📜

नमो तस्स भगवतो अरहतो सम्मासम्बुद्धस्स

खुद्दकनिकाये

महानिद्देसपाळि

१. अट्ठकवग्गो

१. कामसुत्तनिद्देसो

१.

कामं कामयमानस्स, तस्स चे तं समिज्झति;

अद्धा पीतिमनो होति, लद्धा मच्चो यदिच्छति.

कामं कामयमानस्साति कामाति उद्दानतो द्वे कामा – वत्थुकामा च किलेसकामा च. कतमे वत्थुकामा? मनापिका रूपा मनापिका सद्दा मनापिका गन्धा मनापिका रसा मनापिका फोट्ठब्बा; अत्थरणा पावुरणा [पापुरणा (सी. स्या.)] दासिदासा अजेळका कुक्कुटसूकरा हत्थिगवास्सवळवा खेत्तं वत्थु हिरञ्ञं सुवण्णं गामनिगमराजधानियो रट्ठञ्च जनपदो च कोसो च कोट्ठागारञ्च, यं किञ्चि रजनीयं वत्थु – वत्थुकामा.

अपि च अतीता कामा अनागता कामा पच्चुप्पन्ना कामा; अज्झत्ता कामा बहिद्धा कामा अज्झत्तबहिद्धा कामा; हीना कामा मज्झिमा कामा पणीता कामा; आपायिका कामा मानुसिका कामा दिब्बा कामा पच्चुपट्ठिता कामा; निम्मिता कामा अनिम्मिता कामा परनिम्मिता कामा; परिग्गहिता कामा, अपरिग्गहिता कामा, ममायिता कामा, अममायिता कामा; सब्बेपि कामावचरा धम्मा, सब्बेपि रूपावचरा धम्मा, सब्बेपि अरूपावचरा धम्मा, तण्हावत्थुका तण्हारम्मणा कामनीयट्ठेन रजनीयट्ठेन मदनीयट्ठेन कामा – इमे वुच्चन्ति वत्थुकामा.

कतमे किलेसकामा? छन्दो कामो रागो कामो छन्दरागो कामो; सङ्कप्पो कामो रागो कामो सङ्कप्परागो कामो; यो कामेसु कामच्छन्दो कामरागो कामनन्दी कामतण्हा कामस्नेहो कामपरिळाहो काममुच्छा कामज्झोसानं कामोघो कामयोगो कामुपादानं कामच्छन्दनीवरणं.

‘‘अद्दसं काम ते मूलं, सङ्कप्पा काम जायसि;

न तं सङ्कप्पयिस्सामि, एवं काम न होहिसी’’ति [न हेहिसीति (स्या.)]. –

इमे वुच्चन्ति किलेसकामा. कामयमानस्साति कामयमानस्स इच्छमानस्स सादियमानस्स पत्थयमानस्स पिहयमानस्स अभिजप्पमानस्साति – कामं कामयमानस्स.

तस्स चे तं समिज्झतीति. तस्स चेति तस्स खत्तियस्स वा ब्राह्मणस्स वा वेस्सस्स वा सुद्दस्स वा गहट्ठस्स वा पब्बजितस्स वा देवस्स वा मनुस्सस्स वा. तन्ति वत्थुकामा वुच्चन्ति – मनापिका रूपा मनापिका सद्दा मनापिका गन्धा मनापिका रसा मनापिका फोट्ठब्बा. समिज्झतीति इज्झति समिज्झति लभति पटिलभति अधिगच्छति विन्दतीति – तस्स चे तं समिज्झति.

अद्धा पीतिमनो होतीति. अद्धाति एकंसवचनं निस्संसयवचनं निक्कङ्खावचनं अद्वेज्झवचनं अद्वेळ्हकवचनं नियोगवचनं अपण्णकवचनं अवत्थापनवचनमेतं – अद्धाति. पीतीति या पञ्चकामगुणपटिसञ्ञुत्ता पीति पामुज्जं आमोदना पमोदना हासो पहासो वित्ति तुट्ठि ओदग्यं अत्तमनता अभिफरणता चित्तस्स. मनोति यं चित्तं मनो मानसं हदयं पण्डरं मनो मनायतनं मनिन्द्रियं विञ्ञाणं विञ्ञाणक्खन्धो तज्जा मनोविञ्ञाणधातु, अयं वुच्चति मनो. अयं मनो इमाय पीतिया सहगतो होति सहजातो संसट्ठो सम्पयुत्तो एकुप्पादो एकनिरोधो एकवत्थुको एकारम्मणो. पीतिमनो होतीति पीतिमनो होति तुट्ठमनो हट्ठमनो पहट्ठमनो अत्तमनो उदग्गमनो मुदितमनो पमोदितमनो होतीति – अद्धा पीतिमनो होति.

लद्धा मच्चो यदिच्छतीति. लद्धाति लभित्वा पटिलभित्वा अधिगन्त्वा विन्दित्वा. मच्चोति सत्तो नरो मानवो पोसो पुग्गलो जीवो जागु [जातु (स्या.), जगु (क.)] जन्तु इन्दगु [हिन्दगू (सी. स्या.)] मनुजो. यदिच्छतीति यं इच्छति यं सादियति यं पत्थेति यं पिहेति यं अभिजप्पति, रूपं वा सद्दं वा गन्धं वा रसं वा फोट्ठब्बं वाति, लद्धा मच्चो यदिच्छति.

तेनाह भगवा –

‘‘कामं कामयमानस्स, तस्स चे तं समिज्झति;

अद्धा पीतिमनो होति, लद्धा मच्चो यदिच्छती’’ति.

२.

तस्स चे कामयानस्स, छन्दजातस्स जन्तुनो;

ते कामा परिहायन्ति, सल्लविद्धोव रुप्पति.

तस्स चे कामयानस्साति. तस्स चेति तस्स खत्तियस्स वा ब्राह्मणस्स वा वेस्सस्स वा सुद्दस्स वा गहट्ठस्स वा पब्बजितस्स वा देवस्स वा मनुस्सस्स वा. कामयानस्साति कामे इच्छमानस्स सादियमानस्स पत्थयमानस्स पिहयमानस्स अभिजप्पमानस्स. अथ वा कामतण्हाय यायति निय्यति वुय्हति संहरीयति. यथा हत्थियानेन वा अस्सयानेन वा गोयानेन वा अजयानेन वा मेण्डयानेन वा ओट्ठयानेन वा खरयानेन वा यायति निय्यति वुय्हति संहरीयति; एवमेवं कामतण्हाय यायति निय्यति वुय्हति संहरीयतीति – तस्स चे कामयानस्स.

छन्दजातस्स जन्तुनोति. छन्दोति यो कामेसु कामच्छन्दो कामरागो कामनन्दी कामतण्हा कामस्नेहो कामपरिळाहो काममुच्छा कामज्झोसानं कामोघो कामयोगो कामुपादानं कामच्छन्दनीवरणं, तस्स सो कामच्छन्दो जातो होति सञ्जातो निब्बत्तो अभिनिब्बत्तो पातुभूतो. जन्तुनोति सत्तस्स नरस्स मानवस्स पोसस्स पुग्गलस्स जीवस्स जागुस्स जन्तुस्स इन्दगुस्स मनुजस्साति – छन्दजातस्स जन्तुनो.

ते कामा परिहायन्तीति – ते वा कामा परिहायन्ति, सो वा कामेहि परिहायति. कथं ते कामा परिहायन्ति? तस्स तिट्ठन्तस्सेव ते भोगे राजानो वा हरन्ति, चोरा वा हरन्ति, अग्गि वा दहति, उदकं वा वहति, अप्पिया वा दायादा हरन्ति, निहितं वा नाधिगच्छति, दुप्पयुत्ता वा कम्मन्ता भिज्जन्ति, कुले वा कुलङ्गारो उप्पज्जति, यो ते भोगे विकिरति विधमति [विधमेति (स्या.)] विद्धंसेति अनिच्चतायेव अट्ठमी. एवं ते कामा हायन्ति परिहायन्ति परिधंसेन्ति परिपतन्ति अन्तरधायन्ति विप्पलुज्जन्ति. कथं सो कामेहि परिहायति? तिट्ठन्तेव ते भोगे सो चवति मरति विप्पलुज्जति. एवं सो कामेहि हायति परिहायति परिधंसेति परिपतति अन्तरधायति विप्पलुज्जति.

चोरा हरन्ति राजानो, अग्गि दहति नस्सति;

अथ अन्तेन जहति [अथो अन्तेन हेति (स्या.), असहन्तेन दहति (क.)], सरीरं सपरिग्गहं;

एतदञ्ञाय मेधावी, भुञ्जेथ च ददेथ च.

दत्वा च भुत्वा च यथानुभावं, अनिन्दितो सग्गमुपेति ठानन्ति, ते कामा परिहायन्ति.

सल्लविद्धोव रुप्पतीति. यथा अयोमयेन वा सल्लेन विद्धो, अट्ठिमयेन वा सल्लेन दन्तमयेन वा सल्लेन विसाणमयेन वा सल्लेन कट्ठमयेन वा सल्लेन विद्धो रुप्पति कुप्पति घट्टीयति पीळीयति, ब्याधितो दोमनस्सितो होति, एवमेव वत्थुकामानं विपरिणामञ्ञथाभावा उप्पज्जन्ति सोकपरिदेवदुक्खदोमनस्सुपायासा. सो कामसल्लेन च सोकसल्लेन च विद्धो, रुप्पति कुप्पति घट्टीयति पीळीयति ब्याधितो दोमनस्सितो होतीति – सल्लविद्धोव रुप्पति.

तेनाह भगवा –

‘‘तस्स चे कामयानस्स, छन्दजातस्स जन्तुनो;

ते कामा परिहायन्ति, सल्लविद्धोव रुप्पती’’ति.

३.

यो कामे परिवज्जेति, सप्पस्सेव पदा सिरो;

सोमं विसत्तिकं लोके, सतो समतिवत्तति.

यो कामे परिवज्जेतीति. योति यो यादिसो यथायुत्तो यथाविहितो यथापकारो यंठानप्पत्तो यंधम्मसमन्नागतो खत्तियो वा ब्राह्मणो वा वेस्सो वा सुद्दो वा गहट्ठो वा पब्बजितो वा देवो वा मनुस्सो वा. कामे परिवज्जेतीति. कामाति उद्दानतो द्वे कामा – वत्थुकामा च किलेसकामा च…पे… इमे वुच्चन्ति वत्थुकामा…पे… इमे वुच्चन्ति किलेसकामा. कामे परिवज्जेतीति द्वीहि कारणेहि कामे परिवज्जेति – विक्खम्भनतो वा समुच्छेदतो वा. कथं विक्खम्भनतो कामे परिवज्जेति? ‘‘अट्ठिकङ्कलूपमा कामा अप्पस्सादट्ठेना’’ति पस्सन्तो विक्खम्भनतो कामे परिवज्जेति, ‘‘मंसपेसूपमा कामा बहुसाधारणट्ठेना’’ति पस्सन्तो विक्खम्भनतो कामे परिवज्जेति, ‘‘तिणुक्कूपमा कामा अनुदहनट्ठेना’’ति पस्सन्तो विक्खम्भनतो कामे परिवज्जेति, ‘‘अङ्गारकासूपमा कामा महापरिळाहट्ठेना’’ति पस्सन्तो विक्खम्भनतो कामे परिवज्जेति, ‘‘सुपिनकूपमा कामा इत्तरपच्चुपट्ठानट्ठेना’’ति पस्सन्तो विक्खम्भनतो कामे परिवज्जेति, ‘‘याचितकूपमा कामा तावकालिकट्ठेना’’ति पस्सन्तो विक्खम्भनतो कामे परिवज्जेति, ‘‘रुक्खफलूपमा कामा सम्भञ्जनपरिभञ्जनट्ठेना’’ति पस्सन्तो विक्खम्भनतो कामे परिवज्जेति, ‘‘असिसूनूपमा कामा अधिकुट्टनट्ठेना’’ति [अधिकन्तनट्ठेनाति (स्या.)] पस्सन्तो विक्खम्भनतो कामे परिवज्जेति, ‘‘सत्तिसूलूपमा कामा विनिविज्झनट्ठेना’’ति पस्सन्तो विक्खम्भनतो कामे परिवज्जेति, ‘‘सप्पसिरूपमा कामा सप्पटिभयट्ठेना’’ति पस्सन्तो विक्खम्भनतो कामे परिवज्जेति, ‘‘अग्गिक्खन्धूपमा कामा महाभितापनट्ठेना’’ति पस्सन्तो विक्खम्भनतो कामे परिवज्जेति.

बुद्धानुस्सतिं भावेन्तोपि विक्खम्भनतो कामे परिवज्जेति, धम्मानुस्सतिं भावेन्तोपि…पे… सङ्घानुस्सतिं भावेन्तोपि… सीलानुस्सतिं भावेन्तोपि… चागानुस्सतिं भावेन्तोपि… देवतानुस्सतिं भावेन्तोपि… आनापानस्सतिं [आनापानसतिं (सी.)] भावेन्तोपि… मरणस्सतिं भावेन्तोपि… कायगतासतिं भावेन्तोपि… उपसमानुस्सतिं भावेन्तोपि विक्खम्भनतो कामे परिवज्जेति.

