञ्ञादीनि चत्तारि किच्चानि वुत्तानि, तानि यथासभावेन जानितब्बानि. वुत्तं हेतं पोराणेहि –

‘‘यथा पदीपो अपुब्बं अचरिमं एकक्खणे चत्तारि किच्चानि करोति, वट्टिं झापेति, अन्धकारं विधमति, आलोकं परिविदंसेति, सिनेहं परियादियति, एवमेव मग्गञाणं अपुब्बं अचरिमं एकक्खणे चत्तारि सच्चानि अभिसमेति, दुक्खं परिञ्ञाभिसमयेन अभिसमेति, समुदयं पहानाभिसमयेन अभिसमेति, मग्गं भावनाभिसमयेन अभिसमेति, निरोधं सच्छिकिरियाभिसमयेन अभिसमेति. किं वुत्तं होति? निरोधं आरम्मणं करित्वा चत्तारिपि सच्चानि पापुणाति पस्सति पटिविज्झती’’ति.

वुत्तम्पि चेतं ‘‘यो, भिक्खवे, दुक्खं पस्सति, दुक्खसमुदयम्पि सो पस्सति, दुक्खनिरोधम्पि पस्सति, दुक्खनिरोधगामिनिं पटिपदम्पि पस्सती’’ति (सं. नि. ५.११००) सब्बं वेदितब्बं.

अपरम्पि वुत्तं ‘‘मग्गसमङ्गिस्स ञाणं, दुक्खेपेतं ञाणं, दुक्खसमुदयेपेतं ञाणं, दुक्खनिरोधेपेतं ञाणं, दुक्खनिरोधगामिनिया पटिपदायपेतं ञाण’’न्ति (विभ. ७९४; पटि. म. १.१०९).

तत्थ यथा पदीपो वट्टिं झापेति, एवं मग्गञाणं दुक्खं परिजानाति. यथा अन्धकारं विधमति, एवं समुदयं पजहति. यथा आलोकं परिविदंसेति, एवं सहजातादिपच्चयताय सम्मासङ्कप्पादिधम्मसङ्खातं मग्गं भावेति. यथा सिनेहं परियादियति, एवं किलेसपरियादानं निरोधं सच्छिकरोतीति एवं उपमासंसन्दनं वेदितब्बं.

८४०. अपरो ¶ नयो – यथा सूरियो उदयन्तो अपुब्बं अचरिमं सह पातुभावा चत्तारि किच्चानि करोति, रूपगतानि ओभासेति, अन्धकारं ¶ विधमति, आलोकं दस्सेति, सीतं पटिप्पस्सम्भेति, एवमेव मग्गञाणं…पे… निरोधं सच्छिकिरियाभिसमयेन अभिसमेति. इधापि यथा सूरियो रूपगतानि ओभासेति, एवं मग्गञाणं दुक्खं परिजानाति. यथा अन्धकारं विधमति, एवं समुदयं पजहति. यथा आलोकं दस्सेति, एवं सहजातादिपच्चयताय मग्गं भावेति. यथा सीतं पटिप्पस्सम्भेति, एवं किलेसपटिप्पस्सद्धिं निरोधं सच्छिकरोतीति एवं उपमासंसन्दनं वेदितब्बं.

८४१. अपरो नयो – यथा नावा अपुब्बं अचरिमं एकक्खणे चत्तारि किच्चानि करोति, ओरिमतीरं पजहति, सोतं छिन्दति, भण्डं वहति, पारिमतीरं अप्पेति, एवमेव मग्गञाणं…पे… निरोधं सच्छिकिरियाभिसमयेन अभिसमेति. एत्थापि यथा नावा ओरिमतीरं पजहति, एवं मग्गञाणं दुक्खं परिजानाति. यथा सोतं छिन्दति, एवं समुदयं पजहति. यथा भण्डं वहति, एवं सहजातादिपच्चयताय मग्गं भावेति. यथा पारिमतीरं अप्पेति, एवं पारिमतीरभूतं निरोधं सच्छिकरोतीति एवं उपमासंसन्दनं वेदितब्बं.

८४२. एवं सच्चाभिसमयकालस्मिं एकक्खणे चतुन्नं किच्चानं वसेन पवत्तञाणस्स पनस्स सोळसहाकारेहि तथट्ठेन चत्तारि किच्चानि एकपटिवेधानि होन्ति. यथाह –

‘‘कथं तथट्ठेन चत्तारि किच्चानि एकपटिवेधानि? सोळसहि आकारेहि तथट्ठेन चत्तारि किच्चानि एकपटिवेधानि. दुक्खस्स पीळनट्ठो, सङ्खतट्ठो, सन्तापट्ठो, विपरिणामट्ठो, तथट्ठो. समुदयस्स आयूहनट्ठो, निदानट्ठो, संयोगट्ठो, पलिबोधट्ठो, तथट्ठो. निरोधस्स निस्सरणट्ठो, विवेकट्ठो, असङ्खतट्ठो, अमतट्ठो, तथट्ठो. मग्गस्स निय्यानट्ठो, हेतुट्ठो, दस्सनट्ठो, अधिपतेय्यट्ठो, तथट्ठो. इमेहि सोळसहि आकारेहि तथट्ठेन चत्तारि सच्चानि एकसङ्गहितानि. यं एकसङ्गहितं, तं एकत्तं. यं एकत्तं, तं एकेन ञाणेन पटिविज्झतीति चत्तारि सच्चानि एकपटिवेधानी’’ति (पटि. म. २.११).

८४३. तत्थ ¶ सिया यदा दुक्खादीनं अञ्ञेपि रोगगण्डादयो अत्था अत्थि, अथ कस्मा चत्तारोयेव वुत्ताति. एत्थ वदाम, अञ्ञसच्चदस्सनवसेन आविभावतो. ‘‘तत्थ कतमं ¶ दुक्खे ञाणं? दुक्खं आरब्भ या उप्पज्जति पञ्ञा पजानना’’तिआदिना (विभ. ७९४; पटि. म. १.१०९) हि नयेन एकेकसच्चारम्मणवसेनापि सच्चञाणं वुत्तं. ‘‘यो, भिक्खवे, दुक्खं पस्सति, समुदयम्पि सो पस्सती’’तिआदिना (सं. नि. ५.११००) नयेन एकं सच्चं आरम्मणं कत्वा सेसेसुपि किच्चनिप्फत्तिवसेनापि वुत्तं.

तत्थ यदा एकेकं सच्चं आरम्मणं करोति, तदा समुदयदस्सनेन ताव सभावतो पीळनलक्खणस्सापि दुक्खस्स, यस्मा तं आयूहनलक्खणेन समुदयेन आयूहितं सङ्खतं रासिकतं, तस्मास्स सो सङ्खतट्ठो आविभवति. यस्मा पन मग्गो किलेससन्तापहरो सुसीतलो, तस्मास्स मग्गस्स दस्सनेन सन्तापट्ठो आविभवति आयस्मतो नन्दस्स अच्छरादस्सनेन सुन्दरिया अनभिरूपभावो विय. अविपरिणामधम्मस्स पन निरोधस्स दस्सनेनस्स विपरिणामट्ठो आविभवतीति वत्तब्बमेवेत्थ नत्थि.

तथा सभावतो आयूहनलक्खणस्सापि समुदयस्स, दुक्खदस्सनेन निदानट्ठो आविभवति असप्पायभोजनतो उप्पन्नब्याधिदस्सनेन भोजनस्स ब्याधिनिदानभावो विय. विसंयोगभूतस्स निरोधस्स दस्सनेन संयोगट्ठो. निय्यानभूतस्स च मग्गस्स दस्सनेन पलिबोधट्ठोति.

तथा निस्सरणलक्खणस्सापि निरोधस्स, अविवेकभूतस्स समुदयस्स दस्सनेन विवेकट्ठो आविभवति. मग्गदस्सनेन असङ्खतट्ठो, इमिना हि अनमतग्गसंसारे मग्गो नदिट्ठपुब्बो, सोपि च सप्पच्चयत्ता सङ्खतोयेवाति अप्पच्चयधम्मस्स असङ्खतभावो अतिविय पाकटो होति. दुक्खदस्सनेन पनस्स अमतट्ठो आविभवति, दुक्खं हि विसं, अमतं निब्बानन्ति.

तथा निय्यानलक्खणस्सापि मग्गस्स, समुदयदस्सनेन ‘‘नायं हेतु निब्बानस्स पत्तिया, अयं हेतू’’ति हेतुट्ठो आविभवति. निरोधदस्सनेन दस्सनट्ठो, परमसुखुमानि रूपानि पस्सतो ‘‘विप्पसन्नं वत मे ¶ चक्खू’’न्ति चक्खुस्स विप्पसन्नभावो विय. दुक्खदस्सनेन अधिपतेय्यट्ठो, अनेकरोगातुरकपणजनदस्सनेन इस्सरजनस्स उळारभावो वियाति एवमेत्थ सलक्खणवसेन एकेकस्स, अञ्ञसच्चदस्सनवसेन च इतरेसं तिण्णं तिण्णं आविभावतो एकेकस्स चत्तारो चत्तारो अत्था वुत्ता. मग्गक्खणे पन सब्बे चेते अत्था एकेनेव दुक्खादीसु ¶ चतुकिच्चेन ञाणेन पटिवेधं गच्छन्तीति. ये पन नानाभिसमयं इच्छन्ति, तेसं उत्तरं अभिधम्मे कथावत्थुस्मिं वुत्तमेव.

