📜

नमो तस्स भगवतो अरहतो सम्मासम्बुद्धस्स

विसुद्धिमग्ग-महाटीका

(पठमो भागो)

गन्थारम्भकथा

सद्धम्मरंसिमाली ¶ ¶ यो, विनेय्यकमलाकरे;

विबोधेसि महामोह-तमं हन्त्वान सब्बसो.

ञाणातिसयबिम्बं तं, विसुद्धकरुणारुणं;

वन्दित्वा निरुपक्लेसं, बुद्धादिच्चं महोदयं.

लोकालोककरं धम्मं, गुणरस्मिसमुज्जलं;

अरियसङ्घञ्च सम्फुल्लं, विसुद्धकमलाकरं.

वन्दनाजनितं ¶ पुञ्ञं, इति यं रतनत्तये;

हतन्तरायो सब्बत्थ, हुत्वाहं तस्स तेजसा.

सम्पन्नसीलाचारेन, धीमता सुचिवुत्तिना;

अज्झेसितो दाठानागत्थेरेन थिरचेतसा.

विसुद्धचरितो नाथो, यं विसुद्धिमनुत्तरं;

पत्वा देसेसि करुणासमुस्साहितमानसो.

तस्सा अधिगमूपायो, विसुद्धनयमण्डितो;

विसुद्धिमग्गो यो वुत्तो, सुविसुद्धपदक्कमो.

सुविसुद्धं असंकिण्णं, निपुणत्थविनिच्छयं;

महाविहारवासीनं, समयं अविलोमयं.

तस्स ¶ निस्साय पोराणं, कथामग्गं अनाकुलं;

तन्तिनयानुगं सुद्धं, करिस्सामत्थवण्णनं.

इति आकङ्खमानस्स, सद्धम्मस्स चिरट्ठितिं;

विभजन्तस्स तस्सत्थं, निसामयथ साधवोति.

निदानादिकथावण्णना

१. स्वायं विसुद्धिमग्गो यं सुत्तपदं निस्साय पट्ठपीयति, तं ताव निक्खिपित्वा तस्स निदानादिनिद्धारणमुखेन नानप्पकारतो अत्थं संवण्णेतुं ‘‘सीले पतिट्ठाया’’तिआदि आरद्धं. धम्मं संवण्णेन्तेन हि आदितो तस्स निदानं वत्तब्बं, ततो पयोजनं पिण्डत्थो पदत्थो सम्बन्धो अधिप्पायो चोदना सोधनं वत्तब्बं. तथा चेव आचरियेन पटिपन्नं. एत्थ हि भगवन्तं किरातिआदि देसनाय निदानपयोजननिद्धारणं, विसुद्धिमग्गं भासिस्सन्तिआदि पिण्डत्थनिद्धारणं ¶ , सीले ठत्वातिआदि पदत्थसम्बन्धाधिप्पायविभावना, किं सीलन्तिआदि चोदना, ततो परं सोधनं, समाधिपञ्ञाकथासुपि एसेव नयो. कस्मा पनेत्थ विस्सज्जनगाथा आदिम्हि निक्खित्ता, न पुच्छागाथा. पुच्छापुब्बिका हि विस्सज्जनाति? वुच्चते – तदत्थस्स मङ्गलभावतो, सासनस्स आदिकल्याणादिभावविभावनतो, भयादिउपद्दवनिवारणेन अन्तरायविधमनतो, उपरि संवण्णेतब्बधम्मसङ्गहतो चाति वेदितब्बं.

एत्थाह – कस्मा पनायं विसुद्धिमग्गकथा वत्थुपुब्बिका आरद्धा, न सत्थुथोमनापुब्बिकाति? वुच्चते – विसुं असंवण्णनादिभावतो. सुमङ्गलविलासिनीआदयो विय हि दीघनिकायादीनं नायं विसुं संवण्णना, न पकरणन्तरं वा अभिधम्मावतारसुमतावतारादि विय. तासंयेव पन सुमङ्गलविलासिनीआदीनं विसेसभूता. तेनेवाह ‘‘मज्झे विसुद्धिमग्गो’’तिआदि (दी. नि. अट्ठ. १.गन्थारम्भकथा; म. नि. अट्ठ. १.गन्थारम्भकथा; सं. नि. अट्ठ. १.१.गन्थारम्भकथा; अ. नि. अट्ठ. १.१.गन्थारम्भकथा). अथ वा थोमनापुब्बिकापि चायं कथा न वत्थुपुब्बिकावाति दट्ठब्बं. सासने हि वत्थुकित्तनं न लोके विय केवलं होति, सासनसम्पत्तिकित्तनत्ता पन सत्थु अविपरीतधम्मदेसनाभावविभावनेन सत्थुगुणसंकित्तनं उल्लिङ्गन्तमेव पवत्तति. तथा हि वक्खति ‘‘एत्तावता तिस्सो सिक्खा’’तिआदि. सोतापन्नादिभावस्स च कारणन्ति एत्थ हि आदि-सद्देन सब्बसकदागामिअनागामिनो ¶ विय सब्बेपि अरहन्तो सङ्गय्हन्ति विभागस्स अनुद्धटत्ता. तेन तिण्णम्पि बोधिसत्तानं निब्बेधभागिया सीलादयो इध ‘‘सीले पतिट्ठाया’’तिआदिवचनेन सङ्गहिताति दट्ठब्बं. तिण्णम्पि हि नेसं चरिमभवे विसेसतो संसारभयिक्खणं, यथासकं सीले पतिट्ठाय समथविपस्सनं उस्सुक्कापेत्वा तण्हाजटाविजटनपटिपत्ति च समानाति. अथ वा ‘‘सो इमं विजटये जट’’न्ति साधारणवचनेन सातिसयं, निरतिसयञ्च तण्हाजटाविजटनं गहितं. तत्थ यं निरतिसयं सवासनप्पहानताय. तेन सत्थु पहानसम्पदा कित्तिता होति, तन्निमित्ता ञाणसम्पदा च. तदुभयेन नानन्तरिकताय आनुभावसम्पदादयोपीति. एवम्पि थोमनापुब्बिकायं कथाति वेदितब्बं. अथ वा थोमनापुब्बिका एवायं कथाति दट्ठब्बं, ‘‘सब्बधम्मेसु अप्पटिहतञाणचारो’’तिआदिना सत्थु थोमनं पुरक्खत्वा संवण्णनाय आरद्धत्ता. सा पनायं यस्मा पुच्छन्तस्स अज्झासयानुरूपं ब्याकरणसमत्थताय विभावनवसेन पवत्तिता, आचिण्णञ्चेतं आचरियस्स यदिदं संवण्णेतब्बधम्मानुकूलं संवण्णनारम्भे सत्थु अभित्थवनं. तस्मा ¶ इमिना कारणेन एवमेत्थ थोमना पवत्तिताति. थोमनाकारस्स वुच्चमानस्स कारणं उद्धरन्तेन पठमं विस्सज्जनगाथं निक्खिपित्वा तस्सा निदानचोदनामुखेन पुच्छागाथं सरूपतो च अत्थतो च दस्सेत्वा तस्सा पुच्छाय अविपरीतब्याकरणसमत्थभावावजोतनं भगवतो थोमनं पुरक्खत्वा यथाधिप्पेतधम्मसंवण्णना कता. तेनाह ‘‘सीले पतिट्ठाया’’तिआदि. तत्थ गाथाय अत्थो परतो आवि भविस्सति.

इतीतिआदीसु इतीति अयं इति-सद्दो हेतु परिसमापनादिपदत्थविपरियायपकारावधारणनिदस्सनादिअनेकत्थप्पभेदो. तथा हेस ‘‘रुप्पतीति खो, भिक्खवे, तस्मा ‘रूप’न्ति वुच्चती’’तिआदीसु (सं. नि. ३.७९) हेतुम्हि आगतो. ‘‘तस्मातिह मे, भिक्खवे, धम्मदायादा भवथ, मा आमिसदायादा. अत्थि मे तुम्हेसु अनुकम्पा ‘किन्ति मे सावका धम्मदायादा भवेय्युं, नो आमिसदायादा’’तिआदीसु (म. नि. १.२९) परिसमापने. ‘‘इति वा इति एवरूपा नच्चगीतवादितविसूकदस्सना पटिविरतो’’तिआदीसु (दी. नि. १.१९७) आदिअत्थे. ‘‘मागण्डियोति तस्स ब्राह्मणस्स सङ्खा समञ्ञा पञ्ञत्ति वोहारो नामं ¶ नामकम्मं नामधेय्यं निरुत्ति ब्यञ्जनं अभिलापो’’तिआदीसु (महानि. ७३, ७५) पदत्थविपरियाये. ‘‘इति खो, भिक्खवे, सप्पटिभयो बालो, अप्पटिभयो पण्डितो. सउपद्दवो बालो, अनुपद्दवो पण्डितो. सउपसग्गो बालो, अनुपसग्गो पण्डितो’’तिआदीसु (म. नि. ३.१२४) पकारे. ‘‘अत्थि इदप्पच्चया जरामरणन्ति इति पुट्ठेन सता, आनन्द, अत्थीतिस्स वचनीयं, किंपच्चया जरामरणन्ति इति चे वदेय्य, जातिपच्चया जरामरणन्ति इच्चस्स वचनीय’’न्तिआदीसु (दी. नि. २.९६) अवधारणे, सन्निट्ठानेति अत्थो. ‘‘अत्थीति खो, कच्चान, अयमेको अन्तो, नत्थीति खो, कच्चान, अयं दुतियो अन्तो’’तिआदीसु (सं. नि. २.१५; ३.९०) निदस्सने. इधापि निदस्सने दट्ठब्बो, पकारेतिपि वत्तुं वट्टतेव. पठमो पन इति-सद्दो परिसमापने दट्ठब्बो. हीति अवधारणे. इदन्ति आसन्नपच्चक्खवचनं यथाधिगतस्स सुत्तपदस्स अभिमुखीकरणतो.

वुत्तन्ति अयं वुत्त-सद्दो सउपसग्गो, अनुपसग्गो च वप्पनवापसमीकरणकेसोहारणजीवितवुत्तिपमुत्तभावपावचनपवत्तितअज्झेसनकथनादीसु दिस्सति. तथा हि अयं –

‘‘गावो ¶ तस्स पजायन्ति, खेत्ते वुत्तं विरूहति;

वुत्तानं फलमस्नाति, यो मित्तानं न दुब्भती’’ति. –

आदीसु (जा. २.२२.१९) वप्पने आगतो. ‘‘नो च खो पटिवुत्त’’न्तिआदीसु (पारा. २८९) अट्ठदन्तकादीहि वापसमीकरणे. ‘‘कापटिको माणवो दहरो वुत्तसिरो’’तिआदीसु (म. नि. २.४२६) केसोहारणे. ‘‘पन्नलोमो परदत्तवुत्तो मिगभूतेन चेतसा विहरती’’तिआदीसु (चूळव. ३३२) जीवितवुत्तियं. ‘‘सेय्यथापि नाम पण्डुपलासो बन्धना पवुत्तो अभब्बो हरितत्थाया’’तिआदीसु (म. नि. ३.५९; पारा. ९२; पाचि. ६६६; महाव. १२९) बन्धनतो पमुत्तभावे. ‘‘येसमिदं एतरहि पोराणं मन्तपदं गीतं पवुत्तं समिहित’’न्तिआदीसु (दी. नि. १.२८५; म. नि. २.४२७; महाव. ३००) पावचनभावेन पवत्तिते. लोके पन ‘‘वुत्तो गुणो वुत्तो पारायनो’’तिआदीसु अज्झेसने. ‘‘वुत्तं खो ¶ पनेतं भगवता ‘धम्मदायादा मे, भिक्खवे, भवथ, मा आमिसदायादा’ति’’आदीसु (म. नि. १.३०) कथने. इधापि कथने एव दट्ठब्बो. तस्मा ‘‘इति हि एवमेव इदं सुत्तं देसित’’न्ति यथानिक्खित्तं गाथं देसितभावेन निदस्सेति. तस्सा वा देसिताकारं अवधारेति.

कस्माति हेतुम्हि निस्सक्कं. पनाति वचनालङ्कारमत्तं. उभयेनापि कारणं पुच्छति. एतन्ति यथावुत्तं सुत्तपदं पच्चामसति. वुत्तन्ति पुच्छानिमित्तं. तदत्थस्स अत्तनो बुद्धियं विपरिवत्तमानतं उपादाय ‘‘इद’’न्ति वत्वा पुन भगवता भासिताकारं सन्धाय ‘‘एत’’न्ति वुत्तं. सकलेन पनानेन वचनेन देसनाय निदानं जोतितं होति. परतो तस्सा देसकदेसकालपटिग्गाहके विभावेतुं ‘‘भगवन्तं किरा’’तिआदि वुत्तं. तत्थ किराति अनुस्सवनत्थे निपातो. तेन वुच्चमानस्सत्थस्स अनु अनु सुय्यमानतं दीपेति. रत्तिभागेति रत्तिया एकस्मिं कोट्ठासे, मज्झिमयामेति अधिप्पायो. वेस्सवणादयो विय अपाकटनामधेय्यत्ता अञ्ञतरो. देवो एव देवपुत्तो. संसयसमुग्घाटत्थन्ति विचिकिच्छासल्लसमुद्धरणत्थं पुच्छीति योजना. ‘‘संसयसमुग्घाटत्थ’’न्ति च इमिना पञ्चसु पुच्छासु अयं विमतिच्छेदनापुच्छाति दस्सेति. येन अत्थेन तण्हा ‘‘जटा’’ति वुत्ता, तमेव अत्थं दस्सेतुं ‘‘जालिनिया’’तिआदि वुत्तं. सा हि अट्ठसततण्हाविचरितप्पभेदो अत्तनो अवयवभूतो एव जालो एतिस्सा अत्थीति ‘‘जालिनी’’ति वुच्चति.

इदानिस्सा ¶ जटाकारेन पवत्तिं दस्सेतुं ‘‘सा ही’’तिआदि वुत्तं. तत्थ रूपादीसु आरम्मणेसूति तस्सा पवत्तिट्ठानमाह, रूपादिछळारम्मणविनिमुत्तस्स तण्हाविसयस्स अभावतो. हेट्ठुपरियवसेनाति कदाचि रूपारम्मणे कदाचि याव धम्मारम्मणे कदाचि धम्मारम्मणे कदाचि याव रूपारम्मणेति एवं हेट्ठा, उपरि च पवत्तिवसेन. देसनाक्कमेन चेत्थ हेट्ठुपरियता दट्ठब्बा. कदाचि कामभवे कदाचि रूपभवे कदाचि अरूपभवे कदाचि वा अरूपभवे…पे… कदाचि कामभवेति एवमेत्थ हेट्ठुपरियवसेन पवत्ति वेदितब्बा. सब्बसङ्खारानं खणे खणे भिज्जनसभावत्ता अपरापरुप्पत्ति एत्थ संसिब्बनन्ति आह ‘‘पुनप्पुनं उप्पज्जनतो’’ति. ‘‘संसिब्बनट्ठेना’’ति इदं येन सम्बन्धेन जटा वियाति जटाति ¶ जटातण्हानं उपमूपमेय्यता, तंदस्सनं. अयं हेत्थ अत्थो – यथा जालिनो वेळुगुम्बस्स साखा, कोससञ्चयादयो च अत्तना अत्तनो अवयवेहि संसिब्बिता विनद्धा ‘‘जटा’’ति वुच्चन्ति, एवं तण्हापि संसिब्बनसभावेनाति, ‘‘संसिब्बितट्ठेना’’ति वा पाठो, अत्तनाव अत्तनो संसिब्बितभावेनाति अत्थो. अयं हि तण्हा कोसकारकिमि विय अत्तनाव अत्तानम्पि संसिब्बन्ती पवत्तति. तेनाह भगवा ‘‘रूपतण्हा लोके पियरूपं सातरूपं, एत्थेसा तण्हा उप्पज्जमाना उप्पज्जति, एत्थ निविसमाना निविसती’’तिआदि (दी. नि. २.४००; म. नि. १.८६; विभ. २०३). इमे सत्ता ‘‘मम इद’’न्ति परिग्गहितं वत्थुं अत्तनिब्बिसेसं मञ्ञमाना अब्भन्तरिमं करोन्ति. अब्भन्तरत्थो च अन्तोसद्दोति सकपरिक्खारे उप्पज्जमानापि तण्हा ‘‘अन्तोजटा’’ति वुत्ता. पब्बजितस्स पत्तादि, गहट्ठस्स हत्थिआदि सकपरिक्खारो.

‘‘अत्ता’’ति भवति एत्थ अभिमानोति अत्तभावो, उपादानक्खन्धपञ्चकं. सरीरन्ति केचि. मम अत्तभावो सुन्दरो, असुकस्स विय मम अत्तभावो भवेय्याति वा आदिना सकअत्तभावादीसु तण्हाय उप्पज्जमानाकारो वेदितब्बो. अत्तनो चक्खादीनि अज्झत्तिकायतनानि. अत्तनो, परेसञ्च रूपादीनि बाहिरायतनानि. परेसं सब्बानि वा, सपरसन्ततिपरियापन्नानि वा चक्खादीनि अज्झत्तिकायतनानि. तथा रूपादीनि बाहिरायतनानि. परित्तमहग्गतभवेसु पवत्तियापि तण्हाय अन्तोजटाबहिजटाभावो वेदितब्बो. कामभवो हि कस्सचिपि किलेसस्स अविक्खम्भितत्ता कथञ्चिपि अविमुत्तो अज्झत्तग्गहणस्स विसेसपच्चयोति ‘‘अज्झत्तं, अन्तो’’ति च वुच्चति. तब्बिपरियायतो रूपारूपभवो ‘‘बहिद्धा, बही’’ति च. तेनाह भगवा ‘‘अज्झत्तसंयोजनो पुग्गलो, बहिद्धासंयोजनो पुग्गलो’’ति (अ. नि. २.३७). विसयभेदेन, पवत्तिआकारभेदेन च अनेकभेदभिन्नम्पि तण्हं ¶ जटाभावसामञ्ञेन एकन्ति गहेत्वा ‘‘ताय एवं उप्पज्जमानाय जटाया’’ति वुत्तं. सा पन ‘‘पजा’’ति वुत्तसत्तसन्तानपरियापन्ना एव हुत्वा पुनप्पुनं तं जटेन्ती विनन्धन्ती पवत्ततीति आह ‘‘जटाय जटिता पजा’’ति. तथा हि परमत्थतो यदिपि अवयवब्यतिरेकेन समुदायो नत्थि, एकदेसो पन समुदायो नाम न होतीति अवयवतो समुदायं भिन्नं कत्वा उपमूपमेय्यं दस्सेन्तो ‘‘यथा नाम ¶ वेळुजटादीहि…पे… संसिब्बिता’’ति आह. इमं जटन्ति सम्बन्धो. तीसु धातूसु एकम्पि असेसेत्वा संसिब्बनेन तेधातुकं जटेत्वा ठितं. तेनस्सा महाविसयतं, विजटनस्स च सुदुक्करभावमाह. ‘‘विजटेतुं को समत्थो’’ति इमिना ‘‘विजटये’’ति पदं सत्तिअत्थं, न विधिआदिअत्थन्ति दस्सेति.

एवं ‘‘अन्तोजटा’’तिआदिना पुट्ठो पन अस्स देवपुत्तस्स इमं गाथमाहाति सम्बन्धो. ‘‘एदिसोव इमं पञ्हं विस्सज्जेय्या’’ति सत्थारं गुणतो दस्सेन्तो ‘‘सब्बधम्मेसु अप्पटिहतञाणचारो’’तिआदिमाह. तत्थ सब्बधम्मेसूति अतीतादिभेदभिन्नेसु सब्बेसु ञेय्यधम्मेसु. अप्पटिहतञाणचारोति अनवसेसञेय्यावरणप्पहानेन निस्सङ्गचारत्ता नविहतञाणपवत्तिको. एतेन तीसु कालेसु अप्पटिहतञाणताविभावनेन आदितो तिण्णं आवेणिकधम्मानं गहणेनेव तदेकलक्खणताय तदविनाभावतो च भगवतो सेसावेणिकधम्मानम्पि गहितभावो वेदितब्बो. दिब्बन्ति कामगुणादीहि कीळन्ति लळन्ति, तेसु वा विहरन्ति, विजयसमत्थतायोगेन पच्चत्थिके विजेतुं इच्छन्ति, इस्सरियधनादिसक्कारदानग्गहणं, तंतंअत्थानुसासनञ्च करोन्ता वोहरन्ति, पुञ्ञातिसययोगानुभावप्पत्ताय जुतिया जोतन्ति, यथाधिप्पेतञ्च विसयं अप्पटिघातेन गच्छन्ति, यथिच्छितनिप्फादने च सक्कोन्तीति देवा. अथ वा देवनीया तंतंब्यसननित्थरणत्थिकेहि सरणं परायणन्ति गमनीया, अभित्थवनीया वा, सोभाविसेसयोगेन कमनीयाति वा देवा. ते तिविधा – सम्मुतिदेवा उपपत्तिदेवा विसुद्धिदेवाति. भगवा पन निरतिसयाय अभिञ्ञाकीळाय उत्तमेहि दिब्बब्रह्मअरियविहारेहि सपरसन्तानगतपञ्चविधमारविजयिच्छानिप्फत्तिया चित्तिस्सरियसत्तधनादिसम्मापटिपत्ति अवेच्चपसादसक्कारदानग्गहणसङ्खातेन, धम्मसभावपुग्गलज्झासयानुरूपानुसासनीसङ्खातेन च वोहारातिसयेन परमाय पञ्ञासरीरप्पभासङ्खाताय जुतिया, अनञ्ञसाधारणाय ञाणसरीरगतिया, मारविजयसब्बसब्बञ्ञुगुणपरहितनिप्फादनेसु अप्पटिहताय सत्तिया च समन्नागतत्ता सदेवकेन लोकेन ‘‘सरण’’न्ति गमनीयतो, अभित्थवनीयतो, भत्तिवसेन कमनीयतो च सब्बे ¶ ते देवे तेहि गुणेहि अभिभुय्य ठितत्ता तेसं देवानं सेट्ठो उत्तमो देवोति देवदेवो. सब्बदेवेहि ¶ पूजनीयतरो देवोति वा, विसुद्धिदेवभावस्स वा सब्बञ्ञुगुणालङ्कारस्स वा अधिगतत्ता अञ्ञेसं देवानं अतिसयेन देवोति देवदेवो.

अपरिमाणासु लोकधातूसु अपरिमाणानं सक्कानं, महाब्रह्मानञ्च गुणाभिभवनतो अधिको अतिसयो अतिरेकतरो वा सक्को ब्रह्मा चाति सक्कानं अतिसक्को ब्रह्मानं अतिब्रह्मा. ञाणप्पहानदेसनाविसेसेसु सदेवके लोके केनचि अविक्खम्भनीयट्ठानताय कुतोचिपि उत्रस्ताभावतो चतूहि वेसारज्जेहि विसारदोति चतुवेसारज्जविसारदो. यं सन्धाय वुत्तं ‘‘सम्मासम्बुद्धस्स ते पटिजानतो इमे धम्मा अनभिसम्बुद्धाति तत्र वत मं समणो वा…पे… वेसारज्जप्पत्तो विहरामी’’ति (म. नि. १.१५०; अ. नि. ४.८). ठानाठानञाणादीहि दसहि ञाणबलेहि समन्नागतत्ता दसबलधरो. यं सन्धाय वुत्तं ‘‘इध तथागतो ठानञ्च ठानतो, अट्ठानञ्च अट्ठानतो यथाभूतं पजानाती’’तिआदि (अ. नि. १०.२१; विभ. ८०९). यं किञ्चि ञेय्यं नाम, तत्थ सब्बत्थेव अनावटञाणताय अनावरणञाणो. तञ्च सब्बं समन्ततो सब्बाकारतो हत्थतले आमलकं विय पच्चक्खतो दस्सनसमत्थेन ञाणचक्खुना समन्नागतत्ता समन्तचक्खु, सब्बञ्ञूति अत्थो. इमेहि पन द्वीहि पदेहि पच्छिमानि द्वे असाधारणञाणानि गहितानि. भाग्यवन्ततादीहि कारणेहि भगवा. यं पनेत्थ वत्तब्बं, तं परतो बुद्धानुस्सतिनिद्देसे (विसुद्धि. १.१२३ आदयो) वित्थारतो आगमिस्सति.

एत्थ च ‘‘सब्बधम्मेसु अप्पटिहतञाणचारो’’ति इमिना तियद्धारुळ्हानं पुच्छानं भगवतो ब्याकरणसमत्थताय दस्सिताय किं देवतानम्पि पुच्छं ब्याकातुं समत्थो भगवाति आसङ्काय तन्निवत्तनत्थं ‘‘देवदेवो’’ति वुत्तं. देवानं अतिदेवो सक्को देवानमिन्दो देवतानं पञ्हं विस्सज्जेति, ‘‘ततो इमस्स को विसेसो’’ति चिन्तेन्तानं तन्निवत्तनत्थं ‘‘सक्कानं अतिसक्को’’ति वुत्तं. सक्केनपि पुच्छितमत्थं सनङ्कुमारादयो ब्रह्मानो विस्सज्जेन्ति, ‘‘ततो इमस्स को अतिसयो’’ति चिन्तेन्तानं तन्निवत्तनत्थं ‘‘ब्रह्मानं अतिब्रह्मा’’ति वुत्तं. अयं चस्स विसेसो चतुवेसारज्जदसबलञाणेहि पाकटो जातोति दस्सनत्थं ‘‘चतु…पे… ¶ धरो’’ति वुत्तं. इमानि च ञाणानि इमस्स ञाणद्वयस्स अधिगमेन सहेव सिद्धानीति दस्सनत्थं ‘‘अनावरणञाणो समन्तचक्खू’’ति वुत्तं. तयिदं ञाणद्वयं पुञ्ञञाणसम्भारूपचयसिद्धाय भग्गदोसताय सिद्धन्ति दस्सेन्तो ‘‘भगवा’’ति अवोचाति. एवमेतेसं ¶ पदानं गहणे पयोजनं, अनुपुब्बि च वेदितब्बा. यं पनेतं पच्छिमं अनावरणञाणं सब्बञ्ञुतञ्ञाणन्ति ञाणद्वयं, तं अत्थतो अभिन्नं. एकमेव हि तं ञाणं विसयपवत्तिमुखेन अञ्ञेहि असाधारणभावदस्सनत्थं द्विधा कत्वा वुत्तं. अनवसेससङ्खतासङ्खतसम्मुतिधम्मारम्मणताय सब्बञ्ञुतञ्ञाणं, तत्थावरणाभावतो निस्सङ्गचारमुपादाय ‘‘अनावरणञाण’’न्तिपि वुत्तं. यं पनेत्थ वत्तब्बं, तं परतो बुद्धानुस्सतिनिद्देसे (विसुद्धि. १.१२३ आदयो) वक्खाम.

२. महन्ते सीलक्खन्धादिके एसी गवेसीति महेसि, भगवा. तेन महेसिना. वण्णयन्तोति विवरन्तो वित्थारेन्तो. यथाभूतन्ति अविपरीतं. सीलादिभेदनन्ति सीलसमाधिपञ्ञादिविभागं. सुदुल्लभन्ति अट्ठक्खणवज्जितेन नवमेन खणेन लद्धब्बत्ता सुट्ठु दुल्लभं. सीलादिसङ्गहन्ति सीलादिक्खन्धत्तयसङ्गहं. अरियमग्गो हि तीहि खन्धेहि सङ्गहितो सप्पदेसत्ता नगरं विय रज्जेन, न तयो खन्धा अरियमग्गेन निप्पदेसत्ता. वुत्तञ्हेतं ‘‘न खो, आवुसो विसाख, अरियेन अट्ठङ्गिकेन मग्गेन तयो खन्धा सङ्गहिता; तीहि च खो, आवुसो विसाख, खन्धेहि अरियो अट्ठङ्गिको मग्गो सङ्गहितो’’ति (म. नि. १.४६२). किलेसचोरेहि अपरिपन्थनीयताय खेमं. अन्तद्वयपरिवज्जनतो, मायादिकायवङ्कादिप्पहानतो च उजुं. सब्बेसं संकिलेसधम्मानं मारणवसेन गमनतो पवत्तनतो, निब्बानस्स मग्गनतो, निब्बानत्थिकेहि मग्गितब्बतो च मग्गं. विसुद्धियाति निब्बानाय, विसुद्धिभावाय वा, अरहत्तायाति अत्थो.

यथाभूतं अजानन्ताति एवं सीलविसुद्धिआदिविसुद्धिपरम्पराय अधिगन्तब्बो एवरूपो एवंकिच्चको एवमत्थोति याथावतो अनवबुज्झन्ता. सकलसंकिलेसतो, संसारतो च सुद्धिं विमुत्तिं कामेन्ति पत्थेन्तीति सुद्धिकामा. अपि-सद्दो सम्भावने. तेन न केवलं सीलमत्तेन परितुट्ठा, अथ खो विसुद्धिकामापि समानाति दस्सेति. इधाति इमस्मिं सासने. भावनाय युत्तपयुत्तताय योगिनो वायमन्तापि विसुद्धिं ¶ उद्दिस्स पयोगं परक्कमं करोन्तापि उपायस्स अनधिगतत्ता विसुद्धिं नाधिगच्छन्तीति योजना. तेसन्ति योगीनं. कामञ्चायं विसुद्धिमग्गो समन्तभद्दकत्ता सवनधारणपरिचयादिपसुतानं सब्बेसम्पि पामोज्जकरो, योगीनं पन सातिसयं पमोदहेतूति आह ‘‘तेसं पामोज्जकरण’’न्ति. बाहिरकनिकायन्तरलद्धीहि असम्मिस्सताय सुट्ठु विसुद्धविनिच्छयत्ता सुविसुद्धविनिच्छयं. महाविहारवासीनन्ति अत्तनो अपस्सयभूतं निकायं दस्सेति ¶ . देसनानयनिस्सितन्ति धम्मसंवण्णनानयसन्निस्सितं. एत्थ च ‘‘तेसं पामोज्जकरण’’न्तिआदिना सब्बसंकिलेसमलविसुद्धताय विसुद्धिं निब्बानं पत्थेन्तानं योगीनं एकंसेन तदावहत्ता पामोज्जकरो ञाणुत्तरेहि सम्मापटिपन्नेहि अधिट्ठितत्ता सुट्ठु सम्मा विसुद्धविनिच्छयो महाविहारवासीनं कथामग्गोति दस्सेति. सक्कच्चं मे भासतो सक्कच्चं निसामयथाति योजेतब्बं.

एत्थ च ‘‘इमिस्सा दानि गाथाया’’ति इमिना विसुद्धिमग्गभासनस्स निस्सयं, ‘‘कथिताय महेसिना’’ति इमिना तस्स पमाणभावं, ‘‘यथाभूतं अत्थं सीलादिभेदन’’न्ति इमिना अविपरीतपिण्डत्थं, ‘‘सुदुल्लभं…पे… योगिनो’’ति इमिना निमित्तं, ‘‘तेसं पामोज्जकरण’’न्ति इमिना पयोजनं, ‘‘वण्णयन्तो अत्थं, सुविसुद्धविनिच्छयं महाविहारवासीनं देसनानयनिस्सितं, सक्कच्च’’न्ति च इमिना करणप्पकारं दस्सेत्वा ‘‘विसुद्धिकामा सब्बेपि, निसामयथ साधवो’’ति इमिना तत्थ सक्कच्चसवने साधुजने नियोजेति. साधुकं सवनपटिबद्धा हि सासनसम्पत्ति.

३. वचनत्थविभावनेन पवेदितविसुद्धिमग्गसामञ्ञत्थस्स विसुद्धिमग्गकथा वुच्चमाना अभिरुचिं उप्पादेतीति पदत्थतो विसुद्धिमग्गं विभावेतुं ‘‘तत्थ विसुद्धी’’तिआदि आरद्धं. तत्थ तत्थाति यदिदं ‘‘विसुद्धिमग्गं भासिस्स’’न्ति एत्थ विसुद्धिमग्गपदं वुत्तं, तत्थ. सब्बमलविरहितन्ति सब्बेहि रागादिमलेहि, सब्बेहि संकिलेसमलेहि च विरहितं विवित्तं. ततो एव अच्चन्तपरिसुद्धं, सब्बदा सब्बथा च विसुद्धन्ति अत्थो. यथावुत्तं विसुद्धिं मग्गति गवेसति अधिगच्छति एतेनाति विसुद्धिमग्गो. तेनाह ‘‘मग्गोति अधिगमूपायो वुच्चती’’ति. विसुद्धिमग्गोति च निप्परियायेन लोकुत्तरमग्गो वेदितब्बो, तदुपायत्ता पन पुब्बभागमग्गो, तन्निस्सयो कथापबन्धो च तथा वुच्चति.

स्वायं ¶ विसुद्धिमग्गो सत्थारा देसनाविलासतो, वेनेय्यज्झासयतो च नानानयेहि देसितो, तेसु अयमेको नयो गहितोति दस्सेतुं ‘‘सो पनाय’’न्तिआदि आरद्धं. तत्थ कत्थचीति किस्मिञ्चि सुत्ते. विपस्सनामत्तवसेनेवाति अवधारणेन समथं निवत्तेति. सो हि तस्सा पटियोगी, न सीलादि. मत्त-सद्देन च विसेसनिवत्तिअत्थेन सविसेसं समाधिं निवत्तेति. सो उपचारप्पनाभेदो विपस्सनायानिकस्स देसनाति कत्वा न समाधिमत्तं. न हि ¶ खणिकसमाधिं विना विपस्सना सम्भवति. विपस्सनाति च तिविधापि अनुपस्सना वेदितब्बा, न अनिच्चानुपस्सनाव. न हि अनिच्चदस्सनमत्तेन सच्चाभिसमयो सम्भवति. यं पन गाथायं अनिच्चलक्खणस्सेव गहणं कतं, तं यस्स तदेव सुट्ठुतरं पाकटं हुत्वा उपट्ठाति, तादिसस्स वसेन. सोपि हि इतरं लक्खणद्वयं विभूततरं कत्वा सम्मसित्वा विसेसं अधिगच्छति, न अनिच्चलक्खणमेव.

सब्बे सङ्खाराति सब्बे तेभूमकसङ्खारा, ते हि सम्मसनीया. अनिच्चाति न निच्चा अद्धुवा इत्तरा खणभङ्गुराति. पञ्ञायाति विपस्सनापञ्ञाय. पस्सति सम्मसति. अथ पच्छा उदयब्बयञाणादीनं उप्पत्तिया उत्तरकालं. निब्बिन्दति दुक्खेति तस्मिंयेव अनिच्चाकारतो दिट्ठे ‘‘सब्बे सङ्खारा’’ति वुत्ते तेभूमके खन्धपञ्चकसङ्खाते दुक्खे निब्बिन्दति निब्बिदाञाणं पटिलभति. एस मग्गो विसुद्धियाति एस निब्बिदानुपस्सनासङ्खातो विरागादीनं कारणभूतो निब्बानस्स अधिगमूपायो.

झानपञ्ञावसेनाति समथविपस्सनावसेन. झानन्ति चेत्थ विपस्सनाय पादकभूतं झानं अधिप्पेतं. यम्हीति यस्मिं पुग्गले. झानञ्च पञ्ञा चाति एत्थायमत्थो – यो पुग्गलो झानं पादकं कत्वा विपस्सनं पट्ठपेत्वा तं उस्सुक्कापेति. स वे निब्बानसन्तिकेति सो ब्यत्तं निब्बानस्स समीपे एकन्ततो निब्बानं अधिगच्छतीति.

कम्मन्ति मग्गचेतना. सा हि अपचयगामिताय सत्तानं सुद्धिं आवहति. विज्जाति सम्मादिट्ठि. सीलन्ति सम्मावाचाकम्मन्ता. जीवितमुत्तमन्ति सम्माआजीवो. धम्मोति अवसेसा चत्तारो अरियमग्गधम्मा. अथ वा कम्मन्ति सम्माकम्मन्तस्स गहणं. ‘‘या चावुसो विसाख, सम्मादिट्ठि, यो च ¶ सम्मासङ्कप्पो, इमे धम्मा पञ्ञाक्खन्धे सङ्गहिता’’ति (म. नि. १.४६२) वचनतो. विज्जाति सम्मादिट्ठिसम्मासङ्कप्पानं गहणं. धम्मोति समाधि ‘‘एवंधम्मा ते भगवन्तो अहेसु’’न्तिआदीसु (सं. नि. ५.३७८) विय. तग्गहणेनेव ‘‘यो चावुसो विसाख, सम्मावायामो, या च सम्मासति, यो च सम्मासमाधि, इमे धम्मा समाधिक्खन्धे सङ्गहिता’’ति वचनतो सम्मावायामसतीनम्पि गहणं दट्ठब्बं. सीलन्ति सम्मावाचाजीवानं. जीवितमुत्तमन्ति एवरूपस्स अरियपुग्गलस्स जीवितं उत्तमं जीवितन्ति एवमेत्थ अट्ठङ्गिको अरियमग्गो वुत्तोति वेदितब्बो.

सीलादिवसेनाति ¶ सीलसमाधिपञ्ञावीरियवसेन. सब्बदाति समादानतो पभुति सब्बकालं. सीलसम्पन्नोति चतुपारिसुद्धिसीलसम्पदाय सम्पन्नो समन्नागतो. पञ्ञवाति लोकियलोकुत्तराय पञ्ञाय समन्नागतो. सुसमाहितोति तंसम्पयुत्तेन समाधिना सुट्ठु समाहितो. आरद्धवीरियोति अकुसलानं धम्मानं पहानाय, कुसलानं धम्मानं उपसम्पदाय पग्गहितवीरियो. पहितत्तोति निब्बानं पतिपेसितत्तताय काये च जीविते च निरपेक्खचित्तो. ओघन्ति कामोघादिचतुब्बिधम्पि ओघं, संसारमहोघमेव वा.

एकायनोति एकमग्गो. मग्गपरियायो हि इध अयन-सद्दो, तस्मा एकपथभूतो अयं, भिक्खवे, मग्गो, न द्वेधापथभूतोति अत्थो. एकं वा निब्बानं अयति गच्छतीति एकायनो, एकेन वा गणसङ्गणिकं पहाय विवेकट्ठेन अयितब्बो पटिपज्जितब्बोति एकायनो, अयन्ति तेनाति वा अयनो, एकस्स सेट्ठस्स भगवतो अयनोति एकायनो, तेन उप्पादितत्ता, एकस्मिं वा इमस्मिंयेव धम्मविनये अयनोति एकायनो. सत्तानं विसुद्धियाति रागादिमलेहि, अभिज्झाविसमलोभादिउपक्किलेसेहि च सत्तानं विसुद्धत्थाय विसुज्झनत्थाय. यदिदन्ति निपातो, ये इमेति अत्थो. पुब्बे सरणलक्खणेन मग्गट्ठेन च मग्गोति वुत्तस्सेव कायादिविसयभेदेन चतुब्बिधत्ता ‘‘चत्तारो सतिपट्ठाना’’ति वुत्तं. सम्मप्पधानादीसूति एत्थ आदि-सद्देन अप्पमादाभिरतिआदीनं सङ्गहो वेदितब्बो ¶ . अप्पमादाभिरतिआदिवसेनापि हि कत्थचि विसुद्धिमग्गो देसितो. यथाह –

‘‘अप्पमादरतो भिक्खु, पमादे भयदस्सि वा;

अभब्बो परिहानाय, निब्बानस्सेव सन्तिके’’ति. (ध. प. ३२);

४. तत्राति तस्सं गाथायं. उपरि वुच्चमाना गाथाय वित्थारसंवण्णना निद्देसपटिनिद्देसट्ठानिया, ततो संखित्ततरा अत्थवण्णना उद्देसट्ठानियाति आह ‘‘अयं सङ्खेपवण्णना’’ति. यथाउद्दिट्ठस्स हि अत्थस्स निद्देसपटिनिद्देसा सुकरा, सुबोधा च होन्तीति. सीले पतिट्ठायाति एत्थ सीलेति कुसलसीले. यदिपि ‘‘कतमे च, थपति, अकुसला सीला’’तिआदीसु अकुसला धम्मापि सीलन्ति आगता. वुच्चमानाय पन चित्तपञ्ञाभावनाय अधिट्ठानायोग्यताय किरियसीलानम्पि असम्भवो, कुतो इतरेसन्ति कुसलसीलमेवेत्थ अधिप्पेतं. सीलं परिपूरयमानोतिआदीसु परिपूरयमानोति परिपालेन्तो, परिवड्ढेन्तो वा, सब्बभागेहि संवरन्तो ¶ , अवीतिक्कमन्तो चाति अत्थो. तथाभूतो हि तं अविजहन्तो तत्थ पतिट्ठितो नाम होति. ‘‘सीले’’ति हि इदं आधारे भुम्मं. पतिट्ठायाति दुविधा पतिट्ठा निस्सयूपनिस्सयभेदतो. तत्थ उपनिस्सयपतिट्ठा लोकिया, इतरा लोकुत्तरा अभिन्दित्वा गहणे. भिन्दित्वा पन गहणे यथा लोकियचित्तुप्पादेसु सहजातानं, पुरिमपच्छिमानञ्च वसेन निस्सयूपनिस्सयपतिट्ठा सम्भवति, एवं लोकुत्तरेसु हेट्ठिममग्गफलसीलवसेन उपनिस्सयपतिट्ठापि सम्भवति. ‘‘पतिट्ठाया’’ति च पदस्स यदा उपनिस्सयपतिट्ठा अधिप्पेता, तदा ‘‘सद्धं उपनिस्साया’’तिआदीसु (पट्ठा. १.१.४२३) विय पुरिमकालकिरियावसेन अत्थो वेदितब्बो. तेनाह ‘‘पुब्बेव खो पनस्स कायकम्मं वचीकम्मं आजीवो सुपरिसुद्धो होती’’ति (म. नि. ३.४३१). यदा पन निस्सयपतिट्ठा अधिप्पेता, तदा ‘‘चक्खुञ्च पटिच्चा’’तिआदीसु (म. नि. १.२०४; ३.४२१; सं. नि. ४.६०) विय समानकालकिरियावसेन अत्थो वेदितब्बो. सम्मावाचादयो हि अत्तना सम्पयुत्तानं सम्मादिट्ठिआदीनं सहजातवसेनेव निस्सयपच्चया होन्तीति.

नरति ¶ नेतीति नरो, पुरिसो. यथा हि पठमपकतिभूतो सत्तो, इतराय पकतिया सेट्ठट्ठेन पुरि उच्चे ठाने सेति पवत्ततीति ‘‘पुरिसो’’ति वुच्चति, एवं नयनट्ठेन ‘‘नरो’’ति वुच्चति. पुत्तभातुभूतोपि हि पुग्गलो मातुजेट्ठभगिनीनं नेतुट्ठाने तिट्ठति, पगेव इतरो इतरासं. नरेन योगतो, नरस्स अयन्ति वा नारी, इत्थी. सापि चेत्थ कामं तण्हाजटाविजटनसमत्थता अत्थि, पधानमेव पन सत्तं दस्सेन्तो ‘‘नरो’’ति आह यथा ‘‘सत्था देवमनुस्सान’’न्ति (दी. नि. १.१५७, २५५). अट्ठकथायं पन अविभागेन पुग्गलपरियायो अयन्ति दस्सेतुं ‘‘नरोति सत्तो’’ति वुत्तं. सपञ्ञोति विपाकभूताय सह पञ्ञाय पवत्ततीति सपञ्ञो. ताय हि आदितो पट्ठाय सन्तानवसेन बहुलं पवत्तमानाय अयं सत्तो सविसेसं ‘‘सपञ्ञो’’ति वत्तब्बतं अरहति. विपाकपञ्ञापि हि सन्तानविसेसनेन भावनापञ्ञुप्पत्तिया उपनिस्सयो होति अहेतुकद्विहेतुकानं तदभावतो. सम्पजञ्ञसङ्खाताय च तंतंकिच्चकारिकाय पञ्ञाय वसेन ‘‘सपञ्ञो’’ति वत्तुं वट्टति. अट्ठकथायं पन निपक-सद्देन पारिहारिकपञ्ञा गय्हतीति विपाकपञ्ञावसेनेवेत्थ अत्थो वुत्तो. कम्मजतिहेतुकपटिसन्धिपञ्ञायाति कम्मजाय तिहेतुकपटिसन्धियं पञ्ञायाति एवं तिहेतुक-सद्दो पटिसन्धि-सद्देन सम्बन्धितब्बो, न पञ्ञा-सद्देन. न हि पञ्ञा तिहेतुका अत्थि. पटिसन्धितो पभुति पवत्तमाना पञ्ञा ‘‘पटिसन्धियं पञ्ञा’’ति वुत्ता तंमूलकत्ता, न पटिसन्धिक्खणे पवत्ता एव.

चिन्तेति ¶ आरम्मणं उपनिज्झायतीति चित्तं, समाधि. सो हि सातिसयं उपनिज्झानकिच्चो. न हि वितक्कादयो विना समाधिना तमत्थं साधेन्ति, समाधि पन तेहि विनापि साधेतीति. पगुणबलवभावापादनेन पच्चयेहि चितं, तथा सन्तानं चिनोतीतिपि चित्तं, समाधि. पठमज्झानादिवसेन चित्तविचित्तताय, इद्धिविधादिचित्तकरणेन च समाधि चित्तन्ति विनापि परोपदेसेनस्स चित्तपरियायो लब्भतेव. अट्ठकथायं पन चित्त-सद्दो विञ्ञाणे निरुळ्होति कत्वा वुत्तं ‘‘चित्तसीसेन हेत्थ समाधि निद्दिट्ठो’’ति. यथासभावं पकारेहि जानातीति पञ्ञा. सा यदिपि कुसलादिभेदतो बहुविधा. ‘‘भावय’’न्ति पन वचनतो भावेतब्बा इधाधिप्पेताति तं दस्सेतुं ‘‘विपस्सन’’न्ति वुत्तं. ‘‘भावय’’न्ति च इदं पच्चेकं ¶ योजेतब्बं ‘‘चित्तञ्च भावयं, पञ्ञञ्च भावय’’न्ति. तयिदं द्वयं किं लोकियं, उदाहु लोकुत्तरन्ति? लोकुत्तरन्ति दट्ठब्बं उक्कट्ठनिद्देसतो. तं हि भावयमानो अरियमग्गक्खणे तण्हाजटं समुच्छेदवसेन विजटेतीति वुच्चति, न लोकियं. नानन्तरियभावेन पनेत्थ लोकियापि गहिताव होन्ति लोकियसमथविपस्सनाय विना तदभावतो. समथयानिकस्स हि उपचारप्पनाप्पभेदं समाधिं इतरस्स खणिकसमाधिं, उभयेसम्पि विमोक्खमुखत्तयं विना न कदाचिपि लोकुत्तराधिगमो सम्भवति. तेनाह ‘‘समाधिञ्चेव विपस्सनञ्च भावयमानो’’ति. तत्थ यदा लोकिया समथविपस्सना अधिप्पेता, तदा ‘‘भावय’’न्ति इदं भावनाकिरियाय हेतुभावकथनं, भावनाहेतूति अत्थो. तंभावनाहेतुका हि विजटनकिरियाति. यदा पन लोकुत्तरा अधिप्पेता, तदा केवलं वत्तमानभावनिद्देसो. तदुभयभावनासमकालमेव हि तण्हाजटाविजटनं.

‘‘आतापी निपको’’ति इदं यथावुत्तभावनाय उपकारकधम्मकित्तनं. कम्मट्ठानं अनुयुञ्जन्तस्स हि वीरियं सति सम्पजञ्ञन्ति इमे तयो धम्मा बहूपकारा. वीरियूपत्थद्धञ्हि कम्मट्ठानं सतिसम्पजञ्ञानुपालितं न परिपतति, उपरि च विसेसं आवहति. पतिट्ठासिद्धिया चेत्थ सद्धासिद्धि, सद्धूपनिस्सयत्ता सीलस्स, वीरियादिसिद्धिया च. न हि सद्धेय्यवत्थुं असद्दहन्तस्स यथावुत्तवीरियादयो सम्भवन्ति, तथा समाधिपि. यथा हि हेतुभावतो वीरियादीहि सद्धासिद्धि, एवं फलभावतो तेहि समाधिसिद्धि. वीरियादीसु हि सम्पज्जमानेसु समाधि सम्पन्नोव होति असमाहितस्स तदभावतो. कथं पनेत्थ सतिसिद्धि? निपकग्गहणतो. तिक्खविसदभावप्पत्ता हि सति ‘‘नेपक्क’’न्ति वुच्चति. यथाह ‘‘परमेन सतिनेपक्केन समन्नागतो’’ति. अट्ठकथायं पन ‘‘नेपक्कं पञ्ञा’’ति अयमत्थो दस्सितो. तग्गहणेनेव ¶ सतिपि गहिताव होति. न हि सतिविरहिता पञ्ञा अत्थीति. अपरे पन ‘‘सपञ्ञो’’ति इमिनाव पारिहारिकपञ्ञापि गय्हतीति ‘‘निपको’’ति पदस्स ‘‘सतो’’ति अत्थं वदन्ति. यदिपि किलेसानं पहानं आतापनं, तं सम्मादिट्ठिआदीनम्पि अत्थेव. आतप्पसद्दो विय पन आतापसद्दो वीरियेयेव ¶ निरुळ्होति आह ‘‘आतापीति वीरियवा’’ति. अथ वा पटिपक्खप्पहाने सम्पयुत्तधम्मानं अब्भुस्सहनवसेन पवत्तमानस्स वीरियस्स सातिसयं तदातापनन्ति वीरियमेव तथा वुच्चति, न अञ्ञे धम्मा. आतापीति चायमीकारो पसंसाय, अतिसयस्स वा दीपको. वीरियवाति वा-सद्दोपि तदत्थो एव दट्ठब्बो. तेन सम्मप्पधानसमङ्गिता वुत्ता होति. तेनाह ‘‘किलेसानं आतापनपरितापनट्ठेना’’ति. आतापनग्गहणेन चेत्थ आरम्भ धातुमाह आदितो वीरियारम्भोति कत्वा, परितापनग्गहणेन निक्कमपरक्कमधातुयो सब्बसो पटिपक्खतो निक्खन्ततं, उपरूपरि विसेसप्पत्तिञ्च उपादाय. निपयति विसोसेति पटिपक्खं, ततो वा अत्तानं निपाति रक्खतीति निपको, सम्पजानो. कम्मट्ठानस्स परिहरणे नियुत्ताति पारिहारिका.

अभिक्कमादीनि सब्बकिच्चानि सात्थकसम्पजञ्ञादिवसेन परिच्छिज्ज नेतीति सब्बकिच्चपरिणायिका. कम्मट्ठानस्स वा उग्गहो परिपुच्छा भावनारम्भो मनसिकारविधि, तत्थ च सक्कच्चकारिता सातच्चकारिता सप्पायकारिता निमित्तकुसलता पहितत्तता अन्तराअसङ्कोचो इन्द्रियसमत्तपटिपादना वीरियसमतापादनं वीरियसमतायोजनन्ति एवमादीनं सब्बेसं किच्चानं परिणायिका सब्बकिच्चपरिणायिका. भयं इक्खतीति भिक्खूति साधारणतो भिक्खुलक्खणकथनेन पटिपत्तियाव भिक्खुभावो, न भिक्खकभिन्नपटधरादिभावेनाति दस्सेति. एवं हि कतकिच्चानं सामणेरादीनं, पटिपन्नानञ्च अपब्बजितानम्पि सङ्गहो कतो होति. इध पन पटिपज्जनकवसेन अत्थो वेदितब्बो. भिन्दति पापके अकुसले धम्मेति वा भिक्खु. सो इमं विजटयेति यो नरो सप्पञ्ञो सीले पतिट्ठाय आतापी निपको चित्तं पञ्ञञ्च भावयन्ति वुत्तो, सो भिक्खु इमं तण्हाजटं विजटयेति सम्बन्धो. इदानि तम्पि विजटनं वेळुगुम्बविजटनेन उपमेत्वा दस्सेतुं गाथाय यथावुत्ते सीलादिधम्मे ‘‘इमिना च सीलेना’’तिआदिना पच्चामसति. तत्थ यस्मा योगावचरसन्तानगता नानाक्खणिका मिस्सका सीलादिधम्मा गाथाय गहिता, तस्मा ते एकच्चं गण्हन्तो ‘‘छहि धम्मेहि समन्नागतो’’ति आह. न हि ते छ धम्मा एकस्मिं सन्ताने एकस्मिं खणे ¶ लब्भन्ति. यस्मा च पुग्गलाधिट्ठानेन गाथा भासिता, तस्मा पुग्गलाधिट्ठानमेव उपमं दस्सेन्तो ‘‘सेय्यथापि नाम पुरिसो’’तिआदिमाह ¶ . तत्थ सुनिसितन्ति सुट्ठु निसितं, अतिविय तिखिणन्ति अत्थो. सत्थस्स निसानसिलायं निसिततरभावकरणं, बाहुबलेन चस्स उक्खिपनन्ति उभयम्पेतं अत्थापन्नं कत्वा उपमा वुत्ताति तदुभयं उपमेय्ये दस्सेन्तो ‘‘समाधिसिलायं सुनिसितं…पे… पञ्ञाहत्थेन उक्खिपित्वा’’ति आह. समाधिगुणेन हि पञ्ञाय तिक्खभावो. तेनाह भगवा ‘‘समाहितो यथाभूतं पजानाती’’ति (सं. नि. ३.५; ४.९९; ५.१०७१; नेत्ति. ४०; मि. प. २.१.१४). वीरियञ्चस्सा उपत्थम्भकं पग्गण्हनतो. विजटेय्याति विजटेतुं सक्कुणेय्य. वुट्ठानगामिनिविपस्सनाय हि वत्तमानाय योगावचरो तण्हाजटं विजटेतुं समत्थो नाम. विजटनं चेत्थ समुच्छेदवसेन पहानन्ति आह ‘‘सञ्छिन्देय्य सम्पदालेय्या’’ति. दक्खिणं अरहतीति दक्खिणेय्यो, अग्गो च सो दक्खिणेय्यो चाति अग्गदक्खिणेय्यो, अग्गा वा दक्खिणा अग्गदक्खिणा, तं अरहतीति अग्गदक्खिणेय्यो.

५. तत्राति तस्सं गाथायं. अयन्ति ‘‘नरो’’ति च ‘‘भिक्खू’’ति च वुत्तो योगावचरो. पुन तत्राति तस्सं पञ्ञायं. अस्साति भिक्खुनो. कत्तरि चेतं सामिवचनं, अनेनाति अत्थो. करणीयं नत्थि विसेसाधानस्स तिहेतुकपटिसन्धिपञ्ञाय अभावतो. तेनाह ‘‘पुरिमकम्मानुभावेनेव हिस्स सा सिद्धा’’ति. तेनाति योगिना. भावनायं सततपवत्तितवीरियताय सातच्चकारिना. पञ्ञावसेनाति यथावुत्तनेपक्कसङ्खातपञ्ञावसेन. यं किञ्चि कत्तब्बं, तस्स सब्बस्स सम्पजानवसेनेव करणसीलो, तत्थ वा सम्पजानकारो एतस्स अत्थि, सम्पजानस्स वा असम्मोहस्स कारको उप्पादकोति सम्पजानकारी, तेन सम्पजानकारिना. अत्राति अस्सं गाथायं. सीलादिसम्पादने वीरियस्स तेसं अङ्गभावतो तं विसुं अग्गहेत्वा ‘‘सीलसमाधिपञ्ञामुखेना’’ति वुत्तं.

‘‘विसुद्धिमग्गं दस्सेती’’ति अविभागतो देसनाय पिण्डत्थं वत्वा पुन तं विभागतो दस्सेतुं ‘‘एत्तावता’’तिआदि वुत्तं. तत्थ एत्तावताति एत्तकाय देसनाय. सिक्खाति सिक्खितब्बट्ठेन सिक्खा. सिक्खनं चेत्थ आसेवनं दट्ठब्बं. सीलादिधम्मेहि संवरणादिवसेन आसेवन्तो ते सिक्खतीति ¶ वुच्चति. सासनन्ति पटिपत्तिसासनं. उपनिस्सयो बलवकारणं. वज्जनं अनुपगमनं. सेवना भावना. पटिपक्खोति पहायकपटिपक्खो. यदिपि गाथायं ‘‘सीले’’ति सामञ्ञतो वुत्तं, न ‘‘अधिसीले’’ति. तं पन तण्हाजटाविजटनस्स पतिट्ठाभूतं अधिप्पेतन्ति आह ‘‘सीलेन अधिसीलसिक्खा पकासिता’’ति. भवगामि हि सीलं सीलमेव, विभवगामि ¶ सीलं अधिसीलसिक्खा. सामञ्ञजोतना हि विसेसे अवतिट्ठतीति. एस नयो सेससिक्खासुपि.

सीलेनाति अधिसीलसिक्खाभूतेन सीलेन. तं हि अनञ्ञसाधारणताय सासनस्स आदिकल्याणतं पकासेति, न यमनियमादिमत्तं. तेन वुत्तं ‘‘सीलञ्च सुविसुद्धं, सब्बपापस्स अकरण’’न्ति च. कुसलानन्ति मग्गकुसलानं. कुसलानन्ति वा अनवज्जानं. तेन अरियफलधम्मानम्पि सङ्गहो सिद्धो होति. सब्बपापस्स अकरणन्ति सब्बस्सापि सावज्जस्स अकिरिया अनज्झापज्जनं. एतेन चारित्तवारित्तभेदस्स सब्बस्स सीलस्स गहणं कतं होति. कत्तब्बाकरणम्पि हि सावज्जमेवाति. आदिवचनतोति गाथायं वुत्तसमाधिपञ्ञानं आदिम्हि वचनतो. आदिभावो चस्स तम्मूलकत्ता उत्तरिमनुस्सधम्मानं. आदीनं वा वचनं आदिवचनं. आदिसद्देन चेत्थ ‘‘सीलं समाधि पञ्ञा च, विमुत्ति च अनुत्तरा’’ति (दी. नि. २.१८६) एवमादीनं सङ्गहो दट्ठब्बो. सीलस्स विसुद्धत्ता विप्पटिसारादिहेतूनं दूरीकरणतो अविप्पटिसारादिगुणावहं. ‘‘अविप्पटिसारादिगुणावहत्ता’’ति एतेन न केवलं सीलस्स कल्याणताव विभाविता, अथ खो आदिभावोपीति दट्ठब्बं. तथा हिस्स सुत्ते (परि. ३६६) अविप्पटिसारादीनं विमुत्तिञाणपरियोसानानं परम्परपच्चयता वुत्ता. समाधिनाति अधिचित्तसिक्खाभूतेन समाधिना. सकलं सासनं सङ्गहेत्वा पवत्ताय गाथाय आदिपदेन आदिम्हि पटिपज्जितब्बस्स सीलस्स, ततियपदेन परियोसाने पटिपज्जितब्बाय पञ्ञाय गहितत्ता मज्झे पटिपज्जितब्बो समाधि पारिसेसतो दुतियपदेन गय्हतीति ‘‘कुसलस्स उपसम्पदातिआदिवचनतो हि समाधि सासनस्स मज्झे’’ति वुत्तं, न कुसलसद्दस्स समाधिपरियायत्ता. पुब्बूपनिस्सयवतो हि समाहिततादिअट्ठङ्गसमन्नागमेन अभिनीहारक्खमता समाधिस्स इद्धिविधादिगुणावहत्तं, अग्गमग्गपञ्ञाय अधिगताय यदत्थं पब्बजति, तं परियोसितन्ति पञ्ञा सासनस्स ¶ परियोसानं. तेनाह भगवा ‘‘सिक्खानिसंसमिदं, भिक्खवे, ब्रह्मचरियं वुस्सति सद्धाधिपतेय्यं पञ्ञुत्तरं विमुत्तिसार’’न्ति (अ. नि. ४.२४५). सकं चित्तं सचित्तं, सचित्तस्स सब्बसो किलेसानं समुच्छिन्दनेन विसोधनं सचित्तपरियोदापनं. एवं पन पञ्ञाकिच्चे मत्थकप्पत्ते उत्तरि करणीयाभावतो सासनस्स पञ्ञुत्तरता वेदितब्बा. तादिभावावहनतोति यादिसो इट्ठेसु, लाभादीसु च अनुनयाभावतो, तादिसो अनिट्ठेसु, अलाभादीसु च पटिघाभावतो. ततो एव वा यादिसो अनापाथगतेसु इट्ठानिट्ठेसु, तादिसो आपाथगतेसुपीति तादी. तस्स भावो तादिभावो, तस्स आवहनतो. वातेनाति ¶ वातहेतु. न समीरतीति न चलति. न समिञ्जन्तीति न फन्दन्ति, कुतो चलनन्ति अधिप्पायो.

तथाति यथा सीलादयो अधिसीलसिक्खादीनं पकासका, तथा तेविज्जतादीनं उपनिस्सयस्साति तेसं पकासनाकारूपसंहारत्थो तथा-सद्दो. यस्मा सीलं विसुज्झमानं सतिसम्पजञ्ञबलेन, कम्मस्सकतञाणबलेन च संकिलेसमलतो विसुज्झति पारिपूरिञ्च गच्छति, तस्मा सीलसम्पदा सिज्झमाना उपनिस्सयसम्पत्तिभावेन सतिबलं, ञाणबलञ्च पच्चुपट्ठपेतीति तस्सा विज्जत्तयूपनिस्सयता वेदितब्बा सभागहेतुसम्पादनतो. सतिनेपक्केन हि पुब्बेनिवासविज्जासिद्धि, सम्पजञ्ञेन सब्बकिच्चेसु सुदिट्ठकारितापरिचयेन चुतूपपातञाणानुबन्धाय दुतियविज्जासिद्धि, वीतिक्कमाभावेन संकिलेसप्पहानसब्भावतो विवट्टूपनिस्सयतावसेन अज्झासयसुद्धिया ततियविज्जासिद्धि. पुरेतरं सिद्धानं समाधिपञ्ञानं पारिपूरिं विना सीलस्स आसवक्खयञाणूपनिस्सयता सुक्खविपस्सकखीणासवेहि दीपेतब्बा. समाधिपञ्ञा विय अभिञ्ञापटिसम्भिदानं सीलं न सभागहेतूति कत्वा वुत्तं ‘‘न ततो पर’’न्ति. ‘‘समाहितो यथाभूतं पजानाती’’ति (सं. नि. ३.५; ४.९९; नेत्ति. ४०; मि. प. २.१.१४) वचनतो समाधिसम्पदा छळभिञ्ञताय उपनिस्सयो. पञ्ञा विय पटिसम्भिदानं समाधि न सभागहेतूति वुत्तं ‘‘न ततो पर’’न्ति. ‘‘योगा वे जायते भूरी’’ति (ध. प. २८२) वचनतो पुब्बयोगेन, गरुवासदेसभासाकओसल्लउग्गहपरिपुच्छादीहि च परिभाविता पञ्ञासम्पत्ति पटिसम्भिदापभेदस्स उपनिस्सयो ¶ पच्चेकबोधिसम्मासम्बोधियोपि पञ्ञासम्पत्तिसन्निस्सयाति पञ्ञाय अनधिगन्तब्बस्स विसेसस्स अभावतो, तस्सा च पटिसम्भिदापभेदस्स एकन्तिककारणतो हेट्ठा विय ‘‘न ततो पर’’न्ति अवत्वा ‘‘न अञ्ञेन कारणेना’’ति वुत्तं.

एत्थ च ‘‘सीलसम्पत्तिञ्हि निस्साया’’ति वुत्तत्ता यस्स समाधिविजम्भनभूता अनवसेसा छ अभिञ्ञा न इज्झन्ति, तस्स उक्कट्ठपरिच्छेदवसेन न समाधिसम्पदा अत्थीति. सतिपि विज्जानं अभिञ्ञेकदेसभावे सीलसम्पत्तिसमुदागता एव तिस्सो विज्जा गहिता. यथा हि पञ्ञासम्पत्तिसमुदागता चतस्सो पटिसम्भिदा उपनिस्सयसम्पन्नस्स मग्गेनेव इज्झन्ति, मग्गक्खणे एव तासं पटिलभितब्बतो, एवं सीलसम्पत्तिसमुदागता तिस्सो विज्जा समाधिसम्पत्तिसमुदागता च छ अभिञ्ञा उपनिस्सयसम्पन्नस्स मग्गेनेव इज्झन्तीति मग्गाधिगमेनेव ¶ तासं अधिगमो वेदितब्बो. पच्चेकबुद्धानं, सम्मासम्बुद्धानञ्च पच्चेकबोधिसम्मासम्बोधिसमधिगमसदिसा हि इमेसं अरियानं इमे विसेसाधिगमाति. विनयसुत्ताभिधम्मेसु सम्मापटिपत्तिया तेविज्जतादीनं उपनिस्सयतापि यथावुत्तविधिना वेदितब्बा.

सम्पन्नसीलस्स कामसेवनाभावतो सीलेन पठमन्तविवज्जनं वुत्तं. येभुय्येन हि सत्ता कामहेतु पाणातिपातादिवसेनापि असुद्धपयोगा होन्ति. झानसुखलाभिनो कायकिलमथस्स सम्भवो एव नत्थीति समाधिना दुतियन्तविवज्जनं वुत्तं झानसमुट्ठानपणीतरूपफुटकायत्ता. पञ्ञायाति मग्गपञ्ञाय. उक्कट्ठनिद्देसेन हि एकंसतो अरियमग्गोव मज्झिमा पटिपत्ति नाम. एवं सन्तेपि लोकियपञ्ञावसेनपि अन्तद्वयविवज्जनं विभावेतब्बं.

सीलं तंसमङ्गिनो कामसुगतीसुयेव निब्बत्तापनतो चतूहि अपायेहि विमुत्तिया कारणन्ति आह ‘‘सीलेन अपायसमतिक्कमनुपायो पकासितो होती’’ति. न हि पाणातिपातादिपटिविरति दुग्गतिपरिकिलेसं आवहति. समाधि तंसमङ्गिनो महग्गतभूमियंयेव निब्बत्तापनेन सकलकामभवतो विमोचेतीति वुत्तं ‘‘समाधिना कामधातुसमतिक्कमनुपायो पकासितो होती’’ति. न हि कामावचरकम्मस्स अनुबलप्पदायीनं कामच्छन्दादीनं विक्खम्भकं झानं कामधातुपरिकिलेसावहं होति. न चेत्थ उपचारज्झानं निदस्सेतब्बं, अप्पनासमाधिस्स ¶ अधिप्पेतत्ता. नापि ‘‘सीलेनेव अतिक्कमितब्बस्स अपायभवस्स समाधिना अतिक्कमितब्बता’’ति वचनोकासो. सुगतिभवम्पि अतिक्कमन्तस्स दुग्गतिसमतिक्कमने का कथाति. सब्बभवसमतिक्कमनुपायोति कामभवादीनं नवन्नम्पि भवानं समतिक्कमनुपायो सीलसमाधीहि अतिक्कन्तापि भवा अनतिक्कन्ता एव, कारणस्स अपहीनत्ता. पञ्ञाय पनस्स सुप्पहीनत्ता ते समतिक्कन्ता एव.

तदङ्गप्पहानवसेनाति दीपालोकेनेव तमस्स पुञ्ञकिरियवत्थुगतेन तेन तेन कुसलङ्गेन तस्स तस्स अकुसलङ्गस्स पहानवसेन. समाधिना विक्खम्भनप्पहानवसेनाति उपचारप्पनाभेदेन समाधिना पवत्तिनिवारणेन घटप्पहारेनेव जलतले सेवालस्स तेसं तेसं नीवरणादिधम्मानं पहानवसेन. पञ्ञायाति अरियमग्गपञ्ञाय. समुच्छेदप्पहानवसेनाति चतुन्नं अरियमग्गानं भावितत्ता तंतंमग्गवतो अत्तनो सन्ताने ‘‘दिट्ठिगतानं पहानाया’’तिआदिना (ध. स. २७७) वुत्तस्स ¶ समुदयपक्खियस्स किलेसगणस्स अच्चन्तं अप्पवत्तिसङ्खातसमुच्छिन्दनप्पहानवसेन.

किलेसानं वीतिक्कमपटिपक्खोति संकिलेसधम्मानं, कम्मकिलेसानं वा यो कायवचीद्वारेसु वीतिक्कमो अज्झाचारो, तस्स पटिपक्खो सीलेन पकासितो होति, अवीतिक्कमसभावत्ता सीलस्स. ओकासादानवसेन किलेसानं चित्ते कुसलप्पवत्तिं परियादियित्वा उट्ठानं परियुट्ठानं. तं समाधि विक्खम्भेतीति आह ‘‘समाधिना परियुट्ठानपटिपक्खो पकासितो होती’’ति, समाधिस्स परियुट्ठानप्पहायकत्ता. अप्पहीनभावेन सन्ताने अनु अनु सयनतो कारणलाभे उप्पत्तिरहा अनुसया, ते पन अनुरूपं कारणं लद्धा उप्पज्जनारहा थामगता कामरागादयो सत्त किलेसा वेदितब्बा. ते अरियमग्गपञ्ञाय सब्बसो पहीयन्तीति आह ‘‘पञ्ञाय अनुसयपटिपक्खो पकासितो होती’’ति.

कायदुच्चरितादि दुट्ठु चरितं, किलेसेहि वा दूसितं चरितन्ति दुच्चरितं, तमेव यत्थ उप्पन्नं, तं सन्तानं संकिलेसेति विबाधति, उपतापेति चाति संकिलेसो, तस्स विसोधनं सीलेन तदङ्गवसेन पहानं वीतिक्कमपटिपक्खत्ता सीलस्स. तण्हासंकिलेसस्स विसोधनं विक्खम्भनवसेन ¶ पहानं परियुट्ठानपटिपक्खत्ता समाधिस्स, तण्हाय चस्स उजुविपच्चनिकभावतो. दिट्ठिसंकिलेसस्स विसोधनं समुच्छेदवसेन पहानं अनुसयपटिपक्खत्ता पञ्ञाय, दिट्ठिगतानञ्च अयाथावगाहीनं याथावगाहिनिया पञ्ञाय उजुविपच्चनिकभावतो.

कारणन्ति उपनिस्सयपच्चयो. सीलेसु परिपूरकारीति मग्गब्रह्मचरियस्स आदिभूतत्ता आदिब्रह्मचरियकानं पाराजिकसङ्घादिसेससङ्खातानं महासीलसिक्खापदानं अवीतिक्कमनतो खुद्दानुखुद्दकानं आपज्जने सहसाव तेहि वुट्ठानेन सीलेसु यं कत्तब्बं, तं परिपूरं समत्थं करोतीति सीलेसु परिपूरकारी. तथा सकदागामीति ‘‘सीलेसु परिपूरकारी’’ति एतं उपसंहरति तथा-सद्देन. एते हि द्वे अरिया समाधिपारिपन्थिकानं कामरागब्यापादानं पञ्ञापारिपन्थिकस्स सच्चपटिच्छादकमोहस्स सब्बसो असमूहतत्ता समाधिं, पञ्ञञ्च भावेन्तापि समाधिपञ्ञासु यं कत्तब्बं, तं मत्तसो पमाणेन पदेसमत्तमेव करोन्तीति समाधिस्मिं, पञ्ञाय च मत्तसो कारिनो ‘‘सीलेसु परिपूरकारिनो’’इच्चेव वुच्चन्ति. अनागामी ¶ पन कामरागब्यापादानं समुच्छिन्नत्ता समाधिस्मिं परिपूरकारी. अरहा सब्बसो सम्मोहस्स सुसमूहतत्ता पञ्ञाय परिपूरकारी.

वुत्तं हेतं भगवता (अ. नि. ३.८७) –

‘‘इध, भिक्खवे, भिक्खु सीलेसु परिपूरकारी होति, समाधिस्मिं मत्तसो कारी, पञ्ञाय मत्तसो कारी. सो यानि तानि खुद्दानुखुद्दकानि सिक्खापदानि, तानि आपज्जतिपि वुट्ठातिपि. तं किस्स हेतु? न हि मेत्थ, भिक्खवे, अभब्बता वुत्ता. यानि च खो तानि सिक्खापदानि आदिब्रह्मचरियकानि ब्रह्मचरियसारुप्पानि, तत्थ धुवसीलो च होति ठितसीलो च, समादाय सिक्खति सिक्खापदेसु. सो तिण्णं संयोजनानं परिक्खया सोतापन्नो होति अविनिपातधम्मो नियतो सम्बोधिपरायणो. इध पन, भिक्खवे, भिक्खु सीलेसु…पे… सो तिण्णं संयोजनानं परिक्खया रागदोसमोहानं तनुत्ता सकदागामी होति. सकिदेव इमं लोकं आगन्त्वा दुक्खस्सन्तं करोति. इध पन, भिक्खवे, भिक्खु सीलेसु परिपूरकारी ¶ होति, समाधिस्मिं परिपूरकारी, पञ्ञाय मत्तसो कारी. सो यानि तानि…पे… सिक्खति सिक्खापदेसु. सो पञ्चन्नं ओरम्भागियानं…पे… अनावत्तिधम्मो तस्मा लोका. इध पन, भिक्खवे, भिक्खु सीलेसु परिपूरकारी होति, समाधिस्मिं परिपूरकारी, पञ्ञाय परिपूरकारी. सो यानि तानि खुद्दानुखुद्दकानि…पे… सिक्खति सिक्खापदेसु. सो आसवानं खया…पे… उपसम्पज्ज विहरती’’ति.

‘‘कथ’’न्ति पुच्छित्वा सिक्खादिके विभजित्वा वुत्तमेवत्थं निगमेतुं ‘‘एव’’न्तिआदि वुत्तं. तत्थ अञ्ञे चाति तयो विवेका, तीणि कुसलमूलानि, तीणि विमोक्खमुखानि, तीणि इन्द्रियानीति एवमादयो, सिक्खत्तिकादीहि अञ्ञे च गुणत्तिका. एवरूपाति यादिसका सिक्खत्तिकादयो इध सीलादीहि पकासिता होन्ति, एदिसा.

एत्थ हि विवट्टसन्निस्सितस्स सीलस्स इधाधिप्पेतत्ता सीलेन कायविवेको पकासितो होति, समाधिना चित्तविवेको, पञ्ञाय उपधिविवेको. तथा सीलेन अदोसो कुसलमूलं पकासितं होति, तितिक्खप्पधानताय, अपरूपघातसभावताय च सीलस्स. समाधिना अलोभो ¶ कुसलमूलं, लोभपटिपक्खतो, अलोभपधानताय च समाधिस्स. पञ्ञाय पन अमोहोयेव. सीलेन च अनिमित्तविमोक्खमुखं पकासितं होति. अदोसप्पधानं हि सीलसम्पदं निस्साय दोसे आदीनवदस्सिनो अनिच्चानुपस्सना सुखेनेव इज्झति, अनिच्चानुपस्सना च अनिमित्तविमोक्खमुखं. समाधिना अप्पणिहितविमोक्खमुखं. पञ्ञाय सुञ्ञतविमोक्खमुखं. अलोभप्पधानं हि कामनिस्सरणं समाधिसम्पदं निस्साय कामेसु आदीनवदस्सिनो दुक्खानुपस्सना सुखेनेव इज्झति, दुक्खानुपस्सना च अप्पणिहितविमोक्खमुखं. पञ्ञासम्पदं निस्साय अनत्तानुपस्सना सुखेनेव इज्झति, अनत्तानुपस्सना च सुञ्ञतविमोक्खमुखं. तथा सीलेन अनञ्ञातञ्ञस्सामीतिन्द्रियं पकासितं होति. तं हि सीलेसु परिपूरकारिनो अट्ठमकस्स इन्द्रियं. समाधिना अञ्ञिन्द्रियं. तं हि उक्कंसगतं समाधिस्मिं परिपूरकारिनो अनागामिनो, अग्गमग्गट्ठस्स च इन्द्रियं. पञ्ञाय अञ्ञाताविन्द्रियं पकासितं होति. तदुप्पत्तिया हि अरहा पञ्ञाय परिपूरकारीति. इमिना नयेन अञ्ञे च एवरूपा गुणत्तिका सीलादीहि पकासेतब्बा.

१. सीलनिद्देसवण्णना

सीलसरूपादिकथावण्णना

६. एवन्ति ¶ वुत्तप्पकारेन. अनेकगुणसङ्गाहकेनाति अधिसीलसिक्खादीनं, अञ्ञेसञ्च अनेकेसं गुणानं सङ्गाहकेन. सीलसमाधिपञ्ञामुखेनाति ‘‘सब्बे सङ्खारा अनिच्चा’’तिआदीसु (ध. प. २७७; थेरगा. ६७६; नेत्ति. ५) विय विपस्सनामत्तादिमुखेन सङ्खेपतो अदेसेत्वा सीलसमाधिपञ्ञामुखेन देसितोपि, सत्ततिंसायपि वा बोधिपक्खियधम्मानं विसुद्धिमग्गन्तोगधत्ता तत्थ सीलसमाधिपञ्ञा मुखं पमुखं कत्वा देसितोपि. एतेन सीलसमाधिपञ्ञासु अवसेसबोधिपक्खियधम्मानं सभावतो, उपकारतो च अन्तोगधभावो दीपितोति वेदितब्बं. अतिसङ्खेपदेसितोयेव होति सभावविभागादितो अविभावितत्ता. नालन्ति न परियत्तं न समत्थं. सब्बेसन्ति नातिसङ्खेपनातिवित्थाररुचीनम्पि, विपञ्चितञ्ञुनेय्यानम्पि वा. सङ्खेपदेसना हि संखित्तरुचीनं, उग्घटितञ्ञूनंयेव च उपकाराय होति, न पनितरेसं. अस्स विसुद्धिमग्गस्स. पुच्छनट्ठेन पञ्हा, किरिया करणं कम्मं, पञ्हाव कम्मं पञ्हाकम्मं, पुच्छनपयोगो.

किं सीलन्ति सरूपपुच्छा. केनट्ठेन सीलन्ति केन अत्थेन सीलन्ति वुच्चति, ‘‘सील’’न्ति पदं कं अभिधेय्यं निस्साय पवत्तन्ति अत्थो. तयिदं सीलं सभावतो, किच्चतो, उपट्ठानाकारतो, आसन्नकारणतो च कथं जानितब्बन्ति आह ‘‘कानस्स लक्खणरसपच्चुपट्ठानपदट्ठानानी’’ति. पटिपत्ति नाम दिट्ठानिसंसे एव होतीति आह ‘‘किमानिसंस’’न्ति. कतिविधन्ति पभेदपुच्छा. विभागवन्तानं हि सभावविभावनं विभागदस्सनमुखेनेव होतीति. वोदानं विसुद्धि. सा च संकिलेसमलविमुत्ति. तं इच्छन्तेन यस्मा उपायकोसल्लत्थिना अनुपायकोसल्लं विय संकिलेसो जानितब्बोति आह ‘‘को चस्स संकिलेसो’’ति.

तत्राति ¶ तस्मिं, तस्स वा पञ्हाकम्मस्स. विस्सज्जनन्ति विवरणं. पुच्छितो हि अत्थो अविभावितत्ता निगूळ्हो मुट्ठियं कतो विय तिट्ठति. तस्स विवरणं विस्सज्जनं विभूतभावकारणतो. पाणातिपातादीहीति एत्थ ¶ पाणोति वोहारतो सत्तो, परमत्थतो जीवितिन्द्रियं. तस्स सरसेनेव पतनसभावस्स अन्तरे एव अतिव पातनं अतिपातो, सणिकं पतितुं अदत्वा सीघं पातनन्ति अत्थो, अतिक्कम्म वा सत्थादीहि अभिभवित्वा पातनं अतिपातो, पाणघातो. आदिसद्देन अदिन्नादानादिं सङ्गण्हाति. तेहि पाणातिपातादीहि दुस्सील्यकम्मेहि. विरमन्तस्साति समादानविरतिवसेन, सम्पत्तविरतिवसेन च ओरमन्तस्स. वत्तपटिपत्तिन्ति उपज्झायवत्तादिवत्तकरणं. चेतनादयो धम्माति सङ्खेपतो वुत्तमत्थं पाळिवसेन विभजित्वा दस्सेतुं ‘‘वुत्तञ्हेत’’न्तिआदि वुत्तं. तत्थ चेतयतीति चेतना, अत्तना सम्पयुत्तधम्मेहि सद्धिं आरम्मणे अभिसन्दहतीति अत्थो. चेतनाय अनुकूलवसेनेव हि तंसम्पयुत्ता धम्मा आरम्मणे पवत्तन्ति. चेतना कामं कुसलत्तिकसाधारणा, इध पन सीलचेतना अधिप्पेताति कत्वा ‘‘कुसला’’ति वेदितब्बा. चेतसि नियुत्तं चेतसिकं, चित्तसम्पयुत्तन्ति अत्थो. चेतनाय सतिपि चेतसिकत्ते ‘‘चेतना सील’’न्ति विसुं गहितत्ता तदञ्ञमेव विरतिअनभिज्झादिकं चेतसिकं सीलं दट्ठब्बं गोबलीबद्दञायेन. संवरणं संवरो. यथा अकुसला धम्मा चित्ते न ओतरन्ति, तथा पिदहनं. अवीतिक्कमो वीतिक्कमस्स पटिपक्खभूता अवीतिक्कमवसेन पवत्तचित्तचेतसिका. तत्थ चेतना सीलं नामातिआदि यथावुत्तस्स सुत्तपदस्स विवरणं. विरमन्तस्स चेतनाति विरतिसम्पयुत्तं पधानभूतं चेतनमाह. पूरेन्तस्स चेतनाति वत्तपटिपत्तिआयूहिनी. विरमन्तस्स विरतीति विरतिया पधानभावं गहेत्वा वुत्तं.

एत्थ हि यदा ‘‘तिविधा, भिक्खवे, कायसञ्चेतना कुसलं कायकम्म’’न्तिआदि (कथा. ५३९) वचनतो पाणातिपातादीनं पटिपक्खभूता तब्बिरतिविसिट्ठा चेतना तथापवत्ता पधानभावेन पाणातिपातादिपटिविरतिसाधिका होति, तदा तंसम्पयुत्ता विरतिअनभिज्झादयो च चेतनापक्खिका वा, अब्बोहारिका वाति इममत्थं सन्धाय चेतनासीलं वुत्तं. यदा पन पाणातिपातादीहि सङ्कोचं आपज्जन्तस्स ततो विरमणाकारेन पवत्तमाना चेतनाविसिट्ठा विरति, अनभिज्झादयो च तत्थ तत्थ पधानभावेन किच्चसाधिका होन्ति, तदा तंसम्पयुत्ता चेतना विरतिआदिपक्खिका ¶ वा होति, अब्बोहारिका वाति इममत्थं सन्धाय चेतसिकसीलं वुत्तं.

इदानि ¶ सुत्ते आगतनयेन कुसलकम्मपथवसेन चेतनाचेतसिकसीलानि विभजित्वा दस्सेतुं ‘‘अपिचा’’तिआदि वुत्तं. पजहन्तस्साति समादानवसेन ‘‘इतो पट्ठाय न करिस्सामी’’ति सम्पत्तवत्थुकानिपि अनज्झाचरणेन पजहन्तस्स. सत्त कम्मपथचेतनाति पाणातिपातादिपहानसाधिका पटिपाटिया सत्त कुसलकम्मपथचेतना. अभिज्झादिवसेन यं परदारगमनादि करीयति, तस्स पहायका अनभिज्झादयो सीलन्ति आह ‘‘चेतसिकं सीलं नाम अनभिज्झा…पे… सम्मादिट्ठिधम्मा’’ति. यथा हि अभिज्झाब्यापादवसेन मिच्छाचारपाणातिपातादयो करीयन्ति, एवं मिच्छादिट्ठिवसेनापि ते पुत्तमुखदस्सनादिअत्थं करीयन्ति. तेसञ्च पजहनका अनभिज्झादयोति. पातिमोक्खसंवरो चारित्तवारित्तविभागं विनयपरियापन्नं सिक्खापदसीलं. सतिसंवरो मनच्छट्ठानं इन्द्रियानं आरक्खा, सा च तथापवत्ता सतियेव. ञाणसंवरो पञ्ञा. खन्तिसंवरो अधिवासना, सा च तथापवत्ता अदोसपधाना खन्धा, अदोसो एव वा. वीरियसंवरो कामवितक्कादीनं विनोदनवसेन पवत्तं वीरियं. पातिमोक्खसंवरसतिसंवरादीसु यं वत्तब्बं, तं परतो आवि भविस्सति.

सोतानीति तण्हादिट्ठिअविज्जादुच्चरितअवसिट्ठकिलेससोतानि. ‘‘सोतानं संवरं ब्रूमी’’ति वत्वा ‘‘पञ्ञायेते पिधिय्यरे’’ति वचनेन सोतानं संवरो पिदहनं समुच्छेदनं ञाणन्ति विञ्ञायति.

इदमत्थिकतं मनसि कत्वा येन ञाणेन योनिसो पच्चवेक्खित्वा पच्चया पटिसेवीयन्ति. तं पच्चयपटिसेवनम्पि ञाणसभावत्ता एत्थेव ञाणसंवरे एव समोधानं सङ्गहं गच्छति. खमति अधिवासेतीति खमो. उप्पन्नन्ति तस्मिं तस्मिं आरम्मणे जातं निब्बत्तं. कामवितक्कन्ति कामूपसंहितं वितक्कं. नाधिवासेतीति चित्तं आरोपेत्वा अब्भन्तरे न वासेति. आजीवपारिसुद्धिपीति बुद्धपटिकुट्ठं मिच्छाजीवं पहाय अनवज्जेन पच्चयपरियेसनेन सिज्झनकं आजीवपारिसुद्धिसीलम्पि एत्थेव वीरियसंवरे एव समोधानं गच्छति वीरियसाधनत्ता. एत्थ च यथा ञाणं तण्हादिसोतानं पवत्तिनिवारणतो पिदहनट्ठेन संवरणतो संवरो च, परतो पवत्तनकगुणानं आधारादिभावतो सीलनट्ठेन सीलं ¶ , एवं खन्ति अनधिवासनेन उप्पज्जनककिलेसानं अधिवासनेन संवरणतो संवरो च, खमनहेतु उप्पज्जनकगुणानं आधारादिभावतो सीलनट्ठेन सीलं, वीरियं विनोदेतब्बानं पापधम्मानं विनोदनेन संवरणतो संवरो च, विनोदनहेतु उप्पज्जनकगुणानं आधारादिभावतो सीलनट्ठेन सीलन्ति ¶ वेदितब्बं. यथा पन पातिमोक्खसीलादि तस्स तस्स पापधम्मस्स पवत्तितुं अप्पदानवसेन संवरणं पिदहनं, तं उपादाय संवरो, एवं असमादिन्नसीलस्स आगतवत्थुतो विरमणम्पीति आह ‘‘या च पापभीरुकानं…पे… संवरसीलन्ति वेदितब्ब’’न्ति. न वीतिक्कमति एतेनाति अवीतिक्कमो. तथापवत्तो कुसलचित्तुप्पादो.

७. अवसेसेसु पन पञ्हेसु. समाधानं सण्ठपनं. दुस्सील्यवसेन हि पवत्ता कायकम्मादयो सम्पति, आयतिञ्च अहितदुक्खावहा, न सम्मा ठपिताति असण्ठपिता विप्पकिण्णा विसटा च नाम होन्ति, सुसील्यवसेन पन पवत्ता तब्बिपरियायतो सण्ठपिता अविप्पकिण्णा अविसटा च नाम होन्ति यथा तं ओक्खित्तचक्खुता अबाहुप्पचालनादि. तेनाह ‘‘कायकम्मादीनं सुसील्यवसेन अविप्पकिण्णताति अत्थो’’ति. एतेन समाधिकिच्चतो सीलनं विसेसेति. तस्स हि समाधानं सम्पयुत्तधम्मानं अविक्खेपहेतुता. इदं कायकम्मादीनं सण्ठपनं संयमनं. उपधारणं अधिट्ठानं मूलभावो. तथा हिस्स आदिचरणादिभावो वुत्तो. तेन पथवीधातुकिच्चतो सीलनं विसेसितं होति. सा हि सहजातरूपधम्मानं सन्धारणवसेन पवत्तति. इदं पन अनवज्जधम्मानं मूलाधिट्ठानभावेन. तेनाह ‘‘कुसलानं धम्मान’’न्तिआदि. तत्थ कुसलधम्मा नाम सपुब्बभागा महग्गतानुत्तरा धम्मा. अञ्ञे पन आचरिया. सिरट्ठोति यथा सिरसि छिन्ने सब्बो अत्तभावो विनस्सति, एवं सीले भिन्ने सब्बं गुणसरीरं विनस्सति. तस्मा तस्स उत्तमङ्गट्ठो सीलट्ठो. ‘‘सिरो सीस’’न्ति वा वत्तब्बे निरुत्तिनयेन ‘‘सील’’न्ति वुत्तन्ति अधिप्पायो. सीतलट्ठो परिळाहवूपसमनट्ठो. तेन त-कारस्स लोपं कत्वा निरुत्तिनयेनेव ‘‘सील’’न्ति वुत्तन्ति दस्सेति. तथा हिदं पयोगसम्पादितं सब्बकिलेसपरिळाहवूपसमकरं होति. एवमादिनाति ¶ आदि-सद्देन सयन्ति अकुसला एतस्मिं सति अपविट्ठा होन्तीति सीलं, सुपन्ति वा तेन विहतुस्साहानि सब्बदुच्चरितानीति सीलं, सब्बेसं वा कुसलधम्मानं पवेसारहसालाति सीलन्ति एवमादीनं सङ्गहो दट्ठब्बो.

८. ‘‘सीलनट्ठेन सील’’न्ति पुब्बे सद्दत्थुद्धारेन पकासितोपि भावत्थो एवाति आह ‘‘सीलनं लक्खणं तस्सा’’ति. न हि तस्स चेतनादिभेदभिन्नस्स अनवसेसतो सङ्गाहको ततो अञ्ञो अत्थो अत्थि, यो लक्खणभावेन वुच्चेय्य. ननु च अनेकभेदसङ्गाहकं सामञ्ञलक्खणं नाम सिया, न विसेसलक्खणन्ति अनुयोगं मनसि कत्वा आह ‘‘सनिदस्सनत्तं रूपस्स, यथा भिन्नस्सनेकधा’’ति.

यथा ¶ हि नीलादिवसेन अनेकभेदभिन्नस्सापि रूपायतनस्स सनिदस्सनत्तं विसेसलक्खणं तदञ्ञधम्मासाधारणतो. न अनिच्चतादि विय, रुप्पनं विय वा सामञ्ञलक्खणं, एवमिधापि दट्ठब्बं. किं पनेतं सनिदस्सनत्तं नाम? दट्ठब्बता चक्खुविञ्ञाणस्स गोचरभावो. तस्स पन रूपायतनतो अनञ्ञत्तेपि अञ्ञेहि धम्मेहि रूपायतनं विसेसेतुं अञ्ञं विय कत्वा सह निदस्सनेन सनिदस्सनन्ति वुच्चति. धम्मसभावसामञ्ञेन हि एकीभूतेसु धम्मेसु यो नानत्तकरो सभावो, सो अञ्ञं विय कत्वा उपचरितुं युत्तो. एवं हि अत्थविसेसावबोधो होतीति. अथ वा ‘‘सह निदस्सनेना’’ति एत्थ तब्भावत्थो सह-सद्दो यथा नन्दिरागसहगताति (सं. नि. ५.१०८१; महाव. १४; पटि. म. २.३०).

दुस्सील्यविद्धंसनरसन्ति कायिकअसंवरादिभेदस्स दुस्सील्यस्स विधमनकिच्चं. अनवज्जरसन्ति अगारय्हसम्पत्तिकं अगरहितब्बभावेन सम्पज्जनकं, अवज्जपटिपक्खभावेन वा सम्पज्जनकं. लक्खणादीसूति लक्खणरसादीसु वुच्चमानेसु किच्चमेव, सम्पत्ति वा रसोति वुच्चति, न रसायतनरसादीति अधिप्पायो. केचि पन ‘‘किच्चमेवा’’ति अवधारणं तस्स इतररसतो बलवभावदस्सनत्थन्ति वदन्ति, तं तेसं मतिमत्तं, किच्चमेव, सम्पत्ति एव वा रसोति इमस्स अत्थस्स अधिप्पेतत्ता.

सोचेय्यपच्चुपट्ठानन्ति ¶ कायादीहि सुचिभावेन पच्चुपट्ठाति. गहणभावन्ति गहेतब्बभावं. तेन उपट्ठानाकारट्ठेन पच्चुपट्ठानं वुत्तं, फलट्ठेन पन अविप्पटिसारपच्चुपट्ठानं, समाधिपच्चुपट्ठानं वा. सीलं हि सम्पतियेव अविप्पटिसारं पच्चुपट्ठापेति, परम्पराय समाधिं. इमस्स पन आनिसंसफलस्स आनिसंसकथायं वक्खमानत्ता इध अग्गहणं दट्ठब्बं. केचि पन फलस्स अनिच्छितत्ता इध अग्गहणन्ति वदन्ति, तदयुत्तं फलस्स अनेकविधत्ता, लोकियादिसीलस्सापि विभजियमानत्ता. तथा हि वक्खति ‘‘निस्सितानिस्सितवसेना’’तिआदि (विसुद्धि. १.१०). यथा पथवीधातुया कम्मादि दूरकारणं, सेसभूतत्तयं आसन्नकारणं, यथा च वत्थस्स तन्तवायतुरिवेमसलाकादि दूरकारणं, तन्तवो आसन्नकारणं, एवं सीलस्स सद्धम्मस्सवनादि दूरकारणं, हिरिओत्तप्पमस्स आसन्नकारणन्ति दस्सेन्तो आह ‘‘हिरोत्तप्पञ्च पना’’तिआदि. हिरोत्तप्पे हीतिआदि तस्स आसन्नकारणभावसाधनं. तत्थ उप्पज्जति समादानवसेन, तिट्ठति अवीतिक्कमवसेनाति वेदितब्बं.

सीलानिसंसकथावण्णना

९. अविप्पटिसारादीति ¶ एत्थ विप्पटिसारपटिपक्खो कुसलचित्तुप्पादो अविप्पटिसारो. सो पन विसेसतो ‘‘लाभा वत मे, सुलद्धं वत मे, यस्स मे सुपरिसुद्धं सील’’न्ति अत्तनो सीलस्स पच्चवेक्खणवसेन पवत्तोति वेदितब्बो. आदि-सद्देन पामोज्जभोगसम्पत्तिकित्तिसद्दादिं सङ्गण्हाति. अविप्पटिसारत्थानीति अविप्पटिसारप्पयोजनानि. कुसलानीति अनवज्जानि. अविप्पटिसारानिसंसानीति अविप्पटिसारुद्दयानि. एतेन अविप्पटिसारो नाम सीलस्स उद्दयमत्तं, संवड्ढितस्स रुक्खस्स छायापुप्फसदिसं. अञ्ञो एव पनानेन निप्फादेतब्बो समाधिआदिगुणोति दस्सेति.

सीलवतो सीलसम्पदायाति परिसुद्धं परिपुण्णं कत्वा सीलस्स सम्पादनेन सीलवतो, ताय एव सीलसम्पदाय. अप्पमादाधिकरणन्ति अप्पमादकारणा. भोगक्खन्धन्ति भोगरासिं. कल्याणो कित्तिसद्दो अब्भुग्गच्छतीति ‘‘इतिपि सीलवा, इतिपि कल्याणधम्मो’’ति सुन्दरो थुतिघोसो उट्ठहति, लोकं पत्थरति. विसारदोति अत्तनि किञ्चि गरहितब्बं ¶ उपवदितब्बं अपस्सन्तो विगतसारज्जो निब्भयो. अमङ्कुभूतोति अविलक्खो. असम्मूळ्होति ‘‘अकतं वत मे कल्याण’’न्तिआदिना (म. नि. ३.२४८) विप्पटिसाराभावतो, कुसलकम्मादीनंयेव च तदा उपट्ठानतो अमूळ्हो पसन्नमानसो एव कालंकरोति. कायस्स भेदाति उपादिन्नक्खन्धपरिच्चागा, जीवितिन्द्रियस्स उपच्छेदा. परं मरणाति चुतितो उद्धं. सुगतिन्ति सुन्दरं गतिं. तेन मनुस्सगतिपि सङ्गय्हति. सग्गन्ति देवगतिं. सा हि रूपादीहि विसयेहि सुट्ठु अग्गोति सग्गो, लोकियति एत्थ उळारं पुञ्ञफलन्ति लोकोति च वुच्चति.

आकङ्खेय्य चेति यदि इच्छेय्य. पियो च अस्सन्ति पियायितब्बो पियचक्खूहि पस्सितब्बो पेमनियो भवेय्यन्ति अत्थो. मनापोति सब्रह्मचारीनं मनवड्ढनको, तेसं वा मनेन पत्तब्बो, मेत्तचित्तेन फरितब्बोति वुत्तं होति. गरूति गरुट्ठानियो पासाणछत्तसदिसो. भावनीयोति ‘‘अद्धा अयमायस्मा जानं जानाति, पस्सं पस्सती’’ति सम्भावनीयो. सीलेस्वेवस्स परिपूरकारीति चतुपारिसुद्धिसीलेसु एव परिपूरकारी अस्स, अनूनकारी परिपूरणाकारेन समन्नागतो भवेय्य. ‘‘आदिना नयेना’’ति एतेन ‘‘अज्झत्तं चेतोसमथमनुयुत्तो ¶ अनिराकतज्झानो विपस्सनाय समन्नागतो ब्रूहेता सुञ्ञागारान’’न्ति (म. नि. १.६५) एवमादिके सीलथोमनसुत्तागते सत्तरस सीलानिसंसे सङ्गण्हाति.

इदानि न केवलमिमे एव अविप्पटिसारादयो, अथ खो अञ्ञेपि बहू सीलानिसंसा विज्जन्तीति ते दस्सेतुं ‘‘अपिचा’’तिआदि आरद्धं. तत्थ सासनेति इमस्मिं सकललोकियलोकुत्तरगुणावहे सत्थुसासने. आचारकुलपुत्तानं यं सीलं विना पतिट्ठा अवट्ठानं नत्थि, तस्स एवं महानुभावस्स सीलस्स आनिसंसानं परिच्छेदं परिमाणं को वदे को वत्तुं सक्कुणेय्याति अत्थो. एतेन सब्बेसंयेव लोकियलोकुत्तरानं गुणानं सीलमेव मूलभूतन्ति दस्सेत्वा ततो परम्पि मलविसोधनेन, परिळाहवूपसमनेन, सुचिगन्धवायनेन, सग्गनिब्बानाधिगमूपायभावेन, सोभालङ्कारसाधनताय भयविधमनेन, कित्तिपामोज्जजनेन च सीलसदिसं अञ्ञं सत्तानं हितसुखावहं नत्थीति दस्सेन्तो ‘‘न गङ्गा’’तिआदिका गाथा अभासि.

तत्थ ¶ सरभूति एका नदी, ‘‘यं लोके सरभू’’ति वदन्ति. निन्नगा वाचिरवतीति ‘‘अचिरवती’’ति एवंनामिका नदी, वाति सब्बत्थ वा-सद्दो अनियमत्थो. तेन अवुत्ता गोधावरीचन्दभागादिका सङ्गण्हाति. पाणनट्ठेन पाणीनं सत्तानं यं मलं सीलजलं विसोधयति, तं मलं विसोधेतुं न सक्कुणन्ति गङ्गादयो नदियोति पठमगाथाय न-कारं आनेत्वा सम्बन्धितब्बं. हाराति मुत्ताहारा. मणयोति वेळुरियादिमणयो. अरियन्ति विसुद्धं. सीलसमुट्ठानो कित्तिसद्दो गन्धो मनोहरभावतो, दिसासु अभिब्यापनतो च ‘‘सीलगन्धो’’ति वुत्तो. सो हि पटिवातेपि पवत्तति. तेनाह भगवा ‘‘सतञ्च गन्धो पटिवातमेती’’ति (ध. प. ५४; अ. नि. ३.८०; मि. प. ५.४.१). दोसानं बलं नाम वत्थुज्झाचारो, तं तेसं कातुं अदेन्तं सीलं दोसानं बलं घातेतीति वेदितब्बं.

सीलप्पभेदकथावण्णना

१०. ‘‘कतिविध’’न्ति एत्थ विध-सद्दो कोट्ठासपरियायो ‘‘एकविधेन रूपसङ्गहो’’तिआदीसु विय, पकारत्थो वा, कतिप्पकारं कित्तका सीलस्स पकारभेदाति अत्थो. सीलनलक्खणेनाति सीलनसङ्खातेन सभावेन.

चरन्ति ¶ तेन सीलेसु परिपूरकारितं उपगच्छन्तीति चरित्तं, चरित्तमेव चारित्तं. वारिततो तेन अत्तानं तायन्ति रक्खन्तीति वारित्तं. अधिको समाचारो अभिसमाचारो, तत्थ नियुत्तं, सो वा पयोजनं एतस्साति आभिसमाचारिकं. आदि ब्रह्मचरियस्साति आदिब्रह्मचरियं, तदेव आदिब्रह्मचरियकं. विरमति एताय, सयं वा विरमति, विरमणं वा विरति, न विरतीति अविरति. निस्सयतीति निस्सितं, न निस्सितन्ति अनिस्सितं. परियन्तो एतस्स अत्थीति परियन्तं, कालेन परियन्तं कालपरियन्तं, यथापरिच्छिन्नो वा कालो परियन्तो एतस्साति कालपरियन्तं. याव पाणनं जीवनं कोटि एतस्साति आपाणकोटिकं. अत्तनो पच्चयेहि लोके नियुत्तं, तत्थ वा विदितन्ति लोकियं. लोकं उत्तरतीति लोकुत्तरं.

पच्चयतो, फलतो च मज्झिमपणीतेहि निहीनं, तेसं वा गुणेहि परिहीनन्ति हीनं. अत्तनो पच्चयेहि पधानभावं नीतन्ति पणीतं. उभिन्नमेव वेमज्झे ¶ भवं मज्झिमं. अत्ताधिपतितो आगतं अत्ताधिपतेय्यं. सेसपदद्वयेपि एसेव नयो. तण्हाय, दिट्ठिया वा परामट्ठं पधंसितन्ति परामट्ठं. तप्पटिक्खेपतो अपरामट्ठं. पटिप्पस्सद्धकिलेसं पटिप्पस्सद्धं. सिक्खासु जातं, सेक्खस्स इदन्ति वा सेक्खं. परिनिट्ठितसिक्खाकिच्चताय असेक्खधम्मपरियापन्नं असेक्खं. तदुभयपटिक्खेपेन नेवसेक्खनासेक्खं. हानं भजति, हानभागो वा एतस्स अत्थीति हानभागियं. सेसेसुपि एसेव नयो. अप्पपरिमाणत्ता परियन्तवन्तं, पारिसुद्धिवन्तञ्च सीलं परियन्तपारिसुद्धिसीलं. अनप्पपरिमाणत्ता अपरियन्तं, पारिसुद्धिवन्तञ्च सीलं अपरियन्तपारिसुद्धिसीलं. सब्बसो पुण्णं, पारिसुद्धिवन्तञ्च सीलं परिपुण्णपारिसुद्धिसीलं.

११. वुत्तनयेनाति ‘‘सीलनट्ठेन सील’’न्तिआदिना (विसुद्धि. १.७) हेट्ठा वुत्तेन नयेन. इदं कत्तब्बन्ति पञ्ञत्तसिक्खापदपूरणन्ति इदं आभिसमाचारिकं कत्तब्बं पटिपज्जितब्बन्ति एवं पञ्ञत्तस्स सिक्खापदसीलस्स पूरणं. सिक्खापदसीलं हि पूरेन्तो सिक्खापदम्पि पूरेति पालेति नाम. सिक्खा एव वा सिक्खितब्बतो, पटिपज्जितब्बतो च सिक्खापदं. तस्स पूरणन्तिपि योजेतब्बं. इदं न कत्तब्बन्ति पटिक्खित्तस्स अकरणन्ति इदं दुच्चरितं न कत्तब्बन्ति भगवता पटिक्खित्तस्स अकरणं विरमणं. चरन्ति तस्मिन्ति तस्मिं सीले तंसमङ्गिनो चरन्तीति सीलस्स अधिकरणतं विभावेन्तो तेसं पवत्तिट्ठानभावं दस्सेति. तेनाह ‘‘सीलेसु परिपूरकारिताय पवत्तन्ती’’ति. वारितन्ति इदं न कत्तब्बन्ति पटिक्खित्तं अकप्पियं ¶ . तायन्तीति अकरणेनेव तायन्ति. तेनाति वारित्तसीलमाह. वारेति वा सत्था एत्थ, एतेन वाति वारितं, सिक्खापदं. तं अविकोपेन्तो तायन्ति तेनाति वारित्तं. सद्धावीरियसाधनन्ति सद्धाय, उट्ठानवीरियेन च साधेतब्बं. न हि असद्धो, कुसीतो च वत्तपटिपत्तिं परिपूरेति, सद्धो एव सत्थारा पटिक्खित्ते अणुमत्तेपि वज्जे भयदस्सावी समादाय सिक्खति सिक्खापदेसूति आह ‘‘सद्धासाधनं वारित्त’’न्ति.

अधिसीलसिक्खापरियापन्नत्ता अभिविसिट्ठो समाचारोति अभिसमाचारोति आह ‘‘उत्तमसमाचारो’’ति. अभिसमाचारोव आभिसमाचारिकं, यथा वेनयिकोति (अ. नि. ८.११; पारा. ८) अधिप्पायो. अभिसमाचारो उक्कट्ठनिद्देसतो ¶ मग्गसीलं, फलसीलञ्च, तं आरब्भ उद्दिस्स तदत्थं तप्पयोजनं पञ्ञत्तं आभिसमाचारिकं. सुपरिसुद्धानि तीणि कायकम्मानि, चत्तारि वचीकम्मानि, सुपरिसुद्धो आजीवोति इदं आजीवट्ठमकं. तत्थ कामं आजीवहेतुकतो सत्तविधदुच्चरिततो विरति सम्माआजीवोति सोपि सत्तविधो होति, सम्माजीवतासामञ्ञेन पन तं एकं कत्वा वुत्तं. अथ वा तिविधकुहनवत्थुसन्निस्सयतो मिच्छाजीवतो विरतिं एकज्झं कत्वा वुत्तो ‘‘आजीवो सुपरिसुद्धो’’ति. सेट्ठचरियभावतो मग्गो एव ब्रह्मचरियन्ति मग्गब्रह्मचरियं, तस्स. आदिभावभूतन्ति आदिम्हि भावेतब्बतं निप्फादेतब्बतं भूतं पत्तं आदिभावभूतं. किञ्चापि देसनानुक्कमेन सम्मादिट्ठि आदि, पटिपत्तिक्कमेन पन आजीवट्ठमकसीलं आदीति. तस्स सम्पत्तियाति आभिसमाचारिकस्स सम्पज्जनेन परिपूरणेन आदिब्रह्मचरियकं सम्पज्जति. यो हि लहुकानिपि अप्पसावज्जानि परिवज्जेति, सो गरुकानि महासावज्जानि बह्वादीनवानि परिवज्जेस्सतीति वत्तब्बमेव नत्थीति. सुत्तं पन एतमत्थं ब्यतिरेकवसेन विभावेति. तत्थ धम्मन्ति सीलं. तं हि उपरिगुणविसेसानं धारणट्ठेन धम्मोति वुच्चति.

विरतिसीलस्स इतरसीलेन सतिपि सम्पयोगादिके असम्मिस्सकतादस्सनत्थं ‘‘वेरमणिमत्त’’न्ति वुत्तं.

‘‘निस्सितानिस्सितवसेना’’ति एत्थ लब्भमाननिस्सयं ताव दस्सेतुं ‘‘निस्सयो’’तिआदि वुत्तं. तत्थ तण्हाचरितेन निस्सयितब्बतो तण्हाव तण्हानिस्सयो. तथा दिट्ठिनिस्सयो. दिट्ठिचरितो हि असतिपि दिट्ठिया तण्हाविरहे दिट्ठिनिस्सितोव पवत्तति. देवोति चतुमहाराजसक्कसुयामादिपाकटदेवमाह ¶ . देवञ्ञतरोति अपाकटं. तण्हं एव निस्सितन्ति तण्हानिस्सितं. तण्हाय निस्सितन्ति च केचि वदन्ति. तेसं ‘‘द्वे निस्सया’’तिआदिना विरुज्झति. सुद्धिदिट्ठियाति ‘‘इति संसारसुद्धि भविस्सती’’ति एवं पवत्तदिट्ठिया, लोकुत्तरं सीलन्ति अधिप्पायो. तस्सेवाति लोकुत्तरस्सेव सम्भारभूतं कारणभूतं, विवट्टूपनिस्सयन्ति अत्थो.

कालपरिच्छेदं कत्वाति ‘‘इमञ्च रत्तिं, इमञ्च दिव’’न्तिआदिना (अ. नि. ८.४१) विय कालवसेन परिच्छेदं कत्वा. कालपरिच्छेदं अकत्वा समादिन्नम्पि अन्तराविच्छिन्नं ¶ सम्पत्तविरतिवसेन यावजीवं पवत्तितम्पि आपाणकोटिकं न होतीति दस्सेतुं ‘‘यावजीवं समादियित्वा तथेव पवत्तित’’न्ति वुत्तं.

लाभयसञातिअङ्गजीवितवसेनाति लाभयसानं अनुप्पन्नानं उप्पादनवसेन, उप्पन्नानं रक्खणवसेन चेव वड्ढनवसेन च ञातिअङ्गजीवितानं अविनासनवसेन. किं सो वीतिक्कमिस्सतीति यो वीतिक्कमाय चित्तम्पि न उप्पादेति, सो कायवाचाहि वीतिक्कमिस्सतीति किं इदं, नत्थेतन्ति अत्थो. पटिक्खेपे हि अयं किं-सद्दो.

आरम्मणभावेन वणो विय आसवे कामासवादिके पग्घरतीति सम्पयोगभावाभावेपि सहासवेहीति सासवं. तेभूमकधम्मजातन्ति सीलं तप्परियापन्नन्ति आह ‘‘सासवं सीलं लोकिय’’न्ति. भवविसेसा सम्पत्तिभवा. विनयोति विनयपरियत्ति, तत्थ वा आगतसिक्खापदानि. पामोज्जं तरुणपीति. यथाभूतञाणदस्सनं सपच्चयनामरूपदस्सनं, तदधिट्ठाना वा तरुणविपस्सना. निब्बिदाति निब्बिदाञाणं. तेन बलवविपस्सनमाह. विरागो मग्गो. विमुत्ति अरहत्तफलं. विमुत्तिञाणदस्सनं पच्चवेक्खणा. कथाति विनयकथा. मन्तनाति विनयविचारणा. उपनिसाति यथावुत्तकारणपरम्परासङ्खातो उपनिस्सयो. लोकुत्तरं मग्गफलचित्तसम्पयुत्तं आजीवट्ठमकसीलं. तत्थ मग्गसीलं भवनिस्सरणावहं होति, पच्चवेक्खणञाणस्स च भूमि, फलसीलं पन पच्चवेक्खणाञाणस्सेव भूमि.

१२. हीनाधिमुत्तिवसेन छन्दादीनम्पि हीनता. पणीताधिमुत्तिवसेन पणीतता. तदुभयवेमज्झतावसेन मज्झिमता. यथेव हि कम्मं आयूहनवसेन हीनादिभेदभिन्नं होति, एवं ¶ छन्दादयोपि पवत्तिआकारवसेन. सो च नेसं पवत्तिआकारो अधिमुत्तिभेदेनाति दट्ठब्बं. यसकामतायाति कित्तिसिलोकाभिरतिया, परिवारिच्छाय वा. ‘‘कथं नाम मादिसो ईदिसं करेय्या’’ति पापजिगुच्छाय अरियभावं निस्साय. अनुपक्किलिट्ठन्ति अत्तुक्कंसनपरवम्भनाहि, अञ्ञेहि च उपक्किलेसेहि अनुपक्किलिट्ठं. भवभोगत्थायाति भवसम्पत्तिअत्थञ्चेव भोगसम्पत्तिअत्थञ्च. अत्तनो विमोक्खत्थाय पवत्तितन्ति सावकपच्चेकबोधिसत्तसीलमाह. सब्बसत्तानं विमोक्खत्थायाति सब्बसत्तानं संसारबन्धनतो ¶ विमोचनत्थाय. पारमितासीलं महाबोधिसत्तसीलं. या करुणूपायकोसल्लपरिग्गहिता महाबोधिं आरब्भ पवत्ता परमुक्कंसगतसोचेय्यसल्लेखा देसकालसत्तादिविकप्परहिता सीलपारमिता.

अननुरूपन्ति असारुप्पं. अत्ता एव गरु अधिपति एतस्साति अत्तगरु, लज्जाधिको. अत्ताधिपतितो आगतं अत्ताधिपतेय्यं. लोको अधिपति गरु एतस्साति लोकाधिपति, ओत्तप्पाधिको. धम्मो नामायं महानुभावो एकन्तनिय्यानिको, सो च पटिपत्तियाव पूजेतब्बो. तस्मा ‘‘नं सीलसम्पदाय पूजेस्सामी’’ति एवं धम्ममहत्तं पूजेतुकामेन.

परामट्ठत्ताति पराभववसेन आमट्ठत्ता. तण्हादिट्ठियो हि ‘‘इमिनाहं सीलेन देवो वा भविस्सामि देवञ्ञतरो वा, इमिना मे सीलेन संसारसुद्धि भविस्सती’’ति पवत्तस्स सीलं परामसन्तियो तं पराभवं पापेन्ति मग्गस्स अनुपनिस्सयभावकरणतो. पुथुज्जनकल्याणकस्साति पुथुज्जनेसु कल्याणकस्स. सो हि पुथुज्जनोव हुत्वा कल्याणेहि सीलादीहि समन्नागतो. परामसनकिलेसानं विक्खम्भनतो, समुच्छिन्दनतो च तेहि न परामट्ठन्ति अपरामट्ठं. तस्स तस्स किलेसदरथस्स पटिप्पस्सम्भनतो वूपसमनतो पटिप्पस्सद्धं.

कतपटिकम्मन्ति वुट्ठानदेसनाहि यथाधम्मं कतपटिकारं. एवं हि तं सीलं पटिपाकतिकमेव होति. तेनाह ‘‘तं विसुद्ध’’न्ति. ‘‘कतपटिकम्म’’न्ति इमिना च ‘‘न पुनेवं करिस्स’’न्ति अधिट्ठानम्पि सङ्गहितन्ति दट्ठब्बं. ‘‘अच्छमंसं नु खो, सूकरमंसं नु खो’’तिआदिना वत्थुम्हि वा, ‘‘पाचित्तियं नु खो, दुक्कटं नु खो’’तिआदिना आपत्तिया वा, ‘‘मया तं वत्थु वीतिक्कन्तं नु खो, न नु खो वीतिक्कन्त’’न्तिआदिना अज्झाचारे वा वेमतिकस्स संसयापन्नस्स. विसोधेतब्बं यथाधम्मं पटिकम्मेन. विमति एव वेमतिकं, तस्मिं वेमतिके सति, विमतिया उप्पन्नायाति अत्थो. विमति पटिविनेतब्बाति सयं वा तं वत्थुं ¶ विचारेत्वा, विनयधरे वा पुच्छित्वा कङ्खा विनोदेतब्बा. निक्कङ्खेन पन कप्पियं चे कातब्बं, अकप्पियं चे छड्डेतब्बं. तेनाह ‘‘इच्चस्स फासु भविस्सती’’ति.

‘‘चतूहि ¶ अरियमग्गेही’’तिआदिना मग्गफलपरियापन्नं सीलं मग्गफलसम्पयुत्तं वुत्तं. समुदायेसु पवत्तवोहारा अवयवेसुपि पवत्तन्तीति. सेसन्ति सब्बं लोकियसीलं.

पकतिपीति सभावोपि. सुखसीलो सखिलो सुखसंवासो. तेन परियायेनाति पकतिअत्थवाचकत्थेन. एकच्चं अब्याकतं सीलं इधाधिप्पेतसीलेन एकसङ्गहन्ति अकुसलस्सेवायुज्जमानतं दस्सेतुं ‘‘तत्थ अकुसल’’न्तिआदि वुत्तं. तथा हि सेक्खत्तिकं इध गहितं, इध न उपनीतं कुसलत्तिकन्ति अधिप्पायो. वुत्तनयेनेवाति वुत्तेनेव नयेन कुसलत्तिकं अग्गहेत्वा हीनत्तिकादीनं पञ्चन्नं तिकानं वसेन अस्स सीलस्स तिविधता वेदितब्बा.

१३. योधाति यो इध. वत्थुवीतिक्कमेति आपत्तिया वत्थुनो वीतिक्कमने अज्झाचारे. कामसङ्कप्पादयो नव महावितक्का मिच्छासङ्कप्पा. एवरूपस्साति एदिसस्स. तस्स हि सीलवन्ते अनुपसङ्कमित्वा दुस्सीले सेवन्तस्स ततो एव तेसं दिट्ठानुगतिं आपज्जनेन पण्णत्तिवीतिक्कमे अदोसदस्साविनो मिच्छासङ्कप्पबहुलताय मनच्छट्ठानि इन्द्रियानि अरक्खतो सीलं एकंसेनेव हानभागियं होति, न ठितिभागियं, कुतो विसेसादिभागियता. सीलसम्पत्तियाति सीलपारिपूरिया चतुपारिसुद्धिसीलेन. अघटन्तस्स उत्तरीति उत्तरि विसेसाधिगमाय अवायमन्तस्स. ठितिभागियं सीलं भवति असमाधिसंवत्तनियत्ता. सम्पादिते हि समाधिस्मिं सीलस्स समाधिसंवत्तनियता निच्छियति. समाधत्थायाति समथवसेन समाधानत्थाय. निब्बिदन्ति विपस्सनं. बलवविपस्सनादस्सनत्थं निब्बिदागहणं तावतापि सीलस्स निब्बेधभागियभावसिद्धितो.

यानि च सिक्खापदानि नेसं रक्खितब्बानीति सम्बन्धो, तानि पन असाधारणपञ्ञत्तितो अञ्ञानि. नेसन्ति ‘‘रक्खितब्बानी’’ति पदं अपेक्खित्वा कत्तरि सामिवचनं, तेहि भिक्खूहीति अत्थो. सति वा उस्साहेति उस्सक्कित्वा सीलानि रक्खितुं उस्साहे सति. दसाति सामणेरेहि रक्खितब्बसीलमाह घटिकारादीनं विय. अट्ठाति नच्चादिमालादिवेरमणिं एकं कत्वा सब्बपच्छिमवज्जानि अट्ठ.

अवीतिक्कमोति ¶ ¶ पञ्चन्नं सीलानं अवीतिक्कमो. पकतिसीलन्ति सभावसीलं. तत्रूपपत्तिनियतं हि सीलं उत्तरकुरुकानं. मरियादाचारित्तन्ति तस्स तस्स सावज्जस्स अकरणे मरियादभूतं, तत्थ तत्थ कुलादीसु पुब्बपुरिसेहि ठपितं चारित्तं. कुलदेसपासण्डधम्मो हि ‘‘आचारसील’’न्ति अधिप्पेतं. तत्थ कुलधम्मो ताव ब्राह्मणादीनं अमज्जपानादि, देसधम्मो एकच्चजनपदवासीनं अहिंसनादि, पासण्डधम्मो तित्थियानं यमनियमादि. तित्थियमतं हि दिट्ठिपासेन, तण्हापासेन च डेति पवत्तति, पासं वा बाधं अरियविनयस्स डेतीति ‘‘पासण्ड’’न्ति वुच्चति. ‘‘पकतिया सीलवती होती’’ति (दी. नि. २.२०) वचनतो बोधिसत्तमातु पञ्चसिक्खापदसीलं परिपुण्णमेव. इदं पन उक्कंसगतं बोधिसत्तपितरिपि चित्तुप्पादमत्तेनपि असंकिलिट्ठं ‘‘धम्मतासील’’न्ति वुत्तं. कामगुणूपसंहितन्ति कामकोट्ठासेसु अस्सादूपसंहितं कामस्सादगधितं. धम्मतासीलन्ति धम्मताय कारणनियामेन आगतं सीलं. सीलपारमिं हि परमुक्कंसं पापेत्वा कुच्छिगतस्स महाबोधिसत्तस्स सीलतेजेन गुणानुभावेन बोधिसत्तमातु सरसेनेव परमसल्लेखप्पत्तं सीलं होति. महाकस्सपादीनन्ति आदि-सद्देन भद्दादिके सङ्गण्हाति. ते किर सुचिरं कालं सुपरिसुद्धसीला एव हुत्वा आगता. तेनाह ‘‘सुद्धसत्तान’’न्ति. तासु तासु जातीसूति सीलवराजमहिंसराजादिजातीसु. पुब्बे पुरिमजातियं सिद्धो हेतु एतस्साति पुब्बहेतुकसीलं. इदं पन पकतिसीलादिसमादानेन विना अवीतिक्कमलक्खणं सम्पत्तविरतिसङ्गहं दट्ठब्बं.

यं भगवता एवं वुत्तं सीलन्ति सम्बन्धो. इधाति वक्खमानसीलपरिपूरकस्स पुग्गलस्स सन्निस्सयभूतसासनपरिदीपनं, अञ्ञसासनस्स च तथाभावपटिसेधनं. वुत्तं हेतं ‘‘इधेव, भिक्खवे, समणो…पे… सुञ्ञा परप्पवादा समणेभि अञ्ञेही’’ति (दी. नि. २.२१४; म. नि. १.१३९; अ. नि. ४.२४१). भिक्खूति तस्स सीलस्स परिपूरकपुग्गलपरिदीपनं. पातिमोक्खसंवरसंवुतोति इदमस्स पातिमोक्खसीले पतिट्ठितभावपरिदीपनं. विहरतीति इदमस्स तदनुरूपविहारसमङ्गिभावपरिदीपनं. आचारगोचरसम्पन्नोति इदं पातिमोक्खसंवरस्स, उपरिअधिगन्तब्बगुणानञ्च उपकारकधम्मपरिदीपनं. अणुमत्तेसु वज्जेसु भयदस्सावीति इदं पातिमोक्खतो अचवनभावपरिदीपनं. समादायाति सिक्खापदानं अनवसेसतो आदानपरिदीपनं. सिक्खतीति सिक्खाय समङ्गिभावपरिदीपनं ¶ . सिक्खापदेसूति सिक्खितब्बधम्मपरिदीपनं. यं पनेत्थ वत्तब्बं, तं परतो आवि भविस्सति.

सोति ¶ पातिमोक्खसंवरसीले पतिट्ठितभिक्खु. तेन यादिसस्स इन्द्रियसंवरसीलं इच्छितब्बं, तं दस्सेति. चक्खुनाति यतो सो संवरो, तं दस्सेति. रूपन्ति यत्थ सो संवरो, तं दस्सेति. दिस्वा न निमित्तग्गाही होति नानुब्यञ्जनग्गाहीति संवरस्स उपायं दस्सेति. यत्वाधिकरण…पे… अन्वास्सवेय्युन्ति संवरस्स पटिपक्खं तत्थ आदीनवं दस्सेति. संवराय पटिपज्जतीति पगेव सतिया उपट्ठपेतब्बतं दस्सेति. रक्खति चक्खुन्द्रियन्ति सतिया उपट्ठापनमेव चक्खुन्द्रियस्स आरक्खाति दस्सेति. चक्खुन्द्रिये संवरं आपज्जतीति तथाभूता सतियेवेत्थ संवरोति दस्सेति. वीतिक्कमस्स वसेनाति सम्बन्धो. छन्नं सिक्खापदानन्ति ‘‘आजीवहेतु आजीवकारणा असन्तं अभूतं उत्तरिमनुस्सधम्मं उल्लपती’’तिआदिना आगतानं छन्नं पाराजिकादिपटिसंयुत्तानं सिक्खापदानं. सामन्तजप्पनादिना तिविधेन कुहनवत्थुना विम्हापनं कुहना. अत्तानं, दायकं वा उक्खिपित्वा यथा सो किञ्चि ददाति, एवं कथनं लपना. निमित्तं वुच्चति पच्चयदानसञ्ञुप्पादकं कायवचीकम्मं, तेन निमित्तेन चरति, निमित्तं वा करोतीति नेमित्तिको, तस्स भावो नेमित्तिकता. गन्धादयो विय लाभाय परेसं अक्कोसनादिना निपिसतीति निप्पेसो, निप्पेसोव निप्पेसिको, तस्स भावो निप्पेसिकता. महिच्छताय अत्तना लद्धलाभेन परतो लाभपरियेसना लाभेन लाभं निजिगीसनता. एवमादीनन्ति आदि-सद्देन अनुप्पियभाणिताचाटुकम्यतादिं सङ्गण्हाति. पटिसङ्खानेन पच्चवेक्खणाय परिसुद्धो असंकिलिट्ठो पटिसङ्खानपरिसुद्धो. चत्तारो पच्चया परिभुञ्जीयन्ति एतेनाति चतुपच्चयपरिभोगो, तथापवत्ता अनवज्जचेतना.