पठमं झानं भावेन्तोपि विक्खम्भनतो कामे परिवज्जेति, दुतियं झानं भावेन्तोपि…पे… ततियं झानं भावेन्तोपि… चतुत्थं झानं भावेन्तोपि… आकासानञ्चायतनसमापत्तिं भावेन्तोपि… विञ्ञाणञ्चायतनसमापत्तिं भावेन्तोपि… आकिञ्चञ्ञायतनसमापत्तिं भावेन्तोपि … नेवसञ्ञानासञ्ञायतनसमापत्तिं भावेन्तोपि विक्खम्भनतो कामे परिवज्जेति. एवं विक्खम्भनतो कामे परिवज्जेति.

कथं समुच्छेदतो कामे परिवज्जेति? सोतापत्तिमग्गं भावेन्तोपि अपायगमनीये कामे समुच्छेदतो परिवज्जेति, सकदागामिमग्गं भावेन्तोपि ओळारिके कामे समुच्छेदतो परिवज्जेति, अनागामिमग्गं भावेन्तोपि अनुसहगते कामे समुच्छेदतो परिवज्जेति, अरहत्तमग्गं भावेन्तोपि सब्बेन सब्बं सब्बथा सब्बं असेसं निस्सेसं समुच्छेदतो कामे परिवज्जेति. एवं समुच्छेदतो कामे परिवज्जेतीति – यो कामे परिवज्जेति.

सप्पस्सेव पदा सिरोति. सप्पो वुच्चति अहि. केनट्ठेन सप्पो? संसप्पन्तो गच्छतीति सप्पो; भुजन्तो गच्छतीति भुजगो; उरेन गच्छतीति उरगो; पन्नसिरो गच्छतीति पन्नगो; सिरेन सुपतीति [सप्पतीति (क.)] सरीसपो [सिरिंसपो (सी.)]; बिले सयतीति बिलासयो; गुहायं सयतीति गुहासयो; दाठा तस्स आवुधोति दाठावुधो; विसं तस्स घोरन्ति घोरविसो; जिव्हा तस्स दुविधाति द्विजिव्हो; द्वीहि जिव्हाहि रसं सायतीति द्विरसञ्ञू. यथा पुरिसो जीवितुकामो अमरितुकामो सुखकामो दुक्खपटिक्कूलो पादेन सप्पसिरं वज्जेय्य विवज्जेय्य परिवज्जेय्य अभिनिवज्जेय्य; एवमेव सुखकामो दुक्खपटिक्कूलो कामे वज्जेय्य विवज्जेय्य परिवज्जेय्य अभिनिवज्जेय्याति – सप्पस्सेव पदा सिरो.

सोमं विसत्तिकं लोके, सतो समतिवत्ततीति. सोति यो कामे परिवज्जेति. विसत्तिका वुच्चति तण्हा. यो रागो सारागो अनुनयो अनुरोधो नन्दी नन्दिरागो, चित्तस्स सारागो इच्छा मुच्छा अज्झोसानं गेधो पलिगेधो [पळिगेधो (सी.)] सङ्गो पङ्को, एजा माया जनिका सञ्जननी सिब्बिनी जालिनी सरिता विसत्तिका, सुत्तं विसता आयूहिनी [आयूहनी (सी. स्या.)] दुतिया पणिधि भवनेत्ति, वनं वनथो सन्धवो स्नेहो अपेक्खा पटिबन्धु, आसा आसीसना आसीसितत्तं, रूपासा सद्दासा गन्धासा रसासा फोट्ठब्बासा, लाभासा जनासा पुत्तासा जीवितासा, जप्पा पजप्पा अभिजप्पा जप्पना जप्पितत्तं लोलुप्पं लोलुप्पायना लोलुप्पायितत्तं पुच्छञ्जिकता साधुकम्यता, अधम्मरागो विसमलोभो निकन्ति निकामना पत्थना पिहना सम्पत्थना, कामतण्हा भवतण्हा विभवतण्हा, रूपतण्हा अरूपतण्हा निरोधतण्हा, रूपतण्हा सद्दतण्हा गन्धतण्हा रसतण्हा फोट्ठब्बतण्हा धम्मतण्हा, ओघो योगो गन्थो उपादानं आवरणं नीवरणं छदनं बन्धनं, उपक्किलेसो अनुसयो परियुट्ठानं लता वेविच्छं, दुक्खमूलं दुक्खनिदानं दुक्खप्पभवो मारपासो मारबळिसं मारविसयो, तण्हानदी तण्हाजालं तण्हागद्दुलं तण्हासमुद्दो अभिज्झा लोभो अकुसलमूलं.

विसत्तिकाति. केनट्ठेन विसत्तिका? विसताति विसत्तिका; विसालाति विसत्तिका; विसटाति विसत्तिका; विसक्कतीति विसत्तिका; विसंहरतीति विसत्तिका; विसंवादिकाति विसत्तिका; विसमूलाति विसत्तिका; विसफलाति विसत्तिका; विसपरिभोगोति विसत्तिका; विसाला वा पन सा तण्हा रूपे सद्दे गन्धे रसे फोट्ठब्बे, कुले गणे आवासे लाभे यसे, पसंसाय सुखे चीवरे पिण्डपाते सेनासने गिलानपच्चयभेसज्जपरिक्खारे, कामधातुया रूपधातुया अरूपधातुया, कामभवे रूपभवे अरूपभवे, सञ्ञाभवे असञ्ञाभवे नेवसञ्ञानासञ्ञाभवे, एकवोकारभवे चतुवोकारभवे पञ्चवोकारभवे, अतीते अनागते पच्चुप्पन्ने, दिट्ठसुतमुतविञ्ञातब्बेसु धम्मेसु विसटा वित्थताति विसत्तिका.

लोकेति अपायलोके मनुस्सलोके देवलोके, खन्धलोके धातुलोके आयतनलोके. सतोति चतूहि कारणेहि सतो – काये कायानुपस्सनासतिपट्ठानं भावेन्तो सतो, वेदनासु…पे… चित्ते… धम्मेसु धम्मानुपस्सनासतिपट्ठानं भावेन्तो सतो.

अपरेहिपि चतूहि कारणेहि सतो – असतिपरिवज्जनाय सतो, सतिकरणीयानं धम्मानं कतत्ता सतो, सतिपरिबन्धानं धम्मानं हतत्ता सतो, सतिनिमित्तानं धम्मानं असम्मुट्ठत्ता सतो.

अपरेहिपि चतूहि कारणेहि सतो – सतिया समन्नागतत्ता सतो, सतिया वसितत्ता सतो, सतिया पागुञ्ञताय सतो, सतिया अपच्चोरोहणताय [अपच्चोरोपनताय (सी.)] सतो.

अपरेहिपि चतूहि कारणेहि सतो – सत्तत्ता सतो, सन्तत्ता सतो, समितत्ता सतो, सन्तधम्मसमन्नागतत्ता सतो. बुद्धानुस्सतिया सतो, धम्मानुस्सतिया सतो, सङ्घानुस्सतिया सतो, सीलानुस्सतिया सतो, चागानुस्सतिया सतो, देवतानुस्सतिया सतो, आनापानस्सतिया सतो, मरणस्सतिया सतो, कायगतासतिया सतो, उपसमानुस्सतिया सतो. या सति अनुस्सति पटिस्सति सति सरणता धारणता अपिलापनता असम्मुस्सनता सति सतिन्द्रियं सतिबलं सम्मासति सतिसम्बोज्झङ्गो एकायनमग्गो, अयं वुच्चति सति. इमाय सतिया उपेतो होति समुपेतो उपगतो समुपगतो उपपन्नो समुपपन्नो समन्नागतो, सो वुच्चति सतो.

सोमं विसत्तिकं लोके, सतो समतिवत्ततीति. लोके वा सा विसत्तिका, लोके वा तं विसत्तिकं सतो तरति उत्तरति पतरति समतिक्कमति वीतिवत्ततीति – सोमं विसत्तिकं लोके, सतो समतिवत्तति.

तेनाह भगवा –

‘‘यो कामे परिवज्जेति, सप्पस्सेव पदा सिरो;

सोमं विसत्तिकं लोके, सतो समतिवत्तती’’ति.

४.

खेत्तं वत्थुं हिरञ्ञं वा, गवास्सं दासपोरिसं;

थियो बन्धू पुथु कामे, यो नरो अनुगिज्झति.

खेत्तं वत्थुं हिरञ्ञं वाति. खेत्तन्ति सालिक्खेत्तं वीहिक्खेत्तं मुग्गक्खेत्तं मासक्खेत्तं यवक्खेत्तं गोधुमक्खेत्तं तिलक्खेत्तं. वत्थुन्ति घरवत्थुं कोट्ठकवत्थुं पुरेवत्थुं पच्छावत्थुं आरामवत्थुं विहारवत्थुं. हिरञ्ञन्ति हिरञ्ञं वुच्चति कहापणोति – खेत्तं वत्थुं हिरञ्ञं वा.

गवास्सं दासपोरिसन्ति. गवन्ति गवा [गावो (क.)] वुच्चन्ति. अस्साति पसुकादयो वुच्चन्ति. दासाति चत्तारो दासा – अन्तोजातको दासो, धनक्कीतको दासो, सामं वा दासब्यं उपेति, अकामको वा दासविसयं उपेति.

‘‘आमाय दासापि भवन्ति हेके, धनेन कीतापि भवन्ति दासा;

सामञ्च एके उपयन्ति दास्यं, भयापनुण्णापि भवन्ति दासा’’ति.

पुरिसाति तयो पुरिसा – भतका, कम्मकरा, उपजीविनोति – गवास्सं दासपोरिसं.

थियो बन्धू पुथु कामेति. थियोति इत्थिपरिग्गहो वुच्चति. बन्धूति चत्तारो बन्धू – ञातिबन्धवापि बन्धु, गोत्तबन्धवापि बन्धु, मन्तबन्धवापि बन्धु, सिप्पबन्धवापि बन्धु. पुथु कामेति बहू कामे. एते पुथु कामा मनापिका रूपा…पे… मनापिका फोट्ठब्बाति – थियो बन्धू पुथु कामे.

यो नरो अनुगिज्झतीति. योति यो यादिसो यथायुत्तो यथाविहितो यथापकारो यंठानप्पत्तो यंधम्मसमन्नागतो खत्तियो वा ब्राह्मणो वा वेस्सो वा सुद्दो वा गहट्ठो वा पब्बजितो वा देवो वा मनुस्सो वा. नरोति सत्तो नरो मानवो पोसो पुग्गलो जीवो जागु जन्तु इन्दगु मनुजो. अनुगिज्झतीति किलेसकामेन वत्थुकामेसु गिज्झति अनुगिज्झति पलिगिज्झति पलिबज्झतीति – यो नरो अनुगिज्झति.

तेनाह भगवा –

‘‘खेत्तं वत्थुं हिरञ्ञं वा, गवास्सं दासपोरिसं;

थियो बन्धू पुथु कामे, यो नरो अनुगिज्झती’’ति.

५.

अबला नं बलीयन्ति, मद्दन्ते नं परिस्सया;

ततो नं दुक्खमन्वेति, नावं भिन्नमिवोदकं.

अबला नं बलीयन्तीति. अबलाति अबला किलेसा दुब्बला अप्पबला अप्पथामका हीना निहीना ( ) [(परिहीना) (सी. स्या.)] ओमका लामका छतुक्का परित्ता. ते किलेसा तं पुग्गलं सहन्ति परिसहन्ति अभिभवन्ति अज्झोत्थरन्ति परियादियन्ति मद्दन्तीति, एवम्पि अबला नं बलीयन्ति. अथ वा, अबलं पुग्गलं दुब्बलं अप्पबलं अप्पथामकं हीनं निहीनं ओमकं लामकं छतुक्कं परित्तं, यस्स नत्थि सद्धाबलं वीरियबलं सतिबलं समाधिबलं पञ्ञाबलं हिरिबलं ओत्तप्पबलं. ते किलेसा तं पुग्गलं सहन्ति परिसहन्ति अभिभवन्ति अज्झोत्थरन्ति परियादियन्ति मद्दन्तीति – एवम्पि अबला नं बलीयन्तीति.

मद्दन्ते नं परिस्सयाति. द्वे परिस्सया – पाकटपरिस्सया च पटिच्छन्नपरिस्सया च. कतमे पाकटपरिस्सया? सीहा ब्यग्घा दीपी अच्छा तरच्छा कोका महिंसा [महिसा (सी. स्या.)] हत्थी अहिविच्छिका सतपदी, चोरा वा अस्सु मानवा वा कतकम्मा वा अकतकम्मा वा, चक्खुरोगो सोतरोगो घानरोगो जिव्हारोगो कायरोगो सीसरोगो कण्णरोगो मुखरोगो दन्तरोगो, कासो सासो पिनासो डाहो जरो, कुच्छिरोगो मुच्छा पक्खन्दिका सूला विसूचिका, कुट्ठं गण्डो किलासो सोसो अपमारो, दद्दु कण्डु कच्छु रखसा [रक्खसा (क.)] वितच्छिका लोहितपित्तं, मधुमेहो अंसा पिळका भगन्दला, पित्तसमुट्ठाना आबाधा सेम्हसमुट्ठाना आबाधा वातसमुट्ठाना आबाधा सन्निपातिका आबाधा उतुपरिणामजा आबाधा विसमपरिहारजा आबाधा, ओपक्कमिका आबाधा कम्मविपाकजा आबाधा, सीतं उण्हं जिघच्छा पिपासा उच्चारो पस्सावो डंसमकसवातातपसरीसपसम्फस्सा इति वा – इमे वुच्चन्ति पाकटपरिस्सया.

