📜

नमो तस्स भगवतो अरहतो सम्मासम्बुद्धस्स

खुद्दकनिकाये

नेत्तिविभाविनी

गन्थारम्भकथा

यजितब्बं ¶ ¶ यजित्वान, नमितब्बं नमामहं;

यजनाद्यानुभावेन, अन्तराये जहं सदा.

येन या रचिता नेत्ति, येन सा अनुमोदिता;

येहि संवण्णना कता, तेसानुभावनिस्सितो.

किञ्चि किञ्चि सरित्वान, लीनालीनानुसन्ध्यादिं;

करिस्सं जिनसुत्तानं, हितं नेत्तिविभावनं.

अप्पमेय्यगुणो ¶ महाधम्मराजव्हयो भवे;

अच्छरियो अब्भुतो यो, बोधिसम्भारपूरणो.

नानारट्ठिस्सरिस्सरो, सेट्ठो सासनपग्गहो;

पासंसराजपासंसो, नराचिन्तेय्यचिन्तको.

चिन्तितकारको राजा, सिरट्ठिमालपालको;

अजेय्यजेय्यको महाचेत्यादिकारको सदा.

अस्सामच्चेन ब्यत्तेन, जिनचक्कहितत्थिना;

अनन्तसुतिनामेन, सक्कच्चं अभियाचितो.

कामं संवण्णना कता, थेरासभेहि गम्भीरा;

गम्भीरत्ता तु जानितुं, जिनपुत्तेहि दुक्करा.

तस्मा ¶ याचितानुरूपेन, करिस्सं सादरं सुण;

सिस्ससिक्खनयानुगं, योत्तं नेत्तिविभावनन्ति.

१. सङ्गहवारअत्थविभावना

तत्थ यस्स सिक्खत्तयसङ्गहस्स नवङ्गस्स सत्थुसासनवरस्स अत्थसंवण्णनं यं नेत्तिप्पकरणं कातुकामो, तस्स नेत्तिप्पकरणस्स निस्सयं विसयभूतं संवण्णेतब्बसहितं, संवण्णेतब्बं एव वा सलोकपालेन तिलोकेन सदा पूजेतब्बस्स चेव नमस्सितब्बस्स च नरुत्तमस्स सत्थुनो सासनवरं विदूहेव ञातब्बं. एतं सासनवरं ताव दस्सेन्तो तंजनकेन, तंविजानकविदूहि च नियमेतुं, रतनत्तयगुणपरिदीपनञ्च कातुं –

‘‘यं लोको पूजयते, सलोकपालो सदा नमस्सति च;

तस्सेत सासनवरं, विदूहि ञेय्यं नरवरस्सा’’ति. – पठमगाथमाह;

इमाय ¶ हि पठमगाथाय ‘‘एतं सासनवरं ञेय्य’’न्ति एत्तकमेव एकन्ततो करणविसेसभावेन अधिप्पेतं. एतेनेव विसेसकरणेन एकन्ताधिप्पेतनेत्तिविसयसासनवरस्स दस्सितत्ता. एकन्ताधिप्पेतसासनवरमेव नेत्तिसंवण्णनाय संवण्णेतब्बत्ता विसयं तेनेव वक्खति अट्ठकथाचरियो –

‘‘एतं इदानि अम्हेहि विभजितब्बहारनयपट्ठानविचारणविसयभूतं सासनं आदिकल्याणतादिगुणसम्पत्तिया वरं अग्गं उत्तमं निपुणञाणगोचरताय पण्डितवेदनीयमेवा’’ति (नेत्ति. अट्ठ. सङ्गहवारवण्णना) च,

‘‘एतं तिविधम्पि ‘सासनवर’न्ति पदेन सङ्गण्हित्वा तत्थ यं पठमं, तं इतरेसं अधिगमूपायोति सब्बसासनमूलभूतं, अत्तनो पकरणस्स च विसयभूतं परियत्तिसासनमेवा’’ति (नेत्ति. अट्ठ. सङ्गहवारवण्णना) च,

‘‘इदानि ¶ यं वुत्तं ‘सासनवरं विदूहि ञेय्य’न्ति, तत्थ नेत्तिसंवण्णनाय विसयभूतं परियत्तिधम्ममेव पकारन्तरेन नियमेत्वा दस्सेतु’’न्ति (नेत्ति. अट्ठ. सङ्गहवारवण्णना) च.

तत्थ परियत्तिसासनस्सापि मूलं होतीति वुत्तं ‘‘सब्बसासनमूलभूत’’न्ति. एतेन कम्मसाधनेनपि अधिप्पेतत्थे सिद्धे नानाविधसाधकवचनं नानावादानं अनोकासकरणत्थाय कतं. स्वाक्खाततादिधम्मगुणा पन सासनस्स विसेसदेसकनरवरसद्देन वा परिदीपकत्थभावेन वा दीपिता अविनाभावतो. सासनवरस्स पन जनकसम्बन्धिपेक्खत्ता ‘‘नरवरस्सा’’ति वुत्तं. तेन च अग्गपुग्गलो सासनवरजनको वाचकत्थसम्बन्धिभावेन वुत्तो. अनञ्ञसाधारणमहाकरुणासब्बञ्ञुतञ्ञाणादिगुणविसेसा पन जनकसम्बन्धिभूतस्स नरस्स विसेसकेनवरसद्देन वा परिदीपकत्थभावेन वा दीपितो.

किं नु सो सासनवरजनको नरवरो परमत्थोव, उदाहु पूजनीयो चेव नमस्सनीयो चाति वुत्तं ‘‘यं लोको…पे… नमस्सति चा’’ति, तेन सासनवरजनको नरवरो परमत्थोव न होति, अथ खो सलोकपालेन लोकेन सदा सब्बकालेसु पूजनीयो चेव नमस्सनीयो चाति विसेसितो थोमितोति.

एत्थ ¶ च पूजननमस्सनचेतनावाचकेन वा पूजननमस्सनसद्देन फलूपचारत्थो पुञ्ञमहत्तसङ्खातो पूजनीयभावो चेव आसवक्खयञाणपदट्ठानसब्बञ्ञुतञ्ञाणादिगुणसङ्खातो नमस्सनीयभावो च दीपकत्थभावेन परिग्गहेत्वा दीपितो. तेनाह अट्ठकथाचरियो ‘‘भगवतो सदेवकस्स लोकस्स पूजनीयवन्दनीयभावो, अग्गपुग्गलभावो च वुच्चमानो गुणविसिट्ठतं दीपेती’’तिआदि (नेत्ति. अट्ठ. सङ्गहवारवण्णना).

तादिसस्स नरवरस्स तादिसं सासनवरं किं येन केनचि विञ्ञेय्यन्ति वुत्तं ‘‘विदूही’’ति. तेन तिपिटकधरा अरियभूता पण्डिता वाचकत्थभावेन गहिता, सुप्पटिपन्नतादिसङ्घगुणा पन वन्दधातुवचनेन वा दीपकत्थभावेन वा दीपिताति. एवं परिग्गहेत्वा दीपिते रतनत्तयगुणे सन्धाय ‘‘एवं पठमगाथाय सातिसयं रतनत्तयगुणपरिदीपनं कत्वा’’ति (नेत्ति. अट्ठ. सङ्गहवारवण्णना) वक्खति, न गाथाय निरवसेसत्थे. तत्थ ¶ एवन्ति एवं सासनवरदस्सनभूताय पठमगाथायाति अत्थोव दट्ठब्बो. अपरे पनाचरिया ‘‘इमाय पठमगाथाय एकन्ततो अधिप्पेतानाधिप्पेतवचनानि चेव वाचकत्थदीपकत्थविसेसानि च सुट्ठु अविचारेत्वा ‘एवं पठमगाथाय सातिसयं रतनत्तयगुणपरिदीपनं कत्वा’ति वचनच्छायं निस्साय सातिसयं रतनत्तयगुणपरिदीपनं कातुं ‘यं लोकोत्यादिमाहा’ति च सातिसयरतनत्तयगुणे दस्सेन्तो ‘यं लोकोत्यादिमाहा’ति’’ च वदन्ति. तेसं वादो अम्हाकं नक्खमति. कारणं पन मया हेट्ठा वुत्तानुसारेन ञातब्बन्ति अयं पदानुक्कमानुरूपानुसन्ध्यत्थो.

अथ वा एकं समयं जम्बुवनसण्डे निसीदित्वा सिस्सानं हितं चिन्तेन्तो, अत्तनो अभिनीहारसम्पत्तिं पस्सन्तो, सम्मासम्बुद्धेन पसंसितो, महाकच्चायनो सत्थारा अनुमोदितं सासनायत्तं नवङ्गस्सत्थवण्णनं सोळसहारादिअनेकत्थविधं नेत्तिप्पकरणं आरभन्तो, ‘‘यं लोको’’त्यादिमाह. यदि एवं यथावुत्तप्पकारं नेत्तिप्पकरणभूतं सोळसहारात्यादिकं आरभितब्बं, तं अनारभित्वा कस्मा नेत्तिप्पकरणतो बहिभूतं ‘‘यं लोको’’त्यादिकं आरभितब्बं, सेय्यथापि अम्बं पुट्ठो लबुजं ब्याकरेय्य, लबुजं पुट्ठो अम्बं ब्याकरेय्य, एवमेव नेत्तिप्पकरणमारभन्तो अञ्ञं आरभतीति? तथापि यस्स यथावुत्तस्स सासनवरस्स अत्थसंवण्णनं यं नेत्तिप्पकरणं कातुकामो यस्स नेत्तिप्पकरणस्स विसयभूतं संवण्णेतब्बसहितं, संवण्णेतब्बं एव वा तं सासनवरं ताव दस्सेन्तो तंजनकेन, तंविजानकविदूहि च नियमेतुं, रतनत्तयगुणपरिदीपनञ्च कातुं ‘‘यं लोको’’त्यादिमाह. अयं लीनन्तरचोदनासहितो अनुसन्ध्यत्थो.

‘‘यं ¶ लोको पूजयते, सलोकपालो सदा नमस्सति च;

तस्सेत सासनवरं, विदूहि ञेय्यं नरवरस्सा’’ति. –

निग्गहितलोपं कत्वा रचिता गाथा अरियासामञ्ञलक्खणेन सम्पन्ना. कथं? पुब्बड्ढे तिंस मत्ता, अपरड्ढे सत्तवीस मत्ता. सम्पिण्डिता सत्तपञ्ञास मत्ताव भवन्ति. अक्खरानं पन इमिस्सं गाथायं सत्ततिंस. तेसु गरुक्खरा वीसति, लहुक्खरा सत्तरस भवन्ति. ‘‘तस्सेतं सासनवर’’न्ति पन सानुनासिकं विरुज्झति.

तत्थ ¶ निद्देसत्थो अट्ठकथानुसारेन विजानितब्बो. सलोकपालो सब्बो सत्तलोको सक्कच्चं सब्बञ्ञुतञ्ञाणादिअनेकगुणानुस्सरणेन वा पूजेतब्बपूजनेन वा पटिपत्तिपूजनेन वा सदा सब्बकालेसु सक्कच्चं यं नरवरं पूजयते चेव नमस्सति च, तस्स पूजेतब्बस्स चेव नमस्सितब्बस्स च सत्थुनो नरवरस्स तिलोकग्गस्स मया संवण्णेतब्बसहितं, संवण्णेतब्बं एव वा विदूहेव ञेय्यं ञातब्बं. निपुणञाणगोचरं एतं मया बुद्धियं ठपितं सासनवरं मया आरभितब्बस्स नेत्तिप्पकरणस्स विसयन्ति पठमं जानितब्बं दस्सेत्वा तस्स अत्थसंवण्णनाभूतं नेत्तिप्पकरणं अहं आरभिस्सामि, तं तुम्हे साधवो सुणाथ मनसि करोथाति समुदाययोजना, अवयवयोजनापि कातब्बा.

कथं? ‘‘सलोकपालो लोको’’ति विसेसनविसेसितब्बभावेन योजना. लोकपालो वज्जेत्वा अवसेसो लोको च न होति, अथ खो लोकपालसहितो लोकोति विसेसेति. ‘‘लोको पूजयते चेव नमस्सति चा’’ति कत्तुकारकआख्यातकिरियाभावेन योजना ‘‘यो करोति, स कत्ता’’ति वुत्तत्ता. यो लोको कारको, सो कत्ता होतु. यो लोको पूजयते चेव नमस्सति च, कथं सो कत्ताति? ‘‘यो करोति, स कत्ता’’ति सुत्तस्स ‘‘यो करोति किरियं निप्फादेति, सो किरियानिप्फादको कत्ता’’ति अत्थसम्भवतो सयनभुञ्जनादिसब्बकिरियानिप्फादको कत्तायेव होति. अयञ्च लोको पूजननमस्सनकिरियानिप्फादकोयेवाति. कथं अयं लोको किरियानिप्फादकोति? ‘‘लोको’’ति सत्तपञ्ञत्तिया परमत्थतो अविज्जमानायपि पञ्ञापेतब्बो सन्ताने पवत्तमानो हदयवत्थुनिस्सितो चित्तुप्पादो गहेतब्बो, सो यथारहं हेताधिपतिसहजातादिपच्चयेन पच्चयो निप्फादको भवे. एवं लोकस्स कत्तुकारकभावो विजानितब्बोति पच्चयपच्चयुप्पन्नभावेन योजना. एस नयो तीसु पिटकेसुपि एवरूपेसु ठानेसु.

‘‘यं ¶ नरवरं पूजयते चेव नमस्सति चा’’ति कम्मकारकआख्यातकिरियाभावेन योजना ‘‘यं करोति, तं कम्म’’न्ति वुत्तत्ता. यं कातब्बं, तं कम्मं होतु. यं पूजयति चेव नमस्सति च, कथं तं कम्मन्ति? ‘‘यं ¶ करोति, तं कम्म’’न्ति सुत्तस्स ‘‘यं करोति किरियाय सम्बज्झति, किरियाय सम्बज्झितब्बं कम्म’’न्ति अत्थसम्भवतो करणवाचकवचनीयादिसब्बकिरियाय सम्बज्झितब्बं कम्मं होत्वेव. अयञ्च नरवरो पूजननमस्सनकिरियाय वाचकवचनीयभावेन सम्बज्झितब्बोयेवाति. कथं अयं नरवरो वचनीयोति? पूजननमस्सनचेतनाय आरम्मणकरणवसेन नरवरो वचनीयो, चेतना वाचका, एवं वाचकवचितब्बभावो होत्वेव. ‘‘यं नरवर’’न्ति पञ्ञत्तिया परमत्थतो अविज्जमानायपि पञ्ञापेतब्बो सन्तानवसेन पवत्तमानो लोकियलोकुत्तरगुणसहितो खन्धपञ्चको वुत्तो, सो आरम्मणपच्चयेन पच्चयो, चेतना पच्चयुप्पन्नाति पच्चयपच्चयुप्पन्नभावेन योजना. एस नयो तीसु पिटकेसु एवरूपेसु ठानेसु.

‘‘तस्स नरवरस्सा’’ति विसेसनविसेसितब्बभावेन योजना. नरवरो नाम निमन्तितब्बादिको न होति, अथ खो पूजेतब्बो नमस्सितब्बो एवाति विसेसेति. तस्स पूजेतब्बस्स चेव नमस्सितब्बस्स च नरवरस्स सासनवरन्ति जञ्ञजनकभावेन योजना. सासनवरं नाम पच्चेकबुद्धसावकबुद्धराजराजादीनं सासनवरं न होति, पूजेतब्बस्स चेव नमस्सितब्बस्स च नरवरस्स तिलोकस्सेव सासनवरन्ति नियमेति.

‘‘विदूहि ञेय्य’’न्ति कत्तुकारककितकिरियाभावेन योजना. कत्तुभावो हेट्ठा वुत्तोव. ‘‘विदूही’’ति सत्तपञ्ञत्तिया परमत्थतो अविज्जमानायपि पञ्ञापेतब्बो सन्ताने पवत्तमानो सासनवरे सम्मोहधंसकञाणसहितो हदयवत्थुनिस्सितो चित्तुप्पादो वुत्तो, सो यथारहं हेताधिपतिसहजातादिपच्चयेन पच्चयो निप्फादको भवे. ञा-इतिधातुया अत्थभूतं ञाणं पच्चयुप्पन्नं निप्फादेय्यं भवे, एवं पच्चयपच्चयुप्पन्नभावेन योजना.

‘‘ञेय्यं सासनवर’’न्ति विसेसनविसेस्यभावेन योजना. सासनवरं नाम न येन केनचि ञेय्यं, अथ खो विदूहेव सण्हसुखुमञाणेन ञेय्यं सासनवरन्ति विसेसेति.

‘‘एतं सासनवर’’न्ति विसेसनविसेस्यभावेन योजना. सासनवरं नाम मया बुद्धियं अट्ठपितं अप्पवत्तेतब्बं होति, मया इदानि नेत्तिप्पकरणस्स विसयभावेन बुद्धियं विपरिवत्तमानं ठपेतब्बं पवत्तेतब्बं सासनवरन्ति ¶ विसेसेति. एतं सासनवरं नेत्तिप्पकरणस्स ¶ विसयन्ति योजना कातब्बा. तेनाह ‘‘एतं इदानि अम्हेहि विभजितब्बहारनयपट्ठानविचारणविसयभूतं सासन’’न्ति (नेत्ति. अट्ठ. सङ्गहवारवण्णना). इच्चेवं नेत्तिया पठमगाथाय सङ्खेपेन योजनत्थो समत्तो.

तत्थ यन्ति अनियमनरवरस्स सत्थुनो वाचकं पयोगवन्तसब्बनामं. अनियमो च पूजननमस्सनकिरियाय अनियमितत्ता वुत्तो, न नरवरतो अञ्ञसत्तस्स सम्भवतोति. एस नयो सेसानियतेसुपि तीसु पिटकेसु. लोकियन्ति एत्थ पुञ्ञापुञ्ञानि, तब्बिपाको चाति लोको.एत्थ सत्तनिकाये पुञ्ञापुञ्ञानि लोकियन्ति पवत्तन्ति, तब्बिपाको च लोकियति पवत्तति, इति सत्तनिकायस्स पुञ्ञापुञ्ञानं, तब्बिपाकस्स च पवत्तनस्स आधारभावतो ‘‘एत्था’’तिपदेन निद्दिट्ठो सत्तनिकायो लोकोनाम. पूजयतेति विग्गहविरहितं आख्यातपदं, सक्कच्चं पूजनं करोति.

लोकं पालेन्तीति लोकपाला, पुञ्ञापुञ्ञानञ्चेव तब्बिपाकस्स च पवत्तनाधारत्ता लोका च. के ते? चत्तारो महाराजानो, इन्दयमवरुणकुवेरा वा, खत्तियचतुमहाराजसक्कसुयामसन्तुसितसुनिम्मितपरनिम्मितवसवत्तिमहाब्रह्मादयो वा. पालनञ्चेत्थ इस्सरियाधिपच्चेन तंतंसत्तलोकस्स अञ्ञमञ्ञविहेसननिवारणादिआणापवत्तापनयसपरिवारट्ठानन्तरादिनिय्यादना, सह लोकपालेहि यो वत्ततीति सलोकपालो. अथ वा ये हिरोत्तप्पा लोकं पालेन्ति, इति पालनतो ते हिरोत्तप्पा लोकपाला. तेनाह भगवा ‘‘द्वेमे, भिक्खवे, सुक्का धम्मा लोकं पालेन्ती’’ति (अ. नि. २.९; इतिवु. ४२). लोकपालेहि हिरोत्तप्पेहि समन्नागतो लोको सलोकपालो नाम. हिरोत्तप्पसम्पन्नो हि सप्पुरिसो लोको सक्कच्चं सदा सब्बकालेसु पूजयति चेव नमस्सति च पापहिरिजिगुच्छनतो, धम्मच्छन्दवन्तताय च.

अञ्ञे पन पूजेन्ता नमस्सन्तापि कदाचियेव पूजेन्ति नमस्सन्ति, न सब्बदाति. सदाति पूजननमस्सनकालवाचकविग्गहविरहितं विकप्पनामं, सब्बनामं वा. नमस्सतीति विग्गहविरहितं आख्यातपदं, सक्कच्चं नमस्सनं करोति. तस्सेताति ¶ एत्थ तस्साति नियमवाचकं पयोगवन्तसब्बनामं विग्गहविरहितमेव. नियमो च पूजननमस्सनकिरियाय विसेसितो. तस्मा तस्स पूजननमस्सनकिरियाय नियमितब्बस्स पूजेतब्बस्स नमस्सितब्बस्स नरवरस्साति अत्थो युत्तोव. सेसनियमेसु अञ्ञेसुपि एसेव नयो. एतन्ति आचरियेन विभजितब्बहारनयपट्ठानविचारणविसयभूतस्स ¶ सासनवरपरामसनं पयोगवन्तसब्बनामं विग्गहविरहितं.

सासति एतेनाति सासनं, एतेन नवविधसुत्तन्तेन, नवविधसुत्तन्तसहितेन वा वरेन सब्बेन समत्थे वेनेय्ये दिट्ठधम्मिकसम्परायिकपरमत्थेहि तिविधयानमुखेन यथारहं सत्ते सासति अनुसासति विनेति. इति सासनानुसासनकिरियानुसारेन वेनेय्यसत्तानं जाननपटिपज्जनाधिगमस्स कारणकरणत्ता ‘‘एतेना’’ति पदेन निद्दिट्ठं नवविधसुत्तन्तं, नवविधसुत्तन्तसहितं वा वरं सब्बं सासनं नाम. नवविधसुत्तन्तदेसनाय हि वेनेय्यानं जाननं पुरिमजाननेन पच्छिमजाननं, जाननेन पटिपज्जनेन पच्छिमपटिपज्जनेन अधिगमो, पुरिमाधिगमेन पच्छिमाधिगमो होति. तेन वुत्तं ‘‘सद्धा सीलं सुतं चागो पञ्ञा सद्धाय सीलस्स सुतस्स चागस्स पञ्ञाया’’ति (पट्ठा. १.१.४२३) च ‘‘पठमस्स झानस्स परिकम्मं पठमस्स झानस्स’’त्यादि (पट्ठा. १.१.४२३) च. सासधातुया देसनासद्दो च तंजनको देसनाञाणसम्पयुत्तचित्तुप्पादो च मुख्यत्थो, तंउपनिस्सयपच्चया वेनेय्यानं अत्थजाननपटिपज्जनअधिगमनादि कारणूपचारत्थो, ‘‘एतेना’’ति पदेन वुत्ताय सासनभूताय नामपञ्ञत्तिया करणसत्तिसङ्खाता उपनिस्सयपच्चयसत्ति फलूपचारत्थो. इति-सद्दोपि तमेव नामपञ्ञत्तिया उपनिस्सयपच्चयसत्तिं हेतुभावेन परामसति, तस्सा सत्तिया आधारभूता नामपञ्ञत्ति यु-पच्चयत्थो. एसेव नयो तीसु पिटकेसु एवरूपेसु ठानेसु.

एकन्तनिय्यानट्ठेन, अनञ्ञसाधारणगुणताय च उत्तमट्ठेन वरं उत्तमं, परियत्तिसासनम्हि फलनिय्यादनतो, मग्गनिय्यानहेतुभावतो च निय्यानट्ठेन, सावकादीहि अजनियत्ता असाधारणट्ठेन च उत्तमट्ठेन वरं, वरितब्बन्ति वा वरं. यथावुत्तस्स सासनस्स पण्डितेहि अभिपत्थितसमिद्धिहेतुताय वरितब्बत्ता पत्थेतब्बत्ता सासनवरं नाम, यथावुत्तट्ठेन वा सासनञ्च तं वरञ्चाति सासनवरं. च-सद्देन सत्तिभेदं, तं-सद्देन अत्थाभेदं देस्सेति.

विदन्तीति ¶ विदू. ये पण्डिता यथासभावतो कम्मकम्मफलानि, कुसलादिभेदे च धम्मे विदन्ति, इति विदनतो ते पण्डिता विदू नाम, तेहि. ञातब्बन्ति ञेय्यं. ञा-धातुया निप्परियायतो आरम्मणिकं ञाणं वुत्तं, ठानूपचारतो सासनवरस्स आरम्मणपच्चयभावो दस्सितो, इति-सद्देन आरम्मणपच्चयभावो परामसितो. तस्स इति-सद्देन परामसितब्बस्स आरम्मणपच्चयभावस्स आधारं सासनवरं ण्य-पच्चयत्थोति दट्ठब्बं. ञाणं अरहतीति वा ञेय्यं, विदूनं ञाणं जाननं आरम्मणभावेन अरहतीति अत्थो. इमस्मिं नये तद्धितपदं दट्ठब्बं.

नरति ¶ नेतीति नरो. यो पुरिसो अत्तानं इत्थीनं उच्चट्ठानं नरति नेति, इति नरनतो नयनतो सो पुरिसो नरो नाम. सो हि पुत्तभूतोपि मातुया पितुट्ठाने तिट्ठति, कनिट्ठभातुभूतोपि जेट्ठभगिनीनं पितुट्ठाने तिट्ठति. अथ वा नरितब्बो नेतब्बोति नरो. सो हि जातकालतो पट्ठाय याव अत्तनो सभावेन अत्तानं धारेतुं समत्थो न होति, ताव परेहि नेतब्बो, न तथा अञ्ञो तिरच्छानादिकोति. एत्थ पन सत्थुविसयताय नरति वेनेय्यसत्तेति नरोति अत्थो अधिप्पेतो. सत्था हि सत्ते अपायादितो सुगतिं वा मग्गफलनिब्बानं वा नेतीति. सब्बञ्ञुतञ्ञाणादिअनेकगुणसमन्नागतत्ता वरो उत्तमो, वरितब्बो पत्थेतब्बोति वा वरो, तिलोकग्गो. पकतिया उच्चट्ठानट्ठो नरो गुणुत्तमेन समन्नागतो वरो, नरो च सो वरो चाति नरवरो. च-त-सद्दानं अत्थभेदो वुत्तोव, विसेसनपरपदसमासोयं. येन वुत्तं ‘‘अग्गपुग्गलस्साति अत्थो’’ति (नेत्ति. अट्ठ. सङ्गहवारवण्णना). अञ्ञे पन ‘‘नरानं, नरेसु वा वरोति नरवरो’’ति वदन्ति, तं वचनं ‘‘अग्गपुग्गलस्साति अत्थो’’ति (नेत्ति. अट्ठ. सङ्गहवारवण्णना) अट्ठकथावचनेन विरुज्झति मञ्ञे. तस्स नरवरस्साति. इच्चेवं नेत्तिप्पकरणस्स आदिगाथाय समासेन च वचनत्थो समत्तो.

सरूपत्थो योजनत्थवचनत्थानुसारेन विजानितब्बो. तथापि विसुं सुट्ठु जाननत्थाय पुन वत्तब्बो. ‘‘य’’न्ति पदस्स अनञ्ञसाधारणसब्बञ्ञुतञ्ञाणादिअनेकगुणसम्पन्नो सलोकपालेन लोकेन पूजेतब्बो चेव नमस्सितब्बो च सासनवरदेसको तिलोकग्गो सरूपत्थो. ‘‘लोको’’ति पदस्स यथावुत्तलोकपालसहितो सद्धाचागादिसम्पन्नो ¶ सब्बसत्तलोको सरूपत्थो. लोकसद्दो एकवचनयुत्तोपि जातिसद्दत्ता निरवसेसतो सत्ते सङ्गण्हाति यथा ‘‘महाजनो’’ति. कामञ्चेत्थ लोकसद्दो ‘‘लोकविदू’’त्यादीसु सङ्खारभाजनेसुपि पवत्तो, पूजननमस्सनकिरियासाधनत्ता पन सत्तलोकेव वाचकभावेन पवत्तोति. तेनाह ‘‘पूजनकिरियायोग्यभूततावसेना’’ति (नेत्ति. अट्ठ. सङ्गहवारवण्णना).

पूजयतेति एत्थ पूजनकिरियाय मुख्यतो पूजनसङ्खातो पूजेन्तानं चित्तुप्पादो सरूपत्थो, फलूपचारेन तंचित्तुप्पादस्स आरम्मणपकतूपनिस्सयभूता वुत्तप्पकारा सब्बे बुद्धगुणा सरूपत्था. ते-विभत्तिपच्चयस्स पूजनकिरियासाधको वुत्तप्पकारो लोको च सरूपत्थो, एवं सति अत्थभेदाभावतो द्वीसु वाचकेसु एकोव वाचको वत्तब्बो, कस्मा एकस्मिं अत्थे द्वे वाचका वुत्ताति? नायं दोसो द्विन्नं वाचकानं सामञ्ञविसेसवाचकत्ता. लोकसद्दो हि पूजनकिरियासाधको, अञ्ञकिरियासाधको च वदतीति सामञ्ञवाचको च होति. पूजयते-सद्दो लोकपूजनइत्थिपूजनपुरिसपूजनतिरच्छानपूजनादिकिरियासाधकञ्च वदतीति सामञ्ञवाचको ¶ . तस्मा पूजयते-सद्दो लोकसद्दस्स सरूपत्थो, पूजनकिरियासाधको च न अञ्ञकिरियासाधकोति नियमेति. लोकसद्दो च पूजयतेसद्दस्स सरूपत्थो पूजनकिरियासाधको. लोको पन पूजनकिरियासाधको इत्थिपुरिसतिरच्छानादिकोति नियमेति. तीसु पिटकेसु अञ्ञेसुपि एवरूपेसु ठानेसु एसेव नयो.

‘‘सलोकपालो’’ति पदस्स यथावुत्तसेट्ठलोकपालसहगतो, पूजननमस्सनकिरियासाधको च सत्तनिकायो सरूपत्थो. ‘‘सदा’’ति पदस्स रत्तिदिवसकालो अतीतभगवतो धरमानकालो ततो परकालो अभिनीहारतो याव सासनन्तरधाना कालो ततो परकालो सरूपत्थो. सो पन अनागतबुद्धुप्पज्जनकालो अतीतसम्मासम्बुद्धे इदानि पूजयन्ति नमस्सन्ति विय पूजयिस्सति चेव नमस्सिस्सति च. नमस्सतीति एत्थ नमस्सनकिरियाय मुख्यतो नमस्सनसङ्खातो चित्तुप्पादो सरूपत्थो, फलूपचारेन तंचित्तुप्पादस्स आरम्मणपकतूपनिस्सयभूता वुत्तप्पकारा सब्बे बुद्धगुणा सरूपत्थो. ति-विभत्तिपच्चयस्स ¶ नमस्सनकिरियासाधको यथावुत्तसत्तनिकायो लोको च सरूपत्थो, अत्थभेदाभावेपि द्विन्नं वाचकानं पवत्तभावो हेट्ठा वुत्तोव. ‘‘चा’’ति पदस्स इधेकच्चो पूजेन्तोपि न नमस्सति, नमस्सन्तोपि न पूजेति च, अयं पन सत्तनिकायो लोको पूजयति चेव नमस्सति चाति समुच्चयत्थो सरूपत्थो.

तस्साति एत्थ तं-सद्दस्स सब्बञ्ञुतञ्ञाणादिअनेकगुणसमन्नागतो पूजेतब्बो नमस्सितब्बो तिलोकग्गो सत्था सरूपत्थो, छट्ठीविभत्तिया जनकस्स नरवरस्स जञ्ञेन सासनवरेन सम्बन्धो पधानसरूपत्थो, जञ्ञसासनवरस्स जनकेन नरवरेन सम्बन्धो अपधानसरूपत्थो. तीसु पिटकेसु एवरूपेसु अञ्ञेसुपि एसेव नयो.

‘‘एत’’न्ति पदस्स आचरियेन विभजितब्बहारनयपट्ठानविचारणविसयभूतं सासनं सरूपत्थो. ‘‘सासनवर’’न्ति पदस्सापि तमेव सरूपत्थो, एतं सासनवरं परियत्तिपटिपत्तिपटिवेधभेदेन तिविधम्पि परियत्तिसासनमेव सब्बसासनमूलभूतत्ता, नेत्तिप्पकरणस्स विसयभूतत्ता च विसेसतो अधिप्पेतं तस्स मूलभूतभावतो विनयसंवण्णनादीसु बहूपकारेन दस्सितोति अम्हेहि न वत्तब्बो. वदन्तोपि अञ्ञं रचितब्बं रचितुं असमत्थोव हुत्वा वदतीति गहितब्बो वदेय्य.

तं पन परियत्तिसासनं विमुत्तिरसवसेन एकविधं, धम्मविनयवसेन दुविधं, विनयपिटकसुत्तन्तपिटकअभिधम्मपिटकवसेन तिविधं ¶ , आणादेसनावोहारदेसनापरमत्थदेसनावसेन तिविधं, यथापराधसासनायथानुलोमसासनायथाधम्मसासनाभेदेनपि तिविधं, संवरासंवरकथादिट्ठिविनिवेठनकथानामरूपपरिच्छेदकथाभेदेनपि तिविधं. एत्थ च देसना देसकाधीना, सासनं सासितब्बायत्तं, कथा कथेतब्बत्थापेक्खाति विसेसो. दीघनिकायो, मज्झिमनिकायो, संयुत्तनिकायो, अङ्गुत्तरनिकायो, खुद्दकनिकायोति निकायभेदेन पन पञ्चविधं; सुत्तगेय्यवेय्याकरणगाथाउदानइतिवुत्तकजातकअब्भुतधम्मवेदल्लभेदेन पन नवविधं; धम्मक्खन्धभेदेन पन चतुरासीतिधम्मक्खन्धसहस्सविधं; ‘‘संकिलेसभागियवासनाभागियनिब्बेधभागियअसेक्खभागियाति अमिस्सानि चत्तारि; संकिलेसभागियवासनाभागियसंकिलेसभागियनिब्बेध भागियसंकिलेसभागियअसेक्खभागियवासनाभागियनिब्बेधभागियाति मिस्सकदुकानि चत्तारि; संकिलेसभागियवासनाभागियअसेक्खभागियसंकिलेसभागियवासना भागियनिब्बेधभागियाति ¶ मिस्सकतिकानि द्वे; तण्हासंकिलेसदिट्ठिसंकिलेसदुच्चरितसंकिलेसतण्हावोदानभागियदिट्ठिव- उदानभागियदुच्चरितवोदानभागियातिछा’’ति (नेत्ति. ८९) सोळसन्नं सुत्तानं भेदेन सोळसविधं; ‘‘लोकियलोकुत्तरलोकियलोकुत्तरसत्ताधिट्ठानधम्माधिट्ठानसत्तधम्माधिट्ठानञाणञेय्य- ञाणञेय्यदस्सनभावनादस्सनभावनासकवचनपरवचनसकवचनपरवचन विस्सज्जनीयअविस्सज्जनीयविस्सज्जनीयअविस्सज्जनीयकम्मविपाककम्मविपाककुसल अकुसलकुसलाकुसलअनुञ्ञातपटिक्खित्तअनुञ्ञातपटिक्खित्तथवस्स भेदेन अट्ठवीसतिविध’’न्ति (नेत्ति. ११२) एवमादिबहुविधं परियत्तिसासनं नेत्तिप्पकरणस्स विसेसतो विसयं. तस्स विसयभावे सति पटिपत्तिपटिवेधसङ्खातं सासनद्वयम्पि तम्मूलकत्ता विसयं होति परियायतोति दट्ठब्बं.

‘‘विदूही’’ति पदस्स यथावुत्तसासनवरस्स सपरसन्तानपवत्तनपवत्तापनादिवसेन विजाननसमत्थो सण्हसुखुमञाणादिगुणसम्पन्नो कल्याणपुथुज्जनसोतापन्नादिको पुग्गलो सरूपत्थो. ‘‘ञेय्य’’न्ति पदस्स तादिसेहि विदूहि सण्हसुखुमञाणादिना विजानितब्बं सासनवरं सरूपत्थो. ‘‘नरवरस्सा’’ति पदस्स एकविधादिभेदस्स सासनवरस्स जनको अनेकगुणसम्पन्नो तिलोकग्गो सरूपत्थो. इच्चेवं नेत्तिया आदिगाथाय सरूपत्थो सङ्खेपेन विजानितब्बो.

एवं तस्सा अनुसन्ध्यादीनं जानितब्बभावे सतिपि अजानन्तो विय पुच्छित्वा दोसं आरोपेत्वा परिहारवसेनापि गम्भीराधिप्पायस्स अनाकुलस्स विसेसजाननं भविस्सति. तस्मा पुच्छित्वा दोसं रोपेत्वा परिहारवसेन गम्भीराधिप्पायं सम्पिण्डेत्वा कथयिस्सं. अम्हाकाचरिय किमत्थं ‘‘यं लोको’’त्यादिमाह? नेत्तिप्पकरणं कातुं. एवं सति नेत्तिप्पकरणभूतं ‘‘सोळसहारा नेत्ति’’त्यादिकं एव वत्तब्बं, कस्मा तं अवत्वा ततो नेत्तिप्पकरणतो अञ्ञं ‘‘यं लोको पूजयते’’त्यादिमाह. सेय्यथापि समुद्दं गच्छन्तो हिमवन्तं गच्छति, हिमवन्तं गच्छन्तो ¶ समुद्दं गच्छति, एवमेव नेत्तिप्पकरणं करोन्तो ¶ सासनवरदस्सनं करोतीति? सच्चं, तथापि यस्स संवण्णनं नेत्तिप्पकरणं कातुकामो तं सासनवरं पठमं दस्सेतुं ‘‘यं लोको’’त्यादिमाह. एवं सति ‘‘एतं सासनवर’’न्ति एत्तकमेव वत्तब्बं, कस्मा ‘‘यं लोको’’त्यादि वुत्तन्ति? तं सासनवरं जनकेन नरवरेन नियमेत्वा थोमेतुं वुत्तं. तथापि ‘‘तस्स नरवरस्सा’’ति एत्तकमेव वत्तब्बं, कस्मा ‘‘यं लोको’’त्यादि वुत्तन्ति? तं जनकं नरवरं लोकपालेन लोकसेट्ठेन सद्धिं सब्बेन लोकेन पूजनीयनमस्सनीयभावेन थोमेतुं ‘‘यं लोको’’त्यादि वुत्तं. पूजेन्तापि वन्दित्वा पूजेन्ति, तस्मा ‘‘पूजयते’’ति एत्तकमेव वत्तब्बन्ति? तथापि केचि केसञ्चि पूजासक्कारादीनि करोन्तापि तेसं अपाकटगुणताय नमक्कारं न करोन्ति. एवं भगवतो यथाभूतअब्भुग्गतसद्दताय पन भगवन्तं पूजेत्वापि वन्दतियेवाति दस्सेतुं ‘‘नमस्सति चा’’ति वुत्तं. पूजेन्तो, नमस्सन्तो च न कदाचियेव, अथ खो सब्बकालन्ति दस्सेतुं ‘‘सदा’’ति वुत्तं. तादिसस्स नरवरस्स तादिसं सासनवरं सण्हसुखुमञाणसम्पन्नेहि विदूहेव सुखुमञाणेनेव ञेय्यन्ति सासनवरं थोमेतुं ‘‘विदूहि ञेय्य’’न्ति वुत्तं.

एत्थ च ‘‘पूजयते, नमस्सती’’ति एतेहि पूजननमस्सनकिरियाय हेतुभूता सब्बञ्ञुतञ्ञाणादयो अनेके लोकियलोकुत्तरगुणा पकासिता होन्ति ते गुणे आगम्म सब्बलोकस्स पूजननमस्सनचेतनाय पवत्तनतो. तेसु हि किञ्चि सरूपतो, किञ्चि अनुमानतो सारिपुत्तत्थेरादयो अनुस्सरन्ति, पूजेन्ति, नमस्सन्ति. तेन वुत्तं ‘‘अनुस्सरेथ सम्बुद्ध’’न्ति (सं. नि. १.२४९). एकदेसगुणापि पूजारहा नमस्सनारहा, कस्मा सब्बेपि गुणा पकासिताति? सब्बगुणदस्सनेन बोधिसम्भारसम्भरणमहाकरुणायोगसङ्खातहेतुञाणपहान- आनुभावरूपकायसम्पत्तिसङ्खातफलहितज्झासयिन्द्रिय- पाककालागमनदेसनाञाणसङ्खातसत्तु- पकारसम्पदावसेन थोमना दस्सिता. तेन अत्तहितपटिपत्ति, परहितपटिपत्ति च निरुपक्किलेसूपगमनापगमनञ्च लोकसमञ्ञानुपपवत्ति, तदनतिधावनञ्च चरणसम्पत्ति, विज्जासम्पत्ति च अत्ताधिपतिता, धम्माधिपतिता च लोकनाथअत्तनाथता च पुब्बकारिकतञ्ञुता च अपरन्तपता, अनत्तन्तपता च बुद्धकरणधम्मबुद्धभावसिद्धि च परतारणअत्ततारणञ्च ¶ सत्तानुग्गहचित्तता, धम्मविरत्तचित्तता च पकासिता भवन्ति. तेन सब्बप्पकारेन अनुत्तरदक्खिणेय्यताउत्तमपूजनीयनमस्सनीयभावपूजननमस्सनकिरियाय च खेत्तङ्गतभावं पकासेति. तेन पूजनकनमस्सनकानं यथिच्छितब्बपयोजनसम्पत्ति पकासिताति सब्बगुणा पकासिताति.

आदिकल्याणतादिगुणसम्पत्तिया ¶ वरं अग्गं उत्तमं, निपुणञाणगोचरताय पण्डितवेदनीयञ्च, तस्मा ‘‘वरं ञेय्य’’न्ति वचनेहि स्वाक्खाततादयो सब्बे धम्मगुणा पकासिता. अरियसच्चपटिवेधेन समुग्घातकिलेससम्मोहायेव परमत्थतो पण्डिता बाल्यादिसमतिक्कमनतो, तस्मा भावितलोकुत्तरमग्गा, सच्छिकतसामञ्ञफला च पुग्गला विसेसतो ‘‘विदू’’ति वुच्चन्ति. ते हि यथावुत्तसासनवरं अविपरीततो ञातुं, नेतुञ्च सपरसन्ताने सक्कुणन्ति. तस्मा ये सुप्पटिपन्नतादयो अनेकेहि सुत्तपदेहि संवण्णिता, ते अरियसङ्घगुणापि निरवसेसतो ‘‘विदूही’’ति पदेन पकासिताति. एवं नेत्तिया पठमगाथाय ‘‘एतं सासनवर’’न्ति पदेन सासनत्तयं सङ्गण्हित्वा तत्थ इतरेसं द्विन्नं अधिगमूपायभावतो सब्बसासनमूलभूतस्स, अत्तनो नेत्तिप्पकरणस्स च विसयभूतस्स परियत्तिसासनवरस्स दस्सनमुखेन सब्बे रतनत्तयगुणापि थोमनावसेन नयतोव पकासिता होन्ति. नयतो हि दस्सिता सब्बे गुणा निरवसेसा गहिता भवन्ति, न सरूपतो. तेनाह भगवन्तं ठपेत्वा पञ्ञवन्तानं अग्गभूतो धम्मसेनापतिसारिपुत्तत्थेरोपि बुद्धगुणपरिच्छेदनमनुयुत्तो ‘‘अपिच मे धम्मन्वयो विदितो’’ति (दी. नि. २.१४६) भगवतापि –

‘‘एवं अचिन्तिया बुद्धा, बुद्धधम्मा अचिन्तिया;

अचिन्तिये पसन्नानं, विपाको होति अचिन्तियो’’ति. (अप. थेर १.१.८२; नेत्ति. ९५) –

गाथा वुत्ता. तत्थ बुद्धधम्माति बुद्धगुणा. अम्हाकं पन यावजीवं रतनत्तयगुणपरिदीपने अतिउस्साहन्तानम्पि सरूपतो नीहरित्वा दस्सेतुं असमत्थभावो पगेव पण्डितेहि वेदितब्बोति.

इच्चेवं ¶ –

‘‘यं लोको पूजयते, सलोकपालो सदा नमस्सति च;

तस्सेत सासनवरं, विदूहि ञेय्यं नरवरस्सा’’ति. –

निग्गहितलोपवसेन वुत्ताय गाथाय सङ्खेपेन कथितो अनुसन्ध्यादिको समत्तोति.

‘‘यं लोको पूजयते, स लोकपालो सदा नमस्सति च;

तं तस्स सासनवरं, विदूहि ञेय्यं नरवरस्सा’’ति. –

गाथं ¶ अपरे पठन्ति. तस्सापि अनुसन्ध्यत्थो वुत्तनयोव. योजनत्थो पन विसेसो. तत्थ हि सलोकपालो लोको यस्स सत्थुनो नरवरस्स यं सासनवरं संवण्णेतब्बसहितं, संवण्णेतब्बं एव वा पूजयते चेव नमस्सति च, तस्स लोकपालस्स सत्थुनो तं पूजेतब्बं, नमस्सितब्बञ्च विदूहेव विञ्ञातब्बं, एतं सासनवरं नेत्तिप्पकरणस्स विसयन्ति गहेतब्बन्ति योजना. योजनाकारोपि हेट्ठा वुत्तनयोव.

विग्गहत्थोपि विसेसो. इमस्मिञ्हि नये लोकं पालेन्तीति लोकपाला, यथावुत्तचतुमहाराजादयो. तेहि लोकपालेहि सहितं सब्बलोकं पालेति लोकग्गनायकत्ताति लोकपालोति भगवापि लोकपालसद्देन वुत्तो. सो हि ‘‘तस्सा’’ति एत्थ तं-सद्देन परामसीयति, तस्मा तस्स लोकपालस्स सत्थुनो नरवरस्साति अत्थो गहितो. यदि एवं लोकपालो गुणीभूतो अपधानो पधानभूतं लोकं विसेसेत्वा विनिवत्तो, कथं तं-सद्देन परामसीयतीति? लोकविसेसको समानोपि सासनवरापेक्खताय जनकसामिभावेन सम्बन्धिविसेसभूतत्ता पधानभूतो विय परामसीयतीति. भगवा सासनवरस्स सामिभावेन गहितो. कथं सासनवरस्स सामी भगवा सासनवरं पूजयतीति? न चायं विरोधो. बुद्धा हि भगवन्तो धम्मगरुनो, ते सब्बकालं धम्ममपचयमानाव विहरन्तीति. बुद्धानञ्हि धम्मगरुधम्मापचयमानभावो ‘‘यंनूनाहं…पे… तमेव धम्मं सक्कत्वा गरुं कत्वा मानेत्वा पूजेत्वा उपनिस्साय विहरेय्य’’न्ति (अ. नि. ४.२१) वुत्तो, तस्मा लोकपालो भगवा सासनवरं ¶ पूजयतीति दट्ठब्बो. एवं सति लोकपालो भगवा सासनवरं पूजयतीति अत्थो युत्तो होतु, कथं लोकपालो भगवा सासनवरं नमस्सतीति युत्तोति? युत्तोव ‘‘नमस्सती’’ति पदस्स गरुकरणेन तन्निन्नपोणपब्भारोति अत्थस्सापि लब्भनतो. भगवा हि धम्मगरुताय सब्बकालं धम्मनिन्नपोणपब्भारभावेन विहरतीति. वुत्तञ्हेतं ‘‘येन सुदं निच्चकप्पं विहरामी’’तिआदि. सेसमेत्थ हेट्ठा वुत्तनयेन वा संवण्णनासु वुत्तनयेन वा ञातब्बन्ति अम्हेहि न वित्थारीयति.

एवं पठमगाथाय ‘‘सासनवर’’न्ति पदेन तिविधम्पि सासनं सङ्गण्हित्वा तत्थ परियत्तिसासनमेव अत्तनो नेत्तिप्पकरणस्स विसयं नियमेत्वा दस्सेन्तो ‘‘द्वादस पदानि’’त्यादिमाह. अथ वा पठमगाथाय रतनत्तयथोमनेन सह नेत्तिप्पकरणताविसयं सासनवरं आचरियेन दस्सितं, ‘‘तस्स सासनवरं किं सब्बंयेव नेत्तिप्पकरणस्स विसयं, उदाहु परियत्तिसासनमेवा’’ति पुच्छितब्बत्ता परियत्तिसासनभूतं सुत्तमेवाति दस्सेन्तो ‘‘द्वादस पदानि सुत्त’’न्तिआदिमाह. तत्थ ‘‘सासनवर’’न्ति सामञ्ञेन वुत्तम्पि परियत्तिसुत्तमेव सासनवरन्ति ¶ गहेतब्बन्ति अत्थो. ‘‘तं पन कतिविध’’न्ति वत्तब्बत्ता ‘‘द्वादस पदानी’’ति वुत्तं, सङ्खेपतो पभेदेन द्वादसविधन्ति अत्थो. पभेदतो द्वादसविधम्पि ब्यञ्जनपदअत्थपदतो पन दुविधमेवाति दस्सेतुं ‘‘तं सब्बं ब्यञ्जनञ्च अत्थो चा’’ति वुत्तं. ‘‘तस्मिं द्वये एकमेव सरूपतो नेत्तिप्पकरणस्स विसयन्ति विञ्ञेय्यं, उदाहु उभय’’न्ति पुच्छितब्बत्ता उभयन्ति दस्सेतुं ‘‘तं विञ्ञेय्यं उभय’’न्ति वुत्तं. वचनवचनीयभावेन सम्बन्धे यस्मिं ब्यञ्जने, अत्थे च ‘‘सुत्त’’न्ति वोहारो पवत्तो, तं उभयं सरूपतो नेत्तिप्पकरणस्स विसयन्ति विञ्ञेय्यन्ति अत्थो. ‘‘किन्ति विञ्ञेय्य’’न्ति वत्तब्बत्ता ‘‘को अत्थो, ब्यञ्जनं कतम’’न्ति वुत्तं. इदं वुत्तं होति – छब्यञ्जनपदछअत्थपदभेदेन द्वादसविधं ब्यञ्जनपदअत्थपदवसेन दुविधं सब्बपरियत्तिसङ्खातं सुत्तं मम नेत्तिप्पकरणस्स विसयं सासनवरन्ति ञातब्बं. सरूपतो पुच्छित्वा अत्थपदं, ब्यञ्जनपदञ्च सरूपतो ञातब्बन्ति.

एवं पठमगाथाय ‘‘सासनवर’’न्ति वुत्तस्स सुत्तस्स परियत्तिभावञ्चेव अत्थपदब्यञ्जनपदभावेन वेदितब्बत्तञ्च दस्सेत्वा इदानि तस्स सुत्तस्स पविचयूपायं ¶ नेत्तिप्पकरणं पदत्थविभागेन दस्सेतुं ‘‘सोळसहारा’’त्यादिमाह. अथ वा दुतियगाथाय नेत्तिप्पकरणस्स विसयं सासनवरं नियमेत्वा दस्सितं, ‘‘नेत्ति नाम कतमा, कतिविधा’’ति पुच्छितब्बत्ता नेत्तिनाम एत्तिकाति सङ्खेपतो दस्सेतुं ‘‘सोळसहारा’’त्यादिमाह. तत्थ तस्स सासनस्स सुत्तस्स अत्थपरियेट्ठि नेत्तिसंवण्णना मया महाकच्चायनेन निद्दिट्ठा नेत्ति नाम सोळसहारसमुदाया पञ्चनयसमुदाया अट्ठारसमूलपदसमुदायाति विजानितब्बाति.

ते हारादयो केनट्ठेन नेत्ति नाम? वेनेय्यसत्ते अरियधम्मं नेतीति नेत्तीति एवमादि अत्थो संवण्णनासु (नेत्ति. अट्ठ. गन्थारम्भकथा) वुत्तोव. इमाय ततियगाथायपि ‘‘महाकच्चानेन निद्दिट्ठा’’ति पाठो सुन्दरो. ‘‘महाकच्चायनेन निद्दिट्ठा’’ति वा पाठो, न सुन्दरो. लक्खणञ्हि मया हेट्ठा वुत्तन्ति. ‘‘सोळसहारादिसमुदाया नेत्ती’’ति वुत्ता, ते हारा सुत्तस्स ब्यञ्जनविचयो वा होन्ति, अत्थविचयो वा, नया च ब्यञ्जनविचयो वा होन्ति, अत्थविचयो वाति विचारणायं सति ‘‘इमे इमस्स विचयो’’ति नियमेत्वा दस्सेतुं ‘‘हारा ब्यञ्जनविचयो’’तिआदिमाह. तत्थ हारा सुत्तस्स ब्यञ्जनविचयो होन्ति, न अत्थविचयो सोळसहारानं मूलपदनिद्धारणं वज्जेत्वा ब्यञ्जनमुखेनेव संवण्णनाभावतो. तयो पन नया सुत्तस्स अत्थविचयो होन्ति, तिण्णं नयानं मूलपदसङ्खातअविज्जादिसभावधम्मनिद्धारणमुखेनेव सुत्तस्स अत्थसंवण्णनाभावतोति.

‘‘तं ¶ उभयं सुत्ते संवण्णनाभावेन केनचि कत्थचियेव योजेतब्बं, उदाहु सब्बथा सब्बत्थ योजित’’न्ति पुच्छितब्बभावतो तं उभयं सब्बत्थ सुत्तेसु सब्बथा योजितन्ति दस्सेतुं ‘‘उभयं परिग्गहीत’’न्ति वुत्तं. हारा चेव नया च उभयं सुत्तस्स अत्थनिद्धारणवसेन परितो समन्ततो गहितं सब्बथा सुत्तेसु योजितन्ति.

‘‘हारादिसमुदायभूतं नेत्तिसङ्खातं सुत्तं कथं संवण्णेतब्बं सुत्तं संवण्णेती’’ति वत्तब्बभावतो वुत्तं ‘‘वुच्चति सुत्तं यथासुत्त’’न्ति. नेत्तिसङ्खातं संवण्णनासुत्तं संवण्णेतब्बसुत्तानुरूपं यथा येन येन देसनाहारेन वा अञ्ञेन वा संवण्णेतब्बं, तेन तेन वुच्चति संवण्णेतीति ¶ अत्थो. अथ वा ‘‘नेत्तिसङ्खातं सुत्तं कित्तकं संवण्णेतब्बं सुत्तं संवण्णेती’’ति वत्तब्बभावतो वुत्तं ‘‘वुच्चति सुत्तं यथासुत्त’’न्ति. तत्थ यथासुत्तं यं यं सुत्तं भगवता वुत्तं, तं तं सब्बं सुत्तं नेत्तिसङ्खातं सुत्तं वुच्चति वदति अस्सादादीनवदस्सनवसेन संवण्णेतीति. तेन वुत्तं ‘‘नेत्तिनयेन हि संवण्णेतुं असक्कुणेय्यं नाम सुत्तं नत्थी’’ति (नेत्ति. अट्ठ. सङ्गहवारवण्णना).

‘‘यं यं भगवता देसितं सुत्तं नेत्तिसंवण्णनाय संवण्णितं, सा संवण्णेतब्बा देसना च विञ्ञेय्या, उदाहु देसितब्बञ्चा’’ति वत्तब्बभावतो ‘‘या चेव देसना’’त्यादिमाह. या चेव देसना पाळि संवण्णिता, सा च, ताय देसनाय देसितं यं धम्मजातं, तञ्च उभयं विमुत्तायतनदेसनासीसेन परिचयं करोन्तेहि एकन्तेन विञ्ञेय्यं उभयस्सेव अनुपादिसेसपरिनिब्बानपरियोसानानं सम्पत्तीनं हेतुभावतो. ‘‘तस्स उभयस्स विजानने साधेतब्बे साधेतब्बस्स विजाननस्स हेतुभूता कतमा अनुपुब्बी’’ति पुच्छितब्बभावतो वुत्तं ‘‘तत्रा’’त्यादि. तत्थ तत्र विजानने साधेतब्बे सुत्तादिनवङ्गस्स सासनस्स अत्थपरियेसना अत्थविचारणा हारनयानं अयं अनुपुब्बी विजाननस्स साधेतब्बस्स हेतुभूता अनुपुब्बी नामाति अत्थो. अथ वा तस्स उभयस्स विजानने साधेतब्बे सुत्तादिनवङ्गस्स सासनस्स अत्थपरियेसनाय अत्थविचारणाय अयं अनुपुब्बी विजाननस्स साधेतब्बस्स हेतुभूता अनुपुब्बी नामाति. अथ वा वक्खमानाय हारनयानुपुब्बिया नवविधसुत्तन्तपरियेसना विजाननस्स हेतुभूताति वेदितब्बा. तेनाकारेनेव अट्ठकथायं तिधा वुत्ताति.

सङ्गहवारस्स अत्थविभावना निट्ठिता.

२. उद्देसवारअत्थविभावना

१. एवं ¶ सङ्गहवारेन सङ्खेपतो दस्सिते हारादयो इदानि विभागेन दस्सेतुं ‘‘तत्थ कतमे सोळस हारा’’तिआदिदेसना आरद्धा ¶ . अथ वा सोळसहारादिसमुदाया नेत्ति नाम मया महाकच्चानेन निद्दिट्ठाति वुत्ता, ‘‘कतमे ते सोळस हारा’’ति पुच्छितब्बत्ता वुत्तं ‘‘तत्थ सोळस हारा’’त्यादि. तत्थ तत्थाति तेसु सोळसहारादीसु. देसना हारो, विचयो हारो…पे… सामारोपनो हारोति इमे सोळस हाराति दट्ठब्बा.

तत्थ सब्बसाधारणत्ता हारपदस्स वचनत्थो पठमं वत्तब्बो. केनट्ठेन हाराति? हरीयन्ति एतेहीति हारा. एतेहि संवण्णनाविसेसेहि संवण्णियेसु सुत्तगेय्यादीसु अञ्ञाणसंसयविपल्लासा हरीयन्ति, इति अञ्ञाणादिहरणकारणत्ता ‘‘एतेही’’ति पदेन निद्दिट्ठा संवण्णनाविसेसा हारा नाम, हर-धातुया आचरियस्स वचीभेदसद्दो, तंसमुट्ठापको चित्तुप्पादो च मुख्यत्थो, वेनेय्यानं संवण्णेतब्बसुत्तस्स अत्थजाननादिञाणसम्पयुत्तचित्तुप्पादो कारणूपचारत्थो, तस्स उपनिस्सयपच्चयभूतानं संवण्णनाविसेसानं उपनिस्सयपच्चयसत्ति फलूपचारत्थो, इति-सद्देन सा उपनिस्सयपच्चयसत्तियेव परामसीयति. तंसत्तिसम्पन्ना संवण्णनाविसेसा ण-पच्चयत्था होन्ति. एस नयो एवरूपेसु ठानेसुपि. वित्थारो अट्ठकथायं (नेत्ति. अट्ठ. १) वुत्तो एव.

असाधारणतो पन देसीयति एतायाति देसना. एताय संवण्णनाय संवण्णेतब्बसुत्तत्थो देसीयति संवण्णीयति संवण्णनानुसारेन ञापीयति, इति ञापनकारणत्ता ‘‘एताया’’ति पदेन निद्दिट्ठा विसेससंवण्णना देसना नाम, न पाळिदेसना, पाळिदेसनाय संवण्णेतब्बसंवण्णनाभावेन सहचरणतो वा देसना. किञ्चापि अञ्ञे हारा देसनापाळिसङ्खातस्स सुत्तस्स अत्थसंवण्णनाभावतो देसनाय सहचारिनो होन्ति, अयं पन हारो येभुय्येन यथारुतवसेनेव विञ्ञायमानत्ता पाळिदेसनाय सह चरतीति वत्तब्बतं अरहति, न तथा परे. न हि अस्सादादीनवनिस्सरणादिसन्दस्सनलक्खणरहिता पाळिदेसना अत्थि, अयञ्च हारो अस्सादादिसन्दस्सनलक्खणोति.

विचियन्ति एतेनाति विचयो. एतेन संवण्णनाविसेसेन सुत्ते पदपञ्हादयो विचियन्ति, इति ¶ विचारणकारणत्ता सो संवण्णनाविसेसो ¶ विचयो नाम. कत्वत्थाधिकरणत्थापि लब्भन्ति. संवण्णेतब्बसुत्तेन पदपञ्हादिविचयनलक्खणो संवण्णनाविसेसो विचयो हारो.

युत्तायुत्ति विचारीयति एतायाति युत्ति. एताय विसेससंवण्णनाय सब्बेसं हारानं भूमिगोचरानं युत्तायुत्ति विचारीयति, इति विचारणकारणत्ता ‘‘एताया’’ति पदेन निद्दिट्ठा विसेससंवण्णना युत्ति नाम. इध उत्तरपदलोपो दट्ठब्बो, युत्तिया विचारणा, विचारणीयभावेन सहचरणतो वा युत्ति. सब्बहारानं भूमिगोचरानं युत्तायुत्तिविचारणलक्खणो संवण्णनाविसेसो युत्ति हारो.

पदति पवत्तेति फलं एतेनाति पदं, कारणं. ठन्ति तिट्ठन्ति एत्थ फलानि तदायत्तवुत्तितायाति ठानं, कारणं. पदञ्च तं ठानञ्चाति पदट्ठानं, आसन्नकारणं. सुत्ते आगतधम्मानं पदट्ठानं विचारीयति एतायाति पदट्ठाना, विसेससंवण्णना, विचारणलोपोव, सुत्ते आगतधम्मानं पदट्ठानानं, तेसञ्च पदट्ठानानं विचारणलक्खणो संवण्णनाविसेसो पदट्ठानो हारो.

सुत्ते अवुत्तापि समानलक्खणा धम्मा लक्खीयन्ति एतेन संवण्णनाविसेसेनाति लक्खणो, सुत्ते वुत्तेन धम्मेन समानलक्खणानं धम्मानं अवुत्तानम्पि निद्धारणलक्खणो संवण्णनाविसेसो लक्खणो हारो.

सुत्ते दस्सियमाना निब्बचनादयो चत्तारोपि वियूहीयन्ति विभागेन सम्पिण्डीयन्ति एत्थ, एतेन वाति ब्यूहो, चतुन्नं निब्बचनादीनं ब्यूहो चतुब्यूहो. निब्बचनाधिप्पायब्यञ्जनानञ्चेव देसनानिदानस्स च पुब्बापरेन सद्धिं सन्दस्सनलक्खणो संवण्णनाविसेसो चतुब्यूहो हारो.

देसनाय गहितधम्मेन सभागा, विसभागा च धम्मा आवट्टीयन्ति एत्थ, एतेन वाति आवट्टो, देसनाय गहितधम्मानं सभागविसभागधम्मवसेन आवट्टनलक्खणो संवण्णनाविसेसो आवट्टो हारो.

असाधारणासाधारणानं संकिलेसधम्मे, वोदानधम्मे च साधारणासाधारणतो, पदट्ठानतो, भूमितो च विभजनलक्खणो संवण्णनाविसेसो विभत्ति हारो.

सुत्ते ¶ ¶ निद्दिट्ठा धम्मा पटिपक्खवसेन परिवत्तीयन्ति इमिना, एत्थ वाति परिवत्तो, सुत्ते निद्दिट्ठानं धम्मानं पटिपक्खतो परिवत्तनलक्खणो संवण्णनाविसेसो परिवत्तनो हारो.

सुत्ते वुत्तस्स एकस्सेव अत्थस्स वाचकं विविधं वचनं एत्थ संवण्णनाविसेसेति विवचनं, विवचनमेव वेवचनं, सुत्ते वुत्ते एकस्मिं अत्थे अनेकपरियायसद्दयोजनालक्खणो संवण्णनाविसेसो वेवचनो हारो.

सुत्ते वुत्ता अत्था पकारेहि ञापीयन्ति इमिना, एत्थ वाति पञ्ञत्ति, एकेकस्स धम्मस्स अनेकाहि पञ्ञत्तीहि पञ्ञापेतब्बाकारलक्खणो संवण्णनाविसेसो पञ्ञत्ति हारो.

सुत्तागता धम्मा पटिच्चसमुप्पादादीसु ओतरीयन्ति अनुप्पवेसीयन्ति एत्थ, एतेन वाति ओतरणो, पटिच्चसमुप्पादादिमुखेहि सुत्तत्थस्स ओतरणलक्खणो संवण्णनाविसेसो ओतरणो हारो.

सुत्ते पदपदत्थपञ्हारम्भा सोधीयन्ति समाधीयन्ति एत्थ, एतेन वाति सोधनो, सुत्ते पदपदत्थपञ्हारम्भानं सोधनलक्खणो संवण्णनाविसेसो सोधनो हारो.

सामञ्ञविसेसभूता धम्मा विना विकप्पेन अधिट्ठीयन्ति अनुप्पवत्तीयन्ति एत्थ, एतेन वाति अधिट्ठानो, सुत्तागतानं धम्मानं अविकप्पनवसेन सामञ्ञविसेसनिद्धारणलक्खणो संवण्णनाविसेसो अधिट्ठानो हारो.

यो हेतु चेव पच्चयो च फलं परिकरोति अभिसङ्खरोति, इति सो हेतु चेव पच्चयो च परिक्खारो, यो संवण्णनाविसेसो तं परिक्खारं हेतुञ्चेव पच्चयञ्च आचिक्खति, इति सो संवण्णनाविसेसो परिक्खारो नाम. सुत्ते आगतधम्मानं परिक्खारसङ्खाते हेतुपच्चये निद्धारेत्वा संवण्णनालक्खणो संवण्णनाविसेसो परिक्खारो हारो.

सुत्ते आगतधम्मा पदट्ठानादिमुखेन समारोपीयन्ति एत्थ, एतेन वाति समारोपनो, सुत्ते आगतधम्मानं पदट्ठानवेवचनभावपहानसमारोपनविचारणलक्खणो संवण्णनाविसेसो समारोपनो हारो. भावसाधनवसेनापि सब्बत्थ वचनत्थो वत्तब्बोति तस्सापि वसेन योजेतब्बन्ति. सेसं संवण्णनानुसारेन ञातब्बन्ति.

‘‘तत्थ ¶ ¶ कतमे सोळस हारा देसना’’त्यादिना हारसरूपं वुत्तं, किमत्थं ‘‘तस्सानुगीति’’त्यादि वुत्तन्ति? अनुगीतिगाथाय सुखग्गहणत्थं पुन ‘‘तस्सानुगीति देसना विचयो युत्ति’’त्यादि वुत्तं. तत्थ तस्साति हारुद्देसस्स. अनुगीतीति अनु पच्छा गायनगाथा. पञ्चदसोति पञ्चदसमो. सोळसोति सोळसमो. अत्थतो असंकिण्णाति देसनादिपदत्थतो लक्खणत्थतो सङ्करतो रहिता. तेन वुत्तं अट्ठकथायं ‘‘सो च नेसं असङ्करो लक्खणनिद्देसे सुपाकटो होती’’ति. सेसं संवण्णनानुसारेन ञातब्बन्ति. ‘‘केचि हारा केहिचि हारेहि संकिण्णा विय दिस्सन्ति, कस्मा असंकिण्णाति ञातब्ब’’न्ति वत्तब्बत्ता वुत्तं ‘‘एतेसञ्चेवा’’तिआदि. तत्थ एतेसञ्चेव भवतीति एतेसं सोळसन्नं हारानं यथा येनाकारेन असङ्करो होति, तथा असङ्कराकारेन भवति. अयति पवत्तति नयविभत्तीति अया, वित्थारेन अयाति वित्थारतया, त-कारो मिस्सकदोसापगमत्थाय आगतो, नयविभत्तिविसेसवचनं. नयेन ञायेन विभत्ति नयविभत्ति, न पञ्चनयविभत्ताहारानं वित्थारेन पवत्ता ञायविभत्ति तथा असङ्कराकारेन भवति तस्मिं असंकिण्णाति ञातब्बाति अधिप्पायो.

२. सोळस हारा सरूपतो वुत्ता, अम्हेहि च विञ्ञाता, ‘‘कतमे पञ्च नया’’ति वत्तब्बभावतो तथा पुच्छित्वा सरूपतो उद्दिसितुं ‘‘तत्थ कतमे पञ्च नया’’त्यादि वुत्तं. अट्ठकथायं पन ‘‘एवं हारे उद्दिसित्वा इदानि नये उद्दिसितुं ‘तत्थ कतमे’तिआदि वुत्त’’न्ति (नेत्ति. अट्ठ. २) वुत्तं. ‘‘तत्थ नयन्ति संकिलेसे, वोदाने च विभागतो ञापेन्तीति नया, नीयन्ति वा तानि एत्थ, एतेहि वाति नया’’तिआदिना (नेत्ति. अट्ठ. २) अट्ठकथायं वित्थारेन वचनत्थो वुत्तो. नी-धातुया नन्दियावट्टादिनयानुसारेन संकिलेसे, वोदाने च आलम्बित्वा पवत्तो ञाणसम्पयुत्तचित्तुप्पादो मुख्यत्थो, नन्दियावट्टादिनयानं उपनिस्सयपच्चयसत्ति फलूपचारतो गहिता, इति-सद्दो तं फलूपचारतो गहितसत्तिं परामसि, तंसत्तिसहिता नन्दियावट्टादिनया अ-पच्चयत्था.

तण्हाअविज्जाहि संकिलेसपक्खस्स सुत्तस्स, समथविपस्सनाहि वोदानपक्खस्स सुत्तस्स चतुसच्चयोजनमुखेन नयनलक्खणो संवण्णनाविसेसो ¶ नन्दियावट्टो नयो. तत्थ चतुसच्चन्ति तण्हा च अविज्जा च भवमूलत्ता समुदयसच्चं, अवसेसा तेभूमका धम्मा दुक्खसच्चं, समथविपस्सना मग्गसच्चं, तेन पत्तब्बा असङ्खतधातु निरोधसच्चन्ति.

तीहि अवयवेहि लोभादीहि संकिलेसपक्खे, तीहि अवयवेहि अलोभादीहि च वोदानपक्खे ¶ पुक्खलो सोभनोति तिपुक्खलो, अकुसलमूलेहि संकिलेसपक्खस्स, कुसलमूलेहि वोदानपक्खस्स सुत्तत्थस्स चतुसच्चयोजनमुखेन नयनलक्खणो संवण्णनाविसेसो तिपुक्खलो.

सीहस्स भगवतो विक्कीळितं एत्थ नयेति सीहविक्कीळितो, सुभसञ्ञादीहि विपल्लासेहि सकलसंकिलेसपक्खस्स, सद्धिन्द्रियादीहि वोदानपक्खस्स सुत्तत्थस्स चतुसच्चयोजनमुखेन नयनलक्खणो संवण्णनाविसेसो सीहविक्कीळितनयो.

अत्थनयत्तयदिसाभावेन कुसलादिधम्मानं आलोचनं दिसालोचनं. तस्स तस्स अत्थनयस्स योजनत्थं कतेसु सुत्तस्स अत्थविस्सज्जनेसु ये वोदानादयो, संकिलेसिका च तस्स तस्स नयस्स दिसाभूता धम्मा सुत्ततो निद्धारेत्वा कथिता, तेसं यथावुत्तधम्मानं चित्तेनेव ‘‘अयं पठमा दिसा, अयं दुतिया दिसा’’तिआदिना आलोचनं दिसालोचनं.

तथा आलोचितानं धम्मानं अत्थनयत्तययोजने समानयनतो अङ्कुसो वियाति अङ्कुसो, तस्स तस्स नयस्स दिसाभूतानं कुसलादिधम्मानं समानयनं अङ्कुसो नयो.

लञ्जेतीति लञ्जको. यो नयो सुत्तत्थं लञ्जेति पकासेति, इति लञ्जनतो पकासनतो सो नयो लञ्जको नाम, नयो च सो लञ्जको चाति नयलञ्जको. नयलञ्जको पठमो नन्दियावट्टो नाम, नयलञ्जको दुतियो तिपुक्खलो नाम, नयलञ्जको ततियो सीहविक्कीळितो नामाति योजेतब्बो.

उग्गतानं विसेसेन उग्गतोति उत्तमो, तं उत्तमं. गताति ञाता, मताति अत्थो. ‘‘मता’’ति वा पाठो. सेसमेत्थ वुत्तनयानुसारेनपि संवण्णनानुसारेनपि जानितब्बन्ति.

यथावुत्तनयविसेससंवण्णनाय ¶ टीकायं –

‘‘समूहादिं उपादाय लोकसङ्केतसिद्धा वोहारमत्तता सम्मुतिसभावो, पथवीफस्सादीनं कक्खळफुसनादिलक्खणं परमत्थसभावो. अयञ्हेत्थ सङ्खेपो – यस्मिं भिन्ने, इतरापोहे वा चित्तेन कते न तथा बुद्धि, इदं सम्मुतिसच्चं यथा घटे, ससम्भारजले च, तब्बिपरियायेन परमत्थसच्च’’न्ति –

वचने ¶ घटकथलआपजलकद्दमादिसङ्खातं समूहादिं उपादाय लोकस्स पुब्बे घटकथलआपजलकद्दमादिसङ्केतसिद्धा घटकथलआपजलकद्दमादिवोहारमत्तता सम्मुतिसभावो सङ्केतवसेन अवितथत्ता. पथवीआदीनं कक्खळादिलक्खणं, फस्सादीनं फुसनादिलक्खणं परमत्थसभावो. ‘‘यदि एवं घटादिके अभिन्ने वा आपादिके वा अनुरूपेन ऊनभावेन अप्पवत्तमाने वा सति सम्मुतिभावो होतु, भिन्ने वा ऊने वा कथं सम्मुतिभावो भवेय्य, पथवीफस्सादीनम्पि भिज्जमानत्ता, कक्खळफुसनादीनञ्च पथवीफस्सादीहि अनञ्ञत्ता कथं परमत्थसभावो भवेय्य, कतमेन सङ्खेपेन अत्थेन सम्मुतिसभावो, परमत्थसभावो च अम्हेहि जानितब्बो’’ति वत्तब्बभावतो ‘‘अयञ्हेत्थ सङ्खेपो’’तिआदिमाह. तत्थ एत्थाति एतेसु सम्मुतिसभावपरमत्थसभावेसु अयं नयो वुच्चमानो सङ्खेपो अत्थो दट्ठब्बो.

यस्मिं घटादिके भिन्ने सति ततो घटादितो इतरो कथलादिभावो चित्तेन पुब्बे कतेन यथा येन कथलादिवोहारेन भवति, यस्मिं आपादिके सम्भारजलादिके ऊनभावेन पवत्तमाने सति वा ततो आपादितो इतरो कद्दमादिभावो चित्तेन पुब्बे कतेन यथा येन कद्दमादिवोहारेन भवति, तथा तेन वोहारेन बुद्धि कथलादिसभावजाननं कद्दमादिसभावजाननं भवति, इदं अभिन्ने घटादिकं वा भिन्ने कथलादिकं वा अनूने आपादिकं वा ऊने कद्दमादिकं वा सब्बं सम्मुतिसच्चं होत्वेव. ‘‘कद्दमस्मिं भिन्ने, कद्दमस्मिं ऊने वा सति इतरो सम्मुतिसभावो’’ति पुच्छितब्बभावतो ‘‘घटे, सम्भारजले चा’’ति वुत्तं.

सम्मुतिसच्चसभावो ¶ तुम्हेहि वुत्तो, अम्हेहि च ञातो, ‘‘कतमो परमत्थसच्चसभावो’’ति वत्तब्बभावतो ‘‘तब्बिपरियायेन परमत्थसच्च’’न्ति वुत्तं. पथवीआदीनं कक्खळादिलक्खणतो इतरस्स फुसनादिलक्खणस्स असम्भवतो, फस्सादीनञ्च फुसनादिलक्खणतो इतरस्स कक्खळादिलक्खणस्स असम्भवतो पथवीफस्सादीनं लक्खळफुसनादिलक्खणं परमत्थसच्चं होत्वेवाति इमस्मिं सङ्खेपत्थे गहिते कोचि विरोधो नत्थीति अधिप्पायोति.

३. पञ्च नया सरूपतो आचरियेन उद्दिट्ठा, अम्हेहि च विञ्ञाता, ‘‘यानि पदानि अट्ठारस मूलपदानि उद्दिट्ठानि, कतमानि तानी’’ति पुच्छितब्बत्ता तानि सरूपतो दस्सेतुं ‘‘तत्थ कतमानि अट्ठारस मूलपदानि’’त्यादिमाह. अट्ठकथायं पन ‘‘एवं नयेपि उद्दिसित्वा इदानि मूलपदानि उद्दिसितुं ‘तत्थ कतमानी’तिआदि आरद्ध’’न्ति वुत्तं. तत्थ कुसलानि ¶ नव पदानि, अकुसलानि नव पदानि अट्ठारस मूलपदानीति दट्ठब्बानीति योजना. मूलन्ति पतिट्ठहन्ति एतेहि नया, पतिट्ठानविभागा चाति मूलानि, पदन्ति पतिट्ठहन्ति एत्थ नया, पट्ठानविभागा, अधिगमा चाति पदानि, वुत्तप्पकारट्ठेन मूलानि च तानि पदानि चाति मूलपदानि. कुच्छिते पापधम्मे सलयन्तीति कुसलानि, कुसे रागादयो लुनन्तीति कुसलानि, कुसा विय लुनन्तीति कुसलानि, कुसेन ञाणेन लातब्बानि पवत्तेतब्बानीति कुसलानि. कुसलानं पटिपक्खानीति अकुसलानि अ-सद्दो चेत्थ पटिपक्खत्थोति.

नव पदानि कुसलानि, नव पदानि अकुसलानीति गणनपरिच्छेदतो, जातिभेदतो च उद्दिट्ठानि, ‘‘कतमानि तानी’’ति पुच्छितब्बत्ता नव पदानि अकुसलानि पच्चासत्तिन्यायेन सरूपतो दस्सेतुं ‘‘कतमानि नव पदानि अकुसलानी’’तिआदि वुत्तं. अट्ठकथायं पन –

‘‘एवं गणनपरिच्छेदतो, जातिभेदतो च मूलपदानि दस्सेत्वा इदानि सरूपतो दस्सेन्तो संकिलेसपक्खंयेव पठमं उद्दिसति ‘तण्हा’तिआदिना’’ति (नेत्ति. अट्ठ. ३) –

वुत्तं. तत्थ रूपादिके खन्धे तसति परितसतीति तण्हा. अविन्दियं कायदुच्चरितादिं विन्दतीति अविज्जा ¶ , विन्दियं कायसुचरितादिं न विन्दतीति अविज्जा, विज्जाय पटिपक्खाति वा अविज्जा. लुब्भन्ति तेनाति लोभो, लुब्भतीति वा लोभो, लुब्भनं वा लोभो. दोसमोहेसुपि एसेव नयो. असुभे रूपक्खन्धादिके ‘‘सुभ’’न्ति पवत्ता सञ्ञा सुभसञ्ञा. दुक्खदुक्खादिके ‘‘सुख’’न्ति पवत्ता सञ्ञा सुखसञ्ञा. अनिच्चे सङ्खारधम्मे ‘‘निच्च’’न्ति पवत्ता सञ्ञा निच्चसञ्ञा. अनत्तसभावेसु चक्खादीसु खन्धेसु ‘‘अत्ता’’ति पवत्ता सञ्ञा अत्तसञ्ञा. यत्थाति येसु पदेसु सब्बो अकुसलपक्खो सङ्गहं समोसरणं गच्छति, तानि पदानि अकुसलानीति योजना. सङ्गहं गणनं. समोसरणं समारोपनं.

पच्चनीकधम्मे उद्धच्चादिके नीवरणे समेति वूपसमेति तदङ्गविक्खम्भनवसेनाति समथो. सङ्खारे अनिच्चादीहि विविधेहि आकारेहि पस्सतीति विपस्सना. लोभस्स पटिपक्खो अलोभो. दोसस्स पटिपक्खो अदोसो. मोहस्स पटिपक्खो अमोहो. एत्थापि अ-सद्दो पटिपक्खत्थो, न अभावत्थादिकोति अधिप्पायो. असुभे रूपक्खन्धादिके, चक्खादिम्हि वा ‘‘असुभ’’न्ति पवत्ता सञ्ञापधानचित्तुप्पादा असुभसञ्ञा, विसेसतो कायानुपस्सनासतिपट्ठानं ¶ . दुक्खदुक्खतादीसु ‘‘दुक्ख’’न्ति पवत्ता सञ्ञापधानचित्तुप्पादा दुक्खसञ्ञा, विसेसतो वेदनानुपस्सनासतिपट्ठानं. अनिच्चे खन्धादिके विपरिणामधम्मे ‘‘अनिच्च’’न्ति पवत्ता सञ्ञापधानचित्तुप्पादा अनिच्चसञ्ञा, विसेसतो चित्तानुपस्सनासतिपट्ठानं. अनत्तसभावे खन्धे, चक्खादिम्हि वा ‘‘अनत्ता’’ति पवत्ता सञ्ञापधानचित्तुप्पादा अनत्तसञ्ञा, विसेसतो धम्मानुपस्सनासतिपधानं. पञ्ञासतिसीसेन हि पवत्ता अयं देसना. तेन वुत्तं भगवता ‘‘कथञ्च, भिक्खवे, सतिबलं दट्ठब्बं? चतूसु सतिपट्ठानेसु, एत्थ सतिबलं दट्ठब्ब’’न्ति. यत्थाति येसु पदेसु सब्बो कुसलपक्खो सङ्गहं समोसरणं गच्छति, तानि पदानि कुसलानीति योजना.

उद्दानन्ति उद्धं दानं रक्खणं उद्दानं, सङ्गहवचनन्ति अत्थो. उद्दाने अवुत्ते सति हेट्ठा वुत्तस्स अत्थस्स विप्पकिण्णभावो दिन्नो विय भवेय्य, तस्मा विप्पकिण्णभावस्स निवारणत्थं उद्दानन्ति अधिप्पायो. चतुरो च विपल्लासाति सुभसुखनिच्चअत्तसञ्ञा. किलेसा भवन्ति एत्थ नवपदेसूति भूमी, किलेसानं भूमीति किलेसभूमी, किलेसपवत्तनट्ठानानि नव पदानीति वुत्तं होति.

चतुरो ¶ सतिपट्ठानाति असुभदुक्खअनिच्चअनत्तसञ्ञा. इन्द्रियभूमीति सद्धादीनं विमुत्तिपरिपाचनिन्द्रियानं भूमी पवत्तनट्ठानानि समोसरणट्ठानानि.

नवहि कुसलपदेहि कुसलपक्खा युज्जन्ति योजीयन्ति, नवहि अकुसलपदेहि अकुसलपक्खा युज्जन्ति योजीयन्ति. नवहि कुसलपदेहि सह कुसलपक्खा युज्जन्ति युज्जन्ता भवन्ति, नवहि अकुसलपदेहि सह अकुसलपक्खा युज्जन्ति युज्जन्ता भवन्तीति उद्देसवारे वुत्तावसेसो संवण्णनानुसारेन विजानितब्बो.

इति सत्तिबलानुरूपा रचिता

उद्देसवारस्स अत्थविभावना निट्ठिता.

३. निद्देसवारअत्थविभावना

सोळसहारनिद्देसविभावना

४. हारादीसु ¶ समुदायस्स नेत्तिप्पकरणस्स उद्देसो उद्दिट्ठो, अम्हेहि च ञातो, ‘‘कतमो निद्देसो’’ति पुच्छितब्बत्ता उद्दिट्ठे हारादयो निद्दिसितुं ‘‘तत्थ सङ्खेपतो नेत्ती’’तिआदि आरद्धं. अट्ठकथायं पन ‘‘एवं उद्दिट्ठे हारादयो निद्दिसितुं ‘तत्थ सङ्खेपतो’तिआदि आरद्ध’’न्ति (नेत्ति. अट्ठ. ४) वुत्तं. तत्थ तत्थाति तस्मिं ‘‘तत्थ कतमे सोळस हारा? देसना विचयो’’तिआदिउद्देसपाठे. सङ्खेपतोति समासतो. नेत्तीति नेत्तिप्पकरणं. कित्तिताति कथिता, इदानि निद्देसतो कथेस्सामीति वुत्तं होति.

१.

‘‘अस्सादादीनवता, निस्सरणम्पि च फलं उपायो च.

आणत्ती च भगवतो, योगीनं देसनाहारो’’ति. –

गाथायं येन संवण्णनाविसेसेन सुत्ते आगता अस्सादोपि आदीनवता आदीनवोपि निस्सरणम्पि फलम्पि उपायोपि योगीनं अत्थाय भगवतो आणत्तिपि इमे धम्मा दस्सिता संवण्णिता संवण्णनावसेन ञापिता, सो संवण्णनाविसेसो देसनाहारो नामाति अत्थयोजना.

वचनत्थादयो ¶ अट्ठकथायं वित्थारतो वुत्ताव, तस्मा किञ्चिमत्तमेव कथेस्सामि. अस्सादीयतेति अस्सादो, को सो? सुखं, सोमनस्सं, इट्ठारम्मणभूता पञ्चुपादानक्खन्धा च. अस्सादेति एतायाति वा अस्सादो, को सो? तण्हा, विपल्लासा च. विपल्लासवसेन हि एकच्चे सत्ता अनिट्ठम्पि आरम्मणं इट्ठाकारेन अस्सादेन्ति.

आभुसं कम्मेन दीनं दुक्खादि हुत्वा वाति पवत्ततीति आदीनवो, दुक्खादि. अथ वा अतिविय आदीनं कपणं हुत्वा वाति पवत्ततीति आदीनवो, कपणमनुस्सो, तथाभावा च तेभूमका धम्मा अनिच्चतादियोगतो.

निस्सरति एतेनाति निस्सरणं, अरियमग्गो. निस्सरतीति वा निस्सरणं, निब्बानं. पि-सद्दो ¶ सम्पिण्डनत्थो. निस्सरणभेदो अट्ठकथायं (नेत्ति. अट्ठ. ४ हारसङ्खेप) बहुधा वुत्तोव.

फलति पवत्ततीति फलं, देसनाय फलं. यदिपि देसना फलनिप्फादिका न होति, तथापि भगवतो धम्मदेसनं सुत्वा पुञ्ञसम्भारा सम्भवन्ति, पुञ्ञसम्भारहेतुतो फलं पवत्तं, तस्मा देसनाय फलं नामाति. कतमं तं? देवमनुस्सेसु आयुवण्णसुखबलयसपरिवारअधिपतेय्यउपधिसम्पत्तिचक्कवत्तिसिरिदेवरज्ज- सिरिचतुसम्पत्तिचक्कसीलसमाधिसम्पदा विज्जाभिञ्ञा पटिसम्भिदा सावकबोधिपच्चेकबोधिसम्मासम्बोधियो.

पच्चयसामग्गिं उपगन्त्वा अयति पवत्तति फलं एतेनाति उपायो, को सो? अरियमग्गस्स पुब्बभागपटिपदा. पुरिमा पटिपदा हि पच्छिमाय पटिपदाय अधिगमूपायो, परम्पराय मग्गनिब्बानाधिगमस्स च उपायो. केचि ‘‘मग्गोपि उपायो’’ति वदन्ति, तेसं मतेन निब्बानमेव निस्सरणन्ति वुत्तं सिया. ‘‘ते पहाय तरे ओघन्ति इदं निस्सरण’’न्ति (नेत्ति. ५) पन अरियमग्गस्स निस्सरणभावं वक्खति, तस्मा केसञ्चि वादो न गहेतब्बो.

आणत्तीति आणारहस्स भगवतो वेनेय्यानं हितसिद्धिया ‘‘एवं सम्मापटिपत्तिं पटिपज्जाहि, मिच्छापटिपत्तिं मा पटिपज्जाही’’ति विधानं आणाठपनं आणत्ति नाम.

युज्जन्ति ¶ पयुज्जन्ति चतुसच्चकम्मट्ठानभावनासूति योगिनो, वेनेय्या, तेसं योगीनं अत्थायाति वचनसेसं नीहरित्वा योजना कातब्बा. सुत्ते आगतानं सब्बेसं अस्सादादीनं एकदेसागतानम्पि नीहरित्वा सब्बेसं विभजनसंवण्णनाविसेसो देसनाहारोति निद्देसतो गहेतब्बो, सो च विभजनाकारो देसनाहारविभङ्गे (नेत्ति. ५) आगमिस्सतीति इध न दस्सितोति.

देसनाहारनिद्देसो निद्दिट्ठो, अम्हेहि च ञातो, ‘‘कतमो विचयहारनिद्देसो’’ति पुच्छितब्बत्ता –

२.

‘‘यं पुच्छितञ्च विस्सज्जितञ्च, सुत्तस्स या च अनुगीति.

सुत्तस्स यो पविचयो, हारो विचयोति निद्दिट्ठो’’ति. –

गाथा ¶ वुत्ता. तत्थ सुत्तस्स यं पुच्छितञ्च या पुच्छा विचयमाना च सुत्तस्स यं विस्सज्जितञ्च या विस्सज्जना विचयमाना च सुत्तस्स यो पदादिविचयो, अस्सादादिविचयो च अत्थि, ते वुत्तप्पकारा विचयमाना पुच्छादयो येन संवण्णनाविसेसेन विचियन्ति, सो संवण्णनाविसेसो विचयो हारोति निद्दिट्ठोति अत्थयोजना कातब्बा.

पुच्छीयते पुच्छितं. विस्सज्जीयते विस्सज्जितन्ति भावसाधनत्थो दट्ठब्बो, न कम्मसाधनत्थो. तेन वुत्तं टीकायं ‘‘भावत्थे तोति आह – ‘विस्सज्जितन्ति विस्सज्जना’’’ति.

‘‘सुत्तस्सा’’ति नियमितत्ता संवण्णनावसेन अट्ठकथायं आगतं न गहेतब्बन्ति दट्ठब्बं. सो विचयो हारो अट्ठकथायं (नेत्ति. अट्ठ. ४ हारसङ्खेप) वुत्तोव. कथं? –

‘‘अयं पुच्छा अदिट्ठजोतना दिट्ठसंसन्दना विमतिच्छेदना अनुमतिपुच्छा कथेतुकम्यतापुच्छा सत्ताधिट्ठाना धम्माधिट्ठाना एकाधिट्ठाना अनेकाधिट्ठाना सम्मुतिविसया परमत्थविसया अतीतविसया अनागतविसया पच्चुप्पन्नविसया’’तिआदिना पुच्छाविचयो वेदितब्बो. ‘‘इदं विस्सज्जनं एकंसब्याकरणं विभज्जब्याकरणं पटिपुच्छाब्याकरणं ठपनं सावसेसं निरवसेसं सउत्तरं ¶ निरुत्तरं लोकियं लोकुत्तर’’न्तिआदिना विस्सज्जनविचयो.

‘‘अयं पुच्छा इमिना समेति, एतेन न समेती’’ति पुच्छितत्थं आनेत्वा, विचयो पुब्बेनापरं संसन्दित्वा च विचयो पुब्बापरविचयो. ‘‘अयं अनुगीति वुत्तत्थसङ्गहा अवुत्तत्थसङ्गहा तदुभयत्थसङ्गहा कुसलत्थसङ्गहा अकुसलत्थसङ्गहा’’तिआदिना अनुगीतिविचयो. अस्सादादीसु सुखवेदनाय ‘‘इट्ठारम्मणानुभवनलक्खणा’’तिआदिना, तण्हाय ‘‘आरम्मणग्गहणलक्खणा’’तिआदिना, विपल्लासानं ‘‘विपरीतग्गहणलक्खणा’’तिआदिना, अवसिट्ठानं तेभूमकधम्मानं ‘‘यथासकलक्खणा’’तिआदिना सब्बेसञ्च द्वावीसतिया तिकेसु, द्वाचत्तालीसाधिके च दुकसते लब्भमानपदवसेन तंतंअस्सादत्थविसेसनिद्धारणं अस्सादविचयो.

दुक्खवेदनाय ‘‘अनिट्ठानुभवनलक्खणा’’तिआदिना, दुक्खसच्चानं ‘‘पटिसन्धिलक्खणा’’तिआदिना, अनिच्चतादीनं आदिअन्तवन्तताय अनिच्चन्तिकताय च ¶ ‘‘अनिच्चा’’तिआदिना सब्बेसञ्च लोकियधम्मानं संकिलेसभागियहानभागियतादिवसेन आदीनववुत्तिया ओकारनिद्धारणेन आदीनवविचयो. निस्सरणपदे अरियमग्गस्स आगमनतो कायानुपस्सनादिपुब्बभागपटिपदाविभागविसेसनिद्धारणवसेन, निब्बानस्स यथावुत्तपरियायविभागविसेसनिद्धारणवसेनाति एवं निस्सरणविचयो. फलादीनं तंतंसुत्तदेसनाय साधेतब्बफलस्स तदुपायस्स तत्थ तत्थ सुत्तविधिवचनस्स च विभागनिद्धारणवसेन विचयो वेदितब्बो. एवं पदपुच्छाविस्सज्जनपुच्छापुब्बापरानुगीतीनं, अस्सादादीनञ्च विसेसनिद्धारणवसेनेव विचयलक्खणो ‘‘विचयो हारो’’ति वेदितब्बोति –

एवं वुत्तोव.

विस्सज्जनविसेसो पन टीकायं वुत्तो. कथं? –

‘‘चक्खु अनिच्च’’न्ति पुट्ठे ‘‘आम, चक्खु अनिच्चमेवा’’ति एकन्ततो विस्सज्जनं एकंसब्याकरणं, ‘‘अञ्ञिन्द्रियं भावेतब्बं, सच्छिकातब्बञ्चा’’ति ¶ पुट्ठे ‘‘मग्गपरियापन्नं भावेतब्बं, फलपरियापन्नं सच्छिकातब्ब’’न्ति विभजित्वा विस्सज्जनं विभज्जब्याकरणं, ‘‘अञ्ञिन्द्रियं कुसल’’न्ति पुट्ठे ‘‘किं अनवज्जट्ठो कुसलत्थो, उदाहु सुखविपाकट्ठो’’ति पटिपुच्छित्वा विस्सज्जनं पटिपुच्छाब्याकरणं, ‘‘सस्सतो अत्ता, असस्सतो वा’’ति वुत्ते ‘‘अब्याकतमेत’’न्तिआदिना अविस्सज्जनं ठपनं, ‘‘किं पनेते ‘कुसला’ति वा ‘धम्मा’ति वा एकत्था, उदाहु नानत्था’’ति इदं पुच्छनं सावसेसं. विस्सज्जनस्स पन सावसेसतो वेनेय्यज्झासयवसेन देसनायं वेदितब्बा. अपाटिहीरकं सउत्तरं सप्पाटिहीरकं निरुत्तरं, सेसं विचयहारनिद्देसे सुविञ्ञेय्यमेवाति –

वुत्तोव. संवण्णनासु वुत्तो अत्थो अनाकुलो पाकटो यतिपोतेहि विञ्ञातो, सो सब्बत्थ अम्हेहि न विभत्तोति दट्ठब्बो.

विचयहारनिद्देसो निद्दिट्ठो, अम्हेहि च ञातो, ‘‘कतमो युत्तिहारनिद्देसो’’ति पुच्छितब्बत्ता –

३.

‘‘सब्बेसं ¶ हारानं, या भूमी यो च गोचरो तेसं.

युत्तायुत्तपरिक्खा, हारो युत्तीति निद्दिट्ठो’’ति. –

गाथा वुत्ता. तत्थ सब्बेसं सोळसन्नं हारानं या भूमि पवत्तनट्ठानभूतं ब्यञ्जनं, यो गोचरो सुत्तत्थो च अत्थि, तेसं भूमिसङ्खातब्यञ्जनगोचरसङ्खातसुत्तत्थानं या युत्तायुत्तपरिक्खा युत्तायुत्तीनं विचारणा संवण्णना कता, सो युत्तिअयुत्तिपरिक्खाविचारणसङ्खातो संवण्णनाविसेसो ‘‘युत्ति हारो’’ति निद्दिट्ठोति अत्थयोजना.

तेसं हारानं भूमिभूतस्स सुत्ते आगतस्स ब्यञ्जनस्स युत्तिभावो दुविधो सभावनिरुत्तिभावो, अधिप्पेतत्थवाचकभावो च. गोचरभूतस्स पन सुत्ते आगतस्स युत्तिभावो सुत्तविनयधम्मताहि अविलोमनं. अयुत्तिभावो वुत्तविपरियायेन गहेतब्बो.

युत्तिहारनिद्देसो निद्दिट्ठो, अम्हेहि च ञातो, ‘‘कतमो पदट्ठानहारनिद्देसो’’ति पुच्छितब्बत्ता –

४.

‘‘धम्मं ¶ देसेति जिनो, तस्स च धम्मस्स यं पदट्ठानं.

इति याव सब्बधम्मा, एसो हारो पदट्ठानो’’ति. –

गाथा वुत्ता. तत्थ धम्मन्ति यं किञ्चि कुसलादिधम्मं सुत्ते जिनो देसेति, तस्स सुत्ते जिनेन देसितस्स कुसलादिधम्मस्स यञ्च पदट्ठानं निद्धारेतब्बं, तं तं पदट्ठानञ्चाति एवं वुत्तनयेन याव यत्तका सब्बे धम्मा सुत्ते जिनेन देसिता, तत्तकानं सब्बेसं धम्मानं यञ्च पदट्ठानं निद्धारेतब्बं, तस्स च पदट्ठानस्स यञ्च पदट्ठानं निद्धारेतब्बं, तं तं पदट्ठानञ्च, इति एवं वुत्तनयेन याव यत्तका सब्बे पदट्ठानधम्मा निद्धारेतब्बाव, तत्तकानि सब्बानि धम्मपदट्ठानानि यथानुरूपं निद्धारेत्वा येन संवण्णनाविसेसेन कथितानि, एसो संवण्णनाविसेसो ‘‘पदट्ठानो हारो’’ति निद्दिट्ठोति अत्थयोजना.

सुत्ते देसितकुसलधम्मस्स योनिसोमनसिकारसद्धम्मस्सवनसप्पुरिसूपनिस्सयादि पदट्ठानं, सुत्ते देसितअकुसलधम्मस्स अयोनिसोमनसिकारअसद्धम्मस्सवनअसप्पुरिसूपनिस्सयादि पदट्ठानं, अब्याकतस्स धम्मस्स यथारहं कुसलाकुसलाब्याकता पदट्ठानन्तिआदिना निद्धारेतब्बन्ति.

पदट्ठानहारनिद्देसो ¶ निद्दिट्ठो, अम्हेहि च ञातो, ‘‘कतमो लक्खणहारनिद्देसो’’ति पुच्छितब्बत्ता –

५.

‘‘वुत्तम्हि एकधम्मे, ये धम्मा एकलक्खणा केचि.

वुत्ता भवन्ति सब्बे, सो हारो लक्खणो नामा’’ति. –

गाथा वुत्ता. तत्थ एकधम्मे सुत्ते भगवता वुत्तम्हि, अट्ठकथायं निद्धारिते वा सति तेन धम्मेन ये केचि धम्मा एकलक्खणा भवन्ति, सब्बे ते धम्मा सुत्ते सरूपतो अवुत्तापि समानलक्खणताय संवण्णेतब्बभावेन आनेत्वा येन संवण्णनाविसेसेन वुत्ता भवन्ति, सो संवण्णनाविसेसो ‘‘लक्खणो नाम हारो’’ति निद्दिट्ठोति अत्थयोजना.

एकं समानं लक्खणं एतेसन्ति एकलक्खणा, समानलक्खणा, सहचारिताय वा समानकिच्चताय वा समानहेतुताय वा समानफलताय वा समानारम्मणताय वा अवुत्तापि निद्धारिताति. कथं ¶ ? – ‘‘नानत्तकायानानत्तसञ्ञिनो (दी. नि. ३.३४१, ३५७, ३५९; अ. नि. ९.२४), नानत्तसञ्ञानं अमनसिकारा’’तिआदीसु सहचारिताय सञ्ञाय सहगता धम्मा निद्धारिता. ‘‘ददं मित्तानि गन्थती’’तिआदीसु (सं. नि. १.२४६; सु. नि. १८९) समानकिच्चता, पियवचनअत्थचरिया समानत्थतापि निद्धारिता, ‘‘फस्सपच्चया वेदना’’तिआदीसु (म. नि. ३.१२६; सं. नि. २.१; महाव. १; विभ. २२५; उदा. १; नेत्ति. २४) समानहेतुताय सञ्ञादयोपि निद्धारिता, ‘‘अविज्जापच्चया सङ्खारा’’तिआदीसु (म. नि. ३.१२६; सं. नि. २.१; महाव. १; विभ. २२५; उदा. १; नेत्ति. २४) समानफलताय तण्हुपादानादयोपि निद्धारिता, ‘‘रूपं अस्सादेति अभिनन्दति, तं आरब्भ रागो उप्पज्जती’’तिआदीसु (पट्ठा. १.१.४२४) समानारम्मणताय तंसम्पयुत्ता वेदनादयोपि निद्धारिता, निद्धारेत्वा वत्तब्बाति अत्थोति. वित्थारो विभङ्गवारे (नेत्ति. २३) आगमिस्सति.

लक्खणो हारो निद्दिट्ठो, अम्हेहि च ञातो, ‘‘कतमो चतुब्यूहो हारो’’ति पुच्छितब्बत्ता –

६.

‘‘नेरुत्तमधिप्पायो ¶ , ब्यञ्जनमथ देसनानिदानञ्च;

पुब्बापरानुसन्धी, एसो हारो चतुब्यूहो’’ति. –

गाथा वुत्ता. तत्थ नेरुत्तं सुत्तपदनिब्बचनञ्च बुद्धानं तस्स तस्स सुत्तस्स देसकानं, सावकानं वा अधिप्पायो च अत्थब्यञ्जनेन ब्यञ्जनमुखेन देसनानिदानञ्च पुब्बापरेन अनुसन्धि च एते निरुत्तादयो येन संवण्णनाविसेसेन विभावीयन्ति, एसो संवण्णनाविसेसो ‘‘चतुब्यूहो हारो’’ति निद्दिट्ठो. देसनापवत्तिनिमित्तं देसकस्स अज्झासयादि देसनानिदानं नाम. चतुब्यूहहारस्स बहुविसयत्ता विभङ्गे (नेत्ति. २५ आदयो) लक्खणसम्पत्तिं कत्वा कथयिस्साम.

चतुब्यूहहारनिद्देसो निद्दिट्ठो, अम्हेहि च ञातो, ‘‘कतमो आवट्टहारनिद्देसो’’ति पुच्छितब्बत्ता –

७.

‘‘एकम्हि पदट्ठाने, परियेसति सेसकं पदट्ठानं;

आवट्टति पटिपक्खे, आवट्टो नाम सो हारो’’ति. –

गाथा वुत्ता. तत्थ परक्कमधातुआदीनं पदट्ठाने एकम्हि आरम्भधातुआदिके देसनारुळ्हे सति विसभागताय वा सेसकं पदट्ठानं परियेसति ¶ , देसनाय सरूपतो अग्गहणेन वा सेसकं पदट्ठानं परियेसति, येन संवण्णनाविसेसेन परियेसित्वा योजेन्तो देसनं पमादादीनं पदट्ठानभूते कोसज्जादिके पटिपक्खे आवट्टति आवट्टापेति, सो संवण्णनाविसेसो ‘‘आवट्टो हारो नामा’’ति निद्दिट्ठोति अत्थयोजना.

‘‘पटिपक्खे’’ति इदं निदस्सनमत्तं, सेसेपि सभागे आवट्टनतो. न हि आरम्भधातुआदिके देसनारुळ्हे सति तप्पटिपक्खे कोसज्जादिकेयेव देसनं आवट्टेति, अथ खो अवसेसवीरियारम्भादिकेपि देसनं आवट्टेतीति.

आवट्टहारनिद्देसो निद्दिट्ठो, अम्हेहि च ञातो, ‘‘कतमो विभत्तिहारनिद्देसो’’ति पुच्छितब्बत्ता –

८.

‘‘धम्मञ्च ¶ पदट्ठानं, भूमिञ्च विभजते अयं हारो.

साधारणे असाधारणे च नेय्यो विभत्ती’’ति. –

गाथा वुत्ता. तत्थ कुसलादिवसेन अनेकविधं सभावधम्मञ्च दानसीलादिपदट्ठानञ्च ‘‘दस्सनभूमि भावनाभूमी’’ति एवमादिकं भूमिञ्च साधारणे च असाधारणे च येन संवण्णनाविसेसेन विभजते, सो संवण्णनाविसेसो ‘‘विभत्ति हारो’’ति नेय्योति अत्थयोजना.

‘‘इमस्मिं सुत्ते वुत्ता कुसला वासनाभागिया, इमस्मिं सुत्ते वुत्ता कुसला निब्बेधभागिया’’त्यादिना, ‘‘इमस्मिं सुत्ते वुत्ता अकुसला किलेसभागिया’’त्यादिना धम्मञ्च, ‘‘इदं सीलं इमस्स महग्गतविसेसस्स पदट्ठानं, इदं सीलं इदं झानं इमस्स लोकुत्तरस्स पदट्ठान’’न्त्यादिना पदट्ठानञ्च, ‘‘दस्सनपहातब्बस्स पुथुज्जनो भूमि, भावनापहातब्बस्स सोतापन्नादयो भूमि’’त्यादिना भूमिञ्च, ‘‘कामरागब्यापादा पुथुज्जनसोतापन्नानं साधारणा’’त्यादिना साधारणे च, ‘‘कामरागब्यापादा अनागामिअरहन्तानं असाधारणा’’त्यादिना असाधारणे च येन विभजति, सो विभत्ति हारो नामातिआदिना (नेत्ति. ३३-३४) वित्थारेत्वा विभजनाकारो गहेतब्बो.

विभत्तिहारनिद्देसो ¶ निद्दिट्ठो, अम्हेहि च ञातो, ‘‘कतमो परिवत्तनहारनिद्देसो’’ति पुच्छितब्बत्ता –

९.

‘‘कुसलाकुसले धम्मे, निद्दिट्ठे भाविते पहीने च.

परिवत्तति पटिपक्खे, हारो परिवत्तनो नामा’’ति. –

गाथा वुत्ता. तत्थ सुत्ते भाविते भावितब्बे कुसले अनवज्जधम्मे निद्दिट्ठे कथिते, संवण्णिते वा पहीने पहातब्बे अकुसले सावज्जधम्मे निद्दिट्ठे कथिते, संवण्णिते वा तेसं धम्मानं पटिपक्खे विपरीतधम्मे येन संवण्णनाविसेसेन परिवत्तति परिवत्तेति, सो संवण्णनाविसेसो ‘‘परिवत्तनो हारो नामा’’ति वेदितब्बोति अत्थयोजना.

‘‘सम्मादिट्ठिस्स पुरिसपुग्गलस्स मिच्छादिट्ठि निज्जिण्णा भवती’’तिआदिना च ‘‘यस्स वा पाणातिपाता पटिविरतस्स पाणातिपातो पहीनो’’तिआदिना च ‘‘भुञ्जितब्बा कामा ¶ …पे… कामेहि वेरमणी तेसं अधम्मो’’तिआदिना च पटिपक्खे परिवत्तनभावं विभङ्गवारे (नेत्ति. ३५ आदयो) वक्खतीति न वित्थारिता.

परिवत्तनहारनिद्देसो निद्दिट्ठो, अम्हेहि च ञातो, ‘‘कतमो वेवचनहारनिद्देसो’’ति पुच्छितब्बत्ता –

१०.

‘‘वेवचनानि बहूनि तु, सुत्ते वुत्तानि एकधम्मस्स.

यो जानाति सुत्तविदू, वेवचनो नाम सो हारो’’ति. –

गाथा वुत्ता. तत्थ एकधम्मस्स पदत्थस्स सुत्ते वुत्तानि तु वुत्तानि एव, बहूनि तु बहूनि एव वेवचनानि येन संवण्णनाविसेसेन यो सुत्तविदू जानाति, जानित्वा एकस्मिंयेव पदत्थे योजेति, तस्स सुत्तविदुनो सो संवण्णनाविसेसो ‘‘वेवचनो नाम हारो’’ति निद्दिट्ठोति अत्थयोजना.

एत्थ च यो सो-सद्दा असमानत्था च होन्तीति ‘‘यो सुत्तविदू’’ति वत्वा ‘‘सो संवण्णनाविसेसो’’ति वुत्तन्ति. ‘‘भगवा’’ति पदस्स ¶ एकस्मिंयेव अत्थे भगवति ‘‘अरहं सम्मासम्बुद्धो विज्जाचरणसम्पन्नो सुगतो लोकविदू अनुत्तरो पुरिसदम्मसारथि सत्था देवमनुस्सानं बुद्धो भगवा, फलनिप्फत्तिगतो वेसारज्जप्पत्तो अधिगतपटिसम्भिदो चतुयोगविप्पहीनो अगतिगमनवीतिवत्तो उद्धटसल्लो निरुळ्हवणो मद्दितकण्टको निब्बापितपरियुट्ठानो बन्धनातीतो गन्थविनिवेठनो अज्झासयवीतिवत्तो भिन्नन्धकारो चक्खुमा लोकधम्मसमतिक्कन्तो अनुरोधविरोधविप्पयुत्तो इट्ठानिट्ठेसु धम्मेसु असङ्खेपगतो बन्धनातिवत्तो ठपितसङ्गामो अभिक्कन्ततरो उक्काधरो आलोककरो पज्जोतकरो तमोनुदो रणञ्जहो अपरिमाणवण्णो अप्पमेय्यवण्णो असङ्खेय्यवण्णो आभङ्करो पभङ्करो धम्मोभासपज्जोतकरो’’ति (नेत्ति. ३८) एवमादीनि बहूनि वेवचनानि योजितानि. वित्थारो विभङ्गवारे (नेत्ति. ३७ आदयो) आगमिस्सति.

वेवचनहारनिद्देसो निद्दिट्ठो, अम्हेहि च ञातो, ‘‘कतमो पञ्ञत्तिहारनिद्देसो’’ति पुच्छितब्बत्ता –

११.

‘‘एकं ¶ भगवा धम्मं, पञ्ञत्तीहि विविधाहि देसेति.

सो आकारो ञेय्यो, पञ्ञत्ती नाम सो हारो’’ति. –

गाथा वुत्ता. तत्थ भगवा एकं खन्धादिधम्मं विविधाहि निक्खेपप्पभवपञ्ञत्तादीहि पञ्ञत्तीहि येन पञ्ञापेतब्बाकारेन देसेति, सो पञ्ञापेतब्बाकारो येन संवण्णनाविसेसेन विभावितो, सो संवण्णनाविसेसो ‘‘पञ्ञत्ति हारो नामा’’ति ञेय्योति अत्थयोजना.

तत्थ विविधाहि पञ्ञत्तीहि निक्खेपपञ्ञत्तिपभवपञ्ञत्तिपरिञ्ञापञ्ञत्तिपहानपञ्ञत्ति- भावनापञ्ञत्तिसच्छिकिरियापञ्ञत्तिनिरोधपञ्ञत्तिनिब्बिदापञ्ञत्तीति एवमादिपञ्ञत्तीहि एकपदत्थस्सेव पञ्ञापेतब्बाकारविभावनालक्खणो संवण्णनाविसेसो पञ्ञत्ति हारो नामाति.

तत्थ ‘‘इदं दुक्ख’’न्ति अयं पञ्ञत्ति पञ्चन्नं खन्धानं, छन्नं धातूनं, अट्ठारसन्नं धातूनं, द्वादसन्नं आयतनानं, दसन्नं इन्द्रियानं निक्खेपपञ्ञत्ति.

‘‘कबळीकारे चे, भिक्खवे, आहारे अत्थि रागो, अत्थि नन्दी, अत्थि तण्हा, पतिट्ठितं तत्थ विञ्ञाणं विरुळ्हं. यत्थ पतिट्ठितं विञ्ञाणं विरुळ्हं, अत्थि तत्थ ¶ नामरूपस्स अवक्कन्ति. यत्थ अत्थि नामरूपस्स अवक्कन्ति, अत्थि तत्थ सङ्खारानं वुद्धी’’ति (सं. नि. २.६४; कथा. २९६) एवमादि पभवपञ्ञत्ति दुक्खस्स च समुदयस्स चाति.

‘‘कबळीकारे चे, भिक्खवे, आहारे नत्थि रागो, नत्थि नन्दी, नत्थि तण्हा’’ति (सं. नि. २.६४; कथा. २९६) एवमादि परिञ्ञापञ्ञत्ति दुक्खस्स, ‘‘पहानपञ्ञत्ति समुदयस्स, भावनापञ्ञत्ति मग्गस्स, सच्छिकिरियापञ्ञत्ति निरोधस्सा’’ति च ‘‘निक्खेपपञ्ञत्ति सुतमयिया पञ्ञाय, सच्छिकिरियापञ्ञत्ति अनञ्ञातञ्ञस्सामीतिन्द्रियस्स, पवत्तनापञ्ञत्ति धम्मचक्कस्सा’’ति एवमादिवित्थारो विभङ्गे (नेत्ति. ३९ आदयो) आगमिस्सतीति.

पण्णत्तिहारनिद्देसो निद्दिट्ठो, अम्हेहि च ञातो, ‘‘कतमो ओतरणहारनिद्देसो’’ति पुच्छितब्बत्ता –

१२.

‘‘यो ¶ च पटिच्चुप्पादो, इन्द्रियखन्धा च धातुआयतना.

एतेहि ओतरति यो, ओतरणो नाम सो हारो’’ति. –

गाथा वुत्ता. तत्थ यो पटिच्चसमुप्पादो च ये इन्द्रियखन्धा च यानि धातुआयतनानि च येन संवण्णनाविसेसेन निद्धारितानि, एतेहि पटिच्चसमुप्पादादिन्द्रियखन्धधातायतनेहि, सुत्ते आगतपदत्थमुखेन निद्धारियमानेहि च यो संवण्णनाविसेसो ओतरति ओगाहति पटिच्चसमुप्पादादिके तत्थ वाचकवसेन, तत्थ ञापकवसेन वा अनुपविसति, सो संवण्णनाविसेसो ओतरणो हारो नामाति अत्थयोजना.

तत्थ इन्द्रियखन्धाति इन्द्रियानि च खन्धा चाति इन्द्रियखन्धा. धातुआयतनाति धातुयो च आयतनानि च धातुआयतना. कथं ओतरणो? ‘‘उद्धं अधो सब्बधि विप्पमुत्तो’’तिआदि (नेत्ति. ४२) पाठो.

उद्धन्ति रूपधातु च अरूपधातु च. अधोति कामधातु. सब्बधि विप्पमुत्तोति तेधातुके अयं असेक्खाविमुत्ति. तानियेव असेक्खानि पञ्चिन्द्रियानि, अयं इन्द्रियेहि ओतरणा.

तानियेव ¶ असेक्खानि पञ्चिन्द्रियानि विज्जा, विज्जुप्पादा अविज्जानिरोधो…पे… दुक्खक्खन्धस्स निरोधो होति, अयं पटिच्चसमुप्पादेहि ओतरणा.

तानियेव असेक्खानि पञ्चिन्द्रियानि तीहि खन्धेहि सङ्गहितानि सीलक्खन्धेन समाधिक्खन्धेन पञ्ञाक्खन्धेन, अयं खन्धेहि ओतरणा.

तानियेव असेक्खानि पञ्चिन्द्रियानि सङ्खारपरियापन्नानि ये सङ्खारा अनासवा, नो च भवङ्गा, ते सङ्खारा धम्मधातुसङ्गहिता, अयं धातूहि ओतरणा.

सा धम्मधातु धम्मायतनपरियापन्ना, यं आयतनं अनासवं, नो च भवङ्गं, अयं आयतनेहि ओतरणाति एवमादीहि विभङ्गे (नेत्ति. ४२ आदयो) आगमिस्सतीति.

ओतरणहारनिद्देसो ¶ निद्दिट्ठो, अम्हेहि च ञातो, ‘‘कतमो सोधनहारनिद्देसो’’ति पुच्छितब्बत्ता –

१३.

‘‘विस्सज्जितम्हि पञ्हे, गाथायं पुच्छिता यमारब्भ.

सुद्धासुद्धपरिक्खा, हारो सो सोधनो नामा’’ति. –

गाथा वुत्ता. तत्थ तिस्सं गाथायं आरुळ्हे पञ्हे ञातुमिच्छिते अत्थे भगवता विस्सज्जनगाथायं विस्सज्जितम्हि यं सुत्तत्थं आरब्भ अधिकिच्च सा गाथा पुच्छिता पुच्छनत्थाय ठपिता, तस्स सुत्तत्थस्स येन संवण्णनाविसेसेन सुद्धासुद्धपरिक्खा विचारणा भवे, सो संवण्णनाविसेसो सोधनो हारो नामाति अत्थयोजना.

कथं? ‘‘अविज्जाय निवुतो लोको’’ति पदं सोधितं, आरम्भो न सोधितो. ‘‘विविच्छा पमादा नप्पकासती’’ति पदं सोधितं, आरम्भो न सोधितो. ‘‘जप्पाभिलेपनं ब्रूमी’’ति पदं सोधितं, आरम्भो न सोधितो. ‘‘दुक्खमस्स महब्भय’’न्ति पदञ्च सोधितं, आरम्भो च सोधितोति. एवं पदादीनं सोधितासोधितभावविचारो हारो सोधनो नाम. वित्थारतो पन विभङ्गे (नेत्ति. ४५ आदयो) आगमिस्सतीति.

सोधनहारनिद्देसो ¶ निद्दिट्ठो, अम्हेहि च ञातो, ‘‘कतमो अधिट्ठानहारनिद्देसो’’ति पुच्छितब्बत्ता –

१४.

‘‘एकत्तताय धम्मा, येपि च वेमत्तताय निद्दिट्ठा.

ते न विकप्पयितब्बा, एसो हारो अधिट्ठानो’’ति. –

गाथा वुत्ता. तत्थ ये दुक्खसच्चादयो धम्मा एकत्तताय सामञ्ञेनपि च वेमत्तताय विसेसेनपि निद्दिट्ठा, येन संवण्णनाविसेसेन निद्दिट्ठा दुक्खसच्चादयो धम्मा न विकप्पयितब्बा सामञ्ञविसेसकप्पनाय वोहारभावेन अनवट्ठानतो, कालदिसाविसेसादीनं विय अपेक्खासिद्धितो च, एसो संवण्णनाविसेसो अधिट्ठानो हारोति अत्थयोजना.

तत्थ ¶ एकत्ततायाति एकस्स समानस्स भावो एकत्तं, एकत्तमेव एकत्तता, ताय. एकसद्दो चेत्थ समानत्थवाचको, न सङ्ख्यावाचकोति. वेमत्ततायाति विसिट्ठा मत्ता विमत्ता, विमत्ता एव वेमत्तं, वेमत्तस्स भावो वेमत्तता, ताय. यथा हि ‘‘अज्ज स्वे’’ति वुच्चमाना कालविसेसा अनवट्ठिता भवन्ति, ‘‘पुरिमा दिसा, पच्छिमा दिसा’’ति वुच्चमाना दिसाविसेसा, एवं सामञ्ञविसेसा च अत्थस्स सभावाति. तथा हि ‘‘इदं दुक्ख’’न्ति वुच्चमानं जातिआदिं अपेक्खाय सामञ्ञं समानम्पि सच्चापेक्खाय विसेसो होति. एस नयो समुदयसच्चादीसुपीति. ‘‘दुक्ख’’न्ति एकत्तता. ‘‘जाति दुक्खा, जरा दुक्खा, मरणं दुक्ख’’न्ति एवमादि वेमत्तता. ‘‘दुक्खसमुदयो’’ति एकत्तता, ‘‘तण्हा पोनोभविका नन्दीरागसहगता’’ति एवमादि वेमत्तताति एवमादि वित्थारो विभङ्गे (नेत्ति. ४६ आदयो) आगमिस्सतीति.

अधिट्ठानहारनिद्देसो निद्दिट्ठो, अम्हेहि च ञातो, ‘‘कतमो परिक्खारहारनिद्देसो’’ति पुच्छितब्बत्ता –

१५.

‘‘ये धम्मा यं धम्मं, जनयन्तिप्पच्चया परम्परतो.

हेतुमवकड्ढयित्वा, एसो हारो परिक्खारो’’ति. –

गाथा वुत्ता. तत्थ अविज्जादिका ये पच्चयधम्मा सङ्खारादिकं यं फलधम्मं पच्चया सहजातपच्चयेन परम्परतो परम्परपच्चयभावेन जनयन्ति, तस्स सङ्खारादिफलस्स पच्चयं परिक्खारभूतं पुरिमुप्पन्नं अविज्जादिकं असाधारणं ¶ जनकं हेतुं, अयोनिसोमनसिकारादिकं साधारणं पच्चयहेतुञ्च अवकड्ढयित्वा सुत्ततो निद्धारेत्वा यो संवण्णनाविसेसो परिक्खारसंवण्णनाभावेन पवत्तो, एसो संवण्णनाविसेसो परिक्खारो हारो नामाति अत्थयोजना. अविज्जादयो हि अविज्जादीनं असाधारणहेतू भवन्ति, अयोनिसोमनसिकारादयो साधारणपच्चया. तेनाह – ‘‘असाधारणलक्खणो हेतु, साधारणलक्खणो पच्चयो’’ति, ‘‘अविज्जा अविज्जाय हेतु, अयोनिसोमनसिकारो पच्चयो’’तिआदिकं (नेत्ति. ४९) विभङ्गवचनञ्च.

परिक्खारहारनिद्देसो निद्दिट्ठो, अम्हेहि च ञातो, ‘‘कतमो समारोपनहारनिद्देसो’’ति पुच्छितब्बत्ता –

१६.

‘‘ये ¶ धम्मा यंमूला, ये चेकत्था पकासिता मुनिना.

ते समारोपयितब्बा, एस समारोपनो हारो’’ति. –

गाथा वुत्ता. तत्थ ये सीलादयो धम्मा यंमूला येसं समाधिआदीनं मूला, ते सीलादयो धम्मा तेसं समाधिआदीनं पदट्ठानभावेन संवण्णनाविसेसेन समारोपयितब्बा, ये च रागविरागचेतोविमुत्तिसेक्खफलकामधातुसमतिक्कमनादिसद्दा अनागामिफलत्थताय एकत्था समानत्थाति बुद्धमुनिना पकासिता, ते राग…पे… तिक्कमनादिसद्दा अञ्ञमञ्ञवेवचनभावेन समारोपयितब्बा, एसो संवण्णनाविसेसो समारोपनो हारो नामाति अत्थयोजना.

एत्थ च सीलादिक्खन्धत्तयस्स परियायन्तरविभावनापारिपूरी कथिता, भावनापारिपूरी च पहातब्बस्स पहानेन होतीति भावनासमारोपनपहानसमारोपनापि दस्सिताति चतुब्बिधो समारोपनो पदट्ठानसमारोपनो, वेवचनसमारोपनो, भावनासमारोपनो, पहानसमारोपनोति.

तत्थ कायिकसुचरितं, वाचसिकसुचरितञ्च सीलक्खन्धो, मनोसुचरिते अनभिज्झा, अब्यापादो च समाधिक्खन्धो, सम्मादिट्ठि पञ्ञाक्खन्धो. सीलक्खन्धो समाधिक्खन्धस्स पदट्ठानं, समाधिक्खन्धो पञ्ञाक्खन्धस्स पदट्ठानं. सीलक्खन्धो, समाधिक्खन्धो च समथस्स पदट्ठानं, पञ्ञाक्खन्धो ¶ विपस्सनाय पदट्ठानं. समथो रागविरागचेतोविमुत्तिया पदट्ठानं, विपस्सना अविज्जाविरागपञ्ञाविमुत्तिया पदट्ठानन्ति एवमादि पदट्ठानसमारोपनो. रागविरागा चेतोविमुत्ति सेक्खफलं, अविज्जाविरागा पञ्ञाविमुत्ति असेक्खफलं, इदं वेवचनं. रागविरागा चेतोविमुत्ति अनागामिफलं, अविज्जाविरागा पञ्ञाविमुत्ति अग्गफलं अरहत्तं, इदं वेवचनं. रागविरागा चेतोविमुत्ति कामधातुसमतिक्कमनं, अविज्जाविरागा चेतोविमुत्ति तेधातुसमतिक्कमनं, इदं वेवचनं. पञ्ञिन्द्रियं, पञ्ञाबलं, अधिपञ्ञासिक्खा, पञ्ञाक्खन्धोति एवमादि वेवचनन्ति एवमादि वेवचनसमारोपनो. काये कायानुपस्सिनो विहरतो चत्तारो सतिपट्ठाना भावनापारिपूरिं गच्छन्ति, चतूसु सतिपट्ठानेसु भावियमानेसु चत्तारो सम्मप्पधाना भावनापारिपूरिं गच्छन्ति, चतूसु सम्मप्पधानेसु भावियमानेसु चत्तारो इद्धिपादा भावनापारिपूरिं गच्छन्तीति एवमादि भावनासमारोपनो. काये कायानुपस्सी विहरन्तो असुभे ‘‘सुभ’’न्ति विपल्लासं पजहति, कबळीकारो चस्स आहारो परिञ्ञं गच्छति, कामुपादानेन च अनुपादानो भवति, कामयोगेन च विसंयुत्तो भवति, अभिज्झाकायगन्थेन च विप्पयुज्जति, कामासवेन च अनासवो भवति, कामोघञ्च उत्तिण्णो भवति, रागसल्लेन च विसल्लो भवति, रूपूपिका चस्स विञ्ञाणट्ठिति परिञ्ञं गच्छति ¶ , रूपधातुयं चस्स रागो पहीनो भवति, न च छन्दागतिं गच्छति, वेदनासूति एवमादि पहानसमारोपनोति एवमादि समारोपनो हारो नियुत्तोति.

इति सत्तिबलानुरूपा रचिता.

सोळसहारनिद्देसविभावना निट्ठिता.

नयनिद्देसविभावना

१७. हारनिद्देसा निद्दिट्ठा, अम्हेहि च ञाता, ‘‘कतमे नयनिद्देसा’’ति पुच्छितब्बत्ता ‘‘तण्हञ्चा’’तिआदि वुत्तं. अथ वा एवं उद्देसक्कमेनेव हारे निद्दिसित्वा इदानि नये निद्दिसितुं ‘‘तण्हञ्चा’’तिआदि वुत्तं. तत्थ यो संवण्णनाविसेसो सुत्ते आगतं तण्हञ्च अविज्जञ्च अत्थतो निद्धारणवसेन गहितं तण्हञ्च अविज्जञ्च संकिलेसपक्खं नेति, सुत्ते आगतेन ¶ समथेन, सुत्ते आगताय विपस्सनाय अत्थतो निद्धारणवसेन वा गहितेन समथेन, गहिताय विपस्सनाय वोदानपक्खं नेति, नयन्तो च सच्चेहि योजेत्वा नेति, अयं संवण्णनाविसेसो सो नन्दियावट्टो नयो नामाति अत्थयोजना.

एत्थ च अत्थनयस्स भूमि, संवण्णना च गाथायं ‘‘नयो’’ति वुत्ता, तस्मा ‘‘संवण्णनाविसेसो’’ति वुत्तं. न हि अत्थनयो संवण्णना, चतुसच्चपटिवेधस्स अनुरूपो पुब्बभागे अनुगाहणनयो अत्थनयोव. तस्स पन अत्थनयस्स या संवण्णना उग्घटितञ्ञुआदीनं वसेन तण्हादिमुखेन नयभूमिरचना पवत्ता, तस्स संवण्णनाव नयवोहारो कतोति वित्थारतो हारसम्पाते (नेत्ति. ७८-७९) आगमिस्सति.

नन्दियावट्टनयनिद्देसो निद्दिट्ठो, अम्हेहि च ञातो, ‘‘कतमो तिपुक्खलनयनिद्देसो’’ति पुच्छितब्बत्ता –

१८.

‘‘यो अकुसले समूलेहि, नेति कुसले च कुसलमूलेहि.

भूतं तथं अवितथं, तिपुक्खलं तं नयं आहू’’ति. –

गाथा वुत्ता. तत्थ यो संवण्णनाविसेसो अकुसले समूलेहि अत्तनो अकुसलस्स तीहि लोभादीहि ¶ मूलेहि संकिलेसपक्खं नेति, कुसले च कुसलमूलेहि तीहि अलोभादीहि वोदानपक्खं नेति, नयन्तो च भूतं कुसलाकुसलं नेति, न अभूतं मायामरीचिआदयो विय, तथं कुसलाकुसलं नेति, न घटादयो विय सम्मुतिसच्चमत्तं, अवितथं कुसलाकुसलं नेति, न वितथं. कुसलाकुसलानं सभावतो विज्जमानत्ता भूता परमत्थसच्चत्ता तथा, अकुसलस्स इट्ठविपाकताभावतो, कुसलस्स च अनिट्ठविपाकताभावतो विपाके सति अविसंवादकत्ता अवितथा भवन्ति, कुसलाकुसला हि एतेसं तिण्णं ‘‘भूतं, तथं, अवितथ’’न्ति पदानं कुसलाकुसलविसेसनता दट्ठब्बा.

अथ वा अकुसलमूलेहि अकुसलानि, कुसलमूलेहि च कुसलानि नयन्तो अयं नयो भूतं तथं अवितथं नेति चत्तारि सच्चानि निद्धारेत्वा ¶ योजेति. दुक्खादीनि हि बाधकादिभावतो अञ्ञथाभावाभावेन भूतानि, सच्चसभावत्ता तथानि, अविसंवादनतो अवितथानि. वुत्तञ्हेतं भगवता – ‘‘चत्तारिमानि, भिक्खवे, तथानि अवितथानि अनञ्ञथानी’’ति सं. नि. ५.१०९०; पटि. म. २.८). अकुसलादिसुत्तत्थस्स चतुसच्चयोजनमुखेन नयनलक्खणं तं संवण्णनाविसेसं तिपुक्खलं नयन्ति आहूति अत्थयोजना.

तत्थ तीहि हेतूहि पुक्खलो सोभनोति तिपुक्खलो अकुसलादिको अत्थनयो संवण्णनाविसेसोति ठानूपचारतो तिपुक्खलनयो नामाति. वित्थारो पन हारसम्पाते (नेत्ति. ८७-८८) आगमिस्सति.

तिपुक्खलनयनिद्देसो निद्दिट्ठो, अम्हेहि च ञातो, ‘‘कतमो सीहविक्कीळितनयनिद्देसो’’ति पुच्छितब्बत्ता –

१९.

‘‘यो नेति विपल्लासेहि, किलेसे इन्द्रियेहि सद्धम्मे.

एतं नयं नयविदू, सीहविक्कीळितं आहू’’ति. –

गाथा वुत्ता. तत्थ यो संवण्णनाविसेसो सुत्ते वुत्तेहि विपल्लासेहि किलेसे संकिलेसपक्खं नेति, सुत्ते वुत्तेहि इन्द्रियेहि सद्धम्मे वोदानपक्खं नेति, एतं संवण्णनाविसेसं नयविदू सद्धम्मनयकोविदा, अत्थनयकुसला एव वा सीहविक्कीळितं नयन्ति आहूति अत्थयोजना.

तत्थ विपल्लासेहीति असुभे सुभं, दुक्खे सुखं, अनिच्चे निच्चं, अनत्तनि अत्ताति चतूहि ¶ विपल्लासेहि. इन्द्रियेहीति सद्धादीहि इन्द्रियेहि. सद्धम्मेति पटिपत्तिपटिवेधसद्धम्मे. सेसमेत्थ वुत्तनयमेव. वित्थारो पन हारसम्पाते (नेत्ति. ८६-८७) आगमिस्सतीति.

सीहविक्कीळितनयनिद्देसो निद्दिट्ठो, अम्हेहि च ञातो, ‘‘कतमो दिसालोचननयनिद्देसो’’ति पुच्छितब्बत्ता –

२०.

‘‘वेय्याकरणेसु ¶ हि ये, कुसलाकुसला तहिं तहिं वुत्ता.

मनसा वोलोकयते, तं खु दिसालोचनं आहू’’ति. –

गाथा वुत्ता. ‘‘सीहलोचनं आहू’’ति पाठो लिखितो, सो पन न थेरस्स पाठोति दट्ठब्बो भिन्नलक्खणत्ता. तत्थ तहिं तहिं वेय्याकरणेसु ये कुसलाकुसला नयस्स दिसाभूता धम्मा वुत्ता, ते कुसलाकुसले नयस्स दिसाभूतधम्मे अबहि अब्भन्तरं चित्ते एव यं ओलोकनं करोति, तं ओलोकनं खु ओलोकनं एव दिसालोचनन्ति आहूति अत्थयोजना.

तत्थ वेय्याकरणेसूति तस्स तस्स अत्थनयस्स योजनत्थं कतेसु सुत्तस्स अत्थविस्सज्जनेसु. कुसलाति वोदानिया. अकुसलाति संकिलेसिका. वुत्ताति सुत्ततो निद्धारेत्वा कथिता. ओलोकयतेति ते कुसलादिधम्मे चित्तेनेव ‘‘अयं पठमा दिसा, अयं दुतिया दिसा’’तिआदिना तस्स तस्स नयस्स दिसाभावेन उपपरिक्खति, विचारेतीति अत्थो. खूति अवधारणत्थे निपातो, तेन दिसालोचननयो कोचि अत्थविसेसो न होतीति दस्सेतीति.

२१. दिसालोचननयनिद्देसो निद्दिट्ठो. अम्हेहि च ञातो. ‘‘कतमो अङ्कुसनयनिद्देसो’’ति पुच्छितब्बत्ता ‘‘ओलोकेत्वा’’तिआदिगाथा वुत्ता. तत्थ तंतंनयदिसाभूते सब्बे कुसलाकुसले दिसालोचनेन ओलोकेत्वा उक्खिपिय सुत्ततो उद्धरित्वा यं समानेति यं समानयनं करोति, अयं समानयनसङ्खातो नयो अङ्कुसो नयो नामाति अत्थयोजना.

एत्थ च अङ्कुसो नाम हत्थीनं इच्छितट्ठानं आनयनकारणभूतो वजिरादिमयो तिक्खग्गो उजुवङ्कभूतो दब्बसम्भारविसेसो, अयम्पि नयो अङ्कुसो वियाति अत्थेन अङ्कुसो. एतेन हि नयेन इच्छितं सुत्तत्थं नयतीति. मुख्यतो पन अङ्के विज्झनट्ठाने उद्धटो असति अन्तो पविसतीति अङ्कुसो. अङ्कसद्दूपपदउपुब्बअसधातु अपच्चयोति. अयम्पि नयो कोचिपि अत्थविसेसो न होतीति.