पातिमोक्खसंवरसीलवण्णना

१४. तत्राति तेसु पातिमोक्खसंवरादीसु. आदितो पट्ठायाति ‘‘इध भिक्खू’’तिआदिना (विभ. ५०८; दी. नि. १.१९४) आगतदेसनाय आदितो पभुति. विनिच्छयकथाति तत्थ संसयविधमनेन विनिच्छयावहा कथा. पठमस्स अत्थस्स ¶ सब्बसाधारणत्ता असाधारणं पब्बजितावेणिकं परियायं दस्सेन्तो ‘‘छिन्नभिन्नपटधरादिताय वा’’ति आह. एवं हिस्स परिपुण्णपातिमोक्खसंवरयोग्यता दस्सिता होति. भिन्नपटधरादिभावो च नाम दलिद्दस्सापि निग्गहितस्स होतीति ततो विसेसेतुं ‘‘सद्धापब्बजितो’’ति वत्वा पटिपत्तिया योग्यभावदस्सनत्थं ‘‘कुलपुत्तो’’ति वुत्तं. आचारकुलपुत्तो वा हि पटिपज्जितुं सक्कोति जातिकुलपुत्तो वा. सिक्खापदसीलन्ति चारित्तवारित्तप्पभेदं सिक्खापदवसेन पञ्ञत्तं सीलं. योति ¶ अनियमनिद्देसो यो कोचि पुग्गलो. नन्ति विनयपरियापन्नं सीलं. तन्ति पुग्गलं. मोक्खेति सहकारिकारणभावतो. अपाये भवानि आपायिकानि. आदि-सद्देन तदञ्ञं सब्बसंसारदुक्खं सङ्गण्हाति. संवरणं कायवचीद्वारानं पिदहनं. येन ते संवुता पिहिता होन्ति, सो संवरो. यस्मा पन सो सत्तन्नं आपत्तिक्खन्धानं अवीतिक्कमो वीतिक्कमपटिपक्खोति कत्वा, तस्मा वुत्तं ‘‘कायिकवाचसिकस्स अवीतिक्कमस्सेतं नाम’’न्ति. पातिमोक्खसंवरेन संवुतोति पातिमोक्खसंवरेन पिहितकायवचीद्वारो. तथाभूतो च यस्मा तं उपेतो तेन च समङ्गी नाम होति, तस्मा वुत्तं ‘‘उपगतो समन्नागतोति अत्थो’’ति.

अपरो नयो – किलेसानं बलवभावतो, पापकिरियाय सुकरभावतो, पुञ्ञकिरियाय च दुक्करभावतो बहुक्खत्तुं अपायेसु पतनसीलोति पाती, पुथुज्जनो. अनिच्चताय वा भवादीसु कम्मवेगक्खित्तो घटियन्तं विय अनवट्ठानेन परिब्भमनतो गमनसीलोति पाती, मरणवसेन वा तम्हि तम्हि सत्तनिकाये अत्तभावस्स पातनसीलोति पाती, सत्तसन्तानो, चित्तमेव वा. तं पातिनं संसारदुक्खतो मोक्खेतीति पातिमोक्खं. चित्तस्स हि विमोक्खेन सत्तो ‘‘विमुत्तो’’ति वुच्चति. वुत्तं हि ‘‘चित्तवोदाना विसुज्झन्ती’’ति, ‘‘अनुपादाय आसवेहि चित्तं विमुत्त’’न्ति (महाव. २८) च. अथ वा अविज्जादिना हेतुना संसारे पतति गच्छति पवत्ततीति पाती, ‘‘अविज्जानीवरणानं सत्तानं तण्हासंयोजनानं सन्धावतं संसरत’’न्ति (सं. नि. २.१२४) हि वुत्तं. तस्स पातिनो सत्तस्स तण्हादिसंकिलेसत्तयतो मोक्खो एतेनाति पातिमोक्खं ¶ . ‘‘कण्ठेकाळो’’तिआदीनं वियस्स समाससिद्धि वेदितब्बा. अथ वा पातेति विनिपातेति दुक्खेति पाति, चित्तं. वुत्तं हि ‘‘चित्तेन नीयति लोको, चित्तेन परिकस्सती’’ति (सं. नि. १.६२). तस्स पातिनो मोक्खो एतेनाति पातिमोक्खं, पतति वा एतेन अपायदुक्खे, संसारदुक्खे चाति पाती, तण्हादिसंकिलेसो. वुत्तं हि ‘‘तण्हा जनेति पुरिसं (सं. नि. १.५५-५७), तण्हादुतियो पुरिसो’’ति (इतिवु. १५, १०५; अ. नि. ४.९; महानि. १९१; चूळनि. पारायनानुगीतिगाथानिद्देस) च आदि. ततो पातितो मोक्खोति पातिमोक्खं. अथ वा पतति एत्थाति पातीनि, छ अज्झत्तिकबाहिरानि आयतनानि. वुत्तं हि ‘‘छसु लोको समुप्पन्नो, छसु कुब्बति सन्थव’’न्ति (सं. नि. १.७०; सु. नि. १७१). ततो छअज्झत्तिकबाहिरायतनसङ्खाततो पातितो मोक्खोति पातिमोक्खं. अथ वा पातो विनिपातो अस्स ¶ अत्थीति पाती, संसारो. ततो मोक्खोति पातिमोक्खं, अथ वा सब्बलोकाधिपतिभावतो धम्मिस्सरो भगवा ‘‘पती’’ति वुच्चति. मुच्चति एतेनाति मोक्खो, पतिनो मोक्खो तेन पञ्ञत्तत्ताति पतिमोक्खो, पतिमोक्खो एव पातिमोक्खं. सब्बगुणानं वा मूलभावतो उत्तमट्ठेन पति च सो यथावुत्तेनत्थेन मोक्खो चाति पतिमोक्खो, पतिमोक्खो एव पातिमोक्खं. तथा हि वुत्तं ‘‘पातिमोक्खन्ति मुखमेतं पमुखमेत’’न्ति (महाव. १३५) वित्थारो.

अथ वा प-इति पकारे, अती-ति अच्चन्तत्थे निपातो, तस्मा पकारेहि अच्चन्तं मोक्खेतीति पातिमोक्खं. इदं हि सीलं सयं तदङ्गवसेन, समाधिसहितं पञ्ञासहितञ्च विक्खम्भनवसेन, समुच्छेदवसेन च अच्चन्तं मोक्खेति मोचेतीति पातिमोक्खं, पति पति मोक्खोति वा पतिमोक्खो, तम्हा तम्हा वीतिक्कमदोसतो पच्चेकं मोक्खोति अत्थो, पतिमोक्खो एव पातिमोक्खं. मोक्खोति वा निब्बानं, तस्स मोक्खस्स पटिबिम्बभूतोति पतिमोक्खो. सीलसंवरो हि सूरियस्स अरुणुग्गमनं विय निब्बानस्स उदयभूतो तप्पटिभागो विय यथारहं किलेसनिब्बापनतो, पतिमोक्खोयेव पातिमोक्खं. अथ वा मोक्खं पति वत्तति, मोक्खाभिमुखन्ति वा पतिमोक्खं, पतिमोक्खमेव पातिमोक्खन्ति एवमेत्थ पातिमोक्ख-सद्दस्स अत्थो वेदितब्बो. इरियतीति अत्तभावं पवत्तेति. ‘‘विहरती’’ति इमिना पातिमोक्खसंवरसीले ठितस्स ¶ भिक्खुनो इरियापथविहारो दस्सितो. पाळियन्ति झानविभङ्गपाळियं (विभ. ५०८ आदयो).

तत्थ कामं समणचारं, समणगोचरञ्च दस्सेतुं ‘‘आचारगोचरसम्पन्नो’’ति वुत्तं, यथा पन मग्गं आचिक्खन्तो ‘‘वामं मुञ्च, दक्खिणं गण्हा’’ति वज्जेतब्बपुब्बकं गहेतब्बं वदेय्य, यथा वा ससीसन्हानेन पहीनसेदमलजल्लिकस्स मालागन्धविलेपनादिविभूसनसंविधानं युत्तरूपं, एवं पहीनपापधम्मस्स कल्याणधम्मसमायोगो युत्तरूपोति ‘‘अत्थि आचारो, अत्थि अनाचारो’’ति द्वयं उद्दिसित्वा अनाचारं ताव विभजितुं ‘‘तत्थ कतमो अनाचारो’’तिआदि वुत्तं. तत्थ कायिको वीतिक्कमोति तिविधं कायदुच्चरितं. वाचसिको वीतिक्कमोति चतुब्बिधं वचीदुच्चरितं. कायिकवाचसिकोति तदुभयं.

एवं आजीवट्ठमकसीलस्स वीतिक्कमो दस्सितो. इदानि मानसं अनाचारं दस्सेतुं ‘‘सब्बम्पि ¶ दुस्सील्यं अनाचारो’’ति वत्वा तत्थ एकच्चियं दस्सेन्तो ‘‘इधेकच्चो वेळुदानेन वा’’तिआदिमाह. तत्थ वेळुदानेनाति पच्चयुप्पादनत्थेन वेळुदानेन. पत्तदानादीसुपि एसेव नयो. वेळूति मनुस्सानं पयोजनावहो यो कोचि वेळुदण्डो. पत्तं गन्धिकादीनं गन्धपलिवेठनादिअत्थं वा, तालनाळिकेरादिपत्तं वा. पुप्फं यं किञ्चि मनुस्सानं पयोजनावहं. तथा फलं. सिनानं सिरीसचुण्णादिन्हानियचुण्णं. मत्तिकापि एत्थेव सङ्गहं गच्छति. दन्तकट्ठं यं किञ्चि मुखसोधनत्थं दन्तपोनं. चाटुकम्यता अत्तानं दासं विय नीचट्ठाने ठपेत्वा परस्स खलितवचनं सण्ठपेत्वा पियकामताय पग्गय्हवचनं. मुग्गसूप्यताति मुग्गसूपसमता सच्चालिकेन जीवितकप्पनं. यथा हि मुग्गसूपे पच्चन्ते बहू मुग्गा पच्चन्ति, कतिपया न पच्चन्ति, एवं सच्चालिकेन जीवितकप्पने बहु अलिकं होति, अप्पकं सच्चन्ति. परिभटतीति परिभटो, परेसं दारके परिहरन्तो. परिभटस्स कम्मं पारिभट्यं, सा एव पारिभट्यता, अलङ्करणादिना कुलदारकपरिहरणस्सेतं नामं. तेसं तेसं गिहीनं गामन्तरदेसन्तरादीसु सासनपटिसासनहरणं जङ्घपेसनिकं. अञ्ञतरञ्ञतरेनाति एतेसं वा वेळुदानादीनं वेज्जकम्मभण्डागारिककम्मपिण्डपटिपिण्डकम्मसङ्घुप्पादचेतियुप्पादपट्ठपनादीनं वा मिच्छाजीवेन जीवितकप्पनककम्मानं येन केनचि ¶ . बुद्धपटिकुट्ठेनाति बुद्धेहि गरहितेन पटिसिद्धेन. मिच्छाजीवेनाति न सम्माआजीवेन. अयं वुच्चति अनाचारोति अयं सब्बोपि ‘‘अनाचारो’’ति कथीयति. आचारनिद्देसो वुत्तपटिपक्खनयेनेव वेदितब्बो.

गोचरनिद्देसेपि पठमं अगोचरस्स वचने कारणं हेट्ठा वुत्तनयेनेव वेदितब्बं. गोचरोति पिण्डपातादीनं अत्थाय उपसङ्कमितुं युत्तट्ठानं. अयुत्तट्ठानं अगोचरो. वेसिया गोचरो अस्साति वेसियागोचरो, मित्तसन्थववसेन उपसङ्कमितब्बट्ठानन्ति अत्थो. वेसिया नाम रूपूपजीविनियो, ता मित्तसन्थववसेन न उपसङ्कमितब्बा, समणभावस्स अन्तरायकरत्ता, परिसुद्धासयस्सापि गरहहेतुतो, तस्मा दक्खिणादानवसेन सतिं उपट्ठपेत्वाव उपसङ्कमितब्बा. विधवा वुच्चन्ति मतपतिका, पवुत्थपतिका वा. थुल्लकुमारिकाति महल्लिका अनिविट्ठकुमारियो, पण्डकाति नपुंसका. ते हि उस्सन्नकिलेसा अवूपसन्तपरिळाहा लोकामिससन्निस्सितकथाबहुला, तस्मा न उपसङ्कमितब्बा. भिक्खुनियो नाम उस्सन्नब्रह्मचरिया. तथा भिक्खूपि. तेसं अञ्ञमञ्ञं विसभागवत्थुभावतो सन्थववसेन उपसङ्कमने कतिपाहेनेव ब्रह्मचरियन्तरायो सिया, तस्मा न उपसङ्कमितब्बा. गिलानपुच्छनादिवसेन उपसङ्कमने सतोकारिना भवितब्बं. पानागारन्ति सुरापानघरं. तं सोण्डजनेहि ¶ अविवित्तं होति. तत्थ तेहि सोण्डतादिवसेन न उपसङ्कमितब्बं ब्रह्मचरियन्तरायकरत्ता. संसट्ठो विहरति राजूहीतिआदीसु राजानो नाम ये रज्जमनुसासन्ति. राजमहामत्ता राजिस्सरियसदिसाय इस्सरियमत्ताय समन्नागता. तित्थियाति विपरीतदस्सना बाहिरकपरिब्बाजका. तित्थियसावकाति तेसु दळ्हभत्ता पच्चयदायका. अननुलोमिकेन संसग्गेनाति तिस्सन्नं सिक्खानं अननुलोमिकेन पच्चनीकभूतेन संसग्गेन संसट्ठो विहरति, येन ब्रह्मचरियन्तरायं वा सल्लेखपरिहानिं वा पापुणाति.

इदानि अपरेनपि परियायेन अगोचरं दस्सेतुं ‘‘यानि वा पन तानी’’तिआदि वुत्तं. तत्थ अस्सद्धानीति बुद्धादीसु सद्धाविरहितानि. ततो एव अप्पसन्नानि, कम्मकम्मफलसद्धाय वा अभावेन अस्सद्धानि. रतनत्तयप्पसादाभावेन अप्पसन्नानि. अक्कोसकपरिभासकानीति अक्कोसवत्थूहि ¶ अक्कोसकानि चेव भयदस्सनेन सन्तज्जनकानि च. अत्थं न इच्छन्ति अनत्थमेव इच्छन्तीति अनत्थकामानि. हितं न इच्छन्ति अहितमेव इच्छन्तीति अहितकामानि. फासु न इच्छन्ति अफासुंयेव इच्छन्तीति अफासुककामानि. योगक्खेमं निब्भयं न इच्छन्ति, अयोगक्खेममेव इच्छन्तीति अयोगक्खेमकामानि. भिक्खूनन्ति एत्थ सामणेरानम्पि सङ्गहो. भिक्खुनीनन्ति एत्थ सिक्खमानसामणेरीनं. सब्बेसं हि सासनिकानं अनत्थकामतादीपनपदमिदं वचनं. तथारूपानि कुलानीति तादिसानि खत्तियकुलादीनि. सेवतीति निस्साय जीवति. भजतीति उपसङ्कमति. पयिरुपासतीति पुनप्पुनं उपगच्छति. अयं वुच्चतीति अयं वेसियादिको, राजादिको, अस्सद्धकुलादिको च तं तं सेवन्तस्स तिप्पकारोपि अयुत्तो गोचरोति अगोचरो. एत्थ हि वेसियादिको पञ्चकामगुणनिस्सयतो अगोचरो. यथाह ‘‘को च, भिक्खवे, भिक्खुनो अगोचरो परविसयो? यदिदं पञ्च कामगुणा’’ति (सं. नि. ५.३७२). राजादिको समणधम्मस्स अनुपनिस्सयतो, लाभसक्कारासनिविचक्कनिप्पोथनदिट्ठिविपत्तिहेतुतो च. अस्सद्धकुलादिको सद्धाहानिचित्तसन्तासावहतो अगोचरो.

गोचरनिद्देसे ‘‘न वेसियागोचरो’’तिआदीनि वुत्तपटिपक्खवसेन वेदितब्बानि. ओपानभूतानीति उदपानभूतानि भिक्खुसङ्घस्स, भिक्खुनीसङ्घस्स च चतुमहापथे खतपोक्खरणी विय यथासुखं ओगाहनक्खमानि. कासावपज्जोतानीति भिक्खूनं, भिक्खुनीनञ्च निवत्थपारुतकासावानंयेव पभाहि एकोभासानि. इसिवातपटिवातानीति गेहं पविसन्तानं ¶ , निक्खमन्तानञ्च भिक्खुभिक्खुनीसङ्खातानं इसीनं चीवरवातेन चेव समिञ्जनपसारणादिजनितसरीरवातेन च पटिवातानि पवायितानि विनिद्धुतकिब्बिसानि वा.

इदानि निद्देसे आगतनयेनापि आचारगोचरे दस्सेतुं ‘‘अपिचा’’तिआदि आरद्धं. एत्थाति एतस्मिं पातिमोक्खसीलनिद्देसे. इमिनापि नयेनाति इदानि वुच्चमानविधिनापि. सङ्घगतोति सङ्घसन्निपातं गतो. अचित्तीकारकतोति अकतचित्तीकारो, अकतगारवोति अत्थो. घट्टयन्तोति सरीरेन, चीवरेन वा घंसन्तो. पुरतोपि तिट्ठति अचित्तीकारकतोति ¶ सम्बन्धितब्बं. ठितकोपीति उपरि तिट्ठन्तो विय आसन्नतरट्ठाने ठितकोपि भणति. बाहाविक्खेपकोति बाहुं विक्खिपन्तो. अनुपाहनानन्ति अनादरे सामिवचनं. सउपाहनोति उपाहनारुळ्हो. थेरे भिक्खू अनुपखज्जाति थेरानं भिक्खूनं ठितट्ठानं अनुपविसित्वा तेसं आसन्नतरट्ठानं उपगन्त्वा. कट्ठं पक्खिपति अग्गिकुण्डे. वोक्कम्माति पस्सतो अतिक्कमित्वा. गूळ्हानि सभावतो पटिच्छन्नानि साणिपाकारादिना पटिच्छादितानि. अनापुच्छाति अनापुच्छित्वा. अस्साति अनाचारस्स.

अपिच भिक्खूतिआदि सब्बस्सेव भिक्खुनो आचारदस्सनवसेन पवत्तं अट्ठकथावचनं, न निद्देसपाळि. सद्धासीलसुतचागादिगुणहेतुको गरुभावो गरुकरणं वा गारवो, सह गारवेनाति सगारवो. गरुट्ठानियेसु गारवसारज्जादिवसेन पटिस्सायना पतिस्सा, सप्पतिस्सवपटिपत्ति. सह पतिस्सायाति सप्पतिस्सो. सविसेसं हिरिमनताय, ओत्तप्पिभावेन च हिरोत्तप्पसम्पन्नो. सेखियधम्मपारिपूरिवसेन सुनिवत्थो सुपारुतो. पासादिकेनाति पसादावहेन, इत्थम्भूतलक्खणे चेतं करणवचनं. एसेव नयो इतो परेसुपि छसु पदेसु. अभिक्कन्तेनाति अभिक्कमेन. इरियापथसम्पन्नोति सम्पन्नइरियापथो. तेन सेसइरियापथानम्पि पासादिकतमाह. इन्द्रियेसु गुत्तद्वारोति चक्खुन्द्रियादीसु छसु द्वारेसु सुसंविहितारक्खो. भोजने मत्तञ्ञूति परिभुञ्जितब्बतो भोजनसञ्ञिते चतुब्बिधेपि पच्चये परियेसनपटिग्गहणपरिभोगादिवसेन सब्बसो पमाणञ्ञू. जागरियमनुयुत्तोति पुब्बरत्तापररत्तं भावनामनसिकारसङ्खातं जागरियं सातच्चकारितावसेन अनु अनु युत्तो तत्थ युत्तपयुत्तो. सतिसम्पजञ्ञेन समन्नागतोतिआदि यथावुत्तस्स आचारस्स सम्भारदस्सनं. तत्थ अप्पिच्छोति निइच्छो. सन्तुट्ठोति यथालाभादिवसेन सन्तोसेन तुट्ठो. सक्कच्चकारीति आदरकारी. गरुचित्तीकारबहुलोति ¶ गरुट्ठानियेसु गरुकरणबहुलो. अयं वुच्चति आचारोति अयं सगारवतादि अत्थकामेहि आचरितब्बतो आचारो.

सीलादीनं गुणानं उपनिस्सयभूतो उपनिस्सयगोचरो. सतिसङ्खातो चित्तस्स आरक्खभूतो एव गोचरो आरक्खगोचरो. कम्मट्ठानसङ्खातो चित्तस्स उपनिबन्धनट्ठानभूतो गोचरो उपनिबन्धगोचरो. अप्पिच्छतादीहि ¶ दसहि विवट्टनिस्सिताय कथाय वत्थुभूतेहि गुणेहि समन्नागतो दसकथावत्थुगुणसमन्नागतो. ततो एव कल्याणो सुन्दरो मित्तोति कल्याणमित्तो. तस्स लक्खणं परतो आगमिस्सति. अस्सुतं सुत्तगेय्यादिं. सुणातीति सुतमयं ञाणं उप्पादेति. सुतं परियोदापेतीति तमेव यथासुतं अविसदताय अपरियोदातं पुनप्पुनं परिपुच्छनादिना विसोधेति निज्जटं निगुम्बं करोति. तत्थ च ये कङ्खट्ठानिया धम्मा, तेसु संसयं छिन्दन्तो कङ्खं वितरति. कम्मकम्मफलेसु, रतनत्तये च सम्मादिट्ठिया उजुकरणेन दिट्ठिं उजुं करोति. ततो एव च दुविधायपि सद्धासम्पदाय चित्तं पसादेति. अथ वा यथासुतं धम्मं परियोदपेत्वा तत्थागते रूपारूपधम्मे परिग्गहेत्वा सपच्चयं नामरूपं परिग्गण्हन्तो सत्तदिट्ठिवङ्कविधमनेन दिट्ठिं उजुं करोति. धम्मानं पच्चयपच्चयुप्पन्नतामत्तदस्सनेन तीसुपि अद्धासु कङ्खं वितरति. ततो परं च उदयब्बयञाणादिवसेन विपस्सनं वड्ढेत्वा अरियभूमिं ओक्कमन्तो अवेच्चपसादेन रतनत्तये चित्तं पसादेति. तथाभूतोव तस्स कल्याणमित्तस्स अनुसिक्खनेन सद्धादीहि गुणेहि न हायति, अञ्ञदत्थु वड्ढतेव. तेनाह ‘‘यस्स वा’’तिआदि.

अन्तरघरन्ति अन्तरे अन्तरे घरानि एत्थ, तं एतस्साति वा ‘‘अन्तरघर’’न्ति लद्धनामं गोचरगामं पविट्ठो. तत्थ घरे घरे भिक्खापरियेसनाय वीथिं पटिपन्नो. ओक्खित्तचक्खूति हेट्ठाखित्तचक्खु. कित्तकेन पन ओक्खित्तचक्खु होतीति आह ‘‘युगमत्तदस्सावी’’ति. सुसंवुतोति संयतो. यथा पनेत्थ सुसंवुतो नाम होति, तं दस्सेतुं ‘‘न हत्थिं ओलोकेन्तो’’तिआदि वुत्तं.

यत्थाति येसु सतिपट्ठानेसु. चित्तं भावनाचित्तं. उपनिबन्धतीति उपनेत्वा निबन्धति. वुत्तञ्हेतं –

‘‘यथा ¶ थम्भे निबन्धेय्य, वच्छं दमं नरो इध;

बन्धेय्येवं सकं चित्तं, सतियारम्मणे दळ्ह’’न्ति. (विसुद्धि. १.२१७; दी. नि. अट्ठ. २.३७४; म. नि. अट्ठ. १.१०७; पारा. अट्ठ. २.१६५; पटि. म. अट्ठ. २.१.१६३);

सतिपट्ठानानं उपनिबन्धगोचरभावं दस्सेतुं ‘‘वुत्तञ्हेत’’न्तिआदि वुत्तं. तत्थ सको पेत्तिको विसयोति अत्तनो पितु सम्मासम्बुद्धस्स सन्तको, तेन दिट्ठो दस्सितो च विसयो.

अणुप्पमाणेसूति ¶ परमाणुप्पमाणेसु. असञ्चिच्चआपन्नसेखियअकुसलचित्तुप्पादादिभेदेसूति असञ्चिच्च आपन्नसेखियेसु अकुसलचित्तुप्पादादिभेदेसूति एवं असञ्चिच्चग्गहणं सेखियविसेसनं दट्ठब्बं. सेखियग्गहणेन चेत्थ वत्तक्खन्धकादीसु (चूळव. ३५६ आदयो) आगतवत्तादीनम्पि गहणं. तेपि हि सिक्खितब्बट्ठेन ‘‘सेखिया’’ति इच्छिता. तथा हि मातिकायं पाराजिकादीनं विय सेखियानं परिच्छेदो न कतो. एवञ्च कत्वा ‘‘असञ्चिच्च आपन्नसेखिया’’ति असञ्चिच्चग्गहणं समत्थितं होति. न हि मातिकायं आगतेसु पञ्चसत्ततिया सेखियेसु नोसञ्ञाविमोक्खो नाम अत्थि, असञ्चिच्चग्गहणेनेव चेत्थ असतिअजाननानम्पि सङ्गहो कतो. केचि पनेत्थ असिञ्चिच्च आपन्नग्गहणेन अचित्तकापत्तियो गहिताति वदन्ति, तं तेसं मतिमत्तं, गरुकापत्तीसुपि कासञ्चि अचित्तकभावसब्भावतो, अधिट्ठानाविकम्मस्स, देसनाविकम्मस्सेव वा सब्बलहुकस्स वज्जस्स इधाधिप्पेतत्ता. तेनाह ‘‘यानि तानि वज्जानि अप्पमत्तकानि ओरमत्तकानि लहुकानि लहुसम्मतानी’’तिआदि. आदिसद्देन पातिमोक्खसंवरविसुद्धत्थं अनतिक्कमनीयानं अनापत्तिगमनीयानं सङ्गहो दट्ठब्बो. भयदस्सनसीलोति परमाणुमत्तं वज्जं अट्ठसट्ठियोजनसतसहस्सुब्बेधसिनेरुपब्बतसदिसं कत्वा दस्सनसभावो, सब्बलहुकं वा दुब्भासितमत्तं पाराजिकसदिसं कत्वा दस्सनसभावो. यं किञ्चीति मूलपञ्ञत्तिअनुपञ्ञत्तिसब्बत्थपञ्ञत्तिपदेसपञ्ञत्तिआदिभेदं यं किञ्चि सिक्खितब्बं पटिपज्जितब्बं पूरेतब्बं सीलं. सम्मा आदायाति सम्मदेव सक्कच्चं, सब्बसो च आदियित्वा. अयं पन आचारगोचरसम्पदा किं पातिमोक्खसीले परियापन्ना, उदाहु अपरियापन्नाति? परियापन्ना. यदि एवं कस्मा पुन वुत्ताति चोदनं सन्धायाह ‘‘एत्थ चा’’तिआदि.

इन्द्रियसंवरसीलवण्णना

१५. इन्द्रियसंवरसीलं ¶ पातिमोक्खसंवरसीलस्स सम्भारभूतं, तस्मिं सतियेव इच्छितब्बन्ति वुत्तं ‘‘सोति पातिमोक्खसंवरसीले ठितो भिक्खू’’ति. सम्पादिते हि एतस्मिं पातिमोक्खसंवरसीलं सुगुत्तं सुरक्खितमेव होति, सुसंविहितकण्टकवति विय सस्सन्ति. कारणवसेनाति असाधारणकारणस्स वसेन. असाधारणकारणवसेन ¶ हि फलं अपदिसीयति, यथा यवङ्कुरो भेरिसद्दोति. निस्सयवोहारेन वा एतं निस्सितवचनं, यथा मञ्चा उक्कुट्ठिं करोन्तीति. रूपन्ति रूपायतनं. चक्खुना रूपं दिस्वाति एत्थ यदि चक्खु रूपं पस्सेय्य, अञ्ञविञ्ञाणसमङ्गिनोपि पस्सेय्युं, न चेतं अत्थि, कस्मा? अचेतनत्ता चक्खुस्स. तेनाह ‘‘चक्खु रूपं न पस्सति अचित्तकत्ता’’ति. अथ विञ्ञाणं रूपं पस्सेय्य, तिरोकुट्टादिगतम्पि नं पस्सेय्य अप्पटिघभावतो, इदम्पि नत्थि सब्बस्स विञ्ञाणस्स दस्सनाभावतो. तेनाह ‘‘चित्तं न पस्सति अचक्खुकत्ता’’ति. तत्थ यथा चक्खुसन्निस्सितं विञ्ञाणं पस्सति, न यं किञ्चि. तञ्च केनचि कुट्टादिना अन्तरिते न उप्पज्जति, यत्थ आलोकस्स विबन्धो. यत्थ पन न विबन्धो फलिकगब्भपटलादिके, तत्थ अन्तरितेपि उप्पज्जतेव. एवं विञ्ञाणाधिट्ठितं चक्खु पस्सति, न यं किञ्चीति विञ्ञाणाधिट्ठितं चक्खुं सन्धायेतं वुत्तं ‘‘चक्खुना रूपं दिस्वा’’ति.

द्वारारम्मणसङ्घट्टेति द्वारस्स आरम्मणेन सङ्घट्टे सति, चक्खुस्स रूपारम्मणे आपाथगतेति अधिप्पायो. पसादवत्थुकेन चित्तेनाति चक्खुपसादवत्थुकेन तन्निस्साय पवत्तेन विञ्ञाणेन, यं ‘‘चक्खुविञ्ञाण’’न्ति वुच्चति. पस्सतीति ओलोकेति. चक्खुपसादसन्निस्सये हि विञ्ञाणे आलोकानुग्गहितं रूपारम्मणं सन्निस्सयगुणेन ओभासेन्ते तंसमङ्गिपुग्गलो ‘‘रूपं पस्सती’’ति वुच्चति. ओभासनञ्चेत्थ आरम्मणस्स यथासभावतो विभावनं, यं ‘‘पच्चक्खतो गहण’’न्ति वुच्चति. उसुना लक्खस्स वेधे सिज्झन्ते तस्स सम्भारभूतेन धनुना विज्झतीति वचनं विय विञ्ञाणेन रूपदस्सने सिज्झन्ते चक्खुना रूपं पस्सतीति ईदिसी ससम्भारकथा नामेसा होति. ससम्भारा कथा ससम्भारकथा, दस्सनस्स कारणसहिताति अत्थो. ससम्भारस्स वा दस्सनस्स कथा ससम्भारकथा. तस्माति यस्मा केवलेन चक्खुना, केवलेन वा विञ्ञाणेन रूपदस्सनं नत्थि, तस्मा.

इत्थिपुरिसनिमित्तं वाति एत्थ इत्थिसन्ताननिस्सितरूपमुखेन गय्हमानं सण्ठानं थनमंसाविसदता ¶ निम्मस्सुमुखता केसबन्धनवत्थग्गहणं अविसदट्ठानगमनादि च सब्बं ‘‘इत्थी’’ति सञ्जाननस्स कारणभावतो इत्थिनिमित्तं. वुत्तविपरियायतो पुरिसनिमित्तं वेदितब्बं. सुभनिमित्तादिकं वाति एत्थ रागुप्पत्तिहेतुभूतो इट्ठाकारो सुभनिमित्तं. आदि-सद्देन पटिघनिमित्तादीनं ¶ सङ्गहो. सो पन दोसुप्पत्तिआदिहेतुभूतो अनिट्ठादिआकारो वेदितब्बो. कामञ्चेत्थ पाळियं अभिज्झादोमनस्साव सरूपतो आगता, उपेक्खानिमित्तस्सापि पन सङ्गहो इच्छितब्बो, असमपेक्खनेन उप्पज्जनकमोहस्सापि असंवरभावतो. तथा हि वक्खति ‘‘मुट्ठसच्चं वा अञ्ञाणं वा’’ति. उपेक्खानिमित्तन्ति चेत्थ अञ्ञाणुपेक्खाय वत्थुभूतं आरम्मणं, तञ्चस्स असमपेक्खनवसेन वेदितब्बं. एवं सङ्खेपतो रागदोसमोहानं कारणं ‘‘सुभनिमित्तादिक’’न्ति वुत्तं. तेनाह ‘‘किलेसवत्थुभूतं निमित्त’’न्ति. दिट्ठमत्तेयेव सण्ठातीति ‘‘दिट्ठे दिट्ठमत्तं भविस्सती’’ति (उदा. १०) सुत्ते वुत्तनयेन वण्णायतने चक्खुविञ्ञाणेन, वीथिचित्तेहि च गहितमत्तेयेव तिट्ठति, न ततो परं किञ्चि सुभादिआकारं परिकप्पेति. पाकटभावकरणतोति परिब्यत्तभावकरणतो विभूतभावकरणतो. विसभागवत्थुनो हि हत्थादिअवयवेसु सुभादितो परिकप्पेन्तस्स अपरापरं तत्थ उप्पज्जमाना किलेसा परिब्यत्ता होन्तीति ते तेसं अनुब्यञ्जना नाम. ते पन यस्मा तथा तथा सन्निविट्ठानं भूतुपादायरूपानं सन्निवेसाकारो. न हि तं मुञ्चित्वा परमत्थतो हत्थादि नाम कोचि अत्थि. तस्मा वुत्तं ‘‘हत्थपाद…पे… आकारं न गण्हाती’’ति. किं पन गण्हातीति आह ‘‘यं तत्थ भूतं, तदेव गण्हाती’’ति. यं तस्मिं सरीरे विज्जमानं केसलोमादि भूतुपादायमत्तं वा, तदेव याथावतो गण्हाति. तत्थ असुभाकारगहणस्स निदस्सनं दस्सेन्तो ‘‘चेतियपब्बतवासी’’तिआदिना महातिस्सत्थेरवत्थुं आहरि.

तत्थ सुमण्डितपसाधिताति सुट्ठु मण्डिता पसाधिता च. आभरणादीहि आहारिमेहि मण्डनं. सरीरस्स उच्छादनादिवसेन पटिसङ्खरणं पसाधनन्ति वदन्ति, आभरणेहि, पन वत्थालङ्कारादीहि च अलङ्करणं पसाधनं. ऊनट्ठानपूरणं मण्डनं. विपल्लत्थचित्ताति रागवसेन विपरीतचित्ता. ओलोकेन्तोति थेरो कम्मट्ठानमनसिकारेनेव गच्छन्तो सद्दकण्टकत्ता पुब्बभागमनसिकारस्स हसितसद्दानुसारेन ‘‘किमेत’’न्ति ओलोकेन्तो. असुभसञ्ञन्ति अट्ठिकसञ्ञं. अट्ठिककम्मट्ठानं हि थेरो तदा परिहरति. अरहत्तं पापुणीति थेरो ¶ किर तस्सा हसन्तिया दन्तट्ठिदस्सनेनेव पुब्बभागभावनाय सुभावितत्ता पटिभागनिमित्तं, सातिसयञ्च उपचारज्झानं लभित्वा यथाठितोव तत्थ पठमज्झानं अधिगन्त्वा तं पादकं कत्वा ¶ विपस्सनं वड्ढेत्वा मग्गपरम्पराय आसवक्खयं पापुणि. पुब्बसञ्ञं अनुस्सरीति पुब्बकं यथारद्धं कालेन कालं अनुयुञ्जियमानं अट्ठिककम्मट्ठानं अनुस्सरि समन्नाहरि. अनुमग्गन्ति अनुपथं तस्सा पदानुपदं. थेरस्स किर भावनाय पगुणभावतो दन्तट्ठिदस्सनेनेव तस्सा सकलसरीरं अट्ठिकसङ्घातभावेन उपट्ठासि. न तं ‘‘इत्थी’’ति वा ‘‘पुरिसो’’ति वा सञ्जानि. तेनाह ‘‘नाभिजानामि…पे… महापथे’’ति.

‘‘यस्स चक्खुन्द्रियासंवरस्स हेतू’’ति वत्वा पुन ‘‘तस्स चक्खुन्द्रियस्स सतिकवाटेन पिदहनत्थाया’’ति वुत्तं, न असंवरस्साति. यदिदं यं चक्खुन्द्रियासंवरस्स हेतु अभिज्झादिअन्वास्सवनं दस्सितं, तं असंवुतचक्खुन्द्रियस्सेव हेतु पवत्तं दस्सितन्ति कत्वा वुत्तं. चक्खुद्वारिकस्स हि अभिज्झादिअन्वास्सवनस्स तंद्वारिकविञ्ञाणस्स विय चक्खुन्द्रियं पधानकारणं. चक्खुन्द्रियस्स असंवुतत्ते सति ते अन्वास्सवन्तीति असंवरियमानचक्खुन्द्रियहेतुको सो असंवरो तथा वुत्तोति. यत्वाधिकरणन्ति हि यस्स चक्खुन्द्रियस्स कारणाति अत्थो. कीदिसस्स च कारणाति? असंवुतस्स, किञ्च असंवुतं? यस्स चक्खुन्द्रियासंवरस्स हेतु अभिज्झादयो अन्वास्सवन्ति, तस्स संवरायाति अयमेत्थ योजना.

जवनक्खणे पन सचे दुस्सील्यं वातिआदि पुन अवचनत्थं इधेव सब्बं वुत्तन्ति छसु द्वारेसु यथासम्भवं वेदितब्बं. न हि पञ्चद्वारे कायवचीदुच्चरितसङ्खातं दुस्सील्यं अत्थि, तस्मा दुस्सील्यासंवरो मनोद्वारवसेन, सेसासंवरो छद्वारवसेन योजेतब्बो. मुट्ठसच्चादीनं हि सतिपटिपक्खाकुसलधम्मादिभावतो सिया पञ्चद्वारे उप्पत्ति, न त्वेव कायिकवाचसिकवीतिक्कमभूतस्स दुस्सील्यस्स तत्थ उप्पत्ति, पञ्चद्वारिकजवनानं अविञ्ञत्तिजनकत्ता. दुस्सील्यादयो चेत्थ पञ्च असंवरा सीलसंवरादीनं पञ्चन्नं संवरानं पटिपक्खभावेन वुत्ता. तस्मिं सतीति तस्मिं असंवरे सति.

यथा ¶ किन्ति येन पकारेन जवने उप्पज्जमानो असंवरो ‘‘चक्खुन्द्रिये असंवरो’’ति वुच्चति, तं निदस्सनं किन्ति अत्थो. यथातिआदिना नगरद्वारे असंवरे सति तंसम्बन्धानं घरादीनं असंवुतता विय जवने असंवरे सति तंसम्बन्धानं द्वारादीनं असंवुतताति एवं अञ्ञासंवरे अञ्ञासंवुतता सामञ्ञमेव निदस्सेति, न पुब्बापरसामञ्ञं, अन्तोबहिसामञ्ञं वा. सति वा द्वारभवङ्गादिके पुन उप्पज्जमानं जवनं बाहिरं विय कत्वा नगरद्वारसमानं वुत्तं ¶ , इतरञ्च अन्तोनगरे घरादिसमानं. पच्चयभावेन हि पुरिमनिप्फन्नं जवनकाले असन्तम्पि भवङ्गादि चक्खादि विय फलनिप्फत्तिया सन्तंयेव नाम होति. न हि धरमानंयेव ‘‘सन्त’’न्ति वुच्चति. ‘‘बाहिरं विय कत्वा’’ति च परमत्थतो जवनस्स बाहिरभावे, इतरस्स च अब्भन्तरभावे असतिपि ‘‘पभस्सरमिदं, भिक्खवे, चित्तं, तञ्च खो आगन्तुकेहि उपक्किलिट्ठ’’न्तिआदि (अ. नि. १.४९) वचनतो आगन्तुकभूतस्स कदाचि कदाचि उप्पज्जमानस्स जवनस्स बाहिरभावो, तब्बिधुरसभावस्स इतरस्स अब्भन्तरभावो एकेन परियायेन होतीति कत्वा वुत्तं. जवने वा असंवरे उप्पन्ने ततो परं द्वारभवङ्गादीनं असंवरहेतुभावापत्तितो. असंवरस्स हि उप्पत्तिया द्वारभवङ्गादीनं तस्स हेतुभावो पञ्ञायतीति. नगरद्वारसदिसेन जवनेन पविसित्वा दुस्सील्यादिचोरानं द्वारभवङ्गादीसु मुसनं कुसलभण्डविनासनं कथितं. यस्मिं हि द्वारे असंवरो उप्पज्जति, सो तत्थ द्वारादीनं संवरूपनिस्सयभावं उपच्छिन्दन्तोयेव पवत्ततीति. द्वारभवङ्गादीनं जवनेन सह सम्बन्धो एकसन्ततिपरियापन्नतो दट्ठब्बो.

एत्थ च चक्खुद्वारे रूपारम्मणे आपाथगते नियमितादिवसेन कुसलाकुसलजवने सत्तक्खत्तुं उप्पज्जित्वा भवङ्गं ओतिण्णे तदनुरूपमेव मनोद्वारिकजवने तस्मिंयेवारम्मणे सत्तक्खत्तुंयेव उप्पज्जित्वा भवङ्गं ओतिण्णे पुन तस्मिंयेव द्वारे तदेवारम्मणं निस्साय ‘‘इत्थी पुरिसो’’तिआदिना ववत्थपेन्तं पसादरज्जनादिवसेन सत्तक्खत्तुं जवनं जवति. एवं पवत्तमानं जवनं सन्धाय ‘‘जवने दुस्सील्यादीसु उप्पन्नेसु तस्मिं असंवरे सति द्वारम्पि अगुत्त’’न्तिआदि वुत्तं.

तस्मिं पन जवने. सीलादीसूति सीलसंवरसतिसंवरञाणसंवरखन्तिसंवरवीरियसंवरेसु उप्पन्नेसु. यथा हि पगेव सतिआरक्खं अनुपट्ठपेन्तस्स ¶ दुस्सील्यादीनं उप्पत्ति, एवं पगेव सतिआरक्खं उपट्ठपेन्तस्स सीलादीनं उप्पत्ति वेदितब्बा. सद्दादीसुपि यथारहं निमित्तानुब्यञ्जनानि वेदितब्बानि. सोतविञ्ञाणेन हि सद्दं सुत्वा ‘‘इत्थिसद्दो’’ति वा ‘‘पुरिससद्दो’’ति वा इट्ठानिट्ठादिकं वा किलेसवत्थुभूतं निमित्तं न गण्हाति, सुतमत्ते एव सण्ठाति. यो च गीतसद्दादिकस्स किलेसानं अनु अनु ब्यञ्जनतो ‘‘अनुब्यञ्जन’’न्ति लद्धवोहारो मन्दतारादिवसेन ववत्थितो छज्जादिभेदभिन्नो आकारो, तम्पि न गण्हातीति. एवं गन्धादीसुपि यथारहं वत्तब्बं. मनोद्वारे पन सावज्जनभवङ्गं मनोद्वारं तस्मिं द्वारे धम्मारम्मणे ¶ आपाथगते तं जवनमनसाव विञ्ञाय विजानित्वातिआदिना योजेतब्बं. किलेसो अनुबन्धो एतस्साति किलेसानुबन्धो, सो एव निमित्तादिगाहो, ततो परिवज्जनलक्खणं किलेसानुबन्धनिमित्तादिग्गाहपरिवज्जनलक्खणं. आदि-सद्देन अनुब्यञ्जनं सङ्गण्हाति.

आजीवपारिसुद्धिसीलवण्णना

१६. वुत्तेति इधेव उद्देसवसेन पुब्बे वुत्ते. तथा हि ‘‘आजीवहेतु पञ्ञत्तानं छन्नं सिक्खापदान’’न्ति पदुद्धारं कत्वा तानि पाळिवसेनेव दस्सेतुं ‘‘यानि तानी’’तिआदि आरद्धं. तत्थ यानि तानि एवं पञ्ञत्तानि छ सिक्खापदानीति सम्बन्धो. आजीवहेतूति जीविकनिमित्तं, ‘‘एवाहं पच्चयेहि अकिलमन्तो जीविस्सामी’’ति अधिप्पायेन. आजीवकारणाति तस्सेव वेवचनं. पापिच्छोति पापिकाय असन्तगुणसम्भावनिच्छाय समन्नागतो. इच्छापकतोति इच्छाय अपकतो उपद्दुतो, अभिभूतो वा. असन्तन्ति अविज्जमानं. अभूतन्ति अनुप्पन्नं. अनुप्पन्नत्ता हि तस्स तं असन्तन्ति पुरिमस्स पच्छिमं कारणवचनं. उत्तरिमनुस्सधम्मन्ति उत्तरिमनुस्सानं उक्कट्ठपुरिसानं धम्मं, मनुस्सधम्मतो वा उत्तरि उक्कट्ठं. उल्लपतीति उग्गतायुको लपति. सीलं हि भिक्खुनो आयु, तं तस्स तथालपनसमकालमेव विगच्छति. तेनाह ‘‘आपत्ति पाराजिकस्सा’’ति पाराजिकसङ्खाता आपत्ति अस्स, पाराजिकसञ्ञितस्स वा वीतिक्कमस्स आपज्जनं उल्लपनन्ति अत्थो. सञ्चरित्तं समापज्जतीति सञ्चरणभावं आपज्जति, इत्थिया वा पुरिसमतिं, पुरिसस्स वा इत्थिमतिं आरोचेतीति अधिप्पायो. ‘‘इमेसं छन्नं सिक्खापदानं वीतिक्कमस्स वसेना’’ति सम्बन्धो हेट्ठा दस्सितो एव.

कुहनातिआदीसूति ¶ हेट्ठा उद्दिट्ठपाळियाव पदुद्धारो. अयं पाळीति अयं विभङ्गे (विभ. ८६१) आगता निद्देसपाळि.

१७. चीवरादिपच्चया लब्भन्तीति लाभा. ते एव सक्कच्चं आदरवसेन दिय्यमाना सक्कारा. पत्थटयसता कित्तिसद्दो. तं लाभञ्च सक्कारञ्च कित्तिसद्दञ्च. सन्निस्सितस्साति एत्थ तण्हानिस्सयो अधिप्पेतोति आह ‘‘पत्थयन्तस्सा’’ति. असन्तगुणदीपनकामस्साति असन्ते अत्तनि अविज्जमाने सद्धादिगुणे सम्भावेतुकामस्स. असन्तगुणसम्भावनतालक्खणा, पटिग्गहणे ¶ च अमत्तञ्ञुतालक्खणा हि पापिच्छता. इच्छाय अपकतस्साति पापिकाय इच्छाय सम्माआजीवतो अपेतो कतोति अपकतो. तथाभूतो च आजीवूपद्दवेन उपद्दुतोति कत्वा आह ‘‘उपद्दुतस्साति अत्थो’’ति.

कुहनमेव पच्चयुप्पादनस्स वत्थूति कुहनवत्थु. तिविधम्पेतं तत्थ आगतं तस्स निस्सयभूताय इमाय पाळिया दस्सेतुन्ति एवमत्थो दट्ठब्बो. तदत्थिकस्सेवाति तेहि चीवरादीहि अत्थिकस्सेव. पटिक्खिपनेनाति चीवरादीनं पटिक्खिपनहेतु. अस्साति भवेय्य. पटिग्गहणेन चाति च-सद्देन पुब्बे वुत्तं पटिक्खिपनं समुच्चिनोति.

भिय्योकम्यतन्ति बहुकामतं. यन्ति किरियापरामसनं, तस्मा ‘‘धारेय्या’’ति एत्थ यदेतं सङ्घाटिं कत्वा धारणं, एतं समणस्स सारुप्पन्ति योजना. पापणिकानीति आपणतो छड्डितानि. नन्तकानीति अन्तरहितानि चोळखण्डानि. उच्चिनित्वाति उञ्छनेन चिनित्वा सङ्गहेत्वा. उञ्छाचरियायाति उञ्छाचरियाय लद्धेन. गिलानस्स पच्चयभूता भेसज्जसङ्खाता जीवितपरिक्खारा गिलानपच्चयभेसज्जपरिक्खारा. पूतिमुत्तन्ति पुराणस्स, अपुराणस्स च सब्बस्स गोमुत्तस्सेतं नामं. पूतिमुत्तेनाति पूतिभावेन मुत्तेन परेहि छड्डितेन, पूतिभूतेन वा गोमुत्तेन. धुतवादोति परेसम्पि धुतगुणवादी. सम्मुखीभावाति सम्मुखतो विज्जमानत्ता, लब्भमानतायाति अत्थो.

अत्तानं उत्तरिमनुस्सधम्माधिगमस्स सामन्ते कत्वा जप्पनं सामन्तजप्पनं. महेसक्खोति महानुभावो, उत्तरिमनुस्सधम्माधिगमेनाति अधिप्पायो. ‘‘मित्तो’’ति सामञ्ञतो वत्वा पुन तं विसेसेति ‘‘सन्दिट्ठो सम्भत्तो’’ति ¶ . दिट्ठमत्तो हि मित्तो सन्दिट्ठो. दळ्हभत्तिको सम्भत्तो. सहायोति सह आयनको, सखाति अत्थो. सत्तपदिनो हि ‘‘सखा’’ति वुच्चन्ति. विहारो पाकारपरिच्छिन्नो सकलो आवासो. अड्ढयोगो दीघपासादो, गरुळसण्ठानपासादोतिपि वदन्ति. पासादो चतुरस्सपासादो. हम्मियं मुण्डच्छदनपासादो. कूटागारं द्वीहि कण्णिकाहि कत्तब्बपासादो. अट्टो पटिराजूनम्पि पटिबाहनयोग्यो चतुपञ्चभूमको पटिस्सयविसेसो. माळो एककूटसङ्गहितो अनेककोणवन्तो पटिस्सयविसेसो. उद्दण्डो अगब्भिका एकद्वारा दीघसालाति वदन्ति. अपरे पन भणन्ति – विहारो नाम दीघमुखपासादो. अड्ढयोगो एकपस्सेन छदनकसेनासनं. तस्स किर एकपस्से भित्ति उच्चतरा होति, इतरपस्से नीचा, तेन तं एकपस्सछदनकं ¶ होति. पासादो आयतचतुरस्सपासादो. हम्मियं मुण्डच्छदनं चन्दिकङ्गणयुत्तं. गुहा केवला पब्बतगुहा. लेणं द्वारबद्धं. कूटागारं यो कोचि कण्णिकाबद्धपासादो. अट्टो बहलभित्तिगेहं. यस्स गोपानसियो अग्गहेत्वा इट्ठकाहि एव छदनं होति. अट्टालकाकारेन करीयतीतिपि वदन्ति. माळो वट्टाकारेन कतसेनासनं. उद्दण्डो एको पटिस्सयविसेसो. यो ‘‘भण्डसाला, उदोसित’’न्तिपि वुच्चति. उपट्ठानसाला सन्निपतनट्ठानं.

कुच्छितरजभूताय पापिच्छताय निरत्थकं कायवचीविप्फन्दनिग्गण्हनं कोरजं, तं एतस्स अत्थीति कोरजिको, कोहञ्ञेन संयतकायो, अतिविय, अभिण्हं वा कोरजिको कोरजिककोरजिको. अतिपरिसङ्कितोति केचि. अतिविय कुहो कुहककुहको, सातिसयविम्हापकोति अत्थो. अतिविय लपो लपनको लपकलपको. मुखसम्भाविकोति कोरजिककोरजिकादिभावेन पवत्तवचनेहि अत्तनो मुखमत्तेन अञ्ञेहि सम्भाविको. सो एवरूपो एवरूपताय एव अत्तानं परं विय कत्वा ‘‘अयं समणो’’तिआदीनि कथेति. गम्भीरन्तिआदि तस्सा कथाय उत्तरिमनुस्सधम्मपटिबद्धताय वुत्तं.

सम्भावनाधिप्पायकतेनाति ‘‘कथं नु खो मं जनो ‘अरियो’ति वा ‘विसेसलाभी’ति वा सम्भावेय्या’’ति इमिना अधिप्पायेन कतेन. गमनं सण्ठपेतीति विसेसलाभीनं गमनं विय अत्तनो गमनं सक्कच्चं ठपेति ¶ , सतो सम्पजानोव गच्छन्तो विय होति. पणिधायाति ‘‘अरहाति मं जानन्तू’’ति चित्तं सण्ठपेत्वा, पत्थेत्वा वा. समाहितो वियाति झानसमाधिना समाहितो विय. आपाथकज्झायीति मनुस्सानं आपाथट्ठाने समाधिसमापन्नो विय निसीदन्तो आपाथके जनस्स पाकटट्ठाने झायी. इरियापथसङ्खातन्ति इरियापथसण्ठपनसङ्खातं.

पच्चयपटिसेवनसङ्खातेनाति अयोनिसो उप्पादितानं पच्चयानं पटिसेवनन्ति एवं कथितेन, तेन वा पच्चयपटिसेवनेन सङ्खातब्बेन कथितब्बेन. अञ्ञं विय कत्वा अत्तनो समीपे भणनं सामन्तजप्पितं. आ-कारस्स रस्सत्तं कत्वा ‘‘अट्ठपना’’ति वुत्तं. कुहनं कुहो, तस्स अयना पवत्ति कुहायना, कुहस्स वा पुग्गलस्स अयना गति किरिया कुहायना. कुहेति, कुहेन वा इतोति कुहितो, कुहको.

पुट्ठस्साति ¶ ‘‘को तिस्सो, को राजपूजितो’’ति पुट्ठस्स. उद्धं कत्वाति उक्खिपित्वा विभवसम्पत्तिआदिना पग्गहेत्वा.

उन्नहनाति उद्धं उद्धं बन्धना पलिवेठना. द्वे किर भिक्खू एकं गामं पविसित्वा आसनसालाय निसीदित्वा एकं कुमारिकं पक्कोसिंसु. ताय आगताय तत्रेको एकं पुच्छि ‘‘अयं, भन्ते, कस्स कुमारिका’’ति? ‘‘अम्हाकं उपट्ठायिकाय तेलकन्दरिकाय धीता, इमिस्सा माता मयि गेहं गते सप्पिं ददमाना घटेनेव देति, अयम्पि माता विय घटेन देती’’ति (विभ. अट्ठ. ८६२) उक्काचेसि. इमं सन्धाय वुत्तं ‘‘तेलकन्दरिकवत्थु चेत्थ वत्तब्ब’’न्ति.

धम्मानुरूपा वाति मत्तावचनानुरूपं वा. मत्तावचनं हि ‘‘धम्मो’’ति वुच्चति. यथाह ‘‘सुभासितं उत्तममाहु सन्तो, धम्मं भणे नाधम्मं तं दुतिय’’न्ति (सं. नि. १.२१३; सु. नि. ४५२). तेन बहुं विप्पलपनमाह, सच्चतो वा अञ्ञा सुभासिता वाचा ‘‘धम्मो’’ति वेदितब्बो. मुग्गसूपसदिसकम्मो पुग्गलो मुग्गसूप्यो. तेनाह ‘‘अयं पुग्गलो मुग्गसूप्योति वुच्चती’’ति. परिभटस्स कम्मं पारिभट्यं, तदेव पारिभट्यता.

निमित्तेन चरन्तो, जीवन्तो वा निमित्तको, तस्स भावो नेमित्तिकता. अत्तनो इच्छाय पकासनं ओभासो. को पन सोति ¶ ? ‘‘अज्ज भिक्खूनं पच्चया दुल्लभा जाता’’तिआदिका पच्चयपटिसंयुत्तकथा. इच्छितवत्थुस्स समीपे कथनं सामन्तजप्पा.

अक्कोसनभयेनापि ददेय्याति दसहि अक्कोसवत्थूहि अक्कोसनं. तथा वम्भनादयो. उपेक्खना उपासकानं दायकादिभावतो बहि छड्डना. खिपनाति खेपवचनं. तं पन अवहसित्वा वचनं होतीति आह ‘‘उप्पण्डना’’ति. पापनाति अदायकत्तस्स, अवण्णस्स वा पतिट्ठापनं. परेसं पिट्ठिमंसखादनसीलो परपिट्ठिमंसिको, तस्स भावो परपिट्ठिमंसिकता. अब्भङ्गन्ति अब्भञ्जनं. निपिसित्वा गन्धमग्गना वियाति अनिप्पिसिते अलब्भमानस्स गन्धस्स निपिसने लाभो विय परगुणे अनिप्पिसिते अलब्भमानानं पच्चयानं निपिसनेन लाभो दट्ठब्बोति.

निकत्तुं ¶ अप्पेन लाभेन बहुकं वञ्चेत्वा गहेतुं इच्छनं निजिगीसनं, तस्स भावो निजिगीसनता. तस्सेव इच्छनस्स पवत्तिआकारो, तंसहजातं वा गवेसनकम्मं.

अङ्गन्ति हत्थपादादिअङ्गानि उद्दिस्स पवत्तं विज्जं. निमित्तन्ति निमित्तसत्थं. उप्पातन्ति उक्कापातदिसाडाह-भूमिचालादिउप्पातपटिबद्धविज्जं. सुपिनन्ति सुपिनसत्थं. लक्खणन्ति इत्थिपुरिसानं लक्खणजाननसत्थं. मूसिकच्छिन्नन्ति वत्थादीनं असुकभागे मूसिकच्छेदे सति इदं नाम फलं होतीति जाननकसत्थं. पलासग्गिआदीसु इमिना नाम अग्गिना हुते इदं नाम होतीति अग्गिवसेन होमविधानं अग्गिहोमं. इमिना नयेन दब्बिहोमं वेदितब्बं. आदि-सद्देन थुसहोमादीनं, अञ्ञेसञ्च सुत्ते आगतानं मिच्छाजीवानं सङ्गहो दट्ठब्बो. वीरियसाधनत्ता आजीवपारिसुद्धिसीलस्स ‘‘पच्चयपरियेसनवायामो’’ति वुत्तं. तस्स पारिसुद्धि अनवज्जभावो, येन धम्मेन समेन पच्चयलाभो होति. न हि अलसो ञायेन पच्चये परियेसितुं सक्कोतीति.

पच्चयसन्निस्सितसीलवण्णना

१८. पटिसङ्खाति अयं ‘‘सयं अभिञ्ञा’’तिआदीसु (महाव. ११) विय य-कारलोपेन निद्देसो. योनिसोति चेत्थ उपायत्थो योनिसो-सद्दोति दस्सेन्तो आह ‘‘उपायेन पथेना’’ति. ‘‘पटिसङ्खाय ञत्वा’’ति ¶ वत्वा तयिदं पटिसङ्खानं पच्चवेक्खणन्ति दस्सेतुं ‘‘पच्चवेक्खित्वाति अत्थो’’तिआदि वुत्तं. यथा हि पच्चवेक्खित्वाति सीतपटिघातादिकं तं तं पयोजनं पति पति अवेक्खित्वा, ञाणेन पस्सित्वाति अत्थो, एवं पटिसङ्खायाति तदेव पयोजनं पति पति सङ्खाय, जानित्वाति अत्थो. ञाणपरियायो हि इध सङ्खा-सद्दोति. एत्थ च ‘‘पटिसङ्खा योनिसो’’तिआदि कामं पच्चयपरिभोगकालेन वुच्चति, धातुवसेन पन पटिकूलवसेन वा पच्चवेक्खणाय पच्चयसन्निस्सितसीलं सुज्झतीति अपरे. भिज्जतीति केचि. एके पन पठमं एव परियत्तन्ति वदन्ति, वीमंसितब्बं. ‘‘चीवर’’न्ति एकवचनं एकत्तमत्तं वाचकन्ति अधिप्पायेन ‘‘अन्तरवासकादीसु यं किञ्ची’’ति वुत्तं, जातिसद्दताय पन तस्स पाळियं एकवचनन्ति यत्तकानि चीवरानि योगिना परिहरितब्बानि, तेसं सब्बेसं एकज्झं गहणन्ति सक्का विञ्ञातुं, यं किञ्चीति वा अनवसेसपरियादानमेतं, न अनियमवचनं. ‘‘निवासेति वा पारुपति वा’’ति विकप्पनं पन पटिसेवनपरियायस्स परिभोगस्स ¶ विभागदस्सनन्ति तं पञ्ञपेत्वा सयननिसीदन-चीवरकुटिकरणादिवसेनापि परिभोगस्स सङ्गहो दट्ठब्बो.

पयोजनानं मरियादा पयोजनावधि, तस्स परिच्छिन्दनवसेन यो नियमो, तस्स वचनं पयोजना…पे… वचनं. इदानि तं नियमं विवरित्वा दस्सेतुं ‘‘एत्तकमेव ही’’तिआदि वुत्तं. तत्थ अवधारणेन लीळाविभूसाविलम्बनानटम्बरादिवसेन वत्थपरिभोगं निसेधेति. तेनाह ‘‘न इतो भिय्यो’’ति. लीळावसेन हि एकच्चे सत्ता वत्थानि परिदहन्ति चेव उपसंवियन्ति च. यथा तं योब्बने ठिता नागरिकमनुस्सा. एकच्चे विभूसनवसेन, यथा तं रूपूपजीविनिआदयो. विलम्बनवसेन विलम्बका. नटम्बरवसेन भोजादयो. अज्झत्तधातुक्खोभो सीतरोगादिउप्पादको. उतुपरिणामनवसेनाति उतुनो परिवत्तनवसेन विसभागसीतउतुसमुट्ठानेन. वा-सद्देन हेमन्तादीसु हिमपातादिवसेन पवत्तस्स सङ्गहो दट्ठब्बो, न उप्पादेति सीतन्ति अधिप्पायो. यदत्थं पन तं विनोदनं, तं मत्थकप्पत्तं दस्सेतुं ‘‘सीतब्भाहते’’तिआदि वुत्तं. सब्बत्थाति ‘‘उण्हस्स पटिघाताया’’तिआदीसु सब्बेसु सेसपयोजनेसु. यदिपि सूरियसन्तापोपि उण्होव, तस्स पन आतपग्गहणेन गहितत्ता ‘‘अग्गिसन्तापस्सा’’ति ¶ वुत्तं. एकच्चो दावग्गिसन्तापो कायं चीवरेन पटिच्छादेत्वा सक्का विनोदेतुन्ति आह ‘‘तस्स वनदाहादीसु सम्भवो वेदितब्बो’’ति. डंसाति पिङ्गलमक्खिका. ते पन यस्मा डंसनसीला, तस्मा वुत्तं ‘‘डंसनमक्खिका’’ति. सप्पादयोति सप्पसतपदिउण्णनाभिसरबूविच्छिकादयो. फुट्ठसम्फस्सोति फुट्ठविसमाह. तिविधा हि सप्पा – दट्ठविसा फुट्ठविसा दिट्ठविसा. तेसु पुरिमका द्वे एव गहिता. सतपदिआदीनम्पि तादिसानं सङ्गण्हनत्थं. नियतपयोजनं एकन्तिकं, सब्बकालिकञ्च पयोजनं. हिरी कुप्पति निल्लज्जता सण्ठाति. तेनाह ‘‘विनस्सती’’ति. कूपावतरणं वा पटिच्छादनं अरहतीति कोपिनं. हिरियितब्बट्ठेन हिरी च तं कोपिनञ्चाति हिरिकोपिनन्ति एवमेत्थ अत्थो दट्ठब्बो. तस्स चाति च-सद्दो पुब्बे वुत्तपयोजनानं सम्पिण्डनत्थो.

यं किञ्चि आहारन्ति खादनीयभोजनीयादिभेदं यं किञ्चि आहरितब्बवत्थुं. पिण्डाय भिक्खाय उलतीति पिण्डोलो, तस्स कम्मं पिण्डोल्यं. तेन पिण्डोल्येन भिक्खाचरियाय. पतितत्ताति पक्खिपितत्ता. पिण्डपातो पत्ते पक्खित्तभिक्खाहारो. पिण्डानं वा पातोति घरे घरे लद्धभिक्खानं सन्निपातो. ‘‘नत्थि दवा’’तिआदीसु (दी. नि. अट्ठ. ३.३०५) सहसा किरियापि ¶ ‘‘दवा’’ति वुच्चति, ततो विसेसनत्थं ‘‘दवत्थं, कीळानिमित्तन्ति वुत्तं होती’’ति आह. मुट्ठिकमल्ला मुट्ठियुद्धयुज्झनका. आदि-सद्देन निबुद्धयुज्झनकादीनं गहणं. बलमदनिमित्तन्ति बलं निस्साय उप्पज्जनकमदो बलमदो. तं निमित्तं, बलस्स उप्पादनत्थन्ति अत्थो. पोरिसमदनिमित्तन्ति पोरिसमदो वुच्चति पुरिसमानो ‘‘अहं पुरिसो’’ति उप्पज्जनकमानो. असद्धम्मसेवनासमत्थतं निस्साय पवत्तो मानो, रागो एव वा पोरिसमदोति केचि. तं निमित्तं. अन्तेपुरिका राजोरोधा. सब्बेसं सन्निवेसयोग्यताय वेसियो रूपूपजीविनियो. मण्डनं नाम इधावयवपारिपूरीति आह ‘‘अङ्गपच्चङ्गानं पीणभावनिमित्त’’न्ति, परिब्रूहनहेतूति अत्थो. नटा नाम रङ्गनटा. नच्चका लङ्घकादयो. विभूसनं सोभासमुप्पादनन्ति आह ‘‘पसन्नच्छविवण्णतानिमित्त’’न्ति.

एतं पदं. मोहूपनिस्सयप्पहानत्थन्ति मोहस्स उपनिस्सयतापहानाय. दवा हि मोहेन होति, मोहञ्च वड्ढेतीति तस्सा वज्जनेन मोहस्स अनुपनिस्सयता. दोसूपनिस्सयप्पहानत्थन्ति इदं बलमदस्स, पुरिसमदस्स ¶ च दोसहेतुनो वसेन वुत्तं, इतरस्स पन वसेन ‘‘रागूपनिस्सयप्पहानत्थ’’न्ति वत्तब्बं. मण्डनविभूसनपटिक्खेपो सिया मोहूपनिस्सयप्पहानायपि, रागूपनिस्सयताय पन उजुपटिपक्खोति वुत्तं ‘‘रागूपनिस्सयप्पहानत्थ’’न्ति. यदिपि एकच्चस्स दवमदे आरब्भ परस्स पटिघसंयोजनादीनं उप्पत्ति होतियेव मनोपदोसिकदेवादीनं विय, अत्तनो पन दवमदे आरब्भ येसं सविसेसं रागमोहमानादयो पापधम्मा उप्पज्जन्ति. ते सन्धाय ‘‘अत्तनो संयोजनुप्पत्तिपटिसेधनत्थ’’न्ति वत्वा मण्डनविभूसनानि पटिच्च सविसेसं परस्सपि रागमोहादयो पवत्तन्तीति ‘‘परस्सपि संयोजनुप्पत्तिपटिसेधनत्थ’’न्ति वुत्तं. अयोनिसो पटिपत्तियाति एत्थ कामसुखल्लिकानुयोगं मुञ्चित्वा सब्बापि मिच्छापटिपत्ति अयोनिसो पटिपत्ति. पुरिमेहि द्वीहि पदेहि अयोनिसो पटिपत्तिया, पच्छिमेहि द्वीहि कामसुखल्लिकानुयोगस्स पहानं वुत्तन्ति वदन्ति. ‘‘चतूहिपि चेतेही’’ति पन वचनतो सब्बेहि उभिन्नम्पि पहानं वुत्तन्ति वेदितब्बं. कामकीळापि दवन्तोगधा होतियेव, पुरिसमदोपि कामसुखल्लिकानुयोगस्स हेतुयेवाति.

चातुमहाभूतिकस्साति चतुमहाभूते सन्निस्सितस्स. रूपकायस्साति चतुसन्ततिरूपसमूहस्स. ठितियाति ठितत्थं. सा पनस्स ठिति पबन्धवसेन इच्छिताति आह ‘‘पबन्धट्ठितत्थ’’न्ति. पवत्तियाति जीवितिन्द्रियप्पवत्तिया. तथा हि जीवितिन्द्रियं ‘‘यापना वत्तना’’ति ¶ (ध. स. १९, ६३४) च निद्दिट्ठं. तस्सा च अविच्छेदो आहारूपयोगेन होति. कायस्स चिरतरं याव आयुकप्पो, ताव अवत्थानं यापनाति दस्सेन्तो ‘‘चिरकालट्ठितत्थं वा’’ति आह. इदानि वुत्तमेवत्थं पाकटतरं कातुं ‘‘घरूपत्थम्भमिवा’’तिआदि वुत्तं. तत्थायं योजना – यथा जिण्णघरसामिको घरस्स उपत्थम्भनं करोति तस्स अपतनत्थं, यथा च साकटिको अक्खब्भञ्जनं करोति तस्स सम्पवत्तनत्थं, एवमेस योगी कायस्स ठितत्थं, यापनत्थञ्च पिण्डपातं पटिसेवति परिभुञ्जतीति. एतेन ठिति नाम अपतनं यापना पवत्तीति दस्सेति. न दवमदमण्डनविभूसनत्थन्ति इदं ‘‘यावदेवा’’ति अवधारणेन निवत्तितत्थदस्सनं. तिट्ठन्ति उपादिन्नधम्मा एतायाति ठिति, आयूति आह ‘‘ठितीति जीवितिन्द्रियस्सेतं अधिवचन’’न्ति. तथा हि तं आयु ‘‘ठिती’’ति निद्दिट्ठं, ठितिया यापनायाति कायस्स ¶ ठितिहेतुताय ‘‘ठिती’’ति लद्धवोहारस्स जीवितिन्द्रियस्स पवत्तनत्थन्ति अत्थो. तेनाह ‘‘जीवितिन्द्रियपवत्तापनत्थ’’न्ति. आबाधट्ठेनाति विबाधनट्ठेन, रोगट्ठेन वा. जिघच्छापरमा हि रोगा. उपरमत्थन्ति वूपसमत्थं. वणालेपनमिव वणिको. उण्हसीतादीसु अभिभवन्तेसु तप्पटिकारं सीतुण्हं विय पटिसेवतीति सम्बन्धो. मग्गब्रह्मचरियं ठपेत्वा सिक्खत्तयसङ्गहा सासनावचरितब्बा अनुसासनी सासनब्रह्मचरियन्ति आह ‘‘सकलसासनब्रह्मचरियस्स च मग्गब्रह्मचरियस्स चा’’ति. अनुग्गहणत्थन्ति अनु अनु गण्हनत्थं सम्पादनत्थं. कायबलं निस्सायाति यथासमारद्धं गुणविसेसपारिपूरिहेतुभूतं कायबलमत्तं निस्साय. तेनाह ‘‘सिक्खत्तयानुयोगवसेना’’तिआदि. कन्तारनित्थरणत्थिका जायम्पतिका, नदीसमुद्दनित्थरणत्थिका च पुत्तमंसादीनि यथा अगिद्धा अमुच्छिता केवलं तं तं अत्थसिद्धिमेव अवेक्खन्ता पटिसेवन्ति तेहि विना असिज्झनतो, एवमयम्पि केवलं भवकन्तारनित्थरणत्थिको अगिद्धो अमुच्छितो तेन विना असिज्झनतो पिण्डपातं पटिसेवतीति उपमासंसन्दनं.

इतीति पकारत्थे निपातपदं. तेन पटिसेवियमानस्स पिण्डपातस्स पटिसेवनाकारो गय्हतीति आह ‘‘एवं इमिना पिण्डपातपटिसेवनेना’’ति. पुराणन्ति भोजनतो पुरिमकालिकत्ता पुरातनं. पटिहङ्खामीति पटिहनिस्सामि. नवञ्च वेदनं न उप्पादेस्सामीति पटिसेवतीति योजना. कीदिसं, कथञ्चाति आह ‘‘अपरिमित…पे… अञ्ञतरो विया’’ति. अपरिमितं अपरिमाणं भोजनं पच्चयो एतिस्साति अपरिमितभोजनपच्चया, तं अपरिमितभोजनपच्चयं अत्तनो गहणीतेजपमाणतो अतिक्कन्तपमाणभोजनहेतुकन्ति अत्थो. यो बहुं भुञ्जित्वा अत्तनो ¶ धम्मताय उट्ठातुं असक्कोन्तो ‘‘आहर हत्थ’’न्ति वदति, अयं आहरहत्थको. यो भुञ्जित्वा अच्चुद्धुमातकुच्छिताय उट्ठितोपि साटकं निवासेतुं न सक्कोति, अयं अलंसाटको. यो भुञ्जित्वा उट्ठातुं असक्कोन्तो तत्थेव परिवत्तति, अयं तत्रवट्टको. यो यथा काकेहि आमसितुं सक्का, एवं याव मुखद्वारं आहारेति, अयं काकमासको. यो भुञ्जित्वा मुखे सन्धारेतुं असक्कोन्तो तत्थेव वमति, अयं भुत्तवमितको. एतेसं अञ्ञतरो विय. अथ वा पुराणवेदना नाम अभुत्तपच्चया उप्पज्जनकवेदना. तं ‘‘पटिहनिस्सामी’’ति ¶ पटिसेवति. नववेदना नाम अतिभुत्तपच्चयेन उप्पज्जनकवेदना. तं ‘‘न उप्पादेस्सामी’’ति पटिसेवति. अथ वा नववेदना नाम अभुत्तपच्चयेन उप्पज्जनकवेदना, तस्सा अनुप्पन्नाय अनुप्पज्जनत्थमेव पटिसेवति. अभुत्तपच्चया उप्पज्जनकाति चेतं खुद्दाय विसेसनं. यस्सा अप्पवत्ति भोजनेन कातब्बा, तस्सा दस्सनत्थं. अभुत्तपच्चयेन, भुत्तपच्चयेन च उप्पज्जनकानुप्पज्जनकवेदनासु पुरिमा यथापवत्ता जिघच्छानिमित्ता वेदना. सा हि अभुञ्जन्तस्स भिय्योपवड्ढनवसेन उप्पज्जति. पच्छिमापि खुद्दानिमित्ताव अङ्गदाहसूलादिवेदना पवत्ता. सा हि भुत्तपच्चया पुब्बे अनुप्पन्नाव नुप्पज्जिस्सतीति अयमेतासं विसेसो. विहिंसानिमित्तता चेतासं विहिंसाय विसेसो.

या वेदना. अधुनाति एतरहि. असप्पायापरिमितभोजनं निस्सायाति असप्पायापरिमितस्स आहारस्स भुञ्जनपयोगं आगम्म उप्पज्जतीति अत्थो. पुराणकम्मपच्चयवसेनाति पुब्बे पुरिमजातियं कतत्ता पुराणस्स कम्मस्स पच्चयतावसेन पयोगविपत्तिं आगम्म उप्पज्जनारहताय तं वज्जेत्वा पयोगसम्पत्तिया उपट्ठापनं दुक्खवेदनापच्चयघातो, पटिहननञ्च होतीति आह ‘‘तस्सा पच्चयं विनासेन्तो तं पुराणञ्च वेदनं पटिहङ्खामी’’ति. अयुत्तपरिभोगो पच्चये अपच्चवेक्खित्वा परिभोगो. सो एव कतूपचितकम्मताय कम्मूपचयो. तं निस्साय पटिच्च आयतिं अनागते काले उप्पज्जनतो या चायं ‘‘नववेदना’’ति वुच्चतीति योजना. युत्तपरिभोगवसेनाति पच्चवेक्खित्वा पच्चयानं परिभोगवसेन, तस्सा नववेदनाय मूलं अयुत्तपरिभोगकम्मं अनिब्बत्तेन्तो सब्बेन सब्बं अनुप्पादेन्तो. एत्तावताति ‘‘इति पुराण’’न्तिआदिना वुत्तेन पदद्वयेन. ‘‘विहिंसूपरतिया’’तिआदिना वा पदचतुक्केन युत्तपरिभोगसङ्गहो पब्बजितानुच्छविकस्स पच्चयपरिभोगस्स वुत्तत्ता. अत्तकिलमथानुयोगप्पहानं जिघच्छादिदुक्खपटिघातस्स भासितत्ता. झानसुखादीनं ¶ पच्चयभूतस्स कायसुखस्स अविस्सज्जनतो धम्मिकसुखापरिच्चागो च दीपितो होति.

असप्पायापरिमितूपयोगेन जीवितिन्द्रियुपच्छेदको, इरियापथभञ्जनको वा सिया परिस्सयो, सप्पायपरिमितूपयोगेन पन सो न होति. तथा सति चिरकालप्पवत्तिसङ्खाता सरीरस्स यात्रा ¶ यापना भविस्सतीति इममत्थं दस्सेन्तो ‘‘परिमितपरिभोगेन…पे… भविस्सती’’ति आह. यो रोगो साद्धो असाद्धो च न होति, सो याप्यरोगो, सो एतस्स अत्थीति याप्यरोगी. सो हि निच्चकालं भेसज्जं उपसेवति, तथा अयम्पीति. यदि यात्रापि यापना, पुब्बेपि ‘‘यापनाया’’ति वुत्तं, को एत्थ विसेसोति? पुब्बे ‘‘यापनाया’’ति जीवितिन्द्रिययापना अधिप्पेता, इध पन चतुन्नम्पि इरियापथानं अविच्छेदसङ्खाता यापना यात्राति अयमेत्थ विसेसो. बुद्धपटिकुट्ठेन मिच्छाजीवेन पच्चयपरियेसना अयुत्तपरियेसना. दायकदेय्यधम्मानं, अत्तनो च पमाणं अजानित्वा पटिग्गहणं, सद्धादेय्यविनिपातनत्थं वा पटिग्गहणं अयुत्तपटिग्गहणं, येन वा आपत्तिं आपज्जति. अपच्चवेक्खित्वा परिभोगो अयुत्तपरिभोगो. तेसं परिवज्जनं धम्मेन समेन पच्चयुप्पादनादिवसेन वेदितब्बं. धम्मेन हि पच्चये परियेसित्वा धम्मेन पटिग्गहेत्वा पच्चवेक्खित्वा परिभुञ्जनं अनवज्जता नाम.

अरतीति उक्कण्ठा. पन्तसेनासनेसु, अधिकुसलधम्मेसु च अनभिरति. तन्दीति पचलायिका निद्दा. विजम्भिताति थिनमिद्धाभिभवेन कायस्स विजम्भना. विञ्ञूहि गरहा विञ्ञूगरहा. एकच्चो हि अनवज्जंयेव सावज्जं करोति, ‘‘लद्धं मे’’ति पमाणाधिकं भुञ्जित्वा तं जीरापेतुं असक्कोन्तो उद्धंविरेचनअधोविरेचनादीहि किलमति, सकलविहारे भिक्खू तस्स सरीरपटिजग्गनभेसज्जपरियेसनापसुता होन्ति. अञ्ञे ते ‘‘किं इद’’न्ति पुच्छित्वा ‘‘असुकस्स उदरं उद्धुमात’’न्तिआदीनि सुत्वा ‘‘निच्चकालमेस एवंपकतिको अत्तनो कुच्छिपमाणं नाम न जानाती’’ति निन्दन्ति, एवं अनवज्जंयेव सावज्जं करोति. एवं अकत्वा ‘‘अनवज्जता च भविस्सती’’ति पटिसेवति. अत्तनो हि पकतिअग्गिबलादिं जानित्वा ‘‘एवं मे अरतिआदीनं अभावेन कायसुखता, अगरहितब्बता च भविस्सती’’ति पमाणयुत्तमेव पटिसेवति. यावतको भोजनेन अत्थो, तस्स साधनेन यावदत्थं उदरस्स परिपूरणेन उदरावदेहकं भोजनं यावदत्थउदरावदेहकभोजनं, तस्स परिवज्जनेन. सेय्याय सयनेन लद्धब्बसुखं सेय्यसुखं, उभोहि पस्सेहि ¶ सम्परिवत्तनकं सयन्तस्स उप्पज्जनसुखं पस्ससुखं ¶ , मिद्धेन निद्दायनेन उप्पज्जनसुखं मिद्धसुखं, तेसं सेय्य…पे… सुखानं पहानतो चतुन्नं इरियापथानं योग्यभावस्स पटिपादनं कायस्स चतुइरियापथयोग्यभावपटिपादनं, ततो. सुखो इरियापथविहारो फासुविहारो. पच्छिमे विकप्पे, सब्बविकप्पेसु वा वुत्तं फासुविहारलक्खणं आगमेन समत्थेतुं ‘‘वुत्तम्पि हेत’’न्तिआदि वुत्तं. तीसुपि विकप्पेसु आहारस्स ऊनपरिभोगवसेनेव हि फासुविहारो वुत्तोति.

एत्तावताति ‘‘यात्रा’’तिआदिना वुत्तेन पदत्तयेन. ‘‘यात्रा च मे भविस्सती’’ति पयोजनपरिग्गहदीपना. यात्रा हि नं आहारूपयोगं पयोजेतीति. धम्मिकसुखापरिच्चागहेतुको फासुविहारो मज्झिमा पटिपदा अन्तद्वयपरिवज्जनतो. इमस्मिं पन ठाने अट्ठ अङ्गानि समोधानेतब्बानि – ‘‘नेव दवाया’’ति एकं अङ्गं, ‘‘न मदाया’’ति एकं, ‘‘न मण्डनाया’’ति एकं, ‘‘न विभूसनाया’’ति एकं, ‘‘यावदेव इमस्स कायस्स ठितिया यापनाया’’ति एकं, ‘‘विहिंसूपरतिया ब्रह्मचरियानुग्गहाया’’ति एकं, ‘‘इति पुराणञ्च वेदनं पटिहङ्खामि, नवञ्च वेदनं न उप्पादेस्सामी’’ति एकं, ‘‘यात्रा च मे भविस्सती’’ति एकं. ‘‘अनवज्जता च फासुविहारो चा’’ति अयमेत्थ भोजनानिसंसो. महासिवत्थेरो पनाह ‘‘हेट्ठा चत्तारि अङ्गानि पटिक्खेपो नाम, उपरि पन अट्ठङ्गानि समोधानेतब्बानी’’ति. तत्थ ‘‘यावदेव इमस्स कायस्स ठितिया’’ति एकं अङ्गं, ‘‘यापनाया’’ति एकं, ‘‘विहिंसूपरतिया’’ति एकं, ‘‘ब्रह्मचरियानुग्गहाया’’ति एकं, ‘‘इति पुराणञ्च वेदनं पटिहङ्खामी’’ति एकं, ‘‘नवञ्च वेदनं न उप्पादेस्सामी’’ति एकं, ‘‘यात्रा च मे भविस्सती’’ति एकं, ‘‘अनवज्जता चा’’ति एकं. फासुविहारो पन भोजनानिसंसोति. एवं अट्ठङ्गसमन्नागतं आहारं आहारेन्तो पटिसङ्खा योनिसो पिण्डपातं पटिसेवति नाम.

यत्थ यत्थाति भुम्मनिद्देसेन सेन-सद्दस्स अधिकरणत्थवुत्तिमाह. तथा आसन-सद्दस्साति. अड्ढयोगादिम्हीति आदि-सद्देन पासादादिं, मञ्चादिञ्च सङ्गण्हाति. यत्थ यत्थ विहारे वा अड्ढयोगादिम्हि वा आसतीति विहारअड्ढयोगादिके आनेत्वा सम्बन्धितब्बं. इध आदि-सद्देन पीठसन्थतादीनम्पि सङ्गहो वेदितब्बो. परिसहनट्ठेनाति अभिभवनट्ठेन, विबाधनट्ठेनाति अत्थो. उतुयेव उतुपरिस्सयोति सीतुण्हादिउतुयेव ¶ असप्पायो वुत्तनयेन उतुपरिस्सयो. तस्स उतुपरिस्सयस्स विनोदनत्थं, अनुप्पन्नस्स अनुप्पादनत्थं, उप्पन्नस्स वूपसमनत्थञ्चाति अत्थो. नानारम्मणतो ¶ पटिसंहरित्वा कम्मट्ठानभूते एकस्मिंयेव आरम्मणे चित्तस्स सम्मदेव लयनं पटिसल्लानं, तत्थ आरामो अभिरति पटिसल्लानारामो, तदत्थं. सेनासनं हि विवित्तं योगिनो भावनानुकूलं सुञ्ञागारभावतो. तं पनेतं अत्थद्वयं विभावेतुं ‘‘यो सरीराबाधचित्तविक्खेपकरो’’तिआदि वुत्तं. तत्थ एकीभावसुखत्थन्ति एकीभावहेतुकं सुखं एकीभावसुखं, तदत्थं. गणसङ्गणिककिलेससङ्गणिकाभावेन उप्पज्जनकसुखं.

यदि उतुयेव उतुपरिस्सयो, ‘‘उतु च सीतुण्ह’’न्ति सीतुण्हपटिघातं वत्वा उतुपरिस्सयविनोदनं कस्मा वुत्तन्ति चोदनं सन्धायाह ‘‘कामञ्चा’’तिआदि. तत्थ ‘‘नियतं उतुपरिस्सयविनोदन’’न्ति एतेन ‘‘सीतस्स पटिघाताय उण्हस्स पटिघाताया’’ति एत्थ वुत्तं सीतुण्हं अनियतं कदाचि कदाचि उप्पज्जनकं, उतुपरिस्सयो पन सब्बदाभावी अधिप्पेतोति दस्सेति. वुत्तप्पकारोति ‘‘सीतादिको, असप्पायो’’ति च एवं वुत्तप्पकारो विवटङ्गणरुक्खमूलादीसु निसिन्नस्स अपरिगुत्तिया असंवुतद्वारादिताय पाकटपरिस्सया, असप्पायरूपदस्सनादिना अपाकटपरिस्सया च भिक्खुस्स कायचित्तानं आबाधं करेय्युं. यत्थ गुत्ते सेनासने आबाधं न करोन्ति. एवं जानित्वाति उभयपरिस्सयरहितन्ति एवं ञत्वा पटिसेवन्तो भिक्खु वेदितब्बोति सम्बन्धो.

धातुक्खोभलक्खणस्स, तंहेतुकदुक्खवेदनालक्खणस्स वा रोगस्स पटिपक्खभावो पटिअयनट्ठो. तेनाह ‘‘पच्चनीकगमनट्ठेनाति अत्थो’’ति, वूपसमनट्ठेनाति वुत्तं होति. यस्स कस्सचीति सप्पिआदीसु यस्स कस्सचि. सप्पायस्साति हि तस्स विकारवूपसमेनाति अधिप्पायो. भिसक्कस्स कम्मं तेन विधातब्बतो. तेनाह ‘‘तेन अनुञ्ञातत्ता’’ति. नगरपरिक्खारेहीति नगरं परिवारेत्वा रक्खणकेहि. विवटपरिक्खेपो परिक्खा उड्डापो पाकारो एसिका पलिघो पाकारपत्थण्डिलन्ति सत्त ‘‘नगरपरिक्खारा’’ति वदन्ति. सीलपरिक्खारोति सुविसुद्धसीलालङ्कारो ¶ . अरियमग्गो हि इध ‘‘रथो’’ति अधिप्पेतो. तस्स च सम्मावाचादयो अलङ्कारट्ठेन ‘‘परिक्खारो’’ति वुत्ता. जीवितपरिक्खाराति जीवितस्स पवत्तिकारणानि. समुदानेतब्बाति सम्मा उद्धं उद्धं आनेतब्बा परियेसितब्बा. परिवारोपि होति अन्तरायानं परितो वारणतो. तेनाह ‘‘जीवित…पे… रक्खणतो’’ति.

तत्थ अन्तरन्ति विवरं, ओकासोति अत्थो. वेरिकानं अन्तरं अदत्वा अत्तनो सामिकानं ¶ परिवारेत्वा ठितसेवका विय रक्खणतो. अस्साति जीवितस्स. कारणभावतोति चिरप्पवत्तिया कारणभावतो. रसायनभूतं हि भेसज्जं सुचिरम्पि कालं जीवितं पवत्तेतियेव. यदिपि अनुप्पन्ना एव दुक्खवेदना भेसज्जपरिभोगेन पटिहञ्ञन्ति, न उप्पन्ना तासं सरसेनेव भिज्जनतो, उप्पन्नसदिसा पन ‘‘उप्पन्ना’’ति वुच्चन्ति. भवति हि तंसदिसेसु तब्बोहारो, यथा सा एव तित्तिरि, तानियेव ओसधानीति. तस्मा वुत्तं ‘‘उप्पन्नानन्ति जातानं भूतानं निब्बत्तान’’न्ति. सञ्चयतो पट्ठाय सो धातुक्खोभो समुट्ठानं एतेसन्ति तंसमुट्ठाना. ‘‘दुक्खवेदना’’ति वत्वा सा अकुसलसभावापि अत्थीति ततो विसेसेतुं ‘‘अकुसलविपाकवेदना’’ति वुत्तं. ब्याबाधनट्ठेन ब्याबाधो, ब्याबाधोव ब्याबज्झं, दुक्खन्ति अत्थो. नत्थि एत्थ ब्याबज्झन्ति अब्याबज्झं, निद्दुक्खता. तेनाह ‘‘अब्याबज्झपरमताया’’ति निद्दुक्खपरमतायाति. तं दुक्खन्ति रोगनिमित्तकं दुक्खं.

चीवरादीनं पच्चयानं निस्सयनं परिभोगो एवाति दस्सेतुं ‘‘ते पटिच्च निस्साया’’ति वत्वा ‘‘परिभुञ्जमाना’’ति वुत्तं. पवत्तन्तीति जीवन्ति. जीवनम्पि हि पवत्तनं, यतो जीवितिन्द्रियं ‘‘पवत्तनरस’’न्ति वुच्चति.

चतुपारिसुद्धिसम्पादनविधिवण्णना

१९. एवं पातिमोक्खसंवरादिभेदेन निद्दिट्ठं सीलं पुन साधनविभागेन दस्सेतुं ‘‘एवमेतस्मि’’न्तिआदिमारद्धं. तत्थ साधीयति सम्पादियति एतेनाति साधनं, सद्धा साधनं एतस्साति सद्धासाधनो. ननु च वीरियसतिपञ्ञाहिपि विना पातिमोक्खसंवरो न सिज्झतीति? सच्चं न सिज्झति, सद्धाय पन विसेसहेतुभावं सन्धाय एवं वुत्तन्ति दस्सेन्तो आह

‘‘सावकविसयातीतत्ता ¶ सिक्खापदपञ्ञत्तिया’’ति. गरुकलहुकादिभेदे ओतिण्णे वत्थुस्मिं तस्स तस्स अपराधस्स अनुरूपं सिक्खापदपञ्ञापनं नाम सावकानं अविसयो, बुद्धानं एव विसयो. सिक्खापदपञ्ञापनं ताव तिट्ठतु, तस्स कालोपि नाम सावकानं अविसयो, बुद्धानं एव विसयोति दस्सेन्तो ‘‘सिक्खापदपञ्ञत्तियाचनपटिक्खेपो चेत्थ निदस्सन’’न्ति आह. तथा हि वुत्तं ‘‘आगमेहि त्वं सारिपुत्त, आगमेहि त्वं सारिपुत्त, तथागतोव तत्थ कालं ¶ जानिस्सती’’ति (पारा. २१). तत्थ च-सद्दो समुच्चयत्थो. तेन ‘‘अपञ्ञत्तं न पञ्ञपेम, पञ्ञत्तं न समुच्छिन्दाम, यथापञ्ञत्तेसु सिक्खापदेसु समादाय वत्तामा’’ति (पारा. ५६५) एवमादीनं सङ्गहो दट्ठब्बो. सद्धायाति सद्दहनेन सत्थरि, धम्मे च सद्धाय पच्चुपट्ठापनेन. जीवितेपि पगेव जीवितपरिक्खारेति अधिप्पायो.

किकीव अण्डन्ति किकीसकुणिका विय अत्तनो अण्डं. सा किर जीवितम्पि परिच्चजित्वा अण्डमेव रक्खति. चमरीव वालधिन्ति चमरीमिगो विय अत्तनो वालधिं. चमरीमिगा किर ब्याधेन परिपातियमाना जीवितम्पि परिच्चजित्वा कण्डकगुम्बादीसु लग्गं अत्तनो वालमेव रक्खन्ति. पियंव पुत्तं एककन्ति आनेत्वा सम्बन्धितब्बं. यथा हि एकपुत्तको कुटुम्बिको तं एकपुत्तं, एकनयनो च तं एकनयनं सुट्ठुतरं रक्खति. तथेव सीलं अनुरक्खमानकाति अनुकम्पनवसेन वुत्तं. सुपेसलाति सुट्ठु पियसीला. सदा सब्बकालं दहरमज्झिमथेरकालेसु. छन्नम्पि गारवानं वसेन सगारवा, गरुकारवन्तोति अत्थो.

एवमेव खोति यथा महासमुद्दो ठितधम्मो वेलं नातिक्कमति, एवमेव. मम सावकाति अरियसावके सन्धायाह. ते हि धुवसीला. इमस्मिं अत्थेति जीवितहेतुपि सीलस्स अवीतिक्कमने.

महावत्तनिअटवी नाम विञ्झाटवी. हिमवन्तपस्से अटवीति केचि. थेरन्ति नामगोत्तवसेन अपञ्ञातं एकं थेरं. निपज्जापेसुं गन्त्वा कस्सचि मा आरोचेय्याति.

पूतिलतायाति ¶ गळोचिलताय. समसीसीति जीवितसमसीसी. यस्स हि किलेससीसं अविज्जं मग्गपटिपाटिया अरहत्तमग्गो परियादियति, ततो एकूनवीसतिमे पच्चवेक्खणञाणे पतिट्ठाय भवङ्गोत्तरणे वट्टसीसं जीवितिन्द्रियं चुतिचित्तं परियादियति, सो इमाय वारसमताय ‘‘जीवितसमसीसी’’ति वुच्चति. सो च थेरो तथा परिनिब्बायि. तेन वुत्तं ‘‘समसीसी हुत्वा परिनिब्बायी’’ति. अभयत्थेरो किर महाभिञ्ञो. तस्मा चेतियं कारापेसीति वदन्ति. अप्पेवाति अप्पेव नाम अत्तनो जीवितम्पि जहेय्य, न भिन्देति न भिन्देय्य, न वीतिक्कमेय्य.

सतिया ¶ अधिट्ठितानन्ति पगेव उपट्ठिताय सतिया आरक्खवसेन अधिट्ठितानं इन्द्रियानं. अनन्वास्सवनीयतोति द्वारभावेन अभिज्झादीहि अननुबन्धितब्बतो. वरन्ति सेट्ठं. तत्तायाति उण्हाय. आदित्तायाति आदितो पट्ठाय दित्ताय. सम्पज्जलितायाति समन्ततो जलन्तिया. सजोतिभूतायाति एकजालीभूताय. सम्पलिमट्ठन्ति सब्बसो आमट्ठं, अञ्चितन्ति अत्थो. न त्वेव वरन्ति आनेत्वा सम्बन्धितब्बं. रूपेसूति रूपारम्मणेसु. अनुब्यञ्जनसो निमित्तग्गाहोति किलेसानं अनु अनु ब्यञ्जनवसेन उप्पादनेन पाकटीकरणवसेन सुभादिनिमित्तग्गाहो, अथ वा अनुब्यञ्जनसोति हत्थपादादिअनुब्यञ्जनतो, निमित्तग्गाहोति इत्थिपुरिसादिसुभादिनिमित्तग्गहणं. चक्खुद्वारादिपवत्तस्साति चक्खुद्वारादीहि पवत्तस्स. विञ्ञाणस्साति जवनविञ्ञाणस्स. निमित्तादिग्गाहं निसेधेन्तेन सम्पादेतब्बोति सम्बन्धो. असंविहितसाखापरिवारन्ति सम्मा अविहितवतिपरिक्खेपं. परस्सहारीहीति परसन्तकावहारकेहि चोरेहि. समतिविज्झतीति सब्बसो अतिविज्झति अनुपविसति.

रूपेसूति रूपहेतु रूपनिमित्तं. उप्पज्जनकअनत्थतो रक्ख इन्द्रियन्ति सम्बन्धो. एवं सेसेसु. एते हि द्वाराति एते चक्खादिद्वारा. सतिकवाटेन असंवुतत्ता विवटा. ततो एव अरक्खिता. किलेसुप्पत्तिया हेतुभावेन तंसमङ्गिनं हनन्तीति कारणूपचारेनेव वुत्तं. एते वा रूपादयो. किलेसानं आरम्मणभूता द्वारा चक्खादिद्वारा. ते कीदिसा विवटा अरक्खिता असंवुतचक्खादिहेतुं तंसमङ्गिनं हनन्तीति कारणूपचारेनेव वुत्तं. अगारन्ति गेहं. दुच्छन्नन्ति न सम्मा छादितं. अभावितन्ति लोकुत्तरभावनारहितं.

सम्पादितेतिआदिस्स ¶ वोदानपक्खस्स अत्थो वुत्तविपरियायेन वेदितब्बो. अयं पन सब्बसो किलेसानं अनुप्पादो अतिउक्कट्ठदेसना मग्गेनागतसदिसत्ता. सम्पादेतब्बोति ‘‘न पुनेवं करिस्स’’न्ति अधिट्ठानसुद्धिया सम्पादेतब्बो.

अधुनापब्बजितेनाति न चिरपब्बजितेन, नवपब्बजितेनाति अत्थो. कामरागेन डय्हामीति कामरागग्गिना परिडय्हामि. सो च पन दाहो इदानि चित्तगतोति दस्सेन्तो आह ‘‘चित्तं मे परिडय्हती’’ति. साधूति आयाचना. निब्बापनन्ति तस्स निब्बापनुपायं. गोतमाति थेरं गोत्तेन आलपति.

सञ्ञाय ¶ विपरियेसाति ‘‘असुभे सुभ’’न्ति पवत्तसञ्ञाविपरियेसहेतु विपरीतसञ्ञानिमित्तं. निमित्तं परिवज्जेहि कीदिसं? रागूपसञ्हितं रागुप्पत्तिहेतुभूतं सुभनिमित्तं परिवज्जेहि न मनसि करोहि. न केवलं सुभनिमित्तस्सामनसिकारो एव, अथ खो असुभभावनाय अत्तनो चित्तं भावेहि. कथं? एकग्गं सुसमाहितं यथा तं असुभारम्मणे विक्खेपाभावेन एकग्गं, सुट्ठु अप्पितभावेन सुसमाहितञ्च होति, एवं भावेहीति. एवं समथभावनाय कामरागस्स विक्खम्भनं दस्सेत्वा इदानि समुच्छेदनविधिं दस्सेतुं ‘‘सङ्खारे’’तिआदि वुत्तं. तत्थ सङ्खारे परतो पस्साति सब्बेपि सङ्खारे अविधेय्यकताय ‘‘परे’’ति पस्स. अनिच्चताय पन उदयब्बयपटिपीळितत्ता दुक्खतो, अनत्तसभावत्ता, अत्तविरहतो च नो अत्ततो पस्स. एवं लक्खणत्तयं आरोपेत्वा विपस्सनं वड्ढेन्तो मग्गपटिपाटिया चतुत्थमग्गेन सब्बसो निब्बापेहि महारागं तेभूमकस्स अभिभवनतो महाविसयताय महारागं वूपसमेहि. यथा एतरहि, एवं मा डय्हित्थो पुनप्पुनन्ति दळ्हतरं रागविनोदने नियोजेसि.

एवं इन्द्रियसंवरसीलस्स सम्पादने विधिं दस्सेत्वा एवं तं सुसम्पादितं होतीति नयं दस्सेतुं ‘‘अपिचा’’तिआदिना तत्थ परिपूरकारिनो थेरे निदस्सेति. तत्थ ‘‘लेणं न उल्लोकितपुब्ब’’न्ति इदं सब्बत्थेव थेरस्स युगमत्तदस्सिताय वुत्तं. किं पन थेरो सेनासनं न सोधेति ¶ ? ‘‘उल्लोका पठमं ओहारेतब्ब’’न्ति हि वुत्तं, अन्तेवासिकादयो एव किरस्स सेनासनं सोधेन्ति. अस्स नागरुक्खस्स.

तस्मिं गामेति महागामे. तरुणा थञ्ञपिवनका पुत्तधीतरो यासं ता तरुणपुत्ता, तासं. लञ्जापेसीति थनपट्टिकाय थने बन्धापेत्वा राजमुद्दिकाय लञ्जापेसि. राजा थेरं चिरतरं दट्ठुं कालविक्खेपं करोन्तो ‘‘स्वे सीलानि गण्हिस्सामी’’ति आह. थेरो रञ्ञो च देविया च वन्दनकाले सत्ताकारमत्तं गण्हाति. इत्थी पुरिसोति पन विवेकं न करोति. तेनाह ‘‘ववत्थानं न करोमी’’ति. ‘‘अहो सुपरिसुद्धसीलो वतायं अय्यो’’ति दण्डदीपिकं गहेत्वा अट्ठासि. अतिपरिसुद्धं पाकटन्ति सप्पायलाभेन कम्मट्ठानं अतिविय परिसुद्धं विभूतं अहोसि. सकलं पब्बतं उन्नादयन्तोति पथविकम्पनेन सकलं पब्बतं एकं निन्नादं करोन्तो. तन्निवासिदेवतानं साधुकारदानेनाति केचि. भन्तोति अनवट्ठितो. बालोति तरुणदारको. उत्रस्तोति ञातकेहि विनाभावेन सन्त्रस्तो.

विसगण्डकरोगोति ¶ थनकन्दळरोगमाह. मासरोगादिकोपि विसगण्डकरोगोति वदन्ति. यतो पब्बजितो, ततो पट्ठाय पब्बजितकालतो पभुतीति अत्थो. इन्द्रियानीति इन्द्रियसंवरसीलानि. तेसु हि भिन्नेसु इन्द्रियानिपि भिन्नानीति वुच्चन्ति आरक्खाभावतो, इन्द्रियानेव वा निमित्तानुब्यञ्जनग्गाहस्स द्वारभूतानि भिन्नानि नाम तंसमङ्गिनो अनत्थुप्पत्तितो, विपरियायतो अभिन्नानीति वेदितब्बानि. इन्द्रियानं वा अयोनिसो उपसंहारो भेदनं, योनिसो उपसंहारो अभेदनन्ति अपरे. मित्तत्थेरोवाति महामित्तत्थेरो विय. वरेति सेट्ठे.

तथा वीरियेनाति तथा-सद्देन वीरियं विसेसेति. यथा सति अनवज्जलक्खणाव इन्द्रियसंवरसाधनं, तथा वीरियं अनवज्जलक्खणं आजीवपारिसुद्धिसाधनन्ति. वीरियापेक्खमेव विसेसनं दट्ठब्बं. तेनेवाह ‘‘सम्माआरद्धवीरियस्सा’’ति. अयुत्ता एसना अनेसना, यथावुत्तमिच्छाजीवसङ्गहा. सा एव सत्थुसासनस्स न पतिरूपाति अप्पतिरूपं, तं अनेसनं अप्पतिरूपं. अथ वा पतिरूपविरोधिनी अप्पतिरूपा, परिग्गहितधुतङ्गस्स ¶ धुतङ्गनियमविरोधिनी यस्स कस्सचि सल्लेखविकोपिनी पटिपत्ति. इमस्मिं पक्खे च-सद्दो लुत्तनिद्दिट्ठो, अनेसनं, अप्पतिरूपञ्च पहायाति. पटिसेवमानेन परिवज्जयता सम्पादेतब्बाति सम्बन्धो. ‘‘परिसुद्धुप्पादे’’ति इमिनाव धम्मदेसनादीनं परिसुद्धाय समुट्ठानता दीपिता होतीति ‘‘धम्मदेसनादीहि चस्स गुणेहि पसन्नान’’न्ति वुत्तं. आदि-सद्देन बाहुसच्चवत्तपरिपूरणइरियापथसम्पत्तिआदीनं गहणं वेदितब्बं. धुतगुणे चस्स पसन्नानन्ति एत्थापि एसेव नयो. पिण्डपातचरियादीहीति आदि-सद्देन मित्तसुहज्जपंसुकूलचरियादीनं सङ्गहो दट्ठब्बो. धुतङ्गनियमानुलोमेनाति तंतंधुतङ्गनियताय पटिपत्तिया अनुलोमवसेन, अविकोपनवसेनाति अत्थो. महिच्छस्सेव मिच्छाजीवेन जीविका, न अप्पिच्छस्स. अप्पिच्छताय उक्कंसगताय मिच्छाजीवस्स असम्भवो एवाति दस्सेतुं ‘‘एकब्याधिवूपसमत्थ’’न्तिआदि वुत्तं. तत्थ पूतिहरितकीति पूतिमुत्तपरिभावितं, पूतिभावेन वा छड्डितं हरितकं. अरियवंसो एतस्स अत्थीति, अरियवंसे वा नियुत्तोति अरियवंसिको, पच्चयगेधस्स दूरसमुस्सारितत्ता उत्तमो च सो अरियवंसिको चाति उत्तमअरियवंसिको. यस्स कस्सचीति परिग्गहितापरिग्गहितधुतङ्गेसु यस्स कस्सचि.

निमित्तं नाम पच्चये उद्दिस्स यथा अधिप्पायो ञायति एवं निमित्तकम्मं. ओभासो नाम ¶ उजुकमेव अकथेत्वा यथा अधिप्पायो विभूतो होति, एवं ओभासनं. परिकथा नाम परियायेन कथनं. तथा उप्पन्नन्ति निमित्तादिवसेन उप्पन्नं.

द्वारं दिन्नन्ति रोगसीसेन परिभोगस्स द्वारं दिन्नं. तस्मा अरोगकालेपि परिभुञ्जितुं वट्टति, आपत्ति न होतीति अत्थो. तेनाह ‘‘किञ्चापि आपत्ति न होती’’तिआदि. न वट्टतीति सल्लेखपटिपत्तियं ठितस्स न वट्टति, सल्लेखं कोपेतीति अधिप्पायो. ‘‘आजीवं पन कोपेती’’ति इमिनाव सेनासनपटिसंयुत्तधुतङ्गधरस्स निमित्तादयो न वट्टन्तीति वदन्ति. तदञ्ञधुतङ्गधरस्सापि न वट्टन्तियेवाति अपरे. अकरोन्तोति यथासकं अनुञ्ञातविसयेपि अकरोन्तो. अञ्ञत्रेवाति ठपेत्वा एव.

गणवासं ¶ पहाय अरञ्ञायतने पटिप्पस्सद्धिविवेकस्स मुद्धभूताय अग्गफलसमापत्तिया विहरन्तो महाथेरो ‘‘पविवेकं ब्रूहयमानो’’ति वुत्तो. उदरसन्निस्सितो वाताबाधो उदरवाताबाधो. असम्भिन्नं खीरं एतस्साति असम्भिन्नखीरं, तदेव पायासन्ति असम्भिन्नखीरपायासं, उदकेन असम्मिस्सखीरेन पक्कपायासन्ति अत्थो. तस्साति पायासस्स. उप्पत्तिमूलन्ति ‘‘गिहिकाले मे, आवुसो, माता सप्पिमधुसक्करादीहि योजेत्वा असम्भिन्नखीरपायासं अदासि, तेन मे फासु अहोसी’’ति अत्तनो वचीनिच्छारणसङ्खातं उप्पत्तिहेतुं. ‘‘अपरिभोगारहो पिण्डपातो’’ति कस्मा वुत्तं, ननु थेरस्स ओभासनादिचित्तुप्पत्तियेव नत्थीति? सच्चं नत्थि, अज्झासयं पन अजानन्ता एकच्चे पुथुज्जना तथा मञ्ञेय्युं, अनागते च सब्रह्मचारिनो एवं मम दिट्ठानुगतिं आपज्जेय्युन्ति पटिक्खिपि. अपिच महाथेरस्स परमुक्कंसगता सल्लेखपटिपत्ति. तथा हि दहरभिक्खुनो ‘‘कस्स सम्पन्नं न मनाप’’न्ति (पाचि. २०९, २५७, ६१२, १२२८, १२३४; चूळव. ३४३) वचनं निस्साय याव परिनिब्बाना पिट्ठखादनीयं न खादति.

वचीविञ्ञत्तिविप्फाराति वचीनिच्छारणहेतु. अत्थविञ्ञापनवसेन पवत्तमानो हि सद्दो असतिपि विञ्ञत्तिया तस्स केनचि पच्चयेन पच्चयभावे वचीविञ्ञत्तिवसेनेव पवत्ततीति ‘‘वचीविञ्ञत्तिविप्फारो’’ति वुच्चति. भुत्तोति भुत्तवा सचे भवेय्यं अहं. साति अस्स. अकारलोपेन हि निद्देसो ‘‘एवंस ते’’तिआदीसु (म. नि. १.२३; अ. नि. ६.५८; ८.७) विय. अन्तगुणन्ति अन्तभोगो. बहि चरेति आसयतो निक्खमित्वा गोचरग्गहणवसेन ¶ बहि यदि विचरेय्य. परमप्पिच्छं दस्सेतुं लोकवोहारेनेवमाह. लोके हि अयुत्तभोजनं ओदरियं गरहन्ता एवं वदन्ति ‘‘किंसु नाम तस्स अन्तानि बहि चरन्ती’’ति. आराधेमीति आदितो पट्ठाय राधेमि, वसे वत्तेमीति अत्थो.

महातिस्सत्थेरो किर दुब्भिक्खकाले मग्गं गच्छन्तो भत्तच्छेदेन, मग्गकिलमथेन च किलन्तकायो दुब्बलो अञ्ञतरस्स फलितस्स अम्बस्स मूले निपज्जि, बहूनि अम्बफलानि तहं तहं पतितानि होन्ति. तत्थेको वुड्ढतरो उपासको थेरस्स सन्तिकं उपगन्त्वा परिस्समं ञत्वा ¶ अम्बपानं पायेत्वा अत्तनो पिट्ठिं आरोपेत्वा वसनट्ठानं नेति. थेरो –

‘‘न पिता नपि ते माता, न ञाति नपि बन्धवो;

करोतेतादिसं किच्चं, सीलवन्तस्स कारणा’’ति. (विसुद्धि. १.२०) –

अत्तानं ओवदित्वा सम्मसनं आरभित्वा विपस्सनं वड्ढेत्वा तस्स पिट्ठिगतो एव मग्गपटिपाटिया अरहत्तं सच्छाकासि. इमं सन्धाय वुत्तं ‘‘अम्बखादकमहातिस्सत्थेरवत्थुपि चेत्थ कथेतब्ब’’न्ति. सब्बथापीति सब्बप्पकारेनपि अनेसनवसेन, चित्तुप्पत्तिवसेनपि, पगेव कायवचीविप्फन्दितवसेनाति अधिप्पायो. तेनाह ‘‘अनेसनाया’’तिआदि.

अपच्चवेक्खितपरिभोगे इणपरिभोगआपत्तिआदीनवस्स, तब्बिपरियायतो पच्चवेक्खितपरिभोगे आनिसंसस्स च दस्सनं आदीनवानिसंसदस्सनं. तस्स पन पच्चयाधिकारत्ता वुत्तं ‘‘पच्चयेसू’’ति. कारणकारणम्पि हि कारणभावेन वुच्चति यथा तिणेहि भत्तं सिद्धन्ति. येन कारणेन भिक्खुनो अपच्चवेक्खितपरिभोगो नाम सिया, तस्मिं वज्जिते पच्चयसन्निस्सितसीलं सिज्झति, विसुज्झति चाति दस्सेतुं ‘‘तस्मा’’तिआदि वुत्तं. तत्थ पच्चयगेधन्ति गेधग्गहणेनेव सम्मोहोपि गहितोति दट्ठब्बो तेन सह पवत्तनतो, तदुपनिस्सयतो च. धम्मेन समेन उप्पन्नेति इदं पच्चयानं आगमनसुद्धिदस्सनं, न पच्चयसन्निस्सितसीलविसुद्धिदस्सनं. पच्चयानं हि इदमत्थितं उपधारेत्वा परिभुञ्जनं पच्चयसन्निस्सितसीलं. यस्मा पन ते पच्चया ञायाधिगता एव भिक्खुना परिभुञ्जितब्बा, तस्मा वुत्तं ‘‘धम्मेन समेन उप्पन्ने पच्चये’’ति. यथावुत्तेन विधिनाति ‘‘सीतस्स पटिघाताया’’तिआदिना (म. नि. १.२३; अ. नि. ६.५८; महानि. २०६) वुत्तविधिना.

धातुवसेन ¶ वाति ‘‘यथापच्चयं वत्तमानं धातुमत्तमेवेतं, यदिदं चीवरादि, तदुपभुञ्जको च पुग्गलो’’ति एवं धातुमनसिकारवसेन वा. पटिकूलवसेन वाति पिण्डपाते ताव आहारे पटिकूलसञ्ञावसेन, ‘‘सब्बानि पन इमानि चीवरादीनि अजिगुच्छनीयानि, इमं पूतिकायं पत्वा अतिविय जिगुच्छनीयानि जायन्ती’’ति एवं पटिकूलमनसिकारवसेन वा. ततो उत्तरीति पटिलाभकालतो उपरि. अनवज्जोव परिभोगो ¶ आदितोव पञ्ञाय परिसोधितत्ता अधिट्ठहित्वा ठपितपत्तचीवरानं वियाति. पच्चवेक्खणाय आदिसुद्धिदस्सनपरमेतं, न परिभोगकाले पच्चवेक्खणपटिक्खेपपरं. तेनाह ‘‘परिभोगकालेपी’’तिआदि. तत्राति तस्मिं परिभोगकाले पच्चवेक्खणे. सन्निट्ठानकरोति असन्देहकरो एकन्तिको.

थेय्यपरिभोगो नाम अनरहस्स परिभोगो. भगवतापि अत्तनो सासने सीलवतो पच्चया अनुञ्ञाता, न दुस्सीलस्स. दायकानम्पि सीलवतो एव परिच्चागो, न दुस्सीलस्स. अत्तनो कारानं महप्फलभावस्स पच्चासीसनतो. इति सत्थारा अननुञ्ञातत्ता, दायकेहि च अपरिच्चत्तत्ता दुस्सीलस्स परिभोगो थेय्याय परिभोगो थेय्यपरिभोगो. इणवसेन परिभोगो इणपरिभोगो, पटिग्गाहकतो दक्खिणाविसुद्धिया अभावतो इणं गहेत्वा परिभोगो वियाति अत्थो. तस्माति ‘‘सीलवतो’’तिआदिना वुत्तमेवत्थं कारणभावेन पच्चामसति. चीवरं कायतो मोचेत्वा परिभोगे परिभोगे पुरेभत्त…पे… पच्छिमयामेसु पच्चवेक्खितब्बन्ति सम्बन्धो. तथा असक्कोन्तेन यथावुत्तकालविसेसवसेन एकदिवसे चतुक्खत्तुं तिक्खत्तुं द्विक्खत्तुं सकिंयेव वा पच्चवेक्खितब्बं. सचे अरुणं उग्गच्छति, इणपरिभोगट्ठाने तिट्ठति. हिय्यो यं मया चीवरं परिभुत्तं, तं यावदेव सीतस्स पटिघाताय…पे… हिरिकोपीनपटिच्छादनत्थं. हिय्यो यो मया पिण्डपातो परिभुत्तो, सो ‘‘नेव दवाया’’तिआदिना सचे अतीतपरिभोगपच्चवेक्खणं न करेय्याति वदन्ति, तं वीमंसितब्बं. सेनासनम्पि परिभोगे परिभोगेति पवेसे पवेसे. सतिपच्चयताति सतिया पच्चयभावो पटिग्गहणस्स, परिभोगस्स च पच्चवेक्खणसतिया पच्चयभावो युज्जति, पच्चवेक्खित्वाव पटिग्गहेतब्बं, परिभुञ्जितब्बञ्चाति अत्थो. तेनेवाह ‘‘सतिं कत्वा’’तिआदि. एवं सन्तेपीति यदिपि द्वीसुपि ठानेसु पच्चवेक्खणा युत्ता, एवं सन्तेपि. अपरे पनाहु – सति पच्चयताति सति भेसज्जपरिभोगस्स पच्चयभावे, सति पच्चयेति अत्थो. एवं सन्तेपीति पच्चये सतिपीति. तं तेसं मतिमत्तं. तथा हि पच्चयसन्निस्सितसीलं पच्चवेक्खणाय विसुज्झति, न पच्चयस्स भावमत्तेन.

एवं ¶ पच्चयसन्निस्सितसीलस्स विसुद्धिं दस्सेत्वा तेनेव पसङ्गेन सब्बापि विसुद्धियो दस्सेतुं ‘‘चतुब्बिधा हि सुद्धी’’तिआदिमाह. तत्थ सुज्झति ¶ एतायाति सुद्धि, यथाधम्मं देसनाव सुद्धि देसनासुद्धि. वुट्ठानस्सापि चेत्थ देसनाय एव सङ्गहो दट्ठब्बो. छिन्नमूलापत्तीनं पन अभिक्खुतापटिञ्ञाव देसना. अधिट्ठानविसिट्ठो संवरोव सुद्धि संवरसुद्धि. धम्मेन समेन पच्चयानं परियेट्ठि एव सुद्धि परियेट्ठिसुद्धि. चतूसुपि पच्चयेसु वुत्तविधिना पच्चवेक्खणाव सुद्धि पच्चवेक्खणसुद्धि. एस ताव सुद्धीसु समासनयो. सुद्धिमन्तेसु पन देसना सुद्धि एतस्साति देसनासुद्धि. सेसेसुपि एसेव नयो. सुद्धि-सद्दो पन वुत्तनयोव. एवन्ति संवरभेदं सन्धायाह. पहायाति वज्जेत्वा, अकत्वाति अत्थो.

दातब्बट्ठेन दायं, तं आदियन्तीति दायादा. अननुञ्ञातेसु सब्बेन सब्बं परिभोगाभावतो, अनुञ्ञातेसु एव च परिभोगसम्भवतो भिक्खूहि परिभुञ्जितब्बपच्चया भगवतो सन्तका. ‘‘धम्मदायादा मे, भिक्खवे, भवथ मा आमिसदायादा. अत्थि मे तुम्हेसु अनुकम्पा ‘किन्ति मे सावका धम्मदायादा भवेय्युं नो आमिसदायादा’’’ति (म. नि. १.२९) एवं पवत्तं धम्मदायादसुत्तञ्च एत्थ एतस्मिं अत्थे साधकं.

अवीतरागानं तण्हापरवसताय पच्चयपरिभोगे सामिभावो नत्थि, तदभावेन वीतरागानं तत्थ सामिभावो यथारुचिपरिभोगसम्भवतो. तथा हि ते पटिकूलम्पि अप्पटिकूलाकारेन, अप्पटिकूलम्पि पटिकूलाकारेन, तदुभयम्पि वज्जेत्वा अज्झुपेक्खनाकारेन पच्चये परिभुञ्जन्ति, दायकानञ्च मनोरथं परिपूरेन्ति. तेनाह ‘‘ते हि तण्हाय दासब्यं अतीतत्ता सामिनो हुत्वा परिभुञ्जन्ती’’ति.

सब्बेसन्ति अरियानं, पुथुज्जनानञ्च. कथं पुथुज्जनानं इमे परिभोगा सम्भवन्ति? उपचारवसेन. यो हि पुथुज्जनस्सापि सल्लेखपटिपत्तियं ठितस्स पच्चयगेधं पहाय तत्थ तत्थ अनुपलित्तेन चित्तेन परिभोगो, सो सामिपरिभोगो विय होति. सीलवतो पन पच्चवेक्खितपरिभोगो दायज्जपरिभोगो विय होति, दायकानं मनोरथस्स अविराधनतो. तथा हि वुत्तं ‘‘दायज्जपरिभोगेयेव वा सङ्गहं गच्छती’’ति. कल्याणपुथुज्जनस्स परिभोगे वत्तब्बमेव नत्थि, तस्स सेक्खसङ्गहतो. सेक्खसुत्तं (सं. नि. ५.१३) हेतस्सत्थस्स साधकं. तेनाह ‘‘सीलवापि ¶ ही’’तिआदि. पच्चनीकत्ताति यथा इणायिको अत्तनो रुचिया इच्छितदेसं गन्तुं न ¶ लभति, एवं इणपरिभोगयुत्तो लोकतो निस्सरितुं न लभतीति तप्पटिपक्खत्ता सीलवतो पच्चवेक्खितपरिभोगो आणण्यपरिभोगोति आह ‘‘आणण्यपरिभोगो वा’’ति. एतेन निप्परियायतो चतुपरिभोगविनिमुत्तो विसुंयेवायं परिभोगोति दस्सेति. इमाय सिक्खायाति सीलसङ्खाताय सिक्खाय. किच्चकारीति पटिञ्ञानुरूपं पटिपज्जनतो युत्तपत्तकारी.

इदानि तमेव किच्चकारितं सुत्तपदेन विभावेतुं ‘‘वुत्तम्पि चेत’’न्तिआदि वुत्तं. तत्थ विहारन्ति पतिस्सयं. सयनासनन्ति मञ्चादिं. उभयेनपि सेनासनमेव वुत्तं. आपन्ति उदकं. सङ्घाटिरजूपवाहनन्ति पंसुमलादिनो सङ्घाटिगतरजस्स धोवनं. सुत्वान धम्मं सुगतेन देसितन्ति चीवरादीसु ‘‘पटिसङ्खा योनिसो चीवरं पटिसेवति सीतस्स पटिघाताया’’तिआदिना (म. नि. १.२३; अ. नि. ६.५८; महानि. २०६) नयेन भगवता देसितं धम्मं सुत्वा. सङ्खाय सेवे वरपञ्ञसावकोति ‘‘पिण्ड’’न्ति वुत्तं पिण्डपातं, विहारादिपदेहि वुत्तं सेनासनं, ‘‘पिपासागेलञ्ञस्स वूपसमनतो पानीयम्पि गिलानपच्चयो’’ति आपमुखेन दस्सितं गिलानपच्चयं, सङ्घाटियादिचीवरन्ति चतुब्बिधं पच्चयं सङ्खाय ‘‘यावदेव इमस्स कायस्स ठितिया’’तिआदिना (म. नि. १.२३; २.२४; ३.७५; सं. नि. ४.१२०; अ. नि. ६.५८; ८.९; ध. स. १३५५) नयेन पच्चवेक्खित्वा. सेवे सेवितुं सक्कुणेय्य उत्तमपञ्ञस्स भगवतो सावको सेखो वा पुथुज्जनो वा.

यस्मा च सङ्खाय सेवी वरपञ्ञसावको, तस्मा हि पिण्डे…पे… पोक्खरे वारिबिन्दु, तथा होति. कालेनाति अरियानं भोजनकाले. लद्धाति लभित्वा. परतोति अञ्ञतो दायकतो. अनुग्गहाति अनुकम्पाय बहुम्हि उपनीते मत्तं सो जञ्ञा जानेय्य सततं सब्बकालं उपट्ठितो उपट्ठितस्सति. आलेपनरूहने यथाति भेसज्जलेपनेन वणस्स रुहने विय, मत्तं जानेय्याति योजना. आहरेति आहरेय्य. ‘‘आहरेय्याहार’’न्ति वा पाठो. यापनत्थन्ति सरीरस्स यापनाय. अमुच्छितोति तण्हामुच्छाय अमुच्छितो गेधं तण्हं अनापन्नो.

अत्तनो ¶ मातुलस्स सङ्घरक्खितत्थेरस्सेव नामस्स गहितत्ता भागिनेय्यसङ्घरक्खितसामणेरो. सालिकूरन्ति सालिभत्तं. सुनिब्बुतन्ति सुसीतलं. असञ्ञतोति अपच्चवेक्खणं सन्धायाह. सब्बासवपरिक्खीणोति परिक्खीणसब्बासवो.

पठमसीलपञ्चकवण्णना

२०. परियन्तो ¶ एतेसं अत्थीति परियन्तानि, परियन्तानि सिक्खापदानि येसं ते परियन्तसिक्खापदा, तेसं परियन्तसिक्खापदानं. उपसम्पन्नानन्ति ठपेत्वा कल्याणपुथुज्जनसेक्खासेक्खे तदञ्ञेसं उपसम्पन्नानं. सामञ्ञजोतनापि हि विसेसे तिट्ठति. कुसलधम्मे युत्तानन्ति विपस्सनाचारे युत्तपयुत्तानं. सेक्खधम्मा परियन्ता परमा मरियादा एतस्साति सेक्खपरियन्तो. नामरूपपरिच्छेदतो, कुसलधम्मसमादानतो वा पन पट्ठाय याव गोत्रभू, ताव पवत्तकुसलधम्मप्पबन्धो सेक्खधम्मे आहच्च ठितो सेक्खपरियन्तो. सेक्खधम्मानं वा हेट्ठिमन्तभूता सिक्खितब्बा लोकिया तिस्सो सिक्खा सेक्खपरियन्तो, तस्मिं सेक्खपरियन्ते. परिपूरकारीनन्ति किञ्चिपि सिक्खं अहापेत्वा पूरेन्तानं. उपरिविसेसाधिगमत्थं काये च जीविते च अनपेक्खानं. ततो एव सीलपारिपूरिअत्थं परिच्चत्तजीवितानं. दिट्ठिसंकिलेसेन अपरामसनीयतो पारिसुद्धिवन्तं सीलं अपरामट्ठपारिसुद्धिसीलं. किलेसानं सब्बसो पटिप्पस्सद्धिया पारिसुद्धिवन्तं सीलं पटिप्पस्सद्धिपारिसुद्धिसीलं.

अनुपसम्पन्नानं असेक्खानं, सेक्खानं, कल्याणपुथुज्जनानञ्च सीलं महानुभावताय आनुभावतो अपरियन्तमेवाति आह ‘‘गणनवसेन सपरियन्तत्ता’’ति. कायवाचानं संवरणतो, विनयनतो च संवरविनया. पेय्यालमुखेन निद्दिट्ठाति तत्थ तत्थ सत्थारा देसितवित्थारनयेन यथावुत्तगणनतो निद्दिट्ठा. सिक्खाति सीलसङ्खाता सिक्खा. विनयसंवरेति विनयपिटके. गणनवसेन सपरियन्तम्पि उपसम्पन्नानं सीलन्ति हेट्ठा वुत्तं आनेत्वा सम्बन्धितब्बं. यं किञ्चि हि उपसम्पन्नेन सिक्खितब्बं सीलं नाम, तत्थ कस्सचिपि अनवसेसतो अनवसेसवसेन ¶ . समादानभावन्ति समादानसब्भावं. लाभ…पे… वसेन अदिट्ठपरियन्तभावो लाभादिहेतु सीलस्स अवीतिक्कमो.

धनं चजे अङ्गवरस्स हेतु पारिपन्थिकचोरादीहि उपद्दुतो. अङ्गं चजे जीवितं रक्खमानो सप्पदट्ठादिकाले. अङ्गं धनं जीवितञ्चापि सब्बं, चजे नरो धम्ममनुस्सरन्तो सुतसोममहाबोधिसत्तादयो विय. तेनाह ‘‘इमं सप्पुरिसानुस्सतिं अविजहन्तो’’ति. जिघच्छापरिस्समेन जीवितसंसये सतिपि. सिक्खापदं अवीतिक्कम्माति अस्सामिकेसु अम्बफलेसु ¶ भूमियं पतितेसु समीपेयेव सन्तेसुपि पटिग्गाहकाभावेन अपरिभुञ्जन्तो पटिग्गहणसिक्खापदं अवीतिक्कमित्वा.