कतमे पटिच्छन्नपरिस्सया? कायदुच्चरितं वचीदुच्चरितं मनोदुच्चरितं, कामच्छन्दनीवरणं ब्यापादनीवरणं थिनमिद्धनीवरणं उद्धच्चकुक्कुच्चनीवरणं विचिकिच्छानीवरणं, रागो दोसो मोहो कोधो उपनाहो मक्खो पळासो इस्सा मच्छरियं, माया साठेय्यं थम्भो सारम्भो मानो अतिमानो मदो पमादो, सब्बे किलेसा सब्बे दुच्चरिता सब्बे दरथा सब्बे परिळाहा सब्बे सन्तापा सब्बाकुसलाभिसङ्खारा – इमे वुच्चन्ति पटिच्छन्नपरिस्सया.

परिस्सयाति केनट्ठेन परिस्सया? परिसहन्तीति परिस्सया, परिहानाय संवत्तन्तीति परिस्सया, तत्रासयाति परिस्सया. कथं परिसहन्तीति परिस्सया? ते परिस्सया तं पुग्गलं सहन्ति परिसहन्ति अभिभवन्ति अज्झोत्थरन्ति परियादियन्ति मद्दन्ति. एवं परिसहन्तीति परिस्सया. कथं परिहानाय संवत्तन्तीति परिस्सया? ते परिस्सया कुसलानं धम्मानं अन्तरायाय परिहानाय संवत्तन्ति. कतमेसं कुसलानं धम्मानं? सम्मापटिपदाय अनुलोमपटिपदाय अपच्चनीकपटिपदाय अविरुद्धपटिपदाय अन्वत्थपटिपदाय धम्मानुधम्मपटिपदाय, सीलेसु परिपूरिकारिताय इन्द्रियेसु गुत्तद्वारताय भोजने मत्तञ्ञुताय, जागरियानुयोगस्स सतिसम्पजञ्ञस्स, चतुन्नं सतिपट्ठानानं भावनानुयोगस्स चतुन्नं सम्मप्पधानानं भावनानुयोगस्स चतुन्नं इद्धिपादानं भावनानुयोगस्स, पञ्चन्नं इन्द्रियानं भावनानुयोगस्स पञ्चन्नं बलानं भावनानुयोगस्स, सत्तन्नं बोज्झङ्गानं भावनानुयोगस्स अरियस्स अट्ठङ्गिकस्स मग्गस्स भावनानुयोगस्स – इमेसं कुसलानं धम्मानं अन्तरायाय परिहानाय संवत्तन्ति. एवं परिहानाय संवत्तन्तीति – परिस्सया.

कथं तत्रासयाति परिस्सया? तत्थेते पापका अकुसला धम्मा उप्पज्जन्ति अत्तभावसन्निस्सया. यथा बिले बिलासया पाणा सयन्ति, दके दकासया पाणा सयन्ति, वने वनासया पाणा सयन्ति, रुक्खे रुक्खासया पाणा सयन्ति, एवमेव तत्थेते पापका अकुसला धम्मा उप्पज्जन्ति अत्तभावसन्निस्सया. एवम्पि तत्रासयाति – परिस्सया.

वुत्तञ्हेतं भगवता –

‘‘सान्तेवासिको, भिक्खवे, भिक्खु साचरियको दुक्खं न फासु विहरति. कथञ्च, भिक्खवे, भिक्खु सान्तेवासिको साचरियको दुक्खं न फासु विहरति? इध, भिक्खवे, भिक्खुनो चक्खुना रूपं दिस्वा उप्पज्जन्ति ये पापका अकुसला धम्मा सरसङ्कप्पा सञ्ञोजनिया, त्यस्स अन्तो वसन्ति अन्वासवन्ति पापका अकुसला धम्माति – तस्मा सान्तेवासिकोति वुच्चति. ते नं समुदाचरन्ति. समुदाचरन्ति नं पापका अकुसला धम्माति – तस्मा साचरियकोति वुच्चति.

‘‘पुन चपरं, भिक्खवे, भिक्खुनो सोतेन सद्दं सुत्वा, घानेन गन्धं घायित्वा, जिव्हाय रसं सायित्वा, कायेन फोट्ठब्बं फुसित्वा, मनसा धम्मं विञ्ञाय उप्पज्जन्ति ये पापका अकुसला धम्मा सरसङ्कप्पा सञ्ञोजनिया, त्यस्स अन्तो वसन्ति अन्वासवन्ति पापका अकुसला धम्माति – तस्मा सान्तेवासिकोति वुच्चति. ते नं समुदाचरन्ति. समुदाचरन्ति नं पापका अकुसला धम्माति – तस्मा साचरियकोति वुच्चति. एवं खो, भिक्खवे, भिक्खु सान्तेवासिको साचरियको दुक्खं न फासु विहरती’’ति. एवम्पि तत्रासयाति – परिस्सया.

वुत्तञ्हेतं भगवता –

‘‘तयोमे, भिक्खवे, अन्तरामला – अन्तराअमित्ता अन्तरासपत्ता अन्तरावधका अन्तरापच्चत्थिका. कतमे तयो? लोभो, भिक्खवे, अन्तरामलं [अन्तरामलो (स्या.)] अन्तराअमित्तो अन्तरासपत्तो अन्तरावधको अन्तरापच्चत्थिको. दोसो…पे… मोहो, भिक्खवे, अन्तरामलं अन्तराअमित्तो अन्तरासपत्तो अन्तरावधको अन्तरापच्चत्थिको. इमे खो, भिक्खवे, तयो अन्तरामला – अन्तराअमित्ता अन्तरासपत्ता अन्तरावधका अन्तरापच्चत्थिका.

‘‘अनत्थजननो लोभो, लोभो चित्तप्पकोपनो;

भयमन्तरतो जातं, तं जनो नावबुज्झति.

‘‘लुद्धो अत्थं न जानाति, लुद्धो धम्मं न पस्सति;

अन्धन्तमं [अन्धतमं (स्या. क.)] तदा होति, यं लोभो सहते नरं.

‘‘अनत्थजननो दोसो, दोसो चित्तप्पकोपनो;

भयमन्तरतो जातं, तं जनो नावबुज्झति.

‘‘कुद्धो अत्थं न जानाति, कुद्धो धम्मं न पस्सति;

अन्धन्तमं तदा होति, यं दोसो सहते नरं.

‘‘अनत्थजननो मोहो, मोहो चित्तप्पकोपनो;

भयमन्तरतो जातं, तं जनो नावबुज्झति.

‘‘मूळ्हो अत्थं न जानाति, मूळ्हो धम्मं न पस्सति;

अन्धन्तमं तदा होति, यं मोहो सहते नर’’न्ति.

एवम्पि तत्रासयाति – परिस्सया.

वुत्तम्पि हेतं भगवता – ‘‘तयो खो, महाराज, पुरिसस्स धम्मा अज्झत्तं उप्पज्जमाना उप्पज्जन्ति, अहिताय दुक्खाय अफासुविहाराय. कतमे तयो? लोभो खो, महाराज, पुरिसस्स धम्मो अज्झत्तं उप्पज्जमानो उप्पज्जति, अहिताय दुक्खाय अफासुविहाराय. दोसो खो, महाराज…पे… मोहो खो, महाराज, पुरिसस्स धम्मो अज्झत्तं उप्पज्जमानो उप्पज्जति, अहिताय दुक्खाय अफासुविहाराय. इमे खो, महाराज, तयो पुरिसस्स धम्मा अज्झत्तं उप्पज्जमाना उप्पज्जन्ति, अहिताय दुक्खाय अफासुविहाराय.

‘‘लोभो दोसो च मोहो च, पुरिसं पापचेतसं;

हिंसन्ति अत्तसम्भूता, तचसारंव सम्फल’’न्ति.

एवम्पि तत्रासयाति – परिस्सया.

वुत्तम्पि चेतं भगवता –

‘‘रागो च दोसो च इतोनिदाना, अरति रति लोमहंसो इतोजा;

इतो समुट्ठाय मनोवितक्का, कुमारका धङ्कमिवोस्सजन्ती’’ति [धङ्कमिवोस्सज्जन्ति (स्या.)].

एवम्पि तत्रासयाति – परिस्सया. मद्दन्ते नं परिस्सयाति. ते परिस्सया तं पुग्गलं सहन्ति परिसहन्ति अभिभवन्ति अज्झोत्थरन्ति परियादियन्ति मद्दन्तीति – मद्दन्ते नं परिस्सया.

ततो नं दुक्खमन्वेतीति. ततोति ततो ततो परिस्सयतो तं पुग्गलं दुक्खं अन्वेति अनुगच्छति अन्वायिकं होति, जातिदुक्खं अन्वेति अनुगच्छति अन्वायिकं होति, जरादुक्खं अन्वेति अनुगच्छति अन्वायिकं होति, ब्याधिदुक्खं अन्वेति अनुगच्छति अन्वायिकं होति, मरणदुक्खं अन्वेति अनुगच्छति अन्वायिकं होति, सोकपरिदेवदुक्खदोमनस्सुपायासदुक्खं अन्वेति अनुगच्छति अन्वायिकं होति, नेरयिकं दुक्खं, तिरच्छानयोनिकं दुक्खं, पेत्तिविसयिकं दुक्खं अन्वेति अनुगच्छति अन्वायिकं होति, मानुसिकं दुक्खं… गब्भोक्कन्तिमूलकं दुक्खं… गब्भे ठितिमूलकं दुक्खं… गब्भा वुट्ठानमूलकं दुक्खं… जातस्सूपनिबन्धकं दुक्खं… जातस्स पराधेय्यकं दुक्खं… अत्तूपक्कमं दुक्खं… परूपक्कमं दुक्खं अन्वेति अनुगच्छति अन्वायिकं होति, दुक्खदुक्खं अन्वेति अनुगच्छति अन्वायिकं होति, सङ्खारदुक्खं… विपरिणामदुक्खं … चक्खुरोगो सोतरोगो घानरोगो जिव्हारोगो कायरोगो सीसरोगो कण्णरोगो मुखरोगो दन्तरोगो, कासो सासो पिनासो डाहो जरो, कुच्छिरोगो मुच्छा पक्खन्दिका सूला विसूचिका, कुट्ठं गण्डो किलासो सोसो अपमारो, दद्दु कण्डु कच्छु रखसा वितच्छिका लोहितपित्तं, मधुमेहो अंसा पिळका भगन्दला पित्तसमुट्ठाना आबाधा सेम्हसमुट्ठाना आबाधा वातसमुट्ठाना आबाधा सन्निपातिका आबाधा उतुपरिणामजा आबाधा विसमपरिहारजा आबाधा, ओपक्कमिका आबाधा कम्मविपाकजा आबाधा, सीतं उण्हं जिघच्छा पिपासा उच्चारो पस्सावो डंसमकसवातातपसरीसपसम्फस्सदुक्खं… मातुमरणं दुक्खं… पितुमरणं दुक्खं… भातुमरणं दुक्खं… भगिनिमरणं दुक्खं… पुत्तमरणं दुक्खं… धीतुमरणं दुक्खं … ञातिब्यसनं दुक्खं… भोगब्यसनं दुक्खं… रोगब्यसनं दुक्खं… सीलब्यसनं दुक्खं… दिट्ठिब्यसनं दुक्खं अन्वेति अनुगच्छति अन्वायिकं होतीति – ततो नं दुक्खमन्वेति.

नावं भिन्नमिवोदकन्ति. यथा भिन्नं नावं दकमेसिं [उदकदायितो (सी.), उदकं अन्वायिकं (स्या.)] ततो ततो उदकं अन्वेति अनुगच्छति अन्वायिकं होति, पुरतोपि उदकं अन्वेति अनुगच्छति अन्वायिकं होति, पच्छतोपि… हेट्ठतोपि… पस्सतोपि उदकं अन्वेति अनुगच्छति अन्वायिकं होति; एवमेव ततो ततो परिस्सयतो तं पुग्गलं दुक्खं अन्वेति अनुगच्छति अन्वायिकं होति, जातिदुक्खं अन्वेति अनुगच्छति अन्वायिकं होति…पे… दिट्ठिब्यसनं दुक्खं अन्वेति अनुगच्छति अन्वायिकं होतीति – नावं भिन्नमिवोदकं.

तेनाह भगवा –

‘‘अबला नं बलीयन्ति, मद्दन्ते नं परिस्सया;

ततो नं दुक्खमन्वेति, नावं भिन्नमिवोदक’’न्ति.

६.

तस्मा जन्तु सदा सतो, कामानि परिवज्जये;

ते पहाय तरे ओघं, नावं सित्वाव पारगू.

तस्मा जन्तु सदा सतोति. तस्माति तस्मा तंकारणा तंहेतु तप्पच्चया तंनिदाना एतं आदीनवं सम्पस्समानो कामेसूति – तस्मा. जन्तूति सत्तो नरो मानवो पोसो पुग्गलो जीवो जागु जन्तु इन्दगु मनुजो. सदाति सदा सब्बदा सब्बकालं निच्चकालं धुवकालं सततं समितं अब्बोकिण्णं पोङ्खानुपोङ्खं उदकूमिकजातं अवीचि सन्तति सहितं फस्सितं [फुसितं (सी. स्या.)], पुरेभत्तं पच्छाभत्तं पुरिमयामं मज्झिमयामं पच्छिमयामं, काळे जुण्हे वस्से हेमन्ते गिम्हे, पुरिमे वयोखन्धे मज्झिमे वयोखन्धे पच्छिमे वयोखन्धे. सतोति चतूहि कारणेहि सतो – काये कायानुपस्सनासतिपट्ठानं भावेन्तो सतो, वेदनासु… चित्ते… धम्मेसु धम्मानुपस्सनासतिपट्ठानं भावेन्तो सतो. अपरेहि चतूहि कारणेहि सतो…पे… सो वुच्चति सतोति – तस्मा जन्तु सदा सतो.