सोळस ¶ ¶ हारनिद्देसा चेव पञ्च नयनिद्देसा च आचरियेन निद्दिट्ठा. अम्हेहि च ञाता, ‘‘संवण्णेतब्बसुत्ते किं सोळस हारा पठमं योजेतब्बा, उदाहु नया’’ति पुच्छितब्बत्ता –

२२.

‘‘सोळस हारा पठमं, दिसालोचनतो दिसा विलोकेत्वा.

सङ्खिपिय अङ्कुसेन हि, नयेहि तिहि निद्दिसे सुत्त’’न्ति. –

गाथमाह. अट्ठकथायं पन ‘‘एवं हारे, नये च निद्दिसित्वा इदानि नेसं योजनक्कमं दस्सेन्तो ‘सोळस हारा पठम’न्तिआदिमाहा’’ति (नेत्ति. अट्ठ. २२) वुत्तं. तत्थ सोळस हारा ब्यञ्जनपरियेट्ठिभावतो संवण्णेतब्बसुत्ते संवण्णनाभावेन पठमं योजेतब्बा, योजेन्तेन निद्दिट्ठा हारानुक्कमेनेव योजेतब्बा, न उप्पटिपाटिया. हारसंवण्णनानुक्कमेन संवण्णेतब्बं पठमं संवण्णेत्वा पच्छा दिसालोचनेन ओलोकेत्वा अङ्कुसनयेन नेत्वा तीहि अत्थनयेहि निद्दिसेति अधिप्पायो.

इति सत्तिबलानुरूपा रचिता

नयनिद्देसविभावना निट्ठिता.

द्वादसपदविभावना

नेत्तिविसयं सासनवरसङ्खातं संवण्णेतब्बसुत्तं येसं ब्यञ्जनपदानं, अत्थपदानञ्च वसेन ‘‘द्वादस पदानि सुत्त’’न्ति सङ्गहवारे वुत्तं, ‘‘कतमानि तानी’’ति पुच्छितब्बत्ता सरूपतो निद्दिसितुं –

२३.

‘‘अक्खरं पदं ब्यञ्जनं, निरुत्ति तथेव निद्देसो.

आकारछट्ठवचनं, एत्ताव ब्यञ्जनं सब्बं.

२४.

सङ्कासना पकासना, विवरणा विभजनुत्तानीकम्मपञ्ञत्ति.

एतेहि छहि पदेहि, अत्थो कम्मञ्च निद्दिट्ठ’’न्ति. –

गाथाद्वयं ¶ ¶ वुत्तं. अट्ठकथायं पन ‘‘इदानि येसं ब्यञ्जनपदानं, अत्थपदानञ्च वसेन ‘द्वादस पदानि ‘सुत्त’न्ति वुत्तं, तानि पदानि निद्दिसितुं ‘अक्खरपद’न्तिआदिमाहा’’ति (नेत्ति. अट्ठ. २३) वुत्तं.

तत्थ केनट्ठेन अक्खरन्ति? अक्खरट्ठेन असञ्चरणट्ठेन. अकारादिवण्णो हि अकारादितो इकारादिपरियायं नक्खरति, न सञ्चरति, न सङ्कमति. तेनाह अट्ठकथायं ‘‘अपरियोसिते पदे वण्णो अक्खरं परियायवसेन अक्खरणतो असञ्चरणतो’’ति (नेत्ति. अट्ठ. २३). अपरियोसिते पदेति च विभत्यन्तभावं अप्पत्ते द्वितिचतुक्खरवन्तेसु पदेसु एकद्वितिक्खरमत्तेयेव अक्खरं नाम, परियोसिते पदंयेव, न अक्खरन्ति अधिप्पायो. पदं पन पवेसनतो अत्थवसेन परियायं सञ्चरन्तं विय होति, न एवं अकारादिवण्णो अवेवचनत्ता. ‘‘मा एवं मञ्ञसी’’तिआदीसु वा एकक्खरपदा मा-कारादि अक्खरं नाम, विभत्यन्तं पदं पन पदमेव होति.

पज्जति अत्थो एतेनाति पदं. तं नामाख्यातोपसग्गनिपातप्पभेदेन चतुब्बिधं. तत्थ दब्बपधानं ‘‘फस्सो वेदना चित्त’’न्ति एवमादिकं नामपदं. तत्थ हि दब्बमाविभूतरूपं, किरिया अनाविभूतरूपा. किरियापधानं ‘‘फुसति वेदयति विजानाती’’ति एवमादिकं आख्यातपदं नाम. तत्थ हि फुसनादिकिरिया आविभूतरूपा, दब्बमनाविभूतरूपं. किरियाविसेसबोधहेतुभूतं प-उप-इतिएवमादिकं उपसग्गपदं नाम. ‘‘चिरप्पवासिं (ध. प. २१९) उपवुत्थ’’न्ति (अ. नि. ३.७१; सु. नि. ४०५) एवमादीसु हि प-उपादिसद्दा वसनादिकिरियाय वियोगादिविसिट्ठतं दीपेन्ति. वचनत्थो पन नामपदआख्यातपदद्वयं उपगन्त्वा तस्स पदद्वयस्स अत्थं सज्जन्तीति उपसग्गाति दट्ठब्बो. किरियाय चेव दब्बस्स च सरूपविसेसपकासनहेतुभूतं ‘‘एवं, इती’’ति एवमादिकं निपातपदं अस्सपि संवण्णनायपि इच्छितत्ता, अक्खरेन पन कथं गहितोति चे? अक्खरेहि सुय्यमानेहि सुणन्तानं विसेसविधानस्स कतत्ता पदपरियोसाने पदत्थसम्पटिपत्ति होति. तस्मा अक्खरेनपि अत्थाकारो गहितोवाति वेदितब्बो. तेन वुत्तं – ‘‘अक्खरेहि सङ्कासेति, पदेहि पकासेति, अक्खरेहि च पदेहि च उग्घटेती’’ति (नेत्ति. ९) च.

विवरणा ¶ वित्थारणा. विभजना च उत्तानीकम्मञ्च पञ्ञत्ति च विभजनुत्तानीकम्मपञ्ञत्तीति समाहारे अयं द्वन्दसमासो. तत्थ विभागकरणं विभजनं नाम. ब्यञ्जनाकारेहि यो अत्थाकारो निद्दिसियमानो, सो अत्थाकारो विवरणविभजनाति द्वीहि अत्थपदेहि ¶ निद्दिसितो. पाकटकरणं उत्तानीकम्मं नाम. पकारेहि ञापनं पञ्ञत्ति. निरुत्तिनिद्देससङ्खातेहि ब्यञ्जनपदेहि पकासियमानो यो अत्थाकारो अत्थि, सो अत्थाकारो उत्तानीकम्मपञ्ञत्तीहि पटिनिद्दिसितो. एतेहि सङ्कासनादीहि छहि अत्थपदेहि अत्थो सुत्तत्थो गहितो, कम्मञ्च उग्घटनादिकम्मञ्च निद्दिट्ठन्ति अत्थो. येन सुत्तत्थेन उग्घटितञ्ञुनो चित्तसन्तानस्स सम्बोधनकिरियासङ्खातस्स उग्घटनकम्मस्स निब्बत्ति भवे, सो सुत्तत्थो सङ्कासनापकासनाकारो होति. येन सुत्तत्थेन विपञ्चितञ्ञुनो चित्तसन्तानस्स बोधनकिरियासङ्खातस्स विपञ्चनकम्मस्स निब्बत्ति, सो सुत्तत्थो विवरणाविभजनाकारो होति. येन सुत्तत्थेन नेय्यस्स चित्तसन्तानस्स पबोधनकिरियासङ्खातस्स नयकम्मस्स निब्बत्ति, सो सुत्तत्थो उत्तानीकम्मपञ्ञत्ताकारो होतीति दट्ठब्बो. तेनाह अट्ठकथाचरियो ‘‘सुत्तत्थेन हि देसनाय पवत्तियमानेन उग्घटितञ्ञुआदिवेनेय्यानं चित्तसन्तानस्स पबोधनकिरियानिब्बत्ति, सो च सुत्तत्थो सङ्कासनादिआकारो’’ति (नेत्ति. अट्ठ. २४).

‘‘यथावुत्तेहि तीहि अत्थनयेहि चेव छहि अत्थपदेहि च अयुत्तोपि अत्थो किं कोचि अत्थि, उदाहु सब्बो अत्थो युत्तो एवा’’ति पुच्छितब्बत्ता –

२५.

‘‘तीणि च नया अनूना, अत्थस्स च छप्पदानि गणितानि.

नवहि पदेहि भगवतो, वचनस्सत्थो समायुत्तो’’ति. –

गाथमाह. तत्थ तीणीति लिङ्गविपल्लासनिद्देसो, तयोति पन पकतिलिङ्गनिद्देसो वत्तब्बो. गणिता अनूना तयो अत्थस्स नया च गणितानि अनूनानि छ अत्थस्स पदानि च निद्दिट्ठानि, निद्दिट्ठेहि च अत्थपदेहि भगवतो वचनस्स सब्बो अत्थो समायुत्तोव अयुत्तो कोचि अत्थो नत्थीति योजना कातब्बा. अत्थस्साति सुत्तत्थस्स. नयाति नेत्तिअत्थनया. पदानीति नेत्तिअत्थपदानि.

२६. ये ¶ हारादयो निद्दिट्ठा, ते हारादयो सम्पिण्डेत्वा नेत्तिप्पकरणस्स पदत्थे सुखग्गहणत्थं गणनवसेन परिच्छिन्दित्वा दस्सेन्तो ‘‘अत्थस्सा’’तिआदिमाह. तत्थ अत्थस्स समूहस्स अवयवभूतानि नवभेदानि अत्थपदानि सुत्तब्यञ्जनस्स अत्थस्स परियेट्ठिसङ्खाताय संवण्णनाय गणनतो चतुवीसति ब्यञ्जनपदानि होन्ति, अत्थपदब्यञ्जनपदभूतं उभयं सङ्खेपयतो सम्पिण्डयतो तेत्तिंसा तेत्तिंसविधा एत्तिका तेत्तिंसविधाव नेत्तीति योजना.

तत्थ ¶ नवप्पदानीति तयो अत्थनया, छ अत्थपदानि च. चतुब्बीसाति सोळस हारा, छ ब्यञ्जनपदानि, द्वे दिसालोचननयअङ्कुसनया चाति एवं तेत्तिंसविधा च नेत्ति नाम, इतो विनिमुत्तो अञ्ञो कोचि नेत्तिपदत्थो नत्थीति अत्थो दट्ठब्बो.

‘‘एवं तेत्तिंसपदत्थाय नेत्तिया हारनयानं कतमो देसनाहारविचयहारो’’तिआदि देसनाक्कमेनेव सिद्धो, एवं सिद्धे सतिपि ‘‘सोळस हारा पठम’’न्ति आरम्भो ‘‘सब्बेपिमे हारा चेव नया च इमिना दस्सितक्कमेनेव संवण्णेतब्बेसु सुत्तेसु संवण्णनावसेन योजेतब्बा, न उप्पटिपाटिया’’ति इममत्थं दीपेति. दीपनवचनसवनानुसारेन ञापेति, तस्मा एवं कमो दस्सितो, अस्सादादीनवनिस्सरणानि धम्मदेसनाय निस्सयानि, फलञ्च धम्मदेसनाय फलं, उपायो च धम्मदेसनाय उपायो, आणत्ति च धम्मदेसनाय सरीरं. देसनाहारस्स तासं अस्सादादीनवनिस्सरणफलुपायाणत्तीनं विभावनसभावत्ता.

निद्धारणेन विनापि पकतिया सब्बसंवण्णेतब्बसुत्तेसु अनरूपाति सुविञ्ञेय्यत्ता, संवण्णनाविसेसानं विचयहारादीनं निस्सयभावतो च पठमं देसनाहारो दस्सितो.

पदपुच्छाविस्सज्जनापुच्छापदानुगीतीहि सद्धिं देसनाहारपदत्थानं अस्सादादीनं पविचयभावतो देसनाहारानन्तरं विचयो हारो.

विचयहारेन पविचितानं अत्थानं युत्तायुत्तिविचारणभावतो विचयहारानन्तरं युत्ति हारो.

पदट्ठानहारस्स युत्तायुत्तानंयेव अत्थानं उपपत्तिअनुरूपं कारणपरम्पराय निद्धारणत्ता युत्तिहारानन्तरं पदट्ठानहारो.

युत्तायुत्तानं ¶ कारणपरम्पराय परिग्गहितसभावानंयेव च धम्मानं अवुत्तानम्पि समानलक्खणताय गहणलक्खणत्ताय पदट्ठानहारानन्तरं लक्खणहारो.

लक्खणहारेन अत्थतो सुत्तन्तरतो निद्धारितानम्पि धम्मानं निब्बचनादीनि वत्तब्बानि, न सुत्ते सरूपतो आगतधम्मानंयेवाति दस्सनत्थं लक्खणहारानन्तरं चतुब्यूहो हारो. एवञ्हि निरवसेसतो अत्थावबोधो होति.

चतुब्यूहेन ¶ हारेन वुत्तेहि निब्बचनाधिप्पायनिदानेहि सद्धिं सुत्ते पदत्थानं सुत्तन्तरसंसन्दनसङ्खाते पुब्बापरविचारे दस्सिते तेसं सुत्तपदत्थानं सभागविसभागधम्मन्तरावट्टनं सुखेन सक्का दस्सेतुन्ति चतुब्यूहहारानन्तरं आवट्टो हारो. सुत्तन्तरसंसन्दनस्स हि सभागविसभागधम्मन्तरावट्टनयस्स उपायभावतो ‘‘आरम्भथ निक्कमथा’’तिआदिगाथाय (सं. नि. १.१८५; नेत्ति. २९; पेटको. ३८) आरम्भननिक्कमनबुद्धसासनयोगधुननेहि वीरियसमाधिपञ्ञिन्द्रियानि निद्धारेत्वा तेसु आरम्भननिक्कमनबुद्धसासनयोगधुननेसु अननुयोगस्स मूलं पमादोति सुत्तन्तरे दस्सितो पमादो आवट्टितोति.

आवट्टेन हारेन सभागविसभागधम्मावट्टनेन पयोजिते साधारणासाधारणवसेन संकिलेसवोदानधम्मानं पदट्ठानतो चेव भूमितो च विभागो सक्का सुखेन योजेतुन्ति आवट्टहारानन्तरं विभत्ति हारो.

विभत्तिहारेन संकिलेसवोदानधम्मानं विभागे कते संवण्णेतब्बसुत्ते आगता धम्मा अकसिरेन पटिपक्खतो परिवत्तेतुं सक्काति विभत्तिहारानन्तरं परिवत्तनहारो. विभत्तिहारेन हि ‘‘सम्मादिट्ठिस्स पुरिसपुग्गलस्स मिच्छादिट्ठि निज्जिण्णा होती’’ति (नेत्ति. ३५) पटिविभत्तसभावे एव धम्मे परिवत्तनहारविभङ्गे उदाहरीयिस्सति.

परिवत्तनहारेन पटिपक्खतो परिवत्तितापि धम्मा परियायवचनेहि बोधेतब्बा, न संवण्णेतब्बसुत्ते आगतधम्मायेवाति दस्सनत्थं परिवत्तनहारानन्तरं वेवचनहारो.

वेवचनहारेन ¶ परियायतो पकासितानं धम्मानं पभेदतो पञ्ञत्तिवसेन विभजनं सुखेन सक्का ञातुन्ति वेवचनहारानन्तरं पञ्ञत्ति हारो.

पञ्ञत्तिहारेन पभवपरिञ्ञादिपञ्ञत्तिविभागमुखेन पटिच्चसमुप्पादसच्चादिधम्मविभागे कते सुत्ते आगतधम्मानं पटिच्चसमुप्पादादिमुखेन अवतरणं सक्का दस्सेतुन्ति पञ्ञत्तिहारानन्तरं ओतरणो हारो.

ओतरणेन हारेन धातायतनादीसु ओतारितानं संवण्णेतब्बसुत्ते पदत्थानं पुच्छारम्भसोधनं सक्का सुखेन सम्पादेतुन्ति ओतरणहारानन्तरं सोधनो हारो.

सोधनेन ¶ हारेन संवण्णेतब्बसुत्ते पदपदत्थेसु विसोधितेसु तत्थ तत्थ एकत्तताय वा वेमत्तताय वा लब्भमानसामञ्ञविसेसभावो सुकरो होतीति दस्सेतुं सोधनहारानन्तरं अधिट्ठानो हारो.

सामञ्ञविसेसभूतेसु साधारणासाधारणेसु धम्मेसु अधिट्ठानेन हारेन पवेदितेसु परिक्खारसङ्खातस्स साधारणासाधारणरूपस्स पच्चयहेतुरासिस्स पभेदो सुविञ्ञेय्योति अधिट्ठानहारानन्तरं परिक्खारो हारो.

असाधारणे, साधारणे च कारणे परिक्खारेन हारेन दस्सिते तस्स अत्तनो फलेसु कारणाकारो, तेसं हेतुफलानं पभेदतो देसनाकारो, भावेतब्बपहातब्बधम्मानं भावनापहानानि च निद्धारेत्वा वुच्चमानानि सम्मा संवण्णेतब्बसुत्तस्स अत्थं तथत्तावबोधाय संवत्तन्तीति परिक्खारहारानन्तरं समारोपनो हारो दस्सितो होति. इदं हारानं दस्सनानुक्कमकारणं दट्ठब्बं.

उद्देसो उग्घटितञ्ञुनो उपकाराय संवत्तति यथा, एवं नन्दियावट्टनयो उग्घटितञ्ञुनो उपकाराय संवत्तति, तस्मा पठमं नन्दियावट्टनयो दस्सितो. निद्देसो विपञ्चितञ्ञुनो उपकाराय संवत्तति यथा, एवं तिपुक्खलनयो विपञ्चितञ्ञुनो उपकाराय संवत्तति, तस्मा नन्दियावट्टनयानन्तरं तिपुक्खलनयो. पटिनिद्देसो नेय्यस्स उपकाराय संवत्तति यथा, एवं सीहविक्कीळितनयो नेय्यस्स उपकाराय संवत्तति ¶ . तस्मा तिपुक्खलानन्तरं सीहविक्कीळितनयो दस्सितोति तिण्णं अत्थनयानं दस्सनानुक्कमो वेदितब्बो. अत्थनयानं दिसाभूताय भूमिया आलोकेत्वा तेसं तस्सा दिसाय भूमिया समानयनं होति. न हि सक्का अनोलोकेत्वा समानेतुन्ति दिसालोचननयं दस्सेत्वा अङ्कुसनयो दस्सितो. पोत्थकारुळ्हावछेका सब्बासु दिसासु हत्थिगमनट्ठानं ओलोकेत्वा अङ्कुसेन इच्छितट्ठानं समानयन्ति. केचि अच्छेका अनोलोकेत्वा विनयन्ति. तेसं नयनमत्तमेव, न समानयनं. एवमेव पण्डिता सुत्तत्थं वण्णेन्ता मनसाव ओलोकेत्वाव नया नेतब्बाति दट्ठब्बा.

समुट्ठानसंवण्णना अधिप्पायसंवण्णना पदत्थसंवण्णना विधिअनुवादसंवण्णना निगमनसंवण्णनाति वा, पयोजनसंवण्णना पिण्डत्थसंवण्णना अनुसन्धिसंवण्णना चोदनासंवण्णना परिहारसंवण्णनाति वा, उपोग्घाटसंवण्णना पदविग्गहसंवण्णना पदत्थचालनसंवण्णना ¶ पच्चुपट्ठानसंवण्णनाति वा, तथा एकनाळिकाकथा चतुरस्सकथा निसिन्नवत्तिकाकथाति वा आगता.

तत्थ समुट्ठानं निदानमेव. विधिअनुवादो विसेसवचनमेव. उपोग्घाटो निदानमेव. चालना चोदनायेव. पच्चुपट्ठानं परिहारोव.

पाळिं वत्वा एकेकपदस्स अत्थकथनसङ्खाता संवण्णना एकनाळिकाकथा नाम.

पटिपक्खं दस्सेत्वा पटिपक्खस्स उपमं दस्सेत्वा सपक्खं दस्सेत्वा सपक्खस्स उपमं दस्सेत्वा कथनसङ्खाता संवण्णना चतुरस्सकथा नाम.

विसभागधम्मवसेनेव परियोसानं गन्त्वा पुन सभागधम्मवसेनेव परियोसानगमनसङ्खाता संवण्णना निसिन्नवत्तिकाकथा नाम.

ता सब्बा संवण्णनायोपि देसनाहारादीसु नेत्तिसंवण्णनासु अन्तोगधायेव. तेनाह ‘‘यत्तका हि सुत्तस्स संवण्णनाविसेसा, सब्बे ते नेत्तिउपदेसायत्ता’’ति. एवं एत्तावता एतपरमता दट्ठब्बा ¶ . हेतुफलभूमिउपनिसासभागविसभागलक्खणनयादयो पन अट्ठकथायं (नेत्ति. अट्ठ. ४ द्वादसपद) वित्थारतो वुत्ताति न वित्थारयिस्सामीति.

इति सत्तिबलानुरूपा रचिता

निद्देसवारअत्थविभावना निट्ठिता.

४. पटिनिद्देसवारअत्थविभावना

१. देसनाहारविभङ्गविभावना

५. एवं ¶ हारादयो सरूपतो आचरियेन उद्देसतो उद्दिट्ठा, निद्देसतो च निद्दिट्ठा, अम्हेहि च ञाता, अथ कस्मा पुन ‘‘तत्थ कतमो देसनाहारो’’तिआदिको आरद्धोति चे? वेनेय्यानं तिविधत्ता. वेनेय्या हि अतितिक्खपञ्ञो नातितिक्खपञ्ञो मन्दपञ्ञोति तिविधा होन्ति. तेसञ्हि अतितिक्खपञ्ञस्सानुरूपं हारादयो उद्देसतो उद्दिट्ठा, नातितिक्खपञ्ञस्स अनुरूपं निद्देसतो निद्दिट्ठा, इदानि मन्दपञ्ञस्सानुरूपं हारादयो विभजित्वा दस्सेतुं ‘‘तत्थ कतमो देसनाहारो’’तिआदिको विभङ्गवारो आरद्धो. अट्ठकथायं पन ‘‘एवं हारादयोसुखग्गहणत्थं गाथाबन्धवसेन सरूपतो निद्दिसित्वा इदानि तेसु हारे ताव पटिनिद्देसवसेन विभजितुं ‘तत्थ कतमो देसनाहारो’तिआदि आरद्ध’’न्ति (नेत्ति. अट्ठ. ५) वुत्तं.

तत्थ ये हारादयो उद्देसनिद्देसेसु निद्दिट्ठा, तत्थ हारादीसु कतमो देसनाहारोति चे? या ‘‘अस्सादादीनवता’’तिआदिगाथा (नेत्ति. ४) वुत्ता, सा अयं गाथा निद्देसवसेन देसनाहारो नाम, तस्स ‘‘अस्सादादीनवता’’तिआदि (नेत्ति. ४) निद्देसस्स इदानि मया वुच्चमानो ‘‘अयं देसनाहारो किं देसयती’’तिआदिको वित्थारसंवण्णनाविसेसो देसनाहारविभङ्गो नामाति योजना. ‘‘अयं देसनाहारो किं देसयती’’ति पुच्छितब्बत्ता पुच्छं ठपेत्वा ‘‘इमं देसयती’’ति नियमेत्वा दस्सेतुं ‘‘अयं देसनाहारो किं देसयति? अस्सादं आदीनव’’न्तिआदि वुत्तं. तत्थ अयं देसनाहारो किं देसयतीति चे ¶ ? अस्सादं देसयति संवण्णेति वित्थारेति, आदीनवं देसयति…पे… वित्थारेति, निस्सरणं देसयति…पे… वित्थारेति, फलं देसयति…पे… वित्थारेति, उपायं देसयति…पे… वित्थारेति, आणत्तिं देसयति संवण्णेति वित्थारेतीति योजनो.

एत्थ च ‘‘अयं देसनाहारो’’ति सद्दो पुब्बापरापेक्खोति दट्ठब्बो. ‘‘‘अस्सादादीनवता’तिआदिगाथायं (नेत्ति. ४) दस्सिता इमे अस्सादादयो कत्थ संवण्णेतब्बे पाळिधम्मे आगता’’ति पुच्छितब्बत्ता ‘‘धम्मं वो, भिक्खवे, देसेस्सामी’’तिआदि वुत्तं. ‘‘‘अस्सादादीनवता’तिआदिगाथायं (नेत्ति. ४) दस्सिता इमे अस्सादादयो कत्थ संवण्णेतब्बे पाळिधम्मे आगता’’ति पुच्छितब्बत्ता ‘‘धम्मं वो, भिक्खवे, देसेस्सामि आदिकल्याणं ¶ मज्झेकल्याणं परियोसानकल्याणं सात्थं सब्यञ्जनं केवलपरिपुण्णं परिसुद्धं ब्रह्मचरियं पकासेस्सामी’’ति पटिञ्ञातब्बे पाळिधम्मे संवण्णेतब्बे ये अस्सादादयो आगता, ते अयं देसनाहारो देसयतीति अधिप्पायो.

तत्थ धम्मसद्दो परियत्तिसच्चसमाधिपञ्ञापकतिपुञ्ञापत्तिञेय्यादीसु बहूसु अत्थेसु पवत्तो, तथापि इध परियत्तिधम्मेयेव पवत्तोति दट्ठब्बो. अत्थुद्देसो पन अट्ठकथायं (नेत्ति. अट्ठ. ५) वुत्तो, तस्मा इध मया न वुत्तो. वो-कारोपि उपयोगकरणपदपूरणसम्पदानत्थेसु दिस्सति च, तथापि इध सम्पदानत्थेवाति दट्ठब्बो. भिक्खन्ति याचन्ति सीलक्खन्धादयो, पच्चये वा कायविञ्ञत्तियाति भिक्खू, संसारे भयं इक्खन्ति पच्चवेक्खन्तीति वा भिक्खू. भिक्खवेति ते भिक्खू आलपति, किमत्थायाति अत्तनो मुखाभिमुखं कत्वा धम्मस्सवने अतिउस्साहने नियोजेतुं आलपतीति वेदितब्बो.

धम्मं देसेस्सामीति नाहं इस्सरताय तुम्हे अञ्ञं किञ्चि कारेय्यामि, धम्मंयेव देसेस्सामि, देसेन्तो च न अञ्ञेसं धम्मं सुत्वा सुतमयञाणानुसारेन देसेस्सामि, अनावरणञाणेन सब्बञेय्यधम्मेसु पच्चक्खकारिताय इदानि मयायेव पवत्तियमानं धम्मं अहं देसेस्सामीति पटिजानाति. आदिम्हि कल्याणं आदिकल्याणं, आदि कल्याणमेतस्साति वा आदिकल्याणं. सेसेसुपि एसेव नयो. आदिकल्याणादयो चेत्थ अत्थकल्याणादिवसेन वुत्ताति दट्ठब्बा. तेनाह – ‘‘सीलेन ¶ आदिकल्याणं, समाधिना मज्झेकल्याणं, पञ्ञाय परियोसानकल्याणं. बुद्धसुबुद्धताय वा आदिकल्याणं, धम्मसुधम्मताय मज्झेकल्याणं, सङ्घसुप्पटिपत्तिया परियोसानकल्याणं. अथ वा उग्घटितञ्ञुविनयनेन आदिकल्याणं, विपञ्चितञ्ञुविनयनेन मज्झेकल्याणं, नेय्यपुग्गलविनयनेन परियोसानकल्याणं. अयमेवत्थो इधाधिप्पेतो’’ति (नेत्ति. अट्ठ. ५).

अरीयति ञायतीति अत्थो, अर-धातुया निप्परियायतो ञाणप्पधानो आरम्मणिकचित्तुप्पादो अत्थो, ठानूपचारतो अत्थस्स ञातब्बस्स आरम्मणपच्चयसत्ति अत्थो, इति-सद्देन सायेव सत्ति परामसीयति, आरम्मणपच्चयसत्तिसहितो आरम्मणपच्चयसङ्खातो ञातब्बो अत्थो त-पच्चयस्स अत्थोति धातुपच्चयानं अत्थविसेसो दट्ठब्बो. असति भवतीति वा अत्थो, सह अत्थेन यो धम्मो वत्ततीति सो धम्मो सात्थो, अत्थेन समन्नागतो वा धम्मो सात्थो, सङ्कासनादिछअत्थपदसमायोगतो वा सात्थो. अयमेवत्थो इधाधिप्पेतो नेत्तिविसयत्ता. सम्पन्नं ब्यञ्जनं यस्स धम्मस्साति सब्यञ्जनो. सिथिलधनितदीघरस्सगरुलहुसम्बन्धववत्थितविमुत्तनिग्गहितसम्पन्नत्ता ¶ , अकारन्तादिइत्थिलिङ्गादिएकवचनादिसम्पन्नत्ता, पमादलेखादिरहितत्ता च अवयवो सम्पन्नो तंसमूहत्ता धम्मो सम्पन्नब्यञ्जनो नाम, अक्खरादिछब्यञ्जनपदसमायोगा वा सब्यञ्जनो. अयमेवत्थो इधाधिप्पेतो. इमस्मिं अयं ऊनो, सो नेतब्बो पक्खिपितब्बोति उपनेतब्बाभावतो केवलपरिपुण्णो, सीलक्खन्धसमाधिक्खन्धपञ्ञाक्खन्ध- विमुत्तिक्खन्धविमुत्तिञाणदस्सनक्खन्धपारिपूरिया वा केवलपरिपुण्णो. इधायं अतिरेको, सो अपनेतब्बोति वत्वा अपनेतब्बाभावतो परिसुद्धो, चतुरोघनित्थरणत्थाय, लोकामिसनिरपेक्खताय पवत्तियमानत्ता वा परिसुद्धो. सेट्ठत्ता ब्रह्मचरियं, ब्रह्मानं वा सेट्ठानं अरियानं चरियं ब्रह्मचरियं, पब्बज्जब्रह्मचरियमग्गब्रह्मचरियसासनब्रह्मचरियादीसु सासनब्रह्मचरियं पकासयिस्सामि, परिदीपयिस्सामीति अत्थो.

‘‘धम्मं वो, भिक्खवे, देसेस्सामि…पे… पकासेस्सामी’’ति पटिञ्ञातब्बे पाळिधम्मे आगते अस्सादादयो देसनाहारो देसयति संवण्णेति ¶ वित्थारेतीति आचरियेन सामञ्ञवसेनेव वुत्तं, तस्मा देसनाहारो इध पाळियं आगतं इमं अस्सादं देसयति, इध पाळियं आगतं इमं आदीनवं देसयतीतिआदि विसेसो न विञ्ञातब्बो, ‘‘कथं विञ्ञातब्बो’’ति पुच्छितब्बत्ता ‘‘इध पाळियं आगतो अयं अस्सादो, इध पाळियं आगतो अयं आदीनवो’’ति विसेसं नियमेत्वा उपलक्खणनयेन दस्सेतुं ‘‘तत्थ कतमो अस्सादो? कामं कामयमानस्सा’’तिआदि आरद्धं. तत्थ तत्थाति तस्सं ‘‘अस्सादादीनवता’’तिआदिगाथायं निद्दिट्ठेसु विसयविसयिभेदेसु अस्सादेसु कतमो अस्सादो तत्थ तेसु पाळिधम्मेसु कत्थ पाळियं आगतोति पुच्छित्वा –

‘‘कामं कामयमानस्स, तस्स चेतं समिज्झति;

अद्धा पीतिमनो होति, लद्धा मच्चो यदिच्छती’’ति. (सु. नि. ७७२; महानि. १) –

इध पाळिगाथायं यो विसयभूतो अस्सादो आगतो, सो अयं अस्सादेतब्बो अस्सादो देसनाहारस्स विसयोति. अट्ठकथायं पन –

‘‘एवं भगवता देसितो, पकासितो च सासनधम्मो येसं अस्सादादीनं दस्सनवसेन पवत्तो, ते अस्सादादयो देसनाहारस्स विसयभूता यत्थ यत्थ पाठे सविसेसं ¶ वुत्ता, ततो ततो निद्धारेत्वा उदाहरणवसेन इधानेत्वा दस्सेतुं ‘तत्थ कतमो अस्सादो’तिआदि आरद्ध’’न्ति (नेत्ति. अट्ठ. ५) वुत्तं.

तत्थ अस्सादीयतेति अस्सादो, अस्सादेतब्बो वत्थुकामो. कामीयतेति कामो, वत्थुकामो च. तं कामयतीति कामयमानो, सत्तो. तस्स पीतिया युत्तं मनो एतस्साति पीतिमनो. मनति जानातीतिआदिवचनत्थेन मच्चो. कामं कामितब्बं वत्थु कामयमानस्स तस्स सत्तस्स एतं कामितब्बं वत्थु सचे समिज्झति, एवं सति सो सत्तो अद्धा पीतिमनो होति. यो मच्चो यं वत्थुं इच्छति, तं वत्थुं सो मच्चो लद्धा अद्धा पीतिमनो होतीति गाथायत्थो दट्ठब्बो.

‘‘कामं ¶ …पे… पीतिमनो होती’’ति एत्तकमेव अवत्वा ‘‘लद्धा मच्चो यदिच्छती’’ति वुत्तत्ता लोभनीयं वत्थुंयेव लद्धा पीतिमनो न होति, अथ खो पत्थेतब्बं पूजेतब्बन्ति सब्बं लद्धा मच्चो पीतिमनो च होतीति अतिरेकत्थो दट्ठब्बो.

विसयभूतो अस्सादेतब्बो अस्सादो इध पाळियं गाथायं आगतोति आचरियेन विभत्तो, अम्हेहि च ञातो, ‘‘दुक्खदोमनस्सादिभेदेसु आदीनवेसु कतमो आदीनवो कत्थ पाळिधम्मे आगतो’’ति पुच्छितब्बत्ता ‘‘तत्थ कतमो आदीनवो? तस्स चे कामयानस्सा’’तिआदि आरद्धं. तत्थ तत्थाति तस्सं ‘‘अस्सादादीनवता’’तिआदिगाथायं निद्दिट्ठेसु दुक्खदोमनस्सादीसु आदीनवेसु कतमो आदीनवो तत्थ तेसु पाळिधम्मेसु कत्थ पाळियं आगतोति पुच्छित्वा –

‘‘तस्स चे कामयानस्स, छन्दजातस्स जन्तुनो;

ते कामा परिहायन्ति, सल्लविद्धोव रुप्पती’’ति. (सु. नि. ७७३; महानि. २) –

इध पाळिगाथायं यो दोमनस्ससङ्खातो आदीनवो आगतो, सो अयं दोमनस्ससङ्खातो आदीनवो देसनाहारस्स विसयोति.

गाथायं पन कामयति इच्छतीति कामयानो. अथ वा यायति गच्छतीति यानो, कामेन यानो कामयानो, तस्स. छन्दो जातो यस्स सो छन्दजातो, तस्स. विज्झीयतेति विद्धो ¶ , सल्लति पविसतीति सल्लो, सल्लेन विद्धो सल्लविद्धो. कामं कामयानस्स छन्दजातस्स जन्तुनो ये कामा लभितब्बा, ते कामा केनचि अन्तरायेन यदा परिहायन्ति, तदा सो जन्तु रुप्पति. कीदिसोव रुप्पति? अयोमयसल्लविद्धो मिगो रुप्पति इव, परिहीनकामो जन्तु रुप्पतीति दट्ठब्बो. एत्थ च ‘‘रुप्पती’’तिवचनेन दोमनस्सुप्पत्ति दस्सिताति दट्ठब्बा.

दोमनस्सभूतो आदीनवो इध पाळियं आगतोति आचरियेन विभत्तो, अम्हेहि च ञातो, ‘‘मग्गनिब्बानवसेन दुविधेसु निस्सरणेसु कतमं निस्सरणं कत्थ पाळियं आगत’’न्ति पुच्छितब्बत्ता ‘‘तत्थ कतमं निस्सरणं? यो कामे परिवज्जेती’’तिआदि आरद्धं. तत्थ तत्थाति तस्सं ¶ ‘‘अस्सादादीनवता’’तिआदिगाथायं निद्दिट्ठेसु मग्गनिब्बानवसेन दुविधेसु निस्सरणेसु कतमं निस्सरणं तत्थ तेसु पाळिधम्मेसु कत्थ पाळिधम्मे आगतन्ति पुच्छित्वा –

‘‘यो कामे परिवज्जेति, सप्पस्सेव पदा सिरो;

सोमं विसत्तिकं लोके, सतो समतिवत्तती’’ति. (सु. नि. ७७४; महानि. ३) –

इध पाळिगाथायं यं समतिवत्तनकरणं मग्गसङ्खातं निस्सरणं आगतं, तं इदं मग्गसङ्खातं समतिवत्तनकरणं निस्सरणं देसनाहारस्स विसयन्ति.

गाथायं योति झानलाभी वा अरियो वा. कामेति वुत्तप्पकारो वत्थुकामो. तेसु पवत्तछन्दरागस्स विक्खम्भनेन वा समुच्छिन्दनेन वा परिवज्जेति. किं परिवज्जेति इव वज्जेति? सप्पस्स सिरो सिरं चक्खुमा पुरिसो दिस्वा पदा पादेन परिवज्जेति इव, एवं परिवज्जेति. सतो सतिसम्पन्नो सो पुग्गलो लोके रूपादीसु विसत्तिकं इमं तण्हं येन मग्गेन समतिवत्तति सं सुट्ठु अतिक्कमित्वा वत्तति, इदं मग्गसङ्खातं समतिवत्तनकरणं एकदेसं निस्सरणं नामाति योजेतब्बं. ‘‘पादा’’ति वत्तब्बे आकारस्स रस्सं कत्वा ‘‘पदा’’ति वुत्तं. पादाति च पादेन यथा ‘‘अमोहभावा अमोहभावेना’’ति. तेन वुत्तं ‘‘अत्तनो पादेना’’ति (नेत्ति. अट्ठ. ५).

एकदेसो विसयसङ्खातो अस्सादो इध पाळियं आगतोति आचरियेन विभत्तो, अम्हेहि च ञातो, ‘‘एकदेसो विसयिसङ्खातो अस्सादो कत्थ पाळियं आगतो’’ति पुच्छितब्बत्ता ‘‘तत्थ ¶ कतमो अस्सादो? खेत्तं वत्थु’’न्तिआदि आरद्धं. अथ वा ‘‘तत्थ कतमो अस्सादो? खेत्तं वत्थु’’न्तिआदि कस्मा एवं आरद्धं, ननु ‘‘तत्थ कतमो अस्सादो? कामं कामयमानस्सा’’तिआदिना अस्सादो विभत्तो? सच्चं, अस्सादो पन दुविधो विसयविसयिवसेन, तस्मिं विसयसङ्खातो अस्सादो पुब्बे विभत्तो, इदानि विसयिसङ्खातं अस्सादं विभजितुं ‘‘तत्थ कतमो अस्सादो? खेत्तं वत्थु’’न्तिआदि आरद्धं. तत्थ तत्थाति तस्सं ‘‘अस्सादादीनवता’’तिआदिगाथायं निद्दिट्ठेसु विसयविसयिभेदेसु अस्सादेसु कतमो अस्सादो तत्थ तेसु पाळिधम्मेसु कत्थ पाळियं आगतोति पुच्छित्वा –

‘‘खेत्तं वत्थुं ¶ हिरञ्ञं वा, गवास्सं दासपोरिसं;

थियो बन्धू पुथू कामे, यो नरो अनुगिज्झती’’ति. (सु. नि. ७७५; महानि. ४) –

इध पाळिगाथायं यो अनुगिज्झनसङ्खातो अस्सादो आगतो, सो अयं अनुगिज्झनसङ्खातो विसयिअस्सादो देसनाहारस्स विसयोति.

गाथायं खेत्तन्ति खिपीयन्ति बीजानि एत्थ ठानेति खेत्तं. खिपन्तानं जनानं खिपनकिरिया खिप-धातुया मुख्यत्थो, खिपनकिरियाजनको चित्तुप्पादो फलूपचारत्थो, तस्स चित्तुप्पादस्स उपनिस्सयपच्चयभूतस्स केदारस्स विरुळ्हापनसत्ति फलूपचारत्थो, इति-सद्देन सा विरुळ्हापनसत्तियेव परामसीयति, तस्सा सत्तिया पतिट्ठं केदारसङ्खातं ठानं त-पच्चयत्थो. एस नयो तीसु पिटकेसु एवरूपेसु च वचनत्थेसु यथारहं नीहरित्वा गहेतब्बो. वपन्ति पतिट्ठहन्ति एत्थाति वत्थु. अपरण्णादीनं पतिट्ठहनं वप-धातुया मुख्यत्थो, ठानस्स पतिट्ठापनसत्ति फलूपचारत्थो, इति-सद्देन सा पतिट्ठापनसत्ति परामसीयति. तस्सा सत्तिया पतिट्ठट्ठानं त-पच्चयत्थो. खेत्तं पन पुब्बण्णविरूहनट्ठानं, वत्थु अपरण्णविरूहनट्ठानं.

हिनोति पवत्तति पीतिसोमनस्सन्ति हि, किं तं? पीतिसोमनस्सं, राति पवत्तेति जातरूपन्ति रं, किं तं? जातरूपं, हिं रन्ति हिरं, दुतियातप्पुरिससमासो. ञापेति तोसेतीति ञं, किं तं? जातरूपं. हिरं हुत्वा ञं हिरञ्ञं, पवत्तमानं पीतिसोमनस्सं पवत्तेत्वा जने विसेसेन तोसेतीति अत्थो गहेतब्बो. वा-सद्दो वुत्तावुत्तत्थसमुच्चयत्थो. गच्छन्ति विसेसेनाति गावो, रत्तिन्दिवं असन्ति भक्खन्ति विसेसेनाति अस्सा, गावो च अस्सा च गवास्सं. दातब्बं पठमं देन्तीति दा, असन्ति भक्खन्तीति असा, दत्वा असा दासा ¶ , सामिकानं दातब्बं पठमं दत्वा पच्छा असन्ति भक्खन्तीति अत्थो. सामिकेहि वा दिन्नं असन्ति भक्खन्तीति दासा, दुक्खेन कसिरेन असन्ति पवत्तन्तीति वा दासा,. मातापितूनं हदयं पुरेन्तीति पुरिसा, पुरं हितं वा इसन्ति गवेसन्तीति पुरिसा. बुद्धपच्चेकबुद्धचक्कवत्तिभावं पुरेति कम्मन्ति पुरं, किं तं? बलवकम्मं, पुरं इसन्ति सीलेनाति वा पुरिसा. पुरिसा एव हि सम्मासम्बुद्धपच्चेकबुद्धचक्कवत्तिभावं गच्छन्ति. ‘‘पुरि उच्चट्ठाने सेन्तीति वा पुरिसा. पुरिसा ¶ हि मातूनं पितुट्ठाने ठिता’’ति इमे वचनत्था वुत्तप्पकारा युत्तायेव अत्थसम्भवतो. दासा च पुरिसा च दासपोरिसं, मज्झे वुद्धि. एत्थ च दासग्गहणेन दासीपि गहिता. दासा दुक्कटजना, पुरिसा सुखितजनाति विसेसो दट्ठब्बो. ठन्ति पतिट्ठहन्ति एत्थ मातुगामे पुत्तधीताति थियो. नरसद्दस्स विग्गहत्थो हेट्ठा वुत्तोव.

एकदेसो दोमनस्ससङ्खातो आदीनवो इध पाळिगाथायं आगतोति आचरियेन विभत्तो, अम्हेहि च ञातो, ‘‘दुक्खसङ्खातो आदीनवो कत्थ पाळियं आगतो’’ति पुच्छितब्बत्ता ‘‘तत्थ कतमो आदीनवो? अबला नं बलीयन्ती’’तिआदि आरद्धं. अथ वा ‘‘तत्थ कतमो आदीनवो? अबला नं बलीयन्ती’’तिआदि कस्मा एवं आरद्धं, ननु ‘‘तत्थ कतमो आदीनवो? तस्स चे कामयानस्सा’’तिआदिना आदीनवो विभत्तोति? सच्चं, आदीनवो पन बहुविधो दुक्खदोमनस्सादिवसेन, तस्मिं बहुविधे आदीनवे एकदेसो दोमनस्ससङ्खातो आदीनवो पुब्बे विभत्तो, इदानि दुक्खसङ्खातं आदीनवं विभजितुं ‘‘तत्थ कतमो आदीनवो? अबला नं बलीयन्ती’’तिआदि आरद्धं. तत्थ तत्थाति तस्सं ‘‘अस्सादादीनवता’’तिआदिगाथायं निद्दिट्ठेसु दुक्खदोमनस्सादीसु आदीनवेसु कतमो आदीनवो तत्थ तेसु पाळिधम्मेसु कत्थ पाळिधम्मे आगतोति पुच्छित्वा –

‘‘अबला नं बलीयन्ति, मद्दन्तेनं परिस्सया;

ततो नं दुक्खमन्वेति, नावं भिन्नमिवोदक’’न्ति. (सु. नि. ७७६; महानि. ५) –

इध पाळिगाथायं यो दुक्खसङ्खातो एकदेसो आदीनवो आगतो, सो अयं दुक्खसङ्खातो एकदेसो आदीनवो देसनाहारस्स विसयोति.

गाथायं नत्थि बलं एतेसं किलेसानन्ति अबला. कस्मा किलेसा अबला होन्तीति? कुसलेहि पहातब्बत्ता. नरन्ति खेत्तादिकामे अनुगिज्झन्तं नरं, सद्धाबलादिविरहतो वा अबलं ¶ तं नरं बलीयन्ति अभिभवन्ति. किञ्चापि किलेसा कुसलेहि पहातब्बत्ता अबला होन्ति, तथापि काममनुगिज्झन्तं सद्धाबलादिविरहितं अभिभवितुं समत्था भवन्ति. मद्दन्तेनं परिस्सयाति कामगिद्धं कामे परियेसन्तं, कामं रक्खन्तञ्च ¶ एनं नरं परि समन्ततो परिपीळेत्वा अयन्ति पवत्तन्तीति परिस्सया, सीहब्यग्घादयो चेव कायदुच्चरितादयो च मद्दन्ति. ततो तेहि परिस्सयेहि अभिभूतं नं नरं जातिआदिदुक्खं अन्वेति अनुगच्छति. किमिव अन्वेति? उदकं भिन्ननावं अन्वेति इव, एवं अन्वेतीति अत्थो.

एकदेसं मग्गसङ्खातं निस्सरणं इध पाळिगाथायं आगतन्ति आचरियेन विभत्तं, अम्हेति च विञ्ञातं, ‘‘निब्बानसङ्खातं एकदेसं निस्सरणं कत्थ पाळिधम्मे आगत’’न्ति पुच्छितब्बत्ता ‘‘तत्थ कतमं निस्सरणं? तस्मा जन्तु सदा सतो’’तिआदि आरद्धं. अथ वा ‘‘तत्थ कतमं निस्सरणं? तस्मा जन्तु सदा सतो’’तिआदि कस्मा एवं आरद्धं, ननु ‘‘तत्थ कतमं निस्सरणं? यो कामे परिवज्जेती’’तिआदिना निस्सरणं विभत्तन्ति? सच्चं, निस्सरणं पन दुविधं मग्गनिब्बानवसेन, तत्थ दुविधे निस्सरणे मग्गसङ्खातं निस्सरणं पुब्बे विभत्तं, इदानि निब्बानसङ्खातं निस्सरणं विभजितुं ‘‘तत्थ कतमं निस्सरणं? तस्मा जन्तु सदा सतो’’तिआदि आरद्धं. तत्थ तत्थाति तस्सं ‘‘अस्सादादीनवता’’तिआदिगाथायं निद्दिट्ठेसु मग्गनिब्बानेसु निस्सरणेसु एकदेसं निब्बानसङ्खातं निस्सरणं तत्थ तेसु पाळिधम्मेसु कत्थ पाळिधम्मे आगतन्ति पुच्छित्वा –

‘‘तस्मा जन्तु सदा सतो, कामानि परिवज्जये;

ते पहाय तरे ओघं, नावं सित्वाव पारगू’’ति. –

इध पाळिगाथायं यं निब्बानसङ्खातं निस्सरणं आगतं, इदं निस्सरणं देसनाहारस्स विसयन्ति.

गाथायं तस्माति यस्मा कामगिद्धं नरं दुक्खं अन्वेति, तस्मा जन्तु सदा सब्बकाले पुब्बरत्तापररत्ते जागरियानुयोगेन सतो सतिसम्पन्नो हुत्वा कामानि किलेसकामे विक्खम्भनवसेन वा समुच्छेदवसेन वा परिवज्जये परिजहेय्य. ते कामे अरियमग्गेन पहाय चतुब्बिधं ओघं तरेय्य तरितुं सक्कुणेय्य. को तरति इव तरेय्य? नावासामिको नावं यं पविसन्तं उदकं सित्वा बहि सिञ्चित्वा लहुकाय नावाय अप्पकसिरेन तरित्वा पारगू पारं गच्छति इव, एवं अत्तनि पवत्तं किलेसूदकं सिञ्चित्वा अरियमग्गेन नीहरित्वा लहुकेन अत्तभावेन अनुपादिसेसाय ¶ निब्बानधातुया निब्बानेन पारं निब्बानं सन्तिं ¶ गच्छेय्याति अत्थो. इदं निब्बानं कस्मा निस्सरणं होति? सब्बसङ्खतनिस्सरणतो निस्सरणं नाम.

इदं निस्सरणं इध पाळिधम्मे आगतन्ति आचरियेन विभत्तं, अम्हेहि च विञ्ञातं, ‘‘कतमं फलं कत्थ पाळिधम्मे आगत’’न्ति पुच्छितब्बत्ता ‘‘तत्थ कतमं फलं? धम्मो हवे रक्खति धम्मचारि’’न्तिआदि आरद्धं. तत्थ तत्थाति तस्सं ‘‘अस्सादादीनवता’’तिआदिगाथायं निद्दिट्ठेसु रक्खननिप्फादनमच्चुतरणादीसु फलेसु कतमं फलं तत्थ तेसु पाळिधम्मेसु कत्थ पाळिधम्मे आगतन्ति पुच्छित्वा –

‘‘धम्मो हवे रक्खति धम्मचारिं, छत्तं महन्तं यथ वस्सकाले;

एसानिसंसो धम्मे सुचिण्णे, न दुग्गतिं गच्छति धम्मचारी’’ति. (सु. नि. १०२, १०३) –

इध पाळिगाथायं यं अनत्थेहि धम्मस्स रक्खनफलं आगतं, रक्खावहनस्स अब्भुदयस्स यञ्च निप्फादनं फलं आगतं, इदं रक्खननिप्फादनं फलं देसनाहारस्स विसयन्ति.

गाथायं धम्मोति येन पुग्गलेन यो दानादिप्पभेदो पुञ्ञधम्मो निब्बत्तितो, सो धम्मो. धम्मचारिं धम्मनिब्बत्तकं तं पुग्गलं अनत्थेहि रक्खति. किमिव? वस्सकाले देवे वस्सन्ते सति महन्तं कुसलेन धारेतब्बं छत्तं धारेन्तं कुसलं तं जनं वस्सतेमनतो रक्खति यथा, एवं रक्खितब्बो धम्मोपि अत्तसम्मापणिधानेन अप्पमत्तो हुत्वा सुट्ठु धम्मं रक्खन्तंयेव रक्खति, तादिसो धम्मचारीयेव दुग्गतिं न गच्छति. एसो आनिसंसो सुचिण्णे सुचिण्णस्स धम्मे धम्मस्स आनिसंसोति अत्थो.

एकदेसं फलं इध पाळिधम्मे आगतन्ति आचरियेन विभत्तं, अम्हेहि च ञातं, ‘‘कतमो उपायो कत्थ पाळियं आगतो’’ति पुच्छितब्बत्ता ‘‘तत्थ कतमो उपायो? सब्बे सङ्खारा अनिच्चा’’तिआदि आरद्धं. तत्थ तत्थाति तस्सं ‘‘अस्सादादीनवता’’तिआदिगाथायं निद्दिट्ठेसु विपस्सनापुब्बङ्गमनिब्बिदादीसु उपायेसु कतमो उपायो तत्थ तेसु पाळिधम्मेसु कत्थ पाळिधम्मे आगतोति पुच्छित्वा –

‘‘सब्बे ¶ ¶ सङ्खारा ‘अनिच्चा’ति…पे…;

सब्बे धम्मा ‘अनत्ता’ति, यदा पञ्ञाय पस्सती’’ति. (ध. प. २७७-२७९) –

इध पाळिगाथासु यो विपस्सनापुब्बङ्गमनिब्बिदाञाणसङ्खातो विसुद्धिया अधिगमहेतुभावतो मग्गो आगतो, अयं उपायो देसनाहारस्स विसयोति.

गाथासु सब्बे निरवसेसा कम्मचित्तोतुआहारेहि सङ्खरिता सङ्खतसङ्खारा हुत्वा अभावट्ठेन अनिच्चा इति यदा पञ्ञाय पस्सति, अथ अनिच्चे दुक्खसभावे निब्बिन्दति, एसो विपस्सनापुब्बङ्गमो निब्बिन्दनञाणसङ्खातो धम्मो विसुद्धिया मग्गोति. ‘‘सब्बे सङ्खारा अनिच्चा’’तिआदीसु सङ्खारानं सङ्खतधम्मभावो पच्चयाकारविभङ्गट्ठकथायं (विभ. अट्ठ. २२६ सङ्खारपदनिद्देस) वुत्तोव, तं विभङ्गट्ठकथं अनोलोकेत्वा एकच्चे आचरिया ‘‘विपस्सनाञाणारम्मणत्ता तेभूमकधम्मायेवा’’ति वदन्ति, एवं सति मग्गफलधम्मानं निच्चादिभावो भवेय्य, तस्मा विभङ्गट्ठकथानुरूपोव अत्थो दट्ठब्बो. दुक्खाति दुक्खदुक्खविपरिणामदुक्खसङ्खारदुक्खभावेन दुक्खा. अनत्ताति निच्चसारसुखसारअत्तसाररहितत्ता असारकट्ठेन अनत्ता, अवसवत्तनट्ठेन वा अनत्ता.

एकदेसो उपायो इध पाळिधम्मे आगतोति आचरियेन विभत्तो, अम्हेहि च ञातो, ‘‘कतमा आणत्ति कत्थ पाळिधम्मे आगता’’ति पुच्छितब्बत्ता ‘‘तत्थ कतमा आणत्ति? चक्खुमा विसमानीवा’’तिआदि आरद्धं. तत्थ तत्थाति तस्सं ‘‘अस्सादादीनवता’’तिआदिगाथायं निद्दिट्ठासु पापदुच्चरितपरिवज्जनाणत्तिकल्याणसुचरितचरणाणत्तिआदीसु कतमाणत्ति तत्थ तेसु पाळिधम्मेसु कत्थ पाळिधम्मे आगताति पुच्छित्वा –

‘‘चक्खुमा विसमानीव, विज्जमाने परक्कमे;

पण्डितो जीवलोकस्मिं, पापानि परिवज्जये’’ति. (उदा. ४३) –

इध पाळिधम्मे या पापदुच्चरितपरिवज्जनाणत्ति आगता, अयं पापदुच्चरितपरिवज्जनाणत्ति देसनाहारस्स विसयाति.

गाथायं चक्खुमा पुरिसो विज्जमाने परक्कमे आवहितं सरीरं आवहन्तोव हुत्वा विसमानि ¶ भूमिप्पदेसानि वा विसमे हत्थिआदयो वा ¶ परिवज्जेति इव, एवं जीवलोकस्मिं पण्डितो पापानि लामकानि दुच्चरितानि परिवज्जेति. आणत्ति नाम आणारहस्स धम्मराजस्स भगवतो आणा, सा बहुविधा, तस्मा ‘‘करेय्य कल्याण’’न्तिआदिगाथायं सुचरितचरणा आणत्ति.

‘‘उपेथ सरणं बुद्धं, धम्मं सङ्घञ्च तादिनं;

समादियथ सीलानि, तं वो अत्थाय हेहिती’’ति. (थेरीगा. २४९-२५०, २८९-२९०) –

आदीसु गाथासु सरणगमनाणत्तिसीलसमादानाणत्तिआदि आगताति.

‘‘सुञ्ञतो लोकं अवेक्खस्सू’’तिआदि कस्मा एवं आरद्धं, ननु ‘‘तत्थ कतमं फलं? धम्मो हवे’’तिआदिना, ‘‘तत्थ कतमो उपायो? सब्बे सङ्खारा’’तिआदिना, ‘‘तत्थ कतमा आणत्ति? चक्खुमा’’तिआदिना च फलूपायाणत्तियो विभत्ताति? सच्चं, विसुं विसुं पन सुत्तेसु आगता फलूपायाणत्तियो विभत्ता, इदानि एकतो आगता फलूपायाणत्तियो विभजितुं ‘‘सुञ्ञतो लोकं अवेक्खस्सू’’तिआदि आरद्धं.

तत्थ सुञ्ञतो लोकं अवेक्खस्सूति सब्बम्पि सङ्खारलोकं अत्ततो सुञ्ञोति अवसवत्तितासल्लक्खणवसेन वा तुच्छभावसमनुपस्सनवसेन वा पस्साति इदं भगवतो वचनं विधानभावतो आणत्ति नाम. निच्चसारसुखसारअत्तसारादिरहितत्ता ‘‘मोघराजा’’ति आलपति, सद्धासीलसुतचागादिरहितत्ता वा मोघो.

‘‘सदा सतो’’ति पुग्गलवसेन वुत्ताय सतिया सुञ्ञतादस्सनस्स सम्पजानहेतुभावतो सतियेव उपायो, न सतिमाति एत्थ सतीति अधिप्पायो.

अत्तानुदिट्ठिं ऊहच्चाति एत्थ अत्तानुदिट्ठि नाम ‘‘रूपं अत्ता, रूपवा अत्ता, रूपस्मिं अत्ता, अत्तनि रूप’’न्तिआदिप्पकारा वीसतिवत्थुका दिट्ठि. मग्गेन ऊहच्च समुच्छिन्दित्वा एवं वुत्तविधिना मच्चुतरो मच्चुनो विसयातिक्कन्तो सिया भवेय्य. एत्थ यं मच्चुविसयं तरणं अतिक्कमनं, तस्स अतिक्कमनस्स यञ्च पुब्बभागपटिपदासम्पज्जनं, इदं भगवतो देसनाय ¶ फलं देसनाहारस्स विसयन्ति अधिप्पायो. पुब्बे विसुं विसुं फलूपायाणत्तियो विभत्तापि –

‘‘सुञ्ञतो ¶ लोकं अवेक्खस्सु, मोघराज सदा सतो;

अत्तानुदिट्ठिं ऊहच्च, एवं मच्चुतरो सिया’’ति. (सु. नि. ११२५; महानि. १८६; चूळनि. पिङ्गियमाणवपुच्छा १४४, मोघराजमाणवपुच्छानिद्देस ८८) –

एकगाथायं पुन एकतो विभजनतो फलादीसु एकतो दस्सितेसु सब्बत्थ सुत्तेसु वा सब्बत्थ गाथासु वा फलादयो दस्सेतब्बा अस्सादादयो विय कत्थचि निद्धारेत्वाति विसेसो विजानितब्बो. तेनाह अट्ठकथाचरियो ‘‘यथा पन…पे… एकतो उदाहरणं कतन्ति दट्ठब्ब’’न्ति (नेत्ति. अट्ठ. ५).

६. देसनाहारस्स विसयभूता अस्सादादयो ‘‘इध पाळिधम्मे अयं अस्सादो आगतो, इध पाळिधम्मे अयं आदीनवो आगतो’’तिआदिना विसेसतो निदस्सनवसेन सरूपतो आचरियेन विभत्ता, ते अस्सादादयो तिण्णं उग्घटितञ्ञुआदीनं पुग्गलानं सामञ्ञतो भगवा किं नु खो देसेति, उदाहु एकस्स पुग्गलस्स यथालाभं किं नु देसेतीति अनुयोगस्स सम्भवतो इमस्स पुग्गलस्स इमं देसेति, इमस्स पुग्गलस्स इमं देसेतीति पुग्गलभेदेन अस्सादादयो विभजित्वा दस्सेतुं ‘‘तत्थ भगवा उग्घटितञ्ञुस्सा’’तिआदि आरद्धं. तत्थ तत्थाति तेसु अस्सादादीसु. निस्सरणं उग्घटितञ्ञुस्स पुग्गलस्स भगवा देसेति, आदीनवञ्च निस्सरणञ्च इमे द्वे विपञ्चितञ्ञुस्स पुग्गलस्स भगवा देसेति, अस्सादञ्च आदीनवञ्च निस्सरणञ्च इमे तयो नेय्यस्स पुग्गलस्स भगवा देसेतीति योजनत्थो दट्ठब्बो.

अट्ठकथायं पन ‘‘एवं अस्सादादयो उदाहरणवसेन सरूपतो दस्सेत्वा इदानि तत्थ पुग्गलविभागेन देसनाविभागं दस्सेतुं ‘तत्थ भगवा’तिआदि वुत्त’’न्ति वुत्तं.

तत्थ उग्घटितञ्ञुस्साति उग्घटीयते पटिविज्झीयते, ठपीयते वा सप्पभेदो वित्थारो अत्थोति उग्घटितो, जानातीति ञू, उग्घटितं अत्थं ञू उग्घटितञ्ञू, उद्देसमत्तेनेव सप्पभेदं सवित्थारं ¶ पटिविज्झितब्बं अत्थं पटिविज्झतीति अत्थो. यो पुग्गलो उद्देसेनेव उद्दिट्ठमत्तेनेव अत्थं ञत्वा अत्थसिद्धिप्पत्तो होति, सो उग्घटितञ्ञू नाम.

विपञ्चीयते ¶ वित्थरीयते अत्थोति विपञ्चितो, तं जानातीति विपञ्चितञ्ञू. यो पुग्गलो निद्देसेन निद्दिट्ठमत्तमेव अत्थं ञत्वा अत्थसिद्धिप्पत्तो, सो विपञ्चितञ्ञू नाम.

पटिनिद्देसेन अत्थो नेतब्बो पापेतब्बोति नेय्यो. यो पुग्गलो पटिनिद्देसेन वा पटिलोमेन वा विभत्तं एव अत्थं ञत्वा अत्थसिद्धिप्पत्तो, सो नेय्यो नाम. निस्सरणदेसनायेव उग्घटितञ्ञुस्स पटिवेधाभिसमयो सिद्धो होति, आदीनवदेसनाय चेव निस्सरणदेसनाय च विपञ्चितञ्ञुस्स पटिवेधाभिसमयो सिद्धो होति, अस्साददेसनाय च आदीनवदेसनाय च निस्सरणदेसनाय च नेय्यस्स पटिवेधाभिसमयो सिद्धो होतीति अधिप्पायो इध गहेतब्बो.

पदपरमो पनेत्थ पटिवेधाभिसमयभजनाभावतो न गहितो. तस्मिञ्च अग्गहिते अस्सादो, आदीनवो, निस्सरणं, अस्सादादीनवा, अस्सादनिस्सरणानि, आदीनवनिस्सरणानि, अस्सादादीनवनिस्सरणानि चाति सत्तसु पट्ठाननयेसु ततियछट्ठसत्तमाव गहिता, अवसेसा चत्तारो नया न गहिता. वेनेय्यविनयनाभावतो हि गहणागहणं दट्ठब्बं. वेनेय्यविनयञ्च वेनेय्यानं सन्ताने अरियमग्गस्सुप्पादनं, न सासनविनयनमत्तं, अरियमग्गुप्पादनञ्च यथावुत्तेहि एव तीहि पदट्ठाननयेहि सिज्झतीति इतरे नया इध न वुत्ता.

यस्मा पन पेटके (पेटको. २३) –

‘‘तत्थ कतमो अस्सादो च आदीनवो च?

‘यानि करोति पुरिसो, तानि पस्सति अत्तनि;

कल्याणकारी कल्याणं, पापकारी च पापक’न्ति.

‘‘तत्थ यं कल्याणकारी कल्याणं पच्चनुभोति, अयं अस्सादो. यं पापकारी पापं पच्चनुभोति, अयं आदीनवो.

‘‘अट्ठिमे, भिक्खवे, लोकधम्मा. कतमे अट्ठ? ‘लाभो’तिआदि (अ. नि. ८.६). तत्थ लाभो यसो सुखं पसंसा, अयं अस्सादो. अलाभो अयसो दुक्खं निन्दा, अयं आदीनवो.

‘‘तत्थ ¶ कतमो अस्सादो च निस्सरणञ्च?

‘सुखो ¶ विपाको पुञ्ञानं, अधिप्पायो च इज्झति;

खिप्पञ्च परमं सन्तिं, निब्बानमधिगच्छती’ति. –

अयं अस्सादो च निस्सरणञ्च.

‘‘द्वत्तिंसिमानि, भिक्खवे, महापुरिसस्स महापुरिसलक्खणानि, येहि समन्नागतस्स महापुरिसस्स द्वेयेव गतियो भवन्ति…पे… विवटच्छदोति सब्बं लक्खणसुत्तं (दी. नि. ३.१९९) अयं अस्सादो च निस्सरणञ्च.

‘‘तत्थ कतमो आदीनवो च निस्सरणञ्च?

‘भारा हवे पञ्चक्खन्धा, भारहारो च पुग्गलो;

भारादानं दुखं लोके, भारनिक्खेपनं सुखं.

‘निक्खिपित्वा गरुं भारं, अञ्ञं भारं अनादिय;

समूलं तण्हमब्बुय्ह, निच्छातो परिनिब्बुतो’ति. (सं. नि. ३.२२) –

अयं आदीनवो च निस्सरणञ्च.

‘‘तत्थ कतमो अस्सादो च आदीनवो च निस्सरणञ्च?

‘कामा हि चित्रा मधुरा मनोरमा, विरूपरूपेन मथेन्ति चित्तं;

तस्मा अहं पब्बजितोम्हि राज, अपण्णकं सामञ्ञमेव सेय्यो’ति. (म. नि. २.३०७; थेरगा. ७८७; पेटको. २३) –

अयं अस्सादो च आदीनवो च निस्सरणञ्चा’’ति वुत्तं, तस्मा तेपि नया इध निद्धारेत्वा वेदितब्बा. फलादीसुपि अयं नयो लब्भतियेव.

यस्मा ¶ पेटके (सं. नि. १.२३, १९२; पेटको. २२; मि. प. २.१.९) – ‘‘तत्थ कतमं फलञ्च उपायो च? ‘सीले पतिट्ठाय नरो सप्पञ्ञो’ति गाथा, इदं फलञ्च उपायो च.

‘‘तत्थ कतमं फलञ्च आणत्ति च?

‘सचे भायथ दुक्खस्स, सचे वो दुक्खमप्पियं;

माकत्थ पापकं कम्मं, आवि वा यदि वा रहो’ति. (उदा. ४४) –

इदं ¶ फलञ्च आणत्ति च.

‘‘तत्थ कतमो उपायो च आणत्ति च?

‘कुम्भूपमं कायमिमं विदित्वा, नगरूपमं चित्तमिदं ठपेत्वा;

योधेथ मारं पञ्ञावुधेन, जितञ्च रक्खे अनिवेसनो सिया’ति. (ध. प. ४०) –

अयं उपायो च आणत्ति चा’’ति वुत्तं, तस्मा एवं फलादीनं दुक्खवसेनापि उदाहरणं वेदितब्बं.

‘‘उग्घटितञ्ञुआदीनं तिण्णं पुग्गलानं इमस्स पुग्गलस्स इमं देसेति, इमस्स पुग्गलस्स इमं देसेती’’ति येहि पुग्गलेहि अस्सादादयो यथारहं आचरियेन विभत्ता, ते पुग्गला याहि पटिपदाहि भिन्ना, ता पटिपदा कित्तिका भवन्ति, ताहि भिन्ना पुग्गला च कित्तिकाति विचारणाय सम्भवतो ता पटिपदा, ते च पुग्गला एत्तकाति गणनतो दस्सेतुं ‘‘तत्थ चतस्सो पटिपदा’’तिआदि आरद्धं.

तत्थ तत्थाति तेसु उग्घटितञ्ञुआदीसु पुग्गलेसु. ये पुग्गला याहि पटिपदाहि भिन्ना, ता पटिपदा चतस्सो भवन्ति, ते च पुग्गला चत्तारोति योजना कातब्बा. कतमा चतस्सो? दुक्खापटिपदा दन्धाभिञ्ञा, दुक्खापटिपदा खिप्पाभिञ्ञा, सुखापटिपदा दन्धाभिञ्ञा, सुखापटिपदा खिप्पाभिञ्ञा चाति चतस्सो. कतमे चत्तारो? तण्हाचरितो मन्दो ¶ पुग्गलो, तण्हाचरितो उदत्तो पुग्गलो, दिट्ठिचरितो मन्दो पुग्गलो, दिट्ठिचरितो उदत्तो पुग्गलो चाति चत्तारो.

पटिपदाभिञ्ञाहि कतो विभागोपि पटिपदाहि कतो विभागो नाम होति अविनाभावतोति मनसि कत्वा ‘‘चतस्सो पटिपदाभिञ्ञा’’ति अवत्वा ‘‘चतस्सो पटिपदा’’ति वुत्ता. ता पनेता समथवसेनापि भिन्ना, विपस्सनावसेनापि भिन्ना. कथं समथवसेन? पथवीकसिणादीसु सब्बपठमं ‘‘पथवी पथवी’’तिआदिना पवत्तमनसिकारतो पट्ठाय याव झानस्स उपचारं उप्पज्जति, ताव पवत्ता पञ्ञा समथभावना ‘‘पटिपदा’’ति वुच्चति. उपचारतो पन पट्ठाय याव अप्पना, ताव ¶ पवत्ता पञ्ञा ‘‘अभिञ्ञा’’ति वुच्चति हेट्ठिमपञ्ञातो अधिगतपञ्ञाभावतो.

सा च पटिपदा कस्सचि दुक्खा किच्छा होति नीवरणादिपच्चनीकधम्मसमुदाचारग्गहणताय, कस्सचि तदभावतो सुखा अकिच्छा होति, अभिञ्ञापि कस्सचि दन्धा असीघप्पवत्ति होति अविसदञाणताय, कस्सचि खिप्पा सीघप्पवत्ति होति विसदञाणतायाति.

कथं विपस्सनावसेन? यो रूपारूपमुखेन विपस्सनं अभिनिविसन्तो चत्तारि महाभूतानि परिग्गहेत्वा उपादारूपं परिग्गण्हाति, अरूपं परिग्गण्हाति, रूपारूपं पन परिग्गण्हन्तो दुक्खेन कसिरेन किलमन्तो परिग्गहएतउं सक्कोति, तस्स दुक्खापटिपदा नाम होति. परिग्गहितरूपारूपस्स विपस्सनापरिवासे मग्गपातुभावदन्धताय दन्धाभिञ्ञा नाम होति. तब्बिपरियायेन इतरा द्वे होन्ति. विपस्सनावसेन पन भिन्नायेव पटिपदाभिञ्ञायो इध दट्ठब्बा अभिसमयाधिकारत्ता, अट्ठकथायं पन ‘‘एवं येसं पुग्गलानं वसेन देसनाविभागो दस्सितो, ते पुग्गले पटिपदाविभागेन विभजित्वा दस्सेतुं ‘चतस्सो पटिपदा’तिआदि वुत्त’’न्ति (नेत्ति. अट्ठ. ६) वुत्तं. योजनानयो वुत्तनयानुसारेनेव वेदितब्बो.

चतूहि पटिपदाभिञ्ञाहि चत्तारो पुग्गला सब्बेव अनियमतो वट्टदुक्खतो किं नु खो निय्यन्ति, उदाहु ‘‘इमाय पटिपदाभिञ्ञाय अयं पुग्गलो निय्याति, इमाय पटिपदाभिञ्ञाय अयं पुग्गलो निय्याती’’ति नियमतो च निय्यातीति विचारणाय सम्भवतो ‘‘अयं पुग्गलो इमेहि निस्सयेहि उपनिस्सयपच्चयं लभित्वा इमाय पटिपदाभिञ्ञाय वट्टदुक्खतो निय्याती’’ति नियमेत्वा दस्सेतुं ‘‘तण्हाचरितो मन्दो’’तिआदि वुत्तं.

तत्थ ¶ तण्हाचरितो मन्दो पुग्गलो सतिपट्ठानेहि निस्सयेहि उपनिस्सयपच्चयं लभित्वा सतिन्द्रियेन सतिन्द्रियाधिकेन अरियमग्गेन दुक्खापटिपदादन्धाभिञ्ञाय वट्टदुक्खतो निय्याति, तण्हाचरितो उदत्तो पुग्गलो झानेहि निस्सयेहि उपनिस्सयपच्चयं लभित्वा समाधिन्द्रियेन समाधिन्द्रियाधिकेन अरियमग्गेन दुक्खापटिपदाखिप्पाभिञ्ञाय वट्टदुक्खतो निय्याति ¶ , दिट्ठिचरितो मन्दो पुग्गलो सम्मप्पधानेहि निस्सयेहि उपनिस्सयपच्चयं लभित्वा वीरियिन्द्रियेन वीरियिन्द्रियाधिकेन अरियमग्गेन सुखापटिपदादन्धाभिञ्ञाय वट्टदुक्खतो निय्याति, दिट्ठिचरितो उदत्तो पुग्गलो सच्चेहि निस्सयेहि उपनिस्सयपच्चयं लभित्वा पञ्ञिन्द्रियेन पञ्ञिन्द्रियाधिकेन अरियमग्गेन सुखापटिपदाखिप्पाभिञ्ञाय वट्टदुक्खतो निय्यातीति योजना कातब्बा. अट्ठकथायं पन –

‘‘चत्तारो पुग्गलाति यथावुत्तपटिपदाविभागेनेव चत्तारो पटिपन्नकपुग्गला, तं पन पटिपदाविभागं सद्धिं हेतुपायफलेहि दस्सेतुं ‘तण्हाचरितो’तिआदि वुत्त’’न्ति (नेत्ति. अट्ठ. ६) –

वुत्तं. तत्थ तण्हाचरितोति तण्हाय निब्बत्तितं चरितं एतस्स पुग्गलस्साति तण्हाचरितो. मन्दोति मन्दियाय अविज्जाय समन्नागतोति मन्दो, मोहाधिकपुग्गलो. उदत्तोति उदअत्तो, उळारपञ्ञोति अत्थो. उळारं फलं देतीति उदो, को सो? पविचयो, अत्तनि निब्बत्तोति अत्तो, उदो अत्तो यस्स पुग्गलस्साति उदत्तोति वचनत्थो कातब्बो.

पठमाय पटिपदाय हेतु नाम तण्हाचरितता, मन्दपञ्ञता च, उपायो सतिन्द्रियं, सब्बासम्पि फलं निय्यानमेव. दुतियाय पटिपदाय हेतु नाम तण्हाचरितता, उदत्तपञ्ञता च, उपायो वीरियिन्द्रियं. ततियाय पटिपदाय हेतु नाम दिट्ठिचरितता, मन्दपञ्ञता च, उपायो समाधिन्द्रियं. चतुत्थिया पटिपदाय हेतु नाम दिट्ठिचरितता, उदत्तपञ्ञता च, उपायो पञ्ञिन्द्रियन्ति हेतुपायफलानि दट्ठब्बानि.

एत्थ च दिट्ठिचरितो उदत्तो पुग्गलो उग्घटितञ्ञू नाम, दिट्ठिचरितो मन्दो चेव तण्हाचरितो उदत्तो च विपञ्चितञ्ञू नाम, तण्हाचरितो मन्दो पुग्गलो नेय्यो नाम, तस्मा ‘‘तत्थ भगवा उग्घटितञ्ञुस्स पुग्गलस्स निस्सरणं देसयती’’तिआदिना नयेन उग्घटितञ्ञुआदिवेनेय्यत्तयस्स भेददस्सनेन निस्सरणं देसयति, ‘‘आदीनवञ्च निस्सरणञ्च देसयति, अस्सादञ्च आदीनवञ्च निस्सरणञ्च देसयती’’ति देसनाविभागो दस्सितो. ‘‘तत्थ चतस्सो ¶ पटिपदा’’तिआदिना पटिपदाभेददस्सनेन ‘‘तण्हाचरितो मन्दो पुग्गलो, तण्हाचरितो उदत्तो ¶ पुग्गलो, दिट्ठिचरितो मन्दो पुग्गलो, दिट्ठिचरितो उदत्तो पुग्गलो’’ति चतुधा भिन्नं तण्हाचरितमन्दादिकं पुग्गलचतुक्कं दस्सितन्ति दट्ठब्बं.

इदानि चतूहि पटिपदाभिञ्ञाहि चतुधा भिन्नं तण्हाचरितमन्दचतुक्कं अत्थनययोजनाय दुतियाय विसयं कत्वा दस्सेतुं ‘‘उभो तण्हाचरिता’’तिआदि वुत्तं. तत्थ तण्हाय समाधिपटिपक्खत्ता तण्हाचरिता मन्दउदत्ता उभो पुग्गला समथपुब्बङ्गमाय विपस्सनाय उपनिस्सयं लभित्वा रागविरागाय मग्गपञ्ञाय निय्यन्ति चेतोविमुत्तिया सेक्खफलभावाय. सम्मादिट्ठिसहितेनेव सम्मासमाधिना निय्यानं भवति, न सम्मासमाधिना एव, तस्मा दिट्ठिचरिता मन्दउदत्ता उभो पुग्गला विपस्सनापुब्बङ्गमेन समथेन अविज्जाविरागाय मग्गपञ्ञाय निय्यन्ति पञ्ञाविमुत्तिया असेक्खफलभावायाति चत्तारोपि पुग्गला दुविधायेव भवन्तीति वुत्तं होति.

रागविरागायाति रञ्जतीति रागो, सो विरज्जति एतायाति विरागा, रागस्स विरागा रागविरागा, ताय रागविरागाय. चेतोति चित्तप्पभेदेन च समाधि वुच्चति यथा ‘‘चित्तं पञ्ञञ्च भावय’’न्ति (सं. नि. १.२३, १९२; मि. प. २.१.९.). पटिप्पस्सद्धिवसेन पटिपक्खतो विमुच्चतीति विमुत्ति, चेतसा चित्तेन समाधिना विमुच्चतीति चेतोविमुत्ति, चेतो एव वा विमुत्ति चेतोविमुत्ति, अनागामिफलसमाधि. अनागामिपुग्गलो हि समाधिस्मिं परिपूरकारिताय चेतोविमुत्तिया निय्याति. अविज्जाविरागायाति अविन्दियं कायदुच्चरितादिं विन्दतीति अविज्जा, विन्दियं वा कायसुचरितादिं न विन्दतीति अविज्जा निरुत्तिनयेन. विरज्जति एतायाति विरागा, अविज्जाय विरागा अविज्जाविरागा, ताय अविज्जाविरागाय. पकारेहि जानातीति पञ्ञा, विमुच्चतीति विमुत्ति, पञ्ञाय विमुच्चतीति पञ्ञाविमुत्ति, पञ्ञा एव वा विमुत्ति पञ्ञाविमुत्ति, अरहत्तफलपञ्ञा, ताय पञ्ञाविमुत्तिया.

‘‘तेसु कतमे पुग्गला केन अत्थनयेन हातब्बा’’ति वत्तब्बतो ‘‘तत्थ ये समथपुब्बङ्गमाही’’तिआदि वुत्तं. तत्थ तत्थाति तेसु ‘‘उभो तण्हाचरिता’’तिआदिना विभत्तेसु पुग्गलेसु ये उभो तण्हाचरिता मन्दउदत्ता पुग्गला समथ…पे… निय्यन्ति, ते उभो तण्हाचरिता ¶ मन्दउदत्ता पुग्गला नन्दियावट्टेन नयेन हातब्बा गमेतब्बा नेतब्बा. ये उभो दिट्ठिचरिता मन्दउदत्ता पुग्गला विपस्सना…पे… समथेन निय्यन्ति, ते उभो दिट्ठिचरिता ¶ मन्दउदत्ता पुग्गला सीहविक्कीळितेन नयेन हातब्बा गमेतब्बा नेतब्बाति अत्थो.

७. ‘‘तत्थ चतस्सो पटिपदा’’तिआदिना देसनाहारेन दुक्खापटिपदाभेदेन तण्हाचरितमन्दादिभेदो पुग्गलो विभत्तो, अम्हेहि च ञातो, ‘‘तस्स विभत्तानन्तरं स्वायं देसनाहारो कत्थ संवण्णेतब्बे धम्मे केनचि आकारेन सम्भवती’’ति पुच्छितब्बभावतो ‘‘स्वायं हारो कत्थ सम्भवती’’तिआदिमाह. नवमक्खणसम्पन्नस्स सत्था यं धम्मं देसेति, तस्मिं संवण्णेतब्बे धम्मे या वीमंसादिका सुतमयादिका तिस्सो पञ्ञा विभत्ता, ताहि पञ्ञाहि ये उग्घटितञ्ञुआदयो तयो पुग्गला विभत्ता, इति विभत्ताकारेन अयं देसनाहारो सत्थारा देसेतब्बे धम्मे सम्भवतीति दट्ठब्बो.

तत्थ स्वायं हारोति देसनाहारेन पटिपदाविभागेन वेनेय्यपुग्गलविभागो दस्सितो, सो अयं देसनाहारो. कत्थ सम्भवतीति कत्थ संवण्णेतब्बे धम्मे संवण्णनाभावेन सम्भवतीति. यस्साति यो सो वेनेय्यो पच्चन्तजादीहि अट्ठहि अक्खणेहि विमुत्तो, सवनधारणादीहि च सम्पत्तीहि समन्नागतो, तस्स वेनेय्यस्स. सत्थाति सदेवकं लोकं सासति अनुसासतीति सत्था. धम्मन्ति देसितं संवण्णेतब्बं धम्मं. देसयतीति सङ्खेपनयवित्थारनयेहि भासति. अञ्ञतरोति भगवतो सावकेसु एवं धम्मं देसेतुं समत्थो सावको. गरुट्ठानियोति गारवस्स ठानभूतेहि सीलसुतचागादिगुणविसेसेहि युत्तो मानितो सद्दहितब्बवचनो. सब्रह्मचारीति समं, सह वा ब्रह्मं सत्थुसासनं चरति पटिपज्जतीति सब्रह्मचारी. सद्धं लभति ‘‘यो सत्था धम्मं देसेति, सो सत्था सम्मासम्बुद्धो होती’’ति सत्थरि, ‘‘स्वाक्खातो वतायं धम्मो सात्थो सब्यञ्जनो एकन्तपरिपुण्णो एकन्तपरिसुद्धो अत्थावहो हितावहो सुखावहो झानमग्गफलनिब्बत्तको, अम्हेहि च सद्दहितब्बो’’ति देसिते धम्मे च अचलसद्धं लभति, सद्दहनं अत्तनो सन्ताने पुनप्पुनं उप्पादेति. तथा ¶ ‘‘यो सावको धम्मं देसेति, सो सावको सङ्खेपतो वा वित्थारतो वा धम्मं देसेतुं समत्थो वत गरुट्ठानियो सब्रह्मचारी मानितो सद्दहितब्बवचनो’’ति देसके सावके च ‘‘तादिसेन सावकेन देसितो यो धम्मो, सो धम्मो सात्थो सब्यञ्जनो एकन्तपरिपुण्णो एकन्तपरिसुद्धो अत्थावहो हितावहो सुखावहो झानमग्गफलनिब्बत्तको, अम्हेहि च सद्दहितब्बो’’ति सावकेन देसितधम्मे च सद्धं सद्दहनं अत्तनो सन्ताने पुनप्पुनं उप्पादेतीति अत्थो.

तत्थाति तस्मिं सद्दहितब्बे सत्थारा देसितधम्मे चेव सावकेन देसितधम्मे च सद्दहन्तस्स वेनेय्यस्स ¶ या वीमंसा, वीमंसन्तस्स या उस्साहना, उस्सहन्तस्स या तुलना, तुलयन्तस्स या उपपरिक्खा, सा अयं वीमंसादिका पञ्ञा सद्धानुसारेन पवत्तनतो सुतमयी पञ्ञा नाम. तत्थ वीमंसनं विमंसा, पाळिया, पाळिअत्थस्स च वीमंसा. वीमंसतीति वा वीमंसा, पदं पदन्तरेन, पदत्थं पदत्थन्तरेन विचारणका पञ्ञा. यथा चेत्थ, एवं उस्साहनादीसुपि भावसाधनकत्तुसाधनानि कातब्बानि. उस्साहना च उस्साहेन उपत्थम्भिका धम्मस्स धारणपरिचयसाधिका पञ्ञा च, न वीरियं, एत्थ च या सुतमत्तेयेव पवत्ता, वीमंसादिभावं अप्पत्ता निवत्ता, सा सुतमयी पञ्ञा न होति. या च सुत्वा वीमंसित्वा उस्साहनादिभावं अप्पत्ता निवत्ता, या च सुत्वा वीमंसित्वा उस्सहित्वा तुलनादिभावं अप्पत्ता निवत्ता, या च सुत्वा वीमंसित्वा उस्सहित्वा तुलयित्वा उपपरिक्खनभावं अप्पत्ता निवत्ता, सापि पञ्ञा न सुतमयी पञ्ञा होतीति दट्ठब्बा. या पन सुत्वा सद्दहन्तस्स वीमंसा, वीमंसन्तस्स उस्साहना, उस्सहन्तस्स तुलना, तुलयन्तस्स उपपरिक्खा होति, अयं सुतमयी पञ्ञा नाम होतीति दट्ठब्बा.

सुतमयी पञ्ञा आचरियेन विभत्ता, अम्हेहि च ञाता, ‘‘कतमा चिन्तामयी पञ्ञा’’ति वत्तब्बभावतो सुतमयिया पञ्ञाय विभजनानन्तरं चिन्तामयिं पञ्ञं विभजितुं ‘‘तथा सुतेन निस्सयेना’’तिआदिमाह. तत्थ सुतन्ति सुय्यते परियत्तिधम्मोति सुतो, सवनं परियत्तिधम्मस्साति वा सुतं, दुविधम्पि सुतं. निस्सयेन उपनिस्सायाति अत्थो. इत्थम्भूतलक्खणे चेतं ‘‘सुतेन निस्सयेना’’ति करणवचनं. एत्थ पन ‘‘इदं पाणातिपातादिविरमनं सीलनट्ठेन सीलं, अयं एकग्गता समादहनट्ठेन समाधि ¶ , इमानि भूतुपादानि रुप्पनट्ठेन रूपानि, इमे फस्सादयो नमनट्ठेन नामानि, इमे रूपादयो पञ्च धम्मा रासट्ठेन खन्धा’’ति तेसं तेसं धम्मानं पीळनादिसभावस्स वीमंसनाभूता पञ्ञा वीमंसा नाम. तेसंयेव सीलसमाधिआदीनं सीलति पतिट्ठहति एत्थाति सीलन्तिआदिवचनत्थं पुच्छित्वा सभागलक्खणरसपच्चुपट्ठानपदट्ठानानं तुलेत्वा विय गहणपञ्ञा तुलनं नाम. तेसंयेव सीलसमाधिआदीनं धम्मानं सभावलक्खणं अविजहित्वा अनिच्चतादुक्खतादिनमनरुप्पनादिसप्पच्चयसङ्खतादिआकारे वितक्केत्वा उपपरिक्खणपञ्ञा एव उपपरिक्खा नामाति विसेसतो दट्ठब्बो. सुतधम्मस्स धारणपरिचयवसेन पवत्तनतो सुतमयी पञ्ञा उस्साहना जाता विय न चिन्तामयी पञ्ञा चिन्तितस्स धारणपरिचयवसेन अप्पवत्तनतोति ‘‘उस्साहना’’ति न वुत्तं.

सुतमयी पञ्ञा चेव चिन्तामयी पञ्ञा च आचरियेन विभत्ता, अम्हेहि च ञाता, ‘‘कतमा भावनामयी पञ्ञा’’ति वत्तब्बभावतो कारणभूतानं द्विन्नं सुतमयिचिन्तामयिपञ्ञानं दस्सनानन्तरं ¶ फलभूतं भावनामयिं पञ्ञं विभजन्तो ‘‘इमाहि द्वीही’’तिआदिमाह. तत्थ इमाहि द्वीहि पञ्ञाहीति सुतमयिचिन्तामयिपञ्ञाहि कारणभूताहि. सुतमयिपञ्ञाय वा चिन्तामयिपञ्ञाय वा उभयत्थ वा ठितोयेव योगावचरो विपस्सनं आरभतीति. मनसिकारसम्पयुत्तस्साति रूपारूपेसु परिग्गहादिवसेन सङ्खारेसु अनिच्चतादिवसेन मनसिकारेन सम्मा पकारेहि युत्तप्पयुत्तस्स. दिट्ठिविसुद्धिकङ्खावितरणविसुद्धिमग्गामग्गञाणदस्सनविसुद्धि- पटिपदाञाणदस्सनविसुद्धिसम्पादनेन विपस्सनं उस्सुक्कन्तस्स योगावचरस्स सन्ताने ञाणदस्सनविसुद्धिसङ्खातं यं अरियमग्गञाणं निब्बानारम्मणदस्सनभूमियं वा भावनाभूमियं वा उप्पज्जति, अयं भावनामयी पञ्ञाति अत्थो दट्ठब्बो. यदिपि पठममग्गञाणं पठमं निब्बानदस्सनतो ‘‘दस्सन’’न्ति वुत्तं, भावनावसेन पन पवत्तनतो ‘‘भावनामयी पञ्ञा’’ति वेदितब्बं. दस्सनभूमीति पठममग्गफलानि, सेसानि ‘‘भावनाभूमी’’ति वुच्चन्ति.

८. अम्हाकाचरिय तुम्हेहि ‘‘यस्स सत्था वा’’तिआदिना सुतमयिपञ्ञादिका विभत्ता, एवं सति सुतेन विना चिन्तामयी पञ्ञा नाम न भवेय्य, महाबोधिसत्तानं पन सुतेन विना चिन्तामयी पञ्ञा होत्वेवाति चोदनं मनसि कत्वा तस्मिं सङ्गहेत्वा पकारन्तरेन विभजितुं ‘‘परतोघोसा’’तिआदिमाह.

तत्थ ¶ परतोघोसाति परतो पवत्तो देसनाघोसो पच्चयो एतिस्साति परतोघोसा. पच्चत्तसमुट्ठिताति पति विसुं अत्तनियेव समुट्ठिता. योनिसोमनसिकाराति तेसं तेसं चिन्तेतब्बानं रूपादीनं धम्मानं रुप्पननमनादिसभावपरिग्गण्हनादिना उपायेन पवत्तमनसिकारा चिन्तामयी पञ्ञा नाम, इमिना सावकापि सामञ्ञतो गहिता, तथापि उग्घटितञ्ञुआदीनंयेव वुत्तत्ता सावका इध गहिता, तस्मा पुरिमनयो युत्ततरो. परतोति धम्मदेसकतो पवत्तेन धम्मदेसनाघोसेन हेतुना यं ञाणं उप्पज्जति, पच्चत्तसमुट्ठितेन, योनिसोमनसिकारेन च हेतुना यं ञाणं उप्पज्जति, अयं भावनावसेन पवत्तनतो भावनामयी पञ्ञा नाम, इमिना सावकापि सामञ्ञतो गहिता, तथापि उग्घटितञ्ञुआदीनंयेव वुत्तत्ता सावका इध गहिता, तस्मा पुरिमनयो युत्ततरो. परतोति धम्मदेसकतो पवत्तेन धम्मदेसनाघोसेन हेतुना यं ञाणं उप्पज्जति, पच्चत्तसमुट्ठितेन, योनिसोमनसिकारेन च हेतुना यं ञाणं उप्पज्जति, अयं भावनावसेन पवत्तनतो भावनामयी पञ्ञा नामाति विभजित्वा पण्डितेहि ञेय्याति वित्थारेन गम्भीरत्थं ञातुं इच्छन्तेहि ‘‘एवं पटिपदाविभागेना’’तिआदिना (नेत्ति. अट्ठ. ९) अट्ठकथावचनेन जानितब्बो.

सुतमयिपञ्ञादिका ¶ तिस्सो पञ्ञा आचरियेन नानानयेहि विभत्ता, अम्हेहि च ञाता, ‘‘तासु यस्स एका वा द्वे वा पञ्ञा अत्थि, सो पुग्गलो कोनामो, यस्स एकापि नत्थि, सो पुग्गलो कोनामो’’ति पुच्छितब्बभावतो यस्स अयं पञ्ञा, इमा वा अत्थि, सो पुग्गलो इत्थन्नामो, यस्स नत्थि, सो पुग्गलो इत्थन्नामोति पटिपदापञ्ञाप्पभेदेन पुग्गलं विभजितुं ‘‘यस्स इमा’’तिआदि वुत्तं.

तत्थ यस्स अतितिक्खपञ्ञस्स सुतमयी पञ्ञा चेव चिन्तामयी पञ्ञा च इमा द्वे पञ्ञा अत्थि, अयं अतितिक्खपञ्ञो उद्देसमत्तेनेव जाननतो उग्घटितञ्ञू नाम. यस्स नातितिक्खपञ्ञस्स उद्देसनिद्देसेहि सुतमयी पञ्ञा अत्थि, चिन्तामयी पञ्ञा नत्थि, अयं नातितिक्खपञ्ञो उद्देसनिद्देसेहि जाननतो विपञ्चितञ्ञू नाम. यस्स मन्दपञ्ञस्स उद्देसनिद्देसेहि नेव सुतमयी पञ्ञा अत्थि, न चिन्तामयी पञ्ञा च, अयं मन्दपञ्ञो ¶ उद्देसनिद्देसपटिनिद्देसेहि जाननतो निरवसेसवित्थारदेसनाय नेतब्बतो नेय्यो नामाति. अट्ठकथायं पन ‘‘इदानि यदत्थं इमा पञ्ञा उद्धटा, तमेव वेनेय्यपुग्गलविभागं योजेत्वा दस्सेतुं ‘यस्सा’तिआदि वुत्त’’न्तिआदि (नेत्ति. अट्ठ. ८) वुत्तं.

९. ‘‘तत्थ भगवा उग्घटितञ्ञुस्सा’’तिआदिना देसनं विभावेति, ‘‘तत्थ चतस्सो पटिपदा’’तिआदिना पटिपदाविभागेहि, ‘‘स्वायं हारो’’तिआदिना ञाणविभागेहि च देसनाभाजनं वेनेय्यत्तयं आचरियेन विभत्तं, अम्हेहि च ञातं, ‘‘याय देसनापाळिया देसनाहारं योजेतुं पुब्बे ‘धम्मं वो, भिक्खवे, देसेस्सामी’तिआदिना देसनाहारस्स विसयभावेन या पाळिदेसना निक्खित्ता, सा पाळिदेसना देसनाहारेन निद्धारितेसु अस्सादादीसु अत्थेसु किमत्थं देसयती’’ति पुच्छितब्बत्ता ‘‘इमं अत्थं देसयती’’ति नियमेत्वा दस्सेतुं ‘‘सायं धम्मदेसना’’तिआदि आरद्धं.

तत्थ सायं धम्मदेसनाति या धम्मदेसना आदिकल्याणादिका पुब्बे देसनाहारस्स विसयभावेन निक्खित्ता, सायं धम्मदेसना अस्सादादीसु किमत्थं देसयतीति कथेतुकामताय पुच्छति, पुच्छित्वा ‘‘चत्तारि सच्चानि देसयती’’ति विस्सज्जेति, तानि सरूपतो दस्सेतुं ‘‘दुक्खं समुदयं निरोधं मग्ग’’न्ति वुत्तं. पवत्तिपवत्तकनिवत्तिनिवत्तनुपायभावेन अविपरीतभावतो ‘‘सच्चानी’’ति वुत्तानि.

यस्सं देसनायं सच्चानि देसनाहारेन निद्धारितानि, सा देसना चत्तारि सच्चानि देसयतीति ¶ युत्तं होतु. यस्सं देसनायं अस्सादादयो निद्धारिता, सा देसना चत्तारि सच्चानि देसयतीति न सक्का वत्तुं. हेट्ठा च अस्सादादयो निद्धारिता, तस्मा ‘‘अस्सादादयो’’तिपि वत्तब्बन्ति चोदनं मनसि कत्वा ‘‘आदीनवो फलञ्च दुक्ख’’न्तिआदि वुत्तं. देसनाहारेन संवण्णनानयेन देसनायं निद्धारितो आदीनवो चेव फलञ्च दुक्खसच्चं होति, अस्सादो समुदयसच्चं, निस्सरणं निरोधसच्चं, उपायो चेव आणत्ति च मग्गसच्चं होति, तस्मा ‘‘चत्तारि सच्चानि देसयती’’ति वत्तब्बमेवाति.

तण्हावज्जा ¶ तेभूमकधम्मा दुक्खं, ते च अनिच्चादीहि पीळितत्ता आदीनवायेव. फलन्ति देसनाय फलं लोकियं, न लोकुत्तरं, तस्मा दुक्खन्ति वत्तब्बमेव. अस्सादोति तण्हास्सादस्स गहितत्ता ‘‘अस्सादो समुदयो’’ति च वत्तब्बं. अस्सादेकदेसो दुक्खमेव, अस्सादेकदेसो दुक्खञ्चेव समुदयो च. सह विपस्सनाय अरियमग्गो च भगवतो आणत्ति च देसनाय फलाधिगमस्स उपायभावतो ‘‘उपायो, आणत्ति च मग्गो’’ति वुत्तं, निस्सरणेकदेसोपि मग्गोति दट्ठब्बो. ‘‘इमानि चत्तारि सच्चानि या देसना विसेसतो देसयति, कतमा सा’’ति पुच्छितब्बत्ता विसेसं नियमेत्वा दस्सेतुं ‘‘इमानि चत्तारि सच्चानि इदं धम्मचक्क’’न्ति वुत्तं. इदं वुच्चमानं धम्मचक्कं इमानि चत्तारि सच्चानि विसेसतो देसयतीति योजना कातब्बा.

‘‘या देसना इमानि चत्तारि सच्चानि विसेसतो देसयति, तस्सा देसनाय धम्मचक्कभावं किं भगवा आहा’’ति वत्तब्बभावतो ‘‘यथाह भगवा’’तिआदि वुत्तं. तत्थ ‘‘जातिपि दुक्खा’’तिआदिवचनतो (महाव. १४) तण्हावज्जं जातिआदिकं तेभूमकधम्मजातं दुक्खस्स अधिट्ठानभावेन, दुक्खदुक्खादिभावेन च ‘‘दुक्ख’’न्ति वुत्तं. मेति मया पवत्तितन्ति योजना. भिक्खवेति सवने उस्साहं जनेतुं आलपति. बाराणसियन्ति बाराणसीनगरस्स अविदूरे. इसिपतनेति सीलक्खन्धादीनं इसनतो गवेसनतो ‘‘इसी’’ति वोहरितानं पच्चेकबुद्धानं पतनट्ठाने. मिगदायेति मिगानं अभयदानट्ठाने कारिते अस्समेव.

अनुत्तरन्ति उत्तरितराभावेन अनुत्तरं अनतिसयं. धम्मचक्कन्ति सतिपट्ठानादिके सभावधारणादिना अत्थेन धम्मो चेव पवत्तनट्ठेन चक्कञ्चाति धम्मचक्कं. अप्पटिवत्तियन्ति अप्पटिसेधनीयं. कस्मा? जनकस्स भगवतो धम्मिस्सरत्ता सम्मासम्बुद्धत्ता, जञ्ञस्स च अनुत्तरत्ता कोण्डञ्ञादीनञ्चेव अट्ठारसब्रह्मकोटिया च चतुसच्चपटिवेधसाधनतो च. ‘‘केन अप्पटिवत्तिय’’न्ति पुच्छितब्बत्ता ‘‘समणेन वा’’तिआदिमाह. तत्थ समणेनाति पब्बज्जमत्तूपगतेन ¶ . ब्राह्मणेनाति जातिब्राह्मणेन. परमत्थानञ्हि समणब्राह्मणानं पटिसेधने चित्तुप्पादानुप्पज्जनम्पि नत्थि. देवेनाति छकामावचरदेवेन. ब्रह्मुनाति रूपब्रह्मा गहिता. ‘‘समणेन वा ¶ …पे… ब्रह्मुना’’ति एत्तकमेव अवत्वा‘‘केनची’’ति वुत्तवचनेन अवसेसखत्तियगहपतिपरिसजना सङ्गहिता. तस्मा खत्तियब्राह्मणगहपतिसमणचातुमहाराजिकतावतिंसमारब्रह्मपरिसा अट्ठविधापि पटिसेधेतुं असमत्थायेवाति वेदितब्बा. लोकस्मिन्ति सत्तसमूहे धम्मचक्काधारे.

‘‘द्वादस पदानि सुत्त’’न्ति गाथानुरूपं धम्मचक्कसुत्ते पदानि विभजन्तो ‘‘तत्थ अपरिमाणा’’तिआदिमाह. तत्थ तत्थाति धम्मचक्कदेसनायं (सं. नि. ५.१०८१; महाव. १३ आदयो; पटि. म. २.३०). ‘‘अपरिमाणा अक्खरा अपरिमाणा पदा’’ति अवत्वा ‘‘अपरिमाणा पदा अपरिमाणा अक्खरा’’ति उप्पटिपाटिवचनेहि येभुय्येन पदसङ्गहितानीति दस्सेति. पदा, अक्खरा, ब्यञ्जनाति च लिङ्गविपल्लासानीति दट्ठब्बानि. एतस्सेव अत्थस्साति वत्तब्बाकारस्स चतुसच्चसङ्खातस्स अत्थस्सेव सङ्कासना पकासना पकासनाकारो पञ्ञत्ताकारोति आकारवन्तआकारसम्बन्धे सामिवचनं. सङ्कासनाकारोति च सङ्कासनीयस्स अत्थस्स आकारो. एस नयो सेसेसुपि. इतिपीति इति इमिना पकारेनपि, इमिना पकारेनपि इदं जातिआदिकं दुक्खं अरियसच्चन्ति वेदितब्बं.

अयन्ति कामतण्हादिभेदा अयं तण्हा. दुक्खसमुदयोति दुक्खनिब्बत्तनस्स हेतुभावतो दुक्खसमुदयो. अयन्ति सब्बसङ्खततो निस्सटा अयं असङ्खता धातु. दुक्खनिरोधोति जातिआदिप्पभेदस्स दुक्खस्स अनुप्पादननिरोधपच्चयत्ता दुक्खनिरोधो. अयन्ति सम्मादिट्ठादिको अट्ठङ्गिको अरियो मग्गो. दुक्खनिरोधभूतं निब्बानं आरम्मणकरणवसेन गतत्ता, दुक्खनिरोधप्पत्तिया पटिपदाभावतो च दुक्खनिरोधगामिनी पटिपदा. सेसं वुत्तनयमेव.

‘‘तत्थ अपरिमाणा’’तिआदिना ब्यञ्जनपदअत्थपदानि विभजित्वा तेसं अञ्ञमञ्ञं विसयिविसयभावेन सम्बन्धभावं दस्सेतुं ‘‘तत्थ भगवा अक्खरेहि सङ्कासेती’’तिआदि वुत्तं. अथ वा भगवा किं सामञ्ञेहि अक्खरादीहि सङ्कासेति वा पकासेति वा, उदाहु यथारहं सङ्कासेति पकासेतीतिआदिविचारणाय सम्भवतो विसयविसयिभावेन सम्बन्धभावं नियमेत्वा दस्सेतुं ‘‘तत्थ भगवा अक्खरेहि सङ्कासेती’’तिआदि वुत्तं. तत्थ ‘‘अक्खरेहि सङ्कासेती’’ति कस्मा एवं वुत्तं, ननु ‘‘दुक्खसच्च’’न्तिआदीसु ¶ पदेनेव दुक्खसच्चत्थत्तादिको सङ्कासितब्बोति? सच्चं, पदावयवस्स पन अक्खरस्स गहणमुखेनेव अक्खरसमुदायस्सपि पदस्स ¶ गहणं होति, पदे गहिते च दुक्खसच्चत्थादिकावबोधो होत्वेव, एवं सति पदेनेव सिज्झनतो अक्खरो विसुं न गहेतब्बोति? न, दुक्खसच्चत्थादिकावबोधस्स विसेसुप्पत्तिभावतो. दु-इति अक्खरेन हि अनेकुपद्दवाधिट्ठानभावेन कुच्छितत्थो गहितो, ख-इति अक्खरेन धुवसुभसुखत्तभावविरहेन तुच्छत्थोति एवमादिकावबोधस्स विसेसुप्पत्ति भवति. तेन वुत्तं ‘‘पदत्थगहणस्स विसेसाधानं जायती’’ति (नेत्ति. अट्ठ. ९). पदपरियोसाने वाक्यपरियोसानाभावतो अक्खरेहि संखित्तेन दीपियमानो अत्थो पदेहि पकासितोवाति वुत्तं ‘‘पदेहि पकासेती’’ति. वाक्यपरियोसाने पन सङ्कासितो पकासितो अत्थो विवरितो विवटो कतोवाति वुत्तं. ‘‘ब्यञ्जनेहि विवरती’’ति. पकारेहि च वाक्यभेदे कते सो अत्थो विभत्तो नामाति वुत्तं ‘‘आकारेहि विभजती’’ति. वाक्यावयवानं पदानं पच्चेकं निब्बचनविभागे कते सो अत्थो पाकटो कतोवाति वुत्तं ‘‘निरुत्तीहि उत्तानीकरोती’’ति. कतनिब्बचनेहि वाक्यावयवेहि वित्थारवसेन निरवसेसतो देसितेहि वेनेय्यसत्तानं चित्ते परिसमन्ततो तोसनं होति, पञ्ञातेजनञ्चाति आह ‘‘निद्देसेहि पञ्ञपेती’’ति.

‘‘भगवा अक्खरेहि सङ्कासेती’’तिआदीसु ‘‘भगवा एवा’’ति वा ‘‘अक्खरेहि एवा’’ति वा अवधारणे योजिते ‘‘सावको न सङ्कासेति, पदादीहि न सङ्कासेती’’ति अत्थो भवेय्य, सावको च सङ्कासेति, पदादीहि च सङ्कासेति. कत्थ अवधारणं योजेतब्बन्ति चे? ‘‘भगवा अक्खरेहि सङ्कासेतियेवा’’ति अवधारणं योजेतब्बं. एवञ्हि सति सावकेन सङ्कासितो वा पदादीहि सङ्कासितो वा अत्थो सङ्गहितो होति. अत्थपदानञ्च अक्खरादिनानाविसयता सिद्धा होति. तेन एकानुसन्धिके सुत्ते छळेव अत्थपदानि निद्धारेतब्बानि, अनेकानुसन्धिके सुत्ते अनुसन्धिभेदेन विसुं विसुं छ छ अत्थपदानि निद्धारेतब्बानि.

‘‘छसु ¶ ब्यञ्जनपदेसु कतमेन ब्यञ्जनपदेन कतमं किच्चं साधेती’’ति पुच्छितब्बत्ता ‘‘इमिना इदं किच्चं, इमिना इदं किच्चं साधेती’’ति नियमेत्वा दस्सेतुं ‘‘तत्थ भगवा अक्खरेहि च पदेहि च उग्घटेती’’तिआदिमाह. तत्थ तत्थाति अक्खरादीसु ब्यञ्जनपदेसु. उग्घटेतीति उग्घटनकिच्चं साधेतीति अत्थो. किञ्चापि देसनाव उग्घटनकिच्चं साधेति, भगवा पन देसनाजनकत्ता उग्घटनकिच्चं साधेतीति वुच्चति. सेसेसुपि एवमत्थो दट्ठब्बो.

‘‘उग्घटनकिच्चसाधिका देसनायेव किं विपञ्चनवित्थारणकिच्चसाधिका देसनाजनकत्ता, उदाहु विसुं विसुं किच्चसाधिका अञ्ञा’’ति पुच्छितब्बभावतो विसुं विसुं किच्चसाधिका अञ्ञा ¶ देसनाति नियमेत्वा दस्सेतुं ‘‘तत्थ उग्घटना आदी’’तिआदिमाह. अथ वा ‘‘कतमा उग्घटना, कतमा विपञ्चना, कतमा वित्थारणा’’ति पुच्छितब्बत्ता वुत्तं ‘‘तत्थ उग्घटना आदी’’तिआदि. तत्थ तत्थाति उग्घटनादिकिच्चसाधिकासु देसनासु. उग्घटनाति उग्घटनकिच्चसाधिका देसना आदिदेसना होति. विपञ्चनाति विपञ्चनकिच्चसाधिका देसना मज्झेदेसना होति. वित्थारणाति वित्थारणकिच्चसाधिका देसना परियोसानदेसना होतीति अत्थो दट्ठब्बो.

‘‘उग्घटियन्तो उद्दिसियमानो परियत्तिअत्थभूतो धम्मविनयो कतमं पुग्गलं विनेति, विपञ्चियन्तो निद्दिसियमानो परियत्तिअत्थभूतो धम्मविनयो कतमं पुग्गलं विनेति, वित्थारियन्तो पटिनिद्दिसियमानो परियत्तिअत्थभूतो धम्मविनयो कतमं पुग्गलं विनेती’’ति पुच्छितब्बत्ता ‘‘सोयं धम्मविनयो’’तिआदिमाह. अट्ठकथायं पन ‘‘एवं ‘अक्खरेहि सङ्कासेती’तिआदीनं छन्नं ब्यञ्जनपदानं ब्यापारं दस्सेत्वा इदानि अत्थपदानं ब्यापारं दस्सेतुं ‘सोयं धम्मविनयो’तिआदि वुत्त’’न्ति (नेत्ति. अट्ठ. ९) वुत्तं.

तत्थ उग्घटियन्तो उद्दिसियमानो उद्देसपरियत्तिअत्थभूतो सो अयं धम्मविनयो उग्घटितञ्ञुपुग्गलं विनेति, तेन उग्घटितञ्ञुनो पुग्गलस्स विनयनेन नं उग्घटियन्तं उद्दिसियमानं उद्देसपरियत्तिअत्थभूतं विनयं ‘‘आदिकल्याणो’’ति आहु. विपञ्चियन्तो निद्दिसियमानो निद्देसपरियत्तिअत्थभूतो सो अयं धम्मविनयो विपञ्चितञ्ञुपुग्गलं विनेति, तेन ¶ विपञ्चितञ्ञुपुग्गलस्स विनयनेन नं विपञ्चियन्तं निद्दिसियमानं निद्देसपरियत्तिअत्थभूतं विनयं ‘‘मज्झेकल्याणो’’ति आहु. वित्थारियन्तो पटिनिद्दिसियमानो पटिनिद्देसपरियत्तिअत्थभूतो सो अयं धम्मविनयो नेय्यं पुग्गलं विनेति विनयनं जनेति, तेन नेय्यस्स पुग्गलस्स विनयनेन नं वित्थारियन्तं पटिनिद्दिसियमानं पटिनिद्देसपरियत्तिअत्थभूतं विनयं ‘‘परियोसानकल्याणो’’ति आहूति योजनत्थोति दट्ठब्बो.

अथ वा ‘‘अक्खरेहि सङ्कासेती’’तिआदिना छन्नं पदानं ब्यापारो दस्सितो, एवं सति अत्थो निब्यापारो सिया, अत्थो च निप्परियायतो सब्यापारोयेवाति चोदनं मनसि कत्वा आह ‘‘सोयं धम्मविनयो’’तिआदि. एतेन अत्थोयेव मुख्यतो वेनेय्यत्तयस्स विनयनकिच्चं साधेति, अत्थवाचको पन सद्दो ठानूपचारतो वेनेय्यत्तयस्स विनयनकिच्चं साधेतीति दस्सेति. पदपरमस्स पन सच्चप्पटिवेधस्स पतिट्ठानाभावतो सो इध न वुत्तो. सेक्खग्गहणेन वा कल्याणपुथुज्जनस्स विय नेय्यग्गहणेन पदपरमस्स पुग्गलस्सापि गहणं दट्ठब्बं ¶ . अक्खरेहीतिआदीसु करणत्थे करणवचनं, न हेत्वत्थे. अक्खरादीनञ्हि उग्घटनादीनि पयोजनानियेव होन्ति, न उग्घटनादीनं अक्खरादीनि पयोजनानीति ‘‘अन्नेन वसती’’तिआदीसु विय न हेतुअत्थो गहेतब्बो. तत्थ हि अन्नेन हेतुना वसति, वसनेन हेतुना अन्नं लद्धन्ति वसनकिरियाय फलं वसनकिरियाय हेतुभावेन गहितं. ‘‘अज्झेसनेन वसती’’तिआदीसुपि एसेव नयो. तेनाह ‘‘यदत्था च किरिया, सो हेतू’’ति (नेत्ति. अट्ठ. ९). तत्थ यदत्थाति सो अन्नादिको अत्थो यस्सा वसनादिकिरियायाति यदत्था, वसनादिकिरिया, सो अन्नादिको अत्थो तस्सा वसनादिकिरियाय हेतूति अत्थो वेदितब्बो.

१०. ‘‘तत्थ अपरिमाणा पदा’’तिआदिना ‘‘धम्मं वो भिक्खवे देसेस्सामी’’ति उद्दिट्ठाय पाळिया द्वादसपदसम्पत्तिसङ्खातं तिविधकल्याणतं दस्सेत्वा इदानि छअत्थपदछब्यञ्जनपदभेदेन सम्पत्तिसङ्खातं अत्थपदब्यञ्जनपदकल्याणतं दस्सेन्तो ‘‘तत्थ छप्पदानि अत्थो’’तिआदिमाह. अथ वा ‘‘द्वादस पदानि सुत्त’’न्ति वुत्तानुरूपं ‘‘तत्थ अपरिमाणा’’तिआदिना ‘‘धम्मं वो भिक्खवे देसेस्सामी’’ति उद्दिट्ठाय पाळिया द्वादसपदता ¶ दस्सेत्वा ‘‘आदिकल्याणं मज्झेकल्याणं परियोसानकल्याण’’न्ति वुत्तानुरूपं ‘‘तत्थ भगवा अक्खरेहि चा’’तिआदिना तस्सा पाळिया तिविधकल्याणता दस्सिता, दस्सेत्वा इदानि ‘‘सात्थं सब्यञ्जनं केवलपरिपुण्णं परिसुद्ध’’न्ति वुत्तानुरूपं तस्सा पाळिया छअत्थपदब्यञ्जनपदसम्पन्नतं दस्सेतुं ‘‘तत्थ छप्पदानि अत्थो’’तिआदि वुत्तं. तत्थ तत्थाति तिस्सं देसनाहारविसयसङ्खातायं पाळियं छप्पदानि अत्थो. कतमानि छप्पदानि? सङ्कासना, पकासना, विवरणा, विभजना, उत्तानीकम्मं, पञ्ञत्ति इमानि छप्पदानि. अत्थो यस्स अत्थि तस्मा सात्थं. तत्थाति तिस्सं देसनाहारविसयसङ्खातायं पाळियं छप्पदानि ब्यञ्जनं. कतमानि छप्पदानि? अक्खरं, पदं, ब्यञ्जनं, आकारो, निरुत्ति, निद्देसो इमानि छप्पदानि. ब्यञ्जनं यस्स अत्थीति सब्यञ्जनन्ति योजना कातब्बा. तेनाति तस्सा पाळिया तिविधकल्याणछअत्थपदसम्पन्नछब्यञ्जनपदसम्पन्नट्ठेन, ‘‘धम्मं वो, भिक्खवे…पे… सुद्ध’’न्ति भगवा आहाति अत्थो.

केवलसद्दस्स सकलादिअत्थवाचकत्ता अधिप्पेतत्थं नियमेत्वा दस्सेतुं ‘‘केवलन्ति लोकुत्तरं न मिस्सं लोकियेहि धम्मेही’’ति वुत्तं. परिपुण्णन्ति अधिप्पेतत्थे एकोपि अत्थो ऊनो नत्थि, वाचकसद्देसुपि अनत्थको एकोपि सद्दो अधिको नत्थीति परिपुण्णं अनूनं अनतिरेकं. परिसुद्धन्ति सद्ददोसअत्थदोसादिविरहतो वा परिसुद्धं, रागादिमलविरहतो वा परियोदातानं उत्तरिमनुस्सधम्मविसेसानं उपट्ठितट्ठानत्ता परिसुद्धं परियोदातं. निग्गतं मलं एतस्स धम्मस्साति ¶ निम्मलं. सद्ददोसादिविरहतो वा रागादिविरहतो वा सब्बमलेहि अपगतं परि समन्ततो ओदातन्ति परियोदातं. उपट्ठितन्ति उपतिट्ठन्ति एत्थ सब्बविसेसाति उपट्ठितं यथा ‘‘पदक्कन्त’’न्ति. पदक्कन्तं पदक्कन्तट्ठानं. विसिसन्ति मनुस्सधम्मेहीति विसेसा, सब्बे विसेसा सब्बविसेसा, सब्बतो वा विसेसाति सब्बविसेसा, उत्तरिमनुस्सधम्मा. तेसं सब्बविसेसानं उपट्ठितन्ति योजना. इदन्ति सिक्खत्तयसङ्गहं सासनब्रह्मचरियं. तथागतस्स सम्मासम्बुद्धस्स पदन्ति तथागतपदं. पदन्ति च पटिपत्तिगमनेन वा देसनागमनेन वा किलेसग्गहणं. ओत्थरित्वा गमनट्ठानं इतिपि वुच्चति पवुच्चति, तथागतेन गोचरासेवनेन वा भावनासेवनेन वा निसेवितं भजितं इतिपि वुच्चति, तथागतस्स महावजिरञाणसब्बञ्ञुतञ्ञाणदन्तेहि ¶ आरञ्जितं आरञ्जितट्ठानं इतिपि वुच्चति, अतो तथागतपदादिभावेन वत्तब्बभावतो एतं सासनब्रह्मचरियं इति पञ्ञायति. ब्रह्मचरियन्ति ब्रह्मुनो सब्बसत्तुत्तमस्स भगवतो चरियं, ब्रह्मं वा सब्बसेट्ठं चरियं ब्रह्मचरियं. पञ्ञायतीति यथावुत्तेहि पकारेहि ञायतीति अत्थो वेदितब्बो.

‘‘इमस्स सिक्खत्तयस्स सङ्गहस्स सासनस्स परिपुण्णभावपरिसुद्धभावसङ्खातं तथागतपदभावं!तथागतपदभावं, तथागतनिसेवितभावं, तथागतआरञ्जितभावं, तेहि पकारेहि ञापितभावं कथं मयं निक्कङ्खा जानिस्सामा’’ति वत्तब्बतो ‘‘तेनाह भगवा’’तिआदि वुत्तं, तब्भावदीपकेन भगवता वुत्तेन वचनेन तुम्हेहि निक्कङ्खेहि जानितब्बोति वुत्तं होति.

यदि भगवा अक्खरेहि च पदेहि च उग्घटेति, ब्यञ्जनेहि च आकारेहि च विपञ्चयति, निरुत्तीहि च निद्देसेहि च वित्थारेति, एवं सति आचरियेन रचितेन देसनाहारेन पयोजनं न भवति, देसनाहारेन न विना भगवतो देसनायमेव अत्थसिज्झनतोति चोदनं मनसि कत्वा ‘‘केसं अयं धम्मदेसना’’ति पुच्छित्वा ‘‘योगीन’’न्ति आह. तत्थ योगीनन्ति युज्जन्ति चतुसच्चकम्मट्ठानभावनायन्ति योगिनो, तेसं योगीनं. तेन मया रचितेन देसनाहारेन संवण्णिता अयं वुत्तप्पकारा भगवतो देसना उग्घटनादिकिच्चं साधेतीति देसनाहारो योगीनं सात्थकोयेवाति दट्ठब्बो. ‘‘देसनाहारस्स अस्सादादिदेसनाहारभावो केन अम्हेहि जानितब्बो सद्दहितब्बो’’ति वत्तब्बत्ता ‘‘तेनाह आयस्मा…पे… देसनाहारो’’ति वुत्तं. तत्थ तेन अस्सादादिदेसनाहारभावेन आयस्मा महाकच्चानो ‘‘अस्सादादीनवता…पे… देसनाहारो’’ति यं वचनं आह, तेन वचनेन तुम्हेहि देसनाहारस्स योगीनं अस्सादादिदेसनाहारभावो जानितब्बो सद्दहितब्बोति वुत्तं होति.

‘‘किं ¶ पन एत्तावता देसनाहारो परिपुण्णो, अञ्ञो नियुत्तो नत्थी’’ति पुच्छितब्बत्ता ‘‘नियुत्तो देसनाहारो’’ति वुत्तं. तत्थ यस्सं देसनायं अस्सादादयो येन देसनाहारेन निद्धारिता, तस्सं देसनायं ¶ सो देसनाहारो निद्धारेत्वा योजितोति अत्थो दट्ठब्बोति.

इति देसनाहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

२. विचयहारविभङ्गविभावना

११. येन येन संवण्णनाविसेसभूतेन देसनाहारविभङ्गेन अस्सादादयो सुत्तत्था आचरियेन विभत्ता, सो संवण्णनाविसेसभूतो देसनाहारविभङ्गो परिपुण्णो, ‘‘कतमो विचयो हारो’’ति पुच्छितब्बत्ता ‘‘तत्थ कतमो विचयो हारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु हारेसु कतमो संवण्णनाविसेसो विचयो हारो विचयहारविभङ्गो नामाति पुच्छति. ‘‘यं पुच्छितञ्च विस्सज्जितञ्चा’’तिआदिनिद्देसगाथाय इदानि मया वुच्चमानो ‘‘अयं विचयो हारो किं विचिनती’’तिआदिको संवण्णनाविसेसो विचयहारविभङ्गो नामाति योजना.

‘‘अयं विचयो हारो किं विचिनती’’ति इमिना यो विचयो विचिनितब्बो, तं विचयं विचिनितब्बं पुच्छति, तस्मा विचिनितब्बं विसयं विसुं विसुं नियमेत्वा दस्सेतुं ‘‘पदं विचिनति, पञ्हं विचिनती’’तिआदि वुत्तं. ‘‘किं विचयो पदविचयो’’तिआदिं अवत्वा ‘‘किं विचिनति, पदं विचिनती’’तिआदिवचनेन विचयसद्दस्स कत्तुसाधनत्थं दस्सेति. तत्थ पदं विचिनतीति नवविधस्स सुत्तन्तस्स सब्बं पदं याव निगमना नामपदादिजातिसद्दादिइत्थिलिङ्गादिआकारन्तादिपठमविभत्यन्तादिएकवचनादिवसेन विचिनति. पञ्हं विचिनतीति अदिट्ठजोतनादिसत्ताधिट्ठानादिसम्मुतिविसयादिअतीतविसयादिवसेन विचिनति. विस्सज्जनं विचिनतीति एकंसब्याकरणविस्सज्जनादिसावसेसब्याकरणविस्सज्जनादि सउत्तरब्याकरण विस्सज्जनादि लोकियब्याकरणविस्सज्जनादिवसेन विचिनति. पुब्बापरं विचिनतीति ¶ पुब्बेन अपरं संसन्दित्वा ¶ विचिनति. अस्सादं विचिनतीति अस्सादकतण्हादिअस्सादेतब्बसुखादिवसेन विचिनति. आदीनवं विचिनतीति दुक्खदुक्खविपरिणामदुक्खसङ्खारदुक्खवसेन वा अनिट्ठानुभवनादिआदिअन्तवन्ततादिसंकिलेसभागियादिवसेन वा विचिनति. निस्सरणं विचिनतीति मग्गवसेन वा निब्बानवसेन वा मग्गस्स वा आगमवसेन, निब्बानस्स असङ्खतधातुआदिपरियायवसेन वा विचिनति. फलं विचिनतीति धम्मचरणस्स दुग्गतिगमनाभावेन वा मच्चुतरणादिना वा देसनाय फलं, देसनानुसारेन चरणस्स फलं विचिनति. उपायं विचिनतीति अनिच्चानुपस्सनादिवसेन पवत्तननिब्बिदाञाणादिवसेन वा सद्धासतिवसेन वा विसुद्धिया उपायं विचिनति. आणत्तिं विचिनतीति पापपरिवज्जनाणत्तिवसेन वा लोकस्स सुञ्ञतापेक्खनाणत्तिवसेन वा विचिनति. अनुगीतिं विचिनतीति वुत्तानुगीतिवसेन वा वुच्चमानानुगीतिवसेन वा अनुरूपं गीतिं विचिनति. सब्बे नव सुत्तन्ते विचिनतीति सुत्तगेय्यादिके नव सुत्ते आहच्चवचनवसेन वा अनुसन्धिवचनवसेन वा नीतत्थवचनवसेन वा नेय्यत्थवचनवसेन वा संकिलेसभागियादिवसेन वा विचिनति.

किञ्चापि पदविचयो पठमं विभत्तो, सुत्तस्स पन अनुपदं विचिनितब्बताय अतिभारियो, न सुकरो पदविचयोति तं अग्गहेत्वा पञ्हाविचयविस्सज्जनविचये ताव विभजन्तो ‘‘यथा किं भवे’’तिआदिमाह. तत्थ यथा किं भवेति येन पकारेन सो पञ्हाविचयो पवत्तेतब्बो, तं पकारजातं कीदिसं भवेय्याति अत्थो दट्ठब्बो. आयस्मा अजितो पारायने भगवन्तं पञ्हं यथा येन पकारेन पुच्छति, तथा तेन पकारेन पञ्हाविचयो पवत्तेतब्बोति अत्थो. तत्थ आयस्माति पियवचनं. अजितोति बावरीब्राह्मणस्स परिचारकभूतानं सोळसन्नं अञ्ञतरो अजितो. पारायनेति पारं निब्बानं अयति गच्छति एतेनाति पारायनं, अजितसुत्तादिसोळससुत्तस्सेतं अधिवचनं.

‘‘केनस्सु निवुतो लोको, (इच्चायस्मा अजितो,)

केनस्सु नप्पकासति;

किस्साभिलेपनं ब्रूसि, किं सु तस्स महब्भय’’न्ति. (सु. नि. १०३८; चूळनि. वत्थुगाथा ५७, अजितमाणवपुच्छानिद्देस १) –

गाथाय ¶ ‘‘केन धम्मेन लोको अरियवज्जो सत्तो निवुतो पटिच्छादितो, इति आयस्मा अजितो ¶ पुच्छति. केन हेतुना यथावुत्तलोको नप्पकासति, अस्स यथावुत्तलोकस्स किं अभिलेपनं इति त्वं ब्रूसि, तस्स यथावुत्तलोकस्स किं महब्भयन्ति त्वं ब्रूसीति पुच्छती’’ति अत्थो.

इति इमिना पभेदेन चत्तारि इमानि गाथापादपदानि पुच्छितानि पुच्छावसेन वुत्तानि, पुच्छितत्थदीपकानि वा, पधानवसेन पन सो ‘‘एको पञ्हो’’ति मतो, यदिपि चतुन्नं पदानं पुच्छनवसेन पवत्तत्ता चतुब्बिधोति वत्तब्बो, ञातुं पन इच्छितस्स एकस्सेव अत्थस्स सम्भवतो ‘‘एको पञ्हो’’ति वुत्तं. ‘‘कारणं वदेही’’ति वत्तब्बत्ता कारणमाह ‘‘एकवत्थुपरिग्गहा’’ति. इदं वुत्तं होति – ‘‘यदिपि निवारणापकासनाभिलेपनमहब्भयसङ्खाता चत्तारो अत्था पुच्छायं गहिता, एकस्स पन अभिधेय्यत्थस्स गहणतो ‘एको पञ्हो’ति पधानवसेन गहितोति दट्ठब्बो’’ति. ‘‘एकवत्थुपरिग्गहणं कथं अम्हेहि सद्दहितब्ब’’न्ति वत्तब्बभावतो ‘‘एवञ्हि आहा’’ति वुत्तं. एवं एकवत्थुपरिग्गहणेनेव भगवा हि यस्मा आह, इति तस्मा एकवत्थुपरिग्गहणं तुम्हेहि सद्दहितब्बन्ति वुत्तं होति.

‘‘केनस्सु निवुतो लोको’’ति इमिना लोकाधिट्ठानं पटिच्छादनं पुच्छति, न नानाधम्माधिट्ठानं. ‘‘केनस्सु नप्पकासती’’ति इमिना लोकस्सेव अप्पकासनं पुच्छति, न नानासभावधम्मस्स. ‘‘किस्साभिलेपनं ब्रूसी’’ति इमिना लोकस्सेव अभिलेपनं पुच्छति, न नानासभावधम्मस्स. ‘‘किं सु तस्स महब्भय’’न्ति इमिना तस्सेव लोकस्स महब्भयं पुच्छति, न नानासभावधम्मस्स. तस्मा ‘‘केनस्सु निवुतो लोको’’तिआदिपञ्हो एकाधिट्ठाननानाधिट्ठानेसु एकाधिट्ठानो, धम्माधिट्ठानसत्ताधिट्ठानेसु सत्ताधिट्ठानो, अदिट्ठजोतनादीसु अदिट्ठजोतनापञ्होतिआदिना यथासम्भवं विचिनितब्बोति अधिप्पायो.

‘‘पञ्हस्स यो लोको ‘अधिट्ठानो’ति गहितो, सो लोको तिविधो’’ति वत्तब्बभावतो ‘‘लोको तिविधो’’तिआदि वुत्तं. तत्थ तयो विधा एतस्स लोकस्साति तिविधो. किलिस्सति रागादिवसेन कामावचरसत्तोति किलेसो, किलेसो च सो लोको ¶ चाति किलेसलोको, कामावचरसत्तो. सो हि रागादिकिलेसबहुलताय किलेसलोकोति. भवति झानाभिञ्ञाहि बुद्धीहीति भवो, भवो च सो लोको चाति भवलोको, रूपावचरसत्तो. सो हि झानादिबुद्धीहि भवतीति. इन्द्रियेन समन्नागतोति इन्द्रियो, इन्द्रियो च सो लोको चाति इन्द्रियलोको, अरूपावचरसत्तो. सो हि आनेञ्जसमाधिबहुलताय विसुद्धिन्द्रियो होतीति लोकसमञ्ञा परियापन्नधम्मवसेन पवत्ता, तस्मा अरिया न गहिताति.

‘‘केनस्सु ¶ निवुतो लोको’’तिआदिगाथाय पुच्छाविचयो हारो आचरियेन विभत्तो, अम्हेहि च ञातो, ‘‘विस्सज्जनाविचयो हारो कत्थ विस्सज्जनाय विभत्तो’’ति पुच्छितब्बत्ता ‘‘तत्थ विस्सज्जना’’तिआदि वुत्तं. तत्थ तत्थाति तस्सं ‘‘केनस्सु निवुतो लोको’’तिआदिपुच्छायं –

‘‘अविज्जाय निवुतो लोको, (अजिताति भगवा,)

विविच्छा पमादा नप्पकासति;

जप्पाभिलेपनं ब्रूमि, दुक्खमस्स महब्भय’’न्ति. (सु. नि. १०३९; चूळनि. वत्थुगाथा ५८, अजितमाणवपुच्छानिद्देस) –

अयं गाथा विस्सज्जनाति दट्ठब्बा. तत्थ अविज्जाय निवुतो लोकोति काळपक्खचतुद्दसी, घनवनसण्ड, मेघपटलच्छादन, अड्ढरत्तीनं वसेन चतुरङ्गसमन्नागतेन अन्धकारेन रथघटादि पटिच्छादितो विय धम्मसभावपटिच्छादनलक्खणाय अविज्जाय सत्तलोको निवुतो पटिच्छादितो. ‘‘अजिता’’ति च आलपनं कत्वा भगवा आह. विविच्छाति विचिकिच्छाय पमादहेतु यथावुत्तलोको नप्पकासति. जप्पं तण्हं यथावुत्तलोकस्स ‘‘अभिलेपन’’न्ति अहं ब्रूमीति भगवा आह, दुक्खं जातिआदिवट्टदुक्खं अस्स यथावुत्तलोकस्स ‘‘महब्भय’’न्ति अहं ब्रूमीति भगवा अजितं आहाति अत्थो.

‘‘इमाय विस्सज्जनाय कथं विचिनेय्या’’ति पुच्छितब्बत्ता ‘‘इमानि चत्तारि पदानी’’तिआदि वुत्तं. तत्थ इमानि चत्तारि पदानीति ‘‘केनस्सु निवुतो लोको’’तिआदिपुच्छागाथायं वुत्तानि गाथापदानि. इमेहि चतूहि पदेहीति ‘‘अविज्जाय निवुतो लोको’’ति विस्सज्जनागाथायं वुत्तेहि गाथापदेहि विस्सज्जितानि. कथं? पठमं पदं पठमेन पदेन, दुतियं पदं ¶ दुतियेन पदेन, ततियं पदं ततियेन पदेन, चतुत्थं पदं चतुत्थेन पदेन विस्सज्जितं.

‘‘केनस्सु निवुतो लोको’’ति पठमपञ्हे ‘‘अविज्जाय निवुतो लोको’’ति पठमा विस्सज्जना कता, न उप्पटिपाटिया. विज्जाय पटिपक्खा अविज्जा, तस्मा अविज्जाय अजानको लोको भवेय्य. कथं निवुतो सद्दहितब्बोति आह ‘‘नीवरणेहि निवुतो लोको’’ति. यदि एवं ‘‘नीवरणेन निवुतो लोको’’ति विस्सज्जना कातब्बाति चोदनं मनसि ¶ कत्वा वुत्तं ‘‘अविज्जानीवरणा हि सब्बे सत्ता’’ति. ‘‘सब्बसत्तानं अविज्जानीवरणभावो केन वचनेन सद्दहितब्बो’’ति वत्तब्बत्ता ‘‘यथाह भगवा’’तिआदि वुत्तं.

