अञ्ञ > नीति-गन्थ-सङ्गहो > चतुरारक्खदीपनी

MMR Vol 0

Misc. Paragraph

चतुरारक्खदीपनी

कायपच्चवेक्खणा

पणामपटिञा

१. बुद्धानुस्सति निद्देस

२. मरणस्सतिनिद्देस

३. असुभभावना निद्देस

४. मेत्ताभावनानिद्देस

अप्पमादावह पकिण्णकनिद्देस

कायपच्चवेक्खणा

नमो तस्स भगवतो अरहतो सम्मासम्बुद्धस्स

चक्कवाळ ¶ नहुता ग, देवालि गण चुम्बितो;

बुद्ध पादम्बुजो ठातु, सीसे दया तिगन्धजो.

नन्त ¶ चक्कवाळ ब्भुग्ग, गुण सन्निच्चितं जिनं;

वन्दे तप्पूजितं धम्मं, तज्जं सङ्घञ्च निम्मलं.

वक्खामि ¶ चतुरारक्खं, सम्बुद्ध वचन न्वयं;

अप्पमादावहं एतं, सोत्तब्बं भवभीरुहि.

बुद्धानुस्सति ¶ मरणा, भुभा मेत्ताच भावना;

अप्पमादाय आरक्खा, चतस्सो मानिता सतं.

बुद्धोवादं ¶ सरित्वाव, मच्चुब्बिग्गा सुखेसिनो;

सीता सीततरं यन्ति, सुभमेत्तम्बुसि-ट्ठिता.

मरणग्गि वारणम्बु, सम्बुद्धवचनं यिदं;

बहू तदग्गि सन्तत्ता, सीतावासुं तदम्बुना.

सद्धं ¶ बुद्धेन तेजेत्वा, मानं मरणचिन्तया;

असुभाय हने रागं, दोसं मेत्ताय पञ्ञवा.

अरहं ¶ सम्मासम्बुद्धो, विज्जक्खि चरणप्पदो;

सुगतो सुगदो सत्था, सब्बञ्ञू भगवादमो.

आरकत्तारिहन्तत्ता ¶ , पापाकारकतोरहो;

हत चक्कारतो पूजा, रहत्ता चारहं नमे.

समुत्ते ¶ जिय गिहीनं, अनुपुब्बिकथो जिनो;

अदासि परमं तुट्ठिं, सच्चानि दस्सयं दिवा.

भिक्खूनं ¶ पठमे यामे, पायेसि अमतागदं;

जातिखेत्ताग देवानं, कङ्खच्छेदो स मज्झिमे;

आदो फलसुखं वेदि, मज्झे सेय्य मका जिनो;

वेनेय्यो लोकनं अन्ते, पच्छिमेपि तिधा कते.

खेदं ¶ अगणयं नाथो, पञ्च बुद्धकतं वहं;

सत्थसिद्धो परत्थंव, ब्यावटो सुमहादयो.

चङ्कमित्वा निसीदित्वा, रत्तिंदिवञ्च झायितुं;

सुपितुं मज्झयामेव, बुद्धो भिक्खून मोवदि.

नाल ¶ मालसितुं तस्स, महावीरस्स सासने;

पमादाय मुनिन्दस्स, कतञ्ञू साधु सम्मतो.

अनञ्ञातस्स ञाताय, अपत्तस्सच पत्तिया;

आरभेतुंव नो युत्तो, अप्पमत्तो रहोगतो.

आरब्भथ ¶ निक्कमथ, युञ्जथ बुद्धसासने;

धुनाथ मच्चुनो सेनं, नळागारंव कुञ्जरो.

यो ¶ इमस्मिं धम्मविनये, अप्पमत्तो विहिस्सति;

पहाय जाति संसारं, दुक्खस्सन्तं करिस्सति;

इति ¶ उय्योजनं म्हाकं, मुत्तस्स मुत्तिया सरं;

नयुत्तोव पमादाय, महादयस्स सत्थुनो.

सुत्तेन दुब्बितक्केन, अकिच्च करणेनवा;

मोघ कालक्खयो मन्दो, दुक्खस्सन्तं कथंकरे.

आकासं ¶ चक्कवाळञ्च, सत्ता बुद्धगुणा पिच;

अनन्तानाम चत्तारो, परिच्छेदो नविज्जति.

यथापि नभ माकासं, अङ्गुलरज्जुयट्ठिभि;

मिनेतुं नेव सक्कोति, एवं केनचि तग्गुणं.

मरणस्सति ¶ मिच्छन्तो, ताव बुद्धवचो सुण;

अविक्खित्तेन चित्तेन, सम्बुद्ध वचनं हिदं.

अनिमित्त ¶ मनञ्ञातं, मच्चानं इध जीवितं;

कसिरञ्च परित्तञ्च, तञ्च दुक्खेन संयुतं.

न हि सो पक्कमो अत्थि, येन जाता नमिय्यरे;

जरम्पि पत्वा मरणं, एवंधम्मा हि पाणिनो.

फलान ¶ मिव पक्कानं, पातो पतनतो भयं;

एवं जातान मच्चानं, निच्चं मरण तो भयं.

यथापि कुम्भकारस्स, कता मत्तिकभाजना;

सब्बे भेदपरियन्ता, एवं मच्चान जीवितं.

दहराच ¶ महन्ताच, येबाला येच पण्डिता;

सब्बे मच्चुवसं यन्ति, सब्बे मच्चुपरायना.

तेसं मच्चुपरेतानं, गच्छतं परलोकतो;

नपिता तायते पुत्तं, ञातिवापन ञातके;

पेक्खतञ्ञेव ¶ ञातीनं, पस्स लालप्पतं पुथु;

एकमेकोव मच्चानं, गो वज्झोविय निय्यति.

एव मब्भाहतो लोको, मच्चुनाच जरायच;

तस्मा धीरा नसोचन्ति, विदित्वा लोक परियायं.

अञ्ञेपि ¶ पस्स गमने, यथा कम्मुपगे नरे;

मच्चुनो वसमागम्म, फन्दन्तेविध पाणिनो.

न ¶ तत्थ हत्थि नं भुम्मि, न रथानं नपत्तिया;

न चापि मन्तयुद्धेन, सक्का जेतुं धनेनवा.

यो धम्मचारी कायेन, वाचाय उद चेतसा;

इधेवनं पसंसन्ति, पच्चसग्गे पमोदतीति.

यथा ¶ वारिवहो पूरो, वहे रुक्खे पकूलजे;

एवं जरामरणेन, वुय्हन्ते सब्ब पाणिनो.

साय ¶ मेके निदिस्सन्ति, पातो दिट्ठा बहुज्जना;

पातो एके नदिस्सन्ति, सायं दिट्ठा बहुज्जना.

अज्जेव किच्चं आतप्पं, को जञ्ञा मरणं सुवे;

नहि नो सङ्करं तेन, महासेनन मच्चुनाति.

नत्थेत्थञ्ञो ¶ नुसासन्तो, सयंवत्तान मोवद;

जिनेरिता नुसारेन, भिक्खु संसार भीरुको.

अहिवापि ¶ मं डंसेय्य, अञ्ञेपि विसधारिनो;

अपियापिच घातेय्युं, उप्पज्जेय्युं रुजापिमे.

मच्चुसेना वुधासङ्ख्या, बाहिरज्झत्तु पद्दवा;

तेहायु पीळितंछेज्जं, मरिस्स मज्जवा सुवे.

अळक्का ¶ हि गवादीहि, चोरादीहि अरीहिपि;

अभिण्ह सन्निपातेहि, रुजा छनवुतीहिपि.

बहून मुपकारेहि, अन्नोदकादिकेहिपि;

मरिस्सं पीळितो निच्चं, निरुज्झेय्यायु अज्जवा.

बह्वावुधे ¶ विसज्जेति, निल्लेणं मच्चुनिद्दयो;

वसन्तं भवसङ्गामे, नमुत्तो कोचि आवुधा;

महब्बला महापञ्ञा, महिद्धिका महद्धना;

नमुत्ता सम्मासम्बुद्धो, सब्बलोकाधिपो अपि;

मया ¶ समा नवा वुद्धा, तदावुधेहि ते मता;

तथा हम्पि मरिस्सामि, लेणं पुञ्ञंव मे कतं.

धात्वाहारु ¶ तुदोसानं, समत्ते वायु तिट्ठति;

विसमे तङ्खणञ्ञेव, छेज्ज मप्पं पराधिनं.

धात्वा हारुतु दोसानं, विसमा स्वेप्यकल्लको;

उस्साहे कल्लकालेव, किंकरेय्यअकल्लको;

उप्पज्जेय्युं ¶ रुजा स्वेपि, असातो दुक्खमा खरा;

पुरेतरंव आरब्भे, मापच्छा अनुतापनं.

सत्तानं ¶ नीचकम्मानं, सरणोपि भयङ्करो;

नीचानीचं नजानामि, मरणासन्नतम्पिच.

कम्म पीळित सत्तानं, तङ्खणम्पि भयुब्भवो;

मरेय्य मज्जवा स्वेवा, नयुत्तोव पमज्जितुं.

पुञ्ञक्खीणा पजा खिप्पं, अहेतुनापि नस्सये;

सुद्धचित्तो मरिस्सामि, न किलिट्ठेन चेतसा.

उपच्छेदापि ¶ मे सन्ति, भवाभवचिता बहू;

छेज्जं तेहायु अज्जापि, साध्वासुमारभे मतं;

कम्मा पराध सत्तानं, विनासे पच्चुपट्ठिते;

अनयो नयरूपेन, बुद्धिमाकम्य तिट्ठति.

मरणासन्न ¶ तञ्ञेव, चिन्तेय्य पञ्ञवा सतो;

एवं चिन्तयन्तो सन्तो, नपापं कत्तु मुस्सहे.

मरणासन्न तञ्ञेव, चिन्तेय्य बुद्धसावको;

एवं चिन्तयन्तो सन्तो, कदाचिपि अनुण्णतो.

अद्धाग ¶ मरणं पञ्ञो, पुरेतरंव चिन्तये;

करे कातब्ब कम्मञ्च, एवं सो नानुसोचति.

मरणासन्न सञ्ञी सो, अप्पमत्तो विचक्खणो;

पत्तेपि मरणे काले, न सम्मुळ्हो नसोकवा.

मरणा ¶ सन्नसञ्ञी सो, सोधेति अत्तनो मलं;

निम्मलेन चुतो भिक्खु, नत्वेवा पाय गामिको.

सति ¶ आसन्नमरणे, दूरसञ्ञी पमादवा;

आकिण्णो पापधम्मेहि, पज्झायि दुम्मनो तदा.

सति आसन्न मरणे, दुट्ठो दोसोति थद्धवा;

अभिनन्दति सादेति, तदासो अतिदुक्खितो.

सति ¶ आसन्नमरणे, तुवटं न चिकिच्छति;

सञ्चिच्चापत्ति मापन्नो, तदा सो परिदेवति.

सति आसन्न मरणे, गिहीहि नवकेहिच;

संसट्ठो न नुलोमेहि, स्वतिवस्सु मुखो तदा.

सति ¶ आसन्न मरणे, कुहको कुलदूसको;

मिच्छाजीव समापन्नो, दुन्निमित्तोव सो चुतो.

ससोकी ¶ सहनन्दीच, दुक्खे दुक्खो सुखे सुखो;

गिहिकम्मेसु उस्सुक्को, पस्सं गिज्झकूटं चुतो.

मरिस्सन्ति अनावज्ज, किलेसातुर पीळितो;

किमिखज्जवणो साव, भन्तो किं सुगतिं वजे.

मरिस्सन्ति ¶ अनावज्ज, धुरद्वयं न पूरति;

गन्थं विपस्सनं तन्दी, कारुञ्ञोयेव सो चुतो.

मरिस्सन्ति अनावज्ज, किलेसानं वसानुगो;

सम्बुद्धा-णं वीतिक्कन्तो, कारुञ्ञो नत्थि तस्समो.

मरिस्सन्ति ¶ अनावज्जं, धनमेसी अधम्मतो;

पुञ्ञे चिन्तापि नुप्पज्जि, निरयं सो मनं गतो.

मरेय्यन्ति अनावज्जं, धनं चिनि अधम्मतो;

चितं चितं इहेवेतं, तस्मिंगिद्धो स पेत्तिको.

अत्था ¶ गेहे निवत्तन्ते, सुसाने मित्तबन्धवा;

सुकतं दुक्कतं कम्मं, गच्छन्त मनुगच्छति.

मरेय्यन्ति अनावज्जं, इहत्थं वा नुयुञ्जति;

सम्पराय मनपेक्खो, सुजुं वा पायगामिको.

मरेय्यन्ति ¶ समावज्ज, धम्मतो धन मेसति;

पुञ्ञकारी सुलद्धेन, मरणेपि स मोदति.

पञ्चसील सदारक्खो, यथाबलञ्च दायको;

काले उपोसथावासो, सो निच्चं सुगतिं वज्जे.

धोवापत्तिमलं ¶ खिप्पं, मच्चु अद्धा गमिस्सति;

मिच्छावितक्क मुच्छिज्ज, कर कातब्बभावनं.

अतिक्कन्ता बहू रत्यो, खेपेत्वा मम जीवितं;

मन्दायुना पमादेन, युत्तो विहरितुं कथं.

हासन्तं ¶ नन्दि मत्तानं, मच्चुसन्धीहि तच्छये;

कुच्छि मेय्यचुतो अज्ज, को हासनन्दितब्बको.

मच्चुसेनावुधा सङ्ख्या, मरणाभिमुखो अहं;

अच्चायितब्ब कालो यं, इक्खितब्ब मुदिक्खतु.

आकिण्णमच्चुसेनानं ¶ , अज्ज स्वेवा विनासिनं;

अद्धा पहाय गामीनं, किं पमाद विहारिना.

खणमत्तोव पच्चक्खो, अज्ज स्वेवा अतिस्सति;

सम्परायो अतिदीघो, परम्परो अनन्तिको.

खणमत्तोव ¶ पच्चक्खो, मच्चुना तं जहिस्सति;

पहाय गमनीये-स्मिं, महुस्साहो निरत्थको.

सम्परायो अतिदीघो, अपाथेय्ये सुदुत्तरो;

महुस्साहेन कातब्बो, तदत्थो दीघदस्सिना.

सद्धा ¶ बन्धतु पाथेय्यं, तदेसनं इहेव हि;

भवन्तरे नलब्भेय्य, अपाथेय्य तिदुक्खितो.

संसार तरणत्थाय, महोलुम्पानि बन्धथ;

भावना दान सीलेहि, तिवित्तिण्णो भवण्णवो.

मरेय्यन्ति ¶ अनुब्बिग्गो, पापकं कत्तुमुस्सहे;

करेय्य हासनन्दिञ्च, चापल्लञ्च पमाद वा.

मरेय्यमिति ¶ संविग्गो, लेणमेव गवेसति;

न हासि नेवनन्दीच, न चापल्लो कदाचिपि.

अच्चुट्ठित रुजग्गीहि, अच्चायासे भयानके;

नोसधे मरणासन्ने, कतपुञ्ञंव सात-दं.

ञातिसङ्घा ¶ वियोजेन्ता, मरणन्त भुसातुरा;

सब्बं पहाय गन्तापि, नन्दितब्बानि पुञ्ञिनो.

पस्सन्ता सुनिमित्तानि, पाकटानि सकम्मुना;

सुखन्ति मरणे काले, नुमोदन्ता कतानिच.

सात-दातानि ¶ पुञ्ञानि, एवं महब्भये अपि;

सुगतिं लहुनेतानि, कातब्बानि पुरेतरं.

देवदूते ¶ पकासेत्वा, यमपुट्ठो सयंकतं;

पुञ्ञं सरति चे सत्तो, तदेव सुगतिं वजे.

पाप ¶ कड्ढम्पि निरये, मनं दुक्खगतं पजं;

दुक्खा मोचेति यंपुञ्ञं, सदा कातब्बमेव तं.

पहायकंव पुञ्ञञ्हि, पहातब्बंव पापकं;

तं पदीपन्धकारंव, द्वयं ओत्वा खुकं विय.

ञातिसङ्घा ¶ वियोजेन्ता, मरणन्त भुसातुरा;

सब्बं पहाय गन्तारो, भयानकानि पापिनो.

पस्सन्ता दुन्निमित्तानि, पाकटानि सकम्मुना;

मरणे अतिदुक्खन्ति, नुतापेन्ता कतानिच.

पटिपीळानि ¶ पापानि, एवं महब्भये सति;

दुग्गतिं लहुनेतानि, युत्तोव परिवज्जितुं.

देवदूते ¶ पकासेत्वा, यमराजेन पुच्छितो;

पमादस्सन्ति चिक्खन्तो, महग्गिम्हि तुरं पति.

पुञ्ञं अकरिवा मावा, यमराजिन्द पुच्छितो;

पमादस्सन्ति चिक्खन्तो, महादुक्खं तुरं गमि.

पापं ¶ अकरिवा मावा, पुच्छितो यमसामिना;

पमादस्सन्ति चिक्खन्तो, तत्तं गुळं तुरं गिलि.

जातमत्ता तिजिण्णाच, आतुराच मता वुधा;

देवदूते इमे पञ्च, दिस्वा संविग्गतं वजे.

चोदिता ¶ देवदूतेहि, ये पमज्जन्ति मानवा;

ते दीघरत्तं सोचन्ति, हिन कायू पगानरा.

धुरद्वय ¶ मनारब्भ, गिहिकम्मादिके रतो;

कथं गिज्झकूटं सेसं, पेतावासं अतिस्सति.

मोचनत्थाय ¶ पब्बज्ज, संकिलिट्ठा पमादिनो;

सुगत्यापिच ते भट्ठा, अतिदूराव मुत्तितो.

सीदन्तेव ¶ जले खित्ता, सिला महाव खुद्दका;

पतन्ति खुद्दकेनापि, अपायं पाप कम्मुना.

पतन्ता खुद्दकेनेव, बहूहि पुन पीळिता;

मोक्खोकासं नविन्दन्ति, पापं खुद्दम्पि नाचरे.

जेगुच्छित्थूदरागम्म ¶ , पुनापि तत्थ निच्चगू;

दुक्खाति दुक्ख संकिण्णो, हट्ठुं तुट्ठुं नसक्कुणे.

मच्चुदुक्खं खणंयेव, अतिदुक्खं तदुत्तरि;

मातुगामुदरे सन्धि, पतिट्ठानं भयानकं.

मच्चुदुक्खं ¶ खणंयेव, अतिदुक्खं चिरत्तनं;

आम पक्कन्तरे सन्धि, पतिट्ठानं भयानकं.

दुग्गत्यंठातु तंदुक्खं, सुण उच्चकुलेअपि;

कुच्छियं अतिसम्बाधे, जलाबुम्हि जिगुच्छिते.

मिळ्ह सेम्हादि संकिण्णे, अति दुग्गन्ध वासिते;

गूथकूपे किमीविय, तमेजा मूलकम्मतो.

परमाणुकायो ठाति, दुक्खी नेरयिको विय;

धुवातुरो सुखामिस्सो, आम पक्कासयन्तरे;

वेदनट्टोव संवड्ढो, अचित्तोविय निच्चलो;

दसमासन्तरे कच्चे, बहू मरन्ति पाणिनो.

एवं ¶ मच्चुञ्च सन्धिञ्च, विजायनञ्च भेरवं;

पस्सं निब्बिन्दन्तो सन्तो, विरज्जेय्य भवन्दुके.

एवं मच्चुञ्च सन्दिञ्च, अनुस्सर मभिण्हसो;

राजसेट्ठि भवादिम्पि, नइच्छेय्य तदन्वितं.

भवे ¶ दुक्ख मचिन्तेत्वा, भवासाय पवत्तितं;

पुञ्ञं पुनप्पुनं देति, सन्धिं न निब्बुतिं वरं.

भवे दुक्खं विभायित्वा, निब्बिन्देन पवत्तितं;

पुञ्ञं भव मतिक्कम्म, निब्बानं देति निब्बुतिं.

भवे ¶ दुक्खं सरित्वान, मच्चुसन्धि सयादिकं;

तिभवेसु विरज्जेय्या, दित्त गेहेव सामिको.

सन्तो पुञ्ञानि करोन्तो, सन्धिदुक्ख मनुस्सरं;

निब्बिन्द युत्त चित्तेन, वज्जेय्य भवसात तो.

पुञ्ञ ¶ निब्बत्त ठानेपि, जेगुच्छे सन्धिसम्भवो;

भव सात वसा तस्मा, धीरो तं लग्गनं चजे.

सिरिमं ¶ गणिकं दिस्वा, दमेतुं रत्तचेतसं;

दस्सेत्वा मतसारीरं, तस्सा जिनो इदं ब्रवि.

चरंवा ¶ यदिवा तिट्ठं, निसिन्नो उदवा सयं;

समञ्छेति पसारेति, एसा कायस्स इञ्जना.

अट्ठि न्हारूहि संयुत्तो, तच मंसाव लेपनो;

छविया कायो पटिच्छन्नो, यथाभूतं नदिस्सति.

अन्तपूरो ¶ दरपूरो, यकन पेळस्स वत्थिनो;

हदयस्स पप्फासस्स, वक्कस्स पिहकस्सच.

सिङ्घानिकाय खेळस्स, सेदस्सच मेदस्सच;

लोहितस्स लसिकाय, पित्तस्सच वसायच.

अथस्स ¶ नवहि सोतेहि, असुचि सवति सब्बदा;

अक्खिम्हा अक्खिगूथको, कण्णम्हा कण्णगूथको.

सिङ्घानिकाच नासतो, मुखतो वमति एकदा;

पित्तं सेम्हञ्च वमति, कायम्हा सेदजल्लिका.

खादन्ति ¶ नं सुवानाच, सिङ्गालकाच किमियो;

काका गिज्झाच खादन्ति, येचञ्ञे सन्ति पाणका.

सुत्वान ¶ बुद्धवचनं, भिक्खु पञ्ञाणवा इध;

सोखो नं परिजानाति, यथाभूतञ्हि पस्सति.

अज्झत्तञ्च बहिद्धाच, काये छन्दं विराजये.

छन्द ¶ राग विरत्तो सो, भिक्खु पञ्ञाणवा इध;

अज्झगा अमतं सन्तिं, निब्बानं पद मच्चुतं.

द्विपादको यं असुचि, दुग्गन्धो परिहारति;

नानाकुणप परिपूरो, विस्सवन्तो ततोततो.

एतादिसेन ¶ कायेन, यो मञ्ञे उन्नमेतवे;

परंवा अवजानेय्य, किमञ्ञत्र अदस्सनाति;

काय विच्छन्दनीयसुत्तं, विजयसुत्तन्तिपि वत्तब्बं.

र-अक्खरो ¶ सियाग्गिम्हि, रोव अग्गिव आगतो;

तस्मा रागोति वत्तब्बो, तण्हाव निच्चतापिका.

अभिण्हमेव रागग्गि, दय्हते सुभसञ्ञिनं;

किमिखज्जवणो साव, दुक्खी रागी स सब्बदा.

दुक्खी ¶ पिय मलद्धान, लद्धाप्य परिपुण्णतो;

नत्थि रागग्गिखन्धस्स, पियिन्धेन हि पुण्णता.

एकस्स पिवितं खीरं, चतू दधि जला बहु;

रागहेतु भवे सन्धि, ट्ठानं अनमतग्गिकं.

चतूदमि ¶ जला भिय्यो, सीसच्छेदन लोहितं;

रागहेतु भवे मच्च, भयं अनमतग्गिकं.

एकस्स रुदतो अस्सु, चतू दधि जला बहु;

दुक्खं अनमतग्गंव, तंहेतु परिदेवनं.

तत्तायो ¶ गुळ गिलित, वधग्गि दय्हना दिकं;

असङ्ख्येय्यं महादुक्खं, तंहेतु निरये लभि.

एक द्वित्ति चतु पञ्च, बुद्धुप्पादेप्य मोचितं;

खुप्पिपासित निज्झामं, लभि तंहेतु पेत्तिकं.

तिरच्छाने ¶ असूरेच, दुक्खं नानाविधं लभि;

नमतग्गिक संसारे, सब्बन्तं रागहेतुकं.

एकस्सेकेन कप्पेन, पुग्गलस्सट्ठि सञ्चयो;

सचे संहारितो अस्स, वेपुल्ल पब्बताधिको.

एक कप्पे इदं दुक्खं, नादिकप्पेसु काकथा;

रागो ननु महावेरी, बालो जनो त मिच्छति.

रागसुद्धि ¶ असोकोच, निद्दुक्खो ञायपत्तिच;

निब्बानं पञ्च पच्चक्खा, असुभाय फला मता.

असुभग्गहणं ¶ झायी, मिता सिन्द्रिय संवरो;

सोमित्य मुक्कट्ठावाचा, छळिमे राग सुद्धिया.

निच्चुग्गराग रोगीनं, असुभा वातुलोसधा;

रागयक्खाभि गय्हानं, असुभा मन्त मुत्तरं.

सजीवकाच ¶ निज्जीवा, असुभा दुविधा मता;

सजीवा केसलोमादि, दसेविमे अजीवका.

उद्धुमातक ¶ वीनीलं, विपुब्बकं विछिद्दकं;

विक्खायितक विक्खित्तं, हतिविक्खित्त लोहितं.

पुळुव ट्ठिक मिच्चेसु, लद्धा अञ्ञतरं सतो;

रतन वानपस्सेय्य, यथा चेतसि पाकटं.

मतं ¶ खज्जं स मंसञ्च, निलोहितं निमंसकं;

विक्खित्तं सेत पुञ्जट्ठिं, नवधा पुतिमिक्खये.

मच्चुतो ¶ परिमुच्चामि, पटिवत्ति यिमा यिति;

पयोजन समावज्ज, मोदितब्बं जिगुच्छके.

सजीवके जिगुच्छत्थं, निज्जीवा सुभ मीरितं;

तथूपमो अयंकायो, एवमेव भविस्सति.

एवंधम्मो ¶ अयंकायो, एवंभावी नतिक्कमो;

इच्चुप संहरे दिस्वा, एकद्विह मतादिकं.

यथा ¶ इदं तथाएतं, यथाएतं तथा इदं;

जेगुच्छं पटिकूल्यञ्च, काये इच्चुप संहरे.

उद्धुमात ¶ विनीलादो, सोभणं नत्थि किञ्चिपि;

इमस्मिंपि मे काये, गवेसन्तोपि सब्बसो.

पटिकूलवसा धातु, वसाच द्विप्पकारतो;

पच्चवेक्खेय्यिमं कायं, इच्छं विराग मत्तनि.

वण्ण ¶ सण्ठान गन्धेहि, आसयो कासतोपिच;

जेगुच्छ पटिकूल्याच, केसा न तुट्ठमानिता.

कायतो ¶ बहिनिक्खन्तं, पटिकूल्यं जिगुच्छितं;

अनिक्खन्तम्पि जेगुच्छं, पटिकूल्यंव तस्समं.

सङ्खतम्पि यथा वच्चं, मनुञ्ञतं न पापुणे;

उपक्कम सहस्सेहि, एवं केसादिकम्पिच.

सभाव ¶ पटिकूल्यंव, एकम्पि वच्च पुञ्जकं;

ननु जेगुच्छिता भिय्यो, द्वत्तिंस वच्चपुञ्जका.

पच्चेकम्पि ¶ पटिकूल्यं, केसादिकं सभावतो;

केसादिद्वत्तिंस पुञ्जो, भिय्यो जेगुच्छितो ननु.

पुञ्जितेस्वेव कन्तेसु, कन्तोहोति स पुञ्जको;

पुञ्जितेसु अकन्तेस, अकन्तोव स पुञ्जको.

पच्चेकं ¶ विनिभुत्तेस, केस लोम नखादिसु;

नत्थि तञ्ञा कुमारीवा, मुखहत्थादिकानिवा.

सन्तं ¶ चिन्तेय्य नासन्तं, सन्त चिन्तयतो सुखं;

असन्तं परिकप्पेन्तो, नानादुक्खेहि तप्पति.

नावज्ज सन्तजेगुच्छं, सञ्ञं असति कातुन;

सुभा इत्थीति गारग्गि, उप्पज्जि सुभसञ्ञिनो.

असन्तंव ¶ अभूतंव, पस्से रागग्गिजोतिया;

ताय सन्तञ्च भूतञ्च, न पस्सति कदाचिपि.

एकस्स ¶ पिवितं खीरं, सीसच्छेदन लोहितं;

रुदतो अस्सु तंहेतु, चतूदधि जला बहु.

आयतिम्पि अतीतेव, संसरन्तस्स हेस्सति;

रागं हन्तु मनीहोचे, खीरं अस्सुच लोहितं.

उस्सोळ्हि ¶ वीरियो हुत्वा, ब्रूहेय्यासुभ भावनं;

सुभसञ्ञाप्प हानाय, परिच्चज्जापि जीवितं.

अञ्ञकिच्च मुपेक्खाय, ब्रूहेय्यासुभ भावनं;

मन्दि हुत्वेह रागग्गि, निब्बायिस्सति आयतिं.

किच्चं मे इदमेवेति, ब्रूहेय्यासुभ भावनं;

दानि मन्दग्गि हुत्वान, पामोज्जं वे लभिस्सति.

काये ¶ दट्ठब्ब जेगुच्छं, अपस्सन्तो पमादवा;

अलद्धा किञ्चि पामोज्जं, पब्बज्जम्पि न मोदति.

पुरे मरामि काये स्मिं, पस्सा मि पस्सितब्बकं;

इच्चा रद्धो वीतिंलद्धा, पब्बज्जं अतिमोदति.

काये ¶ दट्ठब्ब जेगुच्छं, अपस्सन्तो पमाद वा;

मोघंव दुल्लभातीतो, महाजानीयतं गतो.

सन्तं भूतञ्च जेगुच्छं, रागग्गिना अपस्सियं;

पञ्ञापदीपजोतेन, समिक्खेय्य अभिण्हसो.

सन्तं ¶ भूतञ्च काये स्मिं, दट्ठुकामो सदासतो;

पञ्ञापदीपकेनेव, दक्खे न रागीसीखिना.

जेगुच्छितेन कायेन, निक्खन्तेन जिगुच्छतो;

अज्ज स्वेवा विनट्ठेन, नाल मुन्नमितुं सतो.

कीदिसं ¶ मं तुवं मञ्ञि, अहं सब्ब जेगुच्छको;

जेगुच्छतोच निक्खन्तो, इच्चेव वत्तु मरहति.

काये जेगुच्छसञ्ञंव, करे सब्बिरिया पथे;

तस्मिं तुट्ठब्बकं नत्थि, पियायितं ममायितं.

सुभाय ¶ नव मत्तानं, असुभा परिपाचये;

सन्तो पक्कस्स संसारो, नन्तो नवस्स रागिनो.

काये असुभ सञ्ञाय, परिपक्क सभाविनो;

आलम्बेसु अचापल्ला, थिरा सम्बुद्ध सासने.

अन्तो ¶ गोचरिका पक्का, बहि गोचरिका नवा;

पक्का नासाय उच्चा ते, नीचायेव नवा सिनो.

नवानवा ¶ सुभाभोगी, नीचानीचा भिगामिनो;

पक्का पक्काव धीझायी, सन्तासन्ता विरागिनो.

सक्का सक्का न दस्सेतुं, सुभंसुभं सतंसतं;

धीराधीराग मुज्झन्ति, काये काये क्रियेक्रिये.

सक्का ¶ सक्कापि तं कातुं, सुभंसुभं न धीमयं;

सन्तोसन्तोजिगुच्छञ्ञू, न वानवा सुभेसको.

दुकायं ¶ सुति चिन्तेत्वा, ममायन्ता महातपा;

तपं निब्बायितुं इच्छं, दुकायं दुति चिन्तये.

य्वासुभं सुभतो मञ्ञि, कोनुबालोतदुत्तरि;

अन्धो उम्मत्तकोवा सो, नत्तानं मञ्ञते तथा.

सरितब्बक ¶ मेवेतं, काये जेगुच्छ पुञ्जतं;

मन्दरागो मनोसीतं, लभेय्य तमनुस्सनं.

गिहिभावे अपायेच, रागयक्खन्ध निन्निता;

मंपि नेस्सति सोयक्खो, सादेमिचे तदागतं.

अभिण्ह ¶ गाहिनं राग, यक्खं अनन्त दुक्ख दं;

असुभा तुल मन्तेन, वारेहि तं स भायति.

रागयक्खो बहुमायो, सद्धामेत्ता दिवेसवा;

रागम्पि कुसलं मञ्ञि, जनो तेनेव वञ्चितो.

आतुरं ¶ असुचिं पुतिं, पस्स नन्दे समुस्सयं;

उग्घरन्तं पग्घरन्तं, बालानं अभिपत्थितं.

सुभतो नं मञ्ञति बालो, अविज्जाय पुरक्खतो;

इच्चाह भगवा निन्दि, बालोति सुभसञ्ञिनं.

न्हारुट्ठि ¶ तच मंसानि, सरं सतं न निन्दितो;

बुद्धनिन्दाय मोचेतुं, तानारब्भ अनुस्सरे.

मञ्ञित्वा अत्तनो बाल्यं, असुभे सुभदस्सिनो;

वायामेय्य अबालाय, कायं असुभतो सरं.

अत्तानं ¶ गरहित्वान, बालं विपरिदस्सिनं;

सुभसञ्ञं पहिन्नेय्य, करेय्यासुभ सञ्ञितं.

विस भेसज्जरुक्खट्ठो, अहि डंसेय्यसोसतो;

यथा तस्सेव पण्णादिं, खादेत्वा विस मुज्जहे.

एवं रागो समुप्पज्जे, काये गन्धादि वासिते;

अन्तो तस्सेव जेगुच्छं, चिन्तेत्वा राग मुज्जहे.

जिगुच्छितेन ¶ कायेन, अपस्सन्तो जिगुच्छतं;

उन्नमेति अवञ्ञाति, अविज्जाय पुरक्खतो.

आयतिं ¶ मग्गलाभाय, बीजं करेय्य भावनं;

बीजा भावे कुतो मग्गो, मग्गबीजा हि भावना.

मग्गबीजो अपायेपि, निम्मुग्गो समये गते;

उम्मुज्जित्वाव बुद्धानं, मग्गं लभेय्य सन्तिके.

अजीजस्स ¶ तु संसारो, दीघोयेव अनन्तिको;

तस्माहि भावनाबीजं, करेय्य मोचनत्थिको.

अभिण्ह पीळितं रागं, असुभाय निवारये;

मन्दीहुत्वा पहीयेय्य, रागो असुभ भीरुको.

माजेगुच्छं ¶ ममायेथ, साव जेगुच्छमामको;

अनन्त दुक्ख मापादि, जेगुच्छित ममायना.

न्हारुट्ठि ¶ तच मंसेहि, रागवड्ढकि सङ्खते;

गेहे रोगा पुती पापा, वसन्ति कुच्छिता सदा.

लुङ्गन्ता वीस भूधातू, पित्तादी द्वादसम्बुव;

तापं जिरं दहं पक्कं, चतुरग्गि छवायुका.

यथा ¶ बहि तथा अज्झत्तं, धातू भ्वापा नलानिला;

नमे नाहं नअत्ताति, संमसेय्य पुनप्पुनन्ति.

मेत्ता ¶ भावन मिच्छम्पि, सुण बुद्धवचो यिदं;

दोस निग्गहणत्थाय, दोसो मेत्तायवेरिहि.

अक्कोच्छिमं अवधिमं, अजिनिमं अहासिमे;

येच तं उपनय्हन्ति, वेरं तेसं नसम्मति.

अक्कोच्छिमं ¶ अवधिमं, अजिनिमं अहासिमे;

येचतं नुपनय्हन्ति, वेरं तेसं उपसम्मति.

नहिवेरेन वेरानि, सम्मन्तिध कुदाचन;

अवेरेनच सम्मन्ति, एसधम्मो सनन्तनो.

परेच ¶ नविजानन्ति, मय मेत्थ यमामसे;

येच तत्थ विजानन्ति, ततो सम्मन्ति मेधगा.

कुद्धो अत्थं नजानाति, कुद्धो धम्मं नपस्सति;

सदा अन्धतमं होति, यंकोधो सहतेनरं.

उभिन्न ¶ मत्थं चरति, अत्तनोच परस्सच;

परं संकुप्पितं ञत्वा, यो सतो उपसम्मति.

तस्सेव तेन पापिय्यो, यो कुद्धं पटिकुज्झति;

कुद्धं अपटिकुज्झन्तो, सङ्गामं जेति दुज्जयं.

अकोधेन जिने कोधं, असाधुं साधुना जिने;

जिने कदरियं दानेन, सच्चेना लिकवादिनं.

यो ¶ वे उप्पतितं कोधं, रथं भन्तंव वारये;

त महं सारथी ब्रूमि, रस्मिग्गाहो इतरोजनो.

पुरिसस्स ¶ हि जातस्स, कुधारी जायते मुखे;

याय छिन्दति अत्तानं, बालो दुब्भासितंभणं.

सेलो यथा एकग्घनो, वातेन नसमीरति;

एवं निन्दा पसंसासु, नसमिञ्जन्ति पण्डिता.

समानभागं ¶ क्रुब्बेथ, गामे अक्कुट्ठ वन्दितं;

मनोपदोसं रक्खेय्य, सन्तो अनुण्णतो सिया.

नपरो परं निकुप्पेथ, नातिमञ्ञेथ कत्थचि नकिञ्चि;

ब्यारोसना पटिघसञ्ञा, नञ्ञमञ्ञस्स दुक्ख मिच्छेय्य.

सच्चं ¶ भणे नकुज्झेय्य, दज्जा अप्पम्पि याचितो;

एतेहि तीहि ठानेहि, गच्छे देवान सन्तिके.

न परेसं विलोमानि, न परेसं कताकतं;

अत्तनोव अवेक्खेय्य, कतानि अकतानिच.

सु ¶ दसं वज्जमञ्ञेसं, अत्तनो पन दुद्दसं;

परेसञ्हि सो वज्जानि, ओफुनाति यथा भुसं;

अत्तनो पन छादेति, कलिंव कितवा सट्ठो.

निधीनंव ¶ पवत्तानं, यं पस्से वज्जदस्सिनं;

निग्गय्हवादिं मेधाविं, तादिसं पण्डितं भजे.

हने दोसू पनाहानि, अनत्थ कारकानि हि;

तेस्व सन्तेसु सब्बेसु, मेत्ताहोति सुनिम्मला.

सतं ¶ दुज्जन वाक्येहि, नमनो याति विक्रियं;

नहितापयितुं सक्का, गङ्गानदिं तिणुक्कया.

नहि निन्दा पसंसाहि, सतं मनोविकारता;

न कदाचिपि कम्पेय्य, वातेहि सेलपब्बतो.

नदियं ¶ खुद्दका नावा, विचीहि उन्नतोनता;

महानावा नकम्पन्ति, महन्तीहि विचीहिपि.

लोके पसंस निन्दाहि, दुज्जनोवुन्नतोनतो;

सन्तोपञ्ञो नचलति, महानिन्दा थुतीहिपि.

खमाधग्ग करेतस्स, दुज्जनो किं करिस्सति;

अतिणे पतितो अग्गि, सयमेव पसम्भति.

सयमेव ¶ सकत्तानं, मच्चुब्भयेन तच्छतु;

माञ्ञे तच्छतु दोसेन, किमत्थं अञ्ञतच्छनं.

माञ्ञे तच्छ तुदोसेन, नसेय्यो अञ्ञतच्छनं;

माञ्ञो तं अहिब्यग्घेव, दोमनस्सेन भायतु.

निस्साय ¶ गरुकातब्बं, बहूनं पापमोचनं;

अचापल्लेन सन्तेन, गरुकातब्बतं वजे.

निस्साय गरुकातब्बं, बहूनं पुञ्ञवड्ढनं;

गरुकातब्बतं गच्छे, धीतिया सील गुत्तिया.

सन्तं ¶ हि सीलवं धीतिं, हिरोत्तप्पेन भायति;

दुज्जनं दोमनस्सेन, अहिब्यग्घेव भायति.

नफरुसाय वाचाय, अञ्ञे दमेय्य पण्डितो;

अत्तानंव दमेत्वान, अञ्ञे सण्हेन ओवदे.

चित्ते ¶ सण्हे असण्हापि, नवाचाफरुसा भवे;

तस्मा ओवा दनादीसु, रक्खेय्य थद्धचित्ततो.

अत्तान मोवदत्थाय, सिक्खेय्य बुद्धभासितं;

परम्पि अनुकम्पाय, इच्छन्तो अनुसासये.

अञ्ञं ननिग्गहे किञ्चि, सुतेन पटिपत्तिया;

अत्तनिग्गहणं सेय्यो, नुन्नमेय्य जिनोरसो.

नावीकरेय्य ¶ दोसंवा, लोभं मानं सकंमलं;

माञ्ञे मञ्ञन्तु तं दिस्वा, चिरप्पब्ब जितो नुति.

ककचेन त्तछेदेन्ते, वेरिकेपिनदोसये;

इच्चोवादं मुनिन्दस्स, सम्पटिच्छ जिनोरसो.

वेरी ¶ अच्चुपनाहीपि, रूपेव दुक्खकारको;

न त्व तब्बिसये नामे, दुक्खं माकरि चेतसि.

वेरी तिबन्ध वेरोपि, इहेव दुक्खकारको;

भवन्तरं नअन्वेति, सकम्मुना गतो हिसो.

मेत्तासीतम्बुसेकेन, जिनोवाद मनुस्सरं;

महा नत्थ करं दोसं, निब्बायतु स चेतसि.

छद्दन्तो ¶ लुद्दकं पापं, भूरिदत्तोहि तुण्डिकं;

धम्मपालो खमि तातं, कपिन्दो कन्दरो पतं.

असङ्ख्येय्य त्तभावेसु, परवज्जं तितिक्खतो;

नाथस्स पारमिं खन्तिं, सरं धीरो तितिक्खतु.

सासने ¶ चिरवासेन, एवं निद्दोसका इति;

तुवं पटिच्च मञ्ञन्तु, सासने सप्पयोजनं.

सासने चिर वासापि, मादिसाव इमे इति;

तमागम्म नमञ्ञन्तु, सासने निप्पयोजनं.

द्वे उसेतीति दोसो सो, सपरं दय्हते द्वयं;

पहातब्बो स सब्बेसु, परत्थ सत्थ मिच्छता.

परदिन्नेहि ¶ नोआयु, तिट्ठते नात्तनो वसा;

परवज्जं खमेतब्बं, नसाधु अञ्ञविरोधितो.

जेगुच्छ ¶ क्कोस निन्दानि, बालो गण्हाति अक्खमो;

खमन्तोतु नगण्हाति, जानं जेगुच्छितानिति.

परदिन्नानि वच्चानि, पाभतन्ति नकोचिपि;

गण्हेय्येवं दुरुत्तानि, अगण्हन्तो खमे सतो.

नदि ¶ कल्लोल विचियो, तीरं पत्वा समन्तिध;

सब्बे उप्पतिता दोसा, खन्तिपत्वा समन्ति ते.

दोसुम्मत्तक वाचाय, नुम्मत्तो किंकरिस्सति;

भवे य्युम्मत्तको सोव, तादिसं वचनं भणं.

कोधनो अक्खमो अञ्ञ, दुट्ठसञ्ञी भयालुको;

गाममज्झे अळक्कोव, तथा माहोहि तं जह.

परक्कोसानि निन्दानि, तंव पच्चेन्ति नाञ्ञगू;

खित्तंपंसुव वातुद्धं, गरुकं किं खमायते.

अक्कोसन्तोच ¶ निन्दीच, पीळितो सक कम्मुना;

इध पेच्चच नीचेय्यो, नंनयं गण्हि अक्खमो.

विकारापत्ति मिच्छन्तो, वेरी बहु मुपक्कमि;

मामित्तवस मन्वेहि, निब्बिकारो तुवंभव.

मेत्तम्बुना सद्दोसोच, परदोसोच सम्मति;

मेत्तासेकेन सब्बेसु, सब्बतोग्गिं निपारये.

सदोस ¶ परदोसग्गिं, सब्बतो दिसतो ट्ठितं;

मेत्ता तोयेन वारेय्य, सिया निब्बुति सब्बधि.

नगमे अत्तनो अग्गिं, परग्गिंवापि नागमे;

मेत्तम्बुनाव निब्बातु, सपरग्गि द्वयं भुसं.

गुणी ¶ गुणी नन्दिन्दाय, पसंसाय गुणी गुणी;

निन्दंनिन्दं नकुप्पेय्य, नसादिये थुतिं थुतिं.

गुणं निन्दाय नासेतुं, नसक्का कोचि कुस्सको;

वड्ढेतुंवा पसंसाय, गरुंकरे न तंद्वयं.

दोसब्भा ¶ मल सञ्छन्नो, मेत्ताचन्दो न रोचति;

तंमुत्तस्स तु एतस्स, अतिस्सय पभावतो.

सु सुत्त बुद्ध सुपिना, द्वेपिया गुत्ति नाक्कमो;

समाधि सुमुखा मुळ्हा, ब्रह्मा त्येका दस ग्गुणा.

सीतं ¶ करोतु मेत्ताय, चक्खुं लाभेतु पञ्ञाय;

माकासिनिप्पभे चञ्ञे, चन्दो होहि गतेगते.

दूरासन्नेसु ¶ सब्बेसु, मेत्तं पेसेतु पाभतं;

धम्मं देसेतु पत्तानं, चन्दो होहि गतेगते.

सम्पत्तानं मलं धोव, सीतंकरे सदादयो;

उच्चनीचे नविसेसे, जलस्समो गतेगते.

असअस्सतेसु ¶ फुट्ठेसु, लोकधम्मेसु अट्ठसु;

पतिट्ठो निब्बिकारो त्वं, पथवीसदिसो भव.

नाकासि कलहं सिला, सदा केनचि निच्चला;

मेत्तायन्तो खमायन्तो, महासिलं गुरुंकरे.

सिलाव ¶ सीलवा होतु, दुरुत्तानि तितिक्खतु;

पच्चुत्ते दोससंवड्ढो, अनुत्तोव पसम्भति.

सब्बे अहंव इच्छन्ति, सत्ता सुखन्ति ञातुन;

भावेय्य कमतो मेत्तं, पिय मज्झत्त वेरिके.

सब्बे ¶ तसन्ति दण्डस्स, सब्बे भायन्ति मच्चुनो;

अत्तानं उपमं कत्वा, नहनेय्य नघातये.

अवेरा ¶ ब्यापज्जा नीघो, सुखी चस्सं अहंव मे;

हितकामा तथा अस्सु, मज्झत्ता वेरिनोपिच.

मातरो ¶ भातरो ञाती, दायको पासकापिच;

सुखीहोन्तूति भावेय्य, चजे तेसुच लग्गनं.

दोसो मेत्ताय दूरारि, तण्हा आसन्न वेरिका;

तण्हं पियेसु वारेय्य, दोसं वेरीसु मेत्तिको.

एकुद्देसे ¶ ककम्माच, सिस्सा आचरिया सुखी;

होन्तु सब्रह्मचारीच, तेच ञ्ञोञ्ञ हितावहा.

राजानोच अमच्चाच, गामे इस्सरिया सुखी;

भवन्तु देवतायोच, तेहि सुरक्खितो सुखो.

रट्ठ ¶ पिण्डेन जीवाम, रट्ठवासी सुखन्तुति;

भावेय्येवं अमोघंव, रट्ठपिण्डं सुभुञ्जति.

आपायिका बहू सन्ति, मातापितादि पुब्बका;

तेचञ्ञेच सुखीनीघा, स्स्व ब्यापज्जा अवेरिनो.

सत्ता ¶ भूताच पाणाच, पुग्गला अत्तभाविका;

थी पू रिया नरियाच, देवानरा निपातिका.

अवेरा होन्तु ब्यापज्जा, अनीघाच सुखी इमे;

अत्तानं परिहारन्तु, चतुधा इति भावये.

पुरत्थिमाय ¶ दिसाय, सब्बेसत्ता अवेरिनो;

अब्यापज्जा सुखीनीघा, होन्तूति ताव भावये.

पुरत्थिमाय दिसाय, सब्बेपाणातिआदिना;

द्वादसक्खत्तुं भावेय्य, सेसासुपि अयंनयो.

चतुद्दिसा ¶ नुदिसा धो, उद्धं सत्ताच पाणिनो;

भूताच पुग्गला अत्त, भावी सब्बे थि पूरिसा.

अरिया अरिया देवा, नराच विनिपातिका;

अवेरा ब्यापज्जा नीघा, सुखत्ताच भवन्तु ते.

चतुद्दिसा ¶ नुदिसा धो, उद्धन्ति दसकेदिसि;

द्वादसे ते परिच्छिज्ज, भावेय्य पुग्गले बुधो.

मेत्ता ¶ वस्सेन तेमेतु, पज्जुन्तोविय सब्बधि;

माकिञ्चि परिवज्जेहि, एवं मेत्ता सुभाविता.

पञ्चा नोधि सत्तोधिसा, सियुं द्वादसपुग्गला;

न्तु चतूहेसु भावेत्वा, अट्ठतालीसका सियुं.

दसकेदिसि ¶ तामेत्ता, चतुस्सत असीतियो;

अट्ठतालीसाहि पञ्च, सता ट्ठवीस साधिका.

दुक्खिते ¶ करुणं ब्रूहे, मुदितं सुखिते जने;

मेत्ताचेव उपेक्खाच, उभो उभोसु भाविता.

ब्रह्मवासीति वत्तब्बो, तेस्वञ्ञतर वासितो;

गन्धभूतेसु सो लोके, ब्रह्माविय विरोचति.

सुकुलाच तदुपगा, कामभोगा नपेक्खिनो;

न भयट्टा न इणट्टा, नेव आजीव कारणा.

नालंव ¶ गिहिना ब्रह्म, चरियाय अखण्डितं;

घरावासो तिसम्बाधो, पब्बज्जाव निरालया.

भवपङ्का ¶ पमुच्चाम, तिवित्तिण्णा भयानका;

पटिपत्ति यिमायाति, कत्वा तदुपगा इमे.

उत्तिट्ठे नप्पमज्जेय्य, धम्मं चरितं सुचरे;

धम्मचारी सुखंसेति, अस्मिंलोके परम्हिच.

स्वागता ¶ वत तेभिक्खू, पत्ता सम्बुद्धपुत्त तं;

गिहि बन्धन पुच्छिज्ज, सुखिता सासने रता.

कतपुञ्ञ विसेसाव, एते सुलद्ध दुल्लभा;

छट्टेत्वापि महारज्जं, नेदिसं लद्ध मञ्ञदा.

स्वागता ¶ सुगती होन्तु, मादुग्गती पमादिनो;

दुस्सीला चे गमिस्सन्ति, अपायं तिभयानकं.

गिहिभोगा ¶ परीहिन्नो, सामञ्ञत्तञ्च दूभतो;

परिधंसमानो पकिरेति, छवालातंव नस्सति.

कुसो यथा दुग्गहितो, हत्थमेवा नुकन्तति;

सामञ्ञं दुप्परामट्ठं, निरया युप कड्ढति.

यंकिञ्चि ¶ सिथिलं कम्मं, संकिलिट्ठञ्च यंकतं;

सङ्कस्सरं ब्रह्मचरियं, नतंहोति महप्फलं.

करियाचे करिया वेनं, दळ्हमेनं परक्कमे;

सिथिलोहि परिब्बजो, भिय्यो आकिरते रजं.

इति ¶ वुत्तं मुनिन्देन, नुस्सरं अनि वत्तितो;

सदा अलिन चित्तेन, चरेय्य बुद्धसावको.

रागं असुभचिन्ताय, दोसं मेत्ताय वारये;

मरणेन धजंमानं, सम्बुद्धे तिक्ख सद्धिको.

असुभा कामवितक्कं, मेत्ता ब्यापाद तक्कितं;

विहिंसं करुणायेव, निवारेय्य सदासतो.

बुद्धाणत्ति ¶ सदातीतो, मिच्छावितक्क पीळितो;

पापधम्मेहि संकिण्णो, सोनिच्चापाय गामिको.

धोवित्वा पत्तिमलानि, पुनातिक्कम संवुतो;

मिच्छावितक्क सञ्छेदी, दूरो अपाय गामितो.

खीणासवत्त ¶ बुद्धत्तं, निय्यानिक न्तरा यिकं;

सीहनादं चतुट्ठाने, वेसारज्जो जिनो नदि.

सीलं ¶ निय्यानिकं नाम, आपत्ति अन्तरायिकं;

अन्तराय मनापज्ज, निय्यानेव पतिट्ठतु.

निय्यानिकाच ¶ असुभा, सुभसञ्ञा न्तरायिका;

अन्तराय मनापज्ज, निय्यानेव पतिट्ठतु.

नानापत्ति ¶ पकिण्णोपि, पाराजिका वसेसको;

सो मित्यत्त पणीधीहि, लज्जीयेव विसोधको.

यो ¶ पुब्बेव पमज्जित्वा, पच्छासो नप्पमज्जति;

सोमं लोकं पभासेति, अब्भामुत्तोवचन्दिमा.

धुरंकत्वा ¶ धिपतयो, यो पुञ्ञेसु परक्कमे;

तस्स निय्यानिकं कम्मं, किंनामकं नसिज्झते.

पच्चते ¶ मुनिनो भत्तं, थोकंथोकं घरेघरे;

पिण्डिकायेव जीवन्तु, मापज्जन्तु अनेसनं.

धोवेय्या पत्तिमगानि, वुट्ठान देसनम्बुहि;

संवरिस्सन्ति चित्तेन, सीलं धोतस्स निम्मलं.

बुद्धाणातिक्कमापत्ति ¶ , निग्गहे रागदोसके;

नत्थि सञ्चिच्च आपत्ति, लजीव सो पवुच्चति.

वाणिज्ज कसिकादीहि, नाहारेट्ठि धसासने;

धुर द्वयंव किच्चं तं, नाञ्ञकिच्चेहि हापये.

निग्गण्हेय्य ¶ सकंचित्तं, किट्ठादिं विय दुप्पसुं;

सतिमा सम्पजानोच, चरे सब्बिरियापथे.

यथा ¶ थम्भे निबन्धेय्य, वच्छं दमं नरो इध;

बन्धेय्येवं सकंचित्तं, सतिया रम्मणे दळ्हं.

अधिसीलाधिचित्तानं, अधिपञ्ञाय सिक्खनं;

भिक्खु किच्चत्तयं एतं, करोन्तोव सुभिक्खुको.

पञ्चाट्ठ ¶ दस सीलानि, नाधिसीलं तदुत्तरि;

पातिमोक्खं अधिसीलं, पब्बता धिक मेरुव.

पातिमोक्खं ¶ विसोधेन्तो, अप्पेव जीवितं जहे;

पञ्ञत्तं लोकनाथेन, नभिन्दे सीलसंवरं.

सीलेना तिक्कमं थुल्लं, परियुट्ठं समाधिना;

पञ्ञाया नुसयं सण्हं, किलेसं भिक्खु भिन्दति.

सासनस्सादि ¶ सीलंव, मज्झे तस्स समाधिव;

पञ्ञाव परियोसानं, कल्याणाव इमेतयो.

महापुञ्ञे ¶ ठितं सीलं, समाधि अप्पना गतं;

चतुमग्ग युता पञ्ञा, एतं सिक्खत्तयं मतं.

सीलनलक्खणं सीलं, दुस्सील्य धंसनं रसं;

हिरोत्तप्प पदट्ठानं, सुचि पच्चुपट्ठानकं.

ससीलगुत्ति ¶ नाथोच, दुन्निगहो विसारदो;

धम्मट्ठीतीति पञ्चेते, गुणा वेनयिके मता.

आदि ¶ कल्राण संवेदी, सीलमत्तट्ठ भिक्खवो;

उद्धं कल्याण लाभाय, अलिनो अनिवत्तिको.

धोवित्वा पत्तिमलानि, वुट्ठान देसन म्बुहि;

सुद्धसीले ठितोयेव, एवं चिन्तेय्य पञ्ञवा.

सम्पुद्धोरस ¶ पुत्ताव, बुद्धुरोजा नुस्सावना;

सम्भूता पितु दायादा, पुत्तानाम सभावतो.

खीरं पित्वाव जीवन्ति, जातापि इध पुत्तका;

परियत्ति जिनक्खीरं, पित्वाव जिनपुत्तका.

दायोच ¶ नाम बुद्धस्स, धम्मामिस वसाद्विधा;

मग्गञाणा दयो धम्मो, चत्तारो पच्चयामिसा.

चिर मामिस दायादा, राजपूजादि गाहिनो;

दाया मिस्सग्गहं निच्छि, सद्धम्म गरुको जिनो.

लक्ख ¶ कप्प चतुस्सङ्ख्य, कालं विचित निच्चितं;

धम्मदायं नविन्दम्हा, बुद्धपुत्तापि येमयं.

बुद्धवारित दायादा, सद्धम्मदाय बाहिरा;

पुत्तापि सत्थुदासाभा, भुत्तमत्ता हि दासका.

भद्दन्त ¶ राहुलस्सेव, दायं नोपि अदा जिनो;

नादियिम्हा पमादाय, तं दायं कुसलन्तकं.

धम्मदायादा मेभिक्खवे तुम्हेभवथ,

इमाय ¶ बुद्धवाचाय, बुद्धसन्तक तं सरे;

द्विन्नं आमिसअ दायाद, भावस्सच निवारणं.

रज्जे चण्डालपुत्ताव, सद्धम्मचक्क वत्तिनो;

पुत्ता होन्तापि दायेस्मिं, निरासा तिव निन्दिता.

मिच्छाजीव ¶ समापन्ना, अच्चासा पच्चयामिसे;

महाजानीय सम्पत्ता, मोघकत्वा तिदुल्लभं.

गिहिकामे ¶ पहायागो, परवन्तोसु लग्गितो;

गङ्गातिण्णो तळाकम्हि, निमुग्गोवा तिनिन्दितो.

चीवरे ¶ पिण्डपातेच, पच्चये सयनासने;

एतेसु तण्ह माकासि, मालोकं पुनरागमि.

इतिवुत्ता नुसारेन, पच्चवेक्खण सुद्धिया;

आमिसेसु हने आसं, पुत्तमंसु पमं सरं.

इतिवुत्तं ¶ नुचिन्तेन्तो, वज्जे दुस्सील भावतो;

सीले ठितोव भुञ्जेय्य, मादित्त गुळकं गिलि.

अञ्ञाहि ¶ लाभुपनिसा, अञ्ञा निब्बान गामिनी;

सक्कारं नाभिनन्देय्य, विवेक मनुब्रूहये.

परियत्तिं विना सेय्यं, नलभन्ति बुधाअपि;

सेय्यत्थिकोव सिक्खेय्य, नेव पूजादि कारणा.

भवनिस्सरणत्थंव ¶ , सिक्खे ना लग्गदूपमो;

तथूपमाय सिक्खन्तो, अपायेसु पतिस्सति.

सिक्खितेन अमानत्थं, नसाधु मानथद्धिको;

मुदुभावाय सिक्खित्वा, दमेन्तो मुदुको भवे.

रागं ¶ दोसं धजंमानं, सिक्खन्तोपि विवज्जये;

दहरापि हि मिय्यन्ति, नत्थि वस्सग्गतो मतं.

सद्धंतिक्खेय्य बुद्धेन, रागं असुभ चिन्तया;

मरणेन धजंमानं, दोसं मेत्ताय वारये.

एतेहि ¶ चतुरक्खेहि, गन्थं सिक्खेय्य सं वुतो;

सिक्खन्तस्सेहि रक्खेहि, नकोचि संकिलेसिको.

बुद्धवाचम्पि ¶ सज्झाय, एतेपि मनसीकर;

वुत्तो धम्मविहारीति, एदिसो सासने वरो.

सातं ¶ सेवक्खणेवप्पं, तंहेत्वा नन्तादुक्खन्ति;

धीरो आसं हने कामे, खुरधारमधूपमे.

तिरच्छा ¶ पेत लद्धब्बे, नासं कामसुखे करे;

भायितब्ब सुखं तञ्हि, तस्मिं लग्गा महातपा.

लद्धा कामसुखं बाला, पमोदन्ति नपण्डिता;

पसुपक्खीभि लद्धब्बं, अनन्तदुक्ख कारणं.

लद्धा ¶ धम्मरतिंविञ्ञू, मोदन्ति न अपण्डिता;

अनोम सत्त परिभोगं, भगनिस्सरणावहं.

हीनकम्मं ¶ पटिच्छन्नं, कामस्सादं नपत्थये;

धम्मे पीतिञ्च पामोज्जं, पत्थेय्य साधुसम्पतो.

परिग्गण्हन्ति येकामे, हिं सन्तिते तदत्थिका;

परिच्चत्तं न हिं सन्ति, मुत्तं वण्णेन्ति साधवो.

निच्चुपक्कम्म ¶ पुट्ठोपि, कायो वेरीवसा नुगो;

अचिरंयेव भूसायी, युत्तोव त मुपेक्खितुं.

रक्खितोपि अगुत्तोव, कायो भयमुखे ठितो;

तस्मा काय मुपेक्खित्वा, चरेधम्म मछम्भितो.

पुट्ठो ¶ पुट्ठोपि यंकायो, भुवि रोगासयीसयी;

कतंकतं मुधातो न, तदत्थं दुच्चरे चरे.

पापं ¶ माकर कायत्थं, कायो वेरी वसानुगो;

भूम्यं सेस्सति वेकारी, पापिको निरयं गतो.

चित्त ¶ संसोधका पक्का, कायसंसोधका नवा;

सोधे चित्तंव पक्कत्थं, नकायं भवभीरुको.

चित्तसङ्खरणं ¶ साधु, तं सङ्खतं पभस्सरं;

नसाधु कायसङ्खारो, सङ्खतोप्यसुभोव सो.

सभाव मलिनं कायं, निम्मलाय कथं करे;

आगन्तुमलिनं चित्तं, सक्का कातुं सुनिम्मलं.

आधिब्याधि ¶ परोताय, अज्जस्वेवा विनासिना;

कोहिनाम सरीराय, धम्मापेतं समाचरे.

सभावजेगुच्छं कायं, सोभेतुंनेवसक्कुणे;

चित्तं वा लङ्कतं सोभं, सीलादि गन्धवासितं.

सचे ¶ भायथ दुक्खस्स, सचे वो दुक्ख मप्पियं;

माकत्थ पापकं कम्मं, आविवा यदिवा रहो.

किलेसा गन्तुमलंचित्तं, पभस्सर सभाविकं;

तदागन्तुमलं धोव, चित्तं धोते पभस्सरं.

किलेसा ¶ गन्तुमलंचित्तं, उपक्कमेन सोधये;

सुविसुद्ध मनायेव, उत्तरिंसु भवण्णवा.

काये मलमुपेक्खाय, चित्ते मलंव धोवतु;

चित्ते हि निम्मलेसन्तो, पूतिकायोपि पूजितो.

कायरोगं ¶ तितिक्खाय, चित्तरोगं चिकिच्छतु;

सुखितो कायरोगीपि, चित्ते निरामये सति.

कायरोगे बहू वेज्जा, बुद्धुत्तिव मनोगदे;

इधापि कायिको सन्तो, अनन्ताव मनोरुजा.

सीसदड्ढ ¶ मुपेक्खाय, निब्बातु रागपावकं;

खिप्पं असुभ सञ्ञाय, निच्चदड्ढं भवेभवे.

सुभाय उट्ठितं रागं, असुभाय निवारये;

सोरागो सादितं जन्तुं, चत्वापायं नयिस्सति.

पण्डितानं ¶ मलं मानो, सोत्तुक्कंसेन पाकटो;

माखो अत्तान मुक्कंसे, माविभावे सकंमलं.

गुणं पटिच्च गुणीनं, अहंमानो समुट्ठहे;

मरणं अनुचिन्ताय, धजंमानं निपातय.

एको ¶ कायविवेकेसी, कत्वा किलेसनिग्गहं;

वसे चित्तविवेकेसी, उभो पधि विवेकादा.

अदिट्ठे असुते ठाने, वसेय्य मोचनत्थिको;

अस्सादंहि निवारेतुं, दिट्ठे सुते तिदुक्करं.

अदिट्ठे ¶ असुते रञ्ञे, वसेय्यि न्द्रियगोपको;

वारेतुं विसयाकिण्णे, चक्खुसोतं तिदुक्करं.

रागं असति उप्पन्नं, सन्ताभुजेन वारये;

बाहिरे राग मुप्पन्नं, अन्तो असुभचिन्तया.

रागं ¶ छिन्दाति बुद्धाणं, सरं भिक्खु रहोगतो;

पस्सं कायेध जेगुच्छं, लभेय्या सिट्ठमोचनं.

कायं असुभतोपस्स, कल्लकालेव दस्सनं;

मोघं कालं नखीयेय्य, भवेय्युंस्वेपिआतुरा.

कायं ¶ जेगुच्छतोपस्स, बाल्यन्तो पच्चवेक्खिय;

आदो किञ्चि जिगुच्छाय, जिगुच्छेय्यायतिं भुसं.

कायादिनव मिक्खेय्य, दानि किञ्चिपि दस्सनं;

आयतिं मग्गलाभाय, भवेय्य उपनिस्स यो.

इत्थीन ¶ मङ्गमङ्गानि, नपस्सेय्य नचिन्तये;

तदासा उभतो भट्ठा, सुगत्या सासनापिच.

इत्थिरूप सराकड्ढा, भट्ठा बहूव सासना;

इहापि दुक्खिता हुत्वा, ते पेच्च अतिदुक्खिनो.

पुंमनो ¶ परियादाय, इत्थिरूपसरा ठिता;

तस्सम मञ्ञ मेकम्पि, नविज्जतेव सब्बधि.

सल्लपे ¶ असिहत्थेन, पिसाचेनापि सल्लपे;

आसदे आसिविसेपि, अग्गिक्खन्धेपि आसदे;

नत्वेव मातुगामेन, एकेकाय सुपेसलो.

कामं असुभचिन्ताय, ब्यापादं स्नेहचेतसा;

विहिंसं करुणायेहि, वितक्कग्गी तयोसमे.

असमेत ¶ वितक्कग्गी, थुसरासिम्हि खाणुव;

अथिरा सासने तापी, तेपच्छाअतितापिनो.

असुभा ¶ पगमे लोका, तं मेत्तायुपसङ्कमे;

सुभाविताहि एताहि, जहेलोके पियापियं.

गतट्ठितादो उप्पन्ने, वितक्कग्गी तयो समे;

आतापी पहितत्तोति, एवंभूतो पवुच्चति.

विवादप्पत्तो ¶ दुतीयो, केनेको विवदिस्सति;

तस्सते सग्गकामस्स, एकत्त मुपरोचितं.

सिनिहप्पत्तो दुतीयो, कमेका सिनिहिस्सति;

तस्सते मोक्खकामस्स, एकत्त मुपरोचितं.

पुरतो ¶ पच्छतोवापि, अपरो चे नविज्जति;

तस्सेव फासु भवति, एकस्स वसतो वने.

सुखञ्च काम मयिकं, दुक्खञ्च पविवेकिकं;

पविवेकं दुक्खं सेय्यो, यञ्चे काममयं सुखं.

योच ¶ वस्ससतं जीवे, अपस्सं उदयब्बयं;

एकाहं जीवितं सेय्यो, पस्सतो उदयब्बयं.

सुञ्ञागारं ¶ पविट्ठस्स, सन्तचित्तस्स भिक्खुनो;

अमानुस्सी रति होति, सम्माधम्मं विपस्सतो.

यतोयतो ¶ सम्मसति, खन्धानं उदयब्बयं;

लभति पीतिपामोज्जं, अमतं तं विजानतं.

इच्चुत्तं धम्मपामोज्जं, विवेकजं रसाधिकं;

इच्छन्तो सीलवा भिक्खु, अनिवत्तित वीरियो.

वना वासे वसित्वान, अप्पिच्छादिगुणावहो;

पलि बोधे समुच्छिज्ज, भावेय्येवंरहोगतो.

काये ¶ जेगुच्छपुञ्जानि, रूपं रुप्पनभावतो;

तस्सिता वेदना सञ्ञा, सङ्खाराच ततोपरे.

विञ्ञाणञ्च इमेपञ्च, खन्धा रासत्थतो मता;

तेचानिच्च दुक्खा नत्ता, उपादा वयधम्मिनो.

फेणपिण्डू ¶ पमं रूपं, वेदना पुप्फुळूपमा;

मरीचिकूपमा सञ्ञा, सङ्खारा कदलूपमा.

मायूपमन्ति विञ्ञाणं, दस्सिते सब्ब दस्सिना;

उपमाहि समस्से य्य, पञ्चक्खन्धे असारके.

भय पीळिततो दुक्खा, अनत्ता अविधेय्यतो;

खन्धाव होन्ति भिज्जन्ति, अञ्ञो कोचि नलब्भति.

खन्धा ¶ निच्चा खयट्ठेन, भयट्ठेन दुखाचते;

अनत्ता सारकट्ठेन, इति पस्से पुनप्पुनं.

भाणूदये कयं एन्ति, हेमन्ते पतितुस्सवा;

रागा मानाच सब्बेवं, सत्या निच्चानुपस्सने.

सीहनादं ¶ वनेसुत्वा, संवेजेन्ति ससोतका;

वेहप्फलापि लोकेवं, जिनेरित तिलक्खणं.

वेदनादीनि ¶ नामानि, नामरूपद्वयंव ते;

तण्हाविज्जाच कम्मादि, नामरूपस्स पच्चया.

नामरूपं परिग्गय्ह, ततो तस्सच पच्चयं;

हुत्वा अभावतो निच्चा, उदयब्बय पीळना.

दुक्खा अवसवत्तित्ता, अनत्तातितिलक्खणं;

आरोपेत्वाव सङ्खारे, सम्मसन्तो पुनप्पुनं.

नतुम्हं ¶ भिक्खवे रूपं, तं जहेथाति वुत्ततो;

मेमेतन्ति उपादानं, पञ्चक्खन्धे विनासये.

पुत्ता मत्थि धना मत्थि, इति बालो विहञ्ञति;

अत्तापि अत्तनो नत्थि, कुतोपुत्तोकुतोधनं.

इच्चुत्त मनुचिन्ताय, अत्ताति अत्थिमेतिवा;

सञ्ञं नासेय्य खन्धाव, अत्थीति आभुजे बुधो.

खन्धनास ¶ मनाभुज्ज, मतो मे पुत्तको इति;

सोचन्ति परिदेवन्ति पुत्तोनत्थि नसोमतो.

भिज्जमानेसु ¶ खन्धेसु, अत्तसञ्ञी अनत्तेसु;

नादिकाल विपरिता, महाजानीयतं गता.

भिज्जमानेसु खन्धेसु, लग्गा रत्ता ममायिता;

नारीपुमादि सञ्ञाय, विपरेता अनादिके.

नादिकाल ¶ विपरितो, अत्तसञ्ञी अनत्तनि;

भिज्जमानेसु खन्धेसु, जह त्ताति ममायनं.

अभिण्हुप्पत्तियायेव, भिज्जमानो नञ्ञयति;

अनिच्चलक्खणं छन्नं, तं चिन्तेय्य सुपञ्ञवा.

असन्तेयेव ¶ लग्गन्ता, नमुच्चन्ति भवत्तया;

नत्थि सन्तेसु लग्गन्ता, रूपक्खन्धा दिके स्विध.

तण्हा गिज्झति मेतन्ति, मानो अहन्ति मञ्ञति;

दिट्ठि गण्हाति अत्ताति, एते पपञ्चका तयो.

ममे ¶ त मह मत्ताति, पपञ्चानं वसानुगो;

गण्हन्तो भव पङ्कम्हि, निम्मुग्गोव भयानके.

नमे नाहं नअत्ताति, एतेहि विवदं करे;

विवदन्ताव मुच्चन्ति, भवपङ्का भयानका.

नमे ¶ नाहं नअत्ताति, दट्ठब्बन्ति जिनेरितं;

तथेव सब्बदा मञ्ञे, मा पपञ्च वसानुगो.

लोको विवदि बुद्धेन, नलोकेन कदाचिसो;

अनत्ताति जिनुद्दिट्ठं, लोको अत्ताति मञ्ञति.

सम्बुद्धस्स वसं न्वेतु, सन्झादि भयतज्जितो;

तब्बसंयेव अन्वेन्तो, भवतिण्णो भविस्सति.

अनत्ताति ¶ गिरा सच्चा, अत्ताति वचनं मुसा;

मुसाय विवदे लोको, बुद्धेन सच्च वादिना.

तुरङ्गवजगामम्हा, पुरिमे चमक्य कानने;

वसता अग्गधम्मेन, थेरेन रचितो अयं.

नादिकाल ¶ विपरित, जन भूतत्थ दस्सिनो;

दातुमे कन्तिकस्सादं, सत्थु पादो तिमानितो.

सीसे ¶ पिलन्दिया मोदी, सम्बुद्ध चरण म्बुजं;

साधु तुट्ठिकरं ब्रूमि, सुकाय पच्चवेक्खणं.

योनिसो मनसीकत्वा, नादा विरुद्ध मञ्ञितं;

साधवो त मुदिक्खन्तु, मयापि मन्दबुद्धिनो.

इच्छितब्बान ¶ मायत्ता, तेसञ्च चयभावतो;

तदाकारेन वत्तिता, कायो जेगुच्छ पुञ्जको.

पुनप्पुनंव ओक्कम, ञाण मन्तो पवेसिय;

बाहिरंव अनालम्ब, इक्खणा पच्चवेक्खणा.

मंसच्छन्न ¶ ट्ठिरूपेव, मनोज वायु चालिते;

नारी गताति याचिन्ता, नेव सापच्चवेक्खणा.

सञ्ञादिट्ठिच चित्तञ्च, विपल्लासा इमेतयो;

त दाकारेन वत्तन्ति, अविज्जो त्थरिता भुसं.

असुभेव सुभमिति, अनिच्चेएव निच्चतो;

दुक्खेयेव सुखंवाति, अनत्तनिव अत्ततो.

तण्हा ¶ तस्सि ममेतन्ति, मानो मञ्ञि अहन्तिच;

यस्सि दिट्ठिच अत्ताति, पपञ्चा नामिमे तयो.

पपञ्चन्ति संसारं, तस्मा पपञ्चनामका;

भवयन्ते पयोजेन्ता, मोक्खं नादंसु ते चिरं.

भवपङ्के नि मुज्जन्ता, पपञ्चानं वसानुगा;

चिरस्सं दुक्खिता होन्ति, आरा निब्बानतो तिव.

नमे ¶ नाहं नअत्ताति, एतेहि विवदं करे;

भण्डन्ता विवदन्ता ते, निब्बानतो अदूरिनो.

विपल्लासे पपञ्चेच, द्वेपिएते पहातवे;

सोपच्चवेक्खितब्बे वं, कायो जेगुच्छपुञ्जको.

लग्गिका छवियंयेव, तण्हा बाहिरगोचरा;

तस्मा एत्थ तचोवाह, सम्बुद्धो न बहिच्छविं.

एसा ¶ तचपरियन्त, पदेनापि निवारिता;

जिगुच्छितानि छादेति, अट्ठि मंस तचादिनि;

ञाणेन छिन्दि तब्बाच, तस्मा छवीति वुच्चति.

न्हारुबन्धो ¶ ट्ठिसङ्घातो, मंसलोहि त लिम्पितो;

छवियाव विमोहेति, तचच्छन्नो इमं पजं.

एकेकं ¶ मनसीकत्वा, नये निच्चेव मादिना;

भावेतब्बा समारम्भ, यथापञ्ञायते तथा.

पूरितं मत्थलुङ्गस्स, सीसट्ठिपि जिगुच्छितं;

मुख नासक्खि कण्णादि, छिद्दा वछिद्द दुद्दसं.

पूति ¶ वायु विचरित, कुच्छिट्ठन्तानि लोहितं;

पित्तं सेम्हञ्च पप्फासं, हदयं यकनम्पि धी.

अन्न पानं मनुञ्ञम्पि, खेळ तिन्त मधोपरि;

दन्तेहि पिसितं स्वान, वमथूव जिगुच्छितं.

यावतायु ¶ अधोतेवा, मासये गिलितं ठितं;

किमिकूल समाकिण्णे, तहिमेवा सितासितं.

एतं उदरियं नाम, तम्हा पक्कासयं गतं;

दिनच्चये करीसन्तं, सा सयं तंद्वयम्पि धी.

पकासेत्वा ¶ पवेसेति, अन्नपानं महारहं;

पटिच्छन्नो निहरति, तमेव न्तो ठितं जनो.

जेगुच्छ ¶ पटिकुल्यानि, मंसन्हारु तचट्ठिनि;

नपियानि न तुट्ठानि, नेवइत्थी नपूपिसो.

पच्चेकं ¶ विनिभुत्तेस, केस लोम नखादिसु;

नत्थिकञ्ञा कुमारीवा, सम्पिण्डितेसु सा कुतो.

सन्तं ¶ चिन्तेय्य नासन्तं, सन्तं चिन्तयतो सुखं;

असन्तं अनुचिन्तेन्तो, नानादुक्खेहि तप्पति.

जवत्या विज्जमानेव, नाविज्जा विज्जमानके;

तस्मातंनामको मोहो, तण्हापिच तदन्विता.

पुंकायोवाथीकायोवा ¶ , मलासुचिजिगुच्छितो;

तस्समं नत्थिगारय्हं, य्वामलम्पि मलंकरे.

थीपुं सपरकायोति, पस्सतिपि नपस्सति;

जेगुच्छ पटिकुल्योति, सम्मा पस्सति पस्सति.

बहुस्सुतोपि ¶ बालोव, असुभे सुभमञ्ञको;

असुभोति विपस्सन्तो, अप्पस्सुतोपिपण्डितो.

योच सिप्पानि जानेय्य, सतानि सहस्सानिपि;

कायेकजाननं सेय्यो, यञ्चे अञ्ञ विजानंनं.

कायमेकम्पि ¶ नञ्ञामि, बुद्धालद्धनयो अपि;

सुताच पण्डितात्यम्हा, युत्तोयेवा तिलज्जितुं.

सुभतोयेव मञ्ञामि, एवं जिगुच्छितम्पिनं;

मञ्च ञे पण्डितो त्याहु, अलमेवातिलज्जितुं.

काये ¶ असुभसञ्ञंयो, नलभामि कदाचिपि;

सुलद्ध सुगतो वादो, स्वारहोवातिलज्जितुं.

कायेन संसरन्तोपि, तदाकारं यथातथं;

भवेभवे अजानन्तो, ममायित्वाव तं चजिं.

कायेन ¶ संसरन्तोपि, नञ्ञा काय जिगुच्चतं;

निच्चुपादा ममायन्तो, पियायित्वाव तं चजिं.

कुभारं सारसञ्ञाय, पियायित्वाव हिंसकं;

अनन्तदुक्ख मापादिं, विपल्लासो भवेभवे.

महाजानीय ¶ पत्तोति, संवेजेत्वा सकंमनं;

दिरोकत जिनोवादो, अनिवत्तित वीरियो.

अदिट्ठपुब्ब मेतस्स, तथाकारंव पस्सतु;

किच्च मञ्ञ मुपेक्खाय, संसार भय भीरुको.

यञ्हिकिच्चं ¶ अपविट्ठं, अकिच्चं पन कयिरा;

उन्नळानं पमत्तानं, तेसं वड्ढन्ति आसवा.

येसञ्च सुसमारद्धा, निच्चं कायगता सति;

अकिच्चं ते नसेवन्ति, किच्चे सातत कारिनो;

सतानं सम्पजानानं, अत्थं गच्छन्ति आसवाति.

असुभोति ¶ जिनुद्दिट्ठं, कायं सुभोति गाहिनो;

संमुळ्हाते न मुच्चन्ति, भवा बुद्ध विरोधिनो.

असुभोति जिनुद्दिट्ठं, कायं तथेव गाहिनो;

पण्डिता तेव मुच्चन्ति, भवा बुद्धमतानुगा.

सोधेन्तेलङ्करोन्तेव ¶ , मलासवन्तिकायतो;

अलं कायविसोधेन, बालोव तं गरुं करो.

कायो मनुस्सजातीनं, तिरच्छान त्तभावतो;

जेगुच्छित तरोहोति, दुब्बिसोधोच दुब्भरो.

यथाजातेन ¶ कायेन, सक्का विहरितुं नच;

पच्चहं सोधनीयोच, धोवन मज्जनादिभि.

रत्तं पातुं छविं छेत्वा, सक्का डंसादयोपिनं;

छेत्वा मंस ट्ठिकादीनि, धीरो नालम्बितुं कथं.

लग्गन्ति ¶ छविमत्ते ये, मक्खिका सेदपा यथा;

थीपुं मुखादि सञ्ञाय, ते पमुळ्हा महातपा.

चारी अगोचरे कामे, लग्गालेपे कपीरिव;

बहूहि पीळिता रीहि, मरन्ति अतिदुक्खिनो.

रागारिं ¶ दुज्जयं जेय्युं, जयभुम्मासुभे चरा;

सीतानिस्सित लटुकी, सेनकंव महब्बलं.

काया ¶ सुभं विपस्सन्तु, दिब्ब क्खिनाप्य पस्सियं;

आयतिं मग्गलाभाय, तं दस्सनं भविस्सति.

धीचक्खुनाव धिक्कायं, पस्से न मंसचक्खुना;

उम्मिलित्वाव धीचक्खुं, विवेकट्ठो उदिक्खतु.

पञ्चङ्गानि ¶ यथा कुम्मो, चक्खादीनि निगूहये;

वेरी लभतु मोकासं, पञ्चद्वारा अरक्खिता.

चक्खुरूपेन ¶ संवासा, रागपुत्तं विजायति;

महानत्थकरो सोच, संवासं तेन वारये.

रूपादीसुसञ्जन्तीति, सत्ता इत्थ्यादि सञ्ञाय;

नत्वेव खन्धसञ्ञाय, तंसञ्ञिहि विरागिनो.

बहीव ¶ सोधितं यस्स, न वन्तो जेगुच्छ पुञ्जकं;

तंकायं असुतंजान, तनुरागो सियात्तनि.

कायेविराग मिच्छन्तो, नुपस्सेय्य तदन्तरं;

अन्तोदस्सी अतप्पन्तो, लभे संसारमोचनं.

सत्ता ¶ सत्ता बहिट्ठेवा, सारंसारं ममायिनो;

सन्तोसन्तो विपस्सन्तो, नवानवायतिंभवे.

अलं ¶ अलं कत्वा कायं, मलामलासवन्तितो;

सोभं सोभं नये ठानं, मनं मनं प्यलं कतं.

कामं ¶ कामय मानस्स, तस्सचेतं समिज्झति;

अद्धा पीतिमनो होति, मच्चो लद्धा यदिच्छति.

तस्सचे कामयानस्स, छन्दजातस्स जन्तुनो;

तेकामा परिहायन्ति, सल्लविद्धोव रुप्पति.

योकामे ¶ परिवज्जेति, सप्पस्सेव पदा सिरो;

सोमं विसत्तिकं लोके, सतो समतिवत्तति.

खेत्तं वत्थुं तळाकंवा, गवस्सं दासपोरिसं;

थियो बन्धू पुथुकामे, योनरो अनुगिज्झति.

अबला नं बलीयन्ति, मद्दन्तेनं परिस्सया;

ततोनं दुक्खमन्वेति, नावं भिन्न मिवोदकं.

तस्माजन्तु ¶ सदासतो, कामानि परिवज्जये;

ते पहाय तरे ओघं, नावं सित्वाव पारगू.

सुभानुपस्सिं ¶ विहरन्तं, इन्द्रियेसु असंवुतं;

भोजनम्हि अमत्तञ्ञुं, कुसितं हीन वीरियं;

तंवे पसहति मारो, वातो रुक्खंव दुब्बलं.

असुभानुपस्सिं विहरन्तं, इन्द्रियेसु सुसंवुतं;

भोजनम्हिच मत्तञ्ञुं, सद्धं आरद्ध वीरियं;

तंवे नप्पसहति मारो, वातो सेलंव पब्बतं.

यथा ¶ अगारं दुच्छन्नं, वुट्ठि समति विज्झति;

एवं अभावितं चित्तं, रागो समतिविज्झति.

तदेवं ¶ पच्चवेक्खन्ति, ये ते रागग्गिदुब्बला;

पतिट्ठं सासने लद्धा, नुक्कण्ठा नलसा रता.

बुद्धावादं ¶ लभित्वापि, नाहंसक्का नवोम्हिति;

दोसं तण्हं अनासेन्तो, परिपक्को कदाभवे;

पुञ्ञकम्मं अकरोन्तो, परवज्जं अखमन्तो.

काय सङ्खारिका तण्हा, नीचानीचकराच सा;

चित्तसङ्खारिका सद्धा, उच्चा उच्चकराच सा.

दस्सनीये ¶ रता तण्हा, सद्धास्वाचारभत्तिका;

विकिण्णचारिका तण्हा, सद्धा विसदचारिनी.

मनोकिलेसिका तण्हा, सानुगानन्त दुक्खदा;

चित्तप्पसादिका सद्धा, अत्तानुग सुखावहा.

तण्हा ¶ सद्धान मिच्चेवं, विसेसं जान तत्वतो;

ञत्वा तण्हं विनासेय्य, सद्धंभावेय्य चेतसि.

उच्छुकं यन्तपत्तम्पि, सञ्चुण्णितम्पि चन्दनं;

मधुरंव सुगन्धंव, मेत्तिव हिंसितोपि सं.

अत्तच्छेदम्पि ¶ वासेति, सुगन्धेनिव चन्दनं;

सन्तो मेत्तासुगन्धेन, अत्तहिंसम्पि वासये.

कदाचिपि न दुग्गन्धि, सुक्खं चुण्णम्पि चन्दनं;

तथेव दुक्खपत्तोपि, न सन्तो पापकारको.

खमे ¶ वज्जं करेय्यत्थं, बुद्धखन्ति मनुस्सरं;

मेत्तातिन्तेन वेरीपि, नुपनाहो सियत्तनि.

नगच्छति त मक्कोसो, ममेवा नत्थकारको;

इति ञत्वाव सप्पञ्ञो, नेव क्कोसेय्य किञ्चनं.

तण्हाविज्जाच ¶ मूलाद्वे, संसारविसपादपे;

सब्भत्ति सद्धम्मस्सुतं, द्वेयेव मधुरा फला.

सोधे चित्त मुपक्कम्म, सुद्धं उपक्कमेन तं;

वहे सुखं असङ्खेय्यं, दुक्खं असोधितं मलि.

सोधितं ¶ सुगतिंनेति, दुग्गतिंव असोधितं;

चित्तं सोधेतु मालिम्पे, रागदोस मलेहि तं.

रनकुनवासि ¶ कतावासे, दगुंचेती पुरत्थिमे;

वसता अग्गधम्मेन, थेरेन रचितो अयन्ति.