कामानि परिवज्जयेति. कामाति उद्दानतो द्वे कामा – वत्थुकामा च किलेसकामा च…पे… इमे वुच्चन्ति वत्थुकामा…पे… इमे वुच्चन्ति किलेसकामा. कामानि परिवज्जयेति द्वीहि कारणेहि कामे परिवज्जेय्य – विक्खम्भनतो वा समुच्छेदतो वा. कथं विक्खम्भनतो कामे परिवज्जेय्य? ‘‘अट्ठिकङ्कलूपमा कामा अप्पस्सादट्ठेना’’ति पस्सन्तो विक्खम्भनतो कामे परिवज्जेय्य, ‘‘मंसपेसूपमा कामा बहुसाधारणट्ठेना’’ति पस्सन्तो विक्खम्भनतो कामे परिवज्जेय्य, ‘‘तिणुक्कूपमा कामा अनुदहनट्ठेना’’ति पस्सन्तो विक्खम्भनतो कामे परिवज्जेय्य…पे… नेवसञ्ञानासञ्ञायतनसमापत्तिं भावेन्तो विक्खम्भनतो कामे परिवज्जेय्य. एवं विक्खम्भनतो कामे परिवज्जेय्य…पे… एवं समुच्छेदतो कामे परिवज्जेय्याति – कामानि परिवज्जये.

ते पहाय तरे ओघन्ति. तेति वत्थुकामे परिजानित्वा किलेसकामे पहाय पजहित्वा विनोदेत्वा ब्यन्तिं करित्वा अनभावं गमित्वा; कामच्छन्दनीवरणं पहाय पजहित्वा विनोदेत्वा ब्यन्तिं करित्वा अनभावं गमित्वा; ब्यापादनीवरणं…पे… थिनमिद्धनीवरणं… उद्धच्चकुक्कुच्चनीवरणं… विचिकिच्छानीवरणं पहाय पजहित्वा विनोदेत्वा ब्यन्तिं करित्वा अनभावं गमित्वा कामोघं भवोघं दिट्ठोघं अविज्जोघं तरेय्य उत्तरेय्य पतरेय्य समतिक्कमेय्य वीतिवत्तेय्याति – ते पहाय तरे ओघं.

नावं सित्वाव पारगूति. यथा गरुकं नावं भारिकं उदकं सित्वा [सिञ्चित्वा (सी. स्या.)] ओसिञ्चित्वा छड्डेत्वा लहुकाय नावाय खिप्पं लहुं अप्पकसिरेनेव पारं गच्छेय्य; एवमेव वत्थुकामे परिजानित्वा किलेसकामे पहाय पजहित्वा विनोदेत्वा ब्यन्तिं करित्वा अनभावं गमित्वा; कामच्छन्दनीवरणं… ब्यापादनीवरणं… थिनमिद्धनीवरणं… उद्धच्चकुक्कुच्चनीवरणं… विचिकिच्छानीवरणं पहाय पजहित्वा विनोदेत्वा ब्यन्तिं करित्वा अनभावं गमित्वा खिप्पं लहुं अप्पकसिरेनेव पारं गच्छेय्य. पारं वुच्चति अमतं निब्बानं. यो सो सब्बसङ्खारसमथो सब्बूपधिपटिनिस्सग्गो तण्हक्खयो विरागो निरोधो निब्बानं. पारं गच्छेय्याति – पारं अधिगच्छेय्य, पारं फुसेय्य, पारं सच्छिकरेय्य. पारगूति योपि पारं गन्तुकामो सोपि पारगू; योपि पारं गच्छति सोपि पारगू; योपि पारं गतो, सोपि पारगू.

वुत्तम्पि हेतं भगवता –

तिण्णो पारङ्गतो थले तिट्ठति ब्राह्मणोति. ब्राह्मणोति खो, भिक्खवे, अरहतो एतं अधिवचनं. सो अभिञ्ञापारगू परिञ्ञापारगू पहानपारगू भावनापारगू सच्छिकिरियापारगू समापत्तिपारगू. अभिञ्ञापारगू सब्बधम्मानं, परिञ्ञापारगू सब्बदुक्खानं, पहानपारगू सब्बकिलेसानं, भावनापारगू चतुन्नं अरियमग्गानं, सच्छिकिरियापारगू निरोधस्स, समापत्तिपारगू सब्बसमापत्तीनं. सो वसिप्पत्तो पारमिप्पत्तो अरियस्मिं सीलस्मिं, वसिप्पत्तो पारमिप्पत्तो अरियस्मिं समाधिस्मिं, वसिप्पत्तो पारमिप्पत्तो अरियाय पञ्ञाय, वसिप्पत्तो पारमिप्पत्तो अरियाय विमुत्तिया. सो पारं गतो पारप्पत्तो अन्तगतो अन्तप्पत्तो कोटिगतो कोटिप्पत्तो परियन्तगतो परियन्तप्पत्तो वोसानगतो वोसानप्पत्तो ताणगतो ताणप्पत्तो लेणगतो लेणप्पत्तो सरणगतो सरणप्पत्तो अभयगतो अभयप्पत्तो अच्चुतगतो अच्चुतप्पत्तो अमतगतो अमतप्पत्तो निब्बानगतो निब्बानप्पत्तो. सो वुट्ठवासो चिण्णचरणो गतद्धो गतदिसो गतकोटिको पालितब्रह्मचरियो उत्तमदिट्ठिप्पत्तो भावितमग्गो पहीनकिलेसो पटिविद्धाकुप्पो सच्छिकतनिरोधो, दुक्खं तस्स परिञ्ञातं, समुदयो पहीनो, मग्गो भावितो, निरोधो सच्छिकतो, अभिञ्ञेय्यं अभिञ्ञातं, परिञ्ञेय्यं परिञ्ञातं, पहातब्बं पहीनं, भावेतब्बं भावितं, सच्छिकातब्बं सच्छिकतं.

सो उक्खित्तपलिघो संकिण्णपरिक्खो अब्बुळ्हेसिको निरग्गळो अरियो पन्नद्धजो पन्नभारो विसञ्ञुत्तो पञ्चङ्गविप्पहीनो छळङ्गसमन्नागतो एकारक्खो चतुरापस्सेनो पनुण्णपच्चेकसच्चो समवयसट्ठेसनो अनाविलसङ्कप्पो पस्सद्धकायसङ्खारो सुविमुत्तचित्तो सुविमुत्तपञ्ञो केवली वुसितवा उत्तमपुरिसो परमपुरिसो परमपत्तिप्पत्तो. सो नेवाचिनति [नेव आचिनाति (सी. स्या.)] नापचिनति, अपचिनित्वा ठितो. नेव पजहति न उपादियति, पजहित्वा ठितो. नेव संसिब्बति [नेव सिनेति (सी.), नेव विसीनेति (स्या.)] न उस्सिनेति, विसिनित्वा ठितो. नेव विधूपेति न सन्धूपेति, विधूपेत्वा ठितो. असेक्खेन सीलक्खन्धेन समन्नागतत्ता ठितो. असेक्खेन समाधिक्खन्धेन… असेक्खेन पञ्ञाक्खन्धेन… असेक्खेन विमुत्तिक्खन्धेन… असेक्खेन विमुत्तिञाणदस्सनक्खन्धेन समन्नागतत्ता ठितो. सच्चं सम्पटिपादियित्वा ठितो. एजं समतिक्कमित्वा ठितो. किलेसग्गिं परियादियित्वा ठितो, अपरिगमनताय ठितो, कटं समादाय ठितो, मुत्तिपटिसेवनताय ठितो, मेत्ताय पारिसुद्धिया ठितो, करुणाय… मुदिताय… उपेक्खाय पारिसुद्धिया ठितो, अच्चन्तपारिसुद्धिया ठितो, अकम्मयताय [अतम्मयताय (सी.), अकम्मञ्ञताय (स्या.)] पारिसुद्धिया ठितो, विमुत्तत्ता ठितो, सन्तुस्सितत्ता ठितो, खन्धपरियन्ते ठितो, धातुपरियन्ते ठितो, आयतनपरियन्ते ठितो, गतिपरियन्ते ठितो, उपपत्तिपरियन्ते ठितो, पटिसन्धिपरियन्ते ठितो, (भवपरियन्ते ठितो, संसारपरियन्ते ठितो वट्टपरियन्ते ठितो, अन्तिमे भवे ठितो,) [( ) नत्थि सीहळपोत्थके] अन्तिमे समुस्सये ठितो, अन्तिमदेहधरो अरहा.

‘‘तस्सायं पच्छिमको भवो, चरिमोयं समुस्सयो;

जातिमरणसंसारो, नत्थि तस्स पुनब्भवो’’ति.

नावं सित्वाव पारगूति. तेनाह भगवा –

‘‘तस्मा जन्तु सदा सतो, कामानि परिवज्जये;

ते पहाय तरे ओघं, नावं सित्वाव पारगू’’ति.

कामसुत्तनिद्देसो पठमो.

२. गुहट्ठकसुत्तनिद्देसो

अथ गुहट्ठकसुत्तनिद्देसं वक्खति –

७.

सत्तो गुहायं बहुनाभिछन्नो, तिट्ठं नरो मोहनस्मिं पगाळ्हो;

दूरे विवेका हि तथाविधो सो, कामा हि लोके न हि सुप्पहाया.

सत्तो गुहायं बहुनाभिछन्नोति. सत्तोति हि खो वुत्तं, अपि च गुहा ताव वत्तब्बा. गुहा वुच्चति कायो. कायोति वा गुहाति वा देहोति वा सन्देहोति वा नावाति वा रथोति वा धजोति वा वम्मिकोति वा नगरन्ति वा निड्डन्ति वा कुटीति वा गण्डोति वा कुम्भोति वा नागोति वा कायस्सेतं अधिवचनं. सत्तो गुहायन्ति गुहायं सत्तो विसत्तो आसत्तो लग्गो लग्गितो पलिबुद्धो. यथा भित्तिखिले वा नागदन्ते वा गण्डं सत्तं विसत्तं आसत्तं लग्गं लग्गितं पलिबुद्धं; एवमेव गुहायं सत्तो विसत्तो आसत्तो लग्गो लग्गितो पलिबुद्धो. वुत्तञ्हेतं भगवता –

‘‘रूपे खो, राध, यो छन्दो यो रागो या नन्दी या तण्हा ये उपयूपादाना चेतसो अधिट्ठानाभिनिवेसानुसया, तत्र सत्तो तत्र विसत्तो; तस्मा सत्तोति वुच्चति. वेदनाय खो, राध…पे… सञ्ञाय खो, राध… सङ्खारेसु खो, राध… विञ्ञाणे खो, राध, यो छन्दो यो रागो या नन्दी या तण्हा ये उपयूपादाना चेतसो अधिट्ठानाभिनिवेसानुसया, तत्र सत्तो तत्र विसत्तो; तस्मा सत्तोति वुच्चति. सत्तोति लग्गनाधिवचन’’न्ति – सत्तो गुहायं. बहुनाभिछन्नोति बहुकेहि किलेसेहि छन्नो, रागेन छन्नो दोसेन छन्नो मोहेन छन्नो कोधेन छन्नो उपनाहेन छन्नो मक्खेन छन्नो पळासेन छन्नो इस्साय छन्नो मच्छरियेन छन्नो मायाय छन्नो साठेय्येन छन्नो थम्भेन छन्नो सारम्भेन छन्नो मानेन छन्नो अतिमानेन छन्नो मदेन छन्नो पमादेन छन्नो. सब्बकिलेसेहि सब्बदुच्चरितेहि सब्बदरथेहि सब्बपरिळाहेहि सब्बसन्तापेहि सब्बाकुसलाभिसङ्खारेहि छन्नो विछन्नो उच्छन्नो आवुतो निवुतो ओवुतो [ओफुतो (स्या.)] पिहितो पटिच्छन्नो पटिकुज्जितोति – सत्तो गुहायं बहुनाभिछन्नो.

तिट्ठं नरो मोहनस्मिं पगाळ्होति तिट्ठन्तो नरो रत्तो रागवसेन तिट्ठति, दुट्ठो दोसवसेन तिट्ठति, मूळ्हो मोहवसेन तिट्ठति, विनिबद्धो मानवसेन तिट्ठति, परामट्ठो दिट्ठिवसेन तिट्ठति, विक्खेपगतो उद्धच्चवसेन तिट्ठति, अनिट्ठङ्गतो विचिकिच्छावसेन तिट्ठति, थामगतो अनुसयवसेन तिट्ठति. एवम्पि तिट्ठं नरो.

वुत्तञ्हेतं भगवता – ‘‘सन्ति, भिक्खवे, चक्खुविञ्ञेय्या रूपा इट्ठा कन्ता मनापा पियरूपा कामूपसंहिता रजनीया, तञ्चे भिक्खु अभिनन्दति अभिवदति अज्झोसाय तिट्ठति. सन्ति, भिक्खवे, सोतविञ्ञेय्या सद्दा…पे… घानविञ्ञेय्या गन्धा… जिव्हाविञ्ञेय्या रसा… कायविञ्ञेय्या फोट्ठब्बा… मनोविञ्ञेय्या धम्मा इट्ठा कन्ता मनापा पियरूपा कामूपसंहिता रजनीया, तञ्चे भिक्खु अभिनन्दति अभिवदति अज्झोसाय तिट्ठती’’ति. एवम्पि तिट्ठं नरो.

