📜

नमो तस्स भगवतो अरहतो सम्मासम्बुद्धस्स.

विसुद्धिमग्ग निदानकथा

विसुद्धिमग्गो ¶ नामायं गन्थो पिटकत्तयसारभूतो सकललोके पटिपत्तिदीपकगन्थानं अग्गो होति सेट्ठो पमुखो पामोक्खो उत्तमो पवरो चाति विञ्ञूहि पसत्थो. तत्थ हि सङ्गीतित्तयारूळ्हस्स तेपिटकबुद्धवचनस्स अत्थं संखिपित्वा सिक्खत्तयसङ्गहितं ब्रह्मचरियं परिपुण्णं पकासितं सुविसदञ्च. एवं पसत्थस्सेतस्स विसुद्धिमग्गस्स निदानकथायपि भवितब्बमेव. तस्मादानि तम्पकासनत्थमिदं पञ्हकम्मं वुच्चति –

‘‘सो पनेस विसुद्धिमग्गो केन कतो, कदा कतो, कत्थ कतो, कस्मा कतो, किमत्थं कतो, किं निस्साय कतो, केन पकारेन कतो, किस्स सकललोके पत्थटो’’ति.

तत्थ केन कतोति आचरियबुद्धघोसत्थेरवरेन तेपिटकसङ्गहट्ठकथाकारेन कतो.

कदा कतोति अम्हाकं भगवतो सम्मासम्बुद्धस्स सकललोकनाथस्स परिनिब्बुतिकालतो पच्छा दसमे वस्ससतके (९७३ -बुद्धवस्से) कतो.

कत्थ कतोति सीहळदीपे अनुराधपुरे महाविहारे कतो.

कस्मा कतोति विसुद्धिकामानं साधुजनानं तदधिगमुपायं सम्मापटिपत्तिनयं ञापेतुकामतासङ्खातेन अत्तनो अज्झासयेन सञ्चोदितत्ता, सङ्घपालत्थेरेन च अज्झेसितत्ता कतो.

एत्थ पन ठत्वा आचरियबुद्धघोसत्थेरस्स उप्पत्ति कथेतब्बा, सा च महावंसे (चूळवंसोतिपि वोहरिते दुतियभागे) सत्ततिंसमपरिच्छेदे पन्नरसाधिकद्विसतगाथातो (३७, २१५) पट्ठाय बात्तिंसाय गाथाहि पकासितायेव. कथं? –

महावंस-बुद्धघोसकथा

२१५.

बोधिमण्डसमीपम्हि, ¶ जातो ब्राह्मणमाणवो;

विज्जा-सिप्प-कला-वेदी, तीसु वेदेसु पारगू.

२१६.

सम्मा विञ्ञातसमयो, सब्बवादविसारदो;

वादत्थी जम्बुदीपम्हि, आहिण्डन्तो पवादिको.

२१७.

विहारमेक’मागम्म, रत्तिं पातञ्जलीमतं;

परिवत्तेति सम्पुण्ण-पदं सुपरिमण्डलं.

२१८.

तत्थेको रेवतो नाम, महाथेरो विजानिय;

‘‘महापञ्ञो अयं सत्तो, दमेतुं वट्टती’’ति, सो.

२१९.

‘‘को नु गद्रभरावेन, विरवन्तो’’ति अब्रवि;

‘‘गद्रभानं रवे अत्थं, किं जानासी’’ति आह तं.

२२०.

‘‘अहं जाने’’ति वुत्तो सो, ओतारेसि सकं मतं;

पुट्ठं पुट्ठं वियाकासि, विरद्धम्पि च दस्सयि.

२२१.

‘‘तेन हि त्वं सकं वाद-मोतारेही’’ति चोदितो;

पाळि’माहा’भिधम्मस्स, अत्थ’मस्स न सो’धिगा.

२२२.

आह‘‘कस्से’स मन्तो’’ति,‘‘बुद्धमन्तो’’ति सो’ब्रवि;

‘‘देहि मेतं’’ति वुत्ते हि, ‘‘गण्ह पब्बज्ज तं’’इति.

२२३.

मन्तत्थी पब्बजित्वा सो, उग्गण्हि पिटकत्तयं;

एकायनो अयं मग्गो, इति पच्छा त’मग्गहि.

२२४.

बुद्धस्स विय गम्भीर-घोसत्ता नं वियाकरुं;

बुद्धघोसोति घोसो हि, बुद्धो विय महीतले.

२२५.

तत्थ ञाणोदयं [ञाणोदयं नामपकरणं इदानि कुहिञ्चिपि न दिस्सति;] नाम, कत्वा पकरणं तदा;

धम्मसङ्गणियाकासि, कच्छं सो अट्ठसालिनिं [इदानि दिस्समाना पन अट्ठसालिनी सीहळदीपिकायेव; न जम्बुदीपिका; परतो (५४-५५ पिट्ठेसु) एस आविभविस्सति].

२२६.

परित्तट्ठकथञ्चेव ¶ [परित्तट्ठकथन्ति पिटकत्तयस्स सङ्खेपतो अत्थवण्णनाभूता खुद्दकट्ठकथाति अधिप्पेता भवेसु], कातुं आरभि बुद्धिमा;

तं दिस्वा रेवतो थेरो, इदं वचनमब्रवि.

२२७.

‘‘पाळिमत्तं इधानीतं, नत्थि अट्ठकथा इध [एत्थ सगीभित्तयारूळ्हा मोग्गलिपुत्ततिस्सत्थेरस्स सन्तिका उग्गहिता सिस्सानुसिस्सपरम्परातता मूलट्ठकथा कस्मा जम्बुदीपे सब्बसो अन्तरहिताति विमंसितब्बं];

तथाचरियवादा च, भिन्नरूपा न विज्जरे.

२२८.

सीहळट्ठकथा सुद्धा, महिन्देन मतीमता;

सङ्गीतित्तयमारूळ्हं, सम्मासम्बुद्धदेसितं.

२२९.

सारिपुत्तादिगीतञ्च, कथामग्गं समेक्खिय;

कता सीहळभासाय, सीहळेसु पवत्तति.

२३०.

तं तत्थ गन्त्वा सुत्वा त्वं, मागधानं निरुत्तिया;

परिवत्तेहि, सा होति, सब्बलोकहितावहा’’.

२३१.

एवं वुत्ते पसन्नो सो, निक्खमित्वा ततो इमं;

दीपं आगा इमस्सेव [इदस्सेवाति इमस्सेव महानामरञ्ञो काले ९५३-९७५ बुद्धवस्से; अयञ्च वस्सपरिच्छेदो सीहळराजवंसं निस्साय दस्सितो; युरोपियविचक्खणानं पन मतेन ९४१-९६४ बुद्धवस्से इति वेदितब्बो; एवमुपरिपि;], रञ्ञो काले महामति.

२३२.

महाविहारं सम्पत्तो, विहारं सब्बसाधुनं;

महापधानघरं गन्त्वा, सङ्घपालस्स सन्तिका.

२३३.

सीहळट्ठकथं सुत्वा, थेरवादञ्च सब्बसो;

‘‘धम्मस्सामिस्स एसोव, अधिप्पायो’’ति निच्छिय.

२३४.

तत्थ सङ्घं समानेत्वा, ‘‘कातुं अट्ठकथं मम;

पोत्थके देथ सब्बे’’ति, आह, वीमंसितुं स तं.

२३५.

सङ्घो ¶ गाथाद्वयं तस्सा’दासि ‘‘सामत्थियं तव;

एत्थ दस्सेहि, तं दिस्वा, सब्बे देमाति पोत्थके’’ [२३४-५ गाथासु अयमत्थयोजना– ‘‘तत्थ महाविहारे संघं महानेत्वा संघ सन्निपातं कारेत्वा आचरियपुब्बद्धघोसो एवमाह ‘अट्ठकथं कातुं सब्बे पाळि-अट्ठकथा-पोत्थके मम देथा’ति; सो संघो तं वीमंसितुं संयुत्तनिकायतो ‘अन्तोजटा’तिआदिकं च ‘सीले पतिट्ठाया’तिआदिकं चाति गाथाद्वयं तस्स अदासि ‘एत्थ तव सामत्थियं ञाणप्पभावं दस्सेति; तं दिस्वा सब्बे पोत्थके देमा’तिवत्वा’’ति; इमिना पन अयमत्था दस्सितो होति ‘‘आचरिय बुद्धघोसो विसुद्धिमग्गं करोन्तो तदेव गाथाद्वयं ओलोकेत्वा, किञ्चिपि अञ्ञं पोत्थकं अनोलोकेत्वा अकासी’’ति; तस्स पनत्थस्स युत्तायुत्तविचारणा परतो (३९-४९-पिट्ठेसु) आगमिस्सति].

२३६.

पिटकत्तय’मेत्थेव, सद्धिं अट्ठकथाय सो;

विसुद्धिमग्गं नामा’का, सङ्गहेत्वा समासतो.

२३७.

ततो सङ्घं समूहेत्वा, सम्बुद्धमतकोविदं;

महाबोधिसमीपम्हि, सो तं वाचेतु मारभि.

२३८.

देवता तस्स नेपुञ्ञं, पकासेतुं महाजने;

छादेसुं पोत्थकं सोपि, द्वत्तिक्खत्तुम्पि तं अका [२३८ गाथाय अयमत्थो– ‘‘देवता तस्स बुद्धघोसस्स नेपुञ्ञं निपुणञ्ञाप्पसावं महाजनस्स पकासेतुं तेन लिखितं विसुद्धिमग्गपोत्थकं छादेसुं पटिच्छादेत्वा अपस्सियभावं पापेत्वा ठपेसुं; सोपि बुद्धघोसो दुतियम्पि तं लिखि, तम्पि देवता छदेसुं; ततियम्पि लिखी’’ति; तेन वुत्तं ‘‘द्वत्तिक्खत्तुम्पि तं अका’’ति; इदमेव महावंसवचनं निस्साय वित्तारेत्वा कथिताय बुद्धघोसुप्पत्तिया नाम कथाल एकरत्तेनेव विसुद्धिमग्गस्स तिक्खत्तुम्पि लिखित्वा निट्ठापितभावो पकासितो; ईदिसी पन कथा बहूनं विम्हयजननीपि परिक्खकानं संसयजननी होति; तस्मा इमिस्सापि विचारणा परतो (४७-८-पिट्ठेसु) दस्सियिस्सति].

२३९.

वाचेतुं ततिये वारे, पोत्थके समुदाहटे;

पोत्थकद्वय’मञ्ञम्पि, सण्ठपेसुं तहिं मरू.

२४०.

वाचयिंसु तदा भिक्खू, पोत्थकत्तय’मेकतो;

गन्थतो अत्थतो वापि, पुब्बापरवसेन वा.

२४१.

थेरवादेहि पाळीहि, पदेहि ब्यञ्जनेहि वा;

अञ्ञथत्तमहू नेव, पोत्थकेसुपि तीसुपि.

२४२.

अथ ¶ उग्घोसयी सङ्घो, तुट्ठहट्ठो विसेसतो;

निस्संसयं’स मेत्तेय्यो, इति वत्वा पुनप्पुनं.

२४३.

सद्धिं अट्ठकथाया’दा, पोत्थके पिटकत्तये;

गन्थाकरे वसन्तो सो, विहारे दूरसङ्करे.

२४४.

परिवत्तेसि सब्बापि, सीहळट्ठकथा तदा;

सब्बेसं मूलभासाय, मागधाय निरुत्तिया.

२४५.

सत्तानं सब्बभासानं, सा अहोसि हितावहा;

थेरियाचरिया सब्बे, पाळिं विय त’मग्गहुं.

२४६.

अथ कत्तब्बकिच्चेसु, गतेसु परिनिट्ठितिं;

वन्दितुं सो महाबोधिं, जम्बुदीपं उपागमी’’ति [सो महाबोधि वन्दितुं जम्बुदीपं उपागमीति इदं वचनं पुरिमवचनेहि असंसट्ठं विय होति; पुब्बे हि ‘‘आचरियबुद्धघोसो बोधिमण्डसमीपे जातो’’ति च, ‘‘सीहळदीपं गन्त्वा सीहळट्ठकथायो मागधभासाय परिवत्तेहीति तस्साचरियेन रेवतत्थेरेन वुत्तो’’ति च वुत्तं; तस्मा इधापि आचरियबुद्धघोसस्स पवत्ति तदनुरूपा ‘‘ता भासापरिवत्तितट्ठकथायो आदाय सासनुज्जोतनत्थं जम्बुदीपं उपागमी’’ति एवमादिना सासनुज्जोतनमूलिका एव भवितुं अरहति, न पन महाबोधिवन्दनमूलिकाति].

अयञ्च पन महावंसकथा १९५० - खरिस्तवस्से हाबदमहाविज्जालयमुद्दणयन्ते रोमक्खरेन मुद्दितस्स विसुद्धिमग्गपोत्थकस्स पुरेचारिककथायं ‘‘अनेकानेत्थ अत्थि विचारेतब्बानी’’ति वत्वा धम्मानन्दकोसम्बीनामकेन विचक्खणेन विचारिता. तमेत्थ युत्तायुत्तविचिननाय दस्सेत्वा अनुविचारणम्पिस्स करिस्साम.

जातिदेसविचारणा

१. तत्थ हि तेन धम्मानन्देन ‘‘बुद्धघोसो बोधिमण्डसमीपे (बुद्धगयायं) जातोति न युत्तमेत’’न्ति वत्वा तंसाधनत्थाय चत्तारि ब्यतिरेककारणानि दस्सितानि. कथं?

(क) ‘‘बुद्धघोसेन पकासितेसु तंकालिकवत्थूसु एकम्पि तं नत्थि, यं मगधेसु उप्पन्न’’न्ति पठमं कारणं दस्सितं. तदकारणमेव. आचरियबुद्धघोसत्थेरो हि सङ्गहट्ठकथायो करोन्तो पोराणट्ठकथायोयेव ¶ संखिपित्वा, भासापरिवत्तनमत्तेन च विसेसेत्वा अकासि, न पन यं वा तं वा अत्तनो दिट्ठसुतं दस्सेत्वा. वुत्तञ्हेतं आचरियेन –

‘‘संवण्णनं तञ्च समारभन्तो,

तस्सा महाअट्ठकथं सरीरं;

कत्वा महापच्चरियं तथेव,

कुरुन्दिनामादिसु विस्सुतासु.

विनिच्छयो अट्ठकथासु वुत्तो,

यो युत्तमत्थं अपरिच्चजन्तो;

अथोपि अन्तोगधथेरवादं,

संवण्णनं सम्म समारभिस्स’’न्ति [पारा. अट्ठ. १.गन्थारम्भकथा] च.

‘‘ततो च भासन्तरमेव हित्वा,

वित्थारमग्गञ्च समासयित्वा;

विनिच्छयं सब्बमसेसयित्वा,

तन्तिक्कमं किञ्चि अवोक्कमित्वा.

सुत्तन्तिकानं वचनानमत्थं,

सुत्तानुरूपं परिदीपयन्ती;

यस्मा अयं हेस्सति वण्णनापि,

सक्कच्च तस्मा अनुसिक्खितब्बा’’ति [पारा. अट्ठ. १.गन्थारम्भकथा] च.

यथेव च आचरियबुद्धघोसेन अत्तनो अट्ठकथासु तंकालिकानि मागधिकानि वत्थूनि न पकासितानि, तथेव सीहळिकानिपि दक्खिणइन्दियरट्ठिकानिपि. न हि तत्थ वसभराजकालतो (६०९-६५३ -बुद्धवस्स) पच्छा उप्पन्नवत्थूनि दिट्ठानि ठपेत्वा महासेनराजवत्थुं [पारा. अट्ठ. २.२३६-२३७], आचरियो च ततो तिसतमत्तवस्सेहि पच्छातरे महानामरञ्ञो काले (९५३-९७५-बु-व) सीहळदीपमुपागतो. तस्मा अट्ठकथासु तंकालिकमागधिकवत्थूनं अप्पकासनमत्तेन न सक्का तक्कत्ता न मागधिकोति ञातुन्ति.

[ख) पुनपि ¶ तेन ‘‘सब्बेसुपि बुद्धघोसगन्थेसु उत्तरइन्दियदेसायत्तं पच्चक्खतो दिट्ठस्स विय पकासनं नत्थी’’ति दुतियं कारणं दस्सितं. तस्सपि अकारणभावो पुरिमवचनेनेव वेदितब्बो. अपिच सारत्थप्पकासिनिया नाम संयुत्तट्ठकथायं, सुमङ्गलविलासिनिया नाम दीघनिकायट्ठकथायञ्च वुत्तसंवण्णनायपि वेदितब्बो. तत्थ हि –

‘‘यथेव हि कलम्बनदीतीरतो राजमातुविहारद्वारेन थूपारामं गन्तब्बं होति, एवं हिरञ्ञवतिकाय नाम नदिया पारिमतीरतो सालवनं उय्यानं. यथा अनुराधपुरस्स थूपारामो, एवं तं कुसिनाराय होति. थूपारामतो दक्खिणद्वारेन नगरं पविसनमग्गो पाचीनमुखो गन्त्वा उत्तरेन निवत्तति, एवं उय्यानतो सालपन्ति पाचीनमुखा गन्त्वा उत्तरेन निवत्ता. तस्मा तं उपवत्तनन्ति वुच्चती’’ति [सं. नि. अट्ठ. १.१.१८६; दी. नि. अट्ठ. २.१९८] –

पच्चक्खतो दिट्ठस्स विय पकासनम्पि दिस्सतेव. तम्पि पन पोराणट्ठकथाहि भासापरिवत्तनमत्तमेवाति गहेतब्बं, तादिसाय अत्थसंवण्णनाय महामहिन्दत्थेरकालतोयेव पभुति वुत्ताय एव भवितब्बत्ताति.

[ग) पुनपि तेन ‘‘उण्हस्साति अग्गिसन्तापस्स, तस्स वनदाहादीसु सम्भवो वेदितब्बो’’ति विसुद्धिमग्गे (१, ३०-पिट्ठे) वुत्तसंवण्णनं पकासेत्वा ‘‘तस्सा पनस्स अवहसनीयभावो पाकटोयेवा’’ति च हीळेत्वा ‘‘इन्दियरट्ठे पन उत्तरदेसेसु गिम्हकाले वत्थच्छादनरहिता मानुसकायच्छवि सूरियसन्तापेन एकंसतो दय्हति, तं न जानन्ति दक्खिणइन्दियदेसिका’’ति ततियं कारणं दळ्हतरभावेन दस्सितं. तत्थ पन यदि ‘‘सूरियसन्तापेन एकंसतो दय्हती’’ति एतं उजुकतो सूरियरस्मिसन्तापेनेव दड्ढभावं सन्धाय वुच्चेय्य, एवं सति डंसमकसवातातपसरीसपसम्फस्सानन्ति पदे आतपसद्देन समानत्थत्ता न युत्तमेव. यदि पन सूरियसन्तापसञ्जातेन उण्हउतुना दड्ढभावं सन्धाय वुच्चेय्य, एवं सति उत्तरइन्दियदेसेसु, अञ्ञत्थ च तादिसेसु अतिउण्हट्ठानेसु सूरियसन्तापसञ्जातस्स उण्हउतुनो पटिघाताय ¶ चीवरं सेनासनञ्च पटिसेवीयतीति अयमत्थो न न युत्तो. तथा हि वुत्तं विनयट्ठकथायं (३, ५८)

‘‘सीतं उण्हन्ति उतुविसभागवसेन वुत्त’’न्ति.

सा पन विसुद्धिमग्गे पदत्थसंवण्णना पोराणसुत्तन्तट्ठकथाहि आगता भवेय्य. तथा हि वुत्तं पपञ्चसूदनिया नाम मज्झिमनिकायट्ठकथाय सब्बासवसुत्तवण्णनायं (१, ५८) ‘‘उण्हन्ति चेत्थ अग्गिसन्तापोव वेदितब्बो, सूरियसन्तापवसेन पनेतं वत्थु वुत्त’’न्ति. एत्थ च सचायमत्थो आचरियेन अत्तनो मतिवसेन वुत्तो अस्स, तस्स वत्थुस्स पोराणट्ठकथायं वुत्तभावञ्च तस्सा अत्थसंवण्णनाय अत्तनो मतिभावञ्च युत्तभावञ्च पकासेय्य. आचरियो हि यत्थ यत्थ पोराणट्ठकथासु अवुत्तत्थं विसेसेत्वा दस्सेति, तत्थ तत्थ तादिसं ञापकवचनम्पि पकासेतियेव, यथा सुमङ्गलविलासिनियं (१, ७२) ‘‘एत्थ आणत्तियनिस्सग्गियथावरापि पयोगा युज्जन्ति, अट्ठकथासु पन अनागतत्ता वीमंसित्वा गहेतब्बा’’ति वचनं, यथा च पपञ्चसूदनियं (१, ३०) ‘‘अविचारितमेतं पोराणेहि, अयं पन अत्तनो मती’’ति वचनं. न चेत्थ किञ्चिपि ञापकवचनं पकासितं. तस्मा ‘‘यदेतं ‘उण्हस्साति अग्गिसन्तापस्सा’ति च, ‘उण्हन्ति चेत्थ अग्गिसन्तापोव वेदितब्बो’ति च वचनं, एतं पोराणसुत्तन्तट्ठकथावचन’’न्ति वेदितब्बन्ति.

(घ) पुनपि तेन ‘‘पपञ्चसूदनिया नाम मज्झिमनिकायट्ठकथायं गोपालकसुत्तं संवण्णेन्तो [म. नि. अट्ठ. १.३५०] बुद्धघोसो ‘मगधविदेहरट्ठानं अन्तरे गङ्गाय नदिया मज्झे वालुकत्थलदीपका अत्थी’ति सद्दहति मञ्ञे. बुद्धघोसेन पन दिट्ठगङ्गा सीहळदीपे महावेलिगङ्गायेव, न पन इन्दियरट्ठिकानं सेट्ठसम्मता महागङ्गाति पाकटोयेवायमत्थो’’ति चतुत्थं कारणं दस्सितं. तं पन इदानि महागङ्गाय मज्झे तस्मिं ठाने तादिसं दीपकं अदिस्वा ‘‘पुब्बेपि एवमेव भवेय्या’’ति एकंसतो गहेत्वा वुत्तवचनमत्तमेव. नदियो पन सब्बदापि तेनेवाकारेन तिट्ठन्तीति न सक्का गहेतुन्ति पाकटोयेवायमत्थो. तस्मा यथा पुब्बे तस्स गोपालस्स काले तस्मिं ठाने मज्झे गङ्गाय तादिसा दीपका संविज्जमाना अहेसुं, तथेव पोराणट्ठकथासु एस अत्थो संवण्णितो, ¶ तदेव च वचनं आचरियेन भासापरिवत्तनं कत्वा पकासितन्ति एवमेव गहेतब्बं. तस्मा तम्पि अकारणमेवाति.

ब्राह्मणकुलविचारणा

२. अथ ‘‘ब्राह्मणमाणवो’’ति पदम्पि तेन एवं विचारितं –

(क) ‘‘बुद्धघोसो ‘ब्राह्मणकुलजातो’ति न सक्का गहेतुं. कस्मा वेदकालतो पट्ठाय यावज्जतना सब्बेपि ब्राह्मणा

ब्राह्मणोस्य मुखमासीदि, बाहू राजन्य? कत?;

ऊरू तदस्य यद वग्य?, पद्भ्यां गूद्रो अजायता’’ति [इरुवेद, १०-मण्डल, ९०; तथा अथव ६ वेद १९, ६, ६].

इमं पुरिससुत्तं नाम मन्तं जानन्तीति सद्दहिया.

अयं पनस्सा अत्थो – ‘ब्राह्मणो अस्स (ब्रह्मुनो) मुखं आसि. बाहू राजञ्ञो कतो, खत्तिया अस्स बाहूति वुत्तं होति. यो वेस्सो, सो अस्स ऊरू. सुद्दो अस्स पादेहि अजायी’ति.

बुद्धघोसो पन ‘पण्डितब्राह्मणो’ति ञातोपि तं गाथं न अञ्ञासि. तथा हि तेन बन्धुपादापच्चाति पदस्स अत्थवण्णनायं ‘तेसं किर अयं लद्धि – ब्राह्मणा ब्रह्मुनो मुखतो निक्खन्ता, खत्तिया उरतो, वेस्सा नाभितो, सुद्दा जाणुतो, समणा पिट्ठिपादतो’ति [दी. नि. अट्ठ. १.२६३; म. नि. अट्ठ. १.५०८] तिस्सा वेदगाथाय असमानत्थो वण्णितो’’ति.