सीलवन्तस्साति सीलवन्तभावस्स कारणा, सीलवन्तस्स वा तुय्हं एतादिसं अंसेन वाहणादिकं किच्चं करोति, कारणा सीलस्साति अधिप्पायो. सुधोतजातिमणि वियाति चतूसु पासाणेसु सम्मदेव धोतजातिमणि विय. महासङ्घरक्खितभागिनेय्यसङ्घरक्खितत्थेरानं वियाति महासङ्घरक्खितत्थेरस्स, तस्सेव भागिनेय्यसङ्घरक्खितत्थेरस्स विय च. ‘‘किमत्थं मयं इधागता’’ति महाजनस्स विप्पटिसारो भविस्सतीति अधिप्पायो. अच्छरिकायाति अङ्गुलिफोटनेन. असतियाति सतिसम्मोसेन. अञ्ञाणपकतन्ति अञ्ञाणेन अपरज्झित्वा कतं, अजानित्वा कतन्ति अत्थो.

अप्पस्सुतोपि चे होतीति सुत्तगेय्यादिसुतरहितो होति चे. सीलेसु असमाहितोति पातिमोक्खसंवरादिसीलेसुपि न सम्मा पतिट्ठितो होति चे. नास्स सम्पज्जते सुतन्ति अस्स सीलरहितस्स पुग्गलस्स सुतं अत्तनो, परेसञ्च कत्थचि भवसम्पत्तिआवहं न होति. ‘‘दुस्सीलोयं पुरिसपुग्गलो’’ति हि सिक्खाकामा न तस्स सन्तिकं उपसङ्कमन्ति. बहुस्सुतोपि चेति एत्थ चे-ति निपातमत्तं. पसंसितोति पसंसितो एव नाम.

रागवसेन अपरामट्ठगहणेन तण्हापरामासाभावमाह. तथारूपन्ति रागवसेन अपरामट्ठं. भिन्दित्वाति हनित्वा. सञ्ञपेस्सामीति सञ्ञत्तिं ¶ करिस्सामि, अप्पकं वेलं मं विस्सेज्जेतुन्ति अधिप्पायो. अट्टियामीति जिगुच्छामि. हरायामीति लज्जामि.

पलिपन्नोति सीदन्तो, सम्मक्खितो वा. सीलेनेव सद्धिं मरिस्सामीति सीलं अविनासेन्तो तेन सहेव मरिस्सामि, न इदानि कदाचिपि तं परिच्चजिस्सामि. सति हि भवादाने सीलेन वियोगो सिया, भवमेव नादियिस्सामीति अधिप्पायो. रोगं सम्मसन्तोति रोगभूतं वेदनं वेदनामुखेन सेसारूपधम्मे, रूपधम्मे च परिग्गहेत्वा विपस्सन्तो.

रुप्पतोति विकारं आपादियमानसरीरस्स. परिसुस्सतीति समन्ततो सुस्सति. यथा किं? पुप्फं यथा पंसुनि आतपे कतं सूरियातपसन्तत्ते पंसुनि ठपितं सिरीसादिपुप्फं वियाति ¶ अत्थो. अजञ्ञन्ति अमनुञ्ञं जिगुच्छनीयं. जञ्ञसङ्खातन्ति बालेहि ‘‘जञ्ञ’’न्ति एवं कित्तितं. जञ्ञरूपं अपस्सतोति यथाभूतं अप्पस्सतो अविद्दसुनो ‘‘जञ्ञ’’न्ति पसंसितं. धिरत्थुमन्ति धि अत्थु इमं, धि-सद्दयोगेन सब्बत्थ उपयोगवचनं, इमस्स पूतिकायस्स धिकारो होतूति अत्थो. दुग्गन्धियन्ति दुग्गन्धिकं दुग्गन्धवन्तं. यत्थ यथावुत्ते पूतिकाये रागहेतु पमत्ता पमादं आपन्ना. पजाति सत्ता. हापेन्ति मग्गं सुगतूपपत्तियाति सुगतूपपत्तिया मग्गं, सीलम्पि हापेन्ति, पगेव झानादिन्ति अधिप्पायो. केवलं ‘‘अरहन्तो’’ति वत्तब्बा सावकखीणासवा, इतरे पन पच्चेकबुद्धा सम्मासम्बुद्धाति सह विसेसनेनाति आह ‘‘अरहन्तादीन’’न्ति. सब्बदरथप्पटिप्पस्सद्धियाति सब्बकिलेसदरथप्पटिप्पस्सद्धिया.

दुतियसीलपञ्चकवण्णना

पाणातिपातादीनन्ति आदि-सद्देन अदिन्नादानादीनं अग्गमग्गवज्झकिलेसपरियोसानानं सङ्गहो दट्ठब्बो. पहानादीति आदि-सद्देन वेरमणिआदीनं चतुन्नं. केसुचि पोत्थकेसु ‘‘पहानवसेना’’ति लिखन्ति, सा पमादलेखा. पाणातिपातस्स पहानं सीलन्ति हिरोत्तप्पकरुणालोभादिपमुखेन येन कुसलचित्तुप्पादेन पाणातिपातो पहीयति, तं पाणातिपातस्स पहानं सीलनट्ठेन सीलं. तथा पाणातिपाता ¶ विरति वेरमणी सीलं. पाणातिपातस्स पटिपक्खचेतना चेतना सीलं. पाणातिपातस्स संवरणं पवेसद्वारपिधानं संवरो सीलं. पाणातिपातस्स अवीतिक्कमनं अवीतिक्कमो सीलं. अदिन्नादानस्सातिआदीसुपि एसेव नयो. अभिज्झादीनं पन अनभिज्झादिवसेन पहानं वेदितब्बं. वेरमणी चेतना तंसम्पयुत्ता संवरावीतिक्कमा तप्पमुखा धम्मा.

एवं दसकुसलकम्मपथवसेन पहानसीलादीनि दस्सेत्वा इदानि सउपायानं अट्ठन्नं समापत्तीनं, अट्ठारसन्नं महाविपस्सनानं, अरियमग्गानञ्च वसेन तानि दस्सेतुं ‘‘नेक्खम्मेना’’तिआदि आरद्धं. तत्थ नेक्खम्मेनाति अलोभप्पधानेन कुसलचित्तुप्पादेन. कुसला हि धम्मा कामपटिपक्खा इध ‘‘नेक्खम्म’’न्ति अधिप्पेता. तेनाह ‘‘कामच्छन्दस्स पहानं सील’’न्तिआदि. तत्थ पहानसीलादीनि हेट्ठा वुत्तनयेनेव वेदितब्बानि. विसेसमेव वक्खाम. अब्यापादेनाति मेत्ताय. आलोकसञ्ञायाति विभूतं कत्वा मनसिकरणेन उपट्ठितआलोकसञ्जाननेन ¶ . अविक्खेपेनाति समाधिना. धम्मववत्थानेनाति कुसलादिधम्मानं याथावनिच्छयेन. सपच्चयनामरूपववत्थानेनातिपि वदन्ति.

एवं कामच्छन्दादिनीवरणप्पहानेन ‘‘अभिज्झं लोके पहाया’’तिआदिना (विभ. ५३८) वुत्ताय पठमज्झानाधिगमस्स उपायभूताय पुब्बभागपटिपदाय वसेन पहानसीलादीनि दस्सेत्वा इदानि सउपायानं अट्ठसमापत्तिआदीनं वसेन दस्सेतुं ‘‘ञाणेना’’तिआदि वुत्तं. नामरूपपरिग्गहकङ्खावितरणानं हि विबन्धभूतस्स मोहस्स दूरीकरणेन ञातपरिञ्ञाय ठितस्स अनिच्चसञ्ञादयो सिज्झन्ति. तथा झानसमापत्तीसु अभिरतिनिमित्तेन पामोज्जेन. तत्थ अनभिरतिया विनोदिताय झानादीनं समधिगमोति समापत्तिविपस्सनानं अरतिविनोदनअविज्जापदालनादिना उपायोति वुत्तं ‘‘ञाणेन अविज्जाय, पामोज्जेन अरतिया’’ति. उप्पटिपाटिनिद्देसो पन नीवरणसभावाय अविज्जाय हेट्ठानीवरणेसुपि सङ्गहदस्सनत्थन्ति दट्ठब्बं.

‘‘पठमेन ¶ झानेन नीवरणान’’न्तिआदीसु कथं झानानं सीलभावो, कथं वा तत्थ विरतिया सम्भवो. सुविसुद्धकायकम्मादिकस्स हि चित्तसमादानवसेन इमानि झानानि पवत्तन्ति, न परित्तकुसलानि विय कायकम्मादिविसोधनवसेन, नापि मग्गफलधम्मा विय दुच्चरितदुराजीवसमुच्छेदपटिप्पस्सम्भनवसेनाति? सच्चमेतं. महग्गतधम्मेसु निप्परियायेन नत्थि सीलनट्ठो, कुतो विरमणट्ठो. परियायेन पनेतं वुत्तन्ति दट्ठब्बं. को पन सो परियायो? यदग्गेन महग्गता कुसलधम्मा पटिपक्खे पजहन्ति, तदग्गेन ततो ओरता. ते च यथा चित्तं नारोहन्ति, एवं संवुता नाम होन्ति. परियुट्ठानसङ्खातो मनोद्वारे वीतिक्कमो नत्थि एतेसूति अवीतिक्कमाति च वुच्चन्ति, चेतना पन तंसम्पयुत्ताति. सोयमत्थो परतो आगमिस्सति. एवञ्च कत्वा वितक्कादिपहानवचनम्पि समत्थितं होति. न हि निप्परियायतो सीलं कुसलधम्मानं पहायकं युज्जति, न चेत्थ अकुसलवितक्कादयो अधिप्पेता. किञ्चापि पठमज्झानूपचारेयेव दुक्खस्स, चतुत्थज्झानूपचारे च सुखस्स पहानं होति, अतिसयपहानं पन सन्धाय वुत्तं ‘‘चतुत्थेन झानेन सुखदुक्खानं पहान’’न्ति. ‘‘आकासानञ्चायतनसमापत्तिया’’तिआदीसु यं वत्तब्बं, तं आरुप्पकथायं (विसुद्धि. १.२७५ आदयो) आगमिस्सति.

अनिच्चस्स, अनिच्चन्ति वा अनुपस्सना अनिच्चानुपस्सना. तेभूमिकधम्मानं अनिच्चतं गहेत्वा ¶ पवत्ताय विपस्सनायेतं नामं. निच्चसञ्ञायाति ‘‘सङ्खतधम्मा निच्चा सस्सता’’ति एवं पवत्ताय मिच्छासञ्ञाय, सञ्ञाग्गहणेनेव दिट्ठिचित्तानम्पि गहणं दट्ठब्बं. एस नयो इतो परासुपि. निब्बिदानुपस्सनायाति सङ्खारेसु निब्बिन्दनाकारेन पवत्ताय अनुपस्सनाय. नन्दियाति सप्पीतिकतण्हाय. विरागानुपस्सनायाति विरज्जनाकारेन पवत्ताय अनुपस्सनाय. रागस्साति सङ्खारेसु रागस्स. निरोधानुपस्सनायाति सङ्खारानं निरोधस्स अनुपस्सनाय. यथा वा सङ्खारा निरुज्झन्तियेव, आयतिं पुनब्भववसेन न उप्पज्जन्ति, एवं अनुपस्सना निरोधानुपस्सना. तेनेवाह ‘‘निरोधानुपस्सनाय निरोधेति नो समुदेती’’ति (पटि. म. १.८३). मुञ्चितुकामताय हि अयं बलप्पत्ता. सङ्खारानं पटिनिस्सज्जनाकारेन पवत्ता अनुपस्सना पटिनिस्सग्गानुपस्सना. पटिसङ्खा सन्तिट्ठना हि अयं ¶ . आदानस्साति निच्चादिवसेन गहणस्स. सन्ततिसमूहकिच्चारम्मणवसेन एकत्तगहणं घनसञ्ञा, तस्सा घनसञ्ञाय. आयूहनस्साति अभिसङ्खरणस्स. सङ्खारानं अवत्थादिविसेसापत्ति विपरिणामो. धुवसञ्ञायाति थिरभावगहणस्स. निमित्तस्साति समूहादिघनवसेन सकिच्चपरिच्छेदताय च सङ्खारानं सविग्गहताय. पणिधियाति रागादिपणिधिया, तण्हावसेन सङ्खारेसु निन्नतायाति अत्थो. अभिनिवेसस्साति अत्तानुदिट्ठिया. अनिच्चदुक्खादिवसेन सब्बतेभूमकधम्मतिरणा अधिपञ्ञाधम्मविपस्सना. सारादानाभिनिवेसस्साति असारेसु सारगहणविपल्लासस्स. यथाभूतञाणदस्सनं थिरभावपत्ता अनिच्चादिअनुपस्सनाव. उदयब्बयञाणन्ति केचि. सप्पच्चयनामरूपदस्सनन्ति अपरे. ‘‘इस्सरकुत्तादिवसेन लोको समुप्पन्नो’’ति अभिनिवेसो सम्मोहाभिनिवेसो. उच्छेदसस्सताभिनिवेसोति केचि. ‘‘अहोसिं नु खो अहमतीतमद्धान’’न्तिआदिनयप्पवत्ता (म. नि. १.१८; सं. नि. २.२०; महानि. १७४) संसयापत्ति सम्मोहाभिनिवेसोति अपरे. सङ्खारेसु ताणलेणभावगहणं आलयाभिनिवेसो. ‘‘आलयरता आलयसम्मुदिता’’ति (दी. नि. २.६७; म. नि. १.२८१; २.३३७; सं. नि. १.१७२; महाव. ७-८) वचनतो आलयो तण्हा. सा एव चक्खादीसु, रूपादीसु च अभिनिविसनवसेन पवत्तिया आलयाभिनिवेसोति अपरे. ‘‘एवं ठिता ते सङ्खारा पटिनिस्सज्जीयन्ती’’ति पवत्तं ञाणं पटिसङ्खानुपस्सना. अप्पटिसङ्खा पटिसङ्खाय पटिपक्खभूता मोहप्पधाना अकुसलधम्मा. वट्टतो विगतत्ता विवट्टं निब्बानं, तत्थ निन्नभावसङ्खातेन अनुपस्सनेन पवत्ति विवट्टानुपस्सना, सङ्खारुपेक्खा चेव अनुलोमञाणञ्च. सञ्ञोगाभिनिवेसो संयुज्जनवसेन सङ्खारेसु अभिनिविसनं.

दिट्ठेकट्ठानन्ति ¶ दिट्ठिया सहजेकट्ठानञ्च पहानेकट्ठानञ्च. ओळारिकानन्ति उपरिमग्गवज्झे किलेसे उपादाय वुत्तं. अञ्ञथा दस्सनेन पहातब्बापि दुतियमग्गवज्झेहि ओळारिका. अणुसहगतानन्ति अणुभूतानं, इदं हेट्ठिममग्गवज्झे उपादाय वुत्तं. सब्बकिलेसानन्ति अवसिट्ठसब्बकिलेसानं. न हि पठममग्गादीहि पहीना किलेसा पुन पहीयन्ति.

‘‘चित्तस्स ¶ अविप्पटिसाराय संवत्तन्ती’’तिआदीसु संवरो अविप्पटिसारत्थाय. ‘‘अविप्पटिसारत्थानि खो, आनन्द, कुसलानि सीलानी’’ति (अ. नि. १०.१) वचनतो चेतसो अविप्पटिसारत्थाय भवन्ति. अविप्पटिसारो पामोज्जत्थाय. ‘‘योनिसो मनसि करोतो पामोज्जं जायती’’ति (दी. नि. ३.३५९) वचनतो पामोज्जाय संवत्तन्ति. पामोज्जं पीतिया. ‘‘पमुदितस्स पीति जायती’’ति (दी. नि. १.४६६; ३.३५९; अ. नि. ३.९६; ६.१०; ११.१२) वचनतो पीतिया संवत्तन्ति. पीति पस्सद्धत्थाय. ‘‘पीतिमनस्स कायो पस्सम्भती’’ति (दी. नि. १.४६६; ३.३५९; अ. नि. ३.९६; ६.१०; ११.१२) वचनतो पस्सद्धिया संवत्तन्ति. पस्सद्धि सुखत्थाय. ‘‘पस्सद्धकायो सुखं वेदेती’’ति (दी. नि. १.४६६; ३.३५९; अ. नि. ३.९६; ६.१०; ११.१२) वचनतो सोमनस्साय संवत्तन्तीति. ‘‘सुखत्थाय सुखं वेदेती’’ति चेत्थ सोमनस्सं ‘‘सुख’’न्ति वुत्तं. आसेवनायाति समाधिस्स आसेवनाय. निरामिसे हि सुखे सिद्धे ‘‘सुखिनो चित्तं समाधियती’’ति (दी. नि. १.४६६; ३.३५९; अ. नि. ३.९६; ६.१०; ११.१२) वचनतो समाधि सिद्धोयेव होति, तस्मा समाधिस्स आसेवनाय पगुणबलवभावाय संवत्तन्तीति अत्थो. भावनायाति तस्सेव समाधिस्स वड्ढिया. बहुलीकम्मायाति पुनप्पुनं किरियाय. अलङ्कारायाति तस्सेव समाधिस्स पसाधनभूतसद्धिन्द्रियादिनिप्फत्तिया अलङ्काराय संवत्तन्ति. परिक्खारायाति अविप्पटिसारादिकस्स समाधिसम्भारस्स सिद्धिया तस्सेव समाधिस्स परिक्खाराय संवत्तन्ति. सम्भारत्थो हि इध परिक्खार-सद्दो. ‘‘ये च खो इमे पब्बजितेन जीवितपरिक्खारा समुदानेतब्बा’’तिआदीसु (म. नि. १.१९१) विय सम्भारोति च पच्चयो वेदितब्बो. कामञ्चायं परिक्खार-सद्दो ‘‘रथो सीलपरिक्खारो’’तिआदीसु (सं. नि. ५.४) अलङ्कारत्थो. ‘‘सत्तहि नगरपरिक्खारेहि सुपरिक्खत्तं होती’’तिआदीसु (अ. नि. ७.६७) परिवारत्थो वुत्तो. इध पन अलङ्कारपरिवारानं विसुं गहितत्ता ‘‘सम्भारत्थो’’ति वुत्तं ¶ . परिवारायाति मूलकारणभावेनेव समाधिस्स परिवारभूतसतिवीरियादिधम्मविसेससाधनेन परिवारसम्पत्तिया संवत्तन्ति. पारिपूरियाति वसीभावसम्पापनेन, विपस्सनाय पदट्ठानभावापादनेन च परिपुण्णभावसाधनतो समाधिस्स पारिपूरिया संवत्तन्ति.

एवं सुपरिसुद्धसीलमूलकं सब्बाकारपरिपूरं समाधिं दस्सेत्वा इदानि ‘‘समाहितो पजानाति पस्सति, यथाभूतं जानं पस्सं निब्बिन्दति, निब्बिन्दं विरज्जति ¶ , विरागा विमुच्चती’’ति (अ. नि. १०.२; स. नि. ३.१४) वचनतो सीलमूलकानि समाधिपदट्ठानानि पयोजनानि दस्सेतुं ‘‘एकन्तनिब्बिदाया’’तिआदि वुत्तं. निब्बिदाय हि दस्सिताय तस्सा पदट्ठानभूतं यथाभूतञाणदस्सनं दस्सितमेव होति, तस्मिं असति निब्बिदाय असिज्झनतो. निब्बिदादयो अत्थतो विभत्ता एव. यथाभूतञाणदस्सनन्ति पनेत्थ सप्पच्चयनामरूपदस्सनं अधिप्पेतं. एवमेत्थ अमतमहानिब्बानपरियोसानं सीलस्स पयोजनं दस्सितन्ति वेदितब्बं.

इदानि पहानादीसु सीलत्थं दस्सेतुं ‘‘एत्थ चा’’तिआदि आरद्धं. तत्थ पजहनं अनुप्पादनिरोधो पहानन्ति तस्स भावसाधनतं सन्धाय ‘‘पहानन्ति कोचि धम्मो नाम नत्थी’’ति वुत्तं. यथा पनस्स धम्मभावो सम्भवति, तथा हेट्ठा संवण्णितमेव. एवं हिस्स सीलभावो सुट्ठु युज्जति. तं तं पहानन्ति ‘‘पाणातिपातस्स पहानं, अदिन्नादानस्स पहान’’न्ति एवं वुत्तं तं तं पहानं. तस्स तस्स कुसलधम्मस्साति पाणातिपातस्स पहानं मेत्तादिकुसलधम्मस्स, अदिन्नादानस्स पहानं चागादिकुसलधम्मस्साति एवं तस्स तस्स कुसलधम्मस्स. पतिट्ठानट्ठेनाति पतिट्ठानभावेन. पहानं हि तस्मिं सति होति, असति न होति, तस्स ‘‘पतिट्ठान’’न्ति वत्तब्बतं लभतीति कत्वा यस्मिं सन्ताने पाणातिपातादयो तस्स पकम्पहेतवोति तप्पहानं विकम्पाभावकरणेन च समाधानं वुत्तं. एवं सेसपहानेसुपि वत्तब्बं. समाधानं सण्ठपनं, संयमनं वा. इतरे चत्तारोति वेरमणिआदयो चत्तारो धम्मा न पहानं विय वोहारमत्तन्ति अधिप्पायो. ततो ततोति तम्हा तम्हा पाणातिपातादितो. तस्स तस्साति पाणातिपातादिकस्स संवरणवसेन, तस्स तस्स वा संवरस्स वसेन. तदुभयसम्पयुत्तचेतनावसेनाति वेरमणीहि, संवरधम्मेहि च सम्पयुत्ताय चेतनाय वसेन. तं तं अवीतिक्कमन्तस्साति तं तं पाणातिपातादिं अवीतिक्कमन्तस्स पुग्गलस्स, धम्मसमूहस्स वा वसेन चेतसो पवत्तिसब्भावं सन्धाय वुत्ता. तस्मा एकक्खणेपि लब्भन्तीति अधिप्पायो.

सीलसंकिलेसवोदानवण्णना

२१. संकिलिस्सति ¶ ¶ तेनाति संकिलेसो. को पन सोति आह ‘‘खण्डादिभावो सीलस्स संकिलेसो’’ति. वोदायति विसुज्झति एतेनाति वोदानं, अखण्डादिभावो. लाभयसादीति आदि-सद्देन ञातिअङ्गजीवितादीनं सङ्गहो. सत्तसु आपत्तिक्खन्धेसु आदिम्हि वा अन्ते वा वेमज्झेति च इदं तेसं उद्देसादिपाळिवसेन वुत्तं. न हि अञ्ञो कोचि आपत्तिक्खन्धानं अनुक्कमो अत्थि. खण्डन्ति खण्डवन्तं, खण्डितं वा. छिद्दन्ति एत्थापि एसेव नयो. परियन्ते छिन्नसाटको वियाति वत्थन्ते, दसन्ते वा छिन्नवत्थं विय.

एवन्ति इदानि वुच्चमानाकारेन. मेथुनसंयोगवसेनाति रागपरियुट्ठानेन सदिसभावापत्तिया मिथुनानं इदन्ति मेथुनं, निबन्धनं. मेथुनवसेन समायोगो मेथुनसंयोगो. इध पन मेथुनसंयोगो वियाति मेथुनसंयोगो, तस्स वसेन. इधाति इमस्मिं लोके. एकच्चोति एको. समणो वा ब्राह्मणो वाति पब्बज्जामत्तेन समणो वा जातिमत्तेन ब्राह्मणो वा. द्वयंद्वयसमापत्तिन्ति द्वीहि द्वीहि समापज्जितब्बं, मेथुनन्ति अत्थो. न हेव खो समापज्जतीति सम्बन्धो. उच्छादनं उब्बत्तनं. सम्बाहनं परिमद्दनं. सादियतीति अधिवासेति. तदस्सादेतीति तं उच्छादनादिं अभिरमति. निकामेतीति इच्छति. वित्तिन्ति तुट्ठिं. इदम्पि खोति एत्थ इदन्ति यथावुत्तं सादियनादिं खण्डभावादिवसेन एकं कत्वा वुत्तं. पि-सद्दो वक्खमानं उपादाय समुच्चयत्थो. खो-सद्दो अवधारणत्थो. इदं वुत्तं होति – यदेतं ब्रह्मचारीपटिञ्ञस्स असतिपि द्वयंद्वयसमापत्तियं मातुगामस्स उच्छादनन्हापनसम्बाहनसादियनादि, इदम्पि एकंसेन तस्स ब्रह्मचरियस्स खण्डादिभावापादनतो खण्डम्पि छिद्दम्पि सबलम्पि कम्मासम्पीति. एवं पन खण्डादिभावापत्तिया सो अपरिसुद्धं ब्रह्मचरियं चरति, न परिसुद्धं, संयुत्तो मेथुनसंयोगेन, न विसंयुत्तो. ततो चस्स न जातिआदीहि परिमुत्तीति दस्सेन्तो ‘‘अयं वुच्चती’’तिआदिमाह.

सञ्जग्घतीति किलेसवसेन महाहसितं हसति. संकीळतीति कायसंसग्गवसेन कीळति. संकेलायतीति सब्बसो मातुगामं केलायन्तो ¶ विहरति. चक्खुनाति अत्तनो चक्खुना. चक्खुन्ति मातुगामस्स चक्खुं. उपनिज्झायतीति उपेच्च निज्झायति ओलोकेति. तिरोकुट्टाति कुट्टस्स ¶ परतो. तथा तिरोपाकारा. मत्तिकामया भित्ति कुट्टं, इट्ठकामया पाकारोति वदन्ति. या काचि वा भित्ति पोरिसतो दियड्ढरतनुच्चप्पमाणा कुट्टं, कुट्टतो अधिको पाकारो.

अस्साति ब्रह्मचारीपटिञ्ञस्स. पुब्बेति वतसमादानतो पुब्बे. कामगुणेहीति कामकोट्ठासेहि. समप्पितन्ति सुट्ठु अप्पितं सहितं. समङ्गीभूतन्ति समन्नागतं. परिचारयमानन्ति कीळन्तं, उपट्ठहियमानं वा. पणिधायाति पत्थेत्वा. सीलेनातिआदीसु यमनियमादिसमादानवसेन सीलं. अवीतिक्कमवसेन वतं. उभयम्पि सीलं. दुक्करचरियवसेन पवत्तितं वतं. तंतंअकिच्चसम्मततो वा निवत्तिलक्खणं सीलं. तंतंसमादानवतो वेसभोजनकिच्चकरणादिविसेसपटिपत्ति वतं. सब्बथापि दुक्करचरिया तपो. मेथुनविरति ब्रह्मचरियं.

सब्बसोति अनवसेसतो, सब्बेसं वा. अभेदेनाति अवीतिक्कमेन. अपराय च पापधम्मानं अनुप्पत्तिया, गुणानं उप्पत्तिया सङ्गहितोति योजना. तत्थ कुज्झनलक्खणो कोधो. उपनन्धनलक्खणो उपनाहो. परेसं गुणमक्खनलक्खणो मक्खो. युगग्गाहलक्खणो पळासो. परसम्पत्तिउसूयनलक्खणा इस्सा. अत्तसम्पत्तिनिगूहनलक्खणं मच्छरियं. सन्तदोसपटिच्छादनलक्खणा माया. असन्तगुणसम्भावनलक्खणं साठेय्यं. चित्तस्स थद्धभावलक्खणो थम्भो. करणुत्तरियलक्खणो सारम्भो. उन्नतिलक्खणो मानो. अब्भुन्नतिलक्खणो अतिमानो. मज्जनलक्खणो मदो. चित्तवोसग्गलक्खणो पमादो. आदि-सद्देन लोभमोहविपरीतमनसिकारादीनं सङ्गहो.

इदानि ‘‘अखण्डादिभावो पना’’तिआदिना वुत्तमेवत्थं पाकटतरं कातुं ‘‘यानि ही’’तिआदिमाह. तत्थ अनुपहतानीति अनुपद्दुतानि. विवट्टूपनिस्सयताय तण्हादासब्यतो मोचनेन भुजिस्सभावकरणं. अविञ्ञूनं अप्पमाणत्ता वुत्तं ‘‘विञ्ञूहि पसत्थत्ता’’ति. समाधिसंवत्तनं वा एतेसं पयोजनं, समाधिसंवत्तने वा नियुत्तानीति समाधिसंवत्तनिकानि. निद्दानेन सस्ससम्पत्ति विय पटिपक्खविगमेन सीलसम्पदा, सा च तत्थ ¶ सति दोसदस्सनेति आह ‘‘सीलविपत्तिया च आदीनवदस्सनेना’’ति. निसम्मकारीनं पयोजनगरुकताय दिट्ठगुणेयेव सम्मापटिपत्तीति वुत्तं ‘‘सीलसम्पत्तिया च आनिसंसदस्सनेना’’ति.

तत्थ ¶ सीलविपत्तिया आदीनवो सीलसम्पदाय हेट्ठा दस्सितआनिसंसपटिपक्खतो वेदितब्बो, तं सुविञ्ञेय्यन्ति अवित्थारेत्वा पकारन्तरेहि दस्सेतुं ‘‘अपिचा’’ति आरद्धं. तत्थ यथा सीलसम्पदा सत्तानं मनुञ्ञभावकारणं, एवं सीलविपत्ति अमनुञ्ञभावकारणन्ति आह ‘‘दुस्सीलो…पे… देवमनुस्सान’’न्ति. अननुसासनीयो जिगुच्छितब्बतो. दुक्खितोति सञ्जातदुक्खो. विप्पटिसारीति ‘‘अकतं वत मे कल्याण’’न्तिआदिना पच्चानुतापी. दुब्बण्णोति गुणवण्णेन, कायवण्णेन च विरहितो. अस्साति दुस्सीलस्स. सम्फस्सितानं दुक्खो दुक्खावहो सम्फस्सो एतस्साति दुक्खसम्फस्सो. गुणानुभावाभावतो अप्पं अग्घतीति अप्पग्घो. अनेकवस्सगणिकगूथकूपो वियाति अनेकवस्ससमूहे सञ्चितुक्कारावाटो विय. दुब्बिसोधनो सोधेतुं असक्कुणेय्यो. छवालातं छवडाहे सन्तज्जनुम्मुक्कं. उभतो परिबाहिरोति सामञ्ञतो, गिहिभोगतो च परिहीनो. सब्बेसं वेरी, सब्बे वा वेरी एतस्साति सब्बवेरी, सो एव सब्बवेरिको, पुरिसो. संवासं नारहतीति असंवासारहो. सद्धम्मेति पटिपत्तिसद्धम्मे, पटिवेधसद्धम्मे च.

‘‘अग्गिक्खन्धपरियाये वुत्तदुक्खभागिताया’’ति सङ्खेपेन वुत्तमत्थं वित्थारतो दस्सेतुं ‘‘दुस्सीलानञ्ही’’तिआदि आरद्धं. पञ्चकामगुणपरिभोगसुखे, परेहि कयिरमानवन्दनमाननादिसुखे च अस्सादेन गधितचित्ता पञ्चकाम…पे… गधितचित्ता, तेसं. ते यथावुत्तसुखस्सादा पच्चया एतस्साति तप्पच्चयं. दुक्खन्ति सम्बन्धो.

पस्सथ नोति पस्सथ नु, अपि पस्सथ. महन्तन्ति विपुलं. अग्गिक्खन्धन्ति अग्गिसमूहं. आदित्तन्ति पदित्तं. सम्पज्जलितन्ति समन्ततो पज्जलितं अच्छिविप्फुलिङ्गानि मुच्चन्तं. सजोतिभूतन्ति सपभं समन्ततो उट्ठिताहि जालाहि एकप्पभासमुदयभूतं. तं किं मञ्ञथाति तं इदानि मया वुच्चमानमत्थं किं मञ्ञथाति अनुमतिगहणत्थं पुच्छति. आलिङ्गेत्वाति उपगूहित्वा. उपनिसीदेय्याति तेनेव आलिङ्गनेन उपेच्च निसीदेय्य. यदत्थमेत्थ सत्था अग्गिक्खन्धालिङ्गनं, कञ्ञालिङ्गनञ्च आनेसि, तमत्थं विभावेतुं ‘‘आरोचयामी’’तिआदिमाह ¶ . तत्थ आरोचयामीति आमन्तेमि. वोति तुम्हे. पटिवेदयामीति पबोधेमि. दुस्सीलस्साति निस्सीलस्स सीलविरहितस्स. पापधम्मस्साति दुस्सीलत्ता एव हीनज्झासयताय लामकसभावस्स. असुचिसङ्कस्सरसमाचारस्साति अपरिसुद्धकायसमाचारादिताय असुचिस्स हुत्वा सङ्काय सरितब्बसमाचारस्स. दुस्सीलो हि किञ्चिदेव असारुप्पं दिस्वा ‘‘इदं ¶ असुकेन कतं भविस्सती’’ति परेसं आसङ्कनीयोव होति, केनचिदेव वा करणीयेन मन्तयन्ते भिक्खू दिस्वा ‘‘कच्चि नु खो इमे मया कतं कम्मं जानित्वा मन्तेन्ती’’ति अत्तनोयेव सङ्काय सरितब्बसमाचारोति. पटिच्छन्नकम्मन्तस्साति लज्जितब्बताय पटिच्छादेतब्बकम्मन्तस्स. अस्समणस्साति न समणस्स. सलाकग्गहणादीसु ‘‘अहम्पि समणो’’ति मिच्छापटिञ्ञाय समणपटिञ्ञस्स. असेट्ठचारिताय अब्रह्मचारिस्स. उपोसथादीसु ‘‘अहम्पि ब्रह्मचारी’’ति मिच्छापटिञ्ञाय ब्रह्मचारिपटिञ्ञस्स. पूतिना कम्मेन सीलविपत्तिया अन्तो अनुपविट्ठत्ता अन्तोपूतिकस्स. छहि द्वारेहि रागादिकिलेसानुवस्सनेन तिन्तत्ता अवस्सुतस्स. सञ्जातरागादिकचवरत्ता, सीलवन्तेहि छड्डेतब्बत्ता च कसम्बुजातस्स. अग्गिक्खन्धूपमाय हीनूपमभूतायाति अत्थो. तेनाह भगवा – ‘‘एतदेव तस्स वर’’न्ति. भगवा दुक्खं दस्सेत्वा दुक्खं दस्सेतीति सम्बन्धो.

वाळरज्जुयाति वाळेहि कतरज्जुया. सा हि खरतरा होति. घंसेय्याति पधंसनवसेन घंसेय्य. तेलधोतायाति तेलेन निसिताय. पच्चोरस्मिन्ति पतिउरस्मिं उराभिमुखं, उरमज्झेति अधिप्पायो. अयोसङ्कुनाति सण्डासेन. फेणुद्देहकन्ति फेणं उद्देहेत्वा, अनेकवारं फेणं उट्ठपेत्वाति अत्थो.

अग्गिक्खन्धालिङ्गनदुक्खतोपि अधिमत्तदुक्खताय कटुकभूतं दुक्खं फलं एतस्साति अग्गिक्खन्धालिङ्गनदुक्खाधिकदुक्खकटुकफलं. कामसुखं अविजहतो भिन्नसीलस्स दुस्सीलस्स कुतो तस्स सुखं नत्थेवाति अधिप्पायो. सादनेति सादियने. यन्ति अञ्जलिकम्मसादनं. असीलिनोति दुस्सीलस्स. उपहतन्ति सीलब्यसनेन उपद्दुतं. खतन्ति कुसलमूलानं खणनेन खतं, खणितं वा गुणं सरीरेति अधिप्पायो. सब्बभयेहीति अत्तानुवादादिसब्बभयेहि. उपचारज्झानं उपादाय सब्बेहि अधिगमसुखेहि.

वुत्तप्पकारविपरीततोति ¶ सीलविपत्तियं वुत्ताकारपटिपक्खतो ‘‘मनापो होति देवमनुस्सान’’न्तिआदिना. कायगन्धोपि पामोज्जं, सीलवन्तस्स भिक्खुनो. करोति अपि देवानन्ति एत्थ ‘‘गन्धो इसीनं चिरदिक्खितान’’न्तिआदिका (जा. २.१७.५५) गाथा वित्थारेतब्बा. अविघातीति अप्पटिघाती. वधबन्धादिपरिकिलेसा दिट्ठधम्मिका आसवा उपद्दवा. सम्परायिकदुक्खानं मूलं नाम दुस्सील्यं. अन्तमतिक्कन्तं अच्चन्तं, अच्चन्तं सन्ता अच्चन्तसन्ता ¶ किलेसपरिळाहसङ्खातदरथानं अभावेन सब्बदा सन्ता. उब्बिज्जित्वाति ञाणुत्रासेन उत्तसित्वा. वोदापेतब्बन्ति विसोधेतब्बं.

सीलनिद्देसवण्णना निट्ठिता.

इति पठमपरिच्छेदवण्णना.

२. धुतङ्गनिद्देसवण्णना

२२. अप्पा ¶ ¶ इच्छा एतस्साति अप्पिच्छो, पच्चयगेधरहितो. तस्स भावो अप्पिच्छता, अलोभज्झासयताति अत्थो. समं तुट्ठि, सन्तेन, सकेन वा तुट्ठि सन्तुट्ठि, सन्तुट्ठि एव सन्तुट्ठिता, अञ्ञं अपत्थेत्वा यथालद्धेहि इतरीतरेहि पच्चयेहि परितुस्सना. सन्तुट्ठितादीहीति त-कारो वा पदसन्धिकरो. ‘‘सन्तुट्ठिआदीही’’ति वा पाठो. ते गुणेति ते सीलवोदानस्स हेतुभूते अप्पिच्छतादिगुणे. सम्पादेतुन्ति सम्पन्ने कातुं. ते हि सीलविसुद्धिया पटिलद्धमत्ता हुत्वा धुतधम्मेहि सम्पन्नतरा होन्ति. धुतङ्गसमादानन्ति किलेसानं धुननकअङ्गानं विद्धंसनकारणानं सम्मदेव आदानं. एवन्ति एवं सन्ते, धुतङ्गसमादाने कतेति अत्थो. अस्स योगिनो. सल्लेखो किलेसानं सम्मदेव लिखना छेदना तनुकरणं. पविवेको चित्तविवेकस्स उपायभूता विवेकट्ठकायता. अपचयो यथा पटिपज्जनतो किलेसा नं अपचिनन्ति न आचिनन्ति, तथा पटिपज्जना. वीरियारम्भो अनुप्पन्नानं पापधम्मानं अनुप्पादनादिवसेन आरद्धवीरियता. सुभरता यथावुत्तअप्पिच्छभावादिसिद्धा उपट्ठकानं सुखभरणीयता सुपोसता. आदि-सद्देन अप्पकिच्चतासल्लहुकवुत्तिआदिके सङ्गण्हाति. सीलञ्चेव यथासमादिन्नं पटिपक्खधम्मानं दूरीभावेन सुपरिसुद्धं भविस्सति. वतानि च धुतधम्मा च सम्पज्जिस्सन्ति सम्पन्ना भविस्सन्ति, निप्फज्जिस्सन्ति वा. या थिरभूता इतरीतरचीवरपिण्डपातसेनासनसन्तुट्ठि पोराणानं बुद्धादीनं अरियानं पवेणिभावेन ठिता, तत्थ पतिट्ठितभावं सन्धायाह ‘‘पोराणे अरियवंसत्तये पतिट्ठाया’’ति. भावना आरमितब्बट्ठेन आरामो एतस्साति भावनारामो, तब्भावो भावनारामता, समथविपस्सनाभावनासु युत्तप्पयुत्तता. यस्मा अधिगमारहो भविस्सति, तस्माति सम्बन्धो.

लाभसक्कारादि तण्हाय आमसितब्बतो, लोकपरियापन्नताय च लोकामिसं. निब्बानाधिगमस्स अनुलोमतो अनुलोमपटिपदा विपस्सनाभावना. अत्थतोति वचनत्थतो. पभेदतोति ¶ विभागतो. भेदतोति विनासतो. धुतादीनन्ति धुतधुतवादधुतधम्मधुतङ्गानं. समासब्यासतोति सङ्खेपवित्थारतो.

२३. रथिकाति ¶ रच्छा. सङ्कारकूटादीनन्ति निद्धारणे सामिवचनं. अब्भुग्गतट्ठेनाति उस्सितट्ठेन. ‘‘नदिया कूल’’न्तिआदीसु विय समुस्सयत्थो कूल-सद्दोति आह ‘‘पंसुकूलमिव पंसुकूल’’न्ति. कु-सद्दो कुच्छायं उल-सद्दो गतिअत्थोति आह ‘‘कुच्छितभावं गच्छतीति वुत्तं होती’’ति, पंसु विय कुच्छितं उलति पवत्ततीति वा पंसुकूलं. पंसुकूलस्स धारणं पंसुकूलं उत्तरपदलोपेन, तं सीलमस्साति पंसुकूलिको, यथा ‘‘आपूपिको’’ति. अङ्गति अत्तनो फलं पटिच्च हेतुभावं गच्छतीति अङ्गं, कारणं. येन पुग्गलो ‘‘पंसुकूलिको’’ति वुच्चति, सो समादानचेतनासङ्खातो धम्मो पंसुकूलिकस्स अङ्गन्ति पंसुकूलिकङ्गं. तेनाह ‘‘पंसुकूलिकस्सा’’तिआदि. तस्साति समादानस्स. समादियति एतेनाति समादानं, चेतना.

एतेनेव नयेनाति यथा पंसुकूलधारणं पंसुकूलं, तंसीलो पंसुकूलिको, तस्स अङ्गं समादानचेतना ‘‘पंसुकूलिकङ्ग’’न्ति वुत्तं, एवं एतेनेव वचनत्थनयेन तिचीवरधारणं तिचीवरं, तंसीलो तेचीवरिको, तस्स अङ्गं समादानचेतना ‘‘तेचीवरिकङ्ग’’न्ति वेदितब्बं. सङ्घाटिआदीसु एव तीसु चीवरेसु तिचीवरसमञ्ञा, न कण्डुपटिच्छादिवस्सिकसाटिकादीसूति तानि सरूपतो दस्सेन्तो ‘‘सङ्घाटिउत्तरासङ्गअन्तरवासकसङ्खात’’न्ति आह.

तं पिण्डपातन्ति परेहि दिय्यमानानं पिण्डानं पत्ते पतनसङ्खातं पिण्डपातं, तं उञ्छतीति पिण्डपातिको, यथा बादरिको सामाकिको. पिण्डपाति एव पिण्डपातिको, यथा भद्दो एव भद्दको. अवखण्डनं विच्छिन्दनं निरन्तरमप्पवत्ति. तप्पटिक्खेपतो अनवखण्डनं अविच्छिन्दनं निरन्तरप्पवत्ति. सह अपदानेनाति सह अनवखण्डनेन. सपदानन्ति पदस्स किरियाविसेसनभावं, यत्थ च तं अनवखण्डनं, तञ्च दस्सेतुं ‘‘अवखण्डनरहितं अनुघरन्ति वुत्तं होती’’ति वुत्तं. एकासनेति इरियापथन्तरेन अनन्तरिताय एकाययेव निसज्जाय. पत्ते पिण्डोति एत्थ वत्थुभेदो इधाधिप्पेतो, न सामञ्ञं. एव-कारो च लुत्तनिद्दिट्ठोति दस्सेन्तो ‘‘केवलं एकस्मिंयेव पत्ते’’ति आह. उत्तरपदलोपं कत्वा अयं निद्देसोति दस्सेन्तो ‘‘पत्तपिण्डगहणे पत्तपिण्डसञ्ञं कत्वा’’ति आह. एस नयो इतो परेसुपि.

पच्छाभत्तं ¶ ¶ नाम पवारणतो पच्छा लद्धभत्तं एव. खलु-सद्दस्स पटिसेधत्थवाचकत्ता तेन समानत्थं न-कारं गहेत्वा आह ‘‘न पच्छाभत्तिको’’ति. सिक्खापदस्स विसयो सिक्खापदेनेव पटिक्खित्तो. यो तस्स अविसयो, सो एव समादानस्स विसयोति आह ‘‘समादानवसेन पटिक्खित्तातिरित्तभोजनस्सा’’ति. अब्भोकासे निवासो अब्भोकासो. सुसाने निवासो सुसानं, तं सीलं अस्सातिआदिना सब्बं वत्तब्बन्ति आह ‘‘एसेव नयो’’ति. यथासन्थतं विय यथासन्थतं, आदितो यथाउद्दिट्ठं. तं हेस ‘‘इदं बहुमङ्कुणं दुग्गन्धपवात’’न्तिआदिवसेन अप्पटिक्खिपित्वाव सम्पटिच्छति. तेनेवाह ‘‘इदं तुय्ह’’न्तिआदि. सयनन्ति निपज्जनमाह. तेन तेन समादानेनाति तेन तेन पंसुकूलिकङ्गादिकस्स समादानेन धुतकिलेसत्ताति विद्धंसितकिलेसत्ता, तदङ्गवसेन पहीनतण्हुपादानादिपापधम्मत्ताति अत्थो. येहि तं किलेसधुननं, तानियेव इध धुतस्स भिक्खुनो अङ्गानीति अधिप्पेतानि, न अञ्ञानि यानि कानिचि, अञ्ञेन वा धुतस्साति अयमत्थो अत्थतो आपन्नो. ‘‘ञाणं अङ्गं एतेस’’न्ति इमिना ञाणपुब्बकतं तेसं समादानस्स विभावेति. पटिपत्तियाति सीलादिसम्मापटिपत्तिया. समादियति एतेनाति समादानं, समादानवसेन पवत्ता चेतना, तं लक्खणं एतेसन्ति समादानचेतनालक्खणानि. वुत्तम्पि चेतं अट्ठकथायं –

‘‘समादानकिरियाय, साधकतमभावतो;

सम्पयुत्तधम्मा येनाति, करणभावेन दस्सिता’’ति.

समादानचेतनाय गहणं तंमूलकत्ता परिहरणचेतनापि धुतङ्गमेव. अत्तना, परम्मुखेन च कुसलभण्डस्स भुसं विलुप्पनट्ठेन लोलुप्पं तण्हाचारो, तस्स विद्धंसनकिच्चत्ता लोलुप्पविद्धंसनरसानि. ततो एव निल्लोलुप्पभावेन पच्चुपतिट्ठन्ति, तं वा पच्चुपट्ठापेन्तीति निल्लोलुप्पभावपच्चुपट्ठानानि. अरियधम्मपदट्ठानानीति परिसुद्धसीलादिसद्धम्मपदट्ठानानि.

भगवतोव सन्तिके समादातब्बानीति इदं अन्तरा अविच्छेदनत्थं वुत्तं, रञ्ञो सन्तिके पटिञ्ञातारहस्स अत्थस्स तदुपजीविनो एकंसतो अविसंवादनं विय. सेसानं सन्तिके समादानेपि एसेव नयो. एकसङ्गीतिकस्साति ¶ पञ्चसु दीघनिकायादीसु निकायेसु एकनिकायिकस्स. अट्ठकथाचरियस्साति यस्स अट्ठकथातन्तियेव विसेसतो पगुणा, तस्स. एत्थाति अत्तनापि समादानस्स रुहने. जेट्ठकभातु धुतङ्गप्पिच्छताय वत्थूति सो किर थेरो नेसज्जिको ¶ , तस्स तं न कोचि जानाति. अथेकदिवसं रत्तिया सयनपिट्ठे निसिन्नं विज्जुलतोभासेन दिस्वा इतरो पुच्छि ‘‘किं, भन्ते, तुम्हे नेसज्जिका’’ति. थेरो धुतङ्गप्पिच्छताय तावदेव निपज्जित्वा पच्छा समादियीति एवमागतं वत्थु.

१. पंसुकूलिकङ्गकथावण्णना

२४. गहपतिदानचीवरन्ति एत्थ दायकभावेन समणापि उक्कट्ठस्स गहपतिपक्खंयेव पविट्ठाति दट्ठब्बं. ‘‘पब्बजितो गण्हिस्सती’’ति ठपितकं सिया गहपतिचीवरं, न पन गहपतिदानचीवरन्ति तादिसं निवत्तेतुं दानग्गहणं. अञ्ञतरेनाति एत्थ समादानवचनेन ताव समादिन्नं होतु, पटिक्खेपवचनेन पन कथन्ति? अत्थतो आपन्नत्ता. यथा ‘‘देवदत्तो दिवा न भुञ्जती’’ति वुत्ते ‘‘रत्तियं भुञ्जती’’ति अत्थतो आपन्नमेव होति, तस्स आहारेन विना सरीरट्ठिति नत्थीति, एवमिधापि भिक्खुनो गहपतिदानचीवरे पटिक्खित्ते तदञ्ञचीवरप्पटिग्गहो अत्थतो आपन्नो एव होति, चीवरेन विना सासने ठिति नत्थीति.

एवं समादिन्नधुतङ्गेनातिआदिविधानं पंसुकूलिकङ्गे पटिपज्जनविधि. सुसाने लद्धं सोसानिकं. तं पन यस्मा तत्थ केनचि छड्डितत्ता पतितं होति, तस्मा वुत्तं ‘‘सुसाने पतितक’’न्ति. एवं पापणिकम्पि दट्ठब्बं. तालवेळिमग्गो नाम महागामे एका वीथि. अनुराधपुरेति च वदन्ति. डड्ढो पदेसो एतस्साति डड्ढप्पदेसं, वत्थं. मग्गे पतितकं बहुदिवसातिक्कन्तं गहेतब्बन्ति वदन्ति. ‘‘द्वत्तिदिवसातिक्कन्त’’न्ति अपरे. थोकं रक्खित्वाति कतिपयं कालं आगमेत्वा. वाताहतम्पि सामिकानं सतिसम्मोसेन पतितसदिसन्ति ‘‘सामिके अपस्सन्तेन गहेतुं वट्टती’’ति वुत्तं. तस्मा थोकं आगमेत्वा गहेतब्बं.

‘‘सङ्घस्स देमा’’ति दिन्नं, चोळकभिक्खावसेन लद्धञ्च लद्धकालतो पट्ठाय ‘‘समणचीवरं सिया नु खो, नो’’ति आसङ्कं निवत्तेतुं ‘‘न तं पंसुकूल’’न्ति वुत्तं. न हि तं तेवीसतिया उप्पत्तिट्ठानेसु कत्थचि परियापन्नं. इदानि इमिनाव पसङ्गेन यं भिक्खुदत्तिये लक्खणपत्तं ¶ पंसुकूलं, तस्स च उक्कट्ठानुक्कट्ठविभागं दस्सेतुं ‘‘भिक्खुदत्तियेपी’’तिआदि वुत्तं. तत्थ गाहेत्वा वा दीयतीति सङ्घस्स वा गणस्स वा देन्तेहि यं चीवरं वस्सग्गेन पापेत्वा भिक्खूनं दीयति. सेनासनचीवरन्ति सेनासनं कारेत्वा ‘‘एतस्मिं सेनासने वसन्ता परिभुञ्जन्तू’’ति ¶ दिन्नचीवरं. न तं पंसुकूलन्ति अपंसुकूलभावो पुब्बे वुत्तकारणतो, गाहेत्वा दिन्नत्ता च. तेनाह ‘‘नो गाहापेत्वा दिन्नमेव पंसुकूल’’न्ति. तत्रपीति यं गाहेत्वा न दिन्नं भिक्खुदत्तियं, तत्रपि येन भिक्खुना चीवरं दीयति, तस्स लाभे, दाने च विसुं विसुं उभयत्थ आदरगारवानं सब्भावतो, तदभावतो च भिक्खुदत्तियस्स एकतोसुद्धि उभतोसुद्धि अनुक्कट्ठता होन्तीति इममत्थं दस्सेतुं ‘‘यं दायकेही’’तिआदि वुत्तं, पादमूले ठपेत्वा दिन्नकं समणेनाति अधिप्पायो. यस्स कस्सचीति उक्कट्ठादीसु यस्स कस्सचि. रुचियाति छन्देन. खन्तियाति निज्झानक्खन्तिया.

निस्सयानुरूपपटिपत्तिसब्भावोति उपसम्पन्नसमनन्तरं आचरियेन वुत्तेसु चतूसु निस्सयेसु अत्तना यथापटिञ्ञातदुतियनिस्सयानुरूपाय पटिपत्तिया विज्जमानता. आरक्खदुक्खाभावोति चीवरारक्खनदुक्खस्स अभावो पंसुकूलचीवरस्स अलोभनीयत्ता. परिभोगतण्हाय अभावो सविसेसलूखसभावत्ता. पासादिकताति परेसं पसादावहता. अप्पिच्छतादीनं फलनिप्फत्ति धुतङ्गपरिहरणस्स अप्पिच्छतादीहियेव निप्फादेतब्बतो. धुतधम्मे समादाय वत्तनं यावदेव उपरि सम्मापटिपत्तिसम्पादनायाति वुत्तं ‘‘सम्मापटिपत्तिया अनुब्रूहन’’न्ति. मारसेनविघातायाति मारस्स, मारसेनाय च विहननाय विद्धंसनाय. कायवाचाचित्तेहि यतो संयतोति यति, भिक्खु. धारितं यं लोकगरुना पंसुकूलं, तं को न धारये, यस्मा वा लोकगरुना पंसुकूलं धारितं, तस्मा को तं न धारयेति योजना यंतंसद्दानं एकन्तसम्बन्धिभावतो. पटिञ्ञं समनुस्सरन्ति उपसम्पदमाळे ‘‘आम भन्ते’’ति आचरियपमुखस्स सङ्घस्स सम्मुखा दिन्नं पटिञ्ञं समनुस्सरन्तो.

इति पंसुकूलिकङ्गकथावण्णना.

२. तेचीवरिकङ्गकथावण्णना

२५. चतुत्थकचीवरन्ति ¶ निवासनपारुपनयोग्यं चतुत्थकचीवरन्ति अधिप्पायो, अंसकासावस्स अप्पटिक्खिपितब्बतो. अञ्ञतरवचनेनाति एत्थ यं वत्तब्बं, तं हेट्ठा वुत्तनयमेव. याव न सक्कोति, याव न लभति, याव न सम्पज्जतीति पच्चेकं याव-सद्दो सम्बन्धितब्बो. न सम्पज्जतीति न सिज्झति. निक्खित्तपच्चया दोसो नत्थीति निचयसन्निधिधुतङ्गसंकिलेसदोसो ¶ नत्थि. आसन्नेति चीवरस्स आसन्ने ठाने. रजनक्खणे परिभुञ्जनकासावं रजनकासावं. तत्रट्ठकपच्चत्थरणं नाम अत्तनो, परस्स वा सन्तकं सेनासने पच्चत्थरणवसेन अधिट्ठितं. ‘‘अंसकासावं परिक्खारचोळं होति, इति पच्चत्थरणं, अंसकासावन्ति इमानि द्वेपि अतिरेकचीवरट्ठाने ठितानिपि धुतङ्गभेदं न करोन्ती’’ति अट्ठकथायं वुत्तन्ति वदन्ति. परिहरितुं पन न वट्टतीति रजनकाले एव अनुञ्ञातत्ता निच्चपरिभोगवसेन न वट्टति तेचीवरिकस्स. अंसकासावन्ति खन्धे ठपेतब्बकासावं. कायपरिहारिकेनाति वातातपादिपरिस्सयतो कायस्स परिहरणमत्तेन. समादायेवाति गहेत्वा एव. अप्पसमारम्भताति अप्पकिच्चता. कप्पिये मत्तकारितायाति निसीदनादिवसेन, परिक्खारचोळवसेन च बहूसु चीवरेसु अनुञ्ञातेसुपि तिचीवरमत्ते ठितत्ता. सह पत्तचरणायाति सपत्तचरणो. पक्खी सपक्खको.

इति तेचीवरिकङ्गकथावण्णना.

३. पिण्डपातिकङ्गकथावण्णना

२६. अतिरेकलाभन्ति ‘‘पिण्डियालोपभोजनं निस्साया’’ति (महाव. ७३, १२८) एवं वुत्तभिक्खाहारलाभतो अतिरेकलाभं, सङ्घभत्तादिन्ति अत्थो. सकलस्स सङ्घस्स दातब्बभत्तं सङ्घभत्तं. कतिपये भिक्खू उद्दिसित्वा दातब्बभत्तं उद्देसभत्तं. एकस्मिं पक्खे एकदिवसं दातब्बभत्तं पक्खिकं. उपोसथे उपोसथे दातब्बभत्तं उपोसथिकं. पटिपददिवसे दातब्बभत्तं पाटिपदिकं. विहारं उद्दिस्स दातब्बभत्तं विहारभत्तं. धुरगेहे एव ठपेत्वा दातब्बभत्तं धुरभत्तं. गामवासीआदीहि वारेन दातब्बभत्तं ¶ वारकभत्तं. ‘‘सङ्घभत्तं गण्हथातिआदिना’’ति आदि-सद्देन उद्देसभत्तादिं सङ्गण्हाति. सादितुं वट्टन्तीति भिक्खापरियायेन वुत्तत्ता. भेसज्जादिपटिसंयुत्ता निरामिससलाका. यावकालिकवज्जाति च वदन्ति. विहारे पक्कभत्तम्पीति उपासका इधेव भत्तं पचित्वा ‘‘सब्बेसं अय्यानं दस्सामा’’ति विहारेयेव भत्तं सम्पादेन्ति, तं पिण्डपातिकानम्पि वट्टति. आहरित्वाति पत्तं गहेत्वा गेहतो आनेत्वा. तं दिवसं निसीदित्वाति ‘‘मा, भन्ते, पिण्डाय चरित्थ, विहारेयेव भिक्खा आनीयती’’ति वदन्तानं सम्पटिच्छनेन तं दिवसं निसीदित्वा. सेरिविहारसुखन्ति अपरायत्तविहारितासुखं ¶ . अरियवंसोति अरियवंससुत्तपटिसंयुत्ता (दी. नि. ३.३०९; अ. नि. ४.२८) धम्मकथा. धम्मरसन्ति धम्मूपसञ्हितं पामोज्जादिरसं.

जङ्घबलं निस्साय पिण्डपरियेसनतो कोसज्जनिम्मद्दनता. ‘‘यथापि भमरो पुप्फ’’न्तिआदिना (ध. प. ४९; नेत्ति. १२३) वुत्तविधिना आहारपरियेसनतो परिसुद्धाजीवता. निच्चं अन्तरघरं पविसन्तस्सेव सुप्पटिच्छन्नगमनादयो सेखियधम्मा सम्पज्जन्तीति सेखियपटिपत्तिपूरणं. पटिग्गहणे मत्तञ्ञुताय, संसट्ठविहाराभावतो च अपरपोसिता. कुले कुले अप्पकअप्पकपिण्डगहणेन परानुग्गहकिरिया. अन्तिमाय जीविकाय अवट्ठानेन मानप्पहानं. वुत्तञ्हेतं ‘‘अन्तमिदं, भिक्खवे, जीविकानं, यदिदं पिण्डोल्य’’न्तिआदि (इतिवु. ९१; सं. नि. ३.८०). मिस्सकभत्तेन यापनतो रसतण्हानिवारणं. निमन्तनासम्पटिच्छनतो गणभोजनादिसिक्खापदेहि अनापत्तिता.

अप्पटिहतवुत्तिताय चतूसुपि दिसासु वत्तनट्ठेन चातुद्दिसो. आजीवस्स विसुज्झतीति आजीवो अस्स विसुज्झति. अत्तभरस्साति अप्पानवज्जसुलभरूपेहि पच्चयेहि अत्तनो भरणतो अत्तभरस्स. ततो एव एकविहारिताय सद्धिविहारिकादीनम्पि अञ्ञेसं अपोसनतो अनञ्ञपोसिनो. पदद्वयेनापि कायपरिहारिकेन चीवरेन कुच्छिपरिहारिकेन पिण्डपातेन विचरणतो सल्लहुकवुत्तितं, सुभरतं, परमअप्पिच्छतं, सन्तुट्ठिञ्च दस्सेति. देवापि पिहयन्ति तादिनोति तादिसस्स भुसं अतिविय सन्तकायवचीमनोकम्मताय उपसन्तस्स परमेन सतिनेपक्केन समन्नागमतो सब्बकालं सतिमतो पिण्डपातिकस्स भिक्खुस्स सक्कादयो ¶ देवापि पिहयन्ति पत्थेन्ति. तस्स सीलादिगुणेसु बहुमानं उप्पादेन्ता आदरं जनेन्ति, पगेव मनुस्सा. सचे सो लाभसक्कारसिलोकसन्निस्सितो न होति, तदभिकङ्खी न होतीति अत्थो.

इति पिण्डपातिकङ्गकथावण्णना.

४. सपदानचारिकङ्गकथावण्णना

२७. इमिनाति सपदानचारिकेन. कालतरन्ति कालस्सेव. अफासुकट्ठानन्ति सपरिस्सयादिवसेन ¶ दुप्पवेसनट्ठानं. पुरतोति वीथियं गच्छन्तस्स पुरतो घरं अपविट्ठस्सेव. पत्तविस्सट्ठट्ठानन्ति पेसकारवीथियं पेसकारभावं निम्मिनित्वा ठितस्स सक्कस्स घरद्वारे पत्तविस्सट्ठट्ठानं. उक्कट्ठपिण्डपातिको तं दिवसं न भिक्खं आगमयमानो निसीदति, तस्मा तं अनुलोमेति. कत्थचिपि कुले निबद्धं उपसङ्कमनाभावतो परिचयाभावेन कुलेसु निच्चनवकता. सब्बत्थ अलग्गमानसताय च सोम्मभावेन च चन्दूपमता. कुलेसु परिग्गहचित्ताभावेन तत्थ मच्छेरप्पहानं. हितेसिताय विभागाभावतो समानुकम्पिता. कुलानं सङ्गण्हनसंसट्ठतादयो कुलूपकादीनवा. अव्हानानभिनन्दनाति निमन्तनवसेन अव्हानस्स असम्पटिच्छना. अभिहारेनाति भिक्खाभिहारेन. सेरिचारन्ति यथारुचि विचरणं.

इति सपदानचारिकङ्गकथावण्णना.

५. एकासनिकङ्गकथावण्णना

२८. नानासनभोजनन्ति अनेकस्मिं आसने भोजनं, एकनिसज्जाय एव अभुञ्जित्वा विसुं विसुं निसज्जासु आहारपरिभोगन्ति अत्थो. पतिरूपन्ति युत्तरूपं अनुट्ठापनीयं. वत्तं कातुं वट्टतीति वत्तं कातुं युज्जति. वत्तं नाम गरुट्ठानीये कत्तब्बमेव. तत्थ पन पटिपज्जनविधिं दस्सेतुं यं थेरवादं आह ‘‘आसनं वा रक्खेय्य भोजनं वा’’तिआदि. तस्सत्थो – एकासनिकं भिक्खुं भुञ्जन्तं आसनं वा रक्खेय्य, धुतङ्गभेदतो याव भोजनपरियोसाना न वुट्ठातब्बन्ति वुत्तं होति ¶ . भोजनं वा रक्खेय्य धुतङ्गभेदतो, अभुञ्जियमानं याव भुञ्जितुं नारभति, ताव वुट्ठातब्बन्ति अत्थो. यस्मा तयिदं द्वयं इध नत्थि, तस्मा वत्तकरणं धुतङ्गं न रक्खतीति अधिप्पायो. तेनाह ‘‘अयञ्चा’’तिआदि. ‘‘भेसज्जत्थमेवा’’ति इमिना भेसज्जपरिभोगवसेनेव सप्पिआदीनिपि वट्टन्तीति दस्सेति. अप्पाबाधताति अरोगता. अप्पातङ्कताति अकिच्छजीविता सरीरदुक्खाभावो. लहुट्ठानन्ति कायस्स लहुपरिवत्तिता. बलन्ति सरीरबलं. फासुविहारोति सुखविहारो. सब्बमेतं बहुक्खत्तुं भुञ्जनपच्चया उप्पज्जनविकारपटिक्खेपपदं. रुजाति रोगा. न कम्ममत्तनोति अत्तनो योगकम्मं पुरेभत्तं, पच्छाभत्तञ्च न परिहापेति, बहुसो भोजने अब्यावटभावतो, अरोगभावतो चाति अधिप्पायो.

इति एकासनिकङ्गकथावण्णना.

६. पत्तपिण्डिकङ्गकथावण्णना

२९. अप्पटिकूलं ¶ कत्वा भुञ्जितुं वट्टति पटिकूलस्स भुत्तस्स अगण्हनम्पि सियाति अधिप्पायो. पमाणयुत्तमेव गण्हितब्बन्ति ‘‘एकभाजनमेव गण्हामी’’ति बहुं गहेत्वा न छड्डेतब्बं. नानारसतण्हाविनोदनन्ति नानारसभोजने तण्हाय विनोदनं. अत्र अत्र नानाभाजने ठिते नानारसे इच्छा एतस्साति अत्रिच्छो, तस्स भावो अत्रिच्छता, तस्सा अत्रिच्छताय पहानं. आहारे पयोजनमत्तदस्सिताति असम्भिन्ननानारसे गेधं अकत्वा आहारे सत्थारा अनुञ्ञातपयोजनमत्तदस्सिता. विसुं विसुं भाजनेसु ठितानि ब्यञ्जनानि गण्हतो तत्थ तत्थ साभोगताय सिया विक्खित्तभोजिता, न तथा इमस्स एकपत्तगतसञ्ञिनोति वुत्तं ‘‘अविक्खित्तभोजिता’’ति. ओक्खित्तलोचनोति पत्तसञ्ञिताय हेट्ठाखित्तचक्खु. परिभुञ्जेय्याति परिभुञ्जितुं सक्कुणेय्य.

इति पत्तपिण्डिकङ्गकथावण्णना.

७. खलुपच्छाभत्तिकङ्गकथावण्णना

३०. भुञ्जन्तस्स ¶ यं उपनीतं, तस्स पटिक्खेपेन तं अतिरित्तं भोजनन्ति अतिरित्तभोजनं. पुन भोजनं कप्पियं कारेत्वा न भुञ्जितब्बं, तब्बिसयत्ता इमस्स धुतङ्गस्स. तेनाह ‘‘इदमस्स विधान’’न्ति. यस्मिं भोजनेति यस्मिं भुञ्जियमाने भोजने. तदेव भुञ्जति, न अञ्ञं. अनतिरित्तभोजनपच्चया आपत्ति अनतिरित्तभोजनापत्ति, ततो दूरीभावो अनापज्जनं. ओदरिकत्तं घस्मरभावो कुच्छिपूरकता, तस्स अभावो एकपिण्डेनापि यापनतो. निरामिससन्निधिता निहितस्स अभुञ्जनतो. पुन परियेसनवसेन परियेसनाय खेदं न याति. अभिसल्लेखकानं सन्तोसगुणादीनं वुद्धिया सञ्जननं सन्तोसगुणादिवुड्ढिसञ्जननं. इदन्ति खलुपच्छाभत्तिकङ्गं.

इति खलुपच्छाभत्तिकङ्गकथावण्णना.

८. आरञ्ञिकङ्गकथावण्णना

३१. गामन्तसेनासनं ¶ पहाय अरञ्ञे अरुणं उट्ठापेतब्बन्ति एत्थ गामन्तं, अरञ्ञञ्च सरूपतो दस्सेतुं ‘‘तत्थ सद्धिं उपचारेना’’तिआदि आरद्धं. तत्थ गामपरियापन्नत्ता गामन्तसेनासनस्स ‘‘गामोयेव गामन्तसेनासन’’न्ति वुत्तं. यो कोचि सत्थोपि गामो नामाति सम्बन्धो. इन्दखीलाति उम्मारा. तस्साति लेड्डुपातस्स. विनयपरियायेन अरञ्ञलक्खणं अदिन्नादानपाराजिके (पारा. ९२) आगतं. तत्थ हि ‘‘गामा वा अरञ्ञा वा’’ति अनवसेसतो अवहारट्ठानपरिग्गहे तदुभयं असङ्करतो दस्सेतुं ‘‘ठपेत्वा गामञ्चा’’तिआदि वुत्तं. गामूपचारो हि लोके गामसङ्खमेव गच्छतीति. निप्परियायतो पन गामविनिमुत्तं ठानं अरञ्ञमेव होतीति अभिधम्मे (विभ. ५२९) गामा ‘‘निक्खमित्वा बहि इन्दखीला, सब्बमेतं अरञ्ञ’’न्ति वुत्तं. सुत्तन्तिकपरियायेन आरञ्ञकसिक्खापदे (पारा. ६५४) ‘‘पञ्चधनुसतिकं पच्छिम’’न्ति आगतं आरञ्ञिकं भिक्खुं सन्धाय. न हि सो विनयपरियायिके ‘‘अरञ्ञे वसनतो आरञ्ञिको पन्तसेनासनो’’ति सुत्ते वुत्तो. अयञ्च सुत्तसंवण्णनाति इध सब्बत्थ सुत्तन्तकथाव ¶ पमाणं. तस्मा तत्थ आगतमेव लक्खणं गहेतब्बन्ति दस्सेन्तो ‘‘तं आरोपितेन आचरियधनुना’’तिआदिना मिननविधिं आह. तेनेव हि मज्झिमट्ठकथानयोव (म. नि. अट्ठ. १.२९६) इदमेत्थ पमाणन्ति च वुत्तो.

ततो ततो मग्गन्ति तत्थ तत्थ खुद्दकमग्गं पिदहति. धुतङ्गसुद्धिकेन धुतङ्गसोधनपसुतेन. यथापरिच्छिन्ने कालेति उक्कट्ठस्स तयोपि उतू, मज्झिमस्स द्वे, मुदुकस्स एको उतु. तत्थपि धुतङ्गं न भिज्जति सउस्साहत्ता. निपज्जित्वा गमिस्सामाति चित्तस्स सिथिलभावेन धुतङ्गं भिज्जतीति वुत्तं. अरञ्ञसञ्ञं मनसि करोन्तोति ‘‘अहं विवेकवासं वसिस्सामि, यथालद्धोव कायविवेको सात्थको कातब्बो’’ति मनसिकारसब्भावतो ‘‘भब्बो…पे… रक्खितु’’न्ति वुत्तं. अस्स आरञ्ञिकस्स चित्तं न विक्खिपन्ति आपाथमनुपगमनतो. विगतसन्तासो होति विवेकपरिचयतो. जीवितनिकन्तिं जहति बहुपरिस्सये अरञ्ञे निवासेनेव मरणभयस्स दूरीकरणतो. पविवेकसुखरसं अस्सादेति अनुभवति जनसंसग्गाभावतो. आराधयन्तोति अनुनयन्तो. यथानुसिट्ठं पटिपत्तिया विवेकस्स अधिट्ठानभावतो आरञ्ञिकङ्गयोगिनो वाहनसदिसन्ति कत्वा वुत्तं ‘‘अवसेसधुतायुधो’’ति, अवसिट्ठधुतधम्मायुधोति अत्थो.

इति आरञ्ञिकङ्गकथावण्णना.

९. रुक्खमूलिकङ्गकथावण्णना

३२. छन्नन्ति ¶ इट्ठकाछदनादीहि छादितं, आवसथन्ति अत्थो. सीमन्तरिकरुक्खोति द्विन्नं राजूनं रज्जसीमाय ठितरुक्खो. तत्थ हि तेसं राजूनं बलकायो उपगन्त्वा अन्तरन्तरा युद्धं करेय्य, चोरापि पारिपन्थिका समोसरन्ता भिक्खुस्स सुखेन निसीदितुं न देन्ति. चेतियरुक्खो ‘‘देवताधिट्ठितो’’ति मनुस्सेहि सम्मतरुक्खो पूजेतुं उपगतेहि मनुस्सेहि अविवित्तो होति. निय्यासरुक्खो सज्जरुक्खादि. वग्गुलिरुक्खो वग्गुलिनिसेवितो. सीमन्तरिकरुक्खादयो सपरिस्सया, दुल्लभविवेका चाति आह ‘‘इमे रुक्खे विवज्जेत्वा’’ति. पण्णसटन्ति ¶ रुक्खतो पतितपण्णं. पटिच्छन्ने ठाने निसीदितब्बं रुक्खमूलिकभावस्स पटिच्छादनत्थं. छन्ने वासकप्पना धम्मस्सवनादीनमत्थायपि होति. तस्मा ‘‘जानित्वा अरुणं उट्ठापितमत्ते’’ति वुत्तं.

अभिण्हं तरुपण्णविकारदस्सनेनाति अभिक्खणं तरूसु, तरूनं वा पण्णेसु विकारस्स खणभङ्गस्स दस्सनेन. सेनासनमच्छेरकम्मारामतानन्ति आवासमच्छरियनवकम्मरतभावानं. देवताहीति रुक्खदेवताहि. तापि हि रुक्खट्ठविमानेसु वसन्तियो रुक्खेसु वसन्ति. अयम्पि रुक्खेति सहवासिता. वण्णितोति ‘‘अप्पानि चेवा’’तिआदिना पसंसितो. ‘‘रुक्खमूलसेनासनं निस्साय पब्बज्जा’’ति (महाव. ७३, १२८) एवं निस्सयोति च भासितो. अभिरत्तानि तरुणकाले, नीलानि मज्झिमकाले, पण्डूनि जिण्णकाले. पतितानि मिलायनवसेन. एवं पस्सन्तो तरुपण्णानि पच्चक्खतो एव निच्चसञ्ञं पनूदति पजहति, अनिच्चसञ्ञा एवस्स सण्ठाति. यस्मा भगवतो जातिबोधिधम्मचक्कपवत्तनपरिनिब्बानानि रुक्खमूलेयेव जातानि, तस्मा वुत्तं ‘‘बुद्धदायज्जं रुक्खमूल’’न्ति.

इति रुक्खमूलिकङ्गकथावण्णना.

१०. अब्भोकासिकङ्गकथावण्णना

३३. ‘‘रुक्खमूलं पटिक्खिपामी’’ति एत्तके वुत्ते छन्नं अप्पटिक्खित्तमेव होतीति ‘‘छन्नञ्च ¶ रुक्खमूलञ्च पटिक्खिपामी’’ति वुत्तं. धुतङ्गस्स सब्बसो पटियोगिपटिक्खेपेन हि समादानं इज्झति, नो अञ्ञथाति. ‘‘धम्मस्सवनाया’’ति इमिनाव धम्मं कथेन्तेनापि उपोसथदिवसादीसु सुणन्तानं चित्तानुरक्खणत्थं तेहि याचितेन छन्नं पविसितुं वट्टति, धम्मं पन कथेत्वा अब्भोकासोव गन्तब्बो. रुक्खमूलिकस्सापि एसेव नयो. उपोसथत्थायाति उपोसथकम्माय. उद्दिसन्तेनाति परेसं उद्देसं देन्तेन. उद्दिसापेन्तेनाति सयं उद्देसं गण्हन्तेन. मग्गमज्झे ठितं सालन्ति सीहळदीपे विय मग्गा अनोक्कम्म उजुकमेव पविसितब्बसालं. वेगेन गन्तुं न वट्टति असारुप्पत्ता. याव वस्सूपरमा ठत्वा गन्तब्बं, न ताव धुतङ्गभेदो होतीति अधिप्पायो.

रुक्खस्स ¶ अन्तो नाम रुक्खमूलं. पब्बतस्स पन पब्भारसदिसो पब्बतपदेसो. अच्छन्नमरियादन्ति यथा वस्सोदकं अन्तो न पविसति, एवं छदनसङ्खेपेन उपरि अकतमरियादं. अन्तो पन पब्भारस्स वस्सोदकं पविसति चे, अब्भोकाससङ्खेपमेवाति तत्थ पविसितुं वट्टति. साखामण्डपोति रुक्खसाखाहि विरळच्छन्नमण्डपो. पीठपटो खलित्थद्धसाटको.

पविट्ठक्खणे धुतङ्गं भिज्जति यथावुत्तपब्भारादिके ठपेत्वाति अधिप्पायो. जानित्वाति धम्मस्सवनादिअत्थं छन्नं रुक्खमूलं पविसित्वा निसिन्नो ‘‘इदानि अरुणो उट्ठहती’’ति जानित्वा. रुक्खमूलेपि कत्थचि अत्थेव निवासफासुकताति सिया तत्थ आसङ्गपुब्बको आवासपलिबोधो, न पन अब्भोकासेति इधेव आवासपलिबोधुपच्छेदो आनिसंसो वुत्तो. पसंसायानुरूपताति अनिकेताति वुत्तपसंसाय अनालयभावेन अनुच्छविकता. निस्सङ्गताति आवासपरिग्गहाभावेनेव तत्थ निस्सङ्गता. असुकदिसाय वसनट्ठानं नत्थि, तस्मा तत्थ गन्तुं नेव सक्काति एदिसस्स परिवितक्कस्स अभावतो चातुद्दिसो. मिगभूतेनाति परिग्गहाभावेन मिगस्स विय भूतेन. सितोति निस्सितो. विन्दतीति लभति.

इति अब्भोकासिकङ्गकथावण्णना.

११. सोसानिकङ्गकथावण्णना

३४. न ¶ सुसानन्ति असुसानं. अञ्ञत्थो न-कारो, सुसानलक्खणरहितं वसनट्ठानन्ति अधिप्पायो. न तत्थाति ‘‘सुसान’’न्ति ववत्थपितमत्ते ठाने न वसितब्बं. न हि नाममत्तेन सुसानलक्खणं सिज्झति. तेनाह ‘‘न ही’’तिआदि. झापितकालतो पन पट्ठाय…पे… सुसानमेव छवेन सयितमत्ताय सुसानलक्खणप्पत्तितो. छवसयनं हि ‘‘सुसान’’न्ति वुच्चति.

सोसानिकेन नाम अप्पकिच्चेन सल्लहुकवुत्तिना भवितब्बन्ति दस्सेतुं ‘‘तस्मिं पन वसन्तेना’’तिआदि वुत्तं. गरुकन्ति दुप्परिहारं. तमेव हि दुप्परिहारभावं दस्सेतुं ‘‘तस्मा’’तिआदि वुत्तं. तत्थ उप्पन्नपरिस्सयविघातत्थायाति ¶ ‘‘सुसानं नाम मनुस्सराहस्सेय्यक’’न्ति चोरा कतकम्मापि अकतकम्मापि ओसरन्ति, तत्थ चोरेसु भण्डसामिके दिस्वा भिक्खुसमीपे भण्डं छड्डेत्वा पलातेसु मनुस्सा भिक्खुं ‘‘चोरो’’ति गहेत्वा पोथेय्युं, तस्मा विहारे सङ्घत्थेरं वा गोचरगामे रञ्ञा नियुत्तं राजयुत्तकं वा अत्तनो सोसानिकभावं जानापेत्वा यथा तादिसो, अञ्ञो वा परिस्सयो न होति, तथा अप्पमत्तेन वसितब्बं. चङ्कमन्तस्स यदा आळहनं अभिमुखं न होति, तदापि संवेगजननत्थं तत्थ दिट्ठि विस्सज्जेतब्बाति दस्सेतुं ‘‘अद्धक्खिकेन आळहनं ओलोकेन्तेना’’ति वुत्तं.

उप्पथमग्गेन गन्तब्बं अत्तनो सोसानिकभावस्स अपाकटभावत्थं. आरम्मणन्ति तस्मिं सुसाने ‘‘अयं वम्मिको, अयं रुक्खो, अयं खाणुको’’तिआदिना दिवायेव आरम्मणं ववत्थपेतब्बं. भयानकन्ति भयजनकं वम्मिकादिं. केनचि लेड्डुपासाणादिना आसन्ने विचरन्तीति न पहरितब्बा. तिलपिट्ठं वुच्चति पललं. मासमिस्सं भत्तं मासभत्तं. गुळादीति आदि-सद्देन तिलसंगुळिकादिघनपूवञ्च सङ्गण्हाति. कुलगेहं न पविसितब्बन्ति पेतधूमेन वासितत्ता, पिसाचानुबन्धत्ता च कुलगेहस्स अब्भन्तरं न पविसितब्बं. देवसिकं छवडाहो धुवडाहो. मतञातकानं तत्थ गन्त्वा देवसिकं रोदनं धुवरोदनं. वुत्तनयेनाति ‘‘झापितकालतो पन पट्ठाया’’ति वुत्तनयेन. ‘‘पच्छिमयामे पटिक्कमितुं वट्टती’’ति इच्छितत्ता ‘‘सुसानं अगतदिवसे’’ति अङ्गुत्तरभाणका.

सुसाने निच्चकालं सिवथिकदस्सनेन मरणस्सतिपटिलाभो. ततो एव अप्पमादविहारिता ¶ . तत्थ छड्डितस्स मतकळेवरस्स दस्सनेन असुभनिमित्ताधिगमो. ततो एव कामरागविनोदनं. बहुलं सरीरस्स असुचिदुग्गन्धजेगुच्छभावसल्लक्खणतो अभिण्हं कायसभावदस्सनं. ततो मरणस्सतिपटिलाभतो च संवेगबहुलता. ब्याधिकानं, जराजिण्णानञ्च मतानं तत्थ दस्सनेन आरोग्ययोब्बनजीवितमदप्पहानं. खुद्दकस्स, महतो च भयस्स अभिभवनतो भयभेरवसहनता. संविग्गस्स योनिसो पदहनं सम्भवतीति अमनुस्सानं गरुभावनीयता. निद्दागतम्पीति सुत्तम्पि, सुपिनन्तेपीति अधिप्पायो.

इति सोसानिकङ्गकथावण्णना.

१२. यथासन्थतिकङ्गकथावण्णना

३५. सेनासनगाहणे ¶ परे उट्ठापेत्वा गहणं, ‘‘इदं सुन्दरं, इदं न सुन्दर’’न्ति परितुलयित्वा पुच्छना, ओलोकना च सेनासनलोलुप्पं. तुट्ठब्बन्ति तुस्सितब्बं. विहारस्स परियन्तभावेन दूरेति वा बहूनं सन्निपातट्ठानादीनं अच्चासन्नेति वा पुच्छितुं न लभति, पुच्छनेनपिस्स धुतङ्गस्स संकिलिस्सनतो. ओलोकेतुन्ति लोलुप्पवसेन पस्सितुं. सचस्स तं न रुच्चतीति अस्स यथासन्थतिकस्स तं यथागाहितं सेनासनं अफासुकभावेन सचे न रुच्चति, मुदुकस्स असति रोगे यथागाहितं पहाय अञ्ञस्स सेनासनस्स गहणं लोलुप्पं, मज्झिमस्स गन्त्वा ओलोकना, उक्कट्ठस्स पुच्छना. सब्बेसम्पि उट्ठापेत्वा गहणे वत्तब्बमेव नत्थि.

उपट्ठापनीयानम्पि अनुट्ठापनेन सब्रह्मचारीनं हितेसिता. ताय करुणाविहारानुगुणता. सुन्दरासुन्दरविभागाकरणतो हीनपणीतविकप्पपरिच्चागो. तेन तादिलक्खणानुगुणता. ततो एव अनुरोधविरोधप्पहानं. द्वारपिदहनं ओकासादानतो. यथासन्थतरामतन्ति यथागाहिते यथानिद्दिट्ठे सेनासने अभिरतभावं.

इति यथासन्थतिकङ्गकथावण्णना.

१३. नेसज्जिकङ्गकथावण्णना

३६. सेय्यन्ति ¶ इरियापथलक्खणं सेय्यं. तप्पटिक्खेपेनेव हि तदत्था ‘‘मञ्चो भिसी’’ति एवमादिका (चूळव. ३२१, ३२२) सेय्या पटिक्खित्ता एव होन्ति. ‘‘नेसज्जिको’’ति च सयनं पटिक्खिपित्वा निसज्जाय एव विहरितुं सीलमस्साति इमस्स अत्थस्स इध अधिप्पेतत्ता सेय्या एवेत्थ पटियोगिनी, न इतरे तथा अनिट्ठत्ता, असम्भवतो च. कोसज्जपक्खियो हि इरियापथो इध पटियोगिभावेन इच्छितो, न इतरे. न च सक्का ठानगमनेहि विना निसज्जाय एव यापेतुं तथा पवत्तेतुन्ति सेय्यावेत्थ पटियोगिनी. तेनाह ‘‘तेन पना’’तिआदि. चङ्कमितब्बं न ‘‘नेसज्जिको अह’’न्ति सब्बरत्तिं निसीदितब्बं. इरियापथन्तरानुग्गहितो हि कायो मनसिकारक्खमो होति.

चत्तारो ¶ पादा, पिट्ठिअपस्सयो चाति इमेहि पञ्चहि अङ्गेहि पञ्चङ्गो. चतूहि अट्टनीहि, पिट्ठिअपस्सयेन च पञ्चङ्गोति अपरे. उभोसु पस्सेसु पिट्ठिपस्से च यथासुखं अपस्साय विहरतो नेसज्जिकस्स ‘‘अनेसज्जिकतो को विसेसो’’ति गाहं निवारेतुं अभयत्थेरो निदस्सितो ‘‘थेरो अनागामी हुत्वा परिनिब्बायी’’ति.

उपच्छेदीयति एतेनाति उपच्छेदनन्ति विनिबन्धुपच्छेदस्स साधकतमभावो दट्ठब्बो. सब्बकम्मट्ठानानुयोगसप्पायता अलीनानुद्धच्चपक्खिकत्ता निसज्जाय. ततो एव पासादिकइरियापथता. वीरियारम्भानुकूलता वीरियसमतायोजनस्स अनुच्छविकता. ततो एव सम्मापटिपत्तिया अनुब्रूहनता. पणिधायाति ठपेत्वा. तनुन्ति उपरिमकायं. विकम्पेतीति चालेति, इच्छाविघातं करोतीति अधिप्पायो. वतन्ति धुतङ्गं.

इति नेसज्जिकङ्गकथावण्णना.

धुतङ्गपकिण्णककथावण्णना

३७. सेक्खपुथुज्जनानं वसेन सिया कुसलानि, खीणासवानं वसेन सिया अब्याकतानि ¶ . तत्थ सेक्खपुथुज्जना पटिपत्तिपूरणत्थं, खीणासवा फासुविहारत्थं धुतङ्गानि परिहरन्ति. अकुसलम्पि धुतङ्गन्ति अकुसलचित्तेनापि धुतङ्गसेवना अत्थीति अधिप्पायो. तं न युत्तं, येन अकुसलचित्तेन पब्बजितस्स आरञ्ञिकत्तं, तं धुतङ्गं नाम न होति. कस्मा? लक्खणाभावतो. यं हिदं किलेसानं धुननतो धुतस्स पुग्गलस्स, ञाणस्स, चेतनाय वा अङ्गत्तं, न तं अकुसलधम्मेसु सम्भवति. तस्मा अरञ्ञवासादिमत्तेन आरञ्ञिकादयो ताव होन्तु, आरञ्ञिकङ्गादीनि पन न होन्तीति इममत्थं दस्सेतुं ‘‘न मय’’न्तिआदि वुत्तं. तत्थ इमानीति धुतङ्गानि. वुत्तं हेट्ठा वचनत्थनिद्देसे. न च अकुसलेन कोचि धुतो नाम होति, किलेसानं धुननट्ठेनाति अधिप्पायो. यस्स भिक्खुनो एतानि समादानानि अङ्गानि, एतेन पठमेनापि अत्थविकप्पेन ‘‘नत्थि अकुसलं धुतङ्ग’’न्ति दस्सेति. न च अकुसलं किञ्चि धुनातीति अकुसलं किञ्चि पापं न च धुनाति एव अप्पटिपक्खतो. येसं समादानानं तं अकुसलं ञाणं विय ¶ अङ्गन्ति कत्वा तानि धुतङ्गानीति वुच्चेय्युं. इमिना दुतियेनापि अत्थविकप्पेन ‘‘नत्थि अकुसलं धुतङ्ग’’न्ति दस्सेति. नापि अकुसलन्तिआदि ततियअत्थविकप्पवसेन योजना. तस्मातिआदि वुत्तस्सेवत्थस्स निगमनं.

येसन्ति अभयगिरिवासिके सन्धायाह. ते हि धुतङ्गं नाम पञ्ञत्तीति वदन्ति. तथा सति तस्स परमत्थतो अविज्जमानत्ता किलेसानं धुननट्ठोपि न सिया, समादातब्बता चाति तेसं वचनं पाळिया विरुज्झतीति दस्सेतुं ‘‘कुसलत्तिकविनिमुत्त’’न्तिआदि वुत्तं. तस्माति यस्मा पञ्ञत्तिपक्खे एते दोसा दुन्निवारा, तस्मा तं तेसं वचनं न गहेतब्बं, वुत्तनयो चेतनापक्खोयेव गहेतब्बोति अत्थो. यस्मा एते धुतगुणा कुसलत्तिके पठमततियपदसङ्गहिता, तस्मा सिया सुखाय वेदनाय सम्पयुत्ता, सिया अदुक्खमसुखाय वेदनाय सम्पयुत्ता, सिया विपाकधम्मधम्मा, सिया नेवविपाकनविपाकधम्मधम्मा, सिया अनुपादिन्नुपादानिया, सिया असंकिलिट्ठसंकिलेसिकाति एवं सेसतिकदुकपदेहिपि नेसं यथारहं सङ्गहो विभावेतब्बो.

कामं सब्बोपि अरहा धुतकिलेसो, इध पन धुतङ्गसेवनामुखेन किलेसे विधुनित्वा ठितो खीणासवो ‘‘धुतकिलेसो पुग्गलो’’ति अधिप्पेतो. तथा सब्बोपि अरियमग्गो निप्परियायेन किलेसधुननो धम्मो, विसेसतो अग्गमग्गो. परियायेन पन विपस्सनाञाणादि. हेट्ठिमपरिच्छेदेन धुतङ्गचेतनासम्पयुत्तञाणं दट्ठब्बं. एवं धुतं दस्सेत्वा धुतवादे दस्सेतब्बे यस्मा धुतवादभेदेन ¶ धुतो विय धुतभेदेन धुतवादोपि दुविधो, तस्मा तेसं, तदुभयपटिक्खेपस्स च वसेन चतुक्कमेत्थ सम्भवतीति तं दस्सेतुं ‘‘अत्थि धुतो’’तिआदि वुत्तं.

तयिदन्ति निपातो, तस्स ‘‘सो अय’’न्ति अत्थो. धुतधम्मा नामाति धुतङ्गसेवनाय पटिपक्खभूतानं पापधम्मानं धुननवसेन पवत्तिया ‘‘धुतो’’ति लद्धनामाय धुतङ्गचेतनाय उपकारका धम्माति कत्वा धुतधम्मा नाम. असम्पत्तसम्पत्तेसु पच्चयेसु अलुब्भनाकारेन पवत्तनतो अप्पिच्छता सन्तुट्ठिता च अत्थतो अलोभो. पच्चयगेधादिहेतुकानं लोलतादीनं संकिलेसानं सम्मदेव लिखनतो ¶ छेदनतो गणसङ्गणिकादिभेदतो संसग्गतो चित्तस्स विवेचनतो सल्लेखता पविवेकता च अलोभो अमोहोति इमेसु द्वीसु धम्मेसु अनुपतन्ति तदन्तोगधा तप्परियापन्ना होन्ति, तदुभयस्सेव पवत्तिविसेसभावतो. इमेहि कुसलधम्मेहि अत्थी इदमत्थी, येन ञाणेन पब्बजितेन नाम पंसुकूलिकङ्गादीसु पतिट्ठितेन भवितब्बन्ति यथानुसिट्ठं धुतगुणे समादियति चेव परिहरति च, तं ञाणं इदमत्थिता. तेनाह ‘‘इदमत्थिता ञाणमेवा’’ति. पटिक्खेपवत्थूसूति गहपतिचीवरादीसु तेहि तेहि धुतङ्गेहि पटिक्खिपितब्बवत्थूसु. लोभन्ति तण्हं. तेस्वेव वाति पटिक्खेपवत्थूसु एव. आदीनवपटिच्छादकन्ति आरक्खदुक्खपराधीनवुत्तिचोरभयादिआदीनवपटिच्छादकं. अनुञ्ञातानन्ति सत्थारा निच्छन्दरागपरिभोगवसेन अनुञ्ञातानं सुखसम्फस्सअत्थरणपावुरणादीनं. पटिसेवनमुखेनाति पटिसेवनद्वारेन, तेन लेसेनाति अत्थो. अतिसल्लेखमुखेनाति अतिविय सल्लेखपटिपत्तिमुखेन, उक्कट्ठस्स वत्तनकानम्पि पटिक्खिपनवसेनाति अत्थो.

सुखुमकरणसन्निस्सयो रागो दुक्खाय पटिपत्तिया पतिट्ठं न लभतीति आह ‘‘दुक्खापटिपदञ्च निस्साय रागो वूपसम्मती’’ति. सल्लेखो नाम सम्पजानस्स होति, सतिसम्पजञ्ञे मोहो अपतिट्ठोव अप्पमादसम्भवतोति वुत्तं ‘‘सल्लेखं निस्साय अप्पमत्तस्स मोहो पहीयती’’ति. एत्थाति एतेसु धुतङ्गेसु. तत्थाति अरञ्ञरुक्खमूलेसु.

सीसङ्गानीति सीसभूतानि अङ्गानि, परेसम्पि केसञ्चि नानन्तरिकताय, सुकरताय च सङ्गण्हनतो उत्तमङ्गानीति अत्थो. असम्भिन्नङ्गानीति केहिचि सम्भेदरहितानि, विसुंयेव अङ्गानीति वुत्तं होति. कम्मट्ठानं वड्ढति रागचरितस्स मोहचरितस्स दोसचरितस्सापि, तं एकच्चं ¶ धुतङ्गं सेवन्तस्साति अधिप्पायो. हायति कम्मट्ठानं सुकुमारभावेनलूखपटिपत्तिं असहन्तस्स. वड्ढतेव महापुरिसजातिकस्साति अधिप्पायो. न वड्ढति कम्मट्ठानं उपनिस्सयरहितस्स. एकमेव हि धुतङ्गं यथा किलेसधुननट्ठेन, एवं चेतनासभावत्ता. तेनाह ‘‘समादानचेतना’’ति.

तेरसापि ¶ धुतङ्गानि समादाय परिहरन्तानं पुग्गलानं वसेन ‘‘द्वाचत्तालीस होन्ती’’ति वत्वा भिक्खूनं तेरसन्नम्पि परिहरणस्स एकज्झंयेव सम्भवं दस्सेतुं ‘‘सचे ही’’तिआदि वुत्तं. तत्थ ‘‘एकप्पहारेन सब्बधुतङ्गानि परिभुञ्जितुं सक्कोती’’ति वुत्तं. कथं अब्भोकासे विहरन्तस्स रुक्खमूलिकङ्गं? ‘‘छन्नं पटिक्खिपामि, रुक्खमूलिकङ्गं समादियामी’’ति (विसुद्धि. १.३२) वचनतो छन्ने अरुणं उट्ठापितमत्ते धुतङ्गं भिज्जति, न अब्भोकासे, तस्मा भेदहेतुनो अभावेन तम्पि अरोगमेव. तथा सेनासनलोलुप्पस्स अभावेन यथासन्थतिकङ्गन्ति दट्ठब्बं. आरञ्ञिकङ्गं गणम्हा ओहीयनसिक्खापदेन (पाचि. ६९१-६९२) पटिक्खित्तं, खलुपच्छाभत्तिकङ्गं अनतिरित्तभोजनसिक्खापदेन (पाचि. २३८-२४०). पवारिताय हि भिक्खुनिया अतिरित्तं कत्वा भुञ्जितुं न लब्भति. कप्पिये च वत्थुस्मिं लोलतापहानाय धुतङ्गसमादानं, न अकप्पिये, सिक्खापदेनेव पटिक्खित्तत्ता. अट्ठेव होन्ति भिक्खुनिया संकच्चिकचीवरादीहि सद्धिं पञ्चपि तिचीवरसङ्खमेव गच्छन्तीति कत्वा. यथावुत्तेसूति भिक्खूनं वुत्तेसु तेरससु तिचीवराधिट्ठानविनयकम्माभावतो ठपेत्वा तेचीवरिकङ्गं द्वादस सामणेरानं. सत्ताति भिक्खुनीनं वुत्तेसु अट्ठसु एकं पहाय सत्त तिचीवराधिट्ठानविनयकम्माभावतो. ‘‘ठपेत्वा तेचीवरिकङ्ग’’न्ति हि इमं अनुवत्तमानमेव कत्वा ‘‘सत्त सिक्खमानसामणेरीन’’न्ति वुत्तं. पतिरूपानीति उपासकभावस्स अनुच्छविकानि.

धुतङ्गनिद्देसवण्णना निट्ठिता.

इति दुतियपरिच्छेदवण्णना.

३. कम्मट्ठानग्गहणनिद्देसवण्णना

३८. अप्पिच्छतादीहीति ¶ ¶ अप्पिच्छतासन्तुट्ठिसल्लेखपविवेकापचयवीरियारम्भादीहि. परियोदातेति सुविसुद्धे निरुपक्किलेसे. इमस्मिं सीलेति यथावुत्ते चतुपारिसुद्धिसीले. ‘‘चित्तं भावय’’न्ति इममेव देसनं सन्धायाह ‘‘अतिसङ्खेपदेसितत्ता’’ति. को समाधीति सरूपपुच्छा. केनट्ठेन समाधीति केन अत्थेन समाधीति वुच्चति, ‘‘समाधी’’ति पदं कं अभिधेय्यत्थं निस्साय पवत्तन्ति अत्थो. कतिविधोति पभेदपुच्छा.

‘‘को समाधी’’ति कामञ्चायं सरूपपुच्छा, विभागवन्तानं पन सरूपविभावनं विभागदस्सनमुखेनेव होतीति विभागो ताव अनवसेसतो दस्सेतब्बो. तंदस्सने च अयमादीनवोति दस्सेतुं ‘‘समाधि बहुविधो’’तिआदि वुत्तं. तत्थ बहुविधोति कुसलादिवसेन अनेकविधो. नानप्पकारकोति आलम्बनमनसिकारछन्दपणिधिअधिमोक्खअभिनीहारसञ्ञानानत्तादिनानप्पकारो. न साधेय्याति लोकियसमाधिस्स भावना इध अधिप्पेतत्थो, तञ्च न साधेय्य. झानविमोक्खादीसु हि समाधिं उद्धरित्वा तस्स लब्भमानेहि विभागेहि विस्सज्जने करियमाने झानविभङ्गादीसु (विभ. ५०८ आदयो) आगतो सब्बो समाधिपभेदो विस्सज्जेतब्बो सिया. तथा च सति य्वायं लोकियसमाधिस्स भावनाविधि अधिप्पेतो, तस्स विस्सज्जनाय ओकासोव न भवेय्य. किञ्च येनस्स तिकचतुक्कझानिकेन हीनादिभेदभिन्नेन पवत्तिविभागेन ब्रह्मपारिसज्जादिवसेन नवविधो, पञ्चमज्झानिकेन वेहप्फलादिवसेन दसविधो वा एकादसविधो वा भवप्पभेदो निप्पज्जति. स्वास्स पवत्तिविभागो अयं सोति निद्धारेत्वा वुच्चमानो विक्खेपाय सिया, यथा तं अविसये. तेनाह ‘‘उत्तरि च विक्खेपाय संवत्तेय्या’’ति. कुसलचित्तेकग्गताति कुसला अनवज्जसुखविपाकलक्खणा चित्तेकग्गता.

चित्तचेतसिकानं समं अविसारवसेन सम्पिण्डेन्तस्स विय आधानं समाधानं. अविसारलक्खणो ¶ हि समाधि, सम्पिण्डनरसो च. सम्मा अविक्खिपनवसेन आधानं समाधानं. अविक्खेपलक्खणो वा हि ¶ समाधि, विक्खेपविद्धंसनरसो चाति. स्वायं यस्मा एकारम्मणे चित्तस्स ठितिहेतु, तस्मा ‘‘ठपनन्ति वुत्तं होती’’ति आह. तथा हेस ‘‘चित्तस्स ठिति सण्ठिति अवट्ठिती’’ति (ध. स. १५) निद्दिट्ठो. एकारम्मणग्गहणञ्चेत्थ समाधिस्स सन्तानट्ठितिभावदस्सनत्थं. तथा हिस्स अट्ठकथायं दीपच्चिट्ठिति निदस्सिता. आनुभावेनाति बलेन, पच्चयभावेनाति अत्थो. अविक्खिपमानाति न विक्खिपमाना वूपसममाना. उपसमपच्चुपट्ठानो हि समाधि. एतेनस्स विक्खेपपटिपक्खतं दस्सेति. अविप्पकिण्णाति अविसटा. एतेन अविसारलक्खणतं.

सयं न विक्खिपति, सम्पयुत्ता वा न विक्खिपन्ति एतेनाति अविक्खेपो, सो लक्खणं एतस्साति अविक्खेपलक्खणो. विक्खेपं विद्धंसेति, तथा वा सम्पज्जतीति विक्खेपविद्धंसनरसो. उद्धच्चे अविकम्पनवसेन पच्चुपतिट्ठति, सम्पयुत्तानं वा तं पच्चुपट्ठपेतीति अविकम्पनपच्चुपट्ठानो. सुखन्ति निरामिसं सुखं दट्ठब्बं.

३९. अविक्खेपलक्खणं नाम समाधिस्स आवेणिको सभावो, न तेनस्स कोचि विभागो लब्भतीति आह ‘‘अविक्खेपलक्खणेन ताव एकविधो’’ति. सम्पयुत्तधम्मे आरम्मणे अप्पेन्तो विय पवत्ततीति वितक्को अप्पना. तथा हि सो ‘‘अप्पना ब्यप्पना’’ति (ध. स. ७) निद्दिट्ठो. तप्पमुखतावसेन पन सब्बस्मिं महग्गतानुत्तरे झानधम्मे ‘‘अप्पना’’ति अट्ठकथावोहारो. तथा तस्स अनुप्पत्तिट्ठानभूते परित्तझाने उपचारवोहारो. गामादीनं समीपट्ठाने गामूपचारादिसमञ्ञा वियाति आह ‘‘उपचारप्पनावसेन दुविधो’’ति. इध पन समाधिवसेन वेदितब्बं. लुज्जनपलुज्जनट्ठेन लोकोति वुच्चति वट्टं, तप्परियापन्नताय लोके नियुत्तो, तत्थ वा विदितोति लोकियो. तत्थ अपरियापन्नताय लोकतो उत्तरो उत्तिण्णोति लोकुत्तरो. कामञ्चेत्थ लोकियसमाधि भावेतब्बभावेन गय्हति, उभयं पन एकज्झं गहेत्वा ततो इतरं निद्धारेतुं ‘‘लोकियलोकुत्तरवसेन दुविधो’’ति वुत्तं. सप्पीतिकनिप्पीतिकवसेनाति सह पीतिया वत्ततीति सप्पीतिको, पीतिसम्पयुत्तो. नत्थि एतस्स पीतीति निप्पीतिको, पीतिविप्पयुत्तो. तेसं वसेन. सुखेन सह एकुप्पादादिभावं गतोति सुखसहगतो ¶ , सुखसम्पयुत्तोति अत्थो. उपेक्खासहगतेपि एसेव नयो. उपेक्खाति चेत्थ अदुक्खमसुखवेदना अधिप्पेता. सा हि सुखदुक्खाकारपवत्तिं उपेक्खति मज्झत्ताकारसण्ठितत्ता. सुखसहगत-पदेन ¶ चेत्थ सप्पीतिको, निप्पीतिकेकदेसो च सङ्गहितो, उपेक्खासहगत-पदेन पन निप्पीतिकेकदेसोवाति अयमेतेसं पदानं विसेसो.

सभावतो, पच्चयतो, फलतो च मज्झिमपणीतेहि निहीनो, तेसं वा गुणेहि परिहीनोति हीनो, अत्तनो पच्चयेहि पधानभावं नीतो पणीतो, उभिन्नं मज्झे भवो मज्झिमो. सम्पयोगवसेन पवत्तमानेन सह वितक्केन सवितक्को, सह विचारेन सविचारो, सवितक्को च सो सविचारो चाति सवितक्कसविचारो. आदि-सद्देन अवितक्कविचारमत्तो, अवितक्काविचारो च गहितो. तत्थ विचारतो उत्तरि वितक्केन सम्पयोगाभावतो अवितक्को च सो विचारमत्तो चाति अवितक्कविचारमत्तो. विसेसनिवत्तिअत्थो वा मत्त-सद्दो. सवितक्कसविचारो हि समाधि वितक्कविसिट्ठेन विचारेन सविचारो, अयं पन विचारमत्तेन वितक्कसङ्खातविसेसरहितेन, तस्मा अवितक्कविचारमत्तो. अथ वा भावनाय पहीनत्ता वितक्काभावेनायं विचारमत्तो, न विचारतो अञ्ञस्स अत्तनो सम्पयुत्तधम्मस्स कस्सचि अभावाति दस्सेतुं अवितक्क-वचनेन विचारमत्त-पदं विसेसेत्वा वुत्तं. उभयरहितो अवितक्काविचारो. पीतिसहगतादिवसेनाति पीतिसहगतसुखसहगतउपेक्खासहगतवसेन. यदेत्थ वत्तब्बं, तं सुखसहगतदुके वुत्तनयमेव. पटिपक्खेहि समन्ततो खण्डितत्ता परित्तो. परित्तन्ति वा अप्पमत्तकं वुच्चति, अयम्पि अप्पानुभावताय परित्तो वियाति परित्तो. किलेसविक्खम्भनतो, विपुलफलतो, दीघसन्तानतो च महन्तभावं गतो, महन्तेहि वा उळारच्छन्दादीहि गतो पटिपन्नोति महग्गतो. आरम्मणकरणवसेनापि नत्थि एतस्स पमाणकरधम्मा, तेसं वा पटिपक्खोति अप्पमाणो.

पटिपज्जति झानं एतायाति पटिपदा, पुब्बभागभावना. दुक्खा किच्छा पटिपदा एतस्साति दुक्खापटिपदो. पकतिपञ्ञाय अभिविसिट्ठत्ता अभिञ्ञा नाम अप्पनावहा भावनापञ्ञा, दन्धा मन्दा अभिञ्ञा एतस्साति दन्धाभिञ्ञो. दुक्खापटिपदो च सो दन्धाभिञ्ञो चाति दुक्खापटिपदादन्धाभिञ्ञो ¶ , समाधि. तदादिवसेन. चतुझानङ्गवसेनाति चतुन्नं झानानं अङ्गभाववसेन, चतुक्कनयवसेन चेतं वुत्तं. हानभागियादिवसेनाति हानकोट्ठासिकादिवसेन.

समाधिएककदुकवण्णना

छन्नं ¶ अनुस्सतिट्ठानानन्ति बुद्धानुस्सतिआदीनं छन्नं अनुस्सतिकम्मट्ठानानं. इमेसं वसेनाति इमेसं दसन्नं कम्मट्ठानानं वसेन. ‘‘पुब्बभागे एकग्गता’’ति इमिना अप्पनाय उपकारकनानावज्जनुपचारस्सपि सङ्गहो दट्ठब्बो, न एकावज्जनस्सेव. अप्पनासमाधीनन्ति उपकत्तब्बउपकारकसम्बन्धे सामिवचनं ‘‘पुरिसस्स अत्थो’’तिआदीसु विय. परिकम्मन्ति गोत्रभु. अपरित्तो समाधीति दस्सेतुं ‘‘पठमस्स झानस्सा’’तिआदि वुत्तं.

तीसु भूमीसूति कामरूपारूपभूमीसु. कुसलचित्तेकग्गताय अधिप्पेतत्ता ‘‘अरियमग्गसम्पयुत्ता’’ति वुत्तं. सिया सप्पीतिको, सिया निप्पीतिकोति अनियमवचनं उपचारसमाधिसामञ्ञेन सब्बेसम्पि वा झानानं नानावज्जनवीथियं उपचारसमाधि सिया सप्पीतिको, सिया निप्पीतिको. एकावज्जनवीथियं पन आदितो दुकतिकज्झानानं उपचारसमाधि सप्पीतिकोव, इतरेसं निप्पीतिकोव, विसभागवेदनस्स चित्तस्स आसेवनपच्चयताभावतो, एकवीथियं वेदनापरिवत्तनाभावतो च. सिया सुखसहगतो, सिया उपेक्खासहगतोति एत्थापि वुत्तनयेनेव अत्थो वेदितब्बो. तत्थ पन ‘‘दुकतिकज्झानान’’न्ति वुत्तं, इध ‘‘तिकचतुक्कज्झानान’’न्ति वत्तब्बं.

समाधितिकवण्णना

पटिलद्धमत्तोति अधिगतमत्तो अनासेवितो अबहुलीकतो. सो हि परिदुब्बलभावेन हीनो होति. नातिसुभावितोति अतिविय पगुणभावं अपापितो. सुभावितोति सुट्ठु भावितो सम्मदेव पगुणतं उपनीतो. तेनाह ‘‘वसिप्पत्तो’’ति. छन्दादीनं हीनतादिवसेनापि इमेसं हीनादिता वेदितब्बा. तथा हि उळारपुञ्ञफलकामतावसेन पवत्तितो हीनो, लोकियाभिञ्ञासम्पादनाय पवत्तितो मज्झिमो, विवेककामताय अरियभावे ठितेन पवत्तितो पणीतो ¶ . अत्तहिताय भवसम्पत्तिअत्थं पवत्तितो वा हीनो, केवलं अलोभज्झासयेन पवत्तितो मज्झिमो, परहिताय पवत्तितो पणीतो. वट्टज्झासयेन वा पवत्तितो हीनो, विवेकज्झासयेन पवत्तितो मज्झिमो, विवट्टज्झासयेन लोकुत्तरपादकत्थं पवत्तितो पणीतो.

सद्धिं उपचारसमाधिनाति सब्बेसम्पि झानानं उपचारसमाधिना सह. वितक्कमत्तेयेव आदीनवं ¶ दिस्वाति वितक्केयेव ओळारिकतो उपट्ठहन्ते ‘‘चित्तस्स खोभकरधम्मो अय’’न्ति आदीनवं दिस्वा विचारञ्च सन्ततो मनसि करित्वा. तेनाह ‘‘विचारे अदिस्वा’’ति. तं सन्धायाति तं एवं पटिलद्धं समाधिं सन्धाय. एतं ‘‘अवितक्कविचारमत्तो समाधी’’ति दुतियपदं वुत्तं. तीसूति आदितो तीसु.

तेस्वेवाति तेसु एव चतुक्कपञ्चकनयेसु. ततिये चतुत्थेति चतुक्कनये ततिये, पञ्चकनये चतुत्थेति योजेतब्बं. अवसानेति द्वीसुपि नयेसु परियोसानज्झाने. यथाक्कमं चतुत्थे, पञ्चमे वा. पीतिसुखसहगतो वाति एत्थापि हेट्ठा वुत्तनयेनेव अत्थो वेदितब्बो. एत्थ च सतिपि पीतिसहगतस्सापि समाधिस्स सुखसहगतत्ते तीणिपि पदानि असङ्करतो दस्सेतुं निप्पीतिकसुखतो सप्पीतिकसुखस्स विसेसदस्सनत्थं सत्थु पीतितिकदेसनाति निप्पीतिकस्सेव सुखस्स वसेन सुखसहगतो समाधि गहितोति दट्ठब्बो.

उपचारभूमियन्ति उपचारज्झानसम्पयुत्तचित्तुप्पादे. चित्तुप्पादो हि सहजातधम्मानं उप्पत्तिट्ठानताय ‘‘भूमी’’ति वुच्चति ‘‘सुखभूमियं कामावचरे’’तिआदीसु (ध. स. ९८८) विय. परित्तो समाधि कामावचरभावतो.

समाधिचतुक्कवण्णना

पठमसमन्नाहारो भावनं आरभन्तस्स ‘‘पथवी पथवी’’तिआदिना कम्मट्ठाने पठमाभिनिवेसो. तस्स तस्स झानस्स उपचारन्ति नीवरणवितक्कविचारनिकन्तिआदीनं वूपसमे थिरभूतं कामावचरज्झानं. ‘‘याव अप्पना’’ति इमिना पुब्बभागपञ्ञाय एव अभिञ्ञाभावो वुत्तो विय दिस्सतीति वदन्ति ¶ . अप्पनापञ्ञा पन अभिञ्ञाव. यदग्गेन हि पुब्बभागपञ्ञाय दन्धसीघता, तदग्गेन अप्पनापञ्ञायपीति. समुदाचारगहणतायाति समुदाचारस्स गहणभावेन, पवत्तिबाहुल्लतोति अत्थो. असुखासेवनाति कसिरभावना.

पलिबोधुपच्छेदादीनीति आदि-सद्देन भावनाविधानापरिहापनादिं सङ्गण्हाति. असप्पायसेवीति उपचाराधिगमतो पुब्बे असप्पायसेविताय दुक्खा पटिपदा. पच्छा असप्पायसेविताय दन्धा अभिञ्ञा होति. सप्पायसेविनोति एत्थापि एसेव नयो. पुब्बभागेति उपचारज्झानाधिगमतो ¶ ओरभागे. अपरभागेति ततो उद्धं. तस्स वोमिस्सकताति यो पुब्बभागे असप्पायं सेवित्वा अपरभागे सप्पायसेवी, तस्स दुक्खा पटिपदा खिप्पाभिञ्ञा. इतरस्स सुखा पटिपदा दन्धाभिञ्ञा होति. एवं पठमचतुत्थानं वोमिस्सकताय दुतियततियाति अत्थो. अकतपलिबोधुपच्छेदस्स सपरिपन्थताय पटिपदा दुक्खा होति, इतरस्स सुखा. असम्पादितअप्पनाकोसल्लस्स ञाणस्स अविसदताय दन्धा अभिञ्ञा होति, विसदताय खिप्पा अभिञ्ञा.

तण्हाअविज्जावसेनाति तण्हाअविज्जानं अभिभवानभिभववसेन. समथविपस्सनाधिकारवसेनाति समथविपस्सनासु असतो, सतो च अधिकारस्स वसेन. तण्हाय समाधिस्स उजुपटिपक्खत्ता सा समथपटिपदाय परिपन्थिनीति आह ‘‘तण्हाभिभूतस्स हि दुक्खा पटिपदा होती’’ति. अभिभवो चस्सा इतरकिलेसेहि अधिकताय अनभिभूतस्स तण्हायाति अधिकारतो वेदितब्बं. तथा अविज्जा पञ्ञाय उजुपटिपक्खाति तदभिभूतस्स दन्धाभिञ्ञता वुत्ता. अकताधिकारोति भवन्तरे अकतपरिचयो यथा पगुणं कत्वा विस्सट्ठगन्थो अप्पमत्तकेन पयोगेन सुप्पवत्ति वाचुग्गतोव होति, एवं पुब्बे कतपरिचयस्स भावना अप्पकसिरेनेव इज्झतीति आह ‘‘कताधिकारस्स सुखा’’ति. स्वायं अकतो, कतो च अधिकारो समथनिस्सितो पटिपदायं वुत्तो समाधिप्पधानत्ता पटिपदाय. विपस्सनानिस्सितो अभिञ्ञायं ञाणप्पधानत्ता अप्पनाय. किलेसिन्द्रियवसेनाति तिक्खातिक्खानं किलेसिन्द्रियानं वसेन. तेनाह ‘‘तिब्बकिलेसस्सा’’तिआदि ¶ . तत्थ किलेसा कामच्छन्दादयो, इन्द्रियानि सद्धादीनि.

यथावुत्ता पटिपदाभिञ्ञा पुग्गलाधिट्ठानाति धम्मनिद्देसम्पि पुग्गलाधिट्ठानमुखेन दस्सेतुं ‘‘यो पुग्गलो’’तिआदि वुत्तं. अप्पगुणोति न सुभावितो वसीभावं अपापितो. तेनाह ‘‘उपरिझानस्स पच्चयो भवितुं न सक्कोती’’ति. अयं परित्तोति अयं समाधि अप्पानुभावताय परित्तो. अवड्ढितेति एकङ्गुलद्वङ्गुलमत्तम्पि न वड्ढिते यथाउपट्ठिते आरम्मणे. एकङ्गुलमत्तम्पि हि वड्ढितं अप्पमाणमेवाति वदन्ति. ‘‘पगुणो सुभावितो’’ति वत्वा ‘‘उपरिझानस्स पच्चयो भवितुं सक्कोती’’ति इमिना यथा पगुणोपि उपरिझानस्स पच्चयो भवितुं असक्कोन्तो समाधि परित्तोयेव होति, न अप्पमाणो, एवं ञाणुत्तरस्स एकासनेनेव उपरिझाननिब्बत्तनेनाति सुभावितोपि उपरिझानस्स पच्चयभावसङ्खाताय सुभावितकिच्चसिद्धिया ‘‘अप्पमाणो’’त्वेव वुच्चति. अपरे पन सचे सुभावितो पगुणो वसीभावं पत्तो ¶ उपरिझानस्स पच्चयो अहोन्तोपि अप्पमाणो एव, पमाणकरानं रागादिपटिपक्खानं सुविदूरभावतोति वदन्ति. वुत्तलक्खणवोमिस्सतायाति यो अप्पगुणो उपरिझानस्स पच्चयो भवितुं न सक्कोति, वड्ढिते आरम्मणे पवत्तो, अयं परित्तो अप्पमाणारम्मणो. यो पन पगुणो उपरिझानस्स पच्चयो भवितुं सक्कोति, अवड्ढिते आरम्मणे पवत्तो, अयं अप्पमाणो परित्तारम्मणोति एवं पठमचतुत्थसमाधीनं वुत्तलक्खणस्स वोमिस्सकभावेन दुतियततियसमाधिसङ्गाहको वोमिस्सकनयो वेदितब्बो.

ततोति ततो पठमज्झानतो उद्धं. विरत्तपीतिकन्ति अतिक्कन्तपीतिकं वा जिगुच्छितपीतिकं वा. अवयवो समुदायस्स अङ्गन्ति वुच्चति, ‘‘सेनङ्गं रथङ्ग’’न्तिआदीसु वियाति आह ‘‘चतुन्नं झानानं अङ्गभूता चत्तारो समाधी’’ति.

हानं भजतीति हानभागियो, हानभागो वा एतस्स अत्थीति हानभागियो, परिहानकोट्ठासिकोति अत्थो. आलयस्स अपेक्खाय अपरिच्चजनतो ठितिं भजतीति ठितिभागियो. विसेसं भजतीति विसेसभागियो. पच्चनीकसमुदाचारवसेनाति तस्स तस्स ¶ झानस्स पच्चनीकानं नीवरणवितक्कविचारादीनं पवत्तिवसेन. तदनुधम्मतायाति तदनुरूपभूताय सतिया. सण्ठानवसेनाति सण्ठहनवसेन पतिट्ठानवसेन. ‘‘सा पन तदस्सादसङ्खाता, तदस्सादसम्पयुत्तक्खन्धसङ्खाता वा मिच्छासती’’ति सम्मोहविनोदनियं (विभ. अट्ठ. ७९९) वुत्तं. तत्थ सापेक्खस्स उपरि विसेसं निब्बत्तेतुं असक्कुणेय्यत्ता अविगतनिकन्तिका तंतंपरिहरणसतीतिपि वत्तुं वट्टति. एवञ्च कत्वा ‘‘सतिया वा निकन्तिया वा’’ति विकप्पवचनञ्च युत्तं होति. विसेसाधिगमवसेनाति विसेसाधिगमस्स पच्चयभाववसेन, विसेसं वा अधिगच्छति एतेनाति विसेसाधिगमो, तस्स वसेन. निब्बिदासहगतसञ्ञामनसिकारसमुदाचारवसेनाति आदीनवदस्सनपुब्बङ्गमनिब्बिन्दनञाणसम्पयुत्तसञ्ञाय च आभोगस्स च पवत्तिवसेन. निब्बेधभागियताति सच्चानं निब्बिज्झनपक्खिकता विपस्सनाय संवत्ततीति अत्थो.

कामसहगताति कामारम्मणा, कामसञ्ञाहि वा वोकिण्णा. अवितक्कसहगताति ‘‘कथं नु खो मे अवितक्कं झानं भवेय्या’’ति एवं अवितक्कारम्मणा अवितक्कविसया. कामञ्चायं ‘‘पठमस्स झानस्सा’’तिआदिको पाठो पञ्ञावसेन आगतो, समाधिस्सापि पनेत्थ सङ्गहो ¶ अत्थेवाति उदाहरणस्स सात्थकतं दस्सेतुं ‘‘ताय पन पञ्ञाय सम्पयुत्ता समाधीपि चत्तारो होन्ती’’ति तेसं वसेन एवं वुत्तन्ति अत्थो.

भावनामयस्स समाधिस्स इधाधिप्पेतत्ता उपचारेकग्गता ‘‘कामावचरो समाधी’’ति वुत्तं. अधिपतिं करित्वाति ‘‘छन्दवतो चे समाधि होति, मय्हम्पि एवं होती’’ति छन्दं अधिपतिं, छन्दं धुरं जेट्ठकं पुब्बङ्गमं कत्वा. लभति समाधिन्ति एवं यं समाधिं लभति, अयं वुच्चति छन्दसमाधि, छन्दाधिपतिसमाधीति अत्थो. एवं वीरियसमाधिआदयोपि वेदितब्बा.

चतुक्कभेदेति चतुक्कवसेन समाधिप्पभेदनिद्देसे. अञ्ञत्थ सम्पयोगवसेन विचारेन सह वत्तमानो वितक्को पञ्चकनये दुतियज्झाने वियोजितोपि न सुट्ठु वियोजितोति, तेन सद्धिंयेव विचारसमतिक्कमं दस्सेतुं वुत्तं ‘‘वितक्कविचारातिक्कमेन ततिय’’न्ति. द्विधा ¶ भिन्दित्वा चतुक्कभेदे वुत्तं दुतियं झानन्ति योजना. पञ्चझानङ्गवसेनाति पञ्चन्नं झानानं अङ्गभाववसेन समाधिस्स पञ्चविधता वेदितब्बा.

४०. विभङ्गेति ञाणविभङ्गे. तत्थ हि ‘‘झानविमोक्खसमाधिसमापत्तीनं संकिलेसवोदान’’न्ति, एत्थ ‘‘संकिलेस’’न्तिआदि वुत्तं. तत्थ हानभागियो धम्मोति अपगुणेहि पठमज्झानादीहि वुट्ठितस्स सञ्ञामनसिकारानं कामादिअनुपक्खन्दनं. विसेसभागियो धम्मोति पगुणेहि पठमज्झानादीहि वुट्ठितस्स सञ्ञामनसिकारानं दुतियज्झानादिअनुपक्खन्दनं. तेनाह ‘‘पठमस्स झानस्स लाभि’’न्तिआदि. तस्सत्थो (विभ. अट्ठ. ८२८) – अपगुणस्स पठमस्स झानस्स लाभीनं ततो वुट्ठितं आरम्मणवसेन कामसहगता हुत्वा सञ्ञामनसिकारा समुदाचरन्ति चोदेन्ति तुदन्ति, तस्स कामानुपक्खन्दानं सञ्ञामनसिकारानं वसेन सा पठमज्झानपञ्ञा हायति, तस्मा हानभागिनी पञ्ञा. अवितक्कसहगताति अवितक्कं दुतियं झानं सन्ततो पणीततो मनसि करोतो आरम्मणवसेन अवितक्कसहगता समुदाचरन्ति पगुणपठमज्झानतो वुट्ठितं दुतियज्झानाधिगमत्थाय चोदेन्ति तुदन्ति, तस्स दुतियज्झानानुपक्खन्दानं सञ्ञामनसिकारानं वसेन पठमज्झानपञ्ञा विसेसभूतस्स दुतियज्झानस्स उप्पत्तिया पदट्ठानताय विसेसभागिनी पञ्ञा. तंसम्पयुत्तो समाधि इधाधिप्पेतो. इमिना नयेनाति इमिना पठमज्झाने वुत्तेन विधिना दुतियज्झानादीसुपि हानभागियधम्मो, विसेसभागियधम्मो च वेदितब्बो.

दसपलिबोधवण्णना

४१. अरियमग्गसम्पयुत्तोति ¶ लोकुत्तरअप्पमाणअपरियापन्नग्गहणेन लोकियेहि असाधारणतो, सप्पीतिकादिग्गहणेन साधारणतो च अरियमग्गसम्पयुत्तो समाधि वुत्तो. भावितो होति सञ्ञाय सम्पयुत्तत्ता. तन्ति अरियमग्गसमाधिं. विसुन्ति पञ्ञाभावनाय विसुं कत्वा न वदाम.

कम्मट्ठानभावनं ¶ परिबुन्धेति उपरोधेति पवत्तितुं न देतीति पलिबोधो र-कारस्स ल-कारं कत्वा, परिपन्थोति अत्थो. उपच्छिन्दित्वाति समापनेन, सङ्गहणेन वा उपरुन्धित्वा, अपलिबोधं कत्वाति अत्थो.

आवसन्ति एत्थाति आवासो. परिच्छेदवसेन वेणियति दिस्सतीति परिवेणं. विहारे भिक्खूनं तं तं वसनट्ठानं. स्वायं आवासो. नवकम्मादीसूति आदि-सद्देन आवासस्स तदञ्ञं अभिवुद्धिकारणं सङ्गण्हाति. कारणेनाति ‘‘छायूदकसम्पन्नं सुलभभिक्ख’’न्तिआदिना कारणेन. अपेक्खवाति सालयो.

तत्राति तस्मिं पलिबोधाभावे. पाचीनखण्डराजिन्ति पुरत्थिमदिसायं पब्बतखण्डानं अन्तरे वनराजिट्ठानं. ‘‘नामा’’ति इमिना तस्स पदेसस्स अयं समञ्ञाति दस्सेति. पटिसामितमेवाति निच्चकालं पटिसामेत्वाव विहारतो निक्खमामीति दस्सेति. धातुनिधानट्ठानन्ति कायबन्धनधम्मकरणन्हानसाटिकअक्खकधातुसङ्खातानं परिभोगसरीरधातूनं निदहितट्ठानं. ईदिसस्स अयं थेरो विय अलग्गचित्तस्स. एतेन ‘‘भिक्खुना नाम आवासे एवरूपेन भवितब्ब’’न्ति ओवादो दिन्नो होति. इतो परेसुपि वत्थूसु एसेव नयो.

