📜

नमो तस्स भगवतो अरहतो सम्मासम्बुद्धस्स

संयुत्तनिकाये

महावग्गटीका

१. मग्गसंयुत्तं

१. अविज्जावग्गो

१-२. अविज्जासुत्तादिवण्णना

१-२. पुब्बङ्गमाति ¶ ¶ पुब्बेचरा. अविज्जा हि अञ्ञाणलक्खणा सम्मुय्हनाकारेन आरम्मणे पवत्ततीति सम्पयुत्तधम्मानम्पि तदाकारानुविधानताय पच्चयो होति. तथा हि ते अनिच्चासुभदुक्खानत्तसभावेपि धम्मे निच्चादितो गण्हन्ति, अयमस्सा तेसं सहजातवसेन पुब्बङ्गमता. यं पन मोहेन अभिभूतो पापकिरियाय आदीनवं अपस्सन्तो पाणं हनति, अदिन्नं आदियति, कामेसु मिच्छा चरति, मुसा भणति, अञ्ञम्पि विविधं दुस्सील्यं आचरति, अयमस्स सहजातवसेन च उपनिस्सयवसेन च पुब्बङ्गमता. समापज्जनायाति तब्भावापज्जनाय ¶ अकुसलप्पत्तिया. सभावपटिलाभायाति अत्तलाभाय. तेनाह ‘‘उप्पत्तिया’’ति. सा पनेसा वुत्ताकारेन अकुसलानं पुब्बङ्गमभूता अविज्जा उप्पज्जतीति सम्बन्धो. यदेतन्ति यं एतं पापाजिगुच्छनताय पापतो अलज्जनाकारसण्ठितं अहिरिकं, पापानुत्रासताय पापतो अभायनाकारसण्ठितञ्च अनोत्तप्पं, एतं ¶ द्वयं अनुदेव अन्वागतमेव. अनु-सद्देन चेत्थ एतन्ति उपयोगवचनं. अनुदेवाति एतस्स अत्थो सहेव एकतोति. एत्थ अविज्जाय वुत्तनयानुसारेन तप्पटिपक्खतो च अत्थो वेदितब्बो. अयं पन विसेसो – तत्थ यथा अकुसलकम्मपथवसेन पवत्तियं पुब्बङ्गमता अविज्जाय, एवं कुसलकम्मपथवसेन पुञ्ञकिरियवत्थुवसेन च पवत्तियं विज्जाय पुब्बङ्गमता वत्तब्बा. वीमंसाधिपतिवसेन पवत्तियं आधिपच्चाकारवसेन च पुब्बङ्गमता वेदितब्बा. द्वीहेवाति च अवधारणं आधिपच्चाकारस्स सहजातेनेव सङ्गहेतब्बतो.

लज्जनाकारसण्ठिताति पापतो जिगुच्छनाकारसण्ठिता. भायनाकारसण्ठितन्ति उत्तसनाकारसण्ठितं. एत्थाति हिरिओत्तप्पे. विदति, विन्दतीति वा विज्जा. विद्दसूति च सप्पञ्ञपरियायोति आह ‘‘विद्दसुनोति विदुनो’’ति. याथावदिट्ठीति अविपरीता दिट्ठि, संकिलेसतो निय्यानिकदिट्ठि. सम्मादिट्ठि पहोतीति एत्थ सा विज्जा सम्मादिट्ठि वेदितब्बा. न एकतो सब्बानि लब्भन्ति सम्मावाचाकम्मन्ताजीवानं पुब्बाभिसङ्खारस्स अनेकरूपत्ता. लोकुत्तरमग्गक्खणे एकतो लब्भन्ति किच्चतो भिन्नानम्पि तासं तत्थ सरूपतो अभिन्नत्ता. एका एव हि विरति मग्गक्खणे तिस्सन्नम्पि विरतीनं किच्चं साधेन्ती पवत्तति, यथा एका एव सम्मादिट्ठि परिजाननादिवसेन चतुब्बिधकिच्चं साधेन्ती पवत्तति. तानि च खो सब्बानि अट्ठपि पठमज्झानिके मग्गे लब्भन्तीति योजना. पठमज्झानिकेति पठमझानवन्ते.

तथाभूतस्साति अरियमग्गसमङ्गिनो. यस्मा महासळायतनसुत्ते वुत्तं ‘‘सम्मादिट्ठिआदीनं पञ्चन्नं एव अङ्गानं वसेना’’ति, तस्मा पञ्चङ्गिको लोकुत्तरमग्गो होति. ‘‘पुब्बेव खो पना’’ति हि वचनं तदा मग्गक्खणे विरतीनं अभावं ञापेति, तस्मा कामावचरचित्तेसु विय लोकुत्तरचित्तेसु विरति अनियताति अधिप्पायो. परिसुद्धभावदस्सनन्ति परिसुद्धसीलभावदस्सनत्थं. अयमत्थो दीपितो, न अरियमग्गे विरतीनं अभावो.

यदि एवं कस्मा अभिधम्मे मग्गविभङ्गे पञ्चङ्गिकवारो आगतोति आह ‘‘यम्पि अभिधम्मे’’तिआदि. तन्ति ‘‘पञ्चङ्गिको मग्गो होती’’ति वचनं. ‘‘एकं ¶ किच्चन्तरं दस्सेतुं वुत्त’’न्ति वत्वा तं दस्सेतुं ‘‘यस्मिञ्हि काले’’तिआदि वुत्तं. यस्मिञ्हि कालेति लोकियकाले ¶ . तेन ‘‘एकं किच्चन्तर’’न्ति वुत्तं अट्ठङ्गिककिच्चं दस्सेति. विरतिउप्पादनेन मिच्छावाचादीनि पुग्गलेन मग्गसमये पजहापेन्तीति सम्मादिट्ठिआदीनि ‘‘पञ्च कारकङ्गानी’’ति वुत्तानि. सम्मावाचादिकिरिया हि विरति, तञ्च एतानि कारापेन्तीति. विरतिवसेनाति विरमणकिरियावसेन कारापकभावेन, कत्तुभावेन वाति अत्थो. ‘‘विरतित्तयवसेना’’ति वा पाठो.

सम्माकम्मन्तो पूरतीति इमेहि सम्मादिट्ठिआदीहि सम्माकम्मन्तकिच्चं पूरति नाम तेहि वीरियादिकेहि तदत्थसिद्धितो. तम्पि सन्धाय ‘‘एकं किच्चन्तरं दस्सेतु’’न्ति वुत्तं. इमं किच्चन्तरं दस्सेतुन्ति लोकुत्तरमग्गक्खणेपि इमानेव पञ्च सम्मावाचादिविरतित्तयस्स एकक्खणे कारापकङ्गानीति दस्सेतुं. एवं वुत्तन्ति ‘‘तस्मिं समये पञ्चङ्गिको मग्गो होती’’ति (विभ. ४९४) एवं वुत्तं. लोकियमग्गक्खणे पञ्चेव होन्ति, विरति पन अनियता, तस्मा ‘‘छअङ्गिको’’ति अवत्वा ‘‘पञ्चङ्गिको’’इच्चेव वुत्तं. तयिदं अभिधम्मे पञ्चङ्गिकवारदेसनाय कारणकित्तनमग्गो, अरियमग्गो पन अट्ठङ्गिकोवाति दस्सेतुं, ‘‘या च, भिक्खवे’’तिआदिमाह, तं सुविञ्ञेय्यमेव. मिच्छादिट्ठिआदिका दस, तप्पच्चया अकुसला च दसाति वीसति अकुसलपक्खिया, सम्मादिट्ठिआदिका दस, तप्पच्चया कुसला च दसाति वीसति कुसलपक्खिया महाचत्तारीसकसुत्ते वुत्ता. महाचत्तारीसकन्ति तस्सेतं नामं. मिस्सकोव कथितो लोकुत्तरस्सपि इध लब्भमानत्ता.

यस्मा कोसलसंयुत्तेपि इध च थेरेन ‘‘उपड्ढमिदं, भन्ते, ब्रह्मचरियस्सा’’तिआदिना वुत्तं ‘‘मा हेवं आनन्दा’’तिआदिना पटिक्खिपित्वा ‘‘सकलमेविदं आनन्दा’’तिआदिना भगवता देसितं सुत्तं आगतं. तस्सत्थो कोसलसंयुत्तवण्णनायं वुत्तो, तस्मा वुत्तं ‘‘कोसलसंयुत्ते वुत्तत्थमेवा’’ति.

अविज्जासुत्तादिवण्णना निट्ठिता.

३. सारिपुत्तसुत्तवण्णना

३. सावकबोधि ¶ सावकपारमियो, तप्परियापन्नं ञाणं सावकपारमिञाणं, तं पन द्विन्नं अग्गसावकानं तत्थपि धम्मसेनापतिनो एव सविसेसं मत्थकं पत्तं, न इतरेसन्ति आह – ‘‘सावक…पे… अप्पत्तताया’’ति. तस्मा तस्स मत्थकप्पत्तिया मग्गब्रह्मचरिये इज्झन्ते तस्स एकदेसो इध इज्झति, न सकलन्ति. न हि अद्धब्रह्मचरियं नाम अत्थि, तस्मा वुत्तं, ‘‘सकलम्पि ¶ …पे… लब्भती’’ति, तं पन भण्डागारिको नाञ्ञासि ञाणस्स सावकविसयेपि सप्पदेसिकत्ता, धम्मसेनापति पन ञाणस्स तत्थ निप्पदेसिकत्ता अञ्ञासीति. तेनाह – ‘‘आनन्दत्थेरो…पे… अञ्ञासी’’ति. एवमाहाति ‘‘सकलमिदं, भन्ते’’ति एवं अवोच.

सारिपुत्तसुत्तवण्णना निट्ठिता.

४. जाणुस्सोणिब्राह्मणसुत्तवण्णना

४. वळवाभि-सद्दो वळवापरियायोति आह ‘‘चतूहि वळवाहि युत्तरथेना’’ति. योधरथोति योधेहि युज्झनत्थं आरोहितब्बरथो. अलङ्काररथो मङ्गलदिवसेसु अलङ्कतपटियत्तेहि आरोहितब्बरथो. घनदुकुलेन परिवारितोति रजतपट्टवण्णेन सेतदुकुलेन पटिच्छादितो. पटिच्छादनत्थो हि इध परिवारसद्दो. रजतपनाळिसुपरिक्खित्ता सेतभावकरणत्थं.

छन्नं छन्नं मासानन्ति निद्धारणे सामिवचनं. एकवारं नगरं पदक्खिणं करोतीति इदं तस्मिं ठानन्तरे ठितेन कातब्बं चारित्तं. नगरतो न पक्कन्ताति नगरतो बहि न गता. मङ्गलवचने नियुत्ता मङ्गलिका, सुवत्थिवचने नियुत्ता सोवत्थिका. आदि-सद्देन थुतिमागधवन्दिकाचरियके सङ्गण्हाति. सुकपत्तसदिसानि वण्णतो.

वण्णगीतन्ति थुतिगीतं. ब्रह्मभूतं सेट्ठभूतं यानं, ब्रह्मभूतानं सेट्ठभूतानं यानन्ति वा ब्रह्मयानं. विजितत्ता विसेसेन जिननतो. रागं विनयमाना परियोसापेतीति सब्बम्पि रागं समुच्छेदविनयवसेन विनेति, अत्तनो किच्चं परियोसापेति. किच्चपरियोसापनेनेव हि सयम्पि ¶ परियोसानं निप्फत्तिं उपगच्छति. तेनाह ‘‘परियोसानं गच्छति निप्फज्जती’’ति.

धुरन्ति भुम्मत्थे उपयोगवचनन्ति आह ‘‘तत्रमज्झत्ततायुगे युत्ता’’ति. ईसाति युगसन्धारिका दारुयुगळा. यथा वा बाहिरं युगं धारेति, तस्सा ठिताय एव किच्चसिद्धि, एवं किरियावसेन लद्धबलेन तत्रमज्झत्ततायुगे थिरं धारेति, तेहेव अरियमग्गरथस्स पवत्तनं. हिरिग्गहणेन चेत्थ तंसहचरणतो ओत्तप्पम्पि गहितंयेव होति. तेनाह ‘‘अत्तना सद्धि’’न्तिआदि. नाळिया मिनमानो पुरिसो विय आरम्मणं मिनातीति मनो. कतरं पन तं मनो, कथञ्चस्स योत्तसदिसताति आह ‘‘विपस्सनाचित्त’’न्तिआदि. तेन योत्तं वियाति योत्तन्ति दस्सेति. लोकियविपस्सनाचित्तं अतिरेकपञ्ञास कुसलधम्मे एकाबद्धे एकसङ्गहिते करोतीति सम्बन्धो. ते पन ‘‘फस्सो होति…पे… अविक्खेपो होती’’ति चित्तङ्गवसेन धम्मसङ्गहे (ध. स. १) आगतनयेनेव ¶ वेदितब्बा. लोकुत्तरविपस्सनाचित्तन्ति मग्गचित्तं आह. अतिरेकसट्ठीति ते एव सम्माकम्मन्ताजीवेहि अनञ्ञातञ्ञस्सामीतिन्द्रियादीहि च सद्धिं अतिरेकसट्ठि कुसलधम्मे. एकाबद्धेति एकस्मिं एव आरम्मणे आबद्धे. एकसङ्गहेति तथेव विपस्सनाकिच्चवसेन एकसङ्गहे करोति. पुब्बङ्गमभावेन आरक्खं सारेतीति आरक्खसारथी. ‘‘यथा हि रथस्स…पे… सारथी’’ति वत्वा तं दस्सेतुं ‘‘योग्गियो’’ति वुत्तं. धुरं वाहेति योग्गे. योजेति योग्गे समगतियञ्च. अक्खं अब्भञ्जति सुखप्पवत्तनत्थं. रथं पेसेति योग्गचोदनेन. निब्बिसेवने करोति गमनवीथियं पटिपादनेन सन्नियोजेति. आरक्खपच्चुपट्ठानाति आरक्खं पच्चुपट्ठपेति असम्मोससभावत्ता. गतियोति पवत्तियो, निप्फत्तियो वा. समन्वेसतीति गवेसति.

अरियपुग्गलस्स निब्बानं पटिमुखं सम्पापने रथो वियाति रथो. परिकरोति विभूसयतीति परिक्खारो, विभूसनं, सीलञ्च अरियमग्गस्स विभूसनट्ठानियं. तेन वुत्तं ‘‘चतुपारिसुद्धिसीलालङ्कारो’’ति, सीलभूसनोति अत्थो. विपस्सनासम्पयुत्तानन्ति लोकियाय लोकुत्तराय च विपस्सनाय सम्पयुत्तानं. विधिना ईरेतब्बतो पवत्तेतब्बतो वीरियं, ¶ सम्मावायामो. समं सम्मा च धियतीति समाधि, धुरञ्च तं समाधि चाति धुरसमाधि, उपेक्खा धुरसमाधि एतस्साति उपेक्खाधुरसमाधि, अरियमग्गो उपेक्खासङ्खातधुरसमाधीति अत्थो. अट्ठकथायं पन ब्यञ्जनं अनादियित्वा धुरसमाधिसद्दानं भिन्नाधिकरणता वुत्ता. पयोगमज्झत्तेति वीरियसमताय. अनिच्छाति इच्छापटिपक्खा. तेनाह ‘‘अलोभसङ्खाता’’ति. परिवारणन्ति परिवारो, परिच्छदोति अत्थो.

मेत्ताति मेत्ताचेतोविमुत्ति. तथा करुणा. पुब्बभागोति उभिन्नम्पि उपचारो. द्वेपि कायचित्तविवेका विय पुब्बभागधम्मवसेन वुत्ता. अरियमग्गरथेति परिसुद्धमग्गसङ्खाते रथे. अरियमग्गरथो च मग्गरथो चाति अरियमग्गरथो, एवं एकसेसनयेन वा अत्थो वेदितब्बो. तेनाह ‘‘इमस्मिं लोकियलोकुत्तरमग्गरथे ठितो’’ति. सन्नद्धचम्मोति योगावचरस्स पटिमुक्कचम्मं. न नं ते विज्झन्तीति वचनपथा न नं विज्झन्ति. धम्मभेदनवसेन न भञ्जति, तस्स अरियमग्गस्स रथस्स सम्मा योजितस्स अन्तरा भङ्गो नत्थीति अत्थो.

अत्तनो पुरिसकारं निस्साय लद्धत्ता अत्तनो सन्तानेति अधिप्पायो. अनुत्तरन्ति उत्तररहितं. ततो एव सेट्ठयानं, नस्स केनचि सदिसन्ति असदिसं. धितिसम्पन्नताय धीरा पण्डितपुरिसा ¶ लोकम्हा निय्यन्ति गच्छन्ति. ‘‘जयं जय’’न्ति गाथायं वचनविपल्लासेन वुत्तन्ति आह ‘‘जिनन्ता जिनन्ता’’ति.

जाणुस्सोणिब्राह्मणसुत्तवण्णना निट्ठिता.

५-६. किमत्थियसुत्तादिवण्णना

५-६. नियमत्थोति अवधारणत्थो. तेन नियमेन अवधारणेन – अञ्ञं मग्गं पटिक्खिपति इतो अञ्ञस्स निय्यानिकमग्गस्स अभावतो. ‘‘दुक्खस्स परिञ्ञत्थ’’न्ति वुत्तत्ता वट्टदुक्खं कथितं. अरियमग्गे गहिते तस्स पुब्बभागमग्गो विपस्सनाय गहितो एवाति ‘‘मिस्सकमग्गो कथितो’’ति वुत्तं. उत्तानमेव अपुब्बस्स अभावा. अयं पन विसेसो ‘‘रागक्खयो’’तिआदीहि ¶ यदिपि निब्बानं वुत्तं. तथापि अरहत्तं विय ब्रह्मचरियम्पि. तेन निब्बानं एव वुच्चति ‘‘इदं ब्रह्मचरियपरियोसान’’न्ति.

किमत्थियसुत्तादिवण्णना निट्ठिता.

७. दुतियअञ्ञतरभिक्खुसुत्तवण्णना

७. रागविनयादिपदेहि निब्बानं वापि वुच्चेय्य अरहत्तं वापि. यस्मा सो भिक्खु उभयत्थपि निविट्ठबुद्धि, तस्मा भगवा तस्स अज्झासयवसेन ‘‘निब्बानधातुया खो एत’’न्तिआदिना निब्बानधातुं विस्सज्जेत्वा पुन ‘‘आसवानं खयो तेन वुच्चती’’ति आह. यस्मा अरियमग्गो रागादिके समुच्छेदवसेन विनेति, आसवञ्च सब्बसो खेपेति, तेन च वुत्तं निब्बानं अरहत्तञ्च, तस्मा तदुभयं ‘‘रागविनयोतिआदि नाममेवा’’ति वुत्तं. अनुसन्धिकुसलताय पुच्छन्तो एतं अवोचाति इमिना ‘‘पुच्छानुसन्धि इध लब्भती’’ति दीपितं, अज्झासयानुसन्धिपि एत्थ लब्भतेवाति दट्ठब्बं.

दुतियअञ्ञतरभिक्खुसुत्तवण्णना निट्ठिता.

८. विभङ्गसुत्तवण्णना

८. एकेन परियायेन अट्ठङ्गिकमग्गं विभजित्वाति ‘‘सम्मादिट्ठी’’तिआदिना एकेन परियायेन अरियं अट्ठङ्गिकं मग्गं विभागेन दस्सेत्वा ‘‘कतमा च, भिक्खवे, सम्मादिट्ठी’’तिआदिना ¶ पुन अपरेन परियायेन विभजितुकामो. उग्गहधारणपरिचयञाणानिपि सवनञाणे एव अवरोधं गच्छन्तीति ‘‘सवनसम्मसनपटिवेधपच्चवेक्खणवसेना’’ति वुत्तं.

कम्मट्ठानाभिनिवेसोति कम्मट्ठानपटिपत्ति. पुरिमानि द्वे सच्चानि उग्गण्हित्वाति सम्बन्धो. इट्ठं कन्तं मनापन्ति निरोधमग्गेसु निन्नभावं दस्सेति, न अभिनन्दनं, तन्निन्नभावो एव च तत्थ कम्मकरणं दट्ठब्बं. एकेनेवाकारेन सच्चानं पटिवेधनिमित्तता, सो एव अभिमुखभावो तेसं समागमोति एकाभिसमयो.

अस्साति ¶ ञाणस्स, योगिनो वा. एत्थ च केचि ‘‘लोकियञाणम्पि पटिवेधो सब्बस्स याथावबोधभावतो’’ति वदन्ति. ननु उग्गहादिपटिवेधो च पटिवेधोव, न च सो लोकुत्तरोति? तं न, केवलेन पटिवेध-सद्देन उग्गहादिपटिवेधानं अवचनीयत्ता, पटिवेधनिमित्तत्ता वा उग्गहादिवसेन पवत्तं दुक्खादीसु पुब्बभागे ञाणं ‘‘पटिवेधो’’ति वुच्चति, न पटिवेधत्ता, पटिवेधभूतमेव पन ञाणं उजुकं पटिवेधोति वत्तब्बतं अरहति. किच्चतोति परिञ्ञादिकिच्चतो. आरम्मणपटिवेधोति सच्छिकिरियापटिवेधमाह. किच्चतोति असम्मोहपटिवेधं. उग्गहादीहि सच्चस्स परिग्गण्हनं परिग्गहो.

दुद्दसत्ताति अनधिगतञाणेन याथावसरसलक्खणतो दट्ठुं असक्कुणेय्यत्ता उप्पत्तितो पाकटानिपि. तेनाह ‘‘दुक्खसच्चं ही’’तिआदि. उभयन्ति पुरिमं सच्चद्वयं. पयोगोति किरिया, वायामो वा. तस्स महन्ततरस्स इच्छितब्बतं दुक्करतरतञ्च उपमाहि दस्सेति ‘‘भवग्गग्गहणत्थ’’न्तिआदिना. यथा पुरिमं सच्चद्वयं विय केनचि परियायेन अपाकटताय परमगम्भीरत्ता उग्गहादिवसेन पुब्बभागे पवत्तिभेदं गहेत्वा ‘‘दुक्खे ञाण’’न्तिआदिना चतुब्बिधं कत्वा वुत्तं. एकमेव तं ञाणं होति एकाभिसमयवसेनेव पवत्तनतो.

कामपच्चनीकट्ठेनाति कामानं उजुपच्चनीकभावेन. कामतो निस्सटभावेनाति कामेहि विसंयुत्तभावेन. कामं सम्मसन्तस्साति दुविधम्पि कामं अनिच्चादितो सम्मसन्तस्स. पज्जति पवत्तति एतेनाति पदं, कामस्स पदन्ति कामपदं, कामस्स उप्पत्तिकारणस्स घातो समुग्घातो, तं कामपदघातं. तेनाह ‘‘कामवूपसम’’न्ति. कामेहि विवित्तं कामविवित्तं. सो एव च नेसं अन्तो समुच्छेदविवेकेति कत्वा तस्मिं साधेतब्बे उप्पन्नोति वुत्तं ‘‘कामविवित्तन्ते उप्पन्नो’’ति. कामतो निक्खमतीति निक्खमो, सो एव नेक्खम्मसङ्कप्पो. इमस्मिञ्च ¶ नेक्खम्मसङ्कप्पस्स सद्दत्थविभावेन यथावुत्तो कामपच्चनीकट्ठादिको अत्थनिद्धारणविसेसो अन्तोगधो.

एसेव नयोति इमिना ब्यापादपच्चनीकट्ठेन विहिंसाय पच्चनीकट्ठेनातिआदिकं अब्यापादाविहिंसासङ्कप्पानं अत्थुद्धारणविधिं अतिदिसति. नेक्खम्मसङ्कप्पादयोति आदि-सद्देन अब्यापादअविहिंसासङ्कप्पे एव सङ्गण्हाति. काम…पे… सञ्ञानन्ति कामवितक्कादिविरतिसम्पयुत्तानं नेक्खम्मादिसञ्ञानं. नानत्ताति नानाखणिकत्ता. तीसु ठानेसूति ¶ तिप्पकारेसु कारणेसु. उप्पन्नस्साति उप्पज्जनारहस्स. भूमिलद्धउप्पन्नं इधाधिप्पेतं. एस नयो इतो परेसुपि. पदच्छेदतोति कारणुपच्छेदतो. पदन्ति हि उप्पत्तिकारणन्ति वुत्तोवायमत्थो. अनुप्पत्तिसाधनवसेनाति यथा सङ्कप्पो आयतिं नुप्पज्जति, एवं अनुप्पत्तिसाधनवसेन. सम्मादिट्ठि विय एकोव कुसलसङ्कप्पो उप्पज्जति.

चतूसु ठानेसूति विसंवादनादीसु चतूसु वीतिक्कमट्ठानेसु. पब्बजितानं मिच्छाजीवो नाम आहारनिमित्तकोति आह ‘‘खादनीयभोजनीयादीनं अत्थाया’’ति. सब्बसो अनेसनाय पहानं सम्माआजीवोति आह ‘‘बुद्धप्पसत्थेन आजीवेना’’ति. कम्मपथपत्तानं वसेन ‘‘सत्तसु ठानेसू’’ति वुत्तं. अकम्मपथपत्ताय हि अनेसनाय सो पदघातं करोतियेव.

तथारूपे वा आरम्मणेति यस्मिं आरम्मणे इमस्स पुब्बे किलेसा न उप्पन्ना, तस्मिं एव. अनुप्पन्नानन्ति अनुप्पादस्सपि पत्थनावसेन अनुप्पन्नानं. वीरियच्छन्दन्ति वीरियस्स निब्बत्तेतुकामताछन्दं. ‘‘छन्दसम्पयुत्तवीरियञ्चा’’ति वदन्ति. वीरियमेव पन अनुप्पन्नाकुसलानुप्पादने लब्भमानछन्दताय धुरसम्पग्गहताय छन्दपरियायेन वुत्तं. तथा हि वीरियं – ‘‘अनिक्खित्तछन्दता अनिक्खित्तधुरता’’ति (ध. स. २६) निद्दिट्ठं. कोसज्जपक्खे पतितुं अदत्वा चित्तं पग्गहितं करोति. पधानन्ति पधानभूतवीरियं.

उप्पत्तिपबन्धवसेनाति निरन्तरुप्पादनवसेन. चतूसु ठानेसु किच्चसाधनवसेनाति यथावुत्तेसु चतूसु ठानेसु पधानकिच्चस्स निप्फादनवसेन अनुप्पादनादिवसेन. किच्चसाधनवसेनाति कायवेदनाचित्तधम्मेसु सुभसुखनिच्चअत्तगाहविधमनवसेन असुभदुक्खानिच्चानत्तसाधनवसेन.

अयन्ति यथावुत्तो सदिसासदिसताविसेसो. अस्साति मग्गस्स. एत्थ कथन्ति यदि रूपावचरचतुत्थज्झानतो ¶ पट्ठाय याव सब्बभवग्गा झानङ्गमग्गङ्गबोज्झङ्गानं सदिसता, एवं सन्ते ‘‘आरुप्पे चतुक्कपञ्चकज्झानं उप्पज्जति, तञ्च लोकुत्तर’’न्ति एत्थ कथं अत्थो गहेतब्बोति आह ‘‘एत्थापी’’तिआदि. तंझानिकावाति पठमज्झानादीसु यं झानं मग्गपटिलाभस्स पादकभूतं, तंझानिकाव अस्स अरियस्स उपरिपि तयो मग्गा ¶ . एवन्ति वुत्ताकारेन. पादकज्झानमेव नियमेति आरुप्पे चतुक्कपञ्चकज्झानुप्पत्तियं. विपस्सनाय आरम्मणभूता खन्धाति सम्मसितखन्धे वदन्ति. पुग्गलज्झासयो नियमेति पादकसम्मसितज्झानानं भेदे. यस्मा सङ्खारुपेक्खाञाणमेव अरियमग्गस्स बोज्झङ्गादिविसेसं नियमेति, ततो दुतियादिपादकज्झानतो उप्पन्नस्स सङ्खारुपेक्खाञाणस्स पादकज्झानातिक्कन्तानं अङ्गानं असमापज्जितुकामताविरागभावतो इतरस्स च अतब्भावतो तीसुपि वादेसु विपस्सनाव नियमेतीति वेदितब्बो, तस्मा विपस्सनानियमेनेव हि पठमवादेपि अपादकज्झानादिपादकापि मग्गा पठमज्झानिका होन्ति. इतरेहि च पादकज्झानेहि विपस्सनानियमेहि तंतंझानिकाव. एवं सेसवादेसु विपस्सनानियमो यथासम्भवं योजेतब्बो. दुतियवादे तंतंझानिकता सम्मसितसङ्खारविपस्सनानियमेहि होति. तत्र हि विपस्सना तंतंविरागभावना भावेतब्बा, न सोमनस्ससहगता उपेक्खासहगता हुत्वा झानङ्गादिनियमं मग्गस्स करोतीति एवं विपस्सनानियमो वुत्तनयेनेव वेदितब्बो. इमस्मिञ्च वादे पादकसम्मसितज्झानुपनिस्सयसब्भावे अज्झासयो एकन्तेन होतीति ‘‘पुग्गलज्झासयो नियमेतीति वदन्ती’’ति वुत्तं, अट्ठकथायं पन विसुद्धिमग्गस्स एतिस्सा अट्ठकथाय एकसङ्गहितत्ता ‘‘तेसं वादविनिच्छयो…पे… वेदितब्बो’’ति वुत्तं. पुब्बभागेति विपस्सनाक्खणे.

विभङ्गसुत्तवण्णना निट्ठिता.

९. सूकसुत्तवण्णना

९. सूकन्ति सालियवादीनं वालमाह. सो हि निकन्तकसदिसो पटिमुखगतं हत्थं वा पादं वा भिन्दति, तस्मा भेदं इच्छन्तेन उद्धग्गं कत्वा ठपितं सम्मापणिहितं नाम, तथा अट्ठपितं मिच्छापणिहितं नामाति वुत्तं. मिच्छापणिहितायाति कम्मस्सकतपञ्ञाय मिच्छाठपनं नाम – ‘‘इमे सत्ता कम्मवसेन सुखदुक्खं पच्चनुभवन्ति, तं पन कम्मं इस्सरस्स इच्छावसेन ब्रह्मा निम्मिनाती’’तिआदिना मिच्छापकप्पनं. केचि पन ‘‘नत्थि दिन्नन्तिआदिना नयेन पवत्ति, तस्स वा ञाणस्स अप्पवत्ती’’ति वदन्ति. मग्गभावनायाति ¶ एत्थापि मिच्छामग्गस्स पवत्तनं, अरियमग्गस्स वा अप्पवत्तनं मिच्छाठपनं. तेनाह ‘‘अप्पवत्तितत्ता’’ति. अविज्जं भिन्दिस्सतीति अविज्जं समुच्छिन्दिस्सति. मग्गनिस्सितं कत्वा मग्गे ¶ एव पक्खिपित्वा. तञ्हि ञाणं मग्गस्स मूलकारणं मग्गे सिद्धे तस्स किच्चस्स मत्थकप्पत्तितो. ‘‘सम्मापणिहिताय दिट्ठिया सम्मापणिहिताय मग्गभावनाया’’ति वुत्तत्ता मिस्सकमग्गो कथितो. छविभेदसदिसो चेत्थ अविज्जाभेदो, लोहितुप्पादसदिसो लोकुत्तरमग्गभावो दट्ठब्बो.

सूकसुत्तवण्णना निट्ठिता.

१०. नन्दियसुत्तवण्णना

१०. छन्नपरिब्बाजको वत्थच्छादिया छन्नङ्गपरिब्बाजको, न नग्गपरिब्बाजको.

अविज्जावग्गवण्णना निट्ठिता.

२. विहारवग्गो

१. पठमविहारसुत्तवण्णना

११. अड्ढमासन्ति अच्चन्तसंयोगे उपयोगवचनं. पटिसल्लीयितुन्ति यथावुत्तं कालं पटि दिवसे दिवसे समापत्तियं धम्मचिन्तायं चित्तं निलीयितुं. विनेतब्बोति समुच्छेदविनयेन विनेतब्बो अरियमग्गाधिगन्तब्बो. तन्ति दिट्ठानुगतिआपज्जनं. अस्साति जनताय. अपगच्छतीति सत्थु सन्तिकतो अपेति. सूति निपातमत्तं.

पदेसेनाति एकदेसेन. सह पदेसेनाति सपदेसो. स्वायं सपदेसो यस्मा वेदनावसेनेव पाळियं आगतो, तस्मा परमत्थधम्मकोट्ठासे वेदना अनवसेसतो लब्भति, ते गण्हन्तो ‘‘खन्धपदेसो’’तिआदिमाह. तं सब्बन्ति खन्धपदेसादिकं सब्बम्पि. ‘‘सम्मसन्तो’’ति पदस्स अत्थदस्सनवसेन ‘‘पच्चवेक्खन्तो’’ति आह. पच्चवेक्खणा इध सम्मसनं नाम, न विपस्सना. विपस्सनासम्मसनं पन भगवतो ¶ विसाखपुण्णमायं एव निप्फन्नं, तस्मा भगवतो अञ्ञभूमिकापि वेदना अञ्ञभूमिकानं सत्तानं विरुद्धा उप्पज्जतेवाति वुत्तं ‘‘याव भवग्गा पवत्ता सुखा वेदना’’ति. सब्बाकारेनाति सरूपतो समुदयतो अत्थङ्गमतो अस्सादादितोति सब्बाकारेन. परिग्गण्हन्तो उपपरिक्खन्तो.

निप्पदेसानेव ¶ अनवसेसानेव. इन्द्रियसतिपट्ठानपदेसो सुविञ्ञेय्योति अनुद्धतो. अस्साति भगवतो. ठानेति तस्मिं तस्मिं पच्चवेक्खितब्बसङ्खाते ओकासे. सा सा च विहारसमापत्तीति खन्धवसेन आयतनादिवसेन च पवत्तित्वा तेसं एकदेसभूतं वेदनंयेव परिग्गहेत्वा तं सम्मसित्वा अनुक्कमेन समापन्ना झानसमापत्ति फलसमापत्ति च. फलसमापत्ति हि तथा सम्मसित्वा पुनप्पुनं समापज्जनवसेन अत्थतो अभिन्नापि अधिट्ठानभूतधम्मभेदेन भिन्ना विय वुच्चति, यतो चतुवीसतिकोटिसतसहस्सभेदा देवसिकं वळञ्जनसमापत्तियो अट्ठकथायं वुत्ता. कामं अञ्ञधम्मवसेनपि जाता एव, वेदनावसेन पनेत्थ अभिनिवेसो कतो वेदनानुभावेन जाता. कस्मा एवं जाताति? बुद्धानं ञाणपदस्स अन्तरविभागत्ता. तथा हि भगवा सकलम्पि अड्ढमासं वेदनावसेनेव सम्मसनं पवत्तेति, तदनुसारेन च ता विहारसमापत्तियो समापज्जि. तयिदं अच्छरियं अनञ्ञसाधारणं भिक्खू पवेदेन्तो सत्था – ‘‘येन स्वाह’’न्तिआदिमवोच.

अकुसलावाति पाणातिपात-अदिन्नादान-कामेसुमिच्छाचार-मुसावाद-पिसुणवाचासम्फप्पलाप-अभिज्झा-ब्यापादवसेन तंतंमिच्छादस्सनवसेन च अकुसला वेदना एव होति. ब्रह्मलोकादीसु उप्पज्जित्वा तत्थ निच्चा धुवा भविस्सामाति एवं दिट्ठिं उपनिस्सायाति योजेतब्बं. देवकुलादीसु देवपूजत्थं, सब्बजनपरिभोगत्थं वा मालावच्छं रोपेन्ति. वधबन्धनादीनीति आदि-सद्देन अदिन्नादान-मिच्छाचार-मुसावाद-पिसुणवाचा-सम्फप्पलापादीनं सङ्गहो दट्ठब्बो. दिट्ठधम्मविपाकस्स अपचुरत्ता अपाकटत्ता च ‘‘भवन्तरगतान’’न्ति वुत्तं.

इति नेसन्ति एत्थ इति-सद्दो आदिअत्थो, पकारत्थो वा. तेन यथा फरुसवाचावसेन, एवं तदञ्ञेसम्पि अकुसलकम्मानं वसेन सम्मादिट्ठिपच्चया ¶ अकुसलवेदनाप्पवत्ति यथारहं नीहरित्वा वत्तब्बा. एसेव नयोति इमिना यथा मिच्छादिट्ठिपच्चया सम्मादिट्ठिपच्चया च कुसलाकुसलविपाकवेदना सहजातकोटिया उपनिस्सयकोटिया च वसेन यथारहं योजेत्वा दस्सिता, एवं मिच्छासङ्कप्पपच्चयादीसुपि यथारहं योजेत्वा दस्सेतब्बाति इममत्थं अतिदिसति. छन्दपच्चयाति एत्थ तण्हाछन्दसहितो कत्तुकामताछन्दो अधिप्पेतोति आह ‘‘छन्दपच्चयातिआदीसु पन छन्दपच्चया अट्ठलोभसहगतचित्तसम्पयुत्ता वेदना वेदितब्बा’’ति. वितक्कपच्चयाति एत्थ अप्पनाप्पत्तोव वितक्को अधिप्पेतोति वुत्तं ‘‘वितक्कपच्चया पठमज्झानवेदनावा’’ति. वितक्कपच्चया पठमज्झानवेदनाय गहितत्ता ‘‘ठपेत्वा पठमज्झान’’न्ति. उपरि तिस्सो रूपावचरा, हेट्ठा तिस्सो अरूपावचरा एवं सेसा छ सञ्ञासमापत्तिवेदना.

तिण्णन्ति ¶ छन्दवितक्कसञ्ञानं. अवूपसमेति पटिपक्खेन अवूपसमिते. तिण्णञ्हि तेसं सहभावेन पच्चयता अट्ठलोभसहगतचित्तेसु एव. तत्थ यं वत्तब्बं तं वुत्तमेव. छन्दमत्तस्साति तेसु तीसु छन्दमत्तस्स. वूपसमे पठमज्झानवेदनाव अप्पनाप्पत्तस्स अधिप्पेतत्ता. छन्दवितक्कानं वूपसमे दुतियज्झानादिवेदना अधिप्पेता सञ्ञाय अवूपसन्तत्ता. दुतियज्झानादिवेदनागहणेन हि सब्बा सञ्ञासमापत्तियो च गहिताव होन्ति. तिण्णम्पि वूपसमेति छन्दवितक्कसञ्ञानं वूपसमे नेवसञ्ञानासञ्ञायतनवेदना अधिप्पेता. भवग्गप्पत्तसञ्ञा हि वूपसमन्ति छन्दसङ्कप्पानं अच्चन्तसुखुमभावप्पत्तिया. हेट्ठा ‘‘सम्मादिट्ठिपच्चया’’ति एत्थ सम्मादिट्ठिग्गहणेन हेट्ठिममग्गसम्मादिट्ठिपि गहिताव होतीति आह – ‘‘अप्पत्तस्स पत्तियाति अरहत्तफलस्स पत्तत्थाया’’ति. अथ वा हेट्ठिममग्गाधिगमेन विना अग्गमग्गो नत्थीति हेट्ठिममग्गाधिगमं अत्थापन्नं कत्वा ‘‘अरहत्तफलस्स पत्तत्थाया’’ति वुत्तं. आयमेति फलेन मिस्सितो होति एतेनाति आयामो, सम्मावायामोति आह ‘‘अत्थि आयामन्ति अत्थि वीरिय’’न्ति. तस्स वीरियारम्भस्साति अञ्ञाधिगमकारणस्स सम्मावायामस्स वसेन. पाळियं ठान-सद्दो कारणपरियायोति आह – ‘‘अरहत्तफलस्स कारणे’’ति. तप्पच्चयाति एत्थ तं-सद्देन ‘‘ठाने’’ति वुत्तकारणमेव पच्चामट्ठन्ति आह – ‘‘अरहत्तस्स ठानपच्चया’’ति. चतुमग्गसहजाताति एतेन ‘‘अरहत्तफलस्स पत्तत्थाया’’ति ¶ एत्थ हेट्ठिममग्गानं अत्थापत्तिवसेन गहितभावमेव जोतेति. केचि पन ‘‘चतुमग्गसहजाताति वत्वा निब्बत्तितलोकुत्तरवेदनाति भूतकथनं विसेसनं. निब्बत्तितलोकुत्तरवेदनाति पठमं अपेक्खितब्बं, पच्छा चतुमग्गसहजाता’’ति वदन्ति.

पठमविहारसुत्तवण्णना निट्ठिता.

२. दुतियविहारसुत्तवण्णना

१२. मिच्छादिट्ठि वूपसमति सब्बसो पहीयति एतेनाति मिच्छादिट्ठिवूपसमो. ‘‘मिच्छादिट्ठिवूपसमो नाम सम्मादिट्ठि. भवन्तरे उप्पज्जन्तो अतिदूरेति मञ्ञमानो विपाकवेदनं न गण्हाती’’ति अट्ठकथायं वुत्तं. ‘‘इमिना नयेना’’ति अतिदिसित्वापि तमत्थं पाकटतरं कातुं ‘‘यस्स यस्सा’’तिआदिं वत्वा एव सामञ्ञवसेन वुत्तमत्थं पच्छिमेसु तीसु पदेसु सरूपतोव दस्सेतुं ‘‘छन्दवूपसमपच्चया’’तिआदिमाह, तं सुविञ्ञेय्यमेव. वुत्तत्थानेव अनन्तरसुत्ते.

दुतियविहारसुत्तवण्णना निट्ठिता.

३-७. सेक्खसुत्तादिवण्णना

१३-१७. तिस्सन्नम्पि ¶ सिक्खानं सिक्खनं सीलं एतस्साति सिक्खनसीलो. सिक्खतीतिपि वा सेक्खो. वुत्तञ्हेतं ‘‘सिक्खतीति खो, भिक्खवे, तस्मा सेक्खोति वुच्चति. किञ्च सिक्खति? अधिसीलम्पि सिक्खती’’तिआदि (अ. नि. ३.८६). तीहि फलेहि हेट्ठा. सापि चतुत्थमग्गेन सद्धिं उप्पन्नसिक्खापि. मग्गक्खणे हि सिक्खाकिच्चं न निट्ठितं विप्पकतभावतो, फलक्खणे पन निट्ठितं नाम. उत्तानत्थानेव हेट्ठा वुत्तनयत्ता.

सेक्खसुत्तादिवण्णना निट्ठिता.

विहारवग्गवण्णना निट्ठिता.

३. मिच्छत्तवग्गवण्णना

२१-३०. मिच्छासभावन्ति ¶ अयाथावसभावं अनिय्यानिकसभावं. सम्मासभावन्ति याथावसभावं निय्यानिकसभावं. मिच्छापटिपत्ताधिकरणहेतूति एत्थ अधि-सद्दो अनत्थकोति आह – ‘‘मिच्छापटिपत्तिकरणहेतू’’ति. ञायति पटिविद्धवसेन निब्बानं गच्छतीति ञायो. सो एव तंसमङ्गीनं वट्टदुक्खपाततो धारणट्ठेन धम्मोति आह – ‘‘ञायं धम्मन्ति अरियमग्गधम्म’’न्ति. ञाणस्स मिच्छासभावो नाम नत्थीति विञ्ञाणमेवेत्थ पच्चवेक्खणवसेन पवत्तं ञाण-सद्देन वुच्चतीति आह ‘‘मिच्छाविञ्ञाणो’’ति. मिच्छापच्चवेक्खणोति किञ्चि पापं कत्वा ‘‘अहो मया कतं सुकत’’न्ति एवं पवत्तो मिच्छापच्चवेक्खणो. गोसीलगोवतादिपूरणं मुत्तीति एवं गण्हतो मिच्छाविमुत्ति नाम. मिच्छापटिपदादीहि विवट्टन्ति एवं वट्टविवट्टं कथितं. पुग्गलो पुच्छितोति निगमितो च ‘‘अयं वुच्चति, भिक्खवे, असप्पुरिसो’’तिआदिना. किञ्चापि ‘‘मिच्छादिट्ठिको होती’’तिआदिना पुग्गलोव निद्दिट्ठो, तथापि पुग्गलसीसेनायं धम्मदेसनाति आह ‘‘धम्मो विभत्तो’’ति. तेनेवाह ‘‘धम्मेन पुग्गलो दस्सितो’’ति. धम्मेनाति मिच्छादिट्ठिआदिकेन धम्मेन. कल्याणपुथुज्जनतो पट्ठाय सब्बसो सप्पुरिसा नाम, खीणासवो सप्पुरिसतरो. सुप्पवत्तनियोति सुखेन पवत्तेतुं सक्कुणेय्यो. धावतीति गच्छति. पच्चयुप्पन्नेन उपेच्च निस्सितब्बतो उपनिसा, पच्चयो, एकस्स स-कारस्स लोपं कत्वा वाति आह – ‘‘सउपनिसं सपच्चय’’न्ति. परिकरणतो परिक्खारो, परिवारोति ¶ आह – ‘‘सपरिक्खारं सपरिवार’’न्ति. सहजातवसेन उपनिस्सयवसेन च सपच्चयता किच्चसाधने निप्फादने सहायभावूपगमने च सपरिवारता दट्ठब्बा.

मिच्छत्तवग्गवण्णना निट्ठिता.

४. पटिपत्तिवग्गवण्णना

३१-४०. अयाथावपटिपत्ति, न यथापटिपत्ति, हेतुम्हिपि फलेपि अयाथाववत्थुसाधनतो. एकं सुत्तं धम्मवसेन कथितं पटिपत्तिवसेन. एकं सुत्तं पुग्गलवसेन कथितं पटिपन्नकवसेन. संसारमहोघस्स परतीरभावतो यो नं अधिगच्छति, तं पारेति गमेतीति पारं, निब्बानं, तब्बिधुरताय ¶ नत्थि एत्थ पारन्ति अपारं, संसारोति वुत्तं – ‘‘अपारापारन्ति वट्टतो निब्बान’’न्ति. पारङ्गताति असेक्खे सन्धाय. येपि गच्छन्तीति सेक्खे. येपि गमिस्सन्तीति कल्याणपुथुज्जने. पारगामिनोति एत्थ कित-सद्दो तिकालवाचीति एवं वुत्तं.

तीरन्ति ओरिमतीरमाह. तेन वुत्तं ‘‘वट्टमेव अनुधावती’’ति. एकन्तकाळकत्ता चित्तस्स अपभस्सरभावकरणतो कण्हाभिजातिहेतुतो च वुत्तं ‘‘कण्हन्ति अकुसलधम्म’’न्ति. वोदानभावतो चित्तस्स पभस्सरभावकरणतो सुक्काभिजातिहेतुतो च वुत्तं – ‘‘सुक्कन्ति कुसलधम्म’’न्ति. किलेसमार-अभिसङ्खारमार-मच्चुमारानं पवत्तिट्ठानताय ओकं वुच्चति वट्टं, तब्बिधुरताय अनोकन्ति निब्बानन्ति आह – ‘‘ओका अनोकन्ति वट्टतो निब्बान’’न्ति.

परमत्थतो समणा वुच्चन्ति अरिया, समणानं भावो सामञ्ञं, अरियमग्गो, तेन अरणीयतो उपगन्तब्बतो सामञ्ञत्थो निब्बानन्ति आह – ‘‘सामञ्ञत्थन्ति निब्बानं, तं ही’’तिआदि. ब्रह्मञ्ञत्थन्ति एत्थापि इमिना नयेन अत्थो वेदितब्बो. ब्रह्मञ्ञेन अरियमग्गेन. रागक्खयोति एत्थ इति-सद्दो आदिसद्दत्थो. तेन ‘‘दोसक्खयो मोहक्खयो’’ति पदद्वयं सङ्गण्हाति. वट्टतियेवाति वदन्ति ‘‘रागक्खयो’’ति. परियायेन हि अरहत्तस्स वत्तब्बत्ताति.

पटिपत्तिवग्गवण्णना निट्ठिता.

५. अञ्ञतित्थियपेय्यालवग्गवण्णना

४१-४८. अपरापरं ¶ परिवत्तमानेन वत्तसम्पन्नेन संसारद्धानपरिञ्ञावसेनेव निब्बानस्स पत्तब्बत्ता वुत्तं – ‘‘निब्बानं पत्वा परिञ्ञातं नाम होती’’ति. निब्बानं पत्वाति निब्बानप्पत्तिहेतु. हेतुअत्थो हि अयं त्वा-सद्दो यथा – ‘‘घतं पिवित्वा बलं होति, सीहं दिस्वा भयं होती’’ति. तस्माति यस्मा अपरिञ्ञेय्यपरिजाननकिच्चेन निब्बानस्स पत्तिया अद्धानपरिञ्ञासिद्धि ञायति, तस्मा उपचारवसेन निब्बानं ‘‘अद्धानपरिञ्ञा’’ति वुच्चति यथा ‘‘हिमसन्ति सूरियं उग्गमेती’’ति. विज्जाविमुत्तिफलसच्छिकिरियत्थन्ति एत्थ विज्जाति अग्गमग्गविज्जा. विमुत्तीति अग्गमग्गसमाधि अधिप्पेतो ¶ . तेसं फलं अञ्ञाति आह – ‘‘विज्जाविमुत्तिफलेन अरहत्तं कथित’’न्ति. याथावतो जाननतो पच्चक्खतो दस्सनतो च ञाणदस्सनन्ति इध फलनिब्बानपच्चवेक्खणा अधिप्पेताति आह – ‘‘ञाणदस्सनेन पच्चवेक्खणा कथिता’’ति. सेसेहीति राग-विराग-संयोजनप्पहान-अनुसयसमुग्घात-अद्धानपरिञ्ञा- आसवक्खय-विज्जा-विमुत्ति-फलसच्छिकिरिया-ञाणदस्सन-अनुपादापरिनिब्बानपदेहि.

अञ्ञतित्थियपेय्यालवग्गवण्णना निट्ठिता.

६. सूरियपेय्यालवग्गवण्णना

४९-६२. यथा अरुणुग्गं सूरियुग्गमनस्स एकन्तिकं पुब्बनिमित्तं, एवं कल्याणमित्तता अरियमग्गपातुभावस्साति सदिसूपमा अरुणुग्गं कल्याणमित्तताय. कल्याणमित्तोति चेत्थ अरियो, अरियमग्गो वा दट्ठब्बो सूरियपातुभावो विय तेन विधूपनीयन्धकारविधमनतो. कुसलकत्तुकम्यताछन्दो छन्दसम्पदा इतरछन्दतो सम्पन्नत्ता. कारापकअप्पमादस्साति सच्चपटिवेधस्स कारापकस्स. एवं सब्बत्थेव सम्पदासद्दा विसेसाधिगमहेतुताय वेदितब्बा. अञ्ञेनपि आकारेनाति ‘‘विवेकनिस्सित’’न्तिआदिआकारतो अञ्ञेन ‘‘रागविनयपरियोसान’’न्तिआदिना आकारेन.

सूरियपेय्यालवग्गवण्णना निट्ठिता.

७. एकधम्मपेय्यालवग्गादिवण्णना

६३-१३८. तथा ¶ तथा वुत्ते बुज्झनकानं अज्झासयवसेन कथितो, तस्मा ‘‘वुत्तो एव अत्थो, कस्मा पुन वुत्तो’’ति न चोदेतब्बं.

एकधम्मपेय्यालवग्गादिवण्णना निट्ठिता.

८. अप्पमादपेय्यालवग्गो

१. तथागतसुत्तवण्णना

१३९. कारापकअप्पमादो ¶ नाम ‘‘इमे अकुसला धम्मा पहातब्बा, इमे कुसला धम्मा उप्पादेतब्बा’’ति वुत्तवज्जेतब्बवज्जनसम्पादेतब्बसम्पादनवसेन पवत्तो अप्पमादो. एसाति अप्पमादो. लोकियोव. न लोकुत्तरो. अयन्ति एसाति च अप्पमादमेव वदति. तेसन्ति चतुभूमकधम्मानं. पटिलाभकट्ठेनाति पटिलाभापनट्ठेन.

तथागतसुत्तवण्णना निट्ठिता.

२. पदसुत्तवण्णना

१४०. जङ्गलानन्ति जङ्गलवासीनं. जङ्गल-सद्दो चेत्थ थद्धभावसामञ्ञेन पथवीपरियायो, न अनुपट्ठानविदूरदेसवाची. तेनाह – ‘‘पथवीतलवासीन’’न्ति. पदानं वुच्चमानत्ता ‘‘सपादकपाणान’’न्ति विसेसेत्वा वुत्तं. समोधानन्ति अन्तोगधभावं. तेनाह – ‘‘ओधानं उपक्खेप’’न्ति, उपनेत्वा पक्खिपितब्बन्ति अत्थो.

पदसुत्तवण्णना निट्ठिता.

३-१०. कूटसुत्तादिवण्णना

१४१-१४८. वस्सिकाय पुप्फं वस्सिकं यथा ‘‘आमलकिया फलं आमलक’’न्ति. महातलस्मिन्ति ¶ उपरिपासादे. ‘‘यानि कानिची’’ति पदेहि इतरानि समानाधिकरणानि भवितुं युत्तानीति ‘‘पच्चत्ते सामिवचन’’न्ति वत्वा तथा विभत्तिविपरिणामो कतो. ‘‘तन्तावुतान’’न्ति पदं निद्धारणे सामिवचनन्ति तत्थ ‘‘वत्थानी’’ति वचनसेसेन अत्थं दस्सेतुं ‘‘अथ वा’’तिआदि वुत्तं.

कूटसुत्तादिवण्णना निट्ठिता.

अप्पमादवग्गवण्णना निट्ठिता.

९. बलकरणीयवग्गो

१. बलसुत्तवण्णना

१४९. कम्मानियेव ¶ कम्मन्ता यथा सुत्तन्ता. अरियं अट्ठङ्गिकं मग्गन्ति एत्थ नानन्तरियकताय विपस्सनापि गहिता एव होतीति वुत्तं ‘‘सहविपस्सन’’न्ति.

२. बीजसुत्तवण्णना

१५०. पञ्चविधम्पि समूहट्ठेन बीजगामो नाम. तदेवाति मूलबीजादि एव. सम्पन्नन्ति सहजातमूलवन्तं. नीलभावतो पट्ठायाति नीलभावापत्तितो पट्ठाय.

३. नागसुत्तवण्णना

१५१. बलं गाहेन्तीति अत्तनो सरीरबलं गाहेन्ति. तं पन नागानं बलप्पत्ति एवाति आह – ‘‘बलं गण्हन्ती’’ति. सम्भेज्जमुखद्वारन्ति महासमुद्देन सम्भेदगतमहानदीनं मुखद्वारं. नागा कायं वड्ढेन्तीतिआदि यस्मा च भगवता उपमावसेन आभतं, तस्मा एवमेव खोति एत्थातिआदिना उपमं संसन्दति. आगतेसूतिआदीसु तीसु पदेसु भावेनभावलक्खणे.

५. कुम्भसुत्तवण्णना

१५३. न ¶ पतिआवमतीति च निकुज्जितभावेन उदकवमनो घटो, न तं पुन मुखेन गण्हाति. तेनाह ‘‘न अन्तो पवेसेती’’ति.

७. आकाससुत्तवण्णना

१५५. तेनेतं वुत्तन्ति तेन अरियमग्गस्स इज्झनेन एतेसं सब्बेसं बोधिपक्खियधम्मानं इज्झनं वुत्तं.

८-९-१०. पठममेघसुत्तादिवण्णना

१५६-१५८. पंसुरजोजल्लन्ति भूमिरेणुसहजातमलं. वाणिजकोपमेति वाणिजकोपमपठमसुत्ते चापि.

११-१२. आगन्तुकसुत्तादिवण्णना

१५९-१६०. सहविपस्सनस्स ¶ अरियमग्गस्स भावनाय इज्झनेन एतं अभिञ्ञापरिञ्ञेय्यादिधम्मानं अभिञ्ञापरिजाननादीनं इज्झनं वुत्तं खत्तियादीनं विसयआदिकं करोन्तस्स कथाय सज्जितत्ता.

बलकरणीयवग्गवण्णना निट्ठिता.

१०. एसनावग्गो

१. एसनासुत्तवण्णना

१६१. कामानन्ति वत्थुकामकिलेसकामानं. किलेसकामोपि हि कामितन्ति परिकप्पितेन विधिना च अधिकरागेहि एसनीयो. भवानन्ति तिण्णं गतीनं. दिट्ठिगतिकपरिकप्पितस्स ¶ ब्रह्मचरियस्स निमित्तभावतो मिच्छादिट्ठि ‘‘ब्रह्मचरिय’’न्ति अधिप्पेता.

२-११. विधासुत्तादिवण्णना

१६२-१७१. सेय्योहमस्मीतिआदिना तंतंविभागेन धीयन्ति विधीयन्तीति विधा, मानकोट्ठासा, मानट्ठपना वा. नीहनन्तीति विबाधेन्ति.

एसनावग्गवण्णना निट्ठिता.

११. ओघवग्गो

१-२. ओघसुत्तादिवण्णना

१७२-१७३. वट्टे ओहनन्ति ओसीदापेन्तीति ओघा. रूपारूपभवेति रूपभवे च अरूपभवे च रूपारूपतण्होपनिस्सया रूपारूपावचरकम्मनिब्बत्ता खन्धा. योजनट्ठेन योगो.

३-४. उपादानसुत्तादिवण्णना

१७४-१७५. कामनवसेन उपादियनतो कामुपादानं. तेनाह ‘‘कामग्गहण’’न्ति. नामकायस्साति वेदनादीनं चतुन्नं अरूपक्खन्धानं. घटनपबन्धनकिलेसोति ¶ हेतुना फलस्स कम्मवट्टस्स विपाकवट्टेन दुक्खप्पबन्धसञ्ञितस्स घटनस्स सम्बज्झनस्स निब्बत्तककिलेसो. अन्तग्गाहिकदिट्ठि सस्सतुच्छेदगाहो.

उपादानसुत्तादिवण्णना निट्ठिता.

