📜

नमो तस्स भगवतो अरहतो सम्मासम्बुद्धस्स

मज्झिमनिकाये

उपरिपण्णास-टीका

१. देवदहवग्गो

१. देवदहसुत्तवण्णना

१. दिब्बन्ति ¶ ¶ कामगुणेहि कीळन्ति, लळन्ति, तेसु वा विहरन्ति, विजयसमत्थतायोगेन पच्चत्थिके विजेतुं इच्छन्ति; इस्सरियट्ठानादिसक्कारदानग्गहणं तंतंअत्थानुसासनञ्च करोन्ता वोहरन्ति, पुञ्ञानुभावप्पत्ताय जुतिया जोतेन्ति वाति देवा वुच्चन्ति राजानो. तथा हि ते चतूहि सङ्गहवत्थूहि जनं रञ्जयन्ता सयं यथावुत्तेहि विसेसेहि राजन्ति दिब्बन्ति सोभन्तीति च, ‘‘राजानो’’ति वुच्चन्ति. तत्थाति तस्मिं निगमदेसे. साति पोक्खरणी. तन्ति तं, ‘‘देवदह’’न्ति लद्धनामं पोक्खरणिं उपादाय, तस्स अदूरभवत्ताति केचि. सब्बं सुखादिभेदं वेदयितं. पुब्बेति पुरिमजातियं. कतकम्मपच्चयाति कतस्स कम्मस्स पच्चयभावतो जातं कम्मं पटिच्च. तेन सब्बापि वेदना कम्मफलभूता एव अनुभवितब्बाति दस्सेति. तेनाह ‘‘इमिना’’तिआदि. अनियमेत्वा वुत्तन्ति, ‘‘सन्ति, भिक्खवे, एके समणब्राह्मणा एवंवादिनो’’ति एवं इमे नामाति अविसेसेत्वा वुत्तमत्थं. नियमेत्वाति, ‘‘एवंवादिनो, भिक्खवे, निगण्ठा’’ति एवं विसेसेत्वा दस्सेति.

कलिसासनन्ति ¶ पराजयं. कलीति हि अनत्थो वुच्चति, कलीति ससति विप्फरतीति कलिसासनं, पराजयो. कलीति वा कोधमानादिकिलेसजाति, ताय पन अयुत्तवादिता कलिसासनं. तं आरोपेतुकामो विभावेतुकामो ¶ . ये कम्मं कतं अकतं वाति न जानन्ति, ते कथं तं एदिसन्ति जानिस्सन्ति. ये च कम्मं पभेदतो न जानन्ति, ते कथं तस्स विपाकं जानिस्सन्ति; विपाकपरियोसितभावं जानिस्सन्ति, ये च पापस्स कम्मस्स पटिपक्खमेव न जानन्ति; ते कथं तस्स पहानं कुसलकम्मस्स च सम्पादनविधिं जानिस्सन्तीति इममत्थं दस्सेन्तो, ‘‘उत्तरि पुच्छायपि एसेव नयो’’ति आह.

२. किञ्चापि चूळदुक्खक्खन्धेपि, (म. नि. १.१८०) ‘‘एवं सन्ते’’ति इमिना तेसं निगण्ठानं अजाननभावो एव उजुकं पकासितो हेट्ठा देसनाय तथा पवत्तत्ता. तथा हि अट्ठकथायं (म. नि. अट्ठ. १.१८०) वुत्तं – ‘‘एवं सन्तेति तुम्हाकं एवं अजाननभावे सती’’ति, तथापि तत्थ उपरिदेसनाय सम्बद्धो एवमत्थो वुच्चमानो युज्जति, न अञ्ञथाति दस्सेतुं इध, ‘‘महानिगण्ठस्स वचने सच्चे सन्तेति अत्थो’’ति वुत्तं. एत्तकस्स ठानस्साति यथावुत्तस्स पञ्चपरिमाणस्स कारणस्स.

३. अनेकवारं विसरञ्जनं इध गाळ्हापलेपनं, न साटकस्स विय लित्तताति आह – ‘‘बहलूप…पे… लित्तेन विया’’ति. वुत्तमेव, न पुन वत्तब्बं, तत्थ वुत्तनयेनेव वेदितब्बन्ति अधिप्पायो.

इमेसं निगण्ठानं तादिसस्स तेसं अभावतो, ‘‘जाननकालो सिया’’ति परिकप्पवसेन वदति. तेन एवं जानितुं तेहि सक्का सिया, तेसञ्च दस्सनं सच्चं सिया. यस्मा तेसं दस्सनं असच्चं, तस्मा ते न जानिंसूति दस्सेति. चतूसु कालेसूति वणमुखस्स परिकन्तनकालो, सल्लस्स एसनकालो, अब्बुहनकालो, वणमुखे अगदङ्गारओदहनकालोति इमेसु चतूसु कालेसु. सुद्धन्तेति सुद्धकोट्ठासे, दुक्खस्स अनवसेसतो निज्जीरणट्ठेन निद्दुक्खभावेति अत्थो. एकाय उपमायाति, ‘‘सल्लेन विद्धस्स हि विद्धकाले वेदनाय पाकटकालो विया’’ति इमाय एकाय उपमाय. तयो अत्थाति पुब्बे अहुवम्हा वा नो वा, पापकम्मं अकरिम्हा वा नो वा, एवरूपं वा पापकम्मं अकरिम्हाति इमे तयो अत्था. चतूहि उपमाहीति वणमुखपरिकन्तनादीहि चतूहि उपमाहि. एको अत्थोति, ‘‘एत्तकं दुक्खं निज्जिण्ण’’न्तिआदिना ¶ वुत्तो एको अत्थो. सो हि दुक्खनिज्जीरणभावसामञ्ञा एको अत्थोति वुत्तो.

४. इमे ¶ पन निगण्ठा. आसङ्काय विद्धोस्मीति सञ्ञं उप्पादेत्वा. पच्चाहरितुन्ति पच्चावत्तितुं, परिहरितुन्ति अत्थो.

५. अतीतवादं सद्दहन्तानन्ति, ‘‘अत्थि खो, भो, निगण्ठा पुब्बे पापकम्मं कत’’न्ति एवं अतीतंसं आरब्भ पवत्तं महानिगण्ठस्स वादं सद्दहन्तानं. भूतत्ताति यथाभूतत्ता किं अविपरीतमेव अत्थं आरम्मणं कत्वा पवत्ताति पुच्छति. सेसपदेसुपि एसेव नयो. सह धम्मेनाति सहधम्मो, सो एव सहधम्मिको यथा ‘‘वेनयिको’’ति (अ. नि. ८.११; पारा. ८). ‘‘धम्मो’’ति एत्थ कारणं अधिप्पेतन्ति आह – ‘‘सहेतुकं सकारण’’न्ति. पटिहरति पटिवत्तेतीति पटिहारो, वादो एव पटिहारो वादपटिहारो; तं, उत्तरन्ति अत्थो. तेनाह – ‘‘पच्चागमनकवाद’’न्ति, चोदनं परिवत्तेत्वा पटिपाकतिककरणन्ति अत्थो. तेसन्ति इदं आवुत्तिवसेन गहेतब्बं, ‘‘तेसं सद्धाछेदकवादं नाम तेसं दस्सेती’’ति.

६. अविज्जा अञ्ञाणा सम्मोहाति परियायवचनमेतं. अविज्जाति वा अविज्जाय करणभूताय. अञ्ञाणेनाति अजाननेन. सम्मोहेनाति सम्मुय्हनेन महामुळ्हताय. सामंयेव ओपक्कमिका एतरहि अत्तनो उपक्कमहेतु दुक्खवेदनं वेदियमानं – ‘‘यंकिञ्चायं…पे… पुब्बेकतहेतू’’ति विपरीततो सद्दहथ. पुब्बेकतहेतुवादसञ्ञितं विपल्लासग्गाहं गण्हथ.

७. दिट्ठधम्मो वुच्चति पच्चक्खभूतो, तत्थ वेदितब्बं फलं दिट्ठधम्मवेदनीयं. तेनाह – ‘‘इमस्मिंयेव अत्तभावे विपाकदायक’’न्ति. पयोगेनाति कायिकेन पयोगेन वा वाचसिकेन वा पयोगेन. पधानेनाति पदहनेन चेतसिकेन उस्साहनेन. आसन्ने भवन्तरे विपाचेतुं न सक्का, पगेव दूरेति दस्सेतुं, ‘‘दुतिये वा ततिये वा अत्तभावे’’ति वुत्तं. निब्बत्तकभावतो सुखवेदनाय हितन्ति सुखवेदनीयं. सा पन विपाकवेदनाभावतो एकन्ततो इट्ठारम्मणा एव होतीति आह ‘‘इट्ठारम्मणविपाकदायक’’न्ति. विपरीतन्ति ¶ अनिट्ठारम्मणविपाकदायकं. निप्फन्नेति सद्धिं अञ्ञेन कम्मेन निब्बत्ते. सम्परायवेदनीयस्साति उपपज्जवेदनीयस्स अपरापरियवेदनीयस्स. एवं सन्तेपीति कामं परिपक्कवेदनीयन्ति दिट्ठधम्मवेदनीयमेव वुच्चति, तथापि अत्थेत्थ अतिसयो दिट्ठधम्मविसेसभावतो परिपक्कवेदनीयस्साति दस्सेतुं, ‘‘अयमेत्था’’तिआदि वुत्तं. यस्मिं दिवसे कतं, ततो सत्तदिवसब्भन्तरे.

तत्राति तस्मिं परिपक्कवेदनीयकम्मस्स सत्तदिवसब्भन्तरे विपाकदाने. एकवारं कसित्वा निसीदि छातज्झत्तो हुत्वा. आगच्छन्ती आह – ‘‘उस्सूरे भत्तं आहरीयित्था’’ति दोमनस्सं ¶ अनुप्पादेत्वा यथा कतपुञ्ञं अनुमोदति. विज्जोतमानं दिस्वा, ‘‘किं नु खो इदम्पि तप्पकारो, मम चित्तविकप्पमत्तं, उदाहु सुवण्णमेवा’’ति वीमंसन्तो यट्ठिया पहरित्वा.

वाळयक्खसञ्चरणत्ता राजगहूपचारस्स नगरे सहस्सभण्डिकं चारेसुं. उप्पन्नरागो चूळाय डंसि. रञ्ञो आचिक्खित्वाति तं पवत्तिं रञ्ञो आचिक्खित्वा. मल्लिकाय वत्थु धम्मपदवत्थुम्हि (ध. प. अट्ठ. २.मल्लिकादेवीवत्थु) आगतेन नयेन कथेतब्बं.

मरणसन्तिकेपि कतं, पगेव ततो पुरेतरं अतीतत्तभावेसु च कतं. इध निब्बत्तितविपाकोति वुत्तो अवस्संभाविभावतो. सम्परायवेदनीयमेव भवन्तरे विपाकदायकभावतो. इध निब्बत्तितगुणोत्वेव वुत्तो, न इध निब्बत्तितविपाकोति विमुत्तिभावतो. परिपक्कवेदनीयन्ति वेदितब्बं हेट्ठा वुत्तपरिपक्कवेदनीयलक्खणानतिवत्तनतो. सब्बलहुं फलदायिकाति एतेन फलुप्पादनसमत्थतायोगेन कम्मस्स परिपक्कवेदनीयताति दस्सेति.

चतुप्पञ्चक्खन्धफलताय सञ्ञाभवूपगं कम्मं बहुवेदनीयन्ति वुत्तं. एकखन्धफलत्ता असञ्ञाभवूपगं कम्मं अप्पवेदनीयं. केचि पन, ‘‘अरूपावचरकम्मं बहुकालं वेदितब्बफलत्ता बहुवेदनीयं, इतरं अप्पवेदनीयं. रूपारूपावचरकम्मं वा बहुवेदनीयं, परित्तकम्मं अप्पवेदनीय’’न्ति वदन्ति. सविपाकं कम्मन्ति पच्चयन्तरसमवाये विपाकुप्पादनसमत्थं, न आरद्धविपाकमेव. अविपाकं कम्मन्ति पच्चयवेकल्लेन विपच्चितुं असमत्थं अहोसिकम्मादिभेदं.

८. दिट्ठधम्मवेदनीयादीनन्ति ¶ दिट्ठधम्मवेदनीयादीनं दसन्नं कम्मानं उपक्कमेन कम्मानं अञ्ञाथाभावस्स अनापादनीयत्ता यथासभावेनेव कम्मानि तिट्ठन्ति. तत्थ निगण्ठानं उपक्कमो निप्पयोजनोति आह ‘‘अफलो’’ति. निगण्ठानं पदहनस्स मिच्छावायामस्स निप्फलभावप्पवेदनो पधानच्छेदकवादो. परेहि वुत्तकारणेहीति येहि कारणेहि निगण्ठानं वादेसु दोसं दस्सेन्ति. तेहि परेहि वुत्तकारणेहि. न हि लक्खणयुत्तेन हेतुना विना परवादेसु दोसं दस्सेतुं सक्का. तेनाह ‘‘सकारणा हुत्वा’’ति. निगण्ठानं वादा च अनुवादा चाति निगण्ठेहि वुच्चमाना सकसकसमयप्पवेदिका वादाचेव सावकेहि वुच्चमाना तेसं अनुवादा च. विञ्ञूहि गरहितब्बं कारणं आगच्छन्तीति, ‘‘अयमेत्थ दोसो’’ति तत्थ तत्थ विञ्ञूहि पण्डितेहि गरहारहं कारणं उपगच्छन्ति, पापुणन्तीति अत्थो. तस्सत्थोतिआदीसु अयं सङ्खेपत्थो ¶ , ‘‘वुत्तनयेन परेहि वुत्तेन कारणेन सकारणा हुत्वा दोसदस्सनवसेन निगण्ठानं वादा अनुप्पत्ता, ततो एव तं वादं अप्पसादनीयभावदस्सनेन सोसेन्ता हेतुसम्पत्तिवोहारसुक्खनेन मिलापेन्ता दुक्कटकम्मकारिनोतिआदयो दस गारय्हापदेसा उपगच्छन्ती’’ति.

९. सङ्गतिभावहेतूति तत्थ तत्थ यदिच्छाय समुट्ठितसङ्गतिनिमित्तं. सा पन सङ्गति नियतिलक्खणाति आह ‘‘नियतिभावकारणा’’ति. अच्छेज्जसुत्तावुतअभेज्जमणि विय हि पटिनियतता नियतिपवत्तीति. छळभिजातिहेतूति कण्हाभिजाति नीलाभिजाति लोहिताभिजाति हलिद्दाभिजाति सुक्काभिजाति परमसुक्काभिजातीति इमासु अभिजातीसु जातिनिमित्तं. पापसङ्गतिकाति निहीनसङ्गतिका.

१०. अनद्धभूतन्ति एत्थ अधि-सद्देन समानत्थो अद्ध-सद्दोति आह – ‘‘अनद्धभूतन्ति अनधिभूत’’न्ति. यथा आपायिको अत्तभावो महता दुक्खेन अभिभुय्यति, न तथा अयन्ति आह – ‘‘दुक्खेन अनधिभूतो नाम मनुस्सत्तभावो वुच्चती’’ति. ‘‘अचेलको होती’’तिआदिना (दी. नि. १.३९४) वुत्ताय नानप्पकाराय दुक्करकारिकाय किलमथेन. यदि एवं ¶ कथं धुतङ्गधराति आह ‘‘ये पना’’तिआदि. निय्यानिकसासनस्मिञ्हि वीरियन्ति विवट्टसन्निस्सितं कत्वा पवत्तियमानं वीरियं सरीरं खेदन्तम्पि सम्मावायामो नाम होति ञायारद्धभावतो.

थेरोति एत्थ आगतमहारक्खितत्थेरो. तिस्सो सम्पत्तियो मनुस्सदेवनिब्बानसम्पत्तियो, सीलसमाधिपञ्ञासम्पत्तियो वा. खुरग्गेयेवाति खुरे सीसग्गे एव, खुरे सीसग्गतो अपनीते एवाति अधिप्पायो. अयन्ति, ‘‘इस्सरकुले निब्बत्तो’’तिआदिना वुत्तो. न सब्बे एव सक्कारपुब्बकं पब्बजित्वा अरहत्तं पापुणन्तीति आह ‘‘यो दासिकुच्छिय’’न्तिआदि. रजतमुद्दिकन्ति रजतमयं अङ्गुलिमुद्दिकं. गोरकपियङ्गुमत्तेनपीति कपित्थछल्लिकङ्गुपुप्फगन्धमत्तेनपि.

धम्मेन ञायेन आगतसुखं धम्मसुखन्ति आह – ‘‘सङ्घतो वा…पे… पच्चयसुख’’न्ति. अमुच्छितोति अनज्झापन्नो. इदानि तं अनज्झापन्नतं तस्स च फलं दस्सेतुं ‘‘धम्मिकं ही’’तिआदि वुत्तं. इमस्साति समुदयस्स. सो हि पञ्चक्खन्धस्स दुक्खस्स कारणभूतत्ता आसन्नो पच्चक्खो कत्वा वुत्तो. तेनाह ‘‘पच्चुप्पन्नान’’न्तिआदि. सङ्खारन्ति यथारद्धाय सातिसयं करणतो सङ्खारन्ति लद्धनामं बलववीरियं उस्सोळ्हिं. पदहतोति पयुञ्जन्तस्स पवत्तेन्तस्स. मग्गेन विरागो होतीति अरियमग्गेन दुक्खनिदानस्स विरज्जना ¶ होति. तेनाह ‘‘इदं वुत्तं होती’’ति. इमिना सुखापटिपदा खिप्पाभिञ्ञा कथिता अकसिरेनेव सीघतरं मग्गपजानताय बोधितत्ता. मज्झत्तताकारोति वीरियूपेक्खमाह. सङ्खारं तत्थ पदहतीति पधानसङ्खारं तत्थ दुक्खनिदानस्स विरज्जननिमित्तं विरज्जनत्थं पदहति. कथं? मग्गप्पधानेन चतुकिच्चप्पधाने अरियमग्गे वायामेन पदहति वायमति. अज्झुपेक्खतोति वीरियस्स अनच्चारद्धनातिसिथिलताय वीरियसमतायोजने ब्यापाराकरणेन अज्झुपेक्खतो. तेनाह ‘‘उपेक्खं भावेन्तस्सा’’ति. उपेक्खाभावना च नामेत्थ तथापवत्ता अरियमग्गभावना एवाति आह – ‘‘मग्गभावनाय भावेती’’ति.

एत्थ च एवं पाळिया पदयोजना वेदितब्बा, – ‘‘सो एवं पजानाति. कथं? सङ्खारं मे पदहतो सङ्खारपदहना इमस्स दुक्खनिदानस्स विरागो होति ¶ , अज्झुपेक्खतो मे उपेक्खना इमस्स दुक्खनिदानस्स विरागो होती’’ति. पटिपज्जमानस्स चायं पुब्बभागवीमंसस्साति गहेतब्बं. तत्थ सङ्खारप्पधानाति सम्मसनपदेन सुखेनेव खिप्पतरं भावनाउस्सुक्कापनवीरियं दस्सितन्ति सुखापटिपदा खिप्पाभिञ्ञा दस्सिता. अज्झुपेक्खतोति एत्थ कस्सचि नातिदळ्हं कत्वा पवत्तितवीरियेनपि दुक्खनिदानस्स विरागो होति विपस्सनमनुयुञ्जतीति दस्सितं. उभयत्थापि चतुत्थीयेव पटिपदा विभाविताति दट्ठब्बं. इदानि, ‘‘यस्स हि ख्वास्स…पे… उपेक्खं तत्थ भावेती’’ति वारेहि तासंयेव पटिपदानं वसेन तेसं पुग्गलानं पटिपत्ति दस्सिता. वट्टदुक्खनिदानस्स परिजिण्णं इमेहि वारेहि दुक्खक्खयो विभावितो.

११. बद्धचित्तोति सम्बद्धचित्तो. बहलच्छन्दोति बहलतण्हाछन्दो. अतिचरित्वाति अतिक्कमित्वा. नटसत्थविधिना नच्चनका नटा, नच्चका इतरे. सोमनस्सं उप्पज्जति, ‘‘ईदिसं नाम इत्थिं परिच्चजि’’न्ति. छिज्जाति द्विधा होतु. भिज्जाति भिज्जतु. ‘‘छिज्ज वा भिज्जवा’’ति पदद्वयेनपि विनासमेव वदति. ञत्वाति पुब्बभागञाणेन जानित्वा. तदुभयन्ति सङ्खारपदहनउपेक्खाभावनं.

१२. पेसेन्तस्साति वायमन्तस्स. तं सन्धायाति दुक्खाय पटिपदाय निय्यानतं सन्धाय.

उसुकारो विय योगी तेजनस्स विय चित्तस्स उजुकरणतो. गोमुत्तवङ्कं, चन्दलेखाकुटिलं, नङ्गलकोटिजिम्हं चित्तं. अलाता विय वीरियं आतापन-परितापनतो. कञ्चिकतेलं ¶ विय सद्धा सिनेहनतो. नमनदण्डको विय लोकुत्तरमग्गो निब्बानारम्मणे चित्तस्स नामनतो. लोकुत्तरमग्गेन चित्तस्स उजुकरणं भावनाभिसमयतो दट्ठब्बं. अन्तद्वयवज्जिता मज्झिमा पटिपत्तीति कत्वा किलेसगणविज्झनं पहानाभिसमयो. इतरा पन पटिपदा दन्धाभिञ्ञाति इमेसं द्विन्नं भिक्खूनं इमासु द्वीसु यथावुत्तासु खिप्पाभिञ्ञासु कथितासु, इतरापि कथिताव होन्ति लक्खणहारनयेन पटिपदासामञ्ञतो. सहागमनीयापि वा पटिपदा कथिताव, ‘‘न हेव अनद्धभूतं अत्थान’’न्तिआदिना पुब्बभागपटिपदाय कथितत्ता. ‘‘आगमनीयपटिपदा पन न कथिता’’ति ¶ इदं सविसेसं अज्झुपेक्खस्स अकथिततं सन्धाय वुत्तन्ति दट्ठब्बं. निक्खमनदेसनन्ति निक्खमनुपायं देसनं. सेसं सुविञ्ञेय्यमेव.

देवदहसुत्तवण्णनाय लीनत्थप्पकासना समत्ता.

२. पञ्चत्तयसुत्तवण्णना

२१. एकेति ¶ एत्थ एक-सद्दो अञ्ञत्थो, न गणनादिअत्थोति तं दस्सेन्तो ‘‘एकच्चे’’ति आह. यं पन पाळियं ‘‘सन्ती’’ति वुत्तं. तेन तेसं दिट्ठिगतिकानं विज्जमानताय अविच्छिन्नता; ततो च नेसं मिच्छागहणतो सिथिलकरणविवेचनेहि अत्तनो देसनाय किच्चकारिता अवितथता च दीपिता होति. परमत्थसमणब्राह्मणेसु अपरन्तकप्पिकताय लेसोपि नत्थीति आह ‘‘परिब्बजुपगतभावेना’’तिआदि. सस्सतादिवसेन अपरन्तं कप्पेन्तीति अपरन्तकप्पिनो, ते एव अपरन्तकप्पिका. यस्मा तेहि अपरन्तं पुरिमतरसिद्धेहि तण्हादिट्ठिकप्पेहि कप्पेत्वा आसेवनबलवताय च विकप्पेत्वा अपरभागसिद्धेहि अभिनिवेसभूतेहि तण्हादिट्ठिग्गाहेहि गण्हन्ति अभिनिविसन्ति परामसन्ति; तस्मा वुत्तं – ‘‘अपरन्तं कप्पेत्वा विकप्पेत्वा गण्हन्ती’’ति. तण्हुपादानवसेन कप्पनगहणानि वेदितब्बानि. तण्हापच्चया हि उपादानं. वुत्तम्पि चेतं महानिद्देसे उद्दानतो सङ्खेपतो. तण्हादिट्ठिवसेनाति तण्हाय दिट्ठिया च वसेन. दिट्टिया वा उपनिस्सयभूताय सहजाताय अभिनन्दनकाय च तण्हाय सस्सतादिआकारेन अभिनिविसन्तस्स मिच्छागाहस्स च वसेन. अनागतधम्मविसयाय अधिप्पेतत्ता अनागतकालवाचको इध अपर-सद्दो. रूपादिखन्धविनिमुत्तस्स कप्पनवत्थुनो अभावा अन्त-सद्दो भागवाचकोति आह – ‘‘अनागतं खन्धकोट्ठास’’न्ति. कप्पेत्वाति च तस्मिं अपरन्ते तण्हाय नाभिनिवेसानं समत्तनं परिनिट्ठापनमाह. ठिताति तस्सा लद्धिया अविजहनं.

अनुगताति आरम्मणकरणवसेन अनु अनु गता अपरन्ते पवत्ता. आरब्भाति आलम्बित्वा. विसयो हि तस्सा दिट्ठिया अपरन्तो. विसयभावतो ¶ एव हि सो तस्सा आगमनट्ठानं आरम्मणपच्चयो चाति वुत्तं ‘‘आगम्म पटिच्चा’’ति. अधिवचनपदानीति पञ्ञत्तिपदानि, दासादीसु सिरिवड्ढकादिसद्दो विय वचनमत्तमेव अधिकारं कत्वा पवत्तिया अधिवचनं पञ्ञत्ति. अथ वा अधि-सद्दो उपरिभावे, वुच्चतीति वचनं, उपरि वचनं अधिवचनं, उपादानभूतरूपादीनं उपरि पञ्ञापियमाना उपादापञ्ञत्तीति अत्थो, तस्मा पञ्ञत्तिदीपकपदानीति अत्थो. पञ्ञत्तिमत्तञ्हेतं वुच्चति, यदिदं, ‘‘अत्ता लोको’’ति च, न रूपवेदनादयो विय परमत्थो. अधिकवुत्तिताय वा अधिमुत्तियोति दिट्ठियो वुच्चन्ति. अधिकञ्हि सभावधम्मेसु सस्सतादिं पकतिआदिं द्रब्यादिं जीवादिं कायादिञ्च अभूतमत्थं अज्झारोपेत्वा ¶ दिट्ठियो पवत्तन्तीति. अभिवदन्तीति, ‘‘इदमेव सच्चं मोघमञ्ञ’’न्ति अभिनिविसित्वा वदन्ति, ‘‘अयं धम्मो, नायं धम्मो’’तिआदिना विवदन्ति. अभिवदनकिरियाय अज्जापि अविच्छेदभावदस्सनत्थं वत्तमानकालवचनं.

सञ्ञा एतस्स अत्थीति सञ्ञीति आह ‘‘सञ्ञासमङ्गी’’ति. नत्थि एतस्स रोगो भङ्गोति अरोगोति अरोगसद्दस्स निच्चपरियायता वेदितब्बा. रोगरहिततासीसेन वा निब्बिकारताय निच्चतं पटिजानाति दिट्ठिगतिकोति आह ‘‘अरोगोति निच्चो’’ति. इमिनाति, ‘‘सञ्ञी अत्ता अरोगो परं मरणा’’ति इमिना वचनेन. सोळस सञ्ञीवादाति – रूपीचतुक्कं, अरूपीचतुक्कं, अन्तवाचतुक्कं, एकन्तसुखीचतुक्कन्ति – इमेसं चतुन्नं चतुक्कानं वसेन सोळस सञ्ञीवादा कथिता. इमेसुयेव पुरिमानं द्विन्नं चतुक्कानं वसेन अट्ठ सञ्ञीवादा अट्ठ च नेवसञ्ञीनासञ्ञीवादा वेदितब्बा. सत्त उच्छेदवादाति मनुस्सत्तभावे कामावचरदेवत्तभावे रूपावचरदेवत्तभावे चतुब्बिधारुप्पत्तभावे चवित्वा सत्तस्स उच्छेदपञ्ञापनवसेन सत्त उच्छेदवादा कथिता. असतो विनासासम्भवतो अत्थिभावनिबन्धनो उच्छेदवादोति वुत्तं ‘‘सतोति विज्जमानस्सा’’ति. यावायं अत्ता न उच्छिज्जति, ताव विज्जति एवाति गहणतो निरुदयविनासो इध उच्छेदोति अधिप्पेतोति आह ‘‘उपच्छेद’’न्ति. विसेसेन नासो विनासो, अभावो, सो पन मंसचक्खु-पञ्ञाचक्खु-दस्सनपथातिक्कमोवाति आह ‘‘अदस्सन’’न्ति. अदस्सने ¶ हि नास-सद्दो लोके निरुळ्हो. भवविगमन्ति सभावापगमनं यो हि निरुदयविनासवसेन उच्छिज्जति, न सो अत्तनो सभावेनेव तिट्ठति.

पञ्च दिट्ठधम्मनिब्बानवादाति पञ्चकामगुणसुखमनुभोगवसेन चतुब्बिधरूपज्झानसुखपरिभोगवसेन च दिट्ठधम्मे निब्बानप्पत्तिपञ्ञापनवादा. दिट्ठधम्मोति दस्सनभूतेन ञाणेन उपलद्धधम्मो. तत्थ यो अनिन्द्रियविसयो, सोपि सुपाकटभावेन इन्द्रियविसयो विय होतीति आह – ‘‘दिट्ठधम्मोति पच्चक्खधम्मो वुच्चती’’ति. तेनेव च, ‘‘तत्थ तत्थ पटिलद्धअत्तभावस्सेतं अधिवचन’’न्ति वुत्तं. सञ्ञीति आदिवसेन तीहाकारेहि सन्तन्ति सञ्ञी असञ्ञी नेवसञ्ञीनासञ्ञीति इमेहि आकारेहि विज्जमानं, सदा उपलब्भमानं सस्सतन्ति अत्थो. सञ्ञी अत्तातिआदीनि तीणि दस्सनानि. सन्तअत्थवसेन एकन्ति सस्सतस्स अत्तनो वसेन एकं दस्सनं. इतरानि द्वेति उच्छेदवाद-दिट्ठधम्मनिब्बानवादसञ्ञितानि द्वे दस्सनानि. तीणि हुत्वा पञ्च होन्तीति इदं, ‘‘सन्तअत्थवसेन एक’’न्ति सङ्गहवसेन वुत्तस्स सञ्ञीति आदिविभागवसेन वुत्तत्ता सुविञ्ञेय्यन्ति अट्ठकथायं न उद्धटं.

२२. रूपीं ¶ वाति एत्थ (दी. नि. टी. १.७६-७७) यदि रूपं अस्स अत्थीति रूपीति अयमत्थो अधिप्पेतो. एवं सति रूपविनिमुत्तेन अत्तना भवितब्बं सञ्ञाय विय रूपस्सपि अत्तनियत्ता. न हि सञ्ञी अत्ताति एत्थ सञ्ञा अत्ता. तथा हि वुत्तं सुमङ्गलविलासिनियं (दी. नि. अट्ठ. १.७६-७७) ‘‘तत्थ पवत्तसञ्ञञ्चस्स सञ्ञाति गहेत्वाति वुत्त’’न्ति. एवं सन्ते, ‘‘कसिणरूपं अत्ताति गण्हाती’’ति इदं कथन्ति? न खो पनेतं एवं दट्ठब्बं – ‘‘रूपं अस्स अत्थीति रूपी’’ति, अथ खो ‘‘रुप्पनसीलो रूपी’’ति. रुप्पनञ्चेत्थ रूपसरिक्खताय कसिणरूपस्स वड्ढितावड्ढितकालवसेन विसेसापत्ति, सा च नत्थीति न सक्का वत्तुं परित्तविपुलतादिविसेससब्भावतो. यदि एवं इमस्स वादस्स सस्सतदिट्ठिसङ्गहो न युज्जतीति? नो न युज्जति कायभेदतो उद्धं अत्तनो निब्बिकारताय तेन अधिप्पेतत्ता. तथा हि वुत्तं ‘‘अरोगो परं मरणा’’ति. अथ वा ‘‘रूपं अस्स अत्थीति रूपी’’ति वुच्चमानेपि न दोसो. कप्पनासिद्धेनपि हि भेदेन सामिनिद्देसदस्सनतो यथा ‘‘सिलापुत्तकस्स सरीर’’न्ति ¶ . रुप्पनं वा रुप्पनसभावो रूपं, तं एतस्स अत्थीति रूपी, अत्ता ‘‘रूपिनो धम्मा’’तिआदीसु (ध. स. ११ दुकमातिका) विय. एवञ्च कत्वा रूपसभावत्ता अत्तनो ‘‘रूपं अत्ता’’ति वचनं ञायागतमेवाति ‘‘कसिणरूपं अत्ताति गण्हाती’’ति वुत्तं. अरूपिन्ति एत्तापि वुत्तनयानुसारेन यथारहं अत्थो वत्तब्बो. सन्तसुखुमं मुञ्चित्वा तब्बिपरीतस्स गहणे कारणं नत्थीति लाभी, ‘‘कसिणरूपं अत्ता’’ति गण्हातीति लाभितक्किनो ठपेत्वा, सेसतक्की लाभिग्गहणेनेव गहिता. अनुस्सुतितक्किकोपि सुद्धतक्किकोपि वा निरङ्कुसत्ता तक्कनस्स कसिणरूपम्पि अत्ताति कदाचिपि गण्हेय्याति वुत्तं – ‘‘उभोपि रूपानि गण्हातियेवा’’ति. सुद्धतक्किकस्स उभयग्गहणं न कतं, तस्मा सासङ्कवचनं.

कसिणुग्घाटिमाकास-पठमारुप्पविञ्ञाण-नत्थिभावआकिञ्चञ्ञायतनानि अरूपसमापत्तिनिमित्तं. ठपेत्वा सञ्ञाक्खन्धन्ति इदं सञ्ञाय अत्तनियतं हदये कत्वा वुत्तं. ‘‘रूपिं वा’’ति एत्थ वुत्तनयेन पन अत्थे वुच्चमाने सञ्ञाक्खन्धं बहिद्धा अकत्वा ‘‘अरूपधम्मे’’इच्चेव वत्तब्बं सिया. मिस्सकग्गाहवसेनाति रूपारूपसमापत्तीनं निमित्तानि एकज्झं कत्वा, ‘‘एको अत्ता’’ति, तत्थ पवत्तसञ्ञञ्चस्स, ‘‘सञ्ञा’’ति गहणवसेन. अयञ्हि दिट्ठिगतिको रूपारूपसमापत्तिलाभिताय तंनिमित्तं रूपभावेन अरूपभावेन च गहेत्वा उपतिट्ठति, तस्मा, ‘‘रूपी अरूपी चा’’ति अभिनिवेसं जनेति अज्झत्तवादिनो विय तक्कमत्तेनेव वा रूपारूपधम्मे मिस्सकवसेन गहेत्वा, ‘‘रूपी च अरूपीच अत्ता होती’’ति. तक्कगाहेनेवाति सङ्खारावसेससुखुमभावप्पत्तधम्मा विय च अच्चन्तसुखुमभावपत्तिया सकिच्चसाधनासमत्थताय ¶ थम्भकुट्टहत्थपादानं सङ्घातो विय नेव रूपी, रूपसभावानतिवत्तनतो न अरूपीति एवं पवत्ततक्कगाहेन. लाभिवसेनपि वा अन्तानन्तिकचतुत्थवादे वक्खमाननयेन अञ्ञमञ्ञपटिपक्खवसेन अत्थो वेदितब्बो. केवलं पन तत्थ देसकालभेदवसेन ततियचतुत्थवादा इच्छिता; इध कालवत्थु भेदवसेनाति अयमेव विसेसो. कालभेदवसेन चेत्थ ततियवादस्स पवत्ति रूपारूपनिमित्तानं सह अनुपट्ठानतो; चतुत्थवादस्स पन वत्थुभेदवसेन ¶ पवत्ति रूपारूपधम्मानं समूहतो, ‘‘एको अत्ता’’ति तक्कवसेनाति तत्थ वक्खमाननयानुसारेन वेदितब्बं.

यदिपि अट्ठसमापत्तिलाभिनो दिट्ठिगतिकस्स वसेन समापत्तिभेदेन सञ्ञानानत्तसम्भवतो दुतियदिट्ठिपि समापन्नकवसेन लब्भति; तथापि समापत्तियं एकरूपेनेव सञ्ञाय उपट्ठानतो, ‘‘पठमदिट्ठि समापन्नकवारेन कथिता’’ति आह. तेनेवेत्थ समापन्नकग्गहणं कतं. एकसमापत्तिलाभिनो एव वा वसेन अत्थो वेदितब्बो. समापत्ति भेदेन सञ्ञाभेदसम्भवेपि बहिद्धा पुथुत्तारम्मणे सञ्ञानानत्तेन ओळारिकेन नानत्तसञ्ञीति, ‘‘दुतियदिट्ठि असमापन्नकवारेना’’ति आह. अवड्ढितकसिणवसेन परित्तसञ्ञितं, वड्ढितकसिणवसेन अप्पमाणसञ्ञितं दस्सेतुं, ‘‘ततियदिट्ठि सुप्पमत्तेन वा सरावमत्तेन वा’’तिआदि वुत्तं. ‘‘अङ्गुट्ठप्पमाणो वा अत्ता यवप्पमाणो, अणुमत्तो वा अत्ता’’तिआदिदस्सनवसेन (उदा. अट्ठ. ५४; दी. नि. टी. १.७६-७७) परित्तो सञ्ञीति परित्तसञ्ञी. कपिलकणादादयो (विभ. अनुटी. १८९) विय अत्तनो सब्बगतभावपटिजाननवसेन अप्पमाणो सञ्ञीति अप्पमाणसञ्ञीति एवम्पेत्थ अत्थो दट्ठब्बो.

एतन्ति, ‘‘रूपिं वा’’तिआदिना यथावुत्तअत्तवादं. एकेसन्ति एकच्चानं. उपातिवत्ततन्ति अतिक्कमन्तानं. निद्धारणे चेतं सामिवचनं. विञ्ञाणकसिणमेके अभिवदन्तीति योजना. तेनाह – ‘‘सञ्ञं…पे… अभिवदन्ती’’ति. तत्थ ‘‘सञ्ञं ठपेत्वा सेसानि तीणी’’ति इदं सञ्ञाय चतुक्कम्पि परिपुण्णमेव गहेत्वा, अपरे अट्ठकन्ति वदन्ति. तदुभयन्ति तं सञ्ञाअट्ठकन्ति वुत्तं उभयं. परतो आवि भविस्सतीति, ‘‘चतस्सो रूपसञ्ञी’’तिआदिना उपरि पकासेस्सति. वक्खति हि – ‘‘कोट्ठासतो अट्ठ, अत्थतो पन सत्त सञ्ञा होन्ती’’ति (म. नि. अट्ठ. ३.२२). एत्थाति, ‘‘एतं वा पना’’ति एतस्मिं वाक्ये. समतिक्कमितुं सक्कोन्ति तत्थ आदीनवदस्सनेन तदुद्धं आनिसंसदस्सनेन च ब्रूहितसद्धादि गुणत्ता, विपरियायेन असक्कुणनं वेदितब्बं. ये सक्कोन्ति, तेव गहिता तेसंयेव वसेन वक्खमानस्स विसेसस्स वत्तुं सक्कुणेय्यत्ता. सक्कोन्तानञ्च नेसं उपातिवत्तनं ¶ अत्तनो ञाणबलानुरूपन्ति इममत्थं उपमाय दस्सेतुं, ‘‘तेसं पना’’तिआदि वुत्तं. तत्थ अप्पमाणन्ति अप्पमाणारम्मणो ¶ , अप्पमाणारम्मणता चस्स आगमनवसेन वेदितब्बा अनन्तारम्मणतो वा. न हि आरम्मणे अनन्तन्ति परमानन्तस्स पमाणं वा गण्हाति. सुखदुक्खेहि अनिञ्जनतो रूपविरागभावनाविसेसताय च आनेञ्जं पत्वा तिट्ठति, अयं नो अत्ताति अभिवदन्ता तिट्ठन्ति. विञ्ञाणकसिणमेकेति विञ्ञाणञ्चायतनं एके दिट्ठिगतिका अत्ताति वदन्ति. तेनाह – ‘‘विञ्ञाणञ्चायतनं ताव दस्सेतु’’न्ति. तस्स पन आरम्मणभूतं कसिणुग्घाटिमाकासे पवत्तविञ्ञाणन्ति अपरे. तञ्हि कसिणं मनसिकारवसेन, ‘‘विञ्ञाणकसिण’’न्ति, विञ्ञाणञ्च तं आरम्मणट्ठेन आयतनञ्चाति, ‘‘विञ्ञाणञ्चायतन’’न्ति च वुच्चति. आकिञ्चञ्ञायतनमेकेति एत्थापि एसेव नयो.

तयिदन्ति य-कारो पदसन्धिकरोति आह ‘‘तं इद’’न्ति. दिट्ठिगतन्ति यथा वुत्तं ‘‘सञ्ञी अत्ता’’ति एवं वुत्तं दिट्ठिं. दिट्ठियेव हि दिट्ठिगतं ‘‘मुत्तगतं (म. नि. २.११९; अ. नि. ९.११), सङ्खारगत’’न्तिआदीसु (महानि. ४१) विय. गन्तब्बाभावतो वा दिट्ठिया गतमत्तं दिट्ठिगतं, दिट्ठिया गहणमत्तन्ति अत्थो. दिट्ठिपकारो वा दिट्ठिगतं. लोकिया हि विधयुत्तगतपकारसद्दे समानत्थे इच्छन्ति. दिट्ठिपच्चयो दिट्ठिकारणं, अविज्जादि दिट्ठिट्ठानन्ति अत्थो. तत्थ अविज्जापि हि दिट्ठिट्ठानं उपनिस्सयादिभावतो. यथाह – ‘‘अस्सुतवा, भिक्खवे, पुथुज्जनो अरियानं अदस्सावी अरियधम्मस्स अकोविदो’’तिआदि (ध. स. १००७). फस्सोपि दिट्ठिट्ठानं. यथाह ‘‘तदपि फस्सपच्चया’’ति (दी. नि. १.११८-१२४). सञ्ञापि दिट्ठिट्ठानं. यथाह ‘‘सञ्ञानिदाना हि पपञ्चसङ्खा’’ति (सु. नि. ८८०; महानि. १०९). वितक्कोपि दिट्ठिट्ठानं. यथाह – ‘‘तक्कञ्च दिट्ठीसु पकप्पयित्वा, सच्चं मुसाति द्वयधम्ममाहू’’ति (सु. नि. ८९२; महानि. १२१). अयोनिसोमनसिकारोपि दिट्ठिट्ठानं. यथाह – ‘‘तस्सेवं मनसिकरोतो छन्नं दिट्ठीनं अञ्ञतरा दिट्ठि उप्पज्जति, अत्थि मे अत्ताति तस्स सच्चतो थेततो दिट्ठि उप्पज्जती’’ति (म. नि. १.१९). दिट्ठारम्मणन्ति दिट्ठिआरम्मणभूतं उपादानक्खन्धपञ्चकं. तेनाह – ‘‘रूपं अत्ततो समनुपस्सती’’तिआदि (पटि. म. १.१३०). रूपवेदनादिविनिमुत्तस्स दिट्ठिया आरम्मणस्स अभावतो अनादियित्वा इदमेव ¶ दस्सेति – ‘‘इमिना पच्चयेन इदं नाम दस्सनं गहित’’न्ति. इमिना पच्चयेनाति वा एत्थ पच्चयग्गहणेन आरम्मणम्पि गहितमेवाति दट्ठब्बं.

तदेवाति दिट्ठिगतञ्चेव दिट्ठिपच्चयञ्च. रूपसञ्ञानन्ति एत्थ इति-सद्दो आदिअत्थो. एवं-सद्दो पकारत्थो, ‘‘यदि रूपसञ्ञान’’न्तिआदिना पकारेन वुत्तसञ्ञानन्ति अत्थो. निरुपक्किलेसा ¶ नीवरणादि उपक्किलेसविमुत्तितो. उत्तमा पणीतभावप्पत्तितो, ततो एव सेट्ठा, सेट्ठत्ता एव उत्तरितराभावतो अनुत्तरिया. अक्खायतीति उपट्ठाति. आकिञ्चञ्ञायतनसञ्ञाय विसुं वुच्चमानत्ता चतुत्थारुप्पसञ्ञाय च इमस्मिं सञ्ञीवादे अनोतरणतो, ‘‘यदि आरुप्पसञ्ञानन्ति इमिना आकासानञ्चायतन-विञ्ञाणञ्चायतनसञ्ञा’’इच्चेव वुत्तं. इतरेहि पन द्वीहीति, ‘‘यदि एकत्तसञ्ञानं, यदि नानत्तसञ्ञान’’न्ति इमेहि द्वीहि पदेहि. समापन्नकवारो च तथा इध कथितोति अधिप्पायो. कोट्ठासतो अट्ठ सञ्ञा चतुक्कद्वयसङ्गहतो. एकत्तसञ्ञीपदं ठपेत्वा अत्थतो पन सत्त सञ्ञा होन्ति अग्गहितग्गहणेनाति अधिप्पायो. तेनाह – ‘‘समापन्नक…पे… सङ्गहितोयेवा’’ति.

सञ्ञागतन्ति सञ्ञावसेन गतं, सञ्ञासङ्गहं गतं वा. तस्स पन अदिट्ठिगतस्सपि उपलब्भमानत्ता, ‘‘सद्धिं दिट्ठिगतेना’’ति वुत्तं. पच्चयेहि समागन्त्वा कतन्ति सह कारणभूतेहि पच्चयेहि तेनेव सह कारणभावेन समागन्त्वा निब्बत्तितं; पटिच्चसमुप्पन्नन्ति अत्थो. सङ्खतत्ता ओळारिकं उप्पादवयञ्ञथत्तसब्भावतो. यस्स हि उप्पादो पञ्ञायति, वयो पञ्ञायति, ठितस्स अञ्ञथत्तं पञ्ञायति, तं खणे खणे भिज्जनसभावतो पस्सन्तस्स पाकटभूतविकारं ओळारिकं सिया. न चेत्थ मग्गफलधम्मा निदस्सेतब्बा तेसं तथा अननुपस्सितब्बतो; तेसम्पि सङ्खतभावेन इतरेहि समानयोगक्खमताय दुन्निवारयभावतो. तथा हि ‘‘असेसविरागनिरोधा’’ति (उदा. ३) वचनतो मग्गस्सपि निस्सरणभावेन ‘‘अत्थि खो पन सङ्खारानं निरोधो’’ति निब्बानमेवेत्थ पटियोगभावेन उद्धटं ‘‘निरुज्झन्ति एत्था’’ति कत्वा. निरोधसङ्खातं निब्बानं नाम अत्थीति एत्थ, – ‘‘अत्थि, भिक्खवे, अजातं ¶ अभूतं असङ्खत’’न्ति सुत्तपदं (उदा. ७३) आनेत्वा वत्तब्बं. निब्बानदस्सीति सच्छिकिरियाभिसमयवसेन निब्बानदस्सी, ततो एव इतराभिसमयत्थसिद्धिया तं सङ्खतं अतिक्कन्तो.

२३. अट्ठसु असञ्ञीवादेसूति इदं ब्रह्मजाले (दी. नि. १.७८-८०) आगतनयेन वुत्तमेव हि सन्धाय हेट्ठा, ‘‘सञ्ञीति इमिना अट्ठ असञ्ञीवादा कथिता’’ति वुत्तं. इध पन चत्तारो वादा एव उद्धटा. तेनाह ‘‘असञ्ञी’’तिआदि. एस नयो परतो ‘‘अट्ठसु नेवसञ्ञीनासञ्ञीवादेसू’’ति एत्थापि. सञ्ञाय सति ताय वेदनागाहसब्भावतो ‘‘आबाधनट्ठेन सञ्ञा रोगो’’ति वुत्तं. दुक्खतासूलयोगतो किलेसासुचिपग्घरणतो उप्पादजराभङ्गेहि उद्धुमातपक्कपभिज्जनतो च सञ्ञा गण्डो; स्वायमत्थो दोसदुट्ठताय एव होतीति आह – ‘‘सदोसट्ठेन गण्डो’’ति. पीळाजननतो अन्तोतुदनतो दुरुद्धरणतो च सञ्ञा सल्लं; स्वायमत्थो ¶ अत्तभावं अनुपविसित्वा अवट्ठानेनाति आह ‘‘अनुपविट्ठट्ठेन सल्ल’’न्ति. पटिसन्धिग्गहणे विञ्ञाणं कुतोचि आगतं विय होतीति वुत्तं ‘‘पटिसन्धिवसेन आगति’’न्ति. गतिन्ति पवत्तिं. सा पन तासु तासु गतीसु वुत्ति होतीति वुत्तं – ‘‘चुतिवसेन गति’’न्ति; वड्ढनवसेन घनपबन्धवसेनाति अत्थो. तेनाह ‘‘अपरापर’’न्ति. अपरापरञ्हि पबन्धवसेन पवत्तमानं विञ्ञाणं नन्दूपसेचनं; इतरं खन्धत्तयं वा निस्साय अभिवुद्धिं पतिट्ठं महन्तञ्च पापुणातीति. पवड्ढवसेन वा गतिं, निक्खेपवसेन चुतिं, ततो अपरापरञ्च रूपपवत्तनवसेन उपपत्तिं, इन्द्रियपरिपाकवसेन वुड्ढिं तस्स तस्स कम्मस्स कतूपचितभावेन विरुळ्हिं; तस्स कम्मस्स फलनिब्बत्तिया वेपुल्लन्ति योजेतब्बं.

कामञ्चातिआदिना ‘‘अञ्ञत्र रूपा’’तिआदिका चोदना लक्खणवसेन वुत्ताति दस्सेत्वा अयञ्च नयो चोदनाय अविसिट्ठविसयताय सिया; विसिट्ठविसया पनायं चोदनाति दस्सेतुं, ‘‘अयं पन पञ्हो’’तिआदि वुत्तं. एत्तके खन्धेति यथावुत्ते रूपवेदनादिके चत्तारो खन्धे. अञ्ञत्र रूपाति इमिना यत्थ कत्थचि रूपेन विना विञ्ञाणस्स पवत्ति नत्थीति दीपितं होति. भवविसेसचोदनाय सभावतो ¶ एव विञ्ञाणेन विना रूपस्सपि पवत्ति नत्थीति दीपितं होतीति आह – ‘‘अरूपभवेपि रूपं, असञ्ञाभवे च विञ्ञाणं अत्थी’’ति. निरोधसमापन्नस्साति सञ्ञावेदयितनिरोधं समापन्नस्सपि विञ्ञाणं अत्थि. ब्यञ्जनच्छायाय चे अत्थं पटिबाहसीति यदि सद्दत्थमेव गहेत्वा अधिप्पायं न गण्हसि नेय्यत्थं सुत्तन्ति. एत्थ च असञ्ञभवे निब्बत्तसत्तवसेन पठमवादो; सञ्ञं अत्ततो समनुपस्सतीति एत्थ वुत्तनयेन सञ्ञंयेव अत्ताति गहेत्वा तस्स किञ्चनभावेन ठिताय अञ्ञाय सञ्ञाय अभावतो असञ्ञीति पवत्तो दुतियवादो; तथा सञ्ञाय सह रूपधम्मे सब्बे एव वा रूपारूपधम्मे अत्ताति गहेत्वा पवत्तो ततियवादो; तक्कग्गाहवसेनेव पवत्तो चतुत्थवादो. तेसु यं वत्तब्बं, तं हेट्ठा वुत्तनयेनेव वेदितब्बं. नेवसञ्ञीनासञ्ञीवादेपि असञ्ञभवे निब्बत्तस्स सत्तस्स चुतिपटिसन्धीसु; सब्बत्थ वा पटुसञ्ञाकिच्चं कातुं असमत्थाय सुखुमाय सञ्ञाय अत्थिभावपटिजाननवसेन पठमवादो; असञ्ञीवादे वुत्तनयेन सुखुमाय सञ्ञाय वसेन सञ्जाननसभावतापटिजाननवसेन च दुतियवादादयो पवत्ताति. एवमेत्थ एतेसं वादानं सब्भावो वेदितब्बो. सेसं वुत्तनयमेव.

२४. यत्थ न सञ्ञा, तत्थ ञाणस्स सम्भवो एव नत्थीति आह – ‘‘असञ्ञा सम्मोहो’’ति, असञ्ञभावो नाम सम्मोहप्पवत्तीति अत्थो. यथा निय्यन्तीति निय्यानियाति बहुलं वचनतो कत्तुसाधनो निय्यानियसद्दो, एवं इध विञ्ञातब्बसद्दोति आह – ‘‘विजानातीति ¶ विञ्ञातब्ब’’न्ति, विजाननं विञ्ञाणन्ति अत्थो. तेन दिट्ठसुतमुतविञ्ञातब्बमत्तेनाति दिट्ठसुतमुतविञ्ञाणप्पमाणेनाति अत्थो दट्ठब्बो. तेनाह – ‘‘पञ्चद्वारिकसञ्ञापवत्तिमत्तेना’’ति, निब्बिकप्पभावतो पञ्चद्वारिकसञ्ञापवत्तिसमेन भावनाभिनीहारेनाति अत्थो. ओळारिकसङ्खारप्पवत्तिमत्तेनाति ओळारिकानं सङ्खारानं पवत्तिया. ओळारिकसङ्खाराति चेत्थ आकिञ्चञ्ञायतनपरियोसाना समापत्तिधम्मा अधिप्पेता. उपसम्पदन्ति ये सञ्ञाय, असञ्ञिभावे च दोसं दिस्वा नेवसञ्ञानासञ्ञायतनं वण्णेन्तापि रूपज्झानपटिलाभमत्तेन तस्स सम्पादनं पटिलाभं अधिगमं पञ्ञपेन्ति, तेसं तस्स ब्यसनं अक्खायति अनुपायभावतो. तेनाह ‘‘विनासो’’तिआदि. वुट्ठानन्ति सदिससमापज्जनपुब्बकं परिवुट्ठानं. समापत्ति एव तेसं नत्थि अनधिगतत्ता. ओळारिकसङ्खारप्पवत्तिया अन्तमसो आकिञ्चञ्ञायतनसङ्खारप्पवत्तियापि पत्तब्बन्ति न अक्खायति ¶ तेपि समतिक्कमित्वा पत्तब्बतो. सङ्खारानन्ति निद्धारणे सामिवचनं. अवसेसाति इतो परं सुखुमभावो नाम नत्थीति सुखुमभावापत्तिया अवसेसा. तेनाह – ‘‘भावनावसेन सब्बसुखुमभावं पत्ता सङ्खारा’’ति. एतन्ति नेवसञ्ञानासञ्ञायतनं, पत्तब्बं नाम होति तादिससङ्खारप्पत्तियं तब्बोहारतो. सङ्खतं समेच्च सम्भुय्य पच्चयेहि कतत्ता.

२५. ‘‘ये ते समणब्राह्मणा सतो सत्तस्स उच्छेदं विनासं विभवं पञ्ञपेन्ती’’ति (म. नि. ३.२५) वक्खमानत्ता सबुद्धियं विपरिवत्तमाने एकज्झं गहेत्वा, ‘‘तत्रा’’ति भगवता वुत्तन्ति आह – ‘‘तत्राति सत्तसु उच्छेदवादेसु भुम्म’’न्ति. उद्धं सरन्ति उद्धं गतं सरन्ताति तं दस्सेन्तो आह ‘‘उद्धं वुच्चती’’तिआदि. सरन्ताति यत्थ पत्थेन्ति न लभन्ति, तं जानन्ता. आसत्तिन्ति आसीसनं. पेच्चाति परलोके. वाणिजूपमा वियाति भवपरियापन्नफलविसेसापेक्खाय पटिपज्जनतो. सक्कायस्स भयाति सन्तो कायोति सक्कायो, परमत्थतो विज्जमानो धम्मसमूहोति कत्वा उपादानक्खन्धपञ्चकं, ततो भायनेन. मा खीयि मा परिक्खयं अगमासि. मा ओसीदि मा हेट्ठा भस्सि. अब्भन्ति आकासं मा उन्द्रियि मा भिज्जित्वा पति. गद्दुलेन बद्धो गद्दुलबद्धो. दळ्हथम्भो विय खीलो विय च सक्कायो दुम्मोचनीयतो. सा विय दिट्ठिगतिको तस्स अनुपरिवत्तनतो. दण्डको विय दिट्ठि छेदनकरणाय असमत्थभावकरणतो. रज्जु विय तण्हा बन्धनतो च, आरम्मणकरणवसेन समन्नागमनवसेन च सम्बद्धभावतो. तेन वुत्तं – ‘‘दिट्ठिदण्डके पवेसिताय तण्हारज्जुया’’ति.

२६. भगवा अत्तनो देसनाविलासेन वेनेय्यज्झासयवसेन (चतुचत्तारीस अपरन्तकप्पिकवादा तत्थ तत्थ अन्तोगधाति) उद्देसवसेन पञ्चेव सङ्गहेत्वा यथुद्देसं निगमेन्तो, ‘‘इमानेव ¶ पञ्चायतनानी’’ति ¶ आह. तत्थ दुक्खस्स निमित्तभावतो दिट्ठिगतानं कारणट्ठेन आयतनत्थोति वुत्तं – ‘‘इमानेव पञ्च कारणानी’’ति. सञ्ञीआदिवसेन तीणि उच्छेदवादोति चत्तारि भाजितानि. इतरं पन दिट्ठधम्मनिब्बानं कुहिं पविट्ठं? सरूपतो अभाजितत्ता यथाभाजितेसु वादेसु कत्थ अन्तोगधन्ति पुच्छति. उद्देसे पन सरूपतो गहितमेव, ‘‘दिट्ठधम्मनिब्बानं वा पनेके अभिवदन्ती’’ति. इतरो एकत्तसञ्ञीवादे नानत्तसञ्ञीवादे अन्तोगधन्ति दस्सेन्तो ‘‘एकत्त…पे… वेदितब्ब’’न्ति आह यथासुखञ्चेतं वुत्तं. पठमो हि दिट्ठधम्मनिब्बानवादो नानत्तसञ्ञीवादे अन्तोगधो, इतरे चत्तारो एकत्तसञ्ञीवादे.

२७. अतीतकोट्ठाससङ्खातन्ति अतीतं खन्धकोट्ठाससङ्खातं पुब्बन्तं. पुब्बे निवुत्थधम्मविसया कप्पना इधाधिप्पेता, तस्मा अतीतकालवाचको इध पुब्बसद्दो, रूपादिखन्धविनिमुत्तञ्च कप्पनावत्थु नत्थि, अन्तसद्दो च कोट्ठासवाचको. तेन वुत्तं ‘‘अतीतकोट्ठाससङ्खातं पुब्बन्तं कप्पेत्वा’’ति. ‘‘कप्पेत्वा’’ति च तस्मिं पुब्बन्ते तण्हायनाभिनिविसानं समत्थनं परिनिट्ठापनं वदति. सेसम्पीति ‘‘पुब्बन्तानुदिट्ठी’’ति एवमादिकं. पुब्बे वुत्तप्पकारन्ति ‘‘अपरन्तानुदिट्ठिनो’’तिआदीसु वुत्तप्पकारं. एकेकस्मिञ्च अत्ताति आहितो अहंमानो एत्थाति कत्वा, लोकोति लोकियन्ति एत्थ पुञ्ञपापानि तब्बिपाका चाति कत्वा, तं तं गहणविसेसं उपादाय पञ्ञापनं होतीति आह – ‘‘रूपादीसु अञ्ञतरं अत्ताति च लोकोति च गहेत्वा’’ति. सब्बदाभावेन सस्सतो. अमरो निच्चो धुवोति तस्सेव वेवचनानि. मरणाभावेन अमरो, उप्पादाभावेन सब्बकालं वत्तनतो निच्चो, थिरट्ठेन विकाराभावेन धुवो, यथाहातिआदिना यथावुत्तमत्थं निद्देसपटिसम्भिदापाळीहि विभावेति. अयञ्च अत्थो ‘‘रूपं अत्ततो समनुपस्सति, वेदनं… सञ्ञं… सङ्खारे… विञ्ञाणं अत्ततो समनुपस्सती’’ति (पटि. म. १.१३०-१३१) इमिस्सा पञ्चविधाय सक्कायदिट्ठिया वसेन वुत्तो. ‘‘रूपवन्त’’न्तिआदिकाय (पटि. म. १.१३०-१३१) पन पञ्चदसविधाय सक्कायदिट्ठिया वसेन चत्तारो चत्तारो खन्धे, ‘‘अत्ता’’ति गहेत्वा तदञ्ञं – ‘‘लोको’’ति पञ्ञपेन्तीति अयम्पि अत्थो लब्भति, तथा एकं खन्धं, ‘‘अत्ता’’ति गहेत्वा तदञ्ञे ‘‘लोको’’ति पञ्ञपेन्तीति एवमेत्थ अत्थो दट्ठब्बो. एसेव नयोति इमिना यथा ‘‘रूपादीसु अञ्ञतरं अत्ताति ¶ च लोकोति च गहेत्वा सस्सतो…पे… धुवो’’ति अत्थो वुत्तो; एवं असस्सतो अनिच्चो अधुवो उच्छिज्जति विनस्सति न होति परं मरणा; निच्चो च अनिच्चो च नेवनिच्चो नानिच्चोति एवमादिमत्थं अतिदिसति.

चत्तारो सस्सतवादाति लाभीवसेन तयो, तक्कीवसेन एकोति एवं चत्तारो. पुब्बेनिवासञाणलाभी ¶ तित्थियो मन्दपञ्ञो अनेकजातिसतसहस्समत्तं अनुस्सरति, मज्झिमपञ्ञो दस संवट्टविवट्टकप्पानि, तिक्खपञ्ञो चत्तारीस संवट्टविवट्टकप्पानि, न ततो परं. सो एवं अनुस्सरन्तो अत्ता च लोको चाति अभिवदति. तक्की पन तक्कपरियाहतं वीमंसानुचरितं सयंपटिभानं सस्सतो अत्ता च लोको चाति अभिवदति. तेन वुत्तं – ‘‘लाभीवसेन तयो, तक्कीवसेन एकोति एवं चत्तारो सस्सतवादा’’ति. एतेनेव च अधिच्चसमुप्पत्तिकवादो विय सस्सतवादो कस्मा दुविधेन न विभत्तोति चे? पटिक्खित्तत्ताति दट्ठब्बं.

एत्थ च, ‘‘सस्सतो अत्ता च लोको चा’’ति वादे अयमयुत्तताविभावना – यदि हि परेन परिकप्पितो अत्ता, लोको वा सस्सतो सिया, तस्स निब्बिकारताय पुरिमरूपाविजहनतो कस्सचि विसेसाधानस्स कातुं असक्कुणेय्यताय अहिततो निवत्तनत्थं हिते च पटिपत्तिअत्थं उपदेसो एव निप्पयोजनो सिया सस्सतवादिनो. कथं वा सो उपदेसो पवत्तीयति विकाराभावतो; एवञ्च अत्तनो अजटाकासस्स विय दानादिकिरिया हिंसादिकिरिया च न सम्भवति; तथा सुखस्स दुक्खस्स च अनुभवननिबन्धो एव सस्सतवादिनो न युज्जति कम्मबद्धाभावतो, जातिआदीनं असम्भवतो कुतो विमोक्खो. अथ पन धम्ममत्तं तस्स उप्पज्जति चेव विनस्सति च, यस्स वसेनायं किरियादिवोहारोति वदेय्य. एवम्पि पुरिमरूपाविजहनेन अवट्ठितस्स अत्तनो धम्ममत्तन्ति न सक्का सम्भावेतुं; ते वा पनस्स धम्मा अवत्थाभूता ततो अञ्ञे वा सियुं अनञ्ञे वा, यदि अञ्ञे, न ताहि तस्स उप्पन्नाहिपि कोचि विसेसो अत्थि. यो हि करोति पटिसंवेदेति चवति उपपज्जति चाति इच्छितं. तस्मा तदवत्थो एव यथावुत्तदोसो, किञ्च धम्मकप्पनापि निरत्थका सिया. अथ अनञ्ञे, उप्पादविनासवन्तीहि अवत्थाहि ¶ अनञ्ञस्स अत्तनो तासं विय उप्पादविनाससम्भवापत्तितो कुतो निच्चतावकासो. तासम्पि वा अत्तनो विय निच्चताति बन्धनविमोक्खानं असम्भवो एवाति न युज्जति एव सस्सतवादो; न चेत्थ कोचि वादी धम्मानं सस्सतभावे परिसुद्धं युत्तिं वत्तुं समत्थो अत्थि; युत्तिरहितञ्च वचनं न पण्डितानं चित्तमाराधेतीति विञ्ञूहि छड्डितो एवायं सस्सतवादोति.

सत्त उच्छेदवादाति एत्थ ते सरूपमत्ततो हेट्ठा दस्सिता एव, तत्थ द्वे जना उच्छेददिट्ठिं गण्हन्ति लाभी च अलाभी च. तत्थ लाभी नाम दिब्बचक्खुञाणलाभी दिब्बेन चक्खुना अरहतो चुतिं दिस्वा उपपत्तिं अपस्सन्तो. यो वा पुथुज्जनानम्पि चुतिमत्तमेव दट्ठुं सक्कोति, पुब्बयोगाभावेन परिकम्माकरणेन वा उपपातं दट्ठुं न सक्कोति. सो ‘‘तत्थ तत्थेव ¶ अत्ता उच्छिज्जती’’ति उच्छेददिट्ठिं गण्हाति. अलाभी – ‘‘को परलोकं जानाति, एत्तको जीवविसयो, याव इन्द्रियगोचरो’’ति अत्तनो धीतुया हत्थग्गण्हनकराजा विय कामसुखगिद्धताय वा, ‘‘यथा रुक्खपण्णानि रुक्खतो पतितानि न पटिसन्धियन्ति, एवं सब्बेपि सत्ता अप्पटिसन्धिकमरणमेव गच्छन्ति, जलबुब्बुळकूपमा सत्ता’’ति तक्कमत्तवसेन वा उच्छेददिट्ठिं गण्हाति. तत्थ यं हेट्ठा वुत्तं – ‘‘मनुस्सत्तभावे कामावचरदेवत्तभावे रूपावचरदेवत्तभावे चतुब्बिधअरूपत्तभावे चवित्वा सत्तस्स उच्छेदपञ्ञापनवसेन सत्त उच्छेदवादा कथिता’’ति. तत्थ युत्तं ताव पुरिमेसु तीसु वादेसु ‘‘कायस्स भेदा’’ति वुत्तं; पञ्चवोकारभवपरियापन्नं अत्तभावं आरब्भ पवत्तत्ता तेसं वादानं, न युत्तं चतुवोकारभवपरियापन्नं अत्तभावं निस्साय पवत्तेसु चतुत्थादीसु चतूसु वादेसु, ‘‘कायस्स भेदा’’ति वुत्तं. न हि अरूपीनं कायो अत्थीति? सच्चमेतं, रूपभवे पवत्तवोहारेनेव दिट्ठिगतिको अरूपभवेपि कायवोहारमारोपेत्वा आह ‘‘कायस्स भेदा’’ति. यथा दिट्ठिगतिकेहि दिट्ठियो पञ्ञत्ता, तथेव भगवा दस्सेसीति. अरूपकायभावतो वा फस्सादिधम्मसमूहभूते अरूपत्तभावे कायनिद्देसो दट्ठब्बो.

एत्थाह – ‘‘कामावचरदेवत्तभावादिनिरवसेसविभवपतिट्ठापकानं दुतियवादादीनं युत्तो अपरन्तकप्पिकभावो अनागतद्धविसयत्ता तेसं ¶ वादानं; न पन दिट्ठिगतिक-पच्चक्खभूत-मनुस्सत्तभाव-समुच्छेदपतिट्ठापकस्स पठमवादस्स पच्चुप्पन्नविसयत्ता’’ति. यदि एवं यथा हि दुतियादिवादानं, पुरिमपुरिमवादसङ्गहितस्सेव अत्तनो उत्तरुत्तरभवोपपत्तिया समुच्छेदनतो युज्जति अपरन्तकप्पिकता, तथा च ‘‘नो च खो, भो, अयं अत्ता एत्तावता सम्मा समुच्छिन्नो होती’’तिआदि वुत्तं. एवं अनागतस्सेव मनुस्सत्तभावसमुच्छेदस्स अधिप्पेतत्ता पठमवादस्सपि अपरन्तकप्पिकता युज्जति. एवं सब्बस्सपि पुब्बन्ततो आगतस्स उच्छेदपञ्ञापनवसेन इध पुब्बन्तकप्पिकेसु देसना गता. एते उच्छेदवादा हेट्ठा अपरन्तकप्पिकेसु देसना गता. एते उच्छेदवादा हेट्ठा अपरन्तकप्पिकेसु तत्थ तत्थेव उच्छिज्जति, न ततो उद्धं पवत्ति अत्थीति दस्सनत्थं वुत्ता. जलबुब्बुळकूपमा हि सत्ताति तस्स लद्धि.

इधाति पुब्बन्तकप्पिकेसु. इधेव मनुस्सत्तभावादिके उच्छिज्जति विनट्ठविनासवसेन. एवं अनागते अनुप्पत्तिदस्सनपरानं उच्छेदवादानं अपरन्तकप्पिकेसु गहणं; पुब्बन्ततो पन आगतस्स अत्तनो इधेव उच्छेददस्सनपरानं पुब्बन्तकप्पिकेसु गहणं. इतो परं न गच्छतीति पन इदं अत्थतो आपन्नस्स अत्थस्स दस्सनं. सत्तेसु सङ्खारेसु च एकच्चसस्सतन्ति पवत्तो एकच्चसस्सतवादो ¶ . सो पन ब्रह्मकायिक-खिड्डापदोसिक-मनोपदोसिकत्तभावतो चवित्वा इधागतानं तक्किनो च उप्पज्जनवसेन चतुब्बिधोति आह ‘‘चत्तारो एकच्चसस्सतवादा’’ति. ‘‘सङ्खारेकच्चसस्सतिका’’ति इदं तेहि सस्सतभावेन गय्हमानानं धम्मानं यथासभावदस्सनवसेन वुत्तं, न पनेकच्चसस्सतिकमतदस्सनवसेन. तस्स हि सस्सताभिमतं असङ्खतमेवाति लद्धि. तथा हि वुत्तं (दी. नि. १.४९) ब्रह्मजाले – ‘‘चित्तन्ति वा मनोति वा विञ्ञाणन्ति वा अयं अत्ता निच्चो धुवो सस्सतो अविपरिणामधम्मो सस्सतिसमं तथेव ठस्सती’’ति. न हि यस्स भावस्स पच्चयेहि अभिसङ्खतभावं पटिजानाति; तस्सेव निच्चधुवादिभावो अनुम्मत्तकेन न सक्का पटिञ्ञातुं. एतेन, ‘‘उप्पादवयधुवतायुत्तभावा सिया निच्चा, सिया अनिच्चा, सिया न वत्तब्बा’’तिआदिना पवत्तस्स सत्तभङ्गवादस्स अयुत्तता विभाविता होति.

तत्थायं ¶ (दी. नि. टी. १.३८) अयुत्तताविभावना – यदि, ‘‘येन सभावेन यो धम्मो अत्थीति वुच्चति, तेनेव सभावेन सो धम्मो नत्थी’’तिआदिना वुच्चेय्य, सिया अनेकन्तवादो; अथ अञ्ञेन, सिया न अनेकन्तवादो; न चेत्थ देसन्तरादिसम्बद्धभावो युत्तो वत्तुं तस्स सब्बलोकसिद्धत्ता विवादाभावतो. ये पन वदन्ति – ‘‘यथा सुवण्णघटे मकुटे कते घटभावो नस्सति, मकुटभावो उप्पज्जति, सुवण्णभावो तिट्ठतियेव, एवं सब्बभावानं कोचि धम्मो नस्सति, कोचि उप्पज्जति, सभावो पन तिट्ठती’’ति. ते वत्तब्बा – किं तं सुवण्णं, यं घटे मकुटे च अवट्ठितं? यदि रूपादि, सो सद्दो विय अनिच्चो, अथ रूपादिसमूहो, समूहो नाम सम्मुतिमत्तं. तस्स वोहारमत्तस्स अत्थिता नत्थिता निच्चता वा न वत्तब्बा. तस्स परमत्थसभावेन अनुपलब्भनतोति अनेकन्तवादो न सिया. धम्मा च धम्मितो अञ्ञे वा सियुं अनञ्ञे वा. यदि अञ्ञे, न तेसं अनिच्चताय धम्मी अनिच्चो अञ्ञत्ता. न हि रूपा चक्खुविञ्ञाणं अञ्ञत्ता, न च रूपे चक्खुविञ्ञाणसद्दो होति; किञ्च धम्मकप्पनापि निरत्थिका सिया धम्मिनो निच्चानिच्चताय असिज्झनतो अथ अनञ्ञे; उप्पादविनासवन्तेहि अनञ्ञस्स धम्मिनो तेसं विय उप्पादविनाससब्भावतो कुतो निच्चतावकासो, तेसम्पि वा धम्मिनो विय निच्चतापत्ति सिया. अपिच निच्चानिच्चनवत्तब्बरूपो अत्ता च लोको च परमत्थतो विज्जमानतापटिजाननतो यथा निच्चादीनं अञ्ञतरं रूपं, यथा वा दीपादयो. न हि दीपादीनं उदयब्बयसभावानं निच्चानिच्चनवत्तब्बसभावता सक्का वत्तुं जीवस्स निच्चादीसु अञ्ञतरं रूपं वियाति एवं सत्तभङ्गस्स विय सेसभङ्गानम्पि असम्भवोयेवाति सत्तभङ्गवादस्स अयुत्तता वेदितब्बाति.

एत्थ ¶ च, ‘‘इस्सरो निच्चो, अञ्ञे सत्ता अनिच्चा’’ति एवं पवत्तवादा सत्तेकच्चसस्सतवादा; सेय्यथापि इस्सरवादादयो. ‘‘परमाणवो निच्चा धुवा, द्विअणुकादयो अनिच्चा’’ति एवं पवत्तवादा सङ्खारेकच्चसस्सतवादा; सेय्यथापि कणादवादादयो. ननु च ‘‘एकच्चे धम्मा सस्सता, एकच्चे ¶ असस्सता’’ति; एतस्मिं वादे चक्खादीनं असस्सततासन्निट्ठानं यथासभावावबोधो एव, तयिदं कथं मिच्छादस्सनन्ति, को एवमाह – ‘‘चक्खादीनं असस्सतभावसन्निट्ठानं मिच्छादस्सन’’न्ति? असस्सतेसुयेव पन केसञ्चि धम्मानं सस्सतभावाभिनिवेसो इध मिच्छादस्सनं; तेन पन एकवारे पवत्तमानेन चक्खादीनं असस्सतभावावबोधो विदूसितो संसट्ठभावतो; विससंसट्ठो विय सप्पिमण्डो सकिच्चकारणासमत्तताय सम्मादस्सनपक्खे ठपेतब्बतं नारहति. अथ वा असस्सतभावेन निच्छितापि चक्खुआदयो समारोपितजीवसभावा एव दिट्ठिगति केहि गय्हन्तीति तदवबोधस्स मिच्छादस्सनभावो न सक्का निवारेतुं. तथा हि वुत्तं ब्रह्मजाले (दी. नि. १.४९) – ‘‘चक्खुन्ति वा…पे… कायोति वा अयं मे अत्ता’’तिआदि. एवञ्च कत्वा असङ्खताय सङ्खताय च धातुया वसेन यथाक्कमं एकच्चे धम्मा सस्सता; एकच्चे असस्सताति एवं पवत्तो विभज्जवादोपि एकच्चसस्सतवादो आपज्जतीति एवंपकारा चोदना अनोकासा होति अविपरीतधम्मसभावसम्पटिपत्तिभावतो.

न मरतीति अमरा. का सा? ‘‘एवन्तिपि मे नो’’तिआदिना (दी. नि. १.६२) नयेन परियन्तरहिता दिट्ठिगतिकस्स दिट्ठि च वाचा च, अमराय दिट्ठिया वाचाय विविधो खेपोति अमराविक्खेपो. सो एतस्स अत्थीति अमराविक्खेपो. अथ वा अमराति एका मच्छजाति, सा उम्मुज्जननिम्मुज्जनादिवसेन उदके सन्धावमाना गाहं न गच्छति; एवमेवं अयम्पि वादो इतो चितो च सन्धावति, गाहं नागच्छतीति अमराविक्खेपो, सो एव अमराविक्खेपिको. स्वायं वादो मुसावादअनुयोगछन्दरागमोहहेतुकताय चतुधा पवत्तोति आह – ‘‘चत्तारो अमराविक्खेपिका वुत्ता’’ति. ननु चेत्थ (दी. नि. टी. १.६५-६६) चतुब्बिधोपि अमराविक्खेपिको कुसलादिके धम्मे परलोकत्तिकादीनि च यथाभूतं अनवबुज्झमानो, तत्थ तत्थ पञ्हं पुट्ठो पुच्छाय विक्खेपनमत्तं आपज्जतीति तस्स कथं दिट्ठिगतिकभावो. न हि अवत्तुकामस्स विय पुच्छितमत्थं अजानन्तस्स विक्खेपकरणमत्तेन दिट्ठिगतिकता युत्ताति? न हेवं पुच्छाविक्खेपकरणमत्तेन तस्स दिट्ठिगतिकता इच्छिता, अथ खो मिच्छाभिनिवेसेन. सस्सतवसेन मिच्छाभिनिविट्ठोयेव हि मन्दबुद्धिताय कुसलादिधम्मे परलोकत्तिकादीनि ¶ च, याथावतो अप्पटिपज्जमानो अत्तना अविञ्ञातस्स अत्थस्स परं विञ्ञापेतुं असमत्थताय मुसावादादिभयेन च विक्खेपं आपज्जतीति. तथा हिस्स ¶ वादस्स सस्सतदिट्ठिसङ्गहो वुत्तो. अथ वा पुञ्ञपापानं, तब्बिपाकानञ्च अनवबोधेन, असद्दहनेन च, ‘‘तब्बिसयाय पुच्छाय विक्खेपकरणंयेव युत्तं सुन्दरञ्चा’’ति, खन्तिं रुचिं उप्पादेत्वा अभिनिविसन्तस्स उप्पन्ना विसुंयेवेका एसा दिट्ठि सत्तभङ्गदिट्ठि वियाति दट्ठब्बा. तथा चेव वुत्तं – ‘‘परियन्तरहिता दिट्ठिगतिकस्स दिट्ठि चेव वाचा चा’’ति (दी. नि. अट्ठ. १.६१). कथं पनस्सा सस्सतदिट्ठिसङ्गहो? उच्छेदवसेन अनभिनिवेसतो. ‘‘नत्थि कोचि धम्मानं यथाभूतवेदी विवादबहुलत्ता लोकस्स; ‘एवमेव’न्ति पन सद्दन्तरेन धम्मे निज्झानना अनादिकालिका लोके’’ति गाहवसेन सस्सतलेसोपेत्थ लब्भतियेव.

अमति गच्छति एत्थ सभावो ओसानन्ति अन्तो, मरियादो, सो एतस्स अत्थीति अन्तवा. तेनाह ‘‘सपरियन्तो’’ति. अवड्ढितकसिणस्स पुग्गलस्स एवं होतीति योजना. दुतियवादो ‘‘अनन्तवा लोको’’ति वादो. ततियवादो ‘‘अन्तवा च अनन्तवा चा’’ति वादो. चतुत्थवादो ‘‘नेवन्तवा नानन्तवा’’ति वादो. एते एव चत्तारो वादिनो सन्धाय ब्रह्मजाले (दी. नि. १.५३) – ‘‘अन्तानन्तिका अन्तानन्तं लोकस्स पञ्ञपेन्ति चतूहि वत्थूही’’ति वुत्तं. तत्थ (दी. नि. टी. १.५३) युत्तं ताव पुरिमानं तिण्णं वादीनं अन्तत्तञ्च अनन्तत्तञ्च अन्तानन्तत्तञ्च आरब्भ पवत्तवादत्ता अन्तानन्तिकत्तं. पच्छिमस्स पन तदुभयपटिसेधवसेन पवत्तवादत्ता कथमन्तानन्तिकत्तन्ति? तदुभयपटिसेधवसेन पवत्तवादत्ता एव. यस्मा पटिसेधवादोपि अन्तानन्तविसयो एव तं आरब्भ पवत्तत्ता. अपरे आहु – ‘‘यथा ततियवादे सम्भेदवसेन एतस्सेव अन्तवन्तता अनन्तता च सम्भवति, एवं तक्कीवादेपि कालभेदवसेन उभयसम्भवतो अञ्ञमञ्ञपटिसेधेन उभयञ्ञेव वुच्चति. कथं? अन्तवन्ततापटिसेधेन हि अनन्तता वुच्चति, अनन्ततापटिसेधेन च अन्तवन्तता, अन्तानन्तानञ्च ततियवादभावो कालभेदस्स अधिप्पेतत्ता. इदं वुत्तं होति यस्मा अयं लोकसञ्ञितो अत्ता झायीहि अधिगतविसेसेहि अनन्तो कदाचि सक्खि दिट्ठो अनुसुय्यति; तस्मा नेवन्तवा. यस्मा पन तेहि ¶ एव कदाचि अन्तवा सक्खि दिट्ठो अनुसुय्यति, तस्मा न पन अनन्तवा’’ति. यथा च अनुस्सुतितक्कीवसेन, एवं जातिस्सरतक्किआदीनञ्च वसेन यथासम्भवं योजेतब्बं. अयञ्हि तक्किको अवड्ढितभावपुब्बकत्ता पटिभागनिमित्तानं वड्ढितभावस्स वड्ढितकालवसेन अपच्चक्खकारिताय अनुस्सवादिमत्ते ठत्वा – ‘‘नेवन्तवा’’ति पटिक्खिपति, अवड्ढितकालवसेन पन ‘‘नानन्तो’’ति. न पन अन्तवन्ततानन्ततानं अच्चन्तमभावेन यथा तं ‘‘नेवसञ्ञीनासञ्ञी’’ति, अवस्सञ्च एतं एवं विञ्ञातब्बं, अञ्ञथा विक्खेपपक्खंयेव भजेय्य चतुत्थवादो. न हि अन्तवन्ततानन्ततातदुभयविनिमुत्तो अत्तनो ¶ पकारो अत्थि, तक्कीवादी च युत्तिमग्गको, कालभेदवसेन च तदुभयम्पि एकस्मिं न न युज्जतीति. अनन्तरचतुक्कन्ति एकत्तसञ्ञीति आगतसञ्ञीचतुक्कं.

एकन्तसुखीति एकन्तेनेव सुखी. तं पनस्स सुखं दुक्खेन अवोमिस्सं होतीति आह ‘‘निरन्तरसुखी’’ति. एकन्तसुखमेवाति इदं सुखबहुलतं सन्धाय वुत्तं. अतीतासु सत्तसु जातीसूति इदं ततो परं जातिस्सरञाणेन अनुस्सरितुं न सक्काति कत्वा वुत्तं. तादिसमेवाति सुखसमङ्गिमेव अत्तभावं. ‘‘एवं सुखसमङ्गी’’ति तं अनुस्सरन्तस्स जातिस्सरस्स अतीतजातियम्पि इध विय दुक्खफुट्ठस्स तं अनुस्सरन्तस्स.

सब्बेसम्पीति लाभीनं तक्कीनम्पि. तथाति इमिना ‘‘सब्बेसम्पी’’ति इदं पदं आकड्ढति. कामावचरं नाम अदुक्खमसुखं अनुळारं अविभूतन्ति आह ‘‘चतुत्थज्झानवसेना’’ति. चतुत्थज्झानं कारणभूतं एतस्स अत्थि, तेन वा निब्बत्तन्ति चतुत्थज्झानिकं. मज्झत्तस्साति मज्झत्तभूतस्स मज्झत्तवेदनाबहुलस्स. मज्झत्तभूतट्ठानमेव अत्तनो मज्झत्ततापत्तमेव भूतपुब्बं अनुस्सरन्तस्स. एकच्चसस्सतिकाति एकच्चसस्सतवादिनो वुत्ता. पुग्गलाधिट्ठानेन हि एकच्चसस्सतिका. एस नयो सेसेसुपि. अधिच्चसमुप्पन्नवादो सस्सतवादसमुद्दिट्ठोति कत्वा ‘‘द्वे अधिच्चसमुप्पन्निका’’ति च वुत्तं.

२८. दिट्ठुद्धारन्ति यथावुत्तानं दिट्ठीनं अनिय्यानिकभावदस्सनवसेन पदुद्धरणं. पच्चत्तंयेव ञाणन्ति अपरप्पच्चयं अत्तनियेव ञाणं. तं पन अत्तपच्चक्खं ¶ होतीति आह ‘‘पच्चक्खञाण’’न्ति. सुवण्णस्स विय दोसापगमेन उपक्किलेसविगमेन ञाणस्स विसुद्धन्ति आह ‘‘परिसुद्धन्ति निरुपक्किलेस’’न्ति. किलेसन्धकारविगमतो सप्पभासमुज्जलमेव होतीति वुत्तं – ‘‘परियोदातन्ति पभस्सर’’न्ति बाहिरसमयस्मिम्पि होन्ति झानस्स समिज्झनतो. मयमिदं जानामाति ‘‘सस्सतो अत्ता च लोको च इदमेव सच्चं मोघमञ्ञ’’न्ति च मिच्छागाहवसेन अञ्ञाणभागमेव परिब्रूहेत्वा ततो एव यथागहितं गाहं सन्धाय – ‘‘मयमिदं अत्थं तत्थ जानामा’’ति एवं तत्थ मिच्छागाहे अविज्जमानं ञाणकोट्ठासं ओतारेन्तियेव अनुप्पवेसेन्तियेव. न तं ञाणं, मिच्छादस्सनं नामेतं, किं पन तं मिच्छादस्सनं नाम? सस्सतो अत्ता च लोको चातिआदिना मिच्छाभिनिवेसभावतो. तेनाह ‘‘तदपि…पे… अत्थो’’ति. यं तं दिट्ठिया उपनिस्सयभूतं ञाणं, तं सन्धायाह – ‘‘जाननमत्तलक्खणत्ता ञाणभागमत्तमेवा’’ति. ञाणम्पि हि दिट्ठिया उपनिस्सयो होतियेव लाभिनो इतरस्स च तथा तथा मिच्छाभिनिवेसतो. अनुपातिवत्तनतो अनतिक्कमनतो. असाधारणतो न उपातिवत्तन्ति एतेनाति ¶ अनुपातिवत्तनं, ततो. उपादानपच्चयतोति उपादानस्स पच्चयभावतो. एतेन फलूपचारेनेव उपादानमाह. यदि ब्रह्मजाले आगता सब्बापि दिट्ठियो इध कथिता होन्ति, एवं सन्ते इदं सुत्तं ब्रह्मजालसुत्तेन एकसदिसन्ति आह – ‘‘ब्रह्मजाले पना’’तिआदि. ‘‘अञ्ञत्र रूपं अञ्ञत्र वेदना सक्कायंयेव अनुपरिधावन्ती’’ति वचनतो इध सक्कायदिट्ठि आगता. ब्रह्मजालं कथितमेव होति तत्थ आगतानं द्वासट्ठियापि दिट्ठीनं इधागतत्ता. सस्सतुच्छेदाभिनिवेसो अत्ताभिनिवेसपुब्बको, ‘‘अत्ता सस्सतो अत्ता उच्छेदो’’ति पवत्तनतो.

३०. द्वासट्ठि…पे… दस्सेतुन्ति कथं पनायमत्थो ‘‘इध, भिक्खवे, एकच्चो’’तिआदिपाळिया दस्सितो होतीति? अप्पहीनसक्कायदिट्ठिकस्स पुब्बन्तापरन्तदिट्ठिउपादियनजोतनतो. परिच्चागेनाति विक्खम्भनेन. चतुत्थज्झाननिरोधा ततियज्झानं उपसम्पज्ज विहरतीति एत्थ न परिहीनचतुत्थज्झानस्स ततियज्झानं भवति, ततियज्झाना वुट्ठितस्स पन चतुत्थज्झाना वुट्ठितस्स च ततियं पटिलोमनयेन सम्भवति. तेनाह ‘‘अयं ¶ पनेत्था’’तिआदि. एवंसम्पदमिदं वेदितब्बन्ति ‘‘पविवेका पीति निरुज्झती’’ति इदं, ‘‘निरामिससुखस्सनिरोधा’’ति एत्थ विय वुट्ठाननिरोधवसेन वुत्तन्ति वेदितब्बन्ति अत्थो. हीनज्झानपरियादानकदोमनस्सन्ति नीवरणसहगतदोमनस्समाह. तञ्हि झानपरियादानकरं. कम्मनीयभावोति समापत्तिं पत्तो विय समापत्तिसमापज्जनभावे कम्मक्खमभावो. सोमनस्सविधुरत्ता दोमनस्सं वियाति दोमनस्सन्ति वुत्तं. ‘‘उप्पज्जति पविवेका पीती’’ति पुन वुत्ता पीति झानद्वयपीति. यं ठानं छाया जहतीति यं पदेसं आतपेन अभिभुय्यमानं छाया जहति. तत्थ आतपे छायाति पदेसेन आतपसञ्ञितानं भूतसङ्खतानं पहानट्ठानमाह. तेनाह ‘‘यस्मिं ठाने’’तिआदि.

३१. निरामिसं सुखन्ति ततियज्झानसुखं दूरसमुस्सारितकामामिसत्ता.

३२. अदुक्खमसुखन्ति चतुत्थज्झानवेदनं, न यं किञ्चि उपेक्खावेदनं.

३३. निग्गहणोति ममंकारभावेन किञ्चिपि अगण्हन्तो. निब्बानस्स सप्पायन्ति निब्बानाधिगमस्स, निब्बानस्सेव वा अविलोमवसेन एकन्तिकुपायताय सप्पायं. तेनाह ‘‘उपकारभूत’’न्ति. सब्बत्थाति सब्बेसु तेभूमकधम्मेसु. एतन्ति एतं यथावुत्तसमथभावनाय किलेसानं विक्खम्भनं. सब्बत्थ निकन्तिया असुक्खापितत्ता कथं निब्बानस्स उपकारपटिपदा नाम जातं? न जायते वात्यधिप्पायो. सब्बत्थाति पुब्बन्तानुदिट्ठिआदिके सब्बस्मिं. अग्गण्हनवसेनाति ¶ तण्हागाहेन अग्गहणवसेन. यत्थ हि तण्हागाहो विमोचितो, तत्थ दिट्ठिमानग्गाहा सुक्खा विय होन्ति तदेकट्ठभावतो. तादिसस्स निब्बानगामिनी पटिपदा एव आसन्ने, न दूरे. तेन वुत्तं – ‘‘उपकारपटिपदा नाम जात’’न्ति. तादिसस्स च सन्तोहमस्मीतिआदिका समनुपस्सना अधिमानपक्खे तिट्ठतीति आह – ‘‘अभिवदतीति अभिमानेन उपवदती’’ति. इदमेव उपादियतीति नियमाभावतो ‘‘अट्ठारसविधम्पी’’ति वुत्तं. सेसपदेपि एसेव नयो. दिट्ठुपादाने सति सेसउपादानसम्भवो अवुत्तसिद्धोति तदेव उद्धटं.

से आयतने वेदितब्बेति निरोधस्स कारणं निब्बानं वेदितब्बं. द्विन्नं आयतनानन्ति चक्खायतनादीनं द्विन्नं आयतनानं. पटिक्खेपेन निब्बानं दस्सितं वेनेय्यज्झासयवसेन.

न ¶ गाधतीति न पतिट्ठाति. अतोति अस्मा निब्बाना. सराति तण्हा. सङ्खारपटिक्खेपेनाति सङ्खारेकदेसभूतानं चतुन्नं महाभूतानं पटिक्खेपेन.

विञ्ञाणन्ति विसिट्ठेन ञाणेन जानितब्बं. ततो एव अनिदस्सनं अचक्खुविञ्ञेय्यं अनिन्द्रियगोचरं. अनन्तन्ति अन्तरहितं, निच्चन्ति अत्थो. सब्बतो पभन्ति किलेसन्धकाराभावतो च समन्ततो पभस्सरं. ‘‘सब्बतो पप’’न्ति वा पाठो, सब्बतो पततित्थन्ति अत्थो. चत्तारीसकम्मट्ठानसङ्खातेहि तित्थेहि ओतरित्वा अनुपविसितब्बं अमतसरन्ति वुत्तं होति. अनुपादा कञ्चि धम्मं अग्गहेत्वा विमुच्चन्ति एत्थाति अनुपादाविमोक्खो, निब्बानं. अनुपादा विमुच्चति एतेनाति अनुपादाविमोक्खो, अग्गमग्गो. अनुपादाविमोक्खन्तिकताय पन अरहत्तफलं अनुपादाविमोक्खोति वुत्तं. सेसं सुविञ्ञेय्यमेव.

पञ्चत्तयसुत्तवण्णनाय लीनत्थप्पकासना समत्ता.

३. किन्तिसुत्तवण्णना

३४. भवोति ¶ परित्तो. अभवोति महन्तो. वुद्धिअत्थो हि अयं अ-कारो, ‘‘संवरासंवरो, फलाफल’’न्तिआदीसु विय, तस्मा भवाभवहेतूति खुद्दकस्स महन्तस्स वा भवस्स हेतु, तं पच्चासीसमानोति अत्थो. तेनाह – ‘‘तस्मिं तस्मिं भवे सुखं वेदिस्सामी’’तिआदि.

३५. लोकुत्तरबोधिपक्खियधम्मे उद्दिस्स पुथुज्जनानं विवादो सम्भवतीति आह – ‘‘लोकियलोकुत्तराव कथिता’’ति. लोकियापि हि बोधिपक्खियधम्मा लोकुत्तरधम्माधिगमस्स आसन्नकारणत्ता विसेसकारणन्ति याव अञ्ञेहि लोकियधम्मेहि अभिविसिट्ठोति कत्वा, ‘‘इमेसु सत्ततिंसबोधिपक्खियधम्मेसू’’ति अविसेसेन वुत्तं. अत्थतो नानं होतीति अत्थतो भेदो होति बोधिपक्खियधम्मानं समधिगतत्ता. न हि कायादयो भावेतब्बा, सतियेव पन भावेतब्बाति. ब्यञ्जनतो नानं भेदं. इमिनापि कारणेनाति इमायपि युत्तिया. इदानि तं युत्तिं दस्सेन्तो – ‘‘अत्थञ्च ब्यञ्जनञ्चा’’तिआदिमाह ¶ . तत्थ समानेत्वाति सुत्तन्तरतो समानेत्वा, सुत्तन्तरपदेहि च समानेत्वा. अञ्ञथाति अञ्ञतो, भूततो अपगतं कत्वाति अत्थो. मिच्छा रोपितभावोति अयाथावतो ठपितभावो. अत्थञ्च ब्यञ्जनञ्च विञ्ञापनकारणमेवाति अविपरीतत्थस्स सद्दस्स च बुज्झनहेतुताय.

३७. इध धम्मविनयट्ठाने सतियेव सतिपट्ठानन्ति गहिता, अत्थतो समेति नाम याथावतो अत्थस्स गहितत्ता. असभावनिरुत्तिभावतो ब्यञ्जनतो नानत्तन्ति तं लिङ्गभेदेन वचनभेदेन च दस्सेन्तो, ‘‘सतिपट्ठानोति वा सतिपट्ठानाति वा मिच्छा रोपेथा’’ति आह. अप्पमत्तकन्ति अणुमत्तं सल्लहुकं, न गरुतरं अधनितं कत्वा वत्तब्बम्पि धनितं घोसवन्तं कत्वा रोपिते वुत्तदोसाभावतोति तेनाह – ‘‘निब्बुतिं पत्तुं सक्का होती’’ति.

ब्यञ्जनस्स मिच्छारोपनं न विसेसन्तरायकरं होतीति ञापनत्थं, चतुसु मग्गेसु पञ्हं कथेत्वाव परिनिब्बुतो. सुत्तन्तब्यञ्जनं सन्धायेतं वुत्तं – ‘‘अप्पमत्तकं खो पना’’ति.

३८. अथ चतुत्थवारे विवादो कस्मा जातो? यावता नेसं वचनं अत्थतो चेव समेति ब्यञ्जनतो चाति अधिप्पायो. सञ्ञाय विवादोति किञ्चापि समेति अत्थतो चेव ब्यञ्जनतो ¶ च, सञ्ञा पन नेसं अविसुद्धा, ताय सञ्ञाय वसेन विवादो जातोति दस्सेन्तो ‘‘अह’’न्तिआदिमाह. अहं सतिपट्ठानन्ति वदामि, अयं सतिपट्ठानोति वदतीति एवं तेसं ञाणं होतीति इममत्थं, ‘‘एसेव नयो’’ति इमिना अतिदिसति.

३९. न चोदनत्थाय वेगायितब्बन्ति सीघं सीघं न चोदना कातब्बाति अत्थो. तस्माति यस्मा एकच्चो कोधनभावेन एवं पटिप्फरि, तस्मा. अनादानदिट्ठीति आदियित्वा अनभिनिविसनतो अनादानदिट्ठी अदळ्हग्गाही. पक्खिपन्तो वियाति गिलित्वा पक्खिपन्तो विय.

उपघातोति चित्तप्पघातो फरसुपघातो विय. वणघट्टितस्स वियाति वणे घट्टितस्स विय दुक्खुप्पत्ति चित्तदुक्खुप्पत्ति. द्वे वारे वत्वापि विसज्जेतीति सुप्पटिनिस्सग्गी एवं पगेव चोदितमत्ते विस्सज्जेति चेति अधिप्पायो ¶ . कथनवसेन च कायचित्तकिलमथो. एवरूपोति सहसा अविस्सज्जेन्तेन चोदकस्स विहेसावादो हुत्वापि अक्कोधनादिसभावो.

उपेक्खाति सकेन कम्मेन पञ्ञायिस्सतीति तस्मिं पुग्गले अज्झुपेक्खणा. उपेक्खं अतिमञ्ञति नाम तस्स अनाचारस्स अनज्झुपेक्खणतो.

४०. वचनसञ्चारोति पेसुञ्ञवसेन अञ्ञथावचनुपसंहारो. दिट्ठिपळासोति युगग्गाहवसेन लद्धि. सा पन चित्तस्स अनाराधनियभावो सत्थुचित्तस्स अनाराधकभावो. कलहोति अधिकरणुप्पादवसेन पवत्तो विग्गहो भण्डनस्स पुब्बभागो.

येन कारणेनाति येन धम्मेन सत्थुसासनेन. तमेव हि सन्धाय वदति – ‘‘धम्मोति सारणीयधम्मो अधिप्पेतो’’ति. एत्थाति ‘‘धम्मस्स चानुधम्म’’न्ति एत्थ. धम्मोति सम्बुद्धस्स तस्स तथा पवत्तं ब्याकरणं यथा विवादापन्ना सञ्ञत्तिं गच्छन्ति. तेनाह – ‘‘तेसं भिक्खूनं सञ्ञत्तिकरण’’न्ति. तदेव ब्याकरणं अनुधम्मोति भिक्खुना वुच्चमानो अनुपवत्तो धम्मो. तेनाह – ‘‘तदेव ब्याकरोति नामा’’ति. कोचीति यो कोचि. सहधम्मिको सकारणो. अञ्ञत्थो अयं किं सद्दोति आह ‘‘अञ्ञो’’ति. अस्साति वुत्तनयेन पटिपन्नभिक्खुनो, तस्स पटिपत्ति न केनचि गरहणीया होतीति अत्थो. सेसं सब्बं सुविञ्ञेय्यमेव.

किन्तिसुत्तवण्णनाय लीनत्थप्पकासना समत्ता.

४. सामगामसुत्तवण्णना

४१. द्वेधिकजाताति ¶ जातद्वेधिका सञ्जातभेदा. द्वेज्झजाताति दुविधभावं पत्ता. भण्डन्ति परिभासन्ति एतेनाति भण्डनं, विरुद्धचित्तता. तन्ति भण्डनं. धम्मविनयन्ति पावचनं. वितुज्जन्ता मुखसत्तीहि. सहितं मेति मय्हं वचनं सहितं सिलिट्ठं पुब्बापरसम्बन्धं अत्थयुत्तं. तेनाह ¶ ‘‘अत्थसंहित’’न्ति. अधिचिण्णन्ति आचिण्णं. विपरावत्तन्ति विरोधदस्सनवसेन परावत्तितं, परावत्तं दूसितन्ति अत्थो. तेनाह – ‘‘चिरकालवसेन…पे… निवत्त’’न्ति. परियेसमानो चर, तत्थ तत्थ गन्त्वा सिक्खाहीति अत्थो. सचे सक्कोसि, इदानिमेव मया वेठितदोसं निब्बेठेहि. मरणमेवाति अञ्ञमञ्ञघातवसेन मरणमेव.

नाटपुत्तस्स इमेति नाटपुत्तिया. ते पन तस्स सिस्साति आह ‘‘अन्तेवासिकेसू’’ति. पुरिमपटिपत्तितो पटिनिवत्तनं पटिवानं, तं रूपं सभावो एतेसन्ति पटिवानरूपा. तेनाह ‘‘निवत्तनसभावा’’ति. कथनं अत्थस्स आचिक्खनं. पवेदनं तस्स हेतुदाहरणानि आहरित्वा बोधनं. न उपसमाय संवत्ततीति अनुपसमसंवत्तनं, तदेव अनुपसमसंवत्तनिकं, तस्मिं. समुस्सितं हुत्वा पतिट्ठाहेतुभावतो थूपं पतिट्ठाति आह – ‘‘भिन्नथूपेति भिन्नपतिट्ठे’’ति. थूपोति वा धम्मस्स निय्यानभावो वेदितब्बो, अञ्ञधम्मे अभिभुय्य समुस्सितट्ठेन. सो निगण्ठस्स समये केहिचि अभिन्नसम्मतोपि भिन्नो विनट्ठोयेव सब्बेन सब्बं अभावतोति भिन्नथूपो. सो एव निय्यानभावो वट्टदुक्खतो मुच्चितुकामानं पटिसरणं, तं एत्थ नत्थीति अप्पटिसरणो, तस्मिं भिन्नथूपे अप्पटिसरणेति एवमेत्थ अत्थो वेदितब्बो.

आचरियप्पमाणन्ति आचरियमुट्ठि हुत्वा पमाणभूतं. नानानीहारेनाति नानाकारेन. ‘‘विवादो न उप्पज्जी’’ति वत्वा तस्स अनुप्पत्तिकारणं दस्सेन्तो, ‘‘सत्था हि…पे… अविवादकारणं कत्वाव परिनिब्बायी’’ति वत्वा तं विवरितुं ‘‘भगवता ही’’तिआदि वुत्तं. पतिट्ठा च अवस्सयो च, ‘‘अयं धम्मो अयं विनयो इदं सत्थुसासन’’न्ति विनिच्छयने महापदेसा, पञ्हब्याकरणानि च, यस्मा तेसु पतिट्ठाय ते अवस्साय धम्मविनयधरा च निच्छयं गच्छन्ति. तथा हि सुत्तन्तमहापदेसतो विनये केनचि पुच्छितो अत्थो चतुन्नं पञ्हब्याकरणानं वसेन सुविनिच्छितरूपो, तस्मा धम्मविनयो इध सत्थु किच्चं कातुं सक्कोतीति आह – ‘‘तेनेवा’’तिआदि, तस्मा उळाराय देसनाय भाजनन्ति अधिप्पायो.

४२. पटिपविट्ठं ¶ कत्वा आहरितब्बतो, सच्चं कारितब्बतो पाभतं मूलन्ति आह – ‘‘कथापाभत’’न्ति, धम्मकथाय मूलकारणन्ति अत्थो. येसं ¶ वसेन विवादो उप्पन्नो, तेयेव अधम्मवादिनो, तेसं ताव सो अहिताय दुक्खाय संवत्ततु, ततो अञ्ञेसं देवमनुस्सानं कथन्ति, चोदना परम्पराय संकिलेसवत्थुभावतोति परिहारो. तेनाह – ‘‘कोसम्बकक्खन्धके विया’’तिआदि.

४३. अभिञ्ञा देसिताति अभिविसिट्ठाय पञ्ञाय जानित्वा बोधिता. पतिस्सयमानरूपाति अपदिस्स पतिस्सयमाना गरुकवसेन निस्सयमानसभावा. तेनाह – ‘‘उपनिस्साय विहरन्ती’’ति, गरुतरं निस्सयं कत्वा विहरन्तीति अत्थो. परिवारे पञ्ञत्तानीति, ‘‘आजीवहेतु आजीवकारणा’’ति, एवं निद्धारेत्वा परिवारपाळियं (परि. ३३६) आसङ्करवसेन ठपितानि. ‘‘एवञ्च पन, भिक्खवे, इमं सिक्खापदं उद्दिसेय्या’’ति (पारा. ३९, ४२, ४३) विभङ्गपाठवसेनेव हि तानि भगवता पञ्ञत्तानि. तानि ठपेत्वा सेसानि सब्बसिक्खापदानि अधिपातिमोक्खं नामाति, इदं गोबलीबद्दञायेन वुत्तन्ति दट्ठब्बं तेसम्पि अधिपातिमोक्खभावतो.

तत्रायं नयोति तस्मिं सुप्पजहनाय अप्पमत्तकभावे अयं वक्खमानो. तानीति पणीतभोजनानि. यो कोचीति भिक्खु वा भिक्खुनी वा. दुक्कटवत्थुकन्ति यं किञ्चि दुक्कटापत्तिवत्थुकं. तेनाति सुप्पजहनभावेन मूलापत्तिवीतिक्कमस्स अणुमत्तताय.

पुब्बभागमग्गन्ति लोकियमग्गं. तत्राति तस्मिं पुब्बभागमग्गं निस्साय विवादुप्पादे. ओभासञाणन्ति ओभासस्स उप्पत्तिहेतुभूतं ञाणं. तत्थ पन सो मग्गसञ्ञिभावेन मग्गो च चतुब्बिधोति सुतत्ता, ‘‘पट्ठममग्गो नामा’’तिआदिमाह. एवन्ति एवं असन्दिद्धं अपरिसङ्कितं परिच्चत्तं कत्वा कम्मट्ठानं कथेतुं न सक्कोति.

चेतियं न दिट्ठन्ति तस्स कतं थूपं वदति. निन्दिये पुथुज्जनभावे ठितं पासंसं अरियभावं आरोपेत्वा तं मिच्छालद्धिं अभिनिविस्स पग्गय्ह वोहरणतो सग्गोपि मग्गोपि वारितोयेवाति. वुत्तञ्हेतं –

‘‘यो ¶ निन्दियं पसंसति, तं वा निन्दति यो पसंसियो;

विचिनाति मुखेन सो कलिं, कलिना तेन सुखं न विन्दती’’ति. (सु. नि. ६६३; सं. नि. १.१८०-१८१; अ. नि. ४.३; नेत्ति. ९२);

‘‘खणेनेव ¶ अरहत्तं पापुणितुं समत्थकम्मट्ठानकथं आचिक्खिस्सामी’’ति हि इमिना तत्थ कोहञ्ञम्पि दिस्सति; इतरेसु पन वत्तब्बमेव नत्थि. उप्पाटेत्वाति उद्धरित्वा. ‘‘अथ ते भिक्खू’’तिआदि सेसं नाम. ‘‘अमतं ते परिभुञ्जन्ति, ये कायगतासतिं परिभुञ्जन्ती’’ति (अ. नि. १.६००) वचनं दुग्गहितं गण्हापेत्वा, ‘‘एत्तावता वो अमतं परिभुत्तं नाम भविस्सती’’ति आह.

४४. एवन्ति आकारलक्खणमेतं, न आकारनियमनं. तेन इमिनाव कारणेन च यो विवादो उप्पज्जेय्याति वुत्तं होति. गरुस्मिं गरूति पवत्तं चित्तं गरुविसयत्ता तंसहचरितत्ता गरु, तस्स भावो गारवं, गरुकरणं, तं एत्थ नत्थीति अगारवो. तेनाह ‘‘गारवविरहितो’’ति. गरुस्स गारववसेन पतिस्सयनं पतिस्सोति वुच्चति नीचवुत्तिता, तप्पटिपक्खतो अप्पतिस्सोति आह – ‘‘अप्पतिस्सयो अनीचवुत्ती’’ति. एत्थ यथायं पुग्गलो सत्थरि अगारवो नाम होति, तं दस्सेतुं, ‘‘एत्थ पना’’तिआदि वुत्तं. तत्थ तीसुकालेसु उपट्ठानं न यातीतिआदि समुदायकित्तनअनवसेसदस्सनं, अवयवतो पन अगारवसिद्धि यथा तं सामञ्ञतो सिक्खापदसमादानं तब्बिसेसो भेदो. एस नयो सेसेसुपि.

सक्कच्चं न गच्छतीति आदरवसेन न गच्छति. सङ्घे कतोयेव होति सङ्घपरियापन्नत्ता तस्स, यथा सङ्घं उद्दिस्स दिन्नं एकेन भिक्खुना पटिग्गहितं सङ्घस्स दिन्नमेव होति. अपरिपूरयमानोव सिक्खाय अगारवो. तेनाह भगवा – ‘‘सिक्खाय न परिपूरकारी’’ति (म. नि. २.१३५). अत्तनो परिसाय उप्पन्नं विवादमूलं विसेसतो अत्तना वूपसमेतब्बतो अत्तनो च अनत्थावहतो ‘‘अज्झत्त’’न्त्वेव वुत्तं. एस नयो बहिद्धाति एत्थापि.

४६. छठानानीति छमूलानि. यथा समनवसेन समथानं विवादादीसु अधिकत्तुभावो, एवं विवादादीनं तेहि अधिकत्तब्बतापीति आह – ‘‘वूपसमनत्थाय…पे… अधिकरणानी’’ति. तेन अधिकरणसद्दस्स कम्मत्थतं आह. समथा वा समनवसेन अधिकरीयन्ति एत्थाति अधिकरणानि, विवादादयो.

विवादो ¶ ¶ उप्पन्नमत्तोव हुत्वा परतो कक्खळत्थाय संवत्तनतो यं वत्थुं निस्साय पठमं उप्पन्नो विवादानुसारेन मूलकं विय अनुबन्धरोगो तमेव तदञ्ञं वा वत्थुं कत्वा पवड्ढन्तो विवादाधिकरणं पत्वा उपरि वड्ढति नाम, अनुवादापत्तिकिच्चाधिकरणं पत्वा विवादस्स च वड्ढनं पाकटमेव. तेन वुत्तं – ‘‘चत्तारि अधिकरणानि पत्वा उपरि वड्ढन्तो सो विवादो’’ति. उप्पन्नानं उप्पन्नानन्ति (दी. नि. टी. ३.३३१) उट्ठितानं उट्ठितानं. समथत्थन्ति समनत्थं.

अट्ठारसहि वत्थूहीति लक्खणवचनमेतं यथा ‘‘यदि मे ब्याधी दाहेय्युं. दातब्बमिदमोसध’’न्ति (सं. नि. टी. २.३.३९-४२; कङ्खा. अभि. टी. अधिकरणसमथवण्णना), तस्मा तेसु अञ्ञतरेन विवदन्ता, ‘‘अट्ठारसहि वत्थूहि विवदन्ती’’ति वुच्चन्ति. उपवदनाति अक्कोसो. चोदनाति अनुयोगो.

अधिकरणस्स सम्मुखाव विनयनतो सम्मुखाविनयो. सन्निपतितपरिसाय धम्मवादीनं येभुय्यताय येभुय्यसिककम्मस्स करणं येभुय्यसिका. कारकसङ्घस्स सामग्गिवसेन सम्मुखीभावो, न यथा तथा कारकपुग्गलानं सम्मुखतामत्तं. भूतताति तच्छता. सच्चपरियायो हि इध धम्म-सद्दो ‘‘धम्मवादी’’तिआदीसु (दी. नि. १.९) विय. विनेति एतेनाति विनयो, तस्स तस्स अधिकरणस्स वूपसमाय भगवता वुत्तविधि, तस्स विनयस्स सम्मुखता विनयसम्मुखता. विवादवत्थुसङ्खाते अत्थे पच्चत्थिका अत्थपच्चत्थिका, तेसं अत्थपच्चत्थिकानं. सङ्घसम्मुखता परिहायति सम्मतपुग्गलेहेव वूपसमनतो.

नन्ति विवादाधिकरणं. ‘‘न छन्दागतिं गच्छती’’तिआदिना (परि. ३८३) वुत्तं पञ्चङ्गसमन्नागतं. गुळ्हकादीसु अलज्जुस्सन्नाय परिसाय गुळ्हको सलाकग्गाहो कातब्बो; लज्जुस्सन्नाय विवटको, बालुस्सन्नाय सकण्णजप्पको. यस्सा किरियाय धम्मवादिनो बहुतरा, सा येभुय्यसिकाति आह – ‘‘धम्मवादीनं येभुय्यताया’’तिआदि.

एवं विनिच्छितन्ति आपत्तिं दस्सेत्वा रोपनवसेन विनिच्छितं, पटिकम्मं पन आपत्ताधिकरणसमथे परतो आगमिस्सति. न समणसारुप्पं अस्सामणकं, समणेहि अकातब्बं, तस्मिं. अज्झाचारे वीतिक्कमेसति. पटिचरतोति ¶ पटिच्छादेन्तस्स. पापुस्सन्नताय पापियो, पुग्गलो, तस्स कातब्बकम्मं तस्सपापियसिकं.

सम्मुखाविनयेनेव वूपसमो नत्थि पटिञ्ञाय, तथारूपाय खन्तिया वा विना अवूपसमनतो ¶ . एत्थाति आपत्तिदेसनायं. पटिञ्ञाते आपन्नभावादिके करणकिरिया, ‘‘आयतिं संवरेय्यासी’’ति, परिवासदानादिवसेन च पवत्तं वचीकम्मं पटिञ्ञातकरणं.

यथानुरूपन्ति ‘‘द्वीहि चतूहि तिहि एकेना’’ति एवं वुत्तनयेन यथानुरूपं. एत्थाति इमस्मिं सुत्ते, एतस्मिं वा समथविचारे. विनिच्छयनयोति विनिच्छये नयमत्तं. तेनाह ‘‘वित्थारो पना’’तिआदि.

४७. सङ्खेपतोव वुत्तो, न समथक्खन्धके विय वित्थारतो. तथाति इमिना ‘‘धम्मा’’ति पदं आकड्ढति, एत्थ इति-सद्दो आदिअत्थो, एवमादिना इमिना पकारेनाति वाति वुत्तं होति. बोधिपक्खियधम्मानं एकन्तानवज्जभावतो नत्थि अधम्मभावो, भगवतो देसिताकारं हापेत्वा वड्ढेत्वा वा कथनं यथाधम्मं अकतन्ति कत्वा अधम्मभावोति दस्सेन्तो आह – ‘‘तयो सतिपट्ठाना’’तिआदि.

निय्यानिकन्ति सपाटिहीरं अप्पटिवानं हुत्वा पवत्तति. तथेवाति इमिना ‘‘एवं अम्हाक’’न्तिआदिना वुत्तमत्थं आकड्ढति. भूतेन…पे… कातब्बकम्मं धम्मो नाम यथाधम्मं करणतो, वुत्तविपरियायतो इतो परं अधम्मो. अयं विनयो नाम रागादीनं संवरणतो पहानतो पटिसङ्खानतो च. अयं अविनयो नाम रागादीनं अविनयनतो. अयं विनयो नाम यथाविनयकरणतो, वुत्तविपरियायेन इतरो अविनयो. वत्थुसम्पत्तिआदिना एव सब्बेसं विनयकम्मानं अकुप्पताति आह – ‘‘वत्थुसम्पत्ति…पे… अयं विनयो नामा’’ति, तप्पटिपक्खतो अविनयो वेदितब्बो. तेनाह ‘‘वत्थुविपत्ती’’तिआदि.

सम्मापटिपत्तिया नयनट्ठेन यथावुत्तो धम्मो एव नेत्ति, ततो एव सत्तस्स विय रज्जु असिथिलपवत्तिहेतुताय धम्मरज्जूति अत्थो वुत्तो. सुत्तन्तपरियायेन ताव दस कुसलकम्मपथा धम्मोति एवं वुत्ता. सा एव वा होतु धम्मनेत्ति, यो इध इमिस्सा वण्णनाय, ‘‘छत्तिंस बोधिपक्खियधम्मा’’तिआदिना धम्मेन च विनयेन च वुत्तो, सो एव ¶ वा धम्मनेत्ति होतूति आनेत्वा योजना. ताय धम्मनेत्तिया समेति ताय यथावुत्ताय धम्मनेत्तिया संसन्दति, एकलक्खणमेव होतीति अत्थो. एवं विवादवत्थुभूतो धम्मो चे ‘‘धम्मो’’ति, अधम्मो चे ‘‘अधम्मो’’ति, विनयो चे ‘‘विनयो’’ति, अविनयो चे ‘‘अविनयो’’ति निच्छिनन्तेन एकच्चानं विवादाधिकरणमेव दस्सितं तस्स वूपसमधम्मानं अपरियोसापितत्ता.

४८. तं पनेतन्ति ¶ विवादाधिकरणं पच्चामसति. वारे अत्थसंवण्णनावसेन पत्तेपि. द्वीहीति यस्मिं आवासे विवादाधिकरणं उप्पन्नं, तत्थ वासीहि द्वीहिपि भिक्खूहि अतिरेकतरा.

४९. खन्धसामन्तन्ति आपत्तिक्खन्धभावेन समीपं. आपत्तिसामन्तं नाम पुब्बभागा आपज्जितब्बआपत्ति. मेथुनरागवसेन कायसंसग्गे दुक्कटस्स वत्थूति आह – ‘‘पठमपाराजिकस्स पुब्बभागे दुक्कट’’न्ति. सेसानं तिण्णं पाराजिकानं पुब्बभागे थुल्लच्चयमेव.

५०. परिक्कमित्वा उपक्कमित्वा. आपत्ताधिकरणं दस्सितं तत्थेव विसेसतो पटिञ्ञाय कारेतब्बताय इच्छितब्बत्ता.

५२. कम्मस्स वत्थु दस्सितं न समथोति अधिप्पायो. ननु चायं समथाधिकारोति? सच्चं, समथस्स पन कारणे दस्सिते समथो दस्सितोव होतीति दस्सेतुं ‘‘एवरूपस्स ही’’तिआदि वुत्तं.

५३. इदं कम्मन्ति ‘‘इदं अम्हाकं भण्डनजातान’’न्तिआदिना वुत्तकम्मं. तिणवत्थारकसदिसत्ताति तंसदिसताय तब्बोहारोति दस्सेति यथा – ‘‘एस ब्रह्मदत्तो’’ति. आकारमत्तमेव तिणवत्थारककम्मं नाम, न पन तस्स सब्बसो करणविधानं. तेनाह ‘‘खन्धके’’तिआदि. गिहीनं हीनेन खुंसनवम्भनं यथा ‘‘तिलसंगुळिका नत्थी’’ति. धम्मिकपटिस्सवेसु विसंवादनवसेन आपन्ना आपत्ति. अस्साति किच्चाधिकरणस्स. सम्मुखाविनयेनेव वूपसमो सङ्घसम्मुखतादिनाव वूपसमनतो.

५४. सोतापत्तिफलसच्छिकिरियवचनतो कोसम्बियसुत्ते (म. नि. १.४९२) सोतापत्तिमग्गसम्मादिट्ठि कथिता, इध पन ‘‘दिट्ठिसामञ्ञगतो विहरति’’च्चेव ¶ वुत्तत्ता, ‘‘इमस्मिं सुत्ते सोतापत्तिफलसम्मादिट्ठि वुत्ताति वेदितब्बा’’ति वुत्तं. पापकम्मस्स अप्पता महन्तता सावज्जभावस्स मुदुतिक्खभावेन वेदितब्बाति आह ‘‘अणुन्ति अप्पसावज्जं. थूलन्ति महासावज्ज’’न्ति. सेसं सुविञ्ञेय्यमेव.

सामगामसुत्तवण्णनाय लीनत्थप्पकासना समत्ता.

५. सुनक्खत्तसुत्तवण्णना

५५. हेट्ठिममग्गेहि ¶ ञातमरियादाय पजाननतो अञ्ञा, मग्गपञ्ञा. तस्स फलभावतो अग्गफलपञ्ञा, तंसहगता सम्मासङ्कप्पादयो च ‘‘अञ्ञा’’ति वुत्ताति आह ‘‘अञ्ञाति अरहत्त’’न्ति. चतूहि पदेहि कथिता, ‘‘परिचिण्णा मे भगवा’’तिआदीसु विय न एकपदेनेव. ‘‘लोकुत्तरो धम्मो अधिगतो मया’’ति मञ्ञनामत्तं अधिमानोति दस्सेन्तो, ‘‘अप्पत्ते पत्तसञ्ञिनो’’तिआदिमाह.

५६. इदं ठानन्ति इदं ओभासादिसम्मुतिहेतुभूतं उळारतरं उदयब्बयञाणं. उळारतरभावेन हि तं मग्गफलपञ्ञाय पच्चयो हुत्वा याथावतो दुब्बिञ्ञेय्यताय विपस्सकं विसंवादेति. तेनाह ‘‘अविभूतं अन्धकार’’न्ति. इमं पञ्हन्ति इमं सुत्तं गम्भीरं लोकुत्तरपटिसंयुत्तं अत्तना ञातुं इच्छितं अत्थं. उग्गहेत्वाति केवलं पिटकसम्पादनवसेनेव उग्गण्हित्वा. तेनाह ‘‘अजानित्वा’’ति. विसेवमानाति किलेसविसे अवमानेन्ता, सासनस्स वा अनुपकारविरूपपच्चये सेवमाना. एवमस्साति एवं वुत्तनयेन तेसं करणहेतु अस्स चित्तस्स धम्मदेसनावसेन पवत्तस्स. अञ्ञथाभावो अदेसेतुकामता होति. तन्ति यथावुत्तमत्थं सन्धाय. एतन्ति ‘‘तस्सपि होति अञ्ञथत्त’’न्ति एवं वुत्तं.

५८. किलेसेहि आमसीयतीति आमिसं, लोकेपरियापन्नं आमिसन्ति इध पञ्च कामगुणा अधिप्पेताति तेसु वट्टामिसभावेपि लभिते कामामिसभावो सिद्धोति आह – ‘‘वट्टामिसकामामिसलोकामिसभूतेसू’’ति. कामगुणा हि वट्टस्स वड्ढनतो वट्टामिसं, कामेतब्बतो कामतण्हाय आमसितब्बतो कामामिसं, येभूय्यतो सत्तलोकस्स आमिसभावतो ¶ लोकामिसं. कामगुणसभागाति कामगुणानुलोमा कामगुणपटिसंयुत्ता. आनेञ्जसमापत्तिपटिसंयुत्तायाति किलेसिञ्जनरहितताय इध आनेञ्जाति अधिप्पेताहि हेट्ठिमाहि अरूपसमापत्तीहि पटिसंयुत्ताय. एवरूपोति लोकामिसभूतेसु पच्चयेसु अधिमुत्तो तन्निन्नो तग्गरुको तप्पब्भारो. एत्तावताति एवं सद्धानं मनुस्सानं दस्सनेन तेसं पवत्तितासयेन च. सीसं निक्खन्तं होतीति लाभासाय सीसं बहि निक्खन्तं विय होति. उदरं फलितन्ति अतिबहुभण्डं पक्खिपियमानं पसिब्बकं विय लद्धब्बस्स अतिपहूतभावेन उदरं फीतं होति.

५९. यथा ¶ पुरिमा द्वे अरूपसमापत्तियो अत्तनो पच्चनीककिलेसेहि अनिञ्जनतो ‘‘अनिञ्जा’’ति वुच्चन्ति, एवं इतरापि. तं पवुत्तन्ति लोकामिससंयोजनं विगतं.

६०. निघंसन्ति ‘‘एत्तको अय’’न्ति परिच्छेदन्ति अत्थो. सिलेसेनाति चम्मकारसिलेसादिसिलेसेन, वजिरलेपसिलेसे वत्तब्बमेव नत्थि. तं भिन्नन्ति आनेञ्जसंयोजनं भिन्नं विधमितं समतिक्कन्तं तासु समापत्तीसु अपेक्खाभावतो. अज्झासयेन असम्बद्धत्ता वुत्तं – ‘‘द्वेधाभिन्ना सेला विय होती’’ति. तेनाह – ‘‘तं समापज्जिस्सामीति चित्तं न उप्पज्जती’’ति.

६१. वन्तन्ति छड्डितं, विस्सट्ठन्ति अत्थो.

६२. उपरिसमापत्तिलाभिनोति एत्थ उपरिसमापत्तीति अरहत्तफलसमापत्ति अधिप्पेता, अरहतो च मग्गाधिगमेनेव अनागामिफलसमापत्ति, सेक्खानं विसया हेट्ठिमा फलसमापत्तियो पटिप्पस्सद्धा. लोकिया पन निकन्तिप्पहानेन पटिनिस्सट्ठाति आह – ‘‘हेट्ठा…पे… न उप्पज्जती’’ति.

६३. ‘‘पञ्च खो इमे, सुनक्खत्त, कामगुणा’’तिआदिना आरद्धदेसना, ‘‘सम्मा निब्बानाधिमुत्तो पुरिसपुग्गलो’’ति अरहत्तकित्तनेन निट्ठापिताति ततो परं, ‘‘ठानं खो पना’’तिआदिका देसना, ‘‘पाटियेक्को अनुसन्धी’’ति ¶ वुत्ता. तेनाह ‘‘हेट्ठा ही’’तिआदि. तत्थ यथा खीणासवस्स समापत्तिलाभिनोति योजना, एवं वा खीणासवस्स सुक्खविपस्सकस्साति योजेतब्बा. पटिक्खित्तं अट्ठकथायं. तस्स पटिक्खेपस्स कारणं दस्सेतुं ‘‘समापत्तिलाभिनो ही’’तिआदि वुत्तं. यथा सुक्खविपस्सको अधिमानिको समापत्तिलाभिनो समानयोगक्खमो अप्पत्ते पत्तसञ्ञिताय भेदाभावतो, एवं सुक्खविपस्सको खीणासवो समानयोगक्खमो खीणासवभावेन विसेसाभावतो, तस्मा ‘‘समापत्तिलाभिम्हि कथिते इतरोपि कथितोव होती’’ति वुत्तं. द्विन्नं भिक्खूनन्ति समापत्तिलाभिनो अधिमानिकस्स खीणासवस्स च. तेनेवाह ‘‘पुथुज्जनस्स तावा’’तिआदि.

यदग्गेनाति येन भागेन. यदिपि खीणासवस्स असप्पायारम्मणं किलेसानं उप्पत्तिया पच्चयो न होति तेसं सब्बसो समुच्छिन्नत्ता. सन्तविहारपरिपन्थो पन सिया विसभागतोति वुत्तं – ‘‘खीणासवस्सपि असप्पायमेवा’’ति. तेनाह – ‘‘विसं नाम…पे… विसमेवा’’ति. एतेन ¶ ‘‘यथा विसजाननं अप्पमाणं, विकारुप्पादनतो पन तं परिहरितब्बं, एवं परिञ्ञातम्पि वत्तु अत्थविसेसाभावेन एकरूपमेवाति तं परिहरितब्बमेवा’’ति दस्सेति. तेनाह ‘‘न ही’’तिआदि. न हि असंवुतेन भवितब्बं असारुप्पभावतो. युत्तपयुत्तेनेवाति सभागारम्मणस्स आलोकनादीसु युत्तेनेव भवितुं वट्टति.

६४. यत्थ सयं निपतति उप्पज्जति, तस्स सन्तानस्स विप्पसन्नवसेन रुप्पनतो, विससङ्खातस्स दुक्खस्स मूलभावतो च ‘‘अविज्जासङ्खातो विसदोसो’’ति वुत्तं. रुप्पतीति कत्तब्बादिमुच्छापादनेन विकारं उप्पादेति. अनुद्धंसेय्याति विबाधेय्य. रागो हि उप्पज्जमानोव कुसलचित्तप्पवत्तिया ओकासं अदेन्तो तं विबाधति; तथाभूतो सद्धासिनेहस्स समथविपस्सनाभिवुड्ढिया वमनेन च तं विसोसेति मिलापेति. तेनाह ‘‘सोसेय्य मिलापेय्या’’ति. सगहणसेसन्ति गहेतब्बविसं सावसेसं कत्वाति अत्थो. न अलं न समत्थन्ति अनलं. सूकपरियायो पाळियं वुत्तो सुक-सद्दोति आह – ‘‘वीहिसुकादि च सूक’’न्ति.

सउपादानसल्लुद्धारो ¶ विय अप्पहीनो अविज्जाविसदोसो दट्ठब्बो महानत्थुप्पादनतो. असप्पाय…पे… असंवुतकालो दट्ठब्बो अत्तभावस्स अपरिहरणभावतो. मरणं विय सिक्खं पच्चक्खाय हीनायावत्तनं अधिसीलसङ्खातस्स आयुनो अपेतत्ता. मरणमत्तं दुक्खं विय आपत्तिया आपज्जनं यथावुत्तस्स आयुनो उपपीळनकभावतो. इमिनाव नयेन ओपम्मसंसन्दनन्ति एत्थ अनुपादिसेससल्लुद्धारो विय पहीनो अविज्जाविसदोसो; सप्पाय…पे… सुसंवुतकालो, तदुभयेन वणे पुथुत्तं न गते मरणाभावो विय सिक्खाय अपच्चक्खानं, मरणमत्तदुक्खाभावो विय अञ्ञतराय संकिलिट्ठाय आपत्तिया अनापज्जनन्ति योजना वेदितब्बा.

६५. सतियाति एत्थ यस्मा ‘‘अरियाया’’ति न विसेसितन्ति आह – ‘‘सति पञ्ञागतिका’’तिआदि. पञ्ञा चेत्थ लोकिया अधिप्पेता, न लोकुत्तराति आह – ‘‘परिसुद्धाय विपस्सनापञ्ञाया’’ति.

खीणासवस्स बलन्ति उळारतमेसु दिब्बसदिसेसुपि आरम्मणेसु मनच्छट्ठानं इन्द्रियानं अनुपनमनहेतुभूतं सुसंवुतकारिसङ्खातं खीणासवबलं दस्सेन्तो, ‘‘संवुतकारी’’ति वुत्तं, उक्कंसगतसतिवेपुल्लत्ता यथा असंवरस्स असंवरो होति, एवं सतिसम्पजञ्ञबलेन चक्खादिद्वारानि ¶ संवरित्वा दस्सनादिकिच्चकारी. एवं जानित्वाति ‘‘उपधि दुक्खस्स मूल’’न्ति एवं विपस्सनापञ्ञासहिताय मग्गपञ्ञाय जानित्वा. उपधीयति दुक्खं एतेहीति उपधी, किलेसाति आह – ‘‘किलेसुपधिपहाना निरुपधी’’ति. ततो एव उपादीयति दुक्खं एतेहीति किलेसा ‘‘उपादाना’’तिपि वुच्चन्तीति आह – ‘‘निरुपादानोति अत्थो’’ति. उपधी सम्मदेव खीयन्ति एत्ताति उपधिसङ्खयो, निब्बानन्ति आह – ‘‘उपधीनं सङ्खयभूते निब्बाने’’ति. आरम्मणतोति आरम्मणं कत्वा तदारम्मणाय फलविमुत्तिया विमुत्तो. कामुपधिस्मिं कायं उपसंहरिस्सतीति ‘‘कामेसेविस्सामी’’ति तत्थ कायं उपनामेस्सति; कायूपसंहारो ताव तिट्ठतु, तथा चित्तं वा उप्पादेस्सतीति एतं कारणं नत्थीति. सेसं सुविञ्ञेय्यमेव.

सुनक्खत्तसुत्तवण्णनाय लीनत्थप्पकासना समत्ता.

६. आनेञ्जसप्पायसुत्तवण्णना

६६. खणपभङ्गुताय ¶ ¶ न निच्चा न धुवाति अनिच्चा. ततो एव पण्डितेहि न इच्चा न उपगन्तब्बातिपि अनिच्चा. सो चायं अनिच्चत्थो उदयवयपरिच्छिन्नताय वेदितब्बोति दस्सेन्तो, ‘‘हुत्वा अभावट्ठेन अनिच्चा’’ति आह; उप्पज्जित्वा विनस्सनतोति अत्थो. अयञ्च अनिच्चता वक्खमाना च तुच्छादिता द्विन्नम्पि कामानं साधारणोति आह – ‘‘वत्थुकामापि किलेसकामापी’’ति. रित्ता विवित्ता, तेसं निच्चसारादीनं अत्तनि अभावतो तेहि विसुंभूता. यथा पन सब्बसो सभावरहितमाकासं ‘‘तुच्छं रित्त’’न्ति वुच्चति, न एवमेते. एते पन केवलं निच्चसारादिविरहतो एव तुच्छा रित्ताति दस्सेन्तो ‘‘न पना’’तिआदिमाह. ‘‘न हि तुच्छमुट्ठि नाम नत्थी’’ति इदं लोकसमञ्ञावसेन वुत्तं, लोकसमञ्ञा लोकियकथा न लङ्घितब्बा.

मुसाति इत्तरपच्चुपट्ठानताय न दिस्सतीति आह ‘‘मुसाति नासनका’’ति. विसंवादनट्ठेन वा मुसा. एते हि असुभादिसभावापि बालानं सुभादिभावेन उपट्ठहन्ता सुभादिग्गहणस्स पच्चक्खभावेन सत्ते विसंवादेन्ति. नस्सनसभावाति खणभङ्गत्ता इत्तरपच्चुपट्ठानताय दिस्समाना वियपि हुत्वा अपञ्ञायनकपकतिका. तेनाह ‘‘खेत्तं विया’’तिआदि. धम्मसद्दो चेत्थ ‘‘जातिधम्मान’’न्तिआदीसु (दी. नि. २.३९८) विय पकतिपरियायो, तथा सभावसद्दो चाति दट्ठब्बं. मोसधम्माति मोसनपकतिका, कुसलभण्डहरणसभावाति अत्थो. मायाकतन्ति मायाय कतं उदकादिमणिआदिआकारेन मायादिना उपट्ठापितं; मायाकतं विय मायाकतं अञ्ञसभावा हुत्वा अतथा उपट्ठहनतो. तेनाह ‘‘यथा’’तिआदि. चक्खुपथे एव कतविज्जाय, न ततो परन्ति वुत्तं – ‘‘दस्सनूपचारे ठितस्सेव तथा पञ्ञायती’’ति. तयिदं सम्बरविज्जावसेन वुत्तं.

एवं तावकालिकभावेन कामानं मायाकतभावं दस्सेत्वा इदानि ततो अञ्ञेनपि पकारेन दस्सेतुं ‘‘यथा चा’’तिआदि वुत्तं. अनिच्चादिसभावानं कामानं निच्चादिसभावदस्सनं विपल्लाससहगतताय वेदितब्बं. बालानं लापनतोति अपरिञ्ञातवत्थुकानं अन्धबालानं पुग्गलानं विपल्लासहेतुतो. मनुस्सलोके ठत्वा ¶ मनुस्सानं वा वसेन भगवता भासितत्ता वुत्तं – ‘‘दिट्ठधम्मिका कामाति मानुसका पञ्च कामगुणा’’ति ¶ . ततो एव च ‘‘सम्परायिकाति ते ठपेत्वा अवसेसा’’तिआदि वुत्तं. तत्थ दिट्ठधम्मा पच्चक्खसभावा आरम्मणभूता एतासं अत्थीति दिट्ठधम्मिका. सम्परायिके कामे आरब्भ उप्पन्नसञ्ञा सम्परायिका. ते समेच्च धीयति एत्थ आणाति धेय्यं, आणापवत्तिट्ठानं. मारस्स धेय्यन्ति मारधेय्यं तस्स इस्सरियपवत्तनत्ता. तेनाह ‘‘येही’’तिआदि. गहितन्ति विसयविसयीभावेन गहितं, आरम्मणवसेन आरम्मणकरणवसेन च गहितन्ति अत्थो. तत्थ आरम्मणकरणवसेन गहणं नाम ‘‘इदं मय्ह’’न्ति अविभागेन परिग्गहकरणं; आरम्मणवसेन पन गहणं भागसो आरम्मणानुभवनन्ति वदन्ति. उभयस्सपि पन तण्हारागवसेन गहणं सन्धाय, ‘‘उभयमेतं गहित’’न्ति वुत्तं. मारोति किलेसमारो. यदग्गेन किलेसमारो, तदग्गेन देवपुत्तमारोपि ते अत्तनो वसं वत्तेति. तं सन्धायाति धम्ममुखेन पुग्गलग्गहणं सन्धाय.

अप्पहीनविपल्लासा हि पुग्गला कामाधिमुत्ता मारस्स इस्सरियवत्तनट्ठानताय ‘‘मारधेय्य’’न्ति वुत्ता, तथा मारस्स निवापगोचरपरियायेहिपि ते एवं वुत्ताति दस्सेन्तो, ‘‘यथा चोळस्सा’’तिआदिमाह. निवपतीति निवापो, सो एव बीजन्ति निवापबीजं. तेति कामगुणा. यत्थाति यस्मिं पदेसे.

मनसि भवाति मानसाति आह ‘‘चित्तसम्भूता’’ति. ते पन अविज्जादयो पाळियं आगता. एवञ्हि लोहितसन्निस्सयो पुब्बो विय अनुरोधूपनिस्सयो विरोधोति दस्सेन्तो, ‘‘ममायिते वत्थुस्मि’’न्तिआदिमाह. तेधाति एत्थ इधाति निपातमत्तं ‘‘इधाहं, भिक्खवे, भुत्तावी अस्स’’न्तिआदीसु (म. नि. १.३०) विय. कामलोकन्ति कामगुणसङ्खातं सङ्खारलोकं, यत्थ वा लोके कामगुणवन्तं लोकं. चित्तेन अधिट्ठहित्वाति झानारम्मणं पटिभागनिमित्तं भावनाचित्तेन उप्पादेत्वा. परित्तं नाम विक्खम्भनअसमत्थत्ता किलेसेहि परितो खण्डितं विय होति. तस्स पटिक्खेपेनाति परित्तभावपटिक्खेपेन. पमाणन्तिपि कामावचरमेव ¶ पापकानं पमाणकरणधम्मानं विक्खम्भनवसेन अप्पजहनतो. तप्पटिक्खेपवसेन अप्पमाणं नाम महग्गतन्ति आह – ‘‘रूपावचरं अरूपावचर’’न्ति. समुच्छेदवसेन किलेसानं अप्पहानेन महग्गतज्झानम्पि सुभावितं नाम न होति, पगेव परित्तज्झानन्ति आह – ‘‘सुभावितन्ति…पे… लोकुत्तरस्सेवेतं नाम’’न्ति. एतस्स वसेनाति ‘‘सुभावित’’न्ति पदस्स वसेन.

तमेव पटिपदन्ति तमेव अभिज्झादिपहानावहं झानपटिपदं. अरहत्ते तस्स उपायभूताय ¶ विपस्सनाय वा चतुत्थज्झाने तस्स उपायभूते उपचारे वा सति चित्तं पसन्नमेव होतीति आह – ‘‘अरहत्तं वा…पे… उपचारं वा’’ति. अधिमोक्खसम्पसादोति ‘‘अज्जेव अरहत्तं गण्हिस्सामी’’ति वा विपस्सनाय वीथिपटिपन्नत्ता; ‘‘अज्जेव चतुत्थज्झानं निब्बत्तेस्सामी’’ति वा उपचारसमाधिना चित्तस्स समाहितत्ता अधिमुच्चनभूतो सम्पसादो. पटिलाभसम्पसादोति अरहत्तस्स चतुत्थज्झानस्स वा अधिगमसङ्खातो सम्पसादो. पटिलाभोपि हि किलेसकालुसियाभिभवनतो चित्तस्स सुप्पसन्नभावावहत्ता ‘‘सम्पसादो’’ति वुत्तो. पच्चयाति नामरूपपच्चया अविज्जादयो. सब्बथाति समुदयतो अत्थङ्गमतो अस्सादतो आदीनवतो निस्सरणतोति सब्बप्पकारेन. आसाति अधिमुच्चनवसेन आसीसना. तेनाह – ‘‘आसा सन्तिट्ठति, अधिमोक्खं पटिलभती’’ति.

पादकन्ति पदट्ठानं. किलेसा सन्निसीदन्तीति नीवरणसहगता एव किलेसा विक्खम्भनवसेन वूपसमन्ति. सतीति उपचारज्झानावहा सति सन्तिट्ठति. सङ्खारगतन्ति भावनाय समताय पवत्तमानत्ता, इमे धम्मविचयसम्बोज्झङ्गादयो एकरसा हुत्वा पवत्तन्तीति, भावनाचित्तुप्पादपरियापन्नं सङ्खारगतं विभूतं पाकटं हुत्वा उपट्ठाति. चित्तुप्पादोति भावनाचित्तुप्पादो. लेपपिण्डेति सिलेसपिण्डे लग्गमानो विय अप्पितो विय होति. उपचारेन समाधियति उपचारज्झानेन समाधियति. अयन्ति अयं दुविधोपि अधिमुच्चनाकारो अधिमोक्खसम्पसादो नाम. तस्मिं सम्पसादे सतीति एतस्मिं विपस्सनालक्खणे, उपचारज्झाने वा अधिमोक्खसम्पसादे सति. यो पन अरहत्तं वा पटिलभति चतुत्थज्झानं वा, तस्स चित्तं विप्पसन्नं होतियेव, अयं निप्परियायतो पटिलाभसम्पसादो, एवं सन्तेपि इधामिप्पेतमेव दस्सेतुं ¶ , ‘‘इध पना’’तिआदि वुत्तं. विपस्सना हीतिआदि वुत्तस्स समत्थनं. तत्थ पञ्ञायाति अरहत्तपञ्ञाय. अधिमुच्चनस्साति सद्दहनं उस्सुक्कापज्जनस्स. उपचारन्ति उपचारज्झानं. आनेञ्जसमापत्तिया अधिमुच्चनस्स कारणन्ति योजना.

एतरहि वाति इदानिमेव. आनेञ्जं वाति चतुत्थज्झानं वा. समापज्जतीति अधिगच्छति. इदं हीतिआदिना सङ्खेपतो वुत्तमत्थं विवरति. अरहत्तसच्छिकिरिया नाम अग्गमग्गभावनाय सति अत्थतो आपन्ना होति, अग्गमग्गपञ्ञा एव तदत्थं अधिमुच्चितब्बाति दस्सेन्तो, ‘‘अथ वा’’ति विकप्पन्तरमाह. तत्थ यथा नाम पासादस्स अत्थाय समानीतदब्बसम्भारावयवे अप्पहोन्ते कूटागारं कातुं न पहोन्तियेव, एवंसम्पदमिदन्ति दस्सेन्तो, ‘‘तं अनभिसम्भुणन्तो आनेञ्जं वा समापज्जती’’ति आह. चतुसच्चं ¶ वा सच्छिकरोति हेट्ठिममग्गाधिगमनवसेन आनेञ्जं वा समापज्जति उभयस्सपि हेतुपरिग्गहितत्ता.

तत्राति तस्मिं ‘‘पञ्ञाय वा अधिमुच्चति, आनेञ्जं वा समापज्जती’’ति यथावुत्ते विसेसाधिगमे अयं इदानि वुच्चमानो योजनानयो. एवं होतीति इदानि वुच्चमानाकारेन चित्ताभिनीहारो होति. किच्चन्ति पब्बजितकिच्चं. ततोति अरहत्ताधिगमनतो. ओसक्कितमानसोति संकुचितचित्तो. अन्तरा न तिट्ठतीति असमाहितभूमियं न तिट्ठति. इदानि यथावुत्तमत्थं उपमाय विभावेतुं ‘‘यथा’’तिआदि वुत्तं. तत्रायं सङ्खेपत्थो – यथा तस्स पुरिसस्स वनमहिंसं गहेतुं उस्साहवतो ओसक्कन्तस्स ससगोधादिग्गहणे वत्तब्बमेव नत्थि, एवं इमस्सपि भिक्खुनो अरहत्तं गहेतुं उस्साहवतो ततो ओसक्कित्वा चतुत्थज्झानसमापज्जने वत्तब्बमेव नत्थीति. एसेव नयोति यथावुत्तं उपमं उपमासंसन्दनञ्च मग्गभावनायोजनायं चतुसच्चसच्छिकिरियायोजनायञ्च अतिदिसति.

हेतुअत्थजोतनो यन्ति निपातो, करणे वा एतं पच्चत्तवचनन्ति आह ‘‘येन कारणेना’’ति. तस्स संवत्तनं अरहति, तं वा पयोजनं एतस्साति तंसंवत्तनिकं. विञ्ञाणन्ति विपाकविञ्ञाणं. आनेञ्जसभावं उपगच्छतीति आनेञ्जूपगं. यथा कुसलं आनेञ्जसभावं, एवं तं विपाकविञ्ञाणम्पि आनेञ्जसभावं उपगतं अस्स भवेय्य. तेनाह – ‘‘कादिसमेव भवेय्याति अत्थो’’ति. केचीति अभयगिरिवासिनो. कुसलविञ्ञाणन्ति ¶ विपाकविञ्ञाणम्पि तं कुसलं विय वदन्ति. तन्नामकमेवाति कुसलं विय आनेञ्जनामकमेव सिया. एत्थ च पुरिमविकप्पे ‘‘आनेञ्जूपग’’न्ति तंसदिसता वुत्ता, दुतियविकप्पे ततो एव तंसमञ्ञता. सो पनायमत्थोति आनेञ्जसदिसताय विपाककालेपि तंनामकमेव अस्साति यथावुत्तो अत्थो. इमिना नयेनाति इमिना वुत्तनयेन. एत्थ हि आनेञ्जाभिसङ्खारहेतुविपाकविञ्ञाणं ‘‘आनेञ्जूपगं होति विञ्ञाण’’न्ति वुत्तत्ता तंनामकमेव कत्वा दीपितं. अरहत्तस्सापीति अपिसद्देन अग्गमग्गभावनायपि हेट्ठिममग्गभावनायपीति अत्थो सङ्गहितोति दट्ठब्बो. समाधिवसेन ओसक्कना कथिताति ‘‘विपुलेन महग्गतेन चेतसा विहरेय्य’’न्ति समथनयं दस्सेत्वा देसना कथिता.

६७. अयञ्हि भिक्खूति यं उद्दिस्स अयं दुतियानेञ्जसप्पायदेसनाय भिक्खु वुत्तो. पञ्ञवन्ततरोति वत्वा तं दस्सेतुं, ‘‘द्विन्नम्पि कम्मट्ठानं एकतो कत्वा सम्मसती’’ति वुत्तं. हेट्ठिमस्स हि ‘‘ये च दिट्ठधम्मिका कामा’’तिआदिना रूपसद्दगन्धरसफोट्ठब्बानेव रूपमुखेन विपस्सनाभिनिवेसो ¶ कतो, इमस्स पन ‘‘यं किञ्चि रूप’’न्तिआदिना सकलरूपधम्मवसेन. भगवा हि कम्मट्ठानं कथेन्तो कम्मट्ठानिकस्स भिक्खुनो कारणबलानुरूपमेव पठमं भावनाभिनिवेसं दस्सेति; सो पच्छा ञाणे विपुलं गच्छन्ते अनवसेसतो धम्मं परिग्गण्हाति. रूपपटिबाहनेनाति रूपविरागभावनाय सब्बसो समतिक्कमेन. सब्बत्थाति सब्बेसु ततियानेञ्जादीसु.

पञ्ञवन्ततरोति पञ्ञुत्तरो. तिण्णम्पि कम्मट्ठानं एकतो कत्वाति कामगुणा सब्बरूपधम्मा कामसञ्ञाति एवं तिण्णं पुग्गलानं कम्मट्ठानवसेन तिधा वुत्ते सम्मसनूपगधम्मे एकतो कत्वा, ‘‘सब्बमेतं अनिच्च’’न्ति एकज्झं गहेत्वा, सम्मसति यथा – ‘‘यं किञ्चि समुदयधम्मं, सब्बं तं निरोधधम्म’’न्ति (दी. नि. १.२९८; सं. नि. ५.१०८१; महाव. १६; चूळनि. अजितमाणवपुच्छानिद्देस ४, ७, ८; तिस्समेत्तेय्यमाणवपुच्छानिद्देस १०, ११; पटि. म. २.३०). तेनाह – ‘‘उभयमेतं अनिच्च’’न्तिआदि. कामरूपसञ्ञावसेन दिट्ठधम्मिकसम्परायिकभेदतो अट्ठ एकेककोट्ठासाति एवं कतं उभयन्ति वुत्तन्ति आह – ‘‘दिट्ठधम्मिक…पे… वसेन सङ्खिपित्वा उभयन्ति वुत्त’’न्ति. तण्हादिट्ठिवसेनाति तण्हाभिनन्दनावसेन ‘‘एतं ममा’’ति, दिट्ठाभिनन्दनावसेन ¶ ‘‘एसो मे अत्ता’’ति एवं अभिनन्दितुं. एसेव नयोति इमिना तण्हादिट्ठिवसेन ‘‘एतं मम, एसो मे अत्ता’’ति अभिनन्दितुं अज्झोसाय गिलित्वा परिनिट्ठापेत्वा ठातुन्ति इममत्थं अतिदिसति. कामपटिबाहनेनाति इदं आगमनपटिपदादस्सनत्थं, वण्णभणनत्थञ्च वुत्तं. रूपपटिबाहनं हिस्स आसन्नं, ततोपि आकासानञ्चायतनसमतिक्कमो, तंसमतिक्कमेन सहेव सब्बे ता विपस्सनावसेन ओसक्कना कथिता ‘‘उभयमेतं अनिच्च’’न्तिआदिवचनतो.

६८. इध अत्तनो चाति आकिञ्चञ्ञायतनकम्मट्ठानं सन्धायाह. निरुज्झन्ति तप्पटिबद्धछन्दरागनिरोधेन, समापज्जनक्खणे पन अनुप्पादनेनपि. तेनाह ‘‘आकिञ्चञ्ञायतनं पत्वा’’ति. अतप्पकट्ठेनाति उळारतरभावेन झानसमापत्तिया अतित्तिकरभावेन. तमेव पटिपदन्ति आकिञ्चञ्ञायतनभावनमाह. समाधिवसेन ओसक्कना कथिता ततियारुप्पकम्मट्ठानस्स वुत्तत्ता ‘‘यत्थेता’’तिआदिना.

इध अत्तनोति द्विकोटिकसुञ्ञतामनसिकारसङ्खातं विपस्सनाकम्मट्ठानं. हेट्ठा वुत्तपटिपदन्ति अनन्तरं वुत्तआकिञ्चञ्ञायतनकम्मट्ठानं. सति समथभावनायं सुञ्ञतामनसिकारस्स ¶ इध सातिसयत्ता वुत्तं. ‘‘दुतियाकिञ्चञ्ञायतने विपस्सनावसेन ओसक्कना कथिता’’ति.

७०. ततियाकिञ्चञ्ञायतने अत्तनोति चतुकोटिकसुञ्ञतामनसिकारसङ्खातं विपस्सनाकम्मट्ठानं. एत्थाति एतस्मिं सुञ्ञतानुपस्सनाधिकारे. क्वचीति कत्थचि ठाने, काले, धम्मे वा. अथ वा क्वचीति अज्झत्तं, बहिद्धा वा. अत्तनो अत्तानन्ति सकत्तानं. ‘‘अयं खो, भो ब्रह्मा…पे… वसी पिता भूतभब्यान’’न्तिआदिना (दी. नि. १.४२) परपरिकप्पितं अत्तानञ्च कस्सचि किञ्चनभूतं न पस्सतीति दस्सेन्तो ‘‘कस्सची’’तिआदिमाह. तत्थ परस्साति ‘‘परा पजा’’ति ‘‘परो पुरिसो’’ति च एवं गहितस्स. न च मम क्वचनीति एत्थ मम-सद्दो अट्ठानपयुत्तोति आह ‘‘ममसद्दं ताव ठपेत्वा’’ति. परस्स चाति अत्ततो अञ्ञस्स, ‘‘परो पुरिसो नाम अत्थि ममत्थाय सजितो, तस्स वसेन मय्हं सब्बं ¶ इज्झती’’ति एवं एकच्चदिट्ठिगतिकपरिकप्पितवसेन परं अत्तानं, तञ्च अत्तनो किञ्चनभूतं न पस्सतीति दस्सेन्तो, ‘‘न च क्वचनी’’तिआदिमाह. एत्थ च नाहं क्वचनीति सकअत्तनो अभावं पस्सति. न कस्सचि किञ्चनतस्मिन्ति सकअत्तनो एव कस्सचि अनत्तनियतं पस्सति. न च, ममाति एतं द्वयं यथासङ्ख्यं सम्बन्धितब्बं, अत्थीति पच्चेकं. ‘‘न च क्वचनि परस्स अत्ता अत्थी’’ति परस्स अत्तनो अभावं पस्सति, ‘‘तस्स परस्स अत्तनो मम किस्मिञ्चि किञ्चनता न चत्थी’’ति परस्स अत्तनो अनत्तनियतं पस्सति. एवं अज्झत्तं बहिद्धा च खन्धानं अत्तत्तनियसुञ्ञता सुद्धसङ्खारपुञ्जता चतुकोटिकसुञ्ञतापरिग्गण्हनेन दिट्ठा होति. हेट्ठा वुत्तपटिपदन्ति इधापि आकिञ्चञ्ञायतनकम्मट्ठानमेव वदति. विपस्सनावसेनेव ओसक्कना कथिता चतुकोटिकसुञ्ञतादस्सनविसेसभावतो, तप्पधानत्ता चस्स मनसिकारस्स.

इध अत्तनोति नेवसञ्ञानासञ्ञायतनकम्मट्ठानमाह. सब्बसञ्ञाति रूपसञ्ञा पटिघसञ्ञा नानत्तसञ्ञा हेट्ठिमा तिस्सो अरूपसञ्ञाति एवं सब्बसञ्ञा अनवसेसा निरुज्झन्तीति वदन्ति. ‘‘हेट्ठा वुत्ता’’ति पन विसेसितत्ता इमस्मिं आगता चतुत्थज्झानसञ्ञादयो अपि सञ्ञाति अपरे. तन्ति सम्मुतिमत्तं कामसञ्ञापटिबाहनवसेनेव तेसं नानत्तसञ्ञादिनिरोधस्स अत्थसिद्धत्ता. समाधिवसेन ओसक्कना कथिता नेवसञ्ञानासञ्ञायतनभावनाय समथकम्मट्ठानभावतो.

७१. पुब्बे पञ्चविधं कम्मवट्टन्ति पुरिमकम्मभवस्मिं मोहो अविज्जा आयूहना सङ्खारा निकन्तितण्हा ¶ उपगमनं उपादानं चेतना भवोति एवमागतो सपरिक्खारो कम्मप्पबन्धो. न आयूहितं अस्साति न चेतितं पकप्पितं भवेय्य. एतरहि एवं पञ्चविधं विपाकवट्टन्ति विञ्ञाणनामरूपसळायतनफस्सवेदनासङ्खातो पच्चुप्पन्नो विपाकप्पबन्धो नप्पवत्तेय्य कारणस्स अनिप्फन्नत्ता. सचे आयूहितं न भविस्सतीति यदि चेतितं पकप्पितं न सिया. यं अत्थीति यं परमत्थतो विज्जमानकं. तेनाह ‘‘भूत’’न्ति. तञ्हि पच्चयनिब्बत्तताय ‘‘भूत’’न्ति वुच्चति. तं पजहामीति तप्पटिबद्धछन्दरागप्पहानेन ततो एव आयतिं अनुप्पत्तिधम्मतापादनवसेन पजहामि परिच्चजामि.

परिनिब्बायीति ¶ सह परिकप्पनेन अतीतत्थेति आह ‘‘परिनिब्बायेय्या’’ति. परिनिब्बायेय्य नु खोति वा पाठो, सो एवत्थो. न किञ्चि कथितन्ति नेवसञ्ञानासञ्ञायतनसमापत्तिया सङ्खारावसेससुखुमभावेन ञाणुत्तरस्सेव विसयभावतो सरूपतो न किञ्चि कथितं, नयेन पनस्स विसेसं ञापेतुकामत्ता. भगवतो किर एतदहोसि – ‘‘इमिस्संयेव परिसति निसिन्नो आनन्दो अनुसन्धिकुसलताय नेवसञ्ञानासञ्ञायतनं पादकं कत्वा ठितस्स भिक्खुनो पटिसन्धिं अरहत्तञ्च सन्धाय पञ्हं पुच्छिस्सति, इमिना पुच्छानुसन्धिना तमत्थं देसेस्सामी’’ति. ओसक्कनाय च इधाधिप्पेतत्ता भिन्नरसदेसना होतीति पुच्छानुसन्धि पुच्छिता. तस्मिञ्हि असति अनुसन्धिभेदभिन्नेसा देसना, न च बुद्धाचिण्णा भिन्नरसदेसनाति. विपस्सनानिस्सितन्ति तन्निस्सितं. तस्स भिक्खुनो. उपादियति एतेनाति च उपादानं. न परिनिब्बायति पहातब्बस्स अप्पजहनतो. तेनाह भगवा – ‘‘धम्मापि खो, भिक्खवे, पहातब्बा, पगेव अधम्मा’’ति (म. नि. १.२४०). उपादानसेट्ठन्ति इदं नेवसञ्ञानासञ्ञायतनभवस्स सब्बभवग्गतादस्सनपरं, न पन अरियभवग्गस्स उपादानसेट्ठतापटिसेधपरं.

७३. निस्सायाति भवपरियापन्नं नाम धम्मं निस्साय तप्परियापन्नं नाम निस्साय ओघनित्थरणा भगवता अक्खाता; अहो अच्छरियमेतं, अहो अब्भुतमेतन्ति.

नवसुपि ठानेसु समथयानिकस्सेव वसेन देसनाय आगतत्ता, इध च कस्सचिपि पादकज्झानस्स अनामट्ठत्ता वुत्तं – ‘‘अरियसावकोति सुक्खविपस्सको अरियसावको’’ति. नवन्नम्पि कम्मट्ठानं एकतो कत्वा सम्मसतीति इदं झानधम्मेपि अनुस्सवलद्धे गहेत्वा सम्मसनं सम्भवतीति कत्वा वुत्तं; तेभूमकसङ्खारगतं इध वुत्तन्ति अनवसेसतो परिग्गहणं सन्धाय वुत्तं – ‘‘यावता सक्कायो’’ति.

एतं ¶ अमतन्ति अमतं निब्बानं आरब्भ पवत्तिया एतं अरहत्तं अमतरसं. तेनाह – ‘‘एतं अमतं सन्तं, एतं पणीत’’न्ति. ‘‘अनुपादाय किञ्चिपि अग्गहेत्वा चित्तं विमुच्ची’’ति वुत्तत्तापि अनुपादा चित्तस्स विमोक्खो निब्बानं अञ्ञत्थ सुत्ते वुच्चति.

तिण्णं ¶ भिक्खूनन्ति अभिनिवेसभेदेन तिविधानं. पादकं कत्वा ठितस्स ओसक्कनाय अभावे कारणं हेट्ठा वुत्तनयेनेव वेदितब्बं. समोधानेत्वाति सम्मदेव ओदहित्वा तस्मिं तस्मिं ठाने असङ्करतो ववत्थपेत्वा. सुकथितं नाम होति कथेतब्बस्स अनवसेसेत्वा कथितत्ता.

आनेञ्जसप्पायसुत्तवण्णनाय लीनत्थप्पकासना समत्ता.

७. गणकमोग्गल्लानसुत्तवण्णना

७४. यथा ¶ हेट्ठिमसोपानफलकं ओरोहन्तस्स पच्छिमं नाम होति, एवं आरोहन्तस्स पठमं नाम होतीति वुत्तं – ‘‘याव पच्छिमसोपानकळेवराति याव पठमसोपानफलका’’ति. वत्थुं सोधेत्वाति वत्थुविज्जाचरियेन वुत्तविधिना पासादवत्थुनो सोधनविधिं कत्वा. एत्थाति पासादकरणे. सत्तधा भिन्नस्स वालग्गस्स अंसुकोटिवेधको वालवेधि नाम. ठानसम्पादनन्ति वेसाखमण्डलादीनं सम्पादनं. मुट्ठिकरणादीहीति उसुमुट्ठिकरणजियागाहजियाविज्झादीहि. एवं गणापेमाति एकं नाम एकमेव, द्वे दुका चत्तारि, तीणि तिकानि नव, चत्तारि चतुक्कानि सोळसातिआदिना एवं गणनं सिक्खापेम.

७५. केराटिका होन्तीति समयस्स अनुपक्किलिट्ठकरणमायासाठेय्येन समन्नागता होन्ति. तं दमनं जीवितहेतुपि नातिक्कमति, अयमस्स जातिदोसाभावो.

७६. सतिसम्पजञ्ञाहि समङ्गिभावत्थायाति सततविहारिभावसाधनेहि सतिसम्पजञ्ञेहि समन्नागमत्थाय. ननु च खीणासवा सतिवेपुल्लप्पत्ता पञ्ञावेपुल्लप्पत्ता च, कथं तस्स सतिसम्पजञ्ञं पयोगसाधनीयं पवत्तन्ति आह ‘‘द्वे ही’’तिआदि. सततविहारीति सततं समापत्तिविहारिबहुला, तस्मा ते इच्छितिच्छितक्खणे फलसमापत्तिं समापज्जन्ति. वुत्तविपरियायेन नोसततविहारिनो दट्ठब्बा. तेनाह ‘‘तत्था’’तिआदि. अप्पेतुं न सक्कोति अनाचिण्णभावतो.

तं वितक्केन्तोति ‘‘सामणेरस्स सेनासनं नत्थि, अरञ्ञञ्च सीहादीहि सपरिस्सयं, किं नु खो तस्स भविस्सती’’ति तं वितक्केन्तो. एवरूपोति ¶ एदिसो यथावुत्तसामणेरसदिसो खीणासवो. इमे धम्मेति इमस्मिं सुत्ते आगते सीलादिधम्मे. आवज्जित्वावाति अत्तनो परिसुद्धसीलतादिआवज्जनहेतु एव समापज्जितुं सक्खिस्सति.

७८. ‘‘येमे, भो गोतमा’’ति वचनस्स सम्बन्धं दस्सेतुं, ‘‘तथागते किरा’’तिआदि वुत्तं. एवन्ति ‘‘येमे, भो गोतमा’’तिआदिआकारेहि वत्तुमारद्धो.

अज्जधम्मेसूति ¶ अपुरातनधम्मेसु. तक्कनमत्तानि हि तेहि कप्पेत्वा सयंपटिभानं विरचितानि. पुरातनताय परिपुण्णताय एकन्तनिय्यानिकताय च परमो उत्तमो. तेनाह – ‘‘तेसु…पे… उत्तमोति अत्थो’’ति. सेसं सुविञ्ञेय्यमेव.

गणकमोग्गल्लानसुत्तवण्णनाय लीनत्थप्पकासना समत्ता.

८. गोपकमोग्गल्लानसुत्तवण्णना

७९. कम्मंयेव ¶ कम्मन्तो, सो एत्थ अत्थीति कम्मकरणट्ठानं ‘‘कम्मन्तो’’ति वुत्तं. तेनाह ‘‘कम्मन्तट्ठान’’न्ति. तेहि धम्मेहीति बुद्धगुणेहि. ते पन सब्बञ्ञुतञ्ञाणप्पमुखाति कत्वा आह ‘‘सब्बञ्ञुतञ्ञाणधम्मेही’’ति. सब्बेन सब्बन्ति सब्बप्पकारेन अनवसेसं, एत्तको गुणानं पकारभेदो, तेसु किञ्चिपि पकारं अनवसेसेत्वा. सब्बकोट्ठासेहि सब्बन्ति यत्तका गुणभागा, तेहि सब्बेहि अनवसेसं निस्सेसमेव कत्वा. योपि अहोसीति योपि कोसम्बिवासीनं भिक्खूनं वसेन कोसम्बियं कलहो अहोसि. सोपि तत्थेव उप्पन्नट्ठानेयेव उप्पन्नमत्तो वूपसमितो. परिनिब्बुतकाले पनस्साति अस्स सम्मासम्बुद्धस्स परिनिब्बुतकाले पन. भिय्योसोमत्ताय भिक्खू समग्गा जाता, कथञ्च संवेगो जातोति दस्सेतुं ‘‘अट्ठसट्ठी’’तिआदि वुत्तं. सातिसयं अभिण्हञ्च उपसमप्पत्तिया अतिविय उपसन्तुपसन्ता. अनुसंयायमानोति अनु अनु सम्मदेव जानन्तो विचारेन्तो वोसासमानो. ‘‘अनुसञ्ञायमानो’’ति वा पाठो. तत्थ य-कारस्स ञ-कारं कत्वा निद्देसोति आह ‘‘अनुविचरमानो’’ति.

८०. हेट्ठिमपुच्छमेवाति ¶ गोपकमोग्गल्लानेन पुच्छितपुच्छमेव. सो हि ‘‘तेहि धम्मेही’’तिआदिना, ‘‘अत्थि कोचि तुम्हाकं सासनस्स सारभूतो भिक्खू’’ति पुच्छि. अयञ्च तमेव ‘‘पटिसरणो’’ति परियायेन पुच्छि. अप्पटिसरणेति यं तुम्हे भिक्खुं पटिबोधेय्याथ, तादिसस्स अभावेन अप्पटिसरणे. तथागतेन पवेदितो धम्मो पटिसरणं एतेसन्ति धम्मपटिसरणा. तेनाह ‘‘धम्मो अवस्सयो’’ति.

८१. आगच्छतीति वाचुग्गतभावेन आगच्छति. वत्थुवीतिक्कमसङ्खाते गरुगरुतरलहुलहुतरादिभेदे अज्झाचारे आपत्तिसमञ्ञाति आह – ‘‘आपत्ति…पे… आणातिक्कमनमेवा’’ति. यथाधम्मन्ति धम्मानुरूपं. यथासिट्ठन्ति यथानुसिट्ठं. धम्मो नोति एत्थ नो-सद्दो अवधारणे ‘‘न नो समं अत्थि तथागतेना’’तिआदीसु (खु. पा. ६.३; सु. नि. २२६) विय. तेनेवाह ‘‘धम्मोव कारेती’’ति.

८३. ‘‘यथा तं तुम्हादिसेहि रक्खकेहि गोपकेही’’ति एवं पसन्नवेसेन अत्तानं उक्कंसापेतुकामो ¶ . अरियूपवादपापं खमापने सति अन्तरायाय न होतीति आह – ‘‘इच्चेतं कुसल’’न्ति. गोनङ्गलमक्कटोति गोनङ्गुट्ठमक्कटो.

८४. अयं उक्कंसापेतुं इच्छितं यथारद्धमत्थं विसंवादेति अवण्णितम्पि वण्णितं कत्वा कथेन्तो; इमस्स वचनस्स पटिक्खेपेन इमिना दातब्बपिण्डपातस्स अन्तरायो मा होतूति एवं पिण्डपातं रक्खितुं न खो पन सक्काति योजना. इदन्ति ‘‘न खो, ब्राह्मण, सो भगवा’’तिआदिदेसनं. अब्भन्तरं करित्वाति निब्बानन्तोगधं कत्वा, अन्तरं वा तस्स निज्झानस्स कारणं कत्वा. कामरागवसेन हि तं निज्झानं होतीति. इधाति इमस्मिं सुत्तपदेसे. सब्बसङ्गाहिकज्झानन्ति लोकियलोकुत्तरस्स अन्तरायो मा होतूति एवं कत्वापि रूपावचरस्स मग्गझानस्स फलझानस्साति सब्बस्सपि सङ्गण्हनवसेन देसितत्ता सब्बसङ्गाहकज्झानं नाम कथितं.

यं नो मयन्ति एत्थ नोति निपातमत्तं. तं नोति एत्थ पन नोति अम्हाकन्ति अत्थो. उसूयति राजकिच्चपसुतताधीनताय एकत्थाभिनिवेसभावतो ¶ . मन्दपञ्ञताय वस्सकारगतइस्साभिभूतचित्तताय परिपुण्णं कत्वा वुत्तम्पि अत्थं अनुपधारेन्तो आह – ‘‘एकदेसमेव कथेसी’’ति. सेसं सुविञ्ञेय्यमेव.

गोपकमोग्गल्लानसुत्तवण्णनाय लीनत्थप्पकासना समत्ता.

९. महापुण्णमसुत्तवण्णना

८५. तस्मिं ¶ अहूति तस्मिं अहनीति आह ‘‘तस्मिं दिवसे’’ति. अनसनेनाति सब्बसो आहारस्स अभुञ्जनेन सासनिकसीलेन बाहिरकअनसनेन उपेता हुत्वाति योजना. वा-सद्देन खीरपानमधुसायनादिविधिं सङ्गण्हाति. उपेच्च वसितब्बतो उपोसथो, पातिमोक्खुद्देसो. उपेतेन समन्नागतेन हुत्वा वसितब्बतो सन्ताने वासेतब्बतो उपोसथो, सीलं. अनसनादिधम्मादिं वा उपेच्च वसनं उपवासो उपोसथो. तथारूपे हत्थिजातिविसेसे उपोसथोति समञ्ञामत्तन्ति आह – ‘‘उपोसथो नाम नागराजातिआदीसु पञ्ञत्ती’’ति. वुत्तनयेन उपवसन्ति एत्थाति उपोसथो, दिवसो. सो पनेस उपोसथो. मासपुण्णतायाति मासस्स पूरितभावेन. सम्पुण्णाति सब्बसो पुण्णा. ताय हि रत्तिया वसेन मासो अनवसेसतो पुण्णो होति. मासद्धमासादिभेदं कालं माति मिनन्तो विय होतीति च ‘‘मा’’इति चन्दो वुच्चति. एत्थाति एतिस्सा रत्तिया. पुण्णो परिपुण्णकलो जातोति पुण्णमा. तञ्हि चन्दपारिपूरिया मासपारिपूरिया एवमाह. एतेन तस्स उपोसथभावं दस्सेति.

दिस्सति फलं सन्दिस्सतीति देसो, हेतूति आह ‘‘देसन्ति कारण’’न्ति. सब्बं कथेन्ति सब्बं अत्तना परिग्गहितप्पकारं कथेन्ति. कथेतुं न सक्कोन्ति अविसयत्ता. पासादपरिवेणेति पासादस्स पुरतो विवटङ्गणे. हेट्ठा वुत्तनयेनाति सेखसुत्ते (म. नि. अट्ठ. २.२२) वुत्तनयेन वित्थारेतब्बं.

८६. इमे नु खोति एत्थ नूति संसयजोतनोति आह – ‘‘विमतिपुच्छा विय कथिता’’ति. जानन्तेनातिआदि पुच्छावत्तदस्सनपरं दट्ठब्बं, न ¶ पुच्छकस्स सत्थु अत्तनो अजाननभावदीपनपरं. जानाति हि भगवा. अजानन्तेन विय हुत्वा पुच्छिते. यथाभूतसभावं जानन्तो विय पुच्छति कोहञ्ञे ठत्वा. तेनाह – ‘‘थेरो एवरूपं वचनं किं करिस्सती’’ति कारणस्स सुप्पहीनत्ताति अधिप्पायो.

छन्दमूलकाति तण्हाछन्दमूलका. तण्हा हि दुक्खसमुदयो. कुसलसञ्ञो वा थिरविसदनिपुणसञ्ञो वा, कुसलसङ्खारो वा तिखिणथिरविसदसङ्खारो वा; सुविसुद्धविपुलोदारविञ्ञाणो ¶ वाति इममत्थं ‘‘सञ्ञादीसुपि एसेव नयो’’ति इमिना अतिदिसति. कस्मा पनेत्थ अनागतकालवसेनेव देसना आगताति आह ‘‘यस्मा पना’’तिआदि.

खन्धानं खन्धपण्णत्तीति खन्धसद्दाभिधेय्यानं रुप्पनानुभवनसञ्जाननाभिसङ्खरविजाननसभावानं अत्थानं ‘‘खन्धो’’ति अयं समञ्ञा. कित्तकेनाति किंपरिमाणेन अत्थेन, रासत्थभागत्थादीसु कीदिसेनाति अधिप्पायो.

हेतुहेतूति हेतुपच्चयभूतो हेतु. यो हि लोभादीनं सहजातधम्मेसु मूलट्ठेनुपकारकभावो निप्परियायेन हेतुत्थो; सो पथवीआदीसुपि पच्चयभावमत्तेन हेतुपरियायदस्सनतो दुतियेन हेतु-सद्देन विसेसेत्वा वुत्तो ‘‘हेतुहेतू’’ति. अविज्जा पुञ्ञाभिसङ्खारादीनं साधारणपच्चयत्ता साधारणहेतु, ‘‘अतीतानागतपच्चुप्पन्नानं कम्मसमादानानं ठानसो हेतुसो विपाक’’न्ति एत्थ विज्जमानेसुपि अञ्ञेसु पच्चयेसु इट्ठानिट्ठविपाकनियामकत्ता कम्मं तस्स पधानकारणन्ति आह – ‘‘कुसलाकुसलं अत्तनो अत्तनो विपाकदाने उत्तमहेतू’’ति. ‘‘महाभूता हेतू’’ति अयमेवत्थो ‘‘महाभूता पच्चयो’’ति इमिनापि वुत्तोति हेतुसद्दपच्चयसद्दानं समानत्थत्ता पच्चयो एव हेतु पच्चयहेतु, यो च रूपक्खन्धस्स हेतु, सो एव तस्स पञ्ञापनाय पच्चयोति वुत्तोति आह – ‘‘इध पच्चयहेतु अधिप्पेतो’’ति. यदग्गेन पच्चयधम्मो अत्तनो पच्चयुप्पन्नस्स उप्पादाय ठितिया च पच्चयो, तदग्गेन तस्स भावतो समञ्ञातो पञ्ञापनायपि सो पच्चयोति वत्तब्बतं अरहतीति. पाळियं अविभागेन वुत्तमत्थं विभागेन दस्सेतुं, ‘‘तत्थ पथवीधातू’’तिआदि वुत्तं. तत्थ पञ्ञापनायाति सहेतुअहेतुकन्तिआदिआकारेहि बोधनाय ¶ . तं पन सब्बोधनं ञाणेन दस्सनं होतीति वुत्तं ‘‘दस्सनत्थाया’’ति.

फस्सोति फस्ससमङ्गीभावो. सो चेत्थ सकिच्चनिप्फादनसमत्थस्स फस्सस्स निब्बत्ति. निब्बत्तो हि फस्सो तथारूपाय वेदनाय पच्चयो होतीति. एतदत्थमेवेत्थ भगवता पुग्गलाधिट्ठाना देसना कता, तस्मा पच्चुप्पन्नातीतकालवसेन द्विकालिको फस्ससद्दो वेदितब्बो. फस्से सति वेदेति फस्सपच्चया वेदनाइच्चेव वुत्तं होति. सेसपदद्वयेपि एसेव नयो. यथेव हि वेदनाय एवं सञ्ञाय सङ्खारानम्पि फस्सो विसेसपच्चयो तस्मिं असति अभावतो. चेतनाग्गहणेन आयूहनानुरूपताय तप्पधानत्ता सङ्खारक्खन्धधम्मा गहिता. तथा हि सुत्तन्तभाजनीये सङ्खारक्खन्धभाजनीये (विभ. २१, २२) च ‘‘चक्खुसम्फस्सजा चेतना’’तिआदिना ¶ चेतनाव निद्दिट्ठा. विञ्ञाणक्खन्धस्साति एत्थ एकस्मिं भवे आदिभूतविञ्ञाणस्स नामरूपपच्चयतं दस्सेतुं, ‘‘पटिसन्धिविञ्ञाणेन तावा’’तिआदि वुत्तं. तत्थ गब्भसेय्यकस्स सभावकस्स रूपपवत्तिं सन्धाय ‘‘उपरिमपरिच्छेदेना’’ति वुत्तं समतिंसतो उपरि पटिसन्धिक्खणे तस्स रूपानं असम्भवतो. इदानि पवत्तिविञ्ञाणस्स नामरूपपच्चयं द्वारवसेन दस्सेतुं, ‘‘चक्खुद्वारे’’तिआदि वुत्तं. ननु च विञ्ञाणस्सपि फस्सो पच्चयो, कस्मा तयो एव खन्धा फस्सपच्चया वुत्ताति? सच्चमेतं, यथा पन विञ्ञाणसहितो फस्सो वेदनादीनं पच्चयो, न एवं विञ्ञाणस्स. तेनाह भगवा – ‘‘तिण्णं सङ्गति फस्सो’’ति (म. नि. १.२०४; म. नि. ३.४२१, ४२५, ४२६; सं. नि. २.४४, ४५; २.४.६०) फस्सो विय नामरूपं विञ्ञाणस्स विसेसपच्चयो यथा नामरूपपच्चयापि विञ्ञाणन्ति. तस्मा इमं विसेसं दस्सेतुं नामरूपस्सेव विञ्ञाणपच्चयता वुत्ता, न फस्सस्स.

८७. याव सक्कायदिट्ठि समुप्पज्जति, ताव वट्टस्स परियन्तो नत्थेवाति अप्पहीनसक्कायदिट्ठिको वट्टे परिब्भमतीति आह – ‘‘कथं पन, भन्तेति वट्टं पुच्छन्तो’’ति. यथा च सक्कायदिट्ठिजोतना वट्टपुच्छा, एवं तब्भेदनजोतना विवट्टपुच्छाति आह – ‘‘सक्कायदिट्ठि न होतीति विवट्टं पुच्छन्तो’’ति.

८८. अयं ¶ रूपे अस्सादोति याथावतो दस्सनं परिञ्ञाभिसमयो, दुक्खसच्चपरियापन्नञ्च रूपन्ति आह – ‘‘इमिना परिञ्ञापटिवेधो चेव दुक्खसच्चञ्च कथित’’न्ति. ‘‘यं रूपं अनिच्च’’न्तिआदिवचनतो अनिच्चादिभावो तत्थ आदीनवो, सो चस्स पच्चयाधीनवुत्तिताय पच्चयो समुदयसच्चन्ति समुदयप्पहानेन आदीनवसमतिक्कमोति आदीनवग्गहणेन सिद्धमत्थमाह – ‘‘पहानपटिवेधो चेव समुदयसच्चञ्चा’’ति. सब्बसङ्खतनिस्सरणं निब्बानञ्च सच्छिकिरियाभिसमयवसेन पटिविज्झितब्बन्ति आह – ‘‘इमिना सच्छिकिरियापटिवेधो चेव निरोधसच्चञ्चा’’ति. इमेसु तीसु ठानेसूति यथावुत्तेसु दुक्खादीसु तीसु अभिसमयट्ठानेसु. ये सम्मादिट्ठिआदयो धम्माति ये अरियमग्गसञ्ञिता सम्मादिट्ठिआदयो अट्ठ, सत्त वा धम्मा. भावनापटिवेधो मग्गसच्चन्ति भावनाभिसमयवसेन पवत्तं मग्गसच्चं. सेसपदेसुपीति, ‘‘अयं वेदनाय अस्सादो’’तिआदिपदेसुपि.

८९. इमस्मिन्ति आसन्नपच्चक्खताय सकअत्तभावो गहितो, तदेव अज्झत्ता खन्धाति तप्पटियोगिताय, ‘‘बहिद्धाति परस्स सविञ्ञाणके काये’’ति वुत्तं. सब्बनिमित्तेसूति सब्बेसु रूपनिमित्तादीसुपि ¶ . तानि पन इन्द्रियबद्धानिपि अनिन्द्रियबद्धानिपि तंसभावानीति आह ‘‘अनिन्द्रियबद्धम्पि सङ्गण्हाती’’ति. विञ्ञाणग्गहणेनेवेत्थ वेदनादयोपि गहिता अविनाभावतोति, ‘‘सविञ्ञाणके काये’’ति वुत्तं. ‘‘कायो’’ति वा खन्धसमूहोति अत्थो.

९०. अनत्तनि ठत्वाति अत्तरहिते अनत्तसभावे खन्धकोट्ठासे ठत्वा तं आधारं कत्वा कतानि कम्मानि. कतरस्मिं अत्तनि ठत्वाति कीदिसे अत्तनि निस्सयविपाकं दस्सन्ति विपच्चिस्सन्ति. एतेन कारकवेदकरहितत्ता अत्तपक्खकम्मकानि न युज्जन्तीति दस्सेति, खन्धानं खणिकत्ता च कतनासअकतब्भागमदोसो च आपज्जतीति.

तत्रायं (इतिवु. अट्ठ. ७४; सारत्थ. टी. १.५) चोदनासोधनाविधि – पाणातिपातवसेन ताव कम्मपथसम्बन्धविभावना, खणे खणे हि निरुज्झनसभावेसु सङ्खारेसु को हन्ति, को वा हञ्ञति, यदि चित्तचेतसिकसन्तानो, सो अरूपत्ता ¶ न छेदनभेदनादिवसेन विकोपनसमत्थो, नपि विकोपनीयो. अथ रूपसन्तानो, सो अचेतनत्ता कट्ठकलिङ्गरूपमोति न तत्थ छेदनादिना पाणातिपातापुञ्ञं पसवति यथा मतसरीरे. पयोगोपि पाणातिपातस्स पहरणप्पहारादिको अतीतेसु वा सङ्खारेसु भवेय्य, अनागतेसु, पच्चुप्पन्नेसु वा, तत्थ न ताव अतीतानागतेसु सम्भवति तेसं अभावतो, पच्चुप्पन्नेसु च सङ्खारानं खणिकत्ता सरसेनेव निरुज्झनसभावताय विनासाभिमुखेसु निप्पयोजनो पयोगो सिया, विनासस्स च कारणरहितत्ता न पहरणप्पहारादिप्पयोगहेतुकं मरणं, निरीहकताय च सङ्खारानं कस्स सो पयोगो? खणिकत्ता वधाधिप्पायसमकालभिज्जनकस्स किरियापरियोसानकालानवट्ठानतो कस्स पाणातिपातकम्मबद्धोति?

वुच्चतेयथावुत्तवधकचेतनासहितो सङ्खारपुञ्जो सत्तसङ्खातो हन्ति. तेन पवत्तितवधप्पयोगनिमित्तं अपगतउस्माविञ्ञाणजीवितिन्द्रियो मतवोहारपवत्तिनिबन्धनो यथावुत्तवप्पयोगकरणे उप्पज्जनारहो रूपारूपधम्मसमूहो हञ्ञति, केवलो वा चित्तचेतसिकसन्तानो. वधप्पयोगाविसयभावेपि तस्स पञ्चवोकारभवे रूपसन्तानाधीनवुत्तिताय रूपसन्ताने परेन पयोजितजीवितिन्द्रियुपच्छेदकपयोगवसेन तन्निब्बत्तितविबन्धकविसदिरूपुप्पत्तिया विगते विच्छेदो होतीति न पाणातिपातस्स असम्भवो; नापि अहेतुको पाणातिपातो, न च पयोगो निप्पयोजनो पच्चुप्पन्नेसु सङ्खारेसु कतप्पयोगवसेन तदनन्तरं उप्पज्जनारहस्स सङ्खारकलापस्स तथा अनुप्पत्तितो. खणिकानं सङ्खारानं खणिकमरणस्स इध मरणभावेन अनधिप्पेतत्ता सन्ततिमरणस्स च यथावुत्तनयेन सहेतुकभावतो न अहेतुकं मरणं ¶ ; न च कत्तुरहितो पाणातिपातप्पयोगो निरीहकेसुपि सङ्खारेसु सन्निहिततामत्तेन उपकारकेसु अत्तनो अत्तनो अनुरूपफलुप्पादने नियतेसु कारणेसु कत्तुवोहारसिद्धितो यथा – ‘‘पदीपो पकासेति, निसाकरो चन्दिमा’’ति. न च केवलस्स वचाधिप्पायसहभुनो चित्तचेतसिककलापस्स पाणातिपातो इच्छितो सन्तानवसेन अवट्ठितस्सेव पटिजाननतो; सन्तानवसेन पवत्तमानानञ्च ¶ पदीपादीनं अत्थकिरियसिद्धि दिस्सतीति अत्थेव पाणातिपातेन कम्मुना बद्धो; ततो एव यस्मिं सन्ताने पाणातिपातचेतना पवत्ता; तत्थेव सन्ताने पच्चयन्तरसमवायेन भवन्तरे निरयादीसु तस्सा फलप्पवत्तीति नत्थेव कतविनासो अकतब्भागमो च. इमिना नयेन अदिन्नादानादीनञ्च वसेन यथारहं कम्मपथसम्बन्धविभावना वेदितब्बाति.

सब्बो दिट्ठिग्गाहो तण्हावसगतस्सेव होतीति आह ‘‘तण्हाधिपतेय्येना’’ति. तेसु तेसु धम्मेसूति मया देसियमानदस्सनधम्मेसु. पकतिकम्मट्ठानन्ति तस्स थेरस्स सन्तिके गहेत्वा परिहरियमानकम्मट्ठानं. अञ्ञं नवकम्मट्ठानन्ति भगवतो देसनानुसारेन गहितं अञ्ञं नवं कम्मट्ठानं. सेसं सुविञ्ञेय्यमेव.

महापुण्णमसुत्तवण्णनाय लीनत्थप्पकासना समत्ता.

१०. चूळपुण्णमसुत्तवण्णना

९१. तुण्हीभूतं ¶ तुण्हीभूतन्ति आमेडितवचनं ब्यापनिच्छावसेन वुत्तन्ति आह – ‘‘यं यं दिस’’न्तिआदि. अनुविलोकेत्वाति एत्थ अनुसद्दोपि ब्यापनिच्छायमेवाति अनु अनु विलोकेत्वाति अत्थो. तेनेवाह – ‘‘ततो ततो विलोकेत्वा’’ति. असन्तो नीचो पुरिसोति असप्पुरिसोति आह – ‘‘पापपुरिसो लामकपुरिसो’’ति. सोति असप्पुरिसो. तन्ति असप्पुरिसं जानितुं न सक्कोति असप्पुरिसधम्मानं याथावतो अजाननतो. पापधम्मसमन्नागतोति कायदुच्चरितादिअसन्तुट्ठितादिलामकधम्मसमन्नागतो. असप्पुरिसे भत्ति एतस्साति असप्पुरिसभत्ति. तेनाह – ‘‘असप्पुरिससेवनो’’ति. असप्पुरिसधम्मो असप्पुरिसो उत्तरपदलोपेन, तेसं चिन्तनसीलोति असप्पुरिसचिन्ती. तेनाह ‘‘असप्पुरिसचिन्ताय चिन्तको’’ति, दुच्चिन्तितचिन्तीति अत्थो. असप्पुरिसमन्तनन्ति असाधुजनविचारं असप्पुरिसवीमंसं. असप्पुरिसवाचन्ति चतुब्बिधं दुब्भासितं. असप्पुरिसकम्मं नाम तिविधम्पि कायदुच्चरितं. असप्पुरिसदिट्ठि नाम विसेसतो दसवत्थुका मिच्छादिट्ठि, ताय समन्नागतो असप्पुरिसदिट्ठिया समन्नागतो, असप्पुरिसदानं ¶ नाम असक्कच्चदानादि. सब्बोपायमत्थो पाळितो एव विञ्ञायति.

‘‘पाणं हनिस्सामी’’तिआदिका चेतना कामं परब्याबाधायपि होतियेव, यथा पन सा अत्तनो बलवतरदुक्खत्थाय होति, तथा न परस्साति इममत्थं दस्सेतुं, ‘‘अत्तनो दुक्खत्थाय चिन्तेति’’इच्चेव वुत्तो. यथा असुको असुकन्तिआदीहि पापको पापविपाकेकदेसं बलवं गरुतरं वा पच्चनुभोन्तोपि यथा परो पच्चनुभोति, न तथा सयन्ति दस्सेति. तेनाह ‘‘परब्याबाधाया’’ति. गहेत्वाति पापकिरियाय सहायभावेन गहेत्वा.

असक्कच्चन्ति अनादरं कत्वा. देय्यधम्मस्स असक्करणं अप्पसन्नाकारो, पुग्गलस्स असक्करणं अगरुकरणन्ति इममत्थं दस्सेन्तो, ‘‘देय्यधम्मं न सक्करोति नामा’’तिआदिमाह. अचित्तीकत्वाति न चित्ते कत्वा, न पूजेत्वाति अत्थो. पूजेन्तो हि पूजेतब्बवत्थुं चित्ते ठपेति, ततो न बहि करोति. चित्तं वा अच्छरियं कत्वा पटिपत्ति चित्तीकरणं, सम्भावनकिरिया. तप्पटिक्खेपतो अचित्तीकरणं, असम्भावनकिरिया. अपविद्धन्ति उच्छिट्ठादिछड्डनीयधम्मं विय अवखित्तकं. तेनाह – ‘‘छड्डेतुकामो विया’’तिआदि. रोगं पक्खिपन्तो ¶ वियाति रोगिकसरीरं ओदनादीहि पमज्जित्वा वम्मिके रोगं पक्खिपन्तो विय. अद्धा इमस्स दानस्स फलं ममेव आगच्छतीति एवं यस्स तथा दिट्ठि अत्थि, सो आगमनदिट्ठिको, अयं पन न तादिसोति आह ‘‘अनागमनदिट्ठिको’’ति. तेनाह – ‘‘नो फलपाटिकङ्खी हुत्वा देती’’ति.

कामञ्चायं यथावुत्तपुग्गलो असद्धम्मादीहि पापधम्मेहि समन्नागतो, तेहि पन सब्बेहिपि मिच्छादस्सनं महासावज्जन्ति दस्सेतुं, ‘‘ताय मिच्छादिट्ठिया निरये उपपज्जती’’ति वुत्तं. वुत्तपटिपक्खनयेनाति कण्हपक्खे वुत्तस्स अत्थस्स विपरियायेन सुक्कपक्खे अत्थो वेदितब्बो. ‘‘सदेवकं लोक’’न्तिआदीसु (पारा. १) देवसद्दो छकामावचरदेवेसु, एवमिधाति आह ‘‘छकामावचरदेवा’’ति. तत्थ ब्रह्मानं विसुं गहितत्ता कामावचरदेवग्गहणन्ति चे? इध दानफलस्स अधिप्पेतत्ता कामावचरदेवग्गहणं ¶ , तत्थापि छकामावचरग्गहणं दट्ठब्बं देवमहत्ततादिवचनतो. तिण्णं कुलानं सम्पत्तीति खत्तियमहत्तादीनं तिण्णं कुलानं सम्पत्ति, न केवलं कुलसम्पदा एव अधिप्पेता, अथ खो तत्थ आयुवण्णयसभोगइस्सरियादिसम्पदापि अधिप्पेताति दट्ठब्बं उळारस्स दानमयपुञ्ञस्स वसेन तेसम्पि समिज्झनतो. सुद्धवट्टवसेनेव कथितं सुक्कपक्खेपि सब्बसो विवट्टस्स अनामट्ठत्ता. सद्धादयो हि लोकियकुसलसम्भारा एवेत्थ अधिप्पेताति. सेसं सुविञ्ञेय्यमेव.

चूळपुण्णमसुत्तवण्णनाय लीनत्थप्पकासना समत्ता.

निट्ठिता च देवदहवग्गवण्णना.

२. अनुपदवग्गो

१. अनुपदसुत्तवण्णना

९३. इद्धिमाति ¶ ¶ गुणो पाकटो परतोघोसेन विना पासादकम्पनदेवचारिकादीहि सयमेव पकासभावतो; धुतवादादिगुणानम्पि तथाभावे एतेनेव नयेन तेसं गुणानं पाकटयोगतो च परेसं निच्छितभावतो च. पञ्ञवतो गुणाति पञ्ञापभेदपभाविते गुणविसेसे सन्धाय वदति. ते हि येभुय्येन परेसं अविसया. तेनाह – ‘‘न सक्का अकथिता जानितु’’न्ति. विसभागा सभागा नाम अयोनिसोमनसिकारबहुलेसु पुथुज्जनेसु, ते पन अप्पहीनरागदोसताय परस्स विज्जमानम्पि गुणं मक्खेत्वा अविज्जमानं अवण्णमेव घोसेन्तीति आह – ‘‘विसभाग…पे… कथेन्ती’’ति.

या अट्ठारसन्नं धातूनं समुदयतो अत्थङ्गमतो अस्सादतो आदीनवतो यथाभूतं पजानना, अयं धातुकुसलता. आयतनकुसलतायपि एसेव नयो. अविज्जादीसु द्वादससु पटिच्चसमुप्पादङ्गेसु कोसल्लं पटिच्चसमुप्पादकुसलता. इदं इमस्स फलस्स ठानं कारणं, इदं अट्ठानं अकारणन्ति एवं ठानञ्च ठानतो, अट्ठानञ्च अट्ठानतो यथाभूतं पजानना, अयं ठानाट्ठानकुसलता. यो पन इमेसु धातुआदीसु परिञ्ञाभिसमयादिवसेन निस्सङ्गगतिया पण्डाति लद्धनामेन ञाणेन इतो गतो पवत्तो, अयं पण्डितो नामाति आह – ‘‘इमेहि चतूहि कारणेहि पण्डितो’’ति. महन्तानं अत्थानं परिग्गण्हनतो महती पञ्ञा एतस्साति महापञ्ञो. सेसपदेसुपि एसेव नयोति आह – ‘‘महापञ्ञादीहि समन्नागतोति अत्थो’’ति.

नानत्तन्ति याहि महापञ्ञादीहि समन्नागतत्ता थेरो ‘‘महापञ्ञो’’तिआदिना कित्तीयति, तासं महापञ्ञादीनं इदं नानत्तं अयं वेमत्तता. यस्स कस्सचि (दी. नि. टी. ३.२१६; सं. नि. टी. १.१.११०; अ. नि. टी. १.१.५८४) विसेसतो अरूपधम्मस्स महत्तं नाम किच्चसिद्धिया वेदितब्बन्ति तदस्स किच्चसिद्धिया दस्सेन्तो, ‘‘महन्ते ¶ सीलक्खन्धे परिग्गण्हातीति महापञ्ञा’’तिआदिमाह. तत्थ हेतुमहन्तताय पच्चयमहन्तताय निस्सयमहन्तताय पभेदमहन्तताय किच्चमहन्तताय ¶ फलमहन्तताय आनिसंसमहन्तताय च सीलक्खन्धस्स महन्तभावो वेदितब्बो. तत्थ हेतू अलोभादयो, पच्चया हिरोत्तप्पसद्धासतिवीरियादयो. निस्सया सावकबोधिपच्चेकबोधिसम्मासम्बोधिनियतता तंसमङ्गिनो च पुरिसविसेसा. पभेदो चारित्तादिविभागो. किच्चं तदङ्गादिवसेन पटिपक्खस्स विधमनं. फलं सग्गसम्पदा निब्बानसम्पदा च. आनिसंसो पियमनापतादि. अयमेत्थ सङ्खेपो, वित्थारो पन विसुद्धिमग्गे (विसुद्धि. १.९) आकङ्खेय्यसुत्तादीसु (म. नि. १.६४ आदयो) च आगतनयेन वेदितब्बो. इमिना नयेन समाधिक्खन्धादीनम्पि महन्तता यथारहं निद्धारेत्वा वेदितब्बा, ठानाट्ठानादीनं पन महन्तभावो महाविसयताय वेदितब्बो. तत्थ ठानाट्ठानानं महाविसयता बहुधातुकसुत्ते (म. नि. ३.१२४ आदयो) सयमेव आगमिस्सति. विहारसमापत्तीनं समाधिक्खन्धे निद्धारितनयेन वेदितब्बा, अरियसच्चानं सकलसासनसङ्गहणतो सच्चविभङ्गे (विभ. १८९ आदयो) तंसंवण्णनासु (विभ. अट्ठ. १८९ आदयो) आगतनयेन. सतिपट्ठानादीनं विभङ्गादीसु (विभ. ३५५ आदयो) तंसंवण्णनादीसु (विभ. अट्ठ. ३५५ आदयो) च आगतनयेन. सामञ्ञफलानं महतो हितस्स महतो सुखस्स महतो अत्थस्स महतो योगक्खेमस्स निप्फत्तिभावतो सन्तपणीतनिपुणअतक्कावचरपण्डितवेदनीयभावतो च. अभिञ्ञानं महासम्भारतो महाविसयतो महाकिच्चतो महानुभावतो महानिप्फत्तितो च. निब्बानस्स मदनिम्मदनादिमहत्थसिद्धितो महन्तता वेदितब्बा.

पुथुपञ्ञाति एत्थापि वुत्तनयानुसारेन अत्थो वेदितब्बो. अयं पन विसेसो – नानाखन्धेसु ञाणं पवत्ततीति, ‘‘अयं रूपक्खन्धो नाम…पे… अयं विञ्ञाणक्खन्धो नामा’’ति, एवं पञ्चन्नं खन्धानं नानाकरणं पटिच्च ञाणं पवत्तति. तेसुपि ‘‘एकविधेन रूपक्खन्धो, एकादसविधेन रूपक्खन्धो, एकविधेन वेदनाक्खन्धो, बहुविधेन वेदनाक्खन्धो, एकविधेन सञ्ञाक्खन्धो…पे… एकविधेन विञ्ञाणक्खन्धो, बहुविधेन विञ्ञाणक्खन्धो’’ति एवं एकेकस्स खन्धस्स एकविधादिवसेन अतीतादिभेदवसेनपि नानाकरणं पटिच्च ञाणं पवत्तति. तथा ‘‘इदं चक्खायतनं नाम…पे… इदं धम्मायतनं नाम. तत्थ दसायतना कामावचरा, द्वे चतुभूमका’’ति एवं आयतननानत्तं पटिच्च ञाणं पवत्तति.

नानाधातूसूति ¶ ‘‘अयं चक्खुधातु नाम…पे… अयं मनोविञ्ञाणधातु नाम. तत्थ सोळस धातुयो कामावचरा, द्वे चतुभूमका’’ति एवं नानाधातूसु पटिच्च ञाणं पवत्तति. तयिदं ¶ उपादिण्णकधातुवसेन वुत्तन्ति वेदितब्बं. पच्चेकबुद्धानञ्हि द्विन्नञ्च अग्गसावकानं उपादिण्णकधातूसुयेव नानाकरणं पटिच्च ञाणं पवत्तति. तञ्च खो एकदेसतोव, नो निप्पदेसतो, अनुपादिण्णकधातूनं पन नानाकरणं न जानन्तियेव. सब्बञ्ञुबुद्धानंयेव पन, ‘‘इमाय नाम धातुया उस्सन्नत्ता इमस्स रुक्खस्स खन्धो सेतो होति, इमस्स कण्हो, इमस्स बहलत्तचो, इमस्स तनुत्तचो, इमस्स पत्तं वण्णसण्ठानादिवसेन एवरूपं, इमस्स पुप्फं नीलं पीतं लोहितं ओदातं सुगन्धं दुग्गन्धं, फलं खुद्दकं महन्तं दीघं वट्टं सुसण्ठानं मट्ठं फरुसं सुगन्धं मधुरं तित्तकं अम्बिलं कटुकं कसावं, कण्टको तिखिणो अतिखिणो उजुको कुटिलो लोहितो ओदातो होती’’ति धातुनानत्तं पटिच्च ञाणं पवत्तति.

अत्थेसूति रूपादीसु आरम्मणेसु. नानापटिच्चसमुप्पादेसूति अज्झत्तबहिद्धाभेदतो सन्तानभेदतो च नानप्पभेदेसु पटिच्चसमुप्पादङ्गेसु. अविज्जादिअङ्गानञ्हि पच्चेकं पटिच्चसमुप्पादसञ्ञिताति. तेनाह – सङ्खारपिटके ‘‘द्वादस पच्चया द्वादस पटिच्चसमुप्पादा’’ति. नानासुञ्ञतमनुपलब्भेसूति नानासभावेसु निच्चसारादिविरहतो सुञ्ञसभावेसु, ततो एव इत्थिपुरिसअत्तअत्तनियादिवसेन अनुपलब्भेसु सभावेसु. म-कारो हेत्थ पदसन्धिकरो. नानाअत्थेसूति अत्थपटिसम्भिदाविसयेसु पच्चयुप्पन्नादिनानाअत्थेसु. धम्मेसूति धम्मपटिसम्भिदाविसयेसु पच्चयादिनानाधम्मेसु. निरुत्तीसूति तेसंयेव अत्थधम्मानं निद्धारणवचनसङ्खातासु नानानिरुत्तीसु. पटिभानेसूति एत्थ अत्थपटिसम्भिदादीसु विसयभूतेसु, ‘‘इमानि इदमत्थजोतकानी’’ति (विभ. ७२५-७४५) तथा तथा पटिभानतो पटिभानानीति लद्धनामेसु ञाणेसु. पुथु नानासीलक्खन्धेसूतिआदीसु सीलस्स पुथुत्तं नानत्तञ्च वुत्तमेव. इतरेसं पन वुत्तनयानुसारेन सुविञ्ञेय्यत्ता पाकटमेव. यं पन अभिन्नं एकमेव निब्बानं, तत्थ उपचारवसेन पुथुत्तं गहेतब्बन्ति आह – ‘‘पुथु नानाजनसाधारणे धम्मे समतिक्कम्मा’’ति. तेनस्स मदनिम्मदनादिपरियायेन पुथुत्तं परिदीपितं होति.

एवं ¶ विसयवसेन पञ्ञाय महत्तं पुथुत्तञ्च दस्सेत्वा इदानि सम्पयुत्तधम्मवसेन हासभावं, पवत्तिआकारवसेन जवनभावं, किच्चवसेन तिक्खादिभावञ्च दस्सेतुं, ‘‘कतमा हासपञ्ञा’’तिआदि वुत्तं. तत्थ हासबहुलोति पीतिबहुलो. सेसपदानि तस्सेव वेवचनानि. सीलं परिपूरेतीति हट्ठपहट्ठो उदग्गुदग्गो हुत्वा पीतिसहगताय पञ्ञाय. पीतिसोमनस्ससहगता हि पञ्ञा अभिरतिवसेन आरम्मणे फुल्ला विकसिता विय पवत्तति; न उपेक्खासहगताति पातिमोक्खसीलं ठपेत्वा हासनीयं परं तिविधम्पि सीलं परिपूरेतीति अत्थो. विसुं वुत्तत्ता पुन सीलक्खन्धमाह. समाधिक्खन्धन्तिआदीसुपि एसेव नयो.

रूपं ¶ अनिच्चतो खिप्पं जवतीति रूपक्खन्धं अनिच्चन्ति सीघं वेगेन पवत्तिया पटिपक्खदूरीभावेन पुब्बाभिसङ्खारस्स सातिसयत्ता इन्देन विस्सट्ठवजिरं विय लक्खणं पटिविज्झन्ती अदन्धायन्ती रूपक्खन्धे अनिच्चलक्खणं वेगसा पटिविज्झति, तस्मा सा जवनपञ्ञा नामाति अत्थो. सेसपदेसुपि एसेव नयो. एवं लक्खणारम्मणिकविपस्सनावसेन जवनपञ्ञं दस्सेत्वा बलवविपस्सनावसेन दस्सेतुं, ‘‘रूप’’न्तिआदि वुत्तं. तत्थ खयट्ठेनाति यत्थ यत्थ उप्पज्जति, तत्थ तत्थेव भिज्जनतो खयसभावत्ता. भयट्ठेनाति भयानकभावतो. असारकट्ठेनाति अत्तसारविरहतो निच्चसारादिविरहतो च. तुलयित्वाति तुलाभूताय विपस्सनापञ्ञाय तुलेत्वा. तीरयित्वाति ताय एव तीरणभूताय तीरेत्वा. विभावयित्वाति याथावतो पकासेत्वा पञ्चक्खन्धं विभूतं कत्वा. रूपनिरोधेति रूपक्खन्धस्स निरोधभूते निब्बाने निन्नपोणपब्भारवसेन. इदानि सिखाप्पत्तविपस्सनावसेन जवनपञ्ञं दस्सेतुं, पुन ‘‘रूप’’न्तिआदि वुत्तं. वुट्ठानगामिनिविपस्सनावसेनाति केचि.

ञाणस्स तिक्खभावो नाम सविसेसं पटिपक्खसमुच्छिन्दनेन वेदितब्बोति, ‘‘खिप्पं किलेसे छिन्दतीति तिक्खपञ्ञा’’ति वत्वा ते पन किलेसे विभागेन दस्सेन्तो, ‘‘उप्पन्नं कामवितक्क’’न्तिआदिमाह. तिक्खपञ्ञो हि खिप्पाभिञ्ञो होति, पटिपदा चस्स न चलतीति आह – ‘‘एकस्मिं आसने चत्तारो अरियमग्गा अधिगता होन्ती’’तिआदि.

‘‘सब्बे सङ्खारा अनिच्चा दुक्खा विपरिणामधम्मा सङ्खता पटिच्चसमुप्पन्ना खयधम्मा वयधम्मा निरोधधम्मा’’ति याथावतो दस्सनेन सच्चसम्पटिवेधो इज्झति, न अञ्ञथाति कारणमुखेन निब्बेधिकपञ्ञं दस्सेतुं, ‘‘सब्बसङ्खारेसु ¶ उब्बेगबहुलो होती’’तिआदि वुत्तं. तत्थ उब्बेगबहुलोति वुत्तनयेन सब्बसङ्खारेसु अभिण्हं पवत्तसंवेगो. उत्तासबहुलोति ञाणुत्रासवसेन सब्बसङ्खारेसु बहुसो उत्रस्तमानसो. तेन आदीनवानुपस्सनमाह. उक्कण्ठनबहुलोति पन इमिना निब्बिदानुपस्सनं आह – अरतिबहुलोतिआदिना तस्सा एव अपरापरुप्पत्तिं. बहिमुखोति सब्बसङ्खारतो बहिभूतं निब्बानं उद्दिस्स पवत्तञाणमुखो, तथा वा पवत्तितविमोक्खमुखो. निब्बिज्झनं निब्बेधो, सो एतिस्सा अत्थि, निब्बिज्झतीति वा निब्बेधा, साव पञ्ञा निब्बेधिका. यं पनेत्थ अत्थतो अविभत्तं, तं हेट्ठा वुत्तनयत्ता सुविञ्ञेय्यमेव.

पज्जति एतेन विपस्सनादिकोति पदं, समापत्ति, तस्मा अनुपदन्ति अनुसमापत्तियोति अत्थो. पदं वा सम्मसनुपगा धम्मा विपस्सनाय पवत्तिट्ठानभावतो. तेनाह ‘‘समापत्तिवसेन वा’’ति ¶ . झानङ्गवसेन वाति झानङ्गवसेनाति च अत्थो. अट्ठकथायं पन कमत्थो इध पदसद्दो, तस्मा अनुपदं अनुक्कमेनाति अयमेत्थ अत्थोति आह ‘‘अनुपटिपाटिया’’ति. धम्मविपस्सनन्ति तंतंसमापत्तिचित्तुप्पादपरियापन्नानं धम्मानं विपस्सनं. विपस्सतीति समापत्तियो झानमुखेन ते ते धम्मे याथावतो परिग्गहेत्वा, ‘‘इतिपि दुक्खा’’तिआदिना सम्मसति. अद्धमासेन अरहत्तं पत्तो उक्कंसगतस्स सावकानं सम्मसनचारस्स निप्पदेसेन पवत्तियमानत्ता, सावकपारमीञाणस्स च तथा पटिपादेतब्बत्ता. एवं सन्तेपीति यदिपि महामोग्गल्लानत्थेरो न चिरस्सेव अरहत्तं पत्तो; धम्मसेनापति पन ततो चिरेन, एवं सन्तेपि यस्मा मोग्गल्लानत्थेरोपि महापञ्ञोव, तस्मा सारिपुत्तत्थेरोव महापञ्ञतरोति. इदानि तमत्थं पाकटतरं कातुं, ‘‘महामोग्गल्लानत्थेरो ही’’तिआदि वुत्तं. सम्मसनं चरति एत्थाति सम्मसनचारो, विपस्सनाभूमि, तं सम्मसनचारं. एकदेसमेवाति सकअत्तभावे सङ्खारे अनवसेसतो परिग्गहेतुञ्च सम्मसितुञ्च असक्कोन्तं अत्तनो अभिनीहारसमुदागतञाणबलानुरूपं एकदेसमेव परिग्गहेत्वा सम्मसन्तो. ननु च ‘‘सब्बं, भिक्खवे, अनभिजानं अपरिजानं अविराजयं अप्पजहं अभब्बो दुक्खक्खयाया’’ति (सं. नि. ४.२६) वचनतो वट्टदुक्खतो मुच्चितुकामेन सब्बं परिञ्ञेय्यं परिजानितब्बमेव? सच्चमेतं, तञ्च खो सम्मसनुपगधम्मवसेन वुत्तं. तस्मा ससन्तानगते सब्बधम्मे ¶ , परसन्तानगते च तेसं सन्तानविभागं अकत्वा बहिद्धाभावसामञ्ञतो सम्मसनं, अयं सावकानं सम्मसनचारो. थेरो पन बहिद्धाधम्मेपि सन्तानविभागेन केचि केचि उद्धरित्वा सम्मसि, तञ्च खो ञाणेन फुट्ठमत्तं कत्वा. तेन वुत्तं – ‘‘यट्ठिकोटिया उप्पीळेन्तो विय एकदेसमेव सम्मसन्तो’’ति. तत्थ ञाणेन नाम यावता नेय्यं पवत्तितब्बं, तथा अपवत्तनतो ‘‘यट्ठिकोटिया उप्पीळेन्तो विया’’तिआदि वुत्तं. अनुपदधम्मविपस्सनाय अभावतो ‘‘एकदेसमेव सम्मसन्तो’’ति वुत्तं.

बुद्धानं सम्मसनचारो दससहस्सिलोकधातुयं सत्तसन्तानगता, अनिन्द्रियबद्धा च सङ्खाराति वदन्ति, कोटिसतसहस्सचक्कवाळेसूति अपरे. तथा हि अद्धत्तयवसेन पटिच्चसमुप्पादनयं ओसरित्वा छत्तिंसकोटिसतसहस्समुखेन बुद्धानं महावजिरञाणं पवत्तं. पच्चेकबुद्धानं ससन्तानगतेहि सद्धिं मज्झिमदेसवासिसत्तसन्तानगता अनिन्द्रियबद्धा च सम्मसनचारोति वदन्ति, जम्बुदीपवासिसत्तसन्तानगताति केचि. धम्मसेनापतिनोपि यथावुत्तसावकानं विपस्सनाभूमियेव सम्मसनचारो. तत्थ पन थेरो सातिसयं निरवसेसं अनुपदधम्मं विपस्सि. तेन वुत्तं – ‘‘सावकानं सम्मसनचारं निप्पदेसं सम्मसी’’ति.

तत्थ ‘‘सावकानं विपस्सनाभूमी’’ति एत्थ सुक्खविपस्सका लोकियाभिञ्ञप्पत्ता पकतिसावका ¶ अग्गसावका पच्चेकबुद्धा सम्मासम्बुद्धाति छसु जनेसु सुक्खविपस्सकानं झानाभिञ्ञाहि अनधिगतपञ्ञानेपुञ्ञत्ता अन्धानं विय इच्छितपदेसोक्कमनं विपस्सनाकाले इच्छिकिच्छितधम्मविपस्सना नत्थि. ते यथापरिग्गहितधम्ममत्तेयेव ठत्वा विपस्सनं वड्ढेन्ति. लोकियाभिञ्ञप्पत्ता पन पकतिसावका येन मुखेन विपस्सनं आरभन्ति; ततो अञ्ञेन विपस्सनं वित्थारिकं कातुं सक्कोन्ति विपुलञाणत्ता. महासावका अभिनीहारसम्पन्नत्ता ततो सातिसयं विपस्सनं वित्थारिकं कातुं सक्कोन्ति. अग्गसावकेसु दुतियो अभिनीहारसम्पत्तिया समाधानस्स सातिसयत्ता विपस्सनं ततोपि वित्थारिकं करोति. पठमो पन ततो महापञ्ञताय सावकेहि असाधारणं वित्थारिकं करोति. पच्चेकबुद्धो तेहिपि महाभिनीहारताय अत्तनो अभिनीहारानुरूपं ततोपि वित्थारिकविपस्सनं करोन्ति. बुद्धानं, सम्मदेव, परिपूरितपञ्ञापारमिपभावित-सब्बञ्ञुतञ्ञाणाधिगमनस्स अनुरूपायाति. यथा ¶ नाम कतवालवेधपरिचयेन सरभङ्गसदिसेन धनुग्गहेन खित्तो सरो अन्तरा रुक्खलतादीसु असज्जमानो लक्खणेयेव पतति; न सज्जति न विरज्झति, एवं अन्तरा असज्जमाना अविरज्झमाना विपस्सना सम्मसनीयधम्मेसु याथावतो नानानयेहि पवत्तति. यं महाञाणन्ति वुच्चति, तस्स पवत्तिआकारभेदो गणतो वुत्तोयेव.

एतेसु च सुक्खविपस्सकानं विपस्सनाचारो खज्जोतपभासदिसो, अभिञ्ञप्पत्तपकतिसावकानं दीपपभासदिसो, महासावकानं ओक्कापभासदिसो, अग्गसावकानं ओसधितारकापभासदिसो, पच्चेकबुद्धानं चन्दपभासदिसो, सम्मासम्बुद्धानं रस्मिसहस्सपटिमण्डितसरदसूरियमण्डलसदिसो उपट्ठासि. तथा सुक्खविपस्सकानं विपस्सनाचारो अन्धानं यट्ठिकोटिया गमनसदिसो, लोकियाभिञ्ञप्पत्तपकतिसावकानं दण्डकसेतुगमनसदिसो, महासावकानं जङ्घसेतुगमनसदिसो, अग्गसावकानं सकटसेतुगमनसदिसो, पच्चेकबुद्धानं महाजङ्घमग्गगमनसदिसो, सम्मासम्बुद्धानं महासकमग्गगमनसदिसोति वेदितब्बो.

अरहत्तञ्च किर पत्वाति एत्थ किर-सद्दो अनुस्सवलद्धोयमत्थोति दीपेतुं वुत्तो. पत्वा अञ्ञासि अत्तनो विपस्सनाचारस्स महाविसयत्ता तिक्खविसदसूरभावस्स च सल्लक्खणेन. कथं पनायं महाथेरो दन्धं अरहत्तं पापुणन्तो सीघं अरहत्तं पत्ततो पञ्ञाय अत्तानं सातिसयं कत्वा अञ्ञासीति आह – ‘‘यथा ही’’तिआदि. महाजटन्ति महाजालसाखं अतिविय सिब्बितजालं. यट्ठिं पन सारं वा उजुं वा न लभति वेणुग्गहणे अनुच्चिनित्वा वेणुस्स गहितत्ता. एवंसम्पदन्ति यथा तेसु पुरिसेसु एको वेळुग्गहणे अनुच्चिनित्वा वेळुयट्ठिं गण्हाति, एको उच्चिनित्वा, एवं निप्फत्तिकं. पधानन्ति भावनानुयुञ्जनं.

सत्तसट्ठि ¶ ञाणानीति पटिसम्भिदामग्गे (पटि. म. १.७३ मातिका) आगतेसु तेसत्ततिया ञाणेसु ठपेत्वा छ असाधारणञाणानि सुतमयञाणादीनि पटिभानपटिसम्भिदाञाणपरियोसानानि सत्तसट्ठि ञाणानि. तानि हि सावकेहि पविचितब्बानि, न इतरानि. सोळसविधं पञ्ञन्ति (सं. नि. अट्ठ. ३.५.३७९; सं. नि. टी. ३.५.३७९) महापञ्ञादिका, नवानुपुब्बविहारसमापत्तिपञ्ञाति इदं सोळसविधं पञ्ञं.

तत्राति ¶ तस्स. इदं होतीति इदं दानि वुच्चमानं अनुपुब्बसम्मसनं होति. विपस्सनाकोट्ठासन्ति वितक्कादिसम्मसितब्बधम्मविभागेन विभत्तविपस्सनाभागं.

९४. पठमे झानेति उपसिलेसे भुम्मं, तस्मा ये पठमे झाने धम्माति ये पठमज्झानसंसट्ठा धम्माति अत्थो. अन्तोसमापत्तियन्ति च समापत्तिसहगते चित्तुप्पादे समापत्तिसमञ्ञं आरोपेत्वा वुत्तं. ववत्थिताति कतववत्थना निच्छिता. परिच्छिन्नाति ञाणेन परिच्छिन्ना सलक्खणतो परिच्छिज्ज ञाता. ओलोकेन्तोति ञाणचक्खुना पच्चक्खतो पस्सन्तो. अभिनिरोपनं आरम्मणे चित्तस्स आरोपनं. अनुमज्जनं आरम्मणे चित्तस्स अनुविचारणं. फरणं पणीतरूपेहि कायस्स ब्यापनं, विप्फारिकभावो वा. सातन्ति सातमधुरता. अधिक्खेपो विक्खेपस्स पटिपक्खभूतं समाधानं. फुसनं इन्द्रियविसयविञ्ञाणस्स ततो उप्पज्जित्वा आरम्मणे फुसनाकारेन विय पवत्ति. वेदयितं आरम्मणानुभवनं. सञ्जाननं नीलादिवसेन आरम्मणस्स सल्लक्खणं. चेतयितं चेतसो ब्यापारो. विजाननं आरम्मणूपलद्धि. कत्तुकम्यता चित्तस्स आरम्मणेन अत्थिकता. तस्मिं आरम्मणे अधिमुच्चनं, सन्निट्ठानं वा अधिमोक्खो. कोसज्जपक्खे पतितुं अदत्वा चित्तस्स पग्गण्हनं पग्गाहो, अधिग्गहोति अत्थो. आरम्मणं उपगन्त्वा ठानं, अनिस्सज्जनं वा उपट्ठानं. समप्पवत्तेसु अस्सेसु सारथि विय सकिच्चपसुतेसु सम्पयुत्तेसु अज्झुपेक्खनं मज्झत्तता. सम्पयुत्तधम्मानं आरम्मणे अनुनयनं संचरणं अनुनयो. सभावतोति यथाभूतसभावतो. सोळसन्नं एव चेत्थ धम्मानं गहणं तेसंयेव थेरेन ववत्थापितभावतो, ते एवस्स तदा उपट्ठहिंसु, न इतरेति वदन्ति. वीरियसतिग्गहणेन चेत्थ इन्द्रियभावसामञ्ञतो सद्धापञ्ञा; सतिग्गहणेनेव एकन्तानवज्जभावसामञ्ञतो पस्सद्धिआदयो छ युगळा; अलोभादोसा च सङ्गहिता झानचित्तुप्पादपरियापन्नत्ता तेसं धम्मानं. थेरेन च धम्मा ववत्थानसामञ्ञतो आरद्धा. ते न उपट्ठहिंसूति न सक्का वत्तुन्ति अपरे.

विदिता उप्पज्जन्तीति उप्पादेपि नेसं वेदनानं पजाननं होतियेवाति अत्थो. सेसपदद्वयेपि ¶ एसेव नयो. तं जानातीति तंञाणो, तस्स ¶ भावो तंञाणता, ञाणस्स अत्तसंवेदनन्ति अत्थो. तंसमानयोगक्खमाहि सम्पयुत्तधम्मा. ञाणबहुताति ञाणस्स बहुभावो, एकचित्तुप्पादे अनेकञाणताति अत्थो. इदानि तमेवत्थं विवरितुं, ‘‘यथा ही’’तिआदि वुत्तं. न सक्का जानितुं आरम्मणकरणस्स अभावतो. असम्मोहावबोधो च ईदिसस्स ञाणस्स नत्थि. एकेकमेव ञाणं उप्पज्जति तस्मिं खणे एकस्सेव आवज्जनस्स उप्पज्जनतो, न च आवज्जनेन विना चित्तुप्पत्ति अत्थि. वुत्तञ्हेतं –

‘‘चुल्लासीतिसहस्सानि, कप्पा तिट्ठन्ति ये मरू;

न त्वेव तेपि जीवन्ति, द्वीहि चित्तेहि संयुता’’ति. (महानि. १०, ३९) च,

‘‘नत्थि चित्ते युगा गही’’ति च –

वत्थारम्मणानं परिग्गहिततायाति यस्मिञ्च आरम्मणे ये झानधम्मा पवत्तन्ति, तेसं वत्थारम्मणानं पगेव ञाणेन परिच्छिज्ज गहितत्ता. यथा नाम मिगसूकरादीनं आसयेपरिग्गहिते तत्र ठिता मिगा वा सूकरा वा ततो उट्ठानतोपि आगमनतोपि नेसादस्स सुखग्गहणा होन्ति, एवंसम्पदमिदं. तेनाह ‘‘थेरेन ही’’तिआदि. तेनाति वत्थारम्मणानं परिग्गहितभावेन. अस्साति थेरस्स. तेसं धम्मानन्ति झानचित्तुप्पादपरियापन्नानं धम्मानं. उप्पादं आवज्जन्तस्सातिआदिना उप्पादादीसु यं यदेव आरब्भ ञाणं उप्पज्जति; तस्मिं तस्मिं खणे तस्स तस्सेव चस्स पाकटभावो दीपितो. न हि आवज्जनेन विना ञाणं उप्पज्जति. अहुत्वा सम्भोन्तीति पुब्बे अविज्जमाना हुत्वा सम्भवन्ति, अनुप्पन्ना उप्पज्जन्तीति अत्थो. उदयं पस्सति तेसं धम्मानं, ‘‘अहुत्वा सम्भोन्ती’’ति उप्पादक्खणसमङ्गिभावदस्सनतो. पुब्बे अभावबोधको हि अत्तलाभो धम्मानं उदयो. हुत्वाति उप्पज्जित्वा. पटिवेन्तीति पटि खणे खणे विनस्सन्ति. वयं पस्सति, ‘‘हुत्वा पटिवेन्ती’’ति तेसं धम्मानं भङ्गक्खणसमङ्गिभावदस्सनतो. विद्धंसभावबोधको हि धम्मानं विज्जमानतो वयो.

तेसु धम्मेसु नत्थि एतस्स उपयो रागवसेन उपगमनन्ति अनुपयो, अननुरोधो. हुत्वा विहरतीति योजना. तथा नत्थि एतस्स अपायो पटिघवसेन अपगमनन्ति अनपायो, अविरोधो. ‘‘एतं मम, ¶ एसो मे अत्था’’ति तस्स तण्हादिट्ठिअभिनिवेसाभावतो तण्हादिट्ठिनिस्सयेहि ¶ अनिस्सितो. अप्पटिबद्धोति अनुपयानिस्सितभावतो विपस्सनाय परिबन्धवसेन छन्दरागेन न पटिबद्धो न विबन्धितो. विप्पमुत्तोति ततो एव विक्खम्भनविमुत्तिवसेन कामरागतो विमुत्तो. विसंयुत्तो विक्खम्भनवसेनेव पटिपक्खधम्मेहि विसंयुत्तो.

किलेसमरियादा तेन कता भवेय्याति अन्तोसमापत्तियं पवत्ते सोळस धम्मे आरब्भ पवत्तमानं विपस्सनावीथिं भिन्दित्वा सचे रागादयो उप्पज्जेय्युं; तस्स विपस्सनावीथिया किलेसमरियादा तेन चित्तेन, चित्तसमङ्गिना वा कता भवेय्य. तेसूति तेसु धम्मेसु. अस्साति थेरस्स. एकोपीति रागादीसु एकोपीति च वदन्ति. वुत्ताकारेन एकच्चानं अनापाथगमने सति विपस्सना न तेसु धम्मेसु निरन्तरप्पवत्ताति आरम्मणमरियादा भवेय्य. विक्खम्भितपच्चनीकत्ताति विपस्सनाय पटिपक्खधम्मानं पगेव विक्खम्भितत्ता इदानिपि विक्खम्भेतब्बा किलेसा नत्थीति वुत्तं.

इतोति पठमज्झानतो. अनन्तरोति उपरिमो झानादिविसेसो. तस्स पजाननस्साति, ‘‘अत्थि उत्तरि निस्सरण’’न्ति एवं पवत्तजाननस्स. बहुलीकरणेनाति पुनप्पुनं उप्पादनेन.

सम्पसादनट्ठेनाति किलेसकालुसियापगमनेन, तस्स विचारक्खोभविगमेन वा चेतसो सम्मदेव पासादिकभावेन.

वीरियं सति उपेक्खाति आगतट्ठाने पारिसुद्धिउपेक्खा, अदुक्खमसुखावेदनाति एत्थ झानुपेक्खाति, ‘‘सुखट्ठाने वेदनुपेक्खावा’’ति वुत्तं. सुखट्ठानेति च पठमज्झानादीसु सुखस्स वुत्तट्ठाने. पस्सद्धत्ताति समधुरचेतयितभावेन आरम्मणे विसटवित्थतभावतो यो सो चेतसो आभोगो वुत्तो. सामञ्ञफलादीसु सतिया पारिसुद्धि, सा थन अत्थतो सतिविनिमुत्ता नत्थीति आह ‘‘परिसुद्धासतियेवा’’ति. पारिसुद्धिउपेक्खा, न झानुपेक्खादयो.

९५. ईदिसेसु ठानेसु सतिया न कदाचिपि ञाणविरहो अत्थीति आह – ‘‘ञाणेन सम्पजानो हुत्वा’’ति. तथा हि ततियज्झाने, ‘‘सतिमा सुखविहारी’’ति एत्थ सम्पजानोति अयमत्थो वुत्तो एव होति ¶ . न सावकानं अनुपदधम्मविपस्सना होति सङ्खारावसेससुखुमप्पवत्तिया दुविञ्ञेय्यत्ता विनिब्भुजित्वा गहेतुं असक्कुणेय्यभावतो. तेनाह – ‘‘कलापविपस्सनं दस्सेन्तो एवमाहा’’ति.

९६. पञ्ञाय ¶ चस्सदिस्वा आसवा परिक्खीणा होन्तीति दस्सनसमकालं खीयमाना आसवा, ‘‘दिस्वा परिक्खीणा होन्ती’’ति वुत्ता. समानकालेपि हि एदिसो सद्दप्पयोगो दिस्सति –

‘‘चक्खुञ्च पटिच्च रूपे च उप्पज्जति चक्खुविञ्ञाण’’न्ति (म. नि. १.२०४, ४००; ३.४२१, ४२५, ४२६; सं. नि. २.४३-४५; २.४.६०; कथा. ४६५, ४६७).

‘‘निहन्त्वा तिमिरं सब्बं, उग्गतेजो समुग्गतो;

वेरोचनो रस्मिमाली, लोकचक्खुपभङ्करो’’ति. (पट्ठा. अनुटी. १.२५-३४; विसुद्धि. महाटी. २.५८०) च –

एवमादीसु. हेतुअत्थो वा अयं दिस्वासद्दो असमानकत्तुको यथा – ‘‘घतं पिवित्वा बलं होति, सीहं दिस्वा भयं होती’’ति (विसुद्धि. महाटी. २.८०२). दस्सनहेतुको हि आसवानं परिक्खयो परिञ्ञासच्छिकिरियाभावनाभिसमये सति पहानाभिसमयस्स लब्भनतो. युगनद्धं आहरित्वाति पठमज्झानं समापज्जित्वा वुट्ठाय तत्थ झानधम्मे सम्मसन्तो समथविपस्सनं युगनद्धं भावेति. एवं याव नेवसञ्ञानासञ्ञायतनं समापज्जित्वा वुट्ठाय तत्थ सम्मसन्तो समथविपस्सनं युगनद्धं कत्वा यथा थेरो अरहत्तं पापुणि. तं सन्धाय वुत्तं – ‘‘अरहत्तं पत्तवारो इध गहितो’’ति. इधाति इमस्मिं सुत्ते. दीघनखसुत्तदेसनाय (म. नि. २.२०५-२०६) हि थेरो अरहत्तं पत्तो. तदा च अनागामी हुत्वा निरोधं समापज्जतीति वचनअवसरो नत्थि, तस्मा वुत्तं – ‘‘अरहत्तं पत्तवारो इध गहितो’’ति. यदि एवं – ‘‘सब्बसो नेवसञ्ञानासञ्ञायतनं समतिक्कम्म सञ्ञावेदयितनिरोधं उपसम्पज्ज विहरती’’ति इदं कस्मा वुत्तन्ति? थेरे विज्जमाने पण्डितगुणे अनवसेसतो दस्सेत्वा अरहत्तनिकूटेन देसनं निट्ठापेतुं. निरोधसमापज्जनं पन थेरस्स आचिण्णसमाचिण्णं. तेनाह ‘‘निरोधं पन…पे… वदन्ती’’ति. तेन फलसमापत्तिम्पि अन्तरा समापज्जतियेवाति दस्सेति.

वोमिस्सं ¶ विवरितुं ‘‘तत्थस्सा’’तिआदि वुत्तं. तत्थ ‘‘निरोधं समापज्जिस्सामी’’ति आभोगेन समथविपस्सनं युगनद्धं आहरित्वा ठितस्स निरोधसमापत्ति सीसं नाम होति, तस्स आभोगवसेन निरोधस्स वारो आगच्छति. फलसमापत्ति गूळ्हो होति, ‘‘फलसमापत्तिं समापज्जिस्सामी’’ति आभोगस्स अभावतो. फलसमापत्ति सीसं होतीति एत्थापि वुत्तनयेन अत्थो ¶ वेदितब्बो. एतेन आभोगपटिबद्धमेतेसं आगमनन्ति दीपितन्ति वेदितब्बं. जम्बुदीपवासिनो थेरा पनातिआदि अट्ठकथारुळ्हमेव तं वचनं. अन्तोसमापत्तियन्ति निरोधं समापन्नकाले. तिसमुट्ठानिकरूपधम्मेति उतुकम्माहारवसेन तिसमुट्ठानिकरूपधम्मे.

९७. चिण्णवसितन्ति पटिपक्खदूरिभावेन सुभावितवसीभावं. निप्फत्तिं पत्तोति उक्कंसपरिनिप्फत्तिं पत्तो. उरे वायामजनिताय ओरसो. पभावितन्ति उप्पादितं. धम्मेनाति अरियमग्गधम्मेन. तस्स हि अधिगमेन अरियाय जातिया जातो निब्बत्तोति कत्वा, ‘‘धम्मजो धम्मनिम्मितो’’ति वुच्चति. धम्मदायस्साति नवविधस्स लोकुत्तरधम्मदायस्स. आदियनतोति गण्हनतो, ससन्ताने उप्पादनतोति अत्थो. सेसं सुविञ्ञेय्यमेव.

अनुपदसुत्तवण्णनाय लीनत्थप्पकासना समत्ता.

२. छब्बिसोधनसुत्तवण्णना

९८. खीणा ¶ जातीति अत्तनो जातिक्खयं पटिजानन्तेन अरहत्तं ब्याकतं होति अरहतो तदभावतो. तथा वुसितं ब्रह्मचरियन्ति मग्गब्रह्मचरियवासो मे परियोसितोति पटिजानन्तेनपि. कतं करणीयन्ति चतूहि मग्गेहि चतूसु सच्चेसु परिञ्ञादिवसेन सोळसविधस्सपि किच्चस्स अत्तना निट्ठापितभावं पटिजानन्तेनपि. नापरं इत्थत्तायाति आयतिं पुनब्भवाभावं, आयतिं वा परिञ्ञादिकरणीयाभावं पटिजानन्तेनपीति आह – ‘‘एकेनपि पदेन अञ्ञा ब्याकताव होती’’ति. द्विक्खत्तुं बद्धं पन सुबद्धं वियाति वुत्तं. इध पन अञ्ञाब्याकरणं चतूहि पदेहि आगतं, तस्मा वत्तब्बमेव चेत्थ नत्थीति ¶ अधिप्पायो. चेतनाय दिट्ठवादिता नाम अरियवोहारो. सभावोति पकतिअत्थो हि अयं धम्मसद्दो, ‘‘जातिधम्मा जराधम्मा’’तिआदीसु (म. नि. १.२७४-२७५) विय तस्मा, अनुधम्मोति अरियभावं अनुगता पकतीति अत्थो. परमप्पिच्छताय अरिया अत्तनो गुणे अनाविकरोन्तापि सासनस्स निय्यानिकभावपवेदनत्थञ्चेव सब्रह्मचारीनं सम्मापटिपत्तियं उस्साहजननत्थञ्च तादिसानं परिनिब्बानसमयेयेव आविकरोन्तीति अधिप्पायेनाह – ‘‘परिनिब्बुतस्स…पे… कातब्बो’’ति.

९९. दुब्बलन्ति फेग्गु विय सुभेज्जनीयं बलविरहितं, असारन्ति अत्थो. विरागुतन्ति पलुज्जनसभावं. विगच्छनसभावन्ति विनासगमनसभावं. अनिच्चदुक्खविपरिणामत्ता अस्सासलेसस्सपि अभावतो अस्सासविरहितं. आरम्मणकरणवसेन समन्नागमनवसेन च यथारहं उपेन्ति उपगच्छन्तीति उपया, ‘‘एतं मम, एसो मे अत्ता’’ति उपादियन्ति दळ्हग्गाहं गण्हन्तीति उपादाना. अधितिट्ठति चेतसो अभिनन्दनभूताति चेतसो अधिट्ठानं. ताहीति तण्हादिट्ठीहि. तन्ति चित्तं. अभिनिविसतीति अभिरतिवसेन निविसति, अयञ्हेत्थ अत्थो – सक्कायधम्मेसु चित्तं अभिनिविसति ‘‘एतं ममं, एसो मे अत्ता’’ति अज्झोसाय तिट्ठति एताहि अभिनिवेसाहि, तथा सक्कायधम्मेसु चित्तं अनुसेति एताहीति अनुसया, तण्हादिट्ठियो. यदग्गेन हि तेभूमकधम्मेसु रागादयो अनुसेन्ति, तदग्गेन तंसहगतधम्मा तत्थ अनुसेन्तीति परियायेन, ‘‘तं अनुसेती’’ति वुत्तं. खया विरागाति हेतुम्हि निस्सक्कवचनन्ति ‘‘खयेन विरागेना’’ति हेतुम्हि करणवसेन अत्थो वुत्तो. विरागेनाति च इतिसद्दो आदि अत्थो ¶ . तेन ‘‘निरोधेना’’ति एवमादिकं गहितं होति. अञ्ञमञ्ञवेवचनानेव उपयादीनं समुच्छेदस्सेव बोधनतो.

१००. पतिट्ठाति एत्थ सेसभूतत्तयं उपादारूपञ्चाति पतिट्ठाना, निज्जीवट्ठेन धातुचाति पतिट्ठानधातु. न्हानीयचुण्णं बाहिरउदकं विय सेसभूतत्तयं आबन्धतीति आबन्धनं. पचनीयभत्तं बाहिरतेजो विय सेसभूतत्तयं परिपाचेतीति परिपाचनं. बाहिरवातो विय सेसभूतत्तयं वित्थम्भेतीति वित्थम्भनं. धातुसद्दत्थो वुत्तोयेव. असम्फुट्ठधातूति ¶ असम्फुसितभावो तेसं विपरिमट्ठताभावतो. विजाननं आरम्मणूपलद्धि. अहं अत्ताति अहं, ‘‘रूपधम्मो मे अत्ता’’ति अत्तकोट्ठासेन अत्तभावेन न उपगमिं न गण्हिं. निस्सितनिस्सितापि निस्सिता एव नामाति आह ‘‘पथवीधातुनिस्सितावा’’ति. अत्तना वा पन तन्निस्सिताति ‘‘एकेन परियायेना’’ति. उपादारुपम्पि कामं निस्सितम्पि होति. तथापि तं निस्सितं होतियेवाति तं न उद्धटं. परिच्छेदकरत्ता परिच्छेदाकासस्स ‘‘अविनिब्भोगवसेना’’ति वुत्तं. तेन च तथा परिच्छिन्नत्ता सब्बम्पि भूतुपादारूपं आकासधातुनिस्सितं नाम. तं निस्साय पवत्तिया उपादारूपं विय भूतरूपानि, अरूपक्खन्धा विय च वत्थुरूपानि, ‘‘तंनिस्सितरूपवत्थुका अरूपक्खन्धा’’ति वुत्तनयेन आकासधातुनिस्सितचक्खादिरूपधम्मवत्थुका वेदनादयो अरूपक्खन्धा आकासधातुनिस्सिता नामाति इममत्थं तथा-सद्देन उपसंहरति. इधापीति आकासधातुनिस्सितपदेपि, न पथवीधातुनिस्सितपदादीसु एव. रूपारूपन्ति सब्बम्पि रूपारूपं गहितमेव होति, अग्गहितं नत्थि. सहजाता…पे… निस्सितन्ति इदं निप्परियायसिद्धं निस्सयत्तं गहेत्वा वुत्तं. हेट्ठा वुत्तनयेन परियायसिद्धे निस्सयत्ते गय्हमाने – ‘‘पच्छाजातपच्चयोति पच्छाजाता चित्तचेतसिका धम्मा पुरेजातस्स इमस्स कायस्स पच्छाजातपच्चयेन पच्चयो’’ति (पट्ठा. १.१.११) वचनतो सब्बं चतुसमुट्ठानिकरूपं, ‘‘विञ्ञाणधातुनिस्सित’’न्ति वत्तब्बं. तथा अनन्तरविञ्ञाणधातुपच्चया पवत्तनतो, ‘‘विञ्ञाणधातुनिस्सित’’न्ति वत्तब्बं.

१०१. रुप्पति वण्णविकारं आपज्जमानं हदयङ्गतभावं पकासेतीति रूपन्ति अयमत्थो चक्खुद्वारे आपाथगते रूपायतने निप्परियायतो लब्भति, न आपाथमनागते. चक्खुविञ्ञाणविञ्ञातब्बभावो पन आपाथमनागतेपि तस्मिं लब्भतेव तंसभावानतिवत्थनतो. रूपायतनं द्विधा विभजित्वा. थेरो पन आपाथं अनागतस्सापि रूपायतनस्स रूपभावं न सक्का पटिक्खिपितुन्ति द्विधाकरणं नानुजानन्तो छन्नोवादं निदस्सेति, ‘‘उपरि छन्नोवादे किन्ति करिस्सथा’’ति. तत्थ हि ‘‘चक्खुं, आवुसो छन्न, चक्खुविञ्ञाणं चक्खुविञ्ञाणविञ्ञातब्बे ¶ धम्मे’’ति (म. नि. ३.३९१) आगतं, न चेत्थ चक्खुद्वारे आपाथं आगतमेव रूपायतनं चक्खुविञ्ञाणविञ्ञातब्बपदेन गहितं, न आपाथं अनागतन्ति सक्का विञ्ञातुं ¶ अविसेसेनेव रूपायतनेन तण्हामानदिट्ठिगाहाभावस्स जोतितत्ता. तेनाह ‘‘न यिदं लब्भती’’ति. रूपमेवाति रूपायतनमेव. यदि एवं ‘‘चक्खुविञ्ञाणविञ्ञातब्बेसु धम्मेसू’’ति पदं कथं नेतब्बन्ति आह – ‘‘चक्खुविञ्ञाणसम्पयुत्ता पना’’तिआदि. चक्खुविञ्ञाणेन सद्धिं विञ्ञातब्बेसूति येन मनोविञ्ञाणेन चक्खुविञ्ञाणं अनिच्चन्तिआदिना चक्खुविञ्ञाणेन सद्धिं तेन विञ्ञातब्बेसु तंसम्पयुत्तधम्मेसूति अत्थो. तण्हाछन्दोति तस्सनसभावो छन्दो, न कत्तुकम्यता छन्दोयेवाति तण्हाछन्दो. रज्जनवसेनाति वत्थं विय रङ्गजातं चित्तस्स अनुरञ्जनवसेन. अभिनन्दनवसेनाति आरम्मणे अभिरमित्वा नन्दनवसेन. सप्पीतिकतण्हा हि नन्दीति वुच्चति. तण्हायनवसेन तण्हा.

१०२. अहङ्कारोति ‘‘सेय्योहमस्मी’’तिआदिना (ध. स. ११२१, १२३९; विभ. ८३२, ८६६; सं. नि. ४.१०८; महानि. २१, १७८) अहंकरणं. येन हि ममं करोति, एतं ममङ्कारो. स्वेवाति ‘‘अहङ्कारो’’ति वुत्तमानो. एवं चतुत्थज्झाने निद्दिट्ठे सब्बासु लोकियाभिञ्ञासु वुच्चमानासु हेट्ठा विज्जाद्वयं वत्तब्बन्ति अधिप्पायेन, ‘‘पुब्बेनिवासं दिब्बचक्खुञ्च अवत्वा कस्मा वुत्त’’न्ति आह? इतरो इध सब्बवारेसुपि लोकुत्तरधम्मपुच्छा अधिकता तस्मा ‘‘सो एवं समाहिते’’तिआदिना ततिया विज्जा कथिताति दस्सेन्तो, ‘‘भिक्खू लोकियधम्मं न पुच्छन्ती’’तिआदिमाह. एकविस्सज्जितसुत्तं नामेतं ततियविज्जाय एव आगतत्ता. अरियधम्मवसेनपिस्स समञ्ञा अत्थेवाति दस्सेन्तो, ‘‘छब्बिसोधनन्तिपिस्स नाम’’न्ति वत्वा तेसु धम्मेसु भेदं दस्सेतुं, ‘‘एत्थ ही’’तिआदि वुत्तं. विसुद्धाति तस्सा चोदनाय सोधनवसेन विसोधिता. एकमेव कत्वाति एकवारवसेनेव पाळियं एकज्झं आगतत्ता एकमेव कोट्ठासं कत्वा. यदि एवं कथं वा छब्बिसोधनताति आह – ‘‘चतूहि आहारेहि सद्धि’’न्ति कथं पनेत्थ चत्तारो आहारा गहेतब्बाति? केचि ताव आहु – ‘‘साधूति भासितं अभिनन्दित्वा अनुमोदित्वा उत्तरि पञ्हो पुच्छितब्बो’’ति हेट्ठा आगतेन नयेन आहारवारो आहरित्वा वत्तब्बोति. ‘‘बहिद्धा सब्बनिमित्तेसू’’ति एत्थ आहारानम्पि सङ्गहितत्ता आहारा अत्थतो आगता एवाति अञ्ञे. अपरे पन रूपक्खन्धग्गहणेन कबळीकारो आहारो ¶ , सङ्खारक्खन्धग्गहणेन फस्साहारो, मनोसञ्चेतनाहारग्गहणेन विञ्ञाणाहारो सरूपतोपि गहितोति वदन्ति.

‘‘छब्बिसोधन’’न्ति इमस्स सुत्तस्स समञ्ञाय अन्वत्थतं दस्सेत्वा आयतिम्पि तादिसेन ब्याकरणेन ¶ भिक्खूनं पटिपत्तिम्पि दस्सनत्थं, ‘‘इमे पना’’तिआदि आरद्धं. विनयनिद्देसपरियायेनाति विनयनिद्देसे आगतेन कारणेन. विनये वा आगतनिद्देसानुक्कमेन.

अधिगन्तब्बतो अधिगमो, झानादिअधिगमपुच्छा. तेनाह – ‘‘झानविमोक्खादीसू’’तिआदि. उपायपुच्छाति अधिगमोपायपुच्छा. किन्तीति केन पकारेन विधिनाति अत्थो.

कतमेसं त्वं धम्मानं लाभीति इदं पन पुब्बे ‘‘किं ते अधिगत’’न्ति अनिद्धारितभेदा झानादिविसेसा पुच्छिताति इदानि तेसं निद्धारेत्वा पुच्छनाकारदस्सनं. तस्माति यस्मा यथावुत्तेहि आकारेहि अधिगमब्याकरणं सोधेतब्बं, तस्मा. एत्तावतावाति एत्तकेन ब्याकरणमत्तेनेव न सक्कारो कातब्बो. ब्याकरणञ्हि एकच्चस्स अयाथावतोपि होति, यथा नाम जातरूपपतिरूपं जातरूपं विय खायतीति जातरूपं निघंसनतापनछेदनेहि सोधेतब्बं एवमेवं इमेसु इदानेव वुत्तेसु छसु ठानेसु पक्खिपित्वा सोधनत्थं वत्तब्बो विमोक्खादीसूति आदि-सद्देन समाधि-समापत्ति-ञाणदस्सन-मग्गभावना-फलसच्छिकिरिया सङ्गण्हाति.

पाकटो होति अधिगतविसेसस्स सतिसम्मोसाभावतो. सेसपुच्छासुपि ‘‘पाकटो होती’’ति पदे एसेव नयो. उग्गहपरिपुच्छाकुसलाति सज्झायमग्गसंवण्णनासु निपुणा. याय पटिपदाय यस्स अरियमग्गो आगच्छति, सा पुब्बभागपटिपत्ति आगमनपटिपदा. सोधेतब्बाति सुद्धा उदाहु असुद्धाति विचारणवसेन सोधेतब्बा. न सुज्झतीति तत्थ तत्थ पमादपटिपत्तिभावतो. अपनेतब्बो अत्तनो पटिञ्ञाय. ‘‘सुज्झती’’ति वत्वा सुज्झनाकारं दस्सेतुं, ‘‘दीघरत्त’’न्तिआदि वुत्तं. पञ्ञायतीति एत्थ ‘‘यदी’’ति पदं आनेत्वा यदि सो भिक्खु ताय पटिपदाय यदि पञ्ञायतीति सम्बन्धो. खीणासवपटिपत्तिसदिसा पटिपदा होति दीघरत्तं विक्खम्भितकिलेसत्ता.

नदिया ¶ समुद्दं पक्खन्दनट्ठानं नदीमुखद्वारं. मद्दमानोति बदरसाळवं सरसं पत्ते पक्खित्तो हुत्वा मद्दमानो. सेसं सुविञ्ञेय्यमेव.

छब्बिसोधनसुत्तवण्णनाय लीनत्थप्पकासना समत्ता.

३. सप्पुरिसधम्मसुत्तवण्णना

१०५. सप्पुरिसधम्मन्ति ¶ सप्पुरिसभावकरं धम्मं. सो पन यस्मा सप्पुरिसानं पवेणिको धम्मो होति. तस्मा आह – ‘‘सप्पुरिसानं धम्म’’न्ति, एस नयो असप्पुरिसधम्मन्ति एत्थापि. एवं पधानं अनुट्ठातब्बञ्च सप्पुरिसधम्मं आदिं कत्वा मातिकं ठपेत्वा अयथानुपुब्बिया निद्दिसन्तो ‘‘कतमो च, भिक्खवे, असप्पुरिसधम्मो’’तिआदिमाह. तथा पन निद्दिसन्तो उदाहरणपुब्बकं हेतुं दस्सेतुं, ‘‘यथा नामा’’तिआदि वुत्तं. तेन इच्छितब्बपरिच्चागपुब्बकं गहेतब्बग्गहणं नाम ञायपटिपत्ति, तस्मा सप्पुरिसधम्मा सम्पादेतब्बाति दीपेन्तो सत्था अयथानुपुब्बिया निद्धारीयतीति इममत्थं दस्सेति. तथा अञ्ञत्थापि ‘‘असेवना च बालानं, पण्डितानञ्च सेवना’’ति. एतदेव हि कुलद्वयं ‘‘उच्चकुल’’न्ति वुच्चति निप्परियायतो. तथाहि अन्तिमभविका बोधिसत्ता तत्थेव पटिसन्धिं गण्हन्ति. सोति सामीचिप्पटिपन्नो भिक्खु. अन्तरं करित्वाति तं कारणं कत्वा. पटिपदा हि विञ्ञूनं पूजाय कारणं, न उच्चकुलीनता. महाकुलाति विपुलकुला उपादितोदितकुलसम्पवत्तिकाति अत्थो.

१०६. यससद्दो परिवारवाचको. यसस्सीति च सातिसयपरिवारवन्तता वुच्चतीति आह ‘‘परिवारसम्पन्नो’’ति. आधिपतेय्याभावतो परेसं उपरिनत्ति एतेसं ईसो ईसनं इस्सरियन्ति अक्खातब्बाति अप्पेसक्खा. तेनाह ‘‘अप्पपरिवारा’’ति. अभावत्थो हि इध अप्प-सद्दो.

१०७. नवेव धुतङ्गानि आगतानीति एत्थ यथा उक्कट्ठपंसुकूलिकस्स तेचीवरिकता सुकरा. एवं उक्कट्ठपिण्डपातिकस्स सपदानचारिकता सुकरा. एकासनिकस्स च पत्तपिण्डिकखलुपच्छाभत्तिकता सुकरा एवाति – ‘‘पंसुकूलिको होती’’तिआदिवचनेनेव पाळिया अनागतानम्पि आगतभावो वेदितब्बो परिहरणसुकरताय तेसम्पि समादानसम्भवतो. तेनाह ‘‘तेरस होन्ती’’ति.

१०८. कामतण्हादिकाय ¶ ¶ ताय तण्हाय निब्बत्ताति तम्मया, पुथुज्जना, पकतिभावूपगमनेन तेसं भावो तम्मयता, तप्पटिक्खेपतो अतम्मयता, नित्तण्हता. तंयेव कारणं कत्वाति पठमज्झानेपि तण्हापहानंयेव कारणं कत्वा. चित्ते उप्पादेत्वाति अतम्मयतापरियायेन वुत्ते तण्हाय पटिपक्खधम्मे सम्पादेत्वा. न मञ्ञतीति मञ्ञनानं अरियमग्गेन सब्बसो समुच्छिन्नत्ता किस्मिञ्चि ओकासे कामभवादिके केनचि वत्थुना हत्थिअस्सखेत्तवत्थादिना पत्तचीवरविहारपरिवेणादिना च पुग्गलं न मञ्ञति. सेसं सुविञ्ञेय्यमेव.

सप्पुरिसधम्मसुत्तवण्णनाय लीनत्थप्पकासना समत्ता.

४. सेवितब्बासेवितब्बसुत्तवण्णना

१०९. अञ्ञमञ्ञन्ति ¶ अञ्ञं अञ्ञं. तेनाह ‘‘अञ्ञं सेवितब्ब’’न्तिआदि. सत्तहि पदेहीति सत्तहि वाक्येहि. पज्जति एतेन यथाधिप्पेतो अत्थोति पदं, वाक्यं. सारिपुत्तत्थेरस्स ओकासकरणं धम्मदायादे (म. नि. १.३१) वुत्तनयेन वेदितब्बं.

११३. दिट्ठियेव पच्चयवसेन पटिलद्धताय दिट्ठिपटिलाभो. सञ्ञापटिलाभेपि एसेव नयो. मिच्छादिट्ठिसम्मादिट्ठियो…पे… न गहिता कम्मपथप्पत्तानं तेसं मनोसमाचारभावेन गहितत्ता. यदि एवं कस्मा दिट्ठि चित्तुप्पादवारे न गहिताति? कामं मिच्छादिट्ठिया अवयविभावो लब्भति, तथापि चित्तुप्पादक्खणे लोकियलोकुत्तरचित्तुप्पादेसु कम्मपथकोट्ठासो न उद्धटो.

११५. कामसञ्ञादीनन्ति एत्थ आदि-सद्देन यथा ब्यापादविहिंसासञ्ञा सङ्गहिता, एवं अनभिज्झाअब्यापादअविहिंसासञ्ञा सङ्गहिता पठमेन आदिसद्देन ‘‘अनभिज्झासहगताय सञ्ञाया’’तिआदिपाठस्स सङ्गहितत्ता.

११७. ति कामभवादीनं अपरियोसानाय परियोसानं इच्छतोपि तादिसस्स भवानं अपरियोसानमेव होति ¶ . चत्तारो होन्ति पुग्गलवसेन. तेनाह ‘‘पुथुज्जनोपि ही’’तिआदि. अकुसला धम्मा वड्ढन्तीति तेसं पहानाय अप्पटिपज्जमानस्साति अधिप्पायो, ततो एव कुसला धम्मा परिहायन्ति. तेनस्स किलेसदुक्खेन विपाकदुक्खेन च सदुक्खमेव अत्तभावं अभिनिब्बत्तेति. ओरम्भागियसंयोजनानि पहाय सुद्धावासेसु निब्बत्तनारहो अनागामी कथं…पे… अभिवड्ढन्तीति आह ‘‘अनागामीपी’’तिआदि. सदुक्खमेव अत्तभावं अभिनिब्बत्तेति, याय लब्भमानअकुसलाभिवुद्धिं कुसलपरिहानिञ्च गहेत्वा अनागामिनोपि सब्याबज्झअत्तभावाभिनिब्बत्तनं वुत्तं. एवं यथालब्भमानं अकुसलपरिहानिं कुसलाभिवुद्धिञ्च गहेत्वा पुथुज्जनस्सपि अन्तिमभविकस्स अब्याबज्झअत्तभावाभिनिब्बत्तनं वुत्तन्ति दट्ठब्बं. तेनाह ‘‘पुथुज्जनोपी’’तिआदि. अकुसलमेव हायति,न कुसलं तस्स बुद्धिपक्खे ठितत्ता. तत्थापि विपस्सनमेव गब्भं गण्हापेति, न वट्टगब्भं अन्तिमभविकताय विवट्टूपनिस्सितत्ता अज्झासयस्स, ञाणस्स च पाकगमनतो.

११९. एकच्चस्साति ¶ सामिवचनं ‘‘अभिनन्दती’’तिआदीसु पच्चत्तवसेन परिणामेतब्बं, तथा ‘‘निब्बिन्दती’’तिआदीसुपि. उग्गण्हित्वापीति पि-सद्दो लुत्तनिद्दिट्ठो. भगवतो भासितस्स अत्थं अजानन्ता ताव दीघरत्तं हितसुखतो परिबाहिरा होन्तु जानन्तानम्पि सब्बेसं दीघरत्तं हिताय सुखाय होतीति अनेकंसिकतं चोदेन्तो ‘‘एवं सन्तेपी’’तिआदिमाह. इतरो सब्बेसम्पि दीघरत्तं हिताय सुखाय होतियेवाति, ‘‘अप्पटिसन्धिका’’तिआदिना अनेकंसिकतं परिहरति. सेसं सुविञ्ञेय्यमेव.

सेवितब्बासेवितब्बसुत्तवण्णनाय लीनत्थप्पकासना समत्ता.

५. बहुधातुकसुत्तवण्णना

१२४. भयन्ति ¶ (अ. नि. टी. २.३.१) चित्तसंसप्पताति आह ‘‘चित्तुत्रासो’’ति. उपद्दवोति अन्तरायो. तस्स पन विक्खेपकारणत्ता वुत्तं ‘‘अनेकग्गताकारो’’ति. उपसग्गोति उपसज्जनं. ततो अप्पतीकारविघातापत्ति ¶ यस्मा पतीकाराभावेन विहञ्ञमानस्स किञ्चि कातुं असमत्थस्स ओसीदनकारणं, तस्मा वुत्तं – ‘‘तत्थ तत्थ लग्गनाकारो’’ति. वञ्चेत्वा आगन्तुं यथावुत्ते दिवसे अनागच्छन्तेसु. बहि अनिक्खमनत्थाय द्वारे अग्गिं दत्वा.

नळेहीति नळच्छन्नसङ्खेपेन उपरि छादेत्वा तेहियेव दारुकच्छदननियामेन परितोपि छादिता. एसेव नयोति इमिना तिणेहि छन्नतं, सेससम्भारानं रुक्खमयतञ्च अतिदिसति. विधवापुत्तेति अदन्तभावोपलक्खणं. ते हि निप्पितिका अविनीता असंयता अकिच्चकारिनो होन्ति.

मत्थकं अपापेत्वाव निट्ठापिताति कस्मा भगवा एवमकासीति? आनन्दत्थेरस्स पुच्छाकोसल्लदीपनत्थमेव, तत्थ निसिन्नानं सन्निपतितभिक्खूनं देसनाय जाननत्थञ्च. ते किर सङ्खेपतो वुत्तमत्थं अजानन्ता अन्धकारं पविट्ठा विय ठिता. पुच्छानुसन्धिवसेन परिग्गय्ह जानिस्सन्तीति.

१२५. रूपपरिग्गहोव कथितो, न अञ्ञं किञ्चीति अत्थो. इदानि ततो सच्चानि निद्धारेत्वा चतुसच्चकम्मट्ठानं दस्सेतुं, ‘‘सब्बापी’’तिआदि वुत्तं. पञ्चक्खन्धा होन्तीति अद्धेकादस धातुयो रूपक्खन्धो, अद्धट्ठमा धातुयो यथारहं वेदनादयो चत्तारो अरूपिनो खन्धाति एवं अट्ठारस धातुयो पञ्चक्खन्धा होन्ति. पञ्चपि खन्धा तण्हावज्जा दुक्खसच्चं. अप्पवत्तीति अप्पवत्तिनिमित्तं. निरोधपजाननाति पञ्ञासीसेन मग्गकिच्चमाह. सम्मादिट्ठिपमुखो हि अरियमग्गो. मत्थकं पापेत्वा कथितं होति सम्मसनस्स भूमिया निप्फत्तिया च कथितत्ता. जानाति पस्सतीति इमिना ञाणदस्सनं कथितं तं पन लोकियं लोकुत्तरन्ति दुविधन्ति तदुभयम्पि दस्सेन्तो आह – ‘‘सह विपस्सनाय मग्गो वुत्तो’’ति.

एत्तावतापि खोति पि-सद्दग्गहणेन अञ्ञेन परियायेन सत्था धातुकोसल्लं देसेतुकामोति थेरो ¶ , ‘‘सिया पन, भन्ते’’ति पुच्छतीति भगवा पथवीधातुआदिवसेनपि धातुकोसल्लं विभावेति. तत्थ पथवीधातुआदिसद्देन देसनाकारणं विभावेन्तो, ‘‘पथवीधातु…पे… वुत्ता’’ति आह. तापि हि आदितो छ धातुयो. ‘‘विञ्ञाणधातुतो ¶ नीहरित्वा पूरेतब्बा’’ति वत्वा कथं रूपधातुयो नीहरीयन्तीति चोदनं सन्धाय तं नयं दस्सेतुं, ‘‘विञ्ञाणधातू’’तिआदि वुत्तं. कामञ्चेत्थ कायविञ्ञाणधातुया आरम्मणं फोट्ठब्बधातुपथवीधातु आदिवसेन देसनारुळमेव, कायधातु पन नीहरितब्बाति एकंसमेव नीहरणविधिं दस्सेन्तो, ‘‘एस नयो सब्बत्था’’ति आह. पुरिमपच्छिमवसेन मनोधातूति पच्छिमभागवसेन किरियामनोधातु गहेतब्बा तस्सानुरूपभावतो. ननु चेत्थ मनोधातु नामायं मनोविञ्ञाणधातुया असंसट्ठा, विसुंयेव चेसा धातूति? सच्चमेतं अट्ठारसधातुदेसनाय, चित्तविभत्तिनिद्देसे छविञ्ञाणकायदेसनायं पन सा मनोविञ्ञाणकायसङ्गहितावाति दट्ठब्बं. यं पनेत्थ वत्तब्बं तं विसुद्धिमग्गसंवण्णनायं (विसुद्धि. महाटी. २.५१७) वुत्तनयेन वेदितब्बं. अथ वा पुरिमपच्छिमवसेनाति पुरेचरानुचरवसेन. मनोधातूति विपाकमनोधातु गहेतब्बा पुरेचरणतो, परतो उप्पज्जनकिरियामनोविञ्ञाणधातुया अनन्तरं मनोधातुया, किरियामनोधातुया अनन्तरं मनोविञ्ञाणधातुया अनुप्पज्जनतो च.

धम्मानं यावदेव निस्सत्तनिज्जीवविभावनत्थाय सत्थु धातुदेसनाति अञ्ञेसु सभावधारणादिअत्थेसु लब्भमानेसुपि अयमेत्थ अत्थो पधानोति आह – ‘‘एसनयो सब्बत्था’’ति. सप्पटिपक्खवसेनाति सप्पटिभागवसेन सुखं दुक्खेन सप्पटिभागं, दुक्खं सुखेन, एवं सोमनस्सदोमनस्साति. यथा सुखादीनंयेव समुदाचारो विभूतो, न उपेक्खाय, एवं रागादीनंयेव समुदाचारो विभूतो, न मोहस्स, तेन वुत्तं ‘‘अविभूतभावेना’’ति. कायविञ्ञाणधातु परिग्गहिताव होति तदविनाभावतो. सेसासु सोमनस्सधातुआदीसु, परिग्गहिताव होति अविनाभावतो एव. न हि सोमनस्सादयो मनोधातुया विना वत्तन्ति. उपेक्खाधातुतो नीहरित्वाति एत्थ चक्खुविञ्ञाणधातुआदयो चतस्सो विञ्ञाणधातुयो तासं वत्थारम्मणभूता चक्खुधातुआदयो चाति अट्ठ रूपधातुयो, मनोधातु, उपेक्खासहगता मनोविञ्ञाणधातु, उपेक्खासहगता एव धम्मधातूति एवं पन्नरस धातुयो उपेक्खाधातुतो नीहरितब्बा. सोमनस्सधातुआदयो पन चतस्सो धातुयो धम्मधातुअन्तोगधा ¶ , एवं सुखधातुतो कायविञ्ञाणधातुया तस्सा वत्थारम्मणभूतानं कायधातुफोट्ठब्बधातूनञ्च नीहरणा हेट्ठा दस्सितनयाति, ‘‘उपेक्खाधातुतो नीहरित्वा पूरेतब्बा’’इच्चेव वुत्तं.

कामवितक्कादयो इध कामधातुआदिपरियायेन वुत्ताति ‘‘कामधातुआदीनं द्वेधावितक्के कामवितक्कादीसु ¶ वुत्तनयेन अत्थो वेदितब्बो’’ति आह. तत्थ हि ‘‘कामवितक्कोति कामपटिसंयुत्तो वितक्को, ब्यापादवितक्कोति ब्यापादपटिसंयुत्तो वितक्को, विहिंसावितक्कोति विहिंसापटिसंयुत्तो वितक्को, नेक्खम्मपटिसंयुत्तो वितक्को नेक्खम्मवितक्को, सो याव पठमज्झाना वट्टति. अब्यापादपटिसंयुत्तो वितक्को अब्यापादवितक्को, सो मेत्तापुब्बभागतो पट्ठाय याव पठमज्झाना वट्टति. अविहिंसापटिसंयुत्तो वितक्को अविहिंसावितक्को, सो करुणाय पुब्बभागतो पट्ठाय याव पठमज्झाना वट्टती’’ति वुत्तं. अयं पनत्थो अभिधम्मे वित्थारतो आगतो एवाति दस्सेतुं, ‘‘अभिधम्मे’’तिआदि वुत्तं. कामधातुतो नीहरित्वाति एत्थ कामग्गहणेन गहिता रूपधातुआदयो छ, तंविसया सत्तविञ्ञाणधातुयो, तत्थ पञ्चन्नं विञ्ञाणधातूनं चक्खुधातुआदयो पञ्चाति अट्ठारस. नेक्खम्मधातुआदयो पन धम्मधातुअन्तोगधा एव.

कामतण्हाय विसयभूता धम्मा कामधातूति आह – ‘‘पञ्च कामावचरक्खन्धा कामधातू’’ति. तथा रूपतण्हाय विसयभूता धम्मा रूपधातु, अरूपतण्हाय विसयभूता धम्मा अरूपधातूति आह – ‘‘चत्तारो अरूपावचरक्खन्धा’’तिआदि. कामतण्हा कामो उत्तरपदलोपेन, एवं रूपारूपतण्हा रूपारूपं. आरम्मणकरणवसेन ता यत्थ अवचरन्ति, ते कामावचरादयोति एवं कामावचरक्खन्धादीनं कामतण्हादिभावो वेदितब्बो. आदिना नयेनाति एतेन ‘‘उपरितो परनिम्मितवसवत्तिदेवे अन्तोकरित्वा एत्थावचरा’’तिआदिपाळिं (विभ. १०२०) सङ्गण्हाति. एत्थावचराति अवीचिपरनिम्मितपरिच्छिन्नोकासाय कामतण्हाय विसयभावं सन्धाय वुत्तं, तदोकासता च तण्हाय तन्निन्नत्ता वेदितब्बा. सेसपदद्वयेपि एसेव नयो. परिपुण्णअट्ठारसधातुकत्ता कामावचरधम्मानं ‘‘कामधातुतो नीहरित्वा पूरेतब्बा’’ति ¶ वुत्तं. मनोविञ्ञाणधातुधम्मधातु एकदेसमत्तमेव हि रूपारूपावचरधम्माति.

समागन्त्वाति सहिता हुत्वा. यत्तकञ्हि पच्चयधम्मा अत्तनो फलस्स कारणं, तत्थ तन्निब्बत्तने समागता विय होति वेकल्ले तदनिब्बत्तनतो. सङ्खतधातुतो नीहरित्वा पूरेतब्बा असङ्खताय धातुया धम्मधातुएकदेसभावतो.

१२६. एवं पवत्तमाना मयं अत्ताति गहणं गमिस्सामाति इमिना विय अधिप्पायेन अत्तानं अधिकिच्च उद्दिस्स पवत्ता अज्झत्ता, तेसु भवा तप्परियापन्नत्ताति अज्झत्तिकानि. ततो बहिभूतानि बाहिरानि. आयतनकथा पटिच्चसमुप्पादकथा च विसुद्धिमग्गे (विसुद्धि. २.५१०, ५७०, ५७१) वुत्तनयेनेव वेदितब्बाति न वित्थारिता.

१२७. अविज्जमानं ¶ ठानं अट्ठानं (अ. नि. टी. १.१.२६८; विभ. मूलटी. ८०९), नत्थि ठानन्ति वा अट्ठानं. अनवकासोति एत्थ एसेव नयो. तदत्थनिगमनमेव हि ‘‘नेतं ठानं विज्जती’’ति वचनन्ति. तेनाह ‘‘उभयेनपी’’तिआदि. यन्ति कारणे पच्चत्तवचनं, हेतुअत्थो च कारणत्थोति आह – ‘‘यन्ति येन कारणेना’’ति. उक्कट्ठनिद्देसेन एत्थ दिट्ठिसम्पत्ति वेदितब्बाति वुत्तं ‘‘मग्गदिट्ठिया सम्पन्नो’’ति. कुतो पनायमत्थो लब्भतीति? लिङ्गतो. लिङ्गञ्हेतं, यदिदं निच्चतो उपगमनपटिक्खेपो. चतुभूमकेसूति इदं चतुत्थभूमकसङ्खारानं अरियसावकस्स विसयभावूपगमनतो वुत्तं; न पन ते आरब्भ निच्चतो उपगमनसब्भावतो. वक्खति च ‘‘चतुत्थभूमकसङ्खारा पना’’तिआदिना. अभिसङ्खतसङ्खारअभिसङ्खरणकसङ्खारानं सप्पदेसत्ता निप्पदेससङ्खारग्गहणत्थं ‘‘सङ्खतसङ्खारेसू’’ति वुत्तं. लोकुत्तरसङ्खारानं पन निवत्तने कारणं सयमेव वक्खति. एतं कारणं नत्थि सेतुघातत्ता. तेजुस्सदत्ताति संकिलेसविधमनतेजस्स अधिकभावतो. तथा हि ते गम्भीरभावेन दुद्दसा. अकुसलानं आरम्मणं न होन्तीति इदं पकरणवसेन वुत्तं. अप्पहीनविपल्लासानं सत्तानं कुसलधम्मानम्पि ते आरम्मणं न होन्ति.

असुखे ‘‘सुख’’न्ति विपल्लासो च इध सुखतो उपगमनस्स ठानन्ति अधिप्पेतन्ति दस्सेन्तो, ‘‘एकन्त…पे… वुत्त’’न्ति. अत्तदिट्ठिवसेनाति पधानदिट्ठिमाह ¶ . दिट्ठिया निब्बानस्स अविसयभावो हेट्ठा वुत्तो एवाति ‘‘कसिणादिपण्णत्तिसङ्गहत्थ’’न्ति वुत्तं. परिच्छेदोति सङ्खारानं परिच्छेदो सङ्खारानं परिच्छिज्जगहणं. स्वायं येसं निच्चादितो उपगमनं भवति तेसंयेव वसेन कातब्बोति दस्सेन्तो ‘‘सब्बवारेसू’’तिआदिमाह. सब्बवारेसूति निच्चादिसब्बवारेसु. पुथुज्जनो हीति हि-सद्दो हेतुअत्थो. यस्मा यं यं सङ्खारं निच्चादिवसेन पुथुज्जनकाले उपगच्छति, तं तं अरियमग्गाधिगमेन अनिच्चादिवसेन गण्हन्तो याथावतो जानन्तो तं गाहं तं दिट्ठिं विनिवेठेति विस्सज्जेति. तस्मा यत्थ गाहो तत्थ विस्सज्जनाति चतुत्थभूमकसङ्खारा इध सङ्खारग्गहणेन न गय्हतीति अत्थो.

१२८. पुत्तसम्बन्धेन मातापितुसमञ्ञा, दत्तकित्तिमादिवसेनपि पुत्तवोहारो लोके दिस्सति, सो च खो परियायतो निप्परियायसिद्धं तं दस्सेतुं, ‘‘जनिका व माता जनको पिता’’ति वुत्तं. तथा आनन्तरियकम्मस्स अधिप्पेतत्ता ‘‘मनुस्सभूतोव खीणासवो अरहाति अधिप्पेतो’’ति वुत्तं. ‘‘अट्ठानमेत’’न्तिआदिना मातुआदीनंयेव जीविता वोरोपने अरियसावकस्स अभब्बभावदस्सनतो तदञ्ञं अरियसावको जीविता वोरोपेतीति इदं अत्थतो आपन्नमेवाति मञ्ञमानो वदति – ‘‘किं पन अरियसावको अञ्ञं जीविता वोरोपेय्या’’ति ¶ ? ‘‘अट्ठानमेतं, भिक्खवे, अनवकासो, यं दिट्ठिसम्पन्नो पुग्गलो सञ्चिच्च पाणं जीविता वोरोपेय्य, नेतं ठानं विज्जती’’ति वचनतो, ‘‘एतम्पि अट्ठान’’न्ति वुत्तं. तेनाह ‘‘सचेपि ही’’तिआदि. बलदीपनत्थन्ति सद्धादिबलसमन्नागमदीपनत्थं. अरियमग्गेनागतसद्धादिबलवसेन हि अरियसावको तादिसं सावज्जं न करोति.

पञ्चहि कारणेहीति इदं अत्थनिप्फादकानि तेसं पुब्बभागियानि च कारणानि कारणभावसामञ्ञेन एकज्झं गहेत्वा वुत्तं, न पन सब्बेसं पञ्चन्नं सहयोगक्खमतो. आकारेहीति कारणेहि. अनुस्सावनेनाति अनुरूपं सावनेन. भेदस्स अनुरूपं यथा भेदो होति, एवं भिन्दितब्बानं भिक्खूनं अत्तनो वचनस्स सावनेन विञ्ञापनेन. तेनाह ‘‘ननु तुम्हे’’तिआदि. कण्णमूले वचीभेदं कत्वाति एतेन ¶ ‘‘पाकटं कत्वा भेदकरवत्थुदीपनं वोहारो, तत्थ अत्तनो निच्छितमत्थं रहस्सवसेन विञ्ञापनं अनुस्सावन’’न्ति दस्सेति.

कम्ममेव उद्देसो वा पमाणन्ति तेहि सङ्घभेदसिद्धितो वुत्तं, इतरे पन तेसं पुब्बभागभूता. तेनाह ‘‘वोहारा’’तिआदि. तत्थाति वोहारे. चुतिअनन्तरं फलं अनन्तरं नाम, तस्मिं अनन्तरे नियुत्तानि तन्निब्बत्तनेन अनन्तरकरणसीलानि, अनन्तरप्पयोजनानि चाति आनन्तरियानि, तानि एव ‘‘आनन्तरियकम्मानी’’ति वुत्तानि.

कम्मतोति ‘‘एवं आनन्तरियकम्मं होति, एवं अनन्तरियकम्मसदिस’’न्ति एवं कम्मविभागतो. द्वारतोति कायादिद्वारतो. कप्पट्ठितियतोति ‘‘इदं कप्पट्ठितिकविपाकं, इदं न कप्पट्ठितिकविपाक’’न्ति एवं कप्पट्ठितियविभागतो. पाकाति ‘‘इदमेत्थ विपच्चति, इदं न विपच्चती’’ति विपच्चनविभागतो. साधारणादीहीति गहट्ठपब्बजितानं साधारणासाधारणतो, आदि-सद्देन वेदनादिविभागतो च.

यस्मा मनुस्सत्तभावे ठितस्सेव च कुसलधम्मानं तिक्खविसदसूरभावापत्ति, यथा तं तिण्णम्पि बोधिसत्तानं बोधित्तयनिब्बत्तियं, एवं मनुस्सभावे ठितस्सेव अकुसलधम्मानम्पि तिक्खविसदसूरभावापत्तीति आह ‘‘मनुस्सभूतस्सेवा’’ति. पाकतिकमनुस्सानम्पि च कुसलधम्मानं विसेसप्पत्ति विमानवत्थुअट्ठकथायं (वि. व. अट्ठ. ३) वुत्तनयेन वेदितब्बा. यथा वुत्तो च अत्थो समानजातियस्स विकोपने कम्मं गरुतरं, न तथा विजातियस्साति वुत्तं – ‘‘मनुस्सभूतं मातरं वा पितरं वा’’ति. लिङ्गे परिवत्ते च सो एव एककम्मनिब्बत्तो भवङ्गप्पबन्धो, जीवितिन्द्रियप्पबन्धो च, न अञ्ञोति आह ‘‘अपि परिवत्तलिङ्ग’’न्ति. अरहन्तेपि ¶ एसेव नयो. तस्स विपाकन्तिआदि कम्मस्स आनन्तरियभावसमत्थनं, चतुकोटिकञ्चेत्थ सम्भवति. तत्थ पठमा कोटि दस्सिता, इतरासु विसङ्केतं दस्सेतुं, ‘‘यो पना’’तिआदि वुत्तं. यदिपि तत्थ विसङ्केतो, कम्मं पन गरुतरं आनन्तरियसदिसं भायितब्बन्ति आह – ‘‘आनन्तरियं आहच्चेव तिट्ठती’’ति. अयं पञ्होति ञापनिच्छानिब्बत्ता कथा.

आनन्तरियं फुसति मरणाधिप्पायेनेव आनन्तरियवत्थुनो विकोपितत्ता. आनन्तरियं न फुसति आनन्तरियवत्थुअभावतो. सब्बत्थ ¶ हि पुरिमं अभिसन्धिचित्तं अप्पमाणं, वधकचित्तं पन तदारम्मणं जीवितिन्द्रियञ्च आनन्तरियनानन्तरियभावे पमाणन्ति दट्ठब्बं. सङ्गामचतुक्कं सम्पत्तवसेन योजेतब्बं.

तेनेवाति तेनेव पयोगेन. अरहन्तघातो होतियेव अरहतो मारितत्ता. पुथुज्जनस्सेव दिन्नं होतीति यस्मा यथा वधकचित्तं पच्चुप्पन्नारम्मणम्पि पबन्धविच्छेदवसेन च जीवितिन्द्रियं आरम्मणं कत्वा पवत्तति, न एवं चागचेतना, सा हि चजितब्बवत्थुं आरम्मणं कत्वा चजनमत्तमेव होति, अञ्ञसन्तकभावकरणञ्च तस्स चजनं, तस्मा यस्स तं सन्तकं कतं. तस्सेव दिन्नं होतीति.

लोहितं समो सरतीति अभिघातेन पकुप्पमानं सञ्चितं होति. महन्ततरन्ति गरुतरं. सरीरपटिजग्गने वियाति सत्थुरूपकायपटिजग्गने विय.

असन्निपतितेति इदं सामग्गियदीपनं. भेदो च होतीति सङ्घस्स भेदो होति. वट्टतीति सञ्ञायाति ईदिसकरणं सङ्घस्स भेदाय न होतीति सञ्ञाय. नवतो ऊनपरिसायं करोन्तस्स तथाति योजेतब्बं, तथाति इमिना ‘‘न आनन्तरियकम्मन्ति’’ इमं आकड्ढति, न पन ‘‘भेदो होती’’ति इदं. हेट्ठिमन्तेन हि नवन्नमेव वसेन सङ्घभेदो. धम्मवादिनो अनवज्जा यथाधम्मं अवट्ठानतो. सङ्घभेदस्स पुब्बभागो सङ्घराजि.

कायद्वारमेव पूरेन्ति कायकम्मभावेनेव लक्खितब्बतो.

‘‘सण्ठहन्ते हि…पे… मुच्चती’’ति इदं कप्पट्ठकथाय न समेति. तथा हि कप्पट्ठकथायं (कथा. अट्ठ. ६५४-६५७) वुत्तं – ‘‘आपायिकोति इदं सुत्तं यं सो एकं कप्पं ¶ असीतिभागे कत्वा ततो एकभागमत्तं कालं तिट्ठेय्य, तं आयुकप्पं सन्धाय वुत्त’’न्ति. कप्पविनासेयेवाति पन आयुकप्पविनासेयेवाति अत्थे सति नत्थि विरोधो. एत्थ च सण्ठहन्तेति इदम्पि ‘‘स्वेवविनस्सिस्सती’’ति विय अभूतपरिकप्पवसेन वुत्तं. एकदिवसमेव निरये पच्चति ततो परं कप्पाभावे आयुकप्पस्सपि अभावतोति अविरोधतो ¶ अत्थयोजना दट्ठब्बा. सेसानीति सङ्घभेदतो अञ्ञानि आनन्तरियकम्मानि.

अहोसिकम्मं…पे… सङ्ख्यं गच्छन्ति, एवं सति कथं नेसं आनन्तरियता चुतिअनन्तरं विपाकदानाभावतो. अथ सति फलदाने चुतिअनन्तरो एव एतेसं फलकालो, न अञ्ञोति फलकालनियमेन नियतता निच्छिता, न फलदाननियमेन, एवम्पि नियतफलकालानं अञ्ञेसम्पि उपपज्जवेदनीयानं दिट्ठधम्मवेदनीयानञ्च नियतता आपज्जेय्य. तस्मा विपाकधम्मधम्मानं पच्चयन्तरविकलतादीहि अविपच्चमानानम्पि अत्तनो सभावेन विपाकधम्मता विय बलवता आनन्तरियेन विपाके दिन्ने अविपच्चमानानम्पि आनन्तरियानं फलदाने नियतसभावा आनन्तरियसभावा च पवत्तीति अत्तनो सभावेन फलदाननियमेनेव नियतता आनन्तरियता च वेदितब्बा. अवस्सञ्च आनन्तरियसभावा ततो एव नियतसभावा च तेसं पवत्तीति सम्पटिच्छितब्बमेतं अञ्ञस्स बलवतो आनन्तरियस्स अभावे चुतिअनन्तरं एकन्तेन फलदानतो.

ननु एवं अञ्ञेसम्पि उपपज्जवेदनीयानं अञ्ञस्मिं विपाकदायके असति चुतिअनन्तरमेकन्तेन फलदानतो नियतसभावा अनन्तरियसभावा च पवत्ति आपज्जतीति? नापज्जति. असमानजातिकेन चेतोपणिधिवसेन उपघातकेन च निवत्तेतब्बविपाकत्ता अनन्तरे एकन्तफलदायकत्ताभावा. न पन आनन्तरियकानं पठमज्झानादीनं दुतियज्झानादीनि विय असमानजातिकं फलनिवत्तकं अत्थि सब्बानन्तरियानं अवीचिफलत्ता. न च हेट्ठूपपत्तिं इच्छतो सीलवतो चेतोपणिधि विय उपरूपपत्तिजनककम्मफलं आनन्तरियफलं निवत्तेतुं समत्थो चेतोपणिधि अत्थि अनिच्छन्तस्सेव अवीचिपातनतो, न च आनन्तरियोपघातकं किञ्चि कम्मं अत्थि, तस्मा तेसंयेव अनन्तरे एकन्तविपाकजनकसभावा पवत्तीति. अनेकानि च आनन्तरियानि कतानि एकन्तेनेव विपाके नियतसभावत्ता उपरताविपच्चनसभावासङ्कत्ता निच्छितानि सभावतो नियतानेव. तेसु पन समानसभावेसु एकेन विपाके दिन्ने इतरानि अत्तना कातब्बकिच्चस्स तेनेव कतत्ता न दुतियं ततियं वा पटिसन्धिं करोन्ति. न समत्थताविघातत्ताति नत्थि तेसं आनन्तरियकता निवत्ति; गरुतरभावो पन तेसु लब्भतेवाति सङ्घभेदस्स ¶ सिया ¶ गरुतरभावोति, ‘‘येन…पे… विपच्चती’’ति आह. एकस्स पन अञ्ञानि उपत्थम्भकानि होन्तीति दट्ठब्बानि. पटिसन्धिवसेन विपच्चतीति वचनेन इतरेसं पवत्तिविपाकदायिता अनुञ्ञाता विय दिस्सति. नो वा तथा सीलवतीति यथा पिता सीलवा, तथा सीलवती नो वा होतीति योजना. सचे माता सीलवती, मातुघातो पटिसन्धिवसेन विपच्चतीति योजना.

पकतत्तोति अनुक्खित्तो. समानसंवासकोति अपाराजिको. समानसीमायन्ति एकसीमायं.

सत्थुकिच्चं कातुं असमत्थोति यं सत्थारा कातब्बकिच्चं अनुसासनादि, तं कातुं असमत्थोति भगवन्तं पच्चक्खाय. अञ्ञं तित्थकरन्ति अञ्ञं सत्थारं.

१२९. अभिजातिआदिसु (अ. नि. टी. १.१.२७७) पकप्पनेन देवतूपसङ्कमनादिना जातचक्कवाळेन समानयोगक्खेमं दससहस्सपरिमाणं ठानं जातिखेत्तं, सरसेनेव आणापवत्तिट्ठानं आणाखेत्तं, विसयभूतं ठानं विसयखेत्तं. दससहस्सी लोकधातूति इमाय लोकधातुया सद्धिं इमं लोकधातुं परिवारेत्वा ठिता दससहस्सी लोकधातु. तत्तकानंयेव जातिखेत्तभावो धम्मतावसेन वेदितब्बो. ‘‘परिग्गहवसेना’’ति केचि. ‘‘सब्बेसम्पि बुद्धानं तत्तकं एव जातिखेत्तं तन्निवासीनंयेव च देवतानं धम्माभिसमयो’’ति च वदन्ति. मातुकुच्छिओक्कमनकालादीनं छन्नं एव गहणं निदस्सनमत्तं महाभिनीहारादिकालेपि तस्स पकम्पनस्स लब्भमानतो. आणाखेत्तं नाम यं एकज्झं संवट्टति च विवट्टति च. आणा वत्तति आणाय तन्निवासीनं देवतानं सिरसा सम्पटिच्छनेन, तञ्च खो केवलं बुद्धानं आनुभावेनेव, न अधिप्पायवसेन, अधिप्पायवसेन पन ‘‘यावता वा पन आकङ्खेय्या’’ति (अ. नि. ३.८१) वचनतो ततो परम्पि आणा पवत्तेय्य.

न उप्पज्जन्तीति पन अत्थीति, ‘‘न मे आचरियो अत्थि, सदिसो मे न विज्जती’’तिआदिं (म. नि. १.२८५; २.३४१; महाव. ११; कथा. ४०५; मि. प. ४.५.११) इमिस्सं लोकधातुयं ठत्वा वदन्तेन भगवता, ‘‘किं पनावुसो सारिपुत्त, अत्थेतरहि अञ्ञे समणा वा ब्राह्मणा वा ¶ भगवता समसमा सम्बोधियन्ति, एवं पुट्ठो अहं, भन्ते, नोति वदेय्य’’न्ति (दी. नि. ३.१६१), वत्वा तस्स कारणं दस्सेतुं, ‘‘अट्ठानमेतं अनवकासो, यं एकिस्सा लोकधातुया द्वे अरहन्तो सम्मासम्बुद्धा’’ति इमं सुत्तं (दी. नि. ३.१६१; मि. प. ५.१.१) दस्सेन्तेन ¶ धम्मसेनापतिना च बुद्धखेत्तभूतं इमं लोकधातुं ठपेत्वा अञ्ञत्थ अनुप्पत्ति वुत्ता होतीति अधिप्पायो.

एकतोति सह, एकस्मिं कालेति अत्थो. सो पन कालो कथं परिच्छिन्नोति चरिमभवे पटिसन्धिग्गहणतो पट्ठाय याव धातुपरिनिब्बानाति दस्सेन्तो ‘‘तत्था’’तिआदिमाह. निसिन्नकालतो पट्ठायाति पटिलोमक्कमेन वदति. परिनिब्बानतो पट्ठायाति अनुपादिसेसाय निब्बानधातुया परिनिब्बानतो पट्ठाय. एत्थन्तरेति चरिमभवे बोधिसत्तस्स पटिसन्धिग्गहणं धातुपरिनिब्बानन्ति एतेसं अन्तरे.

अञ्ञस्स बुद्धस्स उप्पत्ति न निवारिता, तत्थ कारणं दस्सेतुं ‘‘तीणि ही’’तिआदि वुत्तं. पटिपत्तिअन्तरधानेन हि सासनस्स ओसक्कितत्ता अपरस्स बुद्धस्स उप्पत्ति लद्धावसरा होति. पटिपदाति पटिवेधावहा पुब्बभागपटिपदा. ‘‘परियत्ति पमाण’’न्ति वत्वा तमत्थं बोधिसत्तं निदस्सनं कत्वा दस्सेतुं, ‘‘यथा’’तिआदि वुत्तं तयिदं हीनं कतन्ति दट्ठब्बं. निय्यानिकधम्मस्स ठितिञ्हि दस्सेन्तो अनिय्यानिकधम्मं निदस्सेति.

मातिकाय अन्तरहितायाति, ‘‘यो पन भिक्खू’’तिआदिनयप्पत्ता सिक्खापदपाळि मातिका, ताय अन्तरहिताय निदानुद्देससङ्खाते पातिमोक्खुद्देसे पब्बज्जायुपसम्पदाकम्मेसु च सासनं तिट्ठतीति अत्थो. अथ वा पातिमोक्खे धरन्तेयेव पब्बज्जा उपसम्पदा च, एवं सति तदुभयं पातिमोक्खे अन्तोगधं तदुभयाभावे पातिमोक्खाभावतो, तस्मा तयिदं तयं सासनस्स ठितिहेतूति आह – ‘‘पातिमोक्खपब्बज्जाउपसम्पदासु ठितासु सासनं तिट्ठती’’ति. यस्मा वा उपसम्पदाधीनं पातिमोक्खं, उपसम्पदा च पब्बज्जाधीना, तस्मा पातिमोक्खे सिद्धे, सिद्धासु पब्बज्जाउपसम्पदासु च सासनं तिट्ठति. पच्छिमपटिवेधतो हि परं पटिवेधसासनं, पच्छिमसीलतो च परं पटिपत्तिसासनं विनट्ठं नाम होति. ओसक्कितं नामाति पच्छिमकपटिवेधसीलभेदद्वयं एकतो कत्वा ततो परं विनट्ठं नाम होतीति अत्थो.

तेन ¶ कामं ‘‘सासनट्ठितिया परियत्ति पमाण’’न्ति वुत्तं, परियत्ति पन पटिपत्तिहेतुकाति पटिपत्तिया असति अप्पतिट्ठा होति, तस्मा पटिपत्तिअन्तरधानं सासनोसक्कनस्स विसेसकारणन्ति दस्सेत्वा तयिदं सासनोसक्कनं धातुपरिनिब्बानोसानन्ति दस्सेतुं, ‘‘तीणि परिनिब्बानानी’’ति वुत्तं.

कारुञ्ञन्ति ¶ परिदेवनकारुञ्ञं. जम्बुदीपे दीपन्तरेसु देवनागब्रह्मलोकेसु च विप्पकिरित्वा ठितानं धातूनं महाबोधिपल्लङ्के एकज्झं सन्निपतनं, रस्मिविस्सज्जनं, तत्थ तेजोधातुया उट्ठानं, एकजालीभावो चाति सब्बमेतं सत्थु अधिट्ठानवसेनेव वेदितब्बं.

अनच्छरियत्ताति द्वीसुपि उप्पज्जमानेसु अच्छरियत्ताभावदोसतोति अत्थो. बुद्धा नाम मज्झे भिन्नं सुवण्णं विय एकसदिसाति तेसं देसनापि एकरसा एवाति आह – ‘‘देसनाय च विसेसाभावतो’’ति. एतेनपि अनच्छरियत्तमेव साधेति. विवादभावतोति एतेन विवादाभावत्थं द्वे एकतो न उप्पज्जन्तीति दस्सेति.

तत्थाति मिलिन्दपञ्हे. एकं बुद्धं धारेतीति एकबुद्धधारणी. एतेन एवं सभावा एते बुद्धगुणा, येन दुतियबुद्धगुणे धारेतुं असमत्था अयं लोकधातूति दस्सेति. पच्चयविसेसनिप्फन्नानञ्हि गुणधम्मानं भारियो विसेसो न सक्का धारेतुन्ति, ‘‘न धारेय्या’’ति वत्वा तमेव अधारणं परियायन्तरेनपि पकासेन्तो ‘‘चलेय्या’’तिआदिमाह. तत्थ चलेय्याति परिप्फन्देय्य. कम्पेय्याति पवेधेय्य. नमेय्याति एकपस्सेन नमेय्य. ओनमेय्याति ओसीदेय्य. विनमेय्याति विविधं इतोचितो च नमेय्य. विकिरेय्याति वातेन थुसमुट्ठि विय विप्पकिरेय्य. विधमेय्याति विनस्सेय्य. विद्धंसेय्याति सब्बसो विद्धस्ता भवेय्य. तथाभूता च कत्थचि न तिट्ठेय्याति आह ‘‘न ठानमुपगच्छेय्या’’ति.

इदानि तत्थ निदस्सनं दस्सेन्तो, ‘‘यथा, महाराजा’’तिआदिमाह. तत्थ समुपादिकाति समं उद्धं पज्जति पवत्ततीति समुपादिका, उदकस्स उपरि समं गामिनीति अत्थो. वण्णेनाति सण्ठानेन. पमाणेनाति आरोहेन ¶ . किसथूलेनाति किसथूलभावेन, परिणाहेनाति अत्थो.

छादेन्तन्ति रोचेन्तं रुचिं उप्पादेन्तं. तन्दीकतोति तेन भोजनेन तन्दीभूतो. अनोनमितदण्डजातोति यावदत्थं भोजनेन ओनमितुं असक्कुणेय्यताय अनोनमितदण्डो विय जातो. सकिं भुत्तो वमेय्याति एकम्पि आलोपं अज्झोहरित्वा वमेय्याति अत्थो.

अतिधम्मभारेन पथवी चलतीति धम्मेन नाम पथवी तिट्ठेय्य. सा किं तेनेव चलति विनस्सतीति अधिप्पायेन पुच्छति. पुन थेरो ‘‘रतनं नाम लोके कुटुम्बं सन्धारेन्तं अभिमतञ्च लोकेन अत्तनो गरुसभावताय सकटभङ्गस्स कारणं अतिभारभूतं दिट्ठं. एवंधम्मो ¶ च हितसुखविसेसेहि तंसमङ्गिनं धारेन्तो अभिमतो च विञ्ञूनं गम्भीरप्पमेय्यभावेन गरुसभावत्ता अतिभारभूतो पथवीचलनस्स कारणं होती’’ति दस्सेन्तो, ‘‘इध, महाराज, द्वे सकटा’’तिआदिमाह. एतेनेव तथागतस्स मातुकुच्छिओक्कमनादिकाले पथवीकम्पनकारणं संवण्णितन्ति दट्ठब्बं. एकसकटतो रतनन्ति एकस्मा, एकस्स वा सकटस्स रतनं, तस्मा सकटतो गहेत्वाति अत्थो.

ओसारितन्ति उच्चारितं, वुत्तन्ति अत्थो. अग्गोति सब्बसत्तेहि अग्गो.

सभावपकतीति सभावभूता अकित्तिमा पकति. कारणमहन्ततायाति महन्तेहि बुद्धकारकधम्मेहि पारमितासङ्खातेहि कारणेहि बुद्धगुणानं निब्बत्तितोति वुत्तं होति. पथविआदीनि महन्तानि वत्थूनि, महन्ता च सक्कभावादयो अत्तनो अत्तनो विसये एकेका एव, सम्मासम्बुद्धोपि महन्तो अत्तनो विसये एकोव, को च तस्स विसयो? बुद्धभूमि, यावतकं वा ञेय्यं. एवं ‘‘आकासो विय अनन्तविसयो भगवा एकोव होती’’ति वदन्तो परचक्कवाळेसु दुतियस्स बुद्धस्स अभावं दस्सेति.

इमिनाव ¶ पदेनाति ‘‘एकिस्सा लोकधातुया’’ति इमिना एव पदेन. दसचक्कवाळसहस्सानि गहितानि जातिखेत्तत्ता. एकचक्कवाळेनेवाति इमिना एकचक्कवाळेनेव. यथा – ‘‘इमस्मिंयेव चक्कवाळे उप्पज्जन्ती’’ति वुत्ते इमस्मिम्पि चक्कवाळे जम्बुदीपेयेव, तत्थपि मज्झिमपदेसे एवाति परिच्छिन्दितुं वट्टति; एवं ‘‘एकिस्सा लोकधातुया’’ति जातिखेत्ते अधिप्पेतेपि इमिनाव चक्कवाळेन परिच्छिन्दितुं वट्टति.

विवादूपच्छेदतोति विवादूपच्छेदकारणा. द्वीसु उप्पन्नेसु यो विवादो भवेय्य, तस्स अनुप्पादोयेवेत्थ विवादुपच्छेदो. एकस्मिं दीपेतिआदिना दीपन्तरेपि एकज्झं न उप्पज्जन्ति, पगेव एकदीपेति दस्सेति. सो परिहायेथाति चक्कवाळस्स पदेसे एव वत्तितब्बत्ता परिहायेय्य.

१३०. मनुस्सत्तन्ति मनुस्सभावो तस्सेव पब्बज्जादिगुणसम्पत्तिआदीनं योग्गभावतो. लिङ्गसम्पत्तीति पुरिसभावो. हेतूति मनोवचीपणिधानपुब्बिका हेतुसम्पदा. सत्थारदस्सनन्ति सत्थुसम्मुखीभावो. पब्बज्जाति कम्मकिरियवादीसु तापसेसु, भिक्खूसु वा पब्बज्जा. गुणसम्पत्तीति अभिञ्ञादिगुणसम्पदा. अधिकारोति बुद्धं उद्दिस्स अधिको सक्कारो. छन्दताति ¶ सम्मासम्बोधिं उद्दिस्स सातिसयो कत्तुकम्यताकुसलच्छन्दो. अट्ठधम्मसमोधानाति एतेसं अट्ठन्नं धम्मानं समायोगेन. अभिनीहारोति कायपणिधानं. समिज्झतीति निप्फज्जतीति अयमेत्थ सङ्खेपो, वित्थारो पन परमत्थदीपनिया चरियापिटकवण्णनाय (चरिया. अट्ठ. पकिण्णककथा) वुत्तनयेनेव वेदितब्बो.

सब्बाकारपरिपूरमेवाति परिपुण्णलक्खणताय सत्तुस्सदादीहि सब्बाकारेहि सम्पन्नमेव. न हि इत्थिया कोसोहितवत्थगुय्हता सम्भवति, दुतियपकति च नाम पठमपकतितो निहीना एव. तेनेवाह अनन्तरवारे ‘‘यस्मा’’तिआदि.

इध पुरिसस्स तत्थ निब्बत्तनतोति इमस्मिं मनुस्सलोके पुरिसभूतस्स तत्थ ब्रह्मलोके ब्रह्मत्तभावेन निब्बत्तनतो. तेन असतिपि पुरिसलिङ्गे पुरिसाकारा ब्रह्मानो होन्तीति दस्सेति. तंयेव हि पुरिसाकारं ¶ सन्धाय वुत्तं – ‘‘यं पुरिसो ब्रह्मत्तं करेय्या’’ति. तेनेवाह ‘‘समानेपी’’तिआदि. यदि एवं इत्थियो ब्रह्मलोके न उप्पज्जन्तीति आह ‘‘ब्रह्मत्त’’न्तिआदि.

१३१. कायदुच्चरितस्सातिआदिपाळिया कम्मनियामो नाम कथितो. समञ्जनं समङ्गो, सो एतस्स अत्थीति समङ्गी, समन्नागतो. समञ्जनसीलो वा समङ्गी. पुब्बभागे आयूहनसमङ्गिता, सन्निट्ठापकचेतनावसेन चेतनासमङ्गिता. चेतनासन्ततिवसेन वा आयूहनसमङ्गिता, तंतंचेतनाखणवसेन चेतनासमङ्गिता. कतूपचितस्स अविपक्कविपाकस्स कम्मस्स वसेन कम्मसमङ्गिता, कम्मे पन विपच्चितुं आरद्धे विपाकप्पवत्तिवसेन विपाकसमङ्गिता. कम्मादीनं उपट्ठानकालवसेन उपट्ठानसमङ्गिता. कुसलाकुसलकम्मायूहनक्खणेति कुसलकम्मस्स च अकुसलकम्मस्स च समीहनक्खणे. तथाति इमिना कुसलाकुसलकम्मपदं आकड्ढति. यथा कतं कम्मं फलदानसमत्थं होति, तथा कतं उपचितं. विपाकारहन्ति दुतियभवादीसु विपच्चनारहं. उप्पज्जमानानं उपपत्तिनिमित्तं उपट्ठातीति योजना. चलतीति परिवत्तति. एकेन हि कम्मुना तज्जे निमित्ते उपट्ठापिते पच्चयविसेसवसेन ततो अञ्ञेन कम्मुना अञ्ञस्स निमित्तस्स उपट्ठानं परिवत्तनं.

सुनखजीविकोति सुनखेहि जीवनसीलो. तलसन्थरणपूजन्ति भूमितलस्स पुप्फेहि सन्तरणपूजं. आयूहनचेतनाकम्मसमङ्गितावसेनाति कायदुच्चरितस्स अपरापरं आयूहनेन सन्निट्ठापकचेतनाय ¶ तस्सेव पकप्पने कम्मक्खयकरञाणेन अखेपितत्ता यथूपचितकम्मुना च समङ्गिभावस्स वसेन.

१३२. एवं सस्सिरिकन्ति वुत्तप्पकारेन अनेकधातुविभजनादिना नानानयविचित्तताय परमनिपुणगम्भीरताय च अत्थतो ब्यञ्जनतो च ससोभं कत्वा.

नं धारेहीति एत्थ नन्ति निपातमत्तं. धातुआदिवसेन परिवट्टीयन्ति अत्था एतेहीति परिवट्टा, देसनाभेदा. चत्तारो परिवट्टा एतस्स, एतस्मिं वाति चतुपरिवट्टो, धम्मपरियायो. धम्मो च सो परियत्तिभावतो यथावुत्तेनत्थेन आदासोति धम्मादासो. उपट्ठानट्ठेन यथाधम्मानं आदासोतिपि धम्मादासो. यथा हि आदासेन ¶ सत्तानं मुखे मलदोसहरणं, एवं इमिनापि सुत्तेन योगीनं मुखे मलदोसहरणं. तस्माति यस्मा इमिना सुत्तेन किलेसे मद्दित्वा समथाधिगमेन योगिनो जयप्पत्ता; तस्मा अमतपुरप्पवेसने उग्घोसनमहाभेरिताय च अमतदुन्दुभि. इध वुत्तन्ति इमस्मिं सुत्ते वुत्तं. अनुत्तरो सङ्गामविजयोति अनुत्तरभावतो किलेससङ्गामविजयो, ‘‘विजेति एतेना’’ति कत्वा. सेसं सुविञ्ञेय्यमेव.

बहुधातुकसुत्तवण्णनाय लीनत्थप्पकासना समत्ता.

६. इसिगिलिसुत्तवण्णना

१३३. समञ्ञायति ¶ एतायाति समञ्ञा, नामन्ति अत्थो. अयमयं नामाति पञ्ञापेन्ति एताय, तथापञ्ञापनमत्तन्ति वा पञ्ञत्ति, नाममेव. तेनाह ‘‘पुरिमपदस्सेव वेवचन’’न्ति. सेसेसुपीति ‘‘पण्डवस्स पब्बतस्सा’’तिआदीसु तीसु वारेसुपि.

समुट्ठानं ताव सुत्तस्स कथेत्वा अत्थसंवण्णनं कातुं ‘‘तदा किरा’’तिआदि वुत्तं. न पब्बतेहि अत्थोति न भगवतो पब्बतेहि कथितेहि अत्थो अत्थि. इसिगिलिभावोति इसिगिलिनामता. इतीति इमिना कारणेन, इमं अट्ठुप्पत्तिं अवेक्खन्तोति अत्थो.

चेतियगब्भेति चेतियघरे चेतियस्स अब्भन्तरे. यमकमहाद्वारन्ति यमककवाटयुत्तं महन्तं द्वारं. द्वेधा कत्वाति पब्बतस्स अब्भन्तरे मण्डपसङ्खेपेन लेणं निम्मिनित्वा द्वेधा कत्वा तदा ते तत्थ वसिंसु.

वसितकालञ्च कथेन्तो तेसं मातुया याव ततियभवतो पट्ठाय समुदागमं दस्सेतुं, ‘‘अतीते किरा’’तिआदि वुत्तं. पत्थेसीति तस्सा किर खेत्तकुटिया वीहयो भज्जन्तिया तत्थ महाकरञ्जपुप्फप्पमाणा महन्ता मनोहरा पञ्चसतमत्ता लाजा जायिंसु. सा ता गहेत्वा महन्ते पदुमिनिपत्ते ठपेसि. तस्मिञ्च समये एको पच्चेकबुद्धो तस्सा अनुग्गहत्थं अविदूरे खेत्तपाळिया गच्छति. सा तं दिस्वा ¶ पसन्नमानसा सुपुप्फितं महन्तं एकं पदुमं गहेत्वा तत्थ लाजे पक्खिपित्वा पच्चेकबुद्धं उपसङ्कमित्वा पञ्चपतिट्ठितेन वन्दित्वा, ‘‘इमस्स, भन्ते, पुञ्ञस्स आनुभावेन आनुभावसम्पन्ने पञ्चसतपुत्ते लभेय्य’’न्ति पञ्च पुत्तसतानि पत्थेसि. तस्मिंयेव खणेति यदा सा यथावुत्तं पत्थनं पट्ठपेसि; तस्मिंयेव खणे पञ्चसता मिगलुद्दका सम्भतसम्भारा परिपक्कपच्चेकबोधिञाणा तस्सेव पच्चेकबुद्धस्स मधुरमंसं दत्वा, ‘‘एतिस्सा पुत्ता भवेय्यामा’’ति पत्थयिंसु. अतीतासु अनेकजातीसु तस्सा पुत्तभावेन आगतत्ता तथा तेसं अहोसीति वदन्ति. पादुद्धारेति पादुद्धारे पादुद्धारे. पादुद्धारसीसेन चेत्थ निक्खिपनं आह.

गब्भमलं निस्सायाति बहि निक्खन्तं गब्भमलं निस्सयं कत्वा संसेदजभावेन निब्बत्ता ¶ . ओपपातिकभावेनाति केचि. खयवयं पट्ठपेत्वाति विपस्सनं आरभित्वा. विपस्सनाति अनिच्चानुपस्सनापुब्बिका सप्पच्चयनामरूपदस्सनपुब्बिका च, सङ्खारे सम्मसन्तस्स अनिच्चलक्खणे दिट्ठे, ‘‘यदनिच्चं तं दुक्खं, यं दुक्खं तदनत्ता’’ति सेसलक्खणानि सुविञ्ञेय्यानेव होन्ति. पच्चेकबोधिञाणं निब्बत्तयिंसूति द्वे असङ्ख्येय्यानि कप्पानं सतसहस्सञ्च पच्चेकबोधिपारमिताय परिनिप्फन्नत्ता ञाणस्स परिपाकत्ता वुत्तनयेन सयमेव विपस्सनं पवत्तेत्वा मत्थकं पापेत्वा पच्चेकबोधिञाणं अधिगच्छिंसु. सब्बेपि ते तंयेव गाथं अभासिंसूति आह – ‘‘अयं तेसं ब्याकरणगाथा अहोसी’’ति.

सरोरुहन्ति सरसि जातं. पदुमपलासपत्तजन्ति खुद्दकमहन्तेहि कमलदलेहि सहजातं. खुद्दकमहन्तकमलदलसङ्खातानि वा पदुमपलासपत्तानि एत्थ सन्तीति पदुमपलासपत्तं, पदुमगच्छं. तत्थ जातन्ति पदुमपलासपत्तजं. सुपुप्फितन्ति सुट्ठु पुप्फितं सम्मा विकसितं. भमरगणानुचिण्णन्ति भमरगणेहि अनुकुलञ्चेव अनुपरिब्भमितञ्च. अनिच्चतायुपगतन्ति खणे खणे वण्णभेदादिवसेन अनिच्चताय उपगतं. विदित्वाति विपस्सनापञ्ञासहिताय मग्गपञ्ञाय जानित्वा. एको चरेति तस्मा अञ्ञोपि मादिसो होतुकामो एवं पटिपज्जित्वा एको चरे खग्गविसाणकप्पोति.

१३५. सतिसारसीलसारादिसमन्नागमनेन ¶ सत्तेसु सारभूता. सब्बसो वट्टदुक्खस्स विगतत्ता निद्दुक्खा. समुच्छिन्नतण्हताय नित्तण्हा. मानच्छिदोति थुतिवचनं.

एतेसं एकनामकायेवाति एतेसं आगतानं पच्चेकबुद्धानं पाळियं अनागता अञ्ञे पच्चेकबुद्धा समाननामका एव. वुत्तमेवत्थं पाकटीकरणत्थं ‘‘इमेसु ही’’तिआदि वुत्तं. विसुं विसुं अवत्वाति पच्चेकं सरूपतो अवत्वा. अञ्ञे चाति असाधारणत्ता आह. सेसं सुविञ्ञेय्यमेव.

इसिगिलिसुत्तवण्णनाय लीनत्थप्पकासना समत्ता.

७. महाचत्तारीसकसुत्तवण्णना

१३६. दोसेहि ¶ आरकाति अरियं. तेनाह ‘‘निद्दोस’’न्ति. सा पन निद्दोसता लोकुत्तरभावेन सविसेसाति आह ‘‘लोकुत्तर’’न्ति. सम्मा सुन्दरो पसत्थो निय्यानिको समाधि सम्मासमाधीति आह – ‘‘सम्मासमाधिन्ति मग्गसमाधि’’न्ति. उपनिसीदति एत्थ फलं तप्पटिबद्धवुत्तितायाति उपनिसं, कारणन्ति आह – ‘‘सउपनिसन्ति सप्पच्चय’’न्ति. परिकरोति परिवारेतीति परिक्खारोति आह – ‘‘सपरिक्खारन्ति सपरिवार’’न्ति.

परिवारिताति सहजातादिपच्चयभावेन परिवारन्तेहि विय उपगता. पुरेचारिकाति वुट्ठानगामिनिभावना सहजातादिपच्चयवसेन पच्चयत्ता पुरस्सरा. तेनाह – ‘‘विपस्सनासम्मादिट्ठि चा’’ति. इदानि तानि किच्चतो दस्सेतुं, ‘‘विपस्सनासम्मादिट्ठी’’तिआदि वुत्तं. तत्थ परिवीमंसग्गहणं तत्थ तत्थ चित्तुप्पादे वीमंसाधिपतेय्येन पवत्तिया सम्मादिट्ठिया पुब्बङ्गमभावदस्सनत्थं. तेनस्स मग्गसमाधिस्स नानाखणिकं पुब्बङ्गमभावं दस्सेति. वीमंसनपरियोसानेति तथापवत्तअनुलोमञाणस्स ओसाने. भूमिलद्धं वट्टं समुग्घाटयमानाति अत्तनो सन्ताने दीघरत्तं अनुसयितं किलेसवट्टं समुच्छिन्दन्ति. वूपसमयमानाति तस्सेव वेवचनं. वूपसमयमानाति वा ततो एव अवसिट्ठम्पि वट्टं अप्पवत्तिकरणवसेन वूपसमेन्ति. तेनेवाह – ‘‘मग्गसम्मादिट्ठि…पे… उप्पज्जती’’ति. साति सम्मादिट्ठि. दुविधापीति ¶ यथावुत्ता दुविधापि. इध अधिप्पेता विपस्सनापञ्ञासहिताय मग्गपञ्ञाय किच्चस्स दस्सितत्ता.

लक्खणे पटिविज्झमाने लक्खणिको धम्मो पटिविद्धो होतीति आह – ‘‘मिच्छादिट्ठिं…पे… आरम्मणतो पजानाती’’ति. विपस्सनासम्मादिट्ठियम्पि एसेव नयो. किच्चतोति भावनाकिच्चतो. सम्मादिट्ठियं तदधिगतअसम्मोहताय असम्मोहतो पजानाति. किच्चतोति पटिवेधकिच्चतो. तं पन सब्बथा असम्मुय्हनमेवाति आह ‘‘असम्मोहतो’’ति. एवं पजाननाति मिच्छादिट्ठि मिच्छादिट्ठीति याथावतो अवबोधो. अस्साति तंसमङ्गिनो पुग्गलस्स.

द्वायन्ति -कारो दीघं कत्वा वुत्तो. तेनाह ‘‘द्वयं वदामी’’ति. द्वे अवयवा एतस्साति द्वयं. तेनाह ‘‘दुविधकोट्ठासं वदामी’’ति. पुञ्ञस्स एको भागो सो एव पुञ्ञभागिको ¶ , क-कारस्स य-कारं कत्वा इत्थिलिङ्गवसेन ‘‘पुञ्ञभागिया’’ति वुत्तं. उपधिसङ्खातस्साति खन्धपबन्धसङ्खातस्स.

अमतद्वारन्ति अरियमग्गं. पञ्ञपेतीति निय्यानादिपकारतो पञ्ञपेति. तेनाह ‘‘विभजित्वा दस्सेती’’ति. तत्थ सम्मोहस्स विद्धंसनेन असम्मोहतो दस्सेति. तस्मिं अत्थेति अमतद्वारपञ्ञापने अत्थे. बोज्झङ्गप्पत्ताति बोज्झङ्गभावप्पत्ता. मग्गभावेन निय्यानभावेन पवत्तिया मग्गपञ्ञाय अट्ठन्नम्पि साधारणत्ता समुदायस्स च अवयवो अङ्गन्ति कत्वा सेसधम्मे अङ्गिकभावेन दस्सेन्तो ‘‘अरियमग्गस्स अङ्ग’’न्ति आह. सो भिक्खूति मिच्छादिट्ठिं ‘‘मिच्छादिट्ठी’’ति सम्मादिट्ठिं ‘‘सम्मादिट्ठी’’ति जानन्तो भिक्खु. पजहनत्थायाति समुच्छेदवसेन पजहनाय. पटिलाभत्थायाति मग्गसम्मादिट्ठिया अधिगमाय. कुसलवायामोति विपस्सनासम्पयुत्तोव कोसल्लसम्भूतो वायामो. सरतीति सतो, तं पनस्स सरणं सतिसमङ्गितायाति आह ‘‘सतिया समन्नागतो’’ति. कामञ्चेत्थ विपस्सनासम्मादिट्ठिं यथाभूता सम्मावायामसतियो सहजाता च पुरेजाता च हुत्वा परिवारेन्ति, ‘‘इतियिमे तयो धम्मा सम्मादिट्ठिं अनुपरिधावन्ति अनुपरिवत्तन्ती’’ति पन वचनतो, ‘‘एत्थ ही’’तिआदिना मग्गसम्मादिट्ठिया एव सेसधम्मानं यथारहं सहचरणभावेन परिवारणं योजितं. सम्मासङ्कप्पादीनन्ति आदि-सद्देन सम्मावाचाकम्मन्ताजीवानं गहणं इतरेसं परिवारभावेन गहितत्ता ¶ . न हि सक्का ते एव परिवारे परिवारवन्ते च कत्वा वत्तुं सङ्करतो सम्मोहजननतो च. तयोति सम्मादिट्ठिवायामसतियो सहजातपरिवाराव होन्ति मग्गक्खणिकानं तेसं अधिप्पेतत्ता विपस्सनाखणविरतीनं असम्भवतो.

१३७. तक्कनवसेन लोकसिद्धेनाति अधिप्पायो. ‘‘एवञ्चेवञ्च भवितब्ब’’न्ति विविधं तक्कनं कूपे विय उदकस्स आरम्मणस्स आकड्ढनं वितक्कनं वितक्को. सङ्कप्पनवसेनाति तं तं आरम्मणं गहेत्वा कप्पनवसेन. तक्कनं कप्पनन्ति च अतंसहजातानमेवाति दट्ठब्बं. एकग्गोति इमिना समाधिना लद्धुपकारस्सेव वितक्कस्स अप्पनापरियायो होतीति दस्सेति. विसेसेन वा अप्पना वितक्कस्स वसेन चित्तं आरम्मणं अभिरोपेति, वितक्के असति कथन्ति आह ‘‘वितक्के पना’’तिआदि. अत्तनोयेव धम्मताय चित्तं आरम्मणं अभिरुहतीति, एतेन आरम्मणधम्मानं गहणं नाम सभावसिद्धं, न धम्मन्तरमपेक्खति, वितक्को पन पवत्तमानो आरम्मणाभिनिरोपनवसेनेव पवत्ततीति दस्सेति. एवं सन्तेपि सभावावितक्कचित्तुप्पादतो सवितक्कचित्तुप्पादस्स आरम्मणग्गहणविसेसो वितक्केन जातोति कत्वा वितक्को चित्तस्स आरम्मणग्गहणे विसेसपच्चयोति पाकटोयमत्थो. अपरे पन भणन्ति ¶ – यथा कोचि राजवल्लभं, तंसम्बन्धीनं मित्तं वा निस्साय राजगेहं आरोहति अनुपविसति, एवं वितक्कं निस्साय चित्तं आरम्मणं आरोहति वितक्कस्स आरम्मणाभिनिरोपनसभावत्ता, अञ्ञेसं धम्मानञ्च अवितक्कसभावतो. तेनाह भगवा – ‘‘चेतसो अभिनिरोपना’’ति (ध. स. ७).

यदि एवं कथं अवितक्कचित्तं आरम्मणं आरोहतीति? वितक्कबलेनेव. यथा हि सो पुरिसो परिचयेन तेन विनापि निरासङ्को राजगेहं पविसति, एवं परिचयेन वितक्केन विनापि अवितक्कं चित्तं आरम्मणं आरोहति. परिचयेनाति च सन्ताने पवत्तवितक्कभावनासङ्खातेन परिचयेन. वितक्कस्स हि सन्ताने अभिण्हं पवत्तस्स वसेन चित्तस्स आरम्मणाभिरुहनं चिरपरिचितं; तेन तं कदाचि वितक्केन विनापि तत्थ पवत्ततेव; यथा ञाणसहगतं चित्तं सम्मसनवसेन चिरपरिचितं कदाचि ¶ ञाणरहितम्पि सम्मसनवसेन पवत्तति; यथा वा किलेससहितं हुत्वा पवत्तं सब्बसो किलेसरहितम्पि परिचयेन किलेसवासनावसेन पवत्तति, एवं सम्पदमिदं दट्ठब्बं.

वाचं सङ्खरोतीति वाचं उप्पादेति, वचीघोसुप्पत्तिया विसेसपच्चयो होतीति अत्थो. लोकियवितक्को द्वत्तिंसचित्तसहगतो वाचं सङ्खरोति वचीविञ्ञत्तिजननतो. वचीसङ्खारोत्वेव पनस्स नामं होति रुळ्हितो, तंसमत्थतानिरोधतो वा सम्भवतो पन सङ्खारोति. ‘‘लोकुत्तरसम्मासङ्कप्पं परिवारेन्ती’’ति वत्वा तिविधे सम्मासङ्कप्पे कदाचि कतमं परिवारेन्तीति? चोदनं सन्धायाह ‘‘एत्था’’तिआदि. नानाचित्तेसु लब्भन्ति नानासमन्नाहारहेतुकत्ता, पुब्बभागेयेव च ते उप्पज्जन्तीति. तीणि नामानि लभति तिविधस्सपि पटिपक्खस्स समुच्छिन्दनेन सातिसयं तिण्णम्पि किच्चकरणतो. एस नयो सम्मावाचादीसुपि.

१३८. विरमति एतायाति वेरमणी विरति वुच्चति. सा मुसावादतो विरमणस्स कारणभावतो चेतनापि वेरस्स मणनतो विनासनतो विरतिपीति आह – ‘‘विरतिपि चेतनापि वट्टती’’ति. आरका रमतीति समुच्छिन्नेहि दूरतो समुस्सारेति. विना तेहि रमतीति अच्चन्तमेव तेहि विना भवति. ततो ततोति दिट्ठे अदिट्ठवादादितो मुसावादा. विसेसतो अनुप्पत्तिधम्मत्ता पटिनिवत्ता हुत्वा.

१४०. तिविधेन कुहनवत्थुनाति पच्चयपटिसेवन-सामन्तजप्पन-इरियापथपवत्तनसङ्खातेन पापिच्छता निब्बत्तेन तिविधेन कुहनवत्थुना. एताय कुहनाय करणभूताय पच्चयुप्पादनत्थं निमित्तं ¶ सीलं एतेसन्ति योजना. अत्तविसयलाभहेतु अक्कोसनखुंसनवम्भनादिवसेन पिसनं घट्टनं विहेठनं निप्पेसो. इतो लद्धं अञ्ञस्स, ततो लद्धं परस्स दत्वा एवं लाभेन लाभं निजिगींसतीति लाभेन लाभं निजिगींसना. पाळियं आगतो कुहनादिवसेन मिच्छाआजीवो. को पन सोति आह ‘‘आजीवहेतू’’तिआदि. तासंयेवाति अवधारणं, ‘‘आजीवो कुप्पमानो कायवचीद्वारेसु एव कुप्पती’’ति कत्वा वुत्तं.

१४१. सम्मा ¶ पसत्था सोभना निय्यानिका दिट्ठि एतस्साति सम्मादिट्ठि, पुग्गलो. तस्स पन यस्मा सम्मादिट्ठि सच्चाभिसमयस्स निब्बानसच्छिकिरियाय अवस्सयो, तस्मा वुत्तं – ‘‘मग्गसम्मादिट्ठियं ठितस्सा’’ति. पहोति भवति ताय सहेव उप्पज्जति पवत्तति. पच्चवेक्खणञाणं याथावतो जाननट्ठेन सम्माञाणन्ति इधाधिप्पेतं, तञ्च खो मग्गसमाधिम्हि ठिते एव होतीति इममत्थं दस्सेतुं आह – ‘‘मग्गसम्मासमाधिम्हि…पे… सम्माञाणं पहोती’’तिआदि. इमिना किं दस्सेतीति? यथा मग्गसम्मादिट्ठियं ठितो पुग्गलो, ‘‘सम्मादिट्ठी’’ति वुत्तो, एवं मग्गफलपच्चवेक्खणञाणे ठितो, ‘‘सम्माञाणो’’ति वुत्तो, तस्स च मग्गफलसम्मासमाधिपवत्तिया पहोति सम्माञाणस्स सम्माविमुत्तिया पहोतीति इममत्थं दस्सेति. फलसमाधि ताव पवत्ततु, मग्गसमाधि पन कथन्ति? तम्पि अकुप्पभावताय अच्चन्तसमाधिभावतो किच्चनिप्फत्तिया पवत्ततेवाति वत्तब्बतं लभति. ठपेत्वा अट्ठफलङ्गानीति फलभूतानि सम्मादिट्ठिआदीनि अट्ठङ्गानि, ‘‘सम्मादिट्ठिस्स सम्मासङ्कप्पो पहोती’’तिआदिना विसुं गहितत्ता ठपेत्वा. सम्माञाणं पच्चवेक्खणं कत्वाति पच्चवेक्खणञाणं सम्माञाणं कत्वा. फलं कातुन्ति फलधम्मसहचरितताय विपाकसभावताय च ‘‘फल’’न्ति लद्धनामे फलसम्पयुत्तधम्मे सम्माविमुत्तिं कातुं वट्टतीति वुत्तं. तथा च वुत्तं सल्लेखसुत्तवण्णनायं (म. नि. अट्ठ. १.८३) ‘‘फलसम्पयुत्तानि पन सम्मादिट्ठिआदीनि अट्ठङ्गानि ठपेत्वा सेसधम्मा सम्माविमुत्तीति वेदितब्बा’’ति.

१४२. निज्जिण्णाति निज्जीरिता, विद्धस्ता विनासिताति अत्थो. फलं कथितन्ति ‘‘सम्मादिट्ठिस्स, भिक्खवे, मिच्छादिट्ठि निज्जिण्णा होती’’ति इमिना वारेन सामञ्ञफलं कथितन्ति वदन्ति, निज्जीरणं पटिप्पस्सम्भनन्ति अधिप्पायो. निज्जीरणं पन समुच्छिन्दनन्ति कत्वा, मज्झिमभाणका…पे… मग्गो कथितोति वदन्ति. दस्सनट्ठेनाति परिञ्ञाभिसमयादिवसेन चतुन्नं सच्चानं पच्चक्खतो दस्सनट्ठेन. विदितकरणट्ठेनाति पच्चक्खेन यथादिट्ठानं मग्गफलानं पाकटकरणट्ठेन. तदधिमुत्तट्ठेनाति तस्मिं यथासच्छिकते निब्बाने अधिमुच्चनभावेन.

कुसलपक्खाति ¶ अनवज्जकोट्ठासा. महाविपाकदानेनाति महतो विपुलस्स लोकुत्तरस्स सुखविपाकस्स चेव कायिकादिदुक्खविपाकस्स च दानेन.

यथा ¶ महाविपाकस्स दानेन महाचत्तारीसकं, तथा बहुतायपि महाचत्तारीसकोति दस्सेतुं, ‘‘इमस्मिञ्च पन सुत्ते पञ्च सम्मादिट्ठियो कथिता’’तिआदि वुत्तं. बहुअत्थोपि हि महा-सद्दो होति ‘‘महाजनो’’तिआदीसु (म. नि. २.६५). एत्थ च ‘‘नत्थि दिन्न’’न्तिआदिना वत्थुभेदेन दस मिच्छादिट्ठिधम्मा कथिता, वत्थुभेदेनेव, ‘‘अत्थि दिन्न’’न्तिआदिना दस सम्मादिट्ठिधम्माति वीसति होति. यथा ‘‘सम्मादिट्ठिस्स, भिक्खवे, सम्मासङ्कप्पो पहोती’’तिआदिना मग्गवसेन दस सम्मत्तधम्मा, तप्पटिपक्खभूता ‘‘मिच्छादिट्ठिस्स मिच्छासङ्कप्पो पहोती’’तिआदिना अत्थतो दस मिच्छत्तधम्माति वीसति, तथा फलवसेन तेसु एवं वीसति. कथं वारेपि सम्मादिट्ठिआदयो दसाति वीसति? एवमेते द्वे चत्तारीसकानि पुरिमेन सद्धिं तयो चत्तारीसका विभाविताति वेदितब्बा.

१४३. पसंसियस्स उजुविपच्चनीकं निन्दियं पसंसन्तोपि अत्थतो पसंसियं निन्दन्तो नाम होति. पसंसियस्स गुणपरिधंसनमुखेनेव हि निन्दियस्स पसंसाय पवत्तनतोति आह – ‘‘मिच्छादिट्ठिनामायं सोभनाति वदन्तोपि सम्मादिट्ठिं गरहति नामा’’तिआदि. एवमादीति आदिसद्देन ‘‘नत्थि हेतु नत्थि पच्चयो सत्तानं संकिलेसाया’’ति (दी. नि. १.१६८; म. नि. २.२२७) एवमादिं सङ्गण्हाति; तस्मा एवंवादिनोति एवं हेतु पटिक्खेपवादिनोति अत्थो. ओक्कन्तनियामाति ओगाळ्हमिच्छत्तनियामा. एवरूपं लद्धिं गहेत्वातिआदीसु यं वत्तब्बं, तं चूळपुण्णमसुत्तवण्णनायं वुत्तनयमेव तस्मा तत्थ वुत्तनयेनेव वेदितब्बं. एदिसो हि ‘‘बुद्धानम्पि अतेकिच्छो’’तिआदि वुत्तसदिसो.

अत्तनो निन्दाभयेनाति ‘‘सम्मादिट्ठिञ्च नामेते गरहन्ती’’आदिना उपरि परेहि वत्तब्बनिन्दाभयेन. घट्टनभयेनाति तथा परेसं आसादनाभयेन. सहधम्मेन परेन अत्तनो उपरि कातब्बनिग्गहो उपारम्भो, गरहतो परित्तासो उपारम्भभयं, तं पन अत्थतो उपवादभयं होतीति आह ‘‘उपवादभयेना’’ति. सेसं सुविञ्ञेय्यमेव.

महाचत्तारीसकसुत्तवण्णनाय लीनत्थप्पकासना समत्ता.

८. आनापानस्सतिसुत्तवण्णना

१४४. पुब्बेनाति ¶ ¶ निस्सक्के करणवचनं. ‘‘अपरं विसेस’’न्ति वुत्तत्ता विसेसविसयो च पुब्बसद्दोति आह – ‘‘सीलपरिपूरणादितो पुब्बविसेसतो’’ति.

१४५. आरद्धो यथानुसिट्ठं पटिपत्तिया आराधितो. यदत्थाय सासने पब्बज्जा, विसेसापत्ति च, तदेवेत्थ अप्पत्तन्ति अधिप्पेतं, तं झानविपस्सनानिमित्तन्ति आह – ‘‘अप्पत्तस्स अरहत्तस्सा’’ति. कोमुदीति कुमुदवती. तदा किर कुमुदानि सुपुप्फितानि होन्ति. तेनाह – ‘‘कुमुदानं अत्थिताय कोमुदी’’ति. कुमुदानं समूहो, कुमुदानि एव वा कोमुदा, ते एत्थ अत्थीति कोमुदीति. पवारणसङ्गहन्ति महापवारणं अकत्वा आगमनीयसङ्गहणं.

आरद्धविपस्सकस्साति आरभितविपस्सनस्स, विपस्सनं वड्ढेत्वा उस्सुक्कापेत्वा विपस्सिस्स. भिक्खू इध ओसरिस्सन्ति वुत्थवस्सा पवारितपवारणा ‘‘भगवन्तं वन्दिस्साम, कम्मट्ठानं सोधेस्साम, यथालद्धं विसेसञ्च पवेदिस्सामा’’ति अज्झासयेन. इमे भिक्खूति इमे तरुणसमथविपस्सना भिक्खू. विसेसं निब्बत्तेतुं न सक्खिस्सन्ति सेनासनसप्पायादिअलाभेन. अपलिबुद्धन्ति अञ्ञेहि अनुपद्दुतं. सेनासनं गहेतुं न लभन्ति अन्तोवस्सभावतो. एकस्स दिन्नोपि सब्बेसं दिन्नोयेव होति, तस्मा सुतसुतट्ठानेयेव एकमासं वसित्वा ओसरिंसु.

१४६. अलन्ति युत्तं, ओपायिकन्ति अत्थो, ‘‘अलमेव निब्बिन्दितु’’न्तिआदीसु (दी. नि. २.२७२; सं. नि. २.१२४, १२८, १३४, १४३) विय. पुटबद्धं परिहरित्वा असितं पुटोसं अ-कारस्स ओ-कारं कत्वा. तेनाह ‘‘पाथेय्य’’न्ति.

१४७. विपस्सना कथिताति अनिच्चसञ्ञामुखेनेव विपस्सनाभावना कथिता. न हि केवलाय अनिच्चानुपस्सनाय विपस्सनाकिच्चं समिज्झति. बहू भिक्खू ते च वित्थाररुचिकाति अधिप्पायो. तेनाह ‘‘तस्मा’’तिआदि.

१४९. सब्बत्थाति ¶ सब्बवारेसु. ‘‘तस्मा तिह, भिक्खवे, वेदनानुपस्सी’’तिआदीसुपि पीतिपटिसंवेदितादिवसेनेव ¶ वेदनानुपस्सनाय वुत्तत्ता, ‘‘सुखवेदनं सन्धायेतं वुत्त’’न्ति आह. सतिपट्ठानभावनामनसिकारताय वुत्तं – ‘‘साधुकं मनसिकार’’न्ति. सञ्ञानामेन पञ्ञा वुत्ता तेसं पयोगत्ता. मनसिकारनामेन वेदना वुत्ता, भावनाय परिचितत्ता आरम्मणस्स मनसिकारन्ति कत्वा. वितक्कविचारे ठपेत्वाति वुत्तं वचीसङ्खारत्ता तेसं.

एवं सन्तेपीति यदिपि मनसिकारपरियापन्नताय ‘‘मनसिकारो’’ति वुत्तं, एवं सन्ते वेदनानुपस्सनाभावो न युज्जति, अस्सासपस्सासा हिस्स आरम्मणं. वत्थुन्ति सुखादीनं वेदनानं पवत्तिट्ठानभूतं वत्थुं आरम्मणं कत्वा वेदनाव वेदियति, वेदनाय एकन्तभावदस्सनेन तस्स वेदनानुपस्सनाभावो युज्जति एवाति इममत्थं दस्सेति. एतस्स अनुयोगस्स.

द्वीहाकारेहीति ये सन्धाय वुत्तं, ते दस्सेन्तो ‘‘आरम्मणतो असम्मोहतो चा’’ति आह. सप्पीतिके द्वे झानेति पीतिसहगतानि पठमदुतियज्झानानि पटिपाटिया समापज्जति. समापत्तिक्खणेति समापज्जनक्खणे. झानपटिलाभेनाति झानेन समङ्गीभावेन. आरम्मणतो आरम्मणमुखेन तदारम्मणझानपरियापन्ना पीति पटिसंविदिता होति आरम्मणस्स पटिसंविदितत्ता. यथा नाम सप्पपरियेसनं चरन्तेन तस्स आसये पटिसंविदिते सोपि पटिसंविदितोव होति मन्तागदबलेन तस्स गहणस्स सुकरत्ता; एवं पीतिया आसयभूते आरम्मणे पटिसंविदिते सा पीति पटिसंविदिता एव होति सलक्खणतो सामञ्ञलक्खणतो च तस्सा गहणस्स सुकरत्ता. विपस्सनाक्खणेति विपस्सनापञ्ञापुब्बङ्गमाय मग्गपञ्ञाय विसेसतो दस्सनक्खणे. लक्खणपटिवेधाति पीतिया सलक्खणस्स सामञ्ञलक्खणस्स च पटिविज्झनेन. यञ्हि पीतिया विसेसतो सामञ्ञतो च लक्खणं, तस्मिं विदिते सा याथावतो विदिता होति. तेनाह – ‘‘असम्मोहतो पीति पटिसंविदिता होती’’ति.

इदानि तमत्थं पाळिया विभावेतुं, ‘‘वुत्तम्पि चेत’’न्तिआदि वुत्तं. तत्थ दीघं अस्सासवसेनाति दीघस्स अस्सासस्स आरम्मणभूतस्स वसेन. चित्तस्स एकग्गतं अविक्खेपं पजानतोति झानपरियापन्नं अविक्खेपोति लद्धनामं ¶ चित्तस्सेकग्गतं तंसम्पयुत्ताय पञ्ञाय पजानतो. यथेव हि आरम्मणमुखेन पीति पटिसंविदिता होति, एवं तंसम्पयुत्तधम्मापि आरम्मणमुखेन पटिसंविदिता एव होन्ति. सति उपट्ठिता होतीति दीघं अस्सासवसेन झानसम्पयुत्ता सति तस्मिं आरम्मणे उपट्ठिते आरम्मणमुखेन झानेपि उपट्ठिता एव नाम होति. ताय सतियाति एवं उपट्ठिताय ताय सतिया यथावुत्तेन तेन ञाणेन सुप्पटिविदितत्ता ¶ आरम्मणस्स तस्स वसेन तदारम्मणा सा पीति पटिसंविदिता होति. अवसेसपदानिपीति ‘‘दीघं पस्सासवसेना’’तिआदिपदानिपि.

एवं पटिसम्भिदामग्गे वुत्तमत्थं इमस्मिं सुत्ते योजेत्वा दस्सेतुं, ‘‘इती’’तिआदि वुत्तं. इमिनापि योगिना मनसिकारेन पटिलभितब्बतो पटिलाभोति वुत्तं – ‘‘झानसम्पयुत्ते वेदनासङ्खातमनसिकारपटिलाभेना’’ति.

अस्सासपस्सासनिमित्तन्ति अस्सासपस्सासे निस्साय पटिलद्धपटिभागनिमित्तं आरम्मणं किञ्चापि करोति; सतिञ्च सम्पजञ्ञञ्च उपट्ठपेत्वा पवत्तनतो आरम्मणमुखेन तदारम्मणस्स पटिसंविदितत्ता चित्ते चित्तानुपस्सीयेव नामेस होति. एवं चित्तानुपस्सनापि सतिसम्पजञ्ञबलेनेव होतीति आह ‘‘न ही’’तिआदि. पजहति एतेन, सयं वा पजहतीति पहानं, ञाणं. दोमनस्सवसेन ब्यापादनीवरणं दस्सितं तदेकट्ठभावतो. तस्साति नीवरणपब्बस्स. पहानकरञाणन्ति पजहनञाणं. विपस्सनापरम्परन्ति पटिपाटिया विपस्सनमाह. समथपटिपन्नन्ति मज्झिमसमथनिमित्तं पटिपन्नचित्तं अज्झुपेक्खति. एकतो उपट्ठानन्ति पटिपक्खविगमेन एकभावेन उपट्ठानं. सहजातानं अज्झुपेक्खना होतीति पग्गहनिग्गहसम्पहंसनेसु ब्यापारस्स अनापज्जितत्ता आरम्मणानं अज्झुपेक्खना, ‘‘यदत्थि यं भूतं तं पजहति उपेक्खं पटिलभती’’ति, एवं वुत्तअज्झुपेक्खना पवत्ताति पटिपन्ना. केवलं नीवरणादिधम्मेति नीवरणादिधम्मे एव पहीने दिस्वा, अथ खो तेसं पजहनञाणम्पि याथावतो पञ्ञाय दिस्वा अज्झुपेक्खिता होति. वुत्तञ्हेतं भगवता ‘‘धम्मापि खो, भिक्खवे, पहातब्बा, पगेव अधम्मा’’ति (म. नि. १.२४०).

१५०. अनिच्चादिवसेन ¶ पविचिनतीति अनिच्चादिप्पकारेहि विचिनति पस्सति. निरामिसाति किलेसामिसरहिता. कायिकचेतसिकदरथपटिप्पस्सद्धियाति कायचित्तानं साधुभावूपगमनेन विक्खम्भितत्ता. सहजातधम्मानं एकसभावेन पवत्तिया सहजातअज्झुपेक्खनाय अज्झुपेक्खिता होति.

तस्मिं काये पवत्ता कायारम्मणा सति, पुब्बभागियो सतिसम्बोज्झङ्गो. एस नयो सेसेसुपि. सोमनस्ससहगतचित्तुप्पादवसेन चेतं ओक्कमनं ओलियनं कोसज्जं, ततो अतिवत्तनं अतिधावनं उद्धच्चं, तदुभयविधुरा बोज्झङ्गुपेक्खाभूता अनोसक्कनअनतिवत्तनसङ्खाता मज्झत्ताकारता. इदानि यथेव हीतिआदिना तमेव मज्झत्ताकारं ¶ उपमाय विभावेति. तुदनं वा पतोदेन. आकड्ढनं वा रस्मिना. नत्थि न कातब्बं अत्थि. एकचित्तक्खणिकाति एकेकस्मिं चित्ते विपस्सनावसेन सह उप्पज्जनका. नानारसलक्खणाति नानाकिच्चा चेव नानासभावा च.

१५२. वुत्तत्थानेव सब्बासवसुत्तवण्णनायं (म. नि. अट्ठ. २७) आनापानारम्मणा अपरापरं पवत्तसतियो आरम्मणसीसेन तदारम्मणा धम्मा गहिता, ता पनेकसन्ताने लोकियचित्तसम्पयुत्ताति लोकिया, ता वड्ढमाना लोकियं चतुब्बिधम्पि सतिपट्ठानं परिपूरेन्ति. विज्जाविमुत्तिफलनिब्बानन्ति विमुत्तीनं फलभूतं तेहियेव वेदितब्बं किलेसनिब्बानं, अमतमहानिब्बानमेव विज्जाविमुत्तीनं अधिगमेन अधिगन्तब्बताय तथा वुत्तं. परिपूरणञ्चस्स आरम्मणं कत्वा अमतस्सानुभवनमेव. इध सुत्ते लोकियापि बोज्झङ्गा कथिता लोकुत्तरापीति एत्तकं गहेत्वा, ‘‘इति लोकियस्स आगतट्ठाने लोकियं कथित’’न्ति च अत्थवण्णनावसेन अट्ठकथायं कथितं. थेरोति महाधम्मरक्खितत्थेरो. अञ्ञत्थ एवं होतीति अञ्ञस्मिं लोकियलोकुत्तरधम्मानं तत्थ तत्थ वोमिस्सकनयेन आगतसुत्ते एवं लोकियं आगतं, इध लोकुत्तरं आगतन्ति कथेतब्बं होति. लोकुत्तरं उपरि आगतन्ति विज्जाविमुत्तिं परिपूरेन्तीति एवं लोकुत्तरं उपरि देसनायं आगतं; तस्मा लोकिया एव बोज्झङ्गा विज्जाविमुत्ति परिपूरिका कथेतब्बा ¶ लोकुत्तरानं बोज्झङ्गानं विज्जागहणेन गहितत्ता, तस्मा थेरेन वुत्तोयेवेत्थ अत्थो गहेतब्बो. सेसं वुत्तनयत्ता सुविञ्ञेय्यमेव.

आनापानस्सतिसुत्तवण्णनाय लीनत्थप्पकासना समत्ता.

९. कायगतासतिसुत्तवण्णना

१५३-४. तप्पटिसरणानं ¶ कामावचरसत्तानं पटिसरणट्ठेन गेहा कामगुणा, गेहे सिता आरब्भ पवत्तिया अल्लीनाति गेहस्सिता. सरन्तीति वेगसा पवत्तन्ति. वेगेन हि पवत्ति धावतीति वुच्चति. सङ्कप्पाति ये केचि मिच्छासङ्कप्पा, ब्यापादविहिंसासङ्कप्पादयोपि कामगुणसिता एवाति. गोचरज्झत्तस्मिंयेवाति परिग्गहिते कम्मट्ठाने एव वत्तन्ति. तञ्हि धम्मवसेन उपट्ठिताय भावनाय गोचरभावतो ‘‘गोचरज्झत्त’’न्ति वुत्तं. अस्सासपस्सासकाये गता पवत्ताति कायगता, तं कायगतासतिं. सतिसीसेन तंसहगते भावनाधम्मे वदति अस्सासपस्सासकायादिके तंतंकोट्ठासे समथवत्थुभावेन परिग्गहेत्वा सतिया परिग्गहितत्ता; तथापरिग्गहिते वा ते आरब्भ अनिच्चादिमनसिकारवसेन पवत्ता कायारम्मणा सती सतिभावेन वत्वा एकज्झं दस्सेन्तो ‘‘कायपरिग्गाहिक’’न्तिआदिमाह.

सतिपट्ठानेति महासतिपट्ठानसुत्ते (दी. नि. २.३७८; म. नि. १.१११), चुद्दसविधेन कायानुपस्सना कथिता, चुण्णकजातानि अट्ठिकानि परियोसानं कत्वा कायानुपस्सना निद्दिट्ठा, इध पन केसादीसु वण्णकसिणवसेन निब्बत्तितानं चतुन्नं झानानं वसेन उपरिदेसनाय वड्ढितत्ता अट्ठारसविधेन कायगतासतिभावना.

१५६. तस्स भिक्खुनोति यो कायगतासतिभावनाय वसीभूतो, तस्स भिक्खुनो. सम्पयोगवसेन विज्जं भजन्तीति सहजात-अञ्ञमञ्ञ-निस्सय-सम्पयुत्त-अत्थि-अविगतपच्चयवसेन विज्जं भजन्ति, ताय सह एकीभावमिव गच्छन्तीति अत्थो. विज्जाभागे विज्जाकोट्ठासे ¶ वत्तन्तीति विज्जासभागताय तदेकदेसे विज्जाकोट्ठासे वत्तन्ति. ताहि सम्पयुत्तधम्मा फस्सादयो. ननु चेत्थ विज्जानं विज्जाभागियता न सम्भवतीति? नो न सम्भवति. याय हि विज्जाय विज्जासम्पयुत्तानं विज्जाभागियता, सा तंनिमित्ताय विज्जाय उपचरीयतीति. एका विज्जा विज्जा, सेसा विज्जाभागियाति अट्ठसु विज्जासु एकं ‘‘विज्जा’’ति गहेत्वा इतरा तस्सा भागताय ‘‘विज्जाभागिया’’ति वेदितब्बा. सद्धिं पवत्तनसभावासु अयमेव विज्जाति वत्तब्बाति नियमस्स अभावतो विज्जाभागो विय विज्जाभागियापि पवत्तति एवाति वत्तब्बं. आपोफरणन्ति पटिभागनिमित्तभूतेन आपोकसिणेन सब्बसो महासमुद्दफरणं आपोफरणं नाम. दिब्बचक्खुञाणस्स किच्चं फरणन्ति कत्वा, दिब्बचक्खुअत्थं वा आलोकफरणं ¶ दिब्बचक्खुफरणन्ति दट्ठब्बं. उभयस्मिम्पि पक्खे समुद्दङ्गमानं कुन्नदीनं समुद्दन्तोगधत्ता तेसं चेतसा फुटता वेदितब्बा. कुन्नदिग्गहणञ्चेत्थ कञ्चिमेव कालं सन्दित्वा तासं उदकस्स समुद्दपरियापन्नभावूपगमनत्ता, न बहि महानदियो विय परित्तकालट्ठितिकाति.

ओतारन्ति किलेसुप्पत्तिया अवसरं, तं पन विवरं छिद्दन्ति च वुत्तं. आरम्मणन्ति किलेसुप्पत्तिया ओलम्बनं. याव परियोसानाति मत्तिकापुञ्जस्स याव परियोसाना.

१५८. अभिञ्ञायाति इद्धिविधादिअभिञ्ञाय. सच्छिकातब्बस्साति पच्चक्खतो कातब्बस्स अधिट्ठानविकुब्बनादिधम्मस्स. अभिञ्ञाव कारणन्ति आह – ‘‘सच्छिकिरियापेक्खाय, अभिञ्ञाकारणस्स पन सिद्धिया पाकटा’’ति. मरियादबद्धाति उदकमातिकामुखे कता.

युत्तयानं विय कताय इच्छितिच्छिते काले सुखेन पच्चवेक्खितब्बत्ता. पतिट्ठाकतायाति सम्पत्तीनं पतिट्ठाभावं पापिताय. अनुप्पवत्तितायाति भावनाबहुलीकारेहि अनुप्पवत्तिताय. परिचयकतायाति आसेवनदळ्हताय सुचिरं परिचयाय. सुसम्पग्गहितायाति सब्बसो उक्कंसं पापिताय. सुसमारद्धायाति अतिविय सम्मदेव निब्बत्तिकताय. सेसं सुविञ्ञेय्यमेव.

कायगतासतिसुत्तवण्णनाय लीनत्थप्पकासना समत्ता.

१०. सङ्खारुपपत्तिसुत्तवण्णना

१६०. सङ्खारुपपत्तिन्ति ¶ ¶ विपाकक्खन्धसञ्ञितानं सङ्खारानं उप्पत्तिं, निब्बत्तिन्ति अत्थो. यस्मा अवधारणं एतस्मिं पदे इच्छितब्बन्ति, ‘‘सङ्खारानंयेव उपपत्ति’’न्ति वत्वा तेन निवत्तितं दस्सेन्तो, ‘‘न सत्तस्सा’’ति आह. तेन सत्तो जीवो उप्पज्जतीति मिच्छावादं पटिक्खिपति. एवं उप्पज्जनकधम्मवसेन उप्पत्तिं दस्सेत्वा इदानि उप्पत्तिजनकधम्मवसेनपि तं दस्सेतुं, ‘‘पुञ्ञाभिसङ्खारेन वा’’तिआदि वुत्तं. तत्थ कामेसु पुञ्ञाभिसङ्खारेनपि उपपत्ति होति, सा पन इमस्मिं सुत्ते गहिताति. पुञ्ञाभिसङ्खारेन वाति वा-सद्दो अवुत्तत्थापेक्खणविकप्पत्थो, अवुत्तत्थापेक्खाय पन न आगतो ‘‘आनेञ्जाभिसङ्खारेना’’ति. अथ वा उपपत्ति आगता, एवं किच्चं आगतं, आनेञ्जाभिसङ्खारो पनेत्थ सरूपेन अनागतोपि पुञ्ञाभिसङ्खारग्गहणेनेव गहितोति दट्ठब्बं. केचि पन ‘‘पुञ्ञानेञ्जाभिसङ्खारेना’’ति पठन्ति. भवूपगक्खन्धानन्ति सुगतिभवूपगानं उपादानक्खन्धानं.

१६१. लोकिका वट्टन्ति कम्मवट्टस्स गहणतो. भवूपपत्तिहेतुभूता ओकप्पनीयसद्धा चतुपारिसुद्धिसीलं तादिसं बुद्धवचनबाहुसच्चं आमिसपरिच्चागो कम्मस्सकताञाणं कम्मफलदिट्ठि च इमे सद्धादयो वेदितब्बा. ठपेतीति पणिदहनवसेन ठपेति. पणिदहतीति हि अयमेत्थ अत्थो. पतिट्ठापेतीति तत्थ सुप्पतिट्ठितं कत्वा ठपेति. सहपत्थनायाति, ‘‘अहो वताहं…पे… उपपज्जेय्य’’न्ति एवं पवत्तपत्थनाय सह. सद्धादयोवाति यथावुत्ता सद्धादयो एव पञ्च धम्मा उपपत्तिया सङ्खरणट्ठेन सङ्खारा, तस्मा एव अञ्ञेहि विसिट्ठभवूपहरणट्ठेन विहारा नामाति. तस्मिं ठानेति तस्मिं उपपत्तिट्ठाने.

पञ्चधम्माव तंसमङ्गीपुग्गलो उपपत्तिं मग्गति गवेसति एतेनाति मग्गो. पटिपज्जति एतायाति पटिपदा. चेतना पनेत्थ सुद्धसङ्खारताय सद्धादिग्गहणेनेव गहिता, तस्मा अवधारणं कतं. उपपत्तिपकप्पनवसेनेव पवत्तिया पत्थनागहणेनेव तस्सा गहणन्ति केचि. चित्तकरयुत्तगतिनिब्बत्तनधम्मवसेन अवधारणस्स कतत्ता. चेतना हि नाम कम्मं, तस्सा उपपत्तिनिब्बत्तने वत्तब्बमेव नत्थि, तस्सा पन किच्चकरणा सद्धादयो पत्थना चाति इमे धम्मा सहकारिनो भवूपपत्तिया नियामका होन्तीति तत्रूपपत्तिया पवत्तन्तीति तेसं मग्गादिभावो वुत्तो. तेनाह ¶ ‘‘यस्स ही’’तिआदि. तेन सद्धा पत्थना चाति उभये धम्मा सहिता ¶ हुत्वा कम्मं विसेसेन्ता गतिं नियमेन्तीति दस्सेति, पटिसन्धिग्गहणं अनियतं केवलस्स कम्मस्स वसेनाति अधिप्पायो. कामञ्चेत्थ ‘‘कम्मं कत्वा’’ति वुत्तं, कम्मायूहनतो पन पगेव पत्थनं ठपेतुम्पि वट्टतियेव. कम्मं कत्वाति चेत्थ ‘‘तापेत्वा भुञ्जति, भुत्वा सयती’’तिआदीसु विय न कालनियमो, कम्मं कत्वा यदा कदाचि पत्थनं कातुं वट्टतीति च इदं चारित्तदस्सनं विय वुत्तं. यथा हि भवपत्थना याव मग्गेन न समुच्छिज्जति, ताव अनुप्पन्नाभिनवकतूपचितस्स कम्मस्स पच्चयो होतियेव. पुन तथा विसेसपच्चयो, यथा नियमेत्वा उप्पादिता. तेन वुत्तं – ‘‘यस्स पञ्च धम्मा अत्थि, न पत्थना तस्स गति अनिबद्धा’’ति.

१६५. सब्बसोवाति ‘‘इदं काळकं सामं सेतं हरितं मण्डलं अपरिमण्डलं चतुरंसं परिपुण्णं खुद्दकं महन्त’’न्तिआदिना सब्बसोव पाकटं होति.

१६७. सुन्दरोति काळकादिदोसरहितताय सोभनो. आकरसम्पन्नो सम्पन्नआकरुप्पत्तिया. धोवनादीहीति धोवनतापनमज्जनादीहि.

१६८. लोकधातूनं सतसहस्सं अत्तनो वसे वत्तनतो सतसहस्सो. तस्स पन तत्थ ओभासकरणं पाकटन्ति आह ‘‘आलोकफरणब्रह्मा’’ति. अयमेव नयो हेट्ठा ‘‘सहस्सो ब्रह्मा’’तिआदीसुपि. निक्खेन कतन्ति निक्खपरिमाणेन जम्बोनदेन कतं. निक्खं पन वीसतिसुवण्णन्ति केचि. पञ्चवीसतिसुवण्णन्ति अपरे. सुवण्णं नाम चतुधरणन्ति वदन्ति. घट्टनमज्जनक्खमं न होति परित्तभावतो. अतिरेकेनाति पञ्चसुवण्णअतिरेकेन निक्खप्पमाणं असम्पत्तेन. वण्णवन्तं पन न होति अविपुलताय उळारं हुत्वा अनुपट्ठानतो. अवण्णवन्तताय एव फरुसधातुकं खायति. तासूति तासु भूमीसु, यत्थ साखा वड्ढित्वा ठिता. तेति सुवण्णङ्कुरा. पचित्वाति तापेत्वा. सम्पहट्ठन्ति समुज्जलीकतन्ति आह – ‘‘धोतघट्टितपमज्जित’’न्ति, तम्बमत्तिकलेपं कत्वा धोतञ्चेव पासाणादिना घट्टितञ्च एळकलोमादिना पमज्जितञ्चाति अत्थो.

एतदेवाति ¶ आलोकं वड्ढेत्वा एत्थ आलोकफरणमेव. अथ वा यं दिब्बचक्खुफरणं, आलोकफरणम्पि एतदेव. यत्तकञ्हि ठानं योगी कसिणालोकेन फरति; तत्तकं ठानं दिब्बचक्खुञाणं फुसतीति दिब्बचक्खुफरणे दस्सिते आलोकफरणं दस्सितमेवाति अत्थो. सब्बत्थाति सब्बस्मिं ‘‘फरित्वा’’ति आगतट्ठाने. अविनासेन्तेनाति असम्भिन्नेन.

कसिणफरणं ¶ वियाति कसिणोभासेन फरणं विय दिस्सति उपट्ठाति, मणिपभाफरणस्स विय ब्रह्मलोके धातुफरणस्स दस्सितत्ताति अधिप्पायो. सरीरपभा पन निक्खपभासदिसाति, ‘‘निक्खोपम्मे सरीरफरणं विय दिस्सती’’ति वुत्तं. अट्ठकथा नाम नत्थीति पाळिपदस्स अत्थवण्णनाय नाम निच्छिताय भवितब्बं, अविनिच्छिताय पन नत्थि वियाति अकथनं नाम अट्ठकथाय अनाचिण्णन्ति तस्स वादं पटिक्खिपित्वा. यथा हि वत्तब्बं, तथा अवत्वा ‘‘विया’’ति वचनं किमत्थियन्ति अधिप्पायो. बुद्धानं ब्यामप्पभा ब्यामप्पदेसे सब्बकालं अधिट्ठाति विय तस्स ब्रह्मुनो सरीरफरणं सरीराभाय पत्थरणं सब्बकालिकं. चत्तारिमानि इतरानि फरणानि अविनासेत्वा अञ्ञमञ्ञमभिन्दित्वा कथेतब्बं. फरणपदस्सेव वेवचनं ‘‘अधिमुच्चनेनेव फरण’’न्ति. पत्थरतीति यथावुत्तं फरणवसेन पत्थरति. जानातीति अधिमुच्चनवसेन जानाति.

१६९. आदयोति आदि-सद्देन सुभे सङ्गण्हाति. आभाति दुतियज्झानभूमिके देवे एकज्झं गहेत्वा साधारणतो वुत्तं. ततो सुभाति ततियज्झानभूमिके. तेनाह – ‘‘पाटियेक्का देवा नत्थी’’तिआदि. साधारणतो कतायपि पत्थनाय झानङ्गं परित्तं भावितञ्चे, परित्ताभेसु उपपत्ति होति, मज्झिमञ्चे, अप्पमाणाभेसु, पणीतञ्चे, आभस्सरेसु उपपत्ति होतीति दट्ठब्बं. सुभाति एत्थापि एसेव नयो. हेट्ठा वुत्तनयेनेव सुविञ्ञेय्योति आह – ‘‘वेहप्फलादिवारा पाकटायेवा’’ति.

कामावचरेसु निब्बत्ततूतिआदिना सद्धादीनं अज्झानविपस्सनानं कथं तदधिट्ठानं होतीति आसङ्कति. इतरो सद्धादीनं अज्झानसभावत्तेपि झानविपस्सनानं अधिट्ठानं निस्सयपच्चयादिवसेन सप्पच्चयत्ता ब्रह्मलोकूपपत्तिं निब्बानञ्च आवहन्तीति दस्सेन्तो, ‘‘इमे पञ्च धम्मा’’तिआदिमाह ¶ . तत्थ सीलन्ति सम्भारसीलं. अनागामी समुच्छिन्नओरम्भागियसंयोजनो समानो सचे सब्बसो उपपत्तियो अतिक्कमितुं न सक्कोति, अरियभूमीसु एव निब्बत्तति यथूपचितझानकम्मुनाति आह – ‘‘अनागामि…पे… निब्बत्तती’’ति. उपरिमग्गन्ति अग्गमग्गं भावेत्वा. आसवक्खयन्ति सब्बसो आसवानं खयं पहानं पापुणाति. सेसं सुविञ्ञेय्यमेव.

सङ्खारुपपत्तिसुत्तवण्णनाय लीनत्थप्पकासना समत्ता.

निट्ठिता च अनुपदवग्गवण्णना.

३. सुञ्ञतवग्गो

१. चूळसुञ्ञतसुत्तवण्णना

१७६. कालपरिच्छेदं ¶ ¶ कत्वाति समापज्जन्तेहि नाम कालपरिच्छेदो कातब्बो. थेरो पन भगवतो वत्तकरणत्थं कालपरिच्छेदं करोति, ‘‘एत्तके काले वीतिवत्ते इदं नाम भगवतो कातब्ब’’न्ति. सो तत्थकंयेव समापत्तिं समापज्जित्वा वुट्ठाति, तं सन्धाय वुत्तं ‘‘कालपरिच्छेदं कत्वा’’ति. सुञ्ञताफलसमापत्तिं अप्पेत्वाति एतेन इतरे, ‘‘न सोतापन्नसकदागामी फलसमापत्तिं समापज्जन्ती’’ति वदन्ति, तं वादं पटिसेधेति. सुञ्ञतोति अत्तसुञ्ञतो च निच्चसुञ्ञतो च सङ्खारा उपट्ठहिंसु. सेक्खानञ्हि सुञ्ञतापटिवेधो पादेसिको सुभसुखसञ्ञानं अप्पहीनत्ता, तस्मा सो थेरो सुञ्ञताकथं सोतुकामो जातो. धुरेन धुरं पहरन्तेन वियाति रथधुरेन रथधुरं पहरन्तेन विय कत्वा उजुकमेव सुञ्ञता…पे… वत्थुं न सक्काति योजना. एकं पदन्ति एकं सुञ्ञतापदं.

पुब्बेपाहन्तिआदिना भगवा पठमबोधियम्पि अत्तनो सुञ्ञताविहारबाहुल्लं पकासेतीति दस्सेन्तो ‘‘पठमबोधियम्पी’’ति आह. एकोतिआदि थेरस्स सुञ्ञताकथाय भाजनभावदस्सनत्थं. सोतुन्ति अट्ठिं कत्वा मनसि कत्वा सब्बचेतसा समन्नाहरित्वा सोतुम्पि. उग्गहेतुम्पिति यथाभूतं धम्मं धारणपरिपुच्छापरिचयवसेन हदयेन उग्गहितं सुवण्णभाजने पक्खित्तसीहवसा विय अविनट्ठे कातुम्पि. कथेतुम्पीति वित्थारेन परेसं दस्सेतुम्पि सक्का. तत्थाति मिगारमातुपासादे. कट्ठरूपपोत्थकरूपचित्तरूपवसेन कताति थम्भादीसु उत्तिरित्वा कतानं कट्ठरूपानं, निय्यूहादीसु पटिमावसेन रचितानं पोत्थकरूपानं, सित्तिपस्से चित्तकम्मवसेन विरचितानं चित्तरूपानञ्च कता निट्ठपिता. वेस्सवणमन्धातादीनन्ति पटिमारूपेन कतानं वेस्सवणमन्धातुसक्कादीनं. चित्तकम्मवसेनाति आरामादिचित्तकम्मवसेन. सण्ठितम्पीति अवयवभावेन सण्ठितं हुत्वा ठितम्पि. जिण्णपटिसङ्खरणत्थन्ति जिण्णानं निय्यूहकूटागारपासादावयवानं अभिसङ्खरणत्थाय तस्मिं तस्मिं ठाने ¶ रहस्ससञ्ञाणेन ठपितं. ‘‘परिभुञ्जिस्सामी’’ति तस्मिं ¶ तस्मिं किच्चे विनियुञ्जनवसेन परिभुञ्जितब्बस्स. एतं वुत्तन्ति, ‘‘अयं मिगारमातुपासादो सुञ्ञो’’तिआदिकं वुत्तं.

निच्चन्ति सब्बकालं रत्तिञ्च दिवा च. एकभावं एकं असुञ्ञतन्ति पच्चत्ते उपयोगवचनं, एकत्तं एको असुञ्ञतोति अत्थो. गामोति पवत्तनवसेनाति गेहसन्निवेसवीथिचच्चरसिङ्घाटकादिके उपादाय गामोति लोकुप्पत्तिवसेन. किलेसवसेनाति तत्थ अनुनयपटिघवसेन. एसेव नयोति इमिना ‘‘पवत्तवसेन वा किलेसवसेन वा उप्पन्नं मनुस्ससञ्ञ’’न्ति इममत्थं अतिदिसति. एत्थ च यथा गामग्गहणेन घरादिसञ्ञा सङ्गहिता, एवं मनुस्सग्गहणेन इत्थिपुरिसादिसञ्ञा सङ्गहिता. यस्मा रुक्खादिके पटिच्च अरञ्ञसञ्ञा तत्थ पब्बतवनसण्डादयो अन्तोगधा, तस्मा तत्थ विज्जमानम्पि तं विभागं अग्गहेत्वा एकं अरञ्ञंयेव पटिच्च अरञ्ञसञ्ञं मनसि करोति. ओतरतीति अनुप्पविसति. अधिमुच्चतीति निच्छिनोति. पवत्तदरथाति तथारूपाय पस्सद्धिया अभावतो ओळारिकधम्मप्पवत्तिसिद्धा दरथा. किलेसदरथाति अनुनयपटिघसम्भवा किलेसदरथा. दुतियपदेति ‘‘ये अस्सु दरथा मनुस्ससञ्ञं पटिच्चा’’ति इमस्मिं पदे. मनसिकारसन्तताय, – ‘‘नायं पुब्बे विय ओळारिका, धम्मप्पवत्ती’’ति सङ्खारदस्सनदरथानं सुखुमता सल्लहुकता च चरितत्थाति आह ‘‘पवत्तदरथमत्ता अत्थी’’ति.

यं किलेसदरथजातं, तं इमिस्सा दरथसञ्ञाय न होतीति योजना. पवत्तदरथमत्तं अवसिट्ठं होति, विज्जमानमेव अत्थि इदन्ति पजानातीति योजना. सुञ्ञता निब्बत्तीति सुञ्ञतन्ति पवत्ति. सुञ्ञता सहचरितञ्हि सुञ्ञं, इध सुञ्ञताति वुत्ता.

१७७. अस्साति भगवतो एवं इदानि वुच्चमानाकारेन चित्तप्पवत्ति अहोसि. अच्चन्तसुञ्ञतन्ति ‘‘परमानुत्तर’’न्ति वुत्तं अरहत्तं देसेस्सामीति. अरञ्ञसञ्ञाय विसेसानधिगमनतोति, ‘‘अरञ्ञं अरञ्ञ’’न्ति मनसिकारेन झानादिविसेसस्स अधिगमाभावतो, ‘‘पथवी’’ति मनसिकारेन विसेसाधिगमनतो. इदानि तमेवत्थं उपमाय विभावेतुं ‘‘यथा ही’’तिआदि वुत्तं. एवं सन्तेति एवं वपिते सालिआदयो सम्पज्जन्ति. धुवसेवनन्ति नियतसेवनं पारिहारियकम्मट्ठानं. पटिच्चाति एत्थ ‘‘सम्भूत’’न्ति वचनसेसो इच्छितोति आह ‘‘पटिच्च सम्भूत’’न्ति. पथविं पटिच्च सम्भूता हि सञ्ञाति.

पथवीकसिणे ¶ सो पथवीसञ्ञी होति, न पकतिपथवियं. तस्साति पथवीकसिणस्स. तेहीति ¶ गण्डादीहि. सुट्ठु विहतन्ति यथा वलीनं लेसोपि न होति, एवं सम्मदेव आकोटितं. नदीतळाकादीनं तीरप्पदेसो उदकस्स आकरट्ठेन कूलं, उन्नतभावतो उग्गतं कूलं वियाति उक्कूलं, भूमिया उच्चट्ठानं. विगतं कूलन्ति विक्कूलं, नीचट्ठानं. तेनाह ‘‘उच्चनीच’’न्ति. एकं सञ्ञन्ति एकं पथवीतिसञ्ञंयेव.

१८२. सतिपि सङ्खारनिमित्तविरहे यादिसानं निमित्तानं अभावेन ‘‘अनिमित्त’’न्ति वुच्चति, तानि दस्सेतुं, ‘‘निच्चनिमित्तादिविरहितो’’ति वुत्तं. चतुमहाभूतिकं चतुमहाभूतनिस्सितं. सळायतनपटिसंयुत्तं चक्खायतनादिसळायतनसहितं.

१८३. विपस्सनाय पटिविपस्सनन्ति धम्मानञ्च पुन विपस्सनं. इधाति अत्तनो पच्चक्खभूतयथाधिगतमग्गफलं वदतीति आह – ‘‘अरियमग्गे चेव अरियफले चा’’ति. उपादिसेसदरथदस्सनत्थन्ति सब्बसो किलेसुपधिया पहीनाय खन्धोपधि अविसिट्ठा, तप्पच्चया दरथा उपादिसेसदरथा, तं दस्सनत्थं. यस्मा विसयतो गामसञ्ञा ओळारिका, मनुस्ससञ्ञा सुखुमा, तस्मा मनुस्ससञ्ञाय गामसञ्ञं निवत्तेत्वा. यस्मा पन मनुस्ससञ्ञापि सभागवत्थुपरिग्गहतो ओळारिका, सभागवत्थुतो अरञ्ञसञ्ञा सुखुमा, तस्मा अरञ्ञसञ्ञाय मनुस्ससञ्ञं निवत्तेत्वा. पथवीसञ्ञादिनिवत्तने कारणं हेट्ठा सुत्तन्तरेसु च वुत्तमेव. अनुपुब्बेनाति मग्गप्पटिपाटिया. निच्चसारादीनं सब्बसो अवत्थुताय अच्चन्तमेव सुञ्ञत्ता अच्चन्तसुञ्ञता.

१८४. सुञ्ञतफलसमापत्तिन्ति सुञ्ञतविमोक्खस्स फलभूतत्ता, सुञ्ञतानुपस्सनाय वसेन समापज्जितब्बत्ता च सुञ्ञतफलसमापत्तिन्ति लद्धनामं अरहत्तफलसमापत्तिं. यस्मा अतीते पच्चेकसम्बुद्धा अहेसुं, अनागते भविस्सन्ति, इदानि पन बुद्धसासनस्स धरमानत्ता पच्चेकबुद्धा न वत्तन्ति, तस्मा पच्चेकबुद्धग्गहणं अकत्वा, ‘‘एतरहिपि बुद्धबुद्धसावकसङ्खाता’’इच्चेव वुत्तं. न हि बुद्धसासने धरन्ते पच्चेकबुद्धा भवन्ति. सेसं सुविञ्ञेय्यमेव.

चूळसुञ्ञतसुत्तवण्णनाय लीनत्थप्पकासना समत्ता.

२. महासुञ्ञतसुत्तवण्णना

१८५. छविवण्णेन ¶ ¶ सो काळो, न नामेन. पलालसन्थारोति आदीनीति आदि-सद्देन कोच्छचिमिलिकाकटसारादीनं गहणं. गणभिक्खूनन्ति गणबन्धनवसेन भिक्खूनं.

यदि संसयो नाम नत्थि, ‘‘सम्बहुला नु खो’’ति इदं कथन्ति आह ‘‘वितक्कपुब्बभागा’’तिआदि. तत्थ वितक्को पुब्बभागो एतिस्साति वितक्कपुब्बभागा, पुच्छा. सा ‘‘सम्बहुला नो एत्थ भिक्खूविहरन्ती’’ति वचनं, वितक्को पन ‘‘सम्बहुला नु खो इध भिक्खू विहरन्ती’’ति इमिना आकारेन तदा भगवतो उप्पन्नो चित्तसङ्कप्पो, तस्स परिवितक्कस्स तब्भावजोतनोयं नु-कारो वुत्तोति दस्सेन्तो आह – ‘‘वितक्कपुब्बभागे चायं नु-कारो निपातमत्तो’’ति. किञ्चापि गच्छन्तो दिस्वा, ‘‘सम्बहुला नो एत्थ भिक्खू विहरन्ती’’ति पुच्छावसेन भगवता वुत्तो, अथ खो ‘‘न खो, आनन्द, भिक्खु सोभति सङ्गणिकारामो’’तिआदि (म. नि. ३.१८५) उपरिदेसनावसेन मत्थकं गच्छन्ते अविनिच्छितो नाम न होति, अथ खो विसुं विनिच्छितो एव होति, दिस्वा निच्छिनित्वाव कथासमुट्ठापनत्थं तथा पुच्छति. तथा हि वुत्तं – ‘‘जानन्तापि तथागता पुच्छन्ती’’ति (पारा. १६). तेनाह ‘‘इतो किरा’’तिआदि.

यथा नदीओतिण्णं उदकं यथानिन्नं पक्खन्दति, एवं सत्ता धातुसो संसन्दन्ति, तस्मा ‘‘गणवासो नदीओतिण्णउदकसदिसो’’ति वुत्तं. इदानि तमत्थं वित्थारतो दस्सेतुं – ‘‘निरयतिरच्छानयोनी’’तिआदि वुत्तं. कुरुविन्दादिन्हानीयचुण्णानि सण्हसुखुमभावतो नाळियं पक्खित्तानि निरन्तरानेव तिट्ठन्तीति आह – ‘‘चुण्णभरिता नाळि विया’’ति. सत्तपण्णास कुलसतसहस्सानीति सत्तसतसहस्साधिकानि पञ्ञास कुलानंयेव सतसहस्सानि, मनुस्सानं पन वसेन सत्त कोटियो तदा तत्थ वसिंसु.

ततो चिन्तेसि, कथं? कामञ्चायं लोकपकति, मय्हं पन सासने अयुत्तोव सोति आह – ‘‘मया’’तिआदि. धम्मन्ति सभावसिद्धं. संवेगोति सहोत्तप्पञाणं वुच्चति. न खो पनेतं सक्का गिलानुपट्ठानओवादानुसासनिआदिवसेन समागमस्स इच्छितब्बत्ता. गणभेदनन्ति गणसङ्गणिकाय विवेचनं.

१८६. कतपरिभण्डन्ति ¶ ¶ पुब्बे कतसंविधानस्स चीवरस्स वुत्ताकारेन पटिसङ्खरणं. नोति अम्हाकं. अनत्तमनोति अनाराधितचित्तो.

सकगणेन सहभावतो सङ्गणिकाति आह ‘‘सकपरिससमोधान’’न्ति. गणोति पन इध जनसमूहोति वुत्तं ‘‘नानाजनसमोधान’’न्ति. सोभति यथानुसिट्ठं पटिपज्जमानतो. कामतो निक्खमतीति निक्खमो, एवं निक्खमवसेन उप्पन्नं सुखं. गणसङ्गणिकाकिलेससङ्गणिकाहि पविवित्ति पविवेको. पविवेकवसेन उप्पन्नं सुखं. रागादीनं उपसमावहं सुखं उपसमसुखं. मग्गसम्बोधावहं सुखं सम्बोधिसुखं. निकामेतब्बस्स, निकामं वा लाभी निकामलाभी. निदुक्खं सुखेनेव लभतीति अदुक्खलाभी. कसिरं वुच्चति अप्पकन्ति आह – ‘‘अकसिरलाभीति विपुललाभी’’ति.

सामायिकन्ति समये किलेसविमुच्चनं अच्चन्तमेवाति सामायिकं म-कारे अ-कारस्स दीघं कत्वा. तेनाह – ‘‘अप्पितप्पितसमये किलेसेहि विमुत्त’’न्ति. कन्तन्ति अङ्गसन्तताय आरम्मणसन्तताय च कमनीयं मनोरम्मं. असामायिकं अच्चन्तविमुत्तं.

एत्तावतातिआदिना सङ्गणिकारामस्स विसेसाधिगमस्स अन्तरायिकभावं अन्वयतो ब्यतिरेकतो च सह निदस्सनेन दस्सेति. तत्थ सा दुविधा अन्तरायिकता वोदानधम्मानं अनुप्पत्तिहेतुका, संकिलेसधम्मानं उप्पत्तिहेतुका च.

ते पठमं ‘‘सङ्गणिकारामो’’तिआदिना विभावेत्वा इतरं विभावेतुं, ‘‘इदानि दोसुप्पत्तिं दस्सेन्तो’’तिआदि वुत्तं. ‘‘अट्ठिञ्च पटिच्च न्हारुञ्च पटिच्च चम्मञ्च पटिच्च मंसञ्च पटिच्च आकासो परिवारितो रूपन्त्वेव सङ्खं गच्छती’’तिआदीसु (म. नि. १.३०६) विय इध रूपसद्दो करजकायपरियायोति ‘‘रूपन्ति सरीर’’न्ति आह. ‘‘नाहं, आनन्द…पे… दोमनस्सुपायासा’’ति कस्मा वुत्तं? ननु काये च जीविते च अनपेक्खचित्तानं आरद्धविपस्सकानम्पि असप्पायवज्जनसप्पायसेवनवसेन कायस्स परिहरणं होतीति? सच्चं, तं पन यो कल्लसरीरं निस्साय धम्मसाधनाय अनुयुञ्जितुकामो होति, तस्सेव धम्मसाधनतावसेन. धम्मसाधनभावञ्हि अपेक्खित्वा असप्पायं वज्जेत्वा सप्पायवसेन पोसेत्वा सुट्ठुतरं हुत्वा ¶ अनुयुञ्जनतो कायस्स परिहरणं, न सो काये अभिरतो नाम होति पच्चवेक्खणायत्तत्ता अपेक्खाय विनोदितब्बो तादिसोति. उपालिगहपतिनोति एत्थापि ‘‘दसबलसावकत्तुपगमनसङ्खातेना’’ति आनेत्वा योजेतब्बं.

१८७. महाकरुणावसेन ¶ परिवुताय परिसाय मज्झे निसिन्नोपि एकन्तविवेकज्झासयत्ता एककोव. एतेन सत्थुनो पविवित्तस्स पविवेकत्तेन विवित्ततं दस्सेति. रूपारूपपटिभागनिमित्तेहि निवत्तनत्थं ‘‘रूपादीनं सङ्खतनिमित्तान’’न्ति वुत्तं. अतिविय सन्ततरपणीततमभावेन विसेसतो सिनोति बन्धतीति विसयो, सो एव ससन्ततिपरियापन्नताय अज्झत्तं. किं पन तन्ति आह – ‘‘सुञ्ञतन्ति सुञ्ञतफलसमापत्ति’’न्ति. उपधिविवेकताय असङ्खता धातु इध विवेकोति अधिप्पेतोति आह – ‘‘विवेकनिन्नेना’’तिआदि. भङ्गमत्तम्पि असेसेत्वा आसवट्ठानियानञ्च धम्मानं तत्थ विगतत्ता तेसं वसेन विगतन्तेन, एवंभूतं तेसं ब्यन्तिभावं पत्तन्ति पाळियं ‘‘ब्यन्तिभूतेना’’ति वुत्तं. उय्योजनं विस्सज्जनं, तं एतस्स अत्थि, उय्योजेति विस्सज्जेतीति वा उय्योजनिकं. यस्मा न सब्बकथा उय्योजनवसेनेव पवत्तति, तस्मा वुत्तं ‘‘उय्योजनिकपटिसंयुत्त’’न्ति.

तेलपाकं गण्हन्तो वियाति यथा तेलपाको नाम परिच्छिन्नकालो न अतिक्कमितब्बो, एवं अत्तनो समापत्तिकालं अनतिक्कमित्वा. यथा हि कुसलो वेज्जो तेलं पचन्तो तं तं तेलकिच्चं चिन्तेत्वा यदि वा पत्थिन्नपाको, यदि वा मज्झिमपाको, यदि वा खरपाको इच्छितब्बो, तस्स कालं उपधारेत्वा पचति, एवं भगवा धम्मं देसेन्तो वेनेय्यानं ञाणपरिपाकं उपधारेत्वा तं तं कालं अनतिक्कमित्वा धम्मं देसेत्वा परिसं उय्योजेन्तो च विवेकनिन्नेनेव चित्तेन उय्योजेति. द्वे पञ्चविञ्ञाणानिपि तदभिनीहतमनोविञ्ञाणवसेन निब्बाननिन्नानेव. बुद्धानञ्हि सङ्खारानं सुट्ठु परिञ्ञातताय पणीतानम्पि रूपादीनं आपाथगमने पगेव इतरेसं पटिकूलताव सुपाकटा हुत्वा उपट्ठाति, तस्मा घम्माभितत्तस्स विय सीतजलट्ठाननिन्नता निब्बाननिन्नमेव चित्तं होति, तस्स अतिविय सन्तपणीतभावतो.

१८८. अज्झत्तमेवाति ¶ इध झानारम्मणं अधिप्पेतन्ति आह ‘‘गोचरज्झत्तमेवा’’ति. इध नियकज्झत्तं सुञ्ञतं. अपगुणपादकज्झानञ्हि एत्थ ‘‘नियकज्झत्त’’न्ति अधिप्पेतं विपस्सनाविसेसस्स अधिप्पेतत्ता, नियकज्झत्तं निज्जीवनिस्सत्ततं, अनत्ततन्ति अत्थो. असम्पज्जनभावजाननेनाति इदानि मे कम्मट्ठानं वीथिपटिपन्नं न होति, उप्पथमेव पवत्ततीति जाननेन.

कस्मा पनेत्थ भगवता विपस्सनाय एव पादके झाने अवत्वा पादकज्झानं गहितन्ति आह – ‘‘अप्पगुणपादकज्झानतो’’तिआदि. न पक्खन्दति सम्मा न समाहितत्ता. सो पन ‘‘अज्झत्तधम्मा ¶ मय्हं निज्जटा निगुम्बा हुत्वा न उपट्ठहन्ति, हन्दाहं बहिद्धाधम्मे मनसि करेय्यं एकच्चेसु सङ्खारेसु उपट्ठितेसु इतरेपि उपट्ठहेय्युमेवा’’ति परस्स…पे… मनसि करोति. पादकज्झानवसेन विय सम्मसितज्झानवसेनपि उभतोभागविमुत्तो होतियेवाति आह – ‘‘अरूपसमापत्तियं नु खो कथन्ति आनेञ्जं मनसि करोती’’ति. न मे चित्तं पक्खन्दतीति मय्हं विपस्सनाचित्तं वीथिपटिपन्नं हुत्वा न वहतीति. पादकज्झानमेवाति विपस्सनाय पादकभूतमेव झानं. पुनप्पुनं मनसि कातब्बन्ति पुनप्पुनं समापज्जितब्बं विपस्सनाय तिक्खविसदतापादनाय. अवहन्ते निपुणाभावेन छेदनकिरियाय अप्पवत्तन्ते. समापज्जित्वा विपस्सनाय तिक्खकम्मकरणं समथविपस्सनाविहारेनाति आह – ‘‘कम्मट्ठाने मनसिकारो वहती’’ति.

१८९. सम्पज्जति मेति वीथिपटिपत्तिया पुब्बेनापरं विसेसाभावतो सम्पज्जति मे कम्मट्ठानन्ति जाननेन. इरियापथं अहापेत्वाति यथा परिस्समो नागच्छति, एवं अत्तनो बलानुरूपं तस्स कालं नेत्वा पमाणमेव पवत्तनेन इरियापथं अहोपेत्वा. सब्बवारेसूति ठाननिसज्जासयनवारेसु. कथावारेसु पन विसेसं तत्थ तत्थ वदन्ति. इदं वुत्तन्ति इदं, ‘‘इमिना विहारेना’’तिआदिवचनं वुत्तं.

१९०. कामवितक्कादयो ओळारिककामरागब्यापादसभागाति आह – ‘‘वितक्कपहानेन द्वे मग्गे कथेत्वा’’ति. कामगुणेसूति निद्धारणे भुम्मं. किस्मिञ्चिदेव किलेसुप्पत्तिकारणेति तस्स पुग्गलस्स किलेसुप्पत्तिकारणं ¶ सन्धाय वुत्तं, अञ्ञथा सब्बेपि पञ्च कामगुणा किलेसुप्पत्तिकारणमेव. समुदाचरतीति समुदाचारोति आह ‘‘समुदाचरणतो’’ति. सो पन यस्मा चित्तस्स, न सत्तस्स, तस्मा वुत्तं पाळियं ‘‘चेतसो’’ति. म-कारो पदसन्धिकरो ए-कारस्स च अकारो कतोति आह ‘‘एवं सन्ते एतन्ति.

१९१. अनुसयोति मानानुसयो भवरागानुसयो अविज्जानुसयोति तिविधोपि अनुसयो पहीयति अरहत्तमग्गेन. वुत्तनयेनेवाति, ‘‘ततो मग्गानन्तरं फलं, फलतो वुट्ठाय पच्चवेक्खमानो पहीनभावं जानाति, तस्स जाननेन सम्पजानो होती’’ति वुत्तनयेन.

कुसलतो आयातीति आयतो, सो एतेसन्ति कुसलायतिका. तेनाह ‘‘कुसलतो आगता’’ति. तं पन नेसं कुसलायतिकत्तं उपनिस्सयवसेन होति सहजातवसेनपीति तदुभयं दस्सेतुं, ‘‘सेय्यथिद’’न्तिआदि वुत्तं.

यस्मा ¶ पन यथावुत्तधम्मेसु केचि लोकिया, केचि लोकुत्तरा; अथ कस्मा विसेसेन ‘‘लोकुत्तरा’’ति वुत्तन्ति आह – ‘‘लोके उत्तरा विसिट्ठा’’ति. तेन लोकियधम्मेसु उत्तमभावेन झानादयो लोकुत्तरा वुत्ता, न लोकस्स उत्तरणतोति दस्सेति. यं किञ्चि महग्गतचित्तं मारस्स अविसयो अकामावचरत्ता, पगेव तं विपस्सनाय पादकभूतं सुविक्खालितमलन्ति आह – ‘‘जानितुं न सक्कोती’’ति. एको आनिसंसो अत्थि भावनानुयोगस्स सप्पायधम्मकथापटिलाभो.

१९२. एतदत्थन्ति केवलस्स सुतस्स अत्थाय. सप्पायासप्पायवसेनाति कस्मा वुत्तं? ननु सप्पायवसेन दसकथावत्थूनि आगतानीति? सच्चमेतं, असप्पायकथावज्जनपुब्बिकाय सप्पाय कथाय वसेन आगतत्ता ‘‘सप्पायासप्पायवसेन आगतानी’’ति वुत्तं. सुतपरियत्तिवसेनाति सरूपेन तत्थ अनागतानिपि दसकथावत्थूनि सुत्तगेय्यादिअन्तोगधत्ता, ‘‘सुतपरियत्तिवसेन आगतानी’’ति वुत्तं. परिपूरणवसेन सरूपतो आगतत्ता इमस्मिं ठाने ठत्वा कथेतब्बानि. अत्थोति सामञ्ञत्थो.

१९३. अनुआवत्तन्तीति ¶ अनुअनु अभिमुखा हुत्वा वत्तन्ति, पयिरुपासनादिवसेन अनुकूलयन्ति. मुच्छनतण्हन्ति पच्चयेसु मुच्छनाकारं. तण्हाय पत्थना नाम तेनाकारेन पवत्तीति आह – ‘‘पत्थेति पवत्तेती’’ति. किलेसूपद्दवेनाति किलेससङ्खातेन उपद्दवेन. किलेसा हि सत्तानं महानत्थकरणतो ‘‘उपद्दवो’’ति वुच्चन्ति. अत्तनो अब्भन्तरे उप्पन्नेन किलेसूपद्दवेन अन्तेवासिनो, उपद्दवो अन्तेवासूपद्दवो, ब्रह्मचरियस्स उपद्दवो ब्रह्मचारुपद्दवोति इममत्थं ‘‘सेसुपद्दवेसुपि एसेव नयो’’ति इमिना अतिदिसति. गुणमरणं कथितं, न जीवितमरणं.

अप्पलाभाति अप्पमत्तकलाभी विसेसानं. एवं वुत्तोति यथावुत्तब्रह्मचारुपद्दवो दुक्खविपाकतरो चेव कटुकविपाकतरो चाति एवं वुत्तो. आचरियन्तेवासिकूपद्दवो हि बाहिरकसमयवसेन वुत्तो, ब्रह्मचारुपद्दवो पन सासनवसेन. दुरक्खाते हि धम्मविनये दुप्पटिपत्ति न महासावज्जा मिच्छाभिनिवेसस्स सिथिलवायामभावतो; स्वाख्याते पन धम्मविनये दुप्पटिपत्ति महासावज्जा महतो अत्थस्स बाहिरभावकरणतो. तेनाह ‘‘सासने पना’’तिआदि.

१९६. तस्माति इदं पुब्बपरापेक्खं पुरिमस्स च अत्थस्स कारणभावेन पच्चामसनन्ति आह ¶ ‘‘यस्मा’’तिआदि. मित्तं एतस्स अत्थीति मित्तवा, तस्स भावो मित्तवता, ताय. मित्तवसेन पटिपज्जनन्ति आह ‘‘मित्तपटिपत्तिया’’ति. सपत्तवतायाति एत्थापि एसेव नयो.

दुक्कटदुब्भासितमत्तम्पीति इमिना पगेव इतरं वीतिक्कमन्तोति दस्सेति. सावकेसु हितपरक्कमनं ओवादानुसासनीहि पटिपज्जनन्ति आह – ‘‘तथा न पटिपज्जिस्सामी’’ति. आमकमत्तन्ति कुलालभाजनं वुच्चति. नाहं तुम्हेसु तथा पटिपज्जिस्सामीति कुम्भकारो विय आमकभाजनेसु अहं तुम्हेसु केवलं जानापेन्तो न पटिपज्जिस्सामि. निग्गण्हित्वाति नीहरित्वा. लोकियगुणापि इध सारोत्वेव अधिप्पेता लोकुत्तरगुणानं अधिट्ठानभावतो. सेसं सुविञ्ञेय्यमेव.

महासुञ्ञतसुत्तवण्णनाय लीनत्थप्पकासना समत्ता.

३. अच्छरियब्भुतसुत्तवण्णना

१९७. विभत्तिपतिरूपका ¶ ¶ च निपाता होन्तीति यथारहं तंतंविभत्तिअत्थदीपका, इध पच्चत्तवचनो यत्रसद्दो, हिसद्दो हेतुअत्थो, नामसद्दो अच्छरियत्थो, पदत्तयस्स पन अच्छरियत्थनिद्दिट्ठताय ‘‘अच्छरियत्थे निपातो’’ति वुत्तं. एकंसतो पनेतं पदत्तयं. तथा हि वक्खति, ‘‘यत्राति निपातवसेन अनागतवचन’’न्ति. पपञ्चसद्दो हेट्ठा वुत्तो. छिन्नवटुमेति इमिना सब्बकिलेसवट्टस्स अकुसलकम्मवट्टस्स च छिन्नत्ता विपाकवट्टस्स च उपरि वक्खमानत्ता आह – ‘‘वटुमन्ति कुसलाकुसलकम्मवट्टं वुच्चती’’ति. निपातवसेन यत्रसद्दयोगेन. अनागतवचनन्ति इदं अनागतवचनसदिसत्ता वुत्तं. अनागतत्थवाची हि अनागतवचनं, अत्थो चेत्थ अतीतोति. अनुस्सरीति इदं अनुस्सरितभावं सन्धाय वुत्तं – ‘‘न अनुस्सरिस्सती’’ति सद्दपयोगस्स अतीतविसयत्ता. यदा पन तेहि भिक्खूहि या कथा पवत्तिता, ततो पच्छापि भगवतो तेसं बुद्धानं अनुस्सरणं होतियेव.

खत्तियजच्चातिआदिकालतो पट्ठाय असम्भिन्नाय खत्तियजातिया उदितोदिताय. ब्रह्मजच्चाति ब्राह्मणजच्चा. एवंगोत्तेपि एसेव नयो. लोकियलोकुत्तरसीलेनाति पारमितासम्भूतेन बुद्धावेणिकत्ता अनञ्ञसाधारणेन लोकियेन लोकुत्तरेन च सीलेन. एवंसीलाति अनवसेससीलानं विसुं पच्चवेक्खणकरणेन एवंसीलाति अनुस्सरिस्सति. एस नयो सेसेसु. यथा विज्जाभागिया विज्जासम्पयुत्तधम्मा, एवं समाधिपक्खा समाधिसम्पयुत्तधम्मापि सतिवीरियादयोति आह – ‘‘हेट्ठा समाधिपक्खानं धम्मानं गहितत्ता विहारो गहितोवा’’ति. तस्मा समाधिपक्खधम्मविनिमुत्तो एव इध विहारो अधिप्पेतोति वुत्तं ‘‘इदं ही’’तिआदि.

यथा वा अट्ठसमापत्तिविपस्सनामग्गफलसङ्गहिता लोकियलोकुत्तरा समाधिपञ्ञा ‘‘एवंधम्मा एवंपञ्ञा’’ति पदेहि हेट्ठा गहितापि यथासकं पटिपक्खतो मुच्चनस्स पवत्तिविसेसं उपादाय ‘‘एवंविमुत्ता’’ति एत्थ पुन गहिता, तथा ‘‘एवंधम्मा’’ति एत्थ गहितापि समाधिपक्खधम्मा दिब्बब्रह्मआनेञ्जअरियविहारसङ्खातं अत्तनो पवत्तिविसेसं उपादाय, ‘‘एवंविहारी’’ति एत्थ पुन गहिताति वुच्चमाने न कोचि विरोधो. फलधम्मानं पवत्तिकालेपि ¶ किलेसानं पटिप्पस्सद्धि न तंआनुभावजाता, अथ खो अरियमग्गेन किलेसानं समुच्छिन्नत्ताति ¶ आह – ‘‘मग्गानुभावेन किलेसानं पटिपस्सद्धन्ते उप्पन्नत्ता’’ति. यो यं पजहति, सो पहायको पहातब्बतो विमुत्तोति वुच्चति विसंसट्ठभावतोति पहानविभागेन वुच्चमाने अपहायकस्स निब्बानस्स कथं विमुत्तता? विसंसट्ठाभावतो एव. तञ्हि पकतियाव सब्बसो किलेसेहि विसंसट्ठं विनिस्सटं सुविदूरविदूरे ठितं, तस्मास्स ततो निस्सटत्ता निस्सरणविमुत्ति निस्सरणपहानन्ति वुच्चतीति आह ‘‘निब्बान’’न्तिआदि.

१९९. इमे तथागतस्स अच्छरियअब्भुतधम्मा, न सावकविसया, मम पन देसना तया सुता एवाति ते थेरस्सेव भारं करोन्तो, ‘‘तं भिय्योसोमत्ताय पटिभन्तू’’ति आह. सतो सम्पजानोति एत्थ कालभेदवसेन लब्भमानम्पि सम्पजानभावं अनामसित्वा गतिविभागेन तं दस्सेतुं, ‘‘द्वे सम्पजञ्ञानी’’तिआदि वुत्तं – अट्ठ वरे गण्हन्तोति एत्थ कथं वरं देवता देति, परस्स दीयमानञ्च तं कथं परस्स समिज्झतीति? कम्मबलेनेव. यदि हि तं कम्मं कतोकासं यस्स तदपदेसेन फलं विपच्चति, एवं देवताय तस्स वरं दिन्नं, इतरेन च लद्धन्ति वोहारो होतीति. अपिच परस्स पत्थितवरानि नाम विपच्चमानस्स कम्मस्स पच्चयभूतो पयोगविसेसोति दट्ठब्बं. तानि विपच्चने एकन्तिकानिपि अप्पेसक्खा देवता – ‘‘अयमस्स पत्थना समिज्झिस्सति, नो’’ति न जानन्ति, सक्को पन पञ्ञवा तानि एकच्चं जानातियेव. तेन वुत्तं – ‘‘सक्केन पसीदित्वा दिन्ने अट्ठ वरे गण्हन्तो’’तिआदि.

पठमजवनवारेति उप्पन्नस्स सब्बपठमजवनवारे. सो हि पटिसन्धिया आसन्नभावतो अविसदो होति, देवभावे निकन्तिवसेन उप्पज्जनतो न जानाति. अञ्ञाहि देवताहि असाधारणजाननं होति दुतियजवनवारतो पट्ठाय पवत्तनतो.

अञ्ञेपि देवातिआदिना बोधिसत्तस्स तत्थ सम्पजञ्ञेनेव ठितभावं ब्यतिरेकमुखेन विभावेति. आहारूपच्छेदेन कालङ्करोन्तीति इदं खिड्डापदोसिकवसेन वुत्तं. इतरेसम्पि दिब्बभोगेहि मुच्छिततं अज्झापन्नानं तिट्ठन्तानं सम्पजञ्ञाभावो होतियेव. किं तथारूपं आरम्मणं ¶ नत्थीति यथारूपं उळारं पणीतञ्च आरम्मणं पटिच्च ते देवा संमुच्छिता आहारूपच्छेदम्पि करोन्ति, किं तथारूपं उळारं पणीतञ्च आरम्मणं बोधिसत्तस्स नत्थीति बोधिसत्तस्स सम्पजञ्ञानुभावं विभावेतुं चोदनं समुट्ठापेति? बोधिसत्तो हि यत्थ यत्थ निब्बत्तति, तत्थ तत्थ अञ्ञे सत्ते दसहि विसेसेहि अधिग्गण्हाति, पगेव तत्थ देवभूतो, तथापि ‘‘सतो सम्पजानो’’ति अयमेत्थ अच्छरियधम्मो वुत्तो.

२००. सम्पत्तिभवे ¶ दीघायुकता नाम पञ्ञाबलेन होति, बोधिसत्तो च महापञ्ञो, तस्मा तत्थ तत्थ भवे तेन दीघायुकेन भवितब्बन्ति अधिप्पायेन, ‘‘सेसत्तभावेसु किं यावतायुकं न तिट्ठती’’ति चोदेति. इतरो ‘‘आम न तिट्ठती’’ति पटिजानित्वा, ‘‘अञ्ञदा ही’’तिआदिना तत्थ कारणमाह. ‘‘इध न भविस्सामी’’ति अधिमुच्चनवसेन कालकिरिया अधिमुत्तिकालकिरिया. पारमिधम्मानञ्हि उक्कंसप्पत्तिया तस्मिं तस्मिं अत्तभावे अभिञ्ञासमापत्तीहि सन्तानस्स विसेसितत्ता अत्तसिनेहस्स तनुभावेन सत्तेसु च महाकरुणाय उळारभावेन अधिट्ठानस्स तिक्खविसदभावापत्तिया बोधिसत्तानं अधिप्पाया समिज्झन्ति, चित्ते विय कम्मेसु च तेसं वसिभावो, तस्मा यत्थुपपन्नानं पारमियो सम्मदेव परिब्रूहेन्ति, वुत्तनयेन कालं कत्वा तत्थ उपपज्जन्ति. तथा हि अयं महासत्तो इमस्मिंयेव कप्पे नानाजातीसु अपरिहीनज्झानो कालं कत्वा ब्रह्मलोके निब्बत्तो अप्पकमेव कालं तत्थ ठत्वा ततो चवित्वा इध निब्बत्तो. तेनाह – ‘‘अयं कालकिरिया अञ्ञेसं न होती’’ति. सब्बपारमीनं पूरितत्ताति इमिना पयोजनाभावतो तत्थ ठत्वा अधिमुत्तिकालकिरिया नाम न होतीति दस्सेति. अपिच चरिमभवे चतुमहानिधिसमुट्ठानपुब्बिकाय दिब्बसम्पत्तिसदिसाय महासम्पत्तिया निब्बत्ति विय बुद्धभूतस्स असदिसदानादिवसेन अनञ्ञसाधारणलाभुप्पत्ति विय च इतो परं महापुरिसस्स दिब्बसम्पत्तिअनुभवनं नाम नत्थीति यावतायुकट्ठानं उस्साहजातस्स पुञ्ञसम्भारस्स वसेनाति दट्ठब्बं. अयञ्हेत्थ धम्मता.

मनुस्सगणनावसेन, न देवगणनावसेन. पुब्बनिमित्तानीति चुतिया पुब्बनिमित्तानि. अमिलायित्वाति एत्थ अमिलातग्गहणेनेव तासं मालानं वण्णसम्पदापि गन्धसम्पदापि सोभासम्पदापि दस्सिताति दट्ठब्बं. बाहिरब्भन्तरानं ¶ रजोजल्लानं लेसस्सपि अभावतो देवानं सरीरगतानि वत्थानि सब्बकालं परिसुद्धपभस्सरानेव हुत्वा तिट्ठन्तीति आह ‘‘वत्थेसुपि एसेव नयो’’ति. नेव सीतं न उण्हन्ति यस्स सीतस्स पतीकारवसेन अधिकं सेवियमानं उण्हं, सयमेव वा खरतरं हुत्वा अधिभवन्तं सरीरे सेदं उप्पादेय्य, तादिसं नेव सीतं न उण्हं होति. तस्मिं कालेति यथावुत्ते मरणासन्नकाले. बिन्दुबिन्दुवसेनाति मुत्तगुळिका विय बिन्दु बिन्दु हुत्वा सेदा मुच्चन्ति. दन्तानं खण्डितभावो खण्डिच्चं. केसानं पलितभावो पालिच्चं. आदि-सद्देन वलित्तचतं सङ्गण्हाति. किलन्तरूपो अत्तभावो होति, न पन खण्डिच्चपालिच्चादीहीति अधिप्पायो. उक्कण्ठिताति अनभिरति, सा नत्थि उपरूपरि उळारुळारानमेव भोगानं विसेसतो रुचिजनकानं उपतिट्ठनतो.

पण्डिता एवाति बुद्धिसम्पन्ना एव देवता. यथा देवता ‘‘सम्पति जाता कीदिसेन पुञ्ञकम्मेन ¶ इध निब्बत्ता’’ति चिन्तेत्वा, ‘‘इमिना नाम पुञ्ञकम्मेन इध निब्बत्ता’’ति जानन्ति, एवं अतीतभवे अत्तना कतं एकच्चं अञ्ञम्पि पुञ्ञं जानन्तियेव महापुञ्ञाति आह – ‘‘ये महापुञ्ञा’’तिआदि.

न पञ्ञायन्ति चिरतरकालत्ता परमायुनो. अनिय्यानिकन्ति न निय्यानावहं सत्तानं अभाजनभावतो. सत्ता न परमायुनो होन्ति नाम पापुस्सन्नतायाति आह – ‘‘तदा हि सत्ता उस्सन्नकिलेसा होन्ती’’ति. एत्थाह – ‘‘कस्मा सम्बुद्धा मनुस्सलोके एव उप्पज्जन्ति, न देवब्रह्मलोकेसू’’ति. देवलोके ताव नुप्पज्जन्ति ब्रह्मचरियवासस्स अनोकासभावतो तथा अनच्छरियभावतो. अच्छरियधम्मा हि बुद्धा भगवन्तो, तेसं सा अच्छरियधम्मता देवत्तभावे ठितानं न पाकटा होति यथा मनुस्सभूतानं. देवभूते हि सम्मासम्बुद्धे दिस्समानं बुद्धानुभावं देवानुभावतोव लोको दहति, न बुद्धानुभावतो, तथा सति सम्मासम्बुद्धे नाधिमुच्चति न सम्पसीदति इस्सरकुत्तग्गाहं न विस्सज्जेति, देवत्तभावस्स च चिरकालपवत्तनतो एकच्चसस्सतवादतो न परिमुच्चति. ‘‘ब्रह्मलोके नुप्पज्जन्ती’’ति एत्थापि एसेव ¶ नयो. सत्तानं तादिसगाहविमोचनत्थञ्हि बुद्धा भगवन्तो मनुस्ससुगतियंयेव उप्पज्जन्ति; न देवसुगतियं, मनुस्ससुगतियं उप्पज्जन्तापि ओपपातिका न होन्ति, सति च ओपपातिकूपपत्तियं वुत्तदोसानतिवत्तनतो. धम्मवेनेय्यानं अत्थाय धम्मतन्तिया ठपनस्स विय धातुवेनेय्यानं अत्थाय धातूनं ठपनस्स इच्छितब्बत्ता च. न हि ओपपातिकानं परिनिब्बानतो उद्धं सरीरधातुयो तिट्ठन्ति, तस्मा न ओपपातिका होन्ति, चरिमभवे च महाबोधिसत्ता, मनुस्सभावस्स पाकटकरणाय दारपरिग्गहम्पि करोन्ता याव पुत्तमुखदस्सना अगारमज्झे तिट्ठन्ति. परिपाकगतसीलनेक्खम्मपञ्ञादिपारमिकापि न अभिनिक्खमन्ति, किं वा एताय कारणचिन्ताय? सब्बबुद्धेहि आचिण्णसमाचिण्णा, यदिदं मनुस्सभूतानंयेव अभिसम्बुज्झना, न देवभूतानन्ति अयमेत्थ धम्मता. तथा हि तदत्थो महाभिनीहारोपि मनुस्सभूतानंयेव इज्झति, न इतरेसं.

कस्मा पन सम्मासम्बुद्धा जम्बुदीपेयेव उप्पज्जन्ति, न सेसदीपेसूति? केचि ताव आहु – ‘‘यस्मा पथविया नाभिभूता बुद्धानुभावसहिता अचलट्ठानभूता बोधिमण्डभूमि जम्बुदीपेयेव उप्पज्जति, तस्मा जम्बुदीपेयेव उप्पज्जन्ती’’ति; ‘‘तथा इतरेसम्पि अविजहितट्ठानानं तत्थेव लब्भमानतो’’ति. अयं पनेत्थ अम्हाकं खन्ति – यस्मा पुरिमबुद्धानं महाबोधिसत्तानं पच्चेकबुद्धानञ्च निब्बत्तिया सावकबोधिसत्तानं सावकबोधिया अभिनीहारो सावकपारमीनं सम्भरणं परिपाचनञ्च बुद्धखेत्तभूते इमस्मिं चक्कवाळे जम्बुदीपेयेव ¶ इज्झति, न अञ्ञत्थ. वेनेय्यानं विनयनत्थो च बुद्धुप्पादोति अग्गसावकादिवेनेय्यविसेसापेक्खाय एकस्मिं जम्बुदीपेयेव बुद्धा निब्बत्तन्ति, न सेसदीपेसु. अयञ्च नयो सब्बबुद्धानं आचिण्णसमाचिण्णोति तेसं उत्तमपुरिसानं तत्थेव उप्पत्ति सम्पत्तिचक्कानं विय अञ्ञमञ्ञुपनिस्सयतो अपरापरं वत्ततीति दट्ठब्बं. तेनाह – ‘‘तीसु दीपेसु बुद्धा न निब्बत्तन्ति, जम्बुदीपेयेव निब्बत्तन्तीति दीपं पस्सती’’ति. इमिना नयेन देसनियमेपि कारणं वत्तब्बं.

इदानि च खत्तियकुलं लोकसम्मतं ब्राह्मणानम्पि पूजनीयभावतो. राजा मे पिता भविस्सतीति कुलं पस्सि पितुवसेन कुलस्स निद्दिसितब्बतो ¶ . दसन्नं मासानं उपरि सत्त दिवसानीति पस्सि तेन अत्तनो अन्तरायाभावं अञ्ञासि, तस्सा च तुसितभवे दिब्बसम्पत्तिपच्चनुभवनं.

ता देवताति दससहस्सिचक्कवाळदेवता. कथं पन ता बोधिसत्तस्स पूरितपारमिभावं भाविनञ्च सम्बुद्धभावं जानन्तीति? महेसक्खानं देवतानं वसेन, येभुय्येन च ता देवता अभिसमयभागिनो. तथा हि भगवतो च धम्मदानसंविभागे अनेकवारं दससहस्सचक्कवाळवासिदेवतासन्निपातो अहोसि.

चवामीति पजानाति चुतिआसन्नजवनेहि ञाणसहितेहि चुतिया उपट्ठितभावस्स पटिसंविदितत्ता. चुतिचित्तं न जानाति चुतिचित्तक्खणस्स इत्तरभावतो. तथा हि तं चुतूपपातञाणस्सपि अविसयो एव. पटिसन्धिचित्तेपि एसेव नयो. आवज्जनपरियायोति आवज्जनक्कमो. यस्मा एकवारं आवज्जितमत्तेन आरम्मणं निच्छिनितुं न सक्का, तस्मा तमेवारम्मणं दुतियं ततियञ्च आवज्जित्वा निच्छीयति, आवज्जनसीसेन चेत्थ जवनवारो गहितो. तेनाह – ‘‘दुतियततियचित्तवारेयेव जानिस्सती’’ति. चुतिया पुरेतरं कतिपयचित्तवारतो पट्ठाय मरणं मे आसन्नन्ति जाननतो, ‘‘चुतिक्खणेपि चवामीति पजानाती’’ति वुत्तं. पटिसन्धिया पन अपुब्बभावतो पटिसन्धिचित्तं न जानाति. निकन्तिया उप्पत्तितो परतो असुकस्मिं ठाने मया पटिसन्धि गहिताति पजानाति, दुतियजवनतो पट्ठाय जानातीति वुत्तोवायमत्थो. तस्मिं कालेति पटिसन्धिग्गहणकाले. दससहस्सी कम्पतीति एत्थ कम्पनकारणं हेट्ठा वुत्तमेव. महाकारुणिका बुद्धा भगवन्तो सत्तानं हितसुखविधानतप्परताय बहुलं सोमनस्सिकाव होन्तीति तेसं पठममहाविपाकचित्तेन पटिसन्धिग्गहणं अट्ठकथायं (दी. नि. अट्ठ. २.१७; ध. स. ४९८; म. नि. अट्ठ. ३.१९९) वुत्तं. महासीवत्थेरो पन ¶ यदिपि महाकारुणिका बुद्धा भगवन्तो सत्तानं हितसुखविधानतप्परा, विवेकज्झासया पन विसङ्खारनिन्ना सब्बसङ्खारेसु अज्झुपेक्खणबहुलाति पञ्चमेन महाविपाकचित्तेन पटिसन्धिग्गहणमाह.

पुरे पुण्णमाय सत्तमदिवसतो पट्ठायाति पुण्णमाय पुरे सत्तमदिवसतो पट्ठाय, सुक्कपक्खे नवमितो पट्ठायाति अत्थो. सत्तमे दिवसेति ¶ आसाळ्हीपुण्णमाय. इदं सुपिनन्ति इदानि वुच्चमानाकारं सुपिनं. नेसं देवियोति महाराजूनं देवियो.

सो च खो पुरिसगब्भो, न इत्थिगब्भो, पुत्तो ते भविस्सतीति एत्तकमेव ते ब्राह्मणा अत्तनो सुपिनसत्थनयेन कथेसुं. सचे अगारं अज्झावसिस्सतीतिआदि पन देवताविग्गहेन भाविनमत्थं याथावतो पवेदेसुं.

गब्भावक्कन्तियोति एत्थ गब्भो वुच्चति मातुकुच्छि, तत्थ उप्पत्ति अवक्कन्ति, ताव गब्भावक्कन्ति, याव न निक्खमति. ठितकाव निक्खमन्ति धम्मासनतो ओतरन्तो धम्मकथिको विय.

२०१. वत्तमानसमीपे वत्तमाने विय वोहरीयतीति ओक्कमतीति वुत्तन्ति आह – ‘‘ओक्कन्तो होतीति अत्थो’’ति. एवं होतीति एवं वुत्तप्पकारेनस्स सम्पजानना होति. न ओक्कममाने पटिसन्धिक्खणस्स दुविञ्ञेय्यत्ता. तथा च वुत्तं – ‘‘पटिसन्धिचित्तं न जानाती’’ति. दससहस्सचक्कवाळपत्थरणेन वा अप्पमाणो. अतिविय समुज्जलभावेन उळारो. देवानुभावन्ति देवानं पभानुभावं. देवानञ्हि पभंसो ओभासो अधिभवति, न तेसं आधिपच्चं. तेनाह ‘‘देवान’’न्तिआदि.

रुक्खगच्छादिना केनचि न हञ्ञतीति अघा, अबाधा. तेनाह ‘‘निच्चविवटा’’ति. असंवुताति हेट्ठा उपरि च केन चि न पिहिता. तेनाह ‘‘हेट्ठापि अप्पतिट्ठा’’ति. तत्थ पि-सद्देन यथा हेट्ठा उदकस्स पिधायिका पथवी नत्थीति असंवुता लोकन्तरिका, एवं उपरिपि चक्कवाळेसु विय देवविमानानं अभावतो असंवुता अप्पतिट्ठाति दस्सेति. अन्धकारो एत्थ अत्थीति अन्धकारा. चक्खुविञ्ञाणं न जायति आलोकस्साभावतो, न चक्खुनो. तथा हि ‘‘तेन ओभासेन अञ्ञमञ्ञं सञ्जानन्ती’’ति वुत्तं. जम्बुदीपे ठितमज्झन्हिकवेलायं पुब्बविदेहवासीनं अत्थङ्गमनवसेन उपड्ढं सूरियमण्डलं पञ्ञायति, अपरगोयानवासीनं ¶ उग्गमनवसेन, एवं सेसदीपेसुपीति आह – ‘‘एकप्पहारेनेव तीसु दीपेसु पञ्ञायन्ती’’ति. इतो अञ्ञथा पन द्वीसु एव दीपेसु एकप्पहारेनेव पञ्ञायतीति. एकेकाय दिसाय नव नव योजनसतसहस्सानि अन्धकारविधमनम्पि इमिना नयेन दट्ठब्बं. पभाय नप्पहोन्तीति ¶ अत्तनो पभाय ओभासितुं न अभिसम्भुणन्ति. युगन्धरपब्बतमत्थकप्पमाणे आकासे विचरणतो, ‘‘चक्कवाळपब्बतस्स वेमज्झेन चरन्ती’’ति वुत्तं.

वावटाति खादनत्थं गण्हितुं उपक्कमन्ता. विपरिवत्तित्वाति विवट्टित्वा. छिज्जित्वाति मुच्छापत्तिया ठितट्ठानतो मुच्चित्वा, अङ्गपच्चङ्गच्छेदनवसेन वा छिज्जित्वा. अच्चन्तखारेति आतपसन्तापाभावेन अतिसीतभावं सन्धाय अच्चन्तखारता वुत्ता सिया. न हि तं कप्पसण्ठानउदकं सम्पत्तिकरमहामेघवुट्ठं पथवीसन्धारकं कप्पविनासकउदकं विय खारं भवितुमरहति. तथा हि सति पथवीपि विलीयेय्य. तेसं वा पापकम्मबलेन पेतानं पकतिउदकस्स पुब्बखेळभावापत्ति विय तस्स उदकस्स तदा खारभावापत्ति होतीति वुत्तं ‘‘अच्चन्तखारे उदके’’ति. समन्ततोति सब्बभागतो छप्पकारम्पि.

२०२. चतुन्नं महाराजूनं वसेनाति वेस्सवणादिचतुमहाराजभावसामञ्ञेन.

२०३. सभावेनेवाति परस्स सन्तिके गहणेन विना अत्तनो सभावेनेव सयमेव अधिट्ठहित्वा सीलसम्पन्ना.

मनुस्सेसूति इदं पकतिचारित्तवसेन वुत्तं – ‘‘मनुस्सित्थिया नाम मनुस्सपुरिसेसु पुरिसाधिप्पायचित्तं उप्पज्जेय्या’’ति, बोधिसत्तमातु पन देवेसूपि तादिसं चित्तं नुप्पज्जतेव. यथा बोधिसत्तस्स आनुभावेन बोधिसत्तस्स मातु पुरिसाधिप्पायचित्तं नुप्पज्जति, एवं तस्स आनुभावेनेव सा केनचि पुरिसेन अनतिक्कमनीयाति आह – ‘‘पादा न वहन्ति, दिब्बसङ्खलिका विय बज्झन्ती’’ति.

पुब्बे ‘‘कामगुणूपसंहितं चित्तं नुप्पज्जती’’ति वुत्तं, पुन ‘‘पञ्चहि कामगुणेहि समप्पिता समङ्गीभूता परिचारेती’’ति वुत्तं, कथमिदं अञ्ञमञ्ञं न विरुज्झतीति आह ‘‘पुब्बे’’तिआदि. वत्थुपटिक्खेपोति अब्रह्मचरियवत्थुपटिसेधो. तेनाह ‘‘पुरिसाधिप्पायवसेना’’ति. आरम्मणपटिलाभोति रूपादिपञ्चकामगुणारम्मणस्सेव पटिलाभो.

२०४. किलमथोति ¶ खेदो. कायस्स हि गरुभावकठिनभावादयोपि तस्सा तदा न होन्ति एव. ‘‘तिरोकुच्छिगतं पस्सती’’ति वुत्तं, कदा ¶ पट्ठाय पस्सतीति आह – ‘‘कललादिकालं अतिक्कमित्वा’’तिआदि. दस्सने पयोजनं सयमेव वदति, तस्स अभावतो कललादिकाले न पस्सति. पुत्तेनाति दहरेन मन्देन उत्तानसेय्यकेन. यं तं मातूतिआदि पकतिचारित्तवसेन वुत्तं. चक्कवत्तिगब्भतोपि हि सविसेसं बोधिसत्तगब्भो परिहारं लभति पुञ्ञसम्भारस्स सातिसयत्ता, तस्मा बोधिसत्तमाता अतिविय सप्पायाहाराचारा च हुत्वा सक्कच्चं परिहरति. पुरत्थाभिमुखोति मातु पुरत्थाभिमुखो. इदानि तिरोकुच्छिगतस्स दिस्समानताय अब्भन्तरं बाहिरञ्च कारणं दस्सेतुं, ‘‘पुब्बे कतकम्म’’न्तिआदि वुत्तं. अस्साति देविया. वत्थुन्ति कुच्छिं. फलिकअब्भपटलादिनो विय बोधिसत्तमातुकुच्छितचस्स पटलभावेन आलोकस्स विबन्धाभावतो यथा बोधिसत्तमाता कुच्छिगतं बोधिसत्तं पस्सति, किमेवं बोधिसत्तोपि मातरं अञ्ञञ्च पुरतो रूपगतं पस्सति, नोति आह, ‘‘बोधिसत्तो पना’’तिआदि. कस्मा पन सति चक्खुम्हि आलोके च न पस्सतीति आह – ‘‘न हि अन्तोकुच्छियं चक्खुविञ्ञाणं उप्पज्जती’’ति. अस्सासपस्सासा विय हि तत्थ चक्खुविञ्ञाणम्पि न उप्पज्जति तज्जासमन्नाहारस्साभावतो.

२०५. यथा अञ्ञा इत्थियो विजातपच्चया तादिसेन रोगेन अभिभूतापि हुत्वा मरन्ति, बोधिसत्तमातु पन बोधिसत्ते कुच्छिगते न कोचि रोगो उप्पज्जति; केवलं आयुपरिक्खयेनेव कालं करोति, स्वायमत्थो हेट्ठा वुत्तोयेव. बोधिसत्तेन वसितट्ठानं हीतिआदिना तत्थ कारणमाह. अपनेत्वाति अग्गमहेसिट्ठानतो नीहरित्वा. अनुरक्खितुं न सक्कोतीति सम्मा गब्भपरिहारं नानुयुञ्जति, तेन गब्भो बह्वाबाधो होति. वत्थुविसदं होतीति गब्भासयो परिसुद्धो होति. मातु मज्झिमवयस्स ततियकोट्ठासे बोधिसत्तस्स गब्भोक्कमनम्पि तस्सा आयुपरिमाणविलोकनेनेव सङ्गहितं वयोवसेन उप्पज्जनकविकारस्स परिवज्जनतो, इत्थिसभावेन उप्पज्जनकविकारो पन बोधिसत्तस्स आनुभावेनेव वूपसम्मति.

सत्तमासजातोति पटिसन्धिग्गहणतो सत्तमे मासे जातो. सो सीतुण्हक्खमो न होति अतिविय सुखुमालताय. अट्ठमासजातो कामं सत्तमासजाततो बुद्धिअवयवो, एकच्चे पन चम्मपदेसा ¶ बुद्धिं पापुणन्ता घट्टनं न सहन्ति, तेन सो न जीवति. सत्तमासजातस्स पन न ताव ते जाताति वदन्ति.

ठिताव हुत्वाति निद्दुक्खताय ठिता एव हुत्वा. दुक्खस्स हि बलवभावतो तं दुक्खं असहमाना ¶ अञ्ञा इत्थियो निसिन्ना वा निपन्ना वा विजायन्ति. उपविजञ्ञाति उपगतविजायनकाला. सकलनगरवासिनोति कपिलवत्थुं परिवारेत्वा ठितेसु देवदहादीसु छसु नगरेसु वसन्ता.

देवा नं पठमं पटिग्गण्हन्तीति लोकनाथं महापुरिसं मयमेव पठमं पटिग्गण्हामाति सञ्जातगारवबहुमाना अत्तनो पीतिं पवेदेन्ता खीणासवा सुद्धावासब्रह्मानो आदितो पटिग्गण्हन्ति. सूतिवेसन्ति सूतिजग्गनधातिवेसं. एकेति उत्तरविहारवासिनो. मच्छक्खिसदिसं छविवसेन.

२०६. अजिनप्पवेणियाति अजिनचम्मेहि सिब्बेत्वा कतपवेणिया. महातेजोति महानुभावो. महायसोति महापरिवारो विपुलकित्तिघोसो च.

भग्गविभग्गाति सम्बाधट्ठानतो निक्खमनेन विभावितत्ता भग्गा विभग्गा विय च हुत्वा. तेन नेसं अविसदभावमेव दस्सेति. अलग्गो हुत्वाति गब्भासये योनिपदेसे च कत्थचि अलग्गो असत्तो हुत्वा. उदकेनाति गब्भासयगतेन उदकेन अमक्खितो निक्खमति सम्मक्खितस्स तादिसस्स उदकसेम्हादिकस्सेव तत्थ अभावतो. बोधिसत्तस्स हि पुञ्ञानुभावेन पटिसन्धिग्गहणतो पट्ठाय तं ठानं विसुद्धं परमसुगन्धगन्धकुटि विय चन्दनगन्धं वायन्तं तिट्ठति. उदकवट्टियोति उदकक्खन्धा.

२०७. मुहुत्तजातोति मुहुत्तेन जातो हुत्वा मुहुत्तमत्तोव. अनुधारियमानेति अनुकूलवसेन नीयमाने. आगतानेवाति तं ठानं उपगतानि एव.

अनेकसाखन्ति रतनमयानेकसतपतिट्ठानहीरकं. सहस्समण्डलन्ति तेसं उपरि पतिट्ठितं अनेकसहस्समण्डलहीरकं. मरूति देवा.

न ¶ खो पनेवं दट्ठब्बन्ति सत्तपदवीतिहारतो पगेव दिसाविलोकनस्स कतत्ता. तेनाह ‘‘महासत्तो ही’’तिआदि. एकङ्गणानीति विवटभावेन विहारङ्गणपरिवेणङ्गणानि विय एकङ्गणसदिसानि अहेसुं. सदिसोपि नत्थीति तुम्हाकं इदं विलोकनं विसिट्ठे पस्सितुं इध तुम्हेहि सदिसोपि नत्थि, कुतो उत्तरितरोति आहंसु. सब्बपठमोति सब्बप्पधानो. पधानपरियायो हि इध पठमसद्दो. तेनाह ‘‘इतरानी’’तिआदि. एत्थ च महेसक्खा ताव देवा ¶ तथा वदन्ति, इतरे पन कथन्ति? महासत्तस्स आनुभावदस्सनेनेव. महेसक्खानञ्हि देवानं महासत्तस्स आनुभावो विय तेन सदिसानम्पि आनुभावो पच्चक्खो अहोसि. इतरे पन तेसं वचनं सुत्वा सद्दहन्ता अनुमिनन्ता तथा आहंसु.

जातमत्तस्सेव बोधिसत्तस्स ठानादीनि येसं विसेसाधिगमानं पुब्बनिमित्तभूतानीति ते निद्धारेत्वा दस्सेन्तो, ‘‘एत्थ चा’’तिआदिमाह. तत्थ पतिट्ठानं चतुइद्धिपादपटिलाभस्स पुब्बनिमित्तं इद्धिपादवसेन लोकुत्तरधम्मेसु सुप्पतिट्ठितभावसमिज्झनतो. उत्तराभिमुखभावो लोकस्स उत्तरणवसेन गमनस्स पुब्बनिमित्तं. सत्तपदगमनं सत्तबोज्झङ्गादिगमनस्स पुब्बनिमित्तं, विसुद्धछत्तधारणं सुविसुद्धविमुत्तिछत्तधारणस्स पुब्बनिमित्तं, पञ्चराजककुधभण्डानि पञ्चविधविमुत्तिगुणपरिवारताय पुब्बनिमित्तं, अनावटदिसानुविलोकनं अनावटञाणताय पुब्बनिमित्तं, ‘‘अग्गोहमस्मी’’तिआदिवचनं अप्पटिवत्तियधम्मचक्कपवत्तनस्स पुब्बनिमित्तं; अयमन्तिमा जातीति आयतिं जातिया अभावकित्तना अनुपादि…पे… पुब्बनिमित्तन्ति वेदितब्बं; तस्स तस्स अनागते लद्धब्बविसेसस्स तं तं निमित्तं अब्यभिचारीनिमित्तन्ति दट्ठब्बं. न आगतोति इमस्मिं सुत्ते अञ्ञत्थ च वक्खमानाय अनुपुब्बिया अनागततं सन्धाय वुत्तं. आहरित्वाति तस्मिं तस्मिं सुत्ते अट्ठकथासु च आगतनयेन आहरित्वा दीपेतब्बो.

दससहस्सिलोकधातु कम्पीति पन इदं सतिपि इध पाळियं आगतत्ते वक्खमानानमच्छरियानं मूलभूतं दस्सेतुं वुत्तं, एवं अञ्ञम्पीदिसं दट्ठब्बं. तन्ति बद्धा वीणा, चम्मबद्धा भेरियोति पञ्चङ्गिकतूरियस्स निदस्सनमत्तं, च-सद्देन वा इतरेसम्पि सङ्गहो दट्ठब्बो. भिज्जिंसूति पादेसु बद्धट्ठानेसुयेव ¶ भिज्जिंसु. विगच्छिंसूति वूपसमिंसु. सकतेजोभासितानीति अतिविय समुज्जलाय अत्तनो पभाय ओभासितानि अहेसुं. न पवत्तीति न सन्दी. वातो न वायीति खरो वातो न वायि, मुदुसुखो पन सत्तानं सुखावहो वायि. पथवीगता अहेसुं उच्चट्ठाने ठातुं अविसहन्ता. उतुसम्पन्नोति अनुण्हासीततासङ्खातेन उतुना सम्पन्नो. वामहत्थं उरे ठपेत्वा दक्खिणेन पुथुपाणिना हत्थताळनेन सद्दकरणं अप्फोटनं. मुखेन उस्सेळनं सद्दमुञ्चनं सेळनं. एकद्धजमाला अहोसीति एत्थ इति-सद्दो आदिअत्थो. तेन विचित्तपुप्फसुगन्धपुप्फवस्सदेवा वस्सिंसु, सूरिये दिब्बमाने एव तारका ओभासिंसु, अच्छं विप्पसन्नं उदकं पथवितो उब्भिज्जि, बिलासया दरिसया तिरच्छाना आसयतो निक्खमिंसु; रागदोसमोहापि तनु भविंसु, पथवियं रजो वूपसमि, अनिट्ठगन्धो विगच्छि, दिब्बगन्धो वायि, रूपिनो देवा सरूपेनेव मनुस्सानं आपाथमगमंसु ¶ , सत्तानं चुतुपपाता नाहेसुन्ति इमेसं सङ्गहो दट्ठब्बो. यानि महाभिनीहारसमये उप्पन्नानि द्वत्तिंस पुब्बनिमित्तानि, तानि अनवसेसानि तदा अहेसुन्ति.

तत्रापीति तेसुपि पथविकम्पादीसु एवं पुब्बनिमित्तभावो वेदितब्बो, न केवलं सम्पतिजातस्स ठानादीसु एवाति अधिप्पायो. सब्बञ्ञुतञ्ञाणपटिलाभस्स पुब्बनिमित्तं सब्बस्स ञेय्यस्स तित्थकरमतस्स च चालनतो. केनचि अनुस्साहितानंयेव इमस्मिंयेव एकचक्कवाळे सन्निपातो, केनचि अनुस्साहितानंयेव एकप्पहारेनेव सन्निपतित्वा धम्मपटिग्गण्हनस्स पुब्बनिमित्तं, पठमं देवतानं पटिग्गहणं दिब्बविहारपटिलाभस्स, पच्छा मनुस्सानं पटिग्गहणं तत्थेव ठानस्स निच्चलसभावतो आनेञ्जविहारपटिलाभस्स पुब्बनिमित्तं. वीणानं सयं वज्जनं परूपदेसेन विना सयमेव अनुपुब्बविहारपटिलाभस्स पुब्बनिमित्तं. भेरीनं वज्जनं चक्कवाळपरियन्ताय परिसाय पवेदनसमत्थस्स धम्मभेरिया अनुसावनस्स अमतदुन्दुभिघोसनस्स पुब्बनिमित्तं. अन्दुबन्धनादीनं छेदो मानविनिबन्धछेदनस्स पुब्बनिमित्तं; सुपट्टनसम्पापुणनं अत्थादि अनुरूपं अत्थादीसु ञाणस्स भेदाधिगमस्स पुब्बनिमित्तं.

निब्बानरसेनाति किलेसानं निब्बायनरसेन. एकरसभावस्साति सासनस्स सब्बत्थ एकरसभावस्स. वातस्स अवायनं किस्स पुब्बनिमित्तन्ति आह ‘‘द्वासट्ठिदिट्ठिगतभिन्दनस्सा’’ति. आकासादिअप्पतिट्ठविसमचञ्चलट्ठानं पहाय ¶ सकुणानं पथवीगमनं तादिसं मिच्छागाहं पहाय सत्तानं पाणेहि रतनत्तयसरणगमनस्स पुब्बनिमित्तं. देवतानं अप्फोटनादीहि कीळनं पमोदनुप्पत्तिउदानस्स भववन्तगमनेन धम्मसभावबोधनेन च पमोदविभावनस्स पुब्बनिमित्तं. धम्मवेगवस्सनस्साति देसनाञाणवेगेन धम्मामतस्स वस्सनस्स पुब्बनिमित्तं. कायगतासतिवसेन लद्धज्झानं पादकं कत्वा उप्पादितमग्गफलसुखानुभवो कायगतासतिअमतपटिलाभो, तस्स पन कायस्सपि अतप्पकसुखावहत्ता खुदापिपासापीळनाभावो पुब्बनिमित्तं वुत्तो. अरियद्धजमालामालितायाति सदेवकस्स लोकस्स अरियमग्गबोज्झङ्गधजमालाहि मालितभावस्स पुब्बनिमित्तं. यं पनेत्थ अनुद्धटं, तं सुविञ्ञेय्यमेव.

एत्थाति ‘‘सम्पतिजातो’’तिआदिना आगते इमस्मिं ठाने. विस्सज्जितोव, तस्मा अम्हेहि इध अपुब्बं वत्तब्बं नत्थीति अधिप्पायो. तदा पथवियं गच्छन्तोपि महासत्तो आकासेन गच्छन्तो विय महाजनस्स उपट्ठासीति अयमेत्थ नियति धम्मनियामो बोधिसत्तानं धम्मताति इदं नियतिवादवसेन कथनं. ‘‘पुब्बे पुरिमजातीसु तादिसस्स पुञ्ञसम्भारकम्मस्स कतत्ता ¶ उपचितत्ता महाजनस्स तथा उपट्ठासी’’ति इदं पुब्बेकतकम्मवादवसेन कथनं. इमेसं सत्तानं उपरि ईसनसीलताय यथासकं कम्ममेव इस्सरो नाम, तस्स निम्मानं अत्तनो फलस्स निब्बत्तनं, महापुरिसोपि सदेवकं लोकं अभिभवितुं समत्थेन उळारेन पुञ्ञकम्मुना निब्बत्तितो तेन इस्सरेन निम्मितो नाम, तस्स चायं निम्मानविसेसो, यदिदं महानुभावता. याय महाजनस्स तथा उपट्ठासीति इदं इस्सरनिम्मानवादवसेन कथनं. एवं तं तं बहुं वत्वा किं इमाय परियायकथायाति अवसाने उजुकमेव एवं ब्याकासि. सम्पतिजातो पथवियं कथं पदसा गच्छति, एवंमहानुभावो आकासेन मञ्ञे गच्छतीति परिकप्पनस्स वसेन आकासेन गच्छन्तो विय अहोसि. सीघतरं पन सत्तपदवीतिहारेन गतत्ता दिस्समानरूपोपि महाजनस्स अदिस्समानो विय अहोसि. अचेलकभावो खुद्दकसरीरता च तादिसस्स इरियापथस्स अननुच्छविकाति कम्मानुभावसञ्जनितपाटिहारियवसेन अलङ्कारपटियत्तो विय; सोळसवस्सुद्देसिको विय च महाजनस्स उपट्ठासीति वेदितब्बं; बुद्धभावानुच्छविकस्स ¶ बोधिसत्तानुभावस्स याथावतो पवेदितत्ता बुद्धेन विय…पे… अत्तमना अहोसि.

पाकटा हुत्वाति विभूता हुत्वा. बुद्धानं ये ये सङ्खारे ववत्थपेतुकामा, ते ते उप्पादक्खणेपि सब्बसो सुप्पटिविदिता सुपाकटा हत्थतले आमलकं विय सुट्ठु विभूता एव हुत्वा उपट्ठहन्ति. तेनाह ‘‘यथा ही’’तिआदि. अनोकासगतेति परिग्गहस्स अनोकासकाले पवत्ते. निप्पदेसेति निरवसेसे. ओकासप्पत्तेति ठानगमनादिकाले उप्पन्ने, ते हि सम्मसनस्स योग्यकाले उप्पत्तिया ओकासप्पत्ताति अधिप्पायो. सत्तदिवसब्भन्तरेति इदं बुद्धानं पाकतिकसम्मसनवसेन वुत्तं, आकङ्खन्ता पन ते यदा कदाचि उप्पन्नसङ्खारे सम्मसन्तियेव. सेसं सुविञ्ञेय्यमेव.

अच्छरियब्भुतसुत्तवण्णनाय लीनत्थप्पकासना समत्ता.

४. बाकुलसुत्तवण्णना

२०९. यथा ¶ ‘‘द्वत्तिंसा’’ति वत्तब्बे द्वि-सद्दस्स बा-आदेसं कत्वा बात्तिंसाति वुच्चति, एवं एत्थ बा-कारादेसं कत्वा बाकुलोति समञ्ञा अहोसि, सायं तस्स अन्वत्थसञ्ञाति दस्सेतुं, ‘‘तस्स ही’’तिआदि वुत्तं. सीसं न्हापेत्वाति मङ्गलत्थं महागङ्गाय सीसं न्हापेत्वा. निमुज्जनवसेनाति जण्णुपमाणे उदके थोकंयेव निमुज्जनवसेन. छड्डेत्वा पलाता मरणभयतज्जिता. पहरियमाना मरन्ति, न जालेन बन्धितमत्तेन. दारकस्स तेजेनाति दारकस्स पुञ्ञतेजेन. नीहटमत्तोव मतो, तस्स मरणत्थं उपक्कमो न कतो, येन उपक्कमेन दारकस्स बाधो सिया. तन्ति मच्छं. सकलमेवाति परिपुण्णावयवमेव.

न केलायतीति न ममायति किस्मिञ्चि न मञ्ञति. दारकस्स पुञ्ञतेजेन पिट्ठितो फालेन्ती. दारकं लभतीति उग्घोसनवसेन भेरिं चरापेत्वा. पवत्तिं आचिक्खि, अत्तनो पुत्तभावं कथेसि. कुच्छिया धारितत्ता अमाता कातुं न सक्का जननीभावतो. मच्छं गण्हन्तापीति मच्छं किणित्वा गण्हन्तापि. तथा गण्हन्ता च तप्परियापन्नं सब्बं गण्हाति नामाति ¶ आह – ‘‘वक्कयकनादीनि बहि कत्वा गण्हन्ता नाम नत्थी’’ति. अयम्पि अमाता कातुं न सक्का सामिकभावतो. दारको उभिन्नम्पि कुलानं दायादो होतु द्विन्नं पुत्तभावतो.

असीतिमेति जातिया असीतिमे वस्से. पब्बज्जामत्तेन किलेसानं असमुच्छिज्जनतो वीतिक्कमितुं कामसञ्ञा उप्पन्नपुब्बाति पुच्छा पन पुच्छितब्बा. तेनाह – ‘‘एवञ्च खो मं, आवुसो कस्सप, पुच्छितब्ब’’न्ति.

२१०. नियमेत्वाति तं तंवारे सेसवारेन नियमेत्वा. कम्मपथभेदकोति कम्मपथविसेसकरो. तत्थ कामवितक्को यथा कायवचीद्वारेसु चोपनप्पत्तो कम्मपथप्पत्तो नाम होति; मनोद्वारे परभण्डस्स अत्तनो परिणामनवसेन पवत्तअभिज्झासहगतो; एवं कामसञ्ञाति, तथा ब्यापादविहिंसावितक्कसञ्ञाति थेरो, ‘‘उभयम्पेतं कम्मपथभेदकमेवा’’ति आह. कम्मपथं अप्पत्तं सञ्ञं सन्धाय, ‘‘सञ्ञा उप्पन्नमत्तावा’’ति वुच्चमाने वितक्कितम्पि समानं कम्मपथं अप्पत्तमेव, उभयस्स पन वसेन सुत्तपदं पवत्तन्ति थेरस्स अधिप्पायो.

२११. आयूहनकम्मन्ति ¶ अत्तना आयूहितब्बकम्मं. लोमकिलिट्ठानीति किलिट्ठलोमानि, किलिट्ठंसूनीति अत्थो. किमेवं भोगेसु परनिम्मितभवे वसवत्तिदेवानं विय सब्बसो आयूहनकम्मेन विना अञ्ञस्सपि पब्बजितस्स पच्चयलाभो दिट्ठपुब्बो सुतपुब्बोति आह ‘‘अनच्छरियञ्चेत’’न्ति. कुलूपकथेरानमेतं कम्मं, थेरो पन कदाचिपि कुलूपको नाहोसि.

गद्दुहनमत्तन्ति गोदुहनमत्तकालं. इध पन सकलो गोदुहनो अधिप्पेतोति दस्सेन्तो, ‘‘गाविं…पे… कालमत्तम्पी’’ति आह. निबन्धीति निबद्धदातब्बं कत्वा ठपेसि.

सकिलेसपुग्गलस्स असेरिभावकरणेन रणेन सदिसताय रणो, संकिलेसो. अञ्ञा उदपादीति पनाह, तस्मा अरहत्तं न पटिञ्ञातन्ति दस्सेति. ननु तथा वचनं पटिजाननं विय होतीति आह ‘‘अपिचा’’तिआदि.

२१२. अवापुरति ¶ द्वारं एतेनाति अवापुरणं. पठमसङ्गहतो पच्छा देसितत्ता दुतियसङ्गहे सङ्गितं. सेसं सुविञ्ञेय्यमेव.

बाकुलसुत्तवण्णनाय लीनत्थप्पकासना समत्ता.

५. दन्तभूमिसुत्तवण्णना

२१३. फुसेय्याति ¶ ञाणफुसना नाम अधिप्पेता, तस्मा लभेय्याति अधिगच्छेय्य. एवं पटिपन्नोति, ‘‘अप्पमत्तो आतापी पहितत्तो’’ति वुत्तप्पकारेन पटिपन्नो. अजाननकोट्ठासेयेवाति अवधारणेन अत्तनि कतं दोसारोपनं निवत्तेति.

२१४. अप्पनाउपचारन्ति अप्पनञ्चेव उपचारञ्च पापेत्वा कथेसीति अत्थं वदन्ति, अप्पनासहितो पन उपचारो अप्पनाउपचारो, तं पापेत्वा कथेसीति अत्थो.

निक्खमतीति निक्खमो, अवग्गाहकामतो निक्खमनं निक्खमो एव नेक्खम्मो, पठमज्झानादि. सति किलेसकामे अत्तनो उपहारं उपचारेत्वा अस्सादेत्वा परिभुञ्जति नामाति आह – ‘‘दुविधेपि कामे परिभुञ्जमानो’’ति. दुविधेपीति हीनपणीतादिवसेन दुविधे.

२१५. कूटाकारन्ति गाळ्हसाठेय्यं अप्पतिरूपे ठाने खन्धगतपातनादि. दन्तगमनन्ति दन्तेहि निब्बिसेवनेहि गन्धब्बगतिं. पत्तब्बं भूमिन्ति सम्माकिरियाय लद्धब्बसम्पत्तिं.

२१६. ब्यतिहरणवसेन लङ्घकं विलङ्घकं, अञ्ञमञ्ञहत्थग्गहणं. तेनाह – ‘‘हत्थेन हत्थं गहेत्वा’’ति.

२१७. गहेतुं समत्थोति गणिकारहत्थिनीहि उपलापेत्वा अरञ्ञहत्थिं वचनवसेन गहेतुं समत्थो. अतिपस्सित्वा अतिट्ठानवसेन पस्सित्वा. एत्थगेधाति एतस्मिं अरञ्ञे नागवने पवत्तगेधा. सुखायतीति सुखं अयति पवत्तेति, ‘‘सुखं हरती’’ति वा पाठो. डिण्डिमो आनको. निहितसब्बवङ्कदोसोति अपगतसब्बसाठेय्यदोसो. अपनीतकसावोति अपेतसारम्भकसावो.

२१९. पञ्चकामगुणनिस्सितसीलानन्ति ¶ अकुसलानं. गेहस्सितसीलानन्ति वा वट्टसन्निस्सितसीलानं.

२२२. एस ¶ नयो सब्बत्थाति, ‘‘मज्झिमो, दहरो’’ति आगतेसु उपमावारेसु, ‘‘थेरो’’तिआदिना आगतेसु उपमेय्यवारेसूति पञ्चसु संकिलेसपक्खियेसु वारेसु एस यथावुत्तोव नयोति वेदितब्बो. सेसं सुविञ्ञेय्यमेव.

दन्तभूमिसुत्तवण्णनाय लीनत्थप्पकासना समत्ता.

६. भूमिजसुत्तवण्णना

२२३. आसञ्चेपि ¶ करित्वाति, ‘‘इमिनाहं ब्रह्मचरियेन देवो वा भवेय्यं देवञ्ञतरो वा, दुक्खतो वा मुच्चेय्य’’न्ति पत्थनं कत्वा चेपि चरन्ति, अभब्बा फलस्स अधिगमाय तण्हाय ब्रह्मचरियस्स विदूसितत्ताति अधिप्पायो. अनासञ्चेपि करित्वाति वुत्तनयेन पत्थनं अकत्वा. अभब्बा फलस्स अधिगमाय अनियमितभावतो. पणिधानवसेन हि पुञ्ञफलं नियतं नाम होति, तदभावतो कतं पुञ्ञं न लभतीति अधिप्पायो. ततियपक्खे उभयट्ठानेहि वुत्तं, चतुत्थपक्खो सम्मावतारो इति चतुकोटिको पञ्हो जालवसेन आहटो, तत्थ आसा नाम पत्थना, मिच्छागाहस्मिं सति न विपच्चति, सम्मागाहस्मिं सति विपच्चति, उभयथापि उभयापेक्खानाम, यो मिच्छत्तधम्मे पुरक्खत्वा ब्रह्मचरियं चरति, तस्स यथाधिप्पायफलं समिज्झतीति न वत्तब्बं अयोनिसो ब्रह्मचरियस्स चिण्णत्ता; यो पन सम्मत्तं पुरक्खत्वा ब्रह्मचरियं चरति, तस्स यथाधिप्पायं ब्रह्मचरियफलं न समिज्झतीति न वत्तब्बं योनिसो ब्रह्मचरियस्स चिण्णत्ता. तेन वुत्तं – ‘‘आसञ्चेपि करित्वा अयोनिसो ब्रह्मचरियं चरन्ती’’तिआदि. सेसं सुविञ्ञेय्यमेव.

भूमिजसुत्तवण्णनाय लीनत्थप्पकासना समत्ता.

७. अनुरुद्धसुत्तवण्णना

२३०. उपसङ्कमित्वा ¶ ¶ एवमाहंसूति वुत्तं उपसङ्कमनकारणं दस्सेन्तो, ‘‘तस्स उपासकस्स अफासुककालो अहोसी’’ति आह. अविराधितन्ति अविरज्झनकं. यदि वा ते धम्मा नानत्था, यदि वा एकत्था, यं तत्थ अविरज्झनकं, तं तंयेव पटिभातूति योजना. झानमेवाति अप्पमाणज्झानमेव, ‘‘चेतोविमुत्ती’’ति पन वुत्तत्ता चित्तेकग्गतायेव एवं वुच्चतीति उपासकस्स अधिप्पायो.

२३१. यावता मज्झन्हिके काले छाया फरति, निवाते पण्णानि पतन्ति, एत्तावता ‘‘रुक्खमूल’’न्ति वुच्चतीति एवं वुत्तं एकरुक्खमूलप्पमाणट्ठानं. कसिणनिमित्तेन ओत्थरित्वाति कसिणारम्मणं झानं समापज्जन्तो तस्मिं कसिण…पे… विहरतीति वुत्तो. आभोगो नत्थि झानक्खणे. कामं समापत्तिक्खणे आभोगो नत्थि ततो पन पुब्बे वा सिया सो आभोगो, तम्पि सन्धाय महग्गतन्ति केचि. इदानि तासं चेतोविमुत्तीनं सतिपि केनचि विसेसेन अभेदे विसयादितो लब्भमानभेदं दस्सेतुं, ‘‘एत्था’’तिआदि वुत्तं. निमित्तं न वड्ढति वड्ढेतब्बस्स निमित्तस्सेव अभावतो. पथवीकसिणादीनं विय आकासभावनाय उग्घाटनं न जायति. तानि झानानीति ब्रह्मविहारज्झानानि. चुद्दसविधेन परिदमनाभावतो अभिञ्ञानं पादकानि न होन्ति. निमित्तुग्घाटस्सेव अभावतो अरूपज्झानानं अनधिट्ठानताय निरोधस्स पादकानि न होन्तीति. कम्मवट्टभावेन किलेसवट्टविपाकवट्टानं तिण्णं वट्टानं पच्चयभावो वट्टपादकता. उपपज्जनवसेनेव तं तं भवं ओक्कमति एतेहीति भवोक्कमनानि. दुतियनयस्स वुत्तविपरियायेन अत्थो वेदितब्बो. उग्घाटनस्स लब्भनतो अरूपज्झानोपरि समतिक्कमो होतीति अयमेव विसेसो. एवन्ति यथावुत्तेन निमित्तावड्ढननिमित्तवड्ढनादिप्पकारेन. नानत्थाति नानासभावा. एवन्ति अप्पमाणमहग्गतसद्दवचनीयताय नानाब्यञ्जना. कामञ्चेत्थ अप्पमाणसमापत्तितोपि नीहरित्वा वक्खमानभवूपपत्तिकारणं दस्सेतुं सक्का, अट्ठकथायं पन कसिणझानतोव नीहरित्वा योजना कताति तथा वुत्तं. अथ वा महग्गतगहणेनेत्थ अप्पमाणाति वुत्तब्रह्मविहारानम्पि सङ्गहो वेदितब्बो तस्सा समञ्ञाय उभयेसम्पि साधारणभावतो.

२३२. एवं ¶ वुत्तोति असतिपि तथारूपे आभोगे ‘‘परित्ताभाति फरित्वा अधिमुच्चित्वा विहरती’’ति ¶ वुत्तो. अप्पमाणं कत्वा कसिणं वड्ढेन्तस्स कसिणवड्ढनवसेन बहुलीकारसम्भवतो सिया झानस्स बलवतरता, तदभावे च दुब्बलता, आचिण्णवसिताय पन पच्चनीकधम्मानं सम्मा अपरिसोधने वत्तब्बमेव नत्थीति पञ्चहाकारेहि झानस्स अप्पगुणतं दस्सेन्तो, ‘‘सुप्पमत्ते वा’’तिआदिमाह. झानस्स अप्पानुभावताय एव तन्निमित्ता पभापि अप्पतरा अपरिसुद्धाव होतीति आह – ‘‘वण्णो…पे… संकिलिट्ठो चा’’ति. दुतियनयो वुत्तविपरियायेन वेदितब्बो. तत्थापि कसिणस्स परित्तभावेन वण्णस्स परित्तता, परित्तारम्मणाय अनुरूपताय वा निमित्तं पभामण्डलकम्पि परित्तमेव सियाति अधिप्पायो. विपुलपरिकम्मन्ति विपुलभावेन परिकम्मं. सेसं ततियचतुत्थनयेसु वत्तब्बं पठमदुतियनयेसु वुत्तसदिसमेव.

वण्णनानत्तन्ति यदि पीतं यदि लोहितं यदि वा ओदातन्ति सरीरवण्णनानत्तं. आभानानत्तन्ति परित्तविपुलतावसेन पभाय नानत्तं. अच्चिनानत्तन्ति तेजोधातुस्स दीघादिवसेन वेमत्तता. अभिनिविसन्तीति अभिरतिवसेन निविसन्ति निसीदन्ति तिट्ठन्ति. तेनाह ‘‘वसन्ती’’ति.

२३४. आभन्ति दिब्बन्तीति आभाति आह ‘‘आभासम्पन्ना’’ति. तदङ्गेनाति वा तस्सा परित्तताय अप्पमाणताय च आभाकारणं, तं पन अत्थतो भवूपपत्तिकारणमेवाति आह – ‘‘तस्सा भवूपपत्तिया अङ्गेना’’ति. कायालसियभावो तन्दीआदीनं हेतुभूता कायस्स वित्थायितता.

२३५. पारमियोति महासावकसंवत्तनिका सावकपारमियो पूरेन्तो. ब्रह्मलोकेति ब्रह्मत्तभावे, ब्रह्मलोके वा उप्पत्तिं पटिलभि, वुत्तम्पि चेतं थेरगाथासु. अवोकिण्णन्ति अञ्ञेहि असम्मिस्सन्ति अत्थो. पुब्बे सञ्चरितन्ति अतीतभवेसु जातिवसेन सञ्चरणं मम, सञ्चरितन्ति तं ममस्साति अत्थो. सेसं सुविञ्ञेय्यमेव.

अनुरुद्धसुत्तवण्णनाय लीनत्थप्पकासना समत्ता.

८. उपक्किलेससुत्तवण्णना

२३६. तस्माति ¶ ¶ अत्थकामत्ता एवमाह, न भगवतो वचनं अनादियन्तो. ये पन तदा सत्थुवचनं न गण्हिंसु, ते किञ्चि अवत्वा तुण्हीभूता मङ्कुभूता अट्ठंसु, तस्मा उभयेसम्पि सत्थरि अगारवपटिपत्ति नाहोसि.

येनपि जनेन न दिट्ठोति येन उभयजनेन अञ्ञविहितताय कुड्डकवाटादिअन्तरिकताय वा न दिट्ठो. दमनत्थन्ति तेहि उपासकेहि निम्मदभावं आपादितानं तेसं भिक्खूनं दमनत्थं. ठपयिंसूति यो इमेसं भिक्खूनं देति, तस्स सतं दण्डोति, सहस्सन्ति च वदन्ति.

२३७. वग्गभावेनेव (सारत्थ. टी. महावग्गो ३.४६४) नानासद्दो अस्साति पुथुसद्दो. समजनोति भण्डने समज्झासयो जनो. बाललक्खणे ठितोपि ‘‘अहं बालो’’ति न मञ्ञति. भिय्यो चाति अत्तनो बालभावस्स अजाननतोपि भिय्यो च भण्डनस्स उपरि फोटो विय सङ्घभेदस्स अत्तनो कारणभावम्पि उप्पज्जमानं न मञ्ञि नञ्ञासि.

कलहवसेन पवत्तवाचायेव गोचरो एतेसन्ति वाचागोचरा हुत्वा. मुखायामन्ति विवादवसेन मुखं आयमेत्वा भाणिनो. न तं जानन्तीति तं कलहं न जानन्ति. कलहं करोन्तो च तं न जानन्तो नाम नत्थि. यथा पन न जानन्ति, तं दस्सेतुं आह – ‘‘एवं सादीनवो अय’’न्ति. अयं कलहो नाम अत्तनो परेसञ्च अत्थजापनतो अनत्थुप्पादनतो दिट्ठेव धम्मे सम्पराये च सादीनवो, सदोसोति अत्थो.

उपनय्हन्तीति उपनाहवसेन अनुबन्धन्ति. पोराणोति पुरिमेहि बुद्धादीहि आचिण्णसमाचिण्णताय पुरातनो.

न जानन्तीति अनिच्चसञ्ञं न पच्चुपट्ठापेन्ति.

तथा पवत्तवेरानन्ति अट्ठिछिन्नादिभावं निस्साय उपनयवसेन चिरकालं पवत्तवेरानं.

बालसहायताय ¶ ¶ इमे भिक्खू कलहपसुता, पण्डितसहायानं पन इदं न सियाति पण्डितसहायस्स बालसहायस्स च वण्णावण्णदीपनत्थं वुत्ता. सीहब्यग्घादिके पाकटपरिस्सये रागदोसादिके पटिच्छन्नपरिस्सये च अभिभवित्वा.

मातङ्गो अरञ्ञे मातङ्गरञ्ञेति सरलोपेन सन्धि. मातङ्गसद्देनेव हत्थिभावस्स वुत्तत्ता नागवचनं तस्स महत्तविभावनत्थन्ति आह – ‘‘नागोति महन्ताधिवचनमेत’’न्ति. महन्तपरियायोपि हि नाग-सद्दो होति ‘‘एवं नागस्स नागेन, ईसादन्तस्स हत्थिनो’’तिआदीसु (उदा. २५; महाव. ४६७).

२३८. किरसद्दो अनुस्सवसूचनत्थो निपातो. तेन अयमेत्थ सुतिपरम्पराति दस्सेति. भगवता हि सो आदीनवो पगेव परिञ्ञातो, न तेन सत्था निब्बिण्णो होति; तस्मिं पन अन्तोवस्से केचि बुद्धवेनेय्या नाहेसुं; तेन अञ्ञत्थ गमनं तेसं भिक्खूनं दमनुपायोति पालिलेय्यकं उद्दिस्स गच्छन्तो एकविहारिं आयस्मन्तं भगुं, समग्गवासं वसन्ते च अनुरुद्धत्थेरादिके सम्पहंसेतुं अनुरुद्धत्थेरस्स च. इमं उपक्किलेसोवादं दातुं तत्थ गतो, तस्मा कलहकारके किरस्साति एत्थापि किरसद्दग्गहणे एसेव नयो. वुत्तनयमेव गोसिङ्गसालसुत्ते (म. नि. १.३२५ आदयो).

२४१. ‘‘यथा कथं पना’’ति वुत्तपुच्छानं पच्छिमभावतो ‘‘अत्थि पन वोति पच्छिमपुच्छाया’’ति वुत्तं, न पुन ‘‘अत्थि पन वो’’ति पवत्तनस्स पुच्छनस्स अत्थिभावतो. सो पन लोकुत्तरधम्मो. थेरानन्ति अनुरुद्धत्थेरादीनं नत्थि. परिकम्मोभासं पुच्छतीति दिब्बचक्खुञाणे कताधिकारत्ता तस्स उप्पादनत्थं परिकम्मोभासं पुच्छति. परिकम्मोभासन्ति परिकम्मसमाधिनिब्बत्तं ओभासं, उपचारज्झानसञ्जनितं ओभासन्ति अत्थो. चतुत्थज्झानलाभी हि दिब्बचक्खुपरिकम्मत्थं ओभासकसिणं भावेत्वा उपचारे ठपितो समाधि परिकम्मसमाधि, तत्थ ओभासो परिकम्मोभासोति वुत्तो. तं सन्धायाह – ‘‘ओभासञ्चेव सञ्जानामाति परिकम्मोभासं सञ्जानामा’’ति. यत्तके हि ठाने दिब्बचक्खुना रूपगतं दट्ठुकामो, तत्तकं ठानं ओभासकसिणं फरित्वा ठितो. तं ¶ ओभासं तत्थ च रूपगतं दिब्बचक्खुञाणेन पस्सति, थेरा च तथा पटिपज्जिंसु. तेन वुत्तं – ‘‘ओभासञ्चेव सञ्जानाम दस्सनञ्च रूपान’’न्ति. यस्मा पन तेसं रूपगतं पस्सन्तानं परिकम्मवारो अतिक्कमि, ततो ओभासो अन्तरधायि, तस्मिं अन्तरहिते रूपगतम्पि न पञ्ञायति. परिकम्मन्ति हि यथावुत्तकसिणारम्मणं उपचारज्झानं, रूपगतं पस्सन्तानं कसिणोभासवसेन रूपगतदस्सनं, कसिणोभासो ¶ च परिकम्मवसेनाति तदुभयम्पि परिकम्मस्स अप्पवत्तिया नाहोसि, तयिदं कारणं आदिकम्मिकभावतो थेरा न मञ्ञिंसु, तस्मा वुत्तं ‘‘नप्पटिविज्झामा’’ति.

निमित्तं पटिविज्झितब्बन्ति कारणं पच्चक्खतो दस्सेत्वा सुविसुद्धदिब्बचक्खुञाणे थेरं पतिट्ठापेतुकामो सत्था वदति. किं न आळुलेस्सन्तीति किं न ब्यामोहेस्सन्ति, ब्यामोहेस्सन्ति एवाति अत्थो. विचिकिच्छा उदपादीति दिब्बचक्खुनो यथाउपट्ठितेसु रूपगतेसु अपुब्बताय, ‘‘इदं नु खो रूपगतं किं, इदं नु खो कि’’न्ति मग्गेन असमुच्छिन्नत्ता विचिकिच्छा संसयो उप्पज्जि. समाधि चवीति विचिकिच्छाय उप्पन्नत्ता परिकम्मसमाधि विगच्छि. ततो एव हि परिकम्मोभासोपि अन्तरधायि, दिब्बचक्खुनापि रूपं न पस्सि. न मनसि करिस्सामीति मनसिकारवसेन मे रूपानि उपट्ठहिंसु, रूपानि पस्सतो विचिकिच्छा उप्पज्जति, तस्मा इदानि किञ्चि न मनसि करिस्सामीति तुण्ही अहोसि तं पन तुण्हीभावप्पत्तिं सन्धायाह ‘‘अमनसिकारो उदपादी’’ति.

तथाभूतस्स अमनसिकारस्स अभावं आगम्म उप्पिलं उदपादि. वीरियं गाळ्हं पग्गहितन्ति थिनमिद्धछम्भितत्तानं वूपसमनत्थं अच्चारद्धवीरियं अहोसि, तेन चित्ते समाधिदूसिका गेहस्सिता बलवपीति उप्पन्ना. तेनाह ‘‘उप्पिलं उप्पन्न’’न्ति. ततोति सिथिलवीरियत्ता. पतमेय्याति अतिविय खिन्नं भवेय्य. तं ममाति पत्थनाअभिभवनीयमनसीसेन जप्पेतीति अभिजप्पा, तण्हा. नानत्ता नानासभावा सञ्ञा नानत्तसञ्ञा. अतिविय उपरि कत्वा निज्झानं पेक्खनं अतिनिज्झायितत्तं.

२४३. परिकम्मोभासमेवाति परिकम्मसमुट्ठितं ओभासमेव. न च रूपानि पस्सामीति ओभासमनसिकारपसुतताय दिब्बचक्खुना रूपानि न पस्सामि. विसयरूपमेवाति तेन फरित्वा ठितट्ठानेव दिब्बचक्खुनो विसयभूतं रूपगतमेव मनसि करोमि.

कसिणरूपानं ¶ वसेनेत्थ ओभासस्स परित्तताति आह ‘‘परित्तट्ठाने ओभास’’न्ति. परित्तानि रूपानीति कतिपयानि, सा च नेसं परित्तता ठानवसेनेवाति आह ‘‘परित्तकट्ठाने रूपानी’’ति. ‘‘अप्पमाणञ्चेवा’’तिआदिना वुत्तो दुतियवारो. ओभासपरित्ततं सन्धाय परिकम्मसमाधि ‘‘परित्तो’’ति वुत्तो तस्सेव ओभासस्स अप्पमाणताय अप्पमाणसमाधीति वचनतो. तस्मिं समयेति तस्मिं परित्तसमाधिनो उप्पन्नसमये. दिब्बचक्खुपि परित्तकं होति परित्तरूपगतदस्सनतो.

२४५. दुकतिकज्झानसमाधिन्ति ¶ चतुक्कनये दुकज्झानसमाधिं, पञ्चकनये तिकज्झानसमाधिन्ति योजना. दुकज्झानसमाधिन्ति चतुक्कनये ततियचतुत्थवसेन दुकज्झानसमाधिं, पञ्चकनये चतुत्थपञ्चमवसेन दुकज्झानसमाधिं. तिकचतुक्कज्झानसमाधिन्ति चतुक्कनये तिकज्झानसमाधिं, पञ्चकनये चतुक्कज्झानसमाधिन्ति योजना.

तिविधन्ति सप्पीतिकवसेन तिप्पकारं समाधिं. तदन्तोगधाति सप्पीतिकादिसभावा. कामं भगवा पुरिमयामे पुब्बेनिवासानुस्सतिञाणं, पच्छिमयामे दिब्बचक्खुञाणं निब्बत्तेन्तोपि इमानि ञाणानि भावेसियेव. विपस्सनापादकानि पन ञाणानि सन्धाय, ‘‘पच्छिमयामे’’ति वुत्तं, तेनाह ‘‘भगवतो ही’’तिआदि. पञ्चमज्झानस्साति पञ्चमज्झानिकस्स वसेन पठमज्झानिको मग्गो नत्थि. सोति पञ्चकनयो भगवतो लोकियो अहोसि. एतन्ति एतं, ‘‘सवितक्कम्पि सविचारं समाधिं भावेमी’’तिआदिवचनं. लोकियलोकुत्तरमिस्सकं सन्धाय वुत्तं, न ‘‘लोकियं वा लोकुत्तरमेव वा’’ति. सेसं सुविञ्ञेय्यमेवाति.

उपक्किलेससुत्तवण्णनाय लीनत्थप्पकासना समत्ता.

९. बालपण्डितसुत्तवण्णना

२४६. एतेहीति ¶ दुचिन्तितादीहि. एतेन लक्खणसद्दस्स करणत्थतमाह. तानेवाति लक्खणानि एव. तस्साति बालस्स. ‘‘अयं बालो’’ति निमीयति सञ्चानीयति एतेहीति बालनिमित्तानि. अपदानं वुच्चति विख्यातं कम्मं. दुचिन्तितादीनि च बाले विख्यातानि, अवधारणभावे वा, तस्मा बालस्स अपदानानीति बालापदानानि. अभिज्झादीहि ¶ दुट्ठं दूसितं चिन्तेतीति दुचिन्तितचिन्ती. लोभादीहि दुट्ठं भासितं मुसावादादिं भासतीति दुब्भासितभासी. तेसं तेसंयेव वसेन कत्तब्बतो दुक्कटकम्मं पाणातिपातादिं करोतीति दुक्कटकम्मकारी. तेनाह ‘‘चिन्तयन्तो’’तिआदि. तानि उपनिस्साय जातन्ति तज्जं. ततो एव तेसं सारुप्पं अनुरूपन्ति तस्सारुप्पं. तेनाह ‘‘तज्जातिक’’न्तिआदि. कच्छमानायाति कथियमानाय.

२४८. यस्मा सत्तानं यथूपचितानि कम्मानि कतोकासानि तदुपट्ठापितानि कम्मनिमित्तगतिनिमित्तानि मरणस्स आसन्नकाले चित्तस्स आपाथं आगच्छन्तानि, तदा ओलम्बन्तानि विय अभिभवन्तानि विय अज्झोत्थरन्तानि विय उपट्ठहन्ति, तस्मा वुत्तं – ‘‘ओलम्बनादिआकारेन हि तानि उपट्ठहन्ती’’ति. उपट्ठानाकारो एव तदा चित्तस्स गोचरभावं गच्छतीति आह – ‘‘तस्मिं उपट्ठानाकारे आपाथगते’’ति.

२४९. न सक्काति न वदतीति एतेन द्वेपि पटिसेधा पकतिअत्थाति अयमत्थो वुत्तो होति. न सुकराति पन इमिना दुक्करभावो दीपितो, दुक्करञ्च ताव उपायेन सक्का कातुन्ति दस्सेन्तो आह – ‘‘न सुकरं पना’’तिआदि. तेनाति विनिविज्झित्वा गमनेन अञ्ञमञ्ञं संविज्झनेन. अस्साति चोरस्स. इतो उत्तरिपीति मज्झन्हिकसमयं सायन्हसमयञ्च सत्तिसतेन.

२५०. सङ्खम्पि न उपेतीति इमिना सङ्खातब्बमत्तं नत्थीति दीपितं होतीति आह – ‘‘गणनामत्तम्पि न गच्छती’’ति. उपनिक्खेपनमत्तम्पीति एत्थापि एसेव नयो. कलभागन्ति कलानं सङ्गणनकोट्ठासं. तेनाह ‘‘सतिमं कल’’न्तिआदि. ओलोकितमत्तम्पीति उपनिक्खेपनवसेन ओलोकनमत्तकम्पि. तं कम्मकारणन्ति तं पञ्चविधबन्धनकम्मकारणं चतुन्नम्पि पस्सानं वसेन सम्परिवत्तेत्वा करोन्तियेव, पाळियं पन एकपस्सवसेन आगता. गेहस्साति ¶ महतो गेहस्स. सब्बतोति सब्बावयवतो. सम्पज्जलिते एकजालीभूते. सुपक्कुथितायाति सुट्ठु निपक्काय.

विभत्तोति तत्थ निब्बत्तकसत्तानं साधारणकम्मुना विभत्तो विय निब्बत्तो. अयोपाकारेन परितो अत्तो गहितोति अयोपाकारपरियत्तो परिक्खित्तो.

यमकगोळकाति ¶ दारकानं कीळनयुगळा. एवम्पि दुक्खोति यथावुत्तउस्सदनिरयवसेनपि सोत-घान-जिव्हा-काय-मनो-गोचरतावसेनपि इमिना आकारेन दुक्खोति.

२५१. दन्तेहि उल्लेहित्वाति उत्तरदन्तेहि अञ्छित्वा. रसवसेन अतित्तो अस्सादो रसादो. तेनाह ‘‘रसगेधेन परिभुत्तरसो’’ति.

२५२. दुरूपोति विरूपो. दुद्दसोति तेनेव विरूपभावेन अनिट्ठदस्सनो. लकुण्ठकोति रस्सो. पविट्ठगीवोति खन्धन्तरं अनुपविट्ठगीवो. महोदरोति विपुलकुच्छि. येभुय्येन हि लकुण्टका सत्ता रस्सगीवा पुथुलकुच्छिकाव होन्तीति तथा वुत्तं. काणो नाम चक्खुविकलोति वुत्तं – ‘‘एकक्खिकाणो वा उभयक्खिकाणो वा’’ति. कुणीति हत्थविकलो वुच्चतीति आह – ‘‘एकहत्थकुणी वा उभयहत्थकुणी वा’’ति. वातादिना उपहतकायपक्खो इध पक्खहतोति अधिप्पेतो, न पक्खिहतोति आह – ‘‘पक्खहतोति पीठसप्पी’’ति. दुक्खानुपबन्धदस्सनत्थन्ति अपरापरजातीसु विपाकदुक्खस्स अनुपबन्धवसेन पवत्तिदस्सनत्थं.

कलीयति खलीयति अप्पहीयति सासनं एतेनाति कलि, जुतपराजयो. सो एव गहसदिसताय ‘‘कलिग्गहो’’ति वुत्तो. अधिबन्धन्ति कुटुम्बस्स अधिवुत्थस्स मूलभूतस्स अत्तनो बन्धितब्बतं. तेनाह ‘‘अत्तनापि बन्धं निगच्छेय्या’’ति. बालभूमिया बालभावस्स मत्थकप्पत्ति निरयगामिकम्मकारिताति ‘‘निरये निब्बत्तति’’च्चेव वुत्तं. तग्गहणेनेव पन ततो मुदुमुदुतरादिकम्मवसेन सेसापायेसु अपरापरनिब्बत्तादिबालभूमि विभाविता होतीति.

२५३. वुत्तानुसारेनाति ‘‘बालो अय’’न्तिआदिना वुत्तस्स अत्थवचनस्स ‘‘पण्डितो अय’’न्ति एतेहि लक्खीयतीतिआदिना अनुसारेन. मनोसुचरितादीनं वसेनाति चिन्तेन्तो अनभिज्झा-अब्यापाद-सम्मादस्सनं सुचिन्तितमेव चिन्तेतीतिआदिना मनोसुचरितानं तिण्णं सुचरितानं वसेन योजेतब्बानि.

चक्करतनवण्णना

२५६. उपोसथं ¶ ¶ (दी. नि. टी. २.२४३) वुच्चति अट्ठङ्गसमन्नागतं सब्बदिवसेसु गहट्ठेहि रक्खितब्बसीलं, समादानवसेन तं एतस्स अत्थीति उपोसथिको, तस्स. तेनाह ‘‘समादिन्नउपोसथङ्गस्सा’’ति. तदाति तस्मिं काले, यस्मिं पन काले चक्कवत्तिभावसंवत्तनिय-दान-सीलादि-पुञ्ञसम्भारसमुदागमसम्पन्नो पूरितचक्कवत्तिवत्तो कादीपदेसविसेसपच्चाजातिया चेव कुलरूपभोगाधिपतेय्यादिगुणविसेससम्पत्तिया च तदनुरूपे अत्तभावे ठितो होति, तस्मिं काले. तादिसे हि काले चक्कवत्तिभावी पुरिसुत्तमो यथावुत्तगुणसमन्नागतो राजा खत्तियो हुत्वा मुद्धावसित्तो विसुद्धसीलो अनुपोसथं सतसहस्सविस्सज्जनादिना सम्मापटिपत्तिं पटिपज्जति, न यदा चक्करतनं उप्पज्जति, तदा एव. तेनाह – ‘‘पातो…पे… धम्मता’’ति. (तत्थ दमो इन्द्रियसंवरो, संयमो सीलसंवरो.)

वुत्तप्पकारपुञ्ञकम्मपच्चयन्ति चक्कवत्तिभावावहदानदमसंयमादिपुञ्ञकम्महेतुकं. नीलमणिसङ्घाटसदिसन्ति इन्दनीलमणिसञ्चयसमानं. दिब्बानुभावयुत्तत्ताति दस्सनीयता मनुञ्ञघोसता आकासगामिता ओभासविस्सज्जना अप्पटिघातता रञ्ञो इच्छितत्थनिप्फत्तिकारणताति एवमादीहि दिब्बसदिसेहि आनुभावेहि समन्नागतत्ता. सब्बेहि आकारेहीति सब्बेहि सुन्दरेहि आकारेहि. परिपूरन्ति परिपुण्णं. सा चस्स पारिपूरि इदानेव वित्थारीयति.

पनाळीति छिद्दं. सुद्धसिनिद्धदन्तपन्तिया निब्बिवरायाति अधिप्पायो. नाभिपनाळि परिक्खेपपट्टेसूति नाभिपरिक्खेपपट्टे चेव नाभिया पनाळिपरिक्खेपपट्टे च. सुविभत्तावाति अञ्ञमञ्ञं असंकिण्णत्ता सुट्ठु विभत्ता. परिच्छेदलेखन्तरेसु मणिका सुविभत्ता हुत्वा पञ्ञायन्तीति वदन्ति.

परिच्छेदलेखादीनीति आदि-सद्देन मालाकम्मादिं सङ्गण्हाति. सुरत्तातिआदीसु सुरत्तग्गहणेन महानामवण्णतं पटिक्खिपति, सुद्धग्गहणेन संकिलिट्ठतं, सिनिद्धग्गहणेन लूखतं. कामं तस्स चक्करतनस्स नेमिमण्डलं असन्धिकंव निब्बत्तं, सब्बत्थकमेव पन केवलं पवाळवण्णोव ¶ न सोभतीति पकतिचक्कस्स सन्धियुत्तेसु ठानेसु रत्तजम्बुनदपरिक्खतं अहोसि, तं सन्धाय वुत्तं ‘‘सन्धीसु पनस्सा’’तिआदि.

नेमिमण्डलपिट्ठियन्ति ¶ नेमिमण्डलस्स पिट्ठिपदेसे. दसन्नं दसन्नं अरानमन्तरेति दसन्नं दसन्नं अरानं अन्तरसमीपे पदेसे. छिद्दमण्डलचित्तोति मण्डलसण्ठानछिद्दविचित्तो. सुकुसलसमन्नाहतस्साति सुट्ठु कुसलेन सिप्पिना पहतस्स, वादितस्साति अत्थो. वग्गूति मनोरमो रजनीयोति सुणन्तानं रागुप्पादको. कमनीयोति कन्तो. समोसरितकुसुमदामाति ओलम्बितसुगन्धकुसुमदामा. नेमिपरिक्खेपस्साति नेमिपरियन्तपरिक्खेपस्स. नाभिपनाळिया द्विन्नं पस्सानं वसेन ‘‘द्विन्नम्पि नाभिपनाळीन’’न्ति वुत्तं. एका एव हि सा पनाळि. येहीति येहि द्वीहि सीहमुखेहि. पुन येहीति मुत्ताकलापेहि.

ओधापयमानन्ति सोतुं अवहितानि कुरुमानं. चन्दो पुरतो, चक्करतनं पच्छाति एवं पुब्बापरियेन पुब्बापरभागेन.

अन्ते पुरस्साति अनुराधपुरे रञ्ञो अन्तेपुरस्स उत्तरसीहपञ्जरआसन्ने तदा रञ्ञो पासादे तादिसस्स उत्तरदिसाय सीहपञ्जरस्स लब्भमानत्ता वुत्तं. सुखेन सक्काति किञ्चि अनारुहित्वा सरीरञ्च अनुल्लङ्घित्वा यथाठितेनेव हत्थेन पुप्फमुट्ठियो खिपित्वा सुखेन सक्का होति पूजेतुं.

नानाविरागरतनप्पभासमुज्जलन्ति नानाविधचित्तवण्णरतनोभासपभस्सरं. आकासं अब्भुग्गन्त्वा पवत्तेति. आगन्त्वा ठितट्ठानतो उपरि आकासं अब्भुग्गन्त्वा पवत्ते.

सन्निवेसक्खमोति खन्धवारसन्निवेसयोग्यो. सुलभाहारूपकरणोति सुखेनेव लद्धब्बधञ्ञगोरसदारुतिणादिभोजनसाधनो. परचक्कन्ति परस्स रञ्ञो सेना, आणा वा.

आगतनन्दनोति आगतो हुत्वा नन्दिजननो. आगतं वा आगमनं, तेन नन्दतीति आगतनन्दनो. गमनेन सोचेतीति गमनसोचनो. उपकप्पेथाति उपरूपरि कप्पेथ संविदहथ, उपनेथाति ¶ अत्थो. उपपरिक्खित्वाति हेतुतोपि सभावतोपि फलतोपि दिट्ठधम्मिकसम्परायिकआदीनवतोपि वीमंसित्वा.

विभावेन्ति पञ्ञाय अत्थं विभूतं करोन्तीति विभाविनो, पञ्ञवन्तो. अनुयन्ताति अनुवत्तका. ओगच्छमानन्ति ओसीदन्तं. योजनमत्तन्ति वित्थारतो योजनमत्तं पदेसं. गम्भीरभावेन ¶ पन यथा भूमि दिस्सति, एवं ओगच्छति. तेनाह ‘‘महासमुद्दतल’’न्तिआदि. अन्ते चक्करतनं उदकेन सेनाय अनज्झोत्थरणत्थं.

२५७. पुरत्थिमो समुद्दो परियन्तो अस्साति पुरत्थिमसमुद्दपरियन्तो, पुरत्थिमसमुद्दं परियन्तं कत्वा. चातुरन्तायाति चातुसमुद्दन्ताय पुब्बविदेहादिचतुकोट्ठासन्ताय.

हत्थिरतनवण्णना

२५८. हरिचन्दनादीहीति आदि-सद्देन चतुज्जातियगन्धादिं सङ्गण्हाति. आगमनं चिन्तेथाति वदन्ति चक्कवत्तिवत्तस्स पूरितताय परिचितत्ता. भूमिफुसनकेहि वालधि, वरङ्गं हत्थोति इमेहि च तीहि, चतूहि पादेहि चाति सत्तहि अवयवेहि ठितत्ता सत्तपतिट्ठो. इतरेसं अमच्चादीनं चिन्तयन्तानं न आगच्छति. अपनेत्वाति अत्तनो आनुभावेन अपनेत्वा. गन्धमेव हि तस्स इतरे हत्थिनो न सहन्ति.

अस्सरतनवण्णना

सिन्धवकुलतोति सिन्धवस्साजानीयकुलतो.

मणिरतनवण्णना

सकटनाभिसमप्पमाणन्ति परिणाहतो महासकटस्स नाभिया समप्पमाणं. उभोसु अन्तेसूति हेट्ठा उपरि चाति द्वीसु अन्तेसु. कण्णिकपरियन्ततोति द्विन्नं कञ्चनपदुमानं कण्णिकाय परियन्ततो. मुत्ताजालके ठपेत्वाति सुविसुद्धे मुत्तामये जालके पतिट्ठपेत्वा.

इत्थिरतनवण्णना

‘‘इत्थिरतनं ¶ पातुभवती’’ति वत्वा अस्स पातुभवनाकारं दस्सेतुं, ‘‘मद्दराजकुलतो वा’’तिआदि वुत्तं. मद्दरट्ठं किर अभिरूपानं इत्थीनं उप्पत्तिट्ठानं. सण्ठानपारिपूरियाति हत्थपादादिसरीरावयवानं सुसण्ठितताय. अवयवपारिपूरिया हि समुदायपारिपूरिसिद्धि. रूपन्ति सरीरं. दस्सनीयाति सुरूपभावेन पस्सितब्बयुत्ता. सोमनस्सवसेन चित्तं पसादेति योनिसो ¶ चिन्तेन्तानं कम्मफलसद्धाय वसेन. पसादावहत्ताति कारणवचनेन यथा पासादिकताय वण्णपोक्खरतासिद्धि वुत्ता, एवं दस्सनीयताय पासादिकतासिद्धि, अभिरूपताय च दस्सनीयतासिद्धि वत्तब्बाति नयं दस्सेति. पटिलोमतो वा वण्णपोक्खरताय पासादिकतासिद्धि, पासादिकताय दस्सनीयतासिद्धि, दस्सनीयताय अभिरूपतासिद्धि योजेतब्बा. एवं सरीरसम्पत्तिवसेन अभिरूपतादिके दस्सेत्वा इदानि सरीरे दोसाभाववसेनपि ते दस्सेतुं, ‘‘अभिरूपा वा’’तिआदि वुत्तं. तत्थ यथा पमाणयुत्ता, एवं आरोहपरिणाहयोगतो च पासादिका नातिदीघतादयो. एवं मनुस्सानं दिब्बरूपतासम्पत्तिपीति ‘‘अप्पत्ता दिब्बवण्ण’’न्ति वुत्तं. कायविपत्तियाति सरीरदोसस्स. अभावोति अच्चन्तमेव दूरीभावो.

सतविहतस्साति सतक्खत्तुं विहतस्स. सतविहतस्साति च इदं कप्पासपिचुवसेन वुत्तं, तूलपिचुनो पन विहननमेव नत्थि. कुङ्कुमतगरतुरुक्खयवनपुप्फानि चतुज्जाति. तमालतगरतुरुक्खयवनपुप्फानीति अपरे.

अग्गिदड्ढा वियाति आसनगतेन अग्गिना दड्ढा विय. पठममेवाति अञ्ञकिच्चतो पठममेव, दस्सनसमकालमेवाति अत्थो. तं तं अत्तना रञ्ञो कातब्बकिच्चं किं करोमीति पुच्छितब्बताय किं करणन्ति पटिस्सावेतीति किङ्कारपटिस्साविनी.

मातुगामो नाम येभुय्येन सठजातिको, इत्थिरतनस्स पन तं नत्थीति दस्सेतुं, ‘‘स्वास्सा’’तिआदि वुत्तं. गुणाति रूपगुणा चेव आचारगुणा च. पुरिमकम्मानुभावेनाति तस्सा पुरिमकम्मानुभावेन. इत्थिरतनस्स तब्भावसंवत्तनियपुरिमकम्मस्स आनुभावेन, चक्कवत्तिनोपि परिवारसंवत्तनियं पुञ्ञकम्मं तादिसस्स फलविसेसस्स उपनिस्सयो होतियेव. तेनाह ‘‘चक्कवत्तिनो पुञ्ञं उपनिस्साया’’ति. एतेन सेसरतनेसुपि ¶ तेसं विसेसानं तदुपनिस्सयता विभाविता एवाति दट्ठब्बं. पुब्बे एकदेसवसेन लब्भमानपारिपूरी रञ्ञो चक्कवत्तिभावूपगमनतो पट्ठाय सब्बाकारपारिपूरा जाता.

गहपतिरतनवण्णना

पकतियावाति सभावेनेव, चक्करतनपातुभावतो पुब्बेपि.

परिणायकरतनवण्णना

निस्सायाति उपनिस्साय.

२६०. कटग्गहो ¶ वुच्चति जयग्गहो सकानं पणानं कटभावेन अत्थसिद्धिवसेन सङ्गण्हनन्ति कत्वा. तेनाह ‘‘जयग्गाहेना’’ति. एकप्पहारेनेवाति एकप्पयोगेनेव सतसहस्सानि अधिगच्छेय्याति योजना. सेसं वुत्तनयत्ता सुविञ्ञेय्यमेव.

बालपण्डितसुत्तवण्णनाय लीनत्थप्पकासना समत्ता.

१०. देवदूतसुत्तवण्णना

२६१. द्वे ¶ अगारातिआदीति आदि-सद्देन ‘‘सद्वारा…पे… अनुविचरन्तेपी’’ति एतमत्थं सङ्गण्हाति. एत्तकमेव हि अस्सपुरसुत्ते (म. नि. १.४३२; म. नि. अट्ठ. १.४३२) वित्थारितं वेदितब्बं. ‘‘दिब्बेन चक्खुना’’तिआदि पन विसुद्धिमग्गे (विसुद्धि. २.३९७) तथा वित्थारितम्पि सुत्तसंवण्णना होतीति कत्वा, ‘‘अस्सपुरसुत्ते वित्थारितमेवा’’ति वुत्तं.

२६२. निरयतो पट्ठाय देसनं देवलोकेन ओसापेतीति संकिलेसधम्मेहि संवेजेत्वा वोदानधम्मेहि निट्ठापेन्तो. दुतियं पन वुत्तविपरियायेन वेदितब्बं, तदिदं वेनेय्यज्झासयविसिट्ठन्ति दट्ठब्बं. इदानि सङ्खिपित्वा वुत्तमत्थं विवरितुं, ‘‘सचे’’तिआदि वुत्तं. सोति भगवा.

एकच्चे ¶ थेराति (कथा. अनुटी. ८६६-८६८; अ. नि. टी. २.३.३६) अन्धकादिके, विञ्ञाणवादिनो च सन्धाय वदति. नेरयिके निरये पालेन्ति ततो निग्गन्तुमप्पदानवसेन रक्खन्तीति निरयपाला. नेरयिकानं नरकदुक्खेन परियोनद्धाय अलं समत्थाति वा निरयपाला. तन्ति ‘‘नत्थि निरयपाला’’तिवचनं. पटिसेधितमेवाति ‘‘अत्थि निरये निरयपाला, अत्थि च कारणिका’’तिआदिना नयेन अभिधम्मे (कथा. ८६६) पटिसेधितमेव. यदि निरयपाला नाम न सियुं, कम्मकारणापि न भवेय्य. सति हि कारणिके कम्मकारणाय भवितब्बन्ति अधिप्पायो. तेनाह ‘‘यथा ही’’तिआदि. एत्थाह – ‘‘किं पनेते निरयपाला नेरयिका, उदाहु अनेरयिका’’ति. किञ्चेत्थ – यदि ताव नेरयिका, इमे निरयसंवत्तनियेन कम्मुना निब्बत्ताति सयम्पि निरयदुक्खं अनुभवेय्युं, तथा सति अञ्ञेसं नेरयिकानं यातनाय असमत्था सियुं, ‘‘इमे नेरयिका, इमे निरयपाला’’ति ववत्थानञ्च न सिया, ये च ये यातेन्ति, तेहि समानरूपबलप्पमाणेहि इतरेसं भयसन्तासा न सियुं. अथ अनेरयिका, नेसं तत्थ कथं सम्भवोति वुच्चते – अनेरयिका निरयपाला अनिरयगतिसंवत्तनियकम्मनिब्बत्तितो. निरयूपपत्तिसंवत्तनियकम्मतो हि अञ्ञेनेव कम्मुना ते निब्बत्तन्ति रक्खसजातिकत्ता. तथा हि वदन्ति सब्बत्थिवादिनो –

‘‘कोधना ¶ कुरूरकम्मन्ता, पापाभिरुचिनो सदा;

दुक्खितेसु च नन्दन्ति, जायन्ति यमरक्खसा’’ति. (कथा. अनुटी. ८६६-८६८; अ. नि. टी. २.३.३६);

तत्थ यदेके वदन्ति ‘‘यातनादुक्खं पटिसंवेदेय्युं, अथ वा अञ्ञमञ्ञं यातेय्यु’’न्तिआदि, तयिदं असारं निरयपालानं नेरयिकभावस्सेव अभावतो. यदिपि अनेरयिका निरयपाला, अयोमयाय पन आदित्ताय सम्पज्जलिताय सजोतिभूताय निरयभूमिया परिक्कममाना कथं दाहदुक्खं नानुभवन्तीति? कम्मानुभावतो. यथा हि इद्धिमन्तो चेतोवसिप्पत्ता महामोग्गल्लानादयो नेरयिके अनुकम्पन्ता इद्धिबलेन निरयभूमिं उपगता दाहदुक्खेन न बाधीयन्ति, एवंसम्पदमिदं दट्ठब्बं.

इद्धिविसयस्स ¶ अचिन्तेय्यभावतोति चे? इदम्पि तंसमानं कम्मविपाकस्स अचिन्तेय्यभावतो. तथारूपेन हि कम्मुना ते निब्बत्ता. यथा निरयदुक्खेन अबाधिता एव हुत्वा नेरयिके यातेन्ति, न चेत्तकेन बाहिरविसयाभावो युज्जति इट्ठानिट्ठताय पच्चेकं द्वारपुरिसेसु विभत्तसभावत्ता. तथा हि एकच्चस्स द्वारस्स पुरिसस्स च इट्ठं एकच्चस्स अनिट्ठं, एकच्चस्स च अनिट्ठं एकच्चस्स इट्ठं होति. एवञ्च कत्वा यदेके वदन्ति – ‘‘नत्थि कम्मवसेन तेजसा परूपतापन’’न्तिआदि, तदपाहतं होति. यं पन वदन्ति – ‘‘अनेरयिकानं नेसं कथं तत्थ सम्भवो’’ति निरये नेरयिकानं यातनासब्भावतो. नेरयिकसत्तयातनायोग्यञ्हि अत्तभावं निब्बत्तेन्तं कम्मं तादिसनिकन्तिविनामितं निरयट्ठानेयेव निब्बत्तेति. ते च नेरयिकेहि अधिकतरबलारोहपरिणाहा अतिविय भयानकदस्सना कुरूरतरपयोगा च होन्ति. एतेनेव तत्थ नेरयिकानं विबाधककाकसुनखादीनम्पि निब्बत्ति संवण्णिताति दट्ठब्बं.

कथं अञ्ञगतिकेहि अञ्ञगतिकबाधनन्ति च न वत्तब्बं अञ्ञत्थापि तथा दस्सनतो. यं पनेके वदन्ति – ‘‘असत्तसभावा एव निरयपाला निरयसुनखादयो चा’’ति तम्पि तेसं मतिमत्तं अञ्ञत्थ तथा अदस्सनतो. न हि काचि अत्थि तादिसी धम्मप्पवत्ति, या असत्तसभावा, सम्पतिसत्तेहि अप्पयोजिता च सत्तकिच्चं साधेन्ती दिट्ठपुब्बा. पेतानं पानीयनिवारकानं दण्डादिहत्थपुरिसानम्पि सब्भावे, असत्तभावे च विसेसकारणं नत्थि. सुपिनोपघातोपि अत्थि, किच्चसमत्थता पन अप्पमाणं दस्सनादिमत्तेनपि तदत्थसिद्धितो. तथा हि सुपिने आहारूपभोगादिना न अत्थसिद्धि, इद्धिनिम्मानरूपं पनेत्थ लद्धपरिहारं इद्धिविसयस्स ¶ अचिन्तेय्यभावतो. इधापि कम्मविपाकस्स अचिन्तेय्यभावतोति चे? तं न, असिद्धत्ता. नेरयिकानं कम्मविपाकतो निरयपालाति असिद्धमेतं, वुत्तनयेन पन पाळितो च तेसं सत्तभावो एव सिद्धोति. सक्का हि वत्तुं, ‘‘सत्तसङ्खाता निरयपालसञ्ञिता धम्मप्पवत्ति साभिसन्धिकपरूपघाती अत्थि किच्चसब्भावतो ओजाहारादिरक्खससन्तति ¶ विया’’ति. अभिसन्धिपुब्बकता चेत्थ न सक्का पटिक्खिपितुं तथा तथा अभिसन्धिया यातनतो, ततो एव न सङ्घातपब्बतादीहि अनेकन्तिकता. ये पन वदन्ति – ‘‘भूतविसेसा एव एते वण्णसण्ठानादिविसेसवन्तो भेरवाकारा ‘नरकपाला’ति समञ्ञं लभन्ती’’ति. तदसिद्धं उजुकमेव पाळियं, – ‘‘अत्थि निरयेसु निरयपाला’’ति (कथा. ८६६) वादस्स पतिट्ठापितत्ता.

अपिच यथा अरियविनये नरकपालानं भूतमत्तता असिद्धा, तथा पञ्ञत्तिमत्तवादिनोपि तेसं भूतमत्तता असिद्धाव सब्बसो रूपधम्मानं अत्थि भावस्सेव अप्पटिजाननतो. न हि तस्स भूतानि नाम परमत्थतो सन्ति. यदि परमत्थं गहेत्वा वोहरति, अथ कस्मा चक्खुरूपादीनि पटिक्खिपतीति? तिट्ठतेसा अनवट्ठिततक्कानं अप्पहीनसम्मोहविपल्लासानं वादवीमंसा, एवं, ‘‘अत्थेव निरये निरयपाला’’ति निट्ठमेत्थ गन्तब्बं. सति च नेसं सब्भावे, असतिपि बाहिरे विसये नरके विय देसादिनियमो होतीति वादो न सिज्झति, सति एव पन बाहिरे विसये देसादिनियमोति दट्ठब्बं.

देवदूतसरापनवसेन सत्ते यथूपचिते पुञ्ञकम्मे यमेति नियमेतीति यमो, तस्स यमस्स वेमानिकपेतानं राजभावतो रञ्ञो. तेनाह – ‘‘यमराजा नाम वेमानिकपेतराजा’’ति. कम्मविपाकन्ति अकुसलकम्मविपाकं. वेमानिकपेताति कण्हसुक्कवसेन मिस्सककम्मं कत्वा विनिपातिकदेवता विय सुक्केन कम्मुना पटिसन्धिं गण्हन्ति. तथा हि ते मग्गफलभागिनोपि होन्ति, पवत्तियं पन कम्मानुरूपं कदाचि पुञ्ञफलं, कदाचि अपुञ्ञफलं पच्चनुभवन्ति. येसं पन अरियमग्गो उप्पज्जति, तेसं मग्गाधिगमतो पट्ठाय पुञ्ञफलमेव उप्पज्जतीति दट्ठब्बं. अपुञ्ञफलं पुब्बे विय कटुकं न होति. मनुस्सत्तभावे ठितानं मुदुकमेव होतीति अपरे. धम्मिको राजाति एत्थ तस्स धम्मिकभावो धम्मदेवपुत्तस्स विय उप्पत्तिनियमितधम्मवसेनेव वेदितब्बो. द्वारेसूति अवीचिमहानरकस्स चतूसु द्वारेसु.

जातिधम्मोति कम्मकिलेसवसेन जातिपकतिको. तेनाह ‘‘जातिसभावो’’ति. सभावो च ¶ नाम तेजोधातुया उण्हता विय न कदाचिपि विगच्छतीति आह ‘‘अपरिमुत्तो जातिया’’तिआदि.

२६३. इदानि ¶ जातिया देवदूतभावं निद्धारेत्वा दस्सेतुं, ‘‘दहरकुमारो’’तिआदि वुत्तं. अत्थतो एवं वदति नामाति वाचाय अवदन्तोपि अत्थापत्तितो एवं वदन्तो विय होति विञ्ञूनन्ति अत्थो. एवं तुम्हाकम्पि जाति आगमिस्सतीति एवं संकिलिट्ठजेगुच्छअसमत्थदहरावत्था जाति तुम्हाकं आगमिस्सति. कामञ्चायं आगता एव, सा पन अतीतानागताय उपरिपि आगमनाय पयोगो इच्छितब्बो, अनागताय न इच्छितब्बोति आह ‘‘जाति आगमिस्सती’’ति. तेनेवाह – ‘‘इति तस्सा…पे… करोथा’’ति. तेनाति तेन कारणेन विञ्ञूनं वेदवत्थुभावेनाति अत्थो.

ऊरुबलन्ति ऊरुबली. तेन दूरेपि गमनागमनलङ्घनादिसमत्थतं दस्सेति, बाहुबलन्ति पन इमिना हत्थेहि कातब्बकिच्चसमत्थतं, जवग्गहणेन वेगस्स पवत्तिसमत्थतं. अन्तरहिता नट्ठा. सेसं पठमदेवदूते वुत्तनयमेव.

विविधं दुक्खं आदहतीति ब्याधि, विसेसेन वा आधीयति एतेनाति ब्याधि, तेन ब्याधिना. अभिहतोति बाधितो, उपद्दुतोति अत्थो.

२६५. कारणा नाम ‘‘हत्थच्छेदादिभेदा अधिकपीळा करीयति एताया’’ति कत्वा यातना, सा एव कारणिकेहि कातब्बट्ठेन कम्मन्ति कम्मकारणा यातनाकम्मन्ति अत्थो.

२६६. बहुं पापं कतन्ति बहुसो पापं कतं. तेन पापस्स बहुलीकरणमाह. बहूति वा महन्तं. महत्थोपि हि बहुसद्दो दिस्सति, ‘‘बहु वत कतं अस्सा’’तिआदीसु, गरुकन्ति वुत्तं होति. सोति गरुकं बहुलं वा पापं कत्वा ठितो निरये निब्बत्ततियेव, न यमपुरिसेहि यमस्स सन्तिकं नीयति. परित्तन्ति पमाणपरित्तताय कालपरित्तताय च परित्तं, पुरिमस्मिं पक्खे अगरुन्ति अत्थो, दुतियस्मिं अबहुलन्ति. यथावुत्तमत्थं उपमाय विभावेतुं, ‘‘यथा ही’’तिआदि वुत्तं. कत्तब्बमेवाति दण्डमेव. अनुविज्जित्वा वीमंसित्वा. विनिच्छयट्ठानन्ति अट्टकरणट्ठानं. परित्तपापकम्माति दुब्बलपापकम्मा. ते हि पापकम्मस्स दुब्बलभावतो कतूपचितस्स च ओकासारहकुसलकम्मस्स बलवभावतो अत्तनो धम्मतायपि सरन्ति.

आकासचेतियन्ति ¶ ¶ गिरिसिखरे विवटङ्गणे कतचेतियं. अग्गिजालसद्दन्ति ‘‘पटपटा’’ति पवत्तमानं अग्गिजालाय सद्दं सुत्वा, ‘‘मया तदा आकासचेतिये पूजितरत्तपटा विया’’ति अत्तनो पूजितपटं अनुस्सरि. पञ्चहिपि न सरतीति बलवता पापकम्मेन ब्यामोहितो पञ्च सञ्ञाणानि न गण्हाति. तुण्ही होति कम्मारहो अयन्ति तत्थ पतीकारं अपस्सन्तो.

२६७. अवीचिमहानिरयो उब्बेधेनपि योजनसतमेवाति वदन्ति. नवनवयोजनिका होति पुथुलतो. महानिरयस्स महन्तत्ता तथापि भित्तिसतं योजनसहस्सं होतीति उस्सदस्स सब्बस्स परिक्खेपतो ‘‘दसयोजनसहस्सं होती’’ति वुत्तं.

२६८. झायतीति पटिपाकतिकं होति. तादिसमेवाति पुरिमसदिसत्ता ‘‘उब्भतं सदिसमेव होती’’ति एवं वुत्तं. बहुसम्पत्तोति वा बहुट्ठानं अतिक्कमित्वा पुरत्थिमद्वारं सम्पत्तो होति.

छन्नं जालानन्ति चतूहि दिसाहि हेट्ठा उपरि च उब्भतानं छन्नं जालानं. सत्तानं निरन्तरता निरयसंवत्तनियकम्मकतानञ्च बहुभावतो जालानं ताव सत्तानञ्च निरन्तरत्ता अवीचि होतु; दुक्खस्स पन कथं निरन्तरताति तं दस्सेन्तो, ‘‘कायद्वारे…पे… एकं दुक्खसहगत’’न्तिआदिमाह. तत्थ आवज्जनं सम्पटिच्छनं सन्तीरणं वोट्ठब्बनं द्वे तदारम्मणचित्तानीति छ उपेक्खासहगतानि. एवं सन्तेपीति यदिपि तत्थ उपेक्खासहगतचित्तानिपि पवत्तन्ति उपेक्खावेदनापि लद्धावसरा; दुक्खवेदना पन बलवतरा निसितनिसितेन तिखिणेन सत्थेन निरन्तरं सरीरं छिन्दन्ती विय दुक्खं उपनेन्ती विय ता वेदना अभिभवन्ती अज्झोत्थरन्ती उप्पज्जन्ती निरन्तरा विय होति. तेनाह ‘‘अनुदहनबलवताया’’तिआदि. उपेक्खावेदनाति वा तत्थ अतिविय अनिट्ठफलताय अनिट्ठारम्मणा उपेक्खावेदना दुक्खाति वुच्चति, यथा इट्ठफलबहुताय इट्ठारम्मणा झानादिपरियापन्ने च सुगतिभवे च उपेक्खावेदना सुखाति वुच्चति, एवं दुक्खस्स निरन्तरताय अवीचीति वेदितब्बं.

२६९. एको ¶ पादो महानिरये होति, एको गूथनिरये निपतति, कम्मवेगुक्खित्तो अन्तरा पदमावहति सेसारम्भताय. हत्थिगीवप्पमाणा परिणाहेन. एकदोणिकनावाप्पमाणा आयामेन.

पोक्खरपत्तानीति ¶ खुरधारासदिसानि तिखिणग्गानि अयोसूलमयानेव पदुमपत्तानि. हेट्ठा खुरधाराति हेट्ठाभूमियं निक्खित्ता, वेत्तलतायो च तिखिणधारकण्टका अयोमया एव. तेनाह – ‘‘सो तत्थ दुक्खा’’तिआदि. कुसतिणानीति कुसतिणजातिताय तथा वुत्तानि. खरवालिकाति खरा तिखिणकोटिका सिङ्घाटकसण्ठाना वालिका.

२७०. दन्ते सम्फुसेतीति हेट्ठिमदन्ते यथा किञ्चि मुखे पक्खिपितुं न सक्का, एवं सुफुसिते करोति. तम्बलोहपानतो पट्ठायाति वुत्तकारणतो पटिलोमतोपि एवं कम्मकारणानं कारणमाह. दुतियेनाति कुठारीहि तच्छनेन. ततियेनाति वासीहि तच्छनेन. अविजहितमेव संवेगहेतुताय लोकस्स महतो अत्थस्स संवत्तनतो.

२७१. हीनकायं हीनं वा अत्तभावं उपगता. उपादानेति चतुब्बिधेपि उपादाने. तं अत्थतो तण्हादिट्ठिग्गाहोति आह ‘‘तण्हादिट्ठिगहणे’’ति. सम्भवति जरामरणं एतेनाति सम्भवो, उपादानन्ति आह – ‘‘जातिया मरणस्स च कारणभूते’’ति. अनुपादाति अनुपादाय. तेनाह ‘‘अनुपादियित्वा’’ति.

सब्बदुक्खातिक्कन्ता नामाति सकलम्पि वट्टदुक्खं अतिक्कन्ता एव होन्ति चरिमचित्तनिरोधेन वट्टदुक्खलेसस्सपि असम्भवतो.

देवदूतसुत्तवण्णनाय लीनत्थप्पकासना समत्ता.

निट्ठिता च सुञ्ञतवग्गवण्णना.

४. विभङ्गवग्गो

१. भद्देकरत्तसुत्तवण्णना

२७२. एका ¶ ¶ रत्ति एकरत्तो, भद्दो एकरत्तो एतस्साति भद्देकरत्तं, विपस्सनं परिब्रूहेन्तो पुग्गलो. तेनाह – ‘‘विपस्सनानुयोगसमन्नागतत्ता’’ति. तं उद्दिस्स पवत्तिया पन भद्देकरत्तसहचरणतो भद्देकरत्तो. तेनाह भगवा – ‘‘भद्देकरत्तस्स वो, भिक्खवे, उद्देसञ्च विभङ्गञ्च देसेस्सामी’’ति. देसेतब्बमत्थं उद्दिसति एतेनाति उद्देसो, सङ्खेपदेसना एव. यस्मा पन निद्देसपदानं जननिट्ठाने ठितत्ता माता वियाति मातिकाति वुच्चति, तस्माह ‘‘उद्देसन्ति मातिक’’न्ति. उद्दिट्ठमत्थं विभजति एतेनाति विभङ्गो वित्थारदेसना, तेनाह – ‘‘वित्थारभाजनिय’’न्ति ‘‘यथाउद्दिट्ठमत्थं वित्थारतो भाजेति विभजति एतेना’’ति कत्वा.

उप्पादादिखणत्तयं पत्वा अतिक्कमं अतिक्कन्तं अतीतं. तं पन अत्थतो विगतं खन्धपञ्चकन्ति आह ‘‘अतीते खन्धपञ्चके’’ति. तण्हादिट्ठीहि नानुगच्छेय्याति तण्हादिट्ठाभिनन्दनाहि नानुभवेय्य, नाभिनन्देय्याति अत्थो. यथा ‘‘निच्च’’न्तिआदिना विपरीतग्गाहवसेन अतीतेसु रूपादीसु मिच्छाअभिनिविसनं परामासो दिट्ठाभिनन्दना; एवं ‘‘निच्च’’न्तिआदिना विपरीतग्गाहवसेन अनागतेसु रूपादीसु मिच्छाअभिनिविसनं परामासो दिट्ठि कम्मसमादानं दिट्ठिपत्थनाति तं पटिक्खिपन्तो आह – ‘‘तण्हादिट्ठीहि न पत्थेय्या’’ति. यदतीतन्ति एत्थ इति-सद्दो आदिअत्थो. तेन ‘‘अपत्त’’न्ति पदं सङ्गण्हाति. तम्पि हि कारणवचनं. तेनाह ‘‘यस्मा चा’’ति. तत्थायमधिप्पायो, ‘‘अतीतं तण्हादिवसेन नाभिनन्दितब्बं सब्बसो अविज्जमानत्ता ससविसाणं विय, तथा अनागतम्पि न पत्थेतब्ब’’न्ति. तत्थ सिया – अतीतं नाभिनन्दितब्बं अभिनन्दनाय निप्पयोजनत्ता, अनागतपत्थना पन सफलापि सियाति न सब्बसो पटिक्खिपितब्बाति? न, तस्सापि सविघातभावेन पटिक्खिपितब्बतो. तेनाह ‘‘यस्मा’’तिआदि. तत्थ पहीनन्ति निस्सट्ठसभावं. निरुद्धन्ति ¶ भग्गं. अत्थङ्गतन्ति विनासं. अप्पत्तन्ति सभावं उप्पादादिकं असम्पत्तं. अजातन्ति न जातं. अनिब्बत्तन्ति तस्सेव वेवचनं.

यत्थ यत्थाति यस्मिं यस्मिं खणे, यस्मिं यस्मिं वा धम्मपुञ्जे उप्पन्नं, तं सब्बम्पि असेसेत्वा. अरञ्ञादीसु वाति वा-सद्दो अनियमत्थो. तेन ¶ अरञ्ञे वा रुक्खमूले वा पब्बतकन्दरादीसु वाति ठाननियमाभावा अनुपस्सनाय सातच्चकारितं दस्सेति. यमकादिवसेन परिब्रूहियमाना विपस्सना विय पटिपक्खेहि अकोपनियाव होतीति आह – ‘‘असंहीरं असंकुप्पन्ति इदं विपस्सनापटिविपस्सनादस्सनत्थं वुत्त’’न्ति. गाथायमयमत्थो विपस्सनावसेन युज्जतीति आह – ‘‘विपस्सना ही’’तिआदि. किं एताय परियायकथायाति निप्परियायतोव असंहीरं असंकुप्पं दस्सेतुं, ‘‘अथ वा’’तिआदि वुत्तं. कथं पन निच्चस्स निब्बानस्स अनुब्रूहना होतीति आह ‘‘पुनप्पुन’’न्तिआदि. एतेन तदारम्मणधम्मा ब्रूहनाय, तेसं आरम्मणम्पि अत्थतो अनुब्रूहितं नाम होति बहुलं मनसिकारेनाति दस्सेति.

आदितो तापनं आतापनं, तेन आरम्भधातुमाह. परितो तापनं परितापनं, तेन निक्कमधातुपरक्कमधातुयो चाति. तस्स सेनाति तस्स मच्चुनो सहकरणट्ठेन सेना वियाति सेना. सङ्गरोतिआदीसु मित्ताकारग्गहणेन सामपयोगमाह. लञ्जग्गहणेन लञ्जदानं, तेन दानप्पयोगं. बलरासीति हत्थिअस्सादिबलकायो. तेन दण्डभेदानि वदति. भेदोपि हि बलवतो एव इज्झति, स्वायं चतुब्बिधोपि उपाययोगेन सम्पवत्तीयति. तत्थ तत्थ च सङ्गं आसत्तिं अरति देतीति सङ्गरो पुब्बभागे वा सङ्गरणवसेन तस्स पटिजाननवसेन पवत्तनतो.

उट्ठाहकं उट्ठानवीरियसम्पन्नं. सपरहितसीवनलक्खणेन असाधुभावपरम्मुखभावगमनेन वा सन्तो.

२७३. मनुञ्ञरूपवसेनेव एवंरूपो अहोसीन्ति अतीतं अन्वागमेति तत्थ नन्दियासमन्वानयनतो. वेदनादीसुपि एसेव नयो. कुसलसुखसोमनस्सवेदनावसेनाति कुसलवेदनावसेन सुखवेदनावसेन सोमनस्सवेदनावसेनाति पच्चेकं वेदनासद्दो योजेतब्बो. तण्हाभिनन्दनाय सति दिट्ठाभिनन्दना सिद्धा एवाति – ‘‘तण्हं समन्वानेति’’इच्चेव वुत्तं. हीनरूपादि…पे… न मञ्ञति अमनुञ्ञोपि समानो समनुञ्ञभावस्सेव वसेन मञ्ञनाय पवत्तनतो. नानुपवत्तयति विक्खम्भनवसेन नन्दिया दूरीकतत्ता.

२७४. उळारसुन्दरभावमुखेनेव ¶ ¶ अनागतेसुपि रूपादीसु तण्हादिट्ठिकप्पना पवत्ततीति आह – ‘‘एवंरूपो…पे… वेदितब्बा’’ति.

२७५. वत्तब्बं सियाति यथा नन्दिया असमन्वानयनजोतनं ब्यतिरेकमुखेन पतिट्ठपेतुं, ‘‘अतीतं न न्वागमेय्या’’ति उद्देसस्स, ‘‘कथञ्च, भिक्खवे, अतीतं अन्वागमेती’’तिआदिना (म. नि. ३.२७३) विभङ्गो वुत्तो, एवं ‘‘पच्चुप्पन्नञ्च यो धम्म’’न्तिआदिकस्स उद्देसस्स ब्यतिरेकमुखेन विभङ्गे वुच्चमाने विपस्सनापटिक्खेपवसेन, ‘‘कथञ्च…पे… वत्तब्बं सिया’’ति वुत्तं. तयिदं परमगम्भीरं सत्थुदेसनानयं अनुपधारेत्वा चोदितं, यस्मा ‘‘पच्चुप्पन्नञ्च यो धम्म’’न्तिआदिकस्स उद्देसस्स ब्यतिरेकमुखेनेव विपस्सनापटिक्खेपवसेन, ‘‘कथञ्च, भिक्खवे, पच्चुप्पन्नेसू’’ति विभङ्गदेसना सम्पवत्तति. तेनाह ‘‘यस्मा पना’’तिआदि. तत्थ तस्सा एवाति विपस्सनाय एव. अभावं दस्सेतुं संहीरतीति मातिकं उद्धरित्वाति कथेतुकम्यताय मातिकावसेन पदुद्धारं कत्वा, ‘‘इध, भिक्खवे, असुतवा सुतवा’’ति च आदिना वित्थारो वुत्तो. विपस्सनाय अभावतोति विपस्सनाय अभावितताय अविक्खम्भितताय तण्हादिट्ठीहि सपत्तेहि विय तत्थ तत्थ ठपनाय आकड्ढीयति, तत्थ तत्थ विसये ततो एव अपायसमुद्दं संसारसमुद्दं आनीयति. सुक्कपक्खो वुत्तविपरियायेन वेदितब्बो. सेसं सुविञ्ञेय्यमेव.

भद्देकरत्तसुत्तवण्णनाय लीनत्थप्पकासना समत्ता.

२. आनन्दभद्देकरत्तसुत्तवण्णना

२७६. बहिद्धा ¶ पुथुत्तारम्मणतो निवत्तेत्वा एकस्मिंयेव आरम्मणे चित्तस्स सम्मदेव लयनं अप्पनं पटिसल्लानं, यो कोचि समापत्तिविहारो, इध पन अरियविहारो अधिप्पेतोति आह – ‘‘पटिसल्लाना वुट्ठितो’’तिआदि. जानन्तोव भगवा कथासमुट्ठापनत्थं पुच्छि. वुत्तञ्हेतं – ‘‘जानन्तापि तथागता पुच्छन्ति, जानन्तापि न पुच्छन्ती’’तिआदि (पारा. १६).

२७८. साधुकारमदासीति ¶ साधुसद्दं सावेसि. तं पन पसंसा होतीति पसंसत्थो साधुसद्दो. तेनाह ‘‘देसनं पसंसन्तो’’ति. विज्जमानेहि वण्णेहि गुणवन्ते उदग्गताकरणं सम्पहंसनं, केवलं गुणसंकित्तनवसेन थोमना पसंसाति अयमेतेसं विसेसो.

आनन्दभद्देकरत्तसुत्तवण्णनाय लीनत्थप्पकासना समत्ता.

३. महाकच्चानभद्देकरत्तसुत्तवण्णना

२७९. उण्हभावेन ¶ तपनतो तपं उदकं एतस्साति तपोदा, रहदो. तेनाह ‘‘तत्तोदकस्स रहदस्सा’’ति. सङ्खेपेन वुत्तमत्थं वित्थारतो दस्सेतुं, ‘‘वेभारपब्बतस्सा’’तिआदि वुत्तं. ततो उदकरहदतो, तं रहदं उपनिस्सायाति अत्थो. नागभवनागतोपि हि सो रहदो ततो उपरि मनुस्सलोके जलासयेन सम्बद्धो होति. तेन वुत्तं – ‘‘तपोदा नाम नदी सन्दती’’ति. एदिसाति कुथिता उण्हा, अन्वत्थनामवसेन तपोदाति च वुच्चतीति अत्थो. पेतलोकोति पेतानं वसनट्ठानं पच्चेकनिरयं सन्धायाह. इमस्स पन आरामस्साति तपोदारामस्स. ततोति तपोदासङ्खातनदितो. महाउदकरहदोति महाउदकभरितं पल्ललं.

२८०. समिद्धोति उळारो, परिपुण्णोयेवाति अत्थो. आदिम्हि ब्रह्मचरियमस्साति आदिब्रह्मचरियो, सो एव आदिब्रह्मचरियको. तेनाह ‘‘पुब्बभागप्पटिपत्तिभूतो’’ति. ‘‘अतीतं अनागतं पच्चुप्पन्न’’न्ति अद्धभेदमुखेन सङ्खतधम्मबोधवचनं.

२८२. कामं खन्धादिवसेन विभजनं साधारणं, पठमदुतियचतुत्थसुत्तेसु पन खन्धवसेन विभजनं कत्वा इध तथा अकत्वा एवं देसनाय ठपनं ततो अञ्ञथा आयतनवसेन विभजनत्थं. एवं विभिन्ना हि सङ्खेपवित्थारतो अनवसेसा सम्मसनुपगा धम्मा विभजित्वा दस्सिता होन्ति; अयं किरेत्थ भगवतो अज्झासयो थेरेन नयतो गहितोति दस्सेतुं, ‘‘इमस्मिं किरा’’तिआदि वुत्तं. तत्थ द्वादसायतनवसेनेव मातिकं ठपेसीति लोकियानि द्वादसायतनानि एव सन्धाय ¶ मातिकं ठपेसि, यथा तीसु सुत्तेसु खन्धवसेन विभत्तं, एवं यदि भगवता इधापि विभजनं इच्छितं सिया, तथा विभजेय्य, यस्मा पन तथा अविभजित्वाव गन्धकुटिं पविट्ठो, तस्मा द्वादसायतनवसेनेवेत्थ विभजनं भगवता च अधिप्पेतन्ति नयग्गाहे ठत्वा थेरो विभजि. तेनाह – ‘‘नयं पटिलभित्वा एवमाहा’’ति. भारियं कतन्ति दुक्करं कतं. अपदे पदं दस्सितं आकासे पदं कतं साधारणस्स अत्थस्स विसिट्ठविसयताय दस्सितत्ता. निकन्तिविञ्ञाणन्ति निकन्तितण्हाय सम्पयुत्तं विञ्ञाणं, ‘‘छन्दरागप्पटिबद्धं होती’’ति वचनतो. मनोति भवङ्गचित्तं मनोद्वारिकजवनानं द्वारभूतं.

२८३. पत्थनावसेन ठपेसीति पत्थनावसेन चित्तं पवत्तेसि.

महाकच्चानभद्देकरत्तसुत्तवण्णनाय लीनत्थप्पकासना

समत्ता.

४. लोमसककङ्गियभद्देकरत्तसुत्तवण्णना

२८६. घननिचितलोमो ¶ लोमसो, अयं पन अप्पताय लोमसकोति आह – ‘‘ईसकलोमसाकारताया’’ति, लोमसको अङ्गिको लोमसककङ्गियो, पठमो क-कारो अप्पत्थो, दुतियं पन पदवड्ढनमेव. रत्तकम्बलसिलायन्ति रत्तकम्बलवण्णसिलायं. ओरुय्हाति आकासतो ओतरित्वा. पाटिहारियं दिस्वा दिन्नलाभसक्कारस्स असादियनतो मनुस्सपथे न वसन्ति.

दसहि चक्कवाळसहस्सेहीति निस्सक्कवचनतो आगन्त्वाति अधिप्पायो. सन्निपतिताहि देवताहीति करणवचनं. पञ्ञापयोगमन्दताय पटिविज्झितुं असक्कोन्तानं देवानं ञाणस्स तिक्खविसदभावापादनेन समुत्तेजेतुं संवेगजननत्थं…पे… अभासि. तत्राति तस्मिं देवसन्निपाते, तिस्सं वा देसनायं. देवत्तस्साति देवभावस्स, दिब्बसम्पत्तियाति अत्थो. भद्देकरत्तस्स सुत्तस्स एताति भद्देकरत्तिया.

सवनमुखेन ब्यञ्जनसो अत्थसो च उपधारणं उग्गण्हनन्ति आह – ‘‘तुण्हीभूतो निसीदित्वा सुणन्तो उग्गण्हाति नामा’’ति. वाचुग्गतकरणं परियापुणनन्ति आह – ‘‘वाचाय सज्झायं करोन्तो परियापुणाति नामा’’ति. गन्थस्स परिहणं धारणं, तं पन परेसु पतिट्ठापनं ¶ पाकटं होतीति आह – ‘‘अञ्ञेसं वाचेन्तो धारेति नामा’’ति. सेसं हेट्ठा वुत्तनयमेव.

लोमसककङ्गियभद्देकरत्तसुत्तवण्णनाय लीनत्थप्पकासना

समत्ता.

५. चूळकम्मविभङ्गसुत्तवण्णना

२८९. अङ्गसुभतायाति ¶ अङ्गानं हत्थपादादिसरीरावयवानं सुन्दरभावेन. यं अपच्चं कुच्छितं मुद्धं वा, तत्थ लोके माणववोहारो, येभुय्येन सत्ता दहरकाले सुद्धधातुका होन्तीति वुत्तं, ‘‘तरुणकाले वोहरिंसू’’ति. अधिपतित्ताति इस्सरभावतो.

समाहारन्ति सन्निचयं. पण्डितो घरमावसेति यस्मा अप्पतरेपि ब्ययमाने भोगा खीयन्ति, अप्पतरेपि सञ्चयमाने वड्ढन्ति, तस्मा विञ्ञुजातिको किञ्चि ब्ययं अकत्वा अयमेव उप्पादेन्तो घरावासं अनुतिट्ठेय्याति लोभादेसितमत्थं वदति.

धनलोभेन…पे… निब्बत्तो. लोभवसिकस्स हि गति निरयो वा तिरच्छानयोनि वा. वुत्तञ्हेतं – ‘‘निमित्तस्सादगथितं वा, भिक्खवे, विञ्ञाणं तिट्ठमानं तिट्ठति अनुब्यञ्जनस्सादगथितं वा. तस्मिं समये कालङ्करेय्य, द्विन्नं गतीनं अञ्ञतरं गतिं वदामि – निरयं वा तिरच्छानयोनिं वा’’ति (सं. नि. ४.२३५). निरये निब्बत्तिस्सति कतोकासस्स कम्मस्स पटिबाहितुं असक्कुणेय्यभावतो.

पत्तक्खन्धअधोमुखभावं सन्धाय ‘‘ओनामेत्वा’’ति वुत्तं. ब्राह्मणचारित्तस्स भाविततं सन्धायाह ‘‘ब्रह्मलोके निब्बत्तो’’ति. तं पवत्तिं पुच्छीति सुतमेतं मया, ‘‘मय्हं पिता सुनखो हुत्वा निब्बत्तो’’ति, एतं भोता गोतमेन वुत्तन्ति. किमिदं वुत्तन्ति इमं पवत्तिं पुच्छि.

तथेव वत्वाति यथा सुनखस्स वुत्तं, तथेव वत्वा. अविसंवादनत्थन्ति, ‘‘तोदेय्यब्राह्मणो सुनखो जातो’’ति अत्तनो वचनस्स अविसंवादनत्थं, विसंवादनाभावदस्सनत्थन्ति अधिप्पायो. ञातोम्हि ¶ इमिनाति इमिना मम पुत्तेन मय्हं पुरिमजातियं पिताति एवं ञातो अम्हीति जानित्वा. बुद्धानुभावेन किर सुनखो तथा दस्सेति, न जातिस्सरताय. भगवन्तं दिस्वा भुक्करणं पन पुरिमजातिसिद्धवासनाय. भवपटिच्छन्नन्ति भवन्तरभावेन पटिच्छन्नं. नाम-सद्दो सम्भावने. पटिसन्धिअन्तरन्ति अञ्ञजातिपटिसन्धिग्गहणेन हेट्ठिमजातं गतिं. अङ्गविज्जापाठको किरेस, तेन अप्पायुकदीघायुकतादिवसेन चुद्दस पञ्हे अभिसङ्खरि; एवं किरस्स अहोसि, ‘‘इमेसं सत्तानं अप्पायुकतादयो विसेसा अङ्गपच्चङ्गवसेन सल्लक्खियन्ति. न ¶ खो पनेतं युत्तं ‘अङ्गपच्चङ्गानि याव तेसं तेसं कारण’न्ति; तस्मा भवितब्बमेत्थ अञ्ञेनेव कारणेन. समणो गोतमो तं कारणं विभजित्वा कथेस्सति, एवायं सब्बञ्ञूति निच्छयो मे अपण्णको भविस्सती’’ति. अपरे पन भणन्ति, ‘‘तिरच्छानगतं मनुस्सं वा आविसित्वा इच्छितत्थकसावनं नाम महामन्तविज्जावसेन होति; तस्मा न एत्तावता समणस्स गोतमस्स सब्बञ्ञुता सुनिच्छिता होति. यं नूनाहं कम्मफलमस्स उद्दिस्स पञ्हं पुच्छेय्यं, तत्थ च मे चित्तं आराधेन्तो पञ्हं ब्याकरिस्सति. एवायं सब्बञ्ञूति विनिच्छयो मे भविस्सतीति ते पञ्हे पुच्छती’’ति.

भण्डकन्ति सापतेय्यं, सन्तकन्ति अत्थो. कम्मुना दातब्बं आदियन्तीति कम्मदायादा, अत्तना कतूपचितकम्मफलभागीति अत्थो. तं पन कम्मदायज्जं कारणोपचारेन वदन्तो, ‘‘कम्मं एतेसं दायज्जं भण्डकन्ति अत्थो’’ति आह – यथा ‘‘कुसलानं, भिक्खवे, धम्मानं समादानहेतु एवमिदं पुञ्ञं पवड्ढती’’ति (दी. नि. ३.८०). यवति फलं सभावतो भिन्नम्पि अभिन्नं विय मिस्सितं होति, एतेनाति योनीति आह – ‘‘कम्मं एतेसं योनि कारण’’न्ति. ममत्तवसेन बज्झति संबज्झतीति बन्धु, ञाति सालोहितो च. कम्मं पन एकन्तसम्बन्धमेवाति आह – ‘‘कम्मं एतेसं बन्धू’’ति. पतिट्ठाति अवस्सयो. कम्मसदिसो हि सत्तानं अवस्सयो नत्थि, अञ्ञो कोचि इस्सरो ब्रह्मा वा न करोति तादिसं कत्तुं सज्जितुं असमत्थभावतो. यं पनेत्थ वत्तब्बं, तं विसुद्धिमग्गसंवण्णनायं वुत्तनयेन वेदितब्बं. कम्ममेवाति कस्मा अवधारितं, ननु किलेसापि सत्तानं हीनपणीतभावकारणं, न केवलन्ति ¶ ? सच्चमेतं, किलेसपयोगेन विपाकवट्टं निब्बत्तं कम्मपवत्तितमेवाति कत्वा वुत्तं. ‘‘कथितस्स अत्थं न सञ्जानासी’’ति सङ्खेपतो वत्वा ननु भगवा महाकारुणिको परेसं ञापनत्थमेव धम्मं देसेतीति आह – ‘‘माननिस्सितो किरेसा’’तिआदि.

२९०. समत्तेनाति परियत्तेन, यथा तं फलं दातुं समत्थं होति, एवं कतेन, उपचितेनाति अत्थो. तादिसं पन अत्तनो किच्चे अनूनं नाम होतीति आह ‘‘परिपुण्णेना’’ति. समादिन्नेनाति एत्थ समादानं नाम तण्हादिट्ठीहि गहणं परामसनन्ति आह – ‘‘गहितेन परामट्ठेना’’ति. पटिपज्जति एताय सुगतिदुग्गतीति पटिपदा, कम्मं. तथा हि तं ‘‘कम्मपथो’’ति वुच्चति.

एसाति पटिपदा. दुब्बलं उपघातकमेव सियाति उपपीळकस्स विसयं दस्सेतुं, ‘‘बलवकम्मेना’’तिआदि वुत्तं. बलवकम्मेनाति पुञ्ञकम्मेन. वदति नामाति वदन्तो विय होति ¶ . निब्बत्तापेय्यन्ति कस्मा वुत्तं, ननु उपपीळकसभावं कम्मं जनकसभावं न होतीति? सब्बमेतं परिकप्पनवचनं, यथा मनुस्सा पच्चत्थिकं पटिपक्खं किञ्चि कातुं असमत्थापि केचि आलम्बनवसेन समत्था विय अत्तानं दस्सेन्ति, एवंसम्पदमिदन्ति केचि. अपरे पन भणन्ति – यस्सिदं कम्मस्सविपाकं पीळेति, सचे तस्मिं अनोकासे एव सयं विपच्चितुं ओकासं लभेय्य, अपायेसु एव तंसमङ्गिपुग्गलं निब्बत्तापेय्य, यस्मा तं कम्मं बलवं हुत्वा अवसेसपच्चयसमवायेन विपच्चितुं आरद्धं, तस्मा इतरं तस्स विपाकं विबाधेन्तं उपपीळकं नाम जातं. एतदत्थमेव चेत्थ ‘‘बलवकम्मेन निब्बत्त’’न्ति बलवग्गहणं कतं. किच्चवसेन हि नेसं कम्मानं एता समञ्ञा, यदिदं उपपीळकं उपच्छेदकं जनकं उपत्थम्भकन्ति, न कुसलानि विय उपत्थम्भानि होन्ति निब्बत्तत्थाय. पीळेत्वाति विहेठेत्वा पटिघाटनादिवसेन उच्छुतेलयन्तादयो विय उच्छुतिलादिके विबाधेत्वा. निरोजन्ति नित्तेजं. नियूसन्ति निरसं. कसटन्ति निस्सारं. परिस्सयन्ति उपद्दवं.

इदानि परिस्सयस्स उपनयनाकारं दस्सेन्तेन तत्थ, ‘‘दारकस्सा’’तिआदिं वत्वा भोगानं विनासनाकारं दस्सेतुं, पुन ‘‘दारकस्सा’’तिआदि वुत्तं. कुम्भदोहनाति कुम्भपूरखीरा. गोमण्डलेति गोयूथे.

अट्ठुसभगमनं ¶ कत्वाति अट्ठउसभप्पमाणं पदेसं पच्चत्थिकं उद्दिस्स धनुग्गहो अनुयायिं कत्वा. तन्ति सरं. अञ्ञोति पच्चत्थिको. तत्थेव पातेय्य अच्चासन्नं कत्वा सरस्स खित्तत्ता. वाळमच्छोदकन्ति मकरादिवाळमच्छवन्तं उदकं.

पटिसन्धिनिब्बत्तकं कम्मं जनककम्मं नाम परिपुण्णविपाकदायिभावतो, न पवत्तिविपाकमत्तनिब्बत्तकं. भोगसम्पदादीति आदि-सद्देन आरोग्यसम्पदादि-परिवारसम्पदादीनि गण्हाति. न दीघायुकतादीनि हि अप्पायुकतासंवत्तनिकेन कम्मुना निब्बत्तानि; अञ्ञं दीघायुकताकरणेन उपत्थम्भेतुं सक्कोति; न अतिदुब्बण्णं अप्पेसक्खं नीचकुलीनं दुप्पञ्ञं वा वण्णवन्ततादिवसेन. तथा हि वक्खति, ‘‘इमस्मिं पन पञ्हविस्सज्जने’’तिआदि, तं पन निदस्सनवसेन वुत्तन्ति दट्ठब्बं.

पुरिमानीति उपपीळकोपच्छेदकानि. उपपीळकुपघाता नाम कुसलविपाकपटिबाहकाति अधिप्पायेन ‘‘द्वे अकुसलानेवा’’ति वुत्तं. उपत्थम्भकं कुसलमेवाति एत्थ यथा जनकं उभयसभावं, एवं इतरेसम्पि उभयसभावताय वुच्चमानाय न कोचि विरोधो. देवदत्तादीनञ्हि नागादीनं ¶ इतो अनुप्पवच्छितानं पेतादीनञ्च नरकादीसु अकुसलकम्मविपाकस्स उपत्थम्भनुपपीळनुपघातनानि न न सम्भवन्ति. एवञ्च कत्वा या हेट्ठा बहूसु आनन्तरियेसु एकेन गहितपटिसन्धिकस्स इतरेसं तस्स अनुबलप्पदायिता वुत्ता, सापि समत्थिता होति. यस्मिञ्हि कम्मे कते जनकनिब्बत्तं कुसलफलं वा अकुसलफलं वा ब्याधिधातुसमतादिनिमित्तं विबाधीयति, तमुपत्थम्भकं. यस्मिं पन कते जातिसमत्थस्स पटिसन्धियं पवत्तियञ्च विपाककटत्तारूपानं उप्पत्ति होति, तं जनकं. यस्मिं पन कते अञ्ञेन जनितस्स इट्ठस्स वा अनिट्ठस्स वा फलस्स विबाधाविच्छेदपच्चयानुप्पत्तिया उपब्रूहनपच्चयुप्पत्तिया च जनकसामत्थियानुरूपं परिवुत्तिचिरतरपबन्धा होति, एतं उपत्थम्भकं. तथा यस्मिं कते जनकनिब्बत्तं कुसलफलं अकुसलफलं वा ब्याधिधातुसमतादिनिमित्तं विबाधीयति, तं उपपीळकं. यस्मिं पन कते जनकसामत्थियवसेन चिरतरपबन्धारहम्पि समानं फलं विच्छेदकपच्चयुप्पत्तिया विच्छिज्जति, तं उपघातकन्ति अयमेत्थ सारो.

तत्थाति ¶ तेसु कम्मेसु. उपच्छेदककम्मेनाति आयुनो उपघातककम्मेन. स्वायमुपघातकभावो द्विधा इच्छितब्बोति तं दस्सेतुं ‘‘पाणातिपातिना’’तिआदि वुत्तं. न सक्कोति पाणातिपातकम्मुना सन्तानस्स तथाभिसङ्खतत्ता. यस्मिञ्हि सन्ताने निब्बत्तं, तस्स तेन अभिसङ्खतता अवस्सं इच्छितब्बा तत्थेव तस्स विपाकस्स विनिबन्धनतो. एतेन कुसलस्स कम्मस्स आयूहनक्खणेयेव पाणातिपातो तादिसं सामत्थियुपघातं करोतीति दस्सेति, ततो कम्मं अप्पफलं होति. ‘‘दीघायुका’’तिआदिना उपघातसामत्थियेन खेत्ते उप्पन्नसस्सं विय उपपत्तिनियामका धम्माति दस्सेति. उपपत्ति नियतविसेसे विपच्चितुं ओकासे करोन्ते एव कुसलकम्मे आकड्ढियमानपटिसन्धिकं पाणातिपातकम्मं अप्पायुकत्थाय नियमेतीति आह – ‘‘पटिसन्धिमेव वा नियामेत्वा अप्पायुकं करोती’’ति. पाणातिपातचेतनाय अच्चन्तकटुकविपाकत्ता सन्निट्ठानचेतनाय निरये निब्बत्तति तस्सा अत्थस्स खीणाभावतो; इतरे पन न तथा भारियाति आह – ‘‘पुब्बा…पे… होती’’ति. इध पन यं हेट्ठा वुत्तसदिसं, तं वुत्तनयेन वेदितब्बं.

मनुस्सामनुस्सपरिस्सयाति मानुसका अमानुसका च उपद्दवा. पुरतोति पुब्बद्वारतो. पच्छतोति पच्छिमवत्थुतो. पवट्टमानाति परिजनस्स, देवतानं वा देसेन पवट्टमाना. परेहीति पुरातनेहि परेहि. सम्मुखीभावन्ति सामिभाववसेन पच्चक्खत्तं. आहरित्वा देन्ति इणायिका. कम्मन्ताति वणिज्जादिकम्मानि. अपाणातिपातकम्मन्ति पाणातिपातस्स पटिपक्खभूतं कम्मं; पाणातिपाता विरतिवसेन पवत्तितकम्मन्ति अत्थो. दीघायुकसंवत्तनिकं होति विपाकस्स कम्मसरिक्खभावतो ¶ . इमिना नयेनाति इमिना अप्पायुकदीघायुकसंवत्तनिकेसु कम्मेसु यथावुत्तेन तं संवत्तनिकविभावननयेन.

विहेठनकम्मादीनिपीति पि-सद्देन कोधइस्सामनकमच्छेरथद्धअविद्दसुभाववसेन पवत्तितकम्मानि सङ्गण्हाति. तथेवाति यथा पाणातिपातकम्मं अत्थतो एवं वदति नामाति वुत्तं, तथेव वदमानानि विय. ‘‘यं यदेवातिपत्थेन्ति, सब्बमेतेन लब्भती’’ति (खु. पा. ८.१०) वचनतो यथा सब्बकुसलं सब्बासं सम्पत्तीनं उपनिस्सयो, एवं सब्बं अकुसलं सब्बासं विपत्तीनं उपनिस्सयोति, ‘‘उपपीळनेन निब्भोगतं आपादेत्वा’’तिआदि वुत्तं ¶ . तथा हि पाणातिपातकम्मवसेनपि अयं नयो दस्सितो. अविहेठनादीनीति एत्थ आदि-सद्देन अक्कोधन-अनिस्सामन-दान-अनतिमान-विद्दसुभावेन पवत्तकम्मानि सङ्गण्हाति.

२९३. इस्सा मनो एतस्साति इस्सामनकोति आह ‘‘इस्सासम्पयुत्तचित्तो’’ति. उपक्कोसन्तोति अक्कोसवत्थूहि अक्कोसन्तो. इस्सं बन्धतीति इस्सं अनुबन्धति इस्सासहितमेव चित्तं अनुपवत्तेति. अप्पेसक्खोति अप्पानुभावो अप्पञ्ञातो. तेनाह ‘‘न पञ्ञायती’’ति. सा पनस्स अप्पानुभावता परिवाराभावेन पाकटा होतीति आह ‘‘अप्पपरिवारो’’ति.

२९४. मच्छरियवसेन न दाता होतीति सब्बसो देय्यधम्मस्स अभावेन न दाता न होति. अमच्छरी हि पुग्गलो सति देय्यधम्मे यथारहं देतियेव.

२९५. अभिवादेतब्बं खेत्तवसेन मत्थकप्पत्तं दस्सेतुं, ‘‘बुद्धं वा’’तिआदि वुत्तं. अञ्ञेपि मातुपितुजेट्ठभातरादयो अभिवादनादिअरहा सन्ति, तेसु थद्धादिवसेन करणं नीचकुलसंवत्तनिकमेव. न हि पवत्ते सक्का कातुन्ति सम्बन्धो. तेन पवत्तिविपाकदायिनो कम्मस्स विसयो एसोति दस्सेति. तेनाह ‘‘पटिसन्धिमेव पना’’तिआदि.

२९६. अपरिपुच्छनेनाति अपरिपुच्छामत्तेन निरये न निब्बत्तति; अपरिपुच्छाहेतु पन कत्तब्बाकरणादीहि सिया निरयनिब्बत्तीति पाळियं, ‘‘न परिपुच्छिता होती’’तिआदि वुत्तन्ति दस्सेन्तो, ‘‘अपरिपुच्छको पना’’तिआदिमाह. यथानुसन्धिं पापेसीति देसनं यथानुसन्धिनिट्ठानं पापेसि. सेसं वुत्तनयत्ता सुविञ्ञेय्यमेव.

चूळकम्मविभङ्गसुत्तवण्णनाय लीनत्थप्पकासना समत्ता.

६. महाकम्मविभङ्गसुत्तवण्णना

२९८. कम्मस्स ¶ मोघभावो नाम फलेन तुच्छता फलाभावोति आह – ‘‘मोघन्ति तुच्छं अफल’’न्ति. तथं भूतन्ति सच्चसद्दस्स अत्थमाह. परिब्बाजको ¶ पन ‘‘सच्च’’न्ति इमिना तमेव सफलन्ति वदति. सफलञ्हि कम्मं सत्थु अभिमतमनोकम्मन्ति अधिप्पायो. इदञ्च ‘‘मोघं कायकम्म’’न्तिआदिवचनं. तं गहेत्वाति परम्पराय गहेत्वा. एसाति पोतलिपुत्तो परिब्बाजको. अभिसञ्ञानिरोधकथं सन्धाय वदति. सापि हि तित्थियानं अन्तरे पाकटा जाताति. थेरोति समिद्धित्थेरो. यथा भगवता वुत्तं, ततो च अञ्ञथाव दोसारोपनभयेन गहेत्वा ततो भगवन्तं थेरो रक्खतीति अधिप्पायेन परिब्बाजको, ‘‘परिरक्खितब्बं मञ्ञिस्सती’’ति अवोचाति आह – ‘‘परिरक्खितब्बन्ति गरहतो मोचनेन रक्खितब्ब’’न्ति. सञ्चेतना अस्स अत्थीति सञ्चेतनिकं. कम्मन्ति सञ्चेतनिकस्सपि कम्मस्स अत्तनो समये इच्छितत्ता परिब्बाजकेन वुत्तं.

सङ्खतसङ्खारताय रूपमेव ‘‘तिलमत्तम्पि सङ्खार’’न्ति वुत्तं. तेनाह – ‘‘मंसचक्खुनाव पस्सती’’ति. समागमदस्सनं सन्धायाति कत्थचिपि तस्स दस्सनं सन्धाय, न परिञ्ञादस्सनं. तेनाह भगवा – ‘‘कुतो पनेवरूपं कथासल्लाप’’न्ति.

२९९. वट्टदुक्खन्ति संसारदुक्खं. किलेसदुक्खन्ति किलेससम्भवरागपरिळाहदुक्खं. सङ्खारदुक्खन्ति यदनिच्चं, तं दुक्खन्ति एवं वुत्तदुक्खं. सचे भासितं भवेय्याति इमं ईदिसं दुक्खं सन्धाय आयस्मता समिद्धिना भासितं सिया नु भगवा, अविभजित्वा ब्याकरणं युत्तमेवाति अधिप्पायो.

३००. उम्मङ्गन्ति उम्मुज्जनं, कथामुळ्हेन अन्तरा अञ्ञाणविसयपञ्हा उम्मङ्गं. तेनाह – ‘‘पञ्हाउम्मङ्ग’’न्ति नेव दिब्बचक्खुनाति कस्मा वुत्तं. न हि तं अयोनिसो उम्मुज्जनं दिब्बचक्खुविसयन्ति? कामञ्चेतं न दिब्बचक्खुविसयं, दिब्बचक्खुपरिभण्डञाविसयं पन सियाति तथा वुत्तं. अधिप्पायेनेवाति उदायित्थेरस्स अधिप्पायेनेव गय्हमानेन तं अयोनियो उम्मुज्जनं अञ्ञासि. सन्निसीदितुं पुब्बे निसिन्नाकारेन सन्निसीदितुं न सक्कोति. समिद्धित्थेरेन अनभिसङ्खतस्सेव अत्थस्स कथितत्ता, ‘‘यं अभूतं, तदेव कथेस्सती’’ति वुत्तं. तेनाह ¶ ‘‘अयोनिसो उम्मुज्जिस्सती’’ति. तिस्सो वेदना पुच्छिता, ‘‘किं सो वेदियती’’ति अविभागेन वेदियमानस्स जातितत्ता. सुखाय वेदनाय हितन्ति सुखवेदनियं. तेनाह ¶ – ‘‘सुखवेदनाय पच्चयभूत’’न्ति. सेसेसूति, ‘‘दुक्खवेदनिय’’न्तिआदीसु.

हेट्ठा तिकज्झानचेतनाति एत्थ, ‘‘कुसलतो’’ति अधिकारतो रूपावचरकुसलतो हेट्ठा तिकज्झानचेतनाति अत्थो. एत्थाति एतेसु कामावचररूपावचरसुखवेदनियकम्मेसु. अदुक्खमसुखम्पीति पि-सद्देन इट्ठारम्मणे सुखम्पीति इममत्थं सम्पिण्डेति.

यदि कायद्वारे पवत्ततो अञ्ञत्थ अदुक्खमसुखं जनेति, अथ कस्मा, ‘‘दुक्खस्सेव जननतो’’ति वुत्तन्ति आह – ‘‘सा पन वेदना’’तिआदि.

चतुत्थज्झानचेतनाति एत्थ अरूपावचरकुसलचेतनातिपि वत्तब्बं. यथा हि ‘‘कायेन वाचाय मनसा’’ति एत्थ यथालाभग्गहणवसेन मनसा सुखवेदनियं अदुक्खमसुखवेदनियन्ति अयमत्थो अरूपावचरकुसलेपि लब्भतीति सुखम्पि जनेति उक्कट्ठस्स ञाणसम्पयुत्तकुसलस्स सोळसविपाकचित्तनिब्बत्तनतो, अयञ्च नयो हेट्ठा, ‘‘अदुक्खमसुखम्पी’’ति एत्थापि वत्तब्बो. पुब्बे परियायतो दुक्खवेदना वुत्ता, सुत्तन्तसंवण्णना हेसाति इदानि निप्परियायतो पुन दस्सेतुं, ‘‘अपिचा’’तिआदि वुत्तं. तेन एत्थ दुक्खवेदनियं पवत्तिवसेनेव वट्टतीति. एतस्साति दुक्खवेदनियस्स पवत्तिवसेनेव युज्जमानत्ता एतस्स वसेन सब्बं सुखवेदनियं अदुक्खमसुखवेदनियञ्च पवत्तिवसेनेव वत्तुं वट्टति.

आलयोति अभिरुचि. महाकम्मविभङ्गञाणन्ति महति कम्मविभजने ञाणं, महन्तं वा कम्मविभजनञाणं. भाजनं नाम निद्देसो, अयं पन उद्देसोति कत्वा आह – ‘‘कतमे चत्तारो…पे… मातिकाट्ठपन’’न्ति.

३०१. पाटियेक्को अनुसन्धि यथाउद्दिट्ठस्स महाकम्मविभङ्गञाणस्स अभाजनभावतो, पुच्छानुसन्धिअज्झासयानुसन्धीसु च अनन्तोगधत्ता. तेनाह ‘‘इदं ही’’तिआदि. इदं आरम्मणं कत्वाति इध, ‘‘पाणातिपातिं अदिन्नादायि’’न्तिआदिना पुग्गलाधिट्ठानेन वुत्तं कम्मविभङ्गं आरब्भ. इमं पच्चयं लभित्वाति तस्सेव वेवचनं. इदं दस्सनं गण्हन्तीति इदं, ‘‘अत्थि किर, भो, पापकानि कम्मानि, नत्थि किर, भो, पापकानि कम्मानी’’ति च आदीनि हत्थिदस्सकअन्धाविय दिट्ठमत्ते एव ठत्वा अचित्तकदस्सनञ्च गण्हन्ति. वीरियं किलेसानं आतापनवसेन ¶ आतप्पं, तदेव पदहवसेन पधानं, ¶ पुनप्पुनं युञ्जनवसेन अनुयोगो, तथा भावनाय नप्पमज्जति एतेनाति अप्पमादो, सम्मा योनिसो मनसि करोति एतेनाति सम्मामनसिकारोति वुच्चतीति अधिप्पायेन, ‘‘पञ्चपि वीरियस्सेव नामानी’’ति आह. अप्पमादो वा सतिया अविप्पवासो. यस्मिं मनसिकारे सति तस्स दिब्बचक्खुञाणं इज्झति, अयमेत्थ सम्मामनसिकारोति एत्थ अत्थो दट्ठब्बो. चेतोसमाधिन्ति दिब्बचक्खुञाणसहगतं चित्तसमाधिं. तेनाह ‘‘दिब्बचक्खुसमाधि’’न्ति. अञ्ञथाति अकुसलकम्मकरणतो अञ्ञथा, तं पन कुसलकम्मकरणं होतीति आह – ‘‘ये दस्सन्नं कुसलानं कम्मपथानं पूरितत्ता’’ति दिट्ठिथामेनाति दिट्ठिवसेन दिट्ठिबलेन. दिट्ठिपरामासेनाति दिट्ठिवसेन धम्मसभावं अतिक्कमित्वा परामासेन. अधिट्ठहित्वाति, ‘‘इदमेव सच्चं, मोघमञ्ञ’’न्ति अधिट्ठाय अभिनिविसित्वा. आदियित्वाति दळ्हग्गाहं गहेत्वा. वोहरतीति अत्तनो गहितग्गहणं परेसं दीपेन्तो वोहरति.

३०२. तत्रानन्दाति एत्थ इति-सद्दो आदिअत्थो. इदम्पीति इदं वचनं. ‘‘तत्रानन्दा’’ति एवमादिवचनम्पीति अत्थो. न महाकम्मविभङ्गञाणस्स भाजनं तस्स अनिद्देसभावतो. अस्साति महाकम्मविभङ्गञाणस्स मातिकाट्ठपनमेव दिब्बचक्खुकानं समणब्राह्मणानं वसेन अनुञ्ञातब्बस्स च दस्सनवसेन उद्देसभावतो. तेनाह ‘‘एत्थ पना’’तिआदि. तत्थ एत्थ पनाति ‘‘तत्रानन्दा’’तिआदिपाठे. एतेसं दिब्बचक्खुकानन्ति एतेसं हेट्ठा चतूसुपि वारेसु आगतानं दिब्बचक्खुकानं. एत्तकाति एकच्चिया सच्चगिरा. अनुञ्ञाताति अनुजानिता. अननुञ्ञाताति पटिक्खेपिता. इध अननुञ्ञातमुखेन दीपितं अननुञ्ञातभावमत्तं. तत्रानन्दातिआदिके तत्राति निद्धारणे भुम्मन्ति दस्सेन्तो, ‘‘तेसु चतूसु समणब्राह्मणेसू’’ति आह. इदं वचनं ‘‘अत्थि किर, भो…पे… विपाको’’ति इदं एवं वुत्तं. अस्साति तथावादिनो समणब्राह्मणस्स. अञ्ञेनाकारेनाति ‘‘यो किर, भो’’तिआदिना वुत्तकारणतो अञ्ञेन कारणेन. द्वीसु ठानेसूति ‘‘अत्थि किर, भो…पे… विपाको’’ति च, ‘‘अपायं…पे… निरयं उपपन्न’’न्ति च इमेसु ¶ द्वीसु पाठपदेसेसु. अनुञ्ञाता तदत्थस्स अत्थिभावतो. तीसु ठानेसूति ‘‘यो किर, भो…पे… निरयं उपपज्जति’’, ‘‘यम्पि सो…पे… ते सञ्जानन्ति’’, ‘‘यम्पि सो यदेव…पे… मोघमञ्ञ’’न्ति इमेसु तीसु पाठपदेसेसु. अननुञ्ञाता तदत्थस्सानेकन्तिकत्ता मिच्छाभिनिवेसतो च. तेनाह भगवा – ‘‘अञ्ञथा हि, आनन्द, तथागतस्स महाकम्मविभङ्गञाण’’न्ति. यथा ते अप्पहीनविपल्लासा पदेसञाणसमणब्राह्मणा कम्मविभङ्गं सञ्जानन्ति, ततो अञ्ञथाव सब्बसो पहीनविपल्लासस्स तथा आगमनादिअत्थेन तथागतस्स सम्मासम्बुद्धस्स महाकम्मविभङ्गञाणं होतीति अत्थो.

३०३. इमिना ¶ दिब्बचक्खुकेन यं कम्मं करोन्तो दिट्ठो, ततो पुब्बेति योजना. ततोति ततो करियमानकम्मतो पुब्बे. खन्दोति कुमारो. सिवोति इस्सरो. पितामहोति ब्रह्मा. इस्सरादीहीति इस्सरब्रह्मपजापतिआदीहि. विसट्ठोति निम्मितो. मिच्छादस्सनेनाति मिच्छादस्सनवसेन. यन्ति यं कम्मं. तत्थाति तेसु पाणातिपातादिवसेन पवत्तकम्मेसु. दिट्ठेव धम्मेति तस्मिंयेव अत्तभावे विपाकं पटिसंवेदेतीति योजना. उपपज्जित्वाति दुतियभवे निब्बत्तित्वा. अपरस्मिं परियायेति अञ्ञस्मिं यत्थ कत्थचि भवे.

एकं कम्मरासिन्ति पाणातिपातादिभेदेन एकं कम्मसमुदायं. एकं विपाकरासिन्ति तस्सेव अङ्गेन एकं विपाकसमुदायं. इमिनाति यथावुत्तेन दिब्बचक्खुकेन समणेन ब्राह्मणेन वा अदिट्ठा. तयोति ‘‘पुब्बे वास्स तं कतं होती’’तिआदिना वुत्ता तयो. द्वे विपाकरासीति दिट्ठधम्मवेदनियो अपरापरियायवेदनियोति द्वे विपाकरासी. उपपज्जवेदनियं पन तेन दिट्ठं, तस्मा ‘‘द्वे’’ति वुत्तं. दिट्ठो एको, अदिट्ठा तयोति दिट्ठे च अदिट्ठे च चत्तारो कम्मरासी, तथा दिट्ठो एको, अदिट्ठा द्वेति तयो विपाकरासी. इमानि सत्त ठानानीति यथावुत्तानि सत्त ञाणस्स पवत्तनट्ठानानि. ‘‘इमस्स नाम कम्मस्स इदं फलं निब्बत्त’’न्ति कम्मस्स, फलस्स वा अदिट्ठत्ता, ‘‘दुतियवारे दिब्बचक्खुकेन किञ्चि न दिट्ठ’’न्ति वुत्तं. पठमं वुत्तनयेन तयो कम्मरासी वेदितब्बा, इध दिब्बचक्खुकेन दिट्ठस्स अभावतो, ‘‘पच्चत्तट्ठानानी’’ति वुत्तं.

भवति वड्ढति एतेनाति भब्बं, वड्ढिनिमित्तं. न भब्बं अभब्बन्ति आह ‘‘भूतविरहित’’न्ति. अत्तनो फले भासनं दिब्बनं आभासनन्ति आह – ‘‘आभासति अभिभवति पटिबाहती’’ति. बलवकम्मन्ति महासावज्जं कम्मं गरुसमासेवितादिभेदं. आसन्नेति मरणे, अभिण्हं उपट्ठानेन वा ¶ तस्स मरणचित्तस्स आसन्ने. बलवकम्मन्ति गरुसमासेविततादिवसेन बलवं कुसलकम्मं. दुब्बलकम्मस्साति अत्तनो दुब्बलस्स. आसन्ने कुसलं कतन्ति इधापि आसन्नता पुब्बे वुत्तनयेनेव वेदितब्बा.

उपट्ठानाकारेनाति मरणस्स आसन्नकाले कम्मस्स उपट्ठानाकारेन. तस्साति तस्स पुग्गलस्स. निब्बत्तिकारणभूतं हुत्वा उपट्ठाति अकुसलन्ति योजना. तित्थिया कम्मन्तरविपाकन्तरेसु अकुसलताय यं किञ्चि कम्मं यस्स कस्सचि विपाकस्स कारणं कत्वा गण्हन्ति हत्थिदस्सकअन्धादयो विय दिट्ठमत्ताभिनिवेसिनोति, ‘‘अञ्ञतित्थिया…पे… उपट्ठाती’’ति वुत्तं. इतरस्मिन्ति भब्बञ्चेव भब्बाभासञ्च, भब्बं अभब्बाभासन्ति इमस्मिं द्वये ¶ . एसेव नयो पठमदुतियपुग्गलवसेन पुरिमानं द्विन्नं कम्मानं योजनानयो वुत्तो उपट्ठानाकारवसेन. अयमेव ततियचतुत्थपुग्गलवसेन पच्छिमानं द्विन्नं कम्मानं योजनानयो. ततियस्स हि कम्मस्स कुसलत्ता तस्स च सग्गे निब्बत्तत्ता तत्थ कारणभूतं कुसलं हुत्वा उपट्ठाति; तथा चतुत्थस्सपि कम्मस्स कुसलत्ता, तस्स पन निरये निब्बत्तत्ता तत्थ निब्बत्तिकारणभूतं अञ्ञतित्थियानं अकुसलं हुत्वा उपट्ठातीति. यं पनेत्थ अत्थतो अविभत्तं, तं सुविञ्ञेय्यमेव.

महाकम्मविभङ्गसुत्तवण्णनाय लीनत्थप्पकासना समत्ता.

७. सळायतनविभङ्गसुत्तवण्णना

३०४. वेदितब्बानीति ¶ एत्थ यथा विदितानि छ अज्झत्तिकानि आयतनानि वट्टदुक्खसमतिक्कमाय होन्ति, तथा वेदनं अधिप्पेतन्ति आह – ‘‘सहविपस्सनेन मग्गेन जानितब्बानी’’ति. तत्थ विपस्सनाय आरम्मणतो मग्गेन असम्मोहतो जाननं दट्ठब्बं. सेसपदेसुपि एसेव नयो. मनो सविसेसं उपविचरति आरम्मणे पवत्तति एतेहीति मनोपविचारा, वितक्कविचारा. आरम्मणे हि अभिनिरोपनानुमज्जनेहि वितक्कविचारेहि सह चित्तं पवत्तति, न तब्बिरहितं. तेनाह ‘‘वितक्कविचारा’’तिआदि. सत्ता पज्जन्ति एतेहि यथारहं वट्टं विवट्टञ्चाति सत्तपदा ¶ , गेहनिस्सिता वट्टपदा. योग्गानं दमनआचरिया योग्गाचरिया. तेनाह ‘‘दमेतब्बदमकान’’न्ति. सेसन्ति वुत्तावसेसं एकसत्ततिविधविञ्ञाणं सफस्सरूपकस्सेव अधिप्पेतत्ता.

३०५. इधाति इमिस्सं छविञ्ञाणकायदेसनायं. मनोधातुत्तयविनिमुत्तमेव मनोविञ्ञाणधातूति वेदितब्बं.

चक्खुम्हि सम्फस्सोति चक्खुं निस्साय उप्पन्नो सम्फस्सो. तेनाह – ‘‘चक्खुविञाणसम्पयुत्तसम्फस्सस्सेतं अधिवचन’’न्ति.

यथा केवलेन विञ्ञाणेन रूपदस्सनं न होति, एवं केवलेन चक्खुपसादेनपीति वुत्तं ‘‘चक्खुविञ्ञाणेना’’ति. तेन पाळियं चक्खुनाति निस्सयमुखेन निस्सितकिच्चं वुत्तन्ति दस्सेति. आरम्मणवसेनाति आरम्मणपच्चयभावेन. ‘‘उपविचरति’’च्चेव कस्मा वुत्तं, ननु तत्थ वितक्कब्यापारोपि अत्थीति? सच्चं अत्थि. सो पनेत्थ तग्गतिकोति आह – ‘‘वितक्को तंसम्पयुत्तो चा’’ति. सम्पयुत्तधम्मानम्पि उपविचरणं वितक्कविचारानंयेवेत्थ किच्चन्ति ‘‘वितक्कविचारसङ्खाता मनोपविचारा’’ति वुत्तं. सोमनस्सयुत्तो उपविचारो सोमनस्सूपविचारो यथा ‘‘आजञ्ञरथो’’ति आह ‘‘सोमनस्सेन सद्धि’’न्तिआदि.

३०६. उपविचारानं उपस्सयट्ठेन गेहं वियाति गेहं, रूपादयोति आह – ‘‘गेहस्सितानीति कामगुणनिस्सितानी’’ति. निच्चसञ्ञादिनिक्खमनतो नेक्खम्मं विपस्सनाति, ‘‘नेक्खम्मस्सितानीति ¶ विपस्सनानिस्सितानी’’ति वुत्तं. इट्ठानन्ति कसिवणिज्जादिवसेन परियिट्ठानन्ति आह ‘‘परियेसितान’’न्ति. पियभावो पन कन्तसद्देनेव कथितोति कामितब्बानं मनो रमेतीति मनोरमानं. लोकेन आमसीयतीति लोकामिसं, तण्हा. ताय गहेतब्बताय इट्ठभावापादनेन पटिसङ्खतताय च पटिसंयुत्तानं. अतीते कतं उप्पज्जति आरम्मणिकअनुभवनस्स असम्भवतोति अधिप्पायो. एदिसं अनुस्सरणं दिट्ठग्गहणानुस्सरेन च होतीति दस्सेतुं, ‘‘यथाह’’न्तिआदि वुत्तं.

अनिच्चाकारन्ति हुत्वा अभावाकारं. विपरिणामविरागनिरोधन्ति जराय मरणेन चाति द्वेधा विपरिणामेतब्बञ्चेव, ततो एव पलोकितं भङ्गञ्च. अट्ठकथायं पन यस्मा उप्पन्नं रूपं तेनेवाकारेन न तिट्ठति ¶ , अथ खो उप्पादावत्थासङ्खातं पकतिं विजहति, विजहितञ्च जरावत्थाय ततो विगच्छति, विगच्छन्तञ्च भङ्गुप्पत्तिया निरुज्झतीति इमं विसेसं दस्सेतुं, ‘‘पकतिविजहनेना’’तिआदि वुत्तं. कामञ्चेत्थ ‘‘यथाभूतं सम्मप्पञ्ञाय पस्सतो’’ति वुत्तं, अनुबोधञाणं पन अधिप्पेतं वीथिपटिपन्नाय विपस्सनाय वसेनाति ‘‘विपस्सनापञ्ञाया’’ति वुत्तं उपविचारनिद्देसभावतो. तथा हि वक्खति – ‘‘छसुद्वारेसु इट्ठारम्मणे आपाथगते’’तिआदि. सङ्खारानं भेदं पस्सतोति सब्बेसं सङ्खारानं खणे खणे भिज्जनसभावं वीथिपटिपन्नेन विपस्सनाञाणेन पस्सतो. तेनाह ‘‘सङ्खारगतम्हि तिक्खे’’तिआदि. तत्थ सङ्खागतम्हीति सङ्खारगते विसयभूते. तिक्खेति भावनाबलेन इन्द्रियानञ्च समताय तिब्बे. सूरेति पटिपक्खेहि अनभिभूतताय, तेसञ्च अभिभवनसमत्थताय विसदे पटुभूते पवत्तन्ते.

किलेसानं विक्खम्भनवसेन वूपसन्तताय सन्तचित्तस्स, संसारे भयस्स इक्खनतो भिक्खुनो, उत्तरिमनुस्सधम्मसन्निस्सितत्ता अमानुसी रतीति विवेकरति नेक्खम्मरति. यतो यतोति यथा यथा नयविपस्सनादीसु येन येन सम्मसनाकारेनाति अत्थो. खन्धानं उदयब्बयन्ति पञ्चुपादानक्खन्धानं उप्पादञ्च भङ्गञ्च. अमतन्तं विजानतन्ति विजानन्तानं विञ्ञूनं आरद्धविपस्सनानं तं पीतिपामोज्जं अमताधिगमहेतुताय अमतन्ति वेदितब्बं.

छसु द्वारेसु इट्ठारम्मणे आपाथगतेति रूपादिवसेन छब्बिधे इट्ठारम्मणे यथारहं छसु द्वारेसु आपाथगते. विसये चेतं भुम्मवचनं.

३०७. पच्चुप्पन्नन्ति सन्ततिपच्चुप्पन्नं. अनुत्तरविमोक्खो नाम अरहत्तं इध अधिप्पेतं उक्कट्ठनिद्देसेन. कथं पन तत्थ पिहं उपट्ठपेति, न हि अधिगतं अरहत्तं आरम्मणं होति, न ¶ च तं आरब्भ पिहा पवत्ततीति? को वा एवमाह – ‘‘अरहत्तं आरम्मणं कत्वा पिहं उपट्ठपेती’’ति. अनुस्सुतिलद्धं पन परिकप्पसिद्धं अरहत्तं उद्दिस्स पत्थनं ठपेति, तत्थ चित्तं पणिदहति. तेनाह भगवा – ‘‘कुदास्सु नामाहं तदायतनं उपसम्पज्ज विहरिस्सामी’’ति. आयतनन्ति अरहत्तमेव छळङ्गसमन्नागमादिकारणभावतो, मनायतनधम्मायतनभावतो च तथा वुत्तं, तं पनेतं दोमनस्सं ¶ पत्थनं पट्ठपेन्तस्स उप्पज्जति पत्थनाय सहावत्तनतो. न हि लोभदोसानं सह वुत्ति अत्थि. पत्थनामूलकत्ताति इमिना उपट्ठापयतो पदस्स हेतुअत्थजोतकतमाह. एवन्ति ‘‘कुदास्सुनामा’’तिआदिना वुत्ताकारेन. उस्सुक्कापेतुन्ति यथा मग्गेन घटेति, एवं उस्सुक्कापेतुं.

३०८. अञ्ञाणुपेक्खाति अञ्ञाणसहिता उपेक्खा असमपेक्खनपवत्ता. तेन तेन मग्गोधिना तस्स तस्स अपायगमनीयकिलेसोधिस्स अनवसेसतो जितत्ता खीणासवो निप्परियायतो ओधिजिनो नाम; तदभावतो पुथुज्जनो निप्परियायतोव अनोधिजिनो नाम; सेखो पन सिया परियायतो ओधिजिनोति. तम्पि निवत्तेन्तो, ‘‘अखीणासवस्साति अत्थो’’ति आह. आयतिं विपाकं जिनित्वाति अप्पवत्तिकरणवसेन सब्बसो आयतिं विपाकं जिनित्वा ठितत्ता खीणासवोव निप्परियायतो विपाकजिनो नाम; तदभावतो पुथुज्जनो निप्परियायतो अविपाकजिनो नाम; सेखो पन सिया परियायतो विपाकजिनोति. तम्पि निवत्तेन्तो ‘‘अखीणासवस्सेवाति अत्थो’’ति आह. अपस्सन्तस्स रूपन्ति पाळितो पदं आनेत्वा सम्बन्धितब्बं. पाळियं पुब्बे ‘‘पुथुज्जनस्सा’’ति वत्वा पुन ‘‘अस्सुतवतो पुथुज्जनस्सा’’ति वचनं अन्धपुथुज्जनस्सायं उपेक्खा, न कल्याणपुथुज्जनस्साति दस्सनत्थं. गेहस्सिता उपेक्खा हि यं किञ्चि आरम्मणवत्थुं अपेक्खस्सेव, न निरपेक्खस्साति इट्ठे, इट्ठमज्झत्ते वा आरम्मणे सियाति वुत्तं ‘‘इट्ठारम्मणे आपाथगते’’ति. अञ्ञाणेन पन तत्थ अज्झुपेक्खनाकारप्पत्ति होति. तेनाह ‘‘गुळपिण्डके’’तिआदि.

इट्ठे अरज्जन्तस्स अनिट्ठे अदुस्सन्तस्साति इदं येभुय्येन सत्तानं इट्ठे रज्जनं, अनिट्ठे दुस्सनन्ति कत्वा वुत्तं. अयोनियोमनसिकारो हि तंतंआरम्मणवसेन न कत्थचिपि जवननियमं करोतीति वुत्तविपरीतेपि आरम्मणे रज्जनदुस्सनं सम्भवति, तथापिस्स रज्जनदुस्सनं अत्थतो पटिक्खित्तमेवाति दट्ठब्बं. असमपेक्खनेति असमं अयुत्तदस्सने अयोनिसो सम्मोहपुब्बकं आरम्मणस्स गहणे.

३०९. पवत्तनवसेनाति उप्पादनवसेन चेव बहुलीकरणवसेन च. निस्साय चेव आगम्म ¶ चाति आगमनट्ठानभूते निस्सयपच्चयभूते च ¶ कत्वा. अतिक्कन्तानि नाम होन्ति विक्खम्भनेन उस्सारेन्ता समुस्सारेन्ता.

सोमनस्सभावसामञ्ञं गहेत्वा, ‘‘सरिक्खकेनेव सरिक्खकं जहापेत्वा’’ति वुत्तं. इधापि पहायकं नाम पहातब्बतो बलवमेव, संकिलेसधम्मानं बलवभावतो सातिसयं पन बलवभावं सन्धाय ‘‘इदानि बलवता’’तिआदि वुत्तं. बलवभावतो वोदानधम्मानं अधिगमस्स अधिप्पेतत्ता हेत्थ नेक्खम्मस्सितदोमनस्सानम्पि पहानं जोतितं.

उपेक्खाय पहायकभावेन अधिप्पेतत्ता ‘‘उपेक्खाकथा वेदितब्बा’’ति वुत्तं. झानस्स अलाभिनो च लाभिनो च पकिण्णकसङ्खारसम्मसनं सन्धाय, ‘‘सुद्धसङ्खारे च पादके कत्वा’’ति. उपेक्खासहगताति भावनाय पगुणभावं आगम्म कदाचि अज्झुपेक्खनवसेनपि हि सम्मसनं होतीति. पादकज्झानवसेन, सम्मसितधम्मवसेन वा आगमनविपस्सनाय बहुलं सोमनस्ससहगतभावतो ‘‘वुट्ठानगामिनी पन विपस्सना सोमनस्ससहगतावा’’ति नियमेत्वा वुत्तं. उपेक्खासहगता होतीति एत्थापि एसेव नयो. चतुत्थज्झानादीनीति आदि-सद्देन अरूपज्झानानि सङ्गण्हाति. पुरिमसदिसावाति पुरिमसदिसा एव, उपेक्खासहगता वा होति सोमनस्ससहगता वाति अत्थो. इदं सन्धायाति यं चतुत्थज्झानादिपादकतो एव उपेक्खासहगतं वुट्ठानगामिनिविपस्सनं निस्साय सोमनस्ससहगताय विपस्सनाय पहानं, इदं सन्धाय. पहानन्ति चेत्थ समतिक्कमलक्खणं वेदितब्बं.

एतं विसेसं विपस्सनाय आवज्जनट्ठानभूतं. वुट्ठानगामिनिया आसन्ने समापन्नज्झानविपस्सना पादकज्झानविपस्सना, सम्मसितधम्मोति विपस्सनाय आरम्मणभूता खन्धा. पुग्गलज्झासयोति पादकज्झानस्स सम्मसितज्झानस्स च भेदे सति पटिपज्जनकस्स पुग्गलस्स, ‘‘अहो वत मय्हं पञ्चङ्गिकं झानं भवेय्य चतुरङ्गिक’’न्तिआदिना पुब्बे पवत्तअज्झासयो. तेसम्पि वादेति एत्थ पठमथेरवादे. अयमेव…पे… नियमेति ततो ततो दुतियादिपादकज्झानतो उप्पन्नस्स सङ्खारुपेक्खाञाणस्स पादकज्झानातिक्कन्तानं ¶ अङ्गानं असमापज्जितुकामता विरागभावनाभावतो इतरस्स च अतब्भावतो. एतेनेव हि पठमथेरवादे अपादकपठमज्झानपादकमग्गा पठमज्झानिकाव होन्ति, इतरे च दुतियज्झानिकादिमग्गा पादकज्झानविपस्सनानियमेहि तंतंझानिकाव. एवं सेसवादेसुपि विपस्सनानियमो यथासम्भवं योजेतब्बो. तेनाह – ‘‘तेसम्पि वादे अयमेव पुब्बभागे वुट्ठानगामिनिविपस्सनाव नियमेती’’ति. वुत्ताव, तस्मा न इध वत्तब्बाति अधिप्पायो.

३१०. नानत्तादि ¶ कामावचरादिकुसलादिविभागतो नानाविधा. तेनाह ‘‘अनेकप्पकारा’’ति. नानत्तसिताति रूपसद्दादिनानारम्मणनिस्सया. एकत्ता एकसभावा जातिभूमिआदिविभागाभावतो. एकारम्मणनिस्सिताति एकप्पकारेनेव आरम्मणे पवत्ता. हेट्ठा अञ्ञाणुपेक्खा वुत्ता ‘‘बालस्स मुळ्हस्सा’’तिआदिना (म. नि. ३.३०८). उपरि छळङ्गुपेक्खा वक्खति ‘‘उपेक्खको विहरती’’तिआदिना (म. नि. ३.३११). द्वे उपेक्खा गहिता द्विन्नम्पि एकत्ता, एकज्झं गहेतब्बतो, नानत्तसिताय उपेक्खाय पकासितभावतो च.

अञ्ञाणुपेक्खा अञ्ञा सद्दादीसु तत्थ तत्थेव विज्जमानत्ता. रूपेसूति च इमिना न केवलं रूपायतनविसेसा एव गहिता, अथ खो कसिणरूपानिपीति आह – ‘‘रूपे उपेक्खाभावञ्च अञ्ञा’’तिआदि. एकत्तसितभावोपि इध एकत्तविसयसम्पयोगवसेनेव इच्छितो, न आरम्मणवसेन चाति दस्सेतुं, ‘‘यस्मा पना’’तिआदि वुत्तं. तेनेवाह ‘‘तत्था’’तिआदि. सम्पयुत्तवसेनाति सम्पयोगवसेन. आकासानञ्चायतनं निस्सयतीति आकासानञ्चायतननिस्सिता, आकासानञ्चायतनखन्धनिस्सिता. सेसासुपीति विञ्ञाणञ्चायतननिस्सितादीसुपि.

अरूपावचरविपस्सनुपेक्खायाति अरूपावचरधम्मारम्मणाय विपस्सनुपेक्खाय. रूपावचरविपस्सनुपेक्खन्ति एत्थापि एसेव नयो. ताय कामरूपारूपभेदाय तण्हाय निब्बत्ताति तम्मया, तेभूमकधम्मा, तेसं भावो तम्मयता, तण्हा यस्स गुणस्स वसेन अत्थे सद्दनिवेसो, तदभिधानकोति आह – ‘‘तम्मयता नाम तण्हा’’ति ¶ . अतम्मयता तम्मयताय पटिपक्खोति कत्वा. विपस्सनुपेक्खन्ति, ‘‘यदत्थि यं भूतं, तं पजहति उपेक्खं पटिलभती’’ति (दी. नि. ३.७१; अ. नि. ७.५५) एवमागतं सङ्खारविचिनने मज्झत्तभूतं उपेक्खं.

३११. यदरियोति एत्थ द-कारो पदसन्धिकरो, उपयोगपुथुवचने च य-सद्दोति दस्सेन्तो, ‘‘ये सतिपट्ठाने अरियो’’ति आह. कामं ‘‘अरियो’’ति पदं सब्बेसम्पि पटिविद्धसच्चानं साधारणं, वक्खमानस्स पन विसेसस्स बुद्धावेणिकत्ता, ‘‘अरियो सम्मासम्बुद्धो’’ति वुत्तं. न हि पच्चेकबुद्धादीनं अयमानुभावो अत्थि. तीसु ठानेसूति न सुस्सूसन्तीति वा, एकच्चे न सुस्सूसन्ति एकच्चे सुस्सूसन्तीति वा, सुस्सूसन्तीति वा, पटिपन्नापटिपन्नानं सावकानं पटिपत्तिसङ्खातेसु तीसु सतिपट्ठानेसु. सतिं पट्ठपेन्तोति पटिघानुनयेहि अनवस्सुतत्ता तदुभयनिवत्तत्ता सब्बदा सतिं उपट्ठपेन्तो. बुद्धानमेव सा निच्चं उपट्ठितसतिता, न इतरेसं आवेणिकधम्मभावतो. आदरेन सोतुमिच्छा इध सुस्सूसाति तदभावं ¶ दस्सेन्तो, ‘‘सद्दहित्वा सोतुं न इच्छन्ती’’ति आह. न अञ्ञाति ‘‘न अञ्ञाया’’ति वत्तब्बे यकारलोपेन निद्देसोति आह ‘‘न जाननत्थाया’’ति. सत्थु ओवादस्स अनादियनमेव वोक्कमनन्ति आह – ‘‘अतिक्कमित्वा…पे… मञ्ञन्ती’’ति.

गेहस्सितदोमनस्सवसेनाति इदं इध पटिक्खिपितब्बमत्तदस्सनपदं दट्ठब्बं. नेक्खम्मस्सितदोमनस्सस्सपि सत्थु पसङ्गवसेन ‘‘न चेव अत्तमनो होती’’ति अत्तमनपटिक्खेपेन अनत्तमनता वुत्ता विय होतीति तं पटिसेधेन्तो – ‘‘अप्पतीतो होतीति न एवमत्थो दट्ठब्बो’’ति. तस्स सेतुघातो हि तथागतानं. यदि एवं कस्मा अत्तमनतापटिक्खेपोति आह – ‘‘अप्पटिपन्नकेसु पन अनत्तमनताकारणस्स अभावेनेतं वुत्त’’न्ति. पटिघअवस्सवेनाति छहि द्वारेहि पटिघविस्सन्दनेन, पटिघप्पवत्तियाति अत्थो. उप्पिलावितोति न एवमत्थो दट्ठब्बो उप्पिलावितत्तस्स बोधिमूले एव पहीनत्ता. पटिपन्नकेसूति इदं अधिकारवसेन वुत्तं, अप्पटिपन्नकेसुपि तथागतस्स अनत्तमनताकारणं नत्थेव. एतं वुत्तन्ति एतं ‘‘अत्तमनो चेव होती’’तिआदिवचनं वुत्तं ¶ सावकानं सम्मापटिपत्तिया सत्थु अनवज्जाय चित्ताराधनाय सम्भवतो.

३१२. दमितोति निब्बिसेवनभावापादनेन सिक्खापितो. इरियापथपरिवत्तनवसेन अपरिवत्तित्वा एकदिसाय एव सत्तदिसाविधावनस्स इधाधिप्पेतत्ता सारितानं हत्थिदम्मादीनं एकदिसाधावनम्पि अनिवत्तनवसेनेव युत्तन्ति आह – ‘‘अनिवत्तित्वा धावन्तो एकंयेव दिसं धावती’’ति. कायेन अनिवत्तित्वावाति कायेन अपरिवत्तित्वा एव. विमोक्खवसेन अट्ठ दिसा विधावति, न पुरत्थिमादिदिसावसेन. एकप्पहारेनेवाति एकनीहारेनेव, एकस्मिंयेव वा दिवसे एकभागेन. ‘‘पहारो’’ति हि दिवसस्स ततियो भागो वुच्चति. विधावनञ्चेत्थ झानसमापज्जनवसेन अकलङ्कमप्पतिसातं जवनचित्तपवत्तन्ति आह ‘‘समापज्जतियेवा’’ति. सेसं सुविञ्ञेय्यमेव.

सळायतनविभङ्गसुत्तवण्णनाय लीनत्थप्पकासना समत्ता.

८. उद्देसविभङ्गसुत्तवण्णना

३१३. देसेतब्बस्स ¶ अत्थस्स उद्दिसनं उद्देसो, विभजनं विभङ्गोति आह – ‘‘मातिकञ्च विभजनञ्चा’’ति तुलेय्यातिआदीनि चत्तारिपि पदानि पञ्ञावेवचनानि. अथ वा तुलेय्याति तुलनभूताय पञ्ञाय तस्स धम्मस्स पग्गहादिविधिना परितुलेय्य. तीरेय्याति तीरणभूताय पञ्ञाय तत्थ ञाणकिरियासमापनवसेन तीरेय्य. परिग्गण्हेय्याति तथासमापन्नो आनिसंसे अस्सादआदीनवे च विचिनेय्य. परिच्छिन्देय्याति परिच्छिन्दभूतेन ञाणेन अत्थं परिच्छिन्दित्वा जानेय्य. आरम्मणेसूति रूपादिपुथुत्तारम्मणेसु. निकन्तिवसेनाति निकामनवसेन अपेक्खावसेन. तिट्ठमानन्ति पवत्तमानं. गोचरज्झत्तेति झानारम्मणभूते. तञ्हि भावनाचित्तेनाभिभुय्य अविस्सज्जित्वा गय्हमानं अज्झत्तं विय होतीति ‘‘गोचरज्झत्त’’न्ति वुच्चति. भावनं आरद्धस्स भिक्खुनो यदि भावनारम्मणे निकन्ति उप्पज्जेय्य, ताय निकन्तिया उपरि भावनं विस्सज्जेत्वा चित्तसंकोचवसेन सण्ठितं नाम, तदभावेन असण्ठितं नाम होतीति, ‘‘अज्झत्तं असण्ठित’’न्ति वुत्तन्ति दस्सेन्तो, ‘‘गोचरज्झत्ते निकन्तिवसेन असण्ठित’’न्ति ¶ आह. तथा हि वक्खति – ‘‘निकन्तिवसेन हि अतिट्ठमानं हानभागियं न होति, विसेसभागियमेव होती’’ति. अग्गहेत्वाति रूपादीसु किञ्चि तण्हादिग्गाहवसेन अग्गहेत्वा. तथा अग्गहणेनेव हि तण्हापरितासादिवसेन न परितस्सेय्य. अवसेसस्स च दुक्खस्साति सोकादिदुक्खस्स. अवसेसस्स च दुक्खस्साति वा जातिजरामरणसीसेन विपाकदुक्खस्स गहितत्ता किलेसदुक्खस्स चेव संसारदुक्खस्स चाति अत्थो.

३१६. रूपमेव किलेसुप्पत्तिया कारणभावतो रूपनिमित्तं. रागादिवसेन तं अनुधावतीति रूपनिमित्तानुसारी.

३१८. निकन्तिवसेन असण्ठितन्ति अपेक्खावसेन सण्ठितं निकन्तिं पहाय पवत्तमानं उपरि विसेसावहतोति. तेनाह ‘‘निकन्तिवसेन ही’’तिआदि.

३२०. अग्गहेत्वा अपरितस्सनाति पञ्चुपादानक्खन्धे, ‘‘एतं ममा’’तिआदिना तण्हादिग्गाहवसेन उपादियित्वा तण्हापरितासादिवसेन परितस्सना, वुत्तविपरियायेन अग्गहेत्वा अपरितस्सना वेदितब्बा. कथं पनेसा अनुपादापरितस्सना होतीति महाथेरस्स अधिप्पायं ¶ विवरितुं चोदनं समुट्ठपेति? उपादातब्बस्स अभावतोति तस्स अनुपादापरितस्सनाभावे कारणवचनं. यदि हीतिआदि तस्स समत्थनं. उपादापरितस्सनाव अस्स तथा उपादातब्बस्स तथेव उपादिन्नत्ता. एवन्ति निच्चादिआकारेन. उपादिन्नापीति गहितपरामट्ठापि. अनुपादिन्नाव होन्ति अयोनिसो गहितत्ता, विञ्ञूसु निस्साय जानितब्बत्ता च. दिट्ठिवसेनाति मिच्छादिट्ठिया गहणाकारवसेन, तस्स पन अयथाभूतगाहिताय परमत्थतो च अभावतो. अत्थतोति परमत्थतो. अनुपादापरितस्सनायेव नाम होति उपादातब्बाकारस्स अभावेन तं अनुपादियित्वा एव परितस्सनाति कत्वा.

परिवत्ततीति न तदेव रूपं अञ्ञथा पवत्तं परिवत्तति, अथ खो पकतिजहनेन सभावविगमेन नस्सति भिज्जति. विपरिणतन्ति अञ्ञथत्तं गतं विनट्ठं. कम्मविञ्ञाणन्ति अभिसङ्खारविञ्ञाणं. ‘‘रूपं अत्ता’’तिआदि मिच्छागाहवसेन विञ्ञाणस्स रूपभेदेन वुत्तस्स भेदानुपरिवत्ति होति. विपरिणामं अनुगन्त्वा विपरिवत्तनतं आरब्भ पवत्तं विपरिणामानुपरिवत्तं; ततो ¶ समुप्पन्ना परितस्सना विपरिणामानुपरिवत्तजा परितस्सनाति दस्सेन्तो आह – ‘‘विपरिणामस्स…पे… परितस्सना’’ति. अकुसलधम्मसमुप्पादा चाति, ‘‘यं अहु वत मे, तं वत मे नत्थी’’तिआदिना पवत्ता अकुसलचित्तुप्पादधम्मा. खेपेत्वाति पवत्तितुं अप्पदानवसेन अनुप्पत्तिनिमित्तताय खेपेत्वा. भयतासेनाति भायनवसेनपि चित्तुत्रासेन. तण्हातासेनाति तस्सनेन. सविघातोति चित्तविघातनविघातेन सविघातो. ततो एव चेतोदुक्खेन सदुक्खो. मणिकरण्डकसञ्ञायाति रित्तकरण्डंयेव मणिपरिपुण्णकरण्डोति उप्पन्नसञ्ञाय. अग्गहेत्वा परितस्सनाति गहेतब्बस्स अभावेन गहणम्पि अविज्जमानपक्खियमेवाति अग्गहेत्वा परितस्सना नाम होति.

३२१. कम्मविञ्ञाणमेव नत्थि सति कम्मविञ्ञाणे रूपभेदानुपरिवत्ति सियाति कम्मविञ्ञाणाभावदस्सनमुखेन खीणासवस्स सब्बसो किलेसाभावं दस्सेति. सेसं सुविञ्ञेय्यमेव.

उद्देसविभङ्गसुत्तवण्णनाय लीनत्थप्पकासना समत्ता.

९. अरणविभङ्गसुत्तवण्णना

३२३. गेहस्सितवसेनाति ¶ किलेसनिस्सितवसेन अनुरोधवसेन. नेव उक्खिपेय्याति न अनुग्गण्हेय्य. न अवक्खिपेय्याति गेहस्सितवसेन विरोधवसेन न निग्गण्हेय्य. अनुरोधेन विना सम्पहंसनवसेन यथाभूतगुणकथनं नेवुस्सादना वज्जाभावतो; तथा विरोधेन विना विवेचनवसेन यथाभूतदोसकथनं न अपसादनं. सभावमेवाति यथाभूतसभावमेव कस्सचि पुग्गलस्स अनादेसकरणवसेन कथेय्य, सेय्यथापि आयस्मा सुभूतित्थेरो. विनिच्छितसुखन्ति, ‘‘अज्झत्तं अनवज्ज’’न्तिआदिना विसेसतो विनिच्छितसुखाय होति. परम्मुखा अवण्णन्ति स्वायं रहोवादो पेसुञ्ञूपसंहारवसेन पवत्तो इधाधिप्पेतोति आह ‘‘पिसुणवाचन्ति अत्थो’’ति. खीणातीति खीणो, यो भासति, यञ्च उद्दिस्स भासति, द्वेपि हिंसति विबाधतीति अत्थो, तं खीणवादं. स्वायं यस्मा किलेसेहि आकिण्णो संकिलिट्ठो एव च होति, तस्मा वुत्तं – ‘‘आकिण्णं ¶ संकिलिट्ठं वाच’’न्ति. तेन अवसिट्ठं तिविधम्पि वचीदुच्चरितमाह. अधिट्ठहित्वाति, ‘‘इदमेव सच्च’’न्ति अज्झोसाय. आदायाति पग्गय्ह. वोहरेय्याति समुदाचरेय्य. लोकसमञ्ञन्ति लोकसङ्केतं.

३२४. आरम्मणतो सम्पयोगतो कामेहि पटिसंहितत्ता कामपटिसन्धि, कामसुखं. तेनाह ‘‘कामूपसंहितेन सुखेना’’ति. सदुक्खोति विपाकदुक्खेन संकिलेसदुक्खेन सदुक्खो. तथा सपरिळाहोति विपाकपरिळाहेन चेव किलेसपरिळाहेन च सपरिळाहो.

३२६. वट्टतो निस्सरितुं अदत्वा तत्थेव सीदापनतो मिच्छापटिपदाभावेन सत्ते संयोजेतीति संयोजनं, विसेसतो भवसंयोजनं तण्हाति आह ‘‘तण्हायेतं नाम’’न्ति. न तण्हायेव मानादयोपि संयोजनत्तं साधेन्ति नाम सब्बसो संयोजनतो सुट्ठु बन्धनतो. तेन वुत्तं – ‘‘अविज्जानीवरणानं, भिक्खवे, सत्तानं तण्हासंयोजनान’’न्ति (सं. नि. २.१२५-१२६).

इमं चतुक्कन्ति, ‘‘ये कामपटिसन्धिसुखिनो सोमनस्सानुयोगं अनुयुत्ता, ये अत्तकिलमथानुयोगं अनुयुत्ता’’ति एवमागतं इमं चतुक्कं निस्साय. ‘‘एतदग्गे ठपितो’’ति, वत्वा तं निस्साय ठपितभावं वित्थारतो दस्सेतुं, ‘‘भगवतो ही’’तिआदि वुत्तं. उस्सादनाअपसादना ¶ पञ्ञायन्ति तथागतेन विनेतब्बपुग्गलवसेन धम्मदेसनाय पवत्तेतब्बतो. अयं पुग्गलो…पे… आचारसम्पन्नोति वा नत्थि परेसं अनुद्देसकवसेन धम्मदेसनाय पवत्तनतो.

३२९. परम्मुखा अवण्णन्ति निन्दियस्स दोसस्स निन्दनं. न हि कदाचि निन्दियो पसंसियो होति, तं पन कालं ञत्वाव कथेतब्बन्ति आह, ‘‘युत्तपत्तकालं ञत्वावा’’ति. खीणवादेपि एसेव नयो तस्स रहोवादेन समानयोगक्खमत्ता.

३३०. घातीयतीति वधीयति. सद्दोपि भिज्जति नस्सति, भेदो होतीति अत्थो. गेलञ्ञप्पत्तोति खेदं परिस्समं पत्तो. अपलिबुद्धन्ति दोसेहि अननुपतितं.

३३१. अभिनिविस्स ¶ वोहरतीति एवमेतं, न इतो अञ्ञथाति तं जनपदनिरुत्तिं अभिनिविसित्वा समुदाचरति. अतिधावनन्ति समञ्ञं नामेतं लोकसङ्केतसिद्धा पञ्ञत्तीति पञ्ञत्तिमत्ते अट्ठत्वा परमत्थतो थामसा परामस्स वोहरणं.

३३२. अपरामसन्तोति अनभिनिविसन्तो समञ्ञामत्ततोव वोहरति.

३३३. मरियादभाजनीयन्ति यथावुत्तसम्मापटिपदाय मिच्छापटिपदाय च अञ्ञमञ्ञं सङ्करभावविभाजनं. रणन्ति सत्ता एतेहि कन्दन्ति अकन्दन्तापि कन्दनकारणभावतोति रणा; रागदोसमोहा, दसपि वा किलेसा, सब्बेपि वा एकन्ताकुसला, तेहि नानप्पकारदुक्खनिब्बत्तकेहि अभिभूता सत्ता कन्दन्ति; सह रणेहीति सरणो. रणसद्दो वा रागादिरेणूसु निरुळ्हो. तेनाह ‘‘सरजो सकिलेसो’’ति. पाळियं पन ‘‘सदुक्खो एसो धम्मो’’तिआदिना आगतत्ता कामसुखानुयोगादयोपि ‘‘सरणो’’ति वुत्ताति दुक्खादीनं रणभावो तन्निब्बत्तकसभावानं अकुसलानं सरणता च वेदितब्बा. अरणोतिआदीनं पदानं वुत्तविपरियायेन अत्थो वेदितब्बो.

वत्थुं सोधेतीति निरोधसमापज्जनेन महप्फलभावकरणेन दक्खिणेय्यवत्थुभूतं अत्तानं विसोधेति; निरोधसमापत्तिया वत्थुविसोधनं निरोधं समापज्जित्वा वुट्ठितानं पच्चेकबुद्धानं महाकस्सपत्थेरादीनं दिन्नदक्खिणाविसुद्धिया दीपेतब्बं. तेनाह ‘‘तथा ही’’तिआदि. तथेवाति इमिना ‘‘पिण्डाय चरन्तो’’तिआदिं उपसंहरति. मेत्ताभावनाय मुदुभूतचित्तबहुमानपुब्बकं देन्तीति ¶ , ‘‘सुभूतित्थेरो दक्खिणं विसोधेती’’ति वुत्तं. तेन दायकतोपि दक्खिणाविसुद्धिं दस्सेति. वत्थुसोधनं पन पटिभागतो. एवं पन कातुं सक्काति सावकानम्पि किमेवं लहुवुट्ठानाधिट्ठानं सावकेसु चिण्णवसीभावो सम्भवतीति पुच्छति. इतरो अग्गसावकमहासावकेसु किं वत्तब्बं, पकतिसावकेसुपि वसिप्पत्तेसु लब्भतीति ते दस्सेन्तो, ‘‘आम सक्का’’तिआदिमाह. सेसं सुविञ्ञेय्यमेव.

अरणविभङ्गसुत्तवण्णनाय लीनत्थप्पकासना समत्ता.

१०. धातुविभङ्गसुत्तवण्णना

३४२. अपरिक्खीणायुकं ¶ ¶ पुक्कुसातिकुलपुत्तं उद्दिस्स गमनन्ति कत्वा वुत्तं ‘‘तुरितगमनचारिक’’न्ति. मम वासुपगमनेन तव चित्तस्स अफासुकं अनिट्ठं सचे नत्थि. सोति पुब्बुपगतो. दिन्नं दिन्नमेव वट्टतीति एकवारं दिन्नं दिन्नमेव युत्तं, न पुन दातब्बन्ति अधिप्पायो. कतं कतमेवाति सङ्गहत्थं कतं अनुच्छविककम्मं कतमेव, न तं पुन विपरिवत्तेतब्बन्ति अधिप्पायो.

पुक्कुसातिम्हि उभयथापि कुलपुत्तभावो परिपुण्णो एवाति आह – ‘‘जातिकुलपुत्तोपि आचारकुलपुत्तोपी’’ति. तत्राति तस्मिं तक्कसीलतो आगमने. अङ्के निपन्नदारकं विय जनं तोसेति तुट्ठिं पापेति. रतनानि उप्पज्जन्ति पब्बतसमुद्दादिसन्निस्सितत्ता पच्चन्तदेसस्स. दस्सनीयन्ति दस्सनेनेव सुखावहं. एवरूपन्ति दस्सनीयं सवनीयञ्च.

अनग्घकम्बले महग्घकम्बले. सारकरण्डकेति चन्दनसारादिसारमयकरण्डके. लिखापेत्वा उक्किरापेत्वा. लाखाय वट्टापेत्वाति मुखं पिदहित्वा लाखापरिकम्मं कारेत्वा.

अन्तो दुस्सभण्डिकं अत्थीति अञ्ञासि नातिगरुकभावतो. अनग्घा अहेसुन्ति वण्णसम्पत्तिफस्ससम्पत्तिपमाणमहत्तदुन्निम्मापियताहि महग्घा अहेसुं, महापुञ्ञो राजा तस्स अत्थेवाति अधिप्पायो.

यदि एवं, ‘‘किन्नु खो पेसेमी’’ति कस्मा वीमंसं आपज्जीति आह – ‘‘अपिच खो पना’’तिआदि. सोति बिम्बिसारो राजा. विचिनितुं आरद्धो रतनस्स अनेकविधत्ता उत्तरुत्तरिञ्च पणीततरादिभावतो. सुवण्णरजतादीति सुवण्णरजतपवाळमणिमुत्तावेळुरियादि. इन्द्रियबद्धन्ति चक्खादिइन्द्रियपटिबद्धं. पदेसन्ति गुणवसेन एकदेसं न पापुणाति.

सामं सच्चानं अभिसम्बुद्धतासामञ्ञेन, ‘‘बुद्धरतनम्पि दुविध’’न्ति वुत्तं. बुद्धरतनसमं रतनं नाम नत्थि, यस्मा पन इमस्मिं लोके परस्मिं वा पन बुद्धेन सदिसो न विज्जतीति. पठमबोधियंयेव पवत्ततीति कत्वा वुत्तं ‘‘घोसोपी’’तिआदि.

राजा ¶ तुट्ठो चिन्तेसि, ‘‘तत्थ अविज्जमानंयेव पेसेतुं लद्ध’’न्ति. तस्माति यस्मा परिपुण्णं एकदिवसम्पि तस्मिं पदेसे बुद्धानं आवासपरिग्गहो ¶ नत्थि, तस्मा. पुब्बदिसामुखन्ति पुब्बदिसाभिमुखं सीहपञ्जरं. तेनस्स सुविभूतालोकतं दस्सेति.

एवं अनञ्ञसाधारणस्स भगवतो ईदिसो समुदागमोति दस्सेतुं, ‘‘एवं दस पारमियो पूरेत्वा’’तिआदि वुत्तं. एवं सम्पन्नसमुदागमस्स तदनुरूपा अयं फलसम्पदाति दस्सेतुं, ‘‘तुसितभवनतो’’तिआदि वुत्तं.

अरियधम्मो नाम अरियमग्गप्पधानो, अरियमग्गो च सत्ततिंसबोधिपक्खियसङ्गहो, ते च उद्देसमत्तेनेव गहिताति आह – ‘‘सत्ततिंसबोधिपक्खिये एकदेसेन लिखित्वा’’ति. चूळसीलादीनि ब्रह्मजाले (दी. नि. १.८-९) आगतनयेन वेदितब्बानि. छद्वारसंवरं सतिसम्पजञ्ञन्ति मनच्छट्ठानं द्वारानं संवरणवसेन सत्तट्ठानिकं सतिसम्पजञ्ञं. द्वादसप्पभेदं चीवरादिचतुप्पच्चयसन्तोसं. अरञ्ञरुक्खमूलादीनञ्च विभङ्गं भावनानुकूलं सेनासनं. ‘‘अभिज्झं लोके पहाया’’तिआदिना वुत्तं नीवरणप्पहानं. परिकम्मन्ति कसिणादिपरिकम्मं. पाळियं आगतनयेन अट्ठतिंस कम्मट्ठानानि. विसुद्धिपटिपाटिया याव आसवक्खया इमं पटिपत्तिं एकदेसेन लिखि. सोळसविधन्ति सोळसविधभावनाय पयोगं.

किलञ्जमयेति नानाविधभित्तिविभत्ते सण्हसुखुमरतनपरिसिब्बिते किलञ्जमयसमुग्गे. बहि वत्थेन वेठेत्वाति पठमं सुखुमकम्बलेन वेठेत्वा पटिपाटिया तेत्तिंसाय समुग्गेसु पक्खिपित्वा ततो बहि सुखुमवत्थेन वेठेत्वा छादेत्वा. तिणगच्छपहानसम्मज्जनादिना सोधितमत्तकमेव होतु, कदलिपुण्णघटठपनधजपटाकुस्सापनादिअलङ्करणेन मा निट्ठापेथाति अत्थो. राजानुभावेन पटियादेथाति मम राजानुरूपं सज्जेथ, अलङ्करोथाति अत्थो. अन्तरभोगिकानन्ति अनुयुत्तराजमहामत्तानं. जवनदूतेति खिप्पं गच्छन्तकदूतपुरिसे. ताळेहि सह अवचरन्तीति ताळावचरा.

रञ्ञा पण्णाकारं उद्दिस्स कतपूजासक्कारस्स अमच्चतो सुतत्ता पण्णाकारं उच्चट्ठाने ठपेत्वा सयं नीचासने निसिन्नो. नायं अञ्ञस्स रतनस्स भविस्सतीति अयं परिहारो अञ्ञस्स मणिमुत्तादिभेदस्स रतनस्स न भविस्सति मणिमुत्तादीहि अभिसङ्खतत्ता. बलवसोमनस्सं ¶ उप्पज्जि चिरतनकालं बुद्धसासने भावितभावनताय वासितवासनताय घटे दीपो विय अब्भन्तरे एव समुज्जलमानपरिपक्कतिहेतुकभावतो.

धारेमीति ¶ इच्छामि, गण्हामीति अत्थो. द्वेज्झवचनन्ति द्वेळ्हकभावो. अन्तरं करोतीति द्विन्नं पादानं अन्तरं तं लेखं करोति, एकेन पादेन अतिक्कमीति अत्थो. तस्सा गतमग्गेनाति ताय देविया विवट्टमानाय नासिताय गतमग्गेन. तं पन लेखन्ति पुक्कुसातिना कतलेखं. पण्णच्छत्तकन्ति तालपत्तमुट्ठिं.

सत्थुगारवेनाति सत्थरि उप्पन्नपसादपेमबहुमानसम्भवेन. तदा सत्थारंयेव मनसि कत्वा तन्निन्नभावेन गच्छन्तो, ‘‘पुच्छिस्सामी’’तिपि चित्तं न उप्पादेसि, ‘‘एत्थ नु खो सत्था वसती’’ति परिवितक्कस्सेव अभावतो; राजगहं पन पत्वा रञ्ञो पेसितसासनवसेन तत्थ च विहारस्स बहुभावतो सत्था कहं वसतीति पुच्छि. सत्थु एककस्सेव निक्खमनं पञ्चचत्तालीस योजनानि पदसा गमनञ्च धम्मपूजावसेन कतन्ति दट्ठब्बं. धम्मपूजाय च बुद्धानं आचिण्णभावो हेट्ठा वित्थारितोयेव. बुद्धसोभं पन पटिच्छादेत्वा अञ्ञातकवेसेन तत्थ गमनं तस्स कुलपुत्तस्स विस्सत्थवसेन मग्गदरथपटिपस्सम्भनत्थं. अप्पटिपस्सद्धमग्गदरथो हि धम्मदेसनाय भाजनं न होतीति. तथाहि वक्खति, ‘‘ननु च भगवा’’तिआदि.

उरुद्धन्ति विसालन्ति केचि. अतिरेकतियोजनसतन्तिआदिना अन्वयतो ब्यतिरेकतो च मच्छेरविनयने सब्रह्मचारीनं ओवाददानं. अच्चन्तसुखुमालोतिआदिना सत्थु धम्मगारवेन सद्धिं कुलपुत्तस्सपि धम्मगारवं संसन्दति समेतीति दस्सेति. तेन भगवतो कतस्स पच्चुग्गमनस्स ठानगतभावं विभावेन्तो अञ्ञेसम्पि भब्बरूपानं कुलपुत्तानं यथारहं सङ्गहो कातब्बोति दस्सेति.

ब्रह्मलोकप्पमाणन्ति उच्चभावेन. आनुभावेनाति इद्धानुभावेन यथा सो सोतपथं न उपगच्छति, एवं वूपसमेतुं सक्कोति. अविब्भन्तन्ति विब्भमरहितं निल्लोलुप्पं. ‘‘भावनपुंसकं पनेत’’न्ति वत्वा तस्स विवरणत्थं, ‘‘पासादिकेन इरियापथेना’’ति वुत्तं. इत्थम्भूतलक्खणे एतं करणवचनं दट्ठब्बं. तेनाह ‘‘यथा इरियतो’’तिआदि. अमनापो ¶ होति पस्सन्तानं. सीहसेय्याय निपन्नस्सपि हि एकच्चे सरीरावयवा अधोखित्तविक्खित्ता विय दिस्सन्ति. कटियं द्विन्नं ऊरुसन्धीनं द्विन्नञ्च जाणुसन्धीनं वसेन चतुसन्धिकपल्लङ्कं. न पतिट्ठातीति नप्पवत्तति, ‘‘कंसि त्व’’न्तिआदिना अपुच्छिते कथापवत्ति एव न होति. अप्पतिट्ठिताय कथाय न सञ्जायतीति तथा पन पुच्छावसेन कथाय अप्पवत्तिताय उपरि धम्मकथा न सञ्जायति न उप्पज्जति. इतीति तस्मा. कथापतिट्ठापनत्थं कथापवत्तनत्थं कथासमुट्ठापनत्थं वा पुच्छि.

सभावमेव ¶ कथेतीति अत्तनो भगवतो अदिट्ठपुब्बत्ता ‘‘अदिट्ठपुब्बकं कथमहं जानेय्य’’न्ति सभावमेव केवलं अत्तनो अज्झासयमेव कथेति; न पन सदेवकस्स लोकस्स सुपाकटं सभावसिद्धं बुद्धरूपकायसभावं. अथ वा सभावमेव कथेतीति ‘‘इदमेव’’न्ति जानन्तोपि तदा भगवतो रुचिया तथापवत्तमानं रूपकायसभावमेव कथेति अप्पविक्खम्भन्ति अधिप्पायो. तेनाह – ‘‘तथा हि न’’न्तिआदि, विपस्सनालक्खणमेव पटिपदन्ति अधिप्पायो.

३४३. ‘‘पुब्बभागपटिपदं अकथेत्वा’’ति वत्वा पुब्बभागपटिपदाय अकथने कारणं पुब्बभागपटिपदञ्च सरूपतो दस्सेतुं, ‘‘यस्स ही’’तिआदि वुत्तं. अपरिसुद्धायपि पुब्बभागपटिपदाय विपस्सना तथा न किच्चकारी, पगेव अविज्जमानायाति, ‘‘यस्स हि…पे… अपरिसुद्धा होति’’च्चेव वुत्तं. पुब्बभागपटिपदा च नाम सङ्खेपतो पन्नरस चरणधम्माति आह – ‘‘सीलसंवरं…पे… इमं पुब्बभागपटिपदं आचिक्खती’’ति. यानकिच्चं साधेति मग्गगमनेन अकिलन्तभावसाधनत्ता. चिरकालं परिभाविताय परिपक्कगताय हेतुसम्पदाय उपट्ठापितं सामणेरसीलम्पि परिपुण्णं अखण्डादिभावप्पत्तिया, यं पुब्बहेतुत्ता ‘‘सील’’न्ति वुच्चति.

धातुयो परमत्थतो विज्जमाना, पञ्ञत्तिमत्थो पुरिसो अविज्जमानो. अथ कस्मा भगवा अरहत्तस्स पदट्ठानभूतं विपस्सनं कथेन्तो ‘‘छधातुरो’’ति अविज्जमानप्पधानं देसनं आरभीति आह – ‘‘भगवा ही’’तिआदि. कत्थचि ‘‘तेविज्जो छळभिञ्ञो’’तिआदीसु विज्जमानेन अविज्जमानं दस्सेति. कत्थचि – ‘‘इत्थिरूपं, भिक्खवे, पुरिसस्स चित्तं परियादाय तिट्ठती’’तिआदीसु (अ. नि. १.१) अविज्जमानेन विज्जमानं दस्सेति. कत्थचि ‘‘चक्खुविञ्ञाणं ¶ सोतविञ्ञाण’’न्तिआदीसु (विभ. १२१) विज्जमानेन विज्जमानं दस्सेति. कत्थचि – ‘‘खत्तियकुमारो ब्राह्मणकञ्ञाय सद्धिं संवासं कप्पेती’’तिआदीसु (दी. नि. १.२७५) अविज्जमानेन अविज्जमानं दस्सेति. इध पन विज्जमानेन अविज्जमानं दस्सेति. ‘‘छधातुरो’’ति हि समासत्थो अविज्जमानो पुग्गलविसयत्ता, तस्स पदस्स अवयवत्थो पन अप्पधानत्थो विज्जमानो, सो सद्दक्कमेन अप्पधानोपि अत्थक्कमेन पधानोति आह – ‘‘विज्जमानेन अविज्जमानं दस्सेन्तो’’ति. पुग्गलाधिट्ठानायेत्थ देसनाय कारणं दस्सेतुं, ‘‘सचे ही’’तिआदि वुत्तं. उपट्ठापेय्याति – ‘‘धातुयो’’इच्चेव कुलपुत्तस्स चित्तं निवेसेय्य तथा सञ्जानेय्य, एवं धम्मं देसेय्याति अत्थो. सन्देहं करेय्याति असति पुरिसे को करोति? को पटिसंवेदेति, धातुयो एवाति किं नु खो इदं, कथं नु खो इदन्ति संसयं उप्पादेय्य? सम्मोहं आपज्जेय्याति चतुरङ्गसमन्नागते अन्धकारे वत्तमानं विय देसियमाने अत्थे सम्मोहं आपज्जेय्य ¶ . तथाभूतो च देसनाय अभाजनभूतत्ता देसनं सम्पटिच्छितुं न सक्कुणेय्य. एवमाहाति एवं ‘‘छधातुरो’’ति आह.

यं त्वं पुरिसोति सञ्जानासीति यं रूपारूपधम्मसमूहं पबन्धवसेन पवत्तमानं अधिट्ठानविसेसविसिट्ठं – ‘‘पुरिसो सत्तो इत्थी’’तिआदिना त्वं सञ्जानासि, सो छधातुरो. सन्तेसुपि छधातुविनिमुत्तेसु धात्वन्तरेसु सुखावग्गहणत्थं तथा वुत्तं तग्गहणेनेव च तेसं गहेतब्बतो, स्वायमत्थो हेट्ठा दस्सितो एव. सेसपदेसूति ‘‘छफस्सायतनो’’तिआदिपदेसुपि. चत्तारि अधिट्ठानानि चतस्सो पतिट्ठा एतस्साति चतुराधिट्ठानो, अधितिट्ठति पतिट्ठहति एतेनाति अधिट्ठानं, येसु पतिट्ठाय उत्तमत्थं अरहत्तं अधिगच्छति, तेसं पञ्ञादीनं एतं अधिवचनं. तेनाह ‘‘स्वायं भिक्खू’’तिआदि. एत्तोति वट्टतो. विवट्टित्वाति विनिवट्टित्वा अपसक्कित्वा. एत्तोति वा एतेहि छधातुआदीहि. एत्थ हि निविट्ठस्स आयत्तस्स उत्तमाय सिद्धिया असम्भवोति. पतिट्ठितन्ति अरियमग्गाधिगमवसेन सुप्पतिट्ठितं. एवञ्हि सब्बसो पटिपक्खसमुच्छिन्दनेन तत्थ पतिट्ठितो होति. मञ्ञस्सवा नप्पवत्तन्तीति छहिपि द्वारेहि पवत्तमानसोताय मग्गेन विसोसिताय सब्बसो विगताय सब्बसो विच्छेदप्पत्तिया न सन्दन्ति. तेनाह ‘‘नप्पवत्तन्ती’’ति. यस्मा माने ¶ सब्बसो समुच्छिन्ने असमुच्छिन्नो अनुपसन्तो किलेसो नाम नत्थि, तस्मा आह – ‘‘मुनि सन्तोति वुच्चती’’ति रागग्गिआदीनं निब्बानेन निब्बुतो.

पञ्ञं नप्पमज्जेय्याति, ‘‘दिवसं चङ्कमेन निसज्जाय आवरणीयेहि धम्मेहि चित्तं परिसोधेती’’तिआदिनयप्पवत्ताय (म. नि. १.४२३; २.२४; ३.७५; सं. नि. ४.१२०; अ. नि. ३.१५; विभ. ५१९; महानि. १६१) अप्पमादप्पटिपत्तिया समाधिविपस्सनापञ्ञं नप्पमज्जेय्य. एतेन पुब्बभागियं समथविपस्सनाभावनमाह. सच्चमनुरक्खेय्याति सच्चानुरक्खनापदेसेन सीलविसोधनमाह; सच्चे ठितो समादिन्नसीलं अविकोपेत्वा परिपूरेन्तो समाधिसंवत्तनियतं करोति. तेनाह ‘‘वचीसच्चं रक्खेय्या’’ति. किलेसपरिच्चागं ब्रूहेय्याति तदङ्गादिवसेन किलेसानं परिच्चजनविधिं वड्ढेय्य. किलेसवूपसमनं सिक्खेय्याति यथा ते किलेसा तदङ्गादिवसेन परिच्चत्ता यथासमुदाचारप्पवत्तिया सन्ताने परिळाहं न जनेन्ति; एवं किलेसानं वूपसमनविधिं सिक्खेय्य पञ्ञाधिट्ठानादीनन्ति लोकुत्तरानं पञ्ञाधिट्ठानादीनं. अधिगमत्थायाति पटिलाभत्थाय.

३४७. पुब्बे ¶ वुत्तानन्ति, ‘‘चतुराधिट्ठानो, यत्थ ठितं मञ्ञस्सवा नप्पवत्तन्ती’’ति (म. नि. ३.३४३) एवं पुब्बे वुत्तानं.

३४८. वत्तब्बं भवेय्याति निद्देसवसेन वत्तब्बं भवेय्य. आदीहीति एवमादीहि. किच्चं नत्थि किच्चाभावतो. उप्पटिपाटिधातुकन्ति अयथानुपुब्बिकं. यथाधम्मवसेनेवाति देसेतब्बधम्मानं यथासभावेनेव. सप्पायं धुतङ्गन्ति अत्तनो किलेसनिग्गण्हनयोग्गं धुतङ्गं. चित्तरुचितन्ति अत्तनो चित्तपकतिया आचरियेहि विरोचेतब्बं, चरियानुकूलन्ति अत्थो. हत्थिपदोपमसुत्तादीसूति आदि-सद्देन विसुद्धिमग्गधातुविभङ्गादिं सङ्गण्हाति.

३५४. अयम्पेत्थाति पि-सद्दो सम्पिण्डनत्थो. तेन ‘‘अथापरं उपेक्खायेव अवसिस्सती’’ति उपरिदेसनं सम्पिण्डेति. सोपि हि पाटियेक्को अनुसन्धीति. ननु चायं यथाउद्दिट्ठाय विञ्ञाणधातुया निद्देसोपि ¶ भविस्सतीति यथानुसन्धिनयो विज्जतीति? न, विञ्ञाणधातुनिद्देसनयेन देसनाय अप्पवत्तत्ता तेनाह ‘‘हेट्ठतो’’तिआदि. यं वा पनातिआदिना पन देसनाय सानुसन्धितं विभावेति. न हि बुद्धा भगवन्तो अननुसन्धिकं देसनं देसेन्ति. आगमनीयविपस्सनावसेनाति यस्सा पुब्बे पवत्तत्ता आगमनीयट्ठाने ठिता विपस्सना, तस्सा वसेन. कम्मकारकविञ्ञाणन्ति ‘‘नेतं मम नेसोहमस्मि, न मेसो अत्ता’’ति एवं विपस्सनाकिच्चकारकं विपस्सनासहितं विञ्ञाणं. विञ्ञाणधातुवसेनाति यथाउद्दिट्ठाय विञ्ञाणधातुया भाजनवसेन. सत्थु कथनत्थायाति सत्थारा उद्देसमेव कत्वा ठपितत्ता निद्देसवसेन कथनत्थाय. अकथितभावो एव हिस्स अवसिट्ठता कथनत्थाय पटिविज्झनत्थाय च. पटिपक्खविगमेन तस्स चित्तस्स परिसुद्धताति आह ‘‘निरुपक्किलेस’’न्ति. उपक्किलेसानं पन पहीनभावतो परियोदातं. समुदयवसेन उदयदस्सनत्थञ्चेव पच्चयनिरोधवसेन अत्थङ्गमदस्सनत्थञ्च. कारणभावेन सुखाय वेदनाय हितन्ति सुखवेदनियं. तेनाह ‘‘सुखवेदनाय पच्चयभूत’’न्ति.

३६०. रूपकम्मट्ठानम्पि चतुधातुववत्थानवसेन, अरूपकम्मट्ठानम्पि सुखदुक्खवेदनामुखेन पगुणं जातं.

सत्थु कथनत्थंयेव अवसिस्सतीति, ‘‘कुलपुत्तस्स पटिविज्झनत्थ’’न्ति वुत्तमेवत्थं निसेधेति, तस्मा वुत्तमेवत्थं समत्थेतुं, ‘‘इमस्मिं ही’’तिआदि वुत्तं. कुलपुत्तस्स रूपावचरज्झानेति कुलपुत्तेन अधिगतरूपावचरज्झाने. तेनाह – ‘‘भिक्खु पगुणं तव इदं रूपावचरचतुत्थज्झान’’न्ति. यं किञ्चि सुवण्णतापनयोग्यं ¶ अङ्गारभाजनं इध ‘‘उक्का’’ति अधिप्पेतन्ति आह ‘‘अङ्गारकपल्ल’’न्ति. सज्जेय्याति यथा तत्थ पक्खित्तसुवण्णञ्च तप्पति, एवं पटियादियेय्य. नीहटदोसन्ति विगतीभूतकाळकं. अपनीतकसावन्ति अपगतसुखुमकाळकं.

अरियमग्गे पतिट्ठापेतुकामेन नाम सब्बस्मिम्पि लोकियधम्मे विरज्जनत्थाय धम्मो कथेतब्बोति अधिप्पायेन, ‘‘कस्मा पना’’तिआदिना चोदना कता. विनेय्यदमनकुसलेन भगवता वेनेय्यज्झासयवसेन ताव चतुत्थज्झानुपेक्खाय वण्णो कथितोति तस्स परिहारं वदन्तो, ‘‘कुलपुत्तस्सा’’तिआदिमाह.

३६१. तदनुधम्मन्ति ¶ तस्स अरूपावचरस्स कुसलस्स अनुरूपधम्मं, याय पटिपदाय तस्स अधिगमो होति, तस्स पुब्बभागपटिपदन्ति अत्थो. तेनाह ‘‘रूपावचरज्झान’’न्ति. तग्गहणाति तस्स गहणेन तस्सा पटिपत्तिया पटिपज्जमानेन. इतो उत्तरिन्ति ‘‘विञ्ञाणञ्चायतन’’न्तिआदीसु.

३६२. तस्सेवाति अरूपावचरज्झानस्स. एतं पन सविपाकं अरूपावचरज्झानं समेच्च सम्भुय्य पच्चयेहि कतत्ता सङ्खतं. पकप्पितन्ति पच्चयवसेन सविहितं. आयूहितन्ति सम्पिण्डितं. करोन्तेन करीयतीति पटिपज्जनकेन पटिपज्जीयति सङ्खरीयति. निब्बानं विय न निच्चं न सस्सतं. अथ खो खणे खणे भिज्जनसभावताय तावकालिकं. ततो एव चवनादिसभावन्ति सब्बमेतं रूपावचरधम्मेसु आदीनवविभावनं. दुक्खे पतिट्ठितन्ति सङ्खारदुक्खे पतिट्ठितं. अताणन्ति चवनसभावादिताय ताणरहितं. अलेणन्ति ततो अरक्खत्ता लीयनट्ठानरहितं. असरणन्ति अप्पटिसरणं. असरणीभूतन्ति सब्बकालम्पि अप्पटिसरणं.

समत्तपत्तविसे खन्धादीसु गहिते दुत्तिकिच्छा सियाति, ‘‘खन्धं वा सीसं वा गहेतुं अदत्वा’’ति वुत्तं. एवमेवाति एत्थायं उपमासंसन्दना – छेको भिसक्को विय सम्मासम्बुद्धो. विसविकारो विय किलेसदुक्खानुबन्धो, भिसक्कस्स विसं ठानतो चावेत्वा उपरि आरोपनं विय भगवतो देसनानुभावेन कुलपुत्तस्स कामभवे निकन्तिं परियादाय अरूपज्झाने भवनं. भिसक्कस्स विसं ओतारेत्वा पथवियं पातनं विय कुलपुत्तस्स ओरम्भागियकिलेसदुक्खापनयनं.

असम्पत्तस्साति अरूपावचरज्झानं अनधिगतस्स. अप्पटिलद्धस्सेवाति तस्स वेवचनं. सब्बमेतन्ति ¶ ‘‘अनिच्चं अधुव’’न्तिआदिना वित्थारतो वुत्तं सब्बमेतं आदीनवं. एकपदेनेव ‘‘सङ्खतमेत’’न्ति कथेसि सङ्खतपदेनेव तस्स अत्थस्स अनवसेसतो परियादिन्नत्ता.

नायूहतीति भवकारणचेतनावसेन ब्यापारं न समूहेति न सम्पिण्डेति. तेनाह – ‘‘न रासिं करोती’’ति. अभिसङ्खरणं नाम चेतनाब्यापारोति आह – ‘‘न अभिसञ्चेतयती’’ति. तं पन फलुप्पादनसमत्थताय फलेन कप्पनन्ति आह ‘‘न कप्पेती’’ति. सचे अभिसङ्खारचेतना उळारा, फलमहत्तसङ्खाताय वुड्ढिया होति, अनुळारा च अवुड्ढियाति आह – ‘‘वुड्ढिया वा परिहानिया वा’’ति. बुद्धविसये ठत्वाति भगवा ¶ अत्तनो बुद्धसुबुद्धताय सीहसमानवुत्तिताय च देसनं उक्कंसतो सावकेहि पत्तब्बं विसेसं अनवसेसेन्तो तथा वदति, न सावकविसयं अतिक्कमित्वा अत्तनो बुद्धविसयमेव देसेन्तो. तेनाह – ‘‘अरहत्तनिकूटं गण्ही’’ति. यदि कुलपुत्तो अत्तनो…पे… पटिविज्झि, अथ कस्मा भगवा देसनाय अरहत्तनिकूटं गण्हीति आह ‘‘यथा नामा’’तिआदि.

इतो पुब्बेति इतो अनागामिफलाधिगमतो उत्तरि उपरि. अस्साति कुलपुत्तस्स. कथेन्तस्स भगवतो धम्मे नेव कङ्खा न विमति पठममग्गेनेव कङ्खाय समुच्छिन्नत्ता. एकच्चेसु ठानेसूति तथा विनेय्यठानेसु. तथा हि अयम्पि कुलपुत्तो अनागामिफलं पत्वा भगवन्तं सञ्जानि. तेन वुत्तं ‘‘यतो अनेना’’तिआदि.

३६३. अनज्झोसिताति अनज्झोसनीयाति अयमत्थोति आह – ‘‘गिलित्वा परिनिट्ठापेत्वा गहेतुं न युत्ता’’ति.

३६४. रागोव अनुसयो रागानुसयो, सो च पच्चयसमवाये उप्पज्जनारहोति वत्तब्बतं लभतीति वुत्तं – ‘‘सुखवेदनं आरब्भ रागानुसयो उप्पज्जेय्या’’ति. न पन तस्स उप्पादनं अत्थि खणत्तयसमायोगासम्भवतो. एस नयो सेसेसुपि. इतरन्ति अदुक्खमसुखवेदनं. विसंयुत्तोति केनचि सञ्ञोजनेन असंयुत्तताय एव नियतविप्पयुत्तो. कायस्स कोटि परमो अन्तो एतस्साति कायकोटिकं. दुतियपदेति ‘‘जीवितपरियन्तिक’’न्ति इमस्मिं पदे. विसेवनस्साति उपादानस्स. सीतीभविस्सन्तीति पदस्स ‘‘निरुज्झिस्सन्ती’’ति अत्थो वुत्तो, कथं पन वेदयितानं द्वादससु आयतनेसु निरुज्झनं सीतिभावप्पत्तीति चोदनं सन्धायाह – ‘‘किलेसा ही’’तिआदि. समुदयपञ्हेनाति महासतिपट्ठाने (दी. नि. २.४००; म. नि. १.१३३) समुदयसच्चनिरोधपञ्हेन. ननु सब्बसो किलेसपरिळाहविगमे सीतिभावो ¶ नाम वेदनानिरोधमत्तेन अधिप्पेतो; तेन इध वेदयितानि वुत्तानि, न किलेसाति वेदयितानं अच्चन्तनिरोधसङ्खातो सीतिभावोपि किलेससमुच्छेदेनेवाति आह ‘‘वेदयितानिपी’’तिआदि.

३६५. इदं ¶ ओपम्मसंसन्दनन्ति एत्थ सञ्ञोजना दीपसिखा विय, अधिट्ठानकपल्लिका विय वेदनाय निस्सयभूता चत्तारो खन्धा, तेलं विय किलेसा, वट्टि विय कम्मवट्टं, उपहरणकपुरिसो विय वट्टगामी पुथुज्जनो, तस्स सीसच्छेदकपुरिसो विय अरहत्तमग्गो सन्तानस्स समुच्छेदकरणतो, अनाहाराय दीपसिखाय निब्बायनं विय कम्मकिलेसानं अनन्तरपच्चयतो अनाहाराय वेदनाय अनुपादिसेसवसेन निब्बायनं.

आदिम्हि समाधिविपस्सनापञ्ञाहीति पुब्बभागपटिपदाभूता तया पगुणसमाधितो अरहत्तस्स पदट्ठानभूतविपस्सनापञ्ञातो च. उत्तरितराति विसिट्ठतरा. एवं समन्नागतोति एत्थ एवं-सद्दो इदंसद्दत्थवचनोति आह – ‘‘इमिना उत्तमेन अरहत्तफलपञ्ञाधिट्ठानेना’’ति. सब्बं वट्टदुक्खं खेपेतीति सब्बदुक्खक्खयो, अग्गमग्गो, तंपरियापन्नताय तत्थ ञाणन्ति आह – ‘‘सब्बदुक्खक्खये ञाणं नाम अरहत्तमग्गे ञाण’’न्ति. अरहत्तफले ञाणं अधिप्पेतं वुत्तनयेन सब्बदुक्खक्खये सन्ते तन्निमित्तं वा उप्पन्नञाणन्ति कत्वा. तस्साति, ‘‘एवं समन्नागतो भिक्खु इमिना परमेन पञ्ञाधिट्ठानेन समन्नागतो होती’’ति वुत्तभिक्खुनो.

३६६. हीति यस्मा. विमुत्तीति अरहत्तफलविमुत्ति, तस्मा सब्बदुक्खक्खये ञाणन्ति अरहत्तफलञाणं अधिप्पेतं. सच्चन्ति परमत्थसच्चं निब्बानं, न मग्गसच्चं. कामं अरहत्तफलविमुत्ति पटिपक्खेहि अकोपनीयताय अकुप्पा, ‘‘सच्चे ठिता’’ति पन वचनतो, ‘‘अकुप्पारम्मणकरणेन अकुप्पाति वुत्ता’’ति आह. वितथन्ति नट्ठं, जराय मरणेन च विपरिणामेतब्बताय यादिसं उप्पादावत्थाय जातं, ततो अञ्ञादिसन्ति अत्थो. तथा हि तं जरामरणेहि परिमुसितब्बरूपताय ‘‘मुसा’’ति वुत्तं. तेनाह – ‘‘मोसधम्मन्ति नस्सनसभाव’’न्ति. तं अवितथन्ति तं वुत्तनयेन अवितथं नाम, तं सभावो सब्बकालं तेनेव लब्भनतो. समथविपस्सनावसेन वचीसच्चतोति समथविपस्सनावसेन यं विसुद्धिमत्तं वचीसच्चं, ततो. दुक्खसच्चसमुदयसच्चेहि तच्छविपल्लासभूतसभावेहि. इति नेसं यथासकं सभावेन अवितथभावे अमोसधम्मताय तेहिपि अवितथभावा परमत्थसच्चं निब्बानमेव उत्तरितरं. तस्माति निब्बानस्सेव उत्तरितरभावतो.

३६७. उपधीयति ¶ ¶ एत्थ दुक्खन्ति उपधी, खन्धा कामगुणा च. उपदहन्ति दुक्खन्ति उपधी, किलेसाभिसङ्खारा. परिपूरा गहिता परामट्ठाति परियत्तभावेन तण्हाय गहिता दिट्ठिया परामट्ठा. समथविपस्सनावसेन किलेसपरिच्चागतोति विक्खम्भनवसेन तदङ्गप्पहानवसेन च किलेसानं परिच्चजनतो. उत्तरितरो विसिट्ठतरस्स पहानप्पकारस्स अभावतो.

३६८. आघातकरणवसेनाति चेतसिकाघातस्स उप्पज्जनवसेन. ब्यापज्जनवसेनाति चित्तस्स विपत्तिभाववसेन. सम्पदुस्सनवसेनाति सब्बसो दुस्सनवसेन. तीहि पदेहि यदि अरहत्तमग्गेन किलेसानं परिच्चागो चागाधिट्ठानं, अरहत्तमग्गेनेव नेसं वूपसमो उपसमाधिट्ठानं होतीति दस्सेति. एत्थ विसेसेन परिच्चागो सम्पजहनं अनुप्पत्तिधम्मतापादनं चागो, तथा पन परिच्चागेन यो सो नेसं तदा वूपसन्तताय अभावो, अयं उपसमोति अयमेतेसं विसेसो.

३६९. मञ्ञितन्ति मञ्ञना, ‘‘एतं ममा’’तिआदिना कप्पनाति अत्थो. अविज्जाविबन्धनतण्हागाहादीनं साधारणभावतो अयमहन्ति एत्थ अहन्ति दिट्ठिमञ्ञनादस्सनं, सा पन दिट्ठि मानमञ्ञनाय अत्तनियगाहवसेन होतीति स्वेव ‘‘अय’’न्ति इमिना गहितोति आह – ‘‘अयमहन्ति एकं तण्हामञ्ञितमेव वट्टती’’ति. आबाधट्ठेनाति पटिपीळनट्ठेन. मञ्ञनावसेन हि सत्तानं तथा होति. अन्तोदोसट्ठेनाति अब्भन्तरदुट्ठभावेन. मञ्ञनादूसितत्ता हि सत्तानं अत्तभावो दुक्खतामूलायत्तो, किलेसासुचिपग्घरणतो उप्पादनिरोधभङ्गेहि उद्धमुद्धं पक्कपभिन्नो होतीति फलूपचारेन ‘‘मञ्ञितं गण्डो’’ति वुत्तो. अनुपविट्ठट्ठेनाति अनुपविसित्वा हदयमाहच्च अधिट्ठानेन. मञ्ञितञ्हि पीळाजननतो अन्तोतुदनतो दुरुद्धरणतो सल्लं. खीणासवमुनि सब्बसो किलेसानं सन्तत्ता, ततो एव परिळाहानं परिनिब्बुतत्ता वूपसन्तत्ता सन्तो उपसन्तो निब्बुतोति वुच्चति. यत्थ ठितन्ति यस्मिं असेक्खभूमियं ठितं. यदि भगवा अत्तनो देसनाञाणानुरूपं देसनं पवत्तापेय्य, महापथविं पत्थरन्तस्स विय, आकासं पसारेन्तस्स विय, अनन्तापरिमेय्यलोकधातुयो पटिच्च तेसं ठिताकारं ¶ अनुप्पूरं विचिनन्तस्स विय देसना परियोसानं न गच्छेय्य. यस्मा पनस्स विनेय्यज्झासयानुरूपमेव देसना पवत्ति, न ततो परं अणुमत्तम्पि वड्ढति. तस्मा वुत्तं – ‘‘सब्बापि धम्मदेसना संखित्ताव, वित्थारदेसना नाम नत्थी’’ति. ननु सत्तपकरणदेसना वित्थारकथाति? न सापि वित्थारकथाति आह – ‘‘समन्तपट्ठानकथापि संखित्तायेवा’’ति. सन्निपतितदेवपरिसाय अज्झासयानुरूपमेव हि तस्सापि पवत्ति, न सत्थुदेसनाञाणानुरूपन्ति. यथानुसन्धिं ¶ पापेसि यथाउद्दिट्ठे अनुपुब्बेन अनवसेसतो विभजनवसेन देसनाय निट्ठापितत्ता. विपञ्चितञ्ञू…पे… कथेसि नातिसङ्खेपवित्थारवसेन देसितत्ता.

३७०. अट्ठन्नं परिक्खारानन्ति नयिदमनवसेसपरियादानं, लक्खणवचनं पनेतं, अञ्ञतरस्साति वचनसेसो. तथा हि, ‘‘मय्हं इद्धिमयपरिक्खारलाभाय पच्चयो होतू’’ति पत्थनं पट्ठपेत्वा पत्तचीवरं, पत्तं, चीवरमेव वा दिन्ने चरिमभवे इद्धिमयपरिक्खारो निब्बत्ततीति वदन्ति. अदिन्नत्ताति केचिवादो, तेनाह ‘‘कुलपुत्तो’’तिआदि. ओकासाभावतोति उपसम्पदालक्खणस्स असम्भवतो. तेनाह – ‘‘कुलपुत्तस्स आयुपरिक्खीण’’न्ति. उदकतित्थ…पे… आरद्धो परमप्पिच्छभावतो.

विब्भन्ताति भन्तचित्ता. सिङ्गेन विज्झित्वा घातेसि पुरिमजातिबद्धाघाततायाति वदन्ति.

मानुसं योगन्ति मनुस्सत्तभावं. अत्तभावो हि युज्जति कम्मकिलेसेहीति ‘‘योगो’’ति वुच्चति. उपच्चगुन्ति उपगच्छिंसु. उपकोतिआदि तेसं नामानि.

गन्धकट्ठेहीति चन्दनागरुसळलदेवदारुआदीहि गन्धदारूहि. सेसं सुविञ्ञेय्यमेव.

धातुविभङ्गसुत्तवण्णनाय लीनत्थप्पकासना समत्ता.

११. सच्चविभङ्गसुत्तवण्णना

३७१. आचिक्खनाति ¶ ¶ – ‘‘इदं दुक्खं अरियसच्चं, अयं दुक्खनिरोधगामिनी पटिपदा अरियसच्च’’न्ति आदितो कथनं. देसनाति तस्सेव अत्थस्स अतिसज्जनं पबोधनं. पञ्ञापनाति पकारेहि ञापना, सा पन यस्मा इत्थमिदन्ति वेनेय्यानं पच्चक्खतो दस्सना, तेसं वा सन्ताने पतिट्ठापना होति, तस्मा आह – ‘‘दुक्खसच्चादीनं ठपना’’ति. पट्ठपनाति पतिट्ठापना. यस्मा पट्ठपियमानसभावा देसना भाजनं उपगच्छन्ती विय होति, तस्मा वुत्तं – ‘‘पञ्ञापना’’ति, जानापनाति अत्थो. विवटकरणाति देसियमानस्स अत्थस्स विवटभावकरणं. विभागकिरियाति यथावुत्तस्स अत्थविभागस्स वित्थारकरणं. पाकटभावकरणन्ति अगम्भीरभावापादनं. अपरो नयो – चतुसच्चसञ्ञितस्स अत्थस्स पच्चेकं सरूपतो दस्सनवसेन इदन्ति आदितो सिक्खापनं कथनं आचिक्खना, एवं परसन्ताने पबोधनवसेन पवत्तापना देसना, एवं विनेय्यानं चित्तपरितोसजननेन तेसं बुद्धिपरिपाचनं ‘‘पञ्ञापना’’ति वुच्चति. एवं पञ्ञापेन्ती च सा देसियमानं अत्थं वेनेय्यसन्ताने पकारतो ठपेति पतिट्ठपेतीति ‘‘पट्ठपना’’ति वुच्चति. पकारतो ठपेन्ती पन संखित्तस्स वित्थारतो पटिवुत्तस्स पुनाभिधानतो ‘‘विवरणा’’ति, तस्सेवत्थस्स विभागकरणतो ‘‘विभजना’’ति, वुत्तस्स वित्थारेनाभिधानतो विभत्तस्स हेतुदाहरणदस्सनतो, ‘‘उत्तानीकम्म’’न्ति वुच्चति. तेनाह – ‘‘पाकटभावकरण’’न्ति, हेतूपमावसेनत्थस्स पाकटभावकरणतोति अत्थो.

अनुग्गाहकाति अनुग्गण्हनकामा. स्वायमनुग्गहो सङ्गहवत्थुवसेन पाकटो होतीति आह ‘‘आमिससङ्गहेना’’तिआदि. जनेता जनेत्तीति आह ‘‘जनिका माता’’ति. वुद्धिं परिसं आपादेतीति आपादेता. तेनाह ‘‘पोसेता’’ति. इदानि द्विन्नं महाथेरानं यथाक्कमं सब्रह्मचारीनं भगवता वुत्तेहि जनिकपोसिकमातुट्ठानियेहि सङ्गाहकतं वित्थारतो दस्सेतुं, ‘‘जनिकमाता ही’’तिआदि वुत्तं. परतोघोसेन विनापि उपरिमग्गाधिगमो होतीति ‘‘पच्चत्तपुरिसकारेना’’ति वुत्तं. पठममग्गो एव हि सावकानं एकन्ततो घोसापेक्खोति. पत्तेसुपीति पि-सद्देन पगेव अप्पत्तेसूति दस्सेति. भवस्स ¶ अप्पमत्तकता नाम इत्तरकालतायाति आह ‘‘अच्छरासङ्घातमत्तम्पी’’ति. जनेताति जनको, थेरो पन अरियाय जनयिता. आपादेताति वड्ढेता परिब्रूहेता. पुरिमस्मिं सच्चद्वये सम्मसनग्गहणं लोकियत्ता तस्स, इतरस्मिं तस्स अग्गहणं लोकुत्तरत्ता.

कामेहि ¶ निक्खन्तो सङ्कप्पो नेक्खम्मसङ्कप्पो. स्वायमस्स ततो निक्खमनत्थो तेसं पटिपक्खभावतो तेहि विसंसग्गतो विरज्जनतो समुच्छिन्दनतो सब्बसो विवित्तभावतो च होतीति दस्सेतुं, ‘‘कामपच्चनीकट्ठेना’’तिआदि वुत्तं. तत्थ कामपदघातन्ति यथा कामो पदं पतिट्ठं न लभति, एवं हननं, कामसमुच्छेदन्ति अत्थो. कामेहि सब्बसो विवित्तत्ता कामविवित्तो, अरियमग्गो, तस्स अन्तो, अरियफलं, तस्मिं कामविवित्तन्ते. एसेव नयोति इमिना ‘‘ब्यापादपच्चनीकट्ठेना’’तिआदियोजनं अतिदिसति. सब्बे चेते नेक्खम्मसङ्कप्पादयो नानाचित्तेसु लब्भन्तीति योजना. यदि एकचित्ते लब्भन्ति, कथं तिविधमिच्छासङ्कप्पानं समुग्घातोति आह ‘‘तत्र ही’’तिआदि. न नाना लब्भतीति इमिना तिविधकिच्चकारितं सम्मासङ्कप्पस्स दस्सेति. किच्चवसेन हि तस्स नामस्स लाभो. सम्मावाचादीनम्पि मग्गक्खणे एकचित्ते लब्भमानानम्पि चतुकिच्चकारिताय चतुब्बिधनामादिता वेदितब्बा. सेसं सुविञ्ञेय्यमेव.

सच्चविभङ्गसुत्तवण्णनाय लीनत्थप्पकासना समत्ता.

१२. दक्खिणाविभङ्गसुत्तवण्णना

३७६. महापजापतिगोतमीति ¶ एत्थ गोतमीति तस्स गोतमगोत्ततो आगतं नामं, महापजापति पन गुणतो. तं विवरितुं, ‘‘नामकरणदिवसे पनस्सा’’तिआदि वुत्तं. महतिं उळारं पजं जननपोसनेहि परिरक्खतीति महापजापति. परिभोगवसेन न हञ्ञतीति अहतं. सिप्पिकानन्ति तन्तवायानं. वायनट्ठानन्ति वीनट्ठानं. तानि मं न तोसेन्ति कायिकस्स पुञ्ञस्स अभावतो. तेनाह – ‘‘सहत्था कतमेव ¶ मं तोसेती’’ति. पिसित्वा निब्बत्तनं कत्वा. पोथेत्वाति सुखुमभावापादनत्थं धनुकेन नेत्वा. कालानुकालञ्च धातिगणपरिवुता गन्त्वा वेमकोटिं अग्गहेसि एकदिवसन्ति अधिप्पायो. एवञ्हि ‘‘एकदिवसं पन…पे… अकासी’’ति पुरिमवचनेन तं न विरुज्झेय्य.

छ चेतनाति छब्बिधा चेतना. न हि ता छयेव चेतनाति. सङ्घे गोतमि देहि…पे… सङ्घो चाति इदमेव सुत्तपदं. सङ्घे गोतमि देहीति सङ्घस्स दानाय नियोजेसि, तस्मा सङ्घोव दक्खिणेय्यतरोति अयमेवेत्थ अत्थो. यदि एवन्तिआदिना तत्थ ब्यभिचारं दस्सेति. राजमहामत्तादयोतिआदिना तत्थ ब्यतिरेकतो निदस्सनं आह. महन्ततरा भवेय्युन्ति आनुभावादिना महन्ततरा भवेय्युं, न च तं अत्थीति. तस्माति यस्मा गुणविसिट्ठहेतुकं दक्खिणेय्यतं अनपेक्खित्वा अत्तनो दीयमानस्स दापनं लभति, तस्मा. मा एवं गण्हाति सम्मासम्बुद्धतो सङ्घोव दक्खिणेय्यो’’ति मा गण्ह.

तत्थ निच्छयसाधकं सुत्तपदं दस्सेन्तो, ‘‘नयिमस्मिं लोके…पे… विपुलफलेसिन’’न्ति आह. स्वायमत्थो रतनसुत्ते (खु. पा. ६.३; सु. नि. २२६), ‘‘यं किञ्चि वित्त’’न्ति गाथाय, अग्गपसादसुत्तादीहि (इतिवु. ९०) च विभावेतब्बोति. तेनाह – ‘‘सत्थारा उत्तरितरो दक्खिणेय्यो नाम नत्थी’’ति.

गोतमिया अन्तिमभविकताय दानस्स दीघरत्तं हिताय सुखाय अनुप्पादनतो न तं गरुतरं सङ्घस्स पादापने कारणन्ति आह – ‘‘पच्छिमाय जनताया’’तिआदि. वचनतोपीति तस्स वत्थयुगस्स सत्थु एव पटिग्गहणाय वचनतोपि. तेनाह ‘‘न ही’’तिआदि.

सत्था ¶ सङ्घपरियापन्नोव ईदिसे ठाने अग्गफलट्ठताय अट्ठ-अरियपुग्गलभावतो, सचे पनस्स न सयं सङ्घपरियापन्नता, कथं सङ्घे पूजिते सत्था पूजितो नाम सियाति अधिप्पायो. तीणि सरणगमनानि तयो एव अग्गपसादाति वक्खतीति अधिप्पायो. अभिधेय्यानुरूपानि हि लिङ्गवचनानि. न रुहति अयाथावपटिपत्तिभावतो, न गिहिवेसग्गहणादिना गिहिभावस्स पटिक्खिपितत्ता. न वत्तब्बमेतं ‘‘सत्था सङ्घपरियापन्नो’’ति सत्थुभावतो. सावकसमूहो हि सङ्घो ¶ . सङ्घगणे हि सत्था उत्तरितरो अनञ्ञसाधारणगुणेहि समन्नागतभावतो मूलरतनभावतो च.

३७७. सम्पतिजातस्स महासत्तस्स सत्तपदवीतिहारगमनं धम्मतावसेन जातं, परं तदञ्ञदहरसदिसी पटिपत्तीति आह – ‘‘हत्थपादकिच्चं असाधेन्तेसू’’ति.

३७८. पच्चूपकारं न सुकरं वदामि अनुच्छविककिरियाय कातुं असक्कुणेय्यत्ता. अभिवादेन्ति एतेनाति अभिवादनं. वन्दमानेहि अन्तेवासिकेहि आचरियं ‘‘सुखी होतू’’तिआदिना अभिवादेन्ति नाम. तेन वुत्तं ‘‘अभिवादन’’न्ति. तदभिमुखो…पे… वन्दित्वा निपज्जति, सेय्यथापि आयस्मा सारिपुत्तो. कालानुकालं उपट्ठानं बीजयनपादसम्बाहनादि अनुच्छविककम्मस्स करणं नाम. अनुच्छविकं किरियं कातुं न सक्कोतियेव, यस्मा आचरियेन कतस्स धम्मानुग्गहस्स अन्तेवासिना करियमानो आमिसानुग्गहो सङ्खम्पि कलम्पि कलभागम्पि न उपेतियेवाति. तेन वुत्तं ‘‘न सुप्पतिकारं वदामी’’ति.

३७९. पाटिपुग्गलिकं दक्खिणं आरब्भ समुट्ठितं, ‘‘तं मे भगवा पटिग्गण्हतू’’ति महापजापतिगोतमिया वचनं निमित्तं कत्वा देसनाय उट्ठितत्ता. न केवलञ्च तस्सा एव वचनं, अथ खो आनन्दत्थेरोपि…पे… समादपेसि, तस्मा विभागतो चुद्दससु…पे… होतीति दस्सेतुं, इमं देसनं आरभि. तत्थ पतिपच्चेकं पुग्गलं दीयतीति पाटिपुग्गलिकं. पठमसद्दो यथा अग्गत्थो, एवं सेट्ठपरियायोपीति आह ‘‘जेट्ठकवसेनपी’’ति. अग्गा उत्तमे खेत्ते पवत्तत्ता. दुतियततियापि परमदक्खिणायेव सब्बसो सम्माविक्खम्भितरागादिकिलेसत्ता. रागादयो हि अदक्खिणेय्यभावस्स कारणं. तेनेवाह – ‘‘तिणदोसानि खेत्तानि, रागदोसा अयं पजा’’तिआदि (ध. प. ३५६). यस्मा पन सवासनं सब्बसो समुच्छिन्नकिलेसेहि ततो एव सब्बसो अप्पटिहतञाणचारेहि अनन्तापरिमेय्यगुणगणाधारेहि सम्मासम्बुद्धेहि सदिसो सदेवके लोके कोचि दक्खिणेय्यो नत्थि. तस्मा ‘‘परमदक्खिणायेवा’’ति सासङ्कं वदति. यस्मा पञ्चाभिञ्ञो अट्ठसमापत्तिलाभी एव ¶ होति लोकियाभिञ्ञानं अट्ठसमापत्तिअधिट्ठानत्ता, तस्मा ‘‘लोकियपञ्चाभिञ्ञे’’इच्चेव वुत्तं, न ‘‘अट्ठसमापत्तिलाभिम्ही’’ति ताय अवुत्तसिद्धत्ता. गोसीलधातुकोति ¶ गोसीलसभावो, सीलवता सदिससीलोति अत्थो. तेनाह ‘‘असठो’’तिआदि. तेन न अलज्जिधातुको पकतिसिद्धो इध पुथुज्जनसीलवाति अधिप्पेतोति दस्सेति.

परिच्छिन्दन्तोति एत्तकोति पच्चेकप्पमाणतो ततो एव अञ्ञमञ्ञं असङ्करतोव परिच्छिन्दन्तो. कथं पन असङ्ख्येय्यभावेन वुच्चमानो विपाको परिच्छिन्नो होति? सोपि तस्स परिच्छेदो एव इतरेहि असंकिण्णभावदीपनतो, एतदत्थमेव पुब्बे असङ्करग्गहणं कतं. गुणवसेनाति लक्खणसम्पन्नादिगुणवसेन. उपकारवसेनाति भोगरक्खादिउपकारवसेन. यं पोसनत्थं दिन्नं, इदं न गहितं दानलक्खणायोगतो. अनुग्गहपूजनिच्छावसेन हि अत्तनो देय्यवत्थुपरिच्चागो दानं भयरागलद्धुकामकुलादिवसेन सावज्जाभावतो. तम्पि न गहितं अयावदत्थताअपरिपुण्णभावेन यथाधिप्पेतफलदानासमत्थभावतो. सम्पत्तस्साति सन्तिकागतस्स. तेन सम्पत्तिपयोजने अनपेक्खतं दस्सेति. फलं पटिकङ्खित्वाति ‘‘इदं मे दानमयं पुञ्ञं आयतिं सुखहितभावाय होतू’’तिआदिना फलं पच्चासीसित्वा. तेनस्स फलदाने नमियतं दस्सेति, यावदत्थन्ति इमिना परिपुण्णफलतं. सतगुणाति एत्थ गुणसद्दो न ‘‘गुणेन नामं उद्धरेय्य’’न्तिआदीसु (ध. स. अट्ठ. १३१३; उदा. अट्ठ. ५३; पटि. म. अट्ठ. १.१.७६; नेत्ति. अट्ठ. ४.३८) विय सम्पत्तिअत्थो, ‘‘तद्दिगुण’’न्तिआदीसु विय न वड्ढनत्थो, ‘‘पञ्च कामगुणा लोके, मनोछट्ठा पवेदिता’’तिआदीसु (सु. नि. १७३) विय न कोट्ठासत्थो, ‘‘अन्तं अन्तगुण’’न्तिआदीसु (दी. नि. २.३७७; म. नि. १.११०; खु. पा. ३) विय न अन्तभागत्थो, अथ खो आनिसंसत्थोति दस्सेन्तो, ‘‘सतानिसंसा’’ति आह, ते आनिसंसे सरूपतो दस्सेतुं, ‘‘आयुसत’’न्तिआदि वुत्तं. सतगुणाति वा सतवड्ढिकाति एवमेत्थ अत्थो दट्ठब्बो. निप्परितसं करोतीति आयुआदीनं आनिसंसानं अपरित्तासं करोति. अथ वा निप्परितसं करोतीति आयुआदिनिमित्तं अपरित्तासं करोति. अथ वा निप्परितसं करोतीति आयुआदीनि ततो ¶ उत्तरिम्पि आहारादिहेतु अपरित्तासं करोति. अत्तभावविनिमुत्तसञ्चरणस्स अभावा, ‘‘भवसतेपि वुत्ते अयमेवत्थो’’ति वुत्तं. सब्बत्थाति, ‘‘पुथुज्जनदुस्सीले’’तिआदीसु सब्बवारेसु. नयो नेतब्बोति, ‘‘आयुसहस्सं वण्णसहस्स’’न्तिआदिको नयो.

सासनावतरणं नाम यावदेव वट्टदुक्खनित्थरणत्थं, तञ्च मग्गपटिवेधनं, तस्मा निब्बेधभागियसरणगमनं सिक्खापदसमादानं पब्बज्जा उपसम्पदा सीलपरिपूरणं अधिचित्तसिक्खानुयोगो विपस्सनाभावनाति सब्बापेसा सोतापत्तिफलसच्छिकिरियाय पटिपत्ति एव होतीति आह – ‘‘तिसरणं गतो उपासकोपी’’तिआदि. तत्थ यथा निब्बेधभागियो समाधि ताव नाम परम्पराय अरियमग्गाधिगमस्स पच्चयभावतो उपनिस्सयो; तथा निब्बेधभागियं ¶ सीलपरिपूरणं उपसम्पदा पब्बज्जा उपासकस्स दससु पञ्चसु सीलेसु पतिट्ठानं अन्तमसो सरणादिगमनम्पि निब्बेधभागियं अरियमग्गाधिगमस्स उपनिस्सयो होतियेवाति, ‘‘सब्बापेसा सोतापत्तिफलसच्छिकिरियाय पटिपत्ती’’ति वुत्ता. तत्थ अनञ्ञसाधारण-विज्जाचरणादि-असङ्ख्येय्यअपरिमेय्य-गुण-समुदयपूरिते भगवति सद्धम्मे अरियसङ्घे उळारतरबहुमानगारवतं गतो. ‘‘सम्मासम्बुद्धो भगवा, स्वाखातो धम्मो, सुप्पटिपन्नो सङ्घो’’ति तप्परायणतादिआकारप्पत्तो ञाणपरिसोधितो पसादो सरणगमनन्ति तेन वत्थुगतेन पसादेन परिभाविते सन्ताने कतं पुञ्ञक्खेत्तसम्पत्तिया महप्फलं महानिसंसमेव होतीति आह – ‘‘तस्मिं दिन्नदानम्पि असङ्ख्येय्यं अप्पमेय्य’’न्ति. तयिदं सरणं वत्थुत्तये पसादभावेन अज्झासयसम्पत्तिमत्तं, तादिसस्स पन पञ्चसीलं अज्झासयसम्पत्तिउपथम्भितो कायवचीसंयमोति तत्थ दिन्नं ततो उत्तरि महप्फलन्ति, दससीलं पन परिपुण्णुपोसथसीलं, तत्थ दिन्नं महप्फलन्ति, ‘‘ततो उत्तरि महप्फल’’न्ति वुत्तं. सामणेरसीलादीनं पन उत्तरि विसिट्ठतरादिभावतो तत्थ तत्थ दिन्नस्स विसेसमहप्फलता वुत्ता.

मग्गसमङ्गिता नाम मग्गचित्तक्खणपरिच्छिन्ना, तस्मिञ्च खणे कथं दातुं पटिग्गहेतुञ्च सम्भवतीति चोदेति ‘‘किं पन मग्गसमङ्गिस्स सक्का दानं दातु’’न्ति. इतरो तादिसे सति समयेति दस्सेन्तो, ‘‘आम सक्का’’ति पटिजानित्वा, ‘‘आरद्धविपस्सको’’तिआदिना तमत्थं विवरति. तस्मिं खणेति तस्मिं पक्खिपनक्खणे. यदि अट्ठमकस्स सोतापन्नस्स दिन्नदानं ¶ फलतो असङ्ख्येय्यमेव, को नेसं विसेसोति आह ‘‘तत्था’’तिआदि. तेन सतिपि असङ्ख्येय्यभावसामञ्ञे अत्थि नेसं अप्पबहुभावो संवट्टट्ठायी असङ्ख्येय्यमहाकप्पासङ्ख्येय्यानं वियाति दस्सेति. मग्गसमङ्गीनं तेन तेन ओधिना संकिलेसधम्मानं पहीयमानत्ता वोदानधम्मानं वड्ढमानत्ता अपरियोसितकिच्चत्ता अपरिपुण्णगुणता, परियोसितकिच्चत्ता फलसमङ्गीनं परिपुण्णगुणताति तंतंमग्गट्ठेहि फलट्ठानं खेत्तातिसयता वेदितब्बा. हेट्ठिमहेट्ठिमेहि पन मग्गट्ठेहि उपरिमानं मग्गट्ठानं फलट्ठेहि फलट्ठानं उत्तरितरता पाकटा एव. तथा हि उपरिमानं दिन्नदानस्स महप्फलता वुत्ता.

३८०. कामञ्चेत्थ बुद्धप्पमुखे उभतोसङ्घे केवले च भिक्खुसङ्घे दानं अत्थि एव, न पन बुद्धप्पमुखे भिक्खुसङ्घे, तं पन बुद्धप्पमुखउभतोसङ्घेनेव सङ्गहितन्ति अविरुद्धं. न पापुणन्ति महप्फलभावेन सदिसतम्पि, कुतो अधिकतं.

‘‘तथागते परिनिब्बुते उभतोसङ्घस्स’’ इच्चेव वुत्तत्ता – ‘‘किं पना’’तिआदिना चोदेति ¶ . इतरो परिनिब्बुते तथागते तं उद्दिस्स गन्धपुप्फादिपरिच्चागो विय चीवरादिपरिच्चागोपि महप्फलो होतियेवाति कत्वा पटिपज्जनविधिं दस्सेतुं, ‘‘उभतोसङ्घस्सा’’तिआदि वुत्तं. ‘‘एत्तकायेव, भिक्खू उद्दिसथा’’ति एवं परिच्छेदस्स अकरणेन उपचारसीमापरियापन्नानं खेत्तपरियापन्नानं वसेन अपरिच्छिन्नकमहाभिक्खुसङ्घे.

गोत्तं वुच्चति साधारणनामं, मत्तसद्दो लुत्तनिद्दिट्ठो, तस्मा समणाति गोत्तमत्तं अनुभवन्ति धारेन्तीति गोत्रभुनो. तेनाह ‘‘नाममत्तसमणा’’ति. दिट्ठिसीलसामञ्ञेन संहतो समणगणो सङ्घो, तस्मा सङ्घो दुस्सीलो नाम नत्थि. गुणसङ्खायाति आनिसंसगणनाय, महप्फलतायाति अत्थो. कासाव…पे… असङ्ख्येय्याति वुत्ता सङ्घं उद्दिस्स दिन्नत्ता. यथा पन सङ्घं उद्दिस्स दानं होति, तं विधिं दस्सेतुं, ‘‘सङ्घगता दक्खिणा’’तिआदि वुत्तं. तत्थ चित्तीकारन्ति गारवं.

सङ्घतो न पुग्गलतो. अञ्ञथत्तं आपज्जतीति ‘‘इमस्स मया दिन्नं सङ्घस्स दिन्नं होती’’ति एवं चित्तं अनुप्पादेत्वा, ‘‘सङ्घस्स दस्सामी’’ति देय्यधम्मं ¶ पटियादेत्वा सामणेरस्स नाम दातब्बं जातन्ति अञ्ञथत्तं आपज्जति; तस्मा तस्स दक्खिणा सङ्घगता न होतियेव पुग्गलवसेन चित्तस्स परिणामितत्ता. निब्बेमतिको हुत्वाति ‘‘किं नु खो मया इमस्स दिन्नं होति वा न वा’’ति विमतिं अनुप्पादेत्वा, ‘‘यो पना’’तिआदिना वुत्ताकारेन करोति.

तत्थातिआदिना वुत्तस्सेवत्थस्स पाकटकरणत्थं वत्थुं निदस्सेति, ‘‘परसमुद्दवासिनो’’तिआदिना. ओपुञ्जापेत्वा परिभण्डं कारेत्वा, हरितगोमयेन उपलिम्पित्वाति अत्थो. कासावकण्ठसङ्घस्साति कासावकण्ठसमूहस्स. को सोधेतीति महप्फलभावकरणेन को विसोधेति. महप्फलभावापत्तिया हि दक्खिणा विसुज्झति नाम. तत्थ येसं हत्थे दिन्नं, तेसं वसेन पटिग्गाहकतो दक्खिणाय विसुद्धत्ता, – ‘‘तदापाहं, आनन्द, सङ्घगतं दक्खिणं असङ्ख्येय्यं अप्पमेय्यं वदामी’’ति (म. नि. ३.३८०) च वुत्तं, तस्मा कम्मवसेनेव दक्खिणाविसुद्धिं पुच्छति. इतरो अरियसङ्घे दिन्नदक्खिणाय निब्बिसिट्ठं कत्वा वुत्तत्ता मत्थकप्पत्तस्सेव अरियसङ्घस्स वसेन दक्खिणाविसुद्धिं दस्सेन्तो, ‘‘सारिपुत्त…पे… सोधेन्ती’’ति वत्वा पुन, ‘‘ये केचि अरहन्तो सोधेन्ती’’ति दस्सेन्तो, ‘‘अपिचा’’तिआदिमाह. थेरा चिरपरिनिब्बुताति इदं अज्जतनानम्पि अरियानं सावकतं दस्सेन्तेन मग्गसोधनवसेन वुत्तन्ति दट्ठब्बं, न उद्दिस्स पुञ्ञकरणे सति अकरणप्पत्तिया. एवञ्हि ‘‘असीतिमहाथेरा सोधेन्ती’’ति इदं सुवुत्तं होति, न अञ्ञथा.

‘‘सङ्घगताय ¶ दक्खिणाया’’ति कामञ्चेतं साधारणवचनं, तथापि तत्थ तत्थ पुग्गलविसेसो ञातब्बोति दस्सेन्तो, ‘‘अत्थि बुद्धप्पमुखो सङ्घो’’तिआदिमाह. न उपनेतब्बो भगवतो काले भिक्खूनं अभिञ्ञापटिसम्भिदागुणवसेन अतिविय उळारभावतो, एतरहि तदभावतो. एतरहि सङ्घो…पे… न उपनेतब्बोति एत्थ नयानुसारेन अत्थो वत्तब्बो. तेन तेनेव समयेनाति तस्स तस्स कालस्स सम्पत्तिविपत्तिमुखेन पटिपत्तिया उळारतं अनुळारतञ्च उल्लिङ्गेति. यत्थ हि भिक्खू गुणेहि सब्बसो परिपुण्णा होन्ति, तस्मिं समये सङ्घगता दक्खिणा इतरस्मिं समये दक्खिणतो महप्फलतराति दट्ठब्बा. सङ्घे चित्तीकारं कातुं सक्कोन्तस्साति सुप्पटिपन्नतादिं सङ्घे आवज्जित्वा सङ्घगतेन ¶ पसादेन सङ्घस्स सम्मुखा विय तस्मिं पुग्गले च गारववसेन देन्तस्स पुथुज्जनसमणे दिन्नं महप्फलतरं सङ्घतो उद्दिसित्वा गहितत्ता, ‘‘सङ्घस्स देमी’’तियेव दिन्नत्ता च.

एसेव नयोति इमिना, ‘‘सोतापन्ने दिन्नं महप्फलतर’’न्ति एवमादिं अतिदिसति. आदि-सद्देन उद्दिसित्वा गहितो सकदागामी, पाटिपुग्गलिको अनागामीति एवमादि सङ्गहितं. महप्फलतरमेव. तेनाह भगवा – ‘‘न त्वेवाहं, आनन्द, केनचि परियायेन सङ्घगताय दक्खिणाय पाटिपुग्गलिकं दानं महप्फलतरं वदामी’’ति (म. नि. ३.३८०). यदि खीणासवे दिन्नदानतो सङ्घतो उद्दिसित्वा गहितदुस्सीलेपि दिन्नदानं महप्फलं, एवं सन्ते – ‘‘सीलवतो, महाराज, दिन्नं महप्फलं, नो तथा दुस्सीले’’ति इदं कथन्ति आह – ‘‘तं इमं नयं गहाया’’तिआदि. सङ्घतो उद्दिसित्वा गहणविधिं पहाय दुस्सीलस्सेव गहणवसेन वुत्तं. इमस्मिं चतुक्के दट्ठब्बन्ति इमस्स पदस्स वसेन दट्ठब्बं. तत्थ हि ‘‘पटिग्गाहका होन्ति दुस्सीला पापधम्मा’’ति आगतं.

३८१. विसुज्झतीति न किलिस्सति, महाजुतिकारी महाविप्फारा होतीति अत्थो. सुचिधम्मोति रागादिअसुचिविधमनेन सुचिसभावो. न पापधम्मोति न निहीनसभावो पापकिरियाय. अकुसलधम्मो हि एकन्तनिहीनो. जूजको सीलवा कल्याणधम्मो न होति. तस्स महाबोधिसत्तस्स अत्तनो पुत्तदानं दानपारमिया मत्थकं गण्हन्तं महापथवीकम्पनसमत्थं जातं, स्वायं दानगुणो वेस्सन्तरमहारञ्ञा कथेतब्बोति.

उद्धरतीति बहुलं कतपापकम्मवसेन लद्धविनिपाततो उद्धरति. तस्मा नत्थि मय्हं किञ्चि चित्तस्स अञ्ञथत्तन्ति अधिप्पायो.

पेतदक्खिणन्ति ¶ पेते उद्दिस्स दातब्बदक्खिणं. पापितकालेयेवाति, ‘‘इदं दानं असुकस्स पेतस्स होतू’’ति उद्दिसनवसेन पत्ते पापितकालेयेव. अस्साति पेतस्स. पापुणीति फलसमापत्तिया वसेन पापुणि. अयञ्हि पेते उद्दिस्स दाने धम्मता.

तदा ¶ कोसलरञ्ञो परिच्चागवसेन अतिविय उळारज्झासयतं, बुद्धप्पमुखस्स च भिक्खुसङ्घस्स उक्कंसगतगुणविसिट्ठतं सन्धायाह, ‘‘असदिसदानं कथेतब्ब’’न्ति.

असारम्पि खेत्तन्ति सारहीनं दुक्खेत्तं. समयेति कसनारहे काले. पंसुं अपनेत्वाति निस्सारं पंसुं नीहरित्वा. सारबीजानीति सभावतो अभिसङ्खारतो च सारभूतानि बीजानि. पतिट्ठपेत्वाति वपित्वा. एवन्ति यथा कस्सको अत्तनो पयोगसम्पत्तिया असारेपि खेत्ते फलं अधिगच्छति. एवं सीलवा अत्तनो पयोगसम्पत्तिया दुस्सीलस्सपि दत्वा फलं महन्तं अधिगच्छति. इमिना उपायेनाति इमिना पठमपदे वुत्तनयेन. सब्बपदेसूति सब्बकोट्ठासेसु विसुज्झनं वुत्तं, ततियपदे पन विसुज्झनं पटिक्खित्तमेव.

३८२. अरहतो दिन्नदानमेव अग्गं दानचेतनाय केनचि उपक्किलेसेन अनुपक्किलिट्ठत्ता, पटिग्गाहकस्स अग्गदक्खिणेय्यत्ता. तेनाह – ‘‘भवालयस्स भवपत्थनाय अभावतो’’ति, ‘‘उभिन्नम्पी’’ति वचनसेसो. खीणासवो दानफलं न सद्दहतीति इदं तस्स अप्पहीनकिलेसजनस्स विय कम्मकम्मफलानं सद्दहनाकारेन पवत्ति नत्थीति कत्वा वुत्तं, यतो अरहा ‘‘असद्धो अकतञ्ञू च…पे… पोरिसो’’ति (ध. प. ९७) थोमीयति. असद्दहनं अनुमानपक्खिकं, अनुमानञ्च संसयपुब्बकं, निस्सन्दिद्धो च कम्मकम्मफलेसु पच्चक्खभावं गतो. तमेव हि निच्छितभावसिद्धं निस्सन्दिद्धतं सन्धाय – ‘‘दानफलं सद्दहन्ता’’तिआदि वुत्तं. यदि एवं तेन कतकम्मं कम्मलक्खणप्पत्तं होतीति आह ‘‘खीणासवेना’’तिआदि. तेनेवाह – ‘‘निच्छन्दरागत्ता’’ति, एतञ्च लक्खणवचनं, केनचि किलेसेन अनुपक्किलिट्ठत्ताति अधिप्पायो. अस्साति खीणासवस्स दानं.

किं पन सम्मासम्बुद्धेनातिआदिना दायकतो दक्खिणाविसुद्धि चोदिता, सारिपुत्तत्थेरेनातिआदिना पन पटिग्गाहकतोति वदन्ति; तदयुत्तं, सावकस्स महप्फलभावे संसयाभावतो, हेट्ठा निच्छितत्ता च, तस्मा उभयेनपि दायकतो दक्खिणाविसुद्धि एव चोदिता. सा हि इध साधारणवसेन निच्छितत्ता संसयवत्थु. तेनाह ¶ – ‘‘सम्मासम्बुद्धेन…पे… वदन्ती’’ति. सम्मासम्बुद्धं हीतिआदि यथावुत्तअत्थस्स कारणवचनं. अञ्ञो दानस्स विपाकं जानितुं ¶ समत्थो नाम नत्थि सब्बसो सत्तानं कम्मविपाकविभागजाननञाणस्स अननुञ्ञातत्ता. तेनाह भगवा – ‘‘यस्मा च खो, भिक्खवे, सत्ता न जानन्ति, दानसंविभागस्स विपाकं यथाहं जानामि, तस्मा अदत्वा भुञ्जन्ती’’तिआदि (इतिवु. २६). एतेन एत्थ ञाणविसोधनं नाम कथितं, न दक्खिणाय विसुद्धि नाम दायकतो पटिग्गाहकतो च वसेन होतीति; सम्मासम्बुद्धेन सारिपुत्तत्थेरस्स दिन्नदानं सब्बसो उपक्किलेसविसुद्धिया ञाणस्स च अतिविय उळारत्ता महानुभावं नाम सिया महातेजवन्तञ्च; न महप्फलं तेसं सन्ताने परिपुण्णफलस्स असम्भवतो. यदि दिन्नदानं परिपुण्णफलं न होति उभयविपाकदानाभावतो, पवत्तिविपाकदायी पन होतीति दस्सेन्तो, ‘‘दानं ही’’तिआदिमाह.

चतूहीति सहयोगे करणवचनं, चतूहि सम्पदाहि सहगता सहितं कत्वाति अत्थो. इमा चतस्सो सम्पदा सब्बसाधारणवसेन वुत्ता, न यथाधिगतपुग्गलवसेन. तेनाह – ‘‘देय्यधम्मस्स धम्मेना’’तिआदि. तस्मिंयेव अत्तभावेति यस्मिं अत्तभावे तं दानमयं पुञ्ञं उप्पन्नं, तस्मिंयेव अत्तभावे विपाकं देति, चेतनाय महन्तत्ता दिट्ठधम्मवेदनीयं हुत्वा विपच्चतीति अत्थो. पुब्बचेतनादिवसेनाति सन्निट्ठापकजवनवीथितो पुब्बापरवीथिचेतनावसेन, अञ्ञथा सन्निट्ठापकवीथियंयेव पुब्बचेतनादिवसेनाति वत्तब्बं सिया. सा हि चेतना दिट्ठधम्मवेदनीयभूता तस्मिंयेव अत्तभावे विपाकं देति, न इतरा. महत्तताति पुब्बाभिसङ्खारवसेन ञाणसम्पयोगादिवसेन चेतनाय उळारता. खीणासवभावेनाति यस्स देति, तस्स खीणासवभावेन. वत्थुसम्पन्नताति एत्थ यथा पटिघसञ्ञा नानत्तसञ्ञानं विगमेन दिब्बविहारानं वसेन, ब्यापादसञ्ञादीनं विगमेन ब्रह्मविहारानं वसेन, सब्बसो रूपसञ्ञानानत्तसञ्ञानं विगमेन आनेञ्जविहारानं वसेन सब्बसो निच्चसञ्ञादीनं पटिप्पस्सद्धिया सब्बसङ्खारविमुखताय अरियविहारानं वसेन वत्थुसम्पन्नता इच्छिता. तंतंसमापत्तिसमापज्जनेन सन्तानस्स निरोधसाधनता तं दिवसं निरोधस्स साधनता ¶ नाम. वत्थुसम्पन्नताति सब्बसो निरोधसमापत्तिसमापज्जनेन वत्थुसम्पन्नता इच्छिता; न सब्बसो अनवसेससञ्ञानिरोधतायाति आह – ‘‘तं दिवसं निरोधतो वुट्ठितभावेन वत्थुसम्पन्नता’’ति. सञ्ञानिरोधस्स चेत्थ अच्चासन्नतं सन्धाय, ‘‘तं दिवस’’न्ति वुत्तं. यं पनेत्थ अत्थतो अविभत्तं, तं सुविञ्ञेय्यमेव.

दक्खिणाविभङ्गसुत्तवण्णनाय लीनत्थप्पकासना समत्ता.

निट्ठिता च विभङ्गवग्गवण्णना.

५. सळायतनवग्गो

१. अनाथपिण्डिकोवादसुत्तवण्णना

३८३. अधिमत्तगिलानोति ¶ ¶ अधिकाय मत्ताय मरणस्स आसन्नताय अतिविय गिलानोति अत्थो. तेनाह ‘‘मरणसेय्यं उपगतो’’ति. अखण्डं अकासि गहपतिनो सत्थरि परमपेमत्ता. यत्तकं चस्साति, ‘‘सकिं वा द्विक्खत्तुं वा’’ति वुत्तं यत्तकं अस्स गहपतिस्स.

३८४. ओसक्कन्तीति परिहायन्ति. ओत्थरन्तीति अभिभवन्ति. उस्मा नाम कम्मजतेजोधातु, सा सह जीवितिन्द्रियनिरोधा परियादियति, याव ता आयुउस्मा वत्तन्ति, ताव मरणन्तिका वेदना वत्तन्तेव विञ्ञाणस्स अनिरुद्धत्ता. तेनाह ‘‘याव उस्मा’’तिआदि.

३८५. तीहि गाहेहीति तण्हामानदिट्ठिग्गाहेहि. पटिबाहितुं विक्खम्भेतुं. चक्खुं तीहि गाहेहि न गण्हिस्सामीति मानग्गाहपटिक्खेपमुखेन चक्खुस्मिं अनिच्चानुपस्सनाति दस्सेति. अनिच्चानुपस्सनाय हि सति अप्पतिट्ठो मानग्गाहो, दुक्खानुपस्सनाय सति अप्पतिट्ठो तण्हाग्गाहो, अनत्तानुपस्सनाय सति अप्पतिट्ठो दिट्ठिग्गाहोति, गाहो च नाम ओळारिको, तस्मिं विगतेपि निकन्ति तिट्ठेय्याति तं विजहापेतुकामेन, – ‘‘न च मे चक्खुनिस्सितं विञ्ञाणं भविस्सती’’ति वुत्तन्ति आह – ‘‘विञ्ञाणञ्चापि मे चक्खुनिस्सितं न भविस्सती’’ति. सब्बं कामभवरूपन्ति कामभूमिपरियापन्नं सब्बं रूपक्खन्धमाह – ‘‘कामरूपभवरूप’’न्ति वा पाठो. सो युत्तो इमस्स वारस्स एव अनवसेसपञ्चवोकारभवपरियापन्नतो. तथा हि उपरि चतुवोकारभवो अनवसेसतो वुत्तो.

३८६. इधलोकन्ति एत्थ सङ्खारलोकविसयोति अधिप्पायेन, ‘‘वसनट्ठानं वा’’तिआदि वुत्तं, तञ्च खो पठमदुतियवारेहि इधलोको गहितोति कत्वा. पठमदुतियवारेहि पन इधलोको ¶ परलोकोति विभागेन विना पञ्चवोकारभवो गहितो; तथा ततियवारे पञ्चवोकारभवो चतुवोकारभवो च गहितोति पुन दिट्ठधम्मसम्परायवसेन तं विभजित्वा दस्सेतुं, ‘‘न इधलोक’’न्तिआदि वुत्तं ¶ . इधलोकन्ति च सत्तसङ्खारवसेनेव गहितं. सब्बम्पि सङ्खारवसेन परिग्गहेत्वा दस्सेतुं, ‘‘यम्पि मे दिट्ठ’’न्तिआदि वुत्तन्ति केचि. अपरितस्सनत्थं तण्हापरितस्सनाय अनुप्पादनत्थं. यस्स दिट्ठधम्मोति वुच्चति, तस्स पन अभावतो, ‘‘मनुस्सलोकं ठपेत्वा सेसा परलोका नामा’’ति वुत्तं. येसं पन ‘‘इधलोक’’न्ति इमिना सत्तलोकस्सपि गहणं इच्छितं. तेसं मतेन, ‘‘मनुस्सलोकं ठपेत्वा’’ति योजना.

३८७. अल्लीयसीति अत्तभावे भोगेसु च अपेक्खं करोसीति अत्थो. एवरूपीति यादिसी तदा धम्मसेनापतिना कथिता, एवरूपी. धम्मकथा न सुतपुब्बाति यथाकथिताकारमेव सन्धाय पटिक्खेपो, न सुखुमगम्भीरसुञ्ञतापटिसंयुत्ततासामञ्ञं. तेनाह ‘‘एवं पना’’तिआदि.

मया गतमग्गमेव अनुगच्छसीति दानमयपुञ्ञभावसामञ्ञं गहेत्वा वदति, न बोधिसत्तदानभूतं दानपारमितं. न पटिभातीति रुच्चनवसेन चित्ते न उपतिट्ठति. तेनाह ‘‘न रुच्चती’’ति. तथा हेस वट्टाभिरतोति. उजुमग्गावहा विपस्सना भगवता पनस्स कथितपुब्बा.

३८८. एसितगुणत्ता एसियमानगुणत्ता च इसि, असेक्खा सेक्खा कल्याणपुथुज्जना च, इसीनं सङ्घो, तेन निसेवितन्ति इसिसङ्घनिसेवितं. कामं तस्स विहारस्स गन्धकुटिपासादकूटागारादिवसेन निसीदननिपज्जनाय रुक्खलतादिवसेन भूमिसयादिवसेन च अनञ्ञसाधारणा महती रमणीयता अत्थेव, सा पन गेहस्सितभावेन अरियानं चित्तं तथा न तोसेति; यथा अरियानं निसेवितभावेनाति आह – ‘‘पठमगाथाय जेतवनस्स वण्णं कथेत्वा’’ति. तेनाह भगवा – ‘‘यत्थ अरहन्तो विहरन्ति, तं भूमिरामणेय्यक’’न्ति (ध. प. ९८; थेरगा. ९९१; सं. नि. १.२६१). अपचयगामिनी चेतना सत्तानं सुद्धिमावहतीति आह – ‘‘कम्मन्ति मग्गचेतना’’ति. चतुन्नं अरियसच्चानं विदितकरणट्ठेन किलेसानं विक्खम्भनट्ठेन च विज्जा, मग्गसम्मादिट्ठीति आह – ‘‘विज्जाति मग्गपञ्ञा’’ति. समाधिपक्खिको धम्मो नाम सम्मावायामसतिसमाधयो. तथा हि विज्जाभागियो समाधिपि समाधिपक्खिको. सीलं तस्स अत्थीति सीलन्ति आह – ‘‘सीले पतिट्ठितस्स जीवितं उत्तम’’न्ति. दिट्ठिसङ्कप्पोति सम्मासङ्कप्पो. तत्थ सम्मासङ्कप्पस्स उपकारकभावेन विज्जाभागो ¶ . तथा ¶ हि सो पञ्ञाक्खन्धसङ्गहितोति वुच्चति, यथा सम्मासङ्कप्पो पञ्ञाक्खन्धेन सङ्गहितो, एवं वायामसतियो समाधिक्खन्धसङ्गहिताति. तेनाह – ‘‘धम्मोति वायामसतिसमाधयो’’ति. ‘‘धम्मो’’ति हि इध सम्मासमाधि अधिप्पेतो, – ‘‘एवं धम्मा ते भगवन्तो अहेसु’’न्तिआदीसु (दी. नि. २.१३; म. नि. ३.१९८; सं. नि. ५.३७८) विय. वाचाकम्मन्ताजीवाति सम्मावाचाकम्मन्ताजीवा मग्गपरियापन्ना एव, ते सब्बेपि गहिताति. तेनाह – ‘‘एतेन अट्ठङ्गिकेन मग्गेना’’ति.

उपायेनाति येन विधिना अरियमग्गो भावेतब्बो, तेन समाधिपक्खियं विपस्सनाधम्मञ्चेव मग्गधम्मञ्च. ‘‘अरियं वो, भिक्खवे, सम्मासमाधिं देसेस्सामि सउपनिसं सपरिक्खार’’न्ति (म. नि. ३.१३६) हि वचनतो सम्मासमाधिआदयो मग्गधम्मापि समाधिपक्खिया. विचिनेय्याति वीमंसेय्य, भावेय्याति अत्थो. तत्थाति हेतुम्हि भुम्मवचनं. अरियमग्गहेतुका हि सत्तानं विसुद्धि. तेनाह – ‘‘तस्मिं अरियमग्गे विसुज्झती’’ति. पञ्चक्खन्धधम्मं विचिनेय्य, पञ्चुपादानक्खन्धे विपस्सेय्य. तेसु हि विपस्सियमानेसु विपस्सना उक्कंसगता. यदग्गेन दुक्खसच्चं परिञ्ञापटिवेधेन पटिविज्झीयति, तदग्गेन समुदयसच्चं पहानपटिवेधेन निरोधसच्चं सच्छिकिरियापटिवेधेन, मग्गसच्चं भावनापटिवेधेन पटिविज्झीयति, एवं अच्चन्तविसुद्धिया सुज्झति. तेनाह – ‘‘एवं तेसु चतूसु सच्चेसु विसुज्झती’’ति. इधापि निमित्तत्थे भुम्मवचनं. सच्चेसु वा पटिविज्झियमानेसूति वचनसेसो.

अवधारणवचनन्ति ववत्थापनवचनं, अवधारणन्ति अत्थो. सारिपुत्तोवाति च अवधारणं तस्स सावकभावतो सावकेसु सारिपुत्तोव सेय्योति इममत्थं दीपेति. किलेसउपसमेनाति इमिना महाथेरस्स तादिसो किलेसूपसमोति दस्सेति, यस्स सावकस्स विसये पञ्ञाय पारमिप्पत्ति अहोसि. यदि एवं – ‘‘योपि पारङ्गतो भिक्खु, एतावपरमो सिया’’ति इदं कथन्ति? तेसं तेसं बुद्धानं सासने पञ्ञाय पारमिप्पत्तसावकवसेनेतं वुत्तन्ति दट्ठब्बं. अथ वा – ‘‘नत्थि विमुत्तिया नानत्त’’न्ति (दी. नि. टी. ३.१४१; विभ. मूलटी. सुत्तन्तभाजनीयवण्णना) वचनतो सावकेहि विमुत्तिपञ्ञामत्तं सन्धायेतं वुत्तं. तेनाह – ‘‘पारङ्गतोति निब्बानं गतो’’तिआदि. सेसं सुविञ्ञेय्यमेव.

अनाथपिण्डिकोवादसुत्तवण्णनाय लीनत्थप्पकासना समत्ता.

२. छन्नोवादसुत्तवण्णना

३८९. छन्नोति ¶ ¶ इदं तस्स नामन्ति आह ‘‘एवंनामको थेरो’’ति. यस्स पन सत्थारा परिनिब्बानकाले ब्रह्मदण्डो आणत्तो, अयं सो न होतीति दस्सेन्तो आह – ‘‘न अभिनिक्खमनं निक्खन्तत्थेरो’’ति, लोकनाथस्स अभिनिक्खमनकाले कपिलपुरतो निक्खन्तोति अत्थो. गिलानपुच्छकाति गिलानस्स पुच्छनका, गिलानभावस्स अवत्थं सोतुकामाति अत्थो. ससनतो हिंसनतो सत्थन्ति आह ‘‘जीवितहारकसत्थ’’न्ति.

३९०. उपवज्जं एतस्स नत्थीति अनुपवज्जं, करजकायं कत्वा आयतिं उप्पत्तिरहितन्ति अत्थो. तेनाह ‘‘अनुप्पत्तिक’’न्ति.

३९१. खयवयं ञत्वाति सङ्खारगतं खणभङ्गं नेत्वा ञाणेन याथावतो ञत्वा. नेतं ममाति दुक्खतो समनुपस्सना सङ्खारेसु दिट्ठेसु ममंकाराभावतो. नेसोहमस्मीति अनिच्चतो समनुपस्सना अनिच्चतो तेसु दिट्ठेसु अहंकाराभावतो. न मेसो अत्ताति अनत्ततो समनुपस्सना अनत्ततो तेसु दिट्ठेसु अत्तग्गाहाभावतोति आह – ‘‘नेतं मम…पे… अत्ताति समनुपस्सामी’’ति.

३९३. तस्मा पुथुज्जनोति यस्मा अरियो सब्बसो परिञ्ञातवत्थुको दुक्खवेदनं अधिवासेतुं असक्कोन्तो नाम नत्थि, तस्मा पुथुज्जनो, केवलं पन अधिमानेनेव – ‘‘नाभिकङ्खामि जीवितं, परिचिण्णो मे सत्था, निरोधं दिस्वा’’ति वदतीति अधिप्पायो. इदम्पीति इदम्पि, ‘‘निस्सितस्स चलित’’न्तिआदि. तण्हानिस्सितभावेन हि आयस्मा छन्नो मारणन्तिकं वेदनं अधिवासेतुं असक्कोन्तो इतो चितो परिवत्तन्तो चलति विप्फन्दति, तस्मा ‘‘निस्सितस्स चलित’’न्तिआदि मनसिकातब्बं, तेन इदं सब्बं तं विप्फन्दितं न भविस्सतीति अधिप्पायो. कप्पसद्दो कालपरियायोपि होति, न कालविसेसवाचको एवाति आह – ‘‘निच्चकप्पन्ति निच्चकाल’’न्ति. यथा अप्पहीनतण्हादिट्ठिको पुग्गलो तंनिस्सितो अल्लिनो, एवं ताहिपि निस्सितो अमुत्तभावतोति आह – ‘‘तण्हादिट्ठीहि निस्सितस्सा’’ति. चलितन्ति यथा यथा असमारद्धाय सम्मापटिपत्तिया आदीनववसेन चलन्तं पन यस्मा अरियस्स विनये विरूपं चलितं नाम होति, तस्मा आह – ‘‘विप्फन्दितं होती’’ति. तादिसे पन ¶ पपञ्चविक्खम्भनवसेन चित्तस्स चलिते ¶ असति भावनाय वीथिपटिपन्नताय किलेसपटिप्पस्सद्धि एव होतीति आह ‘‘चलिते असति पस्सद्धी’’ति. तेन वुत्तं – ‘‘किलेसपस्सद्धि नाम होती’’ति.

भवन्तरं दिस्वा नमनट्ठेन नति. तेनाह – ‘‘नतिया असतीति भवत्थाय आलयनिकन्तिपरियुट्ठानेसु असती’’ति. पटिसन्धिवसेन आगति नामाति पटिसन्धिग्गहणवसेन भवन्तरतो इधेव आगमनं नाम, चुतिवसेन चवनवसेन इतो भवन्तरस्स गमनं नाम न होति आगतिगतिया असति कतूपचितस्सपि कम्मस्स उप्पत्तिपरिकप्पवसेन पवत्तिया अभावतो. चवनवसेनाति निब्बत्तभवतो चवनवसेन चुति, आयतिं उपपज्जनवसेन उपपातो न होति. यतो गति आगति चवनं उपपातो न होति, ततो एव नेविध, न हुरं, न उभयमन्तरेन, कायस्स गतिया आगतिया च अभावतो सब्बसो चुतूपपातो नत्थि; तेन न इधलोके ठितोति वत्तब्बो. न परलोके ठितोति वत्तब्बो, न उभयमन्तरेन ठितोति वत्तब्बो. तेनाह ‘‘नयिध लोके’’तिआदि. तत्थ इधलोकपरलोकविनिमुत्तस्स संसरणपदेसस्स अभावतो, ‘‘न उभयमन्तरेना’’ति वुत्तोति उभयपरियापन्नो न होतीति पटिक्खिपन्तो, ‘‘न उभयत्थ होती’’ति आह. अयमेव अन्तोति यो इधलोके परलोके च अभावो अविज्जमानता अनुप्पज्जनं, अयमेव सकलस्स दुक्खमूलस्स अन्तो परियोसानं.

३९४. कण्ठनाळिं छिन्दीति नाळिं छिन्दितुं आरभि. तस्मिं छिन्दितुं आरद्धक्खणे छेदो च वत्तति; मरणभयञ्च ओक्कमि अवीतरागभावतो, ततो एव गतिनिमित्तं उपट्ठाति. ‘‘सोपि नाम सब्रह्मचारीनं अनुपवज्जतं ब्याकरित्वा सरागमरणं मरिस्सती’’ति संविग्गमानसो सङ्खारे अनिच्चादिवसेन परिग्गण्हन्तो. अरहत्तं पत्वाति पुब्बे बहुसो विपस्सनाय उदयब्बयञाणं पावितत्ता तावदेव अरहत्तं पत्वा अरहत्तफलपच्चवेक्खणानन्तरं कण्ठनाळिच्छेदपच्चया जीवितनिरोधेन समसीसी हुत्वा परिनिब्बायि. न हि अन्तिमभविकस्स अरहत्तं अप्पत्वा जीवितन्तरायो होति. थेरस्साति आयस्मतो छन्नत्थेरस्स. ब्याकरणेनाति हेतुम्हि करणवचनं ‘‘ब्याकरणेन हेतुना’’ति. तन्निमित्तञ्हि थेरो वीरियं ¶ पग्गण्हन्तो विपस्सनं उस्सुक्कापेति. इमिनाति, ‘‘अत्थि, भन्ते’’तिआदिवचनेन. थेरोति आयस्मा सारिपुत्तत्थेरो. पुच्छतीति, भन्ते, तथा कुलसंसग्गपसुतो कथं परिनिब्बायिस्सतीति पुच्छति. ‘‘पुब्बे कुलेसु संसट्ठविहारी’’ति सब्रह्मचारीनं पञ्ञातस्सपि इमस्मिं ‘‘होन्ति हेते सारिपुत्ता’’तिआदिना भगवतो वुत्त-ट्ठाने असंसट्ठभावो पाकटो अहोसि. पक्कम्पि निपक्कं विय सम्मापटिपज्जमानापि केचि असञ्ञता उपट्ठहन्ति. सेसं सुविञ्ञेय्यमेव.

छन्नोवादसुत्तवण्णनाय लीनत्थप्पकासना समत्ता.

३. पुण्णोवादसुत्तवण्णना

३९५. अनन्तरसुत्ते ¶ ‘‘पटिसल्लानाति फलसमापत्तितो’’ति वुत्तं, तत्थ धम्मसेनापतिनो अरियविहारस्स अधिप्पेतत्ता, इध पन अकतकिच्चस्स पटिसल्लानं नाम कायविवेकोति आह – ‘‘पटिसल्लानाति एकीभावा’’ति. ‘‘चक्खुविञ्ञेय्या रूपा’’ति पनेत्थ विञ्ञेय्यरूपं विजानन्तस्स द्वारभूतं चक्खुन्ति उभयं अज्झत्तिकं बाहिरञ्च आयतनं अभिनन्दितादिसामञ्ञेन तञ्चेति एत्थ तं-सद्देन एकज्झं पच्चामट्ठन्ति आह – ‘‘तञ्चेति तं चक्खुञ्चेव रूपञ्चा’’ति. यं पनेत्थ विञ्ञेय्यसद्देन जोतितं विञ्ञाणं तं सम्पयुत्तधम्माति तदुभयं, ‘‘मनोविञ्ञेय्या धम्मा’’ति पदेन कथितमेवाति इध न गहितं. एस नयो सेसेसुपि. समोधानेनाति सहावट्ठानेन, चित्तेन नन्दिया तण्हाय सह पवत्तिया चित्तसहुप्पत्तियाति अत्थो. तेनाह – ‘‘उप्पज्जति नन्दी’’ति. पञ्चक्खन्धदुक्खस्स समोधानन्ति पञ्चक्खन्धसङ्खातस्स दुक्खसच्चस्स पच्चवोकारे सहप्पवत्ति होति. यस्मा दुक्खं उप्पज्जमानं छन्नं द्वारानंयेव वसेन उप्पज्जति, तथा समुदयोति, तस्मा आह – ‘‘इति छसु द्वारेसू’’तिआदि. किलेसवट्टस्स कम्मवट्टस्स विपाकवट्टस्स च कथितत्ता आह – ‘‘वट्टं मत्थकं पापेत्वा दस्सेती’’ति. दुतियनयेति ‘‘सन्ति च खो’’तिआदिना वुत्ते दुतिये देसनानये. पाटियेक्को अनुसन्धीति न यथानुसन्धि नापि अज्झासयानुसन्धीति अधिप्पायो, पुच्छानुसन्धिस्स पन इध सम्भवो एव नत्थीति. सत्तसु ठानेसूति अक्कोसने परिभासने पाणिप्पहारे लेड्डुप्पहारे दण्डप्पहारे सत्थप्पहारे जीवितावोरोपनेति इमेसु सत्तसु. ‘‘भद्दका वतिमे’’तिआदिना खन्तिपटिसंयुत्तं सीहनादं नदापेतुं.

३९६. चण्डाति ¶ कोधना, तेन दूसितचित्तताय दुट्ठाति वुत्ता. किब्बिसाति पापा. फरुसाति ईसकम्पि पसादसिनेहाभावेन लुद्दा. फरुसवचनताय वा फरुसा, तथाभूता पन लुद्दा नाम होन्ति, तस्मा वुत्तं ‘‘कक्खळा’’ति. इदञ्च तेति, ‘‘हत्थच्छेदं नासिकच्छेद’’न्ति एवमादिं इदञ्च अनिट्ठं करिस्सामाति भयदस्सनेन तज्जेस्सन्ति.

घटिकमुग्गरेनाति दण्डानं किर अग्गपस्से घटाकारं दस्सेन्ति, तेन सो ‘‘घटिकमुग्गरो’’ति वुच्चति. एकतोधारादिना सत्थेन करवालखग्गादिना. ‘‘इन्द्रियसंवरादीनं एतं नाम’’न्ति वत्वा यत्थ यत्थ इन्द्रियसंवरादयो ‘‘दमो’’ति वुत्ता, तं पाठपदेसं दस्सेन्तो ‘‘सच्चेना’’तिआदिमाह ¶ . मनच्छट्ठानि इन्द्रियानि दमेति संवरेतीति इन्द्रियसंवरो, दमो. रागादिपापधम्मे दमेति उपसमेतीति दमो, पञ्ञा. पाणातिपातादिकम्मकिलेसे दमेति उपसमेति विक्खम्भेतीति दमो उपोसथो. ब्यापादविहेसादिके दमेति विनेतीति दमोति आह – ‘‘इमस्मिं पन सुत्ते खन्ति ‘दमो’ति वेदितब्बा’’ति. उपसमोति तस्सेव दमस्स वेवचनं, तस्मा दमो च सो ब्यापादादीनं विनयनट्ठेन तेसंयेव उपसमनट्ठेन उपसमो चाति दमूपसमो, अधिवासनखन्ति.

३९७. तत्थ खन्तियं कताधिकारो तं जनपदं गन्त्वा महाजनस्स अवस्सयो होति, तस्मा तदस्स अपदानं समुदागमतो पट्ठाय विभावेतुं, ‘‘को पनेस पुण्णो’’तिआदि आरद्धं. एत्थाति एतस्मिं सुनापरन्तजनपदे. असप्पायविहारन्ति भावनाभियोगस्स न सप्पायं विहारं.

द्वे भातरोति अविभत्तसापतेय्या अविभत्तवोहारसंयोगा. तेनाह ‘‘तेसू’’तिआदि. जनपदचारिकं चरन्तो भण्डं गहेत्वा जनपदेसु विक्कयं करोन्तो.

‘‘बुद्धपूजं धम्मपूजं सङ्घपूजं करिस्सामा’’ति तन्निन्ना. अट्ठिमिञ्जं आहच्च अट्ठासीति, ‘‘बुद्धो’’ति वचनं अस्सुतपुब्बं सोतपथं उपगतं अनप्पकं पीतिसोमनस्सं समुट्ठापेन्तं पीतिसमुट्ठानपणीतरूपेहि छविचम्मादीनि छिन्दित्वा अट्ठिमिञ्जं आहच्च अट्ठासि. विस्सज्जितन्ति विक्किणनवसेन विनियोजितं. कम्मट्ठानं न उपट्ठातीति भावनावीथिं न ओतरति. मय्हं असप्पायोति मय्हं कम्मट्ठानभावनाय सप्पायो उपकारो न होति.

कोचि ¶ चङ्कमितुं समत्थो नाम नत्थि महता समुद्दवीचिसद्देन उपद्दुतत्ता भावनामनसिकारस्स अनभिसम्भुणनतो. तेनाह ‘‘समुद्दवीचियो’’तिआदि. सोति मकुळविहारो.

उत्तमजवेन गच्छमाना यथाधिप्पेतं मग्गं अतिक्कमित्वा अञ्ञतरं दीपकं पापुणि.

उप्पादिकं उट्ठापेत्वाति महावातमण्डलसमुट्ठापनेन तस्मिं पदेसे महासमुद्दं संखोभेन्तो महन्तं उप्पादं उट्ठपेत्वा.

थेरो, ‘‘अम्हे आवज्जेय्याथा’’ति कनिट्ठस्स वचनं सरित्वा अन्तरन्तरा आवज्जेति, तस्मा ¶ तदापि आवज्जेति, तं सन्धाय वुत्तं – ‘‘तस्मिंयेव खणे आवज्जित्वा’’ति. सम्मुखेति सीसट्ठाने. पटिवेदेसुन्ति पवेदेसुं, उपासका मयन्ति पटिजानिंसु. इमिनाति इमिना मय्हं परिच्चत्तकोट्ठासेन. मण्डलमाळन्ति मुण्डमण्डलमाळसदिसं पटिस्सयं. परिचारकाति अवसेसगामिनो.

सच्चबन्धस्स ओकासं करोन्तो ‘‘एकूनपञ्चसतान’’न्ति आह. तं दिवसं…पे… अग्गहेसि, तेन सो थेरो पठमं सलाकं गण्हन्तानं एतदग्गे ठपितो.

वाणिजगामं गन्त्वाति वाणिजगामसमीपं गन्त्वा. बुद्धकोलाहलन्ति बुद्धानं उपगम्म सत्तानं उप्पज्जनकुतूहलं.

महागन्धकुटियंयेवाति जेतवनमहाविहारे महागन्धकुटियंयेव. परिचरितब्बन्ति उपट्ठातब्बं.

गन्धकट्ठानीति चन्दनअगरुसलळादीनि सुगन्धकट्ठानि. सेसं सुविञ्ञेय्यमेवाति.

पुण्णोवादसुत्तवण्णनाय लीनत्थप्पकासना समत्ता.

४. नन्दकोवादसुत्तवण्णना

३९८. सङ्घस्स ¶ भारं अकासि उपायेन नन्दकत्थेरस्स ओवादेन विनेतब्बानं भिक्खुनीनं विनयत्थं. तेनाह ‘‘इमं पना’’तिआदि. परियायति ¶ पवत्ततीति परियायो, पटिपाटीति आह – ‘‘परियायेनाति वारेना’’ति. अस्साति नन्दकत्थेरस्स. वदापेसि अञ्ञेहि अत्तनो अनोकासभावं. परियायेन ओवदन्तीति ओवदितुं समत्था भिक्खुनियो वारेन ओवदन्ति. इदं परियायेन ओवदनं. चित्तं एकग्गं होति पसीदति पुब्बचरियसिद्धेन गारवबहुमानेन गेहस्सितपेमवसेन.

गोतमीति महापजापतिगोतमी. सेट्ठिस्साति बाराणसिसेट्ठिनो.

तेति पच्चेकबुद्धे. किं नु खोति पुच्छि चिरतरकालं पुञ्ञकिरियाय परिभावितसन्तानताय, पच्चेकबुद्धेसु च गारवबहुमानताय. दुग्गतेहिपि सक्का कातुन्ति दुग्गतेहिपि यथाविभवं कता कुटि तुम्हाकं वसितुं सक्काति पुच्छि.

हत्थकम्मं देथाति हत्थकम्मं कत्वा देथाति अत्थो. आनिसंसं आचिक्खित्वाति ‘‘तादिसानं महेसीनं कतं वेय्यावच्चं अम्हाकम्पि दीघरत्तं हिताय होति. आवासदानञ्च नाम महप्फलं महानिसंसं निब्बत्तट्ठाने महासम्पत्तिआवहं भविस्सती’’तिआदिना आनिसंसं आचिक्खित्वा. गाळ्हेन ओवादेन तज्जेत्वाति, ‘‘इमेसु नाम करोन्तेसु त्वं कस्मा न करोसि, मम जेट्ठकदासस्स भरियभावं न जानासि. सब्बेहिपि करियमानस्स हत्थकम्मस्स अकरणे तुय्हं इदञ्चिदञ्च दुक्खं आगमिस्सती’’ति भयेन तज्जेत्वा. सतं सतं हुत्वाति सतं सतं दासपुत्ता एकज्झं हुत्वा एकञ्च एकञ्च कुटिं कत्वा अदासि. चङ्कमनादिपरिवारन्ति चङ्कमनरत्तिट्ठानदिवाट्ठानभोजनादिपरिवारट्ठानसहितं. जग्गित्वा उपट्ठापेत्वा. विस्सज्जापेसीति परिच्चजापेसि. परिवत्तापेत्वाति चेतापेत्वा. तिचीवरानीति सहस्सग्घनिकानि तिचीवरानि कत्वा अदासि. कालेन कालन्ति काले काले, किस्मिञ्चि कालेति अत्थो. रज्जे ठितस्साति सब्बभूतूपकाररज्जे ठितस्स.

नन्दकत्थेरोपीति तदा जेट्ठकदासो एतरहि नन्दकत्थेरो पब्बजित्वा अरहत्तं पत्तो. जेट्ठकदासिधीता ¶ …पे… अग्गमहेसिट्ठाने ठिताति महापजापतिगोतमिं सन्धाय वदति. अयमायस्मा नन्दकोति अयमेव समुदागमतो आयस्मा नन्दकत्थेरो. एताव ता भिक्खुनियोति एतावता समुदागमतो पञ्चसता भिक्खुनियो.

३९९. हेतुनाति ¶ ञायेन अविपरीतपटिपत्तिया. पुब्बभागा हि पुरिमा पुरिमा पटिपदा पच्छिमाय कारणं. याथावसरसतो दिट्ठन्ति यथाभूतसभावतो पच्चक्खं विय.

४०१. तं सभावं तंसभावन्ति तस्सा वेदनाय पच्चयभावेन अनुरूपं.

४०३. पठमतरंयेव अनिच्चाति तस्सापि छायाय अनिच्चभावो पठमतरंयेव सिद्धो. न हि कदाचि अनिच्चं निस्साय पवत्तं किञ्चि निच्चं नाम अत्थीति.

४०४. अनुपहनित्वाति अविनासेत्वा. कथं पन मंसकायं चम्मकायञ्च अविनासेत्वा इतरेसं कन्तनं होतीति ब्यतिरेकमुखेन दस्सेतुं, ‘‘तत्था’’तिआदि वुत्तं. चम्मं अल्लियापेन्तोति चम्मे लग्गापेन्तो चम्मपटिबद्धं करोन्तो. चम्मं बद्धं कत्वाति विवरकाले न फालेन्तो चम्मबद्धे कत्वा. एवं अकत्वाति एवं मंसचम्मकायानं विनासनं अकत्वा, विलिमंसादिविकन्तनेन अञ्ञमञ्ञं विवेचेत्वा. तत्थ विलिमंसन्ति चम्मनिस्सितमंसं, पटिच्छन्नकिलोमकन्ति च वदन्ति. न्हारूति सुखुमन्हारु. बन्धनन्ति चम्ममंसानं सम्बन्धं. तेनाह – ‘‘सब्बचम्मे लग्गविलिपनमंसमेवा’’ति. अन्तरकिलेसमेवाति अन्तरे चित्ते जातत्ता सत्तसन्तानन्तोगधताय अब्भन्तरभूतकिलेसमेव.

४०५. तज्जं वायामन्ति निदस्सनमत्तं दट्ठब्बं. तथा हि पुरिसेन कुठारिना छेज्जं छिन्दिते छेज्जट्ठानस्स सल्लक्खणं इच्छितब्बं, तस्स पटिघातभावो इच्छितब्बो, कायपरिळाहाभावो इच्छितब्बो, तस्स अवट्ठानं इच्छितब्बं, किच्चन्तरे अज्झुपेक्खणं इच्छितब्बं, एवं पञ्ञाय किलेसे छिन्दन्तस्स योगिनो वीरियबलेन सद्धिं सति-पीति-पस्सद्धि-समाधि-उपेक्खासम्बोज्झङ्गं इच्छितब्बन्ति आह – ‘‘एवं न विना छहि…पे… सक्कोती’’ति.

४०७. तेन कारणेनाति येन तासं भिक्खुनीनं सा धम्मदेसना सप्पाया, आसेवनमन्दताय पन अज्झासयेन परिपुण्णसङ्कप्पा न जातायेव; पुन तथा देसनाय सति आसेवनबलवताय ¶ परिपुण्णसङ्कप्पा भविस्सन्ति; तेन कारणेन त्वम्पि ता भिक्खुनियो तेनेव ओवादेन ओवदेय्यासीति.

४१५. सब्बपच्छिमिकाति ¶ सब्बासं कनिट्ठा सोतापन्ना, अनरिया तत्थ काचि नत्थीति अत्थो. तेनाह – ‘‘सेसा पन…पे… खीणासवा चा’’ति. यदि एवन्ति अखीणासवापि तादिसा भिक्खुनी अत्थि. एवं सति सुक्खविपस्सकभावेनपि सति खीणासवभावे अरियस्स विनये अपरिपुण्णसङ्कप्पावाति अधिप्पायेन चोदेति, ‘‘कथं परिपुण्णसङ्कप्पा’’ति? इतरो अज्झासयपारिपूरियाति कारणं वत्वा, ‘‘यस्स ही’’तिआदिना तमत्थं विवरति. अज्झासयपारिपूरियाति तत्थ अधिप्पायपारिपूरिया, न सब्बसो गुणपारिपूरियाति अधिप्पायो. तेनाह ‘‘कदा नु खो’’तिआदि. एतेन पादकज्झानसम्मसितज्झानानं विसदिसताय पुग्गलस्स विपस्सनाकाले पवत्तअज्झासयवसेन अरियमग्गे बोज्झङ्गमग्गङ्गझानङ्गानं विसेसताति अयमत्थो दीपितोति वेदितब्बो. सेसं सुविञ्ञेय्यमेव.

नन्दकोवादसुत्तवण्णनाय लीनत्थप्पकासना समत्ता.

५. राहुलोवादसुत्तवण्णना

४१६. विमुत्तिं ¶ परिपाचेन्तीति किलेसानं पटिप्पस्सद्धिविमुत्तिभूतं अरहत्तं सब्बसो पाचेन्ति साधेन्ति निब्बापेन्तीति विमुत्तिपरिपाचनीया. धम्माति कारणधम्मा. तेनाह – ‘‘विसुद्धिकारणवसेना’’ति, अरहत्तसङ्खाताय विसुद्धिया सम्पादनवसेनाति अत्थो. सद्धिन्द्रियादयो विसुज्झमाना मग्गपटिपाटियाव सब्बसो अस्सद्धियादीहि चित्तं विमोचेन्ता अग्गफलविमुत्तिं सम्पादेन्ति. तेसं पन विसुद्धि बालपरिवज्जनेन पण्डितपयिरुपासनेन पसादावहधम्मपच्चवेक्खणाय च होति. ततो इध पन्नरस धम्मा अधिप्पेताति दस्सेन्तो, ‘‘वुत्तञ्हेत’’न्तिआदिमाह.

तत्थ अस्सद्धे पुग्गलेति सद्धारहिते पुग्गले. ते हि निस्साय न कदाचि सद्धा सम्भवति, तेसं पन दिट्ठानुगतिआपज्जनेन अञ्ञदत्थु असद्धियमेव वड्ढति, तस्मा ते पटिभयमग्गो विय दूरतो वज्जेतब्बा. अस्सद्धियन्ति च सद्धाय पटिपक्खभूता असद्धेय्यवत्थुस्मिं अधिमुच्चनाकारेन पवत्ता संकिलेसधम्मा वेदितब्बा. सद्धे पुग्गलेति सद्धासम्पन्ने पुग्गले. ते हि निस्साय सद्धेय्यवत्थुस्मिं अनुप्पन्ना उप्पज्जति, उप्पन्ना भिय्योभावं वेपुल्लं आपज्जति. सद्धेय्यवत्थूति च बुद्धादीनि रतनानि कम्मकम्मफलानि च. सेवतोति लब्भमानं सद्धासम्पदं उप्पादेतुं वड्ढेतुञ्च निसेवतो. सेसपदानि तस्सेव वेवचनानि. अथ वा सेवतो उपसङ्कमतो. भजतो तेसं पटिपत्तियं भत्तिं कुब्बतो. पयिरुपासतोति तेसं ओवादानुसासनिकरणवसेन उपट्ठहतो. पसादनीयसुत्तन्ता नाम बुद्धादिगुणपटिसंयुत्ता पसादावहा सम्पसादनीयसुत्तादयो. ते हि पच्चवेक्खतो बुद्धादीसु अनुप्पन्ना पसन्ना उपज्जति, उप्पन्ना भिय्योभावं वेपुल्लं ¶ आपज्जति. इमेहि तीहाकारेहीति इमेहि यथावुत्तेहि तीहि कारणेहि. पटिपक्खदूरीभावतो पच्चेकं सूपहारतो च आसेवनं भावनं लभन्ति. सद्धिन्द्रियं विसुज्झति मग्गफलावहभावेन अच्छति विसुद्धिं पापुणाति. इमिना नयेन सेसपदेसुपि अत्थो वेदितब्बो.

अयं पन विसेसो – कुसीतेति अलसे सम्मापटिपत्तियं निक्खित्तधुरे. आरद्धवीरियेति पग्गहितवीरिये सम्मापटिपन्ने. सम्मप्पधानेति अनुप्पन्नानं अकुसलानं अनुप्पादनादिवसेन पवत्ते चत्तारो उपायप्पधाने. पच्चवेक्खतो पटिपत्तिं अवेक्खतो. ते हि पच्चवेक्खतो लीनं अभिभवित्वा ¶ सम्मदेव आरम्भधातुआदि अनुप्पन्नानं विधिना सतिसम्पदाय उप्पादाय भिय्योभावाय संवत्तति. असमाहिते भन्तमिगभन्तगोणसप्पटिभागे विब्भन्तचित्ते. समाहिते उपचारसमाधिना अप्पनासमाधिना च सम्मदेव समाहितचित्ते. झानविमोक्खेति सवितक्कसविचारादिझानानि पठमादिविमोक्खे च. तेसञ्हि पच्चवेक्खणा उपरूपरि अच्चन्तमेव समाधानाय संवत्तति. दुप्पञ्ञेति निप्पञ्ञे, अरियधम्मस्स उग्गहपरिपुच्छासवनसम्मसनाभावेन सब्बसो पञ्ञारहिते च. पञ्ञवन्तेति विपस्सनापञ्ञाय चेव मग्गपञ्ञाय च समन्नागते. गम्भीरञाणचरियन्ति गम्भीरं खन्धायतनधातुसच्चपटिच्चसमुप्पादादिभेदं ञाणस्स चरितब्बट्ठानं, यत्थ वा गम्भीरञाणस्स चरियं पवत्तति. तत्थ हि पच्चवेक्खणा सम्मोहं विधमति, अनुप्पन्नाय पञ्ञाय उप्पादाय भिय्योभावाय संवत्तति. सुत्तन्तक्खन्धेति सुत्तसमूहे.

पुब्बे सद्धिन्द्रियादीनं विसुद्धिकारणानि, ‘‘विमुत्तिपरिपाचनीया धम्मा’’ति वुत्तानीति इध सद्धादिके अञ्ञे च धम्मे दस्सेन्तो, ‘‘अपरेपी’’तिआदिमाह. तत्थ सद्धादीनं विमुत्तिपरिपाचनीयता दस्सिता एव, अनिच्चसञ्ञादीनं ¶ पन विमुत्तिपरिपाचनीयताय वत्तब्बमेव नत्थि विपस्सनाभावतो. तेनाह – ‘‘इमे पञ्च निब्बेधभागिया सञ्ञा’’ति. कल्याणमित्ततादयोति कल्याणमित्तता सीलसंवरो अभिसल्लेखकथा वीरियारम्भो निब्बेधिका पञ्ञा इमे कल्याणमित्ततादयो पञ्च धम्मा. अयमेत्थ सङ्खेपो, वित्थारो पन ‘‘मेघियसुत्तसंवण्णनायं’’ (उदा. अट्ठ. ३१) वुत्तनयेन वेदितब्बो. लोकं वोलोकेन्तस्साति बुद्धवेनेय्यसत्तलोकं बुद्धचक्खुना विसेसतो ओलोकेन्तस्स.

४१९. आयस्मतो राहुलस्स इन्द्रियानं परिपक्कत्ता सद्धिं पट्ठपितपत्थना देवता उदिक्खमाना तिट्ठन्ति, – ‘‘कदा नु खो उत्तरि आसवानं खये विनेस्सती’’ति. यदा पन सत्था एवं परिवितक्केसि, तावदेव समानज्झासयताय सब्बकालं तङ्खणं आगमेन्तियो ता देवतायो तं समवायं दिस्वा एकस्मिं अन्धवनस्मिंयेव सन्निपतिता. उपालिस्स गहपतिनो दीघनखपरिब्बाजकस्स चतुसच्चधम्मेसु दस्सनकिच्चेन पवत्तो सोतापत्तिमग्गोति तेसु सुत्तेसु (पटि. म. अट्ठ. २.२.३०) पठममग्गो ‘‘धम्मचक्खु’’न्ति वुत्तो, तस्स दस्सनत्थस्स सातिसयत्ता, ब्रह्मायुनो पन फलञाणानि हेट्ठिमानि तीणि सातिसयानीति ब्रह्मायुसुत्ते(म. नि. २.३८३ आदयो) तीणि फलानि ‘‘धम्मचक्खु’’न्ति वुत्तानि. इदं पनेत्थ आयस्मतो राहुलस्स मग्गञाणं फलञाणञ्च दस्सनत्थो सातिसयो, ताहि च देवताहि यं ञाणं अधिगतं, तं सातिसयमेवाति वुत्तं – ‘‘इमस्मिं सुत्ते चत्तारो मग्गा, चत्तारि च फलानि धम्मचक्खुन्ति ¶ वेदितब्बानी’’ति. किं पन सावकानं सच्चाभिसमयञाणे अत्थि कोचि विसेसोति? आम अत्थि. सो च खो पुब्बभागे वुट्ठानगामिनिविपस्सनाय पवत्तियाकारविसेसेन लभेय्य काचि विसेसमत्ता. स्वायमत्थो अभिधम्मे ‘‘नो च खो यथा दिट्ठिप्पत्तस्सा’’ति सद्धाविमुत्ततो दिट्ठिप्पत्तस्स किलेसप्पहानं पति विसेसकित्तनेन दीपेतब्बो. किं पन आयस्मा राहुलो विय ता देवता सब्बा एकचित्ता पगेव चत्तारि फलानि अधिगण्हिंसूति? नोति दस्सेन्तो ‘‘तत्थ ही’’तिआदिमाह. कित्तका पन ता देवताति आह ‘‘तासञ्च पना’’तिआदि.

राहुलोवादसुत्तवण्णनाय लीनत्थप्पकासना समत्ता.

६. छछक्कसुत्तवण्णना

४२०. आदिम्हि ¶ ¶ कल्याणन्ति आदिकोट्ठासे कल्याणं एतस्साति वा आदिकल्याणो, तं आदिकल्याणं, आदिकल्याणभावो च दोसविगमेन इच्छितब्बो. यञ्हि सब्बसो विगतदोसं, तं परिपुण्णगुणमेव होतीति ‘‘निद्दोस’’न्ति वुत्तं. कत्वाति च पदं, ‘‘कल्याणं कत्वा भद्दकं कत्वा’’ति पुरिमपदद्वयेनपि योजेतब्बं. देसनाकारो हि इध कल्याणसद्देन गहितो. तेनेवाह – ‘‘देसेतब्बधम्मस्स कल्याणता दस्सिता होती’’ति, दुतिये पन अत्थविकप्पे देसेतब्बधम्मस्स कल्याणता मुख्येनेव कथिता इतरस्स अत्थापत्तितो. मज्झेकल्याणं परियोसानकल्याणन्ति एत्थापि एसेव नयो. अयञ्च देसनाय थोमना बुद्धानं आचिण्णसमाचिण्णावाति दस्सेतुं, ‘‘इति भगवा अरियवंस’’न्तिआदि वुत्तं. धम्मग्गहणम्पि देसनाय थोमना एवाति ‘‘नवहि पदेही’’ति वुत्तं.

वेदना याथावतो जाननं, तञ्च मग्गकिच्चं, तस्स उपायो विपस्सनातिआह – ‘‘सहविपस्सनेन मग्गेन जानितब्बानी’’ति. परिञ्ञाभिसमयादिकिच्चेन निब्बत्तिया असम्मोहतो च पटिविज्झितब्बो. तेभूमकचित्तमेव कथितं सम्मसनट्ठानस्स अधिप्पेतत्ता. एस नयो धम्मायतनादीसुपि. धम्मायतनस्स वा आयतनभावतो बहिद्धागहणं, न सब्बसो अनज्झत्तभावतो. विपाकवेदनापच्चया जवनक्खणे उप्पन्नतण्हाति छत्तिंसविपाकवेदनं निस्साय एवं अस्सादेन्ती अनुभवेय्यन्ति अकुसलजवनक्खणतो उप्पन्नतण्हा.

४२२. पाटियेक्को अनुसन्धीति यथानुसन्धिआदीनं असम्भवतोति अधिप्पायेन वुत्तं. हेट्ठाति विञ्ञाणफस्सवेदनातण्हानं पच्चयायत्तवुत्तितादस्सनेन चक्खायतनादीनं रूपायतनादीनञ्च पच्चयायत्तवुत्तिता दीपिता अपच्चयुप्पन्नस्स पच्चयाभावतो, यञ्च पच्चयायत्तवुत्तिकं, तं अनिच्चं उप्पादसम्भवतो, यदनिच्चं तं दुक्खं, यं दुक्खं तदनत्ताति खन्धपञ्चके च छन्नं छक्कानं वसेन घनविनिब्भोगकरणेन अत्थतो अनत्तलक्खणं विभावितं. न सरूपतोति सरूपतोपि तं विभावेतुकामो तेनेव छछक्कानं वसेन घनविनिब्भोगनयेन ब्यतिरेकतो च अन्वयतो च दस्सेन्तो भगवा – ‘‘चक्खु अत्ताति यो वदेय्या’’तिआदिमाहाति यथानुसन्धिकाव ¶ देसना विभाविता. तेनाह ‘‘हेट्ठा कथितानं ही’’तिआदि. हेट्ठा पन छन्नं छक्कानं वसेन विनिब्भोगदस्सनमत्तं, न अनत्तलक्खणं विभावितं ¶ , इध पन सरूपतो अनत्तलक्खणं विभावितन्ति अधिप्पायेन अनुसन्धन्तरभावजोतना. यदिपि अनत्तभावो नाम चतूसुपि सच्चेसु लब्भतेव, सब्बेपि हि धम्मा अनत्ता, इमे पनेत्थ द्वेपि नया सम्मसनवसेन पवत्ताति वुत्तं – ‘‘द्विन्नं सच्चानं अनत्तभावदस्सनत्थ’’न्ति. न उपपज्जतीति उपपत्तिसङ्खातयुत्तिया न समेतीति अयमेत्थ अत्थोति आह ‘‘न युज्जती’’ति. अत्तवादिना – ‘‘निच्चो धुवो सस्सतो’’ति अभिमतो, चक्खुञ्च उप्पादवन्तताय अनिच्चं, यं पच्चयायत्थवुत्तिता, तस्मा ‘‘चक्खु अत्ताति यो वदेय्य, तं न उपपज्जती’’तिआदि. सक्कायवत्थु चक्खु अनत्ता अनिच्चभावतो सेय्यथापि घटो, चक्खुं अनिच्चं पच्चयायत्तवुत्तिभावतो सेय्यथापि घटो, चक्खु पच्चयायत्तवुत्ति उप्पादादिसम्भवतो सेय्यथापि घटो. विगच्छतीति भङ्गुप्पत्तिया सभावाविगमेन विगच्छति. तेनाह ‘‘निरुज्झती’’ति.

४२४. यस्मा किलेसवट्टमूलकं कम्मवट्टं, कम्मवट्टमूलकञ्च विपाकवट्टं. किलेसुप्पत्ति च तण्हादिग्गाहपुब्बिका, तस्मा ‘‘तिण्णं वा गाहानं वसेन वट्टं दस्सेतु’’न्ति आह. यस्मा पन तण्हापक्खिका धम्मा समुदयसच्चं, चक्खादयो दुक्खसच्चं, तस्मा वुत्तं – ‘‘द्विन्नं सच्चानं वसेन वट्टं दस्सेतु’’न्ति. तण्हामानदिट्ठिग्गाहाव वेदितब्बा सक्कायगामिनिपटिपदाय अधिप्पेतत्ता. ‘‘एतं ममा’’तिआदिना गहणमेवेत्थ अनुपस्सनाति आह – ‘‘गाहत्तयवसेन पस्सती’’ति.

तिण्णं गाहानं पटिपक्खवसेनाति तण्हादिग्गाहपटिपक्खभूतानं दुक्खानिच्चानत्तानुपस्सनानं वसेन, ताहि वा तिण्णं गाहानं पटिपक्खवसेन विनिवेठनवसेन अनुप्पादनवसेनाति अत्थो. पटिपक्खवसेन विवट्टं दस्सेतुन्ति योजना. सक्कायनिरोधगामिनी पटिपदाति एत्थ निरोधधम्मो सरूपेनेव दस्सितोति आह – ‘‘निरोधो…पे… दस्सेतु’’न्ति. पटिसेधवचनानीति पटिक्खेपवचनानि.

४२५. तण्हादीनं अनुपादियनवचनानि तण्हादिट्ठिवसेनेव वुत्तानि तण्हादिट्ठीनंयेव अभिनन्दनादिवसेन पवत्तिसब्भावतो. अप्पहीनत्थो अनुसयत्थोति ¶ आह – ‘‘अनुसेतीति अप्पहीनो होती’’ति अरियमग्गेन हि अप्पहीनो थामगतो रागादिकिलेसो अनुसयो कारणलाभे सति उप्पज्जनारहभावतो. यं पनेत्थ वत्तब्बं, तं हेट्ठा वुत्तमेव. वट्टदुक्खकिलेसदुक्खस्साति वट्टदुक्खस्स चेव किलेसदुक्खस्स च. सउपादिसेसनिब्बानञ्हि किलेसदुक्खस्स अन्तकरणं, अनुपादिसेसनिब्बानं वट्टदुक्खस्स.

४२६. तेसन्ति ¶ अनुसयानं. पटिक्खेपवसेनाति पजहनवसेन, अप्पवत्तिकरणवसेनाति अत्थो. अविज्जं पजहित्वाति अनवसेसतो अविज्जं अप्पवत्तिधम्मतं आपादेत्वा. कामं हेट्ठिममग्गञाणम्पि अविज्जापहायिनी विज्जा एव, तं पन ञाणं अविज्जाय अनवसेसप्पहायकं न होति, अग्गमग्गञाणे पन उप्पन्ने अविज्जाय लेसोपि नावसिस्सतीति तदेव अविज्जाय पहायकन्ति आह – ‘‘अरहत्तमग्गविज्जं उप्पादेत्वा’’ति.

४२७. सयमेव तथागते अत्तनो बुद्धानुभावेन देसेन्ते सट्ठि भिक्खू अरहत्तं पत्ताति अनच्छरियमेतं, अथ किं अच्छरियन्ति आह ‘‘इम’’न्तिआदि. कथेन्तेपीति एत्थ इतिसद्दो पकारत्थो, इमिनाव पकारेनाति अत्थो. पत्ता एवाति सट्ठि भिक्खू अरहत्तं पत्ता एवाति योजना. एतम्पि अनच्छरियं, सत्थु सम्मुखा सावका समुदागमा महाभिञ्ञा पभिन्नपटिसम्भिदा तथा तथा सप्पाटिहारियं धम्मं देसेन्तीति. तेनाह – ‘‘महाभिञ्ञप्पत्ता हि ते सावका’’ति.

महामण्डपेति लोहपासादस्स पुरतो एव महाभिक्खुसन्निपातो जातोति तेसं पहोनकवसेन कते महति साणिमण्डपेति वदन्ति. तेसुपि ठानेसूति तेसु यथावुत्तमहामण्डपादीसु ठानेसु. महाथेरो अत्थीति पदं आनेत्वा सम्बन्धितब्बं. देवत्थेरस्स गुणे सुत्वा पसन्नमानसो महाथेरो, तथापि वत्थसम्पत्तिया पसीदित्वा ‘‘त्वं पन न्हापेही’’ति आह.

हेट्ठापासादेति च कल्याणियमहाविहारे उपोसथागारे हेट्ठापासादे एकदा उपरिपासादे एकदा, कथेसीति. चूळनागस्स तथा महती परिसा देवतानुभावेन अभिञ्ञापादनं अहोसीति केचि ¶ . थेरो पन महिद्धिको अहोसि, तस्मा ताव महतिं परिसं अभिञ्ञापेसीति अपरे.

ततो ततोति तस्सं तस्सं दिसायं. एकोवाति एकच्चो एव, न बहुसो, कतिपयाव पुथुज्जना अहेसुन्ति अत्थो. सेसं हेट्ठा वुत्तनयत्ता सुविञ्ञेय्यमेव.

छछक्कसुत्तवण्णनाय लीनत्थप्पकासना समत्ता.

७. महासळायतनिकसुत्तवण्णना

४२८. महन्तानि ¶ सळायतनानि अधिकिच्च पवत्तत्ता महासळायतनिकं, महन्तता च तेसं महन्तं लोकसन्निवासं अभिब्यापेत्वा ठितत्ता अयोनिसो गय्हमानानं महतो अनत्थाय संवत्तनतो, योनिसो गय्हमानानं महतो अत्थाय हिताय सुखाय संवत्तनतो च दट्ठब्बा. जोतकन्ति बोधकं.

४२९. सिखाप्पत्ताय विपस्सनाय जाननम्पि यथाभूतजाननमेव मग्गेन जाननस्स आसन्नकारणभावतोति आह – ‘‘सहविपस्सनेन मग्गेन अजानन्तो’’ति. वुड्ढिं गच्छन्तीति पच्चयसमोधानेन भवयोनिगतिठितिसत्तावासपाळिया अपरापरं परिवुद्धिं गच्छन्ति. एवंभूता पगुणभावमापादिता समथविपस्सनाधम्मा विय सुट्ठुतरं वसीभावं पापिता झानाभिञ्ञा विय च वसीभूता हुत्वा उपरूपरि ब्रूहेन्तीति आह – ‘‘वसीभावं गच्छन्ती’’ति. तथा हि ते कदाचि भवपत्थनाय अनुप्पादितायपि अप्पहीनभावेनेवस्सा तिट्ठन्ति. अकुसला धम्माव येभुय्येन दस्सनायतनेन विनासदस्सनतो पवत्तन्ति परिवड्ढन्ति च. पञ्चद्वारिकदरथाति पञ्चद्वारिकजवनसहगता अकुसलदरथा. एवं मनोद्वारिकदरथा वेदितब्बा. सन्तापाति दरथेहि बलवन्तो सम्पयुत्तधम्मानं निस्सयस्स च सन्तापनकरा. परिळाहाति ततोपि बलवतरा तेसंयेव परिदहनकरा.

४३०. पञ्चद्वारिकसुखं, न कायप्पसादसन्निस्सितसुखमेव. मनोद्वारिकसुखन्ति मनोद्वारिकचित्तसन्निस्सितसुखं, न यं किञ्चि चेतसिकसुखं तस्स कायिकसुखग्गहणेनेव ¶ गहितत्ता. पञ्चद्वारिकजवनेन समापज्जनं वा वुट्ठानं वा नत्थीति इदं मनोद्वारिकजवनेन तस्स सम्भवं दस्सेतुं, मग्गस्स वसेन वुत्तं, न पन तप्पसङ्गसङ्कानिवत्तनत्थं. विञ्ञत्तिमत्तम्पि जनेतुं असमत्थं समापज्जनस्स कथं पच्चयो होति, बुद्धानं पन भगवन्तानं होतीति चे? तथापि तस्स आसन्नट्ठाने पञ्चद्वारिकचित्तप्पवत्तिया असम्भवो एव तादिसस्स पुब्बाभोगस्स तस्मिं काले असम्भवतो. एतेनेव या केसञ्चि अरियधम्मे अकोविदानं घटसभावादीसु बुद्धितुल्यकारितापत्तिचोदना; सा पटिक्खित्ताति दट्ठब्बा तंतंपुरिमाभोगवसेन तेन तेन पञ्चद्वारिकाभिनियतमनोविञ्ञाणस्स ¶ परतो पवत्तमानमनोविञ्ञाणेन तस्मिं तस्मिं अत्थे वण्णसण्ठानादिविसेसस्स विनिच्छिनितब्बतो. उप्पन्नमत्तकमेव होतीति पञ्चद्वारिकजवनं तादिसं किञ्चि अत्थनिच्छयकिच्चं कातुं न सक्कोति, केवलं उप्पन्नमत्तमेव होति. अयन्ति ‘‘आदीनवानुपस्सिनो’’तिआदिना वुत्ता.

४३१. कुसलचित्त…पे… भूतस्साति वुट्ठानगामिनिविपस्सनासहगतकुसलचित्तस्स सम्पयुत्तचेतोसुखसमङ्गीभूतस्स. पुब्बसुद्धिकाति मग्गुप्पत्तितो, विपस्सनारम्भतोपि वा पुब्बेव सुद्धा. तेनाह – ‘‘आदितो पट्ठाय परिसुद्धाव होन्ती’’ति. सब्बत्थककारापकङ्गानीति सीलविसोधनस्स चित्तसमाधानस्स विपस्सनाभियोगस्स मग्गेन पहातब्बकिलेसपहानस्साति सब्बस्सपि मग्गसम्भारकिच्चस्स कारापकङ्गानि. अट्ठङ्गिको वाति पठमज्झानिको वा अट्ठङ्गिको, दुतियज्झानिको वा सत्तङ्गिको होति.

इममेव सुत्तपदेसं गहेत्वाति, ‘‘या तथाभूतस्स दिट्ठी’’तिआदिना सम्मादिट्ठिआदीनं पञ्चन्नंयेव तस्मिं ठाने गहितत्ता लोकुत्तरमग्गो पञ्चङ्गिकोति वदति. सोति तथा वदन्तो वितण्डवादी. अनन्तरवचनेनेवाति, ‘‘या तथाभूतस्स दिट्ठी’’तिआदिवचनस्स, ‘‘एवमस्साय’’न्तिआदिना अनन्तरवचनेन. पटिसेधितब्बोति पटिक्खिपितब्बो. ‘‘अरियो अट्ठङ्गिको मग्गो’’ति हि इदं वचनं अरियमग्गस्स पञ्चङ्गिकभावं उजुकमेव पटिक्खिपति. यदि एवं ‘‘या तथाभूतस्स दिट्ठी’’तिआदिना तत्थ पञ्चन्नं एव अङ्गानं गहणं किमत्थियन्ति आह ‘‘उत्तरि चा’’तिआदि. सम्मावाचं भावेति अरियमग्गसमङ्गी. तेनाह ‘‘मिच्छावाचं पजहती’’ति. यस्मिञ्हि ¶ खणे सम्मावाचा भावनापारिपूरिं गच्छति, तस्मिंयेव मिच्छावाचा पजहीयतीति. सहेव विरतिया पूरेन्ति समुच्छेदविरतिया विना दुक्खपरिञ्ञादीनं असम्भवतो. आदितो पट्ठाय परिसुद्धानेव वट्टन्ति परिसुद्धे सीले पतिट्ठितस्सेव भावनाय इज्झनतो. यथावुत्तमत्थं गन्थन्तरेनपि समत्थेतुं, ‘‘सुभद्दसुत्तेपि चा’’तिआदि वुत्तं. अनेकेसु सुत्तसतेसु अट्ठङ्गिकोव मग्गो आगतो, न पञ्चङ्गिकोति अधिप्पायो.

सम्मासति मग्गक्खणे कायानुपस्सनादिचतुकिच्चसाधिका होतीति तं चतुब्बिधं कत्वा दस्सेन्तो, ‘‘मग्गसम्पयुत्ताव चत्तारो सतिपट्ठाना’’ति आह. न चतुमग्गसम्पयुत्ततावसेन. एस नयो ¶ सम्मप्पधानादीसुपि. अञ्ञमञ्ञानतिवत्तमाना युगनद्धा युत्ता विय अरियमग्गयुगनद्धा अञ्ञमञ्ञं पटिबद्धाति युगनद्धा. तेनाह – ‘‘एकक्खणिकयुगनन्धा’’ति अरियमग्गक्खणे एव हि समथविपस्सना एकक्खणिका हुत्वा समधुरं वत्तन्ति. तेनेवाह ‘‘एते ही’’तिआदि. अञ्ञस्मिं खणे समापत्ति, अञ्ञस्मिं विपस्सनाति इदं तेसं तत्थ तत्थ किच्चतो अधिकभावं सन्धाय वुत्तं, न अञ्ञथा. न हि पञ्ञारहिता समापत्ति, समाधिरहिता च विपस्सना अत्थि. अरियमग्गे पन एकक्खणिका समधुरताय एकरसभावेनाति अत्थो. फलविमुत्तीति अरहत्तफलविमुत्ति. सेसं हेट्ठा वुत्तनयत्ता सुविञ्ञेय्यमेव.

महासळायतनिकसुत्तवण्णनाय लीनत्थप्पकासना समत्ता.

८. नगरविन्देय्यसुत्तवण्णना

४३५. समविसमं ¶ चरन्तीति कायसमादिं समञ्ञेव, कायविसमादिं विसमञ्ञेव चरन्ति करोन्ति पटिपज्जन्ति. तं पन समविसमं अञ्ञमञ्ञं विरुद्धत्ता विसदिसत्ता न एकस्मिं काले सम्भवतीति आह – ‘‘कालेन समं कालेन विसम’’न्ति. समचरियम्पि हि एतन्ति पुब्बे समचरियाय जोतितत्ता वुत्तं.

४३७. आकरोन्ति अधिप्पेतमत्थं ञापेन्ति पबोधेन्तीति आकारा, ञापककारणन्ति आह – ‘‘के आकाराति कानि कारणानी’’ति. अनुबुद्धियोति ¶ अनुमानञाणानि. तञ्हि यथादिट्ठमत्थं दिट्ठभावेन अन्वेति अनुगच्छतीति ‘‘अन्वया’’ति वुच्चति. हरिततिणचम्पकवनादिवसेनाति हरितकम्बलादिसदिसतिणादिवसेन वित्थारितकनकपटादिसदिविकसितचम्पकवनादिवसेन. आदिसद्देन चेत्थ कीचकवेणुसद्दमधुरसफलाफलवसेन सद्दरसानं अत्थिभावो वेदितब्बोति. चम्पकवसेनेव पन फस्सगन्धानम्पि अत्थिभावो वुत्तोति. तेनाह – ‘‘रूपादयो पञ्च कामगुणा अत्थी’’ति. ‘‘इत्थिरूपादीनि सन्धायेतं कथित’’न्ति वत्वा इन्द्रियबद्धा वा होन्तु रूपादयो अनिन्द्रियबद्धा वा, सब्बेपि चेते किलेसुप्पत्तिनिमित्तताय कामगुणा एवाति चोदनं सन्धाय विसभागित्थिगता रूपादयो सविसेसं किलेसुप्पत्तिनिमित्तन्ति दस्सेन्तो, ‘‘तानि ही’’तिआदिमाह.

तत्थ तानीति रूपादीनि. हि-सद्दो हेतुअत्थो. तेन यथावुत्तमत्थं समत्थेति, ‘‘यस्मा पुरिसस्स चित्तं परियादाय तिट्ठन्ति, तस्मा इत्थिरूपादीनि सन्धाय एतं कथित’’न्ति. पुरिसस्स चित्तन्ति पुरिसस्स चतुभूमकं कुसलचित्तं परियादाय गहेत्वा अन्तोमुट्ठिगतं विय कत्वा. ‘‘हत्थिकायं परियादियित्वा’’तिआदीसु (सं. नि. १.१२६) हि गहणं परियादानं नाम, ‘‘अनिच्चसञ्ञा भाविता बहुलीकता सब्बं कामरागं परियादियती’’तिआदीसु (सं. नि. ३.१०२) खेपनं परियादानं, इध उभयम्पि वट्टति. इदानि यथावुत्तमत्थं सुत्तेनेव साधेतुं, ‘‘यथाहा’’तिआदि वुत्तं. तत्थ ‘‘नाहं, भिक्खवे’’तिआदीसु न-कारो पटिसेधत्थो. अहन्ति भगवा अत्तानं निद्दिसति. भिक्खवेति भिक्खू आलपति. अञ्ञन्ति इदानि वत्तब्बं इत्थिरूपतो अञ्ञं. एकरूपम्पीति एकम्पि रूपं. समनुपस्सामीति ञाणस्स समनुपस्सना अधिप्पेता, हेट्ठा न-कारं आनेत्वा सम्बन्धितब्बं. अयञ्हेत्थ ¶ अत्थो – ‘‘अहं, भिक्खवे, सब्बञ्ञुतञ्ञाणेन सब्बसो ओलोकेन्तो अञ्ञं एकरूपम्पि न समनुपस्सामी’’ति. यं एवं पुरिसस्स चित्तं परियादाय तिट्ठतीति यं रूपं रूपगरुकस्स पुरिसस्स सब्बम्पि कुसलचित्तं पवत्तितुं अप्पदानवसेन परियादियित्वा गहेत्वा खेपेत्वा च तिट्ठति. यथयिदं इत्थिरूपन्ति इत्थिया रूपकायं. रूपसद्दो खन्धादिअनेकत्थवाचको, इध पन इत्थिया चतुसमुट्ठाने रूपायतने वण्णधातुयं दट्ठब्बो. ‘‘इत्थिरूपं, भिक्खवे, पुरिसस्स चित्तं परियादाय तिट्ठती’’ति ¶ इदं पुरिमस्सेव दळ्हीकरणत्थं वुत्तं. पुरिमं ‘‘यथयिदं, भिक्खवे, इत्थिरूप’’न्ति इदं ओपम्मवसेन वुत्तं, इदं परियादानभावे निदस्सनन्ति दट्ठब्बं. सेसं सुविञ्ञेय्यमेव.

नगरविन्देय्यसुत्तवण्णनाय लीनत्थप्पकासना समत्ता.

९. पिण्डपातपारिसुद्धिसुत्तवण्णना

४३८. धम्मसेनापतिनो ¶ पटिसल्लीयनस्स अधिप्पेतत्ता, उपरि च पाळियं, ‘‘सुञ्ञताविहारेन खो अहं, भन्ते, एतरहि बहुलं विहरामी’’ति (म. नि. ३.४३८) वुत्तत्ता ‘‘पटिसल्लानाति फलसमापत्तितो’’ति आह.

विप्पसन्नानीति विसेसतो पसन्नानि. ओकासवसेनाति इन्द्रियानं पतिट्ठितोकासवसेन. ननु तानि इन्द्रियानि सभावतो विप्पसन्नानि होन्तीति? सच्चं होन्ति. न हिदं तादिसं पसन्नतं सन्धाय वुत्तं, इदं पन सन्तपणीतसमापत्तिसमुट्ठितानं पच्चुपट्ठितानं चित्तजरूपानं वसेन सेसतिसन्ततिरूपानं सेट्ठतरं पणीतभावापत्तिं सन्धाय वुत्तं. फलसमापत्तितोति सुञ्ञतानुपस्सनावसेन समापन्नफलसमापत्तितो. महन्तानं बुद्धादीनं पुरिसानं विहारो महापुरिसविहारो. तेनाह – ‘‘बुद्ध…पे… विहारो’’ति. विहारतो पट्ठायाति परिक्खित्ते च विहारे परिक्खेपतो पट्ठाय, अपरिक्खित्ते च परिक्खेपारहट्ठानतो पट्ठाय. केचि पन ‘‘विहारब्भन्तरतो पट्ठाया’’ति वदन्ति. याव गामस्स इन्दखीलाति गामस्स अब्भन्तरिन्दखीलो. गेहपटिपाटियाचरित्वाति पिण्डाय चरित्वा. याव नगरद्वारेन निक्खमनाति नगरद्वारेन याव निक्खमनपदेसा. याव विहाराति याव विहारब्भन्तरा. पटिक्कन्तमग्गोति निवत्तनमग्गो. आरम्मणे पटिहञ्ञनाकारेन पवत्तमानम्पि पटिघसम्पयुत्तं चित्ते पटिहनन्तं विय पवत्ततीति आह – ‘‘चित्ते पटिहञ्ञनकिलेसजात’’न्ति. दिवसञ्च रत्तिञ्च अनुसिक्खन्तेनाति एतंयेव रागादिप्पहायिनिं सम्मापटिपत्तिं दिवा च रत्तिञ्च अनु अनु सिक्खन्तेन उपरूपरि वड्ढेन्तेन.

४४०. पहीना नु खो मे पञ्च कामगुणाति एत्थ कामगुणप्पहानं नाम तप्पटिबद्धछन्दरागप्पहानं. तथा हि वुत्तं – ‘‘तिट्ठन्ति चित्रानि तथेव ¶ लोके, अथेत्थ धीरा विनयन्ति छन्द’’न्ति. एकभिक्खुस्स पच्चवेक्खणा नानाति एकस्सेव भिक्खुनो, ‘‘पहीना नु खो मे पञ्च कामगुणा’’तिआदिना पाळियं आगता नानापच्चवेक्खणा होन्ति. नानाभिक्खूनन्ति विसुं विसुं अनेकेसं भिक्खूनं. पच्चवेक्खणा नानाति वुत्तनानापच्चवेक्खणा. इदानि तमेव सङ्खेपतो वुत्तमत्थं वित्थारतो दस्सेतुं, ‘‘कथ’’न्तिआदि वुत्तं. तत्थ ‘‘पच्चवेक्खती’’ति वुत्तं, कथं पन पच्चवेक्खतीति आह ‘‘पहीना नु खो’’तिआदि. वीरियं पग्गय्हाति ¶ चतुब्बिधसम्मप्पधानवीरियं आरभित्वा विपस्सनं वड्ढित्वा. मग्गानन्तरं अनागामिफलं पत्वाति वचनसेसो. फलानन्तरं मग्गन्ति तस्मिं अनागामिमग्गे ठितो फलसमापत्तितो वुट्ठाय अग्गमग्गत्थाय विपस्सनं आरभित्वा तस्मिंयेव आसने न चिरेनेव विपस्सनं उस्सुक्कापेत्वा अरहत्तमग्गं गण्हन्तो निरोधधम्मानुप्पत्तिया विपस्सनापरिवासाभावतो फलानन्तरं मग्गप्पत्तो नाम होतीति कत्वा.

ततो वुट्ठायाति मग्गानन्तरफलतो वुट्ठाय. मग्गानन्तरतो हि वुट्ठितो मग्गतो वुट्ठितो विय होतीति तथा वुत्तं. ‘‘फलानन्तरं मग्ग’’न्ति एत्थ फलं अनन्तरं एतस्साति फलानन्तरं. ‘‘फलानन्तरं मग्ग’’न्ति पदद्वयेनपि अनागामिमग्गफलानि चेव वदतीति एवमेत्थ अत्थो दट्ठब्बो. नीवरणादीसुपि एसेव नयोति एत्थ, ‘‘पहीना नु खो मे पञ्च नीवरणा’’तिआदिना योजना वेदितब्बा. एतेसन्ति एत्थ एतेसं नीवरणपञ्चुपादानक्खन्धसतिपट्ठानादीनं. पहानादीनीति पहानपरिञ्ञाभावनासच्छिकिरिया. नानापच्चवेक्खणा होतीति ता पच्चवेक्खणा नानाति अधिप्पायो. एतासु पन पच्चवेक्खणासूति एतासु कामगुणपच्चवेक्खणादीसु द्वादससु पच्चवेक्खणासु. एकं पच्चवेक्खणं पच्चवेक्खति द्वादससु नयेसु एकेनेव किच्चसिद्धितो. अञ्ञो भिक्खु. एकन्ति अञ्ञं पच्चवेक्खति. अञ्ञत्थो हि अयं एकसद्दो ‘‘इत्थेके’’तिआदीसु (म. नि. ३.२१, २७) वियाति. नानाभिक्खूनं पन एका पच्चवेक्खणा, नानाभिक्खूनं नानापच्चवेक्खणाति एवं चतुक्कपच्चवेक्खणम्पि एत्थ सम्भवति. इमस्स पन द्वयस्स वसेन अभिसमयो नत्थीति तदुभयं अट्ठकथायं न उद्धटं. सेसं सुविञ्ञेय्यमेव.

पिण्डपातपारिसुद्धिसुत्तवण्णनाय लीनत्थप्पकासना समत्ता.

१०. इन्द्रियभावनासुत्तवण्णना

४५३. एवंनामकेति ¶ ¶ ‘‘गजङ्गला’’ति एवं इत्थिलिङ्गवसेन लद्धनामके मज्झिमपदेसस्स मरियादट्ठानभूते निगमे. सुवेळु नाम निचलरुक्खोति वदन्ति. ततो अञ्ञं एवाति पन अधिप्पायेन ‘‘एका रुक्खजाती’’ति वुत्तं. चक्खुसोतानं यथासकविसयतो निवारणं दमनं इन्द्रियभावना, तञ्च खो सब्बसो अदस्सनेन असवनेनाति आह – ‘‘चक्खुना रूपं न पस्सति, सोतेन सद्दं न सुणाती’’ति. सति हि दस्सने सवने च तानि अदन्तानि अभावितानेवाति अधिप्पायो. चक्खुसोतानि च असम्पत्तग्गाहिताय दुरक्खितानीति ब्राह्मणो तेसंयेव विसयग्गहणं पटिक्खिपि. असदिसायाति अञ्ञतित्थियसमयेहि असाधारणाय. आलयन्ति कथेतुकामताकारन्ति अत्थो.

४५४. विपस्सनुपेक्खाति आरद्धविपस्सकस्स विपस्सनाञाणेन लक्खणत्तये दिट्ठे सङ्खारानं अनिच्चभावादिविचिनने मज्झत्तभूता विपस्सनासङ्खाता उपेक्खा. सा पन यस्मा भावनाविसेसप्पत्तिया हेट्ठिमेहि विपस्सनावारेहि सन्ता चेव पणीता च, पगेव चक्खुविञ्ञाणादिसहगताहि उपेक्खाहि, तस्मा आह – ‘‘एसा सन्ता एसा पणीता’’ति. अतप्पिकाति सन्तपणीतभावनारसवसेन तित्तिं न जनेति. तेनेवाह –

‘‘सुञ्ञागारं पविट्ठस्स, सन्तचित्तस्स भिक्खुनो;

अमानुसी रती होति, सम्मा धम्मं विपस्सतो’’ति. (ध. प. ३७३);

इतीति एवं वक्खमानाकारेनाति अत्थो. अयं भिक्खूति अयं आरद्धविपस्सको भिक्खूति योजना. चक्खुद्वारे रूपारम्मणम्हीति चक्खुद्वारे आपाथगते रूपारम्मणे. मनापन्ति मनापभावेन पवत्तनकं. मज्झत्ते मनापामनापन्ति इट्ठमज्झत्ते मनापभावेन अमनापभावेन च पवत्तनकं मनापामनापं नामाति. तेनाह (‘‘नेव मनापं न अमनाप’’न्ति). इमिना मनापभावो गहितो, ‘‘नेव मनाप’’न्ति इमिना मनापभावो मज्झत्तो च उभयं एकदेसतो लब्भतीति, ‘‘मनापामनाप’’न्ति वुत्तं. एवं आरम्मणे लब्भमानविसेसवसेन तदारम्मणस्स चित्तस्स पाकतिकं पवत्तिआकारं दस्सेत्वा इदानि तप्पटिसेधेन अरियस्स ¶ विनये अनुत्तरं इन्द्रियभावनं दस्सेतुं, ‘‘तस्स रज्जितुं वा’’तिआदि वुत्तं. तत्रायं योजना – तस्स चित्तं इट्ठे आरम्मणे ¶ रज्जितुं वा अनिट्ठे आरम्मणे दुस्सितुं वा मज्झत्ते आरम्मणे मुय्हितुं वा. अदत्वाति निसेधेत्वा. परिग्गहेत्वाति परिजाननवसेन ञाणेन गहेत्वा ञाततीरणपहानपरिञ्ञाहि परिजानित्वा. विपस्सनं मज्झत्ते ठपेतीति अनुक्कमेन विपस्सनुपेक्खं निब्बत्तेत्वा तं सङ्खारुपेक्खं पापेत्वा ठपेति. चक्खुमाति न पसादचक्खुनो अत्थितामत्तजोतनं; अथ खो तस्स अतिसयेन अत्थिताजोतनं, ‘‘सीलवा’’तिआदीसु वियाति आह – ‘‘चक्खुमाति सम्पन्नचक्खु विसुद्धनेत्तो’’ति.

४५६. ईसकं पोणेति मज्झे उच्चं हुत्वा ईसकं पोणे, न अन्तन्तेन वङ्के. तेनाह – ‘‘रथीसा विय उट्ठहित्वा ठिते’’ति.

४६१. पटिकूलेति अमनुञ्ञे आरम्मणे. अप्पटिकूलसञ्ञीति न पटिकूलसञ्ञी. तं पन अप्पटिकूलसञ्ञितं दस्सेतुं, ‘‘मेत्ताफरणेन वा’’तिआदि वुत्तं. तत्थ पटिकूले अनिट्ठे वत्थुस्मिं सत्तसञ्ञिते मेत्ताफरणेन वा धातुसो उपसंहारेन वा सङ्खारसञ्ञिते पन धातुसो उपसंहारेन वाति योजेतब्बं. अप्पटिकूलसञ्ञी विहरतीति हितेसिताय धम्मसभावचिन्तनाय च नप्पटिकूलसञ्ञी हुत्वा इरियापथविहारेन विहरति. अप्पटिकूले इट्ठे वत्थुस्मिं सत्तसञ्ञिते केसादिअसुचिकोट्ठासमत्तमेवाति असुभफरणेन वाति असुभतो मनसिकारवसेन. इदं रूपारूपमत्तं अनिच्चं सङ्खतन्ति अनिच्चतो उपसंहारेन वा. ततो एव, ‘‘दुक्खं विपरिणामधम्म’’न्ति मनसि करोन्तो पटिकूलसञ्ञी विहरति. सेसपदेसूति, ‘‘पटिकूले च अप्पटिकूले चा’’तिआदिना आगतेसु सेसेसु द्वीसु पदेसु. तत्थ हि इट्ठानिट्ठवत्थूनि एकज्झं गहेत्वा वुत्तं यथा सत्तानं पठमं पटिकूलतो उपट्ठितमेव पच्छा गहणाकारवसेन अवत्थन्तरेन वा अप्पटिकूलतो उपट्ठाति. यञ्च अप्पटिकूलतो उपट्ठितमेव पच्छा पटिकूलतो उपट्ठाति, तदुभयेपि खीणासवो सचे आकङ्खति, वुत्तनयेन अप्पटिकूलसञ्ञी विहरेय्य पटिकूलसञ्ञी वाति.

तदुभयं ¶ अभिनिवज्जेत्वाति सभावतो भावनानुभावतो च उपट्ठितं आरम्मणं पटिकूलसभावं अप्पटिकूलसभावं वाति तं उभयं पहाय अग्गहेत्वा. सब्बस्मिं वत्थुस्मिं पन, ‘‘मज्झत्तो हुत्वा विहरितुकामो किं करोती’’ति, वत्वा तत्थ पटिपज्जनविधिं दस्सेन्तो, ‘‘इट्ठानिट्ठेसु…पे… दोमनस्सितो होती’’ति आह. इदानि यथावुत्तमत्थं पटिसम्भिदामग्गपाळिया विभावेतुं, ‘‘वुत्तं हेत’’न्तिआदिमाह. तस्सत्थो हेट्ठा वुत्तनयो एव. सतोति सतिवेपुल्लप्पत्तिया सतिमा. सम्पजानोति पञ्ञावेपुल्लप्पत्तिया सम्पजानकारी. चक्खुना ¶ रूपं दिस्वाति कारणवसेन चक्खूति लद्धवोहारेन रूपदस्सनसमत्थेन चक्खुविञ्ञाणेन, चक्खुना वा करणभूतेन रूपं पस्सित्वा. नेव सुमनो होति गेहस्सितसोमनस्सपटिक्खेपेन नेक्खम्मपक्खिकाय किरियासोमनस्सवेदनाय.

इमेसु चाति ‘‘अञ्ञथा च पनानन्द, अरियस्स विनये अनुत्तरा इन्द्रियभावना होती’’तिआदिना (म. नि. ३.४५३), – ‘‘कथञ्चानन्द, सेखो होति पटिपदो’’तिआदिना (म. नि. ३.४६०); – ‘‘कथञ्चानन्द, अरियो होति भावितिन्द्रियो’’तिआदिना (म. नि. ३.४६१) च आगतेसु तिविधेसु नयेसु. मनापं अमनापं मनापामनापन्ति एत्थ मनापग्गहणेन सोमनस्सयुत्तकुसलाकुसलानं, अमनापग्गहणेन दोमनस्सयुत्तअकुसलानं, मनापामनापग्गहणेन तब्बिधुरुपेक्खायुत्तानं सङ्गहितत्ता पठमनये ‘‘संकिलेसं वट्टति, निक्किलेसं वट्टती’’ति वुत्तं. पठमनये हि पुथुज्जनस्स अधिप्पेतत्ता संकिलेसकिलेसविप्पयुत्तम्पि युज्जति. दुतियनये पन ‘‘सो…पे… अड्डीयती’’तिआदिवचनतो ‘‘पठमं संकिलेसं वट्टती’’ति वुत्तं. सेक्खस्स अधिप्पेतत्ता चस्स अप्पहीनकिलेसवसेन, ‘‘संकिलेसम्पि वट्टती’’ति वुत्तं. ततियनये अरहतो अधिप्पेतत्ता, ‘‘ततियं निक्किलेसमेव वट्टती’’ति वुत्तं. सेक्खवारे पन ‘‘चक्खुमा पुरिसो’’तिआदिका उपमा एकमेव अत्थं ञापेतुं आह. तस्मा चक्खुद्वारस्स उप्पन्ने रागादिके विक्खम्भेत्वा विपस्सनुपेक्खाय पतिट्ठानं अरिया इन्द्रियभावनाति. पठमनयो विपस्सकवसेन आगतो, दुतियो सेक्खस्स वसेन, पठमदुतियो च सेक्खपुथुज्जनानं मूलकम्मट्ठानवसेन, ततियो खीणासवस्स अरियविहारवसेन ¶ आगतो. पठमनये च पुथुज्जनस्स वसेन, दुतियनये सेक्खस्स वसेन कुसलं वुत्तं, ततियनये असेक्खस्स वसेन किरियाब्याकतं वुत्तन्ति अयं विसेसो वेदितब्बो.

पपञ्चसूदनिया मज्झिमनिकायट्ठकथाय

इन्द्रियभावनासुत्तवण्णनाय लीनत्थप्पकासना समत्ता.

निट्ठिता च सळायतनवग्गवण्णना.

उपरिपण्णासटीका समत्ता.