कुलन्ति कुलग्गहणेन कुलमनुस्सानं गहणं गामग्गहणेन गामवासीनं विय. उपट्ठाककुलम्पीति पि-सद्देन पगेव ञातिकुलन्ति दस्सेति. उद्देसत्थन्ति उद्दिसापनत्थं, पाठं उद्दिसापेत्वा सज्झायितुन्ति अत्थो. इधेवाति इमस्मिंयेव पदेसे, यत्थ कत्थचि विहारेति अत्थो. तं विहारन्ति तं कोरण्डकविहारं.

उपगतोति ¶ वस्सं उपगतो. सदाति गतकालतो पभुति विसेसतो पवारितदिवसतो पट्ठाय सब्बदा दिवसे दिवसे. परिदेवमानाति तंतंविलपनवसेन विविधं परिदेवन्ती. सब्बं पवत्तिन्ति अत्तना तत्थ दिट्ठकालतो पट्ठाय पच्छा समागमपरियोसानं दहरस्स सब्बं पवत्तिं.

कायसक्खिन्ति ¶ ‘‘पस्स इम’’न्ति मुखपटिग्गाहकं कत्वा. रथविनीतपटिपदन्ति दसकथावत्थुकित्तनपुब्बिकं रथविनीतूपमाहि विभावितं रथविनीतसुत्ते (म. नि. १.२५२) आगतं सत्तविसुद्धिपटिपदं. नालकपटिपदन्ति ‘‘मोनेय्यं ते उपञ्ञिस्स’’न्तिआदिना (सु. नि. ७०६) सत्थारा नालकत्थेरस्स देसितपटिपदं. तुवटकपटिपदन्ति ‘‘मूलं पपञ्चसङ्खाया’’तिआदिना (सु. नि. ९२२) भगवता देसितपटिपदं. तत्थ हि यथाक्कमं –

‘‘न मुनी गाममागम्म, कुलेसु सहसा चरे;

घासेसनं छिन्नकथो, न वाचं पयुतं भणे’’. (सु. नि. ७१६);

‘‘गामे च नाभिसज्जेय्य, लाभकम्या जनं न लपयेय्या’’ति. (सु. नि. ९३५) –

एवमादिका परमप्पिच्छकथा आगता. चतुपच्चयसन्तोसभावनारामतादीपकन्ति चीवरादीसु चतूसु पच्चयेसु सन्तोसस्स, भावनारामताय च पकासकं.

लब्भतीति लाभो. तेनाह ‘‘चत्तारो पच्चया’’ति. महापरिवारेति विपुलपरिवारे. पिण्डपातं ताव देन्ता बुद्धपूजापत्तचीवरादीनि तस्स परिवारानि कत्वा देन्ति, तथा चीवरादिदानेपि. बाहुल्लिकपिण्डपातिकाति पिण्डपातिका हुत्वा पच्चयबाहुल्लिका. वदन्तीति पुरिमदिवसे भिक्खाय आहिण्डनकाले यथासुतं वदन्ति. निच्चब्यावटो उपासकादीनं सङ्गण्हने.

तस्साति गणस्स. सोति गणपलिबोधो. एवन्ति इदानि वुच्चमानाकारेन गणवाचकस्स परियेसनम्पि लहुकमेव इच्छितब्बन्ति आह ‘‘योजनतो परं अगन्त्वा’’ति. अत्तनो कम्मन्ति समणधम्ममाह.

कताकतेति ¶ कते च अकते च कम्मे जाननवसेन उस्सुक्कं आपज्जितब्बं, कताकतेति वा अप्पके च महन्ते च कते, यथा ‘‘फलाफले’’ति. सचे बहुं अवसिट्ठन्ति सम्बन्धो. भारहारा सङ्घकिच्चपरिणायका.

पब्बज्जापेक्खोति ¶ सीहळदीपे किर कुलदारकानं पब्बज्जा आवाहविवाहसदिसा, तस्मा तं परिच्छिन्नदिवसं अतिक्कमेतुं न सक्का. ‘‘सचे तं अलभन्तो न सक्कोति अधिवासेतु’’न्तिआदिना समापनेन पलिबोधुपच्छेदो वुत्तो, ब्यतिरेकतो पन ‘‘सचे तं अलभन्तो सक्कोति अधिवासेतुं, अरञ्ञं पविसित्वा समणधम्मोव कातब्बो’’ति अयमत्थो दस्सितोति सङ्गहणेन पलिबोधुपच्छेदो वेदितब्बो. एस नयो सेसेसुपि.

तथाति यथा उपज्झायो गिलानो यावजीवं उपट्ठातब्बो, तथा उपसम्पादितअन्तेवासिको अत्तनो कम्मवाचं वत्वा उपसम्पादितो.

यो कोचि रोगोति मूलभूतो, अनुबन्धो वा अत्तनो उप्पन्नो. अनमतग्गेति अनु अनु अमतग्गे अनादिमति.

‘‘गन्थो’’ति इमिना गन्थपलिबोधो इध वुत्तोति आह ‘‘परियत्तिहरण’’न्ति. सज्झायादीहीति सज्झायधारणपरिचयपुच्छादीहि. इतरस्साति अब्यावटस्स. यस्स गन्थधुरं विस्सज्जेत्वा ठितस्सापि गन्थो वत्ततेव, न तस्स गन्थो पलिबोधो. यथा तम्हि तम्हि वत्थुम्हि आगतत्थेरानं, नापि सब्बेन सब्बं अगन्थपसुतस्स. मज्झिमपण्णासको आगच्छति, सुत्तपदेसानं वारानञ्च सदिसताय ब्यामुय्हनतो. पुन न ओलोकेस्सामीति कम्मट्ठानं गहेत्वा गन्थधुरं विस्सज्जेमीति अत्थो.

गामवासिकत्थेरेहीति अनुराधपुरवासीहि. अनुग्गहेत्वाति अग्गहेत्वा तत्थ परिचयं अकत्वा. पञ्चनिकायमण्डलेति दीघागमादिके पञ्चपि निकाये सिक्खितपरिसाय. परिवत्तेस्सामीति वण्णयिस्सामि. सुवण्णभेरिन्ति सेट्ठभेरिं. कतमाचरियानं उग्गहोति कतमेसं आचरियानं उग्गहो, केन परिवत्तीयतीति अधिप्पायो. आचरियमग्गोति आचरियानं कथामग्गो. अत्तनो आचरियानन्ति अत्तनो कथेतुं युत्तानं आचरियानं. सुविनिच्छिता सब्बा तिपिटकपरियत्ति ¶ एतस्मिं अत्थीति सब्बपरियत्तिको, तेपिटकोति अत्थो. पीठे निसिन्नो ततो ओतरित्वा भूमियं तट्टिकाय निसीदित्वा. गतकस्साति पटिपत्तिगमनेन गतस्स दिट्ठसच्चस्स. चीवरं पारुपित्वाति आचरियस्स अपचितिदस्सनत्थं ¶ परिमण्डलं चीवरं पारुपित्वा. साठेय्याभावतो उजु. कारणाकारणस्स आजाननतो आजानीयो.

पोथुज्जनिकाति पुथुज्जने भवा. दुप्परिहारा बहुपरिस्सयताय. तथा हिस्सा उत्तानसेय्यकदारको, तरुणसस्सञ्च निदस्सितं. विपस्सनाय पलिबोधो समथयानिकस्स, न विपस्सनायानिकस्स. येभुय्येन हि झानलाभी समथयानिकोव होति विपस्सनासुखतो. इतरेनाति समथत्थिकेन. अवसेसा नव पलिबोधा.

कम्मट्ठानदायकवण्णना

४२. कम्मट्ठाने नियुत्तो कम्मट्ठानिको, भावनमनुयुञ्जन्तो. तेन कम्मट्ठानिकेन. परिच्छिन्दित्वाति ‘‘इमस्मिं विहारे सब्बे भिक्खू’’ति एवं परिच्छिन्दित्वा. सहवासीनं भिक्खूनं. मुदुचित्ततन्ति अत्तनि मुदुचित्ततं जनेति, अयञ्च सहवासीनं चित्तमद्दवजननादिअत्थो ‘‘मनुस्सानं पियो होती’’तिआदिनयप्पवत्तेन मेत्तानिसंससुत्तेन (अ. नि. ११.१५; पटि. म. २.२२; मि. प. ४.४.६) दीपेतब्बो. अनोलीनवुत्तिको होति सम्मापटिपत्तियं. दिब्बानिपि आरम्मणानि पगेव इतरानि. सब्बत्थ सब्बस्मिं समणकरणीये, सब्बस्मिं वा कम्मट्ठानानुयोगे. पुब्बासेवनवसेन अत्थयितब्बं. योगस्स भावनाय अनुयुञ्जनं योगानुयोगो, तदेव करणीयट्ठेन कम्मं, तस्स योगानुयोगकम्मस्स ठानं निप्फत्तिहेतु.

निच्चं परिहरितब्बत्ताति सब्बत्थककम्मट्ठानं विय एकदाव अननुयुञ्जित्वा सब्बकालं परिहरणीयत्ता अनुयुञ्जितब्बत्ता. एवमादिगुणसमन्नागतन्ति पियभावादीहि गुणेहि सम्पन्नं. कल्याणमित्तो हि सद्धासम्पन्नो होति सीलसम्पन्नो सुतसम्पन्नो चागसम्पन्नो वीरियसम्पन्नो सतिसम्पन्नो समाधिसम्पन्नो पञ्ञासम्पन्नो. तत्थ सद्धासम्पत्तिया सद्दहति तथागतस्स बोधिं, कम्मफलञ्च, तेन सम्मासम्बोधिया हेतुभूतं सत्तेसु हितेसितं न परिच्चजति. सीलसम्पत्तिया सत्तानं पियो होति गरु भावनीयो चोदको पापगरही वत्ता वचनक्खमो, सुतसम्पत्तिया सच्चपटिच्चसमुप्पादादिपटिसंयुत्तानं गम्भीरानं कथानं कत्ता होति, चागसम्पत्तिया अप्पिच्छो होति ¶ सन्तुट्ठो पविवित्तो असंसट्ठो, वीरियसम्पत्तिया आरद्धवीरियो होति अत्तहितपरहितपटिपत्तियं, सतिसम्पत्तिया ¶ उपट्ठितस्सति होति, समाधिसम्पत्तिया अविक्खित्तो समाहितचित्तो, पञ्ञासम्पत्तिया अविपरीतं पजानाति. सो सतिया कुसलाकुसलानं धम्मानं गतियो समन्नेसमानो पञ्ञाय सत्तानं हिताहितं यथाभूतं जानित्वा समाधिना तत्थ एकग्गचित्तो हुत्वा वीरियेन सत्ते अहितं निसेधेत्वा हिते नियोजेति. तेन वुत्तं ‘‘पियो…पे… नियोजकोति एवमादिगुणसमन्नागत’’न्ति.

तं पन कल्याणमित्तं परमुक्कंसगतं दस्सेतुं ‘‘ममं ही’’तिआदि वुत्तं. कारकभावं योगकम्मस्स. पकासेति अत्तानं पटिपत्तिया अमोघभावदस्सनेन समुत्तेजनाय, सम्पहंसनाय च, ननु कथेसि पवेणिपालनत्थन्ति अधिप्पायो. एवरूपोति पेसलो हुत्वा बहुस्सुतो. तन्तिधरोति सुत्तधरो तत्थ केहिचिपि असंहीरो. वंसानुरक्खकोति बुद्धानुबुद्धवंसस्स अनुरक्खको. पवेणिपालकोति पवेणिया आचरियुग्गहणस्स अनुपालको. आचरियमतिकोति आचरियमतियं नियुत्तो तस्सा अनतिवत्तनतो. न अत्तनोमतिं पकासेति कथेतीति न अत्तनोमतिको, अत्तनो मतिं पग्गय्ह वत्ता न होतीति अत्थो.

‘‘पुब्बे वुत्तखीणासवादयो’’तिआदि एकच्चखीणासवतो बहुस्सुतोव कम्मट्ठानदाने सेय्योति दस्सनत्थं आरद्धं. तत्थ पुब्बे वुत्तखीणासवादयोति ‘‘यं कम्मट्ठानं गहेतुकामो’’तिआदिना वुत्तखीणासवादिका. उग्गहपरिपुच्छानं विसोधितत्ताति उग्गहेतब्बतो ‘‘उग्गहो’’ति लद्धनामाय कम्मट्ठानुपकाराय पाळिया, तदत्थं परिपुच्छनतो ‘‘परिपुच्छा’’ति लद्धसमञ्ञाय अत्थसंवण्णनाय च विसेसतो सोधितत्ता निग्गुम्बं निज्जटं कत्वा गहितत्ता. इतो चितो च सुत्तञ्च कारणञ्च सल्लक्खेत्वाति पञ्चसुपि निकायेसु इतो चितो च तस्स तस्स कम्मट्ठानस्स अनुरूपं सुत्तपदञ्चेव सुत्तानुगतं युत्तिञ्च सुट्ठु उपलक्खेत्वा. सप्पायासप्पायं योजेत्वाति यस्स कम्मट्ठानं आचिक्खति, तस्स उपकारानुपकारं युत्तिं मग्गनेन योजेत्वा, समादाय वा सम्मदेव हदये ठपेत्वाति अत्थो. महामग्गं दस्सेन्तोति कम्मट्ठानविधिं महामग्गं कत्वा दस्सेन्तो.

सब्बत्थाति ¶ तत्थ तत्थ विहारे. वत्तपटिपत्तिं कुरुमानेनाति पविट्ठकाले आगन्तुकवत्तं, निक्खमनकाले गमिकवत्तन्ति यथारहं तं तं वत्तं पूरेन्तेन. सब्बपारिहारियतेलन्ति सब्बेसं अङ्गानं ¶ , सब्बेसं वा भिक्खूनं अत्थाय परिहरितब्बतेलं. ठपेमीति अनुजानापनं. यं तं सम्मावत्तं पञ्ञत्तन्ति सम्बन्धो. एकदिवसं सायं विस्सज्जितेनापीति योजना. आरोचेतब्बं आगमनकारणं. सप्पायवेला सरीरचित्तानं कल्लसमयो.

चरियावण्णना

४३. सन्ताने रागस्स उस्सन्नभावेन चरणं पवत्ति रागचरिया, सा सस्सतासयादयो विय दट्ठब्बा. तथा दोसचरियादयो. संसग्गो सम्पयोगारहवसेन वेदितब्बो, यथा ‘‘रागमोहचरिया दोसमोहचरिया’’तिआदि. सन्निपातो एकसन्ततिपरियापन्नतावसेन, यथा ‘‘रागदोसचरिया रागदोसमोहचरिया’’तिआदि. इमा एव हि सन्धाय ‘‘अपरापि चतस्सो’’ति वुत्तं. तथाति यथा रागादीनं, तथा सद्धादीनं संसग्गसन्निपातवसेन सद्धाबुद्धिचरिया सद्धावितक्कचरिया बुद्धिवितक्कचरिया सद्धाबुद्धिवितक्कचरियाति. इमा अपरापि चतस्सो. एवन्ति संसग्गसन्निपातवसेन. संसग्गन्ति संसज्जनं मिस्सीकरणं ‘‘रागसद्धाचरिया दोससद्धाचरिया’’तिआदिना. अनेकाति तेसट्ठि, ततो अतिरेकापि वा, ता पन असम्मोहन्तेन संयुत्तसुत्तटीकायं वित्थारतो दस्सिताति तत्थ वुत्तनयेन वेदितब्बा. ‘‘पकती’’ति इमिना असति पटिपक्खभावनायं तत्थ तत्थ सन्ताने चरियाय सभावभूततं दस्सेति. उस्सन्नता अञ्ञधम्मेहि रागादीनं अधिकता, यतो रागचरियादीनं पच्चयसमवाये रागादयो बलवन्तो होन्ति, अभिण्हञ्च पवत्तन्ति. तासं वसेनाति छन्नं मूलचरियानं वसेन छळेव पुग्गला होन्ति. अञ्ञथा अनेकपुग्गला सियुं, तथा च सति अधिप्पेतत्थसिद्धि च न सियाति अधिप्पायो.

सद्धा बलवती होति रागुस्सन्ने सन्ताने तदनुगुणस्स धम्मस्स नियोगतो अधिकभावसम्भवतो. तेनाह ‘‘रागस्स आसन्नगुणत्ता’’ति, सिनेहपरियेसनापरिच्चजनेहि सभागधम्मत्ताति अत्थो. सभागो हि दूरेपि आसन्नेयेवाति सभागतालक्खणमिध आसन्नग्गहणं. तत्थ सद्धाय सिनिय्हनं पसादवसेन अकालुस्सियं अलूखता ¶ , रागस्स पन रञ्जनवसेन. सद्धाय परियेसनं अधिमुच्चनवसेन तन्निन्नता, रागस्स तण्हायनवसेन. सद्धाय अपरिच्चजनं ओकप्पनवसेन अनुपक्खन्दनं, रागस्स अभिसङ्गवसेनाति एवं भिन्नसभावानम्पि ¶ तेसं यथा अलूखतादिसामञ्ञेन सभागता, एवं तंसमङ्गीनम्पि पुग्गलानन्ति आह ‘‘रागचरितस्स सद्धाचरितो सभागो’’ति.

पञ्ञा बलवती होति दोसुस्सन्ने सन्ताने तदनुगुणस्स धम्मस्स नियोगतो अधिकभावसम्भवतो. तेनाह ‘‘दोसस्स आसन्नगुणत्ता’’ति, अनल्लीयनपरियेसनपरिवज्जनेहि सभागधम्मत्ताति अत्थो. तत्थ पञ्ञाय आरम्मणस्स अनल्लीयनं तस्स यथासभावावबोधवसेन विसंसट्ठता, दोसस्स पन ब्यापज्जनवसेन. पञ्ञाय परियेसनं यथाभूतदोसपविचयो, दोसस्स अभूतदोसनिजिगीसा. पञ्ञाय परिवज्जनं निब्बिन्दनादिवसेन ञाणुत्रासो, दोसस्स अहिताधानवसेन छड्डनन्ति एवं भिन्नसभावानम्पि तेसं यथा अनल्लीयनादिसामञ्ञेन सभागता, एवं तंसमङ्गीनम्पि पुग्गलानन्ति आह ‘‘दोसचरितस्स बुद्धिचरितो सभागो’’ति.

अन्तरायकरा वितक्काति मिच्छावितक्का मिच्छासङ्कप्पा उप्पज्जन्ति मोहुस्सन्ने सन्ताने तदनुगुणस्स धम्मस्स येभुय्येन पवत्तिसब्भावतो. तेनाह ‘‘मोहस्स आसन्नलक्खणत्ता’’ति, अनवट्ठानचञ्चलभावेहि सभागधम्मत्ताति अत्थो. तत्थ वितक्कस्स अनवट्ठानं परिकप्पवसेन सविप्फारताय, मोहस्स सम्मूळ्हतावसेन ब्याकुलताय. तथा वितक्कस्स लहुपरिवितक्कनेन तदङ्गचलताय चञ्चलता, मोहस्स अनोगाळ्हतायाति एवं भिन्नसभावानम्पि तेसं यथा अनवट्ठानादिसामञ्ञेन सभागता, एवं तंसमङ्गीनम्पि पुग्गलानन्ति आह ‘‘मोहचरितस्स वितक्कचरितो सभागो’’ति.

तण्हा रागोयेव सभावतो, तस्मा रागचरियाविनिमुत्ता तण्हाचरिया नत्थीति अत्थो. तंसम्पयुत्तोति तेन रागेन सम्पयुत्तो, दोसादयो विय तेन विप्पयुत्तो नत्थीति अधिप्पायो. तदुभयन्ति तण्हामानद्वयं. नातिवत्ततीति सभावतो, सम्पयोगवसेन च न अतिक्कमित्वा वट्टति. कामञ्चेत्थ यथा रागदोसेहि सम्पयोगवसेन सह ¶ वत्तमानस्सपि मोहस्स उस्सन्नतावसेन विसुं चरियाभावो, न केवलं मोहस्सेव, तथा सद्धाबुद्धिवितक्कानं. एवं रागेन सतिपि सम्पयोगे मानस्सापि विसुं चरियाभावो युत्तो सिया, एवं सन्तेपि रागपटिघमानदिट्ठिविचिकिच्छाविज्जानं विय अनुसयट्ठो इमेसं रागादीनंयेव आवेणिको चरियट्ठोति, नत्थेव मानचरिया. यतो चरिया ‘‘पकती’’ति वुत्ता. पकति च सभावोति. एतेनेव दिट्ठियापि विसुं चरियाभावाभावो संवण्णितोति दट्ठब्बो. अट्ठकथायं पन मोहचरियन्तोगधाव ¶ दिट्ठिचरियाति दस्सेतुं ‘‘मोहनिदानत्ता चा’’तिआदि वुत्तं. तत्थ च-सद्देन सम्पयोगं समुच्चिनोति मोहनिदानत्ता, मोहसम्पयुत्तत्ता चाति.

४४. किं सप्पायन्ति कीदिसं सेनासनादिसप्पायं. पुब्बाचिण्णं पुरिमजातीसु आचरितं. एकच्चेति उपतिस्सत्थेरं सन्धायाह. तेन हि विमुत्तिमग्गे तथा वुत्तं. पुब्बे किराति किर-सद्दो अरुचिसूचनत्थो. इट्ठप्पयोगो मनापकिरिया. सुभकम्मबहुलो येभुय्येन सोभनकम्मकारी. न सब्बे रागचरिता एव होन्ति, अलुद्धानम्पि पुब्बे इट्ठप्पयोगसुभकम्मबहुलतासम्भवतो, सग्गा चवित्वा इधूपपत्तिसम्भवतो च. एतेन असति पुब्बहेतुनियामे यथावुत्तकारणमत्तेन न तेसं लुद्धता, लुद्धभावहेतुका च रागचरियाति इममत्थं दस्सेति.

इतरेति छेदनादिकम्मबहुला निरयादितो इधूपपन्ना च न सब्बे दोसमोहचरिता एव होन्तीति योजना. इधापि यथावुत्तकारणस्स कोधनभावे, मूळ्हभावे च अनेकन्तिकत्ता दोसमोहचरिततायपि अनेकंसिकता वेदितब्बा. धातूनं उस्सदनियमो यदि पमाणतो, सो नत्थि, अथ सामत्थियतो, सोपि एकंसिको न उपलब्भतीति दस्सेन्तो आह ‘‘यथावुत्तेनेव नयेन उस्सदनियमो नाम नत्थी’’ति. तत्थ यथावुत्तेनेवाति ‘‘द्विन्नं पन धातून’’न्तिआदिना वुत्तप्पकारेनेव. दोसनियमेति सेम्हादिदोसाधिकताय रागादिचरितो होतीति दोसवसेन चरियानियमे ‘‘सेम्हाधिको रागचरितो’’ति वत्वा पुन ‘‘सेम्हाधिको मोहचरितो’’ति, ‘‘वाताधिको मोहचरितो’’ति वत्वा पुन ‘‘वाताधिको रागचरितो’’ति च वुत्तत्ता तम्पि दोसवसेन नियमवचनं पुब्बापरविरुद्धमेव. अपरिच्छिन्नवचनन्ति ¶ परिच्छेदकारिकाय पञ्ञाय न परिच्छिन्दित्वा वुत्तवचनं, अनुपपरिक्खितवचनन्ति अत्थो.

उस्सदकित्तनेति विपाककथायं गहितउस्सदकित्तने. पुब्बहेतुनियामेनाति पुरिमभवे पवत्तलोभादिहेतुनियामेन. नियामोति च तेसंयेव लोभादीनं पटिनियतो लुब्भनादिसभावो दट्ठब्बो. लोभो उस्सदो एतेसन्ति लोभुस्सदा, उस्सन्नलोभा, लोभाधिकाति अत्थो. अमोहुस्सदा चाति एत्थ च-सद्दो सम्पिण्डनत्थो. तेन ये इमे लोभुस्सदतादीनं पच्चेकं वोमिस्सतो च चुद्दस पभेदा इच्छिता, ते अनवसेसतो सम्पिण्डेति यथावुत्तेसु छस्वेव तेसं अन्तोगधत्ता. फलभूता चेत्थ लोभुस्सदतादयो दट्ठब्बा.

इदानि ¶ तं नेसं लोभुस्सदतादीनं पच्चेकं वोमिस्सकतादिं विभागेन दस्सेतुं ‘‘यस्स ही’’तिआदि आरद्धं. कम्मायूहनक्खणेति कम्मकरणवेलायं. लोभो बलवाति लोभो तज्जाय पच्चयसामग्गिया सामत्थियतो अधिको होति. अलोभो मन्दोति तप्पटिपक्खो अलोभो दुब्बलो. कथं पनेते लोभालोभा अञ्ञमञ्ञं उजुविपच्चनीकभूता एकक्खणे पवत्तन्तीति? न खो पनेतं एवं दट्ठब्बं ‘‘एकक्खणे पवत्तन्ती’’ति. निकन्तिक्खणं पन आयूहनपक्खियमेव कत्वा एवं वुत्तं. एसेव नयो सेसेसुपि. परियादातुन्ति अभिभवितुं न सक्कोति. यो हि ‘‘एवंसुन्दरं एवंविपुलं एवंमहग्घञ्च न सक्का दातु’’न्तिआदिना अमुत्तचागतादिवसेन पवत्ताय चेतनाय सम्पयुत्तो अलोभो, सो सम्मदेव लोभं परियादातुं न सक्कोति. दोसमोहानं अनुप्पत्तिया, तादिसपच्चयलाभेन च अदोसामोहा बलवन्तो. तस्माति लोभादोसामोहानं बलवभावतो, अलोभदोसमोहानञ्च दुब्बलभावतोति वुत्तमेव कारणं पच्चामसति. सोति तंसमङ्गीपुग्गलो. तेन कम्मेनाति तेन लोभादिउपनिस्सयवता कुसलकम्मुना. सुखसीलोति सखिलो. तमेवत्थं ‘‘अक्कोधनो’’ति परियायेन वदति.

पुरिमनयेनेवाति पुब्बे वुत्तनयानुसारेन मन्दा अलोभादोसा लोभदोसे परियादातुं न सक्कोन्ति, अमोहो पन बलवा मोहं परियादातुं सक्कोतीति एवं तत्थ तत्थ वारे यथारहं अतिदेसत्थो ¶ वेदितब्बो. दुट्ठोति कोधनो. दन्धोति मन्दपञ्ञो. सीलकोति सुखसीलो.

एत्थ च लोभवसेन, दोसमोहलोभदोसलोभमोहदोसमोहलोभदोसमोहवसेनाति तयो एकका, तयो दुका, एको तिकोति लोभादिउस्सदवसेन अकुसलपक्खेयेव सत्त वारा, तथा कुसलपक्खे अलोभादिउस्सदवसेनाति चुद्दस वारा लब्भन्ति. तत्थ अलोभदोसामोहा, अलोभादोसमोहा, अलोभदोसमोहा बलवन्तोति आगतेहि कुसलपक्खे ततियदुतियपठमवारेहि दोसुस्सदमोहुस्सददोसमोहुस्सदवारा गहिता एव होन्ति, तथा अकुसलपक्खे लोभादोसमोहा, लोभदोसामोहा, लोभादोसामोहा बलवन्तोति आगतेहि ततियदुतियपठमवारेहि अदोसुस्सदअमोहुस्सदअदोसामोहुस्सदवारा गहिता एवाति अकुसलकुसलपक्खेसु तयो तयो वारे अन्तोगधे कत्वा अट्ठेव वारा दस्सिता. ये पन उभयेसं मिस्सतावसेन लोभालोभुस्सदवारादयो अपरे एकूनपञ्ञास वारा दस्सेतब्बा, ते अलब्भनतो एव न दस्सिता. न हि एकस्मिं सन्ताने अन्तरेन अवत्थन्तरं ‘‘लोभो च बलवा, अलोभो चा’’तिआदि युज्जतीति, पटिपक्खवसेन वा हि एतेसं बलवदुब्बलभावो, सहजातधम्मवसेन ¶ वा. तत्थ लोभस्स ताव पटिपक्खवसेन अलोभेन अनधिभूतताय बलवभावो, तथा दोसमोहानं अदोसामोहेहि. अलोभादीनं पन लोभादिअभिभवनतो, सब्बेसञ्च समानजातियमभिभुय्य पवत्तिवसेन सहजातधम्मतो बलवभावो. तेन वुत्तं अट्ठकथायं ‘‘लोभो बलवा अलोभो मन्दो, अदोसामोहा बलवन्तो दोसमोहा मन्दा’’ति. सो च नेसं मन्दबलवभावो पुरिमूपनिस्सयतो तथा आसयस्स परिभावितताय वेदितब्बो.

यो लुद्धोति वुत्तोति यो उस्सदकित्तने ‘‘लुद्धो’’ति वुत्तो, अयं इध चरियाविचारे ‘‘रागचरितो’’ति वेदितब्बो. दुट्ठदन्धाति ‘‘दुट्ठो, दन्धो’’ति च वुत्ता यथाक्कमं दोसमोहचरिता. पञ्ञवाति सातिसयं सप्पञ्ञो. यतो सद्धावितक्केसु विज्जमानेसुपि बुद्धिचरितोति वुच्चति. अलोभादोसानं ¶ बलवभावो सद्धूपनिस्सयताय विना न होतीति आह ‘‘अलुद्धअदुट्ठा पसन्नपकतिताय सद्धाचरिता’’ति.

अयञ्च नयो साधारणतो वुत्तोति निब्बत्तितपुब्बहेतुनियामवसेनेव बुद्धिचरितादिकेपि दस्सेतुं ‘‘यथा वा’’तिआदि वुत्तं. तत्थ अमोहपरिवारेनाति अमोहपरिक्खित्तेन, उपनिस्सयतो सम्पयोगतो च पञ्ञाय अभिसङ्खतेनाति अत्थो. सेसपदत्तयेपि एसेव नयो. लोभादिना वोमिस्सपरिवारेनाति एत्थ लोभमोहादिना अञ्ञमञ्ञअविरुद्धवोमिस्सपरिवारेनाति अत्थो. अविरोधो च युगग्गाहवसेन अप्पवत्तिया वेदितब्बो. तथा हि सद्धानुसारिधम्मानुसारिगोत्तानि अञ्ञमञ्ञम्पि भिन्नसभावानेव. एकंसेन च मिस्सकचरियापि सम्पटिच्छितब्बा पुब्बहेतुनियामेन चरियासिद्धितो. तथा चेव उस्सदकित्तनं पवत्तं यथारहं लोभालोभादीनं विपाकस्स पच्चयभावतो. तेनाह पटिसम्भिदामग्गे (पटि. म. १.२३२) –

‘‘गतिसम्पत्तिया ञाणसम्पयुत्ते कतमेसं अट्ठन्नं हेतूनं पच्चया उपपत्ति होति? कुसलकम्मस्स जवनक्खणे तयो हेतू कुसला तस्मिं खणे जातचेतनाय सहजातपच्चया होन्ति, तेन वुच्चति कुसलमूलपच्चयापि सङ्खारा. निकन्तिक्खणे द्वे हेतू अकुसला तस्मिं खणे जातचेतनाय सहजातपच्चया होन्ति, तेन वुच्चति अकुसलमूलपच्चयापि सङ्खारा. पटिसन्धिक्खणे तयो हेतू अब्याकता तस्मिं खणे जातचेतनाय सहजातपच्चया होन्ति, तेन वुच्चति नामरूपपच्चयापि विञ्ञाणं, विञ्ञाणपच्चयापि नामरूप’’न्ति –

आदि ¶ . पुब्बहेतुनियामेन च यथा तिहेतुकस्स पञ्ञावेय्यत्तियं, न तथा दुहेतुकस्स. यथा च दुहेतुकस्स इतिकत्तब्बता नेपक्कं, न तथा अहेतुकस्स. एवं लोभुस्सदादयो पुग्गला रागचरितादयो होन्तीति निट्ठमेत्थ गन्तब्बन्ति. यथावुत्तमत्थं निगमवसेन दस्सेतुं ‘‘एवं लोभादीसू’’तिआदि वुत्तं.

४५. तत्राति ¶ तस्मिं पुच्छावचने. नयोति जानननयो. पुग्गलाधिट्ठानेन वुत्तोपि अत्थो धम्ममुखेनेव पञ्ञायतीति धम्माधिट्ठानेनाह ‘‘चरियायो विभावये’’ति. पकतिगमनेनाति अकित्तिमेन सभावगमनेन. चातुरियेनाति चातुरभावेन सिङ्गारेन. उक्कुटिकन्ति असम्फुट्ठमज्झं. खणन्तो वियाति भूमिं खणन्तो विय. अनुकड्ढितन्ति पादनिक्खेपसमये कड्ढन्तो विय पादं निक्खिपति. तेनस्स पदं अनुकड्ढितं पच्छतो अञ्छितं होति. परिब्याकुलायाति परितो आलुळिताय. छम्भितो वियाति वित्थायन्तो विय. भीतो वियाति केचि. सहसानुपीळितन्ति अग्गपादेन, पण्हिया च सहसाव सन्निरुज्झितं. विवट्टच्छदस्साति विनिवट्टच्छदनस्स पहीनकिलेसस्स. इदमीदिसं पदन्ति भगवतो पदं दिस्वा वदति.

पासादिकन्ति पसादावहं. मधुराकारन्ति इट्ठाकारं. थद्धाकारन्ति थम्भिताकारं. अतरमानोति नतरमानो, सणिकन्ति अत्थो. समोधायाति सम्मदेव ओधाय अविक्खिपित्वा. निपज्जित्वाति कायपसारणलक्खणाय निपज्जाय सेय्याय निपज्जित्वा सयति निद्दायति. पक्खित्तकायोति अवक्खित्तकायो अवसो विय सहसा पतितकायो. दुस्सण्ठानन्ति विरूपसन्निवेसं. विक्खित्तकायोति इतो चितो च खित्तअङ्गपच्चङ्गो.

सम्परिवत्तकन्ति सम्परिवत्तित्वा. आलोळयमानो वालिकाकचवरानि आकुलयन्तो.

निपुणमधुरसमसक्कच्चकारीति सुकोसल्लं सुन्दरं अविसमं साभिसङ्खारञ्च करणसीलो. गाळ्हथद्धविसमकारीति थिरं असिथिलं विसमञ्च करणसीलो. अपरिच्छिन्नं अपरिनिट्ठितं.

मुखपूरकन्ति मुखस्स पूरणं महन्तं. अरसपटिसंवेदीति नरसपटिसंवेदी. भाजने छड्डेन्तोति भोजनभाजने सित्थानि छड्डेन्तो. मुखं मक्खेन्तोति बहिमुखं मक्खेन्तो.

किलन्तरूपो ¶ वियाति तस्स असहनेन खेदप्पत्तो विय. अञ्ञाणुपेक्खायाति अञ्ञाणभूताय उपेक्खाय. अञ्ञाणसङ्खाताय उपेक्खायाति केचि.

मायादीसु ¶ सन्तदोसपटिच्छदनलक्खणा माया. असन्तगुणपकासनलक्खणं साठेय्यं. उन्नतिलक्खणो मानो. असन्तगुणसम्भावनामुखेन पटिग्गहणे अमत्तञ्ञुतालक्खणा पापिच्छता. सन्तगुणसम्भावनामुखेन पटिग्गहणे अमत्तञ्ञुतालक्खणा महिच्छता. सकलाभेन असन्तुस्सनलक्खणा असन्तुट्ठिता. विज्झनट्ठेन सिङ्गं, सिङ्गारतानागरिकभावसङ्खातं किलेससिङ्गं. अत्तनो सरीरस्स, चीवरादिपरिक्खारस्स च मण्डनवसेन पवत्तं लोलुप्पं चापल्यं. एवमादयोति एत्थ आदि-सद्देन अहिरिकानोत्तप्पमदप्पमादादयो सङ्गय्हन्ति.

परापराधस्स उपनय्हनलक्खणो उपनाहो. परेसं गुणमक्खणलक्खणो मक्खो. परस्स गुणे डंसित्वा अपनेन्तो विय युगग्गाहलक्खणो पळासो. परसम्पत्तिउसूयनलक्खणा इस्सा. अत्तसम्पत्तिनिगूहनलक्खणं मच्छरियं. इध आदि-सद्देन दोवचस्सतापापमित्ततादीनं सङ्गहो दट्ठब्बो.

अनुस्साहनं थिनं. असत्तिविघातो मिद्धं. चेतसो अवूपसमो उद्धच्चं. विप्पटिसारो कुक्कुच्चं. संसयो विचिकिच्छा. अयोनिसो दळ्हग्गाहो आधानग्गाहिता. यथागहितस्स मिच्छागाहस्स दुब्बिवेठियता दुप्पटिनिस्सग्गियता. इध आदि-सद्देन मुट्ठसच्चअसम्पजञ्ञादीनं सङ्गहो दट्ठब्बो.

मुत्तचागताति विस्सट्ठचागता निस्सङ्गपरिच्चागो. यथा मायादयो, तथा पवत्ता अकुसलक्खन्धा, यथा अरियानं दस्सनकामतादयो, तथा पवत्ता कुसलक्खन्धा वेदितब्बा.

पसादनीयट्ठानं नाम वत्थुत्तयं. संवेजनीयट्ठानानि जातिआदीनि. कुसलानुयोगेति कुसलधम्मभावनायं. ‘‘एवञ्च एवञ्च करिस्सामी’’ति किच्चानं रत्तिभागे परिवितक्कनं रत्तिं धूमायना. तथावितक्कितानं तेसं दिवसभागे अनुट्ठानं दिवा पज्जलना. हुराहुरं धावनाति इतो चितो च तत्थ तत्थ आरम्मणे चित्तवोसग्गो. तेनेवाह ‘‘इदं पुरे चित्तमचारि चारिकं, येनिच्छकं ¶ यत्थकामं यथासुख’’न्ति (ध. प. ३२६), ‘‘चित्तमस्स विधावती’’ति (सं. नि. १.५५) च.

धम्मप्पवत्तिदस्सनादि ¶ च पाळियं, अट्ठकथायञ्च अनागतमेवाति न सक्का वत्तुन्ति ‘‘सब्बाकारेना’’ति वुत्तं. किञ्चि किञ्चि आगतम्पि अत्थेवाति हि अधिप्पायो. ‘‘न सारतो पच्चेतब्ब’’न्ति वत्वा तत्थ कारणं दस्सेन्तो ‘‘रागचरितस्स ही’’तिआदिमाह. अप्पमादविहारिनोति तत्थ विनिधाय भावं पटिपज्जनेन अप्पमादकारिनो. भिन्नलक्खणा इरियापथादयोति चातुरियेन अचातुरियेन सणिकं, सहसा च गमनादयो. न उपपज्जन्तीति न युज्जन्ति. पुच्छित्वा जानितब्बन्ति धम्मप्पवत्तिआदिं पुच्छित्वा जानितब्बं.

४६. सप्पायं हितं, किलेसविघातीति अत्थो. अधोतवेदिकन्ति अपरिसुद्धपरिक्खेपवेदिकं. भूमट्ठकन्ति भूमितलेयेव उट्ठापितं उपरिमतलरहितं. एकतो ओनतस्स पब्बतपादस्स हेट्ठाभागो अकतभित्तिभूमिपरिकम्मो अकतपब्भारो. जतुकाभरितन्ति अधोमुखाहि ओलम्बमानमुखाहि खुद्दकवग्गुलीहि परिपुण्णं. ओलुग्गविलुग्गन्ति छिन्नभिन्नं. उज्जङ्गलं लूखधूसरं छायूदकरहितं. सीहब्यग्घादिभयेन सासङ्कं. दुरूपन्ति विरूपं. दुब्बण्णन्ति असुन्दरवण्णं, दुस्सण्ठानं वा. जालाकारेन कतपूवं जालपूवं. साणि विय खरसम्फस्सन्ति साणिफलको विय दुक्खसम्फस्सं. भारिकभावेन, अन्तरन्तरा तुन्नकरणेन च किच्छपरिहरणं. आणिगण्ठिकाहतोति आणिना, गण्ठिया च हतसोभो. इदं रागचरितस्स सप्पायं, एवमस्स किलेससमुदाचारो न होतीति अधिप्पायो. एसेव नयो सेसेसुपि.

दिसामुखन्ति दिसाभिमुखं, अब्भोकासाभिमुखन्ति अधिप्पायो. महाकसिणन्ति महन्तं कसिणमण्डलं. सेसं सेनासनादीसु यं वत्तब्बं मोहचरितस्स, तं दोसचरितस्स वुत्तसदिसमेव.

वितक्कविधावनस्सेव पच्चयो होति यथा तं आयस्मतो मेघियत्थेरस्स. दरीमुखेति पब्बतविवरे. परित्तन्ति सुप्पसरावमत्तं.

पभेदपरिच्छेदतो निदानपरिच्छेदतो विभावनपरिच्छेदतो सप्पायपरिच्छेदतोति पच्चेकं परिच्छेद-सद्दो योजेतब्बो. विभावनाति ‘‘अयं रागचरितो’’तिआदिना जाननविभावना. एकच्चकसिणानुस्सतिट्ठानमत्तस्स ¶ पसङ्गेन कथितत्ता वुत्तं ‘‘न च ताव चरियानुकूलं कम्मट्ठानं सब्बाकारेन आविकत’’न्ति.

चत्तालीसकम्मट्ठानवण्णना

४७. सङ्खातनिद्देसतोति ¶ सङ्खातानं ‘‘चत्तालीसाया’’ति सङ्ख्यावसेन गहितानं उद्दिट्ठानं निद्देसतो. ‘‘एत्थ एत्तकानि उपचारज्झानावहानि, एत्तकानि अप्पनाज्झानावहानी’’ति उपचारप्पनावहतो. ‘‘एत्तकानि एकज्झानिकानि, एत्तकानि दुकतिकज्झानिकानि, एत्तकानि सकलज्झानिकानी’’ति झानप्पभेदतो. ‘‘एतेसु अङ्गसमतिक्कमो, एतेसु आरम्मणसमतिक्कमो’’ति एवं समतिक्कमतो. ‘‘एत्तकानेत्थ वड्ढेतब्बानि, एत्तकानि न वड्ढेतब्बानी’’ति वड्ढनावड्ढनतो. आरम्मणतोति सभावधम्मनिमित्तनवत्तब्बवसेन, चलिताचलितवसेन च आरम्मणविभागतो. भूमितोति कामावचरादिभूमिविभागतो. गहणतोति दिट्ठादिवसेन गहणविभागतो. पच्चयतोति आरुप्पादीनं यथारहं पच्चयभावतो. चरियानुकूलतोति रागचरियादीनं अनुकूलभावतो.

कम्मट्ठानानीति आरम्मणभावेन योगकम्मस्स पवत्तिट्ठानानि. चतुक्कज्झानिकाति चतुब्बिधरूपावचरज्झानवन्तो, तेसं आरम्मणभूताति अत्थो. चतुक्कनयवसेन चेतं वुत्तं. तिकचतुक्कज्झानिकेसूति तिकज्झानिकेसु पुरिमेसु ब्रह्मविहारेसु, चतुक्कज्झानिकेसु आनापानकसिणेसु. सेसेसूति वुत्तावसेसेसु एकवीसतिया कम्मट्ठानेसु.

दिब्बचक्खुना दिट्ठहदयरूपस्स सत्तस्स चित्तं आदिकम्मिको चेतोपरियञाणेन परिच्छिन्दितुं सक्कोति, न इतरस्साति कसिणफरणं चेतोपरियञाणस्स पच्चयो होति. तेन वुत्तं ‘‘परसत्तानञ्च चेतसा चित्तमञ्ञातुं समत्थो होती’’ति. ओकासेन परिच्छिन्नत्ताति अत्तनो ठितोकासेन परिच्छिन्नत्ता. तथा उग्गहकोसल्लस्स सम्पादितत्ता परिच्छिन्नाकारेनेव तानि उपतिट्ठन्ति, तस्मा न तत्थ वड्ढनाति अधिप्पायो. सचे पन कोचि वड्ढेय्य, न तेन कोचि गुणोति दस्सेन्तो आह ‘‘आनिसंसाभावा चा’’ति. ‘‘तेसु पना’’तिआदिना तमेव आनिसंसाभावं विवरति. यस्मा वड्ढितेसु कुणपरासियेव वड्ढति, अवड्ढितेपि कामरागविक्खम्भना ¶ होतियेव, तस्मा आनिसंसाभावो. विभूताति विपुलारम्मणताय सुपाकटा, वड्ढितनिमित्तताय अप्पमाणारम्मणभावेन परिब्यत्ताति अत्थो.

केवलन्ति ¶ सकलं अनवसेसं. ‘‘पथविं इम’’न्ति वचनं उपट्ठानाकारेन वुत्तं, न निमित्तस्स वड्ढनेनाति अधिप्पायो. लाभित्ताति सातिसयं लाभिताय, उक्कंसगतवसिभावतोति अत्थो. थेरो हि परमाय वसिपत्तिया अस्समण्डले अस्सं सारेन्तो विय यत्थ तत्थ निसिन्नोपि ठितोपि तं झानं समापज्जतेव. तेनस्स समन्ततो निमित्तं वड्ढितं विय उपट्ठासि. तेन वुत्तं ‘‘सब्बदिसासू’’तिआदि.

वुत्ताति धम्मसङ्गहे वुत्ता. महन्तेति विपुले. निन्नथलादिवसेन हि एकदेसे अट्ठत्वा समन्ततो गहणवसेन सकलसरीरे निमित्तं गण्हन्तस्स तं महन्तं होति. महन्ते वा सरीरे. अप्पकेति सरीरस्स एकदेसे निमित्तं गण्हातीति योजना. अप्पके वा खुद्दके दारकसरीरे. एतन्ति असुभनिमित्तं. आदीनवन्ति ‘‘असुभरासि एव वड्ढति, न च कोचि आनिसंसो’’ति वुत्तं आदीनवं.

सेसानिपि न वड्ढेतब्बानीति सङ्खेपतो वुत्तमत्थं उपपत्तितो विवरितुं ‘‘कस्मा’’तिआदि वुत्तं. पिचुपिण्डादिवसेन उपट्ठहन्तम्पि निमित्तं वातसङ्घातसन्निस्सयन्ति कत्वा वुत्तं ‘‘वातरासियेव वड्ढती’’ति. ओकासेन परिच्छिन्नन्ति नासिकग्गमुखनिमित्तादिओकासेन सपरिच्छेदं. वायोकसिणवड्ढने विय न एत्थ कोचि गुणो, केवलं वातवड्ढनमेवाति आह ‘‘सादीनवत्ता’’ति. तेसन्ति ब्रह्मविहारानं. निमित्तन्ति आरम्मणं. न च तेन अत्थो अत्थीति तेन सत्तरासिवड्ढनेन पथवीकसिणादिवड्ढने विय किञ्चि पयोजनं नत्थि. परिग्गहवसेनाति अपरिग्गहितस्स भावनाविसयस्स परिग्गहवसेन, न निमित्तवड्ढनवसेन. तेनाह ‘‘एकावासद्विआवासादिना’’तिआदि. एत्थाति ब्रह्मविहारभावनायं. यदयन्ति यं पटिभागनिमित्तं अयं योगी. सीमासम्भेदेनेव हेत्थ उपचारज्झानुप्पत्ति, न निमित्तुप्पत्तिया. यदि एवं कथं परित्तादिआरम्मणता झानस्साति आह ‘‘परित्तअप्पमाणारम्मणतापेत्थ परिग्गहवसेना’’ति, कतिपये सत्ते परिग्गहेत्वा पवत्ता मेत्तादयो परित्तारम्मणा, बहुके अप्पमाणारम्मणाति अत्थो. आकासं कसिणुग्घाटिमत्ता न वड्ढेतब्बन्ति योजना. वक्खति वा यं तेन सम्बन्धितब्बं. परिकप्पजमेव आरम्मणं वड्ढेतुं सक्का, न इतरन्ति आह ‘‘न हि सक्का सभावधम्मं ¶ वड्ढेतु’’न्ति ¶ . आरुप्पानं परित्तअप्पमाणारम्मणता परित्तकसिणुग्घाटिमाकासे, विपुलकसिणुग्घाटिमाकासे च पवत्तिया वेदितब्बा. सेसानि बुद्धानुस्सतिआदीनि दस कम्मट्ठानानि. अनिमित्तत्ताति पटिभागनिमित्ताभावा.

पटिभागनिमित्तारम्मणानीति पटिभागनिमित्तभूतानि आरम्मणानि. सेसानि अट्ठारस. सेसानि छाति चत्तारो ब्रह्मविहारा, आकासानञ्चायतनं, आकिञ्चञ्ञायतनन्ति इमानि सेसानि छ. विस्सन्दमानपुब्बताय विपुब्बकं. पग्घरमानलोहितताय लोहितकं. किमीनं पचलनेन पुळुवकं, चलितारम्मणं वुत्तं. वातपानविवरादीहि अन्तोपविट्ठस्स सूरियालोकादिकस्स चलनाकारो पञ्ञायतीति ओभासमण्डलारम्मणम्पि चलितारम्मणं वुत्तं. पुब्बभागेति पटिभागनिमित्तप्पवत्तिया पुब्बभागे. सन्निसिन्नमेवाति सन्तं निच्चलमेव.

देवेसूति कामावचरदेवेसु, तत्थ असुभानं पटिकूलस्स च आहारस्स अभावतो. अस्सासपस्सासानं ब्रह्मलोके अभावतो ‘‘आनापानस्सति चा’’ति वुत्तं.

दिट्ठेनाति दिट्ठेन वत्थुना कारणभूतेन. गहेतब्बानीति उग्गहेतब्बानि, उप्पादेतब्बउग्गहनिमित्तानीति अत्थो. तेनाह ‘‘पुब्बभागे’’तिआदि. तस्साति कायगतासतिया. उच्छुसस्सादीनं पत्तेसु पचलमानवण्णग्गहणमुखेन वा तस्स गहेतब्बत्ता वुत्तं ‘‘वायोकसिणं दिट्ठफुट्ठेना’’ति. न आदिकम्मिकेन गहेतब्बानीति आदिकम्मिकेन न गहेतब्बानि, भावनारम्भवसेन न पट्ठपेतब्बानि, हेट्ठिमे तयो ब्रह्मविहारे, कसिणेसु रूपावचरचतुत्थज्झानञ्च अनधिगन्त्वा सम्पादेतुं असक्कुणेय्यत्ता.

इमेसु पन कम्मट्ठानेसूति एत्थ कम्मट्ठानग्गहणेन यथारहं आरम्मणानं, झानानञ्च गहणं वेदितब्बं. सुखविहारस्साति दिट्ठधम्मसुखविहारस्स.

‘‘एकादस कम्मट्ठानानि अनुकूलानी’’ति उजुविपच्चनीकवसेन चेतं वुत्तं. एवं सेसेसुपि. वक्खति हि ‘‘सब्बञ्चेत’’न्तिआदि. अनुकूलानि रागविक्खम्भनस्स उपायभावतो. अट्ठ अनुकूलानीति योजना. एवं सेसेसु. एकन्ति इदं अनुस्सतिअपेक्खं अनुस्सतीसु एकन्ति, न मोहचरितवितक्कचरितापेक्खं तेसं अञ्ञस्सापि अनुकूलस्स अलब्भनतो ¶ . ‘‘सद्धाचरितस्स ¶ पुरिमा छ अनुस्सतियो’’ति इदं अतिसप्पायवसेन वुत्तं. इमस्सेव उजुविपच्चनीकं इमस्स अतिसप्पायन्ति गहेतब्बस्स विसेसस्स अभावतो सब्बचरितानं अनुकूलानि. परित्तन्ति सरावमत्तं, अप्पमाणन्ति ततो अधिकपमाणं. परित्तं वा सुप्पसरावमत्तं, अप्पमाणं अधिकपमाणं खलमण्डलादिकसिणभावेन परिग्गहितं.

चत्तारो धम्माति चत्तारो मनसिकरणीया धम्मा. उत्तरीति सीलसम्पदा, कल्याणमित्तता, सप्पायधम्मस्सवनं, वीरियं; पञ्ञाति इमेसु पञ्चसु धम्मेसु पतिट्ठानतो उपरि. असुभाति असुभभावना एकादससु असुभकम्मट्ठानेसु भावनानुयोगा. मेत्ताति अनोधिसो, ओधिसो वा पवत्ता मेत्ताभावना. आनापानस्सतीति सोळसवत्थुका आनापानस्सतिसमाधिभावना. वितक्कुपच्छेदायाति मिच्छावितक्कानं उपच्छिन्दनत्थाय. अनिच्चसञ्ञाति ‘‘सब्बे सङ्खारा अनिच्चा’’ति (अ. नि. ३.१३७; ध. प. २७७; महानि. २७) एवं पवत्ता अनिच्चानुपस्सना. अस्मिमानसमुग्घातायाति ‘‘अस्मी’’ति उप्पज्जनकस्स नवविधस्सापि मानस्स समुच्छिन्दनाय. एत्थ हि एकस्सेव चत्तारो धम्मा भावेतब्बा वुत्ता, न एकस्स चतुचरियताय. तेन विञ्ञायति ‘‘सब्बानिपि कम्मट्ठानानि सब्बाकुसलविक्खम्भनानि सब्बकुसलपरिब्रूहनानी’’ति.

एकस्सेव सत्त कम्मट्ठानानि वुत्तानि, न चायस्मा राहुलो सब्बचरितोति अधिप्पायो. वचनमत्तेति ‘‘असुककम्मट्ठानं असुकचरितस्स अनुकूल’’न्ति एवं वुत्तवचनमत्ते. अधिप्पायोति तथावचनस्स अधिप्पायो. सो पन ‘‘सब्बञ्चेत’’न्तिआदिना विभावितो एव.

४८. ‘‘पियो गरू’’तिआदिना (अ. नि. ७.३७) वुत्तप्पकारं कल्याणमित्तं. ‘‘अत्तनो पत्तचीवरं सयमेव गहेत्वा’’तिआदिना वुत्तनयेन उपसङ्कमित्वा. सोमनस्समेव उप्पज्जति ‘‘एवं बहुपरिस्सयोयं अत्तभावो ठानेयेव मया निय्यातितो’’ति. तेनाह ‘‘यथा ही’’तिआदि.

अतज्जनीयोति न तज्जेतब्बो न निग्गहेतब्बो. स्वायं अतज्जनीयभावो दोवचस्सताय वा सिया, आचरिये अनिविट्ठपेमताय वाति तदुभयं दस्सेतुं ‘‘दुब्बचो वा’’तिआदि वुत्तं. यो हि आचरियेन तज्जियमानो कोपञ्च दोसञ्च अपच्चयञ्च पातुकरोति, यो वा ‘‘किमस्स ¶ ¶ सन्तिके वासेना’’ति पक्कमति, अयं दुविधोपि अतज्जनीयो. धम्मेनाति ओवादानुसासनिधम्मेन. गूळ्हं गन्थन्ति कम्मट्ठानगन्थं, सच्चपटिच्चसमुप्पादादिसहितं गम्भीरं सुञ्ञतापटिसंयुत्तञ्च.

तुम्हाकमत्थायाति वुत्तेति ‘‘सतपोरिसे पपाते पतनेन तुम्हाकं कोचि अत्थो होती’’ति केनचि वुत्ते. घंसेन्तोति ‘‘मनुस्सकक्केन तुम्हाकं कोचि अत्थो’’ति वुत्ते घंसेन्तो निरवसेसं अत्तभावं खेपेतुं उस्सहेय्यं. ‘‘मम अस्सासपस्सासनिरुन्धनेन तुम्हाकं कोचि रोगवूपसमादिको अत्थो अत्थी’’ति केनचि वुत्ते. तीहिपि भिक्खूहि आचरिये भत्तिपवेदनमुखेन वीरियारम्भो एव पवेदितो.

४९. अञ्ञत्थ पवत्तित्वापि चित्तं आगम्म यत्थ सेति, सो तस्स आसयो ‘‘मिगासयो’’ विय, आसयो एव अज्झासयो. सो दुविधो विपन्नो, सम्पन्नोति. तत्थ विपन्नो सस्सतादिमिच्छाभिनिवेसनिस्सितो. सम्पन्नो दुविधो वट्टनिस्सितो, विवट्टनिस्सितोति. तेसु विवट्टनिस्सितो अज्झासयो ‘‘सम्पन्नज्झासयेना’’ति इधाधिप्पेतो. इदानि नं विभागेन दस्सेतुं ‘‘अलोभादीनं वसेना’’तिआदि वुत्तं. तत्थ छहाकारेहीति अलुब्भनादीहि छहि आकारेहि. सम्पन्नज्झासयेनाति पुब्बभागियानं सीलसम्पदादीनं साधनवसेन, लोकुत्तरानं उपनिस्सयभावेन च सम्पन्नो अज्झासयो एतस्साति सम्पन्नज्झासयो, तेन. अलोभादयो हि अनेकदोसविधमनतो, अनेकगुणावहतो च सत्तानं बहुकारा विसेसतो योगिनो. तथा हि अलोभादयो मच्छेरमलादीनं पटिपक्खभावेन पवत्तन्ति. वुत्तं हेतं (ध. स. अट्ठ. १ मूलरासीवण्णना) –

‘‘अलोभो मच्छेरमलस्स पटिपक्खो, अदोसो दुस्सील्यमलस्स, अमोहो कुसलेसु धम्मेसु अभावनाय. अलोभो चेत्थ दानहेतु, अदोसो सीलहेतु, अमोहो भावनाहेतु. तेसु च अलोभेन अनधिकं गण्हाति लुद्धस्स अधिकग्गहणतो, अदोसेन अनूनं दुट्ठस्स ऊनग्गहणतो, अमोहेन अविपरीतं मूळ्हस्स विपरीतग्गहणतो.

‘‘अलोभेन ¶ चेत्थ विज्जमानं दोसं दोसतो धारेन्तो दोसे पवत्तति, लुद्धो हि दोसं पटिच्छादेति. अदोसेन विज्जमानं गुणं गुणतो धारेन्तो गुणे पवत्तति, दुट्ठो हि गुणं मक्खेति. अमोहेन याथावसभावं याथावसभावतो धारेन्तो याथावसभावे पवत्तति ¶ , मूळ्हो हि तच्छं ‘अतच्छ’न्ति, अतच्छञ्च ‘तच्छ’न्ति गण्हाति. अलोभेन च पियविप्पयोगदुक्खं न होति लुद्धस्स पियसब्भावतो, पियविप्पयोगासहनतो च, अदोसेन अप्पियसम्पयोगदुक्खं न होति दुट्ठस्स अप्पियसब्भावतो, अप्पियसम्पयोगासहनतो च, अमोहेन इच्छितालाभदुक्खं न होति, अमूळ्हस्स हि ‘तं कुतेत्थ लब्भा’ति एवमादिपच्चवेक्खणसब्भावतो.

‘‘अलोभेन चेत्थ जातिदुक्खं न होति अलोभस्स तण्हापटिपक्खतो, तण्हामूलकत्ता च जातिदुक्खस्स, अदोसेन जरादुक्खं न होति तिक्खदोसस्स खिप्पं जरासम्भवतो, अमोहेन मरणदुक्खं न होति, सम्मोहमरणञ्हि दुक्खं, न च तं अमूळ्हस्स होति. अलोभेन च गहट्ठानं, अमोहेन पब्बजितानं, अदोसेन पन सब्बेसम्पि सुखसंवासता होति.

‘‘विसेसतो चेत्थ अलोभेन पेत्तिविसये उपपत्ति न होति, येभुय्येन हि सत्ता तण्हाय पेत्तिविसयं उपपज्जन्ति, तण्हाय च पटिपक्खो अलोभो. अदोसेन निरये उपपत्ति न होति, दोसेन हि चण्डजातिताय दोससदिसं निरयं उपपज्जन्ति, दोसस्स च पटिपक्खो अदोसो. अमोहेन तिरच्छानयोनियं निब्बत्ति न होति, मोहेन हि निच्चसम्मूळ्हं तिरच्छानयोनिं उपपज्जन्ति, मोहपटिपक्खो च अमोहो. एतेसु च अलोभो रागवसेन उपगमनस्स अभावकरो, अदोसो दोसवसेन अपगमनस्स, अमोहो मोहवसेन अमज्झत्तभावस्स.

‘‘तीहिपि ¶ चेतेहि यथापटिपाटिया नेक्खम्मसञ्ञा अब्यापादसञ्ञा अविहिंसासञ्ञाति इमा तिस्सो, असुभसञ्ञा अप्पमाणसञ्ञा धातुसञ्ञाति इमा च तिस्सो सञ्ञायो होन्ति. अलोभेन पन कामसुखल्लिकानुयोगअन्तस्स, अदोसेन अत्तकिलमथानुयोगअन्तस्स परिवज्जनं होति, अमोहेन मज्झिमाय पटिपत्तिया पटिपज्जनं. तथा अलोभेन अभिज्झाकायगन्थस्स पभेदनं होति, अदोसेन ब्यापादकायगन्थस्स, अमोहेन सेसगन्थद्वयस्स. पुरिमानि च द्वे सतिपट्ठानानि पुरिमानं द्विन्नं आनुभावेन, पच्छिमानि पच्छिमस्सेव आनुभावेन इज्झन्ति.

‘‘अलोभो ¶ चेत्थ आरोग्यस्स पच्चयो होति, अलुद्धो हि लोभनीयम्पि असप्पायं न सेवति, तेन अरोगो होति. अदोसो योब्बनस्स, अदुट्ठो हि वलितपलितावहेन दोसग्गिना अडय्हमानो दीघरत्तं युवा होति. अमोहो दीघायुकताय, अमूळ्हो हि हिताहितं ञत्वा अहितं परिवज्जेन्तो, हितञ्च पटिसेवमानो दीघायुको होति.

‘‘अलोभो चेत्थ भोगसम्पत्तिया पच्चयो चागेन भोगपटिलाभतो, अदोसो मित्तसम्पत्तिया मेत्ताय मित्तानं पटिलाभतो, अपरिहानतो च, अमोहो अत्तसम्पत्तिया, अमूळ्हो हि अत्तनो हितमेव करोन्तो अत्तानं सम्पादेति. अलोभो च दिब्बविहारस्स पच्चयो होति, अदोसो ब्रह्मविहारस्स, अमोहो अरियविहारस्स.

‘‘अलोभेन चेत्थ सकपक्खेसु सत्तसङ्खारेसु निब्बुतो होति तेसं विनासेन अभिसङ्गहेतुकस्स दुक्खस्स अभावा, अदोसेन परपक्खेसु, अदुट्ठस्स हि वेरीसुपि वेरिसञ्ञाय अभावतो, अमोहेन उदासीनपक्खेसु अमूळ्हस्स सब्बाभिसङ्गताय अभावतो.

‘‘अलोभेन ¶ च अनिच्चदस्सनं होति, लुद्धो हि उपभोगासाय अनिच्चेपि सङ्खारे अनिच्चतो न पस्सति. अदोसेन दुक्खदस्सनं, अदोसज्झासयो हि परिच्चत्तआघातवत्थुपरिग्गहो सङ्खारेयेव दुक्खतो पस्सति. अमोहेन अनत्तदस्सनं, अमूळ्हो हि याथावगहणकुसलो अपरिणायकं खन्धपञ्चकं अपरिणायकतो बुज्झति. यथा च एतेहि अनिच्चदस्सनादीनि, एवं एतेपि अनिच्चदस्सनादीहि होन्ति. अनिच्चदस्सनेन हि अलोभो होति, दुक्खदस्सनेन अदोसो, अनत्तदस्सनेन अमोहो. को हि नाम ‘अनिच्चमिद’न्ति सम्मा ञत्वा तस्सत्थाय पिहं उप्पादेय्य, सङ्खारे वा ‘दुक्ख’न्ति जानन्तो अपरम्पि अच्चन्ततिखिणं कोधदुक्खं उप्पादेय्य, अत्तसुञ्ञतञ्च बुज्झित्वा पुन सम्मोहं आपज्जेय्या’’ति.

तेन वुत्तं ‘‘पुब्बभागियानं सीलसम्पदादीनं साधनवसेन लोकुत्तरानं, उपनिस्सयभावेन च सम्पन्नो अज्झासयो एतस्साति सम्पन्नज्झासयो’’ति. तेनाह ‘‘एवं तिस्सन्नं बोधीनं अञ्ञतरं पापुणाती’’ति.

इदानि ¶ ते अज्झासये पाळियाव विभावेतुं ‘‘यथाहा’’तिआदि वुत्तं. तत्थ छाति गणनपरिच्छेदो. अज्झासयाति परिच्छिन्नधम्मनिदस्सनं. उभयं पन एकज्झं कत्वा छब्बिधा अज्झासयाति अत्थो. बोधिसत्ताति बुज्झनकसत्ता, बोधिया वा नियतभावेन सत्ता लग्गा, अधिमुत्ता तन्निन्ना तप्पोणाति अत्थो. बोधिपरिपाकाय संवत्तन्तीति यथाभिनीहारं अत्तना पत्तब्बबोधिया परिपाचनाय भवन्ति. अलोभज्झासयाति अलुब्भनाकारेन पवत्तअज्झासया, आदितो ‘‘कथं नु खो मयं सब्बत्थ, सब्बदा च अलुद्धा एव हेस्सामा’’ति, मज्झे च अलुब्भनवसेनेव, पच्छा च तस्सेव रोचनवसेन पवत्तअज्झासया. लोभे दोसदस्साविनोति लुब्भनलक्खणे लोभे सब्बप्पकारेन आदीनवदस्साविनो. इदं तस्स अज्झासयस्स एकदेसतो ब्रूहनाकारदस्सनं. लोभे हि आदीनवं, अलोभे च आनिसंसं पस्सन्तस्स अलोभज्झासयो परिवड्ढति, स्वायं तत्थ आदीनवानिसंसदस्सनविधि विभावितोयेव. सेसपदेसुपि इमिना नयेन अत्थो वेदितब्बो. अयं ¶ पन विसेसो – नेक्खम्मन्ति इध पब्बज्जा. पविवेको तदङ्गविवेको, विक्खम्भनविवेको, कायविवेको, चित्तविवेको च. निस्सरणं निब्बानं. सब्बभवगतीसूति सब्बेसु भवेसु, सब्बासु च गतीसु. तदधिमुत्ततायाति यदत्थं भावनानुयोगो, यदत्था च पब्बज्जा, तदधिमुत्तेन. तेनेवाह ‘‘समाधाधिमुत्तेना’’तिआदि.

५०. ‘‘किं चरितोसी’’ति पुच्छितो सचे ‘‘न जानामी’’ति वदेय्य, ‘‘के वा ते धम्मा बहुलं समुदाचरन्ती’’ति पुच्छितब्बो. किं वाति किं असुभं वा अनुस्सतिट्ठानं वा अञ्ञं वा. किं ते मनसि करोतो फासु होतीति चित्तस्स एकग्गभावेन सुखं होति. चित्तं नमतीति पकतियाव अभिरतिवसेन नमति. एवमादीहीति आदि-सद्देन इरियापथादीनं सङ्गहो दट्ठब्बो. तेपि हि न सब्बस्स एकंसतो ब्यभिचारिनो एव. तथा हि समुदाचारो पुच्छितब्बो वुत्तो. ‘‘असुकञ्च असुकञ्च मनसिकारविधिं कतिपयदिवसं अनुयुञ्जाही’’ति च वत्तब्बो.

‘‘पकतिया उग्गहितकम्मट्ठानस्सा’’ति इदं यं कम्मट्ठानं गहेतुकामो, तत्थ सज्झायवसेन वा मनसिकारवसेन वा कतपरिचयं सन्धाय वुत्तं. एकं द्वे निसज्जानीति एकं वा द्वे वा उण्हासनानि. सज्झायं कारेत्वा अत्तनो सम्मुखाव अधीयापेत्वा दातब्बं, सो चे अञ्ञत्थ गन्तुकामोति अधिप्पायो. तेनाह ‘‘सन्तिके वसन्तस्सा’’ति. आगतागतक्खणे कथेतब्बं, पवत्तिं सुत्वाति अधिप्पायो.

पथवीकसिणन्ति ¶ पथवीकसिणकम्मट्ठानं. कतस्साति कतस्स कसिणस्स. तं तं आकारन्ति आचरियेन कम्मट्ठाने वुच्चमाने पदपदत्थाधिप्पायओपम्मादिकं अत्तनो ञाणस्स पच्चुपट्ठितं तं तं आकारं, यं यं निमित्तन्ति वुत्तं. उपनिबन्धित्वाति उपनेत्वा निबद्धं विय कत्वा, हदये ठपेत्वा अपमुस्सन्तं कत्वाति अत्थो. एवं सुट्ठु उपट्ठितस्सतिताय निमित्तं गहेत्वा तत्थ सम्पजानकारिताय सक्कच्चं सुणन्तेन. तन्ति तं यथावुत्तं सुग्गहितं निस्साय. इतरस्साति तथा अगण्हन्तस्स. सब्बाकारेनाति कस्सचिपि पकारस्स तत्थ असेसितत्ता वुत्तं.

कम्मट्ठानग्गहणनिद्देसवण्णना निट्ठिता.

इति ततियपरिच्छेदवण्णना.

४. पथवीकसिणनिद्देसवण्णना

५१. फासु ¶ ¶ होतीति आवाससप्पायादिलाभेन मनसिकारफासुता भावनानुकूलता होति. परिसोधेन्तेनाति तेसं तेसं गण्ठिट्ठानानं छिन्दनवसेन विसोधेन्तेन. अकिलमन्तोयेवाति अकिलन्तकायो एव. सति हि कायकिलमथे सिया कम्मट्ठानमनसिकारस्स अन्तरायोति अधिप्पायो. गण्ठिट्ठानन्ति अत्थतो, अधिप्पायतो च दुब्बिनिवेधताय गण्ठिभूतं ठानं. छिन्दित्वाति याथावतो अत्थस्स, अधिप्पायस्स च विभावनेन छिन्दित्वा, विभूतं सुपाकटं कत्वाति अधिप्पायो. सुविसुद्धन्ति सुट्ठु विसुद्धं, निगुम्बं निज्जटन्ति अत्थो.

अननुरूपविहारवण्णना

५२. अञ्ञतरेनाति अञ्ञतरेनापि, पगेव अनेकेहीति अधिप्पायो. महन्तभावो महत्तं. तथा सेसेसु. सोण्डवा सोण्डी. तथा पण्णन्तिआदीसु. बोधिअङ्गणादीसु कातब्बं इध ‘‘वत्त’’न्ति अधिप्पेतन्ति आह ‘‘पानीयघटं वा रित्त’’न्ति. निट्ठितायाति पविट्ठपविट्ठानं दानेन परिक्खीणाय. जिण्णविहारेपि यत्र भिक्खू एवं वदन्ति ‘‘आयस्मा, यथासुखं समणधम्मं करोतु, मयं पटिजग्गिस्सामा’’ति. एवरूपे विहातब्बन्ति अयम्पि नयो लब्भति, वुत्तनयत्ता पन न वुत्तो.

महापथविहारेति महापथसमीपे विहारे. भाजनदारुदोणिकादीनीति रजनभाजनानि, रजनत्थाय दारु, दारुमयदोणिका, रजनपचनट्ठानं, धोवनफलकन्ति एवमादीनि. साकहारिकाति साकहारिनियो इत्थियो. विसभागसद्दो कामगुणूपसंहितो गीतसद्दोति वदन्ति, केवलोपि इत्थिसद्दो विसभागसद्दो एव. तत्राति पुप्फवन्ते विहारे. तादिसोयेवाति ‘‘तत्थस्स कम्मट्ठानं गहेत्वा’’तिआदिना यादिसो पण्णवन्ते विहारे उपद्दवो वुत्तो, तादिसोयेव. ‘‘पुप्फहारिकायो पुप्फं ओचिनन्तियो’’ति पन वत्तब्बं. अयमिध विसेसो.

पत्थनीयेति ¶ तत्थ वसन्तेसु सम्भावनावसेन उपसङ्कमनादिना पत्थेतब्बे. तेनाह ‘‘लेणसम्मते’’ति. दक्खिणागिरीति मगधविसये दक्खिणागिरीति वदन्ति.

विसभागारम्मणानि ¶ इट्ठानि, अनिट्ठानि च. अनिट्ठानं हि दस्सनत्थं ‘‘घटेहि निघंसन्तियो’’तिआदि वुत्तं. दब्बूपकरणयोग्गा रुक्खा दब्बूपकरणरुक्खा.

यो पन विहारो. खलन्ति धञ्ञकरणट्ठानं. गावो रुन्धन्ति ‘‘सस्सं खादिंसू’’ति. उदकवारन्ति केदारेसु सस्सानं दातब्बउदकवारं. अयम्पीति महासङ्घभोगोपि विहारो. वारियमाना कम्मट्ठानिकेन भिक्खुना.

समुद्दसामुद्दिकनदीनिस्सितं उदकपट्टनं. महानगरानं आयद्वारभूतं अटविमुखादिनिस्सितं थलपट्टनं. अप्पसन्ना होन्ति. तेनस्स तत्थ फासुविहारो न होतीति अधिप्पायो. मञ्ञमाना राजमनुस्सा.

समोसरणेनाति इतो चितो सञ्चरणेन. पपातेति पपातसीसे ठत्वा गायि ‘‘गीतसद्देन इधागतं पपाते पातेत्वा खादिस्सामी’’ति. वेगेन गहेत्वाति वेगेनागन्त्वा ‘‘कुहिं यासी’’ति खन्धे गहेत्वा.

यत्थाति यस्मिं विहारे, विहारसामन्ता वा न सक्का होति कल्याणमित्तं लद्धुं, तत्थ विहारे सो अलाभो महादोसोति योजना.

पन्थनिन्ति पन्थे नीतो पवत्तितोति पन्थनी, मग्गनिस्सितो विहारो. तं पन्थनिं. सोण्डिन्ति सोण्डिसहितो विहारो सोण्डी, तं सोण्डिं. तथा पण्णन्तिआदीसु. नगरनिस्सितं नगरन्ति वुत्तं उत्तरपदलोपेन यथा ‘‘भीमसेनो भीमो’’ति. दारुनाति दारुनिस्सितेन सह. विसभागेनाति यो विसभागेहि वुसीयति, विसभागानं वा निवासो, सो विहारो विसभागो. तेन विसभागेन सद्धिं. पच्चन्तनिस्सितञ्च सीमानिस्सितञ्च असप्पायञ्च पच्चन्तसीमासप्पायं. यत्थ मित्तो न लब्भति, तम्पीति सब्बत्थ ठान-सद्दापेक्खाय नपुंसकनिद्देसो. इति विञ्ञायाति ‘‘भावनाय अननुरूपानी’’ति एवं विजानित्वा.

अनुरूपविहारवण्णना

५३. अयं ¶ अनुरूपो नामाति अयं विहारो भावनाय अनुरूपो नाम. नातिदूरन्ति गोचरट्ठानतो अड्ढगावुततो ओरभागताय न ¶ अतिदूरं. नाच्चासन्नन्ति पच्छिमेन पमाणेन गोचरट्ठानतो पञ्चधनुसतिकताय न अतिआसन्नं. ताय च पन नातिदूरनाच्चासन्नताय, गोचरट्ठानं परिस्सयादिरहितमग्गताय च गमनस्स च आगमनस्स च युत्तरूपत्ता गमनागमनसम्पन्नं. दिवसभागे महाजनसंकिण्णताभावेन दिवा अप्पाकिण्णं. अभावत्थो हि अयं अप्प-सद्दो ‘‘अप्पिच्छो’’तिआदीसु (म. नि. १.३३६) विय. रत्तियं जनालापसद्दाभावेन रत्तिं अप्पसद्दं. सब्बदापि जनसन्निपातनिग्घोसाभावेन अप्पनिग्घोसं. अप्पकसिरेनाति अकसिरेन सुखेनेव. सीलादिगुणानं थिरभावप्पत्तिया थेरा. सुत्तगेय्यादि बहु सुतं एतेसन्ति बहुस्सुता. वाचुग्गतकरणेन, सम्मदेव गरूनं सन्तिके आगमितभावेन च आगतो परियत्तिधम्मसङ्खातो आगमो एतेसन्ति आगतागमा. सुत्ताभिधम्मसङ्खातस्स धम्मस्स धारणेन धम्मधरा. विनयस्स धारणेन विनयधरा. तेसंयेव धम्मविनयानं मातिकाय धारणेन मातिकाधरा. तत्थ तत्थ धम्मपरिपुच्छाय परिपुच्छति. अत्थपरिपुच्छाय परिपञ्हति वीमंसति विचारेति. इदं, भन्ते, कथं इमस्स को अत्थोति परिपुच्छनपरिपञ्हाकारदस्सनं. अविवटञ्चेव पाळिया अत्थं पदेसन्तरपाळिदस्सनेन आगमतो विवरन्ति. अनुत्तानीकतञ्च युत्तिविभावनेन उत्तानीकरोन्ति. कङ्खट्ठानियेसु धम्मेसु संसयुप्पत्तिया हेतुताय गण्ठिट्ठानभूतेसु पाळिपदेसेसु याथावतो विनिच्छयदानेन कङ्खं पटिविनोदेन्ति. एत्थ च ‘‘नातिदूरं, नाच्चासन्नं, गमनागमनसम्पन्न’’न्ति एकं अङ्गं, ‘‘दिवा अप्पाकिण्णं, रत्तिं अप्पसद्दं अप्पनिग्घोस’’न्ति एकं, ‘‘अप्पडंसमकसवातातपसरीसपसम्फस्स’’न्ति एकं, ‘‘तस्मिं खो पन सेनासने विहरन्तस्स…पे… परिक्खारा’’ति एकं, ‘‘तस्मिं खो पन सेनासने थेरा…पे… कङ्खं पटिविनोदेन्ती’’ति एकं. एवं पञ्च अङ्गानि वेदितब्बानि.

खुद्दकपलिबोधवण्णना

५४. खुद्दकपलिबोधुपच्छेदे पयोजनं परतो आगमिस्सति. अग्गळअनुवातपरिभण्डदानादिना दळ्हीकम्मं वा. तन्तच्छेदादीसु तुन्नकम्मं वा कातब्बं.

भावनाविधानवण्णना

५५. सब्बकम्मट्ठानवसेनाति ¶ ¶ अनुक्कमेन निद्दिसियमानस्स चत्तालीसविधस्स सब्बस्स कम्मट्ठानस्स वसेन. पिण्डपातपटिक्कन्तेनाति पिण्डपातपरिभोगतो पटिनिवत्तेन, पिण्डपातभुत्ताविना ओनीतपत्तपाणिनाति अत्थो. भत्तसम्मदं पटिविनोदेत्वाति भोजननिमित्तं परिस्समं विनोदेत्वा. आहारे हि आसयं पविट्ठमत्ते तस्स आगन्तुकताय येभुय्येन सिया सरीरस्स कोचि परिस्समो, तं वूपसमेत्वा. तस्मिं हि अवूपसन्ते सरीरखेदेन चित्तं एकग्गतं न लभेय्याति. पविवित्तेति जनविवित्ते. सुखनिसिन्नेनाति पल्लङ्कं आभुजित्वा उजुं कायं पणिधाय निसज्जाय सुखनिसिन्नेन. वुत्तञ्हेतन्ति यं ‘‘कताय वा’’तिआदिना पथविया निमित्तग्गहणं इध वुच्चति, वुत्तं हेतं पोराणट्ठकथायं.

इदानि तं अट्ठकथापाळिं दस्सेन्तो ‘‘पथवीकसिणं उग्गण्हन्तो’’तिआदिमाह. तत्थायं सङ्खेपत्थो – पथवीकसिणं उग्गण्हन्तोति उग्गहनिमित्तभावेन पथवीकसिणं गण्हन्तो आदियन्तो, उग्गहनिमित्तभूतं पथवीकसिणं उप्पादेन्तोति अत्थो. उप्पादनञ्चेत्थ तथानिमित्तस्स उपट्ठापनं दट्ठब्बं. पथवियन्ति वक्खमानविसेसे पथवीमण्डले. निमित्तं गण्हातीति तत्थ चक्खुना आदासतले मुखनिमित्तं विय भावनाञाणेन वक्खमानविसेसं पथवीनिमित्तं गण्हाति. ‘‘पथविय’’न्ति वत्वापि मण्डलापेक्खाय नपुंसकनिद्देसो. कतेति वक्खमानविधिना अभिसङ्खतेति अत्थो. वा-सद्दो अनियमत्थो. अकतेति पाकतिके खलमण्डलादिके पथवीमण्डले. सान्तकेति सअन्तके एव, सपरिच्छेदे एवाति अत्थो. सावधारणञ्हेतं वचनं. तथा हि तेन निवत्तितं दस्सेतुं ‘‘नो अनन्तके’’ति वुत्तं. सकोटियेतिआदीनिपि तस्सेव वेवचनानि. सुप्पमत्ते वातिआदीसु सुप्पसरावानि समप्पमाणानि इच्छितानि. केचि पन वदन्ति ‘‘सरावमत्तं विदत्थिचतुरङ्गुलं होति, सुप्पमत्तं ततो अधिकप्पमाणन्ति. कित्तिमं कसिणमण्डलं हेट्ठिमपरिच्छेदेन सरावमत्तं, उपरिमपरिच्छेदेन सुप्पमत्तं, न ततो अधो, उद्धं वाति परित्तप्पमाणभेदसङ्गण्हनत्थं ‘सुप्पमत्ते वा सरावमत्ते वा’ति वुत्त’’न्ति. यथाउपट्ठिते आरम्मणे एकङ्गुलमत्तम्पि वड्ढितं अप्पमाणमेवाति वुत्तोवायमत्थो. केचि पन ‘‘छत्तमत्तम्पि कसिणमण्डलं कातब्ब’’न्ति वदन्ति.

सो ¶ तं निमित्तं सुग्गहितं करोतीति सो योगावचरो तं पथवीमण्डलं सुग्गहितं निमित्तं ¶ करोति. यदा चक्खुं उम्मीलेत्वा ओलोकेत्वा तत्थ निमित्तं गहेत्वा निम्मीलेत्वा आवज्जेन्तस्स उम्मीलेत्वा ओलोकितक्खणे विय उपट्ठाति, तदा सुग्गहितं करोति नाम. अथेत्थ सतिं सूपट्ठितं कत्वा अबहिगतेन मानसेन पुनप्पुनं सल्लक्खेन्तो सूपधारितं उपधारेति नाम. एवं उपधारितं पन नं पुनप्पुनं आवज्जेन्तो मनसि करोन्तो तमेवारब्भ आसेवनं भावनं बहुलं पवत्तेन्तो सुववत्थितं ववत्थपेति नाम. तस्मिं आरम्मणेति एवं सुग्गहितकरणादिना सम्मदेव उपट्ठिते तस्मिं पथवीकसिणसञ्ञिते आरम्मणे. चित्तं उपनिबन्धतीति अत्तनो चित्तं उपचारज्झानं उपनेत्वा निबन्धति अञ्ञारम्मणतो विनिवत्तं करोति. अद्धा इमायातिआदि आनिसंसदस्सावितादस्सनं.

इदानि यथादस्सितस्स अट्ठकथापाठस्स अत्थप्पकासनेन सद्धिं भावनाविधिं विभावेतुकामो अकते ताव निमित्तग्गहणं दस्सेन्तो ‘‘तत्थ येन अतीतभवेपी’’तिआदिमाह. तत्थ तत्थाति तस्मिं अट्ठकथापाठे. चतुक्कपञ्चकज्झानानीति चतुक्कपञ्चकनयवसेन वदति. पुञ्ञवतोति भावनामयपुञ्ञवतो. उपनिस्सयसम्पन्नस्साति तादिसेनेव उपनिस्सयेन समन्नागतस्स. खलमण्डलेति मण्डलाकारे धञ्ञकरणट्ठाने. तंठानप्पमाणमेवाति ओलोकितट्ठानप्पमाणमेव.

अविराधेत्वाति अविरज्झित्वा वुत्तविधिना एव. नीलपीतलोहितओदातसम्भेदवसेनाति नीलादिवण्णाहि मत्तिकाहि पच्चेकं, एकज्झञ्च संसग्गवसेन. गङ्गावहेति गङ्गासोते. सीहळदीपे किर रावणगङ्गा नाम नदी, तस्सा सोतेन छिन्नतटट्ठाने मत्तिका अरुणवण्णा. तं सन्धाय वुत्तं ‘‘गङ्गावहे मत्तिकासदिसाय अरुणवण्णाया’’ति. अरुणवण्णाय अरुणनिभाय, अरुणप्पभावण्णायाति अत्थो.

एवं कसिणदोसे दस्सेत्वा इदानि कसिणकरणादिके सेसाकारे दस्सेतुं ‘‘तञ्च खो’’तिआदि वुत्तं. संहारिमन्ति संहरितब्बं गहेत्वा चरणयोग्गं. तत्रट्ठकन्ति यत्र कतं, तत्थेव तिट्ठनकं. वुत्तप्पमाणन्ति ¶ ‘‘सुप्पमत्ते वा सरावमत्ते वा’’ति वुत्तप्पमाणं. वट्टन्ति मण्डलसण्ठानं. परिकम्मकालेति निमित्तुग्गहणाय भावनाकाले. एतदेवाति यं विदत्थिचतुरङ्गुलवित्थारं, एतदेव पमाणं सन्धाय ‘‘सुप्पमत्तं वा सरावमत्तं वा’’ति वुत्तं. सुप्पं हि नातिमहन्तं, सरावञ्च महन्तं चाटिपिधानप्पहोनकन्ति समप्पमाणं होति.

५६. तस्माति ¶ परिच्छेदत्थाय वुत्तत्ता. एवं वुत्तपमाणं परिच्छेदन्ति यथावुत्तप्पमाणं विदत्थिचतुरङ्गुलवित्थारं परिच्छेदं कत्वा, एवं वुत्तप्पमाणं वा कसिणमण्डलं विसभागवण्णेन परिच्छेदं कत्वा. रुक्खपाणिकाति कुचन्दनादिरुक्खपाणिका अरुणवण्णस्स विसभागवण्णं समुट्ठपेति. तस्मा तं अग्गहेत्वाति वुत्तं. पकतिरुक्खपाणिका पन पासाणपाणिकागतिकाव. निन्नुन्नतट्ठानाभावेन भेरीतलसदिसं कत्वा. ततो दूरतरेतिआदि यथावुत्ततो पदेसतो, पीठतो च अञ्ञस्मिं आदीनवदस्सनं. कसिणदोसाति हत्थपाणिपदादयो इध कसिणदोसा.

वुत्तनयेनेवाति ‘‘अड्ढतेय्यहत्थन्तरे पदेसे, विदत्थिचतुरङ्गुलपादके पीठे’’ति च वुत्तविधिनाव. कामेसु आदीनवन्ति ‘‘कामा नामेते अट्ठिकङ्कलूपमा निरस्सादट्ठेन, तिणुक्कूपमा अनुदहनट्ठेन, अङ्गारकासूपमा महाभितापट्ठेन, सुपिनकूपमा इत्तरपच्चुपट्ठानट्ठेन, याचितकूपमा तावकालिकट्ठेन, रुक्खफलूपमा सब्बङ्गपच्चङ्गपलिभञ्जनट्ठेन, असिसूनूपमा अधिकुट्टनट्ठेन, सत्तिसूलूपमा विनिविज्झनट्ठेन, सप्पसिरूपमा सपटिभयट्ठेना’’तिआदिना (पाचि. अट्ठ. ४१७; म. नि. अट्ठ. १.२३४) ‘‘अप्पस्सादा कामा बहुदुक्खा बहुपायासा’’तिआदिना (पाचि. ४१७; म. नि. १.२३४; २.४२) ‘‘कामसुखञ्च नामेतं बहुपरिस्सयं, सासङ्कं, सभयं, संकिलिट्ठं, मीळ्हपरिभोगसदिसं, हीनं, गम्मं, पोथुज्जनिकं, अनरियं, अनत्थसंहित’’न्तिआदिना च अनेकाकारवोकारं वत्थुकामकिलेसकामेसु आदीनवं दोसं पच्चवेक्खित्वा. कामनिस्सरणेति कामानं निस्सरणभूते, तेहि वा निस्सटे. अग्गमग्गस्स पादकभावेन सब्बदुक्खसमतिक्कमस्स उपायभूते. नेक्खम्मेति झाने. जाताभिलासेन सञ्जातच्छन्देन. ‘‘सम्मासम्बुद्धो वत भगवा अविपरीतधम्मदेसनत्ता, स्वाक्खातो ¶ धम्मो एकन्तनिय्यानिकत्ता, सुप्पटिपन्नो सङ्घो यथानुसिट्ठं पटिपज्जनतो’’ति एवं बुद्धधम्मसङ्घगुणानुस्सरणेन रतनत्तयविसयं पीतिपामोज्जं जनयित्वा. नेक्खम्मं पटिपज्जति एतायाति नेक्खम्मपटिपदा, सउपचारस्स झानस्स, विपस्सनाय, मग्गस्स, निब्बानस्स च अधिगमकारणन्ति अत्थो. पुब्बे पन पठमज्झानमेव नेक्खम्मन्ति वुत्तत्ता वुत्तावसेसा सब्बेपि नेक्खम्मधम्मा. यथाह –

‘‘पब्बज्जा पठमं झानं, निब्बानं च विपस्सना;

सब्बेपि कुसला धम्मा, ‘नेक्खम्म’न्ति पवुच्चरे’’ति. (इतिवु. अट्ठ. १०९);

पविवेकसुखरसस्साति ¶ चित्तविवेकादिविवेकजस्स सुखरसस्स. एवमेतेहि पञ्चहि पदेहि ‘‘आनिसंसदस्सावी’’तिआदीनं पदानं अत्थो दस्सितोति दट्ठब्बं. समेन आकारेनाति अतिउम्मीलनअतिमन्दालोचनानि वज्जेत्वा नातिउम्मीलननातिमन्दालोचनसङ्खातेन समेन आलोचनाकारेन. निमित्तं गण्हन्तेनाति पथवीकसिणे चक्खुना गहितनिमित्तं मनसा गण्हन्तेन. भावेतब्बन्ति तथापवत्तं निमित्तग्गहणं वड्ढेतब्बं आसेवितब्बं बहुलीकातब्बं.

चक्खु किलमति अतिसुखुमं, अतिभासुरञ्च रूपगतं उपनिज्झायतो विय. अतिविभूतं होति अत्तनो सभावाविभावतो. तथा च वण्णतो वा लक्खणतो वा उपतिट्ठेय्य. तेन वुत्तं ‘‘तेनस्स निमित्तं नुप्पज्जती’’ति. अविभूतं होति गजनिम्मीलनेन पेक्खन्तस्स रूपगतं विय. चित्तञ्च लीनं होति दस्सने मन्दब्यापारताय कोसज्जपाततो. तेनाह ‘‘एवम्पि निमित्तं नुप्पज्जती’’ति. आदासतले मुखनिमित्तदस्सिना वियाति यथा आदासतले मुखनिमित्तदस्सी पुरिसो न तत्थ अतिगाळ्हं उम्मीलति, नापि अतिमन्दं, न आदासतलस्स वण्णं पच्चवेक्खति, नापि लक्खणं मनसि करोति. अथ खो समेन आकारेन ओलोकेन्तो अत्तनो मुखनिमित्तमेव पस्सति, एवमेव अयम्पि पथवीकसिणं समेन आकारेन ओलोकेन्तो निमित्तग्गहणप्पसुतोयेव होति, तेन वुत्तं ‘‘समेन आकारेना’’तिआदि. न वण्णो पच्चवेक्खितब्बोति यो तत्थ पथवीकसिणे अरुणवण्णो, सो न चिन्तेतब्बो. चक्खुविञ्ञाणेन पन गहणं न सक्का निवारेतुं. तेनेवेत्थ ‘‘न ओलोकेतब्बो’’ति ¶ अवत्वा पच्चवेक्खणग्गहणं कतं. न लक्खणं मनसि कातब्बन्ति यं तत्थ पथवीधातुया थद्धलक्खणं, तं न मनसि कातब्बं.

दिस्वा गहेतब्बत्ता ‘‘वण्णं अमुञ्चित्वा’’ति वत्वापि वण्णवसेनेत्थ आभोगो न कातब्बो, सो पन वण्णो निस्सयगतिको कातब्बोति दस्सेन्तो आह ‘‘निस्सयसवण्णं कत्वा’’ति. निस्सयेन समानाकारसन्निस्सितो सो वण्णो ताय पथविया समानगतिकं कत्वा, वण्णेन सहेव ‘‘पथवी’’ति मनसि कातब्बन्ति अत्थो. उस्सदवसेन पण्णत्तिधम्मेति पथवीधातुया उस्सन्नभावेन सत्तितो अधिकभावेन ससम्भारपथवियं ‘‘पथवी’’ति यो लोकवोहारो, तस्मिं पण्णत्तिधम्मे चित्तं पट्ठपेत्वा ‘‘पथवी, पथवी’’ति मनसि कातब्बं. यदि लोकवोहारेन पण्णत्तिमत्ते चित्तं ठपेतब्बं, नामन्तरवसेनपि पथवी मनसि कातब्बा भवेय्याति, होतु, को दोसोति दस्सेन्तो ‘‘मही मेदिनी’’तिआदिमाह. तत्थ यमिच्छतीति यं नामं वत्तुं इच्छति, तं वत्तब्बं. तञ्च खो यदस्स सञ्ञानुकूलं ¶ होति यं नामं अस्स योगिनो पुब्बे तत्थ गहितसञ्ञावसेन अनुकूलं पचुरताय, पगुणताय वा आगच्छति, तं वत्तब्बं. वत्तब्बन्ति च पठमसमन्नाहारे कस्सचि वचीभेदोपि होतीति कत्वा वुत्तं, आचरियेन वा वत्तब्बतं सन्धाय. किं वा बहुना, पाकटभावोयेवेत्थ पमाणन्ति दस्सेतुं ‘‘अपिचा’’तिआदि वुत्तं. कालेन उम्मीलेत्वा कालेन निम्मीलेत्वाति किञ्चि कालं चक्खुं उम्मीलेत्वा निमित्तग्गहणवसेन पथवीमण्डलं ओलोकेत्वा पुन किञ्चि कालं चक्खुं निम्मीलेत्वा आवज्जितब्बं. येनाकारेन ओलोकेत्वा गहितं, तेनाकारेन पुन तं समन्नाहरितब्बं.

५७. आपाथमागच्छतीति मनोद्वारिकजवनानं गोचरभावं उपगच्छति. तस्स उग्गहनिमित्तस्स. न तस्मिं ठाने निसीदितब्बं. कस्मा? यदि उग्गहनिमित्ते जातेपि पथवीमण्डलं ओलोकेत्वा भावेति, पटिभागनिमित्तुप्पत्ति न सिया. समीपट्ठेन च न ओलोकेतुं न सक्का. तेन वुत्तं ‘‘अत्तनो वसनट्ठानं पविसित्वा’’तिआदि. निस्सद्दभावाय एकपटलिकूपाहनागहणं, परिस्सयविनोदनत्थं कत्तरदण्डग्गहणं. सचे नस्सति, अथानेन भावेतब्बन्ति सम्बन्धो. वक्खमानेसु असप्पायेसु केनचिदेव असप्पायेन कारणभूतेन. निमित्तं आदायाति यथाजातं उग्गहनिमित्तं गहेत्वा. समन्नाहरितब्बन्ति आवज्जितब्बं निमित्तन्ति अधिप्पायो, सम्मा वा अनु ¶ अनु आहरितब्बं कम्मट्ठानन्ति अत्थो. तक्काहतं वितक्काहतन्ति तक्कनतो, सविसेसं तक्कनतो च ‘‘तक्को, वितक्को’’ति च एवं लद्धनामेन भावनाचित्तसम्पयुत्तेन सम्मासङ्कप्पेन आहननपरियाहननकिच्चेन अपरापरं वत्तमानेन कम्मट्ठानं आहतं, परियाहतञ्च कातब्बं, बलप्पत्तवितक्को मनसिकारो बहुलं पवत्तेतब्बोति अत्थो. एवं करोन्तस्साति एवं कम्मट्ठानं तक्काहतं वितक्काहतं करोन्तस्स. यथा भावना पुब्बेनापरं विसेसं आवहति, एवं अनुयुञ्जन्तस्स. अनुक्कमेनाति भावनानुक्कमेन. यदा सद्धादीनि इन्द्रियानि सुविसदानि तिक्खानि पवत्तन्ति, तदा अस्सद्धियादीनं दूरीभावेन सातिसयथामप्पत्तेहि सत्तहि बलेहि लद्धूपत्थम्भानि वितक्कादीनि कामावचरानेव झानङ्गानि बहूनि हुत्वा पातुभवन्ति. ततो एव तेसं उजुविपच्चनीकभूता कामच्छन्दादयो सद्धिं तदेकट्ठेहि पापधम्मेहि विदूरी भवन्ति, पटिभागनिमित्तुप्पत्तिया सद्धिं तं आरब्भ उपचारज्झानं उप्पज्जति. तेन वुत्तं ‘‘नीवरणानि विक्खम्भन्ती’’तिआदि. तत्थ सन्निसीदन्तीति सम्मदेव सीदन्ति, उपसमन्तीति अत्थो.

इमस्साति पटिभागनिमित्तस्स. अङ्गुलिपदपाणिपदादिको कसिणदोसो. आदासमण्डलूपमादीहि ¶ उग्गहनिमित्ततो पटिभागनिमित्तस्स सुपरिसुद्धतं, सण्हसुखुमतञ्च दस्सेति. तञ्च खो पटिभागनिमित्तं नेव वण्णवन्तं न सण्ठानवन्तं अपरमत्थसभावत्ता. ईदिसन्ति वण्णसण्ठानवन्तं. तिलक्खणब्भाहतन्ति उप्पादादिलक्खणत्तयानुपविट्ठं, अनिच्चतादिलक्खणत्तयङ्कितं वा. यदि न पनेतं तादिसं वण्णादिवन्तं, कथं झानस्स आरम्मणभावोति आह ‘‘केवलञ्ही’’तिआदि. सञ्ञजन्ति भावनासञ्ञाजनितं, भावनासञ्ञाय सञ्जातमत्तं. न हि असभावस्स कुतोचि समुट्ठानं अत्थि. तेनाह ‘‘उपट्ठानाकारमत्त’’न्ति.

५८. विक्खम्भितानेव सन्निसिन्नाव, न पन तदत्थं उस्साहो कातब्बोति अधिप्पायो. ‘‘उपचारसमाधिना’’ति वुत्ते इतरोपि समाधि अत्थीति अत्थतो आपन्नन्ति तम्पि दस्सेतुं ‘‘दुविधो हि समाधी’’तिआदि आरद्धं. द्वीहाकारेहीति झानधम्मानं पटिपक्खदूरीभावो, थिरभावप्पत्ति चाति इमेहि द्वीहि कारणेहि. इदानि तानि कारणानि अवत्थामुखेन दस्सेतुं ‘‘उपचारभूमियं वा’’तिआदि वुत्तं. उपचारभूमियन्ति उपचारावत्थायं. यदिपि तदा झानङ्गानि पटुतरानि महग्गतभावप्पत्तानि न उप्पज्जन्ति, तेसं ¶ पन पटिपक्खधम्मानं विक्खम्भनेन चित्तं समाधियति. तेनाह ‘‘नीवरणप्पहानेन चित्तं समाहितं होती’’ति. पटिलाभभूमियन्ति झानस्स अधिगमावत्थायं. तदा हि अप्पनापत्तानं झानधम्मानं उप्पत्तिया चित्तं समाधियति. तेनाह ‘‘अङ्गपातुभावेना’’ति. चित्तं समाहितं होतीति सम्बन्धो.

न थामजातानीति न जातथामानि, न भावनाबलं पत्तानीति अत्थो. चित्तन्ति झानचित्तं. केवलम्पि रत्तिं केवलम्पि दिवसं तिट्ठतीति समापत्तिवेलं सन्धायाह. उपचारभूमियं निमित्तवड्ढनं युत्तन्ति कत्वा वुत्तं ‘‘निमित्तं वड्ढेत्वा’’ति. लद्धपरिहानीति लद्धउपचारज्झानपरिहानि. निमित्ते अविनस्सन्ते तदारम्मणझानम्पि अपरिहीनमेव होति, निमित्ते पन आरक्खाभावेन विनट्ठे लद्धं लद्धं झानम्पि विनस्सति तदायत्तवुत्तितो. तेनाह ‘‘आरक्खम्ही’’तिआदि.

सत्तसप्पायवण्णना

५९. ‘‘थावरञ्च होती’’ति वत्वा यथा थावरं होति, तं दस्सेतुं ‘‘सति उपट्ठाति, चित्तं समाधियती’’ति वुत्तं. यथालद्धञ्हि निमित्तं तत्थ सतिं सूपट्ठितं कत्वा एकग्गतं विन्दन्तस्स ¶ थिरं नाम होति, सुरक्खितञ्च. सति-ग्गहणेन चेत्थ सम्पजञ्ञं, समाधिग्गहणेन वीरियञ्च सङ्गहितं होति नानन्तरियभावतो. तत्थाति तेसु आवासेसु. तीणि तीणीति एकेकस्मिं आवासे अवुत्थअवुत्थट्ठाने वसननियामेन तयो तयो दिवसे वसित्वा.

उत्तरेन वा दक्खिणेन वाति वुत्तं गमनागमने सूरियाभिमुखभावनिवारणत्थन्ति. सहस्सधनुप्पमाणं दियड्ढकोसं.

द्वत्तिंस तिरच्छानकथाति राजकथादिके (दी. नि. १.१७; म. नि. २.२२३; सं. नि. ५.१०८०; अ. नि. १०.६९; पाचि. ५०८) सन्धायाह. ता हि पाळियं सरूपतो अनागतापि अरञ्ञपब्बतनदीदीपकथा इति-सद्देन सङ्गहेत्वा सग्गमोक्खानं तिरच्छानभावतो ‘‘द्वत्तिंस तिरच्छानकथा’’ति वुत्ता. दसकथावत्थुनिस्सितन्ति ‘‘अप्पिच्छता, सन्तुट्ठि, पविवेको, असंसग्गो, वीरियारम्भो, सील, समाधि, पञ्ञा, विमुत्ति, विमुत्तिञाणदस्सन’’न्ति इमानि अप्पिच्छकथादीनं वत्थूनि, तन्निस्सितं भस्सं सप्पायं.

अतिरच्छानकथिकोति ¶ नतिरच्छानकथिको, तिरच्छानकथा विधुरं धम्मिकं कम्मट्ठानपटिसंयुत्तमेव कथं कथेतीति अधिप्पायो. सीलादिगुणसम्पन्नोति सीलसमाधिआदिगुणसम्पन्नो. यो हि समाधिकम्मट्ठानिको, समाधिकम्मट्ठानस्स वा पारं पत्तो, सो इमस्स योगिनो सप्पायो. तेनाह ‘‘यं निस्साया’’तिआदि. कायदळ्हीबहुलोति कायस्स सन्तप्पनपोसनप्पसुतो. यं सन्धाय वुत्तं ‘‘यावदत्थं उदरावदेहकं भुञ्जित्वा सेय्यसुखं पस्ससुखं मिद्धसुखं अनुयुत्तो विहरती’’ति (दी. नि. ३.३२०; म. नि. १.१८६; अ. नि. ५.२०६).

भोजनं येभुय्येन मधुरम्बिलरसवसेन सत्तानं उपयोगं गच्छति दधिआदीसु तथा दस्सनतो. कटुकादिरसा पन केवलं अभिसङ्खारका एवाति आह ‘‘कस्सचि मधुरं, कस्सचि अम्बिलं सप्पायं होती’’ति.

यस्मिं इरियापथे आधारभूते, वत्तमाने वा, यस्मिं वा इरियापथे पवत्तमानस्स. निमित्तासेवनबहुलस्साति निमित्ते आसेवनाबहुलस्स पटिभागनिमित्ते विसयभूते भावनामनसिकारं ¶ बहुलं आसेवन्तस्स, निमित्तस्स वा गोचरासेवनवसेन आसेवनाबहुलस्स. येन हि भावेन्तस्स भावनासेवना, तेन गोचरासेवनापि इच्छितब्बाति.

दसविधअप्पनाकोसल्लवण्णना

६०. न होति अप्पना. येन विधिना अप्पनायं कुसलो होति, सो दसविधो विधि अप्पनाकोसल्लं, तन्निब्बत्तं वा ञाणं. वत्थुविसदकिरियतोति वत्थूनं विसदभावकरणतो अप्पनाकोसल्लं इच्छितब्बन्ति सम्बन्धो. एवं सेसेसुपि.

६१. चित्तचेतसिकानं हि पवत्तिट्ठानभावतो सरीरं, तप्पटिबद्धानि चीवरादीनि च इध ‘‘वत्थूनी’’ति अधिप्पेतानि. तानि यथा चित्तस्स सुखावहानि होन्ति, तथा करणं तेसं विसदभावकरणं. तेन वुत्तं ‘‘अज्झत्तिकबाहिरान’’न्तिआदि. सरीरं वाति वा-सद्दो अट्ठानप्पयुत्तो, सरीरं सेदमलग्गहितं वा अञ्ञेन वा अवस्सुतकिच्चेन विबाधितन्ति अधिप्पायो. सेनासनं वाति वा-सद्देन पत्तादीनम्पि सङ्गहो दट्ठब्बो. ननु चायं नयो ¶ खुद्दकपलिबोधुपच्छेदेन सङ्गहितो, पुन कस्मा वुत्तोति? सच्चं सङ्गहितो, सो च खो भावनाय आरम्भकाले. इध पन आरद्धकम्मट्ठानस्स उपचारज्झाने ठत्वा अप्पनापरिवासं वसन्तस्स कालन्तरे जाते तथापटिपत्ति अप्पनाकोसल्लाय वुत्ता. अविसदे सति, विसयभूते वा. कथं भावनमनुयुञ्जन्तस्स तानि विसयो? अन्तरन्तरा पवत्तनकचित्तुप्पादवसेनेवं वुत्तं. ते हि चित्तुप्पादा चित्तेकग्गताय अपरिसुद्धभावाय संवत्तन्ति. चित्तचेतसिकेसु निस्सयादिपच्चयभूतेसु. ञाणम्पीति पि-सद्दो सम्पिण्डने. तेन ‘‘न केवलं तं वत्थुयेव, अथ खो तस्मिं अपरिसुद्धे ञाणम्पि अपरिसुद्धं होती’’ति दस्सितं. तंसम्पयुत्तानं पन अपरिसुद्धता अवुत्तसिद्धा, ञाणस्स च विसुं गहणं अप्पनाय बहुकारत्ता. तथा हि झानं ‘‘दन्धाभिञ्ञं, खिप्पाभिञ्ञ’’न्ति ञाणमुखेन निद्दिट्ठं. निस्सयनिस्सयोपि निस्सयोत्वेव वुच्चतीति आह ‘‘दीपकपल्लिकवट्टितेलानि निस्साया’’ति. ञाणे अविसदे विपस्सनाभावना विय समाधिभावनापि परिदुब्बला होतीति दस्सेतुं ‘‘अपरिसुद्धेन ञाणेना’’तिआदि वुत्तं. तत्थ कम्मट्ठानन्ति समथकम्मट्ठानं आह. वुड्ढिं अङ्गपातुभावेन, विरूळ्हिं गुणभावेन, वेपुल्लं सब्बसो वसिभावप्पत्तिया वेदितब्बं. विसदे पनाति सुक्कपक्खो, तस्स वुत्तविपरियायेन अत्थो वेदितब्बो.

६२. समभावकरणन्ति ¶ किच्चतो अनूनाधिकभावकरणं. यथापच्चयं सद्धेय्यवत्थुस्मिं अधिमोक्खकिच्चस्स पटुतरभावेन, पञ्ञाय अविसदताय, वीरियादीनं च सिथिलतादिना सद्धिन्द्रियं बलवं होति. तेनाह ‘‘इतरानि मन्दानी’’ति. ततोति तस्मा सद्धिन्द्रियस्स बलवभावतो, इतरेसञ्च मन्दत्ता. कोसज्जपक्खे पतितुं अदत्वा सम्पयुत्तधम्मानं पग्गण्हनं अनुबलप्पदानं पग्गहो, पग्गहोव किच्चं, पग्गहकिच्चं कातुं न सक्कोतीति सम्बन्धितब्बं. आरम्मणं उपगन्त्वा ठानं, अनिस्सज्जनं वा उपट्ठानं, विक्खेपपटिपक्खो. येन वा सम्पयुत्ता अविक्खित्ता होन्ति, सो अविक्खेपो. रूपगतं विय चक्खुना येन याथावतो विसयसभावं पस्सति, तं दस्सनकिच्चं कातुं न सक्कोति बलवता सद्धिन्द्रियेन अभिभूतत्ता. सहजातधम्मेसु हि इन्दट्ठं कारेन्तानं सहपवत्तमानानं धम्मानं एकरसतावसेनेव अत्थसिद्धि, न अञ्ञथा. तस्माति वुत्तमेवत्थं कारणभावेन पच्चामसति ¶ . तन्ति सद्धिन्द्रियं. धम्मसभावपच्चवेक्खणेनाति यस्स सद्धेय्यवत्थुनो उळारतादिगुणे अधिमुच्चनस्स सातिसयप्पवत्तिया सद्धिन्द्रियं बलवं जातं, तस्स पच्चयपच्चयुप्पन्नादिविभागतो याथावतो वीमंसनेन. एवञ्हि एवंधम्मतानयेन सभावरसतो परिग्गय्हमाने सविप्फारो अधिमोक्खो न होति, ‘‘अयं इमेसं धम्मानं सभावो’’ति परिजाननवसेन पञ्ञाब्यापारस्स सातिसयत्ता. धुरियधम्मेसु हि यथा सद्धाय बलवभावे पञ्ञाय मन्दभावो होति, एवं पञ्ञाय बलवभावे सद्धाय मन्दभावो होतीति. तेन वुत्तं ‘‘तं धम्मसभावपच्चवेक्खणेन हापेतब्ब’’न्ति.

तथा अमनसिकारेनाति येनाकारेन भावनमनुयुञ्जन्तस्स सद्धिन्द्रियं बलवं होति, तेनाकारेन भावनाय अननुयुञ्जनतोति वुत्तं होति. इध दुविधेन सद्धिन्द्रियस्स बलवभावो, अत्तनो वा पच्चयविसेसतो किच्चुत्तरियेन, वीरियादीनं वा मन्दकिच्चताय. तत्थ पठमविकप्पे हापनविधि दस्सितो, दुतियविकप्पे पन यथा मनसि करोतो वीरियादीनं मन्दकिच्चताय सद्धिन्द्रियं बलवं जातं, तथा अमनसिकारेन वीरियादीनं पटुकिच्चभावावहेन मनसिकारेन सद्धिन्द्रियं तेहि समरसं करोन्तेन हापेतब्बं. इमिना नयेन सेसिन्द्रियेसुपि हापनविधि वेदितब्बो.

वक्कलित्थेरवत्थूति सो हि आयस्मा सद्धाधिमुत्तताय कताधिकारो सत्थु रूपकायदस्सनप्पसुतो एव हुत्वा विहरन्तो सत्थारा ‘‘किं ते, वक्कलि, इमिना पूतिकायेन दिट्ठेन? यो खो, वक्कलि, धम्मं पस्सति, सो मं पस्सती’’तिआदिना (सं. नि. ३.८७) ओवदित्वा ¶ कम्मट्ठाने नियोजितोपि तं अननुयुञ्जन्तो पणामितो अत्तानं विनिपातेतुं पपातट्ठानं अभिरुहि. अथ नं सत्था यथानिसिन्नोव ओभासं विसज्जेन्तो अत्तानं दस्सेत्वा –

‘‘पामोज्जबहुलो भिक्खु, पसन्नो बुद्धसासने;

अधिगच्छे पदं सन्तं, सङ्खारूपसमं सुख’’न्ति. (ध. प. ३८१) –

गाथं वत्वा ‘‘एहि वक्कली’’ति आह. सो तेन अमतेनेव अभिसित्तो हट्ठतुट्ठो हुत्वा विपस्सनं पट्ठपेसि. सद्धाय पन बलवभावतो ¶ विपस्सनावीथिं न ओतरि. तं ञत्वा भगवा इन्द्रियसमतं पटिपादेन्तो कम्मट्ठानं सोधेत्वा अदासि. सो सत्थारा दिन्ननयेन विपस्सनं उस्सुक्कापेत्वा मग्गपटिपाटिया अरहत्तं पापुणि. तेन वुत्तं ‘‘वक्कलित्थेरवत्थु चेत्थ निदस्सन’’न्ति.

इतरकिच्चभेदन्ति उपट्ठानादिकिच्चविसेसं. पस्सद्धादीति आदि-सद्देन समाधिउपेक्खासम्बोज्झङ्गानं सङ्गहो दट्ठब्बो. हापेतब्बन्ति यथा सद्धिन्द्रियस्स बलवभावो धम्मसभावपच्चवेक्खणेन हायति, एवं वीरियिन्द्रियस्स अधिमत्तता पस्सद्धिआदिभावनाय हायति, समाधिपक्खियत्ता तस्सा. तथा हि सा समाधिन्द्रियस्स अधिमत्ततं कोसज्जपाततो रक्खन्ती वीरियादिभावना विय वीरियिन्द्रियस्स अधिमत्ततं उद्धच्चपाततो रक्खन्ती एकंसतो हापेति. तेन वुत्तं ‘‘पस्सद्धादिभावनाय हापेतब्ब’’न्ति.

सोणत्थेरस्स वत्थूति (महाव. २४३) सुकुमारस्स सोणत्थेरस्स वत्थु. सो हि आयस्मा सत्थु सन्तिके कम्मट्ठानं गहेत्वा सीतवने विहरन्तो ‘‘मम सरीरं सुखुमालं, न च सक्का सुखेनेव सुखं अधिगन्तुं, कायं किलमेत्वापि समणधम्मो कातब्बो’’ति ठानचङ्कममेव अधिट्ठाय पधानमनुयुञ्जन्तो पादतलेसु फोटेसु उट्ठितेसुपि वेदनं अज्झुपेक्खित्वा दळ्हं वीरियं करोन्तो अच्चारद्धवीरियताय विसेसं निब्बत्तेतुं नासक्खि. सत्था तत्थ गन्त्वा वीणोवादेन ओवदित्वा वीरियसमतायोजनविधिं दस्सेन्तो कम्मट्ठानं सोधेत्वा गिज्झकूटं गतो. थेरोपि सत्थारा दिन्ननयेन वीरियसमतं योजेन्तो विपस्सनं उस्सुक्कापेत्वा अरहत्ते पतिट्ठासि. तेन वुत्तं ‘‘सोणत्थेरस्स वत्थु दस्सेतब्ब’’न्ति.

सेसेसुपीति ¶ सतिसमाधिपञ्ञिन्द्रियेसुपि. एकस्साति एकेकस्स. सामञ्ञनिद्देसोवायं दट्ठब्बो. एवं पञ्चन्नं इन्द्रियानं पच्चेकं अधिमत्तताय पन हापनवसेन समतं दस्सेत्वा इदानि तत्थ येसं विसेसतो असाधारणतो, साधारणतो च समता इच्छितब्बा, तं दस्सेतुं ‘‘विसेसतो पना’’तिआदि वुत्तं. एत्थाति एतेसु पञ्चसु इन्द्रियेसु. समतन्ति सद्धापञ्ञानं अञ्ञमञ्ञं अनूनानधिकभावं. तथा समाधिवीरियानं ¶ . यथा हि सद्धापञ्ञानं विसुं विसुं धुरियधम्मभूतानं किच्चतो अञ्ञमञ्ञानतिवत्तनं विसेसतो इच्छितब्बमेव, यतो नेसं समधुरताय अप्पना सम्पज्जतीति, एवं समाधिवीरियानं कोसज्जउद्धच्चपक्खिकानं समरसताय सति अञ्ञमञ्ञूपत्थम्भनतो सम्पयुत्तधम्मानं अन्तद्वयपाताभावेन सम्मदेव अप्पना इज्झति.

‘‘बलवसद्धो ही’’तिआदि निदस्सनवसेन वुत्तं. तस्सत्थो – यो बलवतिया सद्धाय समन्नागतो अविसदञाणो, सो मुद्धप्पसन्नो होति, न अवेच्चप्पसन्नो. तथा हि सो अवत्थुस्मिं पसीदति सेय्यथापि तित्थियसावका. केराटिकपक्खन्ति साठेय्यपक्खं भजति. सद्धाहीनाय पञ्ञाय अतिधावन्तो ‘‘देय्यवत्थुपरिच्चागेन विना चित्तुप्पादमत्तेनपि दानमयं पुञ्ञं होती’’तिआदीनि परिकप्पेति हेतुपटिरूपकेहि वञ्चितो. एवंभूतो पन सुक्खतक्कविलुत्तचित्तो पण्डितानं वचनं नादियति, सञ्ञत्तिं न गच्छति. तेनाह ‘‘भेसज्जसमुट्ठितो विय रोगो अतेकिच्छो होती’’ति. यथा चेत्थ सद्धापञ्ञानं अञ्ञमञ्ञविरहो न अत्थावहो अनत्थावहो च, एवमिधापि समाधिवीरियानं अञ्ञमञ्ञविरहो न अविक्खेपावहो विक्खेपावहो चाति वेदितब्बं. कोसज्जं अभिभवति, तेन अप्पनं न पापुणातीति अधिप्पायो. उद्धच्चं अभिभवतीति एत्थापि एसेव नयो. तदुभयन्ति तं सद्धापञ्ञाद्वयं, समाधिवीरियद्वयञ्च. समं कातब्बन्ति समरसं कातब्बं.

समाधिकम्मिकस्साति समथकम्मट्ठानिकस्स. एवन्ति एवं सन्ते, सद्धाय तेसं बलवभावे सतीति अत्थो. सद्दहन्तोति ‘‘पथवी पथवी’’ति मनसिकरणमत्तेन कथं झानुप्पत्तीति अचिन्तेत्वा ‘‘अद्धा सम्मासम्बुद्धेन वुत्तविधि इज्झिस्सती’’ति सद्दहन्तो सद्धं जनेन्तो. ओकप्पेन्तोति आरम्मणं अनुपविसित्वा विय अधिमुच्चनवसेन ओकप्पेन्तो पक्खन्दन्तो. एकग्गता बलवती वट्टति समाधिपधानत्ता झानस्स. उभिन्नन्ति समाधिपञ्ञानं, समाधिकम्मिकस्स समाधिनो अधिमत्ततापि इच्छितब्बाति आह ‘‘समतायपी’’ति, समभावेनापीति अत्थो. अप्पनाति इधाधिप्पेतअप्पना. तथा हि ‘‘होतियेवा’’ति सासङ्कं वदति ¶ , लोकुत्तरप्पना पन तेसं समभावेनेव इच्छिता. यथाह – ‘‘समथविपस्सनं युगनद्धं भावेती’’ति (पटि. म. २.१, ५).

यदि ¶ विसेसतो सद्धापञ्ञानं, समाधिवीरियानञ्च समता इच्छिता, कथं सतीति आह ‘‘सति पन सब्बत्थ बलवती वट्टती’’ति. सब्बत्थाति लीनुद्धच्चपक्खेसु पञ्चसु इन्द्रियेसु. उद्धच्चपक्खिये गण्हन्तो ‘‘सद्धावीरियपञ्ञान’’न्ति आह. अञ्ञथापीति च गहेतब्बा सिया. तथा हि ‘‘कोसज्जपक्खेन समाधिना’’ इच्चेव वुत्तं, न ‘‘पस्सद्धिसमाधिउपेक्खाही’’ति. सा सति. सब्बेसु राजकम्मेसु नियुत्तो सब्बकम्मिको. तेन कारणेन सब्बत्थ इच्छितब्बत्थेन. आह अट्ठकथायं. सब्बत्थ नियुत्ता सब्बत्थिका, सब्बेन वा लीनुद्धच्चपक्खियेन बोज्झङ्गग्गहणेन अत्थेतब्बा सब्बत्थिया, सब्बत्थियाव सब्बत्थिका. चित्तन्ति कुसलचित्तं. तस्स हि सति पटिसरणं परायणं अप्पत्तस्स पत्तिया अनधिगतस्स अधिगमाय. तेनाह ‘‘आरक्खपच्चुपट्ठाना’’तिआदि.

६३. चित्तेकग्गतानिमित्तस्साति चित्तेकग्गताय निमित्तस्स, चित्तेकग्गतासङ्खातस्स च निमित्तस्स. चित्तस्स हि समाहिताकारं सल्लक्खेत्वा समथनिमित्तं रक्खन्तोयेव कसिणनिमित्तं रक्खति. तस्मा पथवीकसिणादिकस्साति आदि-सद्देन न केवलं पटिभागनिमित्तस्सेव, अथ खो समथनिमित्तस्सापि गहणं दट्ठब्बं. तन्ति रक्खणकोसल्लं. इध अप्पनाकोसल्लकथायं ‘‘निमित्तकोसल्ल’’न्ति अधिप्पेतं, करणभावनाकोसल्लानं पगेव सिद्धत्ताति अधिप्पायो.

६४. अतिसिथिलवीरियतादीहीति आदि-सद्देन पमोदनसंवेजनविपरियाये सङ्गण्हाति. लीनन्ति सङ्कुचितं कोसज्जपक्खपतितं. चित्तन्ति भावनाचित्तं. धम्मविचयसम्बोज्झङ्गादयो भावेतीति एत्थ ‘‘तयो’’ति पदं आनेत्वा सम्बन्धितब्बं. यथा पन ते भावेतब्बा, तं सयमेव वक्खति.

परित्तन्ति अप्पकं. उज्जालेतुकामोति पदीपेतुकामो. उदकवातं ददेय्याति उदकमिस्सं वातं उपनेय्य. अकालोति नकालो, अयुत्तकालो वा. सतिआदिधम्मसामग्गिसङ्खाताय बोधिया बुज्झति एतायाति कत्वा, तंसमङ्गिनो वा बुज्झतीति बोधिनो योगिनो अङ्गन्ति बोज्झङ्गो ¶ , पसत्थो, सुन्दरो वा बोज्झङ्गो सम्बोज्झङ्गो ¶ . कायचित्तदरथवूपसमलक्खणा पस्सद्धियेव सम्बोज्झङ्गो पस्सद्धिसम्बोज्झङ्गो, तस्स पस्सद्धिसम्बोज्झङ्गस्स. समाधिसम्बोज्झङ्गादीसुपि एसेव नयो. अयं पन विसेसो – समाधिस्स ताव पदत्थलक्खणानि हेट्ठा आगतानेव. उपपत्तितो इक्खतीति उपेक्खा. सा पनायं अत्थतो तत्रमज्झत्तुपेक्खाव इध बोज्झङ्गुपेक्खा वेदितब्बा. दुसमुट्ठापयन्ति समुट्ठापेतुं उप्पादेतुं असक्कुणेय्यं. धम्मानं, धम्मेसु वा विचयो धम्मविचयो, पञ्ञाति अत्थो. वीरस्स भावो, कम्मं वा, विधिना वा ईरेतब्बं पवत्तेतब्बन्ति वीरियं, उस्साहो. पीणेति कायं, चित्तं च सन्तप्पेतीति पीति.

यं यं सकं यथासकं, अत्तनो अत्तनोति अत्थो. आहारवसेनाति पच्चयवसेन. भावनाति उप्पादना, वड्ढना च. कुसलाकुसलाति कोसल्लसम्भूतट्ठेन कुसला, तप्पटिपक्खतो अकुसला. ये अकुसला, ते सावज्जा. ये कुसला, ते अनवज्जा. अकुसला हीना, इतरे पणीता. कुसलापि वा हीनेहि छन्दादीहि आरद्धा हीना, इतरे पणीता. कण्हाति काळका चित्तस्स अपभस्सरभावकरणा, सुक्काति ओदाता चित्तस्स पभस्सरभावकरणा. कण्हाभिजातिहेतुतो वा कण्हा, सुक्काभिजातिहेतुतो सुक्का. ते एव सप्पटिभागा. कण्हा हि उजुविपच्चनीकताय सुक्केहि सप्पटिभागा. तथा सुक्कापि इतरेहि. अथ वा कण्हा च सुक्का च सप्पटिभागा च कण्हसुक्कसप्पटिभागा. सुखा हि वेदना दुक्खाय वेदनाय सप्पटिभागा, दुक्खा च वेदना सुखाय सप्पटिभागाति. अनुप्पन्नस्साति अनिब्बत्तस्स. उप्पादायाति उप्पादनत्थाय. उप्पन्नस्साति निब्बत्तस्स. भिय्योभावायाति पुनप्पुनभावाय. वेपुल्लायाति विपुलभावाय. भावनायाति वड्ढिया. पारिपूरियाति परिपूरणत्थाय.

तत्थाति ‘‘अत्थि भिक्खवे’’तिआदिना दस्सितपाठे. सभावसामञ्ञलक्खणपटिवेधवसेनाति एकज्झं कत्वा गहणे अनवज्जसुखविपाकादिकस्स विसुं विसुं पन फुसनादिकस्स सभावलक्खणस्स, अनिच्चादिकस्स सामञ्ञलक्खणस्स च पटिविज्झनवसेन. पवत्तमनसिकारोति कुसलादीनं तंतंसभावलक्खणादिकस्स याथावतो अवबुज्झनवसेन उप्पन्नजवनचित्तुप्पादो. सो हि अविपरीतमनसिकारताय ‘‘योनिसोमनसिकारो’’ति वुत्तो. तदाभोगताय आवज्जनापि तग्गतिकाव. रुप्पनलक्खणादिकम्पि ¶ इध सामञ्ञलक्खणेनेव सङ्गहितन्ति दट्ठब्बं. कुसलकिरियाय आदिआरम्भवसेन पवत्तवीरियं धितिसभावताय ‘‘धातू’’ति वुत्तन्ति आह ‘‘आरम्भधातूति पठमवीरियं वुच्चती’’ति. लद्धासेवनं वीरियं बलप्पत्तं ¶ हुत्वा पटिपक्खं विधमतीति आह ‘‘कोसज्जतो निक्खन्तत्ता ततो बलवतर’’न्ति. अधिमत्ताधिमत्ततरानं पटिपक्खधम्मानं विधमनसमत्थं पटुपटुतरादिभावप्पत्तं होतीति वुत्तं ‘‘परं परं ठानं अक्कमनतो ततोपि बलवतर’’न्ति. तिट्ठति पवत्तति एत्थाति ठानिया, पीतिसम्बोज्झङ्गस्स ठानिया पीतिसम्बोज्झङ्गट्ठानिया. ठातब्बो वा ठानियो, पीतिसम्बोज्झङ्गो ठानियो एतेसूति पीतिसम्बोज्झङ्गट्ठानिया, अपरापरं वत्तमाना पीतिसम्बोज्झङ्गसम्पयुत्ता धम्मा. यस्मा पन तेसु पीतियेव पीतिसम्बोज्झङ्गस्स विसेसकारणं, तस्मा वुत्तं ‘‘पीतिया एव एतं नाम’’न्ति. उप्पादकमनसिकारोति यथा मनसि करोतो अनुप्पन्नो पीतिसम्बोज्झङ्गो उप्पज्जति, उप्पन्नो च वड्ढति, तथा पवत्तमनसिकारो.