वुत्तञ्हेतं भगवता – ‘‘रूपूपयं वा, भिक्खवे, विञ्ञाणं तिट्ठमानं तिट्ठति, रूपारम्मणं रूपपतिट्ठं नन्दूपसेचनं वुद्धिं विरूळ्हिं वेपुल्लं आपज्जति. वेदनूपयं वा, भिक्खवे…पे… सञ्ञूपयं… सङ्खारूपयं वा, भिक्खवे, विञ्ञाणं तिट्ठमानं तिट्ठति, सङ्खारारम्मणं सङ्खारपतिट्ठं नन्दूपसेचनं वुद्धिं विरूळ्हिं वेपुल्लं आपज्जती’’ति. एवम्पि तिट्ठं नरो.

वुत्तम्पि हेतं भगवता – ‘‘कबळीकारे चे, भिक्खवे, आहारे अत्थि रागो अत्थि नन्दी अत्थि तण्हा, पतिट्ठितं तत्थ विञ्ञाणं विरूळ्हं. यत्थ पतिट्ठितं विञ्ञाणं विरूळ्हं, अत्थि तत्थ नामरूपस्सावक्कन्ति. यत्थ अत्थि नामरूपस्सावक्कन्ति, अत्थि तत्थ सङ्खारानं वुद्धि. यत्थ अत्थि सङ्खारानं वुद्धि, अत्थि तत्थ आयतिं पुनब्भवाभिनिब्बत्ति. यत्थ अत्थि आयतिं पुनब्भवाभिनिब्बत्ति, अत्थि तत्थ आयतिं जातिजरामरणं. यत्थ अत्थि आयतिं जातिजरामरणं, ससोकं तं, भिक्खवे, सरजं सउपायासन्ति वदामी’’ति. एवम्पि तिट्ठं नरो.

‘‘फस्से चे, भिक्खवे, आहारे…पे… मनोसञ्चेतनाय चे, भिक्खवे, आहारे… विञ्ञाणे चे, भिक्खवे, आहारे अत्थि रागो अत्थि नन्दी अत्थि तण्हा, पतिट्ठितं तत्थ विञ्ञाणं विरूळ्हं. यत्थ पतिट्ठितं विञ्ञाणं विरूळ्हं, अत्थि तत्थ नामरूपस्सावक्कन्ति. यत्थ अत्थि नामरूपस्सावक्कन्ति, अत्थि तत्थ सङ्खारानं वुद्धि. यत्थ अत्थि सङ्खारानं वुद्धि, अत्थि तत्थ आयतिं पुनब्भवाभिनिब्बत्ति. यत्थ अत्थि आयतिं पुनब्भवाभिनिब्बत्ति, अत्थि तत्थ आयतिं जातिजरामरणं. यत्थ अत्थि आयतिं जातिजरामरणं, ससोकं तं, भिक्खवे, सरजं सउपायासन्ति वदामी’’ति. एवम्पि तिट्ठं नरो.

मोहनस्मिं पगाळ्होति. मोहना वुच्चन्ति पञ्च कामगुणा. चक्खुविञ्ञेय्या रूपा इट्ठा कन्ता मनापा पियरूपा कामूपसंहिता रजनीया; सोतविञ्ञेय्या सद्दा… घानविञ्ञेय्या गन्धा… जिव्हाविञ्ञेय्या रसा… कायविञ्ञेय्या फोट्ठब्बा इट्ठा कन्ता मनापा पियरूपा कामूपसंहिता रजनीया. किं कारणा मोहना वुच्चन्ति पञ्च कामगुणा? येभुय्येन देवमनुस्सा पञ्चसु कामगुणेसु मुय्हन्ति सम्मुय्हन्ति सम्पमुय्हन्ति, मूळ्हा सम्मूळ्हा सम्पमूळ्हा अविज्जाय अन्धीकता आवुता निवुता ओवुता पिहिता पटिच्छन्ना पटिकुज्जिता, तं कारणा मोहना वुच्चन्ति पञ्च कामगुणा. मोहनस्मिं पगाळ्होति मोहनस्मिं पगाळ्हो ओगाळ्हो अज्झोगाळ्हो निमुग्गोति – तिट्ठं नरो मोहनस्मिं पगाळ्हो.

दूरे विवेका हि तथाविधो सोति. विवेकाति तयो विवेका – कायविवेको, चित्तविवेको, उपधिविवेको. कतमो कायविवेको? इध भिक्खु विवित्तं सेनासनं भजति अरञ्ञं रुक्खमूलं पब्बतं कन्दरं गिरिगुहं सुसानं वनपत्थं अब्भोकासं पलालपुञ्जं. कायेन विवित्तो विहरति. सो एको गच्छति, एको तिट्ठति, एको निसीदति, एको सेय्यं कप्पेति, एको गामं पिण्डाय पविसति, एको पटिक्कमति, एको रहो निसीदति, एको चङ्कमं अधिट्ठाति, एको चरति विहरति इरियति वत्तति पालेति यपेति यापेति. अयं कायविवेको.

कतमो चित्तविवेको? पठमं झानं समापन्नस्स नीवरणेहि चित्तं विवित्तं होति. दुतियं झानं समापन्नस्स वितक्कविचारेहि चित्तं विवित्तं होति. ततियं झानं समापन्नस्स पीतिया चित्तं विवित्तं होति. चतुत्थं झानं समापन्नस्स सुखदुक्खेहि चित्तं विवित्तं होति. आकासानञ्चायतनं समापन्नस्स रूपसञ्ञाय पटिघसञ्ञाय नानत्तसञ्ञाय चित्तं विवित्तं होति. विञ्ञाणञ्चायतनं समापन्नस्स आकासानञ्चायतनसञ्ञाय चित्तं विवित्तं होति. आकिञ्चञ्ञायतनं समापन्नस्स विञ्ञाणञ्चायतनसञ्ञाय चित्तं विवित्तं होति. नेवसञ्ञानासञ्ञायतनं समापन्नस्स आकिञ्चञ्ञायतनसञ्ञाय चित्तं विवित्तं होति. सोतापन्नस्स सक्कायदिट्ठिया विचिकिच्छाय सीलब्बतपरामासा दिट्ठानुसया विचिकिच्छानुसया, तदेकट्ठेहि च किलेसेहि चित्तं विवित्तं होति. सकदागामिस्स ओळारिका कामरागसञ्ञोजना पटिघसञ्ञोजना ओळारिका कामरागानुसया पटिघानुसया, तदेकट्ठेहि च किलेसेहि चित्तं विवित्तं होति. अनागामिस्स अनुसहगता कामरागसञ्ञोजना पटिघसञ्ञोजना अनुसहगता कामरागानुसया पटिघानुसया, तदेकट्ठेहि च किलेसेहि चित्तं विवित्तं होति. अरहतो रूपारूपरागा माना उद्धच्चा अविज्जाय मानानुसया भवरागानुसया अविज्जानुसया, तदेकट्ठेहि च किलेसेहि बहिद्धा च सब्बनिमित्तेहि चित्तं विवित्तं होति. अयं चित्तविवेको.

कतमो उपधिविवेको? उपधि वुच्चन्ति किलेसा च खन्धा च अभिसङ्खारा च. उपधिविवेको वुच्चति अमतं निब्बानं. यो सब्बसङ्खारसमथो सब्बूपधिपटिनिस्सग्गो तण्हक्खयो विरागो निरोधो निब्बानं. अयं उपधिविवेको. कायविवेको च विवेकट्ठकायानं [वूपकट्ठकायानं (स्या.)] नेक्खम्माभिरतानं, चित्तविवेको च परिसुद्धचित्तानं परमवोदानप्पत्तानं, उपधिविवेको च निरूपधीनं पुग्गलानं विसङ्खारगतानं.

दूरे विवेका हीति. यो सो एवं गुहायं सत्तो, एवं बहुकेहि किलेसेहि छन्नो, एवं मोहनस्मिं पगाळ्हो, सो कायविवेकापि दूरे, चित्तविवेकापि दूरे, उपधिविवेकापि दूरे विदूरे सुविदूरे न सन्तिके न सामन्ता अनासन्ने विवेकट्ठे [ववकट्ठे (सी.), अनुपकट्ठे (स्या.)]. तथाविधोति तादिसो तस्सण्ठितो तप्पकारो तप्पटिभागो यो सो मोहनस्मिं पगाळ्होति – दूरे विवेका हि तथाविधो सो.

कामा हि लोके न हि सुप्पहायाति. कामाति उद्दानतो द्वे कामा – वत्थुकामा च किलेसकामा च. कतमे वत्थुकामा? मनापिका रूपा मनापिका सद्दा मनापिका गन्धा मनापिका रसा मनापिका फोट्ठब्बा, अत्थरणा पावुरणा दासिदासा अजेळका कुक्कुटसूकरा हत्थिगवास्सवळवा, खेत्तं वत्थु हिरञ्ञं सुवण्णं, गामनिगमराजधानियो रट्ठञ्च जनपदो च कोसो च कोट्ठागारञ्च, यं किञ्चि रजनीयं वत्थु – वत्थुकामा. अपि च अतीता कामा अनागता कामा पच्चुप्पन्ना कामा, अज्झत्ता कामा बहिद्धा कामा अज्झत्तबहिद्धा कामा, हीना कामा मज्झिमा कामा पणीता कामा, आपायिका कामा मानुसिका कामा दिब्बा कामा पच्चुपट्ठिता कामा, निम्मिता कामा अनिम्मिता कामा परनिम्मिता कामा, परिग्गहिता कामा अपरिग्गहिता कामा, ममायिता कामा अममायिता कामा, सब्बेपि कामावचरा धम्मा, सब्बेपि रूपावचरा धम्मा, सब्बेपि अरूपावचरा धम्मा, तण्हावत्थुका तण्हारम्मणा कामनीयट्ठेन रजनीयट्ठेन मदनीयट्ठेन कामा. इमे वुच्चन्ति वत्थुकामा.

कतमे किलेसकामा? छन्दो कामो रागो कामो छन्दरागो कामो, सङ्कप्पो कामो रागो कामो सङ्कप्परागो कामो, यो कामेसु कामच्छन्दो कामरागो कामनन्दी कामतण्हा कामस्नेहो कामपरिळाहो काममुच्छा कामज्झोसानं कामोघो कामयोगो कामुपादानं कामच्छन्दनीवरणं.

‘‘अद्दसं काम ते मूलं, सङ्कप्पा काम जायसि;

न तं सङ्कप्पयिस्सामि, एवं काम न होहिसी’’ति. –

इमे वुच्चन्ति किलेसकामा. लोकेति अपायलोके मनुस्सलोके देवलोके, खन्धलोके धातुलोके आयतनलोके. कामा हि लोके न हि सुप्पहायाति. कामा हि लोके दुप्पहाया दुच्चज्जा दुप्परिच्चज्जा दुन्निम्मदया दुन्निवेठया दुब्बिनिवेठया दुत्तरा दुप्पतरा दुस्समतिक्कमा दुब्बिनिवत्ताति – कामा हि लोके न हि सुप्पहाया.

तेनाह भगवा –

‘‘सत्तो गुहायं बहुनाभिछन्नो, तिट्ठं नरो मोहनस्मिं पगाळ्हो;

दूरे विवेका हि तथाविधो सो, कामा हि लोके न हि सुप्पहाया’’ति.

८.

इच्छानिदाना भवसातबद्धा, ते दुप्पमुञ्चा न हि अञ्ञमोक्खा;

पच्छा पुरे वापि अपेक्खमाना, इमे व कामे पुरिमे व जप्पं.

इच्छानिदाना भवसातबद्धाति. इच्छा वुच्चति तण्हा. यो रागो सारागो अनुनयो अनुरोधो नन्दी नन्दिरागो, चित्तस्स सारागो इच्छा मुच्छा अज्झोसानं गेधो पलिगेधो सङ्गो पङ्को, एजा माया जनिका सञ्जननी सिब्बिनी जालिनी सरिता विसत्तिका, सुत्तं विसटा आयूहिनी दुतिया पणिधि भवनेत्ति, वनं वनथो सन्धवो स्नेहो अपेक्खा पटिबन्धु, आसा आसीसना आसीसितत्तं, रूपासा सद्दासा गन्धासा रसासा फोट्ठब्बासा, लाभासा धनासा पुत्तासा जीवितासा, जप्पा पजप्पा अभिजप्पा जप्पना जप्पितत्तं लोलुप्पं लोलुप्पायना लोलुप्पायितत्तं पुच्छञ्छिकता साधुकम्यता, अधम्मरागो विसमलोभो निकन्ति निकामना पत्थना पिहना सम्पत्थना, कामतण्हा भवतण्हा विभवतण्हा, रूपतण्हा अरूपतण्हा निरोधतण्हा, रूपतण्हा सद्दतण्हा गन्धतण्हा रसतण्हा फोट्ठब्बतण्हा धम्मतण्हा, ओघो योगो गन्थो उपादानं आवरणं नीवरणं छदनं बन्धनं, उपक्किलेसो अनुसयो परियुट्ठानं लता वेविच्छं, दुक्खमूलं दुक्खनिदानं दुक्खप्पभवो मारपासो मारबळिसं मारविसयो, तण्हानदी तण्हाजालं तण्हागद्दुलं तण्हासमुद्दो अभिज्झा लोभो अकुसलमूलं. इच्छानिदानाति इच्छानिदानका इच्छाहेतुका इच्छापच्चया इच्छाकारणा इच्छापभवाति – इच्छानिदाना.