५-१०. अनुसयसुत्तादिवण्णना

१७६-१८१. थामगतट्ठेनाति सत्तसन्ताने थिरभावूपगमनभावेन. थामगतन्ति च अञ्ञेहि असाधारणो कामरागादीनंयेव आवेणिको सभावो दट्ठब्बो. कामरागोवाति कामरागो ¶ एव अप्पहीनो. सो सति पच्चयलाभे उप्पज्जनारहताय सन्ताने अनुसेतीति अनुसयो. सेसेसुपीति पटिघानुसयादीसु. ओरम्भागो वुच्चति कामधातु रूपारूपभावतो हेट्ठाभूतत्ता. तत्थ पवत्तिया पच्चयभावतो ओरम्भागियानि यथा ‘‘पच्छियो गोदुहको’’ति. संयोजेन्तीति संयोजनानि, हेट्ठा विय अत्थो वत्तब्बो. उद्धम्भागो महग्गतभागो, तस्स हितानीति सब्बं हेट्ठा वुत्तनयत्ता न वुत्तन्ति अधिप्पायो.

अनुसयसुत्तादिवण्णना निट्ठिता.

ओघवग्गवण्णना निट्ठिता.

मग्गसंयुत्तवण्णना निट्ठिता.

२. बोज्झङ्गसंयुत्तं

१. पब्बतवग्गो

१.हिमवन्तसुत्तवण्णना

१८२. बुज्झति ¶ ¶ चतुसच्चं अरियसावको एतायाति बोधं, धम्मसामग्गी, अरियसावको पन चतुसच्चं बुज्झतीति बोधि. अङ्गाति कारणा. याय धम्मसामग्गियाति सम्बन्धो. तण्हावसेन पतिट्ठानं, दिट्ठिवसेन आयूहना. सस्सतदिट्ठिया पतिट्ठानं, उच्छेददिट्ठिया आयूहना. लीनवसेन पतिट्ठानं, उद्धच्चवसेन आयूहना. कामसुखानुयोगवसेन पतिट्ठानं, अत्तकिलमथानुयोगवसेन आयूहना. ओघतरणसुत्तवण्णनायं (सं. नि. १.१) –

‘‘किलेसवसेन पतिट्ठानं, अभिसङ्खारवसेन आयूहना. तण्हादिट्ठीहि पतिट्ठानं, अवसेसकिलेसाभिसङ्खारेहि आयूहना, सब्बाकुसलाभिसङ्खारवसेन पतिट्ठानं, सब्बलोकियकुसलाभिसङ्खारवसेन आयूहना’’ति –

वुत्तेसु पकारेसु इध अवुत्तानं वसेन वेदितब्बो. किलेससन्ताननिद्दाय उट्ठहतीति एतेन सिखापत्तविपस्सनासहगतानम्पि सतिआदीनं बोज्झङ्गभावं दस्सेति. चत्तारीतिआदिना मग्गफलेन सहगतानं. सत्तहि बोज्झङ्गेहि भावितेहि सच्चपटिवेधो होतीति कथमिदं जानितब्बन्ति चोदनं सन्धायाह ‘‘यथाहा’’तिआदि. झानङ्गमग्गङ्गादयो वियाति एतेन बोधिबोज्झङ्गसद्दानं समुदायावयवविसयतं दस्सेति. सेनङ्गरथङ्गादयो वियाति एतेन पुग्गलपञ्ञत्तिया अविज्जमानपञ्ञत्तिभावं दस्सेति.

बोधाय संवत्तन्तीति बोज्झङ्गाति वुत्तं ‘‘कारणत्थो अङ्गसद्दो’’ति. बुज्झतीति बोधि, बोधिया एव अङ्गाति बोज्झङ्गाति वुत्तं ‘‘बुज्झन्तीति बोज्झङ्गा’’ति. विपस्सनादीनं कारणानं बुज्झितब्बानं सच्चानं अनुरूपं पच्चक्खभावेन पटिमुखं अविपरीतं सम्मा बुज्झन्तीति एवं वत्थुविसेसदीपकेहि ¶ उपरिमग्गेहि अनुबुज्झन्तीतिआदिना वुत्तबोधिसद्देहि निप्पदेसेन वुत्तं ¶ ‘‘बुज्झनतासामञ्ञेन सङ्गण्हाती’’ति. एत्थ च लीनपतिट्ठान-कामसुखल्लिकानुयोग-उच्छेदाभिनिवेसानं धम्मविचय-वीरियपीतिपधान-धम्मसामग्गी पटिपक्खो. उद्धच्चायूहनअत्तकिलमथानुयोग-सस्सताभिनिवेसानं पस्सद्धिसमाधि-उपेक्खापधान-धम्मसामग्गी पटिपक्खो. सति पन उभयत्थापि इच्छितब्बा. तथा हि सा सब्बत्थिका वुत्ता.

सं-सद्दो पसंसायं. पुनदेव सुन्दरो च अत्थोपीति आह ‘‘पसत्थो सुन्दरो च बोज्झङ्गो’’ति. अभिनिब्बत्तेतीति अभिविसिट्ठभावेन निब्बत्तेति सविसेसभावं वदति. ‘‘एके वण्णयन्ती’’ति वत्वा तत्थ यथावुत्तविवेकत्तयतो अञ्ञं विवेकद्वयं उद्धरित्वा दस्सेतुं ‘‘ते ही’’तिआदि वुत्तं. तत्थ झानक्खणे ताव किच्चतो विक्खम्भनविवेकनिस्सितं, विपस्सनाक्खणे अज्झासयतो पटिप्पस्सद्धिविवेकनिस्सितं भावेतीति. तेनाह – ‘‘अनुत्तरं विमोक्खं उपसम्पज्ज विहरिस्सामी’’ति. तत्थ तत्थ निच्छयताय कसिणज्झानग्गहणेन अनुप्पादानम्पि गहणं दट्ठब्बं.

हिमवन्तसुत्तवण्णना निट्ठिता.

२. कायसुत्तवण्णना

१८३. तिट्ठन्ति एतेनाति ठिति, कारणं. कम्मउतुचित्ताहारसञ्ञितो चतुब्बिधो पच्चयो ठिति एतस्साति पच्चयट्ठितिको. आहारपच्चयसद्दा हि एकत्था. सुभम्पीति कामच्छन्दो पच्चयो, असुभे सुभाकारेन पवत्तनतो सुभन्ति वुच्चति. तेन कारणेन पवत्तनकस्स अञ्ञस्स कामच्छन्दस्स निमित्तत्ता सुभनिमित्तन्ति. सुभस्साति यथावुत्तस्स सुभस्स. आरम्मणम्पीति सुभाकारेन, इट्ठाकारेन वा गय्हमानं रूपादिआरम्मणम्पि सुभनिमित्तं वुत्ताकारेन. अनुपायमनसिकारोति आकङ्खितस्स हितसुखस्स अनुपायभूतो मनसिकारो, ततो एव उप्पथमनसिकारोति अयोनिसोमनसिकारो. तस्मिन्ति यथानिद्धारिते कामच्छन्दभूते तदारम्मणभूते च दुविधेपि सुभनिमित्ते. अट्ठकथायं पन ‘‘सुभारम्मणे’’इच्चेव वुत्तं. अत्थि, भिक्खवे, सुभनिमित्तन्तिआदीति आदि-सद्देन कामच्छन्दनीवरणस्स आहारदस्सनपाळि उत्तानाति कत्वा वुत्तं – ‘‘एवं सब्बनीवरणेसु योजना वेदितब्बा’’ति.

पटिघोपि ¶ पटिघनिमित्तं पुरिमुप्पन्नस्स पच्छा उप्पज्जनकस्स निमित्तभावतो. पटिघारम्मणं नाम एकूनवीसति आघातवत्थुभूता सत्तसङ्खारा. अरतीति पन्तसेनासनादीसु अरमणं ¶ . उक्कण्ठिताति उक्कण्ठभावो. पन्तेसूति दूरेसु, विवित्तेसु वा. अधिकुसलेसूति समथविपस्सनाधम्मेसु. अरति रतिपटिपक्खो. अरतिताति अरमणाकारो. अनभिरतीति अनभिरतभावो. अनभिरमणाति अनभिरमणाकारो. उक्कण्ठिताति उक्कण्ठनाकारो. परितस्सिताति उक्कण्ठनवसेनेव परितस्सना.

आगन्तुकं, न सभावसिद्धं. कायालसियन्ति नामकाये अलसभावो. सम्मोहविनोदनियं पन ‘‘तन्दीति जातिआलसिय’’न्ति वुत्तं. वदतीति एतेन अतिसीतादिपच्चया सङ्कोचापत्तिं दस्सेति. यं सन्धाय वुत्तं किलेसवत्थुविभङ्गे (विभ. अट्ठ. ८५७). तन्दीति जातिआलसियं. तन्दियनाति तन्दियनाकारो. तन्दिमनकताति तन्दिया अभिभूतचित्तता. अलसस्स भावो आलस्यं. आलस्यायनाकारो आलस्यायना. आलस्यायितस्स भावो आलस्यायितत्तं. इति सब्बेहिपि इमेहि पदेहि किलेसवसेन कायालसियं कथितं.

किलेसवसेनाति सम्मोहवसेन. कायविनमनाति कायस्स विरूपतो नमना. जम्भनाति फन्दना. पुनप्पुनं जम्भना विजम्भना. आनमनाति पुरतो नमना. विनमनाति पच्छतो नमना. सन्नमनाति समन्ततो नमना. पणमनाति यथा हि तन्ततो उट्ठितपेसकारो किञ्चिदेव उपरिट्ठितं गहेत्वा उजुं कायं उस्सापेति, एवं कायस्स उद्धं ठपना. ब्याधियकन्ति उप्पन्नब्याधिता. इति सब्बेहिपि इमेहि पदेहि किलेसवसेन कायफन्दनमेव कथितं (विभ. अट्ठ. ८५८).

भत्तपरिळाहोति भत्तवसेन परिळाहुप्पत्ति. भुत्ताविस्साति भुत्तवतो. भत्तमुच्छाति भत्तगेलञ्ञं. अतिभुत्तपच्चया हि मुच्छापत्तो विय होति. भत्तकिलमथोति भुत्तपच्चया किलन्तभावो. भत्तपरिळाहोति भत्तदरथो. कुच्छिपूरं भुत्तवतो हि परिळाहुप्पत्तिया उपहतिन्द्रियो विय होति, कायो खिज्जति. कायदुट्ठुल्लन्ति भुत्तभत्तं निस्साय कायस्स अकम्मञ्ञता.

चित्तस्स ¶ लीयनाकारोति आरम्मणे चित्तस्स सङ्कोचप्पत्ति. चित्तस्स अकल्यताति चित्तस्स गिलानभावो. गिलानोति अकल्लको वुच्चति. तथा चाह ‘‘नाहं, भन्ते, अकल्लको’’ति. अकम्मञ्ञताति चित्तगेलञ्ञसङ्खातो अकम्मञ्ञनाकारो. ओलीयनाति ओलीयनाकारो. इरियापथिकम्पि चित्तं यस्स वसेन इरियापथं सन्धारेतुं असक्कोन्तो ओलीयति, तस्स तं आकारं सन्धाय वुत्तं ‘‘ओलीयना’’ति. दुतियपदं उपसग्गेन वड्ढितं. लीनन्ति अविप्फारिकताय ¶ सङ्कोचप्पत्तं. इतरे द्वे आकारनिद्देसा. थिनन्ति अविप्फारिकताय अनुस्साहना असङ्गहनसङ्गहनं. थियनाकारो थियना. थियितत्तन्ति थियितस्स आकारो, अविप्फारिकताति अत्थो.

चेतसो अवूपसमोति चित्तस्स अवूपसन्तता असन्निसिन्नभावो. तेनाह – ‘‘अवूपसन्ताकारो’’ति. अत्थतो पनेतन्ति स्वायं अवूपसन्ताकारो विक्खेपसभावत्ता विक्खेपहेतुताय च अत्थतो एतं उद्धच्चकुक्कुच्चमेव.

विचिकिच्छाय आरम्मणधम्मा नाम ‘‘बुद्धे कङ्खती’’तिआदिना आगतअट्ठकङ्खावत्थुभूता धम्मा. यस्मा विचिकिच्छा ब्यापादादयो विय अनु अनु उग्गहणपच्चया उप्पज्जति, तस्मा कङ्खाट्ठानीयं आरम्मणमेव दस्सितं ‘‘विचिकिच्छाय आरम्मणधम्मा’’ति. यस्मा पुरिमुप्पन्ना विचिकिच्छा पच्छा विचिकिच्छाय पच्चयो होति, तस्मा विचिकिच्छापि विचिकिच्छाट्ठानीयधम्मा वेदितब्बा. तत्रायं वचनत्थो – तिट्ठन्ति पवत्तन्ति एत्थाति ठानीया, विचिकिच्छा एव ठानीया विचिकिच्छाट्ठानीया. अट्ठकथायं पन आरम्मणस्सपि तत्थ विसेसपच्चयतं उपादाय ‘‘कामच्छन्दो विचिकिच्छाति इमे द्वे धम्मा आरम्मणेन कथिता’’ति वुत्तं. सुभनिमित्तस्स हि पच्चयभावमत्तं सन्धायेतं वुत्तं, तथापि यथा ‘‘पटिघम्पि पटिघनिमित्त’’न्ति कत्वा ‘‘ब्यापादो उपनिस्सयेन कथितो’’ति वुत्तं, एवं सुभम्पि सुभनिमित्तन्ति कत्वा कामच्छन्दो उपनिस्सयेन कथितोति सक्का विञ्ञातुं. सेसा थिनमिद्धउद्धच्चकुक्कुच्चानि. तत्थ थिनमिद्धं अञ्ञमञ्ञं सहजातादिवसेन पच्चयो, तथा उद्धच्चकुक्कुच्चन्ति. उभयेसम्पि उपनिस्सयकोटिया पच्चयभावे वत्तब्बमेव नत्थीति आह ‘‘सहजातेन च उपनिस्सयेन चा’’ति.

यस्मा ¶ सति नाम ‘‘चत्तारो सतिपट्ठाना’’तिआदिना तेसं तेसं धम्मानं अनुस्सरणवसेन वत्तति, तस्मा ते धम्मा सतिसम्बोज्झङ्गट्ठानीया नाम. लोकुत्तरधम्मे च अनुस्सवादिवसेन गहेत्वा तथा पवत्ततेव. तेन वुत्तं ‘‘सतिया’’तिआदि.

कोसल्लं वुच्चति पञ्ञा, ततो उप्पन्ना कोसल्लसम्भूता. अनवज्जसुखविपाकाति अनवज्जा हुत्वा सुखविपाका विपच्चनका. पदद्वयेन पच्चयतो सभावतो किच्चतो फलतो कुसलधम्मं दस्सेति. अकुसलनिद्देसेपि एसेव नयो. सावज्जाति गारय्हा. अनवज्जाति अगारय्हा. हीना लामका. पणीता सेट्ठा. कण्हा काळका असुद्धा. सुक्का ओदाता सुद्धा ¶ . पटिभाग-सद्दो पठमे विकप्पे सदिसकोट्ठासत्थो, दुतिये पटिपक्खकोट्ठासत्थो, ततिये निग्गहेतब्बपटिपक्खकोट्ठासत्थो दट्ठब्बो.

कुसलकिरियाय आदिकम्मभावेन पवत्तवीरियं धितिसभावताय धातूति वुत्तन्ति आह ‘‘आरम्भधातूति पठमारम्भवीरिय’’न्ति. लद्धासेवनं वीरियं बलप्पत्तं हुत्वा पटिपक्खं विधमतीति आह – ‘‘निक्कमधातूति कोसज्जतो निक्खन्तत्ता ततो बलवतर’’न्ति. अधिमत्ताधिमत्ततरानं पटिपक्खधम्मानं विधमनसमत्थं पटुपटुतरादिभावप्पत्तं होतीति आह – ‘‘परक्कमधातूति परं परं ठानं अक्कमनताय ततोपि बलवतर’’न्ति.

तिट्ठति पवत्तति एत्थाति ठानीया. आरम्मणधम्मा, पीतिसम्बोज्झङ्गस्स ठानीयाति पीतिसम्बोज्झङ्गट्ठानीयाति ‘‘पीतिया आरम्मणधम्मा’’ति वुत्तं. यस्मा अपरापरुप्पत्तिया पीतिपि तथा वत्तब्बतं लभतीति वुत्तं विसुद्धिमग्गे ‘‘पीतिया एव तं नाम’’न्ति. दरथपस्सद्धीति दरथो किलेसपरिळाहो, सो पस्सम्भति एतायाति दरथपस्सद्धि, कायपस्सद्धिया वेदनादिखन्धत्तयस्स विय रूपकायस्सपि पस्सम्भनं होति, चित्तपस्सद्धिया चित्तस्सेव पस्सम्भनं, ततो एवेत्थ भगवता लहुतादीनं विय दुविधता वुत्ता. तथा समाहिताकारं सल्लक्खेत्वा गय्हमानो समथोव समथनिमित्तं, तस्स आरम्मणभूतं पटिभागनिमित्तम्पि. विविधं अग्गं एतस्साति ब्यग्गो, विक्खेपो. तथा हि सो अनवट्ठानरसो भन्ततापच्चुपट्ठानो वुत्तो. एकग्गभावतो ब्यग्गपटिपक्खोति अब्यग्गो, समाधि, सो एव निमित्तन्ति पुब्बे विय वत्तब्बं. तेनाह ‘‘तस्सेव वेवचन’’न्ति.

यो ¶ आरम्मणे इट्ठानिट्ठाकारं अनादियित्वा गहेतब्बो मज्झत्ताकारो, यो च पुब्बे उपेक्खासम्बोज्झङ्गस्स भावनावसेन उप्पन्नो मज्झत्ताकारो, दुविधोपि सो उपेक्खाय आरम्मणधम्मोति अधिप्पेतोति आह – ‘‘अत्थतो पन मज्झत्ताकारो उपेक्खाट्ठानीया धम्माति वेदितब्बो’’ति. आरम्मणेन कथिता आरम्मणस्सेव तेसं विसेसपच्चयभावतो. सेसाति वीरियादयो चत्तारो धम्मा. तेसञ्हि उपनिस्सयोव सातिसयो इच्छितब्बोति.

कायसुत्तवण्णना निट्ठिता.

३. सीलसुत्तवण्णना

१८४. खीणासवस्स लोकुत्तरं सीलं नाम मग्गफलपरियापन्ना सम्मावाचाकम्मन्ताजीवा सीललक्खणप्पत्ता ¶ तदञ्ञे चेतनादयो. लोकियं पन किरियाब्याकतचित्तपरियापन्नं चारित्तसीलं, वारित्तसीलस्स पन सम्भवो एव नत्थि विरमणवसेन पवत्तिया अभावतो. ‘‘पुब्बभागसीलं लोकियसील’’न्ति केचि.

चक्खुदस्सनन्ति चक्खूहि दस्सनं. लक्खणस्स दस्सनन्ति सभावधम्मानं सङ्खतानं पच्चत्तलक्खणस्स ञातपरिञ्ञाय, अनिच्चादिसामञ्ञलक्खणस्स तीरणपरिञ्ञाय दस्सनं. पजहन्तोपि हि ते पहातब्बाकारतो पस्सति नाम. निब्बानस्स तथलक्खणं मग्गफलेहि दस्सनं, तं पन पटिविज्झनं. झानेन पथवीकसिणादीनं, अभिञ्ञाहि रूपानं दस्सनम्पि ञाणदस्सनमेव. चक्खुदस्सनं अधिप्पेतं सवनपयिरुपासनानं परतो गहितत्ता. पञ्हपयिरुपासनन्ति पञ्हपुच्छनवसेन पयिरुपासनं अञ्ञकम्मत्थाय उपसङ्कमनस्स केवलं उपसङ्कमनेनेव जोतितत्ता.

अरियानं अनुस्सति नाम गुणवसेन, तत्थापि लद्धओवादावज्जनमुखेन यथाभूतसीलादिगुणानुस्सरणन्ति दस्सेतुं ‘‘झानविपस्सना’’तिआदि वुत्तं. अञ्ञेसंयेव सन्तिकेति अरियेहि अञ्ञेसं सासनिकानंयेव सन्तिके. तेनाह – ‘‘अनुपब्बज्जा नामा’’ति. अञ्ञेसूति सासनिकेहि अञ्ञेसु तापसपरिब्बाजकादीसु. तत्थ हि पब्बज्जा अरियानं अनुपब्बज्जा नाम न होतीति वुत्तं.

सतसहस्समत्ता ¶ अहेसुं समन्तपासादिकत्ता महाथेरस्स. लङ्कादीपेति निस्सयसीसेन निस्सितसल्लक्खणं. न हि पब्बज्जा दीपपटिलद्धा, अथ खो दीपनिवासिआचरियपटिलद्धा. महिन्द…पे… पब्बजन्ति नाम तस्स परिवारताय पब्बज्जायाति.

सरतीति तं ओवादानुसासनिधम्मं चिन्तेति चित्ते करोति. वितक्काहतं करोतीति पुनप्पुनं परिवितक्कनेन तदत्थं वितक्कनिप्फादितं करोति. आरद्धो होतीति सम्पादितो होति. तं पन सम्पादनं पारिपूरि एवाति आह ‘‘परिपुण्णो होती’’ति. तत्थाति यथावुत्ते धम्मे. ञाणचारवसेनाति ञाणस्स पवत्तनवसेन. तेसं तेसं धम्मानन्ति तस्मिं तस्मिं ओवादधम्मे आगतानं रूपारूपधम्मानं. लक्खणन्ति विसेसलक्खणं सामञ्ञलक्खणञ्च. पविचिनतीति ‘‘इदं रूपं एत्तकं रूप’’न्तिआदिना विचयं आपज्जति. ञाणञ्च रोपेतीति ‘‘अनिच्चं चलं पलोकं पभङ्गू’’तिआदिना ञाणं पवत्तेति. वीमंसनं…पे… आपज्जतीति रूपसत्तकारूपसत्तकक्कमेन ¶ विपस्सनं पच्चक्खतो विय अनिच्चतादीनं दस्सनं सम्मसनं आपज्जति.

उभयम्पेतन्ति फलानिसंसाति वुत्तद्वयं. अत्थतो एकं परियायसद्दत्ता. पटिकच्चाति पगेव. मरणकालेति मरणकालसमीपे. समीपत्थे हि इदं भुम्मन्ति आह ‘‘मरणस्स आसन्नकाले’’ति.

सो तिविधो होति ञाणस्स तिक्खमज्झमुदुभावेन. तेनाह ‘‘कप्पसहस्सायुकेसू’’तिआदि. उपहच्चपरिनिब्बायी नाम आयुवेमज्झं अतिक्कमित्वा परिनिब्बायनतो. यत्थ कत्थचीति अविहादीसु यत्थ कत्थचि. सप्पयोगेनाति विपस्सनाञाणसङ्खारसङ्खातेन पयोगेन, सह विपस्सनापयोगेनाति अत्थो. सुद्धावासभूमियं उद्धंयेव मग्गसोतो एतस्साति उद्धंसोतो. पटिसन्धिवसेन अकनिट्ठभवं गच्छतीति अकनिट्ठगामी.

अविहादीसु वत्तमानोपि एकंसतो उद्धंगमनारहो पुग्गलो अकनिट्ठगामी एव नामाति वुत्तं ‘‘एको उद्धंसोतो अकनिट्ठगामीति पञ्च होन्ती’’ति. तेसन्ति निद्धारणे सामिवचनं. उद्धंसोतभावतो यदिपि हेट्ठिमादीसुपि अरियभूमि निब्बत्ततेव, तथापि तत्थ भूमीसु आयुं ¶ अग्गहेत्वा अकनिट्ठभवे आयुवसेनेव सोळसकप्पसहस्सायुकता दट्ठब्बा. ‘‘सत्त फला सत्तानिसंसा पाटिकङ्खा’’ति वुत्तत्ता ‘‘अरहत्तमग्गस्स पुब्बभागविपस्सना बोज्झङ्गा कथिता’’ति वुत्तं. सत्तन्नम्पि सहभावो लब्भतीति ‘‘अपुब्बं अचरिमं एकचित्तक्खणिका’’ति वुत्तं. तयिदं पाळियं तत्थ तत्थ ‘‘तस्मिं समये’’ति आगतवचनेन विञ्ञायति, बोज्झङ्गानं पन नानासभावत्ता ‘‘नानालक्खणा’’ति वुत्तं.

सीलसुत्तवण्णना निट्ठिता.

४. वत्थसुत्तवण्णना

१८५. ‘‘सतिसम्बोज्झङ्गो’’ति एवं चे मय्हं होतीति सतिसम्बोज्झङ्गो नाम सेट्ठो उत्तमो पवरो, तस्माहं सतिसम्बोज्झङ्गसीसेन फलसमापत्तिं अप्पेत्वा विहरिस्सामीति एवं चे मय्हं पुब्बभागे होतीति अत्थो. ‘‘अप्पमाणो’’ति एवं मय्हं होतीति स्वायं सतिसम्बोज्झङ्गो, सब्बसो पमाणकरकिलेसाभावतो अप्पमाणधम्मारम्मणतो च अप्पमाणोति एवं मय्हं अन्तोसमापत्तियं असम्मोहवसेन होति. सुपरिपुण्णोति भावनापारिपूरिया सुट्ठु परिपुण्णोति एवं ¶ मय्हं अन्तोसमापत्तियं असम्मोहवसेन होतीति. तिट्ठतीति यथाकालपरिच्छेदसमापत्तिया अवट्ठानेन तप्परियापन्नताय सतिसम्बोज्झङ्गो तिट्ठति पटिबन्धवसेन. उप्पादं अनावज्जितत्ताति उप्पादस्स अनावज्जनेन असमन्नाहारेन. उप्पादसीसेन चेत्थ उप्पादवन्तोव सङ्खारा गहिता. अनुप्पादन्ति निब्बानं उप्पादाभावतो उप्पादवन्तेहि च विनिस्सटत्ता. पवत्तन्ति विपाकप्पवत्तं. अप्पवत्तन्ति निब्बानं तप्पटिक्खेपतो. निमित्तन्ति सब्बसङ्खारनिमित्तं. अनिमित्तन्ति निब्बानं. सङ्खारेति उप्पादादिअनामसनेन केवलमेव सङ्खारगहणं. विसङ्खारन्ति निब्बानं. आवज्जितत्ता आवज्जितकालतो पट्ठाय आरब्भ पवत्तिया सतिसम्बोज्झङ्गो तिट्ठति. अट्ठहाकारेहीति अट्ठहि कारणेहि. जानातीति समापत्तितो वुट्ठितकाले पजानाति. अट्ठहाकारेहीति उप्पादावज्जनादीहि चेव अनुप्पादावज्जनादीहि च वुत्ताकारविपरीतेहि अट्ठहि आकारेहि चवन्तं समापत्तिवसेन अनवट्ठानतोपि गच्छन्तं चवतीति थेरो पजानातीति.

फलबोज्झङ्गाति ¶ फलसमापत्तिपरियापन्ना बोज्झङ्गा. किं पन ते विसुं विसुं पवत्तन्तीति आह ‘‘यदा ही’’तिआदि. सीसं कत्वाति पधानं सेट्ठं कत्वा. तदन्वयाति तदनुगता सतिसम्बोज्झङ्गं अनुगच्छनका. तञ्च खो तथा कत्वा धम्मं पच्चवेक्खणवसेन. केचि पन ‘‘तं पच्चवेक्खणादिकं कत्वा’’ति वदन्ति.

वत्थसुत्तवण्णना निट्ठिता.

५. भिक्खुसुत्तवण्णना

१८६. बोधायाति एत्थ बोधो नाम बुज्झनं, तं पन किस्स केनाति पुच्छन्तो ‘‘किं बुज्झनत्थाया’’ति वत्वा तं दस्सेन्तो ‘‘मग्गेना’’तिआदिमाह. मग्गेन निब्बानं बुज्झनत्थाय संवत्तन्ति, पच्चवेक्खणाय कतकिच्चतं बुज्झनत्थाय संवत्तन्ति, पठमविकप्पे सच्छिकिरियाभिसमयो एव दस्सितोति तेन अतुट्ठे ‘‘मग्गेन वा’’ति दुतियविकप्पमाह. विवेकनिस्सितं विरागनिस्सितन्ति पदेहि सब्बं मग्गकिच्चं तस्स फलञ्च दस्सितं. निरोधनिस्सितन्ति इमिना निब्बानसच्छिकिरिया. कामासवापि चित्तं विमुच्चतीतिआदिना किलेसप्पहानं. विमुत्तस्मिं विमुत्तमिति ञाणं होतीतिआदिना पच्चवेक्खणा दस्सिता.

भिक्खुसुत्तवण्णना निट्ठिता.

६-७. कुण्डलियसुत्तादिवण्णना

१८७-१८८. निबद्धवासवसेन ¶ आरामे निसीदनसीलोति आरामनिसादी. परिसं ओगाळ्हो हुत्वा चरतीति परिसावचरोति आह – ‘‘यो पना’’तिआदि. एवन्ति इमिनाकारेन. गहणन्ति निग्गहणं. तेन पुच्छापदस्स अत्थं विवरति. निब्बेठनन्ति निग्गहनिब्बेठनं. तेन विस्सज्जनपदस्स अत्थं विवरति. इमिना नयेनाति एतेन ‘‘इतिवादो’’ति एत्थ इति-सद्दस्स अत्थं दस्सेति. उपारम्भाधिप्पायो वदति एतेनाति वादो, दोसो. इतिवादो होतीति एवं इमस्स उपरि वादारोपनं होति. इतिवादप्पमोक्खोति एवं ततो पमोक्खो होति ¶ . एवं वादप्पमोक्खानिसंसं परेहि आरोपितदोसस्स निब्बेठनवसेन दस्सेत्वा इदानि दोसपवेदनवसेन दस्सेतुं ‘‘अयं पुच्छाय दोसो’’तिआदि वुत्तं.

एत्तकं ठानन्तिआदितो पट्ठाय याव ‘‘तीणि सुचरितानी’’ति एत्तकं ठानं. इमं देसनन्ति ‘‘इन्द्रियसंवरो खो’’तिआदिनयप्पवत्तं इमं देसनं. नाभिज्झायतीति न अभिज्झायति. नाभिहंसतीति न अभितुस्सति. गोचरज्झत्ते ठितं होतीति कम्मट्ठानारम्मणे समाधानवसेन ठितं होति अवट्ठितं. तेनाह ‘‘सुसण्ठित’’न्ति. सुसण्ठितन्ति सम्मा अविक्खेपवसेन ठितं. कम्मट्ठानविमुत्तियाति कम्मट्ठानानुयुञ्जनवसेन पटिपक्खतो नीवरणतो विमुत्तिया. सुट्ठु विमुत्तन्ति सुविमुत्तं. तस्मिं अमनापरूपदस्सने न मङ्कु विलक्खो न होति. किलेसवसेन दोसवसेन. अट्ठितचित्तो अथद्धचित्तो. कोवेसेन हि चित्तं थद्धं होति, न मुदुकं. अदीनमानसोति दोमनस्सवसेन यो दीनभावो, तदभावेन निद्दोसमानसो. अपूतिचित्तोति ब्यापज्जाभावेन सीतिभूतचित्तो.

इमेसु छसु द्वारेसु अट्ठारस दुच्चरितानि होन्ति पच्चेकं कायवचीमनोदुच्चरितभेदेन. तानि विभागेन दस्सेतुं ‘‘कथ’’न्तिआदि वुत्तं. तत्थ इट्ठारम्मणे आपाथगतेति नयदानमत्तमेतं. तेन ‘‘अनिट्ठारम्मणे आपाथगते दोसं उप्पादेन्तस्सा’’तिआदिना तिविधदुच्चरितं नीहरित्वा वत्तब्बं, तथा ‘‘मज्झत्तारम्मणे मोहं उप्पादेन्तस्सा’’तिआदिना च. मनोदुच्चरितादिसामञ्ञेन पन तीणियेव दुच्चरितानि होन्तीति वेदितब्बं.

पञ्ञत्तिवसेनाति वत्थुं अनामसित्वा पिण्डगहणमुखेन केवलं पञ्ञत्तिवसेनेव. भावनापटिसङ्खानेति भावनासिद्धे पटिसङ्खाने, भावनाय पटिसङ्खाने वाति अत्थो. इमानीति यथावुत्तानि छद्वारारम्मणानि. दुच्चरितानीति दुच्चरितकारणानि. अप्पटिसङ्खाने ठितस्स दुच्चरितानि ¶ सुचरितानि कत्वा. परिणामेतीति परिवत्तेति दुच्चरितानि तत्थ अनुप्पादेत्वा सुचरितानि ¶ उप्पादेन्तो. एवन्ति वुत्तप्पकारेन. इन्द्रियसंवरो…पे… वेदितब्बो इन्द्रियसंवरसम्पादनवसेन तिण्णं सुचरितानं सिज्झनतो. तेनाह ‘‘एत्तावता’’तिआदि. एत्तावताति आदितो पट्ठाय याव ‘‘तीणि सुचरितानि परिपूरेन्ती’’ति पदं, एत्तावता. सीलानुरक्खकं इन्द्रियसंवरसीलन्ति चतुपारिसुद्धिसीलस्स अनुरक्खकं इन्द्रियसंवरसीलं कथिकं. कथं पन तदेव तस्स अनुरक्खकं होतीति? अपरापरुप्पत्तिया उपनिस्सयभावतो.

तीणि सीलानीति इन्द्रियसंवर-आजीवपारिसुद्धि-पच्चयसन्निस्सित-सीलानि. लोकुत्तरमिस्सकाति लोकियापि लोकुत्तरापि होन्तीति अत्थो. सत्तन्नं बोज्झङ्गानन्ति लोकुत्तरानं सत्तन्नं बोज्झङ्गानं. मूलभूता सतिपट्ठाना पुब्बभागा, ते सन्धाय वुत्तं ‘‘चत्तारो खो, कुण्डलिय, सतिपट्ठाना भाविता बहुलीकता सत्त बोज्झङ्गे परिपूरेन्ती’’ति. तेपीति यथावुत्तसतिपट्ठाना. सतिपट्ठानमूलका बोज्झङ्गाति लोकियसतिपट्ठानमूलका बोज्झङ्गाव. पुब्बभागावाति एत्थ केचि ‘‘पुब्बभागा चा’’ति पाठं कत्वा ‘‘पुब्बेव लोकुत्तरा पुब्बभागा चा’’ति अत्थं वदन्ति. विज्जाविमुत्तिमूलकाति ‘‘सत्त खो, कुण्डलिय, बोज्झङ्गा भाविता बहुलीकता विज्जाविमुत्तिं परिपूरेन्ती’’ति एवं वुत्ता बोज्झङ्गा लोकुत्तराव विज्जाविमुत्तिसहगतभावतो.

कुण्डलियसुत्तादिवण्णना निट्ठिता.

८. उपवानसुत्तवण्णना

१८९. पच्चत्तन्ति करणनिद्देसो अयन्ति आह – ‘‘अत्तनावा’’ति. कुरुमानोयेवाति उप्पादेन्तो एव. कम्मट्ठानविमुत्तिया सुट्ठु विमुत्तन्ति कम्मट्ठानमनसिकारेन नीवरणानं दूरीभावतो तेहि सुट्ठु विमुत्तं. अत्थं करित्वाति भावनामनसिकारं उत्तमं कत्वा. ‘‘महा वत मे अयं अत्थो उप्पन्नो’’ति अत्थिको हुत्वा.

९. पठमउप्पन्नसुत्तवण्णना

१९०. तथागतस्स पातुभावातिआदिना बुद्धुप्पादकाले एव बोज्झङ्गरतनपटिलाभोति दस्सेति.

पब्बतवग्गवण्णना निट्ठिता.

२. गिलानवग्गो

१-३. पाणसुत्तादिवण्णना

१९२-१९४. येसन्ति ¶ ¶ येसं सत्तानं. चत्तारो इरियापथा अत्थि लब्भन्ति तदुपगसरीरावयवलाभेन. एतन्ति ‘‘चत्तारो इरियापथे कप्पेन्ती’’ति एतं वचनं. ‘‘विवेकनिस्सित’’न्तिआदिवचनतो ‘‘सहविपस्सनके मग्गबोज्झङ्गे’’इच्चेव वुत्तं. दुतियततियानि उत्तानत्थानेव हेट्ठा वुत्तनयत्ता.

४-१०. पठमगिलानसुत्तादिवण्णना

१९५-२०१. विसुद्धं अहोसि विसभागधातुक्खोभं वूपसमेन्तं. तेनाह – ‘‘पोक्खरपत्ते …पे… विनिवत्तित्वा गतो’’ति. एसेव नयो पाळितो अत्थतो च चतुत्थेन पञ्चमछट्ठानं समानत्ता. विसरुक्खवातसम्फस्सेनाति विसरुक्खसन्निस्सितवातसम्फस्सेन. मन्दसीतजरोति मुदुको सीतजरो. सेसन्ति वुत्तावसेसं. सब्बत्थाति सत्तमादीसु चतूसु.

गिलानवग्गवण्णना निट्ठिता.

३. उदायिवग्गो

१-२. बोधायसुत्तादिवण्णना

२०२-२०३. कित्तकेन नु खो कारणेन बुज्झनकअङ्गा नाम वुच्चन्ति बुज्झनकस्स पुग्गलस्स अङ्गाति वत्तब्बतं लभन्ति. मिस्सकबोज्झङ्गा कथिता सहविपस्सना मग्गबोज्झङ्गा कथिताति कत्वा. धम्मपरिच्छेदो कथितो गणनामत्तेन परिच्छिन्दित्वा वुत्तत्ता न भूमन्तरपरिच्छेदो, विपस्सनादिपरिच्छेदो वा.

३-५. ठानियसुत्तादिवण्णना

२०४-२०६. कामरागेन ¶ गधितब्बट्ठानभूता कामरागट्ठानियाति आह ‘‘आरम्मणधम्मान’’न्ति. ‘‘मनसिकारबहुलीकारा’’ति वुत्तत्ता ‘‘आरम्मणेनेव कथित’’न्ति ¶ वुत्तं. वुत्तपरिच्छेदोति एतेन न केवलं आरम्मणवसेनेव, अथ खो उपनिस्सयवसेनपेत्थ अत्थो लब्भतीति दस्सेति. पठमवग्गस्स हि दुतिये सुत्ते उपनिस्सयवसेनेव अत्थो दस्सितो. मिस्सकबोज्झङ्गा कथिता अविभागेनेव कथितत्ता. अपरिहानियेति तीहि सिक्खाहि अपरिहानावहे.

६-७. तण्हक्खयसुत्तादिवण्णना

२०७-२०८. ‘‘सो मं पुच्छिस्सती’’ति अधिप्पायेन भगवता ओसापितदेसनं. पत्थटत्ता भावनापारिपूरिया वित्थारितं गतत्ता. महन्तभावन्ति भावनावसेनेव महत्तं गतत्ता. ततो एव वड्ढिप्पमाणा. नीवरणविगमे सम्भवतो पच्चयतो ब्यापादो विगतो होतीति आह – ‘‘नीवरणानं दूरीभावेन ब्यापादविरहितत्ता’’ति. तण्हामूलकन्ति तण्हापच्चयं. यञ्हि तण्हासहगतं असहगतम्पि तण्हं उपनिस्साय निप्फन्नं, सब्बं तं तण्हामूलकं. पहीयति अनुप्पादप्पहानेन. तण्हादीनंयेव खया, न तेसं सङ्खारानं खया. एतेहि तण्हक्खयादिपदेहि.

८. निब्बेधभागियसुत्तवण्णना

२०९. निब्बिज्झन्तीति निब्बेधा, निब्बिज्झनधम्मा धम्मविनयादयो, तप्परियापन्नताय निब्बेधभागे गतो निब्बेधभागियो, तं निब्बेधभागियं. तेनाह ‘‘निब्बिज्झनकोट्ठासिय’’न्ति. भावेत्वा ठितेन चित्तेन. विपस्सनामग्गम्पि गहेत्वा ‘‘मग्गबोज्झङ्गा मिस्सका’’ति वुत्ता. तेहीति बोज्झङ्गेहि भावितं चित्तं. ते वा बोज्झङ्गे भावेत्वा ठितं चित्तं नाम फलचित्तं, तस्मा निब्बत्तितलोकुत्तरमेव. तम्पीति फलचित्तम्पि मग्गानन्तरताय मग्गनिस्सितं कत्वा मिस्सकमेव कथेतुं वट्टति ‘‘बोधाय संवत्तन्ती’’ति वुत्तत्ता.

९. एकधम्मसुत्तवण्णना

२१०. संयोजनसङ्खाता विनिबन्धाति कामरागादिसंयोजनसञ्ञिता बन्धना. परिनिट्ठपेत्वा गहणाति गिलित्वा विय परिनिट्ठपेत्वा गहणाकारा.

१०. उदायिसुत्तवण्णना

२११. बहुकतं ¶ ¶ वुच्चति बहुकारो बहुमानो, नत्थि एतस्स बहुकतन्ति अबहुकतो, अकतबहुमानो. धम्मो उप्पज्जमानो उक्कुज्जन्तो विय निरुज्झमानो अवकुज्जन्तो विय होतीति वुत्तं ‘‘उक्कुज्जं वुच्चति उदयो, अवकुज्जं वयो’’ति. परिवत्तेन्तोति अनिच्चातिपि दुक्खातिपि अनत्तातिपि. ‘‘एसो हि ते उदायि मग्गो पटिलद्धो, यो ते…पे… तथत्ताय उपनेस्सती’’ति परियोसाने भगवतो वचनञ्चेत्थ साधकं दट्ठब्बं. तेन तेनाकारेन विहरन्तन्ति येन सम्मसनाकारेन विपस्सनाविहारेन विहरन्तं. तथाभावायाति खीणासवभावपच्चवेक्खणाय. तेनाह – ‘‘खीणा जातीति…पे… तं दस्सेन्तो एवमाहा’’ति.

उदायिवग्गवण्णना निट्ठिता.

४. नीवरणवग्गो

३-४. उपक्किलेससुत्तादिवण्णना

२१४-२१५. न च पभावन्तन्ति न च पभासम्पन्नं. पभिज्जनसभावन्ति तापेत्वा तालने पभङ्गुतं. अवसेसं लोहन्ति वुत्तावसेसं जातिलोहं, विजातिलोहं, कित्तिमलोहन्ति पभेदं सब्बम्पि लोहं. उप्पज्जितुं अप्पदानेनाति एत्थ ननु लोकियकुसलचित्तस्सपि सुविसुद्धस्स उप्पज्जितुं अप्पदानेन उपक्किलेसताति? सच्चमेतं, यस्मिं पन सन्ताने नीवरणानि लद्धपतिट्ठानि, तत्थ महग्गतकुसलस्सपि असम्भवो, पगेव लोकुत्तरकुसलस्स, परित्तकुसलं पन यथापच्चयं उप्पज्जति. नीवरणे हि वूपसन्ते सन्ताने उप्पत्तिया अपरिसुद्धं होति, उपक्किलिट्ठं नाम होति, अपरिसुद्धदीपकपल्लिकवट्ठितेलादिसन्निस्सयो दीपो विय, अपिच निप्परियायतो उप्पज्जितुं अप्पदानेनेव तेसं उपक्किलेसताति दस्सेन्तो ‘‘यदग्गेन ही’’तिआदिमाह. आरम्मणे विक्खित्तप्पत्तिवसेन चुण्णविचुण्णता वेदितब्बा. न आवरन्तीति कुसलधम्मे उप्पज्जितुं अप्पदानवसेन न आवरन्ति, अथ खो तेसं उप्पत्तिया होन्ति. न पटिच्छादेन्तीति न ¶ विनन्धन्ति. चतुभूमकचित्तस्साति चतुत्थभूमककुसलचित्तस्स अनुपक्किलेसा, तेहि अकिलिस्सनतो.

८. आवरणनीवरणसुत्तवण्णना

२१९. पञ्ञा ¶ दुब्बला होति, न बलवती पटिपक्खेन उपक्किलिट्ठभावतो. तेनाह ‘‘मन्दा अविसदा’’ति.

पञ्च नीवरणा दूरे होन्ति आवरणाभावतो. तमेव पीतिन्ति सप्पायधम्मसवने उप्पन्नं पीतिं. तस्सा तदा उप्पन्नाकारसल्लक्खणेन अविजहन्तो पुनप्पुनं तस्सा निब्बत्तनेन. तेनाह ‘‘पञ्च नीवरणे विक्खम्भेत्वा’’ति. इदं सन्धायाति एत्तके दिवसेपि न विनस्सन्ति, सा धम्मपीति लद्धपच्चया हुत्वा विसेसावहाति इममत्थं सन्धाय एतं ‘‘इमस्स पञ्च नीवरणा तस्मिं समये न होन्ती’’तिआदि वुत्तं. पीतिपामोज्जपक्खियाति पीतिपामोज्जपच्चया. नस्सन्तीति निरोधपच्चयवसेन पवत्तनतो नस्सन्ति. सभागपच्चयवसेन पुन उप्पज्जन्तापि…पे… वुच्चति किच्चसाधनवसेन पवत्तनतो.

९. रुक्खसुत्तवण्णना

२२०. अभिरुहनकाति समीपरुक्खे अभिभवित्वा रुहनका. अट्ठिकच्छकोति अट्ठिबहुलकच्छको. कपिथनसदिसफलत्ता कपित्थनोति लद्धनामो.

१०. नीवरणसुत्तवण्णना

२२१. अन्धभावकरणा पञ्ञाचक्खुस्स विबन्धनतो. तथा हि ते ‘‘अचक्खुकरणा पञ्ञानिरोधिका’’ति वुत्ता. विहनति विबाधतीति विघातो, दुक्खन्ति आह ‘‘विघातपक्खियाति दुक्खपक्खिका’’ति. निब्बानत्थाय न संवत्तन्तीति अनिब्बानसंवत्तनिका. मिस्सकबोज्झङ्गाव कथिता पुब्बभागिकानं कथितत्ता.

नीवरणवग्गवण्णना निट्ठिता.

५. चक्कवत्तिवग्गो

१. विधासुत्तवण्णना

२२२. विधीयन्तीति ¶ ¶ विधा, मानादिभागा कोट्ठासाति आह ‘‘तयो मानकोट्ठासा’’ति. तथा तथा विदहनतोति ‘‘सेय्योहमस्मी’’तिआदिना तेन तेनाकारेन विदहनतो ठपनतो, ठपेतब्बतो वा.

२. चक्कवत्तिसुत्तवण्णना

२२३. सिरिसम्पत्तिया राजति दिप्पति सोभतीति राजा, दानपियवचनअत्थचरियासमानत्ततासङ्खातेहि चतूहि सङ्गहवत्थूहि. रञ्जेतीति रमेति. अब्भुग्गतायाति उदीरिता निब्बत्तितो तत्थ तत्थ गच्छनतो. चक्कं वत्तेतीति चक्करतनं पवत्तेति. देवट्ठानन्ति पूजनीयदेवट्ठानं. चित्तीकतट्ठेनाति पूजनीयभावेन. अग्घो नत्थि चिरकालसम्भवपुञ्ञानुभावसिद्धरतनसब्भावतो. अञ्ञेहि चक्कवत्तिनो परिग्गहभूतरतनेहि. लोकेति मनुस्सलोके. तेन तदञ्ञलोकं निवत्तेति. विज्जमानग्गहणेन अतीतानागतं निवत्तेति. बुद्धा च कदाचि करहचि उप्पज्जन्ति चक्कवत्तिनोपि येभुय्येन तस्मिंयेव उप्पज्जनतोति अधिप्पायो. अनोमस्साति अलामकस्स उक्कट्ठस्स. सेसानि रतनानि.

तत्राति वाक्योपञ्ञासने निपातो, तस्मिं पातुभाववचने. ‘‘अयुत्त’’न्ति वत्वा तत्थ अधिप्पायं विवरन्तो ‘‘उप्पन्नं ही’’तिआदिमाह. तेहि रतनेहि चक्कवत्तननियमापेक्खताय चक्कवत्तिवचनस्स. नियमेनाति एकन्तेन. वत्तब्बतं आपज्जति भाविनि भूते विय उपचारोति यथा – ‘‘अगमा राजगहं बुद्धो’’ति (सु. नि. ४१०). लद्धनामस्साति चक्कवत्तीति लोके लद्धसमञ्ञस्स पत्थनीयस्स पुरिसविसेसस्स. मूलुप्पत्तिवचनतोपीति ‘‘चक्कवत्तिस्स पातुभावा’’ति एतस्स पठमुप्पत्तिया वचनतोपि. इदानि तमत्थं विवरन्तो ‘‘यो ही’’तिआदिमाह. यो हि चक्कवत्तिराजा, तस्स उप्पत्तिया चक्करतनस्स उप्पज्जनतो चक्कवत्तीति एवं नामं उप्पज्जति. ‘‘चक्कं वत्तेस्सती’’ति इदं पन नियामं अनपेक्खित्वा तस्स उप्पज्जतीति रतनानुप्पत्तिं ¶ गहेत्वा वुत्तनयतो सञ्ञा उप्पज्जति ‘‘चक्कवत्ती’’ति. एकमेवाति चक्करतनमेव पठमं पातुभवति. यस्मिं भूते रञ्ञो चक्कवत्तिसमञ्ञा, अथ पच्छा ¶ रतनानि पातुभवन्तीति बहूनं पातुभावं उपादाय बहुलवचनतोपि एतं ‘‘चक्कवत्तिस्स पातुभावा रतनानं पातुभावो’’ति वुत्तं. अयं हेतुकत्तुसञ्ञितो अत्थभेदो. पातुभावाति पातुभावतो. पुञ्ञसम्भारो भिन्नसन्तानताय रतनानम्पि परियायेन उपनिस्सयहेतूति वुत्तं. युत्तमेवेतं यथावुत्तयुत्तियुत्तत्ता.

वत्तब्बभूतो अधिप्पायो एतस्स अत्थीति अधिप्पायो, अत्थनिद्देसो, सङ्खेपतो अधिप्पायो सङ्खेपाधिप्पायो. चक्करतनानुभावेन चक्कवत्तिस्सरियस्स सिज्झनतो ‘‘दातुं समत्थस्सा’’ति वुत्तं. योजनप्पमाणे पदेसे पवत्तत्ता योजनप्पमाणं अन्धकारं. अतिदीघातिरस्सतादिं छब्बिधं दोसं विवज्जेत्वा ठितस्साति वचनसेसो.

सब्बेसं चतुभूमकधम्मानं पुरेचरं कुसलानं धम्मानं गतियो समन्वेसनवसेन पवत्तनतो. बुद्धादीहिपि अप्पहानीयताय महन्तधम्मसभावत्ता धम्मकाये च जेट्ठकट्ठेन धम्मकायूपपन्नं. पञ्ञापासादताय चस्स उपरिगतट्ठेन अच्चुग्गतं. वित्थतट्ठेन विपुलं. महन्तताय महन्तं. अनादिकालभावितस्स किलेससन्तानस्स खणेनेव विद्धंसनतो सीघं लहु जवन्ति परियाया. बोज्झङ्गधम्मपरियापन्नत्ता हि वुत्तं ‘‘एकन्त-कुसलत्ता’’ति. सम्पयुत्तवसेन पीतिया आलोकविद्धंसनभाववसेनाति वुत्तं ‘‘सहजातपच्चयादी’’तिआदि. सब्बसङ्गाहिकधम्मपरिच्छेदोति चतुभूमकत्ता सब्बसङ्गाहको बोज्झङ्गधम्मपरिच्छेदो कथितो.

४-१०. दुप्पञ्ञसुत्तादिवण्णना

२२५-२३१. एळं वुच्चति दोसो, एळेन मूगो वियाति एळमूगोति इममत्थं दस्सेन्तो ‘‘मुखेन वाच’’न्तिआदिमाह.

चक्कवत्तिवग्गवण्णना निट्ठिता.

६. साकच्छवग्गो

१. आहारसुत्तवण्णना

२३२. पुरिमनयतोति ¶ ¶ ‘‘सतिसम्बोज्झङ्गट्ठानीयानं धम्मान’’न्तिआदिना आगतनयतो. एवन्ति इदानि वुच्चमानाकारेन. सति च सम्पजञ्ञञ्च सतिसम्पजञ्ञं. सतिपधानं वा अभिक्कन्तादीसु सत्थकभावपरिग्गण्हकञाणं सतिसम्पजञ्ञं. तं सब्बत्थ सतोकारीभावावहत्ता सतिसम्बोज्झङ्गस्स उप्पादाय संवत्तति. यथा च पच्चनीकधम्मप्पहानं अनुरूपधम्मदेसना च अनुप्पन्नानं कुसलानं धम्मानं उप्पादाय होति, एवं सतिरहितपुग्गलवज्जना सतोकारीपुग्गलसेवना च तत्थ च युत्तपयुत्तता सतिसम्बोज्झङ्गस्स उप्पादाय होतीति इममत्थं दस्सेति ‘‘सतिसम्पजञ्ञ’’न्तिआदिना. अरहत्तमग्गेन भावनापारिपूरी होति. तथा हि अरहाव ‘‘सतिवेपुल्लप्पत्तो’’ति वुच्चति.

धम्मानं, धम्मेसु वा विचयो, सो एव हेट्ठा वुत्तनयेन सम्बोज्झङ्गो, तस्स धम्मविचयसम्बोज्झङ्गस्स. परिपुच्छकताति आचरियं पयिरुपासित्वा पञ्चपि निकाये सहट्ठकथाय परियोगाहेत्वा यं यं तत्थ गण्ठिट्ठानं, तस्स तस्स ‘‘इदं, भन्ते, कथं इमस्स को अत्थो’’ति एवं खन्धादीसु अत्थपुच्छकभावो. तेनाह ‘‘खन्ध…पे… बहुलता’’ति.

वत्थुविसदकिरियाति चित्तचेतसिकानं पवत्तिट्ठानभावतो सरीरं तप्पटिबद्धानि च चीवरादीनि इध ‘‘वत्थूनी’’ति अधिप्पेतानि, तानि यथा चित्तस्स सुखावहानि होन्ति, तथा करणं तेसं विसदभावकरणं. तेन वुत्तं ‘‘अज्झत्तिकबाहिरान’’न्तिआदि. उस्सन्नदोसन्ति वातादिउस्सन्नदोसं. सेदमलमक्खितन्ति सेदेन चेव जल्लिकासङ्खातेन सरीरमलेन च मक्खितं. च-सद्देन अञ्ञम्पि सरीरस्स च चित्तस्स च पीळावहं सङ्गण्हाति. सेनासनं वाति वा-सद्देन पत्तादीनं सङ्गहो दट्ठब्बो. अविसदे सति, विसयभूते वा. कथं भावनमनुयुत्तस्स तानि विसयोति? अन्तरन्तरा पवत्तनकचित्तुप्पादवसेन एवं वुत्तं. ते हि चित्तुप्पादा चित्तेकग्गताय इज्झन्तियापि अपरिसुद्धभावाय संवत्तन्ति. चित्तचेतसिकेसु निस्सयादिपच्चयभूतेसु. ञाणम्पीति पि-सद्दो सम्पिण्डने. तेन न केवलं तं वत्थुयेव ¶ , अथ खो तस्मिं अपरिसुद्धे ञाणम्पि अपरिसुद्धं होतीति निस्सयापरिसुद्धिया निस्सितापरिसुद्धि विय विसयस्स अपरिसुद्धताय विसयीनं अपरिसुद्धिं दस्सेति अन्वयतो ब्यतिरेकतो च.

समभावकरणं ¶ किच्चतो अनूनाधिकभावकरणं. यथापच्चयं सद्धेय्यवत्थुस्मिं अधिमोक्खकिच्चस्स पटुतरभावेन पञ्ञाय अविसदताय वीरियादीनञ्च अनुबलप्पदानसिथिलतादिना सद्धिन्द्रियं बलवं होति. तेनाह ‘‘इतरानि मन्दानी’’ति. ततोति तस्मा सद्धिन्द्रियस्स बलवभावतो इतरेसञ्च मन्दत्ता. कोसज्जपक्खे पतितुं अदत्वा सम्पयुत्तधम्मानं पग्गण्हनं अनुबलप्पदानं पग्गहो, पग्गहकिच्चं कातुं न सक्कोतीति सम्बन्धितब्बं. आरम्मणं उपगन्त्वा ठानं, अनिस्सज्जनं वा उपट्ठानं, विक्खेपपटिपक्खो. येन वा सम्पयुत्ता अविक्खित्ता होन्ति, सो अविक्खेपो. रूपगतं विय चक्खुना येन याथावतो विसयसभावं पस्सति, तं दस्सनकिच्चं कातुं न सक्कोति बलवता सद्धिन्द्रियेन अभिभूतत्ता. सहजातधम्मेसु हि इन्दट्ठं करोन्तानं सह पवत्तमानानं धम्मानं एकरसतावसेनेव अत्थसिद्धि, न अञ्ञथा. तस्माति वुत्तमेवत्थं कारणभावेन पच्चामसति. तन्ति सद्धिन्द्रियं.

धम्मसभावपच्चवेक्खणेनाति यस्स सद्धेय्यवत्थुनो उळारतादिगुणे अधिमुच्चनस्स सातिसयप्पवत्तिया सद्धिन्द्रियं बलवं जातं, तस्स पच्चयपच्चयुप्पन्नतादिविभागतो याथावतो वीमंसनेन. एवञ्हि एवंधम्मतानयेन सभावसरसतो परिग्गय्हमाने सविप्फारो अधिमोक्खो न होति – ‘‘अयं इमेसं धम्मानं सभावो’’ति पञ्ञाब्यापारस्स सातिसयत्ता. धुरियधम्मेसु हि यथा सद्धाय बलवभावे पञ्ञाय मन्दभावो होति, एवं पञ्ञाय बलवभावे सद्धाय मन्दभावो होति. तेन वुत्तं – ‘‘तं धम्मसभावपच्चवेक्खणेन…पे… हापेतब्ब’’न्ति. तथा अमनसिकरणेनाति येनाकारेन भावनमनुयुञ्जन्तस्स सद्धिन्द्रियं बलवं जातं, तेनाकारेन भावनं नानुयुञ्जनेनाति वुत्तं होति. इध दुविधेन सद्धिन्द्रियस्स बलवभावो अत्तनो वा पच्चयविसेसेन किच्चुत्तरियतो वीरियादीनं वा मन्दकिच्चताय. तत्थ पठमविकप्पे हापनविधि दस्सितो, दुतियविकप्पे पन यथा मनसिकरोतो वीरियादीनं मन्दकिच्चताय सद्धिन्द्रियं बलवं जातं, तथा अमनसिकारेन वीरियादीनं पटुतरभावावहेन मनसिकारेन सद्धिन्द्रियं तेहि ¶ समतं करोन्तेन हापेतब्बं. इमिना नयेन सेसिन्द्रियेसुपि हापनविधि वेदितब्बो.