परिपुच्छकताति परियोगाहेत्वा पुच्छकभावो. पञ्चपि हि निकाये उग्गहेत्वा आचरिये परियुपासित्वा तस्स तस्स अत्थं परिपुच्छन्तस्स, ते वा सह अट्ठकथाय परियोगाहेत्वा यं यं तत्थ गण्ठिट्ठानं, तं तं ‘‘इदं, भन्ते, कथं, इमस्स को अत्थो’’ति पुच्छन्तस्स धम्मविचयसम्बोज्झङ्गो उप्पज्जतीति. वत्थुविसदकिरिया इन्द्रियसमत्तपटिपादना सङ्खेपतो, वित्थारतो च पकासिता एव. तत्थ पन समाधिसंवत्तनियभावेन आगता, इध पञ्ञासंवत्तनियभावेन. यदग्गेन हि समाधिसंवत्तनिका, तदग्गेन पञ्ञासंवत्तनिका समाधिस्स ञाणपच्चुपट्ठानतो. ‘‘समाहितो यथाभूतं पजानाती’’ति (सं. नि. ४.९९; ५.१०७१) वुत्तं. दुप्पञ्ञपुग्गलपरिवज्जना नाम दुप्पञ्ञानं मन्दबुद्धीनं भत्तनिक्खित्तकाकमंसनिक्खित्तसुनखसदिसानं मोमूहपुग्गलानं दूरतो परिच्चजना. पञ्ञवन्तपुग्गलसेवना नाम पञ्ञाय कताधिकारानं सच्चपटिच्चसमुप्पादादीसु कुसलानं अरियानं, विपस्सनाकम्मिकानं वा महापञ्ञानं कालेन कालं उपसङ्कमनं. गम्भीरञाणचरियपच्चवेक्खणाति गम्भीरञाणेहि चरितब्बानं खन्धायतनधातादीनं, सच्चपच्चयाकारादिदीपनानं वा सुञ्ञतापटिसंयुत्तानं सुत्तन्तानं पच्चवेक्खणा. तदधिमुत्तताति पञ्ञाधिमुत्तता, पञ्ञाय निन्नपोणपब्भारताति अत्थो.

अपायादीति ¶ आदि-सद्देन जातिआदिं अतीते वट्टमूलकं दुक्खं, अनागते वट्टमूलकं दुक्खं, पच्चुप्पन्ने आहारपरियेट्ठिमूलकञ्च दुक्खं सङ्गण्हाति. वीरियायत्तस्स लोकियलोकुत्तरविसेसस्स अधिगमो एव आनिसंसो, तस्स दस्सनसीलता वीरियायत्त…पे… दस्सिता. सपुब्बभागो निब्बानगामिमग्गो गमनवीथि गन्तब्बा पटिपज्जितब्बा पटिपदाति कत्वा ¶ . दायकानं महप्फलभावकरणेन पिण्डापचायनताति पच्चयदायकानं अत्तनि कारस्स अत्तनो सम्मापटिपत्तिया महप्फलकारभावस्स करणेन पिण्डस्स भिक्खाय पटिपूजना. इतरथाति आमिसपूजाय. कुसीतपुग्गलपरिवज्जनताति अलसानं भावनाय नाममत्तम्पि अजानन्तानं कायदळ्हीबहुलानं यावदत्थं भुञ्जित्वा सेय्यसुखादिअनुयुञ्जनकानं तिरच्छानकथिकानं पुग्गलानं दूरतो परिच्चजना. आरद्धवीरियपुग्गलसेवनताति ‘‘दिवसं चङ्कमेन निसज्जाया’’तिआदिना (विभ. ५१९; अ. नि. ३.१६) भावनारम्भवसेन आरद्धवीरियानं दळ्हपरक्कमानं पुग्गलानं कालेन कालं उपसङ्कमना. सम्मप्पधानपच्चवेक्खणताति चतुब्बिधसम्मप्पधानानुभावस्स पच्चवेक्खणता. तदधिमुत्तताति तस्मिं वीरियसम्बोज्झङ्गे अधिमुत्ति सब्बिरियापथेसु निन्नपोणपब्भारता. एत्थ च थिनमिद्धविनोदनकुसीतपुग्गलपरिवज्जनआरद्धवीरियपुग्गलसेवनतदधिमुत्तता पटिपक्खविधमनपच्चयूपसंहारवसेन, अपायादिभयपच्चवेक्खणादयो समुत्तेजनवसेन वीरियसम्बोज्झङ्गस्स उप्पादका दट्ठब्बा.

बुद्धादीसु पसादसिनेहाभावेन थुसखरहदया लूखपुग्गला, तब्बिपरियायेन सिनिद्धपुग्गला वेदितब्बा. बुद्धादीनं गुणपरिदीपना सम्पसादनीयसुत्तादयो (दी. नि. ३.१४१ आदयो) पसादनीयसुत्तन्ता. इमेहि आकारेहीति यथावुत्तेहि कुसलादीनं सभावसामञ्ञलक्खणपटिविज्झनादिआकारेहि चेव परिपुच्छकतादिआकारेहि च. एते धम्मेति एते कुसलादीसु योनिसोमनसिकारादिके चेव धम्मत्थञ्ञुतादिके च.

६५. अच्चारद्धवीरियतादीहीति अतिविय पग्गहितवीरियतादीहि. आदि-सद्देन संवेजनपमोदनादिं सङ्गण्हाति. उद्धतन्ति समाधिआदीनं मन्दताय अवूपसन्तं. दुवूपसमयन्ति वूपसमेतुं समाधातुं असक्कुणेय्यं.

तं ¶ आकारं सल्लक्खेत्वाति येनाकारेन अस्स योगिनो पस्सद्धि समाधि उपेक्खाति इमे पस्सद्धिआदयो धम्मा पुब्बे यथारहं तस्मिं तस्मिं काले उप्पन्नपुब्बा, तं चित्ततंसम्पयुत्तधम्मानं पस्सद्धाकारं, समाहिताकारं, अज्झुपेक्खिताकारञ्च उपलक्खेत्वा उपधारेत्वा. तीसुपि पदेसूति ‘‘अत्थि, भिक्खवे, कायप्पस्सद्धी’’तिआदिना आगतेसु तीसुपि वाक्येसु, तेहि वा पकासितेसु तीसु धम्मकोट्ठासेसु. यथासमाहिताकारं सल्लक्खेत्वा गय्हमानो ¶ समथो एव समथनिमित्तन्ति आह ‘‘समथनिमित्तन्ति च समथस्सेवेतमधिवचन’’न्ति. नानारम्मणे परिब्भमनेन विविधं अग्गं एतस्साति ब्यग्गो, विक्खेपो. तथा हि सो अनवट्ठानरसो, भन्ततापच्चुपट्ठानो च वुत्तो. एकग्गताभावतो ब्यग्गपटिपक्खोति अब्यग्गो, समाधि. सो एव निमित्तन्ति पुब्बे विय वत्तब्बं. तेनाह ‘‘अविक्खेपट्ठेन च तस्सेव अब्यग्गनिमित्तन्ति अधिवचन’’न्ति.

सरीरावत्थं ञत्वा मत्तसो परिभुत्तो पणीताहारो कायलहुतादीनं समुट्ठापनेन पस्सद्धिया पच्चयो होति, तथा उतुसप्पायं, इरियापथसप्पायञ्च सेवितं, पयोगो च कायिको पवत्तितोति आह ‘‘पणीतभोजनसेवनता’’तिआदि. पयोगसमतादीनं अभावेन सदरथकायचित्ता पुग्गला सारद्धपुग्गला. वुत्तविपरियायेन पस्सद्धकाया पुग्गला वेदितब्बा.

निरस्सादस्साति भावनस्सादरहितस्स. भावना हि वीथिपटिपन्ना पुब्बेनापरं विसेसवती पवत्तमाना चित्तस्स अस्सादं उपसमसुखं आवहति, तदभावतो निरस्सादं चित्तं होति. सद्धासंवेगवसेनाति सद्धावसेन, संवेगवसेन च. सम्पहंसनताति सम्मदेव पहंसनता संवेजनपुब्बकपसादुप्पादनेन भावना चित्तस्स तोसना. सम्मापवत्तस्साति लीनुद्धच्चविरहेन, समथवीथिपटिपत्तिया च समं, सविसेसञ्च पवत्तिया सम्मदेव पवत्तस्स भावनाचित्तस्स. अज्झुपेक्खनताति पग्गहनिग्गहसम्पहंसनेसु अब्यावटता. झानविमोक्खपच्चवेक्खणताति पठमादीनि झानानि पच्चनीकधम्मेहि सुट्ठु विमुत्ततादिना तेयेव विमोक्खा तेसं ‘‘एवं भावना, एवं समापज्जना, एवं अधिट्ठानं, एवं वुट्ठानं, एवं संकिलेसो, एवं वोदान’’न्ति पति पति अवेक्खणा.

सत्तमज्झत्तताति ¶ सत्तेसु पियट्ठानियेसुपि गहट्ठपब्बजितेसु मज्झत्ताकारो अज्झुपेक्खना. सङ्खारमज्झत्तताति अज्झत्तिकेसु चक्खादीसु, बाहिरेसु पत्तचीवरादीसु मज्झत्ताकारो अज्झुपेक्खना. सत्तसङ्खारानं ममायनं सत्तसङ्खारकेलायनं. इमेहाकारेहीति इमेहि यथावुत्तेहि कायचित्तानं पस्सद्धाकारसल्लक्खणादिआकारेहि चेव सप्पायाहारसेवनादिआकारेहि च. एते धम्मेति एते पस्सद्धिआदिधम्मे.

६६. पञ्ञापयोगमन्दतायाति पञ्ञाब्यापारस्स अप्पभावेन. यथा हि दानसीलानि अलोभादोसप्पधानानि ¶ , एवं भावना अमोहप्पधाना विसेसतो अप्पनावहा. तत्थ यदा पञ्ञा न बलवती होति, तदा भावनाचित्तस्स अनभिसङ्खतो विय आहारो पुरिसस्स अभिरुचिं न जनेति, तेन तं निरस्सादं होति. यदा च भावना पुब्बेनापरं विसेसावहा न होति सम्मदेव अवीथिपटिपत्तिया, तदा उपसमसुखस्स अलाभेन चित्तं निरस्सादं होति. तदुभयं सन्धायाह ‘‘पञ्ञापयोगमन्दताया’’तिआदि. नन्ति चित्तं. जातिजराब्याधिमरणानि यथारहं सुगतियं, दुग्गतियञ्च होन्तीति तदञ्ञमेव पञ्चविधबन्धनादिखुप्पिपासादिअञ्ञमञ्ञविबाधनादिहेतुकं अपायदुक्खं दट्ठब्बं. तयिदं सब्बं तेसं तेसं सत्तानं पच्चुप्पन्नभवनिस्सितं गहितन्ति अतीते, अनागते च काले वट्टमूलकदुक्खानि विसुं गहितानि. ये पन सत्ता आहारूपजीविनो, तत्थ च उट्ठानफलूपजीविनो, तेसं अञ्ञेहि असाधारणं जीवितदुक्खं अट्ठमं संवेगवत्थु वुत्तन्ति दट्ठब्बं.

अस्साति चित्तस्स. अलीनन्तिआदीसु कोसज्जपक्खियानं धम्मानं अनधिमत्तताय अलीनं. उद्धच्चपक्खिकानं धम्मानं अनधिमत्तताय अनुद्धतं. पञ्ञापयोगसम्पत्तिया, उपसमसुखाधिगमेन च अनिरस्सादं. पुब्बेनापरं सविसेसं ततो एव आरम्मणे समप्पवत्तं, समथवीथिपटिपन्नञ्च. तत्थ अलीनताय पग्गहे, अनुद्धतताय निग्गहे, अनिरस्सादताय सम्पहंसने न ब्यापारं आपज्जति. अलीनानुद्धतताय हि आरम्मणे समप्पवत्तं अनिरस्सादताय समथवीथिपटिपन्नं. समप्पवत्तिया वा अलीनं अनुद्धतं, समथवीथिपटिपत्तिया अनिरस्सादन्ति दट्ठब्बं.

नेक्खम्मपटिपदन्ति झानपटिपत्तिं. समाधिअधिमुत्तताति समाधिनिब्बत्तने झानाधिगमे युत्तप्पयुत्तता. सा पन यस्मा समाधिं गरुं कत्वा तत्थ निन्नपोणपब्भारभावेन ¶ पवत्तिया होति, तस्मा ‘‘समाधिगरू’’तिआदि वुत्तं.

६७. पटिलद्धे निमित्तस्मिं एवं हि सम्पादयतो अप्पनाकोसल्लं इमं अप्पना सम्पवत्ततीति सम्बन्धो. साति अप्पना. हित्वा हीति हि-सद्दो हेतुअत्थो. यस्मा ठानमेतं न विज्जति, तस्मा चित्तप्पवत्तिआकारं भावनाचित्तस्स लीनुद्धतादिवसेन पवत्तिआकारं सल्लक्खयं उपधारेन्तो. समतं वीरियस्सेव वीरियस्स समाधिना समरसतंयेव योजयेथ. कथं पन योजयेथाति आह ‘‘ईसकम्पी’’तिआदि. तत्थ लयन्ति लीनभावं, सङ्कोचन्ति अत्थो. यन्तन्ति गच्छन्तं ¶ , पग्गण्हेथेव समभावायाति अधिप्पायो. तेनाह ‘‘अच्चारद्धं निसेधेत्वा सममेव पवत्तये’’ति. कथं पन सममेव पवत्तयेति आह ‘‘रेणुम्ही’’तिआदि. यथाति रेणुआदीसु यथा मधुकरादीनं पवत्ति उपमाभावेन अट्ठकथायं सम्मवण्णिता, एवं लीनुद्धतभावेहि मोचयित्वा वीरियसमतायोजनेन निमित्ताभिमुखं मानसं पटिपादये पटिभागनिमित्ताभिमुखं भावनाचित्तं सम्पादेय्याति अत्थो.

निमित्ताभिमुखपटिपादनवण्णना

६८. तत्राति तस्मिं ‘‘रेणुम्ही’’तिआदिना वुत्तगाथाद्वये. अत्थदीपना उपमूपमेय्यत्थविभावना. अछेकोति अकुसलो. पक्खन्दोति धावितुं आरद्धो. विकसनक्खणेयेव सरसं कुसुमपरागं होति, पच्छा वातादीहि परिपतति, विरसं वा होति. तस्मा निवत्तने रेणु खीयतीति आह ‘‘खीणे रेणुम्हि सम्पापुणाती’’ति. पुप्फरासिन्ति रुक्खसाखासु निस्सितं पुप्फसञ्चयं.

सल्लकत्तअन्तेवासिकेसूति सल्लकत्तआचरियस्स अन्तेवासिकेसु. उदकथालगतेति उदकथालियं ठपिते. सत्थकम्मन्ति सिरावेधनादिसत्थकम्मं. फुसितुम्पि उप्पलपत्तन्ति सम्बन्धो. समेनाति पुरिमका विय गरुं, मन्दञ्च पयोगं अकत्वा समप्पमाणेन पयोगेन. तत्थाति उप्पलपत्ते. परियोदातसिप्पोति सुविसुद्धसिप्पो निप्फन्नसिप्पो.

मक्कटकसुत्तन्ति ¶ लूतसुत्तं. नियामको नावासारथी. लङ्कारन्ति किलञ्जादिमयं नावाकटसारकं. तेलेन अछड्डेन्तो नाळिं पूरेतीति सरावादिगतेन तेलेन अछड्डेन्तो सुखुमच्छिद्दकं तेलनाळिं पूरेति. एवमेवाति यथा ते आदितो वुत्तमधुकरसल्लकत्तअन्तेवासिसुत्ताकड्ढकनियामकतेलपूरका वेगेन पयोगं करोन्ति, एवमेव यो भिक्खु ‘‘सीघं अप्पनं पापुणिस्सामी’’ति गाळ्हं वीरियं करोति, यो मज्झे वुत्तमधुकरादयो विय वीरियं न करोति, इमे द्वेपि वीरियसमताभावेन अप्पनं पापुणितुं न सक्कोन्ति. यो पन अवसाने वुत्तमधुकरादयो विय समप्पयोगो, अयं अप्पनं पापुणितुं सक्कोति वीरियसमतायोगतोति उपमासंसन्दनं वेदितब्बं. तेन वुत्तं ‘‘एको भिक्खू’’तिआदि. लीनं भावनाचित्तन्ति अधिप्पायो.

पठमज्झानकथावण्णना

६९. एवन्ति ¶ वुत्तप्पकारेन. वीरियसमतायोजनवसेन वीथिपटिपन्नं भावनामानसं पटिभागनिमित्तेयेव ठपनवसेन निमित्ताभिमुखं पटिपादयतो अस्स योगिनो. इज्झिस्सतीति समिज्झिस्सति, उप्पज्जिस्सतीति अत्थो. अनुयोगवसेनाति भावनावसेन. सेसानीति सेसानि तीणि, चत्तारि वा. पकतिचित्तेहीति पाकतिकेहि कामावचरचित्तेहि. बलव…पे… चित्तेकग्गतानि भावनाबलेन पटुतरसभावप्पत्तिया. परिकम्मत्ताति पटिसङ्खारकत्ता. यदि आसन्नत्ता उपचारता, गोत्रभुनो एव उपचारसमञ्ञा सियाति आह ‘‘समीपचारित्ता वा’’ति. अनच्चासन्नोपि हि नातिदूरपवत्ती समीपचारी नाम होति. अप्पनं उपेच्च चरन्तीति उपचारानि. इतो पुब्बे परिकम्मानन्ति नानावज्जनवीथियं परिकम्मानं. एत्थाति एतेसु परिकम्मुपचारानुलोमसञ्ञितेसु. सब्बन्तिमन्ति ततियं, चतुत्थं वा. परित्तगोत्ताभिभवनतोति परित्तस्स गोत्तस्स अभिभवनतो. गंतायतीति हि गोत्तं, ‘‘परित्त’’न्ति पवत्तमानं अभिधानं, बुद्धिञ्च एकंसिकविसयताय रक्खतीति परित्तगोत्तं. यथा हि बुद्धि आरम्मणभूतेन अत्थेन विना न पवत्तति, एवं अभिधानं अभिधेय्यभूतेन. तस्मा सो तानि तायति रक्खतीति वुच्चति. तं पन महग्गतानुत्तरविधुरं कामतण्हाय गोचरभूतं कामावचरधम्मानं आवेणिकरूपं दट्ठब्बं. महग्गतगोत्तेपि इमिना नयेन अत्थो वेदितब्बो. भावनतोति उप्पादनतो.

अविसेसेन ¶ सब्बेसं सब्बा समञ्ञाति पठमनयो गहितग्गहणं होतीति आह ‘‘अग्गहितग्गहणेना’’तिआदि. नानावज्जनपरिकम्ममेव परिकम्मन्ति अधिप्पायेन ‘‘पठमं वा उपचार’’न्तिआदि वुत्तं. चतुत्थं अप्पनाचित्तं, पञ्चमं वा अप्पनाचित्तं पुब्बे वुत्तनयेन सचे चतुत्थं गोत्रभु होतीति अत्थो. पञ्चमं वाति वा-सद्दो अनियमे. स्वायं अनियमो इमिना कारणेनाति दस्सेतुं ‘‘तञ्च खो खिप्पाभिञ्ञदन्धाभिञ्ञवसेना’’ति वुत्तं. तत्थ खिप्पाभिञ्ञस्स चतुत्थं अप्पेति, दन्धाभिञ्ञस्स पञ्चमं. कस्मा पन चतुत्थं, पञ्चमं वा अप्पेति, न ततो परन्ति आह ‘‘ततो परं जवनं पतती’’ति. ततो पञ्चमतो परं छट्ठं, सत्तमञ्च जवनं पतन्तं विय होति परिक्खीणजवत्ताति अधिप्पायो.

यथा अलद्धासेवनं पठमजवनं दुब्बलत्ता गोत्रभुं न उप्पादेति, लद्धासेवनं पन बलवभावतो ¶ दुतियं, ततियं वा गोत्रभुं उप्पादेति, एवं लद्धासेवनताय बलवभावतो छट्ठं, सत्तमम्पि अप्पेतीति थेरस्स अधिप्पायो. तेनाह ‘‘तस्मा छट्ठेपि सत्तमेपि अप्पना होती’’ति. तन्ति थेरस्स वचनं. सुत्तसुत्तानुलोमआचरियवादेहि अनुपत्थम्भितत्ता वुत्तं ‘‘अत्तनोमतिमत्त’’न्ति. ‘‘पुरिमा पुरिमा कुसला धम्मा’’ति (पट्ठा. १.१.१२) पन सुत्तपदमकारणं आसेवनपच्चयलाभस्स बलवभावे अनेकन्तिकत्ता. तथा हि अलद्धासेवनापि पठमचेतना दिट्ठधम्मवेदनीया होति, लद्धासेवना दुतियचेतना याव छट्ठचेतना अपरापरियवेदनीया. चतुत्थपञ्चमेसुयेवातिआदि वुत्तस्सेवत्थस्स युत्तिदस्सनमुखेन निगमनत्थं वुत्तं. तत्थ यदि छट्ठसत्तमं जवनं पतितं नाम होति परिक्खीणजवत्ता, कथं सत्तमजवनचेतना उपपज्जवेदनीया, आनन्तरिया च होतीति? नायं विसेसो आसेवनपच्चयलाभेन बलप्पत्तिया. किञ्चरहि किरियावत्थाविसेसतो. किरियावत्था हि आरम्भमज्झपरियोसानवसेन तिविधा. तत्थ च परियोसानावत्थाय सन्निट्ठापकचेतनाभावेन उपपज्जवेदनीयादिता होति, न बलवभावेनाति दट्ठब्बं. पटिसन्धिया अनन्तरपच्चयभाविनो विपाकसन्तानस्स अनन्तरपच्चयभावेन तथा अभिसङ्खतत्ताति च वदन्ति. तस्मा छट्ठसत्तमानं पपाताभिमुखताय परिक्खीणजवता न सक्का निवारेतुं. तथा हि ‘‘यथा हि पुरिसो’’तिआदि वुत्तं.

सा ¶ च पन अप्पना. अद्धानपरिच्छेदोति कालपरिच्छेदो. सो पनेत्थ सत्तसु ठानेसु कत्थचि अपरिमाणचित्तक्खणताय, कत्थचि अतिइत्तरखणताय नत्थीति वुत्तो. न हेत्थ सम्पुण्णजवनवीथि अद्धा लब्भति. तेनेवाह ‘‘एत्थ मग्गानन्तरफल’’न्तिआदि. सेसट्ठानेसूति पठमप्पना, लोकियाभिञ्ञा, मग्गक्खणो, निरोधा वुट्ठहन्तस्स फलक्खणोति एतेसु चतूसु ठानेसु.

एत्तावताति एत्तकेन भावनाक्कमेन एस योगावचरो पठमं झानं उपसम्पज्ज विहरति. एवं विहरता च अनेन तदेव पठमं झानं अधिगतं होति पथवीकसिणन्ति सम्बन्धो.

७०. तत्थाति तस्मिं झानपाठे. विविच्चित्वाति विसुं हुत्वा. तेनाह ‘‘विना हुत्वा अपक्कमित्वा’’ति, पजहनवसेन अपसक्कित्वाति अत्थो. विविच्चेव कामेहीति एत्थ ‘‘विविच्चा’’ति इमिना विवेचनं झानक्खणे कामानं अभावमत्तं वुत्तं. ‘‘विविच्चेवा’’ति पन इमिना एकंसतो कामानं विवेचेतब्बतादीपनेन तप्पटिपक्खता झानस्स, कामविवेकस्स च झानाधिगमूपायता ¶ दस्सिता होतीति इममत्थं दस्सेतुं ‘‘पठमं झान’’न्तिआदिं वत्वा तमेवत्थं पाकटतरं कातुं ‘‘कथ’’न्तिआदि वुत्तं. ‘‘अन्धकारे सति पदीपोभासो विया’’ति एतेन यथा पदीपोभासाभावेन रत्तियं अन्धकाराभिभवो, एवं झानाभावेन सत्तसन्ततियं कामाभिभवोति दस्सेति.

एतन्ति पुब्बपदेयेव अवधारणवचनं. न खो पन एवं दट्ठब्बं ‘‘कामेहि एवा’’ति अवधारणस्स अकतत्ता. निस्सरन्ति निग्गच्छन्ति एतेन, एत्थ वाति निस्सरणं. के निग्गच्छन्ति? कामा, तेसं कामानं निस्सरणं पहानं तन्निस्सरणं, ततो. कथं पन समाने विक्खम्भने कामानमेवेतं निस्सरणं, न ब्यापादादीनन्ति चोदनं युत्तितो, आगमतो च सोधेतुं ‘‘कामधातू’’तिआदि वुत्तं. तत्थ कामधातुसमतिक्कमनतोति सकलस्सपि कामभवस्स समतिक्कमपटिपदाभावतो. तेन इमस्स झानस्स कामपरिञ्ञाभावमाह. कामरागपटिपक्खतोति वक्खमानविभागस्स किलेसकामस्स पच्चत्थिकभावतो. तेन यथा मेत्ता ब्यापादस्स, करुणा विहिंसाय, एवमिदं झानं कामरागस्स उजुविपच्चनीकभूतन्ति दस्सेति. एवमत्तनो पवत्तिया, विपाकप्पवत्तिया च कामरागतो, कामधातुतो ¶ च विनिवत्तसभावत्ता इदं झानं विसेसतो कामानमेव निस्सरणं. स्वायमत्थो पाठगतो एवाति आह ‘‘यथाहा’’तिआदि. कामञ्चेतमत्थं दीपेतुं पुरिमपदेयेव अवधारणं गहितं, उत्तरपदेपि पन तं गहेतब्बमेव तथा अत्थसम्भवतोति दस्सेतुं ‘‘उत्तरपदेपी’’तिआदि वुत्तं. इतोति कामच्छन्दतो. एस नियमो. साधारणवचनेनाति अविसेसवचनेन. तदङ्गविक्खम्भनसमुच्छेदप्पटिपस्सद्धिनिस्सरणविवेका तदङ्गविवेकादयो. चित्तकायउपधिविवेका चित्तविवेकादयो. तयो एव इध झानकथायं दट्ठब्बा समुच्छेदविवेकादीनं असम्भवतो.

निद्देसेति महानिद्देसे (महानि. १, ७). तत्थ हि ‘‘उद्दानतो द्वे कामा – वत्थुकामा किलेसकामा चा’’ति उद्दिसित्वा ‘‘तत्थ कतमे वत्थुकामा? मनापिया रूपा…पे… मनापिया फोट्ठब्बा’’तिआदिना वत्थुकामा निद्दिट्ठा. ते पन कामीयन्तीति कामाति वेदितब्बा. तत्थेवाति निद्देसे एव. विभङ्गेति झानविभङ्गे (विभ. ५६४). पत्थनाकारेन पवत्तो दुब्बलो लोभो छन्दनट्ठेन छन्दो, ततो बलवा रञ्जनट्ठेन रागो, ततोपि बलवतरो बहलरागो छन्दरागो. निमित्तानुब्यञ्जनानि सङ्कप्पेति एतेनाति सङ्कप्पो, तथापवत्तो लोभो, ततो बलवा रञ्जनट्ठेन रागो, सङ्कप्पनवसेनेव पवत्तो ततोपि बलवतरो सङ्कप्परागोति. स्वायं ¶ पभेदो एकस्सेव लोभस्स पवत्तिआकारवसेन, अवत्थाभेदवसेन च वेदितब्बो यथा ‘‘वच्छो दम्मो बलीबद्दो’’ति. इमे किलेसकामा. कामेन्तीति कामा, कामेन्ति एतेहीति वा.

एवञ्हि सतीति एवं उभयेसम्पि कामानं सङ्गहे सति. वत्थुकामेहिपीति ‘‘वत्थुकामेहि विविच्चेवा’’तिपि अत्थो युज्जतीति एवं युज्जमानत्थन्तरसमुच्चयत्थो पि-सद्दो, न किलेसकामसमुच्चयत्थो. कस्मा? इमस्मिं अत्थे किलेसकामेहि विवेकस्स दुतियपदेन वुत्तत्ता. तेनाति वत्थुकामविवेकेन. कायविवेको वुत्तो होति पुत्तदारादिपरिग्गहविवेकदीपनतो. पुरिमेनाति कायविवेकेन. एत्थाति ‘‘विविच्चेव कामेहि, विविच्च अकुसलेहि धम्मेही’’ति एतस्मिं पदद्वये, इतो वा निद्धारिते विवेकद्वये. अकुसल-सद्देन यदिपि ¶ किलेसकामा, सब्बाकुसलापि वा गहिता, सब्बथा पन किलेसकामेहि विवेको वुत्तोति आह ‘‘दुतियेन किलेसकामेहि विवेकवचनतो’’ति. दुतियेनाति च चित्तविवेकेनाति अत्थो. एतेसन्ति यथावुत्तानं द्विन्नं पदानं, निद्धारणे चेतं सामिवचनं. तण्हादिसंकिलेसानं वत्थुनो पहानं संकिलेसवत्थुप्पहानं. लोलभावो नाम तत्थ तत्थ रूपादीसु तण्हुप्पादो, तस्स हेतु वत्थुकामा एव वेदितब्बा. बालभावो अविज्जा, दुच्चिन्तितचिन्तितादि वा, तस्स अयोनिसोमनसिकारो, सब्बेपि वा अकुसला धम्मा हेतु. कामगुणाधिगमहेतुपि पाणातिपातादिअसुद्धपयोगो होतीति तब्बिवेकेन पयोगसुद्धि विभाविता. तण्हासंकिलेससोधनेन, विवट्टूपनिस्सयसंवड्ढनेन च अज्झासयविसोधनं आसयपोसनं. कामेसूति निद्धारणे भुम्मं.

अनेकभेदोति कामासवकामरागसंयोजनादिवसेन, रूपतण्हादिवसेन च अनेकप्पभेदो. कामच्छन्दोयेवाति कामसभावोयेव छन्दो, न कत्तुकम्यताछन्दो, नापि कुसलच्छन्दोति अधिप्पायो. झानपटिपक्खतोति झानस्स पटिपक्खभावतो तंहेतु तन्निमित्तं विसुं वुत्तो. अकुसलभावसामञ्ञेन अग्गहेत्वा विसुं सरूपेन गहितो. यदि किलेसकामोव पुरिमपदे वुत्तो, कथं बहुवचनन्ति आह ‘‘अनेकभेदतो’’तिआदि.

अञ्ञेसम्पि दिट्ठिमानअहिरिकानोत्तप्पादीनं, तंसहितफस्सादीनञ्च. उपरि वुच्चमानानि झानङ्गानि उपरिझानङ्गानि, तेसं अत्तनो पच्चनीकानं पटिपक्खभावदस्सनतो तप्पच्चनीकनीवरणवचनं. नीवरणानि हि झानङ्गपच्चनीकानि तेसं पवत्तिनिवारणतो. समाधि कामच्छन्दस्स ¶ पटिपक्खो रागप्पणिधिया उजुविपच्चनीकभावतो, नानारम्मणेहि पलोभितस्स परिब्भमन्तस्स चित्तस्स समाधानतो च. पीति ब्यापादस्स पटिपक्खा पामोज्जेन समानयोगक्खेमत्ता. वितक्को थिनमिद्धस्स पटिपक्खो योनिसो सङ्कप्पनवसेन सविप्फारपवत्तितो. सुखं अवूपसमानुतापसभावस्स उद्धच्चकुक्कुच्चस्स पटिपक्खं वूपसन्तसीतलसभावत्ता. विचारो विचिकिच्छाय पटिपक्खो आरम्मणे अनुमज्जनवसेन पञ्ञापटिरूपसभावत्ता. महाकच्चानत्थेरेन देसितं पिटकानं संवण्णना पेटकं, तस्मिं पेटके.

पञ्चकामगुणभेदविसयस्साति ¶ रूपादिपञ्चकामगुणविसेसविसयस्स. आघातवत्थुभेदादिविसयानन्ति ब्यापादविवेकवचनेन ‘‘अनत्थं मे अचरी’’ति (दी. नि. ३.३४०; अ. नि. ९.२९; विभ. ९६०) आदिआघातवत्थुभेदविसयस्स दोसस्स, मोहाधिकेहि थिनमिद्धादीहि विवेकवचनेन पटिच्छादनवसेन दुक्खादिपुब्बन्तादिभेदविसयस्स मोहस्स विक्खम्भनविवेको वुत्तो. कामरागब्यापादतदेकट्ठथिनमिद्धादिविक्खम्भकञ्चेतं सब्बाकुसलपटिपक्खसभावत्ता. सब्बकुसलानं तेन सभावेन सब्बाकुसलप्पहायकं होति, होन्तम्पि कामरागादिविक्खम्भनसभावमेव होति तंसभावत्ताति अविसेसेत्वा नीवरणाकुसलमूलादीनं ‘‘विक्खम्भनविवेको वुत्तो होती’’ति आह.

७१. यथापच्चयं पवत्तमानानं सभावधम्मानं नत्थि काचि वसवत्तिताति वसवत्तिभावनिवारणत्थं ‘‘वितक्कनं वितक्को’’ति वुत्तं. तयिदं ‘‘वितक्कनं ईदिसमिद’’न्ति आरम्मणस्स परिकप्पनन्ति आह ‘‘ऊहनन्ति वुत्तं होती’’ति. यस्मा चित्तं वितक्कबलेन आरम्मणं अभिनिरुळ्हं विय होति, तस्मा सो आरम्मणाभिनिरोपनलक्खणो वुत्तो. यथा हि कोचि राजवल्लभं, तंसम्बन्धिनं मित्तं वा निस्साय राजगेहं आरोहति अनुपविसति, एवं वितक्कं निस्साय चित्तं आरम्मणं आरोहति. यदि एवं, कथं अवितक्कं चित्तं आरम्मणं आरोहतीति? वितक्कबलेनेव. यथा हि सो पुरिसो परिचयेन तेन विनापि निरासङ्को राजगेहं पविसति, एवं परिचयेन वितक्केन विनापि अवितक्कं चित्तं आरम्मणं आरोहति. परिचयेनाति च सन्ताने पवत्तवितक्कभावनासङ्खातेन परिचयेन. वितक्कस्स हि सन्ताने अभिण्हं पवत्तस्स वसेन चित्तस्स आरम्मणाभिरुहणं चिरपरिचितं. तेन तं कदाचि वितक्केन विनापि तत्थ पवत्ततेव. यथा तं ञाणसहितं हुत्वा सम्मसनवसेन चिरपरिचितं कदाचि ञाणविरहितम्पि सम्मसनवसेन पवत्तति, यथा वा किलेससहितं हुत्वा पवत्तं सब्बसो ¶ किलेसरहितम्पि परिचयेन किलेसवासनावसेन पवत्तति, एवंसम्पदमिदं दट्ठब्बं. आदितो, अभिमुखं वा हननं आहननं. परितो, परिवत्तेत्वा वा आहननं परियाहननं. ‘‘रूपं रूपं, पथवी पथवी’’ति आकोटेन्तस्स विय पवत्ति ‘‘आहननं, परियाहनन’’न्ति च वेदितब्बं. आनयनं चित्तस्स आरम्मणे उपनयनं, आकड्ढनं वा.

अनुसञ्चरणं ¶ अनुपरिब्भमनं. स्वायं विसेसो सन्तानम्हि लब्भमानो एव सन्ताने पाकटो होतीति दट्ठब्बो. सेसेसुपि एसेव नयो. अनुमज्जनं आरम्मणे चित्तस्स अनुमसनं, परिमज्जनन्ति अत्थो. तथा हि विचारो ‘‘परिमज्जनहत्थो विय, सञ्चरणहत्थो विया’’ति च वुत्तो. तत्थाति आरम्मणे. सहजातानं अनुयोजनं आरम्मणे अनुविचारणसङ्खातअनुमज्जनवसेनेव वेदितब्बं. अनुप्पबन्धनं आरम्मणे चित्तस्स अविच्छिन्नस्स विय पवत्ति. तथा हि सो ‘‘अनुसन्धानता’’ति (ध. स. ८) निद्दिट्ठो. तेनेव च ‘‘घण्डानुरवो विय, परिब्भमनं विया’’ति च वुत्तो.

कत्थचीति पठमज्झाने, परित्तचित्तुप्पादेसु च. विचारतो ओळारिकट्ठेन, विचारस्सेव च पुब्बङ्गमट्ठेन अनुरवतो ओळारिको, तस्स च पुब्बङ्गमो घण्डाभिघातो विय वितक्को. यथा हि घण्डाभिघातो पठमाभिनिपातो होति, एवं आरम्मणाभिमुखनिरोपनट्ठेन वितक्को चेतसो पठमाभिनिपातो होति. अभिघात-ग्गहणेन चेत्थ अभिघातजो सद्दो गहितोति वेदितब्बो. विप्फारवाति विचलनयुत्तो सपरिप्फन्दो. परिब्भमनं विय परिस्सयाभाववीमंसनत्थं. अनुप्पबन्धेन पवत्तियन्ति उपचारे वा अप्पनायं वा सन्तानेन पवत्तियं. तत्थ हि वितक्को निच्चलो हुत्वा आरम्मणं अनुपविसित्वा विय पवत्तति, न पठमाभिनिपाते. पाकटो होतीति वितक्कस्स विसेसो अभिनिरोपनाकारो ओळारिकत्ता पठमज्झाने पाकटो होति, तदभावतो पञ्चकनये दुतियज्झाने विचारस्स विसेसो अनुमज्जनाकारो पाकटो होति.

वालण्डुपकं एळकलोमादीहि कतचुम्बटकं. उप्पीळनहत्थोति पिण्डस्स उप्पीळनहत्थो. तस्सेव इतो चितो च सञ्चरणहत्थो. मण्डलन्ति कंसभाजनादीसु किञ्चि मण्डलं वट्टलेखं करोन्तस्स. यथा पुप्फफलसाखादिअवयवविनिमुत्तो अविज्जमानोपि रुक्खो ‘‘सपुप्फो सफलो’’ति वोहरीयति, एवं वितक्कादिअङ्गविनिमुत्तं अविज्जमानम्पि झानं ‘‘सवितक्कं सविचार’’न्ति वोहरीयतीति दस्सेतुं ‘‘रुक्खो विया’’तिआदि वुत्तं. झानभावनाय पुग्गलवसेन देसेतब्बत्ता ¶ ‘‘इध भिक्खु विविच्चेव कामेही’’तिआदिना पुग्गलाधिट्ठानेन झानानि उद्दिट्ठानीति. यदिपि विभङ्गे पुग्गलाधिट्ठाना देसना कता, अत्थो पन तत्रापि विभङ्गेपि यथा इध ‘‘इमिना ¶ च वितक्केना’’तिआदिना धम्मवसेन वुत्तो, एवमेव दट्ठब्बो, परमत्थतो पुग्गलस्सेव अभावतोति अधिप्पायो. अत्थो…पे… दट्ठब्बो झानसमङ्गिनो वितक्कविचारसमङ्गितादस्सनेन, झानस्सेव च सवितक्कसविचारताय वुत्तत्ताति एवं वा एत्थ अत्थो दट्ठब्बो.

विवेकाति विवेका हेतुभूताति विवेक-सद्दस्स भावसाधनतं सन्धायाह. विवेकेति कत्तुसाधनतं, कम्मसाधनतं वा. ‘‘विवित्तो’’ति हि इमिना नीवरणेहि विनाभूतो तेहि विवेचितोति च साधनद्वयम्पि सङ्गहितमेवाति.

७२. पीणयतीति तप्पेति, वड्ढेति वा. सम्पियायनलक्खणाति परितुस्सनलक्खणा. पीणनरसाति परिब्रूहनरसा. फरणरसाति पणीतरूपेहि कायस्स ब्यापनरसा. उदग्गभावो ओदग्यं. खुद्दिका लहुं लोमहंसनमत्तं कत्वा भिन्ना न पुन उप्पज्जति. खणिका बहुलं उप्पज्जति. उब्बेगतो फरणा निच्चलत्ता, चिरट्ठितिकत्ता च पणीततरा. चेतियङ्गणं गन्त्वाति पुण्णवल्लिकविहारे चेतियङ्गणं गन्त्वा. पकतिया दिट्ठारम्मणवसेनाति पुब्बे महाचेतियं गहितारम्मणवसेन. चित्रगेण्डुको विचित्राकारेन कतगेण्डुको. उपनिस्सयेति समीपे, तस्स वा विहारस्स निस्सयभूते, गोचरट्ठानभूतेति अत्थो.

घराजिरेति गेहङ्गणे. पब्बतसिखरे कतचेतियं ‘‘आकासचेतिय’’न्ति वुत्तं. गहितनिमित्तेनेवाति चेतियवन्दनं, धम्मस्सवनञ्च उद्दिस्स ‘‘धञ्ञा वतिमे’’तिआदिना गहितकुसलनिमित्तेनेव कारणभूतेन. गहितं वा निमित्तं एतेनाति गहितनिमित्तं, वुत्ताकारेन पवत्तचित्तं, तेन गहितनिमित्तेनेव चित्तेन सह. पक्खन्दन्ति अनुपविट्ठं. अनुपरिप्फुटन्ति अनु अनु समन्ततो फुटं, सब्बसो अनुविसटन्ति अत्थो.

पस्सद्धिया निमित्तभावेन गब्भं गण्हन्ती. परिपाचनवसेन परिपाकं गच्छन्ती. अप्पनासम्पयुत्ताव पीति अप्पनासमाधिपूरिका. खणिकसमाधिपूरिका च उपचारसमाधिपूरिका च अप्पनासमाधिस्स विदूरतराति तदुभयं अनामसन्तो ‘‘तासु या अप्पनासमाधिस्सा’’तिआदिमाह ¶ . समाधिसम्पयोगं गताति पुब्बे उपचारसमाधिना सम्पयुत्ता हुत्वा अनुक्कमेन वड्ढित्वा अप्पनासमाधिना सम्पयोगं गता.

७३. सुखयतीति ¶ सुखं, अत्तना सम्पयुत्तधम्मे लद्धस्सादे करोतीति अत्थो. स्वायं कत्तुनिद्देसो परियायलद्धो धम्मतो अञ्ञस्स कत्तु निवत्तनत्थो, निप्परियायेन पन भावसाधनमेव लब्भतीति ‘‘सुखनं सुख’’न्ति वुत्तं. इट्ठसभावत्ता तंसमङ्गीपुग्गलं, सम्पयुत्तधम्मे वा अत्तनि सादयतीति सातं द-कारस्स त-कारं कत्वा. सातं ‘‘मधुर’’न्ति वदन्ति. सातं लक्खणं एतस्साति सातलक्खणं. उपब्रूहनं सम्पयुत्तधम्मानं संवड्ढनं. दुक्खं विय अविस्सज्जेत्वा अदुक्खमसुखा विय अनज्झुपेक्खित्वा अनु अनु गण्हनं, उपकारिता वा अनुग्गहो. कत्थचि पठमज्झानादिके. पटिलाभतुट्ठीति पटिलाभवसेन उप्पज्जनकतुट्ठि. पटिलद्धरसानुभवनन्ति पटिलद्धस्स आरम्मणरसस्स अनुभवनन्ति सभावतो पीतिसुखानि विभजित्वा दस्सेति. यत्थ पीति, तत्थ सुखन्ति वितक्कस्स विय इतरेन पीतिया सुखेन अच्चन्तसंयोगमाह. ‘‘यत्थ सुखं, तत्थ न नियमतो पीती’’ति विचारस्स विय वितक्केन सुखस्स पीतिया अनच्चन्तसंयोगं. तेन अच्चन्तानच्चन्तसंयोगिताय पीतिसुखानं विसेसं दस्सेति. कं तारेन्ति एत्थाति कन्तारं, निरुदकमरुट्ठानं. वनमेव वनन्तं. तस्मिं तस्मिं समयेति इट्ठारम्मणस्स पटिलाभसमये, पटिलद्धस्स रसानुभवनसमये, वनच्छायादीनं सवनदस्सनसमये, पवेसपरिभोगसमये च. पाकटभावतोति यथाक्कमं पीतिसुखानं विभूतभावतो.

विवेकजं पीतिसुखन्ति एत्थ पुरिमस्मिं अत्थे विवेकजन्ति झानं वुत्तं. पीतिसुखसद्दतो च अत्थिअत्थविसेसतो ‘‘अस्स झानस्स, अस्मिं वा झाने’’ति एत्थ अ-कारो दट्ठब्बो. दुतिये पीतिसुखमेव विवेकजं. ‘‘विवेकजंपीतिसुख’’न्ति च अञ्ञपदत्थसमासो, पच्चत्तनिद्देसस्स च अलोपो कतो. लोपे वा सति ‘‘विवेकजपीतिसुख’’न्ति पाठोति अयं विसेसो.

उपसम्पज्जाति एत्थ उप-सं-सद्दा ‘‘उपलब्भति, संभुञ्जती’’तिआदीसु विय निरत्थकाति दस्सेतुं ‘‘उपगन्त्वा’’तिआदिं वत्वा पुन तेसं सात्थकभावं दस्सेतुं ‘‘उपसम्पादयित्वा’’तिआदि वुत्तं, तस्मा पत्वा, साधेत्वाति वा अत्थो. इरियन्ति किरियं. वुत्तिआदीनि तस्सेव वेवचनानि. पालनाति हि एकं इरियापथबाधनं इरियापथन्तरेहि रक्खणा.

पञ्चङ्गविप्पहीनादिवण्णना

७४. पञ्च ¶ ¶ अङ्गानि विक्खम्भनवसेन पहीनानि एतस्साति पञ्चङ्गविप्पहीनं. ‘‘अग्याहितो’’ति एत्थ आहित-सद्दस्स विय विप्पहीन-सद्दस्सेत्थ परवचनं दट्ठब्बं, पञ्चहि अङ्गेहि विप्पहीनन्ति वा पञ्चङ्गविप्पहीनं. ननु अञ्ञेपि अकुसला धम्मा इमिना झानेन पहीयन्ति, अथ कस्मा पञ्चङ्गविप्पहीनताव वुच्चतीति आह ‘‘किञ्चापी’’तिआदि. झानलाभिनोपि अझानसमङ्गिकाले झानपटिपक्खलोभचित्तादीनं पवत्तिसब्भावतो ‘‘झानक्खणे’’ति वुत्तं. पहीयन्तीति विगच्छन्ति, नप्पवत्तन्तीति अत्थो. एकत्तारम्मणेति पथवीकसिणादिवसेन एकसभावे, एकग्गतासङ्खाते एकत्तावहे वा आरम्मणे. तन्ति तं नानाविसयपलोभितं चित्तं. कामधातुप्पहानायाति नानाविसयसमूपब्यूळ्हाय कामधातुया पहानाय समतिक्कमाय पटिपदं झानं नप्पटिपज्जति. निरन्तरन्ति विक्खेपेन अनन्तरितं, सहितन्ति अत्थो. अकम्मञ्ञन्ति अकम्मनीयं, भावनाकम्मस्स अयोग्यन्ति अत्थो. उद्धच्चकुक्कुच्चपरेतन्ति उद्धच्चकुक्कुच्चेन अभिभूतं. परिब्भमति अनवट्ठानतो, अवट्ठानस्स समाधानस्स अभावतोति अत्थो. विचिकिच्छाय उपहतन्ति सातिसयस्स विचारस्स अभावतो ‘‘सम्मासम्बुद्धो नु खो भगवा, न नु खो’’ति, ‘‘पथवी पथवी’’तिआदिना मनसिकारेन, ‘‘झानं सिया नु खो, न नु खो’’तिआदिना च पवत्ताय विचिकिच्छाय उपहतं. नारोहति अप्पटिपत्तिनिमित्तत्ता. विसेसेन झानन्तरायकरत्ताति समाधिआदीनं उजुविपच्चनीकभावेन झानाधिगमस्स अन्तरायकरणतो.

तेहीति झानाधिगमस्स पच्चयभूतेहि वितक्कविचारेहि. अविक्खेपाय सम्पादितप्पयोगस्साति ततो एवं समाधानाय निप्फादितभावनापयोगस्स. चेतसो पयोगसम्पत्तिसम्भवाति यथावुत्तभावनापयोगसम्पत्तिसमुट्ठाना. पीति पीणनं भावनावसेन तप्पनं. उपब्रूहनं भावनावसेन परिवुद्धिं चेतसो करोतीति सम्बन्धो. नन्ति चित्तं. ससेससम्पयुत्तधम्मन्ति अवसिट्ठफस्सादिधम्मसहितं, समं सम्मा च आधियतीति सम्बन्धो. इन्द्रियसमतावसेन समं, पटिपक्खधम्मानं. दूरीभावे लीनुद्धच्चाभावेन सम्मा च ठपेतीति अत्थो. एकग्गता हि समाधानकिच्चेन चित्तं, सम्पयुत्तधम्मे च अत्तानं अनुवत्तापेन्ती झानक्खणे सातिसयं समाहिते करोतीति. उप्पत्तिवसेनाति यथापच्चयं उप्पज्जनवसेन ¶ . एतेसु ¶ वितक्कादीसु झानं उप्पन्नं नाम होति तत्थेव झानवोहारतो. तेनाह ‘‘तस्मा’’तिआदि. ‘‘यथा पना’’तिआदिनापि उपमावसेन तमेवत्थं पाकटतरं करोति.

पकतिचित्ततोति पाकतिककामावचरचित्ततो. सुविसदेनाति सुट्ठु विसदेन, पटुतरेनाति अत्थो. सब्बावन्तन्ति सब्बावयववन्तं, अनवसेसन्ति अत्थो. अप्फुटन्ति असम्फुट्ठं. आरम्मणेसु फुसिताति अप्पनावसेन पवत्तमाना चित्तेकग्गता समन्ततो आरम्मणं फरन्ती विय होतीति कत्वा वुत्तं. कस्मा पनेत्थ झानपाठे अग्गहिता चित्तेकग्गता गहिताति अनुयोगं सन्धाय ‘‘तत्थ चित्तेकग्गता’’तिआदि वुत्तं. तत्थाति तेसु झानङ्गेसु. न निद्दिट्ठाति सरूपतो न निद्दिट्ठा, सामञ्ञतो पन झानग्गहणेन गहिता. एवं वुत्तत्ताति सरूपेनेव वुत्तत्ता, अङ्गमेव चित्तेकग्गताति सम्बन्धो. येन अधिप्पायेनाति येन वितक्कादीहि सह वत्तन्तं धम्मं दीपेतुं तस्स पकासनाधिप्पायेन ‘‘सवितक्कं सविचार’’न्तिआदिना उद्देसो कतो. सो एव अधिप्पायो तेन भगवता विभङ्गे ‘‘चित्तेकग्गता’’ति निद्दिसन्तेन पकासितो. तस्मा सा झानपाठे अग्गहिताति न चिन्तेतब्बं.

तिविधकल्याणवण्णना

७५. आदिमज्झपरियोसानवसेनाति झानस्स आदिमज्झपरियोसानवसेन. लक्खणवसेनाति तेसंयेव अप्पनायं लक्खितब्बभाववसेन.

तत्राति तस्मिं कल्याणतालक्खणानं विभावने. पटिपदाविसुद्धीति पटिपज्जति झानं एतायाति पटिपदा, गोत्रभुपरियोसानो पुब्बभागियो भावनानयो. परिपन्थतो विसुज्झनं विसुद्धि, पटिपदाय विसुद्धि पटिपदाविसुद्धि. सा पनायं यस्मा झानस्स उप्पादक्खणे लब्भति, तस्मा वुत्तं ‘‘पटिपदाविसुद्धि आदी’’ति. उपेक्खानुब्रूहनाति विसोधेतब्बतादीनं अभावतो झानपरियापन्नाय तत्रमज्झत्तुपेक्खाय किच्चनिप्फत्तिया अनुब्रूहना. सा पनायं विसेसतो झानस्स ठितिक्खणे लब्भति. तेन वुत्तं ‘‘उपेक्खानुब्रूहना मज्झे’’ति. सम्पहंसनाति तत्थ धम्मानं अनतिवत्तनादिसाधकस्स ञाणस्स किच्चनिप्फत्तिवसेन परियोदपना. सा पन यस्मा झानस्स ओसानक्खणे पाकटा होति ¶ , तस्मा वुत्तं ‘‘सम्पहंसना परियोसान’’न्ति. इमानि तीणि लक्खणानीति परिपन्थतो चित्तस्स विसुज्झनाकारो ¶ , मज्झिमस्स समथनिमित्तस्स पटिपज्जनाकारो, तत्थ पक्खन्दनाकारोति इमानि तीणि झानस्स आदितो उप्पादक्खणे अप्पनापत्तिलक्खणानि तेहि आकारेहि विना अप्पनापत्तिया अभावतो, असति च अप्पनाय तदभावतो. आदिकल्याणञ्चेव विसुद्धिपटिपदत्ता. यथावुत्तेहि लक्खणेहि समन्नागतत्ता, सम्पन्नलक्खणत्ता च तिलक्खणसम्पन्नञ्च. इमिना नयेन मज्झपरियोसानलक्खणानञ्च योजना वेदितब्बा.

सम्भरीयति झानं एतेनाति सम्भारो, नानावज्जनपरिकम्मं. सह सम्भारेनाति ससम्भारो, सो एव ससम्भारिको. उपचारोति एकावज्जनूपचारमाह. पग्गहादिकिच्चस्स पुब्बभागे भावनाय एव साधितत्ता या तत्थ एकावज्जनूपचारे सिद्धा अज्झुपेक्खना, सा झानक्खणे परिब्रूहिता नाम होतीति वुत्तं ‘‘उपेक्खानुब्रूहना नाम अप्पना’’ति. यथाधिगतं झानं निस्साय यो पहट्ठाकारो चित्तस्स परितोसो, तं पच्चवेक्खणावसेन पवत्तं सन्धायाह ‘‘सम्पहंसना नाम पच्चवेक्खणा’’ति. एकेति अभयगिरिवासिनो. ते हि एवं पटिपदाविसुद्धिआदिके वण्णयन्ति, तदयुत्तं. तथा हि सति अज्झानधम्मेहि झानस्स गुणसंकित्तनं नाम कतं होति. न हि भूमन्तरं भूमन्तरपरियापन्नं होति. पाळिया चेतं विरुद्धन्ति दस्सेतुं ‘‘यस्मा पना’’तिआदि वुत्तं. तत्थ एकत्तगतं चित्तन्ति इन्द्रियानं एकरसभावेन, एकग्गताय च सिखाप्पत्तिया तदनुगुणं एकत्तं गतन्ति एकत्तगतं, ससम्पयुत्तं अप्पनापत्तचित्तं. तस्सेव पटिपदाविसुद्धिपक्खन्दतादि अनन्तरमेव वुच्चति. तस्माति यस्मा एकस्मिंयेव अप्पनाचित्तक्खणे पटिपदाविसुद्धिआदि पाळियं वुत्तं, तस्मा आगमनवसेनाति परिकम्मागमनवसेन. अनतिवत्तनादीति आदि-सद्देन इन्द्रियेकरसतातदुपगवीरियवाहनासेवनानि सङ्गण्हाति. परियोदापकस्साति परिसोधकस्स पभस्सरभावकरस्स. अनतिवत्तनादिभावसाधनमेव चेत्थ ञाणस्स किच्चनिप्फत्ति वेदितब्बा.

तस्मिन्ति तस्मिं वारे, चतुपञ्चचित्तपरिमाणाय अप्पनावीथियन्ति अत्थो. ततो परिपन्थतो. चित्तं विसुज्झतीति यदिपि आगमनं गहेतुं अविसेसेन विय वुत्तं, परिकम्मविसुद्धितो पन अप्पनाविसुद्धि सातिसयाव. तेनाह ‘‘विसुद्धत्ता’’तिआदि. आवरणविरहितं हुत्वाति येनावरणेन ¶ आवटत्ता चित्तं ततो पुब्बे मज्झिमं समथनिमित्तं पटिपज्जितुं न सक्कोति, तेन विवित्तं हुत्वा, तं विक्खम्भेत्वाति अत्थो. लीनुद्धच्चसङ्खातानं उभिन्नं अन्तानं अनुपगमनेन मज्झिमो, सविसेसं पच्चनीकधम्मानं वूपसमनतो ¶ समथो, योगिनो सुखविसेसानं कारणभावतो निमित्तञ्चाति मज्झिमं समथनिमित्तं. तेनाह ‘‘समप्पवत्तो अप्पनासमाधियेवा’’ति. तदनन्तरं पन पुरिमचित्तन्ति तस्स अप्पनाचित्तस्स अनन्तरपच्चयभूतं पुरिमं चित्तं, गोत्रभुचित्तन्ति अत्थो. एकसन्ततिपरिणामनयेनाति यथा ‘‘तदेव खीरं दधिसम्पन्न’’न्ति, एवं सतिपि परित्तमहग्गतभावभेदे, पच्चयपच्चयुप्पन्नभावभेदे च एकिस्सा एव सन्ततिया परिणामूपगमननयेन एकत्तनयवसेन. तथत्तन्ति तथभावं अप्पनासमाधिवसेन समाहितभावं. एवं पटिपन्नत्ताति वुत्ताकारेन पटिपज्जमानत्ता. यस्मिञ्हि खणे तथत्तं मज्झिमं समथनिमित्तं पटिपज्जति, तस्मिंयेव खणे तथत्तुपगमनेन अप्पनासमाधिना समाहितभावूपगमनेन तत्थ पक्खन्दति नाम. पुरिमचित्तेति अप्पनाचित्तस्स पुरिमस्मिं चित्ते गोत्रभुचित्ते. विज्जमानाकारनिप्फादिकाति तस्मिं चित्ते विज्जमानानं परिपन्थविसुद्धिमज्झिमसमथपटिपत्तिपक्खन्दनाकारानं निप्फादिका, तेनाकारेन निप्फज्जमानाति अत्थो. तेयेव हि आकारा पच्चयविसेसतो झानक्खणे निप्फज्जमाना ‘‘पटिपदाविसुद्धी’’ति लद्धसमञ्ञा झानस्स तं विसेसं निप्फादेन्ता विय वुत्ता. उप्पादक्खणेयेवाति अत्तलाभवेलायमेव. यदि एवं, कथं ते आकारा निप्फज्जन्तीति आह ‘‘आगमनवसेना’’ति.

तस्साति चित्तस्स. ‘‘विसुद्धं चित्तं अज्झुपेक्खती’’ति पाळियं (पटि. म. १.१५८) पुग्गलाधिट्ठानेन आगताति ‘‘ब्यापारं अकरोन्तो’’ति आह. समथपटिपत्तितथत्तुपगमनञ्च इध समथभावापत्तियेवाति आह ‘‘समथभावूपगमनेना’’ति. किलेससंसग्गं पहाय एकत्तेन उपट्ठितस्साति पुब्बे ‘‘कथं नु खो किलेससंसग्गं पजहेय्य’’न्ति पटिपन्नस्स इदानि समथपटिपत्तिया तस्स पहीनत्ता किलेससङ्गणिकाभावेन एकत्तेन उपट्ठितस्स झानचित्तस्स. परिपन्थविसुद्धिमज्झिमसमथपटिपत्तिपक्खन्दनेहि वुद्धिप्पत्तिया अनुब्रूहिते झानचित्ते लद्धोकासा तत्रमज्झत्तुपेक्खा सम्पयुत्तेसु समवाहितभावेन पवत्तमाना ते अनुब्रूहेन्ती विय होतीति आह ‘‘तत्रमज्झत्तुपेक्खाय किच्चवसेन उपेक्खानुब्रूहना वेदितब्बा’’ति.

ये ¶ पनेते युगनद्धधम्माति सम्बन्धो. तत्थाति तस्मिं झानचित्ते. अञ्ञमञ्ञानतिवत्तनवसेन किच्चकरणतो युगे नद्धा बद्धा विय युगनद्धा. विमुत्तिरसेनाति विमुच्चनकिच्चेन, विमुच्चनसम्पत्तिया वा. एस योगी. वाहयतीति पवत्तेति. अस्साति झानचित्तस्स. तस्मिं खणेति भङ्गक्खणे. उप्पादक्खणे अतीते हि ठितिक्खणतो पट्ठाय आसेवना ¶ पवत्तति नाम. ते आकाराति अञ्ञमञ्ञानतिवत्तनादयो तत्थ धम्मानं पवत्तिआकारा. आसेवनापि हि आसेवनपच्चयभावीनं धम्मानं पवत्तिआकारोयेव. संकिलेसवोदानेसूति समाधिपञ्ञानं समरसताय अकरणं भावनाय संकिलेसो, करणं वोदानं. तथा सेसेसुपि. एवमेतेसु संकिलेसवोदानेसु तं तं आदीनवं दोसं आनिसंसं गुणं पुरेतरं पाटिहारियञाणेन दिस्वा यथा अञ्ञमञ्ञानतिवत्तनादयो होन्ति, तथा भावनाय सम्पहंसितत्ता तेनेव ञाणेन विसोधितत्ता. विसोधनं हेत्थ सम्पहंसनं. ते आकारा यस्मा निप्फन्ना, तस्मा ‘‘धम्मानं…पे… वेदितब्बाति वुत्त’’न्ति लक्खणसंवण्णनाय आदिम्हि वुत्तं निगमनवसेन दस्सेति.

‘‘यस्मा उपेक्खावसेन ञाणं पाकटं होती’’ति को सम्बन्धो. कस्मा सम्पहंसनाव परियोसानन्ति वुत्ता, न उपेक्खानुब्रूहनाति चोदनं सन्धाय ‘‘तत्थ यस्मा उपेक्खावसेन ञाणं पाकटं होती’’ति वुत्तं. तत्थाति तस्मिं भावनाचित्ते. उपेक्खावसेन ञाणं पाकटं होतीति अप्पनाकाले भावनाय समप्पवत्तिया, पटिपक्खस्स च पहानतो पग्गहादीसु ब्यापारस्स अकातब्बतो अज्झुपेक्खनाव होति. यं सन्धाय वुत्तं ‘‘समये चित्तस्स अज्झुपेक्खना, विसुद्धं चित्तं अज्झुपेक्खती’’ति च आदि. सा पनायं अज्झुपेक्खना ञाणस्स किच्चसिद्धिया होति, विसेसतो ञाणसाधनत्ता अप्पनाब्यापारस्साति फलेन कारणानुमानञायेन. यस्मा उपेक्खावसेन ञाणं पाकटं होति, तस्मा ञाणकिच्चभूता सम्पहंसना परियोसानन्ति वुत्ताति सम्बन्धो.

इदानि यथावुत्तमत्थं पाळिया समत्थेतुं ‘‘यथाहा’’तिआदि वुत्तं. तथापग्गहितं चित्तन्ति यथा भावनाचित्तं कोसज्जपक्खे न पतति, तथा वीरियसम्बोज्झङ्गट्ठानियानं धम्मानं बहुलीकारवसेन पग्गहितं. साधुकं अज्झुपेक्खतीति पग्गण्हन्तेनापि समाधिस्स वीरियसमतायोजनवसेन पग्गहितत्ता सक्कच्चं अज्झुपेक्खति, तत्रमज्झत्तुपेक्खा ओकासं ¶ लभति. तं पन अज्झुपेक्खनं उपेक्खावसेन पुब्बे पवत्तपारिहारियपञ्ञावसेन अप्पनापञ्ञाय किच्चाधिकताति आह ‘‘पञ्ञावसेन पञ्ञिन्द्रियं अधिमत्तं होती’’ति. तस्स अधिमत्तत्ता एव अज्झुपेक्खन्तस्सेव नानासभावेहि नीवरणपमुखेहि किलेसेहि अप्पनाचित्तं विमुच्चति. विमोक्खवसेन विमुच्चनवसेन. पञ्ञावसेनाति पुब्बे पवत्तपारिहारियपञ्ञावसेन. विमुत्तत्ताति नानाकिलेसेहि विमुत्तत्ता एव. ते धम्मा सद्धादयो, विसेसतो सद्धापञ्ञावीरियसमाधयो ¶ च एकरसा समानकिच्चा होन्ति. एवमयं इन्द्रियानं एकरसट्ठेन भावना निप्फज्जमाना ञाणब्यापारोति आह ‘‘ञाणकिच्चभूता सम्पहंसना परियोसान’’न्ति. एवं तिविधाय पटिपदाविसुद्धिया लद्धविसेसाय तिविधाय उपेक्खानुब्रूहनाय सातिसयं पञ्ञिन्द्रियस्स अधिमुत्तभावेन चतुब्बिधापि सम्पहंसना सिज्झतीति आगमनुपेक्खा ञाणकिच्चवसेन दसपि आकारा झाने एव वेदितब्बा.

गणनानुपुब्बताति गणनानुपुब्बताय, गणनानुपुब्बतामत्तं वा पठमन्ति इदन्ति अत्थो. तेन देसनाक्कमं उल्लिङ्गेति. ‘‘पठमं उप्पन्नन्ति पठम’’न्ति इमिना पटिपत्तिक्कमं, उप्पन्नन्ति हि अधिगतन्ति अत्थो. ‘‘पठमं समापज्जितब्बन्ति पठम’’न्ति इदं पन न एकन्तलक्खणन्ति अट्ठकथायं (ध. स. अट्ठ. १६०) पटिसिद्धत्ता इध न गहितं. आरम्मणूपनिज्झानं लक्खणूपनिज्झानन्ति दुविधे झाने इधाधिप्पेतज्झानमेव दस्सेतुं ‘‘आरम्मणूपनिज्झानतो’’ति वुत्तं. पथवीकसिणसङ्खातस्स अत्तनो अत्तनो आरम्मणस्स रूपं विय चक्खुना उपनिज्झायनतो. पच्चनीकझापनतोति नीवरणादीनं पच्चनीकधम्मानं दहनतो विक्खम्भनवसेन पजहनतो. सकलट्ठेनाति हेट्ठा वुत्तनयेन कते वा अकते वा परिच्छिज्ज गहिते पथवीभागे पथवीमण्डले सकलारम्मणकरणट्ठेन. न हि तस्स एकदेसमारम्मणं करीयति. पथवीकसिणसन्निस्सयताय निमित्तं पथवीकसिणं यथा ‘‘मञ्चा उक्कुट्ठिं करोन्ती’’ति. तंसहचरणतो झानं पथवीकसिणं यथा ‘‘कुन्ता पचरन्ती’’ति.

चिरट्ठितिसम्पादनवण्णना

७६. लक्खट्ठाने ठितं सरेन वालं विज्झतीति वालवेधी. इध पन अनेकधा भिन्नस्स वालस्स अंसुं विज्झन्तो ‘‘वालवेधी’’ति अधिप्पेतो. तेन ¶ वालवेधिना. सूदेनाति भत्तकारेन. ‘‘आकारा परिग्गहेतब्बा’’ति सङ्खेपतो वुत्तमत्थं विवरितुं ‘‘यथा ही’’तिआदि वुत्तं. तत्थ सुकुसलोति सुट्ठु छेको. धनुग्गहोति इस्सासो. कम्मन्ति योग्यं. अक्कन्तपदानन्ति विज्झनकाले अक्कमनवसेन पवत्तपदानं. आकारन्ति धनुजियासरानं गहिताकारं. परिग्गण्हेय्याति उपधारेय्य. भोजनसप्पायादयोति आदि-सद्दो अवुत्ताकारानम्पि सङ्गाहको दट्ठब्बो. तेन उतुभावनानिमित्तादीनम्पि परिग्गण्हनं वुत्तं होति. तस्मिन्ति तस्मिं तरुणसमाधिम्हि.

भत्तारन्ति ¶ सामिनं, भत्तवेतनादीहि पोसकन्ति अत्थो. परिविसन्तोति भोजेन्तो. तस्स रुच्चित्वा भुञ्जनाकारं सल्लक्खेत्वा तस्स उपनामेन्तोति योजना. अयम्पि योगी. अधिगतक्खणे भोजनादयो आकारेति पुब्बे झानस्स अधिगतक्खणे किच्चसाधके भोजनादिगते आकारे. गहेत्वाति परिग्गहेत्वा सल्लक्खेत्वा. नट्ठे नट्ठे समाधिम्हि पुनप्पुनं अप्पनाय.

महानसविज्जापरिचयेन पण्डितो. तत्थ विसदञाणताय ब्यत्तो. ठानुप्पत्तिककओसल्लयोगेन कुसलो. नानच्चयेहीति नानच्चयेहि नानासभावेहि, नानारसेहीति अत्थो. तेनाह ‘‘अम्बिलग्गेही’’तिआदि. सूपेहीति ब्यञ्जनेहि. अम्बिलग्गेहीति अम्बिलकोट्ठासेहि, ये वा अम्बिलरसा हुत्वा अग्गभूता, तेहि चतुरम्बिलादिमिस्सेहि. एस नयो तित्तकग्गादीसुपि. खारिकेहीति वातिङ्गणकळीरादिमिस्सेहि. निमित्तन्ति आकारं रुच्चनवसेन भुञ्जनाकारं. उग्गण्हातीति उपरूपरि गण्हाति उपधारेति. इमस्स वा सूपेय्यस्स अत्थाय हत्थं अभिहरति. अभिहारानन्ति अभिमुखेन हरितब्बानं पण्णाकारानं, पूजाभिहारानं वा. निमित्तं उग्गण्हातीति ‘‘एवं मे चित्तं समाहितं अहोसी’’ति निमित्तं गण्हाति सल्लक्खेति.

समाधिपरिपन्थानन्ति समाधिस्स परिपन्थभूतानं. धम्मानन्ति कामच्छन्दादिनीवरणधम्मानं. सुविसोधितत्ताति सुट्ठु विसोधितत्ता, विक्खम्भनवसेनेव सम्मदेव पहीनत्ताति अत्थो. कामादीनवपच्चवेक्खणादीहीति आदि-सद्देन असुभमनसिकारनेक्खम्मानिसंसपच्चवेक्खणादीनि सङ्गण्हाति. नेक्खम्मगुणदस्सनेनापि ¶ हि तस्स विबन्धभूते कामच्छन्दे आदीनवो विसेसतो पाकटो होतीति. कायदुट्ठुल्लन्ति कायदरथं सारद्धकायतं. तेन कायचित्तानं सारम्भनिमित्तस्स ब्यापादनीवरणस्स न विसोधनमाह. आरम्भधातुमनसिकारादीति आदि-सद्देन वीरियसम्बोज्झङ्गनिमित्तानं, आलोकसञ्ञादीनञ्च सङ्गहो दट्ठब्बो. समथनिमित्तमनसिकारादीति आदि-सद्देन समाधिसम्बोज्झङ्गट्ठानियानं धम्मानं सङ्गहो दट्ठब्बो. अञ्ञेपि समाधिपरिपन्थेति विचिकिच्छाट्ठानिये, मदमानादिके च सन्धायाह. आसयन्ति वसनकसुसिरं. सुपरिसुद्धन्ति आसङ्कनीयत्ताभावेन सुट्ठु परिसुद्धं. एत्थाह – ननु चायं पगेव कामादीनवं पच्चवेक्खित्वा समथपटिपदं पटिपन्नो उपचारक्खणेयेव झानेन नीवरणानि विक्खम्भितानि, अथ कस्मा पुन कामादीनवपच्चवेक्खणादि गहितन्ति? सच्चमेतं. तं पन पहानमत्तन्ति झानस्स चिरट्ठितिया अतिसयपहानत्थं पुन गहितं.

उद्धच्च ¶ मिद्धन्ति कुक्कुच्चं, थिनञ्च तदेकट्ठताय गहितमेवाति कत्वा वुत्तं. सुद्धन्तगतोति सुपरिसुद्धपरियन्तं सब्बसो विसोधितकोणपरियन्तं उय्यानं गतो. तहिं रमेति तस्मिं झाने रमेय्य दिवसभागम्पि झानसमङ्गी एव भवेय्य.

चित्तभावनावेपुल्लत्थन्ति समाधिभावनाय विपुलभावाय. यथा हि भावनावसेन निमित्तस्स उप्पत्ति, एवमस्स भावनावसेनेव वड्ढनम्पि. तस्मा एकङ्गुलादिवसेन निमित्तं वड्ढेन्तस्स पुनप्पुनं बहुलीकारेन झानं भावनापि वुद्धिं विरुळ्हिं वेपुल्लं आपज्जति. तेन वुत्तं ‘‘चित्तभावनावेपुल्लत्थञ्च यथालद्धं पटिभागनिमित्तं वड्ढेतब्ब’’न्ति. तस्साति पटिभागनिमित्तस्स.

निमित्तवड्ढननयवण्णना

७७. तत्राति सामिअत्थे भुम्मवचनं, तस्साति अत्थो. अवड्ढेत्वाति यथा कुम्भकारो मत्तिकाय पत्तं करोन्तो पठमं अपरिच्छिन्दित्वाव पत्तं वड्ढेति, एवं पत्तवड्ढनयोगेन पत्तवड्ढनयुत्तिया अवड्ढेत्वा पूविकस्स पूववड्ढनं. भत्तस्स उपरि भत्तपक्खिपनं भत्तवड्ढनं. वत्थस्स तिन्तस्स अञ्छनादि दुस्सवड्ढनं. पच्चेकं योग-सद्दो योजेतब्बो. अपरिच्छिन्दित्वा ¶ न वड्ढेतब्बं सपरिच्छेदे एव भावनापवत्तितो. तथा हि वुत्तं ‘‘सान्तके नो अनन्तके’’ति (विसुद्धि. १.५५).

हंसपोतकाति जवनहंसपोतका. उक्कूलं उन्नतट्ठानं. विकूलं निन्नट्ठानं. नदीसोतेन कतं विदुग्गं नदीविदुग्गं. विसमाकारेन ठितो पब्बतपदेसो पब्बतविसमो.

थूलानि हुत्वा उपट्ठहन्ति पच्चवेक्खणाबाहुल्लेन विभूतभावतो. दुब्बलानि हुत्वा उपट्ठहन्ति पगुणबलवभावस्स अनापादिकत्ता. उपरि उस्सुक्कनायाति भावनाय उपरि आरोहनाय, दुतियज्झानाधिगमायाति अत्थो.

पब्बतेय्याति पब्बते बहुलचारिनी. अखेत्तञ्ञूति अगोचरञ्ञू. समाधिपरिपन्थानं विसोधनानभिञ्ञाताय बालो. झानस्स पगुणभावापादनवेय्यत्तियस्स अभावेन अब्यत्तो. उपरिझानस्स ¶ पदट्ठानभावानवबोधेन अखेत्तञ्ञू. सब्बथापि समापत्तिकोसल्लाभावेन अकुसलो. समाधिनिमित्तस्स वा अनासेवनाय बालो. अभावनाय अब्यत्तो. अबहुलीकारेन अखेत्तञ्ञू. सम्मदेव अनधिट्ठानतो अकुसलोति योजेतब्बं. उभतो भट्ठोति उभयतो झानतो भट्ठो. सो हि अप्पगुणताय न सुप्पतिट्ठितताय सउस्साहोपि विनासतो, असामत्थियतो च झानद्वयतो परिहीनो. चिण्णवसिनाति आसेवितवसिना.

पञ्चवसीकथावण्णना

७८. वसनं वसीति धातुनिद्देसताय किरियानिद्देसोति अधिप्पायेनाह ‘‘वसियो’’ति, यथारुचि पवत्तियोति अत्थो. आवज्जनाय वसी, आवज्जनावसेन वा वसी आवज्जनवसी. झानं आवज्जितुं यत्थ यत्थ पदेसे इच्छा यत्थिच्छकं. यदा यदा, यस्मिं यस्मिं वा झानङ्गे इच्छा यदिच्छकं. याव याव इच्छा यावदिच्छकं, द-कारो पदसन्धिकरो. ‘‘यावा’’ति च इदं बहूनं जवनवारानं निरन्तरं विय तथापवत्तनं सन्धाय वुत्तं, न एकमेव. सो हि परिच्छिन्नचित्तक्खणोति. आवज्जनाय दन्धायितत्तं नत्थीति वुत्तनयेन यत्थ कत्थचि ठाने यदा यदा ¶ यं किञ्चि झानङ्गं आवज्जेन्तस्स यथिच्छितं कालं आवज्जनाय आवज्जनप्पवत्तिया दन्धायितत्तं वित्थायितत्तं, चिरायितत्तं वा नत्थि. एवं आवज्जनवसी सिद्धा नाम होतीति अत्थो. सेसाति वुट्ठानअधिट्ठानपच्चवेक्खणावसियो.

अङ्गसमुदायभावतो झानस्स झाने आवज्जनवसिं निप्फादेतुकामेन पटिपाटिया झानङ्गानि आवज्जेतब्बानीति आह ‘‘पठमं वितक्कं आवज्जयतो’’ति. यदिपि आवज्जनमेवेत्थ इच्छितं आवज्जनवसिया अधिप्पेतत्ता, आवज्जनाय पन उप्पन्नाय जवनेहि भवितब्बं. तानि च खो आवज्जनतप्परताय चित्ताभिनीहारस्स यथावज्जितझानङ्गारम्मणानि कतिपयानेव होन्ति, न परिपुण्णानीति वुत्तं ‘‘वितक्कारम्मणानेव चत्तारि पञ्च वा जवनानि जवन्ती’’ति. चत्तारि तिक्खिन्द्रियस्स. पञ्च नातितिक्खिन्द्रियस्साति दट्ठब्बं. निरन्तरन्ति विसभागेहि निरन्तरं. अयं पनाति भवङ्गद्वयन्तरिता चतुजवनचित्ता यथावुत्ता आवज्जनवसी. अञ्ञेसं वा धम्मसेनापतिआदीनं. एवरूपे कालेति उट्ठाय समुट्ठाय लहुतरं आवज्जनवसीनिब्बत्तनकाले. सा च खो इत्तरा परित्तकाला, न सत्थु यमकमहापाटिहारिये विय ¶ चिरतरप्पबन्धवती. तथा हि तं सावकेहि असाधारणं वुत्तं. अधिगमेन समं ससम्पयुत्तस्स झानस्स सम्मा आपज्जनं पटिपज्जनं समापज्जनं, झानसमङ्गिता.

सीघन्ति एत्थ समापज्जितुकामतानन्तरं द्वीसु भवङ्गेसु उप्पन्नेसु भवङ्गं उपच्छिन्दित्वा उप्पन्नावज्जनानन्तरं समापज्जनं सीघं समापज्जनसमत्थता. अयञ्च मत्थकप्पत्ता समापज्जनवसी सत्थु धम्मदेसनायं लब्भति. यं सन्धाय वुत्तं ‘‘सो खो अहं, अग्गिवेस्सन, तस्सा एव कथाय परियोसाने तस्मिंयेव पुरिमस्मिं समाधिनिमित्ते अज्झत्तमेव चित्तं सण्ठपेमि सन्निसादेमि एकोदिं करोमि समादहामि येनस्सुदं निच्चकप्पं विहरामी’’ति (म. नि. १.३८७). इतो सीघतरा हि समापज्जनवसी नाम नत्थि. जुण्हाय रत्तिया नवोरोपितेहि केसेहि कपोतकन्दरायं विहरन्तस्स आयस्मतो सारिपुत्तस्स यक्खेन महन्तम्पि पब्बतकूटं पदालेतुं समत्थे पहारे सीसे दिन्ने समापज्जनम्पेत्थ निदस्सेतब्बं. तथा हि वक्खति ‘‘तदा थेरो तस्स पहरणसमये समापत्तिं अप्पेसी’’ति (विसुद्धि. २.३७४). पाळियं पन ‘‘अञ्ञतरं समाधिं समापज्जित्वा निसिन्नो’’ति (उदा. ३४) वुत्तं. इमे पन थेरा ¶ ‘‘समापत्तितो वुट्ठानसमकालं तेन पहारो दिन्नो’’ति वदन्ति.

अच्छरामत्तन्ति अङ्गुलिफोटमत्तं खणं. ठपेतुन्ति सेतु विय सीघसोताय नदिया ओघं वेगेन पवत्तितुं अदत्वा यथावुत्तक्खणं झानं ठपेतुं समत्थता. अभिभुय्य ठपनं, अधिट्ठानं वियाति वा अधिट्ठानं. तत्थ वसी अधिट्ठानवसी. तथेव लहुं वुट्ठातुन्ति अच्छरामत्तं वा दसच्छरामत्तं वा लहुं खणं झानसमङ्गी हुत्वा झानतो वुट्ठातुं समत्थता. भवङ्गचित्तुप्पत्तियेव हेत्थ झानतो वुट्ठानं नाम. एत्थ च यथा ‘‘एत्तकमेव खणं झानं ठपेस्सामी’’ति पुब्बपरिकम्मवसेन अधिट्ठानसमत्थता अधिट्ठानवसी, एवं ‘‘एत्तकमेव खणं झानसमङ्गी हुत्वा झानतो वुट्ठहिस्सामी’’ति पुब्बपरिकम्मवसेन वुट्ठानसमत्थता वुट्ठानवसी वेदितब्बा, या समापत्ति ‘‘वुट्ठानकुसलता’’ति वुच्चति. तदुभयदस्सनत्थन्ति अधिट्ठानवुट्ठानवसीदस्सनत्थं.

तत्थाति तस्मिं निम्मितपब्बते तस्स विवरे. किञ्चापि एकंयेव तं अभिञ्ञाचित्तं येन पब्बतं निम्मिनेय्य, अभिञ्ञापादकस्स पन झानस्स लहुतरं ठपनं, वुट्ठानञ्च इध निदस्सितन्ति दट्ठब्बं. ‘‘एत्तका इद्धिमन्ता एकं उपट्ठाकं गरुळतो रक्खितुं न सक्खिंसू’’ति गारय्हा अस्साम.

आवज्जनानन्तरानीति ¶ आवज्जनवसीभावाय यथाक्कमं वितक्कादीनं झानङ्गानं आवज्जनाय परतो यानि जवनानि पवत्तानि, तानि तेसं पच्चवेक्खणानि. यदग्गेन आवज्जनवसीसिद्धि, तदग्गेन पच्चवेक्खणावसीसिद्धि वेदितब्बा.

दुतियज्झानकथावण्णना

७९. नीवरणप्पहानस्स तप्पठमताय आसन्ननीवरणपच्चत्थिका. थूलं नाम विपुलम्पि फेग्गु विय सुखभञ्जनीयन्ति आह ‘‘ओळारिकत्ता अङ्गदुब्बला’’ति. सन्ततो मनसि करित्वाति पठमज्झानं विय अनोळारिकङ्गत्ता, सन्तधम्मसमङ्गिताय च ‘‘सन्त’’न्ति मनसि कत्वा. ये हि धम्मा दुतियज्झाने पीतिसुखादयो, कामं ते पठमज्झानेपि सन्ति, तेहि पन ते सन्ततरा चेव पणीततरा च भवन्तीति. निकन्तिन्ति निकामनं, अपेक्खन्ति ¶ अत्थो. परियादायाति खेपेत्वा. चत्तारि पञ्चाति वा-सद्दो लुत्तनिद्दिट्ठो. दुतियज्झानं एतस्स अत्थीति दुतियज्झानिकं. वुत्तप्पकारानेवाति पठमज्झाने वुत्तप्पकारानियेव, परिकम्मादिनामकानीति अत्थो.

८०. वूपसमाति वूपसमहेतु, वूपसमोति चेत्थ पहानं अधिप्पेतं, तञ्च वितक्कविचारानं. अतिक्कमो अत्थतो दुतियज्झानक्खणे अनुप्पादोति आह ‘‘समतिक्कमा’’तिआदि. कतमेसं पनेत्थ वितक्कविचारानं वूपसमो अधिप्पेतो, किं पठमज्झानिकानं, उदाहु दुतियज्झानिकानन्ति. किञ्चेत्थ यदि पठमज्झानिकानं, नत्थि तेसं वूपसमो. न हि कदाचि पठमज्झानं वितक्कविचाररहितं अत्थि. अथ दुतियज्झानिकानं, एवम्पि नत्थेव वूपसमो, सब्बेन सब्बं तेसं तत्थ अभावतोति? वुच्चते – येहि वितक्कविचारेहि पठमज्झानस्स ओळारिकता, तेसं समतिक्कमा दुतियस्स झानस्स समधिगमो, न सभावतो अनोळारिकानं फस्सादीनं समतिक्कमाति अयमत्थो ‘‘वितक्कविचारानं वूपसमा’’ति एतेन दीपितो. तस्मा ‘‘किं पठमज्झानिकानं वितक्कविचारानं वूपसमो इधाधिप्पेतो, उदाहु दुतियज्झानिकान’’न्ति एदिसी चोदना अनोकासाव. यस्मा दिट्ठादीनवस्स तंतंझानक्खणे अनुप्पत्तिधम्मतापादनं वूपसमनं अधिप्पेतं. वितक्कादयो एव झानङ्गभूता तथा करीयन्ति, न तंसम्पयुत्ता फस्सादयो, तस्मा वितक्कादीनंयेव वूपसमादिवचनं ञायागतं. यस्मा पन वितक्कादीनं विय तंसम्पयुत्तधम्मानम्पि एतेन ‘‘एतं ओळारिक’’न्ति आदीनवदस्सनं सुत्ते आगतं, तस्मा अविसेसेन ¶ वितक्कादीनं, तंसहगतानञ्च वूपसमादिके वत्तब्बे वितक्कादीनंयेव वूपसमो वुच्चमानो अधिकवचनं अञ्ञं अत्थं बोधेतीति कत्वा किञ्चि विसेसं दीपेतीति दस्सेतुं अट्ठकथायं ‘‘ओळारिकस्स पना’’तिआदि गहितन्ति इध ‘‘येहि वितक्कविचारेही’’तिआदि वुत्तन्ति दट्ठब्बं. ‘‘पीतिया च विरागा’’तिआदीसुपि एसेव नयो. तस्मा वितक्कविचारपीतिसुखसमतिक्कमवचनानि ओळारिकोळारिकङ्गसमतिक्कमा दुतियादिअधिगमदीपकानीति तेसं एकदेसभूतं वितक्कविचारसमतिक्कमवचनं तंदीपकं वुत्तं. विसुं विसुं ठितेपि हि वितक्कविचारसमतिक्कमवचनादिके पहेय्यङ्गनिद्देसतासामञ्ञेन चित्तेन समूहतो गहिते वितक्कविचारवूपसमवचनस्स तदेकदेसता दट्ठब्बा. अयञ्च अत्थो ¶ अवयवेन समुदायोपलक्खणनयेन वुत्तो. अथ वा वितक्कविचारवूपसमवचनेनेव तंसमतिक्कमा दुतियाधिगमदीपकेन पीतिविरागादिवचनानं पीतिआदिसमतिक्कमा ततियादिअधिगमदीपकता दीपिता होतीति तस्स तंदीपकता वुत्ता.

नियकज्झत्तमधिप्पेतं न अज्झत्तज्झत्तादि. तत्थ कारणमाह ‘‘विभङ्गे पना’’तिआदि. नीलवण्णयोगतो नीलवत्थं वियाति नीलयोगतो वत्थं नीलं वियाति अधिप्पायो. येन सम्पसादनेन योगा झानं सम्पसादनं. तस्मिं दस्सिते ‘‘सम्पसादनं झान’’न्ति समानाधिकरणनिद्देसेनेव तंयोगा झाने तंसद्दप्पवत्ति दस्सिताति अविरोधो युत्तो. एकोदिभावे कथन्ति एकोदिम्हि दस्सिते एकोदिभावं झानन्ति समानाधिकरणनिद्देसेनेव झानस्स एकोदिवड्ढनता वुत्ता होतीति चे? ‘‘एकोदिभाव’’न्ति पदं उद्धरित्वा एकोदिस्स निद्देसो न कातब्बो सियाति एकोदिभावसद्दो एव समाधिम्हि पवत्तो सम्पसादनसद्दो विय झाने पवत्ततीति युत्तं. इमस्मिञ्च अत्थविकप्पेति ‘‘चेतसो सम्पसादयती’’ति एतस्मिं पक्खे ‘‘चेतसो’’ति च उपयोगत्थे सामिवचनं. पुरिमस्मिन्ति ‘‘सम्पसादनयोगतो झानं सम्पसादन’’न्ति वुत्तपक्खे. चेतसोति सम्बन्धे सामिवचनं.

सेट्ठोपि लोके ‘‘एको’’ति वुच्चति ‘‘याव परे एकाहं ते करोमी’’तिआदीसु. एको अदुतियो ‘‘एकाकीभि खुद्दकेहि जित’’न्तिआदीसु असहायत्थोपि एक-सद्दो दिट्ठोति आह ‘‘एको असहायो हुत्वा’’ति. सद्धादयोपि कामं सम्पयुत्तधम्मानं साधारणतो, असाधारणतो च पच्चया होन्तियेव, समाधि पन झानक्खणे सम्पयुत्तधम्मानं अविक्खेपलक्खणे इन्दट्ठकरणेन सातिसयं पच्चयो होतीति दस्सेन्तो ‘‘सम्पयुत्तधम्मे…पे… अधिवचन’’न्ति आह.

‘‘सम्पसादनं ¶ , चेतसो एकोदिभाव’’न्ति विसेसनद्वयं झानस्स अतिसयवचनिच्छावसेन गहितं. स्वायमतिसयो यथा इमस्मिं झाने लब्भति, न तथा पठमज्झानेति इमं विसेसं दस्सेतुं ‘‘ननु चा’’तिआदि वुत्तं. आरम्मणे आहननपरियाहननवसेन, अनुमज्जनअनुयोजनवसेन च पवत्तमाना धम्मा सतिपि नीवरणप्पहानेन किलेसकालुस्सियापगमे ¶ सम्पयुत्तानं कञ्चि खोभं करोन्ता विय तेहि च ते न सन्निसिन्ना होन्तीति वुत्तं ‘‘वितक्कविचारक्खोभेन न सुप्पसन्न’’न्ति. खुद्दिका ऊमियो वीचियो. महतियो तरङ्गा. सतिपि इन्द्रियसमत्ते, वीरियसमताय च तेनेव खोभेन, सम्पसादाभावेन च समाधिपि न सुट्ठु पाकटो बहले विय जले मच्छो. यथावुत्तक्खोभो एव पलिबोधो. एवं वुत्तेनाति यस्सा सद्धाय वसेन सम्पसादनं, यस्सा च चित्तेकग्गताय वसेन एकोदिभावन्ति च झानं वुत्तं. तासं एव ‘‘सद्दहना’’तिआदिना पवत्तिआकारस्स विसेसविभावनावसेन वुत्तेन. तेन विभङ्गपाठेन. ‘‘सम्पसादनयोगतो, सम्पसादनतो वा सम्पसादनं, एकोदिं भावेतीति एकोदिभावन्ति झानं वुत्त’’न्ति एवं पवत्ता अयं अत्थवण्णना न विरुज्झति. यथा पन अविरोधो, सो वुत्तो एव.

८१. सन्ताति समं निरोधं गता. समिताति भावनाय समं गमिता निरोधिता. वूपसन्ताति ततो एव सुट्ठु उपसन्ता. अत्थङ्गताति अत्थं विनासं गता. अब्भत्थङ्गताति उपसग्गेन पदं वड्ढेत्वा वुत्तं. अप्पिताति विनासं गमिता. सोसिताति पवत्तिसङ्खातस्स सन्तानस्स अभावेन सोसं सुक्खभावं इता. ब्यन्तिकताति विगतन्तकता.

अयमत्थोति भावनाय पहीनत्ता वितक्कविचारानं अभावो. चोदकेन वुत्तमत्थं सम्पटिच्छित्वा परिहरितुं ‘‘एवमेतं सिद्धोवायमत्थो’’ति वत्वा ‘‘न पनेत’’न्तिआदि वुत्तं. तत्थ एतन्ति ‘‘वितक्कविचारानं वूपसमा’’ति एतं वचनं. तदत्थदीपकन्ति तस्स वितक्कविचाराभावमत्तसङ्खातस्स अत्थस्स दीपकं. अयञ्हेत्थ अत्थो – दुतियज्झानादिअधिगमूपायदीपकेन अज्झत्तसम्पसादनताय, चेतसो एकोदिभावताय च हेतुदीपकेन, अवितक्कअविचारभावहेतुदीपकेन च वितक्कविचारवूपसमवचनेनेव वितक्कविचाराभावो दीपितोति किं पुन अवितक्कअविचारवचनेन कतेनाति? न, अदीपितत्ता. न हि वितक्कविचारवूपसमवचनेन वितक्कविचारानं अप्पवत्ति वुत्ता होति. वितक्कविचारेसु हि तण्हाप्पहानं एतेसं वूपसमनं, ये च सङ्खारेसु तण्हाप्पहानं करोन्ति, तेसु मग्गेसु, पहीनतण्हेसु ¶ च फलेसु सङ्खारपवत्ति होति एव ¶ , एवमेविधापि विक्खम्भितवितक्कविचारतण्हस्स दुतियज्झानस्स वितक्कविचारसम्पयोगो पुरिमेन न निवारितो सियाति तंनिवारणत्थं, आवज्जितुकामतादिअतिक्कमोव तेसं वूपसमोति दस्सनत्थञ्च ‘‘अवितक्कं अविचार’’न्ति वुत्तं. पठमम्पीति पठमं झानम्पि.

‘‘दुतियं उप्पन्नन्तिपि दुतिय’’न्ति वत्तुं वट्टतियेव. न तथा इमस्स वितक्कविचाराति यथा पठमज्झानस्स उपचारक्खणे नीवरणानि पहीयन्ति, तथा इमस्स दुतियज्झानस्स उपचारक्खणे वितक्कविचारा न पहीयन्ति असंकिलिट्ठसभावत्ता, उपचारभावनाय च ते पहातुं असमत्थभावतो. यदिपि ताय तेसु तण्हा पहीयति, न पन सविसेसं. सविसेसञ्हि तत्थ तण्हाप्पहानं अप्पनाय एव होति. तेन वुत्तं ‘‘अप्पनाक्खणेयेवा’’तिआदि. पहानङ्गतापि अतिसयप्पहानवसेनेव वेदितब्बा यथा नीवरणानं पठमज्झानस्स. तस्माति यस्मा तिवङ्गमेवेतं झानं, तस्मा. तन्ति विभङ्गे वचनं. रथस्स पण्डुकम्बलं विय सम्पसादो झानस्स परिक्खारो, न झानङ्गन्ति आह ‘‘सपरिक्खारं झानं दस्सेतु’’न्ति.

ततियज्झानकथावण्णना

८२. उप्पिलावितन्ति कामञ्चायं परिग्गहेसु अपरिच्चत्तपेमस्स अनादीनवदस्सिनो तण्हासहगताय पीतिया पवत्तिआकारो, इध पन दुतियज्झानपीति अधिप्पेता. तथापि सब्बसो पीतियं अविरत्तं, सापि अनुबन्धेय्याति वुत्तं. उप्पिलावितं वियाति वा उप्पिलावितं. आदीनवं हि तत्थ पाकटतरं कत्वा दस्सेतुं एवं वुत्तन्ति दट्ठब्बं.

८३. विरज्जनं विरागो. तं पन विरज्जनं निब्बिन्दनमुखेन हीळनं वा तप्पटिबद्धरागप्पहानं वाति तदुभयं दस्सेतुं ‘‘वुत्तप्पकाराय पीतिया जिगुच्छनं वा समतिक्कमो वा’’ति आह. वुत्तप्पकारायाति ‘‘यदेव तत्थ पीती’’तिआदिना वुत्तप्पकाराय. सम्पिण्डनं समुच्चयो.

मग्गोति उपायो. तदधिगमायाति ततियमग्गाधिगमाय.

८४. उपपत्तितोति ¶ समवाहितभावेन पतिरूपतो. झानुपेक्खापि समवाहितमेव अन्तोनीतं कत्वा पवत्ततीति आह ‘‘समं पस्सती’’ति. विसदायाति ¶ परिब्यत्ताय संकिलेसविगमेन. विपुलायाति महतिया सातिसयं महग्गतभावप्पत्तिया. थामगतायाति पीतिविगमेन थिरभावप्पत्ताय.

परिसुद्धपकति खीणासवपकति निक्किलेसता. सत्तेसु कम्मस्सकतादस्सनहेतुको समभावदस्सनाकारो मज्झत्ताकारो ब्रह्मविहारुपेक्खा.

सहजातधम्मानन्ति निद्धारणे सामिवचनं. समप्पवत्तिया भावनाय वीथिपटिपन्नाय अलीनानुद्धता निरस्सादताय पग्गहनिग्गहसम्पहंसनेसु ब्यापाराभावतो सम्पयुत्तधम्मेसु मज्झत्ताकारभूता बोज्झङ्गुपेक्खा.

उपेक्खानिमित्तन्ति एत्थ लीनुद्धच्चपक्खपातरहितं मज्झत्तं वीरियं उपेक्खा. तदेव तं आकारं गहेत्वा पवत्तेतब्बस्स तादिसस्स वीरियस्स निमित्तभावतो उपेक्खानिमित्तं भावनाय समप्पवत्तिकाले उपेक्खीयतीति उपेक्खा, वीरियमेव उपेक्खा वीरियुपेक्खा.

‘‘पठमं झानं पटिलाभत्थाय नीवरणे…पे… नेवसञ्ञानासञ्ञायतनसमापत्तिं पटिलाभत्थाय आकिञ्चञ्ञायतनसञ्ञं पटिसङ्खा सन्तिट्ठना पञ्ञा सङ्खारुपेक्खासु ञाण’’न्ति (पटि. म. १.५७) एवमागता इमा अट्ठ समाधिवसेन उप्पज्जन्ति. ‘‘सोतापत्तिमग्गं पटिलाभत्थाय उप्पादं पवत्तं निमित्तं आयूहनं पटिसन्धिं गतिं निब्बत्तिं उपपत्तिं जातिं जरं ब्याधिं मरणं सोकं परिदेवं उपायासं. सोतापत्तिफलसमापत्तत्थाय उप्पादं पवत्तं…पे… अरहत्तमग्गं पटिलाभत्थाय उप्पादं…पे… उपायासं…पे… अरहत्तफलसमापत्तत्थाय सुञ्ञताविहारसमापत्तत्थाय अनिमित्तविहारसमापत्तत्थाय उप्पादं पवत्तं निमित्तं आयूहनं पटिसन्धिं गतिं निब्बत्तिं उपपत्तिं जातिं जरं ब्याधिं मरणं सोकं परिदेवं उपायासं पटिसङ्खा सन्तिट्ठना पञ्ञा सङ्खारुपेक्खासु ञाण’’न्ति एवमागता इमा दस विपस्सनावसेन उप्पज्जन्ति. एत्थ च पठमज्झानादीहि विक्खम्भितानि नीवरणवितक्कविचारादीनि पटिसङ्खाय सभावतो उपपरिक्खित्वा सन्निट्ठानवसेन तिट्ठमाना नीवरणादिपटिसङ्खासन्तिट्ठना दिट्ठादीनवत्ता तेसं गहणे उप्पादने अज्झुपेक्खन्ती विपस्सनापञ्ञा गहणे मज्झत्तभूता उपेक्खा.

तत्थ ¶ ¶ उप्पादन्ति पुरिमकम्मपच्चया खन्धानं इध उप्पत्तिमाह. पवत्तन्ति तथाउप्पन्नस्स पवत्तिं. निमित्तन्ति सब्बम्पि तेभूमकसङ्खारगतं निमित्तभावेन उपट्ठानतो. आयूहनन्ति आयतिं पटिसन्धिहेतुभूतं कम्मं. पटिसन्धिन्ति आयतिं उप्पत्तिं. गतिन्ति याय गतिया सा पटिसन्धि होति. निब्बत्तिन्ति खन्धानं निब्बत्तनं. उपपत्तिन्ति ‘‘समापन्नस्स वा उपपन्नस्स वा’’ति (पटि. म. १.७२) एत्थ ‘‘उपपन्नस्सा’’ति वुत्तविपाकप्पवत्तिं. जातिन्ति जरादीनं पच्चयभूतं भवपच्चया जातिं. जराब्याधिमरणादयो पाकटा एव. एत्थ च उप्पादादयो पञ्चेव सङ्खारुपेक्खाञाणस्स विसयवसेन वुत्ता, सेसा तेसं वेवचनवसेन. ‘‘निब्बत्ति, जाती’’ति इदञ्हि द्वयं उप्पादस्स चेव पटिसन्धिया च वेवचनं, ‘‘गति, उपपत्ति चा’’ति इदं द्वयं पवत्तस्स, जरादयो निमित्तस्साति वेदितब्बं. अप्पणिहितविमोक्खवसेन मग्गुप्पत्तिहेतुभूता चतस्सो, तथा फलसमापत्तिया चतस्सो, सुञ्ञतविहारअनिमित्तविहारवसेन द्वेति दस सङ्खारुपेक्खा.

याति विपस्सनापञ्ञा. यदत्थीति यं अनिच्चादिलक्खणत्तयं उपलब्भति. यं भूतन्ति यं पच्चयनिब्बत्तत्ता भूतं खन्धपञ्चकं. तं पजहतीति अनिच्चानुपस्सनादीहि निच्चसञ्ञादयो पजहन्तो सम्मदेव दिट्ठादीनवत्ता तप्पटिबद्धच्छन्दरागप्पहानेन पजहति, यथा आयतिं आदानं न होति, तथा पटिपत्तिया पजहति. तथाभूतो च तत्थ उपेक्खं पटिलभति. विचिननेति अनिच्चादिवसेन सम्मसनेपि.

सम्पयुत्तधम्मानं समप्पवत्तिहेतुताय समवाहितभूता. नीवरणवितक्कविचारादिसब्बपच्चनीकेहि विमुत्तत्ता सब्बपच्चनीकपरिसुद्धा. तेसं वूपसन्तत्ता पच्चनीकवूपसमनेपि अब्यापारभूता अब्यापारभावेन पवत्ता, अब्यापारतं वा पत्ता.

यदि अत्थतो एका, कथमयं भेदोति आह ‘‘तेन तेना’’तिआदि. तस्माति यस्मा सतिपि सभावतो अभेदे येहि पन पच्चयविसेसेहि स्वायमिमासं अवत्थाभेदो, तेसं एकज्झं अप्पवत्तितो न तासं अभेदो, एकज्झं वा पवत्ति, तस्मा. तेनाह ‘‘यत्थ छळङ्गुपेक्खा’’तिआदि.

एकीभावोति ¶ एकता. सतिपि मज्झत्ताभावसामञ्ञे विसयभेदेन पनस्सा भेदो. यमत्थं ¶ सन्धाय ‘‘किच्चवसेन द्विधा भिन्ना’’ति वुत्तं, तं वित्थारतो दस्सेन्तो ‘‘यथा ही’’तिआदिमाह. अयं विपस्सनुपेक्खा. यं सन्धाय वुत्तं पाळियं ‘‘यदत्थि यं भूतं, तं पजहति, उपेक्खं पटिलभती’’ति (म. नि. ३.७१; अ. नि. ७.५५). तत्थ यदत्थि यं भूतन्ति खन्धपञ्चकं, तं मुञ्चितुकम्यताञाणेन पजहति. दिट्ठसोवत्तिकत्तयस्स सब्बलक्खणविचिनने विय दिट्ठलक्खणत्तयस्स भूतस्स सङ्खारलक्खणविचिनने उपेक्खं पटिलभति. सङ्खारानं अनिच्चादिलक्खणस्स सुदिट्ठत्ता तेसं विचिनने मज्झत्तभूताय विपस्सनुपेक्खाय सिद्धाय तथा दिट्ठादीनवानं तेसं गहणेपि अज्झुपेक्खना सिद्धाव होति, सब्बसो विसङ्खारनिन्नत्ता अज्झासयस्स.

अनाभोगरसाति पणीतसुखेपि तस्मिं अवनतिपटिपक्खकिच्चाति अत्थो. अब्यापारपच्चुपट्ठानाति सतिपि सुखपारमिप्पत्तियं तस्मिं सुखे अब्यावटा हुत्वा पच्चुपतिट्ठति, सम्पयुत्तानं वा तत्थ अब्यापारं पच्चुपट्ठपेतीति अत्थो. सम्पयुत्तधम्मानं खोभं, उप्पिलवञ्च आवहन्तेहि वितक्कादीहि अभिभूतत्ता अपरिब्यत्तं. तत्थ तत्रमज्झत्तताय किच्चं. तदभावतो इध परिब्यत्तं.

निट्ठिता ‘‘उपेक्खको च विहरती’’ति एतस्स

सब्बसो अत्थवण्णना.

८५. ‘‘सरतीति सतो’’ति पदस्स कत्तुसाधनतमाह. सम्पजानातीति सम्मदेव पजानाति. सरणं चिन्तनं उपट्ठानं लक्खणमेतिस्साति सरणलक्खणा. सम्मुस्सनपटिपक्खो असम्मुस्सनं, तं किच्चं एतिस्साति असम्मुस्सनरसा. किलेसेहि आरक्खा हुत्वा पच्चुपतिट्ठति, ततो वा आरक्खं पच्चुपट्ठपेतीति आरक्खपच्चुपट्ठाना. असम्मुय्हनं सम्मदेव पजाननं, सम्मोहपटिपक्खो वा असम्मोहो. तीरणं किच्चस्स पारगमनं. पविचयो वीमंसा.

कामं उपचारज्झानादीनि उपादाय पठमदुतियज्झानानिपि सुखुमानेव, इमं पन उपरिझानं उपादाय ‘‘ओळारिकत्ता’’ति वुत्तं. सा च ओळारिकता वितक्कादिथूलङ्गताय वेदितब्बा. केचि ‘‘बहुचेतसिकताया’’ति च वदन्ति ¶ . गति सुखा होति तत्थ झानेसूति अधिप्पायो. अब्यत्तं तत्थ सतिसम्पजञ्ञकिच्चं ‘‘इदं नाम दुक्करं करीयती’’ति वत्तब्बस्स अभावतो. ओळारिकङ्गप्पहानेन सुखुमत्ताति अयमत्थो कामं दुतियज्झानेपि सम्भवति, तथापि येभुय्येन ¶ अविप्पयोगीभावेन वत्तमानेसु पीतिसुखेसु पीतिसङ्खातस्स ओळारिकङ्गस्स पहानेन सुखुमताय इध सातिसयो सतिसम्पजञ्ञब्यापारोति वुत्तं ‘‘पुरिसस्सा’’तिआदि. पुनदेव पीतिं उपगच्छेय्याति हानभागियं झानं सिया दुतियज्झानमेव सम्पज्जेय्याति अत्थो. तेनाह ‘‘पीतिसम्पयुत्तमेव सिया’’ति. ‘‘इदञ्च अतिमधुरं सुख’’न्ति ततियज्झानसुखं सन्धायाह. अतिमधुरता चस्स पहासोदग्यसभावाय पीतिया अभावेनेव वेदितब्बा. इदन्ति ‘‘सतो, सम्पजानो’’ति पदद्वयं.

तस्मा एतमत्थं दस्सेन्तोति यस्मा तस्स झानसमङ्गिनो यं नामकायेन सम्पयुत्तं सुखं, तं सो पटिसंवेदेय्य. यं वा तन्ति अथ वा यं तं यथावुत्तं नामकायसम्पयुत्तं सुखं. तंसमुट्ठानेन ततो समुट्ठितेन अतिपणीतेन रूपेन अस्स झानसमङ्गिनो रूपकायो यस्मा फुटो. यस्स रूपकायस्स फुटत्ता झाना वुट्ठितोपि झानसमङ्गी कायिकं सुखं पटिसंवेदेय्य. तस्मा एतं चेतसिककायिकसुखपटिसंवेदनसङ्खातं अत्थं दस्सेन्तो ‘‘सुखञ्च कायेन पटिसंवेदेतीति आहा’’ति योजना. अयञ्हेत्थ सङ्खेपत्थो – नामकायेन चेतसिकसुखं, कायिकसुखहेतुरूपसमुट्ठापनेन कायिकसुखञ्च झानसमङ्गी पटिसंवेदेतीति वुच्चति. फुटत्ताति ब्यापितत्ताति अत्थो. यथा हि उदकेन फुटसरीरस्स तादिसे नातिपच्चनीके वातादिफोट्ठब्बे फुटे सुखं उप्पज्जति, एवमेतेहि फुटसरीरस्साति. अपरो नयो – सुखञ्च कायेन पटिसंवेदेतीति एत्थ कथमाभोगेन विना सुखपटिसंवेदनाति चोदनायं ‘‘किञ्चापि…पे… एवं सन्तेपी’’ति. यस्मा तस्स नामकायेन सम्पयुत्तं सुखं, तस्मा सुखञ्च कायेन पटिसंवेदेतीति योजना. इदानि सहापि आभोगेन सुखपटिसंवेदनं दस्सेतुं ‘‘यं वा त’’न्तिआदि वुत्तं.

८६. यन्ति हेतुअत्थे निपातो, यस्माति अत्थो. तेनाह ‘‘यंझानहेतू’’ति. ‘‘आचिक्खन्ती’’तिआदीनि पदानि कित्तनत्थानीति अधिप्पायेनाह ‘‘पसंसन्तीति अधिप्पायो’’ति. किन्तीति पसंसनाकारपुच्छा. एदिसेसु ¶ ठानेसु सतिग्गहणेनेव सम्पजञ्ञम्पि गहितं होतीति इध पाळियं सतिया एव गहितत्ता एवं उपट्ठितसतिताय ‘‘सतिमा’’ इच्चेव वुत्तं, ‘‘सम्पजानो’’ति हेट्ठा वुत्तत्ता वा.

झानक्खणे चेतसिकसुखमेव लब्भतीति ‘‘सुखं नामकायेन पटिसंवेदेती’’ति च वुत्तं. ततियन्ति ¶ गणनानुपुब्बताति इतो पट्ठाय दुतियततियज्झानकथाहि अविसेसो, विसेसो च वुत्तोति.

चतुत्थज्झानकथावण्णना

८७. इदानि निब्बत्तितविसेसं दस्सेन्तो ‘‘अयं पन विसेसो’’ति वत्वा ‘‘यस्मा’’तिआदिमाह. आसेवनपच्चयेन पच्चयो न होति, अनिट्ठे ठाने पदन्तरसङ्गहितस्स आसेवनपच्चयत्ताभावतो. अदुक्खमसुखाय वेदनाय उप्पज्जितब्बं सातिसयं सुखविरागभावनाभावतो. तानीति अप्पनावीथियं जवनानि सन्धायाह.

८८. ‘‘पुब्बेवा’’ति वुत्तत्ता कदा पन तेसं पहानं होतीति चोदनायं आह ‘‘चतुन्नं झानानं उपचारक्खणे’’ति. एवं वेदितब्बन्ति सम्बन्धो. पहानक्कमो नाम पहायकधम्मानं उप्पत्तिपटिपाटि. तेन पन वुच्चमाने ‘‘दुक्खं दोमनस्सं सुखं सोमनस्स’’न्ति वत्तब्बं सिया. कस्मा इतो अञ्ञथा वचनन्ति आह ‘‘इन्द्रियविभङ्गे’’तिआदि. अथ कस्मा झानेस्वेव निरोधो वुत्तोति सम्बन्धो.

कत्थ चुप्पन्नं दुक्खिन्द्रियन्ति अत्तनो पच्चयेहि उप्पन्नं दुक्खिन्द्रियं. कत्थ च अपरिसेसं निरुज्झतीति निरोधट्ठानं पुच्छति. तेन ‘‘कत्था’’ति पुच्छायं, ‘‘एत्था’’ति विस्सज्जनेपि हेतुम्हि भुम्मवचनं दट्ठब्बं. झानानुभावनिमित्तं हि अनुप्पज्जन्तं ‘‘दुक्खिन्द्रियं अपरिसेसं निरुज्झती’’ति वुत्तं. अतिसयनिरोधो सुट्ठु पहानं उजुपटिपक्खेन वूपसमो.

नानावज्जनेति येन आवज्जनेन अप्पनावीथि, ततो भिन्नावज्जने, अनेकावज्जने वा. अप्पनावीथियञ्हि उपचारो एकावज्जनो, इतरो अनेकावज्जनो अनेकक्खत्तुं पवत्तनतो. विसमनिसज्जाय उप्पन्नकिलमथो विसमासनुपतापो. पीतिफरणेनाति पीतिया फरणरसत्ता, पीतिसमुट्ठानानं वा पणीतरूपानं कायस्स ब्यापनतो वुत्तं. तेनाह ‘‘सब्बो कायो सुखोक्कन्तो होती’’ति. वितक्कविचारपच्चयेपीति पि-सद्दो ¶ अट्ठानप्पयुत्तो, सो ‘‘पहीनस्सा’’ति एत्थ आनेत्वा सम्बन्धितब्बो ‘‘पहीनस्सापि दोमनस्सिन्द्रियस्सा’’ति. एतं दोमनस्सिन्द्रियं उप्पज्जतीति सम्बन्धो. ‘‘तस्स मय्हं अतिचिरं वितक्कयतो विचारयतो कायोपि किलमिचित्तम्पि उहञ्ञी’’ति वचनतो कायचित्तखेदानं वितक्कविचारप्पच्चयता वेदितब्बा ¶ . ‘‘वितक्कविचारभावे उप्पज्जति दोमनस्सिन्द्रिय’’न्ति आनेत्वा सम्बन्धितब्बं. तत्थस्स सिया उप्पत्तीति तत्थ दुतियज्झानूपचारे अस्स दोमनस्सस्स उप्पत्ति भवेय्य.

एत्थ च यदेके ‘‘तत्थस्स सिया उप्पत्ती’’ति वदन्तेन झानलाभीनम्पि दोमनुस्सुप्पत्ति अत्थीति दस्सितं होति. तेन च अनीवरणसभावो लोभो विय दोसोपि अत्थीति दीपेति. न हि दोसेन विना दोमनस्सं पवत्तति. न चेत्थ पट्ठानपाळिया विरोधो चिन्तेतब्बो. यस्मा तत्थ परिहीनं झानं आरम्मणं कत्वा पवत्तमानं दोमनस्सं दस्सितं, अपरिहीनज्झानमारम्मणं कत्वा उप्पज्जमानस्स दोमनस्सस्स असम्भवतो. झानलाभीनं सब्बसो दोमनस्सं नुप्पज्जतीति च न सक्का वत्तुं, अट्ठसमापत्तिलाभिनो अपि तस्स उप्पन्नत्ता. न हेव खो सो पहीनज्झानो अहोसीति वदन्ति, तं अयुत्तं अनीवरणसभावस्स दोसस्स अभावतो. यदि सिया, रूपारूपावचरसत्तानम्पि उप्पज्जेय्य, न च उप्पज्जति. तथा हि ‘‘अरूपे कामच्छन्दनीवरणं पटिच्च थिनमिद्धनीवरणं उद्धच्चनीवरणं अविज्जानीवरण’’न्तिआदीसु ब्यापादकुक्कुच्चनीवरणानि अनुद्धटानि. न चेत्थ नीवरणत्ता परिहारो, कामच्छन्दादीनम्पि अनीवरणानंयेव नीवरणसदिसताय नीवरणपरियायस्स वुत्तत्ता. यं पन वुत्तं ‘‘अट्ठसमापत्तिलाभिनो अपि तस्स उप्पन्नत्ता’’ति, तम्पि अकारणं उप्पज्जमानेन च दोमनस्सेन झानतो परिहायनतो. लहुकेन पन पच्चयेन परिहीनं तादिसा अप्पकसिरेनेव पटिपाकतिकं करोन्तीति दट्ठब्बं. ‘‘तत्थस्स सिया उप्पत्ती’’ति इदं पन परिकप्पवचनं उपचारक्खणे दोमनस्सस्स अप्पहीनभावदस्सनत्थं. तथा हि वुत्तं ‘‘न त्वेव अन्तोअप्पनाय’’न्ति. यदि पन तदा दोमनस्सं उप्पज्जेय्य, पठमज्झानम्पिस्स परिहीनमेवाति दट्ठब्बं. पहीनम्पि सोमनस्सिन्द्रियं पीति विय न दूरेति कत्वा ¶ ‘‘आसन्नत्ता’’ति वुत्तं. नानावज्जनूपचारे पहीनम्पि पहानङ्गं पटिपक्खेन अविहतत्ता अन्तरन्तरा उप्पज्जेय्य वाति इममत्थं दस्सेन्तो ‘‘अप्पनाप्पत्ताया’’तिआदिमाह. तादिसाय आसेवनाय इच्छितब्बत्ता यथा मग्गवीथितो पुब्बे द्वे तयो जवनवारा सदिसानुपस्सनाव पवत्तन्ति, एवमिधापि अप्पनावारतो पुब्बे द्वे तयो जवनवारा उपेक्खासहगताव पवत्तन्तीति वदन्ति.

समाहटाति समानीता, सङ्गहेत्वा वुत्ताति अत्थो. सुखदुक्खानि विय अनोळारिकत्ता अविभूतताय सुखुमा. ततो एव अनुमिनितब्बसभावत्ता दुविञ्ञेय्या. दुट्ठस्साति दुट्ठपयोगस्स, दुद्दम्मस्साति अत्थो. सक्का होति एसा गाहयितुं अञ्ञापोहननयेनाति अधिप्पायो.

अदुक्खमसुखाय ¶ चेतोविमुत्तियाति इदमेव चतुत्थज्झानं दट्ठब्बं. पच्चयदस्सनत्थन्ति अधिगमस्स उपायभूतपच्चयदस्सनत्थं. तेनाह ‘‘दुक्खप्पहानादयो हि तस्सा पच्चया’’ति. दुक्खप्पहानादयोति च सोपचारा पठमज्झानादयोवेत्थ अधिप्पेता.

पहीनाति वुत्ता ‘‘पञ्चन्नं ओरम्भागियानं संयोजनानं परिक्खया’’ति. एताति सुखादयो वेदना.

सोमनस्सं रागस्स पच्चयो. वुत्तञ्हि ‘‘सुखाय खो, आवुसो विसाख, वेदनाय रागानुसयो अनुसेती’’ति (म. नि. १.४६५). दोमनस्सं दोसस्स पच्चयो. वुत्तम्पि चेतं ‘‘दुक्खाय खो, आवुसो विसाख, वेदनाय पटिघानुसयो अनुसेती’’ति. सुखादिघातेनाति सुखादीनं पहानेन. अस्स झानस्स.

न दुक्खन्ति अदुक्खं, दुक्खविधुरं. यस्मा तत्थ दुक्खं नत्थि, तस्मा वुत्तं ‘‘दुक्खाभावेना’’ति. असुखन्ति एत्थपि एसेव नयो. एतेनाति दुक्खसुखपटिक्खेपवचनेन. ‘‘पटिपक्खभूत’’न्ति इदं इध ततियवेदनाय दुक्खादीनं समतिक्कमवसेन पत्तब्बत्ता वुत्तं, न कुसलाकुसलानं विय उजुविपच्चनीकताय. इट्ठानिट्ठविपरीतस्स मज्झत्तारम्मणस्स, इट्ठानिट्ठविपरीतं वा मज्झत्ताकारेन अनुभवनलक्खणा इट्ठानिट्ठविपरीतानुभवनलक्खणा. ततो एव मज्झत्तरसा. अविभूतपच्चुपट्ठानाति सुखदुक्खानि विय न विभूताकारा ¶ , पिट्ठिपासाणे मिगगतमग्गो विय तेहि अनुमातब्बा अविभूताकारोपट्ठाना. सुखनिरोधो नाम इध चतुत्थज्झानूपचारो, सो पदट्ठानं एतिस्साति सुखनिरोधपदट्ठाना.

८९. ‘‘उपेक्खासतिपारिसुद्धि’’न्ति पुरिमपदे उत्तरपदलोपेनेतं समासपदन्ति आह ‘‘उपेक्खाय जनितसतिपारिसुद्धि’’न्ति. सब्बपच्चनीकधम्मपरिसुद्धाय पच्चनीकसमनेपि अब्यावटाय पारिसुद्धिउपेक्खाय वत्तमानाय चतुत्थज्झाने सति सम्पहंसनपञ्ञा विय सुपरिसुद्धा, सुविसदा च होतीति आह ‘‘या च तस्सा सतिया पारिसुद्धि, सा उपेक्खाय कता, न अञ्ञेना’’ति. यदि तत्रमज्झत्तता इध ‘‘उपेक्खा’’ति अधिप्पेता, कथं सतियेव ‘‘परिसुद्धा’’ति वुत्ताति आह ‘‘न केवल’’न्तिआदि.

एवम्पि ¶ कस्मा अयमेव सति ‘‘उपेक्खासतिपारिसुद्धी’’ति वुत्ताति अनुयोगं सन्धाय ‘‘तत्थ किञ्चापी’’तिआदि वुत्तं. तत्थ हेट्ठा तीसु झानेसु विज्जमानायपि तत्रमज्झत्तताय पच्चनीकाभिभवतो, सहायपच्चयवेकल्लतो च अपारिसुद्धि, तथा तंसम्पयुत्तानं. तदभावतो इध पारिसुद्धीति इममत्थं रूपकवसेन दस्सेतुं ‘‘यथा पना’’तिआदि वुत्तं. सूरियप्पभाभिभवाति सूरियप्पभाय अभिभुय्यमानत्ता. अतिक्खताय चन्दलेखा विय रत्तिपि सोम्मसभावा सभागाय रत्तियमेव च चन्दलेखा समुज्जलतीति सा तस्सा सभागाति दस्सेन्तो ‘‘सोम्मभावेन च अत्तनो उपकारकत्तेन वा सभागाय रत्तिया’’ति आह.

‘‘एकवीथिय’’न्ति इदं तत्थ सोमनस्सस्स एकंसेन अभावतो वुत्तं, न ततो पुरिमतरेसु एकंसेन भावतो. यथा पन वितक्कादयो दुतियादिज्झानक्खणेयेव पहीयन्ति, न तेसं एकवीथियं पुरिमजवनेसु, न एवमेतन्ति दस्सेतुं वुत्तं. चतुक्कज्झानेति चतुक्कनयवसेन निब्बत्तितज्झानचतुक्के.

पञ्चकज्झानकथावण्णना

९०. तत्थाति पठमज्झाने. चतुक्कनयस्स दुतियज्झाने वियाति चतुक्कनयसम्बन्धिनि दुतियज्झाने विय. तं द्विधा भिन्दित्वाति चतुक्कनये दुतियं ¶ ‘‘अवितक्कं विचारमत्तं, अवितक्कं अविचार’’न्ति च एवं द्विधा भिन्दित्वा पञ्चकनये दुतियञ्चेव ततियञ्च होति अभिधम्मेति (ध. स. १६८) अधिप्पायो. सुत्तन्तेसु पन सरूपतो पञ्चकनयो न गहितो.

कस्मा पनेत्थ नयद्वयविभागो गहितोति? अभिधम्मे नयद्वयवसेन झानानं देसितत्ता. कस्मा च तत्थ तथा तानि देसितानि? पुग्गलज्झासयतो, देसनाविलासतो च. सन्निपतितदेवपरिसाय किर येसं यथादेसिते पठमज्झाने वितक्को एव ओळारिकतो उपट्ठासि, इतरे सन्ततो. तेसं अज्झासयवसेन च चतुरङ्गिकं अवितक्कं विचारमत्तं झानं देसितं. येसं विचारो, येसं पीति, येसं सुखं ओळारिकतो उपट्ठासि, इतरे सन्ततो. तेसं तेसं अज्झासयवसेन ततियादीनि झानानि देसितानि. अयं ताव पुग्गलज्झासयो.

यस्सा पन धम्मधातुया सुप्पटिविद्धत्ता भगवा यस्मा देसनाविलासप्पत्तो, तस्मा ञाणमहन्तताय ¶ देसनाय सुकुसलो यं यं अङ्गं लब्भति, तस्स तस्स वसेन यथारुचिं देसनं नियामेन्तो चतुक्कनयवसेन, पञ्चकनयवसेन च. तत्थ च पञ्चङ्गिकं पठमं, चतुरङ्गिकं दुतियं, तिवङ्गिकं ततियं, दुवङ्गिकं चतुत्थं, दुवङ्गिकमेव पञ्चमं झानं देसेसीति अयं देसनाविलासो. एत्थ च पञ्चकनये दुतियज्झानं चतुक्कनये दुतियज्झानपक्खिकं कत्वा विभत्तं ‘‘यस्मिं समये रूपूपपत्तिया मग्गं भावेति अवितक्कं विचारमत्तं समाधिजं पीतिसुखं दुतियं झानं उपसम्पज्ज विहरती’’ति (ध. स. १६८). कस्मा? एकत्तकायनानत्तसञ्ञीसत्तावासफलताय दुतियज्झानेन समानफलत्ता, पठमज्झानसमाधितो जातत्ता च. पठमज्झानमेव हि ‘‘कामेहि अकुसलेहि च विवित्त’’न्ति तदभावा न इध ‘‘विविच्चेव कामेहि विविच्च अकुसलेही’’ति सक्का वत्तुं, नापि ‘‘विवेकज’’न्ति. सुत्तन्तदेसनासु च पञ्चकनये दुतियततियज्झानानि दुतियज्झानमेव भजन्ति वितक्कवूपसमा विचारवूपसमा अवितक्कत्ता, अविचारत्ता च. एवञ्च कत्वा सुत्तन्तदेसनायपि पञ्चकनयो लब्भतेवाति सिद्धं होति. ननु सुत्तन्ते चत्तारियेव झानानि विभत्तानीति पञ्चकनयो न लब्भतीति? न, ‘‘सवितक्कसविचारो समाधी’’तिआदिना (दी. नि. ३.३०५) समाधित्तयापदेसेन पञ्चकनयस्स ¶ लब्भमानत्ता. चतुक्कनयनिस्सितो पन कत्वा पञ्चकनयो विभत्तोति सुत्तन्तदेसनायपि पञ्चकनयो निद्धारेतब्बो. ‘‘वितक्कविचारानं वूपसमा’’ति हि वितक्कस्स, विचारस्स, वितक्कविचारानञ्च ‘‘वितक्कविचारान’’न्ति सक्का वत्तुं. तथा ‘‘अवितक्कं, अविचार’’न्ति च विना, सह च विचारेन वितक्कप्पहानेन अवितक्कं, सह, विना च वितक्केन विचारप्पहानेन अविचारन्ति अवितक्कं, अविचारं, अवितक्कञ्च अविचारञ्चाति वा तिविधम्पि सक्का सङ्गहेतुं.