भवसातबद्धाति. एकं भवसातं – सुखा वेदना. द्वे भवसातानि – सुखा च वेदना इट्ठञ्च वत्थु. तीणि भवसातानि – योब्बञ्ञं, आरोग्यं, जीवितं. चत्तारि भवसातानि – लाभो, यसो, पसंसा, सुखं. पञ्च भवसातानि – मनापिका रूपा, मनापिका सद्दा, मनापिका गन्धा, मनापिका रसा, मनापिका फोट्ठब्बा. छ भवसातानि – चक्खुसम्पदा, सोतसम्पदा, घानसम्पदा, जिव्हासम्पदा, कायसम्पदा, मनोसम्पदा. भवसातबद्धा, सुखाय वेदनाय सातबद्धा, इट्ठस्मिं वत्थुस्मिं बद्धा, योब्बञ्ञे बद्धा, आरोग्ये बद्धा, जीविते बद्धा, लाभे बद्धा, यसे बद्धा, पसंसायं बद्धा, सुखे बद्धा, मनापिकेसु रूपेसु बद्धा, सद्देसु… गन्धेसु… रसेसु… मनापिकेसु फोट्ठब्बेसु बद्धा, चक्खुसम्पदाय बद्धा, सोतघानजिव्हाकायमनोसम्पदाय बद्धा, विबद्धा आबद्धा लग्गा लग्गिता पलिबद्धाति – इच्छानिदाना भवसातबद्धा.

ते दुप्पमुञ्चा न हि अञ्ञमोक्खाति ते वा भवसातवत्थू दुप्पमुञ्चा, सत्ता वा एत्तो दुम्मोचया. कथं ते भवसातवत्थू दुप्पमुञ्चा? सुखा वेदना दुप्पमुञ्चा, इट्ठं वत्थु दुप्पमुञ्चं, योब्बञ्ञं दुप्पमुञ्चं, आरोग्यं दुप्पमुञ्चं, जीवितं दुप्पमुञ्चं, लाभो दुप्पमुञ्चो, यसो दुप्पमुञ्चो, पसंसा दुप्पमुञ्चा, सुखं दुप्पमुञ्चं, मनापिका रूपा दुप्पमुञ्चा, मनापिका सद्दा… गन्धा… रसा… फोट्ठब्बा दुप्पमुञ्चा, चक्खुसम्पदा दुप्पमुञ्चा, सोतघानजिव्हाकायमनोसम्पदा दुप्पमुञ्चा दुम्मोचया दुप्पमोचया दुन्निवेठया दुब्बिनिवेठया, दुत्तरा दुप्पतरा दुस्समतिक्कमा दुब्बिनिवत्ता. एवं ते भवसातवत्थू दुप्पमुञ्चा.

कथं सत्ता एत्तो दुम्मोचया? सुखाय वेदनाय सत्ता दुम्मोचया, इट्ठस्मा वत्थुस्मा दुम्मोचया, योब्बञ्ञा दुम्मोचया, आरोग्या दुम्मोचया, जीविता दुम्मोचया, लाभा दुम्मोचया, यसा दुम्मोचया, पसंसाय दुम्मोचया, सुखा दुम्मोचया, मनापिकेहि रूपेहि दुम्मोचया, मनापिकेहि सद्देहि… गन्धेहि… रसेहि… फोट्ठब्बेहि दुम्मोचया, चक्खुसम्पदाय दुम्मोचया, सोतघानजिव्हाकायमनोसम्पदाय दुम्मोचया दुरुद्धरा [दुद्धरा (क.)], दुस्समुद्धरा दुब्बुट्ठापया दुस्समुट्ठापया दुन्निवेठया दुब्बिनिवेठया दुत्तरा दुप्पतरा दुस्समतिक्कमा दुब्बिनिवत्ता. एवं सत्ता एत्तो दुम्मोचयाति – ते दुप्पमुञ्चा.

न हि अञ्ञमोक्खाति ते अत्तना पलिपपलिपन्ना न सक्कोन्ति परं पलिपपलिपन्नं उद्धरितुं. वुत्तञ्हेतं भगवता – ‘‘सो वत, चुन्द, अत्तना पलिपपलिपन्नो परं पलिपपलिपन्नं उद्धरिस्सतीति नेतं ठानं विज्जति. सो वत, चुन्द, अत्तना अदन्तो अविनीतो अपरिनिब्बुतो परं दमेस्सति विनेस्सति परिनिब्बापेस्सतीति नेतं ठानं विज्जती’’ति. एवम्पि न हि अञ्ञमोक्खा.

अथ वा नत्थञ्ञो कोचि मोचेता. ते यदि मुञ्चेय्युं, सकेन थामेन सकेन बलेन सकेन वीरियेन सकेन परक्कमेन सकेन पुरिसथामेन सकेन पुरिसबलेन सकेन पुरिसवीरियेन सकेन पुरिसपरक्कमेन अत्तना सम्मापटिपदं अनुलोमपटिपदं अपच्चनीकपटिपदं अन्वत्थपटिपदं धम्मानुधम्मपटिपदं पटिपज्जमाना मुञ्चेय्युन्ति. एवम्पि न हि अञ्ञमोक्खा.

वुत्तम्पि हेतं भगवता –

‘‘नाहं सहिस्सामि पमोचनाय, कथंकथिं धोतक किञ्चि लोके;

धम्मञ्च सेट्ठं अभिजानमानो, एवं तुवं ओघमिमं तरेसी’’ति.

एवम्पि न हि अञ्ञमोक्खा.

वुत्तम्पि हेतं भगवता –

‘‘अत्तनाव कतं पापं, अत्तना संकिलिस्सति;

अत्तना अकतं पापं, अत्तनाव विसुज्झति;

सुद्धी असुद्धि पच्चत्तं, नाञ्ञो अञ्ञं विसोधये’’ति.

एवम्पि न हि अञ्ञमोक्खा.

वुत्तम्पि हेतं भगवता – ‘‘एवमेव खो, ब्राह्मण, तिट्ठतेव निब्बानं, तिट्ठति निब्बानगामिमग्गो, तिट्ठामहं समादपेता. अथ च पन मम सावका मया एवं ओवदियमाना एवं अनुसासियमाना अप्पेकच्चे अच्चन्तनिट्ठं निब्बानं आराधेन्ति, एकच्चे नाराधेन्ति. एत्थ क्याहं, ब्राह्मण, करोमि? मग्गक्खायी, ब्राह्मण, तथागतो. मग्गं बुद्धो आचिक्खति. अत्तना पटिपज्जमाना मुञ्चेय्यु’’न्ति. एवम्पि न हि अञ्ञमोक्खाति – ते दुप्पमुञ्चा न हि अञ्ञमोक्खा.

पच्छा पुरे वापि अपेक्खमानाति. पच्छा वुच्चति अनागतं, पुरे वुच्चति अतीतं. अपि च अतीतं उपादाय अनागतञ्च पच्चुप्पन्नञ्च पच्छा, अनागतं उपादाय अतीतञ्च पच्चुप्पन्नञ्च पुरे. कथं पुरे अपेक्खं करोति? ‘‘एवंरूपो अहोसिं अतीतमद्धान’’न्ति तत्थ नन्दिं समन्नानेति. ‘‘एवंवेदनो अहोसिं… एवंसञ्ञो अहोसिं… एवंसङ्खारो अहोसिं… एवंविञ्ञाणो अहोसिं अतीतमद्धान’’न्ति तत्थ नन्दिं समन्नानेति. एवम्पि पुरे अपेक्खं करोति.

अथ वा ‘‘इति मे चक्खु अहोसि अतीतमद्धानं, इति रूपा’’ति – तत्थ छन्दरागपटिबद्धं होति विञ्ञाणं. छन्दरागपटिबद्धत्ता विञ्ञाणस्स तदभिनन्दति. तदभिनन्दन्तो एवम्पि पुरे अपेक्खं करोति. ‘‘इति मे सोतं अहोसि अतीतमद्धानं, इति सद्दा’’ति…पे… ‘‘इति मे घानं अहोसि अतीतमद्धानं, इति गन्धा’’ति… ‘‘इति मे जिव्हा अहोसि अतीतमद्धानं, इति रसा’’ति… ‘‘इति मे कायो अहोसि अतीतमद्धानं, इति फोट्ठब्बा’’ति… ‘‘इति मे मनो अहोसि अतीतमद्धानं, इति धम्मा’’ति – तत्थ छन्दरागपटिबद्धं होति विञ्ञाणं. छन्दरागपटिबद्धत्ता विञ्ञाणस्स तदभिनन्दति. तदभिनन्दन्तो एवम्पि पुरे अपेक्खं करोति.

अथ वा यानिस्स तानि पुब्बे मातुगामेन सद्धिं हसितलपितकीळितानि तदस्सादेति तं निकामेति, तेन च वित्तिं आपज्जति. एवम्पि पुरे अपेक्खं करोति.

कथं पच्छा अपेक्खं करोति? ‘‘एवंरूपो सियं अनागतमद्धान’’न्ति तत्थ नन्दिं समन्नानेति. ‘‘एवंवेदनो सियं… एवंसञ्ञो सियं… एवंसङ्खारो सियं… एवंविञ्ञाणो सियं अनागतमद्धान’’न्ति तत्थ नन्दिं समन्नानेति. एवम्पि पच्छा अपेक्खं करोति.

अथ वा ‘‘इति मे चक्खु सिया अनागतमद्धानं, इति रूपा’’ति – अप्पटिलद्धस्स पटिलाभाय चित्तं पणिदहति. चेतसो पणिधानपच्चया तदभिनन्दति. तदभिनन्दन्तो एवम्पि पच्छा अपेक्खं करोति. ‘‘इति मे सोतं सिया अनागतमद्धानं, इति सद्दा’’ति… ‘‘इति मे घानं सिया अनागतमद्धानं, इति गन्धा’’ति… ‘‘इति मे जिव्हा सिया अनागतमद्धानं, इति रसा’’ति… ‘‘इति मे कायो सिया अनागतमद्धानं, इति फोट्ठब्बा’’ति… ‘‘इति मे मनो सिया अनागतमद्धानं, इति धम्मा’’ति – अप्पटिलद्धस्स पटिलाभाय चित्तं पणिदहति. चेतसो पणिधानपच्चया तदभिनन्दति. तदभिनन्दन्तो एवम्पि पच्छा अपेक्खं करोति.

अथ वा ‘‘इमिनाहं सीलेन वा वतेन वा तपेन वा ब्रह्मचरियेन वा देवो वा भविस्सामि देवञ्ञतरो वा’’ति – अप्पटिलद्धस्स पटिलाभाय चित्तं पणिदहति. चेतसो पणिधानपच्चया तदभिनन्दति. तदभिनन्दन्तो एवम्पि पच्छा अपेक्खं करोतीति – पच्छा पुरे वापि अपेक्खमाना.

इमे व कामे पुरिमे व जप्पन्ति. इमे व कामेति पच्चुप्पन्ने पञ्च कामगुणे इच्छन्ता सादियन्ता पत्थयन्ता पिहयन्ता अभिजप्पन्ता. पुरिमे व जप्पन्ति अतीते पञ्च कामगुणे जप्पन्ता पजप्पन्ता अभिजप्पन्ताति – इमे व कामे पुरिमे व जप्पं.

तेनाह भगवा –

‘‘इच्छानिदाना भवसातबद्धा, ते दुप्पमुञ्चा न हि अञ्ञमोक्खा;

पच्छा पुरे वापि अपेक्खमाना, इमे व कामे पुरिमे व जप्प’’न्ति.

९.

कामेसु गिद्धा पसुता पमूळ्हा, अवदानिया ते विसमे निविट्ठा;

दुक्खूपनीता परिदेवयन्ति, किंसू भविस्साम इतो चुतासे.

कामेसु गिद्धा पसुता पमूळ्हाति. कामाति उद्दानतो द्वे कामा – वत्थुकामा च किलेसकामा च…पे… इमे वुच्चन्ति वत्थुकामा…पे… इमे वुच्चन्ति किलेसकामा. गेधो वुच्चति तण्हा. यो रागो सारागो…पे… अभिज्झा लोभो अकुसलमूलं. किलेसकामेन वत्थुकामेसु रत्ता गिद्धा गधिता मुच्छिता अज्झोसन्ना [अज्झोपन्ना (सी. स्या.)] लग्गा लग्गिता पलिबुद्धाति – कामेसु गिद्धा.

