📜
नमो तस्स भगवतो अरहतो सम्मासम्बुद्धस्स
नरदक्खदीपनी
पालितो ¶ येव सद्धम्मो,
पालितेन वरेन च;
पालिते सुट्ठु यं सीलं,
पालितं धम्म-सुन्दरं.
सम्मा ¶ आरद्धं सब्ब-सम्पत्तीनं,
मूलं होतीति दट्ठब्बं.
वीरियारब्भो ¶ भिक्खवे,
महतो अत्थाय संवत्ततीति.
तस्मा ¶ वीरियमेव कत्तब्बं,
वीरियवतो हि अचिन्तितंपि होति.
यथा ¶ हि तच्छकानं सुत्तं,
पमाणं होति;
एव मेतम्पि विञ्ञूनं.
सुविजानो ¶ भवं होति,
दुब्बिजानो पराभवो;
धम्मकामो भवं होति,
धम्मदेस्सी पराभवो.
अयं ¶ धम्मताति अयं सभावो,
अयं नियामोति वुत्तं होति.
ये ¶ धम्मा हेतुपभवा,
तेसं हेतुं तथागतो.
रतनत्तयं ¶ , सन्ततं, अहं वन्दामि;
आचरियं, सो अहं, निच्चं नमामि;
‘‘होतु सब्बं, मङ्गलं, ममं सब्बधि’’.
नरदक्खदीपनी
नमो तस्स भगवतो अरहतो सम्मासम्बुद्धस्स
पणाम
नरदक्खदीपकस्स,
नमो समन्तचक्खुनो;
संसारा विप्पमुत्तस्स,
संसारा विप्पमुत्तस्स,
स-सद्धम्मस्स सङ्घिनो.
मत्थना
पालितेहि ¶ वरुत्तमं,
पालितं सील-पारमिं;
पालेतु वरसम्बुद्धो,
पालितं गन्थ-कारणं.
आसीस
बहुस्सुतो ¶ च मेधावी,
सीलेसुच समाहितो;
चेतोसमथानुयुत्तो,
अपि मुद्धनि तिट्ठतु.
अभियाचक
धम्म-सङ्घं ¶ वन्दित्वान,
सब्ब-लोकस्स नायकं;
याचितो तिकक्रप-थेरेन,
माणवेन च धीमता.
उत्तानमेव सङ्खेपं,
नाना-सत्थ-सुधारितं;
नर-दक्खं लिखिस्समि,
पस्सन्तु धीर-मामका.
कोसज्जं ¶ भयतो दिस्वा,
वीरियञ्जापि खेमतो;
आरद्धवीरिया होथ;
एसा बुद्धानुसासनी.
वीरियवा ¶ खो भिक्खवे अरियसावको,
अकुसलं पजहति, कुसलं भावेति;
सावज्जं पजहति, अनवज्जं भावेति,
सुद्धमत्तानं परिहरतीति.
वीरियवतो ¶ किं नाम कम्मं न सिज्झति;
पुरिसकारो ¶ नाम न नस्सति,
सुखे पतिट्ठापेतीति जानामि.
यथा ¶ खित्तं नभे लेड्डु,
धुवं पतति भूमियं;
तथेव बुद्ध-सेट्ठानं,
वचनं धुव-सस्सतं.
अ-द्वेज्झवचना ¶ बुद्धा,
अ-मोघवचना जिना.
सुस्सुसा ¶ लभते पञ्ञं,
उट्ठाता विन्दते धनं;
तस्मा पाळिं गुरुं कत्वा,
इमं पस्साहि सोभणं.
सुस्सुसा ¶ सुत-बुद्धिनी,
सुतं पञ्ञाय वड्ढनं;
पञ्ञाय अत्थं जानाति,
ञातो अत्थो सुखावहो.
सततंज्झायनं ¶ वाद,
पर-तन्तवलोकनं;
सब्बिज्जाचेर-सेवाच,
बुद्धि-मति-करो गुणो.
अति-दीघोव ¶ नीघो हि,
कुसीतो हीन-वीरियो;
तस्मा वीरियं कत्वान,
विज्जं एसन्तु साधवो.
सुपोरिसो ¶ ताव सिप्पं,
उग्गण्हेय्य परं धनं;
गवेसेय्य ततो मन्तं,
कथेय्य सच्च-भासितं.
पथमं ¶ न पराजये सिप्पं,
दुतीयं न पराजये धनं;
ततीयं न पराजये धनं,
चतुत्थमत्थं किं करिस्सति.
सोभन्ति ¶ अ-मिलातानि,
पुप्फानिव पिलन्धितुं;
तथा सोभन्ति दारका,
योब्बनेयेव सिक्खितुं.
तस्मा ¶ हवे गुणाधारं,
पञ्ञा-वड्ढनमुत्तमं;
सिक्खेय्य मतिमा पोसो,
पत्थेन्तो हितमत्तनो.
अलं ¶ वायमितुं सिप्पे,
अत्थ-कामेन जन्तुना;
कतं विजञ्ञा विज्जादि,
वयो ते मा उपज्झगा.
विज्जं ¶ सिक्खे, चरे सीलं,
धीरेन सह संवसे;
धनाचये, करे कम्मं,
पियं वाचञ्च संवदे.
न ¶ त्वेव सुपितुं होति,
रत्ति नक्खत्त-मालिनी;
पटिजग्गितुमेवेसा,
रत्ति होति विजानतं.
उट्ठाहथ ¶ निसीदथ,
को अत्थो सुपितेन वो;
साधु खो सिप्प-विज्जाह्वा,
विज्जं सिक्खथ सन्ततं.
आरब्भथ ¶ सदा पुत्ता,
बहुस्सुतं गवेसितुं;
यस्मा लोके सिप्पवन्ता,
सब्बा-दिसासु पाकटा.
सक्यरूपं ¶ पुरे सन्तं,
मया सिप्पं न सिक्खितं;
किच्छा वुत्ति अ-सिप्पस्स,
इति पच्छा नुतप्पति.
लोकत्थं ¶ लोक-कम्मन्तं,
इच्छन्तो परियेसितुं;
निच्चमेव वीरियञ्च,
अत्थं मन्तञ्ज चिन्तये.
धनवा ¶ गुणवा लोके,
सब्बा-दिसाय पाकटो;
सीलवा पञ्ञवा मच्चो,
सब्ब-लोकेहि पूजितो.
सजीवति ¶ यसो यस्स,
कित्ति यस्स सजीवति;
यस-कित्ति विहीनस्स,
जीवन्तोपि मतोपमा.
सद्धीध ¶ वित्तं पुरिसस्स सेट्ठं,
धम्मो सुचिण्णो सुखमावहाति;
सच्चं हवे सादुतरं रसानं,
पञ्ञाजीविं जीवितमाहु सेट्ठन्ति.
सतिमतो ¶ सदा भद्दं,
सतिमा सुखमेधति;
सतिमतो सुवे सेय्यो,
वेरा च परिमुच्चति.
मा ¶ वो खणं विराधेथ,
खणातीता हि सोचरे;
सदत्थे वायमेय्याथ,
खणो वो पटिपादितो.
यथिच्छितं ¶ न पप्पोति,
अ-फियो नाविकोण्णवे;
तथेवावीरियोपेत्थ,
तस्मारभेय्य सासनं.
वायमेथेव ¶ पुरिसो,
याव अत्थस्स निप्फदा;
निप्फन्नसोभणो अत्थो,
खन्ता भिय्यो न विज्जति.
समेव ¶ ञाण-वायामे,
सुखावहो सु-मङ्गलो;
ञुनेधिके तथा नो हि,
द्वयेन साधु सम्पदा.
काय-कम्मानि ¶ सिज्झन्ति,
वची-कम्मानि वीरियं;
न हि किच्चानि चिन्ताहि,
करेय्याथीध वायमं.
पटिकच्चेव ¶ करेय्य,
तं जञ्ञा हितमत्तनो;
न साकटिकचिन्ताय,
मन्दा धीरो परक्कमे.
थिरेन ¶ सक-कम्मेन,
वड्ढतियेव सं फलं;
अ-थिरेन अलसेन,
कर-कम्मं फलञ्च नो.
आसीसेथेव ¶ पुरिसो,
न निब्बिन्देय्य पण्डितो;
पस्सामि वोहं अत्तानं,
यथा इच्छिं तथा अहु.
अणणो ¶ ञातीनं होति,
देवानं पितुनञ्च सो;
करं पुरिस-किच्चानि,
न च पच्छानुतप्पति.
हिय्योति ¶ हिय्यति पोसो,
करिस्सामि परेति यो;
अज्ज कत्तब्ब कम्मं स्वे,
सो ततो परिहायति.
सो ¶ अ-प्पमत्तो अ-कुद्धो,
तात किच्चानि कारय;
वायामस्सु स-किच्चेसु,
नालसो विन्दते सुखं.
हीन-जच्चोपि ¶ चे होति,
उट्ठाता धितिमा नरो;
आचार-सील-सम्पन्नो,
निसे अग्गीव भासति.
यो ¶ पुब्बे करणीयानि,
पच्छा सो कातुमिच्छति;
वरुणकट्ठभञ्जोव,
स पच्छा अनुतप्पति.
उट्ठानकालम्हि ¶ अनुट्ठहानो,
युवा बली आलसियं उपेतो;
अ-पुण्णसङ्कप्पमनो कुसीतो,
पञ्ञाय मग्गं अलसो न विन्दति.
दुम्मेधो ¶ पुरिसो लोके,
कुसीतो हीन-वीरियो;
अप्पस्सुतो अनाचारो,
परिहायति वुड्ढिया.
अप्पस्सुतायं ¶ पुरिसो,
बलीबद्दोव जीरति;
मंसानि तस्स वड्ढन्ति,
पञ्ञा तस्स न वड्ढति.
यस्स ¶ मनुस्स-भूतस्स,
नत्थि भोगा च सिप्पकं;
किंफलं तस्स मानुस्सं,
द्विपादट्ठो हि सो मिगो.
यो ¶ च वस्ससतं जीवे,
कुसीतो हीन-वीरियो;
एकाहं जीवितं सेय्यो,
वीरियारब्भतो दळं.
यो ¶ च धम्म-विभङ्गञ्ञू,
कालुट्ठायी अ-तन्दितो;
अनुट्ठहति कालेन,
फलं तस्स समिज्झति.
अ-चरित्वा ¶ ब्रह्मचरियं,
अ-लद्धा योब्बने धनं;
जिण्णकोञ्चाव झायन्ति,
खीणमच्छेव पल्लले.
अ-चरित्वा ¶ ब्रह्मचरियं,
अ-लद्धा योब्बने धनं;
सेन्त्ति चापातिखीणाव,
पुराणानि अनुत्थुनं.
अप्पकेनापि ¶ मेधावी,
पाभतेन विचक्खणो;
समुट्ठापेति अत्तानं,
अणुं अग्गिंव सन्धमं.
वायामेथेव ¶ पुरिसो,
न निब्बिन्देय्य पण्डितो;
वायामस्स फलं पस्स,
भुत्ता अम्बा अनीतिहं.
अनुट्ठहं ¶ अ-वायामं,
सुखं यत्राधि गच्छति;
सुविर तत्थ गच्छाहि,
मञ्च तत्थेव पापय.
यत्थालसो ¶ अनुट्ठाता,
अच्चन्तं सुखमेधति;
सुविर तत्थ गच्छाहि,
मञ्च त्तत्थेव पापय.
अधिप्पाय-फलं ¶ लोके,
धीतिमन्त्तस्स सिज्झति;
वीरियमेव कत्तब्बं,
एतं बुद्धेहि वण्णितं.
पञ्ञा-निद्देस
पञ्ञं ¶ पथममेसेहि,
पञ्ञा-बलं बहुत्तमं;
कुल-पुत्त बलं पञ्ञा,
किंहिनाम न साध्यति.
अनेक-संसयुच्छेदि ¶ ,
परोक्खत्थस्स दस्सकं;
सब्बस्स लोचनं सत्थं,
यस्स नत्थ्यन्धमेव सो.
पञ्ञा ¶ सुतं विनिच्छिन्दि,
कित्ति-सिलोक-वड्ढनी;
पञ्ञासहितो नरो इध,
अपि सुखानिविन्दति.
सब्बञ्ञुबुद्ध-पच्चेक ¶ ,
चतुसच्च-सुता इति;
चतु-बुद्धेसु एकोव,
बहुस्सुतो नरो भवे.
लेखछेको ¶ वाचछेको,
गन्थछेको सुवाचको;
विधायकछेको सूरो,
निद्दुक्खोव सकम्मनि.
पञ्ञा ¶ हि सेट्ठा कुसला वदन्ति,
नक्खत्त-राजारिव तारकानं;
सीलं सिरीचापि सतञ्च धम्मो,
अन्वायिका पञ्ञावतो भवन्ति.
सेवेथ ¶ बुद्धे निपुणे बहुस्सुत्ते,
उग्गाहको च परिपुच्छको;
सुणेय्य सक्कच्चं सुभासितानि,
एवं करो पञ्ञवा होति मच्चो.
वयेन ¶ यस-पुच्छाहि,
तिट्ठ-वासेन योनिसो;
साकच्छा स्नेहसंसेवा,
पतिरूप-वासेनच.
एतानि अट्ठठानानि,
बुद्धि-विसद-कारणा;
येसं एतानि सम्भोन्ति,
तेसं बुद्धि पभिज्जति.
६४. चत्तारोमे ¶ भिक्खवे धम्मा पञ्ञावुद्धिया संवत्तन्ति. कतमे चत्तारो. सप्पुरिससंसेवो सद्धम्मसवनं योनिसो मनसिकारो धम्मानुधम्म-पटिपत्ति. इमे खो भिक्खवे चत्तारो धम्मा पञ्ञा-वुद्धिया संवत्तन्तीत्ति.
चक्खुपसाद-सम्पन्नो ¶ ,
अच्छिमन्तञ्च पस्सति;
अन्धं काणं सु-पस्सन्तं,
अन्धो सब्बं न पस्सति.
पस्सत्ति ¶ पस्सो पस्सन्तं,
अ-पस्सन्तञ्च पस्सति;
अ-पस्सन्तो अ-पस्सन्तं,
पस्सन्तञ्च न पस्सति.
पाकटं ¶ अ-पटिच्छन्नं,
रूपं पसाद-चक्खुना;
नाञ्ञं पस्सत्ति सब्बंपि,
तथतो ञाण-चक्खुना.
सुजनासुजना ¶ सब्बे,
गुणेनापि विवेकिनो;
विवेकं न समायन्ति,
अ-विवेकीजनन्तिके.
यो ¶ च उप्पतितं अत्थं,
न खिप्पमनुबुज्झति;
अ-मित्तवसमन्वेति,
पच्छा च अनुतप्पति.
एवं ¶ महिद्धिका पञ्ञा,
निपुणा साधुचिन्तिनी;
दिट्ठधम्म-हितत्थाय,
सम्पराय-सुखाय वा.
तं ¶ बलानं बलं सेट्ठ,
अग्ग पञ्ञाबलं बलं;
पञ्ञाबलेनुपत्थद्धो,
एत्थं विन्दति पण्डित्तो.
येन ¶ ञाणेन बुज्झन्ति,
अरिया कत-किच्चतं;
तं ञाण-रतनं लद्धं,
वायामेथ जिनोरसा.
पञ्ञारतनमालस्स ¶ ,
न चिरं वत्तते भवो;
खिप्पं दस्सेति अमतं,
न च सो रोचते भवे.
पमादमनुयुञ्जन्ति ¶ ,
बाला दुम्मेधिनो जना;
अप्पमादञ्च मेधावी,
धनं सेट्ठंव रक्खति.
धन-पुञ्ञ-धी-लाभेन ¶ ,
कालं खिय्यति पण्डितो;
कीळनेन च दुम्मेधो,
निद्दाय कलहेन वा.
पमादं ¶ अप्पमादेन,
यदा नूदति पण्डितो;
पञ्ञापासाद-मारुय्ह,
अ-सोको सोकिनिं पजं,
पब्बतट्ठोव भूमट्ठे,
धीरो बाले अवेक्खति.
नत्ति ¶ अत्तसमं पेमं,
नत्थि धञ्ञसमं धनं;
नत्थि पञ्ञासमा आभा,
वुट्ठि वे परमा सरा.
दिट्ठे ¶ धम्मे च यो अत्थो,
यो चत्थो सम्परायिको;
अत्थाभिसमया धीरो,
पण्डितोति पवुच्चति.
न ¶ तेन पण्डितो होति,
यावता बहु भासति;
खेमी अ-वेरी अ-भयो,
पण्डितोत्ति पवुच्चति.
यम्हि ¶ सच्चञ्च धम्मो च,
अ-हिंसा संयमो दमो;
स वे वन्तमलो धीरो,
थेरो इति पवुच्चत्ति.
सक-गुणं ¶ सक-दोसं,
यो जानाति सपण्डितो;
पर-गुणं पर-दोसं,
यो जानाति सपण्डितो.
सति-वीरिय-पञ्ञाय ¶ ,
यो करोति इरियापथे;
सो पण्डितो हवे भवे,
उभयत्थ-परिग्गहो.
कतञ्ञू ¶ विज्जा-सम्पन्नो,
जातिमा धनवा हवे;
सो विचारण-सीलो च,
निद्दुक्खो पण्डितो भवे.
सब्बे ¶ कम्मस्सका सत्ता,
कम्मं सत्ते विभज्जति.
यो पस्सति पच्चक्खत्थं,
यो च संसारत्थं तेसु;
पच्छिमोव पूजनीयो,
उभयत्थ-सुदिट्ठत्ता.
अप्पेन ¶ अनवज्जेन,
सन्तुट्ठो सुलभेन च;
मत्तञ्ञू सुभरो हुत्वा,
चरेय्य पण्डितो नरो.
अत्तानमेव ¶ पथमं,
पतिरूपे निवेसये;
अथञ्ञमनुसासेय्य,
न किलिस्सेय्य पण्डितो.
उत्तम-परिसाय ¶ वे,
उत्त्तमं वाचमुत्तमो;
भणेय्याखेप-वित्थारं,
सा अनग्घ्या लोकत्तये.
पण्डितस्स ¶ सुभासित्तं,
पण्डितोव सुजानिया;
दुम्मेधो तं न जानाति,
धीरो धीरं ममायति.
येन ¶ केनचि वण्णेन,
परो लभति रूप्पनं;
अत्थो वाचाय चे होति,
तं न भासेय्य पण्डितो.
भुञ्जनत्थं ¶ कथनत्थं,
मुखं होतीत्ति नो वदे;
यंवा तंवा मुखारुळ्हं,
वचनं पण्डितो नरो.
पर-सत्तित्तो ¶ स-सत्तिं,
दुज्जानो हि नरो मिते;
चे जाने सक-सत्तिंच,
का कथा पर-सत्तिया.
कत्त-गुणं ¶ परेसं यो,
पटिकरोति पण्डितो;
जानाति सो आचिक्खति,
न बालो गुण-मामको.
पभूतं ¶ नेव कातब्बं,
भविस्सं नेव चिन्तये;
वत्तमानेन कालेन,
विचरन्ति विचक्खणा.
धम्मेसु ¶ सति इच्छिता,
रसेसु लोणमिच्छितं;
राज-किच्चेसु अमच्चं,
सब्ब-ठानेसु पण्डितं.
खत्तियो ¶ सेट्ठो जने तस्मिं,
ये गोत्तपटिसारिनो;
विज्जा-चरण-सम्पन्नो,
सो सेट्ठो देव-मानुसे.
सम्बुद्धो ¶ द्विपदं सेट्ठो,
आजानीयो चतुप्पदं;
सुस्सुसा सेट्ठा भरियानं,
यो च पुत्तानमस्सवो.
सात्थको ¶ च अ-सम्मोहो,
सप्पायो गोचरो तथा;
चत्तारिमानि सिक्खेय्युं,
सम्पजञ्ञाभिवड्ढका.
पञ्ञञ्च ¶ खो अ-सुस्सुसं,
न कोचि अधिगच्छति;
बहुस्सुतं अनागम्म,
धम्मट्ठं अ-विनिब्भजं.
अधिप्पायो ¶ सुदुब्बोधो,
यस्मा विज्जति पाळियं;
तस्मा उपट्ठहं गण्हे,
गरुं गरुमतं विदू.
चारित्त-निद्देस
अत्ता ¶ हि अत्तनो नाथो,
को हि नाथो परो सिया;
अत्तना हि सुदन्तेन,
नाथं लभति दुल्लभं.
अत्तानञ्चे ¶ पियं जञ्ञा,
रक्खेय्य नं सुरक्खितं;
तिण्णमञ्ञतरं यामं,
पटिजग्गेय्य पण्डितो.
अत्तना ¶ कुरुते लक्खिं,
अ-लक्खिं कुरुतेत्तना;
न हि लक्खिं अ-लक्खिं वा,
अञ्ञो अञ्ञस्स कारको.
न ¶ पीळिता अत्त-दुक्खेन धीरा,
सुखप्फलं कम्मं परिच्चजन्ति;
सम्मोहितावापि सुखेन मत्ता,
न पाप-कम्मञ्च समाचरन्ति.
यो ¶ नेव निन्दं नप्पसंसं,
आदियति गरहं नोपि पूजं;
सिरीच लक्खीच अपेति तम्हा,
आपो सुवुट्ठीव यथा थलम्हा.
साधु ¶ धम्मरुचि राजा,
साधु पञ्ञाणवा नरो;
साधु मित्तानम-द्दुब्भो,
पापस्स अ-करं सुखं.
कल्याणकारी ¶ कल्याणं,
पापकारी च पापकं;
यादिसं वपत्ते बीजं,
तादिसं वहते फलं.
जीवं ¶ पञ्ञाय रक्खेय्य,
धनं कम्मेन रक्खये;
एवं ह्यरोगो सुखितो,
पोराणक-वचो इदं.
अनुपुब्बेन ¶ मेधावी,
थोकं थोकं खणे खणे;
कम्मारो रजतस्सेव,
निद्दमे मलमत्तनो.
वाचानुरक्खी ¶ मनसा सुसंवुतो,
कायेन च नाकुसलं कयिरा;
एतेतयो कम्मपथेविसोधये,
आराधये मग्गमिसि-प्पवेदितं.
अ-सन्ते ¶ नोपसेवेय्य,
सन्ते सेवेय्य पण्डितो;
अ-सन्तो निरयं यन्ति,
सन्तो पापेन्ति सुग्गतिं.
अ-करोन्तोपि ¶ चे पापं,
करोन्तं मुपसेवति;
सङ्कियो होति पापस्मिं,
अ-वण्णो चस्स रूहति.
सङ्घागतो ¶ अनिट्ठेहि,
अम्बोपि मधुरप्फलो;
तित्तपुब्बोव पा एव,
मनुस्सो तु स-जीवको.
निहीन-सेवितो ¶ पोसो,
निहीयति च सब्बदा;
कदाचि न च हायेथ,
तुल्यसेवीपि अत्तना.
वण्ण-गन्ध-रसोपेतो ¶ ,
अम्बोयं अहुवा पुरे;
तमेव पूजं लभमानो;
केनम्बो कटुकप्फलो.
पुचिमन्द-परिवारो ¶ ,
अम्बो ते दधिवाहन;
मूलं मूलेन संसट्ठं,
साखा साखं निसेवरे;
असात्त-सन्निवासेन,
तेनम्बो कटुकप्फलो.
पामोक्ख-भजनं ¶ खिप्पं,
अत्थ-कामो सु-वुड्ढियं;
भजे उत्तरि अत्तना,
तस्मा उदेति पण्डितो.
काचो ¶ कञ्चन-संसग्गा,
धत्ते मार-कतिं जुतिं;
तथा संसन्निधानेन,
मूळ्हो याति पवीणतं.
कीटोपि ¶ सुमनो-सङ्गा,
आरोहति सतं सिरो;
अस्मापि याति देवत्वं,
महब्भि सुप्पतिट्ठितो.
सब्भिरेव ¶ समासेथ,
सब्भि कुब्बेथ सन्धवं;
सतं सद्धम्ममञ्ञाय,
पञ्ञं लभति नाञ्ञतो.
सब्भिरेव ¶ समासेथ,
सब्भि कुब्बेथ सन्धवं;
सतं सद्धम्ममञ्ञाय,
सब्ब-दुक्खा पमुच्चत्ति.
सकिंदेव ¶ कुलपुत्त,
सब्भि होति समागमो;
सा नं सङ्गति पालेति,
नासब्भि बहु सङ्गमो.
सेय्यो ¶ अ-मित्तो मेधावी,
यञ्चे बालानुकम्पको.
सीलवन्तं ¶ पञ्ञवन्तं,
दिवा निस्सय-दायकं;
बहुस्सुतं गवेसन्तो,
भजेय्य अत्थ-मामको.
पाप-मित्ते ¶ विवज्जेत्वा,
भजेय्युत्तम-पुग्गलं;
ओवादे चस्स तिट्ठेय्य,
पत्थेन्तो अ-चलं सुखं.
न ¶ भजे पापके मित्ते,
न भजे पुरिसाधमे;
भजेथ मित्त्ते कल्याणे,
भजेथ पुरिसुत्तमे.
अनवज्जं ¶ मुखम्बोज,
मनवज्जा च भारती;
अलङ्कताव सोभन्ते,
किंसु ते निरलङ्कता.
न ¶ हि वण्णेन सम्पन्ना,
मञ्जुका पिय-दस्सिना;
खरा वाचा पिया होति,
अस्मिं लोके परम्हि च.
ननु ¶ पस्ससिमं काळिं,
दुब्बण्णं तिलकाहतं;
कोलिलं सण्ह-वाचेन,
बहूनं पाणिनं पियं.
तस्मा ¶ सखिल-वाचाय,
मन्त-भाणी अनुद्धतो;
अत्थं धम्मञ्च दीपेति,
मधुरं तस्स भासितं.
तमेव ¶ वाचं भासेय्य,
या सत्तानं न तापये;
परे च न विहिंसेय्य,
सा वे वाचा सुभासिता.
पियं ¶ वाचंव भासेय्य,
या वाचा पटिनन्दिता;
यं अनादाय पापानि;
परेसं भासते पियं.
सच्चं ¶ वे अमता वाचा,
एस धम्मो सनन्तनो;
सच्चे अत्थे च धम्मे च,
आहु सन्तो पतिट्ठिता.
सुभासितञ्च ¶ धम्मञ्च,
पियञ्च सच्चमेव च;
चतु-अङ्गेहि सम्पन्नं,
वाचं भासेय्य पण्डितो.
मनापमेव ¶ भासेय्य,
नामनापं कुदाचनं;
मनापं भासमानस्स,
सिद्धं पियोसधं भवे.
यं ¶ वदेय्य तं करेय्य,
यं न वदे न तं करे;
अ-करोन्तं भासमानं,
परिजानन्ति पण्डिता.
रहोवादं ¶ न भासेय्य,
न सम्मुखा खिणं भणे;
अ-तरमानोव भणेय्य,
तरमानोव नो भणे.
मावोच ¶ फरुसं किञ्चि,
वुत्ता पटिवदेय्युं तं;
दुक्खा हि सारम्भकथा,
पटिदण्डा फुसेय्युं तं.
सक-युत्तं ¶ करे कम्मं,
सक-युत्तं वचिं भणे;
अ-युत्तके धनं नट्ठं,
अ-युत्ते जीवितं खये.
ये ¶ वुड्ढमपचायन्ति,
नरा धम्मस्स धकाविदा;
दिट्ठे धम्मेव पासंसा,
सम्पराये च सुग्गतिं.
पोरी-कथं-व ¶ भासेय्य,
युत्ता कथा हि पूरिनो;
भाति-मत्तञ्च भाताति,
पितु-मत्तं पिता इति.
दानञ्च ¶ पिय-वज्जञ्च,
अत्थ-चरिया च या इध;
समानत्तता धम्मेस,
तत्थ तत्थ यथारहं.
सकिं ¶ वदन्ति राजानो,
सकिं समण-ब्राह्मणा;
सकिंव पुरिसा लोके,
एसधम्मो सनन्तनो.
एक-वाचंव ¶ द्वेवाचं,
भणेय्य अनुकम्पको;
तदुत्तरि न भासेय्य,
दासोवय्यस्स सन्तिके.
तस्सेव ¶ तेन पापियो,
यो कुद्धं पटिकुज्झत्ति;
कुद्धं अ-पटिकुज्झन्तो,
सङ्गामं जेति दुज्जयं.
उभिन्नमत्थं ¶ चरति,
अत्तनो च परस्स च;
परं संकुपितं ञत्वा,
यो सतो उपसम्मति.
अत्तानं ¶ रक्खन्तो परं रक्खति,
परं रक्खन्तो अत्तानं रक्खति.
सील-समाधि-पञ्ञानं ¶ ,
खन्ती पधान-कारणं;
सब्बेपि कुसला धम्मा,
खन्त्यायत्ताव वड्ढरे.
खमा-खग्ग-करेतस्स ¶ ,
दुज्जनो किं करिस्सति;
अ-तिणे पतितो वन्हि,
सयमेवूपसम्मति.
सुस्सुसा ¶ सवणञ्चेव,
गहणं धारणं तथा;
उहापोहत्थविञ्ञाणं,
तत्व-ञ्ञाणञ्चधीगुणं.
यस्सेते ¶ चतुरो धम्मा,
अत्थि पोसेसु पण्डित;
सच्चं धम्मो धीति चागो,
दिट्ठं सो अतिवत्तति.
वेज्जो ¶ पुरोहितो मन्ती,
वेदञ्ञोत्र चतुत्थको;
पभात-काले दट्ठब्बा,
निच्चं स्व-सीरिमिच्छता.
मित्तानं ¶ सन्तिकं गच्छे,
काले न रत्तियं किसं;
चे बहुं भिज्जे चिनित्वा,
तं मित्तेसु समाकरे.
न ¶ परेसं विलोमानि,
न परेसं कताकतं;
अत्तनोव अवेक्खेय्य,
कतानि अ-कतानि च.
देस-जाति-पुब्बे-चरा ¶ ,
अनु-चरा जनो करे;
परेसं वेधकं मायं,
तं जानित्वा सखं करे.
परित्तं ¶ दारुमारुय्ह,
यथा सीदे महण्णवे;
एवं कुसीतमागम्म,
साधु-जीवीपि सीदति;
तस्मा तं परिवज्जेय्य,
कुसीतं हीन-वीरियं.
अलसञ्च ¶ पमादो च,
अनुट्ठानं अ-संयमो;
निद्दा तन्दि च ते छिद्दे,
सब्बसो तं विवज्जये.
चजेय्य ¶ दुम्मित्तं बालं,
आसीविसंव माणवो;
भञ्जेय्य पापकं कम्मं,
नळागारंव कुञ्जरो.
न ¶ हि अञ्ञञ्ञ-चित्तानं,
इत्थीनं पुरिसान वा;
नानावीकत्वा संसग्गं,
तादिसं पिच नास्मसे.
नास्मसे ¶ कत-पापम्हि,
नास्मसे अलिक-वादिने;
नास्मते अत्तत्थपञ्ञम्हि,
अत्त-सन्तेपि नास्मते.
घतासनं ¶ कुञ्जरं कण्ह-सप्पं,
मुद्धा-भिसित्तं पमदा च सब्बा;
एते नरो निच्चसतो भजेथ,
तेसं हवे दुब्बिदू सब्ब-भावो.
इत्थीनं ¶ दुज्जनान-ञ्च,
विस्सासो नो-प पज्जते;
विसे सिङ्गिम्हि नदियं,
रोगे राज-कुलम्हि च.
इत्थि-धुत्तो ¶ सुरा-धुत्तो,
अक्ख-धुत्तो च यो नरो;
लद्धं लद्धं विनासेति,
तं पराभवतो मुखं.
पाप-मित्तो ¶ पाप-सखो,
पाप-आचार गोचरो;
अस्मा लोका परम्हा च,
उभया धंसते नरो.
मच्छेरेन ¶ यसं हतं,
कुप्पनेन गुणो हतो;
कूटेन नस्सते सच्चं,
खुद्देन धम्म-रक्खनं.
अक्ख-देवी ¶ धनानि च,
विनासो होति आपदा;
ठिति हता पमादो च,
द्विजं भिक्खुञ्च नस्सति.
पेसुञ्ञेन ¶ कुलं हतं,
मानेन हितमत्तनो;
दुच्चरितेन मानुसो,
दलिद्दायादरो हतो.
अ-मानना ¶ यत्थ सिया,
सन्तानंपि विमानना;
हीन-सम्माननावापि,
न तत्थ वसतिं वसे.
यत्थालसो ¶ च दक्खो च,
सूरो भीरु च पूजिया;
न तत्थ सन्तो वसन्ति,
अ-विसेस-करे नरे.
नो ¶ चे अस्स सका-बुद्धि,
विनयो वा सु-सिक्खितो;
वने अन्ध-महिंसोव,
चरेय्य बहुको जनो.
फलं ¶ वे कदलिं हन्ति,
फलं वेळुं फलं नळं;
सक्कारो का-पुरिसं हन्ति,
गब्भो अस्सतरिं यथा.
वज्जञ्च वज्जतो ञत्वा,
अ-वज्जञ्च अ-वज्जतो;
सम्मादिट्ठि-समादाना,
सत्ता गच्छन्त्ति सुग्गतिं.
घरावास-निद्देस
दुक्खं ¶ गहब्बतं साधु,
संविभज्जञ्च भोजनं;
अ-हासो अत्थ-लोभेसु,
अत्थ-ब्यापत्ति अब्यथो.
योध ¶ सीतञ्च उण्हञ्च,
तिणा भिय्यो न मञ्ञति;
करं पुरिस-किच्चानि,
सो सुखा न विहायति.
पण्डितो ¶ सील-सम्पन्नो,
सण्हा च पटिभानवा;
निवात-वुत्ति अत्थद्धो,
तादिसो लभते यसं.
उट्ठानको ¶ अनलसो,
आपदासु न वेधति;
अच्छिन्नवुत्ति मेधावी,
तादिसो लभते यसं.
सङ्गाहको ¶ मित्त-करो,
वदञ्ञू वीत्त-मच्छरो;
नेता वि-नेता अनु-नेता,
तादिसो लभते यसं.
उट्ठानवको ¶ सतीमतो,
सुचि-कम्मस्स निसम्मकारिनो;
सञ्ञतस्स धम्म-जीविनो,
अ-प्पमत्तस्स यसोभि-वड्ढति.
द्वेव ¶ तात पदाकानि,
यत्थ सब्बं पतिट्ठितं;
अ-लद्धस्स च यो लाभो,
लद्धस्स अनुरक्खणा.
चतुधा ¶ विभजे भोगे,
पण्डितो घरमावसं;
एकेन भोगं भुञ्जेय्य,
द्वीहि कम्मं पयोजये;
चतुत्थञ्च निधापेय्य,
आपदासु भविस्सति.
अञ्जनानं ¶ खयं दिस्वा,
उपचिकानञ्च आचयं;
मधूनञ्च समाहारं,
पण्डित्तो घरमावसे.
विभवं ¶ रक्खतो लद्धं,
परिहानि न विज्जति;
आरक्खम्हि अ-सन्तम्हि,
लद्धं लद्धं विनस्सति.
पञ्ञा ¶ नत्थि धनं नत्थि,
यस्स लोके न विन्दति;
पुत्त-दारा न पीयन्ति,
तस्स मित्तं सुखावहं.
चत्तारो ¶ च वेदितब्बा,
मित्ता चेव सुहदा च;
उपकारो सुहदोपि,
समान-सुख-दुक्खो च;
अत्थक्खायीनुकम्पको,
तथा मित्तो वेदितब्बो.
भोगा ¶ नट्ठेन जिण्णेन,
अ-मितेन च भोजने;
न तिट्ठन्ति चिरं दिस्वा,
तं पण्डितो घरे वसे.
अति-सीतं ¶ अति-उण्हं,
अति-सायमिदं अहु;
इति विस्सट्ठ-कम्मन्ते,
अत्था अच्चेन्ति माणवे.
न ¶ दिवा सुप्प-सीलेन,
रत्तिनट्ठानदेस्सिना;
निच्चं मत्तेन सोण्डेन,
सक्का आवसितुं घरं.
हनन्ति ¶ भोगा दुम्मेधं,
नो चे पार-गवेसिनो;
भोग-तण्हाय दुम्मेधो,
हन्ति अञ्ञेव अत्तनं.
दुज्जीवितमजीविम्हा ¶ ,
येसं नो न ददामसे;
विज्जमानेसु भोगेसु,
दीपं ना कम्ह मत्तनो.
सट्ठि-वस्स-सहस्सानि ¶ ,
परिपुण्णानि सब्बसो;
निरये पच्चमानानं,
कदा अन्तो भविस्सति.
नत्थि ¶ अन्तो कुतो अन्तो,
न अन्तो पतिदिस्सति;
तदा हि पकतं पापं,
मम तुय्हञ्चे मारिसा;
सोहं ¶ नून इतो गन्ता,
योनि लद्धान मानुसं;
वदञ्ञू सील-सम्पन्नो,
काहामि कुसलं बहुं.
मा ¶ गिज्झे पच्चये मच्चो,
बहु-दोसा हि पच्चया;
चरन्तो पच्चये ञाया,
उभयत्थापि वड्ढति.
अ-लद्धा ¶ वित्तं तप्पति,
पुब्बे अ-समुदानितं;
न पुब्बे धनमेसिस्सं,
इति पच्छानुतप्पति.
कूटवेदी ¶ पुरे आसिं,
पिसुणो पिट्ठि-मंसिको;
चण्डो च फरुसो चापि,
इति पच्छानुतप्पति.
पाणातिपाती ¶ पुरे आसिं,
लुद्दो चापि अनरियो;
भूतानं नानुकम्पियं,
इति पच्छानुतप्पति.
बहूसु ¶ वत सन्तीसु,
अनापादासु इत्थिसु;
पर-दारं असेविस्सं,
इति पच्छानुतप्पति.
बहुम्हि ¶ तव सन्तम्हि,
अन्न-पाने उपट्ठिते;
न पुब्बे अददं दानं,
इति पच्छानुतप्पति.
मातरं ¶ पितरञ्चापि,
जिण्णकं गत-योब्बनं;
पहु सन्तो न पोसिस्सं,
इति पच्छानुकप्पति.
आचरियमनुसत्थारं ¶ ,
सब्ब-काम-रसाहरं;
पितरं अतिमञ्ञिस्सं,
इति पच्छानुतप्पति.
समणे ¶ ब्राह्मणे चापि,
सीलवन्ते बहुस्सुते;
न पुब्बे पयिरुपासिस्सं,
इति पच्छानुतप्पति.
साधु ¶ होति तपो चिण्णो,
सन्तो च पयिरुपासितो;
न पुब्बेव तपोचिण्णो,
इति पच्छानुतप्पति.
यो ¶ च एतानि ठानानि,
योनिसो पटिपज्जति;
करं पुरिस-किच्चानि,
स पच्छा नानुतप्पति.
न ¶ साधारण-दारस्स,
न भुञ्जे साधुमेकको;
न सेवे लोकायतिकं,
नेतं पञ्ञाय वड्ढनं.
सीलवा ¶ वत्त-सम्पन्नो,
अ-प्पमत्तो विचक्खणो;
निवात्त-वुत्ति अत्थद्धो,
सुरतो सखितो मुदु.
सङ्गहेता ¶ च मित्तानं,
संविभागी वीधानवा;
तप्पेय्य अन्न-पानेन,
सदा समण-ब्राह्मणे.
धम्म-कामो ¶ सुता-धारो,
भवेय्य परिपुच्छको;
सक्कच्चं पयिरुपासेय्य,
सीलवन्ते बहुस्सुत्ते.
घरमावसमानस्स ¶ ,
गहट्ठस्स सकं घरं;
खेमा वुत्ति सिया एवं,
एवं नु अस्स सङ्गहो.
अ-ब्यपज्जो ¶ सिया एवं,
सच्च-वादी च माणवो;
अस्मा लोका परं लोकं,
एवं पेच्च न सोचति.
सुखा ¶ मत्तेय्यता लोके,
अथो पेत्तेय्यता सुखा;
सुखा सामञ्ञता लोके,
अथो ब्रह्मञ्ञता सुखा.
पथवी ¶ वेळुकं पत्तं,
चक्कवाळं सुचिप्फलं;
सिनेरु वम्मिको खुद्दो,
समुद्दो पातिको यथा.
ब्रह्माति ¶ माता-पितरो,
पुब्बाचरियाति वुच्चरे;
आहुनेय्या च पुत्तानं,
पजानमनुकम्पका.
तस्मा ¶ हि ने नमसेय्य,
सक्करेय्य च पण्डितो;
अन्नेन अथो पानेन,
वत्थेन सयनेन च.
साधुजन-निद्देस
काय-कम्मं ¶ सुचि तेसं,
वाचा-कम्मं अनाविलं;
मनो-कम्मं सुचि-सुद्धं,
तादिसा सुजना नरा.
सेट्ठ-वित्तं ¶ सुतं पञ्ञा,
सद्धनं सत्तधा होत्ति;
सद्धा सीलं सुतं चागो,
पञ्ञा चेव हिरोत्तप्पं.
सद्धम्मापि ¶ च सत्तेव,
सद्धा हिरी च ओत्तप्पं;
बाहुस्सच्चं धिरो चेव,
सति पञ्ञा च इच्चेवं.
हिरी-ओत्तप्प-सम्पन्ना ¶ ,
सुक्त्क-धम्म-समाहिता;
सन्तो सप्पुरिसा लोके,
देव-धम्माति वुच्चरे.
सद्धो ¶ हिरिमा ओत्तप्पी,
वीरो पञ्ञो स-गारवो;
भब्बो आपज्जितुं बुद्धिं,
विरूळ्हिञ्च विपुल्लतं.
यो ¶ वे कतञ्ञू कत-वेदि धीरो,
कल्याण-मित्तो दळ्हअ-भत्तो च होति;
दुक्खित्तस्स सक्कच्चं करोति किच्चं,
तथाविधं सप्पुरिसं वदन्ति.
माता-पेत्ति-भरं ¶ जन्तुं,
कुले जेट्ठापचायिनं;
सण्हं सखिल-सम्भासं,
पेसुणेयप्पहायिनं.
मच्छेर-विनये युत्तं,
सच्चं कोधाभितुं नरं;
तं वे देवा तावतिंसा,
आहु सप्पुरिसो इति.
अ-प्पमादेन ¶ मघवा,
देवानं सेट्ठतं गतो;
अ-प्पमादं पसंसन्ति,
पमादो गरहितो सदा.
दानं ¶ सीलं परिच्चागं,
आज्जवं मद्दवं तपं;
अ-कोधं अ-विहिंसञ्च,
खन्तीच अ-विरोधनं.
इच्चेते कुसले धम्मे,
ठिते पस्सामि अत्तनि;
ततो मे जायते पीति,
सोमनस्सञ्चनप्पकं.
ननु ¶ तेयेव सन्ता नो,
सागरा न कुलाचला;
मनंपि मरियादं ये,
संवट्टेपि जहन्ति नो.
न ¶ पुप्फ-गन्धो पटिवातमेति,
न चन्दनं तग्गर मल्लिका वा;
सतञ्च गन्धो पटिवातमेति,
सब्बा दिसा सप्पुरिसो पवायति.
तेपि ¶ लोक-हिता सत्ता,
सूरियो चन्दिमा अपि;
अत्थं पस्स गमिस्सन्ति,
नियमो केन लङ्घते.
सत्था ¶ देव-मनुस्सानं,
वसी सोपि मुनिस्सरो;
गतोव निब्बुतिं सब्बे,
सङ्खारा न हि सस्सता.
करेय्य ¶ कुसलं सब्बं,
सिवं निब्बानमावहं;
सरेय्यअ अ-निच्चं खन्धं,
निब्बिदा-ञाण-गोचरं.
यातानुयायी ¶ च भवाहि माणव,
अल्लञ्च पाणिं परिवज्जयस्सु;
मा चस्सु मित्तेसु कदाचि दुब्भि,
मा च वसं अ-सतीनं गच्छ.
अ-सन्धवं ¶ नापि च दिट्ठ-पुब्बं,
यो आसनेनापि निमन्तयेय्य;
तस्सेव अत्थं पुरिसो करेय्य,
यातानुयायीतितमाहुपण्डिता.
यस्सेकरत्तिपि ¶ घरे वसेय्य,
यत्थन्न-पानं पुरिसो लभेय्य;
न तस्स पापं मनसापि चिन्तेय्य,
अ-दुब्भ-पाणि दहते मित्त-दुब्भो.
ततीय साधुनर
यस्स ¶ रुक्खस्स छायाय,
निसीदेय्य सयेय्य वा;
न तस्स साखं भञ्जेय्य,
मित्त-दुब्भो हि पापको.
चतुत्थ साधुनर
पुण्णंपि ¶ चे मं पथविं धनेन,
दज्जित्थिया पुरिसो सम्मताय;
सद्धा खणं अतिमञ्ञेय्य तंपि,
तासं वसं अ-सतीनं न गच्छे.
एवं ¶ खो यातं अनुयायी होति,
अल्लञ्च पाणिं दहते पुनेवं;
अ-सती च सा सो पन मित्तं-दुब्भो,
सो धम्मिको होहि जहस्सु अ-धम्मं.
कायखमनीय-निद्देस
अभिवादन-सीलिस्स ¶ ,
निच्चं वुड्ढापचायिनो;
चत्तारो धम्मा वड्ढन्ति,
आयु वण्णो सुखं बलं.
२३५. पञ्चिमे ¶ भिक्खवे धम्मा आयुस्सा, कतमे पञ्च. सप्पाय-कारी होति. सप्पायेच मत्तं जानाति. परिणत्तभोजी च होति. काल-चारी च, ब्रह्म-चारीच. इमे खो भिक्खवे पञ्च धम्मा आयुस्साति.
२३६. पञ्चिमे ¶ भिक्खवे धम्मा आयुस्सा, कतमे पञ्च. सप्पाय-कारी होति. सप्पायेच मत्तं जानाति. परिणतभोजीचहोति. सीलवाच, कल्याण मित्तोच. इमे खो भिक्खवे पञ्च धम्मा आयुस्साति.
पञ्च-सीलं ¶ समादाय,
समं कत्वा दिने दिने;
सतिमा पञ्ञवा हुत्वा,
चरे सब्बिरियापथे.
२३८. पञ्चिमे ¶ भिक्खवे चङ्कमे आनिसंसा, कतमे पञ्च, अद्धानक्खमो होति. पधानक्खमो होति. अप्पाबाधो होति. असितंपीतंखायितंसायितं सम्मा परिणामं गच्छति. चङ्कमाधिगतो समाधि चिरट्ठितिको होति. इमेखो भिक्खवे पञ्च चङ्कमे आनि संसाति.
परिस्सावन-दानञ्च ¶ ,
आवास-दानमेव च;
गिलान-वत्थु-दानञ्च,
दातब्बं मनुजाधिप.
कातब्बं ¶ जिण्णकावासं,
पटिसङ्खरणं तथा;
पञ्च-सील-समादानं,
कत्वा तं साधु-रक्खितं;
उपोसथोपवासो च,
कातब्बोपोसथे इति.
अति-भोत्ता ¶ रोग-मूलं,
आयुक्खयं करोति वे;
तस्मा तं अति-भुत्तिंव,
परिहरेय्य पण्डितो.
अ-जिण्णे ¶ भोजनं विसं,
दुल्लद्धे अ-विचारके;
जिण्णे सु-लद्धे विचारे,
न वज्जं सब्ब-भोजनं.
चत्तारो ¶ पञ्च आलोपे,
आभुत्वा उदकं पिवे;
अलं फासु-विहाराय;
पहितत्तस्स भिक्खुनो.
मनुजस्स ¶ सदा सतिमतो,
मत्तं जानतो लद्ध-भोजनं;
तनुकस्स भवन्ति वेदना,
सनिकं जीरति आयु पालयं.
गरूनं ¶ अड्ढ-सोहिच्चं,
लहूनं नाति-कित्तिया;
मत्ता-पमाणं निद्दिट्ठं,
सुखं जीरति तावता.
तोयाभावे ¶ पिपासत्ता,
खणा पाणेहि मुच्चते;
तस्मा सब्बासुवत्थासु,
देय्यं वारिं पिपासये.
सीतोदकं ¶ पयो खुद्दं,
घतमेकेकसो द्विसो;
तिस्सो समग्गमथ वा,
पगे पितं युवत्तदं.
अन्नं ¶ ब्रह्मा रसे विण्हु,
भुत्ते चेव महेसरो;
एवं ञत्वातु यो भुञ्जे,
अन्न-दोसं न लिम्पते.
कत्तिकस्सन्तिमो ¶ भागो,
यं चादो मिग-मासजो;
तावुभो यम-दाठाख्यो,
लघ्वाहारोव जीवति.
सत्थानुकुल-चरिया ¶ ,
चित्तञ्ञावसवत्तिना;
बुद्धि-रक्खिलितत्थेन,
परिपुण्णं रसायनं.
अ-जातिया ¶ अ-जातानं,
जातानं विनिवत्तिया;
रोगानं यो विधि दिट्ठो,
तं सुखत्थी समाचरे.
आरोग्यं ¶ परमा लाभा,
सन्तुट्ठि परमं धनं;
विस्सासा परमा ञाति,
निब्बानं परमं सुखं.
पकिण्णक-निद्देस
कुमुदं ¶ को पबोधयि,
नाथो रविन्दु पण्डितो;
कमलं को कुमुदं को,
नरपं को पबोधयि.
चित्तेन ¶ निय्यति लोको,
चित्तेन परिकस्सति;
चित्तस्स एक-धम्मस्स,
सब्बेव वसमन्वगू.
समणो ¶ राजानुराजा,
सेनापति महा-मत्तो;
धम्मट्ठो पण्डितो दिस्वा,
पच्चक्खत्थं न कारिया.
दीपो ¶ नव-दिसं तेजो,
न हेट्ठा च तथा सकं;
पर-वज्जं विदू पस्से,
सक-वज्जंपि पस्सतु.
स-फलं ¶ पण्डितो लोके,
स-कारणं वचं भणे;
अ-कारणंफलं बालो,
इदं उभय-लक्खणं.
तस्स ¶ वाचाय जानेय्य,
कुटिलं बाल-पण्डितं;
वाचा-रूपं मित्तं करे,
वाचा-रूपं धुवं जहे.
दुच्चिन्तितस्स ¶ चिन्ता च,
दुब्भासितस्स भासना;
दुक्कम्मस्स कतञ्चाति,
एतं बालस्स लक्खणं.
सु-चिन्तितस्स ¶ चिन्ता च,
सु-भासितस्स भासना;
सु-कम्मस्स कतञ्चाति,
एतं धीरस्स लक्खणं.
अ-नयं ¶ नयति दुम्मेधो,
अ-धुरायं नि-युञ्जति;
दुन्नयो सेय्यसो होति,
सम्मा वुत्तो पकुप्पति;
विनयं सो न जानाति,
साधु तस्स अ-दस्सनं.
नयं ¶ नयति मेधावी,
अ-धुरायं न युञ्जति;
सु-नयो सेय्यसो होति,
सम्मा वुत्तो न कुप्पति;
विनयं सो पजानाति,
साधु तेन समागमो.
अ-नायका ¶ विनस्सन्ति,
नस्सन्ति बहु-नायका;
थी-नायका विनस्सन्ति,
नस्सन्ति सुसु-नायका.
जेट्ठो ¶ कम्मेसु नीचानं,
जानंजानंव आचरे;
अ-जानेवं करे जानं,
नीचो एति भयं पियं.
कम्मं ¶ दुज्जन-सारुप्पं,
दुधा सुजन-सारुप्पं;
दुज्जनं तेसु दुक्कम्मे,
सु-कम्मे सुजनं इच्छे.
पण्डितो ¶ वेरी बालो च,
दुज्जयो बाल-वेरितो;
पण्डितं-वेरी पमादेन,
न तं जयो हि सब्बदा.
गुय्हस्स ¶ हि गुय्हमेव साधु,
न हि गुय्हस्स पसत्थमावि-कम्मं;
अ-निप्फन्नताय सहेय्य धीरो,
निप्फन्नत्थोव यथा-सुखं भणेय्य.
गुय्हमत्थं ¶ न विवरेय्य,
रक्खेय्य नं यथा निधिं;
न ही पातुकतो साधु,
गुय्हो अत्थो पजानता.
थिया ¶ गुय्हं न संसेय्य,
अ-मित्तस्स च पण्डितो;
यो चामिसेन संहीरो,
हदय-त्थेनो च यो नरो.
विविच्च ¶ भासेय्य दिवा रहस्सं,
रत्तिं गिरं नाति-वेलं पमुञ्चे;
उपस्सुतिका हि सुणन्ति मन्तं,
तस्मा हि मन्तो खिप्पमुपेति भेदं.
न ¶ पकासति गुय्हं यो,
सो गुय्हं पटिगुय्हति;
भयेसु न जहे किच्चे,
सु-मित्तोनुचरो भवे.
करोति ¶ दुक्करं साधुं,
उजुं खमति दुक्खमं;
दुद्ददं सामं ददाति,
यो सु-मित्तो हवे भवे.
पिय-वाचा ¶ सदा मित्तो,
पिय-वत्थुं न याचना;
इच्छागतेन दानेन,
सु-दळ्हो सु-प्पियो हवे;
तदङ्गतो च हीनेन,
अ-प्पियो भिज्जनो भवे.
देहीति ¶ याचने हिरी,
सिरी च काय-देवता;
पलायन्ति सिरिच्छितो,
न याचे पर-सन्तकं.
स्वानो ¶ लद्धान निम्मंसं,
अट्ठिं तुट्ठो पमोदति;
सकन्तिकं मिगं सीहो,
हित्वा हत्थिंनुधावति.
एवं ¶ छन्दानुरूपेन,
जनो आसीसते फलं;
महा छन्दा महन्तंव,
हीनंव हीन-छन्दका.
नाना-छन्दा ¶ महाराज,
एकागारे वसामसे;
अहं गाम-वरं इच्छे,
ब्राह्मणी च गवं सतं.
पुत्तो ¶ च आजञ्ञ-रथं,
कञ्ञा च मणि-कुण्डलं;
या चेसा पुण्णका जम्मी,
उजुक्खलंभि-कङ्खति.
ठानं ¶ मित्ते धने कम्मे,
सतुस्साहे सु-लब्भितं;
तं दळ्हं दुक्करं करे,
पञ्ञा-सति-समाधिना.
भेसज्जे ¶ विहिते सुद्ध,
बुद्धादि-रतनत्तये;
पसादमाचरे निच्चं,
सज्जने स-गुणेपि च.
राजा ¶ रट्ठेन धातुसो,
बालो पापेहि दुम्मनो,
अलङ्कारेन इत्थीपि,
कामेहि च न तप्पति.
अप्पिच्छो ¶ च धुतङ्गेन,
आरद्धो वीरियेन हि;
विसारदो परिसाय,
परिच्चागेन दायको;
सवनेन सु-धम्मंपि,
न तप्पतिव पण्डितो.
जेट्ठस्स ¶ सितं हसितं,
मज्झस्स मधुरस्सरं;
लोके अंस-सिरो-कम्पं,
जम्मस्स अप-हस्सितं;
एतेसं अति-हस्सितं,
हासो होति यथाक्कमं.
नत्थि ¶ दुट्ठे नयो अत्थि,
न धम्मो न सु-भासितं;
निक्कमं दुट्ठे युञ्जेय्य,
सो हि सब्भिं न रञ्जति.
दुल्लभं ¶ पकतिं वाचं,
दुल्लभो खेमको सुतो;
दुल्लभा सदिसी जाया,
दुल्लभो स-जनो पियो.
धजो ¶ रथस्स पञ्ञाणं,
धूमो पञ्ञाणमग्गिनो;
राजा रट्ठस्स पञ्ञाणं,
भत्ता पञ्ञाणमित्थिया.
दुन्नारिया ¶ कुलं सुद्धं,
पुत्तो नस्सति लालना;
समिद्धि अ-नया बन्धु,
पवासा मदना हिरी.
माता ¶ पिता च पुत्तानं,
नोवादे बहु-सासन्नं;
पण्डिता मातरो अप्पं,
वदेय्युं वज्ज-दीपनं.
लाळये ¶ पञ्छ-वस्सानि,
दस-वस्सानि ताळये;
पत्ते तु सोळसे वस्से,
पुत्तं मित्तंवदाचरे.
लालने ¶ धीतरं दोसा,
पालने बहवो गुणा;
धीतुया किरियं निच्चं,
पस्सन्तु सुट्ठु मातरो.
इति ¶ पकिण्णक-निद्देसो नाम
सत्तमा परिच्छेदो.
सील-निद्देस
पमादं ¶ भयतो दिस्वा,
अ-प्पमादञ्च खेमतो;
भावेथ अट्ठङ्गिकं मग्गं,
एसा बुद्धानुसासनी.
हीनेन ¶ ब्रह्म-चरियेन,
खत्तिये उपपज्जति;
मज्झिमेन च देवत्तं,
उत्तमेन वि-सुज्झति.
क.
नगरे ¶ बन्धुमतिया,
बन्धुमा नाम खत्तियो;
दिवसे पुण्णमाय सो,
उपगच्छि उपोसथं.
ख.
अहं तेन समयेन,
गुम्भ-दासी अहं तहिं;
दिस्वा स-राजकं सेनं,
एवाहं चिन्तयिं तदा.
ग.
राजापि ¶ रज्जं छट्टेत्वा,
उपगच्छि उपोसथं;
स-फलं नून तं कम्मं,
जन-कायो पमोदितो.
घ.
योनिसो ¶ पच्चवेक्खित्वा,
दुग्गच्चञ्च दलिद्दतं;
मानसं सम्पहंसित्वा,
उपगच्छिमु पोसथं.
ङ.
अहं ¶ उपोसथं कत्वा,
सम्मा-सम्बुद्धसासने;
तेन कम्मेन सु-कतेन,
तावतिंसं अगच्छहं.
च.
तत्थ मे सु-कतं ब्यम्हं,
उब्भ-योजनमुग्गतं;
कूटागार-वरूपेतं,
महासनसु-भूसितं.
छ.
अच्छरा ¶ सत-सहस्सा,
उपतिट्ठन्ति मं सदा;
अञ्ञे देवे अतिक्कम्म,
अतिरोचामि सब्बदा.
ज.
चतुसट्ठि-देव-राजूनं ¶ ,
महेसित्तमकारयिं;
तेसट्ठि-चक्कवत्तिनं,
महेसित्तमकारयिं.
झ.
सुवण्ण-वणा ¶ हुत्वान,
भवेसु संसरामहं;
सब्बत्थ पवरा होमि,
उपोसथस्सिदं फलं.
ञ.
हत्थि-यानं अस्स-यानं,
रथ-यानञ्च सिविकं;
लभामि सब्बमेतम्पि,
उपोसथस्सिदं फलं.
ट.
सोण्ण-मयं ¶ रूपि-मयं,
अथोपि फलिका-मयं;
लोहितङ्ग-मयञ्चेव,
सब्बं पटिलभामहं.
ठ.
कोसेय्य-कम्बलियानि ¶ ,
खोम-कप्पासिकानि च;
महग्घानि च वत्थानि,
सब्बं पटिलभामहं.
ड.
अन्नं ¶ पानं खादनीयं,
वत्थं सेनासनानि च;
सब्बमेतं पटिलभे,
उपोसथस्सिदं फलं.
ढ.
वर-गन्धञ्च मालञ्च,
चुण्णकञ्छ विलेपनं;
सब्बमेतं पटिलभे,
उपोसथस्सिदं फलं.
ण.
कूटागारञ्च ¶ पासादं,
मण्डपं हम्मियं गुहं;
सब्बमेतं पटिलभे,
उपोसथस्सिदं फलं.
त.
जातिया ¶ सत्त-वस्साहं,
पब्बजिं अन-गारियं;
अड्ढ-मासे अ-सप्पत्ते,
अर हत्तं अपापुणिं.
थ.
किलेसा ¶ झापिता मय्हं,
भवा सब्बे समूहता;
सब्बासव-परिक्खीणा,
नत्थि दानि पुन-ब्भवो.
द.
एक-नवुतितो ¶ कप्पे,
यं कम्ममकरिं तदा;
दुग्गतिं नाभिजानामि,
उपोसथस्सिदं फलं.
ध.
स्वागतं ¶ वत मे आसि,
मम बुद्धस्स सन्तिके;
तिस्सो विज्जा अनु-पत्ता,
कतं बुद्धस्स सासनं.
न.
पटिसम्भिदा चतस्सो,
विमोकापि च अट्ठिमे;
छळाभिञ्ञा सच्छिकता,
कतं बुद्धस्स सासनं.
ञातीनञ्च ¶ पियो होति,
मित्तेसु च विरोचति;
कायस्स भेदा सु-गतिं,
उपपज्जति सीलवा.
निब्बानं ¶ पत्थयन्तेन समादिन्नं,
पञ्च-सीलम्पि अधि-सीलं;
दस-सीलम्पि अधि-सीलमेव.
क.
नगरे ¶ चन्दवतिया,
भटको आसहं तदा;
पर-कम्मायने युत्तो,
पब्बज्जं न लभामहं.
ख.
महन्धकार-पिहिता ¶ ,
तिविधग्गीहि डय्हरे;
केन नुखो उपायेन,
वि-संयुत्तो भवे अहं.
ग.
देय्यधम्मो ¶ च मे नत्थि,
भटको दुक्खितो अहं;
यं नूनाहं पञ्च-सीलं,
रक्खेय्यं परिपूरयं.
घ.
अनोमदस्सिस्स मुनिनो,
निसभो नाम सावको;
तमहं उपसङ्कम्म,
पञ्च-सिक्खापदग्गहिं.
ङ.
वस्स-सत-सहस्सानि ¶ ,
आयु विज्जति तावदे;
तावता पञ्च-सीलानि,
परिपुण्णानि गोपयिं.
च.
मच्चु-कालम्हि ¶ सम्पत्ते,
देवा अस्सासयन्ति मं;
रथो सहस्स-युत्तो ते,
मारिसस्स उपट्ठितो.
छ.
वत्तन्ते ¶ चरिमे चित्ते,
मम सीलं अनुस्सरिं;
तेन कम्मेन सु-कतेन,
तावतिंसं अगच्छहं.
ज.
तिंसखत्तुञ्च देविन्दो,
देव-रज्जमकारयिं;
दिब्ब-सुखं अनुभविं,
अच्छराहि पुरक्खत्तो.
झ.
पञ्च-सत्ततिखत्त्तु-ञ्च ¶ ,
चक्कवत्ती अहोसहं;
पदेस-रज्जं विपुलं,
गणनातो अ-सङ्खयं.
ञ.
देव-लोका ¶ चवित्वान,
सुक्क-मूलेन चोदितो;
पुरे वेसालियं जातो,
महा-कुले सु-अड्ढके.
ट.
वस्सूपनायिके काले,
दिब्बन्ते जिन-सासने;
माता च मे पिता चेव,
पञ्च-सिक्खापदग्गहुं.
ठ.
सह ¶ सुत्वानहं सीलं,
मम सीलं अनुस्सरिं;
एकासने निसीदित्वा,
अरहत्तमपापुणिं.
ड.
जातिया ¶ पञ्च-वस्सेन,
अरहत्तमपापुणिं;
उपसम्पादयि बुद्धो,
गुणमञ्ञाय चक्खुमा.
ढ.
परिपुण्णानि ¶ गोपेत्वा,
पञ्च-सिक्खापदानहं;
अ-परिमेय्यितो कप्पे,
विनिपातं न गच्छहं.
ण.
स्वाहं यसमनुभविं,
तेसं सीलान वाहसा;
कप्प-कोटिपि कित्तेन्तो,
कित्तये एक-देसकं.
त.
पञ्च-सीलानि ¶ गोपेत्वा,
तयो हेतू लभामहं;
दीघायुको महा-भोगो,
तिक्ख-पञ्ञो भवामहं.
थ.
संकित्तेन्तो ¶ च सब्बेसं,
अधि-मत्तञ्च पोरिसं;
भवाभवे संसरित्वा,
एते ठाने लभमहं.
द.
अ-परिमेय्य-सीलेसु ¶ ,
वत्तन्ता जिन-सावका;
भवेसु यदि रज्जेय्युं,
विपाको कीदिसो भवे.
ध.
सु-चिण्णं मे पञ्च-सीलं,
भटकेन तपस्सिना;
तेन सीलेनहं अज्ज,
मोचयिं सब्ब-बन्धना.
न.
अ-परिमेय्यितो ¶ कप्पे,
पञ्च-सीलानि गोपयिं;
दुग्गतिं नाभिजानामि,
पञ्च-सीलानिदं फलं.
प.
पटिसम्भिदा ¶ चतस्सो,
विमोक्खापि च अट्ठिमे;
छळाभिञ्ञा सच्छिकता,
कतं बुद्धस्स सासनं.
क.
तं ¶ नमस्सन्ति ते विज्जा,
सब्बे भूमा च खत्तिया;
चत्तारो च महा-राजा,
तिदसा च यसस्सिनो;
अथ को नाम सो यक्खो,
यं त्वं सक्क नमस्ससि.
ख.
मं ¶ नमस्सन्ति ते-विज्जा,
सब्बे भूमा च खत्तिया;
चत्तारो च महा-राजा,
तिदसा च यसस्सिनो.
ग.
अहञ्च ¶ सील-सम्पन्ने,
चिररत्त-समाहिते;
सम्मा पब्बजिते वन्दे,
ब्रह्म-चरिय परायने.
घ.
ये ¶ गहट्ठा पुञ्ञ-करा,
सीलवन्तो उपासका;
धम्मेन दारं पोसेन्ति,
ते नमस्सामि मातलि.
ङ.
सेट्ठा ¶ हि किर लोकस्मिं,
ये त्वं सक्क नमस्ससि;
अहम्पि ते नमस्सामि,
ये नमस्ससि वासव.
पालितत्थेरनागेन ¶ ,
विसुद्धारामवासिना;
सुतिच्छितानमत्थाय,
कता नरदक्खदीपनी.
पुब्बाचरिय-सीहानं ¶ ,
आलम्बित्वान निस्सयं;
पालितो नाम यो थेरो,
इमं गन्थ सु-लेखनी;
सुन्दरमेव पस्सितुं,
युञ्जेय्याथीध साधवे.
‘‘छप्पदिका’’.
इमं ¶ गन्थं वाचुग्गतो,
सचे भवसि माणव;
पुण्नमायं यथा चन्दो,
अति-सुद्धो विरोचति;
तथेव त्वं पुण्ण-मनो,
विरोच सिरिया धुवं.
सु-निट्ठितो ¶ अयं गन्थो,
सक्कराजे दझम्फिये;
पोट्ठपादम्हि सूरम्हि,
कालपक्खे चतुद्दसिं.
सञ्चितेतं ¶ मया पुञ्ञं,
तं-कम्मेन वरेन च;
चिरं तिट्ठतु सद्धम्मो,
अ-वेरा होन्तु पाणिनो.
इमं ¶ गन्थं पस्सित्वान,
होन्तु सब्बेपि जन्तुनो;
सुखिता धम्मिका ञाणी,
धम्मं पालेतु पत्थिवो.
निब्बानं ¶ पत्थयन्तेन,
सीलं रक्खन्तु सज्जना;
ञत्वा धम्मं सुखावहं,
पापुणन्तु अनासवं.
अट्ठ-कण्ड-मण्डिताय ¶ ,
दक्खय अत्थ-दीपको;
नर-सारो अयं गन्थो,
चिर-कालं पतिट्ठतु.
यावता चन्द-सूरिया,
नागच्छेय्युं मही-तले;
पमोदिता इमं गन्थं,
दिस्सन्तु नय-कोविदा.
सम्मा ¶ छन्देनिमं गन्थ,
वाचेन्ता परियापुणा;
पसन्नेनानायासेन,
पत्वा सुखेन कोविदं.
चन्दादिच्चाव ¶ आकासे,
बहुस्सुतेहि सम्पदा;
विसेस-पुग्गला हुत्वा,
पप्पोन्तु अमतं पदं.
उक्कट्ठ-धम्म-दानेन ¶ ,
पापुणेय्यमनुत्तरं;
लिङ्ग-सम्पत्ति-मेधावी,
तक्की-पञ्ञा सु-पेसली.
नरदक्ख थोमना आसीस
३. गाथा
पालितो ¶ पाळिया छेको,
त्वंसि गम्भीर-ञाणवा;
पालियाव पालितस्स,
ददामिदानि भो अहं.
दक्खावादेसु ¶ कुसलो,
पालितो सासनन्धरी;
पिटकेसु अज्झोगाय्ह,
नरदक्खंभिसङ्खरी.
सुत-धरेन ¶ रचितं,
एतं सार-गवेसिनो;
अतन्दिका सु-दक्खन्तु,
अग्गग्ग-सासने रता.
नरदक्ख थोमना आसीस
२. गाथा
ञुं ¶ पालितोध जातो यो,
थेरो सो अब्भुतोव ञुं;
ञुं महा-पालितो सन्तो,
निकाय-पालितो च ञुं.
ञुं ¶ नर-दक्ख-गन्थं यं,
सोवका नर-दक्ख-दं;
नरा दक्खन्तु सम्मा च,
दक्खत्तं पापुणन्तु ञुं.