अयं पनेत्थ अनुविचारणा – यदि च तंकालिकानम्पि ब्राह्मणानं लद्धि तथेव भवेय्य यथा एतिस्सं गाथायं वुत्ता, सा चत्थवण्णना आचरियस्स मतिमत्ता. एवं सति सा विचारणा युत्ता भवेय्य. एतिस्सं पन गाथायं ‘‘ब्राह्मणोस्य मुखमासीदि’’ति पठमपादेन ‘‘ब्राह्मणा ब्रह्मुनो मुखतो जाता’’ति अत्थो उजुकतो न लब्भति. बुद्धकाले पन ब्राह्मणानं लद्धि ‘‘ब्राह्मणा ब्रह्मुनो मुखतो जाता’’ति एवमेव अहोसीति पाकटोयेवायमत्थो. तथा हि दीघनिकाये पाथिकवग्गे अग्गञ्ञसुत्ते (३, ६७) –

‘‘दिस्सन्ति खो पन वासेट्ठ ब्राह्मणानं ब्राह्मणियो उतुनियोपि गब्भिनियोपि विजायमानापि पायमानापि. ते च ब्राह्मणा ¶ ० योनिजाव समाना एवमाहंसु – ब्राह्मणोव सेट्ठो वण्णो, हीना अञ्ञे वण्णा. ब्राह्मणोव सुक्को वण्णो, कण्हा अञ्ञे वण्णा. ब्राह्मणाव सुज्झन्ति, नो अब्राह्मणा. ब्राह्मणाव ब्रह्मुनो पुत्ता ओरसा मुखतो जाता ब्रह्मजा ब्रह्मनिम्मिता ब्रह्मदायादाति. ते ब्रह्मानञ्चेव अब्भाचिक्खन्ति, मुसा च भासन्ति, बहुञ्च अपुञ्ञं पसवन्ती’’ति –

भगवता महाकारुणिकेन वासेट्ठभारद्वाजानं ब्राह्मणमाणवकानं भासितं, तेहि च तं अभिनन्दितं. ते पन द्वेपि माणवका जातिवसेन परिसुद्धब्राह्मणा चेव होन्ति तिण्णम्पि वेदानं पारगुनो च. तस्मा ‘‘ब्राह्मणा ब्रह्मुनो मुखतो निक्खन्ता’’ति वचनस्स तंकालिकानं ब्राह्मणानं लद्धिवसेन वुत्तभावो पाकटोयेव. यथा चेतं, एवं ‘‘खत्तिया उरतो, वेस्सा नाभितो, सुद्दा जाणुतो, समणा पिट्ठिपादतो’’ति वचनम्पि ‘‘तंकालिकब्राह्मणानं लद्धिञ्ञूहि पोराणट्ठकथाचरियेहि वुत्त’’न्ति सद्दहित्वा आचरियबुद्धघोसेन तं सब्बं पोराणट्ठकथातो भासापरिवत्तनमत्तेन विसेसेत्वा पकासितं भवेय्य. तस्मा तायपि वेदगाथाय आचरियस्स अब्राह्मणभावसाधनं अनुपपन्नमेवाति.

(ख) पुनपि तेन आचरियबुद्धघोसत्थेरस्स अब्राह्मणभावसाधनत्थं दुतियम्पि कारणं एवमाहटं –

‘‘ब्राह्मणगन्थेसु गब्भघातवाचकं भ्रूनहाति पदं पाळियं भूनहु (भूनहनो) इति दिस्सति. मागण्डियसुत्ते भरियाय मेथुनसंवासाभावेन उप्पज्जनारहगब्भस्स नासकत्तं सन्धाय मागण्डियो परिब्बाजको भगवन्तं ‘भूनहु (भूनहनो) समणो गोतमो’ति [म. नि. २.२०७ आदयो] आह. तं बुद्धघोसो न जानातीति पाकटोयेव तदत्थसंवण्णनाय. तत्थ हि तेन भूनहुनोति (भूनहनस्सा) पदं ‘हतवड्ढिनो मरियादकारकस्सा’ति [म. नि. अट्ठ. २.२०७] वण्णित’’न्ति.

तम्पि अयुत्तमेव. न हि मागण्डियेन फोट्ठब्बारम्मणापरिभोगमत्तमेव सन्धाय भूनहुभावो वुत्तो, अथ खो छन्नम्पि लोकामिसारम्मणानं अपरिभोगं सन्धाय वुत्तो. तस्मिञ्हि सुत्ते –

‘‘चक्खुं ¶ खो मागण्डिय रूपारामं रूपरतं रूपसम्मुदितं, तं तथागतस्स दन्तं गुत्तं रक्खितं संवुतं, तस्स च संवराय धम्मं देसेति, इदं नु ते एतं मागण्डिय सन्धाय भासितं ‘भूनहु समणो गोतमो’ति. एतदेव खो पन मे भो गोतम सन्धाय भासितं ‘भूनहु समणो गोतमो’ति. तं किस्स हेतु, एवञ्हि नो सुत्ते ओचरतीति…पे… मनो खो मागण्डिय धम्मारामो धम्मरतो धम्मसम्मुदितो, सो तथागतस्स दन्तो गुत्तो रक्खितो संवुतो, तस्स च संवराय धम्मं देसेति, इदं नु ते एतं मागण्डिय सन्धाय भासितं ‘भूनहु समणो गोतमो’ति. एतदेव खो पन मे भो गोतम सन्धाय भासितं ‘भूनहु समणो गोतमो’ति. तं किस्स हेतु, एवञ्हि नो सुत्ते ओचरती’’ति [म. नि. २.२०७ आदयो].

एवं भगवतो च अनुयोगो मागण्डियस्स च पटिञ्ञा आगता.

एत्थ हि मेथुनप्पटिसेवनवसेन फोट्ठब्बारम्मणपरिभोगहेतु एव गब्भपतिट्ठानं सम्भवतीति तदपरिभोगमेव सन्धाय ‘‘भूनहू’’ति वत्तुं अरहति, तदञ्ञेसं पन पञ्चन्नं रूपादिआरम्मणानं, तत्थापि विसेसतो धम्मारम्मणस्स सुद्धमनोविञ्ञाणेन परिभोगहेतु नत्थि किञ्चि गब्भपतिट्ठानन्ति तेसं अपरिभोगं सन्धाय भूनहूति वत्तुं न अरहतियेव, मागण्डियेन पन सब्बानिपि तानि सन्धाय वुत्तभावो पटिञ्ञातो, कारणञ्चस्स दस्सितं ‘‘एवञ्हि नो सुत्ते ओचरती’’ति. तस्मा किञ्चापि दानि ब्राह्मणगन्थेसु भूनहु- (भ्रूनहा) सद्दो गब्भघातनत्थे दिस्सति, मागण्डियसुत्ते पनेसो अत्थो न युज्जतीति आचरियेन ‘‘हतवड्ढि मरियादकारको’’ति अयमेवत्थो पोराणट्ठकथाय भासापरिवत्तनवसेन पकासितोति वेदितब्बो.

(ग) पुनपि तेन ‘‘इदम्पन बुद्धघोसस्स अब्राह्मणभावसाधकं पच्छिमकारणं, सो हि विसुद्धिमग्गे सीलनिद्देसे (१, ३१) ब्राह्मणानं परिहासं करोन्तो ‘एवं इमिना पिण्डपातपटिसेवनेन पुराणञ्च जिघच्छावेदनं पटिहङ्खामि, नवञ्च वेदनं अपरिमितभोजनपच्चयं आहरहत्थक अलंसाटक तत्रवट्टक काकमासक भुत्तवमितकब्राह्मणानं अञ्ञतरो ¶ विय न उप्पादेस्सामीति पटिसेवती’ति आह. इदं पन एकस्स भिन्नब्राह्मणलद्धिकस्सापि वचनं सियाति तदेव दळ्हकारणं कत्वा न सक्का ‘बुद्धघोसो अब्राह्मणो’ति वत्तु’’न्ति ततियं कारणं वुत्तं. तं पन अतिसंवेजनीयवचनमेव. न हेतं आचरियेन ब्राह्मणानं परिहासं कातुकामेन वुत्तं, न च तं परिहासवचनेन संयोजेतब्बट्ठानं, अञ्ञदत्थु यथाभूतमत्थं दस्सेत्वा सब्रह्मचारीनं ओवादानुसासनिदानवसेन वत्तब्बट्ठानं, तथायेव च आचरियेन वुत्तं. तथा हि ये लोके परदत्तूपजीविनो समणा वा ब्राह्मणा वा अञ्ञे वापि च पुग्गला, ते पच्चवेक्खणञाणरहिता असंवरे ठिता कदाचि अतिपणीतं रसं पहूतं लद्धा अपरिमितम्पि भुञ्जेय्युं, विसेसतो पन ब्राह्मणा लोकिकवत्थुवसेन च, जातकादिसासनिकवत्थुवसेन च तादिसा अहेसुन्ति पाकटा. इमस्मिञ्हि लोके वस्ससतसहस्सेहि वा वस्सकोटीहि वा अपरिच्छिन्नद्धाने को सक्का वत्तुं ‘‘नेदिसा भूतपुब्बा’’ति. तस्मा तादिसेहि विय न अपरिमितभोजनेहि भवितब्बन्ति ओवादानुसासनिदानवसेनेव वुत्तं. तदेवं अत्थसंहितम्पि समानं अयोनिसोमनसिकरोतो अनत्थमेव जातं, यथा सभरियस्स मागण्डियब्राह्मणस्स अनागामिमग्गफलत्थायपि देसिता गाथा [ध. प. अट्ठ. १.सामावतीवत्थु] तेसं धीतुया अनत्थाय संवत्ततीति संवेगोयेवेत्थ ब्रूहेतब्बोति.

पतञ्जलिवादविचारणा

३. अथ तेन ‘‘पातञ्जलीमतं परिवत्तेती’’ति वचनम्पि एवं विचारितं.

(क) ‘‘बुद्धघोसो पतञ्जलिस्स वा अञ्ञेसं वा उत्तरइन्दियरट्ठिकानं वादं अप्पकमेव अञ्ञासि. पतञ्जलिवादेसु हि अणिमा लघिमाति इदमेव द्वयं दस्सेसि [विसुद्धि. १.१४४] ततुत्तरि योगसुत्तं अजानन्तो, पतञ्जलिवादस्स च तुलेत्वा दीपना तस्स गन्थेसु न दिस्सति, पतञ्जलिना कतपकरणञ्च पतञ्जलीति नाममत्तम्पि च तत्थ दीपितं नत्थि. विसुद्धिमग्गे पन पञ्ञाभूमिनिद्देसे ‘पकतिवादीनं पकति विया’ति [विसुद्धि. २.५८४] पकतिवाद (संख्यावाद) नाममत्तं पकासितं, तत्थेव च ‘पटिञ्ञा हेतूतिआदीसु हि लोके वचनावयवो ¶ हेतूति वुच्चती’ति [विसुद्धि. २.५९५] उदाहरितं, तेन ञायति ‘बुद्धघोसो इन्दियतक्कनयदीपके ञायगन्थस्मिं किञ्चि मूलभागमत्तं अपरिपुण्णं जानाती’ति’’.

तं पन सब्बम्पि केवलं आचरियस्स अब्भाचिक्खणमत्तमेव. अतिगम्भीरस्स हि अतिगरुकातब्बस्स सुपरिसुद्धस्स पिटकत्तयस्स अत्थसंवण्णनं करोन्तेन सुपरिसुद्धोयेव पाळिनयो च अट्ठकथानयो च पोराणथेरवादा चाति ईदिसायेव अत्था पकासेतब्बा, यं वा पन अत्थसंवण्णनाय उपकारकं सद्दविनिच्छयपटिसंयुत्तं लोकियगन्थवचनं, तदेव च यथारहं पकासेतब्बं, न पन अनुपकारानिपि तंतंगन्थतक्कत्तुनामानि च, तेहि वुत्तवचनानि च बहूनि, न च तेसं अप्पकासनेन ‘‘न ते अट्ठकथाचरियो जानाती’’ति वत्तब्बो. यदि हि यं यं लोकियगन्थं अत्तना जानाति, तं सब्बं अनुपकारम्पि अत्तनो अट्ठकथायमानेत्वा पकासेय्य, अतिवित्थारा च सा भवेय्य अपरिसुद्धा च असम्मानिता च सासनिकविञ्ञूहीति आचरियेन पतञ्जलिवादादयो न वित्थारेन पकासिताति ञातब्बं, अञ्ञदत्थु येहि येहि लोकियगन्थेहि किञ्चि किञ्चि आचरियेन आनेत्वा पकासितं, ते ते च गन्था, अञ्ञेपि च तादिसा आचरियेन ञातात्वेव जानितब्बा विञ्ञूहि, यथा समुद्दस्स एकदेसं दिस्वा सब्बोपि समुद्दो एदिसोति ञायति. आचरियो पन यत्थ यत्थ वेदपटिसंयुत्तवचनानि आगतानि, तत्थ तत्थ वेदगन्थेहिपि किञ्चि किञ्चि आनेत्वा पकासेसियेव. तथा हि आचरियेन सुमङ्गलविलासिनियं नाम दीघनिकायट्ठकथायं –

‘‘तिण्णं वेदानन्ति इरुवेदयजुवेदसामवेदान’’न्ति [दी. नि. अट्ठ. १.२५६] च,

‘‘इतिहासपञ्चमानन्ति अथब्बणवेदं चतुत्थं कत्वा इतिह आस इतिह आसाति ईदिसवचनपटिसंयुत्तो पुराणकथासङ्खातो इतिहासो पञ्चमो एतेसन्ति इतिहासपञ्चमा, तेसं इतिहासपञ्चमानं वेदान’’न्ति [दी. नि. अट्ठ. १.२५६] च,

‘‘यिट्ठं वुच्चति महायागो’’ति [दी. नि. अट्ठ. १.१७०-१७२] च,

‘‘अग्गिहोमन्ति ¶ एवरूपेन दारुना एवं हुते इदं नाम होतीति अग्गिजुहनं. दब्बिहोमादीनिपि अग्गिहोमानेव, एवरूपाय दब्बिया ईदिसेहि कणादीहि हुते इदं नाम होतीति एवं पवत्तिवसेन पन विसुं वुत्तानी’’ति [दी. नि. अट्ठ. १.२१] च,

‘‘सासपादीनि पन मुखेन गहेत्वा अग्गिम्हि पक्खिपनं, विज्जं परिजप्पित्वा जुहनं वा मुखहोम’’न्ति [दी. नि. अट्ठ. १.२१] च –

एवमादिना वेदपटिसंयुत्तवचनानि वेदगन्थानुरूपतो वण्णितानि. तानि च पोराणट्ठकथातो भासापरिवत्तनवसेन वुत्तानिपि भवेय्युं, वेदगन्थेसु पन अकोविदेन याथावतो भासापरिवत्तनं कातुम्पि न सुकरमेव, तस्मा आचरियस्स वेदगन्थेसु कोविदभावोपि पाकटोयेव. एवं वेदगन्थेसु च तदञ्ञलोकियगन्थेसु च सुकोविदस्सेव समानस्स तेसं वित्थारतो अप्पकासनं यथावुत्तकारणेनेवाति वेदितब्बं.

अपि च आचरियो अत्तनो गन्थारम्भेयेव –

‘‘ततो च भासन्तरमेव हित्वा,

वित्थारमग्गञ्च समासयित्वा;

विनिच्छयं सब्बमसेसयित्वा…पे…

यस्मा अयं हेस्सति वण्णनापी’’ति [पारा. अट्ठ. १.गन्थारम्भकथा] च.

‘‘अपनेत्वान ततोहं, सीहळभासं मनोरमं भासं;

तन्तिनयानुच्छविकं, आरोपेत्वा विगतदोसं.

समयं अविलोमेन्तो, थेरानं थेरवंसपदीपानं;

सुनिपुणविनिच्छयानं, महाविहारे निवासिनं;

हित्वा पुनप्पुनागत-मत्थं अत्थं पकासयिस्सामी’’ति [दी. नि. अट्ठ. १.गन्थारम्भकथा] च–

एवं पोराणट्ठकथानं भासापरिवत्तनसंखिपनवसेनेव विसेसेत्वा अभिनवट्ठकथायो करिस्सामीति पटिञ्ञं कत्वा यथापटिञ्ञातमेव अकासि, न अत्तनो ञाणप्पभावेन विसेसेत्वातिपि वेदितब्बं. तस्मा अट्ठकथासु ¶ पतञ्जलिवादादीनं वित्थारतो अप्पकासनमारब्भ ‘‘बुद्धघोसो पतञ्जलिवादादीनि परिपुण्णं न जानाती’’ति वचनं केवलं आचरियस्स अब्भाचिक्खणमत्तमेवाति.

कब्बसत्थविचारणा

४. पुनपि सो एवमाह ‘‘किञ्चापि बुद्धघोसो रामायणमहाभारतसङ्खातानं महाकब्बसत्थानं सुकुसलो विय न दिस्सति, तथापि तानि दस्सेसि. कथं? अक्खानन्ति भारतयुज्झनादिकं, तं यस्मिं ठाने कथीयति, तत्थ गन्तुम्पि न वट्टतीति [दी. नि. अट्ठ. १.१३] च, तस्स (सम्फपलापस्स) द्वे सम्भारा भारतयुद्धसीताहरणादिनिरत्थककथापुरेक्खारता तथारूपिकथाकथनञ्चाति [दी. नि. अट्ठ. १.८] च दस्सेसी’’ति.

तं पन पुरिमवचनतोपि अहेतुकतरं केवलं अनादरीकरणमत्तमेव. अतिगम्भीरत्थस्स हि अतिगरुकरणीयस्स पिटकत्तयस्स अत्थसंवण्णनायं निरत्थकस्स सम्फपलापसमुदायभूतस्स कब्बसत्थस्स वित्थारतो पकासनेन किं सिया पयोजनं, अञ्ञदत्थु सायेवस्स असम्मानिता, अनादरिया च विञ्ञूहीति.

बाहुसच्चगुणमक्खनं

५. पुनपि धम्मानन्दो आचरियस्स बाहुसच्चगुणं मक्खेतुकामो एवमाह – ‘‘तस्स (बुद्धघोसस्स) समयन्तरकोविदसङ्खातं बाहुसच्चं न ततो उत्तरितरं होति, यं आधुनिकानं गन्थन्तरकोविदानं सीहळिकभिक्खूनं यं वा एकादसमे खरिस्तवस्ससतके (१००१-११००) उप्पन्नानं दक्खिणइन्दियरट्ठिकानं अनुरुद्ध-धम्मपालादीनं भिक्खून’’न्ति.

तं पन सब्बथापि अयुत्तवचनमेव. यदि हि आधुनिका वा सीहळिकभिक्खू, पोराणा वा आचरियअनुरुद्ध-धम्मपालत्थेरादयो समयन्तरबाहुसच्चवसेन आचरियबुद्धघोसेन समाना वा उत्तरितरा वा भवेय्युं, ते आचरियबुद्धघोसत्थेरस्स अट्ठकथाहि अनारद्धचित्ता हुत्वा ततो सुन्दरतरा परिपुण्णतरा च अभिनवट्ठकथायो करेय्युं, न पन ते तथा करोन्ति, न केवलं न करोन्तियेव, अथ ¶ खो तेसं एकोपि न एवं वदति ‘‘अहं बुद्धघोसेन बाहुसच्चवसेन समसमोति वा उत्तरितरो’’ति वा, अञ्ञदत्थु ते आचरियस्स अट्ठकथायोयेव संवण्णेन्ति च उपत्थम्भेन्ति च, आचरियट्ठाने च ठपेन्ति. तेनेतं ञायति सब्बथापि अयुत्तवचनन्ति.

महायानिकनयविचारणा

६. पुन सो तावत्तकेनापि असन्तुट्ठो आचरियं अवमञ्ञन्तो एवमाह – ‘‘महायाननिकायस्स पधानाचरियभूतानं अस्स घोस-नागज्जुनानं नयं वा, नाममत्तम्पि वा तेसं न जानाति मञ्ञे बुद्धघोसो’’ति. तं पन अतिविय अधम्मिकं निरत्थकञ्च निग्गहवचनमत्तमेव. न हि निकायन्तरिकानं वादनयानं अत्तनो अट्ठकथायं अप्पकासनेन सो ते न जानातीति सक्का वत्तुं. ननु आचरियेन आगमट्ठकथासु गन्थारम्भेयेव –

‘‘समयं अविलोमेन्तो, थेरानं थेरवंसपदीपानं;

सुनिपुणविनिच्छयानं, महाविहारे निवासिन’’न्ति च,

इधापि विसुद्धिमग्गे –

‘‘महाविहारवासीनं, देसनानयनिस्सितं;

विसुद्धिमग्गं भासिस्स’’न्ति [विसुद्धि. १.२] च,

‘‘तस्सा अत्थसंवण्णनं करोन्तेन विभज्जवादिमण्डलं ओतरित्वा आचरिये अनब्भाचिक्खन्तेन सकसमयं अवोक्कमन्तेन परसमयं अनायूहन्तेन सुत्तं अप्पटिबाहन्तेन विनयं अनुलोमेन्तेन महापदेसे ओलोकेन्तेन धम्मं दीपेन्तेन अत्थं सङ्गाहेन्तेन तमेवत्थं पुनरावत्तेत्वा अपरेहिपि परियायन्तरेहि निद्दिसन्तेन च यस्मा अत्थसंवण्णना कातब्बा होती’’ति [विसुद्धि. २.५८१] च,

‘‘सासनं पनिदं नाना-देसनानयमण्डितं;

पुब्बाचरियमग्गो च, अब्बोच्छिन्नो पवत्तति;

यस्मा तस्मा तदुभयं, सन्निस्सायत्थवण्णनं;

आरभिस्सामि एतस्सा’’ति [विसुद्धि. २.५८१] च,

पटिञ्ञं ¶ कत्वा यथापटिञ्ञातप्पकारेनेव अट्ठकथायो कता. एवमेतासं करणे कारणम्पेत्थ पकासेतब्बं, तस्मा दानि तम्पकासनत्थं सम्मासम्बुद्धस्स परिनिब्बुतिकालतो पट्ठाय याव आचरियबुद्धघोसस्स कालो, ताव सासनप्पवत्तिक्कमम्पि वक्खाम.

सासनप्पवत्तिक्कमो

भगवतो हि परिनिब्बुतिकालतो पच्छा वस्ससतब्भन्तरे बुद्धसासने कोचिपि वादभेदो नाम नत्थि. वस्ससतकाले पन दुतियसङ्गीतिकारेहि थेरेहि निक्कड्ढिता वज्जिपुत्तका भिक्खू पक्खं लभित्वा धम्मञ्च विनयञ्च अञ्ञथा कत्वा महासङ्गीतिनामेन विसुं सङ्गीतिमकंसु. तदा सङ्गीतिद्वयारूळ्हपुराणधम्मविनयमेव सम्पटिच्छन्तानं थेरानं गणो थेरवादोति च तदञ्ञेसं महासङ्घिकोति च वोहरीयन्ति.

पुन महासङ्घिकतो (१) गोकुलिको (२) एकब्योहारिकोति द्वे आचरियगणा उप्पन्ना. पुन गोकुलिकतो (३) पञ्ञत्तिवादो (४) बाहुलिको (बहुस्सुतिको)ति द्वे उप्पन्ना. पुन बाहुलिकतोपि (५) चेतियवादिगणो उप्पन्नोति एते पञ्च मूलभूतेन महासङ्घिकेन सह छ पाटियेक्का आचरियगणा अहेसुं.

विसुद्धत्थेरवादतोपि (१) महिसासको (२) वज्जिपुत्तकोति द्वे आचरियगणा उप्पन्ना. पुन महिसासकतो (३) सब्बत्थिवादो (४) धम्मगुत्तिकोति द्वे उप्पन्ना. पुन सब्बत्थिवादतोपि (५) कस्सपियो, ततोपि (६) सङ्कन्तिको, ततोपि (७) सुत्तवादीति तयो उप्पन्ना. वज्जिपुत्तकतोपि (८) धम्मोत्तरियो (९) भद्दयानिको (१०) छन्नागारिको (११) सम्मितियोति चत्तारो उप्पन्नाति ते एकादस मूलभूतेन विसुद्धत्थेरवादेन सह द्वादस आचरियगणा अहेसुं. इति इमे च द्वादस पुरिमा च छाति अट्ठारस आचरियगणा दुतियततियसङ्गीतीनं अन्तरे जाता अहेसुं.

तेसु मूलभूतो थेरवादगणोयेव पोराणधम्मविनयगरुको हुत्वा अनूनमनधिकं केवलपरिपुण्णं परिसुद्धं पोराणिकं धम्मविनयं धारेसि. इतरे पन सत्तरस भिन्नगणा पोराणिकं धम्मविनयं अञ्ञथा ¶ अकंसु. तेन तेसं धम्मविनयो कत्थचि ऊनो कत्थचि अधिको हुत्वा अपरिपुण्णो चेव अहोसि अपरिसुद्धो च. तेन वुत्तं दीपवंसे पञ्चमपरिच्छेदे –

३०.

‘‘निक्कड्ढिता पापभिक्खू, थेरेहि वज्जिपुत्तका;

अञ्ञं पक्खं लभित्वान, अधम्मवादी बहू जना.

३१.

दससहस्सा समागन्त्वा, अकंसु धम्मसङ्गहं;

तस्मायं धम्मसङ्गीति, महासङ्गीतीति वुच्चति.

३२.

महासङ्गीतिका भिक्खू, विलोमं अकंसु सासने;

भिन्दित्वा मूलसङ्गहं, अञ्ञं अकंसु सङ्गहं.

३३.