पसुताति येपि कामे एसन्ति गवेसन्ति परियेसन्ति, तच्चरिता तब्बहुला तग्गरुका, तन्निन्ना तप्पोणा तप्पब्भारा तदधिमुत्ता तदधिपतेय्या, तेपि कामपसुता. येपि तण्हावसेन रूपे एसन्ति गवेसन्ति परियेसन्ति… सद्दे… गन्धे… रसे… फोट्ठब्बे…पे… परियेसन्ति तच्चरिता तब्बहुला तग्गरुका, तन्निन्ना तप्पोणा तप्पब्भारा तदधिमुत्ता तदधिपतेय्या, तेपि कामपसुता. येपि तण्हावसेन रूपे पटिलभन्ति… सद्दे… गन्धे … रसे… फोट्ठब्बे पटिलभन्ति तच्चरिता तब्बहुला तग्गरुका, तन्निन्ना तप्पोणा तप्पब्भारा तदधिमुत्ता तदधिपतेय्या, तेपि कामपसुता. येपि तण्हावसेन रूपे परिभुञ्जन्ति … सद्दे… गन्धे… रसे… फोट्ठब्बे परिभुञ्जन्ति तच्चरिता तब्बहुला तग्गरुका, तन्निन्ना तप्पोणा तप्पब्भारा तदधिमुत्ता तदधिपतेय्या, तेपि कामपसुता. यथा कलहकारको कलहपसुतो, कम्मकारको कम्मपसुतो, गोचरे चरन्तो गोचरपसुतो, झायी झानपसुतो; एवमेव येपि कामे एसन्ति गवेसति परियेसन्ति, तच्चरिता तब्बहुला तग्गरुका तन्निन्ना तप्पोणा तप्पब्भारा तदधिमुत्ता तदधिपतेय्या, तेपि कामपसुता. येपि तण्हावसेन रूपे एसन्ति गवेसन्ति परियेसन्ति… सद्दे… गन्धे… रसे… फोट्ठब्बे…पे… परियेसन्ति तच्चरिता तब्बहुला तग्गरुका तन्निन्ना तप्पोणा तप्पब्भारा तदधिमुत्ता तदधिपतेय्या, तेपि कामपसुता. येपि तण्हावसेन रूपे पटिलभन्ति… सद्दे… गन्धे… रसे… फोट्ठब्बे पटिलभन्ति तच्चरिता तब्बहुला तग्गरुका, तन्निन्ना तप्पोणा तप्पब्भारा तदधिमुत्ता तदधिपतेय्या, तेपि कामपसुता. येपि तण्हावसेन रूपे परिभुञ्जन्ति… सद्दे… गन्धे… रसे… फोट्ठब्बे परिभुञ्जन्ति तच्चरिता तब्बहुला तग्गरुका, तन्निन्ना तप्पोणा तप्पब्भारा तदधिमुत्ता तदधिपतेय्या, तेपि कामपसुता.

पमूळ्हाति येभुय्येन देवमनुस्सा पञ्चसु कामगुणेसु मुय्हन्ति सम्मुय्हन्ति सम्पमुय्हन्ति मूळ्हा सम्मूळ्हा सम्पमूळ्हा अविज्जाय अन्धीकता आवुता निवुता ओवुता पिहिता पटिच्छन्ना पटिकुज्जिताति – कामेसु गिद्धा पसुता पमूळ्हा.

अवदानिया ते विसमे निविट्ठाति. अवदानियाति अवगच्छन्तीतिपि अवदानिया, मच्छरिनोपि वुच्चन्ति अवदानिया, बुद्धानं सावकानं वचनं ब्यप्पथं देसनं अनुसिट्ठिं नादियन्तीति – अवदानिया. कथं अवगच्छन्तीति अवदानिया? निरयं गच्छन्ति, तिरच्छानयोनिं गच्छन्ति, पेत्तिविसयं गच्छन्तीति, एवं आगच्छन्तीति – अवदानिया. कथं मच्छरिनो वुच्चन्ति अवदानिया? पञ्च मच्छरियानि – आवासमच्छरियं, कुलमच्छरियं, लाभमच्छरियं, वण्णमच्छरियं, धम्ममच्छरियं. यं एवरूपं मच्छरियं मच्छरायना मच्छरायितत्तं वेविच्छं कदरियं कटुकञ्चुकता अग्गहितत्तं चित्तस्स, इदं वुच्चति मच्छरियं. अपि च, खन्धमच्छरियम्पि मच्छरियं, धातुमच्छरियम्पि मच्छरियं, आयतनमच्छरियम्पि मच्छरियं गाहो. इदं वुच्चति मच्छरियं. इमिना मच्छरियेन अवदञ्ञुताय समन्नागता जना पमत्ता. एवं मच्छरिनो वुच्चन्ति अवदानिया. कथं बुद्धानं सावकानं वचनं ब्यप्पथं देसनं अनुसिट्ठिं नादियन्तीति – अवदानिया? बुद्धानं सावकानं वचनं ब्यप्पथं देसनं अनुसिट्ठिं न आदियन्ति न सुस्सुसन्ति, न सोतं ओदहन्ति, न अञ्ञा चित्तं उपट्ठपेन्ति, अनस्सवा अवचनकरा पटिलोमवुत्तिनो, अञ्ञेनेव मुखं करोन्ति. एवं बुद्धानं सावकानं [बुद्धानं बुद्धसावकानं (सी. स्या.)] वचनं ब्यप्पथं देसनं अनुसिट्ठिं नादियन्तीति अवदानियाति – अवदानिया.

ते विसमे निविट्ठाति विसमे कायकम्मे निविट्ठा, विसमे वचीकम्मे निविट्ठा, विसमे मनोकम्मे निविट्ठा, विसमे पाणातिपाते निविट्ठा, विसमे अदिन्नादाने निविट्ठा, विसमे कामेसुमिच्छाचारे निविट्ठा, विसमे मुसावादे निविट्ठा, विसमाय पिसुणाय वाचाय निविट्ठा, विसमाय फरुसाय वाचाय… विसमे सम्फप्पलापे… विसमाय अभिज्झाय निविट्ठा, विसमे ब्यापादे… विसमाय मिच्छादिट्ठिया निविट्ठा, विसमेसु सङ्खारेसु निविट्ठा, विसमेसु पञ्चसु कामगुणेसु निविट्ठा, विसमेसु पञ्चसु नीवरणेसु निविट्ठा विनिविट्ठा पतिट्ठिता अल्लीना उपगता अज्झोसिता अधिमुत्ता लग्गा लग्गिता पलिबुद्धाति – अवदानिया ते विसमे निविट्ठा.

दुक्खूपनीता परिदेवयन्तीति. दुक्खूपनीताति दुक्खप्पत्ता दुक्खसम्पत्ता दुक्खूपगता, मारप्पत्ता मारसम्पत्ता मारूपगता, मरणप्पत्ता मरणसम्पत्ता मरणूपगता. परिदेवयन्तीति लपन्ति लालपन्ति [सल्लपन्ति (सी.)], सोचन्ति किलमन्ति परिदेवन्ति उरत्ताळिं कन्दन्ति सम्मोहं आपज्जन्तीति – दुक्खूपनीता परिदेवयन्ति.

किंसू भविस्साम इतो चुतासेति इतो चुता किं भविस्साम? नेरयिका भविस्साम, तिरच्छानयोनिका भविस्साम, पेत्तिविसयिका भविस्साम, मनुस्सा भविस्साम, देवा भविस्साम, रूपी भविस्साम, अरूपी भविस्साम, सञ्ञी भविस्साम, असञ्ञी भविस्साम, नेवसञ्ञीनासञ्ञी भविस्साम, ‘‘भविस्साम नु खो मयं अनागतमद्धानं, ननु खो भविस्साम अनागतमद्धानं, किं नु खो भविस्साम अनागतमद्धानं, कथं नु खो भविस्साम अनागतमद्धानं, किं हुत्वा किं भविस्साम नु खो मयं अनागतमद्धान’’न्ति संसयपक्खन्दा विमतिपक्खन्दा द्वेळ्हकजाता लपन्ति लालपन्ति, सोचन्ति किलमन्ति परिदेवन्ति उरत्ताळिं कन्दन्ति सम्मोहं आपज्जन्तीति – किंसू भविस्साम इतो चुतासे.

तेनाह भगवा –

‘‘कामेसु गिद्धा पसुता पमूळ्हा, अवदानिया ते विसमे निविट्ठा;

दुक्खूपनीता परिदेवयन्ति, किंसू भविस्साम इतो चुतासे’’ति.

१०.

तस्मा हि सिक्खेथ इधेव जन्तु, यं किञ्चि जञ्ञा विसमन्ति लोके;

न तस्स हेतू विसमं चरेय्य, अप्पञ्हिदं जीवितमाहु धीरा.

तस्मा हि सिक्खेथ इधेव जन्तूति. तस्माति तंकारणा तंहेतु तप्पच्चया तन्निदाना, एतमादीनवं सम्पस्समानो कामेसूति – तस्मा. सिक्खेथाति तिस्सो सिक्खा – अधिसीलसिक्खा, अधिचित्तसिक्खा, अधिपञ्ञासिक्खा.

कतमा अधिसीलसिक्खा? इध भिक्खु सीलवा होति, पातिमोक्खसंवरसंवुतो विहरति आचारगोचरसम्पन्नो, अणुमत्तेसु वज्जेसु भयदस्सावी, समादाय सिक्खति सिक्खापदेसु. खुद्दको सीलक्खन्धो, महन्तो सीलक्खन्धो, सीलं पतिट्ठा आदि चरणं संयमो संवरो मोक्खं पामोक्खं कुसलानं धम्मानं समापत्तिया – अयं अधिसीलसिक्खा.

कतमा अधिचित्तसिक्खा? इध भिक्खु विविच्चेव कामेहि विविच्च अकुसलेहि धम्मेहि सवितक्कं सविचारं विवेकजं पीतिसुखं पठमं झानं उपसम्पज्ज विहरति. वितक्कविचारानं वूपसमा अज्झत्तं सम्पसादनं चेतसो एकोदिभावं अवितक्कं अविचारं समाधिजं पीतिसुखं दुतियं झानं उपसम्पज्ज विहरति. पीतिया च विरागा उपेक्खको च विहरति सतो च सम्पजानो सुखञ्च कायेन पटिसंवेदेति, यं तं अरिया आचिक्खन्ति – ‘उपेक्खको सतिमा सुखविहारी’ति ततियं झानं उपसम्पज्ज विहरति. सुखस्स च पहाना दुक्खस्स च पहाना पुब्बेव सोमनस्सदोमनस्सानं अत्थङ्गमा अदुक्खमसुखं उपेक्खासतिपारिसुद्धिं चतुत्थं झानं उपसम्पज्ज विहरति – अयं अधिचित्तसिक्खा.

कतमा अधिपञ्ञासिक्खा? इध भिक्खु पञ्ञवा होति उदयत्थगामिनिया पञ्ञाय समन्नागतो, अरियाय निब्बेधिकाय सम्मादुक्खक्खयगामिनिया. सो ‘‘इदं दुक्ख’’न्ति यथाभूतं पजानाति, ‘‘अयं दुक्खसमुदयो’’ति यथाभूतं पजानाति, ‘‘अयं दुक्खनिरोधो’’ति यथाभूतं पजानाति, ‘‘अयं दुक्खनिरोधगामिनी पटिपदा’’ति यथाभूतं पजानाति. ‘‘इमे आसवा’’ति यथाभूतं पजानाति, ‘‘अयं आसवसमुदयो’’ति यथाभूतं पजानाति, ‘‘अयं आसवनिरोधो’’ति यथाभूतं पजानाति, ‘‘अयं आसवनिरोधगामिनी पटिपदा’’ति यथाभूतं पजानाति – अयं अधिपञ्ञासिक्खा.

इमा तिस्सो सिक्खायो आवज्जन्तो सिक्खेय्य, जानन्तो सिक्खेय्य, पस्सन्तो सिक्खेय्य, पच्चवेक्खन्तो सिक्खेय्य, चित्तं अधिट्ठहन्तो सिक्खेय्य, सद्धाय अधिमुच्चन्तो सिक्खेय्य, वीरियं पग्गण्हन्तो सिक्खेय्य, सतिं उपट्ठपेन्तो सिक्खेय्य, चित्तं समादहन्तो सिक्खेय्य, पञ्ञाय पजानन्तो सिक्खेय्य, अभिञ्ञेय्यं अभिजानन्तो सिक्खेय्य, परिञ्ञेय्यं परिजानन्तो सिक्खेय्य, पहातब्बं पजहन्तो सिक्खेय्य, भावेतब्बं भावेन्तो सिक्खेय्य, सच्छिकातब्बं सच्छिकरोन्तो सिक्खेय्य आचरेय्य समाचरेय्य समादाय वत्तेय्य.

इधाति इमिस्सा दिट्ठिया इमिस्सा खन्तिया इमिस्सा रुचिया इमस्मिं आदाये इमस्मिं धम्मे इमस्मिं विनये इमस्मिं धम्मविनये इमस्मिं पावचने इमस्मिं ब्रह्मचरिये इमस्मिं सत्थुसासने इमस्मिं अत्तभावे इमस्मिं मनुस्सलोके – तेन वुच्चति इधाति. जन्तूति सत्तो नरो…पे… मनुजोति – तस्मा हि सिक्खेथ इधेव जन्तु.

यं किञ्चि जञ्ञा विसमन्ति लोकेति. यं किञ्चीति सब्बेन सब्बं सब्बथा सब्बं असेसं निस्सेसं परियादियनवचनमेतं [परिदायवचनमेतं (स्या.)] – यं किञ्चीति. विसमन्ति जञ्ञाति विसमं कायकम्मं विसमन्ति जानेय्य, विसमं वचीकम्मं विसमन्ति जानेय्य, विसमं मनोकम्मं विसमन्ति जानेय्य, विसमं पाणातिपातं विसमोति जानेय्य, विसमं अदिन्नादानं विसमन्ति जानेय्य, विसमं कामेसुमिच्छाचारं विसमोति जानेय्य, विसमं मुसावादं विसमोति जानेय्य, विसमं पिसुणं वाचं विसमाति जानेय्य, विसमं फरुसं वाचं विसमाति जानेय्य, विसमं सम्फप्पलापं विसमोति जानेय्य, विसमं अभिज्झं विसमाति जानेय्य, विसमं ब्यापादं विसमोति जानेय्य, विसमं मिच्छादिट्ठिं विसमाति जानेय्य, विसमे सङ्खारे विसमाति जानेय्य, विसमे पञ्च कामगुणे विसमाति जानेय्य, विसमे पञ्च नीवरणे विसमाति जानेय्य आजानेय्य विजानेय्य पटिविजानेय्य पटिविज्झेय्य. लोकेति अपायलोके…पे… आयतनलोकेति – यं किञ्चि जञ्ञा विसमन्ति लोके.