वक्कलित्थेरवत्थूति सो हि आयस्मा सद्धाधिमुत्तो तत्थ च कताधिकारो सत्थु रूपकायदस्सने पसुतो एव हुत्वा विहरन्तो सत्थारा – ‘‘किं ते, वक्कलि, इमिना पूतिकायेन दिट्ठेन, यो खो, वक्कलि, धम्मं पस्सति, सो मं पस्सती’’तिआदिना (सं. नि. ३.८७) ओवदियमानो कम्मट्ठाने नियोजितोपि तं अननुयुञ्जन्तो पणामितो अत्तानं ¶ विनिपातेतुं पपातट्ठानं अभिरुहि. अथ नं सत्था यथानिसिन्नोव ओभासविस्सज्जनेन अत्तानं दस्सेत्वा –

‘‘पामोज्जबहुलो भिक्खु, पसन्नो बुद्धसासने;

अधिगच्छे पदं सन्तं, सङ्खारूपसमं सुख’’न्ति. (ध. प. ३८१) –

गाथं वत्वा ‘‘एहि, वक्कली’’ति आह. सो तेन वचनेन अमतेनेव अभिसित्तो हट्ठतुट्ठो हुत्वा विपस्सनं पट्ठपेसि, सद्धाय बहुलभावतो विपस्सनावीथिं नारोहति. तं ञत्वा भगवा इन्द्रियसमत्तपटिपादनाय कम्मट्ठानं सोधेत्वा अदासि. सो सत्थारा दिन्ननयेन विपस्सनं उस्सुक्कापेत्वा मग्गपटिपाटिया अरहत्तं पापुणि. तेन वुत्तं – ‘‘वक्कलित्थेरवत्थु चेत्थ निदस्सन’’न्ति. एत्थाति सद्धिन्द्रियस्स अधिमत्तभावे सेसिन्द्रियानं सकिच्चाकरणे.

इतरकिच्चभेदन्ति उपट्ठानादिकिच्चविसेसं. पस्सद्धादीति आदि-सद्देन समाधिउपेक्खासम्बोज्झङ्गानं सङ्गहो दट्ठब्बो. हापेतब्बन्ति यथा सद्धिन्द्रियस्स बलवभावो धम्मसभावपच्चवेक्खणेन हायति, एवं वीरियिन्द्रियस्स अधिमत्तता पस्सद्धियादिभावनाय हायति समाधिपक्खिकत्ता तस्सा. तथा हि समाधिन्द्रियस्स अधिमत्ततं कोसज्जपाततो रक्खन्ती वीरियादिभावना विय वीरियिन्द्रियस्स अधिमत्ततं उद्धच्चपाततो रक्खन्ती एकंसतो हापेति. तेन वुत्तं ‘‘पस्सद्धादिभावनाय हापेतब्ब’’न्ति. सोणत्थेरस्स वत्थूति सुकुमारसोणत्थेरस्स वत्थु. सो हि आयस्मापि सत्थु सन्तिका कम्मट्ठानं गहेत्वा सीतवने विहरन्तो – ‘‘मम सरीरं सुखुमालं, न च सक्का सुखेनेव सुखं अधिगन्तुं, कायं किलमेत्वापि समणधम्मो कातब्बो’’ति ठानचङ्कमनमेव अधिट्ठाय ¶ पधानमनुयुञ्जन्तो पादतलेसु फोटेसु उट्ठितेसुपि वेदनं अज्झुपेक्खित्वा दळ्हवीरियं करोन्तो अच्चारद्धवीरियताय विसेसं पवत्तेतुं नासक्खि. सत्था तत्थ गन्त्वा वीणोपमोवादेन ओवदित्वा वीरियसमतायोजनविधिं दस्सेन्तो कम्मट्ठानं सोधेत्वा गिज्झकूटं गतो. थेरोपि सत्थारा दिन्ननयेन वीरियसमतं याजेत्वा भावेन्तो विपस्सनं उस्सुक्कापेत्वा अरहत्तेव पतिट्ठासि. तेन वुत्तं ‘‘सोणत्थेरस्स वत्थु दस्सेतब्ब’’न्ति. सेसेसुपीति सतिसमाधिपञ्ञिन्द्रियेसुपि.

समतन्ति सद्धापञ्ञानं अञ्ञमञ्ञं अनूनाधिकभावं, तथा समाधिवीरियानञ्च. यथा हि सद्धापञ्ञानं विसुं विसुं धुरियधम्मभूतानं किच्चतो अञ्ञमञ्ञनातिवत्तनं विसेसतो इच्छितब्बं. यतो तेसं समधुरताय अप्पना सम्पज्जति, एवं समाधिवीरियानं कोसज्जुद्धच्चपक्खिकानं ¶ समताय सति अञ्ञमञ्ञुपत्थम्भनतो सम्पयुत्तधम्मानं अन्तद्वयपाताभावेन सम्मदेव अप्पना इज्झतीति. बलवसद्धोतिआदि वुत्तस्सेव अत्थस्स ब्यतिरेकमुखेन समत्थनं. तस्सत्थो – यो बलवतिया सद्धाय समन्नागतो अविसदञाणो, सो मुधप्पसन्नो होति, न अवेच्चप्पसन्नो. तथा हि सो अवत्थुस्मिं पसीदति, सेय्यथापि तित्थियसावका. केराटिकपक्खन्ति साठेय्यपक्खं भजति. सद्धाहीनाय पञ्ञाय अतिधावन्तो ‘‘देय्यवत्थुपरिच्चागेन विना चित्तुप्पादमत्तेनपि दानमयं पुञ्ञं होती’’तिआदीनि परिकप्पेति हेतुपतिरूपकेहि वञ्चितो, एवंभूतो च लूखतक्कविलुत्तचित्तो पण्डितानं वचनं नादियति, सञ्ञत्तिं न गच्छति. तेनाह ‘‘भेसज्जसमुट्ठितो विय रोगो अतेकिच्छो होती’’ति. यथा चेत्थ सद्धापञ्ञानं अञ्ञमञ्ञं समभावो अत्थावहो, विसमभावो अनत्थावहो, एवं समाधिवीरियानं अञ्ञमञ्ञं समभावो अत्थावहो, इतरो अनत्थावहो, तथा समभावो अविक्खेपावहो, इतरो विक्खेपावहो. कोसज्जं अभिभवति, तेन अप्पनं न पापुणातीति अधिप्पायो. एस नयो उद्धच्चं अभिभवतीति एत्थापि. तदुभयन्ति सद्धापञ्ञाद्वयं समाधिवीरियद्वयञ्च. समं कातब्बन्ति समतं कातब्बं.

समाधिकम्मिकस्साति समथकम्मट्ठानिकस्स. एवन्ति एवं सन्ते, सद्धाय थोकं बलवभावे सतीति अत्थो. सद्दहन्तोति ‘‘पथवी पथवीति मनसिकारमत्तेन ¶ कथं झानुप्पत्ती’’ति अचिन्तेत्वा ‘‘अद्धा सम्बुद्धेन वुत्तविधि इज्झती’’ति सद्दहन्तो सद्धं जनेन्तो. ओकप्पेन्तोति आरम्मणं अनुपविसित्वा विय अधिमुच्चनवसेन अवकप्पेन्तो पक्खन्दन्तो. एकग्गता बलवती वट्टति समाधिपधानत्ता झानस्स. उभिन्नन्ति समाधिपञ्ञानं. समाधिकम्मिकस्स समाधिनो अधिमत्तताय पञ्ञाय अधिमत्ततापि इच्छितब्बाति आह ‘‘समतायपी’’ति, समभावेनापीति अत्थो. अप्पनाति लोकियअप्पना. तथा हि ‘‘होतियेवा’’ति सासङ्कं वदति, लोकुत्तरप्पना पन तेसं समभावेनेव इच्छिता. यथाह ‘‘समथविपस्सनं युगनद्धं भावेती’’ति (अ. नि. ४.१७०). यदि विसेसतो सद्धापञ्ञानं समाधिवीरियानञ्च समानतं इच्छति, कथं सतीति आह – ‘‘सति पन सब्बत्थ बलवती वट्टती’’ति. सब्बत्थाति लीनुद्धच्चपक्खिकेसु पञ्चिन्द्रियेसु. उद्धच्चपक्खिकेकदेसे गण्हन्तो ‘‘सद्धावीरियपञ्ञान’’न्ति आह. अञ्ञथा पीति च गहेतब्बा सिया. तथा हि ‘‘कोसज्जपक्खिकेन समाधिना’’इच्चेव वुत्तं, न च ‘‘पस्सद्धिसमाधिउपेक्खाही’’ति. साति सति. सब्बेसु राजकम्मेसु नियुत्तोति सब्बकम्मिको. तेनाति येन कारणेन सब्बत्थ इच्छितब्बा, तेन आह अट्ठकथायं. सब्बत्थ नियुत्ता सब्बत्थिका ¶ , सब्बेन वा लीनुद्धच्चपक्खिकेन बोज्झङ्गेन अत्थेतब्बा सब्बत्थिया, सब्बत्थियाव सब्बत्थिका. चित्तन्ति कुसलचित्तं. तस्स हि सतिपटिसरणं परायणं अप्पत्तस्स पत्तिया अनधिगतस्स अधिगमाय. तेनाह – ‘‘आरक्खपच्चुपट्ठाना’’तिआदि.

खन्धादिभेदे अनोगाळ्हपञ्ञानन्ति परियत्तिबाहुसच्चवसेनपि खन्धायतनादीसु अप्पतिट्ठितबुद्धीनं. बहुस्सुतसेवना हि सुतमयञाणावहा. तरुणविपस्सनासमङ्गीपि भावनामयञाणे ठितत्ता एकंसतो पञ्ञवा एव नाम होतीति आह – ‘‘समपञ्ञास…पे… पुग्गलसेवना’’ति. ञेय्यधम्मस्स गम्भीरभाववसेन तप्परिच्छेदकञाणस्स गम्भीरभावगहणन्ति आह – ‘‘गम्भीरेसु खन्धादीसु पवत्ताय गम्भीरपञ्ञाया’’ति. तञ्हि ञेय्यं तादिसाय पञ्ञाय चरितब्बतो गम्भीरञाणचरियं, तस्सा वा पञ्ञाय तत्थ पभेदतो पवत्ति गम्भीरञाणचरिया, तस्सा पच्चवेक्खणाति आह ‘‘गम्भीरपञ्ञाय पभेदपच्चवेक्खणा’’ति. यथा सतिवेपुल्लप्पत्तो नाम अरहा एव, एवं सो एव पञ्ञावेपुल्लप्पत्तोपीति आह ¶ ‘‘अरहत्तमग्गेन भावनापारिपूरी होती’’ति. वीरियादीसुपि एसेव नयोति.

‘‘तत्तं अयोखिलं हत्थे गमेन्ती’’तिआदिना वुत्तपञ्चविधबन्धनकम्मकारणा निरये निब्बत्तसत्तस्स सब्बपठमं करोन्तीति देवदूतसुत्तादीसु (म. नि. ३.२५०), तस्सा आदितो वुत्तत्ता च आह – ‘‘पञ्चविधबन्धनकम्मकारणतो पट्ठाया’’ति. सकटवहनादिकालेति आदि-सद्देन तदञ्ञमनुस्सेहि तिरच्छानेहि च विबाधनीयकालं सङ्गण्हाति. एकं बुद्धन्तरन्ति इदं अपरापरं पेतेसु एव उप्पज्जनकसत्तवसेन वुत्तं, एकच्चानं वा पेतानं, एकच्चतिरच्छानानं विय तथा दीघायुकतापि सियाति तथा वुत्तं. तथा हि कालो नागराजा चतुन्नं बुद्धानं रूपदस्सावी.

एवं आनिसंसदस्साविनोति ‘‘वीरियायत्तो एव सकललोकियलोकुत्तरविसेसाधिगमो’’ति एवं आनिसंसदस्सनसीलस्स. गमनवीथिन्ति सपुब्बभागं निब्बानगामिनिं पटिपदं. सह विपस्सनाय अरियमग्गपटिपाटि, सत्तविसुद्धिपरम्परा वा. सा हि वट्टतो निय्यानाय गन्तब्बा पटिपदाति कत्वा गमनवीथि नाम.

कायदळ्हीबहुलोति कायस्स पोसनपसुतो. पिण्डन्ति रट्ठपिण्डं. पच्चयदायकानं अत्तनि कारस्स अत्तनो सम्मापटिपत्तिया महप्फलभावस्स करणेन पिण्डाय भिक्खाय पटिपूजना पिण्डापचायना. नीहरन्तोति पत्तत्थविकतो नीहरन्तो. तं सद्दं सुत्वाति तं उपासिकाय वचनं पण्णसालद्वारे ठितोव पञ्चाभिञ्ञताय दिब्बसोतेन सुत्वाति वदन्ति. मनुस्ससम्पत्ति, दिब्बसम्पत्ति ¶ , अन्ते निब्बानसम्पत्तीति तिस्सो सम्पत्तियो. सितं करोन्तोवाति ‘‘अकिच्छेनेव मया वट्टदुक्खं समतिक्कन्त’’न्ति पच्चवेक्खणावसाने सञ्जातपामोज्जवसेन सितं करोन्तो एव.

अलसानं भावनाय नाममत्तम्पि अजानन्तानं कायस्स पोसनबहुलानं यावदत्थं परिभुञ्जित्वा सेय्यसुखादिं अनुयुञ्जन्तानं तिरच्छानकथिकानं दूरतोव वज्जनं कुसीतपुग्गलपरिवज्जना. ‘‘दिवसं चङ्कमेन निसज्जाया’’तिआदिना भावनारम्भवसेन आरद्धवीरियानं दळ्हपरक्कमानं कालेनकालं ¶ उपसङ्कमना आरद्धवीरियपुग्गलसेवना. तेनाह ‘‘कुच्छिं पूरेत्वा’’तिआदि.

विसुद्धिमग्गे पन ‘‘जातिमहत्तपच्चवेक्खणा, सब्रह्मचारिमहत्तपच्चवेक्खणा’’ति इदं द्वयं न गहितं, ‘‘थिनमिद्धविनोदनता, सम्मप्पधानपच्चवेक्खणा’’ति इदं द्वयं गहितं. तत्थ आनिसंसदस्साविताय एव सम्मप्पधानपच्चवेक्खणा गहिता लोकियलोकुत्तरविसेसाधिगमस्स वीरियायत्ततादस्सनभावतो. थिनमिद्धविनोदनं तदधिमुत्तताय गहितं, वीरियुप्पादने युत्तपयुत्तस्स थिनमिद्धविनोदनं अत्थतो सिद्धमेव. तत्थ थिनमिद्धविनोदनं कुसीतपुग्गलपरिवज्जन-आरद्धवीरियपुग्गल-सेवन- तदधिमुत्ततापटिपक्खविधमन-पच्चयूपसंहारवसेन, अपायभयपच्चवेक्खणादयो समुत्तेजनवसेन वीरियसम्बोज्झङ्गस्स उप्पादकाति दट्ठब्बा.

बुद्धानुस्सतिया उपचारसमाधिनिट्ठत्ता वुत्तं ‘‘याव उपचारा’’ति. सकलसरीरं फरमानोति पीतिसमुट्ठानेहि पणीतरूपेहि सकलसरीरं फरमानो. धम्मसङ्घगुणे अनुस्सरन्तस्सपि याव उपचारा सकलसरीरं फरमानो पीतिसम्बोज्झङ्गो उप्पज्जतीति योजना. एवं सेसअनुस्सतीसु पसादनीयसुत्तन्तपच्चवेक्खणाय च योजेतब्बं तस्सापि विमुत्तायतनभावेन तग्गतिकत्ता. एवरूपे कालेति दुब्भिक्खभयादीसूति वुत्तकाले. समापत्तिया…पे… न समुदाचरन्तीति इदं उपसमानुस्सतिया वसेन वुत्तं. सङ्खारानञ्हि सप्पदेसवूपसमेपि निप्पदेसवूपसमे विय तत्थ सपञ्ञाय पवत्तनतो भावनामनसिकारो किलेसविक्खम्भनसमत्थो हुत्वा उपचारसमाधिं आवहन्तो तथारूपपीतिसोमनस्ससमन्नागतो पीतिसम्बोज्झङ्गस्स उप्पादाय होतीति. पसादनीयेसु ठानेसु पसादसिनेहाभावेन संसूचितहदयता लूखता. सा च तत्थ आदरगारवाकरणेन विञ्ञायतीति आह ‘‘असक्कच्चकिरियाय संसूचितलूखभावे’’ति.

कायचित्तदरथवूपसमलक्खणा पस्सद्धि एव यथावुत्तबोधिअङ्गभूतो पस्सद्धिसम्बोज्झङ्गो, तस्स ¶ पस्सद्धिसम्बोज्झङ्गस्स. पणीतभोजनसेवनताति पणीतसप्पायभोजनसेवनता. उतुइरियापथसुखग्गहणेहि सप्पायउतुइरियापथं गहितन्ति दट्ठब्बं. तञ्हि तिविधम्पि सप्पायं सेवियमानं कायस्स कल्लतापादनवसेन चित्तस्स कल्लतं ¶ आवहन्तं दुविधायपि पस्सद्धिया कारणं होति. सत्तेसु लब्भमानं सुखदुक्खं अहेतुकन्ति अयमेको अन्तो, इस्सरादिविसमहेतुकन्ति अयं दुतियो, एते उभो अन्ते अनुपगम्म यथासकं कम्मुना होतीति अयं मज्झिमा पटिपत्ति. मज्झत्तो पयोगो यस्स सो मज्झत्तपयोगो, तस्स भावो मज्झत्तपयोगता. अयञ्हि पहानसारद्धकायता-सङ्खातपस्सद्धकायताय कारणं होन्ती पस्सद्धिद्वयं आवहति. एतेनेव सारद्धकायपुग्गलपरिवज्जन-पस्सद्धकायपुग्गलसेवनानं तदावहनता संवण्णिताति दट्ठब्बं.

वत्थुविसदकिरिया इन्द्रियसमत्तपटिपादना च ‘‘पञ्ञावहा’’ति वुत्ता. समथावहापि ता होन्ति समथावहभावेनेव पञ्ञावहत्ताति वुत्तं ‘‘वत्थुविसद…पे… वेदितब्बा’’ति.

करणकोसल्लभावनाकोसल्लानं नानन्तरियभावतो रक्खणकोसल्लस्स च तंमूलकत्ता ‘‘निमित्तकुसलता नाम कसिणनिमित्तस्स उग्गहणकुसलता’’इच्चेव वुत्तं. अतिसिथिलवीरियतादीहीति आदि-सद्देन पञ्ञापयोगमन्दतं अप्पमादवेकल्लञ्च सङ्गण्हाति. तस्स पग्गण्हनन्ति तस्स लीनस्स चित्तस्स धम्मविचयसम्बोज्झङ्गादिसमुट्ठापनेन लयापत्तितो समुट्ठापनं. वुत्तञ्हेतं भगवता –

‘‘यस्मिञ्च खो, भिक्खवे, समये लीनं चित्तं होति, कालो तस्मिं समये धम्मविचयसम्बोज्झङ्गस्स भावनाय, कालो वीरियसम्बोज्झङ्गस्स भावनाय, कालो पीतिसम्बोज्झङ्गस्स भावनाय. तं किस्स हेतु? लीनं, भिक्खवे, चित्तं, तं एतेहि धम्मेहि सुसमुट्ठापयं होति. सेय्यथापि, भिक्खवे, पुरिसो परित्तं अग्गिं उज्जालेतुकामो अस्स, सो तत्थ सुक्खानि चेव तिणानि पक्खिपेय्य, सुक्खानि गोमयानि पक्खिपेय्य, सुक्खानि कट्ठानि पक्खिपेय्य, मुखवातञ्च ददेय्य, न च पंसुकेन ओकिरेय्य, भब्बो नु खो सो पुरिसो परित्तं अग्गिं उज्जालेतुन्ति. एवं, भन्ते’’ति (सं. नि. ५.२३४).

एत्थ च यथासकं आहारवसेन धम्मविचयसम्बोज्झङ्गादीनं भावना समुट्ठापनाति वेदितब्बा, सा अनन्तरं विभाविता एव.

अच्चारद्धवीरियतादीहीति ¶ ¶ आदि-सद्देन पञ्ञापयोगबलवतं पमोदुप्पिलावनञ्च सङ्गण्हाति. तस्स निग्गण्हनन्ति तस्स उद्धतस्स चित्तस्स समाधिसम्बोज्झङ्गादिसमुट्ठापनेन उद्धतापत्तितो निसेधनं. वुत्तम्पि चेतं भगवता –

‘‘यस्मिञ्च खो, भिक्खवे, समये उद्धतं चित्तं होति, कालो तस्मिं समये पस्सद्धिसम्बोज्झङ्गस्स भावनाय, कालो समाधिसम्बोज्झङ्गस्स भावनाय, कालो उपेक्खासम्बोज्झङ्गस्स भावनाय. तं किस्स हेतु? उद्धतं, भिक्खवे, चित्तं, तं एतेहि धम्मेहि सुवूपसमयं होति. सेय्यथापि, भिक्खवे, पुरिसो महन्तं अग्गिक्खन्धं निब्बापेतुकामो अस्स, सो तत्थ अल्लानि चेव तिणानि….पे… पंसुकेन च ओकिरेय्य, भब्बो नु खो सो पुरिसो महन्तं अग्गिक्खन्धं निब्बापेतुन्ति. एवं, भन्ते’’ति (सं. नि. ५.२३४).

एत्थापि यथासकं आहारवसेन पस्सद्धिसम्बोज्झङ्गादीनं भावना समुट्ठापनाति वेदितब्बा. तत्थ पस्सद्धिसम्बोज्झङ्गस्स भावना वुत्ता एव, समाधिसम्बोज्झङ्गस्स वुच्चमाना, इतरस्स अनन्तरं वक्खति. पञ्ञापयोगमन्दतायाति पञ्ञाब्यापारस्स अप्पभावेन. यथा हि दानं अलोभप्पधानं, सीलं अदोसप्पधानं, एवं भावना अमोहप्पधाना. तत्थ यदा पञ्ञा न बलवती होति, तदा भावना पुब्बेनापरं विसेसावहा न होति, अनभिसङ्खतो विय आहारो पुरिसस्स योगिनो चित्तस्स अभिरुचिं न उप्पादेति, तेन तं निरस्सादं होति. तथा भावनाय सम्मदेव वीथिपटिपत्तिया अभावेन उपसमसुखं न विन्दति, तेनपि चित्तं निरस्सादं होति. तेन वुत्तं ‘‘पञ्ञापयोग…पे… निरस्सादं होती’’ति.

तस्स संवेगुप्पादनञ्च पसादुप्पादनञ्च तिकिच्छनन्ति तं दस्सेन्तो ‘‘अट्ठ संवेगवत्थूनी’’तिआदिमाह. तत्थ जातिजराब्याधिमरणानि यथारहं सुगतियं दुग्गतियञ्च होन्तीति तदञ्ञमेव पञ्चविधबन्धनादिखुप्पिपासादिअञ्ञमञ्ञविबाधनादिहेतुकं अपायदुक्खं दट्ठब्बं. तयिदं सब्बं तेसं तेसं सत्तानं पच्चुप्पन्नभवनिस्सितं गहितन्ति अतीते अनागते च काले ¶ वट्टमूलकदुक्खानि विसुं गहितानियेव. ये पन सत्ता आहारूपजीविनो तत्थ च उट्ठानफलूपजीविनो, तेसं अञ्ञेहि असाधारणं जीविकदुक्खं अट्ठमं संवेगवत्थु गहितन्ति दट्ठब्बं. अयं वुच्चति समये सम्पहंसनाति अयं सम्पहंसितब्बसमये वुत्तनयेन संवेगजननवसेन चेव पसादुप्पादनवसेन च सम्मदेव पहंसना, संवेगजननपुब्बकपसादुप्पादनेन भावनाचित्तस्स तोसनातिअत्थो.

सम्मापटिपत्तिं ¶ आगम्माति लीनुद्धच्चविरहेन समथवीथिपटिपत्तिया च सम्मदेव भावनापटिपत्तिं आगम्म.

अलीनन्तिआदीसु कोसज्जपक्खिकानं धम्मानं अनधिमत्तताय अलीनं, उद्धच्चपक्खिकानं अनधिमत्तताय अनुद्धतं, पञ्ञापयोगसम्पत्तिया उपसमसुखाधिगमेन च अनिरस्सादं, ततो एव आरम्मणे समप्पवत्तं समथवीथिपटिपन्नञ्च. तत्थ अलीनताय पग्गहे, अनुद्धताय च निग्गहे, अनिरस्सादताय सम्पहंसने न ब्यापारं आपज्जति. अलीनानुद्धच्चताहि आरम्मणे समप्पवत्तं, अनिरस्सादताय समथवीथिपटिपन्नं, समप्पवत्तिया वा अलीनं अनुद्धतं, समथवीथिपटिपत्तिया अनिरस्सादन्ति दट्ठब्बं. अयं वुच्चति समये अज्झुपेक्खनताति अयं अज्झुपेक्खितब्बसमये चित्तस्स पग्गहनिग्गहसम्पहंसनेसु ब्यावटतासङ्खातं पटिपक्खं अभिभुय्य उपेक्खना वुच्चति. एसाति समाधिबोज्झङ्गो अनुप्पन्नो उप्पज्जति. अरहत्तमग्गेन भावनापारिपूरी होतीति एतेन निप्परियायतो समाधिवेपुल्लप्पत्तोपि अरहा एवाति दस्सेति.

अनुरोधविरोधपहानवसेन मज्झत्तभावो उपेक्खासम्बोज्झङ्गस्स कारणं तस्मिं सति सिज्झनतो, असति च असिज्झनतो, सो च मज्झत्तभावो विसयवसेन दुविधोति आह ‘‘सत्तमज्झत्तता सङ्खारमज्झत्तता’’ति. तदुभयवसेन चस्स विरुज्झनं पस्सद्धिसम्बोज्झङ्गस्स भावनाय एव दूरीकतन्ति अनुरुज्झनस्सेव पहानविधिं दस्सेन्तो ‘‘सत्तमज्झत्तता’’तिआदिमाह. तथा हिस्स सत्तसङ्खारकेलायनपुग्गलपरिवज्जनं ‘‘उप्पत्तिया कारण’’न्ति वुच्चति. उपेक्खाय हि विसेसतो रागो पटिपक्खो, ततो रागबहुलस्स पुग्गलस्स उपेक्खा ‘‘विसुद्धिमग्गो’’ति वुच्चति. द्वीहाकारेहीति कम्मस्सकतापच्चवेक्खणं अत्तसुञ्ञतापच्चवेक्खणन्ति इमेहि द्वीहि कारणेहि. द्वीहेवाति अवधारणं सङ्खारसहिताय सङ्ख्यासमानताय दस्सनत्थं. सङ्ख्या एव हेत्थ समानं, न ¶ सङ्ख्येय्यं सब्बथा समानन्ति. अस्सामिकभावो अनत्तनियता. सति हि अत्तनि तस्स किञ्चनभावेन चीवरं अञ्ञं वा किञ्चि अत्तनियं नाम सिया, सो पन कोचि नत्थेवाति अधिप्पायो. अनद्धनियन्ति, न अद्धानक्खमं, न चिरट्ठायि इत्तरं अनिच्चन्ति अत्थो. तावकालिकन्ति तस्सेव वेवचनं.

ममायतीति ममत्तं करोति. ममाति तण्हाय परिग्गय्ह तिट्ठति. धनायन्ताति धनं दब्बं करोन्ता. अस्साति उपेक्खासम्बोज्झङ्गस्स अरहत्तमग्गेन भावनापारिपूरी होति. तथा हि अरहतो एव छळङ्गुपेक्खानिप्फत्ति.

असुभारम्मणा ¶ धम्माति असुभप्पकारा असुभझानस्स आरम्मणभूता धम्मा. कामं इन्द्रियबद्धापि केसादयो असुभप्पकारा एव, विसेसतो पन जिगुच्छितब्बे जिगुच्छावहे गण्हन्तो ‘‘दसा’’ति आह. यथा मनसिकरोतो सभावसरसतो तत्थ असुभसञ्ञा सन्तिट्ठति, तथा पवत्तो मनसिकारो उपायमनसिकारो. असुभे असुभपटिक्कूलाकारस्स उग्गण्हनं, यथा वा तत्थ उग्गहनिमित्तं उप्पज्जति, तथा मनसिकारो असुभनिमित्तस्स उग्गहो. उपचारप्पनावहाय असुभभावनाय अनुयुञ्जना असुभभावनानुयोगो.

मनच्छट्ठानं इन्द्रियानं सुट्ठु सुसंवरणे सति अवसरं अलभन्तो कामच्छन्दो पहीयतेव, तथा भोजने मत्तञ्ञुनो मिताहारस्स थिनमिद्धाभिभवाभावा ओतारं अलभमानो कामच्छन्दो पहीयति. यो पन आहारे पटिक्कूलसञ्ञं तब्बिपरिणामस्स तदाधारस्स तस्स च उदरियभूतस्स अतिविय जेगुच्छतं, कायस्स च आहारतिट्ठकतं सम्मदेव जानाति, सो सब्बसो भोजने पमाणस्स जाननेन विसेसतो भोजने मत्तञ्ञू नाम. तस्स कामच्छन्दो पहीयतेव, अट्ठकथायं पन अप्पाहारतंयेव दस्सेतुं ‘‘चतुन्न’’न्तिआदि वुत्तं. असुभकम्मिकतिस्सत्थेरो दन्तट्ठिदस्सावी. पहीनस्साति विक्खम्भनवसेन पहीनस्स. अभिधम्मपरियायेन सब्बोपि लोभो कामच्छन्दनीवरणन्ति ‘‘अरहत्तमग्गेन आयतिं अनुप्पादो’’ति वुत्तं.

मेज्जति हितफरणवसेन सिनिय्हतीति मित्तो, हितेसी पुग्गलो, तस्मिं मित्ते भवा, मित्तस्स वा एसाति मेत्ता, हितेसिता. सा एव पटिपक्खतो ¶ चेतसो विमुत्तीति मेत्ताचेतोविमुत्ति. तत्थ मेत्तायनस्स सत्तेसु हितफरणस्स उप्पादनं पवत्तनं मेत्तानिमित्तस्स उग्गहो. तेनाह ‘‘ओदिस्सका’’तिआदि.

तत्थ अत्तपियसहायमज्झत्तवेरिवसेन ओदिस्सकता. सीमासम्भेदे कते अनोदिस्सकता. एकादिदिसाफरणवसेन दिसाफरणता मेत्ताय उग्गण्हने वेदितब्बा. उग्गहो याव उपचारा दट्ठब्बो. उग्गहिताय आसेवना भावना, सब्बा इत्थियो पुरिसा अरिया अनरिया देवा मनुस्सा विनिपातिकाति सत्तोधिकरणवसेन पवत्ता सत्तविधा, अट्ठवीसतिविधा वा, दसहि दिसाहि दिसोधिकरणवसेन पवत्ता दसविधा, एकेकाय दिसाय सत्तादिइत्थादिअवेरादिभेदेन असीताधिकचतुसतप्पभेदा च ओधिसोफरणमेत्ता. सब्बे सत्ता, पाणा, भूता, पुग्गला, अत्तभावपरियापन्नाति एतेसं वसेन पञ्चविधा. एकेकस्मिं अवेरा होन्तु, अब्यापज्जा, अनीघा, सुखी अत्तानं परिहरन्तूति चतुधा पवत्तिया वीसतिविधा अनोधिसोफरणमेत्ता, तं सन्धायाह – ‘‘ओधिसो…पे… भावेन्तस्सपी’’ति. त्वं एतस्सातिआदिना कम्मस्सकतापच्चवेक्खणं दस्सेति ¶ . पटिसङ्खाने ठितस्साति कोधे यथावुत्तस्स आदीनवस्स तप्पटिपक्खतो अकोधे मेत्ताय आनिसंसस्स च पटिसङ्खाने सम्मदेव जानने. सेवन्तस्साति भजन्तस्स ब्यापादो पहीयति.

अतिभोजने निमित्तग्गाहोति आहारस्स अधिकभोजने थिनमिद्धस्स निमित्तग्गाहो, ‘‘एत्तके भुत्ते थिनमिद्धं उप्पज्जति, एत्तके नो’’ति थिनमिद्धस्स कारणाकारणग्गाहोति अत्थो. दिवा सूरियालोकन्ति दिवा गहितनिमित्तं सूरियालोकं, रत्तियं मनसिकरोन्तस्सपीति एवमेत्थ अत्थो वेदितब्बो. धुतङ्गानं वीरियनिस्सितत्ता वुत्तं ‘‘धुतङ्गनिस्सितसप्पायकथायपी’’ति.

कुक्कुच्चम्पि कताकतानुसोचनवसेन पवत्तमानं चेतसो अवूपसमावहताय उद्धच्चेन समानलक्खणमेवाति तदुभयस्स पहानकारणं दस्सेन्तो भगवा – ‘‘अत्थि, भिक्खवे, चेतसो वूपसमो’’तिआदिमाह. तस्मा बाहुसच्चादि तस्स पहानकारणन्ति दस्सेतुं ‘‘अपिच छ धम्मा’’तिआदिमाह. तत्थ बहुस्सुतस्स गन्थतो, अत्थतो धम्मं विचारेन्तस्स अत्तवेदादिपटिलाभसम्भवतो विक्खेपो न होति. यथाविहितपटिपत्तिया ¶ यथाधम्मपटिकारप्पत्तिया च विप्पटिसारो अनवसरोवाति ‘‘बाहुसच्चेनपि…पे… उद्धच्चकुक्कुच्चं पहीयती’’ति वुत्तं. यदग्गेन बहुस्सुतस्स पटिसङ्खानवतो उद्धच्चकुक्कुच्चं पहीयति, तदग्गेन परिपुच्छकताविनयपकतञ्ञुताहिपि तं पहीयतीति दट्ठब्बं. वुद्धसेविता च वुद्धसीलितं आवहतीति चेतसो वूपसमकरत्ता उद्धच्चकुक्कुच्चस्स पहानकारी वुत्ता, वुद्धभावं पन अनपेक्खित्वा विनयधरा कुक्कुच्चविनोदका कल्याणमित्ताति दट्ठब्बा. विक्खेपो च भिक्खूनं येभुय्येन कुक्कुच्चहेतुको होतीति ‘‘कप्पियाकप्पियपरिपुच्छाबहुलस्सा’’तिआदिना विनयनयेनेव परिपुच्छकतादयो निद्दिट्ठा. पहीने उद्धच्चकुक्कुच्चेति निद्धारणे भुम्मं. कुक्कुच्चस्स दोमनस्ससहगतत्ता अनागामिमग्गेन आयतिं अनुप्पादो वुत्तो.

कुसलाकुसला धम्मातिआदीसु यं वत्तब्बं, तं हेट्ठा वुत्तमेव. कामं बाहुसच्चपरिपुच्छकताहि अट्ठवत्थुकापि विचिकिच्छा पहीयति, तथापि रतनत्तयविचिकिच्छामूलिका सेसविचिकिच्छाति कत्वा वुत्तं ‘‘तीणि रतनानि आरब्भा’’तिआदि. विनये पकतञ्ञुताय च सति सिक्खाय कङ्खाय असम्भवो एव, तथा रतनत्तयगुणावबोधे सति पुब्बन्तादीसु संसयस्साति आह – ‘‘विनये’’तिआदि. ओकप्पनीयसद्धा सद्धेय्यवत्थुं अनुपविसित्वा विय अधिमुच्चनं, तञ्च तथा अधिमोक्खुप्पादनमेव. सद्धाय निन्नपोणपब्भारता अधिमुत्ति. अरहत्तेन कूटं गण्हि सत्तपि बोज्झङ्गे वित्थारेत्वा देसनाय ओसापितत्ता.

आहारसुत्तवण्णना निट्ठिता.

२. परियायसुत्तवण्णना

२३३. सम्बहुलाति ¶ वुच्चन्ति सङ्घसमञ्ञाय अभावतो. ततो परन्ति तिण्णं जनानं उपरि सङ्घो चतुवग्गकरणीयादिसङ्घकम्मवसेन कम्मप्पत्तत्ता. पविसिंसूति भाविनि पविसने भूते विय कत्वा उपचारेन वुत्तन्ति आह – ‘‘पविट्ठा’’ति. भाविनि हि भूते विय उपचारो. तेनाह – ‘‘ते पना’’तिआदि, ते पन भिक्खूति अत्थो. पुन ते पनाति तित्थिया तित्थियसावका च.

इमस्मिं ¶ पञ्ञापनेति ‘‘पञ्च नीवरणे पहाया’’तिआदिनयप्पवत्ते इमस्मिं पकारे अत्थपञ्ञापने. विसिस्सति अञ्ञमञ्ञतो पभिज्जतीति विसेसो, भेदो. स्वायं इध अन्तोगधाधिकभावो अधिप्पेतोति आह – ‘‘को विसेसोति किं अधिक’’न्ति. अधिकं पयसनं पयुञ्जनन्ति अधिप्पयासो, अधिकप्पयोगो. नाना करीयति एतेनाति नानाकरणं, भेदोति आह – ‘‘किं नानत्त’’न्ति. दुतियपदेति ‘‘अनुसासनिया वा अनुसासनि’’न्ति एतस्मिं पदे. एसेव नयोति यथा पठमस्मिं पदे अत्थयोजना, एवं दुतियपदेपि योजेतब्बा.

तीणि ठानानीति देवमारब्रह्मट्ठानानि तीणि ‘‘सदेवके लोके’’तिआदिना लोके पक्खिपित्वा. ‘‘सस्समणब्राह्मणिया पजाय सदेवमनुस्साया’’ति द्वे ठानानि. ‘‘पजाया’’ति एत्थ पक्खिपित्वा इति पञ्चहि पदेहि. उद्देसन्ति उद्दिसितब्बतं. गणनन्ति एको कामच्छन्दोति गहेतब्बतं गच्छति. अत्तनो हत्थपादादीसूति निदस्सनमत्तं दट्ठब्बं समुदायं आरब्भ पटिघस्स उप्पज्जनतो. अत्तनो खन्धेसु विमति ‘‘अहं नु खोस्मी’’तिआदिना.

किञ्चापि सब्बं वीरियं चेतसिकमेव, यं पन कायकम्माधिट्ठानादिवसेन मनसि कायिकपयोगसमुट्ठापनं वीरियं कायिकन्ति लद्धपरियायन्ति ततो विसेसेत्वा चेतसिकन्ति यथाधिप्पेतदुतियतादस्सनत्थं. यदिपि यथाकप्पितइरियापथसन्धारणवसेन पवत्तमानं वीरियं कायस्स तथापवत्तस्स पच्चयभूतन्ति न सक्का वत्तुं, तथापि न तादिसो कायपयोगो, तदा पवत्तो नत्थीति वुत्तं ‘‘कायपयोगं विना उप्पन्नवीरिय’’न्ति. सतिसम्बोज्झङ्गसदिसो वाति इमिना अज्झत्तिके सङ्खारे अज्झुपेक्खनवसेन पवत्ता अज्झत्तधम्मेसु उपेक्खातिआदिनयं अतिदिसति.

‘‘मिस्सकबोज्झङ्गा कथिता’’ति वत्वा तमत्थं विभावेतुं ‘‘एतेसू’’तिआदि वुत्तं. चङ्कमन्तेनपि ¶ अरियमग्गं अधिगन्तुं सक्काति कत्वा वुत्तं ‘‘मग्गं अपत्तं कायिकवीरिय’’न्ति. बोज्झङ्गा न लब्भन्तीति निप्परियायबोज्झङ्गा न लब्भन्ती. बोज्झङ्गे उद्धरन्ति परियायतोति अधिप्पायो. सेसाति बहिद्धाधम्मेसु सति-धम्मविचय-उपेक्खा-चेतसिक-वीरिय-सवितक्क-सविचार-पीति-समाधी द्वे पस्सद्धियो च. अयं पन नयो पचुरप्पवत्तिवसेन अट्ठकथानयेनेव ¶ वुत्तो. थेरवादवसेन पन अवितक्कअविचारमत्ता पीतिसमाधिसम्बोज्झङ्गा रूपावचरापि अत्थीति तेपि गहेत्वा दस मिस्सकाव होन्तीति वत्तब्बं सियाति.

परियायसुत्तवण्णना निट्ठिता.

३. अग्गिसुत्तवण्णना

२३४. लोणधूपनन्ति लोणञ्च धूपनञ्च लोणधूपनं. योधकम्मन्ति योधपुग्गलेन कत्तब्बं कम्मं. मन्तकम्मन्ति राजकिच्चमन्तनं. पटिहारकम्मन्ति रञ्ञो सन्तिकं आगतानं वचनं रञ्ञो निवेदेत्वा ततो नेसं पटिहरणकम्मं. तस्माति सब्बत्थिकत्ता सतिया. एवं ‘‘सतिञ्च ख्वाह’’न्तिआदिकं अवोच. पुब्बभागविपस्सना बोज्झङ्गाव कथिता पग्गहनिग्गहविनोदितत्ता.

अग्गिसुत्तवण्णना निट्ठिता.

४. मेत्तासहगतसुत्तवण्णना

२३५. कीदिसा गति निब्बत्ति एतिस्साति किंगतिका, किंनिट्ठाति वुत्तं होति. कीदिसी परमा उत्तमा कोटि एतिस्साति किंपरमा. कीदिसं फलं आनिसंसं उदयो एतिस्साति किंफला. संसट्ठं सम्पयुत्तन्ति इदं सहगत-सद्दस्स अत्थदस्सनमत्तं, इध पन मेत्ताझानं पादकं कत्वा विपस्सनापुब्बभागबोज्झङ्गा च ‘‘मेत्तासहगतं सतिसम्बोज्झङ्ग’’न्तिआदिना वुत्ताति वेदितब्बं. सब्बत्थाति सब्बेसु बोज्झङ्गेसु सब्बेसु च ब्रह्मविहारेसु.

पटिकूलेति विरज्जतीति पटिकूलं, अनिट्ठं. न पटिकूलं अप्पटिकूलं, इट्ठं. तेनाह ‘‘इट्ठे वत्थुस्मि’’न्ति. एत्थाति अप्पटिकूलवत्थुस्मिं. एवन्ति पटिकूलसञ्ञी. सत्ते अप्पटिकूले असुभफरणं, सङ्खारे अप्पटिकूले अनिच्चन्ति मनसिकारं करोन्तो. असुभायाति असुभसञ्ञाय. अनिच्चतो वा उपसंहरतीति अनिच्चन्ति मनसिकारं पवत्तेति. ‘‘एसेव नयो’’ति सङ्खेपतो वुत्तमत्थं विवरितुं ‘‘अप्पटिकूलपटिकूलेसू’’तिआदि वुत्तं. छळङ्गुपेक्खन्ति छसु आरम्मणेसु पहीनानुरोधस्स उप्पत्तिया छळङ्गवन्तं उपेक्खं.

मेत्तायाति ¶ ¶ मेत्ताभावनाय. पटिकूलादीसु वत्थूसु इच्छितविहारेन विहरितुं समत्थता अरियानं एव, तत्थ च अरहतो एव इज्झनतो अरियिद्धि नाम. तस्सा अरियिद्धिया च दस्सितत्ता देसना विनिवट्टेतब्बा परियोसानेतब्बा सिया. अरहत्तं पापुणितुं न सक्कोति इन्द्रियानं अपरिपक्कत्ता निकन्तिया च दुप्परियादानतो. अयं देसनाति ‘‘मेत्तासहगतं बोज्झङ्गं भावेती’’तिआदिना अयं देसना आरद्धा. यो हि मेत्ताझानं पादकं कत्वा सम्मसनं आरभित्वा अरहत्तं पापुणितुं असक्कोन्तो परिसुद्धेसु वण्णकसिणेसु विमोक्खसङ्खातं रूपावचरज्झानं निब्बत्तेति, तं सन्धायाह भगवा – ‘‘सुभं खो पन विमोक्खं उपसम्पज्ज विहरती’’ति.

सुभपरमन्ति सुभविमोक्खपरमं. इध लोके एव पञ्ञा अस्स. तेनाह ‘‘लोकियपञ्ञस्साति अत्थो’’ति. अरहत्तपरमाव मेत्ता अरहत्तमग्गस्स पादकत्ता. करुणादीसुपि एसेव नयोति करुणादिझानं पादकं कत्वा सङ्खारे सम्मसन्तो अरहत्तं पत्तुं सक्कोति, तस्स अरहत्थपरमा करुणा होति, एवं मुदिताउपेक्खासुपि वत्तब्बन्ति इममत्थं अतिदिसति. पुन देसनारम्भपयोजनं पन ‘‘इमिना नयेना’’ति हेट्ठा अतिदिट्ठमेव.

सुभपरमादिताति मेत्ताकरुणामुदिताउपेक्खानं सुभपरमता आकासानञ्चायतनपरमता, विञ्ञाणञ्चायतनपरमता, आकिञ्चञ्ञायतनपरमता. तस्स तस्साति सुभविमोक्खस्स हेट्ठा तिण्णं अरूपज्झानानञ्च यथाक्कमं उपनिस्सयत्ता. अप्पटिकूलपरिचयाति इट्ठारम्मणे मनसिकारबहुलीकारा. अप्पकसिरेनेवाति सुखेनेव. तत्थाति विसुद्धताय इट्ठेसु वण्णकसिणेसु. चित्तन्ति भावनामयचित्तं पक्खन्दति अप्पनावसेन. ततो परन्ति ततो सुभविमोक्खतो परं विमोक्खानं उपनिस्सयो नाम न होति, मेत्तासहगतभावो दट्ठब्बो.

सत्तदुक्खं समनुपस्सन्तस्साति दण्डेन अभिहटप्पत्तरूपहेतुं सत्तेसु उप्पज्जनकदुक्खं ञाणेन वीमंसन्तस्स. तयिदं रूपनिमित्तकं सत्तेसु उप्पज्जनकं दुक्खं ञाणेन करुणाविहारिस्स विसेसतो पक्खन्दतीति कत्वा वुत्तं ‘‘अप्पकसिरेनेव तत्थ चित्तं पक्खन्दती’’ति, न पन सब्बसो अरूपे आनिसंसदस्सनतो.

विञ्ञाणं ¶ समनुपस्सन्तस्साति इदं पामोज्जगहणमुखेन तन्निस्सयविञ्ञाणस्स गहणं सम्भवतीति कत्वा वुत्तं. विञ्ञाणग्गहणपरिचितन्ति वुत्तनयेन विञ्ञाणग्गहणे परिचितं.

उपेक्खाविहारिस्साति ¶ उपेक्खाब्रह्मविहारं विहरतो. आभोगाभावतोति सुखादिवसेन आभुजनाभावतो. सुख…पे… सम्भवतोति सुखदुक्खाति परमत्थकम्मग्गहणे विमुखतासम्भवतो. अविज्जमानग्गहणदुक्खन्ति परमत्थतो अविज्जमानसत्तपञ्ञत्तिगहणपरिचितं तस्स तस्स अभावमत्तकस्स गहणम्पि दुक्खं कुसलम्पि होति. सेसं सुविञ्ञेय्यमेव.

मेत्तासहगतसुत्तवण्णना निट्ठिता.

५. सङ्गारवसुत्तवण्णना

२३६. पठमञ्ञेवाति पुरेतरंयेव. असज्झायकतानं मन्तानं अप्पटिभानं पगेव पठमंयेव सिद्धं, तत्थ वत्तब्बमेव नत्थीति अधिप्पायो. परियुट्ठानं नाम अभिभवो गहणन्ति आह – ‘‘कामरागपरियुट्ठितेनाति कामरागगहितेना’’ति. विक्खम्भेति अपनेतीति विक्खम्भनं, पटिपक्खतो निस्सरति एतेनाति निस्सरणं, विक्खम्भनञ्च तं निस्सरणञ्चाति विक्खम्भननिस्सरणं. तेनाह – ‘‘तत्था’’तिआदि. सेसपदद्वयेपि एसेव नयो. अत्तना अरणियो पत्तब्बो अत्तत्थो, तथा परत्थो वेदितब्बो.

‘‘अनिच्चतो अनुपस्सन्तो निच्चसञ्ञं पजहती’’तिआदीसु ब्यापादादीनं अनागतत्ता अब्यापादवारे तदङ्गनिस्सरणं न गहितं. किञ्चापि न गहितं, पटिसङ्खानवसेन पन तस्स विनोदेतब्बताय तदङ्गनिस्सरणम्पि लब्भतेवाति सक्का विञ्ञातुं. आलोकसञ्ञा उपचारप्पत्ता, अप्पनाप्पत्ता वा, यो कोचि कसिणज्झानादिभेदो समथो. धम्मववत्थानं उपचारप्पनाप्पत्तवसेन गहेतब्बं.

कुथितोति तत्तो. उस्मुदकजातोति तस्सेव कुथितभावस्स उस्मुदकतं अच्चुण्हतं पत्तो. तेनाह ‘‘उसुमजातो’’ति. तिलबीजकादिभेदेनाति तिलबीजककण्णिककेसरादिभेदेन. सेवालेन…पे… पणकेनाति उदकपिच्छिलेन. अप्पसन्नो आकुलताय. असन्निसिन्नो ¶ कललुप्पत्तिया. अनालोकट्ठानेति आलोकरहिते ठाने.

सङ्गारवसुत्तवण्णना निट्ठिता.

६. अभयसुत्तवण्णना

२३७. एकंसेन भगवा नीवरणाति एकंसतो एव भगवा एते धम्मा नीवरणा चित्ते कुसलप्पवत्तिया ¶ नीवरणतो. कायकिलमथोति कायपरिस्समो, सो पन अट्ठुप्पत्तिया पच्चयत्ता ‘‘दरथो’’ति वुत्तो. चित्तकिलमथो तप्पच्चयजातो दट्ठब्बो. तेनाह – ‘‘तस्स किरा’’तिआदि. चित्तदरथोपि पटिप्पस्सम्भीति आनेत्वा सम्बन्धो. मग्गेनेवाति यथाधिगतेन अरियमग्गेनेव. अस्साति अभयस्स राजकुमारस्स. एतं कायचित्तदरथद्वयं.

अभयसुत्तवण्णना निट्ठिता.

साकच्छवग्गवण्णना निट्ठिता.

७. आनापानवग्गो

१. अट्ठिकमहप्फलसुत्तादिवण्णना

२३८. उप्पन्नसञ्ञाति सञ्ञासीसेन उपचारज्झानं वदति. तेनाह ‘‘तं पनेत’’न्तिआदि. छविचम्मम्पि उपट्ठातीति इदं सविञ्ञाणकं अविञ्ञाणकम्पि कायसामञ्ञतो गहेत्वा वुत्तं. सति वा उपादिसेसेति एत्थ उपादियति अत्तनो आरम्मणं गण्हातीति उपादि, उपादानं, एतस्स एकदेसे अप्पहीने सतीति अत्थो.

आनापानवग्गवण्णना निट्ठिता.

८. निरोधवग्गो

१-१०. असुभसुत्तादिवण्णना

२४८-२५७. अनभिरतिन्ति अनभिरमणं अनपेक्खितं. अच्चन्तनिरोधभूते निब्बाने पवत्तसञ्ञा निरोधसञ्ञा. तत्थ सा मग्गसहगता लोकुत्तरा ¶ , या पन निब्बाने निन्नभावेन पवत्ता, उपसमानुस्सतिसहगता च, सा लोकियाति आह – ‘‘निरोधसञ्ञा मिस्सका’’ति. ‘‘तेसं नवसू’’तिआदि पमादपाठो. ‘‘एकादससु अप्पना होति, नव उपचारज्झानिका’’ति पाठो गहेतब्बो. वीसति कम्मट्ठानानीति इदम्पि इधागतनयो, न विसुद्धिमग्गादीसु आगतनयो ¶ . एत्थ च आरम्मणादीसु यथायोगं अप्पनं उपचारं वा पापुणित्वा अरहत्तप्पत्तस्स पुब्बभागभूता विपस्सनामग्गबोज्झङ्गा कथिता.

निरोधवग्गवण्णना निट्ठिता.

बोज्झङ्गसंयुत्तवण्णना निट्ठिता.

३. सतिपट्ठानसंयुत्तं

१. अम्बपालिवग्गो

१. अम्बपालिसुत्तवण्णना

३६७. एकायन्वायन्ति ¶ ¶ सन्धिवसेन वुत्तं ओ-कारस्स व-कारं अ-कारस्स दीघं कत्वा. अयं किर संयुत्ताभिलापो, तत्थ अयन-सद्दो मग्गपरियायो. न केवलं अयमेव, अथ खो अञ्ञेपि मग्गपरियायाति पदुद्धारं करोन्तो ‘‘मग्गस्स ही’’तिआदिं वत्वा यदि मग्गपरियायो आयन-सद्दो, कस्मा पुन मग्गोति वुत्तन्ति चोदनं सन्धायाह ‘‘तस्मा’’तिआदि. तत्थ एकमग्गोति एकोव मग्गो. न हि निब्बानगामिमग्गो अञ्ञो अत्थीति. ननु सतिपट्ठानं इध मग्गोति अधिप्पेतं, तदञ्ञेपि बहू मग्गधम्मा अत्थीति? सच्चं अत्थि, ते पन सतिपट्ठानग्गहणेनेव गहिता तदविनाभावतो. तथा हि ञाणवीरियादयो निद्देसे गहिता, उद्देसे सतिया एव गहणं वेनेय्यज्झासयवसेनाति दट्ठब्बं, सतिया मग्गभावदस्सनत्थञ्च. न द्वेधापथभूतोति इमिना इमस्स द्वयभावाभावं विय अनिब्बानगामिभावाभावञ्च दस्सेति. निब्बानगमनट्ठेनाति निब्बानं गच्छति एतेनाति निब्बानगमनं, सो एव अविपरीतभावनाय अत्थो, तेन निब्बानगमनट्ठेन, निब्बानाधिगमूपायतायाति अत्थो. मग्गनीयट्ठेनाति गवेसितब्बताय.

रागादीहीति ‘‘रागो मलं, दोसो मलं, मोहो मल’’न्ति (विभ. ९२४) एवं वुत्तेहि रागादीहि मलेहि. सा पनायं संकिलिट्ठचित्तानं विसुद्धि सिज्झमाना यस्मा सोकादीनं अनुप्पादाय संवत्तति, तस्मा वुत्तं ‘‘सोकपरिदेवानं समतिक्कमाया’’तिआदि. तत्थ सोचनं ञातिब्यसनादिनिमित्तं चेतसो सन्तापो अन्तोनिज्झानं सोको. ञातिब्यसनादिनिमित्तमेव सोकाधिकताजनितो ‘‘कहं एकपुत्तका’’तिआदिना परिदेवनवसेन वाचाविप्पलापो परिदेवनं परिदेवो. तस्स आयतिं अनुप्पज्जनं इध समतिक्कमोति आह ‘‘पहानाया’’ति. दुक्खदोमनस्सानन्ति एत्थ चेतसिकदुक्खताय दोमनस्सस्सपि दुक्खसद्देनेव गहणे ¶ सिद्धे सद्देन अनिवत्तनतो ¶ सामञ्ञजोतनाय विसेसवचनं सेट्ठन्ति ‘‘दोमनस्सान’’न्तेव वुत्तं. चेतसिकदोमनस्सस्साति भूतकथनं दट्ठब्बं. ञायति एतेन याथावतो पटिविज्झीयति चतुसच्चन्ति ञायो वुच्चति अरियमग्गो. ननु अयम्पि मग्गो, किं मग्गो एव मग्गस्स अधिगमाय होतीति चोदनं सन्धायाह – ‘‘अयं ही’’तिआदि. तण्हाव कम्मकिलेसविपाकानं विननट्ठेन संसिब्बनट्ठेन वानं. तेन तण्हावानेन विरहितत्ता तस्स अभावाति अत्थो. अत्तपच्चक्खायाति अत्तपच्चक्खत्थाय.

वण्णभासनन्ति पसंसावचनं. विसुद्धिन्ति विसुज्झनं किलेसप्पहानं. उग्गहेतब्बन्ति एत्थ वाचुग्गतकरणं उग्गहो. परिचयकरणं परिपुच्छामूलकत्ता तग्गहणेनेव गहितन्ति दट्ठब्बं.

न ततो हेट्ठाति इध अधिप्पेतकायादीनं वेदनादिसभावत्ताभावा कायवेदनाचित्तविमुत्तस्स तेभूमकधम्मस्स विसुं विपल्लासवत्थन्तरभावेन गहितत्ता च हेट्ठा गहणेसु विपल्लासवत्थूनं अनिट्ठानं सन्धाय वुत्तं. पञ्चमस्स पन विपल्लासवत्थुनो अभावेन ‘‘न उद्ध’’न्ति आह. आरम्मणविभागेन हेत्थ सतिपट्ठानविभागोति. तयो सतिपट्ठानाति सतिपट्ठानसद्दस्स अत्थुद्धारदस्सनं, न इध पाळियं वुत्तस्स सतिपट्ठानसद्दस्स अत्थदस्सनं. आदीसु हीति एत्थ आदि-सद्देन ‘‘फस्ससमुदया वेदनानं समुदयो, नामरूपसमुदया चित्तस्स समुदयो, मनसिकारसमुदया धम्मानं समुदयो’’ति (सं. नि. ५.४०८) सतिपट्ठानाति वुत्तानं सतिगोचरानं पकासके सुत्तपदेसे सङ्गण्हाति. एवं पटिसम्भिदामग्गपाळियम्पि अवसेसपाळिपदेसदस्सनत्थो आदि-सद्दो दट्ठब्बो. सतिया पट्ठानन्ति सतिया पतिट्ठातब्बट्ठानं.