दुतियन्ति च वितक्करहिते, वितक्कविचारद्वयरहिते च ञायागता देसना दुतियं अधिगन्तब्बत्ता, विचारमत्तरहितेपि द्वयप्पहानाधिगतसमानधम्मत्ता. एवञ्च कत्वा पञ्चकनयनिद्देसे दुतिये वूपसन्तोपि वितक्को सहायभूतविचारावूपसमेन न सम्मा वूपसन्तोति वितक्कविचारद्वयरहिते विय विचारवूपसमेनेव तदुपसमं, सेसधम्मानं समानतञ्च दस्सेन्तेन ‘‘वितक्कविचारानं वूपसमा अज्झत्तं सम्पसादनं चेतसो एकोदिभावं अवितक्कं अविचारं समाधिजं पीतिसुखं ततियं झानं उपसम्पज्ज विहरती’’ति ततियं चतुक्कनये दुतियेन निब्बिसेसं विभत्तं. दुविधस्सापि सहायविरहेन, अञ्ञथा च वितक्कप्पहानेन अवितक्कत्तं, समाधिजं पीतिसुखत्तञ्च समानन्ति समानधम्मत्तापि दुतियन्ति निद्देसो ¶ . विचारमत्तम्पि हि वितक्कविचारद्वयरहितं विय ‘‘यस्मिं समये रूपूपपत्तिया मग्गं भावेति अवितक्कं विचारमत्तं समाधिजं पीतिसुखं दुतियं झानं उपसम्पज्ज विहरती’’ति (ध. स. १६८) अवितक्कं समाधिजं पीतिसुखन्ति विभत्तं. पठमज्झाने वा सहचारीसु वितक्कविचारेसु एकं अतिक्कमित्वा दुतियम्पि तत्रट्ठमेव दोसतो दिस्वा उभयम्पि सहातिक्कमन्तस्स पञ्चकनये ततियं वुत्तं, ततियं अधिगन्तब्बत्ता. पठमतो अनन्तरभावेन पनस्स दुतियभावो च उप्पज्जतीति. कस्मा पनेवं सरूपतो पञ्चकनयो न विभत्तोति? विनेय्यज्झासयतो. यथानुलोमदेसना हि सुत्तन्तदेसनाति.

पथवीकसिणनिद्देसवण्णना निट्ठिता.

इति चतुत्थपरिच्छेदवण्णना.

५. सेसकसिणनिद्देसवण्णना

आपोकसिणकथावण्णना

९१. यथावित्थारितस्स ¶ ¶ अत्थस्स अतिदेसोपि वित्थारट्ठानेयेव तिट्ठतीति आह ‘‘वित्थारकथा होती’’ति. आपोकसिणन्ति आपोकसिणज्झानं, आपोकसिणकम्मट्ठानं वा. सब्बं वित्थारेतब्बन्ति पथवीकसिणकम्मट्ठाने वुत्तनयेन वित्थारेतब्बं. एत्तकम्पीति ‘‘कते वा अकते वाति सब्बं वित्थारेतब्ब’’न्ति एत्तकम्पि अवत्वा. सामुद्दिकेन लोणुदकेन भरितो जलासयो लोणी. नीलादिवण्णसङ्करपरिहरणत्थं ‘‘सुद्धवत्थेन गहित’’न्ति वुत्तं. अञ्ञन्ति भूमिं सम्पत्तं. तथारूपन्ति यादिसं आकासजं उदकं, तादिसं. तेनाह ‘‘विप्पसन्नं अनाविल’’न्ति, यं पन उदकन्ति सम्बन्धो. ‘‘न वण्णो पच्चवेक्खितब्बो’’तिआदीसु यं वत्तब्बं, तं पथवीकसिणकथायं वुत्तमेव. लक्खणं पन इध पग्घरणलक्खणं वेदितब्बं.

वुत्तनयेनेवाति पथवीकसिणभावनायं वुत्तनयेनेव. तरङ्गुट्ठानादि, फेणमिस्सतादि च इध कसिणदोसो. सोति योगावचरो. तस्साति पटिभागनिमित्तस्स.

तेजोकसिणकथावण्णना

९२. सिनिद्धानि सिनेहवन्तानि. सारदारूनि न फेग्गुदारूनि. जालाय चिरट्ठितत्थं सिनिद्धसारदारुग्गहणं. घटिकं घटिकं कत्वाति खन्धसो करित्वा. आलिम्पेत्वाति जालेत्वा. घनजालायाति अविरळवसेन पवत्तअग्गिजालायं.

पतनसदिसन्ति पतमानसदिसं. अकते गण्हन्तस्साति वुत्तनयेन यथा कसिणमण्डलं पञ्ञायति, एवं अनभिसङ्खते केवले तेजस्मिं निमित्तं गण्हन्तस्स.

वायोकसिणकथावण्णना

९३. वुत्तञ्हेतन्ति ¶ एत्थ हि-सद्दो हेतुअत्थो, यस्माति अत्थो. तस्स ‘‘तस्मा’’ति इमिना सम्बन्धो. उच्छग्गन्ति उच्छुखेत्ते यथाठितानं अग्गं. एरितन्ति ¶ वातेन चलितं. समेरितन्ति सब्बसो चलितं. तस्माति यस्मा ‘‘वायोकसिणं…पे… उपलक्खेती’’ति एवं वुत्तं अट्ठकथायं, तस्मा. समसीसट्ठितन्ति उपरि पत्तानं वसेन समसीसं हुत्वा ठितं. वेळुं वा रुक्खं वाति एत्थापि ‘‘समसीसं ठितं घनपत्तवेळुं वा घनपत्तरुक्खं वा’’ति आनेत्वा योजेतब्बं. एकङ्गुलादिप्पमाणेसु केसेसु रस्सभावतो, दीघतरेसु ओलम्बनतो, विरळेसु अनुप्पवेसतो वातप्पहारो न पञ्ञायतीति चतुरङ्गुलप्पमाणग्गहणं, घनग्गहणञ्च कतं. एतस्मिं ठाने पहरतीति सतिं ठपेत्वाति उच्छग्गादीनं पचलनाकारग्गहणमुखेन तेसं पहारके वातसङ्घाते सतिं उपट्ठपेत्वा. तत्थ सतिं ठपेत्वाति तस्मिं कायपदेसस्स सङ्घट्टनवसेन पवत्ते वायुपिण्डे सङ्घट्टनाकारग्गहणमुखेन सतिं उपट्ठपेत्वा. ‘‘उसुमवट्टिसदिस’’न्ति एतेन पुरिमकसिणस्स विय इमस्सापि निमित्तस्स संविग्गहतं दस्सेति. ‘‘निच्चल’’न्ति इमिना निच्चलभावोयेव उग्गहनिमित्ततो इमस्स विसेसोति पटिभागनिमित्तस्सापि उसुमवट्टिसदिसताव विभाविता होति.

नीलकसिणकथावण्णना

९४. अञ्जनराजिवट्टादि वण्णधातुया वा. तथारूपं मालागच्छन्ति अविरळविकसितनीलवण्णपुप्फसञ्छन्नं पुप्फगच्छं. इतरेनाति अकताधिकारेन. गिरिकण्णिकग्गहनेन नीलं गिरिकण्णिकमाह. करण्डपटलं समुग्गपिधानं. पत्तेहियेवाति नीलुप्पलादीनं केसरवण्टानि अपनेत्वा केवलेहि पत्तेहियेव. पूरेतब्बन्ति नीलवण्णं वत्थं गहेत्वा भण्डिकं विय बन्धित्वा यथा नीलमण्डलं हुत्वा पञ्ञायति, तथा चङ्कोटकं वा करण्डपटलं वा पूरेतब्बं. मुखवट्टियं वा अस्साति अस्स चङ्कोटकस्स, करण्डपटलस्स वा मुखवट्टियं बन्धितब्बं. मणितालवण्टं इन्दनीलमणिमयं तालवण्टं.

पीतकसिणकथावण्णना

९५. पीतकसिणे मालागच्छन्ति इक्कटादिमालागच्छं. हरितालं, मनोसिला वा धातु. पत्तङ्गपुप्फेहीति ¶ पत्तङ्गनामिका पीतवण्णपुप्फा एका गच्छजाति, तस्स पुप्फेहि. आसनपूजन्ति चेतियङ्गणे कतं आसनपूजं ¶ . कणिकारपुप्फादिनाति आदि-सद्देन आकुलिकिङ्किरातपुप्फादीनं सङ्गहो दट्ठब्बो.

लोहितकसिणकथावण्णना

९६. लोहितमणि लोहितङ्गमणिआदि. लोहितधातु गेरुकजातिहिङ्गुलिकादि.

ओदातकसिणकथावण्णना

९७. ओदातकसिणे मालागच्छन्ति नन्दियावत्तादिमालागच्छं. धातु कक्कटिमुत्तसेतिकादि.

आलोककसिणकथावण्णना

९८. तथा असक्कोन्तेनाति यथा सूरियालोकादिवसेन ओभासनिमित्तुप्पादनं वुत्तं, तस्स ओभासमण्डलस्स न चिरट्ठितिताय तथा निमित्तुप्पादनं कातुं असक्कोन्तेन. घटमुखेन निग्गच्छनकओभासस्स महन्तभावतो ‘‘घटमुखं पिदहित्वा’’ति वुत्तं. भित्तिमुखन्ति भित्तिअभिमुखं. उट्ठितमण्डलसदिसन्ति भित्तिआदीसु उट्ठितपाकतिकआलोकमण्डलसदिसं. घनविप्पसन्नं आलोकपुञ्जसदिसन्ति भगवतो ब्यामप्पभा विय बहलो, विप्पसन्नो च हुत्वा पुञ्जभूतो आलोको अत्थि चे, तंसदिसोति अत्थो.

परिच्छिन्नाकासकसिणकथावण्णना

९९. छिद्दसदिसमेव होतीति येहि भित्तिपरियन्तादीहि परिच्छिन्नं, तं छिद्दं, तंसदिसं, तेनवाकारेन उग्गहनिमित्तं उपट्ठातीति अत्थो. ‘‘वड्ढियमानम्पि न वड्ढती’’ति उग्गहनिमित्तस्स अवड्ढनीयतं दस्सेतुं वुत्तं. सब्बम्पि हि उग्गहनिमित्तं वड्ढियमानं न वड्ढतियेव. सतिपि च वड्ढेतुकामतायं वड्ढना न सम्भवति भावनाय परिदुब्बलत्ता. भावनावसेन हि निमित्तवड्ढना ¶ . पटिभागनिमित्तं पन तस्मिं उप्पन्ने भावना थिराति कत्वा ‘‘वड्ढियमानं वड्ढती’’ति वुत्तं.

किञ्चापि ¶ पाळियं ‘‘पथवीकसिणादीनि रूपझानारम्मणानि अट्ठेव कसिणानि सरूपतो आगतानि, ओदातकसिणे पन आलोककसिणं, आकासकसिणे च परिच्छिन्नाकासकसिणं अन्तोगधं कत्वा देसना कता’’ति अधिप्पायेनाह ‘‘इति कसिणानि दसबलो, दस यानि अवोचा’’ति. पकिण्णककथापि विञ्ञेय्याति पुब्बे विय असाधारणं तस्मिं तस्मिं कसिणे पटिनियतमेव अत्थं अग्गहेत्वा असाधारणतो, साधारणतो च तत्थ तत्थ पकिण्णकं विसटं अत्थं गहेत्वा पवत्ता पकिण्णककथापि विजानितब्बा.

पकिण्णककथावण्णना

१००. आदिभावोति एत्थ आदि-सद्देन यस्स कस्सचि पथवीपक्खियस्स वत्थुनो निम्मानादिं सङ्गण्हाति. ठाननिसज्जादिकप्पनं वाति एत्थापि ‘‘आकासे वा उदके वा’’ति आनेत्वा सम्बन्धितब्बं. परित्तअप्पमाणनयेनाति नीलादिवण्णं अनामसित्वा परित्तअप्पमाणनयेनेव. एवमादीनीति आदि-सद्देन सरीरतो उदकधारानिम्मानादिं सङ्गण्हाति.

यदेव सो इच्छति तस्स डहनसमत्थताति बहूसु कप्पासपिचुसारदारुआदीसु एकज्झं रासिभूतेसु ठितेसु यं यदेव इच्छति, तस्स तस्सेव डहनसमत्थता. इध आदि-सद्देन अन्धकारविधमनादिं सङ्गण्हाति.

वायुगतिया गमनं वायुगतिगमनं, अतिसीघगमनं. इध आदि-सद्देन यदिच्छितदेसन्तरं पापुणनादिं सङ्गण्हाति.

सुवण्णन्ति अधिमुच्चना सुवण्णभावाधिट्ठानं सेय्यथापि आयस्मा पिलिन्दवच्छो (पारा. ६१९-६२०) तिणण्डुपगपासादादीनं. वुत्तनयेनाति सुवण्णदुब्बण्णनयेन.

वण्णकसिणेसु ¶ तत्थ तत्थ आदि-सद्देन नीलोभासनिम्मानादीनं सङ्गहो दट्ठब्बो. पथवीपब्बतादीति आदि-सद्देन समुद्दादीनं सङ्गहो दट्ठब्बो.

सब्बानेव ¶ दसपि कसिणानि. इमं पभेदं लभन्तीति इमं वड्ढनादिविसेसं पापुणन्ति. एकोति एकच्चो. सञ्जानातीति भावनापञ्ञाय सञ्जानाति. आदि-सद्देन ‘‘आपोकसिण’’न्तिआदिपाळिं सङ्गण्हाति.

उपरिगगनतलाभिमुखं ‘‘पथवीकसिणमेको सञ्जानाती’’ति पाळिपदानि आनेत्वा सम्बन्धितब्बं. तञ्च खो वड्ढनवसेन. तेनाह ‘‘एकच्चो हि उद्धमेव कसिणं वड्ढेती’’ति. हेट्ठाभूमितलाभिमुखन्तिआदीसुपि एसेव नयो. पुब्बे वड्ढनकाले पयोजनं अनपेक्खित्वा वड्ढेन्तानं वसेन वुत्तत्ता इदानि ‘‘तेन तेन वा कारणेन एवं पसारेती’’ति आह, कसिणं वड्ढेतीति अत्थो. यथा किन्ति आह ‘‘आलोकमिव दिब्बचक्खुना रूपदस्सनकामो’’ति. उद्धञ्चे रूपं दट्ठुकामो उद्धं आलोकं पसारेति, अधो चे रूपं दट्ठुकामो अधो आलोकं पसारेति, समन्ततो चे रूपं दट्ठुकामो समन्ततो आलोकं पसारेति, एवमयं कसिणन्ति अत्थो.

एकस्साति पथवीकसिणादीसु एकेकस्स. अञ्ञभावानुपगमनत्थन्ति अञ्ञकसिणभावानुपगमनदीपनत्थं, न अञ्ञं पथवीआदि. न हि उदकेन ठितट्ठाने ससम्भारपथवी अत्थि. अञ्ञो कसिणसम्भेदोति आपोकसिणादिना सङ्करो. सब्बत्थाति सब्बेसु आपोकसिणादीसु सेसकसिणेसु. एकदेसे अट्ठत्वा अनवसेसेन फरणप्पमाणस्स अग्गहणतो फरणं अप्पमाणं. तेनेव हि नेसं कसिणसमञ्ञा. तथा चाह ‘‘तञ्ही’’तिआदि. तत्थ चेतसा फरन्तोति भावनाचित्तेन आलम्बनं करोन्तो. भावनाचित्तञ्हि कसिणं परित्तं वा विपुलं वा एकक्खणे सकलमेव मनसि करोति, न एकदेसन्ति.

१०१. आनन्तरियकम्मसमङ्गिनोति पञ्चसु आनन्तरियकम्मेसु येन केनचि समन्नागता. नियतमिच्छादिट्ठिकाति अहेतुकदिट्ठि अकिरियदिट्ठि नत्थिकदिट्ठीति तीसु मिच्छादिट्ठीसु याय कायचि नियताय मिच्छादिट्ठिया समन्नागता. उभतोब्यञ्जनकपण्डकाति उभतोब्यञ्जनका, पण्डका च. कामञ्चेते अहेतुकपटिसन्धिकत्ता विपाकावरणेन समन्नागता होन्ति, तथापि तिब्बकिलेसत्ता किलेसावरणेन समन्नागता वुत्ता. अहेतुकद्विहेतुकपटिसन्धिकाति अहेतुकपटिसन्धिका ¶ , द्विहेतुकपटिसन्धिका च. दुहेतुकपटिसन्धिकानम्पि हि अरियमग्गपटिवेधो, झानपटिलाभो ¶ च नत्थि, तस्मा तेपि विपाकावरणेन समन्नागता एव.

अपच्चनीकपटिपदायन्ति मग्गस्स अनुलोमपटिपदायं सच्चानुलोमिकायं विपस्सनायं. अच्छन्दिकाति ‘‘कत्तुकम्यताछन्दरहिता’’ति सम्मोहविनोदनियं वुत्तं, तम्पि निब्बानाधिगमत्थमेव कत्तुकम्यताछन्दं सन्धाय वुत्तन्ति दट्ठब्बं. उत्तरकुरुकापि मनुस्सा मारादयो विय अच्छन्दिकट्ठानं पविट्ठा निब्बुतिछन्दरहितत्ता. दुप्पञ्ञाति भवङ्गपञ्ञाय परिहीना. ‘‘भवङ्गपञ्ञाय परिपुण्णायपि यस्स भवङ्गं लोकुत्तरस्स पादकं न होति, सोपि दुप्पञ्ञोयेवा’’ति सम्मोहविनोदनियं वुत्तं. यस्मिं हि भवङ्गे वत्तमाने तंसन्ततियं लोकुत्तरं निब्बत्तति, तं तस्स पादकं नाम होति.

कुसलेसु धम्मेसूति अनवज्जधम्मेसु, सुखविपाकधम्मेसु वा. ओक्कमितुन्ति अधिगन्तुं. कसिणेयेवाति कसिणकम्मट्ठानेयेव. एतेसन्ति कम्मावरणसमन्नागतादीनं. तस्माति यस्मा एते विपाकन्तरायादयो एवं अत्थजानिकरा, अनत्थहेतुभूता च, तस्मा. तिण्णमेव चेत्थ अन्तरायानं गहणं इतरस्स सप्पटिकारत्ता, कम्मन्तरायपक्खिकत्ता वाति दट्ठब्बं. सप्पुरिसूपनिस्सयादीहीति आदि-सद्देन तज्जं योनिसोमनसिकारादिं सङ्गण्हाति. सद्धन्ति कम्मफलसद्धं, रतनत्तयसद्धञ्च. छन्दन्ति भावनानुयोगे तिब्बकत्तुकम्यतासङ्खातं कुसलच्छन्दं. पञ्ञन्ति पारिहारियपञ्ञं. वड्ढेत्वाति यथा भावना इज्झति, तथा परिब्रूहेत्वा. यं पनेत्थ अत्थतो न विभत्तं, तं सुविञ्ञेय्यत्ता, हेट्ठा वुत्तनयत्ता च न विभत्तं.

सेसकसिणनिद्देसवण्णना निट्ठिता.

इति पञ्चमपरिच्छेदवण्णना.

६. असुभकम्मट्ठाननिद्देसवण्णना

उद्धुमातकादिपदत्थवण्णना

१०२. ‘‘अविञ्ञाणकासुभेसू’’ति ¶ ¶ इदं उद्धुमातकादीनं सभावदस्सनवसेन वुत्तं. तस्मा भूतकथनमत्तं दट्ठब्बं, न सविञ्ञाणकअसुभस्स अकम्मट्ठानभावतो. तथा हि वक्खति ‘‘न केवलं मतसरीर’’न्तिआदि (विसुद्धि. १.१२२). उद्धं जीवितपरियादानाति जीवितक्खयतो उपरि मरणतो परं. समुग्गतेनाति उट्ठितेन. उद्धुमातत्ताति उद्धं उद्धं धुमातत्ता सूनत्ता. उद्धुमातमेव उद्धुमातकन्ति क-कारेन पदवड्ढनमाह अनत्थन्तरतो यथा ‘‘पीतकं लोहितक’’न्ति. पटिक्कूलत्ताति जिगुच्छनीयत्ता. कुच्छितं उद्धुमातं उद्धुमातकन्ति कुच्छनत्थे वा अयं क-कारोति दस्सेतुं वुत्तं यथा ‘‘पापको कित्तिसद्दो अब्भुग्गच्छती’’ति (महाव. २८५; परि. ३२५; दी. नि. २.१४९; अ. नि. ५.२१३). तथारूपस्साति ‘‘भस्ता विय वायुना’’तिआदिना यथारूपं वुत्तं, तथारूपस्स.

सेतरत्तेहि परिभिन्नं विमिस्सितं नीलं विनीलं, पुरिमवण्णविपरिणामभूतं वा नीलं विनीलं.

परिभिन्नट्ठानेसु काककङ्कादीहि. विस्सन्दमानपुब्बन्ति विस्सवन्तपुब्बं, तहं तहं पग्घरन्तपुब्बन्ति अत्थो.

अपधारितन्ति विवटं उग्घाटितं. खित्तन्ति छड्डितं, सोणसिङ्गालादीहि विसुं कत्वा खादनेन सरीरसङ्घाततो लुञ्चित्वा तहं तहं छड्डितं. विविधं खित्तन्ति विक्खित्तं.

पुरिमनयेनाति ‘‘विविधं खित्त’’न्तिआदिना पुब्बे वुत्तनयेन. सत्थेन हनित्वाति वेरीहि खग्गकरवालादिना ¶ सत्थेन पहरित्वा. वुत्तनयेनाति ‘‘अञ्ञेन हत्थ’’न्तिआदिना पुब्बे वुत्तनयेन.

अब्भन्तरतो निक्खमन्तेहि किमीहि पग्घरन्तकिमिकुलं पुळवकन्ति आह ‘‘किमिपरिपुण्णस्सा’’ति.

उद्धुमातकादीनि ¶ आमकसुसानादीसु छड्डितासुभानि. निस्सायाति पटिच्च तानिपि आरब्भ. निमित्तानन्ति उग्गहपटिभागनिमित्तानं. एतानेव उद्धुमातकादीनेव नामानि.

उद्धुमातककम्मट्ठानवण्णना

१०३. भावेतुकामेनाति उप्पादेतुकामेन. तेनाति आचरियेन. अस्साति योगिनो. असुभनिमित्तत्थायाति असुभनिमित्तस्स उग्गण्हनत्थाय, असुभे वा उग्गहनिमित्तस्स अत्थाय. गमनविधानन्ति गमनविधि. येन विधिना गन्तब्बं, सो विधि. उग्गहनिमित्तस्स उप्पन्नकालतो पट्ठाय पथवीकसिणे वुत्तं पटिपज्जनविधिं सन्धायाह ‘‘अप्पनाविधानपरियोसान’’न्ति.

१०४. तावदेवाति सुतक्खणेयेव. अतित्थेन पुण्णनदीआदिं पक्खन्दन्तेन विय अनुपविसन्तेन विय. केदारकोटियाति केदारमरियादाय. विसभागरूपन्ति खेत्तरक्खिकादिविसभागवत्थुरूपं. सरीरन्ति उद्धुमातककळेवरं. अधुनामतन्ति अचिरमतं उद्धुमातकभावं अप्पत्तं. तक्कयतीति सम्भावेति भारियं कत्वा न मञ्ञति.

१०५. रूपसद्दादीति एत्थ अमनुस्सानं रूपेहि, सीहब्यग्घादीनं सद्दादीहि, अमनुस्सानम्पि वा रूपसद्दादीहि. तथा सीहब्यग्घादीनन्ति यथारहं योजेतब्बं. अनिट्ठारम्मणाभिभूतस्साति भेरवादिभावेन अनिट्ठेहि आरम्मणेहि अभिभूतस्स अज्झोत्थटस्स. न पटिसण्ठातीति विदाहवसेन आसये न तिट्ठति, उच्छड्डेतब्बं होतीति अत्थो. अञ्ञोति अमनुस्सादीनं वसेन वा अञ्ञथा वा वुत्तप्पकारतो अञ्ञो आबाधो होति. सोति सङ्घत्थेरो, अभिञ्ञातभिक्खु वा. यस्सानेन आरोचितं, सो. कतकम्माति कतथेय्यकम्मा. अकतकम्माति थेय्यकम्मं कातुकामा. कतकम्मा पन इधाधिप्पेता. तस्मा तेति कतकम्मा चोरा. सह ओड्ढेनाति सहोड्ढं, थेनेत्वा गहियमानभण्डेन सद्धिन्ति अत्थो. यजमानोति यञ्ञं यजन्तो ¶ यञ्ञसामिको. ‘‘अद्धा इमाय पटिपत्तिया जरामरणतो मुच्चिस्सामी’’ति पीतिसोमनस्सं उप्पादेत्वा.

एवं ¶ गमनविधानं एकदेसेन वत्वा इदानि अट्ठकथासु आगतनयेन तं दस्सेतुं ‘‘अट्ठकथासु वुत्तेन विधिना’’तिआदिमाह. तत्थ उग्गण्हन्तोति उग्गण्हनहेतु. एकोति अयं एक-सद्दो असहायत्थो, न अञ्ञादिअत्थोति ‘‘अदुतियो’’ति वुत्तं. यथा वण्णादितो ववत्थानं एकंसतो समुदितमेव इच्छितब्बं सब्बत्थकभावतो, न तथा सन्धिआदितोति दस्सनत्थं ‘‘वण्णतोपी’’तिआदिना छसु ठानेसु सम्पिण्डनत्थो पि-सद्दो गहितो. पुन एको अदुतियोतिआदि गहितनिमित्तस्स योगिनो निवत्तित्वा वसनट्ठानगमनं सन्धाय वुत्तं. तब्भागियञ्ञेवाति तप्पक्खियंयेव असुभनिमित्तमनसिकारसहितमेव. आसनं पञ्ञपेतीति निसज्जं कप्पेति. यं पन ‘‘असुभनिमित्तदिसाभिमुखे भूमिप्पदेसे’’ति (विसुद्धि. १.११३) वक्खति, तम्पि इममेवत्थं सन्धाय वुत्तं. न हि केवलेन दिसाभिमुखभावेन किञ्चि इज्झति.

समन्ता निमित्तुपलक्खणाति उद्धुमातकस्स समन्ता पासाणादिनिमित्तसल्लक्खणा. असम्मोहत्थाति उग्गहनिमित्ते उपट्ठिते उप्पज्जनकसम्मोहविगमत्था. एकादसविधेनाति वण्णादिवसेन एकादसविधेन. उपनिबन्धनत्थोति असुभारम्मणे चित्तं उपनेत्वा निबन्धनत्थो. वीथिसम्पटिपादनत्थाति कम्मट्ठानवीथिया सम्मदेव पटिपादनत्था. पुञ्ञकिरियवत्थु अधिगतं होतीति सम्बन्धो.

१०६. तस्माति यस्मा असुभनिमित्तस्स उग्गण्हनं अरियमग्गपदट्ठानस्स पठमज्झानस्स अधिगमुपायो, यस्मा वा ‘‘असुभनिमित्तं उग्गण्हन्तो एको अदुतियो गच्छती’’ति वुत्तं, तस्मा. चित्तसञ्ञत्तत्थायाति सरीरसभावसल्लक्खणेन, संवेगजननेन च अत्तनो चित्तस्स सञ्ञत्तिअत्थं सञ्ञापनत्थं. ‘‘चित्तसञ्ञतत्थाया’’ति वा पाठो, किलेसवसेन असंयतस्स चित्तस्स संयमनत्थं दमनत्थं, न कम्मट्ठानत्थन्ति अत्थो. कम्मट्ठानसीसेनाति कम्मट्ठानेन सीसभूतेन, तं उत्तमङ्गं पधानं कारणं कत्वा. मूलकम्मट्ठानन्ति पकतिया अत्तना कालेन कालं परिहरियमानं बुद्धानुस्सतिआदिसब्बत्थककम्मट्ठानं. ‘‘कम्मट्ठानसीसेन गच्छामी’’ति तं अविस्सज्जेत्वा. तेनाह ‘‘तं मनसिकरोन्तेनेवा’’ति. सूपट्ठितभावसम्पादनेनाति मूलकम्मट्ठाने सुट्ठु उपट्ठितभावस्स सम्पादनेन. एवं ¶ हि सति असम्मुट्ठा नाम होति. बहिद्धा ¶ पुथुत्तारम्मणे अप्पवत्तित्वा कम्मट्ठानेयेव पवत्तमानं मानसं अबहिगतं नाम. तथाभूतेन चानेन रूपिन्द्रियानि अप्पवत्तकिच्चानि कतानि होन्तीति आह ‘‘मनच्छट्ठानं…पे… गन्तब्ब’’न्ति.

द्वारं सल्लक्खेतब्बन्ति विहारे पुरत्थिमादीसु दिसासु असुकदिसाय इदं द्वारं, ततो एव ताय दिसाय सल्लक्खितेन असुकद्वारेन निक्खन्तोम्हीति द्वारं उपधारेतब्बं. ततोति द्वारसल्लक्खणतो पच्छा. येन मग्गेन गच्छति सयं. निमित्तट्ठानन्ति असुभनिमित्तस्स गण्हनट्ठानं. आहारं छड्डापेय्याति वमनं कारापेय्य. कण्टकट्ठानन्ति कण्टकवन्तं ठानं.

१०७. दिसा ववत्थपेतब्बाति सङ्खेपतो वुत्तमत्थं विवरितुं ‘‘एकस्मिं ही’’तिआदि वुत्तं. खायतीति उपट्ठाति. कम्मनियन्ति भावनाय कम्मक्खमं. उब्बाळ्हस्साति बाधितस्स. विधावतीति नानारम्मणे विसरति. उक्कम्माति उजुकं अनुवाततो अपक्कम्म. मतकळेवरं पुथुज्जनस्स येभुय्येन भयतो उपट्ठातीति आह ‘‘अच्चासन्ने भयमुप्पज्जती’’ति. अनुपादन्ति पादसमीपं. यत्थ ठितस्स सुखेन ओलोकेतुं सक्का, तं ओलोकेन्तस्स फासुकट्ठानं.

१०८. समन्ताति समन्ततो. पुन समन्ताति सामन्ता समीपे. कच्छकोति काळकच्छको, ‘‘पिलक्खो’’तिपि वदन्ति. कपीतनोति पिप्पलिरुक्खो. सिन्दीति खुद्दकखज्जुरी. करमन्दादयो पाकटा एव. सामाति सामलता. काळवल्लीति काळवण्णा अपत्तिका एका लताजाति. पूतिलताति जीवनवल्लि, या ‘‘गलोची’’ति वुच्चति.

१०९. तं निमित्तकरणादि इधेव यथावुत्ते पासाणादिनिमित्तकरणे एव अन्तोगधं परियापन्नं. सनिमित्तं करोतीति सह निमित्तं करोति, असुभं पासाणादिनिमित्तेन सह करोति ववत्थपेति. अथ वा असुभनिमित्तं, पासाणादिनिमित्तञ्च सह एकज्झं करोन्तो ववत्थपेन्तो ‘‘सनिमित्तं करोती’’ति वुत्तो. समानकालतादीपकेन हि सह-सद्देन अयं समासो यथा ‘‘सचक्कं देही’’ति. तयिदं निमित्तकरणं अपरापरं सल्लक्खणेन ¶ होति, न एकवारमेवाति आह ‘‘पुनप्पुनं ववत्थपेन्तो हि सनिमित्तं करोती’’ति. द्वेति पासाणासुभनिमित्तानि. समासेत्वा सङ्गहेत्वा एकज्झं कत्वा. सारम्मणन्ति असुभारम्मणेन सद्धिं पासाणादिं समानारम्मणं करोति, सह वा आरम्मणं करोति, एकारम्मणं विय उभयं ¶ आरम्मणं करोति, एकज्झं विय च अपरापरं सल्लक्खेन्तो पासाणादिं, असुभनिमित्तञ्चाति द्वयं आरम्मणं करोतीति अत्थो.

अत्तनियोति सको. वणितन्ति सूनं. सभावेन सरसेनाति उद्धुमातकभावसङ्खातेन अत्तनो लक्खणेन, परेसं जिगुच्छुप्पादनसङ्खातेन अत्तनो किच्चेन च, सभावो एव वा तथा निप्फज्जनतो ‘‘रसो’’ति वुत्तो.

११०. छब्बिधेन निमित्तं गहेतब्बन्ति वण्णादिना छप्पकारेन ताव उद्धुमातकअसुभनिमित्तं गहेतब्बं. केचि ‘‘कळेवरस्स दीघरस्सादिप्पमाणेन सद्धिं सत्तविधेना’’ति वदन्ति, तं अट्ठकथायं नत्थि. लिङ्गतोति एत्थ लिङ्गं नाम वयो लिङ्गं, न थनमस्सुआदि इत्थिपुरिसलिङ्गन्ति दस्सेन्तेन ‘‘इत्थिलिङ्गं वा’’तिआदि वुत्तं. ठितस्स सत्तस्स इदं सरीरन्ति सम्बन्धो. उद्धुमातकसण्ठानवसेनेव, न पाकतिकसण्ठानवसेन. एतेन यदि तत्थ कोचि अनुद्धुमातकभावप्पत्तो पदेसो सिया, सो न गहेतब्बोति दस्सेति. ओळारिकावयववसेन इदं सण्ठानववत्थानं, न सुखुमावयववसेनाति सीससण्ठानादिकं नवविधमेव सण्ठानं गहितं.

इमिस्सा दिसायाति इमिस्सा पुरत्थिमाय, दक्खिणपच्छिमउत्तराय दिसाय, अनुदिसाय वा ठितोति योजना. इमस्मिं नाम ओकासे हत्थाति इमस्मिं नाम भूमिप्पदेसे इमस्स कळेवरस्स हत्था ठिताति ववत्थपेतब्बन्ति योजना.

अधो पादतलेनातिआदि नाभिया हेट्ठा अधो, ततो उद्धं उपरीति इमस्स ववत्थानस्स वसेन वुत्तं. हत्थपरिच्छेदो हेट्ठा अङ्गुलिअग्गेन उपरि अंसकूटसन्धिना तिरियं तचपरियन्तेन गहेतब्बो. एस नयो पादपरिच्छेदादीसुपि. यत्तकं वा पन ठानं गण्हतीति सचे सब्बं सरीरं परिच्छिन्दित्वा गहेतुं न सक्कोति, पदेसो तस्स उद्धुमातो, सो ¶ यत्तकं सरीरप्पदेसं उद्धुमातकवसेन ञाणेन परिग्गण्हाति, तत्तकमेव यथापरिग्गहितमेव. इदं ईदिसन्ति इदं हत्थादिकं ईदिसं एवमाकारं. उद्धुमातकन्ति यथासभावतो परिच्छिन्दितब्बं. विसभागे सरीरे आरम्मणन्ति कम्मट्ठानं पटिक्कूलाकारो न उपट्ठाति न खायति, सुभतो उपट्ठहेय्य. तेनाह ‘‘विप्फन्दनस्सेव पच्चयो होती’’ति, किलेसपरिप्फन्दनस्सेव निमित्तं होतीति अत्थो. उग्घाटितापीति ¶ उद्धुमातभावप्पत्तापि, सब्बसो कुथितसरीरापीति वा अत्थो. स्वायमत्थो पठमपाराजिके (पारा. ६७ आदयो) विनीतवत्थूहि दीपेतब्बो.

१११. आसेवितकम्मट्ठानोति असुभकम्मट्ठाने कतपरिचयो. सोसानिकङ्गादीनं वसेन परिहतधुतङ्गो. चतुधातुववत्थानवसेन परिमद्दितमहाभूतो. सलक्खणतो ञाणेन परिग्गहितसङ्खारो. पच्चयपरिग्गहवसेन ववत्थापितनामरूपो. सलक्खणारम्मणिकविपस्सनाय उक्कंसनेन सुञ्ञतानुपस्सनाबलेन उग्घाटितसत्तसञ्ञो. विपस्सनाय पटिपदाञाणदस्सनविसुद्धिसम्पापनेन कतसमणधम्मो. ततो एव सब्बसो कुसलवासनाय, कुसलभावनाय च पूरणेन वासितवासनो भावितभावनो. विवट्टूपनिस्सयकुसलबीजेन सबीजो. ञाणस्स परिपक्कभावेन ञाणुत्तरो. यथावुत्ताय पटिपत्तिया किलेसानं तनुकरणेन अप्पकिलेसो. ओलोकितोलोकितट्ठानेयेवाति उद्धुमातकादिअसुभस्स यत्थ यत्थ ओलोकितोलोकितट्ठाने एव, तादिसस्स कालविसेसो, असुभस्स पदेसविसेसो वा अपेक्खितब्बो नत्थीति अत्थो. नो चे एवं उपट्ठातीति एवं यथावुत्तपुरिसविसेसस्स विय पटिभागनिमित्तं नो चे उपट्ठाति. एवं छब्बिधेनाति एवं वुत्ताकारेन वण्णादिवसेन छब्बिधेन. पुनपीति पि-सद्दो सम्पिण्डनत्थो. तेन निमित्तग्गहणविधिं सम्पिण्डेति, न पञ्चविधतं. छब्बिधेन हि पुब्बे निमित्तग्गहणं विहितं.

११२. असीतिसतसन्धितोति सब्बेपि सन्धयो तदापि अत्थेवाति दस्सनत्थं वत्वा उद्धुमातभावेन येभुय्येन न पञ्ञायन्ति. ये पन पञ्ञायन्ति, ते ववत्थपेतब्बाति दस्सेतुं ‘‘उद्धुमातके पना’’तिआदि वुत्तं. तत्थ तयो दक्खिणहत्थसन्धीति अंसकप्परमणिबन्धानं वसेन ¶ तयो दक्खिणहत्थसन्धयो. तथा वामहत्थसन्धयो. कटिजण्णुगोप्फकानं वसेन तयो दक्खिणपादसन्धयो. तथा वामपादसन्धयो. एको कटिसन्धीति कटिया सद्धिं पिट्ठिकण्टकसन्धिं सन्धाय वदति. हत्थन्तरन्ति दक्खिणहत्थदक्खिणपस्सानं, वामहत्थवामपस्सानञ्च अन्तरं विवरं. पादन्तरन्ति उभिन्नं पादानं वेमज्झं. उदरन्तरन्ति नाभिट्ठानसञ्ञितं कुच्छिवेमज्झं, उदरस्स वा अब्भन्तरं. कण्णन्तरन्ति कण्णछिद्दं. इति-सद्दो आदिअत्थो, तेन नासच्छिद्दादीनम्पि सङ्गहो दट्ठब्बो. अक्खीनं, मुखस्स च वसेनापि विवरं लब्भतेवाति दस्सेतुं ‘‘अक्खीनम्पी’’तिआदि वुत्तं. समन्ततोति एवं सन्धिआदितो उद्धुमातकं ववत्थपेन्तस्स चे निमित्तं उपतिट्ठति, इच्चेतं कुसलं. नो चे, समन्ततो ववत्थपेतब्बन्ति ववत्थापनविधिं दस्सेतुं ‘‘सकलसरीरे’’तिआदि वुत्तं. तत्थ ञाणं चारेत्वाति सब्बत्थकमेव सरीरं ¶ आवज्जेत्वा तत्थ पटिक्कूलाकारसहितं उद्धुमातकभावं आरब्भ निरन्तरं भावनाञाणं पवत्तेत्वा. यं ठानन्ति एवं पन ञाणं चारेन्तस्स तस्मिं सरीरे यो पदेसो विभूतो हुत्वा उद्धुमातकाकारेन विभूतभावेन उपट्ठाति. उदरपरियोसानं उपरिमसरीरं.

विनिच्छयकथावण्णना

११३. विनिच्छयकथाति विनिच्छयसहिता अत्थवण्णना. यथावुत्तनिमित्तग्गाहवसेनाति वण्णादितो, सन्धिआदितो च वुत्तप्पकारउद्धुमातकनिमित्तग्गहणवसेन. सुट्ठु निमित्तं गण्हितब्बन्ति यथा उग्गहनिमित्तं उपट्ठहति, एवं सम्मदेव असुभनिमित्तं गहेतब्बं. इदानि तमेव निमित्तस्स सुट्ठु गहणाकारं उपदिसन्तो ‘‘सतिं सूपट्ठितं कत्वा’’तिआदिमाह. तत्थ एवं पुनप्पुनं करोन्तेनाति यथा ‘‘इमाय पटिपदाय जरामरणतो मुच्चिस्सामी’’ति सञ्जातादरेन सतिसम्पजञ्ञञ्च सुट्ठु उपट्ठपेत्वा उद्धुमातकअसुभं पठमं आवज्जितं, एवं पुनप्पुनं तत्थ आवज्जनं करोन्तेन. साधुकं उपधारेतब्बञ्चेव ववत्थपेतब्बञ्चाति सक्कच्चं सतिया सल्लक्खेतब्बञ्चेव पञ्ञाय निच्छेतब्बञ्च. सति हि ‘‘धारणा’’ति निद्दिट्ठा, धारणञ्चेत्थ सल्लक्खणं. पञ्ञा ‘‘पविचयो’’ति (ध. स. १६) निद्दिट्ठा, पविचयो चेत्थ निच्छयोति. अथ वा उपधारेतब्बन्ति सतिपुब्बङ्गमाय पञ्ञाय उपलक्खेतब्बं ¶ . न हि कदाचि सतिरहिता पञ्ञा अत्थि. ववत्थपेतब्बन्ति पञ्ञापुब्बङ्गमाय सतिया निच्छिनितब्बं. पञ्ञासहिता एव हि सति इधाधिप्पेता, न तब्बिरहिता. अद्धक्खिअपङ्गादिवसेनापि ओलोकनं अत्थीति ‘‘उम्मीलेत्वा ओलोकेत्वा’’ति वुत्तं. तेन परिब्यत्तमेव ओलोकनं दस्सेति. एवं पुनप्पुनं करोन्तस्साति वुत्तप्पकारेन चक्खुं उम्मीलेत्वा ओलोकनं, निम्मीलेत्वा आवज्जनञ्च अपरापरं अनेकवारं करोन्तस्स. उग्गहनिमित्तन्ति उद्धुमातके उग्गण्हननिमित्तं. सुग्गहितन्ति सुट्ठु गहितं. यथा न विनस्सति न पमुट्ठं होति, एवं गहितं. एकसदिसन्ति समानसदिसं. समानत्थो हि अयं एक-सद्दो, यथा ‘‘अरियविनयेति वा, सप्पुरिसविनयेति वा, एसेसे एके एकट्ठे समे समभागे तज्जाते तञ्ञे वा’’ति.

आगमनकालेति विहारतो सुसानं उद्दिस्स आगमनकाले. वुत्तनयेनेवाति अतिदेसवसेन दीपितम्पि अत्थं ‘‘एककेना’’तिआदिना सरूपतो दस्सेति. तत्थ तदेव कम्मट्ठानन्ति उद्धुमातककम्मट्ठानं. मूलकम्मट्ठानन्ति एके, तदयुत्तं. उपट्ठितनिमित्तं हि कम्मट्ठानं विस्सज्जेत्वा ¶ कम्मट्ठानन्तरमनसिकारो रञ्ञो रज्जं छड्डेत्वा विदेसगमनं वियाति. आगतेनाति अत्तनो वसनट्ठानं आगतेन.

११४. अवेलायन्ति सञ्झावेलादिअयुत्तवेलायं. बीभच्छन्ति विरूपं. भेरवारम्मणन्ति वेताळसदिसं भयानकं विसयं. विक्खित्तचित्तोति भीरुकपुरिसो विय पिसाचादिं दिस्वा चित्तविक्खेपं पत्तो. उम्मत्तको वियाति यक्खुम्मत्तको विय एकच्चो होति. झानविब्भन्तकोति झानतो विच्चुतको सीलविब्भन्तकमन्तविब्भन्तका विय. सन्थम्भेत्वाति उप्पन्नपरित्तासवूपसमनेन विगतकम्पताय निच्चलो हुत्वा. सतिं सूपट्ठितन्तिआदि सन्थम्भनस्स उपायदस्सनं. मतसरीरं उट्ठहित्वा अनुबन्धनकं नाम नत्थि असति तादिसे मन्तप्पयोगे. सोपि उद्धुमातकादिभावमप्पत्ते अविनट्ठरूपे एव इज्झति, तथा देवताधिग्गहो, न एवरूपेति अधिप्पायो. सञ्ञजोति भावनापरिकप्पसञ्ञाय जातो. ततो एव सञ्ञासम्भवो सञ्ञामत्तसमुट्ठानो. तासं विनोदेत्वाति निमित्तुपट्ठाननिमित्तं उप्पन्नचित्तसन्तासं वुत्तप्पकारेन विनोदेत्वा वूपसमेत्वा ¶ . ‘‘इदानि तव परिस्समो सप्फलो जातो’’ति हासं पीतिं पमोदनं उप्पादेत्वा. चित्तं सञ्चरापेतब्बन्ति भावनाचित्तं पवत्तेतब्बं मनसिकातब्बं.

निमित्तग्गाहन्ति निमित्तस्स उग्गण्हनं, उग्गहनिमित्तं. सम्पादेन्तोति साधेन्तो निप्फादेन्तो. कम्मट्ठानं उपनिबन्धतीति भावनं यथावुत्ते निमित्ते उपनेन्तो निबन्धति. योगकम्मं हि योगिनो सुखविसेसानं कारणभावतो ‘‘कम्मट्ठान’’न्ति अधिप्पेतं, योगकम्मस्स वा पवत्तिट्ठानताय यथाउपट्ठितनिमित्तं कम्मट्ठानं, तं भावनाचित्ते उपनिबन्धति. तं पनस्स उपनिबन्धनं सन्धाय चित्तं सञ्चरापेतब्बं. एवं ‘‘विसेसमधिगच्छती’’ति वुत्तन्ति दस्सेन्तो ‘‘तस्स ही’’तिआदिमाह. तत्थ तस्साति योगिनो, तस्स वा उद्धुमातकासुभस्स. मानसं चारेन्तस्साति भावनाचित्तं अपरापरं पवत्तेन्तस्स, उग्गहनिमित्तं पुनप्पुनं मनसि करोन्तस्साति अत्थो.

११५. ‘‘वीथिसम्पटिपादनत्था’’ति पदस्स ‘‘कम्मट्ठानवीथिया सम्पटिपादनत्था’’ति अत्थं वत्वा तं पन कम्मट्ठानवीथिं, तस्सा च सम्पटिपादनविधिं वित्थारतो दस्सेतुं ‘‘सचे ही’’तिआदि वुत्तं. तत्थ कतिमीति पक्खस्स कतमी, किं दुतिया, ततियादीसु वा अञ्ञतराति अत्थो. तुण्हीभूतेन गन्तुं न वट्टति पुच्छन्तानं चित्तस्स अञ्ञथत्तपरिहरणत्थं. अप्पसन्नानञ्हि पसादाय, पसन्नानञ्च भिय्योभावाय सासनसम्पटिपत्ति. नस्सतीति न दिस्सति ¶ , न उपट्ठातीति अत्थो. ‘‘आगन्तुकपटिसन्थारो कातब्बो’’ति इमिना आगन्तुकवत्तं एकदेसेन दस्सितन्ति ‘‘अवसेसानिपी’’ति वत्वा आगन्तुकवत्तं परिपुण्णं गहेतुं पुन आगन्तुकग्गहणं कतं. गमिकवत्तादीनीति आदि-सद्देन आवासिकअनुमोदनपिण्डचारिकअनुमोदनपिण्डचारिकआरञ्ञिकसेनासनवच्चकुटिवत्तादीनं सङ्गहो दट्ठब्बो. वत्तक्खन्धके (चूळव. ३५६) हि आगतानि महावत्तानि इध ‘‘खन्धकवत्तानी’’ति वुत्तानि. तज्जनीयकम्मकतादिकाले पन पारिवासिकादिकाले च चरितब्बानि इमस्स भिक्खुनो असम्भवतो इध नाधिप्पेतानि. निमित्तं वा अन्तरधायतीति सुसाने ठितं असुभनिमित्तं उद्धुमातकभावापगमेन अन्तरधायति. तेनाह ‘‘उद्धुमातक’’न्तिआदि. तस्माति तेन ¶ कारणेन, इमस्स कम्मट्ठानस्स दुल्लभत्ताति अत्थो. निसीदित्वा पच्चवेक्खितब्बोति सम्बन्धो.

निमित्तं गहेतुं गमने विय निमित्तं गहेत्वा निवत्तनेपि यथासल्लक्खितदिसादिपच्चवेक्खणं याव निमित्तविनासा पवत्तितकिरियाय अविच्छेदेन उपधारणत्थं. सति हि तस्स निरन्तरूपधारणे विहारं पविसित्वा निसिन्नकाले कम्मट्ठानस्स उपट्ठिताकारो समथनिमित्तस्स गहणे चित्तस्स समाहिताकारो विय पाकटो हुत्वा उपतिट्ठेय्याति. तेनाह ‘‘तस्सेवं…पे… वीथिं पटिपज्जती’’ति. पुरिमाकारेन निमित्तस्स पाकटभावेन उपट्ठितत्ता पुरिमाकारेनेव कम्मट्ठानमनसिकारो भावनावीथिं पटिपज्जति.

११६. उद्धुमातकं नाम अतिविय असुचिदुग्गन्धजेगुच्छपटिक्कूलं बीभच्छं भयानकञ्च, एवरूपे आरम्मणे भावनमनुयुञ्जन्तस्स एवं आबद्धपरिकम्मस्स थिरीभूतस्सेव योगिनो अधिप्पायो समिज्झतीति दस्सेतुं ‘‘आनिसंसदस्सावी’’तिआदि वुत्तं. एवन्ति एवमेव वुत्तप्पकारेनेव आनिसंसदस्साविना. तं रक्खेय्याति ‘‘अद्धा इमिना सुखं जीविस्सामी’’ति अत्तनो जीवितं विय तं मणिरतनं रक्खेय्य. चतुधातुकम्मट्ठानिकोतिआदि नेसं कम्मट्ठानानं सुलभतादस्सनं. तत्थ चतुधातुकम्मट्ठानिकोति चतुधातुकम्मट्ठानं वा तत्थ वा नियुत्तो, चतुधातुकम्मट्ठानं वा परिहरन्तो. इतरानीति वुत्तावसिट्ठानि अनुस्सतिब्रह्मविहारादीनि. तं निमित्तन्ति तं यथालद्धं उग्गहनिमित्तं. ‘‘रक्खितब्ब’’न्ति वत्वा रक्खणविधिं पुन दस्सेतुं ‘‘रत्तिट्ठाने’’तिआदि वुत्तं.

११७. नाना करीयति एतेनाति नानाकरणं, भेदो. बीभच्छं भेरवदस्सनं हुत्वा उपट्ठाति मनसिकारस्स ¶ अनुळारताय, अनुपसन्तताय च आरम्मणस्स. तब्बिपरियायतो ‘‘पटिभागनिमित्तं थूलङ्गपच्चङ्गपुरिसो विय उपट्ठाती’’ति आनेत्वा सम्बन्धितब्बं. बहिद्धाति गोचरज्झत्ततो बहिद्धा. कामानं अमनसिकाराति असुभभावनानुभावेन कामसञ्ञाय दूरसमुस्सारितत्ता कामगुणे आरब्भ मनसिकारस्सेव अभावा. अमनसिकाराति वा मनसिकारपटिपक्खहेतु. याय हि कामसञ्ञाय वसेन सत्ता कामे मनसि करोन्ति, तस्सा पटिपक्खभूता असुभसञ्ञा कामानं अमनसिकारो, तन्निमित्तन्ति अत्थो. तेनाह ¶ ‘‘विक्खम्भनवसेन कामच्छन्दो पहीयती’’ति. पटिभागनिमित्तारम्मणाय हि असुभसञ्ञाय सद्धिं बलप्पत्तो समाधि उप्पज्जमानोव कामच्छन्दं विक्खम्भेति, अनुरोधमूलको आघातो मूलकारणे विक्खम्भिते विक्खम्भितोयेव होतीति आह ‘‘अनुनय…पे… पहीयती’’ति. न हि कदाचि पहीनानुनयस्स ब्यापादो सम्भवति. यथावुत्तअसुभसञ्ञासहगता हि पीति सातिसया पवत्तमानाव ब्यापादं विक्खम्भेन्ती पवत्तति. तथा आरद्धवीरियतायाति यथा उपचारज्झानं उप्पज्जति, तथा कम्मट्ठानमनसिकारवसेन पग्गहितवीरियताय. वीरियञ्हि पग्गण्हन्तस्स सम्मासङ्कप्पो मिच्छासङ्कप्पं विय सविप्फारताय थिनमिद्धं विक्खम्भेन्तमेव उप्पज्जति.

विप्पटिसारो पच्छानुतापो, तप्पटिपक्खतो अविप्पटिसारो दरथपरिळाहाभावेन चित्तस्स निब्बुतता. तस्स अविप्पटिसारस्स पच्चयभूतं सीलं, तंसहगता तदुपनिस्सया च पीतिपस्सद्धिसुखादयो सभावतो, हेतुतो च सन्तसभावा, तेसं अनुयुञ्जनेन अवूपसन्तसभावं उद्धच्चकुक्कुच्चं पहीयतीति आह ‘‘अविप्पटिसारकरसन्तधम्मानुयोगवसेन उद्धच्चकुक्कुच्चं पहीयती’’ति. भावनाय हि पुब्बेनापरं विसेसं आवहन्तिया यं सातिसयं सुखं लब्भति, तं अनुपसन्तसभावं उद्धच्चकुक्कुच्चं विक्खम्भेन्तमेव उप्पज्जति. अधिगतविसेसस्साति यथाधिगतस्स भावनाविसेसस्स. पच्चक्खतायाति पटिपज्जन्तस्स योगिनो पच्चक्खभावतो ‘‘सम्मासम्बुद्धो वत सो भगवा, यो एवरूपिं सम्मापटिपत्तिं देसेती’’ति पटिपत्तिदेसके सत्थरि. पटिपत्तियन्ति पटिपज्जमानज्झानपटिपत्तियं. पटिपत्तिफलेति ताय साधेतब्बे लोकियलोकुत्तरफले. विचिकिच्छा पहीयति धम्मन्वयविचाराहितबलेन विचारबलेन. इति पञ्च नीवरणानि पहीयन्तीति एवं पटिभागनिमित्तपटिलाभसमकालमेव हेट्ठा पवत्तभावनानुभावनिप्फन्नेहि समाधिआदीहि कामच्छन्दादीनि पञ्च नीवरणानि विक्खम्भनवसेन पहीयन्ति. न हि पटिपक्खेन विना पहातब्बस्स पहानं सम्भवति, पटिपक्खा ¶ च समाधिआदयो कामच्छन्दादीनं. यथाह पेटके ‘‘समाधि कामच्छन्दस्स पटिपक्खो’’तिआदि.

तेनेव ¶ च ‘‘इमेहि तेसं नीवरणानं पहान’’न्ति पहानपरिदीपनमुखेन झानङ्गानि सरूपतो दस्सेतुं ‘‘तस्मिञ्ञेव चा’’तिआदि वुत्तं. तत्थ तस्मिञ्ञेव चाति यं तं यथाउपट्ठितं उग्गहनिमित्तं भिन्दित्वा विय उपट्ठितं, तस्स पटिच्छन्नभूतं पटिभागनिमित्तं, तस्मिञ्ञेव निमित्ते. चेतसोति अत्तना सम्पयुत्तचित्तस्स. अभिनिरोपनलक्खणोति आरोपनलक्खणो, अप्पनासभावोति अत्थो. निमित्तानुमज्जनं पटिभागनिमित्ते अनुविचरणं. आरम्मणे हि भमरस्स पदुमस्सूपरि अनुपरिब्भमनं विय विचारस्स अनुविचारणाकारेन पवत्ति अनुमज्जनकिच्चं. विसेसो एव अधिगन्तब्बतो विसेसाधिगमो, पटिलद्धो च सो विसेसाधिगमो चाति पटि…पे… गमो, तप्पच्चया तंहेतुका पटिलद्धविसेसाधिगमपच्चया पीति. पीतिमनस्स पीतिसहितचित्तस्स. पस्सद्धिसम्भवतोति कायचित्तपस्सद्धीनं संसिज्झनतो. ‘‘पीतिमनस्स कायो पस्सम्भती’’ति हि वुत्तं. पस्सद्धिनिमित्तं पस्सद्धिहेतुकं सुखं ‘‘पस्सद्धकायो सुखं वेदियती’’ति वचनतो. सुखनिमित्ता सुखपच्चया एकग्गता. ‘‘सुखिनो चित्तं समाधियती’’ति (दी. नि. १.४६६; अ. नि. ३.९६; ११.१२) हि वुत्तं. इति झानङ्गानि पातुभवन्तीति एवं एतानि वितक्कादीनि झानङ्गानि तस्मिंयेव निमित्ते उप्पज्जन्ति. पठमज्झानपटिबिम्बभूतन्ति पठमज्झानस्स पटिच्छन्नभूतं. तङ्खणञ्ञेव पटिभागनिमित्तपटिलाभसमकालमेव उपचारज्झानम्पि निब्बत्तति, न नीवरणप्पहानमेवाति अधिप्पायो.

विनीलकादिकम्मट्ठानवण्णना

११८. विनीलकादीसुपि कम्मट्ठानेसु. लक्खणं वुत्तन्ति यं तं निमित्तग्गहणलक्खणं वुत्तं. वुत्तनयेनेवाति उद्धुमातके वुत्तनयेनेव. सह विनिच्छयेन, अधिप्पायेन चाति सविनिच्छयाधिप्पायं. तं सब्बं लक्खणं वेदितब्बन्ति सम्बन्धो.

कबरकबरवण्णन्ति येभुय्येन सबलवण्णं. उस्सदवसेनाति रत्तसेतनीलवण्णेसु उस्सदस्स वण्णस्स वसेन.

सन्निसिन्नन्ति ¶ निच्चलभावेनेव सब्बसो थिरतं.

चोराटवियन्ति चोरेहि परियुट्ठितअरञ्ञे. यत्थाति यस्मिं आघातने. छिन्नपुरिसट्ठानेति छिन्नपुरिसवन्ते ठाने. नानादिसायं पतितम्पीति ¶ छिन्नं हुत्वा सरीरस्स खण्डद्वयं विसुं दिसासु पतितम्पि. एकावज्जनेनाति एकसमन्नाहारेन. आपाथमागच्छतीति एकज्झं आपाथं आगच्छति. विस्सासं आपज्जतीति अजेगुच्छितं उपगच्छेय्य सेय्यथापि छवडाहको. सहत्था अपरामसने जिगुच्छा सण्ठातियेवाति आह ‘‘कत्तरयट्ठिया वा दण्डकेन वा…पे… उपनामेतब्ब’’न्ति. विच्छिद्दकभावपञ्ञायनत्थं एकङ्गुलन्तरकरणं. उपनामेतब्बन्ति उपनेतब्बं.

खायितसदिसमेवाति खायितासुभसदिसमेव. अङ्गुलङ्गुलन्तरन्ति विविधं खित्तं सरीरावयवं अङ्गुलन्तरं अङ्गुलन्तरं. कत्वा वाति कत्तरयट्ठिया वा दण्डकेन वा सयं कत्वा वा.

लद्धप्पहारानन्ति लद्धावुधप्पहारानं मुखतोति सम्बन्धो. मुखतोति पहारादिमुखतो. पग्घरमानकालेति लोहितं पग्घरमानकाले. लोहितकं लब्भतीति योजना.

तन्ति पुळवकं. तेसूति सोणादिसरीरेसु. अट्ठिकन्ति अट्ठिकअसुभं नानप्पकारतो वुत्तन्ति सम्बन्धो. पुरिमनयेनेवाति पुब्बे उद्धुमातके वुत्तनयेनेव.

११९. तन्ति अट्ठिकं. न उपट्ठातीति सभावतो न उपट्ठाति, पटिक्कूलवसेन न उपट्ठातीति अत्थो. तेनाह ‘‘ओदातकसिणसम्भेदो होती’’ति. अट्ठिके पठमवयादिसंलक्खणं न सक्काति ‘‘लिङ्गन्ति इध हत्थादीनं नाम’’न्ति वुत्तं. अट्ठिकसङ्खलिका पन ‘‘अयं दहरस्स, अयं योब्बने ठितस्स, अयं अवयवेहि वुद्धिपत्तिस्सा’’ति एवं वयवसेन ववत्थपेतुं सक्कुणेय्याव, अब्यापिताय पन न गहितन्ति वेदितब्बं. यदिपि अट्ठिकसङ्खलिकायं सन्धितो ववत्थापनं लब्भति, अट्ठिके पन न लब्भतीति तस्स अनियतभावदीपनत्थं कमविलङ्घनं कत्वा ‘‘तस्स तस्स अट्ठिनो निन्नट्ठानथलट्ठानवसेना’’तिआदि वुत्तं. तत्थ निन्नट्ठानं नाम अट्ठिनो विनतप्पदेसो. थलट्ठानं उन्नतप्पदेसो. घटितघटितट्ठानवसेनाति अनुपगतन्हारुबन्धानं, इतरेसञ्च अञ्ञमञ्ञं संकिलिट्ठसंकिलिट्ठट्ठानवसेन. अन्तरवसेनाति अञ्ञमञ्ञस्स अन्तरवसेन, सुसिरवसेन च. सब्बत्थेवाति सकलाय अट्ठिसङ्खलिकाय, सब्बस्मिं वा अट्ठिके.

१२०. एत्थाति ¶ ¶ एतस्मिं अट्ठिकासुभे. युज्जमानवसेन सल्लक्खेतब्बन्ति यं निमित्तग्गहणं यत्थ युज्जति, तं तत्थ उग्गण्हनत्थं निमित्तग्गहणवसेन उपलक्खेतब्बं. सकलायाति अनवसेसभागाय परिपुण्णावयवाय. सम्पज्जति निमित्तुपट्ठानवसेन. तेसूति अट्ठिकसङ्खलिकट्ठिकेसु. वुत्तं अट्ठकथायं. तन्ति ‘‘एकसदिसमेवा’’ति वचनं. एकस्मिं अट्ठिके युत्तन्ति इदं यथा विनीलकादीसु उभिन्नं निमित्तानं यथारहं वण्णविसेसतो, परिपुण्णापरिपुण्णतो, सविवराविवरतो, चलाचलतो च विसेसो लब्भति, न एवमेतस्साति कत्वा वुत्तं, न पन सब्बेन सब्बं विसेसाभावतो. तेनेवाह ‘‘एकट्ठिकेपि चा’’तिआदि. तत्थ बीभच्छेनाति सुविभूतअट्ठिरूपत्ता अट्ठिभावेनेव विरूपेन. भयानकेनाति तेनेव पाकतिकसत्तानं भयावहेन. पीतिसोमनस्सजनकेनाति सण्हमट्ठभावेन उपट्ठानतो, भावनाय च सविसेसत्ता पीतिया, सोमनस्सस्स च उप्पादकेन. तेनेवाह ‘‘उपचारावहत्ता’’ति.

इमस्मिं ओकासेति उग्गहपटिभागनिमित्तानं वुत्तट्ठाने. द्वारं दत्वा वाति ‘‘पटिक्कूलभावेयेव दिट्ठे निमित्तं नाम होती’’ति एत्तके एव अट्ठत्वा अनन्तरमेव ‘‘दुविधं इध निमित्त’’न्तिआदिना उग्गहपटिभागनिमित्तानि विभजित्वा वचनेन यथावुत्तस्स निमित्तविभागस्स द्वारं दत्वाव वुत्तं. निब्बिकप्पन्ति ‘‘सुभ’’न्ति विकप्पेन निब्बिकप्पं, असुभन्त्वेवाति अत्थो. विचारेत्वाति ‘‘एकस्मिं अट्ठिके युत्त’’न्तिआदिना विचारेत्वा.

महातिस्सत्थेरस्साति चेतियपब्बतवासीमहातिस्सत्थेरस्स. निदस्सनानीति दन्तट्ठिकमत्तदस्सनेन सकलस्सापि तस्सा इत्थिया सरीरस्स अट्ठिसङ्घातभावेन उपट्ठानादीनि एत्थ अट्ठिककम्मट्ठाने उग्गहपटिभागनिमित्तानं विसेसविभावनानि उदाहरणानि.

सुभगुणोति सवासनानं किलेसानं पहीनत्ता सुपरिसुद्धगुणो. दससतलोचनेनाति सहस्सक्खेन देवानमिन्देन. सो हि एकासनेनेव सहस्सअत्थानं विचारणसमत्थेन पञ्ञाचक्खुना समन्नागतत्ता ‘‘सहस्सक्खो’’ति वुच्चति. थुतकित्तीति ‘‘यो धीरो सब्बधि दन्तो’’तिआदिना (महाव. ५८) अभित्थुतकित्तिसद्दो.

पकिण्णककथावण्णना

१२१. उजुपटिपक्खेन ¶ ¶ पहीनभावं सन्धायाह ‘‘सुविक्खम्भितरागत्ता’’ति. असुभप्पभेदोति उद्धुमातकादिअसुभविभागो. सरीरसभावप्पत्तिवसेनाति सरीरस्स अत्तनो सभावूपगमनवसेन. सरीरञ्हि विनस्समानं अञ्ञरूपेन ठितस्स रक्खसस्स विय सभावप्पत्तिवसेनेव विनस्सति. रागचरितभेदवसेनाति रागचरितविभागवसेन. यदि सरीरसभावप्पत्तिवसेन अयमसुभप्पभेदो वुत्तो, महासतिपट्ठानादीसु (दी. नि. २.३७२ आदयो; म. नि. १.१०५ आदयो) कथं नवप्पभेदोति? सो सरसतो एव सभावप्पत्तिवसेन वुत्तो, अयं पन परूपक्कमेनापि. तत्थ च इधागतेसु दससु असुभेसु एकच्चानेव गहितानि, अट्ठिकञ्च पञ्चविधा विभत्तं. तानि च विपस्सनावसेन, इमानि समथवसेनाति पाकटोयं भेदोति.

इमेसं पन दस्सनम्पि असुभभावसामञ्ञेन सतिपि अविसेसतो रागचरितानं सप्पायभावे यं वुत्तं ‘‘रागचरितभेदवसेन चा’’ति, तं विभजित्वा दस्सेतुं ‘‘विसेसतो’’तिआदि वुत्तं. सूनभावेन सुसण्ठितम्पि सरीरं दुस्सण्ठितमेव होतीति उद्धुमातकसरीरे सण्ठानविपत्तिं दीपेतीति आह ‘‘सरीरसण्ठानविपत्तिप्पकासनतो’’ति. सण्ठानसम्पत्तियं रत्तो सण्ठानरागी, तस्स सप्पायं सण्ठानरागस्स विक्खम्भनुपायभावतो. कायो एव कायवणो, तत्थ पटिबद्धस्स निस्सितस्स. सुसिरभावप्पकासनतोति सुसिरस्स विवरस्स अत्थिभावप्पकासनतो. सरीरे घनभावरागिनोति सरीरे अङ्गपच्चङ्गानं थिरभावं पटिच्च उप्पज्जनकरागवतो. विक्खेपप्पकासनतोति सोणसिङ्गालादीहि इतो चितो च विक्खेपस्स पकासनतो अङ्गपच्चङ्गलीलारागिनो सप्पायं. ईदिसानं किर अनवट्ठितरूपानं अवयवानं को लीळाविलासोति विरागसम्भवतो. सङ्घातभेदविकारप्पकासनतोति सङ्घातस्स अङ्गपच्चङ्गानं संहतभावस्स सुसम्बन्धताय भेदो एव विकारो सङ्घातभेदविकारो, तस्स पकासनतो. लोहितं मक्खितं हुत्वा पटिक्कूलभावो लोहितमक्खितपटिक्कूलभावो, तस्स पकासनतो. ममत्तरागिनोति ‘‘मम अय’’न्ति उप्पज्जनकरागवतो. दन्तसम्पत्तिरागिनोति दन्तसम्पत्तियं रज्जनसीलस्स.

कस्मा ¶ पनेत्थ उद्धुमातकादिके पठमज्झानमेव उप्पज्जति, न दुतियादीनीति अनुयोगं ¶ मनसि कत्वा आह ‘‘यस्मा पना’’तिआदि. अपरिसण्ठितजलायाति सोतवसेन पवत्तिया समन्ततो अट्ठितजलाय असन्निसिन्नसलिलाय. अरित्तबलेनाति पाजनदण्डबलेन. दुब्बलत्ता आरम्मणस्साति पटिक्कूलभावेन अत्तनि चित्तं ठपेतुं असमत्थभावो आरम्मणस्स दुब्बलता. पटिक्कूले हि आरम्मणे सरसतो चित्तं पवत्तितुं न सक्कोति, अभिनिरोपनलक्खणेन पन वितक्केन अभिनिरोपियमानमेव चित्तं एकग्गतं लभति. न विना वितक्केनाति वितक्करहितानि दुतियादिज्झानानि तत्थ पतिट्ठं न लभन्ति. तेनाह ‘‘वितक्कबलेनेवा’’तिआदि.

यदि पटिक्कूलभावतो उद्धुमातादिआरम्मणे दुतियादिज्झानानि न पवत्तन्ति, एवं सन्ते पठमज्झानेनापि तत्थ न उप्पज्जितब्बं. न हि तत्थ पीतिसोमनस्सानं सम्भवो युत्तोति चोदनं सन्धायाह ‘‘पटिक्कूलेपि च एतस्मि’’न्तिआदि. तत्थ आनिसंसदस्सावितानीवरणसन्तापरोगवूपसमानं यथाक्कमं पुप्फच्छड्डक, वमनविरेचनउपमा योजेतब्बा.

१२२. यथावुत्तकारणेन दसधा ववत्थितम्पि सभावतो एकविधमेवाति दस्सेतुं ‘‘दसविधम्पि चेत’’न्तिआदिं वत्वा स्वायं सभावो यथा अविञ्ञाणकेसु, एवं सविञ्ञाणकेसुपि लब्भतेव. तस्मा तत्थापि योनिसोमनसिकारवतो भावना इज्झतेवाति दस्सेन्तो ‘‘तदेतं इमिना लक्खणेना’’तिआदिमाह. एत्थाति एतस्मिं जीवमानकसरीरे. अलङ्कारेनाति पटिजग्गनपुब्बकेन अलङ्करणेन. न पञ्ञायति पचुरजनस्साति अधिप्पायो. अतिरेकतिसतअट्ठिकसमुस्सयं दन्तट्ठिकेहि सद्धिं, तेहि पन विना ‘‘तिमत्तानि अट्ठिसतानी’’ति (विसुद्धि. १.१९०) कायगतासतियं वक्खति. छिद्दावछिद्दन्ति खुद्दानुखुद्दछिद्दवन्तं. मेदकथालिका मेदभरितभाजनं. निच्चुग्घरितपग्घरितन्ति निच्चकालं उपरि, हेट्ठा च विस्सवन्तं. वेमत्तन्ति नानत्तं. नानावत्थेहीति नानावण्णेहि वत्थेहि. हिरिया लज्जाय कोपनतो विनासनतो हिरिकोपिनं, उच्चारपस्सावमग्गं. याथावसरसन्ति यथाभूतं सभावं. याथावतो रसीयति ञायतीति हि रसो, सभावो. रतिन्ति अभिरतिं अभिरुचिं. अत्तसिनेहसङ्खातेन ¶ रागेन रत्ता अत्तसिनेहरागरत्ता. विहञ्ञमानेनाति इच्छितालाभेन विघातं आपज्जन्तेन.

किंसुकन्ति पालिभद्दकं, पलासोति केचि, सिम्बलीति अपरे. अतिलोलुपोति अतिविय लोलसभावो ¶ . अदुन्ति एतं. नन्ति केसादिसरीरकोट्ठासं. मुच्छिताति मोहिता, मुच्छापापिकाय वा तण्हाय वसेन मुच्छं पत्ता. सभावन्ति पटिक्कूलभावं.

उक्करूपमोति उच्चारपस्सावट्ठानसमो, वच्चकूपसमो वा. चक्खुभूतेहीति चक्खुं पत्तेहि पटिलद्धपञ्ञाचक्खुकेहि, लोकस्स वा चक्खुभूतेहि. अल्लचम्मपटिच्छन्नोति अल्लचम्मपरियोनद्धो.

दब्बजातिकेनाति उत्तरिमनुस्सधम्मे पटिलद्धुं भब्बरूपेन. यत्थ यत्थ सरीरे, सरीरस्स वा यत्थ यत्थ कोट्ठासे. निमित्तं गहेत्वाति असुभाकारस्स सुट्ठु सल्लक्खणवसेन यथा उग्गहनिमित्तं उप्पज्जति, एवं उग्गण्हनवसेन निमित्तं गहेत्वा, उग्गहनिमित्तं उप्पादेत्वाति अत्थो. कम्मट्ठानं अप्पनं पापेतब्बन्ति यथालद्धे उग्गहनिमित्ते कम्मं करोन्तेन पटिभागनिमित्तं उप्पादेत्वा उपचारज्झाने ठितेन तमेव भावनं उस्सुक्कापेन्तेन असुभकम्मट्ठानं अप्पनं पापेतब्बं. अधिगतप्पनो हि पठमज्झाने ठितो तमेव झानं पादकं कत्वा विपस्सनं आरभित्वा सङ्खारे सम्मसन्तो नचिरस्सेव सब्बासवे खेपेतीति.

असुभकम्मट्ठाननिद्देसवण्णना निट्ठिता.

इति छट्ठपरिच्छेदवण्णना.

७. छअनुस्सतिनिद्देसवण्णना

१. बुद्धानुस्सतिकथावण्णना

१२३. असुभानन्तरन्ति ¶ ¶ असुभकम्मट्ठानानन्तरं. अनुस्सतीसूति अनुस्सतिकम्मट्ठानेसु. ‘‘अनु अनु सति अनुस्सती’’ति इममत्थं दस्सेतुं ‘‘पुनप्पुनं उप्पज्जनतो’’ति वत्वा न एत्थ अनु-सद्दयोगेन सति-सद्दो अत्थन्तरवाचकोति दस्सेतुं ‘‘सतियेव अनुस्सती’’ति वुत्तं. तेन नायमनु-सद्दो ‘‘उपलब्भती’’तिआदीसु उप-सद्दो विय अनत्थको, नापि ‘‘सञ्जाननं पजानन’’न्तिआदीसु सं-सद्दादयो विय अत्थन्तरदीपकोति दस्सेति. ‘‘पवत्तितब्बट्ठानम्हियेव वा पवत्तत्ता’’ति इमिना च अनुस्सतिया अनुस्सरितब्बानुरूपता वुत्ता होतीति पवत्तकस्सेव अनुरूपतं दस्सेतुं ‘‘कुलपुत्तस्स अनुरूपा’’ति वुत्तं, सद्धापब्बजितस्स वा कुलपुत्तस्स. अनुरूपता नाम पवत्तितब्बट्ठानस्स अनुरूपताय एव होतीति पवत्तकस्सेव अनुरूपता वुत्ता, न उभयस्स. अनुरूपाति च युत्ताति अत्थो. बुद्धन्ति ये गुणे उपादाय भगवति ‘‘बुद्धो’’ति पञ्ञत्ति, ते गुणे एकज्झं गहेत्वा वुत्तं. तेनाह ‘‘बुद्धगुणारम्मणाय सतिया एतमधिवचन’’न्ति. आरब्भाति आलम्बित्वा. धम्मन्ति परियत्तिधम्मेन सद्धिं नवविधम्पि लोकुत्तरधम्मं. ननु च निब्बानं विसुं कम्मट्ठानभावेन वक्खति? किञ्चापि वक्खति, धम्मभावसामञ्ञेन पन मग्गफलेहि सद्धिं इध पाळिया सङ्गहितत्ता तस्सापि धम्मानुस्सतिकम्मट्ठाने गहणं दट्ठब्बं, असङ्खतामतादिभावेन पन मग्गफलेहि विसिट्ठताय तस्स विसुं कम्मट्ठानभावेन गहणं कतं. सीलानुस्सतिआदीनं पन तिस्सन्नं अनुस्सतीनं विसुं कम्मट्ठानभावेन गहणं योगावचरस्स अत्तनो एव सीलस्स चागस्स सद्धादीनञ्च अनुस्सतिट्ठानभावेन गहेतब्बत्ता. रूपकायं गताति अत्तनो करजकायं आरब्भ आरम्मणकरणवसेन पवत्ता. कायेति काये विसयभूते. कोट्ठासनिमित्तारम्मणायाति केसादिकोट्ठासेसु पटिक्कूलनिमित्तारम्मणाय. इतो पुरिमासु सत्तसु अनुस्सतीसु नत्थि निमित्तुप्पत्ति ¶ , इध अत्थीति दस्सनत्थं निमित्त-ग्गहणं. तथा अस्सासपस्सासनिमित्तारम्मणायाति एत्थापि. उपसमन्ति सब्बसङ्खारूपसमं, निब्बानन्ति अत्थो.

१२४. अवेच्च ¶ बुद्धगुणे याथावतो ञत्वा उप्पन्नो पसादो अवेच्चप्पसादो, अरियमग्गेन आगतप्पसादो, तंसदिसोपि वा यो दिट्ठिगतवातेहि अचलो असम्पकम्पियो, तेन समन्नागतेन. तादिसस्स बुद्धानुस्सतिभावना इज्झति, न इतरस्स. पतिरूपसेनासनेति यथावुत्तअट्ठारसदोसवज्जिते पञ्चङ्गसमन्नागते सेनासने. रहोगतेनाति रहसि गतेन. तेन कायविवेकं दस्सेति. पटिसल्लीनेनाति नानारम्मणतो पटिसल्लीनेन, बहिद्धा पुथुत्तारम्मणतो पटिक्कमापेत्वा कम्मट्ठाने सल्लीनेन, सुसिलिट्ठचित्तेनाति अत्थो. एवन्ति इमाय पाळिया आगतनयेन.

सो भगवाति एत्थ सोति यो सो समतिंस पारमियो पूरेत्वा सब्बकिलेसे भञ्जित्वा अनुत्तरं सम्मासम्बोधिं अभिसम्बुद्धो देवानं अतिदेवो ब्रह्मानं अतिब्रह्मा लोकनाथो भाग्यवन्ततादीहि कारणेहि सदेवके लोके ‘‘भगवा’’ति पत्थटकित्तिसद्दो, सो. भगवाति इदं सत्थु नामकित्तनं. तथा हि वुत्तं ‘‘भगवाति नेतं नामं मातरा कत’’न्तिआदि (महानि. १९८, २१०; चूळनि. अजितमाणवपुच्छानिद्देस २). परतो पन भगवाति गुणकित्तनं. अरहन्तिआदीसु नवसु ठानेसु पच्चेकं इतिपि-सद्दं योजेत्वा बुद्धगुणा अनुस्सरितब्बाति दस्सेन्तो ‘‘इतिपि अरहं…पे… इतिपि भगवाति अनुस्सरती’’ति आह. ‘‘इतिपेतं भूतं इतिपेतं तच्छ’’न्तिआदीसु (दी. नि. १.६) विय इति-सद्दो आसन्नपच्चक्खकरणत्थो, पि-सद्दो सम्पिण्डनत्थो. तेन नेसं बहुभावो दीपितो, तानि च गुणसल्लक्खणकारणानि भावेन्तेन चित्तस्स सम्मुखीभूतानि कातब्बानीति दस्सेन्तो ‘‘इमिना च इमिना च कारणेनाति वुत्तं होती’’ति आह.

१२५. दूरता नाम आसन्नता विय उपादायुपादाय वुच्चतीति परमुक्कंसगतं दूरभावं दस्सेन्तो ‘‘सुविदूरविदूरे’’ति आह, सुट्ठु विदूरभावेनेव विदूरेति अत्थो. सा पनस्स किलेसतो दूरता तेसं सब्बसो पहीनत्ताति दस्सेन्तो आह ‘‘मग्गेन किलेसानं विद्धंसितत्ता’’ति. ननु अञ्ञेसम्पि खीणासवानं ते पहीना एवाति अनुयोगं मनसि कत्वा वुत्तं ‘‘सवासनान’’न्ति. न हि भगवन्तं ठपेत्वा अञ्ञे सह वासनाय किलेसे पहातुं सक्कोन्ति ¶ , एतेन अञ्ञेहि असाधारणं ¶ भगवतो अरहत्तन्ति दस्सितं होति. का पनायं वासना नाम? पहीनकिलेसस्सापि अप्पहीनकिलेसस्स पयोगसदिसपयोगहेतुभूतो किलेसनिहितो सामत्थियविसेसो आयस्मतो पिलिन्दवच्छस्स (पारा. ६२१) वसलसमुदाचारनिमित्तं विय. कथं पन ‘‘आरका’’ति वुत्ते ‘‘किलेसेही’’ति अयमत्थो लब्भतीति? सामञ्ञजोतनाय विसेसे अवट्ठानतो, विसेसत्थिना च विसेसस्स अनुपयोजेतब्बतो, ‘‘आरकास्स होन्ति पापका अकुसला धम्मा’’तिआदीनि (म. नि. १.४३४) सुत्तपदानेत्थ उदाहरितब्बानि. आरकाति चेत्थ आ-कारस्स रस्सत्तं, क-कारस्स च ह-कारं, सानुसारं कत्वा निरुत्तिनयेन ‘‘अरह’’न्ति पदसिद्धि वेदितब्बा. वुत्तमेवत्थं सुखग्गहणत्थं ‘‘सो ततो आरका नामा’’ति गाथाबन्धमाह. तत्थ समञ्जनसीलो समङ्गी, न समङ्गिता असमङ्गिता असमन्नागमो असहवुत्तिता.

१२६. अनत्थचरणेन किलेसा एव अरयोति किलेसारयो. ‘‘अरीनं हतत्ता अरिहा’’ति वत्तब्बे निरुत्तिनयेन ‘‘अरह’’न्ति वुत्तं.

१२७. यञ्चेतं संसारचक्कन्ति सम्बन्धो. रथचक्कस्स नाभि विय मूलावयवभूतं अन्तो, बहि च समवट्ठितं अविज्जाभवतण्हामयं द्वयन्ति वुत्तं ‘‘अविज्जाभवतण्हामयनाभी’’ति. नाभिया, नेमिया च सम्बन्धा अरसदिसा पच्चयफलभूतेहि अविज्जातण्हाजरामरणेहि सम्बन्धा पुञ्ञादिसङ्खाराति वुत्तं ‘‘पुञ्ञादिअभिसङ्खारार’’न्ति. तत्थ तत्थ भवे परियन्तभावेन पाकटं जरामरणन्ति तं नेमिट्ठानियं कत्वा आह ‘‘जरामरणनेमी’’ति. यथा च रथचक्कपवत्तिया पधानकारणं अक्खो, एवं संसारचक्कपवत्तिया आसवसमुदयोति आह ‘‘आसवसमुदयमयेन अक्खेन विज्झित्वा’’ति. आसवा एव अविज्जादीनं कारणत्ता आसवसमुदयो. यथाह ‘‘आसवसमुदया अविज्जासमुदयो’’ति (म. नि. १.१०३). विपाककटत्तारूपप्पभेदो कामभवादिको तिभवो एव रथो, तस्मिं तिभवरथे. अत्तनो पच्चयेहि समं, सब्बसो वा आदितो पट्ठाय योजितन्ति समायोजितं. आदिरहितं कालं पवत्ततीति कत्वा अनादिकालप्पवत्तं.

‘‘खन्धानञ्च ¶ पटिपाटि, धातुआयतनान च;

अब्बोच्छिन्नं वत्तमाना, ‘संसारो’ति पवुच्चती’’ति. (दी. नि. अट्ठ. २.९५ अपसादनावण्णना; सं. नि. अट्ठ. २.२.६०; अ. नि. अट्ठ. २.४.१९९) –

एवं ¶ वुत्तसंसारोव संसारचक्कं. अनेनाति भगवता. बोधिमण्डेति बोधिसङ्खातस्स ञाणस्स मण्डभावप्पत्ते ठाने, काले वा. वीरियपादेहीति संकिलेसवोदानपक्खियेसु सन्निरुम्भनसन्निक्खिपनकिच्चताय द्विधा पवत्तेहि अत्तनो वीरियसङ्खातेहि पादेहि. सीलपथवियन्ति पतिट्ठट्ठेन सीलमेव पथवी, तस्सं. पतिट्ठायाति सम्पादनवसेन पतिट्ठहित्वा. सद्धाहत्थेनाति अनवज्जधम्मादानसाधनतो सद्धाव हत्थो, तेन. कम्मक्खयकरन्ति कायकम्मादिभेदस्स सब्बस्सपि कम्मस्स खयकरणतो कम्मक्खयकरं. ञाणफरसुन्ति समाधिसिलायं सुनिसितमग्गञाणफरसुं गहेत्वा.

१२८. एवं ‘‘अरानं हतत्ता’’ति एत्थ वुत्तअरघाते संसारं चक्कं विय चक्कन्ति गहेत्वा अत्थयोजनं कत्वा इदानि पटिच्चसमुप्पाददेसनाक्कमेनपि तं दस्सेतुं ‘‘अथ वा’’तिआदि वुत्तं. तत्थ अनमतग्गं संसारवट्टन्ति अनु अनु अमतग्गं अविञ्ञातकोटिकं संसारमण्डलं. सेसा दस धम्मा सङ्खारादयो जातिपरियोसाना अरा. कथं? नाभिया अविज्जाय मूलतो, नेमिया जरामरणेन अन्ततो सम्बन्धत्ताति दस्सेन्तो आह ‘‘अविज्जामूलकत्ता जरामरणपरियन्तत्ता चा’’ति. दुक्खादीसूति दुक्खसमुदयनिरोधमग्गेसु. तत्थ दुक्खे अञ्ञाणं तदन्तोगधत्ता, तप्पटिच्छादनतो च, सेसेसु पटिच्छादनतोव. दुक्खन्ति चेत्थ दुक्खं अरियसच्चं अधिप्पेतन्ति तं कामभवादिवसेन तिधा भिन्दित्वा तथा तप्पटिच्छादिकं अविज्जं, अविज्जादिपच्चये तीसु भवेसु सङ्खारादिके च पटिपाटिया दस्सेन्तो ‘‘कामभवे च अविज्जा’’तिआदिमाह. तत्थ कामभवे अविज्जाति कामभवे आदीनवप्पटिच्छादिका अविज्जा. रूपभवे अरूपभवे अविज्जाति एत्थापि एसेव नयो. कामभवे सङ्खारानन्ति कामभूमिपरियापन्नानं सङ्खारानं, कामभवे वा निप्फादेतब्बा ये सङ्खारा, तेसं कामभवूपपत्तिनिब्बत्तकसङ्खारानन्ति अत्थो. पच्चयो होतीति पुञ्ञाभिसङ्खारानं ताव आरम्मणपच्चयेन चेव उपनिस्सयपच्चयेन चाति द्विधा पच्चयो होति. अपुञ्ञाभिसङ्खारेसु सहजातस्स सहजातादिवसेन ¶ , असहजातस्स अनन्तरसमनन्तरादिवसेन, नानन्तरस्स पन आरम्मणवसेन चेव उपनिस्सयवसेन च पच्चयो होति. अरूपभवे सङ्खारानन्ति आनेञ्जाभिसङ्खारानं ¶ . पच्चयो होति उपनिस्सयवसेनेव. इमस्मिं पनत्थे एत्थ वित्थारियमाने अतिप्पपञ्चो होति, सयमेव च परतो आगमिस्सतीति न नं वित्थारयाम.

तिण्णं आयतनानन्ति चक्खुसोतमनायतनानं. एकस्सायतनस्साति मनायतनस्स. इमिना नयेन फस्सादीनम्पि विभागो वेदितब्बो. तत्थ तत्थ सा सा तण्हाति रूपतण्हादिभेदा तत्थ तत्थ कामभवादीसु उप्पज्जनका तण्हा.

तण्हादिमूलिका कथा अतिसंखित्ताति तं, उपादानभवे च विभजित्वा वित्थारेत्वा दस्सेतुं ‘‘कथ’’न्तिआदि वुत्तं. तत्थ ‘‘कामे परिभुञ्जिस्सामी’’ति इमिना कामतण्हापवत्तिमाह. तथा ‘‘सग्गसम्पत्तिं अनुभविस्सामी’’तिआदीहि. सा पन तण्हा यस्मा भुसमादानवसेन पवत्तमाना कामुपादानं नाम होति, तस्मा वुत्तं ‘‘कामुपादानपच्चया’’ति. तथेवाति कामुपादानपच्चया एव.

ब्रह्मलोकसम्पत्तिन्ति रूपीब्रह्मलोके सम्पत्तिं. ‘‘सब्बेपि तेभूमका धम्मा कामनीयट्ठेन कामा’’ति (महानि. १; चूळनि. अजितमाणवपुच्छानिद्देस ८ थोक विसदिसं) वचनतो भवरागोपि कामुपादानमेवाति कत्वा ‘‘कामुपादानपच्चया एव मेत्तं भावेती’’तिआदि वुत्तं. सेसुपादानमूलिकासुपीति एत्थायं योजना – इधेकच्चो ‘‘नत्थि परो लोको’’ति नत्थिकदिट्ठिं गण्हाति, सो दिट्ठुपादानपच्चया कायेन दुच्चरितं चरतीतिआदि वुत्तनयेन योजेतब्बं. अपरो ‘‘असुकस्मिं सम्पत्तिभवे अत्ता उच्छिज्जती’’ति उच्छेददिट्ठिं गण्हाति, सो तत्रूपपत्तिया कायेन सुचरितं चरतीतिआदि वुत्तनयेनेव योजेतब्बं. अपरो ‘‘रूपी मनोमयो हुत्वा अत्ता उच्छिज्जती’’ति रूपूपपत्तिया मग्गं भावेति. भावनापारिपूरियाति सब्बं वुत्तनयेनेव वेदितब्बं. अपरो ‘‘अरूपभवे उप्पज्जित्वा अत्ता उच्छिज्जती’’ति अरूपूपपत्तिया मग्गं भावेति. भावनापारिपूरियाति सब्बं वुत्तनयेनेव वेदितब्बं. एताहियेव अत्तवादुपादानमूलिकापि योजना संवण्णिताति दट्ठब्बं. एवं दिट्ठधम्मनिब्बानवादवसेनापि ¶ योजना वेदितब्बा. अपरो ‘‘सीलेन सुद्धी’’ति ‘‘असुद्धिमग्गं सुद्धिमग्गो’’ति परामसन्तो सीलब्बतुपादानपच्चया कायेन दुच्चरितं चरतीतिआदिना सब्बं वुत्तनयेनेव योजेतब्बं.

इदानि य्वायं संसारचक्कं दस्सेन्तेन ‘‘कामभवे अविज्जा कामभवे सङ्खारानं पच्चयो होती’’तिआदिना ¶ अविज्जादीनं पच्चयभावो, सङ्खारादीनं पच्चयुप्पन्नभावो च दस्सितो, तमेव पटिसम्भिदामग्गपाळिं आनेत्वा निगमनवसेन दस्सेन्तो ‘‘एवं अय’’न्तिआदिमाह. तत्थ यथा सङ्खारा हेतुनिब्बत्ता, एवं अविज्जापि कामासवादिना सहेतुका एवाति आह ‘‘उभोपेते हेतुसमुप्पन्ना’’ति. पच्चयपरिग्गहेति नामरूपस्स पच्चयानं अविज्जादीनं परिच्छिज्ज गहणे, निप्फादेतब्बे भुम्मं. पञ्ञाति कङ्खावितरणविसुद्धिसङ्खाता पकारतो जानना. धम्मट्ठितिञाणन्ति पटिच्चसमुप्पादावबोधो. इदञ्च धम्मट्ठितिञाणं यस्मा अद्धात्तये कङ्खामलवितरणवसेन पवत्तति, तस्मा ‘‘अतीतम्पि अद्धान’’न्तिआदि वुत्तं. एतेनेव नयेनाति एतेन ‘‘अविज्जा हेतू’’तिआदिना अविज्जायं वुत्तेन नयेन. ‘‘सङ्खारा हेतु, विञ्ञाणं हेतुसमुप्पन्न’’न्तिआदिना (पटि. म. १.४६) सब्बपदानि वित्थारेतब्बानि.

संखिप्पन्ति एत्थ अविज्जादयो, विञ्ञाणादयो चाति सङ्खेपो, हेतु, विपाको च. हेतु विपाकोति वा संखिप्पतीति सङ्खेपो, अविज्जादयो विञ्ञाणादयो च. सङ्खेपभावसामञ्ञेन पन एकवचनं कतन्ति दट्ठब्बं. ते पन सङ्खेपा अतीते हेतु, एतरहि विपाको, एतरहि हेतु, आयतिं विपाकोति एवं कालविभागेन चत्तारो जाता. तेनाह ‘‘पुरिमसङ्खेपो चेत्थ अतीतो अद्धा’’तिआदि. सङ्खेप-सद्दो वा भागाधिवचनन्ति अतीतो हेतुभागो पठमो सङ्खेपो. एस नयो सेसेसुपि. तण्हुपादानभवा गहिताव होन्ति किलेसकम्मभावसामञ्ञतो, तेहि विना अविज्जासङ्खारानं सकिच्चाकरणतो च. कम्मं तण्हा च तस्स सहकारीकारणं हुत्वा वट्टनत्थेन कम्मवट्टं.

विञ्ञाणनामरूपसळायतनफस्सवेदनानं जातिजराभङ्गावत्था ‘‘जातिजरामरण’’न्ति वुत्ताति आह ‘‘जातिजरामरणापदेसेन विञ्ञाणादीनं ¶ निद्दिट्ठत्ता’’ति. इमेति विञ्ञाणादयो. आयतिं विपाकवट्टं पच्चुप्पन्नहेतुतो भावीनं अनागतानं गहितत्ता. तेति अविज्जादयो. आकारतोति सरूपतो अवुत्तापि तस्मिं तस्मिं सङ्गहे आकिरीयन्ति अविज्जासङ्खारादिग्गहणेहि पकासीयन्तीति आकारा, अतीतहेतुआदीनं वा पकारा आकारा, ततो आकारतो. वीसतिविधा होन्ति अतीतेहेतुपञ्चकादिभेदतो.

सङ्खारविञ्ञाणानं अन्तरा एको सन्धीति हेतुतो फलस्स अविच्छेदप्पवत्तिभावतो हेतुफलसम्बन्धभूतो एको सन्धि. तथा भवजातीनमन्तरा. वेदनातण्हानमन्तरा पन फलतो हेतुनो ¶ अविच्छेदप्पवत्तिभावतो फलहेतुसम्बन्धभूतो एको सन्धि. फलभूतोपि हि धम्मो अञ्ञस्स हेतुसभावस्स धम्मस्स पच्चयो होतीति.

इतीति वुत्तप्पकारपरामसनं. तेनाह ‘‘चतुसङ्खेप’’न्तिआदि. सब्बाकारतोति इध वुत्तेहि, अवुत्तेहि च पटिच्चसमुप्पादविभङ्गे (विभ. २२५ आदयो), अनन्तनयसमन्तपट्ठानादीसु च आगतेहि सब्बेहि आकारेहि. जानातीति अवबुज्झति. पस्सतीति दस्सनभूतेन ञाणचक्खुना पच्चक्खतो पस्सति. अञ्ञाति पटिविज्झतीति तेसंयेव वेवचनं. तन्ति तं जाननं. ञातट्ठेनाति यथासभावतो जाननट्ठेन. पजाननट्ठेनाति अनिच्चादीहि पकारेहि पटिविज्झनट्ठेन.

इदानि यदत्थमिदं भवचक्कं इधानीतं, तं दस्सेतुं ‘‘इमिना’’तिआदि वुत्तं. तत्थ ते धम्मेति ते अविज्जादिके धम्मे. यथाभूतं ञत्वाति महावजिरञाणेन याथावतो जानित्वा. निब्बिन्दन्तो बलवविपस्सनाय विरज्जन्तो विमुच्चन्तो अरियमग्गेहि अरे हनीति योजना. तत्थ यदा भगवा विरज्जति विमुच्चति, तदा अरे हनति नाम. ततो परं पन अभिसम्बुद्धक्खणं गहेत्वा वुत्तं ‘‘हनि विहनि विद्धंसेसी’’ति.

१२९. चक्कवत्तिनो अचेतने चक्करतने उप्पन्ने तत्थेव लोको पूजं करोति, अञ्ञत्थ पूजाविसेसा पच्छिज्जन्ति, किमङ्गं पन सम्मासम्बुद्धे उप्पन्नेति दस्सेन्तो ‘‘उप्पन्ने तथागते’’तिआदिमाह. को पन वादो अञ्ञेसं पूजाविसेसानन्ति यथावुत्ततो अञ्ञेसं अमहेसक्खेहि देवमनुस्सेहि करियमानानं नातिउळारानं पूजाविसेसानं अरहभावे ¶ का नाम कथा. अत्थानुरूपन्ति अरहत्तत्थस्स अनुरूपं अन्वत्थं.

१३०. असिलोकभयेनाति अकित्तिभयेन. रहो पापं करोन्ति ‘‘मा नं कोचि जञ्ञा’’ति एस भगवा न कदाचि करोति पापहेतूनं बोधिमण्डे एव सुप्पहीनत्ता. अपरो नयो – आरकाति अरहं, सुविदूरभावतोइच्चेव अत्थो. कुतो पन सुविदूरभावतोति? ये अभावितकाया अभावितसीला अभावितचित्ता अभावितपञ्ञा, ततो एव अप्पहीनरागदोसमोहा अरियधम्मस्स अकोविदा अरियधम्मे अविनीता अरियधम्मस्स अदस्साविनो अप्पटिपन्ना मिच्छापटिपन्ना च, ततो सुविदूरभावतो. वुत्तञ्हेतं भगवता –

‘‘सङ्घाटिकण्णेचेपि ¶ मे, भिक्खवे, भिक्खु गहेत्वा पिट्ठितो पिट्ठितो अनुबन्धो अस्स पादे पादं निक्खिपन्तो, सो च होति अभिज्झालु कामेसु तिब्बसारागो ब्यापन्नचित्तो पदुट्ठमनसङ्कप्पो मुट्ठस्सति असम्पजानो असमाहितो विब्भन्तचित्तो पाकतिन्द्रियो. अथ खो सो आरकाव मय्हं, अहञ्च तस्स. तं किस्स हेतु? धम्मं हि सो, भिक्खवे, भिक्खु न पस्सति, धम्मं अपस्सन्तो मं न पस्सती’’ति (इतिवु. ९२).

यथावुत्तपुग्गला हि सचेपि सायं पातं सत्थु सन्तिकावचराव सियुं, न ते तावता ‘‘सत्थु सन्तिका’’ति वत्तब्बा, तथा सत्थापि नेसं. इति असप्पुरिसानं आरका दूरेति अरहं.

‘‘सम्मा न पटिपज्जन्ति, ये निहीनासया नरा;

आरका तेहि भगवा, दूरे तेनारहं मतो’’ति.

तथा आरकाति अरहं, आसन्नभावतोति अत्थो. कुतो पन आसन्नभावतोति? ये भावितकाया भावितसीला भावितचित्ता भावितपञ्ञा, ततो एव पहीनरागदोसमोहा अरियधम्मस्स कोविदा अरियधम्मे सुविनीता अरियधम्मस्स दस्साविनो सम्मापटिपन्ना, ततो आसन्नभावतो. वुत्तम्पि चेतं भगवता –

‘‘योजनसते ¶ चेपि मे, भिक्खवे, भिक्खु विहरेय्य, सो च होति अनभिज्झालु कामेसु न तिब्बसारागो अब्यापन्नचित्तो अप्पदुट्ठमनसङ्कप्पो उपट्ठितस्सति सम्पजानो समाहितो एकग्गचित्तो संवुतिन्द्रियो. अथ खो सो सन्तिकेव मय्हं, अहञ्च तस्स. तं किस्स हेतु? धम्मं हि सो, भिक्खवे, भिक्खु पस्सति, धम्मं पस्सन्तो मं पस्सती’’ति (इतिवु. ९२).

तथारूपा हि पुग्गला सत्थु योजनसहस्सन्तरिकापि होन्ति, न तावता ते ‘‘सत्थु दूरचारिनो’’ति वत्तब्बा, तथा सत्थापि नेसं. इति सप्पुरिसानं आरका आसन्नेति अरहं.

ये ¶ सम्मा पटिपज्जन्ति, सुप्पणीताधिमुत्तिका;

आरका तेहि आसन्ने, तेनापि अरहं जिनो.

ये इमे रागादयो पापधम्मा यस्मिं सन्ताने उप्पज्जन्ति, तस्स दिट्ठधम्मिकम्पि सम्परायिकम्पि अनत्थं आवहन्ति. निब्बानगामिनिया पटिपदाय एकंसेनेव उजुविपच्चनीकभूता च, ते अत्तहितं, परहितञ्च परिपूरेतुं सम्मा पटिपज्जन्तेहि साधूहि दूरतो रहितब्बा परिच्चजितब्बा पहातब्बाति रहा नाम, ते च यस्मा भगवतो बोधिमूलेयेव अरियमग्गेन सब्बसो पहीना समुच्छिन्ना. यथाह –

‘‘तथागतस्स खो, ब्राह्मण, रागो पहीनो दोसो मोहो, सब्बेपि पापका अकुसला धम्मा पहीना उच्छिन्नमूला तालावत्थुकता अनभावंकता आयतिं अनुप्पादधम्मा’’ति (पारा. ९-१० अत्थतो समानं).

तस्मा सब्बसो न सन्ति एतस्स रहाति अरहोति वत्तब्बे ओकारस्स सानुसारं अ-कारादेसं कत्वा ‘‘अरह’’न्ति वुत्तं.

पापधम्मा रहा नाम, साधूहि रहितब्बतो;

तेसं सुट्ठु पहीनत्ता, भगवा अरहं मतो.

ये ते सब्बसो परिञ्ञातक्खन्धा पहीनकिलेसा भावितमग्गा सच्छिकतनिरोधा अरहन्तो खीणासवा, ये च सेक्खा अप्पत्तमानसा अनुत्तरं ¶ योगक्खेमं पत्थयमाना विहरन्ति, ये च परिसुद्धपयोगा कल्याणज्झासया सद्धासीलसुतादिगुणसम्पन्ना पुग्गला, तेहि न रहितब्बो न परिच्चजितब्बो, ते च भगवताति अरहं. तथा हि अरियपुग्गला सत्थारा दिट्ठधम्मस्स पच्चक्खकरणतो सत्थु धम्मसरीरेन अविरहिता एव होन्ति. यथाह आयस्मा पिङ्गियो –

‘‘पस्सामि नं मनसा चक्खुनाव,

रत्तिन्दिवं ब्राह्मण अप्पमत्तो;

नमस्समानो ¶ विवसेमि रत्तिं,

तेनेव मञ्ञामि अविप्पवासं.

‘‘सद्धा च पीति च मनो सति च,

नापेन्तिमे गोतमसासनम्हा;

यं यं दिसं वजति भूरिपञ्ञो,

स तेन तेनेव नतोहमस्मी’’ति. (सु. नि. ११४८-११४९);

तेनेव च ते अञ्ञं सत्थारं न उद्दिसन्ति. यथाह –

‘‘अट्ठानमेतं, भिक्खवे, अनवकासो, यं दिट्ठिसम्पन्नो पुग्गलो अञ्ञं सत्थारं उद्दिसेय्याति नेतं ठानं विज्जती’’ति (म. नि. ३.१२८; अ. नि. १.२७६).

कल्याणपुथुज्जनापि येभुय्येन सत्थरि निच्चलसद्धा एव होन्ति. इति सुप्पटिपन्नेहि पुरिसविसेसेहि अविरहितब्बतो, तेसञ्च अविरहनतो न सन्ति एतस्स रहा परिच्चजनका, नत्थि वा एतस्स रहो साधूहि परिच्चजितब्बताति अरहं.

‘‘ये सच्छिकतसद्धम्मा, अरिया सुद्धगोचरा;

न तेहि रहितो होति, नाथो तेनारहं मतो’’ति.

रहोति च गमनं वुच्चति, भगवतो च नानागतीसु परिब्भमनसङ्खातं संसारे गमनं नत्थि कम्मक्खयकरेन अरियमग्गेन बोधिमूलेयेव सब्बसो ससम्भारस्स कम्मवट्टस्स विद्धंसितत्ता. यथाह –

‘‘येन ¶ देवूपपत्यस्स, गन्धब्बो वा विहङ्गमो;

यक्खत्तं येन गच्छेय्यं, मनुस्सत्तञ्च अब्बजे;

ते मय्हं आसवा खीणा, विद्धस्ता विनळीकता’’ति. (अ. नि. ४.३६);

एवं ¶ नत्थि एतस्स रहोगमनं गतीसु पच्चाजातीतिपि अरहं.

रहो वा गमनं यस्स, संसारे नत्थि सब्बसो;

पहीनजातिमरणो, अरहं सुगतो मतो.

पासंसत्ता वा भगवा अरहं. अक्खरचिन्तका हि पसंसायं अरह-सद्दं वण्णेन्ति. पासंसभावो च भगवतो अनञ्ञसाधारणो यथाभुच्चगुणाधिगतो सदेवके लोके सुप्पतिट्ठितो. तथा हेस अनुत्तरेन सीलेन अनुत्तरेन समाधिना अनुत्तराय पञ्ञाय अनुत्तराय विमुत्तिया असमो असमसमो अप्पटिमो अप्पटिभागो अप्पटिपुग्गलोति एवं तस्मिं तस्मिं गुणे विभजित्वा वुच्चमाने पण्डितपुरिसेहि देवेहि ब्रह्मेहि भगवता वा पन परियोसापेतुं असक्कुणेय्यरूपो. इति पासंसत्तापि भगवा अरहं.

गुणेहि सदिसो नत्थि, यस्मा लोके सदेवके;

तस्मा पासंसियत्तापि, अरहं द्विपदुत्तमो.

एवं सब्बथापि –

‘‘आरका मन्दबुद्धीनं, आरका च विजानतं;

रहानं सुप्पहीनत्ता, विदूनमरहेय्यतो;

भवेसु च रहाभावा, पासंसा अरहं जिनो’’ति.

१३१. सम्माति अविपरीतं. सामन्ति सयमेव. सम्बुद्धोति हि एत्थ सं-सद्दो ‘‘सय’’न्ति एतस्स अत्थस्स बोधको दट्ठब्बो. सब्बधम्मानन्ति अनवसेसानं ञेय्यधम्मानं. कथं पनेत्थ सब्बधम्मावबोधो ¶ लब्भतीति? एकदेसस्स अग्गहणतो. पदेसग्गहणे हि असति गहेतब्बस्स निप्पदेसताव विञ्ञायति यथा ‘‘दिक्खितो न ददाती’’ति. एवञ्च कत्वा अत्थविसेसानपेक्खा कत्तरि एव बुद्धसद्दसिद्धि वेदितब्बा कम्मवचनिच्छाय अभावतो. ‘‘सम्मा सामं बुद्धत्ता सम्मासम्बुद्धो’’ति एत्तकमेव हि इध सद्दतो लब्भति, ‘‘सब्बधम्मान’’न्ति पन अत्थतो लब्भमानं गहेत्वा वुत्तं. न हि बुज्झनकिरिया अविसया युज्जति.

इदानि ¶ तस्सा विसयं ‘‘सब्बधम्मे’’ति सामञ्ञतो वुत्तं विभजित्वा दस्सेतुं ‘‘अभिञ्ञेय्ये धम्मे’’तिआदि वुत्तं. तत्थ अभिञ्ञेय्येति अभिविसिट्ठेन ञाणेन जानितब्बे. के पन तेति? चतुसच्चधम्मे. अभिञ्ञेय्यतो बुद्धोति अभिञ्ञेय्यभावतो बुज्झि. पुब्बभागे विपस्सनापञ्ञाय, अधिगमक्खणे मग्गपञ्ञाय, अपरभागे सब्बञ्ञुतञ्ञाणादीहि अञ्ञासीति अत्थो. इतो परेसुपि एसेव नयो. परिञ्ञेय्ये धम्मेति दुक्खं अरियसच्चमाह. पहातब्बेति समुदयपक्खिये. सच्छिकातब्बेति निब्बानं सन्धायाह. बहुवचननिद्देसो पन सोपादिसेसादिकं परियायसिद्धं भेदं गहेत्वा कतो, उद्देसो वा अयं चतुसच्चधम्मानन्ति. तथा हि वक्खति ‘‘चक्खुं दुक्खसच्च’’न्तिआदि. उद्देसो च अविनिच्छितत्थपरिच्छेदस्स धम्मस्स वसेन करीयति. उद्देसेन हि उद्दिसियमानानं धम्मानं अत्थितामत्तं वुच्चति, न परिच्छेदोति अपरिच्छेदेन बहुवचनेन वुत्तं यथा ‘‘अप्पच्चया धम्मा, असङ्खता धम्मा’’ति (ध. स. दुकमातिका ७-८). सच्छिकातब्बेति वा फलविमुत्तीनम्पि गहणं, न निब्बानस्सेवाति बहुवचननिद्देसो कतो. एवञ्च भावेतब्बेति एत्थ झानानम्पि गहणं दट्ठब्बं.

गाथायं भावेतब्बञ्चाति एत्थ च-सद्दो अवुत्तसमुच्चयत्थो, तेन सच्छिकातब्बस्स गहणं वेदितब्बं. तस्मा बुद्धोस्मीति यस्मा चत्तारि सच्चानि मया बुद्धानि, सच्चविनिमुत्तञ्च किञ्चि ञेय्यं नत्थि, तस्मा सब्बम्पि ञेय्यं बुद्धोस्मि, अब्भञ्ञासिन्ति अत्थो.

१३२. एवं सच्चवसेन सामञ्ञतो वुत्तमत्थं द्वारारम्मणेहि सद्धिं द्वारप्पवत्तधम्मेहि, खन्धादीहि च सच्चवसेनेव विभजित्वा दस्सेतुं ‘‘अपि चा’’तिआदि आरद्धं. तत्थ मूलकारणभावेनाति सन्तेसुपि अविज्जादीसु अञ्ञेसु कारणेसु तेसम्पि मूलभूतकारणभावेन. तण्हा हि कम्मस्स विचित्तभावहेतुतो, सहायभावूपगमनतो च दुक्खविचित्तताय पधानकारणं. समुट्ठापिकाति उप्पादिका. पुरिमतण्हाति पुरिमभवसिद्धा तण्हा. उभिन्नन्ति चक्खुस्स ¶ , तंसमुदयस्स च. अप्पवत्तीति अप्पवत्तिनिमित्तं. निरोधपजाननाति सच्छिकिरियाभिसमयवसेन निरोधस्स पटिविज्झना. एकेकपदुद्धारेनाति ‘‘चक्खुं चक्खुसमुदयो’’तिआदिना एकेककोट्ठासनिद्धारणेन ¶ . तण्हायपि परिञ्ञेय्यभावसब्भावतो, उपादानक्खन्धन्तोगधत्ता च दुक्खसच्चसङ्गहं दस्सेतुं ‘‘रूपतण्हादयो छ तण्हाकाया’’ति वुत्तं.

कसिणानीति कसिणज्झानानि. द्वत्तिंसाकाराति द्वत्तिंस कोट्ठासा, तदारम्मणज्झानानि च. नव भवाति कामभवादयो तयो, सञ्ञीभवादयो तयो, एकवोकारभवादयो तयोति नव भवा. चत्तारि झानानीति अग्गहितारम्मणविसेसानि चत्तारि रूपावचरज्झानानि, विपाकज्झानानं वा एतं गहणं. एत्थ च कुसलधम्मानं उपनिस्सयभूता तण्हा समुट्ठापिका पुरिमतण्हाति वेदितब्बा. किरियधम्मानं पन यत्थ ते तस्स अत्तभावस्स कारणभूता.

अनुबुद्धोति बुज्झितब्बधम्मस्स अनुरूपतो बुद्धो. तेनाति तस्मा. यस्मा सामञ्ञतो, विसेसतो च एकेकपदुद्धारेन सब्बधम्मे बुद्धो, तस्मा वुत्तं. किन्ति आह ‘‘सम्मा सामञ्च सब्बधम्मानं बुद्धत्ता’’ति, सब्बस्सपि ञेय्यस्स सब्बाकारतो अविपरीतं सयमेव अभिसम्बुद्धत्ताति अत्थो. इमिनास्स परोपदेसरहितस्स सब्बाकारेन सब्बधम्मावबोधनसमत्थस्स आकङ्खप्पटिबद्धवुत्तिनो अनावरणञाणसङ्खातस्स सब्बञ्ञुतञ्ञाणस्स अधिगमो दस्सितो.

ननु च सब्बञ्ञुतञ्ञाणतो अञ्ञं अनावरणञाणं, अञ्ञथा ‘‘छ असाधारणञाणानि बुद्धञाणानी’’ति (पटि. म. मातिका १.७३) वचनं विरुज्झेय्याति? न विरुज्झति, विसयपवत्तिभेदवसेन अञ्ञेहि असाधारणभावदस्सनत्थं एकस्सेव ञाणस्स द्विधा वुत्तत्ता. एकमेव हि तं ञाणं अनवसेससङ्खतासङ्खतसम्मुतिधम्मविसयताय सब्बञ्ञुतञ्ञाणं, तत्थ च आवरणाभावतो निस्सङ्गचारमुपादाय ‘‘अनावरणञाण’’न्ति वुत्तं. यथाह पटिसम्भिदायं ‘‘सब्बं सङ्खतमसङ्खतं अनवसेसं जानातीति सब्बञ्ञुतञ्ञाणं, तत्थ आवरणं नत्थीति अनावरणञाण’’न्तिआदि (पटि. म. १.११९). तस्मा नत्थि नेसं अत्थतो भेदो, एकन्तेन चेतं एवमिच्छितब्बं. अञ्ञथा सब्बञ्ञुतानावरणञाणानं साधारणता, असब्बधम्मारम्मणता च आपज्जेय्य. न हि भगवतो ञाणस्स अणुमत्तम्पि आवरणं अत्थि, अनावरणञाणस्स च असब्बधम्मारम्मणभावे यत्थ तं न पवत्तति, तत्थावरणसब्भावतो अनावरणभावोयेव न सिया. अथ वा पन होतु ¶ अञ्ञमेव अनावरणञाणं सब्बञ्ञुतञ्ञाणतो, इध पन सब्बत्थ अप्पटिहतवुत्तिताय ¶ अनावरणञाणन्ति सब्बञ्ञुतञ्ञाणमेव अधिप्पेतं. तस्स चाधिगमेन भगवा ‘‘सब्बञ्ञू, सब्बविदू, सम्मासम्बुद्धो’’ति च वुच्चति न सकिंयेव सब्बधम्मावबोधतो. तथा च वुत्तं पटिसम्भिदायं (पटि. म. १.१६२) ‘‘विमोक्खन्तिकमेतं बुद्धानं भगवन्तानं बोधिया मूले सह सब्बञ्ञुतञ्ञाणस्स पटिलाभा सच्छिका पञ्ञत्ति यदिदं ‘‘बुद्धो’’ति. सब्बधम्मावबोधनसमत्थञाणसमधिगमेन हि भगवतो सन्ताने अनवसेसधम्मे पटिविज्झितुं समत्थता अहोसीति.

एत्थाह – किं पनिदं ञाणं पवत्तमानं सकिंयेव सब्बस्मिं विसये पवत्तति, उदाहु कमेनाति? किञ्चेत्थ – यदि ताव सकिंयेव सब्बस्मिं विसये पवत्तति, अतीतानागतपच्चुप्पन्नअज्झत्तबहिद्धादिभेदभिन्नानं सङ्खतधम्मानं, असङ्खतसम्मुतिधम्मानञ्च एकज्झं उपट्ठाने दूरतो चित्तपटं पेक्खन्तस्स विय पटिविभागेनावबोधो न सिया, तथा च सति ‘‘सब्बे धम्मा अनत्ता’’ति विपस्सन्तानं अनत्ताकारेन विय सब्बधम्मा अनिरूपितरूपेन भगवतो ञाणस्स विसया होन्तीति आपज्जति. येपि ‘‘सब्बञेय्यधम्मानं ठितलक्खणविसयं विकप्परहितं सब्बकालं बुद्धानं ञाणं पवत्तति, तेन ते ‘सब्बविदू’ति वुच्चन्ति, एवञ्च कत्वा ‘चरं समाहितो नागो, तिट्ठन्तोपि समाहितो’ति इदम्पि वचनं सुवुत्तं होती’’ति वदन्ति, तेसम्पि वुत्तदोसानातिवत्ति, ठितलक्खणारम्मणताय च अतीतानागतसम्मुतिधम्मानं तदभावतो एकदेसविसयमेव भगवतो ञाणं सिया. तस्मा सकिंयेव ञाणं पवत्ततीति न युज्जति.

अथ कमेन सब्बस्मिं विसये ञाणं पवत्तति? एवम्पि न युज्जति. न हि जातिभूमिसभावादिवसेन, दिसादेसकालादिवसेन च अनेकभेदभिन्ने ञेय्ये कमेन गय्हमाने तस्स अनवसेसपटिवेधो सम्भवति, अपरियन्तभावतो ञेय्यस्स. ये पन ‘‘अत्थस्स अविसंवादनतो ञेय्यस्स एकदेसं पच्चक्खं कत्वा ‘सेसेपि एव’न्ति अधिमुच्चित्वा ववत्थापनेन सब्बञ्ञू भगवा, तञ्च ञाणं न अनुमानिकं संसयाभावतो. संसयानुबद्धं हि लोके अनुमानञाण’’न्ति वदन्ति, तेसम्पि तं न युत्तं. सब्बस्स हि अप्पच्चक्खभावे अत्थाविसंवादनेन ञेय्यस्स एकदेसं पच्चक्खं ¶ कत्वा ‘‘सेसेपि एव’’न्ति अधिमुच्चित्वा ववत्थापनस्स असम्भवतो. यञ्हि तं सेसं, तं अप्पच्चक्खन्ति.

अथ तम्पि पच्चक्खं, तस्स सेसभावो एव न सियाति? सब्बमेतं अकारणं. कस्मा ¶ ? अविसयविचारणभावतो. वुत्तं हेतं भगवता ‘‘बुद्धविसयो, भिक्खवे, अचिन्तेय्यो न चिन्तेतब्बो. यो चिन्तेय्य, उम्मादस्स विघातस्स भागी अस्सा’’ति (अ. नि. ४.७७). इदं पनेत्थ सन्निट्ठानं – यंकिञ्चि भगवता ञातुं इच्छितं सकलं, एकदेसो वा, तत्थ अप्पटिहतवुत्तिताय पच्चक्खतो ञाणं पवत्तति, निच्चसमाधानञ्च विक्खेपाभावतो. ञातुं इच्छितस्स च सकलस्स अविसयभावे तस्स आकङ्खप्पटिबद्धवुत्तिता न सिया, एकन्तेनेव सा इच्छितब्बा ‘‘सब्बे धम्मा बुद्धस्स भगवतो आवज्जनप्पटिबद्धा आकङ्खप्पटिबद्धा मनसिकारप्पटिबद्धा चित्तुप्पादप्पटिबद्धा’’ति वचनतो. अतीतानागतविसयम्पि भगवतो ञाणं अनुमानागमतक्कग्गहणविरहितत्ता पच्चक्खमेव.

ननु च एतस्मिं पक्खे यदा सकलं ञातुं इच्छितं, तदा सकिंयेव सकलविसयताय अनिरूपितरूपेन भगवतो ञाणं पवत्तेय्याति वुत्तदोसानातिवत्तियेवाति? न, तस्स विसोधितत्ता. विसोधितो हि सो बुद्धविसयो अचिन्तेय्योति. अञ्ञथा पचुरजनञाणसमानवुत्तिताय बुद्धानं भगवन्तानं ञाणस्स अचिन्तेय्यता न सिया. तस्मा सकलधम्मारम्मणम्पि तं एकधम्मारम्मणं विय सुववत्थापितेयेव ते धम्मे कत्वा पवत्ततीति इदमेत्थ अचिन्तेय्यं. वुत्तञ्हेतं ‘‘यावतकं ञेय्यं, तावतकं ञाणं. यावतकं ञाणं, तावतकं ञेय्यं. ञेय्यपरियन्तिकं ञाणं, ञाणपरियन्तिकं ञेय्य’’न्ति (महानि. ६९; चूळनि. मोघराजमाणवपुच्छानिद्देस ८५; पटि. म. ३.५). एवमेकज्झं, विसुं, सकिं, कमेन वा इच्छानुरूपं सम्मा सामञ्च सब्बधम्मानं बुद्धत्ता सम्मासम्बुद्धो.

१३३. विज्जाहीति एत्थ विन्दियं विन्दतीति विज्जा, याथावतो उपलब्भतीति अत्थो. अत्तनो वा पटिपक्खस्स विज्झनट्ठेन विज्जा, तमोक्खन्धादिकस्स पदालनट्ठेनाति अत्थो. ततो एव अत्तनो विसयस्स विदितकरणट्ठेनपि विज्जा. सम्पन्नत्ताति समन्नागतत्ता, परिपुण्णत्ता वा, अविकलत्ताति अत्थो. तिस्सन्नं, अट्ठन्नं च विज्जानं तत्थ तत्थ सुत्ते गहणं विनेय्यज्झासयवसेनाति ¶ दट्ठब्बं. सत्त सद्धम्मा नाम सद्धा हिरी ओत्तप्पं बाहुसच्चं वीरियं सति पञ्ञा च. ये सन्धाय वुत्तं ‘‘इध भिक्खु सद्धो होती’’तिआदि (अ. नि. १०.११). चत्तारि झानानीति यानि कानिचि चत्तारि रूपावचरज्झानानि.

कस्मा पनेत्थ सीलादयो पन्नरसेव ‘‘चरण’’न्ति वुत्ताति चोदनं सन्धायाह ‘‘इमेयेव ही’’तिआदि ¶ . तेन तेसं सिक्खत्तयसङ्गहतो निब्बानुपगमने एकंसतो साधनभावमाह. इदानि तदत्थसाधनाय आगमं दस्सेन्तो ‘‘यथाहा’’तिआदिमाह. भगवातिआदि वुत्तस्सेवत्थस्स निगमनवसेन वुत्तं.

ननु चायं विज्जाचरणसम्पदा सावकेसुपि लब्भतीति? किञ्चापि लब्भति, न पन तथा, यथा भगवतोति दस्सेतुं ‘‘तत्थ विज्जासम्पदा’’तिआदि वुत्तं. चरणधम्मपरियापन्नत्ता करुणाब्रह्मविहारस्स, सो चेत्थ महग्गतभावप्पत्ता साधारणभावोति आह ‘‘चरणसम्पदा महाकारुणिकतं पूरेत्वा ठिता’’ति. यथा सत्तानं अनत्थं परिवज्जेत्वा अत्थे नियोजनं पञ्ञाय विना न होति, एवं नेसं अत्थानत्थजाननं सत्थु करुणाय विना न होतीति उभयम्पि उभयत्थ सकिच्चकमेव सिया. यत्थ पन यस्सा पधानभावो, तं दस्सेतुं ‘‘सो सब्बञ्ञुताया’’तिआदि वुत्तं. तत्थ यथा तं विज्जाचरणसम्पन्नोति यथा अञ्ञोपि विज्जाचरणसम्पन्नो, तेन विज्जाचरणसम्पन्नस्सेवायं आवेणिका पटिपत्तीति दस्सेति. सा पनायं सत्थु विज्जाचरणसम्पदा सासनस्स निय्यानिकताय सावकानं सम्मापटिपत्तिया एकन्तकारणन्ति दस्सेतुं ‘‘तेनस्सा’’तिआदि वुत्तं. तं सुविञ्ञेय्यमेव.

एत्थ च विज्जासम्पदाय सत्थु पञ्ञामहत्तं पकासितं होति, चरणसम्पदाय करुणामहत्तं. तेसु पञ्ञाय भगवतो धम्मरज्जप्पत्ति, करुणाय धम्मसंविभागो. पञ्ञाय संसारदुक्खनिब्बिदा, करुणाय संसारदुक्खसहनं. पञ्ञाय परदुक्खपरिजाननं, करुणाय परदुक्खपतिकारारम्भो. पञ्ञाय परिनिब्बानाभिमुखभावो, करुणाय तदधिगमो. पञ्ञाय सयं तरणं, करुणाय परेसं तारणं. पञ्ञाय बुद्धभावसिद्धि, करुणाय बुद्धकिच्चसिद्धि. करुणाय वा बोधिसत्तभूमियं संसाराभिमुखभावो, पञ्ञाय तत्थ अनभिरति. तथा करुणाय परेसं अभिंसापनं ¶ , पञ्ञाय सयं परेहि अभायनं. करुणाय परं रक्खन्तो अत्तानं रक्खति, पञ्ञाय अत्तानं रक्खन्तो परं रक्खति. तथा करुणाय अपरन्तपो, पञ्ञाय अनत्तन्तपो. तेन अत्तहिताय पटिपन्नादीसु चतूसु पुग्गलेसु चतुत्थपुग्गलभावो सिद्धो होति. तथा करुणाय लोकनाथता, पञ्ञाय अत्तनाथता. करुणाय चस्स निन्नताभावो, पञ्ञाय उन्नमाभावो. तथा करुणाय सब्बसत्तेसु जनितानुग्गहो पञ्ञानुगतत्ता न च न सब्बत्थ विरत्तचित्तो, पञ्ञाय सब्बधम्मेसु विरत्तचित्तो करुणानुगतत्ता न च न सब्बसत्तानुग्गहाय पवत्तो. यथा हि करुणा भगवतो सिनेहसोकविरहिता, एवं पञ्ञा अहंकारममंकारविनिमुत्ताति ¶ अञ्ञमञ्ञविसोधिता परमविसुद्धा गुणविसेसा विज्जाचरणसम्पदाहि पकासिताति दट्ठब्बं.

