📜

नमो तस्स भगवतो अरहतो सम्मासम्बुद्धस्स.

अभिधानप्पदीपिकाटीका

गन्थारम्भ

यस्स ¶ ञाणं सदा ञाणं, नाञ्ञेय्या ञाणकं विना;

निस्सेसगुणयुत्तस्स, तस्स नत्वा महेसिनो.

सत्थन्तरा समादाय, सारं सब्बधरा तथा;

करिय्यते’भिधानप्प-दीपकस्सत्थवण्णना.

पणामादिवण्णना

[क] इधायं गन्थकारो पठममत्तनो परेसम्पि सम्मा हितत्थनिप्फादनत्थं पुञ्ञसम्पद’माचिनोति ‘‘तथागतो’’च्चादिना. तत्थ करुणाकरो महाकरुणाय उप्पत्तिट्ठानभूतो यो तथागतो भगवा करोपयातं अत्तनो हत्थगतं सुखप्पदं सुखस्स पतिट्ठानभूतं सुखकारणं वा सुखदायकं वा पदं निब्बानं ओसज्ज चजित्वा कलिसम्भवे दुक्खकारणभूते ¶ भवे संसारे केवलदुक्करं सुकरेनासम्मिस्सं अच्चन्तदुक्करं पञ्चविधपरिच्चागादिकं करं करोन्तो परत्थं परेसमत्थंयेव अका कतवा, तमेदिसं तथागतं अहं नमामि.

[ख] यञ्च धम्मं जरारुजादिमुत्ता जरारोगादीहि विमुत्ता मुनिकुञ्जरा मुनिसेट्ठा भगवन्तो अपूजयुं पूजितवन्तो, तथा उत्तरे उत्तमे सत्तानं वा संसारमहोघपक्खन्दानं ततो उत्तरणसमत्थे यहिं तरे यस्मिं धम्मप्लवे ठिता सम्मापटिपज्जनवसेन आरूळ्हा नरानरा मनुस्सा च देवा च तिवट्टम्बुनिधिं किलेसकम्मविपाकवट्टसङ्खातेहि तीहि वट्टेहि आकुलितं संसारमहम्बुरासिं तरिंसु तिण्णा, अघप्पहं किलेसप्पहानकरं, संसारदुक्खप्पहानकरं वा तं धम्ममपि अहं नमामि.

[ग] मुनिन्दोरससूनुतं भगवतो उरे सम्भवधम्मदेसनाय अरियभावप्पत्तताय मुनिन्दस्स ओरसपुत्तभावं गतं पत्तं नुतं किलेसखेपनकं सुपुञ्ञखेत्तं पुञ्ञत्थिकानं पुञ्ञबीजविरुहनट्ठानं सुखेत्तभूतं भुवने लोके सुतं विस्सुतं ¶ , सुतधरं वा किलेससवनाभावेन अस्सुतं अपाणोपि पाणो करीयित्थाति पाणीकतो, पातिमोक्खसंवरो, सोव संवरो एतस्सत्थीति पाणीकतसंवरो, तं पाणीकतसंवरं, वरं सीलादिगुणेहि सदेवकेहि लोकेहि पत्थनीयं. ‘‘देवापि तस्स पिहयन्ति तादिनो’’ति [उदा. २७] हि वुत्तं. सदा सब्बस्मिं काले गुणोघेन सीलादिगुणसमूहेन निरन्तरन्तरं अविच्छिन्नमानसं, परिपुण्णचित्तं वा गणम्पि अट्ठन्नं अरियपुग्गलानं समूहं अपि अहं नमामीति एवमेत्थ तिण्णम्पि सङ्खेपतो अत्थयोजना दट्ठब्बा.

[घ-ङ] एवं पुञ्ञसम्पदमाचिनित्वा किमभिमतं साधनीयमिच्चाह ‘‘पकासिस्समभिधानप्पदीपिक’’न्ति. बुद्धादीनमभिधानानं सरूपवसेन, लिङ्गवसेन च परिदीपनतो पकासनतो ‘‘अभिधानप्पदीपिक’’न्ति लद्धनामं सत्थं पकासिस्सं अन्तोभावेन निप्फन्नं बहिभावेन पकासिस्सं. अन्तोभावस्स हि बहिभावमपेक्खित्वा भावितमुपपन्नं. ननु सन्तेव पुब्बाचरियानं नामलिङ्गप्पकासनान्यमरकोसतिकण्डोप्पलिन्याद्यभिधानसत्थानि, पाणिनि ब्याडिवररुचिचन्दगोमि रुद्दवामनादिविहितानि च लिङ्गसत्थानि, ततो किमिदमुच्चते इच्चाह ‘‘नामलिङ्गानि बुद्धभासितस्सारहानि दस्सयन्तो’’ति. एतेन सन्तेस्वपि पुब्बाचरियानं सत्थेसु यस्मा न तेसु नामलिङ्गानि बुद्धवचनानुरूपानि होन्ति ¶ , तस्मा तदनुरूपानि नामलिङ्गानि दस्सयन्तो अभिधानसत्थं पकासिस्सामीति एतमत्थं दीपेति. नम्यते अभिधीयते अत्थो अनेनाति नामं, सद्दसत्थे नमुधातुवसेन. लिङ्गयते ‘‘इत्थियमतो आपच्चयो’’त्यादिना विभज्जतेति, इत्थादयो वानेन लिङ्गीयन्ते ब्यञ्जीयन्तेति लिङ्गं, इत्थिपुमनपुंसकं. किमेतस्स अभिधानसत्थस्स करणे पयोजनन्ति पुच्छायं यस्मिं सति तं सोतारो सोतुमुस्सहन्ति, तं दस्सेतुमाह ‘‘नामलिङ्गेस्वि’’च्चादि. यतो बुद्धवचने पटुनो भावो पाटवं, तदेव अत्थो पयोजनं, तं इच्छन्तीति पाटवत्थिनो, तेसं पाटवत्थीनं सोतूनं नामलिङ्गेसु कोसल्लं कुसलता छेकभावो बुद्धवचने महब्बलं अत्थस्स निच्छयकारणं होति, अतो तस्मा कारणा बुद्धभासितस्सारहानि नामलिङ्गानि दस्सयन्तो अभिधानप्पदीपिकं सत्थं पकासिस्सन्ति सम्बन्धो.

[च] इदानि सत्थलहुभावत्थमाह ‘‘भिय्यो’’च्चादि. भिय्यो बाहुल्लेन रूपन्तरा रूपभेदेन इत्थिपच्चयपुम्भावादिकारियकतेन थीपुन्नपुंसकं ञेय्यं, सो च नामानं नामविसेसनस्स, नामपरामसिसब्बनामसद्दस्स च ञेय्यो पकारन्तराभावा. तत्र नामानं रूपभेदो यथा – छुरिका सत्य’सिपुत्ति [अभिधान ३९२ गाथा]. असि खग्गो च सायको [अभिधान ३९१ गाथा]. पानीयं सलिलं दकन्ति [अभिधान ६६१ गाथा]. नामविसेसनस्स यथा – निसीथो मज्झिमा रत्तीति [अभिधान ७० गाथा]. नामपरामसिसब्बनामसद्दस्स यथा – ¶ आकङ्खा रुचि वुत्ता सा, त्वधिका लालसा द्विसूति [अभिधान १६३ गाथा]. साहचरियेन नियतलिङ्गेनाविप्पयोगतो थीपुन्नपुंसकं ञेय्यं. कत्थचीति यत्र रूपभेदो नत्थि, तं यथा – मरीचि मिगतण्हिका [अभिधान ६५ गाथा]. रंसिमा भाकरो भानु [अभिधान ६३ गाथा]. आपो पयो जलं वारि [अभिधान ६६१ गाथा]. मरीझादयो ह्यभिन्नरूपत्ता लिङ्गन्तरेपि सम्भावियन्तेहि नियतलिङ्गेहि मिगतण्हिकाभाकरजलादिसद्देहि साहचरियेन तंलिङ्गे निच्छीयन्ते. आहच्चविधानेन इत्थिपुमनपुंसकानं विसेसेत्वा कथनेन थीपुन्नपुंसकं ञेय्यं. क्वचीति यत्र न रूपभेदो लिङ्गनिण्णयस्स निमित्तं, न च साहचरियं लिङ्गभेदोभिमतो, नेकमेव वा लिङ्गमिच्छते, तं यथा – वल्लरी मञ्जरी नारी [अभिधान ५५० गाथा]. विटपो विटभीत्थियं [अभिधान ५४७ गाथा]. भीतित्थी भयमुत्तासो [अभिधान १६६ गाथा]. वजिरं पुन्नपुंसकेच्चादि [अभिधान २४ गाथा].

[छ] इदानि रूपभेदोति लिङ्गनिण्णयस्स पटिपत्तिहेतुको यो भिन्नलिङ्गानं द्वन्दो, तक्करणपटिसेधेन अभिन्नलिङ्गानमेव द्वन्दो कतोति परिभासितुमुपक्कमते ‘‘अभिन्नलिङ्गिन’’मिच्चादि. अभिन्नलिङ्गीनंयेव नामानं द्वन्दो कतो, न भिन्नलिङ्गीनं, यथा – विमुत्यसङ्खतधातु, सुद्धिनिब्बुतियो सियुन्ति [अभिधान ९ गाथा]. न केवलं द्वन्दोयेव, अथ खो एकसेसोप्यभिन्नलिङ्गानंयेव कतो, यथा – नग्गो दिगम्बरावत्था. [अभिधान ७३४ गाथा] सब्बधरकते पन ‘‘जीमूता मेघपब्बता’’ इच्चुदाहटं. ननु च भिन्नलिङ्गानम्पि एकसेसो कतो, यथा ¶ – माता पिता तु पितरो, पुत्ता तु पुत्तधीतरो [अभिधान २४९ गाथा]. ससुरा सस्सु ससुरा, भातुभगिनि भातरोति [अभिधान २५० गाथा]. एत्थ हि माता च पिता च पितरो, पुत्तो च धीता च पुत्ता, सस्सु च ससुरो च ससुरा, भाता च भगिनी च भातरोति भिन्नलिङ्गानम्पि एकसेसो दस्सितोति. ठानन्तरे तेसं भिन्नलिङ्गताय दस्सितत्ता न दोसो. तातो तु जनको पिता [अभिधान २४३ गाथा]. अम्मा’म्बा जननी माता [अभिधान २४४ गाथा]. अपच्चं पुत्तोत्रजो सुतो [अभिधान २४० गाथा]. नारियं दुहिता धीता [अभिधान २४१ गाथा]. जायापतीनं जननी, सस्सु वुत्ताथ तप्पिता. ससुरोति इच्चादिकञ्हि तेसं [अभिधान २४६ गाथा] ठानन्तरन्ति. तथा एत्थ कमं विना भिन्नलिङ्गानं गणनपाठो विय सङ्करोपि न कतो. तत्र हि सग्गदिसादयो अत्था यथाक्कमं तंसम्बन्धा च सक्कविदिसादयो अत्था सकसकसम्बन्धसहिता यथाभिधानं सरूपपटिपत्यमत्थभिधेय्या, तथा तप्परियायसम्बन्धानि च यानि नामानि, तानि सब्बानि तदभिधानावसरे अभिधेय्यानीति सुखेनेकत्रेव सकलनामपटिपत्ति सरूपपटिपत्ति च यथा सियातिच्चेतदत्थं कमो अभ्युपगम्यते, तथा च सत्यावस्सं सग्गादिपरियाये दिवसद्दादयो, हराद्यवसरे कुमारादयो अभिधेय्या इति कमानुरोधेन लिङ्गसङ्करो परिहरितुमसक्कुणेय्यो, यथावुत्तन्तु कमं विना नेह सङ्करो कतो, इति परियायेन इत्थिप्पकरणादिक्कमेन यथासम्भवमभिधानतो, तं यथा – ईति त्वित्थी अजञ्ञञ्च, उपसग्गो उपद्दवोति [अभिधान ४०१ गाथा]. अत्र हि ये तिलिङ्गा, ते तिलिङ्गावसरे एव निबद्धा, न गणनपाठा विय उच्चारणवसेन, एवं सब्बत्र यथासम्भवं नीयते. वुत्तञ्च –

‘‘भेदाख्यानाय ¶ न द्वन्दो, नेकसेसो न सङ्करो;

कतोत्र भिन्नलिङ्गान-मवुत्तानं कमं विना’’ति [अमर १.४].

इदानि लिङ्गवाचकानं ठानवसेनत्थेसु गमनं दस्सेतुमाह ‘‘लिङ्गवाचके’’च्चादि. गाथापादन्तमज्झट्ठा गाथानं पादानञ्च अन्तमज्झट्ठा लिङ्गवाचका अनेकत्थलिङ्गवाचकानि ञाणदस्सनादीनि लिङ्गानि पुब्बमत्थं वाचकवसेन यन्ति गच्छन्ति. अपरे गाथापादानमादिट्ठा लिङ्गवाचका परमत्थं यन्ति गच्छन्ति. तं यथा –

फले विपस्सनादिब्ब-चक्खुसब्बञ्ञुतासु च;

पच्चवेक्खणञाणम्हि, मग्गे च ञाणदस्सनं [अभिधान ७९४ गाथा].

णादो सद्धाचीवरादि-हेत्वाधारेसु पच्चयो;

कीळादिब्बविहारादो, विहारो सुगतालये [अभिधान ८५७ गाथा].

खग्गे कुरूरे नेत्तिंसो, परस्मिञ्चात्र तीस्वमु [अभिधान १०८९ गाथा];

कुसले सुकतं सुट्ठु-कते च सुकतो तिसु [अभिधान ९३८ गाथा].

समयो समवाये च, समूहे कारणे खणे;

पटिवेधे सिया काले, पहाने लाभदिट्ठिसु [अभिधान ७७८ गाथा].

कन्तारो वनदुग्गेसु [अभिधान ११०७ गाथा].

एत्थ च –

येभुय्यताब्यामिस्सेसु, विसंयोगे च केवलं;

दळ्हत्थेनतिरेके चा-नवसेसम्हि तं तिसु [अभिधान ७८६ गाथा].

समाधिस्मिं पुमेकग्गो-नाकुले वाच्चलिङ्गिको [अभिधान १०३५ गाथा].

जळे थूलो महत्यपि [अभिधान १०६६ गाथा] च्चादीसु

गाथामज्झट्ठानं ¶ , पादन्तमज्झट्ठानञ्च लिङ्गवाचकानं पुब्बपरत्थेस्वपि गमनभावतो ‘‘पुब्बं यन्ती’’ति इदं येभुय्यवसेन वुत्तन्ति दट्ठब्बं. अथ वा गाथानं मज्झन्तट्ठा पुब्बं यन्ति, गाथामज्झट्ठा, पादन्तमज्झट्ठा च पुब्बापरञ्च यन्तीति यथालाभयोजना दट्ठब्बा.

[ज] इदानि विसेसविधिम्हि सत्थलहुभावत्थं परिभासते ‘‘पुमित्थिय’’मिच्चादि. पुमित्थियं ‘‘द्वीसू’’ति पदं ञेय्यं, यथा – असनि द्वीसु [अभिधान २४ गाथा]. सब्बलिङ्गे लिङ्गत्तये ‘‘तीसू’’ति पदं ञेय्यं, यथा – सत्तन्नं पूरणे सेट्ठे’तिसन्ते सत्तमो तिसु [अभिधान ९४२ गाथा]. एत्थ च निसिद्धलिङ्गनामं पारिसेसतो ‘‘सेसलिङ्ग’’न्ति ञेय्यं [निसिद्धलिङ्ग सेसत्थं (अमर १.५.)], यथा – वस्स संवच्छरा नित्थीति [अभिधान ८१ गाथा]. अत्र चेकलिङ्गनिसेधब्याख्यानेन लिङ्गद्वयविधानन्ति [एकलिङ्गनिसेधब्याजेन लिङ्गद्वयाभिधानमिति (अमरकोसचिन्तामणिटीका)].

गन्थलाहवं विधायेदानि पटिपत्तिलाहवत्थमाह ‘‘अभिधानन्तरारम्भे’’इच्चादि. अभिधानन्तरस्स अञ्ञस्स अभिधानस्स आरम्भे सति, तु अन्तो यस्स अभिधानस्स, अथ आदि यस्स अभिधानस्साति इदं अभिधानद्वयञ्च ञेय्यं. त्वन्तमथादिकं नामादिपदं पुब्बेन न सम्बज्झतेति भावो. तत्र नामपदं यथा – जिनो सक्को तु सिद्धत्थो [अभिधान ४ गाथा]. केसवो चक्कपाण्यथ [अभिधान १६ गाथा]. महिस्सरो सिवो सूली [अभिधान १६ गाथा]. लिङ्गपदं यथा – पुमे तु पण्हि पासणि [अभिधान २७७ गाथा]. पुमे तूतु रजो पुप्फं [अभिधान २३८ गाथा]. सा तिरोकरणीप्यथ ¶ [अभिधान २९८ गाथा]. पुन्नपुंसकमुल्लोचं [अभिधान २९९ गाथा]. अत्थपदं यथा – उदरे तु तथा पाचा’नलस्मिं गहणीत्थियं [अभिधान ९७३ गाथा]. पणीतो तीसु मधुरे, उत्तमे विहितेप्यथ. अञ्जसे विसिखायञ्च, पन्तियं वीथि नारियं [अभिधान ९४० गाथा]. अथसद्देन चत्र अनन्तरियत्थेन सकपरियायोपलक्खणतो अथो सद्दादीसु च न पुब्बेन सम्बज्झते. पाणको चाप्यथो उच्चालिङ्गो लोमसपाणकोति [अभिधान ६२३ गाथा].

[झ] इदानि बुद्धवचनानमनुरूपानम्पि पचुरप्पयोगानमेव केसञ्चि गहणं अत्तनो सत्थन्तरापसय्हतावसेन अहंकारपुब्बिकाभावञ्च दस्सेतुमाह ‘‘भिय्यो पयोग’’मिच्चादि. सोगते सुगतस्स वचनभूते आगमे पिटकत्तये, तञ्हि आगच्छन्ति तिविधसम्पत्तियो एतेनाति आगमोति वुच्चति. तस्मिं भिय्यो पयोगं बाहुल्लेन पयुज्जतेति पयोगो, तं आगम्म गहेत्वा क्वचि अरञ्ञवग्गादीसु निघण्टुयुत्तिञ्च निघण्टुनामके सत्थे आगतं बुद्धवचनानुरूपं युत्तिञ्च आनीय आनेत्वा नामलिङ्गं कथीयति अन्तोभावेन निप्फन्नं बहिभावेन पकासीयते. आविभावत्तमेव हि जञ्ञत्तं सन्तकारियकारिनो. आसीसायं वा अवस्सम्भाविनोपि वचनस्स वत्तमानत्थवत्तिच्छाय वत्तमानत्तं, तथा हि लोके अवस्सम्भाविनो सिद्धिमभिसन्धाय भाविनमप्पत्तं वत्तमानत्तेन वा अतीतत्तेन वा वत्तुमिच्छति, तं यथा – ‘‘इदं मममपापये’’ति कोचि केनचाभिहितो सन्तो अवस्सं तं भविस्सतीति मञ्ञमानो पापियमानं पत्तं वा वत्तुमिच्छति ¶ , ततोयेव ‘‘आसीसायं भूतमिव चे’’ति [पाणिनि ३.३.१३२] तदतिदेसवचनं पच्चाख्यायते.

पणामादिवण्णना निट्ठिता.

१. सग्गकण्डवण्णना

१. इदानि यस्मा अभिधेय्यत्थो नाम पञ्ञत्तिपरमत्थत्थवसेन दुविधो, तेसु येभुय्येन पञ्ञत्तत्थतो परमत्थत्थोव सेट्ठो, तेसुपि ओधिसो किलेसानं समुच्छेदपटिप्पस्सद्धिकरत्ता यथाक्कमं अट्ठ धम्मा सेट्ठा, ततोपि निब्बानमेव सेट्ठं, तेसं सब्बेसम्पि धम्मानं सम्मासम्बुद्धोव सेट्ठो. वुत्तञ्हि भगवता ‘‘विरागो सेट्ठो धम्मानं, द्विपदानञ्च चक्खुमा’’ति [ध. प. २७३; नेत्ति. १२५]. एत्थ हि ‘‘यावता, भिक्खवे, धम्मा सङ्खता वा असङ्खता वा, विरागो तेसं धम्मानं अग्गमक्खायती’’ति [अ. नि. ४.३४; ५.३२; इतिवु. ९०] वचनतो सब्बेसम्पि सङ्खतासङ्खतधम्मानं विरागसङ्खातो निब्बानमेव सेट्ठो, चक्खुमा पन सम्मासम्बुद्धो तेसं सब्बेसम्पि धम्मानं, देवमनुस्सादिभेदानं द्विपदानञ्च पञ्ञत्तत्थानं सेट्ठोति अयमत्थो वुत्तो भगवता, तस्मा सब्बत्थसेट्ठत्थाभिधायकाभिधानभूतं बुद्धातिधानमेव पठमं सग्गकण्डस्स आदिम्हि पत्थियवसेन [सत्थियवसेन (क.)] दस्सेतुमाह ‘‘बुद्धो’’च्चादि. तत्थ जिनसद्दन्तं सब्बबुद्धस्स नामं. सब्बं बुद्धवाति बुद्धो, सकम्मका कत्तरि तपच्चयो. विसिट्ठा बुद्धि अस्सत्थीति बुद्धो, पसंसायं यदादिना णपच्चयो. दानसीलक्खन्धादयो ठानाट्ठानञाणादयो वा दस ¶ बलानि यस्सेति दसबलो. सासति विनयति सत्तेति सत्था. सब्बधम्मजाननसीलताय सब्बञ्ञू. द्विपदानं, द्विपदेसु वा उत्तमो द्विपदुत्तमो, बुद्धवंसवण्णनायं [बु. वं. अट्ठ. ३७ निदानकथा] निद्धारणलक्खणाय छट्ठिया समासस्स पटिसिद्धत्ता नेदिसी निद्धारणलक्खणा छट्ठी गम्यते. कस्मा पन सो तत्थ पटिसिद्धोति? समासे येभुय्येन निद्धारणलक्खणत्तयस्स विकलाभावतो. किञ्चापि हि तत्थ छट्ठियायेव पटिसिद्धो, सत्तमिया पन निद्धारणलक्खणाय विज्जमानत्ता तस्सापि सो पटिसेधनीयोयेव. मुनीनं इन्दो राजा मुनिन्दो. पुञ्ञञाणभाग्यादयो भगं नाम, तंयोगा भगवा. नाथति सत्तानं हितं याचति, किलेसे वा उपतापेति, सत्तेसु वा इस्सरियं करोति, तेसं वा हितं आसीसतीति नाथो. बुद्धधम्मसमन्तञाणदिब्बचक्खुसङ्खातेहि पञ्चहि चक्खूहि समन्नागतत्ता चक्खुमा. सब्बदा ब्यामप्पभाय कायतो निच्छरणवसेन अङ्गीरसो. सब्बाकारेन सब्बधम्मानं मुननतो मुनि, धम्मवादेसु वा मोनकरणतो मुनि.

२. लोकानं, लोकेसु वा नाथो लोकनाथो. अत्तनो अधिकस्स कस्सचिपि उत्तमपुग्गलस्स अभावतो अनधिवरो, सब्बपरियन्तगतत्तभावत्ता वा नत्थि एतस्स इतो अञ्ञो अधिको पत्थेतब्बो अत्तभावोति अनधिवरो. महन्तानं सीलक्खन्धादीनं एसनतो गवेसनतो महेसि, महन्तो वा ईसो विभूति एतस्साति महेसि. हितं विनयति अनुसासतीति विनायको, विसिट्ठं वा निब्बानं सत्ते नेतीति विनायको. सब्बधम्मदस्सनसीलताय ¶ ‘‘समन्तचक्खू’ति लद्धनामेन सब्बञ्ञुतञ्ञाणेन समन्नागतत्ता समन्तचक्खु. सोभनं गतं ञाणमस्स, संसारा वा सुट्ठु अपुनरावत्तिया गतवाति सुगतो, सपरसुखसिद्धत्थं वा सम्मा गतवाति सुगतो. भूरि बहुका पञ्ञा यस्स, अनन्तत्ता वा भूरिसमा पञ्ञा एतस्साति भूरिपञ्ञो, अनन्ताय महापथविया सदिसपञ्ञोत्यत्थो. किलेसादिपञ्चविधं मारं जितवाति मारजि.

३. नरानं सीहो सेट्ठो, परप्पवादमद्दनसहनतो वा नरो च सो सीहो चाति नरसीहो, सहतीति सीहो, निरुत्तिनयेन पुब्बवण्णाकारस्सीकारो, सीहसदिसत्ता वा नरो च सो सीहो चाति नरसीहो. यथा हि सीहो मिगराजा चतूहि दाठाहि सब्बसत्ते हिंसति अभिभवति, तथा भगवापि सीलपञ्ञापुञ्ञिद्धिसङ्खातेहि चतूहि धम्मेहि सब्बं लोकं हिंसति अभिभवतीति ओपम्मसंसन्दनं. सब्बपुरिसानं सेट्ठत्ता नरवरो, नरानं वा देवमनुस्सानं सेट्ठत्ता नरवरो, ‘‘सीले पतिट्ठाय नरो सपञ्ञो’’ति [सं. नि. १.२३] एत्थ विय नरसद्देन सब्बे देवमनुस्सा सङ्गहिता. धम्मस्स राजपवत्तकत्ता धम्मराजा, धम्मतो वा सदेवकस्स लोकस्स राजा जातो, नाधम्मतोति धम्मराजा, धम्मेन राजतीति वा धम्मराजा, धम्मपालको वा राजा धम्मराजा. मुनीनं सेट्ठत्ता महामुनि. देवानं अतिदेवोति देवदेवो, देवानं अधिको वा देवो देवदेवो. लोकानं गरु आचरियो लोकगरु, लोकानं गरुभाजनत्ता वा लोकगरु. धम्मस्स सामि यथावुत्तनयेन धम्मस्सामी. यथा पुरिमका सम्मासम्बुद्धा ¶ सब्बञ्ञुभावं गता, तथा अयम्पि गतोति तथागतो, तथा वा सम्मा गतं ञाणमस्साति तथागतोत्यादिना तथागतसद्दस्स अत्थपपञ्चो तत्थ तत्थ [दी. नि. अट्ठ. १.७; म. नि. अट्ठ. १.१२; सं. नि. अट्ठ. २.३.७८; अ. नि. अट्ठ. १.१.७०; उदा. अट्ठ. १८; इतिवु. अट्ठ. ३८; थेरगा. अट्ठ. १.३; बु. वं. अट्ठ. २ निदान कथा; महानि. अट्ठ. १४; पटि. स. अट्ठ. १.१.३७; दी. नि. टी. १.७; दी. नि. अभि. टी. १.७; म. नि. टी. १.१२; अ. नि. टी. १.१.१७०] वुत्तनयेन वेदितब्बो.

४. सयमेव सम्मासम्बुद्धो भवति, अनञ्ञबोधितोति सयम्भू. सम्मा अविपरीतेन स’मत्तनायेव सब्बधम्मे बुज्झति अबुज्झि बुज्झिस्सतीति सम्मासम्बुद्धो. सेट्ठपञ्ञाय समन्नागतत्ता वरपञ्ञो. सत्ते संसारण्णवतो निब्बानपारं नेतीति नायको. जितपञ्चमारत्ता जिनो. एत्थ च समन्तभद्र, लोकजि, छळभिञ्ञ, अद्वयवादी, सिरीघन, अकनिट्ठग [अकनिट्ठक (क.)], धम्मचक्क, रागासनि [रागारि (क.)], तिसरण, खसम [खणसम (क.) खेन आकासेन समा तुल्या गुणा यस्स सो (तिकण्डसेसटीका १.१.८)], गुणाकर, महासुख, वजिर, मेत्ताबल, असम, जितारि, महाबोधि, धम्मधातु, सेतकेतु, खजि, तिमुत्ति [खजिरविमुत्ति (क.) खेन आकासज्झानेन – सुञ्ञभावनायाति भावो – जयति संसारभावं यो, जि+ क्विप सुञ्ञवादीनं बोद्धानं ‘‘सुञ्ञं सब्बमेव’’ इत्याकारभावनाय संसारभावजयनतो तथाभावो (सद्दकप्पद्दुम)], दसभूमिस्सर, पञ्चञाण, बहुक्खम, सम्बुद्ध, सब्बदस्सी, महाबल, सब्बबोध ¶ [सम्बोधधम्म (क.)], धम्मकाय, संगुत्त, अरह, द्वादसक्ख, वीतरागादीनिपि अनेकानि बुद्धस्स नामानि [इमानि परियायवचनानि पायसो अमरकोसतो, तिकण्डसेसाभिधानतो च गहितानि]. समन्ततो पुञ्ञसम्भारतो च ञाणसम्भारतो च भद्रो सेट्ठोति समन्तभद्रोत्यादीनि च निब्बचनानि वेदितब्बानि. वुत्तञ्च –

‘‘असङ्ख्येय्यानि नामानि, सगुणेन महेसिनो;

गुणेन नाममुद्धेय्यं, अपि नामसहस्सतो’’ति [ध. स. अट्ठ. १३१३; उदा. अट्ठ. ५३; पटि. म. अट्ठ. १.१.७६; नेत्ति. अट्ठ. ३८].

तत्थ उद्धेय्यन्ति उद्धरितब्बं. अपि नामसहस्सतोति अनेकेहि नामसहस्सेहीत्यत्थो. सब्बबुद्धनामकथा.

सक्कादिसत्तकं अम्हाकं बुद्धस्स नामं. पञ्चमारे जेतुं सक्कोतीति सक्को, भगिनीहि सद्धिं संवासकरणतो वा लोकमरियादं छिन्दितुं सक्कुणन्तीति सक्का, साकियराजूनं पुब्बराजानो, तेसं वंसभूतत्ता भगवा ‘‘सक्को’’ति वुच्चति. अस्स च जातिसमनन्तरं निधयो रतनानि च उप्पन्नानीति सिद्धत्थोति नामं कतं, सब्बेसं वा लोकानं सिद्धा अत्था एतेन हेतुभूतेनाति सिद्धत्थो. सुद्धं ओदनं अस्साति सुद्धोदनो, तस्स अपच्चं सुद्धोदनि. गोतमवंसस्स कपिलस्स मुनिनो सिस्सताय सक्या गोतमा, भगवा पन गोतमवंसे उप्पन्नत्ता गोतमस्स मुनिनो अपच्चं गोतमो.

५. सक्यवंसावतिण्णो [सक्यवंसा पित्थिण्णो (क.)] सक्यमुनि यो बुद्धो सो सक्यसीहो, सक्यानं वा सेट्ठत्ता सक्यसीहो. सक्यकुलतो ¶ जातो मुनि सक्यमुनि. सूरियदेवपुत्तस्स सोतापन्नत्ता भगवा आदिच्चबन्धूति वुच्चति, आदिच्चस्स बन्धु ञातीति निब्बचनं कत्वा. एत्थपि मायादेवीसुत, महासमण, कलिसासनादीनि [कुलिसासनादीनि (क.) कलिम्हि युगे सासनं अनुसासनं यस्स सो, अथवा कलिम्हि पापे विवादे वा सासनं हितसाधनं यस्स सो (तिकण्डसेसटीका १.१.११)] गोतमपरियायानि वेदितब्बानि.

६. मोक्खादीनि निब्बुतिपरियन्तानि छचत्तालीस नामानि निब्बानस्स नामानि. मुच्चन्ति एत्थ, एतेन वा रागादीहीति मोक्खो. निरुज्झन्ति एत्थ रागादयोति निरोधो, रुन्धति वा निब्बानन्ति रोधो, किलेसो, सो एत्थ नत्थीति निरोधो. वानसङ्खाताय तण्हाय निक्खन्तत्ता, निब्बाति वा एतेन रागग्गिआदिकोति निब्बानं. यथा पकतिदीपो नदीसोतेन वुय्हमानानं पतिट्ठा होति, एवमिदम्पि निब्बानं संसारमहोघेन वुय्हमानानं पतिट्ठाति दीपो वियाति दीपो, निक्किलेसानं वा पदीपसदिसभावकरणतो दीपो वियाति दीपो, ‘‘निब्बन्ति धीरा यथयं पदीपो’’ति हि वुत्तं, दिप्पति वा अरियानं ञाणचक्खुस्सेव पकासतीति दीपो. तण्हानं खयहेतुत्ता तण्हक्खयो. रागादीनं पटिपक्खत्ता, उत्तमट्ठेन वा परं. तायति रक्खति अपायादितोति ताणं. निलीयन्ति एत्थ संसारभयभीरुकाति लेणं. नत्थि दीघरस्सादिकं रूपं सण्ठानमेतस्साति अरूपं, अप्पच्चयत्ता वा अरूपं. रागादीनं सन्तकरणत्ता सन्तं. रागक्खयहेतुभावेन अविपरीतत्ता, चतुसच्चपरियापन्नत्ता ¶ वा सच्चं. नत्थि आलयो तण्हा एत्थाति अनालयं.

७. पच्चयेहि न सङ्करीयतेति असङ्खतं. सिवं खेमभावं करोतीति सिवं, संसारभीरुकेहि सेवितब्बत्ता वा सिवं, यदादिना वपच्चयो. नत्थि एत्थ मतं मरणं, एतस्मिं वा अधिगते पुग्गलस्स मतन्ति अमतं. पस्सितुं सुदुक्करताय सुदुद्दसं. परेहि उत्तमेहि अरियपुग्गलेहि अयितब्बं गन्तब्बन्ति परायणं, परतो वा अयितब्बं गन्तब्बन्ति परायणं, संसारसभावतो अञ्ञसभाववसेन बुज्झितब्बन्त्यत्थो, परेसं वा अरियपुग्गलानं पतिट्ठानत्ता परायणं. येन चत्तारो मग्गा ओधिसो किलेसे सरन्ति हिंसन्ति तं धम्मं सरणं, अरियानं वसितगेहत्ता वा सरणं. ईति उपद्दवो पवासो च ते यत्थ न सन्ति, तं अनीतिकं, सत्ते संसारं नेतीति ‘‘नीती’’ति लद्धनामाय तण्हाय अभावतो वा अनीतिकं. आसवानं अनारम्मणताय अनासवं. निच्चट्ठेन धुवं, धवति वा मग्गानमारम्मणभावं गच्छतीति धुवं, ‘‘धु गतिथेरियेसू’’ति हि कातन्तधातु. दट्ठब्बसभावस्स नत्थिताय अनिदस्सनं. पच्चयेहि अकतत्ता अकतं. सदा विज्जमानत्ता अपलुज्जनसभावं गच्छति, तेन वा विञ्ञायतीति अपलोकितं. ‘‘इतं गते च विञ्ञाते’’ति हि नानत्थसङ्गहे वुत्तं. लोकसभावेन वा विञ्ञायतीति लोकितं, तब्भावापगमनतो अपलोकितं. सण्हट्ठेन निपुणं, येन वा चत्तारो मग्गा ओधिसो किलेसे निस्सेसतो पुनन्ति सोधेन्ति, तं निपुणं. न कदाचिपि यस्स अन्तो विनासो अत्थि, तं अनन्तं. खरन्ति ¶ विनस्सन्तीति खरा, सङ्खता, ते यत्थ न सन्ति, तं अक्खरं, खरसङ्खातानं वा सङ्खतानं पटिपक्खत्ता अक्खरं. एत्थ च असङ्खतन्त्यादिका गाथा रुचिरा नाम.

८. सब्बदुक्खानं खयकारणत्ता दुक्खक्खयो. ब्याबाधतीति ब्याबाधो, सो एव ब्याबादो, दुक्खसच्चं, तस्स भावो ब्याबज्जं, दुक्खस्स पीळनाद्यत्थो, तं यत्थ नत्थि, तं अब्याबज्जं, अब्यापज्झन्तिपि पाठो, तत्थ ब्यापज्जन्ति विनस्सन्तीति ब्यापादा, सङ्खता, तेसं भावो ब्यापज्झं, सङ्खतानं विनस्सनभावो, तं यत्थ नत्थि, तं अब्यापज्झन्ति एवमत्थो वेदितब्बो, निरुत्तिनयेन च द्यस्स ज्झकारो. किलेसकम्मविपाकवट्टानमभावतो विवट्टं. निब्भयट्ठेन खेमं, खयन्ति वा एतेन रागग्गिआदयोति खेमं. सङ्खारेहि असम्मिस्सताय, विसंयोगताय च केवलं. अपवज्जन्ति सङ्खारा एतस्माति अपवग्गो. यस्मा रागो विगतो, सो विरागो. पधानभावं नीतं पणीतं. नत्थि एतस्मिं अधिगते अरियानं चुतं चवनन्ति अच्चुतं. अरियेहि पज्जितब्बत्ता गन्तब्बत्ता पदं.

९. चत्तारो योगा खयन्ति एतेनाति योगक्खेमो. पारेति सक्कोति संसारदुक्खसन्तापं समेतुन्ति पारं, ‘‘संसारदुक्खसन्तापतत्तस्सा’लं समेतवे’’ति हि वुत्तं. पगता संसारचक्कस्स अरा एतस्माति वा पारं. किलेसेहि मुच्चनतो मुत्ति, निकायन्तरिया पन ‘‘सरीरेन्द्रियेहि अत्तनो मुत्तत्ता मुत्ती’’ति वदन्ति. किलेससमनतो सन्ति. विसुज्झन्ति सत्ता एताय रागादिमलेहीति विसुद्धि ¶ . सब्बसङ्खारा विमुच्चनतो विमुत्ति. असङ्खतमेव निस्सत्तनिज्जीवट्ठेन, सन्तिलक्खणधारणतो वा धातूति असङ्खतधातु. सुज्झन्ति सत्ता एताय रागादिमलेहीति सुद्धि. आवुणोति संसारतो निक्खन्तुमप्पदानवसेनाति वुति, तण्हा, ततो निक्खन्तत्ता निब्बुति.

१०. खीणासवादिचतुक्कं अरहन्ते. खीणा आसवा यस्स सो खीणासवो. ततो उत्तरि करणीयाभावतो नत्थि सिक्खा एतस्साति असेक्खो. विगतो रागो यस्माति वीतरागो. संसारचक्कस्स अरे हतवाति अरहा, ‘‘अरह’’न्तिपि पाठो.

देवलोकादिपञ्चकं सग्गस्स नामं. देवानं लोको भवनं देवलोको. दिब्बन्त्यत्र दिवो. अज गतियं, अनेकत्थत्ता ठितियं, चिरं ठियते अस्मिन्ति अग्गो, ठानं, सोभनो अग्गो सग्गो, पुञ्ञेन वा सुट्ठु अजीयतेति सग्गो. तयो देवा दिब्बन्त्यत्रेति तिदिवो. पधानतो हि तीहि हरिहरब्रह्मेहि ब्यपदेसो. तिदसानं देवानं आलयो ठानन्ति तिदसालयो. केचि पन ‘‘देवलोकादित्तयं सग्गसामञ्ञस्स नामं, तिदिवादिद्वयं तावतिंसस्सा’’ति वदन्ति, तं अमरकोसादीसु सामञ्ञस्मिंयेव द्विन्नम्पि गहणतो न सारतो पच्चेतब्बं. एत्थापि नाक, सुरलोक, तिपिट्ठप [विसन्ति सुकतिनो अस्मिं इति पिट्ठपं पिसोदरादि तिदसानं पिट्ठपधिति दससद्दलोपो (चिन्तामणिटीका)], अवरोह, फलोदय ¶ [फलस्स कम्मफलस्स उदयो दिट्ठियोग्यट्ठानं (तिकण्डटीका)], मन्दर, सेरिक, सक्कभवन, खं, नभादीनि देवलोकसामञ्ञानि इधानागतानिपि गहेतब्बानि.

११-१२. तिदसादिचतुद्दसकं देवतासामञ्ञस्स नामं. जातीसु [जातिजातीसु (क.)] वुत्तासु ब्यत्तिपि वुच्चतीति ब्यत्तीनं बहुत्ता बहुवचननिद्देसो. जातिसत्ताविनाससङ्खाता तिस्सो दसा परिमाणा एतेसन्ति तिदसा. एते हि मनुस्सादयो विय बुद्धिविपरिणामखयेहि न युज्जन्ति, पञ्चवीसतिवस्सुद्देसिया एव उप्पज्जन्ति सन्ति विनस्सन्ति च. मरणं मरो, सो येसं नत्थि, ते अमरा. दिब्बन्ति पञ्चकामगुणादीहि कीळन्तीति देवा. विबुज्झन्ति न सुपन्तीति विबुधा, अतीतानागतजातिं विबुज्झन्तीति वा विबुधा. सुधाभोजनभुञ्जनसीलताय सुधासिनो. समुद्दुट्ठा [अमतमथनोट्ठा (चिन्तामणिटीका)] सुरा अत्थि येसं, ते सुरा, सुरन्ति वा कीळन्तीति सुरा, सुखेन रमन्तीति वा सुरा. दीघायुकापि समाना यथापरिच्छेदं सम्पत्तकाले मरन्ति सीलेनाति मरू. दिवो देवलोको ओको आसयो येसं ते दिवोका. सुधाहारस्स पातब्बस्सपि सम्भवतो अमतं पिवन्तीति अमतपा, अमतोसधं वा पिवन्तीति अमतपा. सग्गे वसनसीलत्ता सग्गवासिनो. सदा पञ्चवीसतिवस्सुद्देसियत्ता निराकता जरा एतेसन्ति निज्जरा. न निमिसन्तीति अनिमिसा, भमुका निच्चलं करोन्तीत्यत्थो. दिवे वसन्तीति दिब्बा. देवा एव देवता, सकत्थे देवसद्दतो तापच्चयो, देवता एव देवतानि, सकत्थे निपच्चयो. ‘‘अपुमे’’ति एत्थ पठमसकत्थिकवसेन इत्थिलिङ्गत्तं, दुतियसकत्थिकवसेन ¶ नपुंसकलिङ्गत्तं वेदितब्बं, दुतियसकत्थिकवसेनेव वा द्विलिङ्गत्तं, तत्थ इत्थिलिङ्गपक्खे यदादिना निकारादेसो. अमरकोसे पन ‘‘देवतानि पुमे वा’’ति [अमर १.९] वुत्तं. तस्सत्थो – देवतानिसद्दो विकप्पेन पुल्लिङ्गे, निच्चं नपुंसकेति. टीकायञ्च ‘‘सकत्थिका पकतितो लिङ्गवचनानि अतिवत्तन्तीति पुन्नपुंसकत्त’’न्ति [देवो एव देवता, सकत्थे ता, सकत्थिका अपि पच्चया पकतितो लिङ्गवचनाद्यतिवत्तन्ते, अपीति इत्थित्तं देवता एव देवतं पञ्ञादित्ता अण (चिन्तामणिटीका)] वुत्तं. तत्थ सकत्थिकाति दुतियसकत्थिकं वुत्तं, पकतितोति पठमसकत्थिकं. तेन वुत्तं ‘‘पुन्नपुंसकत्त’’न्ति, इतरथा तापच्चयन्तस्स निच्चं इत्थिलिङ्गताय इत्थिलिङ्गत्तमेव वदेय्य. सुपब्बा, सुमना, तिदिवेसा, आदितेय्या, दिविसदा, लेखा, अदितिनन्दना, आदिच्चा, रिभवो [विभवा (क.), रिकारो देवमाता सिया इति तिकण्डे, ततो भवन्तीति (चिन्तामणिटीका)] असोप्पा, अमच्चा [मरणं मति इति ति, मतियं भवा मच्चा… न मच्चा अमच्चा (चिन्तामणिटीका)], अमतासना, अग्गिमुखा, हविभोजना, गिरब्बाणा, दानवारयो, बिन्दारका, पूजिया, चिरायुका, सग्गिनो, नभोसदाइच्चादीनिपि देवतानं सामञ्ञनामानेव.

१३. सिद्धादयो इमे देवयोनियो देवप्पभवा देववंसा एतेसमुप्पत्तियं देवानमेव आदिकारणत्ता. अणिमादिगुणोपेतत्ता सिज्झन्ति एतस्स यथिच्छिता अत्थाति सिद्धो. यस्स भासाय ब्रूहति कथा, सो भूतो ¶ , पिसाचप्पभेदो अधोमुखादि. वचनत्थो पन भवन्ति ब्रूहन्ति कथा एतस्माति भूतोति. गन्धं अब्बति परिभुञ्जतीति गन्धब्बो, देवगायना ‘‘हाहा हूहू’’ पभुतयो [अमर १.५५]. निधयो गुय्हतीति गुय्हको, सञ्ञायं को, मणिभद्रादिको कुवेरानुचरो. यक्ख पूजायं, यक्खीयते पूजीयतेति यक्खो, कुवेरादिको. रक्खन्ति अत्तानं एतस्माति रक्खसो, विभीसणादि. कुम्भप्पमाणण्डताय कुम्भण्डो. पिसितं मंसं असति भक्खतीति पिसाचो, सकुनि सकुन्तिआदिको कुवेरानुचरो, यदादिना पिसितस्स पिभावो, असस्स च साचादेसभावो [पाणिनि ६.३.१०९; मोग्गल्लानपञ्चिका १.४७]. आदिसद्देन विज्जाधर, अपसर, किन्नरे च सङ्गण्हाति. विज्जं गुळिकाञ्जनमन्तादिकं धरतीति विज्जाधरो. अपसारयन्ति खलयन्तीति अपसरा, उब्बस्यादिका सुरवेसियो [अमर १.५५], अपसरसद्दस्स जातियं सयं बहुत्तं, ब्यत्तियन्तु तदवयवं वा सयं, तथा च बहुत्तंव. वनादिसद्दो कदाचि जातियं पयुज्जते, कदाचि ब्यत्तियं. तत्र यदा जातियं, तदा ब्यत्तिगतं सङ्ख्यमादाय पवत्तति. यदा ब्यत्तियं पयुज्जते, तदा तंब्यत्तावयवानं पाणिपादादीनं बहुत्तसङ्ख्यमादाय पवत्तति. वनसद्दो तु जातिगतेकसङ्ख्याविसिट्ठदब्बाभिधानतो धवादिब्यत्तिगतजात्याभिधानतो वा एकवचनन्ति अपसरसद्दो वामनादिमतेन इत्थियं बहुवचने च, तदञ्ञेसं पन मतेन पुमित्थियं वचनद्वये च दट्ठब्बो. अस्समुखनरसरीरत्ता कुच्छितो नरो, किञ्चि वा नरो, नरसदिसत्ता वा किन्नरो. एता देवयोनियो. गणदेवता पन –

‘‘आदिच्चा विसु वसवो, तुसिता’भस्सरा’निला;

महाराजिका साध्या च, रुद्दा च गणदेवता’’ति [अमर १.१०].

अमरकोसे ¶ कथिता.

तत्रादिच्चा द्वादसका, विसुदेवा दस ठिता;

वसवो अट्ठसङ्ख्याता, छत्तिंस तुसिता मता.

आभस्सरा चतुसट्ठि, वाता पण्णासेकूनका;

महाराजिकनामायो, द्विसतं वीसताधिका.

साध्या द्वादस विख्याता, रुद्दा चेकादस ठिता;

समयन्तरतो एता, विञ्ञेय्या गणदेवता.

१४. पुब्बदेवादिचतुक्कं असुरे. पुब्बं देवा पुब्बदेवा, दुतियासमासो, पुब्बे वा देवा पुब्बदेवा, पुब्बे ह्येते देवपुरे ठिता, अनन्तरं सक्कादीहि ततो चालिता. सुरानं रिपू सत्तवो सुररिपू. सुरानं पटिपक्खभावतो असुरा, देवा विय न सुरन्ति न कीळन्तीति वा असुरा, समुद्दुट्ठा वा सुरा देवेहि अभ्युपगता, नासुरेहीति नत्थि सुरा एतेसन्ति असुराति निकायन्तरिया. दनुनामाय मातुया अपच्चं दानवा. दनु नाम तेरससु रक्खसदुहितीसु एकिस्सा दुहितु नामं. एते पुब्बदेवादयो सदा पुमे पुल्लिङ्गे वत्तन्ति. देच्चा, देतेय्या, दनुजा, इन्दारी, सुरदिसा, सुक्कसिस्सा, दितिसुता, पुब्बजाइच्चादीनिपि असुरस्स सामञ्ञनामानि.

तब्बिसेसा असुरप्पभेदा. सुरेहि सद्धिं सङ्गामत्थं अत्तनो बलकायानं पहारं आयुधं ददातीति पहारदो, सो एव पहारादो. सं पसत्थो वरो जामाता यस्स ¶ सो सम्बरो, तस्स हि सक्को जामाता [सं. नि. अट्ठ. १.१.२५६], पुञ्ञाहरीसु वा इन्द्रियानि संवुणोतीति सम्बरो. बलमेतस्सत्थीति बली, अतिसयबलकायत्ता वा बली, सो एव बलि, ‘‘बलिआदयो’’ति इमिना समासेपि सन्धि नत्थीति दीपेति. आदिना मच्छसकुणादिकेपि कुञ्चादिकेपि असुरभेदे सङ्गण्हाति.

१५. पितामहाद्यट्ठकं ब्रह्मनि. पितूनं पजापतीनं लोकपितूनम्पि पिता पितामहो, आमहपच्चयो [मोग्गल्लान ४.३८]. सब्बलोकानं पितुट्ठानियत्ता पिता, सब्बलोकं वा पाति रक्खतीति पिता, रितुपच्चयो. महन्तसरीरताय ब्रह्मा, ब्रह वुड्ढियं मपच्चयो. लोकानं ईसो इन्दो लोकेसो. कमलसम्भवत्ता कमलं, पद्मं. तं आसनमुप्पत्तिट्ठानमस्स कमलासनो. हिरञ्ञं सुवण्णमयं अण्डं हिरञ्ञं, तस्स गब्भो भूणो [गुणो (क.)] हिरञ्ञगब्भो. झानादिगुणेहि सुरानं जेट्ठत्ता सुरजेट्ठो. पजानं सत्तानं पति सामिभूतो पजापति, पजं पालेतीति वा पजापति. अत्तभू, परमेट्ठि, सयम्भू, चतुराननो, धाता, कमलयोनि, दुहिणो, विरिञ्चि, सजिता, वेधा, विधाता, विधि, हंसरथो, विरिञ्चो, पपितामहो इच्चादयोपि ब्रह्मनामानि.

१६-१७. वासुदेवादिपञ्चकं ¶ कण्हे. वसुदेवस्स अपच्चं वासुदेवो. मच्चानं जीवितं हरति सीलेनाति हरि. कण्हगुणयोगतो कण्हो. केसिं नाम असुरं हतवाति केसवो, ईकारस्स अकारो, हनस्स च वो. वुत्तञ्च –

‘‘यस्मा तया हतो केसी,

तस्मा मे सासनं सुण;

केसवो नाम नामेन,

सेय्यो लोके भविस्ससी’’ति [चिन्तामणिटीकायम्पि].

चक्कं पाणिम्हि अस्स चक्कपाणि. विसणु [पिण्हु (क.)], नारायनो, वेकुण्ठो, दामोदरो, माधवो, सम्भू, देच्चारि, पुण्डरीकक्खो, गोविन्दो, गरुळद्धजो, पीतम्बरो, अच्चुतो, मङ्गलो, सिङ्गी, जनाद्दनो, उपेन्दो, इन्दावरजो, चतुभुजो, पद्मनाभो, मधुरिपु, तिविक्कमो, देवकीनन्दनो, सोरी, सिरीपति, पुरिसोत्तमो, वनमाली, बलिधंसी, कंसाराति, अधोक्खजो, सब्बम्भरो, केटभजि [केटभं जितवा (चिन्तामणिटीका)], विधु, ससबिन्दु, सिरीकरो, सिरीवराहो, अजितो, परपुरिसो, सिरीगब्भो, छबिन्दु, अनन्तो, नरकजि, केसरो, जातिकीलो, नरसीहो, पुराणपुरिसो, नलिनेसयो, वासु, नरायनो, पुनब्बसु, सब्बरूपो, धरणीधरो, वामनो, एकसिङ्गो, सोमगब्भो, आदिदेवो, आदिवराहो, सुवण्णबिन्दु, सदायोगी, सनातनो, राहुमुद्धभिदो ¶ , काळनेमि, पण्डवो, वड्ढमानो, सतानन्दो, पजानाथो, सुयामुनोइच्चादीनि विसणुनामानि. अस्स पन पितु नामानि वसुदेवो, आनकदुन्दुभि [अमर १.२३] इच्चादीनि. रथवाहो पनस्स दारुको नाम [तिकण्डसेस १.१.३४]. मन्ती पन पवनब्याधि नाम [मन्ती पवनब्यामि उद्धवो (तितण्डसेस १.१.३५) पवनब्याधि… उद्धवो इति द्वे पिण्हुस्स मन्तिनो (कट्टीका)].

महिस्सरादिछक्कं हरे. महन्तो इस्सरो विभूति एतस्साति महिस्सरो. गुणावत्थारहितो सम्पति परमानन्दरूपत्ता निब्बिकारो समति भवतीति सिवो, निरुत्तिनयेन अकारस्स इत्तं, मस्स वो च. एवं सब्बत्थ यदादिना वा निरुत्तिनयेन वा सद्दसिद्धि वेदितब्बाति. सूलपाणित्ता सूली. इट्ठे पभवतीति इस्सरो, इस्सति अभिभवतीति वा इस्सरो. पसूनं पमथानं पति पसुपति. ‘‘पसु मिगादो छगले, पमथेपि पसु पुमे’’ति रुद्दो [रभसो (क.)]. ( ) [(गुणे) (क.)] विसिट्ठतमोगुणत्ता सब्बं हरतीति हरो. वुत्तोति क्रियापदं. सम्भु, ईसो, सब्बो, ईसानो, सङ्करो, चन्दसेखरो, भूतेसो, खण्डपरसु, गिरीसो, मच्चुञ्जयो, पिनाकी, पमथाधिपो, उग्गो, कपद्दि, सिरीकण्ठो, काळकण्ठो, कपालभरो, वामदेवो, महादेवो, विरूपक्खो, तिलोचनो, सब्बञ्ञू, नीललोहितो, मारहरो, भग्गो, त्यम्बको, तिपुरन्तको, गङ्गाधरो, अन्धकरिपु, ब्योमकेसो, भवो, भीमो, रुद्दो, उमापति, भगाली, कपिसञ्जनो, हीरो, पञ्चाननो, खकुन्तलो, गोपालको, पिङ्गक्खो [विभङ्गो (क.)], कूटकरो, चन्दापीळो, महानटो, समीरो, हो, नन्दिवड्ढनो, गुळाकेसो [मिगूहो (क.)], मिहिराणो, मेघवाहनो, सुप्पतापो [सुप्पसादो (क.)], उ, थाणु [उपाण्डो (क.)], सिपिविट्ठो, कीलो, धम्मवाहनोइच्चादीनिपि हरनामानि.

कुमारादित्तयं ¶ हरस्स पुत्ते. कुमार कीळायं, कुमारेति कीळतीति कुमारो, सोळसवस्सिको, अयञ्च सोळसवस्सिको. ‘‘बालो च सोळस भवे’’ति हि वुत्तं. खण्डति दानवबलन्ति खन्दो, ण्डस्स न्दो. सत्तिंपहरणविसेसं धरतीति सत्तिधरो, पभावुस्साहमन्तसङ्खातं वा सत्तित्तयं धरतीति सत्तिधरो. अमरकोसे पन –

‘‘कत्तिकेय्यो महासेनो,

सरजातो छळाननो;

पब्बतीनन्दनो खन्दो,

सेनानी अग्गिभू गुहो.

बाहुलेय्यो तारकजि,

विसाखो सिखिवाहनो;

छमातुरो सत्तिधरो,

कुमारो कोञ्चदारणो’’ति [अमर १.४१-२] वुत्तं.

१८-२१. सक्कादीनि वीसति सक्कस्स नामानि. असुरे जेतुं सक्कुणातीति सक्को. पुरे, पुरं वा ददातीति पुरिन्ददो ¶ . देवानं राजा देवराजा. वजिरं पाणिम्हि अस्स वजिरपाणि. सुजाय असुरकञ्ञाय पति सुजम्पति. बहूनं देवमनुस्सानं चिन्तितत्थस्स दस्सनसमत्थताय सहस्सक्खो. महतं देवानं इन्दो राजा महिन्दो, देवेहि महितब्बो वा इन्दो राजा महिन्दो, महन्तो च सो इन्दो चाति वा महिन्दो. वजिरं आवुधं यस्स वजिरावुधो, ‘‘वजिरायुधो’’तिपि पाठो. वसूनि रतनानि सन्त्यस्सेति वासवो. दससतानि नयनानि यस्स सो दससतनयनो. द्विन्नं देवलोकानं अधिपतिभूतत्ता तिदिवाधिभू. सुरानं नाथो सुरनाथो. वजिरं हत्थे यस्स सो वजिरहत्थो. भूतानं सत्तानं पति भूतपति. महितब्बत्ता मघवा. मह पूजायं, हस्स घवो. कोससङ्खातानि धनानि सन्ति यस्स, सो कोसियो, ‘‘कोसियगोत्तताय कोसियो’’ति च वदन्ति. इन्दति परमिस्सरियेन युज्जतेति इन्दो. वत्रं नाम असुरं अभिभवतीति वत्रभू. पाको नामवत्रासुरस्स भाता, तस्स सासनतो निग्गहतो पाकसासनो. विडं ब्यापकं ओजो एतस्स विडोजो. सुनासीरो, पुरन्दरो, लेखासभो [लेखनं देवानं उसतो उत्तमो (चिन्तामणिटीका)], दिवपति, सुरपति, बलाराति, सचीपति, जम्भभेदी, हरिहयो, नमुचिसूदनो, संकन्दनो, मेघवाहनो, आखण्डलो [आखण्डयति परबलं उसादित्ता कलच (चिन्तामणिटीका)], कोसिको, सुरगामणी, नाकनाथो, हरी इच्चादीनिपि सक्कस्स नामानि.

अस्स सक्कस्स भरिया सुजाता नाम. सुखेन जाता, सुन्दरा वा जाति यस्सा सा सुजाता. पुलोमजा, सची, इन्दानी इच्चादीनिपि सक्कभरियाय नामानि.

अस्स सक्कस्स पुरं मसक्कसारादयो तयो भवे. मो च सक्को च मसक्का, ते सरन्ति गच्छन्ति एत्थ कीळावसेनाति मसक्कसारा, महिस्सरादीनं परिसानं, सक्कस्स च कीळानुभवनट्ठानन्त्यत्थोति ¶ चिन्तामणिथुतिटीकायं वुत्तं. सङ्गहटीकायं पन ‘‘मसक्कन्ति वा वसोकन्ति वा असुरपुरस्स नामं, इदं पन तेसं उत्तमत्ता मसक्कसारो, वसोकसारोति च वुत्त’’न्ति वुत्तं. अमरा एतिस्सं सन्ति अमरवती, सा एव अमरावती, रस्सस्स दीघता [पाणिनी ६.३.११९].

अस्स सक्कस्स पासादो वेजयन्तो नाम. वेजयन्ती पटाका पसत्था, भूता वा अस्स अत्थीति वेजयन्तो.

अस्स सक्कस्स सभा सुधम्मा मता. सोभनो धम्मो अस्साति सुधम्मा, देवमण्डपो.

२२. तस्स सक्कस्स रथो वेजयन्तो नाम. वेजयन्तीनामाय पटाकाय योगतो वेजयन्तो. तस्स सक्कस्स सारथि सूतो मातलिनाम. मतलस्स [मातलाय (क.)] अपच्चं मातलि, तस्स सक्कस्स गजो एरावणो नाम, इरावणो समुद्दो, तत्रजातो एरावणो [इरावति समुद्दे जातो (एरावतो), सेसे अण… पिसोदरादित्ता णत्ते एरावणो (चिन्तामणिटीका)]. तस्स सक्कस्स सिलासनं पण्डुकम्बलो नाम. पण्डुवण्णकम्बलसदिसत्ता पण्डुकम्बलो. सिला पासाणो एव आसनं सिलासनं.

२३. तस्स सक्कस्स पुत्ता सुवीर, जयन्तइच्चादयो. अतिसयेन सूरत्ता सुवीरो. असुरे जयतीति जयन्तो. तस्स सक्कस्स पोक्खरणी नन्दा नाम भवे. नन्दीयतीति नन्दा. पोक्खरं वुच्चति पदुमं, सलिलञ्च, तेहि सत्तानं ¶ मनं अत्तानं नयतीति पोक्खरणी, पोक्खरेन वा सुन्दरेन अण्णेन जलेन सहितत्ता पोक्खरण्णी, सा एव पोक्खरणी. तस्स सक्कस्स वनानि उय्यानानि नन्दनादीनि चत्तारि. नन्दयतीति नन्दनं. नानादिब्बरुक्खेहि मिस्सकत्ता मिस्सकं. नानालताहि वल्लीहि चित्तत्ता चित्तलता, नानाविरागवण्णविचित्ताय वा लताय समन्नागतत्ता चित्तलता, देवतानं वा चित्तासा एत्थ अत्थीति चित्ता, आसावती नाम लता, सा यस्स अत्थि, तं चित्तलता. देवतानं वा चित्तं लन्ति गण्हन्तीति चित्तला, दिब्बरुक्खा, तेसं समूहो चित्तलता, इत्थिलिङ्गेन तस्स वनस्स नामं, यथा ‘‘खुद्दसिक्खा’’ति. फारुसकानि यत्थ सन्ति, तं फारुसकं.

२४. असन्यादित्तयं तस्स सक्कस्स आयुधं. अस्सते भुज्जते लोकधातुकमनेनायुधेनाति असनि, अयं असनिसद्दो द्वीसु पुमित्थिलिङ्गेसु वत्तति. कुलिम्हि सक्कस्स हत्थे सेति तिट्ठतीति कुलिसं, कुलि हत्थो भुजादलोति हि तिकण्डसेसो [तिकण्डसेस २.६.२६]. कुयं वा पथवियं लिसति तनु भवतीति कुलिसं. वज गतियं, वजतेव न पटिहञ्ञते यस्स गमनं केनचीति वजिरं, इरपच्चयो. वजिरसहचरणतो कुलिससद्दोपि पुन्नपुंसके. भिदुरं, पवि, सतकोटि, सुरु, सम्बो, दम्भोलिइच्चादीनिपि वजिरस्स नामानि. तत्र भिदुरं पुन्नपुंसके, पविआदयो पुमे.

रम्भा ¶ च अलम्बुसा च इच्चादिका देवित्थियो अच्छरायो नामाति वुत्ता. अच्छराविसेसा हि एता. अच्छो निम्मलवण्णो एतासमत्थीति अच्छरायो. ‘‘अपसरा’’तिपि एतासमेव सामञ्ञसञ्ञा. देवपुत्तानं रतिं भावेन्ति वड्ढेन्तीति रम्भा, रं कामग्गिं भन्ति दीपयन्ति जालेन्तीति वा रम्भा, निग्गहीतागमो. कामरतिवसेन देवपुत्ते अत्तनि वसापेतुं अलं समत्थाति अलम्बुसा, अस्सुकारो. देवानं देवपुत्तानं, देवीभूता वा इत्थियो देवित्थियो.

‘‘पञ्चसिखो, हाहा, हूहू’’इच्चादयो गन्धब्बा नाम. पञ्च सिखा चूळा यस्स सो पञ्चसिखो. ‘‘हा’’ति अनन्दितं धनिं [निन्दिभद्धनिं (चिन्तामणिटीका)] जहतीति हाहा. ‘‘हू’’ति गीतविसेससद्दं हूयतेति हूहू. गन्धं अब्बन्ति भुञ्जन्तीति गन्धब्बा, गायनं वा धम्मो एतेसं गन्धब्बा, म्मस्स ब्बो.

२५. विमानादिद्वयं विमाने. देवानमाकासे गमनं येन तं विमानं, विगतं [विना (क.)] मानं उपमानमस्स विमानं. विहे आकासे गच्छतीति ब्यम्हं, हकारतो पुब्बे अमपच्चयो. एत्थ च विमानब्यम्हसद्दा द्वेपि अनित्थियं पुन्नपुंसके वत्तन्ति.

पीयुसादित्तयं अमते. पीयतेति पीयुसं, ‘‘अमतपा’’ति हि वुत्तं, उसपच्चयो [उणादि ४.७६ ण्वादि २१५ सुत्तेसु पन ‘‘पीयूस’’मिति दिस्सति]. ‘‘पेयुसो’’तिपि नाममस्स. न मतं मरणमनेन अमतं. सुखेन धयन्ति पिवन्ति तं इति सुधा. एत्थ च अमतसद्दो यञ्ञसेसपीयुससलिलघतादीसु नपुंसके ¶ , धन्वन्तरिदेवादीसु पुल्लिङ्गे, गळोझाभयामलक्यादीसु इत्थिलिङ्गेति तीसु वत्तति [अमतं यञ्ञसेसे च, पीयूसे सलिले घते अयाचिते च मोक्खे च, ना धन्वन्तरिदेवसु अमता मागधीपथ्या गुळुच्यामलकीसु च (मेदिनीकोस १६ ७७-८)], तंसहचरणतो पीयुससद्दोपि तीसु लिङ्गेसु. सुधासद्दो पन अमतनुहीलेपादीसुपि निच्चमित्थिलिङ्गोव [सुधा लेपो’मतं नुही (अमर २३.१०१)].

सिनेरुआदिपञ्चकं पब्बतराजे. सिना सोचेय्ये, सिनाति सोचेति देवेति सिनेरु, एरुपच्चयो. मी हिंसायं, मिनाति हिंसति सब्बे पब्बते अत्तनो उच्चतरट्ठेनाति मेरु, रुपच्चयो. तिदिवानं द्विन्नं देवलोकानं आधारो पतिट्ठाति तिदिवाधारो. देवे नयतीति नेरु. सुमेरूति उपसग्गेन नामं वड्ढितं. हेमद्दि, रतनसानु, सुरालयादीनिपि पब्बतराजस्स नामानि.

२६. युगन्धरादीनि सिनेरुस्स परिवारभूतानं सत्तन्नं परिभण्डपब्बतानं नामानि. चन्दसूरियसङ्खातं युगं धारेति तदुब्बेधमग्गचारित्ताति युगन्धरो. ईसं महिस्सरं धारेति तस्स निवासट्ठानत्ताति ईसधरो. करवीरा अस्समारका बहवो एत्थ सन्तीति करवीरो, के वा मयूरा रवन्ति एत्थाति करवीरो, ‘‘करवीको’’तिपि पाठो, इधापि पच्छिमोयेवत्थो, करवीकसकुणा वा बहवो एत्थ सन्तीति करवीको. सुदस्सना ओसधिविसेसा बहुका एत्थ सन्तीति सुदस्सनो, सुखेन पस्सितब्बत्ता वा सुदस्सनो ¶ , सुन्दरं वा दस्सनं एत्थाति सुदस्सनो. पञ्चन्नं पब्बतचक्कानं नेमिसदिसं कत्वा अत्तानं धारेतीति नेमिन्धरो, नेमिभावेन वा धारेतब्बो उपलक्खेतब्बोति नेमिन्धरो, नेमिंवा रथद्दुमं धारेति येभुय्येनाति नेमिन्धरो. विनता नाम सुपण्णमाता, तस्सा निवासट्ठानत्ता विनतकोति चिन्तामणिटीका. वित्थिण्णा वा नता नदियो एत्थाति विनतको. अस्सकण्णा सज्जदुमा बहवो एत्थ सन्तीति अस्सकण्णो, अस्सकण्णसदिसकूटत्ता वा अस्सकण्णो. कुलाचलाति एते सिनेरुआदयो अट्ठ पब्बता अचलसङ्खातानं पब्बतानं कुलानि योनियो पभवा, एते च सिनेरुआदयो अनुपुब्बसमुग्गता, सब्बबाहिरो चेत्थ अस्सकण्णो. निमिजातके पन –

‘‘सुदस्सनो करवीको, ईसधरो युगन्धरो;

नेमिन्धरो विनतको, अस्सकण्णो गिरि ब्रहा’’ति [जा. २.२२.५६८].

वत्वा सिनेरुं परिक्खिपित्वा अस्सकण्णो नाम पब्बतो पतिट्ठितो, तं परिक्खिपित्वा विनतको नाम पब्बतोति एवमञ्ञोयेवानुक्कमो कथितो. किञ्चापि कथितो, नामभेदमत्तकतोयेव पनेत्थ भेदो, नात्थभेदकतोति दट्ठब्बं.

२७. आकासवाहीगङ्गायं मेरुसिङ्गोब्भवायं मन्दाकिन्यादिनामत्तयं. मन्दं अकितुं सीलमस्साति मन्दाकिनी. आकासे सन्दमाना गङ्गा आकासगङ्गा. सुरानं देवानं नदी सुरनदी. सुरदीघिकातिपि एतिस्सा नामं.

२८. कोविळारादित्तयं ¶ ‘‘फलहरो’’तिख्याते पारिच्छत्तके. कुं पथविं विदारयति मूलेनाति कोविळारो, दस्स ळो. परि समन्ततो छत्तं विय तिट्ठतीति पारिच्छत्तको. पारिनो समुद्दस्स जातो अपच्चं पारिजातको, सकत्थे को. पारिभद्दो, निम्बतरु, मन्दारोइच्चादीनिपि पारिच्छत्तकस्स नामानि.

कप्परुक्खो च सन्तानो च आदिना मन्दारो पारिजातको च हरिचन्दनञ्च एते पञ्च देवद्दुमा [अमर १.५३] देवतरवो देवभूमीस्वेव सम्भवतो. कप्पो सङ्कप्पितो अत्थो, तस्स रुक्खो जञ्ञजनकभावेन सम्बन्धो, कप्पं वा ठितो रुक्खो कप्परुक्खो. तननं तानो, भावे णो. गन्धस्स सम्मा तानो अस्सेति सन्तानो, सिरीसरुक्खो. मन्दन्ते मोदन्ते देवा अनेनाति मन्दारो, आरपच्चयो. हरिमिन्दं चदयति सुखयतीति हरिचन्दनं. एते पञ्च देवतरवो अमरकोसनयेन वुत्ता, सोगतनयेन पन सत्त देवतरवो. वुत्तञ्च –

‘‘पाटली सिम्बली जम्बू, देवानं पारिछत्तको;

कदम्बो कप्परुक्खो च, सिरीसेन भवति सत्तम’’न्ति [ध. स. अट्ठ. ५८४; सारत्थ. टी. १.१वेरञ्जकण्डवण्णना].

तत्थ पाटलीति चित्रपाटली, सा असुरलोके तिट्ठति. तथा सिम्बली गरुळेसु, जम्बू जम्बुदीपे, पारिच्छत्तको तावतिंसे, कदम्बो अपरगोयाने. कप्परुक्खो उत्तरकुरूसु ¶ , सिरीसो पुब्बविदेहेति. एते सत्त देवानमेव पतिट्ठानभूमीसु सम्भवतो देवतरवोत्वेव वुच्चन्ति.

सग्गवण्णना समत्ता.

२९. पुब्बपच्छिमउत्तरा दिसा यथाक्कमं पाची पतीची उदीची नाम भवन्ति. पठमं पातो अन्चति रवि यस्सं सा पाची, नकारलोपो. पच्छा दिवावसाने अन्चति रवि यस्सं सा पतीची. उद्धं अन्चति रवि यस्सं सा उदीची, यस्सं वा सीतवियोगं दत्वा अन्चति सा उदीची, वियोगत्थवाचको हेत्थ उकारो, दसद्दो दानत्थो. अथ वा पन्चति पुब्बभावमापज्जतेति पाची. पतिन्चति पच्छाभावमापज्जतेति पतीची. उदञ्चति सीतवियोगदानत्तमापज्जतेति उदीची. एत्थ च उदीचीसहचरणतो पतीची इत्थियं, पतीचीसहचरणतो पाची इत्थियं वत्ततीति दट्ठब्बं. एवं तंतंसहचरणभावेन तस्स तस्स तंतंलिङ्गत्तमुपनेय्युं. पुब्बपच्छिमउत्तराति सब्बनामस्स वुत्तमत्ते पुम्भावो.

दक्खिणादिद्वयं दक्खिणदिसायं. मज्झे अपायं अञ्चति यस्सं रवि, सा अपाची. मज्झत्थोयं अपसद्दो, यथा ‘‘अपदिस’’न्ति, ‘‘अवाची’’तिपि पाठो, अवपुब्बो अञ्च अधोमुखीभावे. अवञ्चति अधोमुखी भवति यस्सं रवि, सा अवाची. उण्हादिके वा तब्बियोगे करोन्तो यस्सं रवि अञ्चति, सा अवाची. विदिसादिद्वयं दिसामज्झे. दिसाहि विनिग्गता विदिसा. दिसानमनुरूपा, अनुवत्तका वा दिसा अनुदिसा. अपदिसन्तिपि विदिसाय नामं [नपुंसकाब्ययं त्व’पदिसं (अमर ३.६)].

३०. एरावतादयो ¶ अट्ठ गजा पुब्बादीनं दिसानं रक्खणतो दिसागजा नाम, पुण्डरीकं नाम सितम्बोजं, तंसदिसवण्णताय पुण्डरीको. रस्ससरीरताय वामनो. कुयं पथवियं मोदते कुमुदो. अञ्जनवण्णताय अञ्जनो. पुप्फा पकासमाना दन्ता अस्स पुप्फदन्तो. सब्बभूमियं चरतीति सब्बभुम्मो, सब्बभुम्मो वा चक्कवत्ती तस्सानुरूपत्ता सब्बभुम्मो. सोभनदन्तावयवत्ता सुप्पतीको [सोभना पतीका अवयवा’स्स सुप्पतीको (क.)]. ‘‘सुप्पतीको सोभनङ्गे, भवे ईसानदिसागजे’’ति हि नानत्थसङ्गहे वुत्तं. एरावतादीनं दिसानं सम्बन्धकथनं पाचीवारणादिनामसूचनत्थं, एसं करेणुयो पन –

अब्भमु कपिला चेव, पिङ्गला नुपमा मता;

तम्बकण्णी सुभदन्ती, अङ्गना अञ्जनावती [अमर ३.५].

३१. धतरट्ठादिद्वयं पुब्बदिसाधिपतिदेवे. धारितं रट्ठमनेनाति धतरट्ठो, रस्स तो. पञ्चसिखादीनं गन्धब्बानं अधिपो नायको गन्धब्बाधिपो. कुम्भण्डसाम्यादिद्वयं दक्खिणदिसाधिपतिदेवे. कुम्भण्डानं सामि नायको कुम्भण्डसामि. विरुहन्ति वुड्ढिं विरूळ्हिमापज्जन्ति एतस्मिं कुम्भण्डाति विरूळ्हको. विरूळ्हं वुड्ढिप्पत्तं वा कं सुखमेतस्साति विरूळ्हको. विरूपक्खादिद्वयं पच्छिमदिसाधिपतिदेवे. विरूपानि अक्खीनि यस्स विरूपक्खो, विविधसण्ठानानि अक्खीनि यस्स वा विरूपक्खो. नागानं अधिपति नागाधिपति.

३२. यक्खाधिपादिचतुक्कं ¶ कुवेरे. आळवकादियक्खानं अधिपो यक्खाधिपो. विस्सवणस्स अपच्चं वेस्सवणो. तिचरणाट्ठदाठाभयानकमत्थिताय कुच्छितं वेरो सरीरमस्स कुवेरो. खुद्देनास्स नरयुत्ता सिविकारथेति नरो वाहनमस्स नरवाहनो. त्यम्बकसखो, यक्खराजो, गुय्हकेसरो, मनुस्सधम्मा, धनदो, राजराजो, धनाधिपो, किन्नरेसो, यक्खो, एकपिङ्गलो, सिरिदो, पुञ्ञजनेस्सरोइच्चादीनिपि कुवेरस्स नामानि.

अस्स कुवेरस्स पुरी ‘‘अळका, अळकमन्दा’’ति च वुच्चति. अलं विभूसने, अलं विभूसनं करोतीति अलका, सा एव अळका. अळका एव मोदकरणतो अळकमन्दा, उकारस्स अकारो, नागमो च. केलासोतिपि तस्स नामं, केलि पयोजनं अस्स केलो, आसते अस्मिन्ति आसो, केलो च सो आसो चेति केलासो, कण्हसप्पादि विय निच्चं कम्मधारयो. अस्स कुवेरस्स पहरणं आयुधं गदा, गं वुच्चति वजिरं, तं विय दुक्खं ददातीति गदा. इमे चत्तारो यथावुत्ता धतरट्ठादयो देवा कमतो पुब्बादीनं चतुद्दिसानं अधिपा अधिपतयो नाम. अमरकोसे पन –

‘‘इन्दो अग्गि पितुपति, नेरितो वरुणो’निलो;

कुवेरो ईसो पतयो, पुब्बादीनं इमे कमा.

रवि ¶ सुक्को महीसूनु, तमो च भानुजो विधु;

बुधो सुरगुरु चेति, दिसाधिपा तथा गहा’’ति [अमर ३.३-४].

अञ्ञेयेव दिसाधिपतयो कथिता, इन्दरविमादीनञ्च दिसाधिपच्चकथनं पाझादीनं इन्ददिसारविदिसादिनामसूचनफलं.

३३-३४. जातवेदाद्यट्ठारसकं अग्गिम्हि. जाते उप्पन्ने विन्दति घातयतीति जातवेदो. अन्धकारे जातं विज्जमानं विन्दति लभति, विदति जानाति एतेनाति वा जातवेदो, जननं जातं वेदो पाकटो यस्स वा सो जातवेदो. सिखा वुच्चति जाला, ताय योगतो सिखी. जोतति दिप्पतीति जोति. पुनातीति पावको, ण्वु. दहतीति दहनो. अनन्ति पालेन्त्यनेनेति अनलो, अलपच्चयो. वेदे हुतं वहति पापयति, सयं वा लभतेति हुतावहो. अच्चि वुच्चति जाला, ताय योगतो अच्चिमा. धूमो केतु धजो यस्साति धूमकेतु. अजति जलमानो कुटिलं गच्छतीति अग्गि, इ. गो रंसि एतस्सत्थीति गिनि, अस्सत्थ्यत्थे इनि, अग्गिनीतिपि पाठो, सो अग्गिसदिसो. भानु पभा यस्सत्थि, सो भानुमा. तेजेति सेसभूतोपादारूपानीति तेजो. धूमो सिखा चूळा यस्स धूमसिखो. वायु सखा अस्स वायुसखो. दहित्वा [दहतो (क.)] गच्छतो कण्हा वत्तनी मग्गो यस्स कण्हवत्तनी. विस्सानरस्स इसिनो अपच्चं वेस्सानरो. हुतं ¶ हविं असति भुञ्जतीति हुतासो. धनञ्जयो, जलनो, आसयासो, रोहितस्सो, सत्ताच्चि, सुक्को, चित्रभानु, विभावसु, सुचिइच्चादीनिपि अग्गिस्स नामानि.

सिखादित्तयं अग्गिजालायं. सिनोति निसानी भवतीति सिखा, ‘‘सि निसाने’’ति कातन्त धातु, खपच्चयो. जलतीति जाला. अच्चते पुज्जते अनेनेति अच्चि. सिखा जाला भिय्यो रूपन्तरा इत्थियं, अच्चि पन अपुमे.

३५. द्वयं अग्गिकणे [तीसु फुलिङ्गो’ग्गिकणो (अमर १.६०) फुलिङ्गानीति अग्गिकणानि (म. नि. टी. ३.६५)]. विविधासु दिसासु फुल्लं गच्छतीति विप्फुलिङ्गं. तथा फुलिङ्गं. सब्बधरकते पन ‘‘फुलिं गच्छतीति फुलिङ्गो’’ति वुत्तं. तिकं छारिकायं. मलीनकंसवत्थादीनं तं दित्तिं सेति पवत्तेतीति भस्मं, मपच्चयो, भसति वा अधो पतति वत्थादीनं मलमेतेनाति भस्मं. कंसादीनं सुक्कभावत्थं इच्छितब्बत्ता इट्ठि अभिलासो सोभनं एतस्सा अत्थीति सेट्ठि, ‘‘सपक्खको सलोमको’’त्यादीसु विय ससद्दस्स विज्जमानत्थत्ता. मलस्स सरणं करोतीति सारिका, सा एव छारिका, यथा ‘‘सळायतन’’न्त्यादीसु.

३६. द्वयं उण्हछारिकायं. उण्हत्ता कुक्कुं कुच्छितं लातीति कुक्कुलो, ‘‘कुक्कु विदत्थियं हत्थे, पकोट्ठे कुच्छितेपि चे’’ति हि नानत्थसङ्गहे वुत्तं. कुक्कुं वा हत्थं लुनाति छिन्दति दहतीति कुक्कुलो, सो एव कुक्कुळो ¶ . उण्हमेव भस्मं उण्हभस्मं, तस्मिं. तिकं दित्तकट्ठादिन्धने. अङ्गति हानिं गच्छतीति अङ्गारो, आरपच्चयो, पुन्नपुंसकोयं. ‘‘अलाते’नित्थि कुजे’ङ्गारो’’ति हि तिकण्डसेसे [तिकण्डसेस ३.३२९] वुत्तं. हानिमेव लाति, न ठितिं विसेसञ्चाति अलातं. उद्धं धूमं मुञ्चतीति उम्मुतं, तदेव उम्मुकं. पञ्चकं कट्ठादिन्धने. सन्तमग्गिं एधयति वड्ढयतीति समिधा. एधयतीति इधुमं, उमो. एधयतीति इधो. उपादियते अग्गिनेति उपादानं. एधयतीति इन्धनं.

३७. पञ्चकं आलोके. ओभासति दिप्पतीति ओभासो. पकासति दिप्पतीति पकासो. आलोचयति पस्सति एतेनाति आलोको, आलोकेति वा एतेनाति आलोको, ‘‘लोक, लोच दस्सने’’ति धातुद्वयपाठतो. उज्जोततीति उज्जोतो, अन्धकारं विद्धंसेन्तो जोततीति वा उज्जोतो. आ समन्ततो तपति दिप्पतीति आतपो. समाति एते पञ्च तुल्यत्थाति भावो.

दसकं वाते. आहारो विय पाणभूतोपि कदाचि सत्ते मारेतीति मारुतो, सोव मालुतो. पुनाति सङ्कारादिकन्ति पवनो. वायति गच्छतीति वायु, वायति वा पुप्फादीनं गन्धो येन सो वायु. तथा वातो. अनन्ति पाणन्त्यनेनेति अनिलो, इलो. सन्तं निच्चलं ¶ ईरयति कम्पेतीति समीरणो, समीरितुं कम्पितुं सीलमस्साति वा समीरणो. गन्धं वहतीति गन्धवाहो, णो. वायो वायुसदिसो, उभयत्रापि यागमो. समन्ततो ईरति खिपति रुक्खादयोति समीरो. सदा सब्बदा गति यस्स सदागति. ससनो, गन्धवहो, आसुगो, मरुतो, जगतिपाणो, पवमानो, पभञ्जनो इच्चादीनिपि वातनामानि.

३८. इमे छ वक्खमाना वायुभेदा वायुविसेसा, उद्धं गच्छतीति उद्धङ्गमो, उच्चारपस्सावादीनं नीहरणवसेन अधोभागं गच्छतीति अधोगमो. कुच्छिम्हि उदरे तिट्ठतीति कुच्छिट्ठो. कोट्ठे अन्ते सेति तिट्ठतीति कोट्ठासयो. पुनप्पुनं ससन्ति येन अस्सासो, बहिनिक्खन्तवातो. पस्सासोति अन्तोपविसनकवातोपि ‘‘अस्सासो’’ति एतेन सङ्गय्हते सहचारितत्ता. सब्बङ्गेसु अनुसरति सीलेन सेदलोहितादिसम्पादनतोति अङ्गानुसारी. अमरकोसे पनायं वातो ठानब्यापारभेदेन पञ्चधा कथितो [पाणो’पानो समानोचोदानब्याना च वायवो सरीरट्ठा इमे (अमर १.६७)], टीकायञ्चस्स –

‘‘हदये पाणो गुदे’पानो, समानो नाभिमज्झट्ठो;

उदानो कण्ठदेसे तु, ब्यानो सब्बङ्गसन्धिसु [हदये पाणो गुदे’पानो, समानो नाभिसण्ठितो; उदानो कण्ठदेसट्ठो, ब्यानो सब्बसरीरगो इति ठाननिण्णयो (चिन्तामणिटीका)].

तत्रपाणोअन्नप्पवेसादिकरो ¶ . अपानो मुत्तकरीससुक्कविसट्ठिकरो. समानो मज्झे अन्नपचनादिकरो. उदानो भासितगीतादिकरो. ब्यानो सेदरत्तसवनुम्मेसनिमेसगत्यादिकरो [खेदचेट्ठाउम्मेसनिम्मेसगत्यादिकरो (क.)]. पकट्ठेन अनन्त्यनेन भत्तादिप्पवेसनतोति पाणो. मुत्तादिकं अपनेत्वा अनन्त्यनेनाति अपानो. सम्मा अनन्ति अनेन भुत्तपरिपाचनतोति समानो. उद्धमनन्त्यनेन भासितादो सामत्थियजननतोति उदानो. विसेसेन अनन्त्यनेन सेदरत्तसेम्हादि [खेदचेट्ठादि (चिन्तामणिटीका)] सम्पादनतोति ब्यानो’’ति [तंब्यापारा च यथा – अन्नप्पवेसनं मुत्ता-द्युस्सग्गो’न्नविपाचनं भासणादि निमेसादि, तंब्यापारा कमा इमे (चिन्तामणिटीका)] वुत्तं.

३९. द्वयं अन्तोपविसनकवाते. आनं वुच्चति बहिनिक्खमनवातो, ततो अपगतं अपानं. अस्सासतो अपगतो पस्सासो. द्वयं बहिनिक्खमनवाते. आदिम्हि पवत्तो सासो अस्सासो. अनन्ति पाणन्त्यनेनेति आनं, आदिम्हि पवत्तं आनं आनं, एकस्साकारस्स लोपो.

४०. वेगखिप्पादयो वातधम्मत्तेन निच्चप्पवत्तिका इति तप्पक्कमे [तप्पक्कमेन तक्कमेन (क.)] उच्चन्ते. तत्र रयन्तं वेगे. सब्बत्र करणसाधनं. इच्छितट्ठानं वजन्ति पापुणन्ति एतेनाति वेगो.

‘‘क्रियावाचित्तमाख्यातुं ¶ , एकेकत्थो निदस्सितो;

पयोगतोनुगन्तब्बा, अनेकत्था हि धातवो’’ति [चन्द्रधातुपाठे].

वुत्तत्ता वजधातु पापुणनेपि पवत्तति, एवं सब्बत्र, अकारस्स ए. जवन्ति एतेनाति जवो, रयन्ति गच्छन्ति एतेनाति रयो.

खिप्पादिनवकं सीघे. अथ जवसीघानं को भेदो? सवेगगतिवचना जवादयो, सीघादयो तु धम्मवचना, तथा च ‘‘सीघं पचति [पस्सति (क.)], सीघं गच्छती’’ति पयोगो, न तु ‘‘जवं पचति, जवंगच्छती’’ति पन पयोगो. ‘‘वेगेन गच्छति, जवेन गच्छती’’त्यादीसु कथं? तत्र भेदस्स वत्तुमिच्छितत्ता न दोसो. खिप्पति पेरतीति खिप्पं, खिप पेरणे. सयतीति सीघं, सी सये, घपच्चयो. ब्युप्पत्ति हि यथा कथञ्चिपि भवति, सञ्ञा तु लोकतोवावगन्तब्बा, सब्बत्रेवं. तरतीति तुरितं. लङ्घतीति लहु, लङ्घ गतिसोसनेसु, घस्स हो, निग्गहीतलोपो, उपच्चयो च, लहुपरियायो लघुसद्दोप्यत्थि. असति खेपतीति आसु, उ. तरतीति तुण्णं, रस्स णो. अरति गच्छतीति अरं. न विलम्बीयति न ओहीयतीति अविलम्बितं, लबि अवसंसने. तुवट्टति सयतीति तुवट्टं, तुरितभावेन वत्ततीति वा तुवट्टं, रितलोपो.

४१. अरियासामञ्ञस्स पुब्बड्ढं सन्तते. एत्थ च अट्ठसु गणेसु छट्ठो सब्बलहुको, ततोपरे छग्गणा स ¶ , भ, स, भ, भ, भा, अट्ठमो गो. समन्ततो तनोतीति सततं. नासभावेन न इच्चं न गन्तब्बं निच्चं, नासं वा न गच्छतीति निच्चं. ‘‘नागो’’त्यादीसु वियाति एत्थापि न दोसो, तस्स चो. न विरमतीति अविरतं. न आरमतीति अनारतं. समन्ततो, पुनप्पुनं वा तनोतीति सन्ततं. न अवरमतीति अनवरतं. सदा धवति गच्छतीति धुवं. ‘‘धु गतिथेरियेसू’’ति कातन्तधातु.

विपुलाड्ढं अतिसये. एत्थ हि अयुगपादे द्वादसमत्ता, युगे अट्ठारसमत्ता, सब्बासु अरियासु पठमे पादे द्वादसमत्ता, दुतिये अट्ठारस, ततिये द्वादस, चतुत्थे पञ्चदस. यदा पन पठमततियेसु परिहायन्ति, तदा युगे अधिका होन्ति, इदं विपुलालक्खणं. अथ सततातिसयानं को भेदो? सततं सन्तति अविच्छेदोक्रियन्तरेहि अब्यवधानं, अतिसयो तु पोनोपुञ्ञं, पकट्ठो च. तेसु पोनोपुञ्ञं क्रियाब्यावुत्ति, पकट्ठो तु क्रियावयवानं उक्कंसता. भासति सब्बेसन्ति भुसं, आस्स उ. भस्सति अधो पततीति वा भुसं. भस अधोपतने, अस्स उ. अतिसयनं अतिसयो, अतिक्कमित्वा वासयनं पवत्तनं अतिसयो. दहति सब्बन्ति दळ्हं, हतो पुब्बे ळो, दलति विदारयतीति वा दळ्हं, हपच्चयो, दहन्तो लातीति वा दळ्हं, वण्णविपरिययो, अभिसयो च दळ्हञ्च अतिसयदळ्हा. तरति अतिक्कमतीति तिब्बं, रस्स वो, अस्स इ. एति गच्छतीति एको, सो एव एकन्तं, एकं तरति अतिक्कमतीति वा एकन्तं. मत्ततो अतिक्कन्तं अतिमत्तं. बहुं लातीति बाळ्हं, उलोपो, वण्णविपरिययो च हसद्दो. अतिवेलं, अच्चत्थं, निब्भरं, नितन्तं, गाळ्हंइच्चादीनिपि अतिसये.

दब्बं सत्वं, तंविपरीते धम्ममत्ते वत्तमाना बाळ्हपरियन्ता खिप्पादयो अतिसयं विना पण्डके नपुंसके वत्तन्ति ¶ . खिप्पं भवति [‘‘खिप्प भवभी’’ति पदद्वयं अधिकं विय दिस्सति], अतिसयो पुल्लिङ्गो, अस्स गुणस्सातिसयो, अस्स दब्बस्सातिसयो इति. ‘‘खिप्पं भुञ्जति, सततं जुहोति, सततं रमणीयो’’इच्चत्र तु क्रियाविसेसनत्तायेव पण्डकत्तं. तेसु खिप्पादीसु ये दब्बगा दब्बाभिधायिनो, ते तीसु लिङ्गेसु. ‘‘दब्बधम्मो लिङ्ग’’न्ति दस्सनन्तरं. यथा खिप्पा जरा, खिप्पो मच्चु, खिप्पं गमनं. सन्तता तण्हा, सन्ततं दुक्खं, सन्ततो आकासो. अतिमत्ता क्रिया, अतिमत्तो नरो, अतिमत्तं पदं इच्चादि.

४२-४३. द्वादसकं मारे. हरनयनग्गिदड्ढत्ता [तिनयनग्गिदड्ढत्ता (क.)] नत्थि विग्गहो सरीरमेतस्स अविग्गहो. कामयति रतिच्छं उप्पादयतीति कामो, कारितन्ता अपच्चयो. सिङ्गाररूपेन पाणीनं मनसि भवतीति मनोभू. पञ्चकामगुणेसु मदयतीति मदनो. लोकानं अन्तं विनासं करोतीति अन्तको. वसे वत्तेति सीलेनाति वसवत्ती. पापं इच्छति करोति, तेन युत्तोति वा पापिमा. परतो जायतीति पजा, अच्छन्दिका, तासं पति पजापति. ये कुसलधम्मेसु पमत्ता, तेसमेव बन्धु पमत्तबन्धु. कण्हधम्मयुत्तताय कण्हो. कुसलधम्मे मारेतीति मारो. अकुसलधम्मे न मुञ्चतीति नमुचि. मीनकेतनो, कन्दप्पो, दप्पको, अनङ्गो, पञ्चसरो, सम्बरारि, मनसिजो, कुसुमेसु ¶ , अनञ्ञजो, पुप्फधन्वा, रतिपति, मकरद्धजोइच्चादीनिपि विण्हुसुतस्स कामस्स नामानि.

तण्हा अरती रगा चेति एता तिस्सो तस्स मारस्स धीतरो. यो तं पस्सति, तं तसितं करोतीति तण्हा, सलोपो, ण्हा च. परेसं कुसलधम्मेसु अरतिं करोतीति अरती. रज्जन्ति एत्थाति रगा. तस्स मारस्स हत्थी गिरिमेखलो नाम. सरीरमहन्तभावेन गिरिसदिसत्ता गिरि वियाति गिरि. मारेन ममायनवसेन ‘‘अयं मे हत्थी मेखलो नाम होतू’’ति कतनामत्ता मेखला वियाति मेखलोति समुदितनामद्वयेन एकमेव हत्थिं वदति, यथा ‘‘वजिरासनि, सीतुण्ह’’न्ति.

४४. तिकं यमे. पजासंयमनतो यमा, मच्चुप्पभुतयो अस्स किङ्कारा, तेसु राजतेति यमराजा. तेधातुकेसुपि आणापवत्तकत्ता महन्तो विसयो एतस्स विसयी, णी, सो एव वेसायी. यत्थ लक्खणेन न सिज्झति, तत्थ सब्बत्र ‘‘यदादिना वा निरुत्तिनयेन वा सद्दसिद्धि वेदितब्बा’’ति हि पुब्बे वुत्तं, दुक्खजनकत्ता वा विसदिसट्ठानं गच्छन्तीति वेसा, नेरयिका, तेसं अधिपतिभावेन अयति पवत्ततीति वेसायी, ई. यमानं राजा यमो. धम्मराजो, कतन्तो, समवत्ती, कालो, दण्डधरो, अन्तकोइच्चादीनिपि यमस्स नामानि. अस्स यमस्स आवुधं नयनमेव. तेन किर कोधचित्तेन ओलोकितमत्तेन सत्तानं सरीरानि आतपे खित्तघतपिण्डानि विय विलीयन्तीति.

द्वयं ¶ असुरभेदे. एतेसञ्हि सतिपि देवभावे हेट्ठा निवासितभावसामञ्ञतो एत्थ वचनं, मारस्स पन सत्तानमनत्थकारकतासामञ्ञेन यमेन सद्धिं वचनं तक्करत्ता. युद्धादीसु वेपितं कम्पितं चित्तमेतस्स वेपचित्ति [सं. नि. अट्ठ. १.१.२५६]. पुण्णं लोमं यस्स सो पुलोमो, पुलामहती उमा कित्ति, कन्ति वा यस्साति पुलोमो. ‘‘उमातसीहेमवति-हलिद्दाकित्तिकन्तिसू’’ति हि नानत्थसङ्गहे वुत्तं. अयं पन सक्कस्स भरियाय सुजाताय पिता. द्वयं किन्नरे. अस्समुखनरसरीरताय कुच्छितो पुरिसो, किञ्चि वा पुरिसो, पुरिससदिसोति वा किम्पुरिसो. एवं किन्नरो. तुरङ्गवदन, अस्समुखादीनिपि किन्नरस्स नामानि.

४५-४६. अद्धपज्जेन आकासस्स नामानि. तेसं तेसं वत्थूनं अन्तरं नानत्तं इक्खते लोको एत्थ, अनेनाति वा अन्तलिक्खं, रस्स लो. इक्खनं वा दस्सनं इक्खा, तस्स अन्तरं कारणं अन्तलिक्खं. खनति ब्यवधानन्ति खं, क्वि. सब्बगहगामणिनो आदिच्चस्स पथो मग्गो आदिच्चपथो. न भवतीति अब्भं. गच्छन्त्यनेन देवाति गगनं, यु, मस्स गो. अम्बते सद्दायते अत्राति अम्बरं, रो. हय गतिम्हि, विसेसेन हयति गच्छति सब्बत्राति वेहासो, यस्स सो, विगतो वा हासो चित्तस्स एत्थारम्मणालाभतोति वेहासो. अनिलस्स वातस्स पथो अनिलपथो. भुसं कासन्ते दिप्पन्ते पदत्था एतेनाति आकासो, न कस्सति न विलेखीयतीति वा आकासो. न भवति ¶ एत्थ किञ्चिपि वत्थूति नभं, नत्थि भूमि एत्थाति वा नभं, न भायन्ति पक्खिनो अनेन, एत्थाति वा नभं. विनो पक्खिनो हयन्ति गच्छन्ति एत्थाति वेहायसं, असो. तारा वुच्चन्ति नक्खत्तादयो, तेसं पथो तारापथो. सुरानं देवानं पथो सुरपथो. न हञ्ञतेति अघं, हनस्स घो. अनन्तं, विसणुपदंइच्चादीनिपि आकासस्स नामानि.

४७-४८. मेघाद्येकादसकं मेघे. मेहति घरति सेचतीति मेघो. वारिं वहतीति वलाहको, वारिसद्दस्स वो, वस्स लो [पाणिनि ६.३.१०९; मोग्गल्लानपञ्चिका १.४७; नीति-सुत्त १३४०, १३४३]. दिब्बन्ति वुड्ढिं विरूळ्हिं गच्छन्ति लोका अनेनाति देवो. पजानं लोकानं अन्नं भोजनं भवति एतेनाति पज्जुन्नो, अकारस्सुकारो. अम्बुं उदकं धारेतीति अम्बुधरो. लोकानं सन्तापं हन्तीति घनो, हस्स घो. जलधारं धारेतीति धाराधरो. जीवनं जलं मूतं बन्धमनेनेति जीमूतो, वनसद्दलोपो, लोकानं वा जीवितं मुनाति बन्धतीति जीमूतो, वितलोपो, जीवितस्स जी आदेसो वा [पाणिनि ६.३.१०९; मोग्गल्लानपञ्चिका १.४७; नीति-सुत्त १३४०, १३४३]. एवं अञ्ञत्र. वारिं वहतीति वारिवाहो. अम्बुं ददातीति अम्बुदो. आपं भरतीति अब्भं, क्वि, पस्स बो.

तिकं वुट्ठियं. वस्सति सिञ्चतीति वस्सं, वस्स सेचने. एवं वस्सनवुट्ठियो.

पञ्चकं ¶ विज्जुयं. सततं ईरति कम्पतीति सतेरो, तलोपो, सो एव सतेरिता. खणमत्तम्पि न तिट्ठतीति अक्खणा. कुटिलं अचिरट्ठायितत्ता विरूपं हुत्वा जवतीति विज्जु. विज्जोततीति विज्जुता. अचिरं पभा यस्स अचिरप्पभा.

४९. चतुक्कं मेघनादे. मेघानं नादो मेघनादो. धनीयते धनितं[थनितं (सी.)], धन सद्दे. गज्जनं गज्जितं, गज्ज सद्दे. रसीयते रसितं. आदिना हरादादि [सब्बत्र नपुंसकेभावे तो, आदिना स्वनितधनितादयो (चिन्तामणिटीका), आदिना धनितहरादरासादयो (ब्याख्यासुधाटीका)]. द्वयं सक्कधनुम्हि. इन्दस्स आवुधं धनु च इन्दावुधं, इन्दधनु च. वातेन खित्तमम्बु वातक्खित्तम्बु, बिन्दु. सीतं करोतीति सीकरो, सिञ्चतीति वा सीकरो, चस्स को, अरो च, वातवसेन वा ततो ततो सरतीति सीकरो, अस्स ई, मज्झे कागमो च.

५०. तिकं जलधारायं. वेगतो जलधारानं सं भुसं पतनं आसारो, पुनप्पुनं सरतीति आसारो. वेगं धारेतीति धारा. अधो पततीति सम्पातो, संसद्दो अधोभागे [वेगतो जलधारानं सम्भूय पतनं धारासम्पातो, सर गतियं घउ इति आसारो (चिन्तामणिटीका)]. द्वयं वस्सोपले. करेन हत्थेन गय्हुपगत्ता करका, जलं पिण्डं करोतीति वा करका, ‘‘वस्सोपले ¶ तु करका, करकोपि च दिस्सते’’ति रुद्दो, करसद्दोत्र. ‘‘करो वस्सोपले पाणि-सोण्डापच्चायरंसिसू’’ति नानत्थसङ्गहे वुत्तं. घनतो, घनकाले वा सञ्जातं उपलं सिला घनोपलं. दुट्ठु दिनं दुद्दिनं, अयं दुद्दिनसद्दो मेघच्छन्नाहे वत्तति, असोभनत्थोप्यत्थि दुद्दिनसद्दो, अगुणवचनतायं वाच्चलिङ्गो.

५१-५२. छक्कं तिरोधाने. धर आवरणे, अपादिपुब्बो. अपिधरति आवुणोतीति पिधानं, अलोपो. अपधरतीति अपधारणं. तिरो धरति पिदहतीति तिरोधानं. अन्तरं धरतीति अन्तरधानं, निग्गहीतलोपो. अपिधरतीति अपिधानं. एत्थ च अपादिउपसग्गा धातुनो आवरणत्थजोतका. छादयतीति छादनं. ब्यवधा, अन्तरधिइच्चादयोपि तिरोधाने.

साद्धपज्जेन चन्दस्स नामानि. इन्दति नक्खत्तानं परमिस्सरियं करोतीति इन्दु. चन्दति हिलादयति सुखयति पजन्ति चन्दो. नक्खत्तानं राजा नक्खत्तराजा. उमा कन्ति, ताय सह विज्जतीति सोमो, सुखं अभिस्सवतीति वा सोमो, मपच्चयो. निसं रत्तिं करोति, तत्थ वा करो रंसि एतस्स निसाकरो. अन्धकारं उसेन्ति दहन्ति विनासेन्तीति ओसा, रंसयो, ते एत्थ धियन्ति पतिट्ठहन्तीति ओसधि, ताराविसेसो, तस्स ईसो पति ओसधीसो. हिमो सीतलो रंसि यस्स हिमरंसि. ससो अङ्को लक्खणं यस्स ससङ्को. चन्दं कप्पूरं माति सदिसं नयतीति चन्दिमा. इकारादेसो. ससलक्खणमेत्थ अत्थि ससी ¶ . ससति वा हिंसति उण्हगुणन्ति ससी, ईपच्चयो तदुपलक्खिते तदुपचारं. सीता रंसयो यस्सत्थीति सीतरंसि. निसाय रत्तिया नाथो तदालङ्कारभावतोति निसानाथो. उळूनं तारानं राजा उळुराजा. माति अत्तानं कप्पूरेन सदिसं करोतीति मा, मासद्दोयं पुमे, तंसहचरणतो उळुराजादयोपि. हिमंसु, कुमुदबन्धु, विधु, सुधंसु, सुब्भंसु, निसापति, मिगङ्को, कलानिधि, द्विजराजो, ससधरो, नक्खत्तेसोइच्चादीनिपि चन्दस्स नामानि.

५३-५४. सोळसन्नं भागानं पूरणो सोळसमो भागो चन्दस्स कला, कल सङ्ख्याने, कलीयते एकादिना सङ्ख्यायतेति कला. द्वयं चन्दस्स सरीरे. मञ्ञते ञायते अनेनेति बिम्बं. मनतो वपच्चयो, निपातना मस्स बो, अस्सि, नस्स मो, वस्स बो, बिम्बसद्दो अनित्थियं. मण्डयतेति मण्डलं, अलो, इत्थियं मण्डली, अयं तीस्वपि [बिम्बो अनित्थी, मण्डलं तीसु (अमर ३.१५)].

पादहीनपज्जेन अद्धभागो. असति खेपेति समुदायन्ति अड्ढो, तो. तथा अद्धो. उपड्ढोति उपसग्गेन पदं वड्ढितं, एते तयो पुमे. खण्डयति समुदायन्ति खण्डं. सक्यते ¶ उब्बाहनादीसु थोकत्ताति सकलं, अलो, खण्डसकला वा पुमे, सत्थे रूपभेदतो नपुंसके. एते च अड्ढादयो तयो असमे भागे पुमे, समे तु नपुंसकेति रूपभेदेनाह ‘‘अद्धं वुत्तं समे भागे’’ति. खण्डादिद्वयं पन असमेपि वत्तमानं पुन्नपुंसके वत्तति, तस्मा ‘‘अद्धं वुत्तं समे भागे’’ति एत्थ ‘‘अड्ढं, उपड्ढ’’न्ति इदं द्वयम्पि सङ्गहितं [असमभागे पुमानि, समे अंसे नपुंसकत्तं रूपभेदतो, उपचारतो तब्भागवति वाच्चलिङ्गो – अद्धा साटी, अद्धं वत्थं अद्धो कम्बलो (चिन्तामणिटीका)].

पसादादयो चन्दे अवस्सम्भाविनो, अञ्ञत्र तु पासङ्गिका इति चन्दपक्कमे उच्चन्ते. विसेसेन सादयति पसादयतीति पसादो. एवं पसन्नो, सो एव पसन्नता.

तिकं चन्दप्पभायं. कुमुदस्सायं विकासो [विकारो (क.)] कोमुदी. चन्दं आचिक्खति पटिपादयतीति चन्दिका. जुति अस्सात्थीति जुण्हा. तस्स णो, हपच्चयो च, चन्दस्स वा जुतिं सोभं नय्हति बन्धतीति जुण्हा.

चतुक्कं सोभनमत्ते. कनति दिप्पतीति कन्ति, कन दित्तियं, कामीयतीति वा कन्ति. सुन्दरं भाति दिप्पतीति सोभा. जोतयतीति जुति. छादयतीति छवि. छद संवरणे, विपच्चयो, दलोपो.

५५. सत्तकं लक्खणे. कं अत्तानं लङ्कयति हीनं करोतीति कलङ्को. लञ्छते लक्खते अनेनेति लञ्छनं ¶ . लक्ख्यते अनेनेति लक्खं. तथा लक्खणं. अङ्कीयते लक्ख्यते अनेनेति अङ्को. अभि विसेसं जानाति एतेनाति अभिञ्ञाणं. चिहीयति लक्खीयति अनेनेति चिहनं. चिह लक्खणे.

सब्बासं सोभानं मज्झे परमा सोभा सुसमा नाम, सोभनं समं सब्बं अस्सं सुसमा, सेट्ठा सोभा.

५६. गुणे फोट्ठब्बविसेसे सीतन्ति नपुंसकं भवति. देवदत्तस्स सीतं वत्तति. सीतादयो तयो गुणीलिङ्गा गुणिनो लिङ्गं गण्हन्ति, तं यथा – सीतला भूमि, सीतलं जलं, सीतलो वातो. उण्हाभितत्तेहि सेवीयतीति सीतं, तेन युत्तो सीतो. सस गतियं, इरो, इत्तञ्च, सीतत्थिकेन सरीयतीति वा सिसिरं. सीतं गुणं लातीति सीतलो.

महिकान्तं हिमे. हिंसतीति हिमं, सस्स मो,निग्गहीतलोपो च. तुह अदने, तोहति हिंसतीति तुहिनं, इनो. उपरितो सवतीति उस्सावो. नीहरन्ति निस्ससन्त्यनेनेति नीहारो, नत्थि ईहा वा एतस्मा हेतुभूताति नीहारो, आरो. महीयते रागीहीति [वाचाभि (चिन्तामणिटीका)] महिका, ण्वु.

५७. छक्कं नक्खत्ते. पुनप्पुनं उदयत्ता न खीयते नक्खत्तं, अत्तनो गमनट्ठानं न खरति न विनासेतीति वा नक्खत्तं, अथ ¶ वा नक्ख गतियं, नक्खतीति नक्खत्तं. जोतति सुभासुभनिमित्तं पकासेतीति जोति, नक्खत्त भंसद्देहि सहचरणतो नपुंसके. यथावुत्तं निमित्तं भाति पकासेतीति भं. कत्तब्बं तरन्ति लोका एतायाति तारा, अत्तनो वीथिं तायति अरति गच्छतीति वा तारा, तारेति वा लोके अहिततोति तारा, अयञ्च तारका, उळु च एते तयो अपुमे. तरा एव ण्वु, तारका [तारा एव तारका ण्वु (क.)]. उच्चं लवति [उलयति (क.)] गच्छतीति उलु. सो एव उळु. न केवलं तारका एव अपुमे, अथ खो उळु चाति चसद्दत्थो. उळुसहचरियतो पक्खे नपुंसके च.

५८-६०. अस्सयुजादयो रेवत्यन्ता सत्ताधिकवीसतारका नक्खत्ता नाम होन्ति. तानि च नक्खत्तानि आकासे यथाठितानि कमतोयेव एत्थ कथितानि, न उप्पटिपाटिया. वक्खति च ‘‘कमतो सत्ताधिकवीसति नक्खत्ता’’ति. अस्सरूपयोगतो अस्सयुजो. यमसदिसत्तासब्बत्र भरतीति भरणी. यु, ई. अग्गिसदिसत्ता कन्तति छिन्दतीति कत्तिका, करोति तस्मा वा कत्थिका, कत्तिकाय सहिता सकत्तिका. भरणी, रोहिणी वा. कमलसम्भवत्ता कमले रुहति वड्ढतीति रोहिणी. मिगसीसण्ठानत्ता ¶ तारापुञ्जो मिगसिरं, छट्ठीसमासो उत्तरप्पधानत्ता नपुंसकत्तं. रुद्दरसावट्ठितकोधरुद्दसदिसत्ता कदाचि अदति घसतीति अद्दा. पुनप्पुनं सत्तेसु हितं वस्सतीति पुनब्बसु, वस्स सेचने. पोसेति क्रियानि, पोसेन्त्यस्मिन्ति वा पुस्सो. भुजगसदिसत्ता न सिलिस्यते नालिङ्ग्यतेति असिलेसो.

महीयते कारियत्थिकेहीति मघा [माघा (क.)], हस्स घो. फलं गण्हापेतीति फग्गुनी, यु, ई. द्वेति पुब्बफग्गुनी, उत्तरफग्गुनी चेति द्वे. हत्थसण्ठानताय हत्थो. तच्छकसदिसत्ता विचित्तं फलं ददातीति चित्ता. सोभना आति, साति वा तनुं करोति सुभासुभन्ति साति [स्वाति (क.)], सुभासुभफलदानतो वा साति, ‘‘साति दानावसानेसू’’ति हि नानत्थसङ्गहे वुत्तं, अयं द्वीसु. विसदिसं फलं खणतीति विसाखा, विविधा वा सखा मित्ता यस्सा सा विसाखा. अनुराधयति संसिज्झति सुभासुभफलमेतायाति अनुराधा. गुणेहि सब्बासं वुड्ढत्ता जेट्ठा. मूलति पतिट्ठाति सुभासुभफलमेत्थाति मूलं. आसाळ्हो नाम भतीनं दण्डो, तंसण्ठानत्ता आसाळ्हा नाम द्वे नक्खत्ता पुब्बासाळ्हउत्तरासाळ्हवसेन.

सवति सुभासुभफलमेतेनाति सवणो, सवणं वा. धनमेसन्ति एत्थाति धनिट्ठा, धनति वा विभूति निधानं धनिट्ठा. सतं भिसजा एत्थ, सतभिसजानं वा अधिपति सतभिसजो. भद्दो गो, तस्सेव पदानि पादा अस्सं भद्दपदा, पुब्बभद्दपदा द्वे, उत्तरभद्दपदा द्वे, समूहो चेसं चतुसङ्ख्याति बहुवचनं. रा वुच्चति धनं, तब्बन्तताय रेवती, आकारस्से, रेवतो वा इसिभेदो, तस्स अपच्चं रेवती.

६१. द्वयं ¶ राहुग्गहे. सो वुच्चति सग्गो, तत्थ भातीति सोब्भानु. रहति चन्दादीनं सोभं जहापेतीति राहु. तमो, विधुन्तुदो, चन्दादो, सेहिकेयोतिपि राहुस्स नामानि.

सूर, चन्द, अङ्गारक, बुध, जीव, सुक्क, असित, राहु, केतूति एते सूरादयो नवग्गहा नाम.

मेसादिको द्वादसकोट्ठासो रासि नाम. आदिना उसभ, मेथुन, कक्कट, सीह, कञ्ञा, तुला, विच्छिक, धनु, मकर, कुम्भ, मीने सङ्गण्हाति.

द्वयं भद्दपदनक्खत्तानं नामं. पोट्ठो गो [पाठो भद्दो गो (क.)], तस्सेव पदानि पादा अस्सं पोट्ठपदा.

६२-६३. पज्जद्वयेन सूरियस्स नामानि. आ भुसो दिप्पतीति आदिच्चो, प्पस्स च्चो. लोकानं सूरभावं जनेतीति सूरियो. तथा सूरो. सतं बहवो रंसयो यस्स सतरंसि. दिवा दिवसं करोतीति दिवाकरो, दिवसे वा करो ¶ आभा यस्स दिवाकरो, दिवासद्दोयं सब्बकारकवचनो, न तु आधारवचनो एव. विसेसेन रोचते दिप्पतेति वेरोचनो. दिनं करोति, कुमुदानं वा दिनं माकुल्यं करोतीति दिनकरो, उण्हो रंसि यस्स उण्हरंसि. पभं करोतीति पभङ्करो.

अंसुनो माला, सा यत्थ अत्थि अंसुमाली. दिनानं पति दिनपति. तपतीति तपनो. रवन्ति एतेन सत्ता पभावित्ताति रवि. भानु यस्स अत्थीति भानुमा. रंसि यस्स अत्थीति रंसिमा. भं आभं करोति, तासं वा आकरो उप्पत्तिट्ठानं भाकरो. भाति दिप्पतीति भानु. देवेहिपि अच्चते पूजीयतेति अक्को. सहस्सं बहवो रंसयो यस्स सहस्सरंसि. द्वादसत्ता, पभाकरो, विभाकरो, विकत्तनो [विस्सकम्मुना विकत्तितो, कम्मनि यु (चिन्तामणिटीका)], मत्तण्डो, दिवमणि, तरणि, मित्तो, चित्रभानु, विभावसु, गहप्पति, हंसो, सविताइच्चादीनिपि सूरियस्स नामानि.

६४. पज्जेन सूरियादीनं रंसिप्पभानं नामानि. रसन्ति तं सत्ताति रंसि. आ भुसो भातीति आभा. पकारेन भातीति पभा. दिप्पतीति दित्ति. रोचते दिप्पतेति रुचि. दीध्यति दिप्पतीति दीधिति. दिप्पतीति वा दीधिति, पस्स धो, इकारागमो. मिय्यन्ते खुद्दजन्तवो अनेनेति मरीचि, ईचि. असति गच्छति दिसन्तन्ति अंसु, उस्सागमो. मरीचिसहचरणतो दीधित्यादयो [खलितपाठो (?), सवरसामी तु अङ्गुलि काकलिसारि सरारि तुम्बिअरि सुसि दीमित्यत्तयो थीपुमेसु इच्चाह (चिन्तामणिटीका)] भानु अंसु च द्वीसु. मय गमनत्थो ¶ दण्डको धातु [दण्डकप्पकरणे आगतधातूति अत्थो, निरुत्तिसारमञ्जुसाटीकायं २५३.४१३ पिट्ठेसु पस्सितब्बं], खपच्चयो ऊकारागमो, अथ वा मा माने, उख गत्यत्थो दण्डको धातु [दण्डकप्पकरणे आगतधातूति अत्थो, निरुत्तिसारमञ्जुसाटीकायं २५३.४१३ पिट्ठेसु पस्सितब्बं], माय मानाय उखतीति मयूखो [मापसं गगनं पमाणयं उखति गच्छतीति पिसोदरादि (चिन्तामणिटीका)]. किरति तिमिरं किरणो. किरति तिमिरं करो.

६५. द्वयं आदिच्चमण्डलोतिख्याते उप्पातादिजाते रंसिमण्डले. सूरियस्स परि समन्ततो धीयते परिधी, परि समन्ततो विसतीति परिवेसो, सूरियं वा परिवेठयतीति परिवेसो. ठस्स सो. उपसूरियकं, मण्डलन्ति द्वेपि परिधिनो नामानि.

द्वयं मरीचिकायं. मरीचिसदिसताय मरीचि. मिगानं तण्हा पिपासा यस्सं जलाभासत्ता सा मिगतण्हिका.

सूरियस्स उदयतो पुब्बे उट्ठितरंसि उग्गतरंसि अरुणो नाम सिया. अरुणवण्णताय अरति गच्छतीति अरुणो. सूरसूतो, अनूरु, कस्सपेय्यो, कस्सपि, गरुडाग्गजोतिपि अरुणस्स नामानीति. आकासवण्णना.

६६-६७. चतुक्कं ¶ काले. कल्यन्ते सङ्ख्यायन्ते आयुप्पमाणादयो अनेनाति कालो, करणं वा कारो, भावे णो, सो एव कालो, न हि क्रियाविनिमुत्तो कालो नाम कोचि अत्थि, महाकालस्स पन सस्सतभावतो अतीतादिवोहारो नत्थेवाति अवयवकालानं समूहभावतो सोपि ‘‘कालो’’ति वुत्तो. सत्तानं जीवितं असति खेपेतीति अद्धा, तस्स धो, आकारन्तोयं अद्धासद्दो पुमे. पुनप्पुनं एतीति समयो. विनासं लातीति वेला, वण्णलोपो. दिट्ठो, अनेहोतिपि कालस्सेवनामानि.

खणादयो पन तब्बिसेसा तस्स कालस्स विसेसा भेदा. के ते, कित्तकप्पमाणा चेत्याह ‘‘खणो’’इच्चादि. दसहि अच्छराहि अङ्गुलिफोटनेहि लक्खितो कालो खणो नाम, खणु हिंसायं, खणोतीति खणो, अ. दस खणा लयो नाम भवे भवन्ति, एतेन वा वचनेन विकभिसङ्ख्यापेक्खिनोपि वाचका सन्तीति गम्यते. लयति गच्छति, सत्तानं जीवितं लुनन्तो वा अयति गच्छतीति लयो. दस लया खणलयो नाम, खणलयानं समूहभावतो. ते दस खणलया मुहुत्तो नाम सिया सियुं वा, अयमनित्थी. हुच्छ कोटिल्ये ¶ , कुटिलयति रत्तिदिवसे सुभासुभदस्सनतोति मुहुत्तो, तो, धातुयादिम्हि मुकारागमो, च्छलोपो च. ते दस मुहुत्ता खणमुहुत्तो नाम.

तिकं दिने. दिब्बन्ति कीळन्त्यस्मिं दिवसो, सो. न जहाति पच्चागमनं अहं. आददाति निब्यापारन्ति दिनं, इनो, आलोपो च, दिब्बति वा एत्थाति दिनं, वस्स नो. घसरो [घसति अन्धकारं रो (चिन्तामणिटीका)], वासरोतिपि दिनस्स नामानि.

६८. कल्लन्तं पच्चूसे. पभात्यस्मिं लोकोति पभातं. तथा विभातं. उस रुजायं, पच्चूसति विनासेति तिमिरन्ति पच्चूसो. कल्यन्ते सङ्ख्यायन्ते अनेन सङ्ख्यादयोति कल्लं. अहोमुखं, ऊसोतिपि पच्चूसस्स नामानि.

द्वयं पदोसे. दोसाय रत्तिया आरम्भो अभिदोसो. दोसाय रत्तिया पारम्भो पदोसो. अभिधानतो पासद्दस्स पुब्बनिपातो, अप्पधानरस्सो च, अथ वा अभिदुस्सन्ति पदुस्सन्ति च यत्थ सब्बकम्मानि अभिदोसो पदोसो च.

तिकं सायन्हे. सायति दिनं अवसायतीति सायो, सायन्तो वा दिनन्तं करोन्तो अयतीति सायो, पुन्नपुंसके. सम्माझायन्ति तं सञ्झा, (‘‘ब्रह्मुनो तनु पिता लोकस्स जनेत्ती’’ति हि आगमो निकायन्तरिकानं.) ¶ [( ) एत्थन्तरे पाठो अधिको विय दिस्सति] दिनानं अच्चयो अतिक्कमो, अवसानं वा दिनच्चयो. दिनन्तोतिपि तस्सेव नामं.

पुब्बण्हापरण्हमज्झन्हवसेन तिविधा सञ्झा [अमर ४.३]. पुब्बञ्च तं अहञ्चाति पुब्बण्हं. अपरञ्च तं मज्झञ्च तं अहञ्चेति अपरण्हं मज्झन्हं. सब्बत्रावयवे समुदायोपचारतो अहस्सेकदेसे अहसद्दोति कम्मधारयो, तासं तिस्सन्नं सञ्झानं समाहारोति सञ्झमित्युच्चते. समाहरणं समाहारो, एकीभावो, सो च भिन्नकालानं न भवतीति बुद्धिया समकालग्गहणतो एककालत्ता तस्मिं अभिधेय्ये दिगुसमासो, तथा हि समाहारो समूहो तंसम्बन्धे छट्ठियायेव भवितब्बन्ति चिन्तेन्तो आचरियो न अञ्ञपदत्थसमासो अयन्ति आकारस्साप्पधाने रस्सत्तन्ति सञ्झं. समाहारो भावो तस्सेकत्ता एकवचनं, कम्मवचने तु समाहारे तिस्सो सञ्झा समाहटाति पठमन्तानं समासे सपदत्थपाधान्या बहुवचनं, रस्साभावो च.

६९. पञ्चकं रत्तियं. निसति तनुं करोति सब्बब्यापारं निसा. रज्जन्ति रागिनो अत्र रजनी, यु, ई. राति गण्हाति अब्यापारन्ति रत्ति,ति, रज्जन्ति वा एत्थ रत्ति. पठममज्झिमपच्छिमयामवसेन तयो यामा पहारा यस्सा तियामा. संवुणोति दिनं संवरी. निसीथिनी, खणदा, खपा, विभावरी, तमस्सिनी, यामिनी, तमीइच्चादीनिपि रत्तिया नामानि.

चन्दिकायुत्ता ¶ चन्दप्पभाय युत्ता रत्ति जुण्हा नाम, जुण्हायोगतो जुण्हा. तमो उस्सन्नो यस्सं सा तमुस्सन्ना रत्ति तिमिसिका नाम, तिमिसं उस्सन्नं एत्थाति तिमिसिका, उपधाय इत्तञ्च.

७०. तिकं अड्ढरत्तियं. मज्झिमारत्ति कम्मभूता ‘‘निसीथो, अड्ढरत्तो, महानिसा’’ति च वुच्चति. निस्सते सयते अस्मिं निसीथो. अड्ढञ्च तं रत्ति चाति अड्ढरत्तो, रत्तेकदेसे रत्तिसद्दो, रत्तिया अड्ढन्ति वा अड्ढरत्तो. महती च सा निसा चाति महानिसा.

चतुक्कं अन्धकारे. अन्धं हतं दिट्ठसत्तिकं लोकं करोतीति अन्धकारो. तमतीति तमो, अथ वा तमन्ति आकङ्खन्ति रतिं लोका एत्थ तमो, तमु आकङ्खायं, तमसद्दो अनित्थी, तंसहचरणतो अन्धकारोपि. तिमिसं इसो, अथ वा तिमु तेमने, तिमन्ति एत्थ रागेनाति तिमिसं. तिमिरं, पुब्बेव इरपच्चयो.

७१. चतुद्दसन्नं रत्तीनं पूरणी चतुद्दसीसङ्खातो काळपक्खो च एकग्घनो वनसण्डो च मेघपटलञ्च अड्ढरत्ति च एतेहि चतूहि समन्नागतो तमो चतुरङ्गतमं नाम.

७२. अन्धञ्च तं तमञ्चाति अन्धतमं, यं लोकं अन्धकारं करोति. अयं अन्धतमसद्दो घनतमे बाळ्हतमे वत्तति.

द्वयं ¶ पहारे. पहरीयते भेरियादि अत्राति पहारो, पुमे सञ्ञायं अपच्चयो. या पापुणे मो, उपयमेति वा अहो रत्ति चानेन यामो, यमितो णो. पहारो एव यामो इति सञ्ञितो यामसञ्ञितो.

दुतिया तिथि पाटिपदो नाम. पटिपज्जते चन्दो खयं, उदयं वा यस्सं पाटिपदो. ततियादी तिथियेव, न पाटिपदो. तनोतीति तिथि, अथ वा ता पालने इथि. तिथिसद्दो द्वीसु.

७३. द्वयं पन्नरसियं, पन्नरसन्नं तिथीनं पूरणी पन्नरसी, पण्णरसीतिपि पाठो अत्थि. द्वयं पुण्णमायं तिथियं. मिय्यते तिथीनं खयो वुड्ढि चानेन मासो, चन्दो, पुण्णो च सो मासो चाति पुण्णमासो, तस्सायं तिथि, पुण्णमासो यस्समत्थीति वा पुण्णमासी. पुण्णो मा चन्दो यत्थ, पुण्णमस्सायं वा तिथि पुण्णमा, ‘‘पुण्णिमा’’ति पाठे पन सति चन्दस्स पुण्णभावो पुण्णो, तेन निब्बत्ता भावपच्चयन्ता तेन निब्बत्ते इमो दिस्सति, लोकासयत्ता लिङ्गस्स इत्थिलिङ्गत्तं, सा पुण्णमा एककलाहीने चन्दे सति अनुमति नाम, अनुमञ्ञन्ते अनुगच्छन्ते देवतापितूहि सह यस्सं सा अनुमति. पुण्णे पन चन्दे सा पुण्णमा राका नाम, राति दस्सनावकासं राका, को [कलाहीने सा’नुमति पुण्णे राका निसाकरे (अमर ४.८)].

अपरा काळपक्खसम्भूतापन्नरसी पन अमावसी, अमावासीतिपि उच्चते. अमा सह वसन्ति रविचन्दा यस्सं अमावसी, अमावासी च दीघं कत्वा, अमासद्दो सहत्थो अब्ययं. दस्सो [दस्सला (क.), दिस्सन्ते रविचन्दा अत्र, ‘‘गणकेही’’ति घ (चिन्तामणिटीका)], सूरियिन्दुसङ्गमोति तस्सायेव नामानि.

७४. सट्ठिघटिकाहि ¶ लक्खितो कालो अहोरत्तो नाम. घटेन्ति अहोरत्तियोति घटिका. अहो च रत्ति च अहोरत्तो, पुमे. अदिगुत्तेपि अहोरत्तन्ति नपुंसकेपि. ते पञ्चदस अहोरत्ता पक्खो नाम. पचन्ति परिणमन्ति भूतान्यनेनेति पक्खो. पुब्बापरभूता ते च पक्खा यथाक्कमं सुक्ककाळा सुक्कपक्खकाळपक्खा नाम. जोतिसत्थक्कमेन सुक्कपक्खो पुब्बसञ्ञितो, कण्हपक्खो अपरसञ्ञितो. ततो एव मासविसेसे लोके सकपरपक्खोति [लोकेप्यपरपक्खोति (क.)] रूळ्ही. सुच सोके, सुक्को, सोचन्ति एत्थ अन्धकाराभिलासिनोति कत्वा, सूचेति पकासेतीति वा सुक्को. किरति सुक्कन्ति कारो, णो, सोव काळो, केन वा जोतिना अरति एत्थ कारो, सोव काळो. ते दुवे सुक्ककाळपक्खा समुदिता मासो नाम. मसि परिमाणे, कम्मनिणो.

७५-७६. साद्धपज्जेन द्वादसमासानं नामानि. चित्ताय परिपुण्णेन्दुयुत्ताय युत्तो, उपलक्खितो वा मासो चित्तो ¶ , संयोगन्तत्ता न वुद्धि, एवं सब्बत्र. परिपुण्णेन्दुयुत्ततंतंनक्खत्तनामवसेन द्वादसन्नं मासानं नामानि वेदितब्बानि. चित्तमासादयो फग्गुनमासपरियन्ता द्वादस कोट्ठासा कमेन मासाति ञेय्या. पसत्थतमत्ता जेट्ठा, तंयोगा जेट्ठो. असय्हो रवि अत्रेति आसाळ्हो. यस्स ळो, सवन्त्यस्मिं सावणो, यु. फलन्त्यत्र फग्गुनो, यु, लस्स गो, अस्स उ. कत्तिकमासो पच्छिमकत्तिको नाम. अस्सयुजमासो पुब्बकत्तिको नाम.

७७. द्वयं सावणमासे. अन्तोवीथितो बहि निक्खमति सूरियो एत्थ, अधिकरणे अनीयो. द्वयं चित्तमासे. नानापुप्फफलविचित्तताय लोकानं रम्मं करोति, रमन्ति वा एत्थाति रम्मको.

७८. कत्तिककाळपक्खतो पच्छिमकत्तिकतो पट्ठाय चतुरो चतुरो मासा कमा कमतो हेमन्तगिम्हानवस्सानसञ्ञिता उतुयो नाम होन्ति. हिमानि एत्थ सन्ति हेमो, सो एव हेमन्तो, ‘‘सुत्तन्तो वनन्तो’’ति यथा, हिनोति वा हानिं गच्छति सब्बमेत्थाति हेमन्तो, अन्तपच्चयो, मागमो च. गिरति पीळयतीति गिम्हानो, मानो, रस्स हो, वण्णविपरिययो च. वस्सति एत्थ वस्सानोयु. उतुयो द्वीसूति पच्चासत्या उतुसद्दो एव द्वीसु, न हेमन्तादयो, अमरकोसे पन उतुसद्दो पुमे वुत्तो [अमर ४.२०].

७९. अञ्ञथापि ¶ उतुभेदं दस्सेतुं अरियसामञ्ञमाह ‘‘हेमन्तो’’इच्चादि. वा अथ वा वुत्तानुसारेन उतुत्तयपभेदे वुत्तवचनस्सानुसारेन. इदं पन ‘‘कत्तिककाळपक्खतो’’ति वचनं सन्धाय वुत्तं, तस्मा कत्तिककाळपक्खतो पभुति द्वे द्वे मासा कमा कमतो हेमन्तो, सिसिरो, वसन्तो, गिम्हो, वस्सानो, सरदो उतूति छ उतू भवन्ति, पुनप्पुनं एतीति कत्वा, तु, इस्स उ. सिसिरं सीतलं, तंयोगा सिसिरं, वाविधानतो न वुद्धि, मकारो पदसन्धिकरो. वस कन्तियं. वसीयतेति वसन्तो. पुप्फधनुत्ता [पुप्फवन्तत्ता (क.)] वा वसति कामो एत्थ वसन्तो. सरति पीळयति अस्मिन्ति सरदो, तस्स दो. सा सुनखा रमन्ति एत्थाति वा सरदो, मस्स दो.

८०-८१. तिकं गिम्हे. उसति दहतीति उण्हो, ण्हो, सलोपो च. निदहन्ते यस्मिन्ति निदाघो, हस्स घो. गिरति ¶ पीळयतीति गिम्हो, मो, रस्स हो, वण्णविपरिययो च. तिकं वस्सानोतुम्हि. वस्सति पवस्सति एत्थाति वस्सो, वस्सानो, पावुसो च. अस्स उ, संयोगलोपो च.

वस्सानादिकेहि तीहि उतूहि दक्खिणायनं सूरियस्स दक्खिणदिसागमनं भवति, अञ्ञेहि तीहि सिसिरवसन्तगिम्हेहि उत्तरायनं उत्तरदिसागमनं भवति. इ गतियं, भावे यु, अयनं. पुस्ससङ्कन्तिमारब्भ आसाळ्हं याव आदिच्चस्स उत्तरा गति उत्तरायनं. आसाळ्हसङ्कन्तिमारब्भ पुस्सं याव दक्खिणा गति दक्खिणायनं. वस्सोयनद्वयन्ति इदं अयनद्वयं सम्पिण्डितं वस्सो नाम. वस्सन्ति एत्थाति वस्सो, वस्सकालेन वा उपलक्खितो वस्सो, ‘‘चित्तो, चक्खुदसक’’न्ति यथा.

पज्जद्धं वस्से. संवसति एत्थ संवच्छरो, छरो, सस्स चो, ‘‘वच्छरो’’तिपि तस्सेव नामं. नत्थि इत्थिलिङ्गत्तमेतेसु अनित्थी. पच्चासत्या सरदोपि तंपच्चासत्या हायनोपि. सरदकालेन लक्खितो सरदो, यथा ‘‘सोतदसकं, वेसाखो’’ति. जहाति भावेति हायनो, पदत्थे वा जहन्तो अयतीति हायनो. समयति विकलयति भावेति समा, सम वेकल्ये. ‘‘समा वस्से थीलिङ्गो तु, समं सब्बसमानेसू’’ति रुद्दो.

सब्बसत्तानं सब्बपारिसदत्ता [सब्बपटिपदत्ता (क.)] सब्बवोहारकुसलत्थं कालाधिकारत्ता परसमये कथितं देवानं वस्सप्पमाणम्पि इधाहरित्वा दीपेतब्बं. तथा हि मनुस्सानं मासेन पितूनं अहोरत्तो, एवं मनुस्सानं वस्सेन देवानं अहोरत्तो, तत्रोत्तरायनं देवानं दिनं, रत्ति पन दक्खिणायनं, देवतानं सट्ठ्याधिकाहोरत्तिसतत्तयेन वस्सेन द्वादसवस्ससहस्सानि देवानं युगं. तेन वुत्तं –

‘‘एसा ¶ द्वादससहस्सी, युगाख्या परिकित्तिता;

एतं सहस्सगुणितं, अहो ब्रह्ममुदाहट’’न्ति [‘‘वेददीपकगन्थे’’ति निस्सये].

तञ्च नरानं चतुयुगं दिब्बसहस्सद्वयेन ब्रह्मुनो द्वे दिवेति. कत, तेता, द्वापर, कलिवसेन चतुयुगं. तत्र कतयुगस्स मनुस्ससङ्ख्याय पमाणं अट्ठवीसतिसहस्साधिकानि सत्तरसवस्सलक्खानि, तेताय छन्नवुतिसहस्साधिकानि द्वादसवस्सलक्खानि, द्वापरस्स चतुसट्ठिसहस्साधिकानि अट्ठवस्सलक्खानि, कलिस्स बात्तिंससहस्साधिकानि चत्तारि वस्सलक्खानि. वुत्तञ्च –

‘‘सुञ्ञं सुञ्ञं खं नागा, करमुनिससिनो;

मान’मादो युगस्स, तेताय खंखंसुञ्ञं.

रसनवसूरिया, वस्ससङ्ख्या पसिद्धा;

सुञ्ञं सुञ्ञं खं वेदा, रसभुजगमिति.

द्वापरे वस्ससङ्ख्या, सुञ्ञाकासंखंनेत्त-;

गुणजलनिधयो, वस्ससङ्ख्या कलिस्से’’ति.

पिण्डो चेस वीसतिवस्ससहस्साधिकानि तेचत्तालीसवस्सलक्खानि. वुत्तञ्च ‘‘खाकाससुञ्ञम्बरदन्तसागरा चतुयुगानं परिमाणसङ्गहो’’ति. ब्रह्मुनो अहोरत्तेन नरानं द्वे कप्पा.

तत्र अट्ठ नागा, द्वे करा, सत्त मुनयो, एको ससी, छ रसा, द्वादस सूरिया, चत्तारो वेदा जलनिधयो च. द्वे नेत्तानि, तयो गुणा, बात्तिंस दन्ता, सङ्ख्याय पसिद्धेहेतेहि सङ्ख्या गहेतब्बा. खाकासम्बरसद्दा सुञ्ञपरियाया. सुञ्ञञ्च गणिते बिन्दुना सङ्गहितं. सब्बञ्चेतं पटियुगं पटिलोमेन पत्थारये. तत्र कतयुगस्स पत्थारो यथा – १७२८०००. तेताय यथा – १२९६००० ¶ . द्वापरस्स यथा – ८६४०००. कलिस्स यथा – ४३२०००. चतुयुगपिण्डस्स च यथा – ४३२००००. युगानं पटिपत्थारञ्च पिण्डस्स च यथाक्कमं अन्तिमं बिन्दुमादाय पटिलोमेन गणये. तं यथा –

‘‘एकं दस सतञ्चेव, सहस्स’मयुतं तथा;

लक्खञ्च नियुतञ्चेव, कमा दसगुणोत्तर’’न्ति.

तत्र दससहस्सानि अयुतं. दसलक्खानि नियुतं. तञ्च कलिद्वापरेसु नत्थीति लक्खपरियन्तमेव तत्र गणये, तदेवं युगानं, तंपिण्डस्स च अङ्कतो पुब्बवुत्ता वस्ससङ्ख्या सञ्ञाता भवतीति.

तत्र ब्रह्मुनो दिनं नरानं उदयकप्पो, रत्ति पन खयकप्पो. एकस्मिञ्च ब्रह्मदिने मनुसञ्ञिता चतुद्दस ब्रह्मसुता भवन्ति. तत्रेकस्स मन्वन्तरस्स एकसत्ततिदिब्बयुगानि पमाणं, तञ्च मानुसं चतुद्दसभि उत्तरं [चतुरासीतिउत्तरं (?)] युगसतद्वयं. तदेवं चतुद्दसभि मन्वन्तरेहि चतुनवुत्युत्तरानि नवदिब्बयुगसतानि भवन्ति. मानुसं तु चतुवीसतियुगसहस्सचतुक्कं. एसञ्च [छसत्तत्याधिकनवतिंसयुगसतं (?)] मन्वन्तरानं अट्ठवीससहस्साधिकसत्तरसमानुसवस्सलक्खसङ्ख्या वा कतयुगप्पमाणका पञ्च सन्धयो भवन्ति. तेन वुत्तं सूरियसिद्धन्ते [१.१८-१९] –

‘‘युगानं सत्तति सेका, मन्वन्तर’मिहो’च्चते;

कतस्स सङ्ख्या तस्सन्ते, सन्धि वुत्तो जलप्लवो.

ससन्धयो ते मनवो, कप्पे ञेय्या चतुद्दस;

कतप्पमाणा कप्पादो, सन्धी पञ्चदसट्ठिता’’ति.

कतयुगस्स च पादेन कलिनो पमाणं, पादद्वयेन द्वापरस्स, पादत्तयेन तेताय. चतुयुगञ्चेतं चक्कमिव भमतीति पञ्चदसहि सन्धीहि नरानं युगानि चतुवीसति भवन्ति. देवानं ¶ तु युगचक्कं. एतानि च ससन्धिचतुद्दसमन्वन्तरान्येकतोपि पिण्डितानि देवानं युगसहस्सं भवति, नरानं चतुयुगसहस्सं, तञ्च ब्रह्मुनो दिनमेकं. अञ्ञो मनु अस्मिं मन्वन्तरं, ब्रह्मसुता एव मनवो.

८२. पञ्चकं खयकप्पे. कप्पते जगती विनस्सतेति कप्पो. खयन्ति एत्थ खयो. कप्पो च खयो चाति कप्पक्खया. संवत्तते उपरमते, विनस्सते वा जगती अस्मिन्ति संवट्टो. चतुयुगानमन्ते जातो युगन्तो. पलीयते खीयते यत्थ लोकोति पलयो, पुमे, सञ्ञायं णो. केचि पनेत्थ ‘‘कप्पक्खयो तू’’ति पाठं वत्वा द्विन्नमेकाभिधानत्तं कप्पेन्ति, तं अमरकोसेन च तट्टीकाय च न समेति. वुत्तञ्हि तत्थ ‘‘संवट्टो, पलयो, कप्पो, खयो, कप्पन्तमिच्चपी’’ति [अमर ४.२२] च ‘‘पञ्चकं खयकप्पे’’ति च.

द्वयं काळकण्णियं. निन्दितब्बत्ता न लक्खीयतेति अलक्खी. अत्तनो निस्सयं काळवण्णसदिसं करोति अप्पकासकत्ताति काळकण्णी, करतो णो, रस्स णो, ई च. द्वयं सिरियं. पसंसितब्बत्ता लक्खीयतेति लक्खी. कतपुञ्ञेहि सेवीयते, ते वा सेवतीति सिरी, रो, ई च.

८३. द्वयं दानवानं मातरि. दा अवखण्डने, दायतीति दनु. द्वयं देवानं मातरि. दितीति असुरानमेव वेमातिका माता, तस्सा पटिपक्खभावेन अदिति.

८४. आगुन्तं ¶ पापे. पान्ति रक्खन्ति अत्तानमस्माति पापं, पकारवण्णागमो, दुग्गतिं पापनतो वा पापं. किल्यते सिथिली करिय्यते येनेति किब्बिसं, लस्स वो, इसो च, करोति अनिट्ठफलन्ति वा किब्बिसं, इब्बिसो. विरूपेन गच्छतीति वेरं. न हन्ति धञ्ञन्ति अघं, हनस्स घो, साधूहि अगन्तब्बत्ता वा अघं, हन गतियं. कुच्छितं चरितं दुच्चरितं. दु निन्दितं करणमस्स दुक्कटं. न पुनातीति अपुञ्ञं. कुसलानं पटिपक्खं अकुसलं. कं सुखं हनतीति कण्हं, वण्णविपरिययो. कल्यते अनेन कलुसं, उसो, कं वा सुखं लुनन्तो सेतीति कलुसं. दु निन्दितं इतं गमनमस्स दुरितं. अगन्तब्बं गच्छति एतेनाति आगु, आ पीळयं गच्छतीति वा आगु, ‘‘आ तु कोधमुदाट्टीसू’’ति हि एकक्खरकोसे वुत्तं.

८५-८६. छक्कं धम्मे. कुच्छितेनाकारेन सन्ताने सेन्तीति कुसा, रागादयो, ते लुनाति छिन्दतीति कुसलं. सुखं करोति, सोभनं वा करणमस्स सुकतं. सुखं करोतीति सुक्कं. पुनातीति पुञ्ञं. धरति सब्बन्ति धम्मं. अपरे पनिदं ‘‘पुञ्ञधम्म’’मित्येकपदं वदन्ति, तं अमरकोसेन [अमर ४.२४] विरुज्झनतो न गहेतब्बं. सुन्दरं चरणमस्स सुचरितं.

तिकं ¶ दिट्ठधम्मिके. दिट्ठधम्मो नाम पच्चक्खो अत्तभावो, तत्थ निब्बत्तं दिट्ठधम्मिकं. इहलोके जातं इहलोकिकं. सन्दिट्ठे पच्चक्खे अत्तभावे जातं सन्दिट्ठिकं. द्वयं सम्परायिके. तं वचनत्थतो सुविञ्ञेय्यं.

द्वयं तक्काले. तस्मिंयेव काले जातं, नासन्नकालादीसूति तक्कालं. तदा तस्मिंयेव काले जातं तदात्वं, त्वं, तदात्तन्तिपि पाठो. द्वयं आयतिकाले. उत्तरकालो पच्छिमो कालो. आगमिस्सतीति आयति, आपुब्बो इ गतिम्हि. एत्थ च यं इमस्मिं अत्तभावे दूरमासन्नं वा, तं दिट्ठधम्मिकं. यं पन इमस्मिं अत्तभावे वा सम्पराये वा दूरतरं, तं आयति.

८७-८८. पमोदन्तं पामोज्जे. हसति येनाति हासो. अत्ता मनो यस्स अत्तमनो. दुट्ठस्स हि मनो अत्ता नाम न होति, तस्स भावो अत्तमनता, पामोज्जं. पीणेति तप्पेतीति पीति. विन्दति सुखं एतायाति वित्ति. तुस्सन्ति एतायाति तुट्ठि, तंसहचरणतो वित्ति, तंसहचरणतो पीति च नारियं, अत्तमनता पन निद्देसतो रूपभेदो. आ भुसो नन्दयतीति आनन्दो. मुद हासे, पमुदो, आमोदोपि. सन्तुस्सनं सन्तोसो ¶ . नन्दनं नन्दि. सम्मदो सम्मदापि [सम्मुदो, सम्मदोपि (?)], उकारस्स अ. पमोदितस्स पुग्गलस्स, चित्तस्स वा भावो पामोज्जं.

तिकं सुखे. सुट्ठु खणतीति सुखं, क्वि. सादीयति अस्सादीयतीति सातं. फस्सति सिनेहतीति फासु, फुसति वा बाधति दुक्खन्ति फासु. सत्तकं कल्याणे. भदि कल्याणे, भद्दतीति भद्दं. पसत्थतरत्ता सेय्यो. सोभतीति सोभं. खी खये, खेपेति असुखं खेमं, मो. कल्यं निरोगं अणति गच्छति, कल्यं वा हितं अणयति पापयतीति कल्याणं, कम्मनि णो [कम्मनि उपपदे णपच्चयोति अधिप्पायो]. मङ्ग गत्यत्थो, मङ्गति धञ्ञं मङ्गलं, अलो. समेति दुक्खन्ति सिवं, वो.

८९. छक्कं दुक्खे. दुक्करं खमनमेत्थ दुक्खं. कस गमने, कसति अपुञ्ञन्ति कसिरं, इरो, कुच्छितेनाकारेन सेतीति वा कसिरं. किर विक्खिपने, किरति सुखन्ति किच्छं, कता वा पुञ्ञकरणिच्छा येनाति किच्छं, ‘‘दुक्खूपनिसा सद्धा’’ति हि वुत्तं. नत्थि अधिगमनत्थं ईहा एत्थाति नीघो, हस्स घो, अथ वा निहन्त्यपुञ्ञं हिंसति गच्छतीति वा नीघो, पुञ्ञं वा न हन्ति न गच्छतीति नीघो. विरूपमसति येनाति ब्यसनं, विसिट्ठं वा असति खेपेतीति ब्यसनं. न हन्ति धञ्ञन्ति अघं. एते पापादयो गुणे यथावुत्तलिङ्गा. पापपुञ्ञानि सुखादि च आकिच्छं किच्छन्तं गुणयोगतो दब्बे विसेस्ये वत्तमानानि तीसु. यथा –

पापा उतुमती कञ्ञा, पापो राजाप्यरक्खको;

पापं ब्याधकुलं हिंसं, पापो विप्पो च सेवको;

पुञ्ञं तित्थमिदं पुञ्ञा, नदी पुञ्ञो’य’मस्समो.

सुखं ¶ कामिकुलं दब्बं [सब्बं (?)], सुखो वासो सहा’म्बया [सहान्वयो (क.)];

सुखा युवति’रिच्छन्ती, सुखा वे मघवग्गहा [सुखा युवतिका गहा (क.)].

यदा तु सकत्थप्पधानं सुखादिकमेव विसेस्यत्तेन वत्तुमिच्छते, न तु दब्बं (पुब्बमिव विसेसनं,) [( ) चिन्तामणिटीकायं न दिस्सति] तदा रूपभेदोत्तमेव लिङ्गं. यथा –

‘‘दालिद्देपि [वलित्तेपि (क.)] धनित्तेपि, वसो परिजनो सुखं;

सुखं सज्जनवासो च, सुखं सन्ति अनुत्तरा’’ति.

ननु ‘‘दुक्कटोयं ब्यापारो, सुकतं कम्मं, कलुसोयं मे ब्यापारो’’ति अञ्ञेसम्पि तीसु वुत्ति अत्थेवेति किं पापपुञ्ञानमेव गहणं भवतीति? वुच्चते – ‘‘दुट्ठु कतो दुक्कटो, सुट्ठु कतं सुकत’’मिच्चेवं क्रियानिबन्धनापि तीसु वुत्ति सम्भवति, नावस्सं गुणनिबन्धना एव. कलुसस्सपि यदा सिट्ठपयोगेसु विसेस्यवुत्ति तिलिङ्गता उपलब्भते, तदा पापग्गहण’मत्थप्पधानं ब्याख्यातब्बं.

९०. पञ्चकं सुभासुभकम्ममत्ते. इट्ठानिट्ठविपाकभागो यत्थ अत्थीति भाग्यं. सुभासुभफलं नेतीति नियति,ति. सुभासुभफलं भाजेतीति भागो. इट्ठानिट्ठविभागभागोधीयति एत्थाति भागधेय्यं. सुभासुभफलं विदधातीति विधि. अयो, सुभावहो, देवं, दिट्ठंइच्चादीनिपि सुभासुभकम्ममत्तस्स नामानि. पञ्चकं जातियं. उप्पज्जनं उप्पत्ति, निप्पज्जनं निब्बत्ति, पद गतियं, निपुब्बो,ति, पस्स बो. जननं जाति. जनीयते जननं. उद्धं भवनं उब्भवो.

९१. पज्जं ¶ हेतुम्हि. अत्तनो फलं निमिनातीति निमित्तं, मा परिमाणे, निपुब्बो. करोति फलन्ति कारणं. तिट्ठति फलमेत्थाति ठानं. पज्जति निपज्जति फलमेतेनाति पदं, विसेसेन जायतेति बीजं, रस्सस्स दीघता. निस्सेसेन अत्तनो फलं बन्धति पवत्तेतीति निबन्धनं. निदीयते निच्छीयते अनेनेति निदानं, यु, निददाति फलन्ति वा निदानं. पभवति फलमेतस्माति पभवो, हिनोति गच्छति परिणमति कारियरूपतन्ति हेतु, तु, हिनोति वा पतिट्ठाति फलमेत्थाति हेतु, हि पतिट्ठायं. सम्भवति येन फलन्ति सम्भवो. सिनोति फलं बन्धतीति सेतु. पटिच्च फलमेतस्मा एतीति पच्चयो.

९२. यं कारणं समासन्नं आसन्नतरं फलेन, तं पदट्ठानन्ति मतं. पदानं हेतूनं ठानं पदट्ठानं, यथा ‘‘राजराजा’’ति. तिविधं कारणं उपादानकारणं सहकारीकारणं कारणकारणन्ति. यथा बीजं अङ्कुरस्स उपादानकारणसङ्खातं पदट्ठानं, भूमिजलादि सहकारीकारणं, ‘‘कम्मस्स [कम्पस्स (?)] कारणं जरो, तस्स कारणं कफो’’ति कफो कारणकारणं कम्मस्स [कम्पस्स (?)].

तिकं ¶ सरीराधिपतिदेवे. जीवन्ति सत्ता येनाति जीवो. पूरेति निस्सयस्साभिलासन्ति पुरिसो, इसो. अतन्ति सततं गच्छन्ति सत्ता येनाति अत्ता. द्वयं सत्तरजोतमोसाम्यावत्थायं. पधीयन्ते पलीयन्ते अत्र गुणा सत्तरजोतमो रूपाति पधानं, यु. पकरोति पुरिसोपभोगत्थं सद्दादिकारियन्ति पकति,ति. मोहरागदोसानं यथासङ्ख्यं सत्तरजोतमानीति सञ्ञा. सतो भावो सत्तं, ठितिपरता. रज्जन्त्यत्राति रजो, सट्ठिपरता. तमन्त्यत्राति तमो, पलयपरता.

९३. पज्जेन पाणिनो नामानि. पणन्ति जीवन्ति सत्ता येनाति पाणो, सो यस्सत्थि, सो पाणो. सरीरसङ्खातो कायो यस्सत्थि, सो सरीरी. कम्मेन भवतीति भूतं, नपुंसके, पुमेवाति वासद्दत्थो. रूपादीसु सञ्जतीति सत्तो, निच्छन्दरागापि रूळ्हिया सत्ताति वुच्चन्ति. देहो कायो यस्सत्थीति देही. पूरेतीति पूति, पूतिसङ्खातं आहारं गिलति अदतीति पुग्गलो, तिस्स लोपो, सत्तानं आयुं पूरेन्तो गच्छतीति पुग्गो, तं लाति भक्खतीति पुग्गलो. जीवन्ति येनाति जीवं, तमस्सत्थीति जीवो. यथावुत्तत्थो पाणो यस्सत्थीति पाणी. पकारेन जातत्ता पजा. जायतीति जन्तु, तु. कुसलाकुसलं जनेतीति जनो. लुज्जतीति लोको, लुज विनासे, जस्स को. यथा पुरिमका सत्ता जातिजरामरणं गच्छन्ति, तथा अयम्पि गच्छतीति तथागतो.

९४. रूपादयो ¶ छ चक्खादिगय्हा धम्मा ‘‘गोचरा’’ति ‘‘आलम्बा’’ति ‘‘विसया’’ति ‘‘आरम्मणानी’’ति ‘‘आलम्बणानी’’ति च वुच्चन्ते. रूपयति पकासेति अत्तनो सभावन्ति रूपं. सप्पति उच्चारीयतीति सद्दो, सप्प गतियं वा, सप्पते ञायते येनेति सद्दो. गन्ध अद्दने, अद्दनं हिंसनं, याचनञ्च, हिंसते अभिलसीयते वा गन्धो, गन्धेति वा अत्तनो वत्थुं सूचेति पकासेति ‘‘इदमेत्थ अत्थी’’ति पेसुञ्ञं करोन्तो विय होतीति गन्धो. रसन्ति तं सत्ता अस्सादेन्तीति रसो. फुसीयतीति फस्सो. गावो इन्द्रियानि चरन्त्येतेसु गोचरा. चित्तचेतसिकेहि आलम्बीयन्तेति आलम्बा. सि बन्धने विपुब्बो, विसिनोन्ति विबन्धन्ति इन्द्रियानीति विसया. आगन्त्वा चित्तचेतसिका रमन्ति एत्थाति आरम्मणानि, यु. एते इन्द्रियत्थातिप्युच्चन्ते, इन्द्रियेहि अत्थ्यन्ते अभिलसीयन्तेति कत्वा.

९५. पज्जद्धं सुक्के. सुच सोके, सोचन्ति एतेन तदत्थिकाति सुक्को, अ. गु सद्दे, गुयते कित्तीयतेति गोरो, रो. सि सेवायं, सेवीयतेति सितो, सिनोति वा बन्धति चित्तन्ति सितो. अवदायति सब्बवण्णेति ओदातो. दा अवखण्डने अवपुब्बो. धावति सुज्झत्यनेनेति धवलो, अलो. सित वण्णे, णो, सेतो ¶ . पडि गतियं, पण्डति पकासेतीति पण्डरो, अरो. सुचि, विसदो, अज्जुनोतिपि सुक्कनामानि.

छक्कं रत्ते. सोण वण्णे, णो, रत्तुप्पलवण्णो, रुह जनने, इतो, लत्ते लोहितो. रञ्जन्त्यनेनेति रत्तो, रन्ज रङ्गे. तम्बो उदुम्बरसङ्खातो लोहविसेसो, तब्बण्णताय तम्बो. मञ्जेट्ठा नाम रत्तवल्लि, याय हत्थिदन्तादिविकतियो रत्ता भवन्ति, तब्बण्णताय मञ्जेट्ठो. रोहितो लोहितसमो, अलत्तमेव विसेसो.

९६. सामलन्तं कण्हे. नील वण्णे, अ. कस्सतेति कण्हो, कस विलेखने, ण्हो. न सितो असितो. वण्णेसु एककोट्ठासभावेन कल्यतेति कालो, सो एव काळो. मच, मचि कक्कने, कक्कनं पिसनं, सेतादिकं मचतीति मेचको, ण्वु, अस्सेत्तं. सा तनुकरणे, सायति तनुकरीयति पटिपक्खवण्णेहीति सामो. सामलो सामसदिसो, मलपच्चयोव विसेसो.

पण्डुसद्दो सितपीते उत्तो, सितपीतसम्मिस्सितवण्णे पण्डुसद्दो वुत्तोत्यत्थो. वुत्तञ्च ‘‘सितपीतसमायुत्तो, पण्डुवण्णो पकित्तितो’’ति [चिन्तामणिटीका ५.१३]. पण्डति एकगणनं गच्छतीति पण्डु, पडि गतियं, उ. हरिणो, पण्डुरोतिपि पण्डुवण्णनामानि. ईसंपण्डु अब्यत्तपण्डुवण्णो धूसरो नाम, यथा धूलिवण्णो. धूस कन्तिकरणे, चुरादि, अरो.

९७. किञ्चिरत्तो ¶ अब्यत्तरत्तवण्णो अरुणो नाम, यथा मच्छस्स चक्खु [यथा मदमत्तस्स चक्खुरागो (चिन्तामणिटीका ५.१५)], सूरियादो तरुणो वुत्तो.

सेतलोहितो सेतरत्तमिस्सो वण्णो पाटलो नाम, यथा पाटलकुसुमं. पाटयतेति पाटलो, अलो, पट विभाजने.

द्विकं पीते. पा पाने, कम्मनि तो, ईत्तञ्च. हलिद्दिया इव आभा यस्स हलिद्याभो.

तिकं तिणपत्तादिगते वण्णे. लस कन्तियं, अतिसयेन लस्यतेति पलासो. ‘‘पालासो’’ति पाठे तु रस्सस्स दीघता. हर हरणे, मनं हरतीति हरितो, इतो. इ, हरि.

९८. नीलपीतसम्मिस्सवण्णे कळारो, कपिलो च वत्तन्ति. कल सङ्ख्याने. अरो, लस्स ळो, कळारो. कब वण्णे, इलो, बस्स पो, कपिलो.

रोचनप्पभे गोरोचनसदिसप्पभायं पिङ्गो, पिसङ्गो च वत्तन्ति. पभासद्दस्स द्विलिङ्गत्तमेव. पिजि भासत्थो, पिङ्गो. परत्र सकारवण्णागमो, पिसङ्गो.

कळारादीनं ¶ चतुन्नं पिङ्गलविसेसत्थवाचकतं दस्सेत्वा पिङ्गलसामञ्ञत्थवाचकत्तम्पि दस्सेतुमाह ‘‘कळारादि’’च्चादि. तस्सायमत्थो – न केवलं कळारादयो पिङ्गलविसेसत्थेयेव पवत्तन्ति, अथ खो पिङ्गलसामञ्ञत्थेपि वत्तन्तीति. वुत्तञ्हि अमरकोसे ‘‘कळारो कपिलो पिङ्गो, पिसङ्गो कद्दु पिङ्गलो’’ति [अमर ५.१६]. केचि पन कळारादयो पिसङ्गपरियन्ता चत्तारो सद्दा पिङ्गलगुणे वत्तमाना पुमे वत्तन्ति, गुणिनि पन वाच्चलिङ्गाति एवं पच्छिमेन सम्बन्धं कत्वा वदन्ति, तं अमरकोसेन विरुज्झनतो इध च ‘‘सुक्कादयो’’ति सब्बेसंयेव गहणतो न गहेतब्बं.

९९. तिकं सबले कोकिलकण्ठसदिसे. कल्यतेति कलो, मसि परिमाणे, कम्मनि णो, कलो एव मासो कम्मासो, लस्स मो, कलनं वा कलो, तं मसतीति कम्मासो, यथा ‘‘कुम्भकारो’’ति. सब गतियं, सबतीति सबलो, अलो. चिय्यतेति चित्तो, त. त्रणपच्चये चित्रो. कम्मीरो, कब्बुरोतिपि सबलस्स नामानि.

कण्हपीतमिस्से सावो वुत्तो. से गतिम्हि, सयतीति सावो, अवो. कपिसोतिपि सावस्स नामं. कण्हलोहितमिस्से धूमाभे पन धूम, धूमला वत्तन्ति. धूमो वियाति धूमो. धूमं लातीति धूमलो. एते सुक्कादयो सावन्ता यदा अभेदोपचारा गुणिनि गुणिम्हि वत्तन्ति, तदा वाच्चलिङ्गा, यथा सुक्को हंसो, सुक्का हंसी ¶ , सुक्कं हंसकुलंइच्चादि योज्जं. यदा गुणे गुणमत्ते वत्तन्ति, तदा पुमे, यथा हंसस्स सुक्को, मयूरस्स चित्तो इच्चादि योज्जं.

१००. लासनन्तं नच्चे. नत गत्तविनामे, पब्बज्जादित्ता नच्चादेसो. नतनं नच्चं, नटनं वा नच्चं, सब्बत्र भावसाधनं. नतीयते नत्तनं. लस्यते लासनं, लस कन्तियं, लसितब्बन्ति वा लासनं.

नच्चं, वादितं, गीतं इति इदं भोरियत्तिकं नाट्यं नामेत्युच्चते [अमर ७.१०]. तुर तुरणहिंसासु. तुरीयन्तेनेनेति तूरियं, मुरजादि. तब्भवो सद्दो तोरियो, णो. तेन लक्खितं तिकं तोरियत्तिकं. नटस्सेदं नाट्यं. ततियस्स तोरियसामञ्ञस्स तु पासङ्गा नाटका.

१०१. नच्चट्ठानं राजङ्गणादि रङ्गो नाम सिया ‘‘रमन्ता गच्छन्ति एत्थ, रज्जन्ति एत्था’’ति वा कत्वा. सूझसूचनं हत्थादीहि सूचितब्बस्स पकासेतब्बस्स सत्थप्पहारादिनो सूचनं पकासनं अभिनयो नाम ‘‘नयनं नयो, पस्सन्तानं अभिमुखं नयो’’ति कत्वा. ब्यञ्जकोतिपि तस्सेव नामं.

भरतसत्थवुत्तअट्ठुत्तरसतकरणनिप्फन्नथिरहत्थपरियत्थकादिनामको द्वत्तिं सप्पकारो [वित्थारो भरतमुनिकते नाट्यसत्थे चतुत्थ अज्झाये पस्सितब्बो] नच्चविसेसो अङ्गविक्खेपो, अङ्गहारो नाम ‘‘अङ्गस्स हारो, विक्खेपो’’ति कत्वा ¶ . तिकं नटे. सब्बत्र कत्तुसाधनं, ‘‘नच्चतीति नट्टको’’त्यादिना.

१०२. सिङ्गारादयो नव रसा नाट्यरसा अस्सादनीयत्ता. यथा हि नानाब्यञ्जनसङ्खतमन्नं भुञ्जन्ता रसे अस्सादयन्ति सुमना पुरिसा हासंव अधिगच्छन्ति, तथा नानाभिनयब्यञ्जिते अङ्गसत्तोपेते ठायीभावे अस्सादयन्ति सुमनाति [सुबोधालङ्कारस्स महासामिटीकाय ३५२ गाथावण्णनायम्पि].

१०३. तेसु सिङ्गारस्सेव सरूपं, पभेदञ्च दस्सेतुमाह ‘‘पोसस्से’’च्चादि. नारियं सङ्गमं पटिच्च कारणं कत्वा पोसस्स पुरिसस्स या पिहा इच्छा मनोविकारविसेसो पोसे च पुरिसे सङ्गमं पटिच्च कारणं कत्वा इत्थिया या पिहा इच्छा मनोविकारविसेसो, एसो रतिकीळादीनं कारणभूतो, रतिकीळादिकारणसहितो वा रसो सिङ्गारो नाम. एत्थ च इत्थिपुरिसानं दस्सनसवनफुसनवसेन वा विप्पयोगवसेन वा या पिहा सञ्जाता, सो रसो नाम. यं पन तं कारणं कत्वा पवत्तं गीतं, तमेव लोकानं अस्सादजनकत्ता रसो नाम. फलूपचारवसेन पन पिहा रसोति वुत्ता, सब्बत्रेवं.

१०४. उत्तमानं ¶ इत्थिपुरिसानं पकति संयोगवियोगसभावो सा एत्थ सिङ्गारे पायो बहुलन्ति उत्तमपकतिप्पायो, येभुय्येन उत्तमानं संयोगवियोगप्पवत्तं गीतमेव सिङ्गारो नामात्यत्थो. इत्थिपुरिसानं पिहा हेतु एतस्साति इत्थिपुरिसहेतुको. सो सिङ्गारो सम्भोगो, वियोगोति इमिना पभेदेन दुविधो मतो. तत्र च –

वापिवनगेहुय्यान-मालाचन्दनादयो;

सम्भोगस्स विभावा ते, ये चञ्ञे ललितङ्करा.

वियोगस्स तु पियादस्सनं विभावो, रसजनको च विभावो. वुत्तञ्च –

‘‘जयन्ते च रसा येन,

स विभावो पकित्तितो;

तेसमेवा’नुभावो’यं,

ख्यातो कवीहि ब्यञ्जको’’ति.

सह भुञ्जनमनुभवनं सम्भोगो. वियुज्जनं नानाभवनं वियोगो. सिङ्गं नामधातु, विज्झनट्ठेन सिङ्गं, नागरिकभावसङ्खातस्स किलेससिङ्गस्सेतं नामं, तं करोति, सिङ्गं वा पभुत्तं, तं करोति रागीसूति सिङ्गारो, आरो, किलेससिङ्गकरणं विलासोति वुत्तं. सुचि, उज्जलोतिपि सिङ्गारस्स नामानि.

सोकोपचयसभावो ¶ करुणो.

इट्ठनासङ्गनासाय [इट्ठनासधनापाय (चिन्तामणिटीका)],

वधबन्धनताळना;

सापक्लेसोपतापेहि,

जायते करुणो रसो.

उस्साहवद्धनो वीरो. विभावा तस्स विनयुपतापबलविक्कमा. स चायं दानवीरो धम्मवीरो युद्धवीरोति तिविधो.

विम्हयोपचयसभावो अब्भुतो.

पासादुय्यानसेलादि-गमना दिब्बदस्सना;

सभाविमानमायेन्द-जालसिप्पादिदस्सना [जालविज्जादिदस्सना (क.)];

हदयेच्छितलाभेहि, विभावेहिस्स सम्भवो.

हासोपचयसभावो हासो.

साबहित्था सविकता, नेपथ्या ब्यङ्गदस्सना;

असम्बन्धकथालापा, हासो सो कुहकादिभि.

भयोपचयसभावो भयानको.

उच्चभेरवसंराव-यक्खपेतादिदस्सना;

सुञ्ञागारमहारञ्ञ-वधबन्धनदस्सना.

तासायासङ्कतोब्बेगो, सिवोलूकरुणादिभि;

विभावेहि च इत्थीनं, नीचानञ्च भयानको.

समणोपचयसभावो सन्तो.

दस्सना सन्तवेसानं, सन्तचित्तान तादिनं;

सन्तकारणधम्मानं, सन्तो नाम रसो भवे.

जिगुच्छोपचयसभावो ¶ बीभच्छो.

पूतिमंसादिकानं तु, दस्सनसुतिकित्तना;

विगतेहि विभावेहि, बीभच्चो जायते रसो.

कोधोपचयसभावो रुद्दं.

तञ्च सङ्गामहेतुकं, उग्गकम्मउपघात-;

मुसावादादिफरुसा, वचनादीहि भवति.

एतेसु च बीभच्छरुद्दानि नपुंसके, अञ्ञे तु पुमे रूपभेदा. एते च नव नाट्यरसा रतनकोसनयेन वुत्ता. वुत्तञ्हि तत्थ –

‘‘सिङ्गारवीर बीभच्छ-रुद्द हास भयानका;

करुणा’ब्भुत सन्ताच, नव नाट्यरसा इमे’’ति.

अमरकोसे पन –

‘‘सिङ्गारवीर करुणा-ब्भुत हास भयानका;

बीभच्छ रुद्दाति रसा’’ति [अमर ७.१७].

अट्ठेव रसा वुत्ता. अथेह नवमो सन्तो रसो कस्मा न वुत्तोति? वुच्चते –

हासो रति च कारुञ्ञं,

कोधुस्साहभयं तथा;

जिगुच्छा विम्हयो चेति,

ठायीभावा पकित्तिता.

ठायी एव तु रसीभवतिप्यागमो, तस्मा पकतिया अट्ठसङ्ख्यत्ता अट्ठेव तु ते वुत्ताति न वुत्तो. सन्तरसो चायं धम्मसिङ्गारत्ता सिङ्गाररसे एवानुपविट्ठो. धम्मयुद्धकामत्तेन तिविधो हि सिङ्गारो. केचि पन पियसमागमादिविभावजपरमं वस्सल्याख्यं रसमाहु.

रभसोप्याह ¶ –

‘‘सिङ्गार वीर बीभच्छ-रुद्द हास भयानका;

करुणा’ब्भुतसन्ता च, वस्सल्यञ्च रसा दसे’’ति.

अञ्ञे तु –

‘‘सिङ्गारानुगतो हासो,

करुणो रुद्दकम्मजो;

वीरतो अब्भुतो जातो,

बीभच्छा च भयानको’’ति –

चत्तारो रसा इच्चाहु.

बीभच्छन्ति वध बन्धने, छो, अब्भासिकारस्स दीघो. वस्स भो, धस्स चो बीभच्छो. रुद्दो देवता अस्सेति रुद्दं. वुत्तञ्च –

‘‘सिङ्गारो हरिदेवोहि, हासो पमथदेवतो;

करुणो यमदेवो तु, रुद्दो रुद्दाधिदेवतो’’ति [सद्दकप्पद्दुमे रोद्रपदेपि].

एत्थ च कामकोधहासादिकतो चित्तविकारो भावो ‘‘भावयति पकासयति कविनो अधिप्पाय’’न्ति कत्वा. सो च ठायी ब्यभिचारी सात्तिको चेति तिविधो. तत्र –

हासो रति च कारुञ्ञं,

कोधु’स्साह भयं तथा;

जिगुच्छा विम्हयो चेति,

ठायीभावा पकित्तिता.

ब्यभिचारी तु तेत्तिंसप्पभेदा. यथा –

सङ्का गिलानि निब्बेदो,

तथा इस्सा मदो समो;

आलस्यं दीनता चिन्ता,

मोहो सति मती धिति.

चापल्यं ¶ हरिसो पीळा,

आवेगो जळतु’ग्गता;

सुत्तं वितक्को तासो च,

गब्भु’स्सुक्को विसादता.

निद्दा’बहित्था’मरिसा,

मरणं ब्याधिरेव च;

अपमारो च उम्मादो,

विबोधो तिंस तुत्तरा.

सात्तिको अट्ठविधो. यथा –

थम्भो सेदो च रोमञ्चो,

सरभेदो तु वेपथु;

वेवण्ण’मस्सुपलया,

इच्चेते अट्ठ सात्तिकाति.

थिरत्ता एकन्तिकत्ता ठायी. ब्यभिचारी अनेकन्तिकत्ता. यथा नाटिकाय सिङ्गारो ठायी, तदुपकारा हासादयो ब्यभिचारिनो, मोहरागदोसा एव सङ्ख्यभासाय सत्तरजोतमानीत्युच्चन्ते. तत्र सत्तेन आसयेन निब्बत्तो सात्तिको. भावस्स बोधको अभिनयो अनुभावो ‘‘अनु पच्छा भावयति पकासयती’’ति कत्वा.

तत्र सम्भोगसभावो यो रत्याख्यो भावो, तस्स लोचनचातुरियभमुक्खेपमिहितविब्भमचित्तङ्गहारिवाक्यादि अनुभावो. वुत्तञ्च –

‘‘तस्स लोचनचातुर-भमुक्खेपसितविब्भमो;

चित्तङ्गहारिवाक्यादि, अनुभावो पकित्तितो’’ति.

वियोगस्स ¶ तु अनुभावो –

अभिलापो तथा चिन्ता,

तस्स सरणकित्तना;

उब्बेगो च विलापो च,

उम्मादो ब्याधिरेव च;

जळता मरणञ्चेव,

दसेवेत्थ पकित्तिता.

हासस्स तु विकारकालादि अनुभावो, यो तु करुणो.

अस्सुसासेहि वेवण्ण-

थम्भगत्तसतिक्खया;

परिदेवितसोकेहि,

अभिनयो ससूरिभि.

करचरणवदनवेपथुगत्तथम्भहदयकम्पनसुक्खोट्ठतालुकण्ठेहि भयानको निच्चमभिनयो.

रुद्दस्स तु भूकुट्यादि अनुभावो.

वीरो’भिनीयते चाग-

वेसारज्जादितो तथा;

अक्खेपसूचतादीहि,

थेरसोरादितो भवे.

बीभच्छस्स तु –

अयं पच्छादना ब्यत्त-

पादबाहच्छिकूलना;

उब्बेजनादीहि मतो,

तज्जेहि’भिनयो सदा.

अब्भुतं ¶ पन –

दन्तलोचनवित्थारा,

पसादोपसमादिहि;

रोमञ्चसेदतासस्सु,

साधुवादेहि दस्सये.

सात्तिकानं त्वट्ठन्नं थम्भसेदरोमञ्चसरभेदवेपथुवेवण्णमस्सुपलयानं यथाक्कमं निक्रियता, वात, च्चासीत, दोभग्गळा’पाङ्गपूरण, मुखच्छायाविपल्लास, लोचनमज्जन, महिपातादयो अभिनया.

एवं ब्यभिचारीनम्पि निब्बेद, गिलानि, सङ्कि’स्सा, मद, समा’लस्यादीनं यथाक्कमं सास, सन्ताप, दिसावलोकन, गुणमच्छेर, भीत, ङ्गमद्दन, समादयो अभिनयाति.

ब्यभिचारीसु सङ्का नाम आसङ्कचित्तता. गिलानि गेलञ्ञता. निब्बेदो अत्तावमाननं. मदो पमादुक्कंसो. समो खेदो. दीनता चेतसो दुक्खता. धिति सन्तोसो. हरिसो चेतोपसादो. पीळा रुद्दाचारादीहि मुखविकारो. आवेगो सम्भमो. जळता अप्पटिपत्ति, उग्गता दारुणत्तं. सुत्तं सुपनं. तासो चित्तक्खोभो. उस्साहो उस्सुक्कं. विसादो खेदो. अबहित्था आकारगुत्तता. अमरिसो अक्खमता. विबोधो विनिद्दता. सेसा पपञ्चभया न वित्थारिताति. रसवण्णना.

१०५. सिलोकेन वचसो नामानि. भासितब्बन्ति भासितं. लप वचने, लपितं. भासीयतेति भासा. वोहरीयतेति ¶ वोहारो, हर हरणे विपुब्बो, ‘‘वोहार वचने’’ति वा धातु. वुच्चतेति वचनं. वचोपि, मनोगणोयं. उच्चतेति उत्ति,ति. वुच्चतेति वाचा, अ. गिणन्ति सद्दायन्ति तन्ति गिरा, गे सद्दे, इरो, गायितब्बाति वा गिरा. वायते सद्दायतेति वाणी, यु, ई च, परेसं मम्मविज्झनट्ठेन वाणो वियाति वा वाणी, ई. भरतो नाम सत्थकारो इसि, तस्सेसा भारती. कथीयतेति कथिता. वुच्चतेति वची, ई. ब्रह्मी, सरोवतीतिपि वचसो नामानि.

१०६. एकमेवाख्यातपदं यत्थ एकाख्यातो सविसेसनेन कारकपदेन सहितत्ता सकारको पदचयो सम्बन्धत्थो पदसमुदायो वाक्यं नाम सिया, यथा – वेस्सन्तरो राजा सुखविपाकं कम्मं करोति, पुरिसो गच्छति. आख्यातग्गहणञ्चेत्थ क्रियासद्दोपलक्खणं, तेन देवदत्तो कटं कतवा इच्चादीनिपि वाक्यं नाम सिया. अमरकोसे पन – ‘‘तिस्याद्यन्तचयो वाक्यं, क्रिया वा कारकान्विता’’ति [अमर ६.२] द्वीहि लक्खणेहि वाक्यमाह. तस्सत्थो – तिस्याद्यन्तचयो त्यादिस्याद्यन्तपदानं चयो समूहो सम्बन्धत्थो वाक्यं, तं यथा – उच्चं पठति, ओदनं पचति. तथा च भावाख्यं आख्यातं साब्ययकारकविसेसनं वाक्यं, आख्यातं त्याद्यन्तं साब्ययं वा सकारकं वा सविसेसनं वा वाक्यमुच्चते. त्यादिग्गहणं क्रियासद्दोपलक्खणं, तेन देवदत्तो ¶ कटं कतवा इच्चादीनिपि वाक्यं. उपलक्खणनिरपेक्खं अपरं वाक्यलक्खणमाह ‘‘क्रिया वा कारकान्विता’’ति. क्रियापदं वा कारकसम्बन्धं वाक्यं, यथा – राजा गच्छति, राजा गतो. इमस्मिं पक्खे साब्ययस्सपि अनब्ययस्सपि सब्बस्स क्रियाकारकपदसमूहस्स वाक्यत्तमाह.

भयादीहि यं द्विक्खत्तुं वा तिक्खत्तुं वा उदीरणं कथनं ‘‘सप्पो सप्पो, विज्झ विज्झा’’त्यादिकं, तं आमेडितं ञेय्यं. मेडि उम्मादने, आपुब्बो द्वत्तिक्खत्तुमुच्चारणे वत्तति. यथा ‘‘एतदेव यदा वाक्यं, आमेडयति वासवो’’ [‘‘हरिवंसे’’ति चिन्तामणिटीकायं वुत्तं]. ‘‘देवदत्तेनामेडो कतो’’ इच्चत्राप्ययमेवत्थो, सोकादिना हि ‘‘भाता भाता’’इत्युच्चारीयते, भावे कम्मनि च तो. कम्मञ्च पदं वाक्यम्हा.

१०७. आमेडितस्स विसयं दस्सेतुमाह ‘‘भये’’च्चादि. ‘‘सप्पो सप्पो, चोरो चोरो’’त्यादीसु भये. ‘‘विज्झ विज्झ, पहर पहरा’’त्यादीसु कोधे. ‘‘साधु साधू’’त्यादीसु पसंसायं. ‘‘गच्छ गच्छ, लुनाहि लुनाही’’त्यादीसु तुरिते. ‘‘आगच्छ आगच्छा’’त्यादीसु कोतूहले. ‘‘बुद्धो बुद्धोति चिन्तयन्तो’’त्यादीसु अच्छरे. ‘‘अभिक्कमथायस्मन्तो अभिक्कमथायस्मन्तो’’त्यादीसु हासे. ‘‘कहं एकपुत्तक, कहं एकपुत्तका’’त्यादीसु सोके. ‘‘अहो सुखं अहो सुख’’न्त्यादीसु पसादे. चसद्दो अवुत्तसमुच्चयत्थो, तेन गरहा’सम्मानादीनं सङ्गहो ¶ दट्ठब्बो. तत्थ ‘‘पापो पापो’’त्यादीसु गरहायं. ‘‘अभिरूपक, अभिरूपका’’त्यादीसु असम्माने. एवमेतेसु नवसु, अञ्ञेसु च आमेडितवचनं बुधो पण्डितो करे करेय्य योजेय्य आमेडनं पुनप्पुनुच्चारणं आमेडियति वा पुनप्पुनुच्चारीयतीति आमेडितन्ति कत्वा.

१०८. इरु, यजु, सामन्ति तयो वेदा सियुं, तत्र इरुसद्दो नारी इत्थिलिङ्गो. इच थुतियं, इच्चन्ते देवा एतायाति इरु, उ, चस्स रो. यजन्ते अनेनेति यजु, उ. सो अन्तकम्मनि, करणे मो, सोयन्ति पापमनेनेति सामं, ओस्सा, ‘‘सा तनुकरणावसानेसू’’ति वा धात्वत्थो. विदन्ति धम्ममेतेहीति वेदा.

एते एव तयो वेदा तयी नाम, तयो अवयवा अस्साति तयी. अयं तयीसद्दो नारी इत्थिलिङ्गो. तिकं वेदे. मुनाति जानाति धम्मं अनेनाति मन्तो, तो, उस्स अ. सुय्यते धम्मं एतायाति सुति. इत्थियं सुतिसद्दो.

१०९. वेदसत्थकारके दस इसयोदस्सेतुमाह ‘‘अट्ठको’’च्चादि. अत्थं हितं, अत्थे वा सत्थे करोतीति अट्ठको. वामं कल्याणवचनं करोतीति वामको, रस्ससरीरत्ता ¶ वा वामनो, सो एव वामको, नस्स ककारत्तं कत्वा. वामो नाम हरो, सो देवो अस्स वामदेवो.

‘‘वामं सब्ये पतीपे [पतीपेति पटिकूले] च, दविणे [दविणेति धने] चातिसुन्दरे;

पयोधरे हरे कामे, जञ्ञा वाम’मपित्थिय’’न्ति.

हि नानत्थसङ्गहे.

अङ्गिरसस्स इसिनो अपच्चं अङ्गिरसो, चित्रसिखण्डिनो अपच्चं पुत्तो. अथ वा अङ्गिम्हि काये रसो सिद्धिप्पत्तो पारदो यस्साति अङ्गिरसो. तेनेव तस्स पुत्तं सुराचरियं ‘‘जीवो’’ति वदति. जीवयति रणे असुरनिहते देवेति जीवो [अमर ३.२४ चिन्तामणिटीका ओलोकेतब्बा]. भरतीति भगु, भं वानक्खत्तं गच्छति जानातीति भगु, उ. यमं संयमं ददाति परेसन्ति यमदो च सो दक्खिणेय्यग्गित्ता अग्गि चेति यमदग्गि, रामस्स पिता [परसुरामस्स पिता (सद्दकप्पद्दुमे)]. वसिट्ठस्स अपच्चं वासिट्ठो. भारद्वाजस्स अपच्चं भारद्वाजो. कस्सपस्स अपच्चं कस्सपो. वेस्सामित्तस्स अपच्चं वेस्सामित्तो. इति इमे दस इसयो मन्तानं वेदानं कत्तारो कारका.

११०. वेदे दस्सेत्वा तस्स छळङ्गानि दस्सेतुमाह ‘‘कप्पो’’च्चादि. यञ्ञकम्मानमुपदेसको कप्पो ‘‘कप्पते पभवती’’ति कत्वा. साधुसद्दानमन्वाख्यायकं ब्याकरणं विसेसेन आकरीयन्ते पकतिच्चादिना आब्यापाद्यन्ते अनेन ¶ सद्दाति, यु. जोतिसत्थं गणनसत्थं सुभासुभकम्मफलजोतनकं. सिक्ख्यन्ते अब्भस्यन्ते [अज्झयन्ते (क.)] एतायाति सिक्खा, अकारादिवण्णानं ठानकरणपयतनानं पटिपादिका. निच्छयेन, निस्सेसतो वा उत्ति निरुत्ति, वण्णागमो वण्णविपरिययोच्चादिका. छन्दसि अनुट्ठुभादिवुत्तानं पटिपादिका छन्दोविचिति, एतानि छ वेदानं अङ्गानीति वदन्ति.

१११. पुरावुत्तनिबन्धनपायत्ता पुरावुत्तं, तस्स पबन्धो वित्थारो, सन्तानो वा भारतादिको भारतयुद्धकथादिको ब्यासादिपकतो गन्थो इतिहासो नाम, इतिहसद्दो पारम्परियोपदेसे निपातो, इतिहा’त्थि अस्मिन्ति इतिहासो.

रुक्खादीनं नामपरियायेहि नामप्पकासकं रतनमालादिकं सत्थं निघण्टु नाम, सोतिमिना निघण्टुसद्दस्स पुल्लिङ्गत्तं दीपेति, सब्बत्रेवं. तत्थ तत्थागतानि नामानि निस्सेसतो घटेन्ति रासीकरोन्ति एत्थाति निघण्टु, बिन्दागमो, वचनीयवाचकभावेन अत्थं सद्दञ्च निखण्डति भिन्दति विभज्ज दस्सेतीति वा निखण्टु, सो एव खस्स घकारं कत्वा निघण्टूति वुत्तो. रुक्खादीनं नामप्पकासकन्तिमिना एकेकस्स अत्थस्स अनेकपरियायनामप्पकासकत्तं वुत्तं, निदस्सनमत्तञ्चेतं, अनेकेसं अत्थानं एकसद्दवचनीयतापकासकवसेनपि ¶ तस्स गन्थस्स पवत्तत्ता [दी. नि. टी. १.२५६; म. नि. टी. १.२२; अ. नि. टी. २.३.५९; सारत्थ. टी. १.ततियसङ्गीतिकथावण्णना].

११२. लोके यं वितण्डवादीनं सत्थं, तं लोकायतन्ति विञ्ञेय्यं. तनु वित्थारे, अञ्ञमञ्ञविरुद्धं, सग्गमोक्खविरुद्धं वा तनोन्ति एत्थाति वितण्डो, डो, णत्तं, विरुद्धेन वा वाददण्डेन ताळेन्ति एत्थ वादिनोति वितण्डो, तडि ताळने, अदेसम्पि हि यं निस्साय वादीनं वादो पवत्तो, तं तेसं देसतोपि उपचारवसेन वुच्चति, यथा ‘‘चक्खुं लोके पियरूपं सातरूपं, एत्थेसा तण्हा पहीयमाना पहीयति, एत्थ निरुज्झमाना निरुज्झती’’ति [दी. नि. २.४०१; म. नि. १.१३४; विभ. २०४]. लोकाति बाललोका, ते एत्थ आयतन्ति उस्सहन्ति वायमन्ति वादस्सादेनाति लोकायतं, आयतिं हितं तेन लोको न यतति न ईहतीति वा लोकायतं, तञ्हि गन्थं निस्साय सत्ता पुञ्ञक्रियाय चित्तम्पि न उप्पादेन्ति.

यो कवीनं पण्डितानं हितो कवित्तभोगसम्पत्तादिपयोजनकरो क्रियाकप्पविकप्पो कवीनं क्रियासङ्खातकप्पबन्धनविधिविधायको सुबोधालङ्कारादिको गन्थो, सो केटुभं नाम, किटन्ति गच्छन्ति कोसल्लं कवयो बन्धनेसु एतेनाति केटुभं, किट गतियं, अभो, अस्सुकारो, अथ वा किटति गमेति क्रियादिविभागं, तं वा अनवसेसेन परियादानतो गमेन्तो पूरेतीति केटुभं, उभ, उम्भ पूरणे.

वचीभेदादिलक्खणा ¶ क्रिया कप्पीयति विकप्पीयति एतेनाति क्रियाकप्पो. सो पन वण्णपदसम्बन्धपदत्थादिविभागतो अतिबहु विकप्पोति आह ‘‘क्रियाकप्पविकप्पो’’ति, इदञ्च मूलक्रियाकप्पगन्थं सन्धाय वुत्तं. सो हि महाविसयो सतसहस्सपरिमाणो नयचरितादिपकरणं [नलचरितादिपकरणं (?)].

११३. उपलद्धो केनप्यत्थो यस्सं सा उपलद्धत्था, इति आख्यायिकात्युच्चते आख्यायते नायकानुसासकचरितमस्सन्ति, सञ्ञायं ण्वु.

पबन्धेनेव च सवित्थारेन कप्पनं यस्सं सा पबन्धकप्पना, कादम्बरीपभुति. कथीयतीति कथा.

अत्था भूमिहिरञ्ञादयो, तत्र पधानं भूमि इतरेसं तप्पभवत्ता, तेसं अज्जने पालने च उपायभूतं सत्थं अत्थसत्थं, पयानक्यादिपणीतं [बहस्वतिचाब्बीक्यादिप्रणीतं (चिन्तामणिटीका ६.५)], तस्मिं दण्डनीतिसद्दो पवत्तो. सामादीनं चतुत्थोपायो वधबन्धनादिलक्खणो दण्डो, तस्स नीति पणयनं दण्डनीति, पायेन नीतिस्स दण्डेन ब्यप्पदेसो, वधदोसबाहुल्येन पायसो दण्डस्स पणयनतो, दण्डनीत्यत्थत्ता सत्थञ्च दण्डनीति.

द्वयं कथायं. वुत्तो अनुवत्तनीयो अन्तो परिसमत्ति यस्स अत्तनो कारियभागस्स पापनतोति वुत्तन्तो. पवत्तन्ते कारिया यस्सं पवत्ति,ति. चकारेन वुत्तउदन्तादयो गहिता. कारियस्स वुत्ति अत्रत्थीति अस्सत्थ्यत्थे ¶ णो. उग्गतो अन्तो परिसमत्ति यस्स उदन्तो.

११४. अधिवचनन्तं नामे. सञ्जानन्ति एतायाति सञ्ञा, अ. आख्यायते एतायाति आख्या. अह्वयते एतायाति अव्हा, हु सद्दे, व्हे अव्हानेति वा धातु, अ. सम्मा आजानाति, समं वा जानाति एतायाति समञ्ञा. अभिधीयते येन, यु. नम्यते अब्भस्सते अस्मिन्ति नामं, नमति नामयतीति वा नामं. अह्वायतेति अव्हयो, कम्मे यो. नाममेव नामधेय्यं. नामरूपेहि [नामसद्देहि (क.) भागरूपनामेहि धेय्यो (पाणिनि ५.४.३६ वा)] सकत्थे धेय्यो यदादिना, तिट्ठति वा एत्थ अत्थोति धेय्यं, धरीयते उच्चारियतेति वा धेय्यं, नाममेव धेय्यं नामधेय्यं. अधीनं वचनं अधिवचनं, केन अधीनं? अत्थेन. पुट्ठस्स पटिवचनं पटिवाक्यं. पटिगतं पच्छागतं वाक्यं पटिवाक्यं. उत्तरीयते अतिक्कम्यते येनाति उत्तरं.

११५. तिकं पुच्छायं. पुच्छितब्बोति पञ्हो, ञातुमिच्छितो हि अत्थो पञ्हो नाम. पुच्छ पुच्छने, चस्स ञो, छस्स हो, उस्स अ, पञ्ह पुच्छनेतिपि धातु. युज योगे, अनुयुञ्जितब्बो ¶ पुच्छितब्बोति अनुयोगो. पुच्छनं, पुच्छितब्बाति वा पुच्छा. एतेनेव नयेन द्वीसुपि भावसाधनम्पि कत्तब्बमेव.

चतुक्कं निदस्सने. पकतेन सदिसं निदस्सेति एतेनाति निदस्सनं, पकतस्सोपपादनं वाक्यं. उपोग्घञ्ञते [उपोहञ्ञते (?)] पटिपादीयते अनेनाति उपोग्घातो. उप उपुब्बो हनधातु पटिपादनत्थो. दस्सीयते अनेनाति दिट्ठन्तो, अन्तो, दिट्ठो वा पकतस्स अन्तो परिसमत्ति येनाति दिट्ठन्तो. सब्बत्रापि वा कम्मसाधनम्पि कत्तब्बं. उदाहरीयति पकतस्सोपपादनायाति उदाहरणं.

११६. चतुक्कं सङ्खेपे. समाति तुल्यत्था. सङ्खिपीयते एकदेसतो कथीयतीति सङ्खेपो, खिप पेरणे. संहरीयते सङ्खेपेन पच्चाख्यायते एतेनाति संहारो. समस्यते सङ्खिपीयतेति समासो, असु खेपने. सङ्खेपेन गय्हते अनेनाति सङ्गहो.

‘‘त्वं सतं सुवण्णं धारयसि’’इत्यादिकं तुच्छभासनं अभूतभासनं अब्भक्खानं नाम. असच्चेन अक्खानं भासनं अब्भक्खानं.

११७. द्वयं ¶ विवादाय विभागविसये [इणवादादिविसये (चिन्तामणिटीका ६.९)]. विरुद्धं कत्वा अवहरति वदति यन्ति वोहारो. विरुद्धं कत्वा वदति यन्ति विवादो. सब्बत्र भावसाधनं वा युज्जति. ‘‘मुसावादं वदन्तो घोरानि त्वं नरकानि यस्ससी’’त्यादिसरूपं सपनं. सप अक्कोसे, थो, सपथो.

तिकं ख्याते. यजति एतेनाथि यसो, जस्स सो, सब्बत्थ यातीति वा यसो, सो, यसति पयसतीति वा यसो. सिलोकति पत्थरतीति सिलोको, सिलोक सङ्घाते. कित्त सद्दने, कित्तीयते कथीयतेति कित्ति, इ. समञ्ञा च ख्याते, सं आपुब्बो जानाति ख्याते. तथा हि ‘‘ञातो, अभिञ्ञातो, सङ्ख्यातो, विस्सुतो, समञ्ञातो’’ति रतनकोसे वुत्तं. उच्चधनिना सद्दनं घोसना नाम, घुस सद्दे, घुसनं सद्दनं घोसना.

११८-११९. द्वयं पटिसद्दे. घुसनं घोसो, तं पटिगतो, दुतियासमासो. एवं रवं पटिगतो पटिरवो. अथ ¶ वा घोसस्स पतिरूपो पटिघोसो. रवस्स पतिरूपो पटिरवो. पटिसुति, पटिद्धनीतिपि पटिसद्दस्स नामानि, वचीमुखं वचनोपक्कमो उपञ्ञासो नाम, उपनिपुब्बो आस उपवेसने, उप पठमं पुरिमवचनस्स समीपं वा न्यासो ठपनं उपञ्ञासो, न्यस्स ञो.

सत्तकं थुतियं. कत्थ सिलाघायं, यु, कथनं वाअसरूपद्विभाववसेन कत्थना. सिलाघ कत्थने, सिलाघा. सीलस्स वा सभागगुणस्स आहननं सीलाघा, सा एव रस्सं कत्वा सिलाघा. वण्ण पसंसायं, वण्णीयतेति वण्णना. नु थुतियं,ति, नुति. थु अभित्थवे,ति, थुति. थोम सिलाघायं, थोमनं. पपुब्बो संस पसंसने, अ.

सिखण्डीनं मयूरानं नादो नदरवो केका नाम, का सद्दे, केइति कायतीति केका, कम्मनि अ, अथ वा कायति, कायनं वा का, के मयूरे पवत्ता का केका, अलुत्तसमासो. गजानं नादो कोञ्चनादो नाम, कोञ्चसकुणनादसदिसो नादो कोञ्चनादो. हयानं अस्सानं धनि सद्दो हेसा नाम, हेस अब्रत्तसद्दे, हेसनं हेसा, हे इति पवत्ततीति वा हेसा.

१२०-१२१. द्वयं परियाये. परिब्यत्तमत्थं अयन्ति गच्छन्ति बुज्झन्ति एतेनाति परियायो. एको अत्थो पुनप्पुनं वुच्चति ¶ येनाति वेवचनं. द्वयं साकच्छायं. सह, सम्मा वा अविरोधेन कथा साकच्छा, संकथा च. तो, थस्स चो, तस्स छो.

साद्धपज्जेन गरहस्स नामानि. दोसक्खानेन वदनं उपवादो. कुस अव्हाने भेदने च, क्वचि ‘‘अपक्कोसो’’ति पाठो, णो. वण्णो थुति, तस्स अवदनं अवण्णवादो. हीळनेन वदनं अनुवादो. जनानं वादो गरहणं जनवादो. गरहणेन वादो अपवादो. परिवदनं परिवादो, रस्सस्स दीघता. एते उपवादादयो तुल्यत्था समानत्था. विसमवुत्तप्पभेदेसु वत्तमिदं. खिप पेरणे, खिपनं बहिकरणं खेपो. निदि कुच्छायं, अ, निन्दा. यथा उपवादादयो गरहत्था, कुच्छादयोपि तथाति तथात्थो. कुच्छ अवक्खेपने, चुरादि, कुस अक्कोसेतिमस्स वा पब्बज्जादित्ता ‘‘कुच्छा’’ति रूपं निप्फज्जति. गुप, गोप कुच्छनेसु, ‘‘तिजगुपकितमानेहि खछसा वा’’ति छो. गरह कुच्छने. तत्थ केचि ‘‘उपवादादयो अब्भक्खानत्था, खेपादयो निन्दत्था’’ति वदन्ति, तं अमरकोसेन विरुज्झनतो अब्भक्खानत्थस्स च वुत्तत्ता न गहेतब्बं. एते उपवादादयो सत्त अब्भक्खानेपि वत्तन्ति.

विवादकामस्स दुब्बादो उपारम्भो, सो च ईदिसे सब्बलोकचूळामणिभूते सक्यकुले सम्भूतस्स भगवतो किमिदं कम्ममुचितन्ति गुणाविकरणपुब्बकोप्यत्थि, बन्धकीसुतस्स तवेदमुचितमेवाति निन्दापुब्बकोपि उपारम्भो. तत्र यो निन्दापुब्बो सनिन्दो उपारम्भो, सो परिभासनमुच्चते. उपगन्त्वा परेसं चित्तस्स आरम्भनं विकोपनं उपारम्भो. दोसक्खानेन भासनं परिभासनं.

१२२. अनरियानं ¶ लामकानं वोहारतो, अरियानं उत्तमजनानं वा अवोहारतो अनरियवोहारोति सङ्खातानं अदिट्ठे दिट्ठवादादीनं अट्ठन्नं वोहारानं वसेन या वाचा लामकजनेहि पवत्तिता वुत्ता, वीतिक्कमदीपनी अज्झाचारवीतिक्कमसाधनी सा वाचा अरियजनेहि वत्तब्बमरियादातिक्कमत्ता अभिवाक्यं नाम सिया.

१२३. मुहुंभासा बहुसो अभिधानं अनुलापो नाम, अनु पुनप्पुनं लापो अनुलापो. अनत्थिका गिरा निप्पयोजनं उम्मत्तादिवचनं पलापो, पयोजनरहितो लापो पलापो, पसद्दो वियोगत्थजोतको.

गमनागमनादिसमये आदिम्हि भासनं पियवचनं आलापो, आदिम्हि लापो आलापो, आपुच्छासद्दोप्यत्र. दोसेन पतिट्ठितो परिद्दवो परिदेवनं अनुसोचनं अतिक्कमलापो विलापो नाम, विविधेन, विविधं वा लापो विलापो. परिदेवनं परिदेवो, सो एव परिद्दवो, देव परिदेवने.

१२४. विरुद्धं ¶ वचनं विरोधोत्ति. विरुद्धं पलापो विप्पलापो. सन्दिस्सतेति सन्देसो, सन्दिस्समानो अत्थो, तस्सोत्ति. याय सन्दिट्ठो अत्थो अभिधीयते, सा सन्देसोत्ति वाचिकमुच्चते. वच सन्देसे, सकत्थे णिको, सन्दिट्ठत्था वाचा एव वाचिकमिच्चत्थो.

मिथु अञ्ञमञ्ञं विरोधरहितं वचनं ‘‘सम्भासनं, सल्लापो’’ति च वुच्चति. यथा एको ब्रूते ‘‘अज्ज सोभनं नक्खत्त’’न्ति, इतरोप्याह ‘‘तथेवा’’ति.

१२५. निट्ठुरं वाक्यं कक्कसवचनं फरुसं नाम, परे जने उस्सापेति दाहेतीति परुसं, तदेव पस्स फकारं कत्वा फरुसं. असवनीयत्ता न इच्छितब्बन्ति निट्ठुरं, उरो, यथा ‘‘नागो’’ति. द्वयं कण्णसुखवचने. मनं आ भुसं ञापेति तोसेतीति मनुञ्ञं, ञा परिमाणतोसननिसानेसु, अस्सुकारो. हदयं मनं गच्छति पविसतीति हदयङ्गमं.

संकुलादिद्वयं पुब्बापरविरोधिनि पुब्बापरविरुद्धे वाक्ये, यथा –

यावजीवमहं मोनी, ब्रह्मचारी च मे पिता;

माता च मम वञ्झासि, अपुत्तो च पितामहो.

संकुलन्ति जळीभवन्त्यनेनाति संकुलं. किलिस्सन्ते एत्थाति किलिट्ठं.

१२६. समुदायत्थरहितं ¶ दसदाळिमादिवाक्यं [दस दाठिमानि ठळपूपा कुण्ड’ मजाजिनं पलालपिण्डा (न्यायभास्स ५.२.१० मोग्गल्लानपञ्चिकाटीका १.१)] असम्बद्धत्ता अबद्धमिति कित्तितं कथितं, न बज्झते हदयमत्राति अबद्धं, तो.

नत्थि तथं सच्चमत्राति वितथं. फरुसादयो वितथसद्दं याव तिलिङ्गिका.

१२७. पज्जद्धं सच्चवचने. सम्मासद्दोयं अब्ययं, सब्बलिङ्गविभत्तिवचनेसु च समानो. न वितथं अवितथं. सन्तेसु साधूसु भवं सच्चं. सत सातच्छे वा, वजादिना यो, सच्चं. तथसद्दो भूतपरियायो, ‘‘तथेन मग्गेन यथात्थभाजिना’’ति [तथागता जिनाति (क.)] पयोगो. तथे साधु तच्छं, साध्वत्थे यो. यथातथसद्दापि च सच्चत्था अलिङ्गा. तब्बन्ता सच्चवचनवन्तवाचका सम्मा सच्चं यथातथंसद्दवज्जिता सेसा अवितथादयो तीसु लिङ्गेसु वत्तन्ति. सच्चंसद्दो तु अलिङ्गो. अमरकोसे पन सम्मा सच्चसद्दानम्पि तब्बति तिलिङ्गत्तं वुत्तं, यथा – सच्चं तच्छं रितं सम्मा, अमूनि तीसु तब्बति [अमर ६.२२]. यथा – सच्चो ब्राह्मणो, सच्चा नारी, सच्चं विप्पकुलं. इध पन सब्बलिङ्गवचनविभत्तीसु रूपभेदाभावा सम्मासद्दस्स अब्ययत्तं, तिलिङ्गेस्वपि रूपभेदाभावा सच्चंसद्दस्स अलिङ्गत्तञ्च वुत्तं. यथा – सम्मा वाचा, सम्मा वोहारो, सम्मा वचनं. सच्चं ब्राह्मणो, सच्चं नारी, सच्चं विप्पकुलं. मिच्छामुसासद्दा पन सब्बत्रापि अब्ययमेव भवन्ति. यथा ¶ – मिच्छा वाचा, मिच्छा वोहारो, मिच्छा वचनं. मुसा वाचा, मुसा वोहारो, मुसा वचनं.

१२८. सोळस सद्दमत्तपरियाये दस्सेतुं उपजातिं ‘‘रवो’’इच्चादिमाह. रुयते सद्दायतेति रवो, रु सद्दे. नदनं नादो, निरत्थो नादो निनादो, नद अब्यत्तसद्दे. एवं निनदो, रस्सत्तमेव विसेसो. सप्पति उच्चारीयतीति सद्दो. घुस सद्दे, पातुभावो घोसो निग्घोसो. नदनं नादो. धन सद्दे, धनीयतीति धनि. निग्घोसो च नादो च धनि च निग्घोसनादधनयो. रवो एव रावो. आरावोति उपसग्गेन पदं वड्ढितं. तथा संरावविरावआरवा. घुसनं घोसो. आरावो च संरावो च विरावो च घोसो च आरवो चाति द्वन्दो. सु सवने, सुय्यतेति सुति. सरति सुय्यमानतं गच्छतीति सरो. निस्सनति एतेनाति निस्सनो, सन सम्भत्तियं निपुब्बो. सरो च निस्सनो चाति द्वन्दो.

१२९. विसज्जीयते न लग्गीयते सेम्हादीहीति विसट्ठो. मनितब्बन्ति मञ्जु, जु, मन ञाणे, सुणन्तानं वा मनं रञ्जेतीति मञ्जु, उ, न रलोपो. सुखेनेव विजानितब्बत्ता विञ्ञेय्यो. हितसुखनिप्फादनतो सोतब्बोति सवनीयो. बहिद्धापरिसा अङ्गुलिमत्तम्पि न विसरति न गच्छतीति अविसारी ¶ , तस्सीलत्थे णी, विविधेन वा न सरतीति अविसारी, छिन्नस्सरानं विय द्वेधा न होतीत्यत्थो. विन्द्यते लब्भतेति बिन्दु, वस्स बो, निग्गहीतागमो, उ च, वट्टत्ता वा बिन्दु, इमस्मिं पक्खे पब्बज्जादिना रूपसिद्धि. पञ्चन्नं ठानगतीनं दूरट्ठानतो जातत्ता गम्भीरो. पुनप्पुनं नादो निन्नादो, क्रियाभिक्खञ्ञत्ता द्वित्तं, अस्स इ, निग्गहीतागमो, सो एत्थ अत्थीति निन्नादी. इच्चेवं भगवतो अट्ठङ्गिको सरो होति.

१३०. खग्गादीनं तिरच्छानगतानं रुतं वस्सितन्त्युच्चते. रु सद्दे, रुतं. वस्स सद्दे, वस्सनं रवनं वस्सितं.

कोलाहलादिद्वयं बहूहि सम्भूय कते अब्यत्तसद्दे. कुल सङ्घाते [सङ्ख्याने (क.)], कोलनं कोलो, एकीभावो, तं आहलति विन्दतीति कोलाहलो. करोति हिंसति मधुरन्ति कलो, तं हलतीति कलहलो. हल विलेखने.

तिकं गायने. गे सद्दे, गेतब्बं गीतं गानं गीतिका च. सब्बत्र भावसाधनं.

१३१. तन्तिकण्ठोट्ठिता [अमर ७.१] उसभादयो सत्त सरा. छज्जादयो तयो गामा समूहात्यत्थो. वुत्तञ्च ‘‘गामो नाम सरसमूहस्स सन्धान’’न्ति. मनुस्सलोकवादनविधिना एकेकस्स ¶ सरस्स वसेन तयो तयो मुच्छना कत्वा एकवीसति मुच्छना, देवलोकवादनविधिना पन समपञ्ञास मुच्छना वदन्ति. तत्थ हि एकेकस्स सरस्स वसेन सत्त सत्त मुच्छना, अन्तसरस्स च एकाति समपञ्ञास मुच्छना आगता, तेनेव सक्कपञ्हसुत्तसंवण्णनायं ‘‘समपञ्ञास मुच्छना मुच्छित्वा’’ति [दी. नि. अट्ठ. २.३४५] पञ्चसिखस्स वीणावादनं दस्सेन्तेन वुत्तं. मुच्छ मोहसमुस्सयेसु, यु, मुच्छना. यथा कमेन वीणा वादितुं सक्का, एवं सज्जनाहि मुच्छनट्ठानानि एकूनपञ्ञासात्यत्थो. एकेकस्स सरस्स सत्त सत्त ठानानि. यतो सरस्स मन्दतारववत्थानं होति, तेन एकूनपञ्ञास ठानानि. इच्चेतं सरमण्डलं सरसमूहो.

१३२. सरादीनं नामसरूपप्पभेदं दस्सेतुमाह ‘‘उसभो’’च्चादि. इस गतियं. इसति चित्तं पविसतीति उसभो, अभो, इस्सु च. ‘‘उस दाहे’’ति वा धात्वत्थो. यस्मा पन सो सरो उसभो विय नदति, तस्मा उसभोति वुच्चति. धीमन्तेहि गीयतेति धेवतो, वण्णविकारो, वत्तं.

नासं कण्ठमुरो तालुं,

जिव्हं दन्ते च निस्सितो;

छधा सञ्जायते यस्मा,

तस्मा छज्जो स उच्चते [चिन्तामणिटीका ७.१].

गन्धं ¶ लेसं अरतीति गन्धरो, रस्सस्स दीघत्ते गन्धारो चेत्यञ्ञे [अञ्ञेसमपीति (पाणिनि ३.१३७) दीघो (चिन्तामणिटीका ७.१)], गन्धारा नाम जनपदा, तेह्ययं गीयतेति गन्धारो, णो. मज्झे लयविसेसे भवो मज्झिमो. पञ्चन्नम्पि धेवतादीनं पूरणो पञ्चमो, (पञ्चन्नं वा महाभूतानं पूरणो पञ्चमो.) [( ) एत्थन्तरे पाठो अधिको विय दिस्सति] निस्सेसतो सीदन्ति सरा यस्मिन्ति [यस्माति (क.) – सदतो अधिकरणे घउ (चिन्तामणिटीका ७.१)], णो. ‘‘निसीदन्ति सरा यस्मिं, निसादो तेन हेतुना’’ति हि वुत्तं. एते सत्त सराति गदिता कथिता.

१३३-१३५. उसभादयो ये नदन्ति, ते दस्सेतुमाह ‘‘नदन्ति’’च्चादि. उसभं नाम सरं गावो नदन्ति. तथा धेवतं तुरङ्गा अस्सा, छज्जं मयूरा सिखण्डिनो, गन्धारं अजा, मज्झिमं कोञ्चा सकुणविसेसा, पञ्चमं परपुट्ठादी कोकिलादयो, निसादं वारणा हत्थिनो नदन्ति. वुत्तञ्च नारदमुनिना –

‘‘छज्जं ¶ नदति मयूरो, गावो नदन्ति उसभं;

अजो रोति च [अजाविका तु (क.)] गन्धारं, कोञ्चा नदन्ति मज्झिमं.

पुप्फसाधारने काले, कोकिलो रोति पञ्चमं;

अस्सो तु धेवतं रोति, निसादं रोति कुञ्जरो’’ति.

मयूरादयोपि सब्बे इमे सत्ता समदा [सन्तो (क.) एते च समदा पञ्चमं गायन्ति (चिन्तामणिटीका ७.१)] पञ्चमं नदन्ति.

छज्जो गामो, मज्झिमो गामो, साधारणो गामोति तयो गामा. तत्र वीणादण्डं विभागं कत्वा अधोभागस्स ‘‘छज्जगामो’’ति सञ्ञा, मज्झभागस्स ‘‘मज्झिमगामो’’ति, उपरिभागस्स ‘‘साधारणगामो’’ति सञ्ञा. किं पन गामभेदे कारणं? यस्मा एकस्सेव सरस्स गामन्तरे भेदो, तंभेदे गामानम्पिभेदो. माघटीकायं पन साधारणगामट्ठाने गन्धारगामो कथितो, एकेकस्मिञ्च गामे सत्त सत्त मुच्छना. इध पन उसभादीसु सत्तसु सरेसु पच्चेकं तिस्सो तिस्सो मुच्छना कथिता. किंकारणा? इध मनुस्सलोकवादनविधिना, तत्थ च देवलोकवादनविधिना कथितत्ता तथेव ठानानि सत्त सत्तेव लब्भरेति. यथा उसभादीसु तेसु यथावुत्तेसु सरेसु पच्चेकं एकेकस्मिं सरे तिस्सो तिस्सो मुच्छना सियुं, तथेव ठानानिपि सत्त सत्तेव लब्भरेत्यत्थो.

१३६. सरानं गामेसु भिन्नसुतित्तं दस्सेतुमाह ‘‘तिस्सो’’इच्चादि. उसभस्स सरस्स तारकलमन्दवसेन तिस्सो सुतियो. धेवतस्स सरस्स तार मन्दवसेन ¶ दुवे. छज्जस्स तारकल मन्द काकलीवसेन चतस्सो. गन्धारस्स च तथा. मज्झिमस्स तारकल काकलीवसेन तिस्सो. पञ्चमस्स कल काकलीवसेन दुवे. निसादस्स तारादिवसेन चतस्सो सुतियो. इच्चेवं सत्तसु सरेसु कमतो सम्पिण्डिता द्वावीसति सुतियो सियुं. माघटीकायं पन अञ्ञथा सुतिभेदो वुत्तो. वुत्तञ्हि तत्थ –

‘‘चतुस्सुति सुविञ्ञेय्यो, मज्झिमो मज्जिमट्ठितो;

द्विस्सुति चापि गन्धारो, तिस्सुति उसभो तथा.

छज्जो चतुस्सुति ञेय्यो, निसादो द्विस्सुती तथा;

चतुस्सुति धेवतो तु, पञ्चमो तिस्सुती मतो’’ति.

सब्बमेतं नाटकसत्थतो गहेतब्बं.

१३७. ‘‘उच्चतरे’’त्यादिना सुतिभेदे सरूपतो दस्सेति. उच्चतरे रवे अत्युच्चधनिम्हि तारो, तारयति बोधयतीति तारो. अब्यत्ते अब्यत्तक्खरे मधुरे सुतिसुखे कलो, कल मदे. गम्भीरे धनिम्हि मन्दो. मदि थुतिमोदमदमोहसुपनगतीसु. मन्दयते बुज्झतेनेनाति मन्दो.

तारादयो तयो वाच्चलिङ्गत्ता तीसु. तारो धनि, तारा वाणी, तारं रुतं इच्चादि. अब्यत्तमधुरसद्दो कलो. तत्र कले सुखुमे काकलीसद्दो, ईपच्चयन्तो, ईसं ¶ कला वाणी काकली नाम, कासद्दोयमीसत्थो. क्रियादिसमताति गीतवादितपादन्यासादिक्रियानं, कालस्स च समत्तं लयो नाम, लय साम्यगतीसु, आधारे अपच्चयो, सब्बाभिनयानम्पि साम्यं लयोति केचि.

१३८. द्वयं वीणायं. वि जनने, तो, ईणत्तं, वीण वेठनेति वा धातु, आ, वीणा. वल्ल संवरणे, वल्लते धनिविसेसं, ण्वु, वल्लकी, नदादि. विपञ्चीतिपि वीणाय नामं. विपञ्चयतीति विपञ्ची [विपञ्चयति वित्थारयतिसद्दं (चिन्तामणिटीका ७.३)], नदादि.

सा वीणा सत्ततन्ती सत्तहि तन्तीहि विसिट्ठा परिवादिनी नाम, परितो वदतीति परिवादिनी, इनी. वीणादयो चत्तारोपि वीणासामञ्ञवाचका इच्चेके, तेसं मते सासद्दस्स चतुन्नम्पि इत्थिलिङ्गत्थदीपकता विञ्ञेय्या, तथापि अमरकोसेन [अमर ७.३] विरुज्झनतो तेसं मतं न गहेतब्बं.

कट्ठादीहि दोणिसण्ठानेन कतं वज्जभण्डं वीणाय पोक्खरो नाम, पोसेति वड्ढेति सद्देति पोक्खरो, खरो, वुद्धि, वण्णविकारो च. दु गमने, णि, दोणि. ककुभो, पसेवकोतिपि पोक्खरस्स नामानि. कं वातं कुभति बन्धतीति ककुभो. पसिब्बन्ति तमिति पसेवको.

द्वयं पोक्खरवेठके चम्मनि. वीणाभावं उपगच्छति येनाति उपवीणो. वेठति पोक्खरन्ति वेठको, ण्वु.

१३९. आततादिपञ्चकं ¶ पञ्चङ्गिकतूरियस्स नामानि.

१४०. चम्मावनद्धेसु चम्मेन बन्धनीयेसु भेरियादीसु मज्झे तलेकेकयुतं एकेकेन तलेन युत्तं कुम्भथुणदद्दरिकादिकं तूरियं आततं नाम, आतनोतीति आततं, तनु वित्थारे. महतीआदिवीणाविसेसोपि [‘‘महती’’ति नारदस्स वीणा (सद्दकप्पद्दुमे)] आततमेवाति ‘‘चम्मावनद्धेसू’’ति विसेसनं कतं. कुम्भसण्ठानत्ता कुम्भो च तं थुननगरसम्भूतत्ता थुनञ्चेति कुम्भथुनं. तदेव कुम्भथुणं, अथ वा थु अभित्थवे, कम्मनि णो. कुम्भो च सो थुणो चेति कुम्भथुणो, थुण पूरणेति वा धात्वत्थो. दर विदारणदाहेसु, द्वेभावो, कापुब्बस्सिकारो च, दद्दरसद्दं करोतीति वा दद्दरिका.

१४१. उभयतलं मुरजादिकं तूरियं विततं नाम, विसेसेन सद्दं तनोतीति विततं, सब्बविनद्धं सब्बपस्सेसु, पुब्बपच्छाभागेसु च परियोनद्धं पणवादिकं, आदिना चतुरस्सआलम्बरगोमुखीआदयो आततविततं नाम, ‘‘चम्मपरियोनद्धं हुत्वा तन्तिबद्धं आततवितत’’न्ति हि वुत्तं. पण ब्यवहारथुतीसु, पणीयतीति पणवो, अवो.

१४२. वंससङ्खादिकं ¶ सुसिरं नाम, रन्धं सुसिरं, तंयोगा सुसिरं. वन, सन सम्भत्तियं, सो, वंसो. सम उपसमखेदेसु, खो, सङ्खो. सम्मताळादिकं अच्चन्तं पीळनतो, अनलसंयोगतो वा द्रवीभूतं पुन घनायतेति घनाख्यं. हन हिंसायं, कम्मनि णो, हस्स घो. घनभावेन समं भवतीति सम्मं, दण्डादीहि ताळितब्बतो ताळं, तळ ताळने, सम्मञ्च तं ताळञ्चेति सम्मताळं. आदिना कंसताळसिलाताळादीनं गहणं. तत्थ सम्मताळं नाम कट्ठमयताळं. कंसताळं नाम लोहमयं. सिलाय च अयोपट्टेन च वादनताळं सिलाताळं.

चतुक्कं आततादीनं नामं. आ समन्ततो तुज्जते ताळीयतेति आतोज्जं. वंसादिकेपि मुखवायुना आतोज्जनमत्थेव. वादयन्ति धनयन्ति तन्ति वादित्तं वादितञ्च, इत्तो, तो च. वादयन्ति तन्ति वज्जं, यो.

१४३. द्वयं भेरियं. भायन्ति सत्तुजना एतेनाति भेरि, रि. उभ पूरणे, उभनं उभि. ‘‘दुन्द’’इति सद्देन उभि यत्र स दुन्दुभि. पुमित्थियमेते द्वे [सेरी थी, दुन्दुभि पुमा (अमर ७.६)]. द्वयं मुदिङ्गे. मुदं मोदं इङ्गति गच्छति येनाति मुदिङ्गो. मुरा असुरा जातो मुरजो.

अस्स ¶ मुरजस्स भेदा विसेसा आलिङ्गङ्क्योद्धका भवन्ति. वुत्तञ्च –

‘‘हरितक्याकति त्वङ्क्यो,

यवमज्झो तथो’द्धको;

आलिङ्ग्यो चेव गोपुच्छो,

आकत्या सम्पकित्तितो’’ति [चिन्तामणिटीकायम्पि].

आलिङ्ग्यतेति आलिङ्गो, णो. उच्छङ्के भवो अक्यो. उद्धं कत्वा एकेन मुखेन वादनतो उद्धो सन्तो कायति सद्दायतीति उद्धको, उद्धसद्दोयं तिलिङ्गिको. उग्गच्छतीति उद्धो, तो, गमिस्स दो, नेरुत्तो. यो तु उपरिपरियायो उद्धंसद्दो, सो अब्ययमेव.

तिणवादीनि चत्तारि पणवस्स नामानि. तनु वित्थारे, अवो, अस्स इत्तं, णत्तञ्च, तिणवो. मा माने सद्दे च, ‘‘डिण्डि’’इति मायते सद्दायतेति डिण्डिमो, णो.

१४४. ‘‘आलम्ब’’इति सद्दायतेति आलम्बरो. ‘‘आलम्बरो तूरियरवे, गजेन्दानञ्च गज्जिते’’ति [अमर २३.१६७] हि अमरकोस नानत्थसङ्गहेसु.

वीणादीनं वादनकट्ठकुटिलादिकं कोणो, कुण्यते सद्दायतेनेनाति कोणो, णो. ‘‘दद्द’’इति सद्दं करोतीति दद्दरि, दद्दति वा सद्दविसेसेन परिणमतीति दद्दरि, रि. ‘‘पट’’इति सद्दं जहातीति पटहो, पटं हन्तीति वा पटहो. हन हिंसागतीसु, क्वि. अपरे मद्दलादयो भेरिप्पभेदा ¶ . ‘‘मद्द’’इति सद्दं लातीति मद्दला, ला आदाने, अ. ‘‘मन्दला’’तिपि पाठो, मन्दं सद्दं लातीति मन्दला. आदिना डमरुआदयोपि भेरिप्पभेदा विञ्ञेय्या.

१४५. जनप्पिये जनेहि पियायितब्बे विमद्दोट्ठे विलेपनकुङ्कुमादीनं, नानागन्धदब्बानञ्च विमद्दनोब्भूते परिमलो भवे, परिमज्जति पवत्तयत्यासयन्ति, अ, नेरुत्तो, मल, मल्ल धारणे वा. परिमल्यते धारीयतेति, णो. विमद्दग्गहणेन वापिकूपादिनो [विमद्दगन्धादिनो (क.)] निरासो, जनग्गहणेन मक्खिकादिनो. सो परिमलो गन्धो दूरगामी अतिनिहारी अतिदूरपाती आमोदो वुच्चते, आमोदन्ते अनेन, णो. इतो परं इट्ठगन्धादयो विस्ससद्दपरियन्ता तीसु लिङ्गेसु वत्तन्ते.

१४६. चतुक्कं इट्ठगन्धे. इट्ठो गन्धो इट्ठगन्धो, अथ वा इट्ठो गन्धो अस्स इट्ठगन्धो. सुट्ठु रभन्ति तुस्सन्त्यनेनाति सुरभि, इ. सुन्दरो गन्धो अस्स सुगन्धो, सुगन्धि च, अन्तस्सिकारादेसो.

द्वयं दुग्गन्धे. पूति गन्धो अस्स, पुब्बे विय इकारादेसो, कम्मधारयसमासं अस्सत्थ्यत्थेपि कत्तुमिच्छन्ति, पक्रियालाघवत्थं बहुब्बीहियेव न्यायोति. दुट्ठु गन्धो अस्साति ¶ दुग्गन्धो, तेन वुत्तं कच्चायनेन – ‘‘कम्मधारयमन्तत्थियेहि बहुब्बीहि लघुतरो’’ति. अञ्ञे तु लाघव’मनादरमाना इच्छन्तेव मन्तत्थियं. दुविधो वा वाच्चधम्मो लहु गरु च, तत्र बहुब्बीहिना लहु, कम्मधारयमन्तत्थियेनगरु. किञ्च बहुब्बीहिना अतिसायनाद्यत्थो न गम्यतेति अवस्सं तप्पटिपादनाय कम्मधारयपुब्बको मन्तत्थियेव दट्ठब्बो.

द्वयं चिताधूमादिगन्धे. विस विप्पयोगे, सो. आमस्स वसादिवत्थुनो गन्धो तंयोगा, इ, यंसद्दो तस्स नपुंसकत्तदीपको.

१४७. कुङ्कुमादयो चत्तारो चतुज्जातिगन्धो नाम. कुक, वक आदाने, उमो, निग्गहीतागमो च, कुङ्कुमं, लोहितचन्दनं, यं ‘‘कस्मीरज’’न्ति वुच्चति, कमिस्स वा कुङ्कादेसो, कुङ्कुमं. यु मिस्सने, यु, यवनं, तस्स पुप्फं यवनपुप्फं, देवकुसुमं, यवनदेसे जातं पुप्फन्ति वा यवनपुप्फं. यं ‘‘लवङ्ग’’न्तिपि वुच्चति, यं पुप्फं नुहीपुप्फसमानं. तगि गत्यत्थो दण्डको धातु, अरो, तगरं, कुटिलं. तरुतो जातो तुरुक्खो, खो, उत्तञ्च, सल्लकीदवो हि ‘‘तुरुक्खो’’ति वुत्तो.

१४८. पज्जेन छरसानं नामानि. कं पानीयं सेवतेति कसावो, अवो, अथ वा कं सवापेतीति कसावो सु ¶ सवने. तुवरोपि कसायोपि कसावपरियायो. तिज निसाने, तो, तित्तो, कटु. मधु माधुरियं, तंयोगा मधुरो. लुनाति जळत्तन्ति लवणो, यु. अम्बसद्दे, अरो, इत्तं, लत्तञ्च. कट गतियं, ण्वु, उत्तं. इमे छ रसा नाम वुच्चन्ति. तब्बति दब्बे कसावादिसद्दा तीसु लिङ्गेसु वत्तन्ति.

१४९. द्वयं फोट्ठब्बे. फुसितब्बो फस्सो, फोट्ठब्बो च, तब्बो, सस्स टो, तस्स ठो. तिकं विसयिम्हि. विसयो अस्स गय्हट्ठेनात्थीति विसयि. उखति गच्छति विसयेति अक्खं, उस्सत्तं द्वित्तञ्च, नत्थि खं वेदना एत्थाति वा अक्खं, न हि सुखवेदनादयो सम्पयोगवसेन पञ्चसु इन्द्रियेसु उप्पज्जन्ति, जवनादीसु एव पन उप्पज्जन्तीति तथा वुत्तं, मनिन्द्रिये तूपचारा [मनिन्द्रियेसुपचारा (क.)] अक्खं. इन्दो अत्ता, तस्स लिङ्गं इन्द्रियं, इयो. ना’नन्तरेन पयोजकं चक्खादयो ब्यापारयन्ते, तस्मा अत्थि अत्ता चक्खादीनं पयोजकोति चक्खादिकं लिङ्गमत्तनो भवतीति निकायन्तरिका. सयं तिक्खमन्दादिभावे चक्खुविञ्ञाणादीनं तिक्खमन्दादिभावसम्भवतो तेसु इन्दति परमिस्सरियं करोतीति वा इन्द्रियं.

छक्कं नयने. नेति अत्तनो निस्सितं पुग्गलन्ति नयनं, यु. असु ब्यापने, असति विसयेसु ब्यापी विय भवतीति अक्खि, सस्स को, अथ वा अक्ख ब्यापनदस्सनेसु, अक्खति विसयेसु ब्यापीभवति, अक्खति वा पस्सति एतेनाति ¶ अक्खि. नेतीति नेत्तं. लोचति पस्सति एतेनाति लोचनं. अच्छ दस्सनब्यापनेसु, इ, अच्छि. चक्खति अस्सादेति रूपन्ति चक्खु, उ, चक्खति पस्सतीति वा चक्खु.

१५०. पञ्चकं सोते. सुणाति एतेनाति सोतं. सद्दो गय्हते अनेनाति सद्दग्गहो. कर करणे, णो, कण्णो, कण्णति सुणाति एतेनाति वा कण्णो, कण्ण सवने. सुणाति येनाति सवनं, सुति च, यु,ति च.

चतुक्कं घाने. नसन्ति एतायाति नत्थु, थु, आ, नासा. ण्वु, अक च इकारो च नासिका. घा गन्धोपादाने, घायति गन्धोपादानं करोतीति घानं, यु, घायन्त्यनेनाति वा घानं.

द्वयं जिव्हायं. जीवति एतायाति जिव्हा, हो, जीव पाणधारणे. जीवितनिमित्तं रसो जीवितं नाम, तं अव्हायतीति वा जिव्हा, वण्णलोपो. रसन्ति एतायाति रसना, रस अस्सादने, रसं जानातीति वा रसना, ञास्स ना, नी नये वा, अ.

१५१. पज्जं सरीरे. सरति गच्छति, सरन्ति वा तं हिंसन्तीति सरीरं, ईरो. वप बीजसन्ताने. वपति कुसलाकुसलबीजमेत्थाति वपु, उ. गच्छति, गण्हाति वा कुसलाकुसलमेतेनाति ¶ गत्तं, गमु गतियं, गह उपादाने वा. ‘‘अत्ता’’ति अभिधानं, बुद्धि च भवन्ति एतस्माति अत्तभावो. वुणोति संवरति एत्थाति बोन्दि, वु संवरणे, दि, निग्गहीतागमो. विविधं गण्हाति एत्थाति विग्गहो. दिह उपचये, दिहति वड्ढति एत्थ कुसलाकुसलन्ति देहं. अयं देहसद्दो पुरिसे पुल्लिङ्गेवत्तति. कुच्छितानं आयो उप्पत्तिट्ठानन्ति कायो. तनु वित्थारे, उ, तनु, तनुसद्दोयं इत्थियं. एत्थापि वासद्दो सम्बन्धितब्बो. ‘‘अङ्गेनाङ्गं तनु च तनुना गाळ्हतत्तेन तत्त’’न्ति [उत्तरमेघ ४२] हि मेघदूते वुत्तं. कळे रेतसि वरं कळेवरं, अलुत्तसमासोयं.

१५२-१५४. छक्कं चित्ते. चिन्तेतीति चित्तं. चेतो च, नलोपो. मनति जानातीति मनो. विजानातीति विञ्ञाणं, यु. हरति अत्तनो आधारन्ति हदयं, यो, रस्स दो च. मनो एव मानसं, सकत्थे सण.

चुद्दस बुद्धाख्यस्स गुणस्स नामानि. झायतीति धी, झे चिन्तायं, झस्स धो, नदादि, धी, धारेतीति वा धी, क्वि, नदादि, धी ¶ , सङ्खारेसु धीकारो जायति एतायाति वा धी, नदादि. पञ्ञायते एतायाति पञ्ञा, अ. बुज्झते तायाति बुद्धि,ति. मेध हिं सासङ्गमेसु, करणे अ, मि हिंसायं वा, धो, मेधा. मनति जानातीति मति, मुति च, उत्तं, मुनातीति वा मुति, मुन ञाणे,ति, मुति. भू सत्तायं, रि, नदादि, भूरी, भूसङ्खाते अत्थे रमतीति वा भूरी, क्वि, नदादि. मनति जानातीति मन्ता, अन्त, आ. विदति जानातीति विज्जा, पब्बज्जादिना सिद्धं. यु मिस्सने. यमति मिस्सीभवति ञेय्येसूति योनि. पटिमुखं भन्ति उपट्ठहन्ति ञेय्या एतेनाति पटिभानं, यु. न मुय्हति एतेनाति अमोहो. वीमंसा विचयो समुपेक्खा उपलद्धि पटिपत्ति उत्तिचेतनादीनिपि बुद्धिनामानि.

विपस्सनादयो नेपक्कन्ता परियाया पञ्ञाभेदा पञ्ञाविसेसा. तत्थ विविधं अनिच्चादिकं सङ्खारेसु पस्सतीति विपस्सना, यु. सम्मादस्सनलक्खणा सम्मादिट्ठि, सा दुविधा लोकियलोकुत्तरवसेन. तत्थ पुरिमा छब्बिसुद्धिप्पवत्तिकाले, इतरा ञाणदस्सनविसुद्धिकाले लब्भति. आदिपरियायेन पभुतिना अनञ्ञातञ्ञस्सामीतिन्द्रियादयो गहिता. तत्थ तत्थ कारियेसु विचारणा. मान वीमंसायं, सो, चित्ताभोगादि. विचारयते एतायाति विचारणा, चर सञ्चये, चुरादिगणो, यु. सम्पजानातीति सम्पजानो, पुग्गलो, धम्मसमूहो वा, ञास्स जा, तस्स भावो सम्पजञ्ञं, न्यस्स ञो, द्वित्तं, तं सात्थकसम्पजञ्ञादिवसेन चतुब्बिधं. निस्सेसतो पाचेति कुसलधम्मेति निपको, ञाणी पुग्गलो, तस्स भावो नेपक्कं. द्वयं वेदनायं. वेदयतीति वेदयितं, विद अनुभवने, चुरादित्ता णयो, तो, इकारागमो च. वेदयतीति वेदना, यु.

१५५. पञ्चकं ¶ वितक्के. तक्क वितक्के. तक्केति सम्पयुत्तधम्मे आरम्मणं अभिनिरोपेतीति तक्को. वितक्कोति उपसग्गमत्तमेव विसेसो. सङ्कप्पन्ति पभवन्त्यनेनाति सङ्कप्पो, णो, कप्प वितक्के, कप्प सामत्थिये वा, भूवादि, सङ्कप्पयन्ति पभवन्त्यनेनाति वा सङ्कप्पो, कप्प वितक्के, चुरादि. अप पापुणने, अप्पेति सम्पयुत्तधम्मे पापेति आरम्मणन्ति अप्पना, यु, आ. ऊह वितक्के. ऊहन्त्यनेनाति ऊहो. तक्कऊहसद्दा चेत्थ अज्झाहारवाचकापि भवन्ति, अज्झाहारं नाम ऊनपूरणत्थमधिकप्पभेदाहरणं [मधिकोपादानं (चिन्तामणिटीका)]. ‘‘अज्झाहारो तक्क ऊहा’’ति [अमर ५.३] हि अमरकोसे वुत्तं. द्वयं जीवितिन्द्रिये. अयइति गमनत्थो दण्डको धातु. अयति अद्धानं गच्छति येनाति आयु, णु, एति एतेनाति वा आयु, इ गतिम्हि, णु, इस्से, ए अय. जीवन्ति अनेनाति जीवितं, जीव पाणधारणे.

चतुक्कं समाधिम्हि. नानालम्बणविसारणाभावतो एकं अग्गं आरम्मणमेतस्साति एकग्गं, चित्तं, ‘‘अग्गसद्दो चेत्थ आलम्बणवाचको’’ति हि सद्धम्मटीकायं वुत्तं, तस्स भावो एकग्गता, एकं वा आरम्मणं अजति गच्छतीति एकग्गं, तस्स भावो एकग्गता. कामच्छन्दं समेतीति समथो, थो, समु उपसमे, ‘‘समाधि कामच्छन्दस्स पटिपक्खो’’ति [पारा. अट्ठ. १.११; ध. स. अट्ठ. १६०] हि वुत्तं. विक्खिपनं नानारम्मणपेरणं विक्खेपो, सो नत्थि एत्थाति अविक्खेपो. एकारम्मणे सुट्ठु आधानं ¶ समाधि, सञ्ञायमि, नानालम्बणविक्खेपवसप्पवत्तं अधिसङ्खातं चित्तब्यधं समेतीति वा समाधि, नेरुत्तो.

१५६. पज्जेन वीरियस्स नामानि. उ दुक्खलाभं, उद्धं वा सहति खमतीति उस्साहो, णो. आ भुसो कायं, चित्तञ्च तापेतीति आतप्पो [आतापो (?) अभिधानप्पदीपिकाटीका ११३५ गाथायं पस्सितब्बं], तप सन्तापे. लीनं चित्तं पग्गण्हाति उक्खिपतीति पग्गहो. अत्तनो निस्सयं परमत्थं गण्हापेतीति वा पग्गहो. ‘‘पसद्दो परमत्थेपी’’ति हि एकक्खरकोसे वुत्तं. वायमन्ति येनाति वायामो, वायम उस्साहने, अथ वा वय गमनत्थो दण्डको धातु, वयति सब्बकालन्ति वायामो, अमो, वायो विय सदा अमति गच्छतीति वा वायामो. परं परं ठानं अक्कमतीति परक्कमो, परं पच्चनीकभूतं कोसज्जं अक्कमतीति वा परक्कमो. पदहति येनाति पधानं, यु. दहस्स धो, दह भस्मीकरणे [पपुब्बधाधातुना साधेतब्बं मञ्ञे]. वीरे साधु, वीरानं वा कम्मं, विधिना वा ईरयितब्बं पवत्तेतब्बन्ति वीरियं, ईर गतियं, ईहति एति वा याय सुभासुभफलन्ति ईहा, ईह चेट्ठायं, इ वा गतिम्हि, पच्छिमे हपच्चयो, उद्धं यन्ति येनाति उय्यामो, अमो. तिट्ठति एत्थ सुभासुभफलन्ति धिति,ति, ठा गतिनिवत्तियं.

१५७. पज्जेन वुत्तपरियायस्स वीरियस्स चत्तारि अङ्गानि दस्सेति. तचादीनं तिण्णं अवसिस्सनं अवसेसता मंसलोहितेहि अवधिभूतेहि, मंसलोहितानं पन सुस्सनं सुक्खता ¶ . एतानि चत्तारि अधिट्ठानवसप्पवत्तानि वीरियस्स अङ्गानि कारणानि होन्ति. अङ्ग गमनत्थो दण्डको धातु. अङ्गति सिद्धिं गच्छति वीरियफलमेतेहीति अङ्गानि. तच पालने, णो, तचो. नह बन्धने आरु. न्हारूतिपि पाठो. तत्थ नन्तस्स लोपो. सिस असब्बप्पयोगे, यु, द्वित्तं. असति खेपेति अद्धानन्ति अट्ठि,ति, नपुंसके, नेरुत्तो, आ भुसो तिट्ठति एतेनाति वा अट्ठि, इ. मन ञाणे, सो, नस्स निग्गहीतं, मंसं. रुह जनने, इतो, लत्तं, लोहितं.

१५८. असाझसाधनेपि यस्सा वसेन उय्यामो, सा अधिमत्तेहा अधिकसत्तियुत्ता ईहा उस्सोळ्ही नाम, उ पबलं दुक्करकम्मं सहति यायाति उस्सोळी, सहस्स सोळ्हो, नदादि, उस्साहानं ऊहाति वा उस्सोळी, यथा ‘‘पदट्ठान’’न्ति, आकारस्सो, हस्स ळो, ऊलोपो, नदादि, वायाममत्तेपि. द्वयं सतियं. सरति, सरन्ति वा ताय, सरणमत्तमेव वा एसाति सति,ति, पमादं वा सरति हिंसतीति सति. अनु पुनप्पुनं सति अनुस्सति, उपसग्गमत्तमेव वा विसेसो, द्वेपि इत्थियं.

द्वयं लज्जायं. लजि पीळे, कातन्तधातु. लज्ज लज्जने, मोग्गल्लानधातु, लज्जति पापाति लज्जा, अ. हिरी लज्जियं, इ. हिरियति पापाति हिरी. समाना तुल्यत्था द्वे. द्वयं ओत्तप्पे. ओत्तप्पति भायति पापतोति ओत्तप्पं, तप भये अवपुब्बो. पापतो भायति सीलेनाति पापभीरु, पुग्गलो, चित्तं वा, तस्स भावो तथा.

१५९. पज्जद्धेन ¶ उपेक्खाय वेदनाय नामानि. मज्झत्ते मज्झत्तसभावे पवत्ता मज्झत्तिका. द्विन्नं वेदनानं समीपे पवत्ता इक्खा अनुभवनन्ति उपेक्खा, इक्ख दस्सने. अदुक्खा च सा असुखा चेति अदुक्खमसुखा, मकारो पदसन्धिकरो.

द्वयं मनसिकारे. भवङ्गवसेन पवत्तस्स चित्तस्स आभुजनतो आवट्टापनतो चित्ताभोगो. पालनज्झोहारत्थो चेत्थ भुजधातु आवट्टनत्थो आपुब्बत्ता, इदं पन वीथिजवनपटिपादके सन्धाय वुत्तं, चित्तस्सारम्मणे आभुजनं पवत्तनं वा चित्ताभोगो, इदं पन आरम्मणपटिपादकवसेन वुत्तं. भवङ्गमनतो विसदिसं मनं करोतीति मनक्कारो, करणं वा कारो, मनस्मिं कारो मनक्कारो. एत्थ च पठमविकप्पेन द्वे पटिपादका वुत्ता, पच्छिमेन तु इतरो.

द्वयं अधिमोक्खे. मुच मोचने, अधिमुच्चनं ‘‘इदमेवा’’ति सन्निट्ठानकरणं अधिमोक्खो. निच्छयनं निण्णयनं निच्छयो, चय गमनत्थो दण्डको धातु, चस्स द्वित्तं, छत्तं, नि भुसं छेदनं वा निच्छयो, छिदि द्विधाकरणे, इस्सत्तं, दस्स यो, असरूपद्वित्तं.

१६०. पज्जद्धं दयायं. दय दानगतिहिंसारक्खणेसु. दयति परदुक्खं, अत्तसुखञ्च हिंसतीति दया, अ. कपि ¶ चलने, अनु पुनप्पुनं कम्पेति अत्ताधारस्स चित्तन्ति अनुकम्पा. कं सुखं रुन्धतीति करुणा, रुधि आवरणे, धस्स णो, अथ वा करोन्ति अत्तानमधीनमेतायाति करुणा, यु, आ, करुणा, सा एव कारुञ्ञं. अनुद्दयाति उपसग्गेन पदं वड्ढितं.

पज्जद्धं विरतियं. रमु उपरमे विपुब्बो, विरमणं वेरमणी, यु, नदादि, वेरं मणति विनासेतीति वा वेरमणी. विरमणं विरति,ति. दूरतो विरमणं आरति.

१६१. चतुक्कं खन्तियं. तितिक्खनं खमनं तितिक्खा, तिज खन्तियं, खो, द्वित्तं, कत्तादि, आ. खमनं सहनं खन्ति,ति. खमते खमनं, खमा च, खमु सहने. द्वयं मेत्तियं. मिद स्नेहे, मिज्जति सिनेहतीति मेत्ता, त, आ. मेत्ति,ति. अथ वा मित्ते भवा मेत्ता, मेत्ति च.

पज्जद्धं दिट्ठियं. दस्सीयते दस्सनं, दिस पेक्खने, यु. दस्सनं दिट्ठि. लभ लाभे,ति, लद्धि, मिच्छादिट्ठियमेव. सेसा तु उभयत्र. ठितपक्खो सिद्धन्तो [ठितो पक्खो सिद्धन्तो, पुब्बपक्खं निरस्य सिद्धपक्खट्ठापने इति भावो (चिन्तामणिटीका)], सिद्धो अन्तो अनेनाति विग्गहो. समन्ततो अयनं गति समयो.

१६२. दोहळन्तं तण्हायं. तस पिपासायं, याय तसन्ति, सा तण्हा, ण्हो. इणम्हि तसिणा. एज कम्पने, एजा ¶ . संसारतो निस्सरितुमप्पदानवसेन जालसदिसत्ता जालिनी, उपमाने इनी. विस पवेसने, सब्बत्र विसता पत्थताति विसत्तिका, सकत्थे णिको. छन्द इच्छायं, छन्दनं छन्दो, कत्तुकम्यतापि. तेसु तेस्वारम्मणेसु आकुलीभूतत्ता जटा वियाति जटा. कमु इच्छायं,ति, निकन्ति. इसु इच्छायं, अ, इस्स आ, आसा. सिवु तन्तसन्ताने, भवादीहि भवादयो सिब्बतीति सिब्बिनी, अ, इनी. सत्ते भवं नेतीति भवनेत्ति,ति.

१६३. झेचिन्तायं, आरम्मणाभिमुखं झायतीति अभिज्झा, आ. वन सम्भत्तियं, वनति येन सो वनथो, थो. वा गतियं, वाति आरम्मणन्ति वानं, यु. लुभ इच्छायं, लुब्भनं लोभो, णो. रन्ज रागे, रज्जनं, रज्जन्ति वा येन सो रागो, णो. लय गतियं, आ पुनप्पुनं लयत्यारम्मणेसूति आलयो, पुनप्पुनं लयति संसिलेसति येनाति वा आलयो. ‘‘लयो विनासे संसिलेसे, साम्ये तोरियत्तिकस्स चे’’ति नानत्थसङ्गहे. पिह इच्छायं, चुरादि, अ, पिहयति यायाति पिहा. चित्तस्स नानारम्मणेसु विब्भमकरणतो मनसो रथो इव मनोरथो, मनो एव रथो वियाति वा मनोरथो. इसु इच्छायं, अ, सस्स च्छादेसो. लस कन्तियं, अभिमुखं कत्वा लसति येनाति अभिलासो, णो. कमु इच्छायं, णो, कामो ¶ . दुह पपूरणे, दुहनं दोहो, तं लातीति दोहळो, दुट्ठं हदयमेतेनाति वा दोहळो, हदयस्स हळो, हल कम्पने द्विसद्दूपपदो, द्वीहि हलति कम्पतीति वा दोहळो, अ, द्विस्स दो, लस्स ळो. द्वे हदया अस्स परमत्थस्साति वा दोहळो. अ, द्विस्स दो, हदयस्स हळो, दस्स ळो वा, यलोपो, इच्छाविसेसत्तेपि दोहळस्स सामञ्ञवत्तिच्छाय निद्देसो.

अतण्हासभावम्पि रुचिं आलम्बणिच्छासभावसामञ्ञेन इधेव वत्तुमाह ‘‘आकङ्खातु’’इच्चादि. कङ्ख इच्छायं, अ. रुच रोचने, रोचनं कत्तुकामता, इ, रुच दित्तियं वा, रुचि. कत्तुकामतेव. सा रुचि अधिका लालसा नाम, लस कन्तियं, पुनप्पुनं, अतिसयं वा लसतीति लालसा, द्वित्तं, अस्सा. ‘‘याचनायं महिच्छायं [तण्हातिरेके याचनायं (चिन्तामणिटीका ७.२८)], उस्सुक्के लालसा द्विसू’’ति रुद्दो.

१६४. तिकं विरोधे. पायेन वीरेसु भवं वेरं, पटिघपापेसुपि. रुध पटिघाते, विरुज्झनं विरोधो. दिस अप्पीतियं, विद्देसनं विद्देसो.

रोसन्तं कोधे. दुस अप्पीतियं, दुस्सनं दोसो. आरम्मणे पटिहञ्ञतीति पटिघं, हन हिंसायं, पटिघसद्दोयं पुल्लिङ्गे वा भवति. कुध कोपे, कुज्झनं कोधो. आगन्त्वा हञ्ञतीति आघातो. कुप कोपे, कुप्पतीति कोपो, कोपयति वा चित्तन्ति कोपो. रुस रोसने, रुसनं दुस्सनं रोसो.

द्वयं ¶ परानत्थचिन्तने. ब्यापज्जति विनस्सति चित्तमेतेनाति ब्यापादो, पटिघेपि. पद गतिम्हि. परसम्पत्तीसु नाभिरमतीति अनभिरति, रमु रमणे,ति.

१६५. द्वयं उपनाहे. नह बन्धने, पुनप्पुनं, उपगन्त्वा वा नय्हति चित्तन्ति उपनाहो. बज्झति वेरमनेनाति बद्धवेरं. द्वयं सोके. सुच सोके, णो, सुचनं सोको. सुचते सोचनं.

तिकं रुदिते. रुदि अस्सुविमोचने, सब्बत्र भावे तो. कदि अव्हाने, रोदने च, तपच्चयस्स अण्णादेसे रुण्णं. द्वयं परिदेवने. देवनं सोकेन विलापो, पुनप्पुनं, समन्ततो वा देवो परिदेवो, परिद्दवो च.

१६६. तिकं भये चित्तुत्राससङ्खाते. सब्बत्र भावसाधनं. भी भये, भायनं भीति,ति. भयं, णो. तस उब्बेजे, उत्तसते उत्तासो, णो. द्वयं महति भये. भीरुनो इदं भेरवं, णो. महन्तञ्च तं भयजनकत्ता भयञ्चाति महब्भयं. महाभयन्तिपि पाठो.

१६७. पज्जं भायितब्बसामञ्ञे. भेरवसद्दोयं सामञ्ञवाचकोपि अत्थीति इध निद्देसो. भायति यस्माति भिंसनं, सो, यु, बिन्दागमो. भायति यस्माति भीमं, मो. दर विदारणे, दरीयतीति दारुणं, उणो. भायति यस्माति ¶ भयानकं, ण्वु, अनकादेसो. घुर भीमे, घुरति भिंसतीति घोरं, णो. पटिवत्तति भयं चित्तुत्रासो यस्माति पटिभयं. भायति यस्माति भेस्मं, स्मपच्चयो. भयं करोतीति भयङ्करं, अलुत्तसमासोयं. इमे नव भेरवादयो भयभेरवादिहेतुम्हि दब्बे विसेसनभावेन वत्तन्ते, तदा तीसु लिङ्गेसु, सामञ्ञेन तु नपुंसके.

१६८. द्वयं पराभ्युदयासहने. इस्स इस्सत्थे, इस्स इस्सायन्ति वा धात्वत्थो, इस्सति सन्तेसुपि गुणेसु वचसा, मनसा वा दोसारोपनं करोतीति इस्सा, अ. उस्सुय [उसूय (?)] दोसाविकरणे. तिकं मच्छेरे. मसु आमसने, च्छेरच्छरपच्चया, मच्छरमेव मच्छरियं, सकत्थे इयो, अथ वा मसुइच्चेतस्स पाटिपदिकस्स सुस्स णम्हि च्छेरच्छरा, मसु मच्छेरेतिपि धातु.

तिकं अञ्ञाणे. मूह वेचित्ते, मुय्हन्ति तेन सम्पयुत्तधम्मा, सयं वा मुय्हति, मुय्हनमत्तमेव वा तन्ति मोहो. विद ञाणे, न विदतीति अविज्जा. न विजानातीति अञ्ञाणं. तिकं माने. भूतेनाभूतेन वा परतो उक्कंसकप्पनेन चेतसो उन्नति मानो, यथा ‘‘सूरो अत्थवाह’मस्मि सीलवा बुद्धिसम्पन्नो’’ति [अवेहि भलवा अस्मि, सीलवा बुद्धिसंयुतो (चिन्तामणिटीका ७.२२)]. मान पूजायं, चुरादि, अ. धारणत्थो धाधातु, करोत्यत्थे विपुब्बो, सेय्यादिभावे अत्तानं विदधाति याय सा विधा, तीसु. उद्धं नमति याय सा उन्नति, इत्थियन्ति.

१६९. द्वयं ¶ उद्धच्चे. हन गतियं, उद्धं उद्धं हनति गच्छतीति उद्धतो, तो, हनस्स धो, असरूपद्वित्तं, चित्तं, उद्धतस्स भावो उद्धच्चं. धाव गतियं, उद्धं धावति चित्तमेतेनाति उद्धवं, अ, रस्सो.

तापादिपञ्चकं कुक्कुच्चे. तप, धुप सन्तापे, तपति चित्तमेतेनाति तापो, णो. कुच्छितं करोतीति कुक्कुतं, चित्तं, तंसमङ्गी वा, तस्स भावो कुक्कुच्चं. पच्छा तपति एतेनाति पच्छातापो. अनु पच्छा तपति येन सो अनुतापो. सर गतियं, विरूपेन पति पुनप्पुनं सरति चित्तमेतेनाति विप्पटिसारो, तस्स टो.

१७०. पज्जं विचिकिच्छायं. लिख लेखने, मनं विलेखति द्विधाकरणवसेनाति मनोविलेखो. दिह उपचये. इध पन संपुब्बत्ता संसये, करणे णो. सी सये, इध संपुब्बत्ता कङ्खायं, सब्बत्रेवं. ‘‘कथमिद’’मिति कथयति याय सा कथंकथा. कित रोगापनयने, छपच्चयो, द्वित्तादि, विगता चिकिच्छा ञाणप्पटिकारो एतायाति विचिकिच्छा. इल गतिकम्पनेसु, द्विधा इलति चित्तमेतेनाति द्वेळ्हकं, हपच्चयो, सकत्थे को च. कङ्ख विचिकिच्छायं, अ, इत्थियं. सङ्क सङ्कायं. विविधेनाकारेन मञ्ञति यस्मा, सा विमति. मन ञाणे, इत्थियन्ति.

१७१. तिकं ¶ नीचपकतिदोससम्भूतरूपिस्सरियादिनिमित्तिके मदे, यस्मिं सति उत्तरदानसादरोलोकनादिविमुखो पुरिसो जायते. मदोप्यत्र ‘‘कत्थूरीगब्बरेतेसु, मदोहस्सेभदानेसू’’ति [कत्तरि गब्भरेतेसु, मदो पुरिसमानेसूति (निस्सय)] रभसो. गब्ब माने, चुरादि, अ, अथ वा गर सेचने, बो. मान पूजायं, विसेसतो मानेतीति अभिमानो. अहंकारे अहंसद्दो निपातो, अम्हसद्दोप्यत्र, ‘‘अह’’मिति अत्तानं करोति येनाति अहंकारो. द्वयं चिन्तायं. चिन्त चिन्तायं, अ. झे चिन्तायं, झायते झानं, द्वीसुपि भावसाधनं, अ. वितक्कचिन्तानं को भेदो? वितक्को ताव वाचाय पुब्बभागप्पवत्तो, ‘‘पुब्बेव खो, गहपति, वितक्केत्वा विचारेत्वा पच्छा वाचं भिन्दती’’ति [सं. नि. ४.३४८] हि वुत्तं. इतरा पन तस्सा अपुब्बभागप्पवत्तापीति अयमेतासं विसेसो. अथ वा वितक्को पकिण्णकपरियापन्नो एको चेतसिकधम्मो, इतरा पन सब्बसाधारणपरियापन्नो मनसिकारनामको एको चेतसिकधम्मोति अयमेतासं विसेसो.

द्वयं निच्छये. नय गमनत्थो दण्डको धातु, आरम्मणं निच्छिनन्तो नयतीति निण्णयो, नस्स णत्तं. अथ अधिमोक्खनिण्णयानं को भेदो? अधिमोक्खो आरम्मणं अज्झोगाहेत्वा तिट्ठति, निण्णयो विनिच्छयमत्तमेवाति अयमेतेसं विसेसो. अथ वा अधिमोक्खो पसादेपि सम्भवति, इतरो पन न तथाति अयंप्येतेसं भेदो ¶ . तत्र निच्छयसद्दो इधापि पवत्ततीति द्वीसुपि वुत्तो.

पादेन अभ्युपगमस्स नामानि. पतिपुब्बो जानाति अभ्युपगमे, इत्थियं अ, पटिञ्ञा. तथा सुणोति च, अ, पटिस्सवो, द्वीसुपि भावसाधनं. संविदा’गू, पटिञ्ञानं, नियमो, अस्सवो, संसवो, अङ्गीकारो, अभ्युपगमो, समाधिइच्चादीनिपि अभ्युपगमस्स नामानि [अमर ५.५].

१७२. छहि पदेहि अनादरस्स नामानि. मान पूजायं, चुरादि, मन ञाणे वा, हेट्ठा कत्वा जाननं अवमानं, भावे यु. यो येनानादरितो, स ततो अवस्समेव कायवचीमनानं अञ्ञतरेनावधीयतेति अनादरेपि ब्यवधानाभिचारतो तिरसद्दो अन्तरधाने वत्तमानो सम्बज्झतेति तिरोधानकरणं तिरक्कारो. परि परापुब्बो भूधातु अवञ्ञाणे, अवपुब्बो जानाति च, सब्बत्र भावे णो, अ च. दर आदरे, आदरो सक्कारो, तब्बिपरीतो अनादरो. पराभवनं पराभवो. अवजाननं अवञ्ञा.

द्वयं उम्मादे. चित्तस्स विब्भमो भन्ति उम्मादो. मद उम्मादे, उग्गतेहि, उम्मग्गसण्ठितेहि वा दोसेहि मदनं उम्मादो.

१७३. स्नेहन्तं ¶ स्नेहे. पियस्स भावो पेमं, इमो, पियस्स पत्तं, पीनयतीति वापी, पिनो भावो पेमं, इमो. सिनिह, स्निह पीतियं, भावे णो. द्वयं मुच्छायं. पीळ विबाधायं, चित्तस्स पीळा चित्तपीळा, विगता नीलादिसञ्जाननलक्खणा सञ्ञा एतस्माति विसञ्ञी, तस्स भावो विसञ्ञिता.

द्वयं पमादे. येन सक्को समानो सयं कत्तब्बं न करोति, सो पमादो, मद पमादे पपुब्बो, पमज्जनं पमादो, णो. सज विसज्जनालिङ्गननिम्मानेसु. सतिया विसज्जनं सतिवोसग्गो, इस्स ओ. अपुब्बवत्थुपरिक्खातिसये कोतूहलादिद्वयं. तुज हिंसायं, कुं पापं तोजतीति कोतूहलं, अलो, वण्णविकारो च. तुल निक्कसे, कुं पापं तुलयतीति कुतूहलं, अ, हकारवण्णागमो. कोतुकं, कुतुकञ्च एतेसं परियायानि.

१७४. विलासादयो क्रिया चेट्ठा, किंविसिट्ठा? सा क्रिया नारिसिङ्गारभावजा इत्थीनं रतिभावजा, या हावसद्देनोच्चन्ते. हुयन्ते रागिनो अत्राति हावो, हु हवने, णो. आदिना विच्छित्तिपभुतीनं गहणं, तथा हि वुत्तं नाटकरतनकोसे –

‘‘लीला ¶ विलासो विच्छित्ति, विब्भमो किलकिञ्चितं;

मोट्टायितं कुट्टमितं, विब्बोको ललितं तथा.

विकतञ्चेति विञ्ञेय्या, दस थीनं [थीनं चेट्ठा (क.)] सभावजा;

हावो च हेला विक्खेप-सम्मूळ्हमदकपण्य’’न्ति.

तत्र पियसमीपगमने यो ठानासनगमनविलोकितेसु विकारो, अकस्मा च कोधमिहितचमक्कारमुखविकूणनं, सो विलासो, विपुब्बा लसधातुम्हा णो. सुकुमारविधानेन भमुकनेत्तादिक्रियासचिवकरचरणङ्गविन्यासो ललितं, लल विलासे, तो. अलद्धपियसमागमेन कुचित्तविनोदनत्थं पियस्स या वेसगतिदिट्ठिहसितभणितेहानुकति करीयते, सा लीला, लल विलासे, लल उपसेवायन्ति वा धात्वत्थो, अ. सुरते पवड्ढेच्छा हेळा, हेला वा, हिल हावकरणे, अ. मदरागहस्सजनितो विपरियासो विब्भमो. आभरणविलेपनादीनं कुतोचि पियापराधतो इस्सायानादरेन चत्तानं सखीनं पयतनेन वारणं विच्छित्ति, छिदि द्वेधाकरणे,ति. पियेन दत्तं पीतिनिबन्धनं स्वप्पमपि भूसनं विच्छित्तीत्यञ्ञे. किलकिञ्चितादयो नाटकसत्थानुसारतो [ब्याख्यासुधाटीकाटीप्पणे] ञेय्या.

१७५. तिकं हसिते. हस हसने, सब्बत्र भावसाधनं. सो हासो मन्दो समानो मिहितं, सितञ्चुच्चते. मिह ईसंहसने. मन्दस्सितं म्हितन्तिपि पाठो, म्हि ¶ ईसंहसनेतिपि धातु, म्हिस्स, मिहिस्स वा स्यादेसो, सितं. सब्बत्र भावे तो.

ईसंफुल्लितदन्तेहि, कटाक्खेहि सोट्ठवेहि च;

अलक्खितद्विजद्वारं, सितमिच्छन्ति सूरयो [चिन्तामणिटीका ७.३४].

द्वयं महाहसिते. अट गतियं, दूरगामिहासो अटहासो, अतिक्कन्तो वा हासो अटहासो, तस्स टो, इकारस्सत्तञ्च. सितातिहसितानं अन्तराळिकं विहसितं.

आकुञ्चितकपोल’क्खं, सस्सनं निस्सनं तथा;

पत्थावोत्थं सानुरागं, आहु विहसितं बुधा [चिन्तामणिटीका ७.३५].

द्वयं लोमुग्गमे. रोमानं अञ्चनं रोमञ्चो, अञ्च गमने, णो. लोमानं हंसनं उद्धग्गभावो लोमहंसनो.

१७६. परिहासादिछक्कं वल्लभादीनं परिहासे. परिहसन्त्यत्राति परिहासो, णो, परिभवितुकामेन हासोति वा परिहासो. दु परिहासे, दु अनादरेति वा धातु, अ, दव दाहेति वा धातु. खिड कीळायं, खिड्डा, खिद्दातिपि पाठो, अथ वा खं तुच्छं इड्डा वाचा, सा एत्थाति खिड्डा. कीळ पीतियकीळनेसु, कीळ विहारेति वा, कीळनं केळि कीळा च कीळितञ्च. परिहासादिछक्केसुपि अधिकरणसाधनम्पि आचरिया वदन्ति.

तिकं ¶ निद्दायं. निपुब्बो दा सुपने, अ. सुप सये, इनो, सुपिनं. अ, सोप्पं. अच्चन्तपरिस्समादिकारणा सब्बङ्गनिमीलनं मिद्धं. मुच्छापायं मिद्धं. मिद कारियक्खमने, तो. मेधयति वा मिद्धं, अकम्मञ्ञभावेन विहिं सतीत्यत्थो, कम्पनत्थो चलधातु मुच्छापाये पपुब्बो. अक्खिदलानं पचलभावेन अयति पवत्ततीति पचलायिका, ण्वु, अस्सित्तं.

१७७-१७८. केतवन्तं कूटे. करणं कति, निन्दिता कति निकति. अट गमने, कुच्छितेनाकारेन अटतीति कूटं. कुट छेदनेति वा धातु [सद्दनीतिधातुमालायं पन ‘‘कूट अप्पसादे’’ति धातुना साधितं]. रभि ब्याजे, ब्याजो नाम केतवं. सठ केतवे, सठं, सठयति न सम्मा भासति येनाति वा सठं. कितवस्स धम्मो केतवं, कितवो नाम जूतकारो, चोरो वा, कित निवासे, अवो. कपटो, ब्याजो, उपधि, कुसति इच्चादीनिपि केतवस्स नामानि.

सत्तकं सभावे. भवनं भावो, सस्स अत्तनो, सन्तो वा संविज्जमानो भावो सभावो. सज विसज्जनालिङ्गननिम्मानेसु, नत्थि विसज्जनमेतस्साति निस्सग्गो. रूप पकासने, संविज्जमानं रूपं सरूपं. करणं भवनं कति, पठमं कति पकति. यथा पठमकाले सम्भूता, तथेव सब्बदापीत्यत्थो. सील समाधिम्हि, समाधि नियमो. लक्ख दस्सनङ्केसु, तथेव लक्खितब्बन्ति लक्खणं, यु. तथेव भवतीति भावो.

द्वयं ¶ उस्सवे. उस दाहे. कं उसवन्ति उग्गिरयन्त्यत्राति उस्सवो, नानासमिद्धीहि सवन्ति एत्थाति वा उस्सवो. छि छेदने, छिन्दति सोकमेत्थाति छणो. यु. इस्स लोपो. सोकं, पापञ्च छिन्दन्ता अणन्ति सद्दायन्ति एत्थाति वा छणो. छि छेदने. अण सद्दत्थो दण्डको धातु.

१७९. यथा सस्नेहं पकतितिलतेलादिस्नेहसहितं दीपकं पज्जोतं धारेन्तो जन्तु नरो अत्यन्धकारगब्भादीस्वपि ठितानि खुद्दकान्यत्थजातानि अतिसुखुमानिपि नानादब्बसमूहानि सुखंव सम्पस्सति, तथा सस्नेहं बुद्धपरियायादिअनेकपरियायस्नेहसहितं इमं अभिधानप्पदीपिकं गन्थं उग्गहणधारणादिना धारेन्तो जन्तु सोतुजनो खुद्दकानि अत्थजातानि नानासत्थेसु आगतानि अतिगम्भीरानि अत्थजातानि सुखं सम्पस्सतीति योजना.

इति सकलब्याकरणमहावनासङ्गञाणचारिना कविकुञ्जरकेसरिना सिरिमहाचतुरङ्गबलेन महामच्चेन विरचितायं अभिधानप्पदीपिकावण्णनायं सग्गकण्डवण्णना समत्ता.

सग्गकण्डवण्णना निट्ठिता.

२. भूकण्ड

१. भूमिवग्गवण्णना

१८०. इध ¶ भूकण्डे साङ्गोपाङ्गेहि भूम्यादीहि दसहि, पातालेन चाति एकादसहि कोट्ठासेहि कमतो वग्गा भूमिवग्गादिनामका वग्गा वुच्चन्ते. सप्पधानोपकारकानि अङ्गानि खारादीनि, अङ्गानं उपकारकानि च उपङ्गानि अद्धादीनि.

१८१. साद्धपज्जेन भूमिया नामानि. वसूनि रतनानि धारयतीति वसुन्धरा. खमु सहने, खस्स छो, छमा, अथ वा छि छेदने, सत्तानमधोपतनं छिन्दतीति छमा, मो, इत्थियमा च. भवन्त्यस्सं भूतानीति भूमि. भू सत्तायं, मि. पुथइति पाटिपदिके ठिते नदादि, ई, पुथस्स पुथुआदेसे, वुद्धिम्हि च कते पुथवी. उस्सुवादेसे पुथुवी. पथादेसे तु पथवी, इमस्मिं पक्खे अवागमो, अथ वा थव गतियं, पथवति एत्थाति पथवी, नदादि, सब्बत्थ पत्थरतीति वा पथवी, थर सन्थरणे पपुब्बो, रस्स वो, नदादि, पुथवी, अस्सु.

‘‘मधुनो केटभस्सापि, मेदमंसपरिप्लुता;

तेनायं मेदिनी देवी, वुच्चते ब्रह्मवादिभी’’ति [चिन्तामणिटीका ११.३]. –

वचनतो मेदयोगा मेदिनी, ई, इनी च. मिद स्नेहने वा, यु, नदादि, इस्सेत्तञ्च. मह पूजायं, नदादि. वित्थिण्णत्ता ¶ उब्बी, नदादि, अवति भूतानीति वा उब्बी, अस्सु. वसूनि सन्त्यस्सं वसुमती. गच्छन्ति यस्सं लोका, सा गो, पुमित्थियं. का सद्दे, कायति एत्थ, कायति मारविजयकालेति वा कु, उ. वसूनि धारयतीति वसुधा. सब्बं लोकं धरयतीति धरणी, यु, नदादि. धरतीति धरा, इत्थियं आ. गमु गमने, गच्छन्त्यस्सं जगती, अन्तपच्चयो, गस्स द्वित्तं, जत्तञ्च, नलोपो, नदादि. भू सत्तायं, रि, नदादि, क्विम्हि भू. भूते सत्ते धरतीति भूतरो. अव रक्खणे, यु, नदादि, अवनी.

१८२. खारा लवणरसा मत्तिका ऊसोत्युच्चते. खादतीति खारा, दस्स रो. पदेसकत्ता मत्तेन पमाणेन युत्ता मत्तिका. ऊस रुजायं, ऊसो. ऊसयोगा ऊसवा, वन्तु. रपच्चये ऊसरो. द्वेपि तीसु वत्तन्ते.

थल ठाने, अधिकरणे अ. कित्तिमं थलं, अकित्तिमा थली, नदादि. थद्धलूखम्हि भूभागे भूमिप्पदेसे जङ्गलसद्दो वत्तति. तत्थ निज्जलत्ता कक्खळत्ता थद्धो. तिक्खसक्खरादिविदारगवादिखुरगण्डुप्पादवच्चादिसहितत्ता लूखो वेदितब्बो. गल चवनाधोपतनादनेसु. जलं गलति एत्थ, जलेन वा गलन्ति एत्थाति जङ्गलो, निज्जलो देसो, ‘‘जङ्गलो निज्जले देसे, तिलिङ्गो पिसिते थिय’’न्ति [तिकण्डसेस ३.३.३९३] हि तिकण्डसेसो, लस्स लोपो, निग्गहीतागमो च.

१८३. वेदेन ¶ पञ्ञाय ईहन्ति एत्थाति वेदेहो. सो एव विदेहो, इमं दीपमुपादाय सिनेरुनो पुब्बदिसाभागत्ता पुब्बो च सो विदेहो चेति पुब्बविदेहो. एवमपरुत्तरेसु. गवेन यन्त्येत्थाति गोयानो. अपरो च सो गोयानो चेति अपरगोयानो. जम्बुया लक्खितो, कप्पट्ठायितादिप्पभावेन वा तप्पधानोदीपोति जम्बुदीपो. धम्मतासिद्धस्स पञ्चसीलस्स आनुभावेन कं सुखं उरु महन्तमेत्थाति कुरु, कुं पापं रुन्धन्ति एत्थाति वा कुरु, क्वि. दीप दित्तिप्पकासनेसु, जलमज्झे दिप्पन्तीति दीपा, दिप्पन्ति एत्थ सद्धम्माति वा दीपा, पमाणतो महन्ता दीपा महादीपा.

१८४. कुरुआदयो एकवीसति जनपदन्तरा जनपदविसेसा, आदिना सुरमहपच्चुग्गता तलकुटा अस्माकादयो च पुम्बहुत्ते पुल्लिङ्गे बहुत्ते च सियुं. कुरु नाम जानपदिनो राजकुमारा, तेसं निवासो एकोपि जनपदो रूळ्हीसद्देन ‘‘कुरू’’ति बहुवचनेन वुच्चति, एवं सब्बत्र. कुं पापं रुन्धतीति कुरु, खत्तियकुमारा, तेसं निवासो कुरू, पच्चयलोपतो न वुद्धि, सब्बत्रेवं [पाणिनि १.२.५२ ४.२.८१ सुत्तेसु पस्सितब्बं]. अरिविजयलोकमरियादातिक्कमादीसु सक्कोन्तीति सक्का. कोसं लन्ति गण्हन्ति, कुसलं पुच्छन्तीति वा कोसला. मगेन सद्धिं धावन्तीति मगधा, क्वि, मंसेसु गिज्झन्तीति वा मगधा. गिध अभिकङ्खायं. सेवन्ति येनाति सिवि, सि सेवायं, वि. सिवं करोन्तीति वा सिवी, अञ्ञत्थे इ. कल सद्दे, इङ्गपच्चयो, कलिङ्गा ¶ , तेसं निवासो कलिङ्गा, उत्तरापथो [‘‘जगन्नाथा पुब्बभागे कण्हातीरन्तरं सिवे कलिङ्गदेसो संवुत्तो’’ इत्युत्तदेसे (थोमनिधि)], कलिं गण्हन्तीति वा कलिङ्गा, क्वि, कलं मधुरसद्दं गायन्तीतिवा कलिङ्गा, अस्सित्तं, केन सुखेन लिङ्गन्तीति वा कलिङ्गा, लिङ्ग गमनत्थो दण्डको धातु. अत्तना खादितं लञ्जं पराजितेहि याचितेपि पुन न वमन्तीति अवन्ती. पञ्चालस्स पुत्ता पञ्चाला. वज्जेतब्बाति वज्जी, ‘‘वज्जेतब्बा इमे’’त्यादिना पवत्तवचनमुपादाय वज्जीति लद्धनामा राजानो. वज्जीरट्ठस्स वा राजानो वज्जी. रट्ठस्स वा पन तंसमञ्ञा तंनिवासिराजकुमारवसेन वेदितब्बा. गं पथविं धारेन्तीति गन्धारा, कित्तिगन्धेन अरन्तीति वा गन्धारा. चित उस्साहने, चेतन्ति उस्सहन्ति युद्धकम्मादीसूति चेतयो.

१८५. वङ्ग गमनत्थो दण्डको धातु. विसिट्ठानि देहानि येसं विदेहा, पुब्बविदेहदीपतो आगतत्ता वा विदेहा. ओज दित्तियं, कम्बुना सम्बुकेन ओजन्ति तस्सं वोहारकरणतोति कम्बोजा, कम्बुकजो ओजो बलमेतेसन्ति वा कम्बोजा. मद मद्दने, मद्दन्तीति वा मद्दा, मं सिवं ददन्तीति वा मद्दा, पञ्चकामगुणादीहि मोदन्तीति वा मद्दा, मद हासे. भञ्ज अवमद्दने, भग्गा. अङ्ग गमनत्थो दण्डको धातु. सीहं लन्तीति सीहळा. कास दित्तियं, सम्पत्तिया कासन्तीति कस्मीरा, मीरो. कास दित्तियं, इ, कासी. पडि गतियं, पण्डु, उ. अथ वा कुं पापं रुन्धति एत्थाति कुरु, इति एकोपि जनपदो निस्सितानं बहुत्ता बहुवचनेन वुच्चति. एवं सब्बत्थ.

१८६. द्वयं ¶ भुवने. लुज अदस्सने, लुज्जतीति लोको, गस्स को, जस्स वो. भवन्ति एत्थाति भुवनं, यु. जगति, विट्ठपादीनिपि भुवनपरियायानि. द्वयं देससामञ्ञे. दिस अतिसज्जने, अतिसज्जनं पबोधनं, ‘‘अयं इत्थन्नामो’’ति दिसति अपदिसतीति देसो. सि सेवायं, सञ्ञायं अ, विसयो.

सिट्ठाचाररहितो मिलक्खदेसो कामरूपादि पच्चन्तो नाम. मिलक्ख अब्यत्तियं वाचायं, मिलक्खन्ति अब्यत्तवाचं भासन्तीति मिलक्खा. सिट्ठाचारमग्गदस्सनत्थाय पञ्ञाचक्खुनो अभावा रागादिमलं अक्खिम्हि येसन्ति वा मिलक्खा, अस्सित्तं, तेसं निवासट्ठानं मिलक्खदेसो. पच्चन्ते मज्झिमदेसस्स बहिद्धाभागे जातो पच्चन्तो.

ब्यवत्था चतुवण्णानं, यस्मिं देसे न विज्जते;

मिलक्खदेसो सो वुत्तो, मज्झभूमि ततो परं [चिन्तामणिटीका ११.७].

अरियाचारभूमित्ता मज्झो च सो देसो चेति मज्झदेसो, नवयोजनसतपरिक्खेपो मज्झिमदेसो.

१८७. सलिलप्पायो बहूदको देसो अनूपो नाम, अनुगता आपा अत्राति अनूपो, आपस्स आदिनो ¶ उत्तं, परलोपो वा. कच बन्धने, छो, कच्छं. अनूपदेसो च. अभिनवोग्गमनेन तिणेन लक्खिते हरिते देसे सद्दलो, दल दित्तियं, भावे अ. विज्जति दलो यत्थ सद्दलो.

१८८. नदिया आभतेन अम्बुना उदकेन जीवन्ति एत्थाति नद्यम्बुजीवनो देसो नदी माता अस्साति नदीमातिकोति वुच्चति, बहुब्बीहिम्हि को. वुट्ठिया वस्सेन निप्फज्जति सस्समेत्थाति वुट्ठिनिप्फज्जसस्सको देसो देवो माता अस्साति देवमातिकोति वुच्चति, बहुब्बीहिम्हियेव को, देवसद्दो चेत्थ वुट्ठिमाह.

१८९. अनूपादयो देवमातिकान्ता तीसु लिङ्गेसु. चन्दसूरादो चन्दसूरियसिनेरुपब्बतादिम्हि सस्सतिसद्दो ईरितो कथितो. सब्बदा सरन्ति गच्छन्तीति सस्सतियो, सर गतियं, सरसद्दस्स सो,ति.

रठ गतियं, रठन्ति एत्थ नगरादयोति रट्ठं, तो. नागरेहि विजिनितब्बन्ति विजितं. आळियं पवत्तमानो यो सेतु, सो पुरिसे पुल्लिङ्गे वत्तति. सि बन्धने, तु. अल भूसने, इ, आळि, तस्सं आळियं.

नगरपब्बतादिनो ¶ उपान्तभू समीपभूमि परिसरो परितो सरन्त्यत्राति, णो.

तिकं वजे. गावो तिट्ठन्त्यत्राति गोट्ठं. कुल सङ्ख्याने, गावो कुलन्त्येत्थाति गोकुलं, गुन्नं कुलं घरन्ति वा गोकुलं. वज गतियं, वजन्ति यं गावो निवासनत्थायाति वजो. गोट्ठानकं, गोट्ठानन्तिपि वजस्स नामानि.

१९०. सिलोकेन मग्गस्स नामानि. पथिकेहि मज्जते नित्तिणं करीयतेति मग्गो, मज्ज सुद्धियं, णो, जस्स गत्तं, पथिकेहि मग्गीयतेति वा मग्गो, मग्ग अन्वेसने, मं सिवं गच्छति एत्थ, एतेनाति वा मग्गो, ‘‘मो सिवे परिसायञ्चे’’ति हि नानत्थसङ्गहे, सिवं गमनं करोतीत्यत्थो, क्रियाविसेसनमेतं. पथि गतियं, चुरादि, नागमो. पन्थयन्ति यन्त्यनेनाति पन्थो, अ, कारितलोपो. पथति यात्यनेनाति पथो. अद गमने, अदति यत्थ सा अद्धा, धो, अद्धा मग्गो, अद्धासद्दोयं कालेपि, समभागत्थवचने तु अद्धं, तस्मा अद्धसद्दो पुमनपुंसकवसेन द्विलिङ्गो, राजादित्ते अद्धा, अराजादित्ते अद्धं. अञ्ज गतियं, असो. वज गतियं, उमो, जस्स टो. पद गतियं, अ, दस्स जो, द्वित्तं, पज्जो. अय गतियं, यु, पद गतियं, अवो, नदादि. वत्त वत्तने, वत्तनं गमनादि, अनि, नदादि, वत्तनी. कन्तनदण्डे पुन्नपुंसकं. पथिकेहि पादेहि हञ्ञतेति पद्धति. पादसद्दसमानत्थेन पदसद्देन नियतप्पयोगतो वुत्तिना सिद्धो, पदसद्दूपपदो हनधातु,ति, हनस्स धो, अलोपो. पद्धतिसहचरणतो वत्तनी, तंसहचरणतो पदवी च इत्थियं.

१९१-१९२. तब्भेदा ¶ तस्स मग्गस्स विसेसा जङ्घमग्गादयो अपथन्ता. जङ्घाहि गतो मग्गो जङ्घमग्गो. सकटेहि गतो मग्गो सकटमग्गो. ते जङ्घमग्गसकटमग्गा महामग्गे वत्तन्ति.

एत्थ च ‘‘तेथा’’ति अथसद्दो न वत्तब्बो, ‘‘ते चा’’ति पन वत्तब्बो. ‘‘मताद्धनी’’ति पाठे पन सति ‘‘तेथा’’ति वत्तब्बोयेव, तदा एकपदिके अद्धनि मग्गे एकपदी मताति योजना कातब्बा. गच्छतं एको असहायो पादो यस्सं, न निसिन्नस्सेव यमकोति एकपदी, समासन्ते निच्चमीपच्चयो, कपच्चये एकपदिको, ईस्स रस्सत्तं.

चोरकण्टकादिदोसे दुग्गमे पथे कन्तारो, पुन्नपुंसके, केन पानीयेन तरन्ति अतिक्कमन्ति यन्ति कन्तारो, तर तरणे, चोरकन्तारादीसु पनायं रूळ्हिवसेन वुत्तो, अथ वा कति छेदने, सप्पटिभयत्ता कन्तति निच्चगमनागमनमेत्थाति कन्तारो, आरो, नागमो च. दुक्खेन गच्छन्त्येत्थाति दुग्गमो.

१९३. द्वयं पटिमग्गे. पटि अभिमुखेन गन्तब्बो मग्गो, पथो च पटिमग्गो, पटिपथो च. दीघमञ्जसं अतिदूरो मग्गो ¶ अद्धानन्ति वुच्चते. अद्धानं अयनं अद्धानं, अच्चायतो मग्गो, यथा ‘‘पदट्ठान’’न्ति, यलोपो.

द्वयं पसत्थेद्धनि. सोभनो पथो, पन्थो चाति विग्गहो. गन्तब्बपथभावतो अपेतं उप्पथं, अपथञ्च, अब्ययीभावसमासो, असद्दो अत्र निपातो.

१९४-१९६. परमाणूनं छत्तिंस एको अणु नाम, अणुतोपि अणुतरत्ता परमो अणु, अणुतो वा परमोति परमाणु, अण सद्दत्थो दण्डको धातु, उ. ते अणवो छत्तिंस तज्जारी नाम, तं तं अत्तनो निस्सयं मलीनकरणवसेन जरापेतीति तज्जारी, जर जीरणे, जर वयोहानिम्हि वा, अ, नदादि. तापि तज्जारियो छत्तिंस रथरेणु नाम, रथानं सञ्चरणवसेन पवत्तो रेणु रथरेणु. ते रथरेणवो छत्तिंस लिक्खा नाम. लक्ख दस्सने, पकतिचक्खुनापि लक्ख्यतेति लिक्खा, अस्सित्तं.

ता ¶ लिक्खा सत्त ऊका नाम, ऊकाति वुच्चति सिरोवत्तकिमि, तप्पमाणत्ता ऊका. ता सत्त ऊका धञ्ञमासो नाम, धञ्ञो वीहियेव परिमाणितब्बत्ता मासो चाति धञ्ञमासो, मसि परिमाणे. ते सत्त धञ्ञमासा अङ्गुलं नाम, अङ्ग गमनत्थो, उलो, अङ्गुलं, पमाणं, उलिपच्चये अङ्गुलि, करसाखा. अमुद्विच्छेति अदुं द्वादसङ्गुलं विदत्थि नाम, कणिट्ठसहितेनङ्गुट्ठेन वित्थारीयते, विधीयतेति वा विदत्थि, विपुब्बो तनु वित्थारे. धा धारणे, उभयत्रापिति, पुब्बपक्खे तस्स थो, नस्स तो, तस्स दो. पच्छिमे धस्स दो, तस्स थो, असरूपद्विभावो च. ता दुवे विदत्थी रतनं सियुं, रमु कीळायं, तनो, मलोपो. तानि सत्तेव रतनानि यट्ठि नाम, यत पयतने,ति, तस्स ठो, तस्स टो. ता वीसति यट्ठियो उसभं नाम, उस दाहे, अभो. एत्थ पन उसभनदन्तरं उसभं. उसभानं असीतिप्पमाणं गावुतं नाम, गवं, गवेहि वा युतं गावुतं. युज समाधिम्हि, गोनदन्तरेहि गहितप्पमाणसमाधानन्त्यत्थो, तं चतुगावुतं योजनं नाम, युज समाधिम्हि, यु, ‘‘एत्तकं योजनं नाम होतू’’ति चतुगावुतेहि समाधानन्त्यत्थो.

१९७. आरोपितानं आचरियधनूनं पञ्चसतं कोसो नाम, अनारोपितानन्त्यपरे. कुस अव्हाने, णो, कुसनं अव्हानं कोसो, इध पन कोसप्पमाणत्ता कोसो, द्विसहस्सकरप्पमाणो. अञ्ञत्थ पन –

‘‘चतुक्काधिवीसतिया ¶ , अङ्गुलेहि करो भवे;

ख्यातमट्ठसहस्सेहि, कोसमानं विभाविना’’त्युत्तं.

चतुरम्बणन्ति चतुरम्बणवीहिबीजजातरोपनयोग्यो भूमिप्पदेसो करीसं नाम, करोन्ति एत्थ कसनरोपनादिकन्ति करीसं, ईसो. चतुरम्बणबीजजातानि रोपेन्त्येत्थाति चतुरम्बणं, अम्बणं एकादसदोणमत्तं, अञ्ञे पन ‘‘चतुरम्बणं चतुयट्ठिकं ठानं करीसं नामा’’ति वदन्ति, तं करीसब्भन्तरानं परियायभावप्पसङ्गा न गहेतब्बं.

पमाणतो हत्थानमट्ठवीसप्पमाणं ठानं अब्भन्तरं नाम, अब्भन्तरे अन्तोकोट्ठासे जातं, न बहिकोट्ठासेति अब्भन्तरं. यत्थ यत्थ हि यो यो ठितो, निसिन्नो वा, तत्थ तत्थ समन्ता अट्ठवीसतिहत्थप्पमाणं ठानं तस्स तस्स अब्भन्तरं ठानं नाम. भूम्यादित्ता भूमिवग्गो, अथ वा अङ्गापेक्खाय भूमियेव पधानं, पधानेन च ब्यप्पदेसो भवतीति भूमिवग्गब्यप्पदेसो.

भूमिवग्गवण्णना निट्ठिता.

२. पुरवग्गवण्णना

१९८. छक्कं नगरे.

‘‘पट्टनञ्च अधिट्ठानं, नगरं पुटभेदनं;

थियो पू नगरी पूरियो, ठानीयं कब्बटं पुट’’न्ति.

हि सिलोकपरियायेसु वोपालितो.

‘‘विचित्तदेवायतनं ¶ , पासादापणमन्दिरं;

नगरं दस्सये विद्वा, राजमग्गोपसोभित’’न्ति [चिन्तामणिटीका १.२.१]. –

नगरलक्खणं. पु पालने, पुर पालनेति च, पुनाति पुरेति च रक्खति परचक्का दुग्गतायाति पुरं, रो, अ च, पुर अग्गगमनेतिपि धात्वत्थो. नगा पासादादयो अस्स सन्ति नगरं, रो. वाकारेन नगरसद्दस्स पुल्लिङ्गत्तं समुच्चिनोति [नगरियो वा पत्तनं (अमर १.२.१) पक्खे पत्तनसाहचरिया नपुंसकत्तं. (चिन्तामणिटीका १.२.१)], पुरसद्दस्सापीत्याचरिया. अकुतोभयत्ता ठानाय हितं ठानीयं, ईयो. पणिकानं पुटा भिज्जन्ते अत्राति पुटभेदनं.

निच्चनिवासनट्ठानं दस्सेत्वा इतरं दस्सेतुमाह ‘‘थिय’’मिच्चादि. राजा तिट्ठति एत्थाति राजठानी, यु, नदादि, निच्चनिवासनट्ठानेपि ‘‘चतुरासीतिनगरसहस्सानि कुसवतीराजठानीपमुखानी’’त्यादीसु [दी. नि. २.२६३]. दारुक्खन्धादीहि आ समन्ततो वरन्ति परिक्खिपीयन्ति एत्थाति खन्धावारो, पत्थनत्थो वरधातु आपुब्बत्ता परिक्खिपनत्थो होति. पञ्चकं नगरे, ‘‘खन्धावारो’’ति पन एकमेव अचिरनिवासनट्ठानस्स नामं.

१९९. मूलपुरा अञ्ञत्र मूलपुरं वज्जेत्वा यं पुरमत्थि योजनवित्थिण्णपाकारादिपरिक्खित्तं, तं मूलपुरस्स तरुट्ठानियस्स साखासदिसत्ता साखानगरं नाम.

२००-२०१. साद्धपज्जद्वयेन ¶ मूलपुरस्स नामानि. वानरसीसं, तंसण्ठानो वा पासाणो एत्थ अत्थीति ‘‘वानरसीस’’न्ति वत्तब्बे वस्स बत्तं, वण्णविपरिययं, दीघं, णत्तं, सस्स लोपञ्च कत्वा ‘‘बाराणसी’’ति वुत्तं. सवत्थस्स इसिनो निवासनट्ठानत्ता सावत्थि, सब्बं धनमेत्थ अत्थीति वा सावत्थि [म. नि. अट्ठ. १.१४], सब्बस्स सावो, धनवाचको अत्थसद्दो, इ. तिक्खत्तुं विसालीभूतत्ता वेसाली, अस्सत्थुत्थे ई. मथि हिंसायं, इलो, अस्सित्तं, मिथिला. अलं भूसनमेत्थाति आळवी, वी, ळत्तञ्च. कुस अव्हाने, ‘‘खादथ पिवथा’’त्यादीहि दसहि सद्देहि कोसन्ति एत्थाति कोसम्बी, बो, नदादि, कुसम्बरुक्खवन्तताय वा कोसम्बी, कुसम्बस्स इसिनो अस्समतो अविदूरे मापितत्ताति एके [उदा. अट्ठ. ३५; म. नि. टी. १.१४; २.२८४]. उग्गं रिपुं जयति यत्थ, सा उज्जेनी, यु, नदादि. तक्क ऊहे, ऊहो ऊनपूरणं, तक्कनं तक्को, सो सीलं सभावो यत्थ सा तक्कसीला, यो हि पुरिसकारेन ऊनो, सो तत्थ गन्त्वा तमूनं पूरेतीति. चम अदने, पो, चम्पा. सानं धनानं आकरं उप्पत्तिट्ठानं साकरो, सो एव सागलं. संसुमारसण्ठानो गिरि एत्थाति संसुमारगिरं, संसुमारो गायति एतस्स मापितकालेति वा संसुमारगिरं, गे सद्दे, इरो. राजूनमेव आधिपच्चवसेन परिग्गहितब्बत्ता राजगहं. आदिकाले कपिलनामस्स इसिनो निवासनट्ठानत्ता कपिलवत्थु, पुमनपुंसके.

साको राजूनं युद्धादीसु सत्ति सञ्जाता एत्थाति साकेतं, ‘‘साको सत्तिम्हि भूपाले, दुमदीपन्तरेसु चे’’ति नानत्थसङ्गहे. सञ्जातत्थे इतो, साको नाम राजा, दुमो वा एत्थ आदिकाले सञ्जातोति वा साकेतं. इन्दं परमिस्सरियभावं पापुणन्ति एत्थाति इन्दपत्तं, इन्दो वा ¶ सक्को देवराजा, सो पत्तो एत्थाति इन्दपत्तं. उक्कं धारयति एतस्स मापितकालेति उक्कट्ठा, वण्णविकारो. यस्स मापितट्ठाने पाटलीनामको एको तरुणरुक्खो अत्थीति तं पाटलिपुत्तकं, अथ वा पटलि नाम एको गामणी, तस्स पुत्तो एत्थ वसतिआदिकालेति पाटलिपुत्तकं. चेतियरट्ठे उत्तमत्ता चेतुत्तरं, ‘‘जेतुत्तर’’न्ति पाठे पन वण्णविकारो, वेरिजयट्ठानत्ता जेतञ्च तं उत्तमत्ता उत्तरञ्चेति वा जेतुत्तरं. यस्स मापितकाले दीपो दिप्पति, तं सङ्कस्सं, कास दित्तियं, द्वित्तं, सम्मा कसन्ति एत्थाति वा सङ्कस्सं, कस विलेखने, यस्स मापितकाले निमित्तमोलोकेन्ता ब्राह्मणा कुसहत्थं नरं पस्सित्वा मापेन्ति, तं कुसिनारं. आदिना मथुर [मधुर, माधुर (क.)] पासाणपुरसोणिकादयोप्यनेकपुरविसेसा सङ्गहिता.

२०२. चतुक्कं अब्भन्तरगाममग्गे. रथस्स हिता रच्छा, पब्बज्जादि. विसयन्ते पकासयन्ते विक्कयेन दब्बानि यस्सं, सा विसिखा, विपुब्बो सि सेवायं, खो, विसन्ति एत्थाति वा विसिखा, विस पवेसने, खो. रथस्स हिता रथिका, इको. वी गमने, थि, वीथि.

अनिब्बिद्धा रच्छन्तरेन मज्झे अनिब्बिद्धा रच्छा ब्यूहो नाम. ब्यूहेति सम्पिण्डेति जने अञ्ञत्र गन्तुमप्पदानवसेनाति ब्यूहो, ऊह सम्पिण्डने विपुब्बत्ता. न निब्बिज्झते रच्छन्तरेनाति अनिब्बिद्धो, विध सम्पहारे, अ. निब्बिद्धा रच्छन्तरेन रच्छा पथो, अद्धीति च वुच्चति. पथ गमने, पथो. अद गमने,ति, अद्धि.

२०३. चतुक्कं ¶ चच्चरे. चतुन्नं पथानं समाहारो चतुक्कं, चर गतिभक्खनेसु, चरो, रस्स चो, चच्चरं, अङ्गणवाचको चायं. द्विन्नं, चतुन्नं वा मग्गानं सन्धि मग्गसन्धि. सिङ्घ घायने, आटको.

द्वयं वप्पस्सोपरि इट्ठकादिरचिते वेठने. वप्पं नाम दुग्गनगरे परिखामत्तिकं कूटं [कुटिं (क.)] कत्वा गोहि, हत्थीहि च विमद्दापेत्वा तिंसहत्थप्पमाणं पाकारस्स हेट्ठिमतलं, तथा हत्थसतं ततो उद्धरित्वा पंसुना वप्पं कारये, तस्सोपरि पाकारन्ति, पकुब्बन्ति तन्ति पाकारो, समन्ततो करीयतेति वा पाकारो, अकत्तरि च कारके सञ्ञायं णो, रस्सस्स दीघता. वु संवरणे, वुणोतीति वरणो, यु, रागमो च. ‘‘सालो’’तिपि पाकारस्स नामं.

द्वयं राजभवनसामञ्ञे. सब्बगेहानं विसेसेन पकासनतो उद्दापो, दीप पकासने, ईस्साकारो. सङ्गम्म करोन्ति तन्ति उपकारिका, ण्वु. के पच्चये थीकताकारपरे पुब्बो अकारो दीघं [कातन्त २.२.६५], अकादेसोपि हि ‘‘को’’ति वुच्चति, यथा देवदत्तो ‘‘दत्तो’’ति. कपच्चयो वा.

२०४. द्वयं गेहादिनो मत्तिकेट्ठकादिमयभित्तियं. कुट छेदने, कुटति छिन्दति मग्गन्ति कुट्टं. भिदि द्विधाकरणे,ति, ¶ भित्ति. गुन्नं वाचानं पुरं गोपुरं. द्वारसमीपे कतो कोट्ठको द्वारकोट्ठको, कुस अक्कोसे, ठको, कोट्ठकोति गेहविसेसो.

द्वयं इन्दखीले. इस इच्छायं, एस गवेसने वा, इको. इन्दस्स सक्कस्स खीलो कण्टको इन्दखीलो. द्वयं द्वारपस्सोपसालायं’हम्यादिपिट्ठे च वातकुटिकायं. अड्ड अतिक्कमहिंसासु, अ. आलकपच्चये अट्टालको.

२०५. उपरि मालादियुत्तं सोभनथम्भद्वयमुभयतो निखनित्वा यं बहिद्वारं कप्पीयते, तं तोरणं. तुर वारणे, यु, थवन्ता वा रणन्त्यत्राति तोरणं, तु अभित्थवे. रण सद्दत्थो, वण्णविकारो. द्वारस्स बहि बहिद्वारं. परि समन्ततो खञ्ञतेति परिखा. दीघभावेन युत्ता दीघिका.

२०६-२०७. सदुमन्तं गेहे. मन्द मोदनथुतिजळत्तेसु, मन्दन्ते यत्थाति मन्दिरं, इरो. सीदन्ति तत्थाति सदनं, यु. सद ¶ विसरणगत्यावसानेसु. न गच्छन्तीति अगा, थम्भादयो, ते राति गण्हातीति अगारं. रस्सस्स दीघत्ते आगारं. चि चये, निचीयते छादीयतेति निकायो, यम्हि चिस्स कादेसो निपातना. ली सिलेसने, णो, निलयो, आलयो च. वस निवासे, आवसन्त्यत्राति आवासो, णो. भू सत्तायं, भवन्त्यत्राति भवनं. विसन्ति तन्ति वेस्मं, मो. कित निवासे, अधिकरणे यु, निकेतनं. निविसन्ति, निवसन्ति वा यत्र, तं निवेसनं. घर सेचने, घरति किलेसमेत्थाति घरं, गय्हतीति वा घरं, णो. गहस्स घरादेसो. गण्हाति पुरिसेन आनीतं धनन्ति गहं. अधिकरणे थो, आवसथो. सर गतिचिन्ताहिंसासु, सरन्ति चिन्तेन्ति एत्थ सुभासुभकम्मानि, सरति वा सूरियसन्तापादिकन्ति सरणं. सि सेवायं, णो, पतिस्सयो. उच समवाये, ओकं. सल गमने, ‘‘इत्थियमतियवो वा’’ति अ, साला, सरधातुम्हि सति लत्तमेव विसेसो. चि चये, कम्मनि णो, चयो. कुट छेदने, इ. वस निवासे,ति. उपधस्स एत्ते गेहं. सदधातुम्हा उमो, सदुमं.

द्वयं मुखरहितदेवकुलसदिसे यञ्ञायतने. चित पूजायं, कम्मनि इयो. यत यतने, आयतन्ति वायमन्ति एत्थ फलकामाति आयतनं, अथ वा आयन्तीति आयानि, तानि तनोतीति आयतनं, फलकारकन्त्यत्थो. एत्थ तुसद्दो समागतानं द्विन्नं पुब्बापरगमनत्थो. ‘‘चेतियायतनानि चा’’तिपि पाठो.

२०८. द्वयं देवानं, नरपतीनञ्च इट्ठकादिमये भवने. अञ्ञस्सापि सादिस्या. पसीदन्ति नयनमनान्यत्राति पासादो. यु ¶ मिस्सने, पो, दीघो च, दीघविधानसामत्थिया ओत्ताभावो.

द्वयं राजतो अञ्ञेसं धनीनं ब्यवहारकादीनं भवने. मुण्डो छदनमेतस्स, न पासादस्स वियाति मुण्डच्छदो, द्वित्तं. हर हरणे, यो, यम्हि मिआगमो च.

दुग्गपुरद्वारे वा, यत्थ कत्थचि वा मत्तिकादिमये गजकुम्भम्हि यो यूपो पासादो पतिट्ठितो, सो हत्थिनखो नाम, हत्थिस्सेव नखो यस्साति हत्थिनखो, नखसद्देन वा नखसहितो पासादो गय्हते.

२०९. सुपण्णस्स गरुळस्स वङ्केन पक्खेन सदिसछदनं गेहं सुवण्णवङ्कच्छदनं. वङ्क गमने. एकपस्सेयेव छदनतो अड्ढयोगो.

एकेनेव कूटेन युत्तो अनेककोणो पतिस्सयविसेसो माळो नाम, वट्टाकारेन कतसेनासनन्ति केचि. मा माने, ळो, माळो.

चतुरस्सो पतिस्सयविसेसो पासादो नाम, आयतचतुरस्सपासादोति केचि.

२१०. सन्तेहि भाति दिब्बतीति सभायं, सभा च, पुरिमे यपच्चयो, सन्तस्स सादेसो तूभयत्र. मण्डा रविरंसयो, ते पिवति नासयतीति मण्डपो, वासद्देन मण्डपपदस्स ¶ पुल्लिङ्गत्तं समुच्चिनोति, जनानं आलयो सन्निपातट्ठानं जनालयो. आसनत्थाय कता साला आसनसाला. पटिक्कमन्ति एत्थाति पटिक्कमनं, कमु पदविक्खेपे, अधिकरणे यु.

२११. जिनस्स वासभूतं भवनं गन्धकुटि नाम, दिब्बगन्धेहि परिभाविता कुटि गन्धकुटि.

तिकं पाकट्ठाने. रसानि सन्त्यस्सं रसवती, पचनं पाको, तस्स ठानं पाकट्ठानं. महन्तानि बहूनि असितब्बानि सन्तेत्थ महानसं, अस भक्खने, यु, वण्णविपरिययो.

२१२. सुवण्णकारादिसिप्पीनं कम्मसाला आवेसनं. आविसन्त्यस्मिं आवेसनं, यु. पानमन्दिरं सुरापानत्थं कतमन्दिरं सोण्डा नाम, कत्तब्बाकत्तब्बं विचारेत्वा अत्तना इच्छितवत्थुकारणा सब्बं देय्यधम्मं सनोन्तीति सोण्डा, सन दाने, तनादि. डो, अस्सोत्तं, वण्णविकारो च, तेसं एसा वसति सोण्डा. पानसद्दसन्निधाना सुरासोण्डायेविध गहिता. वच्चस्स गूथस्स विसज्जनट्ठानं वच्चट्ठानं. वच्चस्स विसज्जनट्ठाना कुटि वच्चकुटि. मुनीनं इसीनं वसनट्ठानं अस्समो नाम, आ कोधं समेन्ति एत्थाति अस्समो, आ भुसो समेन्ति एत्थ रागादयोति वा अस्समो.

२१३. तिकं ¶ पण्यविक्कयसालायं. पण ब्यवहारे, पणितब्बाति पण्या, वत्थादयो, ते एत्थ विक्किणन्तीति पण्यविक्कयो, की दब्बविनिमये, सो एव साला गेहन्ति पण्यविक्कयसाला. आपणयन्ते ब्यवहरन्ते अस्मिन्ति आपणो, णो. पण्यानं विक्कयाय नीयमानानं वीथि पन्थो पण्यवीथिका. वस अच्छादने, तो, उदकं वसितं अच्छादनं कतमनेनाति उदोसितो, वस्सोत्तं, भण्डट्ठपनस्स साला भण्डसाला. कमु पदविक्खेपे, चङ्कमत्यत्राति चङ्कमनं, चङ्कमो च, द्वित्तादि.

२१४. जलन्ति एत्थाति जन्ता, जल दित्तियं, अन्तो, ‘‘इत्थियमतियवो वा’’ति अ, आ, ललोपो, जनेत्यत्र अग्गिन्ति वा जन्ता, जन जनने, अन्तो, सा एव घरं जन्ताघरं. अग्गिनो साला अग्गिसाला. पा पिवने, पपिवन्त्यस्सन्ति पपा, अ. पानीयट्ठा साला पानीयसाला, सा एव पानीयसालिका.

गस गमने, भो, सस्स बो. अवति रक्खतीति ओवरको, अरो, सकत्थे को, अस्सोत्तञ्च. वसनं वासो, तदत्थं अगारं वासागारं. सयति एत्थाति सयनी, यु, नदादि, सा एव गहं सयनिग्गहं.

२१५. चतुक्कं ¶ राजित्थागारे, तदत्थियतो [तदट्ठियतो (क.)] उपचारेन राजित्थीसुपि. राजित्थीनमगारं इत्थागारं. अवरुन्धीयन्ते राजित्थियो अनेनाति ओरोधो, रुध आवरणे. सुद्धा कामापगमत्ता परिसुद्धा रक्खका अन्ते समीपे यस्साति सुद्धन्तो. अन्ते अब्भन्तरे पुरं गेहं अन्तेपुरं, पुरस्स अन्तेति वा अन्तेपुरं. ‘‘अन्तोपुर’’न्तिपि पाठो.

रञ्ञं राजूनं असब्बविसयट्ठानं सब्बेह्यसाधारणट्ठानं ‘‘कच्छन्तर’’न्ति मतं कथितं, यं ‘‘पमदवन’’न्ति वुच्चति, पमदवनं नाम उपकारिकासन्निहितं वा पुरसन्निहितं वा अन्तेपुरोचितं, यत्र अन्तेपुरसहितो एव राजा विहरति, नाञ्ञजनप्पवेसो [अमर १४.३]. पमदानं वनं पमदवनं. निपातना याकारानं [ईकार आकारानन्ति अत्थो] इत्थिगतानं रस्सो क्वचीतिरस्सो. कच्छस्स पकोट्ठस्स अन्तरं अब्भन्तरं कच्छन्तरं. पकोट्ठं नाम अब्भन्तरद्वारं.

२१६. द्वयं इट्ठकादिरचिते आरोहने. उपानेन सह वत्ततेति सोपानो, सोपानं वा नपुंसकेपि. आरूय्हते येन तं आरोहनं, यु, रुह जनने.

द्वयं कट्ठादिरचितायं. निच्छयेन सयन्ति पाकारादिकमेतायाति निस्सेणी, सि सेवायं, णी, नदादि. उद्धमारोहते एतायाति अधिरोहिणी, सासद्दो द्विन्नम्पि इत्थिलिङ्गत्तं जोतेति.

२१७. पञ्चकं ¶ जालके. वातं पिवतीति वातपानं. गवं अक्खि गवक्खो, समासन्तत्ता अ, सञ्ञासद्दतो पुल्लिङ्गत्तं, अक्खि सद्दे वा, गवं अक्खि गवक्खीति विग्गहो. जल दित्तियं, जालं. सीहरूपयुत्तं पञ्जरं सीहपञ्जरं. आलोकानं आतपानं पविसनट्ठानं सन्धि छिद्दन्ति आलोकसन्धि, आलोकीयन्ति एतेनाति आलोको, सो एव सन्धीति वा आलोकसन्धि.

द्वयं लङ्गियं. लगि गत्यत्थो, अ, नदादि. परि पुनप्पुनं गमनागमनवसेन हन्तीति पलिघो, णो. कपिरूपमत्थकत्ता कपिसीसो. अग्गळं नाम कवाटको [कवाटफलविधारणो (क.)], तस्स थम्भो अग्गळत्थम्भो, ‘‘अग्गळं तीसु कल्लोले, दण्डे चान्तकवाटेसू’’ति रभसो, इत्थियमतो आपच्चयो, अग्गळा. निस्सेसतो अब्बति वस्सोदकमनेनाति निब्बं, अब्ब गतिहिंसासु. छद्दस्स छदनस्स कोटि हेट्ठिमावसानं छद्दकोटि, तस्सं.

२१८. तिकं गेहच्छदने. छादेति एतेनाति छदनं, छद संवरणे, चुरादि. पटगमने, ‘‘पट्यादीह्यल’’न्ति अलो. छादेति एतेनाति छद्दं, द्वित्तादि.

तिकं ¶ गेहङ्गणे. अज गतिम्हि, इरो, अजिरं. चर गतिभक्खनेसु, चरो. अङ्ग गमने, करणाधिकरणेसु यु, वण्णविकारो, णत्तं.

पञ्चकं गेहद्वारतो बहिपकोट्ठके, वीथियं द्वारपिण्डके च. अलिन्दो त्वञ्ञपिण्डकेपिच्छते. पठमं हनन्ति गच्छन्ति एत्थाति पघाणो, पघणो च, हनस्स घणादेसो. अलि सखा इन्दो एत्थाति अलिन्दो, ‘‘गेहेकदेसे अलिन्दो, पघाणो पघणोभवे’’ति [चिन्तामणिटीका १२.१२] अमरमालायं. आलिन्दो, दीघादि. पधानं मुखं पमुखं, गेहस्स हि चतूसु मुखेसु तदेव पधानं, यत्थ साधुजनापि आगन्तुकापि निसीदन्ति. द्वारं बन्धति पिदहति एत्थाति द्वारबन्धनं.

२१९. द्वयं द्वारबाहायं. पीठानि लोहविकतिआदीहि सङ्घटीयन्ति एत्थाति पीठसङ्घाटकं, पीठेहि सङ्घटीयतीति वा पीठसङ्घाटकं, घट घटने. द्विभागेन बाहासदिसत्ता बाहा, द्वारस्स बाहा द्वारबाहा. ‘‘कपाटं, कवाट’’न्तिपि द्वारबाहाय नामानि, कं वातं पाटयति, वाटयति चेति कम्मनि णो, इत्थियं कपाटी.

द्वयं गेहादीनं कूटे. कुट छेदने, कम्मनि णो. नय गमनत्थो, के सीसे नयतीति कण्णीका, ण्वु, इत्तं, णत्तञ्च.

२२०. द्वयं ¶ द्वारे. द्वे अरन्त्यत्राति द्वारं, दुज्जने वारयन्त्यस्मा रक्खकाति वा द्वारं, उलोपो. पटिहरन्ति अपनेन्ति एतस्मा रक्खका अञ्ञातन्ति पटिहरो, पटिपक्खे हरति एतस्माति वा पटिहरो, रस्सस्स दीघत्ते पटिहारो.

चतुक्कं उम्मारे, यं ‘‘द्वारपिण्डिका’’ति वुच्चति. उर गतिम्हि, मारो करणे. देहं नेति पवेसेनाति देहनी, ‘‘देहली’’तिपि पाठो, देहं लाति पवेसेनाति देहली. इल गतिम्हि, ण्वु. इन्दो एव पादं खिपति एत्थाति इन्दखीलो, खिप पेरणे. पस्स लोपो, अथ वा इं गमनं ददातीति इन्दो, द्वारं, तत्थ ठपितो खीलो कण्टकोति इन्दखीलो, वेगगभिघातनतो हि सो खीलो विय होति.

थम्भ पटिबन्धने, थम्भो, धारेतीति वा थम्भो, धर धरणे, रम्भपच्चयो, वण्णविकारो च. थु अभित्थवे, उणो, यु वा, धारेतीति वा थूणो, यु, रलोपो, अस्सू.

अड्ढेन्दुपासाणे अद्धचन्दाकारे पासाणे पटिकासद्दो वत्तति. पट गतियं, ण्वु. इत्थिकताकारपरे के अस्सित्तं. गजि सद्दे, ण्वु, अस्सित्तं, बिन्दागमो च. इस इच्छायं, ठको.

२२१. वलभीति ¶ चूळा, ‘‘सिखायं वलभी चूळे’’ति रुद्दो [रस्सन्ता च, सिखायं वळभियं चूळेति रुद्दो (चिन्तामणिटीका १२.१५)]. तच्छादने दारुम्हि कट्ठे गोपानसी मता. वङ्केति दारुविसेसनं. गं वस्सोदकं, सूरियादिकिरणञ्च पिवन्ति विनासयन्ति अब्भन्तरमप्पवेसनवसेनाति गोपाना, इट्ठकादयो, तानि सिनोन्ति बन्धन्ति एत्थाति गोपानसी.

सोधादिगेहेसु छेकपक्खावासत्थं यो बहि करिय कट्ठेकदेसो ठपीयते, सो विटङ्को. कपोते पालयतीति कपोतपालिका, कम्मनि ण्वु. टकि निवासगतीसु. विनो पक्खिनो टङ्कन्ति एत्थाति विटङ्को. णो.

२२२. द्वयं कुञ्चिकाछिद्दे. कुञ्चिकाय विवरं छिद्दं कुञ्चिकाविवरं. ताळस्स पवेसनट्ठानभूतो छिग्गळो छिद्दं ताळच्छिग्गळो.

तिकं कुञ्चिकायं. कुञ्च कोटिल्ये, ण्वु. तायति रक्खतीति तालो. अलो, तलति तिट्ठति एतेनाति वा तालो, तल पतिट्ठायं. अवापुरति विवरति येनाति अवापुरणं, वर संवरणे, यु, वस्स पो, उत्तं, उपसग्गस्स दीघता च, ‘‘अपारुता तेसं अमतस्स ¶ द्वारा’’ति [दी. नि. २.७१; म. नि. १.२८३] वचनतो पुर, पार संवरणेतिपि धात्वत्थं पठन्ति. अवपुब्बो वु संवरणेतिपि धात्वत्थे पन सति वस्स रत्तं, उपसग्गस्स दीघता च, ‘‘अपारुता, सङ्घाटिं पारुपित्वा’’त्यादीसु पन पकारवण्णागमेन सिद्धो. विद लाभे, इम्हि वेदिका, सकत्थे को. इतरत्थ इयेव.

२२३. सङ्घाटादयो मन्दिरङ्गा गेहङ्गविसेसा. सम्मा घटेन्ति एत्थ गोपानस्यादयोति सङ्घाटो, पुब्बपच्छिमदक्खिणुत्तरायामवसेन थम्भानमुपरि ठितो कट्ठविसेसो, ते पन पुब्बपच्छिमयामा तयो कट्ठा, दक्खिणुत्तरयामा पन हेट्ठिमपरिच्छेदतो तयो कट्ठा, उक्कट्ठपरिच्छेदेन पन पञ्चसत्तनवादयोपि. द्विन्नं पक्खानं अपतनत्थं बन्धनतो पासो वियाति पक्खपासो. तुलति सङ्घाटेसु पतिट्ठतीति तुला, तल पतिट्ठायं, अस्सुत्तं, पक्खानं वा समवाहितभावकरणतो तुलयति मिनाति एतायाति तुला, तुल उम्माने.

तिकं सम्मज्जनियं. मुजि सोधने, यु. मज्ज संसुद्धियं, यु. सुध सुद्धियं, सब्बत्र करणे यु.

२२४. तिकं सङ्कारछड्डनप्पदेसे. कट छड्डनमद्दनेसु, सङ्कटन्ति एत्थाति सङ्कटीरं, ईरो, ‘‘सङ्कटो’’ति वा सङ्कारो वुच्चति, तं ईरयन्ति खिपन्ति एत्थाति सङ्कटीरं, ईर खेपे. सङ्कारस्स ठानं सङ्कारट्ठानं. सङ्कारं कटति ¶ छड्डेति एत्थाति सङ्कारकूटं, अस्सू, सकत्थे को.

चतुक्कं सम्मज्जनिया निराकते [निरस्सते (क.)] थुसादिम्हि. नानाविधे सङ्कारे रासीकरणवसेन कचति बन्धति एतेनाति कचो, सो एत्थ इच्छितब्बोति कचवरो, वर इच्छायं. उच्छिट्ठो कलापो समूहो उक्लापो, कस्साकारलोपो. नानाविधेहि तिणादीहि सङ्करीयते मिस्सीकरीयतेति सङ्कारो, णो. अवकरोतिप्यत्र. अवकरीयते निरस्सतेति, अ. ‘‘सम्मज्जो मज्जनी चेव, सङ्कारो’वकरो मतो’’ति हलायुधो. कस विलेखने, अम्बु.

२२५. घरादिभूमि घरखेत्तविहारादीनं यो भूमिप्पदेसो वत्थु नाम, तं नपुंसके, वसन्ति एत्थाति वत्थु, रत्थु. गस मदने, गसन्ति एत्थाति गामो, मो. संवसन्त्यत्राति संवसथो, अथो.

पाकटो ख्यातो गामो, सो निगमो नाम, अतिरेको गामो निगमो, भुसत्थो नि, सञ्ञासद्दत्ता रस्सो.

उपभुञ्जितब्बभोगमनुस्सादीहि ( ) [(इभ्यो) (?)] वड्ढितो अधिको गामो निगमतोपि अधिकतरत्ता ‘‘अधिभू’’ति ईरितो कथितो, अधिको भवतीति अधिभू.

२२६. द्वयं ¶ गामादिपरियन्तभागे. सि बन्धने, मो. परिच्छिन्दित्वा आदीयतेति मरियादा, पस्स मो.

द्वयं आभीरकुटियं [घोसो आभीरपल्ली सिया (अमर १२.२०)]. घु सद्दे, घोसन्त्यत्राति घोसो. गोपालानं गामो गोपालगामको, सकत्थे को.

पुरवग्गवण्णना निट्ठिता.

३. नरवग्गवण्णना

२२७-२२८. पोरिसन्तानि मनुस्सजातिया नामानि. मनो उस्सन्नमस्साति मनुस्सो, सतिसूरभावब्रह्मचरिययोग्यतादिगुणवसेन उपचितमानसा उक्कट्ठगुणचित्ता, के पन ते? जम्बुदीपवासिनो सत्तविसेसा. तेनाह भगवा – ¶ ‘‘तीहि, भिक्खवे, ठानेहि जम्बुदीपका मनुस्सा उत्तरकुरुके मनुस्से अधिग्गण्हन्ति देवे च तावतिंसे. कतमेहि तीहि, सूरा सतिमन्तो इध ब्रह्मचरियवासो’’ति [अ. नि. ९.२१]. तथा हि बुद्धा भगवन्तो पच्चेकबुद्धा अग्गसावकमहासावकचक्कवत्तिनो च अञ्ञे च महानुभावा सत्ता तत्थेव उप्पज्जन्ति. समानरूपादिताय पन सद्धिं परित्तदीपवासीहि इतरमहादीपवासिनोपि मनुस्सात्वेव पञ्ञायिंसूति एके, अपरे पन भणन्ति ‘‘लोभादीहि, अलोभादीहि च सहितस्स मनस्स उस्सदताय मनुस्सा, ये हि सत्ता मनुस्सजातिका, तेसु विसेसतो लोभादयो, अलोभादयो च उस्सदा, ते लोभादीहि उस्सदताय अपायमग्गं, अलोभादीहि उस्सदताय सुगतिमग्गं, निब्बानगामिमग्गञ्च पूरेन्ति, तस्मा लोभादीहि, अलोभादीहि च सहितस्स मनस्स उस्सदताय परित्तदीपवासीहि सद्धिं चतुमहादीपवासिनो सत्तविसेसा मनुस्साति वुच्चन्ती’’ति. लोकिया पन मनुनो अपच्चभावेन मनुस्साति वदन्ति, मनु नाम पठमकप्पिको लोकमरियादाय आदिभूतो हिताहितविधायको सत्तानं पितुट्ठानियो, यो सासने ‘‘महासम्मतो’’ति वुच्चति, पच्चक्खतो, परम्परताय च तस्स ओवादानुसासनियं ठिता तस्स पुत्तसदिसताय मनुस्साति वुच्चन्ति, ततो एव हि ते ‘‘मानवा, मनुजा’’ति च वोहरीयन्ति, उस्सपच्चयो. मनुनो अपच्चं मानुसो, उसो. मर पाणचागे, चो, मच्चो, पब्बज्जादिना वा त्यपच्चयो, धात्वन्तस्स लोपो च. ततो ‘‘यवत’’मिच्चादिना चो, द्वित्तं. मनुनो अपच्चं मानवो. माणवोप्यत्र, णवो. मनुम्हा जातो मनुजो. नी नये, नेतीति नरो, अरो. पुस पोसने, णो, पुरेतीति वा पोसो. पुर पूरणे, सो, उस्सोत्तं, रलोपो. पुनातीति पुमा, पु ¶ पवने, मो, सिस्सा. पुरेतीति पुरिसो, पोरिसो च, इसो, रस्सस्स दीघताय पूरिसो च. एत्थ च मनुस्सादिपञ्चकं इत्थियम्पि वत्तते, नरादयो तु पुमेयेव विसिट्ठलिङ्गत्ता. तत्र मनुस्स मानुस मनुज माणवेहि नदादित्ता ईपच्चयो, एकसकारलोपो, मनुसी, मानुसी, मनुजी, माणवी. मच्चा, इत्थियमतो आपच्चयो.

विद्दसुपरियन्तं पण्डिते. पण्डा बुद्धि सञ्जाता अस्साति पण्डितो, तरत्यादि. पडि गतियं वा, तो. बुज्झतीति बुधो. विदति जानातीति विद्वा, विद ञाणे, वो, सिस्सा. भू सत्तायं, अत्थे विभावेति पकासेति सीलेनाति विभावी, णी. रागादयो समेतीति सन्तो, तो, सुन्दरो अन्तो अवसानमेतस्साति वा सन्तो. सुन्दरा पञ्ञा यस्स सप्पञ्ञो. किन्नाम न विन्दतीति कोविदो, नेरुत्तो, कुं पापं विन्दतीति वा कोविदो. धी पञ्ञा यस्सत्थीति सो धीमा, सोभनं झायतीति सुधी, झे चिन्तायं. झस्स धो, ई, सुन्दरा धी यस्साति वा सुधी. कवि वण्णे, इ, इत्थियं कवी च, कु सद्दे वा, इ, कवि. ब्यञ्जयतीति ब्यत्तो, अञ्ज गतियं, तो. भुजादीनमन्तो नो द्वि च. विसिट्ठो अत्ता यस्साति वा ब्यत्तो. चक्ख दस्सने, यु, विचक्खणो, विचारेतीति वा विचक्खणो, नेरुत्तो. विगतो सारदो एतस्माति विसारदो.

२२९. मेधा धारणा मति पञ्ञा यस्साति मेधावी, वी. अतिसयमतियुत्तताय मतिमा. पञ्ञाय योगतो पञ्ञो. विसेसं जानाति सीलेनाति विञ्ञू, रू. विद ञाणे, उरो, विदुरो [विदूरो (क.)]. रूपच्चये विदू. धीयोगा धीरो, रो. विसिट्ठदस्सनसीलताय ¶ विपस्सी, णी. दोसं जानातीति दोसञ्ञू, रू. बुज्झतीति बुद्धो, तो. दु गतियं, अ, उस्सावो [दु गतियं अब्बो (सूचि)], दब्बो. विद ञाणे, दसु.

२३०-२३१. महिलान्तं इत्थिसामञ्ञे. इसु इच्छायं, तो, नदादि. सीमस्स अन्तो सीमन्तो, केसवेसो, तंयोगा सीमन्तिनी, इनी. नरस्सायं नारी, इदमत्थे णो. तिट्ठति गब्भो यस्सं, सा थी. धा धारणे वा, वण्णविकारो, ई. बन्ध बन्धने, ऊ, बन्धस्स वधादेसो च [ण्वादि ३], वधूसद्दो सुणिसाभरियानम्पि वाचको. वन सम्भत्तियं, तो, इकारागमो च. अङ्ग गमनत्थो, यु, अङ्गना, विसिट्ठनारियम्पि अङ्गना, तदा कल्याणङ्गनारीलक्खणोपेतं पसत्थं हत्थपादादिकमङ्गमस्सत्थीति अस्सत्थ्यत्थे अङ्गा कल्याणे नपच्चयो [मोग्गल्लान ४.९२]. विरूपेसुपि मदो रागमदो यस्सा सा पमदा, विसिट्ठनारियंप्यत्र पमदा, तदा पकट्ठो मदो रूपसोभग्गजनितो चेतोविकारो यस्सा सा पमदा. रूपलावण्यसम्पन्नताय सुन्दरी, विसिट्ठायम्पि. कमनीयवुत्तिताय कन्ता, कमु कन्तियं, तो. कन्तियोगा वा कन्ता, विसिट्ठायम्पि. रमयति विनोदयति नायकं, सा रमणी, नन्दादीहि यु, नदादि, विसिट्ठायम्पि. दय रक्खणे, कम्मनि तो. अप्पं बलं यस्सा सा अबला, अप्पत्थोयं अकारो. मातुया गामो विय गामो यस्सा ¶ सा मातुगामो, माता विय गच्छतीति वा मातुगामो, गमु गमने, णो, माता विय गसतीति वा मातुगामो, गस अदने, मो, माता विय गायतीति वा मातुगामो, गा सद्दे, मो. मही विय सुचिं असुचिम्पि लातीति महिला, महन्तेसु बहूसुपि रत्तचित्तेसु इलति गच्छतीति वा महिला, इल गमने, मह पूजायं वा, इरो, लत्तं, आ, महिला. महेलाप्यत्र.

तिकं विसिट्ठनारियमेव. लल विलासे, नन्दादीहि यु. लल इच्छायन्ति चुरादिगणतो वा यु. भयपकति भीरु, भी भये, रु, ‘‘भीरु अत्ते जने’त्थिय’’न्ति रभसो. अतिसयितकामा कामिनी, कामो सिङ्गाररूपो मदो यस्सात्थीति इनी, सब्बत्रेवं. वामलोचना, भाविनी, नितम्बिनी, रामाइच्चादीनिपि विसिट्ठनारीनामानि.

द्वयं पठमवयसि वत्तमानायं.

अट्ठवस्सा भवे गोरी, दसवस्सा तु कञ्ञका;

सम्पत्ते द्वादसे वस्से, कुमारीत्य’भिधीयते [चिन्तामणिटीका १६.८].

इह त्वभेदोपचारेनेकत्तं. अञ्ञे पनाहु ‘‘कञ्ञासद्दोयं पुमुनाभिसम्बन्धपुब्बके सम्पयोगे निवत्तेती’’ति. कुमार कीळायं, चुरादि, कुमारयतीति कुमारी, अ, नदादि, सकत्थे को, ण्वुना वा सिद्धो. कमनीयतेति कञ्ञा, कन दित्तिकन्तिगतीसु, यो, न्यस्स ञत्तं, अ, आ.

युवसद्दतो ¶ पाटिपदिकतोति, युवति. वरित्थिपरियायसामञ्ञेपि युवतिसद्दो पकत्यन्तरमत्थीति. तर तरणे, यु, उत्तं, ई च.

२३२. साभिसेका लद्धाभिसेका राजित्थी महेसी नाम, मह पूजायं, कम्मनि इसो, इस्से, ततो ई, महतियो राजित्थियो ईसति अभिभवतीति वा महेसी, ईस इस्सरिये, ई. महेसितो अञ्ञा राजनारियो भोगिनियो भोगयोगा, ई, इनी च. यानारी पुरिसस्स सङ्केतं याति, सा ‘‘धवत्थिनी, अभिसारिका’’ति चोच्चते. धवं पतिं अत्थयति इच्छतीति धवत्थिनी, अत्थ याचनिच्छासु, इनी, असतीविसेसो. सर गतियं, अभिसरति सङ्केतन्ति, ण्वु.

२३३. छक्कं वेसियं. चतुसट्ठिकलाकुसलताय, सीलरूपादिमत्ताय च गण्यते आदीयते गणिका, गण सङ्ख्याने, ण्वु. वेसो आकप्पो, तेनातिसोभते, कम्मवेसेहि वा इच्छीयतेति. अतिसोभने, इच्छत्थे वा यपच्चयो. वण्णसम्पन्ना दासी वण्णदासी, दासिम्पि हि वण्णसम्पन्नं केचि सामिका धनलोभेन गणिकं करोन्ति. नगरं सोभेतीति नगरसोभिनी. रूपेन उपजीवतीति रूपूपजीविनी. अतिसयवेसयुत्तताय वेसी.

द्वयं असतीसामञ्ञे. कुलानि अटति नासयतीति कुलटा. बन्धमनुबन्धं कायतीति बन्धकी, नदादि.

२३४. चतुक्कं उत्तमनारियं. वरो आरोहो सोणि यस्सा सा वरारोहा. उत्तमगुणयोगा उत्तमा. सोणिगारवेन ¶ मत्तगजो विय बन्धनगामिनी मत्तकासिनी, कस गतियं. वरवण्णयोगा वरवण्णिनी, इनी.

‘‘सीते सुखोण्हसब्बङ्गी, गिम्हे या सुखसीतला;

भत्तु भत्ता च या नारी, सा भवे वरवण्णिनी’’ति. रुद्दो;

द्वयं अखण्डितचरित्रायं. पति सामिकोव कमनीयो यस्सा पतिब्बता, पतिम्हि वतमस्साति वा पतिब्बता. अस भुवि, अन्तो, ई, आदिलोपो. समेतीति वा सती, समु उपसमे, अन्तो, ई.

द्वयं कामरत्तराजपुत्तादिनो कुलस्स नियतपतियं. कुलानुरूपा इत्थी कुलित्थी, कुलं पालेति रक्खतीति कुलपालिका, ण्वु.

२३५. द्वयं मतभत्तिकायं. विगतो धवो भत्ता यस्सा विधवा. पति सुञ्ञो नट्ठो यस्साति पतिसुञ्ञा.

द्वयं अत्तिच्छाय पत्यन्वेसिनियं कञ्ञायं. पतिं वरति गवेसतीति पतिम्बरा, दुतियायालोपो. सयमेव पतिं वरतीति सयम्बरा, पठमायालोपो, वर पत्थनायं.

चतुक्कं विजातायं. विजनी गब्भविमोक्खने, तो, विजायित्थाति विजाता. सू अभिसवे, तो. जातं अपच्चं पुत्तो एतिस्साति जातापच्चा. पसूताव पसूतिका, कपच्चयो, इत्तञ्च.

२३६. द्वयं ¶ दूतियं. या पेसीयते, सा दूती, दु गमने,ति, ईम्हि दूती. सञ्चारयति यथाभिमतन्ति, ण्वु.

तिकं दासियं. दु कुच्छितं असति भक्खतीति दासी, ई, दीयन्ते तायाति वा दासी, दा दाने, सो, ई च. चिट पेसने, कम्मनि णो, ई. कुटं उदककुम्भं धारेतीति कुटधारिका, ण्वु.

द्वयं सुभासुभनिरूपिनियं संवरिकादिम्हि. वर गतियं, कत्तरि इनी. सुभासुभस्स इक्खणं निरूपनं यस्सात्थीति, इ, सकत्थे को. इमे द्वे सद्दा तुल्यत्था.

या सयं खत्तियजाति यस्स कस्सचि भरिया, सा खत्तियानी, खत्तिया च. खत्तियस्सापच्चं खत्तियानी, आनो, ई. णम्हि खत्तिया.

२३७. पज्जं अग्गिसक्खिपुब्बकतपाणिगहितायं भरियायं, अञ्ञत्र तूपचारा. दारयन्ते येनाति दारो, दर विदारणे, अकत्तरि च कारके सञ्ञायं णो. जायति पुत्तो यायाति जाया, जन जनने, यो, जनिस्स जा च, आ, जयतीति वा जाया, जि जये, यो, जिस्स जा, आ, जाया. कल सङ्ख्याने, अत्तो. घरं नेतीति घरणी, णत्तं. भरितब्बतो भरिया, भर भरणे, यो. पियायितब्बतो पिया,पी तप्पनकन्तीसु, यो. पजं पुत्तं पालेतीति पजापति, पा पालने,ति, आत्तं, रस्सत्तञ्च ¶ . द्विन्नं पूरणी दुतिया. पठमो भत्ता, भरिया दुतिया. सामिकस्स पादे परिचरतीति पादपरिचारिका, ण्वु. पतिनी, पाणिगहिता, सहधम्मिनीतिपि तस्सायेव नामानि.

२३८. तिकं सखियं. तेसु तेसु किच्चेसु सह खायति पकासतीति सखी, सहपुब्बो खा पकासनकथनेसु, ई. अल भूसने आपुब्बो, इ. वयसा तुल्या वयसा, तुल्ये सञ्ञायं सो [पाणिनि ४.४.९१ सुत्ते यपच्चयो दिस्सति].

जरोवुच्चति चोरस्सामिको, तस्सायं जारी, णो, ई. सामिकं अतिक्कम्म अञ्ञत्र चरतीति, इनी.

२३९. पुमे तूति लिङ्गन्तो तुसद्दो न पुब्बं भजते. अर गमने, तु, अरस्सुत्तं. रतिया जायतीति रजो, तिलोपो. पुप्फ विकसने, पुप्फं.

तिकं रजस्सलायं. उतुयोगाउतुनी, इनी. रजयोगा रजस्सला, सलो. पुप्फवन्तताय पुप्फवती. थीधम्मिनी, अवी, अत्तेयी, मलिनी, उतुमती, उदकीइच्चादीनिपि तस्सा नामानि.

तिकं गब्भिनियं. गरु अलहुको गब्भो कुच्छि एतिस्साति गरुगब्भा. आपन्नो पत्तो गब्भट्ठो सत्तो एतायाति आपन्नसत्ता. गब्भयोगा गब्भिनी.

तिकं ¶ येन वेठितो गब्भो कुच्छियं तिट्ठति, तत्रासयेति ख्याते. गब्भो आसयते तिट्ठत्यत्राति, णो. जरं एतीति जलाबु. उ, रस्स लो, यस्स बो, जरापुब्बो इ गतियं. कलं जरतं लातीति कललो, कल सङ्ख्याने वा, अलो.

२४०-२४१. सत्तकं भत्तरि. धू कम्पने, सन्तासं धुनोतीति धवो, अ. सं एतस्सत्थीति सामिको, आमिपच्चयो, सकत्थे को, इपच्चयो वा, निग्गहीतस्स मो, अस्स च दीघो, सामिको. भर भरणे, भरतीति भत्ता, रितु. कमु इच्छायं, तो, ‘‘पक्कमादीहि न्तो चा’’ति न्तत्तं. पा रक्खणे, अति, पति. वर इच्छायं, अ, वरो. पी तप्पनकन्तीसु, यो.

रतिकारणत्ता पतिनो उप उपपति, समासे कते अभिधानतो पुब्बनिपातो, अप्पधानभूतो वा पति उपपति. जर वयोहानिम्हि, जीयन्ते अनेनाति जारो, दारो च.

सत्तकं पुत्ते. नरके न पतन्त्यनेन जातेनाति अपच्चं, पत गतियं, यो, त्यस्स चो, न पतति न विच्छिन्दति वंसो ¶ एतेनाति वा अपच्चं, पुत्ते, धीतरि च निच्चनपुंसकोयं. पू पवने. पुनाति पितरो तेनाति पुत्तो. ‘‘छदादीहि तत्रण’’ति तो. पूरेतीति वा पुत्तो. अत्ततो जातो अत्रजो, ‘‘अत्तजो’’तिपि पाठो. सुयतेति सुतो. सु अभिसवे, सुणातीति वा सुतो, तो, सु सवने. तनुम्हा जातो तनुजो, तनयो च, यो, तनोति मुदन्ति वा तनयो, अयो. सूयतेति सूनु, कम्मनि नु, सू पसवे.

पुत्तादयो सूनुपरियन्ता धीतरि वत्तमाना इत्थियं वत्तन्ति. दुहिता, धीता च सदा नारियमेव. दुह पपूरणे, रातु, ओत्ताभावो, इकारागमो च. धा धारणे, रातु, आस्सी. पुत्तादयो च ते सामञ्ञेनेव कुण्डगोलकादीनं वाचका. सवण्णायं तु ऊढायं सजातो सयं जनितो सुतो ओरसो नाम. सजातसद्देन कुण्डकगोलकखत्तादिब्यवच्छेदो. जीवति भत्तरि जारजो सुतो कुण्डाख्यो. मते भत्तरि जारजो गोलकाख्यो. अरियासुद्दजो सुतो खत्ता नाम [खत्ता अरियासुद्दानं (अमर २०.३)]. आदिना मागधादीनं गहणं. वुत्तञ्हि –

‘‘अमते जारजो कुण्डो,

मते भत्तरि गोलको’’ति [अमर १६.३६].

‘‘मागधो सुद्दखत्ताजो’’ति [अभिधानु ५०३ गाथा] च.

उरसा मनसा निम्मितो, उरसद्दा ततियन्ता निम्मितत्थे णो, निविट्ठत्ता तेन निम्मितोति वुच्चति. उरसि भवोति वा ओरसो.

२४२. चतुक्कंपतिपतिनीनं ¶ युगे, ‘‘दारा पुमे बहुत्ते च, दं कलत्रे नपुंसके’’ति [चिन्तामणिटीका १६.३८] अमरमाला, जंसद्दो त्वब्ययो दारवचनो. तस्मा ‘‘जम्पति, दम्पती’’तिपि भवितब्बं, इध पन कच्चायनमतेनोदाहटा. जाया च पति च जायापति. इतरीतरयोगद्वन्दो. जाया च पति च जानिपति, तथा जायम्पतिआदयो, जायासद्दस्स पतिम्हि परे जानि, तुदञ्च, जायञ्च यदादिना.

तिकं नपुंसके. विगतो रागस्सवो यस्मा वस्सवरो. सु सवने, अरो. पण ब्यवहारे, डो, पडि लिङ्गवेकल्ये वा, भूवादि. न इत्थी न पुमा नपुंसकं, निरुत्तिनयेन इत्थिपुमानं पुंसकभावो, नस्स च पकति. ततियापकति, सण्डो, कलीबन्तिपि तस्स नामानि. ततिया पकति ततियप्पकारो, समजातिके इत्थिपुरिसे अपेक्खित्वा ततियत्तं पकारस्स. पठमा हि पकति इत्थी, दुतिया पकति पुरिसो, इतरपकति ततिया पकति.

२४३. छक्कं ञातिमत्ते, बन्धुयेव बन्धवो, अ, उस्सावो. बन्धतीति बन्धु, उ. सस्स अत्तनो जनो सजनो. समानं गोत्तं कुलं अस्साति सगोत्तो, समानस्स सभावो. ञा अवबोधने, कम्मेति, ञातियेव ञातको, अत्तं, सकत्थे को च. सुसद्दोप्यत्र [स्व (अमर १६.३६)].

द्वयं ¶ सत्तपुरिसावधिकेसु निकटञातीसु. लोहितेन सम्बन्धो सालोहितो, सम्बन्धस्स सादेसो, पुब्बनिपातो च, समानं पिण्डदानं यस्स सपिण्डो, सनाभयोप्यत्र [नाभि सत्तपुरिसावधिककुले (चिन्तामणिटीका १६.३३)]. तिकं पितरि. ता पालने, तो कत्तरि. जनयतीति जनको, ण्वु. पा रक्खणे, रितु, अस्सित्तं.

२४४. छक्कं मातरि. अम पूजायं, कम्मनि मो, बो च, अम्मा, अम्बा. जनयतीति जननी, यु, नदादि. मान पूजायं, पुत्तं मानेतीति माता, रातु, पातीति वा माता, पातिस्स मो. जनेतीति जनेत्ति,ति. जनेतीति जनिका, ण्वु, इत्तं.

अप्पधानभूता माता उपमाता, कुमारे धारेतीति धाति. धा धारणे,ति. जायाय भरियाय भातिको कनिट्ठो च जेट्ठो च सालो नाम, सस्स अत्तनो एसा सा, भरिया, तस्सा भाता सालो, जायाय भातरि अलो. सर गतिचिन्ताहिंसासु वा, णो, लत्तं, साल वितक्के वा, चुरादि.

२४५. सामिनो भत्तु भगिनी ननन्दा नाम, न नन्दतीति ननन्दा, अत्ताभावो नस्स विभासाधिकारा. नन्द समिद्धियं, भूवादि.

द्वयं ¶ अय्यिकायं. मातुया माता मातामही. पितूनं पितरि च मातरि च आमहं यदादिना, नदादि. अरह पूजायं, ण्वु, रहस्स यो, अय गतिम्हि वा, ण्वु, अय्यिका.

मातुया भाता मातुलो नाम, मातुया भाता मातुलो, मातु भातरि उलपच्चयो. अस्स मातुलस्स पजापति जाया मातुलानी नाम, मातुलस्स भरिया मातुलानी, मातुलभरियायं आनो, नदादि, अथ वा मातुलस्स एसा मातुलानी, ई, अस्स आनो.

२४६. जायापतीनं द्विन्नं जननी माता सस्सु वुत्ता, सस गतिहिंसापानेसु. तप्पिता तेसं जायापतीनं पिता पन ससुरो नाम, ससधातुम्हा उरो. भगिनिया पुत्तो पन भागिनेय्यो नाम, भगिनिया अपच्चं भागिनेय्यो, णेय्यो.

२४७. द्वयं सुतस्स, सुताय च पुत्तेसु. नह बन्धने, रितु, नी नये वा. पुत्तस्स पुत्तो पपुत्तो, त्तलोपो, उस्सत्तञ्च. सामिभाता देवरो नाम, अथ वा सामिभाता कनिट्ठो सामिनो भाता देवरो नाम. जेट्ठो तु ससुरो एवोच्चते. दिवु कीळायं, अरो.

द्वयं ¶ धीतुपतिम्हि. जन जनने, रितु, अस्सात्तं, नस्स मादेसो च. द्वयं पितुपितरि. पितुनो पिता पितामहो.

२४८. हुसान्तानि पदेन पदेन नामानि. मातुया भगिनी मातुच्छा, च्छो. पितुनो भगिनी पितुच्छा, पितुभगिनी पितुच्छा भवेत्यत्थो.

पितामहसद्दो न केवलं जनकपितरमेव वदति, अथ खो जनकपितुपितादयोपीति एत्थापि ‘‘पपितामहो’’ इच्चुदाहटो. पितुनो अय्यको पय्यको, तुलोपो. सु सवने, ण्हा. णिसम्हि सुणिसा. सम्हि हुसा, हत्तं. सब्बत्र ‘‘इत्थियमतो आपच्चयो’’ति आ.

२४९. चतुक्कं एकोदरे भातरि. समानोदरे ठितो सोदरियो, समानस्स सो. समानो गब्भो सगब्भो, तत्र भवो सगब्भो, णो. समानोदरे जातो सोदरो. समानोदरे जातो सहजो. सहसद्दो तुल्यवचनो.

मातापितू ते द्वे जना पितरो वुच्चन्ते. उभिन्नम्पि जनकब्यप्पदेसनियतत्ता अभेदवचनिच्छायं पितुत्तमत्थेव. नन्वभेदा जाति, तस्सा चोभयत्र सत्तादेकत्तं, न च जातिया ¶ लिङ्गसङ्ख्या भवन्ति, अदब्बत्ता बहुवचनं न सियाति? नेस दोसो, न हि जातिपदत्थिकस्स न दब्बं, दब्बपदत्थिकस्स वा न जातीति. किन्तुभयेसंप्युभयपदत्थो इहात्थविसेसो. जातिपदत्थिकस्स जाति पधानभूता दब्बं गुणभूतं, दब्बपदत्थिकस्स तु विपरिययो, तत्र जातिवचनिच्छायं दब्बे विय लिङ्गसङ्ख्या वत्तब्बा, तस्स च बहुत्ता बहुवचनं. पुब्बे वियाभेदवचनिच्छायं पुत्तो च धीता च पुत्ता वुच्चन्ते, जञ्ञत्तञ्हि पुत्तब्यपदेसनियतं धीतरिप्यत्थि, विपरियये तु न भवत्यनभिधानतो. भेदवचनिच्छायं पुत्तधीतरोति भवति.

२५०. सस्सु च ससुरो च ससुराति वुच्चन्ते. तदपच्चोहनसम्बन्धिनिबन्धना हि ब्यप्पदेसो सस्सुयम्पि ठितो. भेदवचनिच्छायं तु पुब्बे विय पच्चत्थं सद्दनिवेसो. भाता च भगिनी च भातरो वुच्चन्ते. एकगब्भोसितत्तं भातुब्यप्पदेसनियतं भगिनियंप्यत्थि. ततो एकगब्भोसितत्तस्साभेदवचनिच्छायं उभो भातरो वुच्चन्ते. एत्थ च सब्बत्रापि विरूपेकसेसो दट्ठब्बो. दुविधो हि एकसेसो सरूपासरूपवसेन. तत्र सरूपेकसेसे बहुवचनमेव, इतरत्र पन द्विवचनं, यथा पुरिसो च पुरिसो च पुरिसा, नामञ्च रूपञ्च नामरूपञ्च नामरूपं, माता च पिता च पितरोति.

बाल्ययोब्बनवुड्ढत्तानि तीणि वयानि. तत्र तिकं बाल्ये. द्वयं योब्बने. बालस्स भावो बालत्तं, त्तं. तापच्चये बालता. ण्यम्हि बाल्यं, अथ वा बल पाणने, बलन्ति अस्ससितपस्ससितमत्तेन ¶ पणन्तीति बाला, बल्यन्ते संवरीयन्तेति वा बाला, बल संवरणे. तेसं भावो बालत्तादि. युवस्स भावो योब्बञ्ञं, योब्बनञ्च, भावे ण्यो, णो च, अथ वा यु मिस्सने, यु, उस्स उवादेसो, वुद्धि. तेसं भावो योब्बञ्ञादि.

२५१. ये जराकता सुक्का केसादयो, ते पलितं नाम सियुं, तेसं वा यं सुक्कत्तं, तं पलितं नाम. पच पाके, इतो, चस्स लत्तञ्च.

द्वयं वलिपलितादिमति कायपरिपाके. जीयन्ति वुड्ढा भवन्ति अस्सं जरा, जर वयोहानिम्हि, जरा एव जरता, सकत्थे तापच्चयो. विस्ससातिपि जराय नामं. विसेसेन संसते अधो पातयतीति विस्ससा. संसति’रयं पमादत्थो, अवसंसनत्थो च, इह अवसंसनत्थो, निग्गहीतलोपो, द्वित्तञ्च.

बाल्ययोब्बनवुड्ढत्तानि पुब्बे वुत्तानि. इदानि तब्बतिनामान्याह. तत्र अद्धं छापसामञ्ञे. पुथ, पथ वित्थारे, उको, पुथुको, पल गमने, ण्वु, अस्सित्तं, द्वित्तञ्च, पिल्लको. छुप सम्फस्से, उस्सात्तं, छापो. कुमार कीळायं, कुमारो. बल पाणने, णो, बालो, पू पवने, तो, सकत्थे को, पोतको, इत्थियं पोतकी. पोतो, सावो, सावको, अब्भको, डिम्भो, सुसुको, सुसुइच्चादीनिपि छापसामञ्ञत्थानि.

२५२. बालसामञ्ञवाचकानि ¶ दस्सेत्वा विसेसबालनामानि दस्सेतुमाह ‘‘अथु’’च्चादि. उत्तानो, उत्तानं वा सयतीति उत्तानसयो. कपच्चये उत्तानसेय्यको. थनं पिवतीति थनपो, डिम्भसद्दोप्यत्र.

२५३. सत्तकं तरुणे.

आसोळसा भवे बालो,

तरुणो तु ततो भवे;

वुद्धो तु सत्तत्यायुम्हा,

तीणि वयानि लक्खये.

तर तरणे, उणो. वयसि योब्बने तिट्ठतीति वयट्ठो, तो, ‘‘वयो बाल्यादि पक्खी च, योब्बनञ्च वयो क्वची’’ति [चिन्तामणिटीका १६.४२] रुद्दो, दह भस्मीकरणे, अरो, यु मिस्सने, अ, उवादेसो, सिस्साकारो. सस प्लुतगतिम्हि, उ, अस्सुत्तं, सुसु, तरुणस्स वा पाटिपदिकस्स सुस्वादेसो. मनुनो अपच्चं मानवो, वण्णविकारो, नस्स णत्तं, माणवो. कुच्छायं कपच्चयो, माणवकोति सिद्धं. वुत्तञ्च –

‘‘अपच्चे कुच्छिते मूळ्हे, मनुतोस्सग्गिको मतो’’ति [महाभास्स ४.१.१६१] दर विदारणे, ण्वु.

द्वयं सुखवड्ढिते कुमारे, सुखो कुमारो सुकुमारो, खलोपो, सुखेन एधति वद्धतीति सुखेधितो. ‘‘सुखोचितो’’तिपि ¶ पाठो, सुखं उचितं सम्पिण्डितं एत्थाति सुखोचितो, उच समवाये.

२५४-२५५. द्विपादेन वुड्ढस्स नामानि. आयुमहत्तं लातीति महल्लको, ण्वु, द्वित्तं. वड्ढ वड्ढने, कत्तरि तो, तस्स ढो, ड्ढस्स डो, अस्सुत्तं, धा गतिनिवत्तियं, इरो, धस्स थत्तं, इस्स एत्तं. जर वयोहानिम्हि, कत्तरि तो, तस्स इन्नादेसो, धात्वन्तलोपो, णत्तञ्च, जिण्णो, सकत्थे कम्हि जिण्णको. पकतं वयो योब्बनमस्साति पवयोतिपि वुड्ढस्स नामं.

वलिनन्तानि पादेन नामानि. तत्र तिकं जेट्ठभातरि. अग्गे पुरे काले, पुब्बे च काले जायतीति अग्गजो, पुब्बजो च. अयञ्च वुड्ढो अयञ्च वुड्ढो, अयमिमेसं विसेसेन वुड्ढोति जेट्ठो, वुड्ढसद्दा इट्ठपच्चयो, ‘‘वुड्ढस्स जो इयिट्ठेसू’’ति वुड्ढस्स जो. अलोपे परस्सासवण्णत्तं.

तिकं पच्छाजाते भातरि. अयञ्च युवा अयञ्च युवा, अयमिमेसं विसेसेन युवाति कनिट्ठो, कनियो [कणिट्ठो कणियो (क.)] च. इयिट्ठेसु युवसद्दस्स कनादेसो [कणादेसो (क.)]. अनु पच्छाकाले जातो अनुजो. जघञ्ञे पच्छाकाले जातो जघञ्ञजो. अपरस्मिं पच्छाकाले जातो अपरजोति द्वेप्यत्र.

वलि ¶ सिथिलं तचो चम्मं यस्स वलित्तचो, द्वित्तं. वलि चम्ममेतस्सत्थीति वलिनो, इनो. उत्तानसयादयो वलिनन्ता वाच्चलिङ्गत्ता तीसु लिङ्गेसु वत्तन्ति, यथा – उत्तानसयो बालो, उत्तानसया कुमारी, उत्तानसयं नपुंसकं.

२५६. पञ्चकं मत्थके. सि सये, सो, दीघो च, अङ्गेसु उत्तमङ्गत्ता उत्तमङ्गं, उत्तमो च तं अङ्गञ्चातिपि उत्तमङ्गं. सीसञ्च उत्तमङ्गञ्च सीसोत्तमङ्गानि. सि सेवायं, रो, सेवन्ति एतेनाति सिरो. मुद तोसे, धो. सिस्साकारो. मस आमसने, त्थो, सकत्थे को च, मसि परिमाणे वा.

पज्जद्धं केसे. के मत्थके सेति तिट्ठतीति केसो. सत्तमियालोपो, कति छेदने, अलो, अस्सुत्तं. वल संवरणे, कम्मनि णपच्चयो, वालो. उत्तमङ्गे सीसे रुहतीति उत्तमङ्गरुहो. मुद्धनि जायतीति मुद्धजो. वालो च उत्तमङ्गरुहो च मुद्धजो चेति इतरीतरयोगद्वन्दो. चिकुरो, कचोतिप्यत्र. चि चयने, कुर सद्दे, अनेकत्थत्ता छेदने. वड्ढमानो चिकरीयतेति चिकुरो, कच बन्धने, अ.

२५७. कुसुमगब्भा केसा केसचूळा मुत्तिकादिना बहि संयता सन्थता धम्मिलो नाम. एकतो कत्वा धरीयति ¶ बन्धीयतीति धम्मिलो, कम्मनि इलो. धम्मेन नानादेसियमनुस्सानं समाचारेन इलतीति वा धम्मिलो, इल गमने.

द्वयं कुमारानं सिखापञ्चके, चूळत्तयेति केचि. काकानं पक्खसण्ठानत्ता काकपक्खो. सिखा एव सिखण्डको, सकत्थे को. सिखासिखण्डसद्दानमभेदत्तायेव हि ‘‘सिखण्डी, सिखी चा’’ति मोरो वुत्तो.

पासो, हत्थो च इमे द्वे केसचये केसपरियायतो परे हुत्वा केसानं कलापे वत्तन्ति, न केवला, यथा – केसपासो केसहत्थो इच्चादि. पा रक्खणे, पाति रक्खति अवयवेति पासो, सो, पस बन्धनेति केचि, णो. हन गतियं, अवयवा निहनन्ति एत्थाति हत्थो, थो, पक्खोप्यत्र.

तापसानं वतीनं तहिं केसचये जटासद्दो वुच्चति, जट जटने, जट सङ्घाते वा, ‘‘इत्थियमतियवो वा’’ति अ.

२५८. पोसितभत्तादीहि या बन्झते, तत्र वेणी, पवेणी च. वी पजने, पजनं गब्भविमोक्खो, वी तन्तसन्ताने वा, णी. पक्खे पवेणी.

द्वयं सीसमज्झट्ठचूळायं. चूळ सञ्चोदने, चूळ हावकरणे वा, अ. सिखा वुत्ता. केसपासीप्यत्र, नदादि.

नारीनं ¶ केसमज्झम्हि पद्धति उजुगतमग्गो सीमन्तोति मतो कथितो. सीमस्स अन्तो सीमन्तो, सी सये वा, अन्तो, मज्झे मकारवण्णागमो.

२५९. तिकं लोमे. लू छेदने, वड्ढमानं लूयतेति लोमं, मो. तनुम्हि रुहतीति तनुरुहं, अ. रुह जनने, रूह पातुभावे वा, मो, हलोपो, ओत्तञ्च, लू छेदने वा, मो, लस्स रत्तं, रोमं. अक्खिम्हि जातं लोमं पम्हं, पखुमञ्चोच्चते. पमिनोति तेनाति पम्हं, पपुब्बो मा परिमाणे, हपच्चयो. अक्खिनो पक्खद्वये जातं पखुमं, उमो, कलोपो च.

पुममुखे पुरिसानं मुखे वुत्तं [पवुट्ठं (क.)] लोमं मस्सु नाम, मस आमसने, सु, मस्सु.

तिकं भमुम्हि. भम अनवट्ठाने, ऊ, मलोपो, भू. उम्हि भमु, कपच्चये भमुको. भमुकसहचरणतो भमु पुल्लिङ्गो.

२६०. तिकं नेत्तोदके. खिप पेरणे, पो, इस्सत्तं. नेत्ते जातं जलं नेत्तजलं. अस अधोपतने, सु, अस्सु. नेत्तजलञ्च अस्सु चाति द्वन्दो. अस्सु नपुंसके.

द्वयं ¶ अक्खिपुत्तलिकायं. नेत्ते दिस्समाना तारा नेत्ततारा. कञ्ञासद्दतो तद्धितो अपच्चयो, कञ्ञासद्दस्स कनीनादेसो, इत्थिकताकारपरे के पुब्बो अकारो इकारमापज्जते [कातन्त २.२.६५], कनीनिका. तारकाप्यत्र.

छक्कं मुखविवरे, कवयो पन तदुपलक्खितेपि समुदाये युज्जन्ते. वद वियत्तियं वाचायं, करणे यु. मु बन्धने, खो, ओत्ताभावो निपातना, मुखं. सब्बधरकते पन खञ्ञतेति धातुना मुखन्ति निपातितं, खनु अवदारणे. तुडि तोडने, अ. तनु वित्थारे वा, डो, अस्सुत्तं. वदति तेनाति वत्तं, तो, वुच्चते अनेनाति वा वत्तं. वद वियत्तियं वाचायं, तो. लप वचने, करणे यु. आनन्ति असन्ति अनेनाति आननं, अन पाणने, यु. अस्संप्यत्र. अस भक्खने. करणे सो.

२६१. अड्ढं दन्ते. द्वीसु ठानेसु द्विक्खत्तुं वा जायतेति द्विजो. लपने मुखे जायतीति लपनजो. दा अवखण्डने, दायति भक्खमनेनाति दन्तो, अन्तो, दस अदने वा, दसन्ति भोज्जमनेनाति दन्तो, अन्तो, धात्वन्तलोपो. दमु दमने वा, तो. दंस दंसने, दंसते विलिख्यते भक्खमनेनाति दंसनो, यु. रद विलेखने, यु, रदनो. अम्हि रदो.

दन्तभेदस्मिं दन्तविसेसे दाठासद्दो. इत्थिलिङ्गोयं. दंसधातुतो ठो, दंसिस्स च दा, दाठा, मुद्धजदुतियोयं. अक्खिकोटीसु ¶ वामदक्खिणनेत्तानं अन्तेसु अपाङ्गो वत्तति, सरीरङ्गसङ्खातस्स कण्णस्स अप समीपं अपाङ्गो.

२६२. चतुक्कं ओट्ठे. दन्ते आवरति छादयतीति दन्तावरणं. उस दाहे, तो, ‘‘सादिसन्तपुच्छभन्जहंसादीहि ट्ठो’’ति सहादिब्यञ्जनेन ट्ठो, ओत्तद्वित्तानि, ओट्ठो. गद्रभेप्ययं. अथ वा उस दाहे, ट्ठो, ओत्तद्वित्तादि, उभयत्रापि मुद्धजदुतियो, ईसं किञ्चि कालं धारेति भक्खमेत्थाति अधरो, ईसत्थो ह्यत्र अकारो.

‘‘अ पुमे माधवे ञेय्यो,

पटिसेधे तदब्ययं;

ईसत्थे च विरुद्धत्थे,

सदिसत्थे पयोगतो’’ति. –

हि एकक्खरकोसे वुत्तं. दसने दन्ते छादयतीति दसनच्छदो. एत्थ केचि अधरसद्देन हेट्ठिमोट्ठमेवाहु, तेसं वचनं ‘‘नेत्तन्ताधरपाणिपादयुगलेहि’’च्चादीहि महाकविपयोगेहि असंसन्दनतो न गहेतब्बं.

तिकं कपोले. गडि वदनेकदेसे, अ, धातुप्पक्रियत्थञ्हि धातुपाठवचनं, सब्बत्राप्येवं. केन जलेन पूरियतेति कपोलो, अलो, कप अच्छादने वा, ओलो, कपोलो, नदादि. गण्डी. अधरा अधोभागो चुबुकं नाम, चिबुकंप्यत्र. चिबु ओलम्बके, ण्वु, अस्सुत्तं.

२६३. द्वयं ¶ गीवाय पुरोभागे. गल अदने, करणे अ, गिल गिलने वा, गिलति अनेनाति गलो, इस्सत्तं. कण सद्दत्थो दण्डको धातु, ठो, कण्ठो, मुद्धजदुतियोयं.

तिकं एकत्थं. गा सद्दे, ईवो. कं सीसं धरतीति कन्धरा. सिरं धरतीति सिरोधरा, सिरो धिय्यते अस्सन्ति वा सिरोधरा, धा गतिनिवत्तियं, अरो.

सुवण्णमयो आलिङ्गो मुरजभेदो, तेन सन्निभा सदिसा या गीवा, सा कम्बुगीवा मता, महापुरिसलक्खणमेतं. अथ वा या गीवा तीहि लेखाहि अङ्किता लक्खिता, सा कम्बुगीवा मता, महापुरिसलक्खणमेतञ्च. कम्बु वुच्चति सुवण्णं, कम्बुमयेन आलिङ्गेन सन्निभा गीवा कम्बुगीवा, कम्ब संवरणे, उ, कम्बु.

२६४. तिकं खन्धे. अन गतियं, सो. भुजानं सिरो मत्थकं भुजसिरो. कं मत्थकं दधातीति कन्धो, सो एव खन्धो ककारस्स खकारकरणवसेन, खमति भारन्ति वा खन्धो, खमु सहने, तो, तस्स धो, मस्स नो, निग्गहीतं वा ¶ . तस्सन्धि तस्स खन्धस्स मज्झं जत्तु नाम, यं खन्धानं मज्झे तिट्ठति. जन जनने, जर वयोहानिम्हि वा, तु, जत्तु, तं नपुंसकं.

द्वयं बाहुमूले. बाहूनं भुजानं मूलं बाहुमूलं. कच बन्धने, छो. अस्स कच्छस्स अधोभागट्ठानं पस्सं वुच्चति, दिस पेक्खने, अपच्चयो, दिसस्स पस्सादेसो.

२६५. तिकं बाहुम्हि. वहति अनेनाति वाहु, वाहु एव बाहु, कु [ण्वादि ६]. भुञ्जते अनेनाति भुजो. भुज पालनज्झोहारेसु. बाहु च भुजो चेति द्वन्दो, एते द्वे द्वीसु, इत्थियं भुजा. वहति यायाति बाहा. अपरोसद्दोप्यत्र [अ पारोसद्दोप्यत्र (क.), अ पवेट्ठसद्दोप्यत्र (?)].

तिकं हत्थे. हस हसने, थो. हर हरणे वा. नक्खत्तेप्ययं. कर करणे, अ. पण ब्यवहारथुतीसु, इ. पा रक्खने वा, णि. करो च पाणि च करपाणयो. पञ्चसाखो, सयोप्यत्र.

पकोट्ठन्तो हत्थगण्ठि मणिबन्धो नाम. पकोट्ठो नाम आमणिबन्धं कप्परस्स अधोभागो. मणिविकतिं बन्धति एत्थाति मणिबन्धो. कुस अक्कोसे, ठो, पकोट्ठो.

द्वयं भुजमज्झगण्ठिम्हि. कपु हिंसायं, अरो. कुप्परोतिपि पाठो, तदा अस्सुत्तं. कपु हिंसायं, ओणि, कपोणि, इत्थियं. कफोणीप्यत्र, तत्थ पस्स फत्तं.

२६६. पाणिस्स ¶ पाणितलस्स सम्बन्धीनं मणिबन्धकनिट्ठानं द्विन्नं अन्तरं बहिट्ठानं करभो वुच्चति, येन कुमारका सत्थं कत्वा अञ्ञमञ्ञं पहरन्ति, कर हिंसायं, अभो, कर करणे वा.

द्वयं अङ्गुलिमत्ते. करस्स पाणिस्स साखा करसाखा. अगि गत्यत्थो, अङ्ग गमनत्थो वा, उलि. इत्थिलिङ्गोयं [(नदादि) (क.)], अङ्गुलि.

ता अङ्गुलियो पञ्चप्पभेदा, यथा – अङ्गुट्ठो तज्जनी मज्झिमा अनामिका कनिट्ठा चेति कमा सियुं. अङ्ग गमनत्थो, अस्सुत्तं, अग्गे पुरे तिट्ठतीति वा अङ्गुट्ठो, निग्गहीतागमो, अस्सुत्तञ्च. तज्ज हिंसायं, तज्जेति याय, सा तज्जनी, यु, नदादि. मज्झे तिट्ठतीति मज्झिमा. नत्थि नाममस्साति अनामिका, सकत्थे को. अतिसयेन खुद्दकाति कनिट्ठा. युवप्पानं कन, कण वा इयिट्ठेसु.

२६७. तज्जन्यादीहि युते अङ्गुट्ठे तते पसारिते सति पदेसादिका चतस्सो सञ्ञा कमतो सियुं, यथा – तज्जनीयुते ¶ अङ्गुट्ठे तते पदेसो. दिस पेक्खने. मज्झिमयुते अङ्गुट्ठे तते तालो, तल पतिट्ठायं. अनामिकासहिते अङ्गुट्ठे तते गोकण्णो, गोकण्णसदिसत्ता, तप्पमाणत्ता वा गोकण्णो, अथ वा गोकण्णो नाम एको मिगविसेसो, तक्कण्णसदिसप्पमाणत्ता गोकण्णो, तालो च गोकण्णो च तालगोकण्णा. लिङ्गभेदा ‘‘तालगोकण्णविदत्थी’’ति न वुत्तं, कनिट्ठायुते अङ्गुट्ठे तते विदत्थि, वितनोतीति वितत्थि, वितत्थि एव विदत्थि, तनु वित्थारे,ति, तस्स थो. विदत्थि. ‘‘कमा ततो’’तिपि पाठो.

कुञ्चितो सङ्कोचितो पाणि पसताख्यो, पपुब्बो सर गतियं, तो. पमाणप्पकरणतो विततञ्जलियेवायं कवीहि इच्छितो. सम्पुटञ्जलि पनायं, पसारितसहिता [पसारितसहितत्ता (क.)] यस्स अङ्गुलियो भवन्तीति.

कुञ्चितो च ततङ्गुट्ठो, सपताकोति सम्मतो;

पताकेहि तु हत्थेहि, सम्पुटञ्जलि इच्छितो.

देवतानं गरूनञ्च, पितूनञ्चे’च्छितो पुरे;

अत्थप्पकरणादीहि, भेदो ञेय्यो तहिं तहिं.

यथा जलञ्जलिं ददाति, अञ्जलिना पिवति, देवोयं कतञ्जलिरिति. पुटञ्जलिस्स वा वक्खमानत्ता इध विततञ्जलियेव.

२६८. तिकं सप्पकोट्ठे विततकरे. रमु कीळायं, तनो, मलोपो, रतनं, मणिबुद्धादीसु च. कुक आदाने, उ ¶ , द्वित्तं. हस धातुम्हा थो, तो वा, हत्थो, हत्थसहितत्ता वा पकोट्ठो हत्थो.

द्वयं सम्पुटञ्जलिम्हि. करमयो पुटो करपुटो, अञ्ज ब्यत्तिगतिकन्तीसु, अलि, अञ्जलि. करपुटो च अञ्जलि चेति करपुटञ्जली.

द्वयं नखे. करे जायति रुहतीति करजो. नत्थि खं इन्द्रियं एत्थाति नखो, सञ्ञासद्दत्ता न अत्तं, अविसयत्ता वा. पुनब्भवो, कररुहो, नखरोतिपि नखस्स नामानि.

द्वयं पुटङ्गुलिकरेतिख्याते मुट्ठिम्हि. खट इच्छायं, ण्वु, खद हिंसायं वा, दस्स टो. मु बन्धने,ति, तस्स ठो, द्वित्तं.

२६९. पस्सद्वयवित्थता पस्सद्वयेपि वितता पसारिता सहकरा सपाणयो द्वे बाहू ब्यामो नाम, ब्यामीयते अनेनाति ब्यामो, विपुब्बो याम अञ्छे. उद्धं उपरि तता वितता भुजा च पोसो च तेसं समुदितानं पमाणसदिसं पमाणं यस्स तस्मिं उद्धन्ततभुजपोसप्पमाणे पोरिससद्दो वत्तति. भुजसद्देन सहकरा भुजा गय्हते, एकस्स पमाणसद्दस्स लोपो, पुरिसस्स पमाणं पोरिसं. पुरिससद्दो चेत्थ सकरभुजपुरिसं वदति, तीसु, यथा – पोरिसं जलं, पोरिसो हत्थी, पोरिसी यट्ठि.

२७०. द्वयं उरसि. उस दाहे, रो, सलोपो, अर गतिम्हि वा, अस्सुकारो. हर हरणे, यो, रस्स दो. कोळं [कोट्ठ (क.)] ¶ , भुजन्तरं, वक्खोतिपि उरोनामानि. तिकं उरोजे. तनु वित्थारे, तनोति इच्छन्ति थनो, तस्स थो, थन देवसद्दे, थन चोरिये वा. कुच सङ्कोचने, कुचो. पयो खीरं धारेतीति पयोधरो. कुचो च पयोधरो चाति द्वन्दो.

थनग्गस्मिं थनस्स अग्गे चूचुकं, नपुंसके. ‘‘चूचुको सो कुचानन’’न्ति [चिन्तामणिटीका १६.७७] तु रतनकोसो, चु चवने, उको, द्वित्तं, दीघो च, चूचुकं, चन्चु गतियं वा, उको, नलोपो, अस्सूकारो, चूचुकं.

द्वयं पिट्ठे कायस्स पच्छाभागे. पिट सद्दसङ्घातेसु, तो. इतरत्र ति, पिसु सेचने वा.

२७१. तिकं तनुमज्झे. मज्झे भवो मज्झो. लग सङ्गे, अ. मज्झे भवं मज्झिमं. चतुक्कं उदरे. कुस अक्कोसे, छि, सस्स चो. गह उपादाने, अनि, ईम्हि गहणी, गब्भं गण्हाति धारेतीति वा गहणी, गब्भासयसञ्ञितो मातुकुच्छिप्पदेसो, तेजोधातुम्हि पन यथाभुत्ताहारस्स विपाचनवसेन गण्हनतो अछड्डनतो गहणी. उपुब्बो दर गमने. उदरति उद्धं गच्छति वायु यत्राति उदरं. गु सद्दे, अभो, द्वित्तादि, गब्भो. पिचण्ड जठर तुन्दाप्यत्र.

कुच्छिसम्भवे कुच्छिट्ठे कोट्ठो, अन्तो चाति इमे द्वे वत्तन्ति, कुस अक्कोसे, तो, ठो वा. अम गमनत्थो, तो.

२७२. चतुक्कं ¶ कटियं. हनधातुम्हा यु, हस्स द्वित्तं, हस्स जो, हनस्स घो च, जघनं. निच्छयेन तमतीति नितम्बो, तमुधातुम्हा बो. सू पसवे, णि. कट वस्सावरणेसु, कट्यते आवरीयते वत्थादीहि कटि, इ, एते द्वे नारियं. एत्थ च जघनसद्देन इत्थिकटिया अग्गभागो, नितम्बसद्देन इत्थिकटिया पच्छाभागो, सेसद्वयेन कटिसामञ्ञं वुत्तन्ति दट्ठब्बं, वुत्तञ्च ‘‘पच्छा नितम्बो थीकट्या, जघनं तु पुरो भवे’’ति [अमर १६.७४].

२७३. लिङ्गन्तं लिङ्गसामञ्ञे. अङ्गे सरीरे जायतीति अङ्गजातं, अङ्गसद्दो सरीरवाचको, अङ्गमेतस्सत्थीति कत्वा. रहसि ठाने जातं अङ्गं रहस्सङ्गं, सत्तमियालोपो, इस्सत्तं, सस्स द्वित्तञ्च. वत्थेन गुय्हितब्बन्ति वत्थगुय्हं. मिह सेचने, करणे यु, मिहति रेतोमुत्तानि येनाति मेहनं. निपुब्बो मिह सेचने, तो, निमित्तं. उत्तमङ्गत्ता वरङ्गं. वज गतियं, अस्सीकारो, पच्चयेहि विना जायतीति वा बीजं, विरहत्तजोतको ह्येत्थ विकारो. फल निप्फत्तियं, फलति एतेन पुत्तन्ति फलं. लिङ्गति ‘‘इत्थी, पुरिसो’’ति विभागं गच्छति येनाति लिङ्गं. लिङ्ग ¶ गमने, लीनं अपाकटं अङ्गन्ति वा लिङ्गं. एतेसु बीजफलसद्दा अण्डेपि वत्तन्ति.

द्वयं पुरिसलिङ्गपसिब्बके. अम गमने, डो, अणसद्दत्थो वा, डो, अडि अण्डत्थे वा, तो. कुस अक्कोसे, णो. अण्डसद्दो चेत्थ बीजेपि, अण्डकोसोति समुदितम्पि कोसस्स नामं, ‘‘कुक्कुटच्छापकस्सेव अण्डकोसम्हा’’ति [पारा. १३, १४] हि वुत्तं, अमरकोसेपि [अमरकोसे १६.७६] अण्डकोसोति समुदितेनेव नामं वुत्तं. एत्थ च अण्डस्स बीजस्स कोसो अण्डकोसोति विग्गहो कातब्बो.

द्वयं इत्थिया अङ्गजाते. यु मिस्सने, अधिकरणेनि, योनि, इत्थियं पुमे चायं, इत्थी च पुमा च इत्थिपुमं, तस्मिं. भजन्ति अस्मिन्ति भगं. मारमन्दिर मारकूपा चात्र.

२७४-२७५. तिकं इत्थिपुरिसानं सम्भवे. सुचिस्स पटिपक्खो असुचि, इकारन्तो, द्वीसु, सम्भवलिङ्गो वा. संपुब्बा भूधातुम्हा अ. सक सामत्थियं, तो, तस्स को, अस्सुत्तं, सुच सोके वा, को.

द्वयं वच्चमग्गे. पुनन्ति अनेनाति पायु. पू पवने, उ, ऊस्सायो, पय गमनत्थो वा, पयति वच्चमनेनाति पायु, ¶ करणे उ, अयं पुरिसे पुल्लिङ्गे वत्तति. गुद कीळायं, अ. अपानंप्यत्र.

अट्ठकं वच्चे. गूथ करीसोस्सग्गे, गुप गोपने वा, थो. किर विकिरणे, ईसो, करीसं. वर वरणसम्भत्तीसु, चो, गूथञ्च करीसञ्च वच्चञ्चेति द्वन्दो, तानि विकप्पेन पुमे वत्तन्ति, निच्चं नपुंसके, पुल्लिङ्गत्तं तेसं कत्थचियेव, सब्बत्र नपुंसकत्तमेव बहुलन्त्यत्थो. मल चलने, अ, मल धारणे वा. सक सत्तियं, सस्स छो. उच्चारीयते जह्यतेति उच्चारो, उपुब्बो चरधातु चजने, उक्खिपने च वत्तति. मिह सेचने, लो, वण्णविपरिययो, ळत्तञ्च. अवकरीयतेति उक्कारो, अवस्सुत्तं, किर विक्खिपने. समलंप्यत्र. समु उपसमे, अलो.

द्वयं मुत्ते. सु सवने, सवनं सन्दनं, चुरादि, णो. मुच मोचने, तो, मुत्त पस्सावे वा. उच्चते कथीयते. गोमुत्ते गवं सम्बन्धिनि मुत्ते पूतिमुत्तसद्दो वत्तति. अज्ज पवत्तम्पि हि तं दुग्गन्धभावेन पूतिमुत्तन्त्वेव वुच्चति, यथा ‘‘पूतिकायो’’ति. अस्सादीनं मले छकणसद्दो, सक सत्तियं, यु, सस्स छो.

२७६. नाभिया अधोभागो वत्थि नाम, सो द्वीसु. वत्थि मुत्तपुटं. ‘‘मुत्तासयपुटो वत्थि’’रिति [चिन्तामणिटीका १६.७३] रतनमाला. वसति मुत्तमेत्थाति वत्थि, वस निवासे,ति, तस्स थो, त्थिपच्चयेन वा सिद्धं. उच्छङ्गं अङ्कञ्च इमे द्वे उभो सद्दा ¶ पुमे वत्तन्ति. उस्सज्जति एत्थाति उच्छङ्गं, सज सङ्गे, सस्स छो, द्वित्तं. अङ्क गमनत्थो, अ, अङ्को, अथ वा अङ्क लक्खणे, अ, अङ्को, ‘‘उच्छङ्गचिहनेस्व’ङ्को’’ति अमरकोसे [अमर कोसे २३.४].

द्वयं जाणूपरिभागे. अर गमने, उ, अस्सूकारो. सन्ज सङ्गे, आसज्जति वत्थमत्राति सत्थि, थि. ऊरु च सत्थि चेति द्वन्दो, नपुंसकेपि.

तिकं जाणुम्हि, ऊरुनो पब्बं गण्ठि ऊरुपब्बं. जन जनने, णु. द्वित्ते जण्णु.

२७७. द्वयं पादगण्ठिम्हि. गुप रक्खणे फो, सकत्थे को. पादस्स गण्ठि पादगण्ठि. घुटिकाप्यत्र. घुट परिवत्तने, घुट्यते अनेनेति घुटिका, ण्वु.

द्वयं पादस्स पच्छाभागे गोप्फकस्साधो भागे. पुमे तूति त्वन्तं लिङ्गपदं. पस बाधनफुसनेसु,ति, तस्स णो, सस्स हो, वण्णविपरिययो, णिपच्चयेन वा सिद्धं. सकारवण्णागमे वुद्धियञ्च पासण्हि. एलिप्यत्र, इल गतियं,ति, तलोपो.

द्वयं पादग्गे. पादस्स अग्गं पादग्गं. पकट्ठं पदं पपदन्ति कम्मधारयो. ‘‘पपदो’’तिपि पाठो. तिकं पादे. पद गतिम्हि, णो, पज्जतेति पादो. पज्जते गच्छतीति, अ. चरम्हा करणे यु, चरणं, इदं पुमे विकप्पेन, निच्चं नपुंसके. अङ्घिप्यत्र, अहि गतियं. इ, हस्स घो.

२७८. द्वयं ¶ हत्थाद्यवयवे. अङ्गि गत्यत्थो, अ. अवपुब्बो यु मिस्सने, अ. पतीको, अपघनोप्यत्र. पतिपुब्बा इम्हा को. अपपुब्बा हनिम्हा अ, घनादेसो च.

द्वयं पस्सट्ठिम्हि. पा रक्खणे, सु, ळिकारवण्णागमो, सकत्थे को, पस्स फो. अळागमे फासुका. ‘‘पासुळिका, पासुका’’तिपि पाठो. फुस सम्फस्सेतिपि धातु, तदा उपच्चयादि.

द्वयं अट्ठिमत्ते. असु खेपने, इ, सस्स ट्ठो, अट्ठि, इदं पण्डके नपुंसके वत्तति. धा धारणे, तु, इत्थी. कीकसं, कुल्लंप्यत्र. गलस्स कण्ठस्स हेट्ठिमन्ते जातमट्ठि गलन्तट्ठि. अक गमने, खो, सकत्थे को.

२७९-२८०. द्वयं सिरसोट्ठिखण्डे. समुदिते तु करोटि, इत्थी [अमर १६.६९]. कपु सामत्थिये, अरो, कं सीसं पालेतीति वा कप्परो, रस्सो, लस्स रत्तञ्च. कं पालयतीति ¶ , कम्मादिम्हि णो. ‘‘सिरोट्ठिम्हि कपालो’थी, घटादिसकलेपिचे’’ति रुद्दो [चिन्तामणिटीका १६.६८]. कपालो अथीति [अनित्थीति अत्थो] छेदो. कपालसद्दो विकप्पेन पुल्लिङ्गो. कडि छेदे, अरो. महती सिरा महासिरा, सिराति च. सि बन्धने, रो.

तिकं सुसिरवत्यं वायुवहन्तसिरायं. तिविधा हि कायसिरा एका वायुवहा, अपरा सुत्तमिवाट्ठिबन्धिनी, अञ्ञा आहारवाहिनी अन्तख्या. तत्र ततियेन पठमा, पठमदुतियेहि दुतिया च दीपिता, ततिया पन परतो वक्खति. नह बन्धने, अरु. सि बन्धने, रो. धम सद्दे, यु. नदादि, अनि वा, धमनी.

ततियं दस्सेतुमाह ‘‘रसग्गसा’’त्यादि. रसं गसतीति रसग्गसा, गस अदने. रसं हरति नेतीति रसहरणी, यु, नदादि.

तिकं मंसे. मन ञाणे, सो. मिस सद्दे, आपुब्बो आमसने वा. पिस अवयवे, तो. पललं, कब्बंप्यत्र.

द्वयं आतपादिना सुक्खमंसे. तिलिङ्गकन्तूति त्वन्तं लिङ्गपदं. वल, वल्ल संवरणे, ऊरो, इत्थियं ‘‘इत्थियमतो आपच्चयो’’ति आ, वल्लूरा. उद्धं तत्तं उत्तत्तं. तप सन्तापे, तो.

२८१. चतुक्कं लोहिते. रुह जनने, तो, इतो वा. रुन्झते चम्मेनाति रुधिरं, इरो. सोण वण्णे, तो. रञ्ज रागे, तो. असं, खतजंप्यत्र [खता जायते (चिन्तामणिटीका १६.६४)].

तिकं ¶ खेळे. ला आदाने, अलो, इत्थियमा, लल इच्छायं वा, इत्थियमा. खेल गतियं, अ. खल चलने, सञ्चये वा, णो, ळत्तं, खं वा आकासं इलतीति खेळो. इल गतियं, कम्मनि णो, इल गतिम्हि वा, अ, इस्से.

द्वयं पित्ते. मा परिमाणे, धु. मद उम्मादे वा, णु, दस्स धो. मायूति पाठे मय गतियं, णु. माधुमायुसद्दा द्वे पुरिसे पुल्लिङ्गे. अपिदधातीति पित्तं. अपिपुब्बो धा पिधाने, तो, अलोपो, भुजादि, पित्तं, नपुंसके.

द्वयं सेम्हे. सिलिस सिलेसने, चुरादि, सिलिस्यते अत्रेति सेम्हो, मन, लिसस्स हो, वण्णविपरिययो. इतरत्र उमो, सिलेसुमो. कफोप्यत्र, केन तोयेन फाति वुद्धि यस्स कफो, नेरुत्तो.

२८२-२८३. विलीनो विभूतो स्नेहो वसात्युच्चते, वस निवासे, आ. द्वयं अविलीनस्नेहे. मिद स्नेहने, णो. वप बीजसन्ताने, अ, वपा. ‘‘वपा विवरमेदेसू’’ति नानत्थसङ्गहे, अमरकोसे पन मेदादीनमेकत्थता दीपिता, वुत्तञ्हि तत्थ ‘‘मेदो तु वपा वसा’’ति [अमर १६.६४].

तिकं चन्दनसुवण्णाद्यलङ्कारकतसरीरसोभायं. कपु सामत्थिये, आकप्पनं आकप्पो, णो. ‘‘नेपच्छे गेहमत्ते ¶ च, वेसो वेस्यागहेपि [वेस्सगहेपि (क.)] चे’’ति [चिन्तामणिटीका १६.९९] रभसो. वस कन्तियं, विसि ब्यापने वा, णो. निस्सेसतो पथनं पख्यानं नेपच्छं, पथ पख्याने घ्यण. पटिकम्मं, पसाधनंप्यत्र.

छक्कं हाराद्याभरणे. मडि भूसायं, करणे यु. साध संसिद्धियं, यु, साठ सङ्खारगतीसु वा, पसाठनं, मुद्धजदुतियोत्र. भूस अलङ्कारे, करणेयेव यु. आभरिय्यते तन्ति आभरणं, भर भरणे, कम्मनि यु. अलं विभूसनं करिय्यतेनेनेति अलङ्कारो, णो. पिळन्ध भूसने, करणे यु. परिक्खारोप्यत्र [परिकरोप्यत्र (क.)].

द्वयं मकुटे. किर विकिरणे, ईटो. मकि मण्डने, उटो. मुकुटोतिपि पाठो, एते द्वे अनित्थी.

द्वयं मकुटग्गट्ठे नायकमणिम्हि. मकुटचूळायं चुम्बिता मणि चूळामणि. मकुटसिरसि चुम्बिता मणि सिरोमणि.

२८४. द्वयं उण्हीसपट्टे. सिरसो वेठनं सिरोवेठनं. उपुब्बो नह बन्धने, ईसो, वण्णविकारो. यं बहुकालं देब्यामनुस्सेस्वपि भवति, तत्र कण्णाभरणे कुण्डलादिद्वयं. कुडि दाहे, अलो. वेठ वेठने, कण्णस्स वेठनं कण्णवेठनं, मुद्धजदुतियोयं.

तिकं ताळकाख्ये कण्णाभरणे. कण्णानं भूसनं कण्णिका, कण्णा भूसने बहुललक्खणे णिको. कण्णच्छदनं ¶ पूरति येन सो कण्णपूरो. कण्णस्स विभूसनं कण्णविभूसनं, करणे यु. तालपत्तंप्यत्र.

२८५. द्वयं गीवाभरणे. कण्ठस्स भूसा कण्ठभूसा, थी. गीवायं भवं गीवेय्यं, भवत्थे एय्यो, गीवाय आभरणं वा गीवेय्यं, गीवतो आभरणे एय्यो.

द्वयं मुत्तावलियं. हरीयते मनो येन हारो. मुत्तानं आवलि पन्ति मुत्तावलि. हारासद्दोप्यत्र.

चतुक्कं पकोट्ठाभरणे. पकोट्ठो नाम कप्परस्साधोभागो. नी नये, उरो, इयादेसो. वल संवरणे, अयो, अनित्थी, नियुरोपि. कट वसावरणगतीसु, ण्वु. परि समन्ततो हरति चित्तं यन्ति परिहारकं, ण्वु. अवापकोप्यत्र.

२८६-२८७. द्वयं मुत्तादिघटितवलयविकत्याभरणे. का सद्दे, कणपच्चयो, कण सद्दे वा, द्वित्तं, कङ्कणं, ककि गत्यत्थे ¶ वा, यु, ककि लोल्ये वा, कङ्कति येनाति कङ्कणं, करणे यु. करस्स भूसा करभूसा, थी.

द्वयं खुद्दघण्टिकायं. किं कुच्छितं कणतीति किङ्कणी, नदादि. किङ्किणीतिपि पाठन्तरं, तदा यदादि. खुद्दा एव घण्टा खुद्दघण्टिका, सकत्थे को, घट चलने.

द्वयं अङ्गुल्याभरणे. अङ्गुलियं भवं अङ्गुलीयकं, ईयो, सकत्थे को, अङ्गुलीनमाभरणं अङ्गुल्याभरणं. उम्मिकाप्यत्र. तमेवाङ्गुलीयकं साक्खरमक्खरवन्तं ‘‘मुद्दिका, अङ्गुलिमुद्दा’’ति चोच्चते. मुद तोसे, ण्वु, आ, मुद्दिका, फलविसेसेप्ययं. अङ्गुलियं भवा मुद्दा अङ्गुलिमुद्दा.

द्वयं इत्थिकट्याभरणे. रस सद्दे, कत्तरि यु, आ, रसना. सायेव इनीम्हि रसनी. ‘‘सारे धनिम्हि रसनं, जिव्हायं रसना न सो’’ति रुद्दो. मेहनस्स खस्स माला मेखलाति निरुत्ति, मेहनिन्द्रियस्स मालात्यत्थो. काञ्ची सत्तकी, सारसनंप्यत्र.

एकयट्ठि भवे काञ्ची, मेखला त्व’ट्ठयट्ठिका;

रसना सोळसा ञेय्या, कलापा पञ्चवीसति [कलापो पञ्चवीसको (चिन्तामणिटीका १६.१०८)].

तिकं सोवण्णे पगण्डभूसने. पगण्डो नाम कप्परस्सोपरिभागो. के सद्दे, उरो, यागमो. अङ्ग गमने. दो. बाहुमूलस्स, बाहुमूले वा भवं विभूसनं बाहुमूलविभूसनं.

२८८. चतुक्कं इत्थिचरणविभूसने. अङ्गदाकारं पादभूसनं पादङ्गदं. मजि सद्दत्थो, ईरो, पादे कटकं पादकटकं. ऊनं पादं पूरेतीति नूपुरो, वण्णविपरिययो. पादकटको च नूपुरो चेति कटकसद्दस्स पुल्लिङ्गेपि पवत्तनतो ¶ द्वन्दसमासो. तुलाकोटि, हंसकोप्यत्र. तुल गतिकोटिल्ये. कुटिलकोटित्ता तुलाकोटि, पुमे. हंसगतित्ता हंसको.

२८९. मुखफुल्लादयो अलङ्कारप्पभेदा सियुं. मुखफुल्लं नाम सुवण्णमयो मुखालङ्कारो, मुखे फुल्लतीति मुखफुल्लं, फुल्ल विकसने, दन्तादीसु सुवण्णमयालङ्कारोपि मुखफुल्लमेव. उण्णतं सुवण्णादिरचितं नलाटाभरणं, उपुब्बो नमु नमने. एत्थ च मुखफुल्लुण्णतानं विसेसं विपरिययेनापीति वदन्ति. गावीनं थनाकारत्ता गत्थनं, ओस्सत्तं, तमेव उत्तमत्ता उग्गत्थनं, चतुयट्ठिको हारभेदो. गमु गमने, ण्वु, द्वित्तं, अस्सित्तञ्च, गिङ्गमकं, बात्तिंसयट्ठिको हारभेदोव. आदिना अद्धहारो, माणवको, एकावली, नक्खत्तमालादयो हारभेदा च सङ्गय्हन्ति [अमर १६.१०६].

२९०. पज्जं वत्थमत्ते. चिल वस्सने, चिल्यते अच्छादीयतेति, णो, थियं चेली. छद संवरणे, आपुब्बो करणे, यु. वस अच्छादने, वस्यते अच्छादीयतेति वत्थं, थो. णम्हि वासो. युम्हि वसनं. अम गमने, करणे यु, अंसुकं, रंसिपरियायोप्ययं. अम्ब सद्दे, कत्तरि अरो. पट गमने, करणे अ, सोभनचेलेप्ययं. दु गमने, करणे सो, द्वित्तं, दुरूपं असति खेपतीति वा दुस्सं, दुरूपं असति दीपेतीति वा दुस्सं, दुपुब्बो अस दित्तियं ¶ . चल वसने, अस्सोत्तं, ळत्तञ्च. सट रुजाविसरणगत्यावसानेसु, ण्वु.

२९१. पज्जं वत्थभेदे. तत्रादिद्वयं दुकूलख्ये वत्थे. खु सद्दे, मो, खुमसद्दा विकारे णो, खुमाय विकारो खोमं, खुमा नाम अतसी, तब्बक्कलसम्भवं वत्थं, वाच्चलिङ्गोयं. कूल आवरणे, दुक्खेन कुल्यतेति दुकूलं, दुमेहि जातं कूलन्ति वा दुकूलं. केचि पन ‘‘दुकूलम्पि एकं वत्थन्तरं, न खोमनाम’’न्ति वदन्ति. तं ‘‘खोम’मट्टे दुकूले च, अतसीवसनेपि च’’, ‘‘खोम’मट्टे दुकूलेचा’’ति नानत्थसङ्गहतिकण्डसेसेसु [नानत्थसङ्गह ३.३.२९५] वुत्तत्ता न गहेतब्बं. कोसो नाम किमिगब्भो, ततो जातत्ता कोसेय्यं, एय्यो, ‘‘कोसेय्यं किमिकोसोत्थ’’न्ति [अमर १६.१११] हि वुत्तं. कोसेय्यमेव धोतं पट्टुण्णं नाम, वुत्तञ्च ‘‘पट्टुण्णं धोतकोसेय्य’’न्ति [अमर १६.११३]. पत्तुण्णन्तिपि पाठन्तरं. पट्टुण्णरट्ठे जातत्ता पट्टुण्णन्तिपि वदन्ति. कमु कन्तियं, कमनीयत्ता कम्बलो, रङ्कुनामकस्स हरिणविसेसस्स लोमेनसञ्जातवत्थं [राङ्कवं विगरोमजं (अमर १६.१११)], अलो, वागमो च मज्झे. वासद्दो कम्बलसद्दस्स नपुंसकत्तं समुच्चिनोति. रल्लकोपि [अमर १६.११६] कम्बलपरियायो. सण सद्दे, कत्तरि अ, सणो नाम थिरत्तचो एको रुक्खयोनि, यस्स तचेन केवट्टादयो जालादीनि करोन्ति, सणस्स विकारो साणं, वत्थं. मिगलोमानि कोट्टेत्वा सुखुमानि कत्वा कतमम्बरं कोटुम्बरं, कुट छेदने, उस्सो, अस्सु, कोटुम्बरट्ठेजातत्ता वा कोटुम्बरं. भङ्गं नाम खोमादीनि सब्बानि ¶ एकज्झानि वोमिस्सेत्वा कतवत्थं, भन्ज अवमद्दने, अथ वा भङ्गं नाम साणफलं, तब्बिकारत्ता वत्थं भङ्गं, वुत्तञ्च नानत्थसङ्गहे ‘‘भङ्गा साणाख्यसस्सेपी’’ति. सस्ससद्देन चेत्थ फलं वुत्तं, ‘‘रुक्खादीनं फलं सस्स’’न्ति [अमर १४.१५] वचनतो. भङ्गम्पि वाकमयमेवाति केचि. वत्थन्तरं वत्थविसेसो. आदिना कप्पासादयोपि गहिता.

२९२-२९३. चतुक्कं परिधानभूते अधोवत्थे. अधोभागे वसीयतेति निवासनं, निसद्दो अधोभागस्स जोतको. वस अच्छादने, कम्मनि यु. बाहुल्येन अन्तरे मज्झे भवं अन्तरीयं, ईयो. समानलिङ्गत्ता द्वन्दो. अन्तरे भवं अन्तरं, णो. अन्तरे मज्झे भवो वासो अन्तरवासको, सकत्थे को. उपसंब्यानंप्यत्र [अमर १६.११७].

पञ्चकं उपरिधाने. वर अच्छादने, पपुब्बो, कम्मनि णो, उभयत्रापि वुद्धि, पावारो. उत्तरस्मिं देहभागे आसज्जतेति उत्तरासङ्गो, आ पुब्बो सञ्ज सङ्गे. उपरि संवीयते पिधीयते बाहुल्येनाति, यु. उपसंपुब्बो वी तन्तसन्ताने. उत्तरस्मिं देहभागे भवं विज्जमानं उत्तरं, उत्तरीयञ्च, णो, ईयो च. संब्यानंप्यत्र.

नवं वत्थं अहतन्ति मतं कथितं, न हञ्ञति यं पासाणादीहीति अहतं. तन्ततो अचिरमाहरितं वत्थं. अनाहतं, निप्पवाणि, तन्तकंप्यत्र. वुत्तञ्च ‘‘अनाहतं निप्पवाणि, तन्तकञ्च नवम्बरे’’ति [अमर १६.११२].

द्वयं ¶ चिरकालत्ता निद्दसे जिण्णवत्थे. नत्थि अन्तो दसा यस्स नन्तकं, सकत्थे को. कुच्छितो पटो कप्पटो, कप्प वितक्के वा, अटो. द्वयं अथिरवत्थे, जिण्णवसनं अथिरं वत्थं. ‘‘पट’’इति चरति फोटतीति पटच्चरं, पटच्चरमेव पळच्चरं, ळत्तं.

२९४. द्वयं कोटिकादिसन्नाहे, चोळे च. कच बन्धने, उको, निग्गहीतागमो च. वाणं सरं वारयतीति वारवाणो, कम्मनि णो, अभिधानतो वारस्स पुब्बनिपातो, अनित्थियमेते. वत्थस्स अवयवे दसासद्दो इत्थी. ‘‘दसा वत्यमवत्थायं, वत्थंसे बहुम्हि द्विसू’’ति [चिन्तामणिटीका १६.११४] रभसो. दा छेदने, कम्मनि सो, रस्सो.

उत्तमङ्गम्हि सीसे यो कञ्चुको सुवण्णादिमयो, सो ‘‘नाळिपत्तो’’ति कथितो. नाळिपत्तो तंसण्ठानो सुवण्णादिपटो नाळिपत्तो. सीसकं, सिरियं, सिरोहन्तिपि तस्स नामानि.

२९५. तिकं दीघत्ते. आपुब्बो यमु उपरमे, णो. आ भुसो याति गच्छतीति वा आयामो, या गतिपापुणेसु, मो. दीघस्स भावो दीघता. रुह जनने, णो.

द्वयं ¶ वित्थारे. वत्थविसये ‘‘ओसारो’’ति रूळ्हे. समन्ततो नय्हतीति परिणाहो, नह बन्धने, णो. वित्थारेन सरणं विसारो, सो एव विसालता.

२९६. चतुक्कं चीवरे. अरहतं धजो अरहद्धजो, रूळ्हिया तदञ्ञचीवरेसु. कसायेन, कसावेन च रत्तं कासायं, कासावञ्च, समानलिङ्गत्ता द्वन्दो. चि चये, ईवरो. वत्थखन्धेहि चीयतेति चीवरं.

मण्डलादयो तदङ्गानि समूहभूतस्स चीवरस्स अवयवानि. मडि भूसायं, अलो, मण्डलं. चीवरपरियन्तोयं महापथविया चक्कवाळपब्बतो विय चीवरस्स समन्ततो तिट्ठति. विवट्टो नाम चीवरमज्झगतमग्गो, सो हि विसुं विसुं वट्टतीति विवट्टोति वुच्चति, वट्ट आवट्टने. कुसि नाम मग्गानं मज्झगतवत्थखण्डं, कुस छेदने, कम्मनि इ, कुसि, पुमित्थियं.

२९७. फलादीनं यानि चत्तारि सन्ति, एता वत्थस्स योनियो कारणानि ततो तदुप्पत्तितो. कप्पासिकं वत्थं फालं नाम फलविकारत्ता, विकारे णो, तीसु. यथा – फालो पटो, फाला चेली, फालं वत्थं. खोमादयो पन पटा तचब्भवा तचतो सञ्जाता.

२९८. कोसेय्यं ¶ वत्थं किमिजं नाम. मिगलोममयन्तु कम्बलं. द्वयं ब्यवधायकपटे, कण्डपटेपीति केचि. समानत्था एते द्वे तुल्यत्थात्यत्थो. जु गतियं, भूवादि, जु बन्धने वा, यु, अनकादेसो, सा इत्थी. तिरो करीयति पिधीयति याय, सा तिरोकरणी, यु. पतिसीराप्यत्र. पतिपुब्बो सि बन्धने, रो.

२९९. द्वयं उपरिबन्धपटे, अथसद्दोत्र लिङ्गादिजोतको. उद्धं लोचते बन्धीयतेति उल्लोचं, लुच दस्सने. चन्दातपे वितन्यतेति वितानं, तनु वित्थारे, णो, चुरादि. द्वयम्पि पुन्नपुंसकन्ति ईरितं कथितं.

द्वयं सिनाने. नह सोचे, करणे यु, सिना सोचे, करणे यु, ‘‘सिनाने’’ति सत्तम्यन्तं पदं. द्वयं कुल्यादिना [कुट्यादिना (क.), कुज्जनादिना (निस्सय), कुङ्कुमहलिद्दादिना (चिन्तामणिटीका १६.१२१)] अङ्गनिम्मलीकरणे. उब्बत्तीयते विसारीयते मलमनेनेति उब्बत्तनं, वतु वत्तने, भूवादि. मज्ज सुद्धियं, यु. समन्ति द्वयमिदं समानत्थं.

३००. तिकं नलाटकते चित्तके. तिलकाकति तिलको. चित्तकाकति चित्तकं. चकारेन तमालपत्ताकति तमालपत्तं ¶ . सामञ्ञेन विसेसकं, उभो विसेसकतिलका अनित्थी, सेसद्वयं नपुंसकं [अमर १६.१२३].

तिकं चन्दने, चदि हिलादने, हिलादनं सुखापनं, यु. गन्धानं सारो उत्तमो गन्धसारो, गन्धयुत्तो सारो थिरंसो वा गन्धसारो. मलयदीपगिरिम्हि जायतीति मलयजो. भद्दसिरीप्यत्र.

३०१. तिकं पीतचन्दने. ‘‘गोसीस’’इति पब्बते मलये देसे जातं गोसीसं, गो विय जलं विय सीतन्ति वा गोसीतं, तदेव तस्स सकारं कत्वा गोसीसं. तिलपण्णप्पमाणपण्णयुत्तताय तेलपण्णिकं. मनं हरतीति हरि, तमेव चन्दनन्ति हरिचन्दनं. पीतसारु, सुसीतंप्यत्र. गोसीसादयो तयो पुमे, नपुंसके च वत्तन्ति.

चतुक्कं रत्तचन्दने. तिलपण्णप्पमाणपण्णयुत्तताय तिलपण्णी. पुरिमेन भेदकरणत्थं न वुद्धि. पत्तमङ्गमस्सेति पत्तङ्गं, खुद्दपण्णताय अप्पधानपत्तमिच्चत्थो. ‘‘अङ्गं गत्तन्ति कोपाय-पतीकेस्वप्पधानके’’ति हि नानत्थसङ्गहे. रञ्ज रागे, हेतुकत्तरि यु. रत्तवण्णताय रत्तञ्च तं चन्दनञ्चेति रत्तचन्दनं, अमरकोसे पन ‘‘गोसीसादीनि रत्तचन्दनन्तानि विसेसे वत्तन्ती’’ति [अमर १६.१३१] वुत्तानि. तत्र गोसीसस्स यथावुत्तोयेवत्थो. धवलं, सुसीतलं, चन्दनं, तेलपण्णिकं मलयपब्बतदेसजमेव. हरि मण्डूको, तदाकारे पब्बते जातं चन्दनं हरिचन्दनं. पक्कम्बफलगन्धि पीतवण्णं. तिलपण्णीपत्तङ्गानि रत्तचन्दनसदिसस्स रत्तसारस्स एकस्स चन्दनस्स नामानि.

द्वयं ¶ रत्तचन्दने. अथ वा तिलपण्यादीनि चत्तारि लोहितचन्दनसदिसस्स रत्तसारस्स एकस्स चन्दनविसेसस्स नामानि. कुचन्दनंप्यत्र. ‘‘पत्तङ्गं रञ्जनं रत्तं, पत्रङ्गञ्च कुचन्दन’’न्ति रतनमालायं.

३०२. द्वयं वणिजादीनं ‘‘काळेया’’इति रूळ्हेपीतकट्ठे. काळवण्णं अनुसरति सीलेनाति काळानुसारी, काळवण्णजनकोत्यत्थो. काळं जनेतीति काळियं, ‘‘काळीयकन्तु काळेयं, वण्णदं कन्तिजासक’’न्ति [जासकं कन्तिदायकं (चिन्तामणिटीका १६.१२६)] ब्याडि.

तिकं अगरुसामञ्ञे. लू छेदने, हो. लहुनामत्ता अगरु. रस्स लत्ते अगलु, द्वयं पुमे. वंसिकं, राजारहं, किमिजं, जोङ्गकंप्यत्र.

अस्मिं अगरुम्हि काळे सति ‘‘काळागरू’’त्युच्चते. मल्लिकापुप्फगन्धि अगरु पन मङ्गल्योच्चते.

द्वयं सल्लकीदवे. तुरुक्खो वुत्तो. पिडि सङ्घाते, ण्वु. सिहलो, यावणोप्यत्र.

३०३. द्वयं मिगनाभियं. कत्थ सिलाघायं, ऊरो, नदादि, सकत्थे को. मिगस्स मदो मिगमदो, मिगो मरति येनाति वा मिगमरो, सो एव मिगमदो.

द्वयं ¶ कुट्ठे. कुट छेदने, ठो, तो वा, ‘‘कुटादीहि ठो’’ति ठो, कुट्ठं, रोगभेदेपि. अत्तनो छायूपगते अजे पालेतीति अजपालकं, ण्वु. पारिभाब्यं, पाकलं [फालकी (क.)], उप्पलं, वाप्पंप्यत्र.

द्वयं पिडङ्गे. रोगं लुनन्तो अङ्गति गच्छतीति लवङ्गो. देवानं कुसुमं पुप्फं देवकुसुमं. सिरिसञ्ञंप्यत्र.

द्वयं कुङ्कुमे. कस्मीररट्ठे जातं कस्मीरजं. अग्गिसिखं, वरं, वल्लीकं, पीतनं, रत्तसङ्कोचं, पिसुनं, धीरं लोहितचन्दनंप्यत्र.

३०४. द्वयं धुनके. यक्खेहि कतो धूपो यक्खधूपो, यक्खो देवो. सज्जरुक्खस्स सिलेसो सज्जुलसो. अस्सु, सिलोपो, एस्सत्तञ्च, सज्जस्स रसो दवो सज्जुलसो, अस्सु, लत्तञ्च. सज्जरसोतिपि पाठो. रालो, सब्बरसो, बहुरूपोप्यत्र.

तिकं तक्कोले. तक्क वितक्के, ओलो. कुल सङ्ख्याने, ण्वु. कोसयुत्तं फलमेतस्साति कोसफलं. द्वयं जातिफले. कोससहितं जातिफलमेतस्साति जातिकोसं. जातिफलमेतस्स, न कित्तिमन्ति जातिफलं.

३०५. पज्जद्धं कप्पूरे, घनो हुत्वा सरतीति घनसारो. अब्भमिव सितं सितब्भो, अभिधानतो पुब्बनिपातो, कप्प ¶ सामत्थिये, ऊरो. चन्दसञ्ञो, हिमवालुको, हिमाव्हयोप्यत्र.

पज्जद्धं लाखायं, आ भुसो रत्तं करोतीति अलत्तको, लत्तं, क्वि. यु मिस्सने, ण्वु. लाख सोसने, अ, ला आदाने वा, खो. जन जनने, तु, नलोपो. दुमामयोप्यत्र.

३०६. द्वयं सरलद्दवे. सिरिया लक्खिया आवासो सिरिवासो. सरलनामकस्स रुक्खस्स दवो रसो सरलद्दवो. पायसो, वकधूपो, सिरिवेट्ठोप्यत्र. ‘‘सिरिवासे परमन्ने च, पायसो सम्मतो पुमे’’ति [चिन्तामणिटीका १६.१२९] रुद्दो. द्वयं अञ्जने. अञ्जु ब्यत्तिमक्खनगतिकन्तीसु, यु. कज्ज ब्यसने. कज्जति रोगन्ति कज्जलं, अलो.

द्वयं गन्धगाहापनचुण्णे, वस हिंसत्थो, वसति दुग्गन्धन्ति वासो, णो, वास उपसेवायं वा, वस निवासे वा. सो एव चुण्णं. युज योगे, कम्मनि णो, वासो एव योगो वासयोगो. द्वयं विलेपनमत्ते. वण्ण वण्णक्रियावित्थारगुणवचनेसु, चुरादि. वण्णयतीति वण्णकं. ण्वु. लिप उपदेहे. विलेपीयतेति विलेपनं, कम्मनि यु.

३०७. यो गन्धमाल्यधूपादीहि वत्थतम्बुलादीनं सङ्खारो, तं ‘‘वासन’’मित्युच्चते, वास उपसेवायं, वासीयते सङ्खरीयतेति वासनं, यु.

तिकं ¶ पुप्फदामे. मा माने, लो, मल धारणे वा, अ. मालोव माल्यं. दम गतियं, पुप्फानि दमन्त्यत्रेति पुप्फदामं, पुप्फानं रासिकरणट्ठानमिच्चत्थो. दा लवने वा, मो. अमरकोसे पन ‘‘मालामाल्यानि मुद्धनि पवत्ताय मालाय नामानी’’ति [अमर १६.१३५] वदति. मालमाल्यसद्दा पुप्फेपि, ‘‘माला माल्यं पसुने’’ति हि नानत्थसङ्गहे. द्वयं गन्धग्गाहिते वत्थादो. भू सत्तायं, कम्मनि तो, वुद्धादि. वासापेति गन्धं गाहापेति यन्ति वासितं, वस निवासे, कम्मे तो, तीसु, यथा – भावितो पटो, भाविता चेली, भावितं वत्थं. वासितो, वासिता, वासितं वत्थं.

३०८. पञ्चकं मुद्धमालायं. तसि अलङ्कारे, भूवादि. उद्धं तसीयतेति उत्तंसो. सिखायं जातो सेखरो, रो. मुद्धं अवति रक्खतीति अवेळा, अव रक्खणे, एलो, ळत्तं. ‘‘आवेळा’’तिपि पाठो, दीघत्तं. सेखरो च आवेळा चाति द्वन्दो. मुद्धनि अलङ्कतं माल्यं मुद्धमाल्यं, तस्मिं. अवपुब्बो तसि अलङ्कारे, उद्धं तसीयतेति अवतंसो, सो एव वटंसको, सकत्थे को, तस्स टो, अनेकत्थत्ता उपसग्गनिपातानं उद्धंभावजोतको चेत्थ अवसद्दोति तथोत्तं.

तिकं सेय्यायं. सयन्त्यस्सं सेय्या, यो. सयन्त्यत्रेति सयनं, सेनञ्च. उभयत्रपि अधिकरणे यु, इस्से, ए अय, इतरत्र एत्तं, ‘‘वा परो असरूपा’’ति अलोपो च, सयनीप्यत्र.

द्वयं ¶ मञ्चे. परिपुब्बो अकि लक्खणे, णो, इलोपो, रस्स लत्तं. मचि धारणोच्छायपूजनेसु, भूवादि अ, सकत्थे को. खटाप्यत्र, खट्यते आकङ्खते सयनत्थिकेहीति खटा, खट आकङ्खायं.

३०९. द्वयं मञ्चाधारे. मञ्चस्स आधारो मञ्चाधारो. पटिपज्जति पवत्तति सेय्या येन, सो पटिपादो. मञ्चङ्गे मञ्चावयवे अटनिसद्दो इत्थियं, अट गमनत्थो, अनि, यु वा, नदादि, रस्सो.

३१०. कुळीरपादादयो इमे चत्तारो मञ्चन्तरा मञ्चभेदा सियुं. तत्थ कुळीरो कक्कटको तस्स सण्ठानपादत्ता कुळीरपादो. अटनियं आहच्चो, आहच्च वा पादो तिट्ठति यस्साति आहच्चपादो, पुब्बपक्खे ‘‘रिच्चा’’ति योगविभागेन रिच्चपच्चयन्तो आहच्चसद्दो, परपक्खे तु त्वापच्चयन्तो, यस्स अटनिछिद्दे पादो पविसित्वा तिट्ठति, सो आहच्चपादो. मस आमसने, आरो, सकत्थे को. यस्स पादच्छिद्दे अटनि पविसित्वा तिट्ठति, सो मसारको. बुन्देन पादेन सह एकाबद्धा अटनि यस्स सो बुन्दिकाबद्धो, एकारस्सित्तं. एत्थ च मज्झे द्विन्नं मञ्चानं लक्खणं विपरिययेनापि वदन्ति.

३११. द्वयं सीसाधारे. विसेसेन सीसं वहतीति बिब्बोहनं, यु, बत्तं, अस्सोत्तञ्च. उपधीयते सीसासनं करीयतेति उपधानं, यु, धा धारणे.

तिकं ¶ सामञ्ञपीठे. पीठ हिंसासंकिलेसेसु, भूवादि, ण्वु, आ. यदादिना के पच्चये इत्थिकताकारे परे पुब्बो अकारो इकारमापज्जते, ‘‘के’’ति किं? चेतना. ‘‘पच्चये’’ति किं? बका. ‘‘इत्थी’’ति किं? पाचका. ‘‘कत’’इति किं? वुत्तकम्मा, कम्मपच्चयोयं, तपच्चये पीठं [मोग्गल्लान ४.१४२ सुत्तम्पि पस्सितब्बं]. आसते अस्मिन्ति आसनं.

द्वयं उत्तमारहपीठे. कुच संपच्चनकोटिल्यपतिथम्भविलेखनेसु, छो. भद्दं कल्याणं पीठं भद्दपीठं. गजदन्तादिमयकेसमज्जनियम्पि द्वयमिदमाहु. तदा पसाधनी, कङ्कतिकाप्यत्र. पीठन्तरे दीघपीठे आसन्दी मता. सद विसरणगत्यावसानेसु, नदादि, बिन्दागमो च.

३१२. आयामवित्थारवसेन महन्तो आसनप्पभेदो ‘‘कोजवो’’ति मतो, कुजु थेय्यकरणे, णो, कुयं पथवियं जवतीति वा कोजवो, जु गतियं. दीघेन लोमेन युत्तो आसनप्पभेदो ‘‘गोनको’’ति मतो, गु सद्दे, यु, सकत्थे को, उस्सोत्तं.

द्वयं अत्थरणे. मिगलोमपुण्णताय जातं उण्णामयं. थर सन्थरणे, पादिपुब्बोव, न कदाचिपि पादिरहितो, आ भुसो थरीयतेति अत्थरणं, यु.

द्वयं संसिब्बनचित्तके. चित्तरूपमस्सत्थीति चित्तकं. बाहुल्येन न इकारागमो. वानेन संसिब्बनेन सञ्जातं चित्तरूपमस्साति वानचित्तकं, सकत्थे को.

३१३. द्वयं ¶ निरन्तरपुप्फपटे. घनं सन्धिभूतं पुप्फरूपमेत्थाति घनपुप्फं. पटलमेतिस्सात्थीति पटलिका, इको. द्वयं बहुमुदुलोमे सेतवत्थे. सि सेवायं, सिवत्थिकेहि सेवीयतेति सेतो, तो. पट गमने, ण्वु, पटिका, अद्धेन्दुपासाणेपि.

द्वीसुपि परियन्तेसु यस्सा दसा सन्ति, सा उद्दलोमी, उदितं द्वीसु लोमं दसा यस्सा सा उद्दलोमी, इस्सत्तं, द्वित्तञ्च. एकस्मिं परियन्तेयेव दसा यस्सा एकन्तलोमी, एकस्मिं अन्ते परियन्ते लोमं दसा यस्सात्थीति एकन्तलोमी, उद्दलोमी च एकन्तलोमी चेति उद्दलोमिएकन्तलोमिनो, ‘‘पदानं सन्धि वत्तिच्छातो, न समासन्तरगेसू’’ति वुत्तेपि गाथाभावतो छन्दोहानिभया विसन्धि. यत्थ पन गाथायम्पि [अगाथायम्पि (?)] विसन्धि ‘‘धम्मसंवण्णनाय’न्तिआदिमाहा’’त्यादीसु, तत्थ कथन्ति? ‘‘न समासन्तरङ्गेसू’’ति इमस्सानिच्चत्ता तत्थापि न दोसो, ‘‘नेन निद्दिट्ठमनिच्च’’न्ति हि परिभासितं [नघटितं अनिच्चं (परिभासेन्दुसेखर ९७)].

३१४. तदेव यथावुत्तद्वयमेव सोळसन्नं इत्थीनं नच्चयोग्गं नच्चस्स योग्यट्ठानभूतं ‘‘कुत्तक’’मित्युच्चते. हि पदपूरणे. ‘‘नच्चयोग्यम्ही’’तिपि पाठो, तदा भावसत्तमी. करोन्ति ¶ एत्थ नच्चन्ति कुत्तकं, कर करणे, तो, अस्सु, भुजादि, सकत्थे को.

सीहादिरूपेहि विचित्तरूपं वत्थं, आसनं वा विकतिका नाम भवे, एकस्सेव हि कत्तुनो पकतिविकतिसङ्खातावत्थावसेन द्वित्तं, वत्तिच्छावसेन लिङ्गसङ्ख्याविभत्तिभेदञ्च होति, यथा – मनुस्सा यक्खभत्तं अहेसुं, सत्तप्पकरणानि अभिधम्मो नाम भवन्ति, देवदत्तो रज्जं पापुणातीति. यत्र हि पकतिया वा विकतिया वाति द्विन्नम्पि वुत्तता सिया, तत्र वाचको पकतियायेव सङ्ख्यं गण्हाति, नेतरस्स तन्निस्सितभावेनाप्पधानतो [कच्चायनसारे ६-७ गाथासु पस्सितब्बं]. यदा पन पकतिया सम्बन्धादिभावं वत्तुमिच्छति, तदा अत्तना वत्तब्बस्स अञ्ञत्थस्साभावा विकतिप्युच्चते वाचकेन, यथा – देवदत्तस्स रज्जं पापुणाति, इध पन लिङ्गभेदेनेव वुत्तं ‘‘चित्तं विकतिका भवे’’ति. विकरीयतेति विकति.

३१५. कट्टिस्सकोसेय्यसङ्खातानं द्विन्नमत्थरणानं करणप्पकारं दस्सेतुं अरियासामञ्ञमाह ‘‘कट्टिस्स’’मिच्चादि. कोसियकट्टिस्समयं कोसियसुत्तकट्टिस्सवाकेहि पकतमत्थरणं कट्टिस्सं नाम, विरूपेकसेसवसेन कोसियञ्च कट्टिस्सञ्च कट्टिस्सानि, तेहि पकतं अत्थरणं कट्टिस्सं. कोसियसुत्तेन पकतन्तु अत्थरणं कोसेय्यं नाम. रतनपतिसिब्बितन्ति इदं द्विन्नम्पि विसेसनं, अत्थरणञ्च इति कमा कमतो ‘‘भवे’’ति अज्झाहरितब्बं. अत्थरणसद्दस्सानुण्णामयेस्वपि पवत्तनतो एत्थापि ‘‘अत्थरण’’न्ति ¶ वुत्तं, यथा – सुत्तं कम्मन्ति. एत्थ च चकारो पादन्तत्ता गरूसु गण्हितब्बो, तेनेव हि सत्तपञ्ञासमत्ता परिपुण्णा होन्ति, अरियाय हि पठमपादे द्वादसमत्ता, तथा ततिये, दुतिये अट्ठारस, चतुत्थे पन्नरसमत्ताति सम्पिण्डिता सत्तपञ्ञासमत्ता होन्ति.

३१६. तिकं दीपे. दीप दित्तियं, दिवादि. दिप्पतीति दीपो, णो. ‘‘पदीपो’’ति अञ्ञपदनिवत्तनत्थं उपसग्गेन पदं वड्ढितं. जुति दित्तियं, भूवादि, णो.

द्वयं आदासे. ‘‘पुमे तू’’ति त्वन्तं लिङ्गपदं. आदिस्सते अस्मिन्ति आदासो, णो, आपुब्बो दिस पेक्खने, इस्सा. दिप्पति एत्थाति दप्पणो, यु, इस्सत्तं. मकुरोप्यत्र.

द्वयं चम्ममयकीळागुळके. वासभवनेहि युवतीहि सह कीळासम्भवा ञेय्या, तप्पक्कमेनस्साभिधानं. गुडि वेधने, णुको, उस्से, गुद्द कीळायमेव वा, तदा दस्स ण्डो. कदि अव्हाने रोदने च, णुको, कुद्द कीळायमेव वा, उस्सत्तं, पुब्बदस्स नो.

द्वयं बीजनीमत्ते. वटि विभाजने, तालवण्टेहि कतत्ता तालवण्टं. वण्टं नाम बीजनादिकरणत्थं विसुं भाजितो तालपत्तावयवो, तालवण्टसद्दस्स यथावुत्तवचनत्थयोगेपि सति सञ्ञासद्दत्ता बीजनीसामञ्ञे पवत्ति वेदितब्बा. यदा पन तालवण्टेहि कतबीजनिमेव वत्तुमिच्छति, तदा एकेन तालसद्देन विसेसेत्वा ‘‘तालतालवण्ट’’न्ति वत्तब्बं. यथा – तिलस्स तेलं, सुगतस्स सुगतचीवरन्ति. बिजन्ति वायुना योजयन्ति याय ¶ , सा बीजनी, यु, नदादि, युज योगे, यस्स वो, उस्सी, वज गतियं वा अस्सी. ब्यजनंप्यत्र.

३१७. द्वयं चङ्कोटके. कुट छेदने, सकत्थे को. करडि भाजनत्थे, को. द्वयं कप्पूरादिसम्पुटे [सरूपकादिसम्पुटे (क.)]. समुग्गच्छतीति समुग्गो, क्वि. पुट संसिलेसने, भूवादि, अ.

पज्जद्धं मेथुने. गामवासीनं धम्मो आचारो गामधम्मो, गामसद्देन चेत्थ गामवासिनो वुत्ता, यथा ‘‘गामो आगतो’’ति. असतं असप्पुरिसानं धम्मो, सद्धम्मपटिपक्खत्ता वा असद्धम्मो. ब्यय खये, ब्ययति बलमेतेनाति ब्यवायो, मज्झे वागमो, अथ वा विगतो अयो वुड्ढि तस्माति अवायो, अतिसयो अवायो ब्यवायो. मिथुनानं इत्थिपुरिसानं समानच्छन्दानं आचारो मेथुनं, तदञ्ञेसु उपचारो, रमु रमने, भावे, करणे वाति.

३१८. चतुक्कं विवाहे. वह पापुणे, णो. उपपुब्बो यमु उपरमे, अ. अञ्ञमञ्ञस्स पाणिनो गहणं पाणिग्गहो. नी नये, अ. उब्बाहो, पाणिपीळनंप्यत्र.

धम्मकामत्था तयो वग्गा वुच्चन्ते. आगमनिद्दिट्ठो समाचारो धम्मो. विसयविसयिसन्निपातजं सुखं कामो. सब्बोपकरणं ¶ अत्थो. समोक्खका मोक्खसहिता धम्मकामत्था चतुब्बग्गो वुच्चन्ते. तिवग्गेन विसंयुत्तो मोक्खो निब्बानं. तुल्यबलेहि पन धम्मादीहि चतूहि पधानेहि चतुभद्र [अमर १७.५७] मुच्चते.

३१९-३२०. द्वयं खुज्जे. कुच्छितं वज्जतीति खुज्जो, कस्स खो, वलोपो, णो. गडि निन्दायं, उलो.

तिकं रस्ससरीरे पुग्गले. रस सद्दे, सो. ब्यामप्पमाणं न लातीति वामनो, नेरुत्तो. रस्सो च वामनो चेति द्वन्दो. लकुडि वामनत्थे, अ, सकत्थे को, लकु विय घटिका विय डेति पवत्तेतीति वा लकुण्डको.

पञ्चकं पङ्गुळजने. परेन अङ्गतीति पङ्गुळो, उलो. पीठेन सप्पति सीलेनाति पीठसप्पी, सप्प गमने, उपच्चये पङ्गु, द्वीसु. छिन्नो गमनादिइरियापथो यस्साति सो छिन्निरियापथो. विगता अक्खसदिसा जङ्घा यस्साति पक्खो, यथा हि रथस्स अक्खे भिन्ने गमनं न सिज्झति, तथेव तस्सापि अक्खजङ्घाय भिन्नायाति ओपम्मसंसन्दनं.

द्वयं खञ्जे. खजि गतिवेकल्ये, भूवादि, खञ्जतीति, अ. खोडि गतिपटिघाते, को.

द्वयं ¶ अवाक्ये. वत्तुमसक्कुणेय्यत्ता मिगसदिसोति मूगो, इस्सू. सुञ्ञं वचो यस्साति सो सुञ्ञवचो.

हत्थादिवङ्को पुरिसो ‘‘कुणी’’त्युच्चते. कुणनं कुणो हत्थादिवेकल्यं, तमेतस्सत्थीति कुणी, अथ वा कुण सङ्कोचने, ई, कुच्छितं नयतीति वा कुणी, णत्तं, ‘‘हत्थेन कुणी, पादेन कुणी’’इच्चादिपयोगा. द्वयं अपाङ्गदस्सने जने. वल संवरणे, इरो. कुच्छितं करोतीति केकरो, उस्से.

३२१. द्वयं निक्केससीसे. निक्केसं सीसमेतस्स, खल खलने, सञ्चये च, आटो, निक्केसत्ता खं तुच्छं सीसं लातीति खल्लाटो, टो.

तिकं खुरमुण्डसीसे. मुण्ड खण्डने, भूवादि, अ. भण्ड परिभासने, उ, सकत्थे को, मुण्डको, मुण्डिकोप्यत्र.

अक्खीनं मज्झे एकेनाक्खिना सुञ्ञो काणो नाम, कण सद्दगतिनिमीलनेसु, णो, कणति निमीलतीति काणो, तं पनस्स निमीलनं एकेनेवक्खिना. अट्ठकथादीसु पन ‘‘काणोति एकच्छिकाणो, उभयच्छिकाणो वा’’ति [सं. नि. अट्ठ. १.१.१३२] वुत्तं. द्वयेन अक्खिद्वयेन सुञ्ञो अन्धो नाम, अन्ध दस्सनूपसंहारे, अ.

३२२. द्वयं ¶ नट्ठसोतप्पसादे. बन्ध बन्धने, इरो. नलोपो. सुति कण्णो हीनो विकलो यस्साति सुतिहीनो. एळोप्यत्र.

तिकं गिलानसामञ्ञे. गिल हासक्खये, यु, ब्याधिरोगोसञ्जातो यस्स ब्याधितो. अत सातच्चगमने, अधिकरणे, कत्तरि वा उरो, आतुरो, दीघादि. आमयावी, विकतो, अपटु, अब्भमितो, अब्भान्तोप्यत्र.

उम्मादो वातादिपकोपो रोगविसेसो, तब्बति उम्मत्तो, मद उम्मादे, उग्गतेहि वातादिदोसेहि मदयतीति उम्मादो, णो. खुज्जादयो उम्मत्तन्ता वाच्चलिङ्गे युत्तताय वाच्चलिङ्गिका, यथा – खुज्जो पुरिसो, खुज्जा इत्थी, खुज्जं नपुंसकं. उम्मत्तो पुरिसो, उम्मत्ता इत्थी, उम्मत्तं नपुंसकं.

३२३. नवकं रोगमत्ते. तकि किच्छजीवने, भूवादि, आ भुसो तङ्कतीति आतङ्को, अ. अम रोगे, यो, मय गतिम्हि वा, अथ वा अम रोगे, चुरादि, आमयति रुज्जतीति आमयो, अ, कारितलोपाभावो. विध विज्झने, विज्झतीति ब्याधि, इ, अकारवण्णागमो, बाध विबाधायं वा, तदा यागमो, विविधा वा आधयो मनोपीळा यस्मिंस ¶ ब्याधि, ‘‘पुमे आधि मानसी ब्यथा’’ति [अमर ८.२८] हि अमरकोसे वुत्तं. रोगेगदो, कुवेरायुधे गदा, गदो भाथरिकण्हस्स, ‘‘आमये चायुधे गदा’’ति हि नानत्थसङ्गहे. रुज रोगे, कत्तरि णो, रुजा इत्थी. गिलानस्स भावो गेलञ्ञं. कल गतिसङ्ख्यानेसु, न कलति येन तं अकलं, तमेव अकल्लं, लो. बाध विबाधायं, भूवादि, अ. उपतापोप्यत्र.

द्वयं खयरोगे, रसादिसत्तधातुयो सोसयतीति सोसो, सुस सोसने, दिवादि, णो. खि खये, खयतीति, अ. यक्खा, राजयक्खाप्यत्र. यक्ख पूजायं, चुरादि.

३२४. द्वयं नासरोगे. अपिहिता नासा अनेनाति पीनासो, पीनसोपि. उपसग्गतो नासाय बहुब्बीहिम्हि नसादेसं कुब्बन्ति [पाणिनि ५.४.११९], अपिस्साकारलोपो वण्णनासो, रस्सस्स दीघता. ‘‘सोसो यक्खा राजयक्खा, पतीस्सायो तु पीनसो, आपीनसो पतिस्सायो’’ति रभसो. पतिस्सयोप्यत्र. वेज्जगन्थे इमेसं पीनसपतिस्सायानं भेदो अभिहितो –

आनह्यते यस्स विसुस्सते च,

किलिद्यते धूपति चेव नासा;

न ञायते गन्धरसे च जन्तु,

दुट्ठं विजञ्ञा तमपीनसेनाति.

आनद्धा ¶ पिहिता नासा,

तनुसावप्पसेकिनी;

गलतालोट्ठसोसो च,

नित्तोदो सङ्खकद्वये;

भवे सरो पघातो च,

पतिस्सायोति लक्खितोति.

इह त्वभेदेनोत्तं. पतिपुब्बो सिधातु रुजत्यत्थो. नासिकाय जातो रोगो नासिकारोगो.

घाने पवत्तो अस्सवो सिङ्घानिका नाम, सिङ्घ आघाने, भूवादि, सिङ्घतीति सिङ्घानं, यु, तत्थ जाता सिङ्घानिका. आ पुनप्पुनं सवति सन्दतीति अस्सवो, सू अभिसवे. द्वयं वणमत्ते. अर गमने, उ, अरु, नपुंसकेयेव. वण गत्तविचुण्णने, चुरादि, अ, वणो, अनित्थी. द्वयं फोटे. फुट संसिलेसने, भूवादि, फोटो, णो. पीळ विबाधायं, चुरादि, ण्वु, ‘‘इत्थियमतो आपच्चयो’’ति आ, पीळको, पीळका, पीळकं, तीस्वपि, तथा फोटो.

३२५. द्वयं पक्कवणादीसु सञ्जातदुग्गन्धविसेसे. पुब्ब पूरणे, भूवादि, अ. पूय विसरणे, दुग्गन्धे च, भूवादि.

द्वयं लोहितनिस्सरणरोगे. रत्तस्स लोहितस्स सण्ठानमतिक्कमित्वा सरणं गमनं रत्तातिसारो. पक्खन्दति निस्सरतीति पक्खन्दिका. कमु पदविक्खेपे. ‘‘इत्थियमतियवो वा’’तिति. ‘‘पक्कमादीहिन्तो चे’’ति एत्थ चकारेन तिस्सन्ति, धात्वन्तलोपो च, सकत्थे को. द्वित्ते. यदादिना परककारस्स खो, पक्खन्दिका.

द्वयं ¶ अपमारे. सरणं सारो, अपगतो सारो येन अपमारो, सस्स मो. इतरत्र मकारागमो. द्वयं पादभेदे. पादस्स फोटो भेदनं दरणं पादफोटो, फुट भेदे. विरूपो पादो एताय हेतुभूतायाति विपादिका. समासन्ते को, पुब्बाकारस्सित्तं, विदारीयमानत्ता विपज्जमानो पादो अस्सन्ति वा विपादिका.

३२६. द्वयं वुड्ढिप्पत्तण्डकोसरोगे. वुड्ढिप्पत्तो रोगो वुड्ढिरोगो. वातपूरितं अण्डं कोसो वातण्डं. द्वयं थूलपादरोगे. घनाभावतो सिथिलं पदं सीपदं, वण्णनासो, दीघादि. भारो पादो यस्स, तस्स भावो भारपादता.

पञ्चकं कण्डुयं. कण्ड भेदने, उ, दीघे कण्डू, वधूसद्दोव. तिम्हि कण्डूति, अस्सू, चुरादित्ता यम्हि कण्डूया, यलोपाभावो. खज्ज थेय्यकरणब्यथनेसु, भूवादि, उ. युम्हि कण्डूवनं, अस्सू. उवादेसो, दीघो च.

३२७. तिकं कच्छुयं. या ‘‘खसुरोगो’’ति वुच्चति. पात्यत्तानन्ति पामं, मन, पामाप्यत्थि, पुल्लिङ्गो, राजादि, विसेसेन तच्छति कासन्ति वितच्छिका, तच्छ तनुकरणे, ण्वु ¶ , ‘‘विवच्छिका’’ [विच्चच्चिका (अमर १६.५३)] तिपि पाठो. वच्छ परिभासनतज्जनेसु, भूवादि. कच बन्धने, उ, चस्स छत्तं, द्वित्तादि. तिलकाळकन्तं द्वयं द्वयं समत्थं. तत्र द्वयं सोथे. सु गतिवुड्ढीसु, भूवादि, थो. थुपच्चये सयथु, उस्सत्तं, यागमो च. सोफोप्यत्र. सोकं फायति बहुलं करोतीति सोफो, फाय वुड्ढियं, फायस्स फो, नेरुत्तो.

द्वयं अरिसरोगे. अमङ्गलताय दु निन्दितं नाममस्स दुन्नामं, सकत्थे, कुच्छायं वा को, दीघकोसिकायं दुन्नामा, इत्थी. अरि विय ससति हिं सतीति अरिसं, सस हिंसायं, क्वि, अर गमने वा, इसो. द्वयं वमनरोगे. छद्द वमने, चुरादि, ण्वु. वमु उग्गिरणे, थु. वमिधुप्यत्र. छद्दिका, वमि इत्थियं, वमथु पुमे.

३२८-३२९. द्वयं परितापे. दु परितापे, तनादि, थु. परितपनं सन्तापनं परितापो. द्वयं तिलकाळके. तिलसण्ठानं विय जायतीति तिलको. तिलं विय काळो हुत्वा जायतीति तिलकाळको.

महाविरेको ‘‘विसूचिका’’त्युच्चते. निस्सेसतो सुचति गच्छतीति सूचिका. सुचि, सुच गतियं, भूवादि. सुच सोचेय्ये ¶ वा, निस्सेसतो सोचेतीति विसूचिका, विसेसेन सूचि विय विज्झतीति वा विसूचिका. बहुमोसरणत्ता महन्तो विरेको महाविरेको, रिच वियोजनसम्पुच्छनेसु, णो.

भगन्दलादयो सत्त आमयन्तरा रोगभेदा भवन्ति. तत्र गुदसमीपजो वणविसेसो भगन्दला, इत्थी. भगं योनि, तं दारयतीति रूळ्हीतो अपच्चयन्तो निपातितो. दर विदारणे, भूवादि, लत्ते भगन्दला. भगन्दरोप्यत्र. मेहो मुत्तमेहो, सो च बहुमुत्तताय मधुमेहो, रत्तमेहो, सुक्कमेहोत्यनेकविधो. मिह सेचने, भूवादि, मिहति मुत्तन्ति मेहो, णो. जर रोगे. भूवादि, जरतीति, अ. जरो पसिद्धो. कास सद्दकुच्छायं, दित्तियञ्च, भूवादि, कासतीति कासो, णो, कुच्छितं असतीति वा कासो, कुआपुब्बो. सस पाणने, ससनं सासो, भुसं ससनमेतस्सत्थीति वा सासो, कुट छेदने, ठो, कुट्ठं. सामञ्ञेन तचोविकारे. सुक्के तु सित्तं. सूल रुजायं, भूवादि, सूलं. विद्दधि, अस्मरी, मुत्तकिच्छादयोप्यनेका रोगभेदा.

पज्जद्धं वेज्जे. आयुब्बेदसङ्खातं विज्जं जानातीति वेज्जो, ‘‘ण रागा तस्सेदमञ्ञत्थेसु चा’’ति णो, विद ञाणे वा, विन्दतीति वेज्जो, ण्यो, द्यस्स जो. भिसज्जति चिकिच्छतीति भिसक्को, अ, जस्स को. रोगं हरति सीलेनाति रोगहारी, णी. हरसद्दोयं केवलोपि आनयनापनयनेसु वत्तति ‘‘मनोहरो, दुक्खहरो’’इच्चादीसु, इध अपनयने. कित रोगापनयने, भूवादि. तिकिच्छतीति तिकिच्छको, छपच्चयो, ण्वु, द्वित्तादि. अगदकरोप्यत्र, अगदं अरोगं पाणीनं करोतीति अगदकरो, कम्मादिम्हि णो.

३३०. द्वयं ¶ सल्लनीहरणे वेज्जे. काये पविट्ठसरादिसल्लस्स नीहरणो वेज्जो सल्लवेज्जो. यथावुत्तं सल्लं नीहरणवसेन कन्तति छिन्दतीति सल्लकत्तो, कति छेदने, तो. द्वयं पटिकारे. तिकिच्छनं तिकिच्छा, भावे अ. पतिपुब्बो करोति तिकिच्छायं, करतो रिरिया.

चतुक्कं ओसधे. भिसजानमिदं भेसज्जं, ण्य. न विज्जते गदो यस्मिन्ति अगदो. भिसजानमिदं भेसजं, णो. उस दाहे. रोगमोसापेतीति ओसधं, धो, अथ वा ओसधी नाम असंयोगदब्बं, तेहि संयोजितं ओसधं. जायुप्यत्र. जि जये, णु.

३३१. तिकं आरोग्ये. अनत्थकारकत्ता कुच्छिताकारेन सरीरे सेन्तीति कुसा, रोगा, ते लुनाति छिन्दतीति कुसलं. आमयस्साभावो अनामयं, अब्ययीभावो. अरोगस्स भावो आरोग्यं. कुसलानामयारोग्यन्ति समाहारद्वन्दो. द्वयं अनामयजने. कल गतिसङ्ख्यानेसु. कलति यथासुखं सब्बिरियापथेसूति कल्लो, लो. ‘‘कालं खमतीति कल्यं, अरोगता, तस्सं नियुत्तो कल्यो’’ति अङ्गुत्तरनिकायटीकायं. नत्थि आमयो यस्मिं निरामयो. वुत्तोप्यत्र. वुत्ति जीवितवुत्ति पसत्था अस्सत्थीति वुत्तो. रोगतो निग्गतजने पन उल्लाघो, लाघ सामत्थिये, उसद्दोयं रोगविमुत्यत्थो. नरादित्ता, नरप्पधानत्ता च नरवग्गो.

नरवग्गवण्णना निट्ठिता.

४. चतुब्बण्णवग्गवण्णना

३३२. सन्ततिपरियन्तं वंसे. कुल सन्तानबन्धूसु, भूवादि, णो, कुलं, वन सम्भत्तियं, सो. संतनु वित्थारे, णो. अभिमुखं जनेतीति अभिजनो, णो. गो वुच्चति अभिधानं, बुद्धि च, ते तायतीति गोत्तं. गोत्रम्पि. गवं सद्दं तायतीति वा गोत्तं, ता पालने. अनुपुब्बो इ गतियं, करणे अ. तनोतिस्माति, सन्तति, नलोपो, इत्थियं.

सन्तति पन्तिवित्थार-गोत्तेसु कविभी मता;

परम्परा भवे चापि, पुत्तकञ्ञासु सन्तति.

खत्तियादयो खत्तियब्राह्मणवेस्ससुद्दा चत्तारो वण्णा कुलानि भवन्ति, एते हि अञ्ञमञ्ञमसङ्करतो वण्णेतब्बतो ठपेतब्बतो वण्णाति वुच्चन्ते. वण्ण ठपने.

३३३-३३४. छक्कं ¶ कुलीने. कुलस्सापच्चं कुलिनो, इनो अपच्चे. सोभनो जनो सज्जनो. सपरत्थं साधेतीति साधु, साध संसिद्धिम्हि, उ. सभायं साधु सभ्यो. साध्वत्थे यो. अय गतियं. अयितब्बो उपगन्तब्बोति अय्यो, कम्मनि यो. महाकुलस्सापच्चं महाकुलो, णो.

भूभुजन्तं राजसामञ्ञे. अतितेजवन्तताय विसेसेन राजते दिब्बतेति राजा, राज दित्तियं. भुया भूमिया पति भूपति, भुं पालेतीति वा भूपति, पा रक्खणे,ति, रस्सो. पथविया इस्सरो पत्थिवो, णो, द्वित्तं, इत्तञ्च. जगतिं भूमिं पालेतीति जगतिपालो, कम्मनि णो. दिसानं पति दिसम्पति, दिसा, दिसट्ठे वा पालेतीति दिसम्पति, रस्सत्तं, निग्गहीतागमो च. भुं भूमिं भुञ्जतीति भूभुजो, भुज पालनज्झोहरणेसु, इध पालने, रुधादि. महिखितोप्यत्र. खि निवासगतीसु, महिं अखि गतवा महीखितो.

३३५. पज्जद्धं मुद्धाभिसित्ते जातिखत्तिये, ‘‘राजजच्चे च खत्तिये’’ति वचनतो. रञ्ञो खत्तियस्सापच्चं राजञ्ञो, ञ्ञो ¶ अपच्चे. ‘‘खत्तियो तु विरा खत्तं, राजञ्ञद्विजलिङ्गनो’’ति रभस, रतनकोसेसु परियाया. खत्तस्सापच्चं खत्तियो, अपच्चे इयपच्चयो दिस्सते, खेत्तानं अधिपतिभूतत्ता वा खत्तियोतिआदिकप्पिकराजा वुच्चति, तप्पभवत्ता पन मुद्धाभिसित्तेस्वपि तंसमञ्ञा, एस्सत्तं. खत्तस्सापच्चं खत्तं, णो. रज्जारोपनसमये दक्खिणावट्टसङ्खोदकेन गङ्गानीतेन मुद्धनि खत्तियकञ्ञादीहि अभिसित्तत्ता मुद्धाभिसित्तो, पठमखत्तियो. तप्पभवताय पन अनभिसित्ता च मुद्धाभिसित्ताख्या, यथा – ब्रह्मबाहुजस्स वंसे जातस्सापि ब्रह्मबाहुजो. ब्रह्मबाहुतो जातत्ता बाहुजोति हि निकायन्तरिकानं लद्धि. यस्मिं पन राजिनि असेसा सामन्ता पणमन्ति, सो अधिस्सराख्यो [अमर १८.२]. सं सत्तो लग्गो अन्तो यस्सा सा समन्ता, सविसयानन्तरा भूमि, समन्ताय इमे सामन्ता, अनन्तरराजानो.

द्वयं चक्कवत्तिनि. सब्बभूमिया इस्सरो सब्बभुम्मो, ण्यो. पुञ्ञोपनीतेन चक्करतनेन वत्तते असाधुदमनिकादिराजवत्तं अनुतिट्ठतीति चक्कवत्ती, णी, चक्करतनं वत्तेति आकासे अत्तनो पुरतो गमयतीति वा चक्कवत्ती, पुञ्ञचक्कं, चतुचक्कं वा सत्तेसु वत्तेति, ते वा अस्मिं वत्तेतीति चक्कवत्ती, चक्करतनुप्पादनत्थं द्वादसवस्सचरितं दसराजधम्मं वत्तमेतस्सत्थीति वा चक्कवत्ती. तत्थ अन्तोजनस्मिं बलकाये धम्मिकारक्खावरणगुत्तिया संविधानं, खत्तियेसु, अनुयुत्तेसु, ब्राह्मणगहपतिकेसु, नेगमजानपदेसु, समणब्राह्मणेसु, मिगपक्खीसु, अधम्मकारपटिक्खेपो, अधनानं धनुप्पादनं, समणब्राह्मणे उपसङ्कमित्वा पञ्हपुच्छनन्ति इदं दसविधं चक्कवत्तिवत्तं, इदमेव च गहपतिके, पक्खिजाते च विसुं कत्वा गहणवसेन द्वादसविधम्पि दीपेसु. चतूस्वपि दीपेसु आणाधम्मचक्कानि सत्तेसु ¶ पवत्तेतीति वा चक्कवत्ती. अञ्ञो असब्बभुम्मो अनवकासो सामन्तो भूपो मण्डलिस्सरो नाम. सयमाणापवत्तिट्ठानवसेन परिच्छिन्नस्सेव मण्डलस्स इस्सरो, न सब्बमण्डलस्साति मण्डलिस्सरोतिपि. एत्थ च ‘‘सब्बभुम्मो, चक्कवत्ती’’ति द्वीहि नामेहि चतुदीपिस्सरो राजा दीपितो, इधानागतेपि सङ्गहेत्वा कथितेन अधिस्सरपदेन एकदीपिस्सरो राजा, मण्डलिस्सरपदेन पदेसिस्सरो राजा दीपितो. अथ वा मण्डलिस्सरपदेन एकदीपिस्सरो राजा, सेसेहि राजराजञ्ञादीहि बाहुजपरियन्तेहि पदेसिस्सरो दीपितो.

३३६. द्वयं राजभेदे. सुखुमताय लीना अपाकटा छवियो येसं ते लिच्छविनो. लिच्छवी च वज्जी चाति द्वन्दो. द्वयं सम्मासम्बुद्धकुले राजिनि. पुरिमतरसम्भूते सक्यकुले सञ्जातत्ता सक्यो, णो. सक्कोपि. सक्ये भवो साकियो, इयो, यलोपो, दीघो च.

पञ्चकं बुद्धपुत्तस्सायस्मतो राहुलस्स मातरि. भद्द कल्याणे, सोख्ये च. कुलाचाररूपादिवसेन कल्याणत्ता भद्दा. कच्चस्सापच्चं कच्चाना, अपच्चसद्दोयं निच्चं नपुंसके पुत्ते, पुत्तियञ्च भवतीति. ‘‘राहु विय चन्दं मम निक्खमनं लातुकामो चायं मे पुत्तोति राहुलोति नामेन भवितब्ब’’न्ति मनसि कत्वा ‘‘राहु जातो, बन्धनं जात’’न्ति पितरा वुत्तो सिक्खाकामो आयस्मा राहुलोयेवेत्थ राहुलो, तस्स माता राहुलमाता, बिम्बं वुच्चति सरीरं, अतिसयवण्णसरीरयुत्तताय बिम्बा, वमिधातुम्हा वा ¶ बो, वस्स बत्तं. यसो वुच्चति परिवारो, कित्ति च, ते धारेतीति यसोधरा, मनादित्ता अस्सो.

३३७-३३९. येसं खत्तियानं धनं सतं होति, कीदिसं तं धनं? निधानगं पथवादीसु निधानवसेन गतं पवत्तं, तेसं धनानं सतं कहापणानं, कित्तकप्पमाणानं? कोटीनं सतं. केन परिच्छेदेन? हेट्ठिमन्तेन हेट्ठिमकोट्ठासेन, हेट्ठिमपरिच्छेदेन वा कोटीनं सतं होति. दिवसवळञ्जो दिवसे दिवसे वळञ्जितब्बो पन कहापणो वीसतम्बणमत्तं होति, ते खत्तिया ‘‘खत्तियमहासाला’’त्युच्चन्ते. महन्तो धनसारो येसन्ते महासाला, लत्तं, अम्बणमत्र एकादसदोणमत्तं.

येसं द्विजानं ब्राह्मणानं निधानगानि निधानवसेन पवत्तानि असीतिकोटिधनानि होन्ति, दिवसवळञ्जो पन कहापणो दसम्बणमत्तं होति, ते द्विजा ‘‘द्विजमहासाला’’त्युच्चन्ते.

निधानगे, वळञ्जे च धने तदुपड्ढे तेसं द्विजमहासालानं धनस्स उपड्ढभागे सति गहपतिमहासाला नाम सियुं, उभयत्रापि हेट्ठिमन्तेनेव धनपरिच्छेदो.

३४०. यो ¶ न हीनो, न चुक्कट्ठो, मज्झिमाधिकारब्यवट्ठितो राजपुत्तसेनापतिमहाकणित्थरादि, सो महामत्तो. महती मत्ता परिच्छेदो यस्स महामत्तो, रूपभेदेन पट्ठानं क्लीवं.

‘‘पकतियं महामत्ते, पञ्ञायं परमत्तनि;

नपुंसकं पधानं तं, एकत्ते तु’त्तमे सदा’’ति.

रभसो च. ‘‘महामत्तो, पट्ठानो चा’’ति तु पुंसकण्डे वोपालितो. पकट्ठे तिट्ठतीति पट्ठानं, यु [अभिधानप्पदीपिका टीका ९८३, ११२३ गाथासुपि पस्सितब्बं].

पञ्चकं मन्तिनिम्हि. मतिप्पधानो सचिवो सहायो. इतिकत्तब्बतावधारणं मन्तो, तंयोगा मन्तिनी. अस्सत्थ्यत्थे इनी, अथ वा मन्तेन नयतीति मन्तिनी, अथ वा मन्तयोगा मन्ति, नेतीति नी, मन्ति च नी चाति मन्तिनी. ‘‘मतिसचिवमन्तिनी’’तिपि पाठो, तदा द्विन्नं तिण्णं वा द्वन्दो. रञ्ञा सह जीवतीति सजीवो. सचते समवेतो भवतीति सचिवो. सच समवाये, वो, इकारागमो च. सब्बकिच्चेसु रञ्ञा मन्तेन अमा सह भवतीति अमच्चो, अमासद्दोयं निपातो सहत्थे च्चपच्चयो. सजीवमत्ते चामच्चसद्दो वत्तति. द्वयं सेनापतिम्हि. सेनं नयतीति सेनानी. चमूनं सेनानं पति चमूपति.

३४१. न्यासादीनं ¶ इणादानदायविभागादीनं विवादानं वोहारानं उपदट्ठरि उपदस्सिते अक्खदस्सो, अक्खे वोहारे पस्सतीति अक्खदस्सो, णो, धम्माधिकरणियो. पुच्छाविवाको, पञ्हविवाकोप्यत्र.

पज्जड्ढं पटिहारे. द्वारे नियुत्तो दोवारिको, णिको, ओकारागमो. पटिहरति विञ्ञायति तेनाति पटिहारो, णो. द्वारे तिट्ठतीति द्वारट्ठो, सकत्थे को. द्वारपालको. द्वारट्ठितो, दस्सकोप्यत्र.

३४२. राजूनं अङ्गरक्खगणो अनीकट्ठोति मतो. ‘‘रक्खिवग्गो तु यो रञ्ञं, सो’नीकट्ठो’भिधीयते’’ति अमरमालायञ्च, अनीकेन समूहेन तिट्ठतीति अनीकट्ठो, णो.

द्वयं महल्लके. कञ्चुकं चोळं, तंयोगा कञ्चुकी. सोकं विन्दतीति सोविदल्लो. विद लोभे, लो, कलोपो. थापति, सोविदोप्यत्र. द्वयं सेवके. पभुनो पच्छा जीवतीति अनुजीवी, णी. सेव सेवने, भू, ण्वु. अत्थीप्यत्र. अत्थ याचनायं. अत्थनमत्थो, आसीसो, तंयोगा अत्थी.

३४३. द्वयं ¶ अधिकमत्ते. गामेसु अधिकत्ता अधिका इक्खा अनुभवनमेतस्स अज्झक्खो, इस्सत्तं. अधिकं करोतीति अधिकतो. इदं द्वयं थायुकगोपानं द्विन्नम्पि नामं. तत्र एकगामे अधिकतो थायुको, बहूसु गामेस्वधिकतो गोपो. वुत्तञ्चामरकोसे ‘‘थायुकोधिकतो गामे, गोपो गामेसु भूरिसू’’ति. [अमर १८.७] रुद्देनापि वुत्तं ‘‘गामेस्वधिकते गोपो, गोट्ठज्झक्खेपि वल्लभो’’ति [चिन्तामणिटीका १८.७].

द्वयं सुवण्णरजतज्झक्खानं द्विन्नम्पि नामं. हिरञ्ञं वुच्चति अकतसुवण्णादि, तत्र नियुत्तो हेरञ्ञिको. कन दित्तिगतिकन्तीसु, निपुब्बो, खो, निक्खो, सुवण्णादिविकारो, तत्र नियोगो निक्खिको. विसेसतो पन सुवण्णज्झक्खे भोरिको. भूरिसद्दो सुवण्णे, तंयोगा भोरिको. रूप्याज्झक्खेनिक्खिको, तस्मा’य’मुभयत्रापि हेरञ्ञिकोति सामञ्ञस्मिंयेव. वुत्तञ्च –

‘‘भोरिको कनकाज्झक्खो,

रूप्या’ज्झक्खो तु निक्खिको’’ति [अमर १८.७].

सस्स अत्तनो विजिगीसभूतस्स देसानन्तरो समन्ततो मण्डलीभूतो राजा सत्तुरुच्चते एकत्थाभिनिवेसितत्ता. ततो परं विजिगीसभूम्येकन्तरिको मित्तो एकत्थकारित्तनोपकारत्ता. अरिविजिगीसमित्तानं पन मण्डलानं बहिभूतो दूरमण्डलट्ठो विजिगीसभूमिया अच्चन्तब्यवहितो बलाधिकोपि यो नापकरोत्युपकारोति वा, स उदासीनो दूरमण्डलत्तेनोपकारत्ता. दूरमण्डले ¶ आसतीति उदासीनो, उपुब्बो आस उपसेवने, यु, अस्सि, दागमो च. सत्तुमभियुञ्जमानस्स विजिगीसस्स सत्तुहिताय यो पण्हिं गण्हति पिट्ठितो वत्तति, सो पण्हिग्गाहो. ‘‘पण्हि पच्छा पदं विजिगीसस्सा’’ति रतनकोसे. ‘‘पण्हिपादे ब्यूहपिट्ठे’’ति [तिकण्डसेस ३.३.१३४] तिकण्डसेसो. ‘‘पण्हि पच्छिमभागे च, पादमूलोमदिट्ठिसु. सेनापिट्ठे कुम्भियञ्चे’’ति तु नानत्थसङ्गहे.

३४४-३४५. दिट्ठन्तं रिपुम्हि. मित्तपटिपक्खत्ता अमित्तो, रपत्यवण्णं रजतेति रिपु, उ, इत्तं, रप, लप, जप, जप्प वचने वा. वेरं विरोधो यस्सत्थीति वेरी, ई, दुक्खहेतुत्ता सपत्ति इव सपत्तो, इवत्थे अकारपच्चयो. अर गमने,ति, भूवादित्ता आगमो. सद सादने, तु, भूवादि, सत्तु, यवादिचुण्णेपि. अर गमने, वेरमरतीति अरि, रस्सन्तो इ. सपत्तादीनं चतुन्नं द्वन्दो, ‘‘ब्यञ्जनो च विसंयोगो’’ति सुत्ते चग्गहणेन एकतकारस्स लोपो च. पतियमत्थनं पच्चत्थो, तंयोगा पच्चत्थिको, पतियं विपरीतगमनं. पन्थ गतियं, चुरादि. परिपन्थो परिस्सवट्ठानं, तंयोगा परिपन्थी. पटिविरुद्धो पक्खो सहायो पटिपक्खो, तथा विपक्खो. न हितो अहितो. हिंसायं रमतीति [परतीति (?)] परो, क्वि. पटिपक्खभावेन अमति गच्छतीति पच्चामित्तो, अम गमने, तो, द्वित्तं. नत्थि एतस्मा ईति उपद्दवोति अनीतो ¶ , मित्तो, तप्पटिपक्खो पच्चनीतो, सो एव पच्चनीको, तस्स को, यथा नियको. विरोधोस्सत्थीति विरोधी, ई. दिस, दुस अप्पीतियं, दिवादि. विदुस्सनसीलताय विद्देसी, द्वित्तं, इस्सेत्तं. दुस्सतीति दिसो, अ. तपच्चये दिट्ठो, धात्वन्तेन सह ट्ठादेसो. द्वेसणो, दुहदयो, दस्सु, सात्तवो, अभिघातीप्यत्र.

द्वयं अनुकूलने. अनुरोधनं अनुरोधो, णो. रुध आवरणे. अनुरूपं पवत्तनं अनुवत्तनं, वतु वत्तने, भू, यु.

३४६. पञ्चकं मित्तसामञ्ञे. मिद स्नेहे, भूवादि, तो, वयसा तुल्यो वयसो, मूलवयोसद्देहि सञ्ञायं सपच्चयो [यपच्चयो (?) पाणिनि ४.४.९१ सुत्तं पस्सितब्बं], सब्बकारियेसु सह वयतीति वा वयसो, वय गमने, सहस्स सो वण्णविपरिययो. सह अयति किच्चेसूति सहायो, अय गमने, सहस्स साभावो, यथा सहधम्मिको. सह वा हानि, अयो वा वुड्ढि यस्स सहायो, तिपदबहुब्बीहि, यथा परक्कमाधिगतसम्पदा. अथ वा हानि च आयो च हाया, निलोपो, ते यस्स अत्थि, सो सहायो, ‘‘सपक्खको, सलोमको’’त्यादीसु विय ससद्दस्स विज्जमानत्थत्ता. सुन्दरं हदयमेतस्साति सुहदयो, अलोपो, द्यस्स जो, सोव सुहज्जो. सह परिसहने. परिसहनं अदुस्सनं, खो, हलोपो, सखा, राजादि, समानो ख्यातो पतीतो वा सखा, यलोपो, समानस्स ¶ च सभावो. सिनिद्धो, स्निद्धो, सवयोप्यत्र. सख्यसत्तपदिना पन मेत्तियं वत्तन्ति. सखिम्हि भवं सख्यं. सत्तहि पदेहि अवगम्यतेति सत्तपदिनं [सत्तपदीन (अमर १८.१२)], इनो.

द्वयं अभेज्जमित्ते. सब्बकालं भजतीति सम्भत्तो, भज सेवायं, भूवादि. दळ्हो थिरो मित्तो दळ्हमित्तो. द्वयं दिट्ठमत्तमित्ते. किञ्चि कालं पस्सितब्बोति सन्दिट्ठो. संसद्दोयमप्पत्थो. दिस पेक्खने, दस्सनं दिट्ठं, तं मत्ता पमाणमेतस्स दिट्ठमत्तको, सकत्थे को.

३४७. द्वयं चरपुरिसे तापसादिरूपेन चरमत्ते. चरति जानाति परचक्कन्ति चरो, अ, चारोपि, णो. गुळ्हपुरिसो गुत्तपुरिसो. यथारहवण्णो, पणिधि, अप्पसपो, फस्सोप्यत्र. तत्रादिद्वयं वाणिजकसिबललिङ्गभिक्खुकच्चायनादिलेसेन थायिनिचरे. इतरे इधागतसदिसत्थे. वण्णो पकारो, यथारहवण्णो यथारहप्पकारो. येन परचक्कं सक्का ञातुं तप्पकारवा इच्चत्थो. पणिधिय्यते ञेय्यमस्मिं पणिधि, इ. अपकट्ठं सप्पति चरतीति अपसप्पो, अ. फुस बाधनफुसनेसु, अ, फस्सो.

तिकं पथिके. पथे गच्छतीति पथावी, वी, दीघो. इको, पथिको. अद्धनि मग्गे गच्छति सीलेनाति अद्धगू. अद्धगोप्यत्र.

द्वयं दूते. दु परितापे, तो. सन्देसं वाचिकं हरत्यनेनेति [हरतीति (?)].

द्वयं ¶ जोतिसिके. गणयतीति गणको, ण्वु. मुहुत्तं कालविसेसं जानातीति मुहुत्तिको, वाग्गहणेन न वुद्धि. संवच्छरो, जोतिसिको, देवञ्ञू, मोहुत्तो, ञाणिको, कातन्तिकोप्यत्र. कतन्तो देवमत्तं, तं जानातीति कातन्तिको.

३४८. द्वयं लेखके. लिख लेखने, भू, ण्वु. लिपेन मस्योपदेसेन भवतीति लिपि, इ, वण्णसण्ठानो, तं करोतीति लिपिकारो. अक्खरचणो, अक्खरचुञ्चुप्यत्र. चन दाने, भू. चञ्चु गतियं.

मेलानन्दा मसिमणि, मेलन्धु वण्णकूपिका;

मसिजलन्तु मेला च, पत्तञ्जनं मसि द्विसु.

लेखनी वण्णतूली च, वण्णकक्खरतूलिका;

वण्णदूतो सोत्थिमुखो, लेखो वाचिकहारको.

काचनकितलिको च, काचनं तन्निबन्धनं;

लेख्यट्ठानं गन्थकुटि, मुद्दा पच्चयकारिनी [तिकण्डसेस २.८.२७, २८, २९].

द्वयं वण्णे. वण्णीयति पकासीयति अत्थो येन, सो वण्णो, वण्ण पकासने. न खरति न खीयतीति अक्खरो, खर विनासे, खि खये वा, तदा अरो. लिखनं, लिपि, लिखि इमे वण्णसण्ठाने वत्तन्ति. लिपिलिखियो इत्थियं.

भेदादयो इमे चतुरो उपाया सत्तुविजयकारणानि. सत्तुविजयमुपगच्छन्ति एतेहीति उपाया. परस्मा विसिलेसनं भेदो.

स्नेहरागापनयनं ¶ , संहासोप्पादनं तथा;

सन्तज्जनञ्च भेदोयं, विञ्ञूहि तिविधो मतो [कामन्दकीयनीतिसार १७.८].

तत्रायं तवानुग्गतेन पवुद्धो पासादतरवो विय अत्तानञ्चोच्छिन्दिस्सतीति सङ्कायं जनितायं स्नेहभत्तिञ्चापनयति. अभिभवनञ्चोपादयति [पद्धञ्चोपादयति (क.)]. अञ्ञस्स च परियपच्चामित्तानुग्गहणस्स मरणमेवन्तो भविस्सतीत्येवंपकारमभिभयनं सन्तज्जनं.

वधोत्थग्गहणञ्चेव, परिक्लेसो तथेव च;

इति दण्डविधञ्ञूहि, दण्डोपि तिविधो मतो [कामन्दकीयनीतिसार १७.९].

परिक्लेसो बन्धनताळनादि.

अञ्ञमञ्ञोपकारानं, दस्सनं गुणकित्तनं;

सम्बन्धस्स समक्खानं, आयतिं सम्पकासनं.

वाचा पेसलया साधु, तवाहमिति चप्पणं;

इति सामविधञ्ञूहि, सामं पञ्चविधं मतं [कामन्दकीयनीतिसार १७.४-५].

‘‘अस्मिं एवं कते इदं अम्हाकं भविस्सती’’ति आसादस्सनं आयतिसम्पकासनं. अप्पणमित्यङ्गस्स दानं.

दानञ्च पञ्चधा सारस्सासारस्स च दब्बस्स गहितस्स समप्पणं, तथागहितस्सानुमोदनं, तथा अपुब्बदानं, तथा ‘‘अमुस्स दब्बं गण्हाहि, तथेव भविस्सती’’ति परसेसु सयं गाहप्पवत्तनं, तथा इणप्पमोचनञ्चेति. यथाह –

‘‘यो सम्पत्तधनोस्सग्गो, उत्तममज्झिमाधमो;

पतिदानं तथा तस्स, गहितस्सानुमोदनं.

दब्बदान’मपुब्बञ्च ¶ , सयं गाहप्पवत्तनं;

देय्यस्स पटिमोक्खो च, दानं पञ्चविधं मत’’न्ति [कामन्दकीयनीतिसार १७.६-७].

एते चत्तारो उपाया मायादीस्वेवन्तोगधा, तथा हि मायोपेक्खा च दण्डन्तोगधा. इन्दजालञ्च भेदे अन्तोगधं. केचि पनाहु

‘‘सामं दानञ्च भेदो च, दण्डो चेति चतुक्ककं;

मायोपेक्खिन्दजालञ्च, सत्तोपाया पकित्तिता’’ति [कामन्दकीयनीतिसार १७.३].

३४९. नाममत्तेन वुत्तानं भेदादीनमिदानि परियायान्याह. तत्र द्वयं भेदे. जप मानसे च [जपो चिन्तनवाचासु (धात्वत्थसङ्गह, १३५ गाथा)], भू, णो. भिदि द्विधाकरणे, णो.

तिकं दण्डे. दण्ड निपातने, चुरादि. सहो वुच्चति बलं, तब्भवं साहसं. दमनं दमो, दीघपटिसेधो.

३५०. सामं सुद्दवग्गे, दानञ्च ब्राह्मणवग्गे कथेस्सति. साम्यादयो सत्तरेवाचरियमते. परम्परोपकारित्ता रज्जस्सङ्गानि. पकट्ठमुपकुब्बन्ति रज्जन्ति पकतियोति चोच्चन्ते. वुत्तञ्च कामन्दकीये –

‘‘साम्य’मच्चञ्च रट्ठञ्च, दुग्गं कोसो बलं सखा;

परम्परोपकारीदं, सत्तङ्गं रज्जमुच्चते [कामन्दकीयनीतिसार ४.१].

अमच्चरट्ठदुग्गानि ¶ , कोसो दण्डो च पञ्चमो;

एता पकतियो वुत्ता, विजिगीसस्स राजिनो.

एता पञ्च तथा मित्तं, सत्तमो पथवीपति;

सत्तप्पकतिकं रज्जं, इच्चाह सूरपूजितो’’ति.

तत्र पोरसेणीनं पधानभावेपि सति रट्ठग्गहणेन, बलग्गहणेन वा गहणसिद्धन्ति नेह विसुं गहणं कतं, अमरकोसे पन द्वीहि गहणे सिद्धेपि पधानत्ताख्यापनत्थं विसुं गहिता. वुत्तञ्हि तत्र –

‘‘साम्य’मच्चो सखा कोसो, रज्जदुग्गबलानि च;

रज्जङ्गानि पकतयो, पोरानं सेणियोपि चे’’ति [अमर १८.१७].

एसञ्च साम्यमच्चरट्ठदुग्गकोसबलसखीनं पुब्बतरस्स गरुत्तं विञ्ञेय्यं, इह तु नामलिङ्गानुसासने अभिधानसत्थे अनुपयोगतो यथाक्कमं गरुत्तं न वत्तुमिच्छतीति ब्यतिक्कमेनोपञ्ञासो कतो.

सुवण्णादिमयभण्डागारं कोसो, पब्बतोदकरुक्खादीहि दुग्गमं पुरं दुग्गं, विजितं जनपदवती भूमि, बलं चक्कं, तञ्च मोलभतसेणिसहायामित्ताटविकभेदेन छब्बिधं. तत्र कमागतं मोलं, वेतनसम्बन्धं भतं, पोरं बलं सेणी, सहायभूतं सहायो, अमित्तभूतं अमित्तं, अटविकं अटविसहायो मित्तं. तदपि सहज्जं, पाकतं, कित्तिमञ्चेति तिविधं. ‘‘लिङ्गे सभावे पकति, पोरामच्चादियोनिसु. तिलिङ्गं गुणसाम्येपी’’ति [ब्याख्यासुधा १.४.२९] रुद्दो.

३५१. पभावादीनं ¶ वसा सत्तियो नाम तिस्सो भवन्ति. सक सत्तियं,ति. तत्र यं सन्धादीनं, भेदादीनञ्च याथावतो अवट्ठापनं, तं ञाणबलं मन्तसत्ति, सकसम्पत्तुप्पत्तियं कोसदण्डा पभूसत्ति, तेसंयेव पभुत्तसम्पादने सामत्थियतो. वुत्तञ्च ‘‘कोसदण्डबलं पभूसत्ति’’रिति [चिन्तामणिटीकायम्पि]. बलवती उस्साहचेट्ठा उस्साहसत्ति. वुत्तञ्च ‘‘विक्कमबलमुस्साहसत्ति’’रिति [ब्याख्यासुधा २.८.१९ चिन्तामणिटीकायम्पि].

पभावादीनं सकारणं सरूपं दस्सेतुमाह ‘‘पभावो’’च्चादि. दमनं दण्डो, तदत्थिया बलम्पि दण्डो. ततो जातं यं तेजो, तं पभावो. ततो जातो यो तेजो, सो ‘‘पभावो’’तिपि पुल्लिङ्गेन योजनीयं. पभवन्ति तेजस्सिनो अनेनेति पभावो, णो. पकट्ठो वा भावो पभावो. कोसो धनं, ततो जातो यो तेजो, सो पभावो नाम. तथा कोसजो तेजो धनेन सत्तूनमुपकरणं. पतपन्ति तेजस्सिनो भवन्त्यनेनेति पतापो, णो.

३५२. द्वयं मन्ते. मन्ता वुच्चति पञ्ञा, सा एतस्मिं विज्जति ताय निप्फादेतब्बत्ताति मन्तो, अथ वा मन्त गुत्तभासने, भावे णो. इतरत्र भावे यु.

सो ¶ मन्तो द्विगोचरो द्विन्नं जनानं विसयभूतो चतुक्कण्णो नाम. चत्तारो कण्णा एत्थ चतुक्कण्णो. सो मन्तो तिगोचरो तिण्णं जनानं विसयभूतो छक्कण्णो नाम. मन्तो नाम चतुक्कण्णो वा छक्कण्णो वा कत्तब्बो, न ततो परन्ति द्विन्नमेवेत्थ गहणं. अमरकोसे पन छक्कण्णोपि पटिक्खित्तो. वुत्तञ्हि तत्थ ‘‘अछक्कण्णो, यो ततियाद्यगोचरो’’ति [अमर १८.२२].

सब्बपारिसदत्ता [सब्बपाठिपदत्ता (क.)] ब्याकरणस्स सोतूनं समयन्तरेस्वपि पटुभावजननत्थं इधानागतापि छग्गुणादयो आनेत्वा कथेतब्बा. वुत्तञ्हि –

‘‘सब्बपारिसदं [सब्बपाटिपदं (क.)] हिदं, सब्बसत्थ’मतो मतं;

निस्सीयते क्वचि किञ्चि, सब्बेस’मत्र वादिन’’न्ति.

यथा छग्गुणा सन्धि विग्गहयानासनद्वेधासया [अमर १८.१८-९]. तत्र सन्धि उपहारलक्खणो तिविधो कोसदण्डभूमिप्पदानहेतुको. अपहारलक्खणो विग्गहो, सोपि तिविधो पकासयुद्धं कूटयुद्धं तुण्हियुद्धन्ति.

परब्यसनतासपत्तिदेसकालात्युदयावापयानमत्तेन साद्धे परस्मिं कताचरस्स गुणानुरत्तपकतिस्स विजिगीसस्स यात्रा यानं [कामन्दकीयनीतिसारे ११ सग्गे पस्सितब्बं], तञ्च विग्गय्हयानं सन्धाययानं सम्भूययानं पसङ्गयानं उपेक्खिययानमिति पञ्चविधं. पतिग्गाहीनं निग्गय्ह, सन्धाय, उपेक्खिय वा यं यानं, तं विग्गय्हयानादि. यदा न सक्कोति, तदा सामन्तेहि सहेकीभूय यानं सम्भूययानं. अञ्ञत्र गन्तब्बे अञ्ञस्मिं पसङ्गतो गमनं पसङ्गयानं.

‘‘न मं परो हन्तुं समत्थो, नाहम्पि पर’’मिति कालादिके परिक्खित्वा विजिगीसस्स दुग्गादीनि वड्ढयतो ठिति आसनं, तदपि विग्गय्हासनसन्धायासनादिभेदेन पञ्चविधं. बलीनं ¶ सत्तूनं मज्झे काकक्खिवा’लक्खितस्सो’भयत्र वचनेनत्तनो समप्पणं द्वेधं. अञ्ञतरेन वा बलवतरेन सन्धि, अञ्ञतरेन अबलेन विग्गहो द्वेधं. सत्तुनो वा पकतीहि सन्धाय यो तेन विग्गहो, सत्तुनेव वा यो सन्धिविग्गहसमुदायहेतुको [सत्तुनोव वा सन्धिविग्गहसमुदायहेतुनो (ब्याख्यासुधा १.८.१८)] दुग्गासयस्स ब्यापारो, सोपि द्वेधं. परसन्तानमप्योभयवेदनानं उभयतो वुत्ति द्वेधमुच्चते.

‘‘उच्छिज्जमानो रिपुना निरुपाय पतिक्रियो. सत्तिहीनो समासियते’’ति [ब्याख्यासुधा १.८.१८] हीनेनाञ्ञस्स बलवतरस्स धम्मविजयिनो समासयनं [बलवता अरिना उच्छिज्जमानस्स हीनसत्तिनो यं बलवधम्मविजयिसमासयनं (ब्याख्यासुधा १.८.१८)], तस्सेव वा बलिनो सत्तुनो कोसादिप्पदानेन आसयनं आसयो वुच्चते. एते छग्गुणा.

यस्मिञ्च गुणे ठितो विजिगीसो सक्कोत्यत्तनो अट्ठवग्गियकम्मानि पवत्तयितुं, परस्स चेतान्युपहन्तुं, गुणमाधिट्ठेय्य, सा वुड्ढि.

कसि वणिज्जं पथो दुग्गं, सेतु कुञ्जरबन्धनं;

खन्याकरधनादानं, सुञ्ञानञ्च निवेसनं [कामन्दकीयनीतिसार ५.७८].

इत्येसो अट्ठवग्गो.

यस्मिं वा गुणे ठितो सकम्मानं वुड्ढि, खयं वा नाभिपस्सति, तं ठानं, यस्मिं वा गुणे ठितो सकम्मानमुपघातं पस्सति, तस्मिं न तिट्ठेय्य, सो खयो, अयं नीतिवेदीनं तिवग्गो [अमर १८.१९]. इतरेसं धम्मत्थकामा तिवग्गो.

द्वयं ¶ गुय्हे. रहसि भवं रहस्सं, सो, रहे वा भवं रहस्सं. गुह संवरणे, कम्मनि यो. इदं द्वयं तीसु. रहस्सो मन्तो, रहस्सा वाचा, रहस्सं मन्तनं.

३५३. पञ्चकं विजने. विजि पुथभावे, भू, तो च. विचि विवेचने, पुथुभावे च वा. ‘‘विवित्तं तीसु विजने, असंपक्कपवित्तेसू’’ति रुद्दो. विगतो जनो अस्माति विजनो. छादेतीति छन्नो. छद संवरणे. वित्तमरहतीति रहो, रह चागे, रमन्ते अस्मिन्ति वा रहो, वण्णविकारो. ‘‘रहो निधुवने चापि, रहो गुय्हे नपुंसक’’न्ति [ब्याख्यासुधा २.८.२२] रभसो. दुतियो रहोसद्दो अब्ययं. निस्सलाका, उपासुप्यत्र. निस्सलाका थी, उपासु अब्ययं.

द्वयं विस्सासे. सस पालने, णो. सम्भ विस्सासे. ‘‘विस्सम्भो केलिकलहे, विस्सासे’पणयेपि चे’’ति [चिन्तामणिटीकायम्पि] रुद्दो.

द्वयं न्याये. युज समाधिम्हि, समाधि अभ्युपगमो, तो. उपगन्तब्बत्ता उपायिकं. उपाया सकत्थे इको, ओपायिकं, ओपयिकम्पि [पाणिनि ५.४.३४ (गण)], लब्भं, भजमानं, अभिनीतं, न्यायं, ञायंप्यत्र.

३५४. सिलोकं ओवादे. अवपुब्बो वद वियत्तियं वाचायं, भावे णो. सास अनुसिट्ठिम्हि,ति, आस्सि, अनुसिट्ठि ¶ . अनुसासते अनुसासनं. पुमवज्जे इत्थियं, नपुंसके च. एत्थ च एकस्सेवत्थस्स भिन्नलिङ्गेहि तीहि नामेहि कथनं न केवलं वाच्चलिङ्गोयेव सद्दो, अथ खो वाचकलिङ्गोप्यत्थीति दीपनत्थं.

द्वयं आणायं. आण पेसने, भावे अ, आणा, इत्थी. अववादो, निद्देसो, सिट्ठिप्यत्र. द्वयं बन्धने. दा दाने, भावे यु, दा अवखण्डने वा, वियोगदानतो उद्दानं.

३५५-३५६. द्वयं अपराधे. अपगच्छन्त्यनेनाति आगु, णु, पलोपो, रस्सस्स दीघता, नपुंसके आगु. अपगतो राधो येन अपराधो, राध संसिद्धिम्हि. द्वयं राजगय्हे. किर विकिरणे, कत्तरि अ, अत्तं. बल पाणने, इ. करसाहचरियतो बलि पुल्लिङ्गे. भागधेय्योप्यत्र. भागासकत्थे धेय्यो [पाणिनि ५.४.३६ (वा.)], भागत्तेन तिट्ठतीति वा भागधेय्यो, इयो.

द्वयं तुट्ठिदाये. मनोरथपुण्णत्ता पत्तब्बो भागो पुण्णपत्तो. तुस्सनं तुट्ठो, सोस्सत्थीति तुट्ठी, तेन दातब्बो दायो तुट्ठिदायो, आकारन्तानमायो.

छक्कं ¶ पाभते. तथा हि –

‘‘हेमं सीहासनं वेसं, वुत्तं भद्दासनं तथा;

उपायन’मुपग्गय्हं, पाभतञ्चो’पदा थिय’’न्ति.

सिलोकाद्धं नाम अमरमाला.

उपगन्त्वादातब्बाति उपदा, अ, इत्थी, तं तमत्थं पत्थेन्तेहि आभरीयते आनीयतेति पाभतं, पत्थनत्थजोतकोयं पसद्दो. उपेय्यतेति उपायनं, इतो यु, उपगच्छति येनाति वा उपायनं. कुच सङ्कोचने, णो, विगतो कोचो येन उक्कोचो. पण्णेन सत्थपण्णेन सद्धिं आकरीयते आनीयतेति पण्णाकारो, अञ्ञत्र उपचारा. पहिणन्त्यनेनेति पहेणकं, हि गतियं, यु, सकत्थे को. पदेसनं, उपग्गय्हं, उपहारोप्यत्र.

गुम्बादिदेय्यो गुम्बघटादिको [गुम्बघटादितो (?)] देय्योसुङ्कं, अनित्थी, गुम्बो नाम जलथलमग्गादीसु लद्धब्बभागो, तथा घट्टोपि, समानत्था हेते. आदिना पाभतम्पि सङ्गण्हाति. सुङ्क गमने, सुङ्कति येन, तं सुङ्कं. गमु गमने, बो, अस्सु, गुम्बो. द्वयं गामजनपदादितो लद्धब्बभागे. अय गमने, णो, आयो. अपच्चये अयो. धनानं सम्पत्तकाले आगमो धनागमो.

३५७. द्वयं छत्तसामञ्ञे. आतपतो सूरियालोकतो तायतीति आतपत्तं, तो. छादयतीति छत्तं, छद ¶ अपवारणे, तो, त्रणपच्चये छत्रं, हेमं सुवण्णखचितं रञ्ञं राजूनं आसनं सीहासनाख्यं. सीहाकतिप्पधानत्ता सीहाकतिप्पधानं आसनन्ति विग्गहो.

द्वयं चामरे. वालेन कता बीजनी वालबीजनी. चमरो मिगो तस्सेदं चामरी. ‘‘चामरा चामरं रोमं, गुच्छकञ्चावचूलक’’न्ति [तिकण्डसेस २.८.४०६] तिकण्डसेसो. पकिण्णकंप्यत्र. पकरीयते विक्खिपते पकिण्णकं, सकत्थे को.

३५८. खग्गादयो इमे पञ्च राजूनं ककुधभण्डानि भवन्ति. कुक आदाने, धो, वण्णविपरिययो. रञ्ञो गमनकाले सदा आदातब्बतो ककुधानि च तानि राजधनत्ता भण्डानि चेति ककुधभण्डानि.

३५९. द्वयं पुण्णघटे. जलपुण्णत्ता भद्दो कल्याणो कुम्भो भद्दकुम्भो. द्वयं हेमभाजने. भर भरणे, भरणं धारणं पोसनञ्च, धारणत्थस्स भरतिस्स भिङ्गादेसो, भरति दधाति उदकन्ति भिङ्गारो, आरो. करको, कुण्डिकाप्यत्र.

हत्थी ¶ च अस्सो च रथो च पत्ति च, तेसं समूहो हत्थिस्सरथपत्ति चतुरङ्गिनी सेनात्युच्चते, सेनङ्गत्ता समाहारद्वन्दोयं. चत्तारि अङ्गानि यस्सं संविज्जन्ति, सा चतुरङ्गिनी, ई, इनी.

३६०. दन्त्यन्तं हत्थिनि. कुञ्जो हनु, दन्तो च, तंयोगा कुञ्जरो, अतिसये रो, कुं पथविं जरापेतीति वा कुञ्जरो, अलुत्तसमासो, कुञ्जे वा गिरिकूटे रमति, कोञ्चनादं नदन्तो वा चरति, कुं वा पथविं तदाघातेन जरयतीति कुञ्जरो. वारयति परबलं वारणो, नन्दादीहि यु. हत्थयोगा हत्थी. मतङ्गस्स इसिनो अपच्चं मातङ्गो, महन्तं अङ्गं सरीरमेतस्साति वा मातङ्गो, ह नलोपो, अस्साकारो च. द्वे रदा दन्ता यस्स द्विरदो, ‘‘रद विलेखने दन्ते’’ति हि नानत्थसङ्गहे. गज सद्दे, गजतीति, अ. नगो पब्बतो, सो विय दिस्सतीति नागो, णो. करेन, मुखेन चाति द्वीहि पिवतीति द्विपो. इ गमने, भो. दन्तयोगा दन्ती. सट्ठिहायनो, दन्तावलो, अनेकपो, मतङ्गजो, करी, थम्भेरमो, पद्मी, महामिगो, पीलु, सिन्धुरो, दीघमारुतो, राजीवो, जलकक्खो, निल्लुरो, करटी, वरङ्गो, सुप्पकण्णो इच्चादीनिपि हत्थिनो नामानि. सट्ठिवस्सिकत्ता, जातिया सट्ठिवस्सकाले थामेन हायनतो वा सट्ठिहायनो.

वनकरीनं यो यूथजेट्ठो, सो सयूथानं जेट्ठत्ता यूथजेट्ठो. सयूथे पाति रक्खतीति यूथपोति चोच्चते.

३६१. काळावकादीनि ¶ एतानि हत्थिराजानं कुलानि. कलम्बते सद्दायतेति काळावको, ण्वु, मलोपो. गङ्गायं जातो गङ्गेय्यो, ठानवसेन सा सञ्ञा. पण्डरवण्णताय पण्डरो. वण्णवसेन तम्बवण्णताय तम्बो. पिङ्गलवण्णताय पिङ्गलो. गन्धयुत्तताय गन्धो. मङ्ग गमनत्थो, सोभनगमनयुत्तताय मङ्गलो, अतिसायने, पसंसायं वा लो. हेमवण्णताय हेमो. उपोसथकुले जातत्ता उपोसथो, उपगन्त्वा अरयो उसतीति वा उपोसथो, थो, उस दाहे, उपपुब्बो वस निवासे वा, वस्सो, उपोसथो, तिथीविसेसो च. छब्बण्णदन्तताय छद्दन्तो. एतेसञ्च काळावको दसन्नं पुरिसानं बलं धारेति, गङ्गेय्यो दसन्नं काळावकानं, एवं यावछद्दन्ता नेतब्बो, सम्मासम्बुद्धो पन दसन्नं छद्दन्तानं बलं धारेति, तेनेव भगवा काळावकहत्थिगणनाय कोटिसहस्सबलं धारेति, पुरिसगणनाय दसन्नं पुरिसकोटिसहस्सानं बलं.

३६२. पादो करिपोते. पञ्चवस्सानि याव कलभो, कल सङ्ख्याने, अभो, कलभो, ळत्ते कळभो, मातापितूहि ¶ भरितब्बत्ता भिङ्को, भरतिस्स भिङ्को. करिसावकोप्यत्र. पादो मत्तमातङ्गे. दानं पभिन्नो यस्स पभिन्नो. मज्जतीति मत्तो, मद उम्मादे. गजे जायतीति गज्जो, ण्यो, मदो. सो सञ्जातो यस्स गज्जितो.

द्वयं हत्थिसमूहे. हत्थीनं समूहो हत्थिघटा. गजानं समूहो गजता, गामजनबन्धुसहायादीहि ता. पादो हत्थिनियं. हत्थयोगा हत्थिनी, ई, इनी. कण सद्दे, इरु, सकत्थे को. करेणुकातिपि, तदा करयोगा करेणुका, इणु. करिणी, धेनुका, वसा, करेणुप्यत्र.

३६३. हत्थिसिरोपिण्डा हत्थिनो सिरसि द्वे पिण्डा कुम्भाख्या. के सिरसि भवतीति कुम्भो, अस्सु, निग्गहीतागमो च. द्विन्नं पन कुम्भानं मज्झिमं विदु नाम [अमर १८.३७]. अङ्कुससङ्घातं विन्दत्यस्मिन्ति विदु, पुमे, उ. द्वयं कण्णमूले. चूळ निमज्जने, ण्वु, चूळिका, चुद सञ्चोदने वा, चोदेन्ति एत्थ अङ्कुसादीहि अदन्तन्ति चूळिका, दस्स ळो, ण्वु.

आसते अस्मिन्ति आसनं, खन्धदेसो. खन्धो एव देसो खन्धदेसो, तस्मिं. द्वयं पुच्छमूले. पुच्छस्स मूलं हेट्ठिमभागो.

३६४. तिकं गजबन्धनथम्भे. आलन्त्यस्मिं, अनेन वा बन्धन्ति आलानं, यु. आपुब्बो बन्धनत्थो लाधातु. आहनन्ति ¶ बन्धन्त्यस्मिं, अनेन वा आळ्हको, हनधातु, नस्स ळो, वण्णविपरिययो च, ण्वु. थम्भ पटिबन्धने. बन्धोप्यत्र.

तिकं सङ्खले. अनित्थी तूति त्वन्तं लिङ्गपदं. गल सेचने. निगळति बन्धति येनाति निगळो, अ, कत्तुसाधनं वा. अदि बन्धने, अन्दतीति अन्दुको. ण्वु, अस्सु. भुसं खलत्यनेन सङ्खलं, कटि वत्थबन्धनेपि, ‘‘थीकटीवत्थबन्धेपि, निगळे सङ्खलं तिसू’’ति [चिन्तामणिटीका १८.४१] रभसो. सङ्खलिकाप्यत्र.

द्वयं गजगण्डे. गण्ड वदनेकदेसे, अधातूनम्पि धातूसु पाठो, धातु हि क्रियत्थो. गण्डो कपोलसामञ्ञेपि. कट वस्सावरणेसु, अ. द्वयं करिमदजले. दीयतेति दानं. मद उम्मादे, करणे अ.

३६५. द्वयं हत्थिकरे. सोण वण्णगतीसु, डो, सोड गब्बे वा, निग्गहीतागमो, णो च. द्वीसु द्वेपि.

द्वयं सोण्डग्गे. करस्स सोण्डस्स अग्गं. पुस पोसने. खरो, सस्स को, उस्सोत्तं, पुस वुड्ढिम्हि वा, भू, पुस स्नेहसेचनपूरणेसु वा, कियादि, पुस धारणे वा, चुरादि.

हत्थिस्स कायमज्झम्हि बन्धनरज्जु कच्छा नाम. कच बन्धने, छो. दूसा, वरत्राप्यत्र. कुथो नाम हत्थिपिट्ठत्थरितचित्रकम्बलं, सो आदि येसन्ते कुथादयो. कुथादयो एव कप्पनो नाम भवन्ति. कप्प सामत्थिये, सज्जनायञ्च ¶ , करणे यु. कप्पनापि. कच सज्जनायं, थो, कुथो, तीसु. ‘‘नपुंसकमत्थरणं, थी पवेणी कुथं तिसू’’ति [चिन्तामणिटीका १८.४२] हि वोपालितो. पवेणी, अत्थरणं, वण्णो, परित्थोमोति एते कुथपरियाया.

३६६. द्वयं राजारहे हत्थिनि. राजानमुपगन्त्वा वहितुमरहतीति ओपवय्हो, अरहत्थे ण्यो. राजानं वहितुं अरहतीति राजवय्हो, ण्यो. द्वयं कप्पितहत्थिनि. सज्जा सज्जना सञ्जाता यस्मिं सज्जितो. कप्पा कप्पना सञ्जाता यस्मिं कप्पितो. एतस्मायेव पाठा सज्जकप्पा सज्जनाकप्पनानं परियायाति ञेय्या.

हत्थिनो पादे विज्झनकण्टको ‘‘तोमरो’’त्युच्चते. तुज्जतेनेनेति तोमरो, तुद ब्यथने, अरो, दस्स मो, ओत्तं. वेणुकंप्यत्र [कोत्रं वेणुकमालानं (अमर १८.४१)], क्वचि वेळुकन्तिपि पाठो.

३६७. हत्थिनो कण्णमूलम्हि विज्झनकण्टको ‘‘तुत्त’’मित्युच्चते. तुज्जतेनेनेति तुत्तं, तो. हत्थिनो मत्थकम्हि विज्झनकण्टको ‘‘अङ्कुसो’’त्युच्चते. अङ्कते अनेनेति अङ्कुसो, अङ्क लक्खणे, सो, अस्सु.

पज्जद्धं ¶ हत्थारोहे. मडि भूसायं, हत्थिं मण्डयति रक्खतीति हत्थिमण्डो, सोव हत्थिमेण्डो, मि हिंसायं वा, डो, निग्गहीतागमो. हत्थिं पाति रक्खतीति हत्थिपो, कम्मनि णो. हत्थिं गोपयति रक्खतीति हत्थिगोपको. गुप रक्खणे, सकत्थे को. आधोरणो, निसादिनोप्यत्र.

३६८. मातङ्गहयादीनं गमनादिक्रियासिक्खापको आचरियो ‘‘गामणीयो’’त्युच्चते. गमनं गामो, भावे णो. हत्थादीनं गमनक्रिया गामो, तं नेति सिक्खापेतीति गामणीयो, अञ्ञक्रियासिक्खापनेतूपचारा, गामं वा हत्थादिसमूहं नेतीति गामणीयो, गमनं वा सिक्खापेतीति गामणीयो, सब्बत्र नस्स णत्तं.

पादद्वयं अस्से. हय गतियं, अ. तुरं सीघं गच्छतीति तुरङ्गो, क्वि, बिन्दालोपो, लोपे सति तुरगो. वाह पयतने, अ. अस भक्खने, अ. सिन्धूनमदूरभवो जनपदोपि सिन्धवो, तत्र भवो सिन्धवो, संयोगन्तत्ता न वुद्धि. घोटको, पीति, तुरङ्गमो, वाजी, गन्धब्बो, सत्तिरिच्चादीनिपि अस्से. घुट परिवत्तने, ण्वु. पा पाने,ति. ‘‘पाने थी पीति अस्से सो’’ति रुद्दो. वाजयोगा वाजी, ई. ‘‘एसञ्च पुब्बं पक्खो आसि, स तु देवेत्यत्यत्थितेन सालीभूतमुनिना सक्कं पयोजेत्वा वजिरछेदितो’’ति निकायन्तरिया. सप समवाये,ति, सत्ति, सामत्थियेपि.

३६९. तस्स ¶ अस्सस्स भेदो विसेसो अस्सतरो, अस्सं तरतीति अस्सतरो, तर अतिक्कमने, तरपच्चयेनापि सिद्धं. पधानस्सभूमिभवो सुजातिको अविकारी कुलीनको अस्सो आजानीयो नाम, आ भुसो कारणाकारणं जानातीति आजानीयो, अनीयो, ण्यपच्चयेन वा सिद्धं, तदा ‘‘कियादितो ना’’ति नागमो, ईकारागमो च [चिन्तामणिटीका १८.४४ गाथायम्पि पस्सितब्बं]. कुले सम्भूतो कुलीनको, ईनो, सकत्थे को. सङ्गामे गरुसत्थप्पहारेन निहतो सन्तो पियो सामिकं न जहति सुखं वहनसीलो यो अस्सो, सो विनीतसद्देनोच्चते. विसेसेन दम्मतं नेति यन्ति विनीतो.

द्वयं अस्सपोते. कस गमने, ओरो, अस्सि, किञ्चि सरतीति वा किसोरो, बिन्दुलोपो, अस्सो च, हयो एव बालत्ता हयपोतको, अप्पत्थे को.

३७०. द्वयं अथामस्से. घुट परिवत्तने, ण्वु, घोटको, अस्ससामञ्ञेप्ययं, खरं गच्छतीति खलुङ्गो, सो एव खळुङ्को, गकारस्स ककारं कत्वा, रस्स लो, ळत्तमुत्तञ्च, खळुकोतिपि. जवेन सब्बेसमधिको अस्सो जवनो, यु.

द्वयं ¶ कवीतिख्याते मुखबन्धने. मुखमातिट्ठतीति मुखाठानं. खे मुखविवरे लीनो खलीनो. ‘‘कविका तु खलीनोति [खलीने थी (?)], कवियं कथनंत्यपी’’ति रभसो. कवि, कविकाप्यत्र. कु सद्दे. इ, ई च, सकत्थे को. वासद्देन नपुंसकत्तं समुच्चिनोति. वुत्तञ्च अमरकोसे ‘‘कविका तु खलीनो’नित्थी’’ति [अमर १८.४९].

अस्साभिताळिनी वेत्तविकतादि कसा नाम. कस गमने, अ, करणसाधनं.

३७१. अस्सस्स नासागतरज्जुम्हि कुसा, कुस सिलेसने. द्वयं अस्सायं. वल संवरणे, वो, ळत्तं, आ, वळवा. असतीति अस्सा, ‘‘इत्थियमतियवो वा’’ति अ, आ च, अस्सा. वामीप्यत्र. द्वयं खुरे. खुर छेदने. सं सुखं फरत्यनेन सफं, नेरुत्तो. ‘‘सफं क्लीवे खुरो पुमा’’ति [अमर १८.४९] अमरकोसो.

द्वयं पुच्छमत्ते. पुच्छ पमादे. न गच्छतीति नङ्गुट्ठो, अङ्ग गमने, ठो, अस्सु, द्वेपि अनित्थियं. लूमंप्यत्र. द्वयं केसवति नङ्गुट्ठमत्ते, न तु हत्थिनो एव. वालसमूहयोगा वालहत्थो, यथा केसहत्थो चये, तथात्रापि. वालो धिय्यते अस्मिन्ति वालधि, इ.

एत्थानागतापि अस्सस्स धाराख्या [धावाख्या (क.)] पञ्च गतियो कथेतब्बा. यथा –

अक्कन्दितं ¶ धोरितकं, रेचितं वग्गितं प्लुतं;

गतियोमे पञ्च धारा [धावा (क.)], अस्सानं विञ्ञुना मता [अमर १८.४८-९].

तत्थ वित्थम्भा समावगति अक्कन्दितं, कन्दि गतिसोसनेसु, तो. ततो अधिका चतुरागति धोरितकं, धोर गतिचातुरिये, तो, सकत्थे को. मण्डलिकायानेन गमनं रेचितं, रिच वियोजनसम्बज्झनेसु, सम्बज्झनं मिस्सनं. वेगेन परिक्खित्तो परिचरणं वग्गितं, वग्ग गमनत्थो. तुरं समेन गमनं प्लुतं, प्लु गतियं. त’दुत्त’मस्ससत्थे ‘‘समो’धिको लयो वेगी, तुरितस्सो भवे कमा’’ति.

३७२. द्वयं युद्धत्थे चक्कयुत्तयाने. सन्द गमने, सन्दते गम्यतेनेनेति सन्दनो, यु. रमतेनेनेति रथो, थो, मलोपो. सतङ्गोप्यत्र. सतमङ्गान्यस्स.

यं न रणाय युद्धत्थं चक्कयुत्तं यानं, अपि तु कीळाभमनाद्यत्थं, सो पुस्सरथो. वुत्तञ्च अमरकोसे ‘‘अयं पुस्सरथो चक्क-यानं न समराय य’’न्ति [अमर १८.५१]. पुस पासने, सो, पुसनामकेन फलविसेसेन युत्तो रथो पुस्सरथो, पुस्सनक्खत्तेन कतो, सज्जितो वा रथोति पुस्सरथो.

ब्यग्घस्स चम्मावुतो परिक्खित्तो रथो वेय्यग्घो नाम, ब्यग्घस्स विकारो चम्मं वेय्यग्घं, णो, तेन परिवुतो रथो वेय्यग्घो, णो, उभयत्रापि वुड्ढागमो. ‘‘पच्चत्तं [पच्चत्थं (क.)] अयन्ति ¶ गच्छन्तीति पच्चया’’ति वचनत्थतो पच्चत्तमेव [पच्चत्थमेव (?)] पच्चया भवन्ति, यथा कारितन्तस्मापि पयोजकवसेन अनेककारितपच्चया. दीपिनो चम्मावुतो रथो दीपो नाम, दीपिनो विकारो चम्मं दीपं, णो, तेन परिवुतो रथो दीपो, णो.

३७३. द्वयं पुरिसयुत्तयाने. सि सेवायं. सुखत्थिकेहि सेवीयतेति सिविका, ण्वु, वागमो, इत्तं, कितपच्चया हि येभुय्येन कम्मादीसुपि वत्तन्ति, किच्चपच्चया च कत्तरिपि, यथा ‘‘विनयो, निस्सयो, तपनीया धम्मा’’त्यादीसु, महापदेसेन वा कितकिच्चपच्चयानं कत्तुकम्मादीस्वपि पवत्ति वेदितब्बा, सिवं करोतीति वा सिविका, इको. याप्येहि अधमेहि यायते निय्यतेति याप्ययानं. ‘‘याप्य पानीयके निन्द्ये’’ति हि नानत्थसङ्गहे.

द्वयं सकटे. अनित्थी तूति त्वन्तं लिङ्गपदं. सक सत्तियं, अटो. अन पाणने, करणसाधनं, नत्थि नासा यस्साति वा अनं, सालोपो, रस्सो च. क्लीवे’नं, सकटो, नित्थीत्यमरकोसो [अमर १८.५२].

द्वयं चक्के. करोति गमनमनेनेति चक्कं, द्वित्तं, चक्कादि. रथस्स अङ्गं रथङ्गं. तस्स चक्कस्स अन्तो अवसानं नेमि, सा नारियं इत्थियं. नयति चक्कं नेमि. या भूमिं फुसति, नी नये, मि, ईपच्चये नेमी च. पधिप्यत्र.

३७४. तम्मज्झे ¶ तस्स रथस्स, चक्कस्स वा मज्झे चक्काकारो पिण्डिका, यस्सं सब्बानि कट्ठानि आसज्जन्ते. पिण्डिकासाहचरिया नाभि इत्थी, ईपच्चये नाभी च. सब्बानि कट्ठानि पिण्डेतीति पिण्डिका, पिण्ड सङ्घाते, अ, सकत्थे को. पिण्डीपि, नाभि वियाति नाभि.

रथस्स युगकट्ठं यत्र आसज्जते, स युगन्धरो. कुं पथविं वुणोति अच्छादयतीति कुब्बरो, वु संवरणे, रो, उस्सत्तं. युगं धारेतीति युगन्धरो, सञ्ञायं अ, अभिधाना रस्सो.

अक्खो सकटं, तदवयवो वा, तथा चाहाजयाचरियो –

‘‘अक्खो विभीटके निम्बे, सकटे च ब्यवहारे;

रथस्सावयवे कस्से, पासकेप्य’क्ख’मिन्द्रिये’’ति.

तस्सग्गगते कीले आणी, इत्थी. अणिपि, ‘‘सीमास्सिक्खग्गकीलेसु, अणी आणी इमे द्विसू’’ति [चिन्तामणिटीका १८.५६] हि रुद्दो द्विधा पठति. ‘‘अणी आणी च अक्खग्गकीले सीमास्सिसु मता’’ति च नानत्थसङ्गहोपि. अस्सि कोणो. अण सद्दे, णि. पुब्बपक्खे न वुड्ढि, अन पाणने वा, णत्तं. कण्डकादिसत्थेहि परिरक्खणत्थं कतो रथावरणो वरुथो, यो ‘‘रथगुत्ती’’ति ख्यातो. वर वरणे, वरणमेत्थावरणं, यथा रथं थिरत्थं तट्ठञ्च गोपतीति रथगुत्ति, इत्थी, ‘‘गुत्ति कारागारे वुत्ता, भूगते रक्खणे यमे’’ति नानत्थसङ्गहे.

३७५. रथादीनं ¶ पुरोभागसङ्खाते मुखे धुरो. धर धारणे, अस्सु, यानमुखंप्यत्र. अक्खोपक्खरादयो रथस्स अङ्गा नाम. अक गमने, खो, अक्खो, द्विन्नं रथचक्कानं अन्तरगतो कट्ठविसेसो. उपरि करीयतेति उपक्खरो, अक्खस्सोपरि कट्ठविसेसो. अमरकोसे पन उपक्खरसद्दस्स सब्बरथावयववाचकत्तं वुत्तं ‘‘रथङ्गन्तु उपक्खरो’’ति [अमर १८.५५]. ‘‘अपक्खरो’’तिपि पाठो.

सब्बस्मिं हत्थादिके वाहने यानादित्तयं, सब्बत्र करणसाधनं. योजनीयं युज्जतेनेनाति योग्गं, ण्यो. पत्तं धोरणञ्चात्र. पत गतियं. धोर गतिचातुरिये, एत्थापि करणसाधनं.

३७६. चतुक्कं सारथिम्हि. रथेन चरति सीलेनाति रथचारी. सवति पेरयतीति सूतो, सू पेरणे, तो. अज गमने. पाजेतीति पाजिता, रितु, दीघादि. सर गतियं, थि, रथेन सह गच्छतीति वा सारथि, इण, अञ्ञत्रोपचारा. नियन्ता, यन्ता, खत्ता, सब्यट्ठो, दक्खिणत्थो, रथकुटुम्बीप्यत्र.

‘‘नियन्ता पाजिता यन्ता, सूतो खत्ता च सारथि;

सब्यट्ठो दक्खिणत्थो च, सञ्ञा रथकुटुम्बिनो’’ति [अमर १८.५६-६०]. –

वुत्तं ¶ . अत्थतो सारथिनो रथकुटुम्बी च नामं. रथनायके तु ‘‘रथारोहो च रथिको रथी’’ति पच्छा वक्खति. खुदि संपेसने, तु, दस्स तो, उस्सत्तञ्च, खत्ता.

तिकं रथे पाजिततरा अञ्ञे योधा, अत्र ये ‘‘रथनायका’’तिप्युच्चन्ते. रथमारोहतीति रथिको, रथी च. रथेन युज्जतीति वा रथिको, रथी च. रथिनो, सन्दनारोहोप्यत्र. द्वयं योधे. युध सम्पहारे, णो. भटति युज्जतीति भटो, अ. क्वचि योद्धोपि.

३७७-३७९. चतुक्कं पदातिके. पदेहि अतति अजतीति पदाति, अत सातच्चगमने, इ. पद गमने. पदतीति पत्ति, इ, द्वित्तं. पदेन अदतीति वा पत्ति, अलोपो, दस्स तो, इमे द्वे, वक्खमाना द्वे च पुमे. पदेहि गच्छतीति पदगो, पदिको. पादातिको, पदाजयोप्यत्र [पादेहि अजति ई, रस्सो च पदाजिं (चिन्तामणिटीका १८.६६)].

छक्कं ¶ कवचे. नह बन्धने, करणे णो. कङ्क गत्यत्थो, अटो. वरीयते तन्ति वम्मं, वर वरणे, वर इच्छायं वा, मो, रस्स मो. कच बन्धने, अ, वकारवण्णागमो. उरो छादयन्त्यनेनाति उरच्छदो. वासद्दो द्विन्नं पुन्नपुंसकत्तं सम्पिण्डेति. जल दित्तियं, ण्वु. तनुत्तं, दंसनं, जगरोप्यत्र. ‘‘जगरो कङ्कटो योगो, सन्नाहो च उरच्छदो’’ति [चिन्तामणिटीका १८.६४ ब्याख्यासुधा २.८.६४] वोपालितो.

तिकं कतसन्नाहे. चम्मेन सम्मा नद्धवाति सन्नद्धो, धो. सज्जु गतियं, अ. वम्मेन नद्धवा वम्मिको. दंसितो, उरच्छदिको, ब्यूळ्हकङ्कटो, जगरिकोप्यत्र.

द्वयं परिदहिते वत्थादो. आपतिपुब्बो मुचधातु परिदहने, उभयत्थ तो, भूजादि. पक्खे ‘‘सुसपचसकतो क्खक्का चे’’ति सुत्ते चकारेन तपच्चयस्स क्को, धात्वन्तलोपो च. पिनद्धो, अपिनद्धोप्यत्र. पुब्बपक्खे अपिस्साकारलोपो.

चतुक्कं अभिचारपदातिम्हि. पुरे चरणसीलो, सत्तमिया अलोपो उभयत्रापि. पुब्बे णी. परपक्खे अ, पुब्बं, पुब्बे वा गच्छतीति पुब्बङ्गमो, दुतियायालोपो. पुरोगो, अग्गेसरो, पट्ठो, अग्गतोसरो, पुरस्सरो, पुरोगमोप्यत्र.

द्वयं असीघगामिनि. मन्दं गच्छति सीलेनाति मन्दगामी, णी. मन्थ विलोळने, अनेकत्थत्ता संकिलेसे च. संकिलिस्सतेति मन्थरो, अरो.

तिकं वेगिनि. तुरमेति गच्छतीति तुरितो, इ गतियं, तो. तुरस्सि, पजवी, जवोप्यत्र. द्वयं जेतुयोग्गतामत्ते. जि जये, तब्बो, जेतब्बं, ण्यपच्चये जेय्यं.

३८०. तिकं ¶ सूरे. सुर वीर विक्कन्तेति चुरादिधातु. सुरयति, वीरयतीति सूरो, वीरो च, अ, दीघादि, कन्त छेदने. विक्कन्तो. द्वयं सहायमत्ते. सह एति गच्छतीति सहायो, सब्बत्र कत्तरि च अ. अनुसद्दो पच्छात्थो. समाति एते द्वे तुल्यत्था. अनुप्लपो, अभिसरोपि. सन्नद्धप्पभुती सन्नद्धसद्दादयो अनुचरन्ता तीसु.

पाथेय्यं नाम राजादीनं यात्रास्वेव बहुलं पवत्ततीति इध तं वुत्तं, पथे हितं पाथेय्यं, एय्यो. सम्ब मण्डले, अलो, समेति अद्धानपरिस्सममेतेनाति वा सम्बलं, अलो, बागमो च.

३८१. चतुक्कं सेनायं. वाहयोगा वाहिनी. धजयोगा धजिनी. सि बन्धने, नो, सेना. चमु अदने, ऊ. चमति भीरुन्ति चमू. पुतना, अनीकिनी, वरूथिनीप्यत्र. एत्थ च पुतना अनीकिनी वाहिनी चमू सेनाभेदेपि. ‘‘पुतना’नीकिनी चमू, सेना सेनान्तरेपि चे’’ति रुद्दो, ‘‘सेनापभेदे सेनायं, सवन्त्यमपि वाहिनी’’ति रभसो च. चक्कादितिकं सामञ्ञेन सेनायं, सेनङ्गे च. चाणक्ये तु सेनाविसेसे अनीको वुत्तो ‘‘तीणि तिकान्यनीक’’न्ति.

अस्सेव ¶ कामन्दकीये विवरणं, यथा –

‘‘अस्सस्स पत्तियोधा ये, भवेय्युं पुरिसा तयो;

इति कप्पा तु पञ्चस्सा, विधेय्या कुञ्जरस्स तु;

पादङ्गो पाजितावन्तो, पुरिसा दस पञ्च च;

विधानमिति नागस्स, चतुक्कं सन्दनस्स च;

अनीकमिति विञ्ञेय्य-मिति कप्पा नव द्विपा’’ति.

करीयते विग्गहो येनेति चक्कं. बल संवरणे, अ. अण सद्दे, इको. वाकारो नपुंसकत्तं समुच्चिनोति.

चतुरङ्गबलाय सुसन्नद्धाय सेनाय युद्धत्थं देसविदेसे विन्यासो विभजित्वा न्यसनं ठपनं ब्यूहो कथ्यते. विभजित्वा ऊहनं ठपनं ब्यूहो. तब्भेदा दण्डभोगमण्डलासंहता चत्तारो पकतिब्यूहा. तत्र अनीकानं तिरियतो वुत्ति दण्डो. समत्थानमनीकानमन्वावुत्ति अञ्ञोञ्ञतो वुत्ति भोगो. मण्डलरचनाय सरन्तानमनीकानं सब्बतो वुत्ति सप्पसरीरमिव मण्डलो. ठितानमितरेतरासं हतानं विसिलिट्ठतरानं अनीकानं पुथुवुत्ति असंहतो. तदुत्तं कामन्दकेन –

‘‘तिरियतो वुत्ति दण्डाख्या, भोगोन्वावुत्तिरेव च;

मण्डलो सब्बतोवुत्ति, पुथुवुत्ति असंहतो’’ति.

ब्यूहसमवेतो एव ब्यूहस्सेकदेसो पच्छाभागो ब्यूहपण्हि, ब्यूहस्स पच्छा, ब्यूहन्तरमेव वा. यत्र ठितो राजा ससेनं पटिग्गण्हति, तं सेनाय पच्छा धनुसतद्वयन्तरेन ठितपरिससहितं अनीकं ‘‘पटिग्गहो’’त्युच्चते.

३८२-३८३. एको ¶ हत्थी द्वादसपुरिससहितो ‘‘एको हत्थी’’त्युच्चते, एतेन लक्खणेन अधमन्ततो हेट्ठिमपरिच्छेदेन तयो हत्थिनो हत्थानीकं नाम, तथा एको तुरङ्गो तिपुरिससहितो, एको च रथो चतुपुरिससहितो एको हयो, एको रथोति एतेन लक्खणेन अधमन्ततो तयो हया च तयो रथा च हयानीकं, रथानीकं नाम, तेनाह ‘‘तयो तयो गजादयो’’ति. ससत्था खग्गादिसत्थहत्था चतुज्जना चत्तारो पुरिसा पत्तानीकं नाम वुत्ता. हेट्ठिमन्ततोयेवेत्थापि परिच्छेदो. अमरकोसे त्वञ्ञथा कथिता –

‘‘एककेभरथा त्यस्सा, पत्ति पञ्चपदातिका;

पत्यङ्गेहि तिगुणेहि, कमा सञ्ञा यथोत्तरं.

सेनामुखं गुम्बगणा, वाहिनी पुतना चमू;

अनीकिनी च तासन्तु, दस अक्खोभिनी मत’’न्ति [अमर १८.८०-१].

तस्सत्थो – तीहि अस्सेहि गजेनेकेन रथेन च पदातीभि च पञ्चहि पत्ति नाम सेनन्तरं. पत्यङ्गेहि सब्बेहि गजादीहि ¶ यथापुब्बं गुणेहि यथोत्तरं कमेन सेनामुखादिका सञ्ञा भवति. यथोत्तरन्ति वचनेन यथापुब्बमित्यत्थमाह, तेनेदं वुत्तं ‘‘भवति तयो पत्तिनो सेनामुखं. तीहि सेनामुखेहि गुम्बो. गुम्बत्तयेन गणो. गणत्तयं वाहिनी. वाहिनित्तयं पुतना. पुतनत्तयं चमू. चमुत्तयं अनीकिनी. तासं अनीकिनीनं दस अक्खोभिनी’’ति.

तत्र रथानं सङ्ख्या सत्ततिसहितेहि अट्ठसतेहाधिकान्येकवीसतिसहस्सानि, एवमेव गजानम्पि सङ्ख्या, तथा च –

पञ्चसट्ठिसहस्सानि, छसतानि दसेव तु;

सङ्ख्या ता तुरङ्गानञ्हि, विना रथे तुरङ्गमे.

नरानं सतसहस्सं, सहस्सानि नवेव च;

सतानि तीणि च’ञ्ञानि, पञ्ञासञ्च पदातयोति [ब्याख्यासुधा २.८.८०].

३८४. हेट्ठिमपरिच्छेदेन सेनं दस्सेत्वा उक्कट्ठपरिच्छेदेन दस्सेतुमाह ‘‘सट्ठि…पे… यन्ति’’च्चादि. यन्तिया यानं कुब्बन्तिया सेनाय कत्तुभूताय धूलीकतेसु सन्तेसु. केसु? सट्ठिवंसकलापेसु. कित्तकप्पमाणेसु? पच्चेकं सट्ठिदण्डवन्तेसु, एसा अक्खोभिनी नाम सेना उक्कट्ठपरिच्छेदेन. केनचि खोभेतुमसक्कुणेय्यताय अक्खोभिनी, यु, नदादि. खुभ चलने.

३८५. चतुक्कं ¶ सम्पत्तियं. धनुक्कंसो सम्पत्ति. पद गमने, भावेति. युपक्खे ‘‘इत्थियमतियवो वा’’ति अ. लक्ख दस्सनङ्केसु, ई, लक्खी, सिरी च पुब्बे देवतावसेन वुत्ता, इध धनुक्कंसवसेन.

द्वयं सम्पत्तिविपरीतायं. विरूपं पज्जतीति विपत्ति, पदिम्हा कत्तरिति. विरूपं पज्जनं वा विपत्ति, भावेति. आपदासहचरणतो विपत्ति थियं.

चतुक्कं सत्थमत्ते. आदाय युज्झन्ते यन्ति आवुधं, यस्स वो. आयुधं वा. हर हरणे. हरति जीवितन्ति हेति,ति, अस्से, रलोपो, हनतिवसेन वा सिद्धं. सस हिंसायं, थो. अत्थंप्यत्र. असु खेपने.

३८६-३८७. सङ्खेपेनायुधं दस्सेतुमाह. मुत्तामुत्तञ्च अमुत्तञ्च पाणितो मुत्तञ्च यन्तमुत्तञ्चेति सकलं तं आयुधं चतुब्बिधं बहूनम्पि तब्भेदानतिवत्तनतो.

चतुन्नं सरूपमाह ‘‘मुत्तामुत्तञ्चा’’दि. यट्ठि नाम सत्थविसेसो, न कत्तरदण्डो.

‘‘यट्ठि हारलतासत्थ-भेदेसु धनुदण्डके’’ति हि नानत्थसङ्गहे.

तदादि ¶ आयुधं मुत्तञ्च तं अमुत्तञ्चेति मुत्तामुत्तं, कम्मधारयो, यथा कताकतं. छुरिका असिपुत्ति, तदादिकं अमुत्तं. यन्त सङ्कोचने, यन्तं, धन्वादि.

३८८-३८९. पञ्चकं धनुम्हि. उसुं असति खिपतीति, कम्मनि णो, उस्सि. धन धञ्ञे, उ, हन हिंसायं वा, उ, हस्स धो, धनु. ‘‘धनु वंसविसुद्धोपि, निग्गुणो किं करिस्सती’’ति [हितोपदेस कथामुख २३] पुमे पयोगो. ‘‘सरा वापो धनु इत्थी, तुणता तिणतापिचे’’ति [तिकण्डसेस २.८.५१] तिकण्डसेसो. किं नामेन दण्डयतीति कोदण्डं, दण्ड निपातने, किं नामेन दम्यतीति वा कोदण्डं, दमुधातुम्हा डो, किं नामेन दुनोतीति वा कोदण्डं, दु परितापे, डो निपातितो, कुटिलत्ता वा कुच्छितो दण्डो यस्सत्थीति कोदण्डं. चप सन्तापे, अ, चपो, वंसभेदो, तब्बिकारो चापो, णो. सरमसति खिपतीति सरासनं. कम्मुकम्पि. कम्माय पभवतीति कम्मुकं.

तिकं गुणे. गच्छति सरो येनाति गुणो, मस्स णो, अस्सु, गु सद्दे वा, गवति एतेनाति गुणो, यु, णत्तं. जर वयोहानिम्हि, अ, जियादेसो. पक्खे इकारलोपो, जया. ‘‘जिया चाथा’’तिपि पाठो, तदा द्वयं ¶ गुणे. मुब्बी, सिञ्जिनीप्यत्र. मुब्बविकारो मुब्बी. सिञ्ज अब्यत्तसद्दे, इनी.

तिपादो कण्डे. सर हिंसायं. सरन्त्यनेनाति, पुमे, सञ्ञायं णो. पत्तं वाजो, तंयोगा पत्ती, ई. सा तनुकरणावसानेसु, दिवादि, ण्वु, यस्सालोपो. वण्यते सद्दायतेनेनेति वाणो, णो, वण सद्दे. कण्यतेनेनेति कण्डं, कण सद्दे, डो, कण्ड भेदे वा. इस गमने, उ, इस्सु, उस दाहे वा. खुर छेदने, अपो, अथ वा खे अरति गच्छतीति खुरो, अस्सु, तं पातीति खुरप्पो. तिज निसाने, यु. अस खिपने, कम्मे यु. विसिखो, अजिम्हगो, खगो, आसुगो, कलम्बो, मग्गणो, रोपोप्यत्र. विसन्तो खणतीति विसिखो. कल मदे, अम्बो. मग्ग अन्वेसने, यु. रुप विमोहने, दिवादि, अ, रोपो. ‘‘थूलखेडो विपाटो च, चित्रपुङ्खो सरोपि चे’’ति [तिकण्डसेस २.८.५२] तिकण्डसेसे.

पञ्चकं कलापे. तूण पूरणे, चुरादि, नदादि. ‘‘तूणो निसङ्गो तूणिरो, उपासङ्गो च वाणधि’’रिति [चिन्तामणिटीका १८.८८] अमरमालायं पुंसकण्डे. ‘‘तूणा’’तिपि इत्थिलिङ्गप्पकरणे वुत्तो, इध पन ‘‘तुणी, तूणो’’ति द्वीसु, सरसमूहानं ठानत्ता कलापो. इरपच्चये तूणिरो. वाणा सरा धियन्तेत्रेति वाणधि. ‘‘तूणो पसङ्ग तूणिर-निसङ्गा वाणधि द्विसू’’त्यमरसीहे.

३९०. द्वयं वाजे, यं ‘‘कण्डपत्त’’मित्युच्चते. पत गमने, करणे खो, तस्स को, पक्खेन कतत्ता वा पक्खो ¶ . वजत्यनेनाति वाजो, णो. विसमपिवित्थाति विसप्पीतो सरो दिद्धो नाम. दिस अप्पीतियं, तो. लित्तोप्यत्र.

तिकं विज्झितब्बे. विज्झनत्थं लक्ख्यतेति लक्खं. विज्झितब्बन्ति वेज्झं, ण्यो, झस्स ज्झो, इस्से. सरो वयति गच्छति यस्मिं सरब्यं, वस्साकारलोपो. निच्चं सरानमभ्यासनं वसीकरणं सराभ्यासो. ‘‘ब्याधेप्युपासनायञ्च, वाणाभ्यासेप्युपासन’’न्ति रुद्दो. लक्खमुपगन्त्वा असनं खिपनं उपासनं.

३९१. पञ्चकं खग्गे. मण्डलं अग्गं यस्स. निग्गतो तिंसतो’ङ्गुलितो नेत्तिंसो. अस खेपने, असते खिप्पतेति असि, इ. खग्ग खण्डभेदे. सायको सरेपि. चन्दहासो, रिट्ठि, कक्खलको, करवालोप्यत्र. तस्स खग्गस्स पिधाने कोसि, इत्थी. कुस सिलेसने, इ, कोसि, रस्सन्तो. खग्गछुरिकादीनं मुट्ठियं थरुसद्दो. थर सत्थगतियं, उ.

३९२. तिकं खग्गादीनं सत्थानं वारणफलके. खेट भक्खने, ण्वु. फल विसारणे, ण्वु. फलतीति फलकं, अनित्थी. चर गतिभक्खनेसु, मो, चमु अदने वा, अ. फलम्पि.

वण्टानिहारस्साखग्गाकति ¶ हत्थकुण्डादि इल्ली, इलीपि, इल गतियं, नदादि. करं पालयतीति करपालिका, ण्वु.

द्वयं असिपुत्तियं. छुर छेदने, ण्वु. ससु हिंसायं,ति, नदादि. असिनो पुत्ती, असिधेनुकापि.

द्वयं वड्ढकीनं मुग्गरेहि समानाकारायुधभेदे. लग सङ्गे, अलो, अस्सु, ळत्तञ्च. मुरं गिरतीति मुग्गरो, रस्स गो, गिर निग्गिरणे, मुच्चतीति वा मुग्गरो, अरो. दुघणो, घनोपि.

३९३. द्वयं सल्ले. सल आसुगतियं, अ, सर हिंसायं वा, लो, रस्स लो. सङ्क सङ्कायं, उ. सूलम्पि. सूल रुजायं.

द्वयं वासियं. वस छेदनस्नेहावहारणेसु, णी. तच्छ तनुकरणे, यु, नदादि.

द्वयं फरसुम्हि. छेदकत्ता कुच्छिता धारा यस्साति कुधारी. कुधारोपि. परं ससति हिंसतीति फरसु. उ, पस्स फो, सलोपो च. परसुपि, सो परसुसद्दो नपुंसको. परसुधोप्यत्र.

द्वयं पासाणविदारणे. टङ्क बन्धने. दर विदारणे. पासाणं दारयतीति पासाणदारणो, यु. पासाणदारकोपि.

३९४. द्वयं ¶ हत्थप्पमाणे कणये [कण्डे (चिन्तामणिटीका)]. चक्कपूरणादिवायुवसेन खिप्पते. कण सद्दे, अयो. भिन्दनसीलताय भिन्दी, वाति गच्छति तेनाति वालो, अलो, भिन्दी च सो वालो चाति भिन्दिवालो, ळत्ते भिन्दिवाळो, रस्सो.

चक्कादयो सत्थभेदा. तत्र चक्काकारो आयुधविसेसो चक्कं. कन्त छेदने, अस्सु, कुन्तो दीघदण्डो. गदा, सत्ति च पसिद्धा.

तिकं कोणभागे. कुण सद्दोपकरणेसु, कुण सङ्कोचने वा, णो. सि सेवायं, अ, रस्सो, अस्सो. कुट कोटिल्ले, इण.

३९५. द्विपादं विजिगीसस्स यात्रायं, सब्बत्र भावसाधनं. या पापुणे, निक्खमित्वा यायते निय्यानं, यु. ‘‘छदादीहि तत्रण’’ति त्रण. यात्रा, आ. नदादिनो आकतिगणत्ता ईपच्चयाभावो. ठा गतिनिवत्तियं, पपुब्बो याने, यु, पतिट्ठीयते पट्ठानं, पुरेचारिम्हि पट्ठो.

पञ्चकं धूलीमत्ते. तथा च ‘‘पंसु खोदो मतो रेणु, चुण्णो धूलि’त्थियं भवे’’त्यमरमाला. चुण्ण पिसने, चुण्ण सञ्चुण्णने वा. पंस नासने, उ. रन्ज रागे, रजो, मनोगणोपि नपुंसके, तंसहचरणतो पंसुपि. ‘‘क्लिवं’पराधे रेणुम्ही’’ति ¶ रभसो. अथ वा चुण्णरजोसहचरणतो पंसु नपुंसके. धू विधुनने, धू कम्पने वा, लि, नदादि. रि गतियं, णु, इस्से.

३९६. वंसक्कमवेदीवंसथुतिं यो कुब्बति, सो मागधो. तस्मिं मधुको वुत्तो. सो च खत्तियावेस्ससम्भवो भवति, वंसमग्गं थवतीति मागधो, थस्स धो. मग्गं धवतीति मधुको, ण्वु, ग्गलोपो.