परिञ्ञादिप्पभेदकथा

८४४. इदानि यानि तानि परिञ्ञादीनि चत्तारि किच्चानि वुत्तानि, तेसु –

तिविधा होति परिञ्ञा, तथा पहानम्पि सच्छिकिरियापि;

द्वे भावना अभिमता, विनिच्छयो तत्थ ञातब्बो.

८४५. तिविधा होति परिञ्ञाति ञातपरिञ्ञा तीरणपरिञ्ञा पहानपरिञ्ञाति एवं परिञ्ञा तिविधा होति. तत्थ ‘‘अभिञ्ञापञ्ञा ञातट्ठेन ञाण’’न्ति (पटि. म. मातिका १.२०) एवं उद्दिसित्वा ‘‘ये ये धम्मा अभिञ्ञाता होन्ति, ते ते धम्मा ञाता होन्ती’’ति (पटि. म. १.७५) एवं सङ्खेपतो, ‘‘सब्बं, भिक्खवे, अभिञ्ञेय्यं. किञ्च, भिक्खवे, सब्बं अभिञ्ञेय्यं? चक्खुं, भिक्खवे, अभिञ्ञेय्य’’न्तिआदिना (पटि. म. १.२) नयेन वित्थारतो वुत्ता ञातपरिञ्ञा नाम. तस्सा सप्पच्चयनामरूपाभिजानना आवेणिका भूमि.

८४६. ‘‘परिञ्ञापञ्ञा तीरणट्ठेन ञाण’’न्ति (पटि. म. मातिका १.२१) एवं उद्दिसित्वा पन ‘‘ये ये धम्मा परिञ्ञाता होन्ति, ते ते धम्मा तीरिता होन्ती’’ति (पटि. म. १.७५) एवं सङ्खेपतो, ‘‘सब्बं, भिक्खवे, परिञ्ञेय्यं. किञ्च, भिक्खवे, सब्बं परिञ्ञेय्यं? चक्खुं, भिक्खवे, परिञ्ञेय्य’’न्तिआदिना (पटि. म. १.२१) नयेन वित्थारतो वुत्ता तीरणपरिञ्ञा नाम. तस्सा कलापसम्मसनतो पट्ठाय अनिच्चं दुक्खमनत्ताति तीरणवसेन पवत्तमानाय याव अनुलोमा आवेणिका भूमि.

८४७. ‘‘पहानपञ्ञा परिच्चागट्ठेन ञाण’’न्ति (पटि. म. मातिका १.२२) एवं पन उद्दिसित्वा ‘‘ये ये धम्मा पहीना होन्ति, ते ते धम्मा परिच्चत्ता होन्ती’’ति (पटि. म. १.७५) एवं वित्थारतो ¶ वुत्ता ‘‘अनिच्चानुपस्सनाय निच्चसञ्ञं पजहती’’तिआदिनयप्पवत्ता ¶ पहानपरिञ्ञा. तस्सा भङ्गानुपस्सनतो पट्ठाय याव मग्गञाणा भूमि, अयं इध अधिप्पेता.

यस्मा वा ञाततीरणपरिञ्ञायोपि तदत्थायेव, यस्मा च ये धम्मे पजहति, ते नियमतो ञाता चेव तीरिता च होन्ति, तस्मा परिञ्ञात्तयम्पि इमिना परियायेन मग्गञाणस्स किच्चन्ति वेदितब्बं.

८४८. तथा पहानम्पीति पहानम्पि हि विक्खम्भनप्पहानं तदङ्गप्पहानं समुच्छेदप्पहानन्ति परिञ्ञा विय तिविधमेव होति. तत्थ यं ससेवाले उदके पक्खित्तेन घटेन सेवालस्स विय तेन तेन लोकियसमाधिना नीवरणादीनं पच्चनीकधम्मानं विक्खम्भनं, इदं विक्खम्भनप्पहानं नाम. पाळियं पन ‘‘विक्खम्भनप्पहानञ्च नीवरणानं पठमं झानं भावयतो’’ति (पटि. म. १.२४) नीवरणानञ्ञेव विक्खम्भनं वुत्तं, तं पाकटत्ता वुत्तन्ति वेदितब्बं. नीवरणानि हि झानस्स पुब्बभागेपि पच्छाभागेपि न सहसा चित्तं अज्झोत्थरन्ति, वितक्कादयो अप्पितक्खणेयेव. तस्मा नीवरणानं विक्खम्भनं पाकटं.

८४९. यं पन रत्तिभागे समुज्जलितेन पदीपेन अन्धकारस्स विय तेन तेन विपस्सनाय अवयवभूतेन ञाणङ्गेन पटिपक्खवसेनेव तस्स तस्स पहातब्बधम्मस्स पहानं, इदं तदङ्गप्पहानं नाम. सेय्यथिदं – नामरूपपरिच्छेदेन ताव सक्कायदिट्ठिया. पच्चयपरिग्गहेन अहेतुविसमहेतुदिट्ठिया चेव कङ्खामलस्स च. कलापसम्मसनेन ‘‘अहं ममा’’ति समूहगाहस्स. मग्गामग्गववत्थानेन अमग्गे मग्गसञ्ञाय. उदयदस्सनेन उच्छेददिट्ठिया. वयदस्सनेन सस्सतदिट्ठिया. भयतुपट्ठानेन सभये अभयसञ्ञाय. आदीनवदस्सनेन अस्सादसञ्ञाय. निब्बिदानुपस्सनेन अभिरतिसञ्ञाय. मुञ्चितुकम्यताय अमुञ्चितुकामभावस्स. पटिसङ्खानेन अप्पटिसङ्खानस्स. उपेक्खाय अनुपेक्खनस्स. अनुलोमेन सच्चपटिलोमगाहस्स पहानं.

यं वा पन अट्ठारससु महाविपस्सनासु अनिच्चानुपस्सनाय निच्चसञ्ञाय. दुक्खानुपस्सनाय सुखसञ्ञाय. अनत्तानुपस्सनाय अत्तसञ्ञाय. निब्बिदानुपस्सनाय नन्दिया. विरागानुपस्सनाय रागस्स. निरोधानुपस्सनाय ¶ समुदयस्स. पटिनिस्सग्गानुपस्सनाय ¶ आदानस्स. खयानुपस्सनाय घनसञ्ञाय. वयानुपस्सनाय आयूहनस्स. विपरिणामानुपस्सनाय धुवसञ्ञाय. अनिमित्तानुपस्सनाय निमित्तस्स. अप्पणिहितानुपस्सनाय पणिधिया. सुञ्ञतानुपस्सनाय अभिनिवेसस्स. अधिपञ्ञाधम्मविपस्सनाय सारादानाभिनिवेसस्स. यथाभूतञाणदस्सनेन सम्मोहाभिनिवेसस्स. आदीनवानुपस्सनाय आलयाभिनिवेसस्स. पटिसङ्खानुपस्सनाय अप्पटिसङ्खाय. विवट्टानुपस्सनाय संयोगाभिनिवेसस्स पहानं. इदम्पि तदङ्गप्पहानमेव.

८५०. तत्थ यथा अनिच्चानुपस्सनादीहि सत्तहि निच्चसञ्ञादीनं पहानं होति, तं भङ्गानुपस्सने वुत्तमेव.

खयानुपस्सनाति पन घनविनिब्भोगं कत्वा अनिच्चं खयट्ठेनाति एवं खयं पस्सतो ञाणं. तेन घनसञ्ञाय पहानं होति.

वयानुपस्सनाति –

आरम्मणान्वयेन, उभो एकववत्थाना;

निरोधे अधिमुत्तता, वयलक्खणविपस्सनाति. –

एवं वुत्ता पच्चक्खतो चेव अन्वयतो च सङ्खारानं भङ्गं दिस्वा तस्मिञ्ञेव भङ्गसङ्खाते निरोधे अधिमुत्तता, ताय आयूहनस्स पहानं होति. येसं हि अत्थाय आयूहेय्य, ‘‘ते एवं वयधम्मा’’ति विपस्सतो आयूहने चित्तं न नमति.

विपरिणामानुपस्सनाति रूपसत्तकादिवसेन तं तं परिच्छेदं अतिक्कम्म अञ्ञथापवत्तिदस्सनं. उप्पन्नस्स वा जराय चेव मरणेन च द्वीहाकारेहि विपरिणामदस्सनं, ताय धुवसञ्ञाय पहानं होति.

अनिमित्तानुपस्सनाति अनिच्चानुपस्सनाव, ताय निच्चनिमित्तस्स पहानं होति.

अप्पणिहितानुपस्सनाति दुक्खानुपस्सनाव, ताय सुखपणिधिसुखपत्थनापहानं होति.