न तस्स हेतू विसमं चरेय्याति. विसमस्स कायकम्मस्स हेतु विसमं न चरेय्य, विसमस्स वचीकम्मस्स हेतु विसमं न चरेय्य, विसमस्स मनोकम्मस्स हेतु विसमं न चरेय्य, विसमस्स पाणातिपातस्स हेतु विसमं न चरेय्य, विसमस्स अदिन्नादानस्स हेतु विसमं न चरेय्य, विसमस्स कामेसुमिच्छाचारस्स हेतु विसमं न चरेय्य, विसमस्स मुसावादस्स हेतु विसमं न चरेय्य, विसमाय पिसुणाय वाचाय हेतु विसमं न चरेय्य, विसमाय फरुसाय वाचाय हेतु विसमं न चरेय्य, विसमस्स सम्फप्पलापस्स हेतु विसमं न चरेय्य, विसमाय अभिज्झाय हेतु विसमं न चरेय्य, विसमस्स ब्यापादस्स हेतु विसमं न चरेय्य, विसमाय मिच्छादिट्ठिया हेतु विसमं न चरेय्य, विसमानं सङ्खारानं हेतु विसमं न चरेय्य, विसमानं पञ्चन्नं कामगुणानं हेतु विसमं न चरेय्य, विसमानं पञ्चन्नं नीवरणानं हेतु विसमं न चरेय्य, विसमाय चेतनाय हेतु विसमं न चरेय्य, विसमाय पत्थनाय हेतु विसमं न चरेय्य, विसमाय पणिधिया हेतु विसमं न चरेय्य न आचरेय्य न समाचरेय्य न समादाय वत्तेय्याति – न तस्स हेतू विसमं चरेय्य.

अप्पञ्हिदं जीवितमाहु धीराति. जीवितन्ति आयु ठिति यपना यापना इरियना वत्तना पालना जीवितं जीवितिन्द्रियं. अपि च, द्वीहि कारणेहि अप्पकं जीवितं – ठितिपरित्तताय वा अप्पकं जीवितं, सरसपरित्तताय वा अप्पकं जीवितं. कथं ठितिपरित्तताय अप्पकं जीवितं? अतीते चित्तक्खणे जीवित्थ, न जीवति न जीविस्सति; अनागते चित्तक्खणे जीविस्सति, न जीवति न जीवित्थ; पच्चुप्पन्ने चित्तक्खणे जीवति, न जीवित्थ न जीविस्सति.

‘‘जीवितं अत्तभावो च, सुखदुक्खा च केवला;

एकचित्तसमायुत्ता, लहुसो वत्तते खणो.

‘‘चुल्लासीतिसहस्सानि, कप्पा तिट्ठन्ति ये मरू;

नत्वेव तेपि जीवन्ति, द्वीहि चित्तेहि संयुता.

‘‘ये निरुद्धा मरन्तस्स, तिट्ठमानस्स वा इध;

सब्बेपि सदिसा खन्धा, गता अप्पटिसन्धिका.

‘‘अनन्तरा च ये भग्गा [भङ्गा (सी. स्या.)], ये च भग्गा अनागता;

तदन्तरे निरुद्धानं, वेसमं नत्थि लक्खणे.

‘‘अनिब्बत्तेन न जातो, पच्चुप्पन्नेन जीवति;

चित्तभग्गा मतो लोको, पञ्ञत्ति परमत्थिया.

‘‘यथा निन्ना पवत्तन्ति, छन्देन परिणामिता;

अच्छिन्नधारा वत्तन्ति, सळायतनपच्चया.

‘‘अनिधानगता भग्गा, पुञ्जो नत्थि अनागते;

निब्बत्ता ये च [निब्बत्तायेव (सब्बत्थ)] तिट्ठन्ति, आरग्गे सासपूपमा.

‘‘निब्बत्तानञ्च धम्मानं, भङ्गो नेसं पुरक्खतो;

पलोकधम्मा तिट्ठन्ति, पुराणेहि अमिस्सिता.

‘‘अदस्सनतो आयन्ति, भङ्गा गच्छन्ति दस्सनं;

विज्जुप्पादोव आकासे, उप्पज्जन्ति वयन्ति चा’’ति.

एवं ठितिपरित्तताय अप्पकं जीवितं.

कथं सरसपरित्तताय अप्पकं जीवितं? अस्सासूपनिबन्धं जीवितं, पस्सासूपनिबन्धं जीवितं, अस्सासपस्सासूपनिबन्धं जीवितं, महाभूतूपनिबन्धं जीवितं, कबळीकाराहारूपनिबन्धं जीवितं, उस्मूपनिबन्धं जीवितं, विञ्ञाणूपनिबन्धं जीवितं. मूलम्पि इमेसं दुब्बलं, पुब्बहेतूपि इमेसं दुब्बला. ये पच्चया तेपि दुब्बला, येपि पभाविका तेपि दुब्बला. सहभूमि इमेसं दुब्बला, सम्पयोगापि इमेसं दुब्बला, सहजापि इमेसं दुब्बला, यापि पयोजिका सापि दुब्बला, अञ्ञमञ्ञं इमे निच्चदुब्बला, अञ्ञमञ्ञं अनवट्ठिता इमे. अञ्ञमञ्ञं परिपातयन्ति इमे, अञ्ञमञ्ञस्स हि नत्थि तायिता, न चापि ठपेन्ति अञ्ञमञ्ञं इमे. योपि निब्बत्तको सो न विज्जति.

‘‘न च केनचि कोचि हायति, गन्धब्बा च इमे हि सब्बसो;

पुरिमेहि पभाविका इमे, येपि पभाविका ते पुरे मता;

पुरिमापि च पच्छिमापि च, अञ्ञमञ्ञं न कदाचि मद्दसंसू’’ति.

एवं सरसपरित्तताय अप्पकं जीवितं.

अपि च चातुमहाराजिकानं देवानं जीवितं उपादाय मनुस्सानं अप्पकं जीवितं परित्तकं जीवितं थोकं [थोककं (क.)] जीवितं खणिकं जीवितं लहुकं जीवितं इत्तरं जीवितं अनद्धनीयं जीवितं नचिरट्ठितिकं जीवितं. तावतिंसानं देवानं…पे… यामानं देवानं… तुसितानं देवानं… निम्मानरतीनं देवानं… परनिम्मितवसवत्तीनं देवानं… ब्रह्मकायिकानं देवानं जीवितं उपादाय मनुस्सानं अप्पकं जीवितं परित्तकं जीवितं थोकं जीवितं खणिकं जीवितं लहुकं जीवितं इत्तरं जीवितं अनद्धनीयं जीवितं नचिरट्ठितिकं जीवितं.

वुत्तञ्हेतं भगवता –

‘‘अप्पमिदं, भिक्खवे, मनुस्सानं आयु. गमनियो सम्परायो मन्ताय बोद्धब्बं, कत्तब्बं कुसलं, चरितब्बं ब्रह्मचरियं, नत्थि जातस्स अमरणं. यो, भिक्खवे, चिरं जीवति सो वस्ससतं अप्पं वा भिय्यो’’.

‘‘अप्पमायु मनुस्सानं, हीळेय्य नं सुपोरिसो;

चरेय्यादित्तसीसोव नत्थि मच्चुस्सनागमो.

‘‘अच्चयन्ति अहोरत्ता, जीवितं उपरुज्झति;

आयु खिय्यति मच्चानं, कुन्नदीनंव ओदक’’न्ति.

अप्पञ्हिदं जीवितमाहु धीराति. धीराति धीरा, धितिमाति धीरा, धितिसम्पन्नाति धीरा, धीकतपापाति धीरा. धी वुच्चति पञ्ञा. या पञ्ञा पजानना विचयो पविचयो धम्मविचयो सल्लक्खणा उपलक्खणा पच्चुपलक्खणा पण्डिच्चं कोसल्लं नेपुञ्ञं वेभब्या चिन्ता उपपरिक्खा भूरि मेधा परिणायिका विपस्सना सम्पजञ्ञं पतोदो पञ्ञा पञ्ञिन्द्रियं पञ्ञाबलं पञ्ञासत्थं पञ्ञापासादो पञ्ञाआलोको पञ्ञाओभासो पञ्ञापज्जोतो पञ्ञारतनं अमोहो धम्मविचयो सम्मादिट्ठि, ताय पञ्ञाय समन्नागतत्ता धीरा. अपि च खन्धधीरा धातुधीरा आयतनधीरा, पटिच्चसमुप्पादधीरा सतिपट्ठानधीरा सम्मप्पधानधीरा इद्धिपादधीरा, इन्द्रियधीरा बलधीरा बोज्झङ्गधीरा मग्गधीरा फलधीरा निब्बानधीरा. ते धीरा एवमाहंसु – ‘‘मनुस्सानं अप्पकं जीवितं, परित्तकं जीवितं, थोकं जीवितं, खणिकं जीवितं, लहुकं जीवितं, इत्तरं जीवितं, अनद्धनीयं जीवितं, नचिरट्ठितिकं जीवित’’न्ति. एवमाहंसु एवं कथेन्ति एवं भणन्ति एवं दीपयन्ति एवं वोहरन्तीति – अप्पञ्हिदं जीवितमाहु धीरा.

तेनाह भगवा –

‘‘तस्मा हि सिक्खेथ इधेव जन्तु, यं किञ्चि जञ्ञा विसमन्ति लोके;

न तस्स हेतू विसमं चरेय्य, अप्पञ्हिदं जीवितमाहु धीरा’’ति.

११.

पस्सामि लोके परिफन्दमानं, पजं इमं तण्हगतं भवेसु;

हीना नरा मच्चुमुखे लपन्ति, अवीततण्हासे भवाभवेसु.

पस्सामि लोके परिफन्दमानन्ति. पस्सामीति मंसचक्खुनापि पस्सामि, दिब्बचक्खुनापि पस्सामि, पञ्ञाचक्खुनापि पस्सामि, बुद्धचक्खुनापि पस्सामि, समन्तचक्खुनापि पस्सामि दक्खामि ओलोकेमि निज्झायामि उपपरिक्खामि. लोकेति अपायलोके मनुस्सलोके देवलोके खन्धलोके धातुलोके आयतनलोके.

परिफन्दमानन्ति तण्हाफन्दनाय फन्दमानं, दिट्ठिफन्दनाय फन्दमानं, किलेसफन्दनाय फन्दमानं, पयोगफन्दनाय फन्दमानं, विपाकफन्दनाय फन्दमानं, दुच्चरितफन्दनाय फन्दमानं, रत्तं रागेन फन्दमानं, दुट्ठं दोसेन फन्दमानं, मूळ्हं मोहेन फन्दमानं, विनिबद्धं मानेन फन्दमानं, परामट्ठं दिट्ठिया फन्दमानं, विक्खेपगतं उद्धच्चेन फन्दमानं, अनिट्ठङ्गतं विचिकिच्छाय फन्दमानं, थामगतं अनुसयेहि फन्दमानं, लाभेन फन्दमानं, अलाभेन फन्दमानं, यसेन फन्दमानं, अयसेन फन्दमानं, पसंसाय फन्दमानं, निन्दाय फन्दमानं, सुखेन फन्दमानं, दुक्खेन फन्दमानं, जातिया फन्दमानं, जराय फन्दमानं, ब्याधिना फन्दमानं, मरणेन फन्दमानं, सोकपरिदेवदुक्खदोमनस्सुपायासेहि फन्दमानं, नेरयिकेन दुक्खेन फन्दमानं, तिरच्छानयोनिकेन दुक्खेन फन्दमानं, पेत्तिविसयिकेन दुक्खेन फन्दमानं, मानुसिकेन दुक्खेन फन्दमानं, गब्भोक्कन्तिमूलकेन दुक्खेन फन्दमानं, गब्भे ठितिमूलकेन दुक्खेन फन्दमानं, गब्भा वुट्ठानमूलकेन दुक्खेन फन्दमानं, जातस्सूपनिबन्धकेन दुक्खेन फन्दमानं, जातस्स पराधेय्यकेन दुक्खेन फन्दमानं, अत्तूपक्कमेन दुक्खेन फन्दमानं, परूपक्कमेन दुक्खेन फन्दमानं, दुक्खदुक्खेन फन्दमानं, सङ्खारदुक्खेन फन्दमानं, विपरिणामदुक्खेन फन्दमानं, चक्खुरोगेन दुक्खेन फन्दमानं, सोतरोगेन दुक्खेन फन्दमानं, घानरोगेन दुक्खेन…पे… जिव्हारोगेन… कायरोगेन… सीसरोगेन… कण्णरोगेन… मुखरोगेन… दन्तरोगेन… कासेन… सासेन… पिनासेन… दाहेन… जरेन… कुच्छिरोगेन… मुच्छाय… पक्खन्दिकाय… सूलाय … विसुचिकाय… कुट्ठेन… गण्डेन… किलासेन… सोसेन… अपमारेन… दद्दुया… कण्डुया… कच्छुया… रखसाय… वितच्छिकाय… लोहितेन… पित्तेन… मधुमेहेन… अंसाय… पिळकाय… भगन्दलेन [भगन्दलाय (स्या.)] … पित्तसमुट्ठानेन आबाधेन… सेम्हसमुट्ठानेन आबाधेन… वातसमुट्ठानेन आबाधेन… सन्निपातिकेन आबाधेन… उतुपरिणामजेन आबाधेन… विसमपरिहारजