अञ्ञ > वंस-गन्थ-सङ्गहो

विनयपिटकं, अभिधम्मपिटकं सुत्तन्तपिटकन्ति. तत्थ कतमं विनय पिटकं? पाराजिककण्डं, पाचित्तियकण्डं, महावग्गकण्डं, चुल्लवग्गकण्डं, परिवारकण्डन्ति. इमानि कण्डानि विनयपिटकं नाम.

कतमं अभिधम्मपिटकं? धम्मसङ्गणी-पकरणं, विभङ्ग-पकरणं, धातुकथा-पकरणं, पुग्गलपञ्ञत्ति-पकरणं, कथावत्थु-पकरणं, यमक-पकरणं, पट्ठान-पकरणन्ति. इमानि सत्त पकरणानि अभिधम्मपिटकं नाम. कतमं सुत्तन्तपिटकं? सीलक्खन्धवग्गादिकं, अवसेसं बुद्धवचनं सुत्तन्तपिटकं नाम.

कथं निकायतो? निकाया पञ्च विधा होन्ति. दीघनिकायो, मज्झिमनिकायो, संयुत्तनिकायो, अङ्गुत्तरनिकायो, खुद्दकनिकायोति.

तत्थ कतमो दीघ-निकायो? सीलक्खन्धवग्गो, महावग्गो, पाथिकवग्गोति, इमे तयो वग्गा दीघनिकायो नाम. इमेसु तीसु वग्गेसु, चतुतिंस वग्गानि च होन्ति. [चतुतिंसेव सुत्तन्ता, सीलक्खन्धवग्गादिका, यस्स भवन्ति सो येव दीघनिकाय नाम होति.]

कतमो मज्झिमनिकायो? मूलपण्णासो, मज्झिमपण्णासो, उपरिपण्णासोति, इमे तयो पण्णासा मज्झिमनिकायो नाम. इमेसु तीसु पण्णासेसु द्वेपञ्ञासाधिक-सुत्त-सतानि होन्ति [दियड्ढसतसुत्तन्ता, द्वि सुत्तं यस्स सन्तिसो, मज्झिमनिकायो नामो मूलपण्णासमादि होति.]

कतमो संयुत्तनिकायो? सगाथावग्गो, निदानवग्गो, खन्धकवग्गो, सळायतनवग्गो, महावग्गोति, इमे पञ्च वग्गा संयुत्तनिकायो नाम. इमेसु पञ्चसु वग्गेसु द्वासट्ठिसुत्तसत्तसताधिकसत्त-सुत्तसहस्सानि होन्ति. [द्वासट्ठि-सत्त-सतानि, सत्तसहस्सकानि च.] सुत्तानि यस्स होन्ति सो, सगाथादिकवग्गको, संयुत्तनिकायो नामो वेदितब्बो च विञ्ञूनाति.

कतमो अङ्गुत्तरनिकायो? एक्कनिपातो, दुक्कनिपातो, तिक्कनिपातो, चतुक्कनिपातो, पञ्चकनिपातो, छक्कनिपातो, सत्तकनिपातो, अट्ठकनिपातो, नवकनिपातो, दसकनिपातो, एकादसनिपातोति, इमे एकादस निपाता अङ्गुत्तरनिकायो नाम. इमेसु एकादस निपातेसु सत्त-पञ्ञास-पञ्च-सताधिकनव-सुत्त-सहस्सानि होन्ति. [नवसुत्तसहस्सानि, पञ्चसतमत्तानि च, सत्तपञ्ञासाधिकानि, सुत्तानि यस्स होन्ति सो, अङ्गुत्तरनिकायोति, एक्कनिपातकादिकोति.]

कतमो खुद्दकनिकायो? खुद्दकपाठो, धम्मपदं, उदानं, इतिवुत्तकं, सुत्तनिपातो, विमानवत्थु, पेतवत्थु, थेरकथा, थेरीकथा, जातकं, महानिद्देसो, पटिसम्भिदामग्गो, अपदानं, बुद्धवंसो, चरियापिटकं, विनयपिटकं, अभिधम्मपिटकन्ति. इमेसु सत्तरससु गन्थेसु अनेकानि सुत्त-सहस्सानि होन्ति. [अनेकानि सुत्त-सहस्सानि, निद्दिट्ठानि महेसिना, निकाये पञ्चमे इमे, खुद्दके इति विसुतेति.]

कथं अङ्गतो अङ्गहि नव विधं होति? सुत्तं, गेय्यं, वेय्याकरणं, गाथा, उदानं, इतिवुत्तकं, जातकं, अब्भुतधम्मं, वेदल्लन्ति, नवप्पभेदं होति. तत्थ उभतो विभङ्गनिद्देसखन्धकपरिवारा, सुत्तनिपाते, मङ्गलसुत्त, रतनसुत्त, तुवट्टकसुत्तानि. अञ्ञम्पि सुत्तनामकं तथागतवचनं, सुत्तन्ति वेदितब्बं. सब्बं सगाथकं गेय्यन्ति वेदितब्बं. विसेसनसंयुत्तके सकलोपि सगाथकवग्गो, सकलं अभिधम्मपिटकं निगाथकञ्च सुत्तयञ्च अञ्ञम्पि अट्ठहि अङ्गेहि असङ्गहितं बुद्धवचनं तं वेय्याकरणन्ति वेदितब्बं. धम्मपदं, थेरकथा, थेरीकथा, सुत्तनिपाते, नो सुत्तनामिका सुद्धिकगाथा, गाथाति वेदितब्बा. सोमनस्स ञाणमयिकगाथा पटिक-संयुत्ता द्वे असीतिसुत्तन्ता उदानन्ति वेदितब्बा. वुत्तञ्हेतं भगवतातिआदिनयप्पवत्ता दसुत्तरसतसुत्तन्ता, इतिवुत्तकन्ति वेदितब्बा. अपण्णकजातकादीनि पञ्ञासादिकानि. पञ्चजातकसतानि, जातकन्ति वेदितब्बं. चत्तारो मे भिक्खवे अच्छरिया अभूतधम्मा, आनन्देतिआदिनयप्पवत्ता सब्बेपि अच्छरिय अभूतधम्मपटिसंयुत्ता सुत्तन्ता अभूतधम्मन्ति वेदितब्बा. चुल्लवेदल्ल, महावेदल्ल, सम्मादिट्ठि, सक्कपञ्ह, सङ्खारभाजनिय, महापुण्णमसुत्तन्तादयो सब्बेपि वेदञ्च तुट्ठिञ्च लद्धा [पुच्छ] लद्धा पुच्छितसुत्तन्ता, वेदल्लन्ति वेदितब्बा. कतमानि चतुरासीति धम्मक्खन्धसहस्सानि दुजानानि, चतुरासीति धम्मक्खन्धसहस्सानि सचे वित्थारेन कथिस्सं अतिपपञ्चो भविस्सति. तस्मा नय वसेन कथिस्सामि. एकं वत्थु, एको धम्मक्खन्धो, एकं निदानं एको धम्मक्खन्धो, एकं पञ्हा पुच्छन्तं एको धम्मक्खन्धो, एकं पञ्हा विसज्जनं एको धम्मक्खन्धो, चतुरासीति धम्मक्खन्धसहस्सानि केन भासितानि, कत्थ भासितानि, कदा भासितानि, कमारब्भ भासितानि, किमत्थं भासितानि, केन धारितानि, केनाभतानि, किमत्थं परियापुणितब्बानि. तत्रायं विसज्जना, केन भासितानीति? बुद्धानु बुद्धेहि भासितानि. कत्थ भासितानीति? देवेसु च मानुस्सेसु च, भासितानि. कदा भासितानीति? भगवतो धरमानकाले चेव पच्छिमकाले च भासितानि. कतमारब्भ भासितानीति? पञ्चवग्गियादिके वेनेय्य बन्धवे आरब्भ भासितानीति. किमत्थं भासितानीति? तिवज्जञ्च अवज्जञ्च ञत्वा वज्जं पहाय अवज्जे पटिपत्तित्वा निब्बानपरियन्ते. दिट्ठ-धम्मिकसम्परायिकत्थे सम्पापुणितुं.

केन धारितानीति? अनुबुद्धेहि चेव सिस्सानुसिस्सेहि च धारितानि. केना भतानीति? आचरिय परंपरेहि आभतानि. किमत्थं परियापुणितब्बानीति? वज्जञ्च अवज्जञ्च ञत्वा वज्जं पहाय अवज्जे पटिपत्तित्वा निब्बानपरियन्ते दिट्ठधम्मिकसम्परायिकत्थे, संपापुणितुं, यदेवं ताय निब्बानपरियन्ते दिट्ठधम्मिकसम्परायिकत्थे साधिकानि होन्ति. तेव तत्थ केहि अप्पमत्तेन परियापुणितब्बानि धारेतब्बानि धारेतब्बानि वाचेतब्बानि सज्झायं कातब्बानीति [इति चुल्लगन्थवंसे पिटकत्तय दीपको नाम पठमो परिच्छेदो.]

आचरियो पन अत्थि. पोराणाचरिया अत्थि, अट्ठकथाचरिया अत्थि, गन्थकारकाचरिया अत्थि, तिविधनामिकाचरिया. कतमे पोराणाचरिया? पठमसङ्गायनायं पञ्चसता खीणासवा पञ्चन्नं निकायानं नामञ्च अत्थञ्च अधिप्पायञ्च यदञ्च ब्यञ्जन सोधनञ्च अवसेसं किच्चं करिंसु. दुतियसङ्गायनायं सत्तसता खीणासवा तेसंयेव सद्दत्थादिकं किच्चं पुन करिंसु. ततियसङ्गायनायं सहस्समत्ता खीणासवा तेसंयेव सद्दत्थादिकं किच्चं पुन करिंसु. इच्चेवं द्वेसताधिका द्वेसहस्स खीणासवा महाकच्चायनं ठपेत्वा अवसेसा पोराणाचरिया नाम. ये पोराणाचरिया तेयेव अट्ठकथाचरिया नाम. कतमे गन्थकारकाचरिया? महाअट्ठकथिकापेभदअनेकाचरिया गन्थकारकाचरिया नाम. कतमे तिविध नामाचरिया महाकच्चायनो तिविधनामं. कतमे गन्था महाकच्चायनेन कता? कच्चायनगन्थो, महानिरुत्तिगन्थो, चुल्लनिरुत्तिगन्थो, यमकगन्थो, नेत्तिगन्थो, पेटकोपदेसगन्थोति, इमे छ गन्था महाकच्चायनेन कता. कतमे अनेकाचरियेन कता गन्था? महापच्चरिकाचरियो महापच्चरियं नाम गन्थं अकासि. महाकुरुन्दिकाचरियो कुरुन्दि नाम गन्थं अकासि. अञ्ञतरो आचरियो महापच्चरिय गन्थस्स अट्ठकथं अकासि. अञ्ञतरो आचरियो कुरुन्दि गन्थस्स अट्ठकथं अकासि, महाबुद्धघोसा नामचरियो विसुद्धिमग्गो दीघनिकायस्स सुमङ्गलविलासनि नाम अट्ठकथा, मज्झिमनिकायस्स पपञ्चसूदनी नाम अट्ठकथा, संयुत्तनिकायस्स सारत्थप्पकासिनी नाम अट्ठकथा, अङ्गुत्तरनिकायस्स मनोरथपूरणी नाम अट्ठकथा, पञ्चविनय गन्थानं समन्तपासादिका नाम अट्ठकथा, सत्तन्नं अभिधम्मगन्थानं परमत्थकथा नाम अट्ठकथा, पातिमोक्ख संखाताय मातिकाय कङ्खावितरणीति विसुद्धि नाम अट्ठकथा, धम्मपदस्स अट्ठकथा, जातकस्स अट्ठकथा, खुद्दकपाठस्स अट्ठकथा, सुत्तनिपातस्स अट्ठकथा, अपदानस्स अट्ठकथाति, इमे तेरस गन्थे अकासि. बुद्धदत्तोनामाचरियो विनय विनिच्छयो, उत्तरविनिच्छयो, अभिधम्मावतारो, बुद्धवंसस्स मधुरत्थविलासिनी नाम अट्ठकथाति, इमे चत्तारो गन्थे अकासि. आनन्दोनामाचरिया सत्ताभिधम्मगन्थट्ठकथाय मूटीकं नाम टीकं अकासि. धम्मपालाचरियो नेत्तिप्पकरणट्ठकथा, इतिवुत्तकट्ठकथा, उदानट्ठकथा, चरियापिटकट्ठकथा, थेरकथट्ठकथा, थेरीकथट्ठकथा, विमानवत्थुस्स विमलविलासिनि नाम अट्ठकथा, पेतवत्थुस्स विमलविलासिनि नाम अट्ठकथा, विसुद्धिमग्गस्स परमत्थमञ्जूसा नाम टीका, दीघनिकायस्स अट्ठकथादीनं चतुन्नं अट्ठकथानं लीनत्थप्पकासनि नाम टीका, जातकट्ठकथाय लीनत्थप्पकासनि नाम टीका, नेत्तिपकरणट्ठकथाय टीका, बुद्धवंसट्ठकथाय परमत्थदीपनी नाम टीका, अभिधम्मट्ठकथायटीका लीनत्थवण्णना नाम अनुटीकाति इमे चुद्दस मत्ते गन्थे अकासि.

द्वे पुब्बाचरियानामा चरियानिरुत्ति मञ्जूसं नाम चुल्लनिरुत्ति टीकञ्च महानिरुत्ति सङ्खेपञ्च अकंसु. महावजिरबुद्धिनामाचरियो विनयगण्ठिनाम पकरणं अकासि. दीपङ्करसङ्खातो विमलबुद्धि नामाचरियो मुखमत्तदीपनी नामकं न्यासप्पकरणं अकासि. चुल्लवजिरबुद्धि नामाचरियो अत्थब्याख्यानं नाम पकरणं अकासि.

दीपङ्करो नामाचरियो रूपसिद्धि पकरणं, रूपसिद्धि टीकं, सम्पपञ्च सुत्तञ्चेति तिविधं पकरणं अकासि. आनन्दाचरियस्स जेट्ठसिस्सो धम्मपालो नामाचरियो सच्चसङ्खेपं नाम पकरणं अकासि. कस्सपो नामाचरियो मोहविच्छेदनी, विमतिच्छेदनी, दसबुद्धवंसो, अनागतवंसोति, चतुविधं पकरणं अकासि.

महानामो नामाचरियो, सद्धम्मपकासनी नाम पटिसम्भिदामग्गस्स अट्ठकथं अकासि. दीपवंसो, थूपवंसो, बोधिवंसो, चूलवंसो, महावंसो, पटिसम्भिदामग्गट्ठकथा गण्ठि चेति इमे छ गन्था महानामाचरि विसुं विसुं कता.

नवो महानामो नामाचरियो नवं महावंस नाम पकरणं अकासि. उपसेनो नामाचरियो सद्धम्मपज्जोतिकं नाम महानिद्देसस्स अट्ठकथं अकासि. मोग्गलानो नामाचरियो मोग्गलानब्याकरणं नाम पकरणं अकासि. सङ्घरक्खितो नामाचरियो, सुबोधालङ्कारं नाम पकरणं अकासि. वुत्तोदयकारो नामाचरियो वुत्तोदयं नाम पकरणं अकासि. धम्मसिरि नामाचरियो खुद्दकसिक्खं नाम पकरणं अकासि. पुराणखुद्दसिक्खाय टीका, मूलसिक्खा चेति, इमे द्वे गन्था द्वेहाचरियेहि विसुं विसुं कता.

अनुरुद्धो नामाचरियो परमत्थविनिच्छयं, नामरूपपरिच्छेदं, अभिधम्मत्थसङ्गहं चेति तिविधं पकरणं अकासि. खेमो नामाचरियो खेमं नाम पकरणं अकासि. सारिपुत्तो नामाचरियो विनयट्ठकथाय सारत्थदीपनी नाम टीकं; विनयसङ्गहपकरणं, विनयसङ्गहस्सटीकं; अङ्गुत्तरट्ठकथाय सारत्थमञ्जूसं नाम नवं टीकं; पञ्चिका टीकञ्चेति, इमे पञ्च गन्थे अकासि. बुद्धनागो नामाचरियो विनयत्थमञ्जूसं नाम कङ्खावितरणीया टीकं अकासि. नवो मोग्गलानो नामाचरियो अभिधानप्पदीपिकं नाम पकरणं अकासि. वाचिस्सरो नामाचरियो महासामि नाम सुबोधालङ्कारस्स टीका, वुत्तोदय विवरणं, सुमङ्गलप्पसादनि नाम खुद्दसिक्खाय टीका; सम्बन्धचिन्ता, सम्बन्धचिन्ताय टीका; बालावतारो, मोग्गलानब्याकरणस्स पञ्चिकाय टीका; योगविनिच्छयो, विनयविनिच्छयस्स टीका, उत्तरविनिच्छयस्स टीका, नामरूप-परिच्छेदस्स विभागो, सद्दत्थस्स पदरूपविभावनं; खेमस्स पकरणस्स टीका, सीमालङ्कारो, मूलसिक्खाय टीका, रूपविभागो, पच्चयसङ्गहो, सच्चसङ्खेपस्स टीका चेति, इमे अट्ठारस गन्थे अकासि.

सुमङ्गलो नामाचरियो अभिधम्मावतारस्सटीकं, अभिधम्मत्थसङ्गहस्सटीकञ्च दुविधं पकरणं अकासि. बुद्धपियो नामाचरियो सारत्थसङ्गहं नाम पकरणं अकासि. धम्मकित्ति नामाचरियो दन्तधातु पकरणं अकासि. मेधङ्करो नामाचरियो जिनचरितं नाम पकरणं अकासि. बुद्धरक्खितो नामाचरियो जिनलङ्कारं, जिनलङ्कारस्स टीकञ्चाति दुविधं पकरणं अकासि. उपतिस्सो नामाचरियो अनागतवंसस्स अट्ठकथं अकासि.

कङ्खावितरणीया लीनत्थप्पकासिनि, निसन्देहो, धम्मानुसारणी, ञेय्यासन्तति, ञेय्यासन्ततिया टीका, सुमतादावतारो, लोकपञ्ञत्ति पकरणं, तथागतुप्पत्ति पकरणं, नलाटधातु वण्णना, सीहळवत्थु, धम्मदीपको, पटिपत्तिसङ्गहो, विसुद्धिमग्गण्ठि, अभिधम्मगण्ठि, नेत्तिपकरणगण्ठि, विसुद्धिमग्गचुल्लनवटीका, सोतब्बमालिनी, पसादजननी, ओकासलोको, सुबोधालङ्कारस्स नव टीका चेति, इमे वीसति गन्था वीसताचरियेहि विसुं विसुं कता.

सद्धम्मसिरि नामाचरियो सद्दत्थभेदचिन्ता नाम पकरणं अकासि. देवो नामाचरियो सुमन कूटवण्णनं नाम पकरणं अकासि. चुल्लबुद्धघोसो नामाचरियो सोतत्थकिनिदानं नाम पकरणं अकासि. रट्ठपालो नामाचरियो मधुरसङ्गाहणीकित्ति नाम पकरणं अकासि. सुभूतचन्दो नामाचरियो लिङ्गत्थविवरण-पकरणं अकासि. अग्गवंसो नामाचरियो सद्दनीति पकरणं नाम अकासि. वजिरबुद्धि नामाचरियो महाटीकं नाम न्यासपकरणटीकं अकासि. गुणसागरो नामाचरियो मुखमत्तसारं, मुखमत्तसारस्स टीकञ्च दुविधं पकरणं अकासि. अभयो नामाचरियो सद्दत्थभेदचिन्ताय महाटीकं अकासि. ञाणसागरो नामाचरियो लिङ्गत्थविवरणप्पकासनं नाम पकरणं अकासि. अञ्ञतरो आचरियो गूळत्थटीकं, बालप्पबोधनञ्च दुविधं पकरणं अकासि. अञ्ञतरो आचरियो सद्दत्थ-भेदचिन्ताय मज्झिमटीकं अकासि. उत्तमो नामाचरियो बालावतारटीकं, लिङ्गत्थविवरणटीकञ्च दुविधं पकरणं अकासि. अञ्ञतरो आचरियो सद्दत्थभेदचिन्ताय नव-टीकं अकासि. एको अमच्चो अभिधानप्पदीपिकायटीकं, गण्ठिपकरणस्स दण्डीप्पकरणस्स मागधभूतं टीकं, कोलद्धजनस्स सकटभासाय कतटीकञ्च तिविधं पकरणं अकासि. धम्मसेनापति नामाचरियो कारिकं, एतिमासपिदीपनी, मनोहारञ्च तिविधं पकरणं अकासि. अञ्ञतरो आचरियो कारिकाय टीकं अकासि. अञ्ञतरो आचरियो एतिमासपिदीपिकाय टीकं अकासि.

अञ्ञतरो आचरियो सद्दबिन्दु नाम पकरणं अकासि. सद्धम्मगुरु नामाचरियो सद्दवुत्तिप्पकासकं नाम पकरणं अकासि. सारिपुत्तो नामाचरियो सद्दवुत्तिप्पकासकस्स टीकं अकासि. अञ्ञतरो आचरियो कच्चायनसारं नाम पकरणं कच्चायनसारस्स टीकञ्च दुविधं पकरणं अकासि. नवो मेधङ्करो नामाचरियो लोकदीपकसारं नाम पकरणं अकासि. अग्गपण्डितो नामाचरियो लोकुप्पत्ति नाम पकरणं अकासि. चीवरो नामाचरियो जङ्घदासकस्स टीकं अकासि. मातिकत्थदीपनी, अभिधम्मत्थसङ्गहवण्णना, सीमालङ्कारस्सटीका, विनयसमुट्ठानदीपनी टीका, गण्ठि सारो, पट्ठानगणना नयो, सुत्तनिद्देसो, पातिमोक्खो, चेति, इमे अट्ठ गन्थे सद्धम्मजोतिपालाचरियो अकासि. विमलबुद्धि नामाचरियो अभिधम्म-पन्नरसट्ठानं नाम पकरणं अकासि. नवो विमलबुद्धि नामाचरियो सद्दसारत्थजालिनी, सद्दसारत्थजालिनिया टीका, वुत्तोदय टीका, परमत्थमञ्जूसा नाम अभिधम्मसङ्गहटीकाय अनुटीका दसगण्ठिवण्णना, मागधभूताविदग्गमुखमण्डनटीका चेति इमे छ गन्थे अकासि. अञ्ञतरो आचरियो पञ्चपकरणटीकाय नवानुटीकं अकासि. अरियवंसो नामाचरियो अभिधम्मसङ्गह-टीकाय [परमत्थ] मणिसारमञ्जूसं नाम नवानुटीकं अकासि. अभिधम्मत्थसङ्गहस्स टीका, पेटकोपदेसस्स टीका, चतुभाणवारस्स अट्ठकथा, महासारपकासनी, महादीपनी, सारत्थदीपनी गति पकरणं, हत्थसारो, भुम्मसङ्गहो, भुम्मनिद्देसो, दसवत्थुकायविरतिटीका, जोतना निरुत्ति, विभत्तिकथा, कच्चायनविवरणा, सद्धम्ममालिनी, पञ्चगति वण्णना, बालचित्तपबोधनं, धम्मचक्कसुत्तस्स नवट्ठकथा, दन्तधातु पकरणस्स टीका चेति, इमे वीसति गन्था नानाचरियेहि कता, अञ्ञानि पन पकरणानि अत्थि.

कतमानि सद्धम्मो पायनो, बालप्पबोधनपकरणस्स टीका च, जिनालङ्कारपकरणस्स नवटीका च, लिङ्गत्थविवरणं, लिङ्गविनिच्छयो; पातिमोक्खविवरणं, परमत्थकथाविवरणं, समन्तपासादिका विवरणं, चतुभाणवारट्ठकथा विवरणं, अभिधम्मत्थसङ्गहविवरणं, सच्चसङ्खेपविवरणं, सद्दत्थभेदचिन्ताविवरणं, सद्दवुत्तिविवरणं, कच्चायनसारविवरणं, अभिधम्मत्थसङ्गहस्स टीका विवरणं, महावेस्सन्तराजातकस्स विवरणं, सक्काभिमतं, महावेस्सन्तरजातकस्स नवट्ठकथा, पठम संबोधि, लोकनेत्ति च, बुद्धघोसाचरियनिदानं मिलिन्दपञ्हा वण्णना, चतुरा रक्खा, चतुरक्खाय अट्ठकथा, सद्दवुत्तिपकरणस्स नवटीका, इच्चेवं पञ्चवीसति पमाणानि पकरणानि लङ्को दीपादीसुट्ठानेसु पण्डितेहि कतानि अहेसुं, सम्बुद्धेगाथा च, नरदेव नाम गाथा च, दातवे चीरत्ति गाथा च, वीसति ओवादगाथा च, दानसत्तरि, सीलसत्तरि, सप्पादानवण्णना, अनन्तबुद्धवन्दनगाथा च, अट्ठवीसति बुद्धवन्दनगाथा च, अतीतानागतपच्चुप्पन्नवन्दनगाथा च, असीतिमहासावकवन्दनगाथा च, नवहारगुणवण्णना चाति, इमे बुद्धपणाम-गाथादिका गाथा यो पण्डितेहि लङ्कादीपादिसुट्ठानेसु कता अहेसुं [इति चुल्लगन्थवंसे गन्थकारकाचरिय दीपको नाम दुतियो परिच्छेदो]

३. आचरियानं सञ्जातट्ठानपरिच्छेदो

आचरियेसु च अत्थि जम्बुदीपिकाचरिया अत्थि, लङ्कादीपिकाचरिया. कतमे जम्बुदीपिकाचरिया? कतमे लङ्कादीपिकाचरिया? महाकच्चायनो जम्बुदीपिकाचरियो सो हि अवन्तिरट्ठे उज्जेनी नगरे चन्दपज्जोतस्स नाम रञ्ञो पुरोहितो हुत्वा कामानं आदीनवं दिस्वा, घरावासं पहाय सत्थुसासने पब्बज्जित्वा हेट्ठा वुत्तप्पकारे गन्थे अकासि. महाअट्ठकथाचरियो जम्बुदीपिको, महापच्चरिकाचरियो, महाकुरुन्दिकाचरियो, अञ्ञतरो आचरिया द्वेति इमे च भूवाचरिया. लङ्कादीपिकाचरिया नाम ते किर बुद्धघोसाचरियस्स पूरे भूताचरिये काले अहेसुं. महाबुद्धघोसाचरियो जम्बुदीपिको. सो किर मगधरट्ठे घोसकगामे रञ्ञो पुरोहितस्स केसि नाम ब्राह्मणस्स पुत्तो, सत्थुसासने पब्बज्जित्वा लङ्कादीपं गतो हेट्ठा वुत्तप्पकारे गन्थे अकासि.

बुद्धदत्ताचरियो, आनन्दाचरियो, धम्मपालाचरियो, द्वे बुब्बाचरियो, महावजिर-बुद्धाचरियो, चुल्लवजिर-बुद्धाचरियो, विमलबुद्धसङ्खातो दीपङ्कराचरियो, चुल्लदीपङ्कराचरियो, चुल्लधम्मपालाचरियो, कस्सपाचरियोति इमे एकादसचरिया जम्बुदीपिका हेट्ठा वुत्तपकारे गन्थे अकंसु. महानामाचरियो, अञ्ञतराचरिया, चुल्लमहानामाचरियो, उपसेनाचरियो, मोग्गलानाचरियो, सङ्घरक्खिताचरियो, वुत्तोदयकाराचरियो, धम्मसिराचरियो, अञ्ञतरा द्वाचरिया, अनुरुद्धाचरियो, खेमाचरियो, सारिपुत्ताचरियो, बुद्धनागाचरियो, चुल्लमोग्गलानाचरियो, वाचिस्सवाचरियो, सुमङ्गलाचरियो, बुद्धपियाचरियो, धम्मकित्ति आचरियो मेधङ्कराचरियो, बुद्धरक्खिताचरियो, उपतिस्सा चरियो, अञ्ञतरा वीसताचरिया, सद्धम्मसिराचरियो, देवाचरियो, चुल्लबुद्धघोसाचरियो, सारिपुत्ताचरियो, रट्ठपालाचरियोति इमे द्वे पञ्ञासाचरिया लङ्कादीपिकाचरिया नाम. सुभूतचन्दाचरियो, अग्गवंसाचरियो, नवो वजिरबुद्धाचरियो, गुणसागराचरियो, अभयाचरियो, ञाणसागराचरियो, अञ्ञतरा द्वाचरिया, उत्तमाचरियो, अञ्ञतरो आचरियो, अञ्ञतरो महामच्चो, धम्मसेनापताचरियो, अञ्ञतरा तयो आचरिया, सद्धम्मगुरु आचरियो, सारिपुत्ताचरियो, अञ्ञतरो एका आचरियो, मेधङ्कराचरियो, अग्गपण्डिताचरियो, चीवराचरियो, सद्धम्मजोतिपालाचरियो, विमलबुद्धाचरियोति इमे तेवीसति आचरिया जम्बुदीपिका हेट्ठा वुत्तप्पकारे गन्थे पुक्काम सङ्खाते अरिमद्दन नगरे अकंसु.

नवोविमलबुद्धाचरियो जम्बुदीपिको हेट्ठा वुत्तप्पकारे गन्थे पंयनगरे अकासि. अञ्ञतराचरियो अरियवंसाचरियोति इमे द्वाचरिया जम्बुदीपिका हेट्ठा वुत्तप्पकारे गन्थे अति [नवि] पुरे अकंसु, अञ्ञतरा वीसताचरिया जम्बुदीपिका हेट्ठा वुत्तप्पकारे गन्थे किञ्चि पुरादिघरे अकंसु.

[इति चुल्लगन्थवंसे आचरियानं सञ्जातट्ठान दीपको नाम ततियो परिच्छेदो.]

गन्था पन सिया आयाचनेन आचरियेहि कता, सिया अनायाचनेन आचरियेहि कता. कतमे गन्था आयाचनेन, कतमे अनायाचनेन कता? महाकच्चायन गन्थो, महाअट्ठकथा गन्थो, महापच्चरिय गन्थो, महाकुरुन्दि गन्थो, महापच्चरियगन्थस्स अट्ठकथा गन्थो, महाकुरुन्दि गन्थस्स अट्ठकथा गन्थोति. इमेहि छ गन्थेहि अत्तनो मतिया सासनुग्गहनत्थाय सद्धम्मठितिया कता.

बुद्धघोसाचरिय गन्थेसु पन विसुद्धिमग्गो, सङ्घपालेन नाम सङ्घथेरेन आयाचितेन बुद्धघोसाचरियेन कतो. दीघनिकायस्स अट्ठकथा गन्थो दाठा नामेन सङ्घथेरेन आयाचितेन बुद्धघोसाचरियेन कतो. मज्झिमनिकायस्स अट्ठकथा गन्थो बुद्धमित्तनामेन थेरेन आयाचितेन बुद्धघोसाचरियेन कतो. संयुत्तनिकायस्स अट्ठकथा गन्थो जोतिपालेन नाम थेरेन आयाचितेन बुद्धघोसाचरियेन कतो. अङ्गुत्तरनिकायस्स अट्ठकथा गन्थो भद्दन्ता नाम थेरेन सहआजीवकेन उपासकेन च आयाचितेन बुद्धघोसाचरियेन कतो. समन्तपासादिका नाम अट्ठकथा गन्थो बुद्धसिरि नामेन थेरेन आयाचितेन बुद्धघोसाचरियेन कतो. सत्तन्नं अभिधम्म-गन्थानं अट्ठकथा गन्थो चुल्लबुद्धघोसेन भिक्खुना आयाचितेन बुद्धघोसाचरियेन कतो. धम्मपदस्सअट्ठकथा गन्थो कुमारकस्सपनामेन थेरेन आयाचितेन बुद्धघोसाचरियेन कतो. जातकस्सअट्ठकथा गन्थो अत्थदस्सी, बुद्धमित्त, बुद्धपियदेव सङ्खातेहि तीहि थेरेहि आयाचितेन बुद्धघोसाचरियेन कतो. खुद्दकपाठस्स अट्ठकथा गन्थो, सुत्तनिपातस्स अट्ठकथा गन्थो अत्तनो मतिया बुद्धघोसाचरियेन कतो. अपदानस्स अट्ठकथा गन्थो पञ्चनिकाय विञ्ञूहि पञ्चहि थेरेहि आयाचितेन बुद्धघोसाचरियेन कतो.

बुद्धघोसाचरिय-गन्थदीपना निट्ठिता.

बुद्धत्ताचरिय गन्थेसु पन विनय-विनिच्छयगन्थो अत्तनो सिस्सेन बुद्धसीहेन नाम थेरेन आयाचितेन बुद्धत्ताचरिया कतो. उत्तर-विनिच्छयगन्थो सङ्घपालेन नामेन थेरेन आयाचितेन बुद्धदत्ताचरियेन कतो. अभिधम्मावतारो नाम गन्थो अत्तनो सिस्सेन सुमति थेरेन आयाचितेन बुद्धदत्ताचरियेन कतो. बुद्धवंसस्स अट्ठकथा गन्थो तेनेव बुद्धसीहनाम थेरेन आयाचितेन बुद्धदत्ताचरियेन कतो.

बुद्धदत्ताचरिय-गन्थदीपना निट्ठिता.

अभिधम्मकथाय मूलटीका नाम टीका गन्थो बुद्धमित्ता नाम थेरेन आयाचितेन आनन्दाचरियेन कतो.

नेत्तिपकरणस्स अट्ठकथा गन्थो धम्मरक्खित नाम थेरेन आयाचितेन धम्मपालाचरियेन कतो. इतिवुत्तकअट्ठकथा गन्थो, उदानअट्ठकथा गन्थो, चरियापिटकअट्ठकथा गन्थो, थेरकथाअट्ठकथा गन्थो, थेरिकथाअट्ठकथा गन्थो, विमानवत्थुअट्ठकथा गन्थो, पेतवत्थुअट्ठकथा गन्थो, इमे सत्त गन्था अत्तनो मतिया धम्मपालाचरियेन कतो. विसुद्धिमग्गटीका गन्थो दाठा नामेन नाम थेरेन आयाचितेन धम्मपालाचरियेन कतो, दीघनिकाय-अट्ठकथादीनं चतुन्नं अट्ठकथानं टीका गन्थो, अभिधम्मट्ठकथाय अनुटीका गन्थो, नेत्तिपकरणट्ठकथाय टीका गन्थो, बुद्धवंसट्ठकथाय टीका गन्थो, जातकट्ठकथाय टीका गन्थो चेति इमे पञ्च गन्था अत्तनो मतिया धम्मपालाचरियेन कतो.

धम्मपालाचरिय-गन्थदीपना निट्ठिता.

निरुत्तिमञ्जूसा नाम चुल्लनिरुत्तिटीका गन्थो, महानिरुत्तिसङ्खेपो नाम गन्थो च अत्तनो मतिया पुब्बाचरियेहि विंसु कतो.

पञ्च विनयपकरणानं विनयगण्ठि नाम गन्थो अत्तनो मतिया महावजिरबुद्धाचरियेन कतो. न्याससङ्खातो मुखमत्तदीपनी नाम गन्थो अत्तनो मतिया विमलबुद्धि आचरियेन कतो. अत्थब्यक्ख्यानो नाम गन्थो अत्तनो मतिया चुल्लवजिरबुद्धाचरियेन कतो. रूपसिद्धि तस्स च गन्थस्स टीका गन्थो सब्ब पञ्चसुत्तञ्च अत्तनो मतिया दीपङ्कराचरियेन कतो. सच्चसङ्खेपो नाम गन्थो अत्तनो मतिया चुल्लधम्मपालाचरियेन कतो. मोहच्छेदनी गन्थो, विमतिच्छेदनी गन्थो, दस बुद्धवंसो, अनागतवंसो च. अत्तनो मतिया कस्सपाचरियेन कतो. पटिसम्भिदामग्गस्स अट्ठकथा गन्थो महानामेन उपासकेन आयाचितेन महानामाचरियेन कतो. दीपवंसो, थूपवंसो, बोधिवंसो, चुल्लवंसो, पोराणवंसो, महावंसो चाति इमे छ गन्था अत्तनो मतिया महानामाचरियेहि विसुं कता. नवो महावंसगन्थो अत्तनो मतिया चुल्लमहानामाचरियेन कतो. सद्धम्मपज्जोतिका नाम महानिद्देसस्स अट्ठकथा गन्थो देवेन थेरेन आयाचितेन उपसेनाचरियेन कतो. मोग्गलानब्याकरणगन्थे अत्तनो मतिया मोग्गलानाचरियेन कतो. सुबोधालङ्कार नाम गन्थो अत्तनो मतिया सङ्घरक्खिताचरियेन कतो. वुत्तोदय गन्थो अत्तनो मतिया वुत्तोदयकाराचरियेन कतो. खुद्दसिक्खा नाम गन्थो अत्तनो मतिया धम्मसिराचरियेन कतो. पोराणखुद्दसिक्खा टीका च मूलसिक्खा चाति, इमे द्वे गन्थे अत्तनो मतिया अञ्ञतरेहि द्विहाचरियेहि विंसु कता.

परमत्थविनिच्छयं नाम गन्थो सङ्घरक्खितेन थेरेन आयाचितेन अनुरुद्धाचरियेन कतो. नामरूप-परिच्छेदो नाम गन्थो अत्तनो मतिया अनुरुद्धाचरियेन कतो. अभिधम्मत्थसङ्गहं नाम गन्थो नम्म नामेन उपासकेन आयाचितेन अनुरुद्धाचरियेन कतो. खेमो नाम गन्थो अत्तनो मतिया खेमाचरियेन कतो. सारत्थदीपनी नाम विनयट्ठकथाय टीका गन्थो, विनयसङ्गहं, विनयसङ्गहस्स टीका गन्थो, अङ्गुत्तरट्ठकथाय नवो टीका गन्थोति इमे चत्तारो गन्था परक्कमबाहु नामेन लङ्कादीपिस्सरेन रञ्ञा आयाचितेन सारिपुत्ताचरियेन कतो. सकटसद्दसत्थस्स पञ्चिकाय टीका गन्थो अत्तनो मतिया सारिपुत्ताचरियेन कतो. कङ्खावितरणिया विनयत्थमञ्जूसा नाम टीका गन्थो सुमेधा नामथेरेन आयाचितेन बुद्धनागाचरियेन कतो. अभिधानप्पदीपिको नाम गन्थो अत्तनो मतिया चूलमोग्गलानाचरियेन कतो. सुबोधालङ्कारस्स महासामि नाम टीका, वुत्तोदय विवरणञ्चाति इमे द्वे गन्था अत्तनो मतिया वाचिस्सरेन कता. खुद्दसिक्खाय सुमङ्गलप्पसादनि नाम नवो टीका गन्थो सुमङ्गलेन आयाचितेन नवाचिस्सरेन कतो. सम्बन्धचिन्ताटीका बालावतारो, मोग्गलानब्याकरणस्स टीका चाति इमे तयो गन्था, सुमङ्गल, बुद्धमित्त, महाकस्सप सङ्खातेहि तीहि थेरेहि च, धम्मकित्ति नाम उपासकेन, वानिज्जा भातु उपासकेन च आयाचितेन वाचिस्सरेन कतो. नामरूपपरिच्छेदस्स विभागो, सद्दत्थस्स पदरूप-विभावनं, खेमपकरणस्स टीका, सीमालङ्कारो, मूलसिक्खाय टीका, रूपविभागो, पच्चयसङ्गहो चाति इमे सत्त गन्था अत्तनो मतिया वाचिस्सरेन कता. सच्चसङ्खेपस्स टीका गन्थो सारिपुत्त-नामेन थेरेन आयाचितेन वाचिस्सरेन कतो. अभिधम्मावतारस्स टीका, अभिधम्मत्थसङ्गहस्स टीका चाति इमे द्वे गन्था अत्तनो मतिया सुमङ्गलाचरियेन कता. सारत्थसङ्गहं नाम गन्थो अत्तनो मतिया बुद्धप्पियेन कतो दन्तधातुवण्णना नाम पकरणं

लङ्कादीपिस्सरस्स रञ्ञो सेनापतिना आयाचितेन धम्मकित्तिनामाचरियेन कतं. जिनचरितं नाम पकरणं अत्तनो मतिया मेधङ्कराचरियेन कतं. जिनालङ्कारो, जिनालङ्कारस्स टीका अत्तनो मतिया बुद्धरक्खिताचरियेन कतो. अमतधरस्स नाम अनागतवंसस्स अत्तनो मतिया अट्ठकथा उपतिस्साचरियेन कता. कङ्खावितरणीया लीनत्थपकासिनी, निसन्देहो, धम्मानुसारणी, ञेय्या-सन्तति, ञेय्या-सन्ततिया टीका, सुमतावतारो, लोकपञ्ञत्ति पकरणं, तथागतुप्पत्ति पकरणं, नलाटधातुवण्णना, सीहळवत्थु, धम्मदीपको पटिपत्ति सङ्गहो, विसुद्धिमग्गस्स गण्ठि, अभिधम्मगण्ठि, नेत्तिपकरणगण्ठि, विसुद्धिमग्गचूल-नवटीका, सोतब्बमालिनी, पसादजननी, ओकस्सलोको, सुबोधालङ्कारस्स नव टीका चेति, इमे वीसति गन्था अत्तनो मतिया वीसताचरियेहि विंसु विंसु कता.

सद्दत्थ भेदचिन्ता नाम पकरणं अत्तनो मतिया सद्धम्मसिरिनामाचरियेन कतं. सुमन-कूटवण्णनं नाम पकरणं, राहुला नाम थेरेन आयाचितेन वाचिस्सरेनदेवथेरेन कतं. सोतत्थ किं महानिदानं नाम पकरणं अत्तनो मतिया चुल्लबुद्धघोसाचरियेन कतं. मधुरसङ्गाहनि नाम पकरणं अत्तनो मतिया रट्ठपालाचरियेन कतं. लिङ्गत्थविवरणं नाम पकरणं अत्तनो मतिया सुभूतचन्दाचरियेन कतं. सद्दनीतिपकरणं अत्तनो मतिया अग्गवंसाचरियेन कतं. न्यासपकरणस्स महाटीका नाम टीका अत्तनो मतिया वजिरबुद्धाचरियेन कता. मुखमत्तसारो अत्तनो मतिया गुणसागराचरियेन कतो. मुखमत्तसारस्स टीका सुतसम्पन्न नामेन धम्मराजिनो गुरुना सङ्घथेरेन आयाचितेन गुणसागराचरियेन कता. सद्दत्थभेदचिन्ताय महाटीका अत्तनो मतिया अभयाचरियेन कता. लिङ्गत्थविवरणप्पकासकं नाम पकरणं अत्तनो मतिया ञाणसागराचरियेन कतं. गुळ्हत्थस्स टीका बालप्पबोधनञ्च दुविधं पकरणं अत्तनो मतिया अञ्ञतराचरियेन कतं. सद्दत्थभेदचिन्ताय मज्झिमटीका अत्तनो मतिया अञ्ञतराचरियेन कता. बालावतारस्स टीका, लिङ्गत्थविवरणा टीका च अत्तनो मतिया उत्तमाचरियेन कता. सद्दत्थभेदचिन्ताय नव टीका अत्तनो मतिया अञ्ञतराचरियेन कता. अभिधानप्पदीपिकाय टीका दण्डीपकरणस्स मगघ-भूता टीका चाति दुविधा टीकायो अत्तनो मति, सीहसूर नाम रञ्ञो एकेन अमच्चेन कता. कोलद्धजनस्सटीका पासादिकेन नाम थेरेन आयाचितेन तेनेव महामच्चेन कता. कारिकं नाम पकरणं ञाणगम्भीरनामेन भिक्खुना आयाचितेन धम्मसेनापताचरियेन कतं. एतिमासमिदीपनी [वा एतिमासमिदीपिका] नाम पकरणं मनोहारञ्च अत्तनो मतिया तेनेव धम्मसेनापताचरियेन कतं. कारिकाय टीका अत्तनो मतिया अञ्ञतराचरियेन कता. एतिमासमिदीपिकाय टीका अत्तनो मतिया अञ्ञतराचरियेन कता.

सद्दबिन्दुपकरणं अत्तनो मतिया धम्मराजस्स गुरुना अञ्ञतराचरियेन कतं. सद्दवुत्तिप्पकासकं नाम पकरणं अञ्ञतरेन भिक्खुना आयाचितेन सद्धम्मगुरु नामाचरियेन कतं. सद्दवुत्तिप्पकासकस्स टीका अत्तनो मतिया सारिपुत्ताचरियेन कता.

कच्चायन सारो च कच्चायनसारस्स टीका चाति दुविधं पकरणं अत्तनो मतिया अञ्ञतराचरियेन कतं. लोकदीपकसारं नाम पकरणं अत्तनो मतिया नवेनमेधङ्कराचरियेन कतं. लोकुप्पत्तिपकरणं अत्तनो मतिया अग्गपण्डिताचरियेन कतं. जङ्घदासकस्स टीका भूता मगधटीका अत्तनो मतिया चीवराचरियेन कता. मातिकत्थदीपनी, अभिधम्मत्थसङ्गहवण्णना, सीमालङ्कारस्सटीका, गण्ठिसारो, पट्ठानगणनानयो चाति इमे पञ्च पकरणानि अत्तनो मतिया सद्धम्मजोतिपालाचरियेन कतानि. सङ्खेपवण्णना परक्कमबाहु-नामेन जम्बुदीपिस्सरेन रञ्ञो आयाचिते तेनेव सद्धम्मजोतिपालाचरियेन कता. कच्चायनस्स सुत्तनिद्देसो अत्तनो सिस्सेन धम्मचारिना थेरेन आयाचितेन सद्धम्मजोतिपालाचरियेन कतो. विनयसमुट्ठानदीपनी नाम पकरणं, अत्तनो गुरुना सङ्घथेरेन आयाचितेन सद्धम्म-जोतिपालाचरियेन कतं.

सत्तपकरणानि पन तेन पुक्कामनगरे कतानि. सङ्खेपवण्णनाव लङ्कादीपे कता. अभिधम्म-पन्नरसट्ठानवण्णानं नाम पकरणं अत्तनो मतिया नवेन-विमलबुद्धाचरियेन कता. सद्दसारत्थजालिनी नाम पकरणं अत्तनो मतिया नवेन-विमलबुद्धाचरियेन कतं. सद्दसारत्थ-जालिनिया टीका, पंयनगरे रञ्ञो गुरुना सङ्घराजेन आयाचितेन तेनेव नवेन विमलबुद्धाचरियेन कता. वुत्तोदयस्स टीका, अभिधम्मसङ्गहस्स टीकाय परमत्थमञ्जूसा नाम अनुटीका, दसगण्ठिवण्णनं नाम पकरणं, मगधभूतविदग्गमुखमण्डनियाटीका चाति इमानि चत्तारि पकरणानि अत्तनो मतिया तेनेव नवेन विमलबुद्धाचरियेन कतानि.

पञ्चपकरणटीकाय नवानुटीका अत्तनो मतिया अञ्ञतरो चरियेन कता. अभिधम्मसङ्गहस्स नवटीका अत्तनो मतिया अञ्ञतराचरियेन कता. अभिधम्मत्थसङ्गहटीकाय [मणि] मञ्जूसा [मणिसारमञ्जूसा] नाम नवानुटीका अत्तनो मतिया अरियवंसाचरियेन कता.

पेटकोपदेसस्स टीका अत्तनो मतिया उदुम्बरिनामाचरियेन पुक्कामनगरे कता. चतुभाणवारस्स अट्ठकथा, महासारपकासिनि, महादीपनी, सारत्थदीपनी, गतिपकरणं, हत्थासारो, भुम्मसङ्गहो, भुम्मनिद्देसो, दसवत्थुकायविरतिटीका, चोदनानिरुत्ति, विभत्तिकथा, सद्धम्ममालिनि, पञ्चगतिवण्णना, बालचित्त-पबोधनं, धम्मचक्कसुत्तस्स नवट्ठकथा, दन्तधातु-पकरणस्स टीका च सद्धम्मोपायनो बालप्पबोधनटीका च, जिनालङ्कारस्स नवटीका च, लिङ्गत्थ-विवरणं, लिङ्गत्थ-विनिच्छयो, पातिमोक्खविवरणं, परमत्थकथाविवरणं, समन्तपासादिकविवरणं, चतुभाणवारट्ठकथा विवरणं, अभिधम्मसङ्गहविवरणं, सच्चसङ्खेपविवरणं, सद्दत्थभेदचिन्ताविवरणं, सद्दवुत्तिविवरणं, कच्चायनसारविवरणं, कच्चायनविवरणं, अभिधम्मसङ्गहस्सटीकाविवरणं, महावेस्सन्तरजातकस्स विवरणं, सक्काभिमतं, महावेस्सन्तरजातकस्स नवट्ठकथा, पठम-सम्बोधि च लोकनेत्ति, बुद्धघोसाचरियनिदानं, मिलिन्द-पञ्हो वण्णना, चतुरारक्खा, चतुरारक्खायअट्ठकथा, सद्दवुत्तिप्पकरणस्स नवटीका चाति इमानि, तिचत्तालीस पकरणानि अत्तनो मतिया सासनस्स जातिया सद्धम्मस्स ठितिया च लङ्कादीपादीसु विंसु विंसु कतानि.

सम्बुद्धे गाथा च…पे… नवहारगुणवण्णना चाति इमे बुद्धपणामादिका गाथायो. अत्तनो अत्तनो बुद्धगुणपकासनत्थाय अत्तनो च परे च अनन्तपञ्ञापवत्तनत्थाय च पण्डितेहि लङ्कादीपादीसु विंसु विंसु कता.

[इति चुल्ल-गन्थवंसे आयाचकाचरियदीपको नाम चतुत्थो परिच्छेदो.]

नामं आरोपनं पोत्थकं गन्थकारस्स च. लेखंलेखापनञ्चेव, वदामि तदनन्तरन्ति. तत्थ चतुरासीतिया धम्मक्खन्धसहस्सानि पिटक, निकायङ्ग, वग्ग, निपातादिकं नामं, केनारोपितं, कत्थ आरोपितं, कदा आरोपितं, किमत्थं आरोपितन्ति? तत्रायं पिविसज्जनाकेन आरोपितन्ति पञ्चसतखीणासवेहि आरोपितं. तेहि सब्बबुद्धवचनं सङ्गायन्ति, इदं पिटकं, अयं निकायो, इदं अङ्गं, अयं वग्गो, अयं निपातोति. एवमादिकं नामं आरोपेन्ति. कत्थ आरोपितन्ति? राजगहे वेभारपब्बतस्स पादे धम्ममण्डप्पे आरोपितं. कदा आरोपितन्ति? भगवतो परिनिब्बुते पठमसङ्गायनकाले आरोपितं. किमत्थं आरोपितन्ति? धम्मक्खन्धानं वोहारसुखत्थाय सुखधारणत्थाय च आरोपितं. सङ्गीतिकाले पञ्चसता खीणासवा तेसञ्च धम्मक्खन्धानं नाम वग्गनिपाततो. इमस्स धम्मक्खन्धस्स अयं नामो होतु, इमस्स च पकरणस्स अयं नामोति, अब्रवुं सब्बं नामादिकं किच्चं अकंसु. ते खीणासवा, यदि नामादिकं किच्चं अकतं न सुपाकतं तस्मा वोहारसुखत्थायनामादिकं किच्चं कतं अनागते पनत्थाय नामादिकं पवत्तितं असञ्जातनामो न सुट्ठु पाकतो सब्बसो भवेति. धम्मक्खन्धानं नाम दीपना निट्ठिता.

चतुरासीति धम्मक्खन्धसहस्सानि केन पोत्थके आरोपितानि, कदा आरोपितानि, किमत्थं आरोपितानीति. तत्रायं विसज्जना केनारोपितानिति? खीणासवमहानागेहि आरोपितानि. कत्थ आरोपितानीति? लङ्कादीपे आरोपितानि. कदा आरोपितानीति? सद्धातिस्सस्सराजिनो पुत्तस्स वट्टगामनि राजस्स काले आरोपितानि. किमत्थं आरोपितानीति? धम्मक्खन्धानं अविधंसनत्थाय सद्धम्मट्ठितिया च आरोपितानि.

धरमानो हि भगवा, अम्हाकं सुगतोधीरो;

निकाये पञ्चदेसेति, याव निब्बानगमना.

सब्बेपि ते भिक्खु आदि, मनसा वचसाहारो;

सब्बे च वाचुग्गता होन्ति, महापञ्ञासतिवरा.

निब्बूते लोकनाथम्हि, ततो वस्ससतं भवे;

अरियानरिया चापि च, सब्बे वाचुग्गता धुवं.

ततो परं अट्ठरसं, द्विसतंवस्स गणनं;

सब्बे पुथुज्जना चेव, अरिया च सब्बेपिते.

मनसावचसायेव, वाचुग्गताव सब्बदा;

दुट्ठगामणिरञ्ञो च, काले वाचुग्गता धुवं.

अरियानरियापि च, निकाये धारणासदा;

ततो परम्हि राजा च, ततो चुतो च तुसिते.

उप्पज्जि देव लोके सो, देवेहि परिवारितो;

सद्धा तिस्सोति नामेन, तस्स कनिट्ठको हितो.

ततो लद्धरट्ठो होति, बुद्धसासनपालको.

तदा काले भिक्खू आसुं, सब्बे वाचुग्गता सदा;

निकाये पञ्चवेधेव, याव रञ्ञो च धारणा;

ततो चुतो सो राजा च, तुस्सीते उपपज्जति;

देवलोकेट्ठितो सन्तो, तदा वाचुग्गता ततो.

तस्स पुत्तापि अहेसुं, अनेका वरज्जं गता;

अनुक्कमेन चुतते, देवलोकं गता धुवं;

तदापिते सब्बे भिक्खू, वाचुग्गताव सब्बदा;

निकाये पञ्चविधेव, धारणावसतिमता.

ततो परं पोत्थकेसु, निकाया पञ्च पिट्ठिता;

तदा अट्ठकथा टीका, सब्बे गन्था पोत्थके गता;

सब्बे पोत्थेसु ये गन्था, पाळि अट्ठकथा टीका;

संट्ठितासं ठिता होन्ति, सब्बेपि नो न सन्तिते.

तदा ते पोत्थकेयेव, निकाया पिठिता खिला;

तदा अट्ठकथादीनि, भवन्तीति वदन्ति च.

लङ्कादीपस्स रञ्ञोव, सद्धा तिस्सस्स राजिनो.

पुत्तको लङ्कादीपस्स, इस्सरो धम्मिको वरो;

तदा खीणासवा सब्बे, ओलोकेन्ति अनगते.

खीणासवा पस्सन्ति ते, दुपञ्ञेव पुथुज्जने;

सब्बेपि ते भिक्खू आसुं, बहुंतरा पुथुज्जना;

न सक्खिस्सन्ति ते पञ्च, निकाये वाचुग्गतं इति;

पोत्थकेसु सब्बे पञ्च, आरोपेन्ति खीणासवा.

सद्धम्मट्ठिति चिरत्ताय, जनानं पुञ्ञत्थाय च;

ततो पट्ठायते सब्बे, निकाया होन्ति पोत्थके;

अट्ठकथा टीका सब्बे, ते होन्ति पोत्थकेट्ठिता.

ततो पट्ठायते सब्बे, भिक्खु आदि महागणा;

पोत्थकेसु ठितेयेव, सब्बे पस्सन्ति सब्बदा.

[पोत्थके आरोपन दीपका निट्ठिता.]

यो कोचि पण्डितो धीरो, अट्ठकथादिकं गन्थं करोति वा कारापेति वा, तस्स अनन्तको होति पुञ्ञसंचयो, अनन्तको होति पुञ्ञानिसंसो. चतुरासीति चेतियसहस्स करणसदिसो, चतुरासीति बुद्धरूपसहस्स करणसदिसो, चतुरासीति बोधिरुक्खसहस्सरोपनसदिसो, चतुरासीति विहारसहस्स करणसदिसो, यो च बुद्धवचनमञ्जूसं करोति वा कारापेति वा, यो च बुद्धवचनं मण्डनं करोति वा कारापेति वा, यो च बुद्धवचनं लेखं करोति वा कारापेति वा, यो च पोत्थकं वा, यो च पोत्थकमूलं वा, देति वा दापेति वा, यो च तेलं वा चुण्णं वा, धञ्ञं वा पोत्थकभञ्जनत्थाय यं किञ्चि नित्थं वा पोत्थकछिद्दे आवुनत्थाय, यं किञ्चि सुत्तं वा कट्ठफलकद्वयं वा पोत्थकं पुटनत्थाय यं किञ्चि वत्थं वा, पोत्थक-बन्धनत्थाय, यं किञ्चि योत्तं वा पोत्थकलाप पूटनत्थाय यं किञ्चि थविकं देति वा दापेति वा.

यो च हरितालेन वा मनोसिलाय वा, सुवण्णेन वा रजतेन वा पोत्थकमण्डनं वा कट्ठफलकमण्डनं वा करोति वा कारापेति वा, तस्स अनन्तको होति पुञ्ञसंचयो, अनन्तको होति पुञ्ञानिसंसो. चतुरासीति चेतियसहस्स करणसदिसो, चतुरासीति विहारसहस्स करणसदिसो.

भवे निब्बत्तमानो सो, सीलगुणमुपागता;

महा तेजो सदा होति, सीहनादो विसारदो.

आयुवण्णबलुप्पेतो, धम्मकामो भवे सद्दा;

देवमनुस्सलोकेसु, महेसक्खो अनामयो.

भवे निब्बत्तमानो सो, पञ्ञवा सुसमाहितो;

अधिपच्च परिवारो, सब्बसुखाधि गच्छति.

सद्दोहीरिमा वदञ्ञू, संविग्ग मानसो भवे;

अङ्गपच्चङ्ग सम्पन्नो, आरोह परिणाहवा.

सब्बे सत्तापि यो लोके, सब्बत्थ पूजिताभवे;

देवमनुस्स सञ्चरो, मित्तसहाय पालितो.

देवमनुस्स सम्पत्तिं, अनुभोति पुनप्पुनं;

अरहत्त फलं पत्तो, निब्बानं पापुणिस्सति.

पटिसम्भिदा चतस्सो, अभिञ्ञा छब्बिधे वरे;

विमोक्खे अट्ठके सेट्ठे, गमिस्सति अनागते.

तस्माहि पण्डितो पोसो, संपस्सं हित मत्तनो;

कारेय्य साम गन्थे च, अञ्ञे चापि कारापये.

पोत्थके च ठिते गन्थे, पाळि अट्ठकथादिके;

धम्ममञ्जूसा गन्थे च, लेखं करे कारापये.

पोत्थकं पोत्थकमूलञ्च, तेसं चुल्लथूसम्पि च;

पिलोतिकादिकं सुत्तं, कट्ठफलद्वयम्हि च.

धम्मबन्धनत्थाय च, यं किञ्चि महग्घं वत्थं;

धम्मबन्धनयोत्तञ्च, यं किञ्चि थविकम्पि च.

ददेय्य धम्मखेत्तम्हि, विप्पस्सन्नेन चेतसा;

अञ्ञो चापि दज्जापेय्य, मित्तसहायबन्धवेति.

गन्थाकरलेखलेखापनानिसंस दीपना निट्ठिता.

[इति चूलगन्थवंसे पकिण्णकदीपको नाम पञ्चमो परिच्छेदो.]

सोहं हंसारट्ठ जातो, नन्तपञ्ञोति विस्सुतो

सद्धा सील वीरप्पेतो, धम्मरसं गवेसनो.

सोहं ततो गन्त्वा चिमं, जिन नवं यं पूरं;

सब्ब धम्मं विचिनन्तो, वीसति वस्समागतो.

सब्ब धम्मं विस्सेज्जेन्तो, किकारे नेव भिक्खुनो;

छ वस्सानं गणं भित्वा, कामानं अभिमद्दनं.

सन्ति सभा च निब्बानं, गवेसिञ्च पुनप्पुनं;

वसन्तोहं, वनारम्मं, पिटकत्तय सङ्गहं;

गन्थवंसं इमं खुद्दं, अरियसङ्घदासकन्ति.

इति पामोज्जत्थाय अरञ्ञवासिना, नन्दपञ्ञाचरियेन कतो चूळगन्थवंसो निट्ठितो.

धम्मवटंसकनामेन विसुतो थेरो, यं पकरणं लिक्खितं तं परिपुण्णं तेन पुञ्ञेन तं पिटकं परिसिप्पं परिनिट्ठितं.

ममेव सिस्ससमूहानञ्च परिसिप्पं परिनिट्ठितं. तवे सिस्सानू सिस्सानि च, परिसिप्पं परिनिट्ठितं.