सुञ्ञतानुपस्सनाति अनत्तानुपस्सनाव, ताय ‘‘अत्थि अत्ता’’ति अभिनिवेसस्स पहानं होति.

अधिपञ्ञाधम्मविपस्सनाति ¶ ¶ –

‘‘आरम्मणञ्च पटिसङ्खा, भङ्गञ्च अनुपस्सति;

सुञ्ञतो च उपट्ठानं, अधिपञ्ञा विपस्सना’’ति. –

एवं वुत्ता रूपादिआरम्मणं जानित्वा तस्स च आरम्मणस्स तदारम्मणस्स च चित्तस्स भङ्गं दिस्वा ‘‘सङ्खाराव भिज्जन्ति, सङ्खारानं मरणं, न अञ्ञो कोचि अत्थी’’ति भङ्गवसेन सुञ्ञतं गहेत्वा पवत्ता विपस्सना. सा अधिपञ्ञा च धम्मेसु च विपस्सनाति कत्वा अधिपञ्ञाधम्मविपस्सनाति वुच्चति, ताय निच्चसाराभावस्स च अत्तसाराभावस्स च सुट्ठु दिट्ठत्ता सारादानाभिनिवेसस्स पहानं होति.

यथाभूतञाणदस्सनन्ति सप्पच्चयनामरूपपरिग्गहो, तेन ‘‘अहोसिं नु खो अहं अतीतमद्धान’’न्तिआदिवसेन चेव, ‘‘इस्सरतो लोको सम्भोती’’तिआदिवसेन च पवत्तस्स सम्मोहाभिनिवेसस्स पहानं होति.

आदीनवानुपस्सनाति भयतुपट्ठानवसेन उप्पन्नं सब्बभवादीसु आदीनवदस्सनञाणं, तेन ‘‘किञ्चि अल्लीयितब्बं न दिस्सती’’ति आलयाभिनिवेसस्स पहानं होति.

पटिसङ्खानुपस्सनाति मुञ्चनस्स उपायकरणं पटिसङ्खाञाणं, तेन अप्पटिसङ्खाय पहानं होति.

विवट्टानुपस्सनाति सङ्खारुपेक्खा चेव अनुलोमञ्च. तदा हिस्स चित्तं ईसकपोणे पदुमपलासे उदकबिन्दु विय सब्बस्मा सङ्खारगता पतिलीयति, पतिकुटति, पतिवत्ततीति वुत्तं. तस्मा ताय संयोगाभिनिवेसस्स पहानं होति, कामसंयोगादिकस्स किलेसाभिनिवेसस्स किलेसप्पवत्तिया पहानं होतीति अत्थो. एवं वित्थारतो तदङ्गप्पहानं वेदितब्बं. पाळियं पन ‘‘तदङ्गप्पहानञ्च दिट्ठिगतानं निब्बेधभागियं समाधिं भावयतो’’ति (पटि. म. १.२४) सङ्खेपेनेव वुत्तं.

८५१. यं ¶ पन असनिविचक्काभिहतस्स रुक्खस्स विय अरियमग्गञाणेन संयोजनादीनं धम्मानं यथा न पुन पवत्ति, एवं पहानं, इदं समुच्छेदप्पहानं नाम. यं सन्धाय वुत्तं ‘‘समुच्छेदप्पहानञ्च लोकुत्तरं खयगामिमग्गं भावयतो’’ति (पटि. म. १.२४) ¶ . इति इमेसु तीसु पहानेसु समुच्छेदप्पहानमेव इध अधिप्पेतं. यस्मा पन तस्स योगिनो पुब्बभागे विक्खम्भनतदङ्गप्पहानानिपि तदत्थानेव, तस्मा पहानत्तयम्पि इमिना परियायेन मग्गञाणस्स किच्चन्ति वेदितब्बं. पटिराजानं वधित्वा रज्जं पत्तेन हि यम्पि ततो पुब्बे कतं, सब्बं ‘‘इदञ्चिदञ्च रञ्ञा कत’’न्तियेव वुच्चति.

८५२. सच्छिकिरियापीति लोकियसच्छिकिरिया लोकुत्तरसच्छिकिरियाति द्वेधा भिन्नापि लोकुत्तराय दस्सनभावनावसेन भेदतो तिविधा होति. तत्थ ‘‘पठमस्स झानस्स लाभीम्हि, वसीम्हि, पठमज्झानं सच्छिकतं मया’’तिआदिना (पारा. २०३-२०४) नयेन आगता पठमज्झानादीनं फस्सना लोकियसच्छिकिरिया नाम. फस्सनाति अधिगन्त्वा ‘‘इदं मया अधिगत’’न्ति पच्चक्खतो ञाणफस्सेन फुसना. इममेव हि अत्थं सन्धाय ‘‘सच्छिकिरिया पञ्ञा फस्सनट्ठे ञाण’’न्ति (पटि. म. मातिका १.२४) उद्दिसित्वा ‘‘ये ये धम्मा सच्छिकता होन्ति, ते ते धम्मा फस्सिता होन्ती’’ति (पटि. म. १.७५) सच्छिकिरियनिद्देसो वुत्तो.

अपिच अत्तनो सन्ताने अनुप्पादेत्वापि ये धम्मा केवलं अपरप्पच्चयेन ञाणेन ञाता, ते सच्छिकता होन्ति. तेनेव हि ‘‘सब्बं, भिक्खवे, सच्छिकातब्बं. किञ्च, भिक्खवे, सब्बं सच्छिकातब्बं? चक्खु, भिक्खवे, सच्छिकातब्ब’’न्तिआदि (पटि. म. १.२९) वुत्तं.

अपरम्पि वुत्तं ‘‘रूपं पस्सन्तो सच्छिकरोति. वेदनं…पे… विञ्ञाणं पस्सन्तो सच्छिकरोति. चक्खुं…पे… जरामरणं…पे… अमतोगधं निब्बानं पस्सन्तो सच्छिकरोतीति. ये ये धम्मा सच्छिकता होन्ति, ते ते धम्मा फस्सिता होन्ती’’ति (पटि. म. १.२९).

पठममग्गक्खणे पन निब्बानदस्सनं दस्सनसच्छिकिरिया. सेसमग्गक्खणेसु भावनासच्छिकिरियाति. सा दुविधापि इध अधिप्पेता. तस्मा दस्सनभावनावसेन निब्बानस्स सच्छिकिरिया इमस्स ञाणस्स किच्चन्ति वेदितब्बं.

८५३. द्वे ¶ ¶ भावना अभिमताति भावना पन लोकियभावना लोकुत्तरभावनाति द्वेयेव अभिमता. तत्थ लोकियानं सीलसमाधिपञ्ञानं उप्पादनं, ताहि च सन्तानवासनं लोकियभावना. लोकुत्तरानं उप्पादनं, ताहि च सन्तानवासनं लोकुत्तरभावना. तासु इध लोकुत्तरा अधिप्पेता. लोकुत्तरानि हि सीलादीनि चतुब्बिधम्पेतं ञाणं उप्पादेति. तेसं सहजातपच्चयादिताय तेहि च सन्तानं वासेतीति लोकुत्तरभावनावस्स किच्चन्ति.

एवं –

किच्चानि परिञ्ञादीनि, यानि वुत्तानि अभिसमयकाले;

तानि च यथासभावेन, जानितब्बानि सब्बानीति.

एत्तावता च –

‘‘सीले पतिट्ठाय नरो सपञ्ञो, चित्तं पञ्ञञ्च भावय’’न्ति. –

एवं सरूपेनेव आभताय पञ्ञाभावनाय विधानदस्सनत्थं यं वुत्तं ‘‘मूलभूता द्वे विसुद्धियो सम्पादेत्वा सरीरभूता पञ्च विसुद्धियो सम्पादेन्तेन भावेतब्बा’’ति, तं वित्थारितं होति. कथं भावेतब्बाति अयञ्च पञ्हो विस्सज्जितोति.

इति साधुजनपामोज्जत्थाय कते विसुद्धिमग्गे

पञ्ञाभावनाधिकारे

ञाणदस्सनविसुद्धिनिद्देसो नाम

बावीसतिमो परिच्छेदो.

२३. पञ्ञाभावनानिसंसनिद्देसो

आनिसंसपकासना

८५४. यं ¶ ¶ पन वुत्तं ‘‘पञ्ञाभावनाय को आनिसंसो’’ति, तत्थ वदाम. अयञ्हि पञ्ञाभावना नाम अनेकसतानिसंसा. तस्सा दीघेनापि अद्धुना न सुकरं वित्थारतो आनिसंसं पकासेतुं. सङ्खेपतो पनस्सा नानाकिलेसविद्धंसनं, अरियफलरसानुभवनं, निरोधसमापत्तिसमापज्जनसमत्थता, आहुनेय्यभावादिसिद्धीति अयमानिसंसो वेदितब्बो.