अञ्ञत्र सङ्गहितं सुत्तं, अञ्ञत्र अकरिंसु ते;

अत्थं धम्मञ्च भिन्दिंसु, विनये निकायेसु च पञ्चसु…पे…

४९.

अत्थं धम्मञ्च भिन्दिंसु, एकदेसञ्च सङ्गहं;

गन्थञ्च एकदेसञ्हि, छड्डेत्वा अञ्ञं अकंसु ते.

५०.

नामं लिङ्गं परिक्खारं, आकप्पकरणीयानि च;

पकतिभावं जहित्वा, तञ्च अञ्ञं अकंसु ते.

५१.

सत्तरस भिन्नवादा, एकवादो अभिन्नको;

सब्बेवट्ठारस होन्ति, भिन्नवादेन ते सह.

५२.

निग्रोधोव महारुक्खो, थेर वादानमुत्तमो;

अनूनं अनधिकञ्च, केवलं जिनसासनं;

कण्टका विय रुक्खम्हि, निब्बत्ता वादसेसका.

५३.

पठमे वस्ससते नत्थि, दुतिये वस्ससतन्तरे;

भिन्ना सत्तरस वादा, उप्पन्ना जिनसासने’’ति [कथा. अट्ठ. निदानकथा].

असोकरञ्ञो च काले परिहीनलाभसक्कारा अञ्ञतित्थिया लाभसक्कारं पत्थयमाना भिक्खूसु पब्बजित्वा सकानि सकानि दिट्ठिगतानि दीपेन्ति ‘‘अयं धम्मो, अयं विनयो, इदं सत्थुसासन’’न्ति. भिक्खूनं सन्तिके पब्बज्जं अलभमानापि सयमेव केसे छिन्दित्वा कासायानि वत्थानि अच्छादेत्वा विहारेसु विचरन्ता उपोसथकम्मादिकरणकाले सङ्घमज्झं ¶ पविसन्ति, ते भिक्खुसङ्घेन धम्मेन विनयेन सत्थुसासनेन निग्गय्हमानापि धम्मविनयानुलोमाय पटिपत्तिया असण्ठहन्ता अनेकरूपं सासनस्स अब्बुदञ्च मलञ्च कण्टकञ्च समुट्ठापेन्ति. केचि अग्गिं परिचरन्ति, केचि पञ्चातपे तपन्ति, केचि आदिच्चं अनुपरिवत्तन्ति, केचि धम्मञ्च विनयञ्च वोभिन्दिस्सामाति तथा तथा पग्गण्हन्ति. तदा भिक्खुसङ्घो न तेहि सद्धिं उपोसथं वा पवारणं वा अकासि, असोकारामे सत्त वस्सानि उपोसथो उपच्छिज्जि [कथा. अट्ठ. निदानकथा; पारा. अट्ठ. १.ततियसङ्गीतिकथा].

इमञ्च पन पवत्तिं उपादाय एवम्पि सक्का गहेतुं ‘‘सत्तरसन्नं भिन्नवादगणानं धम्मविनयस्स पच्छिमकालेसु अपरिसुद्धतरभावो ईदिसेनपि कारणेन अहोसी’’ति. किञ्चापि हि बुद्धसासनभूते परिसुद्धधम्मविनये ‘‘कोचिपि निच्चो धुवो सस्सतो नाम नत्थि अञ्ञत्र निब्बानधातुया, परमत्थतो अत्तापि नत्थि, सब्बेपि सङ्खारा अनिच्चा अद्धुवा असस्सता अनत्तायेवा’’ति अत्थो अतिविय पाकटो होति, तथापि दानि अथेरवादिकानं गन्थेसु च पुब्बे वेतुल्लवादादीसु च ‘‘बुद्धो निच्चो धुवो सस्सतो अत्ता’’ति च, ‘‘सब्बेपि सत्ता निच्चा धुवा सस्सता अत्ता’’ति च अत्थो दिस्सति.

अथ असोको धम्मराजा सासनं विसोधेतुकामो मोग्गलिपुत्ततिस्सत्थेरस्स सन्तिके पठममेव समयं उग्गण्हित्वा एकलद्धिके एकलद्धिके भिक्खू एकतो कारेत्वा एकमेकं भिक्खुसमूहं पक्कोसापेत्वा पुच्छि ‘‘किं वादी भन्ते सम्मासम्बुद्धो’’ति. ततो ये ये ‘‘सम्मासम्बुद्धो सस्सतवादी’’ति वा, ‘‘एकच्चसस्सतवादी’’ति वा एवमादिना अत्तनो अत्तनो वादानुरूपं मिच्छावादं आहंसु, ते ते ‘‘नयिमे भिक्खू, अञ्ञतित्थिया इमे’’ति तथतो ञत्वा तेसं सेतकानि वत्थानि दत्वा उप्पब्बाजेसि. ते सब्बेपि सट्ठिसहस्समत्ता अहेसुं.

अथञ्ञे भिक्खू पुच्छित्वा तेहि ‘‘विभज्जवादी महाराज सम्मासम्बुद्धो’’ति वुत्ते ‘‘सुद्धं दानि भन्ते सासनं, करोतु भिक्खुसङ्घो उपोसथ’’न्ति वत्वा आरक्खञ्च दत्वा नगरं पाविसि. समग्गो सङ्घो सन्निपतित्वा उपोसथं अकासि. तस्मिं समागमे मोग्गलिपुत्ततिस्सत्थेरो यानि च ¶ तदा उप्पन्नानि वत्थूनि यानि च आयतिं उप्पज्जिस्सन्ति, सब्बेसम्पि तेसं पटिबाहनत्थं सत्थारा दिन्ननयवसेनेव तथागतेन ठपितमातिकं विभजन्तो परप्पवादमद्दनं कथावत्थुं नाम अभिधम्मपिटके पञ्चमं पकरणं अभासि. ततो मोग्गलिपुत्ततिस्सत्थेरप्पमुखा तिपिटकपरियत्तिधरा पभिन्नपटिसम्भिदापत्ता सहस्सं भिक्खू थेरवादिनो सङ्गीतिद्वयारूळ्हं परिसुद्धं पोराणधम्मविनयं पुन सङ्गायित्वा सुरक्खितं रक्खिंसु [पारा. अट्ठ. १.ततियसङ्गीतिकथा].

अथ मोग्गलिपुत्ततिस्सत्थेरो नवसु पच्चन्तट्ठानेसु सासनपतिट्ठापनत्थं नव नायकत्थेरे उच्चिनित्वा पेसेसि. तेसु अट्ठहि थेरेहि अत्तनो अत्तनो पत्तट्ठानं गन्त्वा बुद्धसासने पतिट्ठापिते महामहिन्दत्थेरो छत्तिंसाधिकद्विसते (२३६) बुद्धवस्से जम्बुदीपतो सीहळदीपं गन्त्वा देवानंपियतिस्सराजप्पमुखं दीपकजनसमूहं पसादेत्वा बुद्धसासनं सम्पतिट्ठापेसि, तेन च रञ्ञा दिन्नं महामेघवनुय्यानं पटिग्गहेत्वा तत्थ महाविहारं नाम सङ्घारामं पतिट्ठापेसि [पारा. अट्ठ. १.ततियसङ्गीतिकथा]. ततो पभुति सीहळदीपे बुद्धसासनं याव वट्टगामणिराजकाला निकायन्तरवादाकुलरहितं निम्मलं सुपरिसुद्धं हुत्वा समुज्जलित्थ. वट्टगामणिराजकालतो पन पट्ठाय निकायन्तरवादापि सीहळदीपमुपागमिंसु. तदा विसुद्धत्थेरवादिनो यथा पुराणधम्मविनयो तेहि निकायन्तरवादेहि असम्मिस्सो अमलीनो पकतिपरिसुद्धो हुत्वा तिट्ठेय्य, तथा तं महुस्साहेन सुरक्खितं रक्खिंसु. कथं?

अभयगिरिनिकायुप्पत्ति

वट्टगामणिराजा हि (४२५-बुद्धवस्से) रज्जं पत्वा पञ्चमासमत्तकाले ब्राह्मणतिस्सदामरिकेन सत्तहि च दमिळयोधेहि उपद्दुतो सङ्गामे च पराजितो पलायित्वा साधिकानि चुद्दसवस्सानि निलीयित्वा अञ्ञतरवेसेन वसति [महावंसे ३३-परिच्छेदे ३७-गाथातो पट्ठाय]. तदा लङ्कादीपे मनुस्सा चोरभयेन दुब्भिक्खभयेन च उपद्दुता भिक्खूनं चतूहि पच्चयेहि उपट्ठातुं न सक्कोन्ति, तेन भिक्खू येभुय्येन ततो जम्बुदीपं गन्त्वा धम्मविनयं धारेन्ता विहरन्ति. लङ्कादीपेयेव ओहीनापि थेरा यथालद्धेहि कन्दमूलपण्णेहि यापेन्ता काये वहन्ते निसीदित्वा परियत्तिधम्मं सज्झायं करोन्ति, अवहन्ते ¶ वालुकं उस्सापेत्वा तं परिवारेत्वा सीसानि एकट्ठाने कत्वा परियत्तिं सम्मसन्ति. एवं द्वादस संवच्छरानि साट्ठकथं तेपिटकं अहापेत्वा धारयिंसु. यदा पन वट्टगामणिराजा दमिळराजानं हन्त्वा (४५५-४६६ बुद्धवस्सब्भन्तरे) पुनपि रज्जं कारेसि [महावंसे ३३, ७८-गाथा]. तदा ते थेरा जम्बुदीपतो पच्चागतत्थेरेहि सद्धिं तेपिटकं सोधेन्ता एकक्खरम्पि असमेन्तं नाम न पस्सिंसु [अ. नि. अट्ठ. १.१.१३०; विभ. अट्ठ. ८१०]. योपि च महानिद्देसो तस्मिं काले एकस्सेव दुस्सीलभिक्खुनो पगुणो अहोसि, सोपि महातिपिटकत्थेरेन महारक्खितत्थेरं तस्स सन्तिका उग्गण्हापेत्वा रक्खितो अहोसि [पारा. अट्ठ. २.५८५]. एवं दुब्भिक्खरट्ठक्खोभुपद्दवेहि पीळितत्ता दुद्धरसमयेपि धम्मविनयं सक्कच्चं धारयिंसु.

राजा अभयगिरिं नाम विहारं कारेत्वा अत्तनो कतूपकारपुब्बस्स महातिस्सत्थेरस्स अदासि. सो पन थेरो कुलसंसग्गबहुलत्ता महाविहारवासीहि भिक्खूहि पब्बाजनीयकम्मं कत्वा नीहटो. तदास्स सिस्सो बहलमस्सुतिस्सनामको थेरो तं कम्मं पटिबाहि, तेनस्स सङ्घो उक्खेपनीयकम्मं अकासि. सो महाविहारवासीनं कुज्झित्वा अभयगिरिविहारमेव गन्त्वा तेन महातिस्सत्थेरेन एकतो हुत्वा विसुं गणं वहन्तो वसि. ते च द्वे थेरा न महाविहारं पुनागमिंसु [महावंसे ३३, ७९-गाथादीसु. निकायसङ्गहे]. ततो पट्ठाय सीहळदीपे महाविहारवासी, अभयगिरिवासीति द्वे निकायाजाता. इदं ताव सीहळदीपे सासनपरिहानिया पठमं कारणं.

धम्मरुचिनिकायुप्पत्ति

तदा च राजा अभयगिरिवासीसुयेव भिक्खूसु विसेसतो पसन्नो हुत्वा तेयेव चतूहि पच्चयेहि पवारेत्वा पग्गण्हाति, राजमहामत्तादयोपि अभिञ्ञाता अभिञ्ञाता बहू जना तस्मिञ्च आरामे अञ्ञत्थ च बहू आवासे कत्वा तेसं देन्ति. एवं अभयगिरिवासिनो भिक्खू बहूनं अभिञ्ञातजनानं सक्कता चेव होन्ति पूजिता च मानिता च. पुन च अभयगिरिवासिनो बहलमस्सुतिस्सत्थेरादयोइन्दियरट्ठतो आगतं वज्जिपुत्तकगणपरियापन्नस्स धम्मरुचिनिकायस्स धम्मविनयभूतं सक्कतभासारोपितं ¶ अभिनवम्पि पिटकं सम्पटिच्छन्ति [महावंसे ३३, ९९ गाथासु. निकायसङ्गहे], तेन तेपि धम्मरुचिनिकायिका नाम अहेसुं. इदं सीहळदीपे सासनपरिहानिया दुतियं कारणं.

पिटकत्तयस्स पोत्थकारोपनं

महाविहारवासिनो पन पोराणिकं पाळिभासाय सण्ठितं परिसुद्धपिटकमेव पटिग्गण्हन्ति, तञ्च मुखपाठेनेव धारेन्ति. तदा पन थेरा पच्छिमजनानं सतिपञ्ञाहानिं दिस्वा बुद्धकालतो पट्ठाय याव तंकाला मुखपाठेनाभतं साट्ठकथं पिटकत्तयं पोत्थके आरोपेतुं समारभिंसु. समारभमाना च ते अनुराधराजधानिपुरतो अट्ठसट्ठिमिलप्पमाणे मलयजनपदे मातुल [मातले इति एतरहि वोहारो] नगरे आलोकलेणे वसन्ता एकस्स तन्देसिकस्स जनपदाधिपतिनो आरक्खं गहेत्वा तं पोत्थकारोपनकम्ममकंसु [महावंसे ३३, १००-१०१-गाथासु]. तेनिदं ञायति ‘‘तदा महाविहारवासिनो थेरा राजराजमहामत्तेहि अलद्धूपकारा हुत्वा अत्तनो बलेनेव पिटकत्तयस्स पोत्थकारोपनकम्ममकंसू’’ति च, ‘‘तञ्च यथेव पच्छिमजनानं सतिपञ्ञाहानिं दिस्वा कतं, तथेव दुब्भिक्खरट्ठक्खोभादिभयुपद्दुतकालेसु दुद्धरभावम्पि दिस्वा’’ति च, तथा ‘‘अभयगिरिवासीनं सम्पटिच्छितसमयन्तरवादेहि अनाकुलनत्थम्पि कत’’न्ति च. एवं महाविहारवासिनो थेरा परिसुद्धत्थेरवादपिटकं समयन्तरेहि असम्मिस्सनत्थाय यथा पुरे, तथा पाळिभासाय एव पोत्थके आरोपेत्वापि सुरक्खितं रक्खिंसु. यदि हि तदा तेपिटकं पोत्थकेसु अनारोपितमस्स, पच्छाकालेसु समयन्तरतो आगतसुत्तानि ‘‘नेतानि अम्हाक’’न्ति पटिक्खिपितुं न सुकरानि भवेय्युं. यतो च खो तदा साट्ठकथं तेपिटकं पोत्थकेसु आरोपितं, ततोयेव अनागतकालेसु समयन्तरागतसुत्तानि तेहि पोत्थकेहि संसन्देत्वा पटिक्खिपितुं सुकरानि होन्ति.

तथा हि भातियराजकाले (५२४-५५२-बु-व) महाविहारवासीनं अभयगिरिवासीहि विनये विवादो उप्पज्जि. तदा राजा दीघकारायनं नाम ब्राह्मणजातिकं अमच्चं थेरानं सन्तिकं पेसेसि. सो उभिन्नं सुत्तं ¶ सुत्वा विनिच्छयं अदासि [पारा. अट्ठ. २.३८४]. तथा वोहारकतिस्सराजकाले च (७५८-७८० बु-व) गोठाभयराजकाले च (७९७-८१० बु-व) थेरवादिका पोत्थकारूळ्हेन धम्मविनयेन संसन्देत्वा अधम्मवादं पटिक्खिपिंसु [निकायसङ्गहे १२-पिट्ठे].

अधम्मवादुप्पत्ति

अयं पन आदितो पट्ठाय सासनमलभूतानं अधम्मवादानं उप्पत्ति. असोकरञ्ञो हि काले उप्पब्बाजेत्वा निक्कड्ढिता अञ्ञतित्थिया बुद्धसासने अलद्धपतिट्ठा कोधाभिभूता पाटलिपुत्ततो निक्खमित्वा राजगहसमीपे नालन्दायं सन्निपतित्वा एवं सम्मन्तयिंसु ‘‘महाजनस्स बुद्धसासने अनवगाहत्थाय सक्यानं धम्मविनयो नासेतब्बो, तञ्च खो तेसं समयं अजानन्तेहि न सक्का कातुं, तस्मा येन केनचि उपायेन पुनपि तत्थ पब्बजितब्बमेवा’’ति. ते एवं सम्मन्तयित्वा पुन आगन्त्वा विसुद्धत्थेरवादीनमन्तरं पविसितुं असक्कोन्ता तदञ्ञेसं सत्तरसन्नं महासङ्घिकादिनिकायानं सन्तिकं उपसङ्कमित्वा अत्तनो अञ्ञतित्थियभावं अजानापेत्वा पब्बजित्वा पिटकत्तयमुग्गण्हित्वा तञ्च विपरिवत्तेत्वा ततो कोसम्बिं गन्त्वा धम्मविनयनासनाय उपायं मन्तयित्वा २५३-बुद्धवस्से छसु ठानेसु वसन्ता (१) हेमवतिको (२) राजगिरिको (३) सिद्धत्थिको (४) पुब्बसेलियो (५) अपरसेलियो (६) वाजिरियो (७) वेतुल्लो (८) अन्धको (९) अञ्ञमहासङ्घिकोति नव अभिनवे निकाये उप्पादेसुं [निकायसङ्गहे ९-पिट्ठे]. तेसं नामानि च लद्धियो च कथावत्थुअट्ठकथायं आगतायेव.

तेसु हेमवतिका सद्धम्मपतिरूपकं बुद्धभासितभावेन दस्सेत्वा

(१) वण्णपिटकं नाम गन्थं अकंसु.

राजगिरिका (२) अङ्गुलिमालपिटकं,

सिद्धत्थिका (३) गूळ्हवेस्सन्तरं,

पुब्बसेलिया (४) रट्ठपालगज्जितं,

अपरसेलिया (५) आळवकगज्जितं,

वजिरपब्बतवासिनो ¶ वाजिरिया (६) गूळ्हविनयं नाम गन्थं अकंसु.

तेयेव सब्बे मायाजालतन्त-समाजतन्तादिके अनेके तन्तगन्थे च, मरीचिकप्प-हेरम्भकप्पादिके अनेके कप्पगन्थे च अकंसु.

वेतुल्लवादिनो पन (७) वेतुल्लपिटकमकंसु.

अन्धका च (८) रतनकूटादिके गन्थे,

अञ्ञमहासङ्घिका च (९) अक्खरसारियादिसुत्तन्ते अकंसु [निकायसङ्गहे ९-पिट्ठे].

तेसु पन सद्धम्मपतिरूपकेसु वेतुल्लवादो, वाजिरियवादो, रतनकूटसत्थन्ति इमानियेव तीणि लङ्कादीपमुपागतानि, अञ्ञानि पन वण्णपिटकादीनि जम्बुदीपेयेव निवत्तन्तीति निकायसङ्गहे वुत्तं. वण्णपिटकादीनम्पि पन लङ्कादीपमुपागतच्छाया दिस्सतेव. तथा हि समन्तपासादिकाय विनयट्ठकथायं (३, ९-पिट्ठे)

‘‘वण्णपिटक अङ्गुलिमालपिटकरट्ठपालगज्जितआळवकगज्जितगूळ्हमग्गगूळ्हवेस्सन्तर गूळ्हविनय वेदल्लपिटकानि [एत्थ ‘‘वेपुल्ल, वेदल्लं, वेतुल्लन्ति अत्थको एकं, बोधिसत्तपिटकस्सेव नाम’’न्ति वेदितब्बं. तथा हि वुत्तं असङ्गेन नाम आचरियेन अभिधम्मसमुच्चये नाम महायानिकगन्ते (७९-पिट्ठे) ‘‘वेपुल्लं कतमं? बोधिसत्तपिटकसम्पयुत्तं भासितं. यदुच्चते वेपुल्लं, तं वेदल्लमप्युच्चते, वेतुल्लमप्युच्चते. किमत्थं वेपुल्लमुच्चते? सब्बसत्तानं हितसुखाधिट्ठानतो, उदारगम्भीरधम्मदेसनातो च. किमत्थमुच्चते वेदल्लं? सब्बावरणविदलनतो. किमत्थमुच्चते वेतुल्लं? उपमानधम्मानं तुलनाभावतो’’ति] पन अबुद्धवचनानियेवाति वुत्त’’न्ति च.

सारत्थप्पकासिनिया संयुत्तट्ठकथायम्पि (२, १८६-पिट्ठे)

‘‘गूळ्हविनयं गूळ्हवेस्सन्तरं गूळ्हमहोसधं वण्णपिटकं अङ्गुलिमालपिटकं रट्ठपालगज्जितं आळवकगज्जितं वेदल्लपिटकन्ति अबुद्धवचनं सद्धम्मपतिरूपकं नामा’’ति च–

तेसं पटिक्खेपो दिस्सति. न हि तानि असुत्वा, तेसञ्च अत्थं अजानित्वा सीहळट्ठकथाचरियेहि तानि पटिक्खिपितुं सक्का, नापि तं पटिक्खेपवचनं जम्बुदीपिकट्ठकथाचरियानं वचनं भवितुं, महामहिन्दत्थेरस्स सीहळदीपं ¶ गमनसमये तेसंयेव अभावतो. तस्मा तानि च तदञ्ञानि च महायानिकपिटकानि तंकालिकानि येभुय्येन सीहळदीपमुपागतानीति गहेतब्बानि. तेसु च वज्जिपुत्तकगणपरियापन्नस्स धम्मरुचिनिकायस्स पिटकानं तदुपागमनं पुब्बेव वुत्तं. तदञ्ञेसं पन तदुपागमनं एवं वेदितब्बं.

वेतुल्लवादस्स पठमनिग्गहो

वोहारकतिस्सरञ्ञो काले (७५८-७८०-बु-व) अभयगिरिवासिनो धम्मरुचिनिकायिका पुब्बे वुत्तप्पकारेन सासनविनासनत्थाय भिक्खुवेसधारीहि वेतुल्लवादिब्राह्मणेहि रचितं वेतुल्लपिटकं सम्पटिग्गहेत्वा ‘‘इदं बुद्धभासित’’न्ति दस्सेन्ति. तं महाविहारवासिनो थेरवादिका धम्मविनयेन संसन्देत्वा अधम्मवादोति पटिक्खिपिंसु. तं सुत्वा राजा सब्बसत्थपारगुं कपिलं नाम अमच्चं पेसेत्वा विनिच्छयं कारापेत्वा अबुद्धभासितभावं ञत्वा सब्बं वेतुल्लपोत्थकं झापेत्वा तल्लद्धिके च पापभिक्खू निग्गहेत्वा बुद्धसासनं जोतेसि [निकायसङ्गहे १२-पिट्ठे]. वुत्तञ्हेतं महावंसे –

३६-४१.

‘‘वेतुल्लवादं मद्दित्वा, कारेत्वा पापनिग्गहं;

कपिलेन अमच्चेन, सासनं जोतयी च सो’’ति.

सागलियनिकायुप्पत्ति

पुनपि ते अभयगिरिवासिनो गोठाभयरञ्ञो काले (७९७-८१०-बु-व) वेतुल्लवादं तथेव दस्सेन्ति. तदा पन तेसु उस्सिलियातिस्सो नाम महाथेरो वोहारकतिस्सराजकाले वेतुल्लवादीनं भिक्खूनं कतनिग्गहं सुत्वा ‘‘विचारणसम्पन्नस्स रञ्ञो समये तथेव भवेय्य, न भद्दकमेत’’न्ति चिन्तेत्वा ‘‘न मयं तेहि एकतो होमा’’ति तिसतमत्ते भिक्खू गहेत्वा दक्खिणगिरिविहारं गन्त्वा धम्मरुचिनिकायतो विसुं हुत्वा वसि. तेसु सागलो नाम महाथेरो तत्थेव दक्खिणगिरिम्हि वसन्तो आगमब्याख्यानमकासि. ततो पट्ठाय तं थेरमारब्भ तस्सन्तेवासिनो सागलिया नाम अहेसुं. तेसम्पि ¶ वादो पच्छा महासेनराजकाले जेतवनविहारे पत्थरि [निकाय १३-पिट्ठे].

वेतुल्लवादस्स दुतियनिग्गहो

गोठाभयो पन राजा पञ्चसु [महाविहार, चेतिय, थूपाराम, इस्सरसमणक, वेस्सगिरिविहारसङ्खातेसु] विहारेसु महाभिक्खुसङ्घं एकतो सन्निपातेत्वा तं पवत्तिं पुच्छित्वा वेतुल्लवादस्स अबुद्धभासितभावं ञत्वा तंवादिनो सट्ठि पापभिक्खू लक्खणाहते कत्वा रट्ठतो पब्बाजेसि, वेतुल्लपोत्थकानि च झापेत्वा बुद्धसासनं जोतेसि [महावंसे ३६, १११-११२-गाथासु, निकाय १३-पिट्ठे].

तदा रट्ठतो पब्बाजितेसु तेसु भिक्खूसु केचि कावीरपट्टनं गन्त्वा तत्थ वसन्ति. तस्मिञ्च समये एको अञ्ञतित्थियमाणवको देसन्तरतो कावीरमागन्त्वा पट्टनगामिकेहि तेसं भिक्खूनं कतूपहारं दिस्वा लाभसक्कारं निस्साय तेसं सन्तिके पब्बजित्वा सङ्घमित्तोति नामेन पाकटो अहोसि. सो महाविहारवासीनं धम्मविनिच्छयं निस्साय गोठाभयरञ्ञा वेतुल्लवादहेतु तेसं भिक्खूनं रट्ठा पब्बाजितभावं ञत्वा महाविहारवासीनं कुद्धो हुत्वा ‘‘वेतुल्लवादं वा ने गाहापेस्सामि, विहारे वा नेसं उम्मूलेत्वा विनासेस्सामी’’ति सीहळदीपं गन्त्वा राजानं पसादेत्वा तस्स द्वे पुत्ते सिप्पं सिक्खापेस्सामीति आरभि. तथापि अत्तनो वादस्स जाननसमत्थं जेट्ठतिस्सं ओहाय अनागते अत्तनो वचनं कारापेतुं सक्कुणेय्यं कनिट्ठं महासेनकुमारमेव सङ्गण्हित्वा सिप्पं सिक्खापेसि. वितुनो अच्चयेन जेट्ठतिस्सकुमारे रज्जं पत्ते (८१०-८१९-बु-व) सो तस्स रञ्ञो भीतो कावीरपट्टनमेव गतो [महावंसे ३६, ११३-गाथादीसु, निकाय १४-पिट्ठे].

महासेनरञ्ञो पन काले (८१९-८४५-बु-व) सो पुन सीहळदीपमागन्त्वा अभयगिरिविहारे वसन्तो महाविहारवासीहि वेतुल्लवादं गाहापेतुं नानापकारेहि वायाममकासि. तथापि तेहि तं गाहापेतुं असक्कोन्तो राजानं उपसङ्कमित्वा नानाकारणेहि सञ्ञापेत्वा ¶ ‘‘यो कोचि एकस्सपि भिक्खुस्स महाविहारवासिनो आहारं ददेय्य, तस्स सतं दण्डो’’ति रञ्ञो आणाय नगरे भेरिं चरापेसि. तदा महाविहारवासिनो नगरे पिण्डाय चरन्ता तयो दिवसे भिक्खमलद्धा महापासादे सन्निपतित्वा ‘‘सचे मयं खुदाहेतु अधम्मं धम्मोति गण्हेय्याम, बहू जना तं गहेत्वा अपायगामिनो भविस्सन्ति, मयञ्च सब्बे सावज्जा भविस्साम, तस्मा न मयं जीवितहेतुपि वेतुल्लवादं पटिग्गण्हिस्सामा’’ति सम्मन्तयित्वा महाविहारादिके सब्बविहारे छड्डेत्वा रोहणजनपदञ्च मलयपदेसञ्च अगमिंसु [महावंसे ३७, २-६-गाथासु. निकायसङ्गहे १४-पिट्ठे].

वेतुल्लवादो

कीदिसो वेतुल्लवादो नाम, यतो महाविहारवासिनो अतिविय जिगुच्छिंसूति? इदानि वेतुल्लवादस्स सरूपं सब्बाकारेन पकासेतुं न सक्का, वेतुल्लनामेन पोत्थकानं वा निकायस्स वा एतरहि अपाकटभावतो. अभिधम्मपिटके पन कथावत्थुअट्ठकथायं [कथा. अट्ठ. ७९३-७९४ आदयो] कतिपया वेतुल्लवादा आगता. कथं? –

‘‘परमत्थतो मग्गफलानेव सङ्घो, मग्गफलेहि अञ्ञो सङ्घो नाम नत्थि, मग्गफलानि च न किञ्चि पटिग्गण्हन्ति, तस्मा न वत्तब्बं सङ्घो दक्खिणं पटिग्गण्हाती’’ति च (१).

‘‘मग्गफलानेव सङ्घो नाम, न च तानि दक्खिणं विसोधेतुं सक्कोन्ति, तस्मा न वत्तब्बं सङ्घो दक्खिणं विसोधेती’’ति च (२).

‘‘मग्गफलानेव सङ्घो नाम, न च तानि किञ्चि भुञ्जन्ति, तस्मा न वत्तब्बं सङ्घो भुञ्जति पिवति खादति सायती’’ति च (३).

मग्गफलानेव सङ्घो नाम, न च सक्का तेसं किञ्चि दातुं, न च तेहि पटिग्गण्हितुं, नापि तेसं दानेन कोचि उपकारो इज्झति, तस्मा न वत्तब्बं सङ्घस्स दिन्नं महप्फल’’न्ति च (४).

‘‘बुद्धो भगवा न किञ्चि परिभुञ्जति, लोकानुवत्तनत्थं पन परिभुञ्जमानं विय अत्तानं दस्सेति, तस्मा निरुपकारत्ता न वत्तब्बं तस्मिं दिन्नं महप्फल’’न्ति च (५).

‘‘भगवा ¶ तुसितभवने निब्बत्तो तत्थेव वसति, न मनुस्सलोकं आगच्छति, निम्मितरूपमत्तकं पनेत्थ दस्सेती’’ति च (६).

‘‘तुसितपुरे ठितो भगवा धम्मदेसनत्थाय अभिनिम्मितं पेसेसि, तेन चेव, तस्स च देसनं सम्पटिच्छित्वा आयस्मता आनन्देन धम्मो देसितो, न बुद्धेन भगवता’’ति च (७).

‘‘एकाधिप्पायेन मेथुनो धम्मो पटिसेवितब्बो. अयं पनेत्थ अत्थो – कारुञ्ञेन वा एकेन अधिप्पायेन एकाधिप्पायो, संसारे वा एकतो भविस्सामाति इत्थिया सद्धिं बुद्धपूजादीनि कत्वा पणिधिवसेन एको अधिप्पायो अस्साति एकाधिप्पायो, एवरूपो द्विन्नम्पि जनानं एकाधिप्पायो मेथुनो धम्मो पटिसेवितब्बो’’ति च (८) एवं वेतुल्लवादीनं लद्धियो आगता, एत्तकायेव नेसं वादा थेरवादगन्थवसेन दानि पञ्ञायन्ति.

एत्थ च आदितो चतूहि वादेहि सुत्तन्तागतसङ्घो च मिच्छा गहितो, विनयागतसङ्घो च सब्बथा पटिक्खित्तो. तदनन्तरं तयो वादा इस्सरनिम्मानवादानुवत्तका. अन्तिमस्स पन असद्धम्मवादभावो अतिविय पाकटोति.

अभिधम्मसमुच्चये पन वेतुल्लपिटकस्स बोधिसत्तपिटकभावो पकासितो, तस्मा सद्धम्मपुण्डरिकसुत्तादिके बोधिसत्तपिटके आगतवादोपि ‘‘वेतुल्लवादो’’ति वेदितब्बो [अभिधम्मसमुच्चये ७९-पिट्ठे].

महाविहारनासनं

महाविहारवासीसु पन वुत्तप्पकारेन सब्बविहारे छड्डेत्वा गतेसु सङ्घमित्तो पापभिक्खु राजानं सञ्ञापेत्वा लोहपासादादिके चतुसट्ठ्याधिके तिसतमत्ते परिवेणपासादे नासेत्वा समूलं उद्धरापेत्वा अभयगिरिविहारं आनयापेसि. विहारभूमियञ्च कसापेत्वा अपरण्णे वपापेसि. एवं तदा महाविहारो नव वस्सानि भिक्खूहि सुञ्ञो अहोसि आवासविरहितो च. अथ राजा मेघवण्णाभयस्स नाम कल्याणमित्तभूतस्स अमच्चस्स सन्तज्जनपुब्बङ्गमेन वचनेन ¶ महाविहारं पुन पाकतिकं कत्वा ते चापि अपक्कन्ते भिक्खू आनेत्वा चतूहि पच्चयेहि उपट्ठहि [महावंसे ३७-३०-गाथासु. निकायसङ्गहे १४-१५-पिट्ठेसु].

जेतवनवासिनिकायुप्पत्ति

पुनपि राजा दक्खिणारामवासिम्हि जिम्हमानसे कुहकतिस्सत्थेरे पसन्नो हुत्वा तस्सत्थाय महाविहारसीमब्भन्तरे जोतिवनुय्याने जेतवनविहारं कारेतुमारभि. महाविहारवासिनो भिक्खू तं निवारेतुं असक्कोन्ता पुनपि ततो अपक्कमिंसु. तदापि महाविहारो नव मासानि भिक्खूहि सुञ्ञो अहोसि. राजा पन अत्तनो अज्झासयवसेनेव तत्थ जेतवनविहारं कारेत्वा तस्स कुहकतिस्सत्थेरस्स अदासियेव. तत्थ दक्खिणगिरिविहारतो सागलिया भिक्खू आगन्त्वा वसिंसु. पच्छा च ते अम्बसामणेरसिलाकालरञ्ञो काले (१०६७-१०८०-बु-व) वेतुल्लवादिनो अहेसुं [महावंसे ३७, ३२-गाथादीसु, निकायसङ्गहे १५-पिट्ठे].

एवं आचरियबुद्धघोसत्थेरस्स सीहळदीपमागमनकालतो (९६५-बु-व) पुब्बेयेव विसुद्धत्थेरवादीहि महाविहारवासीहि विरुद्धसमया अभयगिरिवासिनो (४५५-बु-व) सागलिया (७९७-८१०-बु-व) जेतवनवासिनो (८२९-८४५-बु-व) चाति तयो निकाया उप्पन्ना अहेसुं. तेसु पन अभयगिरिवासिनोयेव विसेसतो पाकटा चेव होन्ति बलवन्तो च. तथा हि ते विसुद्धत्थेरवादपिटकञ्च वज्जिपुत्तकपरियापन्नधम्मरुचिनिकायपिटकञ्च महिसासकादिनिकायपिटकञ्च महायानपिटकञ्च सम्पटिच्छन्ति. तेसु धम्मरुचिनिकायपिटकस्स सम्पटिच्छितभावो पाकटोयेव. महिसासकादिनिकायपिटकस्स सम्पटिच्छितभावो पन फाहियन्नामस्स चिनभिक्खुनो अद्धानक्कमसल्लक्खणकथाय चेव अट्ठकथासु पटिक्खित्तवण्णपिटकादिनामवसेन च वेदितब्बो, तथा महायानपिटकस्स सम्पटिच्छितभावोपि.

फाहियमद्धानक्कमकथा

फाहियन्नामेन हि चिनभिक्खुना ९५६-बुद्धवस्से सीहळदीपतो सक्कतभासारोपितं महिसासकविनयपिटकञ्च दीघागमो च संयुत्तागमो च सन्निपातपिटकञ्च अत्तना सह चिनरट्ठमानीतन्ति तस्स अद्धानक्कमकथायं ¶ दस्सितं. तञ्च सब्बं अभयगिरिविहारतोयेव लद्धमस्स, महाविहारवासीनं सक्कतारोपितपिटकाभावतो. अट्ठकथायं पटिक्खित्तवण्णपिटकादीनि च तत्थेव भवेय्युं, महाविहारवासीहि तेसं अप्पटिग्गहितभावतो. तथा ‘‘फाहियम्भिक्खुस्स सीहळदीपे पटिवसनकाले (९५४-९५६-बु-व) महाविहारे तिसहस्समत्ता भिक्खू वसन्ति, ते थेरवादपिटकमेव उग्गण्हन्ति, न महायानपिटकं. अभयगिरिविहारे पञ्चसहस्समत्ता भिक्खू वसन्ति, ते पन द्वेपि पिटकानि उग्गण्हन्ति महायानपिटकञ्चेव थेरवादपिटकञ्चा’’ति च तेनेव चिनभिक्खुना दस्सितं.

यस्मा पन अभयगिरिवासिनो महायानपिटकम्पि उग्गण्हन्ति, तस्मा तस्मिं विहारे महायानिकानं पधानाचरियभूतेहि अस्सघोसनागज्जुनेहि कतगन्थापि संविज्जमानायेव भवेय्युं, ततोयेव तेसं नयञ्च नामञ्च आचरियबुद्धघोसत्थेरोपि अञ्ञेपि तंकालिका महाविहारवासिनो सुतसम्पन्ना थेरा जानेय्युंयेव. अपिच दक्खिणइन्दियरट्ठे समुद्दसमीपे गुन्ताजनपदे नागारजुनकोण्डं नाम ठानमत्थि, यत्थ नागज्जुनो महायानिकानं पधानाचरियभूतो वसन्तो बुद्धसासनं पतिट्ठापेसि. आचरियबुद्धघोसस्स च तन्देसिकभावनिमित्तं दिस्सति, तं पच्छतो (३३-पिट्ठे) आविभविस्सति. तस्मापि आचरियबुद्धघोसत्थेरो नागज्जुनस्स च अस्सघोसस्स च नयञ्च नामञ्च जानेय्ययेवाति सक्का अनुमिनितुं.

जानतोयेव पन तेसं नयस्स वा नामस्स वा अत्तनो अट्ठकथायमप्पकासनं तेसं निकायन्तरभावतोयेवस्स. तथा हि तेसं अस्सघोसनागज्जुनानं अस्सघोसो [(५७०-६७०-बुद्धवस्सब्भन्तरे)] थेरवादतो भिन्नेसु एकादससु गणेसु सब्बत्थिवादगणे परियापन्नो, नागज्जुनो च महासङ्घिक-चेतियवादिगणादीहि जाते महायाननिकाये परियापन्नो, ¶ महाविहारवासिनो च आदितोयेव पट्ठाय निकायन्तरसमयेहि असम्मिस्सनत्थं अत्तनो पिटकं अतीव आदरं कत्वा रक्खन्ति, अयञ्च आचरियबुद्धघोसो तेसमञ्ञतरो. वुत्तञ्हि तस्स गन्थनिगमनेसु ‘‘महाविहारवासीनं वंसालङ्कारभूतेना’’ति. तस्मा ‘‘आचरियबुद्धघोसो तेसं नयं जानन्तोयेव अत्तनो गन्थेसु निकायन्तरसमयेहि असम्मिस्सनत्थं नप्पकासेसी’’ति वेदितब्बं.

एत्तावता च यानि ‘‘बोधिमण्डसमीपम्हि, जातो ब्राह्मणमाणवो’’तिआदिना वुत्तस्स महावंसवचनस्स विचारणमुखेन आचरियबुद्धघोसस्स वम्भनवचनानि धम्मानन्दकोसम्बिना वुत्तानि, तानि अमूलकभावेन अनुविचारितानि. तथापि ‘‘आचरियबुद्धघोसो बोधिमण्डसमीपे जातो’’ति एतं पन अत्थं साधेतुं दळ्हकारणं न दिस्सतेव ठपेत्वा तं महावंसवचनं, यम्पि बुद्धघोसुप्पत्तियं वुत्तं, तम्पि महावंसमेव निस्साय वुत्तवचनत्ता न दळ्हकारणं होतीति.

मरम्मरट्ठिकभावकथा

एकच्चे पन मरम्मरट्ठिका ‘‘आचरियबुद्धघोसो मरम्मरट्ठे सथुं नाम नगरतो सीहळदीपं गन्त्वा सङ्गहट्ठकथायो अकासी’’ति वदन्ति. तं धम्मानन्देन अनुजानित्वा ‘‘तम्पि थोकं युत्तिसम्पन्नं, अहं एवं सद्दहामि ‘बुद्धघोसो दक्खिणइन्दियरट्ठे तेलङ्गजातिको’ति, तेलङ्गजातिका च बहू जना मरम्मरट्ठे च इन्दोचिन रट्ठे च गन्त्वा वसन्ति, तल्हिङ? इति वोहारो च ततोयेव तेलङ्गपदतो उप्पन्नो. तथा ‘बुद्धघोसो अट्ठकथायो कत्वा सीहळदीपतो मरम्मरट्ठं गन्त्वा पच्छिमभागे तत्थेव वसी’तिपि गहेतुं सक्का, तस्स हि गन्था मरम्मरट्ठे सीहळरट्ठतोपि सुरक्खिततरा होन्ती’’ति च वत्वा पतिट्ठापितं.

दक्खिणइन्दियरट्ठिकभावयुत्ति

बहू पन आधुनिका विचक्खणा धम्मानन्दादयो ‘‘आचरियबुद्धघोसत्थेरो दक्खिणइन्दियरट्ठिको’’ति वदन्ति. अयं पनेत्थ युत्ति, येभुय्येन हि अट्ठकथाटीकाकारा थेरा दक्खिणइन्दियरट्ठिकायेव. तथा ¶ हि बुद्धवंसट्ठकथाय च अभिधम्मावतारट्ठकथाय च विनयविनिच्छयट्ठकथाय च कारको आचरियबुद्धदत्तत्थेरो चोळरट्ठे तम्बपण्णिनदियं उरगनगरे जातो आचरियबुद्धघोसेन एककालिको च. परमत्थविनिच्छय-नामरूपपरिच्छेद-अभिधम्मत्थसङ्गहानं कारको आचरियअनुरुद्धत्थेरो [एकच्चे पन वदन्ति-परमत्थविनिच्छयकारको एको, नामरूपपरिच्छेदअभिधम्मत्थसङ्गहानं कारको एकोति द्वे अनुरुद्धत्थेराति] कञ्चिवररट्ठे कावेरिनगरजातिको. खुद्दकनिकायपरियापन्नउदानादिपाळिया संवण्णनाभूताय परमत्थदीपनिया कारको आचरियधम्मपालत्थेरोपि दक्खिणइन्दियरट्ठे कञ्चिपुरजातिको. तथेवायम्पीति वेदितब्बो. वुत्तञ्हि मनोरथपूरणिया नाम अङ्गुत्तरट्ठकथाय निगमने –

‘‘आयाचितो सुमतिना, थेरेन भदन्तजोतिपालेन;

कञ्चिपुरादीसु मया, पुब्बे सद्धिं वसन्तेना’’ति.

एत्थ च कञ्चिपुरं नाम मदरसनगरस्स ईसकं पच्छिमनिस्सिते दक्खिणदिसाभागे पञ्चचत्तालीसमिलप्पमाणे पदेसे इदानि कञ्जीवर इति वोहरितनगरमेव.

तथा पपञ्चसूदनिया नाम मज्झिमट्ठकथाय निगमनेपि –

‘‘आयाचितो सुमतिना, थेरेन बुद्धमित्तेन;

पुब्बे मयूरदूत [मयूररूप (सी.), मयूरसुत्त (स्या.)] पट्टनम्हि सद्धिं वसन्तेना’’ति – वुत्तं.

एत्थ च मयूरदूतपट्टनं नाम इदानि मदरसनगरसमीपे मिलपोर इति वोहरितट्ठानन्ति पोराणप्पवत्तिगवेसीहि वुत्तं.

इमाहि पन निगमनगाथाहि दक्खिणइन्दियरट्ठेयेव निवुत्थपुब्बतं पकासेति, बोधिमण्डसमीपे वा, मरम्मरट्ठे वा निवुत्थपुब्बताय पकासनञ्च न दिस्सति. तेन आचरियबुद्धघोसो दक्खिणइन्दियरट्ठिको न होतीति न सक्का पटिक्खिपितुं.

समन्तपासादिकायम्पि विनयट्ठकथायं (३, १३) आचरियेन एवं वुत्तं –

‘‘यं ¶ पन अन्धकट्ठकथायं ‘अपरिक्खित्ते पमुखे अनापत्तीति भूमियं विना जगतिया पमुखं सन्धाय कथित’न्ति वुत्तं, तं अन्धकरट्ठे पाटेक्कसन्निवेसा एकच्छदना गब्भपाळियो सन्धाय वुत्त’’न्ति.

इमिना पन वचनेन ‘‘अन्धकट्ठकथा अन्धकरट्ठिकेहि थेरेहि कता’’ति पाकटा होति, आचरियबुद्धघोसोपि च अन्धकट्ठकथाय सन्धायभासितम्पि तन्देसिकगब्भपाळिसन्निवेसाकारम्पि सुट्ठु जानाति, तस्मा तन्देसिको न होतीति न सक्का वत्तुन्ति.

तथा इमस्सपि विसुद्धिमग्गस्स निगमने – ‘‘मोरण्डखेटकवत्तब्बेना’’ति वुत्तं. एत्थ च खेटोति पदस्स गामोति वा, जानपदानं कस्सकानं निवासोति वा, खुद्दकनगरन्ति वा तयो अत्था सक्कताभिधाने पकासिता, दक्खिणइन्दियरट्ठेसु च यावज्जतनापि गामो खेडाति वोहरीयति. तस्मा मोरण्डव्हये खेटे जातो मोरण्डखेटको, मोरण्डखेटको इति वत्तब्बो मोरण्डखेटकवत्तब्बो, तेन मोरण्डखेटकवत्तब्बेनाति वचनत्थं कत्वा ‘‘मोरण्डगामे जातोति वत्तब्बेन थेरेना’’ति अत्थो गहेतब्बो. इदानि पन दक्खिणइन्दियरट्ठे गुन्ताजनपदे नागारजुनकोण्डतो एकपण्णासमिलमत्ते (५१) अमरवतितो च अट्ठपण्णासमिलमत्ते (५८) पदेसे कोतनेमलिपुरीति च गुन्दलपल्लीति च वोहरितं ठानद्वयमत्थि, तत्थ च बहूनि बुद्धसासनिकपोराणसन्तकानि दिट्ठानि, नेमलीति तेलगुवोहारो च मोरस्स, गुन्दलु इति च अण्डस्स, तस्मा तं ठानद्वयमेव पुब्बे मोरण्डखेटोति वोहरितो आचरियबुद्धघोसस्स जातिगामो भवेय्याति पोराणट्ठानगवेसीहि गहितो. यस्मा पनेतं ‘‘मोरण्डखेटकवत्तब्बेना’’ति पदं ‘‘मोरण्डगामजातेना’’ति पदं विय पाळिनयानुच्छविकं न होति, अञ्ञेहि च बहूहि विसेसनपदेहि एकतो अट्ठत्वा विसेस्यपदस्स पच्छतो विसुं ठितं, आगमट्ठकथादीसु च न दिस्सति, तस्मा एतं केनचि तंकालिकेन आचरियस्स जातिट्ठानं सञ्जानन्तेन पक्खित्तं विय दिस्सतीति.

इमेसु पन तीसु ‘‘आचरियबुद्धघोसो बोधिमण्डसमीपे जातोति च मरम्मरट्ठिकोति च दक्खिणइन्दियरट्ठिको’’ति च वुत्तवचनेसु पच्छिममेव बलवतरं होति आचरियस्सेव वचननिस्सितत्ता, तस्मा ¶ तदेव निस्साय आचरियबुद्धघोसत्थेरस्स उप्पत्ति एवं वेदितब्बा.

आचरियबुद्धघोसत्थेरस्स अट्ठुप्पत्ति

आचरियबुद्धघोसो दसमे बुद्धवस्ससतके (९०१-१०००-बु-व) दक्खिणइन्दियरट्ठे मोरण्डगामे ब्राह्मणकुले जातो, सो तीसु वेदेसु चेव सब्बविज्जासिप्पगन्थेसु च पारङ्गतो हुत्वा बुद्धसासनधम्मं सुत्वा तम्पि उग्गण्हितुकामो तस्मिंयेव दक्खिणइन्दियरट्ठे एकस्मिं थेरवादिकविहारे महाविहारवासीनं रेवतत्थेरप्पमुखानं भिक्खूनं सन्तिके पब्बज्जञ्चेव उपसम्पदञ्च गण्हित्वा पिटकत्तयपाळिमुग्गण्हि. सो एवं पिटकत्तयपाळिमुग्गण्हन्तोयेव अञ्ञासि ‘‘अयमेकायनमग्गो दस्सनविसुद्धिया निब्बानसच्छिकिरियाया’’ति. आचरियुपज्झाया च तस्स विसिट्ठञाणप्पभावसम्पन्नभावं ञत्वा ‘‘इमस्स बुद्धसासने कित्तिघोसो बुद्धस्स विय पवत्तिस्सती’’ति सम्पस्समाना ‘‘बुद्धघोसो’’ति नाममकंसु. तेन वुत्तं ‘‘बुद्धघोसोति गरूहि गहितनामधेय्येना’’ति.

सो एवं पिटकत्तयपाळिमुग्गण्हित्वा मदरस नगरसमीपट्ठानभूते मयूरदूतपट्टनम्हि च कञ्चिपुरादीसु च वसन्तो अन्धकट्ठकथाय परिचयं कत्वा ताय असन्तुट्ठचित्तो सीहळट्ठकथासुपि परिचयं कातुकामो ता च पाळिभासमारोपेत्वा अभिनवीकातुमासीसन्तो सीहळदीपमगमासि. तस्मिञ्च काले सीहळदीपे महानामो नाम राजा रज्जं कारेति, सो च राजा अभयगिरिवासीसु पसन्नो तेयेव विसेसतो पग्गण्हाति.

एकच्चे पन आधुनिका विचक्खणा एवं वदन्ति ‘‘आचरियबुद्धघोसस्स सीहळदीपागमनेन सिरिमेघवण्णराजकालतो (८४६-बु-व) पुरेतरंयेव भवितब्ब’’न्ति. इदञ्च नेसं कारणं, तस्स रञ्ञो नववस्सकाले (८५५-बु-व) बुद्धस्स दाठाधातुकलिङ्गरट्ठतो सीहळदीपमानीता, ततो पट्ठाय सीहळराजानो अनुसंवच्छरं महन्तं धातुपूजाउस्सवं करोन्ति. यदि च आचरियबुद्धघोसो ततो पच्छा सीहळदीपमागच्छेय्य, तम्पि पासादिकं महुस्सवं दिस्वा अत्तनो गन्थेसु पकासेय्य यथा फाहियं नाम चिनभिक्खु महानामराजकाले (९५३-९७५-बु-व) तं दिस्वा अत्तनो अद्धानक्कमकथायं पकासेसि, न पन आचरियस्स गन्थेसु ¶ तंपकासना दिस्सति, तेनेतं ञायति ‘‘आचरियबुद्धघोसो दाठाधातुसम्पत्तकालतो (८५५-बु-व) पुरेतरंयेव सीहळदीपमागन्त्वा अट्ठकथायो अकासी’’ति. तं पन न दळ्हकारणं होति, तिपिटकपाळिया हि अत्थसंवण्णनाय यं वा तं वा अत्तनो पच्चक्खदिट्ठं पकासेतब्बं न होति, न च अत्थसंवण्णना अद्धानक्कमकथासदिसा. किञ्च भिय्यो, समन्तपासादिकाय विनयट्ठकथायं दीपवंसतोपि किञ्चि आनेत्वा पकासितं, दीपवंसे च याव महासेनराजकाला (८१९-८४५-बु-व) पवत्ति पकासिताति सिरिमेघवण्णराजकालतो (८४५-८७३-बु-व) पुब्बे दीपवंसोयेव लिखितो न भवेय्य. यदि च अट्ठकथायो ततो पुब्बेयेव कता भवेय्युं, कथं तत्थ दीपवंसो सक्का पकासेतुन्ति.

आचरियबुद्धघोसो पन सीहळदीपं पत्तकाले (९६५-बु-व) महाविहारमेव गन्त्वा तत्थ सीहळमहाथेरानं सन्तिके सीहळट्ठकथायो सुणि. वुत्तञ्हि समन्तपासादिकायं –

‘‘महाअट्ठकथञ्चेव, महापच्चरिमेव च;

कुरुन्दिञ्चाति तिस्सोपि, सीहळट्ठकथा इमा.

बुद्धमित्तोति नामेन, विस्सुतस्स यसस्सिनो;

विनयञ्ञुस्स धीरस्स, सुत्वा थेरस्स सन्तिके’’ति [परि. अट्ठ. निगमनकथा].

इमिना पन अट्ठकथावचनेन महाअट्ठकथादीनं तिस्सन्नंयेव अट्ठकथानं सुतभावो दस्सितो. समन्तपासादिकायं पन सङ्खेपअन्धकट्ठकथानम्पि विनिच्छयो दस्सितोयेव, कस्मा पन ता आचरियेन सीहळत्थेरानं सन्तिके न सुताति? तासु हि अन्धकट्ठकथा ताव अन्धकरट्ठिकभावतो, कतपरिचयभावतो च न सुताति पाकटोयेवायमत्थो. सङ्खेपट्ठकथा पन महापच्चरिट्ठकथाय संखित्तमत्तभावतो न सुताति वेदितब्बा. तथा हि वजिरबुद्धिटीकायं गन्थारम्भसंवण्णनायं [विजिर. टी. गन्थारम्भकथावण्णना] चूळपच्चरिट्ठकथाअन्धकट्ठकथानम्पि आदि-सद्देन सङ्गहितभावो वुत्तो, सारत्थदीपनी-विमतिविनोदनीटीकासु [सारत्थ. टी. १.९२ पाचित्तियकण्ड; वि. वि. टी. १.गन्थारम्भकथावण्णना] पन अन्धकसङ्खेपट्ठकथानं सङ्गहितभावो वुत्तो, समन्तपासादिकायञ्च चूळपच्चरीति नामं कुहिञ्चिपि न दिस्सति, महाट्ठकथा महापच्चरी कुरुन्दी अन्धकसङ्खेपट्ठकथाति ¶ इमानियेव नामानि दिस्सन्ति, बहूसु च ठानेसु ‘‘सङ्खेपट्ठकथायं पन महापच्चरियञ्च वुत्त’’न्तिआदिना [पारा. अट्ठ. १.९४] द्विन्नम्पि समानविनिच्छयो दस्सितो. तस्मा वजिरबुद्धियं चूळपच्चरीति वुत्तट्ठकथा महापच्चरितो उद्धरित्वा सङ्खेपेन कतट्ठकथा भवेय्य, सा च सङ्खेपेन कतत्ता सङ्खेपट्ठकथा नाम जाता भवेय्य. एवञ्च सति महापच्चरिया सुताय सापि सुतायेव होतीति न सा आचरियेन सुताति वेदितब्बा.

एवं सीहळट्ठकथायो सुणन्तस्सेव आचरियबुद्धघोसस्स तिक्खगम्भीरजवनञाणप्पभावविसेससम्पन्नभावञ्च परमविसुद्धसद्धाबुद्धिवीरियपटिमण्डितसीलाचारज्जवमद्दवादिगुणसमुदय- समुदितभावञ्च सकसमयसमयन्तरगहनज्झोगाहणसमत्थपञ्ञावेय्यत्ति- यसमन्नागतभावञ्च अनेकसत्थन्तरोचितसंवण्णनानयसुकोविदभावञ्च ञत्वा तंसवनकिच्चपरिनिट्ठितकाले सङ्घपालादयो थेरा तं विसुद्धिमग्गादिगन्थानं करणत्थाय विसुं विसुं आयाचिंसु. एत्थ च आचरियस्स यथावुत्तगुणेहि सम्पन्नभावो अत्तनो वचनेनेव पाकटो. वुत्तञ्हि अत्तनो गन्थनिगमनेसु –

‘‘परमविसुद्धसद्धाबुद्धिवीरियपटिमण्डितेन सीलाचारज्जवमद्दवादिगुणसमुदयसमुदितेन सकसमयसमयन्तरगहनज्झोगाहणसमत्थेन पञ्ञावेय्यत्तियसमन्नागतेना’’तिआदि.

तत्थ सकसमयसमयन्तरगहनज्झोगाहणसमत्थेनाति पदेन आचरियबुद्धघोसत्थेरो महाविहारवासीनं विसुद्धत्थेरवादीनं देसनानयसङ्खाते सकसमये च महासङ्घिकादिमहायानिकपरियोसानानं निकायन्तरभूतानं परेसं पिटकगन्थन्तरवादनयसङ्खाते परसमये च तथा तंकालिकअञ्ञतित्थियसमणब्राह्मणानं वेदत्तयादिसङ्खाते परसमये च कोविदो, तेसं सकसमयपरसमयानं दुरोगाहदुब्बोधत्थसङ्खाते गहनट्ठानेपि च ओगाहितुं समत्थोति दीपेति. पञ्ञावेय्यत्तियसमन्नागतोति पदेन आचरियबुद्धघोसत्थेरो पोराणट्ठकथायो सङ्खिपितुञ्च पटिसङ्खरितुञ्च समत्थोति दीपेतीति वेदितब्बो.

आयाचनकारणं

कस्मा ¶ पन ते तं आयाचिंसूति? वुच्चते, महाविहारवासिनो हि आदितोयेव पट्ठाय पिटकत्तयं यथा तीसु सङ्गीतीसु पाळिभासाय सङ्गीतं, यथा च वट्टगामणिराजकाले (४५५-४६७-बु-व) पोत्थकेसु आरोपितं, तथा पोराणं पाळिपिटकमेव उग्गण्हन्ति चेव वाचेन्ति च, न सक्कतारोपितपिटकं. अट्ठकथायो च तिवस्ससतमत्ततो पुरे कता. तथा हि अट्ठकथासु वसभराजकालतो (६०९-६५३-बु-०) पच्छा सीहळिकत्थेरानञ्चेव अञ्ञेसञ्च वत्थु न दिस्सति ठपेत्वा महासेनराजवत्थुं [पारा. अट्ठ. २.२३६-२३७], याव आचरियबुद्धघोसकालापि च ता एव पोराणट्ठकथायो अत्थि न अभिनवीकता. तेन तेसं पिटकेसु येभुय्येन जना परिचयं कातुं असञ्जाताभिलासा होन्ति असञ्जातुस्साहा. दीपन्तरेसु च अत्तनो पिटकं पत्थरापेतुं न सक्कोन्ति अट्ठकथानं दीपभासाय अभिसङ्खतत्ता. अभयगिरिवासिनो पन वट्टगामणिराजकालतो पट्ठाय सक्कतभासारोपितं धम्मरुचिनिकायादिपिटकम्पि महायानपिटकम्पि नवं नवं परियापुणन्ति चेव वाचेन्ति च, तेन तेसं पिटकेसु येभुय्येन जना परिचयं कातुं सञ्जाताभिलासा होन्ति सञ्जातुस्साहा, नवं नवमेव हि सत्ता पियायन्ति. ततोयेव ते दीपन्तरेसुपि अत्तनो वादं पत्थरापेतुं सक्कोन्ति. तस्मा ते महाविहारवासिनो थेरा अत्तनो सीहळट्ठकथायो पाळिभासाय अभिसङ्खरितुकामा तथा कातुं समत्थं आचरियबुद्धघोसत्थेरस्स ञाणप्पभावविसेसं यथावुत्तगुणसम्पन्नभावञ्च ञत्वा आयाचिंसूति वेदितब्बं.

विसुद्धिमग्गस्स करणं

तेसु ताव विसुद्धिमग्गं आचरियबुद्धघोसो सङ्घपालत्थेरेन अज्झेसितो महाविहारस्स दक्खिणभागे पधानघरे महानिगमस्सामिनो पासादे [परि. अट्ठ. निगमनकथा] वसन्तो अकासि. एत्तावता च ‘‘सो पनेस विसुद्धिमग्गो केन कतो, कदा कतो, कत्थ कतो, कस्मा कतो’’ति इमेसं पञ्हानमत्थो वित्थारेन विभावितो होति.

इदानि ¶ किमत्थं कतोतिआदीनं पञ्हानमत्थं पकासयिस्साम. तत्थ किमत्थं कतोति एतस्स पन पञ्हस्स अत्थो आचरियेनेव पकासितो. कथं?

‘‘सुदुल्लभं लभित्वान, पब्बज्जं जिनसासने;

सीलादिसङ्गहं खेमं, उजुं मग्गं विसुद्धिया.

यथाभूतं अजानन्ता, सुद्धिकामापि ये इध;

विसुद्धिं नाधिगच्छन्ति, वायमन्तापि योगिनो.

तेसं पामोज्जकरणं, सुविसुद्धविनिच्छयं;

महाविहारवासीनं, देसनानयनिस्सितं.

विसुद्धिमग्गं भासिस्सं, तं मे सक्कच्च भासतो;

विसुद्धिकामा सब्बेपि, निसामयथ साधवो’’ति [विसुद्धि. १.२].

तस्मा एस विसुद्धिमग्गो विसुद्धिसङ्खातनिब्बानकामानं साधुजनानं सीलसमाधिपञ्ञासङ्खातस्स विसुद्धिमग्गस्स याथावतो जाननत्थाय कतोति पधानप्पयोजनवसेन वेदितब्बो. अप्पधानप्पयोजनवसेन पन चतूसु आगमट्ठकथासु गन्थसल्लहुकभावत्थायपि कतोति वेदितब्बो. तथा हि वुत्तं आगमट्ठकथासु –

‘‘मज्झे विसुद्धिमग्गो, एस चतुन्नम्पि आगमानञ्हि;

ठत्वा पकासयिस्सति, तत्थ यथाभासितमत्थं;

इच्चेव मे कतो’’ति [दी. नि. अट्ठ. १.गन्थारम्भकथा].

तन्निस्सयो

किं निस्साय कतोति एतस्सपि पञ्हस्स अत्थो आचरियेनेव पकासितो. वुत्तञ्हि एत्थ गन्थारम्भे –

‘‘महाविहारवासीनं, देसनानयनिस्सित’’न्ति [विसुद्धि. १.२].

तथा निगमनेपि –

‘‘तेसं सीलादिभेदानं, अत्थानं यो विनिच्छयो;

पञ्चन्नम्पि निकायानं, वुत्तो अट्ठकथानये.

समाहरित्वा तं सब्बं, येभुय्येन सनिच्छयो;

सब्बसङ्करदोसेहि, मुत्तो यस्मा पकासितो’’ति [दी. नि. अट्ठ. १.गन्थारम्भकथा].

इमिना ¶ पन वचनेन अयमत्थो पाकटो होति – ‘‘विसुद्धिमग्गं कुरुमानो आचरियो महाविहारवासीनं देसनानयसङ्खाता पञ्चन्नम्पि निकायानं पोराणट्ठकथायो निस्साय तासु वुत्तं गहेतब्बं सब्बं विनिच्छयं समाहरित्वा अकासी’’ति. तस्मा या या एत्थ पदवण्णना वा विनिच्छयो वा साधकवत्थु वा दस्सीयति, तं सब्बं तस्स तस्स निद्धारितपाळिपदस्सनिकायसंवण्णनाभूताय पोराणसीहळट्ठकथातो आनेत्वा भासापरिवत्तनवसेनेव दस्सितन्ति वेदितब्बं. अयम्पि हि विसुद्धिमग्गो न केवलं अत्तनो ञाणप्पभावेन कतो, विसुं पकरणभावेन च, अथ खो चतुन्नम्पि आगमट्ठकथानं अवयवभावेनेव कतो. वुत्तञ्हि तासं निगमने –

‘‘एकूनसट्ठिमत्तो, विसुद्धिमग्गोपि भाणवारेहि;

अत्थप्पकासनत्थाय, आगमानं कतो यस्मा.

तस्मा तेन सहायं, अट्ठकथा भाणवारगणनाय;

सुपरिमितपरिच्छिन्नं, चत्तालीससतं होती’’तिआदि [दी. नि. अट्ठ. ३.निगमनकथा].

या पन विसुद्धिमग्गे मग्गामग्गञाणदस्सनविसुद्धिनिद्देसे ‘‘अयं ताव विसुद्धिकथायं नयो. अरियवंसकथायं पना’’तिआदिना [विसुद्धि. २.७१७] द्वे कथा वुत्ता, तापि महाविहारवासीनं देसनानये अन्तोगधा इमस्स विसुद्धिमग्गस्स निस्सयायेवाति वेदितब्बाति.

तक्करणप्पकारो

केन पकारेन कतोति एत्थ अनन्तरपञ्हे वुत्तप्पकारेनेव कतो. तथा हि आचरियो संयुत्तनिकायतो

‘‘सीले पतिट्ठाय नरो सपञ्ञो, चित्तं पञ्ञञ्च भावयं;

आतापी निपको भिक्खु, सो इमं विजटये जट’’न्ति [सं. नि. १.२३] –

इमं गाथं पठमं दस्सेत्वा तत्थ पधानवसेन वुत्ता सीलसमाधिपञ्ञायो विसुं विसुं वित्थारतो विभजित्वा अकासि. एवं कुरुमानो च पञ्चहिपि निकायेहि सीलसमाधिपञ्ञापटिसंयुत्तानि सुत्तपदानि उद्धरित्वा तेसं अत्थञ्च सीहळट्ठकथाहि भासापरिवत्तनवसेन दस्सेत्वा तासु वुत्तानि सीहळिकवत्थूनि च विनिच्छये च पकासेसि. विसेसतो पन तस्मिं ¶ काले पाकटा सकसमयविरुद्धा समयन्तरा च बहूसु ठानेसु दस्सेत्वा सहेतुकं पटिक्खित्ता. कथं?

तत्थ हि चरियावण्णनायं ‘‘तत्र पुरिमा ताव तिस्सो चरिया पुब्बाचिण्णनिदाना धातुदोसनिदाना चाति एकच्चे वदन्ति. पुब्बे किर इट्ठप्पयोगसुभकम्मबहुलो रागचरितो होति, सग्गा वा चवित्वा इधूपपन्नो. पुब्बे छेदनवधबन्धनवेरकम्मबहुलो दोसचरितो होति, निरयनागयोनीहि वा चवित्वा इधूपपन्नो. पुब्बे मज्जपानबहुलो सुतपरिपुच्छाविहीनो च मोहचरितो होति, तिरच्छानयोनिया वा चवित्वा इधूपपन्नोति एवं पुब्बाचिण्णनिदानाति वदन्ति. द्विन्नं पन धातूनं उस्सन्नत्ता पुग्गलो मोहचरितो होति पथवीधातुया च आपोधातुया च. इतरासं द्विन्नं उस्सन्नत्ता दोसचरितो. सब्बासं समत्ता पन रागचरितोति. दोसेसु च सेम्हाधिको रागचरितो होति. वाताधिको मोहचरितो. सेम्हाधिको वा मोहचरितो. वाताधिको रागचरितोति एवं धातुदोसनिदानाति वदन्ती’’ति एकच्चेवादं दस्सेत्वा सो ‘‘तत्थ यस्मा पुब्बे इट्ठप्पयोगसुभकम्मबहुलापि सग्गा चवित्वा इधूपपन्नापि च न सब्बे रागचरितानेव होन्ति, न इतरे वा दोसमोहचरिता. एवं धातूनञ्च यथावुत्तेनेव नयेन उस्सदनियमो नाम नत्थि. दोसनियमे च रागमोहद्वयमेव वुत्तं, तम्पि च पुब्बापरविरुद्धमेव. तस्मा सब्बमेतं अपरिच्छिन्नवचन’’न्ति [विसुद्धि. १.४४] पटिक्खित्तो. तं परमत्थमञ्जूसाय नाम विसुद्धिमग्गमहाटीकायं ‘‘एकच्चेति उपतिस्सत्थेरं सन्धायाह, तेन हि विमुत्तिमग्गे तथा वुत्त’’न्तिआदिना वण्णितं [विसुद्धि. टी. १.४४].

विमुत्तिमग्गपकरणं

को सो विमुत्तिमग्गो नाम? विसुद्धिमग्गो विय सीलसमाधिपञ्ञानं विसुं विसुं विभजित्वा दीपको एको पटिपत्तिगन्थो. तत्थ हि –

‘‘सीलं समाधि पञ्ञा च, विमुत्ति च अनुत्तरा;

अनुबुद्धा इमे धम्मा, गोतमेन यसस्सिना’’ति [दी. नि. २.१८६; अ. नि. ४.१] –

इमं ¶ गाथं पठमं दस्सेत्वा तदत्थवण्णनावसेन सीलसमाधिपञ्ञाविमुत्तियो विसुं विसुं विभजित्वा दीपिता. सो पन गन्थो इदानि चिनरट्ठेयेव दिट्ठो, चिनभासाय च परिवत्तितो (१०४८-बु-व) सङ्घपालेन नाम भिक्खुना. केन पन सो कुतो च तत्थ आनीतोति न पाकटमेतं. तस्स पन सङ्घपालस्स आचरियो गुणभद्रो नाम महायानिको भिक्खु मज्झिमइन्दियदेसिको, सो इन्दियरट्ठतो चिनरट्ठं गच्छन्तो पठमं सीहळदीपं गन्त्वा ततो (९७८-बु-व) चिनरट्ठं गतो. तदा सो तेन आनीतो भवेय्य [विमुत्तिमग्ग, विसुद्धिमग्ग].

तस्मिञ्हि विमुत्तिमग्गे पुब्बाचिण्णनिदानदस्सनं धातुनिदानदस्सनञ्च यथेव विसुद्धिमग्गे एकच्चेवादो, तथेवागतं. दोसनिदानदस्सने पन ‘‘सेम्हाधिको रागचरितो, पित्ताधिको दोसचरितो, वाताधिको मोहचरितो. सेम्हाधिको वा मोहचरितो, वाताधिको रागचरितो’’ति तिण्णम्पि रागदोसमोहानं दोसनियमो वुत्तो. आचरियबुद्धघोसेन दिट्ठविमुत्तिमग्गपोत्थके पन ‘‘पित्ताधिको दोसचरितो’’ति पाठो ऊनो भवेय्य.

अञ्ञानिपि बहूनि विसुद्धिमग्गे पटिक्खित्तानि तत्थ विमुत्तिमग्गे गहेतब्बभावेन दिस्सन्ति. कथं?

सीलनिद्देसे (१, ८-पिट्ठे) ‘‘अञ्ञे पन सिरट्ठो सीलत्थो, सीतलत्थो सीलत्थोति एवमादिनापि नयेनेत्थ अत्थं वण्णयन्ती’’ति पटिक्खित्तो अत्थोपि तत्थ गहेतब्बभावेन दिस्सति.

तथा धुतङ्गनिद्देसे (१, ७८-पिट्ठे) ‘‘येसम्पि कुसलत्तिकविनिमुत्तं धुतङ्गं, तेसं अत्थतो धुतङ्गमेव नत्थि, असन्तं कस्स धुननतो धुतङ्गं नाम भविस्सति, धुतगुणे समादाय वत्ततीति वचनविरोधोपि च नेसं आपज्जति, तस्मा तं न गहेतब्ब’’न्ति पटिक्खित्तं पञ्ञत्तिधुतङ्गम्पि तत्थ दिस्सति. महाटीकायं (१-१०४) पन ‘‘येसन्ति अभयगिरिवासिके सन्धायाह, ते हि धुतङ्गं नाम पञ्ञत्तीति वदन्ती’’ति वण्णितं.

तथा पथवीकसिणनिद्देसे (१, १४४) ‘‘पटिपदाविसुद्धि नाम ससम्भारिको उपचारो, उपेक्खानुब्रूहना नाम अप्पना, सम्पहंसना नाम ¶ पच्चवेक्खणाति एवमेके वण्णयन्ती’’तिआदिना पटिक्खित्तएकेवादोपि तत्थ दिस्सति. महाटीकायं (१, १७२) पन ‘‘एकेति अभयगिरिवासिनो’’ति वण्णितं.

तथा खन्धनिद्देसे (२, ८०-पिट्ठे) ‘‘बलरूपं सम्भवरूपं जातिरूपं रोगरूपं एकच्चानं मतेन मिद्धरूप’’न्ति एवं अञ्ञानिपि रूपानि आहरित्वा पोराणट्ठकथायं तेसं पटिक्खित्तभावो पकासितो. महाटीकायं ‘‘एकच्चानन्ति अभयगिरिवासीन’’न्ति वण्णितं. तेसु जातिरूपं मिद्धरूपञ्च विमुत्तिमग्गे दस्सितं. न केवलं दस्सनमत्तमेव, अथ खो मिद्धरूपस्स अत्थिभावोपि ‘‘मिद्धं नाम तिविधं आहारजं उतुजं चित्तजञ्चाति. तेसु चित्तजमेव नीवरणं होति, सेसा पन द्वे अरहतोपि भवेय्यु’’न्तिआदिना साधितो.

एत्तावता च विमुत्तिमग्गे विसुद्धिमग्गेन असमानत्थानं वुत्तभावो च अभयगिरिवासीहि तस्स गन्थस्स पटिग्गहितभावो च सक्का ञातुं. अञ्ञानिपि पन ईदिसानि असमानवचनानि बहूनि तत्थ संविज्जन्तियेव, तानि पन सब्बानि न सक्का इध दस्सेतुं.

येभुय्येन पनस्स करणप्पकारो विसुद्धिमग्गस्स विय होति. या या हि पाळि अभिधम्मविभङ्गतो वा पटिसम्भिदामग्गतो वा अञ्ञसुत्तन्तेहि वा आनेत्वा साधकभावेन विसुद्धिमग्गे दस्सियति, तत्थपि सा सा पाळि येभुय्येन दिस्सतेव. तासु कञ्चिमत्तं उद्धरित्वा अनुमिननत्थाय दस्सयिस्साम.

या विसुद्धिमग्गे (१, ४७-पिट्ठे) ‘‘पञ्च सीलानि पाणातिपातस्स पहानं सील’’न्तिआदिका पटिसम्भिदामग्गपाळि दस्सिता, सा विमुत्तिमग्गेपि दिस्सतेव.

यञ्च विसुद्धिमग्गे (१, १३७-पिट्ठे) ‘‘समाधि कामच्छन्दस्स पटिपक्खो…पे… विचारो विचिकिच्छाया’’ति वचनं पेटके वुत्तन्ति दस्सितं, तञ्च तत्थपि तथेव दस्सेत्वा ‘‘तिपेटके वुत्त’’न्ति निद्दिट्ठं. तिपेटकेति नामञ्च पेटकोपदेसमेव सन्धाय वुत्तं भवेय्य. तत्थ हि विविच्चेव कामेहीति पाठसंवण्णनायं ‘‘अलोभस्स पारिपूरिया कामेहि विवेको सम्पज्जति, अदोसस्स. अमोहस्स पारिपूरिया अकुसलेहि धम्मेहि विवेको ¶ सम्पज्जती’’ति पाठस्स तिपेटके वुत्तभावो दस्सितो. सो च पाठो पेटकोपदेसे (२६२-पिट्ठे) ‘‘तत्थ अलोभस्स पारिपूरिया विवित्तो होति कामेही’’तिआदिना दिस्सति.

यथा च विसुद्धिमग्गे (१, २५८-पिट्ठे) ‘‘अयम्पि खो भिक्खवे आनापानस्सतिसमाधि भावितो’’तिआदिका पाळि महावग्गसंयुत्तकतो आनेत्वा दस्सिता, तथेव तत्थपि.

यथा च विसुद्धिमग्गे (१, २७२-पिट्ठे) ‘‘अस्सासादिमज्झपरियोसानं सतिया अनुगच्छतो’’तिआदि पाळि च (१, २७३-पिट्ठे) ककचूपमपाळि च पटिसम्भिदामग्गतो आनेत्वा दस्सिता, तथेव तत्थपि.

यथा च विसुद्धिमग्गे (२, ६९-पिट्ठे) ‘‘कतमा चिन्तामया पञ्ञा’’तिआदिका च पाळि ‘‘तत्थ कतमं आयकोसल्ल’’न्तिआदिका च पाळि (२, ७१-पिट्ठे) ‘‘दुक्खे ञाणं अत्थपटिसम्भिदा’’तिआदिका च पाळि अभिधम्मविभङ्गतो आनेत्वा दस्सिता, तथेव तत्थपि. सब्बापि च तत्थ वुत्ता एकविधदुविधादिपञ्ञापभेदकथा विसुद्धिमग्गे वुत्तकथाय येभुय्येन समानायेव.

‘‘येन चक्खुपसादेन, रूपानि मनुपस्सति;

परित्तं सुखुमं एतं, ऊकासिरसमूपम’’न्ति [विसुद्धि. २.४३६; ध. स. अट्ठ. ५९६] –

अयम्पि गाथा विमुत्तिमग्गेपि आयस्मता सारिपुत्तत्थेरेन भासितभावेनेव दस्सिता. ऊकासिरसमूपमन्ति पदं पन ऊकासमूपमन्ति तत्थ दिस्सति, तञ्च परम्परलेखकानं पमादलेखमत्तमेव सिया.

चतूसु सच्चेसु विसुद्धिमग्गे विय वचनत्थतो लक्खणतो अनूनाधिकतो कमतो अन्तोगधानं पभेदतो उपमातो च विनिच्छयो दस्सितो, सो च येभुय्येन विसुद्धिमग्गेन [विसुद्धि. २.५३०] समानोयेव.

यथा च विसुद्धिमग्गे (२, २४२-२४५) सम्मसनञाणकथायं पञ्चन्नं खन्धानं अतीतादिएकादसविधेन च अनिच्चादिलक्खणत्तयेन च विसुं विसुं सम्मसननयो दस्सितो, तथेव तत्थपि. चक्खादिजरामरणपरियोसानेसु पन धम्मेसु धम्मविचारपरियोसानानं सट्ठिया एव धम्मानं अनिच्चादिलक्खणत्तयेन सम्मसननयो तत्थ दस्सितो.

विसुद्धिमग्गे ¶ पन दिट्ठिविसुद्धिनिद्देसे (२, २३०-२३२-पिट्ठेसु) वुत्ता ‘‘यमकं नामरूपञ्च…पे… उभो भिज्जन्ति पच्चया’’ति गाथा च, ‘‘न चक्खुतो जायरे’’तिआदिका छ गाथायो च, ‘‘न सकेन बलेन जायरे’’तिआदिका छ गाथायो च विमुत्तिमग्गे भङ्गानुपस्सनाञाणकथायं दस्सिता. तासु अप्पमत्तकोयेव पाठभेदो दिस्सति.

विसुद्धिमग्गे (२, २६१-२-पिट्ठेसु) अरूपसत्तकेसु अरियवंसकथानयेन वुत्तो कलापतो च यमकतो च सम्मसननयो विमुत्तिमग्गे एत्थेव भङ्गानुपस्सनाञाणकथायं दस्सितो.

विमुत्तिमग्गे बुद्धानुस्सतिकथायं लोकविदूति पदस्स अत्थवण्णनायं सत्तलोकसङ्खारलोकवसेन द्वेयेव लोका दस्सिता, न पन ओकासलोको यथा विसुद्धिमग्गे (१, १९९-२००-पिट्ठेसु).

एत्तावता च विमुत्तिमग्गो नाम गन्थो कीदिसोति सक्का अनुमिनितुं. सो पन यथा न महाविहारवासीनं गन्थो होति, एवं महायानिकानम्पि न होतियेव थेरवादपिटकमेव निस्साय कतभावतो. यस्मा पन तत्थ न किञ्चिपि सीहळदीपिकं नामं वा थेरवादो वा दिस्सति, तस्मा सो सीहळदीपे कतगन्थोपि न होति. इन्दियरट्ठिकं पन नामञ्च वोहारो च तत्थ बहूसु ठानेसु दिस्सति, तस्मा इन्दियरट्ठे कतगन्थोव भवेय्य. यस्मा चस्स पेटकोपदेसं निस्सितभावो बहूसु ठानेसु दिस्सति, विसेसतो पन मिद्धरूपस्स अत्थिभावो च, अरहतोपि तस्स अत्थिभावो च तमेव निस्साय दस्सीयति, पटिसम्भिदामग्गगण्ठिपदे च पेटकेति पदस्स [पटि. म. अट्ठ. १.१.३६] अत्थवण्णनायं ‘‘सुत्तन्तपिटकत्थाय अट्ठकथा पेटकं महिसासकानं गन्थो’’ति वण्णितो. तस्मा एसो विमुत्तिमग्गो महिसासकनिकायिकेन कतो भवेय्याति अम्हाकं मति.

निस्सयट्ठकथाविभावना

विसुद्धिमग्गो पन न केवलं पुब्बे वुत्तप्पकारेनेव कतो, अथ खो वुच्चमानप्पकारेनापि. तथा हि आचरियबुद्धघोसत्थेरो पोराणट्ठकथाहि समाहरित्वा भासापरिवत्तनवसेन दस्सेन्तोपि या या अत्थवण्णना ¶ वा विनिच्छयो वा संसयितब्बो होति, तत्थ तत्थ विनयट्ठकथायं वुत्तन्ति वा (१, २६३), विनयट्ठकथासु वुत्तं, मज्झिमट्ठकथासु पनाति वा (१, ७०), अङ्गुत्तरभाणकाति वा (१, ७२), अट्ठकथाचरियानं मतानुसारेन विनिच्छयोति वा (१, ९९), वुत्तम्पि चेतं अट्ठकथासूति वा (१, ११८), तं अट्ठकथासु पटिक्खित्तन्ति वा (१, १३४), दीघभाणकसंयुत्तभाणकानं मतन्ति वा, मज्झिमभाणका इच्छन्तीति वा (१, २६७), अट्ठकथासु विनिच्छयोति वा, एवं ताव दीघभाणका, मज्झिमभाणका पनाहूति वा (१, २७७), अङ्गुत्तरट्ठकथायं पन…पे… अयं कमो वुत्तो, सो पाळिया न समेतीति वा (१, ३०९), एवं ताव मज्झिमभाणका, संयुत्तभाणका पनाति वा (२, ६२), संयुत्तट्ठकथायं वुत्तन्ति वा (२, ६३), अट्ठकथायं पनाति वा (२, ८०) एवं तंतंअत्थवण्णनाविनिच्छयानं निस्सयम्पि विभावेत्वा पच्छिमजनानं उप्पज्जमानसंसयं विनोदेन्तोयेव ते दस्सेसि.

तेनिमस्स विसुद्धिमग्गस्स करणकाले सब्बापि सीहळट्ठकथायो आचरियस्स सन्तिके सन्तीति च, पुब्बेयेव ता आचरियेन सीहळत्थेरानं सन्तिके सुताति च, ताहि गहेतब्बं सब्बं गहेत्वा अयं विसुद्धिमग्गो आचरियेन लिखितोति च अयमत्थो अतिविय पाकटो होति. तस्मा यं महावंसे –

‘‘सङ्घो गाथाद्वयं तस्सा’दासि सामत्थियं तवा’’तिआदिना ‘‘गाथाद्वयमेव ओलोकेत्वा किञ्चिपि अञ्ञं पोत्थकं अनोलोकेत्वा आचरियबुद्धघोसो विसुद्धिमग्गं अकासी’’ति अधिप्पायेन अभित्थुतिवचनं वुत्तं, तं अभित्थुतिमत्तमेवाति वेदितब्बं.

पोराणवचनदस्सनं

न केवलं आचरियो अट्ठकथायोयेव निस्सयभावेन दस्सेसि, अथ खो ‘‘पोराणा पनाहू’’तिआदिना पोराणानं वचनम्पि दस्सेसियेव. तदेत्थ द्वावीसतिया ठानेसु दिट्ठं [विसुद्धि. १.१५, १३७, १४२, २१७, २५२, ३०३; २.५८१, ६७५-६७६, ६८९, ७०६, ७३६, ७४५, ७४६, ७४९,७५५, ७७८, ८३९]. के पनेते पोराणा नाम? याव चतुत्थसङ्गीतिकाला सङ्गीतिकारेसु परियापन्ना वा ¶ तादिसा वा महाथेराति वेदितब्बा. तथा हि पटिसम्भिदामग्गे (२९२-३-पिट्ठेसु).

‘‘ओभासे चेव ञाणे च, पीतिया च विकम्पति…पे…

धम्मुद्धच्चकुसलो होति, न च विक्खेपं गच्छती’’ति –

एवमागता गाथायो इध (२७३-४-पिट्ठेसु) पोराणानं वचनभावेन दस्सिता. यदि चिमा गाथायो सङ्गीतिकारेहि पक्खित्ता भवेय्युं यथा परिवारपाळियं (३-पिट्ठे) आगता आचरियपरम्परादीपिका गाथायो, ता हि समन्तपासादिकायं (१, ४६-पिट्ठे) पोराणवचनभावेन दस्सिता, एवं सति तेयेव सङ्गीतिकारा पोराणाति वेदितब्बा. अथ पटिसम्भिदामग्गदेसकेनेव भासिता भवेय्युं, ते विय गरुकरणीया पच्चयिका सद्धायितब्बका महाथेरा पोराणाति वेदितब्बा. समन्तपासादिकासुमङ्गलविलासिनीआदीसु ‘‘पोराणा पन एवं वण्णयन्ती’’तिआदिना वुत्तट्ठानेसुपि तादिसाव आचरिया पोराणाति वुत्ता.

विनयट्ठकथाकरणं

आचरियो पन इमं विसुद्धिमग्गपकरणं यथावुत्तप्पकारेन कत्वा अञ्ञापि तिपिटकट्ठकथायो अनुक्कमेन अकासि. कथं? समन्तपासादिकं नाम विनयट्ठकथं बुद्धसिरित्थेरेन अज्झेसितो महाविहारस्स दक्खिणभागे पधानघरपरिवेणे महानिगमस्सामिनो पासादे वसन्तो अकासि. सा पनेसा सिरिपालोति नामन्तरस्स महानामरञ्ञो वीसतिमवस्से (९७३-बु-व) आरद्धा एकवीसतिमवस्से (९७४-बु-व) निट्ठानप्पत्ता अहोसि. तञ्च पन करोन्तो महामहिन्दत्थेरेनाभतं सीहळभासाय सङ्खतं महाअट्ठकथं तस्सा सरीरं कत्वा महापच्चरीकुरुन्दीसङ्खेपअन्धकट्ठकथाहि च गहेतब्बं गहेत्वा सीहळदीपे याव वसभराजकाला पाकटानं पोराण विनयधरमहाथेरानं विनिच्छयभूतं थेरवादम्पि पक्खिपित्वा अकासि. वुत्तञ्हेतं समन्तपासादिकायं –

‘‘संवण्णनं तञ्च समारभन्तो, तस्सा महाअट्ठकथं सरीरं;

कत्वा महापच्चरियं तथेव, कुरुन्दिनामादिसु विस्सुतासु.

विनिच्छयो ¶ अट्ठकथासु वुत्तो, यो युत्तमत्थं अपरिच्चजन्तो;

ततोपि अन्तोगधथेरवादं, संवण्णनं सम्म समारभिस्स’’न्ति च.

‘‘महामेघवनुय्याने, भूमिभागे पतिट्ठितो;

महाविहारो यो सत्थु, महाबोधिविभूसितो.

यं तस्स दक्खिणे भागे, पधानघरमुत्तमं;

सुचिचारित्तसीलेन, भिक्खुसङ्घेन सेवितं.

उळारकुलसम्भूतो, सङ्घुपट्ठायको सदा;

अनाकुलाय सद्धाय, पसन्नो रतनत्तये.

महानिगमसामीति, विस्सुतो तत्थ कारयि;

चारुपाकारसञ्चितं, यं पासादं मनोरमं.

सन्दच्छायतरूपेतं, सम्पन्नसलिलासयं;

वसता तत्र पासादे, महानिगमसामिनो.

सुचिसीलसमाचारं, थेरं बुद्धसिरिव्हयं;

या उद्दिसित्वा आरद्धा, इद्धा विनयवण्णना.

पालयन्तस्स सकलं, लङ्कादीपं निरब्बुदं;

रञ्ञो सिरिनिवासस्स [सिरिया निवासट्ठोनभूतस्स सिरिपालनामकस्स रञ्ञो (विमति, अन्तिमविट्ठे)], सिरिपालयसस्सिनो.

समवीसतिमे वस्से, जयसंवच्छरे अयं;

आरद्धा एकवीसम्हि, सम्पत्ते परिनिट्ठिता.

उपद्दवाकुले लोके, निरुपद्दवतो अयं;

एकसंवच्छरेनेव, यथा निट्ठं उपागता’’ति [परि. अट्ठ. निगमनकथा] च.

अयञ्च समन्तपासादिका विनयट्ठकथा अधुना मुद्दितछट्ठसङ्गीतिपोत्थकवसेन सहस्सतो उपरि अट्ठपण्णासाधिकतिसतमत्तपिट्ठपरिमाणा (१३५८) होति, तस्सा च एकसंवच्छरेन निट्ठापितत्तं उपनिधाय चतुवीसाधिकसत्तसतमत्तपिट्ठपरिमाणो (७२४) विसुद्धिमग्गोपि अन्तमसो छप्पञ्चमासेहि निट्ठापितो भवेय्याति सक्का ञातुं. तस्मा यं बुद्धघोसुप्पत्तियं महावंसवचनं निस्साय ‘‘विसुद्धिमग्गो आचरियबुद्धघोसेन ¶ एकरत्तेनेव तिक्खत्तुं लिखित्वा निट्ठापितो’’ति अभित्थुतिवचनं वुत्तं, तं तक्कारकस्स अभित्थुतिमत्तमेवाति वेदितब्बं.

ननु च इमिस्सं अट्ठकथायं ‘‘सुमङ्गलविलासिनिय’’न्तिआदिना विसेसनामवसेन आगमट्ठकथानं अतिदेसो दिस्सति [पारा. अट्ठ. १.१५], कथमिमिस्सा ताहि पठमतरं कतभावो वेदितब्बोति? आचरियस्स अट्ठकथासु अञ्ञमञ्ञातिदेसतो, विनयपिटकस्स गरुकातब्बतरभावतो, महाविहारवासीहि विसेसेन गरुकतभावतो, सङ्गीतिक्कमानुरूपभावतो, इधेव परिपुण्णनिदानकथापकासनतो, निगमने च पठमं सीहळट्ठकथायो सुत्वा करणप्पकासनतो ठपेत्वा विसुद्धिमग्गं अयमेव पठमं कताति वेदितब्बा. विसुद्धिमग्गे पन विनयट्ठकथायन्ति वा विनयट्ठकथासूति वा मज्झिमट्ठकथासूति वा एवं सामञ्ञनामवसेनेव अतिदेसो दिस्सति, न समन्तपासादिकादिविसेसनामवसेन. तस्मास्स सब्बपठमं कतभावो पाकटोयेव. आगमट्ठकथानं इधातिदेसो [पारा. अट्ठ. १.१५] इमिस्सापि तत्थाति [दी. नि. अट्ठ. १.८] एवं अञ्ञमञ्ञातिदेसो पन आचरियस्स मनसा सुववत्थितवसेन वा सक्का भवितुं, अपुब्बाचरिमपरिनिट्ठापनेन वा. कथं? आचरियेन हि विसुद्धिमग्गं सब्बसो निट्ठापेत्वा समन्तपासादिकादिं एकेकमट्ठकथं करोन्तेनेव यत्थ यत्थ अत्थवण्णना वित्थारतो अञ्ञट्ठकथासु पकासेतब्बा होति, तत्थ तत्थ ‘‘इमस्मिं नाम ठाने कथेस्सामी’’ति मनसा सुववत्थितं ववत्थपेत्वा तञ्च अतिदिसित्वा यथाववत्थितठानप्पत्तकाले तं वित्थारतो कथेन्तेन ता कता वा भवेय्युं. एकेकिस्साय वा निट्ठानासन्नप्पत्तकाले तं ठपेत्वा अञ्ञञ्च अञ्ञञ्च तथा कत्वा सब्बापि अपुब्बाचरिमं परिनिट्ठापिता भवेय्युन्ति एवं द्विन्नं पकारानमञ्ञतरवसेन आचरियस्साट्ठकथासु अञ्ञमञ्ञातिदेसो होतीति वेदितब्बन्ति.

आगमट्ठकथाकरणं

सुमङ्गलविलासिनिं नाम दीघनिकायट्ठकथं पन आचरियो सुमङ्गलपरिवेणवासिना दाठानागत्थेरेन आयाचितो अकासि. वुत्तं हेतमेतिस्सा निगमने –

‘‘आयाचितो ¶ सुमङ्गल-परिवेणनिवासिना थिरगुणेन;

दाठानाग सङ्घ, त्थेरेन थेरवंसन्वयेन.

दीघागमस्स दसबल-गुणगणपरिदीपनस्स अट्ठकथं;

यं आरभिं सुमङ्गल-विलासिनिं नाम नामेन.

सा हि महाअट्ठकथाय, सारमादाय निट्ठिता एसा’’ति [दी. नि. अट्ठ. ३. निगमनकथा].

पपञ्चसूदनिं नाम मज्झिमनिकायट्ठकथं भदन्तबुद्धमित्तत्थेरेन पुब्बे मयूरदूतपट्टने अत्तना सद्धिं वसन्तेन आयाचितो अकासि. वुत्तं हेतमेतिस्सा निगमने –

‘‘आयाचितो सुमतिना, थेरेन भदन्तबुद्धमित्तेन;

पुब्बे मयूरदूतप,ट्टनम्हि सद्धिं वसन्तेन.

परवादविधंसनस्स, मज्झिमनिकायसेट्ठस्स;

यमहं पपञ्चसूदनि-मट्ठकथं कातुमारभिं.

सा हि महाअट्ठकथाय, सारमादाय निट्ठिता एसा’’ति [म. नि. अट्ठ. ३. निगमनकथा].

सारत्थप्पकासिनिं नाम संयुत्तनिकायट्ठकथं भदन्तजोतिपालत्थेरेन आयाचितो अकासि. वुत्तं हेतमेतिस्सा निगमने –

‘‘एतिस्सा करणत्थं, थेरेन भदन्तजोतिपालेन;

सुचिसीलेन सुभासितस्स पकासयन्तञाणेन.

सासनविभूतिकामेन, याचमानेन मं सुभगुणेन;

यं समधिगतं पुञ्ञं, तेनापि जनो सुखी भवतू’’ति [सं. नि. अट्ठ. ३.५.निगमनकथा].

मनोरथपूरणिं नाम अङ्गुत्तरनिकायट्ठकथं भदन्तजोतिपालत्थेरेन दक्खिणइन्दियरट्ठे कञ्चिपुरादीसु च सीहळदीपे महाविहारम्हि च अत्तना सद्धिं वसन्तेन आयाचितो, तथा जीवकेनापि उपासकेन पिटकत्तयपारगुभूतेन वाताहतेपि अनिञ्जमानसभावे दुमे विय अनिञ्जमानसद्धम्मे ठितेन सुमतिना परिसुद्धाजीवेनाभियाचितो अकासि. वुत्तं हेतमेतिस्सा निगमने –

‘‘आयाचितो सुमतिना, थेरेन भदन्तजोतिपालेन;

कञ्चिपुरादीसु मया, पुब्बे सद्धिं वसन्तेन.

वरतम्बपण्णिदीपे, ¶ महाविहारम्हि वसनकालेपि;

वाताहते विय दुमे, अनिञ्जमानम्हि सद्धम्मे.

पारं पिटकत्तयसा,गरस्स गन्त्वा ठितेन सुमतिना;

परिसुद्धाजीवेना,भियाचितो जीवकेनापि.

धम्मकथानयनिपुणेहि, धम्मकथिकेहि अपरिमाणेहि;

परिकीळितस्स पटिप,ज्जितस्स सकसमयचित्रस्स.

अट्ठकथं अङ्गुत्तर,महानिकायस्स कातुमारद्धो;

यमहं चिरकालट्ठिति-मिच्छन्तो सासनवरस्स.

सा हि महाअट्ठकथाय, सारमादाय निट्ठिता एसा;

चतुन्नवुतिपरिमाणाय, पाळिया भाणवारेहि.

सब्बागमसंवण्णन, मनोरथो पूरितो च मे यस्मा;

एताय मनोरथ पूरणीति नामं ततो अस्सा’’ति [अ. नि. अट्ठ. ३.११.निगमनकथा].

इमा च पन चतस्सो आगमट्ठकथायो कुरुमानो आचरियबुद्धघोसो महामहिन्दत्थेरेनाभतं मूलट्ठकथासङ्खातं महाअट्ठकथंयेव भासापरिवत्तनवसेन चेव पुनप्पुनागतवित्थारकथामग्गस्स संखिपनवसेन च अकासि. वुत्तञ्हेतं गन्थारम्भे –

‘‘सीहळदीपं पन आभ,ताथ वसिना महामहिन्देन;

ठपिता सीहळभासाय, दीपवासीनमत्थाय.

अपनेत्वान ततोहं, सीहळभासं मनोरमं भासं;

तन्तिनयानुच्छविकं, आरोपेन्तो विगतदोसं…पे…

हित्वा पुनप्पुनागत-मत्थं अत्थं पकासयिस्सामी’’ति.

तथा निगमनेपि –

‘‘सा हि महाअट्ठकथाय, सारमादाय निट्ठिता एसा’’ति [दी. नि. अट्ठ. ३.निगमनकथा] च;

‘‘मूलट्ठकथासारं, आदाय मया इमं करोन्तेना’’ति [दी. नि. अट्ठ. ३.निगमनकथा] च.

इमासं सरीरभूतपाठेसु च समन्तपासादिकायं विय ‘‘महापच्चरियं, कुरुन्दिय’’न्तिआदिना विनिच्छयसंवण्णनाभेदप्पकासनं न दिस्सति, तथा अभिधम्मट्ठकथासुपि. ¶ तेनेतं ञायति ‘‘सुत्तन्ताभिधम्मेसु महाअट्ठकथातो अञ्ञा महापच्चरिआदिनामिका पोराणिका सीहळट्ठकथायो चेव अन्धकट्ठकथा च नत्थी’’ति. याव वसभराजकाला (६०९-६५३) पन पाकटानं सीहळिकत्थेरानं विनिच्छयो च वादा च वत्थूनि च एतासुपि दिस्सन्तियेवाति.

अभिधम्मट्ठकथाकरणं

अट्ठसालिनिं पन सम्मोहविनोदनिञ्च धातुकथादिपञ्चपकरणस्स अट्ठकथञ्चाति तिस्सो अभिधम्मट्ठकथायो अत्तना सदिसनामेन सोतत्थकीगन्थकारकेन बुद्धघोसभिक्खुना आयाचितो अकासि. वुत्तञ्हेतं तासु –

‘‘विसुद्धाचारसीलेन, निपुणामलबुद्धिना;

भिक्खुना बुद्धघोसेन, सक्कच्चं अभियाचितो’’ति [ध. स. अट्ठ. गन्थारम्भकथा] च.

‘‘बुद्धघोसोति गरूहि गहितनामधेय्येन थेरेन कता

अयं अट्ठसालिनी नाम धम्मसङ्गहट्ठकथा’’ति [ध. स. अट्ठ. निगमनकथा] च.

‘‘अत्थप्पकासनत्थं, तस्साहं याचितो ठितगुणेन;

यतिना अदन्धगतिना, सुबुद्धिना बुद्धघोसेन.

यं आरभिं रचयितुं, अट्ठकथं सुनिपुणेसु अत्थेसु;

सम्मोहविनोदनतो, सम्मोहविनोदनिं नामा’’ति [विभ. अट्ठ. निगमनकथा] च.

‘‘बुद्धघोसोति गरूहि गहितनामधेय्येन थेरेन कता

अयं सम्मोहविनोदनी नाम विभङ्गट्ठकथा’’ति [विभ. अट्ठ. निगमनकथा] च.

इमासु पन तीसु पञ्चपकरणट्ठकथाय नामविसेसो नत्थि आयाचको च न पकासितो, केवलं अत्तनो सद्धाय एव सञ्चोदितेन आचरियबुद्धघोसेन सा कता विय दिस्सति. वुत्तञ्हेतं तस्सा निगमने –

‘‘कुसलादिधम्मभेदं, ¶ निस्साय नयेहि विविधगणनेहि;

वित्थारेन्तो सत्तम-मभिधम्मप्पकरणं सत्था.

सुविहितसन्निट्ठानो, पट्ठानं नाम यं पकासेसि;

सद्धाय समारद्धा, या अट्ठकथा मया तस्साति च.

‘‘एत्तावता

सत्तप्पकरणं नाथो, अभिधम्ममदेसयि;

देवातिदेवो देवानं, देवलोकम्हि यं पुरे;

तस्स अट्ठकथा एसा, सकलस्सापि निट्ठिता’’ति [पट्ठा. अट्ठ. १९-२४.१] च.

‘‘बुद्धघोसोति गरूहि गहितनामधेय्येन थेरेन कता

अयं सकलस्सपि अभिधम्मपिटकस्स अट्ठकथा’’ति [पट्ठा. अट्ठ. १९-२४.१] च.

एकच्चे पन आधुनिका थेरा ‘‘अभिधम्मट्ठकथायो आचरियबुद्धघोसेन याचितो सङ्घपालबुद्धमित्तजोतिपालादीनं अञ्ञतरो थेरो अकासी’’ति वदन्ति. अयञ्च नेसं विचारणा, अट्ठसालिनीसम्मोहविनोदनीसु ‘‘ता बुद्धघोसेन याचितो अकासी’’ति गन्थकारेन वुत्तं. तेन ञायति ‘‘तक्कारको अञ्ञो, आचरियबुद्धघोसो पन तासु याचकपुग्गलोयेवा’’ति. आगमट्ठकथासु च आचरियबुद्धघोसेन –

‘‘सीलकथा धुतधम्मा, कम्मट्ठानानि चेव सब्बानि…पे…

इति पन सब्बं यस्मा, विसुद्धिमग्गे मया सुपरिसुद्धं;

वुत्तं तस्मा भिय्यो, न तं इध विचारयिस्सामी’’ति [दी. नि. अट्ठ. १.गन्थारम्भकथा] –

एवं सीलकथादीनं अत्तना एव विसुद्धिमग्गे वुत्तभावो मयातिपदेन पकासितो. अट्ठसालिनियं पन –

‘‘कम्मट्ठानानि सब्बानि, चरियाभिञ्ञा विपस्सना;

विसुद्धिमग्गे पनिदं, यस्मा सब्बं पकासित’’न्ति [ध. स. अट्ठ. गन्थारम्भकथा] –

एवं मयाति कत्तुपदेन विना वुत्तं. तेनापि ञायति ‘‘विसुद्धिमग्गकारको अञ्ञो, अभिधम्मट्ठकथाकारको अञ्ञो’’ति. किञ्चापि अभिधम्मट्ठकथासु अभियाचको बुद्धघोसो भिक्खुनाति च यतिनाति च ¶ इमेहेव सामञ्ञगुणपदेहि वुत्तो न थेरेनाति सगारवगुणपदेन, तथापि सो ‘‘विसुद्धाचारसीलेन निपुणामलबुद्धिना’’ति च, ‘‘अदन्धगतिना सुबुद्धिना’’ति च इमेहि अधिकगुणपदेहि थोमितत्ता ‘‘विसुद्धिमग्गादिकारको आचरियबुद्धघोसोयेवा’’ति सक्का गहेतुं. सो हि उपसम्पन्नकालतोयेव पट्ठाय गन्थकोविदो परियत्तिविसारदगुणसम्पन्नो, तस्मिञ्च काले ऊनदसवस्सो भवेय्य, तस्मा थेरेनाति न वुत्तोति सक्का गहेतुन्ति.

तं पन तेसं अतिविचारणमत्तमेव. न हि आचरियबुद्धघोसत्थेरो ‘‘तस्मिं काले ऊनदसवस्सो’’ति सक्का गहेतुं, विसुद्धिमग्गनिगमनेपि ‘‘बुद्धघोसोति गरूहि गहितनामधेय्येन थेरेना’’ति वचनतो, न च ‘‘विसुद्धाचारसीलेन, निपुणामलबुद्धिना’’ति वा, ‘‘अदन्धगतिना सुबुद्धिना’’ति वा एत्तकेहेव द्वीहि द्वीहि गुणपदेहि थोमनेन सुथोमितो होति, अञ्ञदत्थु ‘‘निप्पभीकतखज्जोतो समुदेति दिवाकरो’’ति थोमनं विय होति. ननु आचरियेन अत्तनो गन्थनिगमनेसु –

‘‘परमविसुद्धसद्धाबद्धिवीरियपटिमण्डितेन सीलाचारज्जवमद्दवादिगुणसमुदयसमुदितेन सकसमयसमयन्तरगहनज्झोगाहणसमत्थेन पञ्ञावेय्यत्तियसमन्नागतेन तिपिटकपरियत्तिभेदे साट्ठकथे सत्थुसासने अप्पटिहतञाणप्पभावेन महावेय्याकरणेना’’तिआदिना –

अत्तनो अनुच्छविकानि गुणपदानि पकासितानि, सोयेव च पोराणसीहळट्ठकथायो सङ्खिपित्वा अभिनवसङ्गहट्ठकथानं आदिकत्ता पुब्बङ्गमो, अञ्ञे पन अभिनवट्ठकथाकारा तस्सेव अनुवत्तित्वा अवसेसमेकं वा द्वे वा अट्ठकथायो अकंसु. अभिधम्मट्ठकथासु च यो यो अत्थो विसुद्धिमग्गे वुत्तो, सो सो यथानुप्पत्तट्ठाने ततो गहेत्वा तथेव वुत्तो. विसेसतो पन पटिच्चसमुप्पादविभङ्गखन्धायतनधातुसच्चविभङ्गवण्णनासु झानकथावण्णनासु च अयमत्थो अतिविय पाकटो, योपि च तत्थ अप्पको कतिपयमत्तो विसुद्धिमग्गेन विसदिसो संवण्णनाभेदो दिस्सति, सोपि आभिधम्मिकानं मतानुसारेन यथा पोराणट्ठकथायं वुत्तो, तथेव वुत्तोति वेदितब्बो. यथा च अट्ठसालिनियं समन्तपासादिकाय विनयट्ठकथाय अतिदेसो ¶ दिस्सति [ध. स. अट्ठ. १ अकुसलकम्मपथकथा], तथेव समन्तपासादिकायम्पि अट्ठसालिनिया अतिदेसो दिस्सतेव [पारा. अट्ठ. १.११;]. यदि च अट्ठसालिनी अञ्ञेन कता भवेय्य, कथं तासु अञ्ञमञ्ञातिदेसो सक्का कातुं. तस्मा अभिधम्मट्ठकथासु अभियाचको बुद्धघोसो आचरियेन समाननामो चूळबुद्धघोसोति यावज्जतना आचरियपरम्पराय गहितो सोतत्थकीगन्थकारको अञ्ञोयेव, न आचरियमहाबुद्धघोसत्थेरो. तेनेव तत्थ वुत्तं ‘‘भिक्खुना’’ति च ‘‘यतिना’’ति च.

यदि पन एत्तकेन निट्ठं न गच्छेय्य, एवम्पि विचारेतब्बं – किन्नु खो सङ्घपालादयो थेरा विसुद्धिमग्गादीनं करणत्थाय आचरियबुद्धघोसत्थेरं आयाचमाना अत्तना समत्थतरोति सद्दहन्ता आयाचन्ति उदाहु असद्दहन्ताति? सद्दहन्तायेव आयाचन्तीति पाकटोयेवायमत्थो. तथा च सति आचरियबुद्धघोसत्थेरो सयं अञ्ञेहि समत्थतरोव समानो कस्मा अञ्ञं आयाचेय्य. न हि सद्धासम्पन्नस्स थामसम्पन्नस्स योब्बनसम्पन्नस्स आचरियस्स सुन्दरतरं अभिधम्मट्ठकथं कातुं भारियं भविस्सति. अभिधम्मट्ठकथासु च वुत्तवचनानि विसुद्धिमग्गआगमट्ठकथासु वुत्तसंवण्णनावचनेहि एकाकारानेव होन्ति. यदि च अभिधम्मट्ठकथं अञ्ञो करेय्य, कथमपि ताहि वचनाकारस्स विसदिसता भवेय्य एव. एतासं निगमने च दस्सितेन ‘‘बुद्धघोसोति गरूहि गहितनामधेय्येन थेरेन कता’’ति वचनेन ‘‘आचरियबुद्धघोसेन कता’’त्वेव पाकटा होन्ति, न अञ्ञेनाति. येपि ‘‘अञ्ञेन कता’’ति वदन्ति, तेपि ‘‘इमिना नाम थेरेना’’ति एकंसतो दस्सेतुं न सक्कोन्ति, तथा दस्सेतुञ्च लेसमत्तम्पि साधकवचनं न दिस्सति. तस्मा अभिधम्मट्ठकथायोपि इदानि आचरियेहि चूळबुद्धघोसोति वोहरितेन बुद्धघोसेन नाम भिक्खुनायाचितो विसुद्धिमग्गविनयागमट्ठकथानं कारको आचरियमहाबुद्धघोसत्थेरोयेव अकासीति निट्ठमेत्थ गन्तब्बन्ति.

यं पन महावंसे ‘‘आचरियबुद्धघोसो सीहळदीपागमनतो पुब्बे जम्बुदीपे वसनकालेयेव अट्ठसालिनिं अकासी’’ति अधिप्पायेन –

२२५. ‘‘धम्मसङ्गणियाकासि, कच्छं सो अट्ठसालिनि’’न्ति –

वुत्तं, ¶ तं इदानि दिस्समानाय अट्ठसालिनिया न समेति. तत्थ हि गन्थारम्भेयेव विसुद्धिमग्गं अतिदिसित्वा पच्छापि सो च, समन्तपासादिका च बहूसु ठानेसु अतिदिसीयन्ति. तस्मा तस्सा आचरियेन सीहळदीपं पत्वा विसुद्धिमग्गञ्चेव समन्तपासादिकञ्च कत्वा पच्छायेव कतभावो अतिविय पाकटोति.

कङ्खावितरणीअट्ठकथाकरणं

कङ्खावितरणिं नाम पातिमोक्खट्ठकथं आचरियबुद्धघोसत्थेरो सोणत्थेरेन याचितो महाविहारवासीनं वाचनामग्गनिस्सितं सीहळपातिमोक्खट्ठकथानयं निस्साय एकम्पि पदं पाळिया वा महाविहारवासीनं पोराणट्ठकथाहि वा अविरोधेत्वा अकासि. तेन वुत्तं तिस्सं अट्ठकथायं –

‘‘सूरतेन निवातेन, सुचिसल्लेखवुत्तिना;

विनयाचारयुत्तेन, सोणत्थेरेन याचितो.

तत्थ सञ्जातकङ्खानं, भिक्खूनं तस्स वण्णनं;

कङ्खावितरणत्थाय, परिपुण्णविनिच्छयं.

महाविहारवासीनं, वाचनामग्गनिस्सितं;

वत्तयिस्सामि नामेन, कङ्खावितरणिं सुभ’’न्ति [कङ्खा अट्ठ. गन्थारम्भकथा] च.

‘‘आरभिं यमहं सब्बं, सीहळट्ठकथानयं;

महाविहारवासीनं, वाचनामग्गनिस्सितं.

निस्साय सा अयं निट्ठं, गता आदाय सब्बसो;

सब्बं अट्ठकथासारं, पाळियत्थञ्च केवलं.

न हेत्थ तं पदं अत्थि, यं विरुज्झेय्य पाळिया;

महाविहारवासीनं, पोराणट्ठकथाहि वा’’ति [कङ्खा. अट्ठ. निगमनकथा] च.

धम्मपदट्ठकथाकरणं

अपरापि तिस्सो अट्ठकथायो सन्ति खुद्दकपाठट्ठकथा धम्मपदट्ठकथा सुत्तनिपातट्ठकथा चाति, या तासु दिस्समाननिगमनवसेन आचरियबुद्धघोसेनेव कताति पञ्ञायन्ति. तत्थ पन वुत्तवचनानि कानिचि ¶ कानिचि आगमट्ठकथासु वुत्ताकारेन न होन्ति. तस्मा एके वदन्ति ‘‘नेता आचरियबुद्धघोसस्सा’’ति. एकच्चे पन ‘‘आचरियस्स उपथम्भकत्थेरेहि पठमं कता, पच्छा आचरियेन ओसानसोधनवसेन परियोसापिता वा भवेय्युं, अभिधम्मट्ठकथं आयाचन्तेन चूळबुद्धघोसेन वा कता भवेय्यु’’न्ति वदन्ति.

तं तथा वा होतु अञ्ञथा वा, इदानि एकन्ततो विनिच्छिनितुं न सुकरमेव. तस्मा तासं निगमनवचनवसेनेव एत्थ पकासयिस्साम. तासु हि धम्मपदट्ठकथं कुमारकस्सपत्थेरेन आयाचितो सिरिकूटस्स (सिरिकुड्डस्स) रञ्ञो पासादे विहरन्तो परम्पराभतं सीहळभासाय सण्ठितं पोराणट्ठकथं पाळिभासाय आरोपेत्वा वित्थारगतञ्च वचनक्कमं समासेत्वा गाथासु असंवण्णितपदब्यञ्जनानि संवण्णेत्वा अकासि. वुत्तञ्हि तत्थ गन्थारम्भे –

‘‘परम्पराभता तस्स, निपुणा अत्थवण्णना;

या तम्बपण्णिदीपम्हि, दीपभासाय सण्ठिता…पे…

कुमारकस्सपेनाहं, थेरेन थिरचेतसा;

सद्धम्मट्ठितिकामेन, सक्कच्चं अभियाचितो…पे…

तं भासं अतिवित्थार, गतञ्च वचनक्कमं;

पहायारोपयित्वान, तन्तिभासं मनोरमं.

गाथानं ब्यञ्जनपदं, यं तत्थ न विभावितं;

केवलं तं विभावेत्वा, सेसं तमेव अत्थतो.

भासन्तरेन भासिस्स’’न्ति [ध. प. अट्ठ. १.गन्थारम्भकथा] –

निगमने च वुत्तं –

‘‘विहारे अधिराजेन, कारितम्हि कतञ्ञुना;

पासादे सिरिकूटस्स, रञ्ञो विहरता मया’’ति [ध. प. अट्ठ. २.निगमनकथा].

एत्थ च सिरिकूटो नाम समन्तपासादिकानिगमने सिरिपालोति वुत्तो महानामोयेव राजाति वदन्ति. एवं सति महेसिया आनयनं समादापनमारब्भ तेन रञ्ञा दिन्ने धूमरक्खपब्बतविहारे वसन्तेन सा कताति वेदितब्बा. वुत्तञ्हेतं महावंसे –

३७-२१२.

‘‘लोहद्वार-रलग्गाम-कोटिपस्सावनव्हये;

तयो ¶ विहारे कारेत्वा, भिक्खूनं अभयुत्तरे.

२१३.

विहारं कारयित्वान, धूमरक्खम्हि पब्बते;

महेसिया’नयेना’दा, भिक्खूनं थेरवादिन’’न्ति.

तस्स पन रञ्ञो काले सा निट्ठापिताति न सक्का गहेतुं. तस्स हि रञ्ञो एकवीसतिमवस्से समन्तपासादिकं निट्ठापेसि. सो च राजा द्वावीसतिमवस्से दिवङ्गतो. एत्थन्तरे साधिकएकवस्सेन ‘‘चतस्सो च आगमट्ठकथायो तिस्सो च अभिधम्मट्ठकथायो अयञ्च धम्मपदट्ठकथा’’ति सब्बा एता न सक्का निट्ठापेतुन्ति.

परमत्थजोतिकाट्ठकथाकरणं

परमत्थजोतिकं नाम खुद्दकपाठस्स चेव सुत्तनिपातस्स च अट्ठकथं केनचिपि अनायाचितो अत्तनो इच्छावसेनेव अकासि. वुत्तञ्हेतं खुद्दकपाठट्ठकथाय गन्थारम्भे –

‘‘उत्तमं वन्दनेय्यानं, वन्दित्वा रतनत्तयं;

खुद्दकानं करिस्सामि, केसञ्चि अत्थवण्णनं.

खुद्दकानं गम्भीरत्ता, किञ्चापि अतिदुक्करा;

वण्णना मादिसेनेसा, अबोधन्तेन सासनं.

अज्जापि तु अब्भोच्छिन्नो, पुब्बाचरियनिच्छयो;

तथेव च ठितं यस्मा, नवङ्गं सत्थुसासनं.

तस्माहं कातुमिच्छामि, अत्थसंवण्णनं इमं;

सासनञ्चेव निस्साय, पोराणञ्च विनिच्छयं.

सद्धम्मबहुमानेन, नात्तुक्कंसनकम्यता;

नाञ्ञेसं वम्भनत्थाय, तं सुणाथ समाहिता’’ति.

बहू पन विचक्खणा इमा आरम्भगाथायो विचिनित्वा ‘‘नेतं आचरियबुद्धघोसत्थेरस्स विय वचनं होती’’ति वदन्ति. अयञ्च नेसं विचिननाकारो, आचरियबुद्धघोसो हि यं कञ्चि गन्थं सीलादिगुणसम्पन्नेन अञ्ञेन आयाचितोव करोति, इध पन कोचिपि आयाचको ¶ नत्थि. पुनपि आचरियो ‘‘पोराणसीहळट्ठकथं भासापरिवत्तनवसेन करिस्सामी’’ति च ‘‘महाविहारवासीनं वाचनामग्गं निस्साय करिस्सामी’’ति च एवं पटिञ्ञं कत्वाव करोति, इध पन तादिसीपि पटिञ्ञा नत्थि. पुनपि आचरियो अतिगम्भीरत्थानं चतुन्नञ्चागमानं अभिधम्मस्स च संवण्णनारम्भेपि दुक्करभावं न कथेति, इध पन ‘‘सासनं अबोधन्तेन मादिसेना’’ति अत्तना सासनस्स अबुद्धभावं पकासेत्वा ‘‘अतिदुक्करा’’ति च कथेति. तस्मा ‘‘नेतं आचरियबुद्धघोसस्स विय वचन’’न्ति वदन्ति. तं युत्तं विय दिस्सति, आचरियो हि अत्तनो गन्थनिगमनेसु ‘‘तिपिटकपरियत्तिप्पभेदे साट्ठकथे सत्थुसासने अप्पटिहतञाणप्पभावेना’’ति अत्तनो ञाणप्पभावं पकासेसि, सो ‘‘सासनं अबोधन्तेन मादिसेन अतिदुक्करा’’ति ईदिसं वचनं न कथेय्ययेवाति.

जातकट्ठकथाकरणं

जातकट्ठकथापि च आचरियबुद्धघोसत्थेरेनेव कताति वदन्ति, कारणं पनेत्थ न दिस्सति. सा पन अत्थदस्सित्थेरेन च बुद्धमित्तत्थेरेन च महिसासकनिकायिकेन च बुद्धदेवत्थेरेनाति तीहि थेरेहि अभियाचितो महाविहारवासीनं वाचनामग्गं निस्साय कता. इमिस्सापि नामविसेसो नत्थि. वुत्तं हिमिस्सा आरम्भे –

‘‘बुद्धवंसस्स एतस्स, इच्छन्तेन चिरट्ठितिं;

याचितो अभिगन्त्वान, थेरेन अत्थदस्सिना.

असंसट्ठविहारेन, सदा सुद्धविहारिना;

तथेव बुद्धमित्तेन, सन्तचित्तेन विञ्ञुना.

महिसासकवंसम्हि, सम्भूतेन नयञ्ञुना;

बुद्धदेवेन च तथा, भिक्खुना सुद्धबुद्धिना.

महापुरिसचरियानं, आनुभावं अचिन्तियं;

तस्स विज्जोतयन्तस्स, जातकस्सत्थवण्णनं.

महाविहारवासीनं, वाचनामग्गनिस्सितं;

भासिस्सं भासतो तं मे, साधु गण्हन्तु साधवो’’ति.

एत्तावता ¶ च आचरियबुद्धघोसत्थेरस्स गन्थभावेन पाकटाहि सब्बट्ठकथाहि सह विसुद्धिमग्गस्स करणप्पकारो वित्थारेन विभावितो होति.

सकललोकपत्थारकारणं

किस्सेस विसुद्धिमग्गो सकललोके पत्थटोति? परिसुद्धपिटकपाळिनिस्सयभावतो, सिक्खत्तयसङ्गहभावतो, पोराणट्ठकथानं भासापरिवत्तनभावतो, परसमयविवज्जनतो, सकसमयविसुद्धितो, सीलधुतङ्गसमथअभिञ्ञापञ्ञापभेदादीनं परिपुण्णविभागतो, याव अरहत्ता पटिपत्तिनयपरिदीपनतो, उत्तानानाकुलपदब्यञ्जनसङ्खतभावतो, सुविञ्ञेय्यत्थभावतो, पसादनीयानं दिट्ठानुगतापादनसमत्थानं वत्थूनञ्च दीपनतोति एवमादीहि अनेकसतेहि गुणेहि एस सकललोके पत्थटो जातो.

अयञ्हि विसुद्धिमग्गो सङ्गीतित्तयारूळ्हपरिसुद्धपाळिपिटकमेव निस्साय पवत्तो, न महासङ्घिकादीनं सत्तरसन्नं निकायानं पिटकं, नपि महायानिकानं पिटकं. सपरिवारं सिक्खत्तयञ्च एत्थ परिपुण्णमेव सङ्गहेत्वा दस्सितं. वुत्तञ्हेतं आचरियेन आगमट्ठकथासु गन्थारम्भे –

‘‘सीलकता धुतधम्मा, कम्मट्ठानानि चेव सब्बानि;

चरियाविधानसहितो, झानसमापत्तिवित्थारो.

सब्बा च अभिञ्ञायो, पञ्ञासङ्कलननिच्छयो चेव;

खन्धाधातायतनि,न्द्रियानि अरियानि चेव चत्तारि.

सच्चानि पच्चयाकार,देसना सुपरिसुद्धनिपुणनया;

अविमुत्ततन्तिमग्गा, विपस्सनाभावना चेव.

इति पन सब्बं यस्मा, विसुद्धिमग्गे मया सुपरिसुद्धं;

वुत्तं तस्मा भिय्यो, न तं इध विचारयिस्सामी’’ति.

यस्मा पन विसुद्धिमग्गो चतुन्नं आगमट्ठकथानं अवयवभावेन कतो, तस्मा ता विय पोराणसीहळट्ठकथानं भासापरिवत्तनवसेन चेव पुनप्पुनागतमत्थानं संखिपनवसेन च परसमयविवज्जनवसेन च महाविहारवासीनं परिसुद्धविनिच्छयसङ्खातस्स सकसमयस्स दीपनवसेन च कतो. वुत्तञ्हेतं आचरियेन –

‘‘अपनेत्वान ¶ ततोहं, सीहळभासं मनोरमं भासं;

तन्तिनयानुच्छविकं, आरोपेन्तो विगतदोसं.

समयं अविलोमेन्तो, थेरानं थेरवंसपदीपानं;

सुनिपुणविनिच्छयानं, महाविहारे निवासीनं;

हित्वा पुनप्पुनागत-मत्थं अत्थं पकासयिस्सामी’’ति [दी. नि. अट्ठ. १.गन्थारम्भकथा] च.

‘‘मज्झे विसुद्धिमग्गो, एस चतुन्नम्पि आगमानञ्हि;

ठत्वा पकासयिस्सति, तत्थ यथाभासितमत्थं.

इच्चेव कतो तस्मा, तम्पि गहेत्वान सद्धिमेताय;

अट्ठकथाय विजानथ, दीघागमनिस्सितं अत्थ’’न्ति [दी. नि. अट्ठ. १.गन्थारम्भकथा] च.

‘‘सा हि महाअट्ठकथाय, सारमादाय निट्ठिता एसा;

एकासीतिपमाणाय, पाळिया भाणवारेहि.

एकूनसट्ठिमत्तो, विसुद्धिमग्गोपि भाणवारेहि;

अत्थप्पकासनत्थाय, आगमानं कतो यस्मा.

तस्मा तेन सहायं, अट्ठकथा भाणवारगणनाय;

सुपरिमितपरिच्छिन्नं, चत्तालीसं सतं होती’’ति [दी. नि. अट्ठ. ३.निगमनकथा] च.

यदि चायं विसुद्धिमग्गो आचरियेन आगमट्ठकथायो विय अकत्वा पोराणसीहळट्ठकथायो च अनोलोकेत्वा केवलं अत्तनो ञाणप्पभावेनेव कतो अस्स, नायं आगमट्ठकथानं अवयवोति गहेतब्बो अस्स, अञ्ञदत्थु ‘‘आगमट्ठकथायो महाट्ठकथाय सारभूता, विसुद्धिमग्गो पन न तस्सा सारभूतो, केवलं आचरियस्स मतियाव कतो’’ति एवमेव वत्तब्बो अस्स. यस्मा पन तथा अकत्वा पुब्बे वुत्तप्पकारेनेव कतो, तस्मा अयम्पि विसुद्धिमग्गो तासं आगमट्ठकथानं करणाकारेनेव कतोति च, ततोयेव महाट्ठकथाय सारभूतोति च दट्ठब्बो.

एकच्चे पन विचक्खणा आचरियबुद्धघोसस्स गन्थेसु उत्तरपक्खसासनिकानं अस्सघोसनागज्जुनवसुबन्धुआदीनं भिक्खूनं विय पोराणगन्थे अनिस्साय अत्तनो ञाणेनेव तक्केत्वा दस्सितं धम्मकथाविसेसं अदिस्वा असन्तुट्ठचित्ता एवं वदन्ति ‘‘बुद्धघोसस्स अञ्ञं अनिस्साय अत्तनो ञाणप्पभावेनेव अभिनवगन्थुप्पादनं न पस्सामा’’ति. ¶ तं तेसं गरहावचनम्पि समानं थेरवादीनं पसंसावचनमेव सम्पज्जति. थेरवादिनो हि एवं जानन्ति ‘‘बुद्धेनेव भगवता सम्मासम्बुद्धेन देसेतब्बो चेव धम्मो पञ्ञापेतब्बो च विनयो अनवसेसेन देसितो चेव पञ्ञत्तो च, सोयेव धम्मविनयो सद्धासम्पन्नेहि भिक्खूहि चेव गहट्ठेहि च यथारहं पटिपज्जितब्बो, न ततो अञ्ञो धम्मविनयो तक्केत्वा गवेसेतब्बो. यदि पन अञ्ञो धम्मविनयो केनचि तक्केत्वा कथितो अस्स, तं तस्सेव तक्किनो सासनं होति न सत्थु सासनं. यं यं पन भगवतो धम्मविनये पदब्यञ्जनं अत्थतो अपाकटं होति, तत्थ तत्थ पोराणकेहि पटिसम्भिदाछळभिञ्ञादिगुणसम्पन्नेहि भगवतो अधिप्पायं जानन्तेहि अट्ठकथाचरियेहि संवण्णितनयेन अत्थो गहेतब्बो, न अत्तनोमतिवसेना’’ति. आचरियबुद्धघोसो च तेसं थेरवादीनं अञ्ञतरो, सोपि तथेव जानाति. वुत्तञ्चेतं आचरियेन –

‘‘बुद्धेन धम्मो विनयो च वुत्तो,

यो तस्स पुत्तेहि तथेव ञातो;

सो येहि तेसं मतिमच्चजन्ता,

यस्मा पुरे अट्ठकथा अकंसु.

तस्मा हि यं अट्ठकथासु वुत्तं,

तं वज्जयित्वान पमादलेखं;

सब्बम्पि सिक्खासु सगारवानं,

यस्मा पमाणं इध पण्डितानं.

ततो च भासन्तरमेव हित्वा,

वित्थारमग्गञ्च समासयित्वा…पे…

यस्मा अयं हेस्सति वण्णनापि,

सक्कच्च तस्मा अनुसिक्खितब्बा’’ति [पारा. अट्ठ. १.गन्थारम्भकथा].

तेनेव आचरियो भगवतो धम्मविनयं वा पोराणट्ठकथं वा अनिस्साय अत्तनो ञाणेन तक्केत्वा वा अत्तना परिचितलोकियगन्थेहि गहेत्वा वा न कञ्चि गन्थं अकासि. यदि पन तादिसं करेय्य, ¶ तं थेरवादिनो महापदेससुत्ते [दी. नि. २.१८८; अ. नि. ४.१८०] वुत्तनयेन ‘‘अद्धा इदं न चेव तस्स भगवतो वचनं, बुद्धघोसस्स च थेरस्स दुग्गहित’’न्ति छड्डेय्युंयेव. यतो च खो अयं विसुद्धिमग्गो पोराणट्ठकथानं भासापरिवत्तनादिवसेनेव आचरियेन कतो, ततोयेव थेरवादिनो तं महापदेससुत्ते वुत्तनयेन ‘‘अद्धा इदं तस्स भगवतो वचनं, आचरियबुद्धघोसस्स च थेरस्स सुग्गहित’’न्ति सम्पटिच्छन्ति. तेनापायं सकललोके पत्थटो होति.

सीलधुतङ्गादीनं विभागो च पटिपत्तिनयपरिदीपनञ्च पाकटमेव. तथायं विसुद्धिमग्गो सुविञ्ञेय्यपदवाक्येहि चेव अनाकुलपदवाक्येहि च तन्तिनयानुरूपाय पाळिगतिया सुट्ठु सङ्खतो, ततोयेव चस्स अत्थोपि सुविञ्ञेय्यो होति. तस्मा तं ओलोकेन्ता विञ्ञुनो विसुद्धज्झासया खणे खणे अत्थपटिसंवेदिनो चेव धम्मपटिसंवेदिनो च हुत्वा अनप्पकं पीतिसोमनस्सं पटिसंवेदेन्ति.

अनेकानि चेत्थ पसादावहानि महातिस्सत्थेरवत्थुआदीनि [विसुद्धि. १.१५] सीहळवत्थूनि च धम्मसेनापतिसारिपुत्तत्थेरवत्थुआदीनि [विसुद्धि. १.१९] जम्बुदीपवत्थूनि च दीपितानि. तानि पस्सित्वा अनुस्सरन्तानं सप्पुरिसानं बलवपसादो च उप्पज्जति, ‘‘कदा नु खो मयम्पि ईदिसा भविस्सामा’’ति दिट्ठानुगतिं आपज्जितुकामता च उप्पज्जति.

एवं परिसुद्धपिटकपाळिनिस्सयतादीहि अनेकसतेहि गुणेहि अयं विसुद्धिमग्गो सकललोके पत्थटो जातोति वेदितब्बो. यथा चायं विसुद्धिमग्गो, एवं अञ्ञापि आचरियेन कता तिपिटकसङ्गहट्ठकथायो पोराणट्ठकथानं भासापरिवत्तनभावादीहि गुणेहि सकललोके पत्थटायेव होन्ति.

एत्तावता च पन किमत्थं कतोतिआदीनम्पि पञ्हानमत्थो वित्थारेन विभावितोव होतीति.

तत्थेतं वुच्चति –

१.

सम्भावनीयस्स ¶ सुधीवरान-

मादत्तधीरिट्ठपदस्स यस्स;

पञ्ञादिजाता ललिता गुणाभा,

भातेव लोकम्हि सतं मुदाय.

२.

स बुद्धघोसाव्हथिरग्गधीमा,

विदून’मच्चन्तसमादरा’दा;

सभावजं ब्यत्तिससत्तिलद्धं,

सिरिं दधातेव सुबुद्धघोसो.

३.

‘‘सम्बुद्धसेट्ठे परिनिब्बुतस्मिं,

संवच्छरानं दसमे सतम्हि;

जातो’’ति ञातो विबुधेहि बुद्ध-

घोसङ्कुरो पत्तसमत्तमानी.

४.

विञ्ञू विदू’मस्स पुमग्गजाते,

सञ्जाततं दक्खिणदेसभागे;

रम्मे’न्दियस्मिं सुजनाकरस्मिं,

तत्तत्थमेसीन’मयं पतीति.

५.

मोरण्डगामम्हि स तत्थ जातो,

पुञ्ञानितो विप्पकुलम्हि सम्मा;

सूरस्स लोकत्थसमावहत्थं,

उप्पज्जनाया’द्यरुणोव रंसि.

६.

संवद्धबुद्धी स पवुद्धिपत्तो,

आराधयं ञातिगणं सदेव;

वेदेसु विज्जासु तदञ्ञसिप्प-

गन्थेस्वनायासपवीणता’गा.

७.

सुद्धाधिमुत्तीन विवेचनेन,

सारानु’सारोति विविञ्चमानो;

वेदेस्व’सारत्त’मबुज्झि यस्मा,

तुट्ठिं स नापज्जि सुतेन सेन.

८.

अन्वेसतो ¶ तस्स पसत्थसारं,

सद्धम्मसारो सवनेन लद्धो;

निन्नोव बुद्धस्स स सासनम्हि,

उस्साहजातो’पगमाय तत्थ.

९.

धम्माभिलासी स विरोचि तत्थ,

संलद्धपब्बज्जुपसम्पदोव;

थेरे’पसङ्कम्म विसुद्धथेर-

वादीनिकायम्हि पतीतपञ्ञे.

१०.

तदा हि’सुं दक्खिणइन्दियम्हि,

निवासिनो थेरियवंसजाता;

तदञ्ञवादी च मुनी मुनिन्द-

मतं यथालद्धि पकासयन्ता.

११.

सद्धम्मसाराधिगमाय भिय्यो,

पाळिं समुग्गण्हि जिनेरितं, सा;

जिव्हग्गलीला मनसा’सिता’स्स,

लक्खीव पुञ्ञे निवसं बभास.

१२.

एवं तमुग्गण्ह’मबोधि सम्मा,

‘‘एकायनोयं सुविसुद्धियाति;

मग्गो विवट्टाधिगमाय’’ तत्थो-

य्योगं समापज्जि परं परत्ती.

१३.

सभावपञ्ञा महती च सत्थ-

न्तरोपलद्धा विपुलाव विज्जा;

तेनस्स बुद्धोत्तिसमुद्दतिण्णे,

अकिच्छसाधित्तपभाव’मञ्ञा.

१४.

बुद्धस्स कित्तीव सुकित्तिघोसो,

वत्तिस्सते’च्चस्स गरू वियत्ता;

अत्थान्वितं नाममकंसु बुद्ध-

घोसोति सम्बुद्धमतङ्गतस्स.

१५.

मयूरदूतव्हयपट्टनस्मिं,

निवस्स ¶ कञ्जीव्हपुरादिके च;

स अन्धकाख्यातसदेसियट्ठ-

कथं समुग्गण्हि समाहितत्तो.

१६.

तावत्तकेनस्स सुमेधसस्सा-

सन्तुट्ठचित्तस्स ततुत्तरिम्पि;

सम्बुद्धवाणीसु समत्तमत्थं,

अञ्ञातुमिच्छा महती अजायि.

१७.

महामहिन्दादिवसीवरेभि,

समाभता याट्ठकथा ससारा;

सथेरवादा सुविनिच्छया च,

तदा विभाता वत लङ्कया’सुं.

१८.

पवत्तिमेतं विदिय’स्स मेत-

दहोसि ‘‘यं नून’भिरामलङ्कं;

अलङ्करोन्तिं रतनाकरंव,

उपेच्च सिक्खे’ट्ठकथा महन्ती.

१९.

ता भासया सीहळिकाय रच्चा,

तन्तिं समारोप्य नवं करेय्यं;

एवञ्हि देसन्तरियान बुद्ध-

मानीनमत्थं खलु साधये’’ति.

२०.

पुरे च लङ्कागतसासनं यं,

सुनिम्मलिन्दूव हिमादिमुत्तो;

पभासि, किस्मिञ्चि तदाञ्ञवाद-

मनाकुलं ता’कुलतं जगाम.

२१.

जिनम्हि निब्बानगते हि वस्स-

सतन्तरे सासनिका समग्गा;

समानवादा जिनसासनम्हि,

न कोचि भेदोपि तदा अहोसि.

२२.

पच्छा ¶ च सद्धम्मदुमाहतेभ्य-

धम्मेहि वातेहि पटिच्च पापे;

जातेहि संविग्गमना समाय,

थेरे’स’मुय्योगमकंसु दळ्हं.

२३.

सङ्गीतियो कच्च सुपेसलेहि,

निग्गय्हमानापि थिरेहि दळ्हं;

छिन्नापि रुक्खा’स्सु पुनोरुहावा-

कासुंव धम्मं विनया’ञ्ञथा ते.

२४.

नानागणा ते च अनेकवादा,

संसग्गकारा जिनसासने’सुं;

वादेभि अञ्ञेहि जिनेरितेभ्य-

सुद्धायमाना विनयञ्च धम्मं.

२५.

वादा च वादी पिटकानि तेसं,

लङ्कं मलङ्कंव करं’पयाता;

पटिग्गहेसुं प्यभयादिवासी,

नाञ्ञे महाख्यातविहारवासी.

२६.

यथा च बुद्धाभिहिताव पाळि,

तदत्थसारा च वसीभि ञाता;

न ‘‘तेध वोक्कम्म विसुद्धथेर-

वादी विवादी’’ति पवत्ति काचि.

२७.

जीवंव रक्खिंसु सथेरवादं,

तन्तिं तदत्थञ्च सनिण्णयं ते;

तस्मा न सक्काव तदञ्ञवादि-

वादेभि हन्तुं चु’पगन्तुमद्धा.

२८.

तंवादसंभेदभयञ्च मञ्ञया,

‘‘दुद्धारवेलापि भयेहि तन्तिनं;

सम्मोहतादीहि भवे’’ति पोत्थकं,

आरोप्य सम्मा परिपालयिंसु ते.

२९.

तदा ¶ हि तेसं पटिबाहने रण-

विदंव सिक्खं जिनसासनद्धरो;

स बुद्धघोसो मुनि बुद्धिपाटवो,

गतो’सि दीपं वरतम्बपण्णिकं.

३०.

लङ्कं उपेच्च स महाट्ठकथाण्णवस्स,

पारं परं वितरणे थिरनिण्णयोव;

संसुद्धवंसजनिवासमहाविहार-

मागा’म्बरंव उदयिन्दु’पसोभयन्तो.

३१.

तस्मिञ्च दक्खिणदिसाय वसी स तत्थ,

सोभं पधानघरसञ्ञितपारिवेणं;

पासाद’मुत्तम’मका सुजनेभि सेब्यं,

सन्तो महानिगमसामि सुचिण्णधम्मो.

३२.

सम्मा च योगमकरी बुधबुद्धमित्त-

थेरादि’मन्त’मुपयात’मनूनतन्ते;

संसेवितो विविधञायपबुद्धिया सो,

सुत्ताभिधम्मविनयट्ठकथास्व’नूनं.

३३.

वेय्यत्तियं’स समये समयन्तरे च,

पञ्ञाय दिस्व विवटंव निहीतमत्थं;

थेरा समग्गजिनमग्गमता’मतासी,

मञ्ञिंसु नग्घरतनंव सुदुल्लभन्ति.

३४.

विञ्ञाय धम्मविनयत्थयथिच्छदाने,

चिन्तामणीति सुनिरूपितबुद्धिरूपं;

यस्से’त्थ निच्छितमनो कविसङ्घपाल-

त्थेरुत्तमो जनहिताय नियोजयी तं.

३५.

‘‘किञ्चापि सन्ति विविधा पटिपत्तिगन्था,

केसञ्चि किञ्चि तु न बुद्धमतानुसारं;

संसुद्धथेरसमयेहि च ते विरुद्धा,

तस्मा करोतु विमलं पटिपत्तिगन्थं’’.

३६.

मेत्तादयम्बुदवनं ¶ जनभूमियं’स,

संवस्सते च’रियमग्गगमग्ग’मग्गं;

संसोधनत्थ’मिति ‘‘पत्थितथेरआसं,

पूरेस्स’मेत’’मिति कासि विसुद्धिमग्गं.

३७.

वीरानुकम्पसतियोजितबुद्धिमा सं,

ओग्गय्ह, गय्ह च’ खिलट्ठकथा सतन्ती;

सारं सखेद’मनपेक्खिय साधुकं स,

यं’कासि, कं नु’ध न रोचयते बुधं सो.

३८.

वुत्ते’त्थ भावपरमाव सभावधम्मा,

वत्थू च पीतिसुखवेदनिया’निताव;

पुण्णोव सब्बपटिपत्तिनयेहि चेसो,

पुप्फाभिफुल्लपवनंव विराजते’यं.

३९.

यं पस्सियान परिकप्पिय रत्नसार-

गब्भं विसुद्धि’मभियातु’मपेक्खमाना;

तं सार’मादियितु’मासु पयुत्तयुत्ता,

दिस्वा हि नग्घरतनं ननु वज्जये न.

४०.

कन्ता पदावलि’ह तन्तिनयानुसारा,

सारातिसारनयपन्ति पसिद्धसिद्धा;

अत्था च सन्तिनुगमाय तुलायमानो-

य्योगेन मेत्थ हि विना पटिपत्ति का’ञ्ञा.

४१.

आभाति सत्थु चतुरागममज्झगो’यं-

अत्थे पकासयिह भाणुव नेकदब्बे;

मेधाविपीतिजननं’स विधान’मेतं-

तीतञ्हि याव कविगोचर’मस्स ञाणं.

४२.

दिट्ठाव तिक्खमति’मस्स विसुद्धिमग्ग-

सम्पादनेन समुपात्तसुधीपदेभि;

तेनस्स बुद्धवचनत्थविभावनाय,

पब्यत्तसत्ति विदिता विदितागमेहि.

४३.

ख्यातं ¶ कवीभि’धिगतं यस’मावहेन,

थेरस्स सुद्धमतिबुद्धसिरीव्हयस्स;

लोकत्थ’माविकतपत्थन’मादियान,

सामञ्च निन्नहदयेन जनान’मत्थे.

४४.

सम्बुद्धभावविदितेनि’मिना समन्त-

पासादिकाव्हविनयट्ठकथा पणीता;

सूरो’दिते विय तया विनयत्थमूळ्हा-

मूळ्ही भवन्ति जिननीतिपथा’धिगन्त्वा.

४५.

लङ्का अलङ्कतिकताव महामहिन्द-

त्थेरेन या च विनयट्ठकथा’भता, तं;

कन्ताय सीहळगिराय गिरायमाना,

अच्चन्तकन्तबहुला मुनयो पुरा’सुं.

४६.

अञ्ञा च पच्चरि-कुरुन्दिसमञ्ञितादी,

दीपं पदीपकरणी विनयम्हि या’सुं;

सङ्गय्ह तास’मखिलत्थनये च थेर-

वादे च मुत्तरतनानिव मेकसुत्ते.

४७.

ताहेव सीहळनिरुत्तियुतञ्च तन्तिं,

आरोपियान रुचिरं अथ वित्थतञ्च;

मग्गं समासनवसेन यथा समत्त-

लोकेन या गरुकता कतमानना’का.

४८.

सुद्धन्वयागथविरा च विसुद्धथेर-

वादी विसुद्धविनयागमपुज्जधम्मा;

सुद्धं करिंसु न यथे’न्ति तदञ्ञवादा,

इच्चादि’माविकरिया’सि निदानमेत्थ.

४९.

यस्मिं मनुञ्ञपदपन्ति सुभा सुबोधा,

अत्था च पीतिसम’विम्हयतादिभावी;

चित्रा विचित्रमतिजा कविचित्तहंसा,

तस्मा रसायति तदत्थनुसारिनं यं.

५०.

अच्चन्तसागरनिभा ¶ विविधा नयत्था,

सन्ते’त्थ या’सु विनयट्ठकथा पुराणा;

तासं यथाभिमतपन्ति सुतन्तिकत्तं,

किञ्हि’स्स किञ्चि बलवीर’पटिच्च कातुं.

५१.

उय्योग’मस्स करुणापहितं पटिच्च,

पञ्ञासहायसहितं बलवञ्च दळ्हं;

लद्धाव या निखिललोकमनुञ्ञभूता,

मेधाविनं’नुसभगाव विराजते सा.

५२.

विञ्ञूभि या ‘‘विनयसागरपारतिण्णे’’,

सम्भाविता ‘‘सुतरणायति सीघवाहा’’;

इच्चाभिमानितगुणा’ज्ज रराज याव,

किं यं थिरं लहु विनस्सति दुप्पसय्हं.

५३.

‘‘या ब्यापिनी’खिलनयस्स सुबोधिनी च,

सोतूभि सेवितसदातनधम्मरङ्गं;

कत्वान लोकपहिते सगुणे दधन्ती,

ठातू’’ति नट्ठ’मुपगा’ट्ठकथा पुराणा.

५४.

जनाभिसत्ताय दयाय चोदितो,

विछेज्ज खेदं विनयम्हि साधुनं;

अथागमान’ट्ठकथाविधानने,

धुरं दधातुं’भिमुखा’सि सो सुधी.

५५.

पद्मंव फुल्लाभिनतं सुभाणुभं,

लद्धान फुल्लं’तिसया’सि चेतना;

दाठादिनागेन थिरग्गधीमता,

या पत्थिता’रब्भ तदत्थसिज्झने.

५६.

दीघागमत्थेसु सबुद्धिविक्कम-

मागम्म साराधिगमा सुमङ्गल-

नामानुगन्ताव विलासिनीति या,

संवण्णना लोकहिताय सम्भवी.

५७.

गम्भीरमेधाविसयागमम्हिपि,

¶ आरब्भ बुद्धिं’स सुनिम्मलीकता;

विञ्ञातबुद्धाभिमता बहू जना,

अञ्ञत्थसाधा महतञ्हि बुद्धियो.

५८.

सा’नीतविद्वाक्खिमना मनायिता,

कन्तागमे धम्मसभायते सदा;

तेनेव मञ्ञे’ह तिरोकता तया,

किं सीघग’ञ्ञत्र पथञ्ञगामिका.

५९.

पत्वा महन्ता’म्बर’मम्बुदो यथा,

लोकत्थसाधीपि महासयं मति;

तस्मा’स्स सिद्धा’ट्ठकथापरम्परा,

बुद्धिप्पदानाय’ हुवुं नवा नवा.

६०.

बुद्धादिमित्तं थिरसेट्ठ’मुद्दिसं,

संवण्णना चासि पपञ्चसूदनी;

‘‘सब्बत्थसारे जिनमज्झिमागमे,

लद्धान पीतिं सुजना समेन्तु’’ति.

६१.

उप्पज्जि ‘‘सारत्थपकासिनी’’ति या,

सा जोतिपालस्स यथाभिलासितं;

लोकं यथानामिकसारदीपना,

भाता’सि सम्मापटिपन्नपन्थदा.

६२.

सम्पूरि कातुं’स मनोरथो यया,

अङ्गुत्तरन्तागममत्थवण्णना;

तन्नामधेय्यं सुजनञ्च जीवकं,

सो जोतिपालञ्च पसत्थधीतिमं.

६३.

उद्दिस्स यं’कासि पवीणतं करं,

बुद्धादिसंसेब्यसुमग्गदस्सने;

सद्धम्मपुप्फान’ वनायिता’सि सा,

विद्वालिसङ्घस्स सदावगाहणा.

६४.

येन’त्तलद्धिं ¶ पजहन्तु साधवो,

दुब्बोधधम्मे च सभावदीपने;

बुज्झन्तु, इच्चासि’भिधम्मसागरो,

तत्था’वतारं सुकरेन साधिनी.

६५.

मेधाविलासा’स्स’हुवु’ट्ठसालिनी,

कन्ता च सम्मोहविनोदनीति या;

ता बुद्धघोसोति सतुल्यनामिक-

मागम्म जाता सुजनत्थसाधिनी.

६६.

अञ्ञा च पञ्चट्ठकथा’भिधम्मजे,

भावे निधाये’त्थ यथा’स्सु सुत्तरा;

गम्भीरमत्थेसु पविद्धबुद्धितं,

सम्पादनी सत्थु’तुलत्तदीपनी.

६७.

सोणाव्हथेरस्स पटिच्च याचनं,

ता याय कङ्खा वितरन्ति भिक्खवो;

या पातिमोक्खम्हि, तदन्वयाव्हयं,

संवण्णनं’कासि स धीमतं वरो.

६८.

समत्तलोकट्ठविभाविरञ्जना,

कते’मिना धम्मपदस्स वण्णना;

थिरं समुद्दिस्स कुमारकस्सपं,

सतं मनं पीतिपफुल्लितं यया.

६९.

अञ्ञा’स्स या सुत्तनिपात-खुद्दक-

पाठत्थदाता परमत्थजोतिका;

संवण्णना जातकतन्ति मण्डना,

ता होन्ति लोकस्स हितप्पदीपिनी.

७०.

निस्सेसलोकम्हि पचारणिच्छा,

लङ्कागतान’ट्ठकथान’मद्धा;

या थेरवादीन’मपूरि बुद्ध-

घोसग्गथेरस्स पभावलद्धा.

७१.

भद्दं’स ¶ नामञ्च, गुणा मनुञ्ञा,

समग्गगामी’नुकरोन्ति तेसं;

ससङ्कसूरा हि सदातना ये,

लोकं पमोदञ्च करं चरन्ति.

७२.

सुबुद्धघोसस्स विभाविसत्ति-

पब्यत्ति’मारब्भ थिरासभस्स;

समग्गलोको हि सुथेरवादे,

मानं पवड्ढेसि अनञ्ञजातं.

७३.

बुद्धोति नामं भुवनम्हि याव,

सुबुद्धघोसस्स सिया न किञ्हि;

लद्धा हि साधूभि महोपकारा,

महग्घवित्तानिव तंसकासा.

७४.

खीयेथ वण्णो न समुद्धटोपि,

नन्व’स्स नेका हि गुणा अनन्ता;

को नु’द्धरेय्या’ खिलसागरोदे,

तथापि मञ्ञन्तु सुधी सदा तेति.

छट्ठसङ्गीतिभारनित्थारकसङ्घसमितिया पकासितायं

विसुद्धिमग्गनिदानकथा निट्ठिता.