‘‘सब्बसत्तानं, भिक्खवे, सब्बपाणानं सब्बभूतानं, परियायतो एकमेव नीवरणं वदामि, यदिदं अविज्जा. अविज्जानीवरणा हि सब्बे सत्ता. सब्बसोव भिक्खवे अविज्जाय निरोधा चागा पटिनिस्सग्गा नत्थि सत्तानं नीवरणन्ति वदामी’’ति यं वचनं यथा येन पकारेन भगवा आह, तथा तेन पकारेन वुत्तेन तेन वचनेन तुम्हेहि सब्बसत्तानं अविज्जानीवरणभावो सद्दहितब्बोति.

‘‘अविज्जाय निवुतो लोको’’ति पदेन ‘‘केनस्सु निवुतो लोको’’ति पठमस्सेव पदस्स विस्सज्जना न सिया, ‘‘केनस्सु नप्पकासती’’ति दुतियपदस्सापि विस्सज्जना सियाति चोदनं मनसि कत्वा ‘‘तेन चा’’तिआदि वुत्तं. तत्थ तेन ‘‘अविज्जाय निवुतो लोको’’ति पदेन ‘‘केनस्सु निवुतो लोको’’ति पठमस्स पदस्स विस्सज्जना युत्ता युत्ततरा होति, युत्ततरत्ता ‘‘केनस्सु निवुतो लोको’’ति पञ्हे ‘‘अविज्जाय निवुतो लोको’’ति विस्सज्जनाति मया वत्तब्बायेवाति अधिप्पायो.

‘‘केनस्सु नप्पकासती’’ति इमस्मिं पञ्हे ‘‘विविच्छा पमादा नप्पकासती’’ति अयं विस्सज्जना कातब्बा, विविच्छाय पवत्तत्ता, पमादा च लोको नप्पकासतीति अत्थो. अविज्जानीवरणाय निवुतो लोको नप्पकासतीति विस्सज्जना कातब्बा, ‘‘कथं विविच्छा पमादा लोको नप्पकासतीति विस्सज्जना कता’’ति वत्तब्बत्ता ‘‘यो पुग्गलो’’तिआदि वुत्तं. तत्थ यो पुथुज्जनभूतो पुग्गलो अविज्जानीवरणेहि ¶ निवुतो, सो पुथुज्जनभूतो पुग्गलो विविच्छाय विविच्छति. ‘‘याय विविच्छाय विविच्छति, सा विविच्छा कतमा नामा’’ति पुच्छितब्बत्ता ‘‘विविच्छा नाम वुच्चति विचिकिच्छा’’ति वुत्तं. ‘‘ताय कस्मा नप्पकासती’’ति वत्तब्बत्ता ‘‘सो विचिकिच्छन्तो’’तिआदि वुत्तं. ताय विचिकिच्छन्तो सो पुथुज्जनभूतो पुग्गलो सद्दहितब्बेसु नाभिसद्दहति; सद्दहितब्बेसु न अभिसद्दहन्तो अकुसलानं धम्मानं पहानाय, कुसलानं धम्मानं सच्छिकिरियाय आरभितब्बं वीरियं नारभति; अनारभन्तो सो पुग्गलो इध लोके पमादमनुयुत्तो विहरतीति, पमादेन विहरन्तो पमत्तो पुग्गलो सुक्के धम्मे न उप्पादियति; अनुप्पादयन्तस्स तस्स पुग्गलस्स ते सुक्का धम्मा अनुप्पादियमाना हुत्वा नप्पकासन्ति पकासनवसेन न पवत्तन्ति; तस्मा ‘‘विविच्छा पमादा लोको नप्पकासती’’ति विस्सज्जना कातब्बाति अधिप्पायो.

‘‘तादिसस्स ¶ सुक्कधम्मानं अप्पकासनभावो अम्हेहि केन वचनेन सद्दहितब्बो’’ति वत्तब्बभावतो ‘‘यथाह भगवा’’तिआदि वुत्तं. तत्थ –

‘‘दूरे सन्तो पकासन्ति, हिमवन्तोव पब्बतो;

असन्तेत्थ न दिस्सन्ति, रत्तिं खित्ता यथा सरा;

ते गुणेहि पकासन्ति, कित्तिया च यसेन चा’’ति. –

यं गाथापाठं भगवा यथा येन अप्पकासनाकारेन आह, तथा तेन अप्पकासनाकारेन वुत्तेन तेन गाथापाठेन तादिसस्स पुग्गलस्स सुक्कधम्मानं अप्पकासनभावो तुम्हेहि सद्दहितब्बोयेव, तस्मा ‘‘विविच्छा पमादा लोको नप्पकासती’’ति विस्सज्जना कातब्बावाति अधिप्पायो.

गाथात्थो पन – हिमवन्तो पब्बतो दूरे ठितो दूरे ठितानम्पि सचक्खुकानं पुग्गलानं पकासति इव, एवं सन्तो सप्पुरिसा दूरे ठितानम्पि गुणवसेन पवत्ताय कित्तिया च गुणवसेन पवत्तेहि यसपरिभोगपरिवारेहि च दूरे ठितानं पण्डितानं पकासन्ति, रत्तिकाले खित्ता सरा उसू न दिस्सन्ति यथा, एत्थ सत्तलोके विविच्छापमादानं वसेन विहरन्तो असन्तो न दिस्सन्ति. ये सन्तो पकासन्ति, ते सन्तो गुणेहि पकासन्तीति दस्सेतुं ‘‘ते गुणेहि पकासन्ती’’ति वुत्तं ¶ . गुणा नाम अब्भन्तरे जाता, ‘‘कथं गुणेहि पकासन्ती’’ति वत्तब्बत्ता ‘‘कित्तिया च यसेन चा’’ति वुत्तं. गुणानुभावेन पवत्ताय कित्तिया च गुणानुभावेन पवत्तेन यसेन च पकासन्ता पुग्गला गुणेहि पकासन्तीति वत्तब्बावाति.

यदि विविच्छापमादानं वसेन नप्पकासति, एवं सति लोको निवुतो होति, तस्मा पठमस्स पदस्सापि विस्सज्जना कातब्बाति चोदनं मनसि कत्वा ‘‘तेन चा’’तिआदि वुत्तं. तत्थ तेनाति ‘‘विविच्छा पमादा नप्पकासती’’ति पदेन ‘‘केनस्सु नप्पकासती’’ति दुतियस्स पदस्स विस्सज्जना युत्ता युत्ततराति अत्थो. पदेनाति च पदत्थट्ठेन विस्सज्जनाति अत्थो. पदस्साति पदत्थस्स पुच्छितब्बस्साति अत्थो दट्ठब्बो. एस नयो हेट्ठा, उपरि च.

‘‘किस्साभिलेपनं ब्रूसी’’ति पञ्हे ‘‘जप्पाभिलेपनं ब्रूमी’’ति विस्सज्जना तस्सा अजितेन दट्ठब्बा. ‘‘कतमा जप्पा नामा’’ति पुच्छितब्बत्ता ‘‘जप्पा नाम वुच्चति तण्हा’’ति वुत्तं. सा तण्हा लोकं अभिलिम्पतीति कथं विञ्ञायतीति योजना. तेन वुत्तं ‘‘यथाह भगवा’’तिआदि. तत्थ यथा येन तण्हाय अभिलेपनभावेन –

‘‘रत्तो ¶ अत्थं न जानाति, रत्तो धम्मं न पस्सति;

अन्धं तमं तदा होति, यं रागो सहते नर’’न्ति. –

यं गाथं भगवा आह, तथा तेन अभिलेपनभावेन वुत्ताय ताय गाथाय सा तण्हा लोकं अभिलिम्पतीति विञ्ञायतीति अधिप्पायो.

गाथायं पन – रज्जति सत्तोति रत्तो, रागसमङ्गीसत्तो. कारणं पटिच्च असति पवत्तति फलन्ति अत्थं, फलं. कारणं फलं धारेति, तं कारणं धम्मं नाम. अन्धकारं अन्धं. यन्ति यम्हि काले. यन्ति हि भुम्मत्थे पच्चत्तवचनं. यम्हि काले रागो नरं रागसमङ्गिं सहते अभिभवति, तदा काले अन्धं अन्धकारं तमं होतीति योजना. रागो नरं यं यस्मा सहते, तस्मा अन्धं तमं तदा होतीति वा, रागो यं नरं सहते, तस्स नरस्स अन्धं तमं तदा होतीति वा, रागो नरं यं सहते अभिभूयते यं सहनं अभिभवनं निप्फादेति, तं सहनं अभिभवनं अन्धं अन्धकारं तमं होतीति वा योजना.

‘‘यदि ¶ रत्तो अत्थादिकं न जानाति, एवं सति कथं जप्पाभिलेपनं भवती’’ति वत्तब्बत्ता ‘‘सायं तण्हा’’तिआदि वुत्तं. तत्थ आरम्मणेसु आसत्तिबहुलस्स आसङ्गबहुलस्स तण्हासमङ्गिस्स पुग्गलस्स सा अयं तण्हा एवं बहुआसङ्गवसेन अभिजप्पा परियुट्ठानट्ठायिनी होति. इति करित्वा इमिना कारणेन तत्थ तण्हाय सत्तलोको केनचि सिलेसेन अभिलित्तो मक्खितो विय जप्पाभिलेपेन अभिलित्तो नाम भवतीति योजना. ‘‘जप्पाभिलेपनं अप्पकासनस्सपि कारणं भवति, तस्मा ‘केनस्सु नप्पकासती’ति दुतियपदत्थस्सपि विस्सज्जना सिया’’ति वत्तब्बत्ता ‘‘तेन चा’’तिआदि वुत्तं.

‘‘तस्स लोकस्स महब्भयं कि’’न्ति इमस्मिं चतुत्थपञ्हे ‘‘अस्स लोकस्स दुक्खं महब्भयं भवे’’ति अयं विस्सज्जना तस्सा अजितेन दट्ठब्बा. भायति लोको एतस्माति भयं, महन्तं भयं महब्भयं. ‘‘कतिविधं दुक्ख’’न्ति पुच्छितब्बत्ता ‘‘दुविधं दुक्ख’’न्तिआदि वुत्तं. द्वे विधा अस्स दुक्खस्साति दुविधं. ‘‘कतमं दुविधं दुक्ख’’न्ति पुच्छितब्बत्ता ‘‘कायिकञ्च चेतसिकञ्चा’’ति वुत्तं. ‘‘कतमं कायिकं, कतमं चेतसिक’’न्ति पुच्छितब्बत्ता ‘‘यं कायिकं, इदं दुक्खं यं चेतसिकं, इदं दोमनस्स’’न्ति वुत्तं.

रोगादिसत्थादिअनिट्ठरूपं सत्तलोकस्स महब्भयं भवेय्य, ‘‘कथं दुक्खं महब्भयं भवेति सद्दहेतब्ब’’न्ति ¶ वत्तब्बभावतो ‘‘सब्बे सत्ता ही’’तिआदि वुत्तं. तत्थ सब्बे सत्ता यथावुत्तस्स दुक्खस्स उब्बिज्जन्ति, दुक्खेन समसमं अञ्ञं भयं सत्तानं नत्थि, दुक्खतो उत्तरितरं वा पन भयं कुतो अत्थि. हि यस्मा नत्थि, तस्मा दुक्खतो अञ्ञस्स भयस्स अभावतो ‘‘दुक्खं लोकस्स महब्भय’’न्ति वचनं सद्दहितब्बन्ति अधिप्पायो.

‘‘सब्बे सत्ता’’तिआदिवचनेन रोगादिसत्थादिअनिट्ठरूपं दुक्खमूलमेवाति दस्सेति. ‘‘कायिकचेतसिकवसेन दुविधं दुक्खं दुक्खवेदनायेव, एवं सति सङ्खारदुक्खविपरिणामदुक्खानं महब्भयभावो न आपज्जेय्या’’ति वत्तब्बभावतो ‘‘तिस्सो दुक्खता’’तिआदि वुत्तं.

‘‘तिस्सो दुक्खता सब्बेसं सत्तानं सब्बकालेसु उप्पज्जन्ति, कदाचि कस्सचि न उप्पज्जन्ती’’ति पुच्छितब्बत्ता ‘‘तत्थ लोको’’तिआदि वुत्तं. तत्थ तत्थाति तासु तीसु दुक्खतासु. लोकोति भोगसम्पन्नो चेव अप्पाबाधो ¶ च सत्तलोको. ओधसो ओधिसो कदाचि करहचि अत्तूपक्कममूलाय दुक्खदुक्खताय मुच्चति, कदाचि परूपक्कममूलाय दुक्खदुक्खताय मुच्चति, तथा ओधसो ओधिसो कदाचि करहचि दीघायुको लोको विपरिणामदुक्खताय मुच्चति, ‘‘केन हेतुना मुच्चती’’ति पुच्छितब्बत्ता पुच्छं ठपेत्वा हेतुं दस्सेतुं ‘‘तं किस्स हेतू’’तिआदि वुत्तं. सत्तलोके अप्पेकच्चे अप्पाबाधा होन्ति, ते भोगसम्पन्नत्ता चेव अप्पाबाधत्ता च दुक्खदुक्खताय मुच्चन्ति, विसेसतो रूपावचरसत्ता मुच्चन्ति. अप्पेकच्चे दीघायुकापि होन्ति, ते दीघायुकत्ता विपरिणामदुक्खताय मुच्चन्ति; विसेसतो अरूपावचरसत्ता मुच्चन्ति अरूपावचरसत्तानं उपेक्खासमापत्तिबहुलत्ता.

तेसं ताहि दुक्खताहि मुच्चनं अनेकन्तिकं होति, तस्मा ताहि अनतिक्कन्तत्ता अनेकन्तिकं मुच्चनं तुम्हेहि वुत्तं, अम्हेहि च ञातं, ‘‘कतमं एकन्तिकमुच्चन’’न्ति पुच्छितब्बत्ता ‘‘सङ्खारदुक्खताय पना’’तिआदि वुत्तं. तत्थ सङ्खारदुक्खतायाति दुक्खवेदनापि सङ्खतत्ता सङ्खारपरियापन्ना, तादिसाय सङ्खारदुक्खतायाति अत्थो गहेतब्बो. लोकोति अरहा. उपादीयति विपाकक्खन्धचतुक्ककटत्तारूपसङ्खातं खन्धपञ्चकन्ति उपादि, उपादियेव सेसं उपादिसेसं, खन्धपञ्चकं, तं नत्थि एतिस्सा निब्बानधातुयाति अनुपादिसेसा. अनुपादिसेसाय निब्बानधातुया अनुपादिसेसनिब्बानधातु हुत्वा मुच्चति, इत्थम्भूतलक्खणे चायं करणनिद्देसो. निब्बानधातूति च खन्धपञ्चकस्स निब्बायनमत्तं अधिप्पेतं, न असङ्खतधातु. तस्माति सङ्खारदुक्खताय सकललोकब्यापकभावेन सब्बलोकसङ्गाहकत्ता वुत्तप्पकारसङ्खारदुक्खताय सब्बलोकस्स ¶ दुक्खं होति, इति कत्वा सङ्खारदुक्खताय सब्बलोकस्स दुक्खभावतो ‘‘दुक्खमस्स महब्भय’’न्ति भगवता वुत्तं.

‘‘वेदनापच्चया तण्हा’’ति (म. नि. ३.१२६; सं. नि. २.१, ३, ३६; महाव. १; विभ. २२५) वचनतो ‘‘दुक्खमस्स महब्भय’’न्ति पदेन ‘‘किस्साभिलेपनं ब्रूसी’’ति ततियपदस्सापि विस्सज्जना सियाति आसङ्कभावतो ‘‘तेन च चतुत्थस्स पदस्स विस्सज्जना युत्ता’’ति वुत्तं. ‘‘केन यथाक्कमं पुच्छाविस्सज्जनानं युत्ततरभावो जानितब्बो’’ति वत्तब्बत्ता ‘‘तेनाह भगवा’’तिआदि वुत्तं. तेन यथाक्कमं पुच्छाविस्सज्जनानं युत्ततरत्ता युत्ततरजाननको भगवा ‘‘अविज्जाय निवुतो ¶ लोको’’तिआदिमाह, तस्मा युत्ततरभावो तुम्हेहि जानितब्बोति.

एत्थ च लोकस्स नीवरणादीनि अजानन्तेन च तित्थियवादेसु समयन्तरेसु परिचयेन च तेसु समयन्तरेसु चेव नीवरणादीसु च संसयपक्खन्देन एकंसेनेव सत्ताधिट्ठानेन पुच्छितब्बत्ता, एकंसेनेव सत्ताधिट्ठानेन ब्याकातब्बत्ता च सत्ताधिट्ठाना पुच्छा कताति वेदितब्बा. सा चायं पुच्छा अजानन्तस्स जाननत्थाय, जातसंसयस्स च संसयविनोदनत्थाय विस्सज्जेतब्बस्स नीवरणादिविसयस्स चतुब्बिधत्ता चतुब्बिधा. नीवरणादीनं पन विसयानं लोको च आधारभावेन गाथायं वुत्तोति ‘‘एको पञ्हो दस्सितो’’ति अयमेत्थ पुच्छाविचयो, विस्सज्जनाविचयो पन ‘‘अदिट्ठजोतना विस्सज्जना, विमतिच्छेदना विस्सज्जना’’तिआदिना पुच्छाविचये वुत्तनयानुसारेन वेदितब्बो.

एकाधारे पुच्छाविस्सज्जने विचयो आचरियेहि विभत्तो, अम्हेहि च ञातो, ‘‘अनेकाधारे पुच्छाविस्सज्जने यो विचयो विभजनारहो, सो विचयो कथं अम्हेहि विञ्ञायति, अम्हाकं विञ्ञापनत्थाय तस्मिं विचयं विभजथा’’ति वत्तब्बभावतो अनेकाधारं पुच्छं ताव नीहरित्वा दस्सेतुं –

‘‘सवन्ति सब्बधि सोता, (इच्चायस्मा अजितो,)

सोतानं किं निवारणं;

सोतानं संवरं ब्रूहि, केन सोता पिधीयरे’’ति. (सु. नि. १०४०; चूळनि. वत्थुगाथा ५९, अजितमाणवपुच्छानिद्देस ३) –

गाथमाह ¶ . गाथात्थो ताव दट्ठब्बो. सवन्तीति सन्दन्ति, पवत्तन्तीति अत्थो. सब्बधीति तण्हादीनं आरम्मणभूतेसु सब्बेसु रूपादीसु आयतनेसु. सोताति तण्हाभिज्झाब्यापादादयो सोता. इच्चायस्माति इति एवं आयस्मा अजितो आह. सोतानन्ति तण्हाभिज्झाब्यापादादीनं सोतानं. किं निवारणन्ति किं कतमं धम्मजातं आवरणं भवे, का कतमा धम्मजाति रक्खा भवे. सोतानं संवरं ब्रूहीति सोतानं तण्हाभिज्झाब्यापादादीनं संवरणं आवरणं इदं धम्मजातं भवेति सब्बसत्तहितत्थं अम्हाकं त्वं कथेहि. केन सोता ¶ पिधीयरेति केन पहायकधम्मेन तण्हाभिज्झाब्यापादादयो सोता पण्डितेहि पिधीयरेति पुच्छतीति पुच्छितानि.

‘‘पुच्छावसेन कथिताय ‘सवन्ति…पे… पिधीयरे’ति इमाय गाथाय कित्तकानि पदानि पुच्छितानि, कित्तका पञ्हा’’ति पुच्छितब्बत्ता ‘‘इमानि चत्तारि पदानि पुच्छितानि, ते द्वे पञ्हा’’ति वुत्तं. ‘‘पुच्छावसेन पवत्ताय इमिस्सा गाथाय यदि चत्तारि पदानि सियुं, एवं सन्तेसु पञ्हापि चतुब्बिधा सियुं, कस्मा ‘द्वे’ति वुत्ता’’ति वत्तब्बत्ता ‘‘कस्मा? इमे हि बह्वाधिवचनेन पुच्छिता’’ति वुत्तं. इमे एताय गाथाय गहिता अत्था बह्वाधिवचनेन पुच्छिता. इदं वुत्तं होति – ‘‘सवन्ति…पे… पिधीयरेति बहूनि वचनानि अधिकिच्च पवत्ता संवरसङ्खाता सति चेव पिदहनहेतुभूता पञ्ञा चाति इमे द्वे अत्थाव पुच्छिता, तस्मा अत्थवसेन द्वे पञ्हा वुत्ता वा’’ति. ‘‘पुच्छाय दुविधत्थविसयता कथं वुत्ता’’ति वत्तब्बत्ता पुच्छाय दुविधत्थविसयतं विवरितुं ‘‘एवं समापन्नस्सा’’तिआदि वुत्तं. तत्थ एवं समापन्नस्साति इमाहि दुग्गतिहेतुभूताहि ञातिब्यसनादिसङ्खाताहि आपदाहि वा, पाणवधादीहि आपदाहि वा, समं सह, सब्बथा वा अयं सत्तलोको आपन्नो अज्झोत्थटो, एवं अज्झोत्थटस्स वा समापन्नस्स. एवं संकिलिट्ठस्साति ञातिब्यसनादयो वा पाणवधादीनि आगम्म पवत्तेहि दसहि किलेसवत्थूहि च अयं सत्तलोको संकिलिट्ठो, एवं संकिलिट्ठस्स च लोकस्साति समापन्नस्स अज्झोत्थटस्स लोकस्स वोदानं वुट्ठानं किं कतमं धम्मजातं भवे. इति एवञ्हि सच्चं अजितसुत्ते आहाति वित्थारत्थो, पुच्छाय दुविधत्थविसयता ञातब्बाति अधिप्पायो.

‘‘किं नु सोता सब्बस्स लोकस्स सब्बधि सवन्ति, उदाहु, एकच्चस्सेवा’’ति पुच्छितब्बत्ता ‘‘सवन्ति सब्बधि सोताति, असमाहितस्स सवन्ति अभिज्झाब्यापादप्पमादबहुलस्सा’’ति वुत्तं. तत्थ अभिज्झाब्यापादप्पमादबहुलत्ता रूपादीसु नानारम्मणेसु विक्खित्तचित्तस्सेव सोता सवन्ति पवत्तन्ति, न समाहितस्स अभिज्झाब्यापादप्पमादविरहितस्साति ¶ अधिप्पायो दट्ठब्बो. ‘‘कतमा अभिज्झा, कतमो ब्यापादो, कतमो पमादो’’ति वत्तब्बत्ता ‘‘तत्थ या अभिज्झा’’तिआदि वुत्तं. तत्थ तत्थाति तेसु अभिज्झाब्यापादप्पमादेसु. या अभिज्झा, अयं लोभो, न अभिज्झायनमत्तं. लोभो च अकुसलमूलं, न लुब्भनमत्तं. यो ब्यापादो ¶ , अयं दोसो, न ब्यापज्जनमत्तं. दोसो च अकुसलमूलं, न दूसनमत्तं. यो पमादो, अयं मोहो, न सतिविप्पवासमत्तं. मोहो च अकुसलमूलं, न मूहनमत्तं. एवं इमिना वुत्तप्पकारेन अभिज्झादीनं अकुसलमूलत्ता यस्स अभिज्झाब्यापादप्पमादबहुलस्स असमाहितस्स छसु रूपादीसु आयतनेसु तण्हा सवन्ति.

‘‘कतिविधा सा तण्हा’’ति वत्तब्बत्ता ‘‘रूपतण्हा…पे… धम्मतण्हा’’ति वुत्तं. ‘‘छन्नं रूपतण्हादीनं छसु रूपादिआयतनेसु सवनं केन च वचनेन अम्हेहि सद्दहितब्ब’’न्ति वत्तब्बत्ता ‘‘यथाह भगवा’’तिआदि वुत्तं. ‘‘सवतीति च खो, भिक्खवे…पे… पटिहञ्ञती’’ति यं वचनं भगवा यथा येन पकारेन आह, तथा तेन पकारेन वुत्तनयेन वचनेन तुम्हेहि सद्दहितब्बन्ति अधिप्पायो. एत्थ च चक्खादीनं रूपतण्हादीनं छन्नं सोतानं द्वारभावेन पवत्तत्ता चक्खादयो निस्सितूपचारवसेन सयं सवन्तो विय भगवता वुत्ता. इतीति एवं वुत्तप्पकारेन सब्बा सब्बस्मा चक्खादिद्वारतो च सवति पवत्तति. सब्बथा सब्बप्पकारेन तण्हायनमिच्छाभिनिवेसनउन्नमनादिप्पकारेन सवति पवत्ततीति अत्थो. ‘‘कस्मा सब्बस्मा चक्खादिद्वारतो च सवति पवत्तति, सब्बप्पकारेन तण्हायनमिच्छाभिनिवेसनउन्नमनादिप्पकारेन सवनभावो विजानितब्बो’’ति वत्तब्बत्ता ‘‘तेनाहा’’तिआदि वुत्तं. तत्थ तेनाति असमाहितस्स अभिज्झाब्यापादादीनं चक्खादिद्वारतो च तण्हायनमिच्छाभिनिवेसउन्नमनाकारेन तण्हादिवसेन पवत्तनतो पवत्तजाननको भगवा ‘‘सवन्ति सब्बधि सोता’’ति आह.

‘‘सोतानं ‘किं निवारण’न्ति इमिना किं पुच्छति? सोतानं अनुसयप्पहानं पुच्छति किं? उदाहु वीतिक्कमप्पहानं पुच्छती’’ति वत्तब्बत्ता ‘‘सोतानं किं निवारणन्ति परियुट्ठानविघातं पुच्छती’’ति वुत्तं. ‘‘इदं परियुट्ठानविघातं वोदानं, उदाहु वुट्ठानं कि’’न्ति वत्तब्बत्ता ‘‘इदं वोदान’’न्ति वुत्तं. ‘‘सोतानं संवरं ब्रूहि, ‘केन सोता पिधीयरे’ति इमिना किं पुच्छति? सोतानं परियुट्ठानं पुच्छति किं? उदाहु वीतिक्कमनं, समुग्घाटं वा पुच्छति कि’’न्ति वत्तब्बत्ता सोतानं…पे… पिधीयरेति अनुसयसमुग्घाटं पुच्छती’’ति वुत्तं. ‘‘इदं अनुसयसमुग्घाटं वोदानं किं, उदाहु वुट्ठानं कि’’न्ति वत्तब्बत्ता ‘‘इदं वुट्ठान’’न्ति वुत्तं.

‘‘सवन्ति ¶ ¶ सब्बधि सोता’’तिआदिपुच्छाविचयो आचरियेन वुत्तो, अम्हेहि च ञातो; ताय पुच्छाय ‘‘कतमो विस्सज्जनविचयो’’ति वत्तब्बत्ता ‘‘तत्थ विस्सज्जना’’तिआदि वुत्तं. तत्थ पुच्छायं –

‘‘यानि सोतानि लोकस्मिं, (अजिताति भगवा,)

सति तेसं निवारणं;

सोतानं संवरं ब्रूमि, पञ्ञायेते पिधीयरे’’ति. (सु. नि. १०४१ चूळनि. वत्थुगाथा ६०, अजितमाणवपुच्छानिद्देस ४) –

गाथा विस्सज्जनाति दट्ठब्बा. तस्सं गाथायं अजित लोकस्मिं यानि सोतानि सवन्ति, तेसं सोतानं यं निवारणं, सा सति होति; तं सतिं सोतानं संवरन्ति अहं ब्रूमि; एते सोता पञ्ञाय पिधीयरेति योजना कातब्बा. तत्थ सतीति विपस्सनापञ्ञाय सम्पयुत्ता सति. पञ्ञायाति मग्गपञ्ञाय. पिधीयरेति उप्पज्जितुं अप्पदानवसेन पिधीयन्ति पच्छिज्जन्ति.

‘‘सति तेसं निवारणं सोतानं संवरं ब्रूमी’’ति भगवा आह – ‘‘याय कायचि सतिया सोतानं संवरणकिच्चं सिद्धं किं, विसिट्ठाय सतिया सोतानं संवरणकिच्चं सिद्धं किं, कतमाय सतिया सोतानं संवरणकिच्चं सिद्ध’’न्ति पुच्छितब्बत्ता ‘‘कायगताय सतिया’’तिआदि वुत्तं. तत्थ कायगताय सतियाति रूपकाये गतं केसादिकं अनिच्चादितो विपस्सित्वा पवत्ताय विपस्सनाञाणसम्पयुत्ताय सतिया. भावितायाति कायगतं अनिच्चतो दुक्खतो अनत्ततो निब्बिन्दनतो विरज्जनतो निरोधनतो पटिनिस्सज्जनतो अनुपस्सनावसेन भाविताय. एवञ्हि अनिच्चतो अनुपस्सन्तो निच्चसञ्ञं पजहति; दुक्खतो अनुपस्सन्तो सुखसञ्ञं पजहति; अनत्ततो अनुपस्सन्तो अत्तसञ्ञं पजहति; निब्बिन्दन्तो नन्दिं पजहति; विरज्जन्तो रागं पजहति; निरोधेन्तो समुदयं पजहति; पटिनिस्सज्जन्तो आदानं पजहतीति. बहुलीकतायाति यथावुत्तप्पकारेन दिवसम्पि मासम्पि संवच्छरम्पि सत्तसंवच्छरम्पि बहुलीकताय. चक्खुन्ति अभिज्झादिपवत्तिद्वारभावेन ठितं चक्खुं, निग्गहितागमं दट्ठब्बं. नाविञ्छतीति चक्खुद्वारे पवत्तं अभिज्झादिसहितं चित्तसन्तानं, तंसमङ्गीपुग्गलं वा नाकड्ढति, मनापिकेसु रूपेसु नाविञ्छतीति योजना. अमनापिकेसु रूपेसु न पटिहञ्ञति ¶ . कायगताय सतिया ¶ भाविताय बहुलीकताय सोतं नाविञ्छति. मनापिकेसु सद्देसु…पे… अमनापिकेसु सद्देसु न पटिहञ्ञतीति योजना यथासम्भवतो कातब्बा.

‘‘केन कारणेन नाविञ्छति पटिहञ्ञती’’ति पुच्छति, इन्द्रियानं संवुतनिवारितत्ता नाविञ्छति न पटिहञ्ञतीति विस्सज्जेति. ‘‘केनारक्खेन ते संवुतनिवारिता’’ति पुच्छति, सतिआरक्खेन ते संवुतनिवारिताति विस्सज्जेति. ‘‘सतिआरक्खेन संवुतनिवारितभावो केन अम्हेहि सद्दहितब्बो’’ति वत्तब्बत्ता तेनाहा’’तिआदि वुत्तं. तत्थ तेनाति तस्मा सतिआरक्खेन संवुतनिवारितत्ता संवुतनिवारितजाननको भगवा ‘‘सति तेसं निवारण’’न्ति यं वचनं आह, तेन वचनेन तुम्हेहि सतिआरक्खेन संवुतनिवारितभावो सद्दहितब्बोति पुब्बभागे पञ्ञा सत्यानुगाति किच्चमेवेत्थ अधिकन्ति दट्ठब्बं.

‘‘सति तेसं निवारण’’न्ति विस्सज्जनस्स वित्थारत्थो आचरियेन वुत्तो, अम्हेहि च ञातो, ‘‘पञ्ञायेते पिधीयरे’’ति विस्सज्जनस्स वित्थारत्थो ‘‘कथं अम्हेहि जानितब्बो’’ति वत्तब्बत्ता ‘‘पञ्ञायेते पिधीयरे’’ति विस्सज्जनस्स वित्थारत्थं दस्सेन्तो ‘‘पञ्ञाय अनुसया पहीयन्ती’’तिआदिमाह. तत्थ पञ्ञायाति मग्गपञ्ञाय. अनुसयाति अनुरूपं कारणं लभित्वा उप्पज्जनारहा कामरागानुसयादयो. पहीयन्ति समुच्छेदवसेन अनुसयेसु पञ्ञाय पहीनेसु परियुट्ठानापि अत्थतो पहीयन्ति. किस्स पहीनत्ता ‘‘पहीयन्ती’’ति वुच्चति? अनुसयस्स पहीनत्ता परियुट्ठाना पहीयन्तीति विस्सज्जेति.

‘‘तं अनुसयप्पहानेन परियुट्ठानप्पहानं किं विय भवती’’ति पुच्छितब्बत्ता ‘‘तं यथा खन्धवन्तस्सा’’तिआदि वुत्तं. तत्थ खन्धवन्तस्स रुक्खस्स कुदालादिना भूमिं खणित्वा अनवसेसमूलुद्धरणे कते तस्स रुक्खस्स पुप्फफलपल्लवङ्कुरसन्ततिपि कुदालादिना समुच्छिन्नाव भवति यथा, एवं अरहत्तमग्गञाणेन अनुसयेसु पहीनेसु अनुसयानं परियुट्ठानसन्तति समुच्छिन्ना पिदहिता पटिच्छन्ना भवति. केन समुच्छिन्ना भवति? पञ्ञाय मग्गपञ्ञाय समुच्छिन्ना भवतीति अत्थयोजना दट्ठब्बा. ‘‘पञ्ञाय परिच्छिन्नभावो कथं सद्दहितब्बो’’ति वत्तब्बत्ता ‘‘तेना’’तिआदि वुत्तं. ‘‘पञ्ञायेते पिधीयरे’’ति वचनतो अनुसयानं परियुट्ठानसन्ततिया पञ्ञाय परिच्छिन्नभावो पण्डितेहि सद्दहितब्बोति अधिप्पायो.

इमेसु ¶ पञ्हाविस्सज्जनेसु सोतानं संवरं, पिधानञ्च अजानन्तेन वा संसयितेन वा संवरपिधानानं पुच्छितब्बत्ता धम्माधिट्ठाना पुच्छाति पुच्छाविचयो चेव सतिपञ्ञानं विस्सज्जेतब्बत्ता ¶ धम्माधिट्ठानं विस्सज्जनन्ति विस्सज्जनविचयो च वेदितब्बो. एतेसु च ‘‘केनस्सु निवुतो लोको’’तिआदिको पञ्हो नीवरणविचिकिच्छापमादजप्पानं वसेन चतुब्बिधोपि लोकाधिट्ठानवसेन एको पञ्होति वुत्तो, एवं सति ‘‘सवन्ति सब्बधि सोता’’तिआदिकोपि पञ्हो संवरपिधानानं वसेन दुविधोपि एकत्थवसेन गहेत्वा एकाधिट्ठानवसेन ‘‘एको पञ्हो’’ति वत्तब्बो, सोतानं बहुभावतो वा ‘‘बहुपञ्हो’’ति वत्तब्बो; तथा पन अवत्वा सोते अनामसित्वा संवरपिधानानं वसेन ‘‘सवन्ति सब्बधि सोता’’तिआदिम्हि ‘‘द्वे पञ्हा’’ति वुत्ता. तदनुसारेन ‘‘केनस्सु निवुतो लोको’’तिआदिम्हिपि लोकं अनामसित्वा नीवरणादीनं चतुन्नं वसेन ‘‘चत्तारो पञ्हा’’तिपि वत्तब्बाति अयं नयो दस्सितोति नयदस्सनं दट्ठब्बं.

देसनाकाले वुत्तधम्मस्स अनुसन्धिमग्गहेत्वा अत्तना रचितनियामेनेव पुच्छितपञ्हस्स चेव पञ्हं अट्ठपेत्वा, पटिञ्ञञ्च अकत्वा विस्सज्जनस्स च विचयहारो आचरियेन विभत्तो, अम्हेहि च ञातो, ‘‘देसनाकाले वुत्तधम्मस्स अनुसन्धिं गहेत्वा पुच्छितपञ्हस्स चेव तं पञ्हं ठपेत्वा, पटिञ्ञञ्च कत्वा विस्सज्जनस्स च यो विचयो हारो विभत्तो, सो विचयहारो कथं अम्हेहि विञ्ञायति, अम्हाकं विञ्ञापनत्थाय तस्मिं विचयं विभजेथा’’ति वत्तब्बभावतो तेसु विचेतब्बाकारं दस्सेन्तो ‘‘यानि सोतानी’’तिआदिगाथाय विचयाकारदस्सनानन्तरं ‘‘पञ्ञा चेव सति चा’’तिआदिमाह.

तत्थ गाथात्थो ताव विञ्ञातब्बो – याय पञ्ञाय अनुसयप्पहानेन सोतनिरुज्झनं वुत्तं, याय सतिया च परियुट्ठानप्पहानेन सोतनिरुज्झनं वुत्तं, सायं पञ्ञा चेव सायं सति च ताहि पञ्ञासतीहि असेसं सहुप्पन्नं नामञ्चेव रूपञ्च, एतं सब्बं कत्थ निरुज्झमाने असेसं उपरुज्झतीति मारिस मे मया पुट्ठो त्वं भगवा मय्हं एतं निरुज्झनं पब्रूहि, इति आयस्मा अजितो भगवन्तं पुच्छति.

अजित त्वं यमेतं पञ्हं पुच्छितं निरुज्झनं मं अपुच्छि, अहं ते तव तं निरुज्झनं वदामि. यत्थ विञ्ञाणनिरोधे पञ्ञासतिसहितं नामञ्च रूपञ्च विञ्ञाणस्स ¶ निरोधेन सह एकतो असेसं उपरुज्झति, एत्थ विञ्ञाणनिरोधे एतं सब्बं विञ्ञाणनिरोधेन एकतो एकक्खणे अपुब्बं अचरिमं उपरुज्झति, एतं विञ्ञाणनिरोधं तस्स नामरूपस्स निरोधो नातिवत्तति, तं तं नामरूपनिरोधं सो सो विञ्ञाणनिरोधो नातिवत्ततीति.

‘‘तस्मिं ¶ पञ्हे अयं अजितो किं पुच्छति? उपरुज्झनमेव पुच्छति, उदाहु अञ्ञं पुच्छती’’ति वत्तब्बतो ‘‘अयं पञ्हे अनुसन्धिं पुच्छती’’तिआदि वुत्तं. तत्थ अयन्ति यो आयस्मा अजितो पञ्हं अपुच्छीति अयं अजितो. पञ्हेति ‘‘पञ्ञा चेव सति चा’’तिआदिपञ्हे. यदि अनुसन्धिं पुच्छति, एवं सति ‘‘कत्थेतं उपरुज्झती’’ति पुच्छनं अयुत्तं भवेय्याति? न, अनुसन्धीयति एतेन उपनिरुज्झनेनाति अनुसन्धीति अत्थसम्भवतो. तेन वुत्तं ‘‘अनुसन्धिं पुच्छन्तो किं…पे… निब्बानधातु’’न्ति. अनुसन्धिपुच्छनेन अनुपादिसेसनिब्बानधातुयापि पुच्छनतो ‘‘कत्थेतं उपरुज्झती’’ति पुच्छनं युत्तमेव.

‘‘या अनुपादिसेसनिब्बानधातु पुच्छिता, तं कतमाय पटिपदाय अधिगच्छती’’ति पुच्छितब्बत्ता चतुसच्चकम्मट्ठानभावनासङ्खातं पटिपदं विसयेन सह दस्सेतुं ‘‘तीणी सच्चानी’’तिआदि वुत्तं. तत्थ सङ्खतानीति कम्मादिपच्चयेहि समेच्च सम्भूय दुक्खादीनि करीयन्तीति सङ्खतानि. निरोधधम्मानीति निरुज्झनं निरोधो, धम्मोपि निरोधधम्मोव, तस्मा निरोधो धम्मो सभावो येसं दुक्खादीनन्ति निरोधधम्मानीति अत्थोव गहेतब्बो. तानि तीणि सच्चानि सरूपतो दस्सेतुं ‘‘दुक्खं समुदयो मग्गो’’ति वुत्तं. तीणि दुक्खसमुदयमग्गसच्चानि सङ्खतानीति वुत्तानि, ‘‘किं निरोधसच्च’’न्ति पुच्छितब्बत्ता ‘‘निरोधो असङ्खतो’’ति वुत्तं. इध ‘‘निरोधधम्मो’’तिपि वत्तब्बं. कम्मादिपच्चयेहि असङ्खतत्ता असङ्खतो. उप्पादनिरोधाभावतो अनिरोधधम्मो. ‘‘पहायकपहातब्बेसु सच्चेसु कतमेन पहायकेन कतमो पहातब्बो, कतमाय भूमिया पहीनो’’ति पुच्छितब्बत्ता ‘‘तत्थ समुदयो द्वीसु भूमीसू’’तिआदि वुत्तं. तत्थ द्वीसु भूमीसूति दस्सनभावनाभूमीसु. कामच्छन्दोति कामभवरागो. रूपरागोति रूपभवरागो. अरूपरागोति अरूपभवरागो. संयोजनभेदतो दस संयोजनानि पहीयन्तीति योजना.

१२. पहातब्बसंयोजनानि ¶ दस्सनभूमिभावनाभूमिभेदेन विभत्तानि, अम्हेहिपि ञातानि, ‘‘इन्द्रियभेदतो कथं विभत्तानी’’ति वत्तब्बभावतो ‘‘तत्थ तीणी’’तिआदि वुत्तं. अथ वा ‘‘पहातब्बसंयोजनेसु कतमानि संयोजनानि कतमं इन्द्रियं अत्तनो पहायकं कत्वा निरुज्झन्ती’’ति पुच्छितब्बत्ता ‘‘तत्थ तीणी’’तिआदि वुत्तं. अधिट्ठाय अत्तनो पहायकं कत्वा निरुज्झन्ति अनुप्पादवसेन. ‘‘अनञ्ञातञ्ञस्सामीतिन्द्रियञ्च अञ्ञिन्द्रियञ्च संयोजनानं निरुज्झनहेतु होतु, अञ्ञाताविन्द्रियं किस्स हेतू’’ति पुच्छितब्बत्ता ‘‘यं पना’’तिआदि वुत्तं. तत्थ यं येन अञ्ञाताविन्द्रियेन अरहा ‘‘मे जाति खीणा’’ति एवं जानाति, इदं जाननहेतु अञ्ञाताविन्द्रियं खये जातिक्खये अरहत्तफले पवत्तं ञाणं. यं येन अञ्ञाताविन्द्रियेन अरहा ‘‘इत्थत्ताय अपरं न भविस्सामी’’ति पजानाति, इदं पजाननहेतु ¶ अञ्ञाताविन्द्रियं. अनुप्पादे पन अनुप्पज्जने अरहत्तफले पवत्तं ञाणं अञ्ञाताविन्द्रियं जाननहेतु होतीति वुत्तं होति. इन्द्रियञाणानि पहायकानि कत्वा संयोजनानि निरुज्झन्ति, ‘‘तानि ञाणानि कदा निरुज्झन्ती’’ति वत्तब्बभावतो ‘‘तत्थ यञ्चा’’तिआदि वुत्तं.

‘‘अनञ्ञातञ्ञस्सामीतिन्द्रियं अञ्ञिन्द्रियं पापुणन्तस्स निरुज्झतु, अञ्ञिन्द्रियं अरहत्तं पापुणन्तस्स निरुज्झतु, अञ्ञाताविन्द्रियं कदा निरुज्झती’’ति पुच्छितब्बत्ता ‘‘तत्थ यञ्च खये’’तिआदि वुत्तं. तत्थ द्वेति किच्चभेदेन द्वे, सभावतो पन एकाव.

‘‘पजाननकिच्चम्पि एकमेव, कथं द्वे सियु’’न्ति वत्तब्बत्ता ‘‘अपिचा’’तिआदि वुत्तं. आरम्मणपञ्ञाभेदेन द्वे नामानि लब्भन्तीति वुत्तं होति. साति या पञ्ञा पुब्बगाथायं सोतपिधानकिच्चेन वुत्ता, सा पञ्ञा पकारेहि जाननसभावेन पञ्ञा नाम. यथादिट्ठं आरम्मणं अपिलापनट्ठेन ओगाहनट्ठेन सति नाम.

१३. ‘‘पञ्ञा चेव सति चा’’ति पदस्स अत्थो आचरियेन विभत्तो, अम्हेहि च ञातो, ‘‘नामरूपञ्चा’ति पदस्स अत्थो कथं अम्हेहि ञातब्बो’’ति वत्तब्बत्ता नामरूपं विभजन्तो ‘‘तत्थ ये पञ्चुपादानक्खन्धा’’तिआदिमाह. तत्थ तत्थाति कम्मविपाकवट्टभेदे भवत्तये. तत्थाति पञ्चुपादानक्खन्धसङ्खातनामरूपसमुदाये. पञ्चिन्द्रियानीति चक्खादिपञ्चिन्द्रियानि ¶ . विञ्ञाणसम्पयुत्तन्ति सम्पयुत्तपच्चयत्तं सन्धाय न वुत्तं, पचुरजनस्स पन अविभजित्वा गहणीयसभावमत्तं सन्धाय वुत्तं. विभागं जानन्तेहि पन ‘‘नामं विञ्ञाणसम्पयुत्तं, रूपं पन न विञ्ञाणसम्पयुत्तं, सहजात’’न्ति विभजित्वा गहेतब्बं. तस्साति पञ्ञासतिसहितस्स नामरूपस्स. निरोधन्ति अनुपादिसेसनिब्बानधातुं.

भगवन्तं पुच्छन्तो आयस्मा अजितो ‘‘पञ्ञा चेव…पे… कत्थेतं उपरुज्झती’’ति एवं पारायने आह. ‘‘पञ्ञा चेवातिआदिगाथाय या अनुपादिसेसनिब्बानधातु पुच्छिता, सा अनुपादिसेसनिब्बानधातु कतमेन अधिगमेन पत्तब्बा’’ति पुच्छितब्बत्ता चतुरिद्धिपादमुखेन अरियमग्गाधिगममुखेन पत्तब्बा, चतुरिद्धिपादभावनाय च चत्तारिन्द्रियानि मूलभूतानि, तस्मा मूलभूतानि तानि चत्तारिन्द्रियानि निद्धारेत्वा दस्सेन्तो ‘‘तत्थ सति च पञ्ञा चा’’तिआदिमाह. कुसलाकुसलधम्मगतियो समन्वेसमानाय सतिया सिज्झमानाय एकन्तेन समाधि निप्फादेतब्बो, सतिग्गहणेन च परियुट्ठानप्पहानं गाथायं अधिप्पेतं, परियुट्ठानप्पहानेन च ¶ समाधिकिच्चं पाकटन्ति आह ‘‘सति द्वे इन्द्रियानि सतिन्द्रियञ्च समाधिन्द्रियञ्चा’’ति. पञ्ञाय अनुसयसमुग्घातं चतुब्बिधसम्मप्पधानसङ्खातेन वीरियेन सिज्झति, न विना तेनाति वुत्तं ‘‘पञ्ञा द्वे इन्द्रियानि पञ्ञिन्द्रियञ्च वीरियिन्द्रियञ्चा’’ति.

इमेसु यथावुत्तेसु चतूसु इन्द्रियेसु पुब्बभागे वा मग्गक्खणे वा सिज्झन्तेसु तंसम्पयुत्ता या सद्दहना ओकप्पना सिद्धा, इदं सद्दहनओकप्पनसङ्खातं धम्मजातं सद्धिन्द्रियं सिद्धं, ‘‘तेसु मूलभूतेसु इन्द्रियेसु सिद्धेसु कतमेन इन्द्रियेन कतमो धम्मो सिद्धो’’ति पुच्छितब्बत्ता इमिना अयं सिद्धोति दस्सेन्तो ‘‘तत्थ या सद्धाधिपतेय्या’’तिआदिमाह. तत्थ तत्थाति सत्यादीसु. सद्धाधिपतेय्याति पच्चयभूताय सद्धाय सिद्धो छन्दो अधिपतीति सद्धाधिपति, सद्धाधिपतिना पवत्तेतब्बा चित्तेकग्गताति सद्धाधिपतेय्या. छन्दसमाधीति छन्दं जेट्ठकं कत्वा पवत्तितो समाधि वा छन्दाधिपतिना सम्पयुत्तो पुब्बभागे पवत्तो समाधि वा छन्दसमाधि, पहानं पहानहेतु होतीति योजना कातब्बा. पहानन्ति च पजहति विक्खम्भितकिलेसे एतेन छन्दसमाधिनाति पहानन्ति करणसाधनत्थो गहेतब्बो. पटिसङ्खानबलेनाति परिकम्मबलेन. भावनाबलेनाति महग्गतभावनाबलेन.

‘‘सो ¶ छन्दसमाधि सयं केवलोव पहान’’न्ति वत्तब्बत्ता ‘‘तत्थ ये अस्सासपस्सासा’’तिआदि वुत्तं. तत्थ तत्थाति तस्मिं समाहिते चित्ते चित्तुप्पादे. ‘‘तस्मिं समाहिते चित्तुप्पादे अस्सासा’’तिआदिना अस्सासादिसीसेन अस्सासादिजनका वीरियसङ्खारा गहिता, ते च याव भावनापारिपूरी, ताव पुनप्पुनं सरणतो च सरा, पुनप्पुनं सङ्कप्पतो च सङ्कप्पा. यो पन ‘‘सरसङ्कप्पा, इमे सङ्खारा चा’’ति एवं वुत्तप्पकारो पुरिमको छन्दसमाधि वा किलेसविक्खम्भनताय च तदङ्गप्पहानताय च पहानं पहानहेतुपधानं वा, ‘‘इमे वुत्तप्पकारा सङ्खारादयो किं भावेन्ती’’ति पुच्छितब्बत्ता ‘‘इमे च सङ्खारा’’तिआदि वुत्तं. तत्थ इमे सङ्खारा च तदुभयञ्च छन्दसमाधिप्पधानसङ्खारसमन्नागतं विवेकनिस्सितं विरागनिस्सितं निरोधनिस्सितं वोस्सग्गपरिणामिं इद्धिपादं भावेतीति योजना.

छन्दसमाधिप्पधानसङ्खारसमन्नागतन्ति छन्दो एव अधिपति छन्दाधिपति, छन्दाधिपतिसमाधि. तेन वुत्तं भगवता – ‘‘छन्दं चे, भिक्खवे, भिक्खु अधिपतिं करित्वा लभति समाधि’’न्ति (विभ. ४३२). छन्दहेतुको वा समाधि, छन्दादिको वा समाधि छन्दसमाधि, छन्दाधिपतिस्स पच्चयुप्पन्नो समाधीति वुत्तं होति. पधानभूता सङ्खारा पधानसङ्खारा, पधानसद्देन सङ्खतसङ्खारादयो निवत्तापिता, छन्दसमाधि च पधानसङ्खारा चाति छन्दसमाधिप्पधानसङ्खारा ¶ , तेहि समन्नागतो छन्द…पे… समन्नागतो, तं…पे… गतं. इज्झति समिज्झति निप्पज्जतीति इद्धि, कोट्ठासो, इद्धि एव पादो कोट्ठासोति इद्धिपादो, इद्धिपादचतुत्थो. इज्झन्ति वा ताय सत्ता इद्धा वुद्धा उक्कंसगता होन्तीति इद्धि, पज्जति एतेनाति पादो, इद्धिया पादोति इद्धिपादो. इद्धिपादोति सामञ्ञत्थवसेन वुत्तोपि ‘‘छन्दसमाधिप्पधानसङ्खारसमन्नागत’’न्ति वुत्तत्ता छन्दिद्धिपादोव गहेतब्बो, तं इद्धिपादं तं छन्दिद्धिपादं भावेति वड्ढेतीति अत्थो.

विवेकनिस्सितं विरागनिस्सितन्ति विपस्सनाक्खणे किच्चतो तदङ्गविवेकनिस्सितं, अज्झासयतो निस्सरणविवेकनिस्सितं, मग्गक्खणे पन किच्चतो समुच्छेदविवेकनिस्सितं, आरम्मणतो निस्सरणविवेकनिस्सितं. विरागनिस्सितन्ति विपस्सनाक्खणे किच्चतो तदङ्गविरागनिस्सितं, अज्झासयतो निस्सरणविवेकनिस्सितं, मग्गक्खणे पन किच्चतो समुच्छेदविरागनिस्सितं ¶ , आरम्मणतो निस्सरणविरागनिस्सितं. निरोधनिस्सितन्ति विपस्सनाक्खणे किच्चतो तदङ्गनिरोधनिस्सितं, अज्झासयतो निस्सरणनिरोधनिस्सितं, मग्गक्खणे किच्चतो समुच्छेदनिरोधनिस्सितं, आरम्मणतो निस्सरणनिरोधनिस्सितं. वोस्सग्गपरिणामिन्ति एत्थ परिच्चागवोस्सग्गपक्खन्दनवोस्सग्गवसेन वोस्सग्गो दुविधो. तत्थपि विपस्सनाक्खणे तदङ्गवसेन परिच्चागवोस्सग्गो, निब्बाननिन्नभावेन पक्खन्दनवोस्सग्गो, मग्गक्खणे समुच्छेदवसेन परिच्चागवोस्सग्गो, आरम्मणकरणेन निब्बानपक्खन्दनवोस्सग्गोति विभजित्वा गहेतब्बो. यथावुत्तवोस्सग्गत्थं परिणमति, परिणतं वा परिपचति परिपचनं करोतीति वोस्सग्गपरिणामी, तं वोस्सग्गपरिणामिं.

छन्दिद्धिपादभावनाकारो आचरियेन वुत्तो, अम्हेहि च ञातो, ‘‘कथं वीरियिद्धिपादभावनाकारो अम्हेहि विजानितब्बो’’ति वत्तब्बभावतो ‘‘तत्थ या वीरियाधिपतेय्या’’तिआदि वुत्तं. तस्सत्थो हेट्ठा वुत्तनयानुसारेनेव विञ्ञेय्यो. संखित्तवसेन पन ठपितं पाठं वित्थारतो ठपेस्सामि. कथं? –

‘‘तत्थ या वीरियाधिपतेय्या चित्तेकग्गता, अयं वीरियसमाधि. समाहिते चित्ते किलेसानं विक्खम्भनताय पटिसङ्खानबलेन वा भावनाबलेन वा, इदं पहानं. तत्थ ये अस्सासपस्सासा वितक्कविचारा सञ्ञावेदयिता सरसङ्कप्पा, इमे सङ्खारा. इति पुरिमको च वीरियसमाधि, किलेसविक्खम्भनताय च पहानं इमे च सङ्खारा, तदुभयं वीरियसमाधिप्पधानसङ्खारसमन्नागतं ¶ इद्धिपादं भावेति विवेकनिस्सितं विरागनिस्सितं निरोधनिस्सितं वोस्सग्गपरिणामिं.

‘‘तत्थ या चित्ताधिपतेय्या चित्तेकग्गता, अयं चित्तसमाधि. समाहिते चित्ते किलेसानं विक्खम्भनताय पटिसङ्खानबलेन वा भावनाबलेन वा, इदं पहानं. तत्थ ये अस्सासपस्सासा वितक्कविचारा सञ्ञावेदयिता सरसङ्कप्पा, इमे सङ्खारा. इति पुरिमको च चित्तसमाधि, किलेसविक्खम्भनताय च पहानं इमे च सङ्खारा, तदुभयं चित्तसमाधिप्पधानसङ्खारसमन्नागतं इद्धिपादं भावेति विवेकनिस्सितं विरागनिस्सितं निरोधनिस्सितं वोस्सग्गपरिणामिं.

‘‘तत्थ ¶ या वीमंसाधिपतेय्या चित्तेकग्गता, अयं वीमंसासमाधि, समाहिते चित्ते किलेसानं विक्खम्भनताय पटिसङ्खानबलेन वा भावनाबलेन वा, इदं पहानं. तत्थ ये अस्सासपस्सासा वितक्कविचारा सञ्ञावेदयिता सरसङ्कप्पा, इमे सङ्खारा. इति पुरिमको च वीमंसासमाधि किलेसविक्खम्भनताय च पहानं इमे च सङ्खारा, तदुभयं वीमंसासमाधिप्पधानसङ्खारसमन्नागतं इद्धिपादं भावेति विवेकनिस्सितं विरागनिस्सितं निरोधनिस्सितं वोस्सग्गपरिणामि’’न्ति.

अयं पन विसेसो – वीरियसमाधीति वीरियं जेट्ठकं कत्वा पवत्तितो समाधि वा वीरियाधिपतिना सम्पयुत्तो पुब्बभागे पवत्तो समाधि वा वीरियसमाधि. चित्तसमाधीति चित्तं जेट्ठकं कत्वा पवत्तितो समाधि वा चित्ताधिपतिना सम्पयुत्तो पुब्बभागे पवत्तो समाधि वा चित्तसमाधि. वीमंसासमाधीति वीमंसं जेट्ठकं कत्वा पवत्तितो समाधि वा वीमंसाधिपतिना सम्पयुत्तो पुब्बभागे पवत्तो समाधि वा वीमंसासमाधीति.

सत्तिबलानुरूपेनेत्थ सङ्खेपवण्णना कता, गम्भीरञाणेहि पन अट्ठकथाटीकानुरूपेन वित्थारतो वा गम्भीरतो वा विभजित्वा गहेतब्बा.

१४. ‘‘छन्दसमाधि वीरियसमाधि चित्तसमाधि वीमंसासमाधी’’ति वुत्तो, ‘‘एवं सति वीमंसासमाधियेव ञाणमूलको ञाणपुब्बङ्गमो ञाणानुपरिवत्ति भवेय्य, अञ्ञे तयो समाधयो अञ्ञाणमूलका अञ्ञाणपुब्बङ्गमा अञ्ञाणपवत्तियो भवेय्यु’’न्ति वत्तब्बत्ता सब्बे समाधयो ञाणमूलकादयोयेवाति दस्सेतुं ‘‘सब्बो समाधि ञाणमूलको’’तिआदि वुत्तं. तत्थ सब्बो समाधीति ¶ छन्दसमाधि, वीरियसमाधि, चित्तसमाधि, वीमंसासमाधीति चतुब्बिधो समाधि. ञाणमूलकोति एकावज्जनवीथिनानावज्जनवीथीसु पवत्तं उपचारञाणमूलको. ञाणपुब्बङ्गमोति अधिगमञाणं पुब्बङ्गमं अस्साति ञाणपुब्बङ्गमो. ञाणानुपरिवत्तीति पच्चवेक्खणञाणं अनुपरिवत्ति अस्साति ञाणानुपरिवत्ति. अथ वा नानावज्जनूपचारञाणं वा पटिसन्धिञाणं वा मूलं अस्साति ञाणमूलको, उपचारञाणं पुब्बङ्गमं अस्साति ञाणपुब्बङ्गमो, अप्पनाञाणं अनुपरिवत्ति अस्साति ञाणानुपरिवत्ति ¶ . सब्बं वा उपचारञाणं मूलं अस्साति ञाणमूलको. अप्पनाञाणं पुब्बङ्गमं अस्साति ञाणपुब्बङ्गमो. अभिञ्ञाञाणं अनुपरिवत्ति अस्साति ञाणानुपरिवत्ति, अनुपरिवत्तनं वा अनुपरिवत्ति, ञाणस्स अनुपरिवत्ति ञाणानुपरिवत्ति, ञाणानुपरिवत्ति अस्साति ञाणानुपरिवत्ति. ञाणं पन पुब्बे वुत्तप्पकारमेव.

यथा पुरे तथा पच्छाति यथा छन्दसमाधिआदिचतुब्बिधसमाधिस्स पुब्बेनिवासानुस्सतिञाणानुपरिवत्तिभावेन पुरे अतीतासु जातीसु असङ्ख्येय्येसुपि संवट्टविवट्टेसु अत्तनो खन्धपटिबद्धस्स, परेसं खन्धपटिबद्धस्स च सुट्ठु पटिविज्झनमेव, न दुप्पटिविज्झनं तथा तथावुत्तसमाधिस्स अनागतंसञाणानुपरिवत्तिभावेन पच्छा अनागतासु जातीसु असङ्ख्येय्येसुपि संवट्टविवट्टेसु अत्तनो खन्धपटिबद्धस्स, परेसं खन्धपटिबद्धस्स च सुट्ठु पटिविज्झनमेव, न दुप्पटिविज्झनन्ति अत्थो दट्ठब्बो. यथा पच्छा तथा पुरेति यथा यथावुत्तसमाधिस्स चेतोपरियञाणानुपरिवत्तिभावेन अनागतेसु सत्तसुयेव दिवसेसु परसत्तानंयेव चित्तस्स सुट्ठु पटिविज्झनमेव, न दुप्पटिविज्झनं, तथा तथावुत्तसमाधिस्स पुरे अतीतेसु सत्तसुयेव दिवसेसु परसत्तानंयेव चित्तस्स सुट्ठु पटिविज्झनमेव, न दुप्पटिविज्झनन्ति अत्थो.

यथा दिवा तथा रत्तिन्ति यथा चक्खुमन्तानं सत्तानं दिवसभागे सूरियालोकेन अन्धकारस्स विद्धंसितत्ता आपाथगतं चक्खुविञ्ञेय्यं रूपं मनोविञ्ञाणेनपि सुविञ्ञेय्यं, तथा रत्तिभागे चतुरङ्गसमन्नागतेपि अन्धकारे वत्तमाने यथावुत्तसमाधिस्स दिब्बचक्खुञाणानुपरिवत्तिभावेन रूपायतनस्स सुट्ठु पटिविज्झनमेव, न दुप्पटिविज्झनं. यथा रत्तिं तथा दिवाति यथा रत्तिभागे चतुरङ्गसमन्नागतेपि अन्धकारे यथावुत्तसमाधिस्स दिब्बचक्खुञाणानुपरिवत्तिभावेन रूपायतनस्स सुट्ठु पटिविज्झनमेव, न दुप्पटिविज्झनं, तथा दिवसभागे सुखुमस्स रूपायतनस्स वा केनचि पाकारादिना तिरोहितस्स रूपायतनस्स वा अतिदूरट्ठाने पवत्तस्स रूपायतनस्स वा यथावुत्तसमाधिस्स दिब्बचक्खुञाणानुपरिवत्तिभावेन सुट्ठु पटिविज्झनमेव, न दुप्पटिविज्झनन्ति अत्थो दट्ठब्बो.

यथा ¶ यथावुत्तसमाधिस्स दिवसभागे दिब्बसोतञाणानुपरिवत्तिभावेन सुखुमस्स सद्दायतनस्स वा केनचि पाकारादिना तिरोहितस्स सद्दायतनस्स ¶ वा अतिदूरट्ठाने पवत्तस्स सद्दायतनस्स वा सुट्ठु पटिविज्झनमेव, न दुप्पटिविज्झनं, तथा रत्तिभागेपि यथावुत्तसमाधिस्स दिब्बसोतञाणानुपरिवत्तिभावेन सुखुमस्स सद्दायतनस्स वा केनचि पाकारादिना तिरोहितस्स सद्दायतनस्स वा अतिदूरट्ठाने पवत्तस्स सद्दायतनस्स वा सुट्ठु पटिविज्झनमेव, न दुप्पटिविज्झनन्ति अयं नयोपि नेतब्बो. तेन वुत्तं अट्ठकथायं –

‘‘यथा पुरेति यथा समाधिस्स पुब्बेनिवासानुस्सतिञाणानुपरिवत्तिभावेना’’तिआदिं वत्वा ‘‘यथा च रूपायतने वुत्तं, तथा समाधिस्स दिब्बसोतञाणानुपरिवत्तिताय सद्दायतने च नेतब्ब’’न्ति (नेत्ति. अट्ठ. १४).

‘‘ञाणमूलकादिसमाधिना पुब्बेनिवासानुस्सतिञाणानुपरिवत्तिभावादिसहितेन किं भावेती’’ति पुच्छितब्बत्ता ‘‘इति विवटेना’’तिआदि वुत्तं. तत्थ इतीति एवं वुत्तप्पकारेन. अपरियोनद्धेनाति नीवरणादिविगमनेन. सप्पभासं चित्तन्ति इद्धिपादसम्पयुत्तं मग्गचित्तं भावेति. इद्धिपादसम्पयुत्ते मग्गचित्ते उप्पज्जमाने हि मग्गचित्तसहभूनि कुसलानि सद्धिन्द्रियवीरियिन्द्रियसतिन्द्रियसमाधिन्द्रियपञ्ञिन्द्रियभूतानि पञ्चिन्द्रियानि उप्पज्जन्ति. मग्गचित्ते निरुज्झमाने अनुप्पज्जनभावेन निरुज्झन्ति एकचित्तक्खणिकत्ता. एवं मग्गविञ्ञाणस्स निरोधा पञ्ञा च सति च निरुज्झतीति योजना.

‘‘कस्स विञ्ञाणस्स निरोधा नामरूपं निरुज्झती’’ति वत्तब्बत्ता ‘‘नामरूपञ्चा’’तिआदि वुत्तं, पटिसन्धिविञ्ञाणस्स निरोधा नामरूपञ्च निरुज्झतीति वुत्तं होति. अथ वा ‘‘विञ्ञाणस्स निरोधा पञ्ञा च सति चाति वुत्तानि पञ्चिन्द्रियानि एवं निरुज्झन्ती’’ति वत्तब्बत्ता नामरूपञ्च निरुज्झति, निरुज्झमानं पन नामरूपं पटिसन्धिविञ्ञाणस्स निरोधा निरुज्झतीति दस्सेतुं ‘‘नामरूपञ्चा’’तिआदि वुत्तं. तत्थ नामरूपञ्चाति मग्गेन तण्हाअविज्जादिके अनुपच्छिन्ने उप्पज्जनारहं वेदनादिक्खन्धत्तयं, भूतुपादारूपञ्च. विञ्ञाणहेतुकन्ति उप्पज्जनारहं पटिसन्धिविञ्ञाणं हेतु अस्स नामरूपस्साति विञ्ञाणहेतुकं. विञ्ञाणपच्चया निब्बत्तन्ति विञ्ञाणेन पच्चयेन निब्बत्तं. तस्साति उप्पज्जनारहस्स पटिसन्धिविञ्ञाणस्स. हेतूति तण्हाअविज्जादिको किलेसो. विञ्ञाणन्ति उप्पज्जनारहं पटिसन्धिविञ्ञाणं. अनाहारन्ति अप्पच्चयं. अनभिनन्दितन्ति कामतण्हादीहि ¶ अनभिनन्दितब्बं. अप्पटिसन्धिकन्ति पुनब्भवाभिसन्दहनरहितं. न्ति तादिसं विञ्ञाणं. अहेतूति ¶ नत्थि हेतुसङ्खातं पटिसन्धिविञ्ञाणं इमस्स नामरूपस्साति अहेतु. अप्पच्चयन्ति सहायविरहेन नत्थि पच्चया सङ्खारा इमस्साति अप्पच्चयं. एवं पटिसन्धिविञ्ञाणस्स निरोधा नामरूपञ्च निरुज्झतीति.

‘‘पञ्ञासतीनञ्चेव नामरूपस्स च वुत्तप्पकारेन निरुज्झनभावो कथं अम्हेहि सद्दहितब्बो’’ति वत्तब्बत्ता ‘‘तेनाह भगवा’’तिआदि वुत्तं. वत्तब्बाकारेन पञ्ञासतीनञ्चेव नामरूपस्स च निरुज्झनभावजाननको भगवा यथानिरुज्झनभावदीपकं ‘‘यमेतं…पे… एत्थेतं उपरुज्झती’’ति गाथावचनं आह. तेन गाथावचनेन तुम्हेहि मया वुत्तो निरुज्झनभावो सद्दहितब्बोयेवाति. एत्थापि पञ्ञासतिनामरूपानं निरुज्झनं अजानन्तेन तत्थ वा संसयन्तेन अजितेन पुच्छितब्बत्ता ‘‘अदिट्ठजोतना पुच्छाति वा दिट्ठसंसन्दना पुच्छाति वा पञ्ञादीनं अनेकत्थत्ता धम्मतो वा अनेकाधिट्ठाना पुच्छाति वा धम्माधिट्ठाना पुच्छा’’ति वा इच्चेवमादिपुच्छाविचयो निद्धारेतब्बो. ‘‘सरूपदस्सनविस्सज्जनन्ति वा अनेकाधिट्ठानविस्सज्जनन्ति वा धम्माधिट्ठानविस्सज्जन’’न्ति वा इच्चेवमादिविस्सज्जनविचयो निद्धारेतब्बो.

एवं सत्ताधिट्ठानादिपुच्छाविस्सज्जनानि चेव धम्माधिट्ठानादिपुच्छाविस्सज्जनानि च विसुं विसुं दस्सेत्वा पुच्छाविचयो चेव विस्सज्जनविचयो च आचरियेन विभत्तो, अम्हेहि च ञातो, ‘‘सत्ताधिट्ठानधम्माधिट्ठानेसु एकतो दस्सितेसु पुच्छाविस्सज्जनेसु कथं पुच्छाविचयो चेव विस्सज्जनविचयो च अम्हेहि विञ्ञातब्बो’’ति पुच्छितब्बत्ता सत्ताधिट्ठानधम्माधिट्ठानं पुच्छं नीहरित्वा तत्थ विचयं विभजन्तो ‘‘ये च सङ्खतधम्मासे’’तिआदिमाह. अट्ठकथायं पन –

‘‘एवं अनुसन्धिपुच्छम्पि दस्सेत्वा हेट्ठा सत्ताधिट्ठाना, धम्माधिट्ठाना च पुच्छा विसुं विसुं दस्सिताति इदानि ता सह दस्सेतुं ‘‘ये च सङ्खतधम्मासे’तिआदि आरद्ध’’न्ति (नेत्ति. अट्ठ. १४) –

वुत्तं. तस्सायं अत्थो – इध सासने ये अरहन्तो सङ्खतधम्मा होन्ति, पुथू बहूयेव सत्त जना सेक्खा सीलादिसिक्खमाना होन्ति, तेसं ¶ अरहन्तावञ्चेव सेक्खानञ्च इरियं पटिपत्तिं में महा पुट्ठो निपको त्वं भगवा पब्रूहि मारिस इति आयस्मा अजितो पुच्छन्तो आहाति.

१५. तस्सं गाथायं ‘‘कित्तकानि पुच्छितानी’’ति वत्तब्बत्ता ‘‘इमानी’’तिआदि वुत्तं. पदत्थानुरूपं पुच्छितब्बत्ता ‘‘इमानि तीणि पदानि पुच्छितानी’’ति वुत्तं. ‘‘ये च ¶ …पे… मारिसा’’ति गाथायं ये पञ्हा पुच्छिता, ते पञ्हा तयो होन्ति, ‘‘किस्स केन कारणेन तयो होन्ती’’ति पुच्छितब्बत्ता ‘‘किस्स…पे… योगेना’’ति वुत्तं. सेक्खा अरिया च असेक्खा अरिया च विपस्सनापुब्बङ्गमं पहानञ्चाति सेखासेखविपस्सनापुब्बङ्गमप्पहानानि, तेसं योगोति सेखा…पे… योगो, तेन सेखा…पे… योगेन. एवं पुच्छाविधिना हि यस्मा ‘‘ये च सङ्खतधम्मासे…पे… मारिसा’’ति गाथमाह, तस्मा तयो पञ्हा होन्तीति दट्ठब्बा.

‘‘ये च सङ्खतधम्मासे’’ति इमिना असेक्खानं अरहत्तं पुच्छति, ‘‘ये च सेक्खा पुथू इधा’’ति इमिना सेक्खासेक्खानं सेक्खसिक्खनं पुच्छति, ‘‘तेसं मे निपको इरियं, पुट्ठो पब्रूहि मारिसा’’ति इमिना सेक्खासेक्खानं विपस्सना पुब्बभागे तदङ्गप्पहानं पुच्छति. ‘‘अदिट्ठजोतना पुच्छाति वा दिट्ठसंसन्दना पुच्छाति वा सत्ताधिट्ठाना पुच्छाति वा अनेकाधिट्ठाना पुच्छा’’ति वा इच्चेवमादिपुच्छाविचयो निद्धारेतब्बो.

सत्तधम्माधिट्ठानं पुच्छं नीहरित्वा पुच्छाविचयो आचरियेन विभत्तो, अम्हेहि च ञातो, ‘‘तस्सं पुच्छायं कतमा विस्सज्जनागाथा’’ति पुच्छितब्बत्ता ‘‘तत्थ विस्सज्जना’’तिआदि आरद्धं. तत्थाति तस्सं गाथायं. ‘‘कामेसु…पे… परिब्बजे’’ति विस्सज्जनागाथा भगवता वुत्ता. कामेसूति कामीयन्तीति कामा, तेसु कामेसु. वत्थुकामेसु किलेसकामेन पण्डितेहि नाभिगिज्झेय्य. मनसा नाविलोसियाति आविलभावकरे ब्यापादवितक्कादयो चेव कायदुच्चरितादयो च धम्मे पजहन्तो पण्डितो मनसा अनाविलो सुप्पसन्नो भवेय्य. कुसलो सब्बधम्मानन्ति सब्बधम्मानं अनिच्चतादिना परितुलितत्ता अनिच्चतादीसु पञ्चसु खन्धेसु कुसलो छेको. सतोति केसादीसु सरतीति सतो. भिक्खूति सङ्खतधम्मे भयादितो इक्खतीति भिक्खु. परिब्बजेति ¶ तदङ्गविक्खम्भनसमुच्छेदप्पहानभावेन किलेसकामवत्थुकामे परि समन्ततो वज्जेय्य.

पुच्छागाथायं ‘‘निपको’’ति पदेन पसंसितेन भगवता विस्सज्जनागाथा वुत्ता, तस्स भगवतो येन अनावरणञाणेन उक्कंसगतेन पक्कभावो दस्सितो, तं अनावरणञाणं ताव कायकम्मादिभेदेहि विभजित्वा दस्सेन्तो ‘‘भगवतो सब्बं कायकम्म’’न्तिआदिमाह. तत्थ अनावरणञाणेन जानित्वा कतं सब्बं कायकम्मं ञाणपुब्बङ्गमं ञाणानुपरिवत्ति. एस नयो सेसेसुपि. अतीते अंसेति अतीतभवे सपरक्खन्धादिके कोट्ठासे अञ्ञाणेन अप्पटिहतं भगवतो ¶ ञाणदस्सनं. अनागते अंसेति अनागतभवे सपरक्खन्धादिके कोट्ठासे. पच्चुप्पन्ने अंसेति पच्चुप्पन्ने भवे सपरक्खन्धादिके कोट्ठासे.

‘‘ञाणदस्सनस्स कतरस्मिं पटिघातो’’ति पुच्छितब्बत्ता पुच्छं ठपेत्वा पटिघातविसयं दस्सेतुं ‘‘को चा’’तिआदि वुत्तं. अथ वा ‘‘पच्चुप्पन्नभवे सपरक्खन्धादिके कोट्ठासे अञ्ञेसम्पि ञाणदस्सनं भवेय्य, तदनुसारेन अतीतानागतकोट्ठासेसुपि कतरस्मिं अञ्ञेसं ञाणदस्सनस्स पटिघातो भवेय्या’’ति पुच्छितब्बत्ता पुच्छं ठपेत्वा पटिघातविसयं नियमेत्वा दस्सेतुं ‘‘को चा’’ति वुत्तं. तत्थ को चाति क्व कतरस्मिं समये अञ्ञेसं ञाणदस्सनस्स पटिघातो भवेय्याति पुच्छि.

अनिच्चे, दुक्खे, अनत्तनिये च अञ्ञेसं अञ्ञाणं यं अदस्सनं अत्थि, अञ्ञाणादस्सनसङ्खातो सभावो ञाणदस्सनस्स पटिघातो भवति, न सपरक्खन्धादिदस्सनमत्तपटिघातो. एतेन अनिच्चतो लक्खणत्तये पवत्तस्स ञाणदस्सनस्स अञ्ञेसं दुरभिसम्भवं, भगवतो च ञाणदस्सनस्स अञ्ञेहि असाधारणतं दस्सेति. भगवतो हि लक्खणत्तयविभावनेन वेनेय्या चतुसच्चप्पटिवेधं लभन्ति. ‘‘भगवतो ञाणदस्सनपटिघाताभावेन अञ्ञेसञ्च ञाणदस्सनस्स पटिघातभावो कतमाय उपमाय अम्हाकं पाकटो’’ति वत्तब्बभावतो उपमाय पाकटं कातुं ‘‘यथा इधा’’तिआदि वुत्तं. तत्थ इध सत्तलोके चक्खुमा पुरिसो आकासे तारकानि पस्सेय्य, गणनसङ्केतेन ¶ ‘‘एत्तकानी’’ति नो च जानेय्य यथा, एवं अञ्ञेसं ञाणदस्सनस्स पटिघातो अयं अञ्ञाणदस्सनसभावो भवति.

भगवतो पन तथा अभावतो केनचि अञ्ञाणेन अदस्सनेन अप्पटिहतं ञाणदस्सनं भवतीति अत्थो दट्ठब्बो. ‘‘भगवतो ञाणदस्सनस्स अप्पटिहतभावो कस्मा अम्हेहि सद्दहितब्बो’’ति पुच्छितब्बत्ता ‘‘अनावरणञाणदस्सना हि बुद्धा भगवन्तो’’ति वुत्तं. ‘‘निपकस्स…पे… भगवतो अनावरणञाणं कायकम्मादिभेदेहि आचरियेन विभजित्वा दस्सितं, अम्हेहि च ञातं, पच्छा गाथाय ‘इरिय’न्ति पदेन पुच्छिता सेक्खासेक्खपटिपदा कथं विजानितब्बा’’ति वत्तब्बत्ता सेक्खासेक्खपटिपदं दस्सेतुं ‘‘तत्थ सेखेना’’तिआदि वुत्तं. तत्थ तत्थाति तस्मिं विस्सज्जने. सेखेनाति सिक्खनसीलेन पुग्गलेन रजनीयेसु रूपारम्मणादीसु धम्मेसु गेधा चित्तं रक्खितब्बं, परियुट्ठानीयेसु आघातवत्थूसु दोसा चित्तं रक्खितब्बं.

‘‘तेसु ¶ गेधदोसेसु कतमं निवारेन्तो भगवा विस्सज्जनगाथायं कतमं पदमाहा’’ति पुच्छितब्बत्ता ‘‘तत्थ या इच्छा’’तिआदि वुत्तं. तत्थ तत्थाति गेधदोसेसु. इच्छाति रागिच्छा. मुच्छाति लोभमोहसहगतमोहमुच्छा. पत्थनाति रागपत्थना. पियायनाति तण्हापियायनाव, न मेत्तापियायना. कीळनाति गेधकीळना. एतानि हि गेधपरियायवचनानि. तं गेधसङ्खातं इच्छादिकं निवारेन्तो भगवा ‘‘कामेसु नाभिगिज्झेय्या’’ति एवं विसुं विसुं पकारेन आह.

परियुट्ठानविघातं दोसं निवारेन्तो भगवा ‘‘मनसानाविलो सिया’’ति एवं विसुं विसुं पकारेन आहाति योजना. गेधदोसानं विसुं विसुं निवारेन्तो भगवा द्वे पदानि आहाति वुत्तं, ‘‘तं केन अत्थेन सद्दहितब्ब’’न्ति वत्तब्बत्ता ‘‘तथा हि सेखो’’तिआदि वुत्तं. रजनीयेसु अभिगिज्झन्तो सेखो अनुप्पन्नं लोभपधानं किलेसञ्च उप्पादेति, उप्पन्नं किलेसञ्च फातिं अभिवड्ढनं करोति, परियुट्ठानीयेसु आविलो सेखो अनुप्पन्नं दोसपधानं किलेसञ्च उप्पादेति, उप्पन्नं किलेसञ्च फातिं वड्ढनं करोति, इति इमिना पटिक्खेपअत्थेन तं मम वचनं सद्दहितब्बन्ति अधिप्पायो.

‘‘किं ¶ पन अनभिगिज्झन्तो, अनाविलो च सेक्खो अगेधदोसनिवारणमेव करोति, उदाहु उत्तरिपि पटिपदं पूरेती’’ति पुच्छितब्बत्ता उत्तरिपि पटिपदं पूरेतियेवाति दस्सेन्तो ‘‘यो पन अनाविलसङ्कप्पो’’तिआदिमाह. तत्थ अनाविलसङ्कप्पोति नत्थि आविलकरा सङ्कप्पा ब्यापादसङ्कप्पविहिंसासङ्कप्पा एतस्साति अनाविलसङ्कप्पो, इच्छादिगेधस्स अभावेन अनभिगिज्झन्तो वायमति कुसलवायामं पवत्तेति. ‘‘कथं वायमती’’ति पुच्छितब्बत्ता ‘‘सो अनुप्पन्नान’’न्तिआदि वुत्तं. तत्थ सोति उपरिभावनामग्गभावत्थाय पटिपज्जमानो सेक्खो. अनुप्पन्नानन्तिआदीनं अत्थो सक्का अट्ठकथावचनेनेव (नेत्ति. अट्ठ. १५-१६) जानितुन्ति न विभत्तो.

१६. येनाति असुभादीनं अनुस्सरणलक्खणेन इन्द्रियेन तण्हामयितवत्थूसु कामतण्हाय सहजातं वितक्कं वारेति, इदं असुभादिअनुस्सरणलक्खणं इन्द्रियं सतिन्द्रियं. येन महग्गतभावप्पत्तेन अविक्खेपेन ब्यापादवितक्कं वारेति, इदं अविक्खेपसङ्खातं इन्द्रियं समाधिन्द्रियं. येन सम्मप्पधानेन विहिंसावितक्कं वारेति, इदं सम्मप्पधानसङ्खातं इन्द्रियं वीरियिन्द्रियं. येन सम्मादिट्ठिसङ्खातेन इन्द्रियेन उप्पन्नुप्पन्ने…पे… नाधिवासेति, इदं सम्मादिट्ठिसङ्खातं इन्द्रियं पञ्ञिन्द्रियं. इमेसु चतूसु इन्द्रियेसु सह उप्पज्जमाना या सद्दहना ओकप्पना ¶ उप्पज्जति, अनाविलभावतो इदं सद्दहनसङ्खातं इन्द्रियं सद्धिन्द्रियं. इमानि सेक्खस्स पञ्चिन्द्रियानि.

एकस्मिंयेव विसये जेट्ठकभावं न पापुणेय्युं, अत्तनो विसये जेट्ठकभावं पापुणितुं अरहन्ति, ‘‘कतमं इन्द्रियं कत्थ विसये जेट्ठकभावं पवत्त’’न्ति पुच्छितब्बभावतो इदं इन्द्रियं इमस्मिं विसये पवत्तन्ति दस्सेन्तो ‘‘तत्थ सद्धिन्द्रियं कत्थ दट्ठब्ब’’न्तिआदिमाह. तत्थ तत्थाति तेसु इन्द्रियेसु चतूसु सोतापत्तियङ्गेसु सद्धिन्द्रियं जेट्ठकभावं पवत्तन्ति दट्ठब्बं. एवं सेसेसुपि योजेतब्बं. किं नु सेक्खो पञ्ञिन्द्रियेव अप्पमत्तो’ति भगवता वुत्तो थोमितो, उदाहु सब्बेहि कुसलेहि धम्मेहीति पुच्छितब्बत्ता सब्बेहि कुसलेहि धम्मेहि पञ्चिन्द्रियपमुखेहि वुत्तो थोमितो होतीति दस्सेतुं ‘‘एवं सेखो’’तिआदि वुत्तं. तत्थ एवं पञ्चिन्द्रियानं निब्बत्तिदस्सनेन सेखो पुग्गलो ¶ सब्बेहि कुसलेहि धम्मेहि अप्पमत्तोति भगवता वुत्तो थोमितो अनाविलताय मनसाति योजना. ‘‘सेक्खस्स अनाविलता केन सद्दहितब्बा’’ति वत्तब्बत्ता ‘‘तेनाह भगवा मनसानाविलो सिया’’ति वुत्तं. भगवता ‘‘मनसानाविलो सिया’’ति वुत्तत्ता सेक्खस्स अनाविलता तुम्हेहि सद्दहितब्बाति.

१७. सेक्खस्स मत्थकप्पत्ता पटिपदा आचरियेन विभत्ता, अम्हेहि च ञाता, ‘‘कथं असेक्खस्स मत्थकप्पत्ता पटिपदा ञातब्बा’’ति वत्तब्बत्ता असेक्खस्स मत्थकप्पत्तं पटिपदं विभजित्वा दस्सेतुं ‘‘कुसलो सब्बधम्मान’’न्तिआदिमाह. तत्थ सब्बधम्मानन्ति सब्बेसु धम्मेसु मत्थकप्पत्ताय पटिपदाय असेक्खो कुसलो छेकतरोति भगवता वुत्तो थोमितो अनाविलताय मनसाति. असेक्खस्स सब्बधम्मेसु यं कोसल्लं दस्सेतुकामो, तस्स कोसल्लस्स विसयभूते सब्बधम्मे ताव पुग्गलाधिट्ठानेन विभजित्वा दस्सेतुं ‘‘लोको नामा’’तिआदिमाह. तत्थ ‘‘सब्बधम्मान’’न्ति इमिना वुत्तधम्मसङ्खातो लोको नाम किलेसलोको, भवलोको, इन्द्रियलोकोति तिविधो होतीति योजना. तत्थ परित्तधम्मट्ठो किलेसजननट्ठेन किलेसो, कुसलादिपवत्तनट्ठेन लोको चाति किलेसलोको. महग्गतधम्मट्ठो भवनट्ठेन भवो, वुत्तनयेन लोको चाति भवलोको. सद्धिन्द्रियादिधम्मट्ठो आधिपच्चट्ठयोगवसेन इन्द्रियभूतो हुत्वा सद्धिन्द्रियादिपत्तनट्ठेन लोको चाति इन्द्रियलोको.

‘‘तीसु लोकेसु कतमेन कतमो समुदागच्छती’’ति पुच्छितब्बत्ता ‘‘तत्था’’तिआदि वुत्तं. ‘‘सद्धादिइन्द्रियानि को निब्बत्तेती’’ति पुच्छितब्बत्ता ‘‘सो इन्द्रियानि निब्बत्तेती’’ति वुत्तं ¶ . तत्थ सोति यो पुग्गलो किलेसलोकसङ्खाते परित्तधम्मे, भवलोकसङ्खाते महग्गतधम्मे च तंतंसम्पादनवसेन ठितो, सो पुग्गलो सद्धिन्द्रियादीनि इन्द्रियानि अत्तसन्ताने निब्बत्तेति.

‘‘इन्द्रियेसु अत्तसन्तानेसु पुनप्पुनं निब्बत्तापनवसेन वुड्ढापियमानेसु का पञ्ञा भवती’’ति पुच्छितब्बत्ता ‘‘इन्द्रियेसू’’तिआदि वुत्तं. तत्थ नेय्यस्साति अभिञ्ञेय्यस्स. परिञ्ञाति रूपारूपधम्मे सलक्खणतो, पच्चयतो ¶ च परिग्गहादिवसेन पवत्तपञ्ञा. ‘‘सा परिञ्ञा कतिविधेन उपपरिक्खितब्बा’’ति पुच्छितब्बत्ता ‘‘सा दुविधेना’’तिआदि वुत्तं. तत्थ सा परिञ्ञा दस्सनपरिञ्ञाय च भावनापरिञ्ञाय च दुविधेन विञ्ञूहि उपपरिक्खित्वा गहेतब्बाति. दस्सनपरिञ्ञायाति च दस्सनमग्गपञ्ञाजनिकाय ञातपरिञ्ञायाति अत्थो गहेतब्बो. तेन अट्ठकथायं वुत्तं ‘‘दस्सनपरिञ्ञाति ञातपरिञ्ञा’’ति (नेत्ति. अट्ठ. १७). भावनापरिञ्ञायाति भावनामग्गपञ्ञाजनिकाय तीरणपरिञ्ञाय सद्धिं पहानपरिञ्ञायाति अत्थो.

‘‘सा दुविधेना’तिआदिना वुत्तो अत्थो अतिसङ्खेपो न सक्का विञ्ञातुं, वित्थारेत्वा कथेही’’ति वत्तब्बत्ता ‘‘यदा ही’’तिआदि वुत्तं. तत्थ यदाति बलवविपस्सनुप्पज्जनकाले. सेखोति सिक्खनसीलताय कल्याणपुथुज्जनो चेव सोतापन्नादिको च. ञेय्यन्ति ञातब्बं रूपादिकं सङ्खारं. परिजानातीति परिग्गहादिञाणेन परिग्गहेत्वा जानाति निब्बिदाञाणसहगतेन. तस्साति कल्याणपुथुज्जनस्स चेव सोतापन्नादिकस्स च. द्वे धम्माति कल्याणपुथुज्जनस्स बलवविपस्सनाधम्मो चेव सोतापन्नादिकस्स च बलवविपस्सनाधम्मो च. यथाक्कमं दस्सनकोसल्लं सोतापत्तिमग्गञाणञ्चेव भावनाकोसल्लं सकदागामिमग्गादिकञ्च सन्ताने पवत्तापनवसेन गच्छन्ति.

‘‘पुब्बे यं ञाणं ‘नेय्यस्स परिञ्ञा’ति वुत्तं, तं ञाणं कतिविधेन वेदितब्ब’’न्ति पुच्छितब्बत्ता ‘‘तं ञाणं पञ्चविधेन वेदितब्बं…पे... सच्छिकिरिया’’ति वुत्तं. ‘‘तासु विपस्सनाभेदेन भिन्नासु पञ्चसु अभिञ्ञादीसु कतमा अभिञ्ञा, कतमा परिञ्ञा, कतमं पहानं, कतमा भावना, कतमा सच्छिकिरिया’’ति पुच्छितब्बत्ता ‘‘तत्थ कतमा’’तिआदि वुत्तं. तत्थ तत्थाति अभिञ्ञादीसु. यं धम्मानं सलक्खणे ञाणन्ति रूपधम्मानं कक्खळादिसलक्खणे, अरूपधम्मानं फुसनादिसलक्खणे आरम्मणकरणवसेन पवत्तं यं ञाणं हेतुफलजाननहेतुजाननसङ्खाता धम्मपटिसम्भिदा चेव हेतुफलजाननसङ्खाता अत्थपटिसम्भिदा च भवति. अयं सलक्खणेन सद्धिं हेतुफलजानना पञ्ञा अभिञ्ञा नाम.

एवन्ति ¶ ¶ वुत्तप्पकारेन. अभिञ्ञाञाणेन अभिजानित्वा. या परिजाननातिआदीसु ‘‘इदं अनवज्जं कुसलं, इदं सावज्जं अकुसलं, इदं अकुसलविपाकजनकं सावज्जं, इदं कुसलविपाकजनकं अनवज्जं, इदं संकिलिट्ठं कण्हं, इदं असंकिलिट्ठं सुक्कं, इदं कुसलं अनवज्जादिकं सेवितब्बं, इदं अकुसलं सावज्जादिकं न सेवितब्ब’’न्ति एवं अनिच्चादितो कलापसम्मसनादिवसेन गहिता सम्मसिता इमे विपस्सनाय आरम्मणभूता सङ्खतधम्मा इदं उदयब्बयञाणादिफलं आनिसंसं अनुक्कमेन निब्बत्तापेन्ति. तन्निब्बत्तविपस्सनाय उप्पज्जनतो उपचारं उप्पादेन्ति, एवं अनुक्कमेन गहितानं पवत्तितानं तेसं उदयब्बयञाणादीनं अयं सच्चानुबोधपटिवेधो अत्थोति परिच्छिन्दित्वा या परिजानना पवत्ता, सा अयं परिजानना परिञ्ञा नामाति योजेत्वा, एवं वुत्तप्पकाराय परिञ्ञापञ्ञाय परिजानित्वा पहातब्बा, भावेतब्बा, सच्छिकातब्बा च तयो धम्मा अवसिट्ठा भवन्ति. ‘‘ये अकुसला, ते पहातब्बा’’ति या परिजानना पञ्ञा पवत्ता, इदं पहानं पहानञाणं. ‘‘ये कुसला, ते भावेतब्बा’’ति या परिजानना पञ्ञा पवत्ता, सा भावनापञ्ञा. ‘‘यं असङ्खतं, इदं सच्छिकिरिय’’न्ति या परिजानना पञ्ञा पवत्ता, सा सच्छिकिरियापञ्ञाति योजेत्वा अट्ठकथाधिप्पायेन अविरुद्धो अत्थो गहेतब्बो.

अभिञ्ञादयो पञ्चविधा पञ्ञा आचरियेन विभत्ता, अम्हेहि च ञाता, ‘‘ताहि परिञ्ञाहि जानन्तो पुग्गलो ‘कि’न्ति वुच्चति थोमीयती’’ति वत्तब्बत्ता ‘‘यो एव’’न्तिआदि वुत्तं. तत्थ यो पुग्गलो एवं वुत्तप्पकारेन जानाति, अयं जानन्तो पुग्गलो पच्चयुप्पन्नेसु धम्मेसु कुसलत्ता छेकत्ता ‘‘अत्थकुसलो’’ति वुच्चति थोमीयति, पच्चयधम्मेसु कुसलत्ता ‘‘धम्मकुसलो’’ति च चतुन्नं एकत्तादीनं नयानं युत्तताय कोविदत्ता ‘‘कल्याणताकुसलो’’ति च फलसमापत्तीसु कोविदत्ता ‘‘फलताकुसलो’’ति च वड्ढीसु कोविदत्ता ‘‘आयकुसलो’’ति च अवड्ढीसु कोविदत्ता ‘‘अपायकुसलो’’ति च अच्चायिके किच्चे वा भये वा उप्पन्ने सति तस्स किच्चस्स, भयस्स वा तिकिच्छनसमत्थे ठानुप्पत्तियकारणे कोविदत्ता ‘‘उपायकुसलो’’ति च महन्तेसु अभिक्कमादीसु सतिसम्पजञ्ञाय सम्पन्नत्ता ‘‘महता कोसल्लेन समन्नागतो’’ति च वुच्चति थोमीयति. ‘‘तस्स ¶ असेक्खस्स अत्थादीसु कुसलभावो कथं सद्दहितब्बो’’ति वत्तब्बत्ता ‘‘तेनाहा’’तिआदि वुत्तं. ‘‘कुसलो सब्बधम्मान’’न्ति वुत्तत्ता सद्दहितब्बोति अधिप्पायो.

‘‘कुसलो ¶ सब्बधम्मान’’न्ति पदस्स अत्थो आचरियेन विभत्तो, अम्हेहि च ञातो, ‘‘सतो भिक्खु परिब्बजे’’ति पदस्स अत्थो कथं अम्हेहि वित्थारतो विञ्ञातो’’ति वत्तब्बत्ता ‘‘सतो भिक्खु परिब्बजे’’तिआदि वुत्तं. अथ वा ‘‘सतो भिक्खु परिब्बजे’’ति भगवता वुत्तं, ‘‘कत्थ पवत्तेन सतिसहितेन ञाणेन सम्पन्नो सतो किमत्थं परिब्बजे’’ति पुच्छितब्बत्ता ‘‘इमेसु पवत्तेन सतिसहितञाणेन सम्पन्नो सतो इममत्थं परिब्बजे’’ति नियमेत्वा दस्सेन्तो ‘‘सतो भिक्खु परिब्बजे’’तिआदिमाह. तत्थ तेनाति यो अभिक्कमादीसु पवत्तेन सतिसहितञाणेन समन्नागतो सतो असेक्खभिक्खु, तेन असेक्खभिक्खुना परिनिट्ठितसिक्खत्ता अञ्ञपयोजनाभावतो दिट्ठधम्मसुखविहारत्थं अभिक्कन्ते…पे… तुण्हीभावेन सतेन सतिसहितेन सम्पजानेन ञाणेन विहातब्बं चतुइरियापथपरिवत्तनसङ्खातं विहरणं पवत्तेतब्बं.

‘‘या सेक्खासेक्खपटिपदा निद्दिट्ठा, इमा सेक्खासेक्खपटिपदा सङ्खेपतो कतिविधा’’ति पुच्छितब्बत्ता इमा पटिपदासङ्खाता चरिया सङ्खेपतो पुग्गलवसेन द्वेति दस्सेतुं ‘‘इमा द्वे चरिया’’तिआदिमाह. तत्थ या चरिया भावेतब्बकुसलादिभेदेन वा अत्थकोसल्लादिभेदेन वा अभिक्कमादीसु सतिसम्पजञ्ञभेदेन वा निद्दिट्ठा, इमा चरिया द्वेति भगवता अनुञ्ञाता अनुजाननवसेन देसिता, विसुद्धानं अरहन्तानं एका चरिया, विसुज्झन्तानं सेक्खानं एका चरियाति पुग्गलवसेन द्वेति दट्ठब्बा.

‘‘असेक्खोयेव कस्मा ‘सतो अभिक्कमती’तिआदिना वुच्चति थोमीयति, कल्याणपुथुज्जनोपि ‘सतो अभिक्कमती’तिआदिना वुच्चति थोमीयती’’ति वत्तब्बत्ता ‘‘कतकिच्चानि ही’’तिआदि वुत्तं. अरहतो इन्द्रियानि कतकिच्चानि, इन्द्रियानं कतकिच्चत्ता यं पुच्छं पुच्छितब्बं, तं सब्बं चतुब्बिधं दुक्खस्स परिञ्ञाभिसमयेन बोज्झितब्बं…पे… निरोधस्स सच्छिकिरियाभिसमयेन बोज्झितब्बं भवे. चतुब्बिधं इदं बोज्झं बोज्झितब्बं यो असेक्खो सतिवेपुल्लप्पत्तत्ता एवं परिञ्ञाभिसमयादिना जानाति, अयं ¶ असेक्खो निप्परियायेन ‘‘रागस्स खयाय, दोसस्स खयाय, मोहस्स खयाय सतो अभिक्कमति, सतो पटिक्कमती’’ति वुच्चति थोमीयति. सेक्खोपि यथावुत्तं बोज्झं बोज्झितब्बं अत्तनो परिञ्ञाभिसमयादिना जानाति, तस्मा ‘‘सतो…पे… मोहस्सा’’ति वुच्चति थोमीयतीति वेदितब्बो. तेन वुत्तं ‘‘के विसुज्झन्ता? सेक्खा’’ति.

‘‘कस्मा सेक्खासेक्खानं सतिसम्पजञ्ञेन अभिक्कमनादिभावो, रागादीनञ्च खयभावो ¶ सद्दहितब्बो’’ति वत्तब्बत्ता वुत्तं ‘‘तेनाह भगवा सतो भिक्खु परिब्बजे’’ति. ‘‘भगवतो सब्बं कायकम्मं ञाणपुब्बङ्गम’न्तिआदिना (नेत्ति. १५) मनापिकेसु कामेसु नाभिगिज्झनभावो, अमनापिकेसु कामेसु मनसा अनाविलभावो, सब्बधम्मेसु कुसलभावो, सतिसम्पजञ्ञेन समन्नागतस्स परिब्बजनभावो आचरियेन निद्दिट्ठो, सो नाभिगिज्झनभावादिको कस्मा अम्हेहि सद्दहितब्बो’’ति पुच्छितब्बत्ता वुत्तं ‘‘तेनाह कामेसु…पे… परिब्बजे’’ति. इमिस्सा गाथायपि पुच्छाविस्सज्जनविचयो पुब्बे एकाधिट्ठानादिधम्माधिट्ठानादिवसेन वुत्तनयानुसारेन वेदितब्बो.

विचयहारविभङ्गे अजितसुत्तं नीहरित्वा पुच्छाविस्सज्जनविचयो आचरियेन विभत्तो, अम्हेहि च ञातो, ‘‘कतमो सुत्तन्तरेसु पुच्छाविस्सज्जनविचयो’’ति पुच्छितब्बत्ता अजितसुत्ते पुच्छाविस्सज्जनविचयनयानुसारेन सुत्तन्तरेसुपि पुच्छाविस्सज्जनानि नीहरित्वा पुच्छाविचयविस्सज्जनविचया योजेतब्बाति दस्सेतुं ‘‘एवं पुच्छितब्बं, एवं विस्सज्जितब्ब’’न्ति वुत्तं. अट्ठकथायं पन –

एत्तावता च महाथेरो विचयहारं विभजन्तो अजितसुत्तवसेन पुच्छाविचयं, विस्सज्जनविचयञ्च दस्सेत्वा इदानि सुत्तन्तरेसुपि पुच्छाविस्सज्जनविचयानं नयं दस्सेन्तो एवं पुच्छितब्बं, एवं विस्सज्जितब्ब’न्ति आहा’’ति (नेत्ति. अट्ठ. १७) –

वुत्तं. तत्थ एवन्ति अजितसुत्ते (सु. नि. १०३८ आदयो; चूळनि. वत्थुगाथा ५७, अजितमाणवपुच्छानिद्देस १ आदयो) वुत्तपुच्छाविचयानुसारेन पुच्छावसेन पवत्तसुत्तं नीहरित्वा पुच्छाविचयो विभजेतब्बो, एवं अजितसुत्ते (सु. नि. १०३८ आदयो; चूळनि. वत्थुगाथा ५७ आदयो, अजितमाणवपुच्छानिद्देस १ आदयो) वुत्तविस्सज्जनविचयानुसारेन सुत्तन्तरेसुपि विस्सज्जनवसेन पवत्तसुत्तं नीहरित्वा विस्सज्जनविचयो विभजेतब्बो.

पुच्छाविस्सज्जनविचया ¶ आचरियेन विभत्ता, अम्हेहि च ञाता, ‘‘कतमो सुत्तअनुगीतिविचयो’’ति पुच्छितब्बत्ता ‘‘सुत्तस्स च अनुगीती’’तिआदि वुत्तं. तत्थ सुत्तस्साति नीहरितसुत्तस्स. अनुगीतीति सुत्तन्तरदेसनासङ्खाता अनुगीति. अत्थतो च ब्यञ्जनतो च समानेतब्बाति तस्सा अनुगीतिया अत्थतो, ब्यञ्जनतो च संवण्णेतब्बसुत्तेन समाना सदिसी कातब्बा, तस्मिं वा संवण्णियमानसुत्ते अनुगीति सुत्तत्थतो, ब्यञ्जनतो च समानेतब्बा ¶ . ‘‘अत्थतो असमाने को नाम दोसो आपज्जेय्या’’ति पुच्छितब्बत्ता अत्थापगतं हि ब्यञ्जनं सम्फप्पलापं भवती’’ति वुत्तं. ‘‘अत्थतो असमाने दोसो वुत्तो, अम्हेहि च ञातो, ब्यञ्जनतो असमाने पन को नाम दोसो आपज्जती’’ति पुच्छितब्बत्ता ‘‘दुन्निक्खित्तस्स पदब्यञ्जनस्स अत्थोपि दुन्नयो भवती’’ति वुत्तं. तस्मा सदोसत्ता अनुगीतिया वा सुत्तेन अत्थब्यञ्जनूपेतं सङ्गायितब्बं.

अनुगीतिविचयो आचरियेन विभत्तो, अम्हेहि च ञातो, ‘‘कतमो सुत्तस्स विचयो’’ति पुच्छितब्बत्ता सुत्तञ्चा’’तिआदि वुत्तं. तत्थ सुत्तञ्चाति निद्धारितसुत्तञ्च. ‘‘इदं निद्धारितसुत्तं नाम भगवता वुत्तं आहच्चवचनं किं, उदाहु सङ्गायन्तेहि वुत्तं अनुसन्धिवचनं कि’’न्ति पविचिनितब्बं, ‘‘इदं निद्धारितसुत्तं नीतत्थं किं, उदाहु नेय्यत्थं कि’’न्ति पविचिनितब्बं, ‘‘इदं निद्धारितसुत्तं संकिलेसभागियं किं, उदाहु वासनाभागियं कि’’न्ति पविचिनितब्बं, ‘‘इदं निद्धारितसुत्तं निब्बेधभागियं किं, उदाहु असेक्खभागियं कि’’न्ति पविचिनितब्बं. एवं पविचिनित्वा यदि आहच्चवचनं भवे, एवं सति ‘‘आहच्चवचन’’न्ति निद्धारेत्वा गहेतब्बं. यदि असेक्खसुत्तं भवे, एवं सति ‘‘असेक्खसुत्त’’न्ति निद्धारेत्वा गहेतब्बं, ञातन्ति अत्थो.

‘‘सुत्तं पविचिनित्वा सुत्तस्स अत्थभूतानि सब्बानि सच्चानि निद्धारेत्वा कत्थ पदेसे पस्सितब्बानी’’ति पुच्छितब्बत्ता पुच्छं ठपेत्वा इमस्मिं पदेसे पस्सितब्बानीति दस्सेतुं ‘‘कुहिं इमस्स सुत्तस्स सब्बानि…पे… परियोसाने’’ति वुत्तं. तत्थ इमस्स सुत्तस्साति यं सुत्तं विचिनितुं निद्धारितं, इमस्स सुत्तस्स चतुसच्चविनिमुत्तस्स सुत्तत्थस्स अभावतो सब्बानि सच्चानि तस्सेव सुत्तस्स आदिमज्झपरियोसाने पस्सितब्बानीति अत्थो.

यथावुत्तं ¶ सुत्तविचयं निगमेन्तो ‘‘एवं सुत्तं पविचेतब्ब’’न्ति आह. ‘‘न यथावुत्तपुच्छादीनं पविचेतब्बभावो अम्हेहि जानितब्बो सद्दहितब्बो’’ति वत्तब्बभावतो ‘‘तेनाह…पे… अनुगीती’’ति वुत्तं. तत्थ तेन यथावुत्तपुच्छादीनं विचेतब्बभावेन आयस्मा महाकच्चानो ‘‘यं पुच्छितञ्च…पे… अनुगीती’’तिआदिकं यं वचनं आह, तेन वचनेन विचेतब्बभावो तुम्हेहि जानितब्बो सद्दहितब्बोवाति वुत्तं होति.

‘‘यथावुत्तप्पकारो च विचयो हारो परिपुण्णो किं, उदाहु अञ्ञोपि निद्धारेत्वा योजेतब्बो अत्थि कि’’न्ति पुच्छितब्बत्ता ‘‘नियुत्तो विचयो हारो’’ति वुत्तं. तत्थ पुच्छाविचयविस्सज्जनविचयपुब्बापरविचयअनुगीतिविचयसुत्तविचया ¶ सरूपतो विभत्ता, तेहि अवसेसो अस्सादादिविचयोपि यथारहं निद्धारेत्वा युत्तो युञ्जितब्बोति अधिप्पायो.

इति विचयहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

३. युत्तिहारविभङ्गविभावना

१८. येन येन संवण्णनाविसेसभूतेन विचयहारविभङ्गेन पदपञ्हादयो विचिता, सो संवण्णनाविसेसभूतो विचयहारविभङ्गो परिपुण्णो, ‘‘कतमो युत्तिहारविभङ्गो’’ति पुच्छितब्बत्ता ‘‘तत्थ कतमो युत्तिहारो’’तिआदि वुत्तं. तत्थ तत्थाति तेसु निद्दिट्ठेसु सोळससु हारेसु कतमो संवण्णनाविसेसो युत्तिहारो युत्तिहारविभङ्गोति पुच्छि. ‘‘सब्बेसं हारान’’न्तिआदिनिद्देसस्स इदानि वुच्चमानो ‘‘अयं युत्तिहारो’’तिआदिको वित्थारसंवण्णनाविसेसो युत्तिहारविभङ्गो नामाति विञ्ञेय्यो. तेन वुत्तं ‘‘तत्थ कतमो युत्तिहारोतिआदि युत्तिहारविभङ्गो’’ति (नेत्ति. अट्ठ. १८). अयं युत्तिहारो किं नाम सुत्तत्थं युत्तायुत्तिवसेन योजयतीति युञ्जितब्बं सुत्तत्थं ¶ पुच्छति. सुत्तत्थो पन दुविधो अतथाकारेन गय्हमानो, तथाकारेन गय्हमानो अत्थोति. तत्थ अतथाकारेन गय्हमानोव अत्थो याथावतो युत्तिनिद्धारणेन योजेतब्बो, इतरो पन भूतकथनमत्तेन योजेतब्बो. यस्मा पनायं युत्तिगवेसना नाम संवण्णना महापदेसेहि विना न सम्भवति, तस्मा युत्तिहारं विभजन्तो तस्स युत्तिहारस्स लक्खणं पठमं उपदिसितुं ‘‘चत्तारो महापदेसा’’तिआदिमाह. तत्थ महापदेसाति महन्ते बुद्धादयो अपदिसित्वा वुत्तानि कारणानि, महन्तानि वा धम्मस्स अपदेसानि पतिट्ठानानि. अपदिसीयतेति अपदेसो, बुद्धो अपदेसो एतस्स कारणस्साति बुद्धापदेसो. सेसेसुपि एसेव नयो नेतब्बो. ‘‘बुद्धस्स सम्मुखा एतं सुत्तं मया सुत’’न्ति वत्वा आभतस्स गन्थस्स सुत्तविनयेहि संसन्दनं धम्मो, असंसन्दनं अधम्मोति विनिच्छयकारणं ¶ महापदेसोति अधिप्पायो. ‘‘बुद्धस्स सम्मुखा मया आभतं, सङ्घस्स सम्मुखा मया आभतं, सम्बहुलत्थेरानं सम्मुखा मया आभतं, एकत्थेरस्स सम्मुखा मया आभत’’न्ति वत्वा आभतस्स गन्थस्स यानि ब्यञ्जनपदअत्थपदानि सन्ति, तानि पदब्यञ्जनानि भगवता देसिते सुत्ते ओतरयितब्बानि अनुप्पवेसितानि, विनये रागादिविनये सन्दस्सयितब्बानि संसन्देतब्बानि. धम्मतायं उपनिक्खिपितब्बानि पक्खिपितब्बानि. यदि सुत्तत्थेन, विनयत्थेन, धम्मताय च अविरुद्धानि होन्ति, एवं सति तव आभतपदब्यञ्जनानि युत्तानीति विनिच्छयन्तेहि वत्वा गहेतब्बानीति अधिप्पायो.

सुत्तविनयधम्मतासु ओतरयितब्बानि सन्दस्सयितब्बानि उपनिक्खिपितब्बानीति आचरियेन वुत्तानि, ‘‘कत्थ सुत्ते, कत्थ विनये, कत्थ धम्मताय’’न्ति वत्तब्बत्ता ‘‘कतमस्मिं सुत्ते’’तिआदि वुत्तं. तत्थ चतूसु अरियसच्चेसूति चतुन्नं अरियसच्चानं दस्सनकेसु सुत्तेसु. रागो विनस्सति वूपसमति एतेन असुभादिनाति रागविनयं, किं तं? असुभादिनिमित्तं, तं अस्स अत्थीति रागविनयो, को सो? असुभादिनिमित्तदस्सनको सुत्तन्तविसेसो. एस नयो दोसविनयोतिआदीसुपि. पटिच्चसमुप्पादो नाम सस्सतदिट्ठिउच्छेददिट्ठिं विवज्जेत्वा एकत्तनयादीनं दीपनेन अविज्जादिसङ्खारादिसभावधम्मानं पच्चयपच्चयुप्पन्नभावदीपकोति वुत्तं ‘‘कतमिस्सं धम्मतायं उपनिक्खिपितब्बानि? पटिच्चसमुप्पादे’’ति.

‘‘सुत्तादीसु ¶ अवतरन्ते सन्दिस्सन्ते अविलोमेन्ते किं न जनेती’’ति वत्तब्बतो ‘‘चतूसू’’तिआदि वुत्तं. तत्थ ‘‘बुद्धादीनं सम्मुखा मया आभत’’न्ति वत्वा आभतगन्थो चतूसु अरियसच्चेसु यदि अवतरति, एवं सति आभतगन्थो आसवे न जनेति. रागादिकिलेसविनये यदि सन्दिस्सति, एवं सति आभतगन्थो आसवे न जनेति. धम्मतञ्च यदि न विलोमेति, एवं सति आभतगन्थो आसवे न जनेतीति अत्थो दट्ठब्बो.

‘‘किमत्थं युत्तिहारविभङ्गे चत्तारो महापदेसा आभता’’ति वत्तब्बत्ता ‘‘चतूहि महापदेसेही’’तिआदिमाह. तत्थ आभतगन्थे यं यं अत्थजातं, यं यं धम्मजातं वा चतूहि महापदेसेहि युज्जति, तं तं अत्थजातं वा तं तं धम्मजातं वा संवण्णेतब्बसुत्ते गहेतब्बं. येन येन कारणेन च चतूहि महापदेसेहि युज्जति, तं तं कारणं संवण्णनावसेन संवण्णेतब्बसुत्ते गहेतब्बं. यथा यथा पकारेन चतूहि महापदेसेहि युज्जति, सो सो पकारो संवण्णनावसेन संवण्णेतब्बसुत्ते गहेतब्बो. एवं गाहणत्थं चत्तारो महापदेसा आभताति अत्थो.

१९. चतूहि ¶ महापदेसेहि युत्तं अविरुद्धं तं तं अत्थजातं गहेतब्बन्ति आचरियेन वुत्तं, ‘‘कत्थ केन युत्तिनिद्धारणं कातब्ब’’न्ति वत्तब्बत्ता ‘‘पञ्हं पुच्छितेना’’तिआदि वुत्तं. पञ्हे पञ्हं पुच्छितेन पुग्गलेन युत्तिनिद्धारणं कातब्बन्ति. तत्थ पञ्हन्ति पञ्हितब्बं सभावधम्मं. पुच्छितेनाति विस्सज्जेतुं समत्थेन पण्डितपुग्गलेन. पञ्हेति पुच्छावसेन पवत्तपाठे. पदानि कति कित्तकानि होन्तीति पदसो पठमं परियोगाहितब्बं युत्तिहारेन विचेतब्बं वीमंसितब्बं. ‘‘कथं विचेतब्ब’’न्ति पुच्छितब्बत्ता ‘‘यदि सब्बानी’’तिआदि वुत्तं. तत्थ सब्बानि पदानीति पुच्छितपाठे निरवसेसानि पदानि एकं समानं अत्थं यदि अभिवदन्ति, एवं सति अत्थवसेन एको पञ्हो. एस नयो सेसेसुपि. तेन वुत्तं ‘‘तदत्थस्सेकस्स ञातुं इच्छितत्ता’’ति (नेत्ति. अट्ठ. १९).

एकन्ति अत्थवसेन एकविधं पञ्हं. उपपरिक्खमानेन पुग्गलेन अञ्ञातब्बं दळ्हं जानितब्बं. ‘‘को आजाननाकारो’’ति पुच्छितब्बत्ता आजाननाकारं दस्सेन्तो ‘‘किं इमे धम्मा’’तिआदिमाह. तत्थ ‘‘ये हि परियत्तिधम्मा ¶ संवण्णेतब्बा, इमे परियत्तिधम्मा नानत्था होन्ति किं, नानाब्यञ्जना होन्ति किं, उदाहु इमेसं परियत्तिधम्मानं एको अत्थो होति, ब्यञ्जनमेव नानं होति कि’’न्ति युत्तितो विचेत्वा अञ्ञातब्बन्ति योजना. ‘‘यथावुत्तो पञ्हो किं भवे’’ति पुच्छितब्बत्ता यथावुत्तं पञ्हं एकदेसं दस्सेतुं ‘‘यथा किं भवे’’ति पुच्छित्वा ‘‘यथा सा’’तिआदिमाह.

तस्सं पुच्छागाथायं – चोरघातकेन मनुस्सेन चोरो अब्भाहतो विय केन धम्मेन सत्तलोको सदा अब्भाहतो, मालुवलताय अत्तनो निस्सितरुक्खो परिवारितो अज्झोत्थटो विय केन धम्मेन सत्तलोको सदा परिवारितो अज्झोत्थटो, विसप्पीतखुरप्पेन सल्लेन ओतिण्णो अनुपविट्ठो विय केन सल्लेन सत्तलोको सदा ओतिण्णो अनुपविट्ठो, किस्स केन कारणेन सत्तलोको सदा धूपायितो सन्तापितोति योजना.

‘‘इमाय पुच्छागाथाय कित्तकानि पदानी’’ति पुच्छितब्बत्ता ‘‘इमानी’’तिआदि वुत्तं. तत्थ पुच्छितानीति पुच्छितत्थानि पदानि चत्तारि होन्ति. ‘‘कित्तका पञ्हा’’ति पुच्छितब्बत्ता ‘‘ते तयो पञ्हा’’ति वुत्तं.

भगवा देवताय हि यस्मा विस्सज्जेति, इति तस्मा विस्सज्जनतो ‘‘तयोपञ्हा’’ति विञ्ञायति. ‘‘कतमा विस्सज्जनगाथा’’ति पुच्छितब्बत्ता –

‘‘मच्चुनाब्भाहतो ¶ लोको, जराय परिवारितो;

तण्हासल्लेन ओतिण्णो, इच्छाधूपायितो सदा’’ति. –

वुत्तं. तस्सं विस्सज्जनगाथायं – चोरघातकेन मनुस्सेन चोरो अब्भाहतो विय मच्चुना सत्तलोको सदा अब्भाहतो, मालुवलताय अत्तनो निस्सितरुक्खो परिवारितो अज्झोत्थटो विय जराय सत्तलोको सदा परिवारितो अज्झोत्थटो, विसप्पीतखुरप्पेन सल्लेन ओतिण्णो अनुपविट्ठो विय तण्हासल्लेन सत्तलोको सदा ओतिण्णो अनुपविट्ठो, इच्छाय सत्तलोको सदा धूपायितो सन्तापितोति योजना.

२०. ‘‘कतमं मच्चु, कतमा जरा’’ति पुच्छितब्बत्ता ‘‘तत्थ जरा’’तिआदि वुत्तं. तत्थ तत्थाति तिस्सं विस्सज्जनगाथायं. दुतियपदे वुत्ता जरा च पठमपदे ¶ वुत्तं मरणञ्च इमानि द्वे सङ्खतस्स खन्धपञ्चकस्स सङ्खतलक्खणानि होन्ति, सङ्खतं खन्धपञ्चकं मुञ्चित्वा विसुं न उपलब्भतीति अत्थो. ‘‘सङ्खतलक्खणानं जरामरणानं कथं भेदो जानितब्बो’’ति वत्तब्बत्ता ‘‘जरायं ठितस्सा’’तिआदि वुत्तं. तत्थ जरायं ठितस्स अञ्ञथत्तन्ति ठितस्स खन्धप्पबन्धस्स यं अञ्ञथत्तं, अयं पाकटजरा नाम, न खणट्ठितिजरा. मरणं वयोति सम्मुतिमरणं चुतियेव होति, न खणिकमरणं, न समुच्छेदमरणं. तेन वुत्तं ‘‘उप्पादो पञ्ञायति, वयो पञ्ञायति, ठितस्स अञ्ञथत्तं पञ्ञायती’’ति (सं. नि. ३.३८; अ. नि. ३.४७; कथा. २१४).

यदि ठितस्सेव मरणं सिया, एवं सति जरामरणानं नानत्तं युत्तं न सिया, अयुत्ते सति ‘‘ते तयो पञ्हा’’ति वचनम्पि अयुत्तमेवाति वत्तब्बतो ‘‘तत्थ जराय चा’’तिआदि वुत्तं. तत्थ तत्थाति तिस्सं विस्सज्जनगाथायं वुत्ताय जराय च वुत्तस्स मरणस्स च अत्थतो नानत्तं युत्तं.

‘‘केन कारणेन युत्तं, कथं कारणेन नानत्तं सम्पटिच्छितब्ब’’न्ति वत्तब्बत्ता ‘‘गब्भगतापि हि मीयन्ती’’ति वुत्तं. जरं अप्पत्ता गब्भगतापि सत्ता हि यस्मा मीयन्ति, तस्मा नानत्तं सम्पटिच्छितब्बं. ‘‘गब्भगतापि जरप्पत्ता भवेय्यु’’न्ति वत्तब्बत्ता ‘‘न च ते जिण्णा भवन्ती’’ति वुत्तं. जरप्पत्तापि अजिण्णत्ता जिण्णजरं अप्पत्ताव मीयन्ति, एवं इधाधिप्पेतस्स जिण्णजराविरहितस्स मरणस्स सम्भवतो अञ्ञा जरा, अञ्ञं मरणन्ति ञातब्बन्ति वुत्तं होति. ‘‘न गब्भगतानंयेव जिण्णजरं अप्पत्तं मरणं अत्थि, अञ्ञेसम्पि अत्थी’’ति वत्तब्बभावतो ¶ ‘‘अत्थि च देवानं मरण’’न्ति वुत्तं. ‘‘देवापि चिरकालसम्भवतो जरं पत्ता भवेय्यु’’न्ति वत्तब्बत्ता ‘‘न च तेसं सरीरानि जीरन्ती’’ति वुत्तं. ‘‘जरामरणानं नानत्ते कारणं एत्तकमेवा’’ति वत्तब्बत्ता अञ्ञम्पि अत्थीति दस्सेतुं ‘‘सक्कते वा’’तिआदि वुत्तं. तत्थ जिण्णजराय पटिकम्मं कातुं सक्कतेव, मरणस्स पन पटिकम्मस्स कातुं न सक्कतेव, इमिनापि कारणेन जरामरणानं नानत्तं सम्पटिच्छितब्बमेवाति अत्थो. ‘‘न सक्कते मरणस्स पटिकम्मं कातु’’न्ति कस्मा वुत्तं, ननु इद्धिपादभावनाय वसीभावे सति सक्का मरणस्सापि पटिकम्मं कातुन्ति चोदनं मनसि कत्वा ‘‘अञ्ञत्रेव इद्धिमन्तानं इद्धिविसया’’ति वुत्तं.

जरामरणानं ¶ अञ्ञमञ्ञं नानाभावो आचरियेन दस्सितो, अम्हेहि च ञातो, ‘‘कथं पन तण्हाय जरामरणेहि नानाभावो’’ति वत्तब्बतो तेहि तण्हाय नानत्तं दस्सेतुं ‘‘यं पनाहा’’तिआदि वुत्तं. तण्हाय अविज्जमानायपि जीरन्तापि मीयन्तापि वीतरागा यस्मा दिस्सन्ति, तस्मा तण्हाय जरामरणेहि नानाभावो सम्पटिच्छितब्बो.

‘‘तण्हाय जीरणभिज्जनलक्खणं अत्थीति तेहि तण्हाय अनञ्ञत्ते को नाम दोसो सिया’’ति वत्तब्बतो दोसं दस्सेतुं ‘‘यदि चा’’तिआदि वुत्तं. जरामरणं यथा येन जीरणभिज्जनलक्खणेन पाकटं, एवं जीरणभिज्जनलक्खणेन तण्हापि पाकटा. यदि च सिया; एवं सन्ते योब्बनट्ठापि सब्बे माणवा विगततण्हा सियुं, न च विगततण्हा, तस्मा नानाभावो सम्पटिच्छितब्बो. ततो अञ्ञोपि दोसो आपज्जेय्याति दस्सेतुं ‘‘यथा च तण्हा दुक्खस्सा’’तिआदि वुत्तं. तत्थ जरामरणानं तण्हाय अनञ्ञत्ते सति तण्हाय भवतण्हाय दुक्खसमुदयो होति, एवं जरामरणम्पि दुक्खसमुदयो सिया. यस्मा न जरामरणं दुक्खसमुदयो, तस्मा जरामरणेहि तण्हाय नानत्तं वेदितब्बं.

तेहि ताय अनञ्ञत्ते सति एवम्पि दोसो आपज्जेय्याति दस्सेतुं ‘‘यथा च तण्हा मग्गवज्झा’’तिआदि वुत्तं. तत्थ तेहि ताय अनञ्ञत्ते सति यथा तण्हा मग्गवज्झा होति, एवं जरामरणम्पि मग्गवज्झं सिया. यथा जरामरणं मग्गवज्झं न होति, एवं तण्हापि मग्गवज्झा न सिया, तथा च न होति पहातब्बापहातब्बभावतो, तस्मापि जरामरणेहि तण्हाय नानत्तं वेदितब्बं.

‘‘यदि ¶ चातिआदिना वुत्ताय युत्तिया उपपत्तिया एव जरामरणेहि तण्हाय अञ्ञत्तं गवेसितब्ब’’न्ति वत्तब्बत्ता अञ्ञेहिपि कारणेहि गवेसितब्बन्ति दस्सेतुं ‘‘इमाय युत्तिया’’तिआदि वुत्तं. तत्थ इमाय युत्तियाति या युत्ति ‘‘यदि चा’’तिआदिना वुत्ताय इमाय युत्तिया उपपत्तिया. अञ्ञमञ्ञेहि कारणेहि अञ्ञेहि अञ्ञेहि कारणभूतेहि उपपत्तीहि जरामरणेहि तण्हाय अञ्ञत्तं गवेसितब्बन्ति अत्थो. ‘‘अञ्ञमञ्ञेहि कारणेहि गवेसितब्ब’’न्ति कस्मा वुत्तं, ननु युत्तिया, अत्थतो च अञ्ञत्तं सन्दिस्सतीति चोदनं मनसि कत्वा ‘‘यदि च सन्दिस्सती’’तिआदिमाह. तत्थ युत्तिसमारुळ्हं अत्थतो च मरणेहि ¶ तण्हाय च अञ्ञत्तं यदि च सन्दिस्सति, ब्यञ्जनतोपि अञ्ञत्तं गवेसितब्बमेवाति अत्थो.

‘‘कथं ब्यञ्जनतो अञ्ञत्तं गवेसितब्ब’’न्ति वत्तब्बत्ता ‘‘सल्लोति वा’’तिआदि वुत्तं. तत्थ ‘‘सल्लो’’ति वा ‘‘धूपायन’’न्ति वा द्वीहि ब्यञ्जनेहि वुच्चमानानं इमेसं इच्छातण्हासङ्खातानं धम्मानं अत्थतो एकत्तं समानत्तं युज्जति, न अञ्ञत्तं. ‘‘सल्लो’’ति वा ‘‘धूपायन’’न्ति वा द्वीहि ब्यञ्जनेहि अवुच्चमानानं जरामरणानं तण्हाय एकत्तं न युज्जति. तमेवत्थं विवरितुं ‘‘न ही’’तिआदि वुत्तं. तत्थ इच्छाय च तण्हाय च अत्थतो अञ्ञत्तं न युज्जति, एकत्तमेव युज्जतीति योजना. इच्छाय च तण्हाय च जीरणभिज्जनसम्भवतो जरामरणेहि तण्हाय एकत्तं सिया, ‘‘कस्मा अञ्ञत्तं युत्त’’न्ति वत्तब्बतो ‘‘तण्हाय अधिप्पाये’’तिआदि वुत्तं. तत्थ तण्हाय अधिप्पाये अपरिपूरमाने नवसु आघातवत्थूसु कोधो च उप्पज्जति, उपनाहो च उप्पज्जति. जरामरणेसु अपरिपूरमानेसु नवसु आघातवत्थूसु कोधो च न उप्पज्जति, उपनाहो च न उप्पज्जति. इति इमाय युत्तिया जराय च मरणस्स च तण्हाय च अत्थतो अञ्ञत्तं युज्जतियेवाति दट्ठब्बं.

यदि इच्छा तण्हाय अत्थतो एकत्तं युत्तं, एवं सति कस्मा भगवता ‘‘मच्चुनाब्भाहतो लोको’’तिआदिगाथायं ‘‘तण्हासल्लेन ओतिण्णो, इच्छाधूपायितो सदा’’ति द्विधा वुत्ताति चोदनं परिहरन्तो ‘‘यं पनिदं भगवता’’तिआदिमाह. तत्थ ‘‘इच्छा’’तिपि ‘‘तण्हा’’तिपि द्वीहि नामेहि यं पनिदं अभिलपितं यं पनिदं अभिलपनं कतं, इदं अभिलपनं भगवता बाहिरानं इच्छितब्बतसितब्बानं वत्थूनं रूपादिआरम्मणानं भेदानं वसेन ‘‘इच्छा’’तिपि ‘‘तण्हा’’तिपि द्वीहि नामेहि अभिलपितं अभिलपनवसेन कतन्ति एकत्तं युत्तमेव, न नानत्तन्ति अत्थो दट्ठब्बो.

‘‘नामवसेन ¶ द्विधा वुत्तानं इच्छातण्हादीनं केन एकत्तं युत्तन्ति सद्दहितब्ब’’न्ति वत्तब्बत्ता ‘‘सब्बाही’’तिआदि वुत्तं. तत्थ नानानामवसेन पभेदा सब्बा इच्छादिका तण्हा अज्झोसानलक्खणेन एकलक्खणा हि यस्मा युत्ता, तस्मा नामवसेन भिन्नानम्पि एकलक्खणेन एकत्तं युत्तन्ति सद्दहितब्बन्ति दट्ठब्बं. ‘‘किमिव युत्त’’न्ति पुच्छितब्बत्ता ‘‘यथा सब्बो’’तिआदि वुत्तं. तत्थ कट्ठग्गिआदिवसेन अनेको सब्बो अग्गि ¶ उण्हत्तलक्खणेन एकलक्खणो यथा, एवं अज्झोसानलक्खणेन एकलक्खणाति योजना. सब्बस्स अग्गिनो उपादानवसेन अनेकानि नामानि सरूपतो दस्सेतुं ‘‘अपिचा’’तिआदि वुत्तं. तस्सत्थो पाकटो. आरम्मणवसेन तण्हा अञ्ञेहि अञ्ञेहि नामेहि भगवता अभिलपिता, उपादानवसेन अग्गि अञ्ञेहि अञ्ञेहि नामेहि अभिलपितोति योजना कातब्बा.

‘‘विस्सज्जनगाथायं आगतनामेहि एव तण्हा अभिलपिता’’ति पुच्छितब्बत्ता अनेकेहि नामेहि अभिलपिताति दस्सेतुं ‘‘इच्छाइतिपी’’तिआदि वुत्तं. तत्थ इच्छितब्बानि अत्थानि रूपादीनि आरम्मणानि सत्ता इच्छन्ति एतायाति इच्छा. तसन्ति एतायाति तण्हा. सल्लति पविसति विसप्पीतं सल्लं वियाति सल्ला, सन्तापं लाति आददातीति वा सल्ला, सन्तापं लाति पवत्तेतीति वा सल्ला. धूपायति सन्तापेति परिदहतीति धूपायना. सरति आकड्ढति अवहरति सीघसोता सरिता वियाति सरिता, सरति सल्लतीति वा सरिता. विसरतीति विसत्तिका. पीतिवसेन सिनेहतीति सिनेहो. तासु तासु गतीसु किलमथं उप्पादेतीति किलमथो. सत्ता रूपादिआरम्मणानि मञ्ञन्ति एतायाति मञ्ञना. भवं बन्धतीति बन्धो. आसीयते पत्थीयतेति आसा. आसियति पत्थेतीति वा आसा. पिपासीयतेति पिपासा, आरम्मणरसं पिपासतीति वा पिपासा. अभिनन्दीयतेति अभिनन्दना, अभिनन्दतीति वा अभिनन्दना. वित्थारतो अट्ठकथावसेन (नेत्ति. अट्ठ. २०) वेदितब्बो.

‘‘तण्हाय इच्छादिप्पकारवसेन आलपितभावो केन सद्दहितब्बो’’ति वत्तब्बत्ता ‘‘यथा च वेवचने’’तिआदि वुत्तं. वेवचनहारविभङ्गे ‘‘आसा च पीहा…पे… वेवचन’’न्ति (नेत्ति. ३७) या तण्हा यथा येन पकारेन वुत्ता, तथा तेन पकारेन वुत्ताय तण्हाय इच्छादिप्पकारवसेन आलपितभावो सद्दहितब्बो. ‘‘वेवचनविभङ्गे आचरियेन वुत्तोपि भगवता अवुत्ते केन सद्दहितब्बो’’ति वत्तब्बत्ता ‘‘यथाह भगवा’’तिआदि वुत्तं. यथा येन पकारेन भगवा ‘‘रूपे तिस्सा’’तिआदिकं यं वचनमाह, तथा तेन पकारेन वुत्तेन तेन वचनेन सद्दहितब्बो वाति. एवं युज्जतीति एवं वुत्तनयेन इच्छातण्हानं अत्थतो एकत्ता ¶ , जराय ¶ च मरणस्स च तण्हाय च अत्थतो अञ्ञत्ता च ‘‘तयो पञ्हा’’ति यं वचनं वुत्तं, तं वचनं युज्जतीति अत्थो गहेतब्बो.

२१. ‘‘केनस्सुब्भाहतो लोकोतिआदिगाथाय तयो पञ्हा वुत्ता’’ति पञ्हत्तयभावे युत्ति आचरियेन विभत्ता, अम्हेहि च ञाता. ‘‘ततो अञ्ञेहि पकारेहि युत्ति कथं ञातब्बा’’ति वत्तब्बभावतो अञ्ञेहि पकारेहिपि युत्तिगवेसनं दस्सेन्तो ‘‘सब्बो दुक्खूपचारो’’तिआदिमाह. तत्थ सब्बो दुक्खूपचारो कामतण्हासङ्खारमूलकोति युज्जति, सब्बो निब्बिदूपचारो कामतण्हापरिक्खारमूलकोति न युज्जति. वचनत्थतो पन दुक्खस्स उपचारो पवत्तीति दुक्खूपचारो. कामतण्हापच्चया पवत्तो सङ्खारो मूलं एतस्साति कामतण्हासङ्खारमूलको. निब्बिदाय उपचारो पवत्तीति निब्बिदूपचारो. कामतण्हाय परिक्खारभूतो वत्थुकामो मूलं एतस्साति कामतण्हापरिक्खारमूलकोति. तत्थ अनभिरतिसङ्खाता उक्कण्ठा निब्बिदा कामतण्हापरिक्खारमूलिका युज्जति, ञाणनिब्बिदा कामतण्हापरिक्खारमूलिका न युज्जति, तस्मा सब्बो निब्बिदूपचारो कामतण्हापरिक्खारमूलकोति न पन युज्जतीति वुत्तं.

‘‘पञ्हत्तयभावे चेव दुक्खूपचारनिब्बिदूपचारे च या युत्ति आचरियेन विभत्ता, साव युत्ति सल्लक्खेतब्बा किं, उदाहु इमाय युत्तिया अञ्ञापि युत्ति गवेसितब्बा कि’’न्ति वत्तब्बतो नयं दस्सेतुं ‘‘इमाया’’तिआदिमाह. इदं वुत्तं होति – पञ्हत्तयभावे चेव दुक्खूपचारनिब्बिदूपचारे च या युत्ति मया विभत्ता, इमाय युत्तिया अनुसारेन अञ्ञमञ्ञेहि कारणेहि तेसु तेसु पाळिप्पदेसेसु युत्तिपि गवेसितब्बाति.

‘‘इदं नयदस्सनं संखित्तं, न सक्का वित्थारतो गवेसितु’’न्ति वत्तब्बतो तं नयदस्सनं वित्थारतो विभजित्वा दस्सेतुं ‘‘यथा हि भगवा’’तिआदि आरद्धं. असुभस्स जिगुच्छनीयभावतो रागुप्पादो न युत्तो, तस्मा रागचरितस्स पुग्गलस्स असुभदेसना रागविनयाय युत्ता. मेत्ताय दोसपटिपक्खत्ता दोसचरितस्स पुग्गलस्स मेत्तादेसना दोसविनयाय युत्ता. पटिच्चसमुप्पादस्स पञ्ञाविसयत्ता मोहचरितस्स पुग्गलस्स पटिच्चसमुप्पाददेसना मोहविनयाय युत्ता. ‘‘रागचरितस्सापि मेत्तादिदेसना युज्जेय्य सब्बसत्तसाधारणत्ता’’ति वत्तब्बत्ता ‘‘यदि ¶ हि भगवा’’तिआदि वुत्तं. तिब्बकिलेसस्स रागचरितस्स अधिप्पेतत्ता तादिसस्स पुग्गलस्स मेत्तं चेतोविमुत्तिं यदि देसेय्य, एवं सति मेत्तावसेनपि रागुप्पज्जनतो देसना न युज्जति. सुखं पटिपदं वा यदि देसेय्य, एवं सति रागचरितस्स ¶ दुक्खापटिपदायुज्जनतो देसना न युज्जति. विपस्सनापुब्बङ्गमं पहानं वा यदिपि देसेय्य, एवं सति रागचरितस्स असुभानुपस्सनं वज्जेत्वा विपस्सनापुब्बङ्गमस्स पहानस्स दुक्करतो देसना न युज्जतीति योजना.

‘‘भगवा रागचरितस्सा’’तिआदिना निरवसेसवसेन युत्ति न विभत्ता, नयदस्सनमेवाति यो नयो दस्सितो, तेन नयेन अञ्ञापि गवेसितब्बाति दस्सेतुं ‘‘एवं यं किञ्ची’’तिआदि वुत्तं. रागस्स यं किञ्चि अनुलोमप्पहानं, दोसस्स यं किञ्चि अनुलोमप्पहानं, मोहस्स यं किञ्चि अनुलोमप्पहानं देसितं, तं सब्बं अनुलोमप्पहानं यत्तका पाळिप्पदेसा ञाणस्स भूमि, तत्तकेसु विचयेन हारेन विचिनित्वा युत्तिहारेन योजेतब्बन्ति योजना.

‘‘रागादिप्पहानवसेन युत्ति गवेसितब्बा’’ति वत्तब्बभावतो अञ्ञेहिपि मेत्तादिब्रह्मविहारफलसमापत्तिनवानुपुब्बसमापत्तिवसीभावेहि विभजित्वा युत्तिगवेसनं दस्सेतुं ‘‘मेत्ताविहारिस्सा’’तिआदि आरद्धं. तत्थ मेत्ताविहारिस्स मेत्ताविहारलाभिनो सतो संविज्जमानस्स पुग्गलस्स मेत्ताय ब्यापादपटिपक्खत्ता ब्यापादो चित्तं परियादाय ठस्सतीति देसना न युज्जतीति च, मेत्ताविहारिस्स सतो ब्यापादो पहानं अब्भत्थं गच्छतीति देसना युज्जति. करुणाविहारिस्स करुणाविहारलाभिनो सतो संविज्जमानस्स पुग्गलस्स करुणाय विहेसाय पटिपक्खत्ता विहेसा चित्तं परियादाय ठस्सतीति देसना न युज्जति, करुणाविहारिस्स सतो विहेसा पहानं अब्भत्थं गच्छतीति देसना युज्जति. मुदिताविहारिस्स मुदिताविहारलाभिनो सतो संविज्जमानस्स पुग्गलस्स मुदिताय अरतिया पटिपक्खत्ता अरति चित्तं परियादाय ठस्सतीति देसना न युज्जति, मुदिताविहारिस्स सतो अरति पहानं अब्भत्थं गच्छतीति देसना युज्जति. उपेक्खाविहारिस्स उपेक्खाविहारलाभिनो सतो संविज्जमानस्स पुग्गलस्स उपेक्खाय रागस्स पटिपक्खत्ता रागो चित्तं परियादाय ठस्सतीति देसना न युज्जति, उपेक्खाविहारिस्स सतो रागो पहानं अब्भत्थं गच्छतीति देसना युज्जति.

अनिमित्तविहारिस्स ¶ अनिच्चानुपस्सनामुखेन पटिलद्धफलसमापत्तिविहारलाभिनो सतो संविज्जमानस्स पुग्गलस्स निमित्तानुसारि तेन तेनेव सङ्खारनिमित्तानुसारेनेव निच्चादीसु पहीनेन निमित्तेन विञ्ञाणं पवत्ततीति देसना न युज्जति, अनिमित्तानुपस्सनाय निच्चादिविपल्लासपटिपक्खत्ता अनिमित्तविहारिस्स सतो निमित्तं पहानं अब्भत्थं गच्छतीति देसना ¶ युज्जति. ‘‘अस्मी’’ति मञ्ञितं खन्धपञ्चकं अत्तविगतं ‘‘अयं खन्धपञ्चको अहं अस्मी’’ति न समनुपस्सामि, अथ च पन असमनुपस्सने सतिपि ‘‘मे किं अस्मी’’ति ‘‘कथं अस्मी’’ति विचिकिच्छा कथंकथासल्लं चित्तं परियादाय ठस्सतीति देसना न युज्जति, विचिकिच्छाय पहानेकट्ठभावतो ‘‘अयं खन्धपञ्चको अहं अस्मी’’ति असमनुपस्सन्तस्स विचिकिच्छा कथंकथासल्लं पहानं अब्भत्थं गच्छतीति देसना युज्जति.

‘‘फलसमापत्तिवसेनेव युत्ति गवेसितब्बा कि’’न्ति वत्तब्बत्ता झानसमापत्तिवसेनपि युत्ति गवेसितब्बाति दस्सेतुं ‘‘यथा वा पन पठमं झान’’न्तिआदि आरद्धं. अथ वा ‘‘फलसमापत्तिविहारिस्सेव युत्ति गवेसितब्बा कि’’न्ति वत्तब्बत्ता झानसमापत्तिवसेनपि युत्ति गवेसितब्बाति दस्सेतुं ‘‘यथा वा पन पठमं झान’’न्तिआदि आरद्धं. तत्थ यथा पठमं झानं समापन्नस्स फलसमापत्तिविहारिस्स युत्ति गवेसितब्बा, एवं झानसमापत्तिविहारिस्सपि युत्ति गवेसितब्बा. कथं? पठमं झानं समापन्नस्स पठमज्झानसमङ्गिनो सतो संविज्जमानस्स पुग्गलस्स नीवरणविक्खम्भनतो कामरागब्यापादा विसेसाय दुतियज्झानाय संवत्तन्तीति देसना न युज्जति, कामरागब्यापादा झानस्स हानाय संवत्तन्तीति देसना युज्जति. वितक्कसहगता सञ्ञामनसिकारा उपचारधम्मेन सह दुतियज्झानधम्मा झानस्स हानाय संवत्तन्तीति देसना न युज्जति, वितक्कसहगता सञ्ञामनसिकारा विसेसाय उपरिझानत्थाय संवत्तन्तीति देसना युज्जति.

दुतियं झानं समापन्नस्स सतो संविज्जमानस्स पुग्गलस्स वितक्कविचारसहगता वा सञ्ञामनसिकारा उपचारधम्मेन सह पठमज्झानधम्मा विसेसाय उपरिझानत्थाय संवत्तन्तीति देसना न युज्जति, वितक्कविचारसहगता सञ्ञामनसिकारा अवितक्कझानस्स हानाय संवत्तन्तीति देसना युज्जति. उपेक्खासहगता वा सञ्ञामनसिकारा उपचारधम्मेन सह चतुत्थज्झानधम्मा झानस्स हानाय संवत्तन्तीति देसना न युज्जति, उपेक्खासहगता ¶ सञ्ञामनसिकारा विसेसाय उपरिझानत्थाय संवत्तन्तीति देसना युज्जति. सेसेसुपि अत्थानुरूपं योजना कातब्बा. यथावुत्तसमापत्तीसु वसीभावेन परिचितं कल्लतापरिचितं चित्तं नाम.

एत्तकमेव युत्तिगवेसनं न कातब्बं, नवविधसुत्तन्तेसु यथालद्धयुत्तिगवेसनम्पि कातब्बन्ति दस्सेतुं ‘‘एवं सब्बे’’तिआदि वुत्तं. ‘‘सब्बेसं हारानं यथावुत्तभूमिगोचरानं विचयहारेन विचिनित्वा युत्तिहारेन योजेतब्बभावो केन सद्दहितब्बो’’ति वत्तब्बत्ता ‘‘तेनाहा’’तिआदि ¶ वुत्तं. तत्थ तेन योजेतब्बभावेन आयस्मा महाकच्चानो ‘‘सब्बेस’’न्तिआदिकं यं वचनं आह, तेन वचनेन सद्दहितब्बोति वुत्तं होति.

इति युत्तिहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

४. पदट्ठानहारविभङ्गविभावना

२२. येन येन संवण्णनाविसेसभूतेन युत्तिहारविभङ्गभूतेन पञ्हाविस्सज्जनादीनं युत्तायुत्तभावो विभत्तो, सो संवण्णनाविसेसभूतो युत्तिहारविभङ्गो परिपुण्णो, ‘‘कतमो पदट्ठानहारविभङ्गो’’ति पुच्छितब्बत्ता ‘‘तत्थ कतमो पदट्ठानो हारो’’तिआदि आरद्धं. तत्थ तत्थाति तेसु निद्दिट्ठेसु सोळससु देसनाहारादीसु हारेसु कतमो संवण्णनाविसेसो पदट्ठानो हारो पदट्ठानहारविभङ्गोति पुच्छति. ‘‘धम्मं देसेसि जिनो’’तिआदिनिद्देसस्स इदानि मया वुच्चमानो ‘‘अयं पदट्ठानो हारो’’तिआदिको वित्थारसंवण्णनाविसेसो पदट्ठानहारविभङ्गोति विञ्ञेय्यो. तेन वुत्तं – ‘‘तत्थ कतमो पदट्ठानो हारोतिआदि पदट्ठानहारविभङ्गो’’ति (नेत्ति. अट्ठ. २२). ‘‘अयं इदानि वुच्चमानो वित्थारभूतो पदट्ठानो हारो पिटकत्तये देसितेसु धम्मेसु ¶ किं नाम धम्मं देसयति संवण्णेती’’ति पुच्छं ठपेत्वा ‘‘इदं आसन्नकारणं इमस्स आसन्नफलस्स पदट्ठान’’न्ति नियमेत्वा विभजितुं ‘‘अयं पदट्ठानो’’तिआदि वुत्तं. तस्सत्थो – सब्बेसु विञ्ञेय्यधम्मेसु याथावतो असम्पटिवेधो लक्खणं एतिस्सा अविज्जायाति सब्बधम्मयाथावअसम्पटिवेधलक्खणा, अविज्जा, तस्सा अविज्जाय असुभे ‘‘सुभ’’न्तिआदिविपल्लासा पदट्ठानं आसन्नकारणं. विपल्लासे सति अविज्जा वत्तति उपरूपरि जायति न हायति, तस्मा विपल्लासा अविज्जाय पदट्ठानं आसन्नकारणं भवन्ति. अविज्जाय वट्टमूलकत्ता तं आदिं कत्वा पदट्ठानं विभत्तन्ति दट्ठब्बं.

तण्हायपि वट्टमूलकत्ता तदनन्तरं तण्हाय पदट्ठानं विभजितुं ‘‘अज्झोसानलक्खणा’’तिआदि ¶ वुत्तं. तत्थ पियरूपं सातरूपन्ति पियसभावं सातसभावं चक्खादिधम्मजातं. पियनीयसातनीये चक्खादिके सति तण्हा वत्तति उपरूपरि जायति, तस्मा पियरूपं सातरूपं तण्हाय पदट्ठानं आसन्नकारणं भवति.

अदिन्नादाने सति लोभो वत्तति, तस्मा अदिन्नादानं लोभस्स पदट्ठानं भवति. अदिन्नादानञ्हि एकवारं उप्पन्नम्पि अनादीनवदस्सनतो लोभस्स आसन्नकारणं भवत्वेव.

केसादीसु असुभेसु पवत्तायपि सुभसञ्ञाय नीलादिवण्णदीघादिसण्ठानहसनादिब्यञ्जनग्गहणलक्खणत्ता चक्खुन्द्रियादीनं असंवरो सुभसञ्ञाय पदट्ठानं भवति.

दुक्खदुक्खादीसु पवत्तायपि सुखसञ्ञाय सासवफस्सूपगमनलक्खणत्ता रूपादीसु अस्सादो सुखसञ्ञाय पदट्ठानं.

रूपक्खन्धादीसु अनिच्चेसु पवत्तायपि निच्चसञ्ञाय सङ्खतलक्खणानं धम्मानं असमनुपस्सनलक्खणत्ता रूपक्खन्धादीसु निच्चग्गहणं विञ्ञाणं निच्चसञ्ञाय पदट्ठानं.

अनिच्चदुक्खानत्तसङ्खातेसु खन्धादीसु पवत्तायपि अत्तसञ्ञाय अनिच्चसञ्ञादुक्खसञ्ञानं असमनुपस्सनलक्खणत्ता अहंममादिवसेन पवत्तो नामकायो अत्तसञ्ञाय पदट्ठानं.

एवं ¶ अविज्जादीनं अकुसलपक्खानं धम्मानं पदट्ठानं दस्सेत्वा इदानि तप्पटिपक्खानं विज्जादीनं धम्मानं पदट्ठानं दस्सेतुं ‘‘सब्बधम्मसम्पटिवेधलक्खणा’’तिआदि वुत्तं. सब्बेसु ञेय्यधम्मेसु पवत्ताय विज्जाय सब्बधम्मसम्पटिवेधलक्खणत्ता सब्बं नेय्यं विज्जाय पदट्ठानं.

समथस्स चित्तविक्खेपसङ्खातउद्धच्चपटिसंहरणसङ्खातविक्खम्भनलक्खणत्ता पटिभागनिमित्तभूता असुभा समथस्स पदट्ठानं. असुभाय हि तण्हापटिपक्खत्ता, तण्हाय च अभावे समथो तिट्ठतीति.

अदिन्नादाना वेरमणिवसेन पवत्तस्स अलोभस्स इच्छावचरपटिसंहरणलक्खणत्ता अदिन्नादाना वेरमणी अलोभस्स पदट्ठानं.

पाणातिपाता ¶ वेरमणिवसेन पवत्तस्स अदोसस्स अब्यापज्जलक्खणत्ता पाणातिपाता वेरमणी अदोसस्स पदट्ठानं.

सम्मापटिपत्तिवसेन पवत्तस्स अमोहस्स वत्थुअविप्पटिपत्तिलक्खणत्ता सम्मापटिपत्ति अमोहस्स पदट्ठानं.

निब्बिदावसेन पवत्ताय असुभसञ्ञाय विनीलकविपुब्बकगहणलक्खणत्ता निब्बिदा असुभसञ्ञाय पदट्ठानं. निब्बिदाञाणेन हि अनभिरति पवत्तति, अनभिरतिया च असुभसञ्ञा ठिताति.

दुक्खवेदनावसेन पवत्ताय दुक्खसञ्ञाय सासवफस्सपरिजाननलक्खणत्ता वेदना दुक्खसञ्ञाय पदट्ठानं.

उप्पादवयवसेन पवत्ताय अनिच्चसञ्ञाय सङ्खतलक्खणानं धम्मानं समनुपस्सनलक्खणत्ता उप्पादवया अनिच्चसञ्ञाय पदट्ठानं. उप्पादवयञ्हि समनुपस्सित्वा अनिच्चसञ्ञा पवत्ता.

धम्ममत्तसञ्ञावसेन पवत्ताय अनत्तसञ्ञाय सब्बधम्मअभिनिवेसलक्खणत्ता धम्मसञ्ञा अनत्तसञ्ञाय पदट्ठानं.

कामरागस्स रूपादिपञ्चकामगुणारम्मणत्ता पञ्च कामगुणा कामरागस्स पदट्ठानं.

रूपसङ्खाते काये आरब्भ पवत्तस्स रूपरागस्स चक्खादिपञ्चिन्द्रियानं अनुसारेन पवत्तनतो पञ्चिन्द्रियानि रूपानि रूपरागस्स पदट्ठानं.

भवनिकन्तिवसेन पवत्तस्स भवरागस्स छळायतनं पदट्ठानं. निब्बत्तभवानुपस्सिताति ‘‘एदिसं अनिट्ठं रूपं मा निब्बत्ततु, एदिसं इट्ठं रूपं निब्बत्ततु एदिसी ¶ दुक्खा वेदना मा निब्बत्ततु, एदिसी सुखा वेदना निब्बत्ततू’’ति एवमादिना पकारेन पवत्ता रूपाभिनन्दना, सा पञ्चन्नं उपादानक्खन्धानं पदट्ठानं.

कम्मस्सकतञ्ञाणस्स ¶ पुब्बेनिवासानुस्सतिञाणानुगतत्ता पुब्बेनिवासानुस्सतिञाणदस्सनं कम्मस्सकतञ्ञाणस्स पदट्ठानं.

ओकप्पनं लक्खणं यस्सा सद्धायाति ओकप्पनलक्खणा सद्धा. अधिमुत्ति पच्चुपट्ठानं यस्सा सद्धायाति अधिमुत्तिपच्चुपट्ठाना च सद्धा. अनाविलं लक्खणं यस्स पसादस्साति अनाविललक्खणोति पसादो. सम्पसीदनं पच्चुपट्ठानं यस्स पसादस्साति सम्पसीदनपच्चुपट्ठानो च पसादो. सो पन पसादो सद्धाय एव अवत्थाविसेसोति वेदितब्बो. अवेच्चपसादो अभिपत्थियनलक्खणाय सद्धाय पदट्ठानं, ओकप्पनलक्खणा सद्धा अनाविललक्खणस्स पसादस्स पदट्ठानं, चतुब्बिधं सम्मप्पधानं वीरियं आरम्भलक्खणस्स वीरियस्स पदट्ठानं, कायादिसतिपट्ठानं अपिलापनलक्खणाय सतिया पदट्ठानं, झानसहितस्स समाधिस्स एकग्गलक्खणत्ता वितक्कादिझानानि समाधिस्स पदट्ठानं, पञ्ञाय किच्चपजाननआरम्मणपजाननलक्खणत्ता सच्चानि पञ्ञाय पदट्ठानं.

‘‘येसं अविज्जादीनं पदट्ठानानि आचरियेन विभत्तानि, ते अविज्जादयो कतमेसं धम्मानं पदट्ठानानी’’ति पुच्छितब्बत्ता ते अविज्जादयोपि इमेसं धम्मानं पदट्ठानाति दस्सेतुं ‘‘अपरो नयो’’तिआदि वुत्तं. अविज्जा अस्सादमनसिकारलक्खणस्स अयोनिसोमनसिकारस्स पदट्ठानं. अविज्जाय हि आदीनवच्छादनतो अयोनिसोमनसिकारो जातोति. सच्चसम्मोहनलक्खणा अविज्जा पुञ्ञापुञ्ञानेञ्जाभिसङ्खारानं पदट्ठानं, पुनब्भवविरोहनलक्खणा तेभूमकचेतना सङ्खारा विपाकविञ्ञाणस्स पदट्ठानं, ओपपच्चयिकसङ्खातेन उपपत्तिभवभावेन निब्बत्तिलक्खणं पटिसन्धिविञ्ञाणं नामरूपस्स पदट्ठानं, नामकायरूपकायसङ्घातलक्खणं नामरूपं छळायतनस्स पदट्ठानं सहजातादिपच्चयभावतो, चक्खादीनं छन्नं इन्द्रियानं पवत्तानं लक्खणं छळायतनं छब्बिधस्स फस्सस्स यथाक्कमं पदट्ठानं निस्सयादिपच्चयभावतो, चक्खुपसादरूपारम्मणं चक्खुविञ्ञाणादिसन्निपातलक्खणो छब्बिधो फस्सो, तं वेदनाय तेन छब्बिधेन फस्सेन सहजाताय छब्बिधाय वेदनाय यथाक्कमं पदट्ठानं सहजातादिपच्चयभावतो, इट्ठानुभवनअनिट्ठानुभवनइट्ठानिट्ठानुभवनलक्खणा तिविधा वेदना, तं तण्हाय ताय तिविधाय वेदनाय वसेन पवत्ताय ¶ तण्हाय पदट्ठानं उपनिस्सयादिपच्चयभावतो, सपरसन्तानेसु अज्झोसानलक्खणा तण्हा, तं उपादानस्स ताय तण्हाय वसेन पवत्तस्स चतुब्बिधस्स उपादानस्स पदट्ठानं उपनिस्सयादिपच्चयभावतो. ‘‘सो वेदनाया’’ति च ‘‘सा तण्हाया’’ति च ‘‘सा उपादानस्सा’’ति च पाठेन भवितब्बं, लिङ्गविपल्लासनिद्देसो वा सिया.

यं ¶ उपादानं ओपपच्चयिकं उपपत्तिक्खन्धनिब्बत्तकं, तं उपादानं दुविधस्स भवस्स पदट्ठानं. यो कम्मभवो नामकायरूपकायसम्भवनलक्खणो, सो कम्मभवो जातिया पदट्ठानं. या उपपत्तिभूता जाति खन्धपातुभावलक्खणा, तं सा जाति जराय पदट्ठानं. या जिण्णजरा उपधिक्खन्धपरिपाकलक्खणा, तं सा जिण्णजरा मरणस्स पदट्ठानं. यम्पि यस्स सम्मुतिमरणं जीवितिन्द्रियुपच्छेदलक्खणं, तम्पि तस्स सम्मुतिमरणं सोकस्स पदट्ठानं. पियस्स मरणं चिन्तेन्तस्स येभुय्येन सोकुप्पज्जनतो यो सोको ञातिआदिपियेसु उस्सुक्ककारको, तं सो सोको परिदेवस्स पदट्ठानं. यो परिदेवो लालप्पकारको, तं सो परिदेवो कायिकदुक्खस्स पदट्ठानं. यं कायिकं दुक्खं कायसम्पीळनलक्खणं, तं कायिकं दुक्खं दोमनस्सस्स पदट्ठानं. यं दोमनस्सं चित्तसम्पीळनलक्खणं, तं दोमनस्सं उपायासस्स पदट्ठानं. यो उपायासो ओदहनकारको अवदहनकारको, तं सो उपायासो भवस्स उपायासस्स निस्सयसन्तानभवस्स पदट्ठानं.

भवस्साति वुत्तभवं दस्सेतुं ‘‘इमानी’’तिआदि वुत्तं. तत्थ भवङ्गानि किलेसो भवस्स अङ्गं कारणं कम्मवट्टविपाकवट्टानि भवसङ्खातानि अङ्गानि अवयवानि. यदा पच्चुप्पन्नादिकाले समग्गानि निब्बत्तानि भवन्ति, तदा सो किलेसवट्टकम्मवट्टविपाकवट्टसङ्खातो धम्मसमूहो ‘‘भवस्सा’’ति एत्थ भवोति दट्ठब्बो. तं भवसङ्खातं किलेसवट्टकम्मवट्टविपाकवट्टत्तयं संसारस्स पदट्ठानं पुरिमं पुरिमं जातिनिप्फन्नकिलेसादिवट्टेन संसारस्स अब्बोच्छिन्नुप्पज्जनतो, यो अरियमग्गो निय्यानिकलक्खणो, तं सो अरियमग्गो निरोधस्स निब्बानस्स पदट्ठानं सम्पापकहेतुभावतो.

बहुस्सुतो सब्बसिस्सादीनं पतिट्ठानत्ता तित्थं वियाति तित्थं, जानातीति ञू, तित्थं ञूति तित्थञ्ञू, तित्थञ्ञुनो भावो तित्थञ्ञुता, सम्मापयिरुपासना, सा पीतञ्ञुताय पदट्ठानं. बहुस्सुतस्स हि सम्मापयिरुपासनाय ¶ धम्मूपसञ्हितं पामोज्जं जायति, पामोज्जेन च कम्मट्ठानब्रूहना जायतीति सप्पायधम्मस्सवनेन पीतिं जानातीति पीतञ्ञू, पीतञ्ञुनो भावो पीतञ्ञुता, कम्मट्ठानस्स ब्रूहना, सा पत्तञ्ञुताय पदट्ठानं. कम्मट्ठानब्रूहनाय हि भावनापत्तजाननता जायतीति पत्तञ्ञुता. भावनापत्तजाननता अत्तञ्ञुताय पदट्ठानं. भावनापत्तजाननताय हि पञ्चहि पधानियङ्गेहि समन्नागतस्स अत्तनो जाननता जायतीति अत्तञ्ञुता पुब्बेकतपुञ्ञताय पदट्ठानं.

पधानियङ्गेसु समन्नागतत्तजाननताय हि पुब्बे पुञ्ञकरणं जातं, पुब्बेकतपुञ्ञता पतिरूपदेसवासस्स पदट्ठानं. पुब्बे हि कतेन पुञ्ञेन पतिरूपदेसवासो लद्धो, पतिरूपदेसवासो सप्पुरिसूपनिस्सयस्स ¶ पदट्ठानं. पतिरूपदेसवासेन हि सप्पुरिसूपनिस्सयो लद्धो, सप्पुरिसूपनिस्सयो अत्तसम्मापणिधानस्स पदट्ठानं. सप्पुरिसूपनिस्सयेन हि अत्तसम्मापणिधानं जातं, अत्तसम्मापणिधानं सीलानं पदट्ठानं. अत्तसम्मापणिधानेन हि सीलानि सम्पतिट्ठितानि, सीलानि अविप्पटिसारस्स पदट्ठानं. अत्तनि हि सम्पतिट्ठितं सीलं पच्चवेक्खन्तस्स विप्पटिसारो नत्थेवाति, अविप्पटिसारेन पामोज्जं जायति, तस्मा अविप्पटिसारो पामोज्जस्स पदट्ठानं. पामोज्जेन पीति जायति, तस्मा पामोज्जं पीतिया पदट्ठानं. पीतिया पस्सद्धि जायति, तस्मा पीति पस्सद्धिया पदट्ठानं. पस्सद्धिया सुखं जायति, तस्मा पस्सद्धि सुखस्स पदट्ठानं. सुखेन समाधि जायति, तस्मा सुखं समाधिस्स पदट्ठानं. समाधिना यथाभूतञाणदस्सनं जायति, तस्मा समाधि यथाभूतञाणस्स पदट्ठानं. यथाभूतञाणदस्सनेन निब्बिदाञाणं जायति, तस्मा यथाभूतञाणदस्सनं निब्बिदाय पदट्ठानं. निब्बिदाय विरागो जायति, तस्मा निब्बिदा विरागस्स पदट्ठानं. विरागेन विमुत्ति जायति, तस्मा विरागो विमुत्तिया पदट्ठानं. विमुत्तिया विमुत्तिञाणदस्सनं जायति, तस्मा विमुत्ति विमुत्तिञाणदस्सनस्स पदट्ठानं. एवं यथावुत्तनयेन यो कोचि धम्मो उपनिस्सयो होति, यो कोचि धम्मो पच्चयो होति, सब्बो सो धम्मो अत्तनो पच्चयुप्पन्नस्स धम्मस्स पदट्ठानन्ति दट्ठब्बो.

‘‘उपनिस्सयधम्मस्स, पच्चयधम्मस्स वा पच्चयुप्पन्नधम्मस्स पदट्ठानभावो केन सद्दहितब्बो’’ति वत्तब्बत्ता ‘‘तेनाहा’’तिआदि वुत्तं. तत्थ तेनाति यस्स कस्सचि उपनिस्सयधम्मस्स, पच्चयधम्मस्स च पच्चयुप्पन्नधम्मस्स पदट्ठानभावेन ¶ आयस्मा महाकच्चानो ‘‘धम्मं देसेति जिनो’’तिआदिकं यं वचनं आह, तेन वचनेन तेसं उपनिस्सयधम्मपच्चयधम्मानं पदट्ठानभावो सद्दहितब्बोति. ‘‘यथावुत्तो पदट्ठानो हारो परिपुण्णो किं, उदाहु अञ्ञो निद्धारेत्वा योजेतब्बो अत्थि कि’’न्ति वत्तब्बत्ता ‘‘नियुत्तो पदट्ठानो हारो’’ति वुत्तं. इध पाळियं अविभत्तम्पि यथालाभवसेन पदट्ठानो हारो नीहरित्वा युत्तो युज्जितब्बो, विभजितब्बन्ति वुत्तं होति.

इति पदट्ठानहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

५. लक्खणहारविभङ्गविभावना

२३. येन ¶ येन संवण्णनाविसेसभूतेन पदट्ठानविभङ्गेन अविज्जादीनं पदट्ठानानि विभत्तानि, सो संवण्णनाविसेसभूतो पदट्ठानहारविभङ्गो परिपुण्णो, ‘‘कतमो लक्खणहारविभङ्गो’’ति पुच्छितब्बत्ता ‘‘तत्थ कतमो लक्खणो हारो’’तिआदि वुत्तं. तत्थ तत्थ-सद्दस्स अत्थो वुत्तोव. कतमो संवण्णनाविसेसो लक्खणो हारो लक्खणहारविभङ्गोति पुच्छति. ‘‘वुत्तम्हि एकधम्मे’’तिआदिनिद्देसस्स इदानि मया वुच्चमानो ‘‘ये धम्मा’’तिआदिको वित्थारसंवण्णनाविसेसो लक्खणो हारो लक्खणहारविभङ्गो नामाति विञ्ञेय्योति. तेन वुत्तं –‘‘तत्थ कतमो लक्खणो हारोतिआदि लक्खणहारविभङ्गो नामा’’ति (नेत्ति. अट्ठ. २३). अयं इदानि वुच्चमानो वित्थारभूतो लक्खणो हारो पिटकत्तये देसितेसु धम्मेसु किं नाम लक्खितब्बं धम्मं लक्खीयतीति पुच्छित्वा पुच्छिते लक्खणहारविचये धम्मे सङ्खेपेन दस्सेतुं ‘‘ये धम्मा’’तिआदि वुत्तं. तत्थ ये धम्माति ये समूहा धम्मा. एकलक्खणाति समानलक्खणा. तेसं धम्मानन्ति समानलक्खणानं तेसं समूहधम्मानं, निद्धारणे चेतं. एकस्मिं धम्मेति समानलक्खणे ¶ एकस्मिं धम्मे, पाळियं भगवता वुत्ते सति वुत्तधम्मतो अवसिट्ठसमानलक्खणा धम्मा समानलक्खणेन वुत्ता भवन्तीति अत्थो.

लक्खणहारविसये धम्मे वित्थारतो इमस्मिं धम्मे वुत्ते इमे समानलक्खणा धम्मापि वुत्ता भवन्तीति नियमेत्वा दस्सेतुं ‘‘यथा किं भवे’’तिआदिमाह. तस्सत्थो – यथा येन पकारेन वुत्ता भवन्ति, सो पकारो किं भवेति पुच्छति. यथा येन पकारेन वुत्ता भवन्ति, सो पकारो समानलक्खणाति भावो भवेति अत्थो. किन्ति भगवा आह? ‘‘चक्खुं भिक्खवे’’तिआदिं भगवा आह. ‘‘चक्खुं, भिक्खवे, अनवट्ठित’’न्तिआदिम्हि वुत्ते ‘‘सोतं, भिक्खवे, अनवट्ठित’’न्तिआदिवचनम्पि वुत्तमेव भवति.

‘‘अनवट्ठितादिलक्खणेन समानलक्खणत्ता वा अज्झत्तिकायतनभावेन समानलक्खणत्ता वाति आयतनवसेनेव एकलक्खणं वत्तब्ब’’न्ति वत्तब्बत्ता खन्धवसेनपि एकलक्खणं दस्सेतुं ‘‘यथा चाहा’’तिआदि वुत्तं. ‘‘अतीते, राध, रूपे अनपेक्खो होति, अनागतं रूपं मा अभिनन्दि ¶ , पच्चुप्पन्नस्स रूपस्स निब्बिदाय विरागाय निरोधाय चागाय पटिनिस्सग्गाय पटिपज्जा’’ति वुत्ते ‘‘अतीताय, राध, वेदनाय अनपेक्खो होति, अनागतं वेदनं मा अभिनन्दि, पच्चुप्पन्नाय वेदनाय निब्बिदाय विरागाय निरोधाय चागाय पटिनिस्सग्गाय पटिपज्जा’’तिआदि वुत्तं भवे.

‘‘अनपेक्खनीयलक्खणेन समानलक्खणत्ता वा खन्धलक्खणेन समानलक्खणत्ता वाति खन्धायतनवसेनेव एकलक्खणधम्मा वत्तब्बा’’ति वत्तब्बत्ता सतिपट्ठानवसेनापि वत्तब्बाति दस्सेतुं ‘‘यथाहा’’तिआदि वुत्तं. तत्थ यथा येन एकलक्खणत्तेन च भगवा आह, तथा च तेन एकलक्खणत्तेन च अवुत्तापि धम्मा वुत्ता भवन्तीति अत्थो. ये विपस्सका पुग्गला पञ्चसु खन्धेसु निच्चं सुसमारद्धा निच्चं कायगतासतिं भावेन्ति, ते विपस्सका अकिच्चं सुभसुखादिकं, कसिवाणिज्जादिकम्मं वा न सेवन्ति, किच्चे असुभासुखादिके, कायादिके वा सातच्चकारिनो होन्तीति भगवा आहाति योजना.

इतिसद्दस्स चेत्थ एकस्स लोपो. इति एवं ‘‘येसञ्चा’’तिआदिगाथाय केसादिके काये गताय पवत्ताय सतिया भगवता सरूपेन ¶ वुत्ताय विज्जमानाय तदवसेसा वेदनागता सति च चित्तगता सति च धम्मगता सति च सतिपट्ठानभावेन एकलक्खणत्तेन वुत्ता भवन्तीति सङ्खेपतो निच्चं सुसमारद्धा निच्चं वेदनागता सति च…पे… निच्चं चित्तगता सति च…पे… निच्चं धम्मगता सतीति वत्तब्बाति.

‘‘सतिपट्ठानवसेनेव एकलक्खणा धम्मा वत्तब्बा’’ति वत्तब्बत्ता ‘‘तथा यं किञ्ची’’तिआदि वुत्तं. तत्थ यं किञ्चि रूपायतनं चक्खुविञ्ञाणेन दिट्ठं, यं किञ्चि सद्दायतनं सोतविञ्ञाणेन सुतं, यं किञ्चि गन्धरसफोट्ठब्बायतनं घानविञ्ञाणादित्तयेन विञ्ञाणेन मुतं, इति एवं दिट्ठादित्तये भगवता सरूपेन वुत्ते सति तदवसेसं यं किञ्चि विञ्ञातं धम्मारम्मणपरियापन्नं रूपं भगवता आलम्बितब्बभावेन एकलक्खणत्ता वुत्तं भवतीति अत्थो. अथ वा यं किञ्चि रूपायतनं दिट्ठं भगवता वुत्तं, तस्मिं वुत्ते सति तदवसेसं सुतादिकम्पि वुत्तं होतीति आदिअत्थो विसुं विसुं योजेतब्बो. तेन वुत्तं – ‘‘दिट्ठं वा सुतं वा मुतं वा’’ति.

‘‘कायगताय सतिया वुत्ताय तदवसेसा वेदनागतासतिआदयोयेव वत्तब्बा’’ति पुच्छितब्बत्ता सत्ततिंसबोधिपक्खियधम्मापि वुत्ता भवन्तीति दस्सेतुं ‘‘यथा चाह भगवा’’तिआदि वुत्तं. तत्थ यथा येन निय्यानिकलक्खणेन एकलक्खणत्तेन च भगवा आह, तथा तेन एकलक्खणत्तेन च भगवा आह, तथा तेन एकलक्खणत्तेन च वुत्ता भवन्तीति ¶ अत्थो. ‘‘तस्मा अभिज्झादोमनस्सेन अभिभूतत्ता इह मम सासने, भिक्खु, त्वं आतापी सम्पजानो सतिमा हुत्वा लोके अभिज्झादोमनस्सं तदङ्गप्पहानेन वा विक्खम्भनप्पहानेन वा विनेय्य विनयित्वा काये केसादिरूपकाये कायानुपस्सी केसादिरूपकायानुपस्सी हुत्वा विहराही’’ति भगवता वुत्ते सति ‘‘तस्मातिह, त्वं भिक्खु, वेदनासु वेदनानुपस्सी विहराहि आतापी सम्पजानो सतिमा विनेय्य लोके अभिज्झादोमनस्सं, तस्मातिह, त्वं भिक्खु, चित्ते चित्तानुपस्सी विहराहि…पे… दोमनस्सं, तस्मातिह, त्वं भिक्खु, धम्मेसु धम्मानुपस्सी विहराहि…पे… दोमनस्स’’न्ति वुत्तं भवतीति सङ्खेपत्थो वेदितब्बो. वित्थारत्थो पन अट्ठकथायं (नेत्ति. अट्ठ. २३) बहुधा वुत्तोति अम्हेहि न वित्थारितो.

‘‘एकस्मिं ¶ सतिपट्ठाने वुत्ते कस्मा चत्तारो सतिपट्ठाना वुत्ता भवेय्यु’’न्ति वत्तब्बत्ता ‘‘आतापीति वीरियिन्द्रिय’’न्तिआदि वुत्तं. तत्थ ‘‘आतापी’’ति इमिना पदेन कायवेदनाचित्तधम्मेसु पवत्तं वीरियिन्द्रियं वुत्तं. ‘‘सम्पजानो’’ति पदेन कायवेदनाचित्तधम्मेसु पवत्तं पञ्ञिन्द्रियं वुत्तं. ‘‘सतिमा’’ति पदेन कायवेदनाचित्तधम्मेसु पवत्तं सतिन्द्रियं वुत्तं. ‘‘विनेय्य लोके अभिज्झादोमनस्स’’न्ति पदेन कायवेदनाचित्तधम्मेसु पवत्तं समाधिन्द्रियं वुत्तं, न कायेयेव पवत्तं. एवं पकारेन काये कायानुपस्सिनो योगावचरस्स चत्तारो सतिपट्ठाना भावनापारिपूरिं गच्छन्तीति चे वदेय्य, एवं सति चतुन्नं वीरियपञ्ञासतिसमाधीनं इन्द्रियानं चतुन्नं सतिपट्ठानानं साधकभावेन एकलक्खणत्ता समानलक्खणत्ता पारिपूरिं गच्छन्तीति योजना. तेन वुत्तं अट्ठकथायं – ‘‘चतुसतिपट्ठानसाधने इमेसं इन्द्रियानं सभावभेदाभावतो समानलक्खणत्ता’’ति (नेत्ति. अट्ठ. २३).

२४. ‘‘एवं वुत्तेपि चत्तारो सतिपट्ठानायेव वत्तब्बा भवेय्युं, कथं सत्ततिंसबोधिपक्खियधम्मा वत्तब्बा’’ति वत्तब्बत्ता ‘‘चतूसु सतिपट्ठानेसू’’तिआदि वुत्तं. तत्थ चतूसु सतिपट्ठानेसु येन योगावचरेन भावियमानेसु तस्स योगावचरस्स चत्तारो सम्मप्पधाना भावनापारिपूरिं गच्छन्ति. एवं सेसेसुपि योजना कातब्बा. चतुन्नं सच्चानं बुज्झनं बोधं, अरियमग्गञाणं, बोधं गच्छन्तीति बोधङ्गमा. बोधस्स अरियमग्गञाणस्स पक्खे भवाति बोधिपक्खिया.

‘‘कुसलायेव धम्मा एकलक्खणभावेन नीहरिता किं, उदाहु अकुसलापि धम्मा’’ति पुच्छितब्बत्ता ‘‘एवं अकुसलापी’’तिआदि वुत्तं. तत्थ कुसला धम्मा एकलक्खणत्तेन निद्धारिता ¶ यथा, एवं अकुसलापि धम्मा एकलक्खणत्तेन निद्धारितब्बायेवाति अत्थो. ‘‘कथं निद्धारेतब्बा’’ति पुच्छितब्बत्ता पहानेकट्ठभावेन निद्धारेतब्बाति दस्सेन्तो ‘‘एकलक्खणत्ता पहानं अब्भत्थं गच्छन्ती’’ति आह. तत्थ एकलक्खणत्ताति पहानेकट्ठभावेन समानलक्खणत्ता. ‘‘कतमं पहानं अब्भत्थं गच्छन्ती’’ति पुच्छितब्बत्ता ‘‘चतूसु सतिपट्ठानेसू’’तिआदि वुत्तं.

तत्थ ¶ चतूसु…पे… परिञ्ञं गच्छन्तीति कायागतासतिपट्ठाने योगावचरेन भावियमाने सति तेन योगावचरेन असुभे केसादिके रूपकाये ‘‘सुभ’’न्ति विपल्लासो पहीयति, अस्स योगावचरस्स कबळीकाराहारो परिञ्ञं गच्छति, ‘‘आहारसमुदया रूपसमुदयो’’ति (सं. नि. ३.५६) वुत्तत्ता रूपकाये छन्दरागं पजहन्तस्स तस्स समुदये कबळीकाराहारेपि छन्दरागो पहीयतीति अत्थो. वेदनागतासतिपट्ठाने भावियमाने सति दुक्खे ‘‘सुख’’न्ति विपल्लासो पहीयति, अस्स योगावचरस्स फस्साहारो परिञ्ञं गच्छति, ‘‘फस्सपच्चया वेदना’’ति (म. नि. ३.१२६; सं. नि. २.१, ३९; महाव. १; उदा. १; विभ. २२५) वुत्तत्ता वेदनाय छन्दरागं पजहन्तस्स तस्स पच्चये फस्साहारे छन्दरागो पहीयति. चित्तगतासतिपट्ठाने भावियमाने अनिच्चे ‘‘निच्च’’न्ति विपल्लासो पहीयति, अस्स योगावचरस्स विञ्ञाणाहारो परिञ्ञं गच्छति. धम्मगतासतिपट्ठाने भावियमाने अनत्तनि ‘‘अत्ता’’ति विपल्लासो पहीयति, अस्स योगावचरस्स मनोसञ्चेतनाहारो परिञ्ञं गच्छतीति विसुं विसुं योजेत्वा एकेकस्मिं पहातब्बे वुत्ते तदवसेसा पहातब्बा वुत्ता भवन्ति पहातब्बभावेन एकलक्खणत्ताति अत्थो गहेतब्बो.

‘‘आहारा चस्स परिञ्ञं गच्छन्ती’’ति वचने आहारेसु पवत्ता कामरागदोसमोहा ब्यन्तीकता होन्तीति अत्थो गहितो. कबळीकाराहारञ्हि आरब्भ पवत्ते कामरागे विज्जमाने कबळीकाराहारस्स विजानना नत्थेव, तस्मिं कामरागे पन पहीने परिजानना भवतीति. सेसाहारजाननम्पि एसेव नयो. यस्स योगावचरस्स सतिपट्ठाना भाविता, विपल्लासा पहीना, आहारपरिजानना उप्पन्ना, सो योगावचरो उपादानेहि अनुपादानो भवति. सुभसञ्ञिते हि काये कामुपादानं विसेसेन भवतीति सुभसञ्ञितो कायो कामुपादानस्स वत्थु, कायगताय सतिया अनुसरितब्बो असुभसञ्ञितो केसादि कामुपादानस्स वत्थु न होत्वेव. सुखवेदनाय अस्सादवसेन दिट्ठुपादानं भवतीति सुखसञ्ञिता वेदना दिट्ठुपादानस्स वत्थु, वेदनागताय पन सतिया अनुपस्सितब्बा वेदना दिट्ठुपादानस्स वत्थु न होत्वेव. ‘‘चित्तं निच्च’’न्ति दिट्ठिगहणवसेन तस्स तस्स अत्तनो सीलवतवसेन परिसुद्धीति परामसनं होतीति चित्तं सीलब्बतुपादानस्स ¶ वत्थु, चित्तगताय पन सतिया अनुपस्सितब्बं चित्तं सीलब्बतुपादानस्स ¶ वत्थु न होत्वेव. धम्मे नामरूपपरिच्छेदेन यथाभूतं अपस्सन्तस्स धम्मेसु अत्ताभिनिवेसो होतीति धम्मा अत्तवादुपादानस्स वत्थु, धम्मगताय पन सतिया अनुपस्सितब्बा धम्मा अत्तवादुपादानस्स वत्थु न होन्ति एव. तस्मा चतूसु सतिपट्ठानेसु भावियमानेसु उपादानेहि अनुपादानो भवतीति वुत्तन्ति अधिप्पायो गहेतब्बो.

‘‘येन योगावचरेन सतिपट्ठाना भाविता, सो योगावचरो उपादानेहियेव अनुपादानो भवती’’ति पुच्छितब्बत्ता योगादीहिपि विसंयुत्तो भवतीति दस्सेतुं ‘‘योगेहि च विसंयुत्तो’’तिआदि वुत्तं. तत्थ योगेहि चाति कामयोगभवयोगदिट्ठियोगअविज्जायोगेहि च. विसंयुत्तोति तदङ्गप्पहानविक्खम्भनप्पहानसमुच्छेदप्पहानवसेन विगतो, विमुत्तो च भवतीति अत्थो. सुभसञ्ञितो हि रूपकायो कामरागस्स वत्थु होति, कायगताय पन सतिया अनुपस्सितब्बो कायो कामरागस्स वत्थु न होत्वेव. ‘‘सुखो’’ति वा ‘‘सुखहेतू’’ति वा गहणीयो भवो भवरागस्स वत्थु होति, वेदनागताय पन सतिया अनुपस्सितब्बो भवो भवरागस्स वत्थु न होति. ‘‘अत्ता’’ति अभिनिविसितब्बं चित्तं दिट्ठियोगस्स वत्थु होति, चित्तगताय पन सतिया अनुपस्सितब्बं चित्तं दिट्ठियोगस्स वत्थु न होति. विनिब्भोगस्स दुक्करत्ता, धम्मानं धम्ममत्तताय च दुप्पटिविज्झत्ता अविनिब्भुजितब्बा, धम्ममत्तताय अप्पटिविज्झितब्बा धम्मा अविज्जायोगस्स वत्थु होन्ति, धम्मगताय पन सतिया अनुपस्सितब्बा धम्मा अविज्जायोगस्स वत्थु न होन्ति. तस्मा चतुसतिपट्ठानानुपस्सको ‘‘योगेहि च विसंयुत्तो’’ति वुत्तो. अयं नयो आसवेहि च अनासवो भवति, ओघेहि च नित्थिण्णो भवतीति एत्थापि योजेतब्बो.

गन्थेहि च विप्पयुत्तो भवतीति एत्थ पन सुभसञ्ञितो रूपकायो अभिज्झाकायगन्थस्स वत्थु, कायगताय पन सतिया अनुपस्सितब्बो रूपकायो अभिज्झाकायगन्थस्स वत्थु न होति. दुक्खदुक्खविपरिणामदुक्खसङ्खारदुक्खभूता वेदना ब्यापादकायगन्थस्स वत्थु होन्ति, तेन वुत्तं – ‘‘दुक्खाय वेदनाय पटिघानुसयो अनुसेती’’ति (म. नि. १.४६५). वेदनागताय ¶ पन सतिया अनुपस्सितब्बा वेदना ब्यापादकायगन्थस्स वत्थु न होति. ‘‘चित्तं निच्च’’न्ति अभिनिवेसवसेन सस्सतस्स ‘‘अत्तनो सीलेन सुद्धि, वतेन सुद्धी’’ति परामसनं होति, तस्मा ‘‘निच्च’’न्ति गहितं चित्तं सीलब्बतपरामासकायगन्थस्स वत्थु, चित्तगताय पन सतिया अनुपस्सितब्बं चित्तं सीलब्बतपरामासस्स वत्थु न होति. धम्मानं सप्पच्चयनामरूपसभावस्स अदस्सनतो भवदिट्ठिविभवदिट्ठि होति, तस्मा ‘‘इदं सच्च’’न्ति अभिनिविसितब्बा धम्मा इदंसच्चाभिनिवेसकायगन्थस्स वत्थु, धम्मगताय पन सतिया अनुपस्सितब्बा ¶ धम्मा इदंसच्चाभिनिवेसकायगन्थस्स वत्थु न होन्ति, तस्मा चतुसतिपट्ठानानुपस्सको ‘‘गन्थेहि च विप्पयुत्तो’’ति वुत्तो.

सुभसञ्ञितो च कायो रागसल्लस्स वत्थु, कायगताय पन सतिया अनुपस्सितब्बो कायो रागसल्लस्स वत्थु न होति. सुखसञ्ञिताय वेदनाय दोसो होति, तस्मा वेदना दोससल्लस्स वत्थु, वेदनागताय पन सतिया अनुपस्सितब्बा वेदना दोससल्लस्स वत्थु न होति. ‘‘चित्तं अत्ता’’ति गहेत्वा ‘‘अत्ता सेय्यो’’तिआदिवसेन पवत्तस्स मानसल्लस्स चित्तं वत्थु, चित्तगताय पन सतिया अनुपस्सितब्बं चित्तं मानसल्लस्स वत्थु न होति. धम्मानं सप्पच्चयनामरूपसभावस्स अजाननतो धम्मा मोहसल्लस्स वत्थु, धम्मगताय पन सतिया अनुपस्सितब्बा धम्मा मोहसल्लस्स वत्थु न होन्ति, तस्मा चतुसतिपट्ठानानुपस्सको ‘‘सल्लेहि च विसल्लो भवती’’ति वुत्तो.

‘‘आहारा चस्स परिञ्ञं गच्छन्ती’’ति आचरियेन वुत्तं, ‘‘किं पन आहाराव अस्स योगावचरस्स परिञ्ञं गच्छन्ति, उदाहु अञ्ञेपी’’ति पुच्छितब्बत्ता विञ्ञाणट्ठितियो च अस्स योगावचरस्स परिञ्ञं गच्छन्तीति दस्सेतुं ‘‘विञ्ञाणट्ठितियो चस्स परिञ्ञं गच्छन्ती’’ति वुत्तं. येन योगावचरेन चत्तारो सतिपट्ठाना भाविता, तस्स योगावचरस्स कायवेदनाचित्तधम्माव परिञ्ञं गच्छेय्युं, न विञ्ञाणट्ठितियोति चे वदेय्य कायानुपस्सनादीहि च कायवेदनाचित्तधम्मेसु परिञ्ञातेसु सञ्ञायपि परिञ्ञातब्बभावतो. सा हि वेदनाचित्तसङ्खातेन धम्मेसु परिञ्ञातेसु अविनाभावतो परिञ्ञातावाति.

येन ¶ चत्तारो सतिपट्ठाना भाविता, सो योगावचरो उपादानेहि अनुपादानो च, योगेहि विसंयुत्तो च, खन्धेहि विप्पयुत्तो च, आसवेहि अनासवो च, ओघेहि नित्थिण्णो च, सल्लेहि विसल्लो च भवतीति वुत्तो, ‘‘किं पन तथाविधोव होति, उदाहु अञ्ञथापी’’ति पुच्छितब्बत्ता अगतिम्पि न गच्छतीति दस्सेन्तो ‘‘अगतिगमनेहि च न अगतिं गच्छती’’ति आह. सुभादिसञ्ञिते रूपकाये अपेक्खमानो पुग्गलो छन्दागतिं गच्छतीति सुभादिसञ्ञितो रूपकायो विसेसतो छन्दागतिया वत्थु होति, कायानुपस्सनासतिपट्ठानेन पन अनुपस्सितब्बो अस्सासपस्सासादिको कायो छन्दागतिया वत्थु न होति, तस्मा कायानुपस्सनासतिपट्ठानभावनं भावेन्तो पुग्गलो छन्दागतिं न गच्छति. सुखवेदनस्सादवसेन वेदयमानो तदभावेन ब्यापादं आगच्छतीति सुखवेदना दोसागतिया वत्थु होति, वेदनानुपस्सनासतिपट्ठानेन पन अनुपस्सितब्बा वेदना दोसागतिया वत्थु न होति ¶ , तस्मा वेदनासतिपट्ठानभावनं भावेन्तो पुग्गलो दोसागतिं न गच्छति. सन्ततिघनवसेन ‘‘निच्चं, धुव’’न्ति गहितं चित्तं मोहस्स वत्थु होति, चित्तानुपस्सनासतिपट्ठानेन पन अनुपस्सितब्बं चित्तं मोहस्स वत्थु न होति, तस्मा चित्तानुपस्सनासतिपट्ठानभावनं भावेन्तो पुग्गलो दोसागतिं न गच्छति. विभजित्वा धम्मसभावं अजानन्तस्स भयं जायतीति विभजित्वा अजानियसभावा धम्मा भयस्स वत्थु होन्ति, धम्मानुपस्सनासतिपट्ठानेन पन अनुपस्सितब्बा विभजित्वा जानितब्बा धम्मा रागस्स वत्थु न होन्ति, तस्मा धम्मानुपस्सनासतिपट्ठानभावनं भावेन्तो पुग्गलो भयागतिं न गच्छति. एवं पहातब्बभावेन एकलक्खणे अकुसलेपि धम्मे नीहरित्वा इदानि निगमेतुं ‘‘एवं अकुसलापि धम्मा एकलक्खणत्ता पहानं अब्भत्थं गच्छन्ती’’ति पुन वुत्तं.

भावेतब्बेसु धम्मेसु एकदेसेसु वुत्ते तदवसेसापि भावेतब्बा धम्मा एकलक्खणत्ता नीहरित्वा वत्तब्बा, पहातब्बेसुपि धम्मेसु एकदेसे वुत्ते तदवसेसापि धम्मा पहातब्बा एकलक्खणत्ता नीहरित्वा वत्तब्बाति आचरियेन वुत्ता, अम्हेहि च ञाता, ‘‘अञ्ञथापि यदि वत्तब्बा सियुं, तेपि वदथा’’ति वत्तब्बभावतो अञ्ञेनपि परियायेन लक्खणहारस्स उदाहरणानि दस्सेतुं ‘‘यत्थ वा पना’’तिआदि वुत्तं ¶ . तत्थ यत्थ यस्सं रूपेकदेसदेसनायं रूपिन्द्रियं रुप्पनलक्खणं चक्खुन्द्रियादिजीवितिन्द्रियपरियोसानं अट्ठविधं इन्द्रियं रूपेकदेसं भगवता देसितं. तत्थेव तस्सं रूपेकदेसदेसनायं रूपधातु रुप्पनलक्खणा चक्खुधातादिफोट्ठब्बधातुपरियोसाना दसविधा रूपधातु रुप्पनलक्खणेन एकलक्खणत्ता देसिता. सब्बो रूपक्खन्धो च देसितो. रूपायतनं रुप्पनलक्खणं चक्खायतनादिफोट्ठब्बायतनपरियोसानं दसविधं आयतनं रुप्पनलक्खणेन एकलक्खणत्ता भगवता देसितं.

यत्थ वा पन यस्सं वेदनेकदेसदेसनायं सुखा वेदना भगवता देसिता, तत्थ तस्सं वेदनेकदेसदेसनायं सुखिन्द्रियञ्च देसितं, सोमनस्सिन्द्रियञ्च देसितं, दुक्खसमुदयो अरियसच्चञ्च देसितं सुखवेदनाभावेन एकलक्खणत्ता. यत्थ वा पन यस्सं वेदनेकदेसदेसनायं दुक्खा वेदना भगवता देसिता, तत्थ तस्सं वेदनेकदेसदेसनायं दुक्खिन्द्रियञ्च देसितं दोमनस्सिन्द्रियञ्च देसितं, दुक्खं अरियसच्चञ्च देसितं दुक्खवेदनाभावेन एकलक्खणत्ता. यत्थ वा पन यस्सं वेदनेकदेसदेसनायं अदुक्खमसुखा वेदना भगवता देसिता, तत्थ तस्सं वेदनेकदेसदेसनायं उपेक्खिन्द्रियञ्च देसितं, सब्बो पटिच्चसमुप्पादो च देसितोति योजना कातब्बा.

यस्सं ¶ देसनायं अदुक्खमसुखा वेदना देसिता, तस्सं देसनायं उपेक्खिन्द्रियं देसितं होतु समानलक्खणत्ता, ‘‘केन पटिच्चसमुप्पादो देसितो भवेय्या’’ति वत्तब्बभावतो ‘‘केन कारणेना’’ति पुच्छित्वा कारणं दस्सेतुं ‘‘अदुक्खमसुखाया’’तिआदि वुत्तं. तत्थ अदुक्खमसुखाय वेदनाय हि यस्मा अविज्जा अनुसेति, तस्मा अविज्जा देसिता होति. अविज्जाय च देसिताय अविज्जामूलको सब्बोपि पटिच्चसमुप्पादो ‘‘अविज्जापच्चया सङ्खारा…पे… दुक्खक्खन्धस्स समुदयो होती’’ति देसितोव होतीति अधिप्पायो दट्ठब्बो.

‘‘अविज्जापच्चया सङ्खारा…पे… समुदयो होती’’ति अनुलोमवसेन पवत्तो यो पटिच्चसमुप्पादो देसितोति आचरियेन वुत्तो, ‘‘यदि तथा पवत्तो सो च पटिच्चसमुप्पादो देसितो, एवं सति सब्बो च पटिच्चसमुप्पादो देसितो’’ति न वत्तब्बोति चोदनं मनसि कत्वा ‘‘सो चा’’तिआदि वुत्तं. तत्थ यो च अनुलोमवसेन पवत्तो, सो च सरागसदोससमोहसंकिलेसपक्खेन हातब्बो. यो च ¶ पटिलोमवसेन ‘‘अविज्जाय त्वेव असेसविरागनिरोधा सङ्खारनिरोधो’’तिआदिको पवत्तो, सो च वीतरागवीतदोसवीतमोहअरियधम्मेहि हातब्बो. यो च अनुलोमपटिलोमवसेन पवत्तो, सो च तदुभयेहि हातब्बो. तस्मा ‘‘सब्बो च पटिच्चसमुप्पादो देसितो’’ति वत्तब्बोवाति अधिप्पायो गहेतब्बो.

‘‘ये धम्मा एकलक्खणा, तेसं धम्मानं एकस्मिं धम्मे वुत्ते अवसिट्ठा धम्मा वुत्ता भवन्तीतिआदिना (नेत्ति. २३) आचरियेन या लक्खणहारयोजना वुत्ता, साव कातब्बा, न अञ्ञथा कातब्बा’’ति पुच्छितब्बभावतो अञ्ञथापि लक्खणहारयोजना कातब्बायेवाति दस्सेतुं ‘‘एवं ये धम्मा’’तिआदि वुत्तं. तत्थ ये पथवीआदयो रूपधम्मा, ये फस्सादयो अरूपधम्मा सन्धारणादिकिच्चतो सङ्घट्टनादिकिच्चतो एकलक्खणा, तेसं रूपारूपधम्मानं एकस्मिं धम्मे वुत्ते अवसिट्ठा रूपारूपधम्मा वुत्ता भवन्ति. ये पथवीआदयो रूपधम्मा, ये फस्सादयो अरूपधम्मा कक्खळादिलक्खणतो फुसनादिलक्खणतो एकलक्खणा, तेसं रूपारूपधम्मानं एकस्मिं धम्मे वुत्ते अवसिट्ठा रूपारूपधम्मा वुत्ता भवन्ति. ये धम्मा रुप्पनसामञ्ञतो नमनसामञ्ञतो अनिच्चादिसामञ्ञतो वा खन्धायतनादिसामञ्ञतो वा एकलक्खणा, तेसं सङ्खतधम्मानं एकस्मिं सङ्खतधम्मे वुत्ते अवसिट्ठा धम्मा वुत्ता भवन्ति. ये सङ्खतधम्मा भङ्गुप्पादतो सङ्खतो चुतूपपाततो समाननिरोधुप्पादसङ्खततो वा चुतूपपाततो एकलक्खणा, तेसं सङ्खतधम्मानं एकस्मिं सङ्खतधम्मे वुत्ते अवसिट्ठा सङ्खतधम्मा वुत्ता भवन्तीति अत्थयोजना कातब्बा.

किच्चतो च लक्खणतो चातिआदीसु च-सद्देन सहचरणसमानहेतुतादयो सङ्गहिताति दट्ठब्बा ¶ . सहचरणादीसु च यं वत्तब्बं, तं ‘‘नानत्तकायनानत्तसञ्ञिनो (दी. नि. ३.३४१, ३५७, ३५९; अ. नि. ९.२४), नानत्तसञ्ञानं अमनसिकारा’’तिआदीसु सहचारिताय सञ्ञासहगता धम्मा निद्धारितातिआदिना वुत्तमेव.

‘‘एकस्मिं धम्मे सरूपतो वुत्ते एकलक्खणादितो अवसिट्ठधम्मानम्पि वुत्तभावो केन अम्हेहि जानितब्बो सद्दहितब्बो’’ति वत्तब्बभावतो ‘‘तेना’’तिआदि ¶ वुत्तं. तत्थ तेन अवसिट्ठधम्मानम्पि वुत्तभावेन ‘‘वुत्तम्हि एकधम्मे’’तिआदिकं यं वचनं आयस्मा महाकच्चानो आह, तेन वचनेन तुम्हेहि अवसिट्ठानम्पि वुत्तभावो जानितब्बो सद्दहितब्बोति वुत्तं होति.

‘‘एत्तावता च लक्खणहारो परिपुण्णो, अञ्ञो नियुत्तो नत्थी’’ति वत्तब्बत्ता ‘‘नियुत्तो लक्खणो हारो’’ति वुत्तं. तत्थ यस्सं पाळियं एकस्मिं धम्मे वुत्ते अवसिट्ठधम्मापि येन लक्खणहारेन निद्धारिता, तस्सं पाळियं सो लक्खणो हारो नियुत्तो निद्धारेत्वा योजितोति अत्थो दट्ठब्बोति.

इति लक्खणहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

६. चतुब्यूहहारविभङ्गविभावना

२५. येन येन संवण्णनाविसेसभूतेन लक्खणहारविभङ्गेन सुत्तत्थेहि समानत्था विभत्ता, सो संवण्णनाविसेसभूतो लक्खणहारविभङ्गो परिपुण्णो, ‘‘कतमो चतुब्यूहहारविभङ्गो’’ति पुच्छितब्बत्ता ‘‘तत्थ कतमो चतुब्यूहो हारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु. कतमोति कतमो संवण्णनाविसेसो चतुब्यूहो हारो चतुब्यूहहारविभङ्गो नामाति विञ्ञेय्यो. तेन वुत्तं – ‘‘तत्थ कतमो चतुब्यूहो हारोति चतुब्यूहहारविभङ्गो’’ति (नेत्ति. अट्ठ. २५). ‘‘इमिना चतुब्यूहहारेन कतमस्स ¶ नेरुत्तादयो गवेसितब्बा’’ति पुच्छितब्बत्ता ‘‘ब्यञ्जनेना’’तिआदि वुत्तं. तत्थ ब्यञ्जनेनाति चतुब्यूहहारस्स सुत्तस्स विसेसतो ब्यञ्जनविचयभावतो ‘‘ब्यञ्जना’’ति वोहारितेन इमिना चतुब्यूहहारेन सुत्तस्स नेरुत्तञ्च, सुत्तस्स अधिप्पायो च, सुत्तस्स निदानञ्च, सुत्तस्स पुब्बापरसन्धि च संवण्णेन्तेहि गवेसितब्बोति अत्थो.

‘‘चतुब्यूहहारेन ¶ गवेसितब्बेसु नेरुत्तादीसु कतमं सुत्तस्स गवेसितब्बं नेरुत्त’’न्ति पुच्छितब्बत्ता ‘‘तत्थ कतमं नेरुत्त’’न्तिआदि वुत्तं. तस्सत्थो – तत्थ तेसु इमिना चतुब्यूहहारेन गवेसितब्बेसु नेरुत्तादीसु कतमं सुत्तस्स नेरुत्तं निब्बचनं नामाति चे पुच्छेय्य? सुत्तस्स या निरुत्ति निद्धारेत्वा वुत्ता सभावपञ्ञत्ति गवेसितब्बा, इदं सभावनिरुत्तिभूतं निब्बचनं नेरुत्तं नामाति. ‘‘या निरुत्ति नेरुत्तं नामाति वुत्ता, का पन सा निरुत्ती’’ति पुच्छितब्बत्ता ‘‘पदसंहिता’’ति वुत्तं. पदेसु संहिता युत्ता पदसंहिता. यथा यथा सुत्तत्थो वत्तब्बो, तथा तथा या सभावनिरुत्ति पवत्ता, सा पवत्ता सभावनिरुत्तियेव निरुत्ति नामाति योजना. ‘‘का पन सा सभावनिरुत्ती’’ति पुच्छितब्बत्ता च ‘‘यं धम्मानं नामसो ञाण’’न्ति वुत्तं. यं याय कारणभूताय नामपञ्ञत्तिया धम्मानं नेय्यानं नामसो पथवीनामादिना वा फस्सनामादिना वा खन्धनामादिना वा विविधेन नामेन अत्थधम्मादीसु कुसलस्स पुग्गलस्स ञाणं पवत्तति, सा कारणभूता नामपञ्ञत्ति सभावनिरुत्ति नामाति अत्थो. यन्ति च लिङ्गविपल्लासो, यायाति अत्थो. ‘‘लिङ्गपकतिधम्मानं नामसो पवत्तमानं ञाणं विवरित्वा कथेही’’ति वत्तब्बत्ता ‘‘यदा ही’’तिआदि वुत्तं. अट्ठकथायं पन ‘‘यदा हि भिक्खूतिआदिना ‘धम्मानं नामसो ञाण’न्ति पदस्स अत्थं विवरती’’ति (नेत्ति. अट्ठ. २५) वुत्तं. तस्सत्थो अट्ठकथायं विभजित्वा वुत्तोवाति न विचारितो.

२६. नेरुत्तं आचरियेन विभत्तं, अम्हेहि च ञातं ‘‘कतमो सुत्ते गवेसितब्बो भगवतो अधिप्पायो’’ति पुच्छितब्बत्ता ‘‘तत्थ कतमो अधिप्पायो’’तिआदि वुत्तं. तस्सत्थो पाकटो. अपिच ‘‘धम्मो हवे रक्खती’’तिआदीसु येन पुग्गलेन अत्तना रक्खितेन धम्मेन रक्खितब्बभावो इच्छितो, सो धम्मं रक्खिस्सतीति भगवतो अधिप्पायो. यो पुग्गलो दुग्गतितो मुच्चितुकामो, सो धम्मं रक्खिस्सतीति भगवतो अधिप्पायो.

चोरो यथा सन्धिमुखे गहितोतिआदीसु यो चोरो घातनतो मुच्चितुकामो, सो चोरकम्मं न करिस्सतीति भगवतो अधिप्पायो. यो पुग्गलो अपायादिदुक्खतो मुच्चितुकामो, सो पापकम्मं न करिस्सतीति भगवतो अधिप्पायो.

सुखकामानीतिआदीसु ¶ ¶ ये पुग्गला सुखं इच्छन्ति, ते परहिंसनतो विवज्जिस्सन्तीति भगवतो अधिप्पायो.

मिद्धी यदा होति महग्घसो चातिआदीसु ये पुग्गला पुनप्पुनं पवत्तमानजातिजरामरणतो मुच्चितुकामा, ते भोजने मत्तञ्ञुनो भविस्सन्ति, सन्तुट्ठा भविस्सन्ति, सुद्धाजीवा भविस्सन्ति, पातिमोक्खसंवरसीलसम्पन्ना भविस्सन्ति, अतन्दिनो भविस्सन्ति, विपस्सका भविस्सन्ति, सगारवा सप्पतिस्सा भविस्सन्तीति भगवतो अधिप्पायो.

अप्पमादो अमतपदन्तिआदीसु ये पुग्गला मच्चुनो भायन्ति, निब्बानमिच्छन्ति, ते पुग्गला दानसीलभावनाकम्मेसु अप्पमत्ता भविस्सन्तीति भगवतो अधिप्पायो.

२७. सुत्ते गवेसितब्बो अधिप्पायो आचरियेन विभत्तो, अम्हेहि च विञ्ञातो, ‘‘कतमं सुत्तस्स गवेसितब्बं निदान’’न्ति पुच्छितब्बत्ता ‘‘तत्थ कतमं निदान’’न्तिआदि वुत्तं. तत्थ निदानन्ति फलं नीहरित्वा देतीति निदानं. किं तं? कारणं. धनियोति धनवड्ढनकारणे नियुत्तोति धनियो. गोपालकोति गावो इस्सरभावेन पालेति रक्खतीति गोपालको. उपधीहीति पुत्तगोणादीहि (सु. नि. अट्ठ. १.३३). नरस्साति पुत्तिमन्तस्स वा गोपालकस्स वा नरस्साति च पदट्ठानवसेन वा येभुय्यवसेन वा गाथायं आगतवसेन वा वुत्तं, नारियापि उपधीहि नन्दना अत्थेवाति दट्ठब्बा.

इमिना वत्थुनाति उपधिसङ्खातेन इमिनाव पुत्तगवादिना वत्थुना. वसति पवत्तति नन्दना एत्थ पुत्तगोणादिकेति वत्थु. नन्दनं नीहरित्वा देति पुत्तगोणादिकन्ति निदानन्ति अत्थं गहेत्वा धनियो ‘‘उपधीहि नरस्स नन्दना’’ति आह. भगवा पन ‘‘वसति पवत्तति सोचना एत्थ पुत्तगोणादिकेहि वत्थु, सोचनं नीहरित्वा देति पुत्तगोणादिकन्ति निदान’’न्ति अत्थं गहेत्वा ‘‘उपधीहि नरस्स सोचना’’ति आह. परिग्गहीयतेति परिग्गहं. किं तं? पुत्तगोणादिकं, तं परिग्गहं ‘‘उपधी’’ति आह, न किलेसूपधिकायखन्धूपधिन्ति.

उपधीसूति खन्धसङ्खातेसु कायेसु. कायं ‘‘उपधी’’ति आह, न पुत्तगवादिकं, न परिग्गहं.

बाहिरेसु ¶ वत्थूसूति मणिकुण्डलपुत्तदारादीसु वत्थूसु.

कामसुखन्ति ¶ कामनीयेसु अस्सादसुखवसेन पवत्ता तण्हा. बाहिरवत्थुकाय तण्हायाति कामनीयेसु बाहिरवत्थूसु अस्सादसुखवसेन पवत्ताय तण्हाय.

अज्झत्तिकवत्थुकायाति रूपकायसङ्खाते अज्झत्तिकवत्थुम्हि अभिनन्दनवसेन पवत्ताय.

पुन अज्झत्तिकवत्थुकायाति पञ्चक्खन्धसङ्खाते अज्झत्तिकवत्थुम्हि सिनेहवसेन पवत्ताय.

गवेसितब्बं निदानं विभत्तं, अम्हेहि च ञातं, ‘‘कतमो गवेसितब्बो पुब्बापरसन्धी’’ति पुच्छितब्बत्ता तत्थ कतमो पुब्बापरसन्धी’’तिआदि वुत्तं. तत्थ तत्थाति तेसु नेरुत्ताधिप्पायनिदानपुब्बापरसन्धीसु. यथाति येन अन्धकारादिना सभावेन ‘‘कामन्धा…पे… मातर’’न्ति यं कामतण्हं भगवा आह, अयं कामतण्हा तथा तेन अन्धकारादिना सभावेन ‘‘कामन्धा…पे… मातर’’न्ति गाथा वुत्ताति योजना.

गाथात्थो पन – कामेतीति कामो, कामतण्हा, कामेन अत्थस्स अजाननताय धम्मस्स, अपस्सनताय च अन्धाति कामन्धा. कामतण्हासङ्खातेन जालेन अत्थधम्मानं अजाननापस्सनेन सञ्छन्ना पलिगुण्ठिताति जालसञ्छन्ना. तण्हासङ्खातेन छदनेन तेसंयेव अत्थधम्मानं अजाननापस्सनेन छादिता पिहिताति तण्हाछदनछादिता. अत्थधम्मेसु पमत्तसङ्खातेन पमादेन बन्धनेन बद्धा बन्धितब्बा पुग्गला जरामरणं अन्वेन्ति, कुमिनामुखे पवत्ता मच्छा मरणं अन्वेन्ति इव च, खीरपको वच्छो मातरं अन्वेति इव च, तथा जरामरणं अन्वेन्तीति गहेतब्बो.

‘‘कामन्धा…पे… मातर’न्ति याय देसनाय, गाथाय वा कामतण्हा वुत्ता, सा देसना, गाथा वा कतमेन देसनाभूतेन अपरेन युज्जती’’ति पुच्छितब्बत्ता तथा पुच्छित्वा इमाय देसनाय, गाथाय वा युज्जतीति दस्सेतुं ‘‘सा कतमेना’’तिआदि वुत्तं. तत्थ साति ‘‘कामन्धा…पे… अन्वेन्ती’’ति देसना, गाथा वा. पुब्बापरेनाति ततो देसनातो पुब्बेन देसनावचनेन, गाथावचनेन वा अपरेन देसनावचनेन, गाथावचनेन वा. युज्जति युज्जनं एति समेतीति पुच्छति.

यथाति ¶ येन अन्धकरणादिना. ‘‘रत्तो…पे… नर’’न्ति यं गाथावचनं भगवा आह, तेन गाथावचनेन तथा अन्धकरणादिना युज्जतीति योजना. गाथात्थो पन – रत्तो रञ्जन्तो पुग्गलो अत्थं अत्तहितपयोजनं परहितपयोजनं न जानाति. रत्तो रञ्जन्तो धम्मं यथावुत्तस्स अत्थस्स ¶ हेतुं पञ्ञाचक्खुना न पस्सति. रागो यं नरं यदा सहते, तदा तस्स नरस्स अन्धं अन्धकारं तमं अञ्ञाणं होतीति गहेतब्बो.

इतीति एवं. अन्धताय अन्धकरणताय सञ्छन्नताय सञ्छन्नकरणताय. सायेव तण्हाति ‘‘कामन्धा…पे… मातर’’न्ति गाथावचनेन या कामतण्हा वुत्ता, सायेव कामतण्हा. अभिलपिताति ‘‘रत्तो…पे… नर’’न्ति अपरेन गाथावचनेन भगवता वोहारिता वोहरणेन ञापिता, अभिलपितस्स अत्थस्स समानता पुब्बदेसना अपरदेसनाय युज्जतीति वुत्तं होति.

‘‘द्वीसु गाथासु कतमेहि पदेहि सायेव तण्हा अभिलपिता’’ति पुच्छितब्बत्ता इमेहि अभिलपिताति नियमेत्वा दस्सेतुं ‘‘यञ्चाहा’’तिआदि वुत्तं. तत्थ पठमगाथायं ‘‘कामन्धा…पे… छादिता’’ति यञ्च पदं आह, दुतियगाथायञ्च ‘‘रत्तो…पे… न पस्सती’’ति यञ्च पदं आह. परियुट्ठानेहि परियुट्ठानदीपकेहि इमेहि ‘‘कामन्धा…पे… पस्सती’’ति पदेहि सायेव पठमगाथाय वुत्ता कामतण्हा च भगवता अभिलपिता.

‘‘यं अन्धकारं वुत्तं, कतमं तं? या तण्हा पोनोभविका वुत्ता, कतमा सा’’ति पुच्छितब्बत्ता ‘‘यं अन्धकार’’न्तिआदि वुत्तं. तत्थ अन्धकारं यं अञ्ञाणं वुत्तं, अयं दुक्खसमुदयो भवे. या च तण्हा पोनोभविका वुत्ता, अयञ्च दुक्खसमुदयो भवेति योजना.

‘‘कामा’’ति यञ्च पदं भगवा आह, तेन पदेन इमे किलेसकामा वुत्ता. ‘‘जालसञ्छन्ना’’ति यञ्च पदं भगवा आह, तेन पदेन तेसंयेव किलेसकामानं पयोगेन समुदाचारेन परियुट्ठानं भगवा दस्सेति. तस्माति यस्मा यस्मिं सन्ताने तण्हा उप्पन्ना, तं सन्तानं संसारतो निस्सरितुं अदत्वा रूपारम्मणादीहि पलोभयमाना हुत्वा चित्तं किलेसेहि परियादाय तिट्ठति, तस्मा तण्हाय चित्तं परियादाय सन्ताने तिट्ठमानत्ता. किलेसवसेनाति वीतिक्कमकिलेसवसेन. परियुट्ठानवसेनाति ¶ वीतिक्कमनं अप्पत्वा उप्पज्जमानवसेन. येति वुत्तप्पकारतण्हासहितपुग्गलसदिसा. तेति ते तण्हाबन्धनबद्धा च एदिसका च पुग्गला. जरामरणं अन्वेन्ति जरामरणं अतिक्कमितुं न सक्कुणन्ति. अयन्ति जरामरणानुप्पवत्ति ‘‘जरामरणमन्वेन्ती’’ति इमिना वचनेन भगवता दस्सिताति योजना.

‘‘कामन्धा’’तिआदिगाथाय चेव ‘‘रत्तो’’तिआदिगाथाय च पुब्बापरसन्धि आचरियेन विभत्तो ¶ , अम्हेहि च ञातो, ‘‘कथं ‘यस्स पपञ्चा ठिती चा’तिआदिगाथासु पुब्बापरसन्धि अम्हेहि विञ्ञातब्बो’’ति वत्तब्बत्ता यस्स पपञ्चा’’तिआदि वुत्तं. तस्सा गाथाय – यस्स मुनिनो पपञ्चा तण्हामानदिट्ठी च नत्थि, तण्हामानदिट्ठीहि अभिसङ्खता सङ्खारा च नत्थि, ठिती अनुसया तण्हा च नत्थि, सन्दानसदिसं तण्हापरियुट्ठानं नत्थि, पलिघसदिसो मोहो च नत्थि, सो मुनि पपञ्चादिकं सब्बं वीतिवत्तो अतिक्कन्तोति वुच्चति. नित्तण्हं निमानं निदिट्ठिं निसन्दानं निपलिघं लोके चरन्तं तं मुनिं सदेवको तण्हासहितो लोको न विजानातीति अत्थो.

गाथायं पपञ्चादयो भगवता वुत्ता, ‘‘कतमे ते’’ति पुच्छितब्बत्ता ‘‘पपञ्चा नामा’’तिआदि वुत्तं. अत्तनो आधारपुग्गलं संसारे चिरं पपञ्चन्तापेन्ती तण्हामानदिट्ठियो च, ताहि तण्हामानदिट्ठीहि सहजातवसेन वा उपत्थम्भनवसेन वा अभिसङ्खता सङ्खारा च पपञ्चा नाम. सन्ताने अप्पहीनट्ठेन अनुसया तण्हा सत्तानं तिट्ठनहेतुत्ता ठिती नाम. पवत्तमानाय तण्हाय यं परियुट्ठानञ्च छत्तिंसतण्हाय जालिनिया यानि विचरितानि च वुत्तानि, इदं सब्बं अत्तनो आधारं पुग्गलं बन्धनट्ठेन सन्दानसदिसत्ता सन्दानं नाम. मोहो अत्तनो आधारस्स पुग्गलस्स निब्बाननगरप्पवेसनस्स पटिसेधकत्ता पलिघसदिसत्ता पलिघो नाम. ‘‘यस्स पपञ्चादयो नत्थि, सो किं वीतिवत्तो’’ति पुच्छितब्बत्ता ‘‘ये चा’’तिआदि वुत्तं. ये वुत्तप्पकारा पपञ्चा सङ्खारा, या च वुत्तप्पकारा ठिति, यं वुत्तप्पकारं सन्दानञ्च, यं वुत्तप्पकारं पलिघञ्च नत्थीति वुत्ता, सब्बं एतं पपञ्चादिकं यो मुनि समतिक्कन्तो, अयं मुनि ‘‘नित्तण्हो’’ति वुच्चतीति दट्ठब्बो.

२८. ‘‘यस्स पपञ्चातिआदिगाथायं ये पपञ्चादयो वुत्ता, तेसु तण्हामानदिट्ठिहेतुका सङ्खारा कदा कतिविधं फलं देन्ति, तंसङ्खारसम्पयुत्ता ¶ तण्हा कदा कतिविधं फलं देती’’ति पुच्छितब्बत्ता ‘‘तत्थ परियुट्ठानसङ्खारा’’तिआदि वुत्तं. तत्थ तत्थाति तेसु पपञ्चसङ्खारादीसु. परियुट्ठानसङ्खाराति वीतिक्कमवसेन पवत्ता परियुट्ठाना अकुसलसङ्खारा चेतना. दिट्ठधम्मवेदनीयादीति दिट्ठे पस्सितब्बे धम्मे अत्तभावे वेदनीयं फलं देतीति दिट्ठधम्मवेदनीया, दिट्ठे धम्मे फलं वेदेतीति वा दिट्ठधम्मवेदनीया. का सा? अपदुस्सनीयादीसु अतिदुस्सनादिवसेन पवत्ता पठमजवनचेतना. उपपज्जे फलं वेदेतीति उपपज्जवेदनीया, सत्तमजवनचेतना. अपरापरियाये अत्तभावे फलं वेदेतीति अपरापरियायवेदनीया, मज्झे पवत्ता पञ्च जवनचेतना. तिफलदानवसेन तिविधा सङ्खारा. एवं इमाय तिविधाय सङ्खारचेतनाय सम्पयुत्ता तिविधा तण्हा तिविधं फलं दिट्ठे वा धम्मे अत्तभावे ¶ , उपपज्जे वा अनन्तरभवे, अपरे वा परियाये भवे देति निब्बत्तेतीति एवं फलनिब्बत्तकसङ्खारं वा तंसम्पयुत्तं तण्हं वा भगवा आह.

‘‘याय देसनाय, गाथाय वा फलनिब्बत्तकं सङ्खारं आह, सा देसना, गाथा वा कतमेन देसनाभूतेन वा अपरेन युज्जती’’ति पुच्छितब्बत्ता ‘‘यं लोभपकतं कम्मं करोती’’तिआदि वुत्तं. या ‘‘यस्स…पे… लोको’’ति देसना च या ‘‘यं लोभपकतं कम्मं…पे… अपरे वा परियाये’’ति देसना च वुत्ता, भगवतो इदं देसनाद्वयं अञ्ञमञ्ञं पुब्बापरेन पुब्बं अपरेन अपरं पुब्बेन युज्जति युज्जनं एति समेति, यथा गङ्गोदकं यमुनोदकेन, यमुनोदकम्पि गङ्गोदकेन संसन्दति समेति. ‘‘यस्स…पे… लोको’’ति देसना ‘‘यं लोभपकतं…पे… परियाये’’ति देसनाय संसन्दति समेति, ‘‘यं लोभपकतं…पे… परियाये’’ति देसनापि ‘‘यस्स…पे… लोको’’ति देसनाय संसन्दति समेतीति अत्थो गहेतब्बो. ‘‘कथं युज्जती’’ति पुच्छितब्बत्ता ‘‘तत्थ परियुट्ठान’’न्तिआदि वुत्तं, दिट्ठधम्मवेदनीयादिफलत्तयनिब्बत्तकट्ठेन युज्जतीति वुत्तं होति.

यं यं सुत्तं भगवता देसितं पुब्बापरेन युज्जति, तं तं सुत्तम्पि नीहरित्वा पुब्बापरसंसन्दनं दस्सेतुं ‘‘यथाहा’’तिआदि वुत्तं. संसन्दनाकारो वुत्तनयानुसारेन गहेतब्बो. तत्थाति तेसु परियुट्ठानसङ्खारतण्हाविचरितेसु. परियुट्ठानन्ति रूपारम्मणादीनि अयोनिसोमनसिकारेन आरब्भ सत्तसन्ताने पवत्तं तण्हाचरितं. पटिसङ्खानबलेनाति ¶ असुभानिच्चादिदस्सनबलेन तदङ्गप्पहानवसेन पहातब्बं. सङ्खाराति दस्सनपहातब्बा सङ्खारा. दस्सनबलेनाति दस्सनसङ्खातपठममग्गञाणबलेन पहातब्बा. छत्तिंस तण्हाविचरितानीति दस्सनेन पहातब्बतण्हाविचरितेहि अवसेसानि छत्तिंस तण्हाविचरितानि. निग्गता तण्हा यस्स सो नित्तण्हो, नित्तण्हस्स भावो नित्तण्हता, का सा? सउपादिसेसा निब्बानधातु.

पपञ्चसङ्खाराभिनन्दनत्तयं यदिपि अत्थतो एकं समानं, देसनाय पन पदक्खरादीहि विसेसो अत्थीति दस्सेतुं ‘‘अपिचा’’तिआदि वुत्तं.

‘‘योयं पुब्बापरसन्धि आचरियेन विभत्तो, सोयं कतिविधो’’ति पुच्छितब्बत्ता ‘‘सो चायं पुब्बापरो सन्धी’’तिआदि वुत्तं. अट्ठकथायं पन वुत्तं – ‘‘न केवलं सुत्तन्तरसंसन्दनमेव पुब्बापरसन्धि, अथ खो अञ्ञोपि अत्थीति दस्सेतुं ‘सो चाय’न्तिआदि वुत्त’’न्ति (नेत्ति. अट्ठ. २८). तत्थ अत्थसन्धीति किरियाकारकादिवसेन अत्थस्स अत्थेन सन्धि. पदसन्धीति नामपदादिकस्स ¶ नामपदादिकन्तरेन सन्धि. देसनासन्धीति वुत्तप्पकारस्स देसनन्तरस्स वुत्तप्पकारेन देसनन्तरेन सन्धि. निद्देससन्धीति निद्देसन्तरस्स निद्देसन्तरेन सन्धि.

सन्धि च नाम अत्थादयो मुञ्चित्वा अञ्ञो सभावधम्मो नाम नत्थि, अत्थादीनञ्च छअत्थपदादीसु अवरोधनतो ‘‘अत्थसन्धि छप्पदानी’’तिआदि वुत्तं.

अत्थसन्धिब्यञ्जनसन्धयो आचरियेन विभत्ता, अम्हेहि च ञाता, ‘‘कतमा देसनासन्धी’’ति पुच्छितब्बत्ता ‘‘देसनासन्धि न च पथवि’’न्तिआदि वुत्तं. तत्थ न च पथविं निस्साय झायति झायी झायति चाति एत्थ झायी झानसमङ्गी पुग्गलो पथविं निस्साय आलम्बित्वा न च झायति, सब्बसङ्खारनिस्सटं पन निब्बानं निस्साय आलम्बित्वा फलसमापत्तिं झायति समापज्जति एवाति अत्थो दट्ठब्बो. न च आपन्तिआदीसुपि एस नयो योजेतब्बो. फलसमापत्तिसमङ्गी पुग्गलो हि पथवीआदयो मुञ्चित्वा निब्बानमेव आरब्भ फलसमापत्तिं समापज्जतीति. एत्थ च पथवीआदीहि महाभूतेहि कामभवरूपभवा गहिता रूपपटिबद्धवुत्तिताय. आकासानञ्चायतनादीहिपि अरूपभवो गहितो, भवत्तयं वज्जेत्वा च ¶ झायतीति अधिप्पायो. यदि पथवीआदयो निस्साय न झायी झायति च, एवं सति इधलोकसङ्खातं सत्तसन्तानं वा परलोकसङ्खातं सत्तसन्तानं वा अनिन्द्रियसन्तानं वा निस्साय झायी झायतीति आसङ्कनीयत्ता तं परिहरन्तो ‘‘न च इमं लोक’’न्तिआदिमाह. तत्थ इमं लोकन्ति इधलोकसङ्खातो दिट्ठो अत्तभावो सत्तसन्तानो वुत्तो, तस्मिं निस्साय न झायति झायी झायति च. परलोकन्ति इधलोकतो अञ्ञो भवन्तरसङ्खातो सत्तसन्तानो वुत्तो, तस्मिं निस्साय न च झायति झायी झायति च.

यमिदं उभयन्तिआदीसु इदं उभयं इधलोकपरलोकद्वयं अन्तरेन वज्जेत्वा यं रूपायतनं दिट्ठं, तं रूपायतनम्पि. यं सद्दायतनं सुतं, तं सद्दायतनम्पि. यं गन्धायतनरसायतनफोट्ठब्बायतनं मुतं, तं गन्धायतनरसायतनफोट्ठब्बायतनम्पि. यं आपोधातु आकासधातु लक्खणरूपं ओजासङ्खातं धम्मायतनेकदेसरूपं विञ्ञातं, तं आपोधातादिकं धम्मायतनेकदेसरूपम्पि. यं वत्थु परियेसितं वा अपरियेसितं वा सन्तिके पत्तं, तं वत्थुम्पि. यं वत्थु पत्तं वा अप्पत्तं वा परियेसितं परियेसनारहं सुन्दरं, तं वत्थुम्पि. यं वत्थु वितक्कितं वितक्कनवसेन आलम्बितब्बं, तं वत्थुम्पि. यं वत्थु विचारितं अनुमज्जनवसेन आलम्बितब्बं, तं वत्थुम्पि. यं वत्थु मनसा चित्तेनेव अनुचिन्तितं अनुचिन्तनवसेन आलम्बितब्बं, तं वत्थुम्पि निस्साय न झायति झायी झायति चाति योजना कातब्बा.

एत्थ ¶ दिट्ठादिकं बहिद्धारूपमेव गहेतब्बं अनिन्द्रियबद्धरूपस्स अधिप्पेतत्ता. तेनाह अट्ठकथाचरियो – ‘‘तदुभयविनिमुत्तो अनिन्द्रियबद्धो रूपसन्तानो’’ति (नेत्ति. अट्ठ. २८). ‘‘यदि झायी पुग्गलो यथावुत्ते पथवीआदयो निस्साय न झायति झायी झायति च, एवं सति अयं झायी पुग्गलो इदं नाम निस्साय झायतीति लोके केनचि ञायति किं, उदाहु न ञायती’’ति पुच्छितब्बत्ता न ञायतीति दस्सेतुं ‘‘अयं सदेवके लोके’’तिआदिमाह. तत्थ फलसमापत्तिझानेन झायन्तो अयं खीणासवपुग्गलो सदेवके लोके…पे… सदेवमनुस्साय पजाय यत्थ कत्थचिपि अनिस्सितेन चित्तेन झायतीति सदेवके लोके…पे… सदेवमनुस्साय ¶ पजाय केनचि न ञायतीति अत्थो गहेतब्बो. तेन वुत्तं –

‘‘नमो ते पुरिसाजञ्ञ, नमो ते पुरिसुत्तम;

यस्स ते नाभिजानाम, किं त्वं निस्साय झायसी’’ति. (सं. नि. ३.७९; नेत्ति. १०४);

‘‘केनचि अविञ्ञायभावो केन सुत्तेन विभावेतब्बो’’ति पुच्छितब्बत्ता इमिना गोधिकसुत्तेन (सं. नि. १.१५९) विभावेतब्बोति दस्सेतुं ‘‘यथा मारो पापिमा’’तिआदि वुत्तं. अट्ठकथायं पन ‘‘इदानि खीणासवचित्तस्स कत्थचिपि अनिस्सितभावं गोधिकसुत्तेन (सं. नि. १.१५९) वक्कलिसुत्तेन (सं. नि. ३.८७) च विभावेतुं ‘यथा मारो’तिआदि वुत्त’’न्ति (नेत्ति. अट्ठ. २८) वुत्तं. तत्थ दानादिपुञ्ञकारके, पुञ्ञे वा मारेति निवारेतीति मारो, अत्तहितपरहिते मारेतीति वा मारो. पापचित्तुप्पादवन्तताय पापिमा. पुब्बत्तभावे गोधस्स घातकत्ता ‘‘गोधिको’’ति लद्धनामस्स परिनिब्बायन्तस्स कुलपुत्तस्स परिनिब्बानतो उद्धं पटिसन्धादि विञ्ञाणं समन्वेसन्तो न जानाति न पस्सति. ‘‘परचित्तजाननको मारो कस्मा न जानाती’’ति वत्तब्बत्ता ‘‘सो ही’’तिआदि वुत्तं. सो गोधिको हि यस्मा पपञ्चातीतो, तस्मा तण्हापहानेन दिट्ठिनिस्सयोपि अस्स गोधिकस्स यस्मा नत्थि, तस्मा च न जानातीति.

‘‘गोधिकसुत्तेनेव विभावेतब्बो’’ति पुच्छितब्बत्ता ‘‘यथा चा’’तिआदि वुत्तं. ‘‘गोधिकसुत्तवक्कलिसुत्तेहि अनुपादिसेसाय निब्बानधातुया अनिस्सितभावो विभावितो, एवं सति सउपादिसेसनिब्बानधातुया अनिस्सितभावो केन विञ्ञायतीति अत्थो भवेय्या’’ति वत्तब्बत्ता तदापि न विञ्ञायतियेवाति दस्सेतुं ‘‘सदेवकेन लोकेना’’तिआदि वुत्तं. तत्थ सउपादिसेसाय निब्बानधातुया फलसमापत्तिझानेन झायमाना इमे खीणासवा कत्थचि अनिस्सितचित्ता ¶ झायन्तीति सदेवकेन लोकेन न ञायन्ति समारकेन…पे… सदेवमनुस्साय न ञायन्तीति योजना कातब्बा. अनिस्सितचित्ता न ञायन्तीति एत्थ हि न-कारो च ‘‘झायमाना’’ति पदे न सम्बन्धितब्बो ‘‘न झायमाना’’ति अत्थस्स सम्भवतो. ‘‘न ञायन्ती’’ति पन सम्बन्धितब्बो ¶ हेट्ठा अट्ठकथायं एव ‘‘लोके केनचिपि न ञायती’’ति वुत्तत्ता. अयं देसनासन्धीति गोधिकसुत्तवक्कलिसुत्तानं अञ्ञमञ्ञं अत्थवसेन संसन्दना निद्धारिता विय ‘‘न च पथविं निस्साया’’तिआदिदेसनाय च ‘‘न च इमं लोक’’न्तिआदिदेसनाय च याय देसनाय अत्थवसेन संसन्दना निद्धारिता, ताय देसनाय यत्थ कत्थचि यं किञ्चि निस्साय झायी न झायति, निब्बानं निस्साय झायी झायतीति अत्थवसेन निद्धारिता, अयं संसन्दना देसनासन्धि नामाति अत्थो गहेतब्बो.

देसनासन्धि आचरियेन विभत्ता, अम्हेहि च ञाता, ‘‘कतमा निद्देससन्धी’’ति पुच्छितब्बत्ता ‘‘तत्थ कतमा निद्देससन्धीति निस्सितचित्ता’’तिआदि वुत्तं. तत्थ तत्थाति तेसु चतूसु अत्थसन्धिब्यञ्जनसन्धिदेसनासन्धिनिद्देससन्धीसु या सन्धि ‘‘निद्देससन्धी’’ति उद्दिट्ठा, सा निद्देसतो कतमाति पुच्छतीति अत्थो. निस्सितचित्ताति तण्हादिट्ठिसहजातवसेन वा उपनिस्सयवसेन वा निस्सितं चित्तं येसं पुथुज्जनानन्ति निस्सितचित्ता, पुथुज्जना पुग्गला निद्दिसितब्बा इमाय देसनाय पुग्गलाधिट्ठानत्ता. यदि देसना धम्माधिट्ठाना, एवं सति निस्सितं चित्तं एत्थ सुत्तप्पदेसेसु देसितन्ति निस्सितचित्ता निस्सितचित्तजाननत्थाय देसिता सुत्तप्पदेसा. अनिस्सितं चित्तं येसं अरियपुग्गलानन्ति अनिस्सितचित्ता, अरियपुग्गला निद्दिसितब्बा इमाय देसनाय पुग्गलाधिट्ठानत्ता. धम्माधिट्ठानाय पन अनिस्सितं चित्तं यत्थ सुत्तप्पदेसेसु देसितन्ति अनिस्सितचित्ता, अनिस्सितचित्तजाननत्थाय देसिता सुत्तप्पदेसा.

‘‘निस्सितचित्ता केन निद्देसेन निद्दिसितब्बा, अनिस्सितचित्ता केन निद्देसेन निद्दिसितब्बा’’ति पुच्छितब्बत्ता ‘‘निस्सितचित्ता अकुसलपक्खेन निद्दिसितब्बा’’तिआदि वुत्तं. अकुसलपक्खेन निद्देसेन निद्दिसितब्बा. कुसलपक्खेनातिआदीसुपि एस नयो योजेतब्बो. अकुसलपक्खसामञ्ञकुसलपक्खसामञ्ञेहि दस्सेत्वा अकुसलविसेसकुसलविसेसेहि दस्सेतुं ‘‘निस्सितचित्ता संकिलेसेना’’तिआदि वुत्तं. अयं निद्देससन्धीति अकुसलपक्खादिकस्स पुरिमनिद्देसस्स संकिलेसादिकेन पच्छिमेन निद्देसेन निस्सितचित्तवसेन अयं संसन्दना च निद्देससन्धि नाम. कुसलपक्खादिकस्स पुरिमस्स निद्देसस्स वोदानादिकेन पच्छिमेन निद्देसेन अनिस्सितचित्तवसेन अयं संसन्दना च निद्देससन्धि नामाति विभजित्वा वेदितब्बा.

‘‘चतुब्यूहहारस्स ¶ ¶ नेरुत्तमधिप्पायनिदानपुब्बापरसन्धिप्पभेदेन चेव अत्थब्यञ्जनसन्धिनिद्देससन्धिदेसनासन्धिप्पभेदेन च विभजितब्बभावो केन अम्हेहि जानितब्बो सद्दहितब्बो’’ति वत्तब्बभावतो ‘‘तेनाहा’’तिआदि वुत्तं. तत्थ तेन तथा विभजितब्बभावेन आयस्मा महाकच्चानो ‘‘नेरुत्तमधिप्पायो’’तिआदिकं (नेत्ति. ४ हारसङ्खेप) यं वचनं आह, तेन वचनेन तुम्हेहि चतुब्यूहहारस्स तथा विभजितब्बभावो जानितब्बो सद्दहितब्बोति वुत्तं होति.

‘‘एत्तावता च चतुब्यूहहारो परिपुण्णो, अञ्ञो नियुत्तो नत्थी’’ति वत्तब्बत्ता ‘‘नियुत्तो चतुब्यूहो हारो’’ति वुत्तं. तत्थ यस्सं यस्सं पाळियं यो यो चतुब्बिधो, सो सो चतुब्यूहहारो च यथालाभवसेन योजितो, तस्सं तस्सं पाळियं सो सो चतुब्बिधो चतुब्यूहहारो तथा निद्धारेत्वा युत्तो योजितोति अत्थो दट्ठब्बो.

इति चतुब्यूहहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

७. आवट्टहारविभङ्गविभावना

२९. येन येन संवण्णनाविसेसभूतेन चतुब्यूहहारविभङ्गेन नेरुत्तादयो विभत्ता, सो…पे… चतुब्यूहहारविभङ्गो परिपुण्णो, ‘‘कतमो आवट्टो हारविभङ्गो’’ति पुच्छितब्बत्ता तत्थ कतमो आवट्टो हारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु कतमो संवण्णनाविसेसो आवट्टो हारो आवट्टहारविभङ्गो नामाति पुच्छति. ‘‘एकम्हि पदट्ठाने’’न्तिआदिनिद्देसस्स इदानि मया वुच्चमानो ‘‘आरम्भथा’’तिआदिको वित्थारसंवण्णनाविसेसो आवट्टहारविभङ्गो नामाति गहितो. ‘‘तत्थ देसनायं ¶ एकस्मिं पदट्ठाने ¶ देसनारुळ्हे सेसकं पदट्ठानं परियेसति, परियेसित्वा कथं पटिपक्खे आवट्टेती’’ति वत्तब्बत्ता –

‘‘आरम्भथ निक्कमथ, युञ्जथ बुद्धसासने;

धुनाथ मच्चुनो सेनं, नळागारंव कुञ्जरो’’ति. –

गाथा वुत्ता. इध गाथायं एकस्मिं पदट्ठाने देसनारुळ्हे सेसकं पदट्ठानं परियेसतीति वुत्तं होति. गाथात्थो पन अट्ठकथायं (नेत्ति. अट्ठ. २९) वुत्तो.

‘‘आरम्भथा’तिआदिगाथायं कतरस्मिं पदट्ठाने देसनारुळ्हे कतमं सेसकं पदट्ठानं परियेसती’’ति वत्तब्बत्ता ‘‘आरम्भथ निक्कमथाति वीरियस्स पदट्ठान’’न्तिआदि वुत्तं. तत्थ ‘‘वीरियस्स पदट्ठान’’न्ति सामञ्ञवसेन वुत्तम्पि आरम्भधातुसङ्खातं वीरियं निक्कमधातुसङ्खातस्स वीरियस्स पदट्ठानं, निक्कमधातुसङ्खातं वीरियं परक्कमधातुसङ्खातस्स वीरियस्स पदट्ठानं, परक्कमधातुसङ्खातं वीरियं समथभावनासहितस्स वीरियस्स पदट्ठानन्तिआदिना परियेसितब्बन्ति गहेतब्बं. ‘‘युञ्जथा’’ति इमिना वुत्तं समथभावनासहितं वीरियं ‘‘बुद्धसासने’’ति इमिना वुत्तस्स महग्गतसमाधिस्स पदट्ठानं, देसनारुळ्हं सुखादिकं सेसकम्पि पदट्ठानं परियेसितब्बं. ‘‘धुनाथ मच्चुनो सेन’’न्ति पदेन गहितं विपस्सनासहितं वीरियं किलेसधुनने समत्थाय पञ्ञाय पदट्ठानं, देसनारुळ्हं समाधिआदिकं सेसकम्पि पदट्ठानं परियेसितब्बं.

‘‘यदि ‘आरम्भथा’तिआदिकं वुत्तं वीरियं सामञ्ञभूतानं वीरियसमाधिपञ्ञानंयेव पदट्ठानं सिया, एवं सति कथं वट्टमूलं छिन्दित्वा विवट्टं पापेस्सन्ती’’ति वत्तब्बत्ता पुन ‘‘आरम्भथ निक्कमथाति वीरियिन्द्रियस्स पदट्ठान’’न्तिआदि वुत्तं. आधिपच्चकिच्चताय युत्तस्सापि वीरियाधिकस्स पदट्ठानत्ता आरभन्ता योगावचरपुग्गला वट्टमूलं छिन्दित्वा विवट्टं पापेन्तीति वुत्तं होति. ‘‘आरम्भथा’’तिआदिका पन यस्मा वीरियारम्भवत्थुआदिदेसना होति, तस्मा आरम्भवत्थुआदीनियेव संवण्णितानि पदट्ठानन्ति चोदनं मनसि कत्वा आह ‘‘इमानि पदट्ठानानि देसना’’ति. ‘‘आरम्भथा’’तिआदिका यथावुत्तपदट्ठानानि देसना होति, न वीरियारम्भवत्थुआदीनि, तस्मा पदट्ठानंयेव संवण्णितन्ति दट्ठब्बं.

एवं ¶ ‘‘आरम्भथा’’तिआदिदेसनाय पदट्ठानवसेन अत्थो विभत्तो, अम्हेहि च ञातो, ‘‘कथं तस्सायेव देसनाय पटिपक्खवसेन अत्थो विभजितब्बो’’ति वत्तब्बत्ता ‘‘अयुञ्जन्तानं वा’’तिआदि ¶ वुत्तं. तत्थ योगे भावनायं अयुञ्जन्तानं सत्तानं अपरिपक्कञाणानं योगे योगहेतु वासनाभागियवसेन आयतिं जाननत्थाय ‘‘आरम्भथा’’तिआदिदेसना आरद्धा. युञ्जन्तानं परिपक्कञाणानं सत्तानं आरम्भे आरम्भहेतु दिट्ठेव धम्मे परिजाननत्थाय ‘‘आरम्भथा’’तिआदिदेसना आरद्धा.

तत्थ तेसु युञ्जन्तायुञ्जन्तेसु परिपक्कापरिपक्कञाणेसु ये अपरिपक्कञाणा सत्ता न युञ्जन्ति, ते अपरिपक्कञाणा सत्ता पमादमूलका हुत्वा योगे भावनायं येन पमादेन न युञ्जन्ति, सो पमादो तण्हामूलको पमादो, अविज्जामूलको पमादोति दुब्बिधो होति. तत्थ तस्मिं दुब्बिधे पमादे अञ्ञाणेन निवुतो अविज्जामूलको सत्तो येन पमादेन ञेय्यट्ठानं ‘‘इमे उप्पादवयधम्मा पञ्चक्खन्धा ञेय्यट्ठानं नामा’’ति नप्पजानाति, अयं अञ्ञाणहेतुको पमादो अविज्जामूलको पमादा नाम. यो पमादो तण्हामूलको, सो पमादो तिविधो अनुप्पन्नानं भोगानं उप्पादाय परियेसन्तो तण्हिको सत्तो यं पमादं आपज्जति, अयं पमादो च, उप्पन्नानं भोगानं ठितत्थाय रक्खन्तो तण्हिको सत्तो आरक्खनिमित्तं यं पमादं आपज्जति, अयं पमादो च, ठितं भोगं परिभुञ्जन्तो तण्हिको सत्तो परिभोगनिमित्तं यं पमादं आपज्जति, अयं पमादो चाति तिविधो होति. इति लोके अयं पमादो चतुब्बिधो अविज्जापदट्ठानो एकविधो पमादो, तण्हापदट्ठानो तिविधो पमादोति चतुब्बिधो होति. तत्थ तासु अविज्जातण्हासु नामकायो फस्सादिनामसमूहो अविज्जाय पदट्ठानं, रूपकायो पथवीआदिरूपसमूहो तण्हाय पदट्ठानं होति. इदं वुत्तं होति – आरम्भधातुनिक्कमधातुसङ्खातस्स वीरियस्स पटिपक्खो चतुब्बिधो पमादो निद्धारेतब्बो, निद्धारेत्वा एकविधस्स पमादस्स अविज्जा पदट्ठानं, तिविधस्स पमादस्स तण्हा पदट्ठानं. अविज्जाय नामकायो पदट्ठानं, तण्हाय रूपकायो पदट्ठानन्ति पटिपक्खे आवट्टेत्वा पदट्ठानं परियेसितब्बन्ति.

‘‘कस्मा ¶ नामकायो अविज्जाय पदट्ठानं भवति, रूपकायो तण्हाय पदट्ठानं भवती’’ति पुच्छितब्बत्ता ‘‘तं किस्स हेतू’’ति पुच्छित्वा ‘‘रूपीसु भवेसु अज्झोसानं, अरूपीसु सम्मोहो’’ति वुत्तं. रूपीसु भवेसु रूपधम्मेसु अहंममादिवसेन अज्झोसानं तण्हाभिनिवेसो सत्तेसु पतिट्ठितो यस्मा होति, तस्मा रूपकायो तण्हाय पदट्ठानं भवति. अनमतग्गे हि संसारे इत्थिपुरिसा अञ्ञमञ्ञरूपाभिरामा भवन्ति. अरूपीसु फस्सादीसु सुखुमभावतो सम्मोहो सत्तेसु पतिट्ठितो यस्मा होति, तस्मा नामकायो अविज्जाय पदट्ठानं भवतीति योजना कातब्बा. इदं वुत्तं होति – रूपकायनामकायेसु आरम्मणकरणवसेन तण्हाय ¶ च अविज्जाय च उप्पज्जनतो रूपकायो तण्हाय पदट्ठानं, नामकायो अविज्जाय पदट्ठानन्ति नीहरितब्बावाति.

‘‘कतमो रूपकायो, कतमो नामकायो’’ति पुच्छितब्बत्ता ‘‘तत्थ रूपकायो रूपक्खन्धो, नामकायो चत्तारो अरूपिनो खन्धा’’ति वुत्तं. तत्थ तेसु रूपकायनामकायेसु रूपकायो रूपसमूहो नाम रूपक्खन्धो होति, नामकायो नामसमूहो नाम चत्तारो अरूपिनो खन्धाति. इमे पञ्चक्खन्धा अविज्जातण्हानं आरम्मणत्ता सउपादाना भवेय्युं, ‘‘कतमेन उपादानेन सउपादाना भवन्ती’’ति पुच्छितब्बत्ता तथेव पुच्छित्वा विस्सज्जेतुं ‘‘इमे पञ्चक्खन्धा कतमेन उपादानेन सउपादाना? तण्हाय च अविज्जाय चा’’ति वुत्तं. तत्थ उपादानभूताय तण्हाय च उपादानभूताय अविज्जाय च इमे पञ्चक्खन्धा सउपादाना नाम भवन्तीति योजना कातब्बा.

‘‘कित्तकानि उपादानानि तण्हा नाम भवन्ति, कित्तकानि उपादानानि अविज्जा नाम भवन्ती’’ति पुच्छितब्बत्ता ‘‘तत्थ तण्हा द्वे’’तिआदि वुत्तं. तत्थाति तासु तण्हाअविज्जासु. कामुपादानञ्च सीलब्बतुपादानञ्च द्वे उपादानानि तण्हा नाम भवन्ति. तण्हावसेन हि ‘‘मम सीलं, मम वत’’न्ति परामसनं भवति. दिट्ठुपादानञ्च अत्तवादुपादानञ्च द्वे उपादानानि अविज्जा नाम भवन्ति. अविज्जावसेन हि सस्सतदिट्ठि चेव अहंममादिदिट्ठि च भवन्ति. ‘‘इमेहि चतूहि उपादानेहि सउपादानक्खन्धा चतूसु सच्चेसु कित्तकं सच्चं नामा’’ति पुच्छितब्बत्ता ‘‘इमेही’’तिआदि वुत्तं. ये लोकियक्खन्धा सउपादाना खन्धा भवन्ति, उपादानेन हि ¶ उपादानानिपि भवन्ति, इदं सउपादानक्खन्धपञ्चकं दुक्खं दुक्खसच्चं नाम. यानि चत्तारि उपादानानि दुक्खकारणानि भवन्ति, अयं उपादानचतुक्को समुदयो समुदयसच्चं नाम भवति. पञ्चक्खन्धाति सउपादाना पञ्चक्खन्धा दुक्खवत्थुभावतो दुक्खं. तेसन्ति सउपादानानं पञ्चक्खन्धानं. धम्मं देसेतीति ‘‘आरम्भथा’’तिआदिकं धम्मं वेनेय्यानुरूपं भगवा देसेति. सामञ्ञेन पुब्बे वुत्तम्पि अत्थवसेन विसेसं दस्सेतुं पुन ‘‘दुक्खस्स परिञ्ञाय, समुदयस्स पहानाया’’ति वुत्तं.

३०. आरम्भपटिपक्खभूतपमादवसेन पुरिमसच्चद्वयं आचरियेन निद्धारितं, अम्हेहि च ञातं, ‘‘इतरसच्चद्वयं कथं निद्धारितब्ब’’न्ति वत्तब्बत्ता तं द्वयम्पि पमादमुखेनेव निद्धारितब्बन्ति दस्सेतुं ‘‘तत्थ यो तिविधो’’तिआदि वुत्तं. तत्थ तत्थाति तेसु तण्हामूलकअविज्जामूलकेसु पमादेसु. तस्साति तिविधस्स तण्हामूलकस्स पमादस्स. सम्पटिवेधेनाति अस्सादादीनं परिजाननेन. रक्खणाति अत्तचित्तस्स रक्खणसङ्खाता. पटिसंहरणाति ‘‘तस्सा’’ति ¶ इमिना वुत्तस्स पमादस्स पटिपक्खभूतेन अप्पमादाननुयोगेन संहरणा या खेपना अत्थि, अयं पमादस्स पटिपक्खभूतेन अप्पमादानुयोगेन पवत्ता खेपनसङ्खाता भावना समथो नामाति पमादस्स पटिपक्खमुखेन पुन आवट्टेत्वा समथो निद्धारितोति.

‘‘सो समथो कथं केन उपायेन भवती’’ति पुच्छितब्बत्ता तथा पुच्छित्वा उपायं दस्सेतुं ‘‘सो कथ’’न्तिआदि वुत्तं. तत्थ कथन्ति केन उपायेन. ‘‘कामेन्तीति कामा, कामीयन्तीति वा कामा’’ति वुत्तानं द्विन्नं कामानं पटिच्च उप्पज्जमानं अस्सादञ्च, ‘‘अप्पस्सादा कामा बहुदुक्खा’’तिआदि (म. नि. १.२३५) वचनतो अप्पस्सादनीयानं कामानं पटिच्च उप्पज्जमानं आदीनवञ्च. कामानन्ति च कम्मत्थे सामिवचनं. तेन वुत्तं –‘‘कामे पटिच्चा’’ति (नेत्ति. अट्ठ. ३०). ‘‘कामानमेतं निस्सरणं, यदिदं नेक्खम्म’’न्ति (इतिवु. ७२) वचनतो निस्सरणन्ति इध पठमज्झानं अधिप्पेतं. वोकारन्ति एत्थ व-कारो आगमो, ओ-कारं लामकभावं. आनिसंसन्ति चतुपारिसुद्धिसीलादिकं. यदा जानाति, तदा तेन उपायेन समथो भवतीति अत्थो.

समथो ¶ आचरियेन विभत्तो, अम्हेहि च ञातो, ‘‘कतमा विपस्सना’’ति पुच्छितब्बत्ता विपस्सनं विभजितुं ‘‘तत्थ या वीमंसा’’तिआदि वुत्तं. अथ वा कामानं अस्सादादयो यदा जानाति, तदा समथो भवतीति वुत्तो, ‘‘तस्मिं समथे भवमाने सति कतमा भवती’’ति पुच्छितब्बत्ता ‘‘तत्थ या वीमंसा’’तिआदि वुत्तं. तत्थ तत्थाति तस्मिं समथे भवमाने सति अस्सादादीनं या अनिच्चादिवीमंसा उपपरिक्खा पञ्ञा भवति, अयं वीमंसा उपपरिक्खा पञ्ञा विसेसेन पस्सनतो विपस्सना नाम. अथ वा तिविधस्स तण्हामूलकस्स पमादस्स सम्पटिवेधेन रक्खणा पटिसंहरणा, अयं समथोति आचरियेन वुत्तो, ‘‘कतमा विपस्सना’’ति पुच्छितब्बत्ता ‘‘तत्थ या वीमंसा’’तिआदि वुत्तं. तत्थ तत्थाति तस्मिं यथावुत्ते समथे सति यथावुत्तस्स पमादस्स अनिच्चादिवसेन या वीमंसा उपपरिक्खा पञ्ञा उप्पन्ना, अयं वीमंसा उपपरिक्खा पञ्ञा विसेसेन पस्सनतो विपस्सना नाम. वीमंसाव दुब्बला, उपपरिक्खा बलवतीति विसेसो.

समथो चेव विपस्सना च द्वे धम्मा आचरियेन निद्धारिता, ‘‘इमे निद्धारिता द्वे धम्मा किं गच्छन्ती’’ति वत्तब्बत्ता ‘‘इमे द्वे’’तिआदि वुत्तं. समथो समथभावनापारिपूरिं गच्छति, विपस्सना विपस्सनाभावनापारिपूरिं गच्छति. ‘‘इमेसु द्वीसु धम्मेसु भावियमानेसु कतमे योगावचरेन पहीयन्ती’’ति वत्तब्बत्ता ‘‘इमेसू’’तिआदि वुत्तं. समथे धम्मे भावियमाने तण्हा ¶ योगावचरेन पहीयति, विपस्सनाय भावियमानाय अविज्जा योगावचरेन पहीयतीति इमे द्वे पहातब्बा धम्मा पहीयन्ति तण्हा चेव अविज्जा च. ‘‘इमेसु द्वीसु धम्मेसु पहीयमानेसु कतमे धम्मा निरुज्झन्ती’’ति पुच्छितब्बत्ता उपादानादयोपि निरुज्झन्तीति सकलवट्टदुक्खनिरोधं दस्सेन्तो ‘‘इमेसु द्वीसु धम्मेसु पहीनेसू’’तिआदिमाह. तत्थ तण्हाय समथभावनाय पहीयमानाय, अविज्जाय विपस्सनाभावनाय पहीयमानाय इमेसु द्वीसु धम्मेसु द्वीहि भावनाहि पहीनेसु कामुपादानादीनि चत्तारि उपादानानि विक्खम्भनसमुच्छेदवसेन निरुज्झन्ति, न भङ्गक्खणवसेन.

एत्थाह – ‘‘तण्हानिरोधा उपादाननिरोधो’’ति वुत्तत्ता ‘‘तण्हाय पहीयमानाय उपादानानि निरुज्झन्ती’’ति वचनं युत्तं होतु, कथं अविज्जाय पहीयमानाय उपादानानि निरुज्झन्तीति? ‘‘तण्हानिरोधा उपादाननिरोधो’’ति ¶ पाठे अविज्जासहिततण्हानिरोधा उपादाननिरोधोति अत्थसम्भवतो. यथा हि तण्हासहिताव अविज्जा सङ्खारानं पच्चयो, एवं अविज्जासहिताव तण्हा उपादानानं पच्चयो होतीति अविज्जासहिततण्हानिरोधा उपादाननिरोधोति अत्थो सम्भवतीति गहेतब्बो. विक्खम्भनसमुच्छेदवसेन उपादाननिरोधा तथेव भवनिरोधोति एस नयो सेसेसुपि. एवमेतस्स केवलस्स दुक्खक्खन्धस्स निरोधोति एत्थापि तण्हासहितअविज्जानिरोधा सङ्खारनिरोधोतिआदिको गहितोति दट्ठब्बो. इतीति एवं विसभागसभागधम्मानं आवट्टनवसेन निद्धारितानि च पुरिमकानि द्वे सच्चानि च, समथो च विपस्सना च इमे द्वे धम्मा मग्गो च मग्गसच्चञ्च, वट्टनिरोधो वट्टनिरोधसच्चञ्च निब्बानन्ति चत्तारि सच्चानि निद्धारितानि.

‘‘वीरियपटिपक्खभूतस्स पमादादिधम्मस्स वसेन वा सभागभूतस्स पमादादिधम्मस्स वसेन वा आवट्टेत्वा चतुन्नं सच्चानं निद्धारितब्बभावो अम्हेहि केन सद्दहितब्बो’’ति वत्तब्बत्ता ‘‘तेनाहा’’तिआदि वुत्तं. तेन तथा निद्धारितब्बभावेन भगवा ‘‘आरम्भथ निक्कमथा’’तिआदिगाथावचनं आह, तेन ‘‘आरम्भथ निक्कमथा’’तिआदिगाथावचनेन तथा चतुन्नं सच्चानं निद्धारितब्बभावो तुम्हेहि सद्दहितब्बोति वुत्तं होति.

‘‘आरम्भथ निक्कमथा’तिआदिना वोदानपक्खंयेव निक्खिपित्वा तस्सेव वोदानपक्खस्स विसभागधम्मसभागधम्मवसेनेव आवट्टेत्वा चतुसच्चनिद्धारणं कातब्ब’’न्ति पुच्छितब्बत्ता संकिलेसपक्खम्पि निक्खिपित्वा तस्सेव संकिलेसस्स विसभागधम्मसभागधम्मवसेनपि आवट्टेत्वा चतुसच्चनिद्धारणं दस्सेन्तो ‘‘यथापि मूले’’तिआदिगाथावचनमाह. अट्ठकथायं पन –

‘‘एवं ¶ वोदानपक्खं निक्खिपित्वा तस्स विसभागधम्मवसेन, सभागधम्मवसेन च आवट्टनं दस्सेत्वा इदानि संकिलेसपक्खं निक्खिपित्वा तस्स विसभागधम्मवसेन, सभागधम्मवसेन च आवट्टनं दस्सेतुं ‘यथापि मूले’ति गाथमाहा’’ति (नेत्ति. अट्ठ. ३०) –

वुत्तं. गाथात्थोपि अट्ठकथायं वुत्तो. तथापि यतिपोतानं अत्थाय अट्ठकथानुसारेनेव कथयिस्साम.

समूहो ¶ रुक्खो मूलति पतिट्ठाति एतेन अवयवेन भूमिभागे ठितेनाति मूलं, किं तं? भूमिभागे ठितो मूलसङ्खातो रुक्खावयवो, तस्मिं मूले. नत्थि उपद्दवो फरसुछेदादिअन्तरायो अस्स मूलस्साति अनुपद्दवो. दळ्हेति उपद्दवाभावेन सभावतो थिरे सति. छिन्दीयतीति छिन्नो, को सो? भूमियं पतिट्ठितमूलसहितो रुक्खावयवो, न छिन्दित्वा गहितो रुक्खावयवो. रुहति वड्ढतीति रुक्खो. सो च भूमियं पतिट्ठितमूलसहितो रुक्खावयवो रुक्खोति वुत्तो यथा ‘‘समुद्दो दिट्ठो’’ति. पुनरेव रूहतीति पुन अङ्कुरुप्पादनं सन्धाय वुत्तं. तण्हानुसयेति अत्तभावसङ्खातस्स रुक्खस्स मूले. अनूहतेति अरहत्तमग्गञाणेन अनुपच्छिन्ने सति इदं अत्तभावसङ्खातं दुक्खं दुक्खहेतु पुनप्पुनं अब्बोच्छिन्नं निब्बत्तति न निरुज्झतियेवाति गाथात्थो.

‘‘इध गाथायं यो तण्हानुसयो अनूहतभावेन दुक्खस्स निब्बत्तनस्स मूलन्ति वुत्तो, अयं तण्हानुसयो कतमस्सा तण्हाय अनुसयो’’ति पुच्छति, ‘‘तण्हाय कामतण्हादिवसेन बहुविधत्ता भवतण्हाय अनुसयो’’ति विस्सज्जेति भवस्सादतण्हाभावतो. यो अनुसयो एतस्स भवतण्हासङ्खातस्स धम्मस्स पच्चयो होति, अयं अनुसयो अविज्जानुसयो होति. ‘‘अनुसयो बहुविधो, कस्मा अविज्जानुसयोति सद्दहितब्बो’’ति वत्तब्बत्ता ‘‘अविज्जापच्चया हि भवतण्हा’’ति वुत्तं. अविज्जाय भवतण्हाय पच्चयत्ता अविज्जानुसयो सद्दहितब्बो. अविज्जाय हि भवेसु आदीनवस्स अदस्सनवसेन भवस्सादतण्हा भवतीति. इमे द्वे किलेसातिआदिम्हि हेट्ठा वुत्तनयानुसारेन चत्तारि सच्चानि निद्धारेत्वा विसभागसभागधम्मावट्टनं विञ्ञातब्बं, समथविपस्सना पन मग्गसम्पयुत्ताव गहेतब्बा.

‘‘सब्बपापस्सा’’तिआदिकस्स अनुसन्ध्यत्थो अट्ठकथायं (नेत्ति. अट्ठ. ३०) वुत्तो. सब्बपापस्साति कम्मपथभावप्पत्तापत्तस्स निरवसेसस्स अकुसलस्स. अकरणन्ति सपरसन्तानेसु अनुप्पादनं ¶ . कुसलस्साति कम्मपथभावप्पत्तापत्तस्स तेभूमककुसलस्स चेव लोकुत्तरकुसलस्स च. उपसम्पदाति सन्ताने उप्पादनवसेन सम्पदा. सस्स अत्तनो चित्तन्ति सचित्तं, सचित्तस्स परियोदापनं वोदानं अरहत्तफलुप्पत्तियाति सचित्तपरियोदापनं ¶ . अरहत्तमग्गुप्पादो पन ‘‘कुसलस्स उपसम्पदा’’ति पदेन गहितो. एतं अकरणादित्तयदीपनं बुद्धानं सम्मासम्बुद्धानं सासनं ओवादोति गाथात्थो.

गाथायं यस्स पापस्स अकरणं वुत्तं, तं पापं दुच्चरितकम्मपथवसेन विभजितुं ‘‘सब्बपापं नामा’’तिआदि वुत्तं. दोससमुट्ठानन्ति येभुय्यवसेन वुत्तं, लोभसमुट्ठानम्पि भवति. लोभसमुट्ठानन्तिपि येभुय्यवसेन वुत्तं, दोससमुट्ठानम्पि भवति. मोहसमुट्ठानम्पि तथेव वुत्तं. लोभसमुट्ठानदोससमुट्ठानम्पि सम्भवतीति दट्ठब्बं. सब्बपापो दुच्चरितकम्मपथप्पभेदेन विभत्तो, ‘‘एत्तकेनेव विभजितब्बो, उदाहु अञ्ञेन विभजितब्बो’’ति पुच्छितब्बत्ता अञ्ञेन अकुसलमूलअगतिगमनभेदेनपि विभजितुं ‘‘या अभिज्झा’’तिआदि वुत्तं. अट्ठकथायं पन ‘‘एवं दुच्चरितअकुसलकम्मपथकम्मविभागेन ‘सब्बपाप’न्ति एत्थ वुत्तपापं विभजित्वा इदानिस्स अकुसलमूलवसेन अगतिगमनविभागम्पि दस्सेतुं ‘अकुसलमूल’न्तिआदि वुत्त’’न्ति (नेत्ति. अट्ठ. ३०) अनुसन्ध्यत्थो वुत्तो. मोहवसेन सभावं अजानन्तस्स भयसम्भवतो यं भया च मोहा च अगतिं गच्छति, इदं मोहसमुट्ठानन्ति वुत्तं.

सब्बपापो आचरियेन विभत्तो, अम्हेहि च ञातो, ‘‘कतमं सब्बपापस्स अकरण’’न्ति पुच्छितब्बत्ता तत्थ लोभो असुभाया’’तिआदि वुत्तं. अट्ठकथायं पन –

‘‘एत्तावता ‘सब्बपापस्स अकरण’न्ति एत्थ पापं दस्सेत्वा इदानि तस्स अकरणं दस्सेन्तो ‘लोभो…पे… पञ्ञाया’ति तीहि कुसलमूलेहि तिण्णं अकुसलमूलानं पहानवसेन सब्बपापस्स अकरणं अनुप्पादनमाहा’’ति (नेत्ति. अट्ठ. ३०) –

वुत्तं. सुभाधिमुत्तवसेन पवत्तो लोभो असुभाय असुभभावनाय तथापवत्तेन अलोभेन तदङ्गविक्खम्भनप्पहानेन पहीयति, सत्तेसु कुज्झनदुस्सनवसेन पवत्तो दोसो मेत्ताय मेत्ताभावनाय तथापवत्तेन अदोसेन च तदङ्गविक्खम्भनप्पहानेन पहीयति, सत्तेसु चेव सङ्खारेसु च मुय्हनवसेन पवत्तो मोहो पञ्ञाय ¶ विचारणपञ्ञाय च भावनामग्गपञ्ञाय च तदङ्गविक्खम्भनसमुच्छेदप्पहानेन पहीयति.

‘‘यदि ¶ तीहि कुसलमूलेहेव अकुसलमूलानि पहीयन्ति, एवं सति उपेक्खाकरुणामुदिता निरत्थका भवेय्यु’’न्ति वत्तब्बत्ता ‘‘तथा लोभो उपेक्खाया’’तिआदि वुत्तं. उपेक्खायाति ‘‘सब्बे सत्ता कम्मस्सका’’तिआदिना भाविताय उपेक्खाय. मुदिता अरतिं वूपसमेत्वा अरतिया मूलभूतं मोहम्पि पजहतीति मनसि कत्वा ‘‘मोहो मुदिताय पहानं अब्भत्थं गच्छती’’ति वुत्तं. ‘‘अकुसलमूलानं कुसलमूलादीहि पहातब्बत्तं केन अम्हेहि सद्दहितब्ब’’न्ति वत्तब्बत्ता ‘‘तेनाहा’’तिआदि वुत्तं. तेन तथा पहातब्बत्तेन भगवा ‘‘सब्बपापस्स अकरण’’न्ति वचनं आह, तेन ‘‘सब्बपापस्स अकरण’’न्ति वचनेन तथा पहातब्बत्तं तुम्हेहि सद्दहितब्बन्ति वुत्तं होति.

३१. ‘‘एत्तावता च सब्बपापो विभत्तो, तस्स अकरणञ्च विभत्तं सिया, एवं सति अट्ठमिच्छत्तानं अकरणं अनिवारितं सिया’’ति वत्तब्बत्ता ‘‘सब्बपापं नाम अट्ठ मिच्छत्तानी’’तिआदि वुत्तं. मिच्छासतीति अनिच्चादीसु ‘‘निच्च’’न्ति अनुस्सरणचिन्तनादिवसेन पवत्तअकुसलप्पवत्ति.

सब्बपापस्स अकरणं बहुधा आचरियेन विभत्तं, अम्हेहि च विञ्ञातं, ‘‘कथं कुसलस्स सम्पदा विभजितब्बा विञ्ञातब्बा’’ति वत्तब्बत्ता कुसलस्स सम्पदं विभजित्वा दस्सेन्तो ‘‘अट्ठसु मिच्छत्तेसु पहीनेसू’’तिआदिमाह. अट्ठ सम्मत्तानीति सम्मादिट्ठि सम्मासङ्कप्पो सम्मावाचा सम्माकम्मन्तो सम्माआजीवो सम्मावायामो सम्मासति सम्मासमाधीति अट्ठसम्मत्तानि विसभागपरिवत्तनधम्मवसेन सम्पज्जन्ति. अतीतस्साति अतीतेन सम्मासम्बुद्धेन देसितस्स. विपस्सिनो हि भगवतो अयं पातिमोक्खुद्देसगाथा. चित्ते परियोदापितेति चित्तपटिबद्धा पञ्चक्खन्धापि परियोदापिता भवन्ति. ‘‘चित्तपरियोदापितेन पञ्चन्नं खन्धानं परियोदापितभावो कथं अम्हेहि सद्दहितब्बो’’ति वत्तब्बत्ता ‘‘एवञ्ही’’तिआदि वुत्तं. एवं वुत्तप्पकारेन भगवा यं ‘‘चेतोविसुद्धत्थं भिक्खवे तथागते ब्रह्मचरियं वुस्सती’’ति वचनं आह, तेन ‘‘चेतो…पे… वुस्सती’’ति वचनेन तुम्हेहि सद्दहितब्बोति वुत्तं होति. ‘‘परियोदापना कतिविधा भवन्ती’’ति वत्तब्बत्ता ‘‘दुविधा ही’’तिआदि वुत्तं. समथविपस्सनाय ¶ नीवरणप्पहानञ्च अरियमग्गभावनाय अनुसयसमुग्घातो चाति परियोदापनस्स दुविधत्ता पञ्चक्खन्धा परियोदापिता भवन्तीति अत्थो. पहीननीवरणानुसया हि पुग्गला पसादनीयवण्णा होन्ति.

‘‘परियोदापनस्स कित्तिका भूमियो’’ति पुच्छितब्बत्ता ‘‘द्वे परियोदापनभूमियो’’तिआदि वुत्तं. ‘‘‘सब्बपापस्स अकरण’न्तिआदिगाथाय देसितेसु धम्मेसु कतमं दुक्खसच्चं, कतमं समुदयसच्चं ¶ , कतमं मग्गसच्चं, कतमं निरोधसच्च’’न्ति पुच्छितब्बत्ता ‘‘तत्थ यं पटिवेधेना’’तिआदि वुत्तं. तत्थाति गाथाय देसितेसु धम्मेसु यं खन्धपञ्चकं पटिवेधेन परिञ्ञाभिसमयेन परियोदापेति, इदं खन्धपञ्चकं दुक्खं दुक्खसच्चं भवे. यतो तण्हासंकिलेसतो खन्धपञ्चकं परियोदापेति, अयं तण्हासंकिलेसो समुदयो समुदयसच्चं. येन अरियमग्गङ्गेन परियोदापेति, अयं अरियमग्गो मग्गसच्चं. यं असङ्खतधातुं अधिगतेन पुग्गलेन परियोदापितं, अयं असङ्खतधातुधम्मो निरोधो निरोधसच्चं भवे. इमानि चत्तारि सच्चानि गाथाय देसितधम्मानं सभागविसभागधम्मावट्टनवसेन निद्धारितानि. ‘‘तेनाहा’’तिआदिकस्स अत्थो हेट्ठा वुत्तनयेन वेदितब्बो.

‘‘सब्बपापस्स अकरण’’न्तिआदिगाथाय देसितानं धम्मानं सभागविसभागधम्मावट्टनवसेन चत्तारि सच्चानि आचरियेन निद्धारितानि, अम्हेहि च विञ्ञातानि.

‘‘‘धम्मो हवे रक्खति धम्मचारिं, छत्तं महन्तं यथ वस्सकाले;

एसानिसंसो धम्मे सुचिण्णे, न दुग्गतिं गच्छति धम्मचारी’ति –

गाथाय देसितानं धम्मानं विसभागसभागधम्मानं आवट्टनवसेन कथं चत्तारि सच्चानि निद्धारितानी’’ति वत्तब्बत्ता ‘‘धम्मो हवे’’तिआदिमाह. ताय गाथाय देसिते धम्मे विभजित्वा दस्सेन्तो ‘‘धम्मो नामा’’तिआदिमाह. तत्थ धम्मो नामाति पुञ्ञधम्मो नाम. इन्द्रियसंवरोति मनच्छट्ठिन्द्रियसंवरसीलादिको सब्बो संवरो. तेन वुत्तं –‘‘इन्द्रियसंवरसीसेन ¶ चेत्थ सब्बम्पि सीलं गहितन्ति दट्ठब्ब’’न्ति (नेत्ति. अट्ठ. ३१). चत्तारो अपाया दुक्कटकम्मकारीनं गतिभूतत्ता दुग्गति. सब्बा उपपत्तियो पन दुक्खदुक्खसङ्खारदुक्खविपरिणामदुक्खसमङ्गीनं गतिभूतत्ता दुग्गति नाम.