अरियोति आरकत्तादिना अरियं सम्मासम्बुद्धमाह. एत्थाति एतस्मिं सळायतनविभङ्गसुत्ते (म. नि. ३.३११). तत्थ हि –

‘‘तयो सतिपट्ठाना यदरियो…पे… मरहतीति इति खो पनेतं वुत्तं, किञ्चेतं पटिच्च वुत्तं. इध, भिक्खवे, सत्था सावकानं धम्मं देसेति अनुकम्पको हितेसी अनुकम्पं उपादाय – ‘इदं वो ¶ हिताय इदं वो सुखाया’ति. तस्स सावका न सुस्सूसन्ति, न सोतं ओदहन्ति, न अञ्ञा चित्तं उपट्ठपेन्ति, वोक्कम्म च सत्थुसासना वत्तन्ति. तत्र, भिक्खवे, तथागतो न चेव अनत्तमनो होति, न च अनत्तमनतं पटिसंवेदेति, अनवस्सुतो च विहरति सतो सम्पजानो. इदं, भिक्खवे, पठमं सतिपट्ठानं. यदरियो सेवति…पे... मरहति. पुन चपरं, भिक्खवे, सत्था ¶ …पे… इदं वो सुखायाति. तस्स एकच्चे सावका न सुस्सूसन्ति…पे… एकच्चे सावका सुस्सूसन्ति…पे… न च वोक्कम्म सत्थुसासना वत्तन्ति. तत्र, भिक्खवे, तथागतो न चेव अनत्तमनो होति, न च अनत्तमनतं पटिसंवेदेति, न चेव अत्तमनो होति, न च अत्तमनतं पटिसंवेदेति. अनत्तमनतञ्च अत्तमनतञ्च तदुभयं अभिनिवज्जेत्वा उपेक्खको विहरति सतो सम्पजानो. इदं, भिक्खवे, दुतियं सतिपट्ठानं…पे… मरहति. पुन चपरं, भिक्खवे,…पे… सुखायाति, तस्स सावका सुस्सूसन्ति…पे… वत्तन्ति. तत्र, भिक्खवे, तथागतो अत्तमनो चेव होति, अत्तमनतञ्च पटिसंवेदेति, अनवस्सुतो च विहरति सतो सम्पजानो. इदं, भिक्खवे, ततियं सतिपट्ठान’’न्ति –

एवं पटिघानुनयेहि अनवस्सुतता निच्चं उपट्ठितस्सतिताय तदुभयवीतिवत्तता ‘‘सतिपट्ठान’’न्ति वुत्ता. बुद्धानंयेव हि निच्चं उपट्ठितस्सतिता होति आवेणिकधम्मभावतो, न पच्चेकबुद्धादीनं. प-सद्दो आरम्भं जोतेति, आरम्भो च पवत्तीति कत्वा आह ‘‘पवत्तयितब्बतोति अत्थो’’ति. सतिया करणभूताय पट्ठानं पट्ठपेतब्बं सतिपट्ठानं. अन-सद्दो हि बहुलवचनेन कम्मत्थोपि होतीति.

तथास्स कत्तुअत्थोपि लब्भतीति ‘‘पतिट्ठातीति पट्ठान’’न्ति वुत्तं. उपट्ठातीति एत्थ उप-सद्दो भुसत्थविसिट्ठं पक्खन्दनं दीपेतीति ‘‘ओक्कन्दित्वा पक्खन्दित्वा पवत्ततीति अत्थो’’ति वुत्तं. पुन भावत्थं सतिसद्दं पट्ठानसद्दञ्च वण्णेन्तो ‘‘अथ वा’’तिआदिमाह. तेन पुरिमविकप्पे सति-सद्दो पट्ठान-सद्दो च कत्तुअत्थोति विञ्ञायति. सरणट्ठेनाति चिरकतस्स चिरभासितस्स च अनुस्सरणट्ठेन. इदन्ति यं ‘‘सतियेव सतिपट्ठान’’न्ति वुत्तं, इदं इध इमस्मिं सुत्तपदेसे अधिप्पेतं.

यदि ¶ एवन्ति यदि सति एव सतिपट्ठानं, सति नाम एको धम्मो, एवं सन्ते कस्मा सतिपट्ठानाति बहुवचनन्ति आह ‘‘सतीनं बहुत्ता’’तिआदि. यदि बहुका ता सतियो, अथ कस्मा मग्गोति एकवचनन्ति योजना. मग्गनट्ठेनाति निय्यानट्ठेन. निय्यानिको हि मग्गधम्मो, तेनेव निय्यानिकभावेन एकत्तुपगतो एकन्ततो निब्बानं गच्छति, अत्थिकेहि च तदत्थं मग्गीयतीति आह ‘‘वुत्तञ्हेत’’न्तिआदि. तत्थ चतस्सोपि चेताति कायानुपस्सनादिवसेन चतुब्बिधापि च एता सतियो. अपरभागेति अरियमग्गक्खणे. किच्चं साधयमानाति पुब्बभागे कायादीसु आरम्मणेसु सुभसञ्ञादिविधमनवसेन विसुं विसुं पवत्तित्वा मग्गक्खणे सकिंयेव ¶ तत्थ चतुब्बिधस्सपि विपल्लासस्स समुच्छेदवसेन पहानकिच्चं साधयमाना आरम्मणकरणवसेन निब्बानं गच्छन्ति, तमेवस्स चतुकिच्चसाधनतं उपादाय बहुवचननिद्देसो, तथापि अत्थतो भेदाभावतो मग्गोति एकवचनेन वुच्चति. तेनाह – ‘‘तस्मा चतस्सोपि एको मग्गोति वुत्ता’’ति.

कथेतुकम्यतापुच्छा इतरासं पुच्छानं इध असम्भवतो निद्देसादिवसेन देसेतुकामताय च तथा वुत्तत्ता. ‘‘अयञ्चेव कायो बहिद्धा च नामरूप’’न्तिआदीसु (म. नि. १.२७१, २८७, २९७; पारा. ११) खन्धपञ्चकं, ‘‘सुखञ्च कायेन पटिसंवेदेती’’तिआदीसु वेदनादयो तयो अरूपक्खन्धा, ‘‘या तस्मिं समये कायस्स पस्सद्धि पटिप्पस्सद्धी’’तिआदीसु (ध. स. ४०) वेदनादयो तयो चेतसिका खन्धा ‘‘कायो’’ति वुच्चन्ति, ततो विसेसनत्थं ‘‘कायेति रूपकाये’’ति आह. कायानुपस्सीति एत्थ तस्सीलत्थं दस्सेन्तो ‘‘कायं अनुपस्सनसीलो’’ति आह. अनिच्चतो अनुपस्सतीति चतुसमुट्ठानिककायं ‘‘अनिच्च’’न्ति अनुपस्सति, एवं पस्सन्तो एव चस्स अनिच्चाकारम्पि अनुपस्सतीति वुच्चति, तथाभूतस्स चस्स निच्चगाहस्स विसेसोपि न होतीति वुत्तं ‘‘नो निच्चतो’’ति. तथा हेस ‘‘निच्चसञ्ञं पजहती’’ति (पटि. म. १.२८) वुत्तो. एत्थ च अनिच्चतो एव अनुपस्सतीति एवकारो लुत्तनिद्दिट्ठोति तेन निवत्तितमत्थं दस्सेतुं ‘‘नो निच्चतो’’ति वुत्तं. न चेत्थ दुक्खानुपस्सनादिनिवत्तनमासङ्कितब्बं पटियोगिनिवत्तनपरत्ता एव-कारस्स, उपरि देसनाआरुळ्हत्ता च तासं. दुक्खतो अनुपस्सतीतिआदीसुपि एसेव नयो. अयं पन विसेसो – अनिच्चस्स दुक्खत्ता ¶ तमेव कायं दुक्खतो अनुपस्सति, दुक्खस्स अनत्तत्ता अनत्ततो अनुपस्सतीति.

यस्मा पन यं अनिच्चं दुक्खं अनत्ता, न तं अभिनन्दितब्बं, यञ्च न अभिनन्दितब्बं, न तत्थ रज्जितब्बं, तस्मा वुत्तं ‘‘अनिच्चतो अनुपस्सति, नो निच्चतो, दुक्खतो अनुपस्सति, नो सुखतो, अनत्ततो अनुपस्सति, नो अत्ततो, निब्बिन्दति, नो नन्दति, विरज्जति, नो रज्जती’’ति. सो एवं अरज्जन्तो रागं निरोधेति, नो समुदेति, समुदयं न करोतीति अत्थो. एवं पटिपन्नो च पटिनिस्सज्जति, नो आदियति. अयञ्हि अनिच्चादिअनुपस्सना तदङ्गवसेन सद्धिं कायतन्निस्सयखन्धाभिसङ्खारेहि किलेसानं परिच्चजनतो सङ्खतदोसदस्सनेन तब्बिपरीते निब्बाने तन्निन्नताय पक्खन्दनतो ‘‘परिच्चागपटिनिस्सग्गो चेव पक्खन्दनपटिनिस्सग्गो चा’’ति वुच्चति. तस्मा ताय समन्नागतो भिक्खु वुत्तनयेन किलेसे च परिच्चजति, निब्बाने च पक्खन्दति, तथाभूतो च परिच्चजनवसेन किलेसे ¶ न आदियति, नापि अदोसदस्सितावसेन सङ्खतारम्मणं. तेन वुत्तं ‘‘पटिनिस्सज्जति, नो आदियती’’ति. इदानि निस्सिताहि अनुपस्सनाहि येसं धम्मानं पहानं होति, तं दस्सेतुं ‘‘अनिच्चतो अनुपस्सन्तो निच्चसञ्ञं पजहती’’तिआदि वुत्तं. तत्थ निच्चसञ्ञन्ति सङ्खारा निच्चाति एवं पवत्तं विपरीतसञ्ञं. दिट्ठिचित्तविपल्लासपहानमुखेनेव सञ्ञाविपल्लासप्पहानन्ति सञ्ञागहणं, सञ्ञासीसेन वा तेसम्पि गहणं दट्ठब्बं. नन्दिन्ति सप्पीतिकतण्हं. सेसं वुत्तनयमेव.

विहरतीति इमिना कायानुपस्सनासमङ्गिनो इरियापथविहारो वुत्तोति आह – ‘‘इरियती’’ति, इरियापथं पवत्तेतीति अत्थो. आरम्मणकरणवसेन अभिब्यापनतो ‘‘तीसु भवेसू’’ति वुत्तं, उप्पज्जनवसेन पन किलेसा परित्तभूमका एवाति. यदिपि किलेसानं पहानं आतापनन्ति तं सम्मादिट्ठिआदीनम्पि अत्थेव, आतप्प-सद्दोविय पन आताप-सद्दोपि वीरिये एव निरुळ्होति वुत्तं ‘‘वीरियस्सेतं नाम’’न्ति. अथ वा पटिपक्खप्पहाने सम्पयुत्तधम्मानं अब्भुस्सहनवसेन पवत्तमानस्स वीरियस्स सातिसयं तदातापनन्ति वीरियमेव तथा वुच्चति, न अञ्ञे धम्मा.

आतापीति चायमीकारो पसंसाय, अतिसयस्स वा दीपकोति आतापीगहणेन सम्मप्पधानसमङ्गितं दस्सेति. सम्मा समन्ततो सामञ्च पजानन्तो सम्पजानो, असम्मिस्सतो ववत्थाने अञ्ञधम्मानुपस्सिताभावेन ¶ सम्मा अविपरीतं, सब्बाकारपजाननेन समन्ततो, उपरूपरि विसेसावहभावेन पवत्तिया सामं पजानन्तोति अत्थो. यदि पञ्ञाय अनुपस्सति, कथं सतिपट्ठानताति आह ‘‘न ही’’तिआदि. तस्मा सतिया लद्धुपकाराय एव पञ्ञाय एत्थ यथावुत्ते काये कम्मट्ठानिको भिक्खु अनुपस्सको, तस्मा ‘‘कायानुपस्सी’’ति वुच्चति. अन्तोसङ्खेपो अन्तोलीनता, कोसज्जन्ति अत्थो. उपायपरिग्गहोति एत्थ सीलविसोधनादि गणनादि उग्गहकोसल्लादि च उपायो, तब्बिपरियायतो अनुपायो वेदितब्बो. यस्मा च उपट्ठितस्सती यथावुत्तं उपायं न परिच्चजति, अनुपायञ्च न उपादियति, तस्मा वुत्तं ‘‘मुट्ठस्सति…पे… असमत्थो होती’’ति. तेनाति उपायानुपायानं परिग्गहपरिवज्जनेसु अपरिच्चागापरिग्गहेसु च असमत्थभावेन. अस्स योगिनो.

यस्मा सतियेवेत्थ सतिपट्ठानं वुत्ता, तस्मास्स सम्पयुत्तधम्मा वीरियादयो अङ्गन्ति आह – ‘‘सम्पयोगङ्गञ्चस्स दस्सेत्वा’’ति. अङ्ग-सद्दो चेत्थ कारणपरियायो दट्ठब्बो. सतिग्गहणेनेवेत्थ सम्मासमाधिस्सपि गहणं दट्ठब्बं तस्सा समाधिक्खन्धे सङ्गहितत्ता. यस्मा वा सतिसीसेनायं ¶ देसना. न हि केवलाय सतिया किलेसप्पहानं सम्भवति, निब्बानाधिगमो वा, नापि केवला सति पवत्तति, तस्मास्स झानदेसनायं सवितक्कादिवचनस्स विय सम्पयोगङ्गदस्सनताति अङ्ग-सद्दस्स अवयवपरियायता दट्ठब्बा. पहानङ्गन्ति ‘‘विविच्चेव कामेही’’तिआदीसु विय पहातब्बङ्गं दस्सेतुं. यस्मा एत्थ पुब्बभागमग्गो अधिप्पेतो, न लोकुत्तरमग्गो, तस्मा पुब्बभागियमेव विनयं दस्सेन्तो ‘‘तदङ्गविनयेन वा विक्खम्भनविनयेन वा’’ति आह. अस्साति योगिनो. तेसं धम्मानन्ति वेदनादिधम्मानं. तेसञ्हि तत्थ अनधिप्पेतत्ता ‘‘अत्थुद्धारनयेनेतं वुत्त’’न्ति आह. यं पनाति विभङ्गे, विभङ्गपकरणेति अधिप्पायो. एत्थाति ‘‘लोके’’ति एतस्मिं पदे, ता च लोकिया एव अनुपस्सना नाम सम्मसनन्ति कत्वा.

दुक्खतोति विपरिणामसङ्खारदुक्खताहि दुक्खसभावतो, दुक्खाति अनुपस्सितब्बाति अत्थो. सेसपदद्वयेपि एसेव नयो. यो सुखं ¶ दुक्खतो अद्दाति यो भिक्खु सुखं वेदनं विपरिणामदुक्खताय दुक्खन्ति पञ्ञाचक्खुना अद्दक्खि. दुक्खमद्दक्खि सल्लतोति दुक्खवेदनं पीळाजननतो अन्तोतुदनतो दुन्नीहरणतो च सल्लन्ति अद्दक्खि पस्सि. अदुक्खमसुखन्ति उपेक्खावेदनं. सन्तन्ति सुखदुक्खानं विय अनोळारिकताय पच्चयवसेन वूपसन्तसभावत्ता च सन्तं. अनिच्चतोति हुत्वा अभावतो उदयब्बयवन्ततो तावकालिकतो निच्चपटिक्खेपतो च अनिच्चन्ति यो अद्दक्खि. स वे सम्मद्दसो भिक्खूति सो भिक्खु एकंसेन, परिब्यत्तं वा वेदनाय सम्मा पस्सनकोति अत्थो.

दुक्खातिपीति सङ्खारदुक्खताय दुक्खा इतिपि. सब्बं तं वेदयितं दुक्खस्मिं अन्तोगधं परियापन्नन्ति वदामि सङ्खारदुक्खन्ति वत्तब्बतो. सुखदुक्खतोपि चाति सुखादीनं ठितिविपरिणामञाणसुखताय च विपरिणामट्ठितिअञ्ञाणदुक्खताय च वुत्तत्ता तिस्सोपि सुखतो तिस्सोपि च दुक्खतो अनुपस्सितब्बाति अत्थो. सत्त अनुपस्सना हेट्ठा पकासिता एव.

आरम्मणा…पे… भेदानन्ति रूपादिआरम्मणनानत्तस्स नीलादितब्भेदस्स, छन्दादिअधिपतिनानत्तस्स हीनादितब्भेदस्स, ञाणझानादिसहजातनानत्तस्स ससङ्खारिकासङ्खारिक-सवितक्क-सविचारादितब्भेदस्स, कामावचरादिभूमिनानत्तस्स, उक्कट्ठमज्झिमादितब्भेदस्स, कुसलादिकम्मनानत्तस्स, देवगतिसंवत्तनियतादितब्भेदस्स, कण्हसुक्कविपाकनानत्तस्स, दिट्ठधम्मवेदनीयतादितब्भेदस्स, परित्तभूमकादिकिरियानानत्तस्स, तिहेतुकादितब्भेदस्स वसेन अनुपस्सितब्बन्ति योजना. आदि-सद्देन सवत्थुकावत्थुकादिनानत्तस्स पुग्गलत्तयसाधारणादितब्भेदस्स ¶ च सङ्गहो दट्ठब्बो. सरागादीनन्ति महासतिपट्ठानसुत्ते (दी. नि. २.३८१; म. नि. १.११४) आगतानं सरागवीतरागादिभेदानं. सलक्खण-सामञ्ञलक्खणानन्ति फुसनादितंतंसलक्खणानञ्चेव अनिच्चतादिसामञ्ञलक्खणानञ्च वसेनाति योजना.

सुञ्ञतधम्मस्साति अनत्ततासङ्खातसुञ्ञतसभावस्स. ‘‘सलक्खण-सामञ्ञलक्खणान’’न्ति हि इमिना यो इतो बाहिरकेहि सामिनिवासीकारकवेदकअधिट्ठायकभावेन परिकप्पितो अत्ता, तस्स सङ्खारेसु निच्चता सुखता विय कत्थचिपि अभावो विभावितो. नत्थि एतेसं अत्ताति अनत्ता, यस्मा पन सङ्खारेसु एकधम्मोपि अत्ता ¶ न होति, तस्मा ते न अत्तातिपि अनत्ताति अयं तेसं सुञ्ञतधम्मो. तस्स सुञ्ञतधम्मस्स, यं विभावेतुं अभिधम्मे (ध. स. १२१) ‘‘तस्मिं खो पन समये धम्मा होन्ती’’तिआदिना सुञ्ञतवारदेसना वुत्ता. सेसं सुविञ्ञेय्यमेव.

अम्बपालिसुत्तवण्णना निट्ठिता.

२. सतिसुत्तवण्णना

३६८. सरतीति सतो. अयं पन न याय कायचि सतिया सतो, अथ खो एदिसायाति दस्सेन्तो ‘‘कायादिअनुपस्सनासतिया’’ति आह. चतुसम्पजञ्ञपञ्ञायाति चतुब्बिधसम्पजञ्ञपञ्ञाय, अभिक्कमनं अभिक्कन्तन्ति आह – ‘‘अभिक्कन्तं वुच्चति गमन’’न्ति. तथा पटिक्कमनं पटिक्कन्तन्ति वुत्तं – ‘‘पटिक्कन्तं निवत्तन’’न्ति. निवत्तनञ्च निवत्तिमत्तं, निवत्तित्वा पन गमनं गमनमेव. कायं अभिहरन्तो अभिगमनवसेन कायं नामेन्तो. ठाननिसज्जासयनेसु यो गमनादिविधिना कायस्स पुरतो अभिहारो, सो अभिक्कमो, पच्छतो अपहरणं पटिक्कमोति दस्सेन्तो ‘‘ठानेपी’’तिआदिमाह. आसनस्साति पीठकादिआसनस्स. पुरिमअङ्गाभिमुखोति अटनिकादिपुरिमावयवाभिमुखो. संसरन्तोति संसप्पन्तो. पच्चासंसरन्तोति पटिआसप्पन्तो. एसेव नयोति इमिना सरीरस्सेव अभिमुखसंसप्पनपटिआसप्पनानि निदस्सेति.

सम्मा पजाननं सम्पजानं. तेन अत्तना कातब्बकिच्चस्स करणसीलो सम्पजानकारीति आह – ‘‘सम्पजञ्ञेन सब्बकिच्चकारी’’ति. सम्पजानमेव हि सम्पजञ्ञं. सम्पजञ्ञस्सेव वा कारीति ¶ सम्पजञ्ञस्सेव करणसीलो. सम्पजञ्ञं करोतेवाति अभिक्कन्तादीसु असम्मोहं उप्पादेति एव, सम्पजानस्सेव वा कारो एतस्स अत्थीति सम्पजानकारी.

धम्मतो वड्ढितसङ्खातेन सह अत्थेन वत्ततीति सात्थकं, अभिक्कन्तादि, सात्थकस्स सम्पजाननं सात्थकसम्पजञ्ञं. सप्पायस्स अत्तनो ¶ उपकारावहस्स हितस्स सम्पजाननं सप्पायसम्पजञ्ञं. अभिक्कमादीसु भिक्खाचारगोचरे, अञ्ञत्थापि च पवत्तेसु अविजहिते कम्मट्ठानसङ्खाते गोचरे सम्पजञ्ञं गोचरसम्पजञ्ञं. अभिक्कमादीसु असम्मुय्हनमेव सम्पजञ्ञं असम्मोहसम्पजञ्ञं. परिग्गण्हित्वाति तुलयित्वा तीरेत्वा, पटिसङ्खायाति अत्थो. सङ्घदस्सनेनेव उपोसथपवारणादिअत्थं गमनं सङ्गहितं. असुभदस्सनादीति आदि-सद्देन कसिणपरिकम्मादीनं सङ्गहो दट्ठब्बो. सङ्खेपतो वुत्तमत्थं विवरितुं ‘‘चेतियं दिस्वापि ही’’तिआदि वुत्तं. अरहत्तं पापुणातीति उक्कट्ठनिद्देसो एसो. समथविपस्सनुप्पादनम्पि हि भिक्खुनो वुद्धि एव. दक्खिणद्वारेति चेतियङ्गणस्स दक्खिणद्वारे, तथा पच्छिमद्वारेतिआदीसु. अभयवापि पाळियन्ति अभयवापिया पुरत्थिमतीरे.

बुद्धवंस-अरियवंस-चेतियवंस-दीपवंसादिवंसकथनतो महाअरियवंसभाणको थेरो. पञ्ञायनट्ठानेति चेतियस्स पञ्ञायनट्ठाने. एकपदुद्धारेति पदुद्धारपतिट्ठानपरिवत्तनं अकत्वा एकस्मिंयेव अवट्ठाने. केचीति अभयगिरिवासिनो.

तस्मिं पनाति सात्थकसम्पजञ्ञवसेन परिग्गहितअत्थेपि गमने. अत्थो नाम धम्मतो वड्ढीति यं सात्थकन्ति अधिप्पेतं गमनं, तं सप्पायमेवाति सिया कस्सचि आसङ्काति तन्निवत्तनत्थं ‘‘चेतियदस्सनं तावा’’तिआदि आरद्धं. चित्तकम्मरूपकानि वियाति चित्तकम्मकता पटिमायो विय, यन्तपयोगेन वा विचित्तकम्मा पटिमाय सदिसा यन्तरूपका विय. असमपेक्खनं गेहस्सितअञ्ञाणुपेक्खावसेन आरम्मणे अयोनिसो ओलोकनादि. यं सन्धाय वुत्तं ‘‘चक्खुना रूपं दिस्वा उप्पज्जति उपेक्खा बालस्स मूळ्हस्स पुथुज्जनस्सा’’तिआदि (म. नि. ३.३०८). हत्थिआदिसम्मद्देन जीवितन्तरायो. विसभागरूपदस्सनादिना ब्रह्मचरियन्तरायो.

पब्बजितदिवसतो पट्ठाय भिक्खूनं अनुवत्तनकथा आचिण्णा, अननुवत्तनकथा पन तस्सा अपरा दुतिया नाम होतीति आह – ‘‘द्वे कथा नाम न कथितपुब्बा’’ति. एवन्ति इमिना ¶ ‘‘सचे पना’’तिआदिकं सब्बम्पि वुत्ताकारं पच्चामसति, न ‘‘पुरिसस्स मातुगामासुभ’’न्तिआदिकं वुच्चमानं.

योगकम्मस्स ¶ पवत्तिट्ठानताय भावनाय आरम्मणं कम्मट्ठानं वुच्चतीति आह ‘‘कम्मट्ठानसङ्खातं गोचर’’न्ति. उग्गहेत्वाति यथा उग्गहनिमित्तं उप्पज्जति, एवं उग्गहकोसल्लस्स सम्पादनवसेन उग्गहेत्वा.

हरतीति कम्मट्ठानं पवत्तेति, याव पिण्डपातपटिक्कमा अनुयुञ्जतीति अत्थो. न पच्चाहरतीति आहारूपभोगतो याव दिवाट्ठानुपसङ्कमना कम्मट्ठानं न पटिनेति. समादाय वत्तति सम्मा आदियित्वा तेसं वत्तानं परिपूरणवसेन वत्तति. सरीरपरिकम्मन्ति मुखधोवनादिसरीरपटिजग्गनं. द्वे तयो पल्लङ्केति द्वे तयो निसज्जावारे द्वे तीणि उण्हासनानि. तेनाह – ‘‘उसुमं गाहापेन्तो’’ति. कम्मट्ठानसीसेनेवाति कम्मट्ठानमुखेनेव कम्मट्ठानं अविजहन्तो एव. तेन ‘‘पत्तोपि अचेतनो’’तिआदिना पवत्तेतब्बकम्मट्ठानं, यथापरिहरियमानं वा कम्मट्ठानं अविजहित्वाति दस्सेति. तथेवाति तिक्खत्तुमेव. परिभोगचेतियतो सरीरचेतियं गरुतरन्ति कत्वा ‘‘चेतियं वन्दित्वा’’ति चेतियवन्दनाय पठमं करणीयता वुत्ता. तथा हि अट्ठकथायं – ‘‘चेतियं बाधयमाना बोधिसाखा हरितब्बा’’ति वुत्ता. बुद्धगुणानुस्सरणवसेनेव बोधिञ्च पणिपातकरणन्ति आह – ‘‘बुद्धस्स भगवतो सम्मुखा विय निपच्चकारं दस्सेत्वा’’ति. गामसमीपेति गामस्स उपचारट्ठाने.

जनसङ्गहणत्थन्ति ‘‘मयि अकथेन्ते एतेसं को कथेस्सती’’ति धम्मानुग्गहेन जनसङ्गहणत्थं. तस्माति यस्मा ‘‘धम्मकथा नाम कथेतब्बा एवा’’ति अट्ठकथाचरिया वदन्ति, यस्मा च धम्मकथा कम्मट्ठानविनिमुत्ता नाम नत्थि, तस्मा. कम्मट्ठानसीसेनेवाति अत्तना परिहरियमानं कम्मट्ठानं अविजहन्तो तदनुगुणंयेव धम्मकथं कथेत्वा. अनुमोदनं कत्वाति एत्थापि ‘‘कम्मट्ठानसीसेनेवा’’ति आनेत्वा सम्बन्धितब्बं. सम्पत्तपरिच्छेदेनेवाति परिचितो अपरिचितोतिआदिविभागं अकत्वा सम्पत्तकोटिया एव, समागममत्तेनेवाति अत्थो. भयेति परचक्कादिभये.

कम्मजतेजोति गहणिं सन्धायाह. कम्मट्ठानवीथिं नारोहति खुदापरिस्समेन किलन्तकायत्ता समाधानाभावतो. अवसेसट्ठानेति यागुया ¶ अग्गहितट्ठाने. पोङ्खानुपोङ्खन्ति कम्मट्ठानुपट्ठानस्स ¶ अविच्छेद-दस्सनमेतं, यथा पोङ्खानुपोङ्खं पवत्ताय सरपटिपाटिया अनविच्छेदो, एवमेतस्सपि कम्मट्ठानुपट्ठानस्साति वुत्तं होति.

निक्खित्तधुरो भावनानुयोगे. वत्तपटिपत्तिया अपूरणेन सब्बवत्तानि भिन्दित्वा. कामे अवीतरागो होति. काये अवीतरागो. रूपे अवीतरागो. यावदत्थं उदरावदेहं भुञ्जित्वा सेय्यसुखं पस्ससुखं मिद्धसुखं अनुयुत्तो विहरति. अञ्ञतरं देवनिकायं पणिधाय ब्रह्मचरियं चरती’’ति (दी. नि. ३.३२०; म. नि. १.१८६) एवं वुत्तं पञ्चविधचेतोविनिबन्धचित्तो. चरित्वाति पवत्तित्वा.

गतपच्चागतिकवत्तवसेनाति भावनासहितंयेव भिक्खाय गतपच्चागतं गमनपच्चागमनं एतस्स अत्थीति गतपच्चागतिकं, तदेव वत्तं, तस्स वसेन. अत्तनो हितसुखं कामेन्ति इच्छन्तीति अत्तकामा, धम्मच्छन्दवन्तो. ‘‘धम्मो’’ति हि हितं तंनिमित्तकञ्च सुखन्ति. अथ वा विञ्ञूनं धम्मानं अत्तनियत्ता अत्तभावपरिच्छन्नत्ता च अत्ता नाम धम्मो. तेनाह भगवा – ‘‘अत्तदीपा, भिक्खवे, विहरथ अत्तसरणा’’तिआदि (सं. नि. ३.४३). तं कामेन्ति इच्छन्तीति अत्तकामा. उसभं नाम वीसति यट्ठियो. ताय सञ्ञायाति ताय पासाणसञ्ञाय, ‘‘एत्तकं ठानमागता’’ति जानन्ताति अधिप्पायो. सो एव नयो अयं भिक्खूतिआदिको यो ठाने वुत्तो, सो एव निसज्जायपि नयो. पच्छतो आगच्छन्तानं छिन्नभत्तभावभयेनपि योनिसोमनसिकारं परिब्रूहेति.

मद्दन्ताति धञ्ञकरणट्ठाने सालिसीसानि मद्दन्ता. महापधानं पूजेस्सामीति अम्हाकं अत्थाय लोकनाथेन छ वस्सानि कतं दुक्करचरियं एवाहं यथासत्ति पूजेस्सामीति. पटिपत्तिपूजा हि सत्थुपूजा, न आमिसपूजाति. ठानचङ्कममेवाति अधिट्ठातब्बइरियापथकालवसेन वुत्तं, न भोजनादिकालेसु अवस्सं कातब्बनिसज्जाय पटिक्खेपवसेन.

वीथिं ओतरित्वा इतो चितो अनोलोकेत्वा पठममेव वीथियो सल्लक्खेतब्बाति आह ‘‘वीथियो सल्लक्खेत्वा’’ति. यं सन्धाय ¶ वुच्चति – ‘‘पासादिकेन अभिक्कन्तेना’’तिआदि. तं दस्सेतुं ‘‘तत्थ चा’’तिआदि वुत्तं. आहारे पटिकूलसञ्ञं उपट्ठपेत्वातिआदीसु यं वत्तब्बं, तं हेट्ठा वुत्तमेव. अट्ठङ्गसमन्नागतन्ति ‘‘यावदेव इमस्स कायस्स ठितिया’’तिआदिना (म. नि. १.२३; २.२४; ३.७५; सं. नि. ४.१२०; अ. नि. ६.५८; ८.९) वुत्तेहि अट्ठहि अङ्गेहि समन्नागतं कत्वा. नेव दवायातिआदि पन पटिक्खेपदस्सनं.

पच्चेकबोधिं ¶ सच्छिकरोति, यदि उपनिस्सयसम्पन्नो होतीति सम्बन्धो. इदञ्च यथा हेट्ठा तीसु ठानेसु, एवं इतो परेसु ठानेसु उपनेत्वा सम्बन्धितब्बं. तत्थ पच्चेकबोधिया उपनिस्सयसम्पदा कप्पानं द्वे असङ्ख्येय्यानि सतसहस्सञ्च तज्जं पुञ्ञञाणसम्भारसम्भरणं, सावकबोधियं अग्गसावकानं एकं असङ्ख्येय्यं कप्पसतसहस्सञ्च, महासावकानं कप्पसतसहस्समेव तज्जं सम्भारसम्भरणं, इतरेसं अतीतासु जातीसु विवट्टसन्निस्सयवसेन निब्बत्तितं निब्बेधभागियं कुसलं. बाहियो दारुचीरियोति बाहियविसये जातसंवद्धताय बाहियो, दारुचीरपरिहरणेन दारुचीरियोति लद्धसमञ्ञो. सो हि आयस्मा ‘‘तस्मातिह ते, बाहिय, एवं सिक्खितब्बं – दिट्ठे दिट्ठमत्तं भविस्सती’’तिआदिवसप्पवत्तेन (उदा. १०) संखित्तेनेव ओवादेन खिप्पतरं विसेसं अधिगच्छि. तेन वुत्तं ‘‘खिप्पाभिञ्ञो वा होति सेय्यथापि थेरो बाहियो दारुचीरियो’’ति. एवं महापञ्ञो वातिआदीसु यथारहं वत्तब्बन्ति.

तन्ति असम्मुय्हनं. एवन्ति इदानि वुच्चमानाकारदस्सनं. अत्ता अभिक्कमतीति इमिना अन्धपुथुज्जनस्स दिट्ठिग्गाहवसेन अभिक्कमे सम्मुय्हनं दस्सेति, अहं अभिक्कमामीति पन इमिना मानग्गाहवसेन, तदुभयं पन तण्हाय विना न होतीति तण्हाग्गाहवसेनपि सम्मुय्हनं दस्सितमेव होति, ‘‘तथा असम्मुय्हन्तो’’ति वत्वा तं असम्मुय्हनं येन घनविनिब्भोगेन होति, तं दस्सेन्तो ‘‘अभिक्कमामीति चित्ते उप्पज्जमाने’’तिआदिमाह. तत्थ यस्मा वायोधातुया अनुगता तेजोधातु उद्धरणस्स पच्चयो. उद्धरणगतिका हि तेजोधातूति उद्धरणे वायोधातुया तस्सा अनुगतभावो, तस्मा इमासं द्विन्नमेत्थ धातूनं सामत्थियतो अधिमत्तता, इतरासञ्च ओमत्तताति दस्सेन्तो ‘‘एकेकपादुद्धरणे…पे… बलवतियो’’ति आह. यस्मा पन तेजोधातुया अनुगता ¶ वायोधातु अतिहरणवीतिहरणानं पच्चयो. तिरियगतिकाय हि वायोधातुया अतिहरणवीतिहरणेसु सातिसयो ब्यापारोति तेजोधातुया तस्सानुगतभावो, तस्मा इमासं द्विन्नमेत्थ सामत्थियतो अधिमत्तता, इतरासञ्च ओमत्तताति दस्सेन्तो ‘‘तथा अतिहरणवीतिहरणेसू’’ति आह. सतिपि अनुगमनानुगन्तब्बताविसेसे तेजोधातुवायोधातुभावमत्तं सन्धाय तथा-सद्दग्गहणं.

तत्थ अक्कन्तट्ठानतो पादस्स उक्खिपनं उद्धरणं, ठितट्ठानं अतिक्कमित्वा पुरतो हरणं अतिहरणं. रुक्खखाणुआदिपरिहरणत्थं, पतिट्ठितपादघट्टनपरिहरणत्थं वा पस्सेन हरणं वीतिहरणं. याव पतिट्ठितपादो, ताव आहरणं अतिहरणं, ततो परं हरणं वीतिहरणन्ति अयं वा एतेसं विसेसो. यस्मा पथवीधातुया अनुगता आपोधातु वोस्सज्जनस्स पच्चयो. गरुतरसभावा हि आपोधातूति वोस्सज्जने पथवीधातुया तस्सानुगतभावो, तस्मा तासं द्विन्नमेत्थ ¶ सामत्थियतो अधिमत्तता, इतरासञ्च ओमत्तताति दस्सेन्तो आह ‘‘वोस्सज्जने…पे… बलवतियो’’ति. यस्मा पन आपोधातुया अनुगता पथवीधातु सन्निक्खेपनस्स पच्चयो. पतिट्ठाभावे विय पतिट्ठापनेपि तस्सा सातिसयकिच्चत्ता आपोधातुया तस्सा अनुगतभावो, तथा घट्टनकिरियाय पथवीधातुया वसेन सन्निरुम्भनस्स सिज्झनतो तत्थापि पथवीधातुया आपोधातुअनुगतभावो, तस्मा वुत्तं – ‘‘तथा सन्निक्खेपनसन्निरुम्भनेसू’’ति.

तत्थाति तस्मिं अभिक्कमने, तेसु वा वुत्तेसु उद्धरणादीसु छसु कोट्ठासेसु. उद्धरणेति उद्धरणक्खणे. रूपारूपधम्माति उद्धरणाकारेन पवत्ता रूपधम्मा तंसमुट्ठापका अरूपधम्मा च. अतिहरणं न पापुणन्ति खणमत्तावट्ठानतो. तत्थ तत्थेवाति यत्थ यत्थ उप्पन्ना, तत्थ तत्थेव. न हि धम्मानं देसन्तरसङ्कमनं अत्थि. पब्बं पब्बन्तिआदि उद्धरणादिकोट्ठासे सन्धाय सभागसन्ततिवसेन वुत्तन्ति वेदितब्बं. अतिइत्तरो हि रूपधम्मानम्पि पवत्तिक्खणो, गमनस्सादानं देवपुत्तानं हेट्ठुपरियायेन ¶ पटिमुखं धावन्तानं सिरसि पादे च बद्धखुरधारासमागमतोपि सीघतरो. यथा तिलानं भज्जियमानानं तटतटायनेन भेदो लक्खीयति, एवं सङ्खतधम्मानं उप्पादेनाति दस्सनत्थं ‘‘तटतटायन्ता’’ति वुत्तं. उप्पन्ना हि एकन्ततो भिज्जन्तीति.

सद्धिं रूपेनाति इदं तस्स तस्स चित्तस्स निरोधेन सद्धिं निरुज्झनकरूपधम्मवसेन वुत्तं, यं ततो सत्तरसमचित्तस्स उप्पादक्खणे उप्पन्नं. अञ्ञथा यदि रूपारूपधम्मा समानक्खणा सियुं, ‘‘रूपं गरुपरिणामं दन्धनिरोध’’न्तिआदिवचनेहि विरोधो सिया. तथा – ‘‘नाहं, भिक्खवे, अञ्ञं एकधम्मम्पि समनुपस्सामि, यं एवं लहुपरिवत्तं, यथयिदं चित्त’’न्ति (अ. नि. १.४८) एवमादिपाळिया च. चित्तचेतसिका हि सारम्मणसभावा यथाबलं अत्तनो आरम्मणपच्चयभूतमत्थं विभावेन्तायेव उप्पज्जन्तीति तेसं तंसभावनिप्फत्तिअनन्तरं निरोधो, रूपधम्मा पन अनारम्मणा पकासेतब्बा. एवं तेसं पकासेतब्बभावनिप्फत्ति सोळसहि चित्तेहि होतीति तङ्खणायुकता तेसं इच्छिता, लहुकविञ्ञाणस्स विसयसङ्गतिमत्तपच्चयताय तिण्णं खन्धानं, विसयसङ्गतिमत्तताय च विञ्ञाणस्स लहुपरिवत्तिता, दन्धमहाभूतपच्चयताय रूपधम्मानं दन्धपरिवत्तिता. नानाधातुया यथाभूतञाणं खो पन तथागतस्सेव, तेन च पुरेजातपच्चयो रूपधम्मोव वुत्तो, पच्छाजातपच्चयो च तस्सेवाति रूपारूपधम्मानं समानक्खणता न युज्जतेव, तस्मा वुत्तनयेनेवेत्थ अत्थो वेदितब्बो.

अञ्ञं ¶ उप्पज्जते चित्तं, अञ्ञं चित्तं निरुज्झतीति यं पुरिमुप्पन्नं चित्तं, तं अञ्ञं, तं पन निरुज्झन्तं अपरस्स अनन्तरादिपच्चयो हुत्वा एव निरुज्झतीति तथालद्धपच्चयं अञ्ञं उप्पज्जते चित्तं. यदि एवं तेसं अन्तरो लब्भेय्याति, नोति आह ‘‘अवीचिमनुपबन्धो’’ति. यथा वीचि अन्तरो न लब्भति, ‘‘तदेवेत’’न्ति अविसेसविदू मञ्ञन्ति, एवं अनु अनु पबन्धो चित्तसन्तानो रूपसन्तानो च नदीसोतोव नदियं उदकप्पवाहो विय वत्तति.

अभिमुखं लोकितं आलोकितन्ति आह ‘‘पुरतोपेक्खन’’न्ति. यस्मा यंदिसाभिमुखो गच्छति तिट्ठति निसीदति वा, तदभिमुखं पेक्खनं आलोकितं ¶ , तस्मा तदनुगतं विदिसालोकनं विलोकितन्ति आह ‘‘विलोकितं नाम अनुदिसापेक्खन’’न्ति. सम्मज्जनपरिभण्डादिकरणे ओलोकितस्स, उल्लोकाहरणादीसु उल्लोकितस्स, पच्छतो आगच्छन्तस्स परिस्सयस्स परिवज्जनादिवसेन अपलोकितस्स च सिया सम्भवोति आह – ‘‘इमिना वा मुखेन सब्बानिपि तानि गहितानेवा’’ति.

कायसक्खिन्ति कायेन सच्छिकतवन्तं, पच्चक्खकारिनन्ति अत्थो. सोहायस्मा विपस्सनाकाले एव ‘‘यमेवाहं इन्द्रियेसु अगुत्तद्वारतं निस्साय सासने अनभिरतिआदिविप्पकारं पत्तो, तमेव सुट्ठु निग्गहेस्सामी’’ति उस्साहजातो बलवहिरोत्तप्पो, तत्थ च कताधिकारत्ता इन्द्रियसंवरे उक्कंसपारमिप्पत्तो, तेनेव नं सत्था – ‘‘एतदग्गं, भिक्खवे, मम सावकानं भिक्खूनं इन्द्रियेसु गुत्तद्वारानं यदिदं नन्दो’’ति (अ. नि. १.२३०) एतदग्गे ठपेसि.

सात्थकता च सप्पायता च वेदितब्बा आलोकितविलोकितस्साति आनेत्वा सम्बन्धो. तस्माति कम्मट्ठानाविजहनस्सेव गोचरसम्पजञ्ञभावतोति वुत्तमेवत्थं हेतुभावेन पच्चामसति. अत्तनो कम्मट्ठानवसेनेव आलोकनविलोकनं कातब्बं, खन्धादिकम्मट्ठानिकेहि अञ्ञो उपायो न गवेसितब्बोति अधिप्पायो. यस्मा आलोकितादिसमञ्ञापि धम्ममत्तस्सेव पवत्तिविसेसो, तस्मा तस्स याथावतो पजाननं असम्मोहसम्पजञ्ञन्ति दस्सेतुं ‘‘अब्भन्तरे’’तिआदि वुत्तं. चित्तकिरियवायोधातुविप्फारवसेनाति किरियमयचित्तसमुट्ठानवायोधातुया चलनाकारपवत्तिवसेन. अधो सीदतीति थोकं ओतरति. उद्धं लङ्घेतीति लङ्घन्तं विय उपरि गच्छति.

अङ्गकिच्चं साधयमानन्ति पधानभूतं अङ्गकिच्चं निप्फादेन्तं, उपपत्तिभवस्स सरीरं हुत्वाति अत्थो. पठमजवनेपि…पे… सत्तमजवनेपि न होतीति इदं पञ्चद्वारविञ्ञाणवीथियं ‘‘इत्थी पुरिसो’’ति ¶ रज्जनादीनं अभावं सन्धाय वुत्तं. तत्थ हि आवज्जनवोट्ठब्बनानं अयोनिसो आवज्जनवोट्ठब्बनवसेन इट्ठे इत्थिरूपादिम्हि लोभमत्तं, अनिट्ठे पटिघमत्तं उप्पज्जति. मनोद्वारे पन ‘‘इत्थी पुरिसो’’ति रज्जनादि होति, तस्स पञ्चद्वारजवनं मूलं, यथावुत्तं ¶ वा सब्बं भवङ्गादि. एवं मनोद्वारजवनस्स मूलभूतधम्मपरिजाननवसेनेव मूलपरिञ्ञा वुत्ता, आगन्तुकतावकालिकता पन पञ्चद्वारजवनस्सेव अपुब्बभाववसेन चेव इत्तरभाववसेन च वुत्ता. हेट्ठुपरियवसेन भिज्जित्वा पतितेसूति हेट्ठिमस्स उपरिमस्स च अपरापरं भङ्गप्पत्तिमाह.

तन्ति जवनं. तस्स जवनस्स न युत्तन्ति सम्बन्धो. आगन्तुको अब्भागतो. उदयब्बयपरिच्छिन्नो तावतको कालो एतेसन्ति तावकालिकानि.

एतं असम्मोहसम्पजञ्ञं. समवायेति सामग्गियं. तत्थाति पञ्चक्खन्धवसेन आलोकनविलोकने पञ्ञायमाने तब्बिनिमुत्तो – को एको आलोकेति, को विलोकेति. उपनिस्सयपच्चयोति इदं सुत्तन्तनयेन परियायतो वुत्तं. सहजातपच्चयोति निदस्सनमत्तमेतं अञ्ञमञ्ञसम्पयुत्तअत्थिअविगतादिपच्चयानम्पि लब्भनतो.

कालेति समिञ्जितुं युत्तकाले समिञ्जन्तस्स, तथा पसारेतुं युत्तकाले पसारेन्तस्स. ‘‘मणिसप्पो नाम एका सप्पजाती’’ति वदन्ति. लळनन्ति कम्पनं, लीळाकरणं वा.

उण्हपकतिको परिळाहबहुलकायो. सीलस्स विदूसनेन अहितावहत्ता मिच्छाजीववसेन उप्पन्नं असप्पायं. ‘‘चीवरम्पि अचेतन’’न्तिआदिना चीवरस्स विय कायोपि अचेतनोति कायस्स अत्तसुञ्ञताविभावनेन ‘‘अब्भन्तरे’’तिआदिना वुत्तमेवत्थं परिदीपेन्तो इतरीतरसन्तोसस्स कारणं दस्सेति. तेनाह ‘‘तस्मा’’तिआदि.

चतुपञ्चगण्ठिकाहतोति आहतचतुपञ्चगण्ठिको, चतुपञ्चगण्ठिकाहि वा हतसोभो.

अट्ठविधोपि अत्थोति अट्ठविधोपि पयोजनविसेसो. महासिवत्थेरवादवसेन ‘‘इमस्स कायस्स ठितिया’’तिआदिना नयेन वुत्तो दट्ठब्बो. इमस्मिं पक्खे ‘‘नेव दवायातिआदिना नयेना’’ति पन इदं पटिक्खेपङ्गदस्सनमुखेन पाळि आगताति कत्वा वुत्तन्ति दट्ठब्बं.

पथवीसन्धारकजलस्स ¶ ¶ तंसन्धारकवायुना विय परिभुत्तस्स आहारस्स वायोधातुयाव आसये अवट्ठानन्ति आह – ‘‘वायोधातुवसेनेव तिट्ठती’’ति. अतिहरतीति याव मुखा अभिहरति. वीतिहरतीति ततो कुच्छियं विमिस्सं करोन्तो हरति. अतिहरतीति वा मुखद्वारं अतिक्कामेन्तो हरति. वीतिहरतीति कुच्छिगतं पस्सतो हरति. परिवत्तेतीति अपरापरं चारेति. एत्थ च आहारस्स धारणपरिवत्तनसञ्चुण्णनविसोसनानि पथवीधातुसहिता एव वायोधातु करोति, न केवलाति तानि पथवीधातुया किच्चभावेन वुत्तानि, सा एव धारणादीनि किच्चानि करोन्तस्स साधारणाति वुत्तानि. अल्लत्तञ्च अनुपालेतीति यथा वायोधातुआदीहि अञ्ञेहि विसोसनं न होति, तथा अनुपालेति अल्लभावं. तेजोधातूति गहणीसङ्खाता तेजोधातु. सा हि अन्तोपविट्ठं आहारं परिपाचेति. अञ्जसो होतीति आहारस्स पविसनादीनं मग्गो होति. आभुजतीति परियेसनवसेन, अज्झोहरणजिण्णाजिण्णतादिपटिसंवेदनवसेन च आवज्जेति, विजानातीति अत्थो. तंतंविजाननस्स पच्चयभूतोयेव हि पयोगो ‘‘सम्मापयोगो’’ति वुत्तो. येन हि पयोगेन परियेसनादि निप्फज्जति, सो तब्बिसयविजाननम्पि निप्फादेति नाम तदविनाभावतो. अथ वा सम्मापयोगं सम्मापटिपत्तिं अन्वाय आगम्म आभुजति समन्नाहरति. आभोगपुब्बको हि सब्बोपि विञ्ञाणब्यापारोति तथा वुत्तं.

गमनतोति भिक्खाचारवसेन गोचरगामं उद्दिस्स गमनतो. परियेसनतोति गोचरगामे भिक्खत्थं आहिण्डनतो. परिभोगतोति आहारस्स परिभुञ्जनतो. आसयतोति पित्तादिआसयतो. आसयति एत्थ एकज्झं पवत्तमानोपि कम्मबलववत्थितो हुत्वा मरियादवसेन अञ्ञमञ्ञं असङ्करतो सयति तिट्ठति पवत्ततीति आसयो, आमासयस्स उपरि तिट्ठनको पित्तादिको. मरियादत्थो हि अयमाकारो. निधेति यथाभुत्तो आहारो निचितो हुत्वा तिट्ठति एत्थाति निधानं, आमासयो, ततो निधानतो. अपरिपक्कतोति गहणीसङ्खातेन कम्मजतेजेन अविपक्कतो. परिपक्कतोति यथाभुत्तस्स आहारस्स विपक्कभावतो. फलतोति निप्फत्तितो. निस्सन्दतोति इतो चितो च विस्सन्दनतो ¶ . सम्मक्खनतोति सब्बसो मक्खनतो. अयमेत्थ सङ्खेपो, वित्थारो पन विसुद्धिमग्गसंवण्णनाय (विसुद्धि. महाटी. १.२९४) गहेतब्बो.

सरीरतो सेदा मुच्चन्तीति वेगसन्धारणेन उप्पन्नपरिळाहतो सरीरतो सेदा मुच्चन्ति. अञ्ञे च रोगा कण्णसूलभगन्दरादयो. अट्ठानेति मनुस्सामनुस्सपरिग्गहे अयुत्तट्ठाने खेत्तदेवायतनादिके. कुद्धा हि मनुस्सा अमनुस्सापि वा जीवितक्खयं पापेन्ति. विस्सट्ठत्ता नेव तस्स ¶ भिक्खुनो अत्तनो, कस्सचि अनिस्सज्जितत्ता जिगुच्छनीयत्ता च न परस्स, उदकतुम्बतोति वेळुनाळिआदिउदकभाजनतो. तन्ति छड्डितउदकं.

एत्थ च एको इरियापथो द्वीसु ठानेसु आगतो, सो पुब्बे अभिक्कमपटिक्कमगहणेन. ‘‘गमनेपि पुरतो पच्छतो च कायस्स अभिहरणं वुत्तन्ति इध गमनमेव गहित’’न्ति अपरे. यस्मा इध सम्पजञ्ञकथायं असम्मोहसम्पजञ्ञमेव धुरं, तस्मा अन्तरन्तरे इरियापथे पवत्तानं रूपारूपधम्मानं तत्थ तत्थेव निरोधदस्सनवसेन सम्पजानकारिता गहिताति. मज्झिमभाणका पन एवं वदन्ति – एको हि भिक्खु गच्छन्तो अञ्ञं चिन्तेन्तो, अञ्ञं वितक्केन्तो गच्छति, एको कम्मट्ठानं अविस्सज्जेत्वाव गच्छति, तथा एको तिट्ठन्तो, निसीदन्तो, सयन्तो अञ्ञं चिन्तेन्तो, अञ्ञं वितक्केन्तो सयति, एको कम्मट्ठानं अविस्सज्जेत्वाव सयति. एत्तकेन पन न पाकटं होतीति चङ्कमनेन दीपेन्ति. यो भिक्खु चङ्कमनं ओतरित्वा चङ्कमनकोटियं ठितो परिग्गण्हाति – ‘‘पाचीनचङ्कमनकोटियं पवत्ता रूपारूपधम्मा पच्छिमचङ्कमनकोटिं अप्पत्वा एत्थेव निरुद्धा, पच्छिमचङ्कमनकोटियं पवत्तापि पाचीनचङ्कमनकोटिं अप्पत्वा एत्थेव निरुद्धा, चङ्कमनमज्झे पवत्ता उभो कोटियो अप्पत्वा एत्थेव निरुद्धा, चङ्कमने पवत्ता रूपारूपधम्मा ठानं अप्पत्वा एत्थेव निरुद्धा, ठाने पवत्ता निसज्जं अप्पत्वा एत्थेव निरुद्धा, निसज्जाय पवत्ता सयनं अप्पत्वा एत्थेव निरुद्धा’’ति, एवं परिग्गण्हन्तो परिग्गण्हन्तो एव चित्तं भवङ्गं ओतारेति, उट्ठहन्तो पन कम्मट्ठानं गहेत्वाव उट्ठहति. अयं भिक्खु गतादीसु सम्पजानकारी नाम होतीति.

एवम्पि ¶ सुत्ते कम्मट्ठानं अविभूतं होति, कम्मट्ठानं अविभूतं न कातब्बं, तस्मा सो भिक्खु याव सक्कोति, ताव चङ्कमित्वा ठत्वा निसीदित्वा सयमानो एवं परिग्गहेत्वा सयति – ‘‘कायो अचेतनो मञ्चो अचेतनो, कायो न जानाति ‘अहं मञ्चे सयितो’ति, मञ्चोपि न जानाति ‘मयि कायो सयितो’ति, अचेतनो कायो अचेतने मञ्चे सयितो’’ति, एवं परिग्गण्हन्तो एव चित्तं भवङ्गं ओतारेति, पबुज्झन्तो कम्मट्ठानं गहेत्वाव पबुज्झतीति अयं सुत्ते सम्पजानकारी नाम होति. कायिकादिकिरियानिब्बत्तनेन तम्मयत्ता आवज्जनकिरियानिब्बत्तकत्ता आवज्जनकिरियासमुट्ठितत्ता च जवनं, सब्बम्पि वा छद्वारप्पवत्तं किरियामयपवत्तं नाम, तस्मिं सति जागरितं नाम होतीति परिग्गण्हन्तो जागरिते सम्पजानकारी नाम. अपिच रत्तिन्दिवं छ कोट्ठासे कत्वा पञ्च कोट्ठासे जग्गन्तोपि जागरिते सम्पजानकारी नाम होतीति.

विमुत्तायतनसीसे ¶ ठत्वा धम्मं देसेन्तोपि बात्तिंसतिरच्छानकथं पहाय दसकथावत्थुनिस्सितसप्पायकथं कथेन्तोपि भासिते सम्पजानकारी नाम होति. अट्ठतिंसाय आरम्मणेसु चित्तरुचियं आरम्मणं मनसिकारं पवत्तेन्तोपि दुतियज्झानं समापन्नोपि तुण्हीभावे सम्पजानकारी नाम. दुतियञ्हि झानं वचीसङ्खारप्पहानतो विसेसतो तुण्हीभावो नामाति. ओट्ठे चातिआदीसु च-सद्देन कण्ठसीसनाभिआदीनं सङ्गहो दट्ठब्बो. तदनुरूपं पयोगन्ति तस्स उप्पत्तिया अनुच्छविकं चित्तस्स पवत्तिआकारसञ्ञितं पयोगं, यतो सब्बे विचारादयो निप्फज्जन्ति. उपादारूपपवत्तियाति विञ्ञत्तिविकारसहितसद्दायतनुप्पत्तिया. एवन्ति वुत्तप्पकारेन. सत्तसुपि ठानेसु असम्मुय्हनवसेन ‘‘मिस्सक’’न्ति वुत्तं. मग्गसम्मासतियापि कायानुपस्सनादिअनुरूपत्ता सम्पजञ्ञानुरूपपुब्बभागं सत्तट्ठानियस्स एकन्तलोकियत्ता.

सतिसुत्तवण्णना निट्ठिता.

३. भिक्खुसुत्तवण्णना

३६९. यस्मा सो भिक्खु ‘‘देसेतु मे, भन्ते, भगवा संखित्तेन धम्म’’न्ति संखित्तेन धम्मदेसनं याचि, तस्स संखित्तरुचिभावतो, तस्मा संखित्तेनेव ¶ धम्मं देसेतुकामो भगवा ‘‘तस्मातिहा’’तिआदिमाहाति वुत्तं – ‘‘यस्मा संखित्तेन देसनं याचसि, तस्मा’’ति. कम्मस्सकतादिट्ठिकस्सेव लोकियलोकुत्तरगुणविसेसा इज्झन्ति, न दिट्ठिविपन्नस्स, तस्मा वुत्तं ‘‘दिट्ठीति कम्मस्सकतादिट्ठी’’ति.

४. सालसुत्तवण्णना

३७०. यथानुसिट्ठं पटिपज्जमाने अपायदुक्खे अपातनवसेन धारणट्ठेन धम्मो, सासनब्रह्मचरियं, तदेव तदङ्गादिवसेन किलेसानं विनयनट्ठेन विनयोति आह – ‘‘धम्मोति वा…पे… नाम’’न्ति. पटिपक्खधम्मेहि अनभिभूतताय एको उदेतीति एकोदीति लद्धनामो समाधि भूतो जातो एतेसन्ति एकोदिभूता. एत्थ च एकोदिभूताति एतेन उपचारज्झानावहो पुब्बभागिको समाधि वुत्तो. समाहिताति एतेन उपचारप्पनासमाधि. एकग्गचित्ताति एतेन सुभावितो वसिप्पत्तो अप्पनासमाधि वुत्तोति वेदितब्बो. नवकभिक्खूहि भावितसतिपट्ठाना पुब्बभागा. ते हि यथाभूतञाणाय भाविता. यथाभूतञाणन्ति हि सोतापत्तिमग्गञाणं इधाधिप्पेतं. खीणासवेहि भावितसतिपट्ठानापि पुब्बभागा. तेसञ्हि कतकरणीयानं ¶ दिट्ठधम्मसुखविहाराय सतिपट्ठानभावना, सेक्खानं पन सतिपट्ठानभावना परिञ्ञत्थाय पवत्ता लोकिया, परिजाननवसेन पवत्ता लोकुत्तराति ‘‘मिस्सका’’ति वुत्तं.

५. अकुसलरासिसुत्तवण्णना

३७१. पञ्चमे केवलोति कुसलधम्मेहि असम्मिस्सो, ततो एव सकलो सुक्कपक्खो अनवज्जट्ठो. सेसं वुत्तनयमेव.

६. सकुणग्घिसुत्तवण्णना

३७२. पाकतिकसकुणकुलेसु बलवभावतो तेसं हननतो सकुणग्घि. सेनोति वुत्तं ‘‘सेनस्सेतं अधिवचन’’न्ति, सेनविसेसो पन सो वेदितब्बो. आमिसत्थाय पत्तत्ता ‘‘लोभसाहसेन पत्ता’’ति वुत्तं, लोभनिमित्तेन साहसाकारेन पत्ताति अत्थो. नङ्गलेन कट्ठं कसितं नङ्गलकट्ठं, तं करीयति एत्थाति नङ्गलकट्ठकरणन्ति ¶ आह – ‘‘अधुना कट्ठं खेत्तट्ठान’’न्ति. लेड्डुयो तिट्ठन्ति एत्थाति लेड्डुट्ठानं, लेड्डुनिमित्तं कसितट्ठानं. वज्जतीति वदं, वचनं. कुच्छितं वदं अवदं. गरहने हि अयं अ-कारो यथा – ‘‘अपुत्तो अभरिया’’ति. अवदं मानेतीति अवदमाना, अत्तनो बलमदेन लापं अतिमञ्ञित्वा वदन्तीति अत्थो. तेनेवाह ‘‘गच्छ खो, त्वं लाप, तत्रपि मे गन्त्वा न मोक्खसी’’ति. यं पन अट्ठकथायं वुत्तं ‘‘अत्तनो बलस्स सुट्ठु वण्णं वदमाना’’ति, तत्थ अत्ततो आपन्नं गहेत्वा वुत्तं. ‘‘वदमानो’’ति वा पाठो, सारम्भवसेन अव्हायन्तोति अत्थो. तेनाह ‘‘एहि खो दानि सकुणग्घी’’ति. सुट्ठु ठपेत्वाति जियामुत्तसरस्स विय सीघपातयोग्यताकरणेन उभो पक्खे सम्मा ठपेत्वा. अयन्ति सकुणग्घि. ञत्वाति यथाभूतदस्सनेन अत्तनो ञाणेन जानित्वा. फालीयित्थाति फालच्छेदतिखिणसिखरे सुक्खलेड्डुस्मिं भिज्जित्थ.

७. मक्कटसुत्तवण्णना

३७३. सञ्चारोति सञ्चरणं. लेपन्ति सिलेससदिसं आलेपनं. काजसिक्का वियाति काजदण्डके ओलग्गेतब्बा सिक्का विय. अपिच चतस्सो रज्जुयो उपरि बन्धनट्ठानञ्चाति पञ्चट्ठानं. ओड्डितोति ओलम्बितो. थुनन्तोति नित्थुनन्तो.

८. सूदसुत्तवण्णना

३७४. आहारसम्पादनेन ¶ तंतंआहारवत्थुगते सूदेति पग्घरेतीति सूदो, भत्तकारको. दहरेहि मनापतरं अच्चेतब्बतो अतिक्कमितब्बतो अच्चया, भोजने रसविसेसा, तस्मा नानच्चयेहीति नानप्पकाररसविसेसेहीति अत्थो. तेन वुत्तं ‘‘नानच्चयेही’’तिआदि. अग्गीयति असङ्करतो विभजीयतीति अग्गो, अम्बिलमेव अग्गो अम्बिलग्गोति आह – ‘‘अम्बिलग्गेहीति अम्बिलकोट्ठासेही’’ति. दातुं अभिहरितब्बताय अभिहारा, देय्यधम्मा. तेनाह – ‘‘अभिहटानं दायान’’न्ति. इदं मे कम्मट्ठानं अनुलोमंवाति इदं मम कम्मट्ठानं एवं पवत्तमानं अनुलोमावसानमेव हुत्वा तिट्ठति. एवं पुन पवत्तमानं ¶ उस्सक्कित्वा विसेसनिब्बत्तनत्थमेव होतीति एवं निमित्तं गहेतुं न सक्कोति बालो अब्यत्तो, पण्डितो पन सक्कोति. अत्तनो चित्तस्साति अत्तनो भावनाचित्तस्स. पुब्बभागविपस्सना सतिपट्ठानाव कथिता ‘‘सकस्स चित्तस्स निमित्तं उग्गण्हाती’’ति वुत्तत्ता.

९. गिलानसुत्तवण्णना

३७५. पादगामोति नगरस्स पदसदिसो महन्तगामो. तेनेवाह ‘‘वेसालियं विहरति वेळुवगामके’’ति. अहितनिसेधन-हितनियोजन-ब्यसनपरिच्चजन-लक्खणो मित्तभावो येसु अत्थि, ते मित्ता. ये पन दिट्ठमत्तसहाया, ते सन्दिट्ठा. ये सविसेसं भत्तिमन्तो, ते सम्भत्ताति दस्सेन्तो ‘‘मित्ताति मित्तावा’’तिआदिमाह. अस्साति भगवतो. पञ्चमियं अट्ठमियं चातुद्दसियं पञ्चदसियन्ति एकेकस्मिं पक्खे चत्तारो वारे कत्वा मासस्स अट्ठवारे.

वेदनानं बलवभावेन खरो फरुसो कक्खळो. आबाधोति पुब्बकम्महेतुताय कम्मसमुट्ठानो आबाधो सङ्खारदुक्खतासङ्खातो सब्बकालिकत्ता सरीरस्स सभागरोगो नाम. नायमीदिसो आबाधो, अयं पन बहलतरब्याधिताय ‘‘विसभागरोगो’’ति वुत्तो. अन्त-सद्दो समीपपवत्तोति आह – ‘‘मरणन्तं मरणसन्तिक’’न्ति. वेदना…पे… अकरोन्तो उक्कंसगतभावितकायादिताय. अपीळियमानोति अपीळियमानो विय. ओवादमेव भिक्खुसङ्घस्स अपलोकनन्ति आह – ‘‘ओवादानुसासनिं अदत्वाति वुत्तं होती’’ति. पुब्बभागवीरियं नाम फलसमापत्तिया परिकम्मभूतविपस्सनावीरियं. जीवितम्पि जीवितसङ्खारो पतितुं अदत्वा अत्तभावस्स अभिसङ्खरणतो.

‘‘एत्तकं ¶ कालं अतिक्कमित्वा वुट्ठहिस्सामी’’ति खणपरिच्छेदवती समापत्ति खणिकसमापत्ति. निग्गुम्बं निज्जटं कत्वाति रूपसत्तकारूपसत्तकवसेन पवत्तियमानं विपस्सनाभावनं सब्बसो खिलविरहेन निग्गुम्बं, अब्याकुलताय निज्जटं कत्वा. महाविपस्सनावसेनाति पच्चेकं सविसेसं वित्थारितानं अट्ठारसादीनं महाविपस्सनानं वसेन विपस्सित्वा समापन्ना या समापत्ति, सा सुट्ठु विक्खम्भेति वेदनं महाबलवताय पुब्बारम्मणस्स, महानुभावताय तथापवत्तितविपस्सनावीरियस्स. यथा ¶ नामातिआदिना तस्स निदस्सनं दस्सेति. वेदनाति दुक्खवेदना. चुद्दसहाकारेहीति तस्सेव सत्तकद्वयस्स वसेन वदति. सन्नेत्वाति अन्तरन्तरा समापन्नज्झानसमापत्तिसम्भूतेन विपस्सनापीतिसिनेहेन तेमेत्वा. समापत्तीति फलसमापत्ति.

गिलाना वुट्ठितोति गिलानभावतो वुट्ठितो. सरीरस्स गरुथद्धभावप्पत्ति मधुरकताति आह – ‘‘सञ्जातगरुभावो सञ्जातथद्धभावो’’ति. नानाकारतोति पुरत्थिमादिभेदतो. सतिपट्ठानधम्माति पुब्बे अत्तना भावियमाना सतिपट्ठानधम्मा. पाकटा न होन्ति कायचित्तानं अकम्मञ्ञताय. तन्ति धम्माति परियत्तिधम्मा न ञायन्ति.

अनन्तरं अबाहिरन्ति धम्मवसेन पुग्गलवसेन च अन्तरबाहिरं अकत्वा. एत्तकन्तिआदिना वुत्तमेवत्थं विवरति. दहरकालेति अत्तनो दहरकाले. न एवं होतीति ‘‘अहं भिक्खुसङ्घं परिहरिस्सामी’’तिआदिको मानतण्हामूलको इस्सामच्छरियानं पवत्तिआकारो तथागतस्स न होति, नत्थेव पगेव तेसं समुच्छिन्नत्ताति आह – ‘‘बोधिपल्लङ्केयेवा’’तिआदि. पटिसङ्खरणेन वेठेन मिस्सकेन. मञ्ञेति यथावुत्तं पटिसङ्खरणसञ्ञितेन वेठमिस्सकेन विय जरसकटं. अरहत्तफलवेठेनाति अरहत्तफलसमापत्तिसञ्ञितेन अत्थभाववेठेन.

फलसमापत्तिया अधिप्पेतत्ता ‘‘एकच्चानं वेदनानन्ति लोकियानं वेदनान’’न्ति वुत्तं. अत्तदीपाति एत्थ अत्त-सद्देन धम्मो एव वुत्तो, स्वायमत्थो हेट्ठा विभावितो एव. नवविधो लोकुत्तरधम्मो वेदितब्बो. सो हि चतूहि ओघेहि अनज्झोत्थरणीयतो ‘‘दीपो’’ति वुत्तो. तमअग्गेति तमयोगाभावेन सदेवकस्स लोकस्स अग्गे. सब्बेसन्ति सब्बेसं सिक्खाकामानं. ते ‘‘धम्मदीपा विहरथा’’ति वुत्ता चतुसतिपट्ठानगोचराव भिक्खू अग्गे भविस्सन्ति.

१०. भिक्खुनुपस्सयसुत्तवण्णना

३७६. कम्मट्ठानकम्मिकाति ¶ कम्मट्ठानमनुयुत्ता. विसेसेतीति विसेसो, अतिसयो, स्वायं पुब्बापरविसेसो उपादायुपादाय गहेतब्बोति तं दस्सेतुं ‘‘तत्था’’तिआदिमाह.

उप्पज्जति ¶ किलेसपरिळाहोति काये असुभादिवसेन मनसिकारं अदहन्तस्स मनसिकारस्स वीथियं अपटिपन्नता सुभादिवसेन कायारम्मणो किलेसपरिळाहो च उप्पज्जति. वीरियारम्भस्स अभावेन तस्मिं आरम्मणे चेतसो वा लीनत्तं होति, गोचरज्झत्ततो बहिद्धा पुथुत्तारम्मणे चित्तं विक्खिपति. एवं किलेसपरिळाहे चातिआदिना तिविधम्पि भावनानुयोगस्स किलेसवत्थुभावं उपादाय समुच्चयवसेन अट्ठकथायं वुत्तं. यस्मा पन ते परिळाहलीनत्तविक्खेपा एकज्झं न पवत्तन्ति, तस्मा पाळियं ‘‘कायारम्मणो वा’’तिआदिना अनियमत्थो वा-सद्दो गहितो. किलेसानुरञ्जितेनाति किलेसविवण्णितचित्तेन हुत्वा न वत्तितब्बं. कथं पन वत्तितब्बन्ति आह ‘‘किस्मिञ्चिदेवा’’ति. न च वितक्केति न च विचारेतीति किलेससहगते वितक्कविचारे न पवत्तेति. सुखितोति झानसुखेन सुखितो.

इमस्स भिक्खुनो भावना पवत्ताति सम्बन्धो. यस्मा हि इमस्स भिक्खुनो तं मूलकम्मट्ठानं परिपन्थे सति ठपेत्वा बुद्धगुणादिअनुस्सरणेन चित्तं पसादेत्वा मूलकम्मट्ठानभावना पवत्ता, तस्मा पणिधाय भावनाति वुत्तन्ति सम्बन्धो. अट्ठपेत्वाति चित्तं अप्पवत्तेत्वाति अत्थो वेदितब्बो. कम्मट्ठानादीनं तिण्णम्पि वसेन अत्थयोजना सम्भवति. तेनाह ‘‘तत्था’’तिआदि. सारेन्तो वियाति रथं वाहयन्तो विय. समप्पमाणतो अट्ठकादिवसेन सुतच्छितं पक्खिपन्तो विय. सुखेनेव किलेसानं ओकासं अदेन्तो अन्तरा असज्जन्तो अलग्गन्तो. विपस्सनाचारस्स आरद्धवुत्तितं अपरिपन्थतञ्च दस्सेन्तो ओपम्मद्वयमाह. ब्याभङ्गियाति काजदण्डेन. किलेसपरिळाहादीनन्ति किलेसपरिळाहलीनत्तविक्खेपानं.

गुळखण्डादीनीति गुळखण्डसक्खरखण्डादीनि उच्छुविकारभूतानि. ‘‘काये कायानुपस्सी विहरामी’’तिआदिवचनतो ‘‘पुब्बभागविपस्सना कथिता’’ति वुत्तं.

अम्बपालिवग्गवण्णना निट्ठिता.

२. नालन्दवग्गो

२. नालन्दसुत्तवण्णना

३७८. दुतियवग्गे ¶ ¶ पठमसुत्तं हेट्ठा वुत्तनयत्ता सुविञ्ञेय्यन्ति तं लङ्घित्वा ‘‘दुतिये’’ति वुत्तं.

भिय्यतरो अभिञ्ञातोति सम्बोधिया सेट्ठतरोति अभिलक्खितो. भिय्यतराभिञ्ञोति सब्बसत्तेसु अधिकतरपञ्ञो. तेनाह ‘‘उत्तरितरञाणो’’ति. सम्मा अनवसेसतो बुज्झति एतेनाति सम्बोधीति आह – ‘‘सम्बोधियन्ति सब्बञ्ञुतञ्ञाणे’’ति. निप्पदेसा गहिताति अनवसेसा बुद्धगुणा गहिता अग्गमग्गसिद्धियाव भगवतो सब्बगुणानं सिद्धत्ता. न केवलञ्च बुद्धानं, अथ खो अग्गसावकपच्चेकबुद्धानम्पि तंतंगुणसमिज्झनं अग्गमग्गाधिगमेनेवाति दस्सेन्तो ‘‘द्वेपि अग्गसावका’’तिआदिमाह.

अपरो नयो – पसन्नोति इमिना पसादस्स वत्तमानता दीपिताति उप्पन्नसद्धोति इमिनापि सद्धाय पच्चुप्पन्नता पकासिताति आह – ‘‘एवं सद्दहामीति अत्थो’’ति. अभिजानाति अभिमुखभावेन सब्बञ्ञेय्यं जानातीति अभिञ्ञो, भिय्यो अधिको अभिञ्ञोति भिय्योभिञ्ञो. सो एव अतिसयवचनिच्छावसेन भिय्योभिञ्ञतरोति वुत्तोति आह – ‘‘भिय्यतरो अभिञ्ञातो’’ति. दुतियविकप्पे पन अभिजानातीति अभिञ्ञा, अभिविसिट्ठा पञ्ञा. भिय्यो अभिञ्ञा एतस्साति भिय्योभिञ्ञो, सो एव अतिसयवचनिच्छावसेन भिय्योभिञ्ञतरो. स्वायं अस्स अतिसयो अभिञ्ञाय भिय्योभावकतोति आह – ‘‘भिय्यतराभिञ्ञो वा’’ति. सम्बुज्झति एतायाति सम्बोधि, सब्बञ्ञुतञ्ञाणं अग्गमग्गञाणञ्च. सब्बञ्ञुतञ्ञाणपदट्ठानञ्हि अग्गमग्गञाणं, अग्गमग्गञाणपदट्ठानञ्च सब्बञ्ञुतञ्ञाणं सम्बोधि नाम. तत्थ पधानवसेन तदत्थदस्सने पठमविकप्पो, पदट्ठानवसेन दुतियविकप्पो. कस्मा पनेत्थ अरहत्तमग्गञाणस्सेव गहणं, ननु हेट्ठिमानिपि भगवतो मग्गञाणानि सवासनमेव यथासकं पटिपक्खविधमनवसेन पवत्तानि. सवासनप्पहानञ्हि ञेय्यावरणप्पहानन्ति? सच्चमेतं, तं पन अपरिपुण्णं पटिपक्खविधमनस्स विप्पकतभावतोति आह ‘‘अरहत्तमग्गञाणे वा’’ति. सब्बन्ति सम्मासम्बुद्धेन अधिगन्तब्बं सब्बं.

खादनीयानं ¶ ¶ उळारता सातरसानुभावेनाति आह ‘‘मधुरे आगच्छती’’ति. पसंसाय उळारता विसिट्ठभावेनाति आह – ‘‘सेट्ठे’’ति. ओभासस्स उळारता महन्तभावेनाति वुत्तं – ‘‘विपुले’’ति. उसभस्स अयन्ति आसभी, इध पन आसभी वियाति आसभी. तेनाह – ‘‘उसभस्स वाचासदिसी’’ति. येन गुणेन सा तंसदिसा, तं दस्सेतुं ‘‘अचला असम्पवेधी’’ति वुत्तं. यतो कुतोचि अनुस्सवनं अनुस्सवो. विज्जाट्ठानादीसु कतपरिचयानं आचरियानं तं तं अत्थं ञापेन्ती पवेणी आचरियपरम्परा. केवलं अत्तनो मतिया ‘‘इति किर एवं किरा’’ति परिकप्पना इतिकिरा. पिटकस्स गन्थस्स सम्पदानतो भूततो तस्स गहणं पिटकसम्पदानं. यथासुतानं अत्तानं आकारस्स परिवितक्कनं आकारपरिवितक्को. तथेवस्स ‘‘एवमेत’’न्ति दिट्ठिया निज्झानक्खमनं दिट्ठिनिज्झानक्खन्ति. आगमाधिगमेहि विना केवलं अनुस्सुततो तक्कमग्गं निस्साय तक्कनं तक्को. अनुमानविधिं निस्साय गहणं नयग्गाहो. यस्मा बुद्धविसये ठत्वा भगवतो अयं थेरस्स चोदना थेरस्स च सो अविसयो, तस्मा ‘‘पच्चक्खतो ञाणेन पटिविज्झित्वा विया’’ति वुत्तं. सीहनादो वियाति सीहनादो. तंसदिसता चस्स सेट्ठभावेन, सो चेत्थ एवं वेदितब्बोति दस्सेन्तो ‘‘सीहनादो’’तिआदिमाह. उन्नादयन्तेनाति असनिसदिसं करोन्तेन.

अनुयोगदापनत्थन्ति अनुयोगं सोधापेतुं. विमद्दक्खमञ्हि सीहनादं नदन्तो अत्थतो अनुयोगं सोधेति नाम, अनुयुज्झन्तो च नं सोधापेति नाम. दातुन्ति सोधेतुं. केचि ‘‘दानत्थ’’न्ति अत्थं वदन्ति, तं न युत्तं. न हि यो सीहदानं नदति, सो एव तत्थ अनुयोगं देतीति युज्जति. निघंसनन्ति विमद्दनं. धममानन्ति तापयमानं. तापनञ्चेत्थ गग्गरिया धम्मापनसीसेन वदति.

सब्बे तेति सब्बे ते अतीते निरुद्धे सम्मासम्बुद्धे. तेनेतं दस्सेति – ये ते अहेसुं अतीतमद्धानं तव अभिनीहारतो ओरं सम्मासम्बुद्धा, तेसं ताव सावकञाणगोचरे धम्मे परिच्छिन्दन्तो मारादयो विय च बुद्धानं लोकियचित्ताचारं त्वं जानेय्यासि. ये पन ते अब्भतीता, ततो परतो छिन्नवटुमा छिन्नपपञ्चा परियादिन्नवट्टा सब्बदुक्खवीतिवत्ता सम्मासम्बुद्धा, तेसं सब्बेसम्पि तव सावकञाणस्स ¶ अविसयभूते धम्मे कथं जानिस्ससीति. तेनाति सम्बोधिसङ्खातेन सब्बञ्ञुतञ्ञाणपदट्ठानेन अरहत्तमग्गञाणेन. एवंसीलाति तादिससीला. समाधिपक्खाति समाधि च समाधिपक्खा च समाधिपक्खा एकदेससरूपेकसेसनयेन. तत्थ समाधिपक्खाति वीरियसतियो तदनुगुणा च धम्मा वेदितब्बा ¶ . झानसमापत्तीसु येभुय्येन विहारवोहारो, झानसमापत्तियो समाधिप्पधानाति वुत्तं ‘‘समाधिपक्खानं धम्मानं गहितत्ता विहारो गहितो’’ति.

यथा पन हेट्ठा गहितापि समाधिपञ्ञा पटिपक्खतो विमुत्तत्ता विमुच्चन-सङ्खात-किच्चविसेस-दस्सनवसेन विमुत्तिपरियायेन पुन गहिता ‘‘एवंविमुत्ता’’ति, एवं दिब्बविहारो दिब्बविहारविसेसदस्सनवसेन पुन गहितो ‘‘एवंविहारी’’ति, तस्मा सब्बेसं समापत्तिविहारानं वसेनेत्थ अत्थो युज्जतीति दट्ठब्बं. विमुत्तीति सङ्खं गच्छन्ति विमुच्चित्थाति कत्वा. एस नयो सेसेसुपि. पटिप्पस्सद्धन्तेति पटिप्पस्सम्भनोसापनेन. सब्बकिलेसेहि निस्सटत्ता असंसट्ठत्ता विमुत्तत्ता च निस्सरणविमुत्ति निब्बानं.

अनागतबुद्धानं पनाति पन-सद्दो विसेसत्थजोतनो. तेन अतीतेसु ताव खन्धानं भूतपुब्बत्ता तत्थ सिया ञाणस्स सविसये गति, अनागतेसु पन सब्बसो असञ्जातेसु कथन्ति इममत्थं जोतेति. तेनाह ‘‘अनागतापी’’तिआदि. ‘‘अत्तनो चेतसा परिच्छिन्दित्वा विदिता’’ति कस्मा वुत्तं? ननु अतीतानागते सत्ताहे एव पवत्तं चित्तं चेतोपरियञाणस्स विसयो, न ततो परन्ति? नयिदं चेतोपरियञाणकिच्चवसेन वुत्तं, अथ खो पुब्बेनिवासअनागतंसञाणानं वसेन वुत्तं, तस्मा नायं दोसो. विदितट्ठाने न करोति सिक्खापदेनेव तादिसस्स पटिक्खेपस्स पटिक्खित्तत्ता सेतुघाततो च. कथं पन थेरो द्वयसम्भवे पटिक्खेपमेव अकासि, न विभज्ज ब्याकासीति आह ‘‘थेरो किरा’’तिआदि. पारं परियन्तं मिनोतीति पारमी, सा एव ञाणन्ति पारमिञाणं, सावकानं पारमिञाणं सावकपारमिञाणं. तस्मिं सावकानं उक्कंसपरियन्तगते जानने नायमनुयोगो, अथ खो सब्बञ्ञुतञ्ञाणे सब्बञ्ञुताय जानने. केचि पन ‘‘सावकपारमिञाणेति सावकपारमिञाणविसये’’ति अत्थं वदन्ति, तथा सेसपदेसुपि. सील…पे… समत्थन्ति सीलसमाधिपञ्ञाविमुत्तिञाणसङ्खातानं कारणानं ¶ जाननसमत्थं. बुद्धसीलादयो हि बुद्धानं बुद्धकिच्चस्स परेहि एते बुद्धाति जाननस्स च कारणं.

अनुमानञाणं विय संसयट्ठितं अहुत्वा इदमिदन्ति यथासभावतो ञेय्यं धारेति निच्छिनोतीति धम्मो, पच्चक्खञाणन्ति आह ‘‘धम्मस्स पच्चक्खतो ञाणस्सा’’ति. अनुएतीति अन्वयोति आह ‘‘अनुयोगं अनुगन्त्वा’’ति. पच्चक्खसिद्धञ्हि अत्थं अनुगन्त्वा अनुमानञाणस्स पवत्ति ‘‘दिट्ठेन अदिट्ठस्स अनुमान’’न्ति वेदितब्बा. विदिते वेदकम्पि ञाणं अत्थतो विदितमेव होतीति ‘‘अनुमानञाणं नयग्गाहो विदितो’’ति वुत्तं. विदितोति विद्धो ¶ पटिलद्धो, अधिगतोति अत्थो. अप्पमाणोति अपरिमाणो महाविसयत्ता. तेनाह ‘‘अपरियन्तो’’ति. तेनाति अपरियन्तत्ता. तेन वा अपरियन्तेन ञाणेन. एतेन थेरो यं यं अनुमेय्यमत्थं ञातुकामो होति, तत्थ तत्थ तस्स असङ्गमप्पटिहतं अनुमानञाणं पवत्तेतीति दस्सेति. तेनाह ‘‘सो इमिना’’तिआदि. तत्थ इमिनाति इमिना कारणेन.

पाकारस्स थिरभावं उद्धमुद्धं आपेतीति उद्धापं, पाकारमूलं. आदि-सद्देन पाकारद्वारबन्धपरिखादीनं सङ्गहो वेदितब्बो. पच्चन्ते भवं पच्चन्तिमं. पण्डितदोवारिकट्ठानियं कत्वा थेरो अत्तानं दस्सेतीति दस्सेन्तो ‘‘एकद्वारन्ति कस्मा आहा’’ति चोदनं समुट्ठापेसि.

यस्सा पञ्ञाय वसेन पुरिसो पण्डितोति वुच्चति, तं पण्डिच्चन्ति आह – ‘‘पण्डिच्चेन समन्नागतो’’ति. तंतंइतिकत्तब्बतासु छेकभावो ब्यत्तभावो वेय्यत्तियं. मेधति अञ्ञाणं हिंसति विधमतीति मेधा, सा एतस्स अत्थीति मेधावी. ठाने ठाने उप्पत्ति एतिस्सा अत्थीति ठानुप्पत्तिका, ठानसो उप्पज्जनपञ्ञा. अनुपरियायन्ति एतेनाति अनुपरियायो, सो एव पथोति अनुपरियायपथो, परितो पाकारस्स अनुयायनमग्गो. पाकारभागा सम्बन्धितब्बा एत्थाति पाकारसन्धि, पाकारस्स फुल्लितपदेसो. सो पन हेट्ठिमन्तेन द्विन्नम्पि इट्ठकानं विगमेन एवं वुच्चतीति आह – ‘‘द्विन्नं इट्ठकानं अपगतट्ठान’’न्ति. छिन्नट्ठानन्ति छिन्नभिन्नपदेसं, छिन्नट्ठानं वा. तञ्हि ‘‘विवर’’न्ति वुच्चति. कीलिट्ठन्ति मलीनं. उपतापेन्तीति किलेसपरिळाहेन सन्तापेन्ति. विबाधेन्तीति पीळेन्ति. उप्पन्नाय पञ्ञाय नीवरणेहि न किञ्चि कातुं सक्काति आह ‘‘अनुप्पन्नाय पञ्ञाय उप्पज्जितुं न देन्ती’’ति. तस्माति पच्चयूपघातेन ¶ उप्पज्जितुं अप्पदानतो. चतूसु सतिपट्ठानेसु सुट्ठु ठपितचित्ताति चतुब्बिधायपि सतिपट्ठानभावनाय सम्मदेव ठपितचित्ता अप्पितचित्ता. यथासभावेन भावेत्वाति याथावतो सम्मदेव यथा पटिपक्खा समुच्छिज्जन्ति, एवं भावेत्वा.

पुरिमनये सतिपट्ठानानि बोज्झङ्गा च मिस्सका अधिप्पेताति ततो अञ्ञथा वत्तुं ‘‘अपिचेत्था’’तिआदि वुत्तं. मिस्सकाति समथविपस्सनामग्गवसेन मिस्सका. ‘‘चतूसु सतिपट्ठानेसु सुप्पतिट्ठितचित्ताति पठमं वुत्तत्ता सतिपट्ठानेसु विपस्सनं गहेत्वा सत्त बोज्झङ्गे यथाभूतं भावेत्वाति वुत्तत्ता मग्गपरियापन्नानंयेव च नेसं निप्परियायबोज्झङ्गभावतो तेसु च अधिगतमेव होतीति बोज्झङ्गे मग्गो च सब्बञ्ञुतञ्ञाणञ्चाति गहिते सुन्दरो पञ्हो भवेय्या’’ति महासिवत्थेरो आह. न पनेवं गहितं पोराणेहीति अधिप्पायो. इतीति वुत्तप्पकारपरामसनं. थेरोति सारिपुत्तत्थेरो.

तत्थाति ¶ तेसु पच्चन्तनगरादीसु. नगरं विय निब्बानं तदत्थिकेहि उपगन्तब्बतो उपगतानञ्च परिस्सयरहितसुखाधिगमट्ठानतो. पाकारो विय सीलं तदुपगतानं परितो आरक्खभावतो. अनुपरियायपथो विय हिरी सीलपाकारस्स अधिट्ठानभावतो. वुत्तञ्हेतं – ‘‘परियायपथोति खो भिक्खु हिरिया एतं अधिवचन’’न्ति. द्वारं विय अरियमग्गो निब्बाननगरप्पवेसने अञ्जसभावतो. पण्डितदोवारिको विय धम्मसेनापति निब्बाननगरं पविट्ठपविसनकानं सत्तानं सल्लक्खणतो. दिन्नोति दापितो, सोधितोति अत्थो. सेसं सुविञ्ञेय्यमेव.

३. चुन्दसुत्तवण्णना

३७९. पुब्बे सावत्थितो वेळुवगामस्स गतत्ता वुत्तं ‘‘आगतमग्गेनेव पटिनिवत्तन्तो’’ति. सत्तन्नन्ति उपसेनो, रेवतो, खदिरवनियो, चुन्दो, समणुद्देसो अहन्ति चतुन्नं, चाला, उपचाला, सीसूपचालाति, तिस्सन्नन्ति इमेसं सत्तन्नं अरहन्तानं. नत्थि नु खोति एत्थापि ‘‘ओलोकेन्तो’’ति आनेत्वा सम्बन्धो सीहावलोकनञायेन. भविस्सन्ति मे वत्तारो हरितुं नासक्खीति सम्बन्धो. इदं दानि पच्छिमदस्सनन्ति भूतकथनमत्तं, न तत्थ सालयतादस्सनं यथा तथागतस्स वेसालिया निक्खमित्वा नागापलोकितं.

तस्स ¶ तस्स विसेसस्स अधिट्ठानवसेनेव इद्धिभेददस्सनं इद्धिविकुब्बनं. सीहस्स विजम्भनादिवसेन कीळित्वा नादसदिसी अयं धम्मकथाति वुत्तं ‘‘सीहविकीळितो धम्मपरियायो’’ति. गमनकालो मय्हन्तीति एत्थ इति-सद्दो परिसमापने. तेन थेरेन यथारम्भस्स वचनपबन्धस्स समापितभावं जोतेति. एस नयो सेसेसुपि एदिसेसु सब्बट्ठानेसु. युगन्धरादयो परिभण्डपब्बताति वेदितब्बा. एकप्पहारेनेवाति एकप्पहारेन इव. स्वायं इव-सद्दो न सक्कोमीति एत्थ आनेत्वा सम्बन्धितब्बो.

पटिपादेस्सामीति ठितकायं पटिपादेस्सामि. पत्थनाकाले अनोमदस्सिस्स भगवतो वचनसुतानुसारेन ञाणेन दिट्ठमत्ततं सन्धाय ‘‘तं पठमदस्सन’’न्ति वुत्तं. धारेतुं असक्कोन्ती गुणसारं. एस मग्गोति एसो जातानं सत्तानं मरणनिट्ठितो पन्थो. पुनपि एवंभाविनो नाम सङ्खाराति सङ्खारा नाम एवंभाविनो, मरणपरियोसानाति अत्थो. एत्तकन्ति एत्तकं कालं. सङ्कड्ढित्वा संहरित्वा. मुखं पिधायाति मुखं छादेत्वा. अग्घिकसतानीति मकुळङ्कुरचेतियसतानि.

पुरिमदिवसेति ¶ अतीतदिवसे. यस्मा धम्मसेनापतिनो अरहत्तप्पत्तदिवसेयेव सत्थु सावकसन्निपातो अहोसि, तस्मा ‘‘पूरितसावकसन्निपातो एस भिक्खू’’ति वुत्तं. पञ्च जातिसतानीति भुम्मत्थे, अच्चन्तसंयोगे वा उपयोगवचनं.

कळोपिहत्थोति विलीवमयभाजनहत्थो. ‘‘चम्ममयभाजनहत्थो’’ति च वदन्ति. पुरन्तरेति नगरमज्झे. वनेति अरञ्ञे.

ओसक्कनाकारविरहितोति धम्मदेसनाय सङ्कोचहेतुविरहितो. विसारदोति सारदविरहितो. धम्मोजन्ति धम्मरसं, ओजवन्तं देसनाधम्मन्ति अत्थो. धम्मभोगन्ति धम्मपरिभोगं, परेहि सद्धिं संविभजनवसेन पवत्तं धम्मसम्भोगन्ति देसनाधम्ममेव वदति. तेन वुत्तं ‘‘उभयेनपि धम्मपरिभोगोव कथितो’’ति.

पियायितब्बतो पियेहि. मनस्स वड्ढनतो मनापेहि. जातियाति खत्तियादिजातिया. नानाभावो असहभावो विसुंभावो. अञ्ञथाभावो अञ्ञथत्तं. सरीरन्ति रूपधम्मकायसङ्खातं सरीरं. रूपकाये ¶ हि भिज्जन्ते भिज्जन्तेव. सो भिज्जेय्याति सो महन्ततरो खन्धो भिज्जेय्य.

दक्खिणदिसं गतोति दक्खिणदिसामुखे पवत्तो. महाखन्धो वियाति महन्तो सारवन्तो साखाखन्धो विय. साखखन्धा हि दिसाभिमुखपवत्ताकारा, मूलखन्धो पन उद्धमुग्गतो. सोळसन्नं पञ्हानन्ति सोळसन्नं अपरापरियपवत्तनियानं अत्थानं. ञातुं इच्छितो हि अत्थो पञ्हो.

४-५. उक्कचेलसुत्तादिवण्णना

३८०-३८१. अमावसुपोसथेति अमावसिउपोसथे, कालपक्खउपोसथेति अत्थो. पुरिमनयेनेवाति अनन्तरसुत्ते वुत्तनयेनेव.

६. उत्तियसुत्तवण्णना

३८२. मच्चुधेय्यस्साति मच्चुनो पवत्तिट्ठानस्स.

८. ब्रह्मसुत्तवण्णना

३८४. तस्मिं ¶ कालेति पठमाभिसम्बोधियं. भिक्खुयेव नत्थि धम्मचक्कस्स अप्पवत्तितत्ता, भिक्खुयेव भिक्खुलक्खणयोगतो. एकको मग्गो, न द्वेधापथभूतोति एकमग्गो, तं एकमग्गं. जातिया खयो वट्टदुक्खस्स अन्तभूतोति जातिक्खयन्तो, निब्बानं, तं दिट्ठत्ता जातिक्खयन्तदस्सीति एवमेत्थ अत्थो दट्ठब्बो.

९. सेदकसुत्तवण्णना

३८५. अयं तस्स लद्धीति अयं इदानि वुच्चमाना तस्स आचरियस्स लद्धि. ततो अनामेन्तोति येन वंसो नमति, तेन कायं अनामेन्तो. तथा नमन्तो हि पतित्वा चुण्णविचुण्णं होति. तन्ति कायं, तं वंसं वा. आकड्ढेन्तो वियाति नमितट्ठानतो परभागेन आकड्ढेन्तो विय. एकतोभागियं कत्वाति यथावुत्तं सतिं सूपट्ठितं ¶ कत्वा ओनतं विय कत्वा. तथा करणं पन तथा वातूपत्थम्भगाहापनेनाति आह – ‘‘वातूपत्थम्भं गाहापेत्वा’’ति. तञ्च सतिया तदत्थं उपट्ठानेनाति वुत्तं ‘‘सतिं सूपट्ठितं कत्वा’’ति. निच्चलोव निसीदन्तो अन्तेवासी आचरियं रक्खति, एत्तकं आचरियस्स लद्धिवसेन वुत्तं. ‘‘आचरियो वंसं सुग्गहितं गण्हन्तो’’तिआदि सब्बं हेट्ठा वुत्तनयमेव.

‘‘अत्तानमेव रक्खती’’ति इदं अत्तनो रक्खणं पधानं कत्वा वुत्तं, न अन्तेवासिकन्ति अवधारणफलं. अत्तरक्खाय पनेत्थ सिज्झमानाय अन्तेवासिकरक्खापि सिद्धा एव होतीति. दुतियपक्खेपि एसेव नयो. सो तत्थ ञायोति या अत्तनो एव रक्खा, सा अत्थतो पररक्खापि होतीति अयमेत्थ ञायो युत्तप्पयोगो. अनुवड्ढियाति यथावड्ढितस्स अनुअनुवड्ढिया. एतेन पटिलद्धसम्पयुत्तपमोदनाकारो दस्सितोति आह – ‘‘सपुब्बभागाय मुदितायाति अत्थो’’ति. आसेवनायातिआदीनि पदानि अनुदयतापरियोसानानि (यस्मा सतिपट्ठानं सेवन्तस्स सिद्धं अत्तनो च परस्स च रक्खणं पकासेन्ति, तस्मा) – ‘‘अत्तानं, भिक्खवे, रक्खिस्सामीति सतिपट्ठानं सेवितब्ब’’न्तिआदि वुत्तं.

१०. जनपदकल्याणीसुत्तवण्णना

३८६. जनपदस्मिं कल्याणीति सकलजनपदे भद्दा रूपसम्पत्तिया सिक्खासम्पत्तिया च सुन्दरा ¶ सेट्ठा. रूपसम्पत्ति च नाम सब्बसो रूपदोसाभावेन रूपगुणपारिपूरिया होतीति तदुभयं दस्सेतुं ‘‘छसरीरदोसरहिता पञ्चकल्याणसमन्नागता’’ति वुत्तं. तं दुविधम्पि विवरन्तो ‘‘सा ही’’तिआदिमाह. पञ्चकल्याणसमन्नागताति पञ्चविधसरीरगुणसम्पदाहि समन्नागता. नातिदीघा नातिरस्साति पमाणमज्झिमा दीघतरप्पमाणा न होति, न अतिरस्सा, लकुण्डकरूपा न होति. नातिकिसाति अतिविय किसथद्धमंसलोहिता दिस्समाना अट्ठिसरीरा जालसरीरा न होति. नातिथूलाति भारियमंसा महोदरा न होति. नातिकाळा नाच्चोदाताति अतिविय काळवण्णा झामङ्गारो विय ¶ , दधितक्कादीहि पमज्जितमत्तकंसलोहवण्णा न होति. मनुस्सलोके तादिसिया रूपसम्पत्तिया अभावतो अतिक्कन्ता मनुस्सवण्णं. यथा पमाणयुत्ता, एवं आरोहपरिणाहयोगतो च परेसं पसादावहा नातिदीघतादयो. एवं मनुस्सानं दिब्बरूपतासम्पत्तीपीति वुत्तं ‘‘अप्पत्ता दिब्बवण्ण’’न्ति. एत्थ च नातिदीघनातिरस्सतावचनेन आरोहसम्पत्ति वुत्ता उब्बेधेन पासादिकभावतो. किसथूलदोसाभाववचनेन परिणाहसम्पत्ति वुत्ता. उभयेनपि सण्ठानसम्पदा विभाविता, नातिकाळतावचनेन वण्णसम्पत्ति वुत्ता विवण्णताभावतो. पियङ्गुसामाति परिणतपियङ्गुपुप्फसदिससरीरनिभासा. मुखपरियोसानन्ति अधरोट्ठमाह. अयं यथावुत्ता सरीरवण्णसम्पत्ति. अस्साति जनपदकल्याणिया. छविकल्याणता छविसम्पत्तिहेतुकत्ता तस्सा. एस नयो सेसेसुपि. नखा एव पत्तसदिसताय नखपत्तानि.

(पसावो सरीरावयवेन इरियनन्ति आह – ‘‘पवत्तीति अत्थो’’ति, पसावो यथापरितमेव कनतन्ति, न सभावसन्धानं. यथाविभावसेन उत्तममेव नच्चं नच्चति. ते वा वीसतियासूतिरं धानप्पत्तिया पवत्तिया पवत्तिमकतमन्दता विभावसुटतस्स उत्तममेव गीतञ्च गायतीति अत्थो.) [एत्थन्तरे पाठो असुद्धो दुस्सोधनीयो च. सुद्धपाठो गवेसितब्बो.] समतित्तिको तेलपत्तोति मुखवत्तिसमं तेलानं पूरितत्ता समतित्तिकमुखं तेलभाजनं. अन्तरेन च महासमज्जं अन्तरेन च जनपदकल्याणिन्ति जनपदकल्याणिया, तस्सा च नच्चगीतं पेक्खितुं सन्निपतितमहाजनसमूहस्स मज्झतो परिहरितब्बो नेतब्बो. नन्ति तेलं. आहरेय्याति आपज्जेय्य. तत्रिदं ओपम्मसंसन्दनं – तेलपत्तं विय कायगतासति, तस्स परिहरणपुग्गलो विय विपस्सको, जनकाया विय पुथुत्तारम्मणानि, असिपुरिसो विय मनो, तेलस्स चजनं विय किलेसुप्पादनं, सीसपातनं विय अरियमग्गञाणसीसानुप्पत्ति. ‘‘कायगता सति नो भाविता…पे… सिक्खितब्ब’’न्ति वुत्तत्ता ‘‘पुब्बभागविपस्सनाव कथिता’’ति वुत्तं.

नालन्दवग्गवण्णना निट्ठिता.

३. सीलट्ठितिवग्गो

१-२. सीलसुत्तादिवण्णना

३८७-३८८. सीलानीति ¶ ¶ बहुवचनं अनेकविधत्ता सीलस्स. तञ्हि सीलनट्ठेन एकविधम्पि चारित्तादिवसेन अनेकविधं. तेनाह – ‘‘चतुपारिसुद्धिसीलानी’’ति. पञ्हमग्गोति ञातुं इच्छितस्स अत्थस्स वीमंसनं. तेनाह – ‘‘पञ्हगवेसन’’न्ति.

३-५. परिहानसुत्तादिवण्णना

३८९-३९१. पुग्गलवसेन परिहानं होति न धम्मवसेन. यो न भावेति, तस्सेव परिहायति. तेनाह ‘‘यो ही’’तिआदि.

६. पदेससुत्तवण्णना

३९२. पदेसतो भावितत्ताति एकदेसतो भावितत्ता भावनापारिपूरिया अननुप्पत्तत्ता. तेनाह – ‘‘चत्तारो हि मग्गे’’तिआदि.

७. समत्तसुत्तवण्णना

३९३. समत्ता भावितत्ताति परियत्ता भावितत्ता.

८-१०. लोकसुत्तादिवण्णना

३९४-३९६. महाविसयत्ता महतियो अभिञ्ञा एतस्साति महाभिञ्ञो, तस्स भावोति सब्बं वत्तब्बं. ‘‘सततविहारवसेन वुत्त’’न्ति वत्वा तमत्थं पाकटं कातुं ‘‘थेरो किरा’’तिआदि वुत्तं. तस्साति थेरस्स. आवज्जनस्स गतिन्ति एकावज्जनस्सेव गमनवीथिं. अनुबन्धति चक्कवाळानं सहस्सं एकावज्जनेनेव सहस्सलोकधातुया इच्छितमत्थं जानितुं समत्थोति दस्सेति.

सीलट्ठितिवग्गवण्णना निट्ठिता.

४. अननुस्सुतवग्गवण्णना

३९७-४०७. या ¶ ¶ वेदना सम्मसित्वाति या तेभूमकवेदना सम्मसित्वा. तावस्साति ता तेभूमकवेदना एव अस्स भिक्खुनो. सदिसवसेन चेतं वुत्तं, अनिच्चादिसम्मसनवसेन विदिता पुब्बभागे सम्मसनकाले उपट्ठहन्ति. परिग्गहितेसूति परिजाननवसेन परिच्छिज्ज गहितेसु. ‘‘वेदना तण्हापपञ्चस्स, वितक्को मानपपञ्चस्स, सञ्ञा दिट्ठिपपञ्चस्स मूलवसेन सम्मसनं वुत्ता’’ति वदन्ति. ‘‘वेदनावितक्कसञ्ञा तण्हामानदिट्ठिपपञ्चानं मूलदस्सनवसेना’’ति अपरे.

अननुस्सुतवग्गवण्णना निट्ठिता.

५. अमतवग्गो

२. समुदयसुत्तवण्णना

४०८. सारम्मणसतिपट्ठानाति आरम्मणलक्खिता सतिपट्ठाना कथिता, न सतिलक्खणा.

४. सतिसुत्तवण्णना

४१०. सुद्धिकं कत्वा विसुं विसुं कत्वा. तथा च वुत्तं पाळियं ‘‘काये वा भिक्खू’’ति.

६. पातिमोक्खसंवरसुत्तवण्णना

४१२. जेट्ठकसीलन्ति पधानकसीलं. सीलग्गहणञ्हि पाळियं पातिमोक्खसंवरवसेनेव आगतं. तेनाह ‘‘तिपिटकचूळनागत्थेरो पना’’तिआदि. तत्थ पातिमोक्खसंवरोव सीलन्ति अवधारणं इतरेसं तिण्णं एकदेसेन पातिमोक्खन्तोगधभावं दीपेति. तथा हि अनोलोकियोलोकने आजीवहेतु च छसिक्खापदवीतिक्कमने गिलानपच्चयस्स अप्पच्चवेक्खितपरिभोगे ¶ च आपत्ति विहिताति. तीणीति इन्द्रियसंवरादीनि. सीलन्ति वुत्तट्ठानं नाम नत्थीति सीलपरियायेन तेसं कत्थचि सुत्ते गहितट्ठानं नाम नत्थीति निप्परियायसीलतं तेसं ¶ पटिक्खिपति. छद्वाररक्खणमत्तमेवाति तस्स सल्लहुकतमाह चित्ताधिट्ठानमत्तेन पटिपाकतिकभावप्पत्तितो. इतरद्वयेपि एसेव नयो. पच्चयुप्पत्तिमत्तकन्ति फलेन हेतुं दस्सेति. उप्पादनहेतुका हि पच्चयानं उप्पत्ति. इदमत्थन्ति इदं पयोजनं इमस्स पच्चयस्स परिभुञ्जनेति अधिप्पायो. निप्परियायेनाति इमिना इन्द्रियसंवरादीनि तीणि पधानसीलस्स परिपालनपरिसोधनवसेन पवत्तिया परियायसीलानि नामाति दस्सेति. इदानि पातिमोक्खसीलस्सेव पधानभावं ब्यतिरेकतो अन्वयतो च उपमाय विभावेतुं ‘‘यस्सा’’तिआदिमाह. तत्थ सोति पातिमोक्खसंवरो. सेसानि इन्द्रियसंवरादीनि. पातिमोक्खसद्दस्स अत्थो पन विसुद्धिमग्गसंवण्णनादीसु वित्थारितो, तस्मा तत्थ वुत्तनयेनेव वेदितब्बो.

आचारेन च गोचरेन च सम्पन्नोति कायिकचेतसिकअवीतिक्कमसङ्खातेन आचारेन च नवेसियादिगोचरतादिसङ्खातेन गोचरेन च सम्पन्नो, सम्पन्नआचारगोचरोति अत्थो. अप्पमत्तकेसूति अतिपरित्तकेसु अनापत्तिगमनीयेसु. ‘‘दुक्कटदुब्भासितमत्तेसू’’ति अपरे. वज्जेसूति अकरणीयेसु गारय्हेसु. ते पन एकन्ततो अकुसला होन्तीति आह – ‘‘अकुसलधम्मेसू’’ति. भयदस्सावीति भयतो दस्सनसीलो, परमाणुमत्तम्पि वज्जं सिनेरुप्पमाणं विय कत्वा दस्सनसीलो. सम्मा आदियित्वाति सम्मदेव सक्कच्चं सब्बसो च आदियित्वा. सिक्खापदेसूति निद्धारणे भुम्मन्ति समुदायतो अवयवनिद्धारणं दस्सेन्तो ‘‘सिक्खापदेसु तं तं सिक्खापद’’न्तिआदिमाह. सिक्खापदं समादातब्बं सिक्खितब्बञ्चाति अधिप्पायो. सिक्खाति अधिसीलसिक्खा. पुब्बे पद-सद्दो अधिट्ठानट्ठो, इध भागत्थोति दट्ठब्बन्ति आह – ‘‘सिक्खाकोट्ठासेसू’’ति. मूलपञ्ञत्तिअनुपञ्ञत्तिआदिभेदं यंकिञ्चि सिक्खितब्बं पूरेतब्बं सीलं, तं पन द्वारवसेन दुविधमेवाति आह – ‘‘कायिकं वा वाचसिकं वा’’ति. इमस्मिं अत्थविकप्पे सिक्खापदेसूति आधारे भुम्मं सिक्खाभागेसु कस्सचि विसुं अग्गहणतो. तेनाह – ‘‘तं तं सब्ब’’न्ति. ‘‘ततो त्वं भिक्खु सीलं निस्साया’’ति वचनतो अनभिज्झा अब्यापादसम्मादिट्ठियोपि सीलन्ति वुत्ता, तस्मा इमस्मिं सुत्ते ‘‘पातिमोक्खसंवरसीलमेव कथित’’न्ति वुत्तं.

७. दुच्चरितसुत्तवण्णना

४१३. एत्थापि ¶ मनोसुचरितं सीलं नामाति दस्सेतीति कत्वा वुत्तं ‘‘पच्छिमापि तयो’’ति. अनभिज्झाअब्यापादसम्मादिट्ठिधम्मा सीलं होतीति वेदितब्बा कायवचीसुचरितेहि सद्धिं ¶ मनोसुचरितम्पि वत्वा ‘‘ततो त्वं भिक्खु सीलं निस्साय सीले पतिट्ठाया’’ति वुत्तत्ता. सेसं वुत्तनयमेव. छट्ठसत्तमेसूति छट्ठसत्तमवग्गेसु अपुब्बं नत्थि. तेन वुत्तं ‘‘हेट्ठा वुत्तनयेनेव अत्थो वेदितब्बो’’ति. वग्गपेय्यालतो पन इमस्मिं सतिपट्ठानसंयुत्ते कतिपयवग्गा सङ्गहं आरूळ्हा, तथापि तेसं अत्थविसेसाभावतो एकच्चेसु पोत्थकेसु मुखमत्तं दस्सेत्वा संखित्ता, एकच्चेसु अतिसंखित्ताव, ते सङ्खेपवसेन द्वे कत्वा ‘‘छट्ठसत्तमेसू’’ति वुत्तं.

अमतवग्गवण्णना निट्ठिता.

सतिपट्ठानसंयुत्तवण्णना निट्ठिता.

४. इन्द्रियसंयुत्तं

१. सुद्धिकवग्गो

१. सुद्धिकसुत्तवण्णना

४७१. चतुभूमक ¶ ¶ …पे… लब्भन्ति कुसलाब्याकतभावतो तेसं तिण्णं इन्द्रियानं. वीरियिन्द्रियसमाधिन्द्रियानि…पे… सब्बत्थ लब्भन्ति कुसलत्तिकसाधारणत्ता. चतुभूमक …पे… वसेनाति चतुभूमकधम्मपरिच्छेदवसेन चेव कुसलादीहि सब्बसङ्गाहकधम्मपरिच्छेदवसेन च वुत्तन्ति अत्थो.

दुतियसमणब्राह्मणसुत्तवण्णना

४७७. दुक्खसच्चवसेनाति दुक्खसच्चभावेन न पजानन्ति. तञ्हि परिञ्ञेय्यताय दुक्खसच्चसङ्गहं. समुदयसच्चवसेनाति तण्हाविज्जादिं सद्धिन्द्रियस्स समुदयसच्चभावेन न पजानन्ति. निरोधन्ति सद्धिन्द्रियस्स अनुपादाय निरोधनिमित्तं निब्बानं. पटिपदन्ति सद्धिन्द्रियनिरोधगामिनिं पटिपदं अरियमग्गं. सेसेसूति वीरियिन्द्रियादीसु.

सुक्कपक्खेति ‘‘सद्धिन्द्रियं पजानन्ती’’तिआदिनयप्पवत्ते अनवज्जपक्खे. अधिमोक्खवसेन आवज्जनसमुदयाति ‘‘अत्थि दिन्न’’न्तिआदिनयप्पवत्तपुब्बभागभूतसद्धाधिमोक्खवसेन आवज्जनुप्पत्तिया. तस्मा पठमुप्पन्ना सद्धा एव हेत्थ ‘‘आवज्जन’’न्ति वुत्ता, न मनोद्वारावज्जनं. एस नयो सेसेसुपि. तस्मा पठमुप्पन्ना आवज्जना पग्गहुप्पत्तिट्ठानानं तिक्खानं वीरियिन्द्रियादीनं पठमुप्पत्तिया आवज्जनपरियायेन वुत्ताति दट्ठब्बं. दुब्बला हि पठमुप्पन्ना पग्गहाभावतो वीरियिन्द्रियादीनं समुदयोति बलवभावप्पत्तवीरियिन्द्रियादिकस्स आवज्जनट्ठानियानि होन्तीति तेसं समुदयोति वुत्ता, पुब्बे अधिमुच्चनादिवसेन पवत्तस्स आवज्जनस्स समुदयाति अत्थो. पुन छन्दवसेनाति कत्तुकामताकुसलच्छन्दवसेन सद्धादीनं उप्पादेतुकामताकारप्पवत्तस्स ¶ छन्दस्स वसेन. मनसिकारवसेन आवज्जनसमुदयाति सद्धिन्द्रियादिवसेन पवत्तस्स दुब्बलस्स तस्स निब्बत्तकयोनिसोमनसिकारवसेन आवज्जनस्स उप्पत्तिया. एवम्पीति ‘‘अधिमोक्खवसेना’’तिआदिना वुत्ताकारेनपि. छसु सुत्तेसूति ¶ दुतियतो पट्ठाय छसु सुत्तेसु. चतुसच्चमेव कथितं. अस्सादग्गहणेन हि समुदयसच्चं, आदीनवग्गहणेन दुक्खसच्चं, निस्सरणग्गहणेन निरोधमग्गसच्चानि गहितानीति. पठमसुत्ते पन इन्द्रियानं सरूपदस्सनमेवाति.

८. दब्बसुत्तवण्णना

४७८. सोतो आपज्जीयति एतेनाति सोतापत्ति, अनागतं पति पठममग्गो. सोतोति अरियमग्गसोतो दट्ठब्बो. आपज्जीयतीतिआदितो पटिपज्जीयति. पठममग्गपटिलाभनिमित्तानि सोतापन्नस्स अङ्गानि इध ‘‘सोतापत्तियङ्गानी’’ति वुत्तानि. तानि पन तीसु ठानेसु सद्धा अरियकन्तसीलञ्चाति वेदितब्बानि. सविसयेति सकविसये. जेट्ठकभावदस्सनत्थन्ति पधानभावदस्सनत्थं. यत्थ सद्धादिइन्द्रियानं सातिसयकिच्चं, तेसं किच्चातिरेकतं दस्सेतुन्ति अत्थो. इदानि तमत्थं उपमाहि विभावेतुं ‘‘यथा ही’’तिआदि वुत्तं. पत्वाति अत्तनो किच्चातिरेकट्ठानं पटिलभित्वा. पुब्बङ्गमन्ति सद्दहनकिच्चेसु पुरेचारं धोरय्हं. सेसानि वीरियिन्द्रियादीनि. तदन्वयानीति तदनुगतानि तस्स सद्धिन्द्रियादिकस्स पक्खिकानि. एस नयो सेसेसुपि. झानविमोक्खेति झानसङ्खाते विमोक्खे समाधिपधानताय झानानं. एवञ्च कत्वा ‘‘सोतापत्तियङ्गानि पत्वा’’ति इदञ्च वचनं समत्थितं होति. सद्धूपनिसञ्हि सीलन्ति. अरियसच्चानि पत्वाति चत्तारि सच्चानि अभिसमेतब्बानि पापुणित्वा.

९-१०. पठमविभङ्गसुत्तादिवण्णना

४७९-४८०. नेपक्कं वुच्चति पञ्ञाति आह – ‘‘पञ्ञायेतं नाम’’न्ति. निपायति संकिलेसधम्मे विसोसेति निक्खामेतीति निपको, थिरतिक्खसतिपुग्गलो, तस्स भावो नेपक्कन्ति सतियापि नेपक्कभावो युज्जतेव. एवञ्हि ‘‘सतिनेपक्केना’’ति इदं वचनं समत्थितं होति, सतिया च नेपक्केनाति एवं वुच्चमानेन सतिनिद्देसो नाम कतो होतियेव. असुकं नाम सुत्तं वा कम्मट्ठानं वा मे भासितन्ति. वोस्सज्जीयति सङ्खारगतं एतस्मिं अधिगतेति वोस्सग्गो, निब्बानं. तं आरम्मणं ¶ करित्वाति आह – ‘‘निब्बानारम्मणं कत्वा’’ति. गच्छन्तियाति सङ्खारानं उदयञ्च वयञ्च उदयब्बयं गच्छन्तिया बुज्झन्तिया. तेनाह ¶ ‘‘उदयब्बयपरिग्गाहिकाया’’ति. सद्धासतिपञ्ञिन्द्रियानि पुब्बभागानि ‘‘इतिपि सो भगवा अरहं, चिरकतम्पि चिरभासितम्पि सरिता अनुस्सरिता, उदयत्थगामिनिया पञ्ञाया’’ति च वुत्तत्ता. ‘‘आरद्धवीरियो विहरति, सो अनुप्पन्नान’’न्तिआदिना च वुत्तत्ता वीरियिन्द्रियं मिस्सकं. ‘‘वोस्सग्गारम्मणं करित्वा’’ति वुत्तत्ता समाधिन्द्रियं निब्बत्तितलोकुत्तरमेव. अयमेवाति य्वायं नवमे वुत्तो. अयमेव पुब्बभागमिस्सकलोकुत्तरत्तधम्मपरिच्छेदो.

सुद्धिकवग्गवण्णना निट्ठिता.

२. मुदुतरवग्गो

१. पटिलाभसुत्तवण्णना

४८१. सम्मप्पधाने आरब्भाति सम्मप्पधाने भावनावसेन आरब्भ. तेनाह ‘‘भावेन्तो’’ति. यथा वीरियिन्द्रियनिद्देसे ‘‘चत्तारो सम्मप्पधाने आरब्भ वीरियं पटिलभती’’ति देसना आगता, एवं सतिन्द्रियनिद्देसे ‘‘चत्तारो सतिपट्ठाने आरब्भ सतिं पटिलभती’’ति, तस्मा ‘‘सतिन्द्रियेपि एसेव नयो’’ति वुत्तं. सद्धिन्द्रियादिनिद्देसेसु पन न तथा देसेति.

२. पठमसंखित्तसुत्तवण्णना

४८२. इन्द्रियानं तिक्खादिभावो विपस्सनावसेन वा मग्गवसेन वा फलवसेन वा गहेतब्बोति वुत्तं ‘‘ततोति…पे… वेदितब्ब’’न्ति. ननु चेत्थ मुदुभावो एव पाळियं गहितोति? सच्चमेतं, तं पन तिक्खभावे असति न होति तिक्खादिभावोति वुत्तं. यतो हि अयं मुदु, इतो तं तिक्खन्ति वत्तब्बतं लभति अपेक्खासिद्धत्ता तिक्खमुदुभावानं पारापारं विय. इदानि ‘‘ततो’’तिआदिना सङ्खेपतो वुत्तमत्थं वित्थारतो दस्सेतुं ‘‘समत्तानी’’तिआदि वुत्तं. तत्थ समत्तानीति सम्पन्नानि. इतरं ¶ तस्सेव वेवचनं. समत्तानीति वा परियत्तानि, समत्तानीति अत्थो. ‘‘ततो मुदुतरानि धम्मानुसारीमग्गस्सा’’ति कस्मा वुत्तं? ततोति हि सोतापत्तिमग्गविपस्सनिन्द्रियानि अधिप्पेतानियेव, ‘‘ततो मुदुतरानी’’ति वुत्तपठममग्गो धम्मानुसारी वा सिया सद्धानुसारी वाति ब्यभिचरति? नायं दोसो, सोतापत्तिमग्गेकदेसवसेनेव ¶ लद्धब्बपठममग्गापेक्खाय विपस्सनाय विभागस्स अधिप्पेतत्ता. यो हि सोतापन्नो हुत्वा इरियापथं अकोपेत्वा यथानिसिन्नोव सकदागामिमग्गं पापुणाति, तस्स विपस्सनिन्द्रियानि सन्धाय अविभागेन वुत्तं – ‘‘ततो मुदुतरानि सोतापत्तिमग्गस्स विपस्सनिन्द्रियानि नामा’’ति. यो पन सोतापन्नो हुत्वा कालन्तरेन सकदागामी होति, तस्स सोतापत्तिमग्गत्थाय पवत्तानि विपस्सनिन्द्रियानि नाम होन्ति. सो चे धम्मानुसारीगोत्तो, तस्स यथावुत्तविपस्सनिन्द्रियतो मुदुतरानीति ‘‘ततो मुदुतरानि धम्मानुसारीमग्गस्सा’’ति वुत्तं. विपस्सनिन्द्रियानि नामाति आनेत्वा सम्बन्धो. धम्मानुसारीविपस्सनिन्द्रियतो सद्धानुसारीविपस्सनिन्द्रियानं मुदुभावस्स कारणं सयमेव वक्खति. धम्मेन पञ्ञाय मग्गसोतं अनुस्सरतीति धम्मानुसारी, पञ्ञुत्तरो अरियो. सद्धाय मग्गसोतं अनुस्सरतीति सद्धानुसारी, सद्धुत्तरो अरियो.

एवं विपस्सनावसेन दस्सेत्वा मग्गवसेन दस्सेतुं ‘‘तथा’’तिआदि आरद्धं. सम्पयोगतो सभावतो च अरहत्तमग्गपरियापन्नानि अरहत्तमग्गिन्द्रियानि. अरहत्तफलिन्द्रियानीति एत्थापि एसेव नयो.

इदानि फलवसेन दस्सेतुं ‘‘समत्तानि परिपुण्णानी’’तिआदि वुत्तं. सोतापत्तिमग्गट्ठपुग्गलवसेन नानत्तं जातं, तस्मा ते द्वेपि इध ततियवारे न लब्भन्तीति अधिप्पायो. धम्मानुसारीसद्धानुसारीनं नानत्तं कथं जातन्ति आह ‘‘आगमनेनपि मग्गेनपी’’ति. तदुभयं दस्सेन्तो ‘‘सद्धानुसारीपुग्गलो’’तिआदिमाह. उद्दिसापेन्तोति उद्देसं गण्हन्तो.

मग्गो तिक्खो होति उपनिस्सयिन्द्रियानं तिक्खविसदभावतो. तेनाह ‘‘सूरं ञाणं वहती’’ति. असङ्खारेनाति सरसेनेव. अप्पयोगेनाति तस्सेव वेवचनं. धम्मानुसारीपुग्गलो हि आगमनम्हि किलेसे विक्खम्भेन्तो अप्पदुक्खेन अप्पकसिरेन अकिलमन्तोव विक्खम्भेतुं सक्कोति. सद्धानुसारीपुग्गलो पन दुक्खेन कसिरेन किलमन्तो हुत्वा विक्खम्भेतुं सक्कोति, तस्मा धम्मानुसारिस्स पुब्बभागमग्गक्खणे ¶ किलेसच्छेदकञाणं अदन्धं तिखिणं हुत्वा वहति, यथा नाम तिखिणेन असिना कदलिं छिन्दन्तस्स छिन्नट्ठानं मट्ठं होति, असि खिप्पं वहति, सद्दो न सुय्यति, बलववायामकिच्चं न होति, एवरूपा धम्मानुसारिनो पुब्बभागभावना होति, सद्धानुसारिनो पन पुब्बभागक्खणे किलेसच्छेदकञाणं दन्धं न तिखिणं असूरं हुत्वा वहति, यथा नाम नातितिखिणेन असिना कदलिं छिन्दन्तस्स छिन्नट्ठानं न मट्ठं होति, असि सीघं न वहति, सद्दो सुय्यति, बलववायामकिच्चं इच्छितब्बं ¶ होति, एवरूपा सद्धानुसारिनो पुब्बभागभावना होति. एवं सन्तेपि किलेसक्खये नानत्तं नत्थि. तेनाह ‘‘किलेसक्खये पना’’तिआदि. अवसेसा च किलेसा खीयन्ति संयोजनक्खयाय योगत्ता.

३. दुतियसंखित्तसुत्तवण्णना

४८३. ततोति फलतो फलवेमत्तताय चरियमानत्ता. इन्द्रियवेमत्तता सद्धादीनं इन्द्रियानं नानत्तेन. फलनानत्तन्ति अरहत्तफलादिनानत्तं. पुग्गलनानत्तन्ति अनागामिआदिपुग्गलनानत्तं.

४. ततियसंखित्तसुत्तवण्णना

४८४. सीलक्खन्धादीहि सद्धिन्द्रियादीहि च परितो पूरणेन परिपूरं अरहत्तमग्गं करोन्तो निप्फत्तितो अरहत्तफलं आराधेति निप्फादेति. तयो पदेसमग्गेति सीलक्खन्धादीनं अपारिपूरिया एकदेसभूते तयो हेट्ठिममग्गे. पदेसं हेट्ठिमफलत्तयं. चतूसूति इमस्मिं वग्गे पठमादीसु चतूसु सुत्तेसु. कामञ्चेत्थ ततिये ‘‘ततोति फलवसेन निस्सक्क’’न्ति वुत्तं, चतुत्थे ‘‘परिपूरं परिपूरकारी आराधेति, पदेसं पदेसकारी’’ति, ‘‘चतूसुपि सुत्तेसु मिस्सकानेव इन्द्रियानि कथितानी’’ति पन वचनतो विपस्सनावसेनपि योजना लब्भतेवाति दट्ठब्बं.

५-७. पठमवित्थारसुत्तादिवण्णना

४८५-४८७. विपस्सनावसेन निस्सक्कं वेदितब्बं, न मग्गफलवसेन, इमस्मिं सुत्ते सब्बसोव विपस्सनिन्द्रियानं एव अधिप्पेतत्ता. इदानि तमत्थं ¶ पाकटं कातुं ‘‘परिपुण्णानि ही’’तिआदि वुत्तं. अविहादीसु पञ्चसु सुद्धावासेसु तत्थ तत्थ आयुवेमज्झं अनतिक्कमित्वा अन्तरा किलेसपरिनिब्बानेन परिनिब्बायनतो अन्तरापरिनिब्बायी, असङ्खारेन अप्पयोगेन सरसतोव परिनिब्बायनतो असङ्खारपरिनिब्बायी, तब्बिपरियायतो ससङ्खारपरिनिब्बायी, उद्धं वाहिभावेन उद्धमस्स तण्हासोतं वट्टसोतं वाति उद्धंसोतो, उद्धं वा गन्त्वा पटिलभितब्बतो उद्धमस्स मग्गसोतन्ति उद्धंसोतो, अकनिट्ठभवं गच्छतीति अकनिट्ठगामीति एवमेत्थ सद्दत्थो दट्ठब्बो.

इमस्मिं पन ठानेति ‘‘विपस्सनावसेन निस्सक्क’’न्ति वुत्तट्ठाने. अरहत्तमग्गेयेव ठत्वाति इमस्मिंयेव ¶ भवे अरहत्तमग्गेयेव, न विपस्सनाय च ठत्वा. पञ्च निस्सक्कानि नीहरितब्बानीति ‘‘ततो मुदुतरेहि अन्तरापरिनिब्बायी होती’’तिआदीनि पञ्च निस्सक्कानि निद्धारेत्वा कथेतब्बानि. इदानि तमत्थं विवरन्तो ‘‘अरहत्तमग्गस्स ही’’तिआदिमाह. तत्थ अविहादीसु उप्पज्जित्वा उप्पन्नसमनन्तराय परिनिब्बायनतो पठमअन्तरापरिनिब्बायी. तत्थ आयुप्पमाणवेमज्झं अप्पत्वाव परिनिब्बायनतो दुतियअन्तरापरिनिब्बायी, आयुवेमज्झं पत्वा परिनिब्बायनतो ततो परं ततियअन्तरापरिनिब्बायी वेदितब्बो. ‘‘पञ्च निस्सक्कानी’’ति कस्मा वुत्तं? ननु असङ्खारससङ्खारपरिनिब्बायीति वत्तब्बन्ति? न वत्तब्बन्ति दस्सेन्तो आह ‘‘असङ्खारपरिनिब्बायिस्स ससङ्खारपरिनिब्बायिनोपि एतेव पञ्च जना’’ति.

तीणि निस्सक्कानीति ‘‘ततो मुदुतरेहि सोतापन्नो होती’’तिआदीनि तीणि निस्सक्कपदानि. इध सकदागामी न गहितो, सो अनागामिमग्गे ठत्वा नीहरितब्बो, अनागामिमग्गस्स विपस्सनिन्द्रियेहि मुदुतरेहि सकदागामी होति. सकदा…पे… मुदुतरानीति इदं सकदागामिमग्गस्स विपस्सनिन्द्रियेहि एकबीजिसङ्खातसोतापन्नविपस्सनिन्द्रियानि मुदुतरानि होन्तीति तीणि कत्वा वुत्तं. धम्मानुसारीतिआदिद्वयं कोलंकोलादिद्वयेन गहितं होतीति. सकदागामिमग्गस्स हीतिआदि वुत्तस्सेव अत्थस्स विवरणं. सेसं हेट्ठा वुत्तनयमेव. छट्ठसत्तमानि वुत्तनयानेवाति छट्ठसत्तमानि सुत्तानि दुतियततियेसु वुत्तनयानेव. तत्थ पन मिस्सकानि इन्द्रियानि कथितानि, इध पुब्बभागविपस्सनिन्द्रियानि कथितानीति अयमेव विसेसो.

८. पटिपन्नसुत्तवण्णना

४८८. तन्ति ¶ मग्गफलवसेन निस्सक्कं. पाळियं वुत्तमेव ‘‘अरहत्तफलसच्छिकिरियाय पटिपन्नो होती’’तिआदिना. अट्ठहीति चतूहि फलेहि चतूहि च मग्गेहीति अट्ठहि. बहिभूतो न अन्तोभावो. लोकुत्तरानेव इन्द्रियानि कथितानि मग्गफलचित्तुप्पादपरियापन्नत्ता.

९-१०. सम्पन्नसुत्तादिवण्णना

४८९-४९०. इन्द्रियसम्पन्नोति एत्थ सम्पन्नसद्दो परिपूरिअत्थोति आह ‘‘परिपुण्णिन्द्रियो’’ति. मिस्सकानि इन्द्रियानि कथितानि सामञ्ञतोव देसितत्ता.

मुदुतरवग्गवण्णना निट्ठिता.

३. छळिन्द्रियवग्गो

२. जीवितिन्द्रियसुत्तवण्णना

४९२. इत्थिभावेति ¶ इत्थिताय. इन्दट्ठं करोति तथासत्तजनसामञ्ञकारणभावतो. इत्थिया एव इन्द्रियं इत्थिन्द्रियं. एस नयो पुरिसिन्द्रिये. जीवितेति सहजातधम्मानं जीवने पालने पवत्तने. वट्टिन्द्रियानीति वट्टहेतुभूतानि इन्द्रियानि. इमेसु हि उपादिन्नइन्द्रियेसु सति वट्टं वत्तति पञ्ञायति.

३. अञ्ञिन्द्रियसुत्तवण्णना

४९३. अजानितपुब्बं धम्मन्ति चतुसच्चधम्ममाह, तथा तेसंयेव ञातधम्मानन्ति. अयं पनेत्थ अत्थो – आजानातीति अञ्ञा, पठममग्गेन ञातमनतिक्कमित्वा जानातीति अत्थो. सोतापन्नादीनं छअरियानं एतं नामं. अञ्ञस्स इन्द्रियानि अञ्ञिन्द्रियानि. अञ्ञातावीसूति आजानितवन्तेसु. यस्मा अग्गफलधम्मेसु ञाणकिच्चं सातिसयं, तस्मा तं किच्चं सेसधम्मेसुपि समारोपेत्वा वुत्तं ‘‘अञ्ञातावीसु अरहत्तफलधम्मेसू’’ति. तत्थ तत्थ तेसु तेसु मग्गफलेसु. तेन तेनाकारेनाति अनञ्ञातजाननादिआकारेन.

४. एकबीजिसुत्तवण्णना

४९४. विपस्सनतो ¶ निस्सक्कन्ति विपस्सनिन्द्रियेहि निस्सक्कं. इदानि तमेव सङ्खेपतो वुत्तमत्थं विवरन्तो ‘‘समत्तानी’’तिआदिमाह. तीणि निस्सक्कानि एवमिध पञ्च निस्सक्कानि नीहरितब्बानि एकबीजिआदिविभावनतो. तेनाह ‘‘सकदागामिमग्गस्स ही’’तिआदि. सोतापत्तिमग्गस्स विपस्सनिन्द्रियानि नाम तेनत्तभावेन सकदागामिमग्गं पत्तुं गच्छन्तस्स सोतापन्नस्स विपस्सनिन्द्रियानि. पञ्चपि ते सोतापत्तिमग्गस्स भेदायेवाति ‘‘सकदागामिमग्गे ठत्वा नीहरितब्बानी’’ति वुत्तं.

एकबीजीति एत्थ खन्धबीजं नाम कथितं. यस्स हि सोतापन्नस्स एकं खन्धबीजं अत्थि, एकं अत्तभावग्गहणं, सो एकबीजि नाम. तेनाह – ‘‘सोतापन्नो हुत्वा’’तिआदि. मानुसकं ¶ भवन्ति इदं पनेत्थ देसनामत्तं, देवभवं निब्बत्तेतीतिपि वत्तुं वट्टतियेव. भगवता गहितनामानेतानि. एत्तकञ्हि पमाणं गतो सत्तक्खत्तुपरमो नाम होति, एत्तकं कोलंकोलो, एत्तकं एकबीजीति भगवता एतेसं नामं गहितं.

द्वे तयो भवेति देवमनुस्सेसु एव द्वे तयो भवे. सम्बोधिचतुसच्चधम्मो परं अयनं निस्सयो गति एतस्साति सम्बोधिपरायणो. कुलतो कुलं गच्छतीति कोलंकोलो. सोतापत्तिफलसच्छिकिरियतो पट्ठाय हि नीचकुले उप्पत्ति नाम नत्थि, महाभोगेसु कुलेसु एव निब्बत्ततीति अत्थो. केवलोपि हि कुल-सद्दो महाभोगकुलमेव वदति. द्वे वा तीणि वा कुलानीति देवमनुस्सवसेन द्वे वा तयो वा भवेति अयम्पि मिस्सकभवेन कथितो. जातस्स कुमारस्स विय अरियाय जातिया जातस्स नाममेतं, यदिदं नियतोति सत्तक्खत्तुपरमादिकोति च समञ्ञाति दस्सेन्तो आह ‘‘भगवता गहितनामवसेनेवा’’तिआदि.

यदि पुब्बहेतुनियमतो सोतापन्नो च नियतोति सोतापत्तिमग्गतो उद्धं तिण्णं मग्गानं उपनिस्सयाभावतो पुब्बहेतुकिच्चं नत्थीति सोतापत्तिमग्गस्स उपनिस्सयभावो आपज्जति. यदि तस्सपि पुब्बहेतुउपनिस्सयो सिया, ताव नियमतो सोतापत्तिमग्गुप्पत्तितो पुब्बे एव नियमितो, यावञ्च अकनिट्ठं तस्स पुब्बहेतु नाम ¶ , अहेतुकता आपन्ना, इच्चस्स अहेतु अप्पच्चया निप्फत्ति पापुणाति. किञ्च हेतु चे? नियमतो सोतापन्नो च नियतोति पठममग्गाधिगमेनेव अनुक्कमेन उपरि तिण्णं मग्गानं किच्चानि निप्फज्जन्ति, एवं सत्तक्खत्तुपरमतादिनियमे सति सत्तमभवादितो उद्धं पवत्तताय दुक्खस्स मूलभूता किलेसा पठममग्गेनेव खीणाति उपरि तयो मग्गा अकिच्चा सियुं. तेनाह ‘‘पठममग्गस्स उपनिस्सयो कतो नामा’’तिआदि.

यदि उपरि तयो मग्गा सत्तक्खत्तुपरमादितं नियमेन्ति, ततो च अञ्ञो सोतापन्नो नत्थीति सोतापत्तिमग्गस्स अकिच्चकता निप्पयोजनता आपज्जेय्य. अथ सक्कायदिट्ठिआदिप्पहानं तस्स किच्चं, तेसं तेसं पहानेन सत्तक्खत्तुपरमादिनियमताय. भवितब्बं, याव उपरिमग्गा एव होन्तीति सत्तभवादितो उद्धमपवत्तनतो तेन विनानेन सक्कायदिट्ठिआदिप्पहानेन च तेन विना भवितब्बन्ति आह – ‘‘पठममग्गे अनुप्पन्नेव उपरि तयो मग्गा उप्पन्नाति आपज्जती’’ति. तिण्णं मग्गानन्ति उपरि तिण्णं मग्गानं. विपस्सना नियमेतीति युज्जतीति वुत्तमत्थं विवरन्तो ‘‘सचे ही’’तिआदिमाह.

सोतापन्नो ¶ वट्टज्झासयो. तत्रेकच्चे पाकटे पञ्ञाते दस्सेन्तो ‘‘अनाथपिण्डिको’’तिआदिमाह. इधट्ठकवोकिण्णसुक्खविपस्सकस्साति यो इमस्मिं कामभवे ठितो मनुस्सदेववसेन वोकिण्णभवूपपत्तिको सुक्खविपस्सको च, तस्स वसेन. नामं कथितन्ति सत्तक्खत्तुपरमोति नामं कथितं. केचि पन ‘‘कामभवे सत्तक्खत्तुंयेव उप्पज्जति, न ततो’’ति वदन्ति, तं वीमंसितब्बं.

सोधेस्सामीति जम्बुदीपे केनचि तेपिटकेन भिक्खुना सद्धिं पिटकत्तयमेव मय्हं उग्गहपरिपुच्छावसेन सोधेय्यामीति परतीरं जम्बुदीपं गतो. यो भिक्खु सक्कोतीति योजना. अनिच्चानुपस्सनादीसु एकमुखेन अभिनिविट्ठेनपि अभिधम्मपरियायेन तीहि एव विमोक्खेहि मग्गं लभतीति अभिनिवेसभेदेन तयो पुग्गला सुञ्ञततो वुट्ठिता, तथा तयो अप्पणिहिततो वुट्ठिताति छ होन्ति, तेव सद्धाधुरपञ्ञाधुरवसेन द्वादस सकदागामिनो. तथा अरहन्तो, तयो अन्तरापरिनिब्बायिनो ¶ एको उपहच्चपरिनिब्बायी एको उद्धंसोतो अकनिट्ठगामीति पञ्च, ते असङ्खारससङ्खारपरिनिब्बायिभेदेन दसाति अविहादीसु चतूसुपि चत्तालीस, अकनिट्ठे पन उद्धंसोतो नत्थीति अट्ठचत्तालीस अनागामिनो. विपस्सना कथिता सम्मसनचारस्स कथितत्ता.

५-१०. सुद्धकसुत्तादिवण्णना

४९५-५००. यथा चक्खुस्स सहजाततदिन्द्रियनिस्सितधम्मेसु अधिपतेय्यं अनुवत्तनीयत्ता, एवं तंद्वारिकधम्मेसुपि अधिपतेय्यं तेहि अनुवत्तनीयत्ताति वुत्तं – ‘‘अधिपतेय्यसङ्खातेन इन्दट्ठेना’’ति. एस नयो सेसिन्द्रियादीसुपि. चतुसच्चवसेन कथितानि सभावादिविभावनस्स कथितत्ता.

छळिन्द्रियवग्गवण्णना निट्ठिता.

४. सुखिन्द्रियवग्गो

१-५. सुद्धिकसुत्तादिवण्णना

५०१-५०५. यथा चक्खु दस्सने अधिपतेय्यट्ठेन चक्खुन्द्रियं, एवं सुखवेदना सुखने अधिपतेय्यट्ठेन ¶ सुखिन्द्रियं. एस नयो सेसेसुपि. सेसं तेभूमकन्ति सेसं भूमित्तयवसेन तेभूमकं.

६. पठमविभङ्गसुत्तवण्णना

५०६. कायिकन्ति अयमस्स निस्सयवसेन निद्देसोति आह – ‘‘कायपसादवत्थुक’’न्ति. सरूपनिद्देसो सुखं सुखिन्द्रियस्स सरूपन्ति. सादनीयट्ठेन धम्मपदानि अत्तनि अस्सादयतीति सातं, मधुरं. वेदयितन्ति वेदियनं, अनुभवनन्ति अत्थो. अञ्ञधम्मविसिट्ठोति फस्सादीहि अञ्ञेहि धम्मेहि विसदिसो. कायिकन्ति पसादकायसन्निस्सितं. चेतसिकन्ति चेतोसन्निस्सितं, तेन वुत्तं ‘‘एत्थ पना’’तिआदि. कायपसाद…पे… नत्थि, तस्मा ‘‘चत्तारो पसादकाये वत्थुं कत्वा’’ति वुत्तं.

९. कट्ठोपमसुत्तवण्णना

५०९. द्विन्नं ¶ अरणीनन्ति अधरुत्तरारणीनं. किञ्चि द्वयं सङ्घट्टितमत्तं हुत्वा न समोधानगतं होतीति तंनिवत्तनत्थं ‘‘सङ्घट्टनसमोधाना’’ति वुत्तं. पुनप्पुनं सङ्घट्टनेन हि तेजोपातुभावो. अधरारणी विय वत्थारम्मणं असतिपि वायामे तज्जसम्फस्सपच्चयतो. उत्तरारणी विय फस्सो वत्थारम्मणादिफस्सेन पवत्तनतो. सङ्घट्टो विय फस्ससङ्घट्टनं अरणिद्वयसङ्घट्टना विय फस्सस्सेव वत्थारम्मणेसु सङ्घट्टनाकारेन पवत्तितो. अग्गि विय वेदना अनुदहनट्ठेन खणिकावायञ्च. वत्थारम्मणं वा उत्तरारणी विय इन्धनापातगहणादीसु उस्साहस्स विय पवत्तिसम्भवतो. फस्सो अधरारणी विय निरुस्साहनिरीहतावसेन अत्तसाधनतो.

१०. उप्पटिपाटिकसुत्तवण्णना

५१०. रसनं भञ्जनं निरुज्झनं रसो. यो यो धम्मानं रसो यथाधम्मरसो, तेन यथाधम्मरसेन. पटिपाटियाति कमेन, उभयेनपि धम्मानं पहानक्कमेनाति वुत्तं होति. इमस्मिं इन्द्रियविभङ्गेति इमस्मिं इन्द्रियसंयुत्तसञ्ञिते इन्द्रियविभङ्गे. अदेसितत्ताति सेससुत्तानि विय ‘‘सुखिन्द्रिय’’न्तिआदिना अदेसितत्ता इदं उप्पटिपाटिकसुत्तं नाम. वलिया खरसम्फस्साय फुट्ठस्स. तन्ति कण्टकवेदनादिं. एतस्स दुक्खिन्द्रियस्स.

तेसं ¶ तेसन्ति दोमनस्सिन्द्रियादीनं. कारणवसेनेवाति तंतंअसाधारणकारणवसेन. तेसञ्हि विसेसकारणं दस्सेन्तो ‘‘पत्तचीवरादीनं वा’’ति आह.

एकतोवाति पुनप्पुनं पदुद्धारणं अकत्वा एकज्झमेव. दुतियज्झानादीनं उपचारक्खणे एव निरुज्झन्तीति आनेत्वा सम्बन्धो. तेसं दुक्खिन्द्रियदोमनस्सादीनं. अतिसयनिरोधोति सुट्ठु पहानं उजुप्पटिपक्खेन वूपसमो. निरोधोयेवाति निरोधमत्तमेव. नानावज्जनेति येन आवज्जनेन अप्पनावीथि होति, ततो भिज्जावज्जने, अनेकावज्जने वा. अप्पनावीथियञ्हि उपचारो एकावज्जनो, इतरो अनेकावज्जनो अनेकक्खत्तुं पवत्तनतो. विसमनिसज्जाय उप्पन्नकिलमथो विसमासनुपतापो ¶ . पीतिफरणेनाति पीतिया फरणरसत्ता. पीतिसमुट्ठानानं वा पणीतरूपानं कायस्स ब्यापनतो वुत्तं. तेनाह ‘‘सब्बो कायो सुखोक्कन्तो होती’’ति. वितक्कविचारपच्चयेपीति पि-सद्दो अट्ठानपयुत्तो, सो ‘‘पहीनस्सा’’ति एत्थ आनेत्वा सम्बन्धितब्बो ‘‘पहीनस्सपि दोमनस्सिन्द्रियस्सा’’ति. एतं दोमनस्सिन्द्रियं उप्पज्जतीति सम्बन्धो. ‘‘तस्स मय्हं अतिचिरं वितक्कयतो विचारयतो कायोपि किलमि, चित्तम्पि विहञ्ञी’’ति च वचनतो कायचित्तखेदानं वितक्कविचारपच्चयता वेदितब्बा. वितक्कविचारभावे उप्पज्जति दोमनस्सिन्द्रियन्ति आनेत्वा सम्बन्धितब्बं. तत्थस्स सिया उप्पत्तीति तत्थ दुतियज्झानुपचारे अस्स दोमनस्सस्स उप्पत्ति भवेय्य. ‘‘तत्थस्स सिया उप्पत्ती’’ति इदं परिकप्पवचनं उपचारक्खणे दोमनस्सस्स सुप्पहीनभावदस्सनत्थं. तथा हि वुत्तं ‘‘न त्वेव दुतियज्झाने पहीनपच्चयत्ता’’ति. पहीनम्पि सोमनस्सिन्द्रियं पीति विय न दूरेति कत्वा ‘‘आसन्नत्ता’’ति वुत्तं. नानावज्जनुपचारे पहीनम्पि पहानङ्गं पटिपक्खेन अविहतत्ता अन्तरन्तरा उप्पज्जेय्याति इममत्थं दस्सेन्तो ‘‘अप्पनाप्पत्ताया’’तिआदिमाह. ‘‘तादिसाय आसेवनाय इच्छितब्बत्ता यथा मग्गवीथितो पुब्बे द्वे तयो जवनवारा सदिसानुपस्सनाव पवत्तन्ति, एवमिधापि अप्पनावारतो पुब्बे द्वे तयो जवनवारा उपेक्खासहगताव पवत्तन्ती’’ति वदन्ति. अपरिसेसन्ति सुविक्खम्भितन्ति कत्वा विक्खम्भनेन अनवसेसं.

तथत्तायाति तथभावाय पठमज्झानसमङ्गिताय. सा पनस्स उप्पादनेन वा उप्पन्नस्स समापज्जनेन वा होतीति वुत्तं ‘‘उप्पादनत्थाय समापज्जनत्थाया’’ति. द्वीसूति नवमदसमेसु सुत्तन्तेसु.

सुखिन्द्रियवग्गवण्णना निट्ठिता.

५. जरावग्गो

१. जराधम्मसुत्तवण्णना

५११. पमुखे ¶ , पासादस्स च पच्छिमभागे आतपो पच्छातपो, तस्मिं पच्छातपे. सो हि पासादस्स पमुखभावेन कतो. किं पन भगवतो वजिरसारं सरीरं ओतापेतब्बं होतीति आह – ‘‘सम्मासम्बुद्धस्सा’’तिआदि ¶ . अयञ्च इमं सुत्तं देसितसमये. न सक्कोति ब्यामप्पभाय कायचि पभाय अनभिभवनीयत्ता. किञ्चापि बुद्धाभा सूरियाभाय अनभिभवनीया, घम्मसभावताय पन रस्मीनं परितो फरन्ती सूरियाभा तिखिणा उण्हाति आह ‘‘रस्मितेज’’न्ति. इदानि तमत्थं उपमाय विभावेतुं ‘‘यथेव ही’’तिआदि वुत्तं.

सुवण्णावट्टं वियाति अच्छे सुवण्णपत्ते विनिवत्तआवट्टं विय. गरहणच्छरियं नाम किरेतं ‘‘अच्छरियमेतं अविसिच्छेफलवद’’न्तिआदीसु विय. न एवमेतरहीति अत्तनो पाकटवसेन वदति, न इतरेसम्पीति. सिराजालाति सिरासन्ताना. एवरूपं न होतीति अञ्ञेसं पाकतिकसत्तानं वुत्ताकारं विय न होति पुञ्ञसम्भारस्स उळारतमत्ता विपच्चनस्स परियन्तगतत्ता. तेनाह ‘‘अञ्ञेसं अपाकट’’न्ति. वलियावट्टकन्ति अप्पकं वलियावट्टं. तेनाह ‘‘केसग्गप्पमाण’’न्ति. सब्बानीति सिराजालानि. पुरतो वङ्कोति थोकं पुरतो नतमत्तं सन्धायाह. तेन वुत्तं ‘‘स्वायं अञ्ञेसं अपाकटो’’ति. नयग्गाहतोति अनुमानतो. धी तन्ति धी-सद्दयोगे उपयोगवचनं. धीति जिगुच्छनत्थे निपातो. धिक्कारोति जिगुच्छापयोगो. तं फुसतूति तुय्हं पापुणातु.

२. उण्णाभब्राह्मणसुत्तवण्णना

५१२. अञ्ञमञ्ञस्साति अञ्ञो अञ्ञस्स. न पच्चनुभोति अत्तनो अविसयभावतो. इदानि तं अञ्ञविसयतं अन्वयतो ब्यतिरेकतो विभावेतुं ‘‘सचे ही’’तिआदि वुत्तं.

विसयानि पटिसरन्ति एत्थाति पटिसरणं. इन्द्रियविञ्ञाणानि हि असतिपि तादिसे अधिप्पाये अत्तनो आरम्मणस्स याथावतो सम्पजाननतो पवेदनविजाननानि करोन्तानि विय पवत्तन्ति, तथा लोकस्स अञ्ञत्थ सिद्धितो. तेनाह भगवा – ‘‘मनो पटिसरणं, मनोव नेसं ¶ गोचरविसयं पच्चनुभोती’’ति मनोद्वारिकजवनमनो हि सविसेसं मनोविसयं पच्चनुभोति, पञ्चद्वारिकजवनमनो मननमत्तमेव पच्चनुभवति. रज्जनादिग्गहणञ्चेत्थ निदस्सनमत्तं, तस्मा सद्दहनादिपि गहितमेवाति दट्ठब्बं, पञ्चद्वारप्पवत्तिवसेन तथा वुत्तं. एकस्मिं पन द्वारेति चक्खुद्वारे.

दुब्बलभोजकाति ¶ अप्पानुभावा राजभोग्गा. आयन्ति भोगुप्पत्तिट्ठानं. योत्तबन्धादिनिमित्तं लद्धब्बकहापणो योत्तकहापणो. अद्दुबन्धादिनिमित्तं गहेतब्बकहापणो अद्दुकहापणो. माघातघोसनाय कताय हिंसानिमित्तं गहेतब्बकहापणो मापहारकहापणो. तस्स परिमाणं दस्सेतुं ‘‘अट्ठकहापणो’’तिआदि वुत्तं. सतवत्थुकन्ति सतकरीसवत्थुकं.

मग्गसतीति अरियमग्गसति. भावनमनुयुञ्जन्तस्स हि जवनमनो उस्सक्कित्वाव मग्गसतिं पटिसरति तप्परियोसानत्ता. तन्ति निब्बानं. साति फलविमुत्ति. पटिसरति अग्गमग्गसतिया. फलविमुत्ति निब्बानन्ति उभयं मग्गस्स सिद्धायेवाति. आरम्मणवसेन नत्थि एतस्स पटिसरणन्ति अप्पटिसरणं असङ्खतामतस्स सन्तिनिच्चसभावत्ता. सयं पन सब्बेसंयेव अरियानं पटिसरणं. तेनाह ‘‘निब्बानं अरहतो गती’’ति (परि. ३३९). निब्बानं अनुपविट्ठं निब्बाननिस्सयत्ता. न ततो परं गच्छति गतस्स अञ्ञस्स तादिसस्स अभावा. निब्बानं परि सब्बसो ओसानन्ति निब्बानपरियोसानं.

मूलजाता जातमूला. ततो एव पतिट्ठिता. का पनस्साति आह ‘‘मग्गेन आगतसद्धा’’ति. मग्गो दळ्हाय असंहारियसद्धाय मूलं दिट्ठिसम्पयुत्तानि चेव विचिकिच्छाचित्तञ्चाति पञ्च अकुसलचित्तानि समुच्छेदवसेन पहीनानि. पञ्च नीवरणानीति एत्थ अपायगमनीयानि पठममग्गेनेव पहीनानि, इतरानि विक्खम्भनवसेन झानेन पहीनानीति पञ्चसु ओरम्भागियकिलेससंयोजनेसु एकदेसविगमेनेव बहिद्धासंयोजनो विय जातोति वुत्तं ‘‘झानअनागामिट्ठाने ठितो’’ति. तेनाह ‘‘सो अपरिहीन…पे… निब्बायेय्या’’ति.

५. पठमपुब्बारामसुत्तवण्णना

५१५. पुब्बकोट्ठके एवं आगतसुत्तं आदिं कत्वा फलिन्द्रियानेव कथितानि अग्गफलवसेन देसनाय आगतत्ता.

१०. आपणसुत्तवण्णना

५२०. उपरि ¶ सह विपस्सनाय तयो मग्गाति विपस्सनाय सह सोतापत्तिफलतो उपरि तयो मग्गा. मग्गाधिगमेन इदानि पच्चक्खभूतत्ता ¶ ‘‘इमे खो ते धम्मा’’ति वुत्ता. तत्थ यं अग्गभूतं, तस्स वसेन दस्सेतुं ‘‘अरहत्तफलिन्द्रियं नामा’’ति वुत्तं इन्द्रियभावसामञ्ञेन एकज्झं कत्वा. अतिविज्झित्वा पस्सामीति सच्छिकत्वा याथावतो पस्सामि. चतूहि इन्द्रियेहीति वीरियिन्द्रियादीहि चतूहि इन्द्रियेहि. सा विपस्सनामग्गफलसहगता सियाति मिस्सका वुत्ता.

जरावग्गवण्णना निट्ठिता.

६. सूकरखतवग्गो

१. सालसुत्तवण्णना

५२१. सूरभावेनाति अतिसूरभावेन. बुज्झनत्थायाति सच्चपटिवेधाय.

२. मल्लिकसुत्तवण्णना

५२२. चत्तारि इन्द्रियानीति पञ्ञिन्द्रियं ठपेत्वा सेसानि चत्तारि. ‘‘अरियञाणं लोकुत्तर’’न्ति वुत्तं मग्गञाणं कत्वा. अरिय-सद्दो पन यथा तथा विसुद्धेपि होतीति तादिसं सन्धाय वुत्तं ‘‘तम्पि पना’’तिआदि. यथा हि चत्तारिन्द्रियानि मिस्सकानि, एवं पञ्ञिन्द्रियम्पि मिस्सकन्ति वुच्चमाने न कोचि विरोधोति अधिप्पायेनाह ‘‘तम्पि पन…पे… वट्टती’’ति.

३. सेखसुत्तवण्णना

५२३. न सक्कोति इन्द्रियानं अपरिपक्कत्ता. अत्थीति पजानाति नयग्गाहेन, न पच्चक्खतो. न हि अरियापि अनधिगतं मग्गफलं पच्चवेक्खितुं सक्कोन्ति.

६. पतिट्ठितसुत्तवण्णना

५२६. सासवेसूति ¶ चतुरासवविनिमुत्तेसु सेसधम्मेसु आरम्मणेसु. तेसुपि उप्पज्जनकअनत्थतो चित्तं रक्खति नाम.

८. सूकरखतसुत्तवण्णना

५२८. तं ¶ सन्धायाति तं सूकरखतलेणं सन्धाय. एतं ‘‘सूकरखताय’’न्ति वचनं वुत्तं. भावनपुंसकन्ति भावजोतकं नपुंसकवचनं यथा ‘‘विसमं वाता वायन्ति, एकमन्तं निसीदी’’ति. किच्चपटिपत्ति तेसं संकासनट्ठेन सपतिसो, सपतिसो एव सप्पतिस्सो, सजेट्ठकोति आह ‘‘सप्पतिस्सोति सजेट्ठको’’ति.

सूकरखतवग्गवण्णना निट्ठिता.

७. बोधिपक्खियवग्गवण्णना

५३१-६५०. सत्तानं फलानं हेतुभूतानि ‘‘इमेसं खो, भिक्खवे, पञ्चन्नं इन्द्रियानं भावितत्ता’’तिआदिना वुत्तानि, पञ्चिन्द्रियानियेव फलूपचारेन ‘‘सत्त फलानी’’ति वुत्तानि. तानि च पुब्बभागानि ‘‘इमेसं, भिक्खवे, पञ्चन्नं इन्द्रियानं भावितत्ता…पे… सत्तानिसंसा पाटिकङ्खा’’ति वचनतो. तेसन्ति सत्तानं फलानं. ‘‘द्विन्नं फलानं अञ्ञतरं फल’’न्ति एवं अतीतसुत्ते वुत्तानि हेट्ठा द्वे फलानि नामाति वदन्ति. येहि पन इन्द्रियेहि अञ्ञत्र पन अन्तरापरिनिब्बायिं सेसानि फलानि होन्ति, तानि चत्तारि सपुब्बभागानि लोकुत्तरानीति वुत्तं सिया.

इन्द्रियसंयुत्तवण्णना निट्ठिता.

५. सम्मप्पधानसंयुत्तवण्णना

६५१-७०४. सम्मप्पधानसंयुत्ते ¶ पुब्बभागविपस्सनाव कथिता ‘‘अकुसलानं धम्मानं पहानाया’’तिआदिवचनतो.

सम्मप्पधानसंयुत्तवण्णना निट्ठिता.

६. बलसंयुत्तवण्णना

७०५-८१२. बलसंयुत्ते बलानि मिस्सकानेव कथितानि ‘‘विवेकनिस्सित’’न्ति वचनतो.

बलसंयुत्तवण्णना निट्ठिता.

७. इद्धिपादसंयुत्तं

१. चापालवग्गो

१. अपारसुत्तवण्णना

८१३. छन्दं ¶ ¶ निस्साय पवत्तो समाधीति कत्तुकम्यताछन्दं अधिपतिं कत्वा पटिलद्धसमाधि छन्धसमाधि. पधानसङ्खाराति चतुकिच्चसाधकस्स सम्मप्पधानवीरियस्सेतं अधिवचनं. तेहीति छन्दसमाधिपधानसङ्खारेहि. इद्धिया पादन्ति निप्फत्तिपरियायेन इज्झनट्ठेन, इज्झन्ति एताय सद्धा इद्धा वुद्धा उक्कंसगता होन्तीति इमिना वा परियायेन ‘‘इद्धी’’ति सङ्खातानं उपचारज्झानादिकुसलचित्तसम्पयुत्तानं छन्दसमाधिपधानसङ्खारानं अधिट्ठानट्ठेन पादभूतं, सेसचित्तचेतसिकरासिन्ति अत्थो. सा एव च यथावुत्तइद्धि यस्मा हेट्ठिमा हेट्ठिमा उपरिमाय उपरिमाय पादभूता, तस्मा वुत्तं ‘‘इद्धिभूतं वा पादन्ति इद्धिपाद’’न्ति. सेसेसूति वीरियसमाधिआदीसु. तत्थ हि वीरियं चित्तं वीमंसं अधिपतिं कत्वा पटिलद्धसमाधि वीमंसासमाधीति अत्थो वेदितब्बो. इधाति इमस्मिं इद्धिपादसंयुत्ते. एकपरिच्छेदोव अत्थनिद्देसो.

५. इद्धिपदेससुत्तवण्णना

८१७. इद्धिपदेसन्ति इद्धिया एकदेसं. को पन सोति आह – ‘‘तयो च मग्गे तीणि च फलानी’’ति.

६. समत्तसुत्तवण्णना

८१८. समत्तन्ति सामञ्ञस्स समं अत्तनं इज्झनं समत्तं परिपुण्णं. विवट्टपादका एव इद्धिपादा कथिता ‘‘अपारा पारं गमनाय संवत्तन्ती’’तिआदिवचनतो.

१०. चेतियसुत्तवण्णना

८२२. उदेनयक्खस्स ¶ चेतियट्ठानेति उदेनस्स नाम यक्खस्स देवायतनसङ्खेपेन इट्ठकाहि कते महाजनस्स चित्तीकतट्ठाने. कतविहारोति भगवन्तं उद्दिस्स तत्थ कतविहारो. वुच्चतीति पुरिमवोहारेन ¶ ‘‘उदेनचेतिय’’न्ति वुच्चति. गोतमकादीसुपीति गोतमकचेतियन्ति एवमादीसुपि. एसेव नयोति चेतियट्ठाने कतविहारभावं अतिदिसति. वड्ढिताति भावनापारिपूरिवसेन परिब्रूहिता. पुनप्पुनं कताति भावनाय बहुलीकरणवसेन अपरापरं पवत्तिता आनीता. युत्तयानं विय कताति यथा युत्तमाजञ्ञयानं छेकेन सारथिना अधिट्ठितं यथारुचि पवत्तिमरहति, एवं यथारुचि पवत्तनारहतं गमिता. पतिट्ठानट्ठेनाति अधिट्ठानट्ठेन. वत्थु विय कताति सब्बसो उपक्किलेसविसोधनेन इद्धिविसेसानं पवत्तिट्ठानभावतो सुविसोधितपरिस्सयवत्थु विय कता. अधिट्ठिताति पटिपक्खदूरीभावतो सुभावितभावेन तंतंअधिट्ठानयोग्यताय ठपिता. समन्ततो चिताति सब्बभागेन भावनुपचयं गमिता. तेनाह ‘‘सुवड्ढिता’’ति. सुट्ठु समारद्धाति इद्धिभावनाय सिखप्पत्तिया सम्मदेव संसेविता.

अनियमेनाति ‘‘यस्स कस्सची’’ति अनियतवचनेन. नियमेत्वाति ‘‘तथागतस्सा’’ति सरूपग्गहणेन नियमेत्वा. आयुप्पमाणन्ति परमायुप्पमाणं वदति. तस्सेव गहणे कारणं ब्रह्मजालवण्णनायं वुत्तनयेनेव वेदितब्बं. महासीवत्थेरो पन महाबोधिसत्तानं चरिमभवे पटिसन्धिदायिनो कम्मस्स असङ्खेय्यायुकतासंवत्तनसमत्थतं हदये ठपेत्वा बुद्धानं आयुसङ्खारस्स परिस्सयविक्खम्भनसमत्थता पाळियं आगता एवाति इमं भद्दकप्पमेव तिट्ठेय्याति अवोच.

खण्डिच्चादीहि अभिसुय्यतीति एतेन यथा इद्धिबलेन जराय न पटिघातो, एवं तेन मरणस्सपि न पटिघातोति अत्थतो आपन्नमेवाति. ‘‘क्व सरो खित्तो, क्वचनि पतितो’’ति अञ्ञथा वुट्ठितेनपि थेरवादेन अट्ठकथावचनमेव समत्थितन्ति दट्ठब्बं. तेनाह ‘‘सो पन न रुच्चति…पे… नियमित’’न्ति.

परियुट्ठितचित्तोति यथा किञ्चि अत्थानत्थं सल्लक्खेतुं न सक्का, एवं अभिभूतचित्तो. सो पन अभिभवो महता उदकोघेन अप्पकस्स उदकस्स अज्झोत्थरणं विय अहोसीति वुत्तं ‘‘अज्झोत्थटचित्तो’’ति. अञ्ञोति थेरतो, अरियेहि वा अञ्ञो यो कोचि परो ¶ पुथुज्जनो. पुथुज्जनग्गहणञ्चेत्थ यथा सब्बेन सब्बं अप्पहीनविपल्लासो मारेन परियुट्ठितचित्तो किञ्चि अत्थानत्थं सल्लक्खेतुं न सक्कोति, एवं थेरो भगवता कतं निमित्तोभासं सब्बसो न ¶ सल्लक्खेसीति दस्सनत्थं. तेनाह ‘‘मारो ही’’तिआदि. चत्तारो विपल्लासाति असुभे ‘‘सुभ’’न्ति सञ्ञाविपल्लासो, चित्तविपल्लासो, दुक्खे ‘‘सुख’’न्ति सञ्ञाविपल्लासो, चित्तविपल्लासोति इमे चत्तारो विपल्लासा. तेनाति यदिपि इतरे अट्ठ विपल्लासा पहीना, यथावुत्तानं चतुन्नं विपल्लासानं अप्पहीनभावेन. अस्साति थेरस्स.

मद्दतीति फुसनमत्तेन मद्दन्तो विय होति, अञ्ञथा तेन मद्दिते सत्तानं मरणमेव सिया, किं सक्खिस्सति न सक्खिस्सतीति अधिप्पायो. कस्मा न सक्खिस्सति? ननु एस अग्गसावकस्स महिद्धिकस्स महानुभावस्स कुच्छिं पविट्ठोति? सच्चं पविट्ठो, तञ्च खो अत्तनो महानुभावस्स दस्सनत्थं, न विबाधनाधिप्पायेन. विबाधनाधिप्पायेन पन इध ‘‘किं सक्खिस्सती’’ति वुत्तं हदयमद्दनस्स अधिकतत्ता. निमित्तोभासन्ति एत्थ ‘‘तिट्ठतु भगवा कप्प’’न्ति सकलकप्पं अवट्ठानयाचनाय ‘‘यस्स कस्सचि, आनन्द, चत्तारो इद्धिपादा भाविता’’तिआदिना अञ्ञापदेसेन अत्तनो चतुरिद्धिपादभावनानुभावेन कप्पं अवट्ठानसमत्थतावसेन सञ्ञुप्पादनं निमित्तं. तथा पन परियायग्गहणं मुञ्चित्वा उजुकंयेव अत्तनो अधिप्पायविभावनं ओभासो. जानन्तोयेवाति मारेन परियुट्ठितभावं जानन्तो एव. अत्तनो अपराधहेतुको सत्तानं सोको तनुको होति, न बलवाति आह – ‘‘दोसारोपनेन सोकतनुकरणत्थ’’न्ति. किं पन थेरो मारेन परियुट्ठितचित्तकाले पवत्तिं पच्छा जानातीति? न जानाति सभावेन, बुद्धानुभावेन पन जानाति.

अनत्थे नियोजेन्तो गुणमारणेन मारेति, विरागविबन्धनेन वा जातिनिमित्तताय तत्थ तत्थ जातं मारेन्तो विय होतीति ‘‘मारेतीति मारो’’ति वुत्तं. अतिपापत्ता पापिमा. कण्हधम्मसमन्नागतो कण्हो. विरागादिगुणानं अन्तकरणतो अन्तको. सत्तानं अनत्थावहं पटिपत्तिं न मुञ्चतीति नमुचि. अत्तनो मारपासेन पमत्ते बन्धति, पमत्ता वा बन्धू एतस्साति पमत्तबन्धु. सत्तमसत्ताहतो परं सत्त ¶ अहानि सन्धायाह ‘‘अट्ठमे सत्ताहे’’ति, न पन पल्लङ्कसत्ताहादि विय नियतकिच्चस्स अट्ठमसत्ताहस्स नाम लब्भनतो. सत्तमसत्ताहस्स हि परतो अजपालनिग्रोधमूले ब्रह्मुनो सक्कस्स च पटिञ्ञातधम्मदेसनं भगवन्तं ञत्वा ‘‘इदानि सत्ते धम्मदेसनाय मम विसयं अतिक्कामेस्सती’’ति सञ्जातदोमनस्सो हुत्वा ठितो चिन्तेसि, ‘‘हन्दाहं दानि नं उपायेन परिनिब्बापेस्सामि, एवमस्स मनोरथो अञ्ञथत्तं गमिस्सति, मम मनोरथो इज्झिस्सती’’ति चिन्तेत्वा भगवन्तं उपसङ्कमित्वा एकमन्तं ठितो – ‘‘परिनिब्बातु दानि, भन्ते, भगवा’’तिआदिना परिनिब्बानं याचि. तं सन्धाय वुत्तं ‘‘अट्ठमे सत्ताहे’’तिआदि. तत्थ अज्जाति आयुसङ्खारवोस्सज्जनदिवसं सन्धायाह. भगवा चस्स अतिबन्धनाधिप्पायं ¶ जानन्तोपि तं अनाविकत्वा परिनिब्बानस्स अकालभावमेव पकासेन्तो याचनं पटिक्खिपि. तेनाह ‘‘न तावाह’’न्तिआदि.

मग्गवसेन ब्यत्ताति सच्चपटिवेधवेय्यत्तियेन ब्यत्ता. तथेव विनीताति मग्गवसेन किलेसानं समुच्छेदविनयेन विनीता. तथा विसारदाति अरियमग्गाधिगमेनेव सत्थुसासने वेसारज्जप्पत्तिया विसारदा, सारज्जकरानं दिट्ठिविचिकिच्छादिपापधम्मानं विगमेन विसारदभावं पत्ताति अत्थो. यस्स सुतस्स वसेन वट्टदुक्खतो निस्सरणं सम्भवति, तं इध उक्कट्ठनिद्देसेन ‘‘सुत’’न्ति अधिप्पेतन्ति आह ‘‘तेपिटकवसेना’’ति. तिण्णं पिटकानं समूहो तेपिटकं, तीणि वा पिटकानि तिपिटकं, तिपिटकमेव तेपिटकं, तस्स वसेन. तदेवाति यं तं तेपिटकं सोतब्बभावेन सुतन्ति वुत्तं, तमेव. धम्मन्ति परियत्तिधम्मं. धारेन्तीति सुवण्णभाजने पक्खित्तसीहवसं विय अविनस्सन्तं कत्वा सुप्पगुणसुप्पवत्तिभावेन धारेन्ति हदये ठपेन्ति. इति परियत्तिधम्मवसेन बहुस्सुतधम्मधरभावं दस्सेत्वा इदानि पटिवेधवसेनपि तं दस्सेन्तो ‘‘अथ वा’’तिआदि वुत्तं. अरियधम्मस्साति मग्गफलधम्मस्स, नवविधस्स वा लोकुत्तरधम्मस्स. अनुधम्मभूतन्ति अधिगमायानुरूपं धम्मभूतं. अनुच्छविकपटिपदन्ति तमेव विपस्सनाधम्ममाह, छब्बिधा विसुद्धियो वा. अनुधम्मन्ति निब्बानधम्मस्स अनुधम्मो, यथावुत्तपटिपदा, तस्सानुरूपं अभिसल्लेखितं अप्पिच्छतादिधम्मं. चरणसीलाति समादाय वत्तनसीला. अनुमग्गफलधम्मो एतिस्साति वा अनुधम्मा, वुट्ठानगामिनिविपस्सना, तस्स चरणसीला. अत्तनो आचरियवादन्ति अत्तनो आचरियस्स ¶ सम्मासम्बुद्धस्स वादं. सदेवकस्स लोकस्स आचारसिक्खापनेन आचरियो, भगवा, तस्स वादो, चतुसच्चदेसना.

आचिक्खिस्सन्तीति आदितो कथेस्सन्ति, अत्तना उग्गहितनियामेन परे उग्गण्हापेस्सन्तीति अत्थो. देसेस्सन्तीति वाचेस्सन्ति, पाळिं सम्मा पबोधेस्सन्तीति अत्थो. पञ्ञपेस्सन्तीति पजानापेस्सन्ति, सङ्कासेस्सन्तीति अत्थो. पट्ठपेस्सन्तीति पकारेहि ठपेस्सन्ति, पकासेस्सन्तीति अत्थो. विवरिस्सन्तीति विवटं करिस्सन्ति. विभजिस्सन्तीति विभत्तं करिस्सन्ति. उत्तानीकरिस्सन्तीति अनुत्तानं गम्भीरं उत्तानं पाकटं करिस्सन्ति. सहधम्मेनाति एत्थ धम्म-सद्दो कारणपरियायो ‘‘हेतुम्हि ञाणं धम्मपटिसम्भिदा’’तिआदीसु (विभ. ७२०) वियाति आह ‘‘सहेतुकेन सकारणेन वचनेना’’ति.

सप्पाटिहारियन्ति सनिस्सरणं. यथा परवादं भञ्जित्वा सकवादो पतिट्ठहति, एवं हेतुदाहरणेहि यथाधिगतमत्थं सम्पादेत्वा धम्मं कथेस्सन्ति. तेनाह ‘‘निय्यानिकं कत्वा धम्मं देसेस्सन्ती’’ति ¶ , नवविधं लोकुत्तरं धम्मं पबोधेस्सन्तीति अत्थो. एत्थ च ‘‘पञ्ञपेस्सन्ती’’तिआदीहि छहि पदेहि छ अत्थपदानि दस्सितानि, आदितो पन द्वीहि पदेहि छ ब्यञ्जनपदानि. एत्तावता तेपिटकं बुद्धवचनं संवण्णनानयेन सङ्गहेत्वा दस्सितं होति. वुत्तञ्हेतं नेत्तियं (नेत्ति. सङ्गहवार) ‘‘द्वादस पदानि सुत्तं, तं सब्बं ब्यञ्जनञ्च अत्थो चा’’ति.

सिक्खत्तयसङ्गहितन्ति अधिसीलसिक्खादिसिक्खत्तयसङ्गहं. सकलं सासनब्रह्मचरियन्ति अनवसेसं सत्थुसासनभूतं सेट्ठचरियं. समिद्धन्ति सम्मदेव वड्ढितं. झानस्सादवसेनाति तेहि तेहि भिक्खूहि समधिगतझानसुखवसेन. वुड्ढिप्पत्तन्ति उळारपणीतभावूपगमनेन सब्बसो परिवुड्ढिमुपगतं. सब्बपालिफुल्लं विय अभिञ्ञासम्पदाहि सासनाभिवुड्ढिया मत्थकप्पत्तितो. पतिट्ठितवसेनाति पतिट्ठानवसेन, पतिट्ठप्पत्तियाति अत्थो. पटिवेधवसेन बहुनो जनस्स हितं बाहुजञ्ञं. तेनाह ‘‘महाजनाभिसमयवसेना’’ति. पुथु पुथुलं भूतं जातं, पुथुत्तं भूतं पत्तन्ति वा पुथुभूतं. तेनाह ‘‘सब्बाकारेन पुथुलभावप्पत्त’’न्ति. सुट्ठु पकासितन्ति सम्मदेव आदिकल्याणादिभावेन पवेदितं.

सतिं ¶ सूपट्ठितं कत्वाति अयं कायादिविभागो अत्तभावसञ्ञितो दुक्खभारो मया एत्तकं कालं वहितो, इदानि पन न वहितब्बो, एतस्स अवहनत्थं चिरतरं कालं अरियमग्गसम्भारो सम्भतो, स्वायं अरियमग्गो पटिविद्धो, यतो इमे कायादयो असुभादितो सभावादितो सम्मदेव परिञ्ञाताति चतुब्बिधम्पि सतिं यथातथं विसये सुट्ठु उपट्ठितं कत्वा. ञाणेन परिच्छिन्दित्वाति यस्मा इमस्स अत्तभावसञ्ञितस्स दुक्खभारस्स वहने पयोजनभूतं अत्तहितं बोधिमूले एव परिसमापितं, परहितं पन बुद्धवेनेय्यविनयनं परिसमापितं मत्थकप्पत्तं, तं दानि मासत्तयेनेव परिसमापनं पापुणिस्सति, तस्मा आह ‘‘विसाखपुण्णमायं परिनिब्बायिस्सामी’’ति, एवं बुद्धञाणेन परिच्छिन्दित्वा सच्चभागेन विनिच्छयं कत्वा. आयुसङ्खारं विस्सजीति आयुनो जीवितस्स अभिसङ्खरणं फलसमापत्तिधम्मं न समापज्जिस्सामीति विस्सजि, तं विस्सज्जनेनेव तेन अभिसङ्खरीयमानं जीवितसङ्खारं न पवत्तयिस्सामीति विस्सजि. तेनाह ‘‘तत्था’’तिआदि.

ठानमहन्ततायपि पवत्तिआकारमहन्ततायपि महन्तो पथवीकम्पो. तत्थ ठानमहन्तताय भूमिचालस्स महन्ततं दस्सेतुं ‘‘तदा…पे… अकम्पित्था’’ति वुत्तं, सा पन जातिखेत्तभूता दससहस्सी लोकधातु एव, न या काचि. या महाभिनीहारमहाजातिआदीसुपि अकम्पित्थ, तदापि ¶ तत्तकाय एव कम्पने किं कारणं? जातिखेत्तभावेन तस्सेव आदितो परिग्गहस्स कतत्ता, परिग्गहणञ्चस्स धम्मतावसेन वेदितब्बं. तथा हि पुरिमबुद्धानम्पि तत्तकमेव जातिखेत्तं अहोसि. तथा हि वुत्तं ‘‘दससहस्सी लोकधातु निस्सद्दा होति निराकुला…पे… महासमुद्दो आभुजति, दससहस्सी पकम्पती’’ति च आदि. उदकपरियन्तं कत्वा छप्पकारप्पवेधनेन. अवीतरागे भिंसेतीति भिंसनो, सो एव भिंसनकोति आह ‘‘भयजनको’’ति. देवभेरियोति देवदुन्दुभिसद्दस्स परियायवचनमत्तं, न चेत्थ काचि भेरी देवदुन्दुभीति अधिप्पेता, अथ खो उप्पातभावेन लब्भमानो आकासतो निग्घोससद्दो. तेनाह ‘‘देवो’’तिआदि. देवोति मेघो. तस्स हि तदा अच्छभावेन आकासस्स वस्साभावेन सुक्खगज्जितसञ्ञिते ¶ सद्दे निच्छरन्ते देवदुन्दुभिसमञ्ञा. तेनाह ‘‘देवो सुक्खगज्जितं गज्जी’’ति.

पीतिवेगविस्सट्ठन्ति ‘‘एवं चिरतरकालं वहितो अयं अत्तभावसञ्ञितो दुक्खभारो, दानि न चिरस्सेव निक्खिपिस्सामी’’ति सञ्जातसोमनस्सो भगवा सभावेनेव पीतिवेगविस्सट्ठं उदानं उदानेति, एवं उदानेन्तेन अयम्पि अत्थो साधितो होतीति दस्सनत्थं अट्ठकथायं ‘‘कस्मा’’तिआदि वुत्तं.

तुलीयतीति तुलन्ति तुल-सद्दो कम्मसाधनोति दस्सेतुं ‘‘तुलित’’न्ति वुत्तं. अप्पानुभावताय परिच्छिन्नं. तथा हि तं पटिपक्खेन परितो खण्डितभावेन परित्तन्ति वुच्चति. पटिपक्खविक्खम्भनतो दीघसन्तानताय विपुलफलताय च न तुलं न परिच्छिन्नं. येहि कारणेहि पुब्बे अविसेसतो ‘‘महग्गतं अतुल’’न्ति वुत्तं, तानि कारणानि रूपावचरतो आरुप्पस्स सातिसयं विज्जन्तीति अरूपावचरं अतुलन्ति वुत्तं, इतरञ्च तुलन्ति. अप्पविपाकन्ति तीसुपि कम्मेसु यं अप्पविपाकं हीनं, तं तुलं. बहुविपाकन्ति यं महाविपाकं पणीतं, तं अतुलं. यं पनेत्थ मज्झिमं, तं हीनं उक्कट्ठन्ति द्विधा भिन्दित्वा द्वीसु भागेसु पक्खिपितब्बं. हीनत्तिकवण्णनायं वुत्तनयेनेव अप्पबहुविपाकतं निद्धारेत्वा तस्स वसेन तुलातुलभावो वेदितब्बो. सम्भवति एतस्माति सम्भवोति आह ‘‘सम्भव^ हेतुभूत’’न्ति. नियकज्झत्तरतोति ससन्तानधम्मेसु विपस्सनावसेन गोचरासेवनाय च रतो. सविपाकं समानं पवत्तिविपाकमत्तदायिकम्मं सविपाकट्ठेन सम्भवं, न च तं कामादि^ भवाभिसङ्खारकन्ति ततो विसेसनत्थं सम्भवन्ति वत्वा ‘‘भवसङ्खार’’न्ति वुत्तं. ओस्सजीति अरियमग्गेन अवस्सजि. कवचं विय अत्तभावं परियोनन्धित्वा ठितं अत्तनि सम्भूतत्ता अत्तसम्भवं ¶ किलेसञ्च अभिन्दीति किलेसभेदसहभाविकम्मोस्सज्जनं दस्सेन्तो तदुभयस्स कारणमाह ‘‘अज्झत्तरतो समाहितो’’ति.

पठमविकप्पे अवसज्जनमेव वुत्तं. एत्थ अवसज्जनाकारोति तं दस्सेन्तो ‘‘अथ वा’’तिआदिमाह. तत्थ तीरेन्तोति ‘‘उप्पादो भयं, अनुप्पादो खेम’’न्तिआदिना वीमंसन्तो. तुलेन्तो तीरेन्तोतिआदिना सङ्खेपतो वुत्तमत्थं वित्थारतो दस्सेतुं ‘‘पञ्चक्खन्धा’’तिआदिं वत्वा भवसङ्खारस्स अवसज्जनाकारं सरूपतो दस्सेति. एवन्तिआदिना ¶ पन उदानगाथावण्णनायं आदितो वुत्तमत्थं निगमनवसेन दस्सेति. अभीतभावञापनत्थञ्चाति अयम्पि अत्थो सङ्गहितोति दट्ठब्बं.

चापालवग्गवण्णना निट्ठिता.

२. पासादकम्पनवग्गो

१-२. पुब्बसुत्तादिवण्णना

८२३-८२४. परतो इमस्मिं पासादकम्पनवग्गे दसमसुत्ते आवि भविस्सन्ति. छअभिञ्ञापादकाति छन्नं अभिञ्ञानं पादकभूता पधानभूता. यथा पठमसुत्ते, तथा दुतियततियसुत्तेसुपि च छअभिञ्ञापादका इद्धिपादा कथिताति अत्थो.

३. छन्दसमाधिसुत्तवण्णना

८२५. यो समाधिस्स निस्सयभूतो छन्दो, सो इधाधिप्पेतोति आह ‘‘छन्दन्ति कत्तुकम्यताछन्द’’न्ति. तस्स च अधिपतेय्यट्ठो निस्सयट्ठो, न विना तं छन्दं निस्सायाति आह – ‘‘निस्सायाति निस्सयं कत्वा, अधिपतिं कत्वाति अत्थो’’ति. पधानभूताति सेट्ठभूता, सेट्ठभावो च एकस्सपि चतुकिच्चसाधनवसेन पवत्तिया, ततो एव बहुवचननिद्देसो, पधानसङ्खारट्ठेन पधानसङ्खरणतो. ‘‘छन्दं चे निस्साय…पे… अयं वुच्चति छन्दसमाधी’’ति इमाय पाळिया छन्दाधिपति समाधि छन्दसमाधीति अधिपतिसद्दलोपं कत्वा समासो वुत्तोति विञ्ञायति, अधिपतिसद्दत्थदस्सनवसेन वा छन्दहेतुको, छन्दाधिको वा समाधि छन्दसमाधि. तेन ‘‘छन्दसमाधिना चेव पधानसङ्खारेहि पधानभूतसङ्खारेहि च समन्नागता’’ति वक्खति, तं आनेत्वा ¶ सम्बन्धो. पधानभूताति वीरियभूता. केचि वदन्ति – ‘‘सङ्खतसङ्खारादिनिवत्तनत्थं पधानग्गहण’’न्ति. अथ वा तं तं विसेसं सङ्खरोतीति सङ्खारो, सब्बम्पि वीरियं. तत्थ चतुकिच्चसाधकतो तदञ्ञस्स निवत्तनत्थं पधानग्गहणन्ति. यथा छन्दो छन्दसमाधिना चेव पधानसङ्खारेहि च समन्नागतो, एवं छन्दसमाधि छन्देन चेव पधानसङ्खारेहि च समन्नागतो. पधानसङ्खारापि छन्देन ¶ चेव छन्दसमाधिना च समन्नागताति तीसुपि पदेसु समन्नागतसद्दो योजेतब्बो. तस्माति यस्मा तयोपि छन्दादयो एकचित्तुप्पादपरियापन्ना, तस्मा सब्बे ते धम्मा एकतो कत्वा ‘‘अयं वुच्चति…पे… इद्धिपादो’’ति वुत्तन्ति. एवं छन्दादीनंयेव चेत्थ इद्धिपादभावो वुत्तो, विभङ्गे पन तेसं इद्धिभावो सम्पयुत्तानं इद्धिपादभावो वुत्तोति दस्सेन्तो ‘‘इद्धिपादविभङ्गे पना’’तिआदिमाह.

इदानि नेसं इद्धिपादतापि सम्भवतीति दस्सेन्तो ‘‘अपिचा’’तिआदिमाह. तत्थ छन्दञ्हि भावयतो पधानं कत्वा भावेन्तस्स तथा पवत्तपुब्बाभिसङ्खारवसेन इज्झमानो छन्दो इद्धि नाम, तस्स निस्सयभूता पधानसङ्खारा इद्धिपादो नाम. सेसद्वयेपि एसेव नयो. तथा भावयन्तस्स मुख्यतामत्तं सन्धाय वुत्तं, इज्झनत्थो पन सब्बेसं समानन्ति दस्सेन्तो ‘‘सम्पयुत्त…पे… इज्झन्तियेवा’’ति आह.

इद्धिपादे असङ्करतो दस्सेतुं ‘‘अपिचा’’तिआदि वुत्तं. तत्थ छन्दादयोति छन्दसमाधिपधानसङ्खारा. सेसिद्धिपादेसूति वीरियिद्धिपादादीसु. तत्थ वीरियसमाधिपधानसङ्खारसमन्नागतोति द्विक्खत्तुं वीरियं आगतं, तत्थ पुरिमं समाधिविसेसं, वीरियाधिपतिसमाधि एव वीरियसमाधीति दुतियं समन्नागमङ्गदस्सनं. द्वेयेव हि सब्बत्थ समन्नागमङ्गानि समाधि पधानसङ्खारो च, छन्दादयो समाधिविसेसनानि, पधानसङ्खारो पन पधानवचनेनेव विसेसितो, न छन्दादीहीति न इध वीरियाधिपतिता पधानसङ्खारस्स वुत्ता होति. वीरियञ्च समाधिं विसेसेत्वा ठितमेव समन्नागमङ्गवसेन पधानसङ्खारवचनेन वुत्तन्ति नापि द्वीहि वीरियेहि समन्नागमो वुत्तो होति. यस्मा पन छन्दादीहि विसिट्ठो समाधि, तथापि विसिट्ठेनेव च तेन सम्पयुत्तो पधानसङ्खारो सेसधम्मा च, तस्मा समाधिविसेसनानं वसेन चत्तारो इद्धिपादा वुत्ता, विसेसनभावो च छन्दादीनं तंतंअवस्सयदस्सनवसेन होतीति ‘‘छन्दसमाधि…पे… इद्धिपादो’’ति एत्थ निस्सयत्थेपि पाद-सद्दे उपादायट्ठेन छन्दादीनं इद्धिपादता वुत्ता होति, तेनेव अभिधम्मे उत्तरचूळभाजनिये ‘‘चत्तारो इद्धिपादा छन्दिद्धिपादो’’तिआदिना (विभ. ४५७) छन्दादीनंयेव इद्धिपादता वुत्ता, पञ्हपुच्छके च – ‘‘चत्तारो इद्धिपादा इध भिक्खु छन्दसमाधी’’तिआदिनाव (विभ. ४३१) उद्देसं कत्वापि पुन ¶ छन्दादीनंयेव कुसलादिभावो ¶ विभत्तो. उपायिद्धिपाददस्सनत्थमेव हि निस्सयिद्धिपाददस्सनं कतं, अञ्ञथा चतुब्बिधता न होतीति अयमेत्थ पाळिवसेन अत्थविनिच्छयो. तत्थ उपायिद्धिपाददस्सनत्थमेवाति छन्दादिके धुरे जेट्ठके पुब्बङ्गमे कत्वा निब्बत्तितसमाधि छन्दाधिपतिसमाधीति छन्दादीनं इद्धिया अधिगमूपायदस्सनं उपायिद्धिपाददस्सनं, तदत्थमेव ‘‘तथाभूतस्स वेदनाक्खन्धो…पे… विञ्ञाणक्खन्धो’’ति तत्थ तत्थ पाळियं निस्सयिद्धिपाददस्सनं कतं छन्दादिविसिट्ठानंयेव वेदनाक्खन्धादीनं अधिप्पेतत्ता. एवञ्चेतं सम्पटिच्छितब्बं, अञ्ञथा केवलं इद्धिसम्पयुत्तानंयेव खन्धानं वसेन इद्धिपादभावे गय्हमाने तेसं चतुब्बिधता न होति विसेसकारणभावतोति अधिप्पायो.

केचीति उत्तरविहारवासिनो. अनिब्बत्तोति हेतुपच्चयेहि न निब्बत्तो, न सभावधम्मो, पञ्ञत्तिमत्तन्ति अधिप्पायो. वादमद्दनत्थाय होति, अभिधम्मे च आगतो उत्तरचूळवारोति योजना. चत्तारो इद्धिपादातिआदि उत्तरचूळवारदस्सनं. इमे पन उत्तरचूळवारे आगता इद्धिपादा.

रट्ठपालत्थेरो छन्दे सति कथं नानुजानिस्सन्तीति सत्ताहानि भत्तानि अभुञ्जित्वा मातापितरो अनुजानापेत्वा पब्बजित्वा छन्दमेव निस्साय अरहत्तं पापुणीति आह – ‘‘रट्ठपालत्थेरो छन्दं धुरं कत्वा लोकुत्तरधम्मं निब्बत्तेसी’’ति. सोणत्थेरोति सुखुमालसोणत्थेरो. सो हि आयस्मा अत्तनो सुखुमालभावं अचिन्तेत्वा अतिवेलं चङ्कमनेन पादेसु उट्ठितेसुपि उस्साहं अविस्सज्जेन्तो वीरियं धुरं कत्वा लोकुत्तरधम्मं निब्बत्तेसि. सम्भुतत्थेरो ‘‘चित्तवतो चे अलमरियञाणदस्सनविसेसो इज्झेय्य, मय्हं इज्झेय्याति चित्तं धुरं कत्वा लोकुत्तरधम्मं निब्बत्तेसि. मोघराजा ‘‘पञ्ञवतो चे मग्गभावना इज्झेय्य, मय्हं इज्झेय्या’’ति पञ्ञापुब्बङ्गमं पञ्ञाधुरं पञ्ञाजेट्ठकं कत्वा अरहत्तं पापुणीति आह ‘‘मोघराजा वीमंसं धुरं कत्वा लोकुत्तरधम्मं निब्बत्तेसी’’ति. इदानि नेसं अरियानं उपट्ठानुस्साहमन्तजातिसम्पदं निस्साय रञ्ञो सन्तिके लद्धविसेसे अमच्चपुत्ते निदस्सनभावेन दस्सेतुं ‘‘तत्थ यथा’’तिआदिमाह. एत्थ ¶ च पुनप्पुनं छन्दुप्पादनं तोसनं विय होतीति छन्दस्स उपट्ठानसदिसता वुत्ता, थामभावतो च वीरियस्स सूरत्तसदिसता, चिन्तनप्पधानत्ता चित्तस्स मन्तसंविधानसदिसता, योनिसोमनसिकार-सम्भूतेसु कुसलधम्मेसु पञ्ञा सेट्ठाति वीमंसाय जातिसम्पत्तिसदिसता वुत्ता.

४. मोग्गल्लानसुत्तवण्णना

८२६. उद्धच्चपकतिकाति ¶ विक्खित्तसभावा, विब्भन्तचित्ताति अत्थो. अनवट्ठितताय विप्फन्दितचित्तताय विप्फन्दमानचित्ता. तुच्छताय नळो वियाति नळो, मानो, उग्गतो नळो एतेसन्ति उन्नळाति आह – ‘‘उन्नळाति…पे… वुत्तं होती’’ति. चपलाति चापल्यता नाम लोलभावो. मुराति खरवचना, फरुसवचनाति अत्थो. विकिण्णवाचा नाम सम्फप्पलापिनोति वुत्तं ‘‘असंयतवचना’’तिआदि. पटिपत्तिधम्मे पमुट्ठा विनट्ठा पटिविनट्ठा सति एतेसन्ति मुट्ठसतीति आह – ‘‘नट्ठस्सतिनो’’ति. उब्भन्तचित्ताति समाधिनो अभावेन उद्धच्चेनेव उपरूपरि भन्तचित्ता. पाकतिन्द्रिया अभावितकायताय गामदारका विय पकतिभूतइन्द्रिया. नेमो वुच्चति भूमिया बद्धभावनिमित्तपदेसो, गम्भीरो नेमो एतस्साति गम्भीरनेमो. सुट्ठु निखातोतिआदि तस्स पादस्स सुप्पतिट्ठितभावदस्सनं.

५. उण्णाभब्राह्मणसुत्तवण्णना

८२७. पहानत्थन्ति अनुप्पादपहानत्थं.

९. इद्धादिदेसनासुत्तवण्णना

८३१. अभिञ्ञापादकं चतुत्थज्झानं अधिप्पेतं ‘‘इद्धिलाभाय पवत्तती’’ति वचनतो.

१०. विभङ्गसुत्तवण्णना

८३२. छन्दं उप्पादेत्वाति भावनाछन्दं उप्पादेत्वा. लीनाकारोति भावनाचित्तस्स लयापत्ति. कोसज्जेन वोकिण्णापज्जनं वुत्तं.

एवं ¶ पसादाभावेन चित्तस्स विक्खेपापत्ति, तत्थ पसादुप्पादनेन यं सम्पहंसनं इच्छितब्बं, तस्स उप्पादनाकारं दस्सेतुं वुत्तं ‘‘सो बुद्धधम्मसङ्घगुणे आवज्जेत्वा’’तिआदि. वत्थुकामे आरब्भ विक्खित्तो पुनप्पुनं विक्खित्तो होतियेवाति वुत्तं ‘‘अनुविक्खित्तो’’ति. उप्पथं पटिपन्नस्स चित्तस्स दण्डनट्ठेन निग्गण्हनट्ठेन सुत्तानि एव दण्डोति सुत्तदण्डो, तेन सुत्तदण्डेन ¶ चित्तं तज्जेत्वा. पञ्चकामगुणे आरब्भ पवत्तो चित्तविक्खेपो पुनप्पुनं उप्पज्जतेवाति वुत्तं ‘‘अनुविक्खित्तो अनुविसटो’’ति.

पुरेपच्छाभावो कम्मट्ठानस्स मनसिकारवसेन उग्गहवसेन वाति तदुभयं दस्सेतुं ‘‘कथ’’न्तिआदि वुत्तं. अतिलीनादीसु चतूसु ठानेसूति अतिलीनातिपग्गहितसंखित्तअनुविक्खित्तसञ्ञितेसु चतूसु ठानेसु. तत्थ भावनं अनज्झोगाहेत्वाव सङ्कोचो अतिलीनता, अज्झोगाहेत्वा अन्तो सङ्कोचो संखित्तता, अन्तोसङ्खेपो अतिपग्गहितता, अच्चारद्धवीरियता अनुविक्खित्तता. बहिद्धा विसमवितक्कानुभावनं आपज्जन्तो द्वत्तिंसाकारवसेन अट्ठिकसञ्ञावसेन वा गहेतब्बन्ति आह – ‘‘सरीरवसेन वेदितब्ब’’न्ति. तेनाह ‘‘उद्धं पादतला’’तिआदि (दी. नि. २.३७७; म. नि. १.११०).

अञ्ञमञ्ञं असङ्करतो आकिरीयन्ति पकारतो ठपीयन्तीति आकारा, भागाति आह – ‘‘येहि आकारेहीति येहि कोट्ठासेही’’ति. लिङ्गीयति सल्लक्खीयतीति लिङ्गं, सण्ठानं. निमीयति निद्धारेत्वा परिच्छिन्दीयतीति निमित्तं, उपट्ठानं. यो भिक्खूतिआदि आलोकसञ्ञं यो उग्गण्हाति, तं दस्सनं. अङ्गणेति विवटङ्गणे. आलोकसञ्ञं मनसिकरोति रत्तियं. वीरियादीसुपीति यथा ‘‘इध भिक्खु छन्दं उप्पादेत्वा’’ति छन्दे वित्थारनयो वुत्तो, वीरियादीसुपि एसो एव वित्थारनयो योजेतब्बो.

पासादकम्पनवग्गवण्णना निट्ठिता.

३. अयोगुळवग्गो

२. अयोगुळसुत्तवण्णना

८३४. इमिना चतुमहाभूतमयेनाति इमिना सब्बलोकपच्चक्खेन चतूहि महाभूतेहि निब्बत्तेन चतुमहाभूतमयेन. मनोमयो पन निम्मितकायो ¶ भगवतो रुचिवसेन परेसं पच्चक्खो होति. ओमातीति अवमाति. अव-पुब्बो हि मा-सद्दो सत्तिअत्थोपि होतीति ‘‘पहोति सक्कोती’’ति अत्थो वुत्तो. असम्भिन्नपदन्ति असाधारणपदं अञ्ञत्थ अनागतत्ता. कायस्स ¶ चित्ते समोदहनं आरोपनं तन्निस्सितताकरणञ्च अत्थतो चित्तगतिया पवत्तनमेवाति आह ‘‘चित्तगतिया पेसेती’’ति.

तत्थ चित्तगतिगमनं नाम चित्तवसेन कायस्स परिणामनेन ‘‘अयं कायो इमं चित्तं विय होतू’’ति कायस्स चित्तेन समानगतिकताठपनं. कथं पन कायो दन्धपवत्तिको लहुपवत्तिना चित्तेन समानगतिको होतीति? न सब्बथा समानगतिको. यथेव हि कायवसेन चित्तपरिणामने चित्तं सब्बथा कायेन समानगतिकं न होति. न हि कदाचि तं सभावसिद्धेन अत्तनो खणेन अवत्तित्वा दन्धवुत्तिकस्स रूपधम्मस्स वसेन पवत्तितुं सक्कोति, ‘‘इदं चित्तं अयं कायो विय होतू’’ति पन अधिट्ठानेन दन्धगतिकस्स कायस्स अनुवत्तनतो याव इच्छितट्ठानप्पत्ति, ताव कायगतिअनुलोमेनेव हुत्वा सन्तानवसेन पवत्तमानं चित्तं कायगतिया परिणामितं नाम होति. एवं ‘‘अयं कायो इदं चित्तं विय होतू’’ति अधिट्ठानेन पगेव सुखलहुसञ्ञाय सम्पादितत्ता अभावितिद्धिपादानं विय दन्धं अवत्तित्वा यथा लहुकं कतिपयचित्तवारेनेव इच्छितट्ठानप्पत्ति होति, एवं पवत्तमानो कायो चित्तगतिया परिणामितो नाम होति, न एकचित्तक्खणेनेव इच्छितट्ठानप्पत्तिया, एवञ्च कत्वा बाहासमिञ्जनपसारणूपमापि उपचारेन विना सुट्ठुतरं युत्ता होतीति. अञ्ञथा धम्मताविलोमता सिया, नापि धम्मानं लक्खणञ्ञथत्तं इद्धिबलेन कातुं सक्का, भावञ्ञथत्तमेव पन कातुं सक्काति.

३-१०. भिक्खुसुत्तादिवण्णना

८३५-८४२. ‘‘द्विन्नं फलान’’न्ति आगतसुत्तं सन्धाय ‘‘द्वे फलानि आदिं कत्वा’’ति वुत्तं. सेसं सुविञ्ञेय्यमेव.

अयोगुळवग्गवण्णना निट्ठिता.

इद्धिपादसंयुत्तवण्णना निट्ठिता.

८. अनुरुद्धसंयुत्तं

१. रहोगतवग्गो

१-२. पठमरहोगतसुत्तादिवण्णना

८९९-९००. छत्तिंसाय ¶ ¶ ठानेसूति अज्झत्तं काये समुदयधम्मानुपस्सी, वयो, समुदयवयो, बहिद्धा समुदयो, वयो, समुदयवयो, अज्झत्तबहिद्धा समुदयो, वयो, समुदयवयधम्मानुपस्सीति नव अनुपस्सना, तथा वेदनाय चित्ते धम्मेसूति एवं छत्तिंसाय ठानेसु. दुतिये द्वादससु ठानेसूति काये अज्झत्तं बहिद्धा अज्झत्तबहिद्धा, वेदनाय चित्ते धम्मेसूति एवं द्वादससु ठानेसु.

३. सुतनुसुत्तवण्णना

९०१. इमाय पाळियाति इमाय हीनत्तिकपाळिया. इमे धम्मा हीना लामकट्ठेन. इमे धम्मा मज्झिमा हीनपणीतानं मज्झे भवाति. उत्तमट्ठेन अत्तप्पकट्ठेन पधानभावं नीताति पणीता.

४-७. पठमकण्डकीसुत्तादिवण्णना

९०२-९०५. कण्डका एतिस्सा अत्थीति कण्डकी, करमन्दगच्छो. ओसधिभावापेक्खाय इत्थिलिङ्गनिद्देसो, तब्बहुलताय तं वनं ‘‘कण्डकीवन’’न्तेव पञ्ञायित्थ. सहस्सलोकन्ति सहस्सचक्कवाळलोकं. दसचक्कवाळसहस्सं एकावज्जनस्स आपाथं आगच्छति तथा आलोकवड्ढनस्स कतत्ता.

९. अम्बपालिवनसुत्तवण्णना

९०७. अरहत्तभावदीपकन्ति ¶ अरहत्तस्स अत्थिभावदीपकं. ‘‘अरहत्तभावदीपिक’’न्ति वा पाठो.

रहोगतवग्गवण्णना निट्ठिता.

२. दुतियवग्गवण्णना

९०९-९२२. दसबलञाणन्ति ¶ दसविधबलञाणं. एकदेसेनाति पदेसवसेन. सावकानम्पि अत्तनो अभिनीहारानुरूपं ञाणं पवत्ततीति ते कालपदेसवसेन चेव यथापरिचयसत्तपदेसवसेन च ठानानीति जानन्ति, सम्मासम्बुद्धानं पन अनन्तञाणताय सब्बत्थेव अप्पटिहतमेव ञाणन्ति आह – ‘‘सब्बञ्ञुबुद्धानं पना’’तिआदि. एतं दसबलञाणं अनन्तविसयत्ता निप्पदेसं अनूनताय सब्बाकारपरिपूरं.

दुतियवग्गवण्णना निट्ठिता.

अनुरुद्धसंयुत्तवण्णना निट्ठिता.

९. झानसंयुत्तवण्णना

९२३. झानसंयुत्तं ¶ सुविञ्ञेय्यमेव, मिस्सकन्ति वदन्ति.

झानसंयुत्तवण्णना निट्ठिता.

१०. आनापानसंयुत्तं

१. एकधम्मवग्गो

१. एकधम्मसुत्तवण्णना

९७७. एत्थाति ¶ ¶ एतस्मिं पठमसुत्ते. वुत्तमेव, तस्मा तत्थ वुत्तनयेनेव वेदितब्बन्ति अधिप्पायो.

६. अरिट्ठसुत्तवण्णना

९८२. नो-सद्दो पुच्छायं, तस्मा नूति इमिना समानत्थोति आह ‘‘भावेथ नू’’ति. कामच्छन्दोति वत्थुकामेसु इच्छाति आह ‘‘पञ्चकामगुणिकरागो’’ति. द्वादससु आयतनधम्मेसु सपरसन्ततिपरियापन्नेसु. इमिना कामच्छन्दप्पहानकित्तनेन पटिघसञ्ञापटिविनयकित्तनेन च अनागामिमग्गं कथेति पञ्चोरम्भागियसञ्ञोजनसमुच्छेदस्स ब्याकतत्ता. विपस्सनं दस्सेन्तोति ‘‘विपस्सनं अनुयुञ्जथा’’ति दस्सेन्तो.

८. पदीपोपमसुत्तवण्णना

९८४. ‘‘नेव कायोपि किलमति न चक्खूनी’’ति अट्ठकथायं पदुद्धारो कतो. ‘‘कायोपि किलमति, चक्खूनिपि विहञ्ञन्ती’’ति वत्वा यत्थ यथा होति, तानि दस्सेतुं ‘‘धातुकम्मट्ठानस्मिं ही’’तिआदि वुत्तं. चक्खूनि फन्दन्ति किलमन्तीतिआदि अतिवेलं उपनिज्झायने होतीति कत्वा वुत्तं. इमस्मिं पन कम्मट्ठानेति आनापानकम्मट्ठाने. एवमाहाति ‘‘भिक्खु चेपि आकङ्खेय्य, नेव कायो किलमेय्या’’ति एवमाह.

लब्भतीति अट्ठकथाधिप्पाये ठत्वा वुत्तं, परतो आगतेन थेरवादेन सो अनिच्छितो. न ¶ हि तारकरूपमुत्तावळिकादिसदिसं निमित्तूपट्ठानाकारमत्तं खणमत्तट्ठायिनं कसिणनिमित्तेसु विय उग्घाटनं कातुं सक्कोति. तेनाह ‘‘न लब्भतेवा’’ति. आनिसंसदस्सनत्थं गहितो, आनापानस्सतिसमाधिस्मिं सिद्धे अयं गुणो सुखेनेव इज्झतीति. यस्मा भिक्खूति इमस्मिं वारे नागतन्ति यथा पुरिमवारे ‘‘भिक्खु चेपि आकङ्खेय्या’’ति ¶ आगतं, एवं इध ‘‘भाविते खो, भिक्खवे, आनापानस्सतिसमाधिम्ही’’ति आगतवारे भिक्खुग्गहणमकतं, तस्मा ‘‘सो’’ति न वुत्तं.

९. वेसालीसुत्तवण्णना

९८५. पाकारपरिक्खेपवड्ढनेनाति पाकारपरिक्खेपेन भूमिया वड्ढनेन. राजगहसावत्थियो विय इदम्पि च नगरं…पे… सब्बाकारवेपुल्लतं पत्तं. अनेकपरियायेनाति एत्थ परियायसद्दो कारणवचनोति आह ‘‘अनेकेहि कारणेही’’ति, अयं कायो अविञ्ञाणकोपि सविञ्ञाणकोपि एवम्पि असुभो एवम्पि असुभोति नानाविधेहि कारणेहीति अत्थो. असुभाकारसन्दस्सनप्पवत्तन्ति केसादिवसेन तत्थापि वण्णादितो असुभाकारस्स सब्बसो दस्सनवसेन पवत्तं. कायविच्छन्दनीयकथन्ति अत्तनो परस्स च करजकाये विच्छन्दनुप्पादनकथं. मुत्तं वातिआदिना ब्यतिरेकमुखेन कायस्स अमनुञ्ञतं दस्सेति. तत्थ आदितो तीहि पदेहि अदस्सनीयताय असारकताय च, मज्झे चतूहि दुग्गन्धताय, अन्ते एकेन लेसमत्तेनपि मनुञ्ञताभावमस्स दस्सेति. अथ खोतिआदिना अन्वयतो सरूपेनेव अमनुञ्ञताय दस्सनं. ‘‘केसलोमादी’’ति सङ्खेपतो वुत्तमत्थं विभागेन दस्सेतुं ‘‘येपी’’तिआदि वुत्तं.

वण्णेन्तोति वित्थारेन्तो. असुभायाति असुभमातिकाय. फातिकम्मन्ति बहुलीकारो. किलेसचोरेहि अनभिभवनीयत्ता झानं ‘‘चित्तमञ्जूस’’न्ति वुत्तं. निस्सायाति पादकं कत्वा.

अपरे पन ‘‘तस्मिं किर अद्धमासे न कोचि बुद्धवेनेय्यो अहोसि, तस्मा भगवा एवमाह – ‘इच्छामहं, भिक्खवे’तिआदी’’ति वदन्ति. परे किराति किर-सद्दो अरुचिसंसूचनत्थो. तेनाह ‘‘इदं पन इच्छामत्त’’न्ति.

अनेककारणसम्मिस्सोति एत्थ कारणं नाम कायस्स असुचिदुग्गन्धजेगुच्छपटिकूलताव. सब्बमकंसूति पुथुज्जना नाम सावज्जेपि तत्थ अनवज्जसञ्ञिनो हुत्वा करणकारापनसमनुञ्ञताभेदं ¶ सब्बं पापं अकंसु ¶ . कामं दसानुस्सतिग्गहणेनेव आनापानस्सति गहिता, सा पन तत्थ सन्निपतितभिक्खूसु बहूनं सप्पाया सात्थिका च, तस्मा पुन गहिता. तथा हि भगवा तमेव कम्मट्ठानं इमस्मिं सुत्ते कथेसि. आहारे पटिकूलसञ्ञा असुभकम्मट्ठानसदिसा, चत्तारो पन आरुप्पा आदिकम्मिकानं अयोग्याति तेसं इध अग्गहणं दट्ठब्बं.

वेसालिं उपनिस्सायाति वेसालीनगरं गोचरगामं कत्वा. मुहुत्तेनेवाति सत्थरि सद्धम्मे च गारवेन उपगतभिक्खूनं वचनसमनन्तरमेव उट्ठहिंसूति कत्वा वुत्तं. बुद्धकाले किर भिक्खू भगवतो सन्देसं सिरसा सम्पटिच्छितुं ओहितसोता विहरन्ति.

आनापानपरिग्गाहिकायाति अस्सासपस्सासे परिग्गण्हनवसेन पवत्ताय सतिया. सम्पयुत्तो समाधीति ताय सम्पयुत्तअञ्ञमञ्ञपच्चयभूताय उप्पन्नो समाधि. आनापानस्सतियं वा समाधीति इमिना उपनिस्सयपच्चयसभावम्पि दस्सेति, उभयत्थापि सहजातादीनं सत्तन्नम्पि पच्चयानं वसेन पच्चयभावं दस्सेति. ‘‘यथापटिपन्ना मे सावका चत्तारो सतिपट्ठाने भावेन्ती’’तिआदीसु उप्पादनवड्ढनट्ठेन भावनाति वुच्चतीति तदुभयवसेन अत्थं दस्सेन्तो ‘‘भावितोति उप्पादितो वड्ढितो वा’’ति आह. तत्थ भावं विज्जमानतं इतो गतोति भावितो, उप्पादितो पटिलद्धमत्तोति अत्थो. उप्पन्नो पन लद्धासेवनो भावितो, पगुणभावं आपादितो वड्ढितोति अत्थो. बहुलीकतोति बहुलं पवत्तितो. तेन आवज्जनादिवसीभावप्पत्तिमाह. यो हि वसीभावमापादितो, सो इच्छितिच्छितक्खणे समापज्जितब्बतो पुनप्पुनं पवत्तिस्सति. तेन वुत्तं ‘‘पुनप्पुनं कतो’’ति. यथा ‘‘इधेव, भिक्खवे, समणो (म. नि. १.१३९; अ. नि. ४.२४१), विविच्चेव कामेही’’ति (दी. नि. १.२२६; म. नि. १.२७१; सं. नि. २.१५२; अ. नि. ४.१२३) च एवमादीसु पठमपदे वुत्तो एव-सद्दो दुतियादीसुपि वुत्तोयेव होति, एवमिधापीति आह ‘‘उभयत्थ एवसद्देन नियमो वेदितब्बो’’ति. उभयत्थ नियमेन लद्धगुणं दस्सेतुं ‘‘अयं ही’’तिआदि वुत्तं.

असुभकम्मट्ठानन्ति असुभारम्मणं झानमाह. तञ्हि असुभेसु योगकम्मभावतो योगिनो सुखविसेसानं कारणभावतो च ‘‘असुभकम्मट्ठान’’न्ति वुच्चति. केवलन्ति इमिना आरम्मणं निवत्तेति. पटिवेधवसेनाति ¶ झानपटिवेधवसेन. झानञ्हि भावनाविसेसेन इज्झन्तं अत्तनो विसयं पटिविज्झन्तमेव पवत्तति यथासभावतो पटिविज्झियति चाति पटिवेधोति वुच्चति. ओळारिकारम्मणत्ताति ¶ बीभच्छारम्मणत्ता. पटिकूलारम्मणत्ताति जिगुच्छितब्बारम्मणत्ता. परियायेनाति कारणेन, लेसन्तरेन वा. आरम्मणसन्ततायाति अनुक्कमेन विचितब्बतं पत्तारम्मणस्स परमसुखुमतं सन्धायाह. सन्तेहि सन्निसिन्ने आरम्मणे पवत्तमानो धम्मो सयम्पि सन्निसिन्नोव होति. तेनाह ‘‘सन्तो वूपसन्तो निब्बुतो’’ति, निब्बुतसब्बपरिळाहोति अत्थो. आरम्मणसन्तताय तदारम्मणानं धम्मानं सन्तता लोकुत्तरधम्मारम्मणाहि पच्चवेक्खणाहि वेदितब्बा.

नास्स सन्तपणीतभावावहं किञ्चि सेचनन्ति असेचनको. असेचनकत्ता अनासित्तको, अनासित्तकत्ता एव अब्बोकिण्णो, असम्मिस्सो परिकम्मादिना. ततो एव पाटियेक्को विसुंयेवेको. आवेणिको असाधारणो. सब्बमेतं सरसतो एव सन्तभावं दस्सेतुं वुत्तं, परिकम्मं वा सन्तभावनिमित्तं. परिकम्मन्ति च कसिणकरणादिनिमित्तुप्पादपरियोसानं, तादिसं एत्थ नत्थीति अधिप्पायो. तदा हि कम्मट्ठानं निरस्सादत्ता असन्तं अप्पणीतं सिया. उपचारे वा नत्थि एत्थ सन्तताति योजना. यथा उपचारक्खणे नीवरणादिविगमेन अङ्गपातुभावेन च परेसं सन्तता होति, न एवमिमस्स. अयं पन आदिसमन्ना…पे… पणीतो चाति योजना. केचीति उत्तरविहारवासिनो. अनासित्तकोति उपसेचनेन अनासित्तको. तेनाह – ‘‘ओजवन्तो’’ति ओजवन्तसदिसोति अत्थो. मधुरोति इट्ठो. चेतसिकसुखपटिलाभसंवत्तनं तिकचतुक्कज्झानवसेन, उपेक्खाय वा सन्तभावेन सुखगतिकत्ता सब्बेसम्पि झानानं वसेन वेदितब्बं. झानसमुट्ठानपणीतरूपफुट्ठसरीरतावसेन पन कायिकसुखपटिलाभसंवत्तनं दट्ठब्बं, तञ्च खो झानतो वुट्ठितकाले. इमस्मिं पक्खे ‘‘अप्पितप्पितक्खणे’’ति इदं हेतुम्हि भुम्मवचनं दट्ठब्बं.

अविक्खम्भितेति झानेन सकसन्तानतो अनीहते अप्पहीने. अकोसल्लसम्भूतेति अकोसल्लं वुच्चति अविज्जा, ततो सम्भूते. अविज्जापुब्बङ्गमा हि सब्बे पापधम्मा. खणेनेवाति अत्तनो पवत्तिक्खणेनेव. अन्तरधापेतीति एत्थ अन्तरधापनं विनासनं, तं पन झानकत्तुकं ¶ इधाधिप्पेतन्ति परियुट्ठानप्पहानं होतीति आह – ‘‘विक्खम्भेती’’ति. वूपसमेतीति विसेसेन उपसमेति. विसेसेन उपसमनं पन सम्मदेव उपसमनं होतीति आह ‘‘सुट्ठु उपसमेती’’ति. सासनिकस्स झानभावना येभुय्येन निब्बेधभागिया होतीति आह ‘‘निब्बेधभागियत्ता’’ति. अरियमग्गस्स पादकभूतो अयं समाधि अनुक्कमेन वड्ढित्वा अरियमग्गभावं उपगतो विय होतीति आह ‘‘अनुपुब्बेन अरियमग्गवुड्ढिप्पत्तो’’ति. अयं पनत्थो विरागनिरोधपटिनिस्सग्गानुपस्सनानं वसेन सम्मदेव युज्जति. सेसं सुविञ्ञेय्यमेव.

१०. किमिलसुत्तवण्णना

९८६. थेरोति ¶ आनन्दत्थेरो. अयं देसनाति ‘‘कथं विभावितो नु खो किमिला’’तिआदिना पवत्ता देसना. कायञ्ञतरन्ति रूपकाये अञ्ञतरकोट्ठासे. एवन्ति यथा आनापानं अनुस्सरन्तो भिक्खु काये कायानुपस्सी जातो, एवं सब्बत्थ वारेसु वेदनानुपस्सीतिआदि अत्थो वेदितब्बो.

देसनासीसन्ति देसनापदेसं. मनसिकारपदेसेन वेदना वुत्ताति तं सब्बं सरूपतो अञ्ञापदेसतो अपदिसति. यथेव हीतिआदिना तत्थ निदस्सनं दस्सेति. चित्तसङ्खारपदद्वयेति ‘‘चित्तसङ्खारपटिसंवेदी पस्सम्भयं चित्तसङ्खार’’न्ति एतस्मिं पदद्वये.

एवं सन्तेपीति पीतिमनसिकारचित्तसङ्खारपदेसेन यदि वेदना वुत्ता, एवं सन्तेपि. एसा यथावुत्ता वेदना आरम्मणं न होति. वेदनारम्मणा च अनुपस्सना, तस्मा वेदनानुपस्सना न युज्जति. यदि एवं महासतिपट्ठानादीसु ‘‘वेदना वेदियती’’ति वुत्तं, तं कथन्ति आह – ‘‘महासतिपट्ठानादीसुपी’’तिआदि. तत्थ सुखादीनं वत्थुन्ति सुखादीनं उप्पत्तिया वत्थुभूतं रूपसद्दादिं आरम्मणं कत्वा वेदना वेदियति, न पुग्गलो पुग्गलस्सेव अभावतो. वेदनाप्पवत्तिं उपादाय निस्साय यथा ‘‘पुग्गलो वेदनं वेदियती’’ति वोहारमत्तं होति. एवं इधापि वेदनाय अस्सासपस्सासे आरब्भ पवत्ति, तथा पवत्तमनसिकारसीसेन ‘‘वेदनासु वेदनानुपस्सी भिक्खु तस्मिं समये विहरती’’ति वुत्तो. तं सन्धायाति तं वेदनाय आरम्मणभावं सन्धाय ¶ . आदीनं पदानं. एतस्स ‘‘वेदनानुपस्सना न युज्जती’’ति वुत्तअनुयोगस्स.

सप्पीतिके द्वे झाने समापज्जतीति पीतिसहगतानि पठमदुतियज्झानानि पटिपाटिया समापज्जति. तस्साति तेन. पटिसंविदितसद्दापेक्खाय हि कत्तुअत्थे एतं सामिवचनं. समापत्तिक्खणेति समापज्जनक्खणे. झानपटिलाभेनाति झानेन समङ्गीभावेन. आरम्मणतोति आरम्मणमुखेन तदारम्मणझानपरियापन्ना पीति पटिसंविदिता होति, आरम्मणस्स पटिसंविदितत्ताति वुत्तं होति. यथा नाम सप्पपरियेसनं चरन्तेन तस्स आसये पटिसंविदिते सोपि पटिसंविदितो होति मन्तागदबलेन तस्स गहणस्स सुकरत्ता, एवं पीतिया आसयभूते आरम्मणे पटिसंविदिते सा पीति पटिसंविदिताव होति सलक्खणतो सामञ्ञलक्खणतो च तस्सा गहणस्स सुकरत्ता. विपस्सनक्खणेति विपस्सनापञ्ञाय तिक्खविसदभावप्पत्ताय ¶ विसयतो दस्सनक्खणे. लक्खणप्पटिवेधेनाति पीतिया सलक्खणस्स सामञ्ञलक्खणस्स च पटिविज्झनेन. यञ्हि पीतिया विसेसतो सामञ्ञतो च लक्खणं, तस्मिं विदिते सा याथावतो विदिता एव होति. तेनाह ‘‘असम्मोहतो पीति पटिसंविदिता होती’’ति.

इदानि तमत्थं पाळिया एव विभावेतुं ‘‘वुत्तञ्हेत’’न्तिआदिमाह. तत्थ दीघं अस्सासवसेनाति दीघस्स अस्सासस्स आरम्मणभूतस्स वसेन. पजानतो सा पीति पटिसंविदिता होतीति सम्बन्धो. चित्तस्स एकग्गतं अविक्खेपं पजानतोति झानपरियापन्नं ‘‘अविक्खेपो’’ति लद्धनामं चित्तस्सेकग्गतं तंसम्पयुत्ताय पञ्ञाय पजानतो. यथा हि आरम्मणमुखेन पीति पटिसंविदिता होति, एवं तंसम्पयुत्तधम्मापि आरम्मणमुखेन पटिसंविदिता एव होन्तीति. सति उपट्ठिता होतीति दीघं अस्सासवसेन झानसम्पयुत्ता सति तस्मिं आरम्मणे उपट्ठिता आरम्मणमुखेन झानेपि उपट्ठिता नाम होति. ताय सतियाति एवं उपट्ठिताय ताय सतिया यथावुत्तेन तेन ञाणेन सुप्पटिविदितत्ता आरम्मणस्स तस्स वसेन तदारम्मणा सा पीति पटिसंविदिता होति. दीघं पस्सासवसेनातिआदीसुपि इमिनाव नयेन अत्थो वेदितब्बो. तेन वुत्तं ‘‘एतेनेव नयेन अवसेसपदानिपि अत्थतो वेदितब्बानी’’ति.

यथेवातिआदीसु ¶ अयं सङ्खेपत्थो – झानपटिलाभेन यथा आरम्मणतो पीतिआदयो पटिसंविदिता होन्ति तेन विना तेसं अप्पवत्तनतो. एवं झानसम्पयुत्तेन तंपरियापन्नेन वेदनासङ्खातमनसिकारपटिलाभेन आरम्मणतो वेदना पटिसंविदिता होति अरुणुग्गमेन विय सूरियस्स तेन विना वेदनाय अप्पवत्तनतो. तस्मा वुत्तनयेन अतिसयप्पवत्ति वेदना सुप्पटिविदिता, तस्मा सुवुत्तमेतन्ति पुब्बे वुत्तचोदनं निराकरोति.

आरम्मणेति अस्सासपस्सासनिमित्तं वदति. चित्तानुपस्सीयेव नामेस होति असम्मोहतो चित्तस्स पटिसंविदितत्ता. तेनाह ‘‘तस्मा’’तिआदि. चित्तपटिसंविदितवसेनाति आदि-सद्देन इतरा तिस्सोपि चित्तानुपस्सना सङ्गण्हाति.

सोति धम्मानुपस्सनं अनुयुत्तो भिक्खु. यं तं पहानं पहायकञाणं. पञ्ञायाति अपराय विपस्सनापञ्ञाय अनिच्चविरागादितो दिस्वा दुविधायपि अज्झुपेक्खिता होति. इदञ्हि चतुक्कन्ति अनिच्चानुपस्सनादिवसेन वुत्तं चतुक्कं. तस्सापि धम्मानुपस्सनाय. पजहतीति ¶ पहानन्ति आह ‘‘निच्चसञ्ञं…पे… पहानकरञाणं अधिप्पेत’’न्ति. विपस्सनापरम्परन्ति पटिपाटिया विपस्सनमाह. पथपटिपन्नं अज्झुपेक्खतीति मज्झिमाय पटिपत्तिया सम्मदेव वीथिपटिपन्नं भावनाचित्तं पग्गहनिग्गहानं अकरणेन अज्झुपेक्खति. एकतो उपट्ठानन्ति यस्मा मज्झिमसमथवीथिनातिवत्तिया तत्थ च पक्खन्दनेन इन्द्रियानं एकरसभावेन, तत्रमज्झत्तताय भावतो अविसेसं एकग्गभावूपगमनेन एकन्ततो उपट्ठाति, तस्मा न तत्थ किञ्चि कातब्बन्ति अज्झुपेक्खति. तत्थाति एवं अज्झुपेक्खने. सहजातानम्पि अज्झुपेक्खना होति तेसं पवत्तनाकारस्स अज्झुपेक्खनतो. ‘‘पञ्ञाय दिस्वा’’ति वुत्तत्ता आरम्मणअज्झुपेक्खना अधिप्पेता. न केवलं नीवरणादिधम्मे अज्झुपेक्खिता, अथ खो अभिज्झा …पे… पञ्ञाय दिस्वा अज्झुपेक्खिता होतीति योजना.

पंसुपुञ्जट्ठानियस्स किलेसस्स उप्पत्तिट्ठानदस्सनत्थं ‘‘चतुमहापथो विय छ आयतनानि’’इच्चेव वुत्तं. कायादयो चत्तारो आरम्मणसतिपट्ठाना. चतूसु आरम्मणेसूति कायादीसु चतूसु आरम्मणेसु पवत्ता ¶ चत्तारो सतिपट्ठाना पंसुपुञ्जट्ठानियस्स किलेसस्स उपहननतो.

एकधम्मवग्गवण्णना निट्ठिता.

२. दुतियवग्गो

१-२. इच्छानङ्गलसुत्तादिवण्णना

९८७-९८८. कस्मातिआदि विहारसमापत्तिआचिक्खणे कारणं विभावेतुं आरद्धं.

एव-वाकारोति एव-कारो वा-कारो च. एकन्तसन्तत्ता एकन्तेन सन्तमनसिकारभावतो. सेक्खवचनेनेव तेसं सिक्खितब्बस्स अत्थिभावे सिद्धेपि सिक्खितब्बरहितेसु तेसुपि सेक्खपरियायस्स वुच्चमानत्ता सिक्खितब्बसद्देन सेक्खे विसेसेत्वा वुत्ता. आसवक्खयत्थं सिक्खितब्बस्स अभावेपि दिट्ठधम्मसुखविहारत्थं झानादिसिक्खनेन विना सिक्खितब्बाभावा ‘‘असेक्खा नामा’’ति वुत्ता. बुद्धानं पन सब्बसो सम्मदेव परिनिट्ठितसिक्खत्ता ‘‘सिक्खामी’’ति न वुत्तं. आनापानज्झानफलसमापत्ति तथागतविहारो.

३-१०. पठमआनन्दसुत्तादिवण्णना

९८९-९९६. अनिच्चादिवसेनाति ¶ अनिच्चदुक्खानत्तवसेन. पविचिनति पकारेहि विचिनति. निक्किलेसाति अपगतकिलेसा विक्खम्भितकिलेसा. पीतिसम्बोज्झङ्गो, पस्सद्धिसम्बोज्झङ्गोति पाठो.

याय अनोसक्कनं अनतिवत्तनञ्च होति, अयं तत्रमज्झत्तुपेक्खा मज्झत्ताकारोति वुत्ता. एकचित्तक्खणिकाति एकचित्तुप्पादपरियापन्नत्ता.

चत्तुन्नं चतुक्कानं वसेन सोळसक्खत्तुका. आनापानसन्निस्सयेन पवत्तत्ता आरम्मणवसेन पवत्ता आनापानारम्मणापि अपरभागे सति आनापानस्सतीति परियायेन वत्तब्बतं अरहतीति ‘‘आनापानस्सति मिस्सका कथिता’’ति वुत्तं. आनापानमूलकाति आनापानसन्निस्सयेन ¶ पवत्ता सतिपट्ठाना. तेसं मूलभूताति तेसं सतिपट्ठानानं मूलकारणभूता. बोज्झङ्गमूलकाति बोज्झङ्गपच्चयभूता. तेपि बोज्झङ्गाति एते वीसति सतिपट्ठानहेतुका बोज्झङ्गा. विज्जाविमुत्तिपूरकाति ततियविज्जाय तस्स फलस्स च परिपूरणवसेन पवत्ता बोज्झङ्गा. फलसम्पयुत्ताति चतुत्थफलसम्पयुत्ता, चतुब्बिधफलसम्पयुत्ता वा.

दुतियवग्गवण्णना निट्ठिता.

आनापानसंयुत्तवण्णना निट्ठिता.

११. सोतापत्तिसंयुत्तं

१. वेळुद्वारवग्गो

१. चक्कवत्तिराजसुत्तवण्णना

९९७. अनुग्गहगरहणेसु ¶ ¶ निपातोति अनुग्गण्हनगरहत्थजोतको निपातो. किमेत्थ अनुग्गण्हाति, किं वा गरहतीति आह ‘‘चतुन्न’’न्तिआदि. तत्थ अनुग्गण्हन्तो अनुच्छविकं कत्वा गण्हन्तो. गरहन्तो निन्दन्तो. इस्सरसीलो इस्सरो, तस्स भावो इस्सरियं, पभुता. अधीनं पति अधिपति, तस्स भावो आधिपच्चं, सामिभावोति आह – ‘‘इस्सरियाधिपच्च’’न्तिआदि. अनन्तकानीति अन्तरहितानि.

अवेच्चप्पसादेनाति वत्थुत्तयस्स गुणे याथावतो अवेच्च पविसित्वा पसादो. सो पन केनचि चलनरहितोति आह ‘‘अचलप्पसादेना’’ति. मग्गेनाति अरियमग्गेन. आगतप्पसादो तस्स अधिगमेन लद्धप्पसादो. अपुब्बं अचरिमन्ति एकज्झं. अरियसावकानञ्हि अरियमग्गो उप्पज्जन्तोव तीसु वत्थूसु अवेच्चप्पसादं आवहन्तो एव उप्पज्जति. तेसन्ति विसयभूतानं तिण्णं वत्थूनं वसेन तिधा वुत्तो. यस्मा च अत्थतो एको, तस्माव निन्नानाकरणो होति पवत्तट्ठानभेदे सतिपि. अरियसावकस्स हीतिआदिना नयेन तमत्थं विवरति. पसादो ओकप्पना. पेमं भत्ति. गारवं गरुकरणं. महन्तं उळारं. एतं विभागेन नत्थि सब्बत्थ समानत्ता.

एवन्ति भवन्तरेपि अकोपनीयताय. सदिसवसेनाति अञ्ञेहि अखण्डादीहि सदिसवसेन. तेनाह ‘‘मुखवट्टि यञ्हि छिन्ने’’तिआदि. खण्डा एतिस्सा अत्थीति खण्डा. एस नयो सेसेसुपि. पातिमोक्खे आगतानुक्कमेन सीलस्स आदिमज्झविभागो वेदितब्बो. द्विन्नं वा तिण्णं वाति सीलकोट्ठासानं. एकन्तरं भिन्नन्ति अभिन्नेन एकन्तरं हुत्वा भिन्नं. तेसं खण्डादीनं. ‘‘भुजिस्सेही’’ति उत्तरपदलोपेन निद्देसोति आह ‘‘भुजिस्सभावकरेही’’ति. इदं ¶ वीतिक्कन्तन्ति इदम्पि सीलं वीतिक्कन्तं. ‘‘अयं सीलस्स वीतिक्कमो’’ति एवं परामसितुं असक्कुणेय्येहि.

२. ब्रह्मचरियोगधसुत्तवण्णना

९९८. येसन्ति ¶ अनियमतो सद्धादीनमाधारभूतपुग्गलदस्सनं. बुद्धे पसादो गहितो. सो हि इतरेहि पठमं गहेतब्बोति. अरियकन्तानि सीलानि गहितानि सोतापन्नस्स सीलानं अधिप्पेतत्ता. सङ्घे पसादो गहितो धम्मप्पसादस्स अनन्तरं वुच्चमानत्ता. धम्मे पसादो गहितो अवेच्चप्पसादभावतो. सोतं अरियमग्गं आदितो पत्ति सोतापत्ति, तस्सा अङ्गानि सोतापत्तियङ्गानि. पच्चेन्तीति पजायन्ति अधिगच्छन्ति. तेनाह ‘‘पापुणन्ती’’ति. ब्रह्मचरियन्ति मग्गब्रह्मचरियं. कतरपसादो वत्तमानोति अधिप्पायो. मग्गप्पसादोति मग्गसम्पयुत्तो पसादो. आगतमग्गस्साति अधिगतमग्गस्स. मिस्सकप्पसादो एसोति तस्मा उभोपि थेरा पण्डिता बहुस्सुता.

३. दीघावुउपासकसुत्तवण्णना

९९९. यदग्गेन तस्मिं उपासके यथावुत्तानि सोतापत्तियङ्गानि संविज्जन्ति, तदग्गेन सो तेसु वत्तिस्सतीति आह ‘‘चतूसु सोतापत्तियङ्गेसु सन्दिस्ससी’’ति. विज्जं भजन्तीति विज्जाभागिया, तेसु कोट्ठासेसु परियापन्नाति वुत्तं ‘‘विज्जाभागियेति विज्जाकोट्ठासिके’’ति.

४-५. पठमसारिपुत्तसुत्तादिवण्णना

१०००-१००१. ‘‘सोतापत्ती’’ति पठममग्गो अधिप्पेतो, तस्स अधिगमूपायो सोतापत्तियङ्गं. तेनाह ‘‘सोतापत्तिया पुब्बभागपटिलाभङ्ग’’न्ति. सोतापत्तिअत्थायाति सोतापत्तिमग्गत्थाय. अङ्गन्ति कारणं. इतरे रतनत्तयप्पसादादयो. पुब्बभागियाय सोतापत्तिया अङ्गं कारणन्ति.

६. थपतिसुत्तवण्णना

१००२. (वितानं कायानं कालनकाय, कारणस्स उपगतानं सातपरिया सिज्झति. तत्थ ¶ कायपरिपज्झायमुखेन तन्तिं ठपेसि भगवा. न हि पस्सथ नमत्थेहि करणे निरत्थको पिति वत्तति. ‘‘नियतत्ता’’ति वुत्तं. तमेव नियमं ‘‘मज्झिमपदेसेयेवा’’ति अवधारणेन विभावेति ¶ . महामण्डलचारिकं चरन्तोपि मज्झिमपदेसस्स अन्तन्तेनेव चरति. तत्थ च विनेय्यजनस्स समोसरणता मत्तपनवाचमहत्थसुपनन्ति.) [एत्थन्तरे पाठो असुद्धो दुस्सोधनीयो च, सुद्धपाठो गवेसितब्बो.] अरुणुट्ठापनम्पि तत्थेव होति. पच्चन्तपदेसे पन दूरे विनेय्यजना होन्ति, तत्थ गन्त्वा मग्गफलेसु पतिट्ठापेत्वा ततो पच्चागन्त्वा मज्झिमपदेसे एव वासं उपगच्छति, तत्थ मनुस्सेहि कतानं कारानं महप्फलभावनियमनत्थन्ति दट्ठब्बं. ‘‘आसन्ने नो भगवा’’ति इदं निदस्सनमत्तन्ति दस्सेन्तो ‘‘न केवल’’न्ति आदिमाह.

सकिञ्चनसपलिबोधनट्ठेनाति एत्थ किञ्चनं पलिबोधो असमापितकिच्चता, तदुभयस्स अत्थिभावेनाति अत्थो. महावासेति महागेहे.

द्वेपि जनाति इसिदत्तपुराणा. सितं नाम मन्दहसितं. हसितं नाम विस्सट्ठहसितं. मुत्तचागोतिआदीसु यं वत्तब्बं, तं विसुद्धिमग्गटीकायं (विसुद्धि. महाटी. १.१६०) वुत्तनयेन वेदितब्बं. संविभागेति परस्स दानवसेन संविभजने. अकतविभागन्ति देय्यधम्मवसेन न कतविभागं. पुग्गलवसेन पन ‘‘सीलवन्तेही’’ति वुत्तत्ता कतविभागमेव महप्फलताकरणेन. तेनाह ‘‘सब्बं दातब्बमेव हुत्वा ठित’’न्ति.

(एत्थन्तरे पाठो असुद्धो दुस्सोधनीयो च, सुद्धपाठो गवेसितब्बो.)

७. वेळुद्वारेय्यसुत्तवण्णना

१००३. पवेणिआगतस्साति अनेकपुरिसयुगवसेन परम्परागतस्स. अत्तनि उपनेतब्बन्ति अत्तनि नेत्वा परस्मिं उपनेतब्बं. तेनाह ‘‘यो खो म्यायं धम्मो अप्पियो अमनापो, परस्सपेसो धम्मो अप्पियो अमनापो’’तिआदि. अमन्तभासेनाति सम्फस्स सम्फप्पलापस्स अमन्ताय मन्तारहितभासनेन.

८-९. पठमगिञ्जकावसथसुत्तादिवण्णना

१००४-५. द्वे गामा द्विन्नं ञातीनं गामाति कत्वा. ञातिकेति एवंलद्धनामे एकस्मिं ¶ गामके. गिञ्जकावसथेति गिञ्जका वुच्चन्ति इट्ठका, गिञ्जकाहि एव कतो आवसथो, तस्मिं. सो किर आवासो यथा ¶ सुधाहि परिकम्मेन पयोजनं नत्थि, एवं इट्ठकाहि एव चिनित्वा कतो. तेन वुत्तं ‘‘इट्ठकामये आवसथे’’ति. तुलाथम्भद्वारबन्धकवाटफलकानि पन दारुमया एव. ओरं वुच्चति कामधातु, पच्चयभावेन तं ओरं भजन्तीति ओरम्भागियानि, ओरम्भागस्स वा हितानि ओरम्भागियानि. तेनाह ‘‘हेट्ठाभागियान’’न्तिआदि. तीहि मग्गेहीति हेट्ठिमेहि तीहि मग्गेहि. तेहि पहातब्बताय हि तेसं सञ्ञोजनानं ओरम्भागियता, ओरं भञ्जियानि वा ओरम्भागियानि वुत्तानि निरुत्तिनयेन. इदानि ब्यतिरेकमुखेन नेसं ओरम्भागियभावं विभावेतुं ‘‘तत्था’’तिआदि वुत्तं. विक्खम्भितानि समत्थताविघातेन पुथुज्जनानं, समुच्छिन्नानि सब्बसो अभावेन अरियानं रूपारूपभवूपपत्तिया विबन्धनाय न होन्तीति वुत्तं ‘‘अविक्खम्भितानि मग्गेन वा असमुच्छिन्नानी’’ति. निब्बत्तिवसेनाति पटिसन्धिग्गहणवसेन गन्तुं न देन्ति. महग्गतभवगामिकम्मायूहनस्स विबन्धनतो सक्कायदिट्ठिआदीनि तीणि सञ्ञोजनानि कामच्छन्दब्यापादा विय महग्गतभवूपपत्तिया विसेसपच्चयत्ता तत्थ महग्गतभवे निब्बत्तम्पि तन्निब्बत्तिहेतुकम्मपरिक्खये कामभवूपपत्तिपच्चयताय महग्गतभवतो आनेत्वा इधेव कामभवे एव निब्बत्तापेन्ति. तस्मा सब्बानिपि पञ्चपि संयोजनानि ओरम्भागियानेव. पटिसन्धिवसेन अनागमनसभावोति पटिसन्धिग्गहणवसेन तस्मा लोका इध न आगमनसभावो. बुद्धदस्सन-थेरदस्सन-धम्मस्सवनानं पन अत्थाय अस्स आगमनं अनिवारितं.

कदाचि उप्पत्तिया विरळाकारता, परियुट्ठानमन्दताय अबहलताति द्वेधापि तनुभावो. अभिण्हन्ति बहुसो. बहलबहलाति तिब्बतिब्बा. यत्थ उप्पज्जन्ति, तं सन्तानं मद्दन्ता फरन्ता साधेन्ता अन्धकारं करोन्ता उप्पज्जन्ति, द्वीहि पन मग्गेहि पहीनत्ता तनुकतनुका मन्दमन्दा उप्पज्जन्ति. पुत्तधीतरो होन्तीति इदं अकारणं. तथा हि अङ्गपच्चङ्गपरामसनमत्तेनपि ते होन्ति. इदन्ति ‘‘रागदोसमोहानं तनुत्ता’’ति इदं वचनं. भवतनुकवसेनाति अप्पकभववसेन. तन्ति महासीवत्थेरस्स वचनं पटिक्खित्तन्ति सम्बन्धो. ये भवा अरियानं लब्भन्ति, ते परिपुण्णलक्खणभवा एव. ये न लब्भन्ति, तत्थ कीदिसं तं भवतनुकं. तस्मा उभयथापि भवतनुकस्स असम्भवो एवाति दस्सेतुं ‘‘सोतापन्नस्सा’’तिआदि वुत्तं. अट्ठमे भवे भवतनुकं नत्थि अट्ठमस्सेव भवस्स सब्बस्सेव अभावतो. सेसेसुपि एसेव नयो.

कामावचरलोकं ¶ सन्धाय वुत्तं इतरस्स लोकस्स वसेन तथा वत्तुं असक्कुणेय्यत्ता. यो हि ¶ सकदागामी देवमनुस्सलोकेसु वोमिस्सकवसेन निब्बत्तति, सोपि कामभववसेनेव परिच्छिन्दितब्बो. भगवता च कामलोके ठत्वा – ‘‘सकिदेव इमं लोकं आगन्त्वा’’ति वुत्तं. इमं लोकं आगन्त्वाति च इमिना पञ्चसु सकदागामीसु चत्तारो वज्जेत्वा एकोव गहितो. एकच्चो हि इध सकदागामिफलं पत्वा इधेव परिनिब्बायति, एकच्चो इध पत्वा देवलोके परिनिब्बायति, एकच्चो देवलोके पत्वा तत्थेव परिनिब्बायति, एकच्चो देवलोके पत्वा इधूपपज्जित्वा परिनिब्बायति, इमे चत्तारो इध न लब्भन्ति. यो पन इध पत्वा देवलोके यावतायुकं वसित्वा पुन इधूपपज्जित्वा परिनिब्बायति, अयमिध अधिप्पेतो. अट्ठकथायं पन ‘‘इमं लोकन्ति कामभवो अधिप्पेतो’’ति इममत्थं विभावेतुं ‘‘सचे ही’’तिआदिना अञ्ञंयेव चतुक्कं दस्सितं.

चतूसु…पे… सभावोति अत्थो अपायगमनीयानं पापधम्मानं सब्बसो पहीनत्ता. धम्मनियामेनाति मग्गधम्मनियामेन नियतो उपरिमग्गाधिगमस्स अवस्संभाविभावतो. तेनाह ‘‘सम्बोधिपरायणो’’ति. तेसं तेसं ञाणगतिन्ति तेसं तेसं सत्तानं ‘‘असुको सोतापन्नो, असुको सकदागामी’’तिआदिना तंतंञाणाधिगमनं ञाणूपपत्तिं. ञाणाभिसम्परायन्ति ततो परम्पि – ‘‘नियतो सम्बोधिपरायणो सकिदेव इमं लोकं आगन्त्वा दुक्खस्सन्तं करिस्सती’’तिआदिना ञाणसहितं उपपत्तिपच्चयभवं. ओलोकेन्तस्स ञाणचक्खुना अपेक्खन्तस्स. केवलं कायकिलमथोव, न तेन काचि परेसं अत्थसिद्धीति अधिप्पायो. चित्तविहेसा चित्तखेदो, सा किलेसूपसंहितत्ता बुद्धानं नत्थि.

आदिस्सति आलोकीयति अत्ता एतेनाति आदासं, धम्मभूतं आदासं धम्मादासं, अरियमग्गञाणस्सेतं अधिवचनं. तेन हि अरियसावको चतूसु अरियसच्चेसु विद्धस्तसम्मोहत्ता अत्तानं याथावतो ञत्वा याथावतो ब्याकरेय्य, तप्पकासनतो पन धम्मपरियायस्स सुत्तस्स धम्मादासता वेदितब्बाति. येन धम्मादासेनाति इध पन मग्गधम्ममेव वदति. सेसं उत्तानत्थत्ता सुविञ्ञेय्यमेवाति.

वेळुद्वारवग्गवण्णना निट्ठिता.

२. राजकारामवग्गो

१. सहस्सभिक्खुनिसङ्घसुत्तवण्णना

१००७. धम्मिकत्ता ¶ ¶ देसवासीहि अनुकम्पितो राजाति राजको, तस्स आरामो राजकारामो, तस्मिं. भूमिसीसं सेट्ठप्पदेसो, यत्थ वसन्तो लाभग्गयसग्गप्पत्तो होतीति तेसं अधिप्पायो.

वारापेहीति पटिसेधेहि. युज्झापेतुन्ति कलहं कारापेतुं. पुन आगच्छन्ताति अपरस्मिं संवच्छरे आगच्छन्ता. उब्बट्टेत्वाति महती वीचियो उब्बट्टेत्वा. यथा तस्स सकलमेव रट्ठं एकोदकीभूतं होति, एवं कत्वा समुद्दमेव जातं. तेन वुत्तं ‘‘समुद्दमेव अकंसू’’ति.

इसीनमन्तरं कत्वाति इसीनं कारणं कत्वा, इसीनं हेतूति अत्थो, इसीनं वा अन्तरभेदं कत्वा. तथा लोके कोलाहलस्स पत्थटतं विभावेन्तो भगवा ‘‘मे सुत’’न्ति आह पच्चक्खतो जानम्पि. उच्छिन्नोति कुलच्छेदेन उच्छिन्नो. न केवलं सयमेव, अथ खो सह रट्ठेहि. विभवन्ति विनासं उपगतो.

तं सन्धायेतं वुत्तन्ति तं यथावुत्तं पसेनदिना कोसलराजेन कारितं विहारं सन्धाय एतं ‘‘राजकारामे’’ति वुत्तं.

२-३. ब्राह्मणसुत्तादिवण्णना

१००८-९. उदयगामिनिन्ति आरम्भतो पट्ठाय सम्पत्तिआवहं.

४. दुग्गतिभयसुत्तवण्णना

१०१०. दुट्ठा गति निप्फत्ति दुग्गति, दुग्गतभावो दालिद्दियं, तदेव भयं, तं सब्बं अनवसेसं वा दुग्गतिभयं दलिद्दभयं. सम्मदेव अतिक्कन्तोति समतिक्कन्तो.

६. पठममित्तामच्चसुत्तवण्णना

१०१२. वोहारमित्ताति ¶ तंतंदानग्गहणवसेन वोहारका मित्ता. आमन्तनपटिमन्तनइरियापथादीसुपीति आलापसल्लापगमननिसज्जादिअत्थसंविधानादीसु ¶ . एकतो पवत्तकिच्चाति सह पवत्तकत्तब्बा. अमा सह भवन्तीति अमच्चा. ‘‘अम्हाकं इमे’’ति ञायन्तीति ञाती, आवाहविवाहसम्बद्धा. तेनाह ‘‘सस्सुससुरपक्खिका’’ति. योनिसम्बन्धा वा सालोहिता. तेनाह ‘‘भातिभगिनिमातुलादयो’’ति.

७. दुतियमित्तामच्चसुत्तवण्णना

१०१३. किस्मिञ्चि कस्सचि च तथा तथा उप्पन्नस्स पसादस्स अञ्ञथाभावो पसादञ्ञथत्तं. भूतसङ्घातस्स घनआदिकस्स अञ्ञथाभावो भावञ्ञथत्तं. निरयादिगतिअन्तरउपपत्ति गतिअञ्ञथत्तं. सभावधम्मानं कक्खळफुसनादिलक्खणस्स अञ्ञथाभावो लक्खणञ्ञथत्तं. ‘‘ठितस्स अञ्ञथत्तं पञ्ञायती’’ति एवं वुत्तं अञ्ञथत्तं विपरिणामञ्ञथत्तं. लक्खणञ्ञथत्तं न लब्भति. तेनाह ‘‘लक्खणं पन न विगच्छती’’ति, सेसं लब्भतीति. पथवीधातुयाति ससम्भारपथवीधातुया. आपोधातुयाति एत्थापि एसेव नयो. पुरिमभावोति घनकठिनभावो. भावञ्ञथत्तं रसञ्ञथत्तसभावो. गतिअञ्ञथत्तं उग्गतूपपत्ति. तेनाह ‘‘तञ्हि अरियसावकस्स नत्थी’’ति. पसादञ्ञथत्तम्पि नत्थियेव अरियसावकस्स.

राजकारामवग्गवण्णना निट्ठिता.

३. सरणानिवग्गो

१-२. पठममहानामसुत्तादिवण्णना

१०१७-१८. समिद्धन्ति सम्पुण्णं. सुपुप्फितन्ति उपसोभितताय सुपुप्फितसदिसत्ता. ब्यूहा नाम येहि एव पविसन्ति, तेहि एव निक्खमन्ति. तेनाह ‘‘ब्यूहा वुच्चन्ति अविनिब्बिद्धरच्छायो’’ति. उद्धतचारिनाति यट्ठन्तरा.

३. गोधसक्कसुत्तवण्णना

१०१९. तीहीति ¶ रतनत्तये उप्पन्नेहि तीहि पसादधम्मेहि. चतूहीति तेहि एव सद्धिं सीलेन. कोचिदेवातिआदि परिकप्पवसेन वुत्तं भगवति ¶ अत्तनो सद्धाय उळारतमभावदस्सनत्थं. तेनाह ‘‘भगवतो सब्बञ्ञुताया’’तिआदि. धम्मो समुप्पादोति विवादधम्मउप्पत्तिहेतु. तदेव हि सन्धायाह ‘‘किञ्चिदेव कारण’’न्ति. कारणन्ति नानाकारणं. कल्याणकुसलविमुत्तन्ति अकल्याणं अकुसलं, तदिदं यथावुत्तअप्पसादनेन अपनीतअत्थदस्सनत्थं. अस्साति महानामसक्कस्स. अनवज्जनदोसो एसोति चतूसु धम्मेसु एकेनपि समन्नागतो सोतापन्नो होतीति अनुजानित्वा चतूहिपि समन्नागतेन आचिक्खितब्बन्ति याथावतो अनवज्जनदोसोति अत्थो.

४. पठमसरणानिसक्कसुत्तवण्णना

१०२०. पमाणेनाति एकेन पमाणेन, न सब्बसो. ओलोकनं खमन्तीति दस्सनमग्गेन चतुसच्चधम्मा पच्चत्तं पस्सितब्बा पटिविज्झितब्बा. पठममग्गक्खणे हि चतुसच्चधम्मा एकदेसतोव दिट्ठा नाम होन्ति. ‘‘परिमुच्चती’’ति पन वत्तुं वट्टति पटिविज्झनकिरियाय वत्तमानत्ता. अगन्त्वा अपायेसु अनुप्पत्तिरहत्ता. तेनाह ‘‘न गच्छती’’ति, न उप्पज्जतीति अत्थो. महासाररुक्खे दस्सेन्तो आह – ‘‘यो कोचि विञ्ञुजातिको मम चे गोचरं गच्छति, एकस्स आगमनं अवञ्झं अमोघ’’न्ति दस्सेतुं.

५. दुतियसरणानिसक्कसुत्तवण्णना

१०२१. दुक्खेत्तं निरोजकं, ताय एव दुक्खेत्तताय विसमं होतीति आह ‘‘विसमखेत्त’’न्ति. लोणूपहतन्ति जातसभावेन लोणेन ऊसरेन उपहतं. खण्डानीति खण्डितानि. तेमेत्वाति तेमितत्ता. वातातपहतानीति चिरकालं वातेन चेव आतपेन च उपहतानि आबाधितानि.

६. पठमअनाथपिण्डिकसुत्तवण्णना

१०२२. ठानन्ति ठानसो. तेनाह ‘‘खणेना’’ति. निय्यानिकन्ति पवत्तं ञाणपटिरूपकं ¶ पकतिपुरिसन्तरजाननादिमिच्छाञाणं. तं पन अनिय्यानिकं ‘‘निय्यानिक’’न्ति पच्चवेक्खणवसेन पवत्तेय्याति आह ‘‘मिच्छापच्चवेक्खणेना’’ति. गुणवियुत्तस्स अत्तनो सकत्तनि अवट्ठानसङ्खाता विमुत्ति मिच्छाविमुत्ति.

७. दुतियअनाथपिण्डिकसुत्तवण्णना

१०२३. यथाकम्मं ¶ सम्परेतब्बतो सम्परायो, पेच्चभवो, सम्परायहेतुकं सम्परायिकं, मरणभयं.

सरणानिवग्गवण्णना निट्ठिता.

४. पुञ्ञाभिसन्दवग्गो

१. पठमपुञ्ञाभिसन्दसुत्तवण्णना

१०२७. अविच्छेदेन निच्चप्पवत्तियमानानि पुञ्ञानि अभिसन्दनट्ठेन ‘‘पुञ्ञाभिसन्दा’’ति वुत्ता, तेन पुञ्ञनदियोति अत्थो वुत्तो. सुखस्स आहरणतो आनयनतो सुखस्साहारो.

४. पठमदेवपदसुत्तवण्णना

१०३०. देवानन्ति विसुद्धिदेवानं. देवपदानीति तेसं पदानि देवपदानि, देवोति वा सम्मासम्बुद्धो. देवस्स ञाणेन अक्कन्तपदानीति पटिवेधञाणेन चेव देसनाञाणेन च अक्कन्तपदानि. देवा नाम जातिदेवा. तेसम्पि देवट्ठेन देवोति देवदेवो, सम्बुद्धो.

८. वस्ससुत्तवण्णना

१०३४. पारं वुच्चति निब्बानं संसारमहोघस्स परतीरभावतो. तेनाह – ‘‘तिण्णो पारङ्गतो, थले तिट्ठति ब्राह्मणो (सं. नि. ४.२३८; इतिवु. ६९; पु. प. १८८), ये ¶ जना पारगामिनो’’ति (ध. प. ८५) च. अथ वा पाति रक्खतीति पारं, निब्बानं. यो पटिविज्झति, तं वट्टदुक्खतो पाति रक्खति, अच्चन्तहितेन च विमुत्तिसुखेन च रमेति, तस्मा पारन्ति वुच्चति. गच्छमाना एवाति पारं निब्बानं गच्छमाना एव. ते धम्मा आसवानं खयाय संवत्तन्ति सच्छिकिरियापहानपटिवेधानं समकालत्ता.

१०. नन्दियसक्कसुत्तवण्णना

१०३६. पविवेकत्थायाति ¶ पविवेकसुखत्थाय. पटिसल्लानत्थायाति बहिद्धा नानारम्मणतो चित्तं पटिनिवत्तेत्वा कम्मट्ठाने सम्मदेव लीनत्थाय.

पुञ्ञाभिसन्दवग्गवण्णना निट्ठिता.

५. सगाथकपुञ्ञाभिसन्दवग्गो

१. पठमअभिसन्दसुत्तवण्णना

१०३७. सङ्ख्या अत्थि हेट्ठा महापथविया, उपरि आकासेन, परितो चक्कवाळपब्बतेन, मज्झे तत्थ तत्थ ठितेहि दीपपब्बतपरियन्तेहि परिच्छिन्नत्ता. जानन्तेन योजनतो सङ्खातुं सक्काति अधिप्पायो. महासरीरमच्छ-कुम्भील-यक्ख-रक्खस-महानागदानवादीनं सविञ्ञाणकानं, बळवामुखपातालादीनं अविञ्ञाणकानं भेरवारम्मणानं वसेन बहुभेरवं.

२. दुतियअभिसन्दसुत्तवण्णना

१०३८. सम्भेदेति सम्भेदं समोधानं गतट्ठाने. यत्थिमा महानदियो संसन्दन्ति समेन्तीति परिकप्पवचनमेतं. तादिसासु हि महानदीसु काचि पुरत्थिमसमुद्दं पविट्ठा, काचि पच्छिमं.

३. ततियअभिसन्दसुत्तवण्णना

१०३९. ‘‘कुसले ¶ पतिट्ठितो’’ति एत्थ यं अच्चन्तिकं कुसले पतिट्ठानं. तं दस्सेन्तो ‘‘मग्गकुसले पतिट्ठितो’’ति आह, हेट्ठिममग्गकुसलेति अधिप्पायो. तेनाह ‘‘भावेति मग्ग’’न्ति. अरियफलंयेव धम्मसारो. किलेसा खीयन्ति एत्थाति किलेसक्खयो, निब्बानं, तस्मिं किलेसक्खये रतो.

४. पठममहद्धनसुत्तवण्णना

१०४०. अरियानं ¶ बुद्धानं धनन्तिपि अरियधनं, निब्बानन्ति केचि. अनयतोपि विसुद्धट्ठेन अरियञ्च तं धनञ्च धनायितट्ठेनाति अरियधनं, तेन अरियधनेन. तेनेव भोगेनाति अरियधनभोगेन.

सगाथकपुञ्ञाभिसन्दवग्गवण्णना निट्ठिता.

६. सप्पञ्ञवग्गो

२. वस्संवुत्थसुत्तवण्णना

१०४८. समोधानेत्वाति येहि इन्द्रियादीहि भावियमानेहि सोतापत्तिमग्गो अनुप्पत्तो, तानेव. धम्मसमानताय चेतं वुत्तं. अञ्ञानेव हि अत्थतो तं तं मग्गं साधकानि इन्द्रियादीनि. तन्ति पवेणी कथिताति यं कञ्चि विनेय्यपुग्गलं अनपेक्खित्वा केवलं तन्तिवसेन ठिति कथिता.

३. धम्मदिन्नसुत्तवण्णना

१०४९. सत्तसु जनेसूति सत्तसु कित्तियमानेसु उपासकजनेसु. गम्भीरातिआदीसु धम्मगम्भीराति पाळिगतिया गम्भीरा, तथा च सल्लसुत्तं हेट्ठा पकासितमेव. ‘‘चेतनाहं, भिक्खवे, कम्मं वदामी’’तिआदिना (अ. नि. ६.६३; कथा. ५३९) आगतं चेतनासुत्तं ¶ . तत्थ ‘‘चेतनासहजातं नानाक्खणिक’’न्तिआदिना पट्ठाने आगतनयेन, सुत्तेसु (अ. नि. ३.१०१) च ‘‘दिट्ठधम्मवेदनीय’’न्तिआदिना आगतनयेन गम्भीरभावो वेदितब्बो, निब्बानस्स चेव अरियमग्गस्स च पकासनतो असङ्खतसंयुत्तस्स लोकुत्तरत्थदीपकता. ‘‘अतीतंपाहं रूपेन खज्जिं, एतरहि खज्जामी’’तिआदिना पञ्चन्नं खन्धानं खादकभावस्स, पुग्गलस्स खादितब्बताय विभावनेन खज्जनीयपरियाये (सं. नि. ३.७९) विसेसतो निस्सत्तनिज्जीवता दीपिताति वुत्तं ‘‘सत्तसुञ्ञतादीपका खज्जनिकसुत्तन्तादयो’’ति. उपसम्पज्ज विहरिस्सामाति ये तेसु सुत्तेसु वुत्तपटिपदं सम्मदेव परिपूरेन्ति, ते तेसु उपसम्पज्ज विहरन्ति नाम ¶ . एत्थाति ‘‘न खो नेत’’न्ति एत्थ न-कारो ‘‘अञ्ञमञ्ञ’’न्ति एत्थ म-कारो विय ब्यञ्जनसन्धिमत्तमेव, नास्स कोचि अत्थो.

४. गिलानसुत्तवण्णना

१०५०. न खो पनेतन्ति न खो एतं, नोति च अम्हेहीति अत्थोति आह ‘‘न खो अम्हेही’’तिआदि. अस्ससन्तीति अस्सासनीयाति आह ‘‘अस्सासकरेही’’ति. मरिस्सतीति मारिसो, एकन्तभाविमरणो, सो पन मरणाधीनवुत्तिकोति वुत्तं ‘‘मरणपटिबद्धो’’ति. अधिमुच्चेहीति अधिमुत्तिं उप्पादेहि. तं पन तथा चित्तस्स पणिधानं ठपनन्ति आह ‘‘ठपेही’’ति. आगमनीयगुणेसूति पुब्बभागगुणेसु. पमाणं नाम नत्थि अनन्तापरिमाणत्ता. नानाकरणं नत्थि विमुत्तिया निन्नानत्ता.

९. पञ्ञापटिलाभसुत्तवण्णना

१०५५. पञ्ञापटिलाभायाति मग्गफलपञ्ञाय पटिलाभत्थं. तेनाह ‘‘सत्त सेक्खा’’तिआदि.

सप्पञ्ञवग्गवण्णना निट्ठिता.

७. महापञ्ञवग्गो

१. महापञ्ञसुत्तवण्णना

१०५८. महन्ते ¶ अत्थे परिग्गण्हातीति सच्चपटिच्चसमुप्पादादिके महावित्थारे अत्थे परिच्छिज्ज असेसेत्वा मुट्ठिगते विय कत्वा गण्हाति. सेसं हेट्ठा वुत्तनयमेव.

महापञ्ञवग्गवण्णना निट्ठिता.

सोतापत्तिसंयुत्तवण्णना निट्ठिता.

१२. सच्चसंयुत्तं

१. समाधिवग्गो

१. समाधिसुत्तवण्णना

१०७१. चित्तेकग्गतायाति ¶ ¶ निस्सक्कवचनं ‘‘परिहायन्ती’’ति पदं अपेक्खित्वा. यथाभूतादिवसेनाति यथागतादिवसेन. यथाभूतं नाम इमस्मिं सुत्ते ‘‘समाहितो, भिक्खवे, भिक्खु यथाभूतं पजानाती’’तिआदि. आदि-सद्देन ‘‘तथा यस्मा’’तिआदिसङ्गहो दट्ठब्बो. तथा हि यथाभूतवसेन कारणच्छेदो कतो ‘‘तथा यस्मा’’तिआदिवचनेहि. वण्णाति अक्खरा, ‘‘गुणा’’ति केचि. पदब्यञ्जनानीति नामादिपदानि चेव तंसमुदायभूतब्यञ्जनानि च.

३. पठमकुलपुत्तसुत्तादिवण्णना

१०७३-७५. सासनावचरा अधिप्पेता बाहिरकानं सच्चाभिसमयस्स अभावतो. तथाति इमिना चतुत्थपञ्चमेसु अत्थविसेसाभावं दस्सेति. यदि एवं कस्मा विसुं विसुं देसनाति आह ‘‘तेन तेन अभिलापेना’’तिआदि.

१०. तिरच्छानकथासुत्तवण्णना

१०८०. दुग्गतितो संसारतो च निय्याति एतेनाति निय्यानं, सग्गमग्गो मोक्खमग्गो च. तस्मिं निय्याने नियुत्ता, तं एत्थ अत्थीति निय्यानिका. वचीदुच्चरितसंकिलेसतो वा निय्यातीति ई-कारस्स रस्सत्तं य-कारस्स क-कारं कत्वा निय्यानिका. चेतनाय सद्धिं सम्फप्पलापा वेरमणि. तप्पटिपक्खतो अनिय्यानिका, तस्स भावो अनिय्यानिकत्तं. तिरच्छानभूतन्ति तिरोकरणभूतं. कम्मट्ठानभावेति अनिच्चतापटिसंयुत्तचतुसच्चकम्मट्ठानभावे. सात्थकन्ति दानसीलादिनिस्सितत्ता हितपटिसंयुत्तं.

विसिखाति ¶ घरसन्निवेसो. विसिखागहणेन च गामादिगहणे विय तन्निवासिनो विसेसतो गहिता ‘‘आगतो गामो’’तिआदीसु विय ¶ . तेनाह ‘‘सूरा समत्था’’ति. कुम्भट्ठानापदेसेन कुम्भदासियो वुत्ताति आह – ‘‘कुम्भदासिकथा’’ति. अयाथावतो उप्पत्तिट्ठितिसंहारादिवसेन लोको अक्खायति एतेनाति लोकक्खायिका. इति इमिना पकारेन भवो, इमिना अभवोति एवं पवत्ताय इतिभवाभवकथाय सद्धिं.

समाधिवग्गवण्णना निट्ठिता.

२. धम्मचक्कप्पवत्तनवग्गो

१. धम्मचक्कप्पवत्तनसुत्तवण्णना

१०८१. ‘‘इसीनं पतनुप्पतनवसेन ओसीदनउप्पतनट्ठानवसेन एवं ‘इसिपतन’न्ति ‘लद्धनामे’ति सङ्खेपतो वुत्तमत्थं विवरितुं ‘एत्थ ही’’’तिआदि वुत्तं.

आमन्तेसीति एत्थ यस्मा धम्मचक्कप्पवत्तनत्थं अयं आमन्तना, तस्मा समुदागमतो पट्ठाय सत्थु पुब्बचरितं सङ्खेपेनेव पकासेतुं वट्टतीति ‘‘दीपङ्करपादमूले कताभिनीहारतो पट्ठाया’’तिआदि आरद्धं. तत्थ मारबलं भिन्दित्वाति मारञ्च मारबलञ्च भञ्जित्वा. अथ वा मारस्स अब्भन्तरं बाहिरञ्चाति दुविधं बलं भञ्जित्वा. ‘‘द्वेमे, भिक्खवे, अन्ता’’ति एत्थ अन्त-सद्दो ‘‘पुब्बन्ते ञाणं अपरन्ते ञाण’’न्तिआदीसु (ध. स. १०६३) विय भागपरियायोति आह ‘‘द्वे इमे, भिक्खवे, कोट्ठासा’’ति. सह समुदाहारेनाति उच्चारणसमकालं. पत्थरित्वा अट्ठासि बुद्धानुभावेन. ब्रह्मानो समागच्छिंसु परिपक्ककुसलमूला सच्चाभिसम्बोधाय कताधिकारा.

गिहिसञ्ञोजनन्ति गिहिबन्धनं. छिन्दित्वाति हरित्वा. न वळञ्जेतब्बाति नानुयुञ्जेतब्बा. किलेसकामसुखस्साति किलेसकामयुत्तस्स सुखस्स. अनुयोगोति अनुभवो. गामवासीहि सेवितब्बत्ता गामवासीनं सन्तको. अत्तनोति अत्तभावस्स. आहितो अहंमानो एत्थाति अत्ता, अत्तभावो. दुक्खकरणन्ति दुक्खुप्पादनं. अत्तमारणेहीति ¶ अत्तबाधनेहि. उपसमायाति ¶ किलेसवूपसमो अधिप्पेतो, तदत्थसम्पदानवचनन्ति आह ‘‘किलेसूपसमत्थाया’’ति. एस नयो सेसेसुपि.

सच्चञाणादिवसेन तयो परिवट्टा एतस्साति तिपरिवट्टं, ञाणदस्सनं. तेनाह ‘‘सच्चञाणा’’तिआदि. यथाभूतं ञाणन्ति पटिवेधञाणं आह. तेसुयेव सच्चेसु. ञाणेन कत्तब्बस्स च परिञ्ञापटिवेधादिकिच्चस्स च जाननञाणं, ‘‘तञ्च खो पटिवेधतो पगेवा’’ति केचि. पच्छाति अपरे. तथा कतञाणं. द्वादसाकारन्ति द्वादसविधआकारभेदं. अञ्ञत्थाति अञ्ञेसु सुत्तेसु.

पटिवेधञाणम्पि देसनाञाणम्पि धम्मचक्कन्ति इदं तत्थ ञाणकिच्चं पधानन्ति कत्वा वुत्तं. सद्धिन्द्रियादिधम्मसमुदायो पन पवत्तनट्ठेन चक्कन्ति धम्मचक्कं. अथ वा चक्कन्ति आणा, धम्मतो अनपेतत्ता धम्मञ्च तं चक्कञ्च, धम्मेन ञायेन चक्कन्तिपि धम्मचक्कं. यथाह ‘‘धम्मञ्च पवत्तेति चक्कञ्चाति धम्मचक्कं, चक्कञ्च पवत्तेति धम्मञ्चाति धम्मचक्कं, धम्मेन पवत्ततीति धम्मचक्कं, धम्मचरियाय पवत्ततीति धम्मचक्क’’न्तिआदि (पटि. म. २.४०-४१). उभयम्पीति पटिवेधञाणं देसनाञाणन्ति उभयम्पि. एतन्ति तदुभयं. इमाय देसनायाति इमिना सुत्तेन पकासेन्तेन भगवता यथावुत्तञाणद्वयसङ्खातं धम्मचक्कं पवत्तितं नाम पवत्तनकिच्चस्स अनिट्ठितत्ता. पतिट्ठितेति अञ्ञासि कोण्डञ्ञत्थेरेन सोतापत्तिफले पतिट्ठिते. पवत्तितं नाम कस्सपसम्मासम्बुद्धस्स सासनन्तरधानतो पट्ठाय याव बुद्धुप्पादो, एत्तकं कालं अप्पवत्तपुब्बस्स पवत्तितत्ता, उपरिमग्गाधिगमो पनस्स अत्थङ्गतो एवाति.

एकप्पहारेनाति एकेनेव पहारसञ्ञितेन कालेन. दिवसस्स हि ततियो भागो पहारो नाम. पाळियं पन ‘‘तेन खणेन तेन लयेन तेन मुहुत्तेना’’ति वुत्तं. तं पहारक्खणसल्लक्खणमेव. सब्बञ्ञुतञ्ञाणोभासोति सब्बञ्ञुतञ्ञाणानुभावेन पवत्तो ओभासो चित्तं पटिच्च उतुसमुट्ठानो वेदितब्बो. यस्मा भगवतो धम्मचक्कप्पवत्तनस्स आरम्भे विय परिसमापने अतिविय उळारतमं पीतिसोमनस्सं उदपादि, तस्मा ‘‘इमस्सपि उदानस्सा’’तिआदि वुत्तं.

९. सङ्कासनसुत्तवण्णना

१०८९. अत्थसंवण्णने ¶ वण्णीयन्तेति वण्णा. तेयेव परियायेन अक्खरणतो अक्खरानि ¶ . अत्थं ब्यञ्जेन्तीति ब्यञ्जनानि. यस्मा पन अकारादिके सरसमञ्ञा, ककारादिके ब्यञ्जनसमञ्ञा, उभयत्थ वण्णसमञ्ञा, तस्मा वुत्तं ‘‘वण्णानं वा एकदेसा यदिदं ब्यञ्जना नामा’’ति. नेत्तियं पन वाक्ये ब्यञ्जनसमञ्ञा. ब्यञ्जनग्गहणेनेव चेत्थ आकारनिरुत्तिनिद्देसा गहिता एवाति दट्ठब्बं. सङ्कासनाति अत्थस्स ञापना भागसो. तेनाह ‘‘विभत्तियो’’ति. सङ्कासनग्गहणेनेव चेत्थ पकासना वुत्ता होति. विभत्तियो हि अत्थवचनेनेव विवरन्ति, ताहि कारणपञ्ञत्तियो वुत्तायेवाति, ताहिपि अत्थपदानि गहितानेव होन्ति. अयमेत्थ सङ्खेपो, वित्थारो पन विसुद्धिमग्गवण्णनायं नेत्तिअट्ठकथायञ्च वुत्तनयेन वेदितब्बो. सब्बाकारेनाति सभागादिविभावनाकारेन. वण्णादीनन्ति तस्मिं पन वित्थारे पवत्तवण्णादीनं. तस्माति वण्णादीनं अन्तअभावतो. एवमाहाति ‘‘अपरिमाणा वण्णा ब्यञ्जना सङ्कासना’’ति एवमाह.

१०. तथसुत्तवण्णना

१०९०. सभावाविजहनट्ठेनाति अत्तनो दुक्खसभावस्स कदाचिपि अपरिच्चजनेन तथसभावं. तेनाह ‘‘दुक्खञ्हि दुक्खमेव वुत्त’’न्ति. सभावस्साति दुक्खसभावस्स. अमोघतायाति अवञ्झताय. अवितथन्ति न वितथं. तेनाह ‘‘न हि दुक्खं अदुक्खं नाम होती’’ति. अञ्ञभावानुपगमेनाति समुदयादिसभावानुपगमनेन मुसा न होतीति अञ्ञो अञ्ञथा न होतीति अनञ्ञथं. तेनाह ‘‘न ही’’तिआदि.

धम्मचक्कप्पवत्तनवग्गवण्णना निट्ठिता.

३. कोटिगामवग्गो

१. कोटिगामसुत्तवण्णना

१०९१. अननुबोधाति ¶ पटिवेधस्स अनुरूपबोधाभावेन. अप्पटिवेधाति सच्चानं पटिमुखं वेधाभावेन.

२. दुतियकोटिगामसुत्तवण्णना

१०९२. फलसमाधिफलपञ्ञानन्ति ¶ अग्गफलसमाधिअग्गफलपञ्ञानं.

७. तथसुत्तवण्णना

१०९७. अरियानन्ति बुद्धानं अरियानं. तेनाह ‘‘न ही’’तिआदि.

८. लोकसुत्तवण्णना

१०९८. पटिविद्धत्ता देसितत्ता चाति इमिना पटिवेधञाणेन देसनाञाणेन च परिग्गहितत्ता अरियसन्तकानि होन्ति अरियस्स भगवतो सन्तकभावतो.

१०. गवम्पतिसुत्तवण्णना

११००. एकप्पटिवेधोति एकेनेव ञाणेन चतुन्नं अरियसच्चानं एकज्झं पटिवेधो.

कोटिगामवग्गवण्णना निट्ठिता.

४. सीसपावनवग्गो

३. दण्डसुत्तवण्णना

११०१. पुनप्पुनं वट्टस्मिंयेव निब्बत्तन्ति अदिट्ठत्ता चतुन्नं अरियसच्चानं.

५. सत्तिसतसुत्तवण्णना

११०५. भवेय्य ¶ चेति दुक्खदोमनस्सानि अज्झुपेक्खित्वा सहितेहि तेहि सच्चाभिसमयो भवेय्याति एवं परिकप्पना न कातब्बाति.

९. इन्दखीलसुत्तवण्णना

११०९. अज्झासयन्ति ¶ सस्सतादिभेदं अज्झासयं. सो हि ‘‘इदमेव सच्चं मोघमञ्ञ’’न्ति गाहस्स मुखभूतत्ता मुखन्ति अधिप्पेतो. तञ्च अपरे अदिट्ठसच्चा ओलोकेन्ति, दिट्ठसच्चा पन नेव ओलोकेन्ति.

१०. वादत्थिकसुत्तवण्णना

१११०. कुक्कुको पमाणमज्झिमस्स पुरिसस्स हत्थोति अत्थो. कुक्कूति तस्सेव नामं.

सीसपावनवग्गवण्णना निट्ठिता.

५. पपातवग्गो

१. लोकचिन्तासुत्तवण्णना

११११. लोकचिन्तन्ति लोकसन्निवेसपटिसंयुत्तवीमंसाव. ‘‘लोकचित्त’’न्तिपि पाठो, तंतंलोकपरियापन्नं चित्तन्ति अत्थो. नाळिकेरादयोति आदि-सद्देन अवुत्तानं ओसधितिणवनप्पतिआदीनं सङ्गहो. एवरूपन्ति एदिसं अञ्ञम्पि तंतंलोकचित्तं.

विगतचित्तोति अत्तत्थपरत्थतो अपगतवितक्को अद्दस एवं अधिट्ठहिंसूति सम्बन्धो. सम्बरिमायन्ति सम्बरेन असुरिन्देन उप्पादितं असुरमायं, यं ‘‘इन्दजाल’’न्तिपि वुच्चति इन्दस्स मोहनत्थं उप्पादितत्ता. सम्परिवत्तेत्वाति परिधावेत्वा. यथा नेति ने असुरे यथा सो पुरिसो पस्सति, एवं अधिट्ठहिंसु. कस्मा पनेते एवं अधिट्ठहिंसूति? तं पुरिसं तत्थ तथानिसिन्नं दिस्वा ‘‘अयञ्च देवो’’ति आसङ्कन्ता तथा अधिट्ठहित्वा भिसमुळालछिद्देहि पविसित्वा अत्तनो असुरभवनं गता. तेनाह भगवा – ‘‘देवानंयेव मोहयमाना’’ति.

२-३. पपातसुत्तादिवण्णना

१११२-३. मरियादपासाणोति ¶ ¶ गिज्झकूटपब्बतस्स मरियादपाकारसदिसो महन्तो पासाणो. अनिट्ठरूपन्ति एत्थ रूप-सद्दो सभावत्थो ‘‘पियरूपे सातरूपे’’तिआदीसु (म. नि. १.४०८-४०९) वियाति आह – ‘‘अनिट्ठसभाव’’न्ति.

५. वालसुत्तवण्णना

१११५. उपासनन्ति आचरियउपासनं, आचरियं अन्तेवासिना वा दिवसे दिवसे सिक्खनवसेन उपासितब्बतो उपासनन्ति लद्धनामं कण्डखिपनसिप्पं. कण्डं अतिक्कमन्तेति सरं खिपन्ते. पोङ्खानुपोङ्खन्ति पोङ्खसद्दत्थं पाकटं कत्वा दस्सेतुं ‘‘एकं कण्डं खिपित्वा’’तिआदि वुत्तं. अपरं अनुपोङ्खन्ति एत्थ अपरन्ति ततियकण्डं. अनुपोङ्खं नाम इदन्ति दस्सेतुं ‘‘अनुपोङ्खं नाम दुतियस्स पोङ्ख’’न्ति वुत्तं. तञ्हि ततियेन सरेन विज्झीयति. पुन अपरं तस्स पोङ्खन्ति इदं पन अपरापरं अविरज्झनं दस्सेतुं वुत्तं. दुरभिसम्भवतरन्ति अभिभवितुं असक्कुणेय्यतरं. वालन्ति केसं. सत्तधा भिन्दित्वाति सत्तक्खत्तुं विफालेत्वा. तस्स एकं भेदन्ति तस्स केसस्स एकं अंसुसङ्खातं भेदं गहेत्वा. वातिङ्गणमज्झे बन्धित्वाति वातिङ्गणफलस्स मज्झट्ठाने बन्धित्वा. अपरं भेदन्ति अपरं केसस्स अंसुसङ्खातं भेदं. अग्गकोटियं बन्धित्वाति यथा तस्स वालभेदस्स ऊकामत्तं लिखामत्तं वा कण्डस्स अग्गकोटिं अधिकं हुत्वा तिट्ठति, एवं बन्धित्वा. उसभमत्तेति वीसतियट्ठिमत्ते ठाने ठितो. कण्डबद्धाय कोटियाति कण्डबद्धाय वालस्स कोटिया वातिङ्गणबन्धनवालस्स कोटिं पटिविज्झेय्य.

८. दुतियछिग्गळयुगसुत्तवण्णना

१११८. अधिच्चुप्पत्तिकन्ति यदिच्छावसेन उप्पज्जनकं. छिग्गळेनाति छिग्गळपदेसेन. छिग्गळुपरीति हेट्ठिमयुगस्स छिग्गळपदेसस्स उपरि. आरुळ्हस्स छिग्गळेनाति उभिन्नम्पि छिद्देन. गीवप्पवेसनं वियाति चतुन्नं युगानं छिद्दपदेसेनेव उपरूपरि ठितानं छिद्दन्तरेन काणकच्छपस्स गीवप्पवेसनं ¶ अधिच्चतरसम्भवं. ततोपि अधिच्चतरसम्भवो मनुस्सत्तलाभो, ततो अधिच्चतमसम्भवो अरियमग्गपटिलाभोति दस्सेन्तो आह ‘‘चतुसच्चपटिवेधो अतिविय अधिच्चतरसम्भवो’’ति.

पपातवग्गवण्णना निट्ठिता.

६. अभिसमयवग्गवण्णना

११२१. अभिसमयसंयुत्ते ¶ वित्थारितोव, तस्मा तत्थ वुत्तनयेनेव तस्स अत्थो वेदितब्बो.

७. पठमआमकधञ्ञपेय्यालवग्गो

३. पञ्ञासुत्तवण्णना

११३३. लोकियम्पि विसुद्धत्थेन ‘‘अरिय’’न्ति वत्तब्बतं लभतीति ‘‘लोकियलोकुत्तरेना’’ति वुत्तं.

४. सुरामेरयसुत्तवण्णना

११३४. पिट्ठसुराति पिट्ठेन कातब्बसुरा, तथा ओदनसुरा पूवसुरा, मज्जरसादिभूते किण्णे पक्खिपित्वा कत्तब्बा सुरा किण्णपक्खित्तसुरा. सम्भारसंयुत्ताति मूलभेसज्जसम्भारेहि संयुत्ता. पुप्फासवोति नाळिकेरपुप्फादितो अस्सवनकआसवो. मुद्दिकफलादितो अस्सवनकआसवो फलासवो. इतीतिआदिअत्थो. तेन मध्वासवगुळासवसम्भारसंयुत्ते सङ्गण्हाति. सुरासवविनिमुत्तन्ति यथावुत्तसुरासवविनिमुत्तं.

१०. पचायिकसुत्तवण्णना

११४०. नीचवुत्तिनोति कुले जेट्ठानं महापितुचूळपितुजेट्ठभातिकादीनं अभिवादनपच्चुट्ठानअञ्जलिकम्मसामीचिकम्मादिवसेन नीचवुत्तिनो.

८. दुतियआमकधञ्ञपेय्यालवग्गो

८. बीजगामसुत्तवण्णना

११४८. ‘‘मूलबीज’’न्तिआदीसु ¶ ¶ मूलमेव बीजन्ति मूलबीजं, मूलबीजं एतस्सातिपि मूलबीजं. तत्थ पुरिमेन बीजगामो वुत्तो ‘‘बीजानं समूहो’’ति कत्वा, दुतियेन भूतगामो. दुविधोपेसो सामञ्ञनिद्देसेन, ‘‘मूलबीजञ्च मूलबीजञ्च मूलबीज’’न्ति एकसेसनयेन वा बीजत्थो वेदितब्बो. एस नयो सेसेसुपि. फळुबीजन्ति पब्बबीजं. बाहिरपच्चयन्तरसमवाये सदिसफलुप्पत्तिया विसेसकारणभावतो विरुहनसमत्थे सारफले निरुळ्हो बीज-सद्दो. तदत्थसिद्धिया मूलादीसुपि केसुचि पवत्ततीति ततो निवत्तनत्थं एकेन बीज-सद्देन विसेसेत्वा वुत्तं ‘‘बीजबीज’’न्ति ‘‘रूपरूपं, दुक्खदुक्ख’’न्ति (सं. नि. ४.३२७) च यथा. नीलतिणरुक्खादिकस्साति अल्लतिणस्स चेव अल्लरुक्खादिकस्स च. आदि-सद्देन ओसधिगच्छलतादीनं गहणं.

९. विकालभोजनसुत्तवण्णना

११४९. अरुणुग्गमनतो पट्ठाय याव मज्झन्हिको, अयं बुद्धादिअरियानं आचिण्णसमाचिण्णो भोजनस्स कालो, तदञ्ञो विकालोति आह – ‘‘विकालभोजनाति कालातिक्कन्तभोजना’’ति.

१०. गन्धविलेपनसुत्तवण्णना

११५०. यं किञ्चि पुप्फन्ति गन्थिमं अगन्थिमं वा यं किञ्चि पुप्फजातं, तथा पिसितादिभेदं यं किञ्चि गन्धजातं.

९. ततियआमकधञ्ञपेय्यालवग्गो

१. नच्चगीतसुत्तवण्णना

११५१. सङ्खेपतो ¶ ‘‘सब्बपापस्स अकरण’’न्तिआदिनयप्पवत्तं (दी.नि. २.९०; ध.प. १८३) भगवतो सासनं अच्चन्तछन्दरागपवत्तितो नच्चादीनं दस्सनं न अनुलोमेतीति आह ‘‘सासनस्स अननुलोमत्ता’’ति. अत्तना परेहि च पयोजियमानं ¶ पयोजापियमानञ्च एतेनेव नच्च-सद्देन गहितं, तथा गीतवादितसद्देहि चाति आह – ‘‘नच्चननच्चापनादिवसेना’’ति. आदि-सद्देन गायन-गायापन-वादन-वादापनादीनि सङ्गण्हाति. दस्सनेन चेत्थ सवनम्पि सङ्गहितं विरूपेकसेसनयेन. यथासकं विसयस्स आलोचनसभावताय वा पञ्चन्नं विञ्ञाणानं सवनकिरियायपि दस्सनसङ्खेपसब्भावतो ‘‘दस्सना’’इच्चेव वुत्तं. अविसूकभूतस्स गीतस्स सवनं कदाचि वट्टतीति आह – ‘‘विसूकभूता दस्सना चा’’ति. तथा हि वुत्तं परमत्थजोतिकाय खुद्दकअट्ठकथाय (खु. पा. अट्ठ. २.पच्छिमपञ्चसिक्खापदवण्णना) – ‘‘धम्मूपसंहितं गीतं वट्टति, गीतूपसंहितो धम्मो न वट्टती’’ति.

२. उच्चासयनसुत्तवण्णना

११५२. उच्चाति उच्च-सद्देन समानत्थं एकं सद्दन्तरं. सेति एत्थाति सयनं, उच्चासयनं महासयनञ्च समणसारुप्परहितं पटिक्खित्तन्ति आह – ‘‘पमाणातिक्कन्तं अकप्पियत्थरण’’न्ति. आसन्दादिआसनञ्चेत्थ सयनेनेव सङ्गहितं. यस्मा पन आधारे पटिक्खित्ते तदाधारकिरिया पटिक्खित्ताव होति, तस्मा ‘‘उच्चासयनमहासयना’’इच्चेव वुत्तं. अत्थतो पन तदुपभोगभूतनिसज्जानिपज्जनेहि विरति दस्सिताति दट्ठब्बं. अथ वा उच्चासयनमहासयनञ्च उच्चासयनमहासयनञ्चाति उच्चासयनमहासयनन्ति एतस्मिं अत्थे एकसेसनयेन अयं निद्देसो कतो यथा – ‘‘नामरूपपच्चया सळायतन’’न्ति (उदा. १). आसनकिरियापुब्बकत्ता वा सयनकिरियाय सयनग्गहणेनेव आसनम्पि गहितन्ति दट्ठब्बं.

३. जातरूपसुत्तवण्णना

११५३. अञ्ञेपि उग्गहापने उपनिक्खित्तसादियने च पटिग्गहणत्थो लब्भतीति आह ¶ – ‘‘न उग्गण्हापेन्ति, न उपनिक्खित्तं सादियन्ती’’ति. अथ वा तिविधं पटिग्गहणं कायेन वाचाय मनसाति. तत्थ कायेन पटिग्गहणं उग्गहणं, वाचाय पटिग्गहणं उग्गहापणं, मनसा पटिग्गहणं सादियनं. तिविधम्पि पटिग्गहणं सामञ्ञनिद्देसेन, एकसेसनयेन वा गहेत्वा ‘‘पटिग्गहणा’’ति वुत्तन्ति आह – ‘‘नेव नं उग्गण्हन्ती’’तिआदि. एस नयो ‘‘आमकधञ्ञपटिग्गहणा’’तिआदीसुपि.

४. आमकधञ्ञसुत्तवण्णना

११५४. नीवारादिउपधञ्ञस्स ¶ सालिआदिमूलधञ्ञन्तोगधत्ता वुत्तं ‘‘सत्तविधस्सा’’ति.

५. आमकमंससुत्तवण्णना

११५५. ‘‘अनुजानामि, भिक्खवे, पञ्च वसानि भेसज्जानि – अच्छवसं, मच्छवसं, सुसुकावसं, सूकरवसं, गद्रभवस’’न्ति (महाव. २६२; पारा. अट्ठ. ६२३) वुत्तत्ता इदं उद्दिस्स अनुञ्ञातं नाम. तस्स पन ‘‘काले पटिग्गहित’’न्ति (महाव. २६२) वुत्तत्ता पटिग्गहणं वट्टतीति आह – ‘‘अञ्ञत्र उद्दिस्स अनुञ्ञाता’’ति. विनयवसेन उपपरिक्खितब्बो, तस्मा समन्तपासादिकाय विनयट्ठकथाय वुत्तनयेनेत्थ विनिच्छयो वेदितब्बो.

१०. चतुत्थआमकधञ्ञपेय्यालवग्गो

२-३. कयविक्कयसुत्तादिवण्णना

११६२-६३. कस्सचि भण्डस्स गहणं कयो, दानं विक्कयो. तत्थ तत्थाति गामन्तरे सन्तिके च गमनं दूतकम्मन्ति वुच्चतीति योजना. पहिणगमनं खुद्दकगमनं.

४. तुलाकूटसुत्तवण्णना

११६४. रूपकूटं सरूपेन सदिसेन छलवोहारो. अङ्गकूटं अत्तनो हत्थादिना अङ्गानं छलकरणं ¶ . गहणकूटं मानेसु गहणवसेन. पटिच्छन्नकूटं अयचुण्णादिना पटिच्छन्नेन छलकरणं. महतिया तुलाय. पच्छाभागेति तुलाय पच्छिमभागे. हत्थेनाति हत्थपदेसेन. अक्कमतीति उट्ठातुं अदेन्तो गण्हाति. ददन्तो पुब्बभागेति परेसं ददन्तो पुब्बभागे हत्थेन तुलं अक्कमति. तन्ति अयचुण्णं.

लोहपातियोति तम्बलोहपातियो. सुवण्णवण्णा करोन्तीति असनिखादसुवण्णकनकलिम्पिता सुवण्णवण्णा करोन्ति. मानभाजनस्स ¶ हदयभूतस्स अब्भन्तरस्स भिन्नं हदयभेदो. निमियमानस्स तिलतण्डुलादिकस्स सिखाय अग्गकोटिया भिन्नं सिखाभेदो. खेत्तादीनं मिननरज्जुया अञ्ञथाकरणं रज्जुभेदो. रज्जुगहणेनेव चेत्थ दण्डकस्स गहणं कतमेवाति दट्ठब्बं.

६-११. छेदनसुत्तादिवण्णना

११६६-७१. वधोति मुट्ठिप्पहारकसाताळनादीहि हिंसनं, विहेठनन्ति अत्थो. विहेठनत्थोपि हि वध-सद्दो दिस्सति ‘‘अत्थानं वधित्वा वधित्वा रोदेय्या’’तिआदीसु. अट्ठकथायं पन ‘‘मारण’’न्ति वुत्तं, तं पन पोथनं सन्धायाति सक्का विञ्ञातुं मारणसद्दस्स विहिंसनेपि दिस्सनतो. सेसं सुविञ्ञेय्यमेव.

आमकधञ्ञपेय्यालवग्गवण्णना निट्ठिता.

सारत्थप्पकासिनिया संयुत्तनिकाय-अट्ठकथाय

महावग्गवण्णनाय लीनत्थप्पकासना निट्ठिता.

निगमनकथावण्णना

सकलरूपारूपसम्मसने ¶ सण्हसुखुमविसयञाणताय विपस्सनाचारनिपुणबुद्धीनं सुसंयतकायवचीसमाचारताय समथविपस्सनासु सम्मदेव यतनतो च यतीनं भिक्खूनं खन्धायतनधातुसच्चिन्द्रियपटिच्चसमुप्पादभेदे परमत्थधम्मे नानानयेहि ञाणविभागस्स सन्निस्सयेन बहुकारस्स संयुत्तागमवरस्स अत्थसंवण्णनं कातुं सारत्थप्पकासनतो एव निपुणा या मया अट्ठकथा आरद्धाति सम्बन्धो. सविसेसं पञ्ञावहगुणत्ता एव हिस्स गन्थारम्भे आदितोपि ‘‘पञ्ञापभेदजननस्सा’’ति ¶ वुत्तं. महाअट्ठकथाय सारन्ति संयुत्तमहाअट्ठकथाय सारं. एकूनसट्ठिमत्तोति थोकं ऊनभावतो मत्त-सद्दग्गहणं.

मूलट्ठकथाय सारन्ति पुब्बे वुत्तसंयुत्तमहाअट्ठकथाय सारमेव पुन निगमनवसेन वुत्तन्ति. अथ वा मूलट्ठकथाय सारन्ति पोराणट्ठकथासु अत्थसारं. तेन एतं दस्सेति ‘‘संयुत्तमहाअट्ठकथाय अत्थसारं आदाय इमं सारत्थप्पकासिनिं करोन्तेन सेसमहानिकायानम्पि मूलट्ठकथासु इध वियोगक्खमं अत्थसारं आदाय अकासि’’न्ति. ‘‘महाविहाराधिवासीन’’न्ति च इदं पुरिमपच्छिमपदेहि सद्धिं सम्बन्धितब्बं ‘‘महाविहाराधिवासीनं समयं पकासयन्तिं महाविहाराधिवासीनं मूलट्ठकथाय सारं आदाया’’ति च. तेन पुञ्ञेन. होतु सब्बो सुखी लोकोति कामावचरादिविभागो सब्बो सत्तलोको यथारहं बोधित्तयाधिगमवसेन सम्पयुत्तेन निब्बानसुखेन सुखितो होतूति सदेवकस्स लोकस्स अच्चन्तं सुखाधिगमाय अत्तनो पुञ्ञं परिणामेति.

एत्तावता सारत्थप्पकासिनिया

संयुत्तनिकाय-अट्ठकथाय लीनत्थप्पकासना निट्ठिता.

संयुत्तटीका समत्ता.