📜

नमो तस्स भगवतो अरहतो सम्मासम्बुद्धस्स

मज्झिमनिकाये

मज्झिमपण्णासटीका

१. गहपतिवग्गो

१. कन्दरकसुत्तवण्णना

१. आरामपोक्खरणीआदीसूति ¶ ¶ आरामपोक्खरणीउय्यानचेतियट्ठानादीसु. उस्सन्नाति बहुला. असोककणिकारकोविळारकुम्भीराजरुक्खेहि सम्मिस्सताय तं चम्पकवनं नीलादिपञ्चवण्णकुसुमपटिमण्डितन्ति दट्ठब्बं, न चम्पकरुक्खानंयेव नीलादिपञ्चवण्णकुसुमतायाति वदन्ति. भगवा कुसुमगन्धसुगन्धे चम्पकवने विहरतीति इमिना न मापनकाले एव तस्मिं नगरे चम्पकरुक्खा उस्सन्ना, अथ खो अपरभागेपीति दस्सेति. ‘‘पञ्चसतमत्तेहि अड्ढतेळसेही’’ति एवं अदस्सितपरिच्छेदेन. हत्थिनो चारेति सिक्खापेतीति हत्थाचरियो हत्थीनं सिक्खापको, तस्स पुत्तोति आह ‘‘हत्थाचरियस्स पुत्तो’’ति. तदा भगवा तेसं पसादजननत्थं अत्तनो बुद्धानुभावं अनिगुहित्वाव निसिन्नोति दस्सेन्तो ‘‘छब्बण्णानं घनबुद्धरस्मीन’’न्तिआदिमाह. भगवतो चेव गारवेनाति भगवतो गरुभावेन, भगवति गारवेनाति वा पाठो.

निच्चं ¶ न होतीति अभिण्हं न होति, कदाचिदेव होतीति अत्थो. अभिण्हनिच्चता हि इध अधिप्पेता, न कूटट्ठनिच्चता. लोके किञ्चि विम्हयावहं दिस्वा हत्थविकारम्पि करोन्ति, अङ्गुलिं वा फोटयन्ति, तं सन्धाय वुत्तं ¶ ‘‘अच्छरं पहरितुं युत्त’’न्ति. अभूतपुब्बं भूतन्ति अयं निरुत्तिनयो येभुय्येन उपादाय रुळ्हीवसेन वुत्तोति वेदितब्बो. तथा हि पाळियं ‘‘येपि ते, भो गोतम, अहेसुं अतीतमद्धान’’न्तिआदि वुत्तं, किञ्चि अकत्तब्बम्पि करियमानं दुक्करभावेन विम्हयावहं होति, तथा किञ्चि कत्तब्बं, पुरिमं गरहच्छरियं, पच्छिमं पसंसच्छरियं, तदुभयं सुत्तपदसो दस्सेतुं ‘‘तत्था’’तिआदि वुत्तं.

सम्मा पटिपादितोति सम्मापटिपदायं ठपितो. एसा पटिपदा परमाति एतपरमं, भावनपुंसकनिद्देसोयं यथा ‘‘विसमं चन्दिमसूरिया परिवत्तन्ती’’ति (अ. नि. ४.७०). अयञ्हेत्थ अत्थो – भगवा भिक्खुसङ्घो पटिपदाय तुम्हेहि पटिपादितो, अतीतेपि काले बुद्धा एतपरमंयेव भिक्खुसङ्घं सम्मा पटिपादेसुं, अनागतेपि काले एतपरमंयेव भिक्खुसङ्घं सम्मा पटिपादेस्सन्तीति परिब्बाजको नयग्गाहेन दिट्ठेन अदिट्ठं अनुमिनन्तो सब्बेसम्पि बुद्धानं सासने सङ्घसुप्पटिपत्तिं मज्झे भिन्नसुवण्णं विय समसमं कत्वा दस्सेति, एवं दस्सेन्तो च तेसं सुधम्मतञ्च तथा दस्सेति एवाति वेदितब्बो, बुद्धसुबुद्धता पन नेसं सरूपेनेव दस्सिताति. न इतो भिय्योति इमिना पाळियं एतपरमंयेवाति अवधारणेन निवत्तितं दस्सेति सीलपदट्ठानत्ता समाधिस्स, समाधिपदट्ठानत्ता च पञ्ञाय सीलेपि च अभिसमाचारिकपुब्बकत्ता आदिब्रह्मचरियकस्स वुत्तं ‘‘आभिसमाचारिकवत्तं आदिं कत्वा’’ति.

२. पुच्छानुसन्धिआदीसु अनन्तोगधत्ता ‘‘पाटिएक्को अनुसन्धी’’ति वत्वा तमेवत्थं पाकटं कातुं ‘‘भगवा किरा’’तिआदि वुत्तं. उपसन्तकारणन्ति उपसन्तभावकारणं. तञ्हि अरियानंयेव विसयो, तत्थापि च बुद्धानं एव अनवसेसतो विसयोति इममत्थं ब्यतिरेकतो अन्वयतो च दस्सेतुं न हि त्वन्तिआदि वुत्तं. तत्थ ञातत्थचरिया काकजातकादिवसेन वेदितब्बा, लोकत्थचरिया तंतंपारमिपूरणवसेन, बुद्धत्थचरिया महाबोधिजातकादिवसेन. अच्छरियं भो गोतमातिआदिना कन्दरकेन कतं पसादपवेदनं दस्सेति.

येपि तेतिआदिना तेन वुत्तमत्थं पच्चनुभासन्तेन भगवता सम्पटिच्छितन्ति चरितत्ता आह – ‘‘सन्ति हि कन्दरकाति अयम्पि पाटियेक्को अनुसन्धी’’ति ¶ . यो हि कन्दरकेन भिक्खुसङ्घस्स उपसन्तभावो कित्तितो, तं विभजित्वा दस्सेन्तोपि तेन अपुच्छितोयेव अत्तनो अज्झासयेन भगवा ‘‘सन्ति ही’’तिआदिना देसनं आरभि. तेनाह ‘‘भगवतो किर एतदहोसी’’ ¶ तिआदि. कप्पेत्वाति अञ्ञथा सन्तमेव अत्तानं अञ्ञथा विधाय. पकप्पेत्वाति सनिदस्सनवसेन गहेत्वा. तेनाह ‘‘कुहकभावेना’’तिआदि. पटिपदं पूरयमानाति कामं अविसेसेन सेक्खा वुच्चन्ति, ते पन अधिगतमग्गवसेन ‘‘पूरयमाना’’ति न वत्तब्बा किच्चस्स निट्ठितत्ता. मग्गो हि एकचित्तक्खणिकोति आह ‘‘उपरिमग्गस्स विपस्सनाय उपसन्ता’’ति. इतो मुत्ताति मग्गेनागतूपसमतो मुत्ता. कल्याणपुथुज्जने सन्धाय वदति. तेनाह ‘‘चतूहि सतिपट्ठानेहि उपसन्ता’’ति.

सततसीलाति अविच्छिन्नसीला. सातिसयो हि एतेसं सीलस्स अखण्डादिभावो. सुपरिसुद्धसीलतावसेन सन्तता वुत्ति एतेसन्ति सन्ततवुत्तिनोति आह ‘‘तस्सेव वेवचन’’न्ति. एवं सीलवुत्तिवसेन ‘‘सन्ततवुत्तिनो’’ति पदस्स अत्थं वत्वा इदानि जीवितवुत्तिवसेन दस्सेन्तो ‘‘सन्ततजीविकावाति अत्थो’’ति आह. सासनस्स जीवितवुत्ति सीलसन्निस्सिता एवाति आह ‘‘तस्मि’’न्तिआदि.

निपयति विसोसेति रागादिसंकिलेसं, ततो वा अत्तानं निपातीति निपको, पञ्ञवा. तेनाह ‘‘पञ्ञवन्तो’’ति. पञ्ञाय ठत्वा जीविकाकप्पनं नाम बुद्धपटिकुट्ठमिच्छाजीवं पहाय सम्माजीवेन जीवनन्ति तं दस्सेन्तो ‘‘यथा एकच्चो’’तिआदिमाह. तत्थ यं वत्तब्बं, तं विसुद्धिमग्गे (विसुद्धि. १.१४) तंसंवण्णनायञ्च (विसुद्धि. महाटी. १.१४) वुत्तनयेनेव वेदितब्बं. रथविनीतपटिपदादयो तेसु तेसु सुत्तेसु वुत्तनयेन वेदितब्बा. इतो अञ्ञत्थ महागोपालकसुत्तादीसु (म. नि. १.३४६ आदयो) लोकुत्तरसतिपट्ठाना कथिताति आह – ‘‘इध पन लोकियलोकुत्तरमिस्सका सतिपट्ठाना कथिता’’ति, सतिपट्ठानसुत्तेपि (दी. नि. २.३७३-३७४; म. नि. १.१०६ आदयो) वोमिस्सकाव कथिताति. एत्तकेनाति एत्तकाय देसनाय.

३. कारकभावन्ति ¶ पटिपत्तियं पटिपज्जनकभावं. मयम्पि नाम गिही बहुकिच्चा समाना कालेन कालं सतिपट्ठानेसु सुप्पतिट्ठितचित्ता विहराम, किमङ्गं पन विवेकवासिनोति अत्तनो कारकभावं पवेदेन्तो एवं भिक्खुसङ्घञ्च उक्खिपति. तेनाह ‘‘अयञ्हेत्थ अधिप्पायो’’तिआदि. नानारम्मणेसु अपरापरं उप्पज्जमानानं रागादिकिलेसानं घनजटितसङ्खाताकारेन पवत्ति किलेसगहनेन गहनता, तेनाह ‘‘अन्तो जटा बहि जटा, जटाय जटिता पजा’’ति (सं. नि. १.२३, १९२). मनुस्सानं अज्झासयगहणेन साठेय्यम्पीति दस्सेन्तो आह ‘‘कसटसाठेय्येसुपि एसेव नयो’’ति. यथा सप्पिमधुफाणितादीसु कचवरभावो, ¶ सो कसटोति वुच्चति, एवं सन्ताने अपरिसुद्धो संकिलेसभावो कसटन्ति आह ‘‘अपरिसुद्धट्ठेन कसटता’’ति. अत्तनि असन्तगुणसम्भावनं केराटियट्ठो. जानातीति ‘‘इदं अहितं न सेवितब्बं, इदं हितं सेवितब्ब’’न्ति विचारेति देसेति. विचारणत्थोपि हि होति जानाति-सद्दो यथा ‘‘आयस्मा जानाती’’ति. सब्बापि…पे… अधिप्पेता ‘‘पसुपालका’’तिआदीसु विय. इध अन्तर-सद्दो ‘‘विज्जन्तरिकाया’’तिआदीसु (म. नि. २.१४९) विय खणत्थोति आह ‘‘यत्तकेन खणेना’’ति. तेनाति हत्थिना. तानीति साठेय्यादीनि.

अत्थतो कायचित्तुजुकतापटिपक्खभूताव लोभसहगतचित्तुप्पादस्स पवत्तिआकारविसेसाति तानि पवत्तिआकारेन दस्सेतुं ‘‘तत्था’’तिआदि वुत्तं. तत्थ यस्साति पाणभूतस्स अस्सस्स वा हत्थिनो वा. ठस्सामीति तत्थेव सप्पटिभये ठाने गन्त्वा ठस्सामीति न होति. इमस्स साठेय्यताय पाकटकरणं वञ्चनाधिप्पायभावतो. तथा हि चतूसु ठानेसु ‘‘वञ्चेत्वा’’ इच्चेव वुत्तं, निगुहन्तो पन तत्थेव गन्त्वा तिट्ठेय्य. एस नयो सेसेसुपि. पटिमग्गं आरोहितुकामस्साति आगतमग्गमेव निवत्तित्वा गन्तुकामस्स. लेण्डविस्सज्जनादीसु कालन्तरापेक्खाभावं ‘‘तथा’’ति इमिना उपसंहरति.

अन्तोजातकाति अत्तनो दासिया कुच्छिम्हि जाता. धनक्कीताति धनं दत्वा दासभावेन गहिता. करमरानीताति दासभावेन करमरग्गाहगहिता. दासब्यन्ति दासभावं. पेस्साति अदासा एव हुत्वा वेय्यावच्चकरा. इमं विस्सज्जेत्वाति इमं अत्तनो हत्थगतं विस्सज्जेत्वा. इमं ¶ गण्हन्ताति इमं तस्स हत्थगतं गण्हन्ता. सम्मुखतो अञ्ञथा परम्मुखकाले कायवाचासमुदाचारदस्सनेनेव चित्तस्स नेसं अञ्ञथा ठितभावो निद्दिट्ठोति वेदितब्बो.

४. अयम्पि पाटियेक्को अनुसन्धीति एत्थापि अनन्तरे वुत्तनयेनेव अनुसन्धियोजना वेदितब्बा. तेनेवाह ‘‘अयञ्ही’’तिआदि. चतुत्थो हितपटिपदं पटिपन्नोति योजना. पुग्गलसीसेन पुग्गलपटिपत्तिं दस्सेन्तो ‘‘पुग्गले पहाया’’ति आह. पटिपत्ति हि इध पहातब्बा, न पुग्गला. यथा अस्सद्धादिपुग्गलपरिवज्जनेन सद्धिन्द्रियादिभावना इज्झन्ति, एवं मिच्छापटिपन्नपुग्गलपरिवज्जनेन मिच्छापटिपदा वज्जितब्बाति आह – ‘‘पुरिमे तयो पुग्गले पहाया’’ति. चतुत्थपुग्गलस्साति इमस्मिं चतुक्के वुत्तचतुत्थपुग्गलस्स हितपटिपत्तियंयेव पटिपादेमि पवत्तेमीति दस्सेन्तो. सन्ताति समं विनासं निरोधं पत्ताति अयमेत्थ अत्थोति आह ‘‘निरुद्धा सन्ताति वुत्ता’’ति. पुन सन्ताति भावनावसेन किलेसपरिळाहविगमतो सन्ताति ¶ अयमेत्थ अत्थोति आह ‘‘निब्बुता’’ति. सन्ताति आनेत्वा योजना. सन्तो हवेति एत्थ समभावकरेन साधुभावस्स विसेसपच्चयभूतेन पण्डिच्चेन समन्नागता अरिया ‘‘सन्तो’’ति वुत्ताति आह – ‘‘सन्तो हवे…पे… पण्डिता’’ति.

आहितो अहंमानो एत्थाति अत्ता (अ. नि. टी. २.४.१९८) अत्तभावो, इध पन यो परो न होति, सो अत्ता, तं अत्तानं. परन्ति अत्ततो अञ्ञं. छातं वुच्चति तण्हा जिघच्छाहेतुताय. अन्तो तापनकिलेसानन्ति अत्तनो सन्ताने अत्तपरिळाहजननसन्तप्पनकिलेसानं. चित्तं आराधेतीति चित्तं पसादेति, सम्पहंसेतीति अत्थो. यस्मा पन तथाभूतो चित्तं सम्पादेन्तो अज्झासयं गण्हन्तो नाम होति, तस्मा वुत्तं ‘‘चित्तं सम्पादेती’’तिआदि.

५. दुक्खं पटिक्कूलं जेगुच्छं एतस्साति दुक्खपटिक्कूलो तं दुक्खपटिक्कूलं. विसेसनविसेसितब्बता हि कामचारा. अट्ठकथायं पन दुक्खस्स विसेसितब्बतं सन्धाय बाहिरत्थसमासं अनादियित्वा ‘‘दुक्खस्स पटिक्कूल’’न्ति अत्थो वुत्तो. येन हि भागेन पुरिसस्स दुक्खं पटिक्कूलं, तेन दुक्खस्स पुरिसोपीति. तेनाह – ‘‘पच्चनीकसण्ठित’’न्ति.

६. चतूहि ¶ कारणेहीति धातुकुसलतादीहि चतूहि कारणेहि. कम्मं करोतीति योगकम्मं करोति. यस्मा सम्बुद्धा परेसं मग्गफलाधिगमाय उस्साहजाता, तत्थ निरन्तरं युत्तप्पयुत्ता एव होन्ति, ते पटिच्च तेसं अन्तरायो न होतियेवाति आह ‘‘न पन बुद्धे पटिच्चा’’ति. किरियपरिहानिया देसकस्स तस्सेव वा पुग्गलस्स तज्जपयोगाभावतो. ‘‘देसकस्स वा’’ति इदं सावकानं वसेन दट्ठब्बं. महता अत्थेनाति एत्थ अत्थ-सद्दो आनिसंसपरियायोति आह ‘‘द्वीहि आनिसंसेही’’ति. पसादं पटिलभति ‘‘अरहन्तो’’तिआदिना सङ्घसुप्पटिपत्तिया सुतत्ता. अभिनवो नयो उदपादि सन्ततसीलतादिवसेन अनत्तन्तपतादिवसेन, सोपि तं सुत्वा दासादीसु सविसेसं लज्जी दयापन्नो हितानुकम्पी हुत्वा सेक्खपटिपदं सीलं साधेन्तो अनुक्कमेन सतिपट्ठानभावनं परिब्रूहेति. तेनाह भगवा ‘‘महता अत्थेन संयुत्तो’’ति.

८. परेसं हननघातनादिना रोदापनतो लुद्दो, तथा विघातकभावेन कायचित्तानं विदारणतो दारुणो, विरुद्धवादताय कक्खळो, बन्धनागारे नियुत्तो बन्धनागारिको.

९. खत्तियाभिसेकेनाति ¶ खत्तियानं कत्तब्बअभिसेकेन. सन्थागारन्ति सन्थारवसेन कतं अगारं यञ्ञावाटं. सप्पितेलेनाति सप्पिमयेन तेलेन, यमकस्नेहेन हि तदा कायं अब्भञ्जति. वच्छभावं तरित्वा ठितो वच्छतरो. परिक्खेपकरणत्थायाति वनमालाहि सद्धिं दब्भेहि वेदिया परिक्खेपनत्थाय. यञ्ञभूमियन्ति अवसेसयञ्ञट्ठाने. यं पनेत्थ अत्थतो अविभत्तं तं सुविञ्ञेय्यमेव.

कन्दरकसुत्तवण्णनाय लीनत्थप्पकासना समत्ता.

२. अट्ठकनागरसुत्तवण्णना

१७. अविदूरेति ¶ ¶ इमिना पाळियं ‘‘वेसालिय’’न्ति इदं समीपे भुम्मवचनन्ति दस्सेति. सारप्पत्तकुलगणनायाति (अ. नि. टी. ३.११.१६) महासारमहप्पत्तकुलगणनाय. दसमे ठानेति अञ्ञे अञ्ञेति दसगणनट्ठाने. अट्ठकनगरे जातो भवो अट्ठकनागरो. कुक्कुटारामोति पाटलिपुत्ते कुक्कुटारामो, न कोसम्बियं.

१८. पकतत्थनिद्देसो त-सद्दोति तस्स ‘‘भगवता’’तिआदीहि पदेहि समानाधिकरणभावेन वुत्तस्स येन अभिसम्बुद्धभावेन भगवा पकतो अधिगतो सुपाकटो च, तं अभिसम्बुद्धभावं सद्धिं आगमनीयपटिपदाय अत्थभावेन दस्सेन्तो ‘‘यो सो…पे… अभिसम्बुद्धो’’ति आह. सतिपि ञाणदस्सन-सद्दानं इध पञ्ञावेवचनभावे तेन तेन विसेसेन तेसं विसयविसेसे पवत्तिदस्सनत्थं असाधारणञाणविसेसवसेन विज्जात्तयवसेन विज्जाअभिञ्ञानावरणञाणवसेन सब्बञ्ञुतञाणमंसचक्खुवसेन पटिवेधदेसनाञाणवसेन च तदत्थं योजेत्वा दस्सेन्तो ‘‘तेसं तेस’’न्तिआदिमाह. तत्थ आसयानुसयं जानता आसयानुसयञाणेन सब्बं ञेय्यधम्मं पस्सता सब्बञ्ञुतानावरणञाणेहि. पुब्बेनिवासादीहीति पुब्बेनिवासासवक्खयञाणेहि. पटिवेधपञ्ञायाति अरियमग्गपञ्ञाय. देसनापञ्ञाय पस्सताति देसेतब्बधम्मानं देसेतब्बप्पकारं बोधनेय्यपुग्गलानञ्च आसयानुसयचरिताधिमुत्तिआदिभेदं धम्मदेसनापञ्ञाय याथावतो पस्सता. अरीनन्ति किलेसारीनं, पञ्चविधमारानं वा, सासनस्स वा पच्चत्थिकानं अञ्ञतित्थियानं तेसं पन हननं पाटिहारियेहि अभिभवनं अप्पटिभानताकरणं अज्झुपेक्खनमेव वा, केसिविनयसुत्तञ्चेत्थ निदस्सनं.

तथा ठानाट्ठानादिविभागं जानता यथाकम्मूपगसत्ते पस्सता, सवासनानं आसवानं खीणत्ता अरहता, अभिञ्ञेय्यादिभेदे धम्मे अभिञ्ञेय्यादितो अविपरीतावबोधतो सम्मासम्बुद्धेन. अथ वा तीसु कालेसु अप्पटिहतञाणताय जानता, कायकम्मादिवसेन तिण्णं कम्मानं ञाणानुपरिवत्तितो निसम्मकारिताय पस्सता, दवादीनं अभावसाधिकाय ¶ पहानसम्पदाय अरहता, छन्दादीनं अहानिहेतुभूताय अक्खयपटिभानसाधिकाय सब्बञ्ञुताय सम्मासम्बुद्धेनाति एवं दसबलअट्ठारसआवेणिकबुद्धधम्मवसेनपि योजना कातब्बा.

१९. अभिसङ्खतन्ति ¶ अत्तनो पच्चयेहि अभिसम्मुखभावेन समेच्च सम्भूय्य कतं, स्वस्स कतभावो उप्पादनेन वेदितब्बो, न उप्पन्नस्स पटिसङ्खरणेनाति आह ‘‘उप्पादित’’न्ति. ते चस्स पच्चया चेतनापधानाति दस्सेतुं पाळियं ‘‘अभिसङ्खतं अभिसञ्चेतयित’’न्ति वुत्तन्ति ‘‘चेतयितं पकप्पित’’न्ति अत्थमाह. अभिसङ्खतं अभिसञ्चेतयितन्ति च झानस्स पातुभावदस्सनमुखेन विद्धंसनभावं उल्लिङ्गेति यञ्हि अहुत्वा सम्भवति, तं हुत्वा पटिवेति. तेनाह पाळियं ‘अभिसङ्खत’न्तिआदि. समथविपस्सनाधम्मे ठितोति समथधम्मे ठितत्ता समाहितो विपस्सनं पट्ठपेत्वा अनिच्चानुपस्सनादीहि निच्चसञ्ञादयो पजहन्तो अनुक्कमेन तं अनुलोमञाणं पापेता हुत्वा विपस्सनाधम्मे ठितो. समथविपस्सनासङ्खातेसु धम्मेसु रञ्जनट्ठेन रागो, नन्दनट्ठेन नन्दीति. तत्थ सुखुमा अपेक्खा वुत्ता, या ‘‘निकन्ती’’ति वुच्चति.

एवं सन्तेति एवं यथारुतवसेन च इमस्स सुत्तपदस्स अत्थे गहेतब्बे सति. समथविपस्सनासु छन्दरागो कत्तब्बोति अनागामिफलं निब्बत्तेत्वा तदत्थाय समथविपस्सनापि अनिब्बत्तेत्वा केवलं तत्थ छन्दरागो कत्तब्बो भविस्सति. कस्मा? तेसु समथविपस्सनासङ्खातेसु धम्मेसु छन्दरागमत्तेन अनागामिना लद्धब्बस्स अलद्धानागामिफलेन लद्धब्बत्ता तथा सति तेन अनागामिफलम्पि लद्धब्बमेव नाम होति. तेनाह – ‘‘अनागामिफलं पटिविद्धं भविस्सती’’ति. सभावतो रसितब्बत्ता अविपरीतो अत्थो एव अत्थरसो. अञ्ञापि काचि सुगतियोति विनिपातिके सन्धायाह. अञ्ञापि काचि दुग्गतियोति असुरकायमाह.

समथधुरमेव धुरं समथयानिकस्स वसेन देसनाय आगतत्ता. महामालुक्योवादे ‘‘विविच्च अकुसलेहि धम्मेहि सवितक्कं सविचार’’न्ति पादकज्झानं कत्वा ‘‘सो यदेव तत्थ होति रूपगतं वेदनागत’’न्तिआदिना विपस्सनं वित्थारेत्वा ‘‘सो तत्थ ठितो आसवानं खयं ¶ पापुणाती’’ति (म. नि. २.१३३) आगतत्ता ‘‘महामालुक्योवादे विपस्सनाव धुर’’न्ति आह. महासतिपट्ठानसुत्ते (दी. नि. २.३७३ आदयो; म. नि. १.१०६ आदयो) सब्बत्थकमेव तिक्खतराय विपस्सनाय आगतत्ता वुत्तं ‘‘विपस्सनुत्तरं कथित’’न्ति. कायगतासतिसुत्ते (म. नि. ३.१५३-१५४) आनापानज्झानादिवसेन सविसेसं समथविपस्सनाय आगतत्ता वुत्तं ‘‘समथुत्तरं कथित’’न्ति.

अप्पं याचितेन बहुं देन्तेन उळारपुरिसेन विय एकं धम्मं पुच्छितेन ‘‘अयम्पि एकधम्मो’’ति ¶ कथितत्ता एकादसपि धम्मा पुच्छावसेन एकधम्मो नाम जातो पच्चेकं वाक्यपरिसमापनञायेन. एकवीसति पब्बानि तेहि बोधियमानाय पटिपदाय एकरूपत्ता पटिपदावसेन एकधम्मो नाम जातोति. इध इमस्मिं अट्ठकनागरसुत्ते. नेवसञ्ञानासञ्ञायतनधम्मानं सङ्खारावसेससुखुमभावप्पत्तताय तत्थ सावकानं दुक्करन्ति न चतुत्थारुप्पवसेनेत्थ देसना आगताति चतुन्नं ब्रह्मविहारानं, हेट्ठिमानं तिण्णं आरुप्पानञ्च वसेन एकादस. पुच्छावसेनाति ‘‘अत्थि नु खो, भन्ते आनन्द, तेन…पे… सम्मासम्बुद्धेन एकधम्मो अक्खातो’’ति (म. नि. २.१८) एवं पवत्तपुच्छावसेन. अमतुप्पत्तियत्थेनाति अमतभावस्स उप्पत्तिहेतुताय, सब्बानिपि कम्मट्ठानानि एकरसम्पि अमताधिगमपटिपत्तियाति अत्थो, एवमेत्थ अग्गफलभूमि अनागामिफलभूमीति द्वेव भूमियो सरूपतो आगता, नानन्तरियताय पन हेट्ठिमापि द्वे भूमियो अत्थतो आगता एवाति दट्ठब्बा.

२१. पञ्च सतानि अग्घो एतस्साति पञ्चसतं. सेसं उत्तानमेव.

अट्ठकनागरसुत्तवण्णनाय लीनत्थप्पकासना समत्ता.

३. सेखसुत्तवण्णना

२२. सन्थागारन्ति ¶ अत्थानुसासनागारं. तेनाह – ‘‘उय्योगकालादीसू’’तिआदि. आदि-सद्देन मङ्गलमहादीनं सङ्गहो दट्ठब्बो. सन्थम्भन्तीति विस्समन्ति, परिस्समं विनोदेन्तीति अत्थो. सहाति सन्निवेसवसेन ¶ एकज्झं. सह अत्थानुसासनं अगारन्ति एतस्मिं अत्थे त्थ-कारस्स न्थ-कारं कत्वा सन्थागारन्ति वुत्तन्ति दट्ठब्बं. सन्थरन्तीति सम्मन्तनवसेन तिट्ठन्ति.

तेपिटकं बुद्धवचनं आगतमेव भविस्सतीति बुद्धवचनस्स आगमनसीसेन अरियफलधम्मानम्पि आगमनं वुत्तमेव, तियामरत्तिं तत्थ वसन्तानं फलसमापत्तिवळञ्जनं होतीति. तस्मिञ्च भिक्खुसङ्घे कल्याणपुथुज्जना विपस्सनं उस्सुक्कापेन्ता होन्तीति चे? अरियमग्गधम्मानं तत्थ आगमनं होतियेव.

अल्लगोमयेनाति अच्छेन अल्लगोमयरसेन. ओपुञ्छापेत्वाति विलिम्पित्वा. चतुज्जातियगन्धेहीति तगरकुङ्कुमयवनपुप्फतमालपत्तानि पिसित्वा कतगन्धेहि नानावण्णेति नीलादिवसेन नानावण्णे, न भित्तिविसेसवसेन. भित्तिविसेसवसेन पन नानासण्ठानरूपमेव. महापिट्ठिककोजवकेति हत्थिपिट्ठीसु अत्थरितब्बताय महापिट्ठिकाति लद्धसमञ्ञे कोजवेति वदन्ति. कुत्तके पन सन्धायेतं वुत्तं हत्थत्थरणा हत्थिरूपविचित्ता. अस्सत्थरकसीहत्थरकादयोपि अस्ससीहरूपादिविचित्ता एव अत्थरका, चित्तत्थरकं नानारूपेहि चेव नानाविधमालाकम्मादीहि च विचित्तं अत्थरकं.

उपधानन्ति अपस्सयनं उपदहित्वाति अपस्सययोग्गभावेन ठपेत्वा गन्धेहि कतमाला गन्धदामं, तमालपत्तादीहि कतं पत्तदामं. आदि-सद्देन हिङ्गुलतक्कोलजातिफलजातिपुप्फादीहि कतदामं सङ्गण्हाति. पल्लङ्काकारेन कतपीठं पल्लङ्कपीठं, तीसु पस्सेसु, एकपस्से एव वा सउपस्सयं अपस्सयपीठं, अनपस्सयं मुण्डपीठं योजनावट्टेति योजनपरिक्खेपे.

संविधायाति अन्तरवासकस्स कोणपदेसञ्च इतरपदेसञ्च समं कत्वा विधाय. तेनाह – ‘‘कत्तरिया पदुमं कन्तन्तो विया’’ति तिमण्डलं पटिच्छादेन्तोति एत्थ च यस्मा बुद्धानं रूपसम्पदा विय आकप्पसम्पदापि परमुक्कंसगता, तस्मा तदा भगवा एवं सोभतीति ¶ दस्सेन्तो ‘‘सुवण्णपामङ्गेना’’तिआदिमाह, तत्थ असमेन बुद्धवेसेनातिआदिना ¶ तदा भगवा बुद्धानुभावस्स निगुहणे कारणाभावतो तत्थ सन्निपतितदेवमनुस्सनागयक्खगन्धब्बादीनं पसादजननत्थं अत्तनो सभावपकतिकिरियायेव कपिलवत्थुं पाविसीति दस्सेति. बुद्धानं कायप्पभा नाम पकतिया असीतिहत्थमत्तमेव पदेसं फरतीति आह – ‘‘असीतिहत्थट्ठानं अग्गहेसी’’ति नीलपीतलोहितोदातमञ्जिट्ठपभस्सरानं वसेन छब्बण्णा बुद्धरस्मियो.

सब्बपालिफुल्लोति मूलतो पट्ठाय याव अग्गा फुल्लो विकसितो. पटिपाटिया ठपितानन्तिआदि परिकप्पूपमा. यथा तं…पे… अलङ्कतं अञ्ञो विरोचति, एवं विरोचित्थ, समतिंसाय पारमिताहि अभिसङ्खतत्ता एवं विरोचित्थाति वुत्तं होति. पञ्चवीसतिया नदीनन्ति गङ्गादीनं चन्दभागापरियोसानानं पञ्चवीसतिया महानदीनं. सम्भिज्जाति सम्भेदं मिस्सीभावं पत्वा मुखद्वारेति समुद्दं पविट्ठट्ठाने.

देवमनुस्सनागसुपण्णगन्धब्बयक्खादीनं अक्खीनीति चेतं परिकप्पनवसेन वुत्तं. सहस्सेनाति पदसहस्सेन, भाणवारप्पमाणेन गन्थेनाति अत्थो.

कम्पयन्तो वसुन्धरन्ति अत्तनो गुणविसेसेहि पथवीकम्पं उप्पादेन्तो, एवंभूतोपि अहेठयन्तो पाणानि. सब्बदक्खिणत्ता बुद्धानं दक्खिणं पठमं पादं उद्धरन्तो. समं सम्फुसते भूमिं सुप्पतिट्ठितपादताय. यदिपि भूमिं समं फुसति, रजसानुपलिप्पति सुखुमत्ता छविया. निन्नट्ठानं उन्नमतीतिआदि बुद्धानं सुप्पतिट्ठितपादसङ्खातस्स महापुरिसलक्खणपटिलाभस्स निस्सन्दफलं. नातिदूरे उद्धरतीति अतिदूरे ठपेतुं न उद्धरति. नच्चासन्ने च निक्खिपन्ति अच्चासन्ने च ठाने अनिक्खिपन्तो निय्याति. हासयन्तो सदेवके लोके तोसयन्तो. चतूहि पादेहि चरतीति चतुचारी.

बुद्धानुभावस्स पकासनवसेन गतत्ता वण्णकालो नाम किरेस. सरीरवण्णे वा गुणवण्णे वा कथियमाने दुक्कथितन्ति न वत्तब्बं. कस्मा? अपरिमाणवण्णा हि बुद्धा भगवन्तो, बुद्धगुणसंवण्णना जानन्तस्स यथाधम्मसंवण्णनंयेव अनुपविसतीति.

दुकूलचुम्बटकेनाति ¶ गन्थित्वा गहितदुकूलवत्थेन, नागविक्कन्तचरणोति हत्थिनागसदिसपदनिक्खेपो. सतपुञ्ञलक्खणोति अनेकसतपुञ्ञनिम्मितमहापुरिसलक्खणो मणिवेरोचनो यथाति अतिविय विरोचमानो मणि विय वेरोचनो नाम एको मणिविसेसोति केचि महासालोवाति ¶ महन्तो सालरुक्खो विय, कोविळारादिमहारुक्खो विय वा पदुमो कोकनदो यथाति कोकनदसङ्खातं महापदुमं विय, विकसमानपदुमं विय वा.

आकासगङ्गं ओतारेन्तो वियातिआदि तस्सा पकिण्णककथाय अञ्ञेसं दुक्करभावदस्सनञ्चेव सुणन्तानं अच्चन्तसुखावहभावदस्सनञ्च पथवीजं आकड्ढेन्तो वियाति नाळियन्तं योजेत्वा महापथविया हेट्ठिमतले पप्पटकोजं उद्धंमुखं कत्वा आकड्ढेन्तो विय योजनिकन्ति योजनप्पमाणं मधुभण्डन्ति मधुपटलं.

महन्तन्ति उळारं. सब्बदानं दिन्नमेव होतीति सब्बमेव पच्चयजातं आवासदायकेन दिन्नमेव होति. तथाहि द्वे तयो गामे पिण्डाय चरित्वा किञ्चि अलद्धा आगतस्सपि छायूदकसम्पन्नं आरामं पविसित्वा न्हायित्वा पटिस्सये मुहुत्तं निपज्जित्वा उट्ठाय निसिन्नस्स काये बलं आहरित्वा पक्खित्तं विय होति. बहि विचरन्तस्स च काये वण्णधातु वातातपेहि किलमति, पटिस्सयं पविसित्वा द्वारं पिधाय मुहुत्तं निसिन्नस्स विसभागसन्तति वूपसम्मति, सभागसन्तति पतिट्ठाति, वण्णधातु आहरित्वा पक्खित्ता विय होति, बहि विचरन्तस्स च पादे कण्टको विज्झति, खाणु पहरति, सरीसपादिपरिस्सयो चेव चोरभयञ्च उप्पज्जति, पटिस्सयं पविसित्वा द्वारं पिधाय निपन्नस्स पन सब्बे परिस्सया न होन्ति, अज्झयन्तस्स धम्मपीतिसुखं, कम्मट्ठानं मनसिकरोन्तस्स उपसमसुखं उप्पज्जति बहिद्धा विक्खेपाभावतो, बहि विचरन्तस्स च काये सेदा मुच्चन्ति, अक्खीनि फन्दन्ति, सेनासनं पविसनक्खणे मञ्चपीठादीनि न पञ्ञायन्ति, मुहुत्तं निसिन्नस्स पन अक्खिपसादो आहरित्वा पक्खित्तो विय होति, द्वारवातपानमञ्चपीठादीनि पञ्ञायन्ति, एतस्मिम्पि च आवासे वसन्तं दिस्वा मनुस्सा चतूहि पच्चयेहि सक्कच्चं उपट्ठहन्ति. तेन वुत्तं – ‘‘आवासदानस्मिं दिन्ने सब्बं दानं दिन्नमेव होती’’ति. भूमट्ठक…पे… न सक्काति अयमत्थो महासुदस्सनवत्थुना (दी. नि. २.२४१ आदयो) दीपेतब्बो.

सीतन्ति ¶ (सारत्थ. टी. चूळवग्ग ३.२९५; सं. नि. टी. २.४.२४३) अज्झत्तधातुक्खोभवसेन वा बहिद्धउतुविपरिणामवसेन वा उप्पज्जनकसीतं. उण्हन्ति अग्गिसन्तापं. तस्स पन दवदाहादीसु सम्भवो दट्ठब्बो. पटिहन्तीति पटिबाहति. यथा तदुभयवसेन कायचित्तानं बाधनानि न होन्ति, एवं करोति. सीतुण्हब्भाहते हि सरीरे विक्खित्तचित्तो भिक्खु योनिसो पदहितुं न सक्कोति. वाळमिगानीति सीहब्यग्घादिवाळमिगे. गुत्तसेनासनञ्हि पविसित्वा द्वारं पिधाय निसिन्नस्स ते परिस्सया न होन्ति ¶ . सरीसपेति ये केचि सरन्ता गच्छन्ते दीघजातिके. मकसेति निदस्सनमेतं, डंसादीनं एतेनेव सङ्गहो दट्ठब्बो. सिसिरेति सीतकालवसेन सत्ताहवद्दलिकादिवसेन च उप्पन्ने सिसिरसम्फस्से. वुट्ठियोति यदा तदा उप्पन्ना वस्सवुट्ठियो पटिहनतीति योजना.

वातातपो घोरोति रुक्खगच्छादीनं उम्मूलभञ्जनवसेन पवत्तिया घोरो सरजअरजादिभेदो वातो चेव गिम्हपरिळाहसमयेसु उप्पत्तिया घोरो सूरियातपो च. पटिहञ्ञतीति पटिबाहीयति. लेणत्थन्ति नानारम्मणतो चित्तं निवत्तेत्वा पटिसल्लानारामत्थं. सुखत्थन्ति वुत्तपरिस्सयाभावेन फासुविहारत्थं. झायितुन्ति अट्ठतिंसारम्मणेसु यत्थ कत्थचि चित्तं उपनिज्झायितुं. विपस्सितुन्ति अनिच्चादितो सब्बसङ्खारे सम्मसितुं.

विहारेति पटिस्सये. कारयेति कारापेय्य. रम्मेति मनोरमे निवाससुखे. वासयेत्थ बहुस्सुतेति कारेत्वा पन एत्थ विहारेसु बहुस्सुते सीलवन्ते कल्याणधम्मे निवासेय्य. ते निवासेन्तो पन तेसं बहुस्सुतानं यथा पच्चयेहि किलमथो न होति, एवं अन्नञ्च पानञ्च वत्थसेनासनानि च ददेय्य उजुभूतेसु अज्झासयसम्पन्नेसु कम्मफलानं रतनत्तयगुणानञ्च सद्दहनेन विप्पसन्नेन चेतसा.

इदानि गहट्ठपब्बजितानं अञ्ञमञ्ञूपकारतं दस्सेतुं ‘‘ते तस्सा’’ति गाथमाह. तत्थ तेति बहुस्सुता तस्साति उपासकस्स. धम्मं देसेन्तीति सकलवट्टदुक्खपनुदनं धम्मं देसेन्ति. यं सो धम्मं इधञ्ञायाति सो पुग्गलो यं सद्धम्मं इमस्मिं सासने सम्मापटिपज्जनेन जानित्वा अग्गमग्गाधिगमेन अनासवो हुत्वा परिनिब्बायति.

पूजासक्कारवसेनेव ¶ पठमयामो खेपितो, भगवतो देसनाय अप्पावसेसो मज्झिमयामो गतोति पाळियं ‘‘बहुदेव रत्ति’’न्ति वुत्तन्ति आह ‘‘अतिरेकतरं दियड्ढयाम’’न्ति. सन्दस्सेसीति आनिसंसं दस्सेसि, आवासदानपटिसंयुत्तं धम्मिं कथं सुत्वा ततो परं, ‘‘महाराज, इतिपि सीलं, इतिपि समाधि, इतिपि पञ्ञा’’ति सीलादिगुणे तेसं सम्मा दस्सेसि, हत्थेन गहेत्वा विय पच्चक्खतो पकासेसि. समादपेसीति ‘‘एवं सीलं समादातब्बं, सीले पतिट्ठितेन एवं समाधि, एवं पञ्ञा भावेतब्बा’’ति यथा ते सीलादिगुणे आदियन्ति, तथा गण्हापेसि. समुत्तेजेसीति यथा समादिन्नं सीलं सुविसुद्धं होति, समथविपस्सना च भावियमाना यथा सुट्ठु विसोधिता उपरिविसेसावहा होन्ति, एवं चित्तं समुत्तेजेसि निसामनवसेन वोदापेसि. सम्पहंसेसीति यथानुसिट्ठं ठितसीलादिगुणेहि सम्पति लद्धगुणानिसंसेहि ¶ चेव उपरि लद्धब्बफलविसेसेहि च उपरिचित्तं सम्मा पहंसेसि, लद्धस्सासवसेन सुट्ठु तोसेसि. एवमेतेसं पदानं अत्थो वेदितब्बो.

समुदायवचनोपि असीतिमहाथेर-सद्दो तदेकदेसेपि निरुळ्होति आह ‘‘असीतिमहाथेरेसु विज्जमानेसू’’ति. आनन्दत्थेरोपि हि अन्तोगधो एवाति. साकियमण्डलेति साकियराजसमूहे.

पटिपदाय नियुत्तत्ता पाटिपदो. तेनाह – ‘‘पटिपन्नको’’ति. सिक्खनसीलतादिना सेखो, ओधिसो समितपापताय समणो. सेखो पाटिपदो पटिपज्जनपुग्गलाधिट्ठानेन पटिपदादेसनं नियमेन्तो पटिपदाय पुग्गलं नियमेति नामाति ‘‘पटिपदाय पुग्गलं नियमेत्वा दस्सेती’’ति. सेखप्पटिपदा सासने मङ्गलपटिपदा सम्मदेव असेवितब्बपरिवज्जनेन सेवितब्बसमादानेन उक्कंसवत्थूसु च भावतो असेखधम्मपारिपूरिया आवहत्ता च वड्ढमानकपटिपदा. अकिलमन्ताव सल्लक्खेस्सन्तीति इदं तदा तेसं असेखभूमिअधिगमाय अयोग्यताय वुत्तं. अकिलमन्तावाति इमिना पटिसम्भिदाप्पत्तस्सपि अनधिगतमग्गसञ्ञापना भारियाति दस्सेति. ओसटाति अनुप्पविट्ठा. सकलं विनयपिटकं कथितमेव होति तस्स सीलकथाबाहुल्लतो सेसद्वयेपि एसेव नयो. तीहि पिटकेहीति करणत्थे करणवचनं. तेन तंतंपिटकानं तस्सा तस्सा सिक्खाय साधकतमभावं दस्सेति.

पिट्ठिवातो ¶ उप्पज्जति उपादिन्नकसरीरस्स तथारूपत्ता सङ्खारानञ्च अनिच्चताय दुक्खानुबन्धत्ता. अकारणं वा एतन्ति येनाधिप्पायेन वुत्तं, तमेव अधिप्पायं विवरितुं ‘‘पहोती’’तिआदि वुत्तं. चतूहि इरियापथेहि परिभुञ्जितुकामो अहोसि सक्यराजूनं अज्झासयवसेन. तथा हि वक्खति ‘‘सत्थापि तदेव सन्धाय तत्थ सङ्घाटिं पञ्ञपेत्वा निपज्जीती’’ति. यदि एवं ‘‘पिट्ठि मे आगिलायती’’ति इदं कथन्ति आह ‘‘उपादिन्नकसरीरञ्च नामा’’तिआदि.

२३. ‘‘इमिना पातिमोक्खसंवरेन…पे… सम्पन्नो’’तिआदीसु (विभ. ५११) समन्नागतत्थो सम्पन्न-सद्दो, इध पन पारिपूरिअत्थोति दस्सेतुं ‘‘परिपुण्णसीलोति अत्थो’’ति वुत्तं. यो पन सम्पन्नसीलोयेव, सो परिपुण्णसीलो. परिसुद्धञ्हि सीलं ‘‘परिपुण्ण’’न्ति वुच्चति, न सबलं कम्मासं वा. सुन्दरधम्मेहीति सोभनधम्मेहि. यस्मिं सन्ताने उप्पन्ना तस्स सोभनभावतो. तेहि सप्पुरिसभावसाधनतो सप्पुरिसानं धम्मेहि.

२४. इमिना ¶ एत्तकेन ठानेनाति ‘‘इध, महानाम, अरियसावको’’ति आरभित्वा याव ‘‘अकसिरलाभी’’ति पदं इमिना एत्तकेन उद्देसपदेन मातिकं ठपेत्वा. पटिपाटियाति उद्देसपटिपाटिया. एवमाहाति ‘‘एवं कथञ्च, महानामा’’तिआदिना इदानि वुच्चमानेन दस्सिताकारेन आह.

२५. हिरीयतीति लज्जीयति पीळीयति. यस्मा हिरी पापजिगुच्छनलक्खणा, तस्मा ‘‘जिगुच्छतीति अत्थो’’ति वुत्तं. ओत्तप्पतीति उत्तप्पति. पापुत्रासलक्खणञ्हि ओत्तप्पं. पग्गहितवीरियोति सङ्कोचं अनापन्नवीरियो. तेनाह ‘‘अनोसक्कितमानसो’’ति. पहानत्थायाति समुच्छिन्दनत्थाय. कुसलानं धम्मानं उपसम्पदा नाम अधिगमो एवाति आह ‘‘पटिलाभत्थाया’’ति. सतिनेपक्केनाति सतिया नेपक्केन तिक्खविसदसूरभावेन. अट्ठकथायं पन नेपक्कं नाम पञ्ञाति अधिप्पायेन ‘‘सतिया च निपकभावेन चा’’ति अत्थो वुत्तो, एवं सति अञ्ञो निद्दिट्ठो नाम होति. सतिमाति च इमिनाव विसेसा सति गहिता, परतो ‘‘चिरकतम्पि ¶ चिरभासितम्पि सरिता अनुस्सरिता’’ति सतिकिच्चमेव निद्दिट्ठं, न पञ्ञाकिच्चं, तस्मा सतिनेपक्केनाति सतिया नेपक्कभावेनाति सक्का विञ्ञातुं. तेनेव हि पच्चयविसेसवसेन अञ्ञधम्मनिरपेक्खो सतिया बलवभावो. तथा हि ञाणविप्पयुत्तचित्तेनपि अज्झयनसम्मसनानि सम्भवन्ति.

चेतियङ्गणवत्तादीति आदि-सद्देन बोधियङ्गणवत्तादीनि सङ्गण्हाति. असीतिमहावत्तपटिपत्तिपूरणन्ति एत्थ असीतिवत्तपटिपत्तिपूरणं महावत्तपटिपत्तिपूरणन्ति वत्तपटिपत्तिपूरण-सद्दो पच्चेकं योजेतब्बो. तत्थ महावत्तानि (विभ. मूलटी. ४०६) नाम वत्तखन्धके (चूळव. ३५६ आदयो) वुत्तानि आगन्तुकवत्तं आवासिकं गमिकं अनुमोदनं भत्तग्गं पिण्डचारिकं आरञ्ञिकं सेनासनं जन्ताघरं वच्चकुटि उपज्झायं सद्धिविहारिकं आचरियं अन्तेवासिकवत्तन्ति चुद्दस. ततो अञ्ञानि पन कदाचि तज्जनीयकम्मकतादिकाले पारिवासिकादिकाले च चरितब्बानि असीति खुद्दकवत्तानि सब्बासु अवत्थासु न चरितब्बानि, तस्मा महावत्तेसु, अग्गहितानि. तत्थ ‘‘पारिवासिकानं भिक्खूनं वत्तं पञ्ञपेस्सामी’’ति आरभित्वा ‘‘न उपसम्पादेतब्बं…पे… न छमायं चङ्कमन्ते चङ्कमे चङ्कमितब्ब’’न्ति (चूळव. ८१) वुत्तानि पकभत्ते चरितब्बवत्तावसानानि छसट्ठि, ततो परं ‘‘न, भिक्खवे, पारिवासिकेन भिक्खुना पारिवासिकवुड्ढतरेन भिक्खुना सद्धिं मूलायपटिकस्सनारहेन मानत्तारहेन मानत्तचारिकेन अब्भानारहेन भिक्खुना सद्धिं एकच्छन्ने आवासे वत्तब्ब’’न्तिआदीनि (चूळव. ८२) पकतत्ते चरितब्बेहि अनञ्ञत्ता विसुं विसुं अगणेत्वा पारिवासिकवुड्ढतरादीसु पुग्गलन्तरेसु ¶ चरितब्बत्ता तेसं वसेन सम्पिण्डेत्वा एकेकं कत्वा गणितब्बानि पञ्चाति एकसत्ततिवत्तानि, उक्खेपनियकम्मकतवत्तेसु वत्तपञ्ञापनवसेन वुत्तं – ‘‘न पकतत्तस्स भिक्खुनो अभिवादनं पच्चुट्ठानं…पे… न्हाने पिट्ठिपरिकम्मं सादितब्ब’’न्ति (चूळव. ५१) इदं अभिवादनादीनं असादियनं एकं, ‘‘न पकतत्तो भिक्खु सीलविपत्तिया अनुद्धंसितब्बो’’तिआदीनि च दसाति एवमेतानि द्वासीति. एतेस्वेव पन कानिचि तज्जनीयकम्मादिवत्तानि कानिचि पारिवासिकादिवत्तानीति अग्गहितग्गहणेन द्वासीति, एवं अप्पकं पन ऊनमधिकं वा गणनुपगं न होतीति इध ‘‘असीति’’च्चेव वुत्तं. अञ्ञत्थ पन अट्ठकथापदेसे ‘‘द्वासीति खन्धकवत्तानी’’ति वुच्चति.

सक्कच्चं ¶ उद्दिसनं सक्कच्चं उद्दिसापनन्ति पच्चेकं सक्कच्चं-सद्दो योजेतब्बो. उद्दिसनं उद्देसग्गहणं. धम्मोसारणं धम्मस्स उच्चारणं. धम्मदेसना –

‘‘आदिम्हि सीलं देसेय्य, मज्झे झानं विपस्सनं;

परियोसाने च निब्बानं, एसा कथिकसण्ठिती’’ति. (दी. नि. अट्ठ. १.१९०; सं. नि. अट्ठ. ३.४.२४६) –

एवं कथितलक्खणा धम्मकथा. उपगन्त्वा निसिन्नस्स यस्स कस्सचि गहट्ठस्स पब्बजितस्स वा तङ्खणानुरूपा धम्मी कथा उपनिसिन्नकथा. भत्तानुमोदनकथा अनुमोदनिया. सरिताति एत्थ न केवलं चिरकतचिरभासितानं सरणमनुस्सरणमत्तं अधिप्पेतं, अथ खो तथापवत्तरूपारूपधम्मानं परिग्गहमुखेन पवत्तविपस्सनाचारे सतिसम्बोज्झङ्गसमुट्ठापनन्ति दस्सेतुं ‘‘तस्मिं कायेन चिरकते’’तिआदि वुत्तं. सकिम्पि सरणेनाति एकवारं सरणेन. पुनप्पुनं सरणेनाति अनु अनु सरणेन. सतिसम्बोज्झङ्गम्पि विवेकनिस्सितं विरागनिस्सितं निरोधनिस्सितं वोसग्गपरिणामिञ्च कत्वा सरन्तो तत्थ तत्थ जवनवारे सरणजवनवारे परित्तजवनवसेन अनुस्सरिताति वेदितब्बा.

गतिअत्था धातुसद्दा बुद्धिअत्था होन्तीति आह – ‘‘उदयञ्च वयञ्च पटिविज्झितुं समत्थाया’’ति. मिस्सकनयेनायं देसना आगताति आह – ‘‘विक्खम्भनवसेन च समुच्छेदवसेन चा’’ति. तेनाह ‘‘विपस्सनापञ्ञाय चेवा’’तिआदि. विपस्सनापञ्ञाय निब्बेधिकपरियायतो. सा च खो पदेसिकाति निप्पदेसिकं कत्वा दस्सेतुं ‘‘मग्गपञ्ञाय पटिलाभसंवत्तनतो चा’’ति वुत्तं. दुक्खक्खयगामिनिभावेपि एसेव नयो. सम्माति याथावतो. अकुप्पधम्मताय ¶ हि मग्गपञ्ञा खेपितखेपनाय न पुन किच्चं अत्थीति उपायेन ञायेन या पवत्ति सा एवाति आह – ‘‘हेतुना नयेना’’ति.

२६. अधिकं चेतो अभिचेतो, महग्गतचित्तं, तस्स पन अधिकता कामच्छन्दादिपटिपक्खविगमेन विसिट्ठभावप्पत्ति, तन्निस्सितानि आभिचेतसिकानि. तेनाह ‘‘अभिचित्तं सेट्ठचित्तं सितान’’न्ति. दिट्ठधम्मसुखविहारानन्ति इमस्मिंयेव अत्तभावे फासुविहारभूतानं. तेहि ¶ पन समङ्गितक्खणे यस्मा विवेकजं पीतिसुखं समाधिजं पीतिसुखं अपीतिजं सतिपारिसुद्धिञाणसुखञ्च पटिलभति विन्दति, तस्मा आह – ‘‘अप्पितप्पितक्खणे सुखपटिलाभहेतून’’न्ति. इच्छितिच्छितक्खणे समापज्जिताति इमिना तेसु झानेसु समापज्जनवसीभावमाह, ‘‘निकामलाभी’’ति पन वचनतो आवज्जनाधिट्ठाना पच्चवेक्खणवसियो च वुत्ता एवाति वेदितब्बा. निदुक्खलाभीति इमिना तेसं झानानं सुखपटिपदाखिप्पाभिञ्ञतं दस्सेति, विपुललाभीति इमिना पगुणतं तप्पमाणदस्सितभावदीपनतो. तेनाह ‘‘पगुणभावेना’’तिआदि. समापज्जितुं सक्कोति समापज्जनवसीभावताय साधितत्ता. समाधिपारिपन्थिकधम्मेति वसीभावस्स पच्चनीकधम्मे. झानाधिगमस्स पन पच्चनीकधम्मा पगेव विक्खम्भिता, अञ्ञथा झानाधिगमो एव न सिया. अकिलमन्तो विक्खम्भेतुं न सक्कोतीति किच्छेन विक्खम्भेति विसोधेति, कामादीनवपच्चवेक्खणादीहि कामच्छन्दादीनं अञ्ञेसं समाधिपारिपन्थिकानं दूरसमुस्सारणं इध विक्खम्भनं विसोधनन्ति वेदितब्बं.

२७. विपस्सनाहिताय उपरूपरिविसेसावहत्ता वड्ढमानाय पुब्बभागसीलादिपटिपदाय. सा एव पुब्बभागपटिपदा यथाभावितताय अवस्सं भाविनं विसेसं परिग्गहितत्ता अण्डं वियाति अण्डं, किलेसेहि अदूसितताय अपूति अण्डं एतस्साति अपुच्चण्डो, विपस्सनं उस्सुक्कापेत्वा ठितपुग्गलो, तस्स भावो अपुच्चण्डता. विपस्सनादिञाणप्पभेदायाति पुब्बेनिवासञाणादिञाणपभेदाय. तत्थाति चेतोखिलसुत्ते (म. नि. १.१८५) ‘‘स खो सो, भिक्खवे, एवं उस्सोळ्हिपन्नरसङ्गसमन्नागतो भिक्खु भब्बो अभिनिब्बिदाया’’ति आगतत्ता उस्सोळ्हिपन्नरसेहि अङ्गेहि समन्नागतभावोति एवं यं ओपम्मसंसन्दनं आगतं, तं ओपम्मसंसन्दनं इध इमस्मिं सेखसुत्ते योजेत्वा वेदितब्बन्ति सम्बन्धो.

२८. महग्गतादिभावेन हेट्ठिमानं झानानं अनुरूपम्पि अत्तनो विसेसेन ते उत्तरित्वा अतिक्कमित्वान ठितन्ति अनुत्तरं, तेनाह – ‘‘पठमादिज्झानेहि असदिसं उत्तम’’न्ति. दुतियादीसुपि ¶ अभिनिब्भिदासु. पुब्बेनिवासञाणं उप्पज्जमानं यथा अत्तनो विसयपटिच्छादकं किलेसन्धकारं विधमन्तमेव ¶ उप्पज्जति, एवं अत्तनो विसये कञ्चि विसेसं करोन्तमेव उप्पज्जतीति आह – ‘‘पुब्बेनिवासञाणेन पठमं जायती’’ति, सेसञाणद्वयेपि एसेव नयो.

२९. चरणस्मिन्ति पच्चत्ते भुम्मवचनन्ति आह ‘‘चरणं नाम होतीति अत्थो’’ति. तेनाति करणत्थे करणवचनं अगतपुब्बदिसागमने तेसं साधकतमभावतो.

अट्ठ ञाणानीति इध आगतानि च अनागतानि च अम्बट्ठसुत्तादीसु (दी. नि. १.२५४ आदयो) आगतानि गहेत्वा वदति. विनिविज्झित्वाति पुब्बेनिवासपटिच्छादकादिकिलेसतमं भिन्दित्वा पदालेत्वा.

३०. सनङ्कुमारेनाति सनन्तनकुमारेन. तदेव हि तस्स सनन्तनकुमारतं दस्सेतुं ‘‘चिरकालतो पट्ठाया’’ति वुत्तं. सो अत्तभावोति येन अत्तभावेन मनुस्सपथे झानं निब्बत्तेसि, सो कुमारत्तभावो, तस्मा ब्रह्मभूतोपि तादिसेन कुमारत्तभावेन चरति.

जनितस्मिं-सद्दो एव इ-कारस्स ए-कारं कत्वा ‘‘जनेतस्मि’’न्ति वुत्तो, जनितस्मिन्ति च जनस्मिन्ति अत्थो वेदितब्बो. जनितस्मिन्ति सामञ्ञग्गहणेपि यत्थ चतुवण्णसमञ्ञा, तत्थेव मनुस्सलोके. खत्तियो सेट्ठोति लोकसमञ्ञापि मनुस्सलोकेयेव, न देवकाये ब्रह्मकाये वाति दस्सेतुं ‘‘ये गोत्तपटिसारिनो’’ति वुत्तं. पटिसरन्तीति ‘‘अहं गोतमो, अहं कस्सपो’’ति पति पति अत्तनो गोत्तं अनुसरन्ति पटिजानन्ति वाति अत्थो.

एत्तावताति ‘‘साधु साधु आनन्दा’’ति एत्तकेन साधुकारदानेन. जिनभासितं नाम जातन्तिआदितो पट्ठाय याव परियोसाना थेरभासितं बुद्धभासितमेव नाम जातं. ‘‘किम्पनिदं सुत्तं सत्थुदेसनानुविधानतो जिनभासितं, उदाहु साधुकारदानमत्तेना’’ति एवरूपा चोदना इध अनोकासा थेरस्स देसनाय भगवतो देसनानुविधानहेतुकत्ता साधुकारदानस्साति. यं पनेत्थ अत्थतो अविभत्तं, तं सुविञ्ञेय्यमेव.

सेखसुत्तवण्णनाय लीनत्थप्पकासना समत्ता.

४. पोतलियसुत्तवण्णना

३१. अङ्गा ¶ नाम ¶ जनपदिनो राजकुमारा, तेसं निवासो एकोपि जनपदो रुळ्हिवसेन अङ्गात्वेव वुच्चतीति आह ‘‘अङ्गायेव सो जनपदो’’ति. महिया पनस्स उत्तरेन या आपोति महिया नदिया या आपो तस्स जनपदस्स उत्तरेन होन्ति. तासं अविदूरत्ता सो जनपदो उत्तरापोति वुच्चति. सा पन मही कत्थचि कत्थचि भिज्जित्वा गताति आह ‘‘कतरमहिया उत्तरेन या आपो’’ति. तत्थाति तस्सा महिया आगमनतो पट्ठाय अयं आविभावकथा. यस्मा (अ. नि. टी. ३.८.१९) लोकिया जम्बुदीपो हिमवा तत्थ पतिट्ठितसमुद्ददहपब्बतनदियोति एतेसु यं यं न मनुस्सगोचरं, तत्थ सयं सम्मूळ्हा अञ्ञेपि सम्मोहयन्ति, तत्थ तत्थ सम्मोहविधमनत्थं ‘‘अयं किर जम्बुदीपो’’तिआदिमारद्धं. दससहस्सयोजनपरिमाणो आयामतो च वित्थारतो चाति अधिप्पायो. तेनाह ‘‘तत्था’’तिआदि. उदकेन अज्झोत्थटो तदुपभोगिसत्तानं पुञ्ञक्खयेन.

सुन्दरदस्सनं कूटन्ति सुदस्सनकूटं, यं लोके ‘‘हेमकूट’’न्ति वुच्चति. मूलगन्धो काळानुसारियादि. सारगन्धो चन्दनादि. फेग्गुगन्धो सललादि. तचगन्धो लवङ्गादि. पपटिकगन्धो कबित्थादि. रसगन्धो सज्जादि, पत्तगन्धो तमालहिरिवेरादि. पुप्फगन्धो नागकुङ्कुमादि. फलगन्धो जातिफलादि. गन्धगन्धो सब्बेसं गन्धानं गन्धो. यस्स हि रुक्खस्स सब्बेसम्पि मूलादीनं गन्धो अत्थि, सो इध गन्धो नाम. तस्स गन्धस्स गन्धो गन्धगन्धो. सब्बानि पुथुलतो पञ्ञासयोजनानि, आयामतो पन उब्बेधतो विय द्वियोजनसतानेवाति वदन्ति.

मनोहरसिलातलानीति ओतरणत्थाय मनुञ्ञसोपानसिलातलानि. सुपटियत्तानीति तदुपभोगिसत्तानं साधारणकम्मानुभावेन सुट्ठु पटियत्तानि सुप्पवत्तितानि होन्ति. मच्छकच्छपादयो उदकं मलिनं करोन्ति, तदभावतो फलिकसदिसनिम्मलुदकानि. तिरियतो दीघं उग्गतकूटन्ति ‘‘तिरच्छानपब्बत’’न्ति आह.

आपणानि ¶ एव वोहारस्स मुखभूतानीति आह ‘‘आपणमुखसहस्सानी’’ति. विभत्तानीति ¶ ववत्थितानि अञ्ञमञ्ञासम्भिन्नानि. वसनट्ठानन्ति अत्तनो यथाफासुकं वसितब्बट्ठानं. आसति एत्थाति आसनं, निसीदितब्बट्ठानानि.

असारुप्पं पटिच्च उप्पज्जनकस्स छादनतो छन्नं अनुच्छविकं, तदेव अज्झासयसम्पत्तिं पतिरूपेति पकासेतीति पतिरूपं. तेनाह ‘‘नप्पतिरूप’’न्ति. कारणवेवचनानीति ञापककारणवेवचनानि. ञापकञ्हि कारणं अधिप्पेतं. अत्थं आकरोति पकासेतीति आकारो, तमेव लीनं गुळ्हं अत्थं गमेतीति लिङ्गं, सो तेन निमीयतीति निमित्तन्ति वुच्चति. इदानि तमेवत्थं विवरितुं ‘‘दीघदसवत्थ…पे… निमित्ताति वुत्ता’’ति आह. तेति आकारादयो. तथा हि पन मेतिआदिना पोतलियो गहपति ‘‘परिब्बाजकनियामेन अहं जीवामि, तस्मा गहपति न होमीति वदति. ओवदन्तोति अनुसासन्तो. उपवदन्तोति परिभासन्तो.

३२. गेधभूतो लोभोति गिज्झनसभावो लोभो. अगिज्झनलक्खणो न लोभो, अनिन्दाभूतं अघट्टनन्ति निन्दाय पटिपक्खभूतं परेसं अघट्टनं. निन्दाघट्टनाति निन्दावसेन परेसं घट्टना अक्कोसना. ब्यवहारवोहारोपीति कयविक्कयलक्खणो सब्योहारोपि दानग्गहणं वोहारो. ‘‘दत्तो तिस्सो’’ तिआदिना वोहरणं पञ्ञापनन्ति पञ्ञत्ति वोहारो. यथाधिप्पेतस्स अत्थस्स वोहरणं कथनं बोधनन्ति वचनं वोहारो. याथावतो अयाथावतो च वोहरति एतेनाति वोहारो, चेतना. अयमिधाधिप्पेतोति अयं चेतनालक्खणो वोहारो इध इमस्मिं अत्थे अधिप्पेतो, सो च खो सावज्जोव समुच्छेदस्स इच्छितत्ता. इदानि चतुब्बिधस्सपि वोहारस्स इध सम्भवं दस्सेतुं ‘‘यस्मा वा’’तिआदि वुत्तं. गिहीति चेतना नत्थीति अहं गिहीति चेतनापवत्ति नत्थि. गिहीति वचनं नत्थीति गिहीति अत्तनो परेसञ्च वचनप्पवत्ति नत्थि. गिहीति पण्णत्ति नत्थीति गिहीति समञ्ञा नत्थि. गिहीति ब्यवहारो नत्थीति समुदाचारो नत्थि.

३३. पाणातिपातोव संयोजनं. कस्मा? बन्धनभावेन पवत्तनतो निस्सरितुं अप्पदानतो. पाणातिपातस्स अत्थिताय सो पुग्गलो ¶ ‘‘पाणातिपाती’’ति वुच्चतीति आह – ‘‘पाणातिपातस्स…पे… होती’’ति. यञ्हि यस्स अत्थि, तेन सो अपदिस्सतीति. बहुतायाति अचक्खुकादिभेदेन बहुभावतो. पाणातिपातस्स पटिपक्खो अपाणातिपातो. सो पन अत्थतो कायद्वारिको सीलसंवरोति आह ‘‘कायिकसीलसंवरेना’’ति. अत्तापि मं उपवदेय्यातिआदि पाणातिपाते आदीनवदस्सनं. आदीनवदस्सिनो हि ततो ओरमणं. देसनावसेनाति ¶ अञ्ञत्थ सुत्ते अभिधम्मे च दससु संयोजनेसु पञ्चसु नीवरणेसु देसनावसेन अपरियापन्नम्पि संयोजनन्तिपि नीवरणन्तिपि इध वुत्तं. कस्मा? तदत्थसम्भवतो. तेनाह – ‘‘वट्टबन्धनट्ठेन हितप्पटिच्छादनट्ठेन चा’’ति, पाणातिपातो हि अपाणातिपातपच्चयं हितं पटिच्छादेन्तोव उप्पज्जतीति. एको अविज्जासवोति इदं सहजातवसेन वुत्तं, उपनिस्सयवसेन पन इतरेसम्पि आसवानं यथारहं सम्भवो वेदितब्बो. पाणातिपाती हि पुग्गलो ‘‘तप्पच्चयं अत्थं करिस्सामी’’ति कामे पत्थेति. दिट्ठिं गण्हाति, भवविसेसं पच्चासीसति. तत्थ उप्पन्नं विहनति बाधतीति विघातो, दुक्खं, परिळाहनं अनत्थुप्पादवसेन उपतापनं परिळाहो, अयमेतेसं विसेसो. सब्बत्थाति सब्बेसु वारेसु. इमिना उपायेनाति अतिदेसेन पन परिग्गहितो अत्थो परतो आगमिस्सतीति.

३४-४०. इमस्मिं पदेति एतेन सत्तसुपि वारेसु तथा आगतं पदं सामञ्ञतो गहितं. तेनाह ‘‘इमिना’’तिआदि. रोसनं कायिकं वाचसिकञ्चाति तप्पटिपक्खो अरोसोपि तथा दुविधोति आह ‘‘कायिकवाचसिकसंवरेना’’ति. यथा अभिज्झा लोभो, अनभिज्झा अलोभो, एवं अकोधूपायासो अब्यापादो, संवरे सुखन्ति संवरोति दट्ठब्बो, अनतिलोभो पन सतिसंवरे, अनतिमानो ञाणसंवरे सङ्गहं गच्छतीति दट्ठब्बं. इमेसु पन पदेसु एवं सब्बवारेसु योजना कातब्बाति सम्बन्धो.

एवं आसवुप्पत्ति वेदितब्बाति एत्थ वुत्तस्सपि एकज्झं वुच्चमानत्ता ‘‘पुन अयं सङ्खेपविनिच्छयो’’ति वुत्तं. असम्मोहत्थं आरम्मणस्स. पुरिमेसु ताव चतूसु वारेसु विरमितुं न सक्कोमीति वत्तब्बं. ‘‘अत्तापि मं उपवदेय्या’’ति एतस्स पदस्स अत्थवण्णनायं ‘‘न सक्कोमी’’ति, ‘‘अनुविज्जापि मं विञ्ञू गरहेय्यु’’न्ति एतस्स पदस्स अत्थवण्णनायं ‘‘न सक्कोती’’ति ¶ वत्तब्बं, इमिना नयेन पच्छिमेसुपि चतूसु यथारहं योजना वेदितब्बा. अतिमाने भवासवअविज्जासवाति वुत्तं मानेन सह दिट्ठिया अनुप्पज्जनतो, अतिमानो पन कामरागेनपि उप्पज्जतेवाति ‘‘अतिमाने कामासवअविज्जासवा’’ति वत्तब्बं सिया, स्वायं नयो वुत्तनयत्ता सुविञ्ञेय्योति न दस्सितो. पातिमोक्खसंवरसीलं कथितं आदितो चतूहि छट्ठेन वाति पञ्चहि वारेहि, सेसेहि तीहि पातिमोक्खसंवरसीले ठितस्स भिक्खुनो पटिसङ्खापहानं, सब्बेहिपि पन भिक्खुभावे ठितस्स गिहिवोहारसमुच्छेदो कथितो. तत्थ सब्बत्थ वत्तं ‘‘इदञ्चिदञ्च मय्हं कातुं नप्पतिरूप’’न्ति पटिसङ्खानवसेन अकरणं पजहनञ्च पटिसङ्खापहानं.

कामादीनवकथावण्णना

४२. उपसुम्भेय्याति ¶ एत्थ उप-सद्दो समीपत्थो, सुम्भनं विक्खेपनं. तेनेव तमेनन्ति भुम्मत्थे उपयोगवचनन्ति आह – ‘‘तस्स समीपे खिपेय्या’’ति, तस्स कुक्कुरस्स समीपे अट्ठिकङ्कलं खिपेय्याति अत्थो. निम्मंसत्ता कङ्कलन्ति वुच्चतीति इमिना विगतमंसाय अट्ठिकङ्कलिकाय उरट्ठिम्हि वा पिट्ठिकण्टके वा सीसट्ठिम्हि वा कङ्कल-सद्दो निरुळ्होति दस्सेति. सुनिक्कन्तन्ति निल्लिखितं कत्वाव निब्बिसेसं लिखितं.

एकत्तुपट्ठानस्स अज्झुपेक्खनवसेन पवत्तिया एकत्ता. तेनाह ‘‘चतुत्थझानुपेक्खा’’ति. यस्मा पनस्स आरम्मणम्पि एकसभावमेव, तस्मा आह ‘‘सा ही’’तिआदि. लोकामिससङ्खाताति अपरिञ्ञातवत्थुना लोकेन आमसितब्बतो, लोके वा आमिसोति सङ्खं गताय वसेन कामगुणानं कामभावो च आमिसभावो च, सो एव निप्परियायतो आमिसन्ति वत्तब्बतं अरहति. कामगुणामिसाति कामगुणे छन्दरागा. गहणट्ठेन भुसं आदानट्ठेन.

४३. डयनं आकासेन गमनन्ति आह ‘‘उप्पतित्वा गच्छेय्या’’ति. गिज्झादीनं वासिफरसु न होतीति आह – ‘‘मुखतुण्डकेन डसन्ता तच्छेय्यु’’न्ति. विस्सज्जेय्युन्ति एत्थ ‘‘विस्सज्जन’’न्ति आकड्ढनं अधिप्पेतं अनेकत्थत्ता धातूनं, आकड्ढनञ्च अनुबन्धित्वा पातनन्ति आह ‘‘मंसपेसिं नखेहि कड्ढित्वा पातेय्यु’’न्ति.

४७. पुरिसस्स ¶ आरोहनयोग्यं पोरिसेय्यं.

४८. सम्पन्नं सुन्दरं फलमस्साति सम्पन्नफलं. फलूपपन्नन्ति फलेहि उपेतन्ति आह ‘‘बहुफल’’न्ति.

५०. सुविदूरविदूरेति अरियस्स विनये वोहारसमुच्छेदतो सुट्ठु विदूरभूते एव विदूरे अहं ठितो. कस्सचि नाम अत्थस्सपि अजाननतो न आजानन्तीति अनाजानीयाति कत्तुसाधनमस्स दस्सेन्तो अजाननकेति अजानन्तभोजनसीसेन तेसं दातब्बपच्चये वदति. सेसं सुविञ्ञेय्यमेव.

पोतलियसुत्तवण्णनाय लीनत्थप्पकासना समत्ता.

५. जीवकसुत्तवण्णना

५१. कुमारेन ¶ भतो पोसापितोति कुमारभतो, कुमारभतो एव कोमारभच्चो यथा ‘‘भिसक्कमेव भेसज्ज’’न्ति.

आरभन्तीति एत्थ आरभ-सद्दो कामं कामायूहनयञ्ञुट्ठापनआपत्तिआपज्जनविञ्ञापनादीसुपि आगतो, इध पन हिंसने इच्छितब्बोति आह – ‘‘आरभन्तीति घातेन्ती’’ति. उद्दिसित्वा कतन्ति (अ. नि. टी. ३.८.१२; सारत्थ. टी. महावग्ग ३.२९४) अत्तानं उद्दिसित्वा मारणवसेन कतं निब्बत्तितं. पटिच्चकम्मन्ति एत्थ कम्म-सद्दो कम्मसाधनो अतीतकालिकोति आह – ‘‘अत्तानं पटिच्च कत’’न्ति. निमित्तकम्मस्सेतं अधिवचनं ‘‘पटिच्च कम्मं फुसती’’तिआदीसु (जा. १.४.७५) विय. निमित्तकम्मस्साति निमित्तभावेन लद्धब्बकम्मस्स, न करणकारापनवसेन. पटिच्चकम्मं एत्थ अत्थीति मंसं पटिच्चकम्मं यथा ‘‘बुद्धं एतस्स अत्थीति बुद्धो’’ति. तेसन्ति निगण्ठानं. अञ्ञेपि ब्राह्मणादयो तंलद्धिका अत्थेव.

कारणन्ति एत्थ युत्ति अधिप्पेता, सा एव च धम्मतो अनपेतत्ता ‘‘धम्मो’’ति वुत्ताति आह – ‘‘कारणं नाम तिकोटिपरिसुद्धमच्छमंसपरिभोगो’’ति. अनुकारणं नाम महाजनस्स तथा ब्याकरणं युत्तिया धम्मस्स अनुरूपभावतो मंसं परिभुञ्जितब्बन्ति अनुञ्ञातं तथेव कथनन्ति कत्वा. तन्ति ‘‘जानं उद्दिस्सकतं मंसं परिभुञ्जती’’ति एवं वुत्तं परिभुञ्जनं नेव कारणं होति ¶ सब्बेन सब्बं अभावतो सति च अयुत्तियं अधम्मोति कत्वा. तथा ब्याकरणन्ति ‘‘जानं उद्दिस्सकतं मंसं परिभुञ्जती’’ति कथनं युत्तिया धम्मस्स अननुरूपभावतो न अनुकारणं होति. परेहि वुत्तकारणेन सकारणो हुत्वाति परे तित्थिया ‘जान’न्तिआदिना धम्मं कथेन्ति वदन्ति, तेन कारणभूतेन सकारणो हुत्वा. तेहि तथा वत्तब्बो एव हुत्वा तुम्हाकं वादो वा अनुवादो वा ‘‘मंसं परिभुञ्जितब्ब’’न्ति पवत्ता तुम्हाकं कथा वा परतो परेहि तथा पवत्तिता तस्सा अनुकथा वा. विञ्ञूहि गरहितब्बकारणन्ति तित्थिया ताव तिट्ठन्तु, ततो अञ्ञेहि पण्डितेहि गरहितब्बकारणं. कोचि न आगच्छतीति गरहितब्बतं न आपज्जतीति अत्थो. अभिभवित्वा आचिक्खन्तीति अभिभुय्य मद्दित्वा कथेन्ति, अभिभूतेन अक्कोसन्तीति अत्थो.

५२. कारणेहीति ¶ परिभोगचित्तस्स अविसुद्धताहेतूहि. भिक्खू उद्दिस्सकतं दिट्ठं. तादिसमंसञ्हि परिभोगानारहत्ता चित्तअविसुद्धिया कारणं चित्तसंकिलेसावहतो. इदानि दिट्ठसुतपरिसङ्कितानि सरूपतो दस्सेतुं ‘‘दिट्ठादीसू’’तिआदि वुत्तं. तत्थ तदुभयविमुत्तपरिसङ्कितन्ति ‘‘दिट्ठं सुत’’न्ति इमं उभयं अनिस्साय – ‘‘किं नु खो इमं भिक्खुं उद्दिस्स वधित्वा सम्पादित’’न्ति केवलमेव परिसङ्कितं. सब्बसङ्गाहकोति सब्बेसं तिण्णं परिसङ्कितानं सङ्गण्हनको.

मङ्गलादीनन्ति आदि-सद्देन आहुनपाहुनादिकं सङ्गण्हाति. निब्बेमतिका होन्तीति सब्बेन सब्बं परिसङ्किताभावमाह. इतरेसन्ति अजानन्तानं वट्टति, जानतो एवेत्थ आपत्ति होति. तेयेवाति ये उद्दिस्स कतं, तेयेव.

उद्दिस्सकतमंसपरिभोगतो अकप्पियमंसपरिभोगस्स विसेसं दस्सेतुं ‘‘अकप्पियमंसं पना’’तिआदि वुत्तं. पुरिमस्मिं सचित्तका आपत्ति, इतरस्मिं अचित्तका. तेनाह – ‘‘अकप्पियमंसं अजानित्वा भुत्तस्सपि आपत्तियेवा’’ति. परिभोगन्ति परिभुञ्जितब्बन्ति वदामीति अत्थो.

५३. तादिसस्साति तिकोटिपरिसुद्धस्स मच्छमंसस्स परिभोगे. मेत्ताविहारिनोपीति अपि-सद्देन अमेत्ताविहारिनोपि. मेत्ताविहारिनो परिभोगे सिखाप्पत्ता अनवज्जताति दस्सेतुं ‘‘इध, जीवक, भिक्खू’’तिआदि ¶ वुत्तं. अनियमेत्वाति अविसेसेत्वा सामञ्ञतो. यस्मा भगवता – ‘‘यतो खो, वच्छ, भिक्खुनो तण्हा पहीना होती’’तिआदिना महावच्छगोत्तसुत्ते (म. नि. २.१९४) अत्ता अनियमेत्वा वुत्तो. तथा हि वच्छगोत्तो – ‘‘तिट्ठतु भवं गोतमो, अत्थि पन भोतो गोतमस्स एकभिक्खुपि सावको आसवानं खया…पे… उपसम्पज्ज विहरती’’ति आह, ‘‘इध, भारद्वाज, भिक्खु अञ्ञतरं गामं वा निगमं वा उपनिस्साय विहरती’’तिआदिना चङ्कीसुत्ते (म. नि. २.४३०) अत्ता अनियमेत्वा वुत्तो. तथा हि तत्थ परतो – ‘‘यं खो पन अयमायस्मा धम्मं देसेति, गम्भीरो सो धम्मो दुद्दसो दुरनुबोधो सन्तो पणीतो अतक्कावचरो निपुणो पण्डितवेदनीयो, न सो धम्मो सुदेसनीयो लुद्देना’’तिआदिना देसना आगता, तस्मा वुत्तं ‘‘भगवता हि महावच्छगोत्तसुत्ते, चङ्कीसुत्ते इमस्मिं सुत्तेति तीसु ठानेसु अत्तानंयेव सन्धाय देसना कता’’ति. मंसूपसेचनोव अधिप्पेतो मच्छमंससहितस्स आहारस्स परिभोगभावतो मच्छमंसस्स च इध अधिप्पेतत्ता.

अगथितो ¶ अप्पटिबद्धो. तण्हामुच्छनायाति तण्हायनवसेन मुच्छापत्तिया. अनज्झोपन्नो तण्हाय अभिभवित्वा न अज्झोत्थटो, गिलित्वा परिनिट्ठपेत्वा न सण्ठितोति अत्थो. तेनाह – ‘‘सब्बं आलुम्पित्वा’’तिआदि. इध आदीनवो आहारस्स पटिकूलभावोति आह ‘‘एकरत्तिवासेना’’तिआदि. अयमत्थो आहारपरिभोगोति अत्थसंयोजनपरिच्छेदिका ‘‘यावदेव इमस्स कायस्स ठितिया’’तिआदिना (दी. नि. ३.१८२; म. नि. १.२३; २.२४; ३.७५; सं. नि. ४.१२०) पवत्ता आहारपटिबद्धछन्दरागनिस्सरणभूता पञ्ञा अस्स अत्थीति निस्सरणपञ्ञो. इदमत्थन्ति एतमत्थाय. एवं सन्तेति ‘‘ब्रह्माति च मेत्ताविहारिनो समञ्ञा’’ति अवत्वा ये धम्मा मेत्ताविहारस्स पटिपक्खभूता, तत्थ सावसेसं पहासि ब्रह्मा, अनवसेसं पहासि भगवाति सचे ते इदं सन्धाय भासितं, एवं सन्ते तव इदं यथावुत्तवचनं अनुजानामि, न मेत्ताविहारितासामञ्ञमत्ततोति अत्थो.

५५. ‘‘पाटियेक्को ¶ अनुसन्धी’’ति वत्वा विसुं अनुसन्धिभावं दस्सेतुं ‘‘इमस्मिं ही’’तिआदि वुत्तं. द्वारं थकेतीति मच्छमंसपरिभोगानुञ्ञाय अञ्ञेसं वचनद्वारं पिदहति, चोदनापथं निरुन्धति. कथं सत्तानुद्दयं दस्सेति? सत्तानुद्दयमुखेन बाहिरकानं मच्छमंसपरिभोगपटिक्खेपो तयिदं मिच्छा, तिकोटिपरिसुद्धस्सेव मच्छमंसस्स परिभोगो भगवता अनुञ्ञातो. तथा हि वुत्तं – ‘तीहि खो अहं, जीवक, ठानेहि मंसं परिभोगन्ति वदामी’तिआदि (म. नि. २.५२). विनयेपि (पारा. ४०९; चूळव. ३४३) वुत्तं – ‘‘तिकोटिपरिसुद्धं, देवदत्त, मच्छमंसं मया अनुञ्ञात’’न्ति. तिकोटिपरिसुद्धञ्च भुञ्जन्तानं सत्तेसु अनुद्दया निच्चला. ‘‘सत्तानुद्दयं दस्सेती’’ति सङ्खेपतो वुत्तमत्थं विवरन्तो ‘‘सचे ही’’तिआदिमाह.

पठमेन कारणेनाति देसनावसेनपि पयोगवसेनपि पठमेन परूपघातहेतुना. कड्ढितो सो पाणो. गलेन पवेधेन्तेनाति योत्तगलेन करणेन असय्हमानेन. बहुपुञ्ञमेव होति आसादनापेक्खाय अभावतो, हितज्झासयत्ता वाति अधिप्पायो. एसाहं, भन्तेतिआदि कस्मा वुत्तं, सरणगमनवसेनेव गहितसरणोति चोदनं सन्धायाह ‘‘अय’’न्तिआदि. ओगाहन्तोतिआदितो पट्ठाय याव परियोसाना सुत्तं अनुस्सरन्तो अत्थं उपधारेन्तो. सेसं सुविञ्ञेय्यमेव.

जीवकसुत्तवण्णनाय लीनत्थप्पकासना समत्ता.

६. उपालिसुत्तवण्णना

५६. पावारं ¶ पारुपतीति पावारिको, इदं तस्स कुलसमुदागतं नामं, सो पन महद्धनो महाभोगो नगरे सेट्ठिट्ठाने ठितो. तेनाह ‘‘दुस्सपावारिकसेट्ठिनो’’ति. दीघत्ता दीघतमत्ता. सो किर पमाणतो उपवच्छयतो दियड्ढरतनं अतिक्कम्म ठितो. एवंलद्धनामोति ‘‘दीघतपस्सी’’ति लद्धसमञ्ञो. बाहिरायतनेति तित्थियसमये पिण्डपातोति वोहारो नत्थि, तस्मा सासनवोहारेन ‘‘पिण्डपातप्पटिक्कन्तो’’ति वुत्तन्ति अधिप्पायो.

दस्सेतीति ¶ देसेति. ठपेतीति अञ्ञमञ्ञसङ्करतो ववत्थपेति. किरियायाति करणेन. पवत्तियाति पवत्तनेन. दण्डानि पञ्ञपेतीति एत्थ कस्मा भगवता आदितोव तथा न पुच्छितन्ति? यस्मा सा तस्मिं अत्थे सभावनिरुत्ति न होति, सासने लोके समयन्तरेसु च तादिसो समुदाचारो नत्थि, केवलं पन तस्सेव निगण्ठस्सायं कोट्ठालकसदिसो समुदाचारोति इममत्थं दस्सेतुं ‘‘कम्मानि पञ्ञपेति’’ इच्चेवाह. अचित्तकन्ति चित्तरहितं, चित्तेन असमुट्ठापितन्ति अत्थो. कथं पन तदुभयस्स चित्तेन विना सम्भवोति चोदनं सन्धाय तत्थ निदस्सनमाह ‘‘यथा किरा’’तिआदि. पटिविभत्तानन्ति अत्थतो भिन्नानं. पटिविसिट्ठानन्ति विसेसनपदवसेन सद्दतोपि भिन्नानं. वचनं पतिट्ठपेतुकामोति दीघतपस्सिनो यथावुत्तवचनं पतिट्ठपेतुकामो. तस्मिञ्हि पतिट्ठापिते तेनप्पसङ्गेन आगतो, उपालि गहपति तस्मिं पदेसे धम्मं दिस्वा सासने अभिप्पसीदिस्सति.

कथा एव उपरि वादारोपनस्स वत्थुभावतो कथावत्थु. कथायं पतिट्ठपेसीति कथावत्थुस्मिं, तदत्थे वा पतिट्ठपेसि. यथा तं वादारोपनभयेन न अवजानाति, एवं तस्सं कथायं, तस्मिं वा अत्थे दीघतपस्सिं यावततियं वादे पतिट्ठपेसि. वादन्ति दोसं.

५७. इदानि चेतनासम्पयुत्तधम्मम्पि गहेत्वा कायकम्मादिवसेन सङ्गहेत्वा दस्सेतुं ‘‘अपिचा’’तिआदि वुत्तं. तत्थ तिविधं कायदुच्चरितं कायकम्मं नामातिआदि ‘‘कम्मस्स किरियाया’’ति पाळियं अकुसलकम्मस्स अधिगतत्ता वुत्तं, पुब्बे पन अट्ठकामावचरकुसलचेतनातिआदि सावज्जं अनवज्जञ्च सामञ्ञतो एकज्झं कत्वा दस्सितं. कस्मा पनेत्थ चेतना न गहिताति आह ‘‘इमस्मिं सुत्ते कम्मं धुर’’न्ति. कायकम्मादिभेदं कम्ममेव ¶ धुरं जेट्ठकं पुब्बङ्गमं, न चेतनामत्तमेव. एवमागतेपीति कम्मानीति एवं नामेन आगतेपि चेतना धुरं, तत्थ चेतनं जेट्ठकं पुब्बङ्गमं कत्वा वुत्तन्ति अधिप्पायो. कथं पन तत्थ कम्मन्ति वा कम्मानीति वा आगते तेसं चेतनाय धुरभावोति आह ‘‘यत्थ कत्थचि…पे… लभती’’ति. तत्थ यत्थ कत्थचीति यस्मिं किस्मिञ्चि द्वारे. सा वुत्तावाति सा चेतना वुत्ताव, या कायसङ्खारादिपरियायेन (यस्स कस्सचि कम्मस्स कायद्वारादीसु पवत्तापनचेतना) सम्पयुत्तधम्मापि ¶ तदग्गेन लोकियापि लोकुत्तरापि कम्ममेव, अभिज्झादयो पन चेतनापक्खिकाति दट्ठब्बं.

महन्तन्ति कटुकफलं. न किलमति सप्पाटिहारियत्ता पटिञ्ञाय. इदानि तेसं सप्पाटिहारियतं दस्सेतुं ‘‘तथा ही’’तिआदि वुत्तं. यदि अकुसलं पत्वा कायकम्मं वचीकम्मं महन्तन्ति वदन्तो न किलमति, अथ कस्मा भगवा इध अकुसलं मनोकम्मं महासावज्जं कथेसीति आह ‘‘इमस्मिं पन ठाने’’तिआदि. यावततियं पतिट्ठापनमत्तेन गतमग्गं पटिपज्जन्तो. तेनाह ‘‘किञ्चि अत्थनिप्फत्तिं अपस्सन्तोपी’’ति.

५८. निवासट्ठानभूतो बालको एतिस्सा अत्थीति बालकिनी. सत्थुपटिञ्ञातताय निगण्ठानं महाति सम्भावितत्ता महानिगण्ठो.

६०. आवट्टेति पुरिमाकारतो निवत्तेति अत्तनो वसे वत्तेति एतायाति आवट्टनी, माया. तेनाह ‘‘आवट्टेत्वा गहणमाय’’न्ति. सत्थुपटिञ्ञानं बुद्धदस्सने चित्तमेव न उप्पज्जति, अयमेत्थ धम्मता. सचे पन सो तं पटिञ्ञं अप्पहाय बुद्धानं सम्मुखीभावं उपगच्छेय्य, सत्तधा मुद्धा फलेय्य, तस्मा भगवा ‘‘मा अयं बालो विनस्सी’’तिआदितोव यथा सम्मुखीभावं न लभति, तथा करोति. स्वायमत्थो पाथिकपुत्तसमागमेन दीपेतब्बो. दस्सनसम्पत्तिनियाममाह ‘‘तथागतं ही’’तिआदि. आगमा नु खो इध तुम्हाकं सन्तिकं.

६१. वचीसच्चे पतिट्ठहित्वाति यथापटिञ्ञाताय पटिञ्ञाय ठत्वा.

६२. सीतोदके अमता पाणा पानकाले पन मरन्ति, तेपि तेन सीतोदकपरिभोगेन मारिता होन्ति, तस्मा तपस्सिना नाम सब्बेन सब्बं सीतोदकं न परिभुञ्जितब्बन्ति तेसं लद्धि. पाकतिकं वा उदकं सत्तोति पुरातनानं निगण्ठानं लद्धि. तेनाह ‘‘सत्तसञ्ञाय सीतोदकं पटिक्खिपन्ती’’ति. तेसं तं अधुनातननिगण्ठानं वादेन विरुज्झति. ते हि पथवीआदिनवपदत्थतो ¶ अञ्ञमेव जीवितं पटिजानन्ति. चित्तेन सीतोदकं पातुकामो परिभुञ्जितुकामो होति रोगे ठत्वापि सत्तानं चित्तस्स तथा न विततता. तेनाह – ‘‘तेनस्स मनोदण्डो तत्थेव भिज्जती’’ति. तेनाति सीतोदकं पातुं परिभुञ्जितुञ्च इच्छनेन. अस्साति यथावुत्तस्स निगण्ठस्स. तत्थेवाति तथाचित्तुप्पादने एव. भिज्जति संवरस्स विकोपितत्ता. तथाभूतो सो निगण्ठो सीतोदकं ¶ चे लभेय्य, कतिपयं कालं जीवेय्य, अलाभेन पन परिसुस्समानकण्ठोट्ठतालुजिव्हाआदिको सब्बसो परिदाहाभिभूतो मरेय्य. तेनाह – ‘‘सीतोदकं अलभमानो कालं करेय्या’’ति. कस्मा? यस्मा सीतोदकं पिवाय सन्निस्सितचित्तस्स मरणं होति, तस्मा वुत्तं ‘‘मनोदण्डो पन भिन्नोपि चुतिम्पि आकड्ढती’’ति. यस्मा पन तथाभूतचित्तस्स निगण्ठस्स मनोसत्तेसु नाम देवेसु उपपत्ति होतीति तित्थियानं लद्धि, तस्मा वुत्तं ‘‘मनोदण्डो पन भिन्नोपि पटिसन्धिम्पि आकड्ढती’’ति. इतीति एवं ‘‘इधास्स निगण्ठो’’तिआदिआकारेन. नन्ति उपालिं गहपतिं. महन्तोति वदापेसि ‘‘मनोपटिबद्धो कालङ्करोती’’ति वदन्तोति अधिप्पायो.

उपासकस्साति उपालिस्स गहपतिस्स. मुच्छावसेनातिआदिना अन्वयतो ब्यतिरेकतो च मनोदण्डस्स महन्ततं विभावेति. चित्तसन्ततिप्पवत्तिमत्तेनेवाति विना कायदण्डेन वचीदण्डेन च केवलं चित्तसन्ततिप्पवत्तिमत्तेन. भिज्जित्वापीति एत्थ पि-सद्देन अभिज्जित्वापि. अनिय्यानिकाति अप्पाटिहीरा, अयुत्ताति अत्थो. सल्लक्खेसि उपासकोति विभत्तिं विपरिणामेत्वा योजना. पञ्हपटिभानानीति ञातुं इच्छिते अत्थे उप्पज्जनकपटिभानानि.

‘‘मनोपटिबद्धो कालं करोती’’ति वदन्तेन अत्थतो मनोदण्डस्स तदुत्तरभावो पटिञ्ञातो होतीति आह ‘‘इदानि मनोदण्डो महन्तोति इदं वचन’’न्ति. तथा चेव वुत्तं – ‘‘मनोदण्डोव बलवा महन्तोति वदापेसी’’ति.

६३. पाणातिपातादितो यमनं यामो, चतुब्बिधो यामो चतुयामो, चतुयामसङ्खातेन संवरेन संवुतो चातुयामसंवरसंवुतो. अट्ठकथायं पन याम-सद्दो कोट्ठासपरियायोति ‘‘इमिना चतुकोट्ठासेना’’ति वुत्तं. पियजातिकं रूपादिआरम्मणं रागवसेन बालेहि भावनीयत्ता ‘‘भावित’’न्ति वुच्चतीति आह ‘‘भावितन्ति पञ्च कामगुणा’’ति.

यो सब्बं पापं आसवञ्च वारेतीति सब्बवारी, तस्स नवसु पदत्थेसु सत्तमो पदत्थो, तेन सब्बवारिना पापं वारित्वा ठितोति सब्बवारिवारितो ¶ . तेनाह ‘‘सब्बेन पापवारणेन वारितपापो’’ति. ¶ ततो एव सब्बस्स वारितब्बस्स आसवस्स धुननतो सब्बवारिधुतो. वारितब्बस्स निवारणवसेन सब्बवारिनो फुटो फुसितोति सब्बवारिफुटो. सङ्घातन्ति सहसा हननं, असञ्चेतनिकवधन्ति अत्थो. कतरस्मिं कोट्ठासेति तीसु दण्डकोट्ठासेसु कतरकोट्ठासे.

६४. खलियति समादियतीति खलं, रासीति आह – ‘‘एकं मंसखलन्ति एकं मंसरासि’’न्ति. विज्जाधरइद्धिया इद्धिमा. सा पन इद्धि यस्मा आनुभावसम्पन्नस्सेव इज्झति, न यस्स कस्सचि. तस्मा आह ‘‘आनुभावसम्पन्नो’’ति. विज्जानुभाववसेनेव आनुभावसम्पन्नो. चित्ते वसीभावप्पत्तो आनुभावाय एव विज्जाय पगुणभावापादनेन. एतेन वसीभावं लोकियसमञ्ञावसेन भगवा उपालिं गहपतिं पञ्ञपेतुकामो एवमाह. लोकिका हि ‘‘भावनामयइद्धिया इद्धिमा चेतोवसीभावप्पत्तो परूपघातं करोती’’ति मञ्ञन्ति. तथा हि ते इसयो परेसं संवण्णेन्ति, इसीनं आनुभावं कित्तेन्ति. यं पनेत्थ वत्तब्बं, तं परतो आगमिस्सतीति.

६५. अरञ्ञमेव हुत्वाति सब्बसो अरञ्ञमेव हुत्वा. अरञ्ञभावेन अरञ्ञं जातं, न नाममत्तेन. इसीनं अत्थायाति इसीनं आसादनत्थाय.

गोधावरीतीरतो नातिदूरे. उसूयमानोति ‘‘न मं एस जनो परिवारेती’’ति उसूयं करोन्तो. किलिट्ठो वताति पङ्कदन्तरजसिरतादीहि किलिट्ठसरीरो. अनञ्जितमण्डितोति अनञ्जितक्खिको सब्बेन, सब्बं अमण्डितो च. तस्मिं काले ‘‘कालस्सेव अक्खीनं अञ्जनं मङ्गल’’न्ति मनुस्सानं लद्धि, तस्मा अनञ्जनं विसुं गहितं.

राजा तस्स वचनं गहेत्वाति ‘‘वेदेसु ईदिसं आगतं भविस्सतीति एवं, भन्ते’’ति राजा तस्स पुरोहितस्स वचनं गहेत्वा. उसुमजातहदयोति उत्तत्तहदयो. नासिकानं अप्पहोन्ते मुखेन अस्ससन्तो.

विजितजयेहि आगन्त्वा नक्खत्तयुत्तं आगमेन्तेहि निसीदितब्बट्ठानं जयखन्धावारट्ठानं. उदकवुट्ठिपातनादि तस्मिं पापकम्मे असमङ्गिभूतानम्पि समनुञ्ञताय ¶ अन्तोकरणत्थं कतं. कतभण्डवुट्ठीति आभरणवस्सं. महाजनो समनुञ्ञो जातोति योजना. मातुपोसकरामोति मातरि सम्मापटिपन्नो रामो नाम एको पुरिसो. असमङ्गिभूतानन्ति असमनुञ्ञानं.

अवकिरियाति ¶ असुस्सूसतं पटिच्च. फुलिङ्गानीति अग्गिकणानि. पतन्ति कायेति काये इतो चितो निपतन्ति. एते किर निरयं विवरित्वा महाजनस्स दस्सेन्ति.

यथाफासुकट्ठानन्ति मयं कञ्चिपि देसं उद्दिस्स न गच्छाम, यत्थ पन वसन्तस्स पब्बजितस्स फासु होति, तं यथाफासुकट्ठानं गच्छामाति अधिप्पायो. सङ्घाति संहता. गणाति तंतंसेणिभावेन गणितब्बताय गणा. गणीभूताति एकज्झासया हुत्वा रासिभूता. अदिन्नादानन्तिआदीसुपि निरये पच्चित्वा मनुस्सलोकं आगतस्स विपाकावसेसेनाति आनेत्वा योजेतब्बं.

पग्गण्हिस्सामीति सम्भावनं उप्पादेस्सामि. नेसं कत्तब्बन्ति चिन्तेसीति योजना. किं चिन्तेसि? आघातं उप्पादेत्वा अनत्थकरणूपायं. तेनाह ‘‘सो धम्मकथापरियोसाने’’तिआदि. नागबलपिच्छिल्लादीनन्ति नागबलसासपअङ्कोलतेलकणिकारनिय्यासादीनं चिक्खल्लानं. विहेठयिंसु निरयादिकथाहि घट्टेन्ता. छद्वारारम्मणेति चक्खादीनं छन्नं द्वारानं आरम्मणभूते रूपादिविसये.

नव वुट्ठियोति उदकवुट्ठि सुमनपुप्फवुट्ठि मासकवुट्ठि कहापणवुट्ठि आभरणवुट्ठि आवुधवुट्ठि अङ्गारवुट्ठि पासाणवुट्ठि वालिकावुट्ठीति इमा नव वुट्ठियो. अवञ्चयीति सक्कारं करोन्तो विय हुत्वा असक्कारं करोन्तो अनत्थचरणेन वञ्चयि. अदूसकेति अनपराधे.

‘‘दिट्ठमङ्गलिका ब्राह्मणकञ्ञा’’ति जातकट्ठकथादीसु (जा. अट्ठ. ४.१५.मातङ्गजातकवण्णना) आगतं, इध पन ‘‘सेट्ठिधीता’’ति. वारेय्यत्थायाति आवाहत्थाय, अस्साति पेसितपुग्गलस्स. तादिसेन नीचकुलसंवत्तनियेन कम्मुना लद्धोकासेन चण्डालयोनियं निब्बत्तो.

चम्मगेहेति ¶ चम्मेन छादिते गेहे. मातङ्गोत्वेवस्स नामं अहोसि जातिसमुदागतं. तन्ति घण्टं. वादेन्तो तालनेन सद्दं करोन्तो. महापथं पटिपज्जि दिट्ठमङ्गलिकाय गेहद्वारसमीपेन.

तस्सा वेय्यावच्चकरा चेव उपट्ठाकमनुस्सा पटिबद्धा च सुरासोण्डादयो जाणुकप्परादीहि सुकोट्टितं कोट्टितभावेन मुच्छं आपन्नत्ता मतोति सञ्ञाय छड्डेसुं.

अथ बोधिसत्तो ¶ आयुअवसेसस्स अत्थिताय मन्दमन्दे वाते वायन्ते चिरेन सञ्ञं पटिलभति. तेनाह ‘‘महापुरिसो’’तिआदि. गेहङ्गणेति गेहस्स महाद्वारतो बहि विवटङ्गणे. पतितोति पातं कत्वा इच्छितत्थनिप्फत्तिं अन्तरं कत्वा अनुप्पवेसेन निपन्नो. दिट्ठमङ्गलिकायाति दिट्ठमङ्गलिकाकारणेन.

यसन्ति विभवं कित्तिसद्दञ्च. चन्दन्ति चन्दमण्डलं, चन्दविमानन्ति अत्थो. उच्छिट्ठगेहेति परेहि परिभुत्तगेहे. मण्डपेति नगरमज्झे महामण्डपे.

खीरमणिमूलन्ति खीरमूलं, पादेसु बद्धमणिमूलञ्च. यावता वाचुग्गता परियत्तीति यत्तको मनुस्सवचीद्वारतो उग्गतो निक्खन्तो पवत्तो, यंकिञ्चि वचीमयन्ति अत्थो. आकासङ्गणेति विवटङ्गणे.

दुम्मवासीति धूमो धूसरो, अनञ्जितामण्डितोति अधिप्पायो. ओतल्लकोति निहीनज्झासयो, अप्पानुभावोति अत्थो. पटिमुञ्च कण्ठेति याव गलवाटका पारुपित्वा. को रे तुवन्ति अरे को नाम त्वं.

पकतन्ति पटियत्तं नानप्पकारतो अभिसङ्खतं. उत्तिट्ठपिण्डन्ति अन्तरघरं उपगम्म ठत्वा लद्धब्बपिण्डं, भिक्खाहारन्ति अत्थो. लभतन्ति लच्छतु. सपाकोति महासत्तो जातिवसेन यथाभूतं अत्तानं आविकरोति.

अत्थत्थितं सद्दहतोति सम्परायिकस्स अत्थस्स अत्थिभावं सद्दहन्तस्स. अपेहीति अपगच्छ. एत्तोति इमस्मा ठाना. जम्माति लामक.

अनूपखेत्तेति ¶ अजङ्गले उदकसम्पन्ने खेत्ते फलविसेसं पच्चासीसन्ता. एताय सद्धाय ददाहि दानन्ति निन्नं थलञ्च पूरेन्तो मेघो विय गुणवन्ते निग्गुणे च दानं देहि, एवं देन्तो च अप्पेव आराधये दक्खिणेय्येति. दक्खिणेय्येति सीलादिगुणसमन्नागते.

तानीति ते ब्राह्मणा. वेणुपदरेनाति वेळुविलीवेन.

गिरिं नखेन ¶ खणसीति पब्बतं अत्तनो नखेन खणन्तो विय अहोसि. अयोति काललोहं. पदहसीति अभिभवसि, अत्तनो सरीरेन अभिभवन्तो विय अहोसि.

आवेधितन्ति चलितं विपरिवत्तेत्वा ठितं. पिट्ठितोति पिट्ठिपस्सेन. बाहुं पसारेति अकम्मनेय्यन्ति अकम्मक्खमं बाहुद्वयं थद्धं सुक्खदण्डकं विय केवलं पसारेति, न समिञ्जेति, सेतानि अक्खीनि परिवत्तनेन कण्हमण्डलस्स अदिस्सनतो.

जीवितन्ति जीवनं.

वेहायसन्ति आकासे. पथद्धुनोति पथभूतद्धुनो विय.

सञ्ञम्पि न करोतीति ‘‘इमे कुलप्पसुता’’ति सञ्ञामत्तम्पि न करोति. दन्तकट्ठकुच्छिट्ठकन्ति खादितदन्तकट्ठत्ता वुत्तं. एतस्सेव उपरि पतिस्सति अप्पदुट्ठपदोसभावतो, महासत्तस्स तदा उक्कंसगतखेत्तभावतो. इद्धिविसयो नाम अचिन्तेय्यो, तस्मा कथं सूरियस्स उग्गन्तुं नादासीति न चिन्तेतब्बं. अरुणुग्गं न पञ्ञायतीति तस्मिं पदेसे अरुणपभा न पञ्ञायति, अन्धकारो एव होति.

यक्खावट्टो नु खो अयं कालविपरियायो. महापञ्ञन्ति महन्तानं पञ्ञानं अधिट्ठानभूतं. जनपदस्स मुखं पस्सथाति इमस्स जनपदवासिनो जनस्स उपद्दवेन मङ्कुभूतं मुखं पस्सथ.

एतस्स कथा एतस्सेव उपरि पतिस्सतीति याहि तेन पारमितापरिभावनसमिद्धाहि नानासमापत्तिविहारपरिपूरिताहि सीलदिट्ठिसम्पदाहि सुसङ्खतसन्ताने महाकरुणाधिवासे महासत्ते अरियूपवादकम्मअभिसपसङ्खाता फरुसवाचा पवत्तिता, सा अभिसपि तस्स खेत्तविसेसभावतो तस्स च अज्झासयफरुसताय दिट्ठधम्मवेदनियकम्मं हुत्वा ¶ सचे सो महासत्तं न खमापेति, सत्तमे दिवसे विपच्चनसभावं जातं, खमापिते पन महासत्ते पयोगसम्पत्ति पटिबाहितत्ता अविपाकधम्मतं आपज्जति अहोसिकम्मभावतो. अयञ्हि अरियूपवादपापस्स दिट्ठधम्मवेदनियस्स धम्मता, तेन वुत्तं ‘एतस्स कथा एतस्सेव उपरि पतिस्सती’तिआदि. महासत्तो पन तं तस्स उपरि पतितुं न अदासि, उपायेन मोचेसि. तेन वुत्तं चरियापिटके (चरिया. २.६४) –

‘‘यं सो ¶ तदा मं अभिसपि, कुपितो दुट्ठमानसो;

तस्सेव मत्थके निपति, योगेन तं पमोचयि’’न्ति.

यञ्हि तत्थ सत्तमे दिवसे बोधिसत्तेन सूरियुग्गमननिवारणं कतं, अयमेत्थ योगोति अधिप्पेतो. योगेन हि उब्बळ्हा सराजिका परिसा नगरवासिनो नेगमा चेव जानपदा च बोधिसत्तस्स सन्तिकं तापसं आनेत्वा खमापेसुं. सो च बोधिसत्तस्स गुणे जानित्वा तस्मिं चित्तं पसादेसि. यं पनस्स मत्थके मत्तिकापिण्डस्स ठपनं, तस्स च सत्तधा फालनं कतं, तं मनुस्सानं चित्तानुरक्खणत्थं. अञ्ञथा हि – ‘‘इमे पब्बजिता समाना चित्तस्स वसे वत्तन्ति, न पन चित्तं अत्तनो वसे वत्तापेन्ती’’ति महासत्तम्पि तेन सदिसं कत्वा गण्हेय्युं, तदस्स तेसं दीघरत्तं अहिताय दुक्खायाति. तेनाह ‘‘अथस्सा’’तिआदि.

लोहकूटवस्सन्ति अयगुळवस्सं. तदा हि रतनमत्तानि दियड्ढरतनमत्तानिपि तिखिणंसानि अयगुळमण्डलानि इतो चितो च निपतन्ता मनुस्सानं सरीरानि खण्डखण्डकानि अकंसु. कललवस्सन्ति तनुककद्दमपटलकद्दमं. उपहच्चाति आघाटेत्वा. तदेव मज्झारञ्ञं.

६७. अनुविच्चकारन्ति अनुविच्चकरणं. कारणेहि द्वीहि अनिय्यानिकसासने ठितानं अत्तनो सावकत्तं उपगते पग्गहनिग्गहानि दस्सेतुं ‘‘कस्मा’’तिआदि वुत्तं.

६९. अनुपुब्बिं कथन्ति (दी. नि. टी. २.७५-७६; अ. नि. टी. ३.८.१२) अनुपुब्बिया अनुपुब्बं कथेतब्बकथं, का पन सा? दानादिकथा. दानकथा ताव पचुरजनेसुपि पवत्तिया सब्बसाधारणत्ता सुकरत्ता सीले पतिट्ठानस्स उपायभावतो च आदितोव कथिता ¶ . परिच्चागसीलो हि पुग्गलो परिग्गहवत्थूसु निस्सङ्गभावतो सुखेनेव सीलानि समादियति, तत्थ च सुप्पतिट्ठितो होति. सीलेन दायकपटिग्गहणविसुद्धितो परानुग्गहं वत्वा परपीळानिवत्तिवचनतो, किरियधम्मं वत्वा अकिरियधम्मवचनतो, भोगयससम्पत्तिहेतुं वत्वा भवसम्पत्तिहेतुवचनतो च दानकथानन्तरं सीलकथा कथिता. तञ्च सीलं वट्टनिस्सितं, अयं भवसम्पत्ति तस्स फलन्ति दस्सनत्थं, इमेहि च दानसीलमयेहि पणीतचरियभेदभिन्नेहि पुञ्ञकिरियवत्थूहि एता चातुमहाराजिकादीसु पणीततरादिभेदभिन्ना अपरिमेय्या भोगभवसम्पत्तियोति दस्सनत्थं तदनन्तरं सग्गकथा. स्वायं सग्गो रागादीहि उपक्किलिट्ठो सब्बदा अनुपक्किलिट्ठो अरियमग्गोति दस्सनत्थं सग्गानन्तरं मग्गो, मग्गञ्च कथेन्तेन ¶ तदधिगमूपायसन्दस्सनत्थं सग्गपरियापन्नापि पगेव इतरे सब्बेपि कामा नाम बह्वादीनवा अनिच्चा अद्धुवा विपरिणामधम्माति कामानं आदीनवो. हीना गम्मा पोथुज्जनिका अनरिया अनत्थसञ्हिताति तेसं ओकारो लामकभावो, सब्बेपि भवा किलेसानं वत्थुभूताति तत्थ संकिलेसो. सब्बसो किलेसविप्पमुत्तं निब्बानन्ति नेक्खम्मे आनिसंसो च कथेतब्बोति अयमत्थो मग्गन्तीति एत्थ इति-सद्देन दस्सितोति वेदितब्बं.

सुखानं निदानन्ति दिट्ठधम्मिकानं सम्परायिकानं निब्बानसञ्हितानञ्चाति सब्बेसम्पि सुखानं कारणं. यञ्हि किञ्चि लोके भोगसुखं नाम, तं सब्बं दाननिदानन्ति पाकटो अयमत्थो. यं पन झानविपस्सनामग्गफलनिब्बानपटिसंयुत्तं सुखं, तस्सपि दानं उपनिस्सयपच्चयो होतियेव. सम्पत्तीनं मूलन्ति या इमा लोके पदेसरज्जसिरिस्सरियसत्तरतनसमुज्जलचक्कवत्तिसम्पदाति एवंपभेदा मानुसिका सम्पत्तियो, या च चातुमहाराजादिगता दिब्बा सम्पत्तियो, या वा पनञ्ञापि सम्पत्तियो, तासं सब्बासं इदं मूलकारणं. भोगानन्ति भुञ्जितब्बट्ठेन ‘‘भोगो’’न्ति लद्धनामानं मनापियरूपादीनं, तन्निस्सयानं वा उपभोगसुखानं, पतिट्ठा निच्चलाधिट्ठानताय. विसमगतस्साति ब्यसनप्पत्तस्स. ताणन्ति रक्खा ततो परिपालनतो. लेणन्ति ब्यसनेहि परिपातियमानस्स ओलीयनपदेसो. गतीति गन्तब्बट्ठानं. परायणन्ति पटिसरणं. अवस्सयोति विनिपतितुं अदेन्तो निस्सयो. आरम्मणन्ति ओलुब्भारम्मणं.

रतनमयसीहासनसदिसन्ति ¶ सब्बरतनमयसत्तङ्गमहासीहासनसदिसं, महग्घं हुत्वा सब्बसो विनिपतितुं अप्पदानतो. महापथविसदिसं गतगतट्ठाने पतिट्ठासम्भवतो. यथा दुब्बलस्स पुरिसस्स आलम्बनरज्जु उत्तिट्ठतो तिट्ठतो च उपत्थम्भो, एवं दानं सत्तानं सम्पत्तिभवे उपपत्तिया ठितिया च पच्चयो होतीति आह ‘‘आलम्बनट्ठेन आलम्बनरज्जुसदिस’’न्ति. दुक्खनित्थरणट्ठेनाति दुग्गतिदुक्खनित्थरणट्ठेन. समस्सासनट्ठेनाति लोभमच्छरियादिपटिसत्तुपद्दवतो सम्मदेव अस्सासनट्ठेन. भयपरित्ताणट्ठेनाति दालिद्दियभयतो परिपालनट्ठेन. मच्छेरमलादीहीति मच्छेरलोभदोसइस्सामिच्छादिट्ठिविचिकिच्छादि चित्तमलेहि. अनुपलित्तट्ठेनाति अनुपक्किलिट्ठताय. तेसन्ति मच्छेरमलादीनं. एतेसं एव दुरासदट्ठेन. असन्तासनट्ठेनाति असन्तासहेतुभावेन. यो हि दायको दानपति, सो सम्पतिपि न कुतोचि सन्तसति, पगेव आयतिं. बलवन्तट्ठेनाति महाबलवताय. दायको हि दानपति सम्पति पक्खबलेन बलवा होति, आयतिं पन कायबलादीहि. अभिमङ्गलसम्मतट्ठेनाति ‘‘वुड्ढिकारण’’न्ति अभिसम्मतभावेन. विपत्तितो सम्पत्तिया नयनं खेमन्तभूमिसम्पापनं.

इदानि ¶ महाबोधिचरियभावेनपि दानगुणं दस्सेतुं दानं नामेतन्तिआदि वुत्तं. तत्थ अत्तानं निय्यादेन्तेनाति एतेन दानफलं सम्मदेव पस्सन्ता महापुरिसा अत्तनो जीवितम्पि परिच्चजन्ति, तस्मा को नाम विञ्ञुजातिको बाहिरे वत्थुम्हि सङ्गं करेय्याति ओवादं देति. इदानि या लोकिया लोकुत्तरा च उक्कंसगता सम्पत्तियो, ता सब्बा दानतोयेव पवत्तन्तीति दस्सेन्तो ‘‘दानञ्ही’’तिआदिमाह. तत्थ सक्कमारब्रह्मसम्पत्तियो अत्तहिताय एव, चक्कवत्तिसम्पत्ति पन अत्तहिताय च परहिताय चाति दस्सेतुं सा तासं परतो वुत्ता. एता लोकिया, इमा पन लोकुत्तराति दस्सेतुं ‘‘सावकपारमीञाण’’न्तिआदि वुत्तं. तासुपि उक्कट्ठुक्कट्ठतरुक्कट्ठतममेव दस्सेतुं कमेन ञाणत्तयं वुत्तं. तेसं पन दानस्स पच्चयभावो हेट्ठा वुत्तोयेव. एतेनेव तस्स ब्रह्मसम्पत्तियापि पच्चयभावो दीपितोति वेदितब्बो.

दानञ्च नाम हितज्झासयेन, पूजावसेन वा अत्तनो सन्तकस्स परेसं परिच्चजनं, तस्मा दायको पुरिसपुग्गलो परेसं सन्तकं हरिस्सतीति ¶ अट्ठानमेतन्ति आह – ‘‘दानं ददन्तो सीलं समादातुं सक्कोती’’ति. सीलालङ्कारसदिसो अलङ्कारो नत्थि सोभाविसेसावहत्ता सीलस्स. सीलपुप्फसदिसं पुप्फं नत्थीति एत्थापि एसेव नयो. सीलगन्धसदिसो गन्धो नत्थीति एत्थ ‘‘चन्दनं तगरं वापी’’तिआदिका (ध. प. ५५; मि. प. ४.१.१) गाथा – ‘‘गन्धो इसीनं चिरदिक्खितानं, काया चुतो गच्छति मालुतेना’’तिआदिका (जा. २.१७.५५) जातकगाथायो च आहरित्वा वत्तब्बा, सीलञ्हि सत्तानं आभरणञ्चेव अलङ्कारो च गन्धविलेपनञ्च दस्सनीयभावावहञ्च. तेनाह ‘‘सीलालङ्कारेन ही’’तिआदि.

अयं सग्गो लब्भतीति इदं मज्झिमेहि छन्दादीहि समादानसीलं सन्धायाह. तेनाह सक्को देवराजा –

‘‘हीनेन ब्रह्मचरियेन, खत्तिये उपपज्जति;

मज्झिमेन च देवत्तं, उत्तमेन विसुज्झती’’ति. (जा. १.८.७५; २.२२.४२९; दी. नि. टी. २.७५-७६);

इट्ठोति सुखो. कन्तोति कमनीयो. मनापोति मनवड्ढनको. तं पन तस्स इट्ठादिभावं दस्सेतुं ‘‘निच्चमेत्थ कीळा’’तिआदि वुत्तं.

दोसोति अनिच्चतादिना अप्पस्सादादिना च दूसितभावो, यतो ते विञ्ञूनं चित्तं नाराधेन्ति ¶ . अथ वा आदीनं वाति पवत्तेतीति आदीनवो, परमकपणता. तथा च कामा यथाभूतं पच्चवेक्खन्तानं पच्चुपतिट्ठन्ति. लामकभावोति असेट्ठेहि सेवितब्बो, सेट्ठेहि न सेवितब्बो निहीनभावो. संकिलिस्सनन्ति विबाधकता उपतापता च.

नेक्खम्मे आनिसंसन्ति एत्थ यत्तका कामेसु आदीनवा, तप्पटिपक्खतो तत्तका नेक्खम्मे आनिसंसा. अपिच – ‘‘नेक्खम्मं नामेतं असम्बाधं असंकिलिट्ठं निक्खन्तं कामेहि, निक्खन्तं कामसञ्ञाय, निक्खन्तं कामवितक्केहि, निक्खन्तं कामपरिळाहेहि, निक्खन्तं ब्यापादसञ्ञाया’’तिआदिना (सारत्थ. टी. महावग्ग ३.२६; दी. नि. टी. २.७५-७६) नयेन नेक्खम्मे आनिसंसे पकासेसि, पब्बज्जाय झानादीसु च गुणे विभावेसि वण्णेसि. कल्लचित्तन्ति हेट्ठा पवत्तितदेसनाय अस्सद्धियादीनं चित्तदोसानं विगतत्ता उपरिदेसनाय भाजनभावूपगमनेन कम्मक्खमचित्तं. अट्ठकथायं पन यस्मा अस्सद्धियादयो चित्तस्स रोगभूता ¶ , तदा ते विगता, तस्मा आह ‘‘अरोगचित्त’’न्ति. दिट्ठिमानादिकिलेसविगमेन मुदुचित्तं. कामच्छन्दादिविगमेन विनीवरणचित्तं. सम्मापटिपत्तियं उळारपीतिपामोज्जयोगेन उदग्गचित्तं. तत्थ सद्धासम्पत्तिया पसन्नचित्तं. यदा भगवा अञ्ञासीति सम्बन्धो. अथ वा कल्लचित्तन्ति कामच्छन्दविगमेन अरोगचित्तं. मुदुचित्तन्ति ब्यापादविगमेन मेत्तावसेन अकथिनचित्तं. विनीवरणचित्तन्ति उद्धच्चकुक्कुच्चविगमेन विक्खेपस्स विगतत्ता तेन अपिहितचित्तं. उदग्गचित्तन्ति थिनमिद्धविगमेन सम्पग्गहितवसेन अलीनचित्तं. पसन्नचित्तन्ति विचिकिच्छाविगमेन सम्मापटिपत्तियं अधिमुत्तचित्तन्ति एवमेत्थ सेसपदानं अत्थो वेदितब्बो.

सेय्यथापीतिआदिना उपमावसेन उपालिस्स संकिलेसप्पहानं अरियमग्गनिप्फादनञ्च दस्सेति. अपगतकाळकन्ति विगतकाळकं. सम्मदेवाति सुट्ठु एव. रजनन्ति नीलपीतादिरङ्गजातं. पटिग्गण्हेय्याति गण्हेय्य पभस्सरं भवेय्य. तस्मिंयेव आसनेति तिस्सं एव निसज्जायं. एतेनस्स लहुविपस्सकता तिक्खपञ्ञता सुखपटिपदाखिप्पाभिञ्ञता च दस्सिता होति. विरजन्ति अपायगमनीयरागरजादीनं विगमेन विरजं. अनवसेसदिट्ठिविचिकिच्छामलापगमेन वीतमलं. तिण्णं मग्गानन्ति हेट्ठिमानं तिण्णं मग्गानं. तस्स उप्पत्तिआकारदस्सनन्ति कस्मा वुत्तं? ननु मग्गञाणं असङ्खतधम्मारम्मणन्ति चोदनं सन्धायाह ‘‘तं ही’’तिआदि. तत्थ पटिविज्झन्तन्ति असम्मोहपटिवेधवसेन पटिविज्झन्तं. तेनाह ‘‘किच्चवसेना’’ति.

तत्रिदं ¶ उपमासंसन्दनं – वत्थं विय चित्तं, वत्थस्स आगन्तुकमलेहि किलिट्ठभावो विय चित्तस्स रागादिमलेहि संकिलिट्ठभावो, धोवनसिला विय अनुपुब्बीकथा, उदकं विय सद्धा, उदके तेमेत्वा ऊसगोमयछारिकाभरेहि काळकपदेसे सम्मद्दित्वा वत्थस्स धोवनपयोगो विय सद्धासिनेहेन तेमेत्वा सतिसमाधिपञ्ञाहि दोसे सिथिले कत्वा सुतादिविधिना चित्तस्स सोधने वीरियारम्भो. तेन पयोगेन वत्थे काळकापगमो विय वीरियारम्भेन किलेसविक्खम्भनं, रङ्गजातं विय अरियमग्गो, तेन सुद्धस्स वत्थस्स पभस्सरभावो विय विक्खम्भितकिलेसस्स चित्तस्स मग्गेन परियोदपनन्ति.

दिट्ठधम्मोति वत्वा दस्सनं नाम ञाणदस्सनतो अञ्ञम्पि अत्थीति तन्निवत्तनत्थं ‘‘पत्तधम्मो’’ति वुत्तं. पत्ति च ञाणसम्पत्तितो अञ्ञापि विज्जतीति ¶ ततो विसेसनत्थं ‘‘विदितधम्मो’’ति वुत्तं. सा पनेसा विदितधम्मता धम्मेसु एकदेसनापि होतीति निप्पदेसतो विदितभावं दस्सेतुं ‘‘परियोगाळ्हधम्मो’’ति वुत्तं. तेनस्स सच्चाभिसम्बोधंयेव दीपेति. मग्गञाणञ्हि एकाभिसमयवसेन परिञ्ञादिकिच्चं साधेन्तं निप्पदेसेन चतुसच्चधम्मं समन्ततो ओगाहन्तं नाम होति. तेनाह – ‘‘दिट्ठो अरियसच्चधम्मो एतेनाति दिट्ठधम्मो’’ति. तिण्णा विचिकिच्छाति सप्पटिभयकन्तारसदिसा सोळसवत्थुका अट्ठवत्थुका च तिण्णा विचिकिच्छा तिण्णविचिकिच्छा. विगतकथंकथोति पवत्तिआदीसु ‘‘एवं नु खो, किं नु खो’’ति एवं पवत्तिका विगता समुच्छिन्ना कथंकथा. सारज्जकरानं पापधम्मानं पहीनत्ता तप्पटिपक्खेसु सीलादिगुणेसु सुप्पतिट्ठितत्ता वेसारज्जं विसारदभावं वेय्यत्तियं पत्तो. अत्तना एव पच्चक्खतो दिट्ठत्ता न तस्स परो पच्चेतब्बो अत्थीति अपरप्पच्चयो.

७१. पण्डितोति पञ्ञवा.

७२. तेन हि सम्माति दोवारिकेन सद्धिं सल्लपतियेव, ‘‘एत्थेवा’’ति तेन वुत्तवचनं सुत्वापि तस्स अत्थं असल्लक्खेन्तो. कस्मा? परिदेवताय. तेनाह ‘‘बलवसोकेन अभिभूतो’’ति.

७३. तेनेवाति येन उत्तरासङ्गेन आसनं सम्मज्जति, तेनेव उदरे परिक्खिपन्तो ‘‘माहं सत्थारं मम सरीरेन फुसि’’न्ति अन्तरं करोन्तो उत्तरासङ्गेन तं उदरे परिक्खिपन्तो परिग्गहेत्वा. ‘‘दत्तपञ्ञत्त’’न्तिआदीसु (दी. नि. १.१७१) विय दत्त-सद्दो एत्थ बालपरियायोति ¶ आह ‘‘जळोसि जातो’’ति. उपट्ठाकस्स अञ्ञथाभावेनाति पुब्बे अत्तनो उपट्ठाकस्स इदानि अनुपट्ठाकभावेन.

७५. अविञ्ञाणकं दारुसाखादिमयं. बहलबहलं पीतावलेपनं रङ्गजातन्ति अतिविय बहलं पीतवण्णमञ्जिट्ठआदिअवलेपनरजनं. घट्टेत्वा उप्पादितच्छविं, या रङ्गं पिवति. निल्लोमतन्ति पुनप्पुनं अनुलिम्पनेन. खण्डखण्डितन्ति खण्डखण्डितभावं. रङ्गक्खमो रजनियो. तेनाह ‘‘रागमत्तं जनेती’’ति. अनुयोगन्ति चोदनं. वीमंसन्ति विचारणं. थुसे कोट्टेत्वा तण्डुलपरियेसनं ¶ विय कदलियं सारपरियेसनं विय च निगण्ठवादे सारवीमंसनं. ततो एव च तं वीमंसन्तो रित्तको तुच्छकोव होतीति. सब्बम्पि बुद्धवचनं चतुसच्चविनिमुत्तं नत्थि, तञ्च वीमंसियमानं विञ्ञूनं पीतिसोमनस्समेव जनेति, अतप्पकञ्च असेचनाभावेनाति आह ‘‘चतुसच्चकथा ही’’तिआदि. यथा यथाति यदि खन्धमुखेन यदि धातायतनादीसु अञ्ञतरमुखेन बुद्धवचनं ओगाहिस्सति, तथा तथा गम्भीरञाणानंयेव गोचरभावतो गम्भीरमेव होति. यो चेत्थ पण्डितो निपुणो कतपरप्पवादो पणिधाय सब्बथामेन चोदनं आरम्भति तस्स चोदना केसग्गमत्तम्पि चालेतुं न सक्कोति. पुन सुचिरम्पि कालं विचारेन्तेसुपि विमद्दक्खमतो, एवं तथागतवादो स्वाख्यातभावतोति आह ‘‘अनुयोगक्खमो विमज्जनक्खमो चा’’ति.

७६. विसयपरिञ्ञाणेन दहति पटिपक्खे सोधेतीति धीरो, स्वायमस्स धीरभावो सब्बसो सम्मोहविद्धंसनतायाति आह – ‘‘या पञ्ञा…पे… तेन समन्नागतस्सा’’ति. पभिन्नखीलस्साति समुच्छिन्नसब्बचेतोखीलस्स, किलेसमच्चुमारविजयेनेव अभिसङ्खारखन्धमारा जिताव होन्तीति तेसं द्विन्नं इध अग्गहणं. ईघ-सद्दो दुक्खपरियायोति आह ‘‘निद्दुक्खस्सा’’ति. तत्थ सउपादिसेसनिब्बानप्पत्तिया किलेसेन निद्दुक्खता, अनुपादिसेसनिब्बानप्पत्तिया विपाकदुक्खेन निद्दुक्खता. रज्जनदुस्सनमुय्हनादिवसेन विविधं ईसनतो वीसं, वीसमेव वेसं, रागादीति आह – ‘‘वेसन्तरस्साति रागादिवीसं तरित्वा वितरित्वा ठितस्सा’’ति.

तुसितस्साति करुणायनवसेन तुसिया इतस्स संवत्तस्स. एवं सति ‘‘मुदितस्सा’’ति इदं पुनरुत्तमेव होति. मनुजस्साति पठमाय जातिया भगवा मनुस्सजातियो हुत्वा वुत्तानं वक्खमानानञ्च वसेन सदेवकं अभिभवित्वा ठितो अच्छरियो भगवाति दस्सेति. सदेवकं लोकं संसारतो निब्बानसुखं नरति नेति पापेतीति नरो, नायकोति अत्थो, तस्स नरस्स, तेनाह ¶ ‘‘पुनरुत्त’’न्ति. ‘‘मनुजस्सा’’ति वत्वा ‘‘नरस्सा’’ति पुनरुत्तं पदं. अत्थवसेन अञ्ञथा वुच्चमाने एकेकगाथाय दसगुणा नप्पहोन्ति, न पूरेन्तीति अत्थो.

विनेतीति विनयो, विनयो एव वेनेयिकोति आह ‘‘सत्तानं विनायकस्सा’’ति. विञ्ञूनं रुचिं राति, ईरेतीति वा रुचिरो, स्वायमस्स रुचिरभावो ¶ कुसलतायाति आह ‘‘सुचिधम्मस्सा’’ति. पभासकस्साति ञाणालोकेन पभस्सरभावकरस्स. निस्सङ्गस्साति अट्ठसुपि परिसासु, सदेवे वा सब्बस्मिं लोके अग्गण्हापनपरिच्चागेन निस्सटस्स. गम्भीरगुणस्साति परेसं ञाणेन अप्पतिट्ठभावा गम्भीरगुणस्स. तेनाह भगवा – ‘‘अत्थि, भिक्खवे, अञ्ञेव धम्मा गम्भीरा’’तिआदि (दी. नि. १.२८). अरियाय वा तुण्हीभावेन मोनप्पत्तस्स. धम्मे ठितस्साति धम्मकाये सुप्पतिट्ठितस्स. संवुतत्तस्साति अरक्खियकायसमाचारादिताय संवुतसभावस्स.

आगुं न करोतीतिआदीहि चतूहि कारणेहि, पन्तसेनासनस्साति विवित्तसेनासनस्स. पटिमन्तनपञ्ञायाति सब्बपरप्पवादानं विपरावत्तमन्तनपञ्ञाय. मोनं वुच्चति ञाणं सब्बतो किलेसानं निधुननतो.

इसिसत्तमस्साति सब्बइसीसु जेट्ठस्स साधुतमस्स. सेट्ठप्पत्तस्साति सेट्ठं उत्तमं सम्मासम्बोधिं पत्तस्स. अक्खरादीनीति अक्खरपदब्यञ्जनाकार-निरुत्तिनिद्देस-संकासनपकासन-विवरण-विभजनुत्तानीकरणानीति ब्यञ्जनत्थपदानि. समोधानेत्वा विनेय्यज्झासयानुरूपं पकासनतो कथनतो पदकस्स. पुरि-सद्दो ‘‘पुब्बे’’ति इमिना समानत्थोति आह – ‘‘पुरिन्ददस्साति सब्बपठमं धम्मदानदायकस्सा’’ति. भगवा असय्हं सहितुं समत्थोति आह ‘‘समत्थस्सा’’ति. तेनाह – ‘‘तथागतं बुद्धमसय्हसाहिन’’न्ति (इतिवु. ३८). ते पत्तस्साति ते गुणे अनवसेसतो पत्तस्स. वित्थारेत्वा संकिलेसवोदानधम्मं ब्याकरोतीति ब्याकरणो, ब्याकरणो एव वेय्याकरणो. तन्तिपदन्ति तन्तिं आरोपेत्वा ठपितं पदं.

तण्हाबन्धनेन सब्बेन वा किलेसबन्धनेन अबद्धस्स. महापञ्ञायाति महानुभावाय पञ्ञाय, महाविसयाय वा पञ्ञाय. सब्बा हि भगवतो पञ्ञा महानुभावा, यथासकं विसये महाविसया च एकादिवसेन अनवसेसतो महाविसया नाम सब्बञ्ञुताव. आनुभावदस्सनट्ठेनाति अच्छरियाचिन्तेय्यापरिमेय्यस्स अत्तनो आनुभावस्स लोकस्स दस्सनट्ठेन ¶ . यक्खस्साति वा लोकेन पूजनीयस्स ¶ . अयं उपासको खुज्जुत्तरा विय उपासिका सेखपटिसम्भिदाप्पत्तोति आह ‘‘सोतापत्तिमग्गेनेव पटिसम्भिदा आगता’’ति. किलेसप्पहानवण्णं कथेन्तोति किलेसप्पहानं विसयं निमित्तं कत्वा वण्णं कथेन्तो.

७७. सम्पिण्डिताति सन्निचिता, गन्थिताति अत्थो. इमे सत्ताति यं यदेव परिब्भमन्ता सत्ता. अत्तनोव चिन्तयन्तीति अवीततण्हताय सकंयेव पयोजनं चिन्तेन्ति. तथा हि मते ञातके अनुसोचन्तापि तेहि साधेतब्बस्स अत्तनो पयोजनस्सेव वसेन अनुसोचन्ति. उण्हं अहोसीति बलवता चित्तस्स सन्तापेन सन्तत्तं अब्भन्तरं हदयट्ठानं खदिरङ्गारसन्तापितं विय उण्हं अहोसि. तेनाह ‘‘लोहितं विलीयित्था’’ति. पत्तमत्तन्ति एकपत्तपूरमत्तं. अभिसमयसाधिकाय चतुसच्चदेसनाय सङ्खेपेनेव देसितत्ता आह – ‘उग्घटितञ्ञुपुग्गलस्स वसेन धम्मदेसना परिनिट्ठिता’’ति.

उपालिसुत्तवण्णनाय लीनत्थप्पकासना समत्ता.

७. कुक्कुरवतिकसुत्तवण्णना

७८. कोलियेसूति ¶ बहुवचनवसेनायं पाळि आगता. एवंनामके जनपदेति अत्थवचनं कस्मा वुत्तन्ति आह ‘‘सो ही’’तिआदि. न नियमितोति ‘‘असुकम्हि नाम विहारे’’ति न नियमेत्वा वुत्तो. सेनासनेयेवाति आवासेयेव, न रुक्खमूलादिके. वेसकिरिया घासग्गहणादिना समादातब्बट्ठेन गोवतं, तस्मिं नियुत्तो गोवतिको. तेनाह ‘‘समादिन्नगोवतो’’ति. यं सन्धायाहु वेदवेदिनो – ‘‘गच्छं भक्खेति, तिट्ठं मुत्तेति, उपाहा उदकं धूपेति, तिणानि छिन्दती’’तिआदि. अयं अचेलोति अचेलकपब्बज्जावसेन अचेलो, पुरिमो पन गोवतिको कुक्कुरवतिकोति एत्थ वुत्तनयानुसारेन अत्थो वत्तब्बो. पलिकुण्ठित्वाति उभो हत्थे उभो पादे च समिञ्जित्वा. ‘‘उक्कुटिको हुत्वा’’तिपि वदन्ति. गमनं निप्फज्जनं गतीति आह – ‘‘का ¶ गतीति का निप्फत्ती’’ति. निप्फत्तिपरियोसाना हि विपाकधम्मप्पवत्ति. कतूपचितकम्मवसेन अभिसम्परेति एत्थाति अभिसम्परायो, परलोको. तत्थस्स च निप्फत्तिं पुच्छतीति आह – ‘‘अभिसम्परायम्हि कत्थ निब्बत्ती’’ति. कुक्कुरवतसमादानन्ति कुक्कुरभावसमादानं, ‘‘अज्ज पट्ठाय अहं कुक्कुरो’’ति कुक्कुरभावाधिट्ठानं.

७९. परिपुण्णन्ति यत्तका कुक्कुरविकारा, तेहि परिपुण्णं. तेनाह ‘‘अनून’’न्ति. अब्बोकिण्णन्ति तेहि अवोमिस्सं. कुक्कुराचारन्ति कुक्कुरानं गमनाकारोतिआदिआचारेन कुक्कुरभावाधिट्ठानचित्तमाह. तथा तथा आकप्पेतब्बतो आकप्पो, पवत्तिआकारो. सो पनेत्थ गमनादिकोति आह ‘‘कुक्कुरानं गमनाकारो’’तिआदि. आचारेनाति कुक्कुरसीलाचारेन. वतसमादानेनाति कुक्कुरवताधिट्ठानेन. कुक्कुरचरियादियेव दुक्करतपचरणं. तेन गतिविपरियेसाकारेन पवत्ता लद्धि. अस्स कुक्कुरवतिकस्स अञ्ञा गति नत्थीति इतरगतिं पटिक्खिपति, इतरासं पन सम्भवो एव नत्थीति. निपज्जमानन्ति वतसीलादीनं संगोपनवसेन सिज्झमानं. यथा सकम्मकधातुसद्दा अत्थविसेसवसेन अकम्मका होन्ति ‘‘विबुद्धो पुरिसो विबुद्धो कमलसण्डो’’ति, एवं अत्थविसेसवसेन अकम्मकापि सकम्मका होन्तीति दस्सेन्तो ‘‘न परिदेवामि न अनुत्थुनामी’’तिआदिमाह. अनुत्थुनसद्दो च सकम्मकवसेन पयुज्जति ‘‘पुराणानि अनुत्थुन’’न्तिआदीसु. अयञ्चेत्थ पयोगोति इमिना गाथायञ्च अनुत्थुननरोदनं अधिप्पेतन्ति दस्सेति.

८०. वुत्तनयेनेवाति ¶ इमिना गोवतन्ति गोवतसमादानं. गोसीलन्ति गवाचारं. गोचित्तन्ति ‘‘अज्ज पट्ठाय गोहि कातब्बं करिस्सामी’’ति उप्पन्नचित्तन्ति इममत्थं अतिदिसति. ग्वाकप्पे पन वत्तब्बं अवसिट्ठं ‘‘कुक्कुराकप्पे वुत्तसदिसमेवा’’ति इमिनाव अतिदिट्ठं, विसिट्ठञ्च यथा पन तत्थातिआदिना वुत्तमेव. यं पनेत्थ वत्तब्बं, तं कुक्कुरवतादीसु वुत्तनयमेव.

८१. एकच्चकम्मकिरियावसेनाति एकच्चस्स अकुसलकम्मस्स कुसलकम्मस्स करणप्पसङ्गेन. इमेसन्ति गोवतिककुक्कुरवतिकानं. किरियाति गोवतभावनादिवसेन पवत्ता किरिया. पाकटा भविस्सतीति ‘‘इमस्मिं कम्मचतुक्के इदं नाम कम्मं भजती’’ति पाकटा भविस्सति.

काळकन्ति ¶ (अ. नि. टी. २.४.२३२) मलीनं, चित्तस्स अपभस्सरभावकरणन्ति अत्थो. तं पनेत्थ कम्मपथसम्पत्तमेव अधिप्पेतन्ति आह ‘‘दसअकुसलकम्मपथ’’न्ति. कण्हन्ति कण्हाभिजातिहेतुतो वा कण्हं. तेनाह ‘‘कण्हविपाक’’न्ति. अपायूपपत्ति मनुस्सेसु च दोभग्गियं कण्हविपाको, यथा तमभावो वुत्तो, एकत्तनिद्देसेन पन ‘‘अपाये निब्बत्तनतो’’ति वुत्तं, निब्बत्तापनतोति अत्थो. सुक्कन्ति ओदातं, चित्तस्स पभस्सरभावकरणन्ति अत्थो, सुक्काभिजातिहेतुतो वा सुक्कं. तेनाह ‘‘सुक्कविपाक’’न्ति. सग्गूपपत्ति मनुस्सलोके सोभग्गियञ्च सुक्कविपाको, यथा च जोतिभावो वुत्तो, एकत्तनिद्देसेन पन ‘‘सग्गे निब्बत्तनतो’’ति वुत्तं, निब्बत्तापनतोति अत्थो, वोमिस्सककम्मन्ति कालेन कण्हं, कालेन सुक्कन्ति एवं मिस्सकवसेन कतकम्मं. ‘‘सुखदुक्खविपाक’’न्ति वत्वा सुखदुक्खानं पवत्तिआकारं दस्सेतुं ‘‘मिस्सककम्मञ्ही’’तिआदि वुत्तं. कम्मस्स कण्हसुक्कसमञ्ञा कण्हसुक्काभिजातिहेतुतायाति, अपच्चयगामिताय तदुभयविनिमुत्तस्स कम्मक्खयकरकम्मस्स इध सुक्कपरियायोपि न इच्छितोति आह – ‘‘उभय…पे… असुक्कन्ति वुत्त’’न्ति. तत्थ उभयविपाकस्साति यथाधिगतस्स विपाकस्स. सम्पत्तिभवपरियापन्नो हि विपाको इध ‘‘सुक्कविपाको’’ति अधिप्पेतो, न अच्चन्तपरिसुद्धो.

सदुक्खन्ति अत्तना उप्पादेतब्बेन दुक्खेन सदुक्खं, दुक्खसंवत्तनिकन्ति अत्थो. ‘‘इमस्मिं सुत्ते चेतना धुरं, उपालिसुत्ते (म. नि. २.५६) कम्म’’न्ति हेट्ठा वुत्तम्पि अत्थं इध साधयति विजाननत्थं. अभिसङ्खरित्वाति आयूहित्वा. तं पन पच्चयसमवायसिद्धितो संकड्ढनं पिण्डनं विय होतीति आह – ‘‘सङ्कड्ढित्वा, पिण्डं कत्वाति अत्थो’’ति, सदुक्खं लोकन्ति ¶ अपायलोकमाह. विपाकफस्साति फस्ससीसेन तत्थ विपाकपवत्तमाह. भूतकम्मतोति निब्बत्तकम्मतो अत्तना कतूपचितकम्मतो. यथाभूतन्ति यादिसं. कम्मसभागवसेनाति कम्मसरिक्खकवसेन. उपपत्ति होतीति अपदादिभेदा उपपत्ति. कम्मेन विय वुत्ताति यं करोति, तेन उपपज्जतीति एककम्मेनेव जायमाना विय वुत्ता अपदादिभेदा. उपपत्ति च नाम विपाकेन होति विपाके सम्भवन्ते एकंसेन ते उपपत्तिविसेसा सम्भवन्ति. यदि एवं कस्मा ‘‘तेन उपपज्जती’’ति उपपत्तिकम्महेतुका वुत्ताति आह ‘‘यस्मा पना’’तिआदि. येन कम्मविपाकेन निब्बत्तोति ¶ येन कम्मविपाकेन विपच्चमानेन अयं सत्तो निब्बत्तोति वुच्चति. तंकम्मविपाकफस्साति तस्स तस्स कम्मस्स विपाकभूता फस्सा. कम्मेन दातब्बं दायं तब्बिपाकं आदियन्तीति कम्मदायादा, फस्सा. कम्मस्स दायज्जता कम्मफलस्स दायज्जं, तस्मा वुत्तं ‘‘कम्मदायज्जा’’ति. तेनाह ‘‘कम्ममेव नेसं दायज्जं सन्तक’’न्ति.

तिस्सो च हेट्ठिमज्झानचेतनाति इदं अब्याबज्झवेदनं वेदियनएकन्तसुखुप्पत्तिया हेतुभावसाधनं. यदि एवं यथावुत्ता झानचेतना ताव होतु एकन्तसुखुप्पत्तिहेतुभावतो. कामावचरा किन्तीति कामावचरा पन कुसलचेतना तंसभावाभावतो किन्ति केन पकारेन अब्याबज्झमनोसङ्खारो नाम जातोति चोदेति, इतरो पन न सब्बा कामावचरकुसलचेतना तथा गहिता, अथ खो एकच्चा झानचेतनानुकूलाति दस्सेन्तो ‘‘कसिणसज्जनकाले कसिणासेवनकाले लब्भन्ती’’ति आह. तत्थ कसिणासेवनचेतना गहेतब्बा, सा उपचारज्झानस्स साधिका. तेन कामावचरचेतना पठमज्झानचेतनाय घटिताति कसिणसज्जनचेतनापि कदाचि तादिसा होतीति गहिता. परिकम्मादिवसेन हि पवत्ता भावनामया कामावचरकुसलचेतना पठमज्झानस्स आसन्नताय वुत्ता. चतुत्थज्झानचेतना ततियज्झानचेतनाय घटिताति इदं एकत्तकायएकत्तसञ्ञीसत्तावासवताय तंसरिक्खका उपेक्खापि ईदिसेसु ठानेसु सुखसरिक्खता, एवं सन्तसभावता ञाणसहितता च. केचि पन चतुत्थज्झानचेतनानुगुणाति निदस्सेन्ता कसिणसज्जनकाले कसिणज्झानकाले कसिणासेवनकाले लब्भतीति ततियज्झानचेतनाय आसन्नघटितता वुत्ताति वदन्ति, तं तेसं मतिमत्तं, वुत्तनयेनेव तासं घटितता वेदितब्बा. उभयमिस्सकवसेनाति उभयेसं कुसलाकुसलसङ्खारानं सुखदुक्खानञ्च मिस्सकभाववसेन. वेमानिकपेतानन्ति इदं बाहुल्लतो वुत्तं, इतरेसम्पि विनिपातिकानं कालेन दुक्खं होतियेव.

तस्स ¶ पहानायाति तस्स यथावुत्तस्स कम्मस्स अनुप्पत्तिधम्मतापादनाय. या चेतनाति या अपचयगामिनिचेतना. कम्मं पत्वाति सुखकम्मन्ति वुच्चमाने मग्गचेतनाय अञ्ञो पण्डरतरो धम्मो नाम नत्थि ¶ अच्चन्तपारिसुद्धिभावतो. अकण्हा असुक्काति आगताति एत्थ सुक्कभावपटिक्खेपकारणं हेट्ठा वुत्तनयमेव. तेनाह ‘‘इदं पन कम्मचतुक्कं पत्वा’’तिआदि.

८२. अनिय्यानिकपक्खेति अचेळकपब्बज्जाय कुक्कुरवते च. योगेति ञायधम्मपटिपत्तियन्ति अत्थो. योनेनाति यो तित्थियपरिवासो तेन भगवता पञ्ञत्तो. यं तित्थियपरिवासं समादियित्वाति अयमेत्थ योजना. घंसित्वा सुवण्णं विय निघंसोप्पले. कोट्टेत्वा हत्थेन विय कुलालभाजनं.

वूपकट्ठोति विवित्तो एकीभूतो. पेसितत्तोति निब्बानं पति पेसितत्तो. कामं तदनुत्तरं ब्रह्मचरियपरियोसानं…पे… विहासीति इमिनाव अरहत्तनिकूटेन देसना निट्ठापिता होति, आयस्मतो पन सेनियस्स पटिपत्तिकित्तनपरमेतं उजुकं आपन्नअरहत्तभावदीपनं, यदिदं ‘‘अञ्ञतरो खो पना’’तिआदिवचनन्ति आह ‘‘अरहत्तनिकूटेनेवा’’ति. अरहत्ताधिगमोयेव तस्स तेसं अब्भन्तरता. सेसं सब्बं सुविञ्ञेय्यमेव.

कुक्कुरवतिकसुत्तवण्णनाय लीनत्थप्पकासना समत्ता.

८. अभयराजकुमारसुत्तवण्णना

८३. जातिया ¶ असमानो निहीनाचरियो परदत्तूपजीविकाय मातुया कुच्छियं जातो पादसिकपुत्तो. निन्दावसेन वदति एतेनाति वादो अगुणोति आह – ‘‘वादं आरोपेहीति दोसं आरोपेही’’ति. निब्बत्तवसेन निरयं अरहति, निरयसंवत्तनियेन वा कम्मेन निरये नियुत्तो नेरयिको. आपायिकोति एत्थापि एसेव नयो. अवीचिम्हि उप्पज्जित्वा तत्थ आयुकप्पसञ्ञितं अन्तरकप्पं तिट्ठतीति कप्पट्ठो. निरयूपपत्तिपरिहरणवसेन तिकिच्छितुं सक्कुणेय्योति तेकिच्छो, न तेकिच्छो अतेकिच्छो. द्वे अन्ते मोचेत्वाति फरुसं वा अप्पियं वा कप्पेय्याति द्वे कोट्ठासे मुञ्चित्वा ¶ ते अनामसित्वा पुच्छितं अत्थं ततो बहि करोन्तो उग्गिलति नाम. तं पन एवं कातुं न सक्कोतीति आह – ‘‘उग्गिलितुं बहि नीहरितुं न सक्खिती’’ति. एवमेवायं पुच्छा न गहेतब्बा, अयमेत्थ दोसोति तं अपुच्छं करोन्तो अपनयन्तो ओगिलति नाम, तथा पन असक्कोन्तो पतिट्ठापेन्तो न ओगिलति नाम, भगवा पन तमत्थं ओकासम्पि अकरोन्तो उभयथापि असक्खीति वेदितब्बो. कथं? भगवा हि ‘‘न ख्वेत्थ राजकुमार एकंसेना’’ति वदन्तो निगण्ठस्स अधिप्पायं विपरिवत्तेति, उभो अन्ते मोचेत्वा पञ्हं विस्सज्जेसि, एवं ताव उग्गिलितुं असक्खि. ‘‘न तत्र राजकुमार एकंसेना’’ति वदन्तो एव च ‘‘नायं पुच्छा एवं अविभागेन पुच्छितब्बा, विभजित्वा पन पुच्छितब्बा’’ति पुच्छाय दोसं दीपेन्तो तं हारेन्तो ओगिलितुम्पि सक्खतीति.

उट्ठातुं न सक्खिस्सति चित्तस्स अञ्ञथा पवत्तिया. अभयो द्वे मग्गे कतपरिचयो छेको निपुणो वादसीलो च हुत्वा विचरति. तेनाह – ‘‘सो वादज्झासयताय तस्स वचनं सम्पटिच्छन्तो ‘एवं, भन्ते’ति आहा’’ति.

८५. एवरूपन्ति या परेसं अप्पिया अमनापा दुरुत्तवाचा, एवरूपा वाचा, न पन फरुसवाचा. फरुसवाचाय हि सेतुघातो तथागतानं. चेतनाफरुसताय हि फरुसवाचा इच्छिता, न परेसं अप्पियतामत्तेन. नट्ठा निगण्ठा ओगिलिकादिसम्मतस्स पञ्हस्स एकवचनेन विद्धंसितत्ता.

८६. दारकस्स अङ्के निसीदनस्स कारणं दस्सेतुं ‘‘लेसवादिनो’’तिआदि वुत्तं. तत्थ लेसवादिनोति ¶ छलवादिनो, वादमग्गे वा अपरिपुण्णताय लेसमत्तेनेव वादसीला. ओसटसङ्गामोति अनेकवारं परवादमद्दनवसेन ओतिण्णवादसङ्गामो. विज्झित्वाति नखेन विज्झित्वा. इममेवाति य्वायं दारको अत्तनो वादभङ्गपरिहरणत्थं इमिना अङ्के निसीदापितो, इममेव अस्स दारकं उपमं निस्सयं कत्वा वादं भिन्दिस्सामि. ‘‘अस्स वादं अप्पटितताय उपमाय भञ्जिस्सामी’’ति चिन्तेत्वा.

अपनेय्यं ¶ अस्स अहन्ति अस्स दारकस्स मुखतो अहं तं अपनेय्यं. अभूतत्थोव अभूतं उत्तरपदलोपेनाति आह ‘‘अभूतन्ति अभूतत्थ’’न्ति. अतच्छन्ति तस्सेव वेवचनन्ति आह ‘‘अतच्छन्ति न तच्छ’’न्ति. अभूतन्ति वा असन्तं अविज्जमानं. अतच्छन्ति अतथाकारं. अनत्थसंहितन्ति दिट्ठधम्मिकेन, सम्परायिकेन वा अनत्थेन संहितं, अनत्थे वा संहितं, न अत्थोति वा अनत्थो, अत्थस्स पटिपक्खो सभावो, तेन संहितन्ति अनत्थसंहितं, पिसुणवाचं सम्फप्पलापञ्चाति अत्थो. एवमेत्थ चतुब्बिधस्सपि वचीदुच्चरितस्स गहितता दट्ठब्बा.

दुप्पयुत्तोति दुप्पटिपन्नो. न तं तथागतो भासति अभूततादिदोसदुट्ठत्ता. तम्पि तथागतो न भासति भूतत्थेपि अनत्थसंहिततादिदोसदुट्ठत्ता.

ठानं कारणं एतिस्सा अत्थीति ठानिया क-कारस्स य-कारं कत्वा, न ठानियाति अट्ठानिया, निक्कारणा अयुत्तियुत्ता, सा एव कथाति अट्ठानियकथा. अत्तपच्चक्खकथं कथेमाति अत्तना एव पच्चक्खं कत्वा पवत्तियमानं छलकथं कथेम.

गामिकमहल्लको ‘‘इमे मं वञ्चेतुकामा, अहमेव दानि इमे वञ्चेस्सामी’’ति चिन्तेत्वा ‘‘एवं भविस्सती’’तिआदिमाह. ‘‘न मयं दासा’’तिपि वत्तुं नासक्खिंसु पुब्बे तथाकतिकाय कतत्ता.

ततियं ततियमेवाति द्वीसुपि पक्खेसु ततियं ततियमेव वाचं. भासितब्बकालं अनतिक्कमित्वाति यस्स यदा यथा भासितब्बं, तस्स तदा तथेव च भासनतो भासितब्बं कारणं भासितब्बकालञ्च अनतिक्कमित्वाव भासति.

८७. ठानुप्पत्तिकञाणेनाति ¶ ठाने एव उप्पज्जनकञाणेन. तस्मिं तस्मिं कारणे तस्स तं तं अवत्थाय उप्पज्जनकञाणेन, धम्मानं यथासभावतो अवबुज्झनसभावोति धम्मसभावो. धम्मे सभावधम्मे अनवसेसे वा याथावतो उपधारेतीति धम्मधातु, सब्बञ्ञुता. तेनाह ‘‘सब्बञ्ञुतञ्ञाणस्सेतं अधिवचन’’न्ति. सुप्पटिविद्धन्ति सब्बं ञेय्यधम्मं सुट्ठु पटिविज्झनवसेन, सुट्ठु पटिविद्धन्ति अत्थो. तेनाह ‘‘हत्थगतं भगवतो’’ति. नेय्यपुग्गलवसेन परिनिट्ठिताति कथापरिविभागेन अयमेव ¶ देसना चत्तारि अरियसच्चानि दस्सेन्तो अरहत्तं पच्चक्खासीति.

अभयराजकुमारसुत्तवण्णनाय लीनत्थप्पकासना समत्ता.

९. बहुवेदनियसुत्तवण्णना

८८. पञ्चकङ्गोति ¶ वड्ढकीकिच्चसाधने वासिआदिपञ्चकं अङ्गं संधनं एतस्मिन्ति पञ्चकङ्गो. थम्भादिवत्थूनं थपनट्ठेन थपति. पण्डितउदायित्थेरो, न काळुदायी थेरो.

८९. परियायति अत्तनो फलं वत्तेतीति परियायो, कारणं. वेदनासन्निस्सितो च कायिकचेतसिकभावो कारणं. तेनाह – ‘‘कायिकचेतसिकवसेन द्वे वेदितब्बा’’ति. तत्थ पसादकायसन्निस्सिता कायिका, चेतोसन्निस्सिता चेतसिका. सुखादिवसेन तिस्सोति एत्थ सुखनदुक्खनुपेक्खनानि सुखादिवेदनाय कारणं. तानि हि पवत्तिनिमित्तानि कत्वा तत्थ सुखादिसद्दप्पवत्ति, इमिना नयेन सेसेसुपि यथारहं कारणं निद्धारेत्वा वत्तब्बं. उपविचारवसेनाति आरम्मणं उपेच्च सविसेसपवत्तिवसेन. यस्मिञ्हि आरम्मणे सोमनस्सवेदना पवत्तति, आरम्मणताय तं उपगन्त्वा इतरवेदनाहि विसिट्ठताय सविसेसं तत्थ पवत्ति. तेनाह ‘‘सोमनस्सट्ठानियं रूपं उपविचरती’’ति. एस नयो सेसवेदनासु गेहस्सितानीति गेहनिस्सितानि.

९०. परियायेनाति ‘‘इदमेत्थ दुक्खस्मिन्ति वदामी’’ति वुत्तट्ठानं सन्धाय वदति. तं दस्सेन्तोति कामञ्चेत्थ सुत्ते – ‘‘द्वेपानन्द, वेदना वुत्ता’’ति द्वे आदिं कत्वा वेदना दस्सिता, एकापि पन दस्सिता एवाति दस्सेन्तो. उपत्थम्भेतुन्ति एकापि वेदना वुत्ता मया परियायेन, एवं सति द्वेपि वत्तब्बाति एवं तस्स वादं उपत्थम्भेतुं. कथं पन एका वेदना वुत्ताति? यं किञ्चि वेदयितं सुखं वा दुक्खं वा अदुक्खमसुखं वा, इदमेत्थ दुक्खस्मिन्ति वदामीति. यं पनेत्थ वत्तब्बं, तं इतिवुत्तकवण्णनायं (इतिवु. अट्ठ. ५२ आदयो) परमत्थदीपनियं वुत्तनयेन वेदितब्बं.

कथं ¶ पनेत्थ रूपावचरचतुत्थे अरूपेसु सञ्ञावेदयितनिरोधे सुखं उद्धतन्ति आह ‘‘एत्थ चा’’तिआदि. सन्तट्ठेनाति पटिपक्खधम्मानं वूपसन्तभावेन. पणीतट्ठेनाति भावनाविसेसविसिट्ठेन अतप्पकभावेनेव सेट्ठभावेन च, पच्चयविसेसेन पधानभावं नीतन्तिपि पणीतं. वेदयितसुखं नाम वेदनाभूतं सुखन्ति कत्वा. अवेदयितसुखं नाम यावता निद्दुक्खता, तावता सुखन्ति वुच्चतीति.अथ वा निरोधो सुट्ठु खादति खनति कायिकचेतसिकाबाधन्ति ¶ वत्तब्बतं अरहति सत्ताहम्पि तत्थ दुक्खस्स निरुज्झनतो. तेनाह ‘‘निद्दुक्खभावसङ्खातेन सुखट्ठेना’’ति.

९१. यस्मिं यस्मिं भवे, चित्तुप्पादे, अवत्थाय वा निद्दुक्खभावो, दुक्खस्स पटिपक्खता अनुपलब्भनेन दुक्खविवित्तं, तं सुखस्मिंयेव पञ्ञपेति. सेसं सुविञ्ञेय्यमेव.

बहुवेदनीयसुत्तवण्णनाय लीनत्थप्पकासना समत्ता.

१०. अपण्णकसुत्तवण्णना

९३. नानाविधाति ¶ नानाविधदिट्ठिका समणब्राह्मणाति पब्बज्जामत्तेन समणा, जातिमत्तेन ब्राह्मणा च. दस्सनन्ति दिट्ठि. गहितन्ति अभिनिविस्स गहितं. इति ते अत्तनो दस्सनं गहेतुकामा पुच्छन्ति. विना दस्सनेन लोको न निय्यातीति विमोक्खभावनाय एकेन दस्सनेन विना लोको संसारदुक्खतो न निगच्छति. एकदिट्ठियम्पि पतिट्ठातुं नासक्खिंसु सद्धाकाराभावतो. तथा हि ते इमाय देसनाय सरणेसु पतिट्ठहिंसु. यस्मा अविपरीते सद्धेय्यवत्थुस्मिं उप्पन्नसद्धा ‘‘आकारवती’’ति अधिप्पेता, तस्मा यो लोके अविपरीतधम्मदेसना, अयमेवेसाति पवत्ता मग्गसाधनगताय सद्धाय कारणभावतो तन्निस्सया सद्धा, सा आकारवतीति वुत्ता. अवत्थुस्मिञ्हि सद्धा अयुत्तकारणताय न आकारवती. आकारवतीति एत्थ वती-सद्दो न केवलं अत्थितामत्तदीपको, अथ खो अतिसयत्थदीपको पासंसत्थदीपको वा दट्ठब्बो. तेन आकारवतीति सद्धेय्यवत्थुवसेन अतिसयकारणवतीति वा पासंसकारणवतीति वा ¶ अयमेत्थ अत्थो. अपण्णकोति एत्थ यथा कञ्चि अत्थं साधेतुं आरद्धस्स पयोगो विरद्धो, तत्थ अकारको विय होति पुनपि आरभितब्बताय. अविरद्धो पन अत्थस्स साधनतो अपण्णको, एवं अयम्पि धम्मो अभिभवित्वा पवत्तनतो एकंसतो ‘‘अपण्णको’’ति वुत्तो. तेनाह ‘‘अविरद्धो अद्वेज्झगामी एकंसगाहिको’’ति.

९४. तब्बिपच्चनीकभूताति तस्सा मिच्छादिट्ठिया पच्चनीकभूता.

९५. नेसन्ति कुसलानं धम्मानं. अकुसलतो निक्खन्तभावेति असंकिलिट्ठभावे. आनिसंसोति सुद्धविपाकता. विसुद्धिपक्खोति विसुद्धिभावो परियोदातता. अभूतधम्मस्स दिट्ठिभावस्स सञ्ञापना आचिक्खना अभूतधम्मसञ्ञापना. सावज्जेसु परमवज्जे मिच्छादस्सने पग्गहणन्ति कुतो सुसील्यस्स पग्गहोति आह – ‘‘मिच्छादस्सनं गण्हन्तस्सेव सुसील्यं पहीनं होती’’ति. मिच्छादिट्ठिआदयोति एत्थ मिच्छासङ्कप्पो परलोकाभावचिन्ता, मिच्छावाचा परलोकाभाववादभूतो मुसावादो, अरियानं पच्चनीकतादयो. अपरापरं उप्पज्जनवसेनाति पुनप्पुनं चित्ते उप्पज्जनवसेन. पापका अकुसला धम्माति पच्चवेक्खणसञ्ञापनादिकाले उप्पज्जनका तथापवत्ता अकुसलखन्धा.

कलिग्गहोति ¶ अनत्थपरिग्गहो. सो पन यस्मा दिट्ठेव धम्मे अभिसम्परायञ्च पराजयो होतीति आह ‘‘पराजयग्गाहो’’ति. दुस्समत्तोति एत्थ दु-सद्दो ‘‘समादिन्नो’’ति एत्थापि आनेत्वा योजेतब्बोति आह ‘‘दुप्परामट्ठो’’ति. यथा दुप्परामट्ठो होति, एवं समादिन्नो दुस्समत्तो दुसमादिन्नो वुत्तो. सकवादमेव फरित्वाति अत्तनो नत्थिकवादमेव ‘‘इदमेव सच्चं मोघमञ्ञ’’न्ति (म. नि. २.१८७; ३.२७-२८) अवधारेन्तो अञ्ञस्स ओकासअदानवसेन फरित्वा. तेनाह ‘‘अधिमुच्चित्वा’’ति. ‘‘सम्बुद्धो’’तिआदि अधिमुच्चनाकारदस्सनं. रिञ्चतीति विवेचेति अपनेति. तेनाह ‘‘वज्जेती’’ति.

९६. कटग्गहोति कतं सब्बसो सिद्धिमेव कत्वा गहणं. सो पन जयलाभो होतीति वुत्तं ‘‘जयग्गाहो’’ति. सुग्गहितोति सुट्ठुकरणवसेन गहितो. सुपरामट्ठोति सुट्ठु परापरं आसेवनवसेन आमट्ठो ¶ . उभयेनपि तस्स कम्मस्स कतूपचितभावं दस्सेति, सोत्थिभावावहत्तञ्च सग्गुपपत्तिसंवत्तनतो पापसभावपहानतो च.

९७. सहत्था करोन्तस्साति (दी. नि. टी. १.१६६; सं. नि. टी. २.३.२११) सहत्थेनेव करोन्तस्स. निस्सग्गियथावरादयोपि इध सहत्थकरणेनेव सङ्गहिता. पचनं दहनं विबाधनन्ति आह ‘‘दण्डेन पीळेन्तस्सा’’ति. सोकं सयं करोन्तस्साति परस्स सोककारणं सयं करोन्तस्स, सोकं वा उप्पादेन्तस्स. परेहि अत्तनो वचनकरेहि. सयम्पि फन्दतोति परस्स विबाधनपयोगेन सयम्पि फन्दतो. अतिपातयतोति पदं सुद्धकत्तुअत्थे हेतुकत्तुअत्थे च वत्ततीति आह ‘‘हनन्तस्सपि हनापेन्तस्सापी’’ति.

घरस्स भित्ति अन्तो बहि च सन्धिता हुत्वा ठिता घरसन्धि. किञ्चिपि असेसेत्वा निरवसेसमेव लोपोति निल्लोपो. एकागारे नियुत्तो विलोपो एकागारिको. परितो सब्बसो पन्थे हननं परिपन्थो. पापं न करीयति पुब्बे असतो उप्पादेतुं असक्कुणेय्यत्ता, तस्मा नत्थि पापं. यदि एवं कथं सत्ता पापं पटिपज्जन्तीति आह – ‘‘सत्ता पन करोमाति एवंसञ्ञिनो होन्ती’’ति. एवं किरस्स होति ‘‘इमेसञ्हि सत्तानं हिंसादिकिरिया न अत्तानं फुसति तस्स निच्चताय निब्बिकारत्ता, सरीरं पन अचेतनं कट्ठकलिङ्गरूपमं, तस्मिं विकोपितेपि न किञ्चि पाप’’न्ति. खुरनेमिनाति निसितखुरमयनेमिना. गङ्गाय दक्खिणदिसा अप्पतिरूपदेसो, उत्तरदिसा पतिरूपदेसोति अधिप्पायेन ‘‘दक्खिणञ्चे’’तिआदि वुत्तन्ति ‘‘दक्खिणतीरे मनुस्सा कक्खळा’’तिआदिमाह.

महायागन्ति ¶ महाविजितयञ्ञसदिसं महायागं. सीलसंयमेनाति कायिकवाचसिकसंवरेन. सच्चवचनेनाति सच्चवाचाय. तस्स विसुं वचनं लोके गरुतरपुञ्ञसम्मतभावतो. यथा हि पापधम्मेसु मुसावादो गरु, एवं पुञ्ञधम्मेसु सच्चवाचा. तेनाह भगवा – ‘‘एकं धम्ममतीतस्सा’’तिआदि (ध. प. १७६). वुत्तनयेनेवाति कण्हपक्खे वुत्तनयेन. तत्थ हि – ‘‘नत्थि पापं, नत्थि पापस्स आगमो’’ति आगतं, इध ‘‘अत्थि पुञ्ञं, अत्थि पुञ्ञस्स आगमो’’ति आगतं, अयमेव विसेसो. सेसं वुत्तसदिसमेवाति ¶ ‘‘तेसमेतं पाटिकङ्ख’’न्ति एवमादिं सन्धाय वदति, तं हेट्ठा पुरिमवारसदिसं.

१००. उभयेनाति हेतुपच्चयपटिसेधवचनेन. संकिलेसपच्चयन्ति संसारे परिब्भमनेन किलिन्नस्स मलिनभावस्स कारणं. वुत्तविपरियायेन विसुद्धिपच्चयन्ति सद्दत्थो वेदितब्बो. बलन्तिआदीसु सत्तानं संकिलेसावहं वोदानावहञ्च उस्साहसङ्खातं बलं वा, सूरवीरभावसङ्खातं वीरियं वा, पुरिसेन कत्तब्बो पुरिसथामो वा, सो एव परं परं ठानं अक्कमनप्पत्तिया पुरिसपरक्कमो वा नत्थि न उपलब्भति.

सत्वयोगतो, रूपादीसु सत्तविसत्तताय च सत्ता. पाणनतो अस्सासपस्सासवसेन पवत्तिया पाणा. ते पन सो एकिन्द्रियादिवसेन विभजित्वा वदतीति आह ‘‘एकिन्द्रियो’’तिआदि. अण्डकोसादीसु भवनतो भूताति वुच्चन्तीति आह ‘‘अण्डकोस…पे… वदन्ती’’ति. जीवनतो पाणं धारेन्तो विय वड्ढनतो जीवाति एवं सत्तपाणभूतजीवेसु सद्दत्थो वेदितब्बो. नत्थि एतेसं संकिलेसविसुद्धीसु वसोति अवसा. नत्थि नेसं बलं वीरियञ्चाति अबला अवीरिया. नियतताति अच्छेज्जसुत्तावुताभेज्जमणि विय नियतपवत्तनताय गतिजातिबन्धपजहवसेन नियामो. तत्थ तत्थ गमनन्ति छन्नं अभिजातीनं तासु तासु गतीसु उपगमनं समवायेन समागमो. सभावोयेवाति यथा कण्टकस्स तिक्खता, कबिट्ठफलानं परिमण्डलता, मिगपक्खीनं विचित्ताकारता, एवं सब्बस्सपि लोकस्स हेतुपच्चयेन विना तथा तथा परिणामो, अयं सभावोयेव अकित्तिमोयेव. तेनाह ‘‘येन ही’’तिआदि.

सकुणे हनतीति साकुणिको, तथा सूकरिको. लुद्दोति अञ्ञोपि यो कोचि मागविको नेसादो. पापकम्मपसुतताय कण्हाभिजाति नाम. भिक्खूति साकिया भिक्खू, मच्छमंसखादनतो नीलाभिजातीति वदन्ति. ञायलद्धेपि पच्चये भुञ्जमाना आजीवकसमयस्स विलोमगाहिताय ‘‘पच्चयेसु कण्टके पक्खिपित्वा खादन्ती’’ति वदन्ति. एके पब्बजिता ¶ , ये सविसेसं अत्तकिलमथानुयोगमनुयुत्ता. तथा ¶ हि ते कण्टके वत्तेन्ता विय होन्तीति कण्टकवुत्तिकाति वुत्ता. ठत्वा भुञ्जनदानपटिक्खेपादिवतसमायोगेन पण्डरतरा. अचेलकसावकाति आजीवकसावके वदति. ते किर आजीवकलद्धिया विसुद्धचित्तताय निगण्ठेहिपि पण्डरतरा. नन्दादयो हि तथारूपाय पटिपत्तिया पत्तब्बा, तस्मा नन्दादयो निगण्ठेहि आजीवकसावकेहि च पण्डरतराति वुत्ता ‘‘सुक्काभिजाती’’ति.

अयमेतेसं लद्धीति साकुणिकादिभावूपगमनेन कण्हाभिजातिआदीसु दुक्खं सुखञ्च पटिसंवेदेन्ता अनुक्कमेन महाकप्पानं चुल्लासीतिसहस्सानि खेपेत्वा आजीवकभावूपगमनेन परमसुक्काभिजातियं ठत्वा संसारतो सुज्झन्तीति अयं तेसं नियति आजीवकानं लद्धि.

‘‘नत्थि दिन्न’’न्ति वदन्तो नत्थिको दानस्स फलं पटिक्खिपतीति आह – ‘‘नत्थिकदिट्ठि विपाकं पटिबाहती’’ति. तथा चेव हेट्ठा संवण्णितं ‘‘नत्थिकदिट्ठि हि नत्थितमाहा’’ति. अहेतुकदिट्ठि उभयन्ति कम्मं विपाकञ्च उभयं. सो हि ‘‘अहेतू अपच्चया सत्ता संकिलिस्सन्ति विसुज्झन्ती’’ति वदन्तो कम्मस्स विय विपाकस्सपि संकिलेसविसुद्धीनं पच्चयत्ताभाववचनतो तदुभयं पटिबाहति नाम. विपाको पटिबाहितो होति असति कम्मे विपाकाभावतो. कम्मं पटिबाहितं होति असति विपाके कम्मस्स निरत्थकभावापत्तितो. अत्थतोति सरूपेन. उभयपटिबाहकाति विसुं विसुं तंतंदिट्ठिता वुत्तापि सब्बे ते नत्थिकादयो नत्थिकदिट्ठिआदिवसेन पच्चेकं तिविधदिट्ठिका एव उभयपटिबाहकत्ता. ‘‘उभयपटिबाहका’’ति हि हेतुवचनं. अहेतुकवादा चातिआदि पटिञ्ञावचनं. यो हि विपाकपटिबाहनेन नत्थिकदिट्ठिको, सो अत्थतो कम्मपटिबाहनेन अकिरियदिट्ठिको, उभयपटिबाहनेन अहेतुकदिट्ठिको च होति. सेसद्वयेपि एसेव नयो.

सज्झायन्तीति तं दिट्ठिदीपकं गन्थं उग्गहेत्वा पठन्ति. वीमंसन्तीति तस्स अत्थं विचारेन्ति. तेसन्तिआदि वीमंसनाकारदस्सनं. तस्मिं आरम्मणेति यथापरिकप्पितकम्मफलाभावदीपके ‘‘नत्थि दिन्न’’न्तिआदिनयप्पवत्ताय लद्धिया आरम्मणे. मिच्छासति सन्तिट्ठतीति ‘‘नत्थि दिन्न’’न्तिआदिवसेन ¶ अनुस्सवूपलद्धे अत्थे तदाकारपरिवितक्कनेहि सविग्गहे विय सरूपतो चित्तस्स पच्चुपट्ठिते चिरकालपरिचयेन ‘‘एवमेत’’न्ति निज्झानक्खमभावूपगमनेन निज्झानक्खन्तिया तथा गहिते पुनप्पुनं तथेव आसेवन्तस्स बहुलीकरोन्तस्स मिच्छावितक्केन समादियमाना मिच्छावायामुपत्थम्भिता अतंसभावं ‘‘तंसभाव’’न्ति गण्हन्ती मिच्छासतीति लद्धनामा तंलद्धिसहगता तण्हा सन्तिट्ठति ¶ . चित्तं एकग्गं होतीति यथावुत्तवितक्कादिपच्चयलाभेन तस्मिं आरम्मणे अवट्ठितताय अनेकग्गं पहाय एकग्गं अप्पितं विय होति. मिच्छासमाधिपि हि पच्चयविसेसेहि लद्धभावनाबलेहि कदाचि समाधानपतिरूपकिच्चकरो होतियेव वालविज्झनादीसु वियाति दट्ठब्बं. जवनानि जवन्तीति अनेकक्खत्तुं तेनाकारेन पुब्बभागियेसु जवनवारेसु पवत्तेसु सब्बपच्छिमे जवनवारे सत्त जवनानि जवन्ति. पठमजवने पन सतेकिच्छा होन्ति, तथा दुतियादीसूति धम्मसभावदस्सनमेतं, न पन तस्मिं खणे तेसं सतेकिच्छभावापादनं केनचि सक्का कातुं.

तत्थाति तेसु तीसु मिच्छादस्सनेसु. कोचि एकं दस्सनं ओक्कमतीति यस्स एकस्मिंयेव अभिनिवेसो आसेवना च पवत्ता, सो एकंयेव दस्सनं ओक्कमति. यस्स पन द्वीसु, तीसुपि वा अभिनिवेसना पवत्ता, सो द्वे तीणि ओक्कमति. एतेन या पुब्बे उभयपटिबाहनतामुखेन वुत्ता अत्थसिद्धा सब्बदिट्ठिकता, सा पुब्बभागिया. या पन मिच्छत्तनियामोक्कन्ति भूता, सा यथासकं पच्चयसमुदागमसिद्धितो भिन्नारम्मणानं विय विसेसाधिगमानं अञ्ञमञ्ञं एकज्झं अनुप्पत्तिया असंकिण्णा एवाति दस्सेति. एकस्मिं ओक्कन्तेपीतिआदिना तिस्सन्नम्पि दिट्ठीनं समानबलतं समानफलतञ्च दस्सेति, तस्मा तिस्सोपि चेता एकस्स उप्पन्ना अञ्ञमञ्ञं अब्बोकिण्णा एव, एकाय विपाके दिन्ने इतरा अनुबलप्पदायिका होन्ति. वट्टखाणु नामाति इदं वचनं नेय्यत्थं, न नीतत्थन्ति तं विवरित्वा दस्सेतुं किं पनेसातिआदि वुत्तं, अकुसलं नामेतं अबलं दुब्बलं, न कुसलं विय महाबलन्ति आह – ‘‘एकस्मिंयेव अत्तभावे नियतो’’ति. अञ्ञथा सम्मत्तनियामो विय मिच्छत्तनियामोपि अच्चन्तिको सिया. यदि एवं वट्टखाणुकजोतना कथन्ति आह ‘‘आसेवनवसेन पना’’तिआदि, तस्मा यथा ‘‘सकिं निमुग्गो ¶ निमुग्गोव होती’’ति (अ. नि. ७.१५) वुत्तं, एवं वट्टखाणुकजोतना. यादिसे हि पच्चये पटिच्च अयं तंतंदस्सनं ओक्कन्तो पुन कदाचि तप्पटिपक्खे पच्चये पटिच्च ततो सीसुक्खिपनमस्स न होतीति न वत्तब्बं. तेन वुत्तं ‘‘येभुय्येना’’ति.

तस्माति यस्मा एवं संसारखाणुभावस्सपि पच्चयो अकल्याणजनो, तस्मा. भूतिकामोति दिट्ठधम्मिकसम्परायिकपरमत्थानं वसेन अत्तनो गुणेहि वड्ढिकामो. यं पनेत्थ केचि वदन्ति ‘‘यथा चिरकालभावनाय परिपाकूपगमलद्धबलत्ता उपनिस्सयकुसला अकुसले सब्बसो समुच्छिन्दन्ति, एवं अकुसलधम्मा ततोपि चिरकालभावनासम्भवतो लद्धबला हुत्वा कदाचि कुसलधम्मेपि समुच्छिन्दन्ति. एवञ्च कत्वा दळ्हमिच्छाभिनिवेसस्स मिच्छादिट्ठिकस्स वट्टखाणुकभावजोतनापि ¶ समत्थिता होती’’ति यथा तं ‘‘वस्सभञ्ञानं दिट्ठी’’ति, तं न, मिच्छत्तनियतधम्मानं चिरकालभावनामत्तेन न पटिपक्खस्स पजहनसमत्थता, अथ खो धम्मतासिद्धेन पच्चयविसेसाहितसामत्थियेन अत्तनो पहायकसभावेन पहायकभावो भावनाकुसलानंयेव वुत्तो, अकुसलानंयेव च पहातब्बभावो ‘‘दस्सनेन पहातब्बा’’तिआदिना नयेन, अकुसलानंयेव दुब्बलभावो ‘‘अबलानं बलीयन्ती’’तिआदिना (सु. नि. ७७६; महानि. ५) (युत्तिनापि नामतो वा अधिगमनियो आलोको आलोकभावतो बाहिरारणेका विय न चेत्थ पटिञ्ञत्ते भावेसता सोतुनो आसंकितब्बा विसेसवस्स साधेतब्बतो सामञ्ञस्स च सोतुभावेन अधिप्पेतत्ता वेद-सद्दस्स लोपो दीपे सभावे साधने यथा तं सद्दयभावस्स नापि विसुद्धकअनुमानादिविरोधसम्भावतो. न हि सक्का अन्तरालोकस्स बाहिरालोकस्स विय रूपकायं उपादाय रूपता चक्खुविञ्ञेय्यत्तादिके पतिट्ठापेतुं सक्काति वुत्तं, ननुपि अन्तरालोको अविग्गहत्ता वेदना वियाति सद्धेव ञाणालोकस्स अविज्जन्धकारा विय विधमनियभावे सब्बेसम्पि कुसलधम्मानं केनचिपि अकुसलधम्मेन समुच्छिन्दनियता सिद्धाव होति). वट्टखाणुकचोदनाय यं वत्तब्बं, तं हेट्ठा वुत्तमेवाति तिट्ठतेसा बालजनविकत्थना.

१०३. झानचित्तमयाति ¶ रूपावचरज्झानचित्तेन निब्बत्ता. तथा हि तेसं विसेसेन झानमनसा निब्बत्तत्ता ‘‘मनोमया’’ति वुत्ता, अविसेसेन पन अभिसङ्खारमनसा सब्बेपि सत्ता मनोमया एव. सञ्ञामयाति एत्थापि एसेव नयो. तेनाह ‘‘अरूपज्झानसञ्ञाया’’ति. अयन्ति रूपिताभावपटिपज्जनकपुग्गलो. अप्पटिलद्धज्झानोति अनधिगतरूपज्झानो. तस्सपीति तक्किनोपि. रूपज्झाने कङ्खा नत्थि अनुस्सववसेन लद्धविनिच्छयत्ता.

१०४. सारागायाति सरागभावाय. सन्तिकेति समीपे, न थामगता दिट्ठिनातिदूरत्ता सरागा, न सम्पयुत्तत्ता. सा हि न थामगता वट्टपरियापन्नेसु धम्मेसु रज्जतीति विञ्ञायतीति आह – ‘‘रागवसेन वट्टे रज्जनस्सा’’ति. सब्बेपि संयोजना तण्हावसेनेव सम्भवन्तीति आह – ‘‘तण्हावसेन संयोजनत्थाया’’ति. आरुप्पे पनस्स कङ्खा नत्थीति अनुस्सववसेन लद्धनिच्छयं सन्धाय वुत्तं. कामं दुग्गतिदुक्खानं एकन्तसंवत्तनेन नत्थिकदिट्ठिआदीनं अपण्णकता पाकटा एव, निप्परियायेन पन अनवज्जस्स अत्थस्स एकन्तसाधकं अपण्णकन्ति कत्वा चोदना, सावज्जस्सपि अत्थस्स साधने एकंसिकभावं गहेत्वा परिहारो. तेनाह ‘‘गहणवसेना’’तिआदि. तेन रुळ्हीवसेन ‘‘नत्थि दिन्न’’न्तिआदीनि अपण्णकङ्गानि जातानीति दस्सेति.

१०५. हेट्ठा ¶ तयो पुग्गलाव होन्तीति अत्तन्तपो परन्तपोति इमस्मिं चतुक्के हेट्ठा तयो पुग्गला होन्ति. यथावुत्ता पञ्चपि पुग्गला दुप्पटिपन्नाव, ततो अत्थिकवादादयो पञ्चपुग्गला सम्मापटिपन्नताय इमस्मिं चतुक्के एको चतुत्थपुग्गलोव होति. एतमत्थं दस्सेतुन्ति इध हेट्ठा वुत्तपुग्गलपञ्चकद्वयं इमस्मिं चतुक्के एव सङ्गहं गच्छतीति विभागेन दुप्पटिपत्तिसुप्पटिपत्तियो दस्सेतुं भगवा इमं देसनं आरभीति. यं पनेत्थ अत्थतो अविभत्तं, तं सुविञ्ञेय्यमेव.

अपण्णकसुत्तवण्णनाय लीनत्थप्पकासना समत्ता.

निट्ठिता च गहपतिवग्गवण्णना.

२. भिक्खुवग्गो

१. अम्बलट्ठिकराहुलोवादसुत्तवण्णना

१०७. अम्बलट्ठिकायन्ति ¶ ¶ एत्थ अम्बलट्ठिका वुच्चति सुजातो तरुणम्बरुक्खो, तस्स पन अविदूरे कतो पासादो इध ‘‘अम्बलट्ठिका’’ति अधिप्पेतो. तेनाह ‘‘वेळुवनविहारस्सा’’तिआदि. पधानघरसङ्खेपेति भावनागेहप्पकारे योगीनं गेहेति अत्थो. तिखिणोव होति, न तस्स तिखिणभावो केनचि कातब्बो सभावसिद्धत्ता. एवमेव अत्तनो विमुत्तिपरिपाचनकम्मुना तिक्खविसदभावप्पत्तिया अयम्पि आयस्मा…पे… तत्थ विहासि. पकतिपञ्ञत्तमेवाति पकतिया पञ्ञत्तं बुद्धानं उपगमनतो पुरेतरमेव चारित्तवसेन पञ्ञत्तं.

१०८. उदकं अनेन धीयति, ठपीयति वा एत्थाति उदकाधानं. उदकट्ठानन्ति च खुद्दकभाजनं. ‘‘ओवाददानत्थं आमन्तेसी’’ति वत्वा तं पनस्स ओवाददानं न इधेव, अथ खो बहूसु ठानेसु बहुक्खत्तुं पवत्तितन्ति तानि तानि सङ्खेपतो दस्सेत्वा इध संवण्णनत्थं ‘‘भगवता ही’’तिआदि वुत्तं.

तत्थ सब्बबुद्धेहि अविजहितन्ति इमिना सब्बेसं बुद्धानं सासने कुमारपञ्हा नाम होतीति दस्सेति. एकेकतो पट्ठाय याव दसका पवत्ता दस पुच्छा एतस्साति दसपुच्छं, एकेकतो पट्ठाय याव दसका एकुत्तरवसेन पवत्तं विस्सज्जनत्थाय पञ्चपण्णसविस्सज्जनं सामणेरपञ्हन्ति सम्बन्धो. यं पनेत्थ वत्तब्बं, तं परमत्थजोतिकायं खुद्दकट्ठकथायं (खु. पा. अट्ठ. ४.कुमारपञ्हवण्णना) वुत्तनयेनेव वेदितब्बं. अनादीनवदस्सिताय अभिण्हं मुसा समुदाचरणतो ‘‘पियमुसावादा’’ति वुत्तं, उदकावसेसछड्डनउदकाधाननिकुज्जनउक्कुज्जनदस्सनसञ्ञिता चतस्सो उदकाधानूपमायो सब्बस्स युद्धकम्मस्स अकरणकरणवसेन दस्सिता द्वे हत्थिउपमायो.

तत्थ ¶ राहुलसुत्तन्ति सुत्तनिपाते आगतं राहुलसुत्तं (सु. नि. ३३७ आदयो). अभिण्होवादवसेन वुत्तन्ति इमिना अन्तरन्तरा तं सुत्तं कथेत्वा भगवा थेरं ओवदतीति दस्सेति. इदञ्च पनाति इदं यथावुत्तं भगवतो तंतंकालानुरूपं अत्तनो ओवाददानं सन्धाय. बीजन्ति अण्डं. पस्ससि नूति ¶ नु-सद्दो अनुजानने, ननु पस्ससीति अत्थो. सच्चधम्मं लङ्घित्वा ठितस्स किञ्चिपि अकत्तब्बं नाम पापं नत्थीति आह – ‘‘सम्पजानमुसावादे संवररहितस्स ओपम्मदस्सनत्थं वुत्ता’’ति. तथा हि –

‘‘एकं धम्ममतीतस्स, मुसावादिस्स जन्तुनो;

वितिण्णपरलोकस्स, नत्थि पापमकारिय’’न्ति. (ध. प. १७६);

उरुळ्हवाति उरुळ्हो हुत्वा उस्सितो. सो पन दमवसेन अभिरुय्ह वड्ढितो आरोहनयोग्यो च होतीति आह ‘‘अभिवड्ढितो आरोहसम्पन्नो’’ति. आगतागतेति अत्तनो योग्यपदेसं आगतागते. पटिसेनाय फलककोट्ठकमुण्डपाकारादयोति पटिसेनाय अत्तनो आरक्खत्थाय ठपिते फलककोट्ठके चेव उद्धच्छदपाकारादिके च. एतं पदेसन्ति एतं परसेनापदेसं. एत्तकेनाति ओलोकनमत्तेन. तस्स ओलोकनाकारदस्सनेनेव. सतम्पि सहस्सम्पि सेनानीकं द्वेधा भिज्जति, तीरपातिकं मद्दितं हुत्वा पदाता हुत्वा द्वेधा हुत्वा पलायन्ति. कण्णेहि पहरित्वाति पगेव सरानं आगमनसद्दं उपधारेत्वा यथा वेगो न होति, एवं समुट्ठापेत्वा तेहि पहरित्वा पातनं. पटिहत्थिपटिअस्सातिआदिना पच्चेकं पति-सद्दो योजेतब्बोति. दीघासिलट्ठियाति दीघलताय असिलट्ठिया.

करणेति कम्मकरणे. मञ्ञति हत्थारोहो. अयमुग्गरन्ति तादिसे काले गहितमुग्गरं. ओलोकेत्वाति ञाणचक्खुना दिस्वा, अभिण्हं सम्पजञ्ञं उपट्ठपेत्वाति अत्थो.

१०९. ससक्कन्ति पस्सितुं युत्तं कत्वा उस्साहं जनेत्वा न करणीयं, तादिसं नियमतो अकत्तब्बं होतीति आह ‘‘एकंसेनेव न कातब्ब’’न्ति. पटिसंहरेय्यासीति करणतो सङ्कोचं आपज्जेय्यासि. यथाभूतो असन्तो निवत्तो अकरोन्तो नाम होतीति आह ‘‘निवत्तेय्यासि मा करेय्यासी’’ति. अनुपदेय्यासीति अनुबलप्पदायी भवेय्यासि. तेनाह ‘‘उपत्थम्भेय्यासी’’ति. तं पन अनुबलप्पदानं उपत्थम्भनं पुनप्पुनं करणमेवाति आह ‘‘पुनप्पुनं करेय्यासी’’ति ¶ . सिक्खमानोति तंयेव अधिसीलसिक्खं तन्निस्सयञ्च सिक्खाद्वयं सिक्खन्तो सम्पादेन्तो.

१११. कित्तके ¶ पन ठानेति कित्तके ठाने पवत्तानि. अविदूरे एव पवत्तानीति दस्सेन्तो ‘‘एकस्मिं पुरेभत्तेयेव सोधेतब्बानी’’ति आह. एवञ्हि तानि सुसोधितानि होन्ति सुपरिसुद्धानि. परेसं अप्पियं गरुं गारय्हं, यथावुत्तट्ठानतो पन अञ्ञं वा कम्मट्ठानमनसिकारेनेव कायकम्मादीनि परिसोधितानि होन्तीति न गहितं. पटिघं वाति एत्थ वा-सद्देन असमपेक्खणे मोहस्स सङ्गहो दट्ठब्बो.

११२. वुत्तनयेन कायकम्मादिपरिसोधनं नाम इधेव, न इतो बहिद्धाति आह ‘‘बुद्धा…पे… सावका वा’’ति. ते हि अत्थतो समणब्राह्मणा वाति. तस्माति यस्मा सब्बबुद्धपच्चेकबुद्धसावकेहि आरुळ्हमग्गो, राहुल, मया तुय्हं आचिक्खितो, तस्मा. तेन अनुसिक्खन्तेन तया एवं सिक्खितब्बन्ति ओवादं अदासि. सेसं वुत्तनयत्ता सुविञ्ञेय्यमेव.

अम्बलट्ठिकराहुलोवादसुत्तवण्णनाय लीनत्थप्पकासना

समत्ता.

२. महाराहुलोवादसुत्तवण्णना

११३. इरियापथानुबन्धनेनाति ¶ इरियापथगमनानुबन्धनेन, न पटिपत्तिगमनानुबन्धनेन. अञ्ञमेव हि बुद्धानं पटिपत्तिगमनं अञ्ञं सावकानं. विलासितगमनेनाति – ‘‘दूरे पादं न उद्धरति, न अच्चासन्ने पादं निक्खिपति, नातिसीघं गच्छति नातिसणिक’’न्तिआदिना (सं. नि. अट्ठ. ३.४.२४३; उदा. अट्ठ. ७६; सारत्थ. टी. महावग्ग ३.२८५) वुत्तेन सभावसीलेन बुद्धानं चातुरियगमनेन. तदेव हि सन्धाय ‘‘पदे पदं निक्खिपन्तो’’ति वुत्तं. पदानुपदिकोति राहुलत्थेरस्सपि लक्खणपारिपूरिया तादिसमेव गमनन्ति यत्तकं पदेसं अन्तरं अदत्वा भगवतो पिट्ठितो गन्तुं आरद्धो, सब्बत्थ तमेव गमनपदानुपदं गच्छतीति पदानुपदिको.

वण्णनाभूमि ¶ चायं तत्थ भगवन्तं थेरञ्च अनेकरूपाहि उपमाहि वण्णेन्तो ‘‘तत्थ भगवा’’तिआदिमाह. निक्खन्तगजपोतको विय विरोचित्थाति पदं आनेत्वा योजना. एवं तं केसरसीहो वियातिआदीसुपि आनेत्वा योजेतब्बं. तारकराजा नाम चन्दो. द्विन्नं चन्दमण्डलानन्तिआदि परिकप्पवचनं, बुद्धावेणिकसन्तकं विय बुद्धानं आकप्पसोभा अहोसि, अहो सिरीसम्पत्तीति योजना.

आदियमानाति गण्हन्ति. ‘‘पच्छा जानिस्सामा’’ति न अज्जुपेक्खितब्बो. इदं न कत्तब्बन्ति वुत्तेति इदं पाणअतिपातनं न कत्तब्बन्ति वुत्ते इदं दण्डेन वा लेड्डुना वा विहेठनं न कत्तब्बं, इदं पाणिना दण्डकदानञ्च अन्तमसो कुज्झित्वा ओलोकनमत्तम्पि न कत्तब्बमेवाति नयसतेनपि नयसहस्सेनपि पटिविज्झति, तथा इध ताव सम्मज्जनं कत्तब्बन्ति वुत्तेपि तत्थ परिभण्डकरणं विहारङ्गणसम्मज्जनं कचवरछड्डनं वालिकासमकिरणन्ति एवमादिना नयसतेन नयसहस्सेन पटिविज्झति. तेनाह – ‘‘इदं कत्तब्बन्ति वुत्तेपि एसेव नयो’’ति. परिभासन्ति तज्जनं. लभामीति पच्चासीसति.

सब्बमेतन्ति सब्बं एतं मयि लब्भमानं सिक्खाकामतं. अभिञ्ञायाति जानित्वा. सहायोति रट्ठपालत्थेरं सन्धायाह. सो हि भगवता सद्धापब्बजितभावे एतदग्गे ठपितो. धम्मारक्खोति ¶ सत्थु सद्धम्मरतनानुपालको धम्मभण्डागारिको. पेत्तियोति चूळपिता. सब्बं मे जिनसासनन्ति सब्बम्पि बुद्धसासनं मय्हमेव.

छन्दरागं ञत्वाति छन्दरागं मम चित्ते उप्पन्नं ञत्वा. अञ्ञतरस्मिं रुक्खमूलेति विहारपरियन्ते अञ्ञतरस्मिं रुक्खमूलट्ठाने अनुच्छविके.

तदाति अग्गसावकेहि पसादापनकाले. अञ्ञकम्मट्ठानानि चङ्कमनइरियापथेपि पिट्ठिपसारणकालेपि समिज्झन्ति, न एवमिदन्ति आह – ‘‘इदमस्स एतिस्सा निसज्जाय कम्मट्ठानं अनुच्छविक’’न्ति. आनापानस्सतिन्ति आनापानस्सतिकम्मट्ठानं.

समसीसी होतीति सचे समसीसी हुत्वा न परिनिब्बायति. पच्चेकबोधिं सच्छिकरोति नो चे पच्चेकबोधिं सच्छिकरोति. खिप्पाभिञ्ञोति खिप्पं लहुंयेव पत्तब्बछळभिञ्ञो.

परिपुण्णाति ¶ सोळससु आकारेसु कस्सचिपि अतापनेन सब्बसो पुण्णा. सुभाविताति समथभावनाय विपस्सनाभावनाय च अनुपुब्बसम्पादनेन सुभाविता. गणनाविधानानुपुब्बिया आसेवितत्ता अनुपुब्बं परिचिता.

ओमानं वाति अवजाननं उञ्ञातन्ति एवंविधं मानं वा. अतिमानं वाति ‘‘किं इमेहि, ममेव आनुभावेन जीविस्सामी’’ति एवं अतिमानं वा कुतो जनेस्सतीति.

११४. विसङ्खरित्वाति विसंयुत्ते कत्वा, यथा सङ्गाकारेन गहणं न गच्छति, एवं विनिभुञ्जित्वाति अत्थो. महाभूतानि ताव वित्थारेतु, सम्मसनूपगत्ता, असम्मसनूपगं आकासधातुं अथ कस्मा वित्थारेसीति आह ‘‘उपादारूपदस्सनत्थ’’न्ति. आपोधातु सुखुमरूपं. इतरासु ओळारिकसुखुमतापि लब्भतीति आह ‘‘उपादारूपदस्सनत्थ’’न्ति. हेट्ठा चत्तारि महाभूतानेव कथितानि, न उपादारूपन्ति तस्स पनेत्थ लक्खणहारनयेन आकासदस्सनेन दस्सितता वेदितब्बा. तेनाह ‘‘इमिना मुखेन तं दस्सेतु’’न्ति. न केवलं उपादारूपग्गहणदस्सनत्थमेव आकासधातु वित्थारिता, अथ खो परिग्गहसुखतायपीति दस्सेन्तो ‘‘अपिचा’’तिआदिमाह. तत्थ परिच्छिन्दितब्बस्स रूपस्स निरवसेसपरियादानत्थं ‘‘अज्झत्तिकेना’’ति विसेसनमाह. आकासेनाति आकासधातुया गहिताय. परिच्छिन्नरूपन्ति ताय परिच्छिन्दितकलापगतम्पि पाकटं होति विभूतं हुत्वा उपट्ठाति.

इदानि ¶ वुत्तमेवत्थं सुखग्गहणत्थं गाथाय दस्सेति. तस्साति उपादायरूपस्स. एवं आविभावत्थन्ति एवं परिच्छिन्नताय आकासस्स वसेन विभूतभावत्थं. तन्ति आकासधातुं.

११८. आकासभावं गतन्ति चतूहि महाभूतेहि असम्फुट्ठानं तेसं परिच्छेदकभावेन आकासन्ति गहेतब्बतं गतं, आकासमेव वा आकासगतं यथा ‘‘दिट्ठिगतं (ध. स. ३८१; महानि. १२), अत्थङ्गत’’न्ति (अ. नि. अट्ठ. १.१.१३०) च. आदिन्नन्ति इमन्ति तण्हादिट्ठीहि आदिन्नं. तेनाह ‘‘गहितं परामट्ठ’’न्ति. अञ्ञत्थ कम्मजं ‘‘उपादिन्न’’न्ति वुच्चति, न तथा इधाति आह ‘‘सरीरट्ठकन्ति अत्थो’’ति. पथवीधातुआदीसु ¶ वुत्तनयेनेवाति महाहत्थिपदोपमे (म. नि. १.३०० आदयो) वुत्तनयदस्सनं सन्धाय वदति.

११९. तादिभावो नाम निट्ठितकिच्चस्स होति, अयञ्च विपस्सनं अनुयुञ्जति, अथ किमत्थं तादिभावता वुत्ताति? पथवीसमतादिलक्खणाचिक्खणाहि विपस्सनाय सुखप्पवत्तिअत्थं. तेनाह ‘‘इट्ठानिट्ठेसू’’तिआदि. गहेत्वाति कुसलप्पवत्तिया ओकासदानवसेन परिग्गहेत्वा. न पतिट्ठितोति न निस्सितो न लग्गो.

१२०. ब्रह्मविहारभावना असुभभावना आनापानस्सतिभावना च उपचारं वा अप्पनं वा पापेन्तो विपस्सनाय पादकभावाय अनिच्चादिसञ्ञाय विपस्सनाभावेन उस्सक्कित्वा मग्गपटिपाटिया अरहत्ताधिगमाय होतीति ‘‘मेत्तादिभावनाय पन होती’’ति वुत्तं. यत्थ कत्थचि सत्तेसु सङ्खारेसु च पटिहञ्ञनकिलेसोति आघातभावमेव वदति ञायभावतो अञ्ञेसम्पि. अस्मिमानोति रूपादिके पच्चेकं एकज्झं गहेत्वा ‘‘अयमहमस्मी’’ति एवं पवत्तमानो.

१२१. इदं कम्मट्ठानन्ति एत्थ गणनादिवसेन आसेवियमाना अस्सासपस्सासा योगकम्मस्स पतिट्ठानताय कम्मट्ठानं. तत्थ पन तथापवत्तो मनसिकारो भावना. एत्थ च तस्सेव थेरस्स भगवता बहूनं कम्मट्ठानानं देसितत्ता चरितं अनादियित्वा कम्मट्ठानानि सब्बेसं पुग्गलानं सप्पायानीति अयमत्थो सिद्धो, अतिसप्पायवसेन पन कम्मट्ठानेसु विभागकथा कथिताति वेदितब्बा.

महाराहुलोवादसुत्तवण्णनाय लीनत्थप्पकासना समत्ता.

३. चूळमालुक्यसुत्तवण्णना

१२२. एवं ¶ ठपितानीति ‘‘सस्सतो लोको’’तिआदिनयप्पवत्तानि दिट्ठिगतानि अनिय्यानिकताय न ब्याकातब्बानि न कथेतब्बानि, एवं ठपनीयपक्खे ठपितानि चेव निय्यानिकसासने छड्डनीयताय पटिक्खित्तानि च, अपिचेत्थ अत्थतो पटिक्खेपो एव ब्याकातब्बतो. यथा एको ¶ कम्मकिलेसवसेन इत्थत्तं आगतो, तथा अपरोपि अपरोपीति सत्तो तथागतो वुच्चतीति आह – ‘‘तथागतोति सत्तो’’ति. तं अब्याकरणं मय्हं न रुच्चतीति यदि सस्सतो लोको, सस्सतो लोकोति, असस्सतो लोको, असस्सतो लोकोति जानामाति ब्याकातब्बमेव, यं पन उभयथा अब्याकरणं, तं मे चित्तं न आराधेति अजाननहेतुकत्ता अब्याकरणस्स. तेनाह – ‘‘अजानतो खो पन अपस्सतो एतदेव उजुकं, यदिदं न जानामि न पस्सामी’’ति. सस्सतोतिआदीसु सस्सतोति सब्बकालिको, निच्चो धुवो अविपरिणामधम्मोति अत्थो. सो हि दिट्ठिगतिकेहि लोकीयन्ति एत्थ पुञ्ञपापतब्बिपाका, सयं वा तब्बिपाकाकरादिभावेन अवियुत्तेहि लोकीयतीति लोकोति अधिप्पेतो. एतेन चत्तारोपि सस्सतवादा दस्सिता होन्ति. असस्सतोति न सस्सतो, अनिच्चो अद्धुवो भेदनधम्मोति अत्थो, असस्सतोति च सस्सतभावपटिक्खेपेन उच्छेदो दीपितोति सत्तपि उच्छेदवादा दस्सिता होन्ति. अन्तवाति परिवटुमो परिच्छिन्नपरिमाणो, असब्बगतोति अत्थो. तेन ‘‘सरीरपरिमाणो, अङ्गुट्ठपरिमाणो, यवपरिमाणो परमाणुपरिमाणो अत्ता’’ति (उदा. अट्ठ. ५४; दी. नि. टी. १.७६-७७) एवमादिवादा दस्सिता होन्ति.

तथागतो परं मरणाति तथागतो जीवो अत्ता मरणतो इमस्स कायस्स भेदतो परं उद्धं होति अत्थि संविज्जतीति अत्थो. एतेन सस्सतभावमुखेन सोळस सञ्ञीवादा, अट्ठ असञ्ञीवादा, अट्ठ च नेवसञ्ञीनासञ्ञीवादा दस्सिता होन्ति. न होतीति नत्थि न उपलब्भति. एतेन उच्छेदवादो दस्सितो होति. अपिच होति च न च होतीति अत्थि नत्थि चाति. एतेन एकच्चसस्सतवादो दस्सितो. नेव होति न न होतीति पन इमिना अमराविक्खेपवादो दस्सितोति वेदितब्बं. भगवता पन अनिय्यानिकत्ता अनत्थसंहितानि इमानि दस्सनानीति तानि न ब्याकतानि, तं अब्याकरणं सन्धायाह अयं थेरो ‘‘तं मे न रुच्चती’’ति. सिक्खं पटिक्खिपित्वा यथासमादिन्नसिक्खं पहाय.

१२५. त्वं ¶ नेव ¶ याचकोति अहं भन्ते भगवति ब्रह्मचरियं चरिस्सामीतिआदिना. न याचितकोति त्वं मालुक्यपुत्त मयि ब्रह्मचरियं चरातिआदिना.

१२६. परसेनाय ठितेन पुरिसेन. बहललेपनेनाति बहलविलेपनेन. महासुपियादि सब्बो मुदुहिदको वेणुविसेसो सण्हो. मरुवाति मकचि. खीरपण्णिनोति खीरपण्णिया, यस्सा छिन्दनमत्ते पण्णे खीरं पग्घरति. गच्छन्ति गच्छतो जातं सयंजातगुम्बतो गहितन्ति अधिप्पायो. सिथिलहनु नाम दत्ता कण्णो पतङ्गो. एताय दिट्ठिया सति न होतीति ‘‘सस्सतो लोको’’ति एताय दिट्ठिया सति मग्गब्रह्मचरियवासो न होति, तं पहाय एव पत्तब्बतो.

१२७. अत्थेव जातीतिआदिना एता दिट्ठियो पच्चेकम्पि संसारपरिब्रूहना कटसिवड्ढना निब्बानविबन्धनाति दस्सेति.

१२८. तस्मातिहाति इदं अट्ठाने उद्धटं, ठानेयेव पन ‘‘वुत्तपटिपक्खनयेन वेदितब्ब’’न्ति इमस्स परतो कत्वा संवण्णेतब्बं. अत्तनो फलेन अरणीयतो अनुगन्तब्बतो कारणम्पि ‘‘अत्थो’’ति वुच्चतीति आह ‘‘कारणनिस्सित’’न्ति. तेनाह ‘‘ब्रह्मचरियस्स आदिमत्तम्पी’’ति. पुब्बपदट्ठानन्ति पठमारम्भो. सेसं सुविञ्ञेय्यमेव.

चूळमालुक्यसुत्तवण्णनाय लीनत्थप्पकासना समत्ता.

४. महामालुक्यसुत्तवण्णना

१२९. ओरं ¶ वुच्चति कामधातु, तत्थ पवत्तिया संवत्तनतो ओरं भजन्तीति ओरम्भागियानि, हेट्ठिममग्गवज्झताय ओरम्भागे हेट्ठाकोट्ठासे भजन्तीति ओरम्भागियानि क-कारस्स य-कारं कत्वा. तेनाह ‘‘हेट्ठाकोट्ठासिकानी’’तिआदि. कम्मुना हि वट्टेन च दुक्खं संयोजेन्तीति संयोजनानि, ओरम्भागियसञ्ञितानि संयोजनानि यस्स अप्पहीनानि, तस्सेव वट्टदुक्खं. यस्स पन तानि पहीनानि, तस्स तं नत्थीति. अप्पहीनताय अनुसेतीति अरियमग्गेन असमुच्छिन्नताय कारणलाभे ¶ सति उप्पज्जति, अप्पहीनभावेन अनुसेति. अनुसयमानो संयोजनं नाम होतीति अनुसयत्तं फरित्वा पवत्तमानो पापधम्मो यथावुत्तेनत्थेन संयोजनं नाम होति. एतेन यदि पन अनुसयतो संयोजनं पवत्तं, तथापि ये ते कामरागादयो ‘‘अनुसया’’ति वुच्चन्ति, तेयेव बन्धनट्ठेन संयोजनानीति दस्सेति.

एवं सन्तेपीति यदेव ओरम्भागियसंयोजनं भगवता पुच्छितं, तदेव थेरेनपि विस्सज्जितं, तथापि अयं लद्धि सन्निस्सया. तत्थ दोसारोपनाति दस्सेतुं ‘‘तस्स वादे’’तिआदि वुत्तं. समुदाचारक्खणेयेवाति पवत्तिक्खणे एव. न हि सब्बे वत्तमाना किलेसा संयोजनत्थं फरन्तीति अधिप्पायो. तेनाति तेन कारणेन, तथालद्धिकत्ताति अत्थो. चिन्तेसि ‘‘धम्मं देसेस्सामी’’ति योजना. अत्तनो धम्मतायेवाति अज्झत्तासयेनेव. विसंवादिताति सत्थु चित्तस्स अनाराधनेन विवेचिता. एवमकासि एवं धम्मं देसापेसि.

१३०. सक्कायदिट्ठिपरियुट्ठितेनाति परियुट्ठानसमत्थसक्कायदिट्ठिकेन. तथाभूतञ्च चित्तं ताय दिट्ठिया विगय्हितं अज्झोत्थटञ्च नाम होतीति आह ‘‘गहितेन अभिभूतेना’’ति. दिट्ठिनिस्सरणं नाम दस्सनमग्गो तेन समुच्छिन्दितब्बतो, सो पन निब्बानं आगम्म तं समुच्छिन्दति, तस्मा वुत्तं ‘‘दिट्ठिनिस्सरणं निब्बान’’न्ति. अविनोदिता अनीहटाति पदद्वयेनपि समुच्छेदवसेन अप्पहीनत्तंयेव वदति. अञ्ञं संयोजनं अञ्ञो अनुसयोति वदन्ति, सहभावो नाम अञ्ञेन होति. न हि तदेव तेन सहाति वुच्चतीति तेसं अधिप्पायो. अञ्ञेनाति अत्थतो अञ्ञेन. अवत्थामत्ततो यदिपि अवयवविनिमुत्तो समुदायो नत्थि, अवयवो पन समुदायो न होतीति सो समुदायतो अञ्ञो एवाति सक्का वत्तुन्ति यथावुत्तस्स परिहारस्स अप्पाटिहीरकतं आसङ्कित्वा पक्खन्तरं आसल्लितं ‘‘अथापि सिया’’तिआदिना. पक्खन्तरेहि परिहारा ¶ होन्तीति यथावुत्तञायेनपि अञ्ञो पुरिसो अथापि सिया, अयं पनेत्थ अञ्ञो दोसोति आह ‘‘यदि तदेवा’’तिआदि. अथापि सिया तुय्हं यदि परिवितक्को ईदिसो यदि तदेव संयोजनन्तिआदि. इममत्थं सन्धायाति परमत्थतो सो एव ¶ किलेसो संयोजनमनुसयो च, बन्धनत्थअप्पहीनत्थानं पन अत्थेव भेदोति इममत्थं सन्धाय.

१३२. तचच्छेदो विय समापत्ति किलेसानं समापत्तिविक्खम्भनस्स सारच्छेदस्स अनुसयस्स दूरभावतो. फेग्गुच्छेदो विय विपस्सना तस्स आसन्नभावतो. एवरूपा पुग्गलाति अभावितसद्धादिबलताय दुब्बलनामकाया पुग्गला, येसं सक्कायनिरोधाय…पे… नाधिमुच्चति. एवं दट्ठब्बाति यथा सो दुब्बलको पुरिसो, एवं दट्ठब्बो सो पुरिसो गङ्गापारं विय सक्कायपारं गन्तुं असमत्थत्ता. वुत्तविपरियायेन सुक्कपक्खस्स अत्थो वेदितब्बो.

१३३. उपधिविवेकेनाति इमिना उपधिविवेकाति करणे निस्सक्कनन्ति दस्सेति, उपधिविवेकाति वा हेतुम्हि निस्सक्कवचनस्स उपधिविवेकेनाति हेतुम्हि करणवचनेन पञ्चकामगुणविवेको कथितो. कामगुणापि हि उपधीयति एत्थ दुक्खन्ति उपधीति वुच्चन्तीति. थिनमिद्धपच्चया कायविजम्भितादिभेदं कायालसियं. तत्थाति अन्तोसमापत्तियं समापत्तिअब्भन्तरे जातं. तं पन समापत्तिपरियापन्नम्पि अपरियापन्नम्पीति तदुभयं दस्सेतुं ‘‘अन्तोसमापत्तिक्खणेयेवा’’तिआदि वुत्तं. रूपादयो धम्मेति रूपवेदनादिके पञ्चक्खन्धधम्मे. न निच्चतोति इमिना निच्चपटिक्खेपतो तेसं अनिच्चतमाह. ततो एव उदयवयन्ततो विपरिणामतो तावकालिकतो च ते अनिच्चाति जोतितं होति. यञ्हि निच्चं न होति, तं उदयब्बयपरिच्छिन्नं जराय मरणेन चाति द्वेधा विपरिणतं इत्तरखणमेव च होति. न सुखतोति इमिना सुखपटिक्खेपतो तेसं दुक्खतमाह, अतो एव अभिण्हं पटिपीळनतो दुक्खवत्थुतो च ते दुक्खाति जोतितं होति. उदयब्बयवन्तताय हि ते अभिण्हं पटिपीळनतो निरन्तरदुक्खताय दुक्खस्सेव च अधिट्ठानभूताति. पच्चययापनीयताय रोगमूलताय च रोगतो. दुक्खतासूलयोगिताय किलेसासुचिपग्घरणतो उप्पादजराभङ्गेहि उद्धुमातपक्कभिज्जनतो च गण्डतो. पीळाजननतो अन्तोतुदनतो दुन्नीहरणतो च अवद्धिआवहतो अघवत्थुतो च असेरीभावतो आबाधपदट्ठानताय च आबाधतो. अवसवत्तनतो अविधेय्यताय परतो ¶ . ब्याधिजरामरणेहि पलुज्जनीयताय पलोकतो. सामीनिवासीकारकवेदकअधिट्ठायकविरहतो सुञ्ञतो. अत्तपटिक्खेपट्ठेन अनत्ततो, रूपादिधम्मापि न एत्थ अत्ता होन्तीति अनत्ता, एवं अयम्पि न अत्ता होतीति अनत्ता. तेन ¶ अब्यापारतो निरीहतो तुच्छतो अनत्ताति दीपितं होति. लक्खणत्तयमेव अवबोधत्थं एकादसहि पदेहि विभजित्वा गहितन्ति दस्सेतुं ‘‘तत्था’’तिआदि वुत्तं.

अन्तोसमापत्तियन्ति समापत्तीनं सहजातताय समापत्तीनं अब्भन्तरे. चित्तं पटिसंहरतीति तप्पटिबद्धछन्दरागादिउपक्किलेसविक्खम्भनेन विपस्सनाचित्तं पटिसंहरति. तेनाह ‘‘मोचेती’’ति. सवनवसेनाति ‘‘सब्बसङ्खारसमथो’’तिआदिना सवनवसेन. थुतिवसेनाति तथेव थोमनावसेन गुणतो संकित्तनवसेन. परियत्तिवसेनाति तस्स धम्मस्स परियापुणनवसेन. पञ्ञत्तिवसेनाति तदत्थस्स पञ्ञापनवसेन. आरम्मणकरणवसेनेव उपसंहरति मग्गचित्तं. एतं सन्तन्तिआदि पन अवधारणनिवत्तितत्थदस्सनं. यथा विपस्सना ‘‘एतं सन्तं एतं पणीत’’न्तिआदिना असङ्खताय धातुया चित्तं उपसंहरति, एवं मग्गो निब्बानं सच्छिकिरियाभिसमयवसेन अभिसमेन्तो तत्थ लब्भमाने सब्बे विसेसे असम्मोहतो पटिविजानन्तो तत्थ चित्तं उपसंहरति. तेनाह ‘‘इमिना पन आकारेना’’तिआदि. सो तत्थ ठितोति सो अदन्धविपस्सनो योगी तत्थ ताय अनिच्चादिलक्खणत्तयारम्मणाय विपस्सनाय ठितो. सब्बसोति तस्स मग्गस्स अधिगमाय निब्बत्तितसमथविपस्सनासु. असक्कोन्तो अनागामी होतीति हेट्ठिममग्गवहासु एव समथविपस्सनासु छन्दरागं पहाय अग्गमग्गवहासु तासु निकन्तिं परियादातुं असक्कोन्तो अनागामितायमेव सण्ठाति.

समतिक्कन्तत्ताति समथवसेन विपस्सनावसेन चाति सब्बथापि रूपस्स अतिक्कन्तत्ता. तेनाह ‘‘अयञ्ही’’तिआदि. अनेनाति योगिना. तं अतिक्कम्माति इदं यो वा पठमं पञ्चवोकारभवपरियापन्ने धम्मे सम्मदेव सम्मसित्वा ते विवज्जेत्वा ततो अरूपसमापत्तिं समापज्जित्वा अरूपधम्मे सम्मसति, तं सन्धाय वुत्तं. तेनाह ‘‘इदानि अरूपं सम्मसती’’ति.

समथवसेन ¶ गच्छतोति समथप्पधानं पुब्बभागपटिपदं अनुयुञ्जन्तस्स. चित्तेकग्गता धुरं होतीति तस्स विपस्सनाभावनाय तथा पुब्बे पवत्तत्ता वुट्ठानगामिनिविपस्सना समाधिप्पधाना होति, मग्गेपि चित्तेकग्गता धुरं होति, समाधिन्द्रियं पुब्बङ्गमं बलवं होति. सो चेतोविमुत्तो नामाति सो अरियो चेतोविमुत्तो नाम होति. विपस्सनावसेन गच्छतोति ‘‘समथवसेन गच्छतो’’ति एत्थ वुत्तनयानुसारेन अत्थो वेदितब्बो. अयञ्च पुग्गलविभागो सुत्तन्तनयेन इधाभिहितो परियायो नाम, अभिधम्मनयेन परतो कीटागिरिसुत्तवण्णनायं दस्सयिस्साम. अयं सभावधम्मोयेवाति पुब्बभागपटिपदा समथप्पधाना चे समाधि धुरं, विपस्सनापधाना चे पञ्ञा धुरन्ति अयं धम्मसभावोयेव, एत्थ किञ्चि न आसङ्कितब्बं.

इन्द्रियपरोपरियत्तं ¶ इन्द्रियवेमत्तता. तेनाह ‘‘इन्द्रियनानत्तं वदामी’’ति. इन्द्रियनानत्तता कारणन्ति इदं दस्सेति – अनिच्चादिवसेन विपस्सनाभिनिवेसो विय समथवसेन विपस्सनावसेन च यं पुब्बभागगमनं, तं अप्पमाणं तं वुट्ठानगामिनिविपस्सनं, यस्स समाधि धुरं पुब्बङ्गमं बलवं होति, सो अरियो चेतोविमुत्ति नाम होति. यस्स पञ्ञा धुरं पुब्बङ्गमं बलवं होति सो अरियो पञ्ञाविमुत्तो नाम होति. इदानि तमत्थं बुद्धिविसिट्ठेन निदस्सनेन दस्सेन्तो ‘‘द्वे अग्गसावका’’तिआदिमाह, तं सुविञ्ञेय्यमेव.

महामालुक्यसुत्तवण्णनाय लीनत्थप्पकासना समत्ता.

५. भद्दालिसुत्तवण्णना

१३४. असियतीति ¶ असनं, भुञ्जनं भोजनं, असनस्स भोजनं असनभोजनं, आहारपरिभोगो, एकस्मिं काले असनभोजनं एकासनभोजनं. सो पन कालो सब्बबुद्धानं सब्बपच्चेकबुद्धानं आचिण्णसमाचिण्णवसेन पुब्बण्हो एव इधाधिप्पेतोति आह ‘‘एकस्मिं पुरेभत्ते असनभोजन’’न्ति. विप्पटिसारकुक्कुच्चन्ति ‘‘अयुत्तं वत मया कतं, यो अत्तनो सरीरपकतिं अजानन्तो एकासनभोजनं भुञ्जि, येन मे इदं सरीरं किसं जातं ब्रह्मचरियानुग्गहो नाहोसी’’ति एवं ¶ विप्पटिसारकुक्कुच्चं भवेय्य. एतं सन्धाय सत्था आह, न भद्दालिमेव तादिसं किरियं अनुजानन्तो. इतरथाति यदि एकंयेव भत्तं द्विधा कत्वा ततो एकस्स भागस्स भुञ्जनं एकदेसभुञ्जनं अधिप्पेतं. को सक्कोतीति को एवं यापेतुं सक्कोति. अतीतजातिपरिचयोपि नाम इमेसं सत्तानंयेव अनुबन्धतीति आह ‘‘अतीते’’तिआदि. विरवन्तस्सेवाति अनादरे सामिवचनं. तं मद्दित्वाति ‘‘अयं सिक्खा सब्बेसम्पि बुद्धानं सासने आचिण्णं, अयञ्च भिक्खु इमं सिक्खतेवा’’ति वत्वा तं भद्दालिं तस्स वा अनुस्साहपवेदनं अभिभवित्वा. भिक्खाचारगमनत्थं न वितक्कमाळकं अगमासि, विहारचारिकं चरन्तो तस्स वसनट्ठानं भगवा गच्छति.

१३५. दूसयन्ति गरहन्ति एतेनाति दोसो, अपराधो, सो एव कुच्छितभावेन दोसको. गरहाय पवत्तिट्ठानतो ओकासो. तेनाह – ‘‘एतं ओकासं एतं अपराध’’न्ति. दुक्करतरन्ति पतिकारवसेन अतिसयेन दुक्करं. अपराधो हि न खमापेन्तं यथापच्चयं वित्थारितो हुत्वा दुप्पतिकारो होति. तेनाह ‘‘वस्सञ्ही’’तिआदि.

अलग्गित्वाति इमम्पि नाम अपनीतं अकासीति एवं अविनेत्वा, तं तं तस्स हितपटिपत्तिं निवारणं कत्वाति अत्थो. ञायपटिपत्तिं अतिच्च एति पवत्ततीति अच्चयो, अपराधो, पुरिसेन मद्दित्वा पवत्तितो अपराधो अत्थतो पुरिसं अतिच्च अभिभवित्वा पवत्तो नाम होति. तेनाह ‘‘अच्चयो मं, भन्ते, अच्चगमा’’ति. अवसेसपच्चयानं समागमे एति फलं एतस्मा उप्पज्जति पवत्तति चाति समयो, हेतु यथा ‘‘समुदायो’’ति आह ‘‘एकं कारण’’न्ति. यं पनेत्थ भद्दालित्थेरस्स अपरिपूरकारिताय भिक्खुआदीनं जाननं, तम्पि कारणं कत्वा ‘‘अहं खो, भन्ते, न उस्सहामी’’तिआदिना वत्तब्बन्ति दस्सेति.

१३६. एकचित्तक्खणिकाति ¶ पठममग्गचित्तक्खणेन एकचित्तक्खणिका. एवं आणापेतुं न युत्तन्ति सङ्कमत्थाय आणापेतुं न युत्तं पयोजनाभावतो. अनाचिण्णञ्चेतं बुद्धानं, यदिदं पदसा अक्कमनं. तथा हि –

‘‘अक्कमित्वान मं बुद्धो, सह सिस्सेहि गच्छतु;

मा नं कललं अक्कमित्थ, हिताय मे भविस्सती’’ति. (बु. वं. २.५३);

सुमेधपण्डितेन ¶ पच्चासीसितं न कतं. यथाह –

‘‘दीपङ्करो लोकविदू, आहुतीनं पटिग्गहो;

उस्सीसके मं ठत्वान, इदं वचनमब्रवी’’ति. (बु. वं. २.६०);

भगवता आणत्ते सति तेसम्पि एवं कातुं न युत्तन्ति एत्थापि एसेव नयो. एतेसं पटिबाहितुं युत्तन्ति इदं अट्ठानपरिकप्पनवसेनेव वुत्तं. न हि बुद्धानं कातुं आरद्धं नाम किच्चं केहिचि पटिबाहितुं युत्तं नाम अत्थि पटिबाहितुंयेव अकरणतो. सम्मत्तनियामस्स अनोक्कन्तत्ता वुत्तं ‘‘बाहिरको’’ति.

१३७. न कम्मट्ठानं अल्लीयतीति चित्तं कम्मट्ठानं न ओतरति.

१४०. पुनप्पुनं कारेन्तीति दण्डकम्मपणामनादिकारणं पुनप्पुनं कारेन्ति. सम्मावत्तम्हि न वत्ततीति तस्सा तस्सा आपत्तिया वुट्ठानत्थं भगवता पञ्ञत्तसम्मावत्तम्हि न वत्तति. अनुलोमवत्ते न वत्ततीति येन येन वत्तेन सङ्घो अनुलोमिको होति, तस्मिं तस्मिं अनुलोमवत्ते न वत्तति विलोममेव गण्हाति, पटिलोमेन होति. नित्थारणकवत्तम्हीति येन वत्तेन सङ्घो अनुलोमिको होति, सापत्तिकभावतो नित्थिण्णो होति, तम्हि नित्थारणवत्तस्मिं न वत्तति. तेनाह ‘‘आपत्ती’’तिआदि. दुब्बचकरणेति दुब्बचस्स भिक्खुनो करणे.

१४४. यापेतीति वत्तति, सासने तिट्ठतीति अत्थो. अभिञ्ञापत्ताति ‘‘असुको असुको च थेरो सीलवा कल्याणधम्मो बहुस्सुतो’’तिआदिना अभिञ्ञातभावं पत्ता अधिगतअभिञ्ञाता.

१४५. सत्तेसु हायमानेसूति किलेसबहुलताय पटिपज्जनकसत्तेसु परिहायन्तेसु पटिपथेसु ¶ जायमानेसु. अन्तरधायति नाम तदाधारताय. दिट्ठधम्मिका परूपवादादयो. सम्परायिका अपायदुक्खविसेसा. आसवन्ति तेन तेन पच्चयेन पवत्तन्तीति आसवा. नेसन्ति परूपवादादिआसवानं. तेति वीतिक्कमधम्मा.

अकालं दस्सेत्वाति सिक्खापदपञ्ञत्तिया अकालं दस्सेत्वा. उप्पत्तिन्ति आसवट्ठानियानं धम्मानमुप्पत्तिं. सिक्खापदपञ्ञत्तिया कालं, ताव ¶ सेनासनानि पहोन्ति, तेन आवासमच्छरियादिहेतुना सासने एकच्चे आसवट्ठानिया धम्मा न उप्पज्जन्ति. इमिना नयेनाति इमिना पन हेतुना पदसोधम्मसिक्खापदानं सङ्गहो दट्ठब्बो.

यसन्ति कित्तिसद्दं परिवारञ्च. सागतत्थेरस्स नागदमनकित्तियसादिवसेन सुरापानसङ्खातो आसवट्ठानियो धम्मो उप्पज्जि.

रसेन रसं संसन्देत्वाति उपादिन्नकफस्सरसेन अनुपादिन्नकफस्सरसं संसन्देत्वा.

१४६. न खो, भद्दालि, एसेव हेतु, अथ खो अञ्ञम्पि अत्थीति दस्सेन्तो भगवा ‘‘अपिचा’’तिआदिमाह. तेन धम्मस्स सक्कच्चसवने थेरं नियोजेति.

१४७. विसेवनाचारन्ति अदन्तकिरियं. परिनिब्बायतीति वूपसम्मति. तत्थ अदन्तकिरियं पहाय दन्तो होति. युगस्साति रथधुरस्स.

अनुक्कमेति अनुरूपपरिगमे. तदवत्थानुरूपं पादानं उक्खिपने निक्खिपने च. तेनाह ‘‘चत्तारो पादे’’तिआदि. रज्जुबन्धनविधानेनाति पादतो भूमिया मोचनविधानेन. एवं करणत्थन्ति यथा अस्से निसिन्नस्सेव भूमिं गहेतुं सक्का, एवं चत्तारो पादे तथा कत्वा अत्तनो निच्चलभावकरणत्थं. मण्डलेति मण्डलधाविकायं. पथवीकमनेति पथविं फुट्ठमत्तेन गमने. तेनाह ‘‘अग्गग्गखुरेही’’ति. ओक्कन्तकरणस्मिन्ति ओक्कन्तेत्वा परसेनासम्मद्दन ओक्कन्तकरणे. एकस्मिं ठानेति चतूसु पादेसु यत्थ कत्थचि एकस्मिं ठाने गमनं चोदेन्तीति अत्थो, सो पनेत्थ सीघतरो अधिप्पेतो. दवत्तेति मरियादाकोपनेहि नानप्पयोजने, परसेनाय पवत्तमहानादपहरणेहि अत्थो. तेनाह ‘‘युद्धकालस्मि’’न्तिआदि.

रञ्ञा जानितब्बगुणेति यथा राजा अस्सस्स गुणे जानाति, एवं तेन जानितब्बगुणकारणं ¶ कारेति. अस्सराजवंसेति दुस्सहं दुक्खं पत्वापि यथा अयं राजवंसानुरूपकिरियं न जहिस्सति, एवं सिक्खापने. सिक्खापनमेव हि सन्धाय सब्बत्थ ‘‘कारणं कारेती’’ति वुत्तं तस्स करणकारापनपरियायत्ता.

यथा ¶ उत्तमजवो होतीति जवदस्सनट्ठाने यथा हयो उत्तमजवं न हापेसि, एवं सिक्खापेति. उत्तमहयभावे, यथा उत्तमहयो होतीति कम्मकरणकाले अत्तनो उत्तमसभावं अनिगुहित्वा अवज्जेत्वा यथा अत्थसिद्धि होति, एवं परमजवेन सिक्खापेति. यथा किरिया विना दब्बम्पि विना किरियं न भवति, एवं दट्ठब्बन्ति दस्सेतुं ‘‘तत्थ पकतिया’’तिआदि वुत्तं.

तत्राति तस्मिं पकतिया उत्तमहयस्सेव उत्तमहयकारणारहत्ता उत्तमजवपटिपज्जने. मासखादकघोटकानन्ति मासं खादित्वा यथा तथा विगुणखलुङ्गकानं. वलञ्जकदण्डन्ति रञ्ञा गहेतब्बसुवण्णदण्डं. धातुपत्थद्धोति अत्तनाव समुप्पादितधातुया उपत्थम्भितो हुत्वा.

उत्तमे साखल्येति परमसखिलभावे सखिलवाचाय एव दमेतब्बताय. तेनाह ‘‘मुदुवाचाय ही’’तिआदि.

अरहत्तफलसम्मादिट्ठियाति फलसमापत्तिकाले पवत्तसम्माञाणं. सम्माञाणं पुब्बे वुत्तसम्मादिट्ठियेवाति पन इदं फलसम्मादिट्ठिभावसामञ्ञेन वुत्तं. केचि पन ‘‘पच्चवेक्खणञाण’’न्ति वदन्ति, तं न युज्जति ‘‘असेक्खेना’’ति विसेसितत्ता. तम्पि असेक्खञाणन्ति चे? एवम्पि निप्परियाय सेक्खग्गहणे परियायसेक्खग्गहणं न युत्तमेव, किच्चभेदेन वा वुत्तन्ति दट्ठब्बं. एका एव हि सा पञ्ञा निब्बानस्स पच्चक्खकिरियाय सम्मादस्सनकिच्चं उपादाय ‘‘सम्मादिट्ठी’’ति वुत्ता, सम्माजाननकिच्चं उपादाय ‘‘सम्माञाण’’न्ति. अञ्ञाताविन्द्रियवसेन वा सम्मादिट्ठि, पञ्ञिन्द्रियवसेन सम्माञाणन्ति एवमेत्थ अत्थो दट्ठब्बो. मग्गफलावहाय देसनाय सङ्खेपतोव आगतत्ता वुत्तं ‘‘उग्घटितञ्ञुपुग्गलस्स वसेना’’ति.

भद्दालिसुत्तवण्णनाय लीनत्थप्पकासना समत्ता.

६. लटुकिकोपमसुत्तवण्णना

१४८. महाउदायित्थेरोति ¶ काळुदायिलाळुदायित्थेरेहि अञ्ञो महादेहताय महाउदायीति सासने पञ्ञातो थेरो. अपहरि अपहरति अपहरिस्सतीति अपहत्ता. तेकालिको हि अयं ¶ सद्दो. उपहत्ताति एत्थापि एसेव नयो. अपहारकोति अपनेता. उपहारकोति उपनेता.

१४९. यन्ति भुम्मत्थे पच्चत्तवचनं, तेन च अनन्तरनिद्दिट्ठसमयो पच्चामट्ठोति आह ‘‘यस्मिं समये’’ति. न भगवन्तं पटिच्चाति न भगवन्तं आरम्मणं कत्वा.

कम्मनिप्फन्नत्थन्ति अत्तना आयाचियमानकम्मसिद्धिअत्थं. भवतीति भू, न भूति अभू, भयवसेन पन सा इत्थी ‘‘अभु’’न्ति आह. आतु मातूति एत्थ यथा –

‘‘अङ्गा अङ्गा सम्भवसि, हदया अधिजायसे;

अत्ता एव पुत्त नामासि, स जीव सरदोसत’’न्ति. –

आदीसु पुत्तो ‘‘अत्ता’’ति वुच्चति कुलवसेन सन्ताने पवत्तनतो. एवं पितापि ‘‘पुत्तस्स अत्ता’’ति वुच्चति. यस्मा ‘‘भिक्खुस्स अत्ता माता’’ति वत्थुकामा भयवसेन ‘‘आतु मातू’’ति आह. तेनाह ‘‘आतूति पिता’’तिआदि.

१५०. एवमेवन्ति इदं गरहत्थजोतननिपातपदन्ति वुत्तं ‘‘गरहन्तो आहा’’ति. तथा हि नं वाचकसद्देनेव दस्सेन्तो ‘‘इधेकच्चे मोघपुरिसा’’ति आह. आहंसूति तेसं तथा वचनस्स अविच्छेदेन पवत्तिदीपनन्ति आह ‘‘वदन्ती’’ति. किं पनिमस्स अप्पमत्तकस्साति पहातब्बवत्थुं अवमञ्ञमानेहि वुत्तं. तेनाह ‘‘किं पना’’ति. हेतुम्हि जोतेतब्बे चेतं सामिवचनं यथा ‘‘अनुस्सवस्स हेतु, अज्झेनस्स हेतू’’ति. तेनाह ‘‘अप्पमत्तकस्स हेतू’’ति. ननु अपस्सन्तेन विय असुणन्तेन विय भवितब्बन्ति? सत्थारा नाम अप्पमत्तकेसु दोसेसु अपस्सन्तेन विय च असुणन्तेन विय च भवितब्बन्ति तेसं अधिप्पायेन विवरणं. तेसु चाति सिक्खाकामेसु च. अप्पच्चयं उपट्ठापेन्तीति आनेत्वा सम्बन्धितब्बन्ति दस्सेति. तेसन्ति ये ‘‘मोघपुरिसा’’ति वुत्ता पुग्गला, तेसं. गले बद्धं महाकट्ठन्ति गले ओलम्बेत्वा बद्धं रुक्खदण्डमाह. ¶ पूतिलतायाति गलोचिया. पाराजिकवत्थु विय दुप्पजहं होतीति छन्दकप्पहानवसेन तं पजहितुं न सक्कोति.

१५१. अनुस्सुक्काति ¶ तस्स पहातब्बस्स पहाने उस्सुक्करहिता. अपच्चासीसनपक्खेति ताय परदत्तवुत्तिताय कस्सचि पच्चयस्स कुतोचि अपच्चासीसकपक्खे ठिता हुत्वा सुप्पजहं होति, न तस्स पहाने भारियं अत्थि.

१५२. दलिद्दो दुग्गतो. अस्सकोति असापतेय्यो. गेहयट्ठियोति गेहछदनस्स आधारा, ता उजुकं तिरियं ठपेतब्बदण्डा. समन्ततो भित्तिपादेसु ठपेतब्बदण्डा मण्डला. काकातिदायिन्ति इतो चितो काकेहि अतिपातवसेन उड्डेतब्बं. तेनाह ‘‘यत्थ किञ्चिदेवा’’तिआदि. सूरकाकाति काकानं उड्डेपनाकारमाह. नपरमरूपन्ति हीनरूपं. विलीवमञ्चकोति तालवेत्तकादीहि वीतमञ्चको. सा पनस्स सन्तानानं छिन्नभिन्नताय ओलुग्गविलुग्गता, तथा सति सा विसमरूपा होतीति आह ‘‘ओणता’’तिआदि. सो पुग्गलो लूखभोजी होतीति आह ‘‘धञ्ञं नाम कुद्रूसको’’ति. समकालं वपितब्बताय समवापकं, यथाउतु वपितब्बबीजं. जायिकाति कुच्छिता भरिया, सब्बत्थ गरहायं क-सद्दो. सो वताहं पब्बजेय्यन्ति सोहं केसमस्सुं ओहारेत्वा पब्बजेय्यं, योहं पुरिसो नाम अस्सं वताति पब्बज्जावसेन अत्तनो पुरिसं बोधेय्य. तंसभावे ठितस्स बोधा न तु दुक्करा, सा खटोपिका. सा कुम्भी. मेण्डकसेट्ठिनो अड्ढतेळसानि कोट्ठागारसतानि विय.

१५३. सुवण्णनिक्खसतानन्ति अनेकेसं सुवण्णनिक्खसतानं. चयोति सन्तानेहि निचयो अवीचि निच्चप्पबन्धनिचयो. तेनाह ‘‘सन्तानतो कतसन्निचयो’’ति.

१५४. हेट्ठा किञ्चापि अप्पजहनका पठमं दस्सिता, पजहनका पधाना, तेसञ्च वसेनेत्थ पुग्गलचतुक्कं दस्सितं. ते तञ्चेव पजहन्तीति पजहनका पठमं गहिता. रासिवसेनाति ‘‘इधुदायि एकच्चो पुग्गलो’’तिआदिना चतुक्के आगतविभागं अनामसित्वा ‘‘ते ते’’ति पचुरवसेन वुत्तं. तेनाह ‘‘न पाटियेक्कं विभत्ता’’ति. अविभागेन गहितवत्थूसु विभागतो गहणं लोकसिद्धमेतन्ति दस्सेतुं ‘‘यथा नामा’’तिआदि ¶ वुत्तं. पजहनकपुग्गलाति ‘‘ते तञ्चेव पजहन्ती’’ति एवं पजहनकपुग्गला एव.

उपधिअनुधावनकाति उपधीसु अनुअनुधावनका उपधियो आरब्भ पवत्तनका. वितक्कायेवाति ¶ कामसङ्कप्पादिवितक्कायेव. इन्द्रियनानत्तताति विमुत्तिपरिपाचकानं इन्द्रियानं परोपरियत्तं. तस्स हि वसेनेव ते चत्तारो पुग्गला जाता. अग्गमग्गत्थाय विपस्सनं उस्सुक्कापेत्वा याव न तं मग्गेन समुग्घातेन्ति, ताव नप्पजहन्ति नाम. इति हेट्ठिमा तयोपि अरिया अप्पहीनस्स किलेसस्स वसेन ‘‘नप्पजहन्ती’’ति वुत्ता, पगेव पुथुज्जना. वुत्तनयेन पन विपस्सनं मग्गेन घटेन्ता ते चत्तारो जना अग्गमग्गक्खणे पजहन्ति नाम. ते एव तत्थ सीघकारिनो खिप्पं पजहन्ति नाम, तेनाह ‘‘तत्था’’तिआदि.

संवेगं कत्वा अग्गिं अक्कन्तपुरिसो विय. मग्गेनाति अनुक्कमागतेन अग्गमग्गेन. महाहत्थिपदोपमेति महाहत्थिपदोपमसुत्ते (म. नि. १.३०० आदयो). तत्थ हि ‘‘तस्स धातारम्मणमेव चित्तं पक्खन्दति पसीदति सन्तिट्ठति अधिमुच्चती’’ति (म. नि. १.३०२) एत्थ अतितिक्खनातितिक्ख-नातिमन्दअतिमन्द-पुग्गलवसेन अट्ठकथायं (म. नि. अट्ठ. २.३०२) तयो वारा उद्धटा, तत्थ मज्झिमवसेनेव पञ्हो कथितो. इन्द्रियभावनेति इन्द्रियभावनासुत्ते, तत्थापि मज्झिमनयेनेव पञ्हो कथितो. तेनाह ‘‘इमेसू’’तिआदि.

तन्ति ‘‘उपधी’’ति वुत्तं खन्धपञ्चकं. दुक्खस्स मूलन्ति सब्बस्सपि वट्टदुक्खस्स कारणं. निग्गहणोति निरुपादानो. तेनाह ‘‘नित्तण्हो’’ति.

१५५. ये पजहन्तीति ‘‘ते तञ्चेव पजहन्ती’’ति एवं वुत्तपुग्गला. ते इमे नाम एत्तके किलेसे पजहन्तीति ये ते पुथुज्जना लाभिनो च पञ्च कामगुणे एत्तके तंतंझानादिवत्थुके च तंतंमग्गवज्झताय परिच्छिन्नत्ता एत्तके किलेसे पजहन्ति. ये नप्पजहन्तीति एत्थ वुत्तनयानुसारेन अत्थो वेदितब्बो. असुचिसुखं कायासुचिसन्निस्सितत्ता. अनरियेहीति अपरिसुद्धेहि. पटिलाभतो भायितब्बं किलेसदुक्खगतिकत्ता. विपाकतो भायितब्बं अपायदुक्खगतिकत्ता. गणतोपि किलेसतोपि विवित्तसुखन्ति गणसङ्गणिकतो च किलेससङ्गणिकतो ¶ च विवित्तसुखं. रागादिवूपसमत्थायाति रागादिवूपसमावहं सुखं. न भायितब्बं सम्पति आयतिञ्च एकन्तहितभावतो.

१५६. इञ्जितस्मिन्ति पच्चत्ते भुम्मवचनन्ति आह ‘‘इञ्जन’’न्तिआदि. इञ्जति तेनाति इञ्जितं, तस्स तस्स झानस्स खोभकरं ओळारिकं झानङ्गं. चतुत्थज्झानं अनिञ्जनं सन्निसिन्नाभावतो. तथा हि वुत्तं ‘‘ठिते आनेञ्जप्पत्ते’’ति (दी. नि. १.२४४-२४५; म. नि. १.३८४-३८६; पारा. १२-१३).

अलं-सद्दो ¶ युत्तत्थोपि होति – ‘‘अलमेव निब्बिन्दितुं, अलं विमुच्चितु’’न्तिआदीसु (दी. नि. २.२७२; सं. नि. २.१२४, १२८, १३४, १४३), तस्मा अनलं अनुसङ्गं कातुं अयुत्तन्ति अत्थो. तेनाह ‘‘अकत्तब्बआलयन्ति वदामी’’ति. सन्निट्ठानन्ति सम्मापटिपत्तियं अलं एत्तावताति उस्साहपटिप्पस्सम्भनवसेन सन्निट्ठानं न कातब्बन्ति योजना. उद्धम्भागियसञ्ञितं अणुं वा ओरम्भागियसञ्ञितं थूलं वा, रूपरागोति एवरूपं अणुं वा कामासवो पटिघन्ति एवरूपं थूलं वा, मुदुना पवत्तिआकारविसेसेन अप्पसावज्जं, कम्मबन्धनट्ठेन वा अप्पसावज्जं, तब्बिपरियायतो महासावज्जं वेदितब्बं. नातितिक्खपञ्ञस्स वसेन देसनाय पवत्तत्ता ‘‘नेय्यपुग्गलस्स वसेना’’ति वुत्तं. सब्बसो हि परियादिन्ननिकन्तिकस्स अरियपुग्गलस्स वसेन सञ्ञावेदयितनिरोधस्स आगतत्ता ‘‘अरहत्तनिकूटेनेव निट्ठापिता’’ति वुत्तं. यं पनेत्थ अत्थतो न विभत्तं, तं सुविञ्ञेय्यमेव.

लटुकिकोपमसुत्तवण्णनाय लीनत्थप्पकासना समत्ता.

७. चातुमसुत्तवण्णना

१५७. यथाउपनिस्सयेनाति ¶ यो यो उपनिस्सयो यथाउपनिस्सयो, तेन यथाउपनिस्सयेन सम्मापयोगेन. पतिट्ठहिस्सन्ति सासने पतिट्ठं पटिलभिस्सन्ति. वसनट्ठानानीति वस्सग्गादिवसेन वसनट्ठानानि. सण्ठापयमानाति सुविभत्तभावेन ठपेन्ता.

अविनिब्भोगसद्दन्ति विनिभुञ्जित्वा गहेतुं असक्कुणेय्यसद्दं. वचीघोसोपि हि बहूहि एकच्चं पवत्तितो ठानतो च दूरतरो केवलं महानिग्घोसो ¶ एव हुत्वा सोतपथमागच्छति. मच्छविलोपेति मच्छे विलुम्पित्वा विय गहणे, मच्छानं वा नयने.

१५८. ववस्सग्गत्थेति निच्छयत्थे, इदं ताव अम्हेहि वुच्चमानवचनं एकन्तसोतब्बं, पच्छा तुम्हेहि कातब्बं करोथाति अधिप्पायो. वचनपरिहारोति तेहि सक्यराजूहि वुत्तवचनस्स परिहारो. लेसकप्पन्ति कप्पियलेसं. धुरवहाति धुरवाहिनो, धोरय्हाति अत्थो. पादमूलन्ति उपचारं वदति. विगच्छिस्सतीति हायिस्सति. पटिप्फरितोति न भगवतो सम्मुखाव, सक्यराजूनं पुरतोपि विप्फरितोव होति.

१५९. अभिनन्दतूति अभिमुखो हुत्वा पमोदतु. अभिवदतूति अभिरूपवसेन वदतु. पसादञ्ञथत्तन्ति अप्पसादस्स विपरिणामो हीनायावत्तनसङ्खातं परिवत्तनं, तेनाह ‘‘विब्भमन्तानं. विपरिणामञ्ञथत्त’’न्ति. कारणूपचारेन सस्सेसु बीजपरियायोति आह ‘‘बीजानं तरुणानन्ति तरुणसस्सान’’न्ति. तरुणभावेनेव तस्स भाविनो फलस्स अभावेन विपरिणामो.

१६०. कत्तब्बस्स सरसेनेव करणं चित्तरुचियं, न तथा परस्स उस्सादनेनाति आह – ‘‘पक्कोसियमानानं गमनं नाम न फासुक’’न्ति. मयम्पि भगवा विय दिट्ठधम्मसुखविहारेनेव विहरिस्सामाति दीपेति पकतिया विवेकज्झासयभावतो विरद्धो आगतस्स भारस्स अवहनतोयेव. तेनाह ‘‘अत्तनो भारभावं न अञ्ञासी’’ति.

१६१. कस्मा ¶ आरभीति? सप्पायतो. पञ्चसता हि भिक्खू अभिनवा, तस्मा तेसं ओवाददानत्थं भगवा इमं देसनं आरभीति.

१६२. कोधुपायासस्साति एत्थ कुज्झनट्ठेन कोधो, स्वेव चित्तस्स कायस्स च अतिप्पमद्दनमथनुप्पादनेहि दळ्हं आयासट्ठेन उपायासो. अनेकवारं पवत्तित्वा अत्तना समवेतं सत्तं अज्झोत्थरित्वा सीसं उक्खिपितुं अदत्वा अनयब्यसनपापनेन कोधुपायासस्स ऊमिसदिसता दट्ठब्बा. तेनाह ‘‘कोधुपायासे’’तिआदि.

१६३. ओदरिकत्तेन खादितोति ओदरिकभावेन आमिसगेधेन मिच्छाजीवेन जीविकाकप्पनेन नासितसीलादिगुणताय खादितधम्मसरीरो.

१६४. पञ्चकामगुणावट्टे ¶ निमुज्जित्वाति एत्थ कामरागाभिभूते सत्ते इतो च एत्तो, एत्तो च इतोति एवं मनापियरूपादिविसयसङ्खाते आवट्टे अत्तानं संसारेत्वा यथा ततो बहिभूते नेक्खम्मे चित्तम्पि न उप्पादेति, एवं आवट्टेत्वा ब्यसनापादनेन कामगुणानं आवट्टसदिसता दट्ठब्बा. तेनाह ‘‘यथा ही’’तिआदि.

१६५. रागानुद्धंसितेनाति रागेन अनुद्धंसितेन. चण्डमच्छं आगम्माति सुसुकादिचण्डमच्छं आगम्म. मातुगामं आगम्माति मातुगामो हि योनिसोमनसिकाररहितं अधीरपुरिसं इत्थिकुत्तभूतेहि अत्तनो हावभावविलासेहि अभिभुय्य गहेत्वा धीरजातियम्पि अत्तनो रूपादीहि पलोभनवसेन अनवसेसं अत्तनो उपकारधम्मे सीलादिके सम्पादेतुं असमत्थं करोन्तो अनयब्यसनं पापेति. तेनाह – ‘‘मातुगामं आगम्म उप्पन्नकामरागो विब्भमती’’ति.

भयं नाम यत्थ भायितब्बवत्थु, तत्थ ओतरन्तस्सेव होति, न अनोतरन्तस्स, तं ओतरित्वा भयं विनोदेत्वा तत्थ किच्चं साधेतब्बं, इतरथा चत्थसिद्धि न होतीति इममत्थं उपमोपमितब्बसरूपवसेन दस्सेतुं ‘‘यथा’’तिआदि वुत्तं. तत्थ उदकं निस्साय आनिसंसो पिपासविनयनं सरीरसुद्धि परिळाहूपसमो कायउतुग्गाहापनन्ति एवमादि. सासनं निस्साय आनिसंसो पन सङ्खेपतो वट्टदुक्खूपसमो, वित्थारतो पन सीलानिसंसादिवसेन अनेकविधो, सो विसुद्धिमग्गे (विसुद्धि. १.९) वुत्तनयेन वेदितब्बो. वुत्तप्पकारो आनिसंसो होति तानि भयानि अभिभुय्य पवत्तस्साति अधिप्पायो. इमानि अभायित्वाति इमानि कोधूपायासादिभयानि ¶ अभिभुय्य पवत्तित्वा अभायित्वा. कोधूपायासादयो हि भायति एतस्माति भयन्ति वुत्ता. थेरोति महाधम्मरक्खितत्थेरो. कामं पहानाभिसमयकालो एव सच्छिकिरियाभिसमयो, सम्मादिट्ठिया पन संकिलेसवोदानधम्मेसु किच्चं असंकिण्णं कत्वा दस्सेतुं समानकालिकम्पि असमानकालिकं विय वुत्तं ‘‘तण्हासोतं छिन्दित्वा निब्बानपारं दट्ठुं न सक्कोती’’ति. सेसं सुविञ्ञेय्यमेव.

चातुमसुत्तवण्णनाय लीनत्थप्पकासना समत्ता.

८. नळकपानसुत्तवण्णना

१६६. यत्थ ¶ ¶ बोधिसत्तपमुखो वानरो नळकेन पानीयं पिवि, सा पोक्खरणी, तस्सामन्तो भूमिप्पदेसो, तत्थ निविट्ठगामो च ‘‘नळकपान’’न्तेव पञ्ञायित्थ, इध पन गामो अधिप्पेतोति आह ‘‘नळकपानेति एवंनामके गामे’’ति. इदानि तमत्थं आगमनतो पट्ठाय दस्सेतुं ‘‘पुब्बे किरा’’ति आरद्धं. पञ्ञवाति इतिकत्तब्बताय पञ्ञाय पञ्ञवा.

थूलदीघबहुलभावेन महतीहि दाठिकाहि समन्नागतत्ता महादाठिको. ‘‘उदकरक्खसो अह’’न्ति वत्वा वानरानं कञ्चि अमुञ्चित्वा ‘‘सब्बे तुम्हे मम हत्थगता’’ति दस्सेन्तो ‘‘तुम्हे पन सब्बे खादिस्सामी’’ति आह. धमि…पे… पिविंसूति बोधिसत्तेन गहितनळो अनवसेसो अब्भन्तरे सब्बसन्धीनं निब्बाधेन एकच्छिद्दो अहोसि. नेव मं त्वं वधिस्ससीति उदकरक्खस त्वं वधितुकामोपि मम पुरिसथामेन न वधिस्ससि.

एवं पन वत्वा महासत्तो ‘‘अयं पापो एत्थ पानीयं पिवन्ते अञ्ञेपि सत्ते मा बाधयित्था’’ति करुणायमानो ‘‘एत्थ जायन्ता नळा सब्बे अपब्बबन्धा एकच्छिद्दाव होन्तू’’ति अधिट्ठाय गतो. तेनाह ‘‘ततो पट्ठाया’’तिआदि.

१६७. अनुरुद्धप्पमुखा भिक्खू भगवता ‘‘कच्चि तुम्हे अनुरुद्धा’’ति पुच्छिताति थेरो ‘‘तग्घ मयं, भन्ते’’ति आह.

सचे पब्बजति, जीवितं लभिस्सति, नो अञ्ञथाति रञ्ञा पब्बज्जाय अभिनीताति राजाभिनीता. चोराभिनीताति एत्थापि एसेव नयो. चोरानं मूलं छिन्दन्तो ‘‘कण्टकसोधनं करिस्सामी’’ति. आजीविकायाति आजीवेन जीवितवुत्तिया. इमेसु पन अनुरुद्धत्थेरादीसु.

विवेकन्ति पुब्बकालिककिरियप्पधानं ‘‘अब्यापज्जं उपेत’’न्तिआदीसु वियाति आह – ‘‘विविच्चा’’ति, विविच्चित्वा विवित्तो हुत्वा विना हुत्वाति अत्थो. पब्बजितकिच्चन्ति पब्बजितस्स सारुप्पकिच्चं. समणकिच्चन्ति समणभावकरणकिच्चं. यदग्गेन हि पब्बजितकिच्चं ¶ कातुं न सक्कोति तदग्गेन समणभावकरम्पि किच्चं कातुं न सक्कोति. तेनाह ‘‘सो येवा’’तिआदि.

१६८. अप्पटिसन्धिके ¶ ताव ब्याकरोन्तो पवत्तीसु ठानं अतीतोति कत्वा उपपत्तीसु ब्याकरोति नाम तत्थ पटिसन्धिया अभावकित्तनतो. महन्ततुट्ठिनोति विपुलपमोदा.

१६९. इमस्साति ‘‘अस्सा’’ति पदस्स अत्थवचनं. इमस्स ठितस्स आयस्मतो सामं दिट्ठो वा होति अनुस्सवसुतो वाति योजना. समाधिपक्खिका धम्मा धम्माति अधिप्पेता, समाधि पन एवंविहारीति एत्थ विहारसद्देन गहितो. एवंविमुत्ताति एत्थ पन विमुत्तिसद्देन फलविमुत्ति गहिता. चरतोपीति समथविपस्सनाचारेन चरतोपि विहरन्तस्सपि. उपासकउपासिकाठानेसु लब्भमानम्पि अरहत्तं अप्पकभावतो पाळियं अनुद्धटन्ति दट्ठब्बं. सेसं सुविञ्ञेय्यमेव.

नळकपानसुत्तवण्णनाय लीनत्थप्पकासना समत्ता.

९. गोलियानिसुत्तवण्णना

१७३. पदसमाचारोति ¶ तंतंपच्चयभेददस्सनाय विगतत्ता पकारेहि दलिद्दसमाचारो सिथिलसमाचारोति अत्थो. यस्मा पन तादिसो समाचारो थिरो दळ्हो नाम न होति, तस्मा वुत्तं ‘‘दुब्बलसमाचारो’’ति. ‘‘साखसमाचारो’’ति वा पाठो, तत्थ तत्थ लग्गनट्ठेन साखासदिससीलोति अत्थो. तेनाह ‘‘ओळारिकाचारो’’ति. पच्चयेसु सापेक्खोति पच्चयेसु सापेक्खताय एव हिस्स ओळारिकाचारता वेदितब्बा. गरुना किस्मिञ्चि वुत्ते गारववसेन पतिस्सवनं पतिस्सो, पतिस्सवचनभूतं तंसभागञ्च यं किञ्चि गारवन्ति अत्थो. सह पतिस्सेनाति सप्पतिस्सेन, सप्पतिस्सवेन ओवादसम्पटिच्छनेन. पतिस्सीयतीति वा पतिस्सो, गरुकातब्बो, तेन सह पतिस्सेनाति सब्बं पुब्बे विय. तेनाह ‘‘सजेट्ठकेना’’ति. सेरिविहारो नाम अत्तप्पधानवासो. तेनाह ‘‘निरङ्कुसविहारेना’’ति.

अनुपखज्जाति अनुपकड्ढित्वा. गरुट्ठानियानं अन्तरं अनापुच्छा अनुपविसित्वाति इममत्थं दस्सेतुं ‘‘तत्थ यो’’तिआदि वुत्तं.

आभिसमाचारिकन्ति ¶ अभिसमाचारे भवं. किं पन तन्ति आह ‘‘वत्तपटिपत्तिमत्तम्पी’’ति. नातिकालस्सेव सङ्घस्स पुरतो पविसितब्बं, न पच्छा पटिक्कमितब्बन्ति अधिप्पायेन अतिकाले च गामप्पवेसो अतिदिवा पटिक्कमनञ्च निवारितं, तं दस्सेतुं ‘‘न अतिपातो’’तिआदि वुत्तं. उद्धच्चपकतिकोति विब्भन्तचित्तो. अवचापल्येनाति दळ्हवातापहतपल्लवसदिसेन लोलभावेन.

पञ्ञवताति इमिना भिक्खुसारुप्पेसु इतिकत्तब्बेसु उपायपञ्ञा अधिप्पेता, न सुतमयपञ्ञा. अभिधम्मे अभिविनये योगोति इमिना भावनापञ्ञाउत्तरिमनुस्सधम्मे योगो पकासितो. योगोति च परिचयो उग्गण्हवसेन.

आरुप्पाति इमिना चतस्सोपि अरूपसमापत्तियो गहिता, ता पन चतूहि रूपसमापत्तीहि विना न सम्पज्जन्तीति आह – ‘‘आरुप्पाति एत्तावता अट्ठपि समापत्तियो वुत्ता होन्ती’’ति. कसिणेति दसविधे कसिणे. एकं परिकम्मकम्मट्ठानन्ति यं किञ्चि एकभावना ¶ परिकम्मदीपनं खन्धकम्मट्ठानं. तेनाह ‘‘पगुणं कत्वा’’ति. कसिणपरिकम्मं पन तग्गहणेनेव गहितं होति, लोकिया उत्तरिमनुस्सधम्मा हेट्ठा गहिताति आह ‘‘उत्तरिमनुस्सधम्मेति इमिना सब्बेपि लोकुत्तरधम्मे दस्सेती’’ति. नेय्यपुग्गलस्स वसेनाति जानित्वा वित्थारेत्वा ञातब्बपुग्गलस्स वसेनाति.

गोलियानिसुत्तवण्णनाय लीनत्थप्पकासना समत्ता.

१०. कीटागिरिसुत्तवण्णना

१७४. पञ्च ¶ आनिसंसेति अप्पाबाधतादिके पञ्च गुणे. तत्थ अक्खिरोगकुच्छिरोगादीनं अभावो अप्पाबाधता. सरीरे तेसं कुप्पनदुक्खस्स अभावो अप्पातङ्कं. सरीरस्स उट्ठानसुखता लहुट्ठानं. बलं नाम कायबलं. फासुविहारो इरियापथसुखता. अनुपक्खन्दानीति दुच्चजनवसेन सत्तानं अनुपविट्ठानि. सञ्जानिस्सथाति एत्थ इति-सद्दो आदिअत्थो, तस्मा इति एवं आनिसंसन्ति अत्थो.

१७५. आवासे नियुत्ताति आवासिका तस्स अनतिवत्तनतो. तेनाह ‘‘निबद्धवासिनो’’ति, नियतवासिनोति अत्थो. तन्निबन्धाति ¶ निबन्धं वुच्चति ब्यापारो, तत्थ बन्धा पसुता उस्सुकाति तन्निबन्धा. कथं ते तत्थ निबन्धाति आह ‘‘अकतं सेनासन’’न्तिआदि. उप्पज्जनकेन कालेन पत्तब्बं कालिकं सो पन कालो अनागतो एव होतीति आह ‘‘अनागते काले पत्तब्ब’’न्ति.

१७८. एत्तका वेदना सेवितब्बाति अट्ठारसपि नेक्खम्मनिस्सिता वेदना सेवितब्बा, गेहस्सिता न सेवित्ब्बा.

१८१. तं कतं सोळसविधस्सपि किच्चस्स निट्ठितत्ता. अनुलोमिकानीति उतुसुखभावेन अनुरूपानि. तेनाह ‘‘कम्मट्ठानसप्पायानी’’ति. समानं कुरुमानाति ओमत्ततं अधिमत्ततञ्च पहाय समकिच्चतं सम्पादेन्ता.

१८२. ते द्वे होन्तीति ते आदितो वुत्ता द्वे.

उभतो (अ. नि. टी. ३.७.१४) उभयथा उभोहि भागेहि विमुत्तोति उभतोभागविमुत्तो एकदेससरूपेकसेसनयेन. तथा हि वुत्तं अभिधम्मट्ठकथायं (पु. प. अट्ठ. २४) ‘‘द्वीहि भागेहि द्वे वारे विमुत्तोति उभतोभागविमुत्तो’’ति. तत्थ केचि ताव थेरा – ‘‘समापत्तिया विक्खम्भनविमोक्खेन, मग्गेन समुच्छेदविमोक्खेन विमुत्तोति उभतोभागविमुत्तो’’ति ¶ वदन्ति. अञ्ञे थेरा – ‘‘अयं उभतोभागविमुत्तो रूपतो मुच्चित्वा नामं निस्साय ठितो पुन ततो मुच्चनतो नामनिस्सितको’’ति वत्वा तस्स च साधकं –

‘‘अच्चि यथा वातवेगेन खित्ता, (उपसिवाति भगवा,)

अत्थं पलेति न उपेति सङ्खं;

एवं मुनि नामकाया विमुत्तो,

अत्थं पलेति न उपेति सङ्ख’’न्ति. (सु. नि. १०८०; चूळनि. उपसीवमाणवपुच्छा ११; उपसीवमाणवपुच्छानिद्देस ४३) –

इमं सुत्तपदं वत्वा ‘‘नामकायतो च रूपकायतो च सुविमुत्तत्ता उभतोभागविमुत्तो’’ति वदन्ति. सुत्ते हि आकिञ्चञ्ञायतनलाभिनो उपसिवब्राह्मणस्स भगवता नामकाया विमुत्तोति उभतोभागविमुत्तोति अक्खातोति. अपरे पन ‘‘समापत्तिया विक्खम्भनविमोक्खेन ¶ एकवारं विमुत्तो, मग्गेन समुच्छेदविमोक्खेन एकवारं विमुत्तोति एवं उभतोभागविमुत्तो’’ति वदन्ति. एत्थ पठमवादे द्वीहि भागेहि विमुत्तोति उभतोभागविमुत्तो. दुतियवादे उभतोभागतो विमुत्तोति उभतोभागविमुत्तो. ततियवादे पन द्वीहि भागेहि द्वे वारे विमुत्तोति अयमेतेसं विसेसो. किलेसेहि विमुत्तो किलेसा वा विक्खम्भनसमुच्छेदेहि कायद्वयतो विमुत्ता अस्साति अयमत्थो दट्ठब्बो. तेनाह ‘‘द्वीहि भागेही’’तिआदि.

सोति उभतोभागविमुत्तो. कामञ्चेत्थ रूपावचरचतुत्थज्झानम्पि अरूपावचरज्झानं विय दुवङ्गिकं आनेञ्जप्पत्तन्ति वुच्चति. तं पन पदट्ठानं कत्वा अरहत्तं पत्तो उभतोभागविमुत्तो नाम न होति रूपकायतो अविमुत्तत्ता. तञ्हि किलेसकायतोव विमुत्तं, न रूपकायतो, तस्मा ततो वुट्ठाय अरहत्तं पत्तो उभतोभागविमुत्तो न होतीति आह – ‘‘चतुन्नं अरूप…पे… पञ्चविधो होती’’ति. ‘‘रूपी रूपानि पस्सती’’तिआदिके निरोधसमापत्तिअन्ते अट्ठ विमोक्खे वत्वा – ‘‘यतो च खो, आनन्द, भिक्खु इमे अट्ठ विमोक्खे कायेन फुसित्वा विहरति, पञ्ञाय चस्स दिस्वा आसवा परिक्खीणा होन्ति, अयं वुच्चति, आनन्द, भिक्खु उभतोभागविमुत्तो’’ति यदिपि महानिदाने (दी. नि. २.१२९-१३०) वुत्तं, तं पन उभतोभागविमुत्तसेट्ठवसेन वुत्तन्ति इध सब्बउभतोभागविमुत्तसङ्गहणत्थं ‘‘पञ्चविधो होती’’ति वत्वा ‘‘पाळि पनेत्थ…पे… अभिधम्मे अट्ठविमोक्खलाभिनो वसेन आगता’’ति आह. इधापि हि कीटागिरिसुत्ते ‘‘इध, भिक्खवे, एकच्चो पुग्गलो…पे… उभतोभागविमुत्तो’’ति ¶ अरूपसमापत्तिवसेन चत्तारो उभतोभागविमुत्ता, सेट्ठो च वुत्तो वुत्तलक्खणूपपत्तितो. यथावुत्तेसु हि पञ्चसु पुरिमा चत्तारो निरोधं न समापज्जन्तीति परियायेन उभतोभागविमुत्ता नाम. अट्ठसमापत्तिलाभी अनागामी तं समापज्जित्वा ततो वुट्ठाय विपस्सनं वड्ढेत्वा अरहत्तं पत्तोति निप्परियायेन उभतोभागविमुत्तसेट्ठो नाम.

कतमो च पुग्गलोतिआदीसु कतमोति पुच्छावचनं, पुग्गलोति असाधारणतो पुच्छितब्बवचनं. इधाति इमस्मिं सासने. एकच्चोति एको ¶ . अट्ठ विमोक्खे कायेन फुसित्वा विहरतीति अट्ठ समापत्तियो सहजातनामकायेन पटिलभित्वा विहरति. पञ्ञाय चस्स दिस्वा आसवा परिक्खीणा होन्तीति विपस्सनापञ्ञाय सङ्खारगतं, मग्गपञ्ञाय चत्तारि सच्चानि पस्सित्वा चत्तारोपि आसवा परिक्खीणा होन्तीति एवमत्थो दट्ठब्बो.

पञ्ञाविमुत्तोति विसेसतो पञ्ञाय एव विमुत्तो, न तस्सा पतिट्ठानभूतेन अट्ठविमोक्खसङ्खातेन सातिसयेन समाधिनाति पञ्ञाविमुत्तो. यो अरियो अनधिगतअट्ठविमोक्खेन सब्बसो आसवेहि विमुत्तो, तस्सेतं अधिवचनं. अधिगतेपि हि रूपज्झानविमोक्खे न सो सातिसयसमाधिनिस्सितोति न तस्स वसेन उभतोभागविमुत्तो होतीति वुत्तोवायमत्थो. अरूपज्झानेसु पन एकस्मिम्पि सति उभतोभागविमुत्तोयेव नाम होति. तेन हि अट्ठविमोक्खेकदेसेन तंनामदानसमत्थेन अट्ठविमोक्खलाभीत्वेव वुच्चति. समुदाये हि पवत्तो वोहारो अवयवेपि दिस्सति यथा ‘‘सत्तिसयो’’ति. पाळीति अभिधम्मपाळि. एत्थाति एतिस्सं पञ्ञाविमुत्तिकथायं. अट्ठविमोक्खपटिक्खेपवसेनेवाति अवधारणेन इधापि पटिक्खेपवसेनेव आगतभावं दस्सेति. तेनाह ‘‘कायेन फुसित्वा विहरती’’ति.

फुट्ठन्तं सच्छिकरोतीति फुट्ठानं अन्तो फुट्ठन्तो, फुट्ठानं अरूपज्झानानं अनन्तरो कालोति अधिप्पायो. अच्चन्तसंयोगे चेतं उपयोगवचनं, फुट्ठानन्तरकालमेव सच्छिकरोति सच्छिकातब्बोपायेनाति वुत्तं होति. भावनपुंसकं वा एतं ‘‘एकमन्तं निसीदी’’तिआदीसु (पारा. २) विय. यो हि अरूपज्झानेन रूपकायतो नामकायेकदेसतो च विक्खम्भनविमोक्खेन विमुत्तो, तेन निरोधसङ्खातो विमोक्खो आलोचितो पकासितो विय होति, न पन कायेन सच्छिकतो, निरोधं पन आरम्मणं कत्वा एकच्चेसु आसवेसु खेपितेसु तेन सो सच्छिकतो होति, तस्मा सो सच्छिकातब्बं निरोधं यथाआलोचितं नामकायेन सच्छिकरोतीति ‘‘कायसक्खी’’ति वुच्चति, न तु ‘‘विमुत्तो’’ति एकच्चानं आसवानं ¶ अपरिक्खीणत्ता. तेनाह ¶ – ‘‘झानफस्सं पठमं फुसति, पच्छा निरोधं निब्बानं सच्छिकरोती’’ति. अयं चतुन्नं अरूपसमापत्तीनं एकेकतो वुट्ठाय सङ्खारे सम्मसित्वा कायसक्खिभावं पत्तानं चतुन्नं, निरोधा वुट्ठाय अग्गमग्गप्पत्तअनागामिनो च वसेन उभतोभागविमुत्तो विय पञ्चविधो नाम होति. तेन वुत्तं अभिधम्मटीकायं ‘‘कायसक्खिम्हिपि एसेव नयो’’ति.

दिट्ठन्तं पत्तोति दस्सनसङ्खातस्स सोतापत्तिमग्गञाणस्स अनन्तरं पत्तोति वुत्तं होति. ‘‘दिट्ठत्ता पत्तो’’तिपि पाठो. एतेन चतुसच्चदस्सनसङ्खाताय दिट्ठिया निरोधस्स पत्ततं दीपेति. तेनाह ‘‘दुक्खा सङ्खारा, सुखो निरोधोति ञातं होती’’ति. तत्थ पञ्ञायाति मग्गपञ्ञाय. पठमफलट्ठतो याव अग्गमग्गट्ठा, ताव दिट्ठिप्पत्तो. तेनाह ‘‘सोपि कायसक्खि विय छब्बिधो होती’’ति. यथा पन पञ्ञाविमुत्तो पञ्चविधो वुत्तो, एवं अयम्पि सुक्खविपस्सको, चतूहि रूपज्झानेहि वुट्ठाय दिट्ठिप्पत्तभावप्पत्ता चत्तारो चाति पञ्चविधो होतीति वेदितब्बो. सद्धाविमुत्तेपि एसेव नयो. इदं दुक्खन्ति एत्तकं दुक्खं, न इतो उद्धं दुक्खन्ति. यथाभूतं पजानातीति ठपेत्वा तण्हं उपादानक्खन्धपञ्चकं दुक्खसच्चन्ति याथावतो पजानाति. यस्मा पन तण्हा दुक्खं जनेति निब्बत्तेति, ततो तं दुक्खं समुदेति, तस्मा नं ‘‘अयं दुक्खसमुदयो’’ति यथाभूतं पजानाति यस्मा पन इदं दुक्खं समुदयो च निब्बानं पत्वा निरुज्झति अप्पवत्तिं गच्छति, तस्मा ‘‘अयं दुक्खनिरोधो’’ति यथाभूतं पजानाति. अरियो पन अट्ठङ्गिको मग्गो तं दुक्खनिरोधं गच्छति, तेन ‘‘अयं दुक्खनिरोधगामिनिपटिपदा’’ति यथाभूतं पजानाति. एत्तावता नानक्खणे सच्चववत्थानं दस्सितं. इदानि तं एकक्खणे दस्सेतुं ‘‘तथागतप्पवेदिता’’तिआदि वुत्तं, तस्सत्थो आगमिस्सति.

सद्धाय विमुत्तोति एतेन सब्बथा अविमुत्तस्सपि सद्धामत्तेन विमुत्तभावो दीपितो होति. सद्धाविमुत्तोति वा सद्धाय अधिमुत्तोति अत्थो. वुत्तनयेनेवाति ‘‘सोतापत्तिफल’’न्तिआदिना वुत्तनयेन. सद्दहन्तस्साति ‘‘एकंसतो अयं पटिपदा किलेसक्खयं आवहति सम्मासम्बुद्धेन भासितत्ता’’ति एवं सद्दहन्तस्स. यस्मा पनस्स अनिच्चानुपस्सनादीहि ¶ निच्चसञ्ञापहानवसेन भावनाय पुब्बेनापरं विसेसं पस्सतो तत्थ तत्थ पच्चक्खतापि अत्थि, तस्मा वुत्तं ‘‘सद्दहन्तस्स विया’’ति. सेसपदद्वयं तस्सेव वेवचनं. एत्थ च पुब्बभागमग्गभावनाति वचनेन आगमनीयपटिपदानानत्तेन सद्धाविमुत्तदिट्ठिप्पत्तानं पञ्ञानानत्तं होतीति दस्सितं. अभिधम्मट्ठकथायम्पि (पु. प. अट्ठ. २८) ‘‘नेसं किलेसप्पहाने ¶ नानत्तं नत्थि, पञ्ञाय नानत्तं अत्थियेवा’’ति वत्वा – ‘‘आगमनीयनानत्तेनेव सद्धाविमुत्तो दिट्ठिप्पत्तं न पापुणातीति सन्निट्ठानं कत’’न्ति वुत्तं.

पञ्ञासङ्खातं धम्मं अधिमत्तताय पुब्बङ्गमं हुत्वा पवत्तं अनुस्सरतीति धम्मानुसारी. तेनाह ‘‘धम्मो’’तिआदि. सद्धं अनुस्सरति सद्धापुब्बङ्गमं मग्गं भावेतीति इममत्थं ‘‘एसेव नयो’’ति अतिदिसति. पञ्ञं वाहेतीति पञ्ञावाही, पञ्ञं सातिसयं पवत्तेतीति अत्थो. तेनाह ‘‘पञ्ञापुब्बङ्गमं अरियमग्गं भावेती’’ति. सद्धावाहिन्ति एत्थ वुत्तनयेन अत्थो वेदितब्बो. उभतोभागविमुत्तादिकथाति उभतोभागविमुत्तादीसु आगमनतो पट्ठाय वत्तब्बकथा. एतेसन्ति यथावुत्तानं उभतोभागविमुत्तादीनं. इधाति इमस्मिं कीटागिरिसुत्ते. ननु च अट्ठसमापत्तिलाभिवसेन उभतोभागविमुत्तो कायसक्खीआदयो च अभिधम्मे आगता, कथमिध अरूपज्झानलाभीवसेनेव उद्धटाति चोदनं सन्धायाह ‘‘यस्मा’’तिआदि.

फुसित्वा पत्वा. पञ्ञाय चस्स दिस्वा आसवा परिक्खीणा होन्तीति न आसवा पञ्ञाय पस्सीयन्ति, दस्सनकारणा पञ्ञाय परिक्खीणा ‘‘दिस्वा पञ्ञाय परिक्खीणा’’ति वुत्ता. दस्सनायत्तपरिक्खयत्ता एव हि दस्सनं आसवानं खयस्स पुरिमकिरिया होतीति. तथागतेन पवेदिताति बोधिमण्डे निसीदित्वा तथागतेन पटिविद्धा विदिता पच्छा परेसं पाकटीकता. ‘‘चतुसच्चधम्मा’’ति वत्वा तदन्तोगधत्ता सीलादीनं ‘‘इमस्मिं ठाने सीलं कथित’’न्तिआदि वुत्तं. अत्थेनाति अविप्पटिसारादिपयोजनेन तस्मिं तस्मिं पीतिआदिकेन अत्थेन. कारणेनाति सप्पुरिसूपनिस्सयादिना कारणेन तस्मिं तस्मिं समाधिआदिपदट्ठानताय सीलादि ¶ कारणे. चिण्णचरितत्ताति सद्धाचिण्णभावेन सम्बोधावहभावे. तत्थ तत्थ विचरिता विसेसेन चरिता, तेसु तेन पञ्ञा सुट्ठु चरापिताति अत्थो. पतिट्ठिता होति मग्गेन आगतत्ता. मत्ताय परित्तप्पमाणेन. ओलोकनं खमन्ति, पञ्ञाय गहेतब्बतं उपेन्ति.

तयोति कायसक्खिदिट्ठिप्पत्तसद्धाविमुत्ता. यथाठितोव पाळिअत्थो, न तत्थ किञ्चि निद्धारेत्वा वत्तब्बं अत्थीति सुत्तन्तपरियायेन अवुत्तं वदति. तस्स मग्गस्साति सोतापत्तिमग्गस्स यं कातब्बं, तस्स अधिगतत्ता. उपरि पन तिण्णं मग्गानं अत्थाय सेवमाना अनुलोमसेनासनं, भजमाना कल्याणमित्ते, समन्नानयमाना इन्द्रियानि अनुपुब्बेन भावनामग्गप्पटिपाटिया अरहत्तं पापुणिस्सन्ति मग्गस्स अनेकचित्तक्खणिकतायाति अयमेत्थ सुत्तपदेसे पाळिया अत्थो.

इममेव ¶ पाळिं गहेत्वाति ‘‘कतमो च पुग्गलो सद्धानुसारी’’ति मग्गट्ठे पुग्गले वत्वा ‘‘इमस्स खो अहं, भिक्खवे’’तिआदिना तेसं वसेन अनुलोमसेनासनसेवनादीनं वुत्तत्ता इममेव यथावुत्तं पाळिपदेसं गहेत्वा ‘‘लोकुत्तरधम्मो बहुचित्तक्खणिको’’ति वदति. सो वत्तब्बोति सो वितण्डवादी एवं वत्तब्बो. यदि मग्गट्ठपुग्गले वत्वा अनुलोमिकसेनासनसेवनादि पाळियं वुत्तन्ति मग्गसमङ्गिनो एव हुत्वा ते तथा पटिपज्जन्ति, एवं सन्ते सेनासनपटिसंयुत्तरूपादिविपस्सनग्गहणस्मिं तव मतेन मग्गसमङ्गिनो एव आपज्जेय्युं, न चेतं एवं होति, तस्मा सुत्तं मे लद्धन्ति यं किञ्चि मा कथेहीति वारेतब्बो. तेनाह ‘‘यदि अञ्ञेन चित्तेना’’तिआदि. तत्थ एवं सन्तेति नानाचित्तेनेव सेनासनपटिसेवनादिके सति. तत्थ पाळियं यदि लोकुत्तरधम्मसमङ्गिनो एव पञ्चविञ्ञाणसमङ्गिकालेपि लोकुत्तरसमङ्गितं सचे सम्पटिच्छसि, सत्थारा सद्धिं पटिविरुज्झसि सुत्तविरोधदीपनतो. तेनाह ‘‘सत्थारा ही’’तिआदि. धम्मविचारणा नाम तुय्हं अविसयो, तस्मा यागुं पिवाहीति उय्योजेतब्बो.

१८३. आदिकेनेवाति पठमेनेव. अनुपुब्बसिक्खाति अनुपुब्बेनेव पवत्तसिक्खाय. तेनाह ‘‘करणत्थे पच्चत्तवचन’’न्ति. सद्धा जाता एतस्साति सद्धाजातो, अग्याहितातिपक्खेपेन जात-सद्दस्स पच्छावचनं ¶ . एवमेतन्ति अधिमुच्चनं ओकप्पनियसद्धा. सन्तिके निसीदति उपट्ठानवसेन. साधुकं कत्वा धारेतीति यथासुतं धम्मं वाचुग्गतकरणवसेन तं पगुणं कत्वा सारवसेन धारेति. छन्दो जायतीति धम्मेसु निज्झानक्खमेसु इमे धम्मे भावनापञ्ञाय पच्चक्खतो उस्सामीति कत्तुकम्यताकुसलच्छन्दो जायति. उस्सहतीति छन्दो उप्पादमत्ते अट्ठत्वा ततो भावनारम्भवसेन उस्सहति. तुलयतिति सम्मसनवसेन सङ्खारे. तीरणविपस्सनाय तुलयन्तोति तीरणपरिञ्ञाय जानित्वा उपरि पहानपरिञ्ञाय वसेन परितुलयन्तो पटिजानन्तो. मग्गपधानं पदहतीति मग्गलक्खणं पधानिकं मग्गं पदहति. पेसितचित्तोति निब्बानं पति पेसितचित्तो. नामकायेनाति मग्गप्पटिपाटिया तंतंमग्गसम्पयुत्तनामकायेन. न पन किञ्चि आहाति दूरताय समानं न किञ्चि वचनं भगवा आह ते दळ्हतरं निग्गण्हितुं.

१८४. पणेन वोहारेन ब्याकरणं पणविया, पणविया अभावेन ओपणविया, न उपेतीति न युज्जति. तन्ति इदं इध अधिप्पेतं पणो पणवियं दस्सेतुं. तयिदं सब्बं भगवा ‘‘मयं खो, आवुसो, सायञ्चेव भुञ्जामा’’ति अस्सजिपुनब्बसुकेहि वुत्तं सिक्खाय अवत्तनभावदीपनवचनं सन्धाय वदति.

उक्खिपित्वाति ¶ सीसेन गहेत्वा विय समादाय. अनुधम्मोति अनुरूपो सभावो, सावकभावस्स अनुच्छविका पटिपत्ति. रोहनीयन्ति विरुळ्हिभावं. सिनिय्हति एत्थ, एतेन वाति सिनेहो, कारणं. तं एत्थ अत्थीति सिनेहवन्तं, पादकन्ति अत्थो. तचो एकं अङ्गन्ति तचो वीरपक्खभावे एकमङ्गं. पधानं अनुयुञ्जन्तस्स हि तचे पलुज्जमानेपि तंनिमित्तं अवोसानं अनापज्जनकस्सेव वीरियस्स एकं अङ्गं एकं कारणं. एवं सेसेसु वत्तब्बं. तेनाह – ‘‘अरहत्तं अप्पत्वा न वुट्ठहिस्सामीति एवं पटिपज्जती’’ति. सेसं सुविञ्ञेय्यमेव.

कीटागिरिसुत्तवण्णनाय लीनत्थप्पकासना समत्ता.

निट्ठिता च भिक्खुवग्गवण्णना.

३. परिब्बाजकवग्गो

१. तेविज्जवच्छसुत्तवण्णना

१८५. तत्थाति ¶ ¶ एकपुण्डरीकसञ्ञिते परिब्बाजकारामे. अनागतपुब्बो लोकियसमुदाहारवसेन ‘‘चिरस्सं खो, भन्ते’’तिआदिना वुच्चति, अयं पनेत्थ आगतपुब्बतं उपादाय तथा वुत्तो. भगवा हि केसञ्चि विमुत्तिजननत्थं, केसञ्चि इन्द्रियपरिपाकत्थं, केसञ्चि विसेसाधिगमत्थं कदाचि तित्थियारामं उपगच्छति. अननुञ्ञाय ठत्वाति अननुजानितब्बे ठत्वा. अनुजानितब्बं सिया अनञ्ञातस्स ञेय्यस्स अभावतो. यावतकञ्हि ञेय्यं, तावतकं भगवतो ञाणं, यावतकञ्च भगवतो ञाणं तावतकं ञेय्यं. तेनेवाह – ‘‘न तस्स अदिट्ठमिधत्थि किञ्चि, अथो अविञ्ञातमजानितब्ब’’न्तिआदि (महानि. १५६; चूळनि. धोतकमाणवपुच्छानिद्देस ३२; पटि. म. १.१२१). सब्बञ्ञुतञ्ञाणेन हि भगवा आवज्जेत्वा पजानाति. वुत्तञ्हेतं ‘‘आवज्जनपटिबद्धं बुद्धस्स भगवतो ञाण’’न्ति (मि. प. ४.१.२). यदि एवं ‘‘चरं समाहितो नागो, तिट्ठं नागो समाहितो’’ति (अ. नि. ६.४३) इदं सुत्तपदं कथन्ति? विक्खेपाभावदीपनपदमेतं, न अनावज्जनेनपि ञाणानं पवत्तिपरिदीपनं. यं पनेत्थ वत्तब्बं, तं हेट्ठा वित्थारतो वुत्तमेव.

१८६. यावदेवाति इदं यथारुचि पवत्ति विय अपरापरुप्पत्तिपि इच्छितब्बाति तदभावं दस्सेन्तो आह – ‘‘सकिं खीणानं आसवानं पुन खेपेतब्बाभावा’’ति. पच्चुप्पन्नजाननगुणन्ति इदं दिब्बचक्खुञाणस्स परिभण्डञाणं अनागतंसञाणं अनादियित्वा वुत्तं, तस्स पन वसेन अनागतंसञाणगुणं दस्सेतीति वत्तब्बं सिया.

गिहिपरिक्खारेसूति वत्थाभरणादिधनधञ्ञादिगिहिपरिक्खारेसु. गिहिलिङ्गं पन अप्पमाणं, तस्मा गिहिबन्धनं छिन्दित्वा दुक्खस्सन्तकरा होन्तियेव. सति पन दुक्खस्सन्तकिरियाय गिहिलिङ्गे ते न तिट्ठन्तियेवाति दस्सेन्तो ‘‘येपी’’तिआदिमाह. सुक्खापेत्वा समुच्छिन्दित्वा. अरहत्तं ¶ पत्तदिवसेयेव पब्बजनं वा परिनिब्बानं वाति अयं नयो न सब्बसाधारणोति आह ‘‘भूमदेवता पन तिट्ठन्ती’’ति. तत्थ कारणवचनं ¶ ‘‘निलीयनोकासस्स अत्थिताया’’ति. अरञ्ञपब्बतादिपविवेकट्ठानं निलीयनोकासो. सेसकामभवेति कामलोके. लळितजनस्साति आभरणालङ्कारनच्चगीतादिवसेन विलासयुत्तजनस्स.

सोपीति ‘‘सो अञ्ञत्र एकेना’’ति वुत्तो सोपि. करतो न करीयति पापन्ति एवं न किरियं पटिबाहति. यदि अत्तानंयेव गहेत्वा कथेति, अथ कस्मा महासत्तो तदा आजीवकपब्बज्जं उपगच्छीति आह ‘‘तदा किरा’’तिआदि. तस्सपीति न केवलं अञ्ञेसं एव पासण्डानं, तस्सपि. वीरियं न हापेसीति तपोजिगुच्छवादं समादियित्वा ठितो विरागत्थाय तं समादिण्णवत्तं न परिच्चजि, सत्थुसासनं न छड्डेसि. तेनाह – ‘‘किरियवादी हुत्वा सग्गे निब्बत्तती’’ति.

तेविज्जवच्छसुत्तवण्णनाय लीनत्थप्पकासना समत्ता.

२. अग्गिवच्छसुत्तवण्णना

१८७. लोकस्स ¶ सस्सततापवत्तिपटिक्खेपवसेन पवत्तो वादो उच्छेदवादो एव होतीति सस्सतग्गाहाभावे उच्छेदग्गाहभावतो पुन परिब्बाजकेन ‘‘असस्सतो लोको’’ति वदन्तेन उच्छेदग्गाहो पुच्छितो, भगवतापि सो एव पटिक्खित्तोति आह ‘‘दुतिये नाहं उच्छेददिट्ठिको’’ति. अन्तानन्तिकादिवसेनाति एत्थ अन्तानन्तिकग्गहणेन अन्तवा लोको अनन्तवा लोकोति इमं वादद्वयमाह. आदि-सद्देन ‘‘तं जीवं तं सरीर’’न्तिआदिवादचतुक्कं सङ्गण्हाति, इतरं पन द्वयं सरूपेनेव गहितन्ति. पटिक्खेपो वेदितब्बोति ‘‘ततिये नाहं अन्तवादिट्ठिको, चतुत्थे नाहं अनन्तवादिट्ठिको’’ति एवमादिना पटिक्खेपो वेदितब्बो. ‘‘होति तथागतो परं मरणा’’ति अयम्पि सस्सतवादो, सो च खो अपरन्तकप्पिकवसेन, ‘‘सस्सतो लोको’’ति पन पुब्बन्तकप्पिकवसेनाति अयमेतेसं विसेसो. ‘‘न होति तथागतो परं मरणा’’ति अयम्पि उच्छेदवादो, सो च खो सत्तवसेन, ‘‘असस्सतो लोको’’ति पन सत्तसङ्खारवसेनाति वदन्ति.

१८९. सप्पतिभयं ¶ उप्पज्जनतो सह दुक्खेनाति सदुक्खं. तेनाह ‘‘किलेसदुक्खेना’’तिआदि. तेसंयेवाति किलेसदुक्खविपाकदुक्खानंयेव. सउपघातकन्ति सबाधं. सउपायासन्ति सपरिस्समं सउपतापं सपीळं. सपरिळाहन्ति सदरथं.

किञ्चि दिट्ठिगतन्ति इमा ताव अट्ठ दिट्ठियो मा होन्तु, अत्थि पन, भो गोतम, यं किञ्चि दिट्ठिगतं गहितं. न हि ताय दिट्ठिया विना कञ्चि समयं पवत्तेतुं युज्जतीति अधिप्पायेन पुच्छति. अपविद्धन्ति समुच्छेदप्पहानवसेन छड्डितं. पञ्ञाय दिट्ठन्ति विपस्सनापञ्ञासहिताय मग्गपञ्ञाय भगवता पटिविद्धं. यत्थ उप्पज्जन्ति, तं सत्तं मथेन्ति सम्मद्दन्तीति मथिताति आह ‘‘मथितानन्ति तेसंयेव वेवचन’’न्ति. कञ्चि धम्मन्ति रूपधम्मं अरूपधम्मं वा. अनुपादियित्वाति अग्गहेत्वा.

१९०. न उपेतीति सङ्खं न गच्छतीति अत्थोति आह ‘‘न युज्जती’’ति. अनुजानितब्बं सिया अनुपादाविमुत्तस्स कञ्चिपि उप्पत्तिया अभावतो. ‘‘एवं विमुत्तचित्तो न उपपज्जती’’ति कामञ्चेतं सभावपवेदनं परिनिब्बानं, एके पन उच्छेदवादिनो ‘‘मयम्पि ‘सत्तो आयतिं न उपपज्जती’ति वदाम, समणो गोतमोपि तथा वदती’’ति उच्छेदभावेयेव पतिट्ठहिस्सन्ति, तस्मा भगवा ¶ ‘‘न उपपज्जतीति खो वच्छ न उपेती’’ति आह. ‘‘उपपज्जती’’ति पन वुत्ते सस्सतमेव गण्हेय्याति योजना. सेसद्वयेपि एसेव नयो. अप्पतिट्ठोति उच्छेदवादादिवसेन पतिट्ठारहितो. अनालम्बोति तेसंयेव वादानं ओलम्बारम्मणस्स अभावेन अनालम्बो. सुखपवेसनट्ठानन्ति तेसञ्ञेव वादानं सुखपवेसनोकासं मा लभतूति. अननुञ्ञाय ठत्वाति ‘‘न उपपज्जती’’तिआदिना अनुजानितब्बाय पटिञ्ञाय ठानहेतु. अनुञ्ञम्पीति अनुजानितब्बम्पि दुतियपञ्हं पटिक्खिपि. परियत्तो पन धम्मो अत्थतो पच्चयाकारो एवाति आह ‘‘धम्मोति पच्चयाकारधम्मो’’ति. अञ्ञत्थ पयोगेनाति इमम्हा निय्यानिकसासना अञ्ञस्मिं मिच्छासमये पवत्तप्पयोगेन, अनिय्यानिकं विविधं मिच्छापटिपत्तिं पटिपज्जन्तेनाति अत्थो. ‘‘अञ्ञवादियकेना’’तिपि पाठो, पच्चयाकारतो अञ्ञाकारदीपकआचरियवादं पग्गय्ह तिट्ठन्तेनाति अत्थो.

१९१. अप्पच्चयोति ¶ अनुपादानो, निरिन्धनोति अत्थो.

१९२. येन रूपेनाति येन भूतुपादादिभेदेन रूपधम्मेन. तं रूपं तप्पटिबद्धसंयोजनप्पहानेन खीणासव-तथागतस्स पहीनं अनुप्पत्तिधम्मतं आपन्नं. तेन वुत्तं पाळियं ‘‘अनुप्पादधम्म’’न्तिआदि. अञ्ञेसं जाननाय अभावगुणताय गुणगम्भीरो. ‘‘एत्तका गुणा’’ति पमाणं गण्हितुं न सक्कुणेय्यो. ‘‘ईदिसा एतस्स गुणा’’ति परियोगाहितुं असक्कुणेय्यताय दुप्परियोगाळ्होति. दुज्जानोति अगाधताय गम्भीरो ‘‘एत्तकानि उदकळ्हकसतानी’’तिआदिना पमेतुं न सक्काति अप्पमेय्यो, ततो एव दुज्जानो. एवमेवान्ति यथा महासमुद्दो गम्भीरो अप्पमेय्यो दुज्जानो, एवमेव खीणासवोपि गुणवसेन, तस्मा अयं रूपादिं गहेत्वा रूपीतिआदिवोहारो भवेय्य, परिनिब्बुतस्स पन तदभावा तथा पञ्ञापेतुं न सक्का, ततो तं आरब्भ उपपज्जतीतिआदि न युज्जेय्य. यथा पन विज्जमानो एव जातवेदो ब्यत्तेन पुरिसेन नीयमानो पुरत्थिमादिदिसं गतोति वुच्चेय्य, न निब्बुतो, एवं खीणासवोपीति दस्सेन्तो ‘‘एवमेवा’’तिआदिमाह.

अनिच्चताति एत्थ अनिच्चतागहणं असारनिदस्सनं. तेन यथा सो सालरुक्खो साखापलासादिअसारापगमेन सुद्धो सारे पतिट्ठितो, एवमयं धम्मविनयो सासवसङ्खातअसारविगमेन लोकुत्तरधम्मसारे पतिट्ठितोति दस्सेति. सेसं सुविञ्ञेय्यमेव.

अग्गिवच्छसुत्तवण्णनाय लीनत्थप्पकासना समत्ता.

३. महावच्छसुत्तवण्णना

१९३. सह ¶ कथा एतस्स अत्थीति सहकथी, ‘‘मयं पुच्छावसेन तुम्हे विस्सज्जनवसेना’’ति एवं सहपवत्तकथोति अत्थो. एतस्सेव कथितानि, तत्थ पठमे विज्जात्तयं देसितं, दुतिये अग्गिना दस्सितन्ति तेविज्जवच्छसुत्तं अग्गिवच्छसुत्तन्ति नामं विसेसेत्वा वुत्तं. सीघं लद्धिं न विस्सज्जेन्ति, यस्मा सङ्खारानं नियतोयं विनासो अनञ्ञसमुप्पादो, हेतुसमुप्पन्नापि न चिरेन निज्झानं खमन्ति, न लहुं. तेनाह ‘‘वसातेल ¶ …पे… सुज्झन्ती’’ति. पच्छिमगमनं ञाणस्स परिपाकं गतत्ता. यट्ठिं आलम्बित्वा उदकं तरितुं ओतरन्तो पुरिसो ‘‘यट्ठिं ओतरित्वा उदके पतमानो’’ति वुत्तो. कम्मपथवसेन वित्थारदेसनन्ति संखित्तदेसनं उपादाय वुत्तं. तेनाह ‘‘मूलवसेन चेत्था’’तिआदि. वित्थारसदिसाति कम्मपथवसेन इध देसितदेसनाव मूलवसेन देसितदेसनं उपादाय वित्थारसदिसा. वित्थारदेसना नाम नत्थीति न केवलं अयमेव, अथ खो सब्बापि बुद्धानं निप्परियायेन उजुकेन निरवसेसतो वित्थारदेसना नाम नत्थि देसनाञाणस्स महाविसयताय करणसम्पत्तिया च तज्जाय महानुभावत्ता सब्बञ्ञुतञ्ञाणस्स. सब्बञ्ञुतञ्ञाणसमङ्गिताय हि अवसेसपटिसम्भिदानुभाविताय अपरिमितकालसम्भतञाणसम्भारसमुदागताय कदाचिपि परिक्खयानरहाय अनञ्ञसाधारणाय पटिभानपटिसम्भिदाय पहूतजिव्हादितदनुरूपरूपकायसम्पत्तिसम्पदाय वित्थारियमाना भगवतो देसना कथं परिमिता परिच्छिन्ना भवेय्य, महाकारुणिकताय पन भगवा वेनेय्यज्झासयानुरूपं तत्थ तत्थ परिमितं परिच्छिन्नं कत्वा निट्ठपेति. अयञ्च अत्थो महासीहनादसुत्तेन (म. नि. १.१४६ आदयो) दीपेतब्बो. सब्बं संखित्तमेव अत्तज्झासयवसेन अकथेत्वा बोधनेय्यपुग्गलज्झासयवसेन देसनाय निट्ठापितत्ता. न चेत्थ धम्मसासनविरोधो परियायं अनिस्साय यथाधम्मं धम्मानं बोधितत्ता सब्बलहुत्ता चाति.

१९४. सत्त धम्मा कामावचरा सम्पत्तसमादानविरतीनं इधाधिप्पेतत्ता.

अनियमेत्वाति ‘‘सम्मासम्बुद्धो, सावको’’ति वा नियमं विसेसेन अकत्वा. अत्तानमेव…पे… वेदितब्बं, तथा हि परिब्बाजको ‘‘तिट्ठतु भवं गोतमो’’ति आह.

१९५. सत्थाव ¶ अरहा होति पटिपत्तिया पारिपूरिभावतो. तस्मिं ब्याकतेति तस्मिं ‘‘एकभिक्खुपि सावको’’तिआदिना सुट्ठु पञ्हे कथिते.

१९६. सम्पादकोति पटिपत्तिसम्पादको.

१९७. सेखाय ¶ विज्जायाति सेखलक्खणप्पत्ताय मग्गपञ्ञाय सातिसयं कत्वा करणवसेन वुत्ता, फलपञ्ञा पन ताय पत्तब्बत्ता कम्मभावेन वुत्ता. तेनाह ‘‘हेट्ठिमफलत्तयं पत्तब्ब’’न्ति. इमं पनेत्थ अविपरीतमत्थं पाळितो एव विञ्ञायमानं अप्पटिविज्झनतो वितण्डवादी ‘‘यावतकं सेखेन पत्तब्बं, अनुप्पत्तं तं मया’’ति वचनलेसं गहेत्वा ‘‘अरहत्तमग्गोपि अनेन पत्तोयेवा’’ति वदति. एवन्ति इदानि वुच्चमानाय गाथाय.

किलेसानि पहाय पञ्चाति पञ्चोरम्भागियसंयोजनसङ्खाते संकिलेसे पहाय पजहित्वा, पहानहेतु वा. परिपुण्णसेखोति सब्बसो वड्ढितसेखधम्मो. अपरिहानधम्मोति अपरिहानसभावो. न हि यस्स फातिगतेहि सीलादिधम्मेहि परिहानि अत्थि, समाधिम्हि परिपूरकारिताय चेतोवसिप्पत्तो. तेनाह ‘‘समाहितिन्द्रियो’’ति. अपरिहानधम्मत्ताव ठितत्तो.

अनागामिना हि असेखभावावहा धम्मा परिपूरेतब्बा, न सेखभावावहाति सो एकन्तपरिपुण्णे सेखो वुत्तो. एतं न बुद्धवचनन्ति ‘‘मग्गो बहुचित्तक्खणिको’’ति एतं वचनं न बुद्धवचनं अनन्तरेकन्तविपाकदानतो, बहुक्खत्तुं पवत्तने पयोजनाभावतो च लोकुत्तरकुसलस्स, ‘‘समाधिमानन्तरिकञ्ञमाहु (खु. पा. ६.५; सु. नि. २२८), न पारं दिगुणं यन्ती’’ति (सु. नि. ७१९) एवमादीनि सुत्तपदानि एतस्सत्थसाधकानि. ओरम्भागियसंयोजनप्पहानेन सेक्खधम्मपरिपूरिभावस्स वुत्तताय अत्थो तव वचनेन विरुज्झतीति. अस्स आयस्मतो वच्छस्स.

१९८. अभिञ्ञा वा कारणन्ति यञ्हि तं तत्र तत्र सक्खिभब्बतासङ्खातं इद्धिविधपच्चनुभवनादि, तस्स अभिञ्ञा कारणं. अथ इद्धिविधपच्चनुभवनादि अभिञ्ञा, एवं सति अभिञ्ञापादकज्झानं कारणं. अवसाने छट्ठाभिञ्ञाय पन अरहत्तं. एत्थ च यस्मा पठमसुत्ते आसवक्खयो अधिप्पेतो, आसवा खीणा एव, न पुन खेपेतब्बा, तस्मा तत्थ ‘‘यावदेवा’’ति न वुत्तं. इध फलसमापत्ति अधिप्पेता, सा च पुनप्पुनं समापज्जीयति, तस्मा ‘‘यावदेवा’’ति वुत्तं. ततो एव हि ‘‘अरहत्तं वा कारण’’न्ति वुत्तं. तञ्हि ‘‘कुदास्सु ¶ नामाहं तदायतनं उपसम्पज्ज विहरिस्सामि, ¶ यदरिया एतरहि उपसम्पज्ज विहरन्ती’’ति (म. नि. १.४६५; ३.३०७) अनुत्तरेसु विमोक्खेसु पिहं उपट्ठपेत्वा अभिञ्ञा निब्बत्तेन्तस्स कारणं, तयिदं सब्बसाधारणं न होतीति साधारणवसेन नं दस्सेन्तो ‘‘अरहत्तस्स विपस्सना वा’’ति आह.

२००. परिचरन्ति नाम विप्पकतब्रह्मचरियवासत्ता. परिचिण्णो होति सावकेन नाम सत्थु धम्मे कत्तब्बा परिचरिया सम्मदेव निट्ठापितत्ता. तेनाह ‘‘इति…पे… थेरो एवमाहा’’ति. तेसं गुणानन्ति तेसं असेक्खगुणानं. सेसं सुविञ्ञेय्यमेव.

महावच्छसुत्तवण्णनाय लीनत्थप्पकासना समत्ता.

४. दीघनखसुत्तवण्णना

२०१. खननं ¶ खतं, सूकरस्स खतं एत्थ अत्थीति सूकरखता, सूकरस्स वा इमस्मिं बुद्धुप्पादे पठमं खतं उपादाय सूकरखता, ताय. एवंनामकेति एवं इत्थिलिङ्गवसेन लद्धनामके. पंसुधोतेति धोतपंसुके. ओतरित्वा अभिरुहितब्बन्ति पकतिभूमितो अनेकेहि सोपानफलकेहि ओतरित्वा पुन लेणद्वारं कतिपयेहि अभिरुहितब्बं.

ठितकोवाति मातुलस्स ठितत्ता तत्थ सगारवसपतिस्सवसेन ठितकोव. किञ्चापि सब्ब-सद्दो अविसेसतो अनवसेसपरियादायको, वत्थुअधिप्पायानुरोधी पन सद्दप्पयोगोति तमत्थं सन्धाय परिब्बाजको ‘‘सब्बं मे नक्खमती’’ति आह. या लोके मनुस्सउपपत्तियोतिआदिका उपपत्तियो, ता अनत्थसमुदागता तत्थ तत्थेव सत्तानं उच्छिज्जनतो, तस्मा समयवादीहि वुच्चमाना सब्बा आयतिं उप्पज्जनउपपत्ति न होति. जलबुब्बुळका विय हि इमे सत्ता तत्थ तत्थ समये उप्पज्जित्वा भिज्जन्ति, तेसं तत्थ पटिसन्धि नत्थीति अस्स अधिप्पायो. तेनाह ‘‘पटिसन्धियो’’तिआदि. अस्स अधिप्पायं मुञ्चित्वाति येनाधिप्पायेन परिब्बाजको ‘‘सब्बं मे नक्खमती’’ति आह, तं तस्स अधिप्पायं जानन्तोपि अजानन्तो विय हुत्वा तस्स अक्खरे ताव दोसं दस्सेन्तोति ¶ पदेससब्बं सन्धाय तेन वुत्तं, सब्बसब्बविसयं कत्वा तत्थ दोसं गण्हन्तो. यथा लोके केनचि ‘‘सब्बं वुत्तं, तं मुसा’’ति वुत्ते तस्स वचनस्स सब्बन्तोगधत्ता मुसाभावो आपज्जेय्य, एवं इमस्सपि ‘‘सब्बं मे नक्खमती’’ति वदतो तथा पवत्ता दिट्ठिपि नक्खमतीति अत्थतो आपन्नमेव होति. तेनाह भगवा – ‘‘एसापि ते दिट्ठि नक्खमती’’ति. यथा पन केनचि ‘‘सब्बं वुत्तं मुसा’’ति वुत्ते अधिप्पायानुरोधिनी सद्दप्पवत्ति, तस्स वचनं मुञ्चित्वा तदञ्ञेसमेव मुसाभावो ञायागतो, एवमिधापि ‘‘सब्बं मे नक्खमती’’ति वचनतो यस्सा दिट्ठिया वसेन ‘‘सब्बं मे नक्खमती’’ति तेन वुत्तं, तं दिट्ठिं मुञ्चित्वा तदञ्ञमेव यथाधिप्पेतं सब्बं नक्खमतीति अयमत्थो ञायागतो, भगवा पन वादीवरो सुखुमाय आणिया थूलं आणिं नीहरन्तो विय उपायेन तस्स दिट्ठिगतं नीहरितुं तस्स अधिप्पायेन अवत्वा सद्दवसेन ताव लब्भमानं दोसं दस्सेन्तो ‘‘यापि खो ते’’तिआदिमाह. तेन वुत्तं – ‘‘अस्स अधिप्पायं मुञ्चित्वा अक्खरे ताव दोसं दस्सेन्तो’’ति.

परिब्बाजको ¶ पन यं सन्धाय ‘‘सब्बं मे नक्खमती’’ति मया वुत्तं, ‘‘अयं सो’’ति यथावुत्तदोसपरिहरणत्थं तस्मिं अत्थे वुच्चमाने एस दोसो सब्बो न होति, एवम्पि समणो गोतमो मम वादे दोसमेव आरोपेय्याति अत्तनो अज्झासयं निगुहित्वा यथावुत्तदोसं परिहरितुकामो ‘‘एसा मे’’तिआदिमाह. तत्थ तम्पस्स तादिसमेवाति यं ‘‘सब्बं मे नक्खमती’’ति गहितं वत्थु, तम्पि तादिसमेव भवेय्याति. अयञ्च सब्बन्तोगधदिट्ठि मय्हम्पि दिट्ठिवत्थु, तं मे खमेय्यवाति. यस्मा पन ‘‘एसापि दिट्ठि तुय्हं नक्खमती’’ति यापि दिट्ठि वुत्ता भवता गोतमेन, सापि मय्हं नक्खमति, तस्मा सब्बं मे नक्खमतेवाति परिब्बाजकस्स अधिप्पायो. तेनाह – ‘‘तं परिहरामीति सञ्ञाय वदती’’ति. तथा च वक्खति ‘‘तस्मापि उच्छेददिट्ठि मय्हं नक्खमती’’ति. ‘‘एसा मे दिट्ठी’’ति या ठितिभूता दिट्ठि, ताय ‘‘सब्बं मे नक्खमती’’ति पनेत्थ सब्बग्गहणेन गहितत्ता आह – ‘‘अत्थतो पनस्स एसा दिट्ठि न मे खमतीति आपज्जती’’ति. अयं दोसोति दस्सेन्तो आह ‘‘यस्स पना’’तिआदि. एसाति दिट्ठि. रुचितन्ति दिट्ठिदस्सनेन अभिनिविसित्वा रोचेत्वा गहितं. तेन हि दिट्ठिअक्खमेन अरुचितेन भवितब्बन्ति सति दिट्ठिया अक्खमभावे ततो ताय गहिताय खमेय्य रुच्चेय्य यथा, एवं सब्बस्स अक्खमभावेति ¶ अपरभागे सब्बं खमति रुच्चतीति आपज्जति. न पनेस तं सम्पटिच्छतीति एस ‘‘सब्बं मे नक्खमती’’ति एवं वदन्तो उच्छेदवादी तं वुत्तनयेन सब्बस्स खमनं रुच्चनं न सम्पटिच्छति. ञायेन वुत्तमत्थं कथं न सम्पटिच्छतीति आह ‘‘केवलं तस्सापि उच्छेददिट्ठिया उच्छेदमेव गण्हाती’’ति. सब्बेसञ्हि धम्मानं आयतिं उप्पादं अरुच्चित्वा तं सन्धाय अयं ‘‘सब्बं मे नक्खमती’’ति वदति, उच्छेददिट्ठिकेसु च उच्छिन्नेसु कुतो उच्छेददिट्ठिसभावोति.

तेनाति तेन कारणेन, यस्मा इधेकच्चे सत्ता ईदिसं दिट्ठिं पग्गय्ह तिट्ठन्ति, तस्माति वुत्तं होति. पजहनकेन वा चित्तेन एकज्झं गहेत्वा पजहनकेहि अप्पजहनके निद्धारेतुं भगवा ‘‘अतो…पे… बहुतरा’’ति अवोचाति आह – ‘‘पजहनकेसु निस्सक्क’’न्ति यथा ‘‘पञ्चसीलेहि पभावना पञ्ञवन्ततरा’’ति. ‘‘बहू’’ति वत्वा न केवलं बहू, अथ खो अतिविय बहूति दस्सेन्तो ‘‘बहुतरा’’ति आह. ‘‘बहू ही’’ति नयिदं निस्सक्कवचनं, अथ खो पच्चत्तवचनं. कथं हि-सद्दोति आह ‘‘हि-कारो निपातमत्त’’न्ति. अनिस्सक्कवचनं ताव तस्स पजहनकानं बहुभावतो तेपि परतो ‘‘बहुतरा’’ति वुच्चीयन्ति. मूलदस्सनन्ति ये तादिसं दस्सनं पठमं उपादियन्ति, तज्जातिकमेव पच्छा गहितदस्सनं. विजातियञ्हि पठमं गहितदस्सनं अप्पहाय विजातियस्स गहणं न सम्भवति विरुद्धस्स अभिनिवेसस्स सह अनवट्ठानतो ¶ . अविरुद्धं पन मूलदस्सनं अविस्सज्जित्वा विसयादिभेदभिन्नं अपरदस्सनं गहेतुं लब्भति. तेनाह ‘‘एत्थ चा’’तिआदि.

तत्थ किञ्चापि एकच्चसस्सतवादो सस्सतुच्छेदाभिनिवेसानं वसेन यथाक्कमं सस्सतुच्छेदग्गाहनजातिको, उच्छेदग्गाहेन पन सस्सताभिनिवेसस्स तंगाहेन च असस्सताभिनिवेसस्स विरुज्झनतो उभयत्थपि ‘‘एकच्चसस्सतं वा गहेतुं न सक्का’’ति वुत्तं, तथा ‘‘सस्सतं वा उच्छेदं वा न सक्का गहेतु’’न्ति च. मूलसस्सतञ्हि पठमं गहितं. आयतनेसुपि योजेतब्बन्ति पठमं चक्खायतनं सस्सतन्ति गहेत्वा अपरभागे न केवलं चक्खायतनमेव सस्सतं, सोतायतनम्पि सस्सतं, घानायतनादिपि सस्सतन्ति गण्हातीतिआदिना योजेतब्बं. आयतनेसुपीति पि-सद्देन धातूनं इन्द्रियानम्पि गाहो दट्ठब्बो. इदं सन्धायाति ¶ ‘‘मूले सस्सत’’न्तिआदिना वुत्तपठमग्गाहस्स समानजातियं अपरग्गाहं सन्धाय.

दुतियवारे पठमवारे वुत्तसदिसं वुत्तनयेनेव वेदितब्बं. तत्थ आदीनवं दिस्वाति ‘‘यदि रूपं सस्सतं सिया, नयिदं आबाधाय संवत्तेय्य. यस्मा च खो इदं रूपं असस्सतं, तस्मा अभिण्हपटिपीळनट्ठेन उदयवयवन्तताय रूपं अनिच्चं सङ्खतं पटिच्चसमुप्पन्नं, सस्सताभिनिवेसो मिच्छा’’तिआदिना तत्थ सस्सतवादे आदीनवं दोसं दिस्वा. ओळारिकन्ति तस्मा पटिपीळनट्ठेन अयाथावग्गाहताय रूपं न सण्हं ओळारिकमेव. वेदनादीनम्पि अनिच्चादिभावदस्सनं रूपवेदनाआदीनं समानयोगक्खमत्ता. विस्सज्जेतीति पजहति.

तिस्सो लद्धियोति सस्सतुच्छेदएकच्चसस्सतदिट्ठियो. यस्मा सस्सतदिट्ठिका वट्टे रज्जनस्स आसन्ना. तथा हि ते ओलीयन्तीति वुच्चन्ति, भवाभवदिट्ठीनं वसेन इमेसं सत्तानं संसारतो सीसुक्खिपनं नत्थीति एताव तिस्सो विसेसतो गहेतब्बा.

इधलोकं परलोकञ्च अत्थीति जानातीति एत्तावता सस्सतदस्सनस्स अप्पसावज्जताकारणमाह, वट्टं अस्सादेति, अभिनन्दतीति इमिना दन्धविरागताय. तेनाह ‘‘तस्मा’’तिआदि. इधलोकं परलोकञ्च अत्थीति जानातीति इमिना तासु तासु गतीसु सत्तानं संसरणं पटिक्खिपतीति दस्सेति, सुकतदुक्कटानं कम्मानं फलं अत्थीति जानातीति इमिना कम्मफलं. कुसलं न करोतीति इमिना कम्मं, अकुसलं करोन्तो न भायतीति इमिना पुञ्ञापुञ्ञानि सभावतो जायन्तीति दस्सेति. वट्टं अस्सादेति अभिनन्दति तन्निन्नभावतो ¶ . सीघं लद्धिं जहितुं न सक्कोति वट्टुपच्छेदस्स अरुच्चनतो. उच्छेदवादी हि तस्मिं भवे उच्छेदं मञ्ञति. ततो परं इधलोकं परलोकञ्च अत्थीति जानाति सुकतदुक्कटानं फलं अत्थीति जानाति कम्मफलवादीभावतो. येभुय्येन हि उच्छेदवादी सभावनियतियदिच्छाभिनिवेसेसु अञ्ञत्राभिनिवेसो होति. सीघं दस्सनं पजहति वट्टाभिरतिया अभावतो. पारमियो पूरेतुं सक्कोन्तो पच्चेकबुद्धो हुत्वा, लोकवोहारमत्तेनेव सो सम्मासम्बुद्धो हुत्वा परिनिब्बायतीति योजना. असक्कोन्तोति बुद्धो होतुं असक्कोन्तो. अभिनीहारं ¶ कत्वा अग्गसावकादिभावस्स अभिनीहारं सम्पादेत्वा. सावको हुत्वाति अग्गसावको महासावको हुत्वा, तत्थापि तेविज्जो छळभिञ्ञो पटिसम्भिदाप्पत्तो वा सुक्खविपस्सको एव वा बुद्धसावको हुत्वा परिनिब्बायति. सब्बमिदं उच्छेदवादिनो कल्याणमित्तनिस्सयेन सम्मत्तनियामोक्कमने खिप्पविरागतादस्सनत्थं आगतं. तेनाह ‘‘तस्मा’’तिआदि.

२०२. कञ्जियेनेवाति आरनाळेन. कञ्जियसदिसेन उच्छेददस्सनेन. पूरितोति परिपुण्णज्झासयो. सोति परिब्बाजको. अप्पहायाति अभिन्दित्वा. विग्गहोति कलहो इदमेव सच्चं, मोघमञ्ञन्ति अञ्ञमञ्ञं विरुद्धग्गाहोति कत्वा. विवादन्ति विरुद्धवादं. विघातन्ति विरोधहेतुकं चित्तविघातं. विहेसन्ति विग्गहविवादनिमित्तं कायिकं चेतसिकञ्च किलमथं. आदीनवं दिस्वाति एतासं दिट्ठीनं एवरूपो आदीनवो, अनिय्यानिकभावताय पन सम्पति आयतिञ्च महादीनवोति एवं आदीनवं दिस्वा.

२०५. ‘‘एसोहमस्मि, एसो मे अत्ता’’तिआदिना (म. नि. १.२४१; सं. नि. ३.८) कायं अन्वेतीति कायन्वयो, सोयेव, तस्स वा समूहो कायन्वयता, कायपटिबद्धो किलेसो. तेनाह ‘‘कायं…पे… अत्थो’’ति.

असम्मिस्सभावन्ति असङ्करतो ववत्थितभावं. तेन तासं यथासकं पच्चयानं उप्पज्जित्वा विगमं दस्सेति. एवञ्हि तासं कदाचिपि सङ्करो नत्थि. तेनाह ‘‘तत्रायं सङ्खेपत्थो’’तिआदि. सरूपं अग्गहेत्वा ‘‘अञ्ञा वेदना’’ति अनियमेन वुत्तत्ता तमेव विगमं दस्सेन्तो ‘‘अनुप्पन्नाव होन्ति अन्तरहिता वा’’ति आह. सरूपतो नियमेत्वा वुच्चमाने काचि अनुप्पन्ना वा होति, काचि अन्तरहिता वाति. चुण्णविचुण्णभावदस्सनत्थन्ति खणे खणे भिज्जमानभावदस्सनत्थं.

न केनचि ¶ संवदतीति केनचि पुग्गलेन सद्धिं दिट्ठिरागवसेन संकिलिट्ठचित्तो न वदति. तेनाह ‘‘सस्सतं गहेत्वा’’तिआदि. न विवदतीति विरुद्धभावो हुत्वा न विवदति. परिवत्तेत्वाति उच्छेदं गहेत्वा एकच्चसस्सतं गहेत्वा एवं वुत्तनयेन तयोपि वादा परिवत्तेत्वा योजेतब्बा ¶ . तेन वोहरतीति तेन लोकवोहारेन लोकसमञ्ञं अनतिधावन्तो सत्तो पुरिसो पुग्गलोतिआदिना वोहरति, न पन इतो बाहिरका विय अभिनिविसति. तेनाह ‘‘अपरामसन्तो’’ति. कञ्चि धम्मन्ति रूपादीसु एकं धम्मम्पि. परामासग्गाहेन अग्गण्हन्तोति ‘‘निच्च’’न्तिआदिना, ‘‘एतं ममा’’तिआदिना च धम्मसभावं अतिक्कमित्वा परतो आमसित्वा गहणेन अग्गण्हन्तो.

कतावीति कतकिच्चो. सो वदेय्याति खीणासवो भिक्खु अहङ्कारममङ्कारेसु सब्बसो समुच्छिन्नेसुपि अहं वदामीति वदेय्य. तत्थ अहन्ति नियकज्झत्तसन्ताने. ममन्ति तस्स सन्तकभूते वत्थुस्मिं लोकनिरुळ्हे. समञ्ञन्ति तत्थ सुकुसलताय लोके समञ्ञा कुसलो विदित्वा. वोहारमत्तेनाति केवलं पच्चेकबुद्धो हुत्वा महाबोधिपारमियो पूरेतुं असक्कोन्तो सावको हुत्वा देसवोहारमत्तेन न अप्पहीनतण्हो विय अन्धपुथुज्जनो अभिनिवेसनवसेन.

२०६. सस्सतादीसूति सस्सताभिनिवेसादीसु. तेसं तेसं धम्मानन्ति निद्धारणे सामिवचनं. सस्सतं अभिञ्ञायाति सस्सतदिट्ठिं समुदयतो अत्थङ्गमतो अस्सादतो निस्सरणतो अभिविसिट्ठाय पञ्ञाय पटिविज्झित्वा. पहानन्ति अच्चन्तप्पहानं समुच्छेदं. रूपस्स पहानन्ति रूपस्स तप्पटिबद्धसञ्ञोजनप्पहानेन पहानं. अनुप्पादनिरोधेन निरुद्धेहि आसवेहि अग्गहेत्वाव चित्तं विमुच्चि. ‘‘आसवेहि चित्तं विमुच्ची’’ति एत्थ किञ्चिपि अग्गहेत्वा असेसेत्वा. सोळस पञ्ञाति महापञ्ञादिका सोळस पञ्ञा. चतुरङ्गसमन्नागतोति पुण्णउपोसथदिवसता, केनचि अनामन्तितमेव अनेकसतानंयेव अनेकसहस्सानं वा भिक्खूनं सन्निपतितता, सब्बेसं एहिभिक्खुभावेन उपसम्पन्नता, छळभिञ्ञता चाति. तेनाह ‘‘तत्रिमानि अङ्गानी’’तिआदि. यं पनेत्थ अत्थतो अविभत्तं, तं सुविञ्ञेय्यमेव.

दीघनखसुत्तवण्णनाय लीनत्थप्पकासना समत्ता.

५. मागण्डियसुत्तवण्णना

२०७. द्वे ¶ मागण्डियाति द्वे ¶ मागण्डियनामका. देवगब्भसदिसन्ति देवानं वसनओवरकसदिसं. एतं वुत्तन्ति ‘‘भारद्वाजगोत्तस्स ब्राह्मणस्स अग्यागारे तिणसन्थारके’’ति एतं वुत्तं. न केवलं तं दिवसमेवाति यं दिवसं मागण्डियो परिब्बाजको तिणसन्थारकं पञ्ञत्तं, न केवलं तं दिवसमेव भगवा येनञ्ञतरो वनसण्डो, तेनुपसङ्कमीति योजना. गामूपचारेति गामसमीपे. सञ्ञाणं कत्वाति सञ्ञाणं कत्वा विय. न हि भगवतो तस्स सञ्ञाणकरणे पयोजनं अत्थि.

समणसेय्यानुरूपन्ति समणस्स अनुच्छविका सेय्या. पासंसत्थो हि अयं रूप-सद्दो. तेनाह ‘‘इमं तिणसन्थारक’’न्तिआदि. अनाकिण्णोति विलुळितो अघट्टितो. हत्थपादसीसेहि तत्थ तत्थ पहटेन न चलितो अभिन्नो, अचलितत्ता एव अभिन्नं अत्थरणं. परिच्छिन्दित्वा पञ्ञत्तो वियाति अयं छेकेन चित्तकारेन चिन्तेत्वा तुलिकाय परिच्छिन्नलेखाय परिच्छिन्दित्वा लिखिता चित्तकतसेय्या विय. भूनं वुच्चति वड्ढितं, तं हन्तीति भूनहुनो. तेनाह ‘‘हतवड्ढिनो’’ति. तं पनायं चक्खादीसु संवरविधानं वड्ढिहननं मञ्ञति. तेनाह ‘‘मरियादकारकस्सा’’ति. ब्रूहेतब्बन्ति उळारविसयूपहारेन वड्ढेतब्बं पीणेतब्बं. तं पन अननुभूतानुभवनेन होतीति आह ‘‘अदिट्ठं दक्खितब्ब’’न्ति. अनुभूतं पन अपणीतं होतीति वुत्तं ‘‘दिट्ठं समतिक्कमितब्ब’’न्ति. सेसवारेसुपि एसेव नयो. परमदिट्ठधम्मनिब्बानवादी किरेस परिब्बाजको, तस्मा एवं छसु द्वारेसु वड्ढिं पञ्ञपेति. यस्मा यं छन्नम्पि चक्खादीनं यथासकं विसयग्गहणं पटिक्खिपन्तो लोकस्स अवड्ढितं विनासमेव पञ्ञपेति, तस्मा सो सयम्पि वड्ढिहतो हतवड्ढितो.

संकिलेसतो आरकत्ता अरियो निय्यानिकधम्मभावतो ञायो धम्मो. वज्जलेसस्सपि अभावतो कुसलो. तेनाह ‘‘परिसुद्धे कारणधम्मे अनवज्जे’’ति. उग्गतस्साति उच्चकुलीनतादिना उळारस्स. मुखे आरक्खं ठपेत्वाति मुखेन संयतो हुत्वा. अम्बजम्बूआदीनि गहेत्वा विय अपूरयमानोति अम्बजम्बूआदीनि अञ्ञमञ्ञविसदिसानि विय पूरणकथानयेन यं किञ्चि अकथेत्वा. तेनाह ‘‘मया कथितनियामेना’’ति.

२०८. फलसमापत्तिया ¶ ¶ वुट्ठितोति दिवाविहारतो वुट्ठितोति अत्थो. दिवाविहारोपि हि ‘‘पटिसल्लान’’न्ति वुच्चति ‘‘रहोगतस्स पटिसल्लीनस्स एवं चेतसो परिवितक्को उदपादी’’तिआदीसु (पारा. १८). भगवा हि फलसमापत्तितो वुट्ठानुत्तरकालं तेसं कथासल्लापं सुत्वा दिवाविहारतो वुट्ठाय तत्थ गतो. संवेगो नाम सहोत्तप्पञाणं, तं निब्बिन्दनवसेनपि होति, संवेगनिस्सितं सन्धायाह ‘‘पीतिसंवेगेन संविग्गो’’ति. सो पन यस्मा पुरिमावत्थाय चलनं होति चित्तस्स, तस्मा आह ‘‘चलितो कम्पितो’’ति. तिखिणसोतेन पुरिसेनाति भगवन्तं सन्धायाह.

२०९. धम्मदेसनं आरभि यथा विनेय्यदमनकुसलो वसनट्ठानट्ठेनाति इदं आरमितब्बभावस्स भावलक्खणवचनं. आरमति एत्थाति आरामो, रूपं आरामो एतस्साति रूपारामं, ततो एव तन्निन्नभावेन रूपे रतन्ति रूपरतं, तेन सम्मो दुप्पत्तिया रूपेन सम्मुदितन्ति रूपसम्मुदितं, तदेतं तदभिहतजवनकिच्चं तत्थ आरोपेत्वा वुत्तं. दन्तन्तिआदीसुपि एसेव नयो. दन्तं दमितं. निब्बिसेवनन्ति विगतविसुकायिकं. गुत्तन्ति सतिया गुत्तं. रक्खितन्ति तस्सेव वेवचनं. संवुतन्ति अपनीतं पवेसनिवारणेन. तेनाह ‘‘पिहित’’न्ति.

२१०. उप्पज्जनपरिळाहन्ति उप्पज्जनकिलेसपरिळाहं. किं वचनं वत्तब्बं अस्साति रूपारम्मणं अनुभवित्वा समुदयादिपहानं परिग्गण्हित्वा परिनिब्बिन्दित्वा विरज्जित्वा यो विमुत्तो, तत्थ किं वुद्धिहतपरियायो अवस्सं लभति न लभतीति पुच्छति. परिब्बाजको तादिसे सारबद्धविमुत्तिके वुद्धिहतोति न वदेय्याति आह ‘‘न किञ्चि, भो, गोतमा’’ति.

२११. तेति तया, अयमेव वा पाठो. वस्सं वासो वस्सं उत्तरपदलोपेन, वस्सितुं अरहतीति वस्सिको, वस्सकाले निवासानुच्छविकोति अत्थो.

नातिउच्चो होति नातिनीचोति गिम्हिको विय उच्चो, हेमन्तिको विय नीचो न होति, अथ खो तदुभयवेमज्झलक्खणताय नातिउच्चो होति नातिनीचो. नातितनूनीति ¶ हेमन्तिकस्स विय न खुद्दकानि. नातिबहूनीति गिम्हिकस्स विय न अतिबहूनि. मिस्सकानेवाति हेमन्तिकगिम्हिकेसु वुत्तलक्खणवोमिस्सकानि. उण्हपवेसनत्थायाति नियूहेसु पुरेभत्तं पच्छाभत्तञ्च पतितसूरियोभासवसेन उण्हस्स अब्भन्तरपवेसनत्थाय. भित्तिनियूहानि नीहरीयन्तीति ¶ दक्खिणपस्से भित्तीसु नियूहानि नीहरित्वा करीयन्ति. विपुलजालानीति पुथुलछिद्दानि. उदकयन्तानीति उदकवाहकयन्तानि.

नीलुप्पलगच्छके कत्वाति विकसितेहि नीलुप्पलेहि गच्छके नळिनिके कत्वा. गन्धकललन्ति गन्धमिस्सककद्दमं. यमकभित्तीति युगळभित्ति, तस्सा अन्तरे नाळि, यतो उदकं अभिरुहति. लोहनाळिन्ति लोहमययन्तनाळिं. जालन्ति तम्बलोहमयं जालं. हेट्ठा यन्तं परिवत्तेन्तीति हेट्ठाभागे उदकयन्तं गमेन्ति. उदकफुसिते तेमेन्ते विवण्णता माहोसीति नीलपटं निवासेति. दिवाकालेति दिवसवेलाय. अज्झत्तं वूपसन्तचित्तो विहरामीति एतेन अत्तनो फलसमापत्तिविहारो भगवता दस्सितोति आह – ‘‘ताय रतिया रममानोति इदं चतुत्थज्झानिकफलसमापत्तिरतिं सन्धाय वुत्त’’न्ति.

२१२. महा च नेसं पपञ्चोति नेसं राजूनं महापपञ्चो राजिद्धिवसेन सब्बदा सम्पत्तिविसयो च, अनुभवितुं न लभन्तीति अधिप्पायो. मन्ते गवेसन्ता विचरन्ति, न भोगसुखं. गणना नाम अच्छिन्नगणना, न विगणगणना न पणगणना. आवट्टोति यथाधिगते दिब्बे कामे पहाय कामहेतु आवट्टो निवत्तो परिवत्तितो भवेय्य. एवं मानुसका कामाति यथा कोचि कुसग्गेन उदकं गहेत्वा महासमुद्दे उदकं मिनेय्य. तत्थ महासमुद्दे उदकमेव महन्तं विपुलं पणीतञ्च, एवं दिब्बानं कामानं समीपे उपनिधाय मानुसका कामा अप्पमत्तका ओरमत्तका निहीना, दिब्बाव कामा महन्ता विपुला उळारा पणीता. समधिगय्हाति सम्मा अधिगमनवसेन निग्गय्ह दिब्बम्पि सुखं हीनं कत्वा तिट्ठति.

२१३. आरोग्यहेतुकं सुखं अस्स अत्थीति सुखी, तं पनस्स रोगविगमतोवाति आह ‘‘पठमं दुक्खितो पच्छा सुखितो’’ति. सेरी नाम अत्ताधीनवुत्तीति आह ‘‘सेरी एकको भवेय्या’’ति. अत्तनो वसो ¶ सयंवसो, सो एतस्स अत्थीति सयंवसी. अङ्गारकपल्लं विय कामवत्थुपरिळाहहेतुतो. तच्छेत्वाति घट्टेत्वा, कण्डूयित्वाति अत्थो.

२१४. येन कायो मधुरकजातो होति, तं किर कुट्ठं छविं विनासेति, चम्मं छिद्दजातं विय होति. तेनेवाह ‘‘उपहतकायप्पसादो’’ति. पच्चलत्थाति पटिलभि. अविज्जाभिभूतताय विरोधिपच्चयसमायोगेन पञ्ञिन्द्रियस्स उपहतत्ता. आयतिं दुक्खफलताय एतरहि च किलेसदुक्खबहुलताय कामानं दुक्खसम्फस्सता, तदुभयसंयुत्तेसु तेसु च तं असल्लक्खित्वा ¶ एकन्तसुखाभिनिवेसो विपरीतसञ्ञाय, न केवलाय सुखवेदनाय सुखाति पवत्तसञ्ञी.

२१५. तानीति कुट्ठसरीरे वणमुखानि. असुचीनीति असुभानि. दुग्गन्धानीति विस्सगन्धानि. पूतीनीति कुणपभूतानि. इदानीति एतरहि. नखेहि विप्पतच्छनअग्गिपरितापनेहि अतिनिप्पीळनकाले पाणका…पे… पग्घरन्ति, तेन वेदना तनुका होति. एवन्ति वुत्तनयेन वेदनाय तनुकभावतो.

आरोग्यभावे धनलाभादिलाभुप्पत्तितो, असति च आरोग्ये लाभस्स निरत्थकभावतो, दिट्ठधम्मिकादिसब्बसम्पत्तीनं लाभस्स निमित्तभावतो च आरोग्यपरमा लाभा. निब्बाने सुखुप्पत्तितो, असति च निब्बानाधिगमे तादिसस्स सुखस्स अनुपलब्भनतो, सब्बसङ्खतविवित्तत्ता च सब्बसो च संसारदुक्खाभावतो, अधिगते च तस्मिं सकलवट्टदुक्खाभावतो च निब्बानं परमं सुखं. पुब्बभागमग्गानन्ति कायानुपस्सनादिभेदभिन्नानं अरियमग्गस्स पुब्बभागियानं मग्गानं. तेसञ्च अमतगामिता नाम तन्निन्नतावसेनेव सच्छिकिरियावसेनाति आह ‘‘पुब्बभागगमनेनेव अमतगामिन’’न्ति. अट्ठङ्गिको अरियमग्गो खेमो सब्बपरिस्सयसमुग्घातनेन अनुपद्दुतत्ता, तंसमङ्गीनं सब्बसो अनुपद्दुतत्ता तंसमङ्गीनं सब्बसो अनुपद्दवहेतुतो च. लद्धिवसेन गहिताति सस्सतवादादीहि केवलं तेसं लद्धिवसेन तथा गहिता. खेमअमतगामिनन्ति इमिना हि ‘‘खेमंअमतगामिन’’न्ति विभत्तिअलोपेन निद्देसो, अत्थो पन विभत्तिलोपेन दट्ठब्बोति दस्सेति.

२१६. अनोमज्जतीति ¶ अनु अनु ओमज्जति. अपरापरं हत्थं हेट्ठा ओतारेन्तो मज्जति.

२१७. छेकन्ति घनभावेन वीतं. घनमट्ठभावेन सुन्दरं होतीति आह ‘‘सम्पन्न’’न्ति. साधूहि परमप्पिच्छसन्तुट्ठेहि लातो गहितोति साहुळि. सङ्कारचोळकं निच्चकाळकं.

२१८. तत्थ तत्थ रुजनट्ठेन विबाधनट्ठेन रोगोव भूतो. विपस्सनाञाणेनपि सिखाप्पत्तेन आरोग्यं एकदेसेन पस्सति, निब्बानञ्च वट्टपटिपक्खतोति आह ‘‘विपस्सनाञाणञ्चेवा’’ति.

२१९. अन्तराति ¶ पठमुप्पत्ति जरामरणानं वेमज्झे. उपहतोति पित्तसेम्हादिदोसेहि दूसितभावेन कथितो. पित्तादिदोसे पन भेसज्जसेवनाय निवत्तेन्तो उपहतं पटिपाकतिकं करोन्तो चक्खूनि उप्पादेति नाम. विनट्ठानीति अनुप्पत्तिधम्मतं आपन्नानि.

२२०. पुब्बे वुत्ते साहुळियचीरे. वट्टे अनुगतचित्तेनाति अनमतग्गे संसारवट्टे अनादीनवदस्सिताय अनुगामिचित्तेन.

२२१. धम्मस्साति निब्बानस्स. अनुधम्मन्ति अनुरूपं निय्यानधम्मं. तेनाह ‘‘अनुच्छविकं पटिपद’’न्ति. पञ्चक्खन्धेति पञ्चुपादानक्खन्धे दस्सेति. ‘‘दीघरत्तं वत, भो’’तिआदिना पाळियं विवट्टं दस्सितं. तेनाह ‘‘उपादाननिरोधाति विवट्टं दस्सेन्तो’’ति. सेसं सुविञ्ञेय्यमेव.

मागण्डियसुत्तवण्णनाय लीनत्थप्पकासना समत्ता.

६. सन्दकसुत्तवण्णना

२२३. देवेन ¶ वस्सेन कतो सोब्भो देवकतसोब्भो. तेनाह ‘‘वस्सो…पे… रहदो’’ति. गुहाति पंसुगुहा पासाणगुहा मिस्सकगुहाति तिस्सो गुहा. तत्थ पंसुगुहा उदकमुत्तट्ठाने अहोसि निन्नट्ठानं पन उदकेन अज्झोत्थतं. उमङ्गं कत्वाति हेट्ठा सुदुग्गं कत्वा. अनमतग्गियं ¶ पच्चवेक्खित्वाति ‘‘न खो सो सत्तावासो सुलभरूपो, यो इमिना दीघेन अद्धुना अनावुट्ठपुब्बो’’तिआदिना (म. नि. १.१६०) इदञ्च तळाकं मया वुत्थपुब्बं भविस्सति, तम्पि ठानं सो च अत्तभावो अपञ्ञत्तिकभावं गतोति एवं अनमतग्गियं पच्चवेक्खित्वा तादिसं ठानं गन्तुं वट्टति. इमिना नयेन समुद्दपब्बतदस्सनादीसुपि पच्चवेक्खणाविधि वेदितब्बो.

उच्चं नदमानायाति उच्चं कत्वा सद्दं करोन्तिया कामस्सादभवस्सादादिवत्थुन्ति ‘‘अयञ्च अयञ्च कामो इट्ठो कन्तो मनापो, असुको भवो इट्ठो कन्तो मनापो, एवमयं लोको पियेहि पियतरो’’ति एवं कामस्सादभवस्सादलोकस्सादादिसङ्खातं वत्थुं. दुग्गतितो संसारतो च निय्याति एतेनाति निय्यानं, सग्गमग्गो मोक्खमग्गो च, तं निय्यानं अरहति, निय्याने वा नियुत्ताति निय्यानिका, निय्यानं वा फलं एतिस्सा अत्थीति निय्यानिका, वचीदुच्चरितादिसंकिलेसतो निय्यातीति वा निय्यानीया, ई-कारस्स रस्सत्तं य-कारस्स च क-कारं कत्वा निय्यानिका, चेतनाय सद्धिं सम्फप्पलापा वेरमणि. तप्पटिपक्खतो अनिय्यानिका, तस्सा भावो अनिय्यानिकत्तं, तस्मा अनिय्यानिकत्ता. तिरच्छानभूताति तिरोकरणभूता. गेहस्सितकथाति कामपटिसंयुत्तकथा. कम्मट्ठानभावेति अनिच्चतापटिसंयुत्तचतुसच्चकम्मट्ठानभावे. सह अत्थेनाति सात्थकं, हितपटिसंयुत्तन्ति अत्थो. विसिखाति घरसन्निवेसो, विसिखागहणेन च तन्निवासिनो गहिता ‘‘गामो आगतो’’तिआदीसु (सारत्थ. टी. १.आचरियपरम्परकथावण्णना) विय. तेनेवाह ‘‘सूरा समत्था’’ति ‘‘सद्धा पसन्ना’’ति च. कुम्भट्ठानप्पदेसेन कुम्भदासियो वुत्ताति आह ‘‘कुम्भदासिकथा वा’’ति.

२२८. वोहारो विय तेसं तथा वोहारमत्तं गहेत्वा वुत्तं ‘‘ब्रह्मचरियवासे’’ति. अकताति समेन, विसमेन वा केनचि हेतुना न कता न विहिता. कतविधो करणविधि नत्थि ¶ एतेसन्ति अकटविधा. पदद्वयेनपि लोके केनचि हेतुपच्चयेन नेसं अनिब्बत्ततं दस्सेति. इद्धियापि न निम्मिताति कस्सचि इद्धिमतो चेतोवसिप्पत्तस्स देवस्स, इस्सरादिनो वा इद्धियापि न निम्मिता. अनिम्माताति कस्सचि अनिम्मापिता. रूपादिजनकभावन्ति रूपसद्दादीनं पच्चयभावं, रूपादयोपि पथवियादीहि ¶ अप्पटिबद्धवुत्तिकाति तस्स अधिप्पायो. यथा पब्बतकूटं केनचि अनिब्बत्तितं कस्सचि च अनिब्बत्तनकं, एवमेतेपीति आह ‘‘पब्बतकूटा विय ठिताति कूटट्ठा’’ति. यमिदं बीजतो अङ्कुरादि जायतीति वुच्चति, तं विज्जमानमेव ततो निक्खमति नाविज्जमानं, अञ्ञथा अञ्ञतोपि अञ्ञस्स उपलद्धि सियाति अधिप्पायो. एवं ठिताति एवं निब्बिकारा ठिता. उभयेनपीति अत्थद्वयेनपीति वदन्ति. ‘‘कूटट्ठा एसिकट्ठायिट्ठिता’’ति पदद्वयेनपि. तेसं सत्तन्नं कायानं. ठितत्ताति निब्बिकाराभावेन ठितत्ता. न चलन्तीति विकारं नापज्जन्ति. विकाराभावतो हि तेसं सत्तन्नं कायानं एसिकट्ठायिट्ठितता. अनिञ्जनञ्च अत्थतो पकतिया अवट्ठानमेवाति दस्सेतुं ‘‘न विपरिणामेन्ती’’ति वुत्तं. तथा अविपरिणामधम्मत्ता एव ते अञ्ञमञ्ञं न ब्याबाधेन्ति. सति हि विकारं आपादेतब्बताय ब्याबाधकतापि सिया, तथा अनुग्गहेतब्बताय अनुग्गाहकताति तदभावं दस्सेतुं पाळियं ‘‘नाल’’न्तिआदि वुत्तं.

पथवी एव कायेकदेसत्ता पथवीकायो. हन्तुं वा घातेतुं वा समत्थो नाम नत्थि जीवसत्तमानं कायानं निच्चताय निब्बिकारभावतो, एतेनेव नेसमहन्तब्बता अघातेतब्बता अत्थतो वुत्तायेवाति दट्ठब्बा. तथा हि वुत्तं ‘‘सत्तन्नंत्वेव कायान’’न्तिआदि. सोतुं वा सावेतुं वा समत्थो नाम नत्थीति पच्चेकं नेसं सवनेसु असमत्थत्ता तदेकदेसादीसुपि असमत्थतं दीपेति. यदि कोचि हन्ता नत्थि, कथं सत्थप्पहारोति आह ‘‘यथा मुग्गरासिआदीसू’’तिआदि. केवलं सञ्ञामत्तमेव होति, हननघातनादि पन परमत्थतो नत्थेव कायानं अविकोपनीयभावतोति अधिप्पायो. केवलं तक्कमत्तेन निरत्थकं दिट्ठिं दीपेतीति एतेन यस्मा तक्किका निरङ्कुसताय परिकप्पनस्स यं किञ्चि अत्तना परिकप्पितं सारतो मञ्ञमाना तथेव अभिनिविस्स तक्कदिट्ठिग्गाहं गण्हन्ति, तस्मा न तेसं दिट्ठिवत्थुस्मिं विञ्ञूहि विचारणा कत्तब्बाति दस्सेति. केचीति सारसमासाचरिया. पञ्चिन्द्रियवसेनाति पञ्चरूपिन्द्रियवसेन. कम्मन्ति लद्धि कम्मभावेन सुपाकटत्ता. अवङ्ककथातारणादिका द्वासट्ठि पटिपदा. एकस्मिं कप्पेति एकस्मिं महाकप्पे.

पुरिसभूमियोति ¶ पधानपुग्गलेन निद्देसो, इत्थीनम्पेता भूमियो इच्छन्तेव. भिक्खु च पन्नकोतिआदि तेसं पाळियेव. तत्थ पन्नकोति भिक्खाय विचरणकोति वदन्ति, तेसं वा पटिपत्तिं ¶ पटिपन्नको. जिनोति जिण्णो, जरावसेन निहीनधातुकोति वदन्ति, अत्तनो वा पटिपत्तिया पटिपक्खं जिनित्वा ठितो. सो किर तथाभूतो कस्सचिपि धम्मं न कथेति, तेनाह ‘‘न किञ्चि आहा’’ति. अलाभिन्ति ‘‘सो न कुम्भिमुखा पटिग्गण्हती’’तिआदिना (दी. नि. १.३९४) नयेन वुत्तअलाभहेतुसमायोगेन अलाभिं. ततो एव जिघच्छादुब्बलपरेतताय सयनपरायणं समणं पन्नभूमीति वदति.

आजीववुत्तिसतानीति सत्तानं आजीवभूतानि जीविकावुत्तिसतानि. पसुग्गहणेन एळकजाति गहिता, मिगग्गहणेन रुरुगवयादिसब्बमिगजाति. बहू देवाति चातुमहाराजिकादिब्रह्मकायिकादिवसेन नेसं अन्तरभेदवसेन बहू देवा. तत्थ चातुमहाराजिकानं एकच्चो अन्तरभेदो ‘‘महासमयसुत्तेन’’ (दी. नि. २.३३१ आदयो) दीपेतब्बो. मानुसापि अनन्ताति दीपदेसकुलवंसाजीवादिविभागवसेन मानुसापि अनन्तभेदा. पिसाचा एव पेसाचा, ते अपरपेतादयो महन्ता वेदितब्बा.

छद्दन्तदहमन्दाकिनियो कुळीरमुचलिन्दनामेन वदति. गण्ठिकाति पब्बगण्ठिका. पण्डितोपि…पे… उद्धं न गच्छति, कस्मा? सत्तानं संसरणकालस्स नियतभावतो.

अपरिपक्कं संसरणनिमित्तं सीलादिना परिपाचेति नाम सीघंयेव विसुद्धिप्पत्तिया. परिपक्कं फुस्स फुस्स पत्वा पत्वा परिपक्कभावापादनेन ब्यन्तिं करोति नाम. सुत्तगुळेति सुत्तवट्टियं. निब्बेठियमानमेव पलेतीति उपमाय सत्तानं संसारो अनुक्कमेन खीयतेव, न तस्स वद्धीति दस्सेति परिच्छिन्नरूपत्ता.

२२९. नियतिवादे पक्खिपन्तोति सब्बञ्ञुतं पटिजानित्वापि पदेसञ्ञुताय असम्पायमानो तत्थ अत्तनो अञ्ञाणकिरियं परिहरितुं असक्कोन्तो च ‘‘एवमेसा नियती’’ति नियतिवादे पक्खिपन्तो.

२३०. धम्मकथाय ¶ अपस्सयभूतो अनुस्सवो एतस्स अत्थीति अनुस्सवी, तेनेवस्स अपस्सयवादं दस्सेतुं ‘‘अनुस्सवनिस्सितो’’ति आह. सवनं सच्चतोति यं किञ्चि अनुस्सवं, तं सवनं सच्चन्ति गहेत्वा ठितो. पिटकसम्पदायाति गन्थसम्पादनेन, तादिसं गन्थं पगुणं वाचुग्गतं कत्वा तं निस्साय धम्मं कथेति. तेनाह ‘‘वग्गपण्णासकाया’’तिआदि.

२३२. मन्दपञ्ञोति ¶ परित्तपञ्ञो. मोमूहोति सम्मुय्हको. ‘‘एवन्तिपि मे नो’’तिआदिना विविधो नानप्पकारो खेपो वाचाय परवादानं खीपनं वाचाविक्खेपो, तं वाचाविक्खेपं, न मरति न पच्छिज्जति यथावुत्तो वादविक्खेपो एतायाति अमरा, तत्थ पवत्ता दिट्ठि अमराविक्खेपो, तं अमराविक्खेपं. अपरियन्तविक्खेपन्ति ‘‘एवम्पि मे नो’’तिआदिना पुच्छितस्स अपरियोसापनवसेन विक्खेपं. इतो चितो च सन्धावति एकस्मिं सभावे अनवट्ठानतो. गाहं न उपगच्छतीति मिच्छागाहताय उत्तरविधानाय पुरिमपक्खं ठपेत्वा गाहं न उपगच्छति. अमरासदिसाय अमराय विक्खेपोति अमराविक्खेपो.

इदं कुसलन्ति एत्थ इति-सद्दो पकारत्थो, इमिना पकारेनाति अत्थो. अमराविक्खेपिको यथा कुसले, एवं अञ्ञस्मिं यं किञ्चि केनचि पुच्छितं अत्थं अत्तनो अरुच्चनताय ‘‘एवन्तिपि मे नो’’तिआदिना तत्थ तत्थ विक्खेपञ्ञेव आपज्जति, तस्मा ‘‘एवन्तिपि मे नो’’तिआदि तत्थ तत्थ पुच्छिताकारपटिसेधनवसेन विक्खिपनाकारदस्सनं. ननु चेत्थ विक्खेपवादिनो विक्खेपपक्खस्स अननुजाननं विक्खेपपक्खे अवट्ठानं युत्तन्ति? न, तत्थापि तस्स सम्मूळ्हस्स पटिक्खेपवसेनेव विक्खेपवादस्स पवत्तनतो. तेन वुत्तं ‘‘नो’’ति. तथा हि सञ्चयो बेलट्ठपुत्तो रञ्ञा अजातसत्तुना सन्दिट्ठिकं सामञ्ञफलं पुट्ठो परलोकत्तिकादीनं पटिसेधनमुखेन विक्खेपं ब्याकासि.

एत्थाह – ‘‘ननु चायं सब्बोपि अमराविक्खेपिको कुसलादयो धम्मे परलोकत्तिकादीनि च यथाभूतं अनवबुज्झमानो तत्थ तत्थ पञ्हं पुट्ठो समानो पुच्छाय विक्खेपमत्तं आपज्जति, तस्स कथं दिट्ठिगतभावो. न हि अवत्तुकामस्स विय पुच्छितमत्थं अजानन्तस्स विक्खेपकरणमत्तेन ¶ तस्स दिट्ठिगतिकता युत्ता’’ति? वुच्चते – न हेव खो पुच्छाय विक्खेपकरणमत्तेन तस्स दिट्ठिगतिकता, अथ खो मिच्छाभिनिवेसवसेन. सस्सताभिनिवेसेन मिच्छाभिनिविट्ठोयेव हि पुग्गलो मन्दबुद्धिताय कुसलादिधम्मे परलोकत्तिकादीनि च याथावतो अप्पटिपज्जमानो अत्तना अविञ्ञातस्स अत्थस्स परं विञ्ञापेतुं असक्कुणेय्यताय मुसावादभयेन च विक्खेपं आपज्जतीति. अथ वा पुञ्ञपापानं तब्बिपाकानञ्च अनवबोधेन असद्दहनेन च तब्बिसयाय पुच्छाय विक्खेपकरणंयेव सुन्दरन्ति खन्तिं रुचिं उप्पादेत्वा अभिनिविसन्तस्स उप्पन्ना विसुंयेव सा एका दिट्ठि सत्तभङ्गदिट्ठि वियाति दट्ठब्बा, इन्द्रियबद्धतो च ततियट्ठानभावे दस्सितो.

२३४. सन्निधिकारकं ¶ कामेति एत्थ अनिन्द्रियबद्धानि अधिप्पेतानीति तिलतण्डुलादिग्गहणं, तस्स लोकस्स अप्पसादपरिहारत्थं कदाचि तण्डुलनाळिआदिसङ्गहणकरणं सन्धाय वुत्तं ‘‘तिलतण्डुलादयो पञ्ञायन्ती’’ति.

२३६. आजीवका मता नामाति इमे आजीवका सब्बसो सम्मापटिपत्तिरहिता मिच्छा एव च पटिपज्जमाना अधिसीलसङ्खातस्स सीलजीवितस्स अभावेन मता नाम. पुत्तमताति मतपुत्ता. समणे गोतमे ब्रह्मचरियवासो अत्थीति समणं एव गोतमं परिसुद्धो सुपरिपुण्णो तक्करस्स सम्मा दुक्खक्खयावहो ब्रह्मचरियवासो अत्थि. एतेनेत्थ धम्मसुधम्मतादिदीपनेन बुद्धसुबुद्धतञ्च दीपेति, अञ्ञत्थ नत्थीति इमिना बाहिरकेसु तस्स अभावं. सेसं सुविञ्ञेय्यमेव.

सन्दकसुत्तवण्णनाय लीनत्थप्पकासना समत्ता.

७. महासकुलुदायिसुत्तवण्णना

२३७. अभिञ्ञाताति ¶ एदिसो एदिसो चाति अभिलक्खणवसेन ञाता. अप्पसद्दस्स विनीतो, अप्पसद्दताय मन्दभाणिताय विनीतोति च अप्पसद्दविनीतोति वुच्चमाने अञ्ञेन विनीतभावो दीपितो होति, भगवा पन सयम्भुञाणेन सयमेव विनीतो. तस्मा पाळियं ‘‘अप्पसद्दविनीतो’’ति न वुत्तं. तेनाह ‘‘न हि भगवा अञ्ञेन विनीतो’’ति.

२३८. हिय्योदिवसं ¶ उपादाय ततो आसन्नानि कतिपयानि दिवसानि पुरिमानि नाम होन्ति, पुरिमानीति च पुब्बकानि, अतीतानीति अत्थो. ततो परन्ति यथा वुत्तअतीतदिवसतो अनन्तरं परं पुरिमतरं अतिसयेन पुरिमत्ता. इति इमेसु द्वीसु पवत्तितो यथाक्कमं पुरिमपुरिमतरभावो, एवं सन्तेपि यदेत्थ ‘‘पुरिमतर’’न्ति वुत्तं, ततो पभुति यं यं ओरं, तं तं परं, यं यं परं, तं तं ‘‘पुरिमतर’’न्ति वुत्तं होति. कुतूहलयुत्ता साला कुतूहलसाला यथा ‘‘आजञ्ञरथो’’ति. इमे दस्सनादयो.

अयथाभूतगुणेहीति अयथाभूतं मिच्छादीपितअत्थमत्तेनेव उग्घोसितगुणेहि समुग्गतो घोसितो. तरन्ति अतिक्कमन्ति एतेनाति तित्थं, अग्गमग्गो. दिट्ठिगतिकमग्गो पन अयथाभूतोपि तेसं तथा वितरणं उपादाय तित्थन्ति वोहरीयतीति तं करोन्ता तित्थकरा. ओसरतीति पविसति.

२३९. सहितन्ति पुब्बापराविरुद्धं. न किञ्चि जातन्ति पटिञ्ञादोसहेतुदोसउदाहरणदोसदुट्ठदोसताय न किञ्चि जातं. तेनाह ‘‘आरोपितो ते वादो’’ति. वदन्ति तेन परिभासन्तीति वादो दोसो. सभावक्कोसेनाति सभावतो पवत्तकोट्ठासेन.

२४०. पीळेय्याति मधुभण्डेन सह भाजने पीळेत्वा ददेय्य. सब्रह्मचारीहि सम्पयोजेत्वाति सहधम्मिकेहि विहेठनपयोगं कत्वा, तेनाह ‘‘विवादं कत्वा’’ति.

२४१. इतरीतरेनाति पणीततो इतरेन. तेनाह ‘‘लामकलामकेना’’ति.

२४२. भत्तकोसकेनाति ¶ कोसकभत्तेन, खुद्दकसरावभत्तकेनाति अत्थो. बेलुवमत्तभत्ताहाराति बिल्लपमाणभत्तभोजना. ओट्ठवट्टियाति मुखवट्टिया. सब्बाकारेनेवाति सब्बप्पकारेनेव. अनप्पाहारोति न वत्तब्बो कदाचि अप्पाहारोति कत्वा. तत्थ अतिविय अञ्ञेहि अविसय्हं अप्पाहारतं भगवतो दस्सेतुं ‘‘पधानभूमिय’’न्तिआदि वुत्तं. मयाति निस्सक्कवचनं. विसेसतराति तेन धम्मेन विसेसवन्ततरा.

वतसमादानवसेनेव ¶ पंसुकूलं धारेन्तीति पंसुकूलिकाति आह – ‘‘समादिन्नपंसुकूलिकङ्गा’’ति, सद्दत्थो पन ‘‘विसुद्धिमग्गे’’ (विसुद्धि. १.२४) वुत्तनयेन वेदितब्बो. पिण्डपातिका सपदानचारिनोतिआदीसुपि एसेव नयो. तत्थ तत्थ सत्थेन छिन्दितत्ता सत्थलूखानि. यं यं सप्पायं, तस्सेव गहणं उच्चिनन्ति आह ‘‘उच्चिनित्वा…पे… थिरट्ठानमेव गहेत्वा’’ति. अलाबुलोमसानीति अलाबुलोमानि विय सुखुमतरानि चीवरसुत्तंसूनि एतेसं सन्तीति अलाबुलोमसानि. पातितसाणपंसुकूलन्ति कळेवरेन सद्धिं छड्डितसाणमयं पंसुकूलं, यं तुम्बमत्ते पुळवे ओधुनित्वा सत्था गण्हि.

‘‘यथापि भमरो पुप्फ’’न्तिआदिना (ध. प. ४९) वुत्तं मधुकरभिक्खाचारवतं ‘‘पिण्डियालोपभोजनं निस्साय पब्बज्जा’’ति (महाव. ७३, १२८) वचनतो भिक्खूनं पकतिभूतं वतन्ति वुत्तं ‘‘उञ्छासके वते रता’’ति. वत-सद्दो चेत्थ पकतिवतसङ्खातं सकवतं वदति. तेनाह ‘‘उञ्छाचरियसङ्खाते भिक्खूनं पकतिवते’’ति. उच्चनीचघरद्वारट्ठायिनोति महन्तखुद्दकगेहानं बहिद्वारकोट्ठकट्ठायिनो. कबरमिस्सकं भत्तं संहरित्वाति कणाजकमिस्सकं भत्तं सम्पिण्डित्वा. उम्मारतो पट्ठायाति घरुम्मारतो पट्ठाय.

चीवरानुग्गहत्थन्ति चीवरानुरक्खणत्थं. एत्थ च यस्मा बुद्धा नाम सदेवके लोके अनुत्तरं पुञ्ञक्खेत्तं, सा चस्स पुञ्ञक्खेत्तता परमुक्कंसगता, तस्मा सत्तानं तादिसं उपकारं आचिक्खित्वा ते च अनुग्गण्हन्ता गहपतिचीवरं सादियन्ति, चतुपच्चयसन्तोसे पन ने परमुक्कंसगता एवाति दट्ठब्बं.

२४४. सप्पच्चयन्ति सहेतुकं सकारणं हुत्वा धम्मं देसेतीति अयमेत्थ अत्थो. चोदको पन अधिप्पायं अजानन्तो ‘‘किं पना’’तिआदिमाह. इतरो ‘‘नो न देसेती’’तिआदिना अधिप्पायं विवरति. निदानन्ति चेत्थ ञापकं उप्पत्तिकारणं अधिप्पेतं, तञ्च तस्स तस्स अनुप्पत्तियुत्तस्स अत्थस्स पटिपक्खहरणतो ‘‘सप्पाटिहारिय’’न्ति वुच्चतीति आह ‘‘पुरिमस्सेवेतं ¶ वेवचन’’न्ति. रागादीनं वा पटिहरणं पटिहारियं, तदेव पाटिहारियं, सह पाटिहारियेनाति सप्पाटिहारियं. रागादिपटिसेधवसेनेव हि सत्था धम्मं देसेति.

२४५. तस्स ¶ तस्स पञ्हस्साति यं यं पञ्हं परो अभिसङ्खरित्वा भगवन्तं उपसङ्कमित्वा पुच्छति, तस्स तस्स पञ्हस्स. उपरि आगमनवादपथन्ति विस्सज्जने कते ततो उपरि आगच्छनकं वादमग्गं. विसेसेत्वा वदन्तोति वत्तति, ‘‘भो गोतम, वत्तुमरहती’’ति अत्तनो वादभेदनत्थं आहतं कारणं अत्तनो मारणत्थं आवुधं निदस्सेन्तो विय विसेसेत्वा वदन्तो पहारकेन वचनेन. अन्तरन्तरेति मया वुच्चमानकथापबन्धस्स अन्तरन्तरे. ददेय्य वदेय्य. एवरूपेसु ठानेसूति परवादीहि सद्धिं वादपटिवादट्ठानेसु. ते निग्गहेतुं मया देसितं सुत्तपदं आनेत्वा ममयेव अनुसासनिं ओवादं पच्चासीसन्ति.

२४६. सम्पादेमीति मनोरथं सम्पादेमि. परिपूरेमीति अज्झासयं परिपूरेमि. अधिसीलेति अधिके उत्तमसीले. सावकसीलतो च पच्चेकबुद्धसीलतो च बुद्धानं सीलं अधिकं उक्कट्ठं परमुक्कंसतो अनञ्ञसाधारणभावतो. तेनाह ‘‘बुद्धसीलं नाम कथित’’न्ति. ठानुप्पत्तिकपञ्ञाति तत्थ तत्थ ठानसो उप्पन्नपञ्ञा. तेनाह ‘‘तत्था’’तिआदि. अवसेसा पञ्ञाति इध पाळियं आगता अनागता च यथावुत्तञाणद्वयविनिमुत्ता पञ्ञा.

२४७. विसेसाधिगमानन्ति सतिपट्ठानादीनं अधिगन्धब्बविसेसानं. अभिञ्ञा नाम छ अभिञ्ञा, तासु उक्कट्ठनिद्देसेन छळभिञ्ञारहतोव अग्गमग्गपञ्ञा इध अभिञ्ञाति अधिप्पेता, तस्स वोसानं परियोसानं पारमी परमुक्कंसाति अवकंसाति च अग्गफलं वुच्चतीति आह ‘‘अभिञ्ञा…पे… अरहत्तं पत्ता’’ति.

उपायपधानेति अरियफलाधिगमनस्स उपायभूते पधाने. ‘‘अनुप्पन्नपापकानुप्पादादिअत्था’’ति गहिता तथेव होन्ति, तं अत्थं साधेन्तियेवाति एतस्स अत्थस्स दीपको सम्मा-सद्दोति यथाअधिप्पेतत्थस्स अनुप्पन्नपापकानुप्पादादिनो उपायभूते, पधानउपायभूतेति अत्थो. सम्मा-सद्दस्स वा योनिसो अत्थदीपकतं सन्धाय ‘‘योनिसो पधाने’’ति वुत्तं. छन्दं जनेतीति कत्तुकम्यताकुसलच्छन्दं उप्पादेति पवत्तेति वा. वायमतीति पयोगपरक्कमं करोति. वीरियं आरभतीति कायिकचेतसिकवीरियं करोति. चित्तं उक्खिपतीति ¶ तेनेव सहजातवीरियेन कोसज्जपक्खतो चित्तं उक्खिपति. पदहतीति सम्मप्पधानभूतं वीरियं पवत्तेति. पटिपाटिया पनेतानि चत्तारि पदानि आसेवनाभावनाबहुलीकम्मसातच्चकिरियाहि ¶ योजेतब्बानि. ‘‘पदहती’’ति वा इमिना आसेवनादीहि सद्धिं सिखापत्तं उस्सोळ्हिवीरियं योजेतब्बं. वड्ढिया परिपूरणत्थन्ति यावता भावनापारिपूरिया परिपूरणत्थं. या ठितीति या कुसलानं धम्मानं पटिपक्खविगमेन अवट्ठिति. सो असम्मोसोति सो अविनासो. यं वेपुल्लन्ति यो सब्बसो विपुलभावो महन्तता. भावनापारिपूरीति भावनाय परिपूरिता. अत्थोतिपि वेदितब्बं पुरिमपच्छिमपदानं समानत्थभावतो.

पुब्बभागपटिपदा कथितातंतंविसेसाधिगमस्स पटिपदाविभावनाय आरद्धत्ता. अकुसलानं धम्मानं अनुप्पज्जनेन अनत्थावहता नाम नत्थीति वुत्तं – ‘‘उप्पज्जमाना’’ति वचनं उप्पन्नानं रासन्तरभावेन गहितत्ता. तथा कुसलानं धम्मानं उप्पज्जनेनाति वुत्तं – अनुप्पज्जमानाति वचनं उप्पन्नानं रासन्तरभावेन गहितत्ता. निरुज्झमानाति पटिपक्खसमायोगेन विनस्समाना, न खणनिरोधवसेन निरुज्झमाना.

लोभादयो वेदितब्बा, ये आरद्धविपस्सकानं उप्पज्जनारहा. सकिं उप्पज्जित्वाति सभावकथनमत्तमेतं. एकवारमेव हि मग्गो उप्पज्जति. निरुज्झमानोति सरसेनेव निरुज्झमानो. न हि तस्स पटिपक्खसमायोगो नाम अत्थि. फलस्साति अनन्तरकालेव उप्पज्जनकफलस्स. पच्चयं दत्वाव निरुज्झतीति इमिना मग्गो सम्पति आयतिञ्च एकन्तेनेव अत्थावहोति दस्सेति. पुरिमस्मिम्पीति ‘‘अनुप्पन्ना मे कुसला धम्मा अनुप्पज्जमाना अनत्थाय संवत्तेय्यु’’न्ति एतस्मिं ततियवारेपि. ‘‘समथविपस्सना गहेतब्बा’’ति वुत्तं अट्ठकथायं, तं पन मग्गस्स अनुप्पन्नताय सब्भावतो, अनुप्पज्जमाने च तस्मिं वट्टानत्थसब्भावतोति मग्गस्सपि साधारणभावतो न युत्तन्ति पटिक्खिपति. यदि समथविपस्सनानम्पि अनुप्पत्ति अनत्थावहा, मग्गस्स अनुप्पत्तिया वत्तब्बं नत्थीति.

महन्तं ¶ , गारवं होति, तस्मा ‘‘सङ्घगारवेन यथारुचि वन्दितुं न लभामी’’ति सङ्घेन सह न निक्खमि. एत्तकं धातूनं निधानं नाम अञ्ञत्र नत्थि, महाधातुनिधानतो हि नीहरित्वा कतिपया धातुयो तत्थ तत्थ चेतिये उपनीता, इध पन रामगामथूपे विनट्ठे नागभवनं पविट्ठा दोणमत्ता धातुयो उपनीता. अतिमन्दानि नोति ननु अतिविय मन्दानि.

संविज्जित्वाति ‘‘कथञ्हि नाम मादिसो ईदिसं अनत्थं पापुणिस्सती’’ति संवेगं जनेत्वा. ईदिसं नाम मादिसं आरब्भ वत्तब्बन्ति किं वदतीति तं वचनं अनादियन्तो.

सन्तसमापत्तितो ¶ अञ्ञं सन्थम्भनकारणं बलवं नत्थीति ततो परिहीनो सम्मापटिपत्तियं पतिट्ठा कथं भविस्सतीति आह ‘‘सन्ताय…पे… न सक्कोती’’ति. न हि महारज्जुया छिन्नाय सुत्ततन्तू सन्थम्भेतुं सक्कोन्तीति. समथे दस्सेत्वा तेन समानगतिका इमस्मिं विसये विपस्सनापीति इमिना अधिप्पायेनाह ‘‘एवं उप्पन्ना समथविपस्सना…पे… संवत्तन्ती’’ति.

कासावन्ति कासाववत्थं. कच्छं पीळेत्वा निवत्थन्ति पच्छिमं ओवट्टिकं पीळेन्तो विय दळ्हं कत्वा निवत्थं अद्दसंसूति योजना.

वुत्तनयेनाति (अ. नि. टी. १.१.३९४) ‘‘कामा नामेते अनिच्चा दुक्खा विपरिणामधम्मा’’तिआदिना वत्थुकामकिलेसकामेसु आदीनवदस्सनपुब्बकनेक्खम्मपटिपत्तिया छन्दरागं विक्खम्भयतो समुच्छिन्दन्तस्स च ‘‘अनुप्पन्नो च कामासवो न उप्पज्जती’’तिआदिना हेट्ठा सब्बासवसुत्तवण्णनादीसु (म. नि. १.१५ आदयो; म. नि. अट्ठ. १.१५ आदयो) वुत्तनयेन. आरम्मणरसं अनुभवित्वा निरुद्धविपाकोति तदारम्मणमाह. अनुभवित्वा भवित्वा च विगतं भूतविगतं. अनुभूतभूता हि भूततासामञ्ञेन भूत-सद्देन वुत्ता. सामञ्ञमेव हि उपसग्गेन विसेसीयतीति. अनुभूतसद्दो च कम्मवचनिच्छाय अभावतो अनुभवकवाचको दट्ठब्बो. विपाको आरम्मणे उप्पज्जित्वा निरुद्धो भुत्वाविगतोति वत्तब्बतं अरहति, ¶ विकप्पगाहवसेन रागादीहि तब्बिपक्खेहि च अकुसलं कुसलञ्च कम्मं आरम्मणरसं अनुभवित्वा विगतन्ति वत्तब्बतं अरहति. यथावुत्तो पन विपाको केवलं आरम्मणरसानुभवनवसेनेव पवत्ततीति अनुभवित्वा विगतत्ता निप्परियायेनेव वुत्तो, तस्स च तथा वुत्तत्ता कम्मं भवित्वा विगतपरियायेन, यं ‘‘उप्पन्नानं अकुसलानं धम्मानं पहानाय, उप्पन्नानं कुसलानं धम्मानं ठितिया’’ति एत्थ ‘‘उप्पन्न’’न्ति गहेत्वा तंसदिसानं पहानं, वुद्धि च वुत्ता. विपच्चितुं ओकासकरणवसेन उप्पतितं अतीतकम्मञ्च ततो उप्पज्जितुं आरद्धो अनागतो विपाको च ‘‘ओकासकतुप्पन्नो’’ति वुत्तो. यं उप्पन्नसद्देन विनापि विञ्ञायमानं उप्पन्नं सन्धाय ‘‘नाहं, भिक्खवे, सञ्चेतनिकान’’न्तिआदि (अ. नि. १०.२१७, २१९) वुत्तं.

तेसूति विपस्सनाय भूमिभूतेसु खन्धेसु. अनुसयितकिलेसाति अनुसयवसेन पवत्ता अप्पहीना मग्गेन पहातब्बा किलेसा अधिप्पेता. तेनाह ‘‘अतीता…पे… न वत्तब्बा’’ति. तेसञ्हि अम्बरुक्खोपमाय वत्तमानादिता न वत्तब्बा मग्गेन पहातब्बानं तादिसस्स विभागस्स अनुप्पज्जनतो. अप्पहीनाव होन्तीति इमिना अप्पहीनट्ठेन अनुसयट्ठोति दस्सेति. इदं ¶ भूमिलद्धुप्पन्नं नामाति इदं तेसु खन्धेसु उप्पत्तिरहकिलेसजातं ताय एव उप्पत्तिरहताय भूमिलद्धुप्पन्नं नाम, तेभूमकभूमिलद्धा नाम होतीति अत्थो. तासु तासु भूमीसूति मनुस्सदेवादिअत्तभावसङ्खातेसु उपादानक्खन्धेसु. तस्मिं तस्मिं सन्ताने अनुप्पत्तिअनापादितताय असमुग्घातिता. एत्थ च लद्धभूमिकं भूमिलद्धन्ति वुत्तं अग्गिआहितो विय.

ओकासकतुप्पन्न-सद्देपि च ओकासो कतो एतेनाति ओकासो कतो एतस्साति च अत्थद्वयेपि कत-सद्दस्स परनिपातो दट्ठब्बो. आहतखीररुक्खो विय निमित्तग्गाहवसेन अधिग्गहितं आरम्मणं, अनाहतखीररुक्खो विय अविक्खम्भितताय अन्तोगधकिलेसं आरम्मणं. निमित्तग्गाहकाविक्खम्भितकिलेसा वा पुग्गला आहतानाहतखीररुक्खसदिसा. पुरिमनयेनेवाति अविक्खम्भितुप्पन्ने विय ‘‘इमस्मिं नाम ठाने नुप्पज्जिस्सन्तीति न वत्तब्बा. कस्मा? असमुग्घातितत्ता’’ति योजेत्वा वित्थारेतब्बं.

वुत्तं पटिसम्भिदामग्गे. तत्थ च मग्गेन पहीनकिलेसानमेव तिधा नवत्तब्बतं अपाकटं सुपाकटं कातुं अजातफलरुक्खो उपमाभावेन आगतो ¶ . अतीतादीनं अप्पहीनता दस्सनत्थम्पि ‘‘जातफलरुक्खेन दीपेतब्ब’’न्ति वुत्तं. तत्थ यथा अच्छिन्ने रुक्खे निब्बत्तारहानि फलानि छिन्ने अनुप्पज्जमानानि न कदाचि ससभावानि अहेसुं होन्ति भविस्सन्ति चाति तानि अतीतादिभावेन न वत्तब्बानि, एवं मग्गेन पहीनकिलेसा च दट्ठब्बा. यथा छेदे असति फलानि उप्पज्जिस्सन्ति, सति च नुप्पज्जिस्सन्तीति छेदस्स सात्थकता, एवं मग्गभावनाय च सात्थकता योजेतब्बा.

तेपि पजहतियेव किलेसप्पहानेनेव तेसम्पि अनुप्पत्तिधम्मतापादनतो. अभिसङ्खारविञ्ञाणस्साति पटिसन्धिविञ्ञाणस्स. उपादिन्नअनुपादिन्नतोति उपादिन्नखन्धतो चेव किलेसतो च. उपपत्तिवसेन वुट्ठानं दस्सेतुमाह – ‘‘भववसेन पना’’तिआदि. ये सोतापन्नस्स सत्त भवा अप्पहीना, ततो पञ्च ठपेत्वा इतरे द्वे ‘‘सुगतिभवेकदेसा’’ति अधिप्पेता. सुगतिकामभवतोति सुगतिभवेकदेसभूतकामभवतो. अरहत्तमग्गो रूपारूपभवतो वुट्ठाति उद्धम्भागियसंयोजनसमुग्घातभावतो. यदि अरहत्तमग्गो एव अरियमग्गो सिया, सो एव सब्बकिलेसे पजहेय्य, सब्बभवेहिपि वुट्ठहेय्य. यस्मा पन ओधिसोव किलेसा पहीयन्ति, तस्मा हेट्ठिमहेट्ठिममग्गेहि पहीनावसेसे किलेसे सो पजहति, इति इमं सामत्थियं सन्धाय ¶ ‘‘सब्बभवेहि वुट्ठातियेवातिपि वदन्ती’’ति वुत्तं. तथा हि सो एव ‘‘वजिरूपमो’’ति वुत्तो.

होतु ताव वुत्तनयेन अनुप्पन्नानं अकुसलानं अनुप्पादाय, उप्पन्नानं उप्पन्नसदिसानं पहानाय अनुप्पत्तिधम्मतापादनाय मग्गभावना, अथ मग्गक्खणे कथं अनुप्पन्नानं कुसलानं उप्पादाय उप्पन्नानञ्च ठितिया भावना होति एकचित्तक्खणिकत्ता तस्साति चोदेति, इतरो ‘‘मग्गप्पवत्तियायेवा’’ति परिहारमाह. मग्गो हि कामञ्चेकचित्तक्खणिको, तथारूपो पनस्स पवत्तिविसेसो, यं अनुप्पन्ना कुसला धम्मा सातिसयं उप्पज्जन्ति, उप्पन्ना च सविसेसं पारिपूरिं पापुणन्ति. तेनाह ‘‘मग्गो ही’’तिआदि. किञ्चापि अरियमग्गो वत्तमानक्खणे अनुप्पन्नो नाम न होति, अनुप्पन्नपुब्बतं उपादाय उपचारवसेन तथा वुच्चतीति दस्सेतुं ‘‘अनागतपुब्बं ही’’तिआदि वुत्तं. अयमेवाति अयं मग्गस्स यथापच्चयपवत्ति ¶ एव ठिति नामाति, मग्गसमङ्गी पुग्गलो मग्गम्पि भावेन्तो एव तस्स ठितिया भावेतीति वत्तुं वट्टति.

उपसममानं गच्छतीति विक्खम्भनवसेन समुच्छेदवसेन किलेसे उपसमेन्तं वत्तति. पुब्बभागिन्द्रियानि एव वा अधिप्पेतानि. तेनेवाह ‘‘किलेसूपसमत्थं वा गच्छती’’ति.

२४८. अधिमुच्चनट्ठेनाति (दी. नि. टी. २.१२९; अ. नि. टी. ३.८.६६) अधिकं सविसेसं मुच्चनट्ठेन, तेनाह ‘‘सुट्ठु मुच्चनट्ठो’’ति. एतेन सतिपि सब्बस्सपि रूपावचरज्झानस्स विक्खम्भनवसेन पटिपक्खतो विमुत्तभावे येन भावनाविसेसेन तं झानं सातिसयं पटिपक्खतो विमुच्चित्वा पवत्तति, सो भावनाविसेसो दीपितो. भवति हि समानजातियुत्तोपि भावनाविसेसेन पवत्तिआकारविसेसो. यथा तं सद्धाविमुत्ततो दिट्ठिप्पत्तस्स, तथा पच्चनीकधम्मेहि सुट्ठु विमुत्तताय एव अनिग्गहितभावेन निरासङ्कताय अभिरतिवसेन सुट्ठु अधिमुच्चनट्ठेनपि विमोक्खो. तेनाह ‘‘आरम्मणे चा’’तिआदि. अयं पनत्थोति अयं अधिमुच्चनत्थो पच्छिमविमोक्खे निरोधे नत्थि. केवलो विमुत्तत्थो एव तत्थ लब्भति, तं सयमेव परतो वक्खति.

रूपीति येनायं ससन्ततिपरियापन्नेन रूपेन समन्नागतो, तं यस्स झानस्स हेतुभावेन विसिट्ठं रूपं होति. येन विसिट्ठेन रूपेन ‘‘रूपी’’ति वुच्चेय्य रूपी-सद्दस्स अतिसयत्थदीपनतो, तदेव ससन्ततिपरियापन्नरूपनिमित्तं झानमिव परमत्थतो रूपीभावसाधकन्ति ¶ दट्ठब्बं. तेनाह ‘‘अज्झत्त’’न्तिआदि. रूपज्झानं रूपं उत्तरपदलोपेन. रूपानीति पनेत्थ पुरिमपदलोपो दट्ठब्बो. तेन वुत्तं ‘‘नीलकसिणादीनि रूपानी’’ति.

अन्तोअप्पनायं सुभन्ति आभोगो नत्थीति इमिना पुब्बाभोगवसेन अधिमुत्ति सियाति दस्सेति. एवञ्हेत्थ तथावत्तब्बतापत्तिचोदना अनवकासा होति. यस्मा सुविसुद्धेसु नीलादीसु वण्णकसिणेसु तत्थ कताधिकारानं अभिरतिवसेन सुट्ठु अधिमुत्ति सिया, तस्मा अट्ठकथायं तथा ततियो विमोक्खो संवण्णितो. यस्मा पन मेत्तादिवसेन पवत्तमाना भावना सत्ते अप्पटिकूलतो दहति, ¶ ते सुभतो अधिमुच्चित्वाव पवत्तति, तस्मा पटिसम्भिदामग्गे (पटि. म. १.२१२) ब्रह्मविहारभावना ‘‘सुभविमोक्खो’’ति वुत्ता, तयिदं उभयम्पि तेन तेन परियायेन वुत्तत्ता न विरुज्झतीति दट्ठब्बं.

सब्बसोति अनवसेसतो. न हि चतुन्नं अरूपक्खन्धानं एकदेसोपि तत्थ अवसिट्ठोति. विस्सट्ठत्ताति यथापरिच्छिन्ने काले निरोधितत्ता. उत्तमो विमोक्खो नाम अरियेहेव समापज्जितब्बतो, अरियफलपरियोसानत्ता दिट्ठेव धम्मे निब्बानप्पत्तिभावतो च.

२४९. अभिभवतीति अभिभु (दी. नि. टी. २.१७३; अ. नि. टी. ३.६.६१-६५) परिकम्मं, ञाणं वा. अभिभु आयतनं एतस्साति अभिभायतनं, झानं. अभिभवितब्बं वा आरम्मणसङ्खातं आयतनं एतस्साति अभिभायतनं, झानं. आरम्मणाभिभवनतो अभिभु च तं आयतनञ्च योगिनो सुखविसेसानं अधिट्ठानभावतो मनायतनधम्मायतनभावतो चातिपि ससम्पयुत्तं झानं अभिभायतनं. तेनाह ‘‘अभिभवनकारणानी’’तिआदि. तानीति अभिभायतनसञ्ञितानि झानानि. समापत्तितो वुट्ठितस्स आभोगो पुब्बभागभावनावसेन झानक्खणे पवत्तं अभिभवनाकारं गहेत्वा पवत्तोति दट्ठब्बो. परिकम्मवसेन अज्झत्तं रूपसञ्ञी, न अप्पनावसेन. न हि पटिभागनिमित्तारम्मणा अप्पना अज्झत्तविसया सम्भवति. तं पन अज्झत्त परिकम्मवसेन लद्धं कसिणनिमित्तं असुविसुद्धमेव होति, न बहिद्धा परिकम्मवसेन लद्धं विय विसुद्धं.

परित्तानीति यथालद्धानि सुप्पसरावमत्तानि. तेनाह ‘‘अवड्ढितानी’’ति. परित्तवसेनेवाति वण्णवसेन आभोगे विज्जमानेपि परित्तवसेनेव इदमभिभायतनं वुत्तं. परित्तता हेत्थ अभिभवनस्स कारणं. वण्णाभोगे सतिपि असतिपि अभिभायतनभावना नाम तिक्खपञ्ञस्सेव सम्भवति, न इतरस्साति ‘‘ञाणुत्तरिको पुग्गलो’’ति. अभिभवित्वा समापज्जतीति ¶ एत्थ अभिभवनं समापज्जनञ्च उपचारज्झानाधिगमसमनन्तरमेव अप्पनाझानुप्पादनन्ति आह ‘‘सह निमित्तुप्पादेनेवेत्थ अप्पनं पापेती’’ति. सह निमित्तुप्पादेनाति च अप्पनापरिवासाभावस्स लक्खणवचनमेतं. यो ‘‘खिप्पाभिञ्ञो’’ति वुच्चति ¶ , ततोपि ञाणुत्तरस्सेव अभिभायतनभावना. एत्थाति एतस्मिं निमित्ते. अप्पनं पापेतीति भावना अप्पनं नेति.

एत्थ च केचि ‘‘उप्पन्ने उपचारज्झाने तं आरब्भ ये हेट्ठिमन्तेन द्वे तयो जवनवारा पवत्तन्ति, ते उपचारज्झान पक्खिका एव, तदनन्तरञ्च भवङ्गपरिवासेन उपचारासेवनाय च विना अप्पना होति, सह निमित्तुप्पादेनेव अप्पनं पापेती’’ति वदन्ति, तं तेसं मतिमत्तं. न हि पारिवासिकपरिकम्मेन अप्पनावारो इच्छितो, नापि महग्गतप्पमाणज्झानेसु विय उपचारज्झाने एकन्ततो पच्चवेक्खणा इच्छितब्बा, तस्मा उपचारज्झानाधिगमतो परं कतिपयभवङ्गचित्तावसाने अप्पनं पापुणन्तो ‘‘सह निमित्तुप्पादेनेवेत्थ अप्पनं पापेती’’ति वुत्तो. ‘‘सह निमित्तुप्पादेना’’ति च अधिप्पायिकमिदं वचनं, न नीतत्थं, अधिप्पायो वुत्तनयेनेव वेदितब्बो.

न अन्तोसमापत्तियं तदा तथारूपस्स आभोगस्स असम्भवतो, समापत्तितो वुट्ठितस्स आभोगो पुब्बभागभावनावसेन झानक्खणे पवत्तं अभिभवनाकारं गहेत्वा पवत्तोति दट्ठब्बं. अभिधम्मट्ठकथायं (ध. स. अट्ठ. २०४) पन ‘‘इमिना पनस्स पुब्बभागो कथितो’’ति वुत्तं. अन्तोसमापत्तियं तथा आभोगाभावे कस्मा ‘‘झानसञ्ञायपी’’ति वुत्तन्ति आह ‘‘अभिभव…पे… अत्थी’’ति.

वड्ढितप्पमाणानीति विपुलप्पमाणानीति अत्थो, न एकङ्गुलद्वङ्गुलादिवसेन वड्ढितप्पमाणानीति तथा वड्ढनस्सेवेत्थ असम्भवतो. तेनाह ‘‘महन्तानी’’ति.

रूपे सञ्ञा रूपसञ्ञा, सा अस्स अत्थीति रूपसञ्ञी, न रूपसञ्ञी अरूपसञ्ञी. सञ्ञासीसेन झानं वदति. रूपसञ्ञाय अनुप्पादनमेवेत्थ अलाभिता. बहिद्धाव उप्पन्नन्ति बहिद्धावत्थुस्मिंयेव उप्पन्नं. अभिधम्मे पन ‘‘अज्झत्तं अरूपसञ्ञी बहिद्धा रूपानि पस्सति परित्तानि सुवण्णदुब्बण्णानि, अप्पमाणानि सुवण्णदुब्बण्णानी’’ति एवं चतुन्नं अभिभायतनानं आगतत्ता अभिधम्मट्ठकथायं (ध. स. अट्ठ. २०४) ‘‘कस्मा पन यथा सुत्तन्ते – ‘अज्झत्तं रूपसञ्ञी एको बहिद्धा रूपानि पस्सति परित्तानी’तिआदि वुत्तं, एवं अवत्वा ¶ इध चतूसुपि अभिभायतनेसु अज्झत्तं ¶ अरूपसञ्ञिताव वुत्ता’’ति चोदनं कत्वा ‘‘अज्झत्तरूपानं अनभिभवनीयतो’’ति कारणं वत्वा ‘‘तत्थ वा हि इध वा बहिद्धारूपानेव अभिभवितब्बानि, तस्मा तानि नियमतो वत्तब्बानीति तत्रापि इधापि वुत्तानि. ‘अज्झत्तं अरूपसञ्ञी’ति इदं पन सत्थु देसनाविलासमत्तमेवा’’ति वुत्तं.

एत्थ च वण्णाभोगरहितानि सहितानि च सब्बानि ‘‘परित्तानि सुवण्णदुब्बण्णानी’’ति वुत्तानि, तथा ‘‘अप्पमाणानी’’ति दट्ठब्बानि. अत्थि हि एसो परियायो ‘‘परित्तानि अभिभुय्य तानि चे कदाचि वण्णवसेन आभुजितानि होन्ति सुवण्णदुब्बण्णानि अभिभुय्या’’ति. परियायकथा हि सुत्तन्तदेसनाति. अभिधम्मे पन निप्परियायदेसनत्ता वण्णाभोगरहितानि विसुं वुत्तानि, तथा सहितानि. अत्थि हि उभयत्थ अभिभवनपरियायोति ‘‘अज्झत्तं रूपसञ्ञी’’तिआदिना पठमदुतियअभिभायतनेसु पठमविमोक्खो, ततियचतुत्थाभिभायतनेसु दुतियविमोक्खो, वण्णाभिभायतनेसु ततियविमोक्खो च अभिभवनप्पवत्तितो सङ्गहितो, अभिधम्मे पन निप्परियायदेसनत्ता विमोक्खाभिभायतनानि असङ्करतो दस्सेतुं विमोक्खे वज्जेत्वा अभिभायतनानि कथितानि, सब्बानि च विमोक्खकिच्चानि झानानि विमोक्खदेसनायं वुत्तानि. तदेतं ‘‘अज्झत्तं रूपसञ्ञी’’ति आगतस्स अभिभायतनद्वयस्स अभिधम्मे अभिभायतनेसु अवचनतो ‘‘रूपी रूपानि पस्सती’’तिआदीनञ्च सब्बविमोक्खकिच्चसाधारणवचनभावतो ववत्थानं कतन्ति विञ्ञायति.

‘‘अज्झत्तरूपानं अनभिभवनीयतो’’ति इदं अभिधम्मे कत्थचिपि ‘‘अज्झत्तं रूपानि पस्सती’’ति अवत्वा सब्बत्थ यं वुत्तं ‘‘बहिद्धारूपानि पस्सती’’ति, तस्स कारणवचनं. तेन यं अञ्ञहेतुकं, तं तेन हेतुना वुत्तं, यं पन देसनाविलासहेतुकं अज्झत्तं अरूपसञ्ञिताय एव अभिधम्मे वचनं, न तस्स अञ्ञं कारणं मग्गितब्बन्ति दस्सेति. अज्झत्तरूपानं अनभिभवनीयता च तेसं बहिद्धारूपानं विय अविभूतत्ता, देसनाविलासो च यथावुत्तववत्थानवसेन वेदितब्बो, वेनेय्यज्झासयवसेन विज्जमानपरियायकथनभावतो. ‘‘सुवण्णदुब्बण्णानी’’ति एतेनेव सिद्धत्ता नीलादिअभिभायतनानि न वत्तब्बानीति चे? न, नीलादीसु ¶ कताधिकारानं नीलादिभावस्सेव अभिभवनकारणत्ता. न हि तेसं परिसुद्धापरिसुद्धवण्णानं परित्तता तदप्पमाणता वा अभिभवनकारणं, अथ खो नीलादिभावो एवाति. एतेसु च परित्तादिकसिणरूपेसु यं चरितस्स इमानि अभिभायतनानि इज्झन्ति, तं दस्सेतुं ‘‘इमेसु पना’’तिआदि वुत्तं.

सब्बसङ्गाहिकवसेनाति ¶ सकलनीलवण्णनीलनिदस्सननीलनिभासानं साधारणवसेन. वण्णवसेनाति सभाववण्णवसेन. निदस्सनवसेनाति पस्सितब्बतावसेन. ओभासवसेनाति सप्पभासताय अवभासनवसेन. उमापुप्फन्ति अतसिपुप्फं. नीलमेव होति वण्णसङ्कराभावतो. बाराणसियं भवन्ति बाराणसियं समुट्ठितं.

ते धम्मेति ते सतिपट्ठानादिधम्मे चेव अट्ठविमोक्खधम्मे च. चिण्णवसीभावायेव तत्थ अभिविसिट्ठाय पञ्ञाय परियोसानुत्तरं सतं गता अभिञ्ञावोसानपारमिप्पत्ता.

२५०. सकलट्ठेनाति (दी. नि. टी. ३.३४६; अ. नि. टी. ३.१०.२५) सकलभावेन, असुभनिमित्तादीसु विय एकदेसे अट्ठत्वा अनवसेसतो गहेतब्बट्ठेनाति अत्थो. यथा खेत्तं सस्सानं उप्पत्तिट्ठानं वड्ढिट्ठानञ्च, एवमेव तंतंसम्पयुत्तधम्मानन्ति आह ‘‘खेत्तट्ठेना’’ति. परिच्छिन्दित्वाति इदं उद्धं अधो तिरियन्ति योजेतब्बं. परिच्छिन्दित्वा एव हि सब्बत्थ कसिणं वड्ढेतब्बं. तेन तेन कारणेनाति उपरिआदीसु तेन तेन कसिणेन. यथा किन्ति आह – ‘‘आलोकमिव रूपदस्सनकामो’’ति, यथा दिब्बचक्खुना उद्धं चे रूपं दट्ठुकामो, उद्धं आलोकं पसारेति, अधो चे, अधो, समन्ततो चे रूपं दट्ठुकामो, समन्ततो आलोकं पसारेति, एवं सब्बकसिणन्ति अत्थो. एकस्साति पथवीकसिणादीसु एकेकस्स. अञ्ञभावानुपगमनत्थन्ति अञ्ञकसिणभावानुपगमनदीपनत्थं, अञ्ञस्स वा कसिणभावानुपगमनदीपनत्थं. न हि अञ्ञेन पसारितकसिणं ततो अञ्ञेन पसारितकसिणभावं उपगच्छति, एवम्पि नेसं अञ्ञकसिणसम्भेदाभावो वेदितब्बो. न अञ्ञं पथवीआदि. न हि उदकेन ठितट्ठाने ससम्भारपथवी अत्थि. अञ्ञकसिणसम्भेदोति आपोकसिणादिना सङ्करो ¶ . सब्बत्थाति सब्बेसु सेसकसिणेसु. एकदेसे अट्ठत्वा अनवसेसफरणं पमाणस्स अग्गहणतो अप्पमाणं. तेनेव हि नेसं कसिणसमञ्ञा. तथा हि ‘‘तञ्ही’’तिआदिमाह. तत्थ चेतसा फरन्तोति भावनाचित्तेन आरम्मणं करोन्तो. भावनाचित्तञ्हि कसिणं परित्तं वा विपुलं वा सकलमेव मनसि करोति.

कसिणुग्घाटिमाकासे पवत्तं विञ्ञाणं फरणअप्पमाणवसेन ‘‘विञ्ञाणकसिण’’न्ति वुत्तं. तथा हि तं ‘‘विञ्ञाण’’न्ति वुच्चति. कसिणवसेनाति उग्घाटितकसिणवसेन कसिणुग्घाटिमाकासे उद्धंअधोतिरियता वेदितब्बा. यत्तकञ्हि ठानं कसिणं पसारितं, तत्तकं आकासभावनावसेन आकासं होतीति. एवं यत्तकं ठानं आकासं हुत्वा उपट्ठितं, तत्तकं आकासमेव हुत्वा विञ्ञाणस्स पवत्तनतो आगमनवसेन विञ्ञाणकसिणेपि उद्धंअधोतिरियता ¶ वुत्ताति ‘‘कसिणुग्घाटिमाकासवसेन तत्थ पवत्तविञ्ञाणे उद्धंअधोतिरियता वेदितब्बा’’ति आह.

२५२. वुत्तोयेव वम्मिकसुत्ते. निस्सितञ्च छवत्थुनिस्सितत्ता विपस्सनाञाणस्स. पटिबद्धञ्च तेन विना अप्पवत्तनतो कायसञ्ञितानं रूपधम्मानं आरम्मणकरणतो च. सुट्ठु भाति ओभासतीति वा सुभो. कुरुविन्दजातिआदिजातिविसेसोपि मणि आकरपारिसुद्धिमूलको एवाति आह ‘‘सुपरिसुद्धआकरसमुट्ठितो’’ति. दोसनीहरणवसेन परिकम्मनिप्फत्तीति आह ‘‘सुट्ठु कतपरिकम्मो अपनीतपासाणसक्खरो’’ति. धोवनवेधनादीहीति चतूसु पासाणेसु धोवनेन चेव काळकादिअपहरणत्थाय सुत्तेन आवुननत्थाय च विज्झनेन. तापसण्हकरणादीनं सङ्गहो आदि-सद्देन. वण्णसम्पत्तिन्ति सुत्तस्स वण्णसम्पत्तिं.

मणि विय करजकायो पच्चवेक्खितब्बतो. आवुतसुत्तं विय विपस्सनाञाणं अनुपविसित्वा ठितत्ता. चक्खुमा पुरिसो विय विपस्सनालाभी भिक्खु सम्मदेव तस्स दस्सनतो. तदारम्मणानन्ति रूपधम्मारम्मणानं. फस्सपञ्चमकचित्तचेतसिकग्गहणेन गहितधम्मापि विपस्सनाचित्तुप्पादपरियापन्ना एवाति वेदितब्बं. एवञ्हि तेसं विपस्सनाञाणगतिकत्ता ‘‘आवुतसुत्तं विय विपस्सनाञाण’’न्ति वचनं अविरोधितं होति.

ञाणस्साति ¶ पच्चवेक्खणञाणस्स. यदि एवं ञाणस्स वसेन वत्तब्बं, न पुग्गलस्साति आह ‘‘तस्स पना’’तिआदि. मग्गस्स अनन्तरं, तस्मा लोकियाभिञ्ञानं परतो छट्ठाभिञ्ञाय पुरतो वत्तब्बं विपस्सनाञाणं. एवं सन्तेपीति यदिपायं ञाणानुपुब्बट्ठिति, एवं सन्तेपि एतस्स अन्तरा वारो नत्थीति पञ्चसु लोकियाभिञ्ञासु कथितासु आकङ्खेय्यसुत्तादीसु (म. नि. १.६४ आदयो) विय छट्ठाभिञ्ञा कथेतब्बाति एतस्स अनभिञ्ञालक्खणस्स विपस्सनाञाणस्स तासं अन्तरा वारो न होति, तस्मा तत्थ अवसराभावतो इधेव रूपावचरचतुत्थज्झानानन्तरमेव दस्सितं विपस्सनाञाणं. यस्मा चाति च-सद्दो समुच्चयत्थो. तेन न केवलं तदेव, अथ खो इदम्पि कारणं विपस्सनाञाणस्स इधेव दस्सनेति इममत्थं दीपेति. दिब्बेन चक्खुना भेरवरूपं पस्सतोति एत्थ इद्धिविधञाणेन भेरवं रूपं निम्मिनित्वा चक्खुना पस्सतोति वत्तब्बं, एवम्पि अभिञ्ञालाभिनो अपरिञ्ञाणवत्थुकस्स भयसन्तासो उप्पज्जति उच्चवालिकवासीमहानागत्थेरस्स विय. इधापीति इमस्मिं विपस्सनाञाणेपि, न सतिपट्ठानादीसु एवाति अधिप्पायो.

२५३. मनोमयिद्धियं ¶ चिण्णवसिताय अभिञ्ञा वोसानपारमिप्पत्तता वेदितब्बाति योजना. मनेन निब्बत्तन्ति अभिञ्ञामनेन निब्बत्तितं. तं सदिसभावदस्सनत्थमेवाति सण्ठानतोपि वण्णतोपि अवयवविसेसतोपि सदिसभावदस्सनत्थमेव. सजातियं ठितो, न नागिद्धिया अञ्ञजातिरूपो. सुपरिकम्मकतमत्तिकादयो विय इद्धिविधञाणं विकुब्बनकिरियाय निस्सयभावतो.

२५५. अप्पकसिरेनेवाति अकिच्छेनेव.

२५६. मन्दो उत्तानसेय्यकदारकोपि ‘‘दहरो’’ति वुच्चतीति ततो विसेसनत्थं ‘‘युवा’’ति वुत्तं. युवापि कोचि अनिच्छनतो अमण्डनसीलो होतीति ततो विसेसनत्थं ‘‘मण्डनकजातिको’’ति वुत्तं. तेन वुत्तं ‘‘युवापी’’तिआदि. काळतिलप्पमाणा बिन्दवो काळतिलकानि. नातिकम्मासतिलप्पमाणा बिन्दवो तिलकानि. वङ्कं नाम पियङ्गं. योब्बनपीळकादयो मुखदूसिपीळका. मुखगतो दोसो मुखदोसो, लक्खणवचनञ्चेतं मुखे अदोसस्सपि पाकटभावस्स अधिप्पेतत्ता ¶ . यथा वा मुखे दोसो, एवं मुखे अदोसोपि मुखदोसो सरलोपेन, मुखदोसो च मुखदोसो च मुखदोसोति एकसेसनयेनपेत्थ अत्थो दट्ठब्बो. एवञ्हि परेसं सोळसविधं चित्तं पाकटं होतीति वचनं समत्थितं होति.

२५९. पटिपदावसेनाति यथारहं समथविपस्सनामग्गपटिपदावसेन. अट्ठसु कोट्ठासेसूति सतिपट्ठानादीसु बोधिपक्खियधम्मकोट्ठासेसु, विमोक्खकोट्ठासेसु वाति इमेसु अट्ठसु कोट्ठासेसु. सेसेसूति वुत्तावसेसेसु अभिभायतनकोट्ठासादीसु. सेसं सुविञ्ञेय्यमेव.

महासकुलुदायिसुत्तवण्णनाय लीनत्थप्पकासना समत्ता.

८. समणमुण्डिकापुत्तसुत्तवण्णना

२६०. उग्गहितुन्ति ¶ सिक्खितुं. उग्गाहेतुन्ति सिक्खापेतुं, पाठतो अत्तना यथाउग्गहितमत्थं तब्बिभावनत्थाय उच्चारणवसेन परेसं गाहेतुन्ति अत्थो. समयन्ति दिट्ठिं. सा हि संयोजनभावतो समेति सम्बन्धा एति पवत्तति, दळ्हग्गहणभावतो वा संयुत्ता अयन्ति पवत्तन्ति सत्ता यथाभिनिवेसं एतेनाति समयोति वुच्चति. दिट्ठिसंयोजनेन हि सत्ता अतिविय बज्झन्तीति. सूरियस्स उग्गमनतो अत्थङ्गमा अयं एत्तको कालो रत्तन्धकारविधमनतो दिवा नाम, तस्स पन मज्झिमपहारसञ्ञितो कालो समुज्जलितपभातेजदहनभावेन दिवा नाम. तेनाह ‘‘दिवसस्सपि दिवाभूते’’ति. पटिसंहरित्वाति निवत्तेत्वा. एवं चित्तस्स पटिसंहरणं नाम गोचरक्खेत्ते ठपनन्ति आह ‘‘झानरतिसेवनवसेन एकीभावं गतो’’ति. एतेन कायविवेकपुब्बकं चित्तविवेकमाह. सीलादिगुणविसेसयोगतो मनसा सम्भावनीया, ते पन यस्मा अत्तनो सीलादिगुणेहि विञ्ञूनं मनापा होन्ति (किलेसअनिग्गहस्स पञ्चपसादायत्तत्ता,) तस्मा आह ‘‘मनवड्ढनकान’’न्तिआदि. तत्थ उन्नमतीति उदग्गं होति. वड्ढतीति सद्धावसेन वड्ढति. तेनाह भगवा – ‘‘अनुस्सरणम्पहं, भिक्खवे, तेसं भिक्खूनं बहूपकारं वदामी’’ति (इतिवु. १०४; सं. नि. ५.१८४).

२६१. पञ्ञपेमीति ¶ पजाननभावेन ञापेमि तथा ववत्थपेमि. तेनाह ‘‘दस्सेमि ठपेमी’’ति. परिपुण्णकुसलन्ति सब्बसो पुण्णकुसलधम्मं, उत्तमकुसलन्ति उत्तमभावं सेट्ठभावं पत्तकुसलधम्मं. अयोज्झन्ति वादयुद्धेन अयोधनीयं, वादयुद्धं होतु, तेन पराजयो न होतीति दस्सेति, तेनाह ‘‘वादयुद्धेना’’तिआदि. संवरप्पहानन्ति पञ्चसु संवरेसु येन केनचि संवरेन संवरलक्खणं पहानं. पटिसेवनप्पहानं वाति वा-सद्देन परिवज्जनप्पहानादिं सङ्गण्हाति. सेसपदेसूति ‘‘न भासती’’तिआदीसु पदेसु. एसेव नयोति इमिना ‘‘अभासनमत्तमेव वदती’’ति एवमादिं अतिदिसति.

नाभिनन्दीति न सम्पटिच्छि. सासने तिण्णं दुच्चरितानं मिच्छाजीवस्स विवज्जनं वण्णीयति, अयञ्च एवं कथेति, तस्मा सासनस्स अनुलोमं विय वदति, वदन्तो च सम्मासम्बुद्धे धम्मे चस्स अप्पसादं न दस्सेति, तस्मा पसन्नकारम्पि वदतीति मञ्ञमानो तस्स वादं न पटिसेधेति.

२६२. यथा ¶ तस्स वचनं, एवं सन्तेति यथा तस्स परिब्बाजकस्स वचनं, एवं समणभावे सन्ते लब्भमाने. मयं पन एवं न वदामाति एतेन समणभावो नाम एवं न होतीति दस्सेति. यो हि धम्मो यादिसो, तथेव तं बुद्धा दीपेन्ति. विसेसञाणं न होतीति कायविसेसविसयञाणं तस्स तदा नत्थि, यतो परकाये उपक्कमं करेय्याति दस्सेति, तस्स पन तत्थ विसेसञाणम्पि नत्थेवाति. यस्मा कायपटिबद्धं कायकम्मं, तस्मा तं निवत्तेन्तो आह ‘‘अञ्ञत्र फन्दितमत्ता’’ति. किलेससहगतचित्तेनेवाति दुक्खसम्फस्सस्स असहननिमित्तेन दोमनस्ससहगतचित्तेनेव. दुतियवारेपि एसेव नयो. जिघच्छापिपासदुक्खस्स असहननिमित्तेन दोमनस्सेनेव. विकूजितमत्ताति एत्थ विरूपं कूजितं विकूजितं पुब्बेनिवाससन्निस्सयं उपयं, तं पनेत्थ रोदनहसनसमुट्ठापकचित्तसहगतन्ति दोससहगतं लोभसहगतञ्चाति दट्ठब्बं. चित्तन्ति कुसलचित्तं. अकुसलचित्तं पन अतीतारम्मणं पवत्ततीति वत्तब्बमेव नत्थि. सरित्वाति याव न सतिसण्ठापना धम्मा उप्पज्जन्ति, ताव सुपिनन्ते अनुभूतं विय दुक्खं सरित्वा रोदन्ति. हसन्तीति एत्थापि एसेव नयो. अयञ्च नयो ये लद्धसुखारम्मणा हुत्वा गहितपटिसन्धिका मातुकुच्छितोपि सुखेनेव निक्खमन्ति, तेसं वसेन वुत्तोति दट्ठब्बो. पायन्तियाति अत्तनो जनपददेसरूपेन ¶ पायन्तिया. अयम्पीति आजीवोपि मातु अञ्ञविहितकाले च लोकस्सादवसेन किलेससहगतचित्तेनेव होति.

२६३. समधिगय्हाति सम्मा अधिगतभावेन गहेत्वा अभिभवित्वा विसेसेत्वा विसिट्ठो हुत्वा. खीणासवं सन्धायाति ब्यतिरेकवसेन खीणासवं सन्धाय. अयञ्हेत्थ अत्थो – खीणासवम्पि सोतापन्नकुसलं पञ्ञपेति सेक्खभूमियं ठितत्ता. सेसपदेसुपि एसेव नयो.

तीणि पदानि निस्सायाति न कायेन पापकं कम्मं करोति, न पापकं वाचं भासति, न पापकं आजीवं आजीवतीति इमानि तीणि पदानि निस्साय कुसलसीलमूलका च अकुसलसीलमूलका चाति द्वे पठमचतुक्का ठपिता. एकं पदं निस्सायाति न पापकं सङ्कप्पं सङ्कप्पेतीति इमं एकपदं निस्साय कुसलसङ्कप्पमूलका अकुसलसङ्कप्पमूलका चाति इमे द्वे पच्छिमचतुक्का ठपिता.

२६४. विचिकिच्छुद्धच्चसहगतचित्तद्वयम्पि वट्टति बलवता मोहेन समन्नागतत्ता. तथा हि तानि ‘‘मोमूहचित्तानी’’ति वुच्चन्ति.

कुहिन्ति किंनिमित्तं. कतरंठानं पापुणित्वाति किं कारणं आगम्म. एत्थेतेति एत्थाति कायवचीमनोसुचरितभावनासाजीवनिप्फत्तियं ¶ . सा पन हेट्ठिमकोटिया सोतापत्तिफलेन दीपेतब्बाति आह ‘‘सोतापत्तिफले भुम्म’’न्ति. यस्मा आजीवट्ठमकं अवसिट्ठञ्च सीलं पातिमोक्खसंवरसीलस्स च पारिसुद्धिपातिमोक्खाधिगमेन सोतापत्तिफलप्पत्तिया सिद्धो होतीति आह – ‘‘पातिमोक्ख…पे… निरुज्झती’’ति. ‘‘सुखसीलो दुक्खसीलो’’तिआदीसु विय पकतिअत्थसीलसद्दं गहेत्वा वुत्तं ‘‘अकुसलसील’’न्तिआदि.

२६५. कामावचरकुसलचित्तमेव वुत्तं सम्पत्तसमादानविरतिपुब्बकस्स सीलस्स अधिप्पेतत्ता. तेनाह – ‘‘एतेन हि कुसलसीलं समुट्ठाती’’ति.

सीलवाति एत्थ वा-सद्दो पासंसत्थोव वेदितब्बोति आह ‘‘सीलसम्पन्नो होती’’ति. यो सीलमत्ते पतिट्ठितो, न समाधिपञ्ञासु, सो ¶ सीलमयधम्मपूरितताय सीलमयो. तेनाह ‘‘अलमेत्तावता’’तिआदि. यत्थाति यस्सं चेतोविमुत्तियं पञ्ञाविमुत्तियञ्च. तदुभयञ्च यस्मा अरहत्तफले सङ्गहितं, तस्मा वुत्तं ‘‘अरहत्तफले भुम्म’’न्ति. असेसं निरुज्झति सुखविपाकभावस्स सब्बसो पटिप्पस्सम्भनतो.

२६६. कामपटिसंयुत्ता सञ्ञा कामसञ्ञा. सेसेसुपि एसेव नयो. इतरा द्वेति ब्यापादविहिंसासञ्ञा.

अनागामिफलपठमज्झानन्ति अनागामिफलसहगतं पठमज्झानं. एत्थाति यथावुत्ते पठमज्झाने. एत्थ च उजुविपच्चनीकेन पटिपक्खप्पहानं सातिसयन्ति पठमज्झानग्गहणं. तेनाह ‘‘अपरिसेसा निरुज्झन्ती’’ति. नेक्खम्मसञ्ञानं कामावचरचित्तसहगतता तस्स सीलस्स समुट्ठानता च सम्पयुत्तनयेन वेदितब्बा.

२६७. कुसलसङ्कप्पनिरोधदुतियज्झानिकअरहत्तफलअकुसलसङ्कप्पनिरोध- पठमज्झानिकअनागामिफलग्गहणेन समणो दस्सितो. सेसं सुविञ्ञेय्यमेव.

समणमुण्डिकापुत्तसुत्तवण्णनाय लीनत्थप्पकासना समत्ता.

९. चूळसकुलुदायिसुत्तवण्णना

२७१. पञ्होति ¶ ञातुं इच्छितो अत्थो, तदेव धम्मदेसनाय निमित्तभावतो कारणं. उपट्ठातूति ञाणस्स गोचरभावं उपगच्छतु. येन कारणेनाति येन तुय्हं उपट्ठितेन कारणेन धम्मदेसना उपट्ठहेय्य, तं पन परिब्बाजकस्स अज्झासयवसेन तथा वुत्तं. तेनाह ‘‘एतेन हि…पे… दीपेती’’ति. एकङ्गणानीति पिधानाभावेन एकङ्गणसदिसानि. तेनाह ‘‘पाकटानी’’ति.

जानन्तोति अत्तनो तथाभावं सयं जानन्तो. सक्कच्चं सुस्सूसतीति ‘‘तथाभूतंयेव मं तथा अवोचा’’ति सादरं सुस्सूसति. तस्माति दिब्बचक्खुलाभिनो अनागतंसञाणलाभतो. एवमाहाति ‘‘यो ¶ खो, उदायि, दिब्बेन चक्खुना’’ति आरभित्वा ‘‘सो वा मं अपरन्तं आरब्भ पञ्हं पुच्छेय्या’’ति एवं अवोच.

इतरन्ति अवसिट्ठं इमस्मिं ठाने वत्तब्बं. वुत्तनयमेवाति ‘‘यो हि लाभी’’तिआदिना वुत्तनयमेव. अतीतेति पुब्बेनिवासानुस्सतिञाणस्स विसयभूते अत्थे. अनागतेति अनागतंसञाणस्स विसयभूते अनागते अत्थे.

पंसुपदेसे निब्बत्तनतो पंसुसमोकिण्णसरीरताय पंसुपिसाचकं. एकं मूलं गहेत्वाति दीघसो हेट्ठिमन्तेन चतुरङ्गुलं, उपरिमन्तेन विदत्थिकं रुक्खगच्छलतादीसु यस्स कस्सचि एकं मूलं गहेत्वा अञ्ञजातिकानं अदिस्समानकायो होति. अयं किर नेसं जातिसिद्धा धम्मता. तत्राति तस्स मूलवसेन अदिस्समानकताय. न दिस्सति ञाणेन न पस्सति.

२७२. न च अत्थं दीपेय्याति अधिप्पेतमत्थं सा वाचा सरूपतो न च दीपेय्य, केवलं वाचामत्तमेवाति अधिप्पायो. पटिहरितब्बट्ठेन परसन्ताने नेतब्बट्ठेन पटिहारिय-सद्दद्वारेन विञ्ञातब्बो भावत्थो, सोव पाटिहीरको निरुत्तिनयेन, नत्थि एतस्स पाटिहीरकन्ति अप्पाटिहीरकतं, त-सद्देन पदं वड्ढेत्वा तथा वुत्तं, अनिय्यानं. तेनाह ‘‘निरत्थकं सम्पज्जती’’ति. सुभकिण्हदेवलोके खन्धा विय जोतेतीति इमिना – ‘‘दिब्बो रूपी मनोमयो सब्बङ्गपच्चङ्गी अहीनिन्द्रियो अत्ता’’ति इममत्थं दस्सेति.

२७३. सउपसग्गपदस्स ¶ अत्थो उपसग्गेन विनापि विञ्ञायतीति आह ‘‘विद्धेति उब्बिद्धे’’ति. सा चस्स उब्बिद्धता उपक्किलेसविगमेन सुचिभावेन उपट्ठानन्ति आह ‘‘मेघविगमेन दूरीभूते’’ति. इन्दनीलमणि विय दिब्बति जोतेतीति देवो, आकासो. ‘‘अड्ढरत्तसमये’’ति वत्तब्बे भुम्मत्थे विहितवचनानं अच्चन्तसंयोगाभावा उपयोगवचनं वेदितब्बं. पुण्णमासियञ्हि गगनमज्झस्स पुरतो वा पच्छतो वा अन्ते ठिते अड्ढरत्ते समयो भिन्नो नाम होति, मज्झे एव पन ठितो अभिन्नो नाम. तेनाह ‘‘अभिन्ने अड्ढरत्तसमये’’ति.

ये अनुभोन्तीति ये देवा चन्दिमसूरियानं आभा अनुभोन्ति विनिभुञ्जन्ति वळञ्जन्ति च तेहि देवेहि बहू चेव बहुतरा च चन्दिमसूरियानं आभा ¶ अननुभोन्तो. तेनाह – ‘‘अत्तनो सरीरोभासेनेव आलोकं फरित्वा विहरन्ती’’ति.

२७४. पुच्छामूळ्हो पन जातो ‘‘अयं परमो वण्णो’’ति गहितपदस्स विधमनेन. अचेलकपाळिन्ति ‘‘अचेलको होति मुत्ताचारो’’तिआदिनयप्पवत्तं (दी. नि. १.३९४) अचेलकपटिपत्तिदीपकगन्थं, गन्थसीसेनेव तेन पकासितवादानि वदति. सुरामेरयपानमनुयुत्तपुग्गलस्स सुरापानतो विरति तस्स कायं चित्तञ्च तापेन्ती संवत्ततीति सुरापानविरति (तपो, सोयेव गुणो. तेनाह ‘‘सुरापानविरतीति अत्थो’’ति).

२७५. एकन्तं अच्चन्तमेव सुखं अस्साति एकन्तसुखं. पञ्चसु धम्मेसूति ‘‘पाणातिपाता पटिविरती’’तिआदीसु पञ्चसु सीलाचारधम्मेसु. न जानिंसूति सम्मोसेन अनुपट्ठहन्ति तदत्थं न बुज्झन्ति. बुद्धुप्पादेन किर विहततेजानि महानुभावानि मन्तपदानि विय बाहिरकानं योगावचरगन्थेन सद्धिं योगावचरपटिपदा नस्सति. उग्गण्हिंसूति ‘‘पञ्च पुब्बभागधम्मे’’तिआदिवचनमत्तं उग्गण्हिंसु. ततियज्झानतोति कारणोपचारेन फलं वदति, फलभूततो ततियज्झानतो.

२७६. एकन्तसुखस्स लोकस्स पटिलाभेन पत्तिया तत्थ निब्बत्ति पटिलाभसच्छिकिरिया. एकन्तसुखे लोके अनभिनिब्बत्तित्वा एव इद्धिया तत्थ गन्त्वा तस्स सत्तलोकस्स भाजनलोकस्स च पच्चक्खतो दस्सनं पच्चक्खसच्छिकिरिया. तेनाह ‘‘तत्था’’तिआदि.

२७७. उदञ्चनिकोति ¶ उदञ्चनो. विञ्झुपब्बतपस्से गामानं अनिविट्ठत्ता तिंसयोजनमत्तं ठानं अटवी नाम, तत्थ सेनासनं, तस्मिं अटविसेनासने पधानकम्मिकानं भिक्खूनं बहूनं तत्थ निवासेन एकं पधानघरं अहोसि.

चूळसकुलुदायिसुत्तवण्णनाय लीनत्थप्पकासना समत्ता.

१०. वेखनससुत्तवण्णना

२८०. सह ¶ ¶ वत्थुकामेन किलेसकामो गरु गरुकातब्बो एतस्साति कामगरु. तेस्वेव कामेसु निन्नपोणपब्भारज्झासयोति कामाधिमुत्तो. पब्बज्जापठमज्झानादिकं नेक्खम्मं गरु गरुकातब्बं एतस्साति नेक्खम्मगरु. तत्थ निन्नपोणपब्भारज्झासयो नेक्खम्माधिमुत्तो स्वायमत्थो यथा एकच्चे गहट्ठे लब्भति, एवं एकच्चे अनगारेपीति आह ‘‘पब्बजितोपी’’तिआदि. अयं पन वेखनसो परिब्बाजको. सो हि वेखनसतापसपब्बज्जं उपगन्त्वा वेखनसेन इमिना दिट्ठिमादाय समादियित्वा ठितत्ता ‘‘वेखनसो’’ति वुच्चति. यथा लोको सयं एकादसहि अग्गीहि आदित्तोपि समानो पच्चक्खतो अनुभवियमानं सालाकिकं अग्गिसन्तापं विय अनादिकालानुगतसम्माकवचरसन्तापं आदित्तताय न सल्लक्खेति, सम्मासम्बुद्धेन पन महाकरुणासमुस्साहितमानसेन ‘‘सब्बं, भिक्खवे, आदित्त’’न्ति आदित्तपरियाये (सं. नि. ४.२८; महाव. ५४) देसियमाने सल्लक्खेति, एवं अयम्पि अनादिकालपरिभावितं अत्तअज्झासये अवट्ठितं कामाधिमुत्तं सरसेन अनुपधारेन्तो सत्थारा – ‘‘पञ्च खो इमे, कच्चान, कामगुणा’’तिआदिना कामगुणेसु कामसुखे भासियमाने ‘‘कामाधिमुत्तं वत पब्बजितस्स चित्त’’न्ति उपधारेस्सतीति आह – ‘‘इमाय कथाय कथियमानाय अत्तनो कामाधिमुत्ततं सल्लक्खेस्सती’’ति. कामग्गसुखन्ति कामेतब्बवत्थूहि अग्गभूतं सुखं. सब्बे हि तेभूमकधम्मा कामनीयट्ठेन कामा, ते पटिच्च उप्पज्जनसुखतो निब्बानसुखमेव अग्गभूतं सुखं. यथाह – ‘‘यावता, भिक्खवे, धम्मा सङ्खता वा असङ्खता वा, विरागो तेसं अग्गमक्खायती’’ति (इतिवु. ९०; अ. नि. ४.३४) – ‘‘निब्बानं परमं सुख’’न्ति (म. नि. २.२१५, २१७; ध. प. २०३) च. तेन वुत्तं ‘‘निब्बानं अधिप्पेत’’न्ति.

२८१. पुब्बेनिवासञाणलाभिनो पुब्बन्तं आरब्भ वुच्चमानकथा अनुच्छविका तदत्थस्स पच्चक्खभावतो, तदभावतो वेखनसस्स अननुच्छविकाति आह ‘‘यस्मा…पे… नत्थी’’ति. अनागतकथाय…पे… नत्थीति एत्थापि एसेव नयो. आरक्खत्थायाति देवताहि मन्तपदेहि सह ठिता ¶ तत्थ आरक्खत्थाय. अविज्जायाति इदं लक्खणवचनं, तंमूलकत्ता वा सब्बकिलेसधम्मानं अविज्जाव गहिता. जाननं पहीनकिलेसपच्चवेक्खणञाणेन. सेसं सुविञ्ञेय्यमेव.

वेखनससुत्तवण्णनाय लीनत्थप्पकासना समत्ता.

निट्ठिता च परिब्बाजकवग्गवण्णना.

४. राजवग्गो

१. घटिकारसुत्तवण्णना

२८२. चरियन्ति ¶ ¶ बोधिचरियं, बोधिसम्भारसम्भरणवसेन पवत्तितं बोधिसत्तपटिपत्तिन्ति अत्थो. सुकारणन्ति बोधिपरिपाचनस्स एकन्तिकं सुन्दरं कारणं, कस्सपस्स भगवतो पयिरुपासनादिं सन्धाय वदति. तञ्हि तेन सद्धिं मया इध कतन्ति वत्तब्बतं लभति. मन्दहसितन्ति ईसकं हसितं. कुहं कुहन्ति हास-सद्दस्स अनुकरणमेतं. हट्ठपहट्ठाकारमत्तन्ति हट्ठपहट्ठमत्तं. यथा गहितसङ्केता ‘‘पहट्ठो भगवा’’ति सञ्जानन्ति, एवं आकारदस्सनमत्तं.

इदानि इमिना पसङ्गेन तासं समुट्ठानं विभागतो दस्सेतुं ‘‘हसितञ्च नामेत’’न्तिआदि आरद्धं. तत्थ अज्झुपेक्खनवसेनपि हासो न सम्भवति, पगेव दोमनस्सवसेनाति आह ‘‘तेरसहि सोमनस्ससहगतचित्तेही’’ति. ननु च केचि कोधवसेनपि हसन्तीति? न, तेसम्पि यं तं कोधवत्थु, तस्स मयं दानि यथाकामकारितं आपज्जिस्सामाति दुविञ्ञेय्यन्तरेन सोमनस्सचित्तेनेव हासस्स उप्पज्जनतो. तेसूति पञ्चसु सोमनस्ससहगतचित्तेसु. बलवारम्मणेति उळारआरम्मणे यमकमहापाटिहारियसदिसे. दुब्बलारम्मणेति अनुळारे आरम्मणे. इमस्मिं पन ठाने…पे… उप्पादेसीति इदं पोराणट्ठकथायं तथा आगतत्ता वुत्तं. न अहेतुकसोमनस्ससहगतचित्तेन भगवतो सितं होतीति दस्सनत्थं.

अभिधम्मटीकायं (ध. स. मूलटी. ५६८) पन ‘‘अतीतंसादीसु अप्पटिहतं ञाणं वत्वा ‘इमेहि तीहि धम्मेहि समन्नागतस्स बुद्धस्स भगवतो सब्बं कायकम्मं ञाणपुब्बङ्गमं ञाणानुपरिवत्त’न्तिआदिवचनतो (महानि. ६९, १५६; चूळनि. माघराजमाणवपुच्छानिद्देस ८५; पटि. म. ३.५; नेत्ति. १५; दी. नि. अट्ठ. ३.३०५; विभ. मूलटी. सुत्तन्तभाजनीयवण्णना; दी. नि. टी. ३.१४१, ३०५) ‘भगवतो ¶ इदं चित्तं उप्पज्जती’ति वुत्तवचनं विचारेतब्ब’’न्ति वुत्तं. तत्थ इमिना हसितुप्पादचित्तेन पवत्तियमानम्पि भगवतो सितकरणं पुब्बेनिवास-अनागतंस-सब्बञ्ञुतञ्ञाणानं अनुवत्तकत्ता ञाणानुपरिवत्तियेवाति, एवं पन ञाणानुपरिवत्तिभावे सति न कोचि पाळिअट्ठकथानं विरोधो. तथा हि अभिधम्मट्ठकथायं (ध. स. अट्ठ. ५६८) ‘‘तेसं ¶ ञाणानं चिण्णपरियन्ते इदं चित्तं उप्पज्जती’’ति वुत्तं. अवस्सञ्च एतं एवं इच्छितब्बं, अञ्ञथा आवज्जनस्सपि भगवतो पवत्ति तथारूपे काले न संयुज्जेय्य, तस्सपि हि विञ्ञत्तिसमुट्ठापकभावस्स इच्छितत्ता, तथा हि वुत्तं – ‘‘एवञ्च कत्वा मनोद्वारावज्जनस्सपि विञ्ञत्तिसमुट्ठापकत्तं उपपन्नं होती’’ति, न च विञ्ञत्तिसमुट्ठापकत्ते तंसमुट्ठिताय विञ्ञत्तिया कायकम्मादिभावं आपज्जनभावो विबन्धतीति तमेव सन्धाय वदति. तेनाह ‘‘एवं अप्पमत्तकम्पी’’ति. सतेरिता विज्जुलता नाम सतेरताविज्जुलता. सा हि इतरविज्जुलता विय खणट्ठितिका सीघनिरोधा च न होति, अपिच खो दन्धनिरोधा, तञ्च सब्बकालं चतुदीपिकमहामेघतोव निच्छरति तेनाह ‘‘चातुद्दीपिकमहामेघमुखतो’’ति. अयं किर तासं रस्मिवट्टीनं धम्मता, यदिदं तिक्खत्तुं सिरवरं पदक्खिणं कत्वा दाठग्गेसुयेव अन्तरधानं.

२८३. यदिपि चत्तारि असङ्ख्येय्यानि कप्पानं सतसहस्सञ्च पञ्ञापारमिता परिभाविता, तथापि इदानि तं बुद्धन्तरं तस्सा पटिपादेतब्बत्ता वुत्तं ‘‘अपरिपक्कञाणत्ता’’ति. कामञ्चस्स ञाणाय इदानिपि पटिपादेतब्बता अत्थि, एवं सन्तेपि ननु सम्मासम्बुद्धेसु पसादेन सम्भावनाय भवितब्बं तथा चिरकालं परिभावितत्ता, कथं तत्थ हीळनाति आह ‘‘ब्राह्मणकुले’’तिआदि. चिरकालपरिचितापि हि गुणभावना अप्पकेनपि अकल्याणमित्तसंसग्गेन विपरिवत्तति अञ्ञथत्तं गच्छति. तेन महासत्तोपि जातिसिद्धायं लद्धियं ठत्वा जातिसिद्धेन मानेन एवमाह – ‘‘किं पन तेन मुण्डकेन समणकेन दिट्ठेना’’ति. तथा हि वुत्तं अट्ठकथायं –

‘‘तस्मा अकल्याणजनं, आसीविसमिवोरगं,

आरका परिवज्जेय्य, भूतिकामो विचक्खणो’’ति. (दी. नि. अट्ठ. १.१७०-१७२);

न्हानचुण्णेन सुत्तेन कता सोत्ति, कुरुविन्दगुळिका, सा एव सिनायन्ति कायं विसोधेन्ति एतायाति सिनानं. तेनाह – ‘‘सोत्ति सिनानन्ति सिनानत्थाय कतसोत्ति’’न्ति.

२८४. अरियपरिहारेनाति ¶ अरियानं परिहारेन, अनागामीनं न्हानकाले अत्तनो कायस्स परिहारनियामेनाति अत्थो. अत्तनो ¶ ञाणसम्पत्तिया विभवसम्पत्तिया पसन्नकारं कातुं सक्खिस्सति. एतदत्थन्ति ‘‘अहितनिवारणं, हिते नियोजनं ब्यसने परिवज्जन’’न्ति यदिदं, एतदत्थं मित्ता नाम होन्ति. केचि ‘‘यावेत्थ अहुपी’’ति पठन्ति, तेसं याव एत्थ केसग्गगहणं ताव अयं निबन्धो अहुपीति अत्थो.

२८५. सतिपटिलाभत्थायाति बोधिया महाभिनीहारं कत्वा बोधिसम्भारपटिपदाय पूरणभावे सतिया पटिलाभत्थाय. इदानि तस्स सतुप्पादनीयकथाय पवत्तिताकारं सङ्खेपेनेव दस्सेतुं ‘‘तस्स ही’’तिआदि वुत्तं. तत्थ न लामकट्ठानं ओतिण्णसत्तोति इमिना महासत्तस्स पणीताधिमुत्ततं दस्सेत्वा एवं पणीताधिमुत्तिकस्स पमादकिरिया न युत्ताति दस्सेन्तो ‘‘तादिसस्स नाम पमादविहारो न युत्तो’’ति आह. तदा बोधिसत्तस्स नेक्खम्मज्झासयो तेलप्पदीपो विय विसेसतो निब्बत्ति, तं दिस्वा भगवा तदनुरूपं धम्मकथं करोन्तो ‘‘तादिसस्स…पे… कथेसी’’ति. परसमुद्दवासी थेरा अञ्ञथा वदन्ति. अट्ठकथायं पन नायं बुद्धानं भारो, यदिदं पूरितपारमीनं बोधिसत्तानं तथा धम्मदेसना तेसं महाभिनीहारसमनन्तरम्पि बोधिसम्भारस्स सयम्भुञाणेनेव पटिविदितत्ता. तस्मा बोधिसत्तभावपवेदनमेव तस्स भगवा अकासीति दस्सेतुं ‘‘सतिपटिलाभत्थाया’’तिआदि वुत्तं. सतिपटिलाभत्थायाति सम्मापटिपत्तिया उज्जलने पाकटकरसतिपटिलाभाय.

२८६. ञाणञ्हि किलेसधम्मविदालनपदालनेहि सिङ्गं वियाति सिङ्गं. तञ्हि पटिपत्तिया उपत्थम्भितं उस्सितं नाम होति, तदभावे पतितं नाम. केचि पन वीरियं सिङ्गन्ति वदन्ति. तस्मिं सम्मप्पधानवसेन पवत्ते बाहिरपब्बज्जं उपगतापि महासत्ता विसुद्धासया अप्पिच्छतादिगुणसमङ्गिनो यथारहं गन्थधुरं वासधुरञ्च परिब्रूहयन्ता विहरन्ति, पगेव बुद्धसासने अप्पिच्छतादीहीति आह ‘‘चतुपारिसुद्धिसीले पना’’तिआदि. विपस्सनं ब्रूहेन्ता सिखाप्पत्तविपस्सना होन्तीति वुत्तं – ‘‘याव अनुलोमञाणं आहच्च तिट्ठन्ती’’ति, अनुलोमञाणतो ओरमेव विपस्सनं ठपेन्तीति अत्थो. मग्गफलत्थं वायामं न करोन्ति पञ्ञापारमिताय सब्बञ्ञुतञ्ञाणगब्भस्स अपरिपुण्णत्ता अपरिपक्कत्ता च.

२८७. थेरेहीति ¶ वुद्धतरेहि. निवासे सतीति यस्मिं ठाने पब्बजितो, तत्थेव निवासे. वप्पकालतोति सस्सानं वप्पकालतो. पुब्बे विय ततो परं तिखिणेन सूरियसन्तापेन पयोजनं नत्थीति वुत्तं – ‘‘वप्पकाले वितानं विय उपरि वत्थकिलञ्जं बन्धित्वा’’ति. पुटकेति कलापे.

२८८. पच्चयसामग्गिहेतुकत्ता ¶ धम्मप्पत्तिया पदेसतो परिञ्ञावत्थुकापि अरिया उपट्ठिते चित्तविघातपच्चये यदेतं नातिसावज्जं, तदेवं गण्हन्तीति अयमेत्थ धम्मताति आह – ‘‘अलाभं आरब्भ चित्तञ्ञथत्त’’न्तिआदि. सोति किकी कासिराजा. ब्राह्मणभत्तोति ब्राह्मणेसु भत्तो. देवेति ब्राह्मणे सन्धायाह. भूमिदेवाति तेसं समञ्ञा, तदा ब्राह्मणगरुको लोको. तदा हि कस्सपोपि भगवा ब्राह्मणकुले निब्बत्ति. धीतु अवण्णं वत्वाति, ‘‘महाराज, तव धीता ब्राह्मणसमयं पहाय मुण्डपासण्डिकसमयं गण्ही’’तिआदिना राजपुत्तिया अगुणं वत्वा. वरं गण्हिंसु ञातका. रज्जं निय्यातेसि ‘‘मा मे वचनं मुसा अहोसि, अट्ठमे दिवसे निग्गण्हिस्सामी’’ति.

पावनअस्मनयनवसेन सम्मा पावीकतत्ता परिसुद्धतण्डुलानि. पाळियं तण्डुलपटिभस्तानीति तण्डुलखण्डानि. मुग्गपटिभस्तकळायपटिभस्तेसुपि एसेव नयो.

२८९. को नु खोति भुम्मत्थे पच्चत्तवचनन्ति आह – ‘‘कुहिं नु खो’’ति पारिपूरिं योजीयन्ति ब्यञ्जनभोजनानि एत्थाति परियोगो, ततो परियोगा. तेनाह ‘‘सूपभाजनतो’’ति. सञ्ञं दत्वाति वुत्तं सब्बं आचिक्खित्वा तुम्हाकं अत्थाय सम्पादेत्वा निक्खित्तो उपट्ठाकोति भगवतो आरोचेथाति सञ्ञं दत्वा. अतिविस्सत्थोति अतिविय विस्सत्थो. पञ्चवण्णाति खुद्दिकादिवसेन पञ्चप्पकारा.

२९०. किन्ति निस्सक्के पच्चत्तवचनं, कस्माति अत्थो? धम्मिकोति इमिना आगमनसुद्धिं दस्सेति ¶ . भिक्खूनं पत्ते भत्तसदिसोति इमिना उपासकेन सत्थु परिच्चत्तभावं तत्थ सत्थुनो च अपरिसङ्कतं दस्सेति. सिक्खापदवेला नाम नत्थीति धम्मस्सामिभावतो सिक्खापदमरियादा नाम नत्थि पण्णत्तिवज्जे, पकतिवज्जे पन सेतुघातो एव.

२९१. छदनट्ठाने यदाकासं, तदेव तस्स गेहस्स छदनन्ति आकासच्छदनं. पकतिया उतुफरणमेवाति छादिते यादिसं उतु, छदने उत्तिणभावेपि तम्हि गेहे तादिसमेव उतुफरणं अहोसि. तेसंयेवाति तेसं घटिकारस्स मातापितूनं एव.

२९२. ‘‘चतस्सो ¶ मुट्ठियो एको कुडुवो, चत्तारो कुडुवा एको पत्थो, चत्तारो पत्था एको आळ्हको, चत्तारो आळ्हका एकं दोणं, चत्तारि दोणानि एका मानिका, चतस्सो मानिका एका खारी, वीसति खारिका एको वाहोति तदेव एकसकट’’न्ति सुत्तनिपातट्ठकथादीसु (सु. नि. अट्ठ. २.६६२) वुत्तं, इध पन ‘‘द्वे सकटानि एको वाहो’’ति वुत्तं. तेलफाणितादिन्ति आदि-सद्देन सप्पिआदिं मरिचादिकटुकभण्डञ्च सङ्गण्हाति. नाहं रञ्ञा दिट्ठपुब्बो, कुतो परिप्फस्सोति अधिप्पायो. नच्चित्वाति नच्चं दत्वा.

घटिकारसुत्तवण्णनाय लीनत्थप्पकासना समत्ता.

२. रट्ठपालसुत्तवण्णना

२९३. थूलमेव ¶ थुल्लं, थुल्ला विपुला महन्ता कोट्ठा जाता इमस्साति थुल्लकोट्ठिकन्ति ओदनपूपपहूतवसेन लद्धनामो निगमो. अट्ठकथायं पन थुल्लकोट्ठन्ति अत्थो वुत्तो. तेन पाळियं इक-सद्देन पदवड्ढनं कतन्ति दस्सेति.

२९४. रट्ठपालोति इदं तस्स कुलपुत्तस्स नामं. पवेणिवसेन आगतकुलवंसानुगतन्ति समुदागमतो पट्ठाय दस्सेतुं ‘‘कस्मा रट्ठपालो’’तिआदि वुत्तं. सन्धारेतुन्ति विनासनतो पुब्बे यादिसं, तथेव सम्मदेव धारेतुं समत्थो. सद्धाति कम्मफलसद्धाय सम्पन्ना. सामणेरं दिस्वाति सिक्खाकामताय एतदग्गे ठपियमानं दिस्वा.

सह ¶ रञ्ञाति सराजिकं, रञ्ञा सद्धिं राजपरिसं. चातुवण्णन्ति ब्राह्मणादिचतुवण्णसमुदायं. पोसेतुन्ति वद्धेतुं दानादीहि सङ्गहवत्थूहि सङ्गण्हितुं. यं कुलं. पहोस्सतीति सक्खिस्सति.

तेन तेन मे उपपरिक्खतोति ‘‘कामा नामेते अनिच्चा दुक्खा विपरिणामधम्मा, अट्ठिकङ्कलूपमा’’ति (म. नि. १.२३४; पाचि. ४१७; महानि. ३, ६) च आदिना येन येन आकारेन कामेसु आदीनवं ओकारं संकिलेसं, तब्बिपरियायतो नेक्खम्मे आनिसंसं गुणं पकासेन्तं भगवता धम्मं देसितं आजानामि, तेन तेन पकारेन उपपरिक्खतो वीमंसन्तस्स मय्हं एवं होति एवं उपट्ठाति. सिक्खत्तयब्रह्मचरियन्ति अधिसीलादिसिक्खत्तयसङ्गहं सेट्ठचरियं. अखण्डादिभावापादनेन अखण्डं लक्खणवचनञ्हेतं. कञ्चिपि सिक्खेकदेसं असेसेत्वा एकन्तेनेव परिपूरेतब्बताय एकन्तपरिपुण्णं. चित्तुप्पादमत्तम्पि संकिलेसमलं अनुप्पादेत्वा अच्चन्तमेव विसुद्धं कत्वा परिहरितब्बताय एकन्तपरिसुद्धं. ततो एव सङ्खं विय लिखितन्ति सङ्खलिखितं. तेनाह ‘‘लिखितसङ्खसदिस’’न्ति. दाठिकापि मस्सुग्गहणेनेव गहेत्वा ‘‘मस्सु’’त्वेव वुत्तं, उत्तराधरमस्सुन्ति अत्थो. कसायेन रत्तानि कासायानि. अननुञ्ञातं पुत्तं न पब्बाजेति ‘‘मातापितूनं लोकियमहाजनस्स चित्तञ्ञथत्तं मा होतू’’ति. तथा हि सुद्धोदनमहाराजस्स तथा वरो दिन्नो.

२९५. पियायितब्बतो ¶ पियोति आह ‘‘पीतिजनको’’ति. मनस्स अप्पायनतो मनापोति आह ‘‘मनवड्ढनको’’ति. सुखेधितो तरुणदारककाले. ततो परञ्च सप्पिखीरादिसादुरसमनुञ्ञभोजनादिआहारसम्पत्तिया सुखपरिभतो. अथ वा दळ्हभत्तिकधातिजनादिपरिजनसम्पत्तिया चेव परिच्छदसम्पत्तिया च उळारपणीतसुखपच्चयूपहारेहि च सुखेधितो, अकिच्छेनेव दुक्खप्पच्चयविनोदनेन सुखपरिभतो. अज्झत्तिकङ्गसम्पत्तिया वा सुखेधितो, बाहिरङ्गसम्पत्तिया सुखपरिभतो. कस्सचीति उपयोगत्थे सामिवचनं, किञ्चीति वुत्तं होति, अयमेव वा पाठो. तथा हि ‘‘अप्पमत्तकम्पि कलभागं दुक्खस्स न जानासी’’ति अत्थो वुत्तो. एवं सन्तेति ननु मयं रट्ठपाल मरणादीसु केनचि उपायेन अप्पतीकारेन मरणेनपि तया अकामकापि ¶ विना भविस्साम, एवं सति. येनाति येन कारणेन. किं पनाति एत्थ किन्ति कारणत्थे पच्चत्तवचनन्ति दस्सेन्तो आह ‘‘केन पन कारणेना’’ति.

२९६. परिचारेहीति परितो तत्थ तत्थ यथासकं विसयेसु चारेहि. तेनाह ‘‘इतो चितो च उपनेही’’ति. परिचारेहीति वा सुखूपकरणेहि अत्तानं परिचारेहि, अत्तनो परिचरणं कारेहि. तथाभूतो च यस्मा लळन्तो कीळन्तो नाम होति, तस्मा ‘‘लळा’’तिआदि वुत्तं. निच्चदानं दानं नाम, उपोसथदिवसादीसु दातब्बं अतिरेकदानं पदानं नाम. पवेणीरक्खणवसेन वा दीयमानं दानं नाम, अत्तनाव पट्ठपेत्वा दीयमानं पदानं नाम. पचुरजनसाधारणं वा नातिउळारं दानं नाम, अनञ्ञसाधारणं अतिउळारं पदानं नाम. उद्दस्सेतब्बाति उद्धं दस्सेतब्बा. कुतो उद्धं ते दस्सेतब्बा? पब्बजिततो उद्धं अत्तानं मातापितरो दस्सेतब्बा, तेनाह ‘‘यथा’’तिआदि.

२९९. बलं गहेत्वाति एत्थ बलग्गहणं नाम कायबलस्स उप्पादनमेवाति आह ‘‘कायबलं जनेत्वा’’ति. एवं विहरन्तोति यथा पाळियं वुत्तं एवं एको वूपकट्ठो अप्पमत्तो विहरन्तो. तस्माति यस्मा नेय्यो, न उग्घटितञ्ञू, न च विपञ्चितञ्ञू, तस्मा. चिरेन पब्बजितो द्वादसमे वस्से अरहत्तं पापुणि. यं पन वुत्तं पाळियं ‘‘न चिरस्सेवा’’ति, तं सट्ठि वस्सानि ततो अधिकम्पि विपस्सनापरिवासं वसन्ते उपादाय वुत्तं.

सत्तद्वारकोट्ठकस्साति सत्तगब्भन्तरद्वारकोट्ठकसीसेन गब्भन्तरानि वदति. पहरापेतीति वयोवुड्ढानुरूपं कप्पापनादिना अलङ्कारापेति. अन्तोजातताय ञातिसदिसी दासी ञातिदासी. पूतिभावेनेव लक्खितब्बो दोसो वा अभिदोसो, सोव आभिदोसिको, अभिदोसं वा पच्चूसकालं गतो पत्तो अतिक्कन्तोति आभिदोसिको. तेनाह ‘‘एकरत्तातिक्कन्तस्सा’’तिआदि ¶ . अपरिभोगारहो पूतिभूतभावेन. अरियवोहारेनाति अरियसमुदाचारेन. अरिया हि मातुगामं भगिनिवादेन समुदाचरन्ति. निस्सट्ठपरिग्गहन्ति परिच्चत्तालयं. वत्तुं वट्टतीति निरपेक्खभावतो वुत्तं, इध पन विसेसतो अपरिभोगारहत्ताव वत्थुनो. निमीयति सञ्ञायतीति निमित्तं, तथासल्लक्खितो आकारोति आह ‘‘आकारं अग्गहेसी’’ति.

३००. घरं ¶ पविसित्वाति गेहसामिनिया निसीदितब्बट्ठानभूतं अन्तोगेहं पविसित्वा. आलपनेति दासिजनस्स आलपने. बहि निक्खमन्ताति यथावुत्तअन्तोगेहतो बहि निक्खमन्तियो. घरेसु साला होन्तीति घरेसु एकमन्ते भोजनसाला होन्ति पाकारपरिक्खित्ता सुसंविहितद्वारबन्धा सुसम्मट्ठवालिकङ्गणा.

अनोकप्पनं असद्दहनं. अमरिसनं असहनं. अनागतवचनं अनागतसद्दप्पयोगो, अत्थो पन वत्तमानकालिकोव. तेनाह ‘‘पच्चक्खम्पी’’ति. अरियिद्धियन्ति ‘‘पटिकूले अपटिकूलसञ्ञी विहरती’’ति (अ. नि. ५.१४४) एवं वुत्तअरियिद्धियं.

पूतिकुम्मासो छड्डनीयधम्मो तस्स गेहतो लद्धोपि न दातब्बयुत्तको दासिजनेन दिन्नोति आह ‘‘देय्यधम्मवसेन नेव दानं अलत्थम्हा’’ति. ‘‘इमेहि मुण्डकेही’’तिआदिना नित्थुननवचनेन पच्चक्खानं अत्थतो लद्धमेव, तस्स पन उजुकफासुसमाचारवसेन अलद्धत्ता वुत्तं ‘‘न पच्चक्खान’’न्ति. तेनाह – ‘‘पटिसन्थारवसेन पच्चक्खानम्पि न अलत्थम्हा’’ति. ‘‘नेव दान’’न्तिआदि पच्चासीसाय अक्खन्तिया च वुत्तं विय पचुरजनो मञ्ञेय्याति तन्निवत्तनत्थं अधिप्पायमस्स विवरितुं ‘‘कस्मा पना’’तिआदि वुत्तं. सुत्तिकापटिच्छन्नन्ति सिप्पिकाछदाहि छन्नं.

उक्कट्ठएकासनिकतायाति इदं भूतकथनमत्तं थेरस्स तथाभावदीपनतो. मुदुकस्सपि हि एकासनिकस्स याय निसज्जाय किञ्चिमत्तं भोजनं भुत्तं, वत्तसीसेनपि ततो वुट्ठितस्स पुन भुञ्जितुं न वट्टति. तेनाह तिपिटकचूळाभयत्थेरो ‘‘आसनं वा रक्खेय्य भोजनं वा’’ति. उक्कट्ठसपदानचारिकोति पुरतो पच्छतो च आहटभिक्खम्पि अग्गहेत्वा बहिद्वारे ठत्वा पत्तविस्सज्जनमेव करोति. एतेनेव थेरस्स उक्कट्ठपिण्डपातिकभावो दीपितो. तेनाह – ‘‘स्वातनाय भिक्खं नाम नाधिवासेती’’ति. अथ कस्मा अधिवासेसीति आह ‘‘मातु अनुग्गहेना’’तिआदि ¶ . पण्डिता हि मातापितूनं आचरियुपज्झायानं वा कातब्बं अनुग्गहं अज्झुपेक्खित्वा धुतङ्गसुद्धिका न भवन्ति.

३०१. पयुत्तन्ति वद्धिवसेन पयोजितं, तद्धितलोपं कत्वा वुत्तन्ति वेदितब्बं यथा अञ्ञत्थापि ‘‘पितामहं धनं लद्धा, सुखं जीवति सञ्चयो’’ति ¶ . जेट्ठकित्थियोति पधानित्थियो. इतोति इमस्मिं कुले अनुभवितब्बविभवसम्पत्तितो. अञ्ञतोति इमस्स दिन्नत्ता अञ्ञस्मिं कुले अनुभवितब्बसम्पत्तितो.

३०२. चित्तविचित्तन्ति कप्पनाय चेव अरहरूपेन अलङ्कारादिना च चित्तितञ्चेव विचित्तितञ्च. वणकायन्ति वणभूतं कायं. समन्ततो उस्सितन्ति हेट्ठिमकायवसेन हेट्ठा उपरि च सन्निस्सितं. निच्चातुरन्ति अभिण्हप्पटिपीळितं, सदा दुक्खितं वा. बहुसङ्कप्पन्ति रागवत्थुभावेन अभिजनेहि हावभावविलासवसेन, आमिसवसेन च सोणसिङ्गालादीहि बहूहि सङ्कप्पेतब्बं. ठितीति अवट्ठानं अविपरिणामो नत्थि. तेनाह – ‘‘भिज्जनधम्मताव नियता’’ति, परिस्सवभावापत्ति चेव विनासपत्ति च एकन्तिकाति अत्थो.

चित्तकतम्पीति गन्धादीहि चित्तकतम्पि. रूपन्ति सरीरं.

अलत्तककताति पिण्डिअलत्तकेन सुवण्णकता. तेनाह ‘‘अलत्तकेन रञ्जिता’’ति. चुण्णकमक्खितन्ति दोसनीहरणेहि तापदहनादीहि कताभिसङ्खारमुखं गोरोचनादीहि ओभासनकचुण्णेहि मक्खितं, तेनाह ‘‘सासपकक्केना’’तिआदि.

रसोदकेनाति सरलनिय्यासरसमिस्सेन उदकेन. आवत्तनपरिवत्ते कत्वाति आवत्तनपरिवत्तनवसेन नते कत्वा. अट्ठपदकरचनायाति भित्तिकूटद्धचन्दादिविभागाय अट्ठपदकरचनाय.

विरवमानेति ‘‘अयं पलायति, गण्ह गण्हा’’ति विरवमाने. हिरञ्ञसुवण्णओरोधेति वत्तब्बं.

३०३. उस्सिताय उस्सितायाति कुलविभवबाहुसच्चपञ्ञासम्पत्तिया उग्गताय उग्गताय. अभिलक्खितो उळारभावेन.

३०४. परिजुञ्ञानीति ¶ परिहानानि. ये ब्याधिना अभिभूता सत्ता जिण्णकप्पा वयोहानिसत्ता विय होन्ति, ततो निवत्तेन्तो ‘‘जराजिण्णो’’ति आह. वयोवुड्ढो, न सीलादिवुड्ढो. महत्तं लाति गण्हातीति महल्लको, जातिया महल्लको, न विभवादिनाति जातिमहल्लको ¶ . द्वत्तिराजपरिवत्तसङ्खातं अद्धानं कालं गतो वीतिवत्तोति अद्धगतो. तथा च पठमवयं मज्झिमवयञ्च अतीतो होतीति आह ‘‘अद्धानं अतिक्कन्तो’’ति. जिण्णादिपदेहि पठमवयमज्झिमवयस्स बोधितत्ता अनुप्पत्तताविसिट्ठो वय-सद्दो ओसानवयविसयोति आह ‘‘पच्छिमवयं अनुप्पत्तो’’ति.

‘‘अप्पिच्छो, अप्पडंसमकसवातातपसरीसपसम्फस्सो’’ति (अ. नि. १०.११) एवमादीसु विय अप्प-सद्दो अभावत्थोति अधिप्पायेनाह ‘‘अप्पाबाधोति अरोगो, अप्पातङ्कोति निद्दुक्खो’’ति. अप्पत्थो वा इध, तत्थापि अप्प-सद्दो दट्ठब्बो. एवञ्हि ‘‘यो हि, गहपति, इमं पूतिकायं परिहरन्तो मुहुत्तम्पि आरोग्यं पटिजानेय्य किमञ्ञत्र बाल्या’’ति (सं. नि. ३.१) सुत्तपदं समत्थितं होति. विपच्चनं विपाको, सो एव वेपाको. समो वेपाको एतिस्सा अत्थीति समवेपाकिनी, ताय. तेनेव समवेपाकिनिभावेन सब्बम्पि सम्मदेव गण्हाति धारेतीति गहणी. गहणिसम्पत्तिया हि यथाभुत्तआहारो सम्मदेव जीरन्तो सरीरे तिट्ठति, नो अञ्ञथा भुत्तभुत्तो आहारो जीरति गहणिया तिक्खभावेन. तथेव तिट्ठतीति भुत्ताकारेनेव तिट्ठति गहणिया मन्दभावतो. भत्तच्छन्दो उप्पज्जतेव भुत्तआहारस्स सम्मा परिणामं गतत्ता. तेनेवाति समवेपाकिनिभावेनेव. पत्तानं भोगानं परिक्खियमानं न सहसा एकज्झंयेव परिक्खयं गच्छन्ति, अथ खो अनुक्कमेन, तथा ञातयोपीति आह ‘‘अनुपुब्बेना’’ति. छातकभयादिनाति आदि-सद्देन ब्याधिभयादिं सङ्गण्हाति.

३०५. उद्देससीसेन निद्देसो गहितोति आह ‘‘धम्मनिद्देसा उद्दिट्ठा’’ति. यस्मा वा ये धम्मा उद्दिसितब्बट्ठेन ‘‘उद्देसा’’ति वुच्चन्ति. तेव धम्मा निद्दिसितब्बट्ठेन निद्देसाति ‘‘धम्मनिद्देसा उद्दिट्ठा’’ति अत्थो वुत्तो. अथ वा ये धम्मा अनिच्चतादिविभावनवसेन उद्धं उद्धं देसेस्सन्ति, ते धम्मा तथेव निस्सेसतो देसेस्सन्तीति एवं उद्देसनिद्देसपदानं अनत्थन्तरता वेदितब्बा. तत्थाति जरामरणसन्तिके. अद्धुवोति निद्धुवो न थिरो, अनिच्चोति अत्थो. तेनाह ‘‘धुवट्ठानविरहितो’’ति, अजाताभूतासङ्खतधुवभावकारणविवित्तोति अत्थो. उपनीय्यतीति वा ¶ जरामरणेन लोको सम्मा नीयति, तस्मा अद्धुवोति एवमेत्थ अत्थो दट्ठब्बो. तायितुन्ति जातिआदिब्यसनतो रक्खितुं समत्थेन इस्सरेन अत्तना विरहितोति. ‘‘इमं लोकं इतो वट्टदुक्खतो मोचेस्सामि, जराब्याधिमरणानं तं अधिभवितुं न दस्सामी’’ति एवं अभिसरतीति ¶ अभिस्सरणं, लोकस्स सुखस्स दाता हितस्स विधाता कोचि इस्सरो, तदभावतो आह ‘‘अनभिस्सरोति असरणो’’ति. निस्सको ममायितब्बवत्थुअभावतो, तेनाह ‘‘सकभण्डविरहितो’’तिआदि. तण्हाय वसे जातो तण्हाय विजितोति कत्वा ‘‘तण्हाय दासो’’ति वुत्तं.

३०६. हत्थिविसयत्ता हत्थिसन्निस्सितत्ता वा हत्थिसिप्पं ‘‘हत्थी’’ति गहितन्ति आह – ‘‘हत्थिस्मिन्ति हत्थिसिप्पे’’ति, सेसपदेसुपि एसेव नयो. सातिसयं ऊरुबलं एतस्स अत्थीति ऊरुबलीति आह – ‘‘ऊरुबलसम्पन्नो’’ति, तमेवत्थं पाकटं कत्वा दस्सेतुं ‘‘यस्स ही’’तिआदि वुत्तं. अभिन्नं परसेनं भिन्दतो भिन्नं सकसेनं सन्धारयतो उपत्थम्भयतो. बाहुबलीति एत्थापि ‘‘यस्स हि फलकञ्च आवुधञ्च गहेत्वा’’तिआदिना अत्थो वत्तब्बो, इध पन परहत्थगतं रज्जं आहरितुं बाहुबलन्ति योजना. यथा हि ‘‘ऊरुबली’’ति एत्थापि बाहुबलं अनामसित्वा अत्थो, एवं ‘‘बाहुबली’’ति एत्थ ऊरुबलं अनामसित्वा अत्थो वेदितब्बो, आहितो अहंमानो एत्थाति अत्ता, अत्तभावो. अलं समत्थो अत्ता एतस्साति अलमत्थोति आह ‘‘समत्थअत्तभावो’’ति.

परियोधायाति वा परितो आरक्खं ओदहित्वा. ‘‘संविज्जन्ते खो, भो रट्ठपाल, इमस्मिं राजकुले हत्थिकायापि…पे… वत्तिस्सन्ती’’ति इदम्पि सो राजा उपरि धम्मुद्देसस्स कारणं आहरन्तो आह.

वुत्तस्सेव अनु पच्छा गायनवसेन कथनं अनुगीति. ता पन गाथा धम्मुद्देसानं देसनानुपुब्बिं अनादियित्वापि यथारहं सङ्गण्हनवसेन अनुगीताति आह ‘‘चतुन्नं धम्मुद्देसानं अनुगीति’’न्ति.

३०७. एकन्ति एकजातियं. वत्थुकामकिलेसकामा विसयभेदेन भिन्दित्वा तथा वुत्ताति दट्ठब्बो.

सागरन्तेनाति ¶ सागरपरियन्तेन.

अहो वताति सोचने निपातो, ‘‘अहो वत पापं कतं मया’’तिआदीसु विय. अमरातिआदीसु ¶ आहूति कथेन्ति. मतं उद्दिस्स ‘‘अम्ह’’न्ति वत्तब्बे सोकवसेन ‘‘अमर’’न्ति वुच्चति.

वोसानन्ति निट्ठं, परियोसानन्ति अत्थो. सावाति पञ्ञा एव. धनतोति सब्बधनतो. उत्तमतरा सेट्ठा, तेनेवाह ‘‘पञ्ञाजीविं जीवितमाहु सेट्ठ’’न्ति (सं. नि. १.२४६; सु. नि. १८४).

तेसु पापं करोन्तेसु सत्तेसु, निद्धारणे चेतं भुम्मवचनं. परम्परायाति अत्तभावपरम्पराय. संसारं आपज्जित्वाति भवादीसु संसारस्स आपज्जनहेतुं आपज्जन्तो परलोकं उपेति, परलोकं उपेन्तोव बहुविधदुक्खसङ्खातं गब्भञ्च उपेति. तादिसस्साति तथारूपस्स गब्भवासदुक्खादीनं अधिट्ठानभूतस्स अप्पपञ्ञस्स अञ्ञो अप्पपञ्ञो च अभिसद्दहन्तो हितसुखावहन्ति पत्तियायन्तो.

‘‘पापधम्मो’’ति वुत्तत्ता तादिसस्स परलोको नाम दुग्गति एवाति आह ‘‘परम्हि अपायलोके’’ति.

विविधरूपेनाति रूपसद्दादिवसेन तत्थपि पणीततरादिवसेन बहुविधरूपेन.

सामञ्ञमेवाति समणभावो एव सेय्यो. एत्थ च आदितो द्वीहि गाथाहि चतुत्थो धम्मुद्देसो अनुगीतो. चतुत्थगाथाय ततियो. पञ्चमगाथाय दुतियो. छट्ठगाथाय दुतियततिया. सत्तमगाथाय पठमो धम्मुद्देसो अनुगीतो, अट्ठमादीहि पवत्तिनिवत्तीसु कामेसु नेक्खम्मे च यथारहं आदीनवानिसंसं विभावेत्वा अत्तनो पब्बज्जकारणं परमतो दस्सेन्तो यथावुत्तधम्मुद्देसं निगमेति, तेन वुत्तं ‘‘ता पन गाथा धम्मुद्देसानं देसनानुपुब्बिं अनादियित्वापि यथारहं सङ्गण्हनवसेन अनुगीता’’ति. सेसं सुविञ्ञेय्यमेव.

रट्ठपालसुत्तवण्णनाय लीनत्थप्पकासना समत्ता.

३. मघदेवसुत्तवण्णना

३०८. पुब्बे ¶ ¶ मघदेवो नाम राजाति अतीतकाले इमस्मिंयेव कप्पे अनेकवस्ससहस्सायुकेसु मनुस्सेसु पटिपाटिया उप्पन्नानं चतुरासीतिसहस्सानं चक्कवत्तिराजूनं आदिपुरिसो मघदेवोति एवंनामो राजा.

धम्मोति राजधम्मोति लोकिका वदन्ति. महाबोधिनिधानपारमितासङ्खातो पन धम्मो अत्थीति धम्मिको. धम्मेनाति ञायेन. तदा ब्रह्मविहारादिभावनाधम्मस्स रञ्ञो अनधिगतत्ता तस्सपि वा अनभिज्झादीहि समानयोगक्खमत्ता वुत्तं ‘‘दसकुसलकम्मपथे ठितो’’ति. धम्मन्ति धम्मतो अनपेतं. तथा हि च सो पक्खपाताभावतो ‘‘समो’’ति वुच्चतीति आह ‘‘समं चरती’’ति. पकतिनियामेनेवाति पवेणिया आगतनियामेनेव. यस्मा निगमजनपदेसु येभुय्येन गहपतीनं सङ्गहो, तस्मा अट्ठकथायं ‘‘गहपतिकान’’न्त्वेव वुत्तं. पाळियं पन अञ्ञमेव नागरचारित्तं, अञ्ञं नेगमजनपदचारित्तन्ति ते विसुं गहिता ‘‘नेगमेसु चेव जनपदेसु चा’’ति. पच्चुग्गमननिग्गमनवसेन उपोसथस्स पटिहरणं पाटिहारियो, सो एव पाटिहारिको, पक्खो. इमे दिवसाति इमे चत्तारो दिवसा.

३०९. देवोति मच्चु अभिभवनट्ठेन. यथा हि देवो पकतिसत्ते अभिभवति, एवं मच्चु सत्ते अभिभवति. ‘‘अहं असुकं मद्दितुं आगमिस्सामि, त्वं तस्स केसे गहेत्वा मा विस्सज्जेही’’ति मच्चुदेवस्स आणाकरा दूता वियाति दूताति वुच्चन्ति. अलङ्कतपटियत्तायाति इदं अत्तनो दिब्बानुभावं आविकत्वा ठितायाति दस्सेतुं वुत्तं. देवताब्याकरणसदिसमेव होति न चिरेनेव मरणसम्भवतो. विसुद्धिदेवानन्ति खीणासवब्रह्मानं. ते हि चरिमभवे बोधिसत्तानं जिण्णादिके दस्सेन्ति.

दुखितञ्च ब्याधितन्ति ब्याधिभावेन सञ्जातदुक्खन्ति अत्थो. अन्तिमभविकबोधिसत्तानं विसुद्धिदेवेहि उपट्ठापितभावं उपादाय तदञ्ञेसं तेहि अनुपट्ठापितानम्पि पण्डितानं तथा वोहरितब्बता परियायसिद्धाति आह ‘‘इमिना परियायेना’’ति.

दिसम्पतीति ¶ विभत्तिअलोपेन निद्देसो, दिसासीसेन देसा वुत्ताति देसानं अधिपतिराजाति ¶ अत्थो. उत्तमङ्गे सिरसि रुहन्तीति उत्तमङ्गरुहा, केसा. ते पनेत्थ यस्मा पलितत्ता अविसेसतो सब्बपच्छिमवयसन्दस्सका होन्ति, तस्मा ‘‘वयोहरा’’ति वुत्ता.

पुरिसयुगो यस्मा तस्मिं वंसे सञ्जातपुरिसट्ठितिया परिच्छिन्नो, तस्मा आह ‘‘वंससम्भवे पुरिसे’’ति. राजगेहतो आहटभिक्खाय यापेन्तोति इमिना कुमारकपब्बज्जाय उपगतभावं दस्सेति.

परिहरियमानोवाति अञ्ञेन अञ्ञेन परिहरियमानो विय वेलाय वेलाय तेन महता परिजनेन उपट्ठियमानो कुमारकीळं कीळीति अत्थो. केचि पन ‘‘परिहरियमानो एवा’’ति अवधारणवसेन अत्थं वदन्ति, तथा सति चतुरासीतिवस्ससहस्सानि थञ्ञपायी तरुणदारको अहोसीति आपज्जतीति तदयुत्तं. कुमारकालं वत्वा तदनन्तरं ओपरज्जवचनतो विरुद्धञ्चेतं. (पञ्चमङ्गलवचनेन उन्नङ्गलमङ्गलउक्कन्तनमङ्गलकम्महायमङ्गलदुस्समङ्गलानि समुपगतानि एव अहेसुन्ति दट्ठब्बं).

३११. सवंसवसेन आगता पुत्तनत्तुआदयो पुत्ता च पपुत्ता च एतिस्साति पुत्तपपुत्तका परम्परा. निहतन्ति निहितं ठपितं, पवत्तितन्ति अत्थो. निहतन्ति वा सततं पतिट्ठितभावेन वळञ्जितन्ति अत्थो. तेनाह ‘‘कल्याणवत्त’’न्ति. अतिरेकतरा द्वे गुणाति महासत्तस्स मघदेवकालतो अतिरेकतरा द्वे गुणा इतरराजूहि पन अतिरेकतरा अनेकसतसहस्सप्पभेदा एव गुणा अहेसुन्ति.

३१२. तेत्तिंस सहपुञ्ञकारिनो एत्थ निब्बत्ताति तंसहचरितट्ठानं तेत्तिंसं, तदेव तावतिंसं, तंनिवासो एतेसन्ति तावतिंसा. निवासभावो च तेसं तत्थ निब्बत्तनपुब्बकोति आह – ‘‘देवानं तावतिंसानन्ति तावतिंसभवने निब्बत्तदेवान’’न्ति. रञ्ञोति निमिमहाराजस्स. ओवादे ठत्वाति ‘‘सीलं अरक्खन्तो मम सन्तिकं मा आगच्छतू’’ति निग्गण्हनवसेनपि, ‘‘एकन्ततो मम विजिते वसन्तेन सीलं रक्खितब्ब’’न्ति एवं पवत्तितओवादवसेनपि ओवादे ठत्वा.

अथ ¶ नन्ति महाजुतिकं महाविप्फारं महानुभावं निमिराजानं. ‘‘सक्कोहमस्मि देविन्दो, तव सन्तिकमागतो’’ति अत्तनो सक्कभावं पवेदेत्वा ‘‘कङ्खं ते पटिविनोदेस्सामी’’ति आह. तेनाह ‘‘सब्बभूतानमिस्सरा’’तिआदि.

सीलं ¶ उपादाय ओमकताय ‘‘कि’’न्ति हीळेन्तो वदति. गुणविसिट्ठतायाति लाभयसादीनञ्चेव पियमनापतादीनञ्च आसवक्खयपरियोसानानं निमित्तभावेन उत्तमगुणताय. तदा सक्को अनुरुद्धत्थेरो, सो अत्तनो पुरिमजातियं पच्चक्खसिद्धंव दानतो सीलं महन्तं विभावेन्तो ‘‘अहञ्ही’’तिआदिमाह. तत्थ अत्तना वसियमानं कामावचरदेवलोकं सन्धाय ‘‘पेत्तिविसयतो’’ति वुत्तं. तस्स हि कप्पसतसहस्सं विवट्टज्झासयस्स पूरितपारमिस्स देवलोको पेतलोको विय उपट्ठासि. तेनेवाह ‘‘अच्छरागणसङ्घुट्ठं, पिसाचगणसेवित’’न्ति (सं. नि. १.४६).

खत्तियेति खत्तियजातियं. विसुज्झतीति ब्रह्मलोकूपपत्तिं सन्धाय वदति कामसंकिलेसविसुज्झनतो. कायाति च ब्रह्मकायमाह.

इमस्स मम अदिट्ठपुब्बरूपं दिस्वा ‘‘अहुदेव भय’’न्ति चिन्तेत्वा आह ‘‘अविकम्पमानो’’ति. भायन्तो हि चित्तस्स अञ्ञथत्तेन कायस्स च छम्भितत्तेन विकम्पति नाम. तेनाह ‘‘अभायमानो’’ति. सुखं कथेतुं होतीति पुञ्ञफलं कथेतुं सुखं होति.

३१३. मनं आगम्म युत्तायेव होन्तीति मातलिस्स सक्कस्सेव चित्तं जानित्वा युत्ता विय होन्ति, रथे युत्तआजानीयकिच्चं करोन्ति देवपुत्ता. एवं तादिसे काले तथा पटिपज्जन्ति, यथा एरावणो देवपुत्तो हत्थिकिच्चं. नद्धितो पट्ठायाति रथपञ्जरपरियन्तेन अक्खस्स सम्बन्धट्ठानं नद्धी, ततो पट्ठाय. अक्खो बज्झति एत्थाति अक्खबद्धो, अक्खेन रथस्स बद्धट्ठानं. यथा देवलोकतो याव चन्दमण्डलस्स गमनवीथि, ताव अत्तनो आनुभावेन हेट्ठामुखमेव रथं पेसेसि, एवं चन्दमण्डलस्स गमनवीथितो याव रञ्ञो पासादो, ताव तथेव पेसेसि. द्वे मग्गे दस्सेत्वाति पतोदलट्ठिया आकासं विलिखन्तो विय अत्तनो आनुभावेन निरयगामी देवलोकगामी चाति द्वे मग्गे ¶ दस्सेत्वा. कतमेनातिआदि देसनामत्तं, यथा तेन रथेन गच्छन्तस्स निरयो देवलोको च पाकटा होन्ति, तथा करणं अधिप्पेतं.

वुत्तकारणमेव सन्धायाह महासत्तो ‘‘उभयेनेव मं मातलि नेही’’ति. दुग्गन्ति दुग्गमं. वेत्तरणिन्ति एवंनामकं निरयं. कुथितन्ति पक्कुथितं निपक्कतेलसदिसजालं. खारसंयुत्तन्ति खारोदकसदिसं.

रथं निवत्तेत्वाति निरयाभिमुखतो निवत्तेत्वा. बीरणीदेवधीतायाति ‘‘बीरणी’’ति एवंनामिकाय ¶ अच्छराय. सोणदिन्नदेवपुत्तस्साति ‘‘सोणदिन्नो’’ति एवंनामकस्स देवपुत्तस्स. गणदेवपुत्तानन्ति गणवसेन पुञ्ञं कत्वा गणवसेनेव निब्बत्तदेवपुत्तानं.

पत्तकालेति उपकट्ठाय वेलाय. अतिथिन्ति पच्चेकसम्बुद्धं. कस्सपस्स भगवतो सासने एकं खीणासवत्थेरन्तिपि वदन्ति. माताव पुत्तं सकिमाभिनन्दीति यथा पवासतो आगतं पुत्तं माता सकिं एकवारं आगतकाले अभिनन्दति, तथा निच्चकाले अभिनन्दि सक्कच्चं परिविसि. संयमा संविभागाति सीलसंयमा संविभागसीला. जातकेति निमिजातके.

चित्तकूटन्ति देवनगरस्स दक्खिणदिसाय द्वारकोट्ठकं. सक्को चित्तं सन्धारेतुं असक्कोन्तोति महासत्ते पवत्तं देवतानं सक्कारसम्मानं पटिच्च उप्पन्नं अत्तनो उसूयचित्तं बहि अनाविकत्वा अब्भन्तरेयेव च नं ठपेतुं असक्कोन्तो. अञ्ञेसं पुञ्ञेन वसाहीति सक्कस्स महासत्तं रोसेतुकामताय आराधनं निदस्सेति. पुराणसक्को दीघायुको, तं उपादाय जराजिण्णं विय कत्वा ‘‘जरसक्को’’ति वुत्तं.

३१५. सेसं सब्बन्ति पब्बज्जुपगमना सेसं अत्तनो वंसे पोराणराजूनं राजचारित्तं. पाकतिकन्ति पुन सभावत्तमेव गतो अहोसि, अपब्बजितभाववचनेनेवस्स ब्रह्मविहारभावनादीनं पब्बज्जागुणानं अभावो दीपितो होति.

३१६. वीरियं अकरोन्तो समुच्छिन्दति, न ताव समुच्छिन्नं, कल्याणमित्तसंसग्गादिपच्चयसमवाये सति सीलवतं कल्याणवत्तं पवत्तेतुं सक्कोति ¶ . दुस्सीलेन समुच्छिन्नं नाम होति तस्स तत्थ निरासभावेन पटिपत्तिया एव असम्भवतो. सत्त सेखा पवत्तेन्ति कल्याणवत्तस्स अपरिनिट्ठितकिच्चत्ता. खीणासवेन पवत्तितं नाम परिनिट्ठितकिच्चत्ता. सेसं सुविञ्ञेय्यमेव.

मघदेवसुत्तवण्णनाय लीनत्थप्पकासना समत्ता.

४. मधुरसुत्तवण्णना

३१७. मधुरायन्ति ¶ उत्तरमधुरायं. गुन्दावनेति काळसिप्पलिवने. अतिमुत्तकवनेति च वदन्ति. चतूसु वण्णेसु ब्राह्मणोव सेट्ठो वण्णो. पण्डरोति परिसुद्धो. काळकोति अपरिसुद्धो. जातिगोत्तादिपञ्ञापनट्ठानेसूति जातिगोत्तादिवसेन सुद्धचिन्तायं ब्राह्मणा एव सुद्धजातिका, न इतरेति अधिप्पायो. संसारतो वा सुद्धचिन्तायं ब्राह्मणाव सुज्झन्ति वेदविहितस्स सुद्धविधिनो अञ्ञेसं अविसयत्ताति अधिप्पायो. तं पनेतं तेसं विरुज्झति खत्तियवेस्सानम्पि मन्तज्झेनस्स अनुञ्ञातत्ता, मन्तज्झेनविधिना च संसारसुद्धियाभावतो. पुत्ता नाम अनोरसापि होन्ति, न तथा इमेति आह ‘‘ओरसा’’ति. उरे संवड्ढितपुत्तोपि ‘‘ओरस’’न्ति वुच्चति. इमे पन मुखतो निग्गतो हुत्वा उरे संवड्ढाति दस्सेतुं ‘‘ओरसा मुखतो जाता’’ति वुत्तं. ततो एव ब्रह्मतो जाताति ब्रह्मजा, ब्रह्मसम्भूतापि ‘‘ब्रह्मजा’’ति वुच्चन्ति, न तथा इमे. इमे पन पच्चक्खतो ब्रह्मुना निम्मिताति ब्रह्मनिम्मिता, ततो एव ब्रह्मतो लद्धब्बविज्जादिदायज्जदायादाति ब्रह्मदायादाति सब्बमेतं ब्राह्मणानं कत्थनापलापसदिसं विञ्ञूनं अप्पमाणं अविमद्दक्खमं वाचावत्थुमत्तं ब्रह्मकुत्तस्सेव अभावतो. यं पनेत्थ वत्तब्बं, तं विसुद्धिमग्गवण्णनायं वुत्तमेव. तेनाह ‘‘घोसोयेवा’’तिआदि. वोहारमत्तमेवेतन्ति एतं ‘‘ब्राह्मणोव सेट्ठो वण्णो’’तिआदि वचनमत्तमेव, न तस्स अत्थो तेहि अधिप्पेतप्पकारो अत्थि.

३१८. समिज्झेय्याति दिट्ठिदीपनवसेन अत्तनो अज्झासयो निप्फज्जेय्य. तेनाह ‘‘मनोरथो पूरेय्या’’ति. खत्तियोपीति परखत्तियोपि ¶ . अस्साति समिद्धधनादिं पत्तस्स. तेनाह – ‘‘इस्सरियसम्पत्तस्सा’’ति नेसन्ति एतेसं चतुन्नं वण्णानं एत्थ पुब्बुट्ठायिभावादिना इतरेहि उपचरितब्बताय न किञ्चि नानाकरणन्ति योजना.

३२२. अहं ¶ चीवरादीहि उपट्ठाको, तुम्हाकं इच्छितच्छितक्खणे वदेय्याथ येनत्थोति योजना. चोरादिउपद्दवनिसेधनेन रक्खागुत्ति, दानादिनिमित्तउपद्दवनिसेधनेन आवरणगुत्ति. पच्चुप्पन्नानत्थनिसेधनेन वा रक्खागुत्ति, आगामिअनत्थनिसेधनेन आवरणगुत्ति. एत्थ च खत्तियादीसु यो यो इस्सरो, तस्स इतरेन अनुवत्तेतब्बभावे, कुसलाकुसलकरणेन नेसं वसेन लद्धब्बअभिसम्पराये, पब्बजितेहि लद्धब्बसामीचिकिरियाय च अणुमत्तोपि विसेसो नत्थि, तस्मा सो विसेसाभावो पाळियं तत्थ तत्थ वारे ‘‘एवं सन्ते’’तिआदिना विभावितो. सेसं सुविञ्ञेय्यमेव.

मधुरसुत्तवण्णनाय लीनत्थप्पकासना समत्ता.

५. बोधिराजकुमारसुत्तवण्णना

३२४. ओलोकनकपदुमन्ति ¶ लीलाअरविन्दं. तस्माति कोकनदसण्ठानत्ता कोकनदोति सङ्खं लभि.

३२५. याव पच्छिम…पे… फलकं वुत्तं तस्स सब्बपच्छा सन्थतत्ता. उपरिमफलगतञ्हि सोपानमत्थकं. ओलोकनत्थंयेवाति न केवलं भगवतो आगमनञ्ञेव ओलोकनत्थं, अथ खो अत्तनो पत्थनाय सन्थरापिताय चेलपटिकाय अक्कमनस्सपि.

सकुणपोतकेति कादम्बटिट्टिभपुत्तके. अञ्ञोव भवेय्याति तस्मिं अत्तभावे मातुगामतो अञ्ञो इदानि भरियाभूतो मातुगामो भवेय्य. पुत्तं लभेय्याति अत्तनो कम्मवसेन पुत्तं, नो तस्स. उभोहीति इमेहि एव उभोहि. इमेहि कारणेहीति तस्स राजकुमारस्स बुद्धं पटिच्च मिच्छागहणं, तित्थियानं उज्झायनं, अनागते मनुस्सानं भिक्खूनं उद्दिस्स विप्पटिसारोति इमेहि तीहि कारणेहि. पञ्ञत्तन्ति सन्थतं चेलपटिकं. मङ्गलं इच्छन्तीति मङ्गलिका.

३२६. ततियं ¶ कारणन्ति इमिना भिक्खूसु विप्पटिसारानुप्पादनमाह. यं किञ्चि परिभुञ्जन-सुखं कामसुखल्लिकानुयोगोति अधिप्पायेन कामसुखल्लिकानुयोगसञ्ञी हुत्वा…पे… मञ्ञमानो एवमाह.

३२७. अथ नं भगवा ततो मिच्छाभिनिवेसतो विवेचेतुकामो ‘‘सो खो अह’’न्तिआदिना अत्तनो दुक्करचरियं दस्सेतुं आरभि. महासच्चके(म. नि. १.३६४ आदयो) वुत्तनयेनेव वेदितब्बं ‘‘सो खो अह’’न्तिआदिपाठस्स तत्थ आगतनियामेनेव आगतत्ता. पासरासिसुत्ते (म. नि. १.२७२ आदयो) वुत्तनयेनाति एत्थापि एसेव नयो.

३४३. अङ्कुसं गण्हन्ति एतेन तस्स गहणे छेको होतीति अङ्कुसगहणसिप्पं. मेघउतुन्ति मेघं पटिच्च उप्पन्नसीतउतुं. पब्बतउतुन्ति पब्बतं पटिच्च उण्हउतुं. उभयवसेन च तस्स ¶ तथा सीतुण्हउतुतो एनो आगतोति त-कारस्स द-कारं कत्वा उदेनोति नामं अकासि.

तापसो ओगाळ्हञाणवसेन रञ्ञो मतभावं ञत्वा. आदितो पट्ठायाति कोसम्बिनगरे परन्तपरञ्ञो अग्गमहेसिभावतो पट्ठाय. पुब्बेति सीलवन्तकाले. हत्थिगन्थन्ति हत्थीनं अत्तनो वसे वत्तापनसत्थं. तेनेवस्स तं सिक्खापेति, किच्चञ्च इज्झति.

३४४. पदहनभावोति भावनानुयोगो. पधाने वा नियुत्तो पधानियो, पधानियस्स भिक्खुनो, तस्सेव पधानियभावस्स अङ्गानि कारणानि पधानियङ्गानि. सद्धा एतस्स अत्थीति सद्धो. किञ्चापि पच्चेकबोधिसत्तानम्पि अभिनीहारतो पट्ठाय आगता आगमनसद्धा एव, महाबोधिसत्तानं पन सद्धा गरुतराति सा एव गहिता. अचलभावेन ओकप्पनं ‘‘सम्मासम्बुद्धो भगवा, स्वाख्यातो धम्मो, सुप्पटिपन्नो सङ्घो’’ति केनचि अकम्पियभावेन रतनत्तयगुणे ओगाहित्वा कप्पनं. पसादुप्पत्ति रतनत्तये पसीदनमेव. बोधिन्ति चतुमग्गञाणन्ति वुत्तं तंनिमित्तत्ता सब्बञ्ञुतञ्ञाणस्स, बोधीति वा सम्मासम्बोधि. सब्बञ्ञुतञ्ञाणपदट्ठानञ्हि मग्गञाणं, मग्गञाणपदट्ठानञ्च सब्बञ्ञुतञ्ञाणं ‘‘सम्मासम्बोधी’’ति वुच्चति. निच्छितसुबुद्धताय धम्मस्स सुधम्मता सङ्घस्स सुप्पटिपत्ति विनिच्छिता एव ¶ होतीति आह ‘‘देसनासीसमेव चेत’’न्तिआदि. तस्स पधानं वीरियं इज्झति रतनत्तयसद्धाय ‘‘इमाय पटिपदाय जरामरणतो मुच्चिस्सामी’’ति पधानानुयोगे अवंमुखसम्भवतो.

अप्पाबाधोतिआदि हेट्ठा वुत्तमेव. अगुणं पकासेता आयतिं संवरं आपज्जिता सम्मापटिपत्तिया विसोधनत्थं. उदयञ्च अत्थञ्च गन्तुन्ति ‘‘अविज्जासमुदया’’तिआदिना पञ्चन्नं उपादानक्खन्धानं उदयञ्च वयञ्च जानितुं. तेनाह ‘‘एतेना’’तिआदि. परिसुद्धाय उपक्किलेसविनिमुत्ताय. निब्बिज्झितुन्ति तदङ्गवसेन पजहितुं समुच्छेदप्पहानस्स पच्चयो भवितुं. यं दुक्खं खीयतीति किलेसेसु अप्पहीनेसु तेन तदुपनिस्सयकम्मं पटिच्च यं दुक्खं उप्पज्जेय्य, तं सन्धाय वुत्तं.

३४५. सेसदिवसेति सत्तदिवसतो पट्ठाय याव द्वे रत्तिन्दिवा.

३४६. कुच्छिसन्निस्सितो ¶ गब्भो निस्सयवोहारेन ‘‘कुच्छी’’ति वुच्चति, सो एतिस्सा अत्थीति कुच्छिमती. तेनाह ‘‘आपन्नसत्ता’’ति. आरक्खो पनस्स पच्चुपट्ठितो होतीति मातरा गहितसरणं गब्भवुट्ठितस्स तस्स सरणगमनं पवेदयितस्स कुसलं सरणं नाम, मातु कतरक्खो पुत्तस्सपि पच्चुपट्ठितोति. महल्लककालेति वचनत्थं जाननकाले. सारेन्तीति यथादिट्ठं यथाबलं रतनत्तयगुणपतिट्ठापनवसेन अस्स सारेन्ति. सल्लक्खेत्वाति वुत्तमत्थं उपधारेत्वा. सरणं गहितं नाम होति रतनत्तयस्स सरणभावसल्लक्खणपुब्बकतन्निन्नचित्तभावतोव. सेसं सुविञ्ञेय्यमेव.

बोधिराजकुमारसुत्तवण्णनाय लीनत्थप्पकासना समत्ता.

६. अङ्गुलिमालसुत्तवण्णना

३४७. अङ्गुलीनं ¶ मालं धारेतीति इमिना अन्वत्था तस्स समञ्ञाति दस्सेति. तत्राति तस्मिं आचरियवचनेन अङ्गुलिमालस्स धारणे. करीससहस्सखेत्ते एकसालिसीसं विय अपञ्ञायमानसककिच्चो होतीति अधिप्पायो. तक्कसीलं पेसयिंसु ‘‘तादिसस्स आचरियस्स सन्तिके ¶ सिप्पुग्गहसम्मापयोगेन दिट्ठधम्मिके सम्परायिके च अत्थे जानन्तो भारियं न करेय्या’’ति. बाहिरका अहेसुं अहिंसकस्स वत्तसम्पत्तिया आचरियस्स चित्तसभावतो निब्बत्तनतिभावेन. सिनेहेनेव वदन्तेति सिनेहेन विय वदन्ते.

गणनम्पि न उग्गण्हातीति गणनविधिम्पि न सल्लक्खेति. तत्थ कारणमाह ‘‘पकतिया’’तिआदिना. ठपितट्ठानेति रुक्खगच्छन्तरादिके ठपितट्ठाने सकुन्तसिङ्गालानं वसेन अङ्गुलियो विनस्सन्ति. भग्गवोति कोसलरञ्ञो पुरोहितं गोत्तेन वदति. चोरो अविस्सासनीयो साहसिकभावतो. पुराणसन्थता साखा अविस्सासनीया विच्छिकादीनं पवेसनयोग्यत्ता. राजा अविस्सासनीयो इस्सरियमदेन धनलोभेन च कदाचि जीविते सङ्काभावतो. इत्थी अविस्सासनीया लोलसीलचित्तभावतो. अनुद्धरणीयो भविस्सति संसारपङ्कतो.

३४८. सङ्करित्वाति ‘‘मयं एकज्झं सन्निपतित्वा चोरं मारेत्वा वा पलापेत्वा गमिस्सामा’’ति सङ्करं कत्वा. इद्धाभिसङ्खारन्ति अभिसङ्खरणं अधिट्ठानं. अभिसङ्खासीति अधिट्ठहि. संहरित्वाति संखिपित्वा. ओरभागेति चोरस्स ओरभागे.

३४९. दण्डोति पहरणहत्थच्छेदनादिको दण्डनसङ्खातो दण्डो. पवत्तयितब्बोति आनेतब्बो. अपनेत्वाति अत्तनो सन्तानतो समुच्छेदवसेन पहाय. पटिसङ्खायाति पटिसङ्खानेन. अविहिंसायाति करुणाय. सारणीयधम्मेसूति छसुपि सारणीयधम्मेसु, ठितो अट्ठितानं पापधम्मानं बोधिमूले एव समुच्छिन्नत्ता. यथा अतीते अपरिमितं कालं सन्धावितं, एवं इमाय पटिपत्तिया अनागतेपि सन्धाविस्सतीति दस्सेन्तो ‘‘इदानी’’तिआदिमाह.

इत्वेवाति इति एव, इति-सद्दो निदस्सनत्थो. तेनाह ‘‘एवं वत्वा येवा’’ति. अकिरीति आकिरि, पञ्चपि आवुधानि विकिरि. तेन वुत्तं ‘‘खिपि छड्डेसी’’ति.

३५०. एत्तोवाति ¶ अतो एव आगतमग्गेनेव सावत्थिं गता. अधिवासेस्सतीति ‘‘चोरं पटिसेधेतुं गमिस्सामी’’ति वुत्ते तुण्ही भविस्सति ¶ . दारुणकम्मेन उप्पन्ननामन्ति ‘‘अङ्गुलिमालो’’ति इमं नामं सन्धाय वदति.

३५१. हत्थी अरञ्ञहत्थी होन्ति मनुस्सानं तत्थ गन्तुं असक्कुणेय्यत्ता, एवं अस्सापि. कूटसहस्सानं भिज्जनकारणं होति थेरस्स आगमनभयेन घटे छड्डेत्वा पलायनेन. गब्भमूळ्हायाति ब्याकुलगब्भाय. पब्बज्जाबलेनाति वुत्तं, सत्थु देसनानुभावेनाति पन वत्तब्बं. सो हि तस्सापि कारणन्ति. अरिया नाम जाति पब्बज्जा अरियभावत्थाय जातीति कत्वा.

महापरित्तं नामेतन्ति महानुभावं परित्तं नामेतं. तथा हि नं थेरो सब्बभावेन अरियाय जातो सच्चाधिट्ठानेन अकासि. तेनाह ‘‘सच्चकिरियकतट्ठाने’’ति. गब्भमूळ्हन्ति मूळ्हगब्भं. गब्भो हि परिपक्को सम्पज्जमानो विजायनकाले कम्मजवातेहि सञ्चालेत्वा परिवत्तितो उद्धंपादो अधोसीसो हुत्वा योनिमुखाभिमुखो होति, एवं सो कस्सचि अलग्गो सोत्थिना बहि निक्खमति, विपज्जमानो पन विपरिवत्तनवसेन योनिमग्गं पिदहित्वा तिरियं निपज्जति, तथा यस्सा योनिमग्गो पिदहति, सा तत्थ कम्मजवातेहि अपरापरं परिवत्तमाना ब्याकुला मूळ्हगब्भाति वुच्चति, तं सन्धाय वुत्तं ‘‘गब्भमूळ्ह’’न्ति.

सच्चकिरिया नाम बुद्धासयं अत्तनो सीलं पच्चवेक्खित्वा कता, तस्मा सच्चकिरिया वेज्जकम्मं न होतीति दट्ठब्बं. थेरस्सपि चातिआदिना उपसङ्कमितब्बकारणं वदति. इमे द्वे हेतू पटिच्च भगवा थेरं सच्चकिरियं कारेसि. जातिन्ति मूलजातिं.

३५२. परियादाय आहच्च भिन्नेन सीसेन. सभागदिट्ठधम्मवेदनीयकम्मन्ति निरये निब्बत्तनसककम्मसभागभूतं दिट्ठधम्मवेदनीयकम्मं. सभागता च समानवत्थुकता समानारम्मणताएकवीथिपरियापन्नतादिवसेन सब्बथा सरिक्खता, सदिसम्पि च नाम तदेवाहरीयति यथा ‘‘तस्सेव कम्मस्स विपाको’’ति च ‘‘सा एव तित्तिरी तानेव ओसधानी’’ति च. इदानि तमेव सभागतं दस्सेतुं ‘‘कम्मं ही’’तिआदि आरद्धं. करियमानमेवाति पच्चयसमवायेन पटिपाटिया निब्बत्तियमानमेव. तयो कोट्ठासे पूरेति, दिट्ठधम्मवेदनीयअपरापरियायवेदनीयउपपज्जवेदनीयसङ्खाते तयो भागे पूरेति, तेसं तिण्णं भागानं वसेन पवत्तति.

दिट्ठधम्मो ¶ ¶ वुच्चति पच्चक्खभूतो पच्चुप्पन्नो अत्तभावो, तत्थ वेदितब्बफलं कम्मं दिट्ठधम्मवेदनीयं. पच्चुप्पन्नभवतो अनन्तरं वेदितब्बफलं कम्मं उपपज्जवेदनीयं. दिट्ठधम्मानन्तरभवतो अञ्ञस्मिं अत्तभावपरियाये अत्तभावपरिवत्ते वेदितब्बफलं कम्मं अपरापरियायवेदनीयं. पटिपक्खेहि अनभिभूतताय, पच्चयविसेसेन पटिलद्धविसेसताय च बलवभावप्पत्ता तादिसस्स पुब्बाभिसङ्खारस्स वसेन सातिसया हुत्वा पवत्ता पठमजवनचेतना तस्मिंयेव अत्तभावे फलदायिनी दिट्ठधम्मवेदनीया नाम. सा हि वुत्ताकारेन बलवति जवनसन्ताने गुणविसेसयुत्तेसु उपकारानुपकारवसप्पवत्तिया आसेवनालाभेन अप्पविपाकताय च इतरद्वयं विय पवत्तसन्तानुपरमापेक्खं ओकासलाभापेक्खञ्च कम्मं न होतीति इधेव पुप्फमत्तं विय पवत्तिविपाकमत्तं फलं देति.

तथा असक्कोन्तन्ति कम्मस्स फलदानं नाम उपधिपयोगादिपच्चयन्तरसमवायेनेव होतीति तदभावतो तस्मिंयेव अत्तभावे विपाकं दातुं असक्कोन्तं. अहोसिकम्मन्ति कम्मंयेव अहोसि, न तस्स विपाको अहोसि, अत्थि भविस्सति वाति एवं वत्तब्बं कम्मं. अत्थसाधिकाति दानादिपाणातिपातादिअत्थस्स निप्फादिका. का पन साति आह ‘‘सत्तमजवनचेतना’’ति. सा हि सन्निट्ठापकचेतना वुत्तनयेन पटिलद्धविसेसा पुरिमजवनचेतनाहि लद्धासेवना च समाना अनन्तरे अत्तभावे विपाकदायिनी उपपज्जवेदनीयकम्मं नाम. तेनाह ‘‘अनन्तरे अत्तभावे विपाकं देती’’ति. सति संसारप्पवत्तियाति इमिना असति संसारप्पवत्तिया अहोसिकम्मपक्खे तिट्ठति विपच्चनोकासस्स अभावतोति.

समुग्घाटितानि विपच्चनोकासस्स अनुप्पत्तिधम्मतापादनेन. दिट्ठधम्मवेदनीयं अत्थि विपाकारहाभावस्स अनिब्बत्तितत्ता विपच्चनोकासस्स अनुपच्छिन्नत्ता. कतूपचितञ्हि कम्मं सति विपच्चनोकासे याव न फलं देति, ताव अत्थेव नाम विपाकारहभावतो. ‘‘यस्स खो’’ति इदं अनियमाकारवचनं भगवता कम्मसरिक्खतावसेन साधारणतो वुत्तन्ति आह ‘‘यादिसस्स खो’’ति.

पमादकिलेसविमुत्तोति पमादहेतुकेहि सब्बेहि किलेसेहि विमुत्तो.

पापस्स ¶ पिधानं नाम अविपाकधम्मतापादनन्ति आह ‘‘अप्पटिसन्धिकं करीयती’’ति. बुद्धसासनेति ¶ सिक्खात्तयसङ्गहे बुद्धस्स भगवतो सासने. युत्तप्पयुत्तो विहरतीति अकत्तब्बस्स अकरणवसेन, कत्तब्बस्स च परिपूरणवसेन पवत्तति.

दिस्सन्ति कुज्झन्तीति दिसा, पटिपक्खाति आह ‘‘सपत्ता’’ति. तप्पसंसपकारन्ति मेत्तानिसंसकित्तनाकारं. कालेनाति आमेडितलोपेन निद्देसोति आह ‘‘खणे खणे’’ति. अनुकरोन्तूति येसं कल्याणमित्तानं सन्तिके सुणन्ति, यथासुतं धम्मं तेसं अनुकरोन्तु दिट्ठानुगतिकरणं आपज्जन्तु, अत्तनो वेरिपुग्गलानम्पि भगवतो सन्तिके धम्मस्सवनं सम्मापटिपत्तिञ्च पच्चासीसति.

तसन्ति गतिं पत्थयन्तीति तसा भवन्तरादीसु संसरणभावतो. तेनाह ‘‘तसा वुच्चन्ति सतण्हा’’ति.

नेतब्बट्ठानं उदकं नयन्तीति नेत्तिका. बन्धित्वाति दळ्हं बन्धित्वा. तेलकञ्जिकेनाति तेलमिस्सितेन कञ्जिकेन.

यादिसोव अनिट्ठे, तादिसोव इट्ठेति इट्ठानिट्ठे निब्बिकारेन तादी. येसं पन कामामिसादीनं वन्तत्ता रागादीनं चत्तत्ता कामोघादीनं तिण्णत्ता तादिभावो भवेय्य, तेसं भगवता सब्बसो वन्ता चत्ता तिण्णा, तस्मा भगवा वन्तावीति तादी, चत्तावीति तादी, तिण्णावीति तादी, येहि अनञ्ञसाधारणेहि सीलादिगुणेहि समन्नागतत्ता भगवा तादिभावेन उक्कंसपारमिप्पत्तो तंनिद्देसो, तेहि गुणेहि याथावतो निद्दिसितब्बतोपि तादी. यथा यन्तरज्जुया यन्तं नीयति, एवं याय तण्हाय भवो नीयति, सा ‘‘भवनेत्ति भवरज्जू’’ति वुत्ता. तेनाह ‘‘ताय ही’’तिआदि, कम्मानि कुसलादीनि विपच्चयन्ति अपच्चयन्ति एतायाति कम्मविपाको. अपच्चयभावो नाम अरियमग्गचेतनायाति आह ‘‘मग्गचेतनाया’’ति. याव न किलेसा पहीयन्ति, ताव इमे सत्ता सइणा एव असेरिविहारभावतोति आह ‘‘अणणो निक्किलेसो जातो’’ति.

थेय्यपरिभोगो (विसुद्धि. टी. १.९१) नाम सामिपरिभोगाभावतो. भगवतापि हि अत्तनो सासने सीलवतो पच्चया अनुञ्ञाता, न दुस्सीलस्स, दायकानं ¶ सीलवतोयेव परिच्चागो, न दुस्सीलस्स अत्तनो कारानं महप्फलभावस्स पच्चासीसनतो. इति सत्थारा अननुञ्ञातत्ता दायकेहि च अपरिच्चत्तत्ता ‘‘दुस्सीलस्स परिभोगो थेय्यपरिभोगो नामा’’ति वुत्तं ¶ . इणवसेन परिभोगो इणपरिभोगो. पटिग्गाहकतो दक्खिणाविसुद्धिया अभावतो इणं गहेत्वा परिभोगो वियाति अत्थो. यस्मा सेक्खा भगवतो ओरसपुत्ता, तस्मा ते पितुसन्तकानं पच्चयानं दायादा हुत्वा ते पच्चये परिभुञ्जन्तीति तेसं परिभोगो दायज्जपरिभोगो नाम. किं पन ते भगवतो पच्चये परिभुञ्जन्ति, उदाहु गिहीहि दिन्नन्ति? गिहीहि दिन्नापि ते भगवता अनुञ्ञातत्ता भगवतो सन्तका होन्ति अननुञ्ञातेसु सब्बेन सब्बं परिभोगाभावतो अनुञ्ञातेसुयेव परिभोगसम्भवतो. धम्मदायादसुत्तञ्चेत्थ (म. नि. १.२९ आदयो) साधकं.

अवीतरागानं तण्हापरवसताय पच्चयपरिभोगे सामिभावो नत्थि, तदभावेन वीतरागानं तत्थ सामिभावो यथारुचि परिभोगसम्भवतो. तथा हि ते पटिकूलम्पि अप्पटिकूलाकारेन, अप्पटिकूलम्पि पटिकूलाकारेन तदुभयं विवज्जेत्वा उपेक्खाकारेन च पच्चये परिभुञ्जन्ति, दायकानञ्च मनोरथं परिपूरेन्ति. सेसमेत्थ यं वत्तब्बं, तं विसुद्धिमग्गे, तंसंवण्णनासु च वुत्तनयेनेव वेदितब्बं. किलेसइणानं अभावं सन्धाय ‘‘अणणो’’ति वुत्तं, न पच्चवेक्खितपरिभोगमत्तं. तेनाह आयस्मा च बाकुलो – ‘‘सत्ताहमेव खो अहं, आवुसो, सरणो रट्ठपिण्डं भुञ्जि’’न्ति (म. नि. ३.२११).

वत्थुकामकिलेसकामेहि तण्हाय पवत्तिआकारं पटिच्च अत्थि रमणवोहारोति आह – ‘‘दुविधेसुपि कामेसु तण्हारतिसन्थव’’न्ति. मन्तितन्ति कथितं. उप्पन्नेहि सत्थुपटिञ्ञेहि. संविभत्ताति कुसलादिवसेन खन्धादीहि आकारेहि विभत्ता. सुन्दरं आगमनन्ति स्वागतं. ततो एव न कुच्छितं आगतं. सोळसविधकिच्चस्स परियोसितत्ता आह ‘‘तं सब्बं मया कत’’न्ति. मग्गपञ्ञायमेव ततियविज्जासमञ्ञाति आह – ‘‘तीहि विज्जाहि नवहि च लोकुत्तरधम्मेही’’ति.

अङ्गुलिमालसुत्तवण्णनाय लीनत्थप्पकासना समत्ता.

७. पियजातिकसुत्तवण्णना

३५३. पकतिनियामेनाति ¶ ¶ यथा सोकुप्पत्तितो पुब्बे इति कत्तब्बेसु असम्मोहवसेन चित्तं पक्खन्दति, तानि चस्स उपट्ठहन्ति, न एवं सोकस्स चित्तसङ्कोचसभावतो. तेन वुत्तं ‘‘पकतिनियामेन पन न पटिभन्ती’’ति. केचि पन ‘‘सामन्ता कतिपये न कुटुम्बं सन्धारेति. तेनाह ‘न सब्बेन सब्बं पटिभन्ती’ति’’ वदन्ति. एत्थाति दुतियपदे. अनेकत्थत्ता धातूनं ‘‘न पटिभाती’’ति पदस्स ‘‘न रुच्चती’’ति अत्थमाह. न पटिभातीति वा भुञ्जितुकामताचित्तं न उपट्ठितन्ति अत्थो. पतिट्ठितोकासन्ति इन्द्रियाविट्ठट्ठानं वदति. पियायितब्बतो पियो जाति उप्पत्तिट्ठानं एतेसन्ति पियजातिका. पियो पभुति एतेसन्ति पियप्पभुतिकाति वत्तब्बे, उ-कारस्स व-कारं, त-कारस्स च लोपं कत्वा ‘‘पियप्पभाविका’’ति वुत्तं. तेनाह ‘‘पियतो पभवन्ती’’ति.

३५५. पर-सद्देन समानत्थं अज्झत्तिकभावनिसेधनत्थं ‘‘पिरे’’ति पदन्ति आह ‘‘अम्हाकं परे’’ति. पिरेति वा ‘‘परतो’’ति इमिना समानत्थं निपातपदन्ति आह ‘‘चर पिरेति परतो गच्छा’’ति.

३५६. द्विधा छेत्वाति एत्थ यदि इत्थी तस्स पुरिसस्स पिया, कथं द्विधा छिन्दतीति आह ‘‘यदि ही’’तिआदि.

३५७. कथं कथेय्यन्ति यथा भगवा एतस्स ब्राह्मणस्स कथेसि, सो च मे कथेसि, तथा चाहं कथेय्यं. मरणवसेन विपरिणामो अत्तभावस्स परिवत्तत्ता. पलायित्वा गमनवसेन अञ्ञथाभावो मित्तसन्थवस्स समागमस्स च अञ्ञथाभूतत्ता.

छड्डितभावेनाति परिवत्तितभावेन. हत्थगमनवसेन अञ्ञथाभावो पुब्बे सवसे वत्तितानं इदानि वसे अवत्तनभावेन.

आचमेहीति ¶ आचमनं मुखविक्खालनं कारेहि. यस्मा मुखं विक्खालेन्ता हि हत्थपादे धोवित्वा विक्खालेन्ति, तस्मा ‘‘आचमित्वा’’ति वत्वा पच्छापि तस्स अत्थं दस्सेन्तो ‘‘मुखं विक्खालेत्वा’’ति आह. सेसं सुविञ्ञेय्यमेव.

पियजातिकसुत्तवण्णनाय लीनत्थप्पकासना समत्ता.

८. बाहितिकसुत्तवण्णना

३५९. सावज्जताय ¶ ¶ उपारम्भं अरहतीति ओपारम्भो. तेनाह ‘‘दोसं आरोपनारहो’’ति. बाला उपारम्भवत्थुमञ्ञं अमूलकम्पि नं आरोपेन्ता उग्घोसेन्ति, तस्मा ते अनामसित्वा ‘‘विञ्ञूही’’ति इदं पदं गहेत्वा पञ्हेन ञातुं इच्छितेन अत्थेन उपारम्भादीनं उपरि उत्तरं परिपूरेतुं नासक्खिम्हा. तं कारणन्ति तं उप्पत्तिकारणं. यदि हि मया ‘‘विञ्ञूही’’ति पदं पक्खिपित्वा वुत्तं भवेय्य, पञ्हा मे परिपुण्णा भवेय्य, न पन वुत्ता. इदानि पन तं कारणं उत्तरं आयस्मता आनन्देन ‘‘विञ्ञूही’’ति एवं वदन्तेन परिपूरितं.

३६०. कोसल्लपटिपक्खतो अकोसल्लं वुच्चति अविज्जा, तंसमुट्ठानतो अकोसल्लसम्भूतो. अवज्जं वुच्चति गरहितब्बं, सह अवज्जेहीति सावज्जो, गारय्हो. रागादिदोसेहि सदोसो. तेहि एव सब्याबज्झो, ततो एव सम्पति आयतिञ्च सदुक्खो. सब्याबज्झादिको निस्सन्दविपाको.

तथा अत्थो वुत्तो भवेय्याति पुच्छासभागेनपि अत्थो वुत्तो भवेय्य, पुच्छन्तस्स पन न ताव चित्ताराधनं. तेनाह – ‘‘एवं ब्याकरणं पन न भारिय’’न्ति, गरुकरणं न होति विसारज्जं न सियाति अधिप्पायो. तेनाह – ‘‘अप्पहीनअकुसलोपि हि पहानं वण्णेय्या’’ति. एवरूपो पन यथाकारी तथावादी न होति, न एवं भगवाति आह ‘‘भगवा’’तिआदि. एवं ब्याकासीति ‘‘सब्बाकुसलधम्मपहीनो खो, महाराज, तथागतो’’ति एवं ब्याकासि. सुक्कपक्खेपि एसेव नयोति इमिना ‘‘सब्बेसंयेव कुसलानं धम्मानं उपसम्पदं वण्णेती’’ति वुत्ते यथा पुच्छा, तथा अत्थो वुत्तो भवेय्य, एवं ब्याकरणं पन न भारियं, असम्पादितकुसलधम्मोपि उपसम्पदं वण्णेय्य. भगवा पन सम्मदेव सम्पादितकुसलत्ता यथाकारी तथावादीति दस्सेतुं ‘‘एवं ब्याकासी’’ति इममत्थं दस्सेति. सेसं सुविञ्ञेय्यमेव.

बाहितिकसुत्तवण्णनाय लीनत्थप्पकासना समत्ता.

९. धम्मचेतियसुत्तवण्णना

३६४. मेदवण्णा ¶ ¶ उळुपवण्णा च तत्थ तत्थ पासाणा उस्सन्ना अहेसुन्ति मेदाळुपन्ति गामस्स समञ्ञा जाता. उळुपवण्णाति चन्दसमानवण्णताय मेदपासाणा वुत्ताति केचि. अट्ठकथायं पन ‘‘मेदवण्णा पासाणा किरेत्थ उस्सन्ना अहेसु’’न्ति इदं वुत्तं. अस्साति सेनापतिस्स. कथासमुट्ठापनत्थन्ति मल्लिकाय सोकविनोदनधम्मकथासमुट्ठापनत्थं.

रञ्ञाति पसेनदीकोसलरञ्ञा. महच्चाति महतिया. पदविपल्लासेन चेतं वुत्तं. पसादमरहन्तीति पासादिकानि. तेनाह ‘‘सह रञ्जनकानी’’ति. यानि पन पासादिकानि, तानि पस्सितुं युत्तानि. पासादिकानीति वा सद्दहनसहितानि. तेनाह ‘‘पसादजनकानी’’ति. ‘‘अप्पाबाध’’न्ति आदीसु विय अप्पसद्दो अभावत्थोति आह ‘‘निस्सद्दानी’’ति. अनियमत्थवाची य-सद्दो अनियमाकारवाचकोपि होतीति ‘‘यत्था’’ति पदस्स ‘‘यादिसेसू’’तिआदिमाह. तथा हि अङ्गुलिमालसुत्ते (म. नि. अट्ठ. २.३४७ आदयो) ‘‘यस्स खो’’ति पदस्स ‘‘यादिसस्स खो’’ति अत्थो वुत्तो.

३६६. पटिच्छदन्ति पटिच्छादकं. राजककुधभण्डानीति राजभण्डभूतानि. रहायतीति रहो करोति, मं अज्झेसतीति अत्थो.

३६७. यथासभावतो ञेय्यं धारेति अवधारेतीति धम्मो, ञाणन्ति आह ‘‘पच्चक्खञाणसङ्खातस्स धम्मस्सा’’ति. अनुनयोति अनुगच्छनको. दिट्ठेन हि अदिट्ठस्स अनुमानं. तेनाह ‘‘अनुमानं अनुबुद्धी’’ति. आपाणकोटिकन्ति याव पाणकोटि, ताव जीवितपरियोसानं. एतन्ति धम्मन्वयसङ्खातं अनुमानं. एवन्ति ‘‘इध पनाह’’न्ति वुत्तप्पकारेन.

३६९. चक्खुं अबन्धन्ते वियाति अपासादिकताय पस्सन्तानं चक्खुं अत्तनि अबन्धन्ते विय. कुलसन्तानानुबन्धो रोगो कुलरोगो. उळारन्ति सानुभावं. यो हि आनुभावसम्पन्नो, तं ‘‘महेसक्ख’’न्ति वदन्ति. अरहत्तं गण्हन्तोति उक्कट्ठनिद्देसोयं, हेट्ठिमफलानि गण्हन्तोपि.

३७३. जीविका ¶ ¶ जीवितवुत्ति.

३७४. धम्मं चेतेति संवेदेति एतेहीति धम्मचेतियानि, धम्मस्स पूजावचनानि. ननु चेतानि बुद्धसङ्घगुणदीपनानिपि सन्ति? कथं ‘‘धम्मचेतियानीति धम्मस्स चित्तीकारवचनानी’’ति वुत्तन्ति आह ‘‘तीसु ही’’तिआदि. तत्थ यस्मा बुद्धरतनमूलकानि सेसरतनानि तस्स वसेन लद्धब्बतो. कोसलरञ्ञा चेत्थ बुद्धगारवेन धम्मसङ्घगारवं पवेदितं, तस्मा ‘‘भगवति चित्तीकारे कते धम्मोपि कतोव होती’’ति वुत्तं. यस्मा च रतनत्तयपसादपुब्बिका सासने सम्मापटिपत्ति, तस्मा वुत्तं – ‘‘आदिब्रह्मचरियकानीति मग्गब्रह्मचरियस्स आदिभूतानी’’ति. सेसं सुविञ्ञेय्यमेव.

धम्मचेतियसुत्तवण्णनाय लीनत्थप्पकासना समत्ता.

१०. कण्णकत्थलसुत्तवण्णना

३७५. अनन्तरसुत्ते ¶ वुत्तकरणीयेनेवाति ‘‘पासादे वा नाटकेसु वा चित्तस्सादं अलभमानो तत्थ तत्थ विचरितुं आरद्धो’’ति वुत्तकरणीयेन. अप्पदुट्ठपदोसीनञ्हि एवं होतीति.

३७६. पुच्छितोति ‘‘अञ्ञं दूतं नालत्थु’’न्ति पुच्छितो. सोति राजा. तासं वन्दना सचे उत्तरकालं, अत्तनो आगमनकारणं कथेस्सति.

३७८. एकावज्जनेनाति एकवीथिजवनेन. तेन एकचित्तं ताव तिट्ठतु, एकचित्तवीथियापि सब्बं जानितुं न सक्काति दस्सेति. ‘‘इदं नाम अतीतं जानिस्सामी’’ति अनियमेत्वा आवज्जतो यं किञ्चि अतीतं जानाति, नियमिते पन नियमितमेवाति आह – ‘‘एकेन हि…पे… एकदेसमेव जानाती’’ति. तेन चित्तेनाति ‘‘अतीतं सब्बं जानिस्सामी’’ति एवं पवत्तचित्तेन. इतरेसूति अनागतपच्चुप्पन्नेसु. कारणजातिकन्ति युत्तिसभावं, युत्तिया युत्तन्ति अत्थो. सम्परायगुणन्ति सम्पराये कतकम्मस्स विसेसं.

३७९. लोकुत्तरमिस्सकानि कथितानि बोधिराजकुमारसुत्ते विय लोकिया चेव लोकुत्तरा च. यथालाभवसेन चेत्थ पधानियङ्गानं ¶ लोकुत्तरग्गहणं वेदितब्बं. पच्चेकं एव नेसञ्च पधानियङ्गता दट्ठब्बा यथा ‘‘अट्ठविमोक्खा सन्दिस्सन्ति लोकुत्तरमिस्सका’’ति. लोकुत्तरानेवाति चेत्थ यं वत्तब्बं, तं परतो आवि भविस्सति. पधाननानत्तन्ति पदहननानत्तं, भावनानुयोगविसेसन्ति अत्थो. सङ्खारे परिमद्दित्वा पटिपक्खधम्मे एकदेसतो पजहित्वा ठितस्स भावनानुयोगो सब्बेन सब्बं अपरिमद्दितसङ्खारस्स अप्पहीनपटिपक्खस्स भावनानुयोगतो सुखुमो विसदोव होति, सच्चाभिसमयेन सन्तानस्स आहितविसेसत्ताति आह – ‘‘अञ्ञादिसमेव हि पुथुज्जनस्स पधानं, अञ्ञादिसं सोतापन्नस्सा’’तिआदि. अयञ्च विसेसो न केवलं अनरियअरियपुग्गलतो एव, अथ खो अरियेसुपि सेक्खादिविसेसतोपि लब्भति अभिसङ्खारविसेसतो अभिनीहारतो च इज्झनतोति दस्सेन्तो ‘‘अञ्ञादिसं सकदागामिनो’’तिआदिमाह. न पापुणातीति यस्मा पुथुज्जनो सब्बथाव पधानं पदहन्तो सोतापत्तिमग्गं ¶ अधिगच्छति, सोतापन्नो च सकदागामिमग्गन्ति हेट्ठिमं उपरिमतो ओळारिकं, उपरिमञ्च इतरतो सुखुमं तेन पहातुं असक्कुणेय्यस्स पजहनतो, इति अधिगन्तब्बविसेसेन च अधिगमपटिपदाय सण्हसुखुमता तिक्खविसदता च विञ्ञायतीति आह – ‘‘पुथुज्जनस्स पधानं सोतापन्नस्स पधानं न पापुणाती’’तिआदि.

अकूटकरणन्ति अवञ्चनकिरियं. अनवच्छिन्दनन्ति अतियानं. अविञ्छनं न आकड्ढनं, नियुत्ततं विनिवेठेत्वा समन्ता विपरिवत्तित्वा समधाराय छड्डनं वा. तस्स कारणं तंकारणं, तं कारणन्ति वा तं किरियं तं अधिकारं. दन्तेहि गन्तब्बभूमिन्ति दन्तेहि पत्तब्बट्ठानं, पत्तब्बवत्थुं वा. चत्तारोपि अस्सद्धा नाम उपरिमउपरिमसद्धाय अभावतो. येन हि यं अप्पत्तं, तस्स तं नत्थि. अरियसावकस्स…पे… नत्थि पठममग्गेनेव मायासाठेय्यानं पहातब्बत्ता. तेनेवाति सम्मदेव विरुद्धपक्खानं सद्धादीनं इधाधिप्पेतत्ता. यदि एवं कथं मिस्सककथाति आह ‘‘अस्सखळुङ्कसुत्तन्ते पना’’तिआदि. चत्तारोव होन्ति पुथुज्जनादिवसेन.

ओपम्मसंसन्दने अदन्तहत्थिआदयो वियातिआदिना कण्हपक्खे, यथा पन दन्तहत्थिआदयोतिआदिना सुक्कपक्खे च साधारणतो एकज्झं ¶ कत्वा वुत्तं, असाधारणतो भिन्दित्वा दस्सेतुं ‘‘इदं वुत्तं होती’’तिआदि वुत्तं.

३८०. सम्मप्पधाना निब्बिसिट्ठवीरिया. तेनाह – ‘‘न किञ्चि नानाकरणं वदामि, यदिदं विमुत्तिया विमुत्ति’’न्ति. न हि सुक्खविपस्सकतेविज्जछळभिञ्ञानं विमुत्तिया नानाकरणं अत्थि. तेन वुत्तं ‘‘यं एकस्सा’’तिआदि. किं त्वं न जानासीति सम्बन्धो. आगच्छन्तीति उप्पज्जनवसेन आगच्छन्ति. नागच्छन्तीति एत्थापि एसेव नयो. इदं पुच्छन्तोति इदं पुच्छामीति दस्सेन्तो. अप्पहीनचेतसिकदुक्खा अनधिगतअनागामिता. तेनाह ‘‘उपपत्तिवसेन आगन्तारो’’ति. समुच्छिन्नदुक्खाति समुग्घाटितचेतसिकदुक्खा.

३८१. तम्हा ठानाति ततो यथाधिगतइस्सरियट्ठानतो. पुन तम्हा ठानाति ततो दुग्गता. सम्पन्नकामगुणन्ति उळारकामगुणसमन्नागतं.

तत्थाति कामदेवलोके. ठानभावतोति अरहत्तञ्चे अधिगतं, तावदेव परिनिब्बानतो. उपरिदेवे ¶ चाति उपरूपरि भूमिवासे देवे च, चक्खुविञ्ञाणदस्सनेनपि दस्सनाय नप्पहोन्तीति योजना.

३८२. वुत्तनयेनेवाति देवपुच्छाय वुत्तेनेव नयेन. सा किर कथाति ‘‘नत्थि सो समणो वा ब्राह्मणो वा, यो सकिदेव सब्बं नेय्य’’न्ति कथा. तेति विटटूभसञ्जया. इमस्मिंयेव ठानेति इमस्मिं मिगदायेयेव. सेसं सुविञ्ञेय्यमेव.

कण्णकत्थलसुत्तवण्णनाय लीनत्थप्पकासना समत्ता.

निट्ठिता च राजवग्गवण्णना.

५. ब्राह्मणवग्गो

१. ब्रह्मायुसुत्तवण्णना

३८३. ‘‘महासत्तो ¶ ¶ महिद्धिको महानुभावो’’तिआदीसु (महाव. ३८) उळारता विसयो, ‘‘महाजनकायो सन्निपती’’तिआदीसु सम्बहुलभावविसयो, इध पन तदुभयम्पिस्स अत्थोति ‘‘महताति गुणमहत्तेनपि महता’’तिआदि वुत्तं. अप्पिच्छतादीति आदि-सद्देन सन्तुट्ठिसल्लेखपविवेकअसंसग्गवीरियारम्भादीनं सङ्गहो. दिट्ठिसीलसामञ्ञसङ्घातसङ्खातेनाति एत्थ ‘‘नियतो सम्बोधिपरायणो’’ (सं. नि. २.४१; ३.९९८, १००४) – ‘‘अट्ठानमेतं, भिक्खवे, अनवकासो, यं दिट्ठिसम्पन्नो पुग्गलो सञ्चिच्च पाणं जीविता वोरोपेय्याति नेतं ठानं विज्जती’’तिआदिवचनतो दिट्ठिसीलानं नियतसभावत्ता सोतापन्नापि अञ्ञमञ्ञं दिट्ठिसीलसामञ्ञेन संहता, पगेव सकदागामिआदयो. ‘‘तथारूपाय दिट्ठिया दिट्ठिसामञ्ञगतो विहरति (दी. नि. ३.३२४, ३५६; म. नि. १.४९२; ३.५४; अ. नि. ६.११; परि. २७४) तथारूपेहि सीलेहि सीलसामञ्ञगतो विहरती’’ति (दी. नि. ३.३२४; म. नि. १.४९२; ३.५४; अ. नि. ६.१२; परि. २७४) वचनतो पुथुज्जनानम्पि दिट्ठिसीलसामञ्ञेन संहतभावो लब्भतियेव.

ओट्ठपहतकरणवसेन अत्थविभागवसेन. सनिघण्डुकेटुभानन्ति एत्थ निघण्डूति वचनीयवाचकभावेन अत्थं सद्दञ्च खण्डति विभज्ज दस्सेतीति निखण्डु. सो एव इध ख-कारस्स घ-कारं कत्वा ‘‘निघण्डू’’ति वुत्तो. किटति गमेति किरियादिविभागं, तं वा अनवसेसपरियादानतो गमेन्तो पूरेतीति केटुभं. वेवचनप्पकासकन्ति परियायसद्ददीपकं, एकेकस्स अत्थस्स अनेकपरियायवचनविभावकन्ति अत्थो. निदस्सनमत्तञ्चेतं अनेकेसम्पि अत्थानं एकसद्दवचनीयताविभावनवसेनपि तस्स गन्थस्स पवत्तत्ता. वचीभेदादिलक्खणा किरिया कप्पीयति एतेनाति किरियाकप्पो, सो पन वण्णपदसम्बन्धपदत्थविभागतो बहुविकप्पोति आह ‘‘किरियाकप्पविकप्पो’’ति. इदञ्च मूलकिरियाकप्पगन्थं सन्धाय वुत्तं. सो हि ¶ सतसहस्सपरिमाणो नलचरियादिपकरणं. ठानकरणादिविभागतो ¶ निब्बचनविभागतो च अक्खरा पभेदीयन्ति एतेहीति अक्खरप्पभेदा, सिक्खानिरुत्तियो. एतेसन्ति वेदानं. ते एव वेदे पदसो कायतीति पदको. तं तं सद्दं तदत्थञ्च ब्याकरोति ब्याचिक्खति एतेनाति ब्याकरणं, सद्दसत्थं. आयतिं हितं तेन लोको न यतति न ईहतीति लोकायतं. तञ्हि गन्थं निस्साय सत्ता पुञ्ञकिरियाय चित्तम्पि न उप्पादेन्ति. वयतीति वयो, न वयो अवयो, न अवयो अनवयो, आदिमज्झपरियोसानेसु कत्थचि अपरिकिलन्तो अवित्थायन्तो ते गन्थे सन्धारेति पूरेतीति अत्थो. द्वे पटिसेधा पकतिं गमेन्तीति दस्सेन्तो ‘‘अवयो न होती’’ति वत्वा तत्थ अवयं दस्सेतुं ‘‘अवयो…पे… न सक्कोती’’ति वुत्तं.

३८४. गरूति भारियं अत्तानं ततो मोचेत्वा गमनं दुक्करं होति. अनत्थोपि उप्पज्जति निन्दाब्यारोसउपारम्भादि. अब्भुग्गतोति एत्थ अभिसद्दयोगेन इत्थम्भूताख्यानत्थे उपयोगवचनं.

लक्खणानीति लक्खणदीपनानि मन्तपदानि. अन्तरधायन्तीति न केवलं लक्खणमन्तानियेव, अञ्ञानिपि ब्राह्मणानं ञाणबलाभावेन अनुक्कमेन अन्तरधायन्ति. तथा हि वदन्ति ‘‘एकसतं अद्धरियं दिपञ्ञासमत्ततो सामा’’तिआदि. पणिधिमहतो समादानमहतोतिआदिना पच्चेकं मह-सद्दो योजेतब्बो. पणिधिमहन्ततादि चस्स बुद्धवंसचरियापिटकवण्णनादिवसेनेव वेदितब्बो. निट्ठाति निप्फत्तियो. जातिसामञ्ञतोति लक्खणजातिया लक्खणभावेन समानभावतो. यथा हि बुद्धानं लक्खणानि सुविसुद्धानि सुपरिब्यत्तानि परिपुण्णानि च होन्ति, न एवं चक्कवत्तीनं. तेनाह ‘‘न तेहेव बुद्धो होती’’ति.

अभिरूपता दीघायुकता, अप्पातङ्कता ब्राह्मणादीनं पियमनापताति चतूहि अच्छरियधम्मेहि. दानं पियवचनं अत्थचरिया समानत्तताति इमेहि चतूहि सङ्गहवत्थूहि. रञ्जनतोति पीतिजननतो. चक्कं चक्करतनं वत्तेति पवत्तेतीति चक्कवत्ती, सम्पत्तिचक्केहि सयं वत्तेति, तेहि च परं सत्तनिकायं वत्तेति पवत्तेतीति चक्कवत्ती, परहितावहो इरियापथचक्कानं वत्तो वत्तनं एतस्स अत्थीति चक्कवत्ती, अप्पटिहतं वा ¶ आणासङ्खातं चक्कं वत्तेतीति चक्कवती, अप्पटिहतं वा आणासङ्खातं चक्कं वत्तेतीति चक्कवत्ती, खत्तियमण्डलादिसञ्ञितं चक्कं समूहं अत्तनो वसे वत्तेतीति चक्कवत्ती. धम्मं चरतीति धम्मिको. धम्मतो अनपेतत्ता धम्मो रञ्जनत्थेन राजाति धम्मराजा. कोपादीति आदि-सद्देन कामलोभमानमदादिके ¶ सङ्गण्हाति. विजितावीति विजितवा. केनचि अकम्पियट्ठेन जनपदत्थावरियप्पत्तो. दळ्हभत्तिभावतो वा जनपदो थावरियं पत्तो एत्थाति जनपदत्थावरियप्पत्तो. चित्तीकतभावादिनापि (खु. पा. अट्ठ. ६.३; दी. नि. अट्ठ. २.३३; सं. नि. अट्ठ. ३.५.२२३; सु. नि. अट्ठ. १.२२६; महानि. अट्ठ. ५०) चक्कस्स रतनट्ठो वेदितब्बो. एस नयो सेसेसुपि. रतिनिमित्तताय वा चित्तीकतादिभावस्स रतिजननट्ठेन एकसङ्गहताय विसुं अग्गहणं.

इमेहि पन रतनेहि राजा चक्कवत्ती यं यमत्थं पच्चनुभोति, तं तं दस्सेतुं ‘‘इमेसु पना’’तिआदि वुत्तं. अजितं जिनाति महेसक्खतासंवत्तनियकम्मनिस्सन्दभावतो. विजिते यथासुखं अनुविचरति हत्थिरतनं अस्सरतनञ्च अभिरुहित्वा तेसं आनुभावेन अन्तोपातरासेयेव सकलं पथविं अनुसंयायित्वा राजधानियं पच्चागमनतो. परिणायकरतनेन विजितमनुरक्खति तेन तत्थ तत्थ कत्तब्बकिच्चस्स संविधानतो. सेसेहीति मणिरतनइत्थिरतनगहपतिरतनेहि. तत्थ मणिरतनेन योजनप्पमाणे देसे अन्धकारं विधमित्वा आलोकदस्सनादिना सुखमनुभवति, इत्थिरतनेन अतिक्कन्तमानुसरूपसम्पत्तिदस्सनादिवसेन, गहपतिरतनेन इच्छितिच्छितमणिकनकरजतादिधनप्पटिलाभवसेन. उस्साहसत्तियोगो येन केनचि अप्पटिहताणाचक्कभावसिद्धितो. हत्थिअस्सरतनादीनं महानुभावत्ता कोससम्पत्तियापि पभावसम्पत्तिसिद्धितो ‘‘हत्थि…पे… योगो’’ति वुत्तं. कोसो हि नाम सति उस्साहसम्पत्तियं (उग्गतेजस्स सुकुमारपरक्कमस्स पसन्नमुखस्स सम्मुखे पापुणाति). पच्छिमेनाति परिणायकरतनेन. तञ्हि सब्बराजकिच्चेसु कुसलं अविरज्झनपयोगं. तेनाह ‘‘मन्तसत्तियोगो’’ति. तिविधसत्तियोगफलं परिपुण्णं होतीति सम्बन्धो. सेसेहीति सेसेहि पञ्चहि रतनेहि. अदोसकुसलमूलजनितकम्मानुभावेनाति अदोससङ्खातेन कुसलमूलेन सहजातादिपच्चयवसेन उप्पादितकम्मस्स ¶ आनुभावेन सम्पज्जन्ति सोम्मतररतनजातिकत्ता. मज्झिमानि मणिइत्थिगहपतिरतनानि. अलोभ…पे… कम्मानुभावेन सम्पज्जन्ति उळारधनस्स उळारधनपटिलाभकारणस्स च परिच्चागसम्पदाहेतुकत्ता. पच्छिमन्ति परिणायकरतनं. तञ्हि अमोह…पे… कम्मानुभावेन सम्पज्जति महापञ्ञेनेव चक्कवत्तिराजकिच्चस्स परिणेतब्बत्ता.

सरणतो पटिपक्खविधमनतो सूरा. तेनाह ‘‘अभीरुकजातिका’’ति. असुरे विजिनित्वा ठितत्ता वीरो, सक्को देवानमिन्दो, तस्स अङ्गं देवपुत्तो सेनङ्गभावतोति वुत्तं ‘‘वीरङ्गरूपाति देवपुत्तसदिसकाया’’ति. सभावोति सभावभूतो अत्थो. वीरकारणन्ति वीरभावकारणं. वीरियमयसरीरा वियाति सविग्गहवीरियसदिसा सविग्गहञ्चे वीरियं सिया, तंसदिसाति अत्थो. ¶ ननु रञ्ञो चक्कवत्तिस्स पटिसेना नाम नत्थि, यमस्स पुत्ता पमद्देय्युं, अथ कस्मा ‘‘परसेनपमद्दना’’ति वुत्तन्ति चोदनं सन्धायाह ‘‘सचे’’तिआदि. तेन परसेना होतु वा मा वा, ते पन एवं महानुभावाति दस्सेति. धम्मेनाति कतूपचितेन अत्तनो पुञ्ञधम्मेन. तेन हि सञ्चोदिता पथवियं सब्बराजानो पच्चुग्गन्त्वा ‘‘स्वागतं ते महाराजा’’तिआदिं वत्वा अत्तनो रज्जं रञ्ञो चक्कवत्तिस्स निय्यादेन्ति. तेन वुत्तं ‘‘सो इमं…पे… अज्झावसती’’ति. अट्ठकथायं पन तस्स यथावुत्तधम्मस्स चिरतरं विपच्चितुं पच्चयभूतं चक्कवत्तिवत्तसमुदागतं पयोगसम्पत्तिसङ्खातं धम्मं दस्सेतुं ‘‘पाणो न हन्तब्बोतिआदिना पञ्चसीलधम्मेना’’ति वुत्तं. एवञ्हि ‘‘अदण्डेन असत्थेना’’ति इदं वचनं सुट्ठुतरं समत्थितं होति, यस्मा रागादयो पापधम्मा उप्पज्जमाना सत्तसन्तानं छादेत्वा परियोनन्धित्वा तिट्ठन्ति, कुसलपवत्तिं निवारेन्ति, तस्मा ते ‘‘छदना, छदा’’ति च वुत्ता.

विवट्टेत्वा परिवत्तेत्वा. पूजारहता वुत्ता ‘‘अरहतीति अरह’’न्ति. तस्साति पूजारहताय. यस्मा सम्मासम्बुद्धो, तस्मा अरहन्ति. बुद्धत्तहेतुभूता विवट्टच्छदता वुत्ता सवासनसब्बकिलेसप्पहानपुब्बकत्ता बुद्धभावसिद्धिया. अरहं वट्टाभावेनाति फलेन हेतुअनुमानदस्सनं. सम्मासम्बुद्धो छदनाभावेनाति हेतुना फलानुमानदस्सनं. हेतुद्वयं वुत्तं ‘‘विवट्टो विच्छदो चा’’ति. दुतियवेसारज्जेनाति ‘‘खीणासवस्स ते पटिजानतो’’तिआदिना (म. नि. १.१५०) आगतेन वेसारज्जेन. पुरिमसिद्धीति ¶ पुरिमस्स पदस्स अत्थसिद्धि. पठमेनाति ‘‘सम्मासम्बुद्धस्स ते पटिजानतो’’तिआदिना (म. नि. १.१५०) आगतेन वेसारज्जेन. दुतियसिद्धीति बुद्धत्तसिद्धि. ततियचतुत्थेहीति ‘‘ये खो पन ते अन्तरायिका धम्मा’’तिआदिना (म. नि. १.१५०), ‘‘यस्स खो पन ते अत्थाया’’तिआदिना (म. नि. १.१५०) च आगतेहि ततियचतुत्थेहि वेसारज्जेहि. ततियसिद्धीति विवट्टच्छदनता सिद्धि. याथावतो अन्तरायिकनिय्यानिकधम्मापदेसेन हि सत्थु विवट्टच्छदभावो लोके पाकटो अहोसि. पुरिमं धम्मचक्खुन्ति पुरिमपदं भगवतो धम्मचक्खुं साधेति किलेसारीनं संसारचक्कस्स च अरानं हतभावदीपनतो. दुतियं पदं बुद्धचक्खुं साधेति सम्मासम्बुद्धस्सेव तं सम्भवतो. ततियं पदं समन्तचक्खुं साधेति सवासनसब्बकिलेसप्पहानदीपनतो. ‘‘सम्मासम्बुद्धो’’ति हि वत्वा ‘‘विवट्टच्छदो’’ति वचनं बुद्धभावावहमेव सब्बकिलेसप्पहानं विभावेतीति. सूरभावन्ति लक्खणविभावनेन विसदञाणतं.

३८५. गवेसीति (दी. नि. टी. १.२८७) ञाणेन परियेसनं अकासि. समानयीति ञाणेन सङ्कलेन्तो समानं आनयि समाहरि. न सक्कोति संकुचिते इरियापथे येभुय्येन ¶ तेसं दुब्बिभावनतो. कङ्खतीति पदस्स आकङ्खतीति अयमत्थोति आह – ‘‘अहो वत पस्सेय्यन्ति पत्थनं उप्पादेती’’ति. किच्छतीति किलमति. ‘‘कङ्खती’’ति पदस्स पुब्बे आसीसनत्थतं वत्वा इदानि तस्स संसयत्थत्तमेव विकप्पन्तरवसेन दस्सेन्तो ‘‘कङ्खाय वा दुब्बला विमति वुत्ता’’तिआदि वुत्तं. तीहि धम्मेहि तिप्पकारेहि संसयधम्मेहि. कालुस्सियभावोति अप्पसन्नताय हेतुभूतो आविलभावो. यस्मा भगवतो कोसोहितं सब्बबुद्धावेणिकं वत्थगुय्हं सुविसुद्धकञ्चनमण्डलसन्निकासं अत्तनो सण्ठानसन्निवेससुन्दरताय आजानेय्यगन्धहत्थिनो वरङ्गचारुभावं विकसमानतपनियारविन्दसमुज्जलकेसरावत्तविलासं सञ्झापभानुरञ्जितजलवनन्तराभिलक्खित-सम्पुण्णचन्दमण्डलसोभञ्च अत्तनो सिरिया अभिभुय्य विराजति, यं बाहिरब्भन्तरमलेहि अनुपक्किलिट्ठताय चिरकालं सुपरिचितब्रह्मचरियाधिकारताय सुसण्ठितसण्ठानसम्पत्तिया च कोपीनम्पि सन्तं अकोपीनमेव, तस्मा वुत्तं ‘‘भगवतो ही’’तिआदि. पहूतभावन्ति ¶ पुथुलभावं. एत्थेव हि तस्स संसयो, तनुमुदुसुकुमारतादीसु पनस्स गुणेसु तस्स विचारणा एव नाहोसि.

हिरिकरणोकासन्ति हिरियितब्बट्ठानं. छायन्ति पटिबिम्बं. कीदिसन्ति आह ‘‘इद्धिया’’तिआदि. छायारूपन्ति भगवतो पटिबिम्बरूपं. तञ्च खो बुद्धसन्तानतो विनिमुत्तं रूपकमत्तं भगवतो सरीरवण्णसण्ठानावयवं इद्धिमयं बिम्बकमत्तं, तं पन दस्सेन्तो भगवा यथा अत्तनो बुद्धरूपं न दिस्सति, तथा कत्वा दस्सेति. नीहरित्वाति फरित्वा.

कण्णसोतानं उपचिततनुतम्बलोमताय धोतरजतपनाळिकासदिसता वुत्ता. मुखपरियन्तेति केसन्ते.

किरियाकरणन्ति किरियाय कायिकस्स वाचसिकस्स पटिपत्ति. तत्थाति तेसु किच्चेसु. धम्मकथिकानं वत्तं दस्सेतुं बीजनिग्गहणं कतं. न हि अञ्ञथा सब्बस्सपि लोकस्स अलङ्कारभूतं परमुक्कंसगतं सिक्खासंयमानं बुद्धानं मुखचन्दमण्डलं पटिच्छादेतब्बं होति.

पत्थरितवितानओलम्बितगन्धदामकुसुमदामके गन्धमण्डलमाळे. पुब्बभागेन परिच्छिन्दित्वाति ‘‘एत्तकं वेलं समापत्तिया वीतिनामेस्सामी’’ति एवं पवत्तेन पुब्बभागेन कालं परिच्छिन्दित्वा. पच्चयदायकेसु अनुरोधवसेन परिसं उस्सादेन्तो वा पग्गण्हन्तो, अदायकेसु विरोधवसेन परिसं अपसादेन्तो वा.

योगक्खेमं ¶ अन्तरायाभावं. सभावगुणेनेवाति यथावुत्तगुणेनेव. भोतो गोतमस्स गुणं सविग्गहं चक्कवाळं अतिसम्बाधं वित्थारेन सन्धारेतुं अप्पहोन्ततो. भवग्गं अतिनीचं उपरूपरि सन्धारेतुं अप्पहोन्ततो.

३८६. ठानगमनादीसु (दी. नि. टी. २.३५) भूमियं सुट्ठु समंपतिट्ठिता पादा एतस्साति सुप्पतिट्ठितपादो. तं पन भगवतो सुप्पतिट्ठितपादतं ब्यतिरेकमुखेन विभावेतुं ‘‘यथा ही’’तिआदि वुत्तं. तत्थ अग्गतलन्ति अग्गपादतलं. पण्हीति पण्हितलं. पस्सन्ति पादतलस्स द्वीसु पस्सेसु एकेकं, उभयमेव वा परियन्तं पस्सं. सुवण्णपादुकतलं विय उजुकं निक्खिपियमानं. एकप्पहारेनेवाति एकक्खणेयेव. सकलं पादतलं भूमिं फुसति निक्खिपने. एकप्पहारेनेव सकलं पादतलं भूमितो उट्ठहतीति योजना.

तत्राति ¶ ताय सुप्पतिट्ठितपादताय अनुपुब्बनिन्नाव अच्छरियब्भुतं इदं वुच्चमानं निस्सन्दफलं. वुत्तमेवत्थं सत्थु तिदिवगमनेन सुपाकटं कातुं ‘‘तथा ही’’तिआदिं वत्वा ‘‘न ही’’तिआदिना तं समत्थेति. तेन पठमलक्खणतोपि दुतियलक्खणं महानुभावन्ति दस्सेति. तथा हि वक्खति ‘‘अन्तमसो चक्कवत्तिरञ्ञो परिसं उपादाय सब्बोपि चक्कलक्खणस्सेव परिवारो’’ति. युगन्धरपब्बतस्स तावतिंसभवनस्स च पकतिपदनिक्खेपट्ठानुपसङ्कमने नेव बुद्धानं, न देवतानं आनुभावो, अथ खो बुद्धानं लक्खणानुभावोति इममत्थं निदस्सितं. सीलतेजेन…पे… दसन्नं पारमीनं आनुभावेनाति इदम्पि लक्खणनिब्बत्तकम्मविसेसकित्तनमेवाति दट्ठब्बं. सब्बावन्तेहीति सब्बपदेसवन्तेहि.

नाभिपरिच्छिन्नाति नाभियं परिच्छिन्ना परिच्छेदवसेन ठिता. नाभिमुखपरिक्खेपपट्टोति पकतिचक्कस्स अक्खब्भाहतपरिहरणत्थं नाभिमुखे ठपेतब्बपरिक्खेपपट्टो. नेमिमणिकाति नेमियं आवळिभावेन ठितमणिकालेखा.

सम्बहुलवारोति बहुविधलेखङ्गविभावनवारो. सत्तीति आवुधसत्ति. सिरिवच्छोति सिरिमुखं. नन्दीति दक्खिणावट्टं. सोवत्तिकोति सोवत्तिअङ्को. वटंसकोति आवेळं. वड्ढमानकन्ति पुरिसहारि पुरिसङ्गं. मोरहत्थकोति मोरपिञ्छकलापो, मोरपिञ्छ परिसिब्बितो वा बीजनिविसेसो. वालबीजनीति चामरिवालं. सिद्धत्थादि पुण्णघटपुण्णपातियो. ‘‘चक्कवाळो’’ति वत्वा तस्स पधानावयवे दस्सेतुं ‘‘हिमवा सिनेरु…पे… सहस्सानी’’ति वुत्तं.

आयतपण्हीति ¶ इदं अञ्ञेसं पण्हितो दीघतं सन्धाय वुत्तं, न पन अतिदीघतन्ति आह ‘‘परिपुण्णपण्ही’’ति. यथा पन पण्हिलक्खणं परिपुण्णं नाम होति, तं ब्यतिरेकमुखेन दस्सेतुं ‘‘यथा ही’’तिआदि वुत्तं. आरग्गेनाति मण्डलाय सिखाय. वट्टेत्वाति यथा सुवट्टं होति, एवं वट्टेत्वा. रत्तकम्बलगेण्डुकसदिसाति रत्तकम्बलमयगेण्डुकसदिसा.

मक्कटस्सेवाति वानरस्स विय. दीघभावेन समतं सन्धायेतं वुत्तं. निय्यासतेलेनाति छदिकनिय्यासादिनिय्याससम्मिस्सेन तेलेन.

तलुनाति ¶ सुकुमारा.

चम्मेनाति अङ्गुलन्तरवेठितचम्मेन. पटिबद्धअङ्गुलन्तरोति एकतो सम्बद्धअङ्गुलन्तरो. एकप्पमाणाति दीघतो समानप्पमाणा. यवलक्खणन्ति अब्भन्तरतो अङ्गुलिपब्बेठितं यवलक्खणं. पटिविज्झित्वाति तंतंपब्बानं समानदेसताय अङ्गुलीनं पसारितकाले अञ्ञमञ्ञं विज्झितानि विय फुसित्वा तिट्ठन्ति.

सङ्खा वुच्चन्ति गोप्फका, उद्धं सङ्खा एतेसन्ति उस्सङ्खा, पादा. पिट्ठिपादेति पिट्ठिपादसमीपे. सुखेन पादा परिवत्तन्ति पादनामनादीसु, तेनेव गच्छन्तानं तेसं हेट्ठा पादतलानि दिस्सन्ति. तेनाति गोप्फकानं पिट्ठिपादतो उद्धं पतिट्ठितत्ता. चतुरङ्गुलमत्तञ्हि तानि उद्धं आरोहित्वा पतिट्ठहन्ति, निगुळ्हानि च होन्ति, न अञ्ञेसं विय पञ्ञायमानानि. सतिपि देसन्तरप्पवत्तियं निच्चलोति दस्सनत्थं नाभिग्गहणं.

यस्मा एणीमिगस्स समन्ततो एकसदिसमंसा अनुक्कमेन उद्धं थूला जङ्घा होन्ति, तस्मा वुत्तं ‘‘एणीमिगसदिसजङ्घा’’ति. परिपुण्णजङ्घोति समन्ततो मंसूपचयेन परिपुण्णजङ्घो. तेनाह ‘‘न एकतो’’तिआदि.

एतेनाति ‘‘अनोनमन्तो’’तिआदिवचनेन, जाणुफासुभावदीपनेनाति अत्थो. अवसेसजनाति इमिना लक्खणेन रहिता जना. खुज्जा वा होन्ति हेट्ठिमकायतो उपरिमकायस्स रस्सताय. वामना वा उपरिमकायतो हेट्ठिमकायस्स रस्सताय. एतेन ठपेत्वा सम्मासम्बुद्धं चक्कवत्तिनञ्च इतरे सत्ता खुज्जा वामना चाति दस्सेति.

ओहितन्ति ¶ समोहितं अन्तोगधं. तथाभूतं पन तं तेन छन्नं होतीति आह ‘‘पटिच्छन्न’’न्ति.

सुवण्णवण्णोति सुवण्णवण्णवण्णोति अयमेत्थ अत्थोति आह ‘‘जातिहिङ्गुलकेना’’तिआदि. स्वायमत्थो आवुत्तिञायेन च वेदितब्बो. सरीरपरियायो इध वण्णसद्दोति अधिप्पायेन पठमविकप्पं वत्वा तथारूपाय पन रुळ्हिया अभावं मनसि कत्वा वण्णधातुपरियायमेव वण्णसद्दं गहेत्वा दुतियविकप्पो वुत्तो.

रजोति ¶ सुखुमरजो. जल्लन्ति मलीनभावावहो रेणुसञ्चयो. तेनाह ‘‘मलं वा’’ति. यदि विवट्टति, कथं न्हानादीति आह ‘‘हत्थधोवना’’तिआदि.

आवट्टपरियोसानेति पदक्खिणावट्टाय अन्ते.

ब्रह्मुनो सरीरं पुरतो वा पच्छतो वा अनोनमित्वा उजुकमेव उग्गतन्ति आह ‘‘ब्रह्मा विय उजुगत्तो’’ति. पस्सवङ्काति दक्खिणपस्सेन वा वामपस्सेन वा वङ्का.

हत्थपिट्ठिआदिवसेन सत्त उस्सदा एतस्साति सत्तुस्सदो.

सीहस्स पुब्बद्धं सीहपुब्बद्धं, परिपुण्णावयवताय सीहपुब्बद्धं विय सकलो कायो अस्साति सीहपुब्बद्धकायो. सीहस्सेवाति सीहस्स विय. सण्ठन्तीति सण्ठहन्ति. नानाचित्तेनाति विविधचित्तेन. पुञ्ञचित्तेनाति पारमितापुञ्ञचित्तरूपेन. चित्तितोति सञ्जातचित्तभावो.

द्विन्नं कोट्टानमन्तरन्ति द्विन्नं पिट्ठिबाहानं वेमज्झं, पिट्ठिमज्झस्स उपरिभागो. चितं परिपुण्णन्ति अनिन्नभावेन चितं, द्वीहि कोट्टेहि समतलताय परिपुण्णं. उग्गम्माति उग्गन्त्वा.

निग्रोधपरिमण्डलो विय परिमण्डलो निग्रोधपरिमण्डलो एकस्स परिमण्डलसद्दस्स लोपं कत्वा. न हि सब्बो निग्रोधो मण्डलो. तेनाह ‘‘समक्खन्धसाखो निग्रोधो’’ति. परिमण्डलसद्दसन्निधानेन वा परिमण्डलोव निग्रोधो गय्हतीति परिमण्डलसद्दस्स लोपेन विनापि ¶ अयमत्थो लब्भतीति आह ‘‘निग्रोधो विय परिमण्डलो’’ति. यावतक्वस्साति ओ-कारस्स व-कारादेसं कत्वा वुत्तं.

समवट्टितक्खन्धोति समं सुवट्टितक्खन्धो. कोञ्चा विय दीघगला, बका विय वङ्कगला, वराहा विय पुथुलगलाति योजना. सुवण्णालिङ्गसदिसोति सुवण्णमयखुद्दकमुदिङ्गसदिसो.

रसग्गसग्गीति मधुरादिभेदं रसं गसन्ति अन्तो पवेसन्तीति रसग्गसा, रसग्गसानं अग्गा रसग्गसग्गा, ता एतस्स सन्तीति रसग्गसग्गी. तेनाति ओजाय अफरणेन, हीनधातुकत्ता ते बह्वाबाधा होन्ति.

‘‘हनू’’ति ¶ सन्निस्सयदन्ताधारस्स समञ्ञा, तं भगवतो सीहहनुसदिसं, तस्मा भगवा सीहहनु. तत्थ यस्मा बुद्धानं रूपकायस्स धम्मकायस्स च उपमा नाम निहीनुपमाव, नत्थि समानुपमा, कुतो अधिकूपमा, तस्मा अयम्पि निहीनुपमाति दस्सेतुं ‘‘तत्था’’तिआदि वुत्तं. तिभागवसेन मण्डलताय द्वादसियं पक्खस्स चन्दसदिसानि.

दन्तानं उच्चनीचता अब्भन्तरबाहिरपस्सवसेनपि वेदितब्बा, न अग्गवसेनेव. तेनाह ‘‘अयपट्टछिन्नसङ्खपटलं विया’’ति. अयपट्टन्ति च ककचं अधिप्पेतं. विसमाति विसमसण्ठाना.

विच्छिन्दित्वा विच्छिन्दित्वा पवत्तसरताय छिन्नस्सरापि. अनेकाकारताय भिन्नस्सरापि. काकस्स विय अमनुञ्ञसरताय काकस्सरापि. अपलिबुद्धत्ताति अनुपद्दुतवत्थुकत्ता. वत्थुन्ति च अक्खरुप्पत्तिट्ठानमाह. अट्ठङ्गसमन्नागतोति एत्थ अट्ठङ्गानि परतो आगमिस्सन्ति. मञ्जुघोसोति मधुरस्सरो.

करवीकसद्दो येसं सत्तानं सोतपथं उपगच्छति, ते अत्तनो सरसम्पत्तिया पकतिं जहापेत्वा अवसे करोन्तो अत्तनो वसे वत्तेति, एवं मधुरोति दस्सेन्तो ‘‘तत्रिद’’न्तिआदिमाह. तं पीतिन्ति तं बुद्धगतं पीतिं. तेनेव नीहारेन पुनप्पुनं पवत्तन्तं अविजहित्वा विक्खम्भितकिलेसा थेरानं सन्तिके लद्धधम्मस्सवनसप्पाया उपनिस्सयसम्पत्तिया परिपक्कञाणताय ¶ ‘‘सत्तहि…पे… पतिट्ठासी’’ति. सत्तसतमत्तेन ओरोधजनेन सद्धिं पदसाव थेरानं सन्तिकं उपगतत्ता ‘‘सत्तहि जङ्घासतेहि सद्धि’’न्ति वुत्तं.

अभिनीलनेत्तोति अधिकनीलनेत्तो. अधिकनीलता च सातिसयं नीलभावेन वेदितब्बा, न नेत्ते नीलवण्णस्सेव अधिकभावतोति आह ‘‘न सकलनीलनेत्तोवा’’तिआदि. पीतलोहितवण्णा सेतमण्डलगतराजिवसेन, नीलसेतकाळवण्णा पन तंतंमण्डलवसेनेव वेदितब्बा.

चक्खुभण्डन्ति अक्खिदलन्ति केचि, अक्खिदलपत्तन्ति अञ्ञे. अक्खिदलेहि पन सद्धिं अक्खिबिम्बन्ति वेदितब्बं. एवञ्हि विनिग्गतगम्भीरजोतनापि युत्ता होति.

उण्णासद्दो ¶ लोके अविसेसतो लोमपरियायो, इध पन लोमविसेसवाचकोति आह ‘‘उण्णलोम’’न्ति. नलाटमज्झजाताति नलाटमज्झगता. ओदातताय उपमा, न मुदुताय. रजतपुब्बुळकाति रजतमयतारका.

द्वे अत्थवसे पटिच्च वुत्तन्ति यस्मा बुद्धा चक्कवत्तिनो च परिपुण्णनलाटताय परिपुण्णसीसबिम्बताय च ‘‘उण्हीससीसा’’ति वुच्चन्ति, तस्मा ते द्वे अत्थवसे पटिच्च ‘‘उण्हीससीसो’’ति इदं वुत्तं. इदानि तं अत्थद्वयं भगवति सुप्पतिट्ठितन्ति दस्सेतुं ‘‘तथागतस्सही’’तिआदि वुत्तं. सण्हतमताय सुवण्णवण्णताय च रञ्ञो बद्धउण्हीसपट्टो विय विरोचति. कप्पसीसाति द्विधाभूतसीसा. फलसीसाति फलसदिससीसा. अट्ठिसीसाति मंसस्स अभावतो तचोपरियोनद्धअट्ठिमत्तसीसा. तुम्बसीसाति लाबुसदिससीसा. पब्भारसीसाति पिट्ठिभागेन ओलम्बमानसीसा. पुरिमनयेनाति परिपुण्णनलाटतापक्खेन. उण्हीसवेठितसीसो वियाति उण्हीसपट्टेन वेठितसीसपदेसो विय. उण्हीसं वियाति छेकेन सिप्पिना विरचितउण्हीसमण्डलं विय.

कम्मन्ति येन येन कम्मेन यं यं लक्खणं निब्बत्तं, तं तं कम्मं. कम्मसरिक्खकन्ति तस्स तस्स लक्खणस्स तंकम्मानुरूपता. लक्खणन्ति तस्स महापुरिसलक्खणस्स अविपरीतसभावो. लक्खणानिसंसन्ति तं लक्खणपटिलाभेन लद्धब्बगुणो. इमानि कम्मादीनीति इमानि अनन्तरं वुत्तानि कम्मकम्मसरिक्खकादीनि दस्सेत्वा तं सरूपतो विभावेत्वा कथेतब्बानि संवण्णकेन.

रतनविचित्तसुवण्णतोरणं ¶ तस्मिं काले मनुस्सलोके नत्थीति वुत्तं ‘‘देवनगरे’’ति. सब्बसो सुपुप्फितसालरुक्खो असाधारणसोभो मनुस्सूपचारे न लब्भतीति आह ‘‘सेलन्तरम्ही’’ति. किरियाचारन्ति कायिकवाचसिककिरियापवत्तिं.

३८७. सततपाटिहारियन्ति सततं चरिमभवे सब्बकालं लक्खणनिब्बत्तककम्मानुभावहेतुकं बुद्धावेणिकं पाटिहारियं. बुद्धानं अतिदूरे पादं निक्खिपितुकामानम्पि नातिदूरे एव निक्खिपनं होतीति ‘‘न अतिदूरे ठपेस्सामीति ¶ उद्धरती’’ति वुत्तं. पकतिसञ्चरणवसेनेतं वुत्तं, तादिसेन पादेन अनेकयोजने ठपेस्सामीति उद्धरणम्पि होतियेव. अतिदूरं हीतिआदि पमाणातिक्कमे दोसदस्सनं. एवं सतीति एवं दक्खिणपादवामपादानं यथाधिप्पेतपतिट्ठितट्ठाने सति. पदविच्छेदोति पदवारविच्छेदो. यादिसं पसारेन्तो वामपादस्स उद्धरणं पतिट्ठानञ्च, दक्खिणपादस्स तादिसमेव, इति नेसं उद्धरणपतिट्ठानानं समानतो अञ्ञमञ्ञभावेन अनूनानधिकताय वुत्तं ‘‘दक्खिणपादकिच्चं वामपादेन नियमितं, वामपादकिच्चं दक्खिणपादेन नियमित’’न्ति.

दिवाति उपकट्ठाय वेलाय. विहारभत्तत्थायाति विहारे यथावुद्धं गहेतब्बभत्तत्थाय. पच्छतो आगच्छन्तोति पकतिगमनेन पच्छतो आगच्छन्तो. ओकासं न लभतीति पदनिक्खेपट्ठानं न लभति. ऊरुपरियायो इध सत्थि-सद्दोति आह ‘‘न ऊरुं उन्नामेती’’ति. दण्डङ्कुसं वुच्चति दीघदण्डो अङ्कुसो, तेन रुक्खसाखं छिन्दतो पुरिसस्स यथा पच्छाभागेन पादानं ओसक्कनं होति, एवं भगवतो पादा न ओसक्कन्तीति आह ‘‘रुक्खसाखाछेदन…पे… ओसक्कापेती’’ति. ओबद्धानाबद्धट्ठानेहि पादं कोट्टेन्तो वियाति आबद्धट्ठानेन अनाबद्धट्ठानेन च पादखण्डं कोट्टेत्वा थद्धं करोन्तो विय. न इतो चितो च चालेतीति अपरापरं न चालेति. उस्सङ्खपादताय सुखेनेव पादानं परिवत्तनतो नाभितो पट्ठाय उपरिमकायो न इञ्जतीति हेट्ठिमकायोव इञ्जति. तेनाह ‘‘उपरिम…पे… निच्चलो होती’’ति. न जानाति अनिञ्जनतो. कायबलेनाति गमनपयोगसङ्खातेन कायगतेन विसेसबलेन. जवगमनहेतुभूतेन वा कायबलेन. तेनाह ‘‘बाहा खिपन्तो’’तिआदि. जवेन गच्छन्तो हि बाहा खिपति, सरीरतो सेदा मुच्चन्ति. नागापलोकितवसेनाति नागस्स अपलोकनमिव सकलकायेनेव परिवत्तेत्वा अपलोकनवसेन.

अनावरणञाणस्साति अनावरणञाणबलेन दस्सनस्स. अनावरणवारो पन काये पतिट्ठितरूपदस्सनम्पि अनावरणमेवाति दस्सनत्थं वुत्तो. इन्दखीलतो पट्ठायाति नगरद्वारे इन्दखीलतो ¶ पट्ठाय. पकतिइरियापथेनेवाति ¶ ओनमनादिं अकत्वा उजुकगमनादिना एव. यदि एवं कोट्ठकद्वारगेहप्पवेसे कथन्ति आह ‘‘दलिद्दमनुस्सान’’न्तिआदि. परिवत्तेन्तेनाति निपज्जनत्थं कायं परिवत्तेन्तेन.

हत्थेहि गहेत्वाति उभोहि हत्थेहि उभोसु कटिप्पदेसेसु परिग्गहेत्वा. पतति निसीदनट्ठाने निपज्जनवसेन पतति. ओरिमं अङ्गं निस्साय निसिन्नोति पल्लङ्कमाभुजित्वा उक्कुटिकनिसज्जाय उपरिमकायं हेट्ठिमकाये पतिट्ठपेन्तोयेव भारीकरणवसेन ओरिमङ्गं निस्साय निसिन्नो. घंसन्तोति आनिसददेसेन आसनट्ठानं घंसन्तो. पारिमङ्गन्ति सत्थिभागसम्मद्दं आनिसदपदेसं. तथेवाति घंसन्तो एव. ओलम्बकं धारेन्तो वियाति ओलम्बकसुत्तं ओतारेन्तो विय. तेन उजुकमेव निसीदनमाह. सरीरस्स गरुकभावहेतूनं दूरतो समुपायितभावेन सल्लहुकभावतो तूलपिचुं ठपेन्तो विय.

अप्पेसक्खानं महानुभावगेहप्पवेसे सिया छम्भितत्तं, चित्तक्खोभो, दरथवसेन नानप्पकारकप्पनं, भयवसेन तण्हावसेन परितस्सनं, तं सब्बं भगवतो नत्थीति दस्सेतुं पाळियं ‘‘न छम्भती’’तिआदि (म. नि. २.३८७) वुत्तन्ति आह ‘‘न छम्भती’’तिआदि.

उदकं दीयति एतेनाति उदकदानं, भिङ्कारादि उदकभाजनं. बद्धं कत्वाति हत्थगतमत्तिकं विय अत्तनो वसे अवत्तन्तं कत्वा. परिवत्तेत्वाति कुज्जित्वा. विछड्डयमानो उदकस्स विक्खिपनवसेन छड्डयमानो.

तथा न गण्हाति, ब्यञ्जनमत्ताय एव गण्हन्तो. भत्तं वा अमनापन्ति आनेत्वा योजना. ब्यञ्जनेन आलोपअतिनामनं, आलोपेन ब्यञ्जनअतिनामनन्ति इमेसु पन द्वीसु पठममेव असारुप्पताय अनिट्ठं वज्जेतब्बन्ति पाळियं पटिक्खित्तन्ति दट्ठब्बं. सब्बत्थेवाति सब्बस्मिं आहरितब्बवत्थुस्मिं सुपणीतभावेन रसो पाकटो होति ञाणेन परिञ्ञातत्ता. रसगेधो पन नत्थि सेतुघातत्ता.

अस्साति ‘‘नेव दवाया’’तिआदिपदस्स. वुत्तमेतन्ति ‘‘विसुद्धिमग्गे विनिच्छयो आगतो’’ति सब्बासवसुत्ते (म. नि. १.२३) संवण्णयन्तेन वुत्तमेतं, तस्मा ¶ न एत्थ तं वत्तब्बन्ति अधिप्पायो, तस्मा यो तस्मिं तस्मिं विनिच्छये विसेसवादो इच्छितब्बो. सो परमत्थमञ्जूसाय विसुद्धिमग्गवण्णनाय वुत्तनयेनेव वेदितब्बो. पत्तस्स गहणट्ठानन्ति हत्थेन पत्तस्स ¶ गहणपदेसं. विनिवत्तित्वाति पत्ते सब्बं आमिसगतं सद्धिं भत्तेन विनिवत्तित्वा गच्छति. पमाणातिक्कन्तन्ति केलायनवसेन अतिक्कन्तपमाणं आरक्खं ठपेति. चीवरभोगन्तरन्ति चीवरपटलन्तरं. उदरेन अक्कमित्वाति उदरेनेव सन्निरुम्भित्वा.

अप्पत्तकालं अभिमुखं नामेति उपनामेतीति अतिनामेति, पत्तकालं अतिक्कामेन्तो नामेति अपनेतीति अतिनामेति. उभयम्पि एकज्झं गहेत्वा पाळियं ‘‘न च अनुमोदनस्स कालमतिनामेती’’ति वुत्तन्ति दस्सेन्तो ‘‘यो ही’’तिआदिमाह.

वेगगमनेन पटिसंमुञ्चित्वा धावित्वा गच्छति. अच्चुक्कट्ठन्ति अतिविय उद्धं कत्वा कड्ढितपारुतं. तेनाह ‘‘यो हि याव हनुकट्ठितो…पे… होती’’ति. अच्चोक्कट्ठन्ति अतिविय हेट्ठा कत्वा कड्ढितपारुतं. तेनाह ‘‘याव गोप्फका ओतारेत्वा’’ति. उभतो उक्खिपित्वाति दक्खिणतो वामतोति उभोसु पस्सेसु उत्तरासङ्गं उक्खिपित्वा. थनन्ति दक्खिणथनं.

विस्सट्ठोति विमुत्तो. तेनाह ‘‘विस्सट्ठत्तायेव चेस विञ्ञेय्यो’’ति. यस्मा अमुत्तवादिनो वचनं अविस्सट्ठताय न सिनिय्हति, न एवं मुत्तवादिनोति आह ‘‘सिनिद्धो’’ति. विञ्ञेय्योति सुपरिब्यत्तताय अक्खरतो च ब्यञ्जनतो च विञ्ञातुं सक्कुणेय्यो. तेनाह ‘‘पाकटो’’ति. विञ्ञापनियोति विजानितब्बो. ब्यञ्जनवसेनेव चेत्थ विञ्ञेय्यता वेदितब्बा घोसस्स अधिप्पेतत्ता. मधुरोति पियो पेमनीयो अपलिबुद्धो. सवनमरहति, सवनस्स सोतस्स हितोति वा सवनीयो. सम्पिण्डितोति सहितो. भगवतो हि सद्दो उप्पत्तिट्ठानकतासञ्चितत्ता सहिताकारेनेव आपाथमागच्छति, न अयोसलाकाय पहटकंसथालं विय विप्पकिण्णो. तेनाह ‘‘अविसारी’’ति. गम्भीरोति यथा गम्भीरवत्थुपरिच्छिन्दनेन ञाणस्स गम्भीरसमञ्ञा, एवं गम्भीरट्ठानसम्भवतो सद्दस्स गम्भीरसमञ्ञाति आह ‘‘गम्भीरोति गम्भीरसमुट्ठितो’’ति ¶ . निन्नादवाति सविसेसं निन्नादवा. स्वायं विसेसो गम्भीरभावसिद्धोति आह ‘‘गम्भीरत्तायेव चेस निन्नादी’’ति. एवमेत्थ चत्तारि अङ्गानि चतुरङ्गनिप्फादीनि वेदितब्बानि. अकारणा मा नस्सीति बुद्धानुभावेन विय सरस्स परिसपरियन्तता वुत्ता, धम्मतावसेनेव पन सा वेदितब्बा तस्स मूलकारणस्स तथा अवट्ठितत्ता.

पच्चोसक्कित्वाति पटिनिवत्तित्वा. समुस्सितकञ्चनपब्बतं विय उपरि इन्दनीलरतनविततसिखं ¶ विज्जुल्लताभूसितं. महापथवीआदयो सत्थुगुणपटिभागताय निदस्सनं, केवलं महन्ततामत्तं उपादाय निदस्सिता.

३९०. अप्पटिसंविदितोति अनारोचितो. आगमनवसेन चेत्थ पटिसंवेदितन्ति आह ‘‘अविञ्ञातआगमनो’’ति. उग्गतभावन्ति कुलभोगविज्जादीहि उळारभावं. अनुद्दयसम्पन्नाति कारुणिका.

३९१. सहसाव ओकासकरणेन उच्चकुलीनता दीपिता होतीति आह ‘‘वेगेन उट्ठाय द्विधा भिज्जित्वा’’तिआदि.

नारिसमाननामन्ति इत्थिअत्थजोतकनामं. तेनाह ‘‘इत्थिलिङ्ग’’न्ति. अव्हातब्बाति कथेतब्बा.

३९४. एकनीहारेनेव अट्ठ पञ्हे ब्याकरोन्तो. ‘‘पुब्बेनिवासं…पे… पवुच्चती’’ति इमिना पुब्बेनिवासस्स विदितकारणं वुत्तन्ति आह ‘‘तस्स पुब्बेनिवासो पाकटो’’ति. दिब्बचक्खुञाणं कथितं तस्स परिभण्डञाणभावतो यथाकम्मूपगञाणस्स. ‘‘जातिक्खयं पत्तो, अभिञ्ञा वोसितो’’ति च वुत्तत्ता मुनीति असेक्खमुनि इधाधिप्पेतोति आह ‘‘अरहत्तञाणमोनेय्येन समन्नागतो’’ति.

किलेसरागेहि किलेसविवण्णताहि. जातिक्खयप्पत्तत्ता ‘‘अथो जातिक्खयं पत्तो’’ति वुत्तत्ता. अभिजानित्वाति अभिविसिट्ठताय अग्गमग्गपञ्ञाय ञत्वा. इदानि पटिसम्भिदायं आगतनयेन परिञ्ञापहानभावनासच्छिकिरियासमापत्तीनं पारगमनेन पारगूति अयमेत्थ अत्थोति दस्सेतुं ‘‘पारगूति वा’’तिआदि वुत्तं. अभिञ्ञेय्यधम्मानं जाननवसेन अभिञ्ञापारगू. तादिसोति यादिसो ‘‘पारगू सब्बधम्मान’’न्ति पदद्वयेन ¶ वुत्तो, तादिसो. छहि आकारेहीति पजाननादीहि यथावुत्तेहि छहि आकारेहि.

कामञ्चेत्थ द्वे एव पुच्छागाथा द्वे च विस्सज्जनागाथा, पुच्छापटिपाटिया पन असङ्करतो च विस्सज्जनं पवत्तति, तं निद्धारेतुं किं पनातिआदि वुत्तं. वेदेहि गतत्ताति वेदेहि मग्गञाणेहि पारङ्गतत्ता. पुब्बेनिवासन्तिआदीहि विज्जानं अत्थिताय बोधितत्ता. पापधम्मानन्ति छत्तिंसपापधम्मानं सोत्थानं मग्गं पापनेन निस्सेसतो सोधितत्ता.

३९५. धम्मो ¶ नाम अरहत्तमग्गो कुसलधम्मेसु उक्कंसपारमिप्पत्तिया उक्कट्ठनिद्देसेन. तस्स अनुरूपधम्मभावतो अनुधम्मो नाम हेट्ठिममग्गफलधम्मा. यो सत्थु सन्तिके धम्मं सुत्वा यथानुसिट्ठं न पटिपज्जति, सो तथागतं धम्माधिकरणं विहेठेति नाम. यो पन पटिपज्जन्तो च दन्धाभिञ्ञताय कम्मट्ठानसोधनत्थं अन्तरन्तरा भगवन्तं उपसङ्कमित्वा अनेकवारं कथापेति, सो एत्तावता धम्माधिकरणं तथागतं विहेठेतीति न वत्तब्बो. न हि भगवतो धम्मदेसनाय परिस्समो अत्थि, अयञ्च अत्थो महासुदस्सनसुत्तादीहि (दी. नि. २.२४१ आदयो) दीपेतब्बो, तस्मा – ‘‘सच्चधम्मस्स अनुधम्म’’न्ति वत्तब्बे वुत्तमेव ब्यतिरेकमुखेन विभावेतुं ‘‘न च मं धम्माधिकरणं विहेसेसी’’ति वुत्तन्ति दट्ठब्बं. तत्थ परिनिब्बायीति परकाले चेत्थ परिनिब्बानम्पि सङ्गय्हति, तं पन इमस्मिं गहितमेव होतीति आह ‘‘देसनाय अरहत्तेनेव कूटं गहित’’न्ति.

ब्रह्मायुसुत्तवण्णनाय लीनत्थप्पकासना समत्ता.

२. सेलसुत्तवण्णना

३९६. केणियोति ¶ तस्स नामं, पुब्बे केणिया जीविकाकप्पनतोति वदन्ति. जटिलोति जटाधरो. ब्राह्मणजातिकत्ता कोटिसारताय च ब्राह्मणमहासालो. पयोजेत्वा निस्सयो हुत्वा वसति, रत्तिं कामसम्पत्तिं अनुभवतीति वा योजना. सुसङ्खतन्ति सप्पिमधुसक्करादीहि चेव मरिचसिङ्गीवेरादीहि च सुट्ठु अभिसङ्खतं.

पटिक्खेपपसन्नतायाति ¶ अहोवतायं अप्पिच्छो, यो निमन्तियमानोपि न सादियतीति उपनिमन्तियमानस्स पटिक्खेपे तित्थियानं पसन्नभावतोति. तं कथं? विरुद्धमेतन्ति ‘‘अकारणमेत’’न्ति पटिक्खिपति.

३९८. कप्पसहस्सेहिपि…पे… अहोसीति इदं नानुस्सवसिद्धं अनुमानग्गहणं सन्धायाह. पदेति उत्तरपदलोपेन निद्देसोति आह ‘‘पदप्पमाणे’’ति. पज्जति निक्खिपति एत्थाति वा पदं पकतिया पादनिक्खिपट्ठानं, तस्मिं पदे. कीळापसुततादिना पमादं आपज्जति. बोधिसत्तचारिकन्ति दुक्करचरियं सन्धाय वदति.

३९९. परिपुण्णतायाति अनूनताय. अहीनङ्गतायाति अवेकल्लभावतो. रोचतीति रुचि, देहप्पभा, सोभणा रुचि एतस्साति सुरुचि. आरोहसम्पत्ति कायस्स पमाणयुत्तउच्चता. परिणाहसम्पत्ति किसथूलभाववज्जितपरिणाहता. सण्ठानसम्पत्ति अवयवानं सुसण्ठितता. चारुदस्सनोति पियदस्सनो तेनाह ‘‘सुचिरम्पी’’तिआदि. सुवण्णसदिसवण्णोति जातिहिङ्गुलकेन मद्दित्वा सिलानिघंसेनेव परिकम्मं कत्वा ठपितघनसुवण्णरूपवण्णो. महापुरिसभावं ब्यञ्जेन्ति पकासेन्तीति ब्यञ्जनानि, महापुरिसलक्खणानीति आह ‘‘पठमं वुत्तब्यञ्जनानेवा’’ति.

पुब्बे वुत्तन्ति ‘‘सुरुची’’ति पुब्बे वुत्तं, ‘‘आदिच्चोव विरोचसी’’ति पुन वुत्तं. ‘‘चारुदस्सनो सुवण्णवण्णोसी’’ति पुब्बे वुत्तं, ‘‘कल्याणदस्सनो भिक्खु कञ्चनाभत्तचो’’ति पुन वुत्तन्ति इममत्थं सन्धायाह ‘‘उत्तरगाथायपि एसेव नयो’’ति. सातिसयं उत्तमवण्णे वण्णेत्वा उत्तमवण्णिनोति पदेन सन्तं पकासेतीति आह ‘‘उत्तमवण्णसम्पन्नस्सा’’ति. उत्तमसारथीति ¶ सेट्ठपुरिससारथि. तत्थ तत्थ जम्बुवनसण्डमण्डितताय जम्बुदीपो ‘‘जम्बुसण्डो’’ति वुच्चति. इस्सरियन्ति चक्कवत्तिस्सरियं.

जातिखत्तियाति जातिमन्तो खत्तिया. राजाभिराजाति एत्थ अभि-सद्दो पूजत्थोति आह ‘‘राजूनं पूजनीयो’’ति.

अप्पमाणाति अपरिमाणा लोकधातुयो. ‘‘यावता पन आकङ्खेय्या’’ति (अ. नि. ३.८१) हि वुत्तं. धम्मराजा अनुत्तरोति एत्थ वुत्तअनुत्तरभावं ‘‘यावता ¶ ही’’तिआदिना पाकटतरं कत्वा धम्मराजभावं विभावेतुं ‘‘स्वाह’’न्तिआदि वुत्तं. धम्मेनाति पटिवेधधम्मेन. तेनाह ‘‘अनुत्तरेनेवा’’ति. अनुत्तरेनाति विसिट्ठेन उत्तमेन. इमस्मिं पक्खे धम्मेनाति पटिपत्तिधम्मेनातिपि सङ्गय्हति. परियत्तिधम्मेनाति देसनाधम्मेन आणाचक्कं पवत्तेमीति योजना. देसनाञाणपटिवेधञाणविभागं धम्मचक्कमेव वा. अप्पटिवत्तियन्ति पटिवत्तितुं असक्कुणेय्यं.

तथागतेन जातोति तथागतेन हेतुना अरियाय जातिया जातो. हेतुअत्थे करणवचनं. अनुजातोति च वुत्ते अनु-सद्दस्स वसेन तथागतन्ति च उपयोगवचनमेव होति, सो च अनु-सद्दो हेतुअत्थजोतकोति आह ‘‘तथागतं हेतुं अनुजातो’’ति. अवञ्ञातब्बभावेन जातोति अवजातो दुप्पटिपन्नत्ता. तेनाह ‘‘दुस्सीलो’’ति. तथा हि वुत्तं कोकालिकं आरब्भ ‘‘पुरिसन्तकलि अवजातो’’ति. पुत्तो नाम न होति तस्स ओवादानुसासनियं अट्ठितत्ता. एवमाहाति ‘‘अनुजातो तथागत’’न्ति एवमाह.

विज्जाति मग्गविज्जा. उक्कट्ठनिद्देसेन विमुत्तीति फलविमुत्ति. ननु च मग्गो भावेतब्बेन गहितोति? सच्चं गहितो, सब्बे च पन सत्त धम्मा अभिञ्ञेय्याति विज्जाय अभिञ्ञेय्यभावो वुत्तो. इमिना वा नयेन सब्बेसम्पि अभिञ्ञेय्यभावो वुत्तो एवाति वेदितब्बो. फलेन विना हेतुभावस्सेव अभावतो हेतुवचनेन फलसिद्धि, निरोधस्स च सम्पापनेन मग्गस्स हेतुभावो. दुक्खस्स निब्बत्तनेन तण्हाय समुदयभावोति इममत्थं सङ्गहितमेव अत्थतो आपन्नत्ता. युत्तहेतुनाति युत्तियुत्तेन हेतुना बुद्धभावं साधेति सच्चविनिमुत्तस्स बुज्झितब्बस्स अभावतो सच्चसम्बोधनेनेव च तस्स अनवसेसतो बुद्धत्ता. अत्थवचनञ्चेतं, पयोगवचनानि पन – ब्राह्मण, अहं सम्मासम्बुद्धो सब्बथा अविपरीतधम्मदेसनो, सम्मासम्बुद्धत्ता सब्बत्थ अविपरीतमाचिक्खति यथाहं सब्बमग्गदेसकोति ¶ . किं पन भगवा सयमेव अत्तनो सम्मासम्बुद्धभावं आरोचेतीति? महाकरुणाय अञ्ञेसं महाविसयतो. तत्थ ‘‘एकोम्हि सम्मासम्बुद्धो, सब्बाभिभू सब्बविदूहमस्मी’’तिआदीनि (महाव. ११; म. नि. १.२८५; २.३४१; कथा. ४०५) सुत्तपदानि इदमेव च सुत्तपदं एतस्स अत्थस्स साधकं.

सल्लकन्तनोति ¶ सल्लानं समुच्छिन्नत्ता. रोगस्साति किलेसरोगस्स. तस्माति अपुनपवत्तिपादनेन तिकिच्छनतो. ब्रह्मं वा सेट्ठं सम्मासम्बोधिं पत्तोति ब्रह्मभूतो. एवं आगतायाति इमिना –

‘‘कामा ते पठमा सेना, दुतिया अरति वुच्चति;

ततिया खुप्पिपासा ते, चतुत्थी तण्हा पवुच्चति.

थिनमिद्धं तेपञ्चमं थिनमिद्धं ते, छट्ठा भीरू पवुच्चति;

सत्तमी विचिकिच्छा ते, मक्खो थम्भो ते अट्ठमो.

लाभो सिलोको सक्कारो, मिच्छालद्धो च यो यसो;

यो चत्तानं समुक्कंसे, परे च अवजानति;

एसा नमुचि ते सेना, कण्हस्साभिप्पहारिनी’’ति. (सु. नि. ४३८-४४१);

एवं वुत्तं नवविधं सेनं सङ्गय्हति. वसे वत्तेत्वाति समुच्छिन्दनेन अनुप्पादतापादनेन वसे वत्तेत्वा. कुतोचि अभयो निब्भयो.

सयमेव दट्ठब्बन्ति येन येन अधिगतो, तेन तेन परसद्धाय गन्तब्बं हित्वा असम्मोहतो पच्चवेक्खणाञाणेनेव सामं दट्ठब्बं. तेनाह ‘‘पच्चक्ख’’न्ति. पसट्ठा दिट्ठि सन्दिट्ठि. यथा रथेन जयतीति रथिको, एवं इदं मग्गब्रह्मचरियं सन्दिट्ठिया जयतीति सन्दिट्ठिकं. अथ वा दिट्ठन्ति दस्सनं वुच्चति, दिट्ठमेव सन्दिट्ठं, सन्दस्सनन्ति अत्थो. सन्दिट्ठं अरहतीति सन्दिट्ठिको यथा वत्थयुगं अरहतीति वत्थयुगिको. सन्दिट्ठिकं फलदानं सन्धाय नास्स कालोति अकालं, अकालमेव अकालिकं, न कालन्तरं खेपेत्वा फलं देति, अत्तनो पन पवत्तिसमनन्तरमेव फलं देतीति अत्थो. अथ वा अत्तनो फलप्पदाने पकट्ठो कालो पत्तो अस्साति कालिको, लोकियो कुसलधम्मो, इदं पन समनन्तरफलत्ता न कालिकं.

४००. ‘‘महायञ्ञं ¶ पवत्तयी’’तिआदीसु केवलं दानधम्मादीसु यञ्ञपरियायसम्भवतो ‘‘ब्राह्मणानं यञ्ञाभावतो’’ति वुत्तं. ब्राह्मणा हि ‘‘अग्गिमुखा देवा’’ति अग्गिजुहनपुब्बकं यञ्ञं विदहन्ति. तेनाह ‘‘अग्गिजुहनप्पधानाति अत्थो’’ति ‘‘भूर्भुव? स्व?’’ इति सावित्ती पुब्बकत्ता मुखं पुब्बङ्गमं ¶ . ‘‘मुखमिव मुख’’न्तिआदीसु विय इधापि पधानपरियायो मुखसद्दोति दस्सेन्तो ‘‘मनुस्सानं सेट्ठतो राजा ‘मुख’न्ति वुत्तो’’ति आह. आधारतोति ओगाहन्तीनं नदीनं आधारभावतो पटिसरणतो गन्तब्बट्ठानभावतो. सञ्ञाणतोति चन्दयोगवसेन अज्ज असुकनक्खत्तन्ति पञ्ञायनतो. आलोककरणतोति नक्खत्तानि अभिभवित्वा आलोककरणतो. सोम्मभावतोति सीतहिमवासीतवातूपक्खरभावतो. तपन्तानन्ति दीपसिखा अग्गिजाला असनिविचक्कन्ति एवमादीनं विज्जलन्तानं. आयमुखं अग्गदक्खिणेय्यभावेन.

दिब्बचक्खु धम्मचक्खु पञ्ञाचक्खु बुद्धचक्खु समन्तचक्खूति इमेहि पञ्चहि चक्खूहि. ते सरणस्साति ते सरणस्स च, ते सरणभावमूलकत्ता इतरद्वयस्स च, यथावुत्त ते-पदेन वुत्तत्थतो परस्स चाति अत्थो. इदं वुत्तं होति – ‘‘ते तुय्हं, इतरस्स च सरणस्स अहो आनुभावो’’ति. आवुत्तिवसेन वा ते सरणस्साति एत्थ अत्थो विभावेतब्बो – तुय्हं सरणभूतस्स च इतरसरणस्स च आनुभावोति. सेसं सुविञ्ञेय्यमेव.

सेलसुत्तवण्णनाय लीनत्थप्पकासना समत्ता.

३. अस्सलायनसुत्तवण्णना

४०१. अञ्ञमञ्ञविसिट्ठत्ता ¶ विसदिसं रज्जं विरज्जं, विरज्जतो आगता, तत्थ जाताति वा वेरज्जका, एवं जाता खो पन ते, यस्मा वत्थाभरणादिविभागेन नानप्पकारा होन्ति, तस्मा वुत्तं ‘‘नानावेरज्जकान’’न्ति. अट्ठकथायं पन वेरज्जस्सेव वसेन नानप्पकारता वुत्ता. यञ्ञुपासनादिनाति यञ्ञानुभवनमन्तज्झेनदक्खिणपरियेसनादिना. चतुवण्णसाधारणन्ति खत्तियादीनं चतुन्नं वण्णानं साधारणं संसारसुद्धिपापतस्सनं. न्हानसुद्धियाति तित्थसमुद्दखातेसु मन्तजप्पनपुब्बकं सायंततियउदकोरोहनादिन्हानसुद्धिया. भावनासुद्धियाति परमजोतिभूताय पुरिसभावनासङ्खाताय सुद्धिया. वापितसिरोति ओरोपितकेसो. तमेव हि सिरो वापितन्ति वुच्चति.

सभाववादीति ¶ यथाभूतवादी. पब्बजन्ताति ब्राह्मणपब्बज्जं उपगच्छन्ता, तस्मा ब्राह्मणानं पब्बज्जाविधानं सिक्खन्तेन भोता ‘‘ब्राह्मणाव सुज्झन्ति, नो अब्राह्मणा’’ति अयं विधि सहेतुको सउपादानो सक्कच्चं उग्गहितो, तस्मा तुय्हं पराजयो नत्थि…पे… एवमाहंसु.

४०२. लद्धिभिन्दनत्थन्ति ‘‘ब्राह्मणाव ब्रह्मुनो पुत्ता ओरसा मुखतो जाता ब्रह्मजा’’ति एवं पवत्तलद्धिया विनिवेठनत्थं. पुत्तपटिलाभत्थायाति ‘‘एवं मयं पेत्तिकं इणधारं सोधेय्यामा’’ति लद्धियं ठत्वा पुत्तपटिलाभत्थाय. अयञ्हेत्थ अधम्मिकानं ब्राह्मणानं अज्झासयो. नेसन्ति ब्राह्मणानं. सच्चवचनं सियाति ‘‘ब्रह्मुनो पुत्ता’’तिआदिवचनं सच्चं यदि सिया ब्राह्मणीनं…पे… भवेय्य, न चेतं अत्थि. महाब्रह्मुनो मुखतो जातोति वादच्छेदकवादो मुखतोजातच्छेकवादो. अस्सलायनोविञ्ञू जातिको ‘‘निरक्खेपं समणेन गोतमेन वुत्त’’न्ति जानन्तोपि सहगतानं ब्राह्मणानं चित्तानुरक्खणत्थं ‘‘किञ्चापि भवं गोतमो’’तिआदिमाह.

४०३. इदानि ब्राह्मणोव सेट्ठो वण्णोति वादं भिन्दितुं ‘‘सुतं ते योनककम्बोजेसू’’तिआदि आरद्धं. यदि ब्राह्मणोव सेट्ठो वण्णो, सब्बत्थ ब्राह्मणोव सेट्ठो भवेय्य, अथ कस्मा योनककम्बोजादिजनपदेसु ब्राह्मणानं सेट्ठभावो नत्थि? एवञ्हि तत्थ वण्णा ¶ , तस्मा ‘‘ब्राह्मणोव सेट्ठो’’ति लद्धिमत्तमेतं. तेसु हि जनपदेसु जना एकज्झं सन्निपतित्वा सम्मन्तयित्वा कतिकं अकंसु, दासं सामिकं कत्वा इतरे सब्बे तं पूजेत्वा तस्स वसे वत्तन्ति, यो तेसं अय्यो होति इतरे सब्बे तस्स दासा होन्ति, ते कतिपयसंवच्छरातिक्कमेन तस्स किञ्चि दोसं दिस्वा तं ततो ठानतो अपनेत्वा अञ्ञं ठपेन्ति, इति सो अय्यो हुत्वा दासो होति, इतरो दासो हुत्वा अय्यो होति, एवं ताव केचि ‘‘अय्यो हुत्वा दासो होति, दासो हुत्वा अय्यो होती’’ति एत्थ अत्थं वदन्ति. अट्ठकथायं पन पुरिमवसेनेव तमत्थं दस्सेतुं ‘‘ब्राह्मणो सभरियो’’तिआदि वुत्तं. वयप्पत्ते पुत्ते असतीति इदं वक्खमानस्स दारकस्स दायज्जसामिकभावस्स ताव दस्सनं. मातितो सुद्धोति एत्थ ¶ यो मातितो सुद्धत्ता अय्यो, पितितो असुद्धत्ता दासो होति, सो एव पितितो असुद्धत्ता दासो हुत्वा मातितो अय्यो होतीति जातिं सम्भेदेति. सोव सब्बेन सब्बं होतीति न सक्का वत्तुन्ति अपरे. को थामोति महन्ते लोकसन्निवासे अनमतग्गे अतीते काले इत्थीनं वा चित्ते अनवट्ठिते दासा दासा एव होन्ति, अय्या अय्या एव होन्तीति एत्थ को एकन्तिको सहेतुको अवस्सयो, तस्स साधको सिद्धन्तो, किं निदस्सनन्ति अत्थो.

४०४. सुक्कच्छेदकवादो नामाति ‘‘ब्राह्मणोव सुक्को वण्णो’’ति एवं वुत्तो सुक्कच्छेदकवारो नाम.

४०८. सब्बस्मिं अग्गिकिच्चं करोन्तेति एतेन यथा यतो कुतोचि निस्सयतो उप्पन्नो अग्गिउपादानसम्पन्नो अग्गिकिच्चं करोति, एवं यस्मिं कस्मिञ्चि दासकुले जातो उपनिस्सयसम्पन्नो सम्मापटिपज्जमानो संसारतो सुज्झति एवाति दस्सेति.

४०९. पादसिकवण्णोति अन्तराळवण्णो. एतेसन्ति खत्तियकुमारेन ब्राह्मणकञ्ञाय उप्पन्नपुत्तो, ब्राह्मणकुमारेन खत्तियकञ्ञाय उप्पन्नपुत्तोति एतेसं द्विन्नं माणवकानं. मतकभत्तेति मते उद्दिस्स कतभत्ते. थालिपाकेति कतमङ्गलभत्ते.

४१०. तुम्हेति जातिसामञ्ञतो माणवं ब्राह्मणेहि सद्धिं एकज्झं सङ्गण्हन्तो आह. को नु खोति अवंसिरो इसिवादो, तेसं ब्राह्मणीसीनं असामत्थियदस्सनेन जातिया अप्पमाणतं विभावेतुं गामदारकवेसेन उपगच्छि. तेन वुत्तं ‘‘गामण्डलरूपो विया’’ति. कोण्डदमकोति अदन्तदमको.

४११. जनेतीति ¶ जनिका जनेत्ति. जनको पिताति एत्थापि एसेव नयो. गन्धब्बपञ्हन्ति गन्धब्बस्स मातुकुच्छियं उप्पज्जनकसत्तस्स खत्तियभावादिपुच्छं. दब्बिगहणसिप्पम्पि एका विज्जा वेदितब्बा. तत्थ किर कुसलो यं किञ्चि आहारूपगपण्णपुप्फफलबीजं अन्तमसो एलालुकम्पि गहेत्वा भेसज्जेहि योजेत्वा पचन्तो सप्पिमधुफाणितेहि समानरसं कत्वा सम्पादेतुं ¶ सक्कोति, पुण्णोपि तादिसो, तेन ञातं त्वं दब्बिगहणसिप्पमत्तम्पि न जानासीति सम्बन्धो. सद्धोति कम्मफलसद्धाय सद्धो, पोथुज्जनिकेनेव रतनत्तयपसादेन पसन्नो. तेनेवाह – ‘‘उपासकं मं भवं…पे… सरणं गत’’न्ति.

अस्सलायनसुत्तवण्णनाय लीनत्थप्पकासना समत्ता.

४. घोटमुखसुत्तवण्णना

४१२. खेमिया ¶ नाम रञ्ञो देविया रोपितत्ता तं अम्बवनं खेमियम्बवनन्ति वुच्चतीति वदन्ति. धम्मिकोति धम्मयुत्तो सब्बसोव अधम्मं पहाय धम्मे ठितो. परिब्बजति पब्बजति एतेनाति परिब्बजो, घरावासतो निक्खमनपुब्बकं लिङ्गग्गहणवसेन सीलसमादानं. एत्थाति एतस्मिं परिब्बजे. सभावोति तं परिब्बाजनियं, तेहि तेहि परिब्बाजकेहि अनुट्ठातब्बो पटिपत्तिधम्मसङ्खातो सभावो. धम्मोव पमाणन्ति एतेन मयं अहिरिमना चित्तस्स यथाउपट्ठितं कथेम, तस्मा तं अप्पमाणं, यो पनेत्थ अवितथो धम्मो, तदेव पमाणं. अधिगतपटिपत्तिसङ्खातो सभावो अत्थि, तस्स तुम्हेहि तुम्हेहि बहुना नानासन्दस्सनादि कम्मेन इध भवितब्बं, बहुदेवेत्थ वत्तब्बन्ति अधिप्पायो.

४१४. सारत्तरत्ताति सारज्जनवसेन रत्ता, बहुलरागवसेन अभिरत्ताति अत्थो. अत्तना ञापेतब्बमत्थं अनुग्गहापेति बोधेतीति अनुग्गहो, ञापितकारणं, सह अनुग्गहेनाति सानुग्गहा. तेनाह ‘‘सकारणा’’ति. किं पन तं कारणं? इमस्साधिप्पायो ‘‘नत्थि धम्मिको परिब्बजो’’ति मया वुत्तो, अद्धा पनायस्मा उदेनो याथावतो धम्मिकं परिब्बजं मे आचिक्खतीति. तेनाह ‘‘वुत्तञ्हेत’’न्तिआदि.

४२१. सब्बमिदं थावरजङ्गमं पुरिसकतं, तस्मा यं किञ्चि कत्वा अत्ता पोसेतब्बो रक्खितब्बोति लोकायतनिस्सितो नीतिमग्गो घोटमुखकन्तो, तस्मा आह ‘‘एतस्स किर जाननसिप्पे’’तिआदि. सग्गे ¶ निब्बत्तो नाम नत्थि अकत्तब्बमेव करणतो. देवलोकपरियापन्नधनं मनुस्सानं उपकप्पपुञ्ञाभावतो पुब्बे अत्तना निहितधनं ‘‘असुके चा’’ति आचिक्खित्वा गतो. सेसं सुविञ्ञेय्यमेव.

घोटमुखसुत्तवण्णनाय लीनत्थप्पकासना समत्ता.

५. चङ्कीसुत्तवण्णना

४२२. तस्मिन्ति ¶ सालवने. उत्तरेन ओपासादन्ति ओपासादगामस्स उत्तरदिसायं. उत्तरेनाति एन-सद्दयोगेन हि ओपासादन्ति उपयोगवचनं. अज्झावसतीति एत्थ अधि-आ-सद्दानं अनत्थन्तरतं हदये कत्वा आह ‘‘वसती’’ति. इदानि तेसं अत्थविसेसभावितं दस्सेन्तो ‘‘अभिभवित्वा वा आवसती’’तिआदिमाह. एत्थाति ओपासादपदे. सत्तुस्सदन्तिआदीसु पन कथन्ति आह – ‘‘तस्स अनुप्पयोगत्ताव सेसपदेसू’’ति. उप-अनु-अधि-इति-एवं-पुब्बके वसनकिरिययाट्ठाने उपयोगवचनमेव पापुणातीति सद्दविदू इच्छन्तीति आह ‘‘लक्खणं सद्दसत्थतो परियेसितब्ब’’न्ति. तथा हि वुत्तं ‘‘उपसग्गवसेन पनेत्थ भुम्मत्थे उपयोगवचनं वेदितब्ब’’न्ति. उस्सदता नामेत्थ बहुलताति तं बहुलतं दस्सेतुं ‘‘बहुजन’’न्तिआदि वुत्तं. आवज्जित्वाति परिक्खिपित्वा.

रञ्ञा विय भुञ्जितब्बन्ति वा राजभोग्गं. रञ्ञो दायभूतन्ति कुलपरम्पराय भोग्गभावेन रञ्ञा लद्धदायभूतं. तेनाह ‘‘दायज्जन्ति अत्थो’’ति. राजनीहारेन परिभुञ्जितब्बतो उद्धं परिभोगलाभस्स सेट्ठदेय्यता नाम नत्थीति आह – ‘‘छत्तं उस्सापेत्वा राजसङ्खेपेन परिभुञ्जितब्ब’’न्ति. तित्थपब्बतादीसूति नदीतित्थपब्बतपादगामद्वारअटवीमुखादीसु. निस्सट्ठपरिच्चत्तन्ति मुत्तचागवसेन परिच्चत्तं कत्वा. एतेसं ब्राह्मणगहपतिकानं.

४२३. ति सन्निपतिता. यो कोचि विञ्ञूनं इच्छितो पञ्हो, तस्स पुच्छितस्स याथावतो कथनसमत्थो पुच्छितपञ्हब्याकरणसमत्थो.कुलापदेसादिना महती मत्ता एतस्साति महामत्तो.

४२४. तेति ¶ ‘‘नानावेरज्जका’’ति वुत्तब्राह्मणा. ‘‘उभतो सुजातो’’ति (दी. नि. टी. १.३०३; अ. नि. टी. ३.५.१३४) एत्तके वुत्ते येहि केहिचि द्वीहि भागेहि सुजातता विञ्ञायेय्य, सुजातसद्दो च ‘‘सुजातो चारुदस्सनो’’तिआदीसु (म. नि. २.३९९; सु. नि. ५५३; थेरगा. ८१८) आरोहपरिणाहसम्पत्तिपरियायोति जातिवसेनेव सुजाततं विभावेतुं ‘‘मातितो च पितितो चा’’ति वुत्तं. अनोरसपुत्तवसेनपि लोके मातुपितुसमञ्ञा दिस्सति, इध पनस्स ओरसपुत्तवसेनेव इच्छीयतीति दस्सेतुं ‘‘संसुद्धगहणीको’’ति ¶ वुत्तं. पिता च माता च पितरो, पितूनं पितरो पितामहा, तेसं युगो पितामहयुगो, तस्मा याव सत्तमा पितामहयुगाति एवमेत्थ अत्थो दट्ठब्बो. युगसद्दो चेत्थ एकसेसनयेन दट्ठब्बो ‘‘युगो च युगो च युगा’’ति. एवञ्हि तत्थ तत्थ द्विन्नं गहितमेव होति. तेनाह – ‘‘ततो उद्धं सब्बेपि पुब्बपुरिसा पितामहग्गहणेनेव गहिता’’ति. पुरिसग्गहणञ्चेत्थ उक्कट्ठनिद्देसवसेन कतन्ति दट्ठब्बं. एवञ्हि ‘‘मातितो’’ति पाळिवचनं समत्थितं होति. अक्खित्तोति अप्पत्तखेपो. अनवक्खित्तोति सद्धथालिपाकादीसु न अवक्खित्तो. जातिवादेनाति हेतुम्हि करणवचनन्ति दस्सेतुं ‘‘केन कारणेना’’तिआदि वुत्तं. एत्थ च उभतो…पे… पितामहयुगाति एतेन ब्राह्मणस्स योनिदोसाभावो दस्सितो संसुद्धगहणिकभावकित्तनतो. अक्खित्तोति इमिना किरियापराधाभावो. किरियापराधेन हि सत्ता खेपं पापुणन्ति. अनुपकुट्ठोति इमिना अयुत्तसंसग्गाभावो. अयुत्तसंसग्गम्पि हि पटिच्च सत्ता अक्कोसं लभन्ति.

इस्सरोति अधिपतेय्यसंवत्तनियकम्मफलेन ईसनसीलो. सा पनस्स इस्सरता विभवसम्पत्तिपच्चया पाकटा जाताति अड्ढतापरियायभावेन वदन्तो ‘‘अड्ढोति इस्सरो’’ति आह. महन्तं धनमस्स भूमिगतञ्चेव वेहासट्ठञ्चाति महद्धनो. तस्साति तस्स तस्स. वदन्ति ‘‘अन्वयतो ब्यतिरेकतो च अनुपसङ्कमनकारणं कित्तेमा’’ति.

अधिकरूपोति विसिट्ठरूपो उत्तमसरीरो. दस्सनं अरहतीति दस्सनीयो. तेनाह ‘‘दस्सनयोग्गो’’ति. पसादं आवहतीति पासादिको. तेनाह ‘‘चित्तपसादजननतो’’ति. वण्णस्साति वण्णधातुया ¶ . सरीरन्ति सन्निवेसविसिट्ठो करचरणगीवासीसादि अवयवसमुदायो, सो च सण्ठानमुखेन गय्हतीति ‘‘परमाय वण्णपोक्खरतायाति परमाय…पे… सम्पत्तिया चा’’ति वुत्तं. सब्बवण्णेसु सुवण्णवण्णोव उत्तमोति वुत्तं ‘‘सेट्ठेन सुवण्णवण्णेन समन्नागतो’’ति. तथा हि बुद्धा चक्कवत्तिनो च सुवण्णवण्णाव होन्ति. ब्रह्मवच्छसीति उत्तमसरीराभो सुवण्णाभोति अत्थो. इममेव हि अत्थं सन्धायाह ‘‘महाब्रह्मुनो सरीरसदिसेन सरीरेन समन्नागतो’’ति. न ब्रह्मुजुगत्ततं. अखुद्दावकासो दस्सनायाति आरोहपरिणाहसम्पत्तिया अवयवपारिपूरिया च दस्सनाय ओकासो न खुद्दको. तेनाह ‘‘सब्बानेवा’’तिआदि.

यमनियमलक्खणं सीलमस्स अत्थीति सीलवा, तं पनस्स रत्तञ्ञुताय वुद्धं वड्ढितं सीलं अस्स अत्थीति वुद्धसीली, तेन च सब्बदा समायोगतो वुड्ढसीलेन समन्नागतो. पञ्चसीलमत्तमेव सन्धाय वदन्ति ततो परं सीलस्स तत्थ अभावतो तेसञ्च अजाननतो.

ठानकरणसम्पत्तिया ¶ सिक्खासम्पत्तिया च कत्थचिपि अनूनताय परिमण्डलपदानि ब्यञ्जनानि अक्खरानि एतिस्साति परिमण्डलपदब्यञ्जना. अथ वा पज्जति अत्थो एतेनाति पदं, नामादि, यथाधिप्पेतमत्थं ब्यञ्जेतीति ब्यञ्जनं वाक्यं, तेसं परिपुण्णताय परिमण्डलपदब्यञ्जना. अत्थञापनसाधनताय वाचाव करणन्ति वाक्करणं, उदाहरणघोसो. गुणपरिपुण्णभावेन तस्स ब्राह्मणस्स, तेन वा भासितब्बअत्थस्स. पूरे पुण्णभावे. पूरेति च पुरिमस्मिं अत्थे आधारे भुम्मं, दुतियस्मिं विसये. सुखुमालत्तनेनाति इमिना तस्सा वाचाय मुदुसण्हभावमाह. अपलिबुद्धाय पित्तसेम्हादीहि. सन्दिट्ठं सब्बं दस्सेत्वा विय एकदेसकथनं. विलम्बितं सणिकं चिरायित्वा कथनं. ‘‘सन्दिद्धविलम्बितादी’’ति वा पाठो. तत्थ सन्दिद्धं सन्देहजनकं. आदि-सद्देन खलितानुकड्ढितादिं सङ्गण्हाति. आदिमज्झपरियोसानं पाकटं कत्वाति इमिना चस्स वाचाय अत्थपारिपूरिं वदन्ति.

४२५. सदिसाति एकदेसेन सदिसा. न हि बुद्धानं गुणेहि सब्बथा सदिसा केचिपि गुणा अञ्ञेसु लब्भन्ति. इतरेति अत्तनो गुणेहि असदिसगुणे. इदन्ति इदं अत्थजातं. गोपदकन्ति गाविया पदे ठितउदकं. कुलपरियायेनाति कुलानुक्कमेन.

तत्थाति ¶ मञ्चके. सीहसेय्यं कप्पेसीति यथा राहु असुरिन्दो आयामतो वित्थारतो उब्बेधतो च भगवतो रूपकायस्स परिच्छेदं गहेतुं न सक्कोति, तथारूपं इद्धाभिसङ्खारं अभिसङ्खरोन्तो सीहसेय्यं कप्पेसि.

परिसुद्धट्ठेन अरियन्ति आह ‘‘अरियं उत्तमं परिसुद्ध’’न्ति. अनवज्जट्ठेन कुसलं, न सुखविपाकट्ठेन. कत्थचि चतुरासीति पाणसहस्सानि कत्थचि अपरिमाणापि देवमनुस्सा यस्मा चतुवीसतिया ठानेसु असङ्ख्येय्या अपरिमेय्या मग्गफलामतं पिवन्ति. कोटिसतसहस्सादिपरिमाणेनपि बहू एव. तस्मा अनुत्तराचारसिक्खापनवसेनेव भगवा बहूनं आचरियो. तेति कामरागतो अञ्ञे भगवता पहीनकिलेसे.

अपापपुरेक्खारोति अपापेहि पुरक्खरीयति, न वा पापं पुरतो करोतीतिपि अपापपुरेक्खारोति इममत्थं दस्सेतुं ‘‘अपापे नव लोकुत्तरधम्मे’’तिआदि वुत्तं. तत्थ अपापेति पापपपटिपक्खे पापरहिते च. ब्रह्मनि भवा, ब्रह्मुनो वा हिता गरुकरणादिना, ब्रह्मानं वा मग्गं जानातीति ब्रह्मञ्ञा, तस्सा ब्रह्मञ्ञाय पजाय.

तिरोरट्ठा ¶ तिरोजनपदाति एत्थ रज्जं रट्ठं राजन्ति राजानो एतेनाति कत्वा. तदेकदेसभूता पदेसा पन जनपदो जना पज्जन्ति एत्थ सुखजीविकं पापुणन्तीति कत्वा. पुच्छाय दोसं सल्लक्खेत्वाति सम्बन्धो. भगवा विस्सज्जेति तेसं उपनिस्सयसम्पत्तिं चिन्तेत्वाति अधिप्पायो. नवकाति आगन्तुकभावेन अम्हाकं अभिनवा.

४२६. ओपातेति निप्पातेतीति अत्थो. तथाभूतो च तत्थ पेसिता होतीति वुत्तं ‘‘पवेसेती’’ति. संपुरक्खरोन्तीति सक्कच्चं पुब्बङ्गमं करोन्ति. तेनाह ‘‘पुरतो कत्वा विचरन्ती’’ति.

४२७. सुद्दे बहि कत्वा रहो सासितब्बट्ठेन मन्ता एव तंतंअत्थपटिपत्तिहेतुताय पदन्ति मन्तपदं वेदं. तेनाह ‘‘वेदो’’ति. एवं किराति परम्परभावेन आभतन्ति आचरियपरम्पराय आभतं. पावचनसङ्खातसम्पत्तियाति ¶ पमुखवचनम्हि उदत्तादिसम्पत्तिया. सावित्तिआदीहि छन्दबन्धेहि वग्गबन्धेहि चाति गायत्तीआदीहि अज्झायानुवाकादीहि छन्दबन्धेहि च वग्गबन्धेहि च. सम्पादेत्वाति पदसम्पत्तिं अहापेत्वा. पवत्तारोति वा पावचनवसेन वत्तारो. सज्झायितन्ति गायनवसेन सज्झायितं, तं पन पदेनेव इच्छितन्ति आह ‘‘पदसम्पत्तिवसेना’’ति. अञ्ञेसं वुत्तन्ति पावचनवसेन अञ्ञेसं वुत्तं. रासिकतन्ति इरुवेदयजुवेदसामवेदादिवसेन, तत्थापि पच्चेकं मन्तब्रह्मादिवसेन अज्झायानुवाकादिवसेन रासिकतं. दिब्बेन चक्खुना ओलोकेत्वाति दिब्बचक्खुपरिभण्डेन यथाकम्मूपगञाणेन सत्तानं कम्मस्सकतं, पच्चक्खतो दस्सनट्ठेन दिब्बचक्खुसदिसेन पुब्बेनिवासञाणेन अतीतकप्पे ब्राह्मणानं मन्तज्झेनविधिञ्च ओलोकेत्वा. पावचनेन सह संसन्देत्वाति कस्सपसम्मासम्बुद्धस्स यं वचनं वट्टसन्निस्सितं, तेन सह अविरुद्धं कत्वा. न हि तेसं विवट्टसन्निस्सितो अत्थो पच्चक्खो होति. अपरापरेति अट्ठकादीहि अपरापरे, पच्छिमा ओक्काकराजकालादीसु उप्पन्ना. पक्खिपित्वाति अट्ठकादीहि गन्थितमन्तपदेसु किलेससन्निस्सितपदानं तत्थ तत्थ पदे पक्खिपनं कत्वा. विरुद्धे अकंसूति ब्राह्मणधम्मिकसुत्तादीसु (खु. नि. ब्राह्मणधम्मिकसुत्तं) आगतनयेनेव संकिलेसिकत्थदीपनतो पच्चनीकभूते अकंसु.

४२८. पटिपाटिया घटिताति पटिपाटिया सम्बद्धा. परम्परसंसत्ताति आदानियाय यट्ठिया संसत्ता. तेनाह ‘‘यट्ठिग्गाहकेन चक्खुमता’’ति. पुरिमस्साति मण्डलाकारेन ठिताय अन्धवेणिया सब्बपुरिमस्स हत्थेन सब्बपच्छिमस्स कच्छं गण्हापेत्वा. दिवसम्पीति अनेकदिवसम्पि ¶ . चक्खुस्स अनागतभवं ञत्वा यथाअक्कन्तट्ठानेयेव अनुपतित्वा अक्कमनंव सल्लक्खेत्वा ‘‘कहं चक्खुमा कहं मग्गो’’ति परिवेदित्वा.

पाळिआगतेसु द्वीसूति सद्धा अनुस्सवोति इमेसु द्वीसु. एवरूपेति यथा सद्धानुस्सवा, एवरूपे एव पच्चक्खगाहिनोति अत्थो. तयोति रुचिआकारपरिवितक्कदिट्ठिनिज्झानक्खन्तियो. भूतविपाकाति भूतत्थनिट्ठायका अधिप्पेतत्थसाधका, वुत्तविपरियायेन अभूतत्थविपाका वेदितब्बा ¶ . एत्थाति एतेसु सद्धायितादिवत्थूसु. एकंसेनेव निट्ठं गन्तुं नालं अनेकन्तिकत्ता सद्धादिग्गाहस्स. उपरि पुच्छाय मग्गं विवरित्वा ठपेसि सच्चानुरक्खाय ञातुकामताय उप्पादितत्ता. पस्सति हि भगवा – मया ‘‘सच्चमनुरक्खता…पे… निट्ठं गन्तु’’न्ति वुत्ते सच्चानुरक्खणं ञातुकामो माणवो ‘‘कित्तावता’’तिआदिना पुच्छिस्सति, तस्स तं विस्सज्जेत्वा सच्चानुबोधे पुच्छाय अवसरं दत्वा तस्स उपनिस्सये उपकारधम्मे कथेस्सामीति. तेन वुत्तं – ‘‘उपरि पुच्छाय मग्गं विवरित्वा ठपेसी’’ति.

४३०. अत्तानञ्ञेव सन्धाय वदति, यतो वुत्तं पाळियं – ‘‘यं खो पनायमायस्मा धम्मं देसेति, गम्भीरो सो धम्मो दुद्दसो दुरनुबोधो’’तिआदि. लुब्भन्तीति लोभनीया यथा ‘‘अपायगमनीया’’ति आह ‘‘लोभनीयेसु धम्मेसूति लोभधम्मेसू’’ति. यथा वा रूपादिधम्मा लोभनीया, एवं लोभोति आह ‘‘लोभनीयेसु धम्मेसूति लोभधम्मेसू’’ति. तेनेवाह – ‘‘यं लोके पियरूपं सातरूपं, एत्थेसा तण्हा उप्पज्जमाना उप्पज्जति, एत्थ निविसमाना निविसती’’ति (दी. नि. २.४००; म. नि. १.१३३; विभ. २०३). एसे नयो सेसपदद्वयेपि.

४३२. निवेसेतीति ठपेति पट्ठपेति. पयिरुपासतीति उपट्ठानवसेन उपगन्त्वा निसीदति. सुय्यति एतेनाति सोतन्ति आह ‘‘पसादसोत’’न्ति. तञ्हि सवनाय ओदहितब्बन्ति. धारेति सन्धारेति तत्थेव मनं ठपेति. अत्थतोति यथावुत्तस्स धम्मस्स अत्थतो. कारणतोति युत्तितो हेतुदाहरणेहि उपपत्तितो. ओलोकनन्ति एवमेतन्ति यथासभावतो पञ्ञाचक्खुना दट्ठब्बतं खमन्ति, तञ्च महन्तस्स मणिनो पज्जलन्तस्स विय आविकत्वा अत्थस्स चित्ते उपट्ठानन्ति आह ‘‘इधा’’तिआदि. कत्तुकम्यताछन्दोति कत्तुकामतासङ्खातो कुसलच्छन्दो. वायमतीतिआदितो चतुन्नम्पि वीरियानं वसेन वायामं परक्कमं करोति. मग्गपधानं पदहतीति मग्गावहं मग्गपरियापन्नञ्च सम्मप्पधानं पदहति, पदहनवसेन तं परिपूरेति. परमसच्चन्ति अमोघधम्मत्ता परमत्थसच्चं. सहजातनामकायेनाति मग्गपञ्ञासहजातनामकायेन ¶ . तदेवाति तदेव परमसच्चं निब्बानं. तेनेवाह – ‘‘सच्छिकिरियाभिसमयेन विभूतं पाकटं करोन्तो पस्सती’’ति.

४३३-४. मग्गानुबोधोति ¶ मग्गपटिपाटिया बोधो बुज्झनं, येसं किलेसानं समुच्छिन्दनवसेन मग्गप्पटिवेधो, तेसं पटिपस्सम्भनवसेन पवत्तमानं सामञ्ञफलं, मग्गेन पटिविद्धानि सच्चानि, परमत्थसच्चमेव वा अनुरूपबुज्झनन्ति अधिप्पायो. ‘‘सच्चानुप्पत्तीति फलसच्छिकिरिया’’ति वुत्तं. एवञ्हि सति हेट्ठा वुत्ता सद्धापटिलाभादयो द्वादस धम्मा सच्चानुप्पत्तिया उपकारा होन्ति, तस्मा वुत्तं ‘‘तेसंयेवाति हेट्ठा वुत्तानं द्वादसन्न’’न्ति. नायं ‘‘तेसंयेवा’’ति पदस्स अत्थो. सतिपि कुसलविपाकादिभावेन नानत्ते वत्थारम्मणभूमिकिच्चादिवसेन पन सदिसाति उपायतोव मग्गधम्मा आसेविता बहुलीकता फलभूताति वत्तब्बतं अरहतीति तंसदिसे तब्बोहारं कत्वा ‘‘तेसं मग्गसम्पयुत्तधम्मान’’न्ति वुत्तं. एवञ्हि आसेवनागहणं समत्थितं, न अञ्ञथा. न हि एकचित्तक्खणिकानं मग्गधम्मानं आसेवना, बहुलीकम्मं वा अत्थीति. तुलनाति विपस्सना. सा हि वुट्ठानगामिनिभूता मग्गप्पधानस्स बहुकारा तस्स अभावे मग्गप्पधानस्सेव अभावतो, एवं उस्साहो तुलनाय छन्दो उस्साहस्स बहुकारोतिआदिना हेट्ठिमस्स उपरिमूपकारतं सुविञ्ञेय्यमेवाति आह – ‘‘इमिना नयेन सब्बपदेसु अत्थो वेदितब्बो’’ति. सेसं सुविञ्ञेय्यमेव.

चङ्कीसुत्तवण्णनाय लीनत्थप्पकासना समत्ता.

६. एसुकारीसुत्तवण्णना

४३७. कोट्ठासन्ति ¶ मंसभागं. लग्गापेय्युन्ति न्हारुना वा वाकेन वा बन्धित्वा पुरिसस्स हत्थे वा वसनगेहे वा ओलम्बनवसेन बन्धेय्युं. सत्थधम्मन्ति सत्थिकेसु सत्थवाहेन पणेतब्बं आणाधम्मं. तस्स निक्खमनत्थन्ति तं मूलं सत्थिकेहि नित्थरणत्थं. पापं अस्साति परिचरन्तस्स पारिचरियाय अहितंव अस्स. तेनाह ‘‘न सेय्यो’’ति. उच्चकुलीनादयो दुतियवारादीहि वुच्चन्ति, इध उपधिविपत्तिसम्पत्तियो पापियादिपदेहि वुत्ताति अधिप्पायो. तेनाह – ‘‘पापियोति पापको लामको अत्तभावो अस्सा’’ति. सेय्यंसोति हितकोट्ठासो, हितसभावोति अत्थो. उच्चकुलीनताति करणत्थे पच्चत्तवचनन्ति आह ‘‘उच्चाकुलीनत्तेना’’ति. ‘‘वण्णो न खीयेथ तथागतस्सा’’तिआदीसु ¶ (दी. नि. अट्ठ. १.३०५; ३.१४१; म. नि. अट्ठ. २.४२५; उदा. ५३; अप. अट्ठ. २.७.२०; बु. वं. अट्ठ. ४.४; चरिया. अट्ठ. १.निदानकथा; २.पकिण्णककथा; दी. नि. टी. १.गन्थारम्भकथावण्णना; सं. नि. टी. १.२.१; अ. नि. टी. १.१.१; वजिर. टी. गन्थारम्भकथावण्णना; सारत्थ. टी. १.गन्थारम्भकथावण्णना; नेत्ति. टी. गन्थारम्भकथावण्णना; म. नि. टी. १.१) विय वण्णसद्दो इध पसंसापरियायोति आह ‘‘वेस्सोपि हि उळारवण्णो होती’’ति.

४४०. ‘‘निरवो पदसद्दो सोळारगोत्तस्स अकिण्णमत्तिकापत्तो तिट्ठेय्य असङ्गचारी’’ति वुत्तत्ता भिक्खा चरितब्बाव, अयं तेसं कुलधम्मोति अधिप्पायो. हरित्वाति अपनेत्वा. सत्तजीवो सत्तवाणिजको. गोपेति रक्खतीति गोपो, आरक्खाधिकारे नियुत्तो. असन्ति लूनन्ति तेनाति असितं, लवित्तं. विविधं भारं आभञ्जन्ति ओलम्बन्ति एत्थाति ब्याभङ्गी, काजं.

४४१. अनुस्सरतोति अनुस्सरणहेतु कुलवंसानुस्सरणक्खणे खत्तियोतिआदिना सङ्ख्यं गच्छति. तेनाह ‘‘पोराणे…पे… अनुस्सरियमाने’’ति. उच्चनीचत्तजाननत्थञ्च कुलववत्थानं कतं होतीति खत्तियादिकुलकम्मुना तेसं चतुन्नं वण्णानं सन्धनं जीविकं पञ्ञपेन्ति ब्राह्मणा, तथागतो पन लोकुत्तरधम्ममेव पुरिसस्स सन्धनं पञ्ञपेति तेन सत्तस्स लोकग्गभावसिद्धितो. सेसं सुविञ्ञेय्यमेव.

एसुकारीसुत्तवण्णना लीनत्थप्पकासना समत्ता.

७. धनञ्जानिसुत्तवण्णना

४४५. राजगहं ¶ परिक्खिपित्वा ठितपब्बतस्साति पण्डवपब्बतं सन्धायाह. राजगहनगरस्स दक्खिणदिसाभागे पब्बतस्स समीपे ठितो जनपदो दक्खिणागिरि. तण्डुलपुटकानं पालि एत्थाति तण्डुलपालि. तस्स ¶ किर द्वारसमीपे तण्डुलवाणिजा तण्डुलपसिब्बके विवरित्वा पटिपाटिया ठपेत्वा निसीदन्ति, तेनस्स ‘‘तण्डुलपालिद्वार’’न्ति समञ्ञा अहोसि. सब्बमेव सस्सं गण्हातीति दलिद्दकस्सकानं दिवसपरिब्बयमत्तमेव विस्सज्जेत्वा सब्बमेव आयतो निप्फन्नं धञ्ञं गण्हाति. मन्दसस्सानीति मन्दनिप्फत्तिकानि सस्सानि.

४४६. इमिना नयेनाति दासकम्मकरस्स निवासनभत्तवेत्तनानुप्पदानेन मङ्गलदिवसेसु धनवत्थालङ्कारानुप्पदानादिना च पोसेतब्बो. मित्तामच्चानं पियवचनअत्थचरियासमानत्ततादि मित्तामच्चकरणीयं कत्तब्बं, तथा ञातिसालोहितानं. तत्थ आवाहविवाहसम्बद्धेन ‘‘अम्हाकं इमे’’ति ञायन्तीति ञाती, मातापितादिसम्बद्धताय समानलोहिताति सालोहिता. सम्मा ददन्तेसुपि असज्जनतो नत्थि एतेसं तिथीति अतिथि, तेसं अत्तना समानपरिभोगवसेन अतिथिकरणीयं कातब्बं, अतिथिबलीति अत्थो. ञातकभूतपुब्बा पेत्तिविसयं उपगता पुब्बपेता, दक्खिणेय्येसु कालेन कालं दानं दत्वा तेसं उद्दिसनं पुब्बपेतकरणीयं, पेतबलीति अत्थो. गन्धपुप्फविलेपनजालाभत्तेहि कालेन कालं देवतानं पूजा देवताकरणीयं, देवताबलीति अत्थो, राजकिच्चकरणं उपट्ठानं राजकरणीयं. अयम्पि कायोति अत्तनो कायं सन्धाय वदति. इममत्थं सन्धायाह ‘‘इमिना नयेन अत्थो वेदितब्बो’’ति.

४४७. पञ्च दुस्सील्यकम्मानीति निच्चसीलपटिपक्खधम्मा. दस अकुसलकम्मपथधम्मा दस दुस्सील्यकम्मानि. अधम्मचारी एव विसमचारी कायविसमादिचरणतोति विसमचारीपदस्स अत्थो विसुं न वुत्तो.

४४८-४५३. ओसरन्ति ¶ अपसक्कन्ति, खीयन्तीति अत्थो. तेनाह ‘‘परिहायन्ती’’ति. अभिसरन्तीति अभिवड्ढनवसेन पवत्तन्ति. तेनाह ‘‘वड्ढन्ती’’ति. तत्राति ब्रह्मलोके. अस्साति ब्रह्मलोके उप्पन्नस्स धनञ्जानिस्स. ततो पट्ठायाति यदा भगवता ‘‘एसो, भिक्खवे, सारिपुत्तो’’तिआदि वुत्तं, ततो पट्ठाय. चतुसच्चविनिमुत्तन्ति निद्धारेत्वा विभजित्वा वुच्चमानेहि सच्चेहि विमुत्तं. अत्थतो पन ततो पुब्बेपि सच्चविमुत्तं कथं न कथेसियेव सच्चविमुत्तस्स निय्यानस्स अभावतो.

धनञ्जानिसुत्तवण्णनाय लीनत्थप्पकासना समत्ता.

८. वासेट्ठसुत्तवण्णना

४५४. जातिं ¶ ¶ सोधेतुकामा होन्तीति सहवासीनं ब्राह्मणानं किरिया पराधेन वा असारुप्पत्तेन वा जातिया उपक्किलेसं आसङ्काय तं सोधेतुकामा होन्ति. मन्ते सोधेतुकामा होन्तीति मन्तवचने आचरियमतिचोदनाय अञ्ञेन वाक्येन केनचि कारणेन संसये उप्पन्ने तं सोधेतुकामा होन्ति. अन्तराति वेमज्झे, अञ्ञत्थेवा अन्तरासद्दोति तस्स अञ्ञा कथाति वचनं अवगन्तब्बं. खन्तीमेत्तानुद्दयादिगुणसम्पन्नो एव ‘‘सीलवाति गुणवा’’तिआह. तेहि सीलस्स विस्सज्जनकालेपि ‘‘सीलवा’’ति वुच्चति. सम्पन्नसीलत्ता वा तेहि समन्नागतो एव होतीति आह ‘‘सीलवाति गुणवा’’ति. आचारसम्पन्नोति साधु आचारवत्तो.

४५५. सिक्खिताति तेविज्जानं सिक्खिता तुम्हे, न दानि तुम्हेहि किञ्चि कत्तब्बं अत्थीति अत्थो. पटिञ्ञाताति पटिजानित्वा ठिता.

वेदत्तयसङ्खाता तिस्सो विज्जा अज्झयन्तीति तेविज्जा. तेनाह ‘‘तिवेदान’’न्ति. तयो वेदे अणन्ति अज्झयन्तीति ब्राह्मणा, तेसं. यं एकं पदम्पि अक्खातं, तं अत्थतो ब्यञ्जनतो च केवलिनो अधियिनो अप्पपयोगेन. निट्ठागतम्हाति निप्फत्तिं गता अम्हा तेविज्जाय सकसमयस्स कथने.

मनोकम्मतो हि वत्तसम्पदातिकारणूपचारेनायमत्थो वुत्तोति आह – ‘‘तेन समन्नागतो हि आचारसम्पन्नो होती’’ति.

खयातीतन्ति वड्ढिपक्खे ठितन्ति अत्थो. सुक्कपक्खपाटिपदतो पट्ठाय हि चन्दो वड्ढतीति वुच्चति, न खीयतीति. वन्दमाना जना नमक्कारं करोन्ति.

अत्थदस्सनेनाति विवरणेन दस्सनपरिणायकट्ठेन लोकस्स चक्खु हुत्वा समुप्पन्नं.

४५६. तिट्ठतु ताव ब्राह्मणचिन्ताति – ‘‘किं जातिया ब्राह्मणो होति उदाहु भवति कम्मुना’’ति अयं ब्राह्मणविचारो ताव तिट्ठतु ¶ . जातिदस्सनत्थं तिणरुक्खकीटपटङ्गतो पट्ठाय लोके ¶ जातिविभङ्गं वित्थारतो कथेस्सामीति तेसं चित्तसम्पहंसनत्थं देसेतब्बमत्थं पटिजानाति. तत्थ अञ्ञमञ्ञा हि जातियोति इदं कारणवचनं, यस्मा इमा जातियो नाम अञ्ञमञ्ञं विसिट्ठा, तस्मा जातिविभङ्गं ब्याकरिस्सामीति.

यस्मा इध उपादिन्नकजाति ब्याकातब्बभावेन आगता, तस्सा पन निदस्सनभावेन इतरा, तस्मा ‘‘जातिविभङ्गं पाणान’’न्ति पाळियं वुत्तं. तेसं तेसं पाणानं जातियोति अत्थो. एवन्ति निदस्सनं कथेत्वा निदस्सितब्बे कथियमाने. तस्साति वासेट्ठस्स. कामं ‘‘तेसं वोहं ब्यक्खिस्स’’न्ति उभोपि माणवे निस्साय देसना आगता, तथापि तत्थ तत्थ ‘‘एवं, वासेट्ठ, जानाही’’तिआदिना वासेट्ठमेव आलपन्तो भगवा तमेव इमिना नियामेन पमुखं अकासि. तेन वुत्तं ‘‘तस्साति वासेट्ठस्सा’’ति. जातिभेदो जातिविसेसो, जातिया भेदो पाकटो भविस्सति निदस्सनेन विभूतभावं आपादितेन पटिञ्ञातस्स अत्थस्स विभूतभावापत्तितो. आम न वट्टतीति कम्मनानताय एव उपादिन्ननानताय पटिक्खेपपदमेतं, न बीजनानताय अनुपादिन्ननानताय पटिक्खेपपदन्ति दस्सेतुं ‘‘कम्मं ही’’तिआदि वुत्तं. तस्सत्थो – तंतंयोनिखिपनमत्तं कम्मस्स सामत्थियं, तंतंयोनिनियता पन ये वण्णविसेसा, ते तंतंयोनिसिद्धियाव सिद्धा होन्तीति तं पन योनिखिपनकम्मं तंतंयोनिविसिट्ठ-विसेसाभिभूताय पयोगनिप्फत्तिया, असंमुच्छिताय एव वा पच्चयभूताय भवपत्थनाय अभिसङ्खतमेवाति विञ्ञातब्बपच्चयविसेसेन विना फलविसेसाभावतो एतं समीहितकम्मं पत्थनादीहि च भिन्नसत्तितं विसिट्ठसामत्थियं वा आपज्जित्वा चक्खुन्द्रियादिविसिट्ठफलनिब्बत्तकं जायति, एवं योनिखिपनतंयोनिनियतविसेसावहता होतीति. थेरेन हि बीजनानता विय कम्मनानतापि उपादिन्नकनानताय सिया नु खो पच्चयोति चोदनं पटिक्खिपित्वा पच्चयविसेसविसिट्ठा कम्मनानता पन पच्चयोति निच्छितन्ति दट्ठब्बं.

नानावण्णाति नानप्पकारवण्णा. तालनाळिकेरादीनं लोके अभिञ्ञाततिणजातिभावतो विसेसेन गय्हति अभिञ्ञातसोतनयेन. जातिया ब्राह्मणोवाति अट्ठानपयुत्तो एव-सद्दो, जातियाव ¶ ब्राह्मणो भवेय्याति योजना. न च गय्हतीति तिणरुक्खादीसु विय ब्राह्मणेसु जातिनियतस्स लिङ्गस्स अनुपलब्भनतो, पिवनभुञ्जनकथनहसनादिकिरियाय ब्राह्मणभावेन एकन्तिकलिङ्गनियताय मन्तज्झेनादिं विना अनुपलब्भनतो च. वचीभेदेनेवाति आहच्चवचनेनेव.

कीटे पटङ्गेतिआदीसु जातिनानता लब्भति अञ्ञमञ्ञलिङ्गविसिट्ठतादस्सना. कुन्था कीटका ¶ , खज्जखादका किपिल्लिका. उप्पतित्वाति उड्डेत्वा उड्डेत्वा. पटभावं गच्छन्तीति वा पटङ्गा, न खुद्दकपाणका कीटा नाम. तेसम्पि कीटकानं.

काळकादयोति कलन्दकादयो.

उदरंयेव नेसं पादा उदरेनेव सम्पज्जनतो.

सञ्ञापुब्बको विधि अनिच्चोति दस्सेन्तो ‘‘उदके’’ति आह यथा ‘‘वीरस्स भावो वीरिय’’न्ति.

पत्तसमुदाये पक्खसद्दोति ‘‘पत्तेहि यन्ती’’ति वुत्तं. न हि अवयवब्यतिरेकेन समुदायो अत्थि.

सङ्खेपेन वुत्तो ‘‘जातिवसेन नाना’’तिआदिना. एत्थ पदत्थे दुब्बिञ्ञेय्यं नत्थीति सम्बन्धमत्तं दस्सेतुं ‘‘तत्रायं योजना’’तिआदि वुत्तं. ‘‘न हि ब्राह्मणानं एदिसं सीसं होति, खत्तियानं एदिसन्ति नियमो अत्थि यथा हत्थिअस्समिगादीन’’न्ति इदमेव वाक्यं सब्बत्थ नेतब्बं. तं संङ्खिपित्वा दस्सेन्तो ‘‘इमिना नयेन सब्बं योजेतब्ब’’न्ति आह.

तस्साति यथावुत्तनिगमनवचनस्स अयं योजना इदानि वुच्चमाना योजना वेदितब्बा.

४५७. वोकारन्ति वोकरणं, येन विसिट्ठताय न वोकरीयति जातिभेदोति अत्थो. तेनाह ‘‘नानत्त’’न्ति.

गोरक्खादिउपजीवनेन आजीवविपन्नो, हिंसादिना सीलविपन्नो, निक्खित्तवत्ततादिना आचारविपन्नोति. सामञ्ञजोतना विसेसे निविट्ठा होतीति आह ‘‘गोरक्खन्ति खेत्तरक्ख’’न्ति. ‘‘गोति हि पथविया नाम’’न्ति. तेहि तेहि उपायेहि सिक्खितब्बट्ठेन सिप्पं, तत्थ कोसल्लं. परेसं ¶ ईसनट्ठेन हिंसनट्ठेन इस्सो, सो अस्स अत्थीति इस्सो योधाजीविको, इस्सस्स कम्मं पहरणं, उसुं सत्तिञ्च निस्साय पवत्ता जीविका इस्सत्तं. तेनाह ‘‘आवुधजीविक’’न्ति. यं निस्साय अस्स जीविका, तदेव दस्सेतुं ‘‘उसुञ्च सत्तिञ्चा’’ति वुत्तं.

ब्रह्मं ¶ वुच्चति वेदो, तं अणति जानातीति ब्राह्मणो, जाननञ्च पोराणेहि ब्राह्मणेहि विहितनियामेन ब्राह्मणेहि कतोपसमेन अनुट्ठानतपेन यथा ‘‘आजीवसीलाचारविपन्नो नत्थी’’ति ब्राह्मणधम्मिकेहि लोकियपण्डितेहि च सम्पटिच्छितो, तथा पटिपज्जनमेवाति आह ‘‘एवं ब्राह्मणसमयेन…पे… साधेत्वा’’ति. एवं सन्तेति एवं आजीवसीलाचारविपन्नस्स अब्राह्मणभावे सति न जातिया ब्राह्मणो होति, गुणेहि पन आजीवसीलाचारसम्पत्तिसङ्खातेहि ब्राह्मणो होति, तस्मा गुणानंयेव ब्राह्मणभावकरणतो चतुवण्णविभागे यत्थ कत्थचि कुले जातो यो सीलादिगुणसम्पन्नताय गुणवा, सो वुत्तलक्खणेन निप्परियायतो बाहितपापताय ब्राह्मणोति अयमेत्थ ब्राह्मणभावे ञायोति, एवं ञायं अत्थतो आपन्नं कत्वा. नन्ति तमेव यथावुत्तं ञायं. यो ब्राह्मणस्स संवण्णितायाति मातुया उभतोसुजाततादिकुलवण्णेन संवण्णिताय पसत्थाय यथारूपाय ब्राह्मणस्स माता भवितुं युत्ता, तथारूपाय मातरिसम्भूतो. एतेन चतुन्नं योनीनं यत्थ कत्थचि विसेसनिट्ठा कता. तेनाह ‘‘तत्रापि विसेसेना’’ति. एवं सामञ्ञतो विसेसनिट्ठावसेन ‘‘योनिजं मत्तिसम्भव’’न्ति पदस्स अत्थं वत्वा इदानि सामञ्ञजोतनं अनादियित्वा विसेसजोतनावसेनेव अत्थं वत्तुं ‘‘याचाय’’न्तिआदि वुत्तं. परिसुद्धउप्पत्तिमग्गसङ्खाता योनि वुत्ताति अनुपक्कुट्ठभावेन परिसुद्धउप्पत्तिमग्गसङ्खाता या चायं योनि वुत्ताति सम्बन्धो. ततोपि जातसम्भूतत्ताति ततो योनितो जातत्ता मातापेत्तिसम्पत्तितो सम्भूतत्ता.

विसिट्ठत्ताति समुदायभूता मनुस्सा रागादिना विसिट्ठत्ता. रागादिना सह किञ्चनेनाति सकिञ्चनो. तथेव रागादिसङ्खातेन पलिबोधनट्ठेन सह पलिबोधेनाति सपलिबोधो. सब्बगहणपटिनिस्सग्गेनाति उपादानसङ्खातस्स सब्बस्स गहणस्स पटिनिस्सज्जनेन. यस्मा बाहितपापो अत्तनो सन्तानतो बहिकतपापो, तस्मा तमहं ब्रूमि ब्राह्मणन्ति ¶ अत्थो वत्तब्बो. एवरूपो एतिस्सा कथाय उपदेसो नानप्पकारतो विभत्तो, तस्मा तत्थ तत्थ वुत्तनयेनेव वेदितब्बो.

४५८. गहितदण्डेसूति परेसं दण्डेन विहेठनं अनिधाय आदिन्नदण्डेसु.

४५९. किञ्चि गहणन्ति तण्हागाहादीसु किञ्चि गाहं.

येन कामभवेन मानुसकेहि पञ्चहि कामगुणेहि युञ्जति, तं मानुसकं योगं. ‘‘मानुसकं ¶ योग’’न्ति एत्थ च एकदेसं गहेत्वा वुत्तं, एस नयो ‘‘दिब्बयोग’’न्ति एत्थापि. सब्बयोगविसंयुत्तन्ति पदद्वयेन वुत्तेहि सब्बकिलेसयोगेहि विप्पयुत्तं.

रतिन्ति अभिरतिं आसत्तिं. कुसलभावनायाति कायभावनादि कुसलधम्मभावनाय उक्कण्ठितं. वीरियवन्तन्ति वीरियसब्भावेन वीरं निद्दिसति, वीरभावो हि वीरियन्ति.

सुन्दरं ठानन्ति निब्बानं. सुन्दराय पटिपत्तिया अरियपटिपत्तिया.

निब्बत्तिन्ति परियोसानं. अतीतेति अतीतकोट्ठासे. किञ्चनकारकोति पलिबोधहेतुभूतो.

असेक्खे सीलक्खन्धादिके महन्ते गुणे. पञ्चन्नं मारानं विजितत्ता विजितविजयं.

४६०. इदं अजानन्ताति ‘‘जातिया ब्राह्मणो’’ति इदं लोकसमञ्ञामत्तन्ति अजानन्ता. ये ब्राह्मणेसु नामगोत्तं नाम ततियं दिट्ठाभिनिवेसं जनेन्ति, साव नेसं दिट्ठि. कतं अभिसङ्खतन्ति परिकप्पनवसेनेव कतं ठपितं तदुपचितं, न हेतुपच्चयसमायोगेन. समुच्चाति सम्मुतिया. का पन सा सम्मुतीति आह ‘‘समञ्ञाया’’ति, लोकसमञ्ञातेनाति अत्थो. सम्मा पन परमत्थतो अजानन्तानं नामगोत्तं एवं कप्पेतीति आह ‘‘नो चे’’तिआदि. तं पन असन्तम्पि परमत्थतो सन्ततायेव अभिनिविसन्ति, तेसमयं दोसोति दस्सेतुं ‘‘एवं पकप्पित’’न्तिआदि वुत्तं. तेनाह भगवा – ‘‘जनपदनिरुत्तिं नाभिनिवेसेय्या’’ति ¶ (म. नि. ३.३३१). अजानन्ता नोति एत्थ नो-सद्दो अवधारणत्थो – ‘‘न नो समं अत्थि तथागतेना’’तिआदीसु (खु. पा. ६.३) वियाति आह ‘‘अजानन्ताव एवं वदन्ती’’ति.

निप्परियायन्ति भावनपुंसकनिद्देसो, निप्परियायेन उजुकमेवाति अत्थो, न पुब्बे विय ‘‘यो हि कोची’’ति परियायवसेन. ‘‘न जच्चा’’ति गाथाय पुब्बद्धेन जातिवादं पटिक्खिपन्तो पच्छिमद्धेन कम्मवादं पतिट्ठपेन्तो. तत्थाति तिस्सं गाथायं. उपड्ढगाथाय वित्थारणत्थन्ति उपड्ढगाथाय अत्थं वित्थारेतुं ‘‘कस्सको कम्मुना’’ति वुत्तं. तत्थ पुरिमाय चतूहि पादेहि, पच्छिमे द्वीहि द्विन्नम्पि साधारणतो अत्थो वित्थारितो. तत्थ कसिकम्मादीति आदि-सद्देन सिप्पकम्मवाणिजादि सङ्गहो.

पटिच्चसमुप्पादपधानवचनविञ्ञेय्यो ¶ पच्चयो पटिच्चसमुप्पादसद्दस्स अत्थो पच्चयुप्पन्नापेक्खाय होतीति आह – ‘‘इमिना पच्चयेन एतं होती’’ति. यं पनेत्थ वत्तब्बं, तं विसुद्धिमग्गे (विसुद्धि. २.५७०) तंसंवण्णनायञ्च (विसुद्धि. महाटी. २.५७०) वुत्तनयेन वेदितब्बं. सम्मानावमानारहकुलेति सम्मानारहे खत्तियादिकुले, अवमानारहे चण्डालादिकुले कम्मवसेन उपपत्ति होति कम्मस्स विपच्चमानोकासकरताय विना तादिसाय उच्चनीचकुलनिब्बत्तिया अभावतो. अड्ढदलिद्दतादि अञ्ञापि हीनपणीतता.

कम्मुनाति चेत्थ यथा लोकपजासत्तसद्देहि एको एवत्थो वुत्तो, एवं सेससद्देहिपि, अधिप्पायविसेसो पन तत्थ अत्थीति दस्सेतुं ‘‘पुरिमपदेन चेत्था’’तिआदि वुत्तं. नायं लोको ब्रह्मनिम्मितो कम्मेन उप्पज्जनतो. न हि सन्निहितकारणानं फलानं अञ्ञेन उप्पत्तिदिट्ठि युज्जति. तेनाह ‘‘दिट्ठिया पटिसेधो वेदितब्बो’’ति. यं पनेत्थ वत्तब्बं तं विसुद्धिमग्गसंवण्णनादीसुवुत्तनयेन वेदितब्बं. तथा लोकस्स पठमुप्पत्ति न ब्रह्मुनाति ‘‘कम्मुना हि तासु तासू’’तिआदि वुत्तं. ततियेन ‘‘अयं लोको आदितो पभुति पभवकम्मुना वत्तती’’ति वुत्तमत्थं निगमेति.वुत्तस्सेवत्थस्स सूचनञ्हि निगमनं. तं पन नियमत्थं होतीति आह ‘‘कम्मेनेव बद्धा हुत्वा पवत्तन्ति, न अञ्ञथा’’ति ¶ . चतुत्थेन पदेन. यायतोति गच्छतो. निब्बत्ततोति निब्बत्तन्तस्स. पवत्ततोति पवत्तन्तस्स.

धुतधम्मा विसेसतो तण्हाय सन्तत्तवसेन वत्तन्तीति आह ‘‘तपेनाति धुतङ्गतपेना’’ति. मेथुनविरति विसेसतो ब्राह्मणानं ब्रह्मचरियन्ति सा इध ब्रह्मचरियेनाति अधिप्पेताति आह ‘‘ब्रह्मचरियेनाति मेथुनविरतिया’’ति. एतेनाति इमिना ‘‘तपेना’’तिआदीहि चतूहि पदेहि वुत्तेन. सेट्ठेनाति उत्तमेन. संकिलेसविसुद्धिया परिसुद्धेन. ब्रह्मन्ति ब्रह्मभावं सेट्ठभावं. सो पनेत्थ अत्थतो ब्राह्मणभावोति आह ‘‘ब्राह्मणभावं आवहती’’ति.

ब्रह्मा च सक्को चाति सक्कगरुकानं सक्को सक्केनपि गरुकातब्बतो, ब्रह्मगरुकानं ब्रह्मा ब्रह्मुनापि गरुकातब्बतो. विजानतन्ति परमत्थब्राह्मणस्स विसेसं जानन्तानं विञ्ञूनं. अविञ्ञुनो हि अप्पमाणं. तेनाह – ‘‘पण्डितान’’न्ति. सेसं सुविञ्ञेय्यमेव.

वासेट्ठसुत्तवण्णनाय लीनत्थप्पकासना समत्ता.

९. सुभसुत्तवण्णना

४६२. तुदिसञ्ञातो ¶ गामो निगमो एतस्साति तोदेय्यो, तस्स अत्तजो तोदेय्यपुत्तोति आह ‘‘तुदिगामा’’तिआदि. आराधकोति संराधको. धम्मनिसन्ति यस्मा सम्पादनेन परिपूरणेन इच्छिता, तस्मा वुत्तं ‘‘सम्पादको परिपूरको’’ति. ञायति निच्छयेन गमेति निब्बानं, तं वा ञायति पटिविज्झीयति एतेनाति ञायो, ततो एतस्स सम्पादकहेतुभावतो ञायो धम्मो अरियमग्गो तं ञायं धम्मं. तेनाह ‘‘कारणधम्म’’न्ति. अनवज्जन्ति अवज्जपटिपक्खं.

४६३. वट्टचारकतो निय्यातीति निय्यानिकं ईकारस्स रस्सत्तं य-कारस्स च क-कारं कत्वा. निय्याने वा नियुत्तं, निय्यानं सीलन्ति वा निय्यानिकं, तप्पटिपक्खतो अनिय्यानिकं. सा पन अत्थतो अकुसलकिरियाति आह ‘‘अकुसलपटिपद’’न्ति.

बहुभाववाचको ¶ इध महासद्दो ‘‘महाजनो’’तिआदीसुवियाति आह ‘‘महन्तेहि बहूही’’ति. अत्थोति पयोजनं. महन्तानीति बहुलानि. किच्चानीति कातब्बानि. अधिकरणानीति अधिकारजीविकारूपानि. घरावासकम्ममेव पञ्चबलिकरणदसअत्थट्ठानभावतो लोकयात्राय च सम्पवत्तिट्ठानभावतो जीवितवुत्तिया वा हेतुभावतो घरावासकम्मट्ठानं.

‘‘अप्पकेनपि मेधावी, पाभतेन विचक्खणो;

समुट्ठापेति अत्तानं, अणुं अग्गिंव सन्धम’’न्ति. (जा. १.१.४);

गाथाय वुत्तनयेन चूळन्तेवासिकस्स विय.

४६४. अयोनिसो पवत्तितं वाणिज्जकम्मं विय अपायभूतं कसिकम्मं निदस्सनभावे ठपेत्वा अयोनिसोमनसिकरणवसेन पवत्तं घरावासकिच्चं सन्धायाह – ‘‘यथा कसि…पे… एवं घरावासकम्मट्ठानम्पी’’ति. ब्राह्मणभत्तो अहोसीति सो किर बहू ब्राह्मणे धनं दत्वा यञ्ञं कारेसि. उपरीति ‘‘उपरि उपट्ठातीति वदेही’’ति ब्राह्मणेहि अत्तनो समयेन आचिक्खापितोपि यथा उपट्ठितमेव कथेत्वा कालं कत्वा निरये निब्बत्तो, अथ ब्राह्मणा – ‘‘इमिना ¶ अम्हाकं यञ्ञे दोसो दिन्नो’’ति कुज्झित्वा तस्स कळेवरं सुसानं नेतुं नादंसु. अथस्स ञातकेहि सहस्से दिन्ने तं सहस्सं गहेत्वा गेहतो नीहरितुं अदंसु. कस्सपसम्मासम्बुद्धकाले छत्तिंस इत्थियो ‘‘एका वत्थं अदासि, एका गन्धं, एका सुमनमाल’’न्तिआदिना तं तं दानमयं पुञ्ञं कत्वा आयुपरियोसाने तावतिंसभवने सक्कस्स देवरञ्ञो परिचारिका हुत्वा निब्बत्तिंसु सहस्सअच्छरापरिवारिका, सक्कस्स देवरञ्ञो वेजयन्तरथं पेसेत्वा पक्कोसापितेन गुत्तिलाचरियभूतेन महाबोधिसत्तेन पुच्छिता तं तं अत्तना कतं पुञ्ञं ब्याकरिंसु. तं सन्धाय वुत्तं ‘‘सकलाय गुत्तिलविमानकथाय दीपेतब्ब’’न्ति. वणिज्जकम्मट्ठानं विपज्जमानन्ति एत्थ तस्स विपज्जमानाकारो हेट्ठा वुत्तो. एवं पब्बज्जकम्मट्ठानम्पि विपज्जमानं अप्पफलं होतीति आनेत्वा सम्बन्धो. सीलेसु अपरिपूरकारिनोतिआदि तस्स विपज्जनाकारदस्सनं. झानादिसुखन्ति एत्थ आदि-सद्देन अभिञ्ञाविपस्सनादिसुखस्स विय सब्रह्मचारीहि सद्धिं सीलसम्पदादिसुखस्स ¶ सङ्गहो दट्ठब्बो. अरहत्तम्पि पापुणाति पगेव सेक्खपुथुज्जनसम्पत्तियोति अधिप्पायो.

चागसीसेनाति पधानभूतेन चागेन दानेन तं अवस्सयं कत्वा. एत्थ ते न कोचि अफासुकभावोति. उजुकं कत्वा अविरुद्धं कत्वा, सम्पयोजेत्वाति अत्थो. तपचरियन्ति अग्गिपरिचरणं, तपचरियञ्च ब्रह्मचरियग्गहणा दुट्ठुल्लभावतो.

४६६. अजाननभावन्ति असब्बञ्ञुभावं. भगवतो पन सब्बञ्ञुभावो सदेवके लोके जलतले पक्खित्ततेलं विय पत्थरित्वा ठितो, न मे इदं पतिरूपं, ततो परिवत्तिस्सामीति ‘‘ब्राह्मणो, भो, गोतमा’’तिआदिमाह. पच्चाहरितुं पटिपक्खेन अपहरितुं. सेतपोक्खरसदिसोति पुण्डरीकपत्तसदिसवण्णो. सुवट्टिताति वट्टभावयुत्तट्ठाने सुवट्टा. नामकंयेवाति नाममत्तमेव वचनमत्तमेव. तथाभूतानं भावस्सपि अभावेन निहीनं नाम होति, नाम-सद्दो निहीनपरियायो. तेनाह – ‘‘लामकंयेवा’’ति.

४६७. कतमा वाचा तेसं सेय्योति तेसं चङ्कियादीनं ब्राह्मणमहासालानं वुच्चमानविभागासु वाचासु कतमा वाचा सेय्योति. ‘‘सेय्या’’ति लिङ्गविपल्लासेन वुत्तं. सम्मुतियाति अविलङ्घितसाधुमरियादाय लोकसम्मुतिया. तेनाह ‘‘लोकवोहारेना’’ति. मन्ताति मन्तासङ्खाताय पञ्ञाय मन्तेत्वा जानित्वा. तेनाह ‘‘तुलयित्वा’’ति. अत्थसंहितन्ति हेतुसञ्हितं. तं पन एकंसतो युत्तियुत्तं होतीति आह – ‘‘कारणनिस्सित’’न्ति. आवुतोतिआदीसु आदितो अभिमुखं ञाणगतिया विबन्धनेन आवुतो, आवरियेन विसेसतो ञाणगतिया ¶ निबन्धनेन निवुतो, एवं ओफुटो पलिगुण्ठितो. परियोनद्धोति समन्ततो ओनद्धो छादितो. तेनाह ‘‘पलिवेठितो’’ति.

४६८. सचे एतं कारणमत्थीति ‘‘निस्सट्ठतिणकट्ठुपादानो अग्गि जलती’’ति एतं कारणं सचे अत्थि यदि सिया, सो अपरो तिणकट्ठुपादानो अग्गि यदि भवेय्य. सदोसो सादीनवो सपरिक्किलेसो. परिसुद्धोति उपक्किलेसाभावेन सब्बसो सुद्धो. जाति आदीनं अभावेनाति जातिपच्चयानं कम्मकिलेसानं निग्गमेन.

४६९. न ¶ निच्चला तिट्ठन्तीति तत्थ पक्खिपितब्बस्स लब्भमानत्ता यथापञ्ञत्तं हुत्वा निच्चला अकम्पिया न तिट्ठन्ति. तं दोसं तं ऊनतादोसं.

अञ्ञस्मिं असतीति अत्थभञ्जकमुसावादे असति. सो हि अत्तनो सन्तकस्स अदातुकामतादिवसेन पवत्तस्स अकम्मपथप्पत्तस्स मुसावादभावस्स विपरीतो अञ्ञो इध अधिप्पेतो. तथा हि इतरो येभुय्येन वळञ्जितब्बतो वोहरितब्बतो वळञ्जकमुसावादोति आह. न कदाचि मुसावादीति द्वे कथा न कथेन्ति. बाहिरकानं अनवज्जतपसम्मतायपि निस्सितोति वत्तुं आह ‘‘सीलवा तपनिस्सितको होति’’ति. विवटमुखा मन्तज्झेनमण्डिता सब्बसो सज्झाया होन्ति, न इतरेति आह ‘‘पब्बजिता निच्चं सज्झायन्ती’’ति.

४७०. चिरं निक्खन्तोति निग्गतो हुत्वा चिरकाले. न सब्बसो पच्चक्खा होन्ति सतिसम्मोहतो मग्गानञ्च अञ्ञथा करणतो. चिरायितत्तन्ति ‘‘अयं मग्गो’’ति कथनस्स चिरायनं. वित्थायितत्तन्ति असप्पटिभानं. तं पन सउपमाह दस्सेतुं ‘‘यथा’’तिआदि वुत्तं.

बलसम्पन्नोति कायबलेन समन्नागतो. पमाणकतं कम्मं नाम पमाणकरानं रागादिकिलेसानं अविक्खम्भितत्ता ‘‘पमाणकतं कम्मं नाम कामावचर’’न्ति आह, तेसं पन विक्खम्भितत्ता वुत्तं ‘‘अप्पमाणकतं कम्मं नाम रूपारूपावचर’’न्ति. तत्थापि विसेसतो अप्पमञ्ञाभावना सम्भवतीति आह ‘‘तेसुपी’’तिआदि. निरीहकत्ता यथा अप्पमाणसमञ्ञा लब्भति, तं दस्सेतुं ‘‘पमाणं…पे… वुच्चती’’ति आह. न ओहीयति न तिट्ठतीति कतूपचितम्पि कामावचरकम्मं यथाधिगते महग्गतज्झाने अपरिहीने तं अभिभवित्वा आसीदेत्वा पस्से ओहीयकं कत्वा पटिसन्धिं दातुं समत्थभावेन न तिट्ठति. लग्गितुन्ति आवरितुं ¶ . ठातुन्ति पतिट्ठातुं. फरित्वाति पटिप्फरित्वा. परियादियित्वाति तस्स सामत्थियं खेपेत्वा. कम्मस्स परियादियनं नाम विपाकुप्पादबन्धनमेवाति आह – ‘‘तस्स विपाकं पटिबाहित्वा’’ति. सेसं सुविञ्ञेय्यमेव.

सुभसुत्तवण्णनाय लीनत्थप्पकासना समत्ता.

१०. सङ्गारवसुत्तवण्णना

४७३. अभिप्पसन्नाति ¶ ¶ अभिसमेच्च पसन्ना. तेनाह – ‘‘अवेच्चप्पसादवसेन पसन्ना’’ति. ब्राह्मणी विगतमलमच्छेरताय ‘‘तुय्हं देय्यधम्मं रुच्चनकट्ठाने देही’’ति आह. मग्गेनेव हिस्सा मच्छरियस्स पहीनत्ता बुद्धपक्खब्राह्मणपक्खवसेन उभतोपक्खिका.

किंसूति किन्ति पुच्छावचनं. छेत्वा अनादियित्वा विनासेत्वा. सुखं सेतीति चित्तसन्तापाभावेन सुखेन सुपति. न सोचतीति ततो एव सोकं नाम विनासेति. कोधन्ति कुज्झनलक्खणं कोधं. छेत्वा समुच्छिन्दित्वा. सुखं सेतीति कोधपरिळाहेन अपरिडय्हमानत्ता सुखं सुपति. कोधविनासेन विनट्ठदोमनस्सत्ता न सोचति. विसमूलस्साति दुक्खविपाकस्स. मधुरग्गस्साति अक्कोसकस्स पच्चक्कोसनेन, पहारकस्स पटिप्पहरणेन यं सुखं उप्पज्जति, तं सन्धायेव ‘‘मधुरग्गो’’ति वुत्तो. इमस्मिञ्हि ठाने परियोसानं ‘‘अग्ग’’न्ति वुत्तं. अरियाति बुद्धादयो अरिया.

पञ्हं कथेसीति ब्राह्मणो किर चिन्तेसि – ‘‘समणो गोतमो लोकपूजितो, न सक्का यं वा तं वा वत्वा सन्तज्जेतुं, एकं सण्हपञ्हं पुच्छिस्सामी’’ति. सो एकं पुच्छागाथं अभिसङ्खरित्वा ‘‘सचे असुकस्स नाम वधं रोचेमीति वक्खति, ये तुय्हं न रुच्चन्ति, ते मारेतुकामोसि, लोकवधाय उप्पन्नो किं तुय्हं समणभावेनाति निग्गहेस्सामि. सचे न कस्सचि वधं रोचेमीति वक्खति, अथ नं त्वं रागादीनम्पि वधं न इच्छसि, तस्मा समणो हुत्वा आहिण्डसीति निग्गण्हिस्सामीति इमं उभतोकोटिकं पञ्हं पुट्ठो समणो गोतमो नेव गिलितुं न उग्गिलितुं सक्खिस्सती’’ति एवं चिन्तेत्वा इमं पय्हं पुच्छि. तस्स भगवा अज्झासयानुरूपं कथेसि. सो पञ्हब्याकरणेन आराधितचित्तो पब्बज्जं याचि. सत्था तं पब्बाजेसि, सो पब्बज्जाकिच्चं मत्थकं पापेसि. तेन वुत्तं ‘‘पब्बजित्वा अरहत्तं पत्तो’’ति.

अवभूताति अधोभूता. अधोभावो सत्तानं अवड्ढि अवमङ्गलन्ति आह – ‘‘अवड्ढिभूता अवमङ्गलभूतायेवा’’ति. परिभूताति परिभवप्पत्ता. विज्जमानानन्ति पाळियं अनादरे सामिवचनन्ति तदत्थं दस्सेन्तो ‘‘विज्जमानेसू’’तिआह. पकट्ठं, पवड्ढं वा ञाणन्ति पञ्ञाणन्ति भगवतो ञाणं विसेसेत्वा वुत्तं.

४७४. अभिजानित्वाति ¶ ¶ अभिविसिट्ठेन ञाणेन जानित्वा. वोसितवोसानाति कतकरणीयताय सब्बसो परिसोसितनिट्ठा. पारमिसङ्खातन्ति परमुक्कंसभावतो पारमीति सङ्खातं. तेनाह ‘‘सब्बधम्मानं पारभूत’’न्ति. ब्रह्मचरियस्साति सासनब्रह्मचरियस्स आदिभूतं. तेनाह ‘‘उप्पादका जनका’’ति. ‘‘इदमेवं भविस्सति इदमेव’’न्ति तक्कनं तक्को, सो एतस्स अत्थीति तक्की. यस्मा सो तं तं वत्थुं तथा तथा तक्कित्वा गण्हति, तस्मा वुत्तं ‘‘तक्कगाही’’ति. वीमंसनसीलो वीमंसी पच्चक्खभूतमत्थं वीमंसनभूताय पञ्ञाय केवलं वीमंसनतो. तेनाह ‘‘पञ्ञाचारं चरापेत्वा एवंवादी’’ति. यथावुत्ततक्कीवीमंसीभावेन तक्कपरियाहतं वीमंसानुचरितं सयंपटिभानं एवमेतन्ति वत्वा.

४८५. अट्ठितपधानवतन्ति अञ्ञत्थ किस्मिञ्चि पुग्गले अट्ठितपधानवतं अनञ्ञसाधारणं भोतो गोतमस्स पधानं अहोसि. सप्पुरिसपधानवतं अहोसि सप्पुरिसपधानवताधिगतानं एतादिसानं अरहतं अच्छरियपुग्गलानंयेव आवेणिकपधानवतं अहोसि. अजानन्तोव पकासेतीति अयं पुच्छितमत्थं सयं पच्चक्खतो अजानन्तो एव केवलं सद्दं उप्पादेत्वाव पकासेसीति सञ्ञाय आह. अजाननभावे सन्तेति इमे अधिदेवाति पच्चक्खतो जानने असति. पण्डितेन मनुस्सेनाति लोकवोहारकुसलेन मनुस्सेन, त्वं पन लोकवोहारेपि अकुसलो. वचनत्थञ्हि अजानन्तो यं किञ्चि वदति. उच्चेन सम्मतन्ति उच्चं सुपाकटं सब्बसो तरुणदारकेहिपि सम्मतं. ञातमेतं यदिदं अत्थि देवाति. तेनाह ‘‘सुसुदारकापी’’तिआदि. देवाति उपपत्तिदेवा. अधिदेवा नाम सम्मुतिदेवेहि अधिकदेवाति कत्वा, तदञ्ञे च मनुस्से अधिकभावे किमेव वत्तब्बं. सेसं सुविञ्ञेय्यमेव.

पपञ्चसूदनिया मज्झिमनिकायट्ठकथाय

सङ्गारवसुत्तवण्णनाय लीनत्थप्पकासना समत्ता.

निट्ठिता च ब्राह्मणवग्गवण्णना.

मज्झिमपण्णासटीका समत्ता.