‘‘तस्मिं दुविधे धम्मे इन्द्रियसंवरधम्मो कत्थ ठितो, कथं सुचिण्णो, कुतो रक्खती’’ति पुच्छितब्बत्ता ‘‘तत्थ या संवरसीले’’तिआदि वुत्तं. तत्थाति तस्मिं दुविधे धम्मे. संवरसीले ठिता या अखण्डकारिता होति, अयं अखण्डवसेन कातब्बो संवरसीले ठितो सुट्ठु आचिण्णपरिचिण्णो पुञ्ञधम्मो चतूहि अपायेहि अत्तनो आधारं अत्तानं रक्खन्तं पुग्गलं एकन्तिकभावेन रक्खति, अनेकन्तिकभावेन पन रक्खितमत्तो पुञ्ञधम्मोपि रक्खतीति अत्थो गहेतब्बो. अपायेहीति च पधानवसेन वुत्तं, रोगादिअन्तरायतोपि रक्खति. रोगादिअन्तरायो वा अयतो अपगतत्ता अपायन्तोगधोति दट्ठब्बो.

‘‘तथा ¶ रक्खतीति केन अम्हेहि सद्दहितब्बो’’ति वत्तब्बत्ता ‘‘एवं भगवा’’तिआदि वुत्तं. एवं वुत्तप्पकारेन लक्खणपकारदस्सनं भगवा ‘‘द्वेमा, भिक्खवे, सीलवतो गतियो देवा च मनुस्सा चा’’ति यं वचनं आह, तेन ‘‘द्वेमा…पे… मनुस्सा चा’’ति वचनेन तुम्हेहि सद्दहितब्बोति वुत्तं होति. ‘‘संवरसीले ठितस्स अखण्डकातब्बस्स सुचिण्णस्स पुञ्ञधम्मस्स अपायेहि रक्खणे एकन्तिकभावो केन सुत्तेन दीपेतब्बो’’ति वत्तब्बत्ता ‘‘एवञ्च नाळन्दाय’’न्तिआदि वुत्तं. तत्थ एवञ्चाति इमिना इदानि वुच्चमानेन पकारेनपि वुत्तप्पकारो अत्थो वेदितब्बो. नाळन्दायन्ति नाळन्दनामके निगमे निसिन्नो असिबन्धकनामस्स पुत्तो गामणि गामजेट्ठको भगवन्तं एतं वुच्चमानं ‘‘ब्राह्मणा, भन्ते’’तिआदिवचनं अवोच.

ब्राह्मणाति बाहिरका ब्राह्मणा. भन्तेति भगवन्तं गामणि आलपति. पच्छाभूमकाति पच्छिमदिसाय निसिन्नका. उय्यापेन्तीति मनुस्सलोकतो उद्धं देवलोकं यापेन्ति पापेन्ति.

इधस्साति इधलोके अस्स भवेय्य. पुरिसो पाणातिपाती…पे… मिच्छादिट्ठिको अस्स भवेय्याति योजना. सेसं पाळितो चेव वुत्तानुसारेन च ञेय्यं.

३२. ‘‘विसभागधम्मसभागधम्मावट्टनवसेन ¶ चतुन्नं सच्चानं निद्धारितभावो केन अम्हेहि सद्दहितब्बो’’ति वत्तब्बत्ता ‘‘तेनाह महाकच्चानो एकम्हि पदट्ठाने’’ति वुत्तं.

‘‘एत्तावता च आवट्टो हारो परिपुण्णो, अञ्ञो नियुत्तो नत्थी’’ति वत्तब्बत्ता ‘‘नियुत्तो आवट्टो हारो’’ति वुत्तं. यस्सं यस्सं पाळियं यो यो आवट्टो हारो यथालाभवसेन योजितो, तस्सं तस्सं पाळियं सो सो आवट्टो हारो तथा निद्धारेत्वा युत्तो योजितोति अत्थो दट्ठब्बो.

इति आवट्टहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेनेव गम्भीरत्थो वित्थारतो विभजित्वा गहेतब्बोति.

८. विभत्तिहारविभङ्गविभावना

३३. येन ¶ येन संवण्णनाविसेसभूतेन आवट्टहारविभङ्गेन आवट्टेतब्बा पदट्ठानादयो विभत्ता, सो संवण्णनाविसेसभूतो आवट्टहारविभङ्गो परिपुण्णो, ‘‘तत्थ कतमो विभत्तिहारविभङ्गो’’ति पुच्छितब्बत्ता ‘‘तत्थ कतमो विभत्तिहारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु कतमो संवण्णनाविसेसो विभत्तिहारो विभत्तिहारविभङ्गो नामाति पुच्छति. ‘‘धम्मञ्च पदट्ठानं भूमिञ्चा’’तिआदिनिद्देसस्स इदानि मया वुच्चमानो ‘‘द्वे सुत्तानी’’तिआदिको वित्थारभूतो संवण्णनाविसेसो विभत्तिहारो विभत्तिहारविभङ्गो नामाति अत्थो गहेतब्बो.

‘‘येसु सुत्तेसु वुत्ता धम्मपदट्ठानभूमियो इमिना विभत्तिहारेन विभत्ता, तानि सुत्तानि कित्तकानी’’ति पुच्छितब्बत्ता तानि सुत्तानि पठमं दस्सेतुं ‘‘द्वे सुत्तानि वासनाभागियञ्च निब्बेधभागियञ्चा’’ति वुत्तं. तत्थ वासनाभागियन्ति पुञ्ञभावना वासना नाम, वासनाय भागो कोट्ठासो वासनाभागो, वासनाभागे वाचकभावेन नियुत्तं ¶ सुत्तन्ति वासनाभागियं, कतमं तं? यस्मिं सुत्ते तीणि पुञ्ञकिरियवत्थूनि भगवता देसितानि, तं सुत्तं वासनाभागियं. निब्बेधभागियन्ति लोभक्खन्धादीनं निब्बिज्झनं पदालनं निब्बेधो, निब्बेधस्स भागो कोट्ठासो निब्बेधभागो, निब्बेधभागे वाचकभावेन नियुत्तं सुत्तन्ति निब्बेधभागियं, कतमं तं? यस्मिं सुत्ते सेक्खासेक्खधम्मा भगवता देसिता, तं सुत्तं निब्बेधभागियं.

‘‘तेसं सुत्तानं पटिग्गाहका पुग्गला याहि पटिपदाहि सम्पज्जन्ति, ता पटिपदा कित्तिका’’ति पुच्छितब्बत्ता ‘‘द्वे पटिपदा’’तिआदि वुत्तं. दानसीलभावनामयपुञ्ञभागे भवा पटिपदाति पुञ्ञभागिया. फलभागे भवा पटिपदाति फलभागिया. ‘‘येसु सीलेसु ठिता पटिग्गाहका पटिपज्जन्ति, तानि सीलानि कित्तकानी’’ति पुच्छितब्बत्ता ‘‘द्वे सीलानी’’तिआदि वुत्तं. संवरति एतेन संवरेनाति संवरो, सो संवरो पातिमोक्खसंवरो, सतिसंवरो, ञाणसंवरो, खन्तिसंवरो, वीरियसंवरोति पञ्चविधो. सब्बोपि पापसंवरणतो संवरो, लोकियलोकुत्तरसम्पत्तिट्ठानत्ता सीलं नाम. पजहति एतेन पहातब्बेति पहानं, पजहनं वा पहानं, तञ्च पहानं तदङ्गप्पहानं, विक्खम्भनप्पहानं, समुच्छेदप्पहानं, पटिपस्सद्धिप्पहानं, निस्सरणप्पहानन्ति पञ्चविधं. तत्थ निस्सरणप्पहानं वज्जेत्वा चतुब्बिधं पहानं वुत्तनयेन सीलं नाम.

‘‘तेसु ¶ सुत्तादीसु भगवा कतमं सुत्तं कतमाय पटिपदाय देसयति, कतरस्मिं सीले ठितो पुग्गलो कतमेन सीलेन ब्रह्मचारी भवती’’ति पुच्छितब्बत्ता तथा विभजित्वा दस्सेतुं ‘‘तत्थ भगवा’’तिआदि वुत्तं. तत्थ तेसु वासनाभागियादीसु सुत्तेसु वासनाभागियं सुत्तं तत्थ तासु पुञ्ञभागियादिपटिपदासु पुञ्ञभागियाय पटिपदाय भगवा यस्स पुग्गलस्स देसयति, सो वासनाभागियसुत्तपटिग्गाहको पुग्गलो तत्थ संवरसीलादीसु संवरसीले ठितो हुत्वा तेन संवरसीलसङ्खातेन ब्रह्मचरियेन सेट्ठचरियेन ब्रह्मचारी सेट्ठाचारपूरको भवति. तत्थ तेसु वासनाभागियादीसु सुत्तेसु निब्बेधभागियं सुत्तं तत्थ तासु पुञ्ञभागियादिपटिपदासु फलभागियाय पटिपदाय यस्स पुग्गलस्स भगवा देसयति, सो निब्बेधभागियसुत्तपटिग्गाहको पुग्गलो तत्थ संवरसीलादीसु पहानसीले समुच्छेदप्पस्सद्धिप्पहानवसेन ¶ ठितो हुत्वा तेन पहानसीलसङ्खातेन विसेसभूतेन मग्गसङ्खातेन ब्रह्मचरियेन ब्रह्मचारी भवतीति योजना कातब्बा.

‘‘वासनाभागियसुत्तादीसु कतमं वासनाभागियं सुत्त’’न्ति पुच्छितब्बत्ता ‘‘तत्थ कतम’’न्तिआदि वुत्तं. तत्थ तत्थाति तेसु वासनाभागियसुत्तादीसु. दानकथाति सप्पुरिसदानदानफलअसप्पुरिसदानदानफलकथा. सीलकथाति पञ्चसीलादिसीलफलकथा. सग्गकथाति सग्गसम्पत्तिसुखकथा चेव सग्गे निब्बत्तापकपुञ्ञकथा च. आदीनवोति आदीनवदस्सको सुत्तन्तो. आनिसंसोति आनिसंसदस्सको सुत्तन्तो. वासनाभागियं सुत्तं नामाति योजना.

‘‘तत्थ कतम’’न्तिआदीसु अनुसन्ध्यत्थो वुत्तनयोव. या देसना चतुसच्चप्पकासना, सा देसना निब्बेधभागियं सुत्तं नामाति योजना. एवञ्च सति वासनाभागियसुत्तस्सपि निब्बेधभागियसुत्तभावो आपज्जेय्य चतुसच्चप्पकासनतोति चोदनं मनसि कत्वा ‘‘वासनाभागिये सुत्ते’’तिआदि वुत्तं. वासनाभागिये सुत्ते पजानना वुट्ठानगामिनिविपस्सना अरियमग्गपदट्ठानभूता पञ्ञा नत्थि, मग्गो अरियमग्गो नत्थि, फलं अरियफलं नत्थि. निब्बेधभागिये सुत्ते पन पजाननादयो अत्थि, वासनाभागिये सुत्ते नत्थि. ‘‘पजानना’’तिआदिना चतुसच्चप्पकासना दानकथादिका निब्बेधभागिये सुत्ते अन्तोगधा, इतरंयेव वासनाभागियसुत्तन्ति नामाति दस्सेति. येसु सुत्तेसु वुत्ता धम्मपदट्ठानभूमियो विभत्ता, तानि सुत्तानि द्वेयेव न होन्ति, कस्मा ‘‘द्वेयेव सुत्तानि निद्धारितानी’’ति चे वदेय्युं? असङ्करतो सुत्ते वुत्तानं धम्मपदट्ठानभूमीनं विभजितब्बानं सुविञ्ञेय्यत्ता. ‘‘यदि एवं संकिलेसभागियअसेक्खभागियसुत्तानिपि निद्धारितानि असङ्करत्ता’’ति चे वदेय्युं? नो निद्धारितानि, वासनाभागियसुत्ते निद्धारिते संकिलेसभागियसुत्तम्पि निद्धारितं, संकिलेसधम्मतो निस्सट्ठधम्मानंयेव वासनाभागियधम्मत्ता निब्बेधभागियसुत्ते च निद्धारिते असेक्खभागियसुत्तम्पि निद्धारितं अनञ्ञत्ता.

‘‘येसु ¶ सुत्तेसु वुत्ता धम्मपदट्ठानभूमियो विभत्तिहारेन विभत्ता, तानि सुत्तानि कतमेन फलेन योजयितब्बानी’’ति पुच्छितब्बत्ता ‘‘इमानि चत्तारि सुत्तानी’’तिआदि वुत्तं. तत्थ इमानि चत्तारि सुत्तानीति ¶ यथानिद्धारितानि वासनाभागियनिब्बेधभागियसुत्तानि चेव तंनिद्धारणेन निद्धारितानि संकिलेसभागियअसेक्खभागियसुत्तानि चाति चत्तारि सुत्तानि इमेसंयेव चतुन्नं सुत्तानं देसनाय नयेन नीतेन फलेन सब्बतो सब्बभागेन संवरसीलप्पहानसीलेन ब्रह्मचरियेन योजयितब्बानि. योजेन्तेन च सब्बतो सब्बभागेन च पदादिविचयेन हारेन संवरसीलादिकं फलं विचिनित्वा युत्तिहारेन युत्तं फलं गवेसित्वा ‘‘इदं फलं इमस्स पुग्गलस्स फलं, इदं फलं इमस्स सुत्तस्स फल’’न्ति सुत्तानि विसुं विसुं फलेन योजयितब्बानीति अत्थो गहेतब्बो.

‘‘कित्तकेन फलेन ब्रह्मचरियेन योजेतब्बानी’’ति पुच्छितब्बत्ता ‘‘यावतिका ञाणस्स भूमी’’ति वुत्तं. भगवता देसितेन वासनाभागियसुत्तेन सिद्धा यावतिका पुञ्ञभागिया पटिपदादयो विभजनञाणस्स भूमि आरम्मणा भवितुमरहन्ति, तावतिकाहि भूमीहि वासनाभागियसुत्तं योजयितब्बं. निब्बेधभागियसुत्तेन सिद्धा यावतिका फलभागिया पटिपदादयो विभजनञाणस्स भूमि आरम्मणा भवितुमरहन्ति, तावतिकाहि भूमीहि निब्बेधभागियसुत्तं योजेतब्बं. इतरद्वयम्पि सुत्तं यथासम्भवं योजेतब्बं. एतेन ञाणस्स भूमीनं सुत्तत्थानं बहुविधत्तं दस्सेति.

३४. वासनाभागियसुत्तादीसु वुत्ता धम्मा वासनाभागियनिब्बेधभागियभावेहि आचरियेन विभत्ता, अम्हेहि च ञाता, ‘‘कथं संकिलेसभागियअसेक्खाभागियभावेहि असाधारणासाधारणभावेहि विभजितब्बा’’ति पुच्छितब्बत्ता ‘‘तत्थ कतमे धम्मा साधारणा’’तिआदि आरद्धं. अट्ठकथाय पन –

‘‘एवं वासनाभागियनिब्बेधभागियभावेहि धम्मे एकदेसेन विभजित्वा इदानि तेसं किलेसभागियअसेक्खभागियभावेहि साधारणासाधारणभावेहि विभजितुं ‘तत्थ कतमे धम्मा साधारणा’तिआदि आरद्ध’’न्ति (नेत्ति. अट्ठ. ३४) –

वुत्तं. तत्थ तत्थाति ये धम्मा सुत्ते वुत्ता विभत्तिहारेन विभजितब्बा, तेसु धम्मेसु कतमे धम्मा साधारणाति पुच्छति, द्वे धम्मा साधारणाति ¶ विस्सज्जेति. ते द्वे धम्मे सरूपतो दस्सेतुं ‘‘नामसाधारणा, वत्थुसाधारणा चा’’ति वुत्तं. तत्थ नामसाधारणाति नामेन नामपञ्ञत्तिया ¶ साधारणा समाना, ‘‘कुसला’’ति नामेन एकवीसति चित्तुप्पादा समाना, ‘‘अकुसला’’त्यादिनामेन द्वादस चित्तुप्पादा समाना, कुसलादिनामपञ्ञत्तिवचनेन वचनीया अत्था कुसलादिनामसाधारणाति वुत्ता. तेन टीकायं –

‘‘नामं नामपञ्ञत्ति, तंमुखेनेव सद्दतो तदत्थावगमो. सद्देन च सामञ्ञरूपेनेव तथारूपस्स अत्थस्स गहणं, न विसेसरूपेन. तस्मा सद्दवचनीया अत्था साधारणरूपनामायत्तगहणीयताय नामसाधारणा वुत्ता’’ति –

वुत्तं. वत्थुसाधारणाति पतिट्ठानभूतेन वत्थुना साधारणा. यस्मिं पतिट्ठानभूते सन्ताने वा चित्तुप्पादादिम्हि वा ये धम्मा पवत्तन्ति, ते धम्मा तेन सन्तानेन वा वत्थुना तेन चित्तुप्पादादिना वा साधारणा समानाति अत्थो. एकसन्ताने पतितत्ता फुसनादिसभावतो भिन्नापि वत्थुसाधारणा समानवत्थुकायेव भवन्तीति विभत्तिहारेन विभजित्वाति वुत्तं होति.

‘‘किं नामसाधारणवत्थुसाधारणायेव विभजितब्बा, अञ्ञं विभजितब्बं नत्थी’’ति पुच्छितब्बत्ता ‘‘यं वा पना’’तिआदि वुत्तं. नामसाधारणवत्थुसाधारणेहि अञ्ञं यं वा पन किच्चसाधारणपच्चयसाधारणपटिपक्खादिसाधारणम्पि धम्मजातं एवंजातियं साधारणजातियं, तम्पि सब्बं विचयहारेन विचिनित्वा युत्तिहारेन गवेसित्वा युत्तं साधारणं विभत्तिहारेन विभजितब्बन्ति अधिप्पायो. ‘‘तेसु नामसाधारणादीसु कतमे नामसाधारणा, कतमे वत्थुसाधारणा’’ति पुच्छितब्बत्ता ‘‘मिच्छत्तनियतानं सत्तान’’न्तिआदि वुत्तं. मातुघातकादीनं छन्नं मिच्छत्तनियतकम्मकरानं सत्तानञ्च दुग्गतिअहेतुकसुगतिअहेतुकदुहेतुकतिहेतुकानं चतुन्नं पुथुज्जनानं अनियतकम्मकरानं सत्तानञ्च सन्ताने पवत्ता दस्सनपहातब्बा किलेसा दस्सनपहातब्बनामसाधारणा समाना भवन्ति सक्कायदिट्ठिविचिकिच्छासीलब्बतपरामसनवसेन भिन्नसभावानम्पि दस्सनपहातब्बनामनातिवत्तनतो. वुत्तप्पकारानं नियतानियतसत्तानं ¶ दस्सनपहातब्बानं किलेसानं पतिट्ठानवत्थुभावतो वत्थुसाधारणा च समानवत्थुकाति अत्थो. पुथुज्जनस्स दुग्गतिअहेतुकादिचतुब्बिधसत्तस्स, सोतापन्नस्स च सन्ताने पवत्ता कामरागब्यापादा किलेसा कामरागब्यापादनामसाधारणा समाना भवन्ति सकदागामिमग्गप्पहातब्बअनागामिमग्गप्पहातब्बवसेन भिन्नसभावानम्पि कामरागब्यापादनामनातिवत्तनतो. वुत्तप्पकारस्स पुथुज्जनस्स, सोतापन्नस्स च कामरागब्यापादानं पतिट्ठानवत्थुभावतो वत्थुसाधारणा समानवत्थुकाति अत्थो च गहेतब्बो. पुथुज्जनस्स, अनागामिस्स च सन्ताने पवत्ता उद्धंभागिया संयोजना उद्धम्भागियनामसाधारणा समाना भवन्ति रूपरागादिवसेन भिन्नसभावानम्पि ¶ उद्धंभागियनामनातिवत्तनतो. पुथुज्जनस्स, अनागामिस्स च उद्धंभागियानं पतिट्ठानवत्थुभावतो वत्थुसाधारणा समानवत्थुकाति अत्थो च गहेतब्बो. तेन वुत्तं टीकायं – ‘‘दस्सनपहातब्बानञ्हि यथा मिच्छत्तनियतसत्ता पवत्तिट्ठानं, एवं अनियतापी’’ति वुत्तं. सङ्खेपतो पन संकिलेसपक्खे पहानेकट्ठा किलेसा नामसाधारणा होन्ति, सहजेकट्ठा किलेसा वत्थुसाधारणाति दट्ठब्बा.

संकिलेसपक्खे साधारणा आचरियेन विभत्ता, अम्हेहि च ञाता, ‘‘कथं वोदानपक्खे साधारणा विभत्ता’’ति पुच्छितब्बत्ता ‘‘यं किञ्चि अरियसावको’’तिआदि वुत्तं. तत्थ यं किञ्चीति सामञ्ञवसेन वुत्ता पठमज्झानसमापत्तिआदिका लोकिया समापत्तियेव गहिता. अरियसावकोति अरियस्स भगवतो सावको अरियसावकोति वत्तब्बो, झानलाभी च फलट्ठो च पुग्गलो, न मग्गट्ठो. मग्गट्ठो हि लोकियं यं किञ्चि समापत्तिं न समापज्जति. सब्बा सा लोकियसमापत्ति रूपावचरा अरूपावचरा दिब्बविहारो ब्रह्मविहारो पठमज्झानसमापत्तीति एवमादीहि परियायेहि साधारणा तंसमङ्गीहि वीतरागावीतरागेहि साधारणा लोकियसमापत्तिनामनातिवत्तनतो च वीतरागावीतरागेहि समापज्जितब्बतो च. ‘‘अरियसावको च लोकियं समापत्तिं समापज्जन्तो ओधिसो ओधिसो समापज्जति, एवं सति कथं वीतरागेहि साधारणाति सद्दहितब्बा’’ति वत्तब्बत्ता ‘‘साधारणा हि धम्मा’’तिआदि वुत्तं. अट्ठकथायं पन – ‘‘कथं ते ओधिसो गहिता, अथ ¶ ओधिसो गहेतब्बा, कथं साधारणाति अनुयोगं मनसि कत्वा तं विसोधेन्तो आह – ‘साधारणा हि धम्मा एवं अञ्ञमञ्ञ’न्तिआदी’’ति वुत्तं.

तत्थ एवं वीतरागावीतरागेहि ओधिसो ओधिसो समापज्जितब्बा धम्मा परं परं पच्छा पच्छा पवत्तियमानं धम्मजातं सकं सकं पुब्बे पुब्बे जातं ‘‘लोकियसमापत्ती’’ति नामं नियतविसयं अञ्ञमञ्ञं हुत्वा हि यस्मा नातिवत्तन्ति, तस्मा साधारणाति सद्दहितब्बा गहेतब्बाति अत्थो. ‘‘परं परं समापज्जन्तो कथं नातिवत्तती’’ति वत्तब्बत्ता नातिवत्तनं पाकटं कातुं ‘‘योपी’’तिआदि वुत्तं. यो अरियसावको वा अवीतरागो वा. इमेहि लोकियसमापत्तिधम्मेहि समन्नागतो, सो अरियसावको वा अवीतरागो वा परं परं समापज्जन्तोपि तं धम्मं लोकियं समापत्तिधम्मं नातिवत्तति, अञ्ञं उपगन्त्वा नातिक्कमतीति अत्थो. येहि लोकियसमापत्तिधम्मेहि समन्नागतो, इमे लोकियसमापत्ति धम्मा साधारणावाति दट्ठब्बा.

‘‘वासनाभागियादिसुत्तेसु वुत्ता ये धम्मा इमिना विभत्तिहारेन विभत्ता, येसु धम्मेसु कतमे धम्मा असाधारणा’’ति पुच्छितब्बत्ता ‘‘तत्थ कतमे धम्मा असाधारणा’’तिआदि वुत्तं. तत्थ ¶ तेसु विभजितब्बेसु धम्मेसु कतमे धम्मा असाधारणाति पुच्छति, पुच्छित्वा याव देसनं उपादाय असाधारणा धम्मा गवेसितब्बा, ‘‘सेक्खासेक्खा’’ति वा गवेसितब्बा, ‘‘भब्बाभब्बा’’ति वा गवेसितब्बा. अथ वा याव ‘‘सेक्खासेक्खा भब्बाभब्बा’’ति देसना वुत्ता, ताव देसनं उपादाय असाधारणा गवेसितब्बा. कथं गवेसितब्बा? अरियेसु सेक्खासेक्खधम्मवसेन ‘‘सेक्खा’’ति नामं असेक्खेन असाधारणं, ‘‘असेक्खा’’ति नामं सेक्खेन असाधारणन्ति वा, अनरियेसु ‘‘भब्बा’’ति नामं अभब्बेन असाधारणं, ‘‘अभब्बा’’ति नामं भब्बेन असाधारणन्ति वा गवेसितब्बा. कामरागब्यापादा संयोजना अप्पहीनत्ता अनुसयभावेन उप्पज्जनारहत्ता अट्ठमकस्स सोतापत्तिमग्गट्ठस्स च सोतापन्नस्स फलट्ठस्स च साधारणा भवन्ति, धम्मता धम्मसभावो असाधारणो. इदं वुत्तं होति – ‘‘अट्ठमकस्स सोतापत्तिमग्गट्ठता सोतापन्नस्स असाधारणा, सोतापन्नस्स ¶ सोतापन्नफलट्ठता च अट्ठमकस्स सोतापत्तिमग्गट्ठस्स असाधारणा. अट्ठमकस्स वा पहीयमानकिलेसता सोतापन्नस्स असाधारणा, सोतापन्नस्स पहीनकिलेसता च अट्ठमकस्स असाधारणा’’ति.

उद्धम्भागिया संयोजना अप्पहीनत्ता अनुसयभावेन उप्पज्जनारहत्ता अट्ठमकस्स मग्गट्ठभावेन अट्ठमकसदिसस्स अनागामिमग्गट्ठस्स च अनागामिस्स फलट्ठस्स च साधारणा, धम्मता धम्मसभावो असाधारणा. इदं वुत्तं होति – ‘‘अट्ठमकस्स अनागामिमग्गट्ठता अनागामिस्स फलट्ठस्स असाधारणा, अनागामिस्स अनागामिफलट्ठता च अट्ठमकस्स असाधारणा. अट्ठमकस्स वा पहीयमानकिलेसता अनागामिस्स असाधारणा, अनागामिस्स फलट्ठस्स पहीनकिलेसता च अट्ठमकस्स असाधारणा’’ति. ‘‘मग्गट्ठता फलट्ठताय असाधारणा, फलट्ठता च मग्गट्ठताय असाधारणा’’तिपि वत्तुं वट्टति. सब्बेसं सत्तन्नं सेक्खानं पुग्गलानं नामं ‘‘सेक्खा’’ति नामं साधारणं. धम्मता असाधारणाति चतुन्नं मग्गट्ठानं तंतंमग्गट्ठता अञ्ञमञ्ञं मग्गट्ठानं असाधारणा. हेट्ठिमफलत्तयट्ठानञ्च असाधारणा, हेट्ठिमफलत्तयट्ठानं तंतंफलट्ठता च अञ्ञमञ्ञं फलट्ठानं असाधारणा, चतुन्नं मग्गट्ठानञ्च असाधारणाति अत्थो. ‘‘सेक्खानं तंतंमग्गट्ठता तंतंफलट्ठताय असाधारणा, तंतंफलट्ठता च तंतंमग्गट्ठताय असाधारणा’’ति वत्तुम्पि वट्टति. सब्बेसं पटिपन्नकानन्ति फलत्थाय पटिपज्जन्तीति पटिपन्नका, तेसं मग्गसमङ्गीनं चतुन्नं पुग्गलानं नामं ‘‘पटिपन्नका’’ति नामं साधारणं, धम्मता तंतंमग्गट्ठता असाधारणा. सब्बेसं सेक्खानं सत्तन्नं पुग्गलानं सेक्खानं सीलं साधारणं, धम्मता तंतंमग्गट्ठफलट्ठता असाधारणाति. वासनाभागियसंकिलेसभागियसुत्तेसु वुत्ता दस्सनेनपहातब्बादयो चेव निब्बेधभागियअसेक्खभागियसुत्तेसु वुत्ता सेक्खादयो च धम्मा साधारणासाधारणभेदेन विभत्तिहारेन विभजितब्बाति अधिप्पायो वेदितब्बो.

‘‘अट्ठमकस्सा’’तिआदिना ¶ अरियेसु पुग्गलेसु असाधारणा आचरियेन विभत्ता, अम्हेहि च ञाता, ‘‘कथं अनरियेसु असाधारणा विभत्ता’’ति पुच्छितब्बत्ता अरियेसु वुत्तनयानुसारेन अनरियेसुपि विभजित्वा गवेसितब्बाति दस्सेतुं ‘‘एवं विसेसानुपस्सिना’’तिआदि वुत्तं ¶ . अट्ठकथायं पन – ‘‘एवं ‘अट्ठमकस्सा’तिआदिना अरियपुग्गलेसु असाधारणधम्मं दस्सेत्वा इतरेसु नयदस्सनत्थं ‘एवं विसेसानुपस्सिना’तिआदि वुत्त’’न्ति वुत्तं. एवं अरियेसु वुत्तनयानुसारेन भब्बाभब्बेसु अनरियेसु विसेसानुपस्सिना असाधारणतो विसेसं असाधारणं अनुपस्सिना गवेसकेन पण्डितेन भब्बाभब्बेसुपि हीनुक्कट्ठमज्झिमं उपादाय गवेसितब्बं. कथं? मातुघातादिवसेन पवत्तानं पटिघसम्पयुत्तदिट्ठिसम्पयुत्तसत्तमजवनचित्तुप्पादानं मिच्छत्तनियतानं तंसमङ्गीनं वा तथापवत्ता पठमजवनचित्तुपादादयो अनियता धम्मा पटिघसम्पयुत्तादिभावेन साधारणा, मिच्छत्तनियता धम्मा एकचित्तुप्पादत्ता असाधारणा. यथा हि चित्तं ‘‘चित्तसंसट्ठ’’न्ति न वत्तब्बं, एवं मिच्छत्तनियतापि ‘‘मिच्छत्तनियतसाधारणा’’ति न वत्तब्बा. मिच्छत्तनियतेसुपि नियतमिच्छादिट्ठिकानं दिट्ठिसम्पयुत्तसत्तमजवनचित्तुप्पादसमङ्गीनं अनियता दिट्ठिसम्पयुत्तपठमजवनचित्तुप्पादादयो धम्मा दिट्ठिसम्पयुत्तादिभावेन साधारणा, नियतमिच्छादिट्ठि एकचित्तुप्पादसमङ्गीभावतो असाधारणा. तेनाह अट्ठकथाचरियो –

‘‘मिच्छत्तनियतानं अनियता धम्मा साधारण, मिच्छत्तनियता धम्मा असाधारणा. मिच्छत्तनियतेसुपि नियतमिच्छादिट्ठिकानं अनियता धम्मा साधारणा, नियतमिच्छादिट्ठि असाधारणाति इमिना नयेन विसेसानुपस्सिना वेदितब्बा’’ति (नेत्ति. अट्ठ. ३४).

तत्थ ‘‘इमिना नयेना’’ति इमिना मिच्छत्तनियतानं उप्पज्जितुं भब्बा अनियता धम्मा साधारणा, उप्पज्जितुं अभब्बा अनियता धम्मा असाधारणाति गहिता. तेन वुत्तं ‘‘भब्बाभब्बा’’ति. तथा हीनस्स हीनो हीनभावेन साधारणो, मज्झिमुक्कट्ठा असाधारणा. मज्झिमस्स मज्झिमो साधारणो, हीनुक्कट्ठा असाधारणा. उक्कट्ठस्स उक्कट्ठो उक्कट्ठभावेन साधारणो, हीनमज्झिमा असाधारणातिपि गवेसितब्बा. तेनाह – ‘‘हीनुक्कट्ठमज्झिमं उपादाय गवेसितब्ब’’न्ति.

‘‘तत्थ कतमे धम्मा साधारणा’’तिआदिना नानाविधेन विभत्तिहारनयेन धम्मा विभजित्वा दस्सिता, अम्हेहि च ञाता, ‘‘कथं भूमिपदट्ठानानि विभत्तिहारनयेन विभजित्वा दस्सितानी’’ति पुच्छितब्बभावतो धम्मविभजनानन्तरं ¶ भूमिपदट्ठानानि विभजित्वा दस्सेन्तो ‘‘दस्सनभूमी’’तिआदिमाह. तत्थ दस्सनभूमीति दस्सनं भवति एत्थ पठममग्गेति दस्सनभूमि, सोतापत्तिमग्गो ¶ . नियामावक्कन्तियाति नियमनं नियामो, को सो? सम्पत्तनियामो, अवक्कनं अवक्कन्ति, सोतापत्तिफलं, नियामस्स अवक्कन्ति नियामावक्कन्ति, ताय. दस्सनभूमिनामको सोतापत्तिमग्गो नियामावक्कन्तिनामकस्स सोतापत्तिफलस्स पत्तिया पदट्ठानं. पठममग्गसमङ्गी पुग्गलो हि नियामं ओक्कमन्तो नाम, फलसमङ्गी पन नियामं ओक्कन्तो नाम होति, तस्मा नियामावक्कन्तिसद्देन पठमफलुप्पत्ति गहिता. भावनाभूमीति उपरिमग्गत्तयं. उत्तरिकानन्ति तस्स तस्स मग्गस्स उपरिपवत्तानं तंतंफलानं पत्तिया पदट्ठानन्ति पच्चेकं योजेतब्बं.

दुक्खा पटिपदा दन्धाभिञ्ञा मन्दपञ्ञस्स उप्पज्जनतो समथं आवहन्ती हुत्वा समथस्स पदट्ठानं होति, सुखापटिपदा खिप्पाभिञ्ञा ञाणाधिकस्स उप्पज्जनतो विपस्सनावहन्ती हुत्वा विपस्सनाय पदट्ठानं, अवसेसा द्वे पटिपदापि नातिपञ्ञस्स उप्पज्जनतो समथस्स पदट्ठानन्ति गहेतब्बा. तेन अट्ठकथायं वुत्तं – ‘‘इतरा पन तिस्सोपि पटिपदा समथं आवहन्ती’’तिआदि (नेत्ति. अट्ठ. ३४). दानमयं पुञ्ञकिरियवत्थु सयमेव एकन्तेन धम्मस्सवनस्स पदट्ठानं न होति, वन्दनयाचनपञ्हापुच्छनादयोपि पदट्ठानं होन्ति, तस्मा तेहि कारणेहि साधारणं हुत्वा परतोघोसस्स पदट्ठानं होति, परतोघोसो च धम्मस्सवनपञ्हाविस्सज्जनादिवसेन पवत्तो. दातब्बवत्थुपरिच्चजनवन्दनयाचनकालेसु हि येभुय्येन धम्मं देसेन्ति, पञ्हापुच्छनादिकालेसु च विस्सज्जेन्ति, पटिपुच्छसाकच्छादीनि वा करोन्ति. सीलमयं पुञ्ञकिरियवत्थु पामोज्जपीतिपस्सद्धिसुखसमाधीहि पदट्ठानभावेन साधारणं हुत्वा चिन्तामयिया पञ्ञाय पदट्ठानं होति. सीलवन्तस्स हि सीलं पच्चवेक्खन्तस्स पामोज्जादयो होन्ति, समाहितो च धम्मचिन्तने समत्थो होति.

भावनामयं पुञ्ञकिरियवत्थूति पुरिमा पुरिमा समथभावना चेव विपस्सनाभावना च पुञ्ञकिरियवत्थुदानसीलादीहि कारणेहि साधारणं हुत्वा भावनामयिया पञ्ञाय पच्छिमाय पच्छिमाय समथभावनाय चेव विपस्सनाभावनाय च पदट्ठानं. तेन वुत्तं अट्ठकथायं – ‘‘साधारणन्ति न बीजं विय अङ्कुरस्स, दस्सनभूमिआदयो विय नियामावक्कन्तिआदीनं आवेणिकं ¶ , अथ खो साधारणं तदञ्ञकारणेहिपी’’ति. ‘‘दानमयसीलमयभावनामयपुञ्ञकिरियवत्थूनं परतोघोसचिन्तामयिभावनामयिपञ्ञानं पदट्ठानभावो आचरियेन विभत्तो, एवं सति तेसं दानमयादीनं यथाक्कमं परियत्तिबाहुसच्चकम्मट्ठानानुयोगमग्गसम्मादिट्ठीनं पदट्ठानभावो न भवेय्या’’ति वत्तब्बत्ता तथापवत्तं पदट्ठानभावम्पि दस्सेतुं ‘‘दानमयं पुञ्ञकिरियवत्थु परतो च घोसस्स सुतमयिया च पञ्ञाया’’तिआदि वुत्तं. अट्ठकथायं पन –

‘‘इदानि ¶ यस्मा दानं, सीलं, लोकियभावना च न केवलं यथावुत्तपरतोघोसादीनंयेव, अथ खो यथाक्कमं परियत्तिबाहुसच्चकम्मट्ठानानुयोगमग्गसम्मादिट्ठीनम्पि पच्चया होन्ति, तस्मा तम्पि नयं दस्सेतुं पुन ‘दानमय’न्तिआदिना देसनं वड्ढेसी’’ति (नेत्ति. अट्ठ. ३४) –

वुत्तं. तत्थ दानमयपुञ्ञकिरियवत्थुनो परतोघोसस्स साधारणपदट्ठानभावो हेट्ठा वुत्तनयेन ञातब्बो. दानं पन दत्वा देसनं सुत्वा सुतानुसारेन वित्थारेत्वा चिन्तेन्तस्स पवत्तमानाय सुतमयिया पञ्ञाय वन्दनयाचनादीहि साधारणं हुत्वा पदट्ठानं होति. सीलमयपुञ्ञकिरियवत्थुनोपि चिन्तामयिया पञ्ञाय साधारणपदट्ठानभावो वुत्तोयेव. परिसुद्धसीलं पन निस्साय ‘‘झानं निब्बत्तेस्सामि, मग्गफलं निब्बत्तेस्सामी’’तिआदिना पच्चवेक्खन्तस्स पवत्तमानस्स योनिसोमनसिकारस्स पामोज्जादीहि साधारणं हुत्वा पदट्ठानं होति. भावनामयपुञ्ञकिरियवत्थुनो भावनामयिया पञ्ञाय साधारणपदट्ठानभावोपि वुत्तोयेव. समथभावनासङ्खातं पन झानं पादकं कत्वा वा परिपाकं विपस्सनाभावंयेव वा निस्साय पवत्तमानाय सम्मादिट्ठिया परिसुद्धसीलादीहि साधारणं हुत्वा पदट्ठानं होति.

दानमयपुञ्ञकिरियवत्थुआदीनं परतोघोसादीनं पदट्ठानभावो पुनप्पुनं आचरियेन विभत्तो, अम्हेहि च ञातो, ‘‘पतिरूपदेसवासादयोपि इमेसं धम्मानं पदट्ठानानीति यथा विभजितब्बा, अम्हेहि च विञ्ञातब्बा, तथा विभजित्वा दस्सेथा’’ति वत्तब्बत्ता तेपि विभजित्वा दस्सेतुं ‘‘पतिरूपदेसवासो’’तिआदिमाह. अट्ठकथायं पन ‘‘तथा ¶ पतिरूपदेसवासादयो कायविवेकचित्तविवेकादीनं कारणं होन्तीति इमं नयं दस्सेतुं ‘पतिरूपदेसवासो’तिआदिमाहा’’ति (नेत्ति. अट्ठ. ३४) वुत्तं. पतिरूपदेसं निस्साय वसन्तस्स कायविवेकचित्तविवेकवड्ढनतो, समाधिवड्ढनतो च पतिरूपदेसवासो कायचित्तविवेकस्स च उपचारसमाधिअप्पनासमाधिस्स च सीलादीहि साधारणं हुत्वा पदट्ठानं. सप्पुरिसूपनिस्सयोति सप्पुरिससन्ताने पवत्तो पयिरुपासतो आलम्बितब्बो पसादो, ततो वा उपनिस्सयं लभित्वा पयिरुपासन्तानं सन्ताने पवत्तो पुब्बपसादो यथाविधो सप्पुरिसूपनिस्सयो पयिरुपासन्तस्स सद्धासम्पन्नस्स रतनत्तये तिण्णं अवेच्चप्पसादानं रतनत्तयगुणादीहि साधारणं हुत्वा पदट्ठानं, समथस्स लभननिमित्तदायकं सप्पुरिसं पयिरुपासित्वा तेन दिन्ननये ठत्वा पवत्तेतब्बस्स समथस्स सप्पुरिसूपनिस्सयो सीलपामोज्जपीतादीहि ¶ साधारणं हुत्वा पदट्ठानं. अत्तसम्मापणिहितस्स पापजिगुच्छादीनं सम्भवतो अत्तसम्मापणिधानं जातिवयादिपच्चवेक्खणेन साधारणं हुत्वा हिरिया च पदट्ठानं, अत्तसम्मापणिहितस्स निब्बिदादीनं सम्भवतो सीलादीहि साधारणं हुत्वा विपस्सनाय च पदट्ठानं.

तदङ्गादिवसेन अकुसलपरिच्चागो निब्बिदाञाणादीहि साधारणं हुत्वा कुसलवीमंसाय पटिसङ्खानुपस्सनाय पञ्ञाय च अरियमग्गसमाधिन्द्रियस्स च पदट्ठानं. धम्मस्वाक्खातता स्वाक्खातधम्मस्सवनानुसारेन पवत्तकुसलमूलका लोकियलोकुत्तरसम्पत्ति कुसलमूलरोपना नाम, ताय च तथाविधकुसलमूलकाय फलसमापत्तिया च पदट्ठानं. सङ्घसुप्पटिपन्नता सङ्घसुट्ठुताय सङ्घस्स उपट्ठाकानं सुट्ठुभावाय सप्पतिस्सवाय वचनसम्पटिच्छनभावाय पदट्ठानं. सत्थुसम्पदा सत्थरि चेव धम्मादीसु च गुणअजाननताय अप्पसन्नानञ्च पसादाय पसन्नानञ्च अप्पमत्तकपसादानञ्च भिय्योभावाय वड्ढनाय पदट्ठानं. अप्पटिहतपातिमोक्खता सङ्घमज्झे वा परिसमज्झे वा दुम्मङ्कूनं दुम्मुखानं दुस्सीलानं पुग्गलानं निग्गहाय, पेसलानं पातिमोक्खसंवरादिसीलसम्पन्नानं पुग्गलानं फासुविहाराय च पदट्ठानं होति. होन्तो पन यथानुरूपेहि अञ्ञेहि कारणेहि साधारणं हुत्वा होतीति वेदितब्बो.

‘‘वासनाभागियसुत्तादीसु ¶ वुत्तधम्मभूमिपदट्ठानानं विभत्तिहारेन विभजितब्बभावो अम्हेहि केन जानितब्बो सद्दहितब्बो’’ति पुच्छितब्बत्ता ‘‘तेनाहा’’तिआदि वुत्तं. तस्सत्थो वुत्तनयानुसारेन वेदितब्बो.

‘‘एत्तावता च विभत्तिहारो परिपुण्णो, अञ्ञो नियुत्तो नत्थी’’ति वत्तब्बत्ता ‘‘नियुत्तो विभत्तिहारो’’ति वुत्तं. यत्थ यत्थ सुत्ते ये ये धम्मादयो वुत्ता, तत्थ तत्थ सुत्ते वुत्तेसु तेसु तेसु धम्मादीसु यथालाभवसेन यो यो विभत्तिहारो योजितो, सो सो विभत्तिहारो निद्धारेत्वा युत्तो योजितोति अत्थो दट्ठब्बो.

इति विभत्तिहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेनेव गम्भीरत्थो वित्थारतो विभजित्वा गहेतब्बोति.

९. परिवत्तनहारविभङ्गविभावना

३५. येन ¶ येन संवण्णाविसेसभूतेन विभत्तिहारविभङ्गेन सुत्ते वुत्ता धम्मादयो विभत्ता, सो संवण्णाविसेसभूतो विभङ्गो परिपुण्णो, ‘‘कतमो परिवत्तनहारविभङ्गो’’ति पुच्छितब्बत्ता ‘‘तत्थ कतमो परिवत्तनो हारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु कतमो संवण्णनाविसेसो परिवत्तनो हारो परिवत्तनहारविभङ्गो नामाति पुच्छति. ‘‘कुसलाकुसले धम्मे’’तिआदिनिद्देसस्स इदानि मया वुच्चमानो ‘‘सम्मादिट्ठिस्स पुरिसपुग्गलस्सा’’तिआदिको वित्थारसंवण्णनाविसेसो परिवत्तनो हारो परिवत्तनहारविभङ्गो नामाति अत्थो गहेतब्बो.

‘‘संवण्णियमाने सुत्ते निद्दिट्ठस्स कतमस्स भावितब्बस्स कुसलस्स कतमो पटिपक्खो, कथं परिवत्तेतब्बो’’ति पुच्छितब्बत्ता इमस्स भावितब्बस्स कुसलस्स अयं पटिपक्खो, एवं पहातब्बभाववसेन परिवत्तेतब्बोति ¶ दस्सेन्तो ‘‘सम्मादिट्ठिस्स पुरिसपुग्गलस्सा’’तिआदिमाह. अट्ठकथायं पन –

‘‘तत्थ यस्मा संवण्णियमाने सुत्ते यथानिद्दिट्ठानं कुसलाकुसलधम्मानं पटिपक्खभूते अकुसलकुसलधम्मे पहातब्बभावादिवसेन निद्धारणं पटिपक्खतो परिवत्तनं, तस्मा ‘सम्मादिट्ठिस्स पुरिसपुग्गलस्स मिच्छादिट्ठि निज्जिण्णा भवती’तिआदि आरद्ध’’न्ति (नेत्ति. अट्ठ. ३५) –

वुत्तं. पहायकस्स हि धम्मस्स पहातब्बभाववसेन निद्धारणं, पहातब्बस्स च धम्मस्स पहायकभाववसेन निद्धारणं पटिपक्खतो परिवत्तनं नाम होति. तत्थ सम्मादिट्ठिस्साति सम्मा सुन्दरा पसत्था दिट्ठि यस्स पुग्गलस्साति सम्मादिट्ठि. पुग्गलपदट्ठाना हि अयं देसना. तेन वुत्तं ‘‘पुरिसपुग्गलस्सा’’ति. सा पन सम्मादिट्ठि कम्मकम्मफलादिसद्दहनवसेन वा अनिच्चादिविपस्सनावसेन वा मग्गसम्मादस्सनवसेन वा पवत्ता निरवसेसाव गहिता. ‘‘याय भाविताय सम्मादिट्ठिया पहातब्बा मिच्छादिट्ठि निज्जिण्णा भवति, यदि केवला मिच्छादिट्ठियेव निज्जिण्णा भवति, एवं सति तदवसेसा अकुसला धम्मा अजिण्णा

भवेय्यु’’न्ति ¶ वत्तब्बत्ता ‘‘ये चस्स मिच्छादिट्ठिपच्चया’’तिआदि वुत्तं. मिच्छादिट्ठिपच्चया अनेके पापका अकुसलायेव धम्मा च उप्पज्जेय्युं उप्पज्जनारहा भवेय्युं, ते च अकुसला धम्मा अस्स सम्मादिट्ठिसम्पन्नस्स पुरिसपुग्गलस्स निज्जिण्णा पहातब्बारहा अनुप्पज्जनसभावा होन्ति. तेनाह भगवा – ‘‘उपादाननिरोधा भवनिरोधो’’ति (उदा. २; महाव. १).

‘‘यदि सम्मादिट्ठिस्स पुरिसपुग्गलस्स मिच्छादिट्ठि, तप्पच्चया अकुसलधम्मायेव निज्जिण्णा भवन्ति, एवं सति सम्मादिट्ठिपच्चया कुसला धम्मा न सम्भवेय्यु’’न्ति वत्तब्बत्ता ‘‘सम्मादिट्ठिपच्चया चा’’तिआदि वुत्तं. अस्स सम्मादिट्ठिसम्पन्नस्स पुरिसपुग्गलस्स उप्पज्जनारहा सम्मादिट्ठिपच्चया अनेके कुसला समथविपस्सना वा बोधिपक्खिया वा धम्मा सम्भवन्ति, उप्पन्ना च ते धम्मा अस्स सम्मादिट्ठिसम्पन्नस्स पुरिसपुग्गलस्स सन्ताने पुनप्पुनं पवत्तनवसेन भावनापारिपूरिं गच्छन्ति.

सम्मादिट्ठिया ¶ पटिपक्खानं मिच्छादिट्ठिया, तप्पच्चयानं अकुसलानं धम्मानं परिवत्तनभावो आचरियेन विभत्तो, अम्हेहि च ञातो, ‘‘सम्मासङ्कप्पस्स धम्मस्स पटिपक्खो धम्मो कथं परिवत्तेतब्बो’’ति वत्तब्बत्ता ‘‘सम्मासङ्कप्पस्स पुरिसपुग्गलस्सा’’तिआदि वुत्तं. योजनत्थ आदयो वुत्तनयानुसारेन वेदितब्बा. सम्मा सुन्दरा पसत्था वाचा यस्स पुग्गलस्साति सम्मावाचो, तस्स सम्मावाचस्स. ‘‘पुरिसपुग्गलस्सा’’तिआदीनं अत्थोपि वुत्तनयेन वेदितब्बो. अयं पन विसेसत्थोसम्मा अविपरीततो विमुत्तिञाणदस्सनं यस्स पुग्गलस्साति सम्माविमुत्तिञाणदस्सनो, तस्स सम्माविमुत्तिञाणदस्सनस्स पच्चवेक्खणञाणदस्सनसम्पन्नस्स पुरिसपुग्गलस्स ‘‘अविमुत्ताव समाना विमुत्ता मय’’न्ति मिच्छाभिनिवेसवसेन पवत्तं मिच्छाविमुत्तिञाणदस्सनं निज्जिण्णं विगतं भवति. ‘‘ये चस्सा’’तिआदीनं अनुसन्ध्यादिको वुत्तनयानुसारेन वेदितब्बो.

३६. ‘‘सम्मादिट्ठिस्सातिआदिना सम्मादिट्ठिआदीनं कुसलानं पटिपक्खा मिच्छादिट्ठादिकायेव अकुसला पहातब्बभावेन परिवत्तेतब्बा’’ति पुच्छितब्बत्ता पाणातिपातावेरमणिआदीनं कुसलानं पटिपक्खा पाणातिपातादिकापि अकुसला पहातब्बभावेन परिवत्तेतब्बाति दस्सेतुं ‘‘यस्स वा पाणातिपाता पटिविरतस्सा’’तिआदि वुत्तं. अट्ठकथायं पन ‘‘एवं सम्मादिट्ठिआदिमुखेन मिच्छादिट्ठिआदिं दस्सेत्वा पुन पाणातिपातअदिन्नादानकामेसुमिच्छाचारादितो वेरमणियादीहि पाणातिपातादीनं परिवत्तनं दस्सेतुं ‘यस्सा’तिआदि आरद्ध’’न्ति (नेत्ति. अट्ठ. ३६) वुत्तं. तदङ्गादिवसेनपहीनो होति. कालवादिस्साति वदितब्बकाले वदितब्बं वदति सीलेनाति कालवादी, तस्स.

‘‘यथावुत्तप्पकारेनेव ¶ परिवत्तेतब्बा’’ति पुच्छितब्बत्ता अञ्ञेन पकारेनपि परिवत्तेतब्बाति दस्सेतुं ‘‘ये च खो केची’’तिआदि वुत्तं. अट्ठकथायं पन ‘‘ये च खो केचीतिआदिना सम्मादिट्ठिआदिमुखेनेव मिच्छादिट्ठिआदीहि एव परिवत्तनं पकारन्तरेन दस्सेती’’ति (नेत्ति. अट्ठ. ३६) वुत्तं. तत्थ केचि मिच्छादिट्ठिकमिच्छासङ्कप्पादिकायेव पुग्गला परेसं अरियानं अरियं अट्ठङ्गिकं मग्गं गरहन्ति. सन्दिट्ठिका सन्दिट्ठे नियुत्ता, सहधम्मिका सह धम्मेन कारणेन ये वत्तन्ति सहधम्मिका. गारय्हा गरहितब्बाकारे युत्ता ¶ . वादा च अनुवादा च वादानुवादा, ते भवन्तो सम्मादिट्ठिञ्च धम्मं गरहन्ति. तेन गरहणेन. पुज्जा पूजितब्बा च न भवन्ति, पासंसा पसंसितब्बा च न भवन्ति. एवन्तिआदीसु सम्मासङ्कप्पं वा सम्मावाचादिकं वा विसुं विसुं सम्मासङ्कप्पञ्च ते भवन्तो धम्मं गरहन्ति. तेन हि ये मिच्छासङ्कप्पिका, ते भवन्तो न पुज्जा च पासंसा च…पे… सम्माविमुत्तिञ्च ते भवन्तो धम्मं गरहन्ति. तेन हि ये मिच्छादिट्ठिवाचिका, ते भवन्तो न पुज्जा च पासंसा च. सम्माविमुत्तिञाणदस्सनञ्च ते भवन्तो धम्मं गरहन्ति. तेन हि ये मिच्छाविमुत्तिका, ते भवन्तो न पुज्जा च पासंसा च. सम्माविमुत्तिञाणदस्सनञ्च ते भवन्तो धम्मं गरहन्ति. तेन हि ये मिच्छाविमुत्तिञाणदस्सनिका, ते भवन्तो न पुज्जा च पासंसा चाति योजना कातब्बा. ‘‘मिच्छाविमुत्तिञाणदस्सना’’तिपि पाठो अत्थि.

‘‘अरियमग्गसम्मादिट्ठादीनं गरहवसेनेव मिच्छादिट्ठादयो च परिवत्तेतब्बा, नावसेसानं पसंसावसेना’’ति वत्तब्बत्ता कामादीनं पसंसावसेनपि कामानं पटिपक्खा वेरमणियादयोपि परिवत्तेतब्बाति दस्सेतुं ‘‘ये च खो केचि एवमाहंसू’’तिआदि वुत्तं. तत्थ भुञ्जितब्बा कामा, परिभुञ्जितब्बा कामा, आसेवितब्बा कामा, निसेवितब्बा कामाति एत्थ कामीयन्तेति कामाति कम्मसाधनवसेन वत्थुकामा गहिता, नातिपणीता कामा भुञ्जितब्बा, अतिपणीता कामा परि समन्ततो भुञ्जितब्बा. अतिपणीततरा कामा आ भुसो सेवितब्बा, नियता सेवितब्बा. भावयितब्बा कामा, बहुलीकातब्बा कामाति एत्थ पन कामेन्तीति कामाति कत्तुसाधनवसेन किलेसकामा गहिता, पुनप्पुनं उप्पादनवसेन भावयितब्बा वड्ढापेतब्बा पवत्तेतब्बा किलेसकामा, बहूनं पुनप्पुनं उप्पादनवसेन कातब्बा वड्ढापेतब्बा किलेसकामाति ये च कामवसिका पुथुज्जना केचि एवमाहंसु तेसं कामवसिकानं पुथुज्जनानं केसञ्चि तादिसेहि कामेहि वेरमणी कुसलचेतना पटिपक्खवसेन अधम्मो असेवितब्बो नाम आपज्जेय्याति अधिप्पायो गहेतब्बो.

अन्तद्वयवसेन ¶ परिवत्तनं दस्सेतुं ‘‘ये वा पन केची’’तिआदि वुत्तं. अत्तकिलमथानुयोगो धम्मोति निय्यानिकोति ये वा पन पञ्चातपादिपटिपन्नका तत्थिया एवमाहंसु, तेसं पञ्चातपादिपटिपन्नकानं निय्यानिको धम्मो मज्झिमापटिपदासङ्खातो विपस्सनासहितो अरियमग्गो ¶ अधम्मो अनिय्यानिको अभावेतब्बो नाम आपज्जेय्याति. सुखदुक्खवसेनपि परिवत्तनं दस्सेतुं ‘‘ये च खो’’तिआदि वुत्तं. ‘‘पापं निज्जरापेस्सामा’’ति अत्तहिंसनादिवसेन पटिपन्नकानं पवत्तो सरीरतापनो दुक्खो धम्मो निय्यानिकोति.

ये च तथापटिपन्नका केचि एवमाहंसु, तेसं तथापटिपन्नकानं अनवज्जपच्चयपरिभोगवसेन पवत्तो सरीरदुक्खूपसमो सुखो धम्मो अधम्मो अप्पवत्तेतब्बो आपज्जेय्याति.

अन्तद्वयादिवसेन परिवत्तनं आचरियेन विभत्तं, अम्हेहि च ञातं, ‘‘कथं असुभसञ्ञादिवसेन परिवत्तेतब्बो’’ति पुच्छितब्बत्ता एवं असुभसञ्ञादिवसेन सुभसञ्ञादिका परिवत्तेतब्बाति दस्सेतुं ‘‘यथा वा पना’’तिआदि वुत्तं. अट्ठकथायं पन ‘‘इदानि असुभसञ्ञादिमुखेन सुभसञ्ञादिपरिवत्तनं दस्सेतुं ‘यथा वा पना’तिआदि वुत्त’’न्ति (नेत्ति. अट्ठ. ३६) वुत्तं. सब्बसङ्खारेसूति तेभूमकसङ्खारेसु. आरद्धविपस्सकस्स हि तेभूमका धम्मा किलेसासुचिपग्घरणकत्ता असुभतो उपट्ठहन्ति.

‘‘यदि सरूपतोयेव इमेसं इमे पटिपक्खाति अपरिवत्तेतब्बा सियुं, एवं सति निरवसेसा च पटिपक्खा न सक्का परिवत्तेतुं, कथं सक्का परिवत्तेतु’’न्ति वत्तब्बत्ता परिवत्तनलक्खणं दस्सेन्तो ‘‘यं यं वा पना’’तिआदिमाह. तत्थ कुसलं वा अकुसलं वा यं यं धम्मं परिवत्तेतुकामो आचरियो चित्तेन रोचयति दिट्ठिया उपगच्छति, कुसलस्स वा अकुसलस्स वा तस्स तस्स रुचिकस्स उपगतस्स धम्मस्स यो पटिपक्खो, सो पटिपक्खधम्मो असद्धम्मो अस्स धम्मस्स अनिट्ठतो पच्चनीकतो अज्झापन्नो परिञ्ञातो. इट्ठं वा अनिट्ठं वा यं यं धम्मं परिवत्तेतुकामो आचरियो चित्तेन रोचयति दिट्ठिया उपगच्छति, इट्ठस्स वा अनिट्ठस्स वा तस्स तस्स रुचिकस्स धम्मस्स यो पटिपक्खो, सो पटिपक्खधम्मो अस्स धम्मस्स अनिट्ठतो पच्चनीकधम्मतो अज्झापन्नो परिञ्ञातो भवतीति परिवत्तेतुकामेन इच्छितब्बधम्मानुरूपपटिपक्खवसेन परिवत्तनं कातब्बन्ति परिवत्तने पटिपक्खलक्खणं वुत्तं. तेन अट्ठकथायं वुत्तं – ‘‘पटिपक्खस्स लक्खणं विभावेती’’ति.

‘‘एवं ¶ ¶ वुत्तप्पकारं परिवत्तनं अम्हेहि कथं सद्दहितब्ब’’न्ति वत्तब्बता ‘‘तेनाहा’’तिआदि वुत्तं.

‘‘एत्तावता परिवत्तो हारो परिपुण्णो, अञ्ञो नियुत्तो नत्थी’’ति वत्तब्बत्ता ‘‘नियुत्तो परिवत्तनो हारो’’ति वुत्तं. यस्मिं सुत्ते कुसलाकुसले निद्दिट्ठे पटिपक्खवसेन नीहरित्वा यथासम्भवं यो यो परिवत्तनो हारो नियुत्तो, तस्मिं सुत्ते निद्दिट्ठे पटिपक्खवसेन नीहरित्वा सो सो परिवत्तनो हारो नियुत्तो निद्धारेत्वा युत्तो योजितोति अत्थो गहेतब्बोति.

इति परिवत्तनहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

१०. वेवचनहारविभङ्गविभावना

३७. येन येन संवण्णनाविसेसभूतेन पवत्तनहारविभङ्गेन परिवत्तेतब्बा सुत्तत्था विभत्ता, सो संवण्णनाविसेसभूतो परिवत्तनहारविभङ्गो परिपुण्णो, ‘‘कतमो वेवचनहारविभङ्गो’’ति पुच्छितब्बत्ता ‘‘तत्थ कतमो वेवचनो हारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु कतमो संवण्णनाविसेसो वेवचनो हारो वेवचनहारविभङ्गो नामाति पुच्छति. ‘‘वेवचनानि बहूनी’’तिआदिनिद्देसस्स इदानि मया वुच्चमानो ‘‘एकं भगवा धम्म’’न्तिआदिको वित्थारसंवण्णनाविसेसो वेवचनो हारो वेवचनहारविभङ्गो नामाति अत्थो गहेतब्बो. ‘‘यानि वेवचनानि निद्धारितानि, कतमानि तानि वेवचनानी’’ति पुच्छितब्बत्ता ‘‘यथा एक’’न्तिआदि वुत्तं. एकं विञ्ञातब्बं धम्मं सभावधम्मं पञ्ञापेतब्बं वा धम्मं अञ्ञमञ्ञेहि यथा येहि पकारेहि चेव वेवचनेहि च भगवा निद्दिसति, तथापकारानि वेवचनानि विञ्ञातब्बानीति अत्थो. ‘‘तानि वेवचनानि किन्ति ¶ भगवा आहा’’ति वत्तब्बत्ता ‘‘यथाह भगवा’’तिआदि वुत्तं. यथा यंयंपकारानि वेवचनानि –

‘‘आसा ¶ च पिहा च अभिनन्दना च, अनेकधातूसु सरा पतिट्ठिता;

अञ्ञाणमूलप्पभवा पजप्पिता, सब्बा मया ब्यन्तिकता समूलिका’’ति. –

भगवा आह, तंतंपकारानि वेवचनानि विञ्ञातब्बानीति अत्थो.

एकस्सेव धम्मस्स अनेकेहि परियायभूतेहि वेवचनेहि निद्दिसने फलं अट्ठकथायं (नेत्ति. अट्ठ. ३७) बहुधा वुत्तं, तस्मा अम्हेहि न दस्सितं. ‘‘कतमा आसा, कतमा पिहादी’’ति पुच्छितब्बत्ता ‘‘आसा नाम वुच्चती’’तिआदि वुत्तं. या भविस्सस्स अत्थस्स आसीसना अवस्सं आगमिस्सतीति या आसा अस्स आसीसन्तस्स पुग्गलस्स उप्पज्जति, तस्स आसीसना ‘‘आसा नामा’’ति वुच्चति. वत्तमानस्स या पत्थना अस्स पत्थयन्तस्स उप्पज्जति, सेय्यतरं वा अञ्ञं दिस्वा ‘‘एदिसो अहं भवेय्य’’न्ति या पिहा अस्स पिहयन्तस्स उप्पज्जति, सा पत्थना ‘‘पिहा नामा’’ति वुच्चति. अनागतत्थं आरब्भ पवत्ता तण्हा ‘‘आसा’’ति वुच्चति, अनागतपच्चुप्पन्नत्थं आरब्भ पवत्ता तण्हा ‘‘पिहा’’ति वुच्चति, तथापि तण्हाभावेन एकत्ता एको धम्मोव अत्थस्स इच्छितस्स निप्फत्ति अत्थनिप्फत्ति, पटिपालेति एताय तण्हायाति पटिपालना, अत्थनिप्फत्तिया पटिपालनाति अत्थनिप्फत्तिपटिपालना. या तण्हा अस्स पालयन्तस्स पुग्गलस्स उप्पज्जति, सा तण्हा ‘‘अभिनन्दना’’ति वुच्चति.

‘‘या अत्थनिप्फत्ति तण्हाय पटिपालेतब्बा, कतमा सा अत्थनिप्फत्ती’’ति पुच्छितब्बत्ता तं अत्थनिप्फत्तिं सत्ततो वा सङ्खारतो वा विभजित्वा दस्सेन्तो ‘‘पियं वा ञातिं, पियं वा धम्म’’न्तिआदिमाह. तत्थ ‘‘ञाति’’न्ति इमिना मित्तबन्धवादयोपि गहिता. धम्मं पन पियरूपारम्मणादिकं छब्बिधम्पि याय तण्हाय तण्हिको अभिनन्दति, सा तण्हा ‘‘अभिनन्दना नामा’’ति वुच्चति. पटिक्कूलं ञातिं वा धम्मं वा विपल्लासवसेन अप्पटिक्कूलं ञातिं वा धम्मं वा सभाववसेन अप्पटिक्कूलतो याय तण्हाय तण्हिको अभिनन्दति ¶ , सा तण्हा वा ‘‘अभिनन्दना नामा’’ति वुच्चतीति योजेत्वा अत्थो गहेतब्बो.

‘‘यासु अनेकासु धातूसु वुत्तप्पकारा तण्हा ‘सरा’ति भगवता वुत्ता, कतमा ता धातुयो’’ति पुच्छितब्बत्ता ता धातुयो सरूपतो दस्सेतुं ‘‘चक्खुधातू’’तिआदि वुत्तं.

‘‘तासु धातूसु कतमाय धातुया कतमा सरा पतिट्ठिता पवत्ता’’ति पुच्छितब्बत्ता इमाय धातुया अयं सरा पतिट्ठिता पवत्ताति नियमेत्वा दस्सेतुं ‘‘सराति केचि रूपाधिमुत्ता’’तिआदि ¶ वुत्तं. तत्थ केचीति सरासङ्खाताय रूपतण्हाय तण्हिका पुग्गला. रूपाधिमुत्ताति रूपधातुसङ्खाते आरम्मणे अधिमुत्ता अज्झोसिता. इमिना पदेन रूपतण्हासङ्खाता सरा रूपधातुया पतिट्ठिता पवत्ताति गहिता, ‘‘केचि सद्दाधिमुत्ता’’तिआदीहिपि सद्दतण्हासङ्खातादयो सरा सद्दधातुयादीसु पतिट्ठिता पवत्ता सराव गहिता. केचि धम्माधिमुत्ताति एत्थ धम्मग्गहणेन चक्खुधातुसोतधातुघानधातुजिव्हाधातुकायधातुसत्तविञ्ञाणधातुधम्मधातुयो गहिता, तस्मा अट्ठारस धातुयो पतिट्ठानभावेन गहितापि छब्बिधाव गहिताति दट्ठब्बा. ‘‘रूपाधिमुत्तादीसु कित्तकानि पदानि तण्हापक्खे तण्हाय वेवचना’’ति पुच्छितब्बत्ता एतादिसानि एत्तकानि पदानि तण्हापक्खे तण्हावेवचनानीति नियमेत्वा दस्सेतुं ‘‘तत्थ यानि छ गेहसितानी’’तिआदि वुत्तं. तत्थाति तेसु छसु रूपादीसु. छ गेहसितानि दोमनस्सानीति छसु रूपादीसु पवत्तं तण्हापेमं निस्साय पवत्तानि छ दोमनस्सानि. एस नयो सेसेसुपि. ‘‘छ उपेक्खा गेहसितापि भगवता वुत्ता, कस्मा न गहिता’’ति वत्तब्बत्ता ‘‘या छ उपेक्खा गेहसिता, अयं दिट्ठिपक्खो’’ति वुत्तं, दिट्ठिपक्खत्ता न गहिताति अत्थो.

३८. ‘‘कथं वुत्तप्पकारा तण्हा एव गहिता’’ति वत्तब्बत्ता ‘‘सायेव पत्थनाकारेना’’तिआदि वुत्तं. सा वुत्तप्पकारा एव तण्हा पत्थनाकारेन पवत्तनतो आसादिपरियायेन वुत्ता, रूपादिआरम्मणधम्मेसु नन्दनतो ‘‘धम्मनन्दी’’ति परियायेन वुत्ता, रूपादिआरम्मणधम्मेसु गिलित्वा परिनिट्ठपेति विय अज्झोसाय तिट्ठनतो ‘‘धम्मज्झोसान’’न्ति परियायेन वुत्ता, तस्मा तण्हाय वेवचनानि होन्ति.

तण्हाय ¶ वेवचनानि आचरियेन निद्दिट्ठानि, अम्हेहि च ञातानि, ‘‘कतमानि चित्तस्स वेवचनानी’’ति पुच्छितब्बत्ता ‘‘चित्तं मनो’’तिआदि वुत्तं. ‘‘आरम्मणं चिन्तेतीति चित्तं. मनति जानातीति मनो. विजानातीति विञ्ञाण’’न्तिआदिना अत्थो पकरणेसु (ध. स. अट्ठ. ५) वुत्तोव, तस्मा अम्हेहि न वित्थारितो. वेवचनानियेव इमानि इमस्स वेवचनानीति एत्तकानियेव कथयिस्साम. ‘‘पञ्ञिन्द्रियं पञ्ञाबल’’न्तिआदीनि पञ्ञावेवचनानि.

‘‘अरहं सम्मासम्बुद्धो’’तिआदीनि बुद्धस्स वेवचनानि. ‘‘तानि कत्थ देसितानी’’ति पुच्छितब्बत्ता ‘‘यथा च बुद्धानुस्सतियं वुत्त’’न्तिआदि वुत्तं. बुद्धानुस्सतिदेसनायं यथा च यंयंपकारं ¶ वेवचनं भगवता ‘‘इतिपि सो भगवा अरहं…पे… भगवतो’’ति वुत्तं, एतंपकारं वेवचनं बुद्धानुस्सतिया वेवचनं बुद्धस्स वेवचनन्ति दट्ठब्बं. ‘‘यथा च धम्मानुस्सतियं वुत्त’’न्तिआदीसुपि एवमेव योजना कातब्बा.

‘‘तेनाहा’’तिआद्यानुसन्ध्यादिअत्थो चेव ‘‘नियुत्तो वेवचनो हारो’’तिआनुसन्ध्यादिअत्थो च वुत्तनयानुसारेन वेदितब्बो.

इति वेवचनहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

११. पञ्ञत्तिहारविभङ्गविभावना

३९. येन येन संवण्णनाविसेसभूतेन विभङ्गेन वेवचनानि विभत्तानि, सो संवण्णनाविसेसभूतो विभङ्गो परिपुण्णो, ‘‘कतमो पञ्ञत्तिहारविभङ्गो’’ति पुच्छितब्बत्ता ‘‘तत्थ कतमो पञ्ञत्तिहारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु कतमो संवण्णनाविसेसो पञ्ञत्तिहारो पञ्ञत्तिहारविभङ्गो नामाति पुच्छति. ‘‘एकं भगवा धम्मं पञ्ञत्तीहि विविधाहि देसेती’’तिआदिनिद्देसस्स इदानि मया वुच्चमानो ‘‘या पकतिकथाय देसना’’तिआदिको वित्थारसंवण्णनाविसेसो पञ्ञत्तिहारो पञ्ञत्तिहारविभङ्गो नामाति गहेतब्बो.

‘‘याहि ¶ विविधाहि पञ्ञत्तीहि एकं धम्मं भगवा देसेति, कतमा ता विविधा पञ्ञत्तियो’’ति पुच्छितब्बत्ता ‘‘या पकतिकथाया’’तिआदि वुत्तं. तत्थ पकतिकथायाति अस्सादादिपदत्थविसेसं अनिद्धारेत्वा अत्थसभावेन पवत्ताय कथाय साधुकं मनसिकारधम्मकथाय या देसना यथाधिप्पेतमत्थं वेनेय्यसन्ताने निक्खिपति पतिट्ठपेति पकारेन ञापेति, तस्मा निक्खेपपञ्ञत्ति, ताय पञ्ञत्तिया धम्मं देसेतीति अत्थो. ‘‘या पञ्ञत्ति ‘पकतिकथाय ¶ देसना’ति वुत्ता, कतमा सा’’ति पुच्छितब्बत्ता तथा पुच्छित्वा वित्थारतो दस्सेतुं ‘‘का च पकतिकथाय देसना’’तिआदि वुत्तं. अट्ठकथायं पन –‘‘इति ‘पकतिकथाय देसना’ति सङ्खेपेन वुत्तमत्थं वित्थारेन विभजितुं ‘का च पकतिकथाय देसना’ति पुच्छित्वा ‘चत्तारि सच्चानी’तिआदिमाहा’’ति (नेत्ति. अट्ठ. ३९) वुत्तं. तत्थ देसनादेसेतब्बस्स भेदभावेपि अभेदोपचारेन ‘‘देसना चत्तारि सच्चानी’’ति वुत्तं, चतुन्नं सच्चानं पञ्ञत्ति देसना नामाति अत्थो.

‘‘कथं तं सच्चपञ्ञत्तिं भगवा आहा’’ति पुच्छितब्बत्ता ‘‘यथा भगवा आहा’’ति वुत्तं. यथा येन पकारेन भगवा यं यं पञ्ञत्तिं आह, तथा तेन पकारेन सा पञ्ञत्ति जानितब्बा. ‘‘इदं दुक्ख’’न्ति यं पञ्ञत्तिं भगवा आह, अयं ‘‘इदं दुक्ख’’न्ति पञ्ञत्ति पञ्चन्नं खन्धानं निक्खेपपञ्ञत्ति, छन्नं धातूनं निक्खेपपञ्ञत्ति, अट्ठारसन्नं धातूनं निक्खेपपञ्ञत्ति, द्वादसन्नं आयतनानं निक्खेपपञ्ञत्ति, दसन्नं इन्द्रियानं निक्खेपपञ्ञत्तीति योजना कातब्बा. खन्धधातुआयतनिन्द्रियानि च लोकियानेव. पीळनसङ्खतसन्तापविपरिणामत्थतासामञ्ञेन एकत्तं उपनेत्वा ‘‘इदं दुक्ख’’न्ति वुत्ता. दसन्नं इन्द्रियानन्ति चक्खुसोतघानजिव्हाकायइत्थिपुरिसजीवितमनवेदनिन्द्रियानं दसन्नं. अनुभवनलक्खणेन एकलक्खणत्ता वेदनिन्द्रियं एकन्ति गहितं, सद्धिन्द्रियादीनि पन मग्गपरियापन्नत्ता न गहितानि.

कबळीकारेति ठानूपचारेन वोहरिते ओजासङ्खाते आहारे, रागो अरियमग्गेन अप्पहातब्बत्ता अनुसयवसेन, आसावसेन वा पत्थनावसेन वा अत्थि नन्दी. अत्थि तण्हाति एत्थापि एसेव नयो. पतिट्ठितं विरुळ्हन्ति पटिसन्धिआकड्ढनसमत्थतापत्तिया पतिट्ठितत्ता पतिट्ठितञ्चेव विरुळ्हञ्चाति गहेतब्बं. सङ्खारानन्ति पुनब्भवनिब्बत्तकस्स भवस्स अभिनिब्बत्तिहेतुकानं ¶ सङ्खारानं. जातिजरामरणन्ति अभिनिब्बत्तनलक्खणा जाति, न उप्पादोव, परिपाकलक्खणा जरा, न ठितियेव, भेदनलक्खणं मरणं, न भङ्गमेव. तेन वुत्तं ‘‘ससोकं सदरं सउपायास’’न्ति.

‘‘फस्से चे, भिक्खवे, आहारे…पे… मनोसञ्चेतनाय चे, भिक्खवे, आहारे…पे… विञ्ञाणे चे, भिक्खवे, आहारे अत्थि रागो…पे… वदामी’’ति अयं पञ्ञत्ति दुक्खस्स च समुदयस्स च पभवस्स पञ्ञापनतो पभवपञ्ञत्ति नाम.

वट्टवसेन पञ्ञत्तिभेदो आचरियेन विभत्तो, अम्हेहि च ञातो, ‘‘कथं विवट्टवसेन पञ्ञत्तिभेदो ¶ विभत्तो’’ति वत्तब्बत्ता ‘‘कबळीकारे चे, भिक्खवे, आहारे नत्थि रागो’’तिआदि वुत्तं. ‘‘कबळीकारे…पे… अनुपायासन्ति वदामी’’ति अयं पञ्ञत्ति दुक्खस्स परिञ्ञाय च पञ्ञापनतो परिञ्ञापञ्ञत्ति नाम, समुदयस्स पहानस्स च पञ्ञापनतो पहानपञ्ञत्ति नाम, मग्गस्स भावनाय च पञ्ञापनतो भावनापञ्ञत्ति नाम, निरोधस्स सच्छिकिरियाय च पञ्ञापनतो सच्छिकिरियापञ्ञत्ति नाम.

४०. विवट्टवसेन पञ्ञत्तिभेदो आचरियेन विभत्तो, अम्हेहि च ञातो, ‘‘कथं सम्मसनवसेन पञ्ञत्तिभेदो विभत्तो’’ति वत्तब्बत्ता ‘‘समाधिं, भिक्खवे, भावेथा’’तिआदि वुत्तं. ‘‘समाधिं, भिक्खवे, भावेथ…पे… यथाभूतं पजानाती’’ति अयं पञ्ञत्ति मग्गस्स भावनाय च पञ्ञापनतो भावनापञ्ञत्ति नाम, दुक्खस्स परिञ्ञाय च पञ्ञापनतो परिञ्ञापञ्ञत्ति नाम, समुदयस्स पहानस्स च पञ्ञापनतो पहानपञ्ञत्ति नाम, निरोधस्स सच्छिकिरियाय च पञ्ञापनतो सच्छिकिरियापञ्ञत्ति नाम.

सम्मसनवसेन पञ्ञत्तिभेदो आचरियेन विभत्तो, अम्हेहि च ञातो, ‘‘कथं उपादानक्खन्धवसेन पञ्ञत्तिभेदो विभत्तो’’ति वत्तब्बत्ता ‘‘रूपं, राध, विकिरथा’’तिआदि वुत्तं. ‘‘रूपं, राध, विकिरथ…पे… निब्बान’’न्ति अयं पञ्ञत्ति तण्हासङ्खातस्स रोधस्स निरोधस्स च पञ्ञापनतो निरोधपञ्ञत्ति नाम, अस्सादस्स निब्बिदाय च पञ्ञापनतो निब्बिदापञ्ञत्ति नाम, दुक्खस्स परिञ्ञाय च पञ्ञापनतो परिञ्ञापञ्ञत्ति नाम, समुदयस्स पहानस्स च पञ्ञापनतो पहानपञ्ञत्ति नाम, मग्गस्स भावनाय च पञ्ञापनतो भावनापञ्ञत्ति नाम, निरोधस्स सच्छिकिरियाय च पञ्ञापनतो सच्छिकिरियापञ्ञत्ति नाम.

‘‘रूपवेदनासञ्ञासङ्खारविञ्ञाणानि ¶ विकिरन्तो विद्धंसेन्तो विकीळनियं करोन्तो पञ्ञाय तण्हाक्खयाय पटिपज्जन्तो किं पजानाती’’ति पुच्छितब्बत्ता ‘‘सो ‘इदं दुक्ख’न्ति यथाभूतं पजानाती’’तिआदि वुत्तं. ‘‘सो ‘इदं दुक्ख’न्ति यथाभूतं पजानातीति…पे… निरोधगामिनिपटिपदाति यथाभूतं पजानाती’’ति अयं पञ्ञत्ति सच्चानं पटिवेधस्स पञ्ञापनतो पटिवेधपञ्ञत्ति नाम, दस्सनभूमिया निक्खेपस्स च पञ्ञापनतो निक्खेपपञ्ञत्ति नाम, मग्गस्स भावनाय च पञ्ञापनतो भावनापञ्ञत्ति नाम, सोतापत्तिफलस्स सच्छिकिरियाय च पञ्ञापनतो सच्छिकिरियापञ्ञत्ति नाम. ‘‘सो ‘इमे आसवा’ति यथाभूतं पजानाति…पे… ‘आसवा असेसं निरुज्झन्ती’ति यथाभूतं पजानाती’’ति अयं पञ्ञत्ति खयेञाणस्स उप्पादस्स च पञ्ञापनतो उप्पादपञ्ञत्ति नाम, अनुप्पादेञाणस्स ओकासस्स च ¶ पञ्ञापनतो ओकासपञ्ञत्ति नाम, मग्गस्स भावनाय च पञ्ञापनतो भावनापञ्ञत्ति नाम, दुक्खस्स परिञ्ञाय च पञ्ञापनतो परिञ्ञापञ्ञत्ति नाम, समुदयस्स पहानस्स च पञ्ञापनतो पहानपञ्ञत्ति नाम, वीरियिन्द्रियस्स आरम्भस्स च पञ्ञापनतो आरम्भपञ्ञत्ति नाम, आसाटिकानं आहटनाय च पञ्ञापनतो आहटनापञ्ञत्ति नाम, भावनाभूमिया निक्खेपस्स च पञ्ञापनतो निक्खेपपञ्ञत्ति नाम, पापकानं अकुसलानं धम्मानं अभिनिघातस्स च पञ्ञापनतो अभिनिघातपञ्ञत्ति नाम.

४१. वट्टवसेन वा विवट्टवसेन वा धम्मसम्मसनवसेन वा उपादानक्खन्धवसेन वा पजाननवसेन वा सच्चेसु नानाविधो पञ्ञत्तिभेदो आचरियेन विभत्तो, अम्हेहि च ञातो, ‘‘कथं तेपरिवट्टवसेन सच्चेसु पञ्ञत्तिभेदो विभत्तो’’ति वत्तब्बत्ता तेपरिवट्टवसेन सच्चेसु पञ्ञत्तिभेदं दस्सेतुं ‘‘इदं दुक्खन्ति मे, भिक्खवे’’तिआदि आरद्धं. अट्ठकथायं पन – ‘‘एवं वट्टविवट्टमुखेन सम्मसनउपादानक्खन्धमुखेनेव सच्चेसु पञ्ञत्तिविभागं दस्सेत्वा इदानि तेपरिवट्टवसेन दस्सेतुं ‘इदं दुक्खन्ति मे भिक्खवे’तिआदि आरद्ध’’न्ति (नेत्ति. अट्ठ. ४१) वुत्तं. तत्थ पुब्बे परिजाननतो पट्ठाय. अननुस्सुतेसूति परिजाननवसेन अननुस्सुतेसु चतूसु सच्चधम्मेसु. चक्खुन्ति पठमं निब्बानदस्सनट्ठेन चक्खु नाम. यथासभावतो किच्चपरिजाननट्ठेन सच्छिकिरियपरिजाननट्ठेन ञाणं नाम. यथासभावतो ¶ किच्चपरिजाननादीनं पटिविज्झित्वा पजाननट्ठेन पञ्ञा नाम. तथा विदितकरणट्ठेन विज्जा नाम. आलोकोभासकरणट्ठेन आलोको नाम. इदं चक्खादिकं सब्बं पञ्ञावेवचनमेव. ‘‘इदं दुक्खन्ति मे भिक्खवे…पे… उदपादी’’ति अयं पञ्ञत्ति सच्चानं देसनाय पञ्ञापनतो देसनापञ्ञत्ति नाम, सुतमयिया पञ्ञाय निक्खेपस्स च पञ्ञापनतो निक्खेपपञ्ञत्ति नाम, अनञ्ञातञ्ञस्सामीतिन्द्रियस्स सच्छिकिरियाय च पञ्ञापनतो सच्छिकिरियापञ्ञत्ति नाम, धम्मचक्कस्स पवत्तनाय च पञ्ञापनतो पवत्तनापञ्ञत्ति नाम.

‘‘तं खो पनिदं दुक्खं परिञ्ञेय्यं…पे… उदपादी’’ति अयं पञ्ञत्ति मग्गस्स भावनाय पञ्ञापनतो भावनापञ्ञत्ति नाम, चिन्तामयिया पञ्ञाय निक्खेपस्स च पञ्ञापनतो निक्खेपपञ्ञत्ति नाम, अञ्ञिन्द्रियस्स सच्छिकिरियाय च पञ्ञापनतो सच्छिकिरियापञ्ञत्ति नाम.

‘‘तं खो पनिदं दुक्खं परिञ्ञातं…पे… उदपादी’’ति अयं पञ्ञत्ति मग्गस्स भावनाय पञ्ञापनतो भावनापञ्ञत्ति नाम, भावनामयिया पञ्ञाय निक्खेपस्स च पञ्ञापनतो ¶ निक्खेपपञ्ञत्ति नाम, अञ्ञाताविनो इन्द्रियस्स सच्छिकिरियाय च पञ्ञापनतो सच्छिकिरियापञ्ञत्ति नाम, धम्मचक्कस्स पवत्तनाय च पञ्ञापनतो पवत्तनापञ्ञत्ति नाम.

तेपरिवट्टवसेन सच्चेसु नानाविधो पञ्ञत्तिभेदो आचरियेन विभत्तो, अम्हेहि च ञातो, ‘‘कथं कुसलाकुसलादिवसेन देसितधम्मस्स पञ्ञत्तिभेदो विभत्तो’’ति वत्तब्बत्ता ‘‘तुलमतुलञ्च सम्भव’’न्तिआदि वुत्तं. अथ वा धम्मचक्कसुत्ते पञ्ञत्तिभेदो आचरियेन विभत्तो, अम्हेहि च ञातो, ‘‘तुलमतुलञ्चातिआदिगाथाय कथं पञ्ञत्तिभेदो विभत्तो’’ति वत्तब्बत्ता ‘‘तुलमतुलञ्चा’’तिआदि वुत्तं. तुलीयति परिच्छिज्जीयतीति तुलं, कामावचरकम्मं, नत्थि तुलं सदिसं अञ्ञं लोकियकम्मं अस्स महग्गतकम्मस्साति अतुलं, रूपारूपावचरकम्मं. पुनब्भवं सम्भवति एतेन सङ्खारेनाति सम्भवो, तं सम्भवं. पुनब्भवं सङ्खरोतीति भवसङ्खारो. अज्झत्ते विपस्सनावसेन रमतीति अज्झत्तरतो. समथवसेन समाधियतीति समाहितो. अत्तनि सम्भवतीति अत्तसम्भवो, तं अत्तसम्भवं. मुनि सम्बुद्धो सम्भवं भवसङ्खारं तुलञ्च अतुलञ्च अवस्सजि, अज्झत्तरतो समाहितो कवचं अभिन्दि इव, एवं अत्तसम्भवं अभिन्दि पदालयीति योजना कातब्बा. अथ वा मुनि सम्बुद्धो ‘‘पञ्चक्खन्धा अनिच्चा ¶ दुक्खा अनत्ता विपरिणामधम्मा, निब्बानं पन निच्चं सुखं असङ्खतं अविपरिणामधम्म’’न्ति तुलं तुलयन्तो अतुलं निब्बानं दिस्वा सम्भवं भवसङ्खारं अरियमग्गेन अवस्सजि. कथं अवस्सजि? सो हि मुनि विपस्सनावसेन अज्झत्तरतो च हुत्वा, समथवसेन उपचारप्पनासु समाहितो च हुत्वा कवचं अभिन्दि इव, एवं अत्तसम्भवं अत्तनि सञ्जातं किलेसं अभिन्दि पदालयि, किलेसाभावेन कम्मञ्च जहीति गाथात्थो गहेतब्बो.

‘‘तुलमतुलञ्च सम्भव’’न्ति पञ्ञत्ति सब्बधम्मानं अभिञ्ञाय पञ्ञापनतो अभिञ्ञापञ्ञत्ति नाम, धम्मपटिसम्भिदाय निक्खेपस्स च पञ्ञापनतो निक्खेपपञ्ञत्ति नाम, ‘‘भवसङ्खारमवस्सजि मुनी’’ति पञ्ञत्ति समुदयस्स परिच्चागस्स च पञ्ञापनतो परिच्चागपञ्ञत्ति नाम, दुक्खस्स परिञ्ञाय च पञ्ञापनतो परिञ्ञापञ्ञत्ति नाम, ‘‘अज्झत्तरतो समाहितो’’ति पञ्ञत्ति कायगताय सतिया भावनाय च पञ्ञापनतो भावनापञ्ञत्ति नाम, चित्तेकग्गताय ठितिया च पञ्ञापनतो ठितिपञ्ञत्ति नाम, ‘‘अभिन्दि कवचमिवत्तसम्भव’’न्ति पञ्ञत्ति चित्तस्स अभिनिब्बिदाय च पञ्ञापनतो अभिनिब्बिदापञ्ञत्ति नाम, सब्बञ्ञुताय उपादानस्स च पञ्ञापनतो उपादानपञ्ञत्ति नाम, अविज्जाण्डकोसानं पदालनाय च पञ्ञापनतो पदालपञ्ञत्ति नाम, ‘‘यथावुत्तो पञ्ञत्तिप्पभेदो केन सद्दहितब्बो’’ति वत्तब्बत्ता ‘‘तेनाहा’’तिआदि वुत्तं. तथावुत्तस्स पञ्ञत्तिप्पभेदस्स ¶ सम्भवतो भगवा यं ‘‘तुलमतुल’’न्तिआदिगाथमाह, तथासम्भवतो यथावुत्ताय गाथाय यथावुत्तो पञ्ञत्तिप्पभेदो सद्दहितब्बोति.

‘‘तुलमतुलञ्चा’’तिआदिगाथायं पञ्ञत्तिप्पभेदो आचरियेन विभत्तो, अम्हेहि च ञातो.

‘यो दुक्खमद्दक्खि यतोनिदानं, कामेसु सो जन्तु कथं नमेय्य;

कामा हि लोके सङ्गोति ञत्वा, तेसं सतीमा विनयाय सिक्खे’ति. –

गाथायं पन कथं पञ्ञत्तिभेदो विभत्तो’’ति वत्तब्बत्ता ‘‘यो दुक्खमद्दक्खी’’तिआदि वुत्तं. यो आरद्धविपस्सको जन्तु यतोनिदानं सब्बं तेभूमकं ¶ हेतुफलं दुक्खं अद्दक्खि, सो आरद्धविपस्सको जन्तु कामेसु कथं नमेय्य नमेतुं नारहति. कामा लोके ‘‘सङ्गो’’ति हि यस्मा पस्सितब्बा, तस्मा नमेतुं नारहति, इति एतं दुक्खभावं दुक्खहेतुभावं ञत्वा तेसं कामानं विनयाय वूपसमाय सतिमा कायगतासतिसम्पन्नो तीणि सिक्खानि सिक्खे सिक्खेय्याति गाथात्थो सङ्खेपेन विञ्ञातब्बो. अट्ठकथायं (नेत्ति. अट्ठ. ४१) पन वित्थारेन संवण्णितो.

‘‘यो दुक्ख’’न्ति पञ्ञत्ति दुक्खस्स वेवचनस्स च परिञ्ञाय च पञ्ञापनतो वेवचनपञ्ञत्ति, परिञ्ञापञ्ञत्ति च होति. ‘‘यतोनिदान’’न्ति पञ्ञत्ति समुदयस्स पभवस्स च पहानस्स च पञ्ञापनतो पभवपञ्ञत्ति चेव पहानपञ्ञत्ति च होति. ‘‘अद्दक्खी’’ति पञ्ञत्ति ञाणचक्खुस्स वेवचनस्स च पटिवेधस्स च पञ्ञापनतो वेवचनपञ्ञत्ति चेव पटिवेधपञ्ञत्ति च होति. ‘‘कामेसु सो जन्तु कथं नमेय्या’’ति पञ्ञत्ति कामतण्हाय वेवचनस्स च अनभिनिविसस्स च पञ्ञापनतो वेवचनपञ्ञत्ति चेव अनभिनिवेसपञ्ञत्ति च होति. ‘‘कामा हि लोके सङ्गोति ञत्वा’’ति पञ्ञत्ति कामानं पच्चत्थिकतो दस्सनस्स च पञ्ञापनतो दस्सनपञ्ञत्ति नाम. कामा हि अनत्थजाननतो पच्चत्थिकसदिसा.

‘‘कीदिसा हुत्वा अनत्थजनका’’ति पुच्छितब्बत्ता ‘‘कामा ही’’तिआदि वुत्तं. कामा रागग्गिआदीहि अन्तोदय्हनतो अङ्गारकासूपमा च, पूतिभावापज्जनतो मंसपेसूपमा च, बहि अञ्ञेन दय्हनतो पावककप्पा जलितग्गिक्खन्धूपमा च, पतिट्ठानाभावतो पपातूपमा च, विससदिसेहि दोसादीहि परहिंसनतो उरगोपमा च. ‘‘तेसं सतीमा’’ति पञ्ञत्ति पहानाय अपचयस्स च पञ्ञापनतो अपचयपञ्ञत्ति नाम, कायगताय सतिया निक्खेपस्स च पञ्ञापनतो ¶ निक्खेपपञ्ञत्ति नाम, मग्गस्स भावनाय च पञ्ञापनतो भावनापञ्ञत्ति नाम. ‘‘विनयाय सिक्खे’’ति पञ्ञत्तिरागविनयस्स दोसविनयस्स मोहविनयस्स पटिवेधस्स च पञ्ञापनतो पटिवेधपञ्ञत्ति नाम. ‘‘जन्तू’’ति पञ्ञत्ति योगिस्स वेवचनस्स च पञ्ञापनतो वेवचनपञ्ञत्ति नाम.

‘‘जन्तूति सामञ्ञसत्तवाचको सद्दो कस्मा योगिवाचकोति विञ्ञातब्बो’’ति वत्तब्बत्ता ‘‘यदा ही’’तिआदि वुत्तं. योगी यदा यस्मिं काले ¶ कामा सङ्गोति पजानाति, तदा तस्मिं काले सो योगी कामानं अनुप्पादाय कुसले धम्मे कायगतासतिआदीहि उप्पादयति, सो कुसले धम्मे उप्पादेन्तो योगी अनुप्पन्नानं कुसलानं धम्मानं उप्पादाय वायमति कुसलवीरियं करोति, तस्मा योगीवाचको जन्तुसद्दोति विञ्ञातब्बो. ‘‘जन्तू’’ति अयं पञ्ञत्ति अप्पत्तस्स कुसलस्स झानधम्मादिकस्स पत्तिया वायामस्स च पञ्ञापनतो वायामपञ्ञत्ति नाम, ओरमत्तिकाय असन्तुट्ठिया निक्खेपस्स च पञ्ञापनतो निक्खेपपञ्ञत्ति नाम. ‘‘सो अनुप्पन्नानं कुसलानं धम्मानं उप्पादाय वायमती’’ति अयं पञ्ञत्ति वायामपञ्ञत्ति, ‘‘हेतुसो उप्पन्नानं कुसलानं धम्मानं ठितिया वायमतीति पञ्ञत्ति कतमा पञ्ञत्ती’’ति पुच्छितब्बत्ता ‘‘तत्थ सो उप्पन्नान’’न्तिआदि वुत्तं. तत्थ तस्मिं ‘‘अनुप्पन्नान’’न्तिआदिम्हि. ‘‘सो उप्पन्नानं कुसलानं धम्मानं ठितिया वायमती’’ति अयं पञ्ञत्ति भावनाय अप्पमादस्स च पञ्ञापनतो अप्पमादपञ्ञत्ति नाम, वीरियिन्द्रियस्स निक्खेपस्स च पञ्ञापनतो निक्खेपपञ्ञत्ति नाम, कुसलानं धम्मानं आरक्खस्स च पञ्ञापनतो आरक्खपञ्ञत्ति नाम, अधिचित्तसिक्खाय ठितिया च पञ्ञापनतो ठितिपञ्ञत्ति नाम. ‘‘केन यथावुत्तप्पकारो पञ्ञत्तिप्पभेदो सद्दहितब्बो’’ति वत्तब्बत्ता ‘‘तेनाहा’’तिआदि वुत्तं.

‘‘यो दुक्खमद्दक्खि यतोनिदान’’न्तिआदिगाथाय पञ्ञत्तिप्पभेदो आचरियेन विभत्तो, अम्हेहि च ञातो.

‘‘मोहसम्बन्धनो लोको, भब्बरूपोव दिस्सति;

उपधिबन्धनो बालो, तमसा परिवारितो;

अस्सिरी विय खायति, पस्सतो नत्थि किञ्चनन्ति. –

गाथायं पन कथं पञ्ञत्तिप्पभेदो विभत्तो’’ति वत्तब्बत्ता ‘‘मोहसम्बन्धनो’’तिआदि वुत्तं. तत्थ मोहसम्बन्धनोति मोहहेतुकेहि संयोजनेहि सम्बन्धो. लोकोति अप्पहीनसंयोजनो सत्तलोको. भब्बरूपोव ¶ दिस्सतीति अभब्बोपि अत्ता भब्बरूपोव भब्बजातिको विय बालानं अविपस्सकानं दिस्सति. उपधिबन्धनोति किलेसूपधीहि बन्धितब्बो. यु-पच्चयो हि कम्मत्थे विहितो. उपधीसु वा किलेसानं बन्धनं यस्स बालस्साति उपधिबन्धनो. द्वे अवड्ढियो लाति गण्हातीति बालो. तमसा सम्मोहेन परिवारितो पटिच्छादितो पण्डितानं विपस्सकानं अस्सिरी विय सिरीविरहितो विय खायति ¶ उपट्ठाति. पस्सतो पञ्ञाचक्खुना पस्सन्तस्स पण्डितस्स किञ्चनं नत्थीति सङ्खेपत्थो दट्ठब्बो.

‘‘मोहसम्बन्धनो लोको’’ति पञ्ञत्ति मोहसीसेन गहितानं विपल्लासानं देसनाय पञ्ञापनतो देसनापञ्ञत्ति नाम. ‘‘भब्बरूपोव दिस्सती’’ति पञ्ञत्ति लोकस्स विपरीतस्स विपरीताकारेन उपट्ठहन्तस्स पञ्ञापनतो विपरीतपञ्ञत्ति नाम. ‘‘उपधिबन्धनो बालो’’ति पञ्ञत्ति पापकानं इच्छावचरानं पभवस्स पञ्ञापनतो पभवपञ्ञत्ति नाम. ‘‘उपधिबन्धनो बालो’’ति पञ्ञत्ति परियुट्ठानानं अकुसलानं धम्मानं बन्धनकिच्चस्स पञ्ञापनतो किच्चपञ्ञत्ति नाम. ‘‘उपधिबन्धनो बालो’’ति पञ्ञत्ति किलेसानं बन्धनबलमूहनबलानं पञ्ञापनतो बलपञ्ञत्ति नाम. ‘‘उपधिबन्धनो बालो’’ति पञ्ञत्ति सङ्खारानं विरुहनाय पञ्ञापनतो विरुहनापञ्ञत्ति नाम. ‘‘तमसा परिवारितो’’ति पञ्ञत्ति अविज्जन्धकारस्स देसनाय पञ्ञापनतो देसनापञ्ञत्ति नाम, अविज्जन्धकारस्स वेवचनस्स च पञ्ञापनतो वेवचनपञ्ञत्ति नाम. ‘‘अस्सिरी विय खायती’’ति पञ्ञत्ति दिब्बचक्खुस्स दस्सनकिरियाय पञ्ञापनतो दस्सनपञ्ञत्ति नाम. ‘‘अस्सिरी विय खायती’’ति पञ्ञत्ति पञ्ञाचक्खुस्स निक्खेपस्स पञ्ञापनतो निक्खेपपञ्ञत्ति नाम. ‘‘पस्सतो नत्थि किञ्चन’’न्ति पञ्ञत्ति सत्तानं अरियानं पटिवेधस्स पञ्ञापनतो पटिवेधपञ्ञत्ति नाम.

‘‘कतमं किञ्चन’’न्ति पुच्छितब्बत्ता ‘‘रागो किञ्चन’’न्तिआदि वुत्तं. ‘‘यथावुत्तो पञ्ञत्तिप्पभेदो कथं अम्हेहि सद्दहितब्बो’’ति वत्तब्बत्ता ‘‘तेनाहा’’तिआदि वुत्तं. यथावुत्तस्स पञ्ञत्तिप्पभेदस्स सम्भवतो भगवा यं ‘‘मोहसम्बन्धनो’’तिआदिमाह, तथासम्भवतो ताय गाथाय यथावुत्तो पञ्ञत्तिप्पभेदो गाथानुसारेन सद्दहितब्बो.

‘‘मोहसम्बन्धनो लोको’’तिआदिगाथाय पञ्ञत्तिप्पभेदो आचरियेन विभत्तो, अम्हेहि च ञातो, ‘‘अत्थि, भिक्खवे, अजात’न्तिआदिपाठस्स पञ्ञत्तिप्पभेदो कथं विभत्तो’’ति पुच्छितब्बत्ता ‘‘अत्थि भिक्खवे’’तिआदिपाळिमाह. ‘‘सा पन पाळि किमत्थं भगवता वुत्ता’’ति चे पुच्छेय्य? परमत्थतो अविज्जमानत्ता निब्बानं नत्थि, तस्मा ‘‘अत्थि निब्बान’’न्ति ¶ वचनं ससविसाणवचनं विय अनत्थं, वोहारमत्तमेतन्ति वदन्तानं मिच्छावादं भञ्जितुं भगवता वुत्ताति दट्ठब्बा.

कुतोचिपि ¶ अजातत्ता अभूतत्ता अजातं अभूतं. पच्चयेहि अकतत्ता अकतं. सङ्खताभावतो असङ्खतं निब्बानं अत्थि. एतं अजातादिकं निब्बानं नो चे अभविस्स, एवं सति निस्सरणं न पञ्ञायेथ, निब्बानस्स च अरियमग्गफलानं आरम्मणत्ता, मग्गफलानञ्च किलेसानं समुच्छिन्दनतो पटिप्पस्सम्भनतो, समुच्छिन्दनेन च तिविधस्स वट्टस्स अपवट्टनतो अजातादिकं निब्बानं अत्थियेवाति दट्ठब्बं.

‘‘अत्थि, भिक्खवे, अजातं…पे… असङ्खत’’न्ति अयं पञ्ञत्ति निब्बानस्स देसनापञ्ञत्ति च निब्बानस्स वेवचनपञ्ञत्ति च होति. ‘‘नयिध जातस्स…पे… पञ्ञायेथा’’ति अयं पञ्ञत्ति सङ्खतस्स वेवचनपञ्ञत्ति च सङ्खतस्स उपनयनपञ्ञत्ति च होति. ‘‘यस्मा च…पे… असङ्खत’’न्ति अयं पञ्ञत्ति निब्बानस्स वेवचनपञ्ञत्ति च निब्बानस्स जोतनापञ्ञत्ति च होति. ‘‘यस्मा जातस्स…पे… पञ्ञायती’’ति अयं पञ्ञत्ति निब्बानस्स वेवचनपञ्ञत्ति च मग्गस्स संसारतो निय्यानिकपञ्ञत्ति च निस्सरणपञ्ञत्ति च होतीति पञ्ञत्तिविसेसो पण्डितेहि निद्धारेत्वा गहेतब्बो.

‘‘यथावुत्तो निब्बानस्स पञ्ञत्तिप्पभेदो केन सद्दहितब्बो’’ति वत्तब्बत्ता ‘‘तेनाह भगवा’’तिआदि वुत्तं. ‘‘तेनाह आयस्मा’’तिआद्यानुसन्ध्यादिअत्थो चेव ‘‘नियुत्तो पञ्ञत्तिहारो’’ति अनुसन्ध्यादिअत्थो च वुत्तनयानुसारेन वेदितब्बो.

इति पञ्ञत्तिहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

१२. ओतरणहारविभङ्गविभावना

४२. येन ¶ येन संवण्णनाविसेसभूतेन पञ्ञत्तिहारविभङ्गेन पञ्ञत्तियो विभत्ता, सो संवण्णनाविसेसभूतो विभङ्गो परिपुण्णो, ‘‘कतमो ओतरणो हारविभङ्गो’’ति पुच्छितब्बत्ता ‘‘तत्थ कतमो ओतरणो हारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु ¶ कतमो संवण्णनाविसेसो ओतरणो हारो ओतरणहारविभङ्गो नामाति पुच्छति. ‘‘यो च पटिच्चुप्पादो’’तिआदिनिद्देसस्स इदानि मया वुच्चमानो ‘‘उद्धं अधो सब्बधि विप्पमुत्तो’’तिआदिको वित्थारसंवण्णनाविसेसो ओतरणो हारो ओतरणहारविभङ्गो नामाति गहेतब्बो.

तत्थ पाठे ‘‘कतमे पटिच्चसमुप्पादादयो निद्धारेत्वा कतमेहि निद्धारितेहि धम्मेहि ओतरती’’ति पुच्छितब्बत्ता इमस्मिं पाठे इमे पटिच्चसमुप्पादादयो निद्धारेत्वा इमेहि निद्धारितेहि धम्मेहि ओतरतीति दस्सेतुं ‘‘उद्धं अधो सब्बधि विप्पमुत्तो’’तिआदि वुत्तं. तत्थ उद्धन्ति कामधातुतो उद्धं उपरिभागे पवत्ताय रूपधातुअरूपधातुया. अधोति रूपधातुतो हेट्ठाभागे पवत्ताय कामधातुया. सब्बधीति सब्बस्मिं कामरूपअरूपधातुम्हि. विप्पमुत्तोति पटिसन्धिवसेन अप्पवत्तनतो विप्पमुत्तो असेक्खो. अयं सेक्खो दस्सनमग्गेन सक्कायदिट्ठिया समुग्घातत्ता ‘‘अहं अस्मी’’ति अनानुपस्सी विहरति. एवं सेक्खाय विमुत्तिया चेव असेक्खाय विमुत्तिया च सेक्खो चेव असेक्खो च अतिण्णपुब्बं ओघं अपुनब्भवाय विमुत्तो उदतारीति गाथात्थो गहेतब्बो.

तस्मिं गाथापाठे ‘‘कतमे निद्धारेत्वा कतमेहि ओतरती’’ति पुच्छितब्बत्ता ‘‘उद्धन्ति रूपधातू’’तिआदि वुत्तं. उद्धन्ति मनुस्सलोकतो उद्धं चातुमहाराजिकादयोपि गहिताति अत्थसम्भवतो तं निवत्तेतुं ‘‘रूपधातु अरूपधातू’’ति वुत्तं. अधोति मनुस्सभवतो अधो चत्तारो अपायभूमियो च गहिताति अत्थसम्भवतो तं निवत्तेतुं ‘‘कामधातू’’ति वुत्तं. सब्बधीति चतुभूमिकेति अत्थसम्भवतो ‘‘तेधातुके’’ति वुत्तं. अयं असेक्खा विमुत्तीति विमुत्तस्स असेक्खस्स या विरागता अत्थि, अयम्पि विरागता असेक्खफलविमुत्ति. ‘‘उद्धं अधो सब्बधि विप्पमुत्तो’’ति पाठे वुत्तप्पकारा अयं असेक्खा विमुत्ति निद्धारिताति अत्थो. निद्धारिताय असेक्खाय विमुत्तिया यानि सद्धादिपञ्चिन्द्रियानि निद्धारितानि, तानियेव असेक्खानि ¶ पञ्चिन्द्रियानि भवन्ति. अयं वुत्तप्पकारा ओतरणा इन्द्रियेहि विमुत्तिया ओतरणा नाम पवेसना नाम.

तानियेव असेक्खानि पञ्चिन्द्रियानि विज्जाय उपकारकत्ता, पञ्ञापदट्ठानत्ता वा विज्जा भवन्ति. विज्जुप्पादा तादिसाय विज्जाय उप्पादा उप्पादहेतुतो ¶ अविज्जानिरोधो अविज्जाय निरोधो होति…पे… दुक्खक्खन्धस्स निरोधो होति, अयं वुत्तप्पकारा ओतरणा पटिच्चसमुप्पादेहि ओतरणा नाम.

तानियेव असेक्खानि पञ्चिन्द्रियानि तीहि खन्धेहि सङ्गहितानि सद्धावीरियेहि सीलसम्भवतो, सतिया च पञ्ञानुवत्तकत्ता. सेसा वुत्तनयानुसारेन वेदितब्बा.

‘‘उद्धं अधो सब्बधि विप्पमुत्तो’’ति पाठे निद्धारेत्वा ओतरणा आचरियेन विभत्ता, अम्हेहि च ञाता, ‘‘अयं अहस्मीति अनानुपस्सी’’ति पाठे ‘‘कतमे निद्धारेत्वा कतमेहि ओतरणेहि ओतरती’’ति वत्तब्बत्ता ‘‘अयं अहस्मीति अनानुपस्सीति अयं सक्कायदिट्ठिया’’तिआदि वुत्तं. यो अयं सेक्खो ‘‘अहमस्मी’’ति नानुपस्सी, तस्स सेक्खस्स सक्कायदिट्ठिया यो समुग्घातो अत्थि, या समुग्घातसङ्खाता समुग्घातविमुत्ति सेक्खा विमुत्ति होति, तस्सा सेक्खाय विमुत्तिया यानि सद्धादिपञ्चिन्द्रियानि निद्धारितानि, तानियेव सेक्खानि पञ्चिन्द्रियानि भवन्ति. अयं वुत्तप्पकारा ओतरणा इन्द्रियेहि ओतरणा नाम. सेसा वुत्तनयानुसारेन वेदितब्बा.

४३. ‘‘उद्धं अधो’’तिआदिगाथायं ओतरणा आचरियेन विभत्ता, अम्हेहि च ञाता, ‘‘निस्सितस्स चलित’’न्तिआदिपाठे ‘‘कतमे निद्धारेत्वा कतमेहि ओतरती’’ति पुच्छितब्बत्ता ‘‘निस्सितस्स चलितं, अनिस्सितस्स चलितं नत्थी’’तिआदि वुत्तं. निस्सितस्स पुग्गलस्स चलितं चलनं अत्थि, अनिस्सितस्स पुग्गलस्स चलितं चलनं नत्थि. चलिते चलने असति पस्सद्धि भवति, पस्सद्धिया सति विज्जमानाय नति न होति, नतिया असति अविज्जमानाय आगतिगति न होति, आगतिगतिया असति अविज्जमानाय चुतूपपातो न होति, चुतूपपाते असति अविज्जमाने इध छसु अज्झत्तिकायतनेसु अत्तानं नेव पस्सति, हुरं वा छसु बाहिरायतनेसु अत्तानं न पस्सति, उभयं अन्तरेन वज्जेत्वा फस्सादिसमुदायेसु धम्मेसु अत्तानं न पस्सति, एसोव पटिच्चसमुप्पादो ‘‘अविज्जानिरोधा’’तिआदिको दुक्खस्स अन्तो अवसानं करोतीति अत्थो.

निस्सितस्स ¶ चलितन्ति एत्थ ‘‘निस्सयो कतिविधो’’ति पुच्छितब्बत्ता ‘‘निस्सितस्स चलितन्ति निस्सयो नामा’’तिआदि वुत्तं. तत्थाति तेसु दुविधेसु तण्हानिस्सयदिट्ठिनिस्सयेसु ¶ या चेतना रत्तस्स पुग्गलस्स निद्धारिता, अयं चेतनाधम्मो तण्हानिस्सयो नाम. या चेतना मूळ्हस्स पुग्गलस्स निद्धारिता. अयं चेतनाधम्मो दिट्ठिनिस्सयो नाम. सा दुविधा चेतना पन सङ्खारा नाम. सङ्खारपच्चया विञ्ञाणं…पे… सब्बो पटिच्चसमुप्पादो निद्धारितो. अयं वुत्तप्पकारा ओतरणा पटिच्चसमुप्पादेहि ओतरणा नाम.

तत्थाति तस्मिं तण्हानिस्सयदिट्ठिनिस्सये या वेदना रत्तस्स पुग्गलस्स निद्धारिता, अयं सुखा वेदना. या चेतना सम्मूळ्हस्स पुग्गलस्स निद्धारिता, अयं अदुक्खमसुखा वेदना. येभुय्येन सेसा वुत्तनयानुसारेन वेदितब्बा.

४४. ‘‘निस्सितस्स चलित’’न्तिआदिपाठे ओतरणा आचरियेन विभत्ता, अम्हेहि च ञाता.

‘‘ये केचि सोका परिदेविता वा…पे…

पियं न कयिराथ कुहिञ्चि लोके’’ति. –

गाथापाठे ‘‘कतमे निद्धारेत्वा कतमेहि ओतरती’’ति पुच्छितब्बत्ता ‘‘ये केचि सोका’’तिआदि वुत्तं. ये केचि सोका वा या काचि परिदेविता वा अनेकरूपा या काचि दुक्खा वा लोकस्मिं सम्भवन्ति. एते सोकादयो पियं पटिच्च पभवन्ति, पिये असन्ते एते सोकादयो न भवन्ति. तस्मा पिये असन्ते सोकादीनं अभावतो येसं वीतसोकानं कुहिञ्चि लोकेपि नत्थि, ते वीतसोका सुखिनो भवन्ति. तस्मा वीतसोकानं सुखसम्पन्नत्ता असोकं विरजं पत्थयानो सप्पुरिसो कुहिञ्चि लोके पियं न कयिराथाति गाथात्थो.

‘‘ये केचि सोका परिदेविता वा, दुक्खा च लोकस्मिमनेकरूपा पियं पटिच्च पभवन्ति एते’’ति एत्थ पाठे या वेदना निद्धारिता, अयं दुक्खा वेदना. सेसा वुत्तनयानुसारेन वेदितब्बा.

‘‘ये केचि सोका’’तिआदिगाथापाठे ओतरणा आचरियेन विभत्ता, अम्हेहि च ञाता ¶ , ‘‘कामं कामयमानस्सा’’तिआदिगाथापाठे ‘‘कतमे ¶ निद्धारेत्वा कतमेहि ओतरती’’ति वत्तब्बत्ता ‘‘कामं कामयमानस्सा’’तिआदि वुत्तं. तस्सं गाथायं अत्थो हेट्ठा वुत्तोव.

तत्थाति तस्मिं ‘‘पीतिमनो होती’’ति पाठे या पीतिमनता वुत्ता निद्धारिता, अयं पीतिमनता अनुनयो होति. ‘‘सल्लविद्धोव रुप्पती’’ति पाठे यं रुप्पनं आह, इदं रुप्पनं पटिघं होति, अनुनयो च पटिघञ्च निद्धारिताति अत्थो.

‘‘अनुनये च पटिघे च निद्धारिते कतमो धम्मो निद्धारितो’’ति वत्तब्बत्ता ‘‘अनुनयो पटिघञ्च पन तण्हापक्खो’’ति वुत्तं. तण्हापक्खोति तण्हापक्खत्ता तण्हा निद्धारिता. ‘‘अनुनयो तण्हापक्खो होतु, पटिघं पन तण्हापक्खं न सिया’’ति चे वदेय्य? पटिघस्स अत्तसिनेहवसेन पवत्तनतो पटिघम्पि तण्हापक्खं होति. ‘‘तण्हाय निद्धारिताय कतमो निद्धारितो’’ति वत्तब्बत्ता ‘‘तण्हाय च पना’’तिआदि वुत्तं. दसन्नं रूपायतनानं तण्हाय पदट्ठानत्ता दस रूपानि आयतनानि निद्धारितानि. अयं वुत्तप्पकारा ओतरणा आयतनेहि ओतरणा नाम. सुत्ते आगता पटिच्चसमुप्पादादयो तेन संवण्णनाविसेसेन नयेन निद्धारिता, सुत्तत्थमुखेन वा निद्धारिता, तेन…पे… नयेन निद्धारितेसु पटिच्चसमुप्पादादीसु यो संवण्णनानयविसेसो तदत्थवाचकवसेन वा तदत्थञापकवसेन वा ओतरति पविसति समोसरति, सो संवण्णनानयविसेसो ओतरणो हारो नामाति अधिप्पायो दट्ठब्बो. सेसेसुपि वुत्तनयानुसारेन ओतरणा गहेतब्बा. ‘‘तेनाह आयस्मा’’तिआद्यानुसन्ध्यादिअत्थो चेव ‘‘नियुत्तो ओतरणो हारो’’ति अनुसन्ध्यादिअत्थो च वुत्तनयानुसारेन वेदितब्बो.

इति ओतरणहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

१३. सोधनहारविभङ्गविभावना

४५. येन ¶ ¶ येन संवण्णनाविसेसभूतेन ओतरणहारविभङ्गेन ओतरेतब्बा सुत्तत्था विभत्ता, सो संवण्णनाविसेसभूतो विभङ्गो परिपुण्णो, ‘‘कतमो सोधनहारविभङ्गो’’ति पुच्छितब्बत्ता ‘‘तत्थ कतमो सोधनो हारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु कतमो संवण्णनाविसेसो सोधनो हारो सोधनहारविभङ्गो नामाति पुच्छति. ‘‘विस्सज्जितम्हि पञ्हे’’तिआदिनिद्देसस्स इदानि मया वुच्चमानो ‘‘यथा आयस्मा अजितो’’तिआदिको वित्थारसंवण्णनाविसेसो सोधनहारविभङ्गो नामाति गहेतब्बो. ‘‘कथं तत्थ पञ्हे सोधनो हारो विञ्ञातब्बो’’ति वत्तब्बत्ता ‘‘यथा आयस्मा’’तिआदि वुत्तं. यथा येन पकारेन आयस्मा अजितो पारायने भगवन्तं पञ्हं पुच्छति, तथा तेन पकारेन विस्सज्जितम्हि पञ्हे अयं सोधनो हारो विञ्ञातब्बोति. ‘‘नियमेत्वा विभजेही’’ति वत्तब्बत्ता नियमेत्वा विभजितुं ‘‘केनस्सू’’तिआदि वुत्तं. गाथात्थो वुत्तोव.

‘‘केनस्सु निवुतो लोको, केनस्सु नप्पकासति;

किस्साभिलेपनं ब्रूसि, किंसु तस्स महब्भय’’न्ति. –

पुच्छावसेन पवत्तगाथायञ्च –

‘‘अविज्जाय निवुतो लोको, (अजिताति भगवा,)

विविच्छा पमादा नप्पकासति;

जप्पाभिलेपनं ब्रूमि, दुक्खमस्स महब्भय’’न्ति. –

विस्सज्जनवसेन पवत्तगाथायञ्चाति इमासु द्वीसु गाथासु ‘‘केनस्सु निवुतो लोको’’ति इमिना पदेन पञ्हे पुच्छिते ‘‘अविज्जाय निवुतो लोको’’ति इमिना पदेन भगवा ‘‘केनस्सु निवुतो लोको’’ति पदं तदत्थे अञ्ञाणसंसयादिमलानं अपनयनेन सोधेति. तदत्थे हि विस्सज्जिते अञ्ञाणसंसयादीनं अभावतो अत्थो सोधितो नाम, अत्थे च सोधिते पदम्पि सोधितंयेव. तेनाह अट्ठकथायं – ‘‘तदत्थस्स विस्सज्जनतो’’ति (नेत्ति. अट्ठ. ४५), टीकायञ्च ‘‘तब्बिसयअञ्ञाणसंसयादिमलापनयनेन सोधेती’’ति वुत्तं. नो च आरम्भन्ति पुच्छितुं आरभितब्बं ¶ सब्बगाथापदं, गाथात्थं वा, ञातुं इच्छितस्स सब्बस्स अत्थस्स विस्सज्जनवसेन अपरियोसितत्ता ¶ भगवा ‘‘अविज्जाय निवुतो लोको’’ति एत्तकेनेव पदेन सोधेति. सेसेसुपि एस नयो.

‘‘किंसु तस्स महब्भय’’न्ति इमिना पदेन पञ्हे पुच्छिते ‘‘दुक्खमस्स महब्भय’’न्ति पदेन भगवता आरम्भो ञातुं इच्छितो अत्थो सुद्धो सोधितो होति. सेसगाथासुपि एसेव नयो.

यत्थ पञ्हे एवं निरवसेसविस्सज्जनवसेन आरम्भो सुद्धो सोधितो भवति, सो पञ्हो विस्सज्जितो सोधितो भवति. यत्थ पञ्हे एवं निरवसेसविस्सज्जनवसेन आरम्भो याव असुद्धो असोधितो भवति, ताव सो पञ्हो विस्सज्जितो सोधितो न भवतीति योजना. ‘‘तेनाहा’’तिआद्यानुसन्ध्याद्यत्थो चेव ‘‘नियुत्तो सोधनो हारो’’ति अनुसन्ध्याद्यत्थो च वुत्तनयानुसारेन वेदितब्बो.

इति सोधनहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

१४. अधिट्ठानहारविभङ्गविभावना

४६. येन येन संवण्णनाविसेसभूतेन विभङ्गेन पञ्हादयो सोधिता, सो संवण्णनाविसेसभूतो परिपुण्णो, ‘‘कतमो अधिट्ठानहारविभङ्गो’’ति पुच्छितब्बत्ता ‘‘तत्थ कतमो अधिट्ठानो हारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु कतमो संवण्णनाविसेसो पटिनिद्देसतो अधिट्ठानो हारो अधिट्ठानहारविभङ्गो नामाति पुच्छति. ‘‘एकत्तताय धम्मा, येपि च वेमत्तताय निद्दिट्ठा’’तिआदिनिद्देसस्स इदानि मया वुच्चमानो ‘‘ये तत्थ निद्दिट्ठा, तथा ते धारयितब्बा’’तिआदिको वित्थारसंवण्णनाविसेसो अधिट्ठानहारविभङ्गो नामाति गहेतब्बो.

‘‘ये ¶ धम्मा सुत्तेसु एकत्तताय च वेमत्तताय च निद्दिट्ठा, ते धम्मा किं पन तथेव धारयितब्बा ¶ , उदाहु अञ्ञथापि विकप्पयितब्बा’’ति पुच्छितब्बत्ता ‘‘ये तत्था’’तिआदि वुत्तं. तत्थ तेसु सुत्तन्तेसु ये दुक्खसच्चादयो धम्मा एकत्तताय च वेमत्तताय च निद्दिट्ठा, ते दुक्खसच्चादयो धम्मा तथा एकत्तताय च वेमत्तताय च धारयितब्बा उपलक्खितब्बा, न अञ्ञथा विकप्पयितब्बा.

‘‘सामञ्ञकप्पनाय वोहारभावेन अनवट्ठानतो कतमा एकत्तता, कतमा वेमत्तता’’ति पुच्छितब्बत्ता ‘‘दुक्खन्ति एकत्तता’’तिआदि वुत्तं. दुक्खन्ति जातिआदिविसेसमनपेक्खित्वा या दुक्खसामञ्ञता वुत्ता, सा अयं दुक्खसामञ्ञता दुक्खस्स एकत्तता नाम. ‘‘तत्थ कतमं दुक्ख’’न्ति पुच्छिता ‘‘जाति दुक्खा, जरा दुक्खा…पे... विञ्ञाणं दुक्ख’’न्ति जातिआदिविसेसमपेक्खित्वा या दुक्खविसेसता वुत्ता, सा अयं दुक्खविसेसता दुक्खस्स वेमत्तता नाम. तत्थाति ये दुक्खादयो धम्मा सुत्ते वुत्ता, तत्थ तेसु दुक्खादीसु अत्थेसु.

दुक्खसमुदयोति ‘‘तण्हा पोनोभविका’’ति विसेसमनपेक्खित्वा या समुदयसामञ्ञता वुत्ता, सा अयं समुदयसामञ्ञता समुदयस्स एकत्तता नाम. ‘‘तत्थ कतमो समुदयो’’ति पुच्छित्वा ‘‘यायं तण्हा…पे… विभवतण्हा’’ति विसेसं अपेक्खित्वा या समुदयविसेसता वुत्ता, सा अयं समुदयविसेसता समुदयस्स वेमत्तता नाम.

दुक्खनिरोधोति ‘‘तस्सायेव तण्हाय असेसविरागनिरोधो’’ति विसेसमनपेक्खित्वा या निरोधसामञ्ञता वुत्ता, सा अयं निरोधसामञ्ञता निरोधस्स एकत्तता नाम. ‘‘तत्थ कतमो दुक्खनिरोधो’’ति पुच्छित्वा ‘‘यो तस्सायेव तण्हाय असेसविरागनिरोधो चागो पटिनिस्सग्गो मुत्ति अनालयो’’ति विसेसमपेक्खित्वा या निरोधविसेसता वुत्ता, सा अयं निरोधविसेसता निरोधस्स वेमत्तता नाम.

दुक्खनिरोधगामिनी पटिपदाति? पटिपदाति सम्मादिट्ठिआदिविसेसमनपेक्खित्वा या निरोधगामिनिपटिपदासामञ्ञता वुत्ता, सा अयं निरोधगामिनिपटिपदासामञ्ञता मग्गस्स एकत्तता नाम. ‘‘तत्थ कतमा दुक्खनिरोधगामिनी पटिपदा’’ति ¶ पुच्छित्वा ‘‘अयमेव अरियो…पे… सम्मासमाधी’’ति सम्मादिट्ठिआदिविसेसमपेक्खित्वा या विसेसदुक्खनिरोधगामिनिपटिपदता वुत्ता, सा अयं विसेसदुक्खनिरोधगामिनिपटिपदता मग्गस्स वेमत्तता नाम.

मग्गोति निरयगामिमग्गादिविसेसमनपेक्खित्वा या सामञ्ञमग्गता वुत्ता, सा अयं सामञ्ञमग्गता ¶ मग्गस्स एकत्तता नाम. ‘‘तत्थ कतमो मग्गो’’ति पुच्छित्वा ‘‘निरयगामी मग्गो…पे… निब्बानगामी मग्गो’’ति निरयगामिमग्गादिविसेसं अपेक्खित्वा या विसेसमग्गता वुत्ता, सा अयं विसेसमग्गता मग्गस्स वेमत्तता नाम.

निरोधोति पटिसङ्खानिरोधादिविसेसं अनपेक्खित्वा या सामञ्ञनिरोधता वुत्ता, सा अयं सामञ्ञनिरोधता निरोधस्स एकत्तता नाम. ‘‘तत्थ कतमो निरोधो’’ति पुच्छित्वा ‘‘पटिसङ्खानिरोधो…पे… सब्बकिलेसनिरोधो’’ति पटिसङ्खानिरोधादिविसेसं अपेक्खित्वा या विसेसनिरोधता वुत्ता, सा अयं विसेसनिरोधता निरोधस्स वेमत्तता नाम.

रूपन्ति चातुमहाभूतिकादिविसेसमनपेक्खित्वा या सामञ्ञरूपता वुत्ता, सा अयं सामञ्ञरूपता रूपस्स एकत्तता नाम. ‘‘तत्थ कतमं रूप’’न्ति पुच्छित्वा ‘‘चातुमहाभूतिकं…पे… वायोधातुया चित्तं विराजेती’’ति चातुमहाभूतिकादिविसेसमपेक्खित्वा या विसेसरूपता वुत्ता, सा अयं विसेसरूपता रूपस्स वेमत्तता नाम.

४८. अविज्जाति दुक्खेअञ्ञाणादिविसेसमनपेक्खित्वा या अविज्जासामञ्ञता वुत्ता, सा अयं अविज्जासामञ्ञता अविज्जाय एकत्तता नाम. ‘‘तत्थ कतमा अविज्जा’’ति पुच्छित्वा ‘‘दुक्खे अञ्ञाणं, दुक्खसमुदये अञ्ञाणं…पे… अविज्जालङ्घी मोहो अकुसलमूल’’न्ति दुक्खेअञ्ञाणादिविसेसमपेक्खित्वा या अविज्जाविसेसता वुत्ता, सा अयं अविज्जाविसेसता अविज्जाय वेमत्तता नाम.

विज्जाति दुक्खेञाणादिविसेसमनपेक्खित्वा या विज्जासामञ्ञता वुत्ता, सा अयं विज्जासामञ्ञता विज्जाय एकत्तता नाम. ‘‘तत्थ कतमा विज्जा’’ति पुच्छित्वा ‘‘दुक्खे ञाणं, दुक्खसमुदये ञाणं…पे… धम्मविचयसम्बोज्झङ्गो मग्गङ्गं मग्गपरियापन्न’’न्ति दुक्खेञाणादिविसेसमपेक्खित्वा या ¶ विज्जाविसेसता वुत्ता, सा अयं विज्जाविसेसता विज्जाय वेमत्तता नाम.

समापत्तीति सञ्ञासमापत्यादिविसेसं अनपेक्खित्वा या सामञ्ञसमापत्तिता वुत्ता, सा सामञ्ञसमापत्तिता समापत्तिया एकत्तता नाम. ‘‘तत्थ कतमा समापत्ती’’ति पुच्छित्वा ‘‘सञ्ञासमापत्ति असञ्ञासमापत्ति…पे… निरोधसमापत्ती’’ति सञ्ञासमापत्यादिविसेसं अपेक्खित्वा या विसेससमापत्तिता वुत्ता, सा अयं विसेससमापत्तिता समापत्तिया वेमत्तता नाम.

झायीति ¶ सेक्खझायीआदिविसेसं अनपेक्खित्वा या झायीसामञ्ञता वुत्ता, सा झायीसामञ्ञता झायिनो एकत्तता नाम. ‘‘तत्थ कतमो झायी’’ति पुच्छित्वा ‘‘अत्थि सेक्खो झायी, अत्थि असेक्खो झायी…पे… पञ्ञुत्तरो झायी’’ति सेक्खझायीअसेक्खझायीआदिविसेसमपेक्खित्वा या झायीविसेसता वुत्ता, सा अयं झायीविसेसता झायिनो वेमत्तता नाम.

समाधीति सरणसमाध्यादिविसेसमनपेक्खित्वा या समाधिसामञ्ञता वुत्ता, सा अयं समाधिसामञ्ञता समाधिनो एकत्तता नाम. ‘‘तत्थ कतमो समाधी’’ति पुच्छित्वा ‘‘सरणो समाधि, अरणो समाधि…पे… मिच्छासमाधि, सम्मासमाधी’’ति सरणसमाध्यादिविसेसमपेक्खित्वा या समाधिविसेसता वुत्ता, सा अयं समाधिविसेसता समाधिनो वेमत्तता नाम.

पटिपदाति आगाळ्हपटिपदादिविसेसमनपेक्खित्वा या पटिपदासामञ्ञता वुत्ता, अयं पटिपदासामञ्ञता पटिपदाय एकत्तता नाम. ‘‘तत्थ कतमा पटिपदा’’ति पुच्छित्वा ‘‘आगाळ्हपटिपदा, निज्झामपटिपदा…पे… सुखा पटिपदा खिप्पाभिञ्ञा’’ति आगाळ्हपटिपदादिविसेसमपेक्खित्वा या पटिपदाविसेसता वुत्ता, सा अयं पटिपदाविसेसता पटिपदाय वेमत्तता नाम.

कायोति नामकायादिविसेसमनपेक्खित्वा या कायसामञ्ञता वुत्ता, सा अयं कायसामञ्ञता कायस्स एकत्तता नाम. ‘‘तत्थ कतमो कायो’’ति पुच्छित्वा ‘‘नामकायो रूपकायो…पे… अयं नामकायो’’ति नामकायादिविसेसमपेक्खित्वा या कायविसेसता ¶ वुत्ता, सा अयं कायविसेसता कायस्स वेमत्तता नामाति योजना कातब्बा. पदत्थादिको विसेसो अट्ठकथायं (नेत्ति. अट्ठ. ४७) वित्थारतो वुत्तो.

वुत्तप्पकारस्स दुक्खसमुदयादिकस्स धम्मस्स एकत्ततादिलक्खणं निगमनवसेन दस्सेतुं ‘‘एवं यो धम्मो’’तिआदि वुत्तं. तत्थ एवन्ति इमिना मया वुत्तेन ‘‘दुक्खन्ति एकत्तता. तत्थ कतमं दुक्खं? जाति दुक्खा, जरा दुक्खा’’तिआदिवचनेन. यो धम्मोति यो कोचि जातिजराब्याध्यादिविसेसधम्मो. यस्स धम्मस्साति ततो जातिआदिविसेसधम्मतो अञ्ञस्स जरादिविसेसधम्मस्स. समानभावोति जातिआदिविसेसधम्मेन जरादिविसेसधम्मस्स दुक्खभावेन समानभावो. तस्स धम्मस्साति जरादिविसेसधम्मस्स. एकत्ततायाति दुक्खसमुदयतादिसमानताय ¶ दुक्खसमुदयादिभावानं एकीभावेन. एकीभवतीति जातिआदिविसेसभेदेन अनेकोपि ‘‘दुक्खसमुदयो’’तिआदिना एकसद्दाभिधेय्यताय एकीभवति. येन येन वा पन विलक्खणो, तेन तेन वेमत्तं गच्छति. यस्स जातिआदिधम्मस्स येन येन अभिनिब्बत्तनपरिपाचनादिसभावेन यो जातिआदिधम्मो जरादिधम्मेन विलक्खणो विसदिसो होति, तस्स जातिआदिधम्मस्स तेन तेन अभिनिब्बत्तनपरिपाचनादिसभावेन सो जातिआदिधम्मो जरादिधम्मेन वेमत्ततं विसदिसत्तं गच्छति, दुक्खसमुदयादिभावेन समानोपि जातिआदिधम्मो जरादिधम्मस्स विसिट्ठतं गच्छतीति अत्थो दट्ठब्बो.

दुक्खसमुदयादिधम्मस्स एकत्तवेमत्तता आचरियेन विभत्ता, अम्हेहि च ञाता, ‘‘ताय एकत्तवेमत्तताय कत्थ पुच्छिते सति अधिट्ठानं वीमंसितब्ब’’न्ति पुच्छितब्बत्ता सुत्तादिके पुच्छिते सति वीमंसितब्बन्ति दस्सेतुं ‘‘एवं सुत्ते वा’’तिआदि वुत्तं. तत्थ एवं इमिना वुत्तप्पकारेन सुत्ते वा पुच्छिते, वेय्याकरणे वा पुच्छिते, गाथायं वा पुच्छितायं सति अधिट्ठानं वीमंसितब्बं. ‘‘किं वीमंसितब्ब’’न्ति पुच्छेय्य ‘‘एकत्तताय पुच्छति किं, उदाहु वेमत्तताय पुच्छति कि’’न्ति वीमंसितब्बन्ति योजना. अट्ठकथायं पन – ‘‘इदानि ताव एकत्तवेमत्तताविसये नियोजेत्वा दस्सेतुं ‘सुत्ते वा वेय्याकरणे वा’तिआदि वुत्त’’न्ति (नेत्ति. अट्ठ. ४८) वुत्तं. ‘‘कथं पुच्छितं, कथं विस्सज्जितब्ब’’न्ति वत्तब्बत्ता ‘‘यदि एकत्तताया’’तिआदि ¶ वुत्तं. ‘‘तेनाहा’’तिआद्यानुसन्ध्यादिको च ‘‘नियुत्तो अधिट्ठानो हारो’’ति इमस्स अनुसन्ध्यादिको च वुत्तनयानुसारेन वेदितब्बो.

इति अधिट्ठानहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

१५. परिक्खारहारविभङ्गविभावना

४९. येन ¶ येन संवण्णनाविसेसभूतेन विभङ्गेन दुक्खसच्चादीनं एकत्ततादयो विभत्ता, सो संवण्णनाविसेसभूतो परिपुण्णो, ‘‘कतमो परिक्खारहारविभङ्गो नामा’’ति पुच्छितब्बत्ता ‘‘तत्थ कतमो परिक्खारो हारो’’तिआदि वुत्तं. तत्थ तत्थाति तेसु निद्दिट्ठेसु सोळससु देसनाहारादीसु कतमो संवण्णनाविसेसो परिक्खारो हारो परिक्खारहारविभङ्गो नामाति पुच्छति. ‘‘ये धम्मा यं धम्मं जनयन्ती’’तिआदिनिद्देसस्स इदानि मया वुच्चमानो ‘‘यो धम्मो यं धम्मं जनयति, तस्स सो परिक्खारो’’तिआदिको परिक्खारभूतस्स हेतुनो चेव पच्चयस्स च वित्थारसंवण्णनाविसेसो परिक्खारविभङ्गो नाम.

‘‘कतमो संवण्णेतब्बो परिक्खारो’’ति पुच्छितब्बत्ता ‘‘यो धम्मो’’तिआदि वुत्तं. तत्थ यो हेतुपच्चयप्पकारो धम्मो यं फलभूतं धम्मं जनयति जनेति, तस्स फलधम्मस्स सो हेतुपच्चयप्पकारो धम्मो परिक्खारो नाम. ‘‘किंलक्खणो परिक्खारो’’ति पुच्छितब्बत्ता तथा पुच्छित्वा लक्खणविसेसं दस्सेतुं ‘‘किंलक्खणो’’तिआदि वुत्तं. अट्ठकथायं पन – ‘‘तत्थ ‘यो धम्मो यं धम्मं जनयति, तस्स सो परिक्खारो’ति सङ्खेपतो परिक्खारलक्खणं वत्वा तं विभागेन दस्सेतुं ‘किंलक्खणो’तिआदि वुत्त’’न्ति (नेत्ति. अट्ठ. ४९) वुत्तं. ‘‘कित्तका धम्मा जनयन्ती’’ति पुच्छितब्बत्ता ‘‘द्वे धम्मा जनयन्ति हेतु च पच्चयो चा’’ति वुत्तं. ‘‘हेतुपि कारणं, पच्चयोपि कारणं ¶ , तस्मा कारणायेव केन लक्खणेन द्विधा वुत्ता’’ति वत्तब्बत्ता ‘‘तत्थ किंलक्खणो’’तिआदि वुत्तं. जनितब्बफलतो अञ्ञेहि फलेहि असाधारणलक्खणो हेतु, सब्बफलेहि साधारणलक्खणो पच्चयो, इमिना विसेसलक्खणेन द्विधा वत्तब्बाति अत्थो. ‘‘साधारणासाधारणविसेसो कीदिसो भवे’’ति पुच्छितब्बत्ता ‘‘यथा किं भवे’’ति पुच्छित्वा ‘‘यथा अङ्कुरस्सा’’तिआदि वुत्तं. यथा यो साधारणासाधारणविसेसो अत्थि, तथा सो साधारणासाधारणविसेसो किं विय भवेति अत्थो. अङ्कुरस्स निब्बत्तिया बीजं असाधारणं यथा, तथा हेतु फलस्स निब्बत्तिया असाधारणो भवे. पथवी च आपो च अङ्कुरस्स निब्बत्तिया साधारणा भवन्ति यथा, तथा पच्चयो फलस्स निब्बत्तिया साधारणो भवे. सब्बफलस्स पच्चयत्ता अङ्कुरस्स बीजं असाधारणं जनकं हेतु. ‘‘कथं पथवी, आपो च साधारणा जनकाति सद्दहितब्बा’’ति पुच्छितब्बत्ता ‘‘अङ्कुरस्स ही’’तिआदि वुत्तं. समं समानं फलं भवापेतीति सभावो, को सो? बीजं हेतुयेव. ‘‘किं हेतुपच्चयानं विसेसो बीजङ्कुरोपमायेव दस्सेतब्बो, उदाहु अञ्ञूपमायपि दस्सेतब्बो’’ति वत्तब्बत्ता अञ्ञाय उपमायपि ¶ विसेसं दस्सेतुं ‘‘यथा वा पना’’तिआदि वुत्तं. इमाय उपमायपि हेतुपच्चयानं विसेसो विजानितब्बोति अधिप्पायो.

बीजङ्कुरादीसु बाहिरेसु परिक्खारभूतानं हेतुपच्चयानं विसेसो आचरियेन विभत्तो, अम्हेहि च ञातो, ‘‘कथं अज्झत्तिकेसु विभत्तो’’ति पुच्छितब्बत्ता ‘‘अयञ्हि संसारो’’तिआदि वुत्तं. अथ वा ‘‘बाहिरेसु परिक्खारभूतो हेतुपच्चयो युत्तो होतु, कथं अज्झत्तिकेसु युत्तो’’ति वत्तब्बत्ता ‘‘अयञ्हि संसारो’’तिआदि वुत्तं. अट्ठकथायं पन – ‘‘एवं बाहिरं हेतुपच्चयविभागं दस्सेत्वा इदानि अज्झत्तिकं दस्सेतुं ‘अयञ्हि संसारो’तिआदि वुत्त’’न्ति (नेत्ति. अट्ठ. ४९) वुत्तं. हेतुपच्चयेहि सह संसारो भवतीति सहेतुपच्चयो. अयं संसारो हि यस्मा सहेतुपच्चयो हुत्वा निब्बत्तो, तस्मा अज्झत्तिकेपि परिक्खारभूतो हेतुपच्चयो युत्तोयेवाति दट्ठब्बोति अधिप्पायो.

सो ¶ इमस्स संसारस्स सहेतुपच्चयत्तं यदि भगवता वुत्तं, एवं सति अम्हेहि सद्दहितब्बं, ‘‘कथं सद्दहितब्ब’’न्ति वत्तब्बत्ता ‘‘एवञ्ही’’तिआदि वुत्तं. एवन्ति इमिना अविज्जादिना हेतुपच्चयेन सब्बो पटिच्चसमुप्पादो संसारोति निब्बत्तोति भगवता संसारस्स सहेतुपच्चयत्तं वुत्तं, तस्मा सद्दहितब्बं. अविज्जादयो सङ्खारादीनं पच्चयो होतु, ‘‘कतमो अविज्जाय हेतू’’ति पुच्छितब्बत्ता ‘‘इति अविज्जा अविज्जाय हेतू’’ति वुत्तं. ‘‘कतमो अविज्जाय पच्चयो’’ति पुच्छितब्बत्ता ‘‘अयोनिसो मनसिकारो पच्चयो’’ति वुत्तं. ‘‘कतमा अविज्जा कतमाय अविज्जाय हेतू’’ति पुच्छितब्बत्ता ‘‘पुरिमिका अविज्जा पच्छिमिकाय अविज्जाय हेतू’’ति वुत्तं. ‘‘कतमा पुरिमिका अविज्जा कतमा पच्छिमिका अविज्जा’’ति पुच्छितब्बत्ता ‘‘तत्था’’तिआदि वुत्तं. ‘‘अविज्जापरियुट्ठानस्स हेतुभूतो पुरिमो अविज्जानुसयो समनन्तरोव किं, उदाहु परम्परहेतुपि होती’’ति पुच्छितब्बत्ता ‘‘बीजङ्कुरो विया’’तिआदि वुत्तं. बीजङ्कुरोति बीजानं अङ्कुरोति बीजङ्कुरो, बीजानं समनन्तरहेतुताय अङ्कुरो निब्बत्तति विय. यत्थ रुक्खादिके यं फलं निब्बत्तति, तस्मिं रुक्खादिके निब्बत्तस्स अस्स फलस्स इदं बीजं पन परम्परहेतुताय हेतुभूतं भवति.

‘‘बीजं पन एकंयेव होति, कथं द्विधा वत्तब्ब’’न्ति वत्तब्बत्ता ‘‘दुविधो ही’’तिआदि वुत्तं, समनन्तरकालपरम्परकालभेदेन हेतुपि दुविधो होतियेवाति अत्थो. बीजभूतो हेतु दुविधो यथा, एवं अविज्जाय हेतुभूतो अविज्जानुसयोपि समनन्तरहेतु च परम्परहेतु चाति कालभेदेन दुविधो भवति, समनन्तरो अविज्जानुसयो समनन्तरस्स अविज्जापरियुट्ठानस्स समनन्तरहेतु ¶ होति. पुरिमतरो अविज्जानुसयो पच्छिमतरस्स अविज्जापरियुट्ठानस्स परम्परहेतु होति. इति बीजभूतो असाधारणो हेतु, पथवीआपादिको साधारणो पच्चयोति विसेसो पाकटो यथा, एवं अविज्जानुसयो असाधारणो हेतु, अयोनिसोमनसिकारो साधारणो पच्चयोति विसेसो दट्ठब्बो.

‘‘एत्तकेनेव हेतुपच्चयानं विसेसो वत्तब्बो’’ति वत्तब्बत्ता ‘‘यथा वा पन थालकञ्चा’’तिआदि वुत्तं. अट्ठकथायं पन – ‘‘यथा वा पनातिआदिनापि ¶ हेतुपच्चयविभागमेव दस्सेती’’ति वुत्तं. तत्थ पदीपस्स पच्चयभूतं थालकञ्च वट्टि च तेलञ्च पदीपस्स सभावहेतु समानहेतु न होतीति योजना. ‘‘पदीपस्स पच्चयभूतम्पि थालकादिकं सभावहेतु न होतीति कस्मा सद्दहितब्ब’’न्ति वत्तब्बत्ता ‘‘न हि सक्का’’तिआदि वुत्तं. पदीपस्स पच्चयभूतं अनग्गिकं अग्गिरहितं थालकञ्च वट्टिञ्च तेलञ्च दीपेतुं जालेतुं हि यस्मा न सक्का, तस्मा पुरिमो पदीपो पच्छिमस्स पदीपस्स सभावहेतु होति विय, एवं थालकादिकं सभावहेतु न होति. इति एवंपकारो सभावो समानो पदीपो हेतु होति यथा, परभावो असमानो थालकादिको पच्चयो होति यथा च, तथा अज्झत्तिको सभावो हेतु होति, बाहिरो असमानो पच्चयो होति. जनको अविज्जानुसयो अविज्जापरियुट्ठानस्स हेतु होति, परिग्गाहको उपत्थम्भको पच्चयो होति. अञ्ञेहि फलेहि असाधारणो हेतु होति, सब्बेहि फलेहि साधारणो पच्चयो होतीति योजेत्वा पदीपोपमायपि हेतुपच्चयानं पाकटो विसेसो दट्ठब्बोति अधिप्पायो.

हेतुपच्चयप्पभेदं कारणं परिक्खारोति आचरियेन वुत्तं, तस्स कारणस्स कारणभावो च फलापेक्खो होति, तस्मा ‘‘यो कारणभावो येनाकारेन होति, कतमो सो कारणभावो, कतमो सो आकारो’’ति पुच्छितब्बत्ता च ‘‘यं फलं येन विसेसेन होति, कतमं तं फलं, कतमो सो विसेसो’’ति पुच्छितब्बत्ता च ‘‘कारणफलानं यो सम्बन्धो होति, कतमो सो सम्बन्धो’’ति पुच्छितब्बत्ता च तं सब्बं विभावेतुं ‘‘अवुपच्छेदत्थो’’तिआदि वुत्तं. अयमनुसन्ध्यत्थो च अट्ठकथायं ‘‘इदानि यस्मा कारणं ‘परिक्खारो’ति वुत्तं, कारणभावो च फलापेक्खाय, तस्मा कारणस्स यो कारणभावो यथा च सो होति, यञ्च फलं, यो च तस्स विसेसो, यो च कारणफलानं सम्बन्धो, तं सब्बं विभावेतुं ‘अवुपच्छेदत्थो’तिआदि वुत्त’’न्ति (नेत्ति. अट्ठ. ४९) इमिना वुत्तोति दट्ठब्बो.

तत्थ अवुपच्छिन्नस्स हेतुपच्चयसङ्खातस्स कारणस्स यो अनुपच्छेदत्थो अत्थि, सो अनुपच्छेदत्थो ¶ सन्ततिअत्थो होति फलेन सम्बन्धत्ता ¶ , यञ्च कारणं अत्तनो फलस्स जनकं उपत्थम्भकं हुत्वा निरुज्झति, सो अनुपच्छिन्नो एव नाम होतीति. यञ्च फलं अञ्ञस्स कारणं हुत्वा निरुज्झति, तस्मिं अनुपच्छिन्ने तस्स च सन्ततिअत्थो होति. यं पन फलं अञ्ञस्स फलस्स कारणं अहुत्वा निरुज्झति, तं उपच्छिन्नं होति, यथा तं अरहतो चुतिचित्तन्ति. कारणतो निब्बत्तस्स फलस्स यो निब्बत्तिअत्थो अत्थि, सो निब्बत्तिअत्थो फलत्थो होति. पटिसन्धिक्खन्धानं यो पटिसन्धिअत्थो पटिसन्दहनत्थो अत्थि, सो पटिसन्धिअत्थो पुनब्भवत्थो पुनब्भवनत्थो होति. किलेसानं यो पलिबोधत्थो सन्ताने उप्पज्जनत्थो अत्थि, सो पलिबोधत्थो परियुट्ठानत्थो होति. किलेसानं मग्गेन यो असमुग्घातत्थो अत्थि, सो असमुग्घातत्थो अनुसयत्थो होति. अविज्जाय चतुन्नं सच्चानं यो असम्पटिवेधत्थो अत्थि, सो असम्पटिवेधत्थो अविज्जत्थो होति. अरहत्तमग्गेन यो अपरिञ्ञातत्थो अत्थि, सो अपरिञ्ञातत्थो विञ्ञाणस्स पटिसन्धिविञ्ञाणस्स बीजत्थो होति.

एत्तावता कारणभावो च कारणाकारो च फलञ्च फलविसेसो च आचरियेन विभत्तो, अम्हेहि च ञातो, ‘‘कतमो परम्परहेतुपच्चयत्थो, कतमो च सम्बन्धत्थो’’ति पुच्छितब्बत्ता ‘‘यत्थ अवुपच्छेदो’’तिआदि वुत्तं. यत्थ यस्सं रूपारूपपवत्तियं अवुपच्छिन्नस्स हेतुपच्चयप्पभेदस्स कारणस्स यो अवुपच्छेदो अत्थि, सो अवुपच्छेदो तत्थ तिस्सं रूपारूपपवत्तियं सन्तति होति. यत्थ यस्सं रूपारूपपवत्तियं या सन्तति अत्थि, सा सन्ततितत्थ रूपारूपपवत्तियं निब्बत्ति होतीतिआदिना योजेत्वा परम्परहेतुआदिको विञ्ञातब्बो.

सीलक्खन्धोति परिसुद्धसीलक्खन्धो. समाधिक्खन्धस्साति महग्गतक्खन्धस्स, समाधिपट्ठानो हि महग्गतधम्मो. पञ्ञाक्खन्धोति मग्गफलपञ्ञापधानक्खन्धो. सो हि विमुत्तिञाणदस्सनसङ्खातस्स पच्चवेक्खणञाणक्खन्धस्स पच्चयो होति. तित्थञ्ञुतादीनं अत्थो पदट्ठानहारविभङ्गवण्णनायं वुत्तोव.

सभावो हेतूति आचरियेन वुत्तो, ‘‘कीदिसो सो सभावो हेतू’’ति पुच्छितब्बत्ता ‘‘यथा वा पन चक्खुञ्च पटिच्चा’’तिआदि वुत्तं ¶ . चक्खुविञ्ञाणं चक्खुञ्च चक्खुन्द्रियञ्च पटिच्च निस्सयं कत्वा रूपे पटिच्च आरम्मणं कत्वा उप्पज्जति. तत्थ चक्खादीसु चक्खुन्द्रियं आधिपतेय्यपच्चयताय इन्द्रियपच्चयताय चक्खुविञ्ञाणस्स पच्चयो, रूपारम्मणं पुरेजातारम्मणपच्चयताय ¶ पच्चयो, आलोको सन्निस्सयताय उपनिस्सयताय पच्चयो होति. सो पच्चयो होन्तो फलेन चक्खुविञ्ञाणेन असमानत्ता सभावो हेतु न होति, पच्चयो च होति मनसिकारो. किरियमनोधातु पन फलेन चक्खुविञ्ञाणेन विञ्ञाणभावेन समानत्ता सभावो हेतु होति यथा, एवं सङ्खारा नामक्खन्धभावेन समानत्ता विञ्ञाणस्स पच्चया होन्ता सभावो हेतु होन्ति. विञ्ञाणं नामरूपेन एकसन्ततिवसेन समानत्ता नामरूपस्स पच्चयो होन्तं सभावो हेतु होति. इमिना नयेन ‘‘नामरूपं सळायतनस्सा’’तिआदीसुपि अत्थो वेदितब्बो. एवं वुत्तप्पकारो हेतु, पच्चयो जनको, उपत्थम्भको च यो कोचि उपनिस्सयो बलवपच्चयो होति, सब्बो सो हेतुपच्चयो जनकउपत्थम्भको जनितब्बुपत्थम्भियस्स फलस्स परिक्खरणतो अभिसङ्खरणतो निप्परियायतो परिक्खारो नाम.

‘‘वुत्तप्पकारो हेतुपच्चयो परिक्खारो नामाति केन अम्हेहि सद्दहितब्बो’’ति वत्तब्बत्ता ‘‘तेनाहा’’तिआदि वुत्तं. तेन कारणभूतेन सब्बस्स हेतुपच्चयस्स परिक्खारभावेन आयस्मा महाकच्चानो ‘‘ये धम्मा यं धम्मं जनयन्ती’’ति यं वचनं आह, तेन वचनेन सद्दहितब्बो, ‘‘ये धम्मा यं धम्मं जनयन्ती’’ति वचनं निस्साय तुम्हेहि सल्लक्खेतब्बोति अधिप्पायो.

‘‘एत्तकोव परिक्खारो हारो युञ्जितब्बो’’ति वत्तब्बत्ता ‘‘नियुत्तो परिक्खारो हारो’’ति वुत्तं, यो यो परिक्खारो हारो युञ्जितब्बो, सो सो परिक्खारो हारो नीहरित्वा युत्तो युञ्जितब्बोति.

इति परिक्खारहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

१६. समारोपनहारविभङ्गविभावना

५०. येन ¶ ¶ येन संवण्णनाविसेसभूतेन परिक्खारहारविभङ्गेन सुत्तत्थानं हेतुपच्चयो विभत्तो, सो…पे… विभङ्गो परिपुण्णो, ‘‘कतमो समारोपनहारविभङ्गो’’ति पुच्छितब्बत्ता ‘‘तत्थ कतमो समारोपनो हारो’’तिआदि वुत्तं. तत्थ तेसु निद्दिट्ठेसु सोळससु देसनाहारादीसु कतमो संवण्णनाविसेसो समारोपनो हारो समारोपनहारविभङ्गो नामाति पुच्छति. ‘‘ये धम्मा यंमूला’’तिआदिनिद्देसस्स इदानि मया वुच्चमानो ‘‘एकस्मिं पदट्ठाने यत्तकानि पदट्ठानानि ओतरन्ती’’तिआदिको वित्थारसंवण्णनाविसेसो समारोपनहारविभङ्गो नाम.

‘‘कित्तके पदट्ठाने सुत्ते वुत्ते कित्तकानि पदट्ठानानि समारोपयितब्बानी’’ति पुच्छितब्बत्ता ‘‘एकस्मिं पदट्ठाने’’तिआदि वुत्तं. एकस्मिं पदट्ठाने सुत्ते वुत्ते सति अवुत्तानि यत्तकानि पदट्ठानानि ओतरन्ति समोसरन्ति, सब्बानि तानि अवुत्तानि पदट्ठानानि सुत्ते वुत्तानि विय निद्धारणवसेन आनेत्वा देसनाय आरोपयितब्बानि. ‘‘कानि विय समारोपयितब्बानी’’ति वत्तब्बत्ता ‘‘यथा आवट्टे’’तिआदि वुत्तं. आवट्टे हारे एकस्मिं पदट्ठाने सुत्ते वुत्ते सति सुत्ते अवुत्तानि बहुकानि पदट्ठानानि ओतरन्ति, तानि बहुकानि पदट्ठानानि परियेसितब्बानि यथा, एवं समारोपने हारेपि बहुकानि पदट्ठानानि देसनाय समारोपयितब्बानीति अत्थो.

‘‘केवलं पन पदट्ठानवसेनेव समारोपना कातब्बा किं, उदाहु अञ्ञवसेनापि समारोपना कातब्बा कि’’न्ति वत्तब्बत्ता अञ्ञवसेनापि समारोपना कातब्बा; तस्मा समारोपना चतुब्बिधा कातब्बाति दस्सेन्तो ‘‘तत्थ समारोपना चतुब्बिधा’’तिआदिमाह. तत्थ तत्थाति तासु समारोपयितब्बसमारोपनासु पदट्ठानं पदट्ठानसमारोपना, वेवचनं वेवचनसमारोपना, भावना भावनासमारोपना, पहानं पहानसमारोपना, इति इमिना पभेदेन समारोपना चतुब्बिधा कातब्बा.

‘‘तासु चतुब्बिधासु समारोपनासु कतमा पदट्ठानसमारोपना’’ति पुच्छितब्बत्ता तथा पुच्छित्वा पदट्ठानसमारोपनं दस्सेतुं ‘‘तत्थ ¶ कतमा’’तिआदि वुत्तं. सुत्ते वुत्तेन पदट्ठानेन सुत्ते अवुत्तानं पदट्ठानानं समारोपना कतमाति पुच्छति.

सब्बपापस्स ¶ अकुसलस्स यं अकरणं अकरणहेतु सासनं अत्थि, एतं सासनं बुद्धानं सासनं ओवादो होति, अथ वा अकरणं अकरणत्थाय यं सासनं अत्थि, एतं बुद्धानं सासनं ओवादो होति, न यस्स कस्सचि सासनन्ति अत्थो. अकरणन्ति हि सम्पदानत्थे पवत्तं पच्चत्तवचनं यथा ‘‘किस्स अत्थाय किमत्थ’’न्ति. कुसलस्स सम्पदा सम्पदाय यं सासनं अत्थि, एतं बुद्धानं सासनं. सचित्तपरियोदापनं सचित्तपरियोदापनत्थं यं सासनं अत्थि, एतं बुद्धानं सासनं होति.

इति एवंपकारेन वुत्तस्स तस्स सासनस्स किं पदट्ठानन्ति विसेसस्स विसेसपदट्ठानं पुन पुच्छति. इदं सुचरितत्तयं सासनस्स ओवादस्स पदट्ठानं सुचरितत्तयेन हेतुना सासनत्ताति दट्ठब्बं यथा ‘‘अन्नेन वसती’’तिआदि. ‘‘सुचरितत्तये पदट्ठाने वुत्ते कतमं पदट्ठानं समारोपयितब्ब’’न्ति पुच्छितब्बत्ता ‘‘तत्थ यं कायिकञ्चा’’तिआदि वुत्तं. इदं खन्धत्तयं सासनस्स पदट्ठानं समारोपयितब्बं, ‘‘खन्धत्तये पदट्ठाने समारोपयिते कतमं समारोपयितब्ब’’न्ति पुच्छितब्बत्ता ‘‘तत्थ सीलक्खन्धो चा’’तिआदि वुत्तं. इदं समथविपस्सनाद्वयं सासनस्स पदट्ठानं समारोपयितब्बं. ‘‘समथविपस्सनाद्वये पदट्ठाने समारोपयिते कतमं पदट्ठानं समारोपयितब्ब’’न्ति पुच्छितब्बत्ता ‘‘तत्थ समथस्स फल’’न्तिआदि वुत्तं. इदं फलद्वयं सासनस्स पदट्ठानं समारोपयितब्बं.

सासनस्स पदट्ठानानि समारोपयितब्बानीति आचरियेन निद्धारेत्वा विभत्तानि, अम्हेहि च ञातानि, ‘‘इदानि कतमस्स कतमं पदट्ठानं समारोपयितब्ब’’न्ति पुच्छितब्बत्ता ‘‘वनं वनथस्सा’’तिआदि वुत्तं. इदं कामगुणपञ्चकं वनं तण्हाभूतस्स वनथस्स पदट्ठानं तण्हावत्थुभावतो, ‘‘इत्थी’’ति वा ‘‘पुरिसो’’ति वा निमित्तग्गाहसङ्खातं इदं वनं ‘‘अहो चक्खु, अहो सोतं, अहो घानं, अहो जिव्हा, अहो कायो’’ति तेसं तेसं अङ्गपच्चङ्गानं अनुब्यञ्जनग्गाहसङ्खातस्स वनथस्स पदट्ठानं समारोपयितब्बं. अपरिञ्ञातं द्वादसायतनसङ्खातं इदं वनं संयोजनसङ्खातस्स वनथस्स पदट्ठानं समारोपयितब्बं, आयतनं पटिच्च संयोजनुप्पज्जनतो ¶ अनुसयसङ्खातं इदं वनं परियुट्ठानसङ्खातस्स वनथस्स पदट्ठानं समारोपयितब्बं. ‘‘पञ्चकामगुणादीनं वनभावो च तण्हादीनं वनथभावो च केन अम्हेहि सद्दहितब्बो’’ति वत्तब्बत्ता ‘‘तेनाह भगवा’’तिआदि वुत्तं. तेन पञ्चकामगुणादीनं वनभावेन च तण्हादीनं वनथभावेन च भगवा ‘‘छेत्वा वनञ्च वनथञ्चा’’ति यं वचनं आह, तेन भगवतो वचनेन वचनानुसारेन सद्दहितब्बोति. अयन्ति अयं ‘‘एकस्मिं पदट्ठाने’’तिआदिसंवण्णना. पदट्ठानेनाति एकेकेन पदट्ठानेन. समारोपनाति तदञ्ञपदट्ठानानं समारोपना ¶ . समारोपेन्ति समारोपयितब्बानि एताय संवण्णनायाति समारोपनाति विग्गहोति. (१)

५१. पदट्ठानेन समारोपना आचरियेन निद्दिट्ठा, अम्हेहि च ञाता, ‘‘कतमा वेवचनेन समारोपना’’ति पुच्छितब्बत्ता ‘‘तत्थ कतमा वेवचनेना’’तिआदि वुत्तं. तत्थाति तासु चतूसु पदट्ठानसमारोपनादीसु समारोपनासु वेवचनेन एकेकेन रोतदञ्ञवेवचनानं समारोपना कतमाति पुच्छति. ‘‘रागविरागा’’ति च ‘‘चेतोविमुत्ती’’ति च ‘‘सेक्खफल’’न्ति च इदं वचनत्तयं अनागामिफलत्थत्ता अनागामिफलस्स वेवचनं. ‘‘अविज्जाविरागा’’ति च ‘‘पञ्ञाविमुत्ती’’ति च ‘‘असेक्खफल’’न्ति च इदं वचनत्तयं अरहत्तफलत्थत्ता अरहत्तफलस्स वेवचनं. इमिना नयेन सेसेसु योजना कातब्बा. (२)

वेवचनेन समारोपना आचरियेन निद्दिट्ठा, अम्हेहि च ञाता, ‘‘कतमा भावनाय समारोपना’’ति पुच्छितब्बत्ता ‘‘तत्थ कतमा भावनाया’’तिआदि वुत्तं. तत्थाति तासु चतूसु पदट्ठानसमारोपनादीसु कतमाय देसिताय भावनाय कतमेसानं अदेसितानं भावनारोपना कतमाति पुच्छति. यथा येन पकारेन यं भावनं भगवा ‘‘तस्मातिह, त्वं भिक्खु, काये कायानुपस्सी विहरति, आतापी सम्पजानो सतिमा विनेय्य लोके अभिज्झादोमनस्स’’न्ति (सं. नि. ५.३६९, ३७१, ३९५, ४१५) आह, तथा तेन पकारेन ताय भावनाय तदञ्ञभावनापि समारोपयितब्बाति अत्थो.

‘‘तस्मातिहा’’तिआदिपाठे ¶ ‘‘किं भावनं भगवा आहा’’ति पुच्छितब्बत्ता ‘‘आतापी’’तिआदि वुत्तं. ‘‘आतापी’’ति वचनेन वीरियिन्द्रियं भगवा आह. ‘‘सम्पजानो’’ति वचनेन पञ्ञिन्द्रियं भगवा आह. ‘‘सतिमा’’ति वचनेन सतिन्द्रियं आह. ‘‘विनेय्य लोके अभिज्झादोमनस्स’’न्ति वचनेन समाधिन्द्रियं आह. ‘‘एवं वुत्ते कतमा भावना समारोपयितब्बा’’ति पुच्छितब्बत्ता ‘‘एवं काये कायानुपस्सिनो विहरतो चत्तारो सतिपट्ठाना भावनापारिपूरिं गच्छन्ती’’ति वुत्तं. एवं वुत्ताय वीरियिन्द्रियादिभावनाय चत्तारो सतिपट्ठाना समारोपयितब्बाति अत्थो. केन कारणेन भावनापारिपूरिं गच्छन्तीति पुच्छति. चतुन्नं इन्द्रियानं इन्द्रियभावेन, भावेतब्बभावेन वा एकलक्खणत्ता भावनापारिपूरिं गच्छन्तीति विस्सज्जेति. ‘‘तेसु समारोपितेसु कतमे समारोपयितब्बा’’ति पुच्छितब्बत्ता ‘‘चतूसू’’तिआदि वुत्तं. चतूसु सतिपट्ठानेसु भावियमानेसु समारोपयितब्बेसु चत्तारो सम्मप्पधाना भावनापारिपूरिं गच्छन्तीति समारोपयितब्बाति अत्थो. सेसेसुपि एवमेव समारोपयितब्बा.

भावनाय ¶ समारोपना आचरियेन विभत्ता, अम्हेहि च ञाता, ‘‘कतमा पहानेन समारोपना’’ति पुच्छितब्बत्ता ‘‘तत्थ कतमा’’तिआदि वुत्तं. तत्थाति तासु चतूसु पदट्ठानसमारोपनादीसु कतमेन देसितेन पहानेन कतमेसं अदेसितानं पहानानं कतमा समारोपनाति पुच्छति. ‘‘काये कायानुपस्सी विहरन्तो असुभे ‘सुभ’न्ति विपल्लासं पजहती’’ति देसितेन ‘‘सुभ’’न्ति विपल्लासप्पहानेन कबळीकाराहारपरिञ्ञाय परिबन्धकिलेसकामुपादानप्पहानादयोपि समारोपयितब्बा.

‘‘वेदनासु वेदनानुपस्सी विहरन्तो दुक्खे ‘सुख’न्ति विपल्लासं पजहती’’ति देसितेन ‘‘सुख’’न्ति विपल्लासप्पहानेन फस्साहारपरिञ्ञाय परिबन्धकिलेसभवुपादानप्पहानादयोपि समारोपयितब्बा.

‘‘चित्ते चित्तानुपस्सी विहरन्तो अनिच्चे ‘निच्च’न्ति विपल्लासं पजहती’’ति देसितेन ‘‘निच्च’’न्ति विपल्लासप्पहानेन विञ्ञाणाहारपरिञ्ञाय परिबन्धकिलेसदिट्ठुपादानप्पहानादयोपि समारोपयितब्बा.

‘‘धम्मेसु ¶ धम्मानुपस्सी विहरन्तो अनत्तनि ‘अत्ता’ति विपल्लासं पजहती’’ति देसितेन ‘‘अत्ता’’ति विपल्लासप्पहानेन मनोसञ्चेतनाहारपरिञ्ञाय? मनोसञ्चेतनाहारपरिञ्ञाय परिबन्धकिलेसअत्तवादुपादानप्पहानादयोपि समारोपयितब्बाति अधिप्पायो. (४)

पहानहारो पन लक्खणहारविभङ्गवण्णनायं वुत्तोयेवाति इध न वदाम.

‘‘सुत्ते देसितेन एकेकेन पदट्ठानादिकेन अदेसितानं पदट्ठानादीनं समारोपनभावो केन अम्हेहि विजानितब्बो सद्दहितब्बो’’ति वत्तब्बत्ता ‘‘तेनाह आयस्मा’’तिआदिमाह. तेन तथा समारोपनभावेन आयस्मा महाकच्चानो –

‘‘ये धम्मा यंमूला, ये चेकत्था पकासिता मुनिना;

ते समारोपयितब्बा, एस समारोपनो हारो’’ति –

यं वचनं आह, तेन वचनेन वचनानुसारेन तथा समारोपनभावो तुम्हेहि विजानितब्बो सद्दहितब्बोति वुत्तं होति.

‘‘किं ¶ पन एत्तावता समारोपनो हारो परिपुण्णो, अञ्ञो नियुत्तो नत्थी’’ति वत्तब्बत्ता ‘‘नियुत्तो समारोपनो हारो’’ति वुत्तं. सुत्ते देसितेन नयेन पदट्ठानादिकेन अदेसितानि पदट्ठानानि समारोपयितब्बानि भवन्ति, तेन तेन पदट्ठानादिकेन अदेसितानं पदट्ठानादीनं समारोपनो हारो नियुत्तो निद्धारेत्वा युञ्जितब्बोति अत्थो दट्ठब्बो.

इति समारोपनहारविभङ्गे सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बो.

इमे यथावुत्ता सोळस संवण्णनाविसेसा संवण्णेतब्बत्थेसु अञ्ञाणसंसयानं हरणतो अपनयनतो हारा नामाति.

निट्ठिता हारविभङ्गवारविभावना.

१. देसनाहारसम्पातविभावना

५२. येन ¶ येन संवण्णनाविसेसभूतेन देसनाहारविभङ्गादिहारविभङ्गेन अस्सादादयो नानासुत्तत्था विभत्ता, सो संवण्णनाविसेसभूतो देसनाहारविभङ्गादिहारविभङ्गो परिपुण्णो.

‘‘सोळस हारा पठमं, दिसालोचनतो दिसा विलोकेत्वा;

सङ्खिपिय अङ्कुसेन हि, नयेहि तीहि निद्दिसे सुत्त’’न्ति. (नेत्ति. ४ नयसङ्खेप) –

गाथा निद्देसवारे आचरियेन वुत्ता, तस्सा गाथाय निद्देसो हारविभङ्गवारस्स आदिम्हि न विभत्तो, ‘‘कुहिञ्चि विभत्तो, हारसम्पाते वा विभत्तो किं, उदाहु नयसमुट्ठानहारे वा विभत्तो ¶ कि’’न्ति पुच्छितब्बत्ता ‘‘हारसम्पाते विभत्तो’’ति तुम्हेहि दट्ठब्बोति विञ्ञापनत्थं ‘‘सोळस हारा पठम’’न्तिआदि वुत्तं.

अथ वा सुपरिकम्मकतभूमिसदिसेसु संवण्णेतब्बेसु नानासुत्तप्पदेसेसु नानावण्णसुगन्धपुप्फसदिसे सोळस हारे संवण्णनाभावेन योजेत्वा सोळस हारा आचरियेन विभत्ता, तथा सुसिक्खितसिप्पाचरियसुविचारितजम्बुनदाभरणसदिसेसु संवण्णेतब्बेसु नानासुत्तप्पदेसेसु नानाविधरंसिजालविविधमणिरतनसदिसे सोळस हारे संवण्णनाभावेन योजेत्वाव सोळस हारा विभत्ता, महापथविं परिवत्तेत्वा पप्पटकोजस्स खादापनं अतिदुक्करं विय, नानाविधेसु संवण्णेतब्बेसु सुत्तप्पदेसेसु परमत्थोजाय सोळसहि हारेहि अतिदुक्करखादापनसदिसं विञ्ञापनं करोन्तेन च योजनिकमधुगण्डं पीळेत्वा सुमधुरसस्स पायापनं अतिदुक्करं विय नानाविधेसु संवण्णेतब्बेसु सुत्तप्पदेसेसु परमत्थमधुरसस्स सोळसहि हारेहि अतिदुक्करं पायापनसदिसं विञ्ञापनं करोन्तेन च आचरियेन अनेकेसु संवण्णेतब्बसुत्तप्पदेसेसु सोळस हारे संवण्णनाभावेन योजेत्वा सोळस हारा विभत्ता, अम्हेहि च ञाता, ‘‘नानाविधसुत्तप्पदेसेसु ते संवण्णनाभावेन योजेत्वा सोळस हारा विभत्ता किं ¶ , उदाहु एकस्मिम्पि संवण्णेतब्बसुत्तप्पदेसे संवण्णनाभावेन योजेत्वा सोळस हारा विभत्ता कि’’न्ति वत्तब्बत्ता एकस्मिम्पि संवण्णेतब्बसुत्तप्पदेसे संवण्णनाभावेन योजेत्वा सोळस हारा विभत्तायेवाति तथा विभजन्तो ‘‘सोळस हारा पठम’’न्तिआदिकं हारसम्पातवारं आह.

ननु हारसम्पातवारं कथेतुकामेन आचरियेन ‘‘तत्थ कतमो देसनाहारसम्पातो’’तिआदिवचनं वत्तब्बं, अथ कस्मा ‘‘सोळस हारा पठम’’न्तिआदि वत्तब्बन्ति चे? निद्देसे वुत्तं ‘‘सोळस हारा पठम’’न्तिआदिकं गाथं हारविभङ्गवारो नप्पयोजेति विप्पकिण्णविसयत्ता च नयविचारस्स च अन्तरितत्ता. हारसम्पातवारो पन तं गाथं पयोजेति अविकिण्णविसयत्ता. तस्मा तं गाथं पच्चामसित्वा हारसम्पातवारे तस्सा गाथाय निद्देसो दट्ठब्बोति विञ्ञापनत्थं ‘‘सोळस हारा पठम’’न्तिआदि वत्तब्बंयेवाति. अट्ठकथायं पन –

एवं सुपरिकम्मकताय भूमिया नानावण्णानि मुत्तपुप्फानि पकिरन्तो विय, सुसिक्खितसिप्पाचरियविचारितेसु सुरत्तसुवण्णालङ्कारेसु नानाविधरंसिजालसमुज्जलानि विविधानि मणिरतनानि बन्धन्तो विय, महापथविं परिवत्तेत्वा पप्पटकोजं खादापेन्तो विय ¶ , योजनिकमधुगण्डं पीळेत्वा सुमधुरसं पायेन्तो विय च आयस्मा महाकच्चानो नानासुत्तप्पदेसे उदाहरन्तो सोळस हारे विभजित्वा इदानि ते एकस्मिंयेव सुत्ते योजेत्वा दस्सेन्तो हारसम्पातवारं आरभि. आरभन्तो च यायं निद्देसवारे –

‘‘सोळस हारा पठमं, दिसालोचनतो दिसा विलोकेत्वा;

सङ्खिपिय अङ्कुसेन हि, नयेहि तीहि निद्दिसे सुत्त’’न्ति. –

गाथा वुत्ता. यस्मा तं हारविभङ्गवारो नप्पयोजेति विप्पकिण्णविसयत्ता, नयविचारस्स च अन्तरितत्ता. अनेकेहि सुत्तप्पदेसेहि हारानं विभागदस्सनमेव हि हारविभङ्गवारो. हारसम्पातवारो पन तं पयोजेति एकस्मिंयेव सुत्तप्पदेसे ¶ सोळस हारे योजेत्वाव तदनन्तरं नयसमुट्ठानस्स कथितत्ता. तस्मा ‘‘सोळस हारा पठम’’न्ति गाथं पच्चामसित्वा ‘‘तस्सा निद्देसो कुहिं दट्ठब्बो? हारसम्पातेति आहा’’ति –

वुत्तं. गाथात्थो निद्देसविभावनायं वुत्तोव. ‘‘सोळस…पे… सुत्त’’न्ति या गाथा निद्देसे आचरियेन वुत्ता, तस्सा गाथाय निद्देसो कुहिं दट्ठब्बो, हारविभङ्गस्स आदिम्हि आचरियेन न विभत्तो, हारसम्पाते वा पच्चामसित्वा विभत्तोति दट्ठब्बो किं, उदाहु नयसमुट्ठाने वा पच्चामसित्वा विभत्तोति दट्ठब्बो किन्ति पुच्छति. हारसम्पाते पच्चामसित्वा विभत्तोति दट्ठब्बोति विस्सज्जना.

हारसम्पाते तस्सा गाथाय निद्देसो दट्ठब्बोति आचरियेन वुत्तो, सो हारसम्पातो देसनाहारसम्पातभेदेन सोळसविधो, ‘‘तत्थ कतमो हारसम्पातो देसनाहारसम्पातो’’ति पुच्छितब्बत्ता इमस्मिं सुत्ते संवण्णेतब्बे संवण्णनाभावेन मया विभजियमानो हारसम्पातभूतो संवण्णनाविसेसो देसनाहारसम्पातो नामाति तथा विभजितुं ‘‘तत्थ कतमो देसनाहारसम्पातो’’तिआदि वुत्तं. तत्थाति तस्मिं सोळसविधे देसनाहारसम्पातादिके हारसम्पाते. कतमो हारसम्पातभूतो संवण्णनाविसेसो देसनाहारसम्पातो नामाति पुच्छति.

‘‘अरक्खितेन चित्तेन, मिच्छादिट्ठिहतेन च;

थिनमिद्धाभिभूतेन, वसं मारस्स गच्छती’’ति. –

सुत्ते ‘‘अरक्खितेन चित्तेनाति किंदेसयती’’ति पुच्छित्वा ‘‘पमादं देसयती’’तिआदिसंवण्णनाविसेसो ¶ देसनाहारसम्पातो नामाति वुत्तं होति. गाथात्थो अट्ठकथायं (नेत्ति. अट्ठ. ५२) विभत्तो. योजनत्थो पन अरक्खितेन चित्तेन अरक्खितचित्तसमङ्गी पुग्गलो मारस्स मच्चुनो वसं गच्छति. मिच्छादिट्ठिहतेन विपल्लासेन विपल्लाससमङ्गी पुग्गलो मारस्स वसं गच्छति. थिनमिद्धाभिभूतेन ससङ्खारिकचित्तेन कुसीतचित्तेन तंचित्तसमङ्गी पुग्गलो मारस्स किलेसादिमारस्स वसं गच्छतीति.

‘‘अरक्खितेन ¶ चित्तेना’ति पदेन देसितं तं पमादधम्मजातं कस्स पद’’न्ति वत्तब्बत्ता ‘‘तं मच्चुनो पद’’न्ति वुत्तं. ‘‘अरक्खितेन चित्तेना’’ति इमिना सुत्तप्पदेसेन देसितो अत्थो आचरियेन विभत्तो, अम्हेहि च ञातो, ‘‘मिच्छादिट्ठिहतेन चाति सुत्तप्पदेसेन देसितो अत्थो कथं विभत्तो’’ति वत्तब्बत्ता ‘‘मिच्छादिट्ठिहतेन चा’’तिआदि वुत्तं. येन विपल्लासेन यदा अनिच्चे ‘‘निच्च’’न्ति पस्सति, तदा पवत्तो सो विपल्लासो ‘‘मिच्छादिट्ठिहतं नामा’’ति वुच्चति. ‘‘सो पन विपल्लासो किंलक्खणो’’ति पुच्छितब्बत्ता तथा पुच्छित्वा ‘‘विपरीतग्गाहलक्खणो विपल्लासो’’ति वुत्तं.

विपरीतग्गाहलक्खणोति असुभादीनंयेव सुभादिविपरीतग्गाहलक्खणो विपल्लासो ‘‘विपल्लासयती’’ति कारितत्थसम्भवतो. किं विपल्लासो विपरीतग्गाहलक्खणो? सो विपल्लासो सञ्ञं विपल्लासयति, चित्तम्पि विपल्लासयति, दिट्ठिम्पि विपल्लासयति. इति तयो धम्मे विपल्लासयतीति विपल्लासेतब्बानं तिविधत्ता विपल्लासापि तिविधा होन्ति. तेसु सञ्ञाविपल्लासो मुदुको दुब्बलो सुभादिवसेन उपट्ठिताकारग्गहणमत्तत्ता, चित्तविपल्लासो सञ्ञाविपल्लासतो बलवा सुभादिवसेन उपट्ठहन्तानं रूपक्खन्धादीनं सुभादिवसेन सन्निट्ठानं कत्वा गहणतो. दिट्ठिविपल्लासो सञ्ञाविपल्लासचित्तविपल्लासेहि बलवतरो, यं यं आरम्मणं सुभादिआकारेन उपट्ठाति. तं तं आरम्मणं सस्सतादिवसेन अभिनिविसित्वा गहणतो. तस्मा सञ्ञाविपल्लासो पठमं वुत्तो, तदनन्तरं चित्तविपल्लासो, तदनन्तरं दिट्ठिविपल्लासो वुत्तो. वित्थारतो पन एकेकस्स सुभसुखअत्तनिच्चग्गहणवसेन चतुब्बिधत्ता द्वादसविधा होन्ति.

विपल्लासा आचरियेन विभत्ता, अम्हेहि च ञाता, ‘‘कतमे विपल्लासपवत्तिट्ठानविसया’’ति पुच्छितब्बत्ता इमानि अत्तभाववत्थूनि विपल्लासपवत्तिट्ठानविसयानीति दस्सेतुं ‘‘सो कुहिं विपल्लासयति चतूसु अत्तभाववत्थूसू’’ति वुत्तं. चतूसु रूपकायवेदनाचित्तधम्मसङ्खातेसु अत्तभाववत्थूसु सो सब्बो विपल्लासो सञ्ञाचित्तदिट्ठियो विपल्लासयति. ‘‘कथं समनुपस्सन्तस्स विपल्लासयती’’ति पुच्छितब्बत्ता ‘‘रूपं अत्ततो समनुपस्सती’’तिआदि ¶ वुत्तं. यो पुग्गलो रूपं वा अत्ततो समनुपस्सति, रूपवन्तं अत्तानं वा अत्ततो समनुपस्सति ¶ , अत्तनि रूपं वा अत्ततो समनुपस्सति. रूपस्मिं अत्तानं वा अत्ततो समनुपस्सति, एवं तस्स समनुपस्सन्तस्स पुग्गलस्स विपल्लासो रूपकाये सञ्ञाचित्तदिट्ठियो विपल्लासयति. एसेव नयो वेदनादीसुपि.

‘‘तेसु रूपकायादीसु कतमं कतमस्स विपल्लासस्स वत्थू’’ति पुच्छितब्बत्ता एवं पवत्तमानस्स विपल्लासस्स इदं इमस्स वत्थूति विभजितुं ‘‘तत्थ रूप’’न्तिआदि वुत्तं. तत्थाति तेसु रूपादीसु चतूसु पठमं विपल्लासवत्थु रूपं ‘‘असुभे सुभ’’न्ति एवं पवत्तमानस्स विपल्लासस्स वत्थु होतीति विभजित्वा गहेतब्बं. एस नयो सेसेसुपि. एवं ‘‘असुभे सुभ’’न्तिआदिप्पकारेन विपल्लासा चतुब्बिधा भवन्ति.

इदं इमस्स वत्थूति आचरियेन विभजित्वा दस्सिता, अम्हेहि च ञाता, ‘‘तेसं विपल्लासानं कतमे मूलकारणधम्मा’’ति पुच्छितब्बत्ता ‘‘द्वे धम्मा’’तिआदि वुत्तं. चित्तस्स संकिलेसा, तण्हा च अविज्जा च – इमे द्वे धम्मा विपल्लासानं मूलकारणभूता भवन्ति.

‘‘इमे द्वे धम्मा एकतो विपल्लासानं मूलकारणं किं होन्ति, उदाहु विसुं विसु’’न्ति वत्तब्बत्ता विसुं विसुं विभजितुं ‘‘तण्हानिवुत’’न्तिआदि वुत्तं. अविज्जारहिता तण्हा नाम नत्थि, तस्मा ‘‘तण्हाअविज्जानिवुत’’न्ति वत्तब्बन्ति? न, तण्हाय सातिसयपच्चयत्ता. सातिसयाय हि तण्हाय असुभेपि ‘‘सुभ’’न्ति, दुक्खेपि ‘‘सुख’’न्ति समनुपस्सन्ति. ‘‘तण्हा च अविज्जा चा’’ति वुत्तत्ता ‘‘अविज्जानिवुत’’न्ति वत्तब्बं, कस्मा ‘‘दिट्ठिनिवुत’’न्ति वुत्तन्ति? अविज्जाय दिट्ठि भवतीति दिट्ठिसीसेन अविज्जं गहेत्वा ‘‘दिट्ठिनिवुत’’न्ति वुत्तं, अविज्जानिवुतन्ति अत्थो गहेतब्बो. ‘‘अविज्जानिवुत’’न्ति वुत्ते पन दिट्ठिरहिता अविज्जापि गहिता सिया, दिट्ठिसहिताय हि अविज्जाय अनिच्चेपि ‘‘निच्च’’न्ति, अनत्तनियेपि ‘‘अत्ता’’ति समनुपस्सन्ति.

‘‘कथं तण्हामूलको विपल्लासो पवत्तो, कथं दिट्ठिसहिताविज्जामूलको विपल्लासो पवत्तो’’ति वत्तब्बत्ता ‘‘तत्थ यो दिट्ठिविपल्लासो’’तिआदि वुत्तं. तत्थाति तेसु तण्हामूलकदिट्ठिसहिताविज्जामूलकेसु. दिट्ठिविपल्लासोति दिट्ठिसहिताविज्जामूलकविपल्लासो. अतीतं रूपं अत्ततो समनुपस्सतीति अदब्बभूतोपि दब्बभूतो विय वुत्तो. तण्हाविपल्लासोति दिट्ठिसहिततण्हामूलको विपल्लासो अनागतं ¶ रूपं दिट्ठिभिनन्दनवसेन अभिनन्दतीति. एवं अतीतसमनुपस्सनअनागताभिनन्दनभेदेन ¶ पवत्तिविसेसो दट्ठब्बो. ‘‘चित्तस्स संकिलेसो तण्हाअविज्जायेव द्वे धम्मा न होन्ति, अथ खो दस किलेसापि, कस्मा द्वेयेव वुत्ता’’ति वत्तब्बत्ता ‘‘द्वे धम्मा चित्तस्स उपक्किलेसा’’तिआदि वुत्तं. तण्हा च अविज्जा च – इमे द्वेयेव धम्मा परमसावज्जस्स विपल्लासस्स मूलकारणत्ता. ताहि तण्हाअविज्जाहि विसुज्झन्तं चित्तं सब्बेहि किलेसेहि विसुज्झति, तस्मा च विसेसतो चित्तस्स उपक्किलेसा होन्तीति द्वे धम्मा वुत्ता. न हि तासु तण्हाअविज्जासु अरहत्तमग्गेन पहीनासु कोचि संकिलेसो अप्पहीनो नाम नत्थीति.

‘‘वुत्तप्पकारा तण्हाअविज्जा वुत्तप्पकारानं विपल्लासानंयेव मूलकारणं होन्ति किं, उदाहु सकलस्स वट्टस्सापि मूलकारणं होन्ति कि’’न्ति वत्तब्बत्ता वुत्तप्पकारा तण्हाअविज्जा वुत्तप्पकारानं मूलकारणं होन्ति यथा, एवं सकलस्स वट्टस्सापि मूलकारणं होन्तीति दस्सेतुं ‘‘तेस’’न्तिआदि वुत्तं. तत्थ येसं पुग्गलानं चित्तं अरक्खितं, मिच्छादिट्ठिहतञ्च होति, तेसं पुग्गलानं. येसं अविज्जानीवरणानं तण्हासंयोजनानं पुब्बकोटि न पञ्ञायति, तेहि अविज्जानीवरणेहि तण्हासंयोजनेहि संसारे सन्धावन्तानं संसरन्तानं पुग्गलानं सकिं निरयं मारवसगमनेन सन्धावनं संसरणं होति, सकिं तिरच्छानयोनिं सन्धावनं संसरणं होति, सकिं पेत्तिविसयं सन्धावनं संसरणं होति, सकिं असुरकायं सन्धावनं संसरणं होति, सकिं देवे सन्धावनं संसरणं होति, सकिं मनुस्से सन्धावनं संसरणं होतीति अत्थो.

‘‘मिच्छादिट्ठिहतेन चा’’ति सुत्तप्पदेसेन देसितो अत्थो आचरियेन विभत्तो, अम्हेहि च ञातो, ‘‘थिनमिद्धाभिभूतेनाति सुत्तप्पदेसेन देसितो अत्थो कथं विभत्तो’’ति वत्तब्बत्ता ‘‘थिनमिद्धाभिभूतेना’’तिआदि वुत्तं. चित्तस्स विञ्ञाणक्खन्धस्स या अकल्लता अकम्मनियता अत्थि, इदं अकल्लत्तं अकम्मनियत्तं थिनं नाम. यं कायस्स लीनत्तं वेदनादिक्खन्धत्तयलीनत्तं अत्थि, इदं कायस्स लीनत्तं मिद्धं नामाति थिनमिद्धसरूपमेव वुत्तं. तेहि थिनमिद्धेहि चित्तस्स अभिभूतभावादिको पन सुविञ्ञेय्यत्ता न वुत्तो, अवुत्तेपि येसं पुग्गलानं चित्तं ¶ थिनमिद्धेहि अभिभूतं, तेसं पुग्गलानं तेन चित्तेन चित्तसीसेन संयोजनेन संसारे मारवसगमनेन सन्धावनं संसरणं परियोसानसभावो वित्थारेत्वा गहेतब्बो.

‘‘वसं मारस्स गच्छतीति सुत्तप्पदेसेन देसितो अत्थो कथं विभत्तो’’ति वत्तब्बत्ता ‘‘वसं मारस्स गच्छती’’ति वुत्तं. तत्थ किलेसमारस्साति किलेसो दानादिपुञ्ञे मारेति निवारेतीति अत्थेन मारोति किलेसमारो. इमिना किलेसमारं निस्साय पवत्तत्ता अभिसङ्खारमारखन्धमारमच्चुमारा ¶ च गहिता, च-सद्देन वा गहिताति वेदितब्बा. सत्तमारस्साति देवपुत्तमारस्स. अथ वा ‘‘देवपुत्तमारस्सा’’ति अवत्वा ‘‘सत्तमारस्सा’’ति वुत्तत्ता यो यो राजचोरादिको दानादीनि वा इस्सरियभोगादीनि वा मारेति, सो सो राजचोरादिकोपि गहितो, तस्मा यस्स कस्सचि सत्तमारस्साति अत्थो. वसन्ति इच्छं लोभं अधिप्पायं रुचिं आकङ्खं आणं आणत्तिं. गच्छतीति उपगच्छति उपेति अनुवत्तति अनुगच्छति नातिक्कमतीति अत्थो. ‘‘कस्मा वसं गच्छती’’ति वत्तब्बत्ता ‘‘सो ही’’तिआदि वुत्तं. यो सत्तो अरक्खितचित्तेन च मिच्छादिट्ठिहतचित्तेन च थिनमिद्धाभिभूतचित्तेन च समन्नागतो होति, सो सत्तो अविज्जानीवरणादीहि निवुतो हुत्वा संसाराभिमुखो हि यस्मा होति, न विसङ्खाराभिमुखो, तस्मा मारस्स वसं गच्छतीति अत्थो.

‘‘अरक्खितेनातिआदिकस्स यस्स सुत्तस्स अत्थो विभत्तो, तेन ‘अरक्खितेना’तिआदिकेन सुत्तेन कित्तकानि सच्चानि देसितानी’’तिवत्तब्बत्ता ‘‘इमानि भगवता’’तिआदि वुत्तं. ‘‘अरक्खितेना’’तिआदिसुत्तेन भगवता इमानि द्वे सच्चानि देसितानि दुक्खं, समुदयो चाति. कथं देसितानि? अभिधम्मनिस्सिताय कथाय चेव सुत्तन्तनिस्सिताय कथाय च देसितानि. तासु कथासु अभिधम्मनिस्सिताय कथाय देसिते सति ‘‘अरक्खितेन चित्तेना’’ति इमिना पदेन अरक्खितं रत्तम्पि चित्तं, अरक्खितं दुट्ठम्पि चित्तं, अरक्खितं मूळ्हम्पि चित्तं भगवता देसितं ञापितं. तत्थ रत्तचित्तं लोभसहगतचित्तुप्पादवसेन अट्ठविधं, दुट्ठचित्तं पटिघसम्पयुत्तचित्तुप्पादवसेन दुब्बिधं, मूळ्हचित्तं मोमूहचित्तुप्पादवसेन दुब्बिधन्ति वेदितब्बं. इमेसञ्हि चित्तुप्पादानं वसेन या चक्खुन्द्रियादीनं अगुत्ति अनारक्खा उप्पन्ना, ताय अगुत्तिया अनारक्खाय चित्तं अरक्खितं होति फलूपचारेनाति.

‘‘मिच्छादिट्ठिहतेना’’ति ¶ इमिना पदेन मिच्छादिट्ठिसंसट्ठं चित्तं देसितं, तं दिट्ठिसम्पयुत्तचित्तुप्पादवसेन चतुब्बिधन्ति वेदितब्बं. तञ्हि मिच्छादिट्ठिया संसट्ठभावेन मिच्छादिट्ठिवसानुगतत्ता मिच्छादिट्ठिहतं नामाति. ‘‘थिनमिद्धाभिभूतेना’’ति इमिना पदेन थिनमिद्धेन संसट्ठं चित्तं देसितं, तं ससङ्खारिकचित्तुप्पादवसेन पञ्चविधन्ति वेदितब्बं. तञ्हि थिनमिद्धेन संसट्ठभावेन थिनमिद्धवसानुगतत्ता थिनमिद्धाभिभूतं नामाति एवं ये द्वादसाकुसला चित्तुप्पादकण्डे ‘‘कतमे धम्मा अकुसला? यस्मिं समये अकुसलं चित्तं उप्पन्नं होती’’तिआदिना (ध. स. ३६५) वित्थारतो वत्तब्बा, ते द्वादसाकुसलचित्तुप्पादा तीहि पदेहि भगवता देसिताति वेदितब्बा. ‘‘मारस्सा’’ति पदेन पञ्च मारा गहिता. तेसु किलेसमारो ¶ ‘‘चत्तारो आसवा, चत्तारो ओघा, चत्तारो योगा, चत्तारो गन्था, चत्तारि उपादानानि, अट्ठ नीवरणा, दस किलेसा’’ति (ध. स. ११०२ आदयो) देसितो. अभिसङ्खारमारो पन ‘‘कुसला चेतना (विभ. २२६) अकुसला चेतना (विभ. २२६) कुसलं कम्मं अकुसलं कम्म’’न्तिआदिना देसितो. खन्धमारो पन ‘‘अत्तभावो पञ्चक्खन्धा’’तिआदिना देसितो. मच्चुमारो पन ‘‘चुति चवनता’’तिआदिना (विभ. १९३) देसितो. एवं तावेत्थ अभिधम्मनिस्सिताय कथाय देसितो अत्थो दट्ठब्बो.

सुत्तन्तनिस्सिताय पन कथाय देसिते सति ‘‘चक्खुना रूपं दिस्वा निमित्तग्गाही होति अनुब्यञ्जनग्गाही, यत्वाधिकरणमेनं चक्खुन्द्रियं असंवुतं विहरन्तं अभिज्झादोमनस्सा पापका अकुसला धम्मा अन्वास्सवेय्युं, तस्स संवराय न पटिपज्जति, न रक्खति चक्खुन्द्रियं, चक्खुन्द्रिये न संवरं आपज्जति…पे… सोतिन्द्रिये न संवरं आपज्जति… घानिन्द्रिये न संवरं आपज्जति… जिव्हिन्द्रिये न संवरं आपज्जति… कायिन्द्रिये न संवरं आपज्जति… मनिन्द्रिये न संवरं आपज्जती’’ति (म. नि. १.३४७) एवं पुग्गलाधिट्ठानेन यं छद्वारिकचित्तं वुत्तं, तं छद्वारिकचित्तं ‘‘अरक्खितेन चित्तेना’’ति इमिना पदेन देसितं. या मिच्छादिट्ठियो पुब्बन्तकप्पनवसेन वा अपरन्तकप्पनवसेन वा पुब्बन्तापरन्तकप्पनवसेन वा मिच्छा अभिनिविसन्तस्स अयोनिसो उम्मुज्जन्तस्स ‘‘सस्सतो लोको’’ति वा ‘‘असस्सतो लोको’’ति वा ‘‘न होति तथागतो परं मरणा’’ति वा उप्पन्ना, ताहि ¶ दिट्ठीहि वा, या च दिट्ठियो ‘‘इमा चत्तारो सस्सतवादा…पे… परमदिट्ठधम्मनिब्बानवादा’’ति ब्रह्मजालसुत्तादीसु (दी. नि. १.३० आदयो) वुत्ता, ताहि दिट्ठीहि वा सम्पयुत्तं यं चित्तं ‘‘मिच्छादिट्ठिहतेन चा’’ति इमिना पदेन देसितं.

‘‘थिनं नाम चित्तस्स अकम्मञ्ञता, मिद्धं नाम वेदनादिक्खन्धत्तयस्स अकम्मञ्ञता’’ति वा ‘‘थिनं अनुस्साहसंसीदनं, मिद्धं उस्साहसत्तिविघातो’’ति वा यानि थिनमिद्धानि वुत्तानि, तेहि थिनमिद्धेहि यं चित्तं अभिभूतं अज्झोत्थटं, तं चित्तं ‘‘थिनमिद्धाभिभूतेना’’ति इमिना पदेन देसितं.

‘‘वसो नाम इच्छा लोभो अधिप्पायो रुचि आकङ्खा आणा आणत्ती’’ति यो वसो वुत्तो, सो वसो ‘‘वस’’न्ति इमिना पदेन देसितो. ‘‘पञ्च मारा – खन्धमारो अभिसङ्खारमारो मच्चुमारो देवपुत्तमारो किलेसमारो’’ति यो मारो वुत्तो, सो मारो ‘‘मारस्सा’’ति इमिना देसितो. ‘‘गच्छति, उपगच्छति, उपेति, अनुवत्तति, अनुगच्छति, नातिक्कमती’’ति ¶ यो पुग्गलो वुत्तो, सो पुग्गलो ‘‘गच्छती’’ति इमिना देसितोति. एवं देसितेसु धम्मेसु अकुसला समुदयसच्चं, ‘‘वसं मारस्स गच्छती’’ति इमिना पदेन ये पञ्चुपादानक्खन्धे उपादाय पञ्ञत्तो पुग्गलो वुत्तो, ते पञ्चुपादानक्खन्धा दुक्खसच्चन्ति द्वे सच्चानि देसितानि. ‘‘किमत्थाय द्वे सच्चानि देसितानी’’ति पुच्छितब्बत्ता ‘‘तेसं भगवा’’तिआदि वुत्तं. तेसं द्विन्नं सच्चानं परिञ्ञाय च पहानाय च ‘‘अरक्खितेना’’तिआदि धम्मं भगवा देसेति, तानि द्वे सच्चानि ‘‘अरक्खितेना’’तिआदिकेन ञापेतीति अत्थो.

‘‘तेसु द्वीसु सच्चेसु कस्स सच्चस्स परिञ्ञाय, कस्स सच्चस्स पहानाय देसेती’’ति पुच्छितब्बत्ता ‘‘दुक्खस्स परिञ्ञाय, समुदयस्स पहानाया’’ति वुत्तं. ‘‘परिञ्ञापहानेहि कतमानि सच्चानि देसितानी’’ति वत्तब्बत्ता ‘‘येन चा’’तिआदि वुत्तं. येन अरहत्तमग्गेन परिजानाति, येन अरहत्तमग्गेन पजहति च, अयं अरहत्तमग्गो मग्गसच्चं नाम. यं निब्बानधम्मं आरब्भ तण्हाय, अविज्जाय च पहानं जातं, अयं निब्बानधम्मो निरोधो निरोधसच्चं नामाति. एवं चत्तारि सच्चानि भगवता देसितानि.

‘‘चतुन्नं ¶ सच्चानं देसितभावो केन विञ्ञातब्बो’’ति वत्तब्बत्ता ‘‘तेनाहा’’तिआदि वुत्तं. तेसु चतूसु सच्चेसु समुदयसच्चेन अस्सादो गहितो, दुक्खसच्चेन आदीनवो गहितो, मग्गसच्चनिरोधसच्चेहि निस्सरणं गहितं, समुदयप्पहानवसेन सब्बगतिपजहनं जातं, सब्बगतिपजहनं फलन्ति गहितं. येन रक्खितचित्ततादिकेन सब्बगतिपजहनं जातं, सो रक्खितचित्ततादिको उपायोति गहितो, अरक्खितचित्ततादिकस्स पटिसेधनमुखेन रक्खितचित्ततादिकस्स नियोजनं भगवतो आणत्तीति गहितन्ति देसनाहारेन नानासुत्तेसु दस्सिता अस्सादादयो ‘‘अरक्खितेना’’तिआदिके एकस्मिंयेव सुत्ते नीहरित्वा दस्सिता.

‘‘अस्सादादीनं नीहरित्वा दस्सितभावो केन विञ्ञातब्बो सद्दहितब्बो’’ति वत्तब्बत्ता ‘‘तेनाहा’’तिआदि वुत्तं. एत्थ च येन संवण्णनाविसेसेन नानासुत्तेसु अस्सादादयो नीहरित्वा दस्सिता, सो संवण्णनाविसेसो देसनाहारविभङ्गो नाम. येन संवण्णनाविसेसेन एकस्मिंयेव सुत्ते अस्सादादयो नीहरित्वा दस्सिता, सो संवण्णनाविसेसो देसनाहारसम्पातो नामाति विसेसो दट्ठब्बो.

‘‘एत्तकोव देसनाहारसम्पातो परिपुण्णो’’ति वत्तब्बत्ता ‘‘नियुत्तो देसनाहारसम्पातो’’ति वुत्तं. एकेकस्मिंयेव सुत्ते अस्सादादयो येन येन संवण्णनाविसेसभूतेन देसनाहारसम्पातेन नीहरित्वा ¶ यथारहं दस्सिता, सो सो संवण्णनाविसेसभूतो देसनाहारसम्पातो नियुत्तो यथारहं निद्धारेत्वा युज्जितब्बोति अत्थो गहितो.

इति देसनाहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

२. विचयहारसम्पातविभावना

५३. येन ¶ देसनाहारसम्पातेन अस्सादादयो आचरियेन विभत्ता, अम्हेहि च ञाता, सो देसनाहारसम्पातो परिपुण्णो, ‘‘कतमो विचयहारसम्पातो’’ति पुच्छितब्बत्ता ‘‘तत्थ कतमो विचयो हारसम्पातो’’तिआदि वुत्तं. तत्थाति तेसु देसनाहारसम्पातादीसु सोळससु हारसम्पातेसु कतमो संवण्णनाविसेसो विचयहारसम्पातो नामाति पुच्छति. इमेसु धम्मेसु अयं धम्मो येन संवण्णनाविसेसेन विचयितब्बो, सो संवण्णनाविसेसो विचयहारसम्पातो नामाति नियमेत्वा विभजितुं ‘‘तत्थ तण्हा’’तिआदि वुत्तं. अट्ठकथायं पन –

‘‘एवं देसनाहारसम्पातं दस्सेत्वा इदानि विचयहारसम्पातं दस्सेन्तो यस्मा देसनाहारपदत्थविचयो विचयहारो, तस्मा देसनाहारे विपल्लासहेतुभावेन निद्धारिताय तण्हाय कुसलादिविभागपविचयमुखेन विचयहारसम्पातं दस्सेतुं ‘तत्थ तण्हा दुविधा’तिआदि आरद्ध’’न्ति (नेत्ति. अट्ठ. ५३) –

वुत्तं. तत्थ तत्थाति तस्मिं ‘‘अरक्खितेन चित्तेना’’तिआदिसुत्तत्थे देसनाहारसम्पातेन संवण्णिते अकुसलधम्मे ‘‘तण्हा’’ति निद्धारिता सब्बतण्हा. कुसलापीति चतुभूमके कुसले उद्दिस्स पवत्ता तण्हापि. अकुसलापीति अकुसलधम्मे उद्दिस्स पवत्ता तण्हापीति दुविधा होतीति विचयितब्बा. तेन वुत्तं टीकायं – ‘‘कुसलधम्मारम्मणाति कुसलधम्मे उद्दिस्स पवत्तमत्तं सन्धाय वुत्तं, न तेसं आरम्मणपच्चयतं, इध ‘कुसला धम्मा’ति लोकुत्तरधम्मानम्पि अधिप्पेतत्ता’’ति.

‘‘कुसला ¶ तण्हा किंगामिनी, अकुसला तण्हा किं गामिनी’’ति पुच्छितब्बत्ता ‘‘अकुसला संसारगामिनी’’तिआदि वुत्तं. अथ वा ‘‘कतमो कुसलाकुसलतण्हानं विसेसो’’ति पुच्छितब्बत्ता ‘‘अकुसला संसारगामिनी’’तिआदि वुत्तं. ‘‘तण्हा नाम संसारगामिनी होतु, कथं अपचयगामिनी’’ति वत्तब्बत्ता ‘‘पहानतण्हा’’ति वुत्तं, पहानस्स हेतुभूता तण्हा पहानतण्हाति अत्थो, पहातब्बतण्हं आगम्म यं पहानं पवत्तेतब्बं, तेन पवत्तेतब्बेन पहानेन अपचयं गच्छतीति वुत्तं होति.

‘‘किं ¶ पन तण्हायेव कुसलाकुसलाति दुब्बिधा, उदाहु अञ्ञोपि कुसलाकुसलाति दुब्बिधो’’ति वत्तब्बत्ता ‘‘मानोपी’’तिआदि वुत्तं. ‘‘कतमो मानो कुसलो, कतमो मानो अकुसलो’’ति पुच्छितब्बत्ता ‘‘यं मानं निस्साय मानं पजहति, अयं मानो कुसलो. यो पन मानो दुक्खं निब्बत्तयति, अयं मानो अकुसलो’’ति वुत्तं. तत्थ यं मानं…पे… कुसलोति यं मानं निस्साय उपनिस्साय पहानं पवत्तितं, तेन पहानेन सन्ताने उप्पज्जनारहं मानं पजहति, अयं उपनिस्सयपच्चयभूतो मानो फलूपचारेन कुसलो. यो पन…पे… अकुसलोति यो पन मानो परहिंसनादिवसेन पवत्तमानो हुत्वा अत्तनो च परस्स च दुक्खं निब्बत्तयति, अयं मानो अकुसलोति विचयित्वा वेदितब्बो.

‘‘संसारापचयगामिनीसु तासु तण्हासु कतमा अपचयगामिनी तण्हा कुसला’’ति पुच्छितब्बत्ता ‘‘कुसला’’ति वुत्ताय तण्हाय सरूपं दस्सेतुं ‘‘तत्थ यं नेक्खम्मसित’’न्तिआदि वुत्तं. तत्थाति तासु संसारापचयगामिनीसु तण्हाभूतासु कुसलाकुसलासु. अयं तण्हा कुसलाति सम्बन्धो. ‘‘अरिया पुग्गला सन्तं आयतनं यं अरियफलधम्मं सच्छिकत्वा उपसम्पज्ज विहरन्ति, तं आयतनं अरियफलधम्मं अहं कुदास्सु सच्छिकत्वा विहरिस्स’’न्ति पत्थयन्तस्स तस्स कुलपुत्तस्स तस्मिं अरियफले पिहा उप्पज्जति, पिहापच्चया यं दोमनस्सं उप्पज्जति, इदं दोमनस्सं ‘‘नेक्खम्मसित’’न्ति वुच्चति. अयं अरियफले पिहासङ्खाता तण्हा कुसला अनवज्जा अनवज्जअरियफलधम्मं उद्दिस्स पवत्तत्ताति विचयितब्बं.

‘‘कथं पवत्ता’’ति वत्तब्बत्ता ‘‘रागविरागा’’तिआदि वुत्तं. या रागविरागा चेतोविमुत्ति पत्तब्बा. तदारम्मणा तं चेतोविमुत्तिं आगम्म पवत्ता तण्हा कुसला अनवज्जा, या अविज्जाविरागा पञ्ञाविमुत्ति पत्तब्बा, तदारम्मणा तं पञ्ञाविमुत्तिं आगम्म पवत्ता तण्हा कुसला अनवज्जाति विचयितब्बा. ताय पञ्ञाविमुत्तिया वसेन भगवता –

‘‘तस्मा ¶ रक्खितचित्तस्स, सम्मासङ्कप्पगोचरो;

सम्मादिट्ठिपुरेक्खारो, ञत्वान उदयब्बयं;

थिनमिद्धाभिभू भिक्खु, सब्बा दुग्गतियो जहे’’ति. (उदा. ३२; नेत्ति. ३१, ६५, ७८) –

गाथायं ¶ ‘‘सब्बा दुग्गतियो जहे’’ति पदं वुत्तं, ‘‘तस्सा पञ्ञाविमुत्तिया यो पविचयो कातब्बो, कतमो सो पविचयो’’ति पुच्छितब्बत्ता ‘‘तस्सा को पविचयो’’तिआदि वुत्तं. तस्सा पञ्ञाविमुत्तिया को पविचयोति चे पुच्छेय्य ‘‘अट्ठ मग्गङ्गानि – सम्मादिट्ठि सम्मासङ्कप्पो सम्मावाचा सम्माकम्मन्तो सम्माआजीवो सम्मावायामो सम्मासति सम्मासमाधी’’ति पविचयो वेदितब्बो. ‘‘सो पविचयो कत्थ दट्ठब्बो’’ति पुच्छितब्बत्ता ‘‘सो कत्था’’तिआदि वुत्तं. सो पञ्ञाविमुत्तिया पविचयो कत्थ कस्मिं धम्मे दट्ठब्बोति पुच्छति. चतुत्थे झाने पारमिताय उक्कंसगताय चतुत्थज्झानभावनाय सो पविचयो दट्ठब्बो.

‘‘चतुत्थे झाने पारमिताया’’ति वुत्तमत्थं विवरितुं ‘‘चतुत्थे हि झाने’’तिआदि वुत्तं. यो सो चतुत्थज्झानलाभी पुग्गलो चतुत्थे झाने परिसुद्धं परियोदातं अनङ्गणं विगतूपक्किलेसं मुदु कम्मनियं ठितं आनेञ्जप्पत्तं, इति अट्ठङ्गसमन्नागतं चित्तं भावयति, सो चतुत्थज्झानलाभी पुग्गलो तत्थ चतुत्थे झाने अट्ठविधं विज्जाचरणं अधिगच्छति. कतमं अट्ठविधं? छ अभिञ्ञा, द्वे च विसेसे वा अधिगच्छतीति योजना. इद्धिविधादयो पञ्च, लोकियाभिञ्ञा चेव अरहत्तमग्गपञ्ञा चाति छ अभिञ्ञा. मनोमयिद्धि चेव विपस्सनाञाणञ्चाति द्वे च विसेसा होन्ति.

‘‘तं चतुत्थज्झानचित्तं कुतो परिसुद्धं…पे… कुतो आनेञ्जप्पत्त’’न्ति पुच्छितब्बत्ता ‘‘तं चित्तं यतो परिसुद्ध’’न्तिआदि वुत्तं. तं चित्तं यतो उपेक्खासतिपारिसुद्धिभावतो परिसुद्धं, ततो उपेक्खासतिपारिसुद्धिभावतो परियोदातं होति. सुखादीनं पच्चयघातेन यतो वीतरागादिअनङ्गणभावतो अनङ्गणं, ततो वीतरागादिअनङ्गणभावतो विगतूपक्किलेसं. यतो सुभावितभावतो मुदु, ततो सुभावितभावतो कम्मनियं. यतो परिसुद्धादीसु ठितभावतो ठितं, ततो परिसुद्धादीसु ठितभावतो आनेञ्जप्पत्तं होतीतिपि योजना युत्ता अट्ठकथायं (नेत्ति. अट्ठ. ५३) युगळतो आगतत्ता. सद्धावीरियसतिसमाधिपञ्ञाओभासेहि परिग्गहितभावतो आनेञ्जप्पत्तं. सद्धाय हि परिग्गहितं चित्तं पटिपक्खे अस्सद्धिये न इञ्जति न चलति, वीरियेन परिग्गहितं ¶ चित्तं पटिपक्खे कोसज्जे न इञ्जति, सतिया परिग्गहितं ¶ चित्तं पटिपक्खे पमादे न इञ्जति, समाधिना परिग्गहितं चित्तं पटिपक्खे उद्धच्चे न इञ्जति, पञ्ञाय परिग्गहितं चित्तं पटिपक्खाय अविज्जाय न इञ्जति, ओभासगतं चित्तं किलेसन्धकारे न इञ्जति. इति इमेहि छहि धम्मेहि परिग्गहितं चतुत्थज्झानचित्तं आनेञ्जप्पत्तं होति. एवं अट्ठङ्गसमन्नागतत्ता चतुत्थज्झानचित्तं छन्नं अभिञ्ञाञाणानञ्च मनोमयिद्धिविपस्सनाञाणानञ्च अधिगमूपायो होति, तस्मा सो पञ्ञाविमुत्तिपरिचयो चतुत्थज्झाने दट्ठब्बोयेवाति सङ्खेपत्थो. वित्थारतो पन अट्ठकथायं (नेत्ति. अट्ठ. ५३) ‘‘तत्थ उपेक्खासतिपारिसुद्धिभावेना’’तिआदिना वा ‘‘अपरो नयो’’तिआदिना वा वुत्तोयेवाति अम्हेहि न वुत्तो.

‘‘येसं रागादिअङ्गणानं अभावेन अनङ्गणं, येसं अभिज्झादिउपक्किलेसानं अभावेन विगतूपक्किलेसं, याय चित्तस्स ठितिया अभावेन ठितं, इञ्जनाय अभावेन आनेञ्जप्पत्तं, ते रागादिअङ्गणादयो कतमाय पक्खा’’ति पुच्छितब्बत्ता ‘‘तत्थ अङ्गणा’’तिआदि वुत्तं. तत्थाति तेसु रागादिअङ्गणादीसु अङ्गणा च रागादिअङ्गणा च उपक्किलेसा अभिज्झादिउपक्किलेसा च सन्ति, तदुभयं रागादिअङ्गणअभिज्झादिउपक्किलेसद्वयं तण्हापक्खो रागादिअङ्गणानं तण्हासभावत्ता, अभिज्झादिउपक्किलेसानञ्च तण्हाय अनुलोमत्ता. या इञ्जना फन्दना या च चित्तस्स अट्ठिति अनवट्ठानं अत्थि, अयं इञ्जना अट्ठिति दिट्ठिपक्खो इञ्जनाय च अट्ठितिया च मिच्छाभिनिवेसहेतुभावतोति पविचयो कातब्बो.

‘‘किं पन चतुत्थज्झानचित्तं अट्ठङ्गसमन्नागतत्तायेव छन्नं अभिञ्ञाञाणानञ्च मनोमयिद्धिविपस्सनाञाणानञ्च अधिगमूपायो होती’’ति पुच्छितब्बत्ता ‘‘चत्तारि इन्द्रियानी’’ति वुत्तं. ‘‘तस्स चतुत्थज्झानलाभिनो, दुक्खिन्द्रियं दोमनस्सिन्द्रियं सुखिन्द्रियं सोमनस्सिन्द्रियं इति चत्तारिन्द्रियानि चतुत्थज्झाने निरुज्झन्ति, तस्स चतुत्थज्झानलाभिनो उपेक्खिन्द्रियं अवसिट्ठं भवति, तस्मापि चतुत्थज्झानचित्तं वुत्तप्पकारानं अट्ठन्नं ञाणानं अधिगमूपायो होति, सो च अधिगमूपायभावो चिण्णवसीभावस्सेव भवेय्य, कथं चतुत्थज्झानमत्तलाभिनो चिण्णवसीभावो सिया’’ति वत्तब्बत्ता सो चतुत्थज्झानलाभी चतुत्थज्झानेयेव अट्ठत्वा अरूपसमापत्तियोपि ¶ एवं कत्वा निब्बत्तेति भावेति, तस्मा चिण्णवसीभावो होतीति दस्सेतुं ‘‘सो उपरिमं समापत्ति’’न्तिआदि वुत्तं. तस्सत्थो अट्ठकथायं (नेत्ति. अट्ठ. ५३) वित्थारतो वुत्तो, तस्मा योजनमत्तं करिस्साम.

सो रूपावचरचतुत्थज्झानलाभी योगावचरो रूपावचरचतुत्थज्झानसमापत्तितो उपरिमं आकासानञ्चायतनसमापत्तिं ¶ सन्ततो सन्ततरतो मनसि करोति. यथावुत्तं उपरिमं समापत्तिं सन्ततो मनसि करोतो तस्स चतुत्थज्झानलाभिनो योगावचरस्स चतुत्थज्झाने सञ्ञा सञ्ञापधाना समापत्ति ओळारिका विय हुत्वा सण्ठहति, पटिघसञ्ञा च उक्कण्ठा अनभिरति हुत्वा सण्ठहति, सो यथावुत्तेन विधिना मनसि करोन्तो योगावचरो सब्बसो निरवसेसतो रूपसञ्ञानं समतिक्कमा पटिघसञ्ञानं अत्थङ्गमा नानत्तसञ्ञानं अमनसिकारा ‘‘आकासं अनन्त’’न्ति मनसि कत्वा पवत्तमानं आकासानञ्चायतनसमापत्तिं सच्छिकत्वा उपसम्पज्ज विहरति. रूपसञ्ञा रूपावचरसञ्ञा पञ्चविधअभिञ्ञाभिनीहारो होति. नानत्तसञ्ञा नानारम्मणेसु वोकारो अकुसलो पवत्तति. एवं रूपावचरज्झाने आदीनवदस्सी हुत्वा ता रूपसञ्ञानानत्तसञ्ञायो आरम्मणे समतिक्कमति, अस्स योगावचरस्स पटिघसञ्ञा च अब्भत्थं गच्छति. एवं इमिना वुत्तनयेन समतिक्कमेन समाहितस्स, सन्तवुत्तिना अरूपावचरसमाधिना समाहितस्स योगावचरस्स ओभासो रूपावचरज्झानोभासो अन्तरधायति. रूपानं कसिणरूपानं झानचक्खुना दस्सनञ्च अन्तरधायतीति योजना.

‘‘येन समाधिना समाहितस्स, समाहितस्स ओभासो च रूपानं दस्सनञ्च अन्तरधायति, सो समाधि कित्तकेहि अङ्गेहि समन्नागतो, कथं पच्चवेक्खितब्बो’’ति पुच्छितब्बत्ता ‘‘सो समाधी’’तिआदि वुत्तं. सो समाधीति येन रूपारूपावचरसमाधिना समाहितो, सो दुविधोपि समाधि अनभिज्झाब्यापादवीरियारम्भेहि तीहि उपकारकङ्गेहि च पस्सद्धिसतीहि द्वीहि परिक्खारङ्गेहि च अविक्खित्तेन एकेन सभावङ्गेन च छहि अङ्गेहि समन्नागतोति पच्चवेक्खितब्बो पुनप्पुनं चिन्तेतब्बो सल्लक्खेतब्बो ¶ . ‘‘कथं कत्थ पच्चवेक्खितब्बो’’ति पुच्छितब्बत्ता ‘‘अनभिज्झासहगतं मे मानसं सब्बलोके’’तिआदि वुत्तं. ‘‘तेसु छसु अङ्गेसु कित्तको समथो, कित्तका विपस्सना’’ति पुच्छितब्बत्ता एत्तको समथो, एत्तका विपस्सनाति विभजितुं ‘‘तत्थ यञ्चा’’तिआदि वुत्तं.

५४. ‘‘पञ्ञाविमुत्ती’’ति वुत्तस्स अरहत्तफलस्स समाधिस्स समथविपस्सनासङ्खाता पुब्बभागपटिपदा समाधिमुखेन आचरियेन विभत्ता, ‘‘ताय पटिपदाय लभितब्बो अरहत्तफलसमाधि कित्तकेन वेदितब्बो’’ति पुच्छितब्बत्ता ‘‘सो समाधि पञ्चविधेन वेदितब्बो’’ति वुत्तं. यो अरहत्तफलसमाधि समथविपस्सनापटिपदाय लभितब्बो, सो अरहत्तफलसमाधि पञ्चविधेन ञाणदस्सनेन वेदितब्बो.

‘‘कथं पञ्चविधञाणदस्सनं पच्चुपट्ठितं भवती’’ति वत्तब्बत्ता ‘‘अयं समाधी’’तिआदि ¶ वुत्तं. अयं अरहत्तफलसमाधि अप्पितप्पितक्खणे फलसमापत्तिसुखत्ता पच्चुप्पन्नसुखो होति, इति पच्चवेक्खन्तस्स अस्स अरहतो पच्चत्तमेव ञाणदस्सनं पच्चुपट्ठितं भवति. अयं अरहत्तफलसमाधि आयतिं समापज्जितब्बस्स अरहत्तफलसमाधिस्स उपनिस्सयपच्चयत्ता आयतिं सुखविपाको होति, इति पच्चवेक्खन्तस्स…पे… भवति. अयं अरहत्तफलसमाधि किलेसअरीहि आरकत्ता अरियो, कामामिसवट्टामिसलोकामिसानं अभावतो निरामिसो च होति, इति पच्चवेक्खन्तस्स…पे… भवति. अयं अरहत्तफलसमाधि अकापुरिसेहि सम्मासम्बुद्धपच्चेकबुद्धसावकबुद्धेहि सेवितब्बत्ता अकापुरिससेवितो होति, इति पच्चवेक्खन्तस्स…पे… भवति. अयं अरहत्तफलसमाधि अङ्गसन्तकिलेसदरथसन्तत्ता सन्तो चेव दिवसम्पि समापज्जन्तस्स अतित्तिकरणतो पणीतो च पटिप्पस्सद्धकिलेसेन अरहता पुग्गलेन लद्धत्ता पटिप्पस्सद्धिलद्धो च अरहत्तमग्गसमाधिसङ्खातेन एकोदिभावेन अधिगतत्ता एकोदिभावाधिगतो च ससङ्खारेन सपयोगेन अधिगतत्ता, नीवरणादिपच्चनीकधम्मे निग्गय्ह अनधिगतत्ता, अञ्ञे किलेसे वारेत्वा अनधिगतत्ता, अरहत्तमग्गफलभावेनेव पवत्तत्ता नससङ्खारनिग्गय्हवारितगतो होति, इति पच्चवेक्खन्तस्स अस्स अरहतो पच्चत्तमेव ञाणदस्सनं पच्चुपट्ठितं भवतीति पञ्चविधेन ञाणदस्सनेन सो अरहत्तफलसमाधि विचयित्वा वेदितब्बोति.

‘‘पच्चुप्पन्नसुखादीसु ¶ समाधीसु कित्तको समथो, कित्तका विपस्सना’’ति पुच्छितब्बत्ता ‘‘तत्थ यो च समाधि पच्चुप्पन्नसुखो’’तिआदि वुत्तं. समथो, विपस्सनाति च अरहत्तफलसमथविपस्सनाव अधिप्पेता, न पुब्बभागसमथविपस्सनाति. अरहत्तफलसमाधि पञ्चविधेन वेदितब्बोति आचरियेन वुत्तो, ‘‘तस्स अरहत्तफलसमाधिस्स पुब्बभागपटिपदायं वुत्तो समाधि कित्तकेन वेदितब्बो’’ति पुच्छितब्बत्ता ‘‘सो समाधि पञ्चविधेन वेदितब्बो’’ति वुत्तं. यो रूपावचरचतुत्थज्झानसमाधि पुब्बभागपटिपदायं वुत्तो, सो रूपावचरचतुत्थज्झानसमाधि पञ्चविधेन पकारेन वेदितब्बो. ‘‘कतमेना’’ति पुच्छितब्बत्ता ‘‘पीतिफरणता’’तिआदि वुत्तं. पठमदुतियज्झानेसु पञ्ञा पीतिफरणता होति. पठमदुतियततियज्झानेसु पञ्ञा सुखफरणता होति. चतुत्थज्झाने चेतोपरियपञ्ञा चेतोफरणता होति. दिब्बचक्खुपञ्ञा आलोकफरणता होति. झानं पच्चवेक्खित्वा पवत्तमानपञ्ञा पच्चवेक्खणानिमित्तं होति. इति पञ्चविधेन पञ्ञापकारेन विचयित्वा वेदितब्बोति. ‘‘तेसु पञ्चविधेसु पकारेसु कित्तको समथो, कित्तका विपस्सना’’ति पुच्छितब्बत्ता ‘‘तत्थ यो च पीतिफरणो’’तिआदि वुत्तं.

५५. सम्पयोगवसेन समाधि आचरियेन विभत्तो, अम्हेहि च ञातो, ‘‘कथं आरम्मणवसेन ¶ विभत्तो’’ति पुच्छितब्बत्ता ‘‘दस कसिणायतनानी’’तिआदि वुत्तं. इमेहि दसहि आरम्मणेहि कसिणेहिपि समाधि विचिनित्वा वेदितब्बोति. ‘‘तेसु दससु कित्तको समथो, कित्तका विपस्सना’’ति पुच्छितब्बत्ता ‘‘तत्थ यञ्चा’’तिआदि वुत्तं. कसिणन्ति च कसिणमण्डलम्पि परिकम्मम्पि पटिभागनिमित्तम्पि तस्मिं पटिभागनिमित्ते उप्पन्नज्झानम्पि वुच्चति, इध पन ससम्पयुत्तज्झानमेव अधिप्पेतं.

‘‘किं पन वुत्तप्पकारो समाधियेव समथविपस्सनाय योजेतब्बो, उदाहु अञ्ञोपि योजेतब्बो’’ति वत्तब्बत्ता सतिपट्ठानादिपुब्बभागपटिपदाभेदेन अनेकभेदभिन्नो निरवसेसो अरियमग्गोपि विचयित्वा योजेतब्बोति दस्सेतुं ‘‘एवं सब्बो’’तिआदि वुत्तं. तत्थ एवन्ति मया वुत्तनयेन वुत्तनयानुसारेन सब्बो निरवसेसो सतिपट्ठानादिपुब्बभागपटिपदाभेदेन अनेकभेदभिन्नो अरियो मग्गो योजेतब्बो. कथं? येन येन अनभिज्झादिआकारेन पच्चुप्पन्नसुखतादिआकारेन ¶ समाधि मया वुत्तो, तेन तेन अनभिज्झादिआकारेन पच्चुप्पन्नसुखतादिआकारेन यो यो अरियमग्गो समथेन योजेतुं सम्भवति, सो सो अरियमग्गो समथेन विचयित्वा योजयितब्बो. यो यो अरियमग्गो विपस्सनाय योजेतुं सम्भवति, सो सो अरियमग्गो विपस्सनाय योजयित्वा योजयितब्बोति अत्थो गहेतब्बो.

‘‘येहि समथाधिट्ठानेहि विपस्सनाधम्मेहि योजयितब्बो, ते समथाधिट्ठाना विपस्सनाधम्मा कतमेहि धम्मेहि सङ्गहिता’’ति पुच्छितब्बत्ता ‘‘ते तीहि धम्मेहि सङ्गहिता अनिच्चताय दुक्खताय अनत्तताया’’ति वुत्तं, ते समथाधिट्ठाना विपस्सनाधम्मा ‘‘अनिच्चताय पञ्ञाय दुक्खताय पञ्ञाय अनत्तताय पञ्ञाया’’ति तीहि अनुपस्सनाधम्मेहि सङ्गहिता गण्हिताति अत्थो. अनिच्चतादिना सहचरणतो अनुपस्सनापञ्ञापि ‘‘अनिच्चता दुक्खता अनत्तता’’ति वुच्चति.

‘‘यो योगी पुग्गलो समथाधिट्ठानं विपस्सनं भावयमानो होति, सो योगी पुग्गलो किं भावयती’’ति पुच्छितब्बत्ता ‘‘सो समथविपस्सनं भावयमानो’’तिआदि वुत्तं.

समथविपस्सनादीनि भावयमानो पुग्गलो रागचरितो दोसचरितो मोहचरितोति तिविधो, ‘‘तत्थ कतमो पुग्गलो कतमेन कतमेन विमोक्खमुखेन निय्याति, कतमायं कतमायं सिक्खन्तो, कतमं कतमं पजहन्तो, कतमं कतमं अनुपगच्छन्तो, कतमं कतमं परिजानन्तो, कतमं कतमं पवाहेन्तो, कतमं कतमं निद्धुनन्तो, कतमं कतमं वमेन्तो, कतमं कतमं निब्बापेन्तो, कतमं कतमं उप्पाटेन्तो, कतमं कतमं विजटेन्तो निय्याती’’ति पुच्छितब्बत्ता ¶ ‘‘रागचरितो पुग्गलो’’तिआदि वुत्तं. अट्ठकथायं पन ‘‘इदानि येसं पुग्गलानं यत्थ सिक्खन्तानं विसेसतो निय्यानमुखानि, येसञ्च किलेसानं पटिपक्खभूतानि तीणि विमोक्खमुखानि, तेहि सद्धिं तानि दस्सेतुं ‘रागचरितो’तिआदि वुत्त’’न्ति वुत्तं. तस्सत्थोपि अट्ठकथायं (नेत्ति. अट्ठ. ५५) वुत्तोयेव.

‘‘कस्मा ¶ तीणि विमोक्खमुखानि भावयन्तो तयो खन्धे भावयती’’ति वत्तब्बत्ता ‘‘तत्थ सुञ्ञतविमोक्खमुख’’न्तिआदि वुत्तं. तत्थाति तेसु तीसु विमोक्खमुखेसु. सुञ्ञतविमोक्खमुखं पञ्ञाक्खन्धो अनत्तानुपस्सनाय पञ्ञापधानत्ता. अनिमित्तविमोक्खमुखं समाधिक्खन्धो अनिच्चानुपस्सनाय समाधिपधानत्ता. अप्पणिहितविमोक्खमुखं सीलक्खन्धो दुक्खानुपस्सनाय सीलपधानत्ता. इति तीहि विमोक्खमुखेहि तिण्णं खन्धानं सङ्गहितत्ता तीणि विमोक्खमुखानि भावयन्तो सो योगी पुग्गलो तयो खन्धे भावयतियेवाति पञ्ञापधानादिभावो अट्ठकथायं (नेत्ति. अट्ठ. ५५) वुत्तो. तयो खन्धे भावयन्तो अरियं अट्ठङ्गिकं मग्गं भावयति. ‘‘कस्मा भावयती’’ति वत्तब्बत्ता कारणं दस्सेतुं ‘‘तत्थ या’’तिआदि वुत्तं.

तिण्णं खन्धानं अरियअट्ठङ्गिकमग्गभावो विभत्तो, अम्हेहि च जानितो, ‘‘कथं समथविपस्सनाभावो जानितब्बो’’ति वत्तब्बत्ता तिण्णं खन्धानं समथविपस्सनाभावं दस्सेतुं ‘‘तत्थ सीलक्खन्धो चा’’तिआदि वुत्तं. ‘‘यो योगी पुग्गलो समथविपस्सनं भावेति, तस्स योगिनो पुग्गलस्स भवङ्गानि कतमं भावनं गच्छन्ती’’ति पुच्छितब्बत्ता ‘‘यो समथविपस्सनं भावेति, तस्सा’’तिआदि वुत्तं. कायो च चित्तञ्च द्वे भवङ्गानि उपपत्तिभवस्स अङ्गानि भावनं वड्ढनं गच्छन्ति. सीलञ्च समाधि च द्वे पदानि द्वे पादा भवनिरोधगामिनी पटिपदा भावनं वड्ढनं गच्छन्ति.

‘‘कथं गच्छन्ती’’ति वत्तब्बत्ता ‘‘सो होति भिक्खू’’तिआदि वुत्तं. भावितकायोति भावितो कायो कायआभिसमाचारिको, कायसंवरो वा येन भिक्खुनाति भावितकायो. सेसेसुपि एस नयो. काये कायआभिसमाचारिके, कायसंवरे वा भावियमाने सति सम्माकम्मन्तो, सम्मावायामो च द्वे धम्मा भावनं गच्छन्ति कायसमाचारसीलत्ता. सीले वाचासंवरआजीवसंवरवसेन पवत्ते सीले भावियमाने सति सम्मावाचा च सम्माआजीवो च द्वे धम्मा भावनं गच्छन्ति वाचादिसंवरसीलत्ता. चित्ते चित्तसंवरवसेन पवत्ते चित्ते भावियमाने सति सम्मासति च सम्मासमाधि च द्वे धम्मा भावनं गच्छन्ति चित्तसंवरसीलत्ता. पञ्ञाय भावियमानाय सति ¶ सम्मादिट्ठि च सम्मासङ्कप्पो ¶ च द्वे धम्मा भावनं गच्छन्ति समानत्ता, उपकारकत्ता च. सम्मासङ्कप्पेन हि पुनप्पुनं सङ्कप्पन्तस्स पञ्ञा वड्ढतीति.

‘‘सम्माकम्मन्तो च सम्मावायामो च द्वे धम्मा कायवसेनेव विभत्ता विचेतब्बा किं, उदाहु चित्तवसेन विभत्ता विचेतब्बा कि’’न्ति पुच्छितब्बत्ता ‘‘तत्थ यो च सम्माकम्मन्तो’’तिआदि वुत्तं. कायसुचरितचेतनाभूतो यो च सम्माकम्मन्तो, तंसहितो यो च सम्मावायामो सिया कायिको, विरतिभूतो यो च सम्माकम्मन्तो, तंसहितो यो च सम्मावायामो सिया चेतसिको, तत्थ तेसु कायिकचेतसिकभूतेसु सम्माकम्मन्तसम्मावायामेसु यो सम्माकम्मन्तसम्मावायामो कायसङ्गहो, सो सम्माकम्मन्तसम्मावायामो काये कायआभिसमाचारिके, कायसंवरे वा भाविते सति भावनं गच्छति. यो सम्माकम्मन्तसम्मावायामो चित्तसङ्गहो, सो सम्माकम्मन्तसम्मावायामो चित्ते चित्तसंवरे भाविते सति भावनं गच्छतीति योजना.

‘‘समथविपस्सनं भावयन्तो सो योगी पुग्गलो कित्तकं अधिगमं गच्छती’’ति विचयितब्बत्ता ‘‘सो समथविपस्सनं भावयन्तो’’तिआदि वुत्तं. पञ्चविधं अरियमग्गाधिगमं दस्सेतुं ‘‘खिप्पाधिगमो चा’’तिआदि वुत्तं. तस्सत्थो अट्ठकथायं (नेत्ति. अट्ठ. ५५) विभत्तो. ‘‘केन कतमो अधिगमो होती’’ति पुच्छितब्बत्ता ‘‘तत्थ समथेना’’तिआदि वुत्तं.

५६. ‘‘अरक्खितेन चित्तेना’’तिआदिसुत्तत्थो वेनेय्यानं अरहत्तफलविमुत्तिमुखेन आचरियेन विचयितो विभत्तो, अम्हेहि च ञातो, ‘‘देसकस्स दसबलसमन्नागतस्स दस बलानि कथं विचयितब्बानी’’ति पुच्छितब्बत्ता ‘‘तत्थ यो देसयति, सो दसबलसमन्नागतो’’तिआदि वुत्तं. अट्ठकथायं पन –

‘‘इति महाथेरो ‘तस्मा रक्खितचित्तस्सा’ति गाथाय वसेन अरहत्तफलविमुत्तिमुखेन विचयहारसम्पातं निद्दिसन्तो, देसनाकुसलताय अनेकेहि सुत्तप्पदेसेहि तस्सा पुब्बभागपटिपदाय भावनाविसेसानं भावनानिसंसानञ्च विभजनवसेन नानप्पकारतो विचयहारं दस्सेत्वा, इदानि दसन्नं ¶ तथागतबलानम्पि वसेन तं दस्सेतुं ‘तत्थ यो देसयती’तिआदिमाहा’’ति –

वुत्तं. तत्थ तत्थाति तेसु समथविपस्सनं भावयन्तेसु सासितब्बसासकेसु. दसबलसमन्नागतो यो ¶ देसको सत्था ‘‘अरक्खितेन चित्तेना’’तिआदिधम्मं देसेति, ओवादेन सावके न विसंवादयति, तस्स देसकस्स सत्थुनो दस बलानि विचयितब्बानीति योजना.

‘‘किन्ति देसेती’’ति पुच्छितब्बत्ता ‘‘सो तिविध’’न्तिआदि वुत्तं. तेसु दससु तथागतबलेसु ठानाट्ठानञाणं पठमं तथागतबलं नाम, ‘‘तं बलं कथं विचयितब्ब’’न्ति पुच्छितब्बत्ता ‘‘सो तथा ओवदितो’’तिआदि वुत्तं. अत्थो अट्ठकथायं (नेत्ति. अट्ठ. ५६) वुत्तो, पाळिवसेनपि पाकटो. ‘‘एतं ठानं न विज्जती’’ति जाननं अट्ठानञाणं नाम, ‘‘एतं ठानं विज्जती’’ति जाननं ठानञाणं नामाति ठानाट्ठानानं जाननञाणं पठमं तथागतबलं विचयितब्बन्ति अधिप्पायो वेदितब्बो. (१)

५७. ठानाट्ठानञाणं पठमं तथागतबलं आचरियेन विचयितं विभत्तं अम्हेहि च ञातं, ‘‘कथं सब्बत्थगामिनिपटिपदाञाणं दुतियतथागतबलं विचयितब्ब’’न्ति पुच्छितब्बत्ता ‘‘इति ठानाट्ठानता’’ति वुत्तं. ‘‘अयं पटिपदा इमस्मिं भवे गामिनी, अयं पटिपदा इमस्मिं भवे गामिनी’’ति सब्बत्थ गामिनिया पटिपदाय जाननञाणं सब्बत्थगामिनिपटिपदाञाणं नामाति सब्बत्थगामिनिपटिपदाञाणं दुतियं तथागतबलं विचयितब्बन्ति अधिप्पायो. (२)

५९. सब्बत्थगामिनिपटिपदाञाणं दुतियं तथागतबलं आचरियेन विचयितं, अम्हेहि च ञातं, ‘‘कथं अनेकधातुनानाधातुञाणं ततियं तथागतबलं विचयितब्ब’’न्ति पुच्छितब्बत्ता ‘‘इति सब्बत्थगामिनी पटिपदा’’तिआदि वुत्तं. ‘‘अयं धातु च अयं धातु च अनेकधातु नाम, अयं धातु च अयं धातु च नानाधातु नामा’’ति अनेकधातुनानाधातूनं जाननञाणं अनेकधातुनानाधातुञाणं नामाति अनेकधातुनानाधातुञाणं ततियं तथागतबलं विचयितब्बन्ति. (३)

६०. अनेकधातुनानाधातुञाणं ¶ ततियं तथागतबलं आचरियेन विचयितं विभत्तं, अम्हेहि च ञातं, ‘‘कथं सत्तानं नानाधिमुत्तिकताञाणं चतुत्थं तथागतबलं विचयितब्ब’’न्ति पुच्छितब्बत्ता ‘‘इति अनेकधातुनानाधातुकस्स लोकस्सा’’तिआदि वुत्तं. ‘‘इमे सत्ता एवं अधिमुत्ता, इमे सत्ता एवं अधिमुत्ता’’ति सत्तानं अधिमुच्चनानं जाननञाणं सत्तानं नानाधिमुत्तिकताञाणं नामाति सत्तानं नानाधिमुत्तिकताञाणं चतुत्थं तथागतबलं विचयितब्बन्ति. (४)

सत्तानं ¶ नानाधिमुत्तिकताञाणं चतुत्थं तथागतबलं आचरियेन विभत्तं, अम्हेहि च ञातं, ‘‘कथं विपाकवेमत्तताञाणं पञ्चमं तथागतबलं विचयितब्ब’’न्ति पुच्छितब्बत्ता ‘‘इति ते यथाधिमुत्ता चा’’तिआदि वुत्तं. ‘‘एवं अधिमुत्तानं सत्तानं इदं कम्मं कण्हं, इमस्स कण्हकम्मस्स अयं विपाको. इदं कम्मं सुक्कं, इमस्स सुक्ककम्मस्स अयं विपाको’’ति एवमादीहि विपाकानं नानत्तजाननञाणं विपाकवेमत्तताञाणं नामाति विपाकवेमत्तताञाणं पञ्चमं तथागतबलं विचयितब्बन्ति.

६२. विपाकवेमत्तताञाणं पञ्चमं तथागतबलं आचरियेन विचयितं, अम्हेहि च ञातं, ‘‘कथं झानानं संकिलेसवोदानवुट्ठानञाणं छट्ठं तथागतबलं विचयितब्ब’’न्ति पुच्छितब्बत्ता ‘‘इति तथा समादिन्नान’’न्तिआदि वुत्तं. ‘‘एवं समादिन्नानं कम्मानं झानानं विमोक्खानं समाधीनं समापत्तीनं अयं संकिलेसो, इदं वोदानं, इदं वुट्ठानं, एवं संकिलिस्सति, एवं वोदायति, एवं वुट्ठहती’’ति झानानं संकिलेसवोदानवुट्ठानानं अनावरणञाणं झानानं संकिलेसवोदानवुट्ठानञाणं नामाति झानानं संकिलेसवोदानवुट्ठानञाणं छट्ठं तथागतबलं विचयितब्बन्ति. (५)

६३. झानानं संकिलेसञाणं छट्ठं तथागतबलं आचरियेन विचयितं, ‘‘कथं इन्द्रियपरोपरियत्तवेमत्तताञाणं सत्तमं तथागतबलं विचयितब्ब’’न्ति पुच्छितब्बत्ता ‘‘इति तस्सेव समाधिस्सा’’तिआदि वुत्तं. ‘‘एवं आधिपतेय्यट्ठेन इन्द्रियानि, एवं अकम्पियट्ठेन बलानी’’ति जाननेन सह ‘‘अयं मुदिन्द्रियो, अयं मज्झिन्द्रियो, अयं तिक्खिन्द्रियो’’ति परसत्तानं परपुग्गलानं इन्द्रियबलानं अमुदुमज्झाधिमत्तताजाननञाणंअमुदुमज्झाधिमत्तताजाननञाणं इन्द्रियपरोपरियत्तवेमत्तताञाणं नामाति इन्द्रियपरोपरियत्तवेमत्तताञाणं सत्तमं तथागतबलं विचयितब्बन्ति. (६)

६४. इन्द्रियपरोपरियत्तञाणं ¶ सत्तमं तथागतबलं आचरियेन विचयितं, ‘‘कथं पुब्बेनिवासानुस्सतिञाणं अट्ठमं तथागतबलं विचयितब्बं, कथं दिब्बचक्खुञाणं नवमं तथागतबलं विचयितब्ब’’न्ति पुच्छितब्बत्ता ‘‘इति तत्थ यं अनेकविहित’’न्तिआदि वुत्तं. ‘‘एकं जाति’’न्तिआदिना जातिवसेन वा ‘‘एवंनामो’’तिआदिना नामगोत्तवण्णाहारसुखदुक्खपटिसंवेदनाय परियन्तवसेन वा साकारस्स सउद्देसस्स अनेकविहितपुब्बेनिवासस्स तंतंभवस्स असेसतो जाननञाणं पुब्बेनिवासानुस्सतिञाणं नामाति पुब्बेनिवासानुस्सतिञाणं अट्ठमं तथागतबलं विचयितब्बन्ति. (७)

चवमानउपपज्जमानहीनपणीतसुवण्णदुब्बण्णसुगतदुग्गतयथाकम्मूपगानं ¶ सत्तानं असेसतो चुतूपपातानं जाननञाणं दिब्बचक्खुञाणं नामाति दिब्बचक्खुञाणं नवमं तथागतबलं विचयितब्बन्ति. (८-९)

पुब्बेनिवासादिअट्ठमनवमं तथागतबलं आचरियेन विचयितं विभत्तं, ‘‘कथं सब्बासवक्खयञाणं दसमं तथागतबलं विचयितब्ब’’न्ति पुच्छितब्बत्ता ‘‘इति तत्थ य’’न्तिआदि वुत्तं. बोधिमूले संकिलेसमारनिहनं ञाणं उप्पन्नं, इदं किलेसमारनिहनं ञाणं सब्बासवक्खयञाणं नामाति सब्बासवक्खयञाणं दसमं तथागतबलं विचयितब्बन्ति अयं सङ्खेपत्थो. वित्थारतो पन पाळितो च अट्ठकथातो च यतिपोतानम्पि पाकटो भवेय्याति मञ्ञित्वा न दस्सितो.(१०)

‘‘एत्तकोव विचयहारसम्पातो परिपुण्णो’’ति वत्तब्बत्ता ‘‘नियुत्तो विचयो हारसम्पातो’’ति वुत्तं. ये ये सुत्तप्पदेसत्था वुत्ता, ते ते सुत्तप्पदेसत्था येन येन संवण्णनाविसेसभूतेन विचयहारसम्पातेन विचयितब्बा, सो सो संवण्णनाविसेसभूतो विचयहारसम्पातो नियुत्तो यथारहं नीहरित्वा युज्जितब्बोति अत्थो गहेतब्बोति.

इति विचयहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

३. युत्तिहारसम्पातविभावना

६५. येन ¶ येन विचयहारसम्पातेन सुत्तप्पदेसत्था आचरियेन विचयितब्बा, अम्हेहि च ञाता, सो विचयहारसम्पातो परिपुण्णो, ‘‘कतमो युत्तिहारसम्पातो’’ति पुच्छितब्बत्ता ‘‘तत्थ कतमो युत्तिहारसम्पातो’’तिआदि वुत्तं. अट्ठकथायं पन – ‘‘एवं नानानयेहि विचयहारसम्पातं वित्थारेत्वा इदानि युत्तिहारसम्पातादीनि दस्सेतुं ‘तत्थ कतमो युत्तिहारसम्पातो’तिआदि आरद्ध’’न्ति (नेत्ति. अट्ठ. ६५) वुत्तं. तत्थाति तेसु देसनाहारसम्पातादीसु ¶ सोळससु हारसम्पातेसु कतमो संवण्णनाविसेसो युत्तिहारसम्पातो नामाति पुच्छति, पुच्छित्वा यस्मिं सुत्तप्पदेसे वुत्तानं अत्थानं युत्तिभावो विचारेतब्बो, तं सुत्तप्पदेसं नीहरितुं –

‘‘तस्मा रक्खितचित्तस्स, सम्मासङ्कप्पगोचरो;

सम्मादिट्ठिपुरेक्खारो, ञत्वान उदयब्बयं;

थिनमिद्धाभिभू भिक्खु, सब्बा दुग्गतियो जहे’’ति. (उदा. ३२; नेत्ति. ३१, ७८) –

वुत्तं. तस्सं गाथायं तस्मा अरक्खितचित्तस्स मारवसानुगतत्ता सतिसंवरइन्द्रियसंवरादिवसेन भिक्खु रक्खितचित्तो अस्स भवेय्य, तस्मा कामवितक्कादिमिच्छासङ्कप्पगोचरस्स मारवसानुगतत्ता नेक्खम्मसङ्कप्पादिवसेन भिक्खु सम्मासङ्कप्पगोचरो अस्स भवेय्य, तस्मा मिच्छादिट्ठिहतचित्तस्स मारवसानुगतत्ता योनिसोमनसिकारेन भिक्खु उदयब्बयं ञत्वान सम्मादिट्ठिपुरेक्खारो अस्स भवेय्य, तस्मा थिनमिद्धेन हतचित्तस्स मारवसानुगतत्ता वीरियवसेन भिक्खु थिनमिद्धाभिभू अस्स भवेय्य, तादिसो भिक्खु सब्बा दुग्गतियो जहे जहिस्सतीति अत्थो वेदितब्बो.

‘‘तस्सं गाथायं कथं युत्तिभावो विचारेतब्बो’’ति वत्तब्बत्ता ‘‘तस्मा रक्खितचित्तस्सा’’तिआदि वुत्तं. रक्खितचित्तस्स सम्मासङ्कप्पगोचरो भविस्सतीति अत्थो युज्जति एव, नो न युज्जति. मिच्छासङ्कप्पानम्पि जहितत्ता सम्मादिट्ठिपुरेक्खारो हुत्वा विहरन्तो उदयब्बयं पटिविज्झिस्सतीति अत्थो युज्जति सम्मादिट्ठिपुरेक्खारस्स उदयब्बयानुपस्सनासम्भवतो. उदयब्बयं पटिविज्झन्तो सब्बा दुग्गतियो जहिस्सतीति अत्थो ¶ युज्जति उदयब्बयानुपस्सनानुक्कमेन अरियमग्गसम्भवतो. सब्बा दुग्गतियो जहन्तो सब्बानि दुग्गतिविनिपातभयानि समतिक्कमिस्सतीति अत्थो युज्जति सब्बेसं दुग्गतिविनिपातभयानं अनुप्पज्जनतो.

‘‘एत्तकोव युत्तिहारसम्पातो परिपुण्णो’’ति वत्तब्बत्ता ‘‘नियुत्तो युत्तिहारसम्पातो’’ति वुत्तं. येन येन संवण्णनाविसेसभूतेन युत्तिहारसम्पातेन सुत्तप्पदेसत्थानं युत्तिभावो विचारेतब्बो ¶ , सो सो संवण्णनाविसेसभूतो युत्तिहारसम्पातो नियुत्तो यथारहं निद्धारेत्वा युज्जितब्बोति अत्थो गहेतब्बोति.

इति युत्तिहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

४. पदट्ठानहारसम्पातविभावना

६६. येन येन युत्तिहारसम्पातेन सुत्तप्पदेसत्थानं युत्तिभावो आचरियेन विभावितो, अम्हेहि च ञातो, सो युत्तिहारसम्पातो परिपुण्णो, ‘‘कतमो पदट्ठानहारसम्पातो’’ति पुच्छितब्बत्ता ‘‘तत्थ कतमो पदट्ठानो हारसम्पातो’’ति पुच्छति.

पुच्छित्वा यस्मिं सुत्तप्पदेसे वुत्तानि पदट्ठानानि नीहरितानि, तं सुत्तप्पदेसं नीहरितुं ‘‘तस्मा रक्खितचित्तस्स, सम्मासङ्कप्पगोचरोति गाथा’’ति वुत्ता. गाथात्थो वुत्तोव. ‘‘कतमे गाथात्था कतमेसं धम्मानं पदट्ठानानी’’ति पुच्छितब्बत्ता ‘‘तस्मा रक्खितचित्तस्सा’’तिआदि वुत्तं. ‘‘तस्मा रक्खितचित्तस्सा’’ति सुत्तप्पदेसस्स अत्थभूता इन्द्रियेसु गुत्तद्वारता तिण्णं सुचरितानं पदट्ठानं नाम सुचरितपारिपूरिया आसन्नकारणत्ता. ‘‘सम्मासङ्कप्पगोचरो’’ति सुत्तप्पदेसस्स अत्थभूता नेक्खम्मसङ्कप्पादयो सम्मासङ्कप्पा समथस्स पदट्ठानं नाम कामच्छन्दआदिनीवरणविक्खम्भनस्स आसन्नकारणत्ता. ‘‘सम्मादिट्ठिपुरेक्खारो’’ति सुत्तप्पदेसस्स अत्थभूता कम्मस्सकतासम्मादिट्ठि च सप्पच्चयनामरूपदस्सनसम्मादिट्ठि ¶ च विपस्सनाय पदट्ठानं नाम अनिच्चानुपस्सनादीनं विसेसकारणत्ता. ‘‘ञत्वान उदयब्बय’’न्ति सुत्तप्पदेसस्स अत्थभूता उदयब्बयानुपस्सनापञ्ञा दस्सनभूमिया पदट्ठानं नाम पठममग्गाधिगमस्स आसन्नकारणत्ता. ‘‘थिनमिद्धाभिभू भिक्खू’’ति सुत्तप्पदेसस्स अत्थभूतं थिनमिद्धाभिभवनं वीरियस्स पदट्ठानं नाम आसन्नकारणत्ता. ‘‘सब्बा दुग्गतियो जहे’’ति सुत्तप्पदेसस्स अत्थभूता पहातब्बजहनभावनाय अरियमग्गभावनाय पदट्ठानं नाम पहातब्बप्पहानेन अरियमग्गभावनापारिपूरिसम्भवतो.

‘‘एत्तकोव ¶ पदट्ठानहारसम्पातो परिपुण्णो’’ति वत्तब्बत्ता ‘‘नियुत्तो पदट्ठानो हारसम्पातो’’ति वुत्तं. येन येन संवण्णनाविसेसभूतेन पदट्ठानहारसम्पातभूतेन सुत्तप्पदेसत्थानि पदट्ठानानि नीहरितानि, सो सो संवण्णनाविसेसभूतो पदट्ठानहारसम्पातो नियुत्तो यथारहं निद्धारेत्वा युज्जितब्बोति अत्थो गहेतब्बोति.

इति पदट्ठानहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

५. लक्खणहारसम्पातविभावना

६७. येन येन पदट्ठानहारसम्पातेन सुत्तप्पदेसत्थानि पदट्ठानानि आचरियेन निद्धारितानि, अम्हेहि च ञातानि, सो पदट्ठानहारसम्पातो परिपुण्णो, ‘‘कतमो लक्खणहारसम्पातो’’ति पुच्छितब्बत्ता ‘‘तत्थ कतमो लक्खणो हारसम्पातो’’तिआदि वुत्तं. तत्थ तेसु देसनाहारसम्पातादीसु सोळससु हारसम्पातेसु कतमो संवण्णनाविसेसो लक्खणहारसम्पातो नामाति पुच्छति.

‘‘कतमेहि सुत्तत्थेहि समानलक्खणा कतमे धम्मा गहिता’’ति पुच्छितब्बत्ता ‘‘तस्मा’’तिआदि वुत्तं. ‘‘तस्मा रक्खितचित्तस्स, सम्मासङ्कप्पगोचरो’’ति सुत्तप्पदेसेन वुत्तं इदं रक्खणं सतिन्द्रियं गहितं, सतिन्द्रिये ¶ गहिते सद्धादिपञ्चिन्द्रियानि गहितानि भवन्ति इन्द्रियट्ठेन समानलक्खणत्ता. ‘‘सम्मादिट्ठिपुरेक्खारो’’ति सुत्तप्पदेसेन वुत्ता सम्मादिट्ठि गहिता, सम्मादिट्ठिया गहिताय अरियो अट्ठङ्गिको मग्गो गहितो भवति. तं किस्स हेतूति कारणं पुच्छति. पुच्छित्वा कारणमाह ‘‘सम्मादिट्ठितो ही’’तिआदिना. सम्मादिट्ठिहेतुतो सम्मासङ्कप्पो हि यस्मा पभवति, तस्मा, सम्मासङ्कप्पतो सम्मावाचा हि यस्मा पभवति, तस्मा, सम्मावाचातो सम्माकम्मन्तो हि यस्मा पभवति, तस्मा, सम्माकम्मन्ततो सम्माआजीवो हि यस्मा पभवति, तस्मा, सम्माआजीवतो सम्मावायामो हि यस्मा पभवति, तस्मा, सम्मावायामतो सम्मासतिहि यस्मा पभवति, तस्मा, सम्मासतितो ¶ सम्मासमाधि हि यस्मा पभवति, तस्मा, सम्मासमाधितो सम्माविमुत्ति हि यस्मा पभवति, तस्मा, सम्माविमुत्तितो सम्माविमुत्तिञाणदस्सनं हि यस्मा पभवति, तस्मा, अरियो अट्ठङ्गिको मग्गो गहितो भवतीति.

‘‘एत्तकोव लक्खणहारसम्पातो परिपुण्णो’’ति वत्तब्बत्ता ‘‘नियुत्तो लक्खणो हारसम्पातो’’ति वुत्तं. येन येन संवण्णनाविसेसभूतेन लक्खणहारसम्पातेन सुत्तप्पदेसत्था समानलक्खणेन गहिता भवन्ति, सो सो संवण्णनाविसेसभूतो लक्खणहारसम्पातो नियुत्तो यथारहं निद्धारेत्वा युज्जितब्बोति अत्थो गहितोति.

इति लक्खणहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

६. चतुब्यूहहारसम्पातविभावना

६८. येन येन लक्खणहारसम्पातेन सुत्तप्पदेसत्था समानलक्खणेन गहिता, सो लक्खणहारसम्पातो परिपुण्णो, ‘‘कतमो चतुब्यूहहारसम्पातो’’ति पुच्छितब्बत्ता ‘‘तत्थ कतमो चतुब्यूहो हारसम्पातो’’तिआदि वुत्तं. तत्थ तेसु देसनाहारसम्पातादीसु सोळससु हारसम्पातेसु कतमो संवण्णनाविसेसो चतुब्यूहहारसम्पातो नामाति पुच्छति.

‘‘कतमस्मिं ¶ सुत्ते कतमे निरुत्याधिप्पायनिदानपुब्बापरानुसन्धयो निद्धारिता’’ति पुच्छितब्बत्ता ‘‘तस्मा’’तिआदि वुत्तं. ‘‘तस्मा रक्खितचित्तस्सा’’ति सुत्तप्पदेसे ‘‘रक्खीयते रक्खित’’न्ति निरुत्तिं ‘‘परिपालीयती’’ति इमिना परियायेन दस्सेति, इतिसद्दस्स आद्यत्थत्ता ‘‘चिन्तेतीति चित्तं, अत्तनो सन्तानं चिनोतीति चित्तं, पच्चयेहि चितन्ति चित्तं, चित्तविचित्तट्ठेन चित्तं, चित्तकरणट्ठेन चित्तं, रक्खितं चित्तं यस्साति रक्खितचित्तो. सम्मा सङ्कप्पेतीति सम्मासङ्कप्पो, गावो चरन्ति एत्थाति गोचरो, गोचरो वियाति गोचरो, सम्मासङ्कप्पो गोचरो अस्साति सम्मासङ्कप्पगोचरो. सम्मा पस्सतीति सम्मादिट्ठि, सम्मादिट्ठि पुरेक्खारो ¶ अस्साति सम्मादिट्ठिपुरेक्खारो. जानातीति ञत्वान. उदयो च वयो च उदयब्बयं. थिनञ्च मिद्धञ्च थिनमिद्धं, अभिभवतीति अभिभू, थिनमिद्धं अभिभूति थिनमिद्धाभिभू. भिक्खतीति भिक्खू’’ति निरुत्तिपि नीहरिता. तेनाह – ‘‘इति-सद्दो आद्यत्थो’’ति (नेत्ति. अट्ठ. ६८). एसा वुत्तप्पकारा पञ्ञत्ति निरुत्ति नामाति नीहरिता.

इध सुत्तप्पदेसे भगवतो को अधिप्पायोति चे पुच्छेय्य, ये सप्पुरिसा सब्बाहि दुग्गतीहि परिमुच्चितुकामा भविस्सन्ति, ते सप्पुरिसा धम्मचारिनो रक्खितचित्ता भविस्सन्तीति अयं अधिप्पायो. एत्थ ‘‘तस्मा रक्खितचित्तस्सा’’तिआदिसुत्तप्पदेसे भगवतो अधिप्पायोति नीहरितब्बो.

‘‘कतमं निदान’’न्ति चे पुच्छेय्य, कोकालिको सारिपुत्तमोग्गल्लानेसु थेरेसु चित्तं अरक्खित्वा पदोसयित्वा महापदुमनिरये यस्मा उपपन्नो, यस्मा भगवा च सतिआरक्खेन समन्नागतो सब्बा दुग्गतियो जहति, तस्मा च सब्बा दुग्गतियो जहितुकामो भिक्खु सप्पुरिसो रक्खितचित्तो अस्स भवेय्याति निदानं नीहरितब्बं.

‘‘कतमो पुब्बापरसन्धी’’ति चे पुच्छेय्य, सुत्तम्हि ‘‘सतिया चित्तं रक्खितब्ब’’न्ति यं वचनं वुत्तं, तेन पुब्बवचनेन अयं ‘‘तस्मा रक्खितचित्तस्स…पे… सब्बा दुग्गतियो जहे’’ति सुत्तप्पदेसो अनुसन्धि संसन्दति समेतीति पुब्बपरानुसन्धि निद्धारितब्बोति.

‘‘एत्तकोव ¶ चतुब्यूहहारसम्पातो परिपुण्णो’’ति वत्तब्बत्ता ‘‘नियुत्तो चतुब्यूहो हारसम्पातो’’ति वुत्तं. येन येन संवण्णनाविसेसभूतेन चतुब्यूहहारसम्पातेन निरुत्याधिप्पायनिदानपुब्बापरानुसन्धि निद्धारितब्बो, सो सो संवण्णनाविसेसभूतो चतुब्यूहहारसम्पातो नियुत्तो यथारहं निद्धारेत्वा युज्जितब्बोति अत्थो गहेतब्बोति.

इति चतुब्यूहहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

७. आवट्टहारसम्पातविभावना

६९. येन ¶ येन चतुब्यूहहारसम्पातेन निरुत्याधिप्पायनिदानपुब्बापरानुसन्धयो विभत्ता, सो चतुब्यूहहारसम्पातो परिपुण्णो, ‘‘कतमो आवट्टहारसम्पातो’’ति पुच्छितब्बत्ता ‘‘तत्थ कतमो आवट्टो हारसम्पातो’’तिआदि वुत्तं. तत्थ कतमो संवण्णनाविसेसो आवट्टहारसम्पातो नामाति पुच्छति.

‘‘कतमे सुत्तत्था कथं आवट्टेतब्बा’’ति पुच्छितब्बत्ता ‘‘तस्मा’’तिआदि वुत्तं. नेक्खम्मसङ्कप्पसङ्खातसम्मासङ्कप्पबहुलो कसिणादिवसेन, अविहिंसासङ्कप्पसङ्खातसम्मासङ्कप्पबहुलो मेत्तादिवसेन अधिगताय चित्तेकग्गताय चित्तं ठपेन्तो संकिलेसतो रक्खितचित्तो नाम होति, ‘‘तस्मा रक्खितचित्तस्स, सम्मासङ्कप्पगोचरो’’ति इमिना रक्खितचित्ते वुत्ते सति या एकग्गता आवट्टेतब्बा, सा अयं एकग्गता समथो. ‘‘सम्मादिट्ठिपुरेक्खारो’’ति इमिना सम्मादिट्ठिपुरेक्खारे वुत्ते सति या पञ्ञा आवट्टेतब्बा, सा अयं पञ्ञा विपस्सना. ‘‘ञत्वान उदयब्बय’’न्ति इमिना उदयब्बयञाणसमन्नागते वुत्ते सति या दुक्खपरिजानना आवट्टेतब्बा, सा अयं दुक्खपरिजानना दुक्खपरिञ्ञा. ‘‘थिनमिद्धाभिभू भिक्खू’’ति इमिना पुग्गलाधिट्ठानेन यं थिनमिद्धाभिभवनं वुत्तं, इदं थिनमिद्धाभिभवनं समुदयप्पहानं. ‘‘सम्मा दुग्गतियो जहे’’ति इमिना यो सब्बदुग्गतिजहनसङ्खातो अनुप्पादो वुत्तो, सो अयं अनुप्पादो ¶ निरोधो. इति दुक्खपरिञ्ञाय परिञ्ञेतब्बं दुक्खसच्चं आवट्टेतब्बं, समुदयप्पहानेन पहातब्बं समुदयसच्चं आवट्टेतब्बं, निरोधेन निरोधसच्चं आवट्टेतब्बं, समथविपस्सनाहि मग्गसच्चं आवट्टेतब्बन्ति इमानि चत्तारि सच्चानि आवट्टेतब्बानीति.

‘‘एत्तकोव आवट्टो हारसम्पातो परिपुण्णो’’ति वत्तब्बत्ता ‘‘नियुत्तो आवट्टो हारसम्पातो’’ति वुत्तं. येन येन संवण्णनाविसेसभूतेन आवट्टहारसम्पातेन समथादयो आवट्टेतब्बा ¶ , सो सो संवण्णनाविसेसभूतो आवट्टहारसम्पातो नियुत्तो यथारहं निद्धारेत्वा युज्जितब्बोति अत्थो गहेतब्बोति.

इति आवट्टहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

८. विभत्तिहारसम्पातविभावना

७०. येन येन आवट्टहारसम्पातेन सुत्तत्था आवट्टेतब्बा, सो आवट्टहारसम्पातो परिपुण्णो, ‘‘कतमो विभत्तिहारसम्पातो’’ति पुच्छितब्बत्ता ‘‘तत्थ कतमो विभत्तिहारसम्पातो’’तिआदि वुत्तं. तत्थ कतमो संवण्णनाविसेसो विभत्तिहारसम्पातो नामाति पुच्छति.

‘‘कतमे सुत्तत्था कत्थ विभत्ता’’ति पुच्छितब्बत्ता ‘‘तस्मा रक्खितचित्तस्सा’’तिआदि वुत्तं. या ‘‘तस्मा…पे… गोचरो’’ति गाथा वुत्ता, तिस्सं गाथायं वुत्तो कुसलपक्खो धम्मो कुसलपक्खेन धम्मेन सतिसंवरो धम्मो निद्दिसितब्बो विभजितब्बो, अकुसलपक्खेन धम्मेन निद्दिसितब्बो विभजितब्बो.

कथं? ‘‘रक्खितचित्तस्सा’’ति पदेन वुत्तो कुसलपक्खो सतिसंवरो धम्मो ‘‘चक्खुद्वारसंवरो…पे… मनोद्वारसंवरो’’ति छब्बिधेन कुसलपक्खेन धम्मेन निद्दिसितब्बो विभजितब्बो. ‘‘सम्मासङ्कप्पो’’ति पदेन वुत्तो कुसलपक्खो सम्मासङ्कप्पो धम्मो ‘‘नेक्खम्मसङ्कप्पो अब्यापाद-सङ्कप्पो अविहिंसासङ्कप्पो’’ति तिविधेन कुसलपक्खेन धम्मेन ¶ विभजितब्बो. ‘‘सम्मादिट्ठिपुरेक्खारो’’ति पदेन वुत्ता कुसलपक्खा धम्मजाति ‘‘दुक्खे ञाणं, दुक्खसमुदये ञाणं, दुक्खनिरोधे ञाणं, दुक्खनिरोधगामिनिपटिपदाय ञाणं, पुब्बन्ते ञाणं, अपरन्ते ञाणं, पुब्बन्तापरन्ते ञाणं, इदप्पच्चयतापटिच्चसमुप्पन्नेसु धम्मेसु ञाण’’न्ति (ध. स. १०६३) अट्ठविधेन कुसलपक्खेन धम्मेन विभजितब्बा. ‘‘ञत्वान उदयब्बय’’न्ति पदेन वुत्तं कुसलपक्खउदयब्बयञाणं धम्मजातं पञ्ञासविधेन उदयब्बयञाणेन कुसलपक्खेन विभजितब्बं. ‘‘थिनमिद्धाभिभू’’ति पदेन वुत्तं थिनमिद्धाभिभवनं कुसलपक्खं धम्मजातं ‘‘सोतापत्तिमग्गाभिभवनं ¶ सकदागामिमग्गाभिभवनं अनागामिमग्गाभिभवनं अरहत्तमग्गाभिभवन’’न्ति चतुब्बिधेन कुसलपक्खेन विभजितब्बं.

सतिसंवरो कुसलपक्खो ‘‘लोकियो सतिसंवरो, लोकुत्तरो सतिसंवरो’’ति दुब्बिधेन विभजितब्बोति. लोकियो सतिसंवरो कामावचरोवाति एकविधेन विभजितब्बो. लोकुत्तरा सतिसंवरो ‘‘दस्सनभूमि, भावनाभूमी’’ति दुब्बिधेन विभजितब्बो. कामावचरो सतिसंवरो ‘‘कायानुपस्सनासतिसंवरो वेदनानुपस्सनासतिसंवरो चित्तानुपस्सनासतिसंवरो धम्मानुपस्सनासतिसंवरो’’ति चतुब्बिधेन विभजितब्बो. लोकुत्तरो सतिसंवरोपि तथा चतुब्बिधेन विभजितब्बो. सम्मासङ्कप्पसम्मादिट्ठियोपि लोकियलोकुत्तरवसेन दुब्बिधादिभेदेन विभजितब्बा. पदट्ठानेनपि पदट्ठानहारसम्पाते वुत्तनयेन विभजितब्बा.

अकुसलपक्खेन ‘‘अरक्खितेन चित्तेना’’ति पदेन वुत्तो असंवरो ‘‘चक्खुअसंवरो …पे… कायअसंवरो, चोपनकायअसंवरो, वाचाअसंवरो, मनोअसंवरो’’ति अट्ठविधेन विभजितब्बो. ‘‘मिच्छादिट्ठिहतेना’’ति पदेन गहितो मिच्छासङ्कप्पो ‘‘कामवितक्को ब्यापादवितक्को विहिंसावितक्को’’ति तिविधेन विभजितब्बो. ‘‘मिच्छादिट्ठी’’ति पदेन वुत्ता मिच्छादिट्ठि ‘‘दुक्खे अञ्ञाणं…पे…इदप्पच्चयतापटिच्चसमुप्पन्नेसु धम्मेसु अञ्ञाण’’न्ति अट्ठविधेन विभजितब्बा, द्वासट्ठिदिट्ठिविधेनपि विभजितब्बा. थिनमिद्धं पञ्चविधेन ससङ्खारिकविधेन विभजितब्बं.

‘‘एत्तकोव विभत्तिहारसम्पातो परिपुण्णो’’ति वत्तब्बत्ता ‘‘नियुत्तो विभत्तिहारसम्पातो’’ति वुत्तं. येन येन संवण्णनाविसेसभूतेन विभत्तिहारसम्पातेन सुत्तप्पदेसत्था विभत्ता, सो सो ¶ संवण्णनाविसेसभूतो विभत्तिहारसम्पातो नियुत्तोति यथारह निद्धारेत्वा युज्जितब्बोति अत्थो गहेतब्बोति.

इति विभत्तिहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

९. परिवत्तनहारसम्पातविभावना

७१. येन ¶ येन विभत्तिहारसम्पातेन सुत्तप्पदेसत्था विभत्ता, सो विभत्तिहारसम्पातो परिपुण्णो, ‘‘कतमो परिवत्तनहारसम्पातो’’ति पुच्छितब्बत्ता ‘‘तत्थ कतमो परिवत्तनो हारसम्पातो’’तिआदि वुत्तं.

‘‘कतमे सुत्तप्पदेसत्था कथं परिवत्तेतब्बा’’ति पुच्छितब्बत्ता ‘‘तस्मा’’तिआदि वुत्तं. या ‘‘तस्मा…पे… गोचरो’’ति गाथा वुत्ता, ताय गाथाय या समथविपस्सना निद्धारिता, ताय समथविपस्सनाय भाविताय अकुसलानं निरोधो फलं पयोजनं होति, परिञ्ञातं दुक्खं होति, समुदयो पहीनो होति, मग्गो भावितो होतीति परिवत्तेतब्बो. पटिपक्खेन पन समथविपस्सनाय अभाविताय अकुसलानं अनिरोधो, अपरिञ्ञातं दुक्खं, समुदयो अप्पहीनो, मग्गो अभावितो होतीति परिवत्तेतब्बो.

‘‘एत्तकोव परिवत्तनहारसम्पातो परिपुण्णो’’ति वत्तब्बत्ता ‘‘नियुत्तो परिवत्तनो हारसम्पातो’’ति वुत्तं. येन येन संवण्णनाविसेसभूतेन परिवत्तनहारसम्पातेन सुत्तप्पदेसत्था परिवत्तेतब्बा, सो सो संवण्णनाविसेसभूतो परिवत्तनहारसम्पातो नियुत्तो यथारहं नीहरित्वा युज्जितब्बोति अत्थो गहेतब्बोति.

इति परिवत्तनहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

१०. वेवचनहारसम्पातविभावना

७२. येन ¶ येन परिवत्तनहारसम्पातेन सुत्तप्पदेसत्था परिवत्तेतब्बा, सो परिवत्तनो हारसम्पातोति परिपुण्णो, ‘‘कतमो वेवचनो हारसम्पातो’’ति पुच्छितब्बत्ता ‘‘तत्थ कतमो वेवचनो हारसम्पातो’’तिआदि वुत्तं.

‘‘कतमेसं ¶ सुत्तप्पदेसत्थानं, सुत्तपदानं वा कतमानि वेवचनानी’’ति पुच्छितब्बत्ता ‘‘तस्मा’’तिआदि वुत्तं. या ‘‘तस्मा…पे… गोचरो’’ति गाथा वुत्ता, ताय गाथाय ‘‘रक्खितचित्तस्सा’’ति पदेन वुत्तस्स चित्तस्स, ‘‘रक्खितचित्तस्सा’’ति एत्थ चित्तस्स पदस्स वा ‘‘चित्तं…पे… विजानितत्त’’न्ति यं वचनं वुत्तं, इदं वचनं वेवचनं, ‘‘मानसं हदय’’न्तिआदिवचनम्पि (ध. स. १७, ६३) चित्तस्स वेवचनं. ‘‘सम्मासङ्कप्पगोचरो’’ति एत्थ सम्मासङ्कप्पस्स ‘‘नेक्खम्मसङ्कप्पो अब्यापादसङ्कप्पो अविहिंसासङ्कप्पो’’ति यं वचनं वुत्तं, इदं वचनं वेवचनं, ‘‘तक्को वितक्को’’तिआदि (ध. स. ७) वचनम्पि सम्मासङ्कप्पस्स वेवचनं. ‘‘सम्मादिट्ठिपुरेक्खारो’’ति एत्थ सम्मादिट्ठिपदस्स ‘‘सम्मादिट्ठि नाम पञ्ञासत्थं पञ्ञाखग्गो पञ्ञारतनं पञ्ञापतोदो पञ्ञापासादो’’ति यं वचनं वुत्तं, इदं वचनं वेवचनं, ‘‘पञ्ञा पजानना विचयो’’तिआदि (ध. स. १६) वचनम्पि सम्मादिट्ठिपदस्स वेवचनं. ‘‘थिनं थियना थियितत्तं चित्तस्स, चित्तस्स अकल्लता अकम्मञ्ञता ओनाहो परियोनाहो अन्तोसङ्कोचो’’ति (ध. स. ११६२-११६३) यं वचनं वुत्तं, इदं वचनं थिनस्स वेवचनं. ‘‘कायस्स अकल्लता अकम्मञ्ञता कायालसियं सोप्पं सुपना सुप्पितत्त’’न्ति (ध. स. ११६३) यं वचनं वुत्तं, इदं वचनं मिद्धस्स वेवचनं. ‘‘भिक्खको भिक्खू’’तिआदिकं (पारा. ४५; विभ. ५१०) यं वचनं वुत्तं, इदं वचनं भिक्खुपदस्स वेवचनं. ‘‘दुग्गति अपायो विनिपातो वट्टदुक्खं संसारो’’तिआदिकं यं वचनं वुत्तं, इदं वचनं दुग्गतिपदस्स वेवचनं. इति वेवचनानि नीहरितानि.

‘‘एत्तकोव वेवचनहारसम्पातो परिपुण्णो’’ति वत्तब्बत्ता ‘‘नियुत्तो वेवचनो हारसम्पातो’’ति वुत्तं. येन येन संवण्णनाविसेसभूतेन वेवचनहारसम्पातेन वेवचनानि नीहरितानि, सो सो ¶ संवण्णनाविसेसभूतो वेवचनहारसम्पातो नियुत्तो यथासम्भवं नीहरित्वा युज्जितब्बोति अत्थो गहितोति.

इति वेवचनहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

११. पञ्ञत्तिहारसम्पातविभावना

७३. येन ¶ येन वेवचनहारसम्पातेन वेवचनानि निद्धारितानि, सो वेवचनहारसम्पातो परिपुण्णो, ‘‘कतमो पञ्ञत्तिहारसम्पातो’’ति पुच्छितब्बत्ता ‘‘तत्थ कतमो पञ्ञत्तिहारसम्पातो’’तिआदि वुत्तं.

‘‘कतमा सुत्तप्पदेसभूता पञ्ञत्ति कतमेसं धम्मानं पञ्ञत्ती’’ति पुच्छितब्बत्ता ‘‘तस्मा’’तिआदि वुत्तं. ‘‘तस्मा रक्खितचित्तस्सा’’ति पञ्ञत्ति सतिया पदट्ठानस्स रक्खितब्बस्स चित्तस्स पञ्ञापनतो सतिया पदट्ठानपञ्ञत्ति नाम. सतिया हि रक्खितब्बं चित्तं सतिया पदट्ठानं अधिट्ठानं नाम. तेनाह अट्ठकथायं – ‘‘अधिट्ठहित्वा रक्खन्तिया सतिया रक्खियमानं चित्तं तस्सा अधिट्ठानं विय होती’’ति. ‘‘सम्मासङ्कप्पगोचरो’’ति पञ्ञत्ति समथस्स भावनाय पञ्ञापनतो समथस्स भावनापञ्ञत्ति नाम. ‘‘सम्मादिट्ठिपुरेक्खारो, ञत्वान उदयब्बय’’न्ति पञ्ञत्ति दस्सनभूमिया निक्खेपस्स पञ्ञापनतो निक्खेपपञ्ञत्ति नाम. ‘‘थिनमिद्धाभिभू भिक्खू’’ति समुदयस्स अनवसेसप्पहानस्स पञ्ञापनतो अनवसेसप्पहानपञ्ञत्ति नाम. ‘‘सब्बा दुग्गतियो जहे’’ति पञ्ञत्ति मग्गस्स अरियमग्गस्स भावनाय पञ्ञापनतो भावनापञ्ञत्ति नाम.

‘‘एत्तकोव पञ्ञत्तिहारसम्पातो परिपुण्णो’’ति वत्तब्बत्ता ‘‘नियुत्तो पञ्ञत्तिहारसम्पातो’’ति वुत्तं. येन येन संवण्णनाविसेसभूतेन पञ्ञत्तिहारसम्पातेन पञ्ञत्तिप्पभेदा निद्धारिता, सो सो ¶ संवण्णनाविसेसभूतो पञ्ञत्तिहारसम्पातो नियुत्तो यथारहं निद्धारेत्वा युज्जितब्बोति अत्थो गहेतब्बोति.

इति पञ्ञत्तिहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

१२. ओतरणहारसम्पातविभावना

७४. येन ¶ येन पञ्ञत्तिहारसम्पातेन पञ्ञत्तिप्पभेदा निद्धारिता, सो पञ्ञत्तिहारसम्पातो परिपुण्णो, ‘‘कतमो ओतरणो हारसम्पातो’’ति पुच्छितब्बत्ता ‘‘तत्थ कतमो ओतरणो हारसम्पातो’’तिआदिमाह.

‘‘तत्थ तिस्सं गाथायं कतमानि इन्द्रियानि निद्धारेत्वा कतमेहि निद्धारितेहि धम्मेहि ओतरती’’ति पुच्छितब्बत्ता ‘‘तस्मा’’तिआदि वुत्तं. या ‘‘तस्मा रक्खितचित्तस्सा’’तिआदिगाथा वुत्ता, तिस्सं गाथायं ‘‘तस्मा…पे… पुरेक्खारो’’ति सुत्तप्पदेसेन सम्मादिट्ठि गहिता, सम्मादिट्ठिया गहिताय पञ्चिन्द्रियानि सद्धादिपञ्चिन्द्रियानि गहितानि भवन्ति.

तानियेव सद्धादिपञ्चिन्द्रियानि विज्जाय उपकारत्ता वा पदट्ठानत्ता वा विज्जा भवन्ति, विज्जुप्पादा तादिसाय विज्जाय उप्पादा उप्पादहेतुतो अविज्जानिरोधो सम्भवति, अविज्जानिरोधा सङ्खारनिरोधो सम्भवति…पे… जातिनिरोधा जरामरणनिरोधो सम्भवतीति. अयं ओतरणा पटिच्चसमुप्पादेन पञ्चिन्द्रियानं ओतरणा नाम.

तानियेव पञ्चिन्द्रियानि सीलक्खन्धेन समाधिक्खन्धेन पञ्ञाक्खन्धेन तीहि खन्धेहि सङ्गहितानि भवन्ति सद्धावीरियेहि सीलसम्भवतो, सतिया च पञ्ञानुवत्तकत्ता. अयं ओतरणा खन्धेहि पञ्चिन्द्रियानं ओतरणा नाम.

तानियेव पञ्चिन्द्रियानि सङ्खारपरियापन्नानि भवन्ति. ये सङ्खारा अनासवा भवन्ति, भवङ्गा भवहेतू नो भवन्ति, ते अनासवा सङ्खारा धम्मधातुसङ्गहिता भवन्ति धम्मधातुया अन्तोगधत्ता. अयं ओतरणा धातूहि पञ्चिन्द्रियानं ओतरणा नाम.

सा ¶ अनासवा धम्मधातु धम्मायतनपरियापन्ना भवति, यं आयतनं अनासवं भवति, भवङ्गं भवहेतु नो भवति. अयं ओतरणा आयतनेहि धम्मधातुया ओतरणा नाम.

‘‘एत्तकोव ओतरणो हारसम्पातो परिपुण्णो’’ति वत्तब्बत्ता ‘‘नियुत्तो ओतरणो हारसम्पातो’’ति ¶ वुत्तं. येन येन संवण्णनाविसेसभूतेन ओतरणहारसम्पातेन सुत्तप्पदेसत्था ओतरितब्बा, सो सो संवण्णनाविसेसभूतो ओतरणो हारसम्पातो नियुत्तो यथारहं निद्धारेत्वा युज्जितब्बोति अत्थो गहेतब्बोति.

इति ओतरणहारसम्पाते सत्तिबलानुरूपा रचिता

विभावना निट्ठिता.

पण्डितेहि पन…पे… गहेतब्बोति.

इतो पट्ठाय ‘‘तत्थ कतमो’’तिआदिअनुसन्ध्यत्थो च परियोसाने ‘‘नियुत्तो’’तिआदिअनुसन्ध्यत्थो च वुत्तनयानुसारेनेव विञ्ञातब्बो. कत्थचि कत्थचि पाठे अपाकटंयेव यथाबलं कथयिस्साम.

१३. सोधनहारसम्पातविभावना

७५. यत्थाति यस्मिं पञ्हे. आरम्भो अत्थो सुद्धो परिपुण्णो, सो पञ्हो निरवसेसतो विस्सज्जितो भवति. यत्थ पञ्हे पन आरम्भो अत्थो न सुद्धो अपरिपुण्णो कोचि विस्सज्जेतब्बो अवसिट्ठो, सो पञ्हो ताव विस्सज्जितो न भवति.

१५. परिक्खारहारसम्पातविभावना

७७. ‘‘तस्मा रक्खितचित्तस्सा’’ति पदेन यो सतिसंवरो वुत्तो, अयं सतिसंवरो समथस्स परिक्खारो. ‘‘सम्मासङ्कप्पगोचरो’’ति पदेन यो सम्मासङ्कप्पो वुत्तो, सो सम्मासङ्कप्पो विपस्सनाय परिक्खारोति विभजित्वा योजेतब्बो.

१६. समारोपनहारसम्पातविभावना

७८. ‘‘तस्मा ¶ ¶ रक्खितचित्तस्सा’’ति पदेन यं रक्खितचित्तं वुत्तं, तं रक्खितचित्तं तिण्णं सुचरितानं कम्मानं पदट्ठानं. सम्मादिट्ठिया भाविताय अरियो अट्ठङ्गिको मग्गो भावितो भवति एकतो भावितब्बत्ता, पदट्ठानकारणत्ता च. तेन वुत्तं – ‘‘सम्मादिट्ठितो ही’’तिआदि. यस्स अरहतो समाधिविमुत्ति भवति, अयं अरहा अनुपादिसेसो पुग्गलो, अयं समाधिविमुत्ति अनुपादिसेसा निब्बानधातु.

‘‘देसनाहारसम्पातादिको हारसम्पातो येन सोळसप्पभेदभावेन सुत्तप्पदेसत्थे निद्धारेत्वा युज्जितो, सोळसप्पभेदभावो केन अम्हेहि सद्दहितब्बो’’ति वत्तब्बत्ता ‘‘तेनाहा’’तिआदि वुत्तं. तेन सोळसप्पभेदभावेन आयस्मा महाकच्चानो ‘‘सोळस…पे… सुत्त’’न्ति यं वचनं आह, तेन वचनेन सोळसप्पभेदभावो तुम्हेहि सद्दहितब्बो.

‘‘एत्तकोव हारसम्पातो परिपुण्णो’’ति वत्तब्बत्ता ‘‘नियुत्तो हारसम्पातो’’ति वुत्तं. येन येन संवण्णनाविसेसभूतेन देसनाहारसम्पातेन सुत्तप्पदेसत्था निद्धारिता, सो सो संवण्णनाविसेसभूतो देसनाहारसम्पातादिहारसम्पातो नियुत्तो यथारहं निद्धारेत्वा युज्जितब्बोति अत्थो गहेतब्बो, अट्ठकथायञ्च (नेत्ति. अट्ठ. ७३, ७६) तथा निद्धारेत्वा युज्जितोति.

इति देसनाहारसम्पातादिहारसम्पाते सत्तिबलानुरूपा

रचिता विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

नयसमुट्ठानविभावना

७९. येन येन संवण्णनाविसेसभूतेन देसनाहारसम्पातादिना हारसम्पातेन एकसुत्तप्पदेसत्था निद्धारेत्वा विभत्ता, सो ¶ संवण्णनाविसेसभूतो देसनाहारसम्पातादिहारसम्पातो परिपुण्णो, ‘‘कतमं नयसमुट्ठान’’न्ति पुच्छितब्बत्ता ‘‘तत्थ कतमं नयसमुट्ठान’’न्तिआदि आरद्धं. अट्ठकथायं पन –‘‘एवं नानासुत्तवसेन, एकसुत्तवसेन च ¶ हारविचारं दस्सेत्वा इदानि नयविचारं दस्सेतुं ‘तत्थ कतमं नयसमुट्ठान’न्तिआदि आरद्ध’’न्ति (नेत्ति. अट्ठ. ७९) वुत्तं. ‘‘तत्थ कतमो नन्दियावट्टनयो’’तिआदिं अनारभित्वा ‘‘तत्थ कतमं नयसमुट्ठान’’न्तिआदिआरम्भने कारणं अट्ठकथायं वुत्तमेव. तत्थ तत्थाति तेसु हारादीसु यो अत्थनयो संवण्णनानयेन निद्दिट्ठो, तस्सेव अत्थनयस्स समुट्ठानं भूमिं पुच्छति ‘‘कतमं नयसमुट्ठान’’न्ति.

किञ्चापि संवण्णनानया निद्दिट्ठा, तथापि अत्थनयसंवण्णनानयानं विसेसस्स पाकटं कातुं पुन कथयिस्साम. तण्हाअविज्जाहि संकिलेसपक्खस्स सुत्तत्थस्स चतुसच्चयोजनमुखेन नयनलक्खणो संवण्णनाविसेसो चेव समथविपस्सनाहि वोदानपक्खस्स सुत्तत्थस्स चतुसच्चयोजनमुखेन नयनलक्खणो संवण्णनाविसेसो च नन्दियावट्टो नयो नाम. तीहि अकुसलमूलेहि लोभादीहि संकिलेसपक्खस्स सुत्तत्थस्स चतुसच्चयोजनमुखेन नयनलक्खणो संवण्णनाविसेसो चेव तीहि कुसलमूलेहि अलोभादीहि वोदानपक्खस्स सुत्तत्थस्स चतुसच्चयोजनमुखेन नयनलक्खणो संवण्णनाविसेसो च तिपुक्खलो नयो नाम. चतूहि सुभसञ्ञादीहि विपल्लासेहि सकलसंकिलेसपक्खस्स सुत्तत्थस्स चतुसच्चयोजनमुखेन नयनलक्खणो संवण्णनाविसेसो चेव चतूहि असुभसञ्ञादीहि अविपल्लासेहि सतिपट्ठानेहि, सद्धिन्द्रियेहि वा वोदानपक्खस्स सुत्तत्थस्स चतुसच्चयोजनमुखेन नयनलक्खणो संवण्णनाविसेसो च सीहविक्कीळितो नयो नामाति वुत्ता नया संवण्णनानया नाम. तेसं संवण्णनानयानं समुट्ठानं पुच्छति ‘‘कतमं नयसमुट्ठान’’न्ति.

नया पन नानासुत्ततो निद्धारितेहि तण्हाअविज्जादीहि मूलपदेहि चतुसच्चयोजनाय नयतो अनुबुज्झियमानो दुक्खादिअत्थो. सो हि मग्गञाणं नयति सम्पापेतीति ‘‘नयो’’ति वुत्तो, सो अत्थनयो नाम. तस्सेव अत्थनयस्स समुट्ठानं पुच्छति ‘‘कतमं नयसमुट्ठान’’न्ति? तस्मा ¶ चतुसच्चयोजनाय नयग्गाहतो नीयति अनुपुच्छीयतीति नयो, को सो? सुत्तत्थभूतो दुक्खादिको अत्थो. नयति मग्गञाणं पापेतीति वा नयो, दुक्खादिको अत्थोव. तेनाह – ‘‘अनुबुज्झियमानो दुक्खादिअत्थो. सो हि मग्गञाणं नयति सम्पापेतीति नयो’’ति (नेत्ति. अट्ठ. ७९). समुट्ठहन्ति नया एतेनाति समुट्ठानं, किं तं? अविज्जातण्हादिकारणं, तंदीपना संवण्णना च. अविज्जातण्हादिना हि दुक्खादिअत्थनया सम्भवन्ति. अथ वा अविज्जातण्हादीहि चतुसच्चयोजना समुट्ठानं नाम. तेन वुत्तं – ‘‘किं पन तं? तंतंमूलपदेहि चतुसच्चयोजना’’ति (नेत्ति. अट्ठ. ७९). एवं अत्थे गय्हमाने सति संवण्णनानयापि गहिता होन्ति, नयानं समुट्ठानं नयसमुट्ठानं, तस्मिं नयसमुट्ठाने.

‘‘कतमं ¶ नन्दियावट्टनयसमुट्ठान’’न्ति पुच्छितब्बत्ता पठमं नन्दियावट्टनयसमुट्ठानं दस्सेतुं ‘‘पुब्बा कोटि न पञ्ञायती’’तिआदि वुत्तं. नन्दियावट्टनयसमुट्ठानभूताय अविज्जाय च तण्हाय च पुब्बा कोटि ‘‘असुकस्स बुद्धस्स भगवतो उप्पज्जनकाले उप्पन्ना, असुकस्स चक्कवत्तिनो उप्पज्जनकाले उप्पन्ना’’ति न पञ्ञायति कोटिया अभावतोति योजना. ‘‘अविज्जातण्हासु कतमा नीवरणं, कतमा संयोजन’’न्ति पुच्छितब्बत्ता ‘‘तत्थ अविज्जा नीवरणं तण्हा संयोजन’’न्ति वुत्तं. तत्थाति तासु अविज्जातण्हासु. आदीनवपटिच्छादिकत्ता अविज्जा नीवरणं. भवेसु संयोजनतो तण्हा संयोजनं. ‘‘अविज्जानीवरणा सत्ता कथं विचरन्ति, कथं वुच्चन्ति, तण्हासंयोजना सत्ता कथं विचरन्ति कथं वुच्चन्ती’’ति पुच्छितब्बत्ता ‘‘अविज्जानीवरणा सत्ता’’तिआदि वुत्तं. अविज्जानीवरणमेतेसमत्थीति अविज्जानीवरणा. अविज्जाय संयुत्ता विय पवत्ता अविज्जाय अभिनिविसवत्थूसु संयुत्ता विय पवत्ता सत्ता अविज्जापक्खेन विपल्लासेन निच्चादिअभिनिवेसवत्थुभूते रूपादिआरम्मणे विचरन्ति विविधा चरन्ति पवत्तन्ति, ते निच्चादिअभिनिविसन्ता विचरन्ता सत्ता ‘‘दिट्ठिचरिता’’ति वुच्चन्ति. तण्हासंयोजनमेतेसन्ति तण्हासंयोजना. तण्हाय संयुत्ता विय पवत्ता, तण्हाय वा आरम्मणभूते वत्थुकामे संयुत्ता विय पवत्ता सत्ता तण्हापक्खेन अट्ठसततण्हाविचरितेन आरम्मणभूते वत्थुस्मिं विचरन्ति पवत्तन्तीति अत्थो.

‘‘दिट्ठिचरिता ¶ सत्ता कं पटिपत्तिं अनुयुत्ता विहरन्ति, तण्हाचरिता सत्ता कं पटिपत्तिं अनुयुत्ता विहरन्ती’’ति पुच्छितब्बत्ता ‘‘दिट्ठिचरिता’’तिआदि वुत्तं. दिट्ठिचरिता सत्ता इतो सासनतो बहिद्धा पब्बजिता होन्तापि ‘‘सुखेन अधिगन्तब्बं सुखं नत्थि, दुक्खेन अधिगन्तब्बं सुखं पन अत्थी’’ति मनसि करोन्ता अत्तकिलमथानुयोगं पञ्चातपादिपटिपत्तिं अनुयुत्ता विहरन्ति. तण्हाचरिता सत्ता इतो सासनतो बहिद्धा पब्बजिता होन्तापि ‘‘कामे पटिसेवन्ता लोकं वड्ढापेन्ता बहुं पुञ्ञं वड्ढापेन्ती’’ति मनसि करोन्ता कामेसु कामसुखल्लिकानुयोगं पटिपत्तिं अनुयुत्ता विहरन्ति.

‘‘कस्मा दिट्ठिचरिता तथाविधं पटिपत्तिं अनुयुत्ता विहरन्ति, कस्मा तण्हाचरिता तथाविधं पटिपत्तिं अनुयुत्ता विहरन्ती’’ति पुच्छितब्बत्ता ‘‘तत्थ किं कारण’’न्तिआदि वुत्तं. तत्थाति तत्थ तेसु दिट्ठिचरिततण्हाचरितेसु. यं यस्मा कारणा विहरन्ति, तं कारणं किन्ति पुच्छति. इतो सासनतो बहिद्धा येसं पुग्गलानं सच्चववत्थानं नत्थि, चतुसच्चप्पकासना कुतो च अत्थि, समथविपस्सनाकोसल्लं वा उपसमसुखप्पत्ति वा कुतो अत्थि, ते पुग्गला उपसमसुखस्स अनभिञ्ञा विपरीतचेता हुत्वा एवं आहंसु ‘‘सुखेन अधिगन्तब्बं सुखं नत्थि ¶ , दुक्खेन अधिगन्तब्बं सुखं नाम अत्थी’’ति. ते एवंसञ्ञी एवंदिट्ठी दुक्खेन सुखं पत्थयमाना हुत्वा अत्तकिलमथानुयोगमनुयुत्ता विहरन्ति. इतो सासनतो बहिद्धा येसं पुग्गलानं सच्चववत्थानं नत्थि, चतुसच्चप्पकासना कुतो च अत्थि, समथविपस्सनाकोसल्लं वा उपसमसुखप्पत्ति वा कुतो अत्थि, ते पुग्गला उपसमसुखस्स अनभिञ्ञा विपरीतचेता हुत्वा एवमाहंसु ‘‘यो कामे पटिसेवति, सो लोकं वड्ढयति, यो लोकं वड्ढयति, सो बहुं पुञ्ञं पसवती’’ति. ते एवंसञ्ञी एवंदिट्ठी कामेसु सुखसञ्ञी हुत्वा कामसुखल्लिकानुयोगं अनुयुत्ता च विहरन्तीति योजना कातब्बा.

‘‘तथा विहरन्ता किं वड्ढयन्ती’’ति पुच्छितब्बत्ता ‘‘ते तदभिञ्ञा सन्ता रोगमेव वड्ढयन्ती’’ति वुत्तं. ‘‘तथा वड्ढयन्ता रोगादीनं भेसज्जं समथविपस्सनं वड्ढयन्ति कि’’न्ति पुच्छितब्बत्ता ‘‘ते रोगाभितुन्ना गण्डपटिपीळिता सल्लानुविद्धा निरयतिरच्छानयोनिपेतासुरेसु उम्मुज्जनिमुज्जानि करोन्ता उग्घातनिग्घातं पच्चनुभोन्ता रोगगण्डसल्लभेसज्जं न ¶ विन्दन्ती’’ति वुत्तं. अत्थो पन अट्ठकथायं (नेत्ति. अट्ठ. ७९) वुत्तो. ‘‘कतमे संकिलेसवोदाना, कतमे रोगादयो, कतमं भेसज्ज’’न्ति पुच्छितब्बत्ता ‘‘तत्थ अत्तकिलमथानुयोगो’’तिआदि वुत्तं. तत्थाति तेसु संकिलेसवोदानरोगभेसज्जादीसु. अत्तकिलमथानुयोगो च कामसुखल्लिकानुयोगो च संकिलेसो होति, समथविपस्सना वोदानं होति, अत्तकिलमथानुयोगो च रोगो होति, समथविपस्सना रोगनिग्घातकभेसज्जं…पे... समथविपस्सना सल्लुद्धारणभेसज्जं होति.

‘‘कतमो कतमं सच्च’’न्ति पुच्छितब्बत्ता ‘‘तत्थ संकिलेसो दुक्ख’’न्तिआदि वुत्तं. तत्थाति तेसु संकिलेसादीसु संकिलेसो एकदेसवसेन दुक्खं दुक्खसच्चं होति. तदभिसङ्गोति तस्मिं संकिलेसे अभिसङ्गो विय पवत्तो लोकियधम्मो निरवसेसवसेन दुक्खसच्चं होति. अथ वा तस्मिं दुक्खे अभिसङ्गो विय पवत्ता तण्हा दुक्खसमुदयो समुदयसच्चं होति. तण्हानिरोधो दुक्खनिरोधो निरोधसच्चं होति. समथविपस्सना दुक्खनिरोधगामिनी पटिपदा मग्गसच्चं होति. इमानि चत्तारि सच्चानि निद्धारेत्वा योजेतब्बानि. ‘‘तेसु चतूसु सच्चेसु कतमं परिञ्ञेय्यं, कतमो पहातब्बो, कतमो भावेतब्बो, कतमो सच्छिकातब्बो’’ति पुच्छितब्बत्ता ‘‘दुक्खं परिञ्ञेय्य’’न्तिआदि वुत्तं.

८०. दिट्ठिचरिततण्हाचरितानं अत्तकिलमथानुयोगादिवसेन चत्तारि सच्चानि निद्धारितानि, ‘‘कथं दिट्ठिचरिततण्हाचरितानं सक्कायदस्सने पवत्तिभेदवसेन चत्तारि सच्चानि निद्धारितानी’’ति पुच्छितब्बत्ता ‘‘तत्थ दिट्ठिचरिता’’तिआदि वुत्तं. अथ वा ‘‘दिट्ठिचरिततण्हाचरितानं ¶ सक्कायदस्सने कतमो पवत्तिभेदो’’ति पुच्छितब्बत्ता इमेसं सक्कायदस्सने अयं पवत्तिभेदोति विभजित्वा दस्सेतुं ‘‘तत्थ दिट्ठिचरिता’’तिआदि वुत्तं. तेन वुत्तं – ‘‘इदानि दिट्ठिचरिततण्हाचरितानं सक्कायदिट्ठिदस्सने पवत्तिभेदं दस्सेतुं ‘दिट्ठिचरिता’तिआदि वुत्त’’न्ति. तत्थाति तेसु दिट्ठिचरिततण्हाचरितेसु. दिट्ठिचरिता पुग्गला रूपं ‘‘अत्ता’’ति अत्ततो उपगच्छन्ति…पे… विञ्ञाणं ‘‘अत्ता’’ति अत्ततो उपगच्छन्ति दिट्ठिचरितानं अत्ताभिनिवेसस्स बलवभावतो, तण्हाचरिता पन रूपं वा ¶ ‘‘अत्ता’’ति रूपवन्तं अत्तानं उपगच्छन्ति अत्तनि वा रूपं, रूपस्मिं वा ‘‘अत्ता’’ति अत्तानं उपगच्छन्ति…पे… विञ्ञाणस्मिं वा ‘‘अत्ता’’ति अत्तानं उपगच्छन्ति तण्हाचरितानं अत्तनियाभिनिवेसस्स बलवभावतो. पञ्चसु उपादानक्खन्धेसु एकेकं निस्साय चतुब्बिधत्ता वीसतिवत्थुका अयं मिच्छादिट्ठि ‘‘सक्कायदिट्ठी’’ति वुच्चति. एवं दिट्ठिचरिततण्हाचरितानं सक्कायदस्सने पवत्तिभेदो विञ्ञातब्बोति अत्थो.

‘‘सक्कायदिट्ठिया कतमो पटिपक्खो’’ति पुच्छितब्बत्ता ‘‘तस्सा पटिपक्खो’’तिआदि वुत्तं. तस्सा सक्कायदिट्ठिया पजहनवसेन लोकुत्तरा सम्मादिट्ठि पटिपक्खो, तस्सा सम्मादिट्ठिया अन्वायिका अनुगुणभावेन पवत्तनका धम्मा च सक्कायदिट्ठिया पजहनवसेन पटिपक्खा भवन्ति. ‘‘कतमे धम्मा अन्वायिका’’ति पुच्छितब्बत्ता ‘‘सम्मासङ्कप्पो’’तिआदि वुत्तं. सम्मासङ्कप्पो…पे… सम्मासमाधि इमे धम्मा अन्वायिका होन्ति. अयं सम्मादिट्ठिआदिको अरियो अट्ठङ्गिको मग्गो तस्सा सक्कायदिट्ठिया पटिपक्खो होति पहायकत्ता. ‘‘ते सम्मादिट्ठियादयो धम्मा खन्धतो कित्तका होन्ती’’ति पुच्छितब्बत्ता ‘‘ते तयो खन्धा’’तिआदि वुत्तं. ‘‘कतमो खन्धो समथो, कतमो खन्धो विपस्सना’’ति पुच्छितब्बत्ता ‘‘सीलक्खन्धो समाधिक्खन्धो च समथो, पञ्ञाक्खन्धो विपस्सना’’ति वुत्तं. ‘‘सक्कायादीसु कतमो कतमं सच्चं, कतमो कतमं सच्च’’न्ति पुच्छितब्बत्ता ‘‘तत्थ सक्कायो’’तिआदि वुत्तं.

‘‘दिट्ठिचरिततण्हाचरितानं सक्कायदिट्ठितप्पटिपक्खवसेन चत्तारि सच्चानि निद्धारितानि, कथं अन्तद्वयमज्झिमपटिपदा निद्धारिता’’ति वत्तब्बत्ता ‘‘तत्थ ये रूपं अत्ततो’’तिआदि वुत्तं. तत्थाति तेसु दिट्ठिचरिततण्हाचरितेसु ये दिट्ठिचरिता पुग्गला रूपं ‘‘अत्ता’’ति अत्ततो उपगच्छन्ति…पे… विञ्ञाणं ‘‘अत्ता’’ति अत्ततो उपगच्छन्ति. इमे दिट्ठिचरिता पुग्गला ‘‘रूपादयो च अत्ता, रूपादीनञ्च अनिच्चत्ता, अत्तस्सापि अनिच्चत्ता अत्ता उच्छिज्जति, अत्ता विनस्सति, अत्ता परं मरणा न होती’’ति अभिनिविसनतो ‘‘उच्छेदवादिनो’’ति ¶ वुच्चन्ति. ये तण्हाचरिता पुग्गला रूपं वा ‘‘अत्ता’’ति रूपवन्तं अत्तानं उपगच्छन्ति…पे… विञ्ञाणं वा ‘‘अत्ता’’ति विञ्ञाणवन्तं अत्तानं उपगच्छन्ति. अत्तनि वा विञ्ञाणं, विञ्ञाणस्मिं वा अत्तानं उपगच्छन्ति. इमे तण्हाचरिता पुग्गला ‘‘रूपादीहि अत्ता अञ्ञो ¶ अञ्ञत्ता अत्ता निच्चो सस्सतो’’ति अभिनिविसनतो ‘‘सस्सतवादिनो’’ति वुच्चन्ति.

तत्थ तेसु उच्छेदवादीसस्सतवादीपुग्गलेसु पवत्ता उच्छेदवादसस्सतवादा उभो अन्ता अन्तद्वयपटिपदा होन्ति. अयं अन्तद्वयपटिपदा संसारपवत्तनस्स हेतुभावतो संसारपवत्ति होति, तस्स अन्तद्वयस्स पटिपज्जनस्स पजहनवसेन मज्झिमपटिपदासङ्खातोव अरियो अट्ठङ्गिको मग्गो पटिपक्खो होति पहायकत्ता. अयं मग्गो संसारनिवत्तनस्स हेतुभावतो संसारनिवत्ति होति. तत्थ संसारपवत्तिसंसारनिवत्तीसु पवत्ति संसारपवत्ति दुक्खं दुक्खसच्चं, तदभिसङ्गो तस्मिं दुक्खे अभिसङ्गो तण्हा समुदयो समुदयसच्चं, तण्हानिरोधो दुक्खनिरोधो निरोधसच्चं, अरियो अट्ठङ्गिको मग्गो दुक्खनिरोधगामिनी पटिपदा मग्गसच्चं, इति इमानि चत्तारि सच्चानि निद्धारितानि. ‘‘दुक्खं परिञ्ञेय्य’’न्तिआदिम्हि वुत्तनयोव अत्थो.

‘‘उच्छेदसस्सतस्स कित्तको पभेदो, मग्गस्स कित्तको’’ति पुच्छितब्बत्ता ‘‘तत्थ उच्छेदसस्सत’’न्तिआदि वुत्तं. तत्थ उच्छेदसस्सतअरियमग्गेसु उच्छेदसस्सतदस्सनं समासतो सङ्खेपतो वीसतिवत्थुका सक्कायदिट्ठि. उच्छेदो पञ्चुपादानक्खन्धे निस्साय पवत्तत्ता पञ्चविधो, सस्सतदस्सनं एकेकस्मिं तिधा उप्पज्जनतो पन्नरसविधन्ति वीसतिविधं होति. वित्थारतो द्वासट्ठि दिट्ठिगतानि. कतमानि? चत्तारो सस्सतवादा, चत्तारो एकच्चसस्सतवादा, चत्तारो अन्तानन्तवादा, चत्तारो अमराविक्खेपवादा, द्वे अधिच्चसमुप्पन्नवादा, सोळस सञ्ञीवादा, अट्ठ असञ्ञीवादा, अट्ठ नेवसञ्ञीनासञ्ञीवादा, सत्त उच्छेदवादा, पञ्च दिट्ठधम्मनिब्बानवादाति द्वासट्ठि दिट्ठिगतानि वेदितब्बानि. वित्थारतो पन ब्रह्मजालसुत्ते (दी. नि. १.३० आदयो) आगतानि. तेसं उच्छेदसस्सतदस्सनानं तेचत्तालीसं बोधिपक्खियधम्मा पटिपक्खो मग्गो. कतमे तेचत्तालीसं? ‘‘अनिच्चसञ्ञा दुक्खसञ्ञा अनत्तसञ्ञा’’ति तिस्सो सञ्ञा च ‘‘पहानसञ्ञा विरागसञ्ञा निरोधसञ्ञा’’ति तिस्सो सञ्ञा चाति छ सञ्ञा च ‘‘चत्तारो सतिपट्ठाना, चत्तारो सम्मप्पधाना, चत्तारो इद्धिपादा, पञ्चिन्द्रियानि, पञ्च बलानि, सत्त बोज्झङ्गा, अट्ठ मग्गङ्गानी’’ति तेचत्तालीसं बोधिपक्खियधम्मा विपस्सनावसेन पटिपक्खो मग्गो नाम.

‘‘समथवसेन ¶ ¶ कतमो पटिपक्खो’’ति वत्तब्बत्ता ‘‘अट्ठ विमोक्खा’’तिआदि वुत्तं. अट्ठ विमोक्खा पाकटा. दस कसिणायतनानि समथवसेन पटिपक्खो मग्गो नाम. ‘‘कतमं ञाणं कतमस्स धम्मस्स पदालन’’न्ति पुच्छितब्बत्ता ‘‘द्वासट्ठि दिट्ठिगतानी’’तिआदि वुत्तं. दिट्ठिचरिते पवत्तानि दिट्ठिगतानि, मोहो. तण्हाचरिते पवत्तानि दिट्ठिगतानि, जालं. अनादिवसेन पवत्तो मोहो. अनिधनवसेन पवत्तं जालं. अट्ठ समापत्तियो समापज्जित्वा तेजेत्वा तिक्खं विपस्सनाञाणञ्च अरियमग्गञाणञ्चञाणवजिरं नाम बोधिपक्खियधम्मानं ञाणपदट्ठानत्ता. मोहो च जालञ्च मोहजालं. पदालेतीति पदालनं, कत्तरि युपच्चयो, मोहजालस्स पदालनन्ति मोहजालपदालनं. पदालनञ्हि दुविधं विक्खम्भनपदालनं समुच्छेदपदालनन्ति. पुब्बभागे समथविपस्सनावसेन विक्खम्भनपदालनं, मग्गक्खणे समुच्छेदपदालनं एव दट्ठब्बं. तत्थाति तस्मिं मोहजाले अविज्जा मोहो, भवतण्हा जालं. अत्तनो आधारं पुग्गलं दुक्खादीसु अट्ठसु ठानेसु मोहेतीति मोहो. पठमं जालं जटं लायित्वा जटावसेन लाति पवत्ततीति जालं, अत्तनि जातं मच्छसकुणादिकं लाति गण्हाति, लापेति गण्हापेतीति वा जालं, जालं वियाति जालं. तेन वुत्तं – ‘‘अतीतादिभेदभिन्नेसु रूपादीसु, सकअत्तभावादीसु च संसिब्बनवसेन पवत्तनतो जालं भवतण्हा’’ति (नेत्ति. अट्ठ. ८०). ‘‘अविज्जातण्हाहि अत्तकिलमथानुयोगादीनं किलेसपक्खानं निद्धारणं कतं कथं केन सद्दहितब्ब’’न्ति वत्तब्बत्ता ‘‘तेन वुच्चति ‘पुब्बा कोटि न पञ्ञायति अविज्जाय च भवतण्हाय चा’ति’’ वुत्तं.

८१. ‘‘इतो सासनतो बहिद्धा दिट्ठिचरिततण्हाचरितानं पटिपदादयो निद्धारिता, सासने दिट्ठिचरिततण्हाचरितानं पटिपदादयो कथं निद्धारितब्बा’’ति वत्तब्बत्ता ‘‘संकिलेसपक्खा सुत्तत्था आचरियेन दस्सिता, वोदानपक्खसुत्तत्था कथं दस्सितब्बा’’ति वत्तब्बत्ता वा ‘‘तत्थ दिट्ठिचरितो अस्मिं सासने’’तिआदि वुत्तं. तत्थाति तेसु दिट्ठिचरिततण्हाचरितेसु. दिट्ठिचरितो पुग्गलो अस्मिं सासने पब्बजितो हुत्वा चतूसु पच्चयेसु सल्लेखानुसन्ततवुत्ति भवति. कस्मा? यस्मा सल्लेखे तिब्बगारवो, तस्मा सल्लेखे तिब्बगारवत्ता. तण्हाचरितो पुग्गलो अस्मिं सासने पब्बजितो हुत्वा सिक्खानुसन्ततवुत्ति भवति ¶ . कस्मा? यस्मा सिक्खाय तिब्बगारवो, तस्मा सिक्खाय तिब्बगारवत्ता. दिट्ठिचरितो पुग्गलो सम्मत्तनियामं ओक्कमन्तो हुत्वा धम्मानुसारी पुग्गलो भवति. कस्मा? दिट्ठिया दिट्ठिविसये पञ्ञासदिसपवत्तनतो. तण्हाचरितो पुग्गलो सम्मत्तनियामं ओक्कमन्तो हुत्वा सद्धानुसारी भवति. कस्मा? तण्हावसेन मिच्छाधिमोक्खत्ता. दिट्ठिचरितो पुग्गलो सुखाय पटिपदाय, दन्धाभिञ्ञाय च निय्याति, सुखाय ¶ पटिपदाय, खिप्पाभिञ्ञाय च निय्याति सुखेन किलेसेहि विक्खम्भितुं समत्थत्ता. तण्हाचरितो पुग्गलो दुक्खाय पटिपदाय, दन्धाभिञ्ञाय च निय्याति, दुक्खाय पटिपदाय, खिप्पाभिञ्ञाय च निय्याति दुक्खेन किलेसेहि विक्खम्भितुं समत्थत्ता.

‘‘तथा कस्मा निय्याती’’ति पुच्छितब्बत्ता ‘‘तत्थ किं कारणं य’’न्तिआदि वुत्तं. यं येन कारणेन निय्याति, तं कारणं किन्ति पुच्छति. तस्स तण्हाचरितस्स कामा सुखेन अपरिच्चत्ता हि यस्मा भवन्ति, तस्मा कामानं सुखेन अपरिच्चत्तत्ता तथा निय्याति. सो तण्हाचरितो कामेहि वत्थुकामकिलेसकामेहि विवेचियमानो दुक्खेन पटिनिस्सरति, दन्धञ्च धम्मं चतुसच्चधम्मं आजानाति. यो पन अयं पुग्गलो दिट्ठिचरितो होति, सो अयं दिट्ठिचरितो पुग्गलो आदितो आदिम्हियेव कामेहि किलेसकामवत्थुकामेहि अनत्थिको भवति. सो दिट्ठिचरितो ततो तेहि कामेहि विवेचियमानो खिप्पञ्च सुखेन पटिनिस्सरति, खिप्पञ्च धम्मं आजानाति.

‘‘तण्हाचरितो दुक्खाय पटिपदाय दन्धाभिञ्ञाय निय्याति, दिट्ठिचरितो सुखाय पटिपदाय खिप्पाभिञ्ञाय निय्यातीति एकेकाय पटिपदाय भवितब्ब’’न्ति वत्तब्बत्ता ‘‘दुक्खापि पटिपदा दुविधा दन्धाभिञ्ञा च खिप्पाभिञ्ञा च, सुखापि पटिपदा दुविधा दन्धाभिञ्ञा च खिप्पाभिञ्ञा चा’’ति वुत्तं. ‘‘एवं सति एकोव द्वीहि द्वीहि पटिपदाहि निय्यातीति आपज्जती’’ति वत्तब्बत्ता ‘‘सत्तापी’’तिआदि वुत्तं. तण्हाचरिता सत्तापि दुविधा मुदिन्द्रियापि तिक्खिन्द्रियापि, दिट्ठिचरिता सत्तापि दुविधा मुदिन्द्रियापि तिक्खिन्द्रियापीति योजना कातब्बा. ये तण्हाचरितदिट्ठिचरिता मुदिन्द्रिया भवन्ति, ते तण्हाचरितदिट्ठिचरिता दन्धञ्च पटिनिस्सरन्ति, दन्धञ्च धम्मं आजानन्ति. ये तण्हाचरितदिट्ठिचरिता तिक्खिन्द्रिया भवन्ति, ते तण्हाचरितदिट्ठिचरिता खिप्पञ्च पटिनिस्सरन्ति, खिप्पञ्च धम्मं आजानन्ति, तस्मा एकेकस्सेव एकेका पटिपदा ¶ युत्तावाति. ‘‘इमाहि पटिपदाहि निय्यन्तियेव, न निय्यिंसु निय्यिस्सन्तीति आपज्जेय्य वत्तमानविभत्तिया निद्दिट्ठत्ता’’ति वत्तब्बत्ता ‘‘इमा चतस्सो’’तिआदि वुत्तं. अतीतेपि इमाहि चतूहि पटिपदाहि निय्यिंसु, पच्चुप्पन्नेसुपि निय्यन्ति, अनागतेपि निय्यिस्सन्तीति अत्थो गहेतब्बो यथा ‘‘पब्बतो तिट्ठती’’ति.

एवन्ति एवं वुत्तप्पकारेन. अरियपुग्गला चतुक्कमग्गं पटिपदं पञ्ञापेन्ति. ‘‘किमत्थं पञ्ञापेन्ती’’ति वत्तब्बत्ता ‘‘अबुधजनसेविताया’’तिआदि वुत्तं. अयं वुच्चति नन्दियावट्टस्स नयस्स भूमीति तण्हाअविज्जानं वसेन संकिलेसपक्खे द्विदिसा चतुसच्चयोजनापि समथविपस्सनानं ¶ वसेन वोदानपक्खे द्विदिसा चतुसच्चयोजनापि दस्सिता. अयं चतुब्बिधा चतुसच्चयोजना नन्दियावट्टस्स नयस्स समुट्ठानं भूमि समुट्ठानभावतोति. ‘‘तथाविधाय चतुसच्चयोजनाय नन्दियावट्टस्स नयस्स समुट्ठानभूमिभावो केन सद्दहितब्बो’’ति वत्तब्बत्ता ‘‘तेनाहा’’तिआदि वुत्तं.

८२. ‘‘नन्दियावट्टस्स नयस्स समुट्ठानभूता भूमि दस्सिता, तस्स नन्दियावट्टस्स नयस्स कत्थ कतमा दिसा कित्तकेन उपपरिक्खितब्बा’’ति वत्तब्बत्ता ‘‘वेय्याकरणेसु ही’’तिआदि वुत्तं. हि-सद्दो पक्खन्तरत्थो. ये दिसाभूता आहारादयो धम्मा वेय्याकरणेसु ‘‘कुसलाकुसला’’ति वुत्तं, ते दिसाभूता आहारादयो धम्मा दुविधेन ‘‘इमे अकुसला धम्मा संकिलेसधम्मा, इमे कुसला वोदानधम्मा’’ति दुविधेन उपपरिक्खितब्बा आलोचितब्बा. ‘‘कतमेन दुविधेना’’ति पुच्छितब्बत्ता ‘‘लोकवट्टानुसारी च लोकविवट्टानुसारी चा’’ति वुत्तं. ‘‘कतमं वट्टं, कतमं विवट्ट’’न्ति पुच्छितब्बत्ता ‘‘वट्टं नाम संसारो, विवट्टं निब्बान’’न्ति वुत्तं. ‘‘संसारस्स कतमो हेतू’’ति पुच्छितब्बत्ता ‘‘कम्मकिलेसा हेतु संसारस्सा’’ति वुत्तं. ‘‘कतमं कम्मं नाम, चेतनायेव कम्मं नाम किं, उदाहु चेतसिकञ्च फलदानसमत्थासमत्थम्पि कम्मं कि’’न्ति पुच्छितब्बत्ता ‘‘तत्थ कम्म’’न्तिआदि वुत्तं. तत्थाति तेसु कम्मकिलेसेसु. ‘‘तं कम्मं कथं केन पकारेन दट्ठब्ब’’न्ति चे वदेय्य, यथा येन उपचयेन कतं कम्मं फलदानसमत्थं होति, तस्मिं उपचये तं कम्मं दट्ठब्बं. ‘‘ते किलेसा कतमेहि धम्मेहि निद्दिसितब्बा’’ति चे पुच्छेय्य, सब्बेपि किलेसा चतूहि विपल्लासेहि निद्दिसितब्बा. ‘‘ते किलेसा कत्थ ¶ दट्ठब्बा’’ति चे पुच्छेय्य, दसवत्थुके किलेसपुञ्जे ते किलेसा दट्ठब्बा.

‘‘कतमानि दस वत्थूनी’’ति चे पुच्छेय्य, चत्तारो आहारा, चत्तारो विपल्लासा, चत्तारि उपादानानि, चत्तारो योगा, चत्तारो गन्था, चत्तारो आसवा, चत्तारो ओघा, चत्तारो सल्ला, चतस्सो विञ्ञाणट्ठितियो, चत्तारि अगतिगमनानीति दस वत्थूनीति वेदितब्बानि चतुन्नं किच्चवसेन एकत्ता. एत्थ च किलेसानं पच्चयो वत्थुकामोपि किलेसोपि किलेसवत्थु होति पुरिमानं पुरिमानं किलेसानं पच्छिमानं पच्छिमानं किलेसानं पच्चयभावतो.

‘‘कतमो कतमो कतमस्स कतमस्स वत्थू’’ति पुच्छितब्बत्ता ‘‘पठमे आहारे’’तिआदि वुत्तं. आलम्बितब्बे पठमे कबळीकाराहारे पठमो ‘‘रूपं सुभ’’न्ति विपल्लासो आरम्मणकरणवसेन पवत्तति. आलम्बितब्बे दुतिये फस्साहारे दुतियो ‘‘फस्सपच्चया वेदना सुखा’’ति ¶ विपल्लासो पवत्तति. आलम्बितब्बे ततिये चित्ताहारे ततियो ‘‘चित्तं निच्च’’न्ति विपल्लासो पवत्तति, आलम्बितब्बे चतुत्थे मनोसञ्चेतनाहारे ‘‘धम्मो अत्ता’’ति विपल्लासो आरम्मणकरणवसेन पवत्तति. आलम्बितब्बे पठमे ‘‘रूपं सुभ’’न्ति विपल्लासो पठमं कामुपादानं आरम्मणकरणवसेन पवत्तति. सेसेसुपि यथारहं नयानुसारेन योजेत्वा अत्थो वेदितब्बो.

८३. ‘‘तेसु आहारादीसु कतमो कतमस्स पुग्गलस्स उपक्किलेसो’’ति वत्तब्बत्ता ‘‘तत्थ यो चा’’तिआदि वुत्तं. तत्थाति तेसु आहारादीसु, तण्हाचरितदिट्ठिचरितेसु वा. तण्हाचरितस्स रूपवेदनासु तिब्बच्छन्दरागस्स उप्पज्जनतो यो च कबळीकारो आहारो, यो च फस्साहारो पवत्तति, इमे कबळीकाराहारफस्साहारा तण्हाचरितस्स पुग्गलस्स उपक्किलेसा भवन्ति. दिट्ठिचरितस्स धम्मचित्तेसु बलवअत्तनिच्चाभिनिवेसस्स उप्पज्जनतो यो च मनोसञ्चेतनाहारो, यो च विञ्ञाणाहारो पवत्तति, इमे मनोसञ्चेतनाहारविञ्ञाणाहारा दिट्ठिचरितस्स पुग्गलस्स उपक्किलेसा भवन्ति. ‘‘तत्थ यो च असुभे सुभ’’न्तिआदीसुपि वुत्तनयानुसारेन अत्थो गहेतब्बोति. पुरिमानं ¶ द्विन्नं द्विन्नं तण्हापधानत्ता चेव तण्हासभावत्ता च, पच्छिमानं द्विन्नं द्विन्नं दिट्ठिपधानत्ता चेव दिट्ठिसभावत्ता चाति.

८४. ‘‘कतमस्मिं पठमादिके आहारे कतमो पठमादिको विपल्लासो पवत्तती’’ति पुच्छितब्बत्ता ‘‘तत्थ कबळीकारे आहारे’’तिआदिना नामवसेन नियमेत्वा पुब्बे वुत्तत्थमेव दस्सेति. ‘‘कतमस्मिं विपल्लासे ठितो कतमं उपादियती’’ति पुच्छितब्बत्ता ‘‘पठमे विपल्लासे ठितो’’तिआदि वुत्तं. पठमे विपल्लासे ठितो पुग्गलो कामे येन उपादानेन उपादियति, इदं उपादानं ‘‘कामुपादानं नामा’’ति वुच्चति. सेसेसु इमिना नयेन योजना कातब्बा.

‘‘येन कामुपादानेन कामेहि पुग्गलो संयुज्जति, अयं कामुपादानधम्मो ‘कामयोगो’ति वुच्चती’’तिआदिना योजना कातब्बा. सेसानं योजनत्थादयो पाळितो, अट्ठकथातो च पाकटा.

८५. ‘‘आहारादीसु कतमे कतमा दिसा’’ति पुच्छितब्बत्ता ‘‘तत्थ इमा चतस्सो दिसा’’तिआदि वुत्तं. तत्थ तेसु आहारचतुक्कादीसु दससु चतुक्केसु पठमो पठमो कबळीकाराहारादिको ¶ पठमा दिसा, दुतियो दुतियो फस्साहारादिको दुतिया दिसा, ततियो ततियो विञ्ञाणाहारादिको ततिया दिसा, चतुत्थो चतुत्थो मनोसञ्चेतनाहारादिको चतुत्था दिसाति वेदितब्बा.

‘‘तासु चतूसु दिसासु तेसु कबळीकाराहारादीसु धम्मेसु कतमे धम्मा कतमस्स उपक्किलेसा’’ति पुच्छितब्बत्ता इमे आहारादयो धम्मा इमस्स पुग्गलस्स उपक्किलेसाति विभत्ताति दस्सेतुं ‘‘तत्थ यो च कबळीकारो आहारो…पे… इमे दिट्ठिचरितस्स उदत्तस्स उपक्किलेसा’’ति वुत्तं. अट्ठकथायं पन – ‘‘कबळीकाराहारो आहारोतिआदि आहारादीसु ये यस्स पुग्गलस्स उपक्किलेसा, तं विभजित्वा दस्सेतुं आरद्ध’’न्ति (नेत्ति. अट्ठ. ८५) वुत्तं. दसन्नं सुत्तानन्ति एकदेसभूतानं दसन्नं सुत्तानं. अत्थोति सभावधम्मो. सद्दत्थो हि असमानोति. ‘‘ब्यञ्जनमेव नान’’न्ति एतेन च सद्दत्थस्स नानत्तं दस्सेति.

‘‘कबळीकाराहारादीसु ¶ कतमे आहारादयो कतमेन विमोक्खमुखेन परिञ्ञं पहानं गच्छन्ती’’ति पुच्छितब्बत्ता ‘‘तत्थ यो च कबळीकारो’’तिआदि वुत्तं.

इतीति एवं वुत्तप्पकारा. सब्बेति सब्बे आहारादयो धम्मा लोकवट्टानुसारिनो भवन्ति. तेति ते सब्बे आहारादयो धम्मा. लोकाति लोकतो वट्टतो. तीहि विमोक्खमुखेहि अनिच्चानुपस्सनादीहि निय्यन्ति.

८६. संकिलेसपक्खे दिसाभूता आहारचतुक्कादयो दस चतुक्का धम्मा आचरियेन निद्धारेत्वा दस्सिता, अम्हेहि च ञाता, ‘‘वोदानपक्खे कतमे दिसाभूता धम्मा’’ति पुच्छितब्बत्ता वोदानपक्खे दिसाभूते धम्मे दस्सेतुं ‘‘चतस्सो पटिपदा’’तिआदि वुत्तं. चत्तारो विहाराति दिब्बविहारा ब्रह्मविहारा अरियविहारा आनेञ्जविहाराति चत्तारो विहारा. तेसु रूपावचरसमापत्तियो दिब्बविहारा, चतस्सो अप्पमञ्ञायो ब्रह्मविहारा, चतस्सो फलसमापत्तियो अरियविहारा, चतस्सो अरूपसमापत्तियो आनेञ्जविहारा चत्तारो अच्छरिया अब्भुता धम्माति मानपहानं आलयसमुग्घातो अविज्जापहानं भवूपसमोति चत्तारो अच्छरियअब्भुतधम्मा. चत्तारि अधिट्ठानानीति सच्चाधिट्ठानं चागाधिट्ठानं पञ्ञाधिट्ठानं उपसमाधिट्ठानन्ति चत्तारि अधिट्ठानानि. चतस्सो समाधिभावनाति छन्दसमाधिभावना वीरियसमाधिभावना चित्तसमाधिभावना वीमंसासमाधिभावनाति चतस्सो समाधिभावना. चत्तारो ¶ सुखभागियाति इन्द्रियसंवरो तपो बोज्झङ्गो सब्बूपधिपटिनिस्सग्गोति चत्तारो सुखभागिया. अवसेसा पाकटा.

‘‘चतूसु चतूसु पटिपदादीसु कतमो पटिपदादिको पठमो सतिपट्ठानादिको भवती’’ति पुच्छितब्बत्ता ‘‘पठमा पटिपदा पठमं सतिपट्ठान’’न्तिआदि वुत्तं. ‘‘पटिपदादयो पञ्ञापदट्ठानादिका, सतिपट्ठानादयो पन सतिपदट्ठानादिका, तस्मा ‘पठमा पटिपदा पठमं सतिपट्ठान’न्तिआदियोजना कातब्बा’’ति वत्तब्बत्ता ‘‘पठमा पटिपदा भाविता बहुलीकता पठमं सतिपट्ठानं पूरेती’’तिआदि वुत्तं, पूरकपूरेतब्बभावतो तथा योजना कातब्बाति अधिप्पायो. अथ ¶ वा ‘‘भाविता बहुलीकता कतमे पटिपदादयो कतमे सतिपट्ठानादिके पूरेन्ती’’ति पुच्छितब्बत्ता ‘‘पठमा पटिपदा भाविता बहुलीकता पठमं सतिपट्ठानं पूरेती’’तिआदि वुत्तं.

८७. ‘‘तेसु दससु पटिपदाचतुक्कादीसु कतमे धम्मा कतमा दिसा, कतमे धम्मा कतमा दिसा’’ति पुच्छितब्बत्ता ‘‘तत्थ इमा चतस्सो दिसा पठमा पटिपदा, पठमो सतिपट्ठानो’’तिआदि वुत्तं. तत्थाति तेसु दससु पटिपदाचतुक्कादीसु. इमा मया वुच्चमाना पठमा पटिपदादयो दिसा चतस्सो दिसा भवन्ति.

‘‘तेसु चतूसु दिसाभूतेसु पटिपदाचतुक्कादीसु कतमो दिसाभूतो अत्थो कतमस्स पुग्गलस्स भेसज्ज’’न्ति पुच्छितब्बत्ता ‘‘तत्थ पठमा पटिपदा…पे… दिट्ठिचरितस्स उदत्तस्स भेसज्ज’’न्ति वुत्तं.

‘‘तेसु दससु पटिपदादिचतुक्केसु धम्मेसु कतमो कतमो कतमं कतमं विमोक्खमुख’’न्ति पुच्छितब्बत्ता ‘‘तत्थ दुक्खा च पटिपदा’’तिआदि वुत्तं. अत्थो पन टीकायं वित्थारेन वुत्तो पाकटो. संकिलेसपक्खे दिसाभूता आहारचतुक्कादयो दस चतुक्का समतिक्कमितब्बपहातब्बभावेन निद्धारिता, वोदानपक्खे पन दिसाभूता पटिपदाचतुक्कादयो दस चतुक्का समतिक्कमपहायकभावेन निद्धारिता.

‘‘तेसं आहारचतुक्कादीनं दसन्नं चतुक्कानं समतिक्कमनपहानसङ्खातं यं विक्कीळितञ्च तेसं पटिपदाचतुक्कादीनं दसन्नं चतुक्कानं भावनासङ्खातं यं विक्कीळितञ्च सच्छिकिरियासङ्खातं यं विक्कीळितञ्च अत्थि, तं तिविधं विक्कीळितं कतमेसं पुग्गलानं विक्कीळितं ¶ भवती’’ति पुच्छितब्बत्ता ‘‘तेसं विक्कीळित’’न्ति वुत्तं. अथ वा ‘‘यथावुत्तप्पकारेहि विमोक्खमुखेहि ये बुद्धपच्चेकबुद्धसावका विमुच्चिंसु, तेसु बुद्धस्सेव विक्कीळितं भवति किं, पच्चेकबुद्धस्सेव विक्कीळितं भवति किं, सावकस्सेव विक्कीळितं भवति किं, उदाहु सब्बेसं बुद्धपच्चेकबुद्धसावकानं विक्कीळितं भवति कि’’न्ति विचारणाय सम्भवतो ‘‘तेसं विक्कीळित’’न्ति वुत्तं. यथावुत्तप्पकारेहि विमोक्खमुखेहि ये बुद्धपच्चेकबुद्धसावका मुच्चिंसु, तेसं बुद्धपच्चेकबुद्धसावकानं विक्कीळितं. यं आहारचतुक्कादीनं दसन्नं चतुक्कानं ¶ सपरसन्ताने समतिक्कमनपहानञ्च या पटिपदाचतुक्कादीनं दसन्नं चतुक्कानं सपरसन्ताने भावनासम्पादना, सच्छिकिरियासम्पादना च अत्थि, इदं सब्बं विक्कीळितं नाम भवतीति अत्थो.

‘‘सब्बेसं आहारचतुक्कादीनं दसन्नं चतुक्कानं सब्बे पटिपदाचतुक्कादयो दस चतुक्का पटिपक्खा होन्ति किं, उदाहु यथाक्कमं चतुक्कानं चतुक्का पटिपक्खा होन्ति कि’’न्ति विचारणाय सम्भवतो यथाक्कमं चतुक्कानं चतुक्का पटिपक्खा होन्ति पहातब्बपहायकभावेनाति दस्सेन्तो ‘‘चत्तारो आहारा तेसं पटिपक्खो चतस्सो पटिपदा’’तिआदिमाह. अट्ठकथायं पन – ‘‘इदानि आहारादीनं पटिपदादीहि येन समतिक्कमनं, तं नेसं पटिपक्खभावं दस्सेन्तो ‘चत्तारो आहारा तेसं पटिपक्खो चतस्सो पटिपदा’तिआदिमाहा’’ति (नेत्ति. अट्ठ. ८७) वुत्तं. तत्थ संकिलेसपक्खे चत्तारो ये आहारा निद्धारिता, तेसं चतुन्नं आहारानं वोदानपक्खे या चतस्सो पटिपदा निद्धारिता, ता चतस्सो पटिपदा पटिपक्खो आहारानं पहातब्बत्ता, पटिपदानं पन पहायकत्ता. सतिपि आहारानं अप्पहातब्बभावे विपस्सनारम्मणत्ता आहारपटिबद्धछन्दरागप्पहानवसेन पहातब्बभावो वुत्तोति एवमादियोजना कातब्बा.

सीहाति सीहसदिसा बुद्धा च सीहसदिसा पच्चेकबुद्धा च सीहसदिसा सावका चाति सीहसदिसा विसुं विसुं योजेतब्बा. सावका पन अहतरागदोसमोहापि सन्ति, तेपि ‘‘सीहा’’ति मञ्ञेय्युन्ति तं निवत्तापनत्थं ‘‘हतरागदोसमोहा’’ति वुत्तं. हनितब्बाति हता, रागो च दोसो च मोहो च रागदोसमोहा, हता रागदोसमोहा एतेहि सावकेहीति हतरागदोसमोहा, सावकाति योजना कातब्बा सावकानंयेव ब्यभिचारसम्भवतोति. तेसं सीहानं बुद्धानं, तेसं सीहानं पच्चेकबुद्धानं, तेसं सीहानं सावकानं भावना वोदानपक्खे भावितब्बानं बोधिपक्खियधम्मानं भावना वड्ढना च, सच्छिकिरिया वोदानपक्खेयेव सच्छिकातब्बानं ¶ फलनिब्बानानं सच्छिकिरिया च, ब्यन्तीकिरिया संकिलेसपक्खे पहातब्बानं पहानसङ्खाता ब्यन्तीकिरिया च विक्कीळितं नाम भवति.

इन्द्रियाधिट्ठानन्ति ¶ सद्धिन्द्रियादीनं इन्द्रियानं अधिट्ठानं पवत्तनं भावना, सच्छिकिरिया च. विपरियासानधिट्ठानन्ति विपल्लासानं अधिट्ठानं पहानवसेन अप्पवत्तनं, अनुप्पादनञ्च सङ्खेपतो विक्कीळितं नामाति गहितं. इन्द्रियानि सद्धिन्द्रियादीनि सद्धम्मगोचरो सद्धम्मस्स वोदानपक्खस्स गोचरो पवत्तनहेतूति अधिप्पेतानि. विपरियासा विपल्लासा किलेसगोचरो संकिलेसपक्खस्स गोचरो पवत्तिहेतूति अधिप्पेता.

‘‘चत्तारो आहारातिआदिना संकिलेसपक्खे आहारचतुक्कादीनं दसन्नं चतुक्कानं तण्हाचरितादीनं चतुन्नं पुग्गलानं उपक्किलेसविभावनामुखेन या निद्धारणा आचरियेन कता, ‘चतस्सो पटिपदा’तिआदिना च वोदानपक्खे पटिपदाचतुक्कादीनं दसन्नं चतुक्कानं तण्हाचरितादीनं चतुन्नं पुग्गलानं वोदानविभावनामुखेन या निद्धारणा आचरियेन कता, सा अयं निद्धारणा कतमस्स नयस्स समुट्ठानं भूमीति वुच्चती’’ति पुच्छितब्बत्ता ‘‘अयं वुच्चति सीहविक्कीळितस्स नयस्स भूमी’’ति वुत्तं. तत्थ अयन्ति या अयं वुत्तनयेन द्विप्पकारा निद्धारणा कता, सा अयं द्विप्पकारा निद्धारणा सीहविक्कीळितस्स नयस्स भूमि पवत्तिट्ठानं समुट्ठानन्ति नयसमुट्ठानकोसल्लेहि पुग्गलेहि वुच्चतीति योजना कातब्बाति.

‘‘वुत्तप्पकाराय निद्धारिताय नयस्स भूमिभावो कस्मा विञ्ञायती’’ति वत्तब्बत्ता ‘‘तेनाहा’’तिआदि वुत्तं. तेन वुत्तप्पकाराय निद्धारणाय नयभूमिभावेन ‘‘यो नेति…पे… कुसलाति चा’’ति यं वचनं आचरियो आह, तेन वचनेन विञ्ञायतीति.

सीहविक्कीळितनयभूमि आचरियेन विभाविता, अम्हेहि च ञाता, ‘‘कतमा तिपुक्खलनयभूमी’’ति पुच्छितब्बत्ता तिपुक्खलनयभूमिं विभावेतुकामो ‘‘तत्थ ये दुक्खाय पटिपदाया’’तिआदिमाह. एवं सति ‘‘अयं संकिलेसो, तीणि अकुसलमूलानी’’तिआदिवचनमेव आचरियेन वत्तब्बं, कस्मा पन ‘‘तत्थ ये दुक्खाय पटिपदाया’’तिआदिवचनं वत्तब्बन्ति? सच्चं, तिपुक्खलनयभूमिभावना पन उग्घटितञ्ञुआदिपुग्गलत्तयवसेन पवत्ता, तस्मा उग्घटितञ्ञुआदिपुग्गलत्तयं विभावेतुं ‘‘तत्थ ये दुक्खाय पटिपदाया’’तिआदिवचनं वुत्तं. एवमपि ‘‘तत्थ यो सुखाय पटिपदाय खिप्पाभिञ्ञाय ¶ निय्याति, अयं उग्घटितञ्ञू’’तिआदिवचनमेव वत्तब्बं ¶ , कस्मा पन ‘‘तत्थ ये दुक्खाय पटिपदाया’’तिआदिवचनं वत्तब्बन्ति? सच्चं, उग्घटितञ्ञुआदिपुग्गलत्तयं पन सीहविक्कीळितनयतो तिपुक्खलनयस्स निग्गच्छनतो निक्खमनतो सीहविक्कीळितनयभूमिविभावनायं पटिपदाविभागतो विभावितपुग्गलचतुक्कतो निद्धारितं, सीहविक्कीळितनयभूमिविभावनायं पटिपदाविभागतो विभावितं पुग्गलचतुक्कं पठमं विभावेतुं ‘‘तत्थ ये दुक्खाय पटिपदाया’’तिआदि वुत्तं. तत्थाति यो पटिपदाचतुक्को सीहविक्कीळितनयभूमिविभावनायं निद्धारितो, तस्मिं पटिपदाचतुक्के. येति ये दन्धउदत्ता दिट्ठिचरितपुग्गला यथाक्कमं सुखाय पटिपदाय दन्धाभिञ्ञाय च सुखाय पटिपदाय खिप्पाभिञ्ञाय च निय्यन्ति, इति निय्यका द्वे पुग्गला च निद्धारिता. ‘‘तेसं चतुन्नं पुग्गलानं कतमो संकिलेसो’’ति पुच्छितब्बत्ता ‘‘तेसं चतुन्नं पुग्गलानं अयं संकिलेसो’’ति विस्सज्जेतुं ‘‘तेसं चतुन्नं पुग्गलानं अयं संकिलेसो’’तिआदि वुत्तं. चत्तारो आहारा निद्धारिता…पे… चत्तारि अगतिगमनानि निद्धारितानि, इति अयं दसविधो आहारचतुक्कादिचतुक्को तेसं चतुन्नं पुग्गलानं संकिलेसो होति. तेसं चतुन्नं पुग्गलानं संकिलेसो आचरियेन निद्धारितो, ‘‘कतमं वोदान’’न्ति पुच्छितब्बत्ता ‘‘तेसं चतुन्नं पुग्गलानं इदं वोदान’’न्तिआदि वुत्तं. चतस्सो पटिपदा निद्धारिता, चतस्सो अप्पमाणा निद्धारिता, इति इदं दसविधं पटिपदाचतुक्कादिचतुक्कभूतं धम्मजातं तेसं चतुन्नं पुग्गलानं वोदानं होति.

८८. ‘‘तेसु चतूसु पुग्गलेसु कतमो पुग्गलो उग्घटितञ्ञू, कतमो पुग्गलो विपञ्चितञ्ञू, कतमो पुग्गलो नेय्यो’’ति पुच्छितब्बत्ता ‘‘तत्थ ये’’तिआदि वुत्तं. ‘‘पुब्बेपि ‘तत्थ ये’तिआदिना चत्तारो पुग्गला निद्धारिता, कस्मा पन पुन ‘‘तत्थ ये’तिआदिना चत्तारो पुग्गला निद्धारिता’’ति चे वदेय्य? पुब्बे संकिलेसवोदानं सामिभावेन निद्धारिता, पच्छा पन उग्घटितञ्ञुआदीनं अवयवानं समूहभावेन निद्धारिताति विसेसत्थो गहेतब्बो. तत्थ ये…पे… इमे द्वे पुग्गलाति एत्थ योजनत्थो हेट्ठा वुत्तसदिसोव. तत्थाति तेसु चतूसु पुग्गलेसु. योति उदत्तो दिट्ठिचरितो. अयन्ति अयं नियतो उदत्तो दिट्ठिचरितो. पुन योति उदत्तोव तण्हाचरितो च मन्दो दिट्ठिचरितो च. साधारणायाति दुक्खाय पटिपदाय खिप्पाभिञ्ञाय च सुखाय पटिपदाय दन्धाभिञ्ञाय च.

‘‘उग्घटितञ्ञुआदयो ¶ तयो पुग्गला आचरियेन निद्धारिता, तेसु तीसु पुग्गलेसु कतमस्स कतमस्स कतमं कतमं भगवा उपदिसती’’ति पुच्छितब्बत्ता ‘‘तत्थ भगवा’’तिआदि वुत्तं. अथ वा ‘‘पटिपदाभेदेन पुग्गलभेदो आचरियेन विभावितो, कथं देसनाभेदेन ¶ पुग्गलभेदो विभावितो’’ति वत्तब्बत्ता देसनाभेदेनपि पुग्गलभेदं विभावेतुं ‘‘तत्थ भगवा’’तिआदि वुत्तं. तत्थाति तेसु तीसु उग्घटितञ्ञुआदीसु पुग्गलेसु. ‘‘समथदेसनाविपस्सनादेसनाभेदेनेव पुग्गलभेदो विभावितो’’ति वत्तब्बत्ता मुदुधम्मदेसनातिक्खधम्मदेसनाभेदेनपि पुग्गलभेदं विभावेतुं ‘‘तत्थ भगवा’’तिआदि वुत्तं. सेसेसुपि एवमेव अनुसन्ध्यत्थो वत्तब्बो.

विसुं विसुं पटिपदाभेदेन चत्तारो हुत्वा विसुं च सम्पिण्डिता च पटिपदाभेदेन चेव देसनाभेदेन च तयो होन्तीति विभावेतुं ‘‘तत्थ ये’’तिआदिं पुन वत्वा ‘‘इति खो चत्तारि हुत्वा तीणि भवन्ती’’ति वुत्तं. तत्थ चत्तारि तीणीति लिङ्गविपल्लासनिद्देसो, ‘‘चत्तारो तयो’’ति पन पकतिलिङ्गनिद्देसो कातब्बोव.

‘‘तेसं तिण्णं पुग्गलानं कतमो संकिलेसो’’ति पुच्छितब्बत्ता ‘‘तेसं तिण्णं पुग्गलानं अयं संकिलेसो’’तिआदि वुत्तं. तत्थ अयं संकिलेसोति ‘‘तीणि अकुसलमूलानि…पे… सीलविपत्ति दिट्ठिविपत्ति आचारविपत्ती’’ति निद्धारितानं अकुसलानं धम्मानं इति अयं समूहो संकिलेसो होति. ‘‘तेसं तिण्णं पुग्गलानं संकिलेसो आचरियेन निद्धारितो, कथं वोदानं निद्धारितब्ब’’न्ति वत्तब्बत्ता ‘‘तेसं तिण्णं पुग्गलानं इदं वोदान’’न्तिआदि वुत्तं. तत्थ इदं वोदानन्ति ‘‘तीणि कुसलमूलानि…पे… तीणि विमोक्खमुखानि सुञ्ञतं अनिमित्तं अप्पणिहित’’न्ति निद्धारितानं कुसलधम्मानं समूहभूतं इति इदं धम्मजातं वोदानं होति.

‘‘वुत्तप्पकारेन चत्तारो हुत्वा तयो पुग्गला भवन्तीति आचरियेन विभाविता, तयो हुत्वा कित्तका पुग्गला भवन्ती’’ति वत्तब्बभावतो ‘‘इति खो चत्तारि हुत्वा तीणि भवन्ति, तीणि हुत्वा द्वे भवन्ति तण्हाचरितो च दिट्ठिचरितो चा’’तिआदि वुत्तं. इतीति हेट्ठा वुत्तप्पकारेन चत्तारि चत्तारो हुत्वा तीणि तयो भवन्ति. तीणि तयो हुत्वा तण्हाचरितो च दिट्ठिचरितो चाति द्वे पुग्गला भवन्ति.

‘‘तेसं ¶ द्विन्नं पुग्गलानं कतमो संकिलेसो’’ति वत्तब्बभावतो ‘‘तेसं द्विन्नं पुग्गलानं अयं संकिलेसो’’तिआदि वुत्तं. तत्थ अयं संकिलेसोति ‘‘तण्हा च अविज्जा च…पे… सस्सतदिट्ठि च उच्छेददिट्ठि चा’’ति निद्धारितानं अकुसलधम्मानं इति अयं समूहो संकिलेसो होति.

‘‘तेसं ¶ द्विन्नं पुग्गलानं संकिलेसो आचरियेन निद्धारितो, कथं वोदान’’न्ति वत्तब्बभावतो ‘‘तेसं द्विन्नं पुग्गलानं इदं वोदान’’न्तिआदि वुत्तं. इदं वोदानन्ति ‘‘समथो च विपस्सना च…पे… सउपादिसेसा च निब्बानधातु, अनुपादिसेसा च निब्बानधातू’’ति निद्धारितानं कुसलधम्मानं समूहभूतं इति इदं धम्मजातं वोदानं होति.

‘‘तीणि अकुसलमूलानी’’तिआदिना संकिलेसपक्खे अकुसलमूलतिकादीनं द्विन्नं द्वादसन्नं तिकानं, तिण्णं उग्घटितञ्ञुआदिपुग्गलानं संकिलेसविभावनामुखेन या निद्धारणा कता, ‘‘तीणि कुसलमूलानी’’तिआदिना वोदानपक्खे कुसलमूलतिकादीनं द्विन्नं द्वादसन्नं तिकानं, तिण्णं उग्घटितञ्ञुआदिपुग्गलानं वोदानविभावनामुखेन या निद्धारणा कता, अयं वुत्तप्पकारनिद्धारणा तिपुक्खलस्स च नयस्स, अङ्कुसस्स च नयस्स भूमि समुट्ठानं पवत्तिहेतु नामाति योजेत्वा ‘‘तण्हा च अविज्जा चा’’तिआदिना संकिलेसपक्खे तण्हाअविज्जादुकादीनं पन्नरसन्नं दुकानं, द्विन्नं तण्हाचरितदिट्ठिचरितानं पुग्गलानं वोदानविभावनामुखेन या निद्धारणा कता, ‘‘समथो च विपस्सना चा’’तिआदिना वोदानपक्खे समथविपस्सनादुकादीनं एकूनवीसतिदुकानं, द्विन्नं तण्हाचरितदिट्ठिचरितानं पुग्गलानं वोदानविभावनामुखेन या निद्धारणा कता, अयं वुत्तप्पकारा नन्दियावट्टस्स नयस्स भूमीतिपि नीहरित्वा योजेतब्बा. पुग्गलाधिट्ठानवसेन हि नन्दियावट्टनयतो सीहविक्कीळितनयस्स सम्भवो, सीहविक्कीळितनयतो च तिपुक्खलनयस्स सम्भवो होति. धम्माधिट्ठानवसेन पन सीहविक्कीळितनयतो तिपुक्खलनयस्स सम्भवो, तिपुक्खलनयतो च नन्दियावट्टनयस्स सम्भवो होति. तेनाह अट्ठकथायं ‘‘अन्ते ‘तण्हा च अविज्जा चा’तिआदिना समथस्स नयस्स भूमि दस्सिता. तेनेव हि ‘चत्तारि हुत्वा तीणि भवन्ति, तीणि हुत्वा द्वे भवन्ती’ति वुत्त’’न्ति (नेत्ति. अट्ठ. ८८).

‘‘कस्मा ¶ पन अयं वुत्तप्पकाराय निद्धारणाय तिपुक्खलस्स च नयस्स, अङ्कुसस्स च नयस्स भूमिभावो विञ्ञायती’’ति वत्तब्बभावतो ‘‘तेनाहा’’तिआदि वुत्तं. तेन यथावुत्तस्स निद्धारणाय भूमिभावेन आचरियो ‘‘यो अकुसले…पे… दिसालोचनेनाति चा’’ति यं वचनं आह, तेन वचनेन वुत्तप्पकाराय निद्धारणाय तिपुक्खल…पे… यस्स भूमिभावो विञ्ञायतीति अत्थो.

‘‘एत्तावता नयसमुट्ठानं परिपुण्णं होति, अञ्ञं नत्थी’’ति वत्तब्बत्ता ‘‘नियुत्तं नयसमुट्ठान’’न्ति वुत्तं. येन येन नयसमुट्ठानेन संकिलेसपक्खे वा अकुसला धम्मा निद्धारिता ¶ , वोदानपक्खे वा कुसला धम्मा निद्धारिता, तं तं नयसमुट्ठानं नियुत्तं यथारहं निद्धारेत्वा युज्जितब्बन्ति अत्थो गहेतब्बो.

नयक्कमेन पन सङ्खेपतो दस्सयिस्सामि – द्वे पुग्गला, तयो पुग्गला, चत्तारो पुग्गलाति पुग्गला तिकोट्ठासा भवन्ति, चतुदिसा, छदिसा, अट्ठदिसाति दिसापि तिकोट्ठासा भवन्ति. तत्थ द्वे पुग्गलाति तण्हाचरितो पुग्गलो, दिट्ठिचरितो पुग्गलोति द्वे पुग्गला भवन्ति. तयो पुग्गलाति उग्घटितञ्ञुपुग्गलो, विपञ्चितञ्ञुपुग्गलो, नेय्यपुग्गलोति तयो पुग्गला भवन्ति. चत्तारो पुग्गलाति दुक्खापटिपदादन्धाभिञ्ञादिभेदेन भिन्ना मुदिन्द्रियो तण्हाचरितो पुग्गलो, मुदिन्द्रियो दिट्ठिचरितो पुग्गलो, तिक्खिन्द्रियो तण्हाचरितो पुग्गलो, तिक्खिन्द्रियो दिट्ठिचरितो पुग्गलोति चत्तारो पुग्गला भवन्ति. चतुदिसाति संकिलेसपक्खे द्वे द्वे दिसा, वोदानपक्खे द्वे द्वे दिसाति चतुदिसा भवन्ति. छदिसाति संकिलेसपक्खे तिस्सो तिस्सो दिसा, वोदानपक्खे तिस्सो तिस्सो दिसाति छदिसा भवन्ति. अट्ठदिसाति संकिलेसपक्खे चतस्सो चतस्सो दिसा, वोदानपक्खे चतस्सो चतस्सो दिसाति अट्ठदिसा भवन्ति. तेसु द्वे द्वे तण्हाचरितदिट्ठिचरिते पुग्गले, चतुदिसा च निस्साय नन्दियावट्टनयसमुट्ठानं भवति. तयो उग्घटितञ्ञुविपञ्चितञ्ञुनेय्यपुग्गले च छदिसा च निस्साय तिपुक्खलनयसमुट्ठानं भवति. दुक्खापटिपदादन्धाभिञ्ञादिभेदेन भिन्ने चत्तारो मुदिन्द्रियतण्हाचरिततिक्खिन्द्रियतण्हाचरितमुदिन्द्रियदिट्ठिचरिततिक्खिन्द्रियदिट्ठिचरिते पुग्गले च अट्ठदिसा च निस्साय सीहविक्कीळितनयसमुट्ठानं भवति ¶ . एकेकस्मिं नयसमुट्ठाने विभजिते दिसालोचनअङ्कुसनयसमुट्ठानानिपि विभजितानि भवन्ति.

‘‘कथं नन्दियावट्टनयसमुट्ठानं भवती’’ति चे वदेय्य? ‘‘तण्हा च अविज्जा च अहिरिकञ्च अनोत्तप्पञ्च अस्सति च असम्पजञ्ञञ्च अयोनिसोमनसिकारो च कोसज्जञ्च दोवचस्सञ्च अहंकारो च ममंकारो च अस्सद्धा च पमादो च असद्धम्मस्सवनञ्च असंवरो च अभिज्झा च ब्यापादो च नीवरणञ्च संयोजनञ्च कोधो च उपनाहो च मक्खो च पळासो च इस्सा च मच्छेरञ्च माया च साठेय्यञ्च सस्सतदिट्ठि च उच्छेददिट्ठि चा’’ति (नेत्ति. ८८) दुकदुकवसेन देसितो अयं दिसाभूतो अकुसलधम्मसमूहो द्विन्नं तण्हाचरितदिट्ठिचरितानं पुग्गलानं संकिलेसो होतीति संकिलेसपक्खे संकिलेससामञ्ञभावेन योजेत्वा ‘‘इमेसु पन्नरससु दुकदुकवसेन देसितेसु दिसाभूतेसु अकुसलधम्मेसु कतमो अकुसलधम्मो कतमस्स पुग्गलस्स दिसा’’ति मनसाव दिसाधम्मभावेन ओलोकेत्वा ‘‘अयं अयं पठमो पठमो अकुसलधम्मो तण्हाचरितस्स पुग्गलस्स संकिलेसपक्खे ¶ पठमा दिसा नाम, अयं अयं दुतियो दुतियो अकुसलधम्मो दिट्ठिचरितस्स पुग्गलस्स संकिलेसपक्खे दुतिया दिसा नामा’’ति विसुं विसुं योजेत्वा समुदयसच्चदुक्खसच्चानि यथारहं नीहरित्वा विभजितब्बधम्मसभावो च येन संवण्णनाविसेसेन दस्सितो, सो संवण्णनाविसेसो च नन्दियावट्टनयसमुट्ठानं भवति, तस्स ओलोकना च येन संवण्णनाविसेसेन दस्सिता, सो संवण्णनाविसेसो च दिसालोचननयसमुट्ठानं भवति, तथा ओलोकेत्वा दिसाविसेसभूतस्स धम्मविसेसस्स पुग्गलानं नयनञ्च येन संवण्णनाविसेसेन नयति, सो संवण्णनाविसेसो च अङ्कुसनयसमुट्ठानं भवति.

‘‘समथो च विपस्सना च, हिरी च ओत्तप्पञ्च, सति च सम्पजञ्ञञ्च, योनिसोमनसिकारो च वीरियारम्भो च, सोवचस्सञ्च धम्मे ञाणञ्च अन्वये ञाणञ्च, खये ञाणञ्च अनुप्पादे ञाणञ्च, सद्धा च अप्पमादो च, सद्धम्मस्सवनञ्च संवरो च, अनभिज्झा च अब्यापादो च, रागविरागा च चेतोविमुत्ति, अविज्जाविरागा च पञ्ञाविमुत्ति, अभिसमयो च अप्पिच्छता च, सन्तुट्ठि च अक्कोधो च, अनुपनाहो च अमक्खो च, अपळासो ¶ च इस्सापहानञ्च मच्छरियप्पहानञ्च विज्जा च, विमुत्ति च सङ्खतारम्मणो च विमोक्खो, असङ्खतारम्मणो च विमोक्खो, सउपादिसेसा च निब्बानधातु, अनुपादिसेसा च निब्बानधातू’’ति (नेत्ति. ८८) तिकदुकवसेन देसितं इदं दिसाभूतं कुसलसमूहधम्मजातं द्विन्नं तण्हाचरितदिट्ठिचरितानं पुग्गलानं वोदानं होतीति वोदानपक्खे वोदानसामञ्ञभावेन योजेत्वा ‘‘इमेसु एकूनवीसतिया दुकदुकवसेन वा देसितेसु दिसाभूतेसु धम्मेसु कतमो कतमो कुसलधम्मो कतमस्स कतमस्स पुग्गलस्स दिसा’’ति मनसाव दिसाधम्मभावेन ओलोकेत्वा ‘‘अयं पठमो पठमो कुसलधम्मो तण्हाचरितस्स पुग्गलस्स वोदानपक्खे पठमा दिसा नाम, अयं दुतियो दुतियो कुसलधम्मो दिट्ठिचरितस्स पुग्गलस्स वोदानपक्खे दुतिया दिसा नामा’’ति विसुं विसुं योजेत्वा मग्गसच्चनिरोधसच्चानि यथारहं नीहरित्वा विभजितब्बधम्मभावो च येन संवण्णनाविसेसेन दस्सितो, सो संवण्णनाविसेसो च नन्दियावट्टनयसमुट्ठानं भवति, तस्स ओलोकना च येन संवण्णनाविसेसेन दस्सिता, सो संवण्णनाविसेसो च दिसालोचननयसमुट्ठानं भवति, तथा ओलोकेत्वा दिसाविसेसभूतस्स धम्मविसेसस्स पुग्गलानं नयनञ्च येन संवण्णनाविसेसेन नयति, सो संवण्णनाविसेसो च अङ्कुसनयसमुट्ठानं भवति.

‘‘कथं तिपुक्खलनयसमुट्ठानं भवती’’ति चे पुच्छेय्य, ‘‘तीणि अकुसलमूलानि – लोभो अकुसलमूलं, दोसो अकुसलमूलं, मोहो अकुसलमूलं. तीणि दुच्चरितानि – कायदुच्चरितं ¶ , वचीदुच्चरितं, मनोदुच्चरितं. तयो अकुसलवितक्का – कामवितक्को, ब्यापादवितक्को, विहिंसावितक्को. तिस्सो अकुसलसञ्ञा – कामसञ्ञा, ब्यापादसञ्ञा, विहिंसासञ्ञा. तिस्सो विपरीतसञ्ञा – निच्चसञ्ञा, सुखसञ्ञा, अत्तसञ्ञा. तिस्सो वेदना – सुखा वेदना, दुक्खा वेदना, अदुक्खमसुखा वेदना. तिस्सो दुक्खता – दुक्खदुक्खता, सङ्खारदुक्खता, विपरिणामदुक्खता. तयो अग्गी – रागग्गि, दोसग्गि, मोहग्गि. तयो सल्ला – रागसल्लो, दोससल्लो, मोहसल्लो. तिस्सो जटा – रागजटा, दोसजटा, मोहजटा. तिस्सो अकुसलूपपरिक्खा – अकुसलं कायकम्मं ¶ , अकुसलं वचीकम्मं, अकुसलं मनोकम्मं. तिस्सो विपत्तियो – सीलविपत्ति, दिट्ठिविपत्ति, आचारविपत्ती’’ति (नेत्ति. ८८) तिकवसेन देसितो अयं दिसाभूतो अकुसलधम्मसमूहो तिण्णं उग्घटितञ्ञुविपञ्चितञ्ञुनेय्यपुग्गलानं संकिलेसो होतीति संकिलेसपक्खे संकिलेससामञ्ञभावेन योजेत्वा ‘‘इमेसु द्वादससु तिकतिकवसेन देसितेसु दिसाभूतेसु अकुसलधम्मेसु कतमो कतमो अकुसलो धम्मो कतमस्स कतमस्स पुग्गलस्स दिसा’’ति मनसाव दिसाधम्मभावेन ओलोकेत्वा ‘‘अयं अयं पठमो पठमो अकुसलधम्मो उग्घटितञ्ञुपुग्गलस्स संकिलेसपक्खे पठमा दिसा नाम. अयं अयं दुतियो दुतियो अकुसलधम्मो विपञ्चितञ्ञुपुग्गलस्स संकिलेसपक्खे दुतिया दिसा नाम. अयं अयं ततियो ततियो अकुसलधम्मो नेय्यस्स पुग्गलस्स संकिलेसपक्खे ततिया दिसा नामा’’ति विसुं विसुं योजेत्वा समुदयसच्चदुक्खसच्चानि यथारहं नीहरित्वा विभजितब्बधम्मसभावो च येन संवण्णनाविसेसेन दस्सितो. सो संवण्णनाविसेसो च तिपुक्खलनयसमुट्ठानं भवति. तस्स ओलोकना च येन संवण्णनाविसेसेन दस्सिता, सो संवण्णनाविसेसो च दिसालोचननयसमुट्ठानं भवति तथा ओलोकेत्वा दिसाविसेसभूतस्स धम्मविसेसस्स पुग्गलानं नयनञ्च येन संवण्णनाविसेसेन नयति, सो संवण्णनाविसेसो अङ्कुसनयसमुट्ठानं भवति.

‘‘तीणि कुसलमूलानि – अलोभो कुसलमूलं, अदोसो कुसलमूलं, अमोहो कुसलमूलं. तीणि सुचरितानि – कायसुचरितं, वचीसुचरितं, मनोसुचरितं. तयो कुसलवितक्का – नेक्खम्मवितक्को, अब्यापादवितक्को, अविहिंसावितक्को. तयो समाधी – सवितक्को सविचारो समाधि, अवितक्को विचारमत्तो समाधि, अवितक्को अविचारो समाधि. तिस्सो कुसलसञ्ञा – नेक्खम्मसञ्ञा, अब्यापादसञ्ञा, अविहिंसासञ्ञा. तिस्सो अविपरीतसञ्ञा – अनिच्चसञ्ञा, दुक्खसञ्ञा, अनत्तसञ्ञा. तिस्सो कुसलूपपरिक्खा – कुसलं कायकम्मं, कुसलं वचीकम्मं, कुसलं मनोकम्मं. तीणि सोचेय्यानि – कायसोचेय्यं, वचीसोचेय्यं, मनोसोचेय्यं. तिस्सो सम्पत्तियो – सीलसम्पत्ति, समाधिसम्पत्ति, पञ्ञासम्पत्ति ¶ . तिस्सो सिक्खा – अधिसीलसिक्खा, अधिचित्तसिक्खा ¶ , अधिपञ्ञासिक्खा. तयो खन्धा – सीलक्खन्धो, समाधिक्खन्धो, पञ्ञाक्खन्धो. तीणि विमोक्खमुखानि – सुञ्ञतं, अनिमित्तं, अप्पणिहित’’न्ति (नेत्ति. ८८) तिकतिकवसेन देसितं इदं दिसाभूतं कुसलसमूहधम्मजातं तिण्णं उग्घटितञ्ञुविपञ्चितञ्ञुनेय्यपुग्गलानं वोदानं होतीति वोदानपक्खे वोदानसामञ्ञभावेन योजेत्वा ‘‘इमेसु द्वीसु द्वादससु तिकतिकवसेन देसितेसु दिसाभूतेसु कुसलधम्मेसु कतमो कतमो कुसलधम्मो कतमस्स कतमस्स पुग्गलस्स दिसा’’ति मनसाव दिसाधम्मभावेन ओलोकेत्वा ‘‘अयं अयं पठमो पठमो कुसलधम्मो उग्घटितञ्ञुपुग्गलस्स वोदानपक्खे पठमा दिसा नाम. अयं अयं दुतियो दुतियो कुसलो धम्मो विपञ्चितञ्ञुपुग्गलस्स वोदानपक्खे दुतिया दिसा नाम. अयं अयं ततियो ततियो कुसलधम्मो नेय्यपुग्गलस्स वोदानपक्खे ततिया दिसा नामा’’ति विसुं विसुं दिसाभावेन योजेत्वा मग्गसच्चनिरोधसच्चानि यथारहं नीहरित्वा विभजितब्बधम्मसभावो च येन संवण्णनाविसेसेन दस्सितो. सो संवण्णनाविसेसो च तिपुक्खलनयसमुट्ठानं भवति. तस्स ओलोकना च येन संवण्णनाविसेसेन दस्सिता, सो संवण्णनाविसेसो च दिसालोचननयसमुट्ठानं भवति. तथा ओलोकेत्वा दिसाविसेसभूतस्स धम्मस्स पुग्गलानं नयनञ्च येन संवण्णनाविसेसेन नयति, सो संवण्णनाविसेसो च अङ्कुसनयसमुट्ठानं भवति.

‘‘कथं सीहविक्कीळितनयसमुट्ठान’’न्ति चे पुच्छेय्य, ‘‘चत्तारो आहारा, चत्तारो विपल्लासा, चत्तारि उपादानानि, चत्तारो योगा, चत्तारो गन्था, चत्तारो आसवा, चत्तारो ओघा, चत्तारो सल्ला, चतस्सो विञ्ञाणट्ठितियो, चत्तारि अगतिगमनानी’’ति (नेत्ति. ८७) चतुक्कचतुक्कवसेन देसितो अयं दिसाभूतो चतुक्को चतुक्को अकुसलधम्मो ‘‘दुक्खाय पटिपदाय दन्धाभिञ्ञाय निय्यकस्स मुदिन्द्रियस्स तण्हाचरितस्स च दुक्खाय पटिपदाय खिप्पाभिञ्ञाय निय्यकस्स तिक्खिन्द्रियस्स तण्हाचरितस्स च सुखाय पटिपदाय दन्धाभिञ्ञाय निय्यकस्स मुदिन्द्रियस्स दिट्ठिचरितस्स च सुखाय पटिपदाय खिप्पाभिञ्ञाय निय्यकस्स तिक्खिन्द्रियस्स दिट्ठिचरितस्स चा’’ति चतुन्नं पुग्गलानं संकिलेसोति संकिलेसपक्खे संकिलेससामञ्ञभावेन योजेत्वा ‘‘इमेसु चतुक्कचतुक्कवसेन देसितेसु दससु ¶ चतुक्केसु धम्मेसु कतमो कतमो अकुसलधम्मो कतमस्स कतमस्स पुग्गलस्स दिसा’’ति मनसाव संकिलेसपक्खे दिसाधम्मभावेन ओलोकेत्वा ‘‘अयं अयं पठमो पठमो अकुसलधम्मो दुक्खाय पटिपदाय दन्धाभिञ्ञाय निय्यकस्स मुदिन्द्रियस्स तण्हाचरितस्स पुग्गलस्स पठमा दिसा नाम. अयं अयं दुतियो दुतियो अकुसलधम्मो दुक्खाय पटिपदाय खिप्पाभिञ्ञाय निय्यकस्स तिक्खिन्द्रियस्स तण्हाचरितस्स पुग्गलस्स दुतिया दिसा नाम. अयं ¶ अयं ततियो ततियो अकुसलधम्मो सुखाय पटिपदाय दन्धाभिञ्ञाय निय्यकस्स मुदिन्द्रियस्स दिट्ठिचरितस्स पुग्गलस्स ततिया दिसा नाम. अयं अयं चतुत्थो चतुत्थो अकुसलधम्मो सुखाय पटिपदाय खिप्पाभिञ्ञाय निय्यकस्स तिक्खिन्द्रियस्स दिट्ठिचरितस्स पुग्गलस्स चतुत्था दिसा नामा’’ति विसुं विसुं दिसाभावेन योजेत्वा, समुदयसच्चदुक्खसच्चानि यथारहं नीहरित्वा, विभजितब्बधम्मसभावो च येन संवण्णनाविसेसेन दस्सितो. सो संवण्णनाविसेसो च सीहविक्कीळितनयसमुट्ठानं भवति. तस्स ओलोकना च येन संवण्णनाविसेसेन दस्सिता, सो संवण्णनाविसेसो च दिसालोचननयसमुट्ठानं भवति. तथा ओलोकेत्वा दिसाविसेसभूतस्स धम्मस्स पुग्गलानं नयनञ्च येन संवण्णनाविसेसेन नयति, सो संवण्णनाविसेसो च अङ्कुसनयसमुट्ठानं भवति.

‘‘चतस्सो पटिपदा, चत्तारो सतिपट्ठाना, चत्तारि झानानि, चत्तारो विहारा, चत्तारो सम्मप्पधाना, चत्तारो अच्छरिया अब्भुता धम्मा, चत्तारि अधिट्ठानानि, चतस्सो समाधिभावना, चत्तारो सुखभागिया धम्मा, चतस्सो अप्पमाणा’’ति (नेत्ति. ८६) चतुक्कचतुक्कवसेन देसितं इदं दिसाभूतं कुसलसमूहधम्मजातं ‘‘दुक्खाय पटिपदाय दन्धाभिञ्ञाय निय्यकस्स मुदिन्द्रियस्स तण्हाचरितस्स च दुक्खाय पटिपदाय खिप्पाभिञ्ञाय निय्यकस्स तिक्खिन्द्रियस्स तण्हाचरितस्स च सुखाय पटिपदाय दन्धाभिञ्ञाय निय्यकस्स मुदिन्द्रियस्स दिट्ठिचरितस्स स सुखाय पटिपदाय खिप्पाभिञ्ञाय निय्यकस्स तिक्खिन्द्रियस्स दिट्ठिचरितस्स चा’’ति चतुन्नं पुग्गलानं वोदानं होतीति वोदानपक्खे वोदानसामञ्ञभावेन योजेत्वा ‘‘इमेसु चतुक्कचतुक्कवसेन देसितेसु दससु चतुक्केसु कुसलधम्मेसु कतमो ¶ कतमो कुसलधम्मो कतमस्स कतमस्स पुग्गलस्स दिसा’’ति मनसाव दिसाधम्मभावेन ओलोकेत्वा, ‘‘अयं अयं पठमो पठमो कुसलधम्मो दुक्खाय पटिपदाय दन्धाभिञ्ञाय निय्यकस्स मुदिन्द्रियस्स तण्हाचरितस्स पुग्गलस्स पठमा दिसा नाम. अयं अयं दुतियो दुतियो कुसलधम्मो दुक्खाय पटिपदाय खिप्पाभिञ्ञाय निय्यकस्स तिक्खिन्द्रियस्स तण्हाचरितस्स पुग्गलस्स दुतिया दिसा नाम. अयं अयं ततियो ततियो कुसलधम्मो सुखाय पटिपदाय दन्धाभिञ्ञाय निय्यकस्स मुदिन्द्रियस्स दिट्ठिचरितस्स पुग्गलस्स ततिया दिसा नाम. अयं अयं चतुत्थो चतुत्थो कुसलधम्मो सुखाय पटिपदाय खिप्पाभिञ्ञाय निय्यकस्स तिक्खिन्द्रियस्स दिट्ठिचरितस्स पुग्गलस्स चतुत्था दिसा नामा’’ति विसुं विसुं दिसाभावेन योजेत्वा, मग्गसच्चनिरोधसच्चानि यथारहं नीहरित्वा, विभजितब्बधम्मसभावो च येन संवण्णनाविसेसेन दस्सितो. सो संवण्णनाविसेसो च सीहविक्कीळितनयसमुट्ठानं भवति. तस्स ओलोकना च येन संवण्णनाविसेसेन दस्सिता. सो संवण्णनाविसेसो च दिसालोचननयसमुट्ठानं ¶ भवति. तथा ओलोकेत्वा दिसाविसेसस्स धम्मस्स पुग्गलानं नयनञ्च येन संवण्णनाविसेसेन नयति, सो संवण्णनाविसेसो च अङ्कुसनयसमुट्ठानं भवतीति नयक्कमेन सङ्खेपतो नयसमुट्ठानं भवतीति विञ्ञातब्बन्ति.

इति नयसमुट्ठाने सत्तिबलानुरूपा रचिता

विभावना निट्ठिता.

पण्डितेहि पन अट्ठकथाटीकानुसारेन गम्भीरत्थो वित्थारतो विभजित्वा गहेतब्बोति.

सासनपट्ठानविभावना

८९. ‘‘तत्थ कतमं नयसमुट्ठान’’न्तिआदिना आचरियेन सब्बथा नयसमुट्ठानं ठपितं, अम्हेहि च ञातं, ‘‘सोळसहारपञ्चनयअट्ठारसमूलपदेसु अट्ठारस मूलपदा कथं विभत्ता, कुहिं अम्हेहि दट्ठब्बा’’ति वत्तब्बभावतो ¶ ‘‘तत्थ अट्ठारस मूलपदा कुहिं दट्ठब्बा’’तिआदि वुत्तं. तत्थाति तेसु सोळसहारपञ्चनयअट्ठारसमूलपदेसु अट्ठारस मूलपदा केन पदेन आचरियेन विभत्ता, कुहिं अम्हेहि वित्थारतो दट्ठब्बाति पुच्छति. अट्ठारस मूलपदा सासनपट्ठाने मया विभत्ता, तुम्हेहि च वित्थारतो सासनपट्ठाने दट्ठब्बाति विस्सज्जेति. विभत्तायेव हि अट्ठारस मूलपदा दट्ठब्बा भवन्ति. अट्ठकथायं (नेत्ति. अट्ठ. ८९) पन –

‘‘एवं सब्बथा नयसमुट्ठानं विभजित्वा इदानि सासनपट्ठानं विभजन्तो यस्मा सङ्गहवारादीसु मूलपदेहेव पट्ठानं सङ्गहेत्वा सरूपतो न दस्सितं, तस्मा यथा मूलपदेहि पट्ठानं निद्धारेतब्बं, एवं पट्ठानतोपि मूलपदानि निद्धारेतब्बानीति दस्सनत्थं ‘अट्ठारस मूलपदा कुहिं दट्ठब्बा? सासनपट्ठाने’ति आहा’’ति –

वुत्तं. सासनपट्ठाने अट्ठारस मूलपदा दट्ठब्बाति आचरियेन वुत्ता, ‘‘कतमं तं सासनपट्ठान’’न्ति पुच्छितब्बत्ता ‘‘तत्थ कतमं सासनपट्ठान’’न्तिआदि वुत्तं. तत्थाति तेसु अट्ठारसमूलपदसासनपट्ठानेसु कतमं तं सासनपट्ठानन्ति इदानि मया निद्धारियमानं भगवता देसितं ¶ संकिलेसभागियादिसुत्तं सासनपट्ठानं नामाति विस्सज्जेति. सासनन्ति परियत्तिसासनं. पट्ठानन्ति तस्स परियत्तिसासनस्स संकिलेसभागियतादीहि पकारेहि ठानं पवत्तनं पट्ठानं, तंदीपनसुत्तं पन इध पट्ठानं नाम. तेन वुत्तं – ‘‘संकिलेसभागियं सुत्त’’न्तिआदि. अथ वा सासनन्ति अधिसीलअधिचित्तअधिपञ्ञासिक्खत्तयं सासनं नाम, तं सिक्खत्तयं पतिट्ठहति एतेन संकिलेसादिनाति पट्ठानं, सिक्खत्तयस्स सासनस्स पट्ठानन्ति सासनपट्ठानं. तदाधारभूतं सुत्तम्पि ठान्यूपचारतो सासनपट्ठानं नाम. तं सासनपट्ठानसुत्तं सरूपतो दस्सेतुं –

‘‘संकिलेसभागियं सुत्तं, वासनाभागियं सुत्तं, निब्बेधभागियं सुत्तं, असेक्खभागियं सुत्तं, संकिलेसभागियञ्च वासनाभागियञ्च सुत्तं, संकिलेसभागियञ्च निब्बेधभागियञ्च सुत्तं, संकिलेसभागियञ्च असेक्खभागियञ्च सुत्तं, संकिलेसभागियञ्च निब्बेधभागियञ्च असेक्खभागियञ्च सुत्तं, संकिलेसभागियञ्च वासनाभागियञ्च निब्बेधभागियञ्च सुत्तं, वासनाभागियञ्च ¶ निब्बेधभागियञ्च सुत्तं, तण्हासंकिलेसभागियं सुत्तं, दिट्ठिसंकिलेसभागियं सुत्तं, दुच्चरितसंकिलेसभागियं सुत्तं, तण्हावोदानभागियं सुत्तं, दिट्ठिवोदानभागियं सुत्तं, दुच्चरितवोदानभागियं सुत्त’’न्ति –

वुत्तं. ‘‘तेसु सुत्तेसु ये संकिलेसादयो भगवता वुत्ता, तेसु संकिलेसादीसु संकिलेसो कित्तको’’ति पुच्छितब्बत्ता ‘‘तत्थ संकिलेसो तिविधो तण्हासंकिलेसो दिट्ठिसंकिलेसो दुच्चरितसंकिलेसो’’ति वुत्तं. तत्थाति तेसु सुत्तन्तेसु संकिलेसादीसु धम्मेसु. ‘‘तिविधे तस्मिं संकिलेसे तण्हासंकिलेसो कतमेन कुसलेन विसुज्झती’’ति पुच्छितब्बत्ता ‘‘तत्थ तण्हासंकिलेसो समथेन विसुज्झती’’ति वुत्तं. तत्थाति तस्मिं तिविधे तण्हासंकिलेसादिके. ‘‘सो समथो खन्धेसु कतमो खन्धो’’ति पुच्छितब्बत्ता ‘‘सो समथो समाधिक्खन्धो’’ति वुत्तं. ‘‘दिट्ठिसंकिलेसो केन विसुज्झती’’ति पुच्छितब्बत्ता ‘‘दिट्ठिसंकिलेसो विपस्सनाय विसुज्झती’’ति वुत्तं. ‘‘सा विपस्सना कतमो खन्धो’’ति वत्तब्बत्ता ‘‘सा विपस्सना पञ्ञाक्खन्धो’’ति वुत्तं. ‘‘दुच्चरितसंकिलेसो केन विसुज्झती’’ति वत्तब्बत्ता ‘‘दुच्चरितसंकिलेसो सुचरितेन विसुज्झती’’ति वुत्तं. ‘‘तं सुचरितं कतमो खन्धो’’ति वत्तब्बत्ता ‘‘तं सुचरितं सीलक्खन्धो’’ति वुत्तं. ‘‘तस्मिं सीले ठितस्स पुग्गलस्स किं भवती’’ति वत्तब्बत्ता ‘‘तस्स सीले पतिट्ठितस्सा’’तिआदि वुत्तं. सीले सुचरितसङ्खाते सीलक्खन्धे पतिट्ठितस्स तस्स सीलवन्तस्स पुग्गलस्स भवेसु कामभवरूपारूपभवेसु आसत्ति भवपत्थना यदि उप्पज्जति, एवंसायन्ति एवं अस्स अयन्ति पदच्छेदो. एवं सति अस्स सीले ¶ पतिट्ठितस्स अयं आसत्ति भवपत्थना समथविपस्सनाभावनामयपुञ्ञकिरियवत्थु च भवति, च-सद्देन दानमयसीलमयपुञ्ञकिरियवत्थु च भवतीति अत्थो सङ्गहितो. तत्राति तेसु कामभवरूपारूपभवेसु उपपत्तिया संवत्ततीति.

‘‘संकिलेसादयो येहि सुत्तेहि दस्सिता, तानि सुत्तानि कित्तकानी’’ति वत्तब्बत्ता ‘‘इमानि चत्तारि सुत्तानी’’तिआदि वुत्तं. असाधारणानि संकिलेसभागियसुत्तवासनाभागियसुत्तनिब्बेधभागियसुत्तअसेक्खभागियसुत्तानि चत्तारि सुत्तानि भवन्ति, साधारणानि ¶ संकिलेसभागियवासनाभागियसुत्त, संकिलेसभागियनिब्बेधभागियसुत्त, संकिलेसभागियअसेक्खभागियसुत्त, वासनाभागियनिब्बेधभागियसुत्तानि कतानि मिस्सितानि चत्तारि भवन्ति. इति अट्ठ सुत्तानि भवन्ति. तानियेव वुत्तप्पकारानि अट्ठ सुत्तानि भवन्ति. साधारणानि वासनाभागियअसेक्खभागियसुत्तनिब्बेधभागियअसेक्खभागियसुत्त- संकिलेसभागियवासनाभागियनिब्बेधभागियसुत्तसंकिलेस- भागियवासनाभागियअसेक्खभागियसुत्त- संकिलेसभागियनिब्बेधभागियअसेक्खभागियसुत्त- वासनाभागियनिब्बेधभागियअसेक्खभागियसुत्त- संकिलेसभागियवासनाभागियनिब्बेधभागियअसेक्खभागियसुत्त- नेवसंकिलेसभागियनवासना- भागियननिब्बेधभागियनअसेक्खभागियसुत्तानि कतानि मिस्सितानि अट्ठ सुत्तानि भवन्तीति सोळस सुत्तानि भवन्ति. तेसु सोळससुत्तेसु चत्तारि एककानि सुत्तानि च चत्तारि दुकानि सुत्तानि च द्वे तिकानि च पाळियं आगतानि, द्वे दुकानि सुत्तानि च द्वे तिकानि च द्वे चतुक्कानि सुत्तानि च अट्ठकथायं (नेत्ति. अट्ठ. ८९) आगतानि.

‘‘यदि पट्ठाननयेन वुत्तप्पकारानि सोळस सुत्तानियेव विभत्तानि, एवं सति सुत्तगेय्यादिनवविधं सकलं परियत्तिसासनं पट्ठाननयेन अविभत्तं भवेय्या’’ति वत्तब्बत्ता ‘‘इमेहि सोळसहि सुत्तेही’’तिआदि वुत्तं. पट्ठाननयेन विभत्तेहि सोळसहि इमेहि सुत्तेहि नवविधं सकलं परियत्तिसुत्तं पट्ठाननयेन विभत्तंयेव हुत्वा भिन्नं भवति. संकिलेसभागियादिपभेदाय गाथाय गाथा अनुमिनितब्बा, संकिलेसभागियादिपभेदेन वेय्याकरणेन वेय्याकरणं अनुमिनितब्बं. संकिलेसभागियादिपभेदेन सुत्तेन सुत्तं अनुमिनितब्बं भवतियेवाति.

९०. ‘‘तेसु सोळससु संकिलेसभागियादीसु सुत्तेसु कतमं संकिलेसभागियं सुत्त’’न्ति पुच्छितब्बत्ता ‘‘तत्थ कतमं संकिलेसभागियं सुत्त’’न्तिआदि वुत्तं. तत्थाति तेसु सोळससु संकिलेसभागियादीसु सुत्तेसु कतमं सुत्तं संकिलेसभागियं सुत्तं नामाति पुच्छति.

‘‘कामन्धा ¶ ¶ जालसञ्छन्ना, तण्हाछदनछादिता;

पमत्तबन्धनाबद्धा, मच्छाव कुमिनामुखे;

जरामरणमन्वेन्ति, वच्छो खीरपकोव मातर’’न्ति. –

इदं सुत्तं संकिलेसभागे वाचकञापकभावेन पवत्तनतो संकिलेसभागियं सुत्तं नाम. ये सत्ता कामन्धा कामेन अन्धा जालसञ्छन्ना तण्हाछदनेन छादिता, पमत्तबन्धनाय बद्धा बन्धितब्बा, ते सत्ते जरामरणं अन्वेति, यथा तं कुमिनामुखे ये मच्छा गहिता, ते मच्छे जरामरणं अन्वेति इव, एवं ते सत्ते जरामरणं अन्वेति. खीरपको वच्छो मातरं अन्वेति इव, एवं ते सत्ते जरामरणं अन्वेतीति योजना कातब्बा. अथ वा खीरपको वच्छो मातरं अन्वेति इव, कुमिनामुखे गहिता मच्छा जरामरणं अन्वेन्ति इव च, एवं ये सत्ता कामन्धा पमत्तबन्धनाय बन्धितब्बा, ते सत्ता जरामरणं अन्वेन्तीति योजना.

‘‘इदं सुत्तंयेवा’’ति वत्तब्बत्ता –

‘‘चत्तारिमानि, भिक्खवे, अगतिगमनानि. कतमानि चत्तारि? छन्दागतिं गच्छति, दोसागतिं गच्छति, मोहागतिं गच्छति, भयागतिं गच्छति, इमानि खो, भिक्खवे, चत्तारि अगतिगमनानि. इदमवोच भगवा, इदं वत्वान सुगतो, अथापरं एतदवोच सत्था –

‘‘छन्दा दोसा भया मोहा, यो धम्मं अतिवत्तति;

निहीयति तस्स यसो, काळपक्खेव चन्दिमा’’ति. –

इदं संकिलेसभागियं सुत्तन्ति –

वुत्तं. छन्दा छन्दहेतुना दोसा दोसहेतुना भया भयहेतुना मोहा मोहहेतुना यो राजादिको यो विनयधरादिको वा धम्मं सप्पुरिसधम्मं अतिवत्तति अतिक्कमित्वा वत्तति, तस्स राजादिनो वा तस्स विनयधरादिनो वा यसो कित्ति च परिवारो च भोगो च निहीयति. चन्दिमा काळपक्खे पभाय निहीयति इव, एवं निहीयतीति योजना.

‘‘एत्तकंयेवा’’ति ¶ ¶ वत्तब्बत्ता ‘‘मनोपुब्बङ्गमा धम्मा…पे… चक्कंव वहतो पदन्ति इदं संकिलेसभागियं सुत्त’’न्ति वुत्तं. अत्थो पाकटो. अट्ठकथायम्पि विभत्तो.

‘‘मिद्धी यदा होति महग्घसो च, निद्दायिता सम्परिवत्तसायी;

महावराहोव निवापपुट्ठो, पुनप्पुनं गब्भमुपेति मन्दो’’ति. –

इदं सुत्तम्पि संकिलेसभागे विसये वाचकञापकभावेन पवत्तनतो संकिलेसभागियं सुत्तं नाम. निवापपुट्ठो महावराहो गामसूकरो निद्दायिता सुपनसीलो सम्परिवत्तसायी होति इव, एवं यो मन्दो सत्तो यदा महग्घसो होति, सो मन्दो सत्तो मिद्धी थिनमिद्धाभिभूतो हुत्वा निद्दायिता मुदुफस्ससयने मुदुहत्थेहि परामसितो सम्परिवत्तसायी पुनप्पुनं गब्भं उपेतीति योजना.

‘‘अयसाव मलं समुट्ठितं, ततुट्ठाय तमेव खादति;

एवं अतिधोनचारिनं, सानि कम्मानि नयन्ति दुग्गति’’न्ति. –

इदं सुत्तम्पि संकिलेसभागियं सुत्तं नाम. अयसा अयतो समुट्ठितं जातमलं ततुट्ठाय ततो अयतो उट्ठहित्वा तमेव अयं खादति इव, एवं अतिधोनचारिनं अतिक्कमित्वा धोनचारिपुग्गलं सानि सयं कतानि अकुसलकम्मानि दुग्गतिं नयन्तीति योजना.

‘‘चोरो यथा सन्धिमुखे गहीतो, सकम्मुना हञ्ञति बज्झते च;

एवं अयं पेच्च पजा परत्थ, सकम्मुना हञ्ञति बज्झते चा’’ति. –

इदं सुत्तम्पि संकिलेसभागियं सुत्तं नाम. सन्धिमुखे राजपुरिसादीहि गहितो चोरो सकम्मुना अत्तना कतेन चोरकम्मेन हञ्ञति च बज्झते च यथा, एवं अयं पापकारिनी पजा परत्थ परलोके पेच्च सकम्मुना सयं कतेन अकुसलकम्मुना सत्थादीहि हञ्ञति च अद्दुबन्धनादीहि बज्झते चाति योजना.

‘‘सुखकामानि ¶ भूतानि, यो दण्डेन विहिंसति;

अत्तनो सुखमेसानो, पेच्च सो न लभते सुख’’न्ति. –

इदं ¶ सुत्तम्पि संकिलेसभागियं सुत्तं नाम. अत्तनो सुखं एसानो एसमानो यो सत्तो अञ्ञानि सुखकामानि भूतानि दण्डेन विहिंसति, सो हिंसको सत्तो परलोके पेच्च सुखं न लभतीति योजना.

‘‘गुन्नं चे तरमानानं, जिम्हं गच्छति पुङ्गवो;

सब्बा ता जिम्हं गच्छन्ति, नेत्ते जिम्हं गते सति.

‘‘एवमेव मनुस्सेसु, यो होति सेट्ठसम्मतो;

सो चे अधम्मं चरति, पगेव इतरा पजा;

सब्बं रट्ठं दुक्खं सेति, राजा चे होति अधम्मिको’’ति. –

इदं सुत्तम्पि संकिलेसभागियं सुत्तं नाम. नदिं तरमानानं गुन्नं पुङ्गवो जिम्हं चे गच्छति, एवं नेत्ते जिम्हं गते सति सब्बा ता गावियो जिम्हं गच्छन्ति यथा, एवमेव मनुस्सेसु यो राजा सेट्ठसम्मतो, सो राजा अधम्मं चरति, एवं रञ्ञे अधम्मं चरन्ते सति इतरा पजा पगेव पठममेव अधम्मं चरति. राजा अधम्मिको चे होति, एवं रञ्ञे अधम्मिके सति सब्बं रट्ठं दुक्खं सेतीति योजना.

‘‘सुकिच्छरूपा वतिमे मनुस्सा, करोन्ति पापं उपधीसु रत्ता;

गच्छन्ति ते बहुजनसन्निवासं, निरयं अवीचिं कटुकं भयानक’’न्ति. –

इदं सुत्तम्पि संकिलेसभागियं सुत्तं नाम. ये मनुस्सा उपधीसु कामगुणूपधीसु रत्ता रागाभिभूता हुत्वा पापं अकुसलकम्मं करोन्ति, इमे पापकम्मकरा मनुस्सा सुकिच्छरूपा वत सुट्ठु किच्छापन्नरूपा वत भवन्ति, ते पापकम्मकरा मनुस्सा कटुकं भयानकं बहुजनसन्निवासं निरयं अवीचिं गच्छन्तीति योजना.

‘‘फलं वे कदलिं हन्ति, फलं वेळुं फलं नळं;

सक्कारो कापुरिसं हन्ति, गब्भो अस्सतरिं यथा’’ति. –

इदं ¶ सुत्तम्पि संकिलेसभागियं सुत्तं नाम. फलं कदलिया फलं कदलिं वे एकन्तेन हन्ति यथा, फलं वेळुं वे एकन्तेन हन्ति यथा, फलं नळं वे एकन्तेन हन्ति यथा, गब्भो अस्सतरिं ¶ मातरं वे एकन्तेन हन्ति यथा, एवं सक्कारो कापुरिसं वे एकन्तेन हन्तीति योजना.

‘‘कोधमक्खगरु भिक्खु, लाभसक्कारगारवो;

सुखेत्ते पूतिबीजंव, सद्धम्मे न विरूहती’’ति. –

इदं सुत्तम्पि संकिलेसभागियं सुत्तं नाम. सुखेत्ते सुन्दरे खेत्तेपि खित्तं पूतिबीजं न रुहति इव, एवं यो भिक्खु लाभसक्कारगारवो कोधं कुज्झनलक्खणं कोधं, मक्खं परगुणसीलमक्खनलक्खणं मक्खञ्च गरुं कत्वा चरति, सो चरन्तो भिक्खु सद्धम्मस्मिं न रुहतीति योजना.

९१. ‘‘इधाहं, भिक्खवे, एकच्चं पुग्गलं पदुट्ठचित्तं एवं चेतसा चेतो परिच्च पजानामि…पे… इति मे सुत’’न्ति इदं सुत्तम्पि संकिलेसभागियं सुत्तं नाम. भिक्खवे इध सासने, लोके वा अहं एकच्चं पुग्गलं पदुट्ठचित्तं मम चेतसा तस्स चेतो चित्तं परिच्च परिच्छिन्दित्वा बुद्धचक्खुना एवं पजानामि. ‘‘कथं पजानामी’’ति चे पुच्छेय्य, यञ्च पटिपदं पटिपन्नो, यञ्च मग्गं समारुळ्हो अयं पुग्गलो यथा याय दुप्पटिपदाय येन दुम्मग्गेन इरियति पवत्तति, ताय दुप्पटिपदाय तेन दुम्मग्गेन इमम्हि इमस्मिं समये दुप्पटिपज्जनकाले अयं दुप्पटिपन्नं पटिपन्नो दुम्मग्गसमारुळ्हो पुग्गलो चे कालं करेय्य, एवं सति आभतं वत्थु निक्खित्तं यथा, एवं निरये निक्खित्तो. तं किस्स हेतु? भिक्खवे अस्स पुग्गलस्स चित्तं पदुट्ठं पदोसितं हि यस्मा होति, तस्मा निक्खित्तो. एवं इध सासने, लोके वा चेतोपदोसहेतु च पन एकच्चे सत्ता पुग्गला कायस्स भेदा परं मरणा अपायं दुग्गतिं विनिपातं उपपज्जन्तीति पजानामीति. एतमत्थं भगवा अवोच. तत्थ तस्मिं सुत्ते एतं ‘‘पदुट्ठचित्तं ञत्वान…पे… निरयं सो उपपज्जती’’ति गाथावचनं इति एवं वुच्चति.

सत्था इध सासने, लोके वा पदुट्ठचित्तं एकच्चं पुग्गलं ञत्वान भिक्खूनं सन्तिके एतमत्थं ब्याकासि. इमम्हि इमस्मिं समये अयं पुग्गलो चे कालं कयिराथ, एवं सति पदुट्ठचित्तसमङ्गी हि निरयस्मिं उपपज्जेय्य, पुग्गलस्स चित्तं पदूसितं हि यस्मा होति, तस्मा उपपज्जेय्य, चेतोपदोसहेतु ¶ सत्ता दुग्गतिं गच्छन्ति आभतं वत्थुं निक्खिपेय्य यथा, एवमेवं ¶ तथाविधो दुप्पञ्ञो सो पदोसचित्तो पुग्गलो कायस्स भेदा परं मरणा निरयं उपपज्जतीति अयम्पि अत्थो भगवता वुत्तो, इति मे मया सुतन्ति योजना.

‘‘सचे भायथ दुक्खस्स, सचे वो दुक्खमप्पियं;

माकत्थ पापकं कम्मं, आवि वा यदि वा रहो.

‘‘सचे च पापकं कम्मं, करिस्सथ करोथ वा;

न वो दुक्खा पमुत्यत्थि, उपेच्चपि पलायत’’न्ति. –

इदं सुत्तम्पि संकिलेसभागियं सुत्तं नाम. सप्पुरिसा तुम्हे दुक्खस्स जातिदुक्खजरादुक्खब्याधिदुक्खमरणदुक्खअपायदुक्ख- अतीतवट्टमूलकदुक्खअनागतवट्टमूलकदुक्खपच्चुप्पन्नाहारमूलकदुक्खाति अट्ठविधस्स दुक्खस्स सचे भायथ, वो तुम्हेहि दुक्खं तथा अट्ठविधं दुक्खं सचे अप्पियं, एवं सति आवि वा यदि रहो वा पापकं कम्मं माकत्थ मा अकत्थ. सप्पुरिसा तुम्हे आवि वा यदि रहो वा पापकं कम्मं सचे करिस्सथ वा सचे करोथ वा, एवं सति उपेच्चपि सञ्चिच्चापि पलायतं पलायन्तानं वो तुम्हाकं दुक्खा अट्ठविधा दुक्खतो पमुत्ति मुच्चनं नत्थेवाति योजना.

‘‘अधम्मेन धनं लद्धा, मुसावादेन चूभयं;

ममेति बाला मञ्ञन्ति, तं कथं नु भविस्सति.

‘‘अन्तराया सु भविस्सन्ति, सम्भतस्स विनस्सति;

मता सग्गं न गच्छन्ति, ननु एत्तावता हता’’ति. –

इदं सुत्तम्पि संकिलेसभागियं सुत्तं नाम. ये बाला अधम्मेन च मुसावादेन च धनं सविञ्ञाणाविञ्ञाणं सब्बं लभितब्बं धनं लद्धा उभयं धनं ‘‘मम धन’’न्ति मञ्ञन्ति, तेसं बालानं तं उभयं धनं कथं केन नु पकारेन भविस्सति, अधम्मेन सम्भतत्ता चिरट्ठितिकं न होति. अन्तराया राजन्तरायादयो अन्तराया तेसं बालानं भविस्सन्ति. येन अधम्मवोहारादिकेन यं धनं सम्भतं, अस्स अधम्मवोहारादिकस्स तं सम्भतं धनं विनस्सति. मता मरन्ता ते बाला सग्गं सुगतिं न गच्छन्ति. सुगति हि सोभनेहि भोगेहि अग्गोति ‘‘सग्गो’’ति ¶ अधिप्पेता ¶ . एत्तावता एत्तकेन दिट्ठधम्मिकसम्परायिकानं अत्तहितानं हायनेन ते बाला हता विनट्ठा भवन्ति ननूति योजना.

‘‘कथं खणति अत्तानं, कथं मित्तेहि जीरति;

कथं विवट्टते धम्मा, कथं सग्गं न गच्छति’’.

‘‘लोभा खणति अत्तानं, लुद्धो मित्तेहि जीरति;

लोभा विवट्टते धम्मा, लोभा सग्गं न गच्छती’’ति. –

इदं सुत्तम्पि संकिलेसभागियं सुत्तं नाम. योजनत्थो पाकटो.

‘‘चरन्ति बाला दुम्मेधा, अमित्तेनेव अत्तना;

करोन्ता पापकं कम्मं, यं होति कटुकप्फलं.

‘‘न तं कम्मं कतं साधु, यं कत्वा अनुतप्पति;

यस्स अस्सुमुखो रोदं, विपाकं पटिसेवती’’ति. –

इदं सुत्तम्पि संकिलेसभागियं सुत्तं नाम. दुम्मेधा निप्पञ्ञा बाला अमित्तेन पापकं कम्मं कतं इव, एवं अत्तना कटुकप्फलं यं कम्मं कतं होति, तं पापकं कतं कम्मं करोन्ता चरन्ति. यं कम्मं कत्वा करोन्तो पच्छा अनुतप्पति, तं कतं कम्मं न साधु. यस्स कम्मस्स विपाकं रोदं रुदन्तो अस्सुमुखो पटिसेवति, तं कतं कम्मं न साधूति योजना.

‘‘दुक्करं दुत्तितिक्खञ्च…पे… अवीतरागो’’ति इदं सुत्तम्पि संकिलेसभागियं सुत्तं नाम. सुत्तत्थो अट्ठकथायं वित्थारतो वुत्तो.

‘‘अप्पमेय्यं पमिनन्तो, कोध विद्वा विकप्पये;

अप्पमेय्यं पमायिनं, निवुतं तं मञ्ञे अकिस्सव’’न्ति. –

इदं सुत्तम्पि संकिलेसभागियं सुत्तं नाम. इध सासने अप्पमेय्यं अप्पमेय्यगुणं खीणासवं पुग्गलं ‘‘अयं खीणासवो पुग्गलो एत्तकसीलो एत्तकसमाधि एत्तकपञ्ञो’’ति पमिनन्तो को पुथुज्जनो ¶ विकप्पये. अप्पमेय्यं खीणासवपुग्गलं पमायिनं पमायन्तं तं पुथुज्जनं अयं निवुतं अवकुज्जपञ्ञं अकिस्सवं अपञ्ञन्ति मञ्ञे मञ्ञामीति योजना.

‘‘पुरिसस्स ¶ हि जातस्स, कुठारी जायते मुखे;

याय छिन्दति अत्तानं, बालो दुब्भासितं भणं.

‘‘न हि सत्थं सुनिसितं, विसं हलाहलं इव;

एवं विरद्धं पातेति, वाचा दुब्भासिता यथा’’ति. –

इदं सुत्तम्पि संकिलेसभागियं सुत्तं नाम. दुब्भासितं अरियूपवादसङ्खातं फरुसवाचं भणं भणन्तो बालो दुट्ठो पुरिसो याय कुठारीसदिसिया दुब्भासितवाचाय अत्तानं छिन्दति, सा कुठारीसदिसी दुब्भासितवाचा जातस्स पुरिसस्स मुखे जायते जायति, सा दुब्भासितवाचा मुखे जायति इव, एवं सुनिसितं सत्थं मुखे न जायति, यथा हलाहलं विसं मुखे न जायति, दुब्भासिता वाचा अपायेसु विरद्धं पुग्गलं पातेति यथा, एवं सुनिसितं सत्थं अपायेसु न पातेति, हलाहलं विसं अपायेसु न पातेतीति योजना.

९२.

‘‘यो निन्दियं पसंसति, तं वा निन्दति यो पसंसियो;

विचिनाति मुखेन सो कलिं, कलिना तेन सुखं न विन्दति.

‘‘अप्पमत्तो अयं कलि, यो अक्खेसु धनपराजयो;

सब्बस्सापि सहापि अत्तना, अयमेव महन्ततरो कलि;

यो सुगतेसु मनं पदोसये.

‘‘सतं सहस्सानं निरब्बुदानं, छत्तिंसती पञ्च च अब्बुदानि;

यमरियगरही निरयं उपेति, वाचं मनञ्च पणिधाय पापक’’न्ति. –

इदं सुत्तम्पि संकिलेसभागियं सुत्तं नाम. यो पुग्गलो निन्दियं दुच्चरं दुस्सीलं पुग्गलं पसंसति, सो पसंसको पुग्गलो मुखेन कलिं विचिनाति उपचिनाति, तेन कलिना सुखं न विन्दति. यो सुचारी सीलवा पुग्गलो पसंसियो होति, तं वा सुचारिं वा सीलवन्तं पुग्गलं ¶ यो पुग्गलो ¶ निन्दति, सो निन्दन्तो पुग्गलो मुखेन कलिं विचिनाति उपचिनाति, तेन कलिना सुखं न विन्दति.

अत्तना सहापि सब्बस्स धनस्स वसेनपि अक्खेसु यो धनपराजयो भवति, अयं कलि अयं धनपराजयो अप्पमत्तो होति. यो पुग्गलो सुगतेसु मनं पदोसये, तस्स पुग्गलस्स यो कलि भवति, अयमेव कलि महन्ततरो होति.

कस्मा? वाचञ्च मनञ्च पणिधाय अरियगरही पुग्गलो यं कालं पापकं निरयं उपेति, सो कालो ‘‘सतं सहस्सानं निरब्बुदानञ्च छत्तिंस निरब्बुदानि च पञ्च अब्बुदानि च यस्मिं काले गणीयन्ती’’ति तेन कालेन समो होति, तस्मा महन्ततरो होतीति योजना.

‘‘यो लोभगुणे अनुयुत्तो…पे…

गच्छसि खो पपतं चिररत्त’’न्ति. –

इदं सुत्तम्पि संकिलेसभागियं सुत्तं नाम. यो पुग्गलो लोभगुणे अनुयुत्तो अनु पुनप्पुनं युत्तो होति, सो पुग्गलो अञ्ञे पुग्गले वचसा परिभासति, अस्सद्धो कदरियो अवदञ्ञू बुद्धानं ओवादञ्ञू न होति, मच्छरी पेसुणियं पेसुणियस्मिं अनुयुत्तो होति.