नानाकिलेसविद्धंसनकथा

८५५. तत्थ यं नामरूपपरिच्छेदतो पट्ठाय सक्कायदिट्ठादीनं वसेन नानाकिलेसविद्धंसनं वुत्तं, अयं लोकिकाय पञ्ञाभावनाय आनिसंसो. यं अरियमग्गक्खणे संयोजनादीनं वसेन नानाकिलेसविद्धंसनं वुत्तं, अयं लोकुत्तराय पञ्ञाभावनाय आनिसंसोति वेदितब्बो.

भीमवेगानुपतिता, असनीव सिलुच्चये;

वायुवेगसमुट्ठितो, अरञ्ञमिव पावको.

अन्धकारं विय रवि, सतेजुज्जलमण्डलो;

दीघरत्तानुपतितं, सब्बानत्थविधायकं.

किलेसजालं पञ्ञा हि, विद्धंसयति भाविता;

सन्दिट्ठिकमतो जञ्ञा, आनिसंसमिमं इध.

फलसमापत्तिकथा

८५६. अरियफलरसानुभवनन्ति ¶ न केवलञ्च किलेसविद्धंसनञ्ञेव, अरियफलरसानुभवनम्पि पञ्ञाभावनाय आनिसंसो. अरियफलन्ति हि सोतापत्तिफलादि सामञ्ञफलं वुच्चति. तस्स द्वीहाकारेहि रसानुभवनं होति. मग्गवीथियञ्च फलसमापत्तिवसेन च पवत्तियं. तत्रास्स मग्गवीथियं पवत्ति दस्सितायेव.

८५७. अपिच ¶ ये ‘‘संयोजनप्पहानमत्तमेव फलं नाम, न कोचि अञ्ञो धम्मो अत्थी’’ति वदन्ति, तेसं अनुनयत्थं इदं सुत्तम्पि दस्सेतब्बं – ‘‘कथं पयोगपटिप्पस्सद्धिपञ्ञा फले ञाणं? सोतापत्तिमग्गक्खणे दस्सनट्ठेन सम्मादिट्ठि मिच्छादिट्ठिया वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तम्पयोगपटिप्पस्सद्धत्ता उप्पज्जति सम्मादिट्ठि, मग्गस्सेतं फल’’न्ति (पटि. म. १.६३) वित्थारेतब्बं.

‘‘चत्तारो मग्गा अपरियापन्ना, चत्तारि च सामञ्ञफलानि, इमे धम्मा अप्पमाणारम्मणा’’ (ध. स. १४२२). ‘‘महग्गतो धम्मो अप्पमाणस्स धम्मस्स अनन्तरपच्चयेन पच्चयो’’ति (पट्ठा. २.१२.६२) एवमादीनिपि चेत्थ साधकानि.

८५८. फलसमापत्तियं पवत्तिदस्सनत्थं पनस्स इदं पञ्हाकम्मं – का फलसमापत्ति, के तं समापज्जन्ति, के न समापज्जन्ति, कस्मा समापज्जन्ति, कथञ्चस्सा समापज्जनं होति, कथं ठानं, कथं वुट्ठानं, किं फलस्स अनन्तरं, कस्स च फलं अनन्तरन्ति?

८५९. तत्थ का फलसमापत्तीति या अरियफलस्स निरोधे अप्पना.

८६०. के तं समापज्जन्ति, के न समापज्जन्तीति सब्बेपि पुथुज्जना न समापज्जन्ति. कस्मा? अनधिगतत्ता. अरिया पन सब्बेपि समापज्जन्ति. कस्मा? अधिगतत्ता. उपरिमा पन हेट्ठिमं न समापज्जन्ति, पुग्गलन्तरभावुपगमनेन पटिप्पस्सद्धत्ता. हेट्ठिमा च उपरिमं, अनधिगतत्ता. अत्तनो अत्तनोयेव पन फलं समापज्जन्तीति इदमेत्थ सन्निट्ठानं.

केचि पन ‘‘सोतापन्नसकदागामिनोपि न समापज्जन्ति. उपरिमा द्वेयेव समापज्जन्ती’’ति ¶ वदन्ति. इदञ्च तेसं कारणं, एते हि समाधिस्मिं परिपूरकारिनोति. तं पुथुज्जनस्सापि अत्तना पटिलद्धलोकियसमाधिसमापज्जनतो अकारणमेव. किञ्चेत्थ कारणाकारणचिन्ताय. ननु पाळियंयेव वुत्तं – ‘‘कतमे दस गोत्रभुधम्मा विपस्सनावसेन उप्पज्जन्ति? सोतापत्तिमग्गपटिलाभत्थाय उप्पादं पवत्तं…पे… उपायासं बहिद्धा सङ्खारनिमित्तं अभिभुय्यतीति गोत्रभु. सोतापत्तिफलसमापत्तत्थाय सकदागामिमग्गं ¶ …पे… अरहत्तफलसमापत्तत्थाय… सुञ्ञतविहारसमापत्तत्थाय… अनिमित्तविहारसमापत्तत्थाय उप्पादं…पे… बहिद्धा सङ्खारनिमित्तं अभिभुय्यतीति गोत्रभू’’ति (पटि. म. १.६०). तस्मा सब्बेपि अरिया अत्तनो अत्तनो फलं समापज्जन्तीति निट्ठमेत्थ गन्तब्बं.

८६१. कस्मा समापज्जन्तीति दिट्ठधम्मसुखविहारत्थं. यथा हि राजा रज्जसुखं, देवता दिब्बसुखं अनुभवन्ति, एवं अरिया ‘‘अरियं लोकुत्तरसुखं अनुभविस्सामा’’ति अद्धानप्परिच्छेदं कत्वा इच्छितिच्छितक्खणे फलसमापत्तिं समापज्जन्ति.

८६२. कथञ्चस्सा समापज्जनं होति, कथं ठानं, कथं वुट्ठानन्ति द्वीहि ताव आकारेहि अस्सा समापज्जनं होति – निब्बानतो अञ्ञस्स आरम्मणस्स अमनसिकारा निब्बानस्स च मनसिकारा. यथाह – ‘‘द्वे खो, आवुसो, पच्चया अनिमित्ताय चेतोविमुत्तिया समापत्तिया सब्बनिमित्तानञ्च अमनसिकारो, अनिमित्ताय च धातुया मनसिकारो’’ति (म. नि. १.४५८).

८६३. अयम्पनेत्थ समापज्जनक्कमो. फलसमापत्तत्थिकेन हि अरियसावकेन रहोगतेन पटिसल्लीनेन उदयब्बयादिवसेन सङ्खारा विपस्सितब्बा. तस्स पवत्तानुपुब्बविपस्सनस्स सङ्खारारम्मणगोत्रभुञाणानन्तरा फलसमापत्तिवसेन निरोधे चित्तं अप्पेति. फलसमापत्तिनिन्नताय चेत्थ सेक्खस्सापि फलमेव उप्पज्जति, न मग्गो.

ये पन वदन्ति ‘‘सोतापन्नो ‘फलसमापत्तिं समापज्जिस्सामी’ति विपस्सनं पट्ठपेत्वा सकदागामी होति. सकदागामी च अनागामी’’ति, ते वत्तब्बा ‘‘एवं सति अनागामी अरहा भविस्सति, अरहा पच्चेकबुद्धो, पच्चेकबुद्धो च बुद्धो. तस्मा न किञ्चि एतं, पाळिवसेनेव च पटिक्खित्त’’न्तिपि न गहेतब्बं. इदमेव पन गहेतब्बं – सेक्खस्सापि फलमेव ¶ उप्पज्जति, न मग्गो. फलञ्चस्स सचे अनेन पठमज्झानिको मग्गो अधिगतो होति. पठमज्झानिकमेव उप्पज्जति. सचे दुतियादीसु अञ्ञतरज्झानिको, दुतियादीसु अञ्ञतरज्झानिकमेवाति. एवं तावस्सा समापज्जनं होति.

८६४. ‘‘तयो ¶ खो, आवुसो, पच्चया अनिमित्ताय चेतोविमुत्तिया ठितिया सब्बनिमित्तानञ्च अमनसिकारो, अनिमित्ताय च धातुया मनसिकारो, पुब्बे च अभिसङ्खारो’’ति (म. नि. १.४५८) वचनतो पनस्सा तीहाकारेहि ठानं होति. तत्थ पुब्बे च अभिसङ्खारोति समापत्तितो पुब्बे कालपरिच्छेदो. ‘‘असुकस्मिं नाम काले वुट्ठहिस्सामी’’ति परिच्छिन्नत्ता हिस्सा याव सो कालो नागच्छति, ताव ठानं होति. एवमस्सा ठानं होतीति.

८६५. ‘‘द्वे खो, आवुसो, पच्चया अनिमित्ताय चेतोविमुत्तिया वुट्ठानाय सब्बनिमित्तानञ्च मनसिकारो, अनिमित्ताय च धातुया अमनसिकारो’’ति (म. नि. १.४५८) वचनतो पनस्सा द्वीहाकारेहि वुट्ठानं होति. तत्थ सब्बनिमित्तानन्ति रूपनिमित्तवेदनासञ्ञासङ्खारविञ्ञाणनिमित्तानं. कामञ्च न सब्बानेवेतानि एकतो मनसिकरोति सब्बसङ्गाहिकवसेन पनेतं वुत्तं. तस्मा यं भवङ्गस्स आरम्मणं होति, तं मनसिकरोतो फलसमापत्तिवुट्ठानं होतीति एवमस्सा वुट्ठानं वेदितब्बं.

८६६. किं फलस्स अनन्तरं, कस्स च फलं अनन्तरन्ति फलस्स ताव फलमेव वा अनन्तरं होति, भवङ्गं वा. फलं पन अत्थि मग्गानन्तरं, अत्थि फलानन्तरं, अत्थि गोत्रभुअनन्तरं, अत्थि नेवसञ्ञानासञ्ञायतनानन्तरं. तत्थ मग्गवीथियं मग्गानन्तरं, पुरिमस्स पुरिमस्स पच्छिमं पच्छिमं फलानन्तरं. फलसमापत्तीसु पुरिमं पुरिमं गोत्रभुअनन्तरं. गोत्रभूति चेत्थ अनुलोमं वेदितब्बं. वुत्तञ्हेतं पट्ठाने – ‘‘अरहतो अनुलोमं फलसमापत्तिया अनन्तरपच्चयेन पच्चयो. सेक्खानं अनुलोमं फलसमापत्तिया अनन्तरपच्चयेन पच्चयो’’ति (पट्ठा. १.१.४१७). येन फलेन निरोधा वुट्ठानं होति, तं नेवसञ्ञानासञ्ञायतनानन्तरन्ति. तत्थ ठपेत्वा मग्गवीथियं उप्पन्नं फलं अवसेसं सब्बं फलसमापत्तिवसेन पवत्तं नाम. एवमेतं मग्गवीथियं फलसमापत्तियं वा उप्पज्जनवसेन,

पटिप्पस्सद्धदरथं ¶ , अमतारम्मणं सुभं;

वन्तलोकामिसं सन्तं, सामञ्ञफलमुत्तमं.

ओजवन्तेन सुचिना, सुखेन अभिसन्दितं;

येन सातातिसातेन, अमतेन मधुं विय.

तं ¶ सुखं तस्स अरियस्स, रसभूतमनुत्तरं;

फलस्स पञ्ञं भावेत्वा, यस्मा विन्दति पण्डितो.

तस्मा अरियफलस्सेतं, रसानुभवनं इध;

विपस्सनाभावनाय, आनिसंसोति वुच्चति.

निरोधसमापत्तिकथा

८६७. निरोधसमापत्तिसमापज्जनसमत्थताति न केवलञ्च अरियफलरसानुभवनंयेव, अयं पन निरोधसमापत्तिया समापज्जनसमत्थतापि इमिस्सा पञ्ञाभावनाय आनिसंसोति वेदितब्बो.

तत्रिदं निरोधसमापत्तिया विभावनत्थं पञ्हाकम्मं – का निरोधसमापत्ति, के तं समापज्जन्ति, के न समापज्जन्ति, कत्थ समापज्जन्ति, कस्मा समापज्जन्ति, कथञ्चस्सा समापज्जनं होति, कथं ठानं, कथं वुट्ठानं, वुट्ठितस्स किंनिन्नं चित्तं होति, मतस्स च समापन्नस्स च को विसेसो, निरोधसमापत्ति किं सङ्खता असङ्खता लोकिया लोकुत्तरा निप्फन्ना अनिप्फन्नाति?

८६८. तत्थ का निरोधसमापत्तीति या अनुपुब्बनिरोधवसेन चित्तचेतसिकानं धम्मानं अप्पवत्ति. के तं समापज्जन्ति, के न समापज्जन्तीति सब्बेपि पुथुज्जना, सोतापन्ना, सकदागामिनो, सुक्खविपस्सका च अनागामिनो, अरहन्तो न समापज्जन्ति. अट्ठसमापत्तिलाभिनो पन अनागामिनो, खीणासवा च समापज्जन्ति. ‘‘द्वीहि बलेहि समन्नागतत्ता ¶ , तयो च सङ्खारानं पटिप्पस्सद्धिया, सोळसहि ञाणचरियाहि, नवहि समाधिचरियाहि वसीभावता पञ्ञा निरोधसमापत्तिया ञाण’’न्ति (पटि. म. मातिका १.३४) हि वुत्तं. अयञ्च सम्पदा ठपेत्वा अट्ठसमापत्तिलाभिनो अनागामिखीणासवे अञ्ञेसं नत्थि. तस्मा तेयेव समापज्जन्ति, न अञ्ञे.

८६९. कतमानि पनेत्थ द्वे बलानि…पे… कतमा वसीभावताति? न एत्थ किञ्चि अम्हेहि वत्तब्बं अत्थि. सब्बमिदं एतस्स उद्देसस्स निद्देसे वुत्तमेव. यथाह –

‘‘द्वीहि ¶ बलेहीति द्वे बलानि समथबलं विपस्सनाबलं. कतमं समथबलं? नेक्खम्मवसेन चित्तस्स एकग्गता अविक्खेपो समथबलं. अब्यापादवसेन… आलोकसञ्ञावसेन… अविक्खेपवसेन…पे… पटिनिस्सग्गानुपस्सिअस्सासवसेन… पटिनिस्सग्गानुपस्सिपस्सासवसेन चित्तस्स एकग्गता अविक्खेपो समथबलन्ति. केनट्ठेन समथबलं? पठमज्झानेन नीवरणे न कम्पतीति समथबलं. दुतियज्झानेन वितक्कविचारे…पे… नेवसञ्ञानासञ्ञायतनसमापत्तिया आकिञ्चञ्ञायतनसञ्ञाय न कम्पतीति समथबलं. उद्धच्चे च उद्धच्चसहगतकिलेसे च खन्धे च न कम्पति न चलति न वेधतीति समथबलं. इदं समथबलं.

‘‘कतमं विपस्सनाबलं? अनिच्चानुपस्सना विपस्सनाबलं. दुक्खानुपस्सना… अनत्तानुपस्सना… निब्बिदानुपस्सना… विरागानुपस्सना… निरोधानुपस्सना… पटिनिस्सग्गानुपस्सना विपस्सनाबलं. रूपे अनिच्चानुपस्सना…पे… रूपे पटिनिस्सग्गानुपस्सना विपस्सनाबलं. वेदनाय… सञ्ञाय… सङ्खारेसु… विञ्ञाणे… चक्खुस्मिं…पे… जरामरणे अनिच्चानुपस्सना. जरामरणे पटिनिस्सग्गानुपस्सना विपस्सनाबलन्ति. केनट्ठेन विपस्सनाबलं? अनिच्चानुपस्सनाय निच्चसञ्ञाय न कम्पतीति विपस्सनाबलं. दुक्खानुपस्सनाय सुखसञ्ञाय न कम्पतीति… अनत्तानुपस्सनाय अत्तसञ्ञाय न कम्पतीति… निब्बिदानुपस्सनाय नन्दिया न कम्पतीति… विरागानुपस्सनाय रागे न कम्पतीति… निरोधानुपस्सनाय समुदये न कम्पतीति… पटिनिस्सग्गानुपस्सनाय आदाने न कम्पतीति विपस्सनाबलं. अविज्जाय ¶ च अविज्जासहगतकिलेसे च खन्धे च न कम्पति न चलति न वेधतीति विपस्सनाबलं. इदं विपस्सनाबलं.

‘‘तयो च सङ्खारानं पटिप्पस्सद्धियाति कतमेसं तिण्णन्नं सङ्खारानं पटिप्पस्सद्धिया? दुतियज्झानं समापन्नस्स वितक्कविचारा वचीसङ्खारा पटिप्पस्सद्धा होन्ति. चतुत्थं झानं समापन्नस्स अस्सासपस्सासा कायसङ्खारा पटिप्पस्सद्धा होन्ति. सञ्ञावेदयितनिरोधं समापन्नस्स सञ्ञा च वेदना च चित्तसङ्खारा पटिप्पस्सद्धा होन्ति. इमेसं तिण्णन्नं सङ्खारानं पटिप्पस्सद्धिया.

‘‘सोळसहि ¶ ञाणचरियाहीति कतमाहि सोळसहि ञाणचरियाहि? अनिच्चानुपस्सना ञाणचरिया. दुक्खा… अनत्ता… निब्बिदा… विरागा… निरोधा… पटिनिस्सग्गा… विवट्टानुपस्सना ञाणचरिया. सोतापत्तिमग्गो ञाणचरिया. सोतापत्तिफलसमापत्ति ञाणचरिया. सकदागामिमग्गो…पे… अरहत्तफलसमापत्ति ञाणचरिया. इमाहि सोळसहि ञाणचरियाहि.

‘‘नवहि समाधिचरियाहीति कतमाहि नवहि समाधिचरियाहि? पठमज्झानं समाधिचरिया. दुतियज्झानं…पे… नेवसञ्ञानासञ्ञायतनसमापत्ति समाधिचरिया. पठमज्झानपटिलाभत्थाय वितक्को च विचारो च पीति च सुखञ्च चित्तेकग्गता च…पे… नेवसञ्ञानासञ्ञायतनसमापत्तिं पटिलाभत्थाय वितक्को च विचारो च पीति च सुखञ्च चित्तेकग्गता च. इमाहि नवहि समाधिचरियाहि.

‘‘वसीति पञ्च वसियो – आवज्जनवसी, समापज्जनवसी, अधिट्ठानवसी, वुट्ठानवसी, पच्चवेक्खणवसी. पठमज्झानं यत्थिच्छकं यदिच्छकं यावतिच्छकं आवज्जति, आवज्जनाय दन्धायितत्तं नत्थीति आवज्जनवसी. पठमज्झानं यत्थिच्छकं यदिच्छकं यावतिच्छकं समापज्जति, समापज्जनाय दन्धायितत्तं नत्थीति समापज्जनवसी…पे… अधिट्ठाति अधिट्ठाने…पे… वुट्ठाति वुट्ठाने…पे… पच्चवेक्खति पच्चवेक्खणाय दन्धायितत्तं नत्थीति पच्चवेक्खणवसी. दुतियं…पे… नेवसञ्ञानासञ्ञायतनसमापत्तिं यत्थिच्छकं यदिच्छकं यावतिच्छकं आवज्जति ¶ …पे… पच्चवेक्खति. पच्चवेक्खणाय दन्धायितत्तं नत्थीति पच्चवेक्खणवसी. इमा पञ्च वसियो’’ति (पटि. म. १.८३).

८७०. एत्थ च ‘‘सोळसहि ञाणचरियाही’’ति उक्कट्ठनिद्देसो एस. अनागामिनो पन चुद्दसहि ञाणचरियाहि होति. यदि एवं सकदागामिनो द्वादसहि सोतापन्नस्स च दसहि किं न होतीति? न होति, समाधिपारिबन्धिकस्स पञ्च कामगुणिकरागस्स अप्पहीनत्ता. तेसं हि सो अप्पहीनो. तस्मा समथबलं न परिपुण्णं होति, तस्मिं अपरिपूरे द्वीहि बलेहि समापज्जितब्बं निरोधसमापत्तिं बलवेकल्लेन समापज्जितुं न सक्कोन्ति. अनागामिस्स पन सो पहीनो, तस्मा एस परिपुण्णबलो ¶ होति. परिपुण्णबलत्ता सक्कोति. तेनाह भगवा – ‘‘निरोधा वुट्ठहन्तस्स नेवसञ्ञानासञ्ञायतनकुसलं फलसमापत्तिया अनन्तरपच्चयेन पच्चयो’’ति (पट्ठा. १.१.४१७). इदञ्हि पट्ठाने महापकरणे अनागामिनोव निरोधा वुट्ठानं सन्धाय वुत्तन्ति.

८७१. कत्थ समापज्जन्तीति पञ्चवोकारभवे. कस्मा? अनुपुब्बसमापत्तिसब्भावतो. चतुवोकारभवे पन पठमज्झानादीनं उप्पत्ति नत्थि. तस्मा न सक्का तत्थ समापज्जितुन्ति. केचि पन ‘‘वत्थुस्स अभावा’’ति वदन्ति.

८७२. कस्मा समापज्जन्तीति सङ्खारानं पवत्तिभेदे उक्कण्ठित्वा दिट्ठेव धम्मे अचित्तका हुत्वा ‘‘निरोधं निब्बानं पत्वा सुखं विहरिस्सामा’’ति समापज्जन्ति.

८७३. कथञ्चस्सा समापज्जनं होतीति समथविपस्सनावसेन उस्सक्कित्वा कतपुब्बकिच्चस्स नेवसञ्ञानासञ्ञायतनं निरोधयतो, एवमस्स समापज्जनं होति. यो हि समथवसेनेव उस्सक्कति, सो नेवसञ्ञानासञ्ञायतनसमापत्तिं पत्वा तिट्ठति. यो पन विपस्सनावसेनेव उस्सक्कति, सो फलसमापत्तिं पत्वा तिट्ठति. यो पन उभयवसेनेव उस्सक्कित्वा पुब्बकिच्चं कत्वा नेवसञ्ञानासञ्ञायतनं निरोधेति, सो तं समापज्जतीति अयमेत्थ सङ्खेपो.

८७४. अयं पन वित्थारो – इध भिक्खु निरोधं समापज्जितुकामो कतभत्तकिच्चो सुधोतहत्थपादो ¶ विवित्ते ओकासे सुपञ्ञत्तम्हि आसने निसीदति पल्लङ्कं आभुजित्वा उजुं कायं पणिधाय परिमुखं सतिं उपट्ठपेत्वा, सो पठमं झानं समापज्जित्वा वुट्ठाय तत्थ सङ्खारे अनिच्चतो दुक्खतो अनत्ततो विपस्सति.

विपस्सना पनेसा तिविधा होति – सङ्खारपरिगण्हनकविपस्सना, फलसमापत्तिविपस्सना, निरोधसमापत्तिविपस्सनाति. तत्थ सङ्खारपरिगण्हनकविपस्सना मन्दा वा होतु तिक्खा वा, मग्गस्स पदट्ठानं होतियेव. फलसमापत्तिविपस्सना ¶ तिक्खाव वट्टति मग्गभावनासदिसा. निरोधसमापत्तिविपस्सना पन नातिमन्दनातितिक्खा वट्टति. तस्मा एस नातिमन्दाय नातितिक्खाय विपस्सनाय ते सङ्खारे विपस्सति.

ततो दुतियं झानं समापज्जित्वा वुट्ठाय तत्थ सङ्खारे तथेव विपस्सति. ततो ततियं झानं…पे… ततो विञ्ञाणञ्चायतनं समापज्जित्वा वुट्ठाय तत्थ सङ्खारे तथेव विपस्सति. तथा आकिञ्चञ्ञायतनं समापज्जित्वा वुट्ठाय चतुब्बिधं पुब्बकिच्चं करोति – नानाबद्धअविकोपनं, सङ्घपटिमाननं, सत्थुपक्कोसनं, अद्धानपरिच्छेदन्ति.

८७५. तत्थ नानाबद्धअविकोपनन्ति यं इमिना भिक्खुना सद्धिं एकाबद्धं न होति, नानाबद्धं हुत्वा ठितं पत्तचीवरं वा मञ्चपीठं वा निवासगेहं वा अञ्ञं वा पन किञ्चि परिक्खारजातं, तं यथा न विकुप्पति, अग्गिउदकवातचोरउन्दूरादीनं वसेन न विनस्सति, एवं अधिट्ठातब्बं.

तत्रिदं अधिट्ठानविधानं ‘‘इदञ्च इदञ्च इमस्मिं सत्ताहब्भन्तरे मा अग्गिना झायतु, मा उदकेन वुय्हतु, मा वातेन विद्धंसतु, मा चोरेहि हरियतु, मा उन्दूरादीहि खज्जतू’’ति. एवं अधिट्ठिते तं सत्ताहं तस्स न कोचि परिस्सयो होति.

अनधिट्ठहतो पन अग्गिआदीहि विनस्सति महानागत्थेरस्स विय. थेरो किर मातुउपासिकाय गामं पिण्डाय पाविसि. उपासिका यागुं दत्वा आसनसालाय निसीदापेसि. थेरो निरोधं समापज्जित्वा निसीदि. तस्मिं निसिन्ने आसनसालाय अग्गिना गहिताय सेसभिक्खू अत्तनो अत्तनो निसिन्नासनं गहेत्वा पलायिंसु. गामवासिका सन्निपतित्वा ¶ थेरं दिस्वा ‘‘अलससमणो’’ति आहंसु. अग्गि तिणवेणुकट्ठानि झापेत्वा थेरं परिक्खिपित्वा अट्ठासि. मनुस्सा घटेहि उदकं आहरित्वा निब्बापेत्वा छारिकं अपनेत्वा परिभण्डं कत्वा पुप्फानि विकिरित्वा नमस्समाना अट्ठंसु. थेरो परिच्छिन्नकालवसेन वुट्ठाय ते दिस्वा ‘‘पाकटोम्हि जातो’’ति वेहासं उप्पतित्वा पियङ्गुदीपं अगमासि. इदं नानाबद्धअविकोपनं नाम.

यं एकाबद्धं होति निवासनपावुरणं वा निसिन्नासनं वा, तत्थ विसुं अधिट्ठानकिच्चं नत्थि. समापत्तिवसेनेव नं रक्खति आयस्मतो सञ्जीवस्स विय ¶ . वुत्तम्पि चेतं ‘‘आयस्मतो सञ्जीवस्स समाधिविप्फारा इद्धि, आयस्मतो सारिपुत्तस्स समाधिविप्फारा इद्धी’’ति.

८७६. सङ्घपटिमाननन्ति सङ्घस्स पटिमाननं उदिक्खनं. याव एसो भिक्खु आगच्छति, ताव सङ्घकम्मस्स अकरणन्ति अत्थो. एत्थ च न पटिमाननं एतस्स पुब्बकिच्चं, पटिमाननावज्जनं पन पुब्बकिच्चं. तस्मा एवं आवज्जितब्बं ‘‘सचे मयि सत्ताहं निरोधं समापज्जित्वा निसिन्ने सङ्घो उत्तिकम्मादीसु किञ्चिदेव कम्मं कत्तुकामो होति, याव मं कोचि भिक्खु आगन्त्वा न पक्कोसति, तावदेव वुट्ठहिस्सामी’’ति. एवं कत्वा समापन्नो हि तस्मिं समये वुट्ठातियेव.

यो पन एवं न करोति, सङ्घो च सन्निपतित्वा तं अपस्सन्तो ‘‘असुको भिक्खु कुहि’’न्ति ‘‘निरोधसमापन्नो’’ति वुत्ते सङ्घो कञ्चि भिक्खुं पेसेति ‘‘गच्छ नं सङ्घस्स वचनेन पक्कोसाही’’ति. अथस्स तेन भिक्खुना सवनूपचारे ठत्वा ‘‘सङ्घो तं आवुसो पटिमानेती’’ति वुत्तमत्तेव वुट्ठानं होति. एवं गरुका हि सङ्घस्स आणा नाम. तस्मा तं आवज्जित्वा यथा सयमेव वुट्ठाति, एवं समापज्जितब्बं.

८७७. सत्थुपक्कोसनन्ति इधापि सत्थुपक्कोसनावज्जनमेव इमस्स किच्चं. तस्मा तम्पि एवं आवज्जितब्बं ‘‘सचे मयि सत्ताहं निरोधं समापज्जित्वा निसिन्ने सत्था ओतिण्णवत्थुस्मिं सिक्खापदं वा पञ्ञपेति, तथारूपाय वा अत्थुप्पत्तिया धम्मं देसेति, याव मं ¶ कोचि आगन्त्वा न पक्कोसति, तावदेव वुट्ठहिस्सामी’’ति. एवं कत्वा निसिन्नो हि तस्मिं समये वुट्ठातियेव.

यो पन एवं न करोति, सत्था च सङ्घे सन्निपतिते तं अपस्सन्तो ‘‘असुको भिक्खु कुहि’’न्ति ‘‘निरोधसमापन्नो’’ति वुत्ते कञ्चि भिक्खुं पेसेति ‘‘गच्छ नं मम वचनेन पक्कोसा’’ति. अथस्स तेन भिक्खुना सवनूपचारे ठत्वा ‘‘सत्था आयस्मन्तं आमन्तेती’’ति वुत्तमत्तेव वुट्ठानं होति. एवं गरुकं हि सत्थुपक्कोसनं, तस्मा तं आवज्जित्वा यथा सयमेव वुट्ठाति, एवं समापज्जितब्बं.

८७८. अद्धानपरिच्छेदोति जीवितद्धानस्स परिच्छेदो. इमिना भिक्खुना अद्धानपरिच्छेदे सुकुसलेन भवितब्बं. अत्तनो ‘‘आयुसङ्खारा सत्ताहं ¶ पवत्तिस्सन्ति न पवत्तिस्सन्ती’’ति आवज्जित्वाव समापज्जितब्बं. सचे हि सत्ताहब्भन्तरे निरुज्झनके आयुसङ्खारे अनावज्जित्वाव समापज्जति, नास्स निरोधसमापत्ति मरणं पटिबाहितुं सक्कोति. अन्तोनिरोधे मरणस्स नत्थिताय अन्तराव समापत्तितो वुट्ठाति. तस्मा एतं आवज्जित्वाव समापज्जितब्बं. अवसेसं हि अनावज्जितुम्पि वट्टति. इदं पन आवज्जितब्बमेवाति वुत्तं.

८७९. सो एवं आकिञ्चञ्ञायतनं समापज्जित्वा वुट्ठाय इमं पुब्बकिच्चं कत्वा नेवसञ्ञानासञ्ञायतनं समापज्जति. अथेकं वा द्वे वा चित्तवारे अतिक्कमित्वा अचित्तको होति, निरोधं फुसति. कस्मा पनस्स द्विन्नं चित्तानं उपरिचित्तानि न पवत्तन्तीति? निरोधस्स पयोगत्ता. इदञ्हि इमस्स भिक्खुनो द्वे समथविपस्सनाधम्मे युगनद्धे कत्वा अट्ठ समापत्तिआरोहनं अनुपुब्बनिरोधस्स पयोगो, न नेवसञ्ञानासञ्ञायतनसमापत्तियाति निरोधस्स पयोगत्ता द्विन्नं चित्तानं उपरि न पवत्तन्ति.

यो पन भिक्खु आकिञ्चञ्ञायतनतो वुट्ठाय इदं पुब्बकिच्चं अकत्वा नेवसञ्ञानासञ्ञायतनं समापज्जति, सो परतो अचित्तको भवितुं न सक्कोति, पटिनिवत्तित्वा पुन आकिञ्चञ्ञायतनेयेव पतिट्ठाति. मग्गं अगतपुब्बपुरिसूपमा चेत्थ वत्तब्बा –

एको ¶ किर पुरिसो एकं मग्गं अगतपुब्बो अन्तरा उदककन्दरं वा गम्भीरं उदकचिक्खल्लं अतिक्कमित्वा ठपितं चण्डातपसन्तत्तपासाणं वा आगम्म तं निवासनपावुरणं असण्ठपेत्वाव कन्दरं ओरूळ्हो परिक्खारतेमनभयेन पुनदेव तीरे पतिट्ठाति. पासाणं अक्कमित्वापि सन्तत्तपादो पुनदेव ओरभागे पतिट्ठाति. तत्थ यथा सो पुरिसो असण्ठपितनिवासनपावुरणत्ता कन्दरं ओतिण्णमत्तोव, तत्तपासाणं अक्कन्तमत्तो एव च पटिनिवत्तित्वा ओरतोव पतिट्ठाति, एवं योगावचरोपि पुब्बकिच्चस्स अकतत्ता नेवसञ्ञानासञ्ञायतनं समापन्नमत्तोव पटिनिवत्तित्वा आकिञ्चञ्ञायतने पतिट्ठाति.

यथा पन पुब्बेपि तं मग्गं गतपुब्बपुरिसो तं ठानं आगम्म एकं साटकं दळ्हं निवासेत्वा अपरं हत्थेन गहेत्वा कन्दरं उत्तरित्वा तत्तपासाणं ¶ वा अक्कन्तमत्तकमेव करित्वा परतो गच्छति, एवमेवं कतपुब्बकिच्चो भिक्खु नेवसञ्ञानासञ्ञायतनं समापज्जित्वाव परतो अचित्तको हुत्वा निरोधं फुसित्वा विहरति.

८८०. कथं ठानन्ति एवं समापन्नाय पनस्सा कालपरिच्छेदवसेन चेव अन्तराआयुक्खयसङ्घपटिमाननसत्थुपक्कोसनाभावेन च ठानं होति.

८८१. कथं वुट्ठानन्ति अनागामिस्स अनागामिफलुप्पत्तिया, अरहतो अरहत्तफलुप्पत्तियाति एवं द्वेधा वुट्ठानं होति.

८८२. वुट्ठितस्स किंनिन्नं चित्तं होतीति निब्बाननिन्नं. वुत्तं हेतं ‘‘सञ्ञावेदयितनिरोधसमापत्तिया वुट्ठितस्स खो, आवुसो विसाख, भिक्खुनो विवेकनिन्नं चित्तं होति विवेकपोणं विवेकपब्भार’’न्ति (म. नि. १.४६४).

८८३. मतस्स च समापन्नस्स च को विसेसोति अयम्पि अत्थो सुत्ते वुत्तोयेव. यथाह – ‘‘य्वायं, आवुसो, मतो कालङ्कतो, तस्स कायसङ्खारा निरुद्धा पटिप्पस्सद्धा, वचीसङ्खारा… चित्तसङ्खारा निरुद्धा पटिप्पस्सद्धा, आयु परिक्खीणो, उस्मा वूपसन्ता, इन्द्रियानि परिभिन्नानि. यो चायं भिक्खु सञ्ञावेदयितनिरोधं समापन्नो, तस्सपि कायसङ्खारा ¶ निरुद्धा पटिप्पस्सद्धा, वचीसङ्खारा… चित्तसङ्खारा निरुद्धा पटिप्पस्सद्धा, आयु अपरिक्खीणो, उस्मा अवूपसन्ता, इन्द्रियानि अपरिभिन्नानी’’ति (म. नि. १.४५७).

८८४. निरोधसमापत्ति सङ्खतातिआदिपुच्छायं पन सङ्खतातिपि असङ्खतातिपि लोकियातिपि लोकुत्तरातिपि न वत्तब्बा. कस्मा? सभावतो नत्थिताय. यस्मा पनस्सा समापज्जन्तस्स वसेन समापन्ना नाम होति, तस्मा निप्फन्नाति वत्तुं वट्टति, नो अनिप्फन्ना.

इति सन्तं समापत्तिं, इमं अरियनिसेवितं;

दिट्ठेव धम्मे निब्बानमितिसङ्खं उपागतं;

भावेत्वा अरियं पञ्ञं, समापज्जन्ति पण्डिता.

यस्मा तस्मा इमिस्सापि, समापत्तिसमत्थता;

अरियमग्गेसु पञ्ञाय, आनिसंसोति वुच्चतीति.

आहुनेय्यभावादिसिद्धिकथा

८८५. आहुनेय्यभावादिसिद्धीति ¶ न केवलञ्च निरोधसमापत्तिया समापज्जनसमत्थताव, अयं पन आहुनेय्यभावादिसिद्धिपि इमिस्सा लोकुत्तरपञ्ञाभावनाय आनिसंसोति वेदितब्बो. अविसेसेन हि चतुब्बिधायपि एतिस्सा भावितत्ता भावितपञ्ञो पुग्गलो सदेवकस्स लोकस्स आहुनेय्यो होति पाहुनेय्यो दक्खिणेय्यो अञ्जलीकरणीयो अनुत्तरं पुञ्ञक्खेत्तं लोकस्स.

८८६. विसेसतो पनेत्थ पठममग्गपञ्ञं ताव भावेत्वा मन्दाय विपस्सनाय आगतो मुदिन्द्रियोपि सत्तक्खत्तुपरमो नाम होति, सत्तसुगतिभवे संसरित्वा दुक्खस्सन्तं करोति. मज्झिमाय विपस्सनाय आगतो मज्झिमिन्द्रियो कोलंकोलो नाम होति, द्वे वा तीणि वा कुलानि ¶ सन्धावित्वा संसरित्वा दुक्खस्सन्तं करोति. तिक्खाय विपस्सनाय आगतो तिक्खिन्द्रियो एकबीजी नाम होति, एकञ्ञेव मानुसकं भवं निब्बत्तेत्वा दुक्खस्सन्तं करोति.

८८७. दुतियमग्गपञ्ञं भावेत्वा सकदागामी नाम होति, सकिदेव इमं लोकं आगन्त्वा दुक्खस्सन्तं करोति.

८८८. ततियमग्गपञ्ञं भावेत्वा अनागामी नाम होति. सो इन्द्रियवेमत्ततावसेन अन्तरापरिनिब्बायी, उपहच्चपरिनिब्बायी, असङ्खारपरिनिब्बायी, ससङ्खारपरिनिब्बायी, उद्धंसोतो अकनिट्ठगामीति पञ्चधा. इध विहायनिट्ठो होति. तत्थ अन्तरापरिनिब्बायीति यत्थ कत्थचि सुद्धावासभवे उपपज्जित्वा आयुवेमज्झं अप्पत्वाव परिनिब्बायति. उपहच्चपरिनिब्बायीति आयुवेमज्झं अतिक्कमित्वा परिनिब्बायति. असङ्खारपरिनिब्बायीति असङ्खारेन अप्पयोगेन उपरिमग्गं निब्बत्तेति. ससङ्खारपरिनिब्बायीति ससङ्खारेन सप्पयोगेन उपरिमग्गं निब्बत्तेति. उद्धंसोतो अकनिट्ठगामीति यत्थुपपन्नो, ततो उद्धं याव अकनिट्ठभवा आरुय्ह तत्थ परिनिब्बायति.

८८९. चतुत्थमग्गपञ्ञं भावेत्वा कोचि सद्धाविमुत्तो होति, कोचि पञ्ञाविमुत्तो होति, कोचि उभतोभागविमुत्तो होति, कोचि तेविज्जो, कोचि छळभिञ्ञो, कोचि पटिसम्भिदप्पभेदप्पत्तो महाखीणासवो. यं सन्धाय वुत्तं ‘‘मग्गक्खणे पनेस तं जटं विजटेति नाम ¶ . फलक्खणे विजटितजटो सदेवकस्स लोकस्स अग्गदक्खिणेय्यो होती’’ति.

एवं अनेकानिसंसा, अरियपञ्ञाय भावना;

यस्मा तस्मा करेय्याथ, रतिं तत्थ विचक्खणो.

८९०. एत्तावता च –

सीले पतिट्ठाय नरो सपञ्ञो, चित्तं पञ्ञञ्च भावयं;

आतापी निपको भिक्खु, सो इमं विजटये जटन्ति. –

इमिस्सा ¶ गाथाय सीलसमाधिपञ्ञामुखेन देसिते विसुद्धिमग्गे सानिसंसा पञ्ञाभावना परिदीपिता होतीति.

इति साधुजनपामोज्जत्थाय कते विसुद्धिमग्गे

पञ्ञाभावनाधिकारे

पञ्ञाभावनानिसंसनिद्देसो नाम

तेवीसतिमो परिच्छेदो.

निगमनकथा

८९१. एत्तावता ¶ च –

‘‘सीले पतिट्ठाय नरो सपञ्ञो, चित्तं पञ्ञञ्च भावयं;

आतापी निपको भिक्खु, सो इमं विजटये जट’’न्ति. –

इमं गाथं निक्खिपित्वा यदवोचुम्ह –

‘‘इमिस्सा दानि गाथाय, कथिताय महेसिना;

वण्णयन्तो यथाभूतं, अत्थं सीलादिभेदनं.

‘‘सुदुल्लभं लभित्वान, पब्बज्जं जिनसासने;

सीलादिसङ्गहं खेमं, उजुं मग्गं विसुद्धिया.

‘‘यथाभूतं अजानन्ता, सुद्धिकामापि ये इध;

विसुद्धिं नाधिगच्छन्ति, वायमन्तापि योगिनो.

‘‘तेसं ¶ पामोज्जकरणं, सुविसुद्धविनिच्छयं;

महाविहारवासीनं, देसनानयनिस्सितं.

‘‘विसुद्धिमग्गं भासिस्सं, तं मे सक्कच्च भासतो;

विसुद्धिकामा सब्बेपि, निसामयथ साधवो’’ति.

स्वायं भासितो होति.

८९२. तत्थ च –

तेसं सीलादिभेदानं, अत्थानं यो विनिच्छयो;

पञ्चन्नम्पि निकायानं, वुत्तो अट्ठकथानये.

समाहरित्वा तं सब्बं, येभुय्येन सनिच्छयो;

सब्बसङ्करदोसेहि, मुत्तो यस्मा पकासितो.

तस्मा विसुद्धिकामेहि, सुद्धपञ्ञेहि योगिहि;

विसुद्धिमग्गे एतस्मिं, करणीयोव आदरोति.

८९३.

विभज्जवादिसेट्ठानं ¶ , थेरियानं यसस्सिनं;

महाविहारवासीनं, वंसजस्स विभाविनो.

भदन्तसङ्घपालस्स, सुचिसल्लेखवुत्तिनो;

विनयाचारयुत्तस्स, युत्तस्स पटिपत्तियं.

खन्तिसोरच्चमेत्तादि-गुणभूसितचेतसो;

अज्झेसनं गहेत्वान, करोन्तेन इमं मया.

सद्धम्मट्ठितिकामेन ¶ , यो पत्तो पुञ्ञसञ्चयो;

तस्स तेजेन सब्बेपि, सुखमेधन्तु पाणिनो.

८९४.

विसुद्धिमग्गो एसो च, अन्तरायं विना इध;

निट्ठितो अट्ठपञ्ञास-भाणवाराय पाळिया.

यथा तथेव लोकस्स, सब्बे कल्याणनिस्सिता;

अनन्तराया इज्झन्तु, सीघं सीघं मनोरथाति.

८९५. परम विसुद्ध सद्धा बुद्धि वीरिय पटिमण्डितेन सीलाचारज्जव मद्दवादिगुणसमुदयसमुदितेन सकसमय समयन्तरगहनज्झोगाहणसमत्थेन पञ्ञावेय्यत्तियसमन्नागतेन तिपिटकपरियत्तिभेदे साट्ठकथे सत्थुसासने अप्पटिहतञाणप्पभावेन महावेय्याकरणेन करणसम्पत्तिजनितसुखविनिग्गतमधुरोदारवचनलावण्णयुत्तेन युत्तमुत्तवादिना वादीवरेन महाकविना छळभिञ्ञापटिसम्भिदादि भेदगुणपटिमण्डिते उत्तरिमनुस्सधम्मे अप्पटिहतबुद्धीनं थेरवंसप्पदीपानं थेरानं महाविहारवासीनं वंसालङ्कारभूतेन विपुलविसुद्धबुद्धिना बुद्धघोसोति गरूहि गहितनामधेय्येन थेरेन मुदन्तखेदकवत्तब्बेन कतो विसुद्धिमग्गो नाम.

८९६.

ताव तिट्ठतु लोकस्मिं, लोकनित्थरणेसिनं;

दस्सेन्तो कुलपुत्तानं, नयं सीलादिसुद्धिया.

याव ¶ बुद्धोति नामम्पि, सुद्धचित्तस्स तादिनो;

लोकम्हि लोकजेट्ठस्स, पवत्तति महेसिनोति.

इति साधुजनपामोज्जत्थाय कता विसुद्धिमग्गकथा,

पाळिगणनाय पन सा अट्ठपञ्ञासभाणवारा होतीति.

विसुद्धिमग्गपकरणं निट्ठितं.