१३४. गमनम्पि हि गतन्ति वुच्चति ‘‘गते ठिते’’तिआदीसु (दी. नि. १.२१४; २.३७६). सोभनन्ति सुभं. सुभभावो विसुद्धताय, विसुद्धता दोसविगमेनाति आह ‘‘परिसुद्धमनवज्ज’’न्ति. गमनञ्च नाम बहुविधन्ति इधाधिप्पेतं गमनं दस्सेन्तो ‘‘अरियमग्गो’’ति आह. सो हि निब्बानस्स गति अधिगमोति कत्वा ‘‘गतं, गमन’’न्ति च वुच्चति. इदानि तस्सेव गहणे कारणं दस्सेतुं ‘‘तेन हेसा’’तिआदि वुत्तं. खेमं दिसन्ति निब्बानं. असज्जमानोति परिपन्थाभावेन सुगतिगमनेपि असज्जन्तो सङ्गं अकरोन्तो, पगेव इतरत्थ. अथ वा एकासने निसीदित्वा खिप्पभिञ्ञावसेनेव चतुन्नम्पि मग्गानं पटिलद्धभावतो असज्जमानो असज्जन्तो गतो. यं गमनं गच्छन्तो सब्बमनत्थं अपहरति, सब्बञ्च अनुत्तरं सम्पत्तिं आवहति, तदेव सोभनं नाम. तेन च भगवा गतोति आह ‘‘इति सोभनगमनत्ता सुगतो’’ति सोभनत्थो सु-सद्दोति कत्वा.

असुन्दरानं दुक्खानं सङ्खारप्पवत्तीनं अभावतो अच्चन्तसुखत्ता एकन्ततो सुन्दरं नाम असङ्खता धातूति आह ‘‘सुन्दरञ्चेस ठानं गतो अमतं निब्बान’’न्ति. तेनाह भगवा ‘‘निब्बानं परमं सुख’’न्ति (म. नि. २.२१५; ध. प. २०३-२०४). सम्माति सुट्ठु. सुट्ठु गमनञ्च नाम पटिपक्खेन अनभिभूतस्स गमनन्ति आह ‘‘पहीने किलेसे पुन अपच्चागच्छन्तो’’ति. इदञ्च सिखाप्पत्तं सम्मागमनं, याय आगमनीयपटिपदाय सिद्धं, सापि सम्मागमनमेवाति एवम्पि ¶ भगवा सुगतोति दस्सेतुं ‘‘सम्मा वा गतो’’तिआदि वुत्तं. सम्मापटिपत्तियाति सम्मासम्बोधिया सम्पापने अविपरीतपटिपत्तिया. ‘‘सब्बलोकस्स हितसुखमेव करोन्तो’’ति एतेन महाबोधिया पटिपदा अविभागेन सब्बसत्तानं सब्बदा हितसुखावहभावेनेव पवत्ततीति दस्सेति. ‘‘सस्सतं उच्छेदन्ति इमे अन्ते अनुपगच्छन्तो गतो’’ति एतेन पटिच्चसमुप्पादगतिं दस्सेति. ‘‘कामसुखं अत्तकिलमथन्ति इमे अनुपगच्छन्तो गतो’’ति एतेन अरियमग्गगतिं दस्सेति.

तत्राति युत्तट्ठाने युत्तस्सेव भासने निप्फादेतब्बे, साधेतब्बे चेतं भुम्मं. अभूतन्ति अभूतत्थं. अत्थमुखेन हि वाचाय अभूतता, भूतता वा. अतच्छन्ति तस्सेव वेवचनं. अभूतन्ति ¶ वा असन्तं अविज्जमानं. अतच्छन्ति अतथाकारं अञ्ञथासन्तं. अनत्थसञ्हितन्ति दिट्ठधम्मिकेन, सम्परायिकेन वा अनत्थेन सञ्हितं, अनत्थावहं. न अत्थोति अनत्थो, अत्थस्स पटिपक्खो, अभावो च, तेन सञ्हितं, पिसुणवाचं, सम्फप्पलापञ्चाति अत्थो. एवमेत्थ चतुब्बिधस्सापि वचीदुच्चरितस्स सङ्गहो दट्ठब्बो. एत्थ च पठमा वाचा सीलवन्तं ‘‘दुस्सीलो’’ति, अचण्डालादिमेव ‘‘चण्डालो’’तिआदिना भासमानस्स दट्ठब्बा. दुतिया दुस्सीलं ‘‘दुस्सीलो’’ति, चण्डालादिमेव ‘‘चण्डालो’’तिआदिना अविनयेन भासमानस्स. ततिया नेरयिकादिकस्स नेरयिकादिभावविभावनीकथा यथा ‘‘आपायिको देवदत्तो नेरयिको’’तिआदिका (चूळव. ३४८). चतुत्थी ‘‘वेदविहितेन यञ्ञविधिना पाणातिपातादिकतं सुगतिं आवहती’’ति लोकस्स ब्यामोहनकथा. पञ्चमी भूतेन पेसुञ्ञूपसंहारादिकथा. छट्ठा युत्तप्पत्तट्ठाने पवत्तिता दानसीलादिकथा वेदितब्बा. एवं सम्मा गदत्ताति यथावुत्तं अभूतादिं वज्जेत्वा भूतं तच्छं अत्थसञ्हितं पियं मनापं ततो एव सम्मा सुट्ठु गदनतो सुगतो द-कारस्स त-कारं कत्वा. आपाथगमनमत्तेन कस्सचि अप्पियम्पि हि भगवतो वचनं पियं मनापमेव अत्थसिद्धिया लोकस्स हितसुखावहत्ता.

अपिच सोभनं गतं गमनं एतस्साति सुगतो. भगवतो हि वेनेय्यजनुपसङ्कमनं एकन्तेन तेसं हितसुखनिप्फादनतो सोभनं भद्दकं ¶ . तथा लक्खणानुब्यञ्जनपटिमण्डितरूपकायताय दुतविलम्बितखलितानुकड्ढननिप्पीळनुक्कुटिककुटिलाकुलतादिदोसरहितविलासितराजहंसवसभवारणमिगराजगमनं कायगमनं, ञाणगमनञ्च विपुलनिम्मलकरुणासतिवीरियादिगुणविसेससहितं अभिनीहारतो याव महाबोधि अनवज्जताय, सत्तानं हितसुखावहताय च सोभनमेव. अथ वा सयम्भूञाणेन सकलम्पि लोकं परिञ्ञाभिसमयवसेन परिजानन्तो सम्मा गतो अवगतोति सुगतो. तथा लोकसमुदयं पहानाभिसमयवसेन पजहन्तो अनुप्पत्तिधम्मतं आपादेन्तो सम्मा गतो अतीतोति सुगतो. लोकनिरोधं निब्बानं सच्छिकिरियाभिसमयवसेन सम्मा गतो अधिगतोति सुगतो. लोकनिरोधगामिनिं पटिपदं भावनाभिसमयवसेन सम्मा गतो पटिपन्नोति सुगतो. तथा यं इमस्स सदेवकस्स लोकस्स दिट्ठं सुतं मुतं विञ्ञातं पत्तं परियेसितं अनुविचरितं मनसा, सब्बं तं हत्थतले आमलकं विय सम्मा पच्चक्खतो गतो अब्भञ्ञासीति सुगतो.

१३५. सब्बथाति सब्बप्पकारेन. यो यो लोको यथा यथा वेदितब्बो, तथा तथा. ते ¶ पन पकारे दस्सेतुं ‘‘सभावतो’’तिआदि वुत्तं. तत्थ सभावतोति दुक्खसभावतो. सब्बो हि लोको दुक्खसभावो. यथाह ‘‘संखित्तेन पञ्चुपादानक्खन्धा दुक्खा’’ति (महाव. १४; दी. नि. २.३८७). समुदयतोति यतो सो समुदेति, ततो तण्हादितो. निरोधतोति यत्थ सो निरुज्झति, ततो विसङ्खारतो. निरोधूपायतोति येन विधिना सो निरोधो पत्तब्बो, ततो अरियमग्गतो, इतो अञ्ञस्स पकारस्स अभावा.

इति ‘‘सब्बथा लोकं अवेदी’’ति वत्वा तदत्थसाधकं सुत्तं दस्सेन्तो ‘‘यत्थ खो आवुसो’’तिआदिमाह. तत्थ ‘‘न जायती’’तिआदिना उजुकं जातिआदीनि पटिक्खिपित्वा ‘‘न चवति न उपपज्जती’’ति पदद्वयेन अपरापरं चवनुपपज्जनानि पटिक्खिपति. केचि पन ‘‘न जायतीतिआदि गब्भसेय्यकवसेन वुत्तं, इतरं ओपपातिकवसेना’’ति वदन्ति. तन्ति जातिआदिरहितं. गमनेनाति पदसा गमनेन. ञातेय्यन्ति जानितब्बं. ‘‘ञाताय’’न्ति वा पाठो, ञाता अयं निब्बानत्थिकोति अधिप्पायो.

कामं ¶ पादगमनेन गन्त्वा लोकस्सन्तं ञातुं, दट्ठुं, पत्तुं वा न सक्का, अपिच परिमितपरिच्छिन्नट्ठाने तं पञ्ञापेत्वा दस्सेमीति दस्सेन्तो ‘‘अपिचा’’तिआदिमाह. तत्थ ससञ्ञिम्हीति सञ्ञासहिते. ततो एव समनके सविञ्ञाणके. अविञ्ञाणके पन उतुसमुट्ठानरूपसमुदायमत्ते पञ्ञापेतुं न सक्काति अधिप्पायो. लोकन्ति खन्धादिलोकं. लोकनिरोधन्ति तस्स लोकस्स निरुज्झनं, निब्बानमेव वा. अदेसम्पि हि तं येसं निरोधो, तेसं वसेन उपचारतो, देसतोपि निद्दिसीयति यथा ‘‘चक्खुं लोके पियरूपं सातरूपं, एत्थेसा तण्हा पहीयमाना पहीयति, एत्थ निरुज्झमाना निरुज्झती’’ति (दी. नि. २.४०१; म. नि. १.१३४; विभ. २०४).

गमनेनाति पाकतिकगमनेन. लोकस्सन्तोति सङ्खारलोकस्स अन्तो अन्तकिरियाहेतुभूतं निब्बानं. कुदाचनन्ति कदाचिपि. अपत्वाति अग्गमग्गेन अनधिगन्त्वा. पमोचनन्ति पमुत्ति निस्सरणं. तस्माति यस्मा लोकस्सन्तं अपत्वा वट्टदुक्खतो मुत्ति नत्थि, तस्मा. हवेति निपातमत्तं. लोकविदूति सभावादितो सब्बं लोकं जानन्तो. सुमेधोति सुन्दरपञ्ञो. लोकन्तगूति परिञ्ञाभिसमयेन लोकं विदित्वा पहानाभिसमयेन लोकन्तगू. मग्गब्रह्मचरियवासस्स परिनिट्ठितत्ता वुसितब्रह्मचरियो. सब्बेसं किलेसानं समितत्ता, चतुसच्चधम्मानं ¶ वा अभिसमितत्ता समितावी. नासीसति न पत्थेति. यथा इमं लोकं, एवं परञ्च लोकं अप्पटिसन्धिकत्ता.

१३६. एवं यदिपि लोकविदुता अनवसेसतो दस्सिता सभावतो दस्सितत्ता, लोको पन एकदेसेनेव वुत्तोति तं अनवसेसतो दस्सेतुं ‘‘अपिच तयो लोका’’तिआदि वुत्तं. तत्थ इन्द्रियबद्धानं खन्धानं समूहो, सन्तानो च सत्तलोको. रूपादीसु सत्तविसत्तताय सत्तो, लोकीयन्ति एत्थ कुसलाकुसलं, तब्बिपाको चाति लोकोति. अनिन्द्रियबद्धानं रूपादीनं समूहो, सन्तानो च ओकासलोको लोकियन्ति एत्थ तसा, थावरा च, तेसञ्च ओकासभूतोति. तदाधारताय हेस ‘‘भाजनलोको’’तिपि वुच्चति. उभयेपि खन्धा सङ्खारलोको पच्चयेहि सङ्खरीयन्ति, लुज्जन्ति पलुज्जन्ति चाति. आहारट्ठितिकाति पच्चयट्ठितिका, पच्चयायत्तवुत्तिकाति ¶ अत्थो. पच्चयत्थो हेत्थ आहार-सद्दो ‘‘अयमाहारो अनुप्पन्नस्स वा कामच्छन्दस्स उप्पादाया’’तिआदीसु (सं. नि. ५.२३२) विय. एवं हि ‘‘सब्बे सत्ता’’ति इमिना असञ्ञसत्तापि परिग्गहिता होन्ति. सा पनायं आहारट्ठितिकता निप्परियायतो सङ्खारधम्मो, न सत्तधम्मोति आह ‘‘आहारट्ठितिकाति आगतट्ठाने सङ्खारलोको वेदितब्बो’’ति.

यदि एवं ‘‘सब्बे सत्ता’’ति इदं कथन्ति? पुग्गलाधिट्ठाना देसनाति नायं दोसो. यथा अञ्ञत्थापि ‘‘एकधम्मे, भिक्खवे, भिक्खु सम्मा निब्बिन्दमानो सम्मा विरज्जमानो सम्मा विमुच्चमानो सम्मा परियन्तदस्सावी सम्मदत्थं अभिसमेच्च दिट्ठेव धम्मे दुक्खस्सन्तकरो होति. कतमस्मिं एकधम्मे? सब्बे सत्ता आहारट्ठितिका’’ति (अ. नि. १०.२७). दिट्ठिगतिकानं सस्सतादिवसेन ‘‘अत्ता, लोको’’ति च परिकप्पना येभुय्येन सत्तविसया, न सङ्खारविसयाति आह ‘‘सस्सतो लोकोति वा असस्सतो लोकोति वा आगतट्ठाने सत्तलोको वेदितब्बो’’ति.

यावता चन्दिमसूरिया परिहरन्तीति यत्तके ठाने चन्दिमसूरिया परिवत्तन्ति परिब्भमन्ति. दिसा भन्ति विरोचमानाति तेसं परिब्भमनेनेव ता दिसा पभस्सरा हुत्वा विरोचन्ति. ताव सहस्सधा लोकोति तत्तकं सहस्सप्पकारो ओकासलोको, सहस्सलोकधातुयोति अत्थो. ‘‘ताव सहस्सवा’’ति वा पाठो.

तम्पीति ¶ तं तिविधम्पि लोकं. तथा हिस्स सब्बथापि विदितोति सम्बन्धो. एको लोकोति ‘‘सब्बे सत्ता आहारट्ठितिका’’ति याय पुग्गलाधिट्ठानाय कथाय सब्बेसं सङ्खारानं पच्चयायत्तवुत्तिता वुत्ता, ताय सब्बो सङ्खारलोको एको एकविधो पकारन्तरस्स अभावतो. द्वे लोकातिआदीसुपि इमिना नयेन अत्थो वेदितब्बो. नाम-ग्गहणेन चेत्थ निब्बानस्स अग्गहणं, तस्स अलोकसभावत्ता. ननु च ‘‘आहारट्ठितिका’’ति एत्थ पच्चयायत्तवुत्तिताय मग्गफलधम्मानम्पि लोकता आपज्जतीति? नापज्जति, परिञ्ञेय्यानं दुक्खसच्चधम्मानं इध ‘‘लोको’’ति अधिप्पेतत्ता. अथ वा ‘‘न लुज्जति न पलुज्जती’’ति ¶ यो गहितो तथा न होति, सो लोकोति तंगहणरहितानं लोकुत्तरानं नत्थि लोकता. उपादानानं आरम्मणभूता खन्धा उपादानक्खन्धा. दसायतनानीति दस रूपायतनानि.

एत्थ च ‘‘आहारट्ठितिका’’ति पच्चयायत्तवुत्तितावचनेन सङ्खारानं अनिच्चता. ताय च ‘‘यदनिच्चं, तं दुक्खं. यं दुक्खं, तदनत्ता’’ति (सं. नि. ३.१५) वचनतो दुक्खानत्तता च पकासिता होन्तीति तीणिपि सामञ्ञलक्खणानि गहितानि. नामन्ति चत्तारो अरूपिनो खन्धा, ते च अत्थतो फस्सादयो. रूपन्ति भूतुपादायरूपानि, तानि च अत्थतो पथवीआदयोति अविसेसेनेव सलक्खणतो सङ्खारा गहिता. तग्गहणेनेव ये तेसं विसेसा कुसलादयो, हेतुआदयो च, तेपि गहिता एव होन्तीति आह ‘‘इति अयं सङ्खारलोकोपि सब्बथा विदितो’’ति.

आगम्म चित्तं सेति एत्थाति आसयो मिगासयो विय. यथा मिगो गोचराय गन्त्वा पच्चागन्त्वा तत्थेव वनगहने सयतीति सो तस्स आसयो, एवं अञ्ञथा पवत्तित्वापि चित्तं आगम्म यत्थ सेति, सो तस्स आसयोति वुच्चति. सो पन सस्सतदिट्ठिआदिवसेन चतुब्बिधो. वुत्तञ्च –

‘‘सस्सतुच्छेददिट्ठि च, खन्ति चेवानुलोमिका;

यथाभूतञ्च यं ञाणं, एतं आसयसद्दित’’न्ति.

तत्थ सब्बदिट्ठीनं सस्सतुच्छेददिट्ठीहि सङ्गहितत्ता सब्बेपि दिट्ठिगतिका सत्ता इमा एव द्वे दिट्ठियो सन्निस्सिता. यथाह ‘‘द्वयनिस्सितो ख्वायं, कच्चान, लोको येभुय्येन अत्थितञ्च नत्थितञ्चा’’ति ¶ (सं. नि. २.१५). अत्थिताति हि सस्सतग्गाहो अधिप्पेतो, नत्थिताति उच्छेदग्गाहो. अयं ताव वट्टनिस्सितानं पुथुज्जनानं आसयो. विवट्टनिस्सितानं पन सुद्धसत्तानं अनुलोमिका खन्ति, यथाभूतञाणन्ति दुविधो आसयो.

आसयं जानातीति चतुब्बिधम्पि सत्तानं आसयं जानाति. जानन्तो च तेसं दिट्ठिगतानं, तेसञ्च ञाणानं अप्पवत्तिक्खणेपि जानाति. वुत्तञ्हेतं –

‘‘कामं ¶ सेवन्तञ्ञेव जानाति ‘अयं पुग्गलो कामगरुको कामासयो कामाधिमुत्तो’ति, कामं सेवन्तञ्ञेव जानाति ‘अयं पुग्गलो नेक्खम्मगरुको नेक्खम्मासयो नेक्खम्माधिमुत्तो’ति’’आदि (पटि. म. १.११३).

अप्पहीनभावेन सन्ताने अनु अनु सयन्तीति अनुसया, अनुरूपं कारणं लभित्वा उप्पज्जन्तीति अत्थो. एतेन नेसं कारणलाभे उप्पज्जनारहतं दस्सेति. अप्पहीना हि किलेसा कारणलाभे सति उप्पज्जन्ति. के पन ते? रागादयो सत्त अनागता किलेसा, अतीता, पच्चुप्पन्ना च तंसभावत्ता तथा वुच्चन्ति. न हि धम्मानं कालभेदेन सभावभेदो अत्थि. तं सत्तविधं अनुसयं तस्स तस्स सत्तस्स सन्ताने परोपरभावेन पवत्तमानं जानाति.

चरितन्ति सुचरितदुच्चरितं. तं हि विभङ्गे (विभ. ८१४, ८१७) चरितनिद्देसे निद्दिट्ठं. अथ वा चरितन्ति चरिया वेदितब्बा. ता पन रागदोसमोहसद्धाबुद्धिवितक्कवसेन छ मूलचरिया, तासं अपरियन्तो अन्तरभेदो, संसग्गभेदो पन तेसट्ठिविधो. तं चरितं सभावतो संकिलेसवोदानतो समुट्ठानतो फलतो निस्सन्दतोति एवमादिना पकारेन जानाति.

अधिमुत्ति अज्झासयधातु. सा दुविधा हीनाधिमुत्ति पणीताधिमुत्तीति. याय हीनाधिमुत्तिका सत्ता हीनाधिमुत्तिकेयेव सेवन्ति, पणीताधिमुत्तिका च पणीताधिमुत्तिकेयेव. सा अज्झासयधातु अज्झासयसभावो अधिमुत्ति. तं अधिमुत्तिं जानाति ‘‘इमस्स अधिमुत्ति हीना, इमस्स पणीता’’ति, तत्थापि ‘‘इमस्स मुदु, इमस्स मुदुतरा, इमस्स मुदुतमा’’तिआदिना. इन्द्रियानं हि तिक्खमुदुभावादिना यथारहं अधिमुत्तिया तिक्खमुदुभावादिको वेदितब्बो. तथा हि वुत्तं सम्मोहविनोदनीयं (विभ. अट्ठ. ८१८, ८२०) ‘‘हेट्ठा ¶ गहितापि अधिमुत्ति इध सत्तानं तिक्खिन्द्रियमुदिन्द्रियभावदस्सनत्थं पुन गहिता’’ति.

अप्परजं अक्खं एतेसन्ति अप्परजक्खा, अप्पं वा रजं पञ्ञामये अक्खिम्हि एतेसन्ति अप्परजक्खा, अनुस्सदरागादिरजा सत्ता, ते अप्परजक्खे. महारजक्खेति एत्थापि एसेव नयो. उस्सदरागादिरजा महारजक्खा.

तिक्खिन्द्रियेति ¶ तिखिणेहि सद्धादीहि इन्द्रियेहि समन्नागते. मुदिन्द्रियेति मुदुकेहि सद्धादीहि इन्द्रियेहि समन्नागते. उपनिस्सयइन्द्रियानि नाम इधाधिप्पेतानि. स्वाकारेति सुन्दराकारे कल्याणपकतिके, विवट्टज्झासयेति अत्थो. सुविञ्ञापयेति सम्मत्तनियामं विञ्ञापेतुं सुकरे सद्धे, पञ्ञवन्ते च. भब्बे अभब्बेति एत्थ भब्बेति कम्मावरणकिलेसावरणविपाकावरणरहिते. वुत्तविपरियायेन द्वाकारदुविञ्ञापयाभब्बा वेदितब्बा. एत्थ च ‘‘इमस्स रागरजो अप्पो, इमस्स दोसरजो अप्पो’’तिआदिना अप्परजक्खेसु जाननं वेदितब्बं. सेसेसुपि एसेव नयो. तस्माति यस्मा भगवा अपरिमाणे सत्ते आसयादितो अनवसेसेत्वा जानाति, तस्मा अस्स भगवतो सत्तलोकोपि सब्बथा विदितो.

ननु च सत्तेसु पमाणादिपि जानितब्बो अत्थीति? अत्थि. तस्स पन जाननं न निब्बिदाय विरागाय निरोधायाति इध न गहितं, भगवतो पन तम्पि सुविदितं सुववत्थापितमेव, पयोजनाभावा देसनं नारुळ्हं. तेन वुत्तं –

‘‘अथ खो भगवा परित्तं नखसिखायं पंसुं आरोपेत्वा भिक्खू आमन्तेसि ‘तं किं मञ्ञथ, भिक्खवे, कतमं नु खो बहुतरं – यो वायं मया परित्तो नखसिखायं पंसु आरोपितो, अयं वा महापथवी’’’तिआदि (सं. नि. ५.११२१).

१३७. ओकासलोकोपि सब्बथा विदितोति सम्बन्धो. चक्कवाळन्ति लोकधातु. सा हि नेमिमण्डलसदिसेन चक्कवाळपब्बतेन समन्ततो परिक्खित्तत्ता ‘‘चक्कवाळ’’न्ति वुच्चति. चतुतिंससतानि चाति चतुअधिकानि तिंससतानि, तीणिसहस्सानि, चत्तारिसतानि चाति अत्थो ¶ . अड्ढुड्ढानीति उपड्ढचतुत्थानि, तीणिसतानि, पञ्ञासञ्चाति अत्थो. नहुतानीति दससहस्सानि. सङ्खाताति कथिता. सण्ठितीति हेट्ठा, उपरितो चाति सब्बसो ठिति.

एवं सण्ठितेति एवमवट्ठिते. एत्थाति चक्कवाळे. अच्चुग्गतो तावदेवाति तत्तकमेव चतुरासीति योजनसहस्सानियेव उब्बेधो ¶ . न केवलं चेत्थ उब्बेधोव, अथ खो आयामवित्थारापिस्स तत्तकायेव. वुत्तञ्हेतं –

‘‘सिनेरु, भिक्खवे, पब्बतराजा चतुरासीति योजनसहस्सानि आयामेन, चतुरासीति योजनसहस्सानि वित्थारेना’’ति (अ. नि. ७.६६).

ततोति सिनेरुस्स हेट्ठा, उपरि च वुत्तप्पमाणतो. उपड्ढुपड्ढेनाति उपड्ढेन उपड्ढेन. इदं वुत्तं होति – द्वाचत्तालीस योजनसहस्सानि समुद्दे अज्झोगाळ्हो तत्तकमेव च उपरि उग्गतो युगन्धरपब्बतो, एकवीस योजनसहस्सानि समुद्दे अज्झोगाळ्हो तत्तकमेव च उपरि उग्गतो ईसधरो पब्बतोति इमिना नयेन सेसेसुपि उपड्ढुपड्ढपमाणता वेदितब्बा. यथा महासमुद्दो याव चक्कवाळपादमूला अनुपुब्बनिन्नो, एवं याव सिनेरुपादमूलाति हेट्ठा सिनेरुपमाणतो उपड्ढपमाणोपि युगन्धरपब्बतो पथवियं सुप्पतिट्ठितो, एवं ईसधरादयोपीति दट्ठब्बं. वुत्तं हेतं ‘‘महासमुद्दो, भिक्खवे, अनुपुब्बनिन्नो अनुपुब्बपोणो अनुपुब्बपब्भारो’’ति (उदा. ४५; चूळव. ३८४; अ. नि. ८.१९). सिनेरुयुगन्धरादीनं अन्तरे सीदन्तरसमुद्दा नाम. ते वित्थारतो यथाक्कमं सिनेरुआदीनं अच्चुग्गतसमानपरिमाणाति वदन्ति. ब्रहाति महन्तो.

सिनेरुस्स समन्ततोति परिक्खिपनवसेन सिनेरुस्स समन्ततो ठिता. सिनेरुं ताव परिक्खिपित्वा ठितो युगन्धरो, तं परिक्खिपित्वा ईसधरो. एवं तं तं परिक्खिपित्वा ठिता ‘‘सिनेरुस्स समन्ततो’’ति वुत्ता.

योजनानं सतानुच्चो, हिमवा पञ्च पब्बतोति हिमवा पब्बतो पञ्च योजनानं सतानि उच्चो उब्बेधो. नगव्हयाति नग-सद्देन अव्हातब्बा रुक्खाभिधाना. पञ्ञासयोजनक्खन्धसाखायामाति’ उब्बेधतो पञ्ञासयोजनक्खन्धायामा, उब्बेधतो, समन्ततो च पञ्ञासयोजनसाखायामा ¶ च. ततो एव सतयोजनवित्थिण्णा, तावदेव च उग्गता. यस्सानुभावेनाति यस्सा महन्तता कप्पट्ठायितादिप्पकारेन पभावेन.

गरुळानं सिम्बलिरुक्खो सिनेरुस्स दुतियपरिभण्डे पतिट्ठितो.

सिरीसेनाति ¶ पच्चत्ते करणवचनं. सत्तमन्ति लिङ्गविपल्लासेन वुत्तं, सिरीसो भवति सत्तमोति अत्थो.

तत्थ चण्डमण्डलं हेट्ठा, सूरियमण्डलं उपरि. तस्स आसन्नभावेन चन्दमण्डलं अत्तनो छायाय विकलभावेन उपट्ठाति. तानि योजनन्तरिकानि युगन्धरग्गपमाणे आकासे विचरन्ति. असुरभवनं सिनेरुस्स हेट्ठा. अवीचि जम्बुदीपस्स. जम्बुदीपो सकटसण्ठानो. अपरगोयानं आदाससण्ठानो. पुब्बविदेहो अद्धचन्दसण्ठानो. उत्तरकुरु पीठसण्ठानो. तंतंनिवासीनं, तंतंपरिवारदीपवासीनञ्च मनुस्सानं मुखम्पि तंतंसण्ठानन्ति वदन्ति. तदन्तरेसूति तेसं चक्कवाळानं अन्तरेसु. तिण्णं हि पत्तानं अञ्ञमञ्ञआसन्नभावेन ठपितानं अन्तरसदिसे तिण्णं तिण्णं चक्कवाळानं अन्तरे एकेको लोकन्तरनिरयो.

अनन्तानीति अपरिमाणानि, ‘‘एत्तकानी’’ति अञ्ञेहि मिनितुं असक्कुणेय्यानि. भगवा अनन्तेन बुद्धञाणेन अवेदि ‘‘अनन्तो आकासो, अनन्तो सत्तनिकायो, अनन्तानि चक्कवाळानी’’ति तिविधम्पि अनन्तं बुद्धञाणं परिच्छिन्दति सयम्पि अनन्तत्ता. यावतकं हि ञेय्यं, तावतकं ञाणं. यावतकं ञाणं, तावतकं ञेय्यं. ञेय्यपरियन्तिकं ञाणं, ञाणपरियन्तिकं ञेय्यन्ति. तेन वुत्तं ‘‘अनन्तेन बुद्धञाणेन अवेदी’’ति. अनन्तता चस्स अनन्तञेय्यपटिविज्झनेनेव वेदितब्बा तत्थ अप्पटिहतचारत्ता. ननु चेत्थ विवट्टादीनम्पि विदितता वत्तब्बाति? सच्चं वत्तब्बं, सा पन परतो अभिञ्ञाकथायं आगमिस्सतीति इध न गहिता.

१३८. अत्तनाति निस्सक्कवचनमेतं. गुणेहि अत्तना विसिट्ठतरस्साति सम्बन्धो. तर-ग्गहणं चेत्थ ‘‘अनुत्तरो’’ति पदस्स अत्थनिद्देसताय कतं, न विसिट्ठस्स कस्सचि अत्थिताय. सदेवके हि लोके सदिसकप्पोपि नाम कोचि तथागतस्स नत्थि, कुतो सदिसो. विसिट्ठे पन का ¶ कथा. कस्सचीति कस्सचिपि. अभिभवतीति सीलसम्पदाय उपनिस्सयभूतानं हिरोत्तप्पमेत्ताकरुणानं, विसेसपच्चयानं सद्धासतिवीरियपञ्ञानञ्च उक्कंसप्पत्तिया समुदागमतो पट्ठाय अनञ्ञसाधारणो सवासनपटिपक्खस्स पहीनत्ता उक्कंसपारमिप्पत्तो सत्थु सीलगुणो. तेन भगवा सदेवकं लोकं अञ्ञदत्थु अभिभुय्य ¶ पवत्तति, न सयं केनचि अभिभुय्यतीति अधिप्पायो. एवं समाधिगुणादीसुपि यथारहं वत्तब्बं. सीलादयो चेते लोकियलोकुत्तरमिस्सका वेदितब्बा. विमुत्तिञाणदस्सनं पन लोकियं कामावचरमेव.

यदि एवं, कथं तेन सदेवकं लोकं अभिभवतीति? तस्सापि आनुभावतो असदिसत्ता. तम्पि हि विसयतो, पवत्तितो, पवत्ति आकारतो च उत्तरितरमेव. तं हि अनञ्ञसाधारणं सत्थु विमुत्तिगुणं आरब्भ पवत्तति, पवत्तमानञ्च अतक्कावचरं परमगम्भीरं सण्हसुखुमं सविसयं पटिपक्खधम्मानं सुप्पहीनत्ता सुट्ठु पाकटं विभूततरं कत्वा पवत्तति, सम्मदेव च वसीभावस्स पापितत्ता, भवङ्गपरिवासस्स च अतिपरित्तकत्ता लहुं लहुं पवत्ततीति.

एवं सीलादिगुणेहि भगवतो उत्तरितरस्स अभावं दस्सेत्वा इदानि सदिसस्सापि अभावं दस्सेतुं ‘‘असमो’’तिआदि वुत्तं. तत्थ असमोति एकस्मिं काले नत्थि एतस्स सीलादिगुणेन समा सदिसाति असमो. तथा असमेहि अतीतानागतबुद्धेहि समो, असमा वा समा एतस्साति असमसमो. सीलादिगुणेन नत्थि एतस्स पटिमाति अप्पटिमो. सेसपदद्वयेपि एसेव नयो. तत्थ उपमामत्तं पटिमा, सदिसूपमा पटिभागो, युगग्गाहवसेन ठितो पटिपुग्गलो वेदितब्बो.

न खो पनाहं समनुपस्सामीति मम समन्तचक्खुना हत्थतले आमलकं विय सब्बलोकं पस्सन्तोपि तत्थ सदेवके…पे… पजाय अत्तना अत्ततो सीलसम्पन्नतरं सम्पन्नतरसीलं कञ्चि पुग्गलं न खो पन पस्सामि, तादिसस्स अभावतोति अधिप्पायो. अग्गप्पसादसुत्तादीनीति एत्थ –

‘‘यावता, भिक्खवे, सत्ता अपदा वा द्विपदा वा चतुप्पदा वा बहुप्पदा वा रूपिनो वा अरूपिनो वा सञ्ञिनो वा असञ्ञिनो वा नेवसञ्ञिनासञ्ञिनो वा, तथागतो तेसं अग्गमक्खायति अरहं सम्मासम्बुद्धो. ये, भिक्खवे, बुद्धे पसन्ना, अग्गे ¶ ते पसन्ना. अग्गे खो पन पसन्नानं अग्गो विपाको होती’’ति (अ. नि. ४.३४; ५.३२; १०.१५; इतिवु९०) –

इदं ¶ अग्गप्पसादसुत्तं. आदि-सद्देन –

‘‘सदेवके…पे… सदेवमनुस्साय तथागतो अभिभू अनभिभूतो अञ्ञदत्थुदसो वसवत्ती, तस्मा ‘तथागतो’ति वुच्चती’’ति (अ. नि. ४.२४; दी. नि. ३.१८८) –

एवमादीनि सुत्तपदानि वेदितब्बानि. आदिका गाथायोति एत्थ –

‘‘अहं हि अरहा लोके, अहं सत्था अनुत्तरो;

एकोम्हि सम्मासम्बुद्धो, सीतिभूतोस्मि निब्बुतो. (महाव. ११; म. नि. १.२८५; २.३४१);

‘‘दन्तो दमयतं सेट्ठो, सन्तो समयतं इसि;

मुत्तो मोचयतं अग्गो, तिण्णो तारयतं वरो. (इतिवु. ११२);

‘‘नयिमस्मिं लोके परस्मिं वा पन,

बुद्धेन सेट्ठो सदिसो च विज्जति;

यमाहु दक्खिणेय्यानं अग्गतं गतो,

पुञ्ञत्थिकानं विपुलफलेसिन’’न्ति. (वि. व. १०४७; कथा. ७९९) –

एवमादिका गाथा वित्थारेतब्बा.

१३९. दमेतीति समेति, कायसमादीहि योजेतीति अत्थो. तं पन कायसमादीहि योजनं यथारहं तदङ्गविनयादीसु पतिट्ठापनं होतीति आह ‘‘विनेतीति वुत्तं होती’’ति. दमेतुं युत्ताति ¶ दमनारहा. अमनुस्सपुरिसाति एत्थ न मनुस्साति अमनुस्सा. तंसदिसता एत्थ जोतीयति, तेन मनुस्सत्तमत्तं नत्थि, अञ्ञं समानन्ति यक्खादयो ‘‘अमनुस्सा’’ति अधिप्पेता, न ये केचि मनुस्सेहि अञ्ञे. तथा हि तिरच्छानपुरिसानं विसुं गहणं कतं, यक्खादयो एव च निद्दिट्ठा. अपलालो हिमवन्तवासी. चूळोदरमहोदरा नागदीपवासिनो. अग्गिसिखधूमसिखा सीहळदीपवासिनो. निब्बिसा कता दोसविसस्स विनोदनेन. तेनाह ‘‘सरणेसु च सीलेसु च पतिट्ठापिता’’ति. कूटदन्तादयोति आदि-सद्देन घोटमुखउपालिगहपतिआदीनं सङ्गहो दट्ठब्बो. सक्कदेवराजादयोति आदि-सद्देन अजकलापयक्खबकब्रह्मादीनं ¶ सङ्गहो दट्ठब्बो. इदं चेत्थ सुत्तन्ति इदं केसिसुत्तं. विनीता विचित्रेहि विनयनूपायेहीति एतस्मिं अत्थे वित्थारेतब्बं यथारहं सण्हादीहि उपायेहि विनयस्स दीपनतो.

विसुद्धसीलादीनं पठमज्झानादीनीति ‘‘विसुद्धसीलस्स पठमज्झानं, पठमज्झानलाभिनो दुतियज्झान’’न्तिआदिना तस्स तस्स उपरूपरि विसेसं आचिक्खन्तोति सम्बन्धो. सोतापन्नादीनन्ति एत्थापि एसेव नयो. ‘‘दन्तेपि दमेतियेवा’’ति इदं पुब्बे ‘‘सब्बेन सब्बं दमथं अनुपगता पुरिसदम्मा’’ति वुत्ताति कत्वा वुत्तं. ये पन विप्पकतदम्मभावा सब्बथा दमेतब्बतं नातिवत्ता, ते सत्ते सन्धाय ‘‘दन्तेपि दमेतियेवा’’ति वुत्तं. तेपि हि पुरिसदम्मा एवाति, यतो ने सत्था दमेति.

अत्थपदन्ति अत्थाभिब्यञ्जकपदं, वाक्यन्ति अत्थो. वाक्येन हि अत्थाभिब्यत्ति, न नामादिपदमत्तेन. एकपदभावेन च अनञ्ञसाधारणो सत्थु पुरिसदम्मसारथिभावो दस्सितो होति. तेनाह ‘‘भगवा ही’’तिआदि. अट्ठ दिसाति अट्ठ समापत्तियो. ता हि अञ्ञमञ्ञसम्बन्धापि असंकिण्णभावेन दिस्सन्ति अपदिस्सन्तीति दिसा, दिसा वियाति वा दिसा. असज्जमानाति न सज्जमाना वसीभावप्पत्तिया निस्सङ्गचारा. धावन्ति जवनवुत्तियोगतो. एकंयेव दिसं धावति, अत्तनो कायं अपरिवत्तेन्तोति अधिप्पायो. सत्थारा पन दमिता पुरिसदम्मा एकिरियापथेनेव अट्ठ दिसा धावन्ति. तेनाह ‘‘एकपल्लङ्केनेव निसिन्ना’’ति. अट्ठ दिसाति च निदस्सनमत्तमेतं, लोकियेहि अगतपुब्बं निरोधसमापत्तिदिसं, अमतदिसञ्च पक्खन्दनतो.

१४०. दिट्ठधम्मो वुच्चति पच्चक्खो अत्तभावो, तत्थ नियुत्तोति दिट्ठधम्मिको, इधलोकत्थो ¶ . कम्मकिलेसवसेन सम्परेतब्बतो सम्मा गन्तब्बतो सम्परायो, परलोको, तत्थ नियुत्तोति सम्परायिको, परलोकत्थो. परमो उत्तमो अत्थो परमत्थो, निब्बानं. तेहि दिट्ठधम्मिकसम्परायिकपरमत्थेहि. यथारहन्ति यथानुरूपं. तेसु अत्थेसु यो यो पुग्गलो यं यं अरहति, तदनुरूपं. अनुसासतीति विनेति तस्मिं अत्थे पतिट्ठपेति, सह अत्थेन वत्ततीति सत्थो, भण्डमूलेन वाणिज्जाय देसन्तरं गच्छन्तो जनसमूहो. हितुपदेसादिवसेन परिपालेतब्बो सासितब्बो सो एतस्स ¶ अत्थीति सत्था, सत्थवाहो. सो विय भगवाति आह ‘‘सत्था वियाति सत्था, भगवा सत्थवाहो’’ति.

इदानि तमत्थं निद्देसपाळिनयेन दस्सेतुं ‘‘यथा सत्थवाहो’’तिआदि वुत्तं. तत्थ सत्थेति सत्थिके जने. कं तारेन्ति एत्थाति कन्तारो, निरुदको अरञ्ञप्पदेसो. रुळ्हीवसेन पन इतरोपि अरञ्ञप्पदेसो तथा वुच्चति. चोरकन्तारन्ति चोरेहि अधिट्ठितकन्तारं. तथा वाळकन्तारं. दुब्भिक्खकन्तारन्ति दुल्लभभिक्खं कन्तारं. तारेतीति अखेमन्तट्ठानं अतिक्कामेति. उत्तारेतीतिआदि उपसग्गेन पदं वड्ढेत्वा वुत्तं. अथ वा उत्तारेतीति खेमन्तभूमिं उपनेन्तो तारेति. नित्तारेतीति अखेमन्तट्ठानतो निक्खामेन्तो तारेति. पतारेतीति परिग्गहेत्वा तारेति, हत्थेन परिग्गहेत्वा विय तारेतीति अत्थो. सब्बम्पेतं तारणुत्तारणादिखेमट्ठाने ठपनमेवाति आह ‘‘खेमन्तभूमिं सम्पापेती’’ति. सत्तेति वेनेय्यसत्ते. महागहनताय, महानत्थताय, दुन्नित्थरणताय च जातियेव कन्तारो जातिकन्तारो, तं जातिकन्तारं.

उक्कट्ठपरिच्छेदवसेनाति उक्कट्ठसत्तपरिच्छेदवसेन. देवमनुस्सा एव हि उक्कट्ठसत्ता, न तिरच्छानादयो. भब्बपुग्गलपरिच्छेदवसेनाति सम्मत्तनियामोक्कमनस्स योग्यपुग्गलस्स परिच्छिन्दनवसेन. एतन्ति ‘‘देवमनुस्सान’’न्ति एतं वचनं. भगवतोति निस्सक्कवचनं यथा ‘‘उपज्झायतो अज्झेती’’ति, भगवतो सन्तिकेति वा अत्थो. उपनिस्सयसम्पत्तिन्ति तिहेतुकपटिसन्धिआदिकं मग्गफलाधिगमस्स बलवकारणं.

गग्गरायाति गग्गराय नाम रञ्ञो देविया, ताय वा कारितत्ता ‘‘गग्गरा’’ति लद्धनामाय. सरे निमित्तं अग्गहेसीति ‘‘धम्मो एसो वुच्चती’’ति धम्मसञ्ञाय सरे निमित्तं गण्हि, गण्हन्तो च पसन्नचित्तो परिसपरियन्ते निपज्जि. सन्निरुम्भित्वा अट्ठासीति तस्स सीसे दण्डस्स ठपितभावं अपस्सन्तो तत्थ दण्डं उप्पीळेत्वा अट्ठासि. मण्डूकोपि दण्डे ठपितेपि ¶ उप्पीळितेपि धम्मगतेन पसादेन विस्सरमकरोन्तोव कालमकासि. देवलोके निब्बत्तसत्तानं अयं धम्मता, या ‘‘कुतोहं इध निब्बत्तो, तत्थ किं नु खो कम्ममकासि’’न्ति आवज्जना. तस्मा अत्तनो पुरिमभवस्स दिट्ठत्ता आह ‘‘अरे अहम्पि नाम इध निब्बत्तो’’ति ¶ . भगवतो पादे वन्दि कतञ्ञुतासंवड्ढितेन पेमगारवबहुमानेन.

भगवा जानन्तोव महाजनस्स कम्मफलं, बुद्धानुभावञ्च पच्चक्खं कातुकामो ‘‘को मे वन्दती’’ति गाथाय पुच्छि. तत्थ कोति देवनागयक्खगन्धब्बादीसु को, कतमोति अत्थो. मेति मम. पादानीति पादे. इद्धियाति इमाय एवरूपाय देविद्धिया. ‘‘यससा’’ति इमिना एदिसेन परिवारेन, परिच्छेदेन च. जलन्ति विज्जोतमानो. अभिक्कन्तेनाति अतिविय कन्तेन कमनीयेन सुन्दरेन. वण्णेनाति छविवण्णेन सरीरवण्णनिभाय. सब्बा ओभासयं दिसाति सब्बा दसपि दिसा पभासेन्तो, चन्दो विय, सूरियो विय च एकोभासं एकालोकं करोन्तोति अत्थो.

एवं पन भगवता पुच्छितो देवपुत्तो अत्तानं पवेदेन्तो ‘‘मण्डूकोहं पुरे आसि’’न्ति गाथमाह. तत्थ पुरेति पुरिमजातियं. ‘‘उदके’’ति इदं तदा अत्तनो उप्पत्तिट्ठानदस्सनं. ‘‘उदके मण्डूको’’ति एतेन उद्धमायिकादिकस्स थले मण्डूकस्स निवत्तनं कतं होति. गावो चरन्ति एत्थाति गोचरो, गुन्नं घासेसनट्ठानं. इध पन गोचरो वियाति गोचरो, वारि उदकं गोचरो एतस्साति वारिगोचरो. उदकचारीपि हि कोचि कच्छपादि अवारिगोचरोपि होतीति ‘‘वारिगोचरो’’ति विसेसेत्वा वुत्तं. तव धम्मं सुणन्तस्साति ब्रह्मस्सरेन करवीकरुतमञ्जुना देसेन्तस्स तव धम्मं ‘‘धम्मो एसो वुच्चती’’ति सरे निमित्तग्गाहवसेन सुणन्तस्स. अनादरे चेतं सामिवचनं. अवधि वच्छपालकोति वच्छे रक्खन्तो गोपालदारको मम समीपं आगन्त्वा दण्डमोलुब्भ तिट्ठन्तो मम सीसे दण्डं सन्निरुम्भित्वा मं मारेसीति अत्थो.

सितं कत्वाति ‘‘तथा परित्ततरेनापि पुञ्ञानुभावेन एवं अतिविय उळारा लोकियलोकुत्तरा सम्पत्तियो लब्भन्ती’’ति पीतिसोमनस्सजातो भासुरतरधवलविप्फुरन्तदस्सनकिरणावलीहि भिय्योसो मत्ताय तं पदेसं ओभासेन्तो सितं कत्वा. पीतिसोमनस्सवसेन हि सो –

‘‘मुहुत्तं ¶ चित्तपसादस्स, इद्धिं पस्स यसञ्च मे;

आनुभावञ्च मे पस्स, वण्णं पस्स जुतिञ्च मे.

‘‘ये ¶ च ते दीघमद्धानं, धम्मं अस्सोसुं गोतम;

पत्ता ते अचलट्ठानं, यत्थ गन्त्वा न सोचरे’’ति. (वि. व. ८५९-८६०);

इमा द्वे गाथा वत्वा पक्कामि.

१४१. यं पन किञ्चीति एत्थ यन्ति अनियमितवचनं. तथा किञ्चीति. पनाति वचनालङ्कारमत्तं. तस्मा यं किञ्चीति ञेय्यस्स अनवसेसपरियादानं कतं होति. पनाति वा विसेसत्थदीपको निपातो. तेन ‘‘सम्मासम्बुद्धो’’ति इमिना सङ्खेपतो, वित्थारतो च सत्थु चतुसच्चाभिसम्बोधो वुत्तो. ‘‘बुद्धो’’ति पन इमिना तदञ्ञस्सपि ञेय्यस्सावबोधो. पुरिमेन वा सत्थु पटिवेधञाणानुभावो, पच्छिमेन देसनाञाणानुभावो. पीति उपरि वुच्चमानो विसेसो जोतीयति. सब्बसो पटिपक्खेहि विमुच्चतीति विमोक्खो, अग्गमग्गो. तस्स अन्तो अग्गफलं, तत्थ भवं तस्मिं लद्धे लद्धब्बतो विमोक्खन्तिकञाणं, सब्बञ्ञुतञ्ञाणेन सद्धिं सब्बम्पि बुद्धञाणं. एवं पवत्तोति एत्थ –

‘‘सब्बञ्ञुताय बुद्धो, सब्बदस्साविताय बुद्धो, अनञ्ञनेय्यताय बुद्धो, विसविताय बुद्धो, खीणासवसङ्खातेन बुद्धो, निरुपलेपसङ्खातेन बुद्धो, एकन्तवीतरागोति बुद्धो, एकन्तवीतदोसोति बुद्धो, एकन्तवीतमोहोति बुद्धो, एकन्तनिक्किलेसोति बुद्धो, एकायनमग्गं गतोति बुद्धो, एको अनुत्तरं सम्मासम्बोधिं अभिसम्बुद्धोति बुद्धो, अबुद्धिविहतत्ता बुद्धिपटिलाभा बुद्धो. बुद्धोति नेतं नामं मातरा कतं, न पितरा कतं, न भातरा कतं, न भगिनिया कतं, न मित्तामच्चेहिकतं, न ञातिसालोहितेहि कतं, न समणब्राह्मणेहि कतं, न देवताहि कतं. विमोक्खन्तिकमेतं बुद्धानं भगवन्तानं बोधिया मूले सह सब्बञ्ञुतञ्ञाणस्स पटिलाभा सच्छिका पञ्ञत्ति यदिदं बुद्धो’’ति (महानि. १९२) –

अयं ¶ निद्देसपाळिनयो. यस्मा चेत्थ तस्सा पटिसम्भिदापाळिया भेदो नत्थि, तस्मा द्वीसु एकेनापि अत्थसिद्धीति दस्सनत्थं ‘‘पटिसम्भिदानयो वा’’ति अनियमत्थो वा-सद्दो वुत्तो.

तत्थ ¶ यथा लोके अवगन्ता ‘‘अवगतो’’ति वुच्चति, एवं बुज्झिता सच्चानीति बुद्धो सुद्धकत्तुवसेन. यथा पण्णसोसा वाता ‘‘पण्णसुसा’’ति वुच्चन्ति, एवं बोधेता पजायाति बुद्धो हेतुकत्तुवसेन, हेतुअत्थो चेत्थ अन्तोनीतो.

सब्बञ्ञुताय बुद्धोति सब्बधम्मबुज्झनसमत्थाय बुद्धिया बुद्धोति अत्थो. सब्बदस्साविताय बुद्धोति सब्बधम्मानं ञाणचक्खुना दिट्ठत्ता बुद्धोति अत्थो. अनञ्ञनेय्यताय बुद्धोति अञ्ञेन अबोधनीतो सयमेव बुद्धत्ता बुद्धोति अत्थो. विसविताय बुद्धोति नानागुणविसवनतो पदुममिव विकसनट्ठेन बुद्धोति अत्थो. खीणासवसङ्खातेन बुद्धोति एवमादीहि छहि परियायेहि निद्दक्खयविबुद्धो पुरिसो विय सब्बकिलेसनिद्दक्खयविबुद्धत्ता बुद्धोति वुत्तं होति. एकायनमग्गं गतोति बुद्धोति गमनत्थानं बुद्धिअत्थताय बुद्धिअत्थानम्पि गमनत्थता लब्भतीति एकायनमग्गं गतत्ता बुद्धोति वुच्चतीति अत्थो. एको अनुत्तरं सम्मासम्बोधिं अभिसम्बुद्धोति बुद्धोति न परेहि बुद्धत्ता बुद्धो, अथ खो सयमेव अनुत्तरं सम्मासम्बोधिं अभिसम्बुद्धत्ता बुद्धोति अत्थो. अबुद्धिविहतत्ता बुद्धिपटिलाभा बुद्धोति बुद्धि बुद्धं बोधोति अनत्थन्तरं. तत्थ यथा रत्तगुणयोगतो रत्तो पटो, एवं बुद्धगुणयोगतो बुद्धोति ञापनत्थं वुत्तं. ततो परं बुद्धोति नेतं नामन्तिआदि अत्थानुगतायं पञ्ञत्तीति बोधनत्थं वुत्तन्ति एवमेत्थ इमिनापि कारणेन भगवा बुद्धोति वेदितब्बं.

१४२. अस्साति भगवतो. गुणविसिट्ठसब्बसत्तुत्तमगरुगारवाधिवचनन्ति सब्बेहि सीलादिगुणेहि विसिट्ठस्स ततो एव सब्बसत्तेहि उत्तमस्स गरुनो गारववसेन वुत्तवचनमिदं भगवाति. तथा हि लोकनाथो अपरिमितनिरुपमप्पभावसीलादिगुणविसेससमङ्गिताय सब्बानत्थपरिहारपुब्बङ्गमाय ¶ निरवसेसहितसुखविधानतप्पराय निरतिसयाय पयोगसम्पत्तिया सदेवमनुस्साय पजाय, अच्चन्तुपकारिताय च अपरिमाणासु लोकधातूसु अपरिमाणानं सत्तानं उत्तमगारवट्ठानन्ति.

भगवाति वचनं सेट्ठन्ति सेट्ठवाचकं वचनं सेट्ठगुणसहचरणतो ‘‘सेट्ठ’’न्ति वुत्तं. अथ वा वुच्चतीति वचनं, अत्थो. तस्मा यो ‘‘भगवा’’ति वचनेन वचनीयो अत्थो, सो सेट्ठोति अत्थो. भगवाति वचनमुत्तमन्ति एत्थापि एसेव नयो. गारवयुत्तोति गरुभावयुत्तो गरुगुणयोगतो, गरुकरणं वा सातिसयं अरहतीति गारवयुत्तो, गारवारहोति अत्थो.

गुणविसेसहेतुकं ¶ ‘‘भगवा’’ति इदं भगवतो नामन्ति सङ्खेपतो वुत्तमत्थं वित्थारतो विभजितुकामो नामंयेव ताव अत्थुद्धारवसेन दस्सेन्तो ‘‘चतुब्बिधं वा नाम’’न्तिआदिमाह. तत्थ आवत्थिकन्ति अवत्थाय विदितं तं तं अवत्थं उपादाय पञ्ञत्तं वोहरितं. तथा लिङ्गिकं तेन तेन लिङ्गेन वोहरितं. नेमित्तिकन्ति निमित्ततो आगतं. अधिच्चसमुप्पन्नन्ति यदिच्छाय पवत्तं, यदिच्छाय आगतं यदिच्छकं. पठमेन आदि-सद्देन बालो, युवा, वुड्ढोति एवमादिं सङ्गण्हाति, दुतियेन मुण्डी, जटीति एवमादिं, ततियेन बहुस्सुतो, धम्मकथिको, झायीति एवमादिं, चतुत्थेन अघमरिसनं पावचनन्ति एवमादिं सङ्गण्हाति. ‘‘नेमित्तिक’’न्ति वुत्तमत्थं ब्यतिरेकवसेन पतिट्ठापेतुं ‘‘न महामायाया’’तिआदि वुत्तं. ‘‘विमोक्खन्तिक’’न्ति इमिना इदं नामं अरियाय जातिया जातक्खणेयेव जातन्ति दस्सेति. यदि विमोक्खन्तिकं, अथ कस्मा अञ्ञेहि खीणासवेहि असाधारणन्ति आह ‘‘सह सब्बञ्ञुतञ्ञाणस्स पटिलाभा’’ति. बुद्धानञ्हि अरहत्तफलं निप्फज्जमानं सब्बञ्ञुतञ्ञाणादीहि सब्बेहि बुद्धगुणेहि सद्धिंयेव निप्फज्जति. तेन वुत्तं ‘‘विमोक्खन्तिक’’न्ति. सच्छिका पञ्ञत्तीति सब्बधम्मानं सच्छिकिरियानिमित्ता पञ्ञत्ति. अथ वा सच्छिका पञ्ञत्तीति पच्चक्खसिद्धा पञ्ञत्ति. यंगुणनिमित्ता हि सा, ते सत्थु पच्चक्खभूताति गुणा विय सापि सच्छिकता एव नाम होति, न परेसं वोहारमत्तेनाति अधिप्पायो.

१४३. वदन्तीति ¶ महाथेरस्स गरुभावतो बहुवचनेनाह, सङ्गीतिकारेहि वा कतमनुवादं सन्धाय. इस्सरियादिभेदो भगो अस्स अत्थीति भगी. अकासि भग्गन्ति रागादिपापधम्मं भग्गं अकासि, भग्गवाति अत्थो. बहूहि ञायेहीति कायभावनादिकेहि अनेकेहि भावनाक्कमेहि. सुभावितत्तनोति सम्मदेव भावितसभावस्स. पच्चत्ते चेतं सामिवचनं.

निद्देसे वुत्तनयेनाति एत्थायं निद्देसनयो –

‘‘भगवाति गारवाधिवचनमेतं. अपिच भग्गरागोति भगवा, भग्गदोसोति भगवा, भग्गमोहोति भगवा, भग्गमानोति भगवा, भग्गदिट्ठीति भगवा, भग्गतण्होति भगवा, भग्गकिलेसोति भगवा, भजि विभजि पविभजि धम्मरतनन्ति भगवा, भवानं अन्तकरोति भगवा, भावितकायो भावितसीलो भावितचित्तो भावितपञ्ञोति भगवा, भजि ¶ वा भगवा अरञ्ञवनपत्थानि पन्तानि सेनासनानि अप्पसद्दानि अप्पनिग्घोसानि विजनवातानि मनुस्सराहस्सेय्यकानि पटिसल्लानसारुप्पानीति भगवा, भागी वा भगवा चीवरपिण्डपातसेनासनगिलानपच्चयभेसज्जपरिक्खारानन्ति भगवा, भागी वा भगवा अत्थरसस्स धम्मरसस्स विमुत्तिरसस्स अधिसीलस्स अधिचित्तस्स अधिपञ्ञायाति भगवा, भागी वा भगवा चतुन्नं झानानं चतुन्नं अप्पमञ्ञानं चतुन्नं अरूपसमापत्तीनन्ति भगवा, भागी वा भगवा अट्ठन्नं विमोक्खानं अट्ठन्नं अभिभायतनानं नवन्नं अनुपुब्बविहारसमापत्तीनन्ति भगवा, भागी वा भगवा दसन्नं सञ्ञाभावनानं दसन्नं कसिणसमापत्तीनं आनापानस्सतिसमाधिस्स असुभसमापत्तियाति भगवा, भागी वा भगवा चतुन्नं सतिपट्ठानानं चतुन्नं सम्मप्पधानानं चतुन्नं इद्धिपादानं पञ्चन्नं इन्द्रियानं पञ्चन्नं बलानं सत्तन्नं बोज्झङ्गानं अरियस्स अट्ठङ्गिकस्स मग्गस्साति भगवा, भागी वा भगवा दसन्नं तथागतबलानं चतुन्नं वेसारज्जानं चतुन्नं पटिसम्भिदानं छन्नं अभिञ्ञानं छन्नं बुद्धधम्मानन्ति भगवा, भगवाति नेतं नामं…पे… सच्छिका पञ्ञत्ति यदिदं भगवा’’ति (महानि. ८३).

एत्थ ¶ च ‘‘गारवाधिवचन’’न्तिआदीनि यदिपि गाथायं आगतपदानुक्कमेन न निद्दिट्ठानि, यथारहं पन तेसं सब्बेसम्पि निद्देसभावेन वेदितब्बानि. तत्थ गारवाधिवचनन्ति गरूनं गरुभाववाचकं वचनं. भजीति भागसो कथेसि. तेनाह ‘‘विभजी’’ति. धम्मरतनन्ति मग्गफलादिअरियधम्मरतनं. पुन भजीति सेवि. भागीति भागधेय्यवा. पुन भागीति भजनसीलो. अत्थरसस्साति अत्थसन्निस्सयस्स रसस्स. विमुत्तायतनसीसे हि ठत्वा धम्मं कथेन्तस्स, सुणन्तस्स च तदत्थं आरब्भ उप्पज्जनकपीतिसोमनस्सं अत्थरसो. धम्मं आरब्भ धम्मरसो. यं सन्धाय वुत्तं ‘‘लभति अत्थवेदं, लभति धम्मवेद’’न्ति (अ. नि. ६.१०). विमुत्तिरसस्साति विमुत्तिभूतस्स, विमुत्तिसन्निस्सयस्स वा रसस्स. सञ्ञाभावनानन्ति अनिच्चसञ्ञादीनं दसन्नं सञ्ञाभावनानं. छन्नं बुद्धधम्मानन्ति छ असाधारणञाणानि सन्धाय वुत्तं. तत्थ तत्थ ‘‘भगवा’’ति सद्दसिद्धि निरुत्तिनयेन वेदितब्बा.

१४४. यदिपि ‘‘भाग्यवा’’तिआदीहि पदेहि वुच्चमानो अत्थो ‘‘भगी भजी’’ति निद्देसगाथाय सङ्गहितो एव, तथापि पदसिद्धि अत्थविभागअत्थयोजनादिसहितो संवण्णनानयो ततो अञ्ञाकारोति वुत्तं ‘‘अयं पन अपरो नयो’’ति. आदिकन्ति आदि-सद्देन वण्णविकारो ¶ , वण्णलोपो, धातुअत्थेन नियोजनञ्चाति इमं तिविधं लक्खणं सङ्गण्हाति. सद्दनयेनाति ब्याकरणनयेन. पिसोदरादीनं सद्दानं आकतिगणभावतो वुत्तं ‘‘पिसोदरादिपक्खेपलक्खणं गहेत्वा’’ति. पक्खिपनमेव लक्खणं. तप्परियापन्नताकरणं हि पक्खिपनं. पारप्पत्तन्ति परमुक्कंसगतं पारमिभावप्पत्तं. भाग्यन्ति कुसलं. तत्थ मग्गकुसलं लोकुत्तरसुखनिब्बत्तकं, इतरं लोकियसुखनिब्बत्तकं, इतरम्पि वा विवट्टूपनिस्सयं परियायतो लोकुत्तरसुखनिब्बत्तकं सिया.

लोभादयो एककवसेन गहिता. तथा विपरीतमनसिकारो विपल्लासभावसामञ्ञेन, अहिरिकादयो दुकवसेन. लोभादयो च पुन ‘‘तिविधाकुसलमूल’’न्ति तिकवसेन गहिता. कायदुच्चरितादि-तण्हासंकिलेसादिरागमलादिरागविसमादिकामसञ्ञादिकामवितक्कादितण्हापपञ्चादयो तिविधदुच्चरितादयो. सुभसञ्ञादिका चतुब्बिधविपरियेसा. ‘‘चीवरहेतु वा भिक्खुनो तण्हा उप्पज्जमाना उप्पज्जति, पिण्डपात ¶ , सेनासन, इतिभवाभवहेतु वा’’ति (अ. नि. ४.९) एवमागता चत्तारो तण्हुप्पादा. ‘‘बुद्धे कङ्खति, धम्मे, सङ्घे, सिक्खाय, सब्रह्मचारीसु कुपितो होति अनत्तमनो आहतचित्तो खीलजातो’’ति (दी. नि. ३.३१९; म. नि. १.१८५; अ. नि. ५.२०५; ९.७१; विभ. ९४१) एवमागतानि पञ्च चेतोखीलानि. ‘‘कामे अवीतरागो होति, काये अवीतरागो, रूपे अवीतरागो, यावदत्थं उदरावदेहकं भुञ्जित्वा सेय्यसुखं पस्ससुखं मिद्धसुखं अनुयुत्तो विहरति, अञ्ञतरं देवनिकायं पणिधाय ब्रह्मचरियं चरती’’ति (दी. नि. ३.३२०; म. नि. १.१८६) आगता पञ्च विनिबन्धा. रूपाभिनन्दनादयो पञ्चाभिनन्दना. कोधो, मक्खो, इस्सा, साठेय्यं, पापिच्छता, सन्दिट्ठिपरामासोति इमानि छ विवादमूलानि. रूपतण्हादयो छ तण्हाकाया.

कामरागपटिघदिट्ठिविचिकिच्छाभवरागमानाविज्जा सत्तानुसया. मिच्छादिट्ठिआदयो अट्ठ मिच्छत्ता. ‘‘तण्हं पटिच्च परियेसना, परियेसनं पटिच्च लाभो, लाभं पटिच्च विनिच्छयो, विनिच्छयं पटिच्च छन्दरागो, छन्दरागं पटिच्च अज्झोसानं, अज्झोसानं पटिच्च परिग्गहो, परिग्गहं पटिच्च मच्छरियं, मच्छरियं पटिच्च आरक्खा, आरक्खाधिकरणं दण्डादानादयो’’ति (दी. नि. २.१०३; ३.३५९) एते नव तण्हामूलका. चत्तारो सस्सतवादा, चत्तारो एकच्चसस्सतवादा, चत्तारो अन्तानन्तिका, चत्तारो अमराविक्खेपिका, द्वे अधिच्चसमुप्पन्निका, सोळस सञ्ञीवादा, अट्ठ असञ्ञीवादा, अट्ठ नेवसञ्ञीनासञ्ञीवादा ¶ , सत्त उच्छेदवादा, पञ्च परमदिट्ठधम्मनिब्बानवादाति एतानि द्वासट्ठि दिट्ठिगतानि. अज्झत्तिकस्स उपादाय ‘‘अस्मी’’ति होति, ‘‘इत्थस्मी’’ति, ‘‘एवस्मी’’ति, ‘‘अञ्ञथास्मी’’ति, ‘‘भविस्स’’न्ति, ‘‘इत्थं भविस्स’’न्ति, ‘‘एवं भविस्स’’न्ति, ‘‘अञ्ञथा भविस्स’’न्ति, ‘‘असस्मी’’ति, ‘‘सातस्मी’’ति, ‘‘सिय’’न्ति, ‘‘इत्थं सिय’’न्ति, ‘‘एवं सिय’’न्ति, ‘‘अञ्ञथा सिय’’न्ति, ‘‘अपाहं सिय’’न्ति, ‘‘अपाहं इत्थं सिय’’न्ति, ‘‘अपाहं एवं सिय’’न्ति, ‘‘अपाहं अञ्ञथा सिय’’न्ति होतीति अट्ठारस, बाहिरस्सुपादाय ‘‘इमिना अस्मी’’ति होति, ‘‘इमिना इत्थस्मी’’ति, ‘‘इमिना एवस्मी’’ति, ‘‘इमिना अञ्ञथास्मी’’तिआदिका (विभ. ९७५-९७६) वुत्तनया अट्ठारसाति छत्तिंस, अतीता छत्तिंस, अनागता छत्तिंस, पच्चुप्पन्ना छत्तिंसाति अट्ठसततण्हाविचरितानि.

पभेद-सद्दो ¶ पच्चेकं सम्बन्धितब्बो. तत्थायं योजना – लोभप्पभेदा दोसप्पभेदा याव अट्ठसततण्हाविचरितप्पभेदाति. सब्बानि सत्तानं दरथपरिळाहकरानि किलेसानं अनेकानि सतसहस्सानि अभञ्जीति योजना. आरम्मणादिविभागतो हि पवत्तिआकारविभागतो च अनन्तप्पभेदा किलेसाति. सङ्खेपतोति एत्थ समुच्छेदप्पहानवसेन सब्बसो अप्पवत्तिकरणेन किलेसमारं, समुदयप्पहानपरिञ्ञावसेन खन्धमारं, सहायवेकल्लकरणवसेन सब्बथा अप्पवत्तिकरणेन अभिसङ्खारमारं, बलविधमनविसयातिक्कमनवसेन देवपुत्तमच्चुमारञ्च अभञ्जि भग्गे अकासि. परिस्सयानन्ति उपद्दवानं. सम्पति, आयतिञ्च सत्तानं अनत्थावहत्ता मारणट्ठेन विबाधनट्ठेन किलेसाव मारोति किलेसमारो. वधकट्ठेन खन्धाव मारोति खन्धमारो. तथा हि वुत्तं ‘‘वधकं रूपं ‘वधकं रूप’न्ति यथाभूतं नप्पजानाती’’तिआदि (सं. नि. ३.८५). जातिजरादिमहाब्यसननिब्बत्तनेन अभिसङ्खारोव मारोति अभिसङ्खारमारो. संकिलेसनिमित्तं हुत्वा गुणमारणट्ठेन देवपुत्तोव मारोति देवपुत्तमारो. सत्तानं जीवितस्स, जीवितपरिक्खारानञ्च जानिकरणेन महाबाधरूपत्ता मच्चु एव मारोति मच्चुमारो.

सतपुञ्ञलक्खणधरस्साति अनेकसतपुञ्ञनिब्बत्तमहापुरिसलक्खणवहतो रूपकायसम्पत्ति दीपिता होति, इतरासं फलसम्पदानं मूलभावतो, अधिट्ठानभावतो च. धम्मकायसम्पत्ति दीपिता होति, पहानसम्पदापुब्बकत्ता ञाणसम्पदादीनं. भाग्यवताय लोकियानं बहुमतभावो. भग्गदोसताय परिक्खकानं बहुमतभावोति योजना. एवं इतो परेसुपि यथासङ्ख्यं योजेतब्बं. पुञ्ञवन्तं हि गहट्ठा खत्तियादयो अभिगच्छन्ति, पहीनदोसं पब्बजिततापसपरिब्बाजकादयो ¶ ‘‘दोसविनयाय धम्मं देसेती’’ति. अभिगतानञ्च नेसं कायचित्तदुक्खापनयने पटिबलभावो, आमिसदानधम्मदानेहि उपकारसब्भावतो. रूपकायं तस्स पसादचक्खुना, धम्मकायं पञ्ञाचक्खुना दिस्वा दुक्खद्वयस्स पटिप्पस्सम्भनतो उपगतानञ्च तेसं आमिसदानधम्मदानेहि उपकारिता, ‘‘पुब्बे आमिसदानधम्मदानेहि मया अयं ¶ लोकग्गभावो अधिगतो, तस्मा तुम्हेहिपि एवमेव पटिपज्जितब्ब’’न्ति एवं सम्मापटिपत्तियं नियोजनेन अभिगतानं लोकियलोकुत्तरसुखेहि संयोजनसमत्थता च दीपिता होति.

सकचित्ते इस्सरियं अत्तनो चित्तस्स वसीभावापादनं, येन पटिक्कूलादीसु अप्पटिक्कूलसञ्ञितादिविहारसिद्धि, अधिट्ठानिद्धिआदिको इद्धिविधोपि चित्तिस्सरियमेव चित्तभावनाय वसीभावप्पत्तिया इज्झनतो. अणिमालघिमादिकन्ति आदि-सद्देन महिमा पत्ति पाकम्मं ईसिता वसिता यत्थकामावसायिताति इमे छपि सङ्गहिता. तत्थ कायस्स अणुभावकरणं अणिमा. लहुभावो लघिमा आकासे पदसा गमनादिना. महत्तं महिमा कायस्स महन्ततापादनं. इट्ठदेसप्पत्ति पत्ति. अधिट्ठानादिवसेन इच्छितनिप्फादनं पाकम्मं. सयंवसिता इस्सरभावो ईसिता. इद्धिविधे वसीभावो वसिता. आकासेन वा गच्छतो, अञ्ञं वा किञ्चि करोतो यत्थ कत्थचि वोसानप्पत्ति यत्थकामावसायिता. ‘‘कुमारकरूपादिदस्सन’’न्तिपि वदन्ति. एवमिदं अट्ठविधं लोकियसम्मतं इस्सरियं. तं पन भगवतो इद्धिविधन्तोगधं, अनञ्ञसाधारणञ्चाति आह ‘‘सब्बाकारपरिपूरं अत्थी’’ति.

केसञ्चि पदेसवुत्ति, अयथाभूतगुणसन्निस्सयत्ता अपरिसुद्धो च यसो होति, न एवं तथागतस्साति दस्सेतुं ‘‘लोकत्तयब्यापको’’तिआदि वुत्तं. तत्थ इध अधिगतसत्थुगुणानं आरुप्पे उप्पन्नानं ‘‘इतिपि सो भगवा’’तिआदिना भगवतो गुणे अनुस्सरन्तानं यसो पाकटो होतीति आह ‘‘लोकत्तयब्यापको’’ति. यथाभुच्चगुणाधिगतत्ता एव अतिविय परिसुद्धो. अनवसेसलक्खणानुब्यञ्जनादिसम्पत्तिया सब्बाकारपरिपूरा. सब्बङ्गपच्चङ्गसिरी सब्बेसं अङ्गपच्चङ्गानं सोभा. ‘‘तिण्णो तारेय्य’’न्तिआदिना यं यं एतेन लोकनाथेन इच्छितं मनोवचीपणिधानवसेन, पत्थितं कायपणिधानवसेन. तथेवाति पणिधानानुरूपमेव. वीरियपारमिभावप्पत्तो, अरियमग्गपरियापन्नो च सम्मावायामसङ्खातो पयत्तो.

भेदेहीति सब्बत्तिकदुकपदसंहितेहि पभेदेहि. पटिच्चसमुप्पादादीहीति आदि-सद्देन न केवलं ¶ विभङ्गपाळियं आगता सतिपट्ठानादयोव सङ्गहिता, अथ खो सङ्गहादयो, समयविमुत्तादयो, ठपनादयो ¶ , तिकपट्ठानादयो च सङ्गहिताति वेदितब्बं. दुक्खसच्चस्स पीळनट्ठो तंसमङ्गिनो सत्तस्स हिंसनं अविप्फारिकताकरणं. सङ्खतट्ठो समेच्चसम्भूयपच्चयेहि कतभावो. सन्तापट्ठो दुक्खदुक्खतादीहि सन्तप्पनं परिदहनं. विपरिणामट्ठो जराय, मरणेन चाति द्विधा विपरिणामेतब्बता. समुदयस्स आयूहनट्ठो दुक्खस्स निब्बत्तनवसेन सम्पिण्डनं. निदानट्ठो ‘‘इदं तं दुक्ख’’न्ति निददन्तस्स विय समुट्ठापनं. संयोगट्ठो संसारदुक्खेन संयोजनं. पलिबोधट्ठो मग्गाधिगमस्स निवारणं. निरोधस्स निस्सरणट्ठो सब्बूपधीनं पटिनिस्सग्गसभावत्ता ततो विनिस्सटता, तन्निस्सरणनिमित्तता वा. विवेकट्ठो सब्बसङ्खारविसंयुत्तता. असङ्खतट्ठो केनचिपि पच्चयेन अनभिसङ्खतता. अमतट्ठो निच्चसभावत्ता मरणाभावो, सत्तानं मरणाभावहेतुता वा. मग्गस्स निय्यानट्ठो वट्टदुक्खतो निग्गमनट्ठो. हेतुअत्थो निब्बानस्स सम्पापकभावो. दस्सनट्ठो अच्चन्तसुखुमस्स निब्बानस्स सच्छिकरणं. आधिपतेय्यट्ठो चतुसच्चदस्सने सम्पयुत्तानं आधिपच्चकरणं, आरम्मणाधिपतिभावो वा विसेसतो मग्गाधिपतिवचनतो. सतिपि हि झानादीनं आरम्मणाधिपतिभावे ‘‘झानाधिपतिनो धम्मा’’ति एवमादिं अवत्वा ‘‘मग्गाधिपतिनो धम्मा’’ इच्चेव वुत्तं, तस्मा विञ्ञायति ‘‘अत्थि मग्गस्स आरम्मणाधिपतिभावे विसेसो’’ति. एते च पीळनादयो सोळसाकारा नाम. कस्मा पनेत्थ अञ्ञेसु रोगगण्ठादिआकारेसु विज्जमानेसु एतेव परिग्गय्हन्तीति? सलक्खणतो च सच्चन्तरदस्सनतो च आविभावतो. स्वायमत्थो परतो सच्चकथायमेव आवि भविस्सति.

दिब्बविहारो कसिणादिआरम्मणानि रूपावचरज्झानानि. मेत्तादिज्झानानि ब्रह्मविहारो. फलसमापत्ति अरियविहारो. कामेहि विवेकट्ठकायतावसेन एकीभावो कायविवेको. पठमज्झानादिना नीवरणादीहि विवित्तचित्तता चित्तविवेको. उपधिविवेको निब्बानं. अञ्ञेति लोकियाभिञ्ञादिके.

किलेसाभिसङ्खारवसेन भवेसु परिब्भमनं, सो च तण्हाप्पधानोति वुत्तं ‘‘तण्हासङ्खातं गमन’’न्ति. वन्तन्ति अरियमग्गमुखेन उग्गिरितं पुन अपच्चावमनवसेन छड्डितं. भगवाति वुच्चति निरुत्तिनयेनाति दस्सेन्तो आह ‘‘यथा…पे… मेखला’’ति.

अपरो ¶ ¶ नयो – भागवाति भगवा, भतवाति भगवा, भागे वनीति भगवा, भगे वनीति भगवा, भत्तवाति भगवा, भगे वमीति भगवा. भागे वमीति भगवा.

भागवा भतवा भागे, भगे च वनि भत्तवा;

भगे वमि तथा भागे, वमीति भगवा जिनो.

तत्थ कथं भागवाति भगवा? ये ते सीलादयो धम्मक्खन्धा गुणकोट्ठासा, ते अनञ्ञसाधारणा निरतिसया तथागतस्स अत्थि उपलब्भन्ति. तथा हिस्स सीलं समाधि पञ्ञा विमुत्ति विमुत्तिञाणदस्सनं, हिरी ओत्तप्पं, सद्धा वीरियं, सति सम्पजञ्ञं, सीलविसुद्धि दिट्ठिविसुद्धि, समथो विपस्सना, तीणि कुसलमूलानि, तीणि सुचरितानि, तयो सम्मावितक्का, तिस्सो अनवज्जसञ्ञा, तिस्सो धातुयो, चत्तारो सतिपट्ठाना, चत्तारो सम्मप्पधाना, चत्तारो इद्धिपादा, चत्तारो अरियमग्गा, चत्तारि अरियफलानि, चतस्सो पटिसम्भिदा, चतुयोनिपरिच्छेदकञाणानि, चत्तारो अरियवंसा, चत्तारि वेसारज्जञाणानि, पञ्च पधानियङ्गानि, पञ्चङ्गिको सम्मासमाधि, पञ्चञाणिको सम्मासमाधि, पञ्चिन्द्रियानि, पञ्च बलानि, पञ्च निस्सारणीया धातुयो, पञ्च विमुत्तायतनञाणानि, पञ्च विमुत्तिपरिपाचनीया सञ्ञा, छ अनुस्सतिट्ठानानि, छ गारवा, छ निस्सारणीया धातुयो, छ सततविहारा, छ अनुत्तरियानि, छ निब्बेधभागिया सञ्ञा, छ अभिञ्ञा, छ असाधारणञाणानि, सत्त अपरिहानिया धम्मा, सत्त अरियधम्मा, सत्त अरियधनानि, सत्त बोज्झङ्गा, सत्त सप्पुरिसधम्मा, सत्त निज्जरवत्थूनि, सत्त सञ्ञा, सत्तदक्खिणेय्यपुग्गलदेसना, सत्तविञ्ञाणट्ठितिदेसना, सत्तखीणासवबलदेसना, अट्ठपञ्ञापटिलाभहेतुदेसना, अट्ठ सम्मत्तानि, अट्ठलोकधम्मातिक्कमा, अट्ठ आरम्भवत्थूनि, अट्ठअक्खणदेसना, अट्ठ महापुरिसवितक्का, अट्ठअभिभायतनदेसना, अट्ठ विमोक्खा, नव योनिसोमनसिकारमूलका धम्मा, नव पारिसुद्धिपधानियङ्गानि, नवसत्तावासदेसना, नव आघातपटिविनया, नव सञ्ञा, नव नानत्ता, नव अनुपुब्बविहारा, दस नाथकारणा धम्मा, दस कसिणायतनानि, दस कुसलकम्मपथा, दस सम्मत्तानि, दस अरियवासा, दस असेक्खधम्मा, दस तथागतबलानि, एकादस मेत्तानिसंसा, द्वादस ¶ धम्मचक्काकारा, तेरस धुतगुणा, चुद्दस बुद्धञाणानि, पञ्चदस विमुत्तिपरिपाचनीया धम्मा, सोळसविधा आनापानस्सति, सोळस अपरन्तपनीया धम्मा, अट्ठारस बुद्धधम्मा, एकूनवीसति पच्चवेक्खणञाणानि, चतुचत्तालीस ञाणवत्थूनि ¶ , पञ्ञास उदयब्बयञाणानि, परोपञ्ञास कुसलधम्मा, सत्तसत्ततिञाणवत्थूनि, चतुवीसतिकोटिसतसहस्ससमापत्तिसञ्चारिमहावजिरञाणं, अनन्तनयसमन्तपट्ठानपविचयपच्चवेक्खणदेसनाञाणानि, तथा अनन्तासु लोकधातूसु अनन्तानं सत्तानं आसयादिविभावनञाणानि चाति एवमादयो अनन्तापरिमाणभेदा अनञ्ञसाधारणा निरतिसया गुणभागा गुणकोट्ठासा संविज्जन्ति उपलब्भन्ति. तस्मा यथावुत्तविभागा गुणभागा अस्स अत्थीति भागवाति वत्तब्बे आ-कारस्स रस्सत्तं कत्वा ‘‘भगवा’’ति वुत्तो. एवं ताव भागवाति भगवा.

यस्मा सीलादयो सब्बे, गुणभागा असेसतो;

विज्जन्ति सुगते तस्मा, ‘‘भगवा’’ति पवुच्चति.

कथं भतवाति भगवा? ये ते सब्बलोकहिताय उस्सुक्कमापन्नेहि मनुस्सत्तादिके अट्ठ धम्मे समोधानेत्वा सम्मासम्बोधिया कतमहाभिनीहारेहि महाबोधिसत्तेहि परिपूरेतब्बा दानपारमी, सीलनेक्खम्मपञ्ञावीरियखन्तिसच्चअधिट्ठानमेत्ताउपेक्खापारमीति दस पारमियो, दस उपपारमियो, दस परमत्थपारमियोति समतिंस पारमियो, दानादीनि चत्तारि सङ्गहवत्थूनि, सच्चादीनि चत्तारि अधिट्ठानानि, अत्तपरिच्चागो, नयन, धन, रज्ज, पुत्तदारपरिच्चागोति पञ्च महापरिच्चागा, पुब्बयोगो, पुब्बचरिया, धम्मक्खानं, ञातत्थचरिया, लोकत्थचरिया, बुद्धत्थचरियाति एवमादयो, सङ्खेपतो वा सब्बे पुञ्ञसम्भारञाणसम्भारबुद्धकारकधम्मा, ते महाभिनीहारतो पट्ठाय कप्पानं सतसहस्साधिकानि चत्तारि असङ्ख्येयानि यथा हानभागिया, संकिलेसभागिया, ठितिभागिया वा न होन्ति, अथ खो उत्तरुत्तरि विसेसभागियाव होन्ति, एवं सक्कच्चं निरन्तरं अनवसेसतो भता सम्भता अस्स अत्थीति भतवाति वत्तब्बे ‘‘भगवा’’ति वुत्तो निरुत्तिनयेन त-कारस्स ग-कारं कत्वा. अथ वा भतवाति तेयेव यथावुत्ते बुद्धकारकधम्मे वुत्तनयेन भरि सम्भरि, परिपूरेसीति अत्थो. एवम्पि भतवाति भगवा.

सम्मासम्बोधिया ¶ सब्बे, दानपारमिआदिके;

सम्भारे भतवा नाथो, तस्मापि भगवा मतो.

कथं ¶ भागे वनीति भगवा? ये ते चतुवीसतिकोटिसतसहस्ससङ्खा देवसिकं वळञ्जनकसमापत्तिभागा, ते अनवसेसतो लोकहितत्थं, अत्तनो च दिट्ठधम्मसुखविहारत्थं निच्चकप्पं निच्चकप्पं वनि भजि सेवि बहुलमकासीति भागे वनीति भगवा. अथ वा अभिञ्ञेय्यधम्मेसु, कुसलादीसु, खन्धादीसु च ये ते परिञ्ञेय्यादिवसेन सङ्खेपतो वा चतुब्बिधा अभिसमयभागा, वित्थारतो पन ‘‘चक्खुं परिञ्ञेय्यं…पे… जरामरणं परिञ्ञेय्य’’न्तिआदिना अनेकपरिञ्ञेय्यभागा, ‘‘चक्खुस्स समुदयो पहातब्बो…पे… जरामरणस्स समुदयो पहातब्बो’’तिआदिना पहातब्बभागा, ‘‘चक्खुस्स निरोधो…पे… जरामरणस्स निरोधो सच्छिकातब्बो’’तिआदिना (पटि. म. १.२१) सच्छिकातब्बभागा, ‘‘चक्खुस्स निरोधगामिनी पटिपदा’’तिआदिना, ‘‘चत्तारो सतिपट्ठाना’’तिआदिना च अनेकभेदा भावेतब्बभागा च धम्मा, ते सब्बे वनि भजि यथारहं गोचरभावनासेवनानं वसेन सेवि. एवम्पि भागे वनीति भगवा. अथ वा ये इमे सीलादयो धम्मक्खन्धा सावकेहि साधारणा गुणकोट्ठासा गुणभागा, ‘‘किन्ति नु खो ते वेनेय्यसन्तानेसु पतिट्ठपेय्य’’न्ति महाकरुणाय वनि अभिपत्थयि, सा चस्स अभिपत्थना यथाधिप्पेतफलावहा अहोसि. एवम्पि भागे वनीति भगवा.

यस्मा ञेय्यसमापत्ति-गुणभागे तथागतो;

भजि पत्थयि सत्तानं, हिताय भगवा ततो.

कथं भगे वनीति भगवा? समासतो ताव कतपुञ्ञेहि पयोगसम्पन्नेहि यथाविभवं भजीयन्तीति भगा, लोकियलोकुत्तरसम्पत्तियो. तत्थ लोकिये ताव तथागतो सम्बोधितो पुब्बे बोधिसत्तभूतो परमुक्कंसगते वनि भजि सेवि, यत्थ पतिट्ठाय निरवसेसतो बुद्धकारकधम्मे समन्नानेन्तो बुद्धधम्मे परिपाचेसि. बुद्धभूतो ¶ पन ते निरवज्जसुखूपसंहिते अनञ्ञसाधारणे लोकुत्तरेपि वनि भजि सेवि. वित्थारतो पन पदेसरज्जइस्सरियचक्कवत्तिसम्पत्तिदेवरज्जसम्पत्तिआदिवसेन, झानविमोक्खसमाधिसमापत्तिञाणदस्सनमग्गभावनाफलसच्छिकिरियादिउत्तरिमनुस्सधम्मवसेन च अनेकविहिते अनञ्ञसाधारणे भगे वनि भजि सेवि. एवम्पि भगे वनीति भगवा.

या ¶ ता सम्पत्तियो लोके, या च लोकुत्तरा पुथू;

सब्बा ता भजि सम्बुद्धो, तस्मापि भगवा मतो.

कथं भत्तवाति भगवा? भत्ता दळ्हभत्तिका अस्स बहू अत्थीति भत्तवा. तथागतो हि महाकरुणासब्बञ्ञुतञ्ञाणादिअपरिमितनिरुपमप्पभावगुणविसेससमङ्गि भावतो सब्बसत्तुत्तमो सब्बानत्थपरिहारपुब्बङ्गमाय निरवसेसहितसुखविधानतप्पराय निरतिसयाय पयोगसम्पत्तिया सदेवमनुस्साय पजाय अच्चन्तुपकारिताय द्वत्तिंसमहापुरिसलक्खणअसीतिअनुब्यञ्जनब्यामप्पभादिअनञ्ञसाधारणगुणविसेसपटिमण्डितरूपकायताय यथाभुच्चगुणाधिगतेन ‘‘इतिपि सो भगवा’’तिआदिनयप्पवत्तेन लोकत्तयब्यापिनासुविपुलेन, सुविसुद्धेन च थुतिघोसेन समन्नागतत्ता, उक्कंसपारमिप्पत्तासु अप्पिच्छतासन्तुट्ठिआदीसु सुपतिट्ठितभावतो, दसबलचतुवेसारज्जादिनिरतिसयगुणविसेससमङ्गिभावतो च ‘‘रूपप्पमाणो रूपप्पसन्नो, घोसप्पमाणो घोसप्पसन्नो, लूखप्पमाणो लूखप्पसन्नो, धम्मप्पमाणो धम्मप्पसन्नो’’ति एवं चतुप्पमाणिके लोकसन्निवासे सब्बथापि पसादावहभावेन समन्तपासादिकत्ता अपरिमाणानं सत्तानं सदेवमनुस्सानं आदरबहुमानगारवायतनताय परमपेमसम्भत्तिट्ठानं. ये तस्स ओवादे पतिट्ठिता अवेच्चप्पसादेन समन्नागता होन्ति, केनचि असंहारिया तेसं सम्भत्ति समणेन वा ब्राह्मणेन वा देवेन वा मारेन वा ब्रह्मुना वाति. तथा हि ते अत्तनो जीवितपरिच्चागेपि तत्थ पसादं न परिच्चजन्ति, तस्स वा आणं दळ्हभत्तिभावतो. तेनेवाह –

‘‘यो वे कतञ्ञू कतवेदि धीरो,

कल्याणमित्तो दळ्हभत्ति च होती’’ति. (जा. २.१७.७८);

‘‘सेय्यथापि ¶ , भिक्खवे, महासमुद्दो ठितधम्मो वेलं नातिवत्तति, एवमेव खो, भिक्खवे, यं मया सावकानं सिक्खापदं पञ्ञत्तं, तं मम सावका जीवितहेतुपि नातिक्कमन्ती’’ति (उदा. ४५; चूळव. ३८५) च.

एवं भत्तवाति भगवा निरुत्तिनयेन एकस्स त-कारस्स लोपं कत्वा इतरस्स ग-कारं कत्वा.

गुणातिसययुत्तस्स ¶ , यस्मा लोकहितेसिनो;

सम्भत्ता बहवो सत्थु, भगवा तेन वुच्चति.

कथं भगे वमीति भगवा? यस्मा तथागतो बोधिसत्तभूतोपि पुरिमासु जातीसु पारमियो पूरेन्तो भगसङ्खातं सिरिं, इस्सरियं, यसञ्च वमि उग्गिरि खेळपिण्डं विय अनपेक्खो छड्डयि. तथा हिस्स सोमनस्सकुमारकाले (जा. १.१५.२११ आदयो) हत्थिपालकुमारकाले (जा. १.१५.३३७ आदयो) अयोघरपण्डितकाले (जा. १.१५.३६३ आदयो) मूगपक्खपण्डितकाले (जा. २.२२.१ आदयो) चूळसुतसोमकालेति (जा. २.१७.१९५ आदयो) एवमादीसु नेक्खम्मपारमिपूरणवसेन देवरज्जसदिसाय रज्जसिरिया परिच्चत्तअत्तभावानं परिमाणं नत्थि. चरिमत्तभावेपि हत्थगतं चक्कवत्तिसिरिं देवलोकाधिपच्चसदिसं चतुदीपिस्सरियं, चक्कवत्तिसम्पत्तिसन्निस्सयं सत्तरतनसमुज्जलं यसञ्च तिणायपि अमञ्ञमानो निरपेक्खो पहाय अभिनिक्खमित्वा सम्मासम्बोधिं अभिसम्बुद्धो, तस्मा इमे सिरिआदिके भगे वमीति भगवा. अथ वा भानि नाम नक्खत्तानि, तेहि समं गच्छन्ति पवत्तन्तीति भगा, सिनेरुयुगन्धरउत्तरकुरुहिमवन्तादिभाजनलोकविसेससन्निस्सया सोभा कप्पट्ठियभावतो. तेपि भगवा वमि तन्निवाससत्तावाससमतिक्कमनतो तप्पटिबद्धछन्दरागप्पहानेन पजहीति. एवम्पि भगे वमीति भगवा.

चक्कवत्तिसिरिं यस्मा, यसं इस्सरियं सुखं;

पहासि लोकचित्तञ्च, सुगतो भगवा ततो.

कथं भागे वमीति भगवा? भागा नाम सभावधम्मकोट्ठासा, ते खन्धायतनधातादिवसेन, तत्थापि रूपवेदनादिवसेन, अतीतादिवसेन च अनेकविधा, ते च भगवा ‘‘सब्बं पपञ्चं, सब्बं योगं, सब्बं ¶ गन्थं, सब्बं संयोजनं समुच्छिन्दित्वा अमतं धातुं समधिगच्छन्तो वमि उग्गिरि अनपेक्खो छड्डयि न पच्चावमि. तथा हेस सब्बत्थकमेव पथविं आपं तेजं वायं, चक्खुं सोतं घानं जिव्हं कायं मनं, रूपे सद्दे गन्धे रसे फोट्ठब्बे धम्मे, चक्खुविञ्ञाणं…पे… मनोविञ्ञाणं, चक्खुसम्फस्सं…पे… मनोसम्फस्सं, चक्खुसम्फस्सजं वेदनं…पे… मनोसम्फस्सजं वेदनं, चक्खुसम्फस्सजं सञ्ञं…पे… मनोसम्फस्सजं सञ्ञं, चक्खुसम्फस्सजं चेतनं…पे… मनोसम्फस्सजं चेतनं, रूपतण्हं ¶ …पे… धम्मतण्हं, रूपवितक्कं…पे… धम्मवितक्कं, रूपविचारं…पे… धम्मविचार’’न्तिआदिना अनुपदधम्मविभागवसेनपि सब्बेव धम्मकोट्ठासे अनवसेसतो वमि उग्गिरि अनपेक्खपरिच्चागेन छड्डयि. वुत्तं हेतं –

‘‘यं तं, आनन्द, चत्तं वन्तं मुत्तं पहीनं पटिनिस्सट्ठं, तं तथागतो पुन पच्चावमिस्सतीति नेतं ठानं विज्जती’’ति (दी. नि. २.१८३).

एवम्पि भागे वमीति भगवा. अथ वा भागे वमीति सब्बेपि कुसलाकुसले सावज्जानवज्जे हीनपणीते कण्हसुक्कसप्पटिभागे धम्मे अरियमग्गञाणमुखेन वमि उग्गिरि अनपेक्खो परिच्चजि पजहि, परेसञ्च तथत्ताय धम्मं देसेसि. वुत्तम्पि चेतं –

‘‘धम्मापि वो, भिक्खवे, पहातब्बा, पगेव अधम्मा (म. नि. १.२४०). कुल्लूपमं वो, भिक्खवे, धम्मं देसेस्सामि नित्थरणत्थाय, नो गहणत्थाया’’तिआदि (म. नि. १.२४०).

एवम्पि भागे वमीति भगवा.

खन्धायतनधातादि-धम्मभेदा महेसिना;

कण्हा सुक्का यतो वन्ता, ततोपि भगवा मतो.

तेन वुत्तं –

‘‘भागवा भतवा भागे, भगे च वनि भत्तवा;

भगे वमि तथा भागे, वमीति भगवा जिनो’’ति.

एत्थ च यस्मा सङ्खेपतो अत्तहितसम्पत्तिपरहितपटिपत्तिवसेन दुविधा बुद्धगुणा, तासु अत्तहितसम्पत्ति पहानसम्पदाञाणसम्पदाभेदतो दुविधा, आनुभावसम्पदादीनं तदविनाभावेन तदन्तोगधत्ता. परहितपटिपत्ति पयोगासयभेदतो ¶ दुविधा. तत्थ पयोगतो लाभसक्कारादिनिरपेक्खचित्तस्स सब्बदुक्खनिय्यानिकधम्मूपदेसो, आसयतो पटिविरुद्धेसुपि निच्चं हितेसिता, ञाणपरिपाककालागमनादिपरहितपटिपत्ति च, आमिसपटिग्गहणादिनापि अत्थचरिया ¶ परहितपटिपत्ति होतियेव. तस्मा तेसं विभावनवसेन पाळियं ‘‘अरह’’न्तिआदीनं पदानं गहणं वेदितब्बं.

तत्थ ‘‘अरह’’न्ति इमिना पदेन पहानसम्पदावसेन भगवतो अत्तहितसम्पत्ति विभाविता. ‘‘सम्मासम्बुद्धो, लोकविदू’’ति च इमेहि पदेहि ञाणसम्पदावसेन. ननु च ‘‘लोकविदू’’ति इमिनापि सम्मासम्बुद्धता विभावीयतीति? सच्चं विभावीयति, अत्थि पन विसेसो, ‘‘सम्मासम्बुद्धो’’ति इमिना सब्बञ्ञुतञ्ञाणानुभावो विभावितो, ‘‘लोकविदू’’ति पन इमिना आसयानुसयञाणादीनम्पि आनुभावो विभावितोति. ‘‘विज्जाचरणसम्पन्नो’’ति इमिना सब्बापि भगवतो अत्तहितसम्पत्ति विभाविता. ‘‘सुगतो’’ति पन इमिना समुदागमतो पट्ठाय भगवतो अत्तहितसम्पत्ति, परहितपटिपत्ति च विभाविता. ‘‘अनुत्तरो पुरिसदम्मसारथि सत्था देवमनुस्सान’’न्ति इमेहि पदेहि भगवतो परहितपटिपत्ति विभाविता. ‘‘बुद्धो’’ति इमिना भगवतो अत्तहितसम्पत्ति, परहितपटिपत्ति च विभाविता. एवञ्च कत्वा ‘‘सम्मासम्बुद्धो’’ति वत्वा ‘‘बुद्धो’’ति वचनं समत्थितं होति. तेनेवाह ‘‘अत्तनापि बुज्झि अञ्ञेपि सत्ते बोधेसी’’तिआदि. ‘‘भगवा’’ति च इमिनापि समुदागमतो पट्ठाय भगवतो सब्बा अत्तहितसम्पत्ति, परहितपटिपत्ति च विभाविता.

अपरो नयो – हेतुफलसत्तूपकारवसेन सङ्खेपतो तिविधा बुद्धगुणा. तत्थ ‘‘अरहं सम्मासम्बुद्धो विज्जाचरणसम्पन्नो लोकविदू’’ति इमेहि पदेहि फलसम्पत्तिवसेन बुद्धगुणा विभाविता. ‘‘अनुत्तरो पुरिसदम्मसारथि सत्था देवमनुस्सान’’न्ति इमेहि सत्तूपकारवसेन बुद्धगुणा पकासिता. ‘‘बुद्धो’’ति इमिना फलवसेन, सत्तूपकारवसेन च बुद्धगुणा विभाविता. ‘‘सुगतो भगवा’’ति पन इमेहि पदेहि हेतुफलसत्तूपकारवसेन बुद्धगुणा विभाविताति वेदितब्बं.

१४५. तस्साति ¶ बुद्धानुस्सतिकम्मट्ठानिकस्स योगिनो. एवन्ति ‘‘तत्रायं नयो’’तिआदिना वुत्तप्पकारेन. तस्मिं समयेति बुद्धगुणानुस्सरणसमये. रागपरियुट्ठितन्ति रागेन परियुट्ठितं, परियुट्ठानप्पत्तेहि रागेहि सहितं चित्तं अरञ्ञमिव चोरेहि तेन परियुट्ठितन्ति वुत्तं, तस्स परियुट्ठानट्ठानभावतो, परियुट्ठितरागन्ति अत्थो. यं वा रागस्स परियुट्ठानं, तं तंसहिते चित्ते उपचरितन्ति दट्ठब्बं. एतस्मिं पक्खे रागेनाति रागेन हेतुनाति ¶ अत्थो. उजुगतमेवाति पगेव कायवङ्कादीनं अपनीतत्ता, चित्तस्स च अनुजुभावकरानं मायादीनं अभावतो, रागादिपरियुट्ठानाभावेन वा ओनतिउन्नतिविरहतो उजुभावमेव कतं. अथ वा उजुगतमेवाति कम्मट्ठानस्स वीथिं ओतिण्णताय लीनुद्धच्चविगमनतो मज्झिमसमथनिमित्तपटिपत्तिया उजुभावमेव गतं. तथागतं आरब्भाति तथागतगुणे आरम्मणं कत्वा.

इच्चस्साति इति अस्स. ‘‘सो भगवा इतिपि अरह’’न्तिआदिना पुब्बे वुत्तप्पकारेन बुद्धगुणे अनुवितक्कयतोति सम्बन्धो. एवन्ति ‘‘नेव तस्मिं समये’’तिआदिना वुत्तनयेन. बुद्धगुणपोणाति बुद्धगुणनिन्ना. ‘‘वितक्कविचारा पवत्तन्ती’’ति एतेन बुद्धगुणसङ्खातं कम्मट्ठानं वितक्काहतं, वितक्कपरियाहतं, पुनप्पुनं अनुमज्जनञ्च करोतीति दस्सेति. पीति उप्पज्जतीति भावनावसेन उपचारज्झाननिप्फादिका बलवती पीति उप्पज्जति. पीतिमनस्स वुत्तप्पकारपीतिसहितचित्तस्स. कायचित्तदरथाति कायचित्तपस्सद्धीनं पटिपक्खभूता सुखुमावत्था उद्धच्चसहगता किलेसा. पटिप्पस्सम्भन्तीति सन्निसीदन्ति. अनुक्कमेन एकक्खणेति यदा बुद्धगुणारम्मणा भावना उपरूपरि विसेसं आवहन्ती पवत्तति, तदा नीवरणानि विक्खम्भितानेव होन्ति, किलेसा सन्निसिन्नाव होन्ति, सुविसदानि सद्धादीनि इन्द्रियानि होन्ति, भावनाय पगुणताय वितक्कविचारा सातिसयं पटुकिच्चाव होन्ति, बलवती पीति उप्पज्जति, पीतिपदट्ठाना पस्सद्धि सविसेसा जायति, पस्सद्धकायस्स समाधिपदट्ठानं सुखं थिरतरं हुत्वा पवत्तति, सुखेन अनुब्रूहितं चित्तं कम्मट्ठाने सम्मदेव समाधियति. एवं अनुक्कमेन पुब्बभागे वितक्कादयो उपरूपरि पटुपटुतरभावेन पवत्तित्वा भावनाय मज्झिमसमथपटिपत्तिया इन्द्रियानञ्च एकरसभावेन पटुतमानि हुत्वा एकक्खणे झानङ्गानि उप्पज्जन्ति. यं सन्धाय वुत्तं भगवता –

‘‘यस्मिं ¶ , महानाम, समये अरियसावको तथागतं अनुस्सरति, नेवस्स तस्मिं समये रागपरियुट्ठितं चित्तं होति…पे… सुखिनो चित्तं समाधियती’’ति (अ. नि. ६.१०).

कस्मा पनेत्थ झानं अप्पनापत्तं न होतीति आह ‘‘बुद्धगुणानं पन गम्भीरताया’’तिआदि. गम्भीरे हि आरम्मणे गम्भीरे उदके पतितनावा विय समथभावना पतिट्ठं ¶ न लभति, ‘‘गम्भीरताया’’ति च इमिना सभावधम्मतापि सङ्गहिता. सभावधम्मो हि गम्भीरो न पञ्ञत्ति. ननु च तज्जापञ्ञत्तिवसेन सभावधम्मो गय्हतीति? सच्चं गय्हति पुब्बभागे, भावनाय पन वड्ढमानाय पञ्ञत्तिं समतिक्कमित्वा सभावेयेव चित्तं तिट्ठति. ननु च सभावधम्मेपि कत्थचि अप्पना समिज्झति दुतियारुप्पज्झानादीति? सच्चं समिज्झति, तञ्च खो एकप्पकारे आरम्मणे, इदं पन नानप्पकारन्ति दस्सेन्तो ‘‘नानप्पकारगुणानुस्सरणाधिमुत्तताया’’ति आह. एवम्पि यथा नानप्पकारेसु केसादिकोट्ठासेसु मनसिकारं पवत्तेन्तस्स एकस्मिंयेव कोट्ठासे अप्पनावसेन भावना अवतिट्ठति, एवमिध कस्मा न होतीति? विसमोयं उपञ्ञासो. तत्थ हि सतिपि कोट्ठासबहुभावे एकप्पकारेनेव भावना वत्तति पटिक्कूलाकारस्सेव गहणतो, इध पन नानप्पकारेन गुणानं नानप्पकारत्ता, न अयमेकस्मिंयेव गुणे ठातुं सक्कोति भावनाबलेन पच्चक्खतो बुद्धगुणेसु उपट्ठहन्तेसु सद्धाय बलवभावतो. तेनेव हि ‘‘अधिमुत्तताया’’ति वुत्तं. यदि उपचारप्पत्तं झानं होति, कथं बुद्धानुस्सतीति वुत्तन्ति आह ‘‘तदेत’’न्तिआदि.

सगारवो होति सप्पतिस्सो, सत्थु गुणसरीरस्स पच्चक्खतो उपट्ठहनतो. ततोयेव सद्धावेपुल्लं अवेच्चप्पसादसदिसं सद्धामहत्तं. बुद्धगुणानं अनुस्सरणवसेन भावनाय पवत्तत्ता सतिवेपुल्लं. तेसं परमगम्भीरताय, नानप्पकारताय च पञ्ञावेपुल्लं. तेसं उळारपुञ्ञक्खेत्तताय पुञ्ञवेपुल्लञ्च अधिगच्छति. पीतिपामोज्जबहुलो होति पीतिसम्बोज्झङ्गट्ठानीयत्ता बुद्धानुस्सतिया. भयभेरवसहो बुद्धगुणारम्मणाय सतिया भयभेरवाभिभवनतो. तेनाह भगवा ‘‘अनुस्सरेथ सम्बुद्धं, भयं तुम्हाक नो सिया’’ति (सं. नि. १.२४९ थोकं विसदिसं). दुक्खाधिवासनसमत्थो बुद्धानुस्सतिया सरीरदुक्खस्स पदुमपलासे उदकस्स विय विनिवट्टनतो ¶ . संवाससञ्ञन्ति सहवाससञ्ञं. बुद्धभूमियं चित्तं नमति बुद्धगुणानं महन्तभावस्स पच्चक्खतो उपट्ठानतो. बुद्धानुस्सतिभावनाय सब्बदा बुद्धगुणानं चित्ते विपरिवत्तनतो वुत्तं ‘‘सम्मुखा सत्थारं पस्सतो विया’’ति. उत्तरि अप्पटिविज्झन्तोति इमाय भावनाय उपरि तं अधिट्ठानं कत्वा सच्चानि अप्पटिविज्झन्तो. सुगतिपरायणोति सुगतिसम्परायो.

अप्पमादन्ति अप्पमज्जनं सक्कच्चं अनुयोगं. कयिराथाति करेय्य. सुमेधसोति सुन्दरपञ्ञो ¶ . एवं महानुभावायाति वुत्तप्पकारेन नीवरणविक्खम्भनादिसमत्थेन सत्थरि सगारवभावादिहेतुभूतेन महता सामत्थियेन समन्नागताय.

२. धम्मानुस्सतिकथावण्णना

१४६. धम्मानुस्सतिन्ति एत्थ पदत्थो, सभावत्थो च आदितो वुत्तोयेवाति तं अनामसित्वा भावनाविधानमेव दस्सेतुं ‘‘धम्मानुस्सतिं भावेतुकामेनापी’’तिआदि आरद्धं. कस्मा पनेत्थ बुद्धानुस्सतियं विय ‘‘अवेच्चप्पसादसमन्नागतेना’’ति न वुत्तं. ननु एता पटिपाटिया छ अनुस्सतियो अरियसावकानं वसेन देसनं आरुळ्हाति? सच्चमेतं, एवं सन्तेपि ‘‘परिसुद्धसीलादिगुणानं पुथुज्जनानम्पि इज्झन्ती’’ति दस्सनत्थं ‘‘अवेच्चप्पसादसमन्नागतेना’’ति इध न वुत्तं, अरियसावकानं पन सुखेन इज्झन्तीति. तथापि पाळियं आगतत्ता च बुद्धानुस्सतिनिद्देसे वुत्तन्ति दट्ठब्बं, अयञ्च विचारो परतो आगमिस्सतेव.

१४७. परियत्तिधम्मोपीति पि-सद्देन लोकुत्तरधम्मं सम्पिण्डेति. इतरेसूति सन्दिट्ठिकादिपदेसु. लोकुत्तरधम्मोवाति अवधारणं निप्परियायेन सन्दिट्ठिकादिअत्थं सन्धाय वुत्तं, परियायतो पनेते परियत्तिधम्मेपि सम्भवन्तेव. तथा हि परियत्तिधम्मो बहुस्सुतेन आगतागमेन परमेन सतिनेपक्केन समन्नागतेन पञ्ञवता आदिकल्याणतादिविसेसतो सयं दट्ठब्बोति सन्दिट्ठिको. आचरियपयिरुपासनाय विना न लब्भाति चे? लोकुत्तरधम्मेपि समाने कल्याणमित्तसन्निस्सयेनेव सिज्झनतो, तथा सत्थुसन्दस्सनेपि. ‘‘सन्दिट्ठिया जयती’’ति अयं पनत्थो तित्थियनिम्मद्दने निप्परियायतोव लब्भति ¶ , किलेसजये परियायतो परम्पराहेतुभावतो. ‘‘सन्दिट्ठं अरहती’’ति अयम्पि अत्थो लब्भतेव, सब्बसो संकिलेसधम्मानं पहानं, वोदानधम्मानं परिब्रूहनञ्च उद्दिस्स पवत्तत्ता. अयञ्च अत्थो ‘‘ये खो त्वं, गोतमि, धम्मे जानेय्यासि, इमे धम्मा सरागाय संवत्तन्ति नो विरागाय, सञ्ञोगाय संवत्तन्ति नो विसञ्ञोगाय, सउपादानाय संवत्तन्ति नो अनुपादानाय. एकंसेन, गोतमि, धारेय्यासि ‘नेसो धम्मो, नेसो विनयो, नेतं सत्थुसासन’’’न्ति (चूळव. ४०६; अ. नि. ८.५३), ‘‘धम्मापि वो, भिक्खवे, पहातब्बा, पगेव अधम्मा’’ति (म. नि. १.२४०) च एवमादीहि सुत्तपदेहि विभावेतब्बो. अकालिकाधिगमुपायताय अकालिको. विज्जमानतापरिसुद्धताहि एहिपस्सविधिं अरहतीति एहिपस्सिको. ततो एव वट्टदुक्खनित्थरणत्थिकेहि ¶ अत्तनो चित्ते उपनयनं, चित्तस्स वा तत्थ उपनयनं अरहतीति ओपनेय्यिको. विमुत्तायतनसीसे ठत्वा परिचयेन सम्मदेव अत्थवेदं, धम्मवेदञ्च लभन्तेहि पच्चत्तं वेदितब्बो विञ्ञूहीति. एवं सन्दिट्ठिकादिपदेसु परियत्तिधम्मम्पि पक्खिपित्वा मनसिकारो युज्जतेव.

साति गाथा. समन्तभद्रकत्ताति सब्बभागेहि सुन्दरत्ता. धम्मस्साति सासनधम्मस्स. किञ्चापि अवयवविनिमुत्तो समुदायो नाम परमत्थतो कोचि नत्थि, येसु पन अवयवेसु समुदायरूपेन अवेक्खितेसु ‘‘गाथा’’ति समञ्ञा, तं ततो भिन्नं विय कत्वा संसामिवोहारं आरोपेत्वा दस्सेन्तो ‘‘पठमेन पादेन आदिकल्याणा’’तिआदिमाह. ‘‘एकानुसन्धिक’’न्ति इदं नातिबहुविभागं यथानुसन्धिना एकानुसन्धिकं सन्धाय वुत्तं, इतरस्स पन तेनेव देसेतब्बधम्मविभागेन आदिमज्झपरियोसानभागा लब्भन्तीति. निदानेनाति कालदेसदेसकपरिसादिअपदिसनलक्खणेन निदानगन्थेन. निगमनेनाति ‘‘इदमवोचा’’तिआदिकेन (सं. नि. १.२४९), ‘‘इति यं तं वुत्तं, इदमेतं पटिच्च वुत्त’’न्ति (अ. नि. १०.२७) वा यथावुत्तत्थनिगमनेन.

अयं कथा विसेसतो सुत्तपिटकसंवण्णनाति कत्वा सुत्तपिटकवसेन धम्मस्स आदिकल्याणादिकं दस्सेत्वा इदानि सुत्तपिटकविनयपिटकानं वसेन तं दस्सेतुं ‘‘सनिदानसउप्पत्तिकत्ता’’तिआदि वुत्तं. तत्थ सनिदानसउप्पत्तिकत्ताति यथावुत्तनिदानेन सनिदानताय, सअट्ठुप्पत्तिकताय ¶ च. वेनेय्यानं अनुरूपतोति सिक्खापदपञ्ञत्तिया, धम्मदेसनाय च तंतंसिक्खापदभावेन पञ्ञापियमानस्स वेनेय्यज्झासयानुरूपं पवत्तियमानस्स अनुरूपतो. अत्थस्साति देसियमानस्स च सीलादिअत्थस्स. ‘‘तं किस्स हेतु (सं. नि. १.२४९)? सेय्यथापि, भिक्खवे’’तिआदिना (सं. नि. ३.९५) तत्थ तत्थ हेतूपमागहणेन हेतुदाहरणयुत्ततो.

एवं सुत्तविनयवसेन परियत्तिधम्मस्स आदिमज्झपरियोसानकल्याणतं दस्सेत्वा इदानि तीणि पिटकानि एकज्झं गहेत्वा तं दस्सेतुं ‘‘सकलोपी’’तिआदि वुत्तं. तत्थ सासनधम्मोति –

‘‘सब्बपापस्स ¶ अकरणं, कुसलस्स उपसम्पदा;

सचित्तपरियोदपनं, एतं बुद्धान सासन’’न्ति. (ध. प. १८३; दी. नि. २.९०) –

एवं वुत्तस्स सत्थुसासनस्स पकासको परियत्तिधम्मो. सीलेन आदिकल्याणो सीलमूलकत्ता सासनस्स. समथादीहि मज्झेकल्याणो तेसं सासनसम्पत्तिया वेमज्झभावतो. निब्बानेन परियोसानकल्याणो तदधिगमतो उत्तरिकरणीयाभावतो. सासने सम्मापटिपत्ति नाम पञ्ञाय होति, तस्सा च सीलं, समाधि च मूलन्ति आह ‘‘सीलसमाधीहि आदिकल्याणो’’ति. पञ्ञा पन अनुबोधपटिवेधवसेन दुविधाति तदुभयम्पि गण्हन्तो ‘‘विपस्सनामग्गेहि मज्झेकल्याणो’’ति आह. तस्स निप्फत्ति फलं, किच्चं निब्बानसच्छिकिरिया, ततो परं कत्तब्बं नत्थीति दस्सेन्तो आह ‘‘फलनिब्बानेहि परियोसानकल्याणो’’ति. फलग्गहणेन वा सउपादिसेसनिब्बानमाह, इतरेन इतरं, तदुभयञ्च सासनसम्पत्तिया ओसानन्ति आह ‘‘फलनिब्बानेहि परियोसानकल्याणो’’ति.

बुद्धस्स सुबोधिता सम्मासम्बुद्धता, ताय आदिकल्याणो तप्पभवत्ता. सब्बसो संकिलेसप्पहानं वोदानं, पारिपूरी च धम्मसुधम्मता, ताय मज्झेकल्याणो तंसरीरत्ता. सत्थारा यथानुसिट्ठं तथा पटिपत्ति सङ्घसुप्पटिपत्ति, ताय परियोसानकल्याणो, ताय सासनस्स लोके सुप्पतिट्ठितभावतो. तन्ति सासनधम्मं. तथत्तायाति यथत्ताय भगवता धम्मो देसितो, तथत्ताय तथभावाय. सो पन अभिसम्बोधि पच्चेकबोधि सावकबोधीति तिविधो ¶ , इतो अञ्ञथा निब्बानाधिगमस्स अभावतो. तत्थ सब्बगुणेहि अग्गभावतो, इतरबोधिद्वयमूलताय च पठमाय बोधिया आदिकल्याणता, गुणेहि वेमज्झभावतो दुतियाय मज्झेकल्याणता, तदुभयावरताय, तदोसानताय च सासनधम्मस्स ततियाय परियोसानकल्याणता वुत्ता.

एसोति सासनधम्मो. नीवरणविक्खम्भनतोति विमुत्तायतनसीसे ठत्वा सद्धम्मं सुणन्तस्स नीवरणानं विक्खम्भनसम्भवतो. वुत्तं हेतं –

‘‘यथा यथावुसो, भिक्खुनो सत्था वा धम्मं देसेति, अञ्ञतरो वा गरुट्ठानियो सब्रह्मचारी ¶ , तथा तथा सो तत्थ लभति अत्थवेदं लभति धम्मवेद’’न्ति (अ. नि. ५.२६).

‘‘यस्मिं, भिक्खवे, समये अरियसावको ओहितसोतो धम्मं सुणाति, पञ्चस्स नीवरणानि तस्मिं समये पहीनानि होन्ती’’ति (सं. नि. ५.२१९) –

च आदि. समथविपस्सनासुखावहनतोति समथसुखस्स च विपस्सनासुखस्स च सम्पादनतो. वुत्तम्पि चेतं –

‘‘सो विविच्चेव कामेहि विविच्च अकुसलेहि धम्मेहि सवितक्कं सविचारं विवेकजं पीतिसुख’’न्तिआदि (दी. नि. १.२७९; म. नि. २.१३८).

तथा –

‘‘यतो यतो सम्मसति, खन्धानं उदयब्बयं;

लभती पीतिपामोज्जं, अमतं तं विजानतं;

अमानुसी रती होति, सम्मा धम्मं विपस्सतो’’ति च. (ध. प. ३७४, ३७३);

तथापटिपन्नोति यथा समथविपस्सनासुखं आवहति, यथा वा सत्थारा अनुसिट्ठं, तथा पटिपन्नो सासनधम्मो. तादिभावावहनतोति छळङ्गुपेक्खावसेन इट्ठादीसु तादिभावस्स लोकधम्मेहि अनुपलेपस्स आवहनतो. एस भगवा वुत्तनयेन तिविधकल्याणं धम्मं देसेन्तो यं सासनब्रह्मचरियं, मग्गब्रह्मचरियञ्च पकासेति, तं यथानुरूपं अत्थसम्पत्तिया सात्थं, ब्यञ्जनसम्पत्तिया सब्यञ्जनन्ति योजना.

तत्थ ¶ अविसेसेन तिस्सो सिक्खा, सकलो च तन्तिधम्मो सासनब्रह्मचरियं. यं सन्धाय वुत्तं ‘‘कतमेसानं खो, भन्ते, बुद्धानं भगवन्तानं ब्रह्मचरियं नचिरट्ठितिकं अहोसी’’तिआदि (पारा. १८). सब्बसिक्खानं मण्डभूतसिक्खत्तयसङ्गहितो अरियमग्गो मग्गब्रह्मचरियं. यं सन्धाय ¶ वुत्तं ‘‘खीणा जाति, वुसितं ब्रह्मचरियं, कतं करणीय’’न्ति (महाव. २३; सं. नि. ५.१८६). यथानुरूपन्ति यथारहं. सिक्खत्तयसङ्गहं हि सासनब्रह्मचरियं अत्थसम्पत्तिया सात्थं. मग्गब्रह्मचरिये वत्तब्बमेव नत्थि. अत्थसम्पत्तियाति सम्पन्नत्थताय. सम्पत्तिअत्थो हि इध सह-सद्दो. इतरं पन यथावुत्तेनत्थेन सात्थं, सब्यञ्जनञ्च. ये पनेत्थ ‘‘वचनसभावं सात्थं, अत्थसभावं सब्यञ्जन’’न्ति विभजित्वा वदन्ति, तं न सुन्दरं, तथा विभत्तस्स परियत्तिधम्मस्स अभावतो. सद्दत्था हि अभिन्नरूपा विय हुत्वा विनियोगं गच्छन्ति. तथा हि नेसं लोकियामिस्सीभावं पटिजानन्ति. सतिपि वा भेदे ‘‘सब्यञ्जन’’न्ति एत्थ यदि तुल्ययोगो अधिप्पेतो ‘‘सपुत्तो आगतो’’तिआदीसु विय, एवं सति ‘‘अत्थपटिसरणा, भिक्खवे, होथ, मा ब्यञ्जनपटिसरणा’’ति अत्थप्पधानवादो बाधितो सिया, अथ विज्जमानतामत्तं ‘‘सलोमको सपक्खको’’तिआदीसु विय ब्यञ्जनसम्पत्ति अग्गहिता सिया. तस्मा अट्ठकथायं वुत्तनयेनेव अत्थो गहेतब्बो.

सात्थं सब्यञ्जनन्ति एत्थ नेत्तिनयेनापि अत्थं दस्सेतुं ‘‘सङ्कासन…पे… सब्यञ्जन’’न्ति वुत्तं. तत्थ यदिपि नेत्तियं ब्यञ्जनमुखेन ब्यञ्जनत्थग्गहणं होतीति ‘‘अक्खरं पद’’न्तिआदिना (नेत्ति. ४ द्वादसपद) ब्यञ्जनपदानि पठमं उद्दिट्ठानि, इध पन पाळियं ‘‘सात्थं सब्यञ्जन’’न्ति आगतत्ता अत्थपदानियेव पठमं दस्सेतुं ‘‘सङ्कासनपकासना’’तिआदि वुत्तं. तत्थ सङ्खेपतो कासनं दीपनं सङ्कासनं ‘‘मञ्ञमानो भिक्खु बद्धो मारस्स, अमञ्ञमानो मुत्तो’’तिआदीसु (सं. नि. ३.६४) विय. तत्तकेन हि तेन भिक्खुना पटिविद्धं. तेनाह ‘‘अञ्ञातं भगवा’’तिआदि. पठमं कासनं पकासनं. आदिकम्मस्मिं हि अयं पसद्दो ‘‘पञ्ञपेति पट्ठपेती’’तिआदीसु (सं. नि. २.२०) विय. तिक्खिन्द्रियापेक्खं चेतं पदद्वयं उद्देसभावतो. तिक्खिन्द्रियो हि सङ्खेपतो पठमञ्च वुत्तमत्थं पटिपज्जति ¶ . संखित्तस्स वित्थारवचनं, सकिं वुत्तस्स पुन वचनञ्च विवरणविभजनानि. यथा ‘‘कुसला धम्मा’’ति सङ्खेपतो सकिंयेव च वुत्तस्स अत्थस्स ‘‘कतमे धम्मा कुसला? यस्मिं समये कामावचरं कुसलं चित्त’’न्तिआदिना (ध. स. १) वित्थारतो विवरणवसेन, विभजनवसेन च पुन वचनं. मज्झिमिन्द्रियापेक्खमेतं पदद्वयं निद्देसभावतो. विवटस्स वित्थारतराभिधानं, विभत्तस्स च पकारेहि ञापनं वेनेय्यानं चित्तपरितोसनं उत्तानीकरणपञ्ञापनानि. यथा ‘‘फस्सो होती’’तिआदिना (ध. स. २) विवटविभत्तस्स अत्थस्स ‘‘कतमो तस्मिं समये फस्सो? यो तस्मिं समये फस्सो फुसना सम्फुसना’’तिआदिना ¶ (ध. स. २) उत्तानीकिरिया, पञ्ञापना च. मुदिन्द्रियापेक्खमेतं पदद्वयं पटिनिद्देसभावतो. ‘‘पञ्ञापनपट्ठपनविवरणविभजनउत्तानीकरणपकासनअत्थपदसमायोगतो’’तिपि पाठो.

कथं पनायं पाठविकप्पो जातोति? वुच्चते – नेत्तिपाळियं आगतनयेन पुरिमपाठो. तत्थ हि –

‘‘सङ्कासना पकासना,

विवरणा विभजनुत्तानीकम्मपञ्ञत्ति;

एतेहि छहि पदेहि,

अत्थो कम्मञ्च निद्दिट्ठ’’न्ति. (नेत्ति. ४ द्वादसपद) –

देसनाहारयोजनाय च एतस्सेवत्थस्स ‘‘सङ्कासना पकासना’’तिआदिना आगतं. पच्छिमो पन ‘‘पञ्ञपेति पट्ठपेति विवरति विभजति उत्तानीकरोति ‘पस्सथा’ति चाहा’’ति (सं. नि. २.२०) सुत्ते आगतनयेन ब्यञ्जनमत्तकतो. एवञ्च नेसं द्विन्नं पाठानं विसेसो, न अत्थतो. तथा हि सङ्खेपतो ‘‘पठमं ञापनं पञ्ञापनं, पठममेव ठपनं पट्ठपन’’न्ति इमानि पदानि सङ्कासनपकासनपदेहि अत्थतो अविसिट्ठानि. यञ्च पुरिमपाठे छट्ठं पदं ‘‘पकारतो ञापन’’न्ति पञ्ञापनं वुत्तं, तं दुतियपाठे पकासनपदेन ‘‘निब्बिसेसं पकारतो कासन’’न्ति कत्वा. यस्मा ञापनकासनानि अत्थावभासनसभावताय अभिन्नानि, सब्बेसञ्च वेनेय्यानं चित्तस्स तोसनं, बुद्धिया च निसानं याथावतो वत्थुसभावावभासने जायतीति. एवं अत्थपदरूपत्ता परियत्तिअत्थस्स यथावुत्तछअत्थपदसमायोगतो सात्थं सासनं.

अक्खरपदब्यञ्जनाकारनिरुत्तिनिद्देससम्पत्तियाति ¶ एत्थ उच्चारणवेलायं अपरियोसिते पदे वण्णो अक्खरं. ‘‘एकक्खरं पदं अक्खर’’न्ति एके ‘‘आ एवं किर त’’न्तिआदीसु आ-कारादयो विय. ‘‘विसुद्धकरणानं मनसा देसनावाचाय अक्खरणतो अक्खर’’न्ति अञ्ञे. विभत्तियन्तं अत्थञापनतो पदं. सङ्खेपतो वुत्तं पदाभिहितं अत्थं ब्यञ्जेतीति ब्यञ्जनं, वाक्यं. ‘‘किरियापदं अब्ययकारकविसेसनयुत्तं वाक्य’’न्ति हि वदन्ति. पकारतो वाक्यविभागो ¶ आकारो. आकाराभिहितं निब्बचनं निरुत्ति. निब्बचनवित्थारो निस्सेसुपदेसतो निद्देसो. एतेसं अक्खरादीनं ब्यञ्जनपदानं सम्पत्तिया सम्पन्नताय सब्यञ्जनं.

तत्रायमस्स अत्थपदसमायोगो, ब्यञ्जनसम्पत्ति च – अक्खरेहि सङ्कासेति, पदेहि पकासेति, ब्यञ्जनेहि विवरति, आकारेहि विभजति, निरुत्तीहि उत्तानीकरोति, निद्देसेहि पञ्ञपेति, तथा अक्खरेहि उग्घाटेत्वा पदेहि विनेति उग्घटितञ्ञुं, ब्यञ्जनेहि विपञ्चेत्वा आकारेहि विनेति विपञ्चितञ्ञुं, निरुत्तीहि नेत्वा निद्देसेहि विनेति नेय्यं. एवञ्चायं धम्मो उग्घटियमानो उग्घटितञ्ञुं विनेति, विपञ्चियमानो विपञ्चितञ्ञुं, निय्यमानो नेय्यं. तत्थ उग्घटना आदि, विपञ्चना मज्झे, नयनमन्ते. एवं तीसु कालेसु तिधा देसितो दोसत्तयविधमनो गुणत्तयावहो तिविधवेनेय्यविनयनोति. एवम्पि तिविधकल्याणोयं धम्मो अत्थब्यञ्जनपारिपूरिया ‘‘सात्थो सब्यञ्जनो’’ति वेदितब्बो ‘‘परिपुण्णो, परिसुद्धो’’ति च.

अत्थगम्भीरतातिआदीसु अत्थो नाम तन्तिअत्थो. धम्मो तन्ति. पटिवेधो तन्तिया, तन्तिअत्थस्स च यथाभूतावबोधो. देसना मनसा ववत्थापिताय तन्तिया देसना. ते पनेते अत्थादयो यस्मा ससादीहि विय महासमुद्दो मन्दबुद्धीहि दुक्खोगाहा, अलब्भनेय्यपतिट्ठा च, तस्मा गम्भीरा. अथ वा अत्थो नाम हेतुफलं. धम्मो हेतु. देसना पञ्ञत्ति, यथाधम्मं धम्माभिलापो, अनुलोमपटिलोमसङ्खेपवित्थारादिवसेन वा कथनं. पटिवेधो अभिसमयो, अत्थानुरूपं धम्मेसु, धम्मानुरूपं अत्थेसु, पञ्ञत्तिपथानुरूपं पञ्ञत्तीसु अवबोधो, तेसं तेसं वा धम्मानं पटिविज्झितब्बो सलक्खणसङ्खातो अविपरीतसभावो. तेपि चेते अत्थादयो यस्मा अनुपचितकुसलसम्भारेहि दुप्पञ्ञेहि ¶ ससादीहि विय महासमुद्दो दुक्खोगाहा, अलब्भनेय्यपतिट्ठा च, तस्मा गम्भीरा. तेसु पटिवेधस्सापि अत्थसन्निस्सितत्ता वुत्तं ‘‘अत्थगम्भीरतापटिवेधगम्भीरताहि सात्थ’’न्ति अत्थगुणदीपनतो. तासं धम्मदेसनानं ब्यञ्जनसन्निस्सितत्ता वुत्तं ‘‘धम्मगम्भीरतादेसनागम्भीरताहि सब्यञ्जन’’न्ति तासं ब्यञ्जनसम्पत्तिदीपनतो.

अत्थेसु पभेदगतं ञाणं अत्थपटिसम्भिदा. अत्थधम्मनिरुत्तिपटिसम्भिदासु पभेदगतं ञाणं पटिभानपटिसम्भिदाति इमिस्सापि पटिसम्भिदाय अत्थविसयत्ता आह ‘‘अत्थपटिभानपटिसम्भिदाविसयतो सात्थ’’न्ति, अत्थसम्पत्तिया असति तदभावतो. धम्मोति तन्ति ¶ . निरुत्तीति तन्तिपदानं निद्धारेत्वा वचनं. तत्थ पभेदगतानि ञाणानि धम्मनिरुत्तिपटिसम्भिदाति आह ‘‘धम्मनिरुत्तिपटिसम्भिदाविसयतो सब्यञ्जनन्ति, असति ब्यञ्जनसम्पत्तिया तदभावतो. परिक्खकजनप्पसादकन्ति एत्थ इति-सद्दो हेतुअत्थो. यस्मा परिक्खकजनानं किंकुसलगवेसीनं पसादावहं, तस्मा सात्थं. अत्थसम्पन्नन्ति फलेन हेतुनो अनुमानं नदीपूरेन विय उपरि वुट्ठिप्पवत्तिया. सात्थकता पनस्स पण्डितवेदनीयताय, सा परमगम्भीरसण्हसुखुमभावतो वेदितब्बा. वुत्तञ्हेतं ‘‘गम्भीरो दुद्दसो’’तिआदि (महाव. ८). लोकियजनप्पसादकन्ति सब्यञ्जनन्ति यस्मा लोकियजनस्स पसादावहं, तस्मा सब्यञ्जनं. लोकियजनो हि ब्यञ्जनसम्पत्तिया तुस्सति, इधापि फलेन हेतुनो अनुमानं. सब्यञ्जनता पनस्स सद्धेय्यताय, सा आदिकल्याणादिभावतो वेदितब्बा.

अथ वा पण्डितवेदनीयतो सात्थ’’न्ति पञ्ञापदट्ठानताय अत्थसम्पन्नतं आह, ततो परिक्खकजनप्पसादकं. सद्धेय्यतो सब्यञ्जनन्ति सद्धापदट्ठानताय ब्यञ्जनसम्पन्नतं, ततो लोकियजनप्पसादकन्ति एवमेत्थ अत्थो दट्ठब्बो. गम्भीराधिप्पायतो सात्थन्ति अधिप्पायतो अगाधापारताय अत्थसम्पन्नं अञ्ञथा तदभावतो. उत्तानपदतो सब्यञ्जनन्ति सुबोधसद्दताय ब्यञ्जनसम्पन्नं, परमगम्भीरस्सपि अत्थस्स वेनेय्यानं सुविञ्ञेय्यभावापादनतो. सब्बोपेस पठमस्स अत्थद्वयस्स पभेदो दट्ठब्बो, तथा चेव तत्थ तत्थ संवण्णितं. तथा हेत्थ ¶ विकप्पस्स, समुच्चयस्स वा अग्गहणं. उपनेतब्बस्साति पक्खिपितब्बस्स वोदानत्थस्स अवुत्तस्स अभावतो. सकलपरिपुण्णभावेनाति सब्बभागेहि परिपुण्णताय. अपनेतब्बस्साति संकिलेसधम्मस्स.

पटिपत्तियाति सीलविसुद्धियादिसम्मापटिपत्तिया, तन्निमित्तं. अधिगमब्यत्तितोति सच्चपटिवेधेन अधिगमवेय्यत्तियसब्भावतो सात्थं कपिलवतादि विय तुच्छं निरत्थकं अहुत्वा अत्थसम्पन्नन्ति कत्वा. परियत्तियाति परियत्तिधम्मपरिचयेन. आगमब्यत्तितोति दुरक्खातधम्मेसु परिचयं करोन्तस्स विय सम्मोहं अजनेत्वा बाहुसच्चवेय्यत्तियसब्भावतो सब्यञ्चनं. ब्यञ्जनसम्पत्तिया हि सति आगमब्यत्तीति. सीलादिपञ्चधम्मक्खन्धयुत्ततोति सीलादीहि पञ्चहि धम्मकोट्ठासेहि अविरहितत्ता. केवलपरिपुण्णं अनवसेसेन समन्ततो पुण्णं पूरितं. निरुपक्किलेसतोति दिट्ठिमानादिउपक्किलेसाभावतो. नित्थरणत्थायाति वट्टदुक्खतो निस्सरणाय. लोकामिसनिरपेक्खतोति कथञ्चिपि तण्हासन्निस्सयस्स अनिस्सयनतो.

एवं ¶ आदिकल्याणतादिअपदेसेन सत्थु पुरिमवेसारज्जद्वयवसेन धम्मस्स स्वाक्खाततं विभावेत्वा इदानि पच्छिमवेसारज्जद्वयवसेनापि तं दस्सेतुं ‘‘अत्थविपल्लासाभावतो वा सुट्ठु अक्खातोति स्वाक्खातो’’ति वत्वा तमत्थं ब्यतिरेकमुखेन विभावेन्तो ‘‘यथा ही’’तिआदिमाह. तत्थ विपल्लासमापज्जतीति तेसं धम्मे ‘‘अन्तरायिका’’ति वुत्तधम्मानं विपाकादीनं अन्तरायिकत्ताभावतो एकंसेन अपायूपपत्तिहेतुताय अभावतो. निय्यानिकत्ताभावतोति अतम्मयताभावतो, संसारतो च निय्यानिकाति वुत्तधम्मानं एकच्चयञ्ञकिरियापकतिपुरिसन्तरञ्ञाणादीनं ततो निय्यानिकत्ताभावतो विपरीतो एव होति. तेनाति अत्थस्स विपल्लासापज्जनेन. ते अञ्ञतित्थिया. तथाभावानतिक्कमनतोति कम्मन्तरायादीनं पञ्चन्नं अन्तरायिकभावस्स अरियमग्गधम्मानं निय्यानिकभावस्स कदाचिपि अनतिवत्तनतो.

निब्बानानुरूपाय पटिपत्तियाति अधिगन्तब्बस्स सब्बसङ्खतविनिस्सटस्स निब्बानस्स अनुरूपाय सब्बसङ्खारनिस्सरणूपायभूताय सपुब्बभागाय सम्मापटिपत्तिया ¶ अक्खातत्ताति योजना. पटिपदानुरूपस्साति सब्बदुक्खनिय्यानिकभूता आरम्मणकरणमत्तेनापि किलेसेहि अनामसनीया यादिसी पटिपदा, तदनुरूपस्स. सुपञ्ञत्ताति सीलादिक्खन्धत्तयसङ्गहिता सम्मादिट्ठिआदिप्पभेदा मिच्छादिट्ठिआदीनं पहायिकभावेन सुट्ठु सम्मदेव विहिता. संसन्दति किलेसमलविसुद्धिताय समेति. एवं मग्गनिब्बानानं पटिपदापटिपज्जनीयभावेहि अञ्ञमञ्ञानुरूपताय स्वाक्खाततं दस्सेत्वा इदानि तिविधस्सापि लोकुत्तरधम्मस्स पच्चेकं स्वाक्खाततं दस्सेतुं ‘‘अरियमग्गो चेत्था’’तिआदि वुत्तं. तत्थ अन्तद्वयन्ति सस्सतुच्छेदं, कामसुखअत्तकिलमथानुयोगं, लीनुद्धच्चं, पतिट्ठानायूहनन्ति एवं पभेदं अन्तद्वयं. अनुपगम्माति अनुपगन्त्वा, अनुपगमनहेतु वा. पटिपस्सद्धकिलेसानीति सुट्ठु वूपसन्तकिलेसानि, पटिपस्सद्धिप्पहानवसेन सम्मदेव पहीनदोसानि. सस्सतादिसभाववसेनाति ‘‘सस्सतञ्च वो, भिक्खवे, धम्मं देसेस्सामि अमतञ्च ताणञ्च लेणञ्चा’’तिआदिना तेसु तेसु सुत्तेसु सस्सतादिभावकित्तनवसेन.

१४८. ‘‘रागादीनं अभावं करोन्तेन अरियपुग्गलेन सामं दट्ठब्बो’’ति इमिना ‘‘अरियमग्गेन मम रागादयो पहीना’’ति सयं अत्तना अनञ्ञनेय्येन दट्ठब्बोति सन्दिट्ठि, सन्दिट्ठि एव सन्दिट्ठिको.

तेन ¶ तेन अरियसावकेन परसद्धाय परस्स सद्दहनेन परनेय्येन गन्तब्बतं हित्वा ञापेतब्बतं पहाय पच्चवेक्खणञाणेन करणभूतेन. पसत्था दिट्ठि सन्दिट्ठि यथा सम्बोज्झङ्गो. अरियमग्गो अत्तना सम्पयुत्ताय सन्दिट्ठिया किलेसे जयति, अरियफलं ताय एव अत्तनो कारणभूताय, निब्बानं आरम्मणकरणेन अत्तनो विसयीभूताय सन्दिट्ठिया किलेसे जयतीति योजना.

भावनाभिसमयवसेन मग्गधम्मो. सच्छिकिरियाभिसमयवसेन निब्बानधम्मो. फलम्पि हेट्ठिमं सकदागामिविपस्सनादीनं पच्चयभावेन उपरि मग्गाधिगमस्स उपनिस्सयभावतो परियायतो ‘‘दिस्समानो वट्टभयं निवत्तेती’’ति वत्तब्बतं लभति.

१४९. नास्स ¶ कालोति नास्स आगमेतब्बो कालो अत्थि. यथा हि लोकियकुसलस्स ‘‘उपपज्जे, अपरपरियाये’’तिआदिना फलदानं पति आगमेतब्बो कालो अत्थि, न एवमेतस्साति अत्थो. तेनाह ‘‘न पञ्चाहा’’तिआदि. पकट्ठोति दूरो. फलदानं पति कालो पकट्ठो अस्साति कालिको, कालन्तरफलदायी. तेनाह ‘‘अत्तनो फलदाने’’ति. पत्तोति उपनीतो. इदन्ति ‘‘अकालिको’’ति पदं.

१५०. विधिन्ति विधानं, ‘‘एहि पस्सा’’ति एवंपवत्तविधिवचनं. विज्जमानत्ताति परमत्थतो उपलब्भमानत्ता. परिसुद्धत्ताति किलेसमलविरहेन सब्बथा विसुद्धत्ता. अमनुञ्ञम्पि कदाचि पयोजनवसेन यथासभावप्पकासनेन दस्सेतब्बं भवेय्याति तदभावं दस्सेन्तो आह ‘‘मनुञ्ञभावप्पकासनेना’’ति.

१५१. उपनेतब्बोति उपनेय्यो, उपनेय्योव ओपनेय्यिकोति इमस्स अत्थस्स अधिप्पेतत्ता आह ‘‘उपनेतब्बोति ओपनेय्यिको’’ति. चित्ते उपनयनं उप्पादनन्ति आह ‘‘इदं सङ्खते लोकुत्तरधम्मे युज्जती’’ति. चित्ते उपनयनन्ति पन आरम्मणभूतस्स धम्मस्स आरम्मणभावूपनयने अधिप्पेते असङ्खतेपि युज्जेय्य ‘‘आरम्मणकरणसङ्खातं उपनयनं अरहतीति ओपनेय्यिको’’ति. अल्लीयनन्ति फुसनं. निब्बानं उपनेति अरियपुग्गलन्ति अधिप्पायो.

१५२. विञ्ञूहीति ¶ विदूहि, पटिविद्धसच्चेहीति अत्थो. ते पन एकंसतो उग्घटितञ्ञूआदयो होन्तीति आह ‘‘उग्घटितञ्ञूआदीही’’ति. ‘‘पच्चत्त’’न्ति एतस्स ‘‘पति अत्तनी’’ति भुम्मवसेन अत्थो गहेतब्बोति आह ‘‘अत्तनि अत्तनी’’ति. वेदितब्बोति वुत्तं, कथं वेदितब्बोति आह ‘‘भावितो मे’’तिआदि. तत्थ ‘‘मे’’ति इमिना ‘‘पच्चत्त’’न्ति पदेन वुत्तमत्थं अन्वयतो दस्सेत्वा पुन ब्यतिरेकेन दस्सेतुं ‘‘न ही’’तिआदि वुत्तं, तं सुविञ्ञेय्यमेव. ‘‘विञ्ञूही’’ति इदं अन्तोगधावधारणन्ति दस्सेन्तो ‘‘बालानं पन अविसयो चेसा’’ति आह.

एवं आदिकल्याणतादिना अञ्ञमञ्ञस्स अनुरूपदेसनाय धम्मस्स स्वाक्खाततं दस्सेत्वा इदानि पुरिमस्स पुरिमस्स पच्छिमं पच्छिमं पदं कारणवचनन्ति दस्सेन्तो ‘‘अपिचा’’तिआदिमाह. तत्थ सन्दिट्ठिकत्ताति यस्मा ¶ अयं धम्मो वुत्तनयेन सामं दट्ठब्बो, सन्दिट्ठिया किलेसे विद्धंसेति, सन्दस्सनञ्च अरहति, तस्मा स्वाक्खातो दुरक्खाते तित्थियधम्मे तदभावतो. इमिना नयेन सेसपदेसुपि यथारहं अत्थो दट्ठब्बो.

१५३. तस्सेवन्तिआदीसु यं वत्तब्बं, तं बुद्धानुस्सतियं वुत्तनयेन वेदितब्बं.

३. सङ्घानुस्सतिकथावण्णना

१५४. अरियसङ्घगुणाति आरकत्ता किलेसेहि, अनये न इरियनतो, अये च इरियनतो, सदेवकेन च लोकेन ‘‘सरण’’न्ति अरणीयतो अरियो च सो सङ्घो च, अरियानं वा सङ्घो अरियसङ्घो, तस्स गुणा.

१५५. यं सम्मापटिपदं पटिपन्नो ‘‘सुट्ठु पटिपन्नो’’ति वुच्चति. सा अरियमग्गपटिपदा पटिपक्खधम्मे अनिवत्तिधम्मे कत्वा पजहनतो पयोजनाभावा सयम्पि अनिवत्तिधम्मा, अधिगन्तब्बस्स च निब्बानस्स एकंसतो अनुलोमीति. ततो एव अपच्चनीका, अनुधम्मभूता च, तस्सा च पटिपन्नत्ता अरियसङ्घो ‘‘सुप्पटिपन्नो’’ति वुत्तोति दस्सेतुं ‘‘सुट्ठु पटिपन्नो’’तिआदि वुत्तं. तत्थ ‘‘अनिवत्तिपटिपद’’न्ति इमिना उजुप्पटिपत्तिं दस्सेति. पुनप्पुनं निवत्तने हि सति उजुप्पटिपत्ति न होति. ‘‘अनुलोमपटिपदं अपच्चनीकपटिपद’’न्ति ¶ इमिना ञायप्पटिपत्तिं. पटिपज्जितब्बस्स हि निब्बानस्स अनुलोमनेन, अपच्चनीकताय चस्सा ञायतो. ‘‘धम्मानुधम्मपटिपद’’न्ति इमिना सामीचिप्पटिपत्तिं अनुच्छविकभावदीपनतो. एतेन पठमपदस्स पपञ्चनिद्देसो, इतरानि तीणि पदानीति दस्सेति. तेनाह ‘‘यस्मा पना’’तिआदि.

यथानुसिट्ठं पटिपज्जनेन किच्चसिद्धितो अरियभावावहं सवनं सक्कच्चसवनं नामाति वुत्तं ‘‘सक्कच्चं सुणन्तीति सावका’’ति, तेन अरिया एव निप्परियायतो सत्थु सावका नामाति दस्सेति. सीलदिट्ठिसामञ्ञतायाति अरियेन सीलेन, अरियाय च दिट्ठिया समानभावेन. अरियानञ्हि सीलदिट्ठियो मज्झे भिन्नसुवण्णं विय निन्नानाकरणं मग्गेनागतत्ता. तेन ¶ ते यत्थ कत्थचि ठितापि संहताव. तेनाह ‘‘सङ्घातभावमापन्नो’’ति. मायासाठेय्यादिपापधम्मसमुच्छेदेन उजु. ततो एव गोमुत्तवङ्काभावेन अवङ्का. चन्दलेखावङ्काभावेन अकुटिला. नङ्गलकोटिवङ्काभावेन अजिम्हा. अवङ्कादिभावेन वा उजु. परिसुद्धट्ठेन अरिया. अपण्णकभावेन ञायति कमति निब्बानं, तं वा ञायति पटिविज्झीयति एतेनाति ञायो. वट्टदुक्खनिय्यानाय अनुच्छविकत्ता. अनुरूपत्ता सामीचि ओपायिकातिपि सङ्खं समञ्ञं गता सम्मापटिपत्ति, ताय समङ्गिताय सुप्पटिपन्ना ‘‘सम्मा पटिपज्जन्ती’’ति कत्वा. वत्तमानत्थो हि अयं पटिपन्न-सद्दो यथा ‘‘सोतापत्तिफलसच्छिकिरियाय पटिपन्नो’’ति (पु. प. २०६). अतीतं पटिपदन्ति यथावुत्तमग्गसम्मापटिपत्तिं वदति. उभयेन च सामञ्ञनिद्देसेन, ‘‘सुप्पटिपन्ना च सुप्पटिपन्ना च सुप्पटिपन्ना’’ति एकसेसनयेन वा गहितानं समूहो ‘‘सुप्पटिपन्नो’’ति वुत्तोति दस्सेति.

एवं आदिपदत्थनिद्देसभावेन इतरपदानं अत्थं वत्वा इदानि चतुन्नम्पि पदानं अवोमिस्सकं अत्थं दस्सेतुं ‘‘अपिचा’’तिआदि वुत्तं. तत्थ यथानुसिट्ठन्ति सत्थारा यथा अनुसिट्ठं, तथा अनुसासनीअनुरूपन्ति अत्थो. अपण्णकपटिपदन्ति अविरज्झनकपटिपदं, अनवज्जपटिपत्तिन्ति अत्थो. एत्थ च स्वाक्खाते धम्मविनये अपण्णकपटिपदं पटिपन्नत्ताति एवं सम्बन्धितब्बं. पुरिमपदेन सम्बन्धे दुतियपदं न वत्तब्बं सिया, ननु च दुतियपदेन सम्बन्धेपि पठमं पदं न वत्तब्बं सियाति? न तस्स पठमं अपेक्खितत्ता. सा पन सावकानं अपण्णकपटिपदा यथानुसिट्ठं पटिपदाति दस्सनत्थं ‘‘यथानुसिट्ठं पटिपन्नत्ता’’ति वत्तब्बं ¶ . उभयस्सापि वा सुप्पटिपन्नभावसाधनत्ता उभयं वुत्तं. तथा हि पि-सद्देन उभयं समुच्चिनोति.

किलेसजिम्हवसेन अन्तद्वयगाहोति सब्बसो तं पहाय सम्मापटिपदा कायादिवङ्कप्पहायिनी उजुप्पटिपत्ति होतीति आह ‘‘मज्झिमाय पटिपदाय…पे… उजुप्पटिपन्नो’’ति.

ञायो नाम युत्तप्पत्तपटिपत्ति, निब्बानञ्च, सब्बसङ्खारसमथताय आदित्तं चेलं, सीसं वा अज्झुपेक्खित्वापि पटिपज्जितब्बमेवाति आह ‘‘ञायो वुच्चति निब्बान’’न्ति. निब्बायनकिरियामुखेन चेत्थ निब्बानं वुत्तन्ति दट्ठब्बं ¶ , मग्गञाणादीहि वा ञायति पटिविज्झीयति सच्छिकरीयति चाति ञायो निब्बानन्ति एवमेत्थ अत्थो दट्ठब्बो.

गुणसम्भावनाय परेहि कयिरमानं पच्चुपट्ठानादिसामीचिकम्मं अरहन्तीति सामीचिकम्मारहा.

१५६. यदिदन्ति अन्तोगधलिङ्गवचनभेदो निपातोति तस्स वचनभेदेन अत्थमाह ‘‘या इमानी’’ति. एवन्ति पकारत्थे निपातो, इमिना पकारेनाति अत्थो. तेन इतरानि तीणि युगळानि दस्सितानि होन्तीति आह ‘‘एवं चत्तारि पुरिसयुगळानि होन्ती’’ति. एतन्ति एतं ‘‘पुरिसपुग्गला’’ति बहुवचनवसेन वुत्तं पदं. पुरिसा च ते पुग्गला च पुरिसपुग्गला. तत्थ ‘‘पुरिसा’’ति इमिना पठमाय पकतिया गहणं, ‘‘पुग्गला’’ति पन दुतियायपि सत्तसामञ्ञेनाति एवं वा एत्थ अत्थो दट्ठब्बो. चतुन्नं पच्चयानं कीदिसानं? आनेत्वा हुनितब्बानन्ति अधिकारतो पाकटोयमत्थो. दातब्बन्ति वा पच्चत्तवचनं ‘‘चतुन्नं पच्चयान’’न्ति पदं अपेक्खित्वा सामिवसेन परिणामेतब्बं, अञ्ञथा येसं केसञ्चि चतुन्नं पच्चयानं ‘‘आहुन’’न्ति समञ्ञा सिया. आहुनं अरहतीति वा आहुनेय्यो. सक्कादीनम्पि वा आहवनन्ति सक्कादीहिपि दिय्यमानं दानं. यत्थ हुतं महप्फलन्ति यस्मिं आवहनीयग्गिम्हि हुतं दधिआदि आहुनेय्यग्गिगहपतग्गिदक्खिणेय्यग्गीसु हुततो उळारफलन्ति तेसं ब्राह्मणानं लद्धि. हुतन्ति दिन्नं. निकायन्तरेति सब्बत्थिकवादिनिकाये.

ठपेत्वा १६५ तेति ते पियमनापे ञातिमित्ते अपनेत्वा, तेसं अदत्वाति अधिप्पायो. एस एसो. एकबुद्धन्तरे च दिस्सतीति एकस्मिं बुद्धन्तरे वीतिवत्ते दिस्सति. च-सद्देन कदाचि असङ्ख्येय्येपि कप्पे वीतिवत्तेति दस्सेति. अब्बोकिण्णन्ति पटिपक्खेहि अवोमिस्सं, किरियाविसेसकञ्चेतं. पियमनापत्तकरधम्मा नाम सीलादयो, ते अरियसङ्घे सुप्पतिट्ठिता. अयं हेत्थ अधिप्पायो – ञातिमित्ता विप्पयुत्ता न चिरस्सेव समागच्छन्ति, अनवट्ठिता च तेसु पियमनापता, न एवमरियसङ्घो. तस्मा सङ्घोव पाहुनेय्योति. पुब्बकारन्ति अग्गकिरियं. सब्बप्पकारेनाति आदरगारवबहुमानादिना, देय्यधम्मस्स सक्कच्चकरणादिना ¶ च सब्बेन पकारेन. स्वायं पाहवनीय-सद्दो ‘‘पाहुनेय्यो’’ति वुच्चति परियायभावेन.

दक्खन्ति एताय सत्ता यथाधिप्पेताहि सम्पत्तीहि वड्ढन्तीति दक्खिणा. तथाभावकरणेन दक्खिणं अरहति. यथा उळारातिविपुलुद्रयलाभेन विसोधितं नाम होति, एवं दक्खिणा विपुलफलतायाति वुत्तं ‘‘महप्फलकरणताय विसोधेती’’ति.

पुञ्ञत्थिकेहि अञ्जलि करणीया एत्थाति अञ्जलिकरणीयो.

यदिपि पाळियं ‘‘अनुत्तर’’न्ति वुत्तं. नत्थि इतो उत्तरं विसिट्ठन्ति हि अनुत्तरं. समम्पिस्स पन नत्थीति दस्सेन्तो ‘‘असदिस’’न्ति आह. खित्तं वुत्तं बीजं महप्फलभावकरणेन तायति रक्खति, खिपन्ति वपन्ति एत्थ बीजानीति वा खेत्तं, केदारादि, खेत्तं विय खेत्तं, पुञ्ञानं खेत्तं पुञ्ञक्खेत्तं. सेसं बुद्धानुस्सतियं वुत्तनयानुसारेन वेदितब्बं.

४. सीलानुस्सतिकथावण्णना

१५८. अहो वत सीलानि अखण्डानि, अहो वत अच्छिद्दानीति एवं सब्बत्थ योजेतब्बं. अहो वताति च सम्भावने निपातो. तेनाह ‘‘अखण्डतादिगुणवसेना’’ति. अखण्डभावादिसम्पत्तिवसेनाति अत्थो. परस्स सीलानि अनुस्सरियमानानि पियमनापभावावहनेन केवलं मेत्ताय पदट्ठानं होन्ति, न विसुं कम्मट्ठानन्ति आह ‘‘अत्तनो सीलानि अनुस्सरितब्बानी’’ति. चागादीसुपि एसेव नयो.

येसन्ति ¶ सीलादीनं. पटिपाटिया समादाने समादानक्कमेन, एकज्झं समादाने उद्देसक्कमेन सीलानं आदिअन्तं वेदितब्बं. परियन्ते छिन्नसाटको वियाति वत्थन्ते, दसन्ते वा छिन्नवत्थं विय, विसदिसूदाहरणं चेतं. एवं सेसानिपि उदाहरणानि. विनिवेधवसेन छिन्नसाटको विनिविद्धसाटको. विसभागवण्णेन गावी वियाति सम्बन्धो. सबलरहितानि वा असबलानि. तथा अकम्मासानि. सत्तविधमेथुनसंयोगो हेट्ठा सीलकथायं वुत्तो एव. कोधूपनाहादीहीति आदि-सद्देन मक्खपळासइस्सामच्छरियमायासाठेय्यमानातिमानादयो गहिता. तानियेव अखण्डादिगुणानि सीलानि. सीलस्स तण्हादासब्यतो ¶ मोचनं विवट्टूपनिस्सयभावापादनं. ततो एव तंसमङ्गीपुग्गलो सेरी सयंवसी भुजिस्सो नाम होति. तेनाह ‘‘भुजिस्सभावकरणेन भुजिस्सानी’’ति. ‘‘इमिनाहं सीलेन देवो वा भवेय्यं देवञ्ञतरो वा, तत्थ निच्चो धुवो सस्सतो’’ति, ‘‘सीलेन सुद्धी’’ति च एवमादिना तण्हादिट्ठीहि अपरामट्ठत्ता अयं ते सीलेसु दोसोति चतूसु विपत्तीसु याय कायचि विपत्तिया दस्सनेन परामट्ठुं अनुद्धंसेतुं. समाधिसंवत्तनप्पयोजनानि समाधिसंवत्तनिकानि.

१५९. सिक्खाय सगारवोति सीलधनं निस्साय पटिलद्धसमादानत्ता सातिसयं सिक्खाय सगारवो सप्पतिस्सो होति. सभागवुत्तीति सम्पन्नसीलेहि सभागवुत्तिको, ताय एव वा सिक्खाय सभागवुत्ति. यो हि सिक्खागारवरहितो, सो ताय विसभागवुत्ति नाम होति विलोमनतो. यथा परेहि सद्धिं अत्तनो छिद्दं न होति, एवं धम्मामिसेहि पटिसन्थरणं पटिसन्थारो. सिक्खाय सगारवत्ता एव तत्थ अप्पमत्तो होति. अत्तानुवादभयं परानुवादभयं दण्डभयं दुग्गतिभयन्ति एवमादीनि भयानि इमस्स दूरसमुस्सारितानीति आह ‘‘अत्तानुवादादिभयविरहितो’’ति. सेसं सुविञ्ञेय्यमेव.

५. चागानुस्सतिकथावण्णना

१६०. पकतियाति सभावेन. चागाधिमुत्तेनाति देय्यधम्मपरिच्चागे युत्तप्पयुत्तेन तन्निन्नेन तप्पोणेन. निच्चं सदा पवत्ता दानसंविभागा यस्स सो निच्चपवत्तदानसंविभागो, तेन. इधापि ‘‘पकतिया’’ति आनेत्वा सम्बन्धितब्बं. यं परस्स पटियत्तं दिय्यति, तं दानं. यं अत्तना परिभुञ्जितब्बतो संविभजति, सो संविभागो. इतो दानि पभुतीति इतो पट्ठाय दानि अज्जतग्गे अज्जदिवसं आदिं कत्वा. अदत्वा न भुञ्जिस्सामीति दानसमादानं कत्वा ¶ . तंदिवसन्ति तस्मिं भावनारम्भदिवसे. तत्थ निमित्तं गण्हित्वाति तस्मिं दाने परिच्चागचेतनाय पवत्तिआकारस्स सल्लक्खणवसेन निमित्तं गहेत्वा. विगतमलमच्छेरतादिगुणवसेनाति विगतानि मलमच्छेरानि एतस्माति विगतमलमच्छेरो, चागो, तस्स भावो विगतमलमच्छेरता. तदादीनं गुणानं, सम्पत्तीनं, आनिसंसानं वा वसेन.

सतं ¶ धम्मं अनुक्कमन्ति साधूनं बोधिसत्तानं धम्मं पवेणिं अनु अनु कमन्तो ओक्कमन्तो, अवोक्कमन्तो वा. ये इमे दायकस्स लाभा आयुवण्णसुखबलपटिभानादयो, पियभावादयो च भगवता संवण्णिता पकित्तिता. मनुस्सत्तं वाति वा-सद्दो अवुत्तविकप्पत्थो, तेन इन्द्रियपाटवभावकम्मस्सकताञाणादीनं सङ्गहो दट्ठब्बो.

मच्छेरमलेनाति मच्छेरसङ्खातेन मलेन. अथ वा मच्छेरञ्च मलञ्च मच्छेरमलं, तेन मच्छेरेन चेव लोभादिमलेन चाति अत्थो. पजायनवसेनाति यथासकं कम्मनिब्बत्तनवसेन. कण्हधम्मानन्ति लोभादिएकन्तकाळकानं पापधम्मानं. विगतत्ताति पहीनत्ता. विगतमलमच्छेरेन चेतसाति इत्थम्भूतलक्खणे करणवचनं. सोतापन्नस्स सतोति गेहं आवसन्तस्स सोतापन्नस्स समानस्स. निस्सयविहारन्ति निस्साय विहरितब्बविहारं, देवसिकं वळञ्जनककम्मट्ठानन्ति अत्थो. अभिभवित्वाति अगारं आवसन्तानं अञ्ञेसं उप्पज्जनकरागादिउपक्किलेसे अभिभुय्य.

यो किञ्चि देन्तोपि सापेक्खोव देति, सो मुत्तचागो न होति, अयं पन न एवन्ति ‘‘मुत्तचागो’’ति वुत्तं. विस्सट्ठचागोति निरपेक्खपरिच्चागोति अत्थो. यथा पाणातिपातबहुलो पुग्गलो ‘‘लोहितपाणी’’ति वुच्चति, एवं दानबहुलो पुग्गलो ‘‘पयतपाणी’’ति वुत्तोति दस्सेन्तो ‘‘दातुं सदा धोतहत्थोयेवा’’ति आह. तत्थ सदाति निच्चं, अभिण्हन्ति अत्थो. परिच्चागोति देय्यधम्मपरिच्चागोति अधिकारतो विञ्ञायति. यं यं देय्यधम्मं परे याचनका. याचने योगो याचनयोगो, परेहि याचितुं युत्तोति अत्थो. याजेन युत्तोति दानेन युत्तो सदा परिच्चजनतो. उभयेति यथावुत्ते दाने, संविभागे च रतो अभिरतो.

१६१. यथा परिसुद्धसीलस्स पुग्गलस्स अखण्डतादिगुणवसेन अत्तनो सीलस्स अनुस्सरन्तस्स सीलानुस्सतिभावना इज्झति, एवं परिसुद्धउळारपरिच्चागस्स पुग्गलस्स अनुपक्किलिट्ठमेव ¶ अत्तनो परिच्चागं अनुस्सरन्तस्स भावना इज्झतीति दस्सेतुं ‘‘विगतमलमच्छेरतादिगुणवसेना’’तिआदि वुत्तं, तं वुत्तत्थमेव.

भिय्योसोति ¶ उपरिपि. मत्ताय पमाणस्स महतिया मत्ताय, विपुलेन पमाणेनाति अत्थो. चागाधिमुत्तोति परिच्चागे अधिमुत्तो निन्नपोणपब्भारो. ततो एव अलोभज्झासयो कत्थचिपि अनभिसङ्गचित्तो. पटिग्गाहकेसु मेत्तायनवसेन परिच्चागो होतीति मेत्ताय मेत्ताभावनाय अनुलोमकारी अनुरूपपटिपत्ति. विसारदोति विसदो अत्तनोव गुणेन कत्थचिपि अमङ्कुभूतो अभिभुय्य विहारी. सेसं सुविञ्ञेय्यमेव.

६. देवतानुस्सतिकथावण्णना

१६२. अरियमग्गवसेनाति अरियमग्गस्स अधिगमवसेन. समुदागतेहीति सम्मदेव तदुप्पत्तितो उद्धं आगतेहि. यादिसा हि अरियानं सन्ताने लोकियापि सद्धादयो, न तादिसा कदाचिपि पोथुज्जनिका सद्धादयो. दिब्बन्तीति देवा. चत्तारो महाराजानो एतेसन्ति चतुमहाराजा, ते एव चातुमहाराजिका. तेत्तिंस सहपुञ्ञकारिनो तत्थूपपन्नाति तंसहचरितं ठानं तावतिंसं, तन्निवासिनोपि देवा तंसहचरणतो एव तावतिंसा. दुक्खतो याता अपयाताति यामा. तुसाय पीतिया इता उपगताति तुसिता. भोगानं निम्माने रति एतेसन्ति निम्मानरतिनो. परनिम्मितेसु भोगेसु वसं वत्तेन्तीति परनिम्मितवसवत्तिनो. ब्रह्मानं कायो समूहो ब्रह्मकायो, तप्परियापन्नताय तत्थ भवाति ब्रह्मकायिका. ततुत्तरीति ततो ब्रह्मकायिकेहि उत्तरि, उपरि परित्ताभादिके सन्धाय वदति. देवता सक्खिट्ठाने ठपेत्वाति ‘‘यथारूपाय मग्गेनागताय सद्धाय समन्नागता, सीलेन सुतेन चागेन पञ्ञाय समन्नागता इतो चुता तत्थ उपपन्ना ता देवता, मय्हम्पि तथारूपा सद्धा सीलं सुतं चागो पञ्ञा च संविज्जती’’ति देवता सक्खिट्ठाने ठपेत्वा सक्खिं ओतारेन्तेन विय अत्तनो सद्धादिगुणा अनुस्सरितब्बा.

यदि एवं सुत्ते (अ. नि. ६.१०) उभयगुणानुस्सरणं वुत्तं, तं कथन्ति अनुयोगं मनसि कत्वा आह ‘‘सुत्ते पना’’तिआदि. तत्थ किञ्चापि वुत्तन्ति ‘‘अत्तनो च, तासञ्च देवतान’’न्ति उभयं समधुरं विय सुत्ते (अ. नि. ६.१०) किञ्चापि वुत्तं. अथ ¶ खो तं ‘‘देवतानं सद्धञ्च सीलञ्चा’’तिआदिवचनं. सक्खिट्ठाने ठपेतब्बन्ति ‘‘वुत्त’’न्ति परतो पदं ¶ आनेत्वा सम्बन्धितब्बं. किमत्थं पन सक्खिट्ठाने ठपनन्ति आह ‘‘देवतानं अत्तनो सद्धादीहि समानगुणदीपनत्थन्ति वेदितब्ब’’न्ति. कस्मा पन सुत्ते यथारुतवसेन अत्थं अग्गहेत्वा एवं अत्थो गय्हतीति आह ‘‘अट्ठकथायञ्ही’’तिआदि.

१६३. तस्माति यस्मा अट्ठकथायं देवता सक्खिट्ठाने ठपेत्वा अत्तनो गुणानुस्सरणं दळ्हं कत्वा वुत्तं, सीलचागानुस्सतीसु विय इधापि अत्तनो गुणानुस्सरणं झानुप्पत्तिनिमित्तं युत्तं, तस्मा. पुब्बभागे भावनारम्भे. अपरभागेति यथा भावेन्तस्स उपचारज्झानं इज्झति, तथा भावनाकाले. यदि अत्तनो एव इध गुणा अनुस्सरितब्बा, कथमयं देवतानुस्सतीति आह ‘‘देवतानं गुणसदिससद्धादिगुणानुस्सरणवसेना’’ति. तेन सदिसकप्पनाय अयं भावना ‘‘देवतानुस्सती’’ति वुत्ता, न देवतानं, तासं गुणानं वा अनुस्सरणेनाति दस्सेति. पुब्बभागे वा पवत्तं देवतागुणानुस्सरणं उपादाय ‘‘देवतानुस्सती’’ति इमिस्सा समञ्ञा वेदितब्बा. तथा हि वक्खति ‘‘पुब्बभागे देवता आरब्भ पवत्तचित्तवसेना’’ति. सेसं सुविञ्ञेय्यमेव.

पकिण्णककथावण्णना

१६४. एतासन्ति एतासं बुद्धानुस्सतिआदीनं छन्नं अनुस्सतीनं. वित्थारदेसनायन्ति वित्थारवसेन पवत्तदेसनायं, महानामसुत्तं (अ. नि. ६.१०; ११.११) सन्धाय वदति. भगवातिआदीनं अत्थन्ति भगवातिआदीनं पदानं अत्थं. अत्थवेदन्ति वा हेतुफलं पटिच्च उप्पन्नं तुट्ठिमाह. धम्मवेदन्ति हेतुं पटिच्च उप्पन्नं तुट्ठिं. ‘‘आरकत्ता अरह’’न्ति अनुस्सरन्तस्स हि यं तं भगवतो किलेसेहि आरकत्तं, सो हेतु. ञापको चेत्थ हेतु अधिप्पेतो, न कारको, सम्पापको वा. योनेन ञायमानो अरहत्तत्थो, तं फलं. इमिना नयेन सेसपदेसुपि हेतुफलविभागो वेदितब्बो. धम्मानुस्सतिआदीसुपि ‘‘आदिमज्झपरियोसानकल्याणत्ता’’तिआदिना, ‘‘यस्मा पन सा सम्मापटिपदा’’तिआदिना च तत्थ तत्थ हेतुअपदेसो कतोयेवाति. धम्मूपसंहितन्ति यथावुत्तहेतुहेतुफलसङ्खातगुणूपसंहितं. गुणेति अत्तनो गुणे.

१६५. अरियसावकानञ्ञेव ¶ इज्झन्तीति अरियसावकानं इज्झन्तियेवाति उत्तरपदावधारणं दट्ठब्बं, अवधारणञ्च तेसं सुखसिद्धिदस्सनत्थं. तेनाह ‘‘तेसं ही’’तिआदि. न पुथुज्जनानं सब्बेन सब्बं इज्झन्तीति. तथा हि वक्खति ‘‘एवं सन्तेपी’’तिआदि. यदि एवं ¶ , कस्मा महानामसुत्तादीसु (अ. नि. ६.१०; ११.११) बहूसु सुत्तेसु अरियसावकग्गहणं कतन्ति? तेसं बहुलविहारतायाति आचरिया.

निक्खन्तन्ति निग्गतं निस्सटं. मुत्तन्ति विस्सट्ठं. वुट्ठितन्ति अपेतं. सब्बमेतं विक्खम्भनमेव सन्धाय वदति. गेधम्हाति पलिबोधतो. इदम्पीति बुद्धानुस्सतिवसेन लद्धं उपचारज्झानमाह. आरम्मणं करित्वाति पच्चयं कत्वा, पादकं कत्वाति अत्थो. विसुज्झन्तीति परमत्थविसुद्धिं पापुणन्ति.

सम्बाधेति तण्हासंकिलेसादिना सम्पीळे संकटे घरावासे. ओकासाधिगमो लोकुत्तरधम्मस्स अधिगमाय अधिगन्तब्बओकासो. अनुस्सतियो एव अनुस्सतिट्ठानानि. विसुद्धिधम्माति विसुज्झनसभावा, विसुज्झितुं वा भब्बा. परमत्थविसुद्धिधम्मतायाति परमत्थविसुद्धिया निब्बानस्स भब्बभावेन. उपक्कमेनाति पयोगेन. परियोदपनाति विसोधना.

१६६. एवं सन्तेपीति एवं महानामसुत्तादीसु अनेकेसु सुत्तेसु अरियसावकस्सेव वसेन छसु अनुस्सतीसु देसितासुपि. यस्सानुभावेनाति यस्स चित्तप्पसादस्स बलेन. पीतिं पटिलभित्वाति अनुस्सववसेन बुद्धारम्मणं पीतिं उप्पादेत्वा.

छअनुस्सतिनिद्देसवण्णना निट्ठिता.

इति सत्तमपरिच्छेदवण्णना.

८. अनुस्सतिकम्मट्ठाननिद्देसवण्णना

मरणस्सतिकथावण्णना

१६७. इतोति ¶ ¶ देवतानुस्सतिया. सा हि छसु अनुस्सतीसु सब्बपच्छा निद्दिट्ठत्ता आसन्ना, पच्चक्खा च. अनन्तरायाति तदनन्तरं उद्दिट्ठत्ता वुत्तं. मरणस्स सति मरणस्सतीति मरणं ताव दस्सेतुं ‘‘तत्थ मरण’’न्तिआदि वुत्तं. कामञ्चेत्थ खन्धानं भेदो ‘‘जरामरणं द्वीहि खन्धेहि सङ्गहित’’न्ति (धातु. ७१) वचनतो चुतिखन्धानं विनासो मरणन्ति वत्तब्बं, विसेसतो पन तं जीवितिन्द्रियस्स विनासभावेन कम्मट्ठानिकानं पच्चुपतिट्ठतीति ‘‘जीवितिन्द्रियस्स उपच्छेदो’’ति वुत्तं. तेनेवाह निद्देसे ‘‘कळेवरस्स निक्खेपो जीवितिन्द्रियस्सुपच्छेदो’’ति (विभ. २३६; दी. नि. २.३९०; म. नि. १.९२, १२३). तत्थ एकभवपरियापन्नस्साति एकेन भवेन परिच्छिन्नस्स. जीवितिन्द्रियस्स उपच्छेदोति जीवितिन्द्रियप्पबन्धस्स विच्छेदो आयुक्खयादिवसेन अन्तरधानं. समुच्छेदमरणन्ति अरहतो सन्तानस्स सब्बसो उच्छेदभूतं मरणं. सङ्खारानं खणभङ्गसङ्खातन्ति सङ्खतधम्मानं उदयवयपरिच्छिन्नस्स पवत्तिखणस्स भङ्गो निरोधोति सङ्खं गतं. खणिकमरणन्ति यथावुत्तखणवन्तं तस्मिंयेव खणे लब्भमानं मरणं. यं खन्धप्पबन्धं उपादाय रुक्खादिसमञ्ञा, तस्मिं अनुपच्छिन्नेपि अल्लतादिविगमनं निस्साय मतवोहारो सम्मुतिमरणं. न तं इध अधिप्पेतन्ति तं समुच्छेदखणिकसम्मुतिमरणं इध मरणानुस्सतियं नाधिप्पेतं अबाहुल्लतो, अनुपट्ठहनतो, असंवेगवत्थुतो चाति अधिप्पायो.

अधिप्पेतं सतिया आरम्मणभावेन. आयुआदीनं खयकाले मरणं कालमरणं. तेसं अपरिक्खीणकाले मरणं अकालमरणं. ‘‘कालमरणं पुञ्ञक्खयेना’’ति इदं यथाधिकारं सम्पत्तिभववसेन वुत्तं, विपत्तिभववसेन पन ‘‘पापक्खयेना’’ति वत्तब्बं.

आयुसन्तानजनकपच्चयसम्पत्तियाति ¶ आयुप्पबन्धस्स पवत्तापनकानं आहारादिपच्चयानं सम्पत्तियं. विपक्कविपाकत्ताति अत्तनो फलानुरूपं दातब्बविपाकस्स दिन्नत्ता. गतिकालाहारादिसम्पत्तिया अभावेनाति ¶ देवानं विय गतिसम्पत्तिया, पठमकप्पियानं विय कालसम्पत्तिया, उत्तरकुरुकादीनं विय आहारसम्पत्तिया च अभावेन. आदि-सद्देन उतुसुक्कसोणितादिं परिग्गय्हति. अज्जतनकालपुरिसानं वियाति विय-सद्दो अट्ठाने पट्ठपितो, अज्जतनकालपुरिसानं वस्ससतमत्तपरिमाणस्स विय आयुनो खयवसेनाति योजना. एवं हि अनागतेपि परमायुनो सङ्गहो कतो होति, अतीते पन गतिसम्पत्तिया विय कालाहारादिसम्पत्तिया भावेन अनेकवस्ससहस्स परिमाणोपि आयु अहोसि. अयञ्च विभागो वत्तमानस्स अन्तरकप्पस्स वसेन वुत्तोति दट्ठब्बं. कलाबुराजादीनन्ति आदि-सद्देन नन्दयक्खनन्दमाणवकादीनं सङ्गहो दट्ठब्बो. तं सब्बम्पीति यं ‘‘कालमरणं अकालमरणं, तत्थापि पुञ्ञक्खयमरणं आयुक्खयमरणं उभयक्खयमरणं उपक्कममरण’’न्ति वुत्तप्पभेदं मरणं, तं सब्बम्पि.

१६८. योनिसोति उपायेन. मनसिकारोति मरणारम्मणो मनसिकारो. येन पन उपायेन मनसिकारो पवत्तेतब्बो, तं ब्यतिरेकमुखेन दस्सेतुं ‘‘अयोनिसो पवत्तयतो’’तिआदि वुत्तं. तत्थ अयोनिसो पवत्तयतोति अनुपायेन सतिं, संवेगं, ञाणञ्च अनुपट्ठपेत्वा मरणं अनुस्सरतो. तदेतं सब्बम्पीति सोकपामोज्जानं उप्पज्जनं, संवेगस्स अनुप्पज्जनं, सन्तासस्स उप्पज्जनञ्च यथाक्कमं सतिसंवेगञाणविहरतो होति. यो हि ‘‘मरणं नामेतं जातस्स एकन्तिक’’न्ति पण्डितानं वचनं सरति, तत्थ संवेगजातो होति सम्पजानो च, तस्स इट्ठजनमरणादिनिमित्तं सोकादयो अनोकासाव. तस्माति यस्मा अयोनिसो मनसिकारं पवत्तयतो एते दोसा, तस्मा. तत्थ तत्थाति अरञ्ञसुसानादीसु. हतमतसत्तेति चोरादीहि हते, सरसेन मते च सत्ते. दिट्ठपुब्बा सम्पत्ति येसं ते दिट्ठपुब्बसम्पत्ती, तेसं दिट्ठपुब्बसम्पत्तीनं. योजेत्वाति उपट्ठपेत्वा. एकच्चस्साति तिक्खिन्द्रियस्स ञाणुत्तरस्स.

१६९. वधकपच्चुपट्ठानतोति घातकस्स विय पति पति उपट्ठानतो आसन्नभावतो. सम्पत्तिविपत्तितोति आरोग्यादिसम्पत्तीनं विय जीवितसम्पत्तिया विपज्जनतो. उपसंहरणतोति परेसं मरणं दस्सेत्वा अत्तनो ¶ मरणस्स उपनयनतो. कायबहुसाधारणतोति सरीरस्स बहूनं साधारणभावतो. आयुदुब्बलतोति जीवितस्स दुब्बलभावतो. अनिमित्ततोति मरणस्स ववत्थितनिमित्ताभावतो ¶ . अद्धानपरिच्छेदतोति कालस्स परिच्छन्नभावतो. खणपरित्ततोति जीवितक्खणस्स इत्तरभावतो.

वधकपच्चुपट्ठानतोति एत्थ विय-सद्दो लुत्तनिद्दिट्ठोति दस्सेन्तो ‘‘वधकस्स विय पच्चुपट्ठानतो’’ति वत्वा तमेवत्थं विवरन्तो ‘‘यथा ही’’तिआदिमाह. तत्थ चारयमानोति आगुरेन्तो पहरणाकारं करोन्तो. पच्चुपट्ठितोव उपगन्त्वा ठितो समीपे एव. जरामरणं गहेत्वाव निब्बत्तन्ति ‘‘यथा हि अहिच्छत्तकमकुळं उग्गच्छन्तं पंसुविरहितं न होति, एवं सत्ता निब्बत्तन्ता जरामरणविरहिता न होन्ती’’ति एत्तकेन उपमा. अहिच्छत्तकमकुळं कदाचि कत्थचि पंसुविरहितम्पि भवेय्य, सत्ता पन कथञ्चिपि जरामरणविरहिता न होन्तीति खणिकमरणं ताव उपमाभावेन दस्सेत्वा इधाधिप्पेतं मरणं दस्सेतुं ‘‘तथा ही’’तिआदि वुत्तं. अथ वा यदिमे सत्ता जरामरणं गहेत्वाव निब्बत्तन्ति, निब्बत्तिसमनन्तरमेव मरितब्बन्ति चोदनं सन्धायाह ‘‘तथा ही’’तिआदि. अवस्सं मरणतोति अवस्सं मरितब्बतो, एकन्तेन मरणसब्भावतो वा. पब्बतेय्याति पब्बततो आगता. हारहारिनीति पवाहे पतितस्स तिणपण्णादिकस्स अतिविय हरणसीला. सन्दतेवाति सवति एव. वत्ततेवाति पवाहवसेन वत्तति एव न तिट्ठति.

यमेकरत्तिन्ति यस्सं एकरत्तियं, भुम्मत्थे उपयोगवचनं दट्ठब्बं, अच्चन्तसंयोगे वा. पठमन्ति सब्बपठमं पटिसन्धिक्खणे. गब्भेति मातुकुच्छियं. माणवोति सत्तो. येभुय्येन सत्ता रत्तियं पटिसन्धिं गण्हन्तीति रत्तिग्गहणं. अब्भुट्ठितोवाति उट्ठितअब्भो विय, अभिमुखभावेन वा उट्ठितोव मरणस्साति अधिप्पायो. सो यातीति सो माणवो याति, पठमक्खणतो पट्ठाय गच्छतेव. स गच्छं न निवत्ततीति सो एवं गच्छन्तो खणमत्तम्पि न निवत्तति, अञ्ञदत्थु मरणंयेव उपगच्छति.

कुन्नदीनन्ति पब्बततो पतितानं खुद्दकनदीनं. पातो आपोरसानुगतबन्धनानन्ति पुरिमदिवसे दिवा सूरियसन्तापेन अन्तो अनुपविसित्वा पुन रत्तियं बन्धनमूलं उपगतेन आपोरसेन तिन्तसिथिलबन्धनताय पातो आपोरसानुगतबन्धनानं.

अच्चयन्तीति ¶ अतिक्कमन्ति. उपरुज्झतीति निरुज्झति. उदकमेव ओदकं, उदकोघं वा ¶ . यस्मा अच्चयन्ति अहोरत्ता, तस्मा जीवितं उपरुज्झति. यस्मा जीवितं उपरुज्झति, तस्मा आयु खीयति मच्चानं. पपततोति पपतनतो भयं सामिकानं रुक्खे ठत्वा कम्मे विनियुञ्जितुकामानं, हेट्ठा पविट्ठानं वा. उग्गमनं पति उग्गमननिमित्तं. मा मं अम्म निवारय पब्बज्जायाति अधिप्पायो.

कोचि मित्तमुखसत्तुरन्धगवेसी सह वत्तमानोपि न हनेय्य, अयं पन एकंसेन हनतियेवाति दस्सेतुं ‘‘सहजातिया आगततो’’ति वत्वा ‘‘जीवितहरणतो चा’’ति वुत्तं.

१७०. नन्ति सम्पत्तिं. सुखीति दिब्बसदिसेहि भोगेहि, आधिपतेय्येन च सुखसमङ्गी. देहबन्धेनाति सरीरेन. असोकोति असोकमहाराजा. सोकमागतोति सोचितब्बतं गतो.

आरोग्यं योब्बनानं. ब्याधिजरापरियोसानता जीवितस्स मरणपरियोसानताय उदाहरणवसेन आनीता, पच्चयभागवसेन वा. लोकोयेव लोकसन्निवासो यथा सत्तावासाति, सन्निवसितब्बताय वा सत्तनिकायो लोकसन्निवासो. अनुगतोति अनुबन्धो पच्चत्थिकेन विय. अनुसटोति अनुपविट्ठो उपविसेन विय. अभिभूतोति अज्झोत्थटो मद्दहत्थीहि विय. अब्भाहतोति पहटो भूतेहि विय.

सेलाति सिलामया, न पंसुआदिमया. विपुलाति महन्ता अनेकयोजनायामवित्थारा. नभं आहच्चाति विपुलत्ता एव आकासं अभिविहच्च सब्बदिसासु फरित्वा. अनुपरियेय्युन्ति अनुविचरेय्युं. निप्पोथेन्ताति अत्तना आघातितं चुण्णविचुण्णं करोन्ता. अधिवत्तन्तीति अधिभवन्ति. कुलेन वा रूपेन वा सीलेन वा सुतेन वा सद्धादीहि वा सेट्ठोति सम्भावनाय खत्तियादीसु न कञ्चि परिवज्जेति. तेहि एव निहीनोति अवमञ्ञमानाय सुद्दादीसु न कञ्चि परिवज्जेति. अञ्ञदत्थु सब्बमेव अभिमद्दति निम्मथति. दण्डादिउपाया च तत्थ अविसया एवाति दस्सेतुं ‘‘न तत्थ हत्थीनं भूमी’’तिआदि वुत्तं. तत्थ मन्तयुद्धेनाति ¶ आथब्बणवेदविहितेन मन्तसङ्गामप्पयोगेन. धनेनाति धनदानेन. वा-सद्दो अवुत्तविकप्पनत्थो. तेन सामं, भेदञ्च सङ्गण्हाति.

१७१. परेहि सद्धिं अत्तनो उपसंहरणतोति परेहि मतेहि सद्धिं ‘‘तेपि नाम मता, किमङ्गं ¶ पन मादिसा’’ति अत्तनो मरणस्स उपनयनतो. यसमहत्ततोति परिवारमहत्ततो, विभवमहत्ततो च. पुञ्ञमहत्ततोति महापुञ्ञभावतो. थाममहत्ततोति वीरियबलमहत्ततो. युधिट्ठिलो धम्मपुत्तो. चानुरो यो बलदेवेन निब्बुद्धं कत्वा मारितो.

सह इद्धीहीति वेजयन्तकम्पननन्दोपनन्ददमनादीसु दिट्ठानुभावाहि अत्तनो इद्धीहि सद्धिं मच्चुमुखं पविट्ठो.

कलं नग्घन्ति सोळसिन्ति सोळसन्नं पूरणभागं न अग्घन्ति. इदं वुत्तं होति – आयस्मतो थेरस्स सारिपुत्तस्स पञ्ञं सोळसभागे कत्वा ततो एकं भागं सोळसधा गहेत्वा लद्धं एकभागसङ्खातं कलं सम्मासम्बुद्धं ठपेत्वा अञ्ञेसं सत्तानं पञ्ञा न अग्घन्तीति.

सब्बस्सापि संकिलेसपक्खस्स समुग्घातो ञायेन आरद्धवीरियस्स होतीति आह ‘‘ञाणवीरियबलेना’’ति. सम्मादिट्ठिसम्मावायामेसु हि सिद्धेसु अट्ठङ्गिको अरियमग्गो सिद्धोव होतीति. एकाकीभावेन खग्गविसाणकप्पा. परतोघोसेन विना सयमेव भूता पटिविद्धाकुप्पाति सयम्भुनो.

हत्थगतसुवण्णवलयानं अञ्ञमञ्ञं सङ्घट्टनं वंसकळीरस्स कत्थचि असत्तताति एवमादिकं तं तं निमित्तं कारणं आगम्म. वीमंसन्ताति पवत्तिनिवत्तियो उपपरिक्खन्ता. महन्तानं सीलक्खन्धादीनं एसनट्ठेन महेसयो. एकचरियनिवासेनाति एकचरियनिवासमत्तेन, न सीलादिना. खग्गमिगसिङ्गसमा उपमा येसं, खग्गमिगसिङ्गं वा समूपमा येसं ते खग्गसिङ्गसमूपमा.

तम्बनखतुङ्गनखतादिअसीतिअनुब्यञ्जनपटिमण्डितेहि सुप्पतिट्ठितपादतादीहि द्वत्तिंसाय महापुरिसलक्खणेहि विचित्रो अच्छरियब्भुतो रूपकायो एतस्साति असीति…पे… रूपकायो. सह वासनाय सब्बेसं किलेसानं ¶ पहीनत्ता सब्बाकारपरिसुद्धसीलक्खन्धादिगुणरतनेहि समिद्धो धम्मकायो एतस्साति सब्बाकार…पे… धम्मकायो. ठानसोति तङ्खणेयेव.

एवं ¶ महानुभावस्साति एवं यथावुत्तरूपकायसम्पत्तिया, धम्मकायसम्पत्तिया च विञ्ञायमानविपुलापरिमेय्यबुद्धानुभावस्स, वसं नागतं अनुपगमनवसेनाति अधिप्पायो.

मरणं सामञ्ञं एतस्साति मरणसामञ्ञो, तस्स भावो मरणसामञ्ञता, ताय.

१७२. किमिकुलानन्ति किमिसमूहानं, किमिजातीनं वा. जीयन्तीति जरं पापुणन्ति.

निक्खन्तेति वीतिवत्ते. पटिहितायाति पच्चानुगताय. सो ममस्स अन्तरायोति सा यथावुत्ता न केवलं कालकिरियाव, अथ खो मम अतिदुल्लभं खणं लभित्वा ठितस्स सत्थुसासनमनसिकारस्स अन्तरायो अस्स भवेय्य. ब्यापज्जेय्याति विपत्तिं गच्छेय्य. सत्थकेन विय अङ्गपच्चङ्गानं कन्तनका मरणकाले सन्धिबन्धनच्छेदनकवाता सत्थकवाता.

१७३. अबलन्ति बलहीनं. दुब्बलन्ति तस्सेव वेवचनं. अभावत्थो हि अयं दु-सद्दो ‘‘दुस्सीलो (अ. नि. ५.२१३; अ. नि. १०.७५) दुप्पञ्ञो’’तिआदीसु (म. नि. १.४४९) विय. तदेतं आयु. अस्सासपस्सासानं समवुत्तिता अपरापरं पवेसनिक्खमोव. बहि निक्खन्तनासिकवाते अन्तो अपविसन्ते, पविट्ठे वा अनिक्खमन्तेति एकस्सेव पवेसनिक्खमो विय वुत्तं, तं नासिकवातभावसामञ्ञेनाति दट्ठब्बं. अधिमत्तताय अच्चासन्नअधिट्ठानादिना. तदभावो हि इरियापथानं समवुत्तिता. अतिसीतेन अभिभूतस्स कायस्स विपज्जनं महिंसरट्ठादीसु हिमपातकालेन दीपेतब्बं. तत्थ हि सत्ता सीतेन भिन्नसरीरा जीवितक्खयं पापुणन्ति. अतिउण्हेन अभिभूतस्स विपज्जनं मरुकन्तारे उण्हाभितत्ताय पच्छिं, तत्थ ठपितं उपरि साटकं, पुत्तञ्च अक्कमित्वा मताय इत्थिया दीपेतब्बं. महाभूतानं समवुत्तिता पकोपाभावो ¶ . पथवीधातुआदीनं पकोपेन सरीरस्स विकारापत्ति परतो धातुकम्मट्ठानकथायं आगमिस्सति. युत्तकालेति भुञ्जितुं युत्तकाले खुद्दाभिभूतकाले.

१७४. अववत्थानतोति कालादिवसेन ववत्थानाभावतो. ववत्थानन्ति चेत्थ परिच्छेदो अधिप्पेतो, न असङ्करतो ववत्थानं, निच्छयो चाति आह ‘‘परिच्छेदाभावतो’’ति. न नायरेति न ञायन्ति.

इतो ¶ परन्ति एत्थ परन्ति परं अञ्ञं कालन्ति अत्थो. तेन ओरकालस्सापि सङ्गहो सिद्धो होति. परमायुतो ओरकालं एव चेत्थ ‘‘पर’’न्ति अधिप्पेतं. ततो परं सत्तानं जीवनस्स अभावतो ‘‘ववत्थानाभावतो’’ति वत्तुं न सक्काति. अब्बुदपेसीतिआदीसु ‘‘अब्बुदकाले पेसिकाले’’तिआदिना काल-सद्दो पच्चेकं योजेतब्बो. कालोति इध पुब्बण्हादिवेला अधिप्पेता. तेनाह ‘‘पुब्बण्हेपि ही’’तिआदि. इधेव देहेन पतितब्बन्ति सम्बन्धो. अनेकप्पकारतोति नगरे जातानं गामे, गामे जातानं नगरे, वने जातानं जनपदे, जनपदे जातानं वनेतिआदिना अनेकप्पकारतो. इतो चुतेनाति इतो गतितो चुतेन. इध इमिस्सं गतियं. यन्तयुत्तगोणो वियाति यथा यन्ते युत्तगोणो यन्तं नातिवत्तति, एवं लोको गतिपञ्चकन्ति एत्तकेन उपमा.

१७५. अप्पं वा भिय्योति वस्ससततो उपरि ‘‘दस वा वस्सानि, वीसति वा’’तिआदिना दुतियं वस्ससतं अपापुणन्तो अप्पकं वा जीवतीति अत्थो. गमनीयोति गन्धब्बो उपपज्जनवसेन. सम्परायोति परलोको.

हीळेय्याति परिभवेय्य न सम्भावेय्य. नन्ति आयुं. सुपोरिसोति साधुपुरिसो पञ्ञवा. चरेय्याति सुचरितं चरेय्य. तेनाह ‘‘आदित्तसीसोवा’’ति.

सत्तहि उपमाहीति –

‘‘सेय्यथापि, ब्राह्मण, तिणग्गे उस्सावबिन्दु सूरिये उग्गच्छन्ते खिप्पंयेव पटिविगच्छति, न चिरट्ठितिकं होति. उदके उदकपुब्बुळं. उदके ¶ दण्डराजि. नदी पब्बतेय्या दूरङ्गमा सीघसोता हारहारिनी. बलवा पुरिसो जिव्हग्गे खेळपिण्डं संयूहित्वा अकसिरेनेव वमेय्य. दिवसं सन्तत्ते अयोकटाहे मंसपेसि पक्खित्ता खिप्पंयेव पटिविगच्छति, न चिरट्ठितिका होति. गावी वज्झा आघातनं नीयमाना यं यदेव पादं उद्धरति, सन्तिकेव होति वधस्स, सन्तिकेव मरणस्स, एवमेवं खो, ब्राह्मण, गोवज्झूपमं जीवितं मनुस्सानं परित्तं लहुकं बहुदुक्खं बहुपायासं मन्तायं बोद्धब्बं, कत्तब्बं कुसलं, चरितब्बं ब्रह्मचरियं, नत्थि जातस्स अमरण’’न्ति (अ. नि. ७.७४) –

एवमागताहि ¶ इमाहि सत्तहि उपमाहि अलङ्कतं.

रत्तिन्दिवन्ति एकं रत्तिन्दिवं. भगवतो सासनन्ति अरियमग्गपटिवेधावहं सत्थु ओवादं. बहुं वत मे कतं अस्साति बहुं वत मया अत्तहितं पब्बजितकिच्चं कतं भवेय्य. तदन्तरन्ति तं खणं तत्तकं वेलं. एकं पिण्डपातन्ति एकं दिवसं यापनप्पहोनकं पिण्डपातं. दन्धन्ति मन्दं चिराय. अविस्सासियो अविस्सासनीयो.

१७६. चित्ते धरन्तेयेव सत्तानं जीवितवोहारो, चित्तस्स च अतिइत्तरो खणो लहुपरिवत्तिभावतो. यथाह भगवा ‘‘नाहं, भिक्खवे, अञ्ञं एकधम्मम्पि समनुपस्सामि, यं एवं लहुपरिवत्तं, यथयिदं चित्त’’न्ति (अ. नि. १.४८; कथा. ३३५). तस्मा सत्तानं जीवितं एकचित्तक्खणिकत्ता लहुसं इत्तरन्ति दस्सेन्तो ‘‘परमत्थतो’’तिआदिमाह. तत्थ ‘‘परमत्थतो’’ति इमिना यायं ‘‘यो चिरं जीवति, सो वस्ससत’’न्तिआदिना सत्तानं (दी. नि. २.७; सं. नि. १.१४५; अ. नि. ७.७४) जीवितप्पवत्ति वुत्ता, सा पबन्धविसयत्ता वोहारवसेनाति तं पटिक्खिपति. ‘‘अतिपरित्तो’’ति इमिना –

‘‘सेय्यथापि, भिक्खवे, चत्तारो दळ्हधम्मा धनुग्गहा सुसिक्खिता कतहत्था कतूपासना चतुद्दिसा ठिता अस्सु, अथ पुरिसो आगच्छेय्य ‘अहं इमेसं…पे… कतूपासनानं चतुद्दिसा कण्डे खित्ते अप्पतिट्ठिते पथवियं गहेत्वा आहरिस्सामी’ति. यथा ¶ च, भिक्खवे, तस्स पुरिसस्स जवो, यथा च चन्दिमसूरियानं जवो, ततो सीघतरो. यथा च, भिक्खवे, तस्स पुरिसस्स जवो, यथा च चन्दिमसूरियानं जवो, यथा च या देवता चन्दिमसूरियानं पुरतो धावन्ति, तासं देवतानं जवो, ततो सीघतरं आयुसङ्खारा खीयन्ती’’ति (सं. नि. २.२२८) –

एवं वुत्तं परित्तम्पि पटिक्खिपति. तत्र हि गमनस्सादानं देवपुत्तानं हेट्ठुपरियेन पटिमुखं धावन्तानं सिरसि, पादे च बद्धखुरधारासन्निपाततोपि परित्तको रूपजीवितिन्द्रियस्स सो खणो वुत्तो, चित्तस्स पन अतिविय परित्ततरो, यस्स उपमापि नत्थि. तेनेवाह ‘‘यावञ्चिदं, भिक्खवे, उपमापि न सुकरा, याव लहुपरिवत्तं चित्त’’न्ति (अ. नि. १.४८). जीवितक्खणोति जीवनक्खणो. एकचित्तप्पवत्तिमत्तोयेव एकस्स चित्तस्स पवत्तिमत्तेनेव ¶ सत्तानं परमत्थतो जीवनक्खणस्स परिच्छिन्नत्ता. इदानि तमत्थं उपमाय पकासेन्तो ‘‘यथा नामा’’तिआदिमाह. तत्थ पवत्तमानन्ति पवत्तन्तं. एकचित्तक्खणिकन्ति एकचित्तक्खणमत्तवन्तं. तस्मिं चित्ते निरुद्धमत्तेति येन वत्तमानचित्तक्खणेन ‘‘जीवती’’ति वुच्चति, तस्मिं चित्ते निरोधं भङ्गं पत्तमत्ते तंसमङ्गी सत्तो निरुद्धो मतोति वुच्चति. वुत्तमेवत्थं पाळिया विभावेतुं ‘‘यथाहा’’तिआदि वुत्तं. तेन तीसुपि कालेसु सत्तानं परमत्थतो जीवनं नाम चित्तक्खणवसेनेवाति दस्सेति.

जीवितन्ति जीवितिन्द्रियं. सुखदुक्खाति सुखदुक्खवेदना. उपेक्खापि हि सुखदुक्खासु एव अन्तोगधा इट्ठानिट्ठभावतो. अत्तभावोति जीवितवेदनाविञ्ञाणानि ठपेत्वा अवसिट्ठधम्मा वुत्ता. केवलाति अत्तना, निच्चभावेन वा अवोमिस्सा. एकचित्तसमायुत्ताति एकेकेन चित्तेन सहिता. लहुसो वत्तति खणोति वुत्तनयेन एकचित्तक्खणिकताय लहुको अतिइत्तरो जीवितादीनं खणो वत्तति.

ये निरुद्धा मरन्तस्साति चवन्तस्स सत्तस्स चुतितो उद्धं ‘‘निरुद्धा’’ति वत्तब्बा ये खन्धा. तिट्ठमानस्स वा इधाति ये वा इध पवत्तियं तिट्ठन्तस्स धरन्तस्स भङ्गप्पत्तिया निरुद्धा खन्धा. सब्बेपि सदिसा ते सब्बेपि एकसदिसा. कथं? गता अप्पटिसन्धिका पुन आगन्त्वा पटिसन्धानाभावेन विगता. यथा ¶ हि चुतिखन्धा न निवत्तन्ति, एवं ततो पुब्बेपि खन्धा, तस्मा एकचित्तक्खणिकं सत्तानं जीवितन्ति अधिप्पायो.

अनिब्बत्तेन न जातोति अनुप्पन्नेन चित्तेन जातो न होति अजातो नाम होति. पच्चुप्पन्नेन वत्तमानेन चित्तेन जीवति जीवमानो नाम होति. चित्तभङ्गा मतो लोकोति चुतिचित्तस्स विय सब्बस्सपि तस्स तस्स चित्तस्स भङ्गप्पत्तिया अयं लोको परमत्थतो मतो नाम होति निरुद्धस्स अप्पटिसन्धिकत्ता. एवं सन्तेपि पञ्ञत्ति परमत्थिया या तं तं धरन्तं चित्तं उपादाय ‘‘तिस्सो जीवति, फुस्सो जीवती’’ति वचनप्पवत्तिया विसयभूता सन्तानपञ्ञत्ति, सा एत्थ परमत्थिया परमत्थभूता. तथा हि वदन्ति ‘‘नामगोत्तं न जीरती’’ति (सं. नि. १.७६).

१७७. अञ्ञतरञ्ञतरेन आकारेन. चित्तन्ति कम्मट्ठानारम्मणं चित्तं. आसेवनं लभतीति भावनासेवनं ¶ लभति, बहिद्धा विक्खेपं पहाय एकत्तवसेन मरणारम्मणमेव होतीति. तेनाह ‘‘मरणारम्मणा सति सन्तिट्ठती’’ति. सभावधम्मानं भेदो सभावधम्मगतिको एवाति आह ‘‘सभावधम्मत्ता पन आरम्मणस्सा’’ति. तेनाह भगवा ‘‘जरामरणं, भिक्खवे, अनिच्चं सङ्खतं पटिच्चसमुप्पन्न’’न्तिआदि (सं. नि. २.२०). संवेजनीयत्ताति संवेगजननतो महाभूतेसु महाविकारता विय गय्हमाना मरणं अनुस्सरियमानं उपरूपरि उब्बेगमेव आवहतीति तत्थ न भावनाचित्तं अप्पेतुं सक्कोति. यदि सभावधम्मत्ता अप्पनं न पापुणाति, लोकुत्तरज्झानं एकच्चानि अरूपज्झानानि च कथन्ति आह ‘‘लोकुत्तरज्झानं पना’’तिआदि. विसुद्धिभावनानुक्कमवसेनाति हेट्ठिमविसुद्धिया आनुभावेन अधिगतातिसयाय पटिपदाञाणदस्सनविसुद्धिभावनाय, सब्बसङ्खारेहि निब्बिन्दनविरज्जनादिविसंयोगाधिमुत्तिअप्पनाय च पटिपक्खभूतानं पापधम्मानं विगमोति एवंभूतस्स विसुद्धिभावनानुक्कमस्स वसेन लोकुत्तरज्झानं अप्पनाप्पत्तमेव होति. आरम्मणसमतिक्कमनमत्तं तत्थ होतीति अञ्ञेसं सभावधम्मारम्मणकम्मट्ठानानं विय चित्तस्स समाधाने ब्यापारो नत्थि. यथासमाहितेन पन चित्तेन आरम्मणसमतिक्कमनमत्तमेव भावनाय कातब्बं, तस्मा सभावधम्मेपि आरुप्पज्झानं अप्पेतीति.

सततं ¶ अप्पमत्तो होति संवेगबहुलत्ता, ततो एवस्स सब्बभवेसु अनभिरतिसञ्ञापटिलाभो. जीवितनिकन्तिं जहाति मरणस्स अवस्संभावितादस्सनतो. पापगरही होति अनिच्चसञ्ञापटिलाभतो, ततो एव असन्निधिबहुलता, विगतमलमच्छेरता च. तदनुसारेनाति अनिच्चसञ्ञापरिचयानुसारेन. अभावितमरणाति अभावितमरणानुस्सरणा. अभयो असम्मूळ्हो कालं करोति पगेव मरणसञ्ञाय सूपट्ठितत्ता.

कायगतासतिकथावण्णना

१७८. बुद्धा उप्पज्जन्ति एत्थाति बुद्धुप्पादो, बुद्धानं उप्पज्जनकालो, तस्मा. अञ्ञत्र तं ठपेत्वा, अञ्ञस्मिं कालेति अत्थो. न पवत्तपुब्बन्ति अपवत्तपुब्बं. ततो एव सब्बतित्थियानं अविसयभूतं. ननु च सुनेत्तसत्थारादयो (अ. नि. ६.५४; ७.६६, ७३), अञ्ञे च तापसपरिब्बाजका सरीरं ‘‘असुभ’’न्ति जानिंसु. तथा हि सुमेधतापसेन सरीरं जिगुच्छन्तेन वुत्तं –

‘‘यन्नूनिमं ¶ पूतिकायं, नानाकुणपपूरितं;

छड्डयित्वान गच्छेय्यं, अनपेक्खो अनत्थिको’’ति. (बु. वं. २.८) –

आदि. कामं बोधिसत्ता, अञ्ञे च तापसादयो सरीरं ‘‘असुभ’’न्ति जानन्ति, कम्मट्ठानभावेन पन न जानन्ति. तेन वुत्तं ‘‘अञ्ञत्र बुद्धुप्पादा’’तिआदि. संवेगाय संवत्तति याथावतो कायसभावप्पवेदनतो. अत्थायाति दिट्ठधम्मिकादिअत्थाय. योगक्खेमायाति चतूहि योगेहि खेमभावाय. सतिसम्पजञ्ञायाति सब्बत्थ सतिअविप्पवासाय च सत्तट्ठानियसम्पजञ्ञाय च. ञाणदस्सनपटिलाभायाति विपस्सनाञाणाधिगमाय. विज्जाविमुत्तिफलसच्छिकिरियायाति तिस्सो विज्जा, चित्तस्स अधिमुत्ति निब्बानं, चत्तारि सामञ्ञफलानीति एतेसं पच्चक्खकरणाय. अमतस्स निब्बानस्स अधिगमहेतुताय, अमतसदिसातप्पकसुखसहितताय च कायगतासति ‘‘अमत’’न्ति वुत्ता. परिभुञ्जन्तीति झानसमापज्जनेन वळञ्जन्ति. परिहीनन्ति जिनं. विरद्धन्ति अनधिगमेन विरज्झितं. आरद्धन्ति साधितं निप्फादितं. अनेकेहि आकारेहि तेसु तेसु सुत्तन्तेसु पसंसित्वा यं तं कायगतासतिकम्मट्ठानं निद्दिट्ठन्ति सम्बन्धो ¶ . कत्थ पन निद्दिट्ठन्ति? कायगतासतिसुत्ते (म. नि. ३.१५३ आदयो). तत्थ हि ‘‘कथं भाविता च भिक्खवे’’तिआदिना अयं देसना आगता. तत्रायं सङ्खेपत्थो – भिक्खवे, केन पकारेन कायगतासतिभावना भाविता, केन च पकारेन पुनप्पुनं कता आनापानज्झानादीनं निप्फत्तिया महप्फला, तेसं तेसं विज्जाभागियानं, अभिञ्ञासच्छिकरणीयानञ्च धम्मानं, अरतिरतिसहनतादीनञ्च संसिद्धिया महानिसंसा च होतीति? आनापानपब्बन्ति आनापानकम्मट्ठानावधि. एस नयो सेसेसुपि.

धातुमनसिकारकम्मट्ठानेन यदिपि उपचारसमाधि इज्झति, सम्मसनवारो पन तत्थ सातिसयोति धातुमनसिकारपब्बम्पि ‘‘विपस्सनावसेन वुत्त’’न्ति वुत्तं. ‘‘अयम्पि खो कायो एवंधम्मो एवंभावी एवंअनतीतो’’ति (दी. नि. २.३७९; म. नि. १.११२) तत्थ तत्थ असुभानिच्चतादीहि सद्धिं काये आदीनवस्स विभावनवसेन देसनाय आगतत्ता ‘‘नवसिवथिक…पे… वुत्तानी’’ति वुत्तं. एत्थ उद्धुमातकादीसूति एतेसु सिवथिकपब्बेसु आगतउद्धुमातकादीसु. आनापानस्सतिवसेनाति आनापानस्सतिभावनावसेन. यो उपरि ‘‘करीसं मत्थलुङ्ग’’न्ति मत्थलुङ्गकोट्ठासो गय्हति, तं इध पाळियं (म. नि. ३.१५४) अट्ठिमिञ्जेनेव सङ्गण्हित्वा देसना आगताति दस्सेन्तो ‘‘मत्थलुङ्गं अट्ठिमिञ्जेन सङ्गहेत्वा’’ति आह ¶ . इधाति इमस्मिं अनुस्सतिनिद्देसे. कायं गता, काये वा गता सति कायगतासतीति सतिसीसेन इदं द्वत्तिंसाकारकम्मट्ठानं अधिप्पेतन्ति योजना.

१७९. चतुमहाभूतिकन्ति चतुमहाभूतसन्निस्सयं. पूतिकायन्ति पूतिभूतं परमदुग्गन्धकायं. ठानगमनावत्थं सरीरं सन्धाय, तस्स वा अवयवेसु सब्बहेट्ठिमं पादतलन्ति वुत्तं ‘‘उद्धं पादतला’’ति. तिरियं तचपरिच्छिन्नन्ति एत्थ ननु केसलोमनखानं, तचस्स च अतचपरिच्छिन्नता अत्थीति? किञ्चापि अत्थि, तचपरिच्छिन्नबहुलताय पन कायस्स तचपरिच्छिन्नता होतीति एवं वुत्तं. तचो परियन्तो अस्साति तचपरियन्तोति एतेन पन वचनेन कायेकदेसभूतो तचो गहितो एव, तप्पटिबद्धा च केसादयो तदनुपविट्ठमूला तचपरियन्ताव होन्तीति ¶ द्वत्तिंसाकारसमूहो सब्बोपि कायो तचपरियन्तो वुत्तोति वेदितब्बो.

अत्थीति वचनविपल्लासेन वुत्तं, निपातपदं वा एतं. तस्मा तीसुपि सङ्खासु तदेवस्स रूपं. तेनाह ‘‘संविज्जन्ती’’ति. अक्खरचिन्तकेहि सरीरे काय-सद्दं वण्णन्तेहिपि असुचिसमुदायभावेनेव इच्छितब्बोति दस्सेन्तो ‘‘असुचिसञ्चयतो’’ति वत्वा पुन नं निरुत्तिनयेन दस्सेतुं ‘‘कुच्छितान’’न्तिआदि वुत्तं. तत्थ आयभूततोति उप्पत्तिट्ठानभूतत्ता. ‘‘पूरं नानप्पकारस्सा’’ति वुत्तं. ‘‘के पन ते पकारा? येहि नानप्पकारं असुचि वुत्त’’न्ति ते केसादिके दस्सेतुं पाळियं ‘‘केसा लोमा’’तिआदि वुत्तन्ति इममत्थं दीपेन्तो आह ‘‘एते केसादयो द्वत्तिंसाकारा’’ति. आकारा पकाराति हि एको अत्थोति. एवं सम्बन्धोति ‘‘अत्थि इमस्मिं काये नखा’’तिआदिना सब्बकोट्ठासेसु ‘‘अत्थि इमस्मिं काये’’ति पदत्तयेन सम्बन्धो वेदितब्बो.

परितोति तिरियं, समन्ततो वा पादतलकेसमूलेसु च तचस्स लब्भनतो. सुचिभावन्ति सुचिनो सब्भावं, सुचिमेव वा.

१८०. येन विधिना उग्गहे कुसलो होति, सो सत्तविधो विधि ‘‘उग्गहकोसल्ल’’न्ति वुच्चति, तन्निब्बत्तं वा ञाणं. मनसिकारकोसल्लेपि एसेव नयो.

सज्झायन्ता वाति सज्झायं करोन्ता एव. तेसं किर चत्तारो मासे सज्झायन्तानं सज्झायमग्गेनेव ¶ कोट्ठासे उपधारेन्तानं पटिपाटिया द्वत्तिंसाकारा विभूततरा हुत्वा खायिंसु, पटिक्कूलसञ्ञा सण्ठासि, ते तस्मिं निमित्ते झानं अप्पेत्वा झानपादकं विपस्सनं वड्ढेत्वा दस्सनमग्गं पटिविज्झिंसु. तेन वुत्तं ‘‘सज्झायन्ता व सोतापन्ना अहेसु’’न्ति.

परिच्छिन्दित्वाति तचपञ्चकादिवसेनेव परिच्छेदं कत्वा. पथवीधातुबहुलभावतो मत्थलुङ्गस्स करीसावसाने तन्तिआरोपनमाह. एत्थ च मंसं, न्हारु, अट्ठि, अट्ठिमिञ्जं वक्कं, वक्कं अट्ठिमिञ्जं, अट्ठि, न्हारु, मंसं, तचो, दन्ता, नखा, लोमा, केसाति एवं वक्कपञ्चकादीसु अनुलोमसज्झायं वत्वा पटिलोमसज्झायो पुरिमेहि सम्बन्धो वुत्तो. स्वायं सम्मोहविनोदनियं ¶ (विभ. अट्ठ. ३५६) विसुं तिपञ्चाहं, पुरिमेहि एकतो तिपञ्चाहन्ति छपञ्चाहं सज्झायो वुत्तो, तत्थ आदिअन्तदस्सनवसेन वुत्तोति दट्ठब्बो. अनुलोमपटिलोमसज्झायेपि हि पटिलोमसज्झायो अन्तिमो होति, सज्झायप्पकारन्तरं वा एतम्पीति वेदितब्बं.

हत्थसङ्खलिकाति अङ्गुलिपन्तिमाह.

मनसा सज्झायोति चित्तेन चिन्तनमाह, यं मानसं ‘‘जप्पन’’न्ति वुच्चति, सम्मदेव अज्झायोति वा सज्झायो, चिन्तनन्ति अत्थो. चिरतरं सुट्ठु पवत्तनेन पगुणभूता कम्मट्ठानतन्ति समावज्जित्वा मनसि करोन्तस्स आदितो पट्ठाय याव परियोसाना कत्थचि असज्जमाना निरन्तरमेव उपट्ठाति, तदनुसारेन तदत्थोपि विभूततरो हुत्वा खायतीति आह ‘‘वचसा सज्झायो हि…पे… पटिवेधस्स पच्चयो होती’’ति. लक्खणपटिवेधस्साति असुभलक्खणपटिवेधस्स.

पटिक्कूलसभावसल्लक्खणस्स कस्सचि वण्णग्गहणमुखेन कोट्ठासा ववत्थानं गच्छन्ति, कस्सचि सण्ठानग्गहणमुखेन, कस्सचि दिसाविभागग्गहणमुखेन, कस्सचि पतिट्ठितोकासग्गहणमुखेन, कस्सचि सब्बसो परिच्छिज्जग्गहणमुखेनाति वण्णादितो सल्लक्खणं उग्गहकोसल्लावहं वुत्तन्ति तं दस्सेन्तो ‘‘केसादीनं वण्णो ववत्थपेतब्बो’’तिआदिमाह.

अत्तनो भागो सभागो, सभागेन परिच्छेदो सभागपरिच्छेदो, हेट्ठुपरितिरियपरियन्तेहि, सकोट्ठासिककेसन्तरादीहि ¶ च परिच्छेदोति अत्थो. अमिस्सकतावसेनाति कोट्ठासन्तरेहि अवोमिस्सकतावसेन. असभागो हि इध ‘‘विसभागो’’ति अधिप्पेतो, न विरुद्धसभागो. स्वायमत्थो केसादिसद्दतो एव लब्भति. सद्दन्तरत्थापोहनवसेन सद्दो अत्थं वदतीति ‘‘केसा’’ति वुत्ते ‘‘अकेसा न होन्ती’’ति अयमत्थो विञ्ञायति. के पन ते अकेसा? लोमादयो, न च घटादीसु पसङ्गोपकरणेनेव तेसं निवत्तितत्ता.

पटिक्कूलवसेनेव कथितं धातुविभागस्स सामञ्ञतोपि अगहितत्ता. तत्थेव विसुं धातुकम्मट्ठानस्स कथितत्ता च धातुविभङ्गो पक्कुसातिसुत्तं ¶ (म. नि. ३.३४२) विभङ्गप्पकरणे धातुविभङ्गपाळि (विभ. १७२ आदयो) च. यस्स वण्णतो उपट्ठाति केसादि, तं पुग्गलं सन्धाय झानानि केसादीसु वण्णकसिणारम्मणानि विभत्तानि. ञत्वा आचिक्खितब्बन्ति यदत्थं वुत्तं, तं दस्सेतुं ‘‘तत्थ धातुवसेना’’तिआदि वुत्तं. इधाति इमस्मिं पटिक्कूलमनसिकारपब्बे. कायगतासतिसुत्ते (म. नि. ३.१५३ आदयो) हि पटिक्कूलमनसिकारपब्बं गहेत्वा इध कायगतासतिभावना निद्दिसीयति.

१८१. न एकन्तरिकायाति एकन्तरिकायपि न मनसि कातब्बं, पगेव द्वन्तरिकादिनाति अधिप्पायो. न भावनं सम्पादेति, लक्खणपटिवेधं न पापुणाति एकन्तरिकाय मनसि करोन्तोति सम्बन्धो.

ओक्कमनविस्सज्जनन्ति पटिपज्जितब्बविस्सज्जेतब्बे मग्गे. पुच्छित्वाव गन्तब्बं होति गहेतब्बविस्सज्जेतब्बट्ठानस्स असल्लक्खणतो. कम्मट्ठानं परियोसानं पापुणातीति आदितो पट्ठाय याव परियोसाना मनसिकारमत्तं होतीति अधिप्पायो. अविभूतं पन होति पटिक्कूलाकारस्स सुट्ठु असल्लक्खणतो. ततो एव न विसेसं आवहति.

कम्मट्ठानं परियोसानं न गच्छतीति पटिपाटिया सब्बकोट्ठासे मनसि करोतोयेव विभूता हुत्वा उपट्ठहन्ति. ते सातिसयं पाटिक्कूलतो मनसि करोन्तस्स कम्मट्ठानं परियोसानं गच्छेय्य, इमस्स पन अतिविय दन्धं मनसि करोतो विभूततो उपट्ठानमेव नत्थि, कुतो पटिक्कूलताय सण्ठानं. तेनाह ‘‘विसेसाधिगमस्स पच्चयो न होती’’ति.

बहिद्धा ¶ पुथुत्तारम्मणेति ‘‘असुचि पटिक्कूल’’न्ति केसादीसु पवत्तेतब्बं असुभानुपस्सनं हित्वा सुभादिवसेन गय्हमाना केसादयोपि इध ‘‘बहिद्धा पुथुत्तारम्मणमेवा’’ति वेदितब्बा. रूपादयो हि नीलादिवसेन पुथुसभावताय पुथुत्तारम्मणं नाम, नानारम्मणन्ति अत्थो. असमाधानं चेतसो विरूपो खेपोति विक्खेपो. सो सतिं सूपट्ठितं कत्वा सक्कच्चं कम्मट्ठानं मनसि करोन्तेन पटिबाहितब्बो. परिहायतीति हायति. परिधंसतीति विनस्सति.

या ¶ अयं केसा लोमातिआदिका लोकसङ्केतानुगता. पण्णत्तीति अट्ठ धम्मे उपादाय पण्णत्ति. तं केसादिपण्णत्तिं. अतिक्कमित्वाति पटिक्कूलभावनाय अतिक्कमित्वा उग्घाटेत्वा. तस्सा उग्घाटितत्ता तस्मिं तस्मिं कोट्ठासे पटिक्कूलतो उपट्ठहन्ते ‘‘पटिक्कूल’’न्ति चित्तं ठपेतब्बं. इदानि तमत्थं उपमाय विभावेन्तो ‘‘यथा ही’’तिआदिमाह. तत्रिदं उपमासंसन्दनं – मनुस्सा विय योगावचरो. उदपानं विय कोट्ठासा. तालपण्णादिसञ्ञाणं विय केसादिपञ्ञत्ति. तेन मनुस्सानं उदपाने न्हानपिवनादि विय योगावचरस्स पुब्बभागे केसा लोमाति पण्णत्तिवसेन मनसिकारो. अभिण्हसञ्चारेन मनुस्सानं सञ्ञाणेन विना उदपाने किच्चकरणं विय योगावचरस्स मनसिकारबलेन पण्णत्तिं अतिक्कमित्वा पटिक्कूलभावेयेव चित्तं ठपेत्वा भावनानुयोगो. पुब्बभागे…पे… पाकटो होतीति ‘‘केसा लोमा’’तिआदिना (म. नि. ३.१५४) भावनमनुयुञ्जन्तस्स केसादिपञ्ञत्तिया सद्धिंयेव कोट्ठासानं पटिक्कूलभावो पुब्बभागे पाकटो होति. अथाति पच्छा भावनाय वीथिपटिपन्नकाले. पटिक्कूलभावेयेव चित्तं ठपेतब्बन्ति कोट्ठासानं पटिक्कूलाकारेयेव भावनाचित्तं पवत्तेतब्बं.

अनुपुब्बेन मुञ्चनं अनुपुब्बमुञ्चनं, अनुपट्ठहन्तस्स अनुपट्ठहन्तस्स मुञ्चनन्ति अत्थो. कथं पन अनुपट्ठानं होतीति आह ‘‘आदिकम्मिकस्सा’’तिआदि. परियोसानकोट्ठासमेव आहच्च तिट्ठतीति इदं कम्मट्ठानं तन्तिअनुसारेन आदितो कम्मट्ठानमनसिकारो पवत्ततीति कत्वा वुत्तं. तथा हिस्स मनसा सज्झायो विय मनसिकारो ते ते कोट्ठासे आमट्ठमत्ते कत्वा गच्छति, न लक्खणसल्लक्खणवसेन. यदा पन ने लक्खणसल्लक्खणवसेन सुट्ठु उपधारेन्तो मनसि करोति, तदा केचि उपट्ठहन्ति, केचि न उपट्ठहन्ति. तत्थ पटिपज्जनविधिं दस्सेन्तो ‘‘अथस्सा’’तिआदिमाह. तत्थ कम्मन्ति मनसिकारकम्मं ताव कातब्बं. कीव चिरन्ति? याव द्वीसु उपट्ठितेसु, तेसम्पि द्विन्नं एको सुट्ठुतरं उपट्ठहति ताव.

उक्कुट्ठुक्कुट्ठिट्ठानेयेव ¶ उट्ठहित्वाति पुब्बे विय एकत्थकताय उक्कुट्ठिया कमेन सब्बतालेसु पतित्वा उट्ठहित्वा उट्ठहित्वा परियन्ततालं ¶ , आदितालञ्च आगन्त्वा ततो ततो तत्थ तत्थेव कताय उक्कुट्ठिया उट्ठहित्वाति अत्थो.

द्वे भिक्खाति द्वीसु गेहेसु लद्धभिक्खा.

अप्पनातोति अप्पनाकारतो द्वत्तिंसाकारे अप्पना होन्ति. किं पच्चेकं कोट्ठासेसु होति उदाहु अञ्ञथाति विचारणायं आह ‘‘अप्पनाकोट्ठासतो’’ति, कोट्ठासतो कोट्ठासतोति अत्थो. तेनाह ‘‘केसादीसू’’तिआदि.

अधिचित्तन्ति समथविपस्सनाचित्तं.

अनुयुत्तेनाति युत्तप्पयुत्तेन, भावेन्तेनाति अत्थो. कालेनकालन्ति काले काले. समाधिनिमित्तं उपलक्खितसमाधानाकारो समाधि एव. मनसि कातब्बन्ति चित्ते कातब्बं, उप्पादेतब्बन्ति अत्थो. समाधिकारणं वा आरम्मणं समाधिनिमित्तं, तं आवज्जितब्बन्ति अत्थो. पग्गहनिमित्तउपेक्खानिमित्तेसुपि एसेव नयो. ठानं अत्थीति वचनसेसो. तं भावना चित्तं कोसज्जाय संवत्तेय्य, एतस्स संवत्तनस्स ठानं कारणं अत्थीति अत्थो. तं वा मनसिकरणचित्तं कोसज्जाय संवत्तेय्य, एतस्स ठानं कारणं अत्थीति अत्थो. मुदुन्ति सुभावितभावेन मुदुभूतं, वसीभावप्पत्तन्ति अत्थो. मुदुत्ता एव कम्मञ्ञं कम्मक्खमं कम्मयोग्गं. पभस्सरन्ति उपक्किलेसविगमेन परिसुद्धं, परियोदातन्ति अत्थो. न च पभङ्गूति कम्मनियभावूपगमनेन न च पभिज्जनसभावं सुद्धन्तं विय सुवण्णं विनियोगक्खमं. तेनाह ‘‘सम्मा समाधियति आसवानं खयाया’’ति.

उक्कं बन्धतीति मूसं सम्पादेति. आलिम्पेतीति आदीपेति जालेति. तञ्चाति तं पिळन्धनविकतिसङ्खातं अत्थं पयोजनं अस्स सुवण्णकारस्स अनुभोति पहोति साधेति. अस्स वा सुवण्णस्स अत्थं सुवण्णकारो अनुभोति पापुणाति.

अभिञ्ञाय इद्धिविधादिञाणेन सच्छिकरणीयस्स इद्धिविधपच्चनुभवनादिकस्स अभिञ्ञा सच्छिकरणीयस्स ¶ . यस्स पच्चक्खं अत्थि, सो सक्खि. सक्खिनो भब्बता सक्खिभब्बता, सक्खिभवनन्ति वुत्तं होति. सक्खि च सो ¶ भब्बो चाति वा सक्खिभब्बो. अयञ्हि इद्धिविधादीनं भब्बो, तत्थ च सक्खीति सक्खिभब्बो, तस्स भावो सक्खिभब्बता, तं पापुणाति. सति सति आयतनेति तस्मिं तस्मिं पुब्बहेतुआदिके कारणे सति.

सीतिभावन्ति निब्बानं, किलेसदरथवूपसमं वा. निग्गण्हातीति उद्धटं चित्तं उद्धच्चपाततो रक्खणवसेन निग्गण्हाति. पग्गण्हातीति लीनं चित्तं कोसज्जपाततो रक्खणवसेन पग्गण्हाति. सम्पहंसेतीति समप्पवत्तं चित्तं तथापवत्तियं पञ्ञाय तोसेति, उत्तेजेति वा. यदा वा निरस्सादं चित्तं भावनाय न पक्खन्दति, तदा जातिआदीनि संवेगवत्थूनि (अ. नि. अट्ठ. १.१.४१८; इतिवु. अट्ठ. ३७) पच्चवेक्खित्वा सम्पहंसेति समुत्तेजेति. अज्झुपेक्खतीति यदा पन चित्तं अलीनं अनुद्धतं सम्मदेव भावनावीथिं ओतिण्णं होति, तदा पग्गहनिग्गहसम्पहंसनेसु कञ्चि ब्यापारं अकत्वा समप्पवत्तेसु युगेसु सारथि विय अज्झुपेक्खति उपेक्खकोव होति. पणीताधिमुत्तिकोति पणीते उत्तमे मग्गफले अधिमुत्तो निन्नपोणपब्भारो.

सुग्गहितं कत्वाति यथावुत्तं उग्गहकोसल्लसङ्खातं विधिं सुट्ठु उग्गहितं परियापुणनादिना सुपरिग्गहितं कत्वा. सुट्ठु ववत्थपेत्वाति मनसिकारकोसल्लसङ्खातं विधिं सम्मदेव सल्लक्खणवसेन उपधारेत्वा. विसेसन्ति पुब्बेनापरं भावनाय विसेसं. पुनप्पुनं परिवत्तेत्वाति कम्मट्ठानतन्तिं पगुणभावं पापेन्तो भिय्यो भिय्यो वाचाय, मनसा च परिवत्तेत्वा. गण्ठिट्ठानन्ति यथा रुक्खस्स दुब्बिनिभेदो अरञ्ञस्स वा गहनभूतो पदेसो ‘‘गण्ठिट्ठान’’न्ति वुच्चति, एवं कम्मट्ठानतन्तिया अत्थतो दुब्बिनिभेदो गहनभूतो च पदेसो ‘‘गण्ठिट्ठान’’न्ति वुच्चति. तं परिपुच्छनादिलद्धेन ञाणफरसुना छिन्दित्वा.

निमित्तन्ति कम्मट्ठाननिमित्तं, असुभाकारो. एदिसेन पयोजनेन लुञ्चनम्पि अनवज्जन्ति दस्सेतुं ‘‘लुञ्चित्वा’’ति वुत्तं. छिन्नट्ठानेति मुण्डितट्ठाने. वट्टतियेव निस्सरणज्झासयेन ओलोकनतो. उस्सदवसेनाति अफलितानं, फलितानं वा बहुलतावसेन. दिस्वाव निमित्तं गहेतब्बं दस्सनयोग्यताय तचपञ्चकस्स, इतरेसु सुत्वा च ञत्वा च निमित्तं गहेतब्बं.

कोट्ठासववत्थापनकथावण्णना

१८२. अद्दारिट्ठकवण्णाति ¶ ¶ अभिनवारिट्ठफलवण्णा. कण्णचूळिकाति उपरिकण्णसक्खलिकाय परभागं सन्धाय वुत्तं. तिरियं अञ्ञमञ्ञेन परिच्छिन्ना, कथं? द्वे केसा एकतो नत्थीति.

आसयोति निस्सयो, पच्चयोति अत्थो.

१८४. असम्भिन्नकाळका अञ्ञेन वण्णेन असम्मिस्सकाळका.

१८५. पत्तसदिसत्ता नखा एव नखपत्तानि. नखा तिरियं अञ्ञमञ्ञेन परिच्छिन्नाति विसुं ववत्थिततं सन्धाय वुत्तं. तमेव हि अत्थं दस्सेतुं ‘‘द्वे नखा एकतो नत्थी’’ति आह.

१८६. दन्तपाळियाति दन्तावलिया. यानकउपत्थम्भिनीति सकटस्स धुरट्ठाने उपत्थम्भकदण्डो. दन्तानं आधारभूता अट्ठि हनुकट्ठि.

१८७. सङ्कड्ढियमानाति सम्पिण्डियमाना. कोसकारककोसो उपल्लिण्डुपोट्टलकं, यं ‘‘कोसेय्यफल’’न्तिपि वुच्चति. पुटबन्धउपाहनो सकलपिट्ठिपादच्छादनउपाहनो. आनिसदं आसनपदेसो. तूणिरो सरावासो. गलकञ्चुकं कण्ठत्ताणं. कीटकुलावकं खरमुखकुटि.

अनुलोमेन पटिलोमेन चाति एत्थ अंसपदेसतो पट्ठाय बाहुनो पिट्ठिपदेसेन ओतरणं अनुलोमो, मणिबन्धतो पट्ठाय बाहुनो पुरिमभागेन आरोहनं पटिलोमो. तेनेव नयेनाति दक्खिणहत्थे वुत्तेन नयेन अनुलोमेन पटिलोमेन चाति अत्थो. सुखुमम्पीति यथावुत्तओळारिकचम्मतो सुखुमं. अन्तोमुखचम्मादिकोट्ठासेसु वा तचेन परिच्छिन्नत्ता यं दुरुपलक्खणीयं, तं ‘‘सुखुम’’न्ति वुत्तं. तञ्हि वुत्तनयेन ञाणेन तचं विवरित्वा पस्सन्तस्स पाकटं होति. इध छविपि तचगतिका एवाति ‘‘तचो उपरि आकासेन परिच्छिन्नो’’ति वुत्तो.

१८८. निसदपोतो ¶ ¶ सिलापुत्तको. उद्धनकोटीति मत्तिकापिण्डेन कतउद्धनस्स कोटि. तालगुळपटलं नाम पक्कतालफललसिकं तालपट्टिकादीसु लिम्पित्वा सुक्खापेत्वा उद्धरित्वा गहितपटलं. सुखुमन्ति यथावुत्तमंसतो सुखुमं. पण्हिकमंसादिथूलानं सकलसरीरस्स किसानं येभुय्येन मंसेन पटिच्छादितत्ता वुत्तं ‘‘तिरियं अञ्ञमञ्ञेन परिच्छिन्न’’न्ति.

१८९. जालाकारो कञ्चुको जालकञ्चुको. विसुं ववत्थितभावेनेव न्हारू तिरियं अञ्ञमञ्ञेन परिच्छिन्ना.

१९०. दन्तानं विसुं गहितत्ता ‘‘ठपेत्वा द्वत्तिंस दन्तट्ठीनी’’ति वुत्तं. एकं जण्णुकट्ठि, एकं ऊरुट्ठीति एक-ग्गहणं ‘‘एकेकस्मिं पादे’’ति अधिकतत्ता. एवं तिमत्तानीति एवं मत्तसद्देहि आनिसदट्ठिआदीनि इध अवुत्तानिपि दस्सेतीति वेदितब्बं. एवञ्च कत्वा ‘‘अतिरेकतिसतअट्ठिकसमुस्सय’’न्ति (विसुद्धि. १.१२२) इदञ्च वचनं समत्थितं होति.

कीळागोळकानि सुत्तेन बन्धित्वा अञ्ञमञ्ञं घट्टेत्वा कीळनगोळकानि. धनुकदण्डो दारकानं कीळनकखुद्दकधनुकं. तत्थ जङ्घट्ठिकस्स पतिट्ठितट्ठानन्ति जण्णुकट्ठिम्हि पविसित्वा ठितट्ठानन्ति अधिप्पायो. तेन ऊरुट्ठिना पतिट्ठितं ठानं यं कटिट्ठिनो, तं अग्गच्छिन्नमहापुन्नागफलसदिसं.

कुम्भकारेन निप्फादितं उद्धनं कुम्भकारिकउद्धनं. सीसकपट्टवेठकं वेठेत्वा ठपितं सीसमयं पट्टकं. येन सुत्तं कन्तन्ति, तस्मिं तक्कम्हि विज्झित्वा ठपितगोळका वट्टना नाम, वट्टनानं आवळि वट्टनावळि.

मण्डलाकारेन छिन्नवंसकळीरखण्डानि वंसकळीरचक्कलकानि. अवलेखनसत्थकं उच्छुतचावलेखनसत्थकं.

१९२. वक्कभागेन परिच्छिन्नन्ति वक्कपरियन्तेन भागेन परिच्छिन्नं. इतो परेसुपि एवरूपेसु एसेव नयो.

१९३. यं ¶ निस्सायाति यं लोहितं निस्साय, निस्सयनिस्सयोपि ‘‘निस्सयो’’त्वेव वुच्चति. भवति हि कारणकारणेपि कारणवोहारो यथा ‘‘चोरेहि गामो दड्ढो’’ति. अथ वा यस्मिं रूपकलापे हदयवत्थु ¶ , तम्पि लोहितगतिकमेव हुत्वा तिट्ठतीति ‘‘यं निस्साया’’ति वुत्तं.

१९४. पण्डुकधातुकन्ति पण्डुसभावं.

१९५. परियोनहनमंसन्ति पटिच्छादकमंसं.

१९६. उदरजिव्हामंसन्ति जिव्हासण्ठानं उदरस्स मत्थकपस्से तिट्ठनकमंसं. ‘‘नील’’न्ति वत्वा नीलं नाम बहुधातुकन्ति आह ‘‘निग्गुण्डिपुप्फवण्ण’’न्ति.

१९७. पप्फासमंसन्ति यथाठाने एव लम्बित्वा थोकं परिवत्तकमंसं. निरसन्ति निहीनरसं. निरोजन्ति निप्पभं, ओजारहितं वा.

१९८. ओभग्गाति अवभुजित्वा ठिता. सक्खरसुधावण्णन्ति मरुम्बेहि कतसुधावण्णं. ‘‘सेतसक्खरसुधावण्ण’’न्तिपि पाठो, सेतसक्खरवण्णं, सुधावण्णञ्चाति अत्थो.

१९९. अन्तस्स आभुजित्वा आभुजित्वा ठितप्पदेसा अन्तभोगट्ठानानि. तेसं बन्धनभूतं अन्तगुणं नामाति दस्सेन्तो आह ‘‘अन्तगुणन्ति अन्तभोगट्ठानेसु बन्धन’’न्ति. कुद्दालफरसुकम्मादीनि करोन्तानं अन्तभोगे अगळन्ते एकतो आबन्धित्वा, किं विय? यन्तसुत्तकमिव यन्तफलकानीति. किमिव तत्थ ठितन्ति आह ‘‘पादपुञ्छन…पे… ठित’’न्ति. पुरिमञ्चेत्थ आबन्धनस्स, दुतियं ठानाकारस्स निदस्सनन्ति दट्ठब्बं.

२००. असितं नाम भुत्तं ओदनादि. पीतं नाम पिवनवसेन अज्झोहटपानकादि. खायितं नाम संखादितं पिट्ठमूलफलखज्जादि. सायितं नाम अस्सादितं अम्बपक्कमधुफाणितादि.

यत्थाति ¶ यस्मिं उदरे. यन्ति च उदरमेव पच्चामसति. यत्थ पानभोजनादीनि पतित्वा तिट्ठतीति सम्बन्धो. सुवानवमथु सारमेय्यवन्तं. विवेकन्ति विभागं.

२०१. हेट्ठानाभिपिट्ठिकण्टकमूलानं ¶ अन्तरेति पुरिमभागवसेन नाभिया हेट्ठापदेसस्स पच्छिमभागवसेन हेट्ठिमपिट्ठिकण्टकानं वेमज्झे. वेळुनाळिकसदिसो पदेसोति अधिप्पायो.

२०२. समोहितन्ति निचितं.

२०४. पूतिभावं आपन्नं कुक्कुटण्डं पूतिकुक्कुटण्डं. उद्देको पित्तादीहि विना केवलो उद्धङ्गमवातो.

२०५. आचामो अवस्सावनकञ्जिकं.

२०६. वक्कहदययकनपप्फासे तेमयमानन्ति एत्थ यकनं हेट्ठाभागपूरणेनेव तेमेति, इतरानि तेसं उपरि थोकं थोकं पग्घरणेनाति दट्ठब्बं.

२०७. उतुविकारो उण्हवलाहकादिहेतुको. विसमच्छिन्नो भिसादिकलापो विसमं उदकं पग्घरति, एवमेवं सरीरं केसकूपादिविवरेहि उपरि, हेट्ठा, तिरियञ्च सेदं विसमं पग्घरतीति दस्सेतुं विसमच्छिन्न-ग्गहणं कतं.

२०८. विसमाहारन्ति तदापवत्तमानसरीरावत्थाय असप्पायाहारं, अतिकटुकअच्चुण्हादिविसभागाहारं वा. सम्मोहविनोदनियं (विभ. अट्ठ. ३५६) पन ‘‘विसभागाहार’’न्त्वेव वुत्तं तदा पवत्तमानानं धातूनं विसभागत्ता.

२०९. ‘‘न्हानकाले’’ति इदं उदकस्स उपरि सिनेहस्स सम्भवदस्सनत्थं वुत्तं. परिब्भमन्तसिनेहबिन्दुविसटसण्ठानाति विसटं हुत्वा परिब्भमन्तसिनेहबिन्दुसण्ठाना. उतुविसभागो बहिद्धासमुट्ठानो. धातुविसभागो अन्तोसमुट्ठानो. ते पदेसाति ते हत्थतलादिपदेसा.

२१०. किञ्चीति ¶ उण्हादिरसानं अञ्ञतरं आहारवत्थु. नेसन्ति सत्तानं. हदयं आगिलायतीति विसभागाहारादिं पटिच्च हदयप्पदेसो विवत्तति.

२११. दधिनो ¶ विस्सन्दनअच्छरसो दधिमुत्तं. गळित्वाति सन्दित्वा. तालुमत्थकविवरेन ओतरित्वाति मत्थकविवरतो आगन्त्वा तालुमत्थकेन ओतरित्वा.

२१२. तेलं विय सकटस्स नाभिअक्खसीसानं अट्ठिसन्धीनं अब्भञ्जनकिच्चं साधयमाना. कटकटायन्तीति ‘‘कट कटा’’ति सद्दं करोन्ति. अनुरवदस्सनं हेतं. दुक्खन्तीति दुक्खितानि सञ्जातदुक्खानि होन्ति.

२१३. समूलकूलमासं झापेत्वा छारिकं अवस्सावेत्वा गहितयूसो मासखारो. उच्छिट्ठोदकगब्भमलादीनं छड्डनट्ठानं चन्दनिका. रवणघटं नाम पकतिया सम्मुखमेव होति. यस्स पन आरग्गमत्तम्पि उदकस्स पविसनमुखं नत्थि, तं दस्सेतुं ‘‘अमुखे रवणघटे’’ति वुत्तं. आयूहनन्ति समीहनं.

२१४. एवञ्हीतिआदि यथावुत्ताय उग्गहकोसल्लपटिपत्तिया निगमनं. इदानि यथावुत्तं मनसिकारकोसल्लपटिपत्तिम्पि निगमनवसेन गहेत्वा कम्मट्ठानं मत्थकं पापेत्वा दस्सेतुं ‘‘अनुपुब्बतो’’तिआदि आरद्धं. तत्थ पण्णत्तिसमतिक्कमावसानेति केसादिपण्णत्तिसमतिक्कमवसेन पवत्ताय भावनाय अवसाने. अपुब्बापरियमिवाति एकज्झमिव. केसाति इति-सद्दो आदिअत्थो, पकारत्थो वा, एवमादिना इमिना पकारेन वाति अत्थो. ते धम्माति वण्णादिवसेन ववत्थापिता पटिक्कूलाकारतो उपट्ठिता कोट्ठासधम्मा.

बहिद्धापीति ससन्तानतो बहिपि, परसन्तानकायेपीति अत्थो. मनसिकारं उपसंहरतीति यथावुत्तं पटिक्कूलमनसिकारं उपनेति. यथा इदं, तथा एतन्ति. एवं सब्बकोट्ठासेसु पाकटीभूतेसूति यथा अत्तनो काये, एवं परेसम्पि काये सब्बेसु केसादिकोट्ठासेसु पटिक्कूलवसेन विभूतभावेन उपट्ठितेसूति अत्थो. अयमेत्थ कसिणेसु वड्ढनसदिसो योगिनो भावनाविसेसो दस्सितो.

अनुपुब्बमुञ्चनादीति ¶ आदि-सद्देन सुत्तन्तनयेन विभावितं वीरियसमतायोजनं सङ्गण्हाति. पुनप्पुनं मनसि करोतोति वुत्तनयेन अत्तनो ¶ काये केसादिके ‘‘पटिक्कूला पटिक्कूला’’ति अभिण्हसो मनसिकारं पवत्तेन्तस्स यदा सद्धादीनि इन्द्रियानि लद्धसमथानि विसदानि पवत्तन्ति, तदा अस्सद्धियादीनं दूरीभावेन सातिसयं बलप्पत्तेहि सत्तहि सद्धम्मेहि लद्धूपत्थम्भानि वितक्कादीनि झानङ्गानि पटुतरानि हुत्वा पातुभवन्ति. तेसं उजुविपच्चनीकताय नीवरणानि विक्खम्भितानेव होन्ति सद्धिं तदेकट्ठेहि पापधम्मेहि. उपचारसमाधिना चित्तं समाधियति, सो तंयेव निमित्तं आसेवन्तो भावेन्तो बहुलीकरोन्तो अप्पनं पापुणाति. तेन वुत्तं ‘‘अनुक्कमेन अप्पना उप्पज्जती’’ति. सब्बाकारतोति वण्णादिवसेन पञ्चधापि. साति अप्पना.

यदि पनेतं कम्मट्ठानं अविञ्ञाणकासुभकम्मट्ठानानि विय पठमज्झानवसेन सिज्झति, अथ कस्मा ‘‘कायगतासती’’ति वुत्तन्ति आह ‘‘एवं पठमज्झानवसेना’’तिआदि. नानावण्णसण्ठानादीसु द्वत्तिंसाय कोट्ठासेसु पवत्तमानाय सतिया किच्चमेत्थ सातिसयन्ति आह ‘‘सतिबलेन इज्झनतो’’ति.

पन्तसेनासनेसु, अधिकुसलेसु च अरतिं, कामगुणेसु च रतिं सहति अभिभवतीति अरतिरतिसहो सरीरसभावचिन्तनेन अनभिरतिया पहीनत्ता. तथा कोट्ठासभावनाय अत्तसिनेहस्स परिक्खीणत्ता भयभेरवं सहति, सीतादीनञ्च अधिवासकजातिको होति. अत्तसिनेहवसेन हि पुरिसस्स भयभेरवं होति, दुक्खस्स च अनधिवासनं. इमं पन कोट्ठासभावनमनुयुत्तस्स न केवलं पठमज्झानमत्तमेव, उत्तरिपि पटिवेधो अत्थीति दस्सेतुं ‘‘केसादीन’’न्तिआदि वुत्तं.

आनापानस्सतिकथावण्णना

२१५. यं तं एवं पसंसित्वा आनापानस्सतिकम्मट्ठानं निद्दिट्ठन्ति सम्बन्धो. तत्थ यस्मा ‘‘कथं भावितो’’तिआदिकाय पुच्छापाळिया अत्थे विभाविते थोमनापाळियापि अत्थो विभावितोयेव होति भेदाभावतो, तस्मा तं लङ्घित्वा ‘‘कथं भावितो चा’’तिआदिना आरभति. तत्थ हि इतो पसंसाभावो ‘‘अयम्पि खो’’ति वचनञ्च विसेसो. तेसु पसंसाभावं ¶ दस्सेतुं ‘‘एवं पसंसित्वा’’ति वुत्तं. पसंसा च तत्थ अभिरुचिजननेन उस्साहनत्था. तञ्हि सुत्वा भिक्खू ‘‘भगवा इमं समाधिं अनेकेहि आकारेहि पसंसति, सन्तो ¶ किरायं समाधि पणीतो च असेचनको च सुखो च विहारो पापधम्मे च ठानसो अन्तरधापेती’’ति सञ्जाताभिरुचयो उस्साहजाता सक्कच्चं अनुयुञ्जितब्बं पटिपज्जितब्बं मञ्ञन्ति. ‘‘अयम्पि खो’’ति पदस्स ये इमे मया निब्बानमहासरस्स ओतरणतित्थभूता कसिणज्झानअसुभज्झानादयो देसिता, न केवलं ते एव, अयम्पि खोति भगवा अत्तनो पच्चक्खभूतं समाधिं देसनानुभावेन तेसम्पि भिक्खूनं आसन्नं, पच्चक्खञ्च करोन्तो सम्पिण्डनवसेन एवमाहाति सम्बन्धमुखेन अत्थो वेदितब्बो.

सोळसवत्थुकन्ति चतूसु अनुपस्सनासु चतुन्नं चतुक्कानं वसेन सोळसट्ठानं. सब्बाकारपरिपूरोति कम्मट्ठानपाळिया पदत्थो पिण्डत्थो उपमा चोदना परिहारो पयोजनन्ति एवमादीहि सब्बेहि आकारेहि परिपुण्णो. निद्देसोति कम्मट्ठानस्स निस्सेसतो वित्थारो.

२१६. कथन्ति इदं पुच्छनाकारविभावनपदं. पुच्छा चेत्थ कथेतुकम्यतावसेन अञ्ञासं असम्भवतो. सा च उपरि देसनं आरुळ्हानं सब्बेसं पकारविसेसानं आमसनवसेनाति इममत्थं दस्सेन्तो ‘‘कथन्ति…पे… कम्यतापुच्छा’’ति आह. कथं बहुलीकतोति एत्थापि ‘‘आनापानस्सतिसमाधी’’ति पदं आनेत्वा सम्बन्धितब्बं. तत्थ कथन्ति आनापानस्सतिसमाधिबहुलीकारं नानप्पकारतो वित्थारेतुकम्यतापुच्छा. बहुलीकतो आनापानस्सतिसमाधीति तथापुट्ठधम्मनिदस्सनन्ति इममत्थं ‘‘एसेव नयो’’ति इमिना अतिदिसति. तथा सन्तभावादयोपि तस्स येहि भावनाबहुलीकारेहि सिद्धा, तग्गहणेनेव गहिता होन्तीति दस्सेतुं ‘‘कथं बहुलीकतो…पे… वूपसमेतीति एत्थापि एसेव नयो’’ति वुत्तं.

‘‘पुन च परं, उदायि, अक्खाता मया सावकानं पटिपदा, यथापटिपन्ना मे सावका चत्तारो सतिपट्ठाने भावेन्ती’’तिआदीसु (म. नि. २.२४७) उप्पादनवड्ढनट्ठेन भावना वुच्चतीति तदुभयवसेन अत्थं दस्सेन्तो ‘‘भावितोति उप्पादितो वड्ढितो वा’’ति आह. तत्थ भावं विज्जमानतं इतो गतोति भावितो, उप्पादितो पटिलद्धमत्तोति अत्थो. उप्पन्नो पन लद्धासेवनो, भावितो पगुणभावं आपादितो, वड्ढितोति अत्थो ¶ . आनापानपरिग्गाहिकायाति दीघरस्सादिविसेसेहि सद्धिं अस्सासपस्सासे परिच्छिज्जगाहिकाय, ते आरब्भ पवत्ताय, सतियं ¶ पच्चयभूतायन्ति अत्थो. पुरिमस्मिञ्हि अत्थे समाधिस्स सतिया सहजातादिपच्चयभावो वुत्तो सम्पयुत्तवचनतो, दुतियस्मिं पन उपनिस्सयभावोपि. उपचारज्झानसहगता हि सति अप्पनासमाधिस्स उपनिस्सयो होतीति. बहुलीकतोति बहुलं पवत्तितो, तेन आवज्जनादिवसीभावप्पत्तिमाह. यो हि वसीभावं आपादितो, सो इच्छितिच्छितक्खणे समापज्जितब्बतो पुनप्पुनं पवत्तीयति. तेन वुत्तं ‘‘पुनप्पुनं कतो’’ति. यथा ‘‘इधेव, भिक्खवे, समणो’’ति (म. नि. १.१३९; अ. नि. ४.२४१), ‘‘विविच्चेव कामेही’’ति (दी. नि. १.२२६; सं. नि. २.१५२; अ. नि. ४.१२३) च एवमादीसु पठमपदे वुत्तो एव-सद्दो दुतियादीसुपि वुत्तो एव होति, एवमिधापीति आह ‘‘उभयत्थ एवसद्देन नियमो वेदितब्बो’’ति. उभयपदनियमेन लद्धगुणं दस्सेतुं ‘‘अयञ्ही’’तिआदि वुत्तं.

असुभकम्मट्ठानन्ति असुभारम्मणझानमाह. तं हि असुभेसु योगकम्मभावतो, योगिनो सुखविसेसानं कारणभावतो च ‘‘असुभकम्मट्ठान’’न्ति वुच्चति. ‘‘केवल’’न्ति इमिना आरम्मणं निवत्तेति. पटिवेधवसेनाति झानपटिवेधवसेन. झानञ्हि भावनाविसेसेन इज्झन्तं अत्तनो विसयं पटिविज्झन्तमेव पवत्तति, यथासभावतो पटिविज्झीयति चाति ‘‘पटिवेधो’’ति वुच्चति. ओळारिकारम्मणत्ताति बीभच्छारम्मणत्ता. पटिक्कूलारम्मणत्ताति जिगुच्छितब्बारम्मणत्ता. परियायेनाति कारणेन, लेसन्तरेन वा. आरम्मणसन्ततायाति अनुक्कमेन विचेतब्बतं पत्तं आरम्मणस्स परमसुखुमतं सन्धायाह. सन्ते हि सन्निसिन्ने आरम्मणे पवत्तमानो धम्मो सयम्पि सन्निसिन्नोव होति. तेनाह ‘‘सन्तो वूपसन्तो निब्बुतो’’ति, निब्बुतसब्बपरिळाहोति अत्थो. आरम्मणसन्तताय तदारम्मणधम्मानं सन्तता लोकुत्तरधम्मारम्मणाहि पच्चवेक्खणाहि दीपेतब्बा.

नास्स सन्तपणीतभावावहं किञ्चि सेचनन्ति असेचनको. असेचनकत्ता अनासित्तको. अनासित्तकत्ता एव अब्बोकिण्णो असम्मिस्सो परिकम्मादिना. ततो एव पाटियेक्को विसुंयेवेको. आवेणिको असाधारणो. सब्बमेतं सरसतो एव सन्तभावं दस्सेतुं ¶ वुत्तं. परिकम्मं वा सन्तभावनिमित्तं, परिकम्मन्ति च कसिणकरणादीनि निमित्तुप्पादपरियोसानं, तादिसं इध नत्थीति अधिप्पायो. तदा हि कम्मट्ठानं निरस्सादत्ता असन्तमप्पणीतं सिया. उपचारेन वा नत्थि एत्थ सन्तताति योजना. यथा उपचारक्खणे नीवरणविगमेन, अङ्गपातुभावेन ¶ च परेसं सन्तता होति, न एवमिमस्स. अयं पन आदिसमन्ना…पे… पणीतो चाति योजना. केचीति उत्तरविहारवासिके सन्धायाह. अनासित्तकोति उपसेचनेन न आसित्तको. तेनाह ‘‘ओजवन्तो’’ति, ओजवन्तसदिसोति अत्थो. मधूरोति इट्ठो, चेतसिकसुखपटिलाभसंवत्तनं तिकचतुक्कज्झानवसेन, उपेक्खाय वा सन्तभावेन सुखगतिकत्ता सब्बेसम्पि वसेन वेदितब्बं. झानसमुट्ठानपणीतरूपफुट्ठसरीरतावसेन पन कायिकसुखपटिलाभसंवत्तनं दट्ठब्बं, तञ्च खो झानतो वुट्ठितकाले. इमस्मिं पक्खे ‘‘अप्पितप्पितक्खणे’’ति इदं हेतुम्हि भुम्मवचनं दट्ठब्बं. अविक्खम्भितेति झानेन सकसन्तानतो अनीहटे अप्पहीने. अकोसल्लसम्भूतेति अकोसल्लं वुच्चति अविज्जा, ततो सम्भूते. अविज्जापुब्बङ्गमा हि सब्बे पापधम्मा. खणेनेवाति अत्तनो पवत्तिक्खणेनेव. अन्तरधापेतीति एत्थ अन्तरधापनं विनासनं, तं पन झानकत्तुकस्स इधाधिप्पेतत्ता परियुट्ठानप्पहानं होतीति आह ‘‘विक्खम्भेती’’ति. वूपसमेतीति विसेसेन उपसमेति. विसेसेन उपसमनं पन सम्मदेव उपसमनं होतीति आह ‘‘सुट्ठु उपसमेती’’ति.