मुखदुग्ग मुखविसम विभूत विगतभूत अनरिय भूनहु बुद्धिविनासक पापक दुक्कटकारि पुरिसन्त पुरिसलामक कलि अलक्खि अवजातपुत्त त्वं नेरयिको असि. इध इदानि बहुभाणी मा होहि.

अहिताय रजं अत्तनि मा आकिरसि मा पक्खिपसि. किब्बिसकारि त्वं सन्ते खीणासवे पुग्गले गरहसि, बहूनि दुच्चरितानि कम्मानि चरसि, चरित्वा त्वं चिररत्तं रचनविरहितं पपतं नरकं निरयं गच्छसि खो एकंसेनाति योजना.

नानाविधं संकिलेसभागियं सुत्तं आचरियेन निद्धारितं, अम्हेहि च ञातं, ‘‘कतमं वासनाभागियं सुत्त’’न्ति पुच्छितब्बत्ता ‘‘तत्थ कतमं वासनाभागियं सुत्त’’न्तिआदि वुत्तं. तत्थाति तेसु सोळससु संकिलेसभागियादीसु सुत्तेसु कतमं सुत्तं वासनाभागियं सुत्तं नामाति ¶ पुच्छति. ‘‘मनोपुब्बङ्गमा धम्मा…पे… छायाव अनपायिनी’’ति इदं वासनाभागे पुञ्ञभागे विसये वाचकञापकभावेन पवत्तनतो वासनाभागियं सुत्तं नाम. अत्थो पाकटो.

९३. ‘‘महानामो ¶ सक्को भगवन्तं एतदवोच…पे… अपापिका कालङ्किरिया’’ति इदं सुत्तम्पि वासनाभागे पुञ्ञभागे विसये वाचकञापकभावेन पवत्तनतो वासनाभागियं सुत्तं नाम. अत्थो पाकटो.

‘‘सुखकामानि भूतानि, यो दण्डेन न हिंसति;

अत्तनो सुखमेसानो, पेच्च सो लभते सुख’’न्ति. –

इदं सुत्तम्पि वासनाभागियं सुत्तं नाम. अत्थो पाकटो.

‘‘गुन्नं चे तरमानानं…पे… राजा चे होति धम्मिको’’ति इदं सुत्तम्पि वासनाभागियं सुत्तं नाम. अत्थो पाकटो.

९४. ‘‘भगवा सावत्थियं विहरति…पे… एवं पजानाती’’ति इदं सुत्तम्पि वासना…पे… सुत्तं नाम. अत्थो पाकटो.

‘‘कस्मा भगवा जनपदचारिकं चरती’’ति पुच्छेय्य, सत्तहि कारणेहि बुद्धा भगवन्तो जनपदचारिकं चरन्ति. कतमेहि सत्तहि? देसन्तरगतानं वेनेय्यानं विनयनत्थं, तत्र ठितानं उस्सुक्कसमुप्पादनत्थं, सावकानं एकस्मिं ठाने निबद्धवासनिवारणत्थं, अत्तनो च तत्थ निबद्धवासे अनासङ्गदस्सनत्थं, सम्बुद्धवसितट्ठानताय देसानं चेतियभावसम्पादनत्थं, बहूनं सत्तानं दस्सनूपसङ्कमनादीहि पुञ्ञोघप्पसवनत्थं, अवुट्ठिआदिउपद्दवूपसमनत्थञ्चाति इमेहि सत्तहि कारणेहि बुद्धा भगवन्तो जनपदचारिकं चरन्तीति जनपदचरणकारणं वेदितब्बं.

‘‘एकपुप्फं चजित्वान, सहस्सं कप्पकोटियो;

देवे चेव मनुस्से च, सेसेन परिनिब्बुतो’’ति. –

इदं सुत्तम्पि वासनाभागियं सुत्तं नाम. सहस्सं कप्पकोटियोति सहस्सं अत्तभावतो कोटियो.

‘‘अस्सत्थे ¶ हरितोभासे, संविरूळ्हम्हि पादपे;

एकं बुद्धगतं सञ्ञं, अलभिंहं पतिस्सतो.

‘‘अज्ज तिंसं ततो कप्पा, नाभिजानामि दुग्गतिं;

तिस्सो विज्जा सच्छिकता, तस्सा सञ्ञाय वासना’’ति. –

इदं सुत्तम्पि वासनाभागियं सुत्तं नाम. हरितोभासेति हरितओभासे. अलभिंहन्ति अहं अलभिं.

‘‘पिण्डाय ¶ कोसलं पुरं…पे… विपाको होति अचिन्तियो’’ति इदं सुत्तम्पि वासनाभागियं सुत्तं नाम. अग्गपुग्गलो अनुकम्पको तण्हानिघातको मुनि सम्बुद्धो पुरेभत्तं पिण्डाय पिण्डं पटिग्गण्हितुं कोसलं पुरं पाविसि.

यस्स पुरिसस्स हत्थे सब्बपुप्फेहि अलङ्कतो वटंसको पुप्फवटंसकोव अत्थि, सो अयं पुरिसो राजमग्गेन कोसलपुरं पविसन्तं भिक्खुसङ्घपुरक्खतं देवमानुसपूजितं सम्बुद्धं अद्दस, दिस्वा हट्ठो चित्तं पसादेसि; पसादेत्वा सम्बुद्धं उपसङ्कमि.

उपसङ्कमित्वा सो अयं पसन्नो हुत्वा सुरभिं वण्णवन्तं मनोरमं तं वटंसकं सम्बुद्धस्स सेहि पाणीभि उपनामेसि.

ततो बुद्धस्स लपनन्तरा लपनस्स वदनस्स अन्तरा अग्गिसिखा वण्णा सहस्सरंसि ओक्का पभा निक्खमि, अब्भा विज्जु निक्खमति इव, एवं आनना सहस्सरंसि निक्खमित्वा आदिच्चबन्धुनो सीसे तिक्खत्तुं पदक्खिणं करित्वान परिवट्टेत्वा मुद्धनि अन्तरधायथ.

आनन्दो अच्छरियं अब्भुतं लोमहंसनं इदं पाटिहारियं दिस्वा चीवरं एकंसं करित्वा एतं अब्रवि – ‘‘महामुनि, सितकम्मस्स हेतु को? तं हेतुं ब्याकरोहि, धम्मालोको भविस्सती’’ति.

यस्स भगवतो सब्बधम्मेसु ञाणं सदा पवत्तति, कङ्खावितरणो मुनि सो भगवा कङ्खिं वेमतिकं ¶ आनन्दं थेरं एतं अब्रवि. आनन्द, यो सोपुरिसो मयि चित्तं पसादयि, सो पुरिसो चतुरासीतिकप्पानि दुग्गतिं न गमिस्सति, देवेसु देवसोभग्गं दिब्बं रज्जं पसासित्वा मनुजेसु रट्ठे सकलरट्ठे मनुजिन्दो राजा भविस्सति. सो पुरिसो चरिमं पब्बजित्वा, धम्मतं सच्छिकत्वा च धुतरागो वटंसको नाम पच्चेकबुद्धो भविस्सति.

तथागते वा सम्मासम्बुद्धे वा पच्चेकसम्बुद्धे वा तस्स तथागतस्स सावके वा चित्ते पसन्नम्हि दक्खिणा अप्पका नाम नत्थि.

बुद्धा एवं एत्तकाति अचिन्तिया भवन्ति. बुद्धधम्मा बुद्धगुणा एवं एत्तकाति अचिन्तिया भवन्ति, अचिन्तिये पसन्नानं विपाको पुञ्ञविपाको एवं एत्तकोति अचिन्तियो होतीति एतं अब्रवीति योजना.

९६. ‘‘इधाहं ¶ , भिक्खवे, एकच्चं पुग्गलं…पे… अयम्पि अत्थो वुत्तो भगवता इति मे सुत’’न्ति इदं सुत्तम्पि वासनाभागियं सुत्तं नाम. भिक्खवे, इध इमस्मिं सासने अहं एकच्चं पुग्गलं एवं मम चेतसा एकच्चस्स पुग्गलस्स चेतो चित्तं परिच्च बुद्धचक्खुना एवं पजानामि, यथा येन पकारेन अयं पुग्गलो यञ्च दानादिपटिपदं पटिपन्नो, यञ्च दस्सनादिमग्गं समारुळ्हो हुत्वा तं पटिपदं, मग्गञ्च इरियति पवत्तेति, इमम्हि इमस्मिञ्च समये अयं पुग्गलो चे कालं करेय्य, एवं सति आभतं वत्थुं निक्खिपति यथा, एवं ताय पटिपदाय तेन मग्गेन सग्गे अत्तनिक्खित्तो भवे. तं किस्स हेतु? भिक्खवे, अस्स पुग्गलस्स चित्तं हि यस्मा पसन्नं पसादितं, तस्मा निक्खित्तो भवे. इध सासने, लोके वा एकच्चे सत्ता पुग्गला कायस्स भेदा परं मरणा सुगतिं सग्गं लोकं चेतोपसादहेतु खो पन उपपज्जन्तीति एवं अहं पजानामीति भगवा एतमत्थं अवोच. तत्थ तस्मिं अत्थे सङ्गहवसेन पवत्तं एतं ‘‘पसन्नचित्तं ञत्वान…पे… सग्गं सो उपपज्जती’’ति गाथावचनं वुच्चति. अयम्पि अत्थो भगवता वुत्तो, इति मे मया सुतन्ति योजना.

‘‘सुवण्णच्छदनं नावं…पे… एतादिसं कतपुञ्ञा लभि’’न्ति इदं सुत्तम्पि वासनाभागियं सुत्तं नाम. नारि देवधीता सुवण्णच्छदनं सुवण्णालङ्कारेहि छादितं नावं आरुय्ह तिट्ठसि, पोक्खरणिं देवपोक्खरणिं ओगाहसि, पदुमं पाणिना छिन्दसि.

देवते ¶ केन कम्मेन ते तव तादिसो वण्णो तादिसो आनुभावो तादिसी जुति भवति, देवते ते तव ये केचि भोगा मनसा इच्छिता भवन्ति, ते भोगा च केन कम्मेन उप्पज्जन्ति. देवते मे पुच्छिता त्वं संस संसाहि इदं सब्बं किस्स कम्मस्स च फलन्ति सक्को पुच्छति.

देवराजेन पुच्छिता सा देवधीता अत्तमना हुत्वा पञ्हं पुट्ठा सक्कस्स ब्याकासि. देवराजा अद्धानं दीघमग्गं पटिपन्ना अहं यसस्सिनो कस्सपस्स भगवतो मनोरमं थूपं अद्दस्सं, दिस्वा तत्थ थूपे चित्तं पसादेसिं. पसन्नाहं सेहि पाणीहि पदुमपुप्फेहि पूजेसिं. तस्सेव कम्मस्स इदं सब्बं फलं विपाको भवे. कतपुञ्ञाहं एतादिसं फलं अलभिन्ति सक्कस्स ब्याकासि. इति मे सुतन्ति महामोग्गल्लानो वदतीति योजना.

‘‘यथानिद्धारितसुत्तानियेव ¶ वासनाभागियसुत्तानि परिपुण्णानी’’ति वत्तब्बत्ता ‘‘दानकथा सीलकथा सग्गकथा पुञ्ञकथा पुञ्ञविपाककथाति इदं वासनाभागिय’’न्तिआदि वुत्तं. तत्थ याय देसनाय दानञ्च दानफलञ्च दस्सितं, सा देसना दानकथा नाम. याय देसनाय सीलञ्च सीलफलञ्च दस्सितं, सा देसना सीलकथा नाम. याय देसनाय सग्गा च सग्गेसु निब्बत्तापकञ्च कम्मं दस्सितं, सा सग्गकथा नाम. याय देसनाय दानसीलभावनादिवसेन दसविधं पुञ्ञकम्मं दस्सितं, सा पुञ्ञकथा नाम. याय देसनाय तादिसस्स पुञ्ञकम्मस्स विविधो अयं विपाको इमस्स पुञ्ञस्स विपाकोति नियमेत्वा दस्सितो, सा पुञ्ञविपाककथा नाम.

दसबलधरानं सम्मासम्बुद्धानं उद्दिस्सकतेसु सरीरधातुं अब्भन्तरे ठपेत्वा पंसूहि कतेसु थूपेसु ये नरा पसन्ना, ते नरा तत्थ थूपे कारं पुञ्ञं कत्वा सग्गेसु उप्पज्जित्वा पमोदन्तीति योजना. इदं सुत्तं वा…पे… सुत्तं.

९७. देवपुत्तसरीरवण्णा देवपुत्तसरीरसदिसवण्णा सुभगसण्ठिति सोभग्गयुत्तसण्ठाना सब्बे जना उदकेन पंसुं तेमेत्वा थूपं वड्ढेथ, सो अयं थूपो कस्स पुग्गलस्स थूपोति पुच्छति.

सुगत्ते सुन्दरगत्ते देवते तस्मिं थूपे पसन्ना इमे देवमनुजा कारं पुञ्ञं करोन्ता हुत्वा जरामरणतो ¶ पमुच्चरे. सो अयं थूपो महेसिनो दसबलधम्मधारिनो सुगतस्स थूपोति वेदितब्बोति आहाति योजना. इदं सुत्तं वा…पे… सुत्तं.

याहं या अहं महेसिनो थूपं चत्तारि उप्पलानि च मालञ्च अभिरोपयिं, तेन मया कतं तं पुञ्ञं उळारं वत आसि अहोसि. ततो कप्पतो अज्ज कप्पा तिंसं धरन्ति सत्थुनो थूपं पूजेत्वा तत्तकानि दुग्गतिं न जानामि, विनिपातं न गच्छामीति योजना. इदं सुत्तं वा…पे… सुत्तं.

अहं बात्तिंसलक्खणधरस्स बात्तिंसलक्खणधरेन सम्पन्नस्स विजितविजयस्स लोकनाथस्स थूपं अपूजेसिं, पूजेत्वा सतसहस्सं कप्पे आयुकप्पे पमुदितो आसिं. मया यं पुञ्ञं पसुतं, तेन पुञ्ञेन विनिपातं अनागन्तुन अनागन्त्वा देवसोभग्गं सम्पत्तिं च देवरज्जानि च तानि अकारिं ¶ . अथ वा देवसोभग्गञ्च मया कारितं, रज्जानि च मया कारितानि.

अदन्तदमकस्स सासने यं चक्खु पञ्ञाचक्खु पणिहितं, तथा चित्तं यं विमुत्तचित्तं पणिहितं, तं सब्बं पञ्ञाचक्खु विमुत्तचित्तं मे मया लद्धं, अहं विधुतलतासङ्खाततण्हा हुत्वा विमुत्तचित्ता फलविमुत्तचित्तसम्पन्ना अम्हीति अवोचाति योजना. इदं सुत्तं वा…पे… सुत्तं.

९८. विमुत्तचित्ते फलविमुत्तचित्तसम्पन्ने अखिले पञ्चचेतोखीलरहिते अनासवे अरणविहारिम्हि अरणविहारसीले असङ्गमानसे अलग्गमानसे पच्चेकबुद्धस्मिं सामाकपत्थोदनमत्तमेव दक्खिणं अदासिं.

तस्मिं पच्चेकबुद्धे उत्तमं धम्मं पच्चेकबोधिधम्मं ओकप्पयिं ‘‘सो उत्तमो धम्मो अत्थी’’ति सद्दहिं. एवं अरियविहारेन विहारीहि पच्चेकबुद्धेहि मे मम सङ्गमो कतो सिया भवे, कुदासुपि च अहं अपेक्खवा मा भवेय्यन्ति मानसं तस्मिञ्च धम्मे पणिधेसिं ‘‘इमिना पच्चेकबुद्धेन लद्धधम्मं अहम्पि सच्छिकरेय्य’’न्ति चित्तं पणिदहिं.

तस्सेव पच्चेकबुद्धे कतस्सेव कम्मस्स विपाकतो अहं दीघायुकेसु अममेसु ‘‘मम परिग्गहो’’ति परिग्गहाभावेन अपरिग्गहेसु विसेसगामीसु अहीनगामीसु कुरूसु उत्तरकुरूसु पाणीसु सत्तेसु सहस्सक्खत्तुं उपपज्जथ उपपज्जिं.

तस्सेव ¶ कम्मस्स विपाकतो विचित्रमालाभरणानुलेपीसु यसस्सीसु परिवारवन्तेसु तिदसो देवो अहं विसिट्ठकायूपगतो हुत्वा सहस्सक्खत्तुं उपपज्जथ.

तस्सेव कम्मस्स विपाकतो अहं विमुत्तचित्तो अखीलो अनासवो हुत्वा हिताहितासीहि कुसलाकुसलवीतिवत्तेहि अन्तिमदेहधारिभि इमेहि पच्चेकबुद्धेहि, बुद्धसावकेहि वा मे मम समागमो आसि.

‘‘सीलवतो यं इच्छितं, तं समिज्झते’’ति इमं वचनं तथागतो जिनो पच्चक्खं कत्वा अवच खो, यथा यथा येन येन पकारेन मे मनसा विचिन्तितं, तथा तथा तेन तेन पकारेन समिद्धं भवति. अयं भवो अन्तिमो भवोति योजना. इदं सुत्तं वा…पे… सुत्तं.

एकतिंसम्हि ¶ कप्पम्हि जिनो अनेजो अनन्तदस्सी ‘‘सिखी’’ति इतिनामको उप्पज्जि. तस्सापि भगवतो राजा भाता सिखिद्धे च सिखी इतिनामके बुद्धे च तस्स भगवतो धम्मे च अभिप्पसन्नो लोकविनायकम्हि परिनिब्बुते सति देवातिदेवस्स नरुत्तमस्स महेसिनो विपुलं महन्तं समन्ततो गावुतिकं थूपं अकासिं.

तस्मिं थूपे बलिं पूजाबलिं अभिहारी मनुस्सो जातिसुमनं पग्गय्ह पहट्ठो पूजेसि. अस्स मनुस्सस्स एकं पुप्फं वातेन पहरितं हुत्वा पतितं. अहं तं पतितं एकं पुप्फं गहेत्वा तस्सेव पुप्फसामिकस्स अदासिं.

सो मनुस्सो पुप्फसामिको अभिप्पसन्नचित्तो हुत्वा मं ‘‘त्वमेव एतं एकं पुप्फं पूजा’’ति अदासि. ददासीति एत्थ द-कारो आगमो. अहं तं एकं पुप्फं गहेत्वा बुद्धं बुद्धगुणं पुनप्पुनं अनुस्सरन्तो यस्मिं कप्पे अभिरोपयिं, ततो कप्पतो अज्ज कप्पा तिंसं अहेसुं. तेसु कप्पेसु दुग्गतिं नाभिजानामि, विनिपातञ्च न गच्छामि, इदं फलं थूपपूजाय फलन्ति अवोचाति योजना. इदं सुत्तं वा…पे… सुत्तं.

ब्रह्मदत्तस्स ब्रह्मदत्तनामकस्स राजिनो कपिलं नाम नगरं सुविभत्तं भागतो सुट्ठु विभत्तं, महापथं महापथसम्पन्नं आकिण्णं, नानाजातिकेहि मनुस्सेहि परिपुण्णं, इद्धं फीतञ्च आसि.

पञ्चालानं ¶ तत्थ पुरुत्तमे अहं कुम्मासं विक्किणिं, सो अहं यसस्सिनं उपरिट्ठं उपसमीपे ठितं अरिट्ठं नाम सम्बुद्धं पच्चेकबुद्धं अद्दसिं, दिस्वा हट्ठो चित्तं पसादेत्वा नरुत्तमं अरिट्ठं मे गेहस्मिं यं धुवभत्तं विज्जथ विज्जि, तेन धुवभत्तेन निमन्तेसिं.

यतो च यस्मिं काले च कत्तिको यस्सं पन्नरसीपुण्णो, सा पुण्णमासी पन्नरसी उपट्ठिता, ततो च तस्मिं काले च अहं नवं दुस्सयुगं गय्ह अरिट्ठस्स अरिट्ठनामकस्स पच्चेकबुद्धस्स उपनामेसिं.

नरुत्तमो अनुकम्पको कारुणिको तण्हानिघातको मुनि पच्चेकबुद्धो पसन्नचित्तं मं ञत्वान पटिग्गण्हि.

अहं ¶ कल्याणं बुद्धवण्णितं कम्मं करित्वान देवे च मनुस्से च सन्धावित्वा ततो चुतो बाराणसियं नगरे अड्ढे कुलस्मिं सेट्ठिस्स एकपुत्तको उप्पज्जिं, पाणेहि च पियतरो आसिं.

ततो च तस्मिं काले विञ्ञुतं पत्तो हुत्वा देवपुत्तेन चोदितो अहं पासादा ओरुहित्वान सम्बुद्धं भगवन्तं गोतमं उपसङ्कमिं.

सो सम्बुद्धो भगवा गोतमो अनुकम्पाय मे धम्मं अदेसेसि. दुक्खं दुक्खसच्चञ्च दुक्खसमुप्पादं समुदयसच्चञ्च दुक्खस्स अतिक्कमं निरोधसच्चञ्च अरियं अट्ठङ्गिकं दुक्खूपसमगामिनं मग्गं मग्गसच्चञ्च इति चत्तारि सच्चानि देसितानि, तदुप्पादकं धम्मं मुनि भगवा गोतमो अदेसयि.

अहं तस्स भगवतो गोतमस्स वचनं सुत्वा सासने रतो हुत्वा विहरिं, अहं रत्तिन्दिवं अतन्दितो हुत्वा समथं पटिविज्झिं.

अज्झत्तञ्च ये आसवा, बहिद्धा च ये आसवा मग्गेन समुच्छिन्ना आसुं, सब्बे ते आसवा मे मम विज्जिंसु, पुन न च उप्पज्जरे.

दुक्खं ‘‘परियन्तकतं यस्स दुक्खस्सा’’ति परियन्तकतं आसि, अयं समुस्सयो जातिमरणसंसारो ¶ चरिमो अन्तिमो आसि, इदानि इमस्स अत्तभावस्स अनन्तरं पुनब्भवो मम नत्थीति अवोचाति योजना. यं नानाविधं वासनाभागियं सुत्तं उदाहरणवसेन निद्धारितं, इदं नानाविधं सुत्तं वासनाभागे पुञ्ञकोट्ठासे विसये वाचकञापकभावेन पवत्तनतो वासनाभागियं सुत्तं नाम.

नानाविधं वासनाभागियं सुत्तं आचरियेन निद्धारितं, अम्हेहि च ञातं, ‘‘कतमं निब्बेधभागियं सुत्त’’न्ति पुच्छितब्बत्ता ‘‘तत्थ कतमं निब्बेधभागियं सुत्त’’न्तिआदि वुत्तं. तत्थ तेसु सोळससु संकिलेसभागियादीसु सुत्तेसु कतमं सुत्तं निब्बेधभागियं सुत्तं नामाति पुच्छति.

उद्धं ब्रह्मलोके अधो कामावचरे भवे सब्बधि सब्बेसु भवेसु विप्पमुत्तो अरहा ‘‘अयं नाम धम्मो अहं अस्मी’’ति अनानुपस्सी, एवं विमुत्तो अरहा अतिण्णपुब्बं ओघं अपुनब्भवाय उदतारि उत्तिण्णोति योजना. इदं सुत्तं निब्बेधभागे सेक्खधम्मे विसये वाचकञापकभावेन पवत्तनतो निब्बेधभागियं सुत्तं नाम.

‘‘एत्तकमेवा’’ति ¶ वत्तब्बत्ता ‘‘सीलवतो’’तिआदि वुत्तं. आनन्द, सीलवतो पुग्गलस्स ‘‘किन्ति मे मम अविप्पटिसारो जायेय्य पवत्तेय्या’’ति चेतना न करणीया न कातब्बा. आनन्द, सीलवतो अविप्पटिसारो यं जायेय्य पवत्तेय्य, एसा अविप्पटिसारस्स जायना पवत्तना धम्मता भवति. आनन्द, अविप्पटिसारिना पुग्गलेन ‘‘किन्ति मे मम पामोज्जं जायेय्य पवत्तेय्या’’ति चेतना न करणीया, आनन्द, अविप्पटिसारिनो पुग्गलस्स पामोज्जं यं जायेय्य पवत्तेय्य, एसा पामोज्जस्स जायना पवत्तना धम्मता. सेसेसुपि इमस्स योजनानयानुसारेन योजनानयो गहेतब्बो. इदं सुत्तम्पि निब्बेधभागियं सुत्तं नाम.

आतापिनो किलेसानं आतापेन सम्मप्पधानेन समन्नागतस्स झायतो झायन्तस्स ब्राह्मणस्स बाहितपापस्स खीणासवस्स धम्मा अनुलोमपच्चयाकारपटिवेधसाधका बोधिपक्खियधम्मा यदा यस्मिं काले हवे एकन्तेन पातुभवन्ति उप्पज्जन्ति. अथ वा धम्मा चतुअरियसच्चधम्मा पातुभवन्ति पकासयन्ति अभिसमयवसेन पाकटा होन्ति. अथ वा पातुभवनकाले अस्स आतापिनो झायतो ब्राह्मणस्स खीणासवस्स सब्बा कङ्खा वपयन्ति अपगच्छन्ति निरुज्झन्ति. कस्मा? सहेतुधम्मं अविज्जादिकेन हेतुना सह पवत्तं सङ्खारादिकं सुखेन असम्मिस्सं दुक्खक्खन्धधम्मं यतो यस्मा पजानाति अञ्ञासि पटिविज्झति ¶ , ततो तस्मा वपयन्ति अपगच्छन्ति निरुज्झन्तीति योजना. इदं सुत्तं निब्बेधभागियं सुत्तं नाम.

दुतियगाथायं पन पच्चयानं खयं खयसङ्खातं निब्बानं यतो यस्मा अवेदि अञ्ञासि पटिविज्झि, ततो तस्मा सब्बापि कङ्खा वपयन्तीति योजना. इदं सुत्तं निब्बेधभागियं सुत्तं.

तिस्स, त्वं किं नु कुज्झसि? मा कुज्झि, तिस्स, ते तव अक्कोधो अकुज्झनं वरं उत्तमं, हि सच्चं, तिस्स, तया कोधमानमक्खविनयत्थं ब्रह्मचरियं वुस्सति नूति भगवा अवोचाति योजना.

आरञ्ञं आरञ्ञकं पंसुकूलिकं अञ्ञातुञ्छेन अञ्ञातअनभिलक्खितघरपटिपाटिया ठत्वा उञ्छेन पिण्डपातचरणवीरियेन लद्धेन मिस्सकभोजनेन यापेन्तं नन्दं कदा काले अहं पस्सेय्यन्ति अवोचाति योजना. इदं सुत्तं निब्बेधभागियं सुत्तं.

गोतम ¶ , किंसु कतमं छेत्वा वधित्वा वधन्तो कोधपरिळाहेन अपरिदय्हमानो हुत्वा सुखं सेति सयति, किंसु कतमं छेत्वा वधित्वा वधन्तो कोधविनासेन विनट्ठदोमनस्सो हुत्वा न सोचति, गोतम, त्वं किस्स एकधम्मस्स वधं वधनं रोचेसीति ब्राह्मणो पुच्छति.

ब्राह्मण, कोधं कुज्झनं छेत्वा वधित्वा वधन्तो कोधपरिळाहेन अपरिदय्हमानो हुत्वा सुखं सेति सयति, कोधं कुज्झनं छेत्वा वधित्वा वधन्तो कोधविनासेन विनट्ठदोमनस्सो हुत्वा न सोचति, विसमूलस्स विससदिसस्स दुक्खस्स मूलभूतस्स मधुरग्गस्स मधुरसङ्खातस्स सुखपरियोसानस्स कोधस्स कुज्झनस्स वधं वधनं अरिया बुद्धादयो पुग्गला पसंसन्ति. हि सच्चं तं कोधं कुज्झनं छेत्वा वधित्वा वधन्तो कोधविनासेन विनट्ठदोमनस्सो हुत्वा सेति सयतीति योजना. मधुरग्गस्साति च मधुरं चेतसिकसुखं अस्सादअग्गं परियोसानं अस्स कोधस्साति मधुरग्गोति समासो वेदितब्बो. कुज्झन्तस्स हि अक्कोसित्वा परिभासित्वा पहरित्वा परियोसाने चेतसिकसुखस्सादो उप्पज्जतीति. इदं सुत्तं निब्बेधभागियं सुत्तं.

गोतम, हनन्तो धीरो उप्पतितं किंसु कतमं हने हनेय्य. विनोदेन्तो धीरो जातं किंसु ¶ कतमं विनोदये विनोदयेय्य. पजहन्तो धीरो किं च कतमं पजहे पजहेय्य. धीरस्स किस्स धम्मस्स अभिसमयो सुखोति देवता पुच्छति.

देवपुत्त, हनन्तो धीरो उप्पतितं कोधं कुज्झनं हने हनेय्य. विनोदेन्तो धीरो जातं रागं विनोदये विनोदयेय्य. पजहन्तो धीरो अविज्जं पजहे पजहेय्य. सच्चधम्मस्स अभिसमयो सुखोति भगवा अवोचाति योजना. इदं सुत्तं निब्बेधभागियं सुत्तं.

१०१. भगवा सत्तिया ओमट्ठो उपरितो याव हेट्ठा विद्धो पुरिसो सत्तिप्पहानाय वीरियं आरभति विय, अग्गिना मत्थके डय्हमानो आदित्तसिरो पुरिसो अग्गिनिब्बापनत्थाय वीरियं आरभति इव, एवं कामरागेन डय्हमानो भिक्खु कामरागप्पहानाय कामरागविक्खम्भनाय अप्पमत्तो वायममानो सतो सतिसम्पन्नो हुत्वा परिब्बजे विहरेय्याति देवता कथेसि.

भगवा ¶ पन ‘‘समुच्छेदप्पहानाय वीरियं आरभीयती’’ति दस्सेतुं ‘‘सत्तिया विय ओमट्ठो’’तिआदिमाह. देवपुत्त, सत्तिया ओमट्ठो पुरिसो सत्तिप्पहानाय वीरियं आरभति विय, अग्गिना मत्थके डय्हमानो आदित्तसिरो पुरिसो अग्गिनिब्बापनत्थाय वीरियं आरभति इव, एवं सक्कायदिट्ठिया अभिभूतो भिक्खु सक्कायदिट्ठिया पहानाय मग्गेन समुच्छेदप्पहानाय अप्पमत्तो वायममानो सतो सतिसम्पन्नो हुत्वा परिब्बजे विहरेय्याति भगवा अवोचाति योजना. इदं सुत्तं निब्बेधभागियं सुत्तं नाम.

सब्बे निचया भोगा खयन्ता खयपरियोसाना भवन्ति, सब्बे समुस्सया धम्मा पतनन्ता पतनपरियोसाना भवन्ति, सब्बेसं सत्तानं मरणमागम्म सब्बेसं सत्तानं जीवितं अद्धुवं भवति, इति एतं वुत्तप्पकारं भयं भयहेतुं मरणं सम्मुतिमरणं अपेक्खमानो पण्डितो सुखावहानि दिट्ठधम्मिकसम्परायिकसुखावहानि पुञ्ञानि दानसीलभावनामयपुञ्ञानि कयिराथाति देवता अवोच.

देवपुत्त, सब्बे निचया भोगा खयन्ता खयपरियोसाना, सब्बे समुस्सया धम्मा पतनन्ता पतनपरियोसाना, सब्बेसं सत्तानं मरणमागम्म सब्बेसं सत्तानं जीवितं अद्धुवं, इति एतं वुत्तप्पकारं भयं भयहेतुं मरणं अपेक्खमानो सन्तिपेक्खो सब्बसङ्खारुपसमं निब्बानं अपेक्खमानो ¶ पण्डितो लोकामिसं कामगुणं पजहे पजहेय्याति भगवा अवोचाति योजना. इदं सुत्तं निब्बेधभागियं सुत्तं नाम.

माविध येसं मुनीनं चित्तं झानरतं झाने रतं होति, ते मुनयो सुखं सयन्ति न सोचन्ति. पञ्ञवा मग्गपञ्ञवा सुसमाहितो आरद्धवीरियो पहितत्तो निब्बानं पेसितचित्तो पुग्गलो दुत्तरं ओघं संसारोघं तरति.

कामसञ्ञाय विरतो विगतचित्तो यो खीणासवो सब्बसंयोजनातीतो अरहत्तमग्गेन सब्बे संयोजने अतीतो नन्दिभवपरिक्खीणो अहोसि, सो खीणासवो गम्भीरे संसारण्णवे न सीदतीति योजना. नन्दिसङ्खाता तण्हा च कामभवरूपभवअरूपभवा च नन्दिभवा, नन्दिभवा परिक्खीणा यस्स खीणासवस्साति नन्दिभवपरिक्खीणोति समासो वेदितब्बो. इदं सुत्तं निब्बेधभागियं सुत्तं नाम.

अरहतं ¶ अरहन्तानं बुद्धपच्चेकबुद्धसावकानं धम्मं सुचरितादिभेदञ्च सत्ततिंसबोधिपक्खियभेदञ्च धम्मं यो पण्डितो सद्दहानो सद्दहन्तो हुत्वा निब्बानप्पत्तिया अप्पमत्तो विचक्खणो हुत्वा सुस्सूसं सुस्सूसन्तो भवे, सो पण्डितो पञ्ञं लोकियलोकुत्तरपञ्ञं लभते लभति.

यो वीरियवा पुग्गलो पतिरूपदेसकारी देसकालादीनि अहापेत्वा लोकियलोकुत्तरधम्मपतिरूपं अधिगमूपायं करोति, धुरवा चेतसिकवीरियेन अनिक्खित्तधुरो उट्ठाता कायिकवीरियवसेन उट्ठानसम्पन्नो होति, सो वीरियवा पुग्गलो धनं लोकियलोकुत्तरधनं विन्दते अधिगच्छति. सच्चेन वचीसच्चेन च परमत्थसच्चेन च बुद्धादिको सच्चधम्मे ठितो सप्पुरिसो कित्तिं पप्पोति. ददं ददन्तो यं किञ्चि इच्छितं पत्थितं चतुसङ्गहवत्थुं ददन्तो सङ्गहन्तो सप्पुरिसो मित्तानि एकन्तमित्तानि गन्थति सम्पादेति, एवं चतूहि सच्चधम्मधितिचागेहि समन्नागतो सो सप्पुरिसो अस्मा लोका परं लोकं पेच्च गन्त्वा एकन्तेन सोककारणस्स अभावतो न सोचतीति योजना.

गोतम, सब्बगन्थप्पहीनो तीहि भवेहि विप्पमुत्तो सतो सतिसम्पन्नो त्वं, समणो, अञ्ञं देवमनुस्सादिकं यं अनुसाससि यं अनुसासनं करोसि, तं अनुसासनं सब्बगन्थप्पहीनस्स ¶ तीहि भवेहि विप्पमुत्तस्स समणस्स ते तव न साधूति सक्कनामको मारपक्खिको यक्खो गाथाय अज्झभासि.

‘‘सक्क सक्कनामक यक्ख अनुकम्पितेन पुरिसेन सद्धिं येन केनचि वण्णेन कारणेन संवासो एकस्मिं ठाने सहवासो जायति, तं अनुकम्पितब्बं सहवासगतं पुरिसं सप्पञ्ञो मनसा अनुकम्पितुं न अरहति अनुकम्पितुंयेव अरहति. या अनुकम्पा करुणा, या अनुद्दया मेत्ता, मुदिता च उप्पन्ना, ताय अनुकम्पाय करुणाय, ताय अनुद्दयाय मेत्ताय मुदिताय च समुस्साहितेन पसन्नेन मनसा यो सप्पञ्ञो सप्पुरिसो अञ्ञं देवमनुस्सादिकं यं अनुसासति यं अनुसासनं करोति, सो सप्पञ्ञो सप्पुरिसो तेन अनुसासनेन संयुत्तो कामच्छन्दादीनं संयोजनानं वसेन अननुलोमसंयोगेन संयुत्तो न होतीति भगवा अवोचाति योजना.

१०२. समण ¶ , रागो च दोसो च इमे द्वे धम्मा कुतोनिदाना, किंनिदाना, किंपच्चया भवन्ति, अरति च रति च लोमहंसो च इमे तयो कुतोजा कुतो भवन्ति? कुमारका धङ्कं काकं गहेत्वा पादे दीघसुत्तकेन बन्धित्वा सुत्तकोटिं अङ्गुलियं वेठेत्वा ओसजन्ति इव, एवं मनोवितक्का कुतो समुट्ठाय चित्तं ओसजन्तीति सूचिलोमयक्खो भगवन्तं पुच्छि.

रागो च दोसो च इमे द्वे धम्मा इतोनिदाना इतो अत्तभावतो निदाना जायन्ति; अरति च रति च लोमहंसो च इमे तयो इतोजा इतो अत्ततो भवन्ति; कुमारका धङ्कं काकं गहेत्वा पादे दीघसुत्तकेन बन्धित्वा सुत्तकोटिं अङ्गुलियं वेठेत्वा ओसजन्ति इव, एवं मनोवितक्का इतो अत्तभावतो समुट्ठाय चित्तं ओसजन्ति.

निग्रोधस्स खन्धजा पारोहा साखासु जायन्ति इव, वने रुक्खं निस्साय जाता मालुवा लता तं रुक्खं अज्झोत्थरित्वा वितता ओततवितता तिट्ठति इव, एवं, यक्ख, त्वं सुणोहि स्नेहजा तण्हास्नेहतो जाता अत्तसम्भूता अत्तनि सम्भूता पुन अनेकप्पकारा मनोवितक्का पापमनोवितक्का चेव तंसम्पयुत्तकिलेसा च कामेसु वत्थुकामेसु विसत्ता लग्गा संसिब्बिता ठिता.

ये पण्डिता ‘‘यं निदानं अस्स अत्तभावस्सा’’ति यतोनिदानं नं किलेसगहनं समुदयसच्चं ¶ पजानन्ति, ते पण्डिता अत्तभावसङ्खातस्स दुक्खसच्चस्स निदानभूतं नं किलेसगहनं समुदयसच्चं मग्गसच्चेन विनोदेन्ति. अपुनब्भवाय अपुनभवसङ्खाताय निरोधसच्चत्थाय अतिण्णपुब्बं अनमतग्गे संसारे सुपिनेनापि अतिण्णपुब्बं दुत्तरं इमं ओघं चतुब्बिधं संकिलेसोघं तरन्तीति भगवा अवोचाति योजना.

‘‘भगवा, समणधम्मस्स करणं नाम दुक्करं, भगवा, समणधम्मस्स करणं नाम सुदुक्करं सुट्ठुतरं दुक्कर’’न्ति एको कुलपुत्तो पब्बजित्वा समणधम्मं कत्वा अरियभूमिं अप्पत्वा कालं कत्वा देवलोके निब्बत्तो, सो देवपुत्तो भगवन्तं उपसङ्कमित्वा आह. कामद, सीलसमाहिता ठितत्ता ठितसभावा सत्त सेक्खा पुग्गला दुक्करं वापि समणधम्मं करोन्ति. अनगारियुपेतस्स अनगारियं निग्गेहभावं उपगतस्स पब्बजितस्स ¶ तुट्ठि चतुपच्चयसन्तोसो सुखावहा होती’’ति भगवा अवोच.

‘‘भगवा, यदिदं या एसा तुट्ठि सुखावहा, एसा तुट्ठि दुल्लभा’’ति सो देवपुत्तो आह. ‘‘कामद, येसं सेक्खानं मनो दिवा च रत्तो च भावनाय रतो चित्तवूपसमे रतो, ते सेक्खा दुल्लभं वापि तुस्सनं लभन्ती’’ति भगवा अवोच.

‘‘भगवा, यदिदं यं इदं चित्तं भावनाय रतं, तं चित्तं दुस्समादह’’न्ति सो देवपुत्तो आह. ‘‘कामद, ये अरिया इन्द्रियूपसमे रत्तिन्दिवं रता, ते अरिया दुस्समादहं वापि चित्तं समादहन्ति, कामद, ते अरिया मच्चुनो जालं किलेसजालं छेत्वा मग्गं गच्छन्ती’’ति भगवा अवोच.

‘‘भगवा, यो मग्गो पुब्बभागपटिपदावसेन विसमो, सो मग्गो दुग्गमो’’ति सो देवपुत्तो आह. ‘‘कामद, अरिया दुग्गमे विसमे वापि मग्गं गच्छन्ति, अनरिया विसमे मग्गे अवंसिरा पपतन्ति, अरियानं सो मग्गो समोव भवे, न असमो. हि सच्चं विसमे विसत्तकाये अरिया समा भवन्ती’’ति भगवा अवोचाति योजना.

१०३. यं जेतवनं इसिसङ्घनिसेवितं धम्मराजेन आवुत्थं, इदं तं जेतवनं मम पीतिसञ्जननं पीतिया सञ्जननं करं हि करं एव.

कम्मं मग्गचेतनाकम्मञ्च विज्जा मग्गपञ्ञा च धम्मो समाधि चेव समाधिपक्खिको च ¶ धम्मो सीलं, सीले ठितस्स जीवितं उत्तमं, एतेन अट्ठङ्गिकेन मग्गेन सत्ता सुज्झन्ति, गोत्तेन वा धनेन वा सत्ता न सुज्झन्ति.

तस्मा मग्गेनेव सत्तानं विसुज्झनतो अत्तनो अत्थं सम्पस्सं पस्सन्तो पण्डितो पोसो योनिसो उपायेन धम्मं बोधिपक्खियधम्मं विचिने विचिनेय्य, एवं विचिनने सति तत्थ अरियमग्गे विचिनन्तो पुग्गलो सुज्झति.

सारिपुत्तो सीलेन च उपसमेन च पारङ्गतो इव, एवं योपि भिक्खु सीलेन च उपसमेन च पारङ्गतो, सो भिक्खु एताव परमो सारिपुत्तसदिसोव सियाति अनाथपिण्डिकनामो देवपुत्तो भगवन्तं उपसङ्कमित्वा आहाति योजना. इदं सुत्तं निब्बेधभागियं सुत्तं नाम.

अतीतं ¶ अतीतक्खन्धपञ्चकं तण्हादिट्ठीहि नान्वागमेय्य, अनागतं अनागतक्खन्धपञ्चकं तण्हादिट्ठीहि नप्पटिकङ्खे न पत्थेय्य. यं यस्मा अतीतं पहीनं निरुद्धं अत्थङ्गतं, तस्मा अतीतस्स पहीनत्ता निरुद्धत्ता अत्थङ्गतत्ता नान्वागमेय्य. यं यस्मा अनागतं अप्पत्तं, तस्मा न पटिकङ्खे.

पच्चुप्पन्नं खन्धपञ्चकं वयधम्मं यत्थ यत्थ सन्ताने वा, यत्थ यत्थ अरञ्ञादीसु वा उप्पन्नं, तत्थ तत्थ सन्ताने वा, तत्थ तत्थ अरञ्ञादीसु वा नं पच्चुप्पन्नधम्मं याहि अनिच्चानुपस्सनादीहि विपस्सति, ताहि अनिच्चानुपस्सनादीहि निब्बानं रागादीहि असंहीरं असंकुप्पं भवति, तं निब्बानं विपस्सको पुग्गलो विद्वा निब्बानारम्मणं फलसमापत्तिं अप्पेन्तो हुत्वा अनुब्रूहये वड्ढेय्य.

आतप्पं संकिलेसानं आतपन्तं वीरियं अज्जेव किच्चं कातब्बं, सुवे जीवितं वा मरणं वा को जञ्ञा जानेय्य, ‘‘सुवे वा दानादिपुञ्ञं जानिस्सामी’’ति चित्तं अनुप्पादेत्वा ‘‘अज्जेव करिस्सामी’’ति एवं वीरियं कातब्बं. हि सच्चं मरणकारणभावताय अहिविच्छिकविससत्थादिअनेकाय सेनाय वसेन महासेनेन तेन मच्चुना सद्धिं मित्तसन्थवाकारेन वा लञ्जदानेन वा सङ्गरं नत्थीति.

एवं ¶ मनसि कत्वा विहारिं विहरन्तं आतापिं अहोरत्तं अतन्दितं अनलसं उट्ठाहकं सप्पुरिसं ‘‘भद्देकरत्तो’’ति सन्तो मुनि वे एकन्तेन आचिक्खते आचिक्खतियेवाति योजना.

‘‘चत्तारिमानि भिक्खवे’’त्यादिसुत्तं पाळितो च अट्ठकथातो च पाकटं.

१०४. नानाविधं निब्बेधभागियं सुत्तं आचरियेन निद्धारितं, अम्हेहि च ञातं, ‘‘कतमं असेक्खभागियं सुत्त’’न्ति पुच्छितब्बत्ता ‘‘तत्थ कतमं असेक्खभागियं सुत्त’’न्तिआदि वुत्तं. तत्थाति तेसु सोळससु संकिलेसभागियादीसु सुत्तेसु कतमं सुत्तं असेक्खभागियं सुत्तं नामाति पुच्छति.

यस्स उत्तमपुरिसस्स चित्तं सेलूपमं ठितं लोकधम्मवातेहि नानुकम्पति, रजनीयेसु लाभादीसु विरत्तं भवे, सो उत्तमपुरिसो कोपनेय्ये ¶ अलाभादिके न कुप्पति, तस्स उत्तमपुरिसस्स चित्तं एवं अनिच्चतादिना भावितं, नं भावितचित्तं उत्तमपुरिसं वीतिक्कन्तलोकधम्महेतुकं दुक्खं कुतो एस्सतीति योजना. इदं सुत्तं असेक्खभागे विसये वाचकञापकभावेन पवत्तनतो असेक्खभागियं सुत्तं नाम. एस नयो इतो परेसुपि वेदितब्बो.

‘‘असेक्खभागियं सुत्तं इदमेवा’’ति वत्तब्बभावतो ‘‘आयस्मतो चा’’तिआदि वुत्तं.

यो ब्राह्मणो बाहितपापधम्मत्ता बाहितपापधम्मो भवे, सो ब्राह्मणो निग्गतहुंहुंकत्ता निहुंहुङ्को भवे, निग्गतकिलेसकसावत्ता निक्कसावो भवे, सीलसंवरेन संयतचित्तताय यतत्तो भवे, यो ब्राह्मणो चतुमग्गञाणवेदेहि अन्तं निब्बानं गतत्ता वेदन्तगू भवे, धम्मेन वुसितब्रह्मचरियत्ता वुसितब्रह्मचरियो भवे. यस्स ब्राह्मणस्स कुहिञ्चि लोके उस्सदा रागुस्सदो दोसुस्सदो मोहुस्सदो मानुस्सदो दिट्ठुस्सदो नत्थि, सो ब्राह्मणो ब्रह्मवादं ‘‘अहं ब्राह्मणोम्ही’’ति वाचं वदेय्याति भगवा अवोचाति योजना.

ये बुद्धा पापके अकुसले धम्मे बाहित्वा सदा चरन्ति सता सतिसम्पन्ना खीणसंयोजना, ते बुद्धा लोकस्मिं ब्राह्मणाति वे एकन्तेन कथीयन्तीति अवोचाति योजना.

यत्थ निब्बाने आपो च पथवी च तेजो च वायो च न गाधति न पतिट्ठहति, तत्थ ¶ निब्बाने सुक्का गहा चेव तारका च न जोतन्ति, तत्थ निब्बाने आदिच्चो नप्पकासति, तत्थ निब्बाने चन्दिमा न भाति, तत्थ निब्बाने तमो न विज्जति.

यो ब्राह्मणो अत्तना सयं मुनि मोनेन यदा तं निब्बानं अवेदि विन्दति पटिलभति पटिविज्झति, अथ पटिविज्झनक्खणे सो ब्राह्मणो रूपा रूपधम्मतो च अरूपा अरूपधम्मतो च सुखदुक्खा सुखदुक्खतो च पमुच्चतीति अवोचाति योजना.

यक्ख, यो ब्राह्मणो सकेसु सकअत्तभावेसु धम्मेसु उपादानक्खन्धेसु सच्चेसु, धम्मेसु च पारगू होति, अथ पारगमनक्खणे सो ब्राह्मणो एतं अजकलापकं तया वुत्तं एतं पिसाचं किलेसपिसाचञ्च ¶ , तया कतं अक्कुलञ्च अक्कुलं, पक्कुलकरणं अतिवत्ततीति अवोचाति योजना.

यो भिक्खु आयन्तिं आगच्छन्तिं पुराणदुतियिकं भरियं वा, अञ्ञं आगच्छन्तिं इत्थिं वा चित्तेन न अभिनन्दति, पक्कमन्तिं पुराणदुतियिकं भरियं वा, अञ्ञं पक्कमन्तिं इत्थिं वा चित्तेन न सोचति, सङ्गा पञ्चविधतोपि सङ्गतो मुत्तं सङ्गामजिं तं भिक्खुं ‘‘ब्राह्मण’’न्ति अहं वदामीति अवोचाति योजना.

एत्थ नदियं बहुजनो न्हायति, सो बहुजनो न्हायको उदकेन उदकन्हानेन सुची न होति. यम्हि पुग्गले सच्चं, सच्चतो सेसधम्मो च अत्थि, सो पुग्गलो सुची च होति, सो पुग्गलो ब्राह्मणो च होतीति अवोचाति योजना; सुचिअसुचिभावो टीकायं वित्थारतो वुत्तोव.

आतापिनो झायतो यस्स ब्राह्मणस्स धम्मा सच्चधम्मा यदा हवे एकन्तेन पातुभवन्ति, तदा धम्मानं पातुभवनक्खणे सो ब्राह्मणो मारसेनं विधूपयं विधूपयन्तो तिट्ठति. ‘‘किमिवा’’ति वत्तब्बत्ता ‘‘सूरियोव ओभासयमन्तलिक्ख’’न्ति वुत्तं. सूरियो अन्तलिक्खं ओभासयन्तो तिट्ठति इव, एवं तिट्ठतीति योजना.

यो पंसुकूलिको भिक्खु सब्बानि चत्तारि योगानि उपातिवत्तो सकिञ्चने लोके अकिञ्चनो इरियति चतुब्बिधइरियापथं वत्तेति. अपहानधम्मं केनचि मग्गेन अप्पहानसभावं अप्पत्तकायेन अप्पत्तं तेविज्जपत्तं, इरियमानं सन्तिन्द्रियं तं पंसुकूलिकं भिक्खुं तुम्हे पस्सथ.

आजानियं ¶ पुरिसआजानीयं जातिबलनिसेधं ‘‘अहं जातिब्राह्मणो’’ति जातिमत्तकेन पवत्तमानबलनिसेधकं तं पंसुकूलिकं भिक्खुं सम्बहुला उळारा देवता ब्रह्मं विमानं उपसङ्कमित्वा इध सासने, ब्रह्मविमाने वा पसन्नचित्ता हुत्वा नमस्सन्ति. निधाति च एत्थ न-कारो आगमो.

पुरिसाजञ्ञ ते तव अम्हाकं नमो अत्थु, पुरिसुत्तम ते तव अम्हाकं नमो अत्थु, यस्स ते तव निस्सयं मयं नाभिजानाम, सो त्वं किं पुग्गलं निस्साय झायसीति अवोचुन्ति योजना.

ये ¶ भिक्खू कालेन कालं धम्मस्सवनवसेन चिररत्तं समेतिका भवन्ति, इमे भिक्खू सहाया होन्ति वत. नेसं सहायानं भिक्खूनं धम्मे बुद्धप्पवेदिते धम्मे सद्धम्मो समेति.

कप्पिनेन अरियप्पवेदिते धम्मे सुविनीता ते सहायका भिक्खू सवाहिनिं मारं जेत्वा अन्तिमं देहं अत्तभावं धारेन्तीति अवोचाति योजना.

सिथिलं वीरियं आरब्भ सब्बदुक्खप्पमोचनं इदं निब्बानं योगावचरेन न अधिगन्तब्बं, अप्पेन अप्पकेन थामसा इदं निब्बानं न अधिगन्तब्बं.

अयञ्च योगावचरो भिक्खु दहरो, यो पुरिसो सवाहिनिं मारं जेत्वा अन्तिमं देहं अत्तभावं धारेति, सो अयं पुरिसो सो उत्तमपुरिसोवाति अवोचाति योजना. ‘‘पुरिसो’’ति वत्तब्बे छन्दानुरक्खणवसेन ‘‘पोरिसो’’ति वुत्तं.

मोघराज, दुब्बण्णको लूखचीवरो सदा सतो सतिसम्पन्नो खीणासवो च विसंयुत्तो च कतकिच्चो च अनासवो च तेविज्जो च इद्धिप्पत्तो च चेतोपरियायकोविदो च सो भिक्खु सवाहिनिं मारं जेत्वा अन्तिमं देहं धारेतीति अवोचाति योजना.

१०५. ‘‘तथागतो’’तिआदीसु योजना पाकटा. इदं सुत्तं असेक्खभागे विसये वाचकञापकभावेन पवत्तनतो असेक्खभागियं सुत्तं नाम.

१०६. नानाविधं ¶ असेक्खभागियं सुत्तं आचरियेन निद्धारितं, अम्हेहि च ञातं, ‘‘कतमं संकिलेसभागियञ्च वासनाभागियञ्च सुत्त’’न्ति वत्तब्बत्ता ‘‘तत्थ कतमं संकिलेसभागियञ्च वासनाभागियञ्च सुत्त’’न्तिआदि वुत्तं. तत्थाति तेसु सोळससु संकिलेसभागियादीसु सुत्तेसु कतमं सुत्तं संकिलेसभागियञ्च वासनाभागियञ्च सुत्तं नामाति पुच्छति.

छन्नं आपत्तिं आपज्जित्वा छन्नं छादेन्तं भिक्खुं दुक्कटादिवस्सो अतिवस्सति, विवटं आपत्तिं आपज्जित्वा विवटं देसेन्तं आचिक्खन्तं भिक्खुं दुक्कटादिवस्सो नातिवस्सति, तस्मा छन्नस्स अतिवस्सनतो च विवटस्स नातिवस्सनतो च छन्नं छादितब्बं आपत्तिं विवरेथ देसेथ आरोचेथ ¶ , एवं विवरणे सति तं विवरन्तं भिक्खुं दुक्कटादिवस्सो नातिवस्सतीति योजना.

‘‘इमस्मिं सुत्ते कित्तकेन संकिलेसो दस्सितो, कित्तकेन वासना दस्सिता’’ति पुच्छितब्बत्ता ‘‘छन्नमतिवस्सती’’ति संकिलेसो, ‘विवटं नातिवस्सती’ति वासना, ‘तस्मा छन्नं विवरेथ, एवं तं नातिवस्सती’ति अयं संकिलेसो च वासना चा’’ति वुत्तं. ‘‘छन्नमतिवस्सती’’ति एत्तकेन संकिलेसो दस्सितो. ‘‘विवटं नातिवस्सती’’ति एत्तकेन वासना दस्सिता. ‘‘तस्मा छन्नं विवरेथ, एवं तं नातिवस्सती’’ति एत्तकेन अयं संकिलेसो च दस्सितो, अयं वासना च दस्सिता. इदं ‘‘छन्नं…पे... वस्सती’’ति सुत्तं संकिलेसभागे विसये च वासनाभागे विसये च वाचकञापकभावेन पवत्तनतो संकिलेसभागियञ्च वासनाभागियञ्च सुत्तं नाम.

‘‘संकिलेसभागियञ्च वासनाभागियञ्च सुत्तं एत्तकमेवा’’ति वत्तब्बत्ता ‘‘चत्तारोमे महाराजा’’तिआदि वुत्तं. ‘‘तेसु चतूसु पुग्गलेसु कतमे पुग्गला संकिलेसभागिया, कतमे पुग्गला वासनाभागिया’’ति पुच्छितब्बत्ता ‘‘तत्थ यो च पुग्गलो’’तिआदि वुत्तं. तत्थाति तेसु चतूसु तमोतमपरायणादीसु पुग्गलेसु. तस्सत्थो पाकटो. इदं ‘‘चत्तारोमे’’तिआदिकं सुत्तं संकिलेसभागियेसु द्वीसु पुग्गलेसु च वासनाभागियेसु द्वीसु पुग्गलेसु च वाचकञापकभावेन पवत्तनतो संकिलेसभागियञ्च वासनाभागियञ्च सुत्तं नाम.

नानाविधं संकिलेसभागियञ्च वासनाभागियञ्च सुत्तं आचरियेन निद्धारितं, अम्हेहि च ञातं, ‘‘कतमं संकिलेसभागियञ्च निब्बेधभागियञ्च सुत्तं नामा’’ति पुच्छितब्बत्ता तत्थ कतमं ¶ संकिलेसभागियञ्च निब्बेधभागियञ्च सुत्त’’न्तिआदि वुत्तं. तस्सत्थो वुत्तनयेन वेदितब्बो.

अयसं यं बन्धनञ्च दारुजं यं बन्धनञ्च पब्बजं यं बन्धनञ्च लोके अत्थि, तं अयसादिबन्धनं ‘‘दळ्हं बन्धन’’न्ति धीरा बुद्धादयो पण्डितपुरिसा न आहु. मणिकुण्डलेसु च पुत्तेसु च दारेसु च या सारत्तरत्ता बलवरागरत्ता अपेक्खा लोके विज्जति, तं सारत्तरत्तअपेक्खासङ्खातं रागबन्धनं ‘‘दळ्हं बन्धन’’न्ति धीरा पण्डितपुरिसा आहु. इमिना सुत्तप्पदेसेन अयं सारत्तरत्तअपेक्खासङ्खातो अकुसलधम्मो संकिलेसो दस्सितो.

‘‘केन ¶ निब्बेधो दस्सितो’’ति वत्तब्बत्ता ‘‘एत’’न्तिआदि वुत्तं. धीरा पण्डितपुरिसा एतं रागबन्धनं ‘‘दळ्हं बन्धन’’न्ति आहु. एतं रागबन्धनं ओहारिनं हेट्ठा अपायं अवहरणं होति, सिथिलं बन्धनट्ठाने छविआदीनि अकोपेतत्ता सिथिलं होति, दुप्पमुञ्चं लोभवसेन एकवारम्पि उप्पन्नस्स रागबन्धनस्स दुम्मोचयत्ता दुप्पमुञ्चं होति, पण्डितपुरिसा एतम्पि वुत्तप्पकारं रागबन्धनम्पि मग्गेन छेत्वान अनपेक्खिनो हुत्वा कामसुखं पहाय परिब्बजन्ति. इति इमिना सुत्तप्पदेसेन अयं मग्गो निब्बेधो दस्सितो. इदं ‘‘अयस’’न्तिआदिकं सुत्तं रागादिसंकिलेसभागे विसये च वासनाभागे विसये च वाचकञापकभावेन पवत्तनतो संकिलेसभागियञ्च वासनाभागियञ्च सुत्तं नाम.

१०७. भिक्खवे, यञ्च चेतेति यञ्च चेतनं निब्बत्तेति, यञ्च पकप्पेति यञ्च पकप्पनं करोति, यञ्च अनुसेति यञ्च अनुसयनं भवति, एतं चेतनं एतं पकप्पनं एतं अनुसयनं विञ्ञाणस्स ठितिया आरम्मणं पच्चयो होति. आरम्मणे पच्चये सति तस्स अभिसङ्खार विञ्ञाणस्स पतिट्ठा होति. तस्मिं अभिसङ्खारविञ्ञाणे पतिट्ठिते विरुळ्हे सति आयतिं पुनब्भवाभिनिब्बत्ति विञ्ञाणादिनिब्बत्ति होति. आयतिं पुनब्भवाभिनिब्बत्तिया सति आयतिं जातिजरामरणं सम्भवति. आयतिं सोक…पे… समुदयो होति.

भिक्खवे, चे नो चेतेति, चे नो पकप्पेति, अथ तथापि चे अनुसेति अनुसयनं भवति, एवं सति एतं अनुसयनं विञ्ञाणस्स अभिसङ्खारविञ्ञाणस्स आरम्मणं पच्चयो होति…पे… समुदयो होति. इति इमिना सुत्तप्पदेसेन अयं वुत्तप्पकारो चेतयनादिको अकुसलधम्मो संकिलेसो दस्सितो.

‘‘केन ¶ निब्बेधो दस्सितो’’ति वत्तब्बत्ता ‘‘यतो चा’’तिआदि वुत्तं. भिक्खवे, यतो च अरियमग्गिको नेव चेतेति, नो च पकप्पेति, नो च अनुसेति, एतं अचेतयनं एतं अकप्पनं एतं अननुसयनं विञ्ञाणस्स अभिसङ्खारविञ्ञाणस्स आरम्मणं पच्चयो न होति…पे… आयतिं जातिजरामरणं निरुज्झति, आयतिं सोक…पे… यासा निरुज्झन्ति…पे… निरोधो होति. इति इमिना सुत्तप्पदेसेन अयं अरियमग्गो निब्बेधो दस्सितो. इदं ‘‘यञ्च भिक्खवे’’तिआदिकं सुत्तं ¶ संकिलेसभागे विसये च निब्बेधभागे विसये च वाचकञापकभावेन पवत्तनतो संकिलेसभागियञ्च निब्बेधभागियञ्च सुत्तं नाम.

१०८. नानाविधं संकिलेसभागियञ्च निब्बेधभागियञ्च सुत्तं आचरियेन निद्धारितं, अम्हेहि च ञातं, ‘‘कतमं संकिलेसभागियञ्च असेक्खभागियञ्च सुत्त’’न्ति पुच्छितब्बत्ता ‘‘तत्थ कतमं संकिलेसभागियञ्च असेक्खभागियञ्च सुत्त’’न्तिआदि वुत्तं. तस्सत्थो वुत्तनयेन वेदितब्बो.

भिक्खवे, अस्सुतवा पुथुज्जनो समुद्दो जलसागरसमुद्दो ‘‘समुद्दो समुद्दो’’ति भासति. केनट्ठेन भासति? दुप्पूरणट्ठेन च संसरणट्ठेन च दुरतिक्कमनट्ठेन च समुद्दोति भासति. एवं सति, भिक्खवे, एसो जलसागरसमुद्दो अरियस्स भगवतो विनये वुत्तप्पकारट्ठेन समुद्दो न होति. भिक्खवे, एसो जलसागरसमुद्दो महा उदकरासि महा उदकण्णवो होति. भिक्खवे, चक्खु पुरिसस्स समुद्दो होति, तस्स चक्खुस्स रूपमयो रूपायतनमयो वेगो. केनट्ठेन? पथवितो याव अकनिट्ठब्रह्मलोका नीलादिरूपारम्मणं समोसरन्तम्पि दुप्पूरणट्ठेन च अनमतग्गे संसारे संसरणट्ठेन च दुरतिक्कमनट्ठेन च चक्खुमेव समुद्दो होति. नीलादिरूपायतनस्स अप्पमेय्यस्स अप्पमेय्येन ऊमिमयेन वेगेन संसरणट्ठेन नीलादिरूपमेव वेगो होति. इति इमिना सुत्तप्पदेसेन अयं चक्खु समुद्दो रूपमयो वेगो च संकिलेसो संकिलेसहेतु दस्सितो.

‘‘केन असेक्खो दस्सितो’’ति वत्तब्बत्ता ‘‘यो त’’न्तिआदि वुत्तं. यस्मिं अरहत्तफले ठितो यो अरहा रूपमयं तं वेगं सहति मनापे रूपे रागं, अमनापे रूपे दोसं, असमपेक्खने मोहं अनुप्पादेन्तो हुत्वा उपेक्खकभावेन सहति, अयं अरहा, भिक्खवे, सऊमिं सावट्टं सगहं सरक्खसं चक्खुसमुद्दं अतरीति वुच्चति, तिण्णो पारङ्गतो थले तिट्ठति ब्राह्मणोति वुच्चति. इति इमिना सुत्तप्पदेसेन अयं अरहत्तफलभूतो असेक्खो दस्सितो.

‘‘सोतं ¶ ¶ भिक्खवे’’तिआदीसुपि इमिना नयेन यथासम्भवं अत्थो वेदितब्बो. इदं ‘‘समुद्दो’’तिआदिकं सुत्तं संकिलेसभागे विसये च असेक्खभागे विसये च वाचकञापकभावेन पवत्तनतो संकिलेसभागियञ्च असेक्खभागियञ्च सुत्तं नाम.

‘‘एत्तकमेवा’’ति वत्तब्बत्ता ‘‘छयिमे’’तिआदि वुत्तं. भिक्खवे, लोकस्मिं सत्तानं अनयाय अनत्थाय पाणीनं ब्याबाधाय इमे मया वुच्चमाना बळिसा छ भवन्ति. कतमे छ? भिक्खवे, चक्खुविञ्ञेय्या चक्खुविञ्ञाणेन विञ्ञेय्या इट्ठा कन्ता कामनीया मनापा मनवड्ढका पियरूपा पियसभावा कामूपसंहिता किलेसकामसहिता रजनीया रूपा नीलादिरूपारम्मणा सन्ति, तं वुत्तप्पकारं रूपं भिक्खु चे अभिनन्दति सप्पीतिकतण्हाय अभिमुखो नन्दति, चे अभिवदति ‘‘अहो सुखं अहो सुख’’न्ति वदापेन्तिया तण्हायनवसेन अभिवदति, चे अज्झोसाय तिट्ठति गिलित्वा विय परिनिट्ठपेत्वा तिट्ठति, एवं सति, भिक्खवे, अयं भिक्खु ‘‘गिलितबळिसो…पे… पापिमतो’’ति वुच्चति. एत्थ च नीलादिभेदेन अनेकविधत्ता ‘‘रूपा इट्ठा…पे… रजनीया’’ति बहुवचननिद्देसो कतोपि रूपायतनरूपारम्मणभावेन च चक्खुविञ्ञेय्यभावेन च एकविधतं अनतिवत्तनतो ‘‘त’’न्ति एकवचननिद्देसो कतोति वेदितब्बो. ‘‘सन्ति, भिक्खवे, सोतविञ्ञेय्या’’तिआदीसुपि इमिना नयेन यथासम्भवं अत्थो वेदितब्बो. इति इमिना सुत्तप्पदेसेन अयं चक्खुविञ्ञेय्यादिको छब्बिधो बळिसो संकिलेसो किलेसहेतु दस्सितो.

‘‘केन असेक्खो दस्सितो’’ति वत्तब्बत्ता ‘‘सन्ति चा’’तिआदि वुत्तं.

अभेदि भिन्दि, परिभेदि परिसमन्ततो भिन्दि. इति इमिना सुत्तप्पदेसेन अयं अरहत्तफलभूतो असेक्खो दस्सितो. इदं ‘‘छयिमे’’तिआदिकं सुत्तं वुत्तनयेन संकिलेसभागियञ्च असेक्खभागियञ्च सुत्तं नाम.

१०९. नानाविधं संकिलेसभागियञ्च असेक्खभागियञ्च सुत्तं आचरियेन निद्धारितं, अम्हेहि च ञातं, ‘‘कतमं संकिलेसभागियञ्च निब्बेधभागियञ्च असेक्खभागियञ्च सुत्त’’न्ति पुच्छितब्बत्ता ‘‘तत्थ कतमं संकिलेसभागियञ्च निब्बेधभागियञ्च असेक्खभागियञ्च सुत्त’’न्तिआदि वुत्तं.

अयं ¶ लोको सत्तलोको सन्तापजातो ञातिब्यसनादिवसेन जातसोकसन्तापो चेव रागादिवसेन ¶ जातपरिळाहसन्तापो च फस्सपरेतो अनेकेहि दुक्खसम्फस्सेहि अभिभूतो रोदं रोदन्तो वदति. किन्ति वदति? अत्तना फुट्ठं दुक्खं अभावितकायताय अधिवासेतुं असक्कोन्तो हुत्वा ‘‘अहो दुक्खं, ईदिसं दुक्खं मय्हं सत्तुनोपि मा होतू’’तिआदिना रोदन्तो विलपन्तो वदति, ‘‘कस्मा एवं वदती’’ति वत्तब्बत्ता ‘‘अत्ततो येन येन हि मञ्ञन्ती’’तिआदि वुत्तं. एते सत्ता येन येन कामज्झोसादिना पकारेन अत्ततो दुक्खस्स पटिकारं मञ्ञन्ति, ततो पकारतो अञ्ञथा अञ्ञेन पकारेन तं दुक्खं तिकिच्छितब्बं हि यस्मा होति.

अञ्ञथाभावीति यस्मा रोदं रोदन्तो वदति, येन येन वा परविहिंसादिपकारेन अत्तनो वड्ढिं मञ्ञन्ति आसीसन्ति, ततो पकारतो अञ्ञथा अवड्ढि एव होति. तं आसीसितब्बं अञ्ञथाभावि अवड्ढितभावि एव हि यस्मा होति, तस्मा मञ्ञितब्बस्स आसीसितब्बस्स अञ्ञथा भवनसीलत्ता रोदं रोदन्तो वदति, अयं सत्तलोको रोदन्तो च हुत्वा वदति. ‘‘कि’’न्ति पुच्छितब्बत्ता ‘‘भवसत्तो’’तिआदि वुत्तं. भवसत्तो कामभवादीसु सत्तो विसत्तो लोको भवमेव कामभवादिभवमेव अभिनन्दति. यं भवं अभिनन्दति, तं जरामरणादिअनेकब्यसनानुबन्धत्ता भयानकट्ठेन भयं होति. यस्स यतो जरामरणादितो भायति, तं जरामरणादिदुक्खस्स अधिट्ठानभावतो दुक्खं दुक्खाधिट्ठानं होति. इति इमिना सुत्तप्पदेसेन अयं सन्तापादिको संकिलेसो संकिलेसहेतु दस्सितो.

संकिलेसो दस्सितो, ‘‘केन निब्बेधो दस्सितो’’ति वत्तब्बत्ता ‘‘भवविप्पहानाय खो’’तिआदि वुत्तं. भवविप्पहानाय खो पन कामभवादिकस्स भवस्स पजहनत्थाय एव इदं मया अधिगतं मग्गब्रह्मचरियं वुस्सति. इति इमिना सुत्तप्पदेसेन अयं ब्रह्मचरियभूतो मग्गो निब्बेधो दस्सितो.

‘‘भवविप्पहानाया’’तिआदिना एकन्तेन निय्यानिकमग्गो निब्बेधो आचरियेन दस्सितो, अम्हेहि च ञातो, ‘‘कतमो अनिय्यानिकमग्गो’’ति पुच्छितब्बत्ता ‘‘ये हि केचि समणा वा’’तिआदि वुत्तं. हि-सद्दो वाचासिलिट्ठत्थो. ये केचि समणा वा ये केचि ब्राह्मणा वा भवेन ¶ रूपभवेन भवस्स कामभवस्स विप्पमोक्खं आहंसु, भवेन अरूपभवेन भवस्स कामभवस्स चेव रूपभवस्स च विप्पमोक्खं आहंसु, सब्बे ते समणा वा सब्बे ते ब्राह्मणा वा भवस्मा वुत्तप्पकारभवतो अविप्पमुत्ता भवन्तीति अहं वदामि.

‘‘रूपभवादिना ¶ ये च कामभवादिभवस्स विप्पमोक्खं आहंसू’’ति वत्तब्बत्ता विभवेन भवस्स निस्सरणं आहंसूति दस्सेतुं ‘‘ये वा पना’’तिआदि वुत्तं. ये वा पन केचि समणा वा ये वा पन केचि ब्राह्मणा वा विभवेन उच्छेददिट्ठिया भवस्स संसारभवस्स निस्सरणं आहंसु, सब्बे ते समणा वा सब्बे ते ब्राह्मणा वा भवस्मा संसारभवतो अनिस्सटाव होन्तीति अहं वदामि. ‘‘कस्मा अनिस्सटा’’ति वत्तब्बत्ता अनिस्सटकारणं दस्सेतुं ‘‘उपधिं ही’’तिआदि वुत्तं. इदं दुक्खं संसारदुक्खं उपधिं खन्धूपधिकिलेसूपधिअभिसङ्खारूपधयो पटिच्च हि यस्मा सम्भोति, तस्मा अनिस्सटा होन्ति. इति इमिना सुत्तप्पदेसेन अयं मिच्छादिट्ठिसङ्खातो संकिलेसो दस्सितो.

ये हि ‘‘केची’’तिआदिना संकिलेसो दस्सितो, ‘‘केन निब्बेधो दस्सितो’’ति वत्तब्बत्ता ‘‘सब्बुपादानक्खया’’तिआदि वुत्तं. सब्बुपादानक्खया अरियमग्गतो दुक्खस्स संसारदुक्खस्स सम्भवो नत्थि. इति इमिना सुत्तप्पदेसेन अयं अरियमग्गो निब्बेधो दस्सितो.

‘‘वुत्तप्पकारा अञ्ञसुत्तप्पदेसेनपि दस्सितो’’ति दस्सेतुं ‘‘लोकमिम’’न्तिआदि वुत्तं. पुथू विसुं विसुं अविज्जाय परेतं अभिभूतं भूतरतं भूतेसु इत्थिपुरिसेसु अञ्ञमञ्ञरतं भूतं खन्धपञ्चकं भवेहि अपरिमुत्तं इमं लोकं मम चित्त त्वं पस्स. ये केचि भवा इत्तरखणा वा भवा, दीघायुका वा भवा, सातवन्तो वा भवा, असातवन्तो वा भवा पञ्चक्खन्धा सब्बधि ‘‘उद्धं अधो तिरिय’’न्ति इमेसु सब्बेसु सब्बत्थताय सब्बत्थभावेन अहेसुं, सब्बे ते वुत्तप्पकारा भवा निच्चधुवरहितत्ता अनिच्चा सम्पीळितत्ता दुक्खा विपरिणामभावतो विपरिणामधम्मा अहेसुं. इति इमिना सुत्तप्पदेसेन अयं अविज्जादिको संकिलेसो दस्सितो.

‘‘लोकमिम’’न्तिआदिना संकिलेसो दस्सितो, ‘‘केन निब्बेधो दस्सितो’’ति वत्तब्बत्ता ‘‘एवमेत’’न्तिआदि वुत्तं. एवं वुत्तप्पकारेन एतं खन्धपञ्चकं ¶ यथाभूतं सम्मप्पञ्ञाय सस्स अत्तनो मग्गपञ्ञाय, विपस्सनापञ्ञाय वा पस्सतो पस्सन्तस्स पुग्गलस्स भवतण्हा पहीयति, सम्मप्पञ्ञाय यथाभूतं खन्धपञ्चकं पस्सन्तो विभवं उच्छेददिट्ठिं नाभिनन्दति न पत्थेति. तस्स पुग्गलस्स सब्बसो तण्हानं खया असेसविरागनिरोधो असेसविरागसङ्खातेन मग्गेन निरोधो निरुज्झनं निब्बानं निब्बुति होति. इति इमिना सुत्तप्पदेसेन अयं मग्गो निब्बेधो दस्सितो.

‘‘एवमेत’’न्तिआदिना ¶ निब्बेधो दस्सितो, ‘‘केन असेक्खो दस्सितो’’ति वत्तब्बत्ता ‘‘तस्स निब्बुतस्सा’’तिआदि वुत्तं. तण्हादिट्ठिनिब्बुतस्स तस्स भिक्खुनो अनुपादा किलेसाभिसङ्खारानं अनुप्पादनतो अग्गहणतो पुनब्भवो न होति, एवंभूतेन अरियपुग्गलेन पुब्बे अत्तानं अभिभूतो पञ्चविधो मारो विजितो अहोसि, अनेन अरियपुग्गलेन पञ्चहि मारेहि सङ्गामो विजितो, सङ्गामे, इट्ठानिट्ठादीसु वा तादी तादिलक्खणप्पत्तो अरियपुग्गलो सब्बभवानि उपच्चगा अतिक्कन्तोव जातो. इति इमिना सुत्तप्पदेसेन अयं असेक्खो दस्सितो. इदं वुत्तप्पकारं ‘‘अयं लोको’’तिआदिकं सुत्तं संकिलेसभागे विसये च निब्बेधभागे विसये च असेक्खभागे विसये च वाचकञापकभावेन एकदेसवसेन पवत्तनतो संकिलेसभागियञ्च निब्बेधभागियञ्च असेक्खभागियञ्च सुत्तं नाम.

‘‘एत्तकमेवा’’ति वत्तब्बत्ता ‘‘चत्तारोमे’’तिआदि वुत्तं. अन्धपुथुज्जनो संसारसोतस्स अनुकूलभावेन गच्छनतो अनुसोतगामी नाम, कल्याणपुथुज्जनो संसारसोतस्स निब्बिदानुपस्सनादीहि पटिक्कूलवसेन पवत्तनतो पटिसोतगामी नाम, सेक्खो अचलप्पसादादिसमन्नागमेन ठितसभावत्ता ठितत्तो नाम, असेक्खो संसारपारङ्गतवसेन तिट्ठनतो ‘‘थले तिट्ठती’’ति वुच्चति.

‘‘तेसु चतूसु पुग्गलेसु कतमो पुग्गलो संकिलेसभागियादी’’ति वत्तब्बभावतो ‘‘तत्थ योय’’न्तिआदि वुत्तं.

११०. नानाविधं संकिलेसभागियञ्च निब्बेधभागियञ्च असेक्खभागियञ्च सुत्तं आचरियेन निद्धारितं, अम्हेहि च ञातं, ‘‘कतमं संकिलेसभागियञ्च वासनाभागियञ्च निब्बेधभागियञ्च सुत्त’’न्ति पुच्छितब्बत्ता ‘‘तत्थ कतम’’न्तिआदि वुत्तं.

अभिजातियो ¶ पुग्गला छ संविज्जन्ति लोकस्मिं, कण्हे नीचे कुले निब्बत्तो कण्हाभिजातिको, कण्हधम्मसमन्नागतत्ता वा कण्हो कण्हाभिजातिको हुत्वा कण्हं काळकं दसविधं दुस्सील्यधम्मं अभिजायति पसवति, एसो पुग्गलो अत्थि. वुत्तप्पकारेन कण्हो कण्हाभिजातिको हुत्वा सुक्कं दसविधं कुसलधम्मं अभिजायति, एसो पुग्गलो अत्थि. कण्हो कण्हाभिजातिको हुत्वा अकण्हं असुक्कं अकण्हअसुक्कविपाकं अच्चन्तदिट्ठं निब्बानं आराधेति, एसो पुग्गलो अत्थि. वुत्तविपरियायेन तयो पुग्गला जानितब्बा.

‘‘तेसु ¶ कतमे पुग्गला संकिलेसभागिया’’तिआदिना वत्तब्बत्ता ‘‘तत्थ यो चा’’तिआदि वुत्तं.

‘‘एत्तकमेवा’’ति वत्तब्बत्ता ‘‘चत्तारिमानी’’तिआदि वुत्तं.

१११. नानाविधं संकिलेसभागियञ्च वासनाभागियञ्च निब्बेधभागियञ्च सुत्तं आचरियेन निद्धारितं, अम्हेहि च ञातं, ‘‘कतमं वासनाभागियञ्च निब्बेधभागियञ्च सुत्त’’न्ति पुच्छितब्बत्ता ‘‘तत्थ कतमं वासनाभागियञ्च निब्बेधभागियञ्चा’’तिआदि वुत्तं.

मानुसत्तं मनुस्सभावं लद्धान किच्चं, अकिच्चञ्च द्वे भवन्ति, द्वे किच्चानियेव कत्तब्बानि. तेनाह अट्ठकथाचरियो (नेत्ति. अट्ठ. १११) ‘‘कत्तब्ब’’न्ति दस्सेति. ‘‘कतमं कत्तब्बं किच्च’’न्ति वत्तब्बत्ता कत्तब्बकिच्चं दस्सेतुं ‘‘सुकिच्चं चेवा’’तिआदि वुत्तं. पुञ्ञानि च कत्तब्बत्ता सुकिच्चं एव, संयोजनविप्पहानं वा कत्तब्बत्ता सुकिच्चं नामाति योजना.

‘‘तत्थ सुत्ते कतमेन कतमो दस्सितो’’ति वत्तब्बत्ता ‘‘सुकिच्चंचेव पुञ्ञानीति वासना, संयोजनविप्पहानं वाति निब्बेधो’’ति वुत्तो.

‘‘एत्तकमेवा’’ति वत्तब्बत्ता ‘‘पुञ्ञानि करित्वाना’’तिआदि वुत्तं. पुञ्ञानि करित्वान कतपुञ्ञा पुग्गला सग्गा सग्गतो सग्गंयेव वजन्ति. संयोजनप्पहाना अरिया जरामरणा जरामरणतो विप्पमुच्चन्ति.

‘‘तत्थ सुत्ते कतमेन कतमो दस्सितो’’ति वत्तब्बत्ता ‘‘पुञ्ञानि करित्वान, सग्गा सग्गं वजन्ति कतपुञ्ञा’ति वासना, ‘संयोजनप्पहाना, जरामरणा विप्पमुच्चन्ती’ति निब्बेधो’’ति वुत्तं.

‘‘एत्तकमेवा’’ति ¶ वत्तब्बत्ता ‘‘द्वेमानी’’तिआदि वुत्तं. ‘‘कतमेन कतमो दस्सितो’’ति वत्तब्बत्ता ‘‘तत्थ यो…पे… अयं निब्बेधो’’ति वुत्तं.

नानाविधं वासनाभागियञ्च निब्बेधभागियञ्च सुत्तं आचरियेन निद्धारितं, अम्हेहि च ञातं ¶ , ‘‘कतमं तण्हासंकिलेसभागियं सुत्त’’न्ति पुच्छितब्बत्ता ‘‘तत्थ तण्हासंकिलेसभागिय’’न्तिआदि वुत्तं. तत्थाति तेसु सोळससु संकिलेसभागियादीसु सुत्तेसु तण्हासंकिलेसभागियं सुत्तं तण्हापक्खेनेव निद्दिसितब्बं, बहुविसयत्ता नियमेत्वान निद्धारेस्सामीति वुत्तं होति. ‘‘केन पकारेन निद्दिसितब्ब’’न्ति वत्तब्बत्ता ‘‘तीहि तण्हाही’’तिआदि वुत्तं. भवतण्हायाति रूपभवतण्हाय. विभवतण्हायाति अरूपभवतण्हाय. येन येन वा पन वत्थुना तण्हापभेदउच्छेदादिवत्थुना अज्झोसिता भवतण्हादिवसेन अज्झोसिता, तेन तेन पकारेन तण्हादिना वा तण्हापभेदउच्छेदादिवत्थुना वा तण्हासंकिलेसभागियं सुत्तं निद्दिसितब्बं.

तण्हासंकिलेसभागियं सुत्तं तण्हापक्खेनेव निद्दिसितब्बन्ति आचरियेन वुत्तं, अम्हेहि च लक्खितं, ‘‘दिट्ठिसंकिलेसभागियं सुत्तं केन पक्खेन निद्दिसितब्ब’’न्ति वत्तब्बत्ता ‘‘तत्थ दिट्ठिसंकिलेसभागिय’’न्तिआदि वुत्तं. येन येन वा पन वत्थुनाति दिट्ठिप्पभेदअमराविक्खेपादिवत्थुना.

दिट्ठिसंकिलेसभागियं सुत्तं दिट्ठिपक्खेनेव निद्दिसितब्बन्ति आचरियेन वुत्तं, अम्हेहि च लक्खितं, ‘‘दुच्चरितसंकिलेसभागियं सुत्तं केन पकारेन निद्दिसितब्ब’’न्ति वत्तब्बत्ता ‘‘तत्थ दुच्चरितसंकिलेसभागिय’’न्तिआदि वुत्तं. तथेव वत्तब्बत्ता ‘‘तत्थ तण्हावोदानभागिय’’न्तिआदि वुत्तं, ‘‘दिट्ठिवोदानभागिय’’न्तिआदि वुत्तं, ‘‘दुच्चरितवोदानभागिय’’न्तिआदि वुत्तं.

११२. यस्मिं सासनपट्ठाने अट्ठारस मूलपदा दट्ठब्बा, तं सासनपट्ठानं सोळसहि संकिलेसभागियादीहि सुत्तेहि एकदेसनिद्धारणवसेन विभजितं, अम्हेहि च ञातं, ‘‘किं पन तं सासनपट्ठानं तेहि सोळसहि एव संकिलेसभागियादीहि विभजितब्बं, उदाहु अञ्ञेहि सुत्तेहिपि विभजितब्ब’’न्ति वत्तब्बत्ता अञ्ञेहि अट्ठवीससुत्तेहिपि विभजितुं ‘‘तत्थ कतमे अट्ठारस मूलपदा? लोकियं लोकुत्तर’’न्तिआदि वुत्तं ¶ . ‘‘यदि अञ्ञेहिपि अट्ठवीससुत्तेहि विभजितब्बं, एवं सति ‘लोकिय’न्तिआदिवचनमेव वत्तब्बं, कस्मा ‘तत्थ कतमे अट्ठारस मूलपदा’ति वुत्ता’’ति चे? तस्स सासनपट्ठानविभागो अट्ठारसहि मूलपदेहि सङ्गहितो, अट्ठारस मूलपदापि विभजिते सासनपट्ठाने दट्ठब्बा, तस्मा मूलपदा विभत्तायेव. तानि मूलपदानि विभजितुं ‘‘तत्थ कतमे अट्ठारस मूलपदा’’ति वुत्तं. अट्ठकथायं (नेत्ति. अट्ठ. ११२) पन –

‘‘एवं ¶ सोळसविधेन सासनपट्ठानं नानासुत्तेहि उदाहरणवसेन विभजित्वा इदानि अट्ठवीसतिविधेन सासनपट्ठानं दस्सेन्तेन यस्मा अयम्पि पट्ठानविभागो मूलपदेहि सङ्गहितो, न इमस्सापि तेहि असङ्गहितो पदेसो अत्थि, तस्मा मूलपदं, विभजितब्बतञ्च दस्सेतुं ‘तत्थ कतमे अट्ठारस मूलपदा’ति पुच्छाय वसेन मूलपदानि उद्धरित्वा ‘लोकियं लोकुत्तर’न्तिआदिना नव तिका, थवो चाति अट्ठवीसतिविधं सासनपट्ठानं उद्दिट्ठ’’न्ति –

वुत्तं. तत्थाति तेसु सोळसहारपञ्चकनयअट्ठारसमूलपदेसु कतमानि पदानि मूलपदानि होन्तीति पुच्छति. लोके नियुत्तो सभावधम्मोति लोकियो, लोके वा विदूहि विदितो सभावोतिपि लोकियो, लोकियो सभावधम्मो अस्स विसेससुत्तस्स अत्थीति तं विसेससुत्तं लोकियं नाम. एस नयो ‘‘लोकुत्तर’’न्तिआदीसुपि वेदितब्बो. जानातीति ञाणं, ञाणं अस्स विसेससुत्तस्स अत्थीति ञाणं. ञातब्बाति ञेय्या, ञेय्या अस्स विसेससुत्तस्स अत्थीति ञेय्यं. एसेव नयो – ‘‘ञाणञ्च ञेय्यञ्चा’’ति एत्थापि वेदितब्बो. निब्बानं पठमं पस्सतीति दस्सनं, पठममग्गञाणं, दस्सनं अस्स विसेससुत्तस्स अत्थीति दस्सनं. भावना अस्स विसेससुत्तस्स पाळिया अत्थीति भावना. ‘‘दस्सनञ्च भावना चा’’ति एत्थापि एस नयो वेदितब्बो. सस्स अत्तनो वचनन्ति सकं, सकं वचनं सकवचनं, भगवतो वचनन्ति अत्थो. परस्स वचनं परवचनं. विस्सज्जनीयो अस्स विसेससुत्तस्स अत्थीति विस्सज्जनीयं. नत्थि विस्सज्जनीयो अस्स विसेससुत्तस्साति अविस्सज्जनीयं. कम्मं अस्स विसेससुत्तस्स अत्थीति कम्मं. विपाको अस्स पाठस्स अत्थीति विपाको ¶ . सेसेसुपि अस्सत्थिअत्थो गहेतब्बो. अथ वा लोकियादिअत्थो मुख्यत्थो, तंवाचकसुत्तम्पि ठान्यूपचारेन वुत्तं. बुद्धादीनं गुणे अभित्थवति एतेन सुत्तप्पदेसेनाति थवो, सुत्तप्पदेसो.

‘‘तेसु अट्ठवीसतिविधेसु लोकियादीसु सासनपट्ठानसुत्तेसु कतमं सुत्तं लोकियं सुत्त’’न्ति पुच्छितब्बत्ता ‘‘तत्थ कतमं लोकिय’’न्तिआदि वुत्तं. तत्थाति तेसु अट्ठवीसतिविधेसु लोकियादीसु सासनपट्ठानसुत्तेसु कतमं सुत्तं लोकियं सासनपट्ठानं सुत्तन्ति पुच्छति.

भिक्खवे, धेनुया थनेहि निक्खन्तं सज्जुखीरं निक्खन्तक्खणे न मुच्चति न परिणमति खीरभावं पजहित्वा दधिभावं न पापुणाति, तक्कादिअम्बिलसमायोगतो पच्छा खीरभावं पजहति दधिभावं पापुणाति इव, एवं येन बालेन पापं यं कम्मं कतं, तं कम्मं करणक्खणे ¶ तस्स बालस्स अपायदुक्खादिनिब्बत्तापनवसेन न विपच्चति. दुतिये पन वा ततियादिम्हि वा अत्तभावे विपच्चति. भस्मच्छन्नो छारिकाय पटिच्छन्नो पावको अग्गि अक्कन्तं जनं अक्कमनक्खणे न डहति. छारिकं पन तापेत्वा कालन्तरे डहति इव, एवं येन बालेन पापं यं कम्मं कतं, तं कम्मं करणक्खणे तं बालं अपायदुक्खादिनिब्बत्तापनवसेन डहापेन्तं हुत्वा न अन्वेति. दुतिये वा ततियादिम्हि वा अत्तभावे अपायदुक्खादिनिब्बत्तापनवसेन डहापेन्तं हुत्वा डहन्तं तं बालं तं अन्वेतीति योजना. इदं ‘‘न हि…पे… पावको’’ति सुत्तं लोकिये अत्थे वाचकञापकभावेन पवत्तनतो लोकियं नाम.

‘‘एत्तकमेव लोकिय’’न्ति वत्तब्बत्ता ‘‘चत्तारिमानी’’तिआदि वुत्तं. अत्थो पाकटो. इदं ‘‘चत्तारिमानि…पे… काळपक्खेव चन्दिमा’’ति सुत्तं लोकिये अत्थे वाचकञापकभावेन पवत्तनतो लोकियं नाम.

‘‘एवं दुविधंयेव लोकिय’’न्ति वत्तब्बत्ता ‘‘अट्ठिमे, भिक्खवे, लोकधम्मा’’तिआदि वुत्तं. अत्थो पाकटो. इदं ‘‘अट्ठिमे’’तिआदिकं सुत्तं लोकियेसु अट्ठविधेसु अत्थेसु वाचकञापकभावेन पवत्तनतो लोकियं नाम.

नानाविधं लोकियं आचरियेन निद्धारितं, अम्हेहि च ञातं, ‘‘कतमं सुत्तं लोकुत्तर’’न्ति वत्तब्बत्ता ‘‘तत्थ कतमं लोकुत्तर’’न्तिआदि वुत्तं ¶ . इतो परेसुपि एस नयो वेदितब्बो. तत्थाति तेसु अट्ठवीसतिविधेसु लोकियादीसु सुत्तेसु.

छेकेन सारथिना सुदन्ता अस्सा समथङ्गता यथा, एवं पहीनमानस्स पहीननवविधमानस्स यस्स अनासवस्स भिक्खुनो इन्द्रियानि छब्बिधानि चक्खुन्द्रियादीनि समथङ्गतानि. तादिनो तादिलक्खणेन समन्नागतस्स अनासवस्स तस्स भिक्खुनो देवापि मनुस्सापि पिहयन्तीति योजना. इदं ‘‘यस्सिन्द्रियानी’’तिआदिकं सुत्तं लोकुत्तरे अत्थे वाचकञापकभावेन पवत्तनतो लोकुत्तरं नाम.

‘‘एत्तकमेवा’’ति वत्तब्बत्ता ‘‘पञ्चिमानि भिक्खवे इन्द्रियानी’’तिआदि वुत्तं. इदं ‘‘पञ्चिमानी’’तिआदिकं सुत्तम्पि लोकुत्तरे अत्थे वाचकञापकभावेन पवत्तनतो लोकुत्तरं नाम. (१)

‘‘लद्धान ¶ मानुसत्तं द्वे, किच्चं अकिच्चमेव चा’’तिआदिका द्वे गाथा वुत्ता. इह गाथासु ‘‘सुकिच्चं चेव पुञ्ञानी’’ति यं गाथापदञ्च ‘‘पुञ्ञानि करित्वान, सग्गा सग्गं वजन्ति कतपुञ्ञा’’ति यं गाथापदञ्च वुत्तं, इदं गाथापदं लोकिये अत्थे वाचकञापकभावेन पवत्तनतो लोकियं नाम.

इह गाथासु ‘‘संयोजनविप्पहानं वा’’ति यं गाथापदञ्च ‘‘संयोजनविप्पहाना, जरामरणा विप्पमुच्चन्ती’’ति यं गाथापदञ्च वुत्तं, इदं गाथापदं वुत्तनयेन लोकुत्तरं नाम. इदं ‘‘लद्धाना’’तिआदिकं वुत्तप्पकारेन लोकियञ्च लोकुत्तरञ्च.

भिक्खवे, विञ्ञाणे आहारे आहारपटिबद्धे छन्दरागे सति नामरूपस्स अवक्कन्ति होति. ‘‘विञ्ञाणे…पे… होती’’ति इदं वुत्तनयेन लोकियं नाम. ‘‘विञ्ञाणे…पे… निरोधो’’ति इदं सुत्तं लोकुत्तरं नाम. इदं ‘‘विञ्ञाणे चे भिक्खवे’’तिआदिकं सुत्तं लोकिये अत्थे च लोकुत्तरे अत्थे च एकदेसवसेन वाचकञापकवसेन पवत्तनतो लोकियञ्च लोकुत्तरञ्च. (२)

११३. सत्तलोके सब्बा दिसा अनुपरिगम्म क्वचि दिसायं चेतसा अत्तना अत्ततो पियतरं अञ्ञं नेव अज्झगा, अत्ताव पियतरो यथा ¶ , एवं परेसं सत्तानं पुथु विसुं विसुं अत्ताव पियो पियतरो, तस्मा अत्तनोव पियतरत्ता अत्तकामो अत्तनो हितकामो पण्डितो सत्तलोको अत्तानं उपमं कत्वा परं न हिंसे न हिंसेय्याति योजना. इदं ‘‘सब्बा दिसा’’तिआदिकं सुत्तं सत्तेसु वाचकञापकभावेन पवत्तनतो सत्ताधिट्ठानं नाम.

ये केचि खीणासवा पुग्गला भूताव न भविस्सन्ति, सब्बे ते खीणासवा पुग्गला देहं अत्तभावं पहाय निब्बानं गमिस्सन्ति. ये च पुथुज्जनादयो सत्ता पुनब्भवेसु भविस्सन्ति, सब्बे ते पुथुज्जनादयो सत्ता देहं अत्तभावं पहाय परलोकं गमिस्सन्ति, तं सब्बजानिं सब्बस्स सत्तस्स हानिं मरणं, विनासं वा कुसलो यो पुग्गलो विजानाति, सो कुसलो पुग्गलो तं सब्बजानिं विदित्वा आतापियो ब्रह्मचरियं चरेय्याति योजना. इदं ‘‘ये केची’’तिआदिकं वुत्तनयेन सत्ताधिट्ठानं.

सत्तहि अङ्गेहि समन्नागतं कल्याणमित्तं यावजीवं कुसलेन पुग्गलेन न विजहितब्बं. कतमेहि सत्तहि? परिसुद्धसीलसम्पत्तिपरिसुद्धदिट्ठिसम्पत्तीहि समन्नागतत्ता पियो च पियायितब्बो ¶ च होति, पासाणछत्तं विय गरु च होति, सम्भावेतब्बताय भावनीयो च होति, ‘‘कालेन वदामि, नो अकालेना’’तिआदिके पञ्चधम्मे अत्तनि उपट्ठापेत्वा सब्रह्मचारीनं वा सिस्सानं वा विनिच्छयउल्लुम्पनओवाददानभावे ठत्वा वत्ता च होति, सब्रह्मचारीहि वा सिस्सादीहि वा वुच्चमानो सुवचो हुत्वा तेसं वचनक्खमो च होति, सच्चपटिच्चसमुप्पादादिगम्भीरं वा अञ्ञं गम्भीरं वा कथं कत्ता च होति, धम्मविनयादिवसेनेव दीपनतो अट्ठाने च न नियोजको होति. इमेहि सत्तहि अङ्गेहि समन्नागतं कल्याणमित्तं यावजीवं न विजहितब्बं. इदं ‘‘सत्तही’’तिआदिवचनं भगवा अवोच. इदं ‘‘सत्तही’’तिआदिकं वचनं सुगतो वत्वा अथापरं एतं गाथावचनं सत्था अवोच. किं अवोच?

‘‘पियो गरु भावनीयो, वत्ता च वचनक्खमो;

गम्भीरञ्च कथं कत्ता, न चट्ठाने नियोजको;

तं मित्तं मित्तकामेन, यावजीवम्पि सेविय’’न्ति. –

एतं ¶ गाथावचनं सत्था अवोचाति योजना. ‘‘न च अट्ठानयोजको’’ति पाठो अत्थि. इदं ‘‘सत्तही’’तिआदिकं वचनं सत्ताधिट्ठानं.

लोके यं कामसुखञ्च यं इदं दिवियं सुखञ्च अत्थि, एते कामसुखदिवियसुखा तण्हाक्खयसुखस्स सोळसिं कलं न अग्घन्तीति योजना. इदं ‘‘यञ्चा’’तिआदिकं सुत्तं धम्माधिट्ठानं.

यत्थ निब्बाने दुक्खं निरुज्झति, सम्मासम्बुद्धदेसितं असोकं विरजं खेमं तं निब्बानं सुसुखं वताति योजना. इदं ‘‘सुसुख’’न्तिआदिकं सुत्तम्पि धम्माधिट्ठानं. (३)

तीसु भवेसु सत्तानं जननतो तण्हासङ्खातं मातरञ्च, पितरं निस्साय मानस्स उप्पज्जनतो मानसङ्खातं पितरञ्च, रट्ठे लोको रट्ठिस्सरं राजानं भजति विय द्विन्नं सस्सतुच्छेददिट्ठीनं सब्बदिट्ठिगतेहि भजनीयत्ता सस्सतुच्छेददिट्ठिसङ्खाते खत्तिये द्वे राजानो च, आयसाधको पुरिसो रट्ठे अत्थं अनुचरति इव नन्दिरागस्स द्वादसायतने अनुचरणतो नन्दिरागसङ्खातेन अनुचरणेन सह पवत्तनट्ठानं द्वादसायतनसङ्खातं रट्ठञ्च खीणासवो यो ब्राह्मणो हनति, सो ब्राह्मणो हन्त्वा अनीघो निद्दुक्खो हुत्वा यातीति योजना. इह ‘‘मातर’’न्तिआदिगाथायं ¶ ‘‘मातरं…पे… हन्त्वा’’ति इदं गाथावचनं धम्माधिट्ठानं. ‘‘अनीघो याति ब्राह्मणो’’ति इदं गाथावचनं सत्ताधिट्ठानं. इदं ‘‘मातर’’न्तिआदिकं सुत्तं सत्ताधिट्ठानञ्च धम्माधिट्ठानञ्च.

‘‘चत्तारोमे भिक्खवे इद्धिपादा’’ति इदं सुत्तप्पदेसवचनं धम्माधिट्ठानं. सो चतूहि इद्धिपादेहि समन्नागतो पुग्गलो कायेपि करजकायेपि चित्तं पादकज्झानचित्तं समोदहति पक्खिपति, सो पुग्गलो दिस्समानकायेन गन्तुकामो करजकायगतिकं पादकज्झानचित्तं अधिट्ठहति. चित्तेपि पादकज्झानचित्तेपि कायं करजकायं समोदहति पक्खिपति, सो पुग्गलो सीघं अञ्ञं गन्तुकामो पादकज्झानचित्तगतिकं करजकायं अधिट्ठहति. काये करजकाये सुखसञ्ञञ्च सुखविहारसञ्ञञ्च लहुसञ्ञञ्च लहुगमनसञ्ञञ्च ओक्कमित्वा अञ्ञं गमनेय्यं इच्छितट्ठानं एकचित्तक्खणेनेव च गन्त्वा उपसम्पज्ज विहरति. इदं ‘‘सो’’तिआदिकं सुत्तप्पदेसवचनं सत्ताधिट्ठानं. इदं ‘‘चत्तारोमे’’तिआदिकं सुत्तं सत्ताधिट्ठानञ्च धम्माधिट्ठानञ्च. (४)

११४. यं ¶ सब्बञ्ञुतञाणं लोकुत्तरं लोकं उत्तरित्वा अभिभवित्वा ठितं, येन सब्बञ्ञुतञ्ञाणेन भगवा ‘‘सब्बञ्ञू’’ति वुच्चति, तस्स सब्बञ्ञुतञ्ञाणस्स परिहानं नत्थि, तं सब्बञ्ञुतञ्ञाणं सब्बकाले जानितुं आवज्जनकाले पवत्ततीति योजना. इदं ‘‘यं त’’न्तिआदिकं ञाणे अत्थे वाचकञापकभावेनपि पवत्तनतो ञाणं नाम.

याय निब्बानगामिनिया मग्गपञ्ञाय जातिमरणसङ्खयं पजानाति, सा निब्बानगामिनी मग्गपञ्ञा सब्बाहि लोकियाहि पञ्ञाहि सेट्ठा पसत्थाति योजना. इदं ‘‘पञ्ञा ही’’तिआदिकं वुत्तनयेन ञाणं नाम.

‘‘धोतक, वो तुम्हाकं सन्तिं अहं कित्तयिस्सामी’’ति भगवा अवोच. ‘‘दिट्ठे धम्मे दुक्खादिधम्मे वा अत्तभावे वा सतो अनिच्चानुपस्सनादिसतिसम्पन्नो हुत्वा चरं चरन्तो योगावचरो अनीतिहं यं सन्तिं यं निब्बानं अरियमग्गेन विदित्वा लोके संसारलोके विसत्तिकं विसप्पकं तण्हं तरे तरेय्या’’ति भगवा अवोच.

धोतको भगवन्तं वदति ‘‘महेसि महन्ते सीलक्खन्धादी एसनसील, गोतम, सतो ‘सब्बे सङ्खारा अनिच्चा’तिआदिसरणसम्पन्नो हुत्वा चरं चरन्तो योगावचरो उत्तमं यं सन्तिं यं ¶ निब्बानं अरियमग्गेन विदित्वा लोके संसारलोके विसत्तिकं तण्हं तरे तरेय्याति तञ्च वचनं तञ्च सन्तिं निब्बानं अहं अभिनन्दामि अभिपत्थयामि, महेसि त्वं, यञ्च सम्पजानासी’’ति धोतको भगवन्तं वदति.

‘‘धोतका’’ति आलपित्वा भगवा धोतकं अवोच. ‘‘उद्धं अनागतं उपरि अधो अतीतं हेट्ठा च तिरियञ्चापि मज्झे पच्चुप्पन्नं परितो च लोके संसारलोके एतं तण्हं भवाभवाय खुद्दकभवमहन्तभवत्थाय सङ्गो लग्गोति विदित्वा विचरन्तो त्वं तण्हं माकासि मा अकासी’’ति भगवा धोतकं अवोचाति योजना. इदं ‘‘कित्तयिस्सामी’’तिआदिकं ञेय्ये विसये अत्थे वाचकञापकभावेन पवत्तनतो ञेय्यं नाम.

‘‘एत्तकमेवा’’ति वत्तब्बत्ता ‘‘चतुन्नं भिक्खवे’’तिआदि वुत्तं. भिक्खवे, चतुन्नं अरियसच्चानं अरियभावकरानं सच्चानं अननुबोधा अबुज्झनेन अप्पटिवेधा अप्पटिविज्झनेन एवं इमिना कारणेन ममञ्चेव तुम्हाकञ्च दीघमद्धानं इदं सन्धावितं सन्धावनं, इदं संसरितं संसरणं अहोसीति, भिक्खवे, अज्ज ¶ तयिदं तं इदं दुक्खं अरियसच्चं मया अनुबुद्धं पटिविद्धं…पे… तयिदं तं इदं दुक्खनिरोधगामिनी पटिपदा अरियसच्चं मया अनुबुद्धं पटिविद्धं, मम भवतण्हा उच्छिन्ना, भवनेत्ति तण्हा खीणा, इदानि मम पुनब्भवो नत्थि, इति इदं ‘‘चतुन्न’’न्तिआदिकं भगवा अवोच, सुगतो इदं ‘‘चतुन्न’’न्तिआदिकं वत्वा अथापरं एतं ‘‘चतुन्न’’न्तिआदिगाथावचनं सत्था अवोचाति योजेत्वा गाथायञ्च तथेव योजना कातब्बा. इदं ‘‘चतुन्न’’न्तिआदिकं वुत्तनयेन ञेय्यं नाम. (५)

‘‘रूपं अनिच्चं…पे… विञ्ञाणं अनिच्च’’न्ति इदं सुत्तं ञेय्ये रूपादिधम्मे वाचकञापकभावेन पवत्तनतो ञेय्यं नाम.

एवं ‘‘रूपं अनिच्च’’न्तिआदिना पकारेन जानं जानन्तो एवं ‘‘रूपं अनिच्च’’न्तिआदिना पकारेन पस्सं पस्सन्तो अरियसावको अरियस्स भगवतो सावको ‘‘इदं रूपं अनिच्च’’न्ति रूपं पस्सति, ‘‘अयं वेदना अनिच्चा’’ति वेदनं पस्सति, ‘‘अयं सञ्ञा अनिच्चा’’ति सञ्ञं पस्सति, ‘‘इमे सङ्खारा अनिच्चा’’ति सङ्खारे पस्सति, ‘‘इदं विञ्ञाणं अनिच्च’’न्ति विञ्ञाणं पस्सति. इति इदं सुत्तं रूपादिपस्सने ञाणे वाचकञापकभावेन पवत्तनतो ञाणं नाम.

सो ¶ ‘‘रूपं अनिच्च’’न्तिआदिना पकारेन पस्सन्तो अरियसावको रूपेन रूपरागेन परिमुच्चति…पे… विञ्ञाणम्हा विञ्ञाणरागम्हा परिमुच्चतीति दुक्खस्मा परिमुच्चतीति अहं वदामीति योजना. इदं ‘‘सो परिमुच्चती’’तिआदिकं सुत्तं ञाणे च ञेय्ये च वाचकञापकभावेन पवत्तनतो ञाणञ्च ञेय्यञ्च होति.

सब्बे पञ्चक्खन्धा पच्चयेहि सङ्खरितत्ता सङ्खारा आदिअन्तवन्तभावतो, अनिच्चन्तिकभावतो, तावकालिकभावतो च खणपरित्तभावतो अनिच्चा भवन्ति. इदं ‘‘सब्बे सङ्खारा अनिच्चा’’ति सुत्तप्पदेसवचनं वुत्तनयेन ञेय्यं नाम. यदा विपस्सनाकरणकाले पञ्ञाय विपस्सनापञ्ञाय पस्सति अनिच्चतादिकं पस्सति. इदं ‘‘यदा पञ्ञाय पस्सती’’ति सुत्तप्पदेसवचनं ञाणं नाम. अथ पस्सनक्खणे दुक्खे पञ्चक्खन्धे विपस्सको निब्बिन्दति, निब्बिन्दन्तो पुग्गलो दुक्खादिजाननादिवसेन चत्तारि सच्चानि पटिविज्झति, एसो चतुसच्चपटिवेधो विसुद्धिया विसुद्धत्थाय मग्गोति. इदं ‘‘अथा’’तिआदिकं सुत्तप्पदेसवचनं ञाणञ्च ञेय्यञ्च होति.

सोणाति ¶ सोणं आलपति. समणा बाहिरकसमणा ब्राह्मणा जातिब्राह्मणा अनिच्चेन रूपेन, दुक्खेन रूपेन, विपरिणामधम्मेन रूपेन ‘‘अहं परेहि सेय्यो उत्तमो अस्मी’’ति वा समनुपस्सन्ति, ‘‘अहं परेन सदिसो समानो अस्मी’’ति वा समनुपस्सन्ति, ‘‘अहं परतो हीनो लामको अस्मी’’ति वा समनुपस्सन्ति, यथाभूतस्स अदस्सना अञ्ञत्र वज्जेत्वा अञ्ञं किं नाम कारणं सिया, यथाभूतं अदस्सनतो ताव समनुपस्सनस्स अञ्ञं कारणं नत्थि, यथाभूतं अदस्सनमेव कारणन्ति वेदितब्बं. ‘‘अनिच्चाय वेदनाया’’तिआदीसुपि इमिना वुत्तनयेन वुत्तनयानुसारेन योजना कातब्बा. इदं ‘‘ये हि केची’’तिआदिकं सुत्तप्पदेसवचनं ञेय्यं नाम. ‘‘ये च खो केची’’तिआदिको सुक्कपक्खो पन वुत्तविपरियायेन वेदितब्बो. इदं ‘‘ये च खो’’तिआदिकं सुत्तप्पदेसवचनं ञाणं नाम. इदं ‘‘ये हि केची’’तिआदिकं सुत्तं ञाणे च ञेय्ये च अत्थे वाचकञापकभावेन पवत्तनतो ञाणञ्च ञेय्यञ्च होति. (६)

नानाविधं ञाणञ्च ञेय्यञ्च सासनपट्ठानसुत्तं आचरियेन निद्धारितं, अम्हेहि च ञातं, ‘‘कतमं दस्सन’’न्ति पुच्छितब्बत्ता ‘‘तत्थ कतमं दस्सन’’न्तिआदि वुत्तं. तत्थाति तेसु लोकियादीसु अट्ठवीसतिविधेसु सासनपट्ठानेसु सुत्तेसु कतमं सुत्तं दस्सनं नामाति पुच्छति.

११५. गम्भीरपञ्ञेन ¶ सब्बञ्ञुबुद्धेन सुदेसितानि सङ्खेपवित्थारादीहि तेहि तेहि नयेहि सुट्ठु देसितानि अरियसच्चानि ये भावितभावना अरियपुग्गला पञ्ञाओभासेन विभावयन्ति, ते भावितभावना अरियपुग्गला देवरज्जचक्कवत्तिरज्जादिपमादट्ठानं आगम्म भुसं पमत्ता किञ्चापि होन्ति, तथापि ते भावितभावना अरियपुग्गला सोतापत्तिमग्गञाणेन अभिसङ्खारविञ्ञाणस्स निरोधेन अट्ठमभवादीसु उप्पज्जनारहानं नामरूपानं निरुद्धत्ता अट्ठमक्खत्तुवसेन अट्ठमं भवं न आदियन्तीति योजना. इदं ‘‘ये अरियसच्चानी’’तिआदिकं सुत्तं दस्सने पठममग्गञाणे वाचकञापकभावेन पवत्तनतो दस्सनं नाम.

नगरद्वारबाहथिरकरणत्थं उम्मारब्भन्तरे पथवियं अट्ठहत्थदसहत्थप्पमाणं आवाटं खणित्वा तस्मिं आवाटे उस्सापितत्ता पथविस्सितो पथविनिस्सितो अन्तोपथविनिस्सितो इन्दखीलो सारदारुमयो थम्भो ¶ चतुब्भि चतूहि दिसाहि आगतेहि वातेहि महावातेहि असम्पकम्पियो सम्पकम्पितुं असक्कुणेय्यो सिया यथा, यो सप्पुरिसो अरियसच्चानि अवेच्च पस्सति, तं सप्पुरिसं सब्बतित्थियवादवातेहि असम्पकम्पियत्ता तथूपमं अहं वदामीति योजना. इदं ‘‘यथिन्दखीलो’’तिआदिकं सुत्तं वुत्तनयेन दस्सनं नाम.

भिक्खवे, चतूहि सोतापत्तियङ्गेहि समन्नागतो अरियसावको अरियस्स भगवतो सम्मासम्बुद्धस्स सावको आचिक्खितुं आकङ्खमानो हुत्वा अत्तनाव सयमेव अत्तानं ब्याकरेय्य ‘‘भो, मम अत्त अहं इदानि खीणनिरयो अम्हि, खीणतिरच्छानयोनि अम्हि…पे…. दुक्खस्सन्तं करिस्सामी’’ति ब्याकरेय्य. चतुरङ्गसरूपं दस्सेतुं ‘‘कतमेहि चतूही’’तिआदि वुत्तं. इदं ‘‘चतूही’’तिआदिकं दस्सनं नाम.

नानाविधं दस्सनं निद्धारितं, ‘‘कतमा भावना’’ति पुच्छितब्बत्ता ‘‘तत्थ कतमा भावना’’तिआदि वुत्तं.

इध सासने यस्स अरियसावकस्स अज्झत्तं कामभवे निब्बत्तापकानं ओरम्भागियसंयोजनानं पजहनवसेन च बहिद्धा रूपारूपभवेसु निब्बत्तापकानं उद्धम्भागियसंयोजनानं पजहनवसेन च इन्द्रियानि सद्धिन्द्रियादीनि इन्द्रियानि सुभावितानि अरियमग्गभावनावसेन सुट्ठु भावितानि भवन्ति, भावितो भावितमग्गो स दन्तो सो अरियसावको इमं लोकञ्च परं लोकञ्च निब्बिज्झ निब्बिज्झित्वा पटिविज्झित्वा कालं मरणकाले ¶ , कालंकिरियं वा कङ्खति पत्थेतीति योजना. अयं ‘‘यस्सिन्द्रियानी’’तिआदिका पाळि भावनाय वाचकञापकभावेन पवत्तनतो भावना नाम.

धम्मपदानि झानविपस्सनामग्गफलनिब्बानधम्मकोट्ठासानि. अनभिज्झा धम्मपदं अनभिज्झासीसेन अधिगतझानविपस्सनामग्गनिब्बानधम्मपदं कोट्ठासं. एस नयो सेसेसुपि. अयं ‘‘चत्तारिमानी’’तिआदिका पाळि वुत्तनयेन भावना नाम. (७)

देवपुत्त छिन्दन्तो पुग्गलो पञ्च ओरम्भागियसंयोजनानि हेट्ठा मग्गत्तयेन छिन्दे छिन्देय्य, पजहन्तो पुग्गलो पञ्च उद्धम्भागियसंयोजनानि अरहत्तमग्गेन जहे पजहेय्य, भावयन्तो पुग्गलो पञ्च ¶ सद्धिन्द्रियादीनि च उत्तरि भावये भावेय्य. पञ्चसङ्गातिगो रागसङ्गदोससङ्गमोहसङ्गमानसङ्गदिट्ठिसङ्गातिगो भिक्खु ओघतिण्णोति कामोघभवोघदिट्ठोघअविज्जोघतिण्णोति वुच्चति कथीयतीति योजना. ‘‘पञ्च छिन्दे पञ्च जहे’’ति इदं वचनं दस्सनं नाम. ‘‘पञ्च चुत्तरि…पे… वुच्चती’’ति अयं पाळि भावना नाम. इदं ‘‘पञ्चा’’तिआदिकं सुत्तं दस्सनञ्च भावना च होति.

‘‘तीणिमानि, भिक्खवे’’तिआदीसु योजना पाकटा. (८)

११६. ‘‘सब्बपापस्स अकरणं…पे… बुद्धान सासन’’न्ति इदं सुत्तं सम्मासम्बुद्धस्स वचनभावतो सकवचनं नाम. अत्थो हेट्ठा वुत्तोव.

भिक्खवे, बालस्स बाललक्खणानि बालउपलक्खणकारणानि बालनिमित्तानि ‘‘अयं बालो’’ति गहणकारणानि बालापदानानि बालस्स अपदानानि पोराणानि विरुळ्हानि कम्मानि येहि बाललक्खणादीहि बालं ‘‘बालो’’ति परे पण्डिता सञ्जानन्ति, इमानि बाललक्खणानि मया वुच्चमानानि तीणि. कतमानि तीणि? भिक्खवे, बालो दुच्चिन्तितचिन्ती च दुच्चिन्तितं अभिज्झाब्यापादमिच्छादस्सनं चिन्ती च होति, दुब्भासितभासी दुब्भासितं मुसावादादिं भासी च होति. दुक्कटकम्मकारी च दुक्कटं पाणातिपातादिकम्मं कारी च होति. भिक्खवे, बालस्स…पे… बालापदानानि इमिना मया वुत्तानि तीणि खो भवन्ति. सुक्कपक्खो पन वुत्तविपरियायेन वेदितब्बो. इदं ‘‘तीणिमानि भिक्खवे’’तिआदिकं वचनं सम्मासम्बुद्धस्स वचनभावतो सकवचनं नाम.

पथवीसमो ¶ वित्थतो सम्बोधो नाम नत्थि. पातं वुट्ठं उदकं आभुसो लाभि गण्हातीति पातालो, पातालेन समो पातालसमो निन्नो न विज्जति. मेरुसमो उन्नतो नत्थि, चक्कवत्तिसदिसो पोरिसो नत्थीति योजना. इदं ‘‘पथवीसमो’’तिआदिकं वचनं परस्स देवस्स वचनभावतो परवचनं होति.

‘‘देवानं इन्द, तव सुभासितेन जयो होती’’ति वत्वा ‘‘वेपचित्ति, तव सुभासितेन जयो होतू’’ति वत्वा ‘‘वेपचित्ति, त्वं गाथं भण भणाही’’ति अवोच. भिक्खवे, अथ खो असुरिन्दो वेपचित्ति इमं वुच्चमानं गाथं अभासि ‘‘ते पटिसेधको नो चे अस्स नो चे भवेय्य ¶ , एवं सति बाला भिय्यो पकुज्झेय्युं, तस्मा धीरो पण्डितो भुसेन दण्डेन बालं निसेधये’’ति.

गाथाय, भिक्खवे, असुरिन्देन वेपचित्तिना भासिताय असुरा अनुमोदिंसु, देवा तुण्ही अहेसुं. भिक्खवे, अथ खो असुरिन्दो वेपचित्ति देवानं इन्दं सक्कं एतं वचनं अवोच ‘‘देवानमिन्द, त्वं गाथं भण भणाही’’ति एतं वचनं अवोच. भिक्खवे, अथ खो देवानमिन्दो सक्को इमं गाथं अभासि ‘‘बालस्स पटिसेधनं परं पच्चत्थिकं सङ्कुपितं ञत्वा सतो सतिमा यो पण्डितो कोधतो उपसम्मति, तस्स पण्डितस्स एतदेव उपसमं वरन्ति अहं मञ्ञे’’ति.

गाथाय, भिक्खवे, देवानमिन्देन सक्केन भासिताय देवा अनुमोदिंसु, असुरा तुण्ही अहेसुं. भिक्खवे, अथ खो देवानमिन्दो सक्को असुरिन्दं वेपचित्तिं एतं वचनं अवोच ‘‘वेपचित्ति, त्वं गाथं भणाही’’ति एतं वचनं अवोच. भिक्खवे, अथ खो असुरिन्दो वेपचित्ति इमं गाथं अभासि ‘‘वासव यदा तितिक्खति, तदा नं तितिक्खन्तं पुग्गलं बालो ‘‘अयं मे भया तितिक्खती’’ति मञ्ञति, तितिक्खाय एतदेव वज्जं अहं पस्सामि. वासव गोगणो पलायिनं गवं अज्झोत्थरति इव, एवं दुम्मेधो खमन्तं भिय्यो अज्झारुहति अज्झोत्थरति.

गाथाय, भिक्खवे, असुरिन्देन वेपचित्तिना भासिताय असुरा अनुमोदिंसु, देवा तुण्ही अहेसुं. जायमाने च गोयुद्धे पठमं द्वेयेव गोणा युज्झन्ति, गोगणो पन याव एको गोणो न पलायति, ताव ओलोकेन्तोव तिट्ठति. यदा च एको गोणो पलायति ¶ , तदा सब्बो गोणो तं पलायिनं गवं भिय्यो अज्झोत्थरतीति गोयुद्धसभावो वेदितब्बो. ‘‘अथ खो’’तिआदीनं योजनत्थो पाकटो.

वेपचित्ति, यो पुग्गलो तितिक्खति, तं खमन्तं पुग्गलं ‘‘अयं मे भया तितिक्खती’’ति कामं मञ्ञतु वा, मा मञ्ञतु वा, तं मञ्ञनं निप्फलमेव. अत्था सदत्थपरमा भवन्ति. खन्त्या खन्तितो भिय्यो सदत्थो नाम न विज्जति.

यो बलवा सन्तो दुब्बलस्स हवे तितिक्खतीति तस्स बलवन्तस्स तं तितिक्खनं परमं खन्तिन्ति सप्पुरिसा आहु, दुब्बलो निच्चं खमति एव.

यस्स ¶ बालस्स बालबलं अत्थि, तस्स बालस्स बालबलं ‘‘अबल’’न्ति सप्पुरिसा आहु, यस्स धम्मगुत्तस्स यं बलं अत्थि, तस्स धम्मगुत्तस्स तस्स बलस्स पटिवत्ता पटिप्फरित्वा वत्ता न विज्जति.

वेपचित्ति, यो पुग्गलो कुद्धं पठमं कुज्झन्तस्स पटिकुज्झति, सो पटिकुज्झन्तो पुग्गलो तेन पटिकुज्झनेन तस्स पठमं कुज्झन्तस्स पापपुग्गलस्स पापपुग्गलतो पापियो एव पापतरो हीनतरो एव भवे.

वेपचित्ति, यो सप्पुरिसो सतो सतिमा परं सङ्कुपितं ञत्वा पठमं कुज्झन्तस्स अप्पटिकुज्झन्तोव भवे, सो सप्पुरिसो दुज्जयं सङ्गामं जेति नाम, अत्तनो च परस्स च उभिन्नं अत्थं चरति नाम.

अत्तनो च परस्स च तिकिच्छन्तानं उभिन्नं कोधो उपसम्मति, ये जना धम्मस्स खन्तिधम्मस्स अत्थे, चतुसच्चधम्मे वा अकोविदा भवन्ति, ते जना खमन्तं सप्पुरिसं ‘‘अयं बालो’’ति मञ्ञन्ति, तेसं अकोविदानं जनानं तं मञ्ञनं निप्फलन्ति.

गाथासु, भिक्खवे, देवानमिन्देन सक्केन भासितासु देवा अनुमोदिंसु, असुरा तुण्ही अहेसुन्ति योजना. इदं ‘‘भिय्यो बाला’’तिआदिकं वचनं सक्कवेपचित्तीनं वचनभावतो परवचनं नाम. (९)

११७. पत्तं ¶ एतरहि अधिगतं यञ्च कामूपकरणं, आयतिं पत्तब्बं अधिगतं यञ्च कामूपकरणं अत्थि, एतं उभयं रजानुकिण्णं रागरजादिकिण्णं इति आतुरस्स आतुरानंयेव पुग्गलानं सन्तिके अनुसिक्खतो अनुसिक्खन्तस्स सिक्खासारा हुत्वा उपट्ठहन्ति, सीलं वतं जीवितं ब्रह्मचरियं इमे सिक्खासारा हुत्वा उपट्ठहन्तीति ये उपट्ठानसारा पुग्गला सारतो गहेत्वा ठिता. एत्थ सीलं नाम ‘‘न करोमी’’ति ओरमणं. वतं नाम भोजनकिच्चकरणादि. जीवितं नाम आजीवो. ब्रह्मचरियं नाम मेथुनविरतिविसेसभावो वेदितब्बो. तेसं उपट्ठानसारानं पुग्गलानं अयं वादो एको पठमो अन्तो लामको. ये च पुग्गला ‘‘कामेसु दोसो नत्थी’’ति एवंवादिनो एवंदिट्ठिनो हुत्वा ठिता, तेसं पुग्गलानं अयं वादो एको दुतियो अन्तो ¶ लामको. इच्चेते उभो अन्ता अन्तवादा पुग्गला कटसिवड्ढना कटसियो दिट्ठिं वड्ढेन्ति. एते उभो अन्ते अत्तकिलमथानुयोगे कामसुखल्लिकानुयोगे एके पुग्गला अनभिञ्ञाय ओलीयन्ति, एके पुग्गला अतिधावन्तीति योजना. इदं ‘‘यञ्च पत्त’’न्तिआदिकं वचनं परेसं पुग्गलानं वचनभावतो परवचनं नाम.

ये च सम्मादिट्ठिपुग्गला ते उभो अन्ते अत्तकिलमथानुयोगकामसुखल्लिकानुयोगे अभिञ्ञाय तत्र च अन्ते न अहेसुं. तेन च अभिजाननेन ते उभो अन्ते न अमञ्ञिंसु, तेसं सम्मादिट्ठिपुग्गलानं वट्टं तिविधं वट्टं पञ्ञापनाय नत्थि. इति एवं इदं ‘‘ये चा’’तिआदिकं वचनं भगवतो वचनभावतो सकवचनं नाम. अयं उदानो ‘‘यञ्च पत्तं…पे… पञ्ञापनाया’’ति अयं उदानो वुत्तनयेन सकवचनञ्च परवचनञ्च होति.

पसेनदि नाम कोसलो कोसलिस्सरो राजा भगवन्तं एतं ‘‘इध मय्हं…पे… तेसं पियो अत्ता’’ति वचनं अवोच. भन्ते, इध रहोगतस्स पटिसल्लीनस्स मय्हं मम चेतसो चित्तस्स एवं परिवितक्को उदपादि, केसं सत्तानं अत्ता पियो नु खो, केसं सत्तानं अत्ता अप्पियो नु खो इति एतं परिवितक्कनं उदपादि. भन्ते, तस्स मय्हं एतं परिवितक्कनं अहोसि, ये च केचि सत्ता कायेन दुच्चरितं चरन्ति खो…पे… मनसा दुच्चरितं चरन्ति खो, तेसं सत्तानं अत्ता अप्पियो खो. ते दुच्चरितं चरन्ता सत्ता ‘‘नो अत्ता पियो’’ति एवं किञ्चापि वदेय्युं, अथ खो तेसं दुच्चरितं चरन्तानं सत्तानं अत्ता अप्पियोव. तं किस्स हेतु? अप्पियो अप्पियस्स अनत्थाय यं दुच्चरितं करेय्य, तं दुच्चरितं ते दुच्चरितं चरन्ता सत्ता अत्तनाव. सयमेव. अत्तनो अनत्थाय हि यस्मा करोन्ति, तस्मा तेसं दुच्चरितं चरन्तानं सत्तानं अत्ता अप्पियोवाति एतं परिवितक्कनं अहोसि.

भन्ते ¶ , ये च केचि सत्ता कायेन सुचरितं चरन्ति खो…पे… मनसा सुचरितं चरन्ति खो, तेसं सुचरितं चरन्तानं सत्तानं अत्ता पियो खो, ते सुचरितं चरन्ता सत्ता ‘‘नो अत्ता अप्पियो’’ति एवं किञ्चापि वदेय्युं, अथ खो तेसं सुचरितं चरन्तानं सत्तानं अत्ता पियोव. तं किस्स हेतु? पियो पियस्स अत्थाय यं सुचरितं चरेय्य, तं सुचरितं ते सुचरितं चरन्ता सत्ता अत्तनाव सयमेव अत्तनो अत्थाय हि यस्मा करोन्ति ¶ , तस्मा तेसं सुचरितं चरन्तानं सत्तानं अत्ता पियोवाति एतं परिवितक्कनं अहोसि. एतं वचनं अवोचाति योजना.

‘‘एवमेतं महाराजा’’ति वचनं पठमं वत्वा ‘‘ये हि केची’’तिआदिके भगवतो वुत्तवचनेपि योजना तथेव कातब्बा.

गाथासु पन यो पण्डितो अत्तानं ‘‘पिय’’न्ति चे जञ्ञा, एवं सति सो पण्डितो नं अत्तानं पापेन कम्मेन न संयुजे न संयोजेय्य, तं वचनं हि सच्चं पियं अत्तानं सुलभं न होति, दुक्कटकारिना सुखं सुलभं न होति.

अन्तकेन मच्चुना अधिपन्नस्स मानुसं भवं जहतो पजहन्तस्स तस्स मरणमुखे ठितस्स सत्तस्स किं सकं होति, मरणमुखे ठितो सो सत्तो किञ्च आदाय परलोकं गच्छति, छाया गच्छन्तं सत्तं अनपायिनी इव, एवं अस्स परलोकगतस्स सत्तस्स किञ्च अनुगं होति.

इति भगवा एवं पुच्छति, पुच्छित्वा ‘‘उभो’’तिआदिविस्सज्जनवचनञ्च आह. इध लोके यो मच्चो यं पुञ्ञञ्च यं पापञ्च उभो कम्मे कुरुते करोति, तस्स परलोकगतस्स मच्चस्स तं पुञ्ञपापद्वयं सकं होति. परलोकं गतो मच्चो तंव पुञ्ञपापद्वयं आदाय परलोकं गच्छति, छाया गच्छन्तं सत्तं अनपायिनी इव, एवं अस्स परलोकगतस्स मच्चस्स तंव पुञ्ञपापद्वयं अनुगं होति.

तस्मा पण्डितो सम्परायिकं सम्पराये फलनिब्बत्तापकं कल्याणं निचयं निचयन्तो हुत्वा करेय्य. पाणिनं परलोकस्मिं पुञ्ञानि पतिट्ठा होन्ति, इति भगवा आहाति योजना कातब्बा. इदं ‘‘राजा पसेनदी’’तिआदिकं सुत्तं कोसलरञ्ञो वचनभावतो परवचनं होति. ‘‘एवमेतं ¶ , महाराज, एवमेतं महाराजा’’तिआदिका अनुगीति भगवतो वचनभावतो सकवचनं होति. इदं द्वयं वचनं सकवचनञ्च परवचनञ्च होति. (१०)

११८. पञ्हे पुच्छिते इदं दुक्खसच्चं अभिञ्ञेय्यं, इदं समुदयसच्चं पहातब्बं, इदं मग्गसच्चं भावेतब्बं, इदं निरोधसच्चं, फलं वा सच्छिकातब्बं, इमे कुसलाकुसला धम्मा एवं कुसलाकुसलभावेन गहिता अनवज्जसावज्जभावेन वा गहिता सुखविपाकदुक्खविपाकभावेन वा गहिता ¶ , इदं इट्ठविपाकं इदं अनिट्ठविपाकं फलं निब्बत्तयइति एवंगहितानं तेसं कुसलाकुसलधम्मानं अयं वुड्ढि अत्थो, अयं हानि अत्थोति. इति इदं ‘‘पञ्हे पुच्छिते’’तिआदिकं सुत्तं विस्सज्जनीये अत्थे वाचकञापकभावेन पवत्तनतो विस्सज्जनीयं नाम.

‘‘उळारो बुद्धो भगवा’’ति इमिना पदेन बुद्धउळारतं एकंसेनेव एककोट्ठासेनेव निद्दिसे. ‘‘स्वाक्खातो धम्मो’’ति इमिना पदेन धम्मस्वाक्खाततं एकंसेनेव एककोट्ठासेनेव निद्दिसे. ‘‘सुप्पटिपन्नो सङ्घो’’ति इमिना पदेन सङ्घसुप्पटिपत्तिं एकंसेनेव एककोट्ठासेनेव निद्दिसे ‘‘सब्बे सङ्खारा अनिच्चा’’ति इमिना पदेन सङ्खारानिच्चतं एकंसेनेव निद्दिसे. ‘‘सब्बे सङ्खारा दुक्खा’’ति इमिना पदेन सङ्खारदुक्खतं एकंसेनेव निद्दिसे. ‘‘सब्बे धम्मा अनत्ता’’ति इमिना पदेन धम्मानत्ततं एकंसेनेव निद्दिसे. ‘‘सब्बे सङ्खारा अनत्ता’’ति अवत्वा ‘‘सब्बे धम्मा अनत्ता’’ति वुत्तेन इमिना पदेन सङ्खारेहि अञ्ञं यं वा पन मग्गफलनिरोधसमापत्तिधम्मजातं अत्थि, तं मग्गफलनिरोधसमापत्तिधम्मजातम्पि एवंजातियं एवं एकंसब्याकरणीयन्ति मग्गफलनिरोधसमापत्तिधम्मजातस्सापि अनत्ततं एकंसेनेव निद्दिसेति योजना. इदं ‘‘उळारो’’तिआदिकं सुत्तं विस्सज्जनीये बुद्धउळारतादिके वाचकञापकभावेन पवत्तनतो विस्सज्जनीयं नाम.

नरदम्मसारथि आकङ्खतो ते भगवतो मनसा सब्बञ्ञुतञ्ञाणसहितादिमनसा विचिन्तितं ञेय्यधम्मं देवा मनुस्सा सब्बे पाणिनो न जञ्ञा न जानेय्युं. सन्तं अरणं समाधिं निसेवतो ते भगवतो मनसा विचिन्तिता कसिणापि सब्बे पाणिनो न जञ्ञा न जानेय्युं. कसिणापि वा कसिणारम्मणाय पञ्ञायपि न जञ्ञा न जानेय्युं. कसिणापीति एत्थ च ‘‘कसिणायपी’’ति वत्तब्बेपि य-कार लोपवसेन ‘‘कसिणापी’’ति वुत्तं. अथ वा ‘‘यं आकङ्खति यं आकङ्खनं करोति, तं आकङ्खनं किं कतम’’न्ति पुच्छितं पञ्हं अञ्ञेसं अविसयत्ता ¶ अविस्सज्जनीयं होतीति योजना. इदं ‘‘आकङ्खतो’’तिआदिकं सुत्तं अविस्सज्जनीये विसये वाचकञापकभावेन पवत्तनतो अविस्सज्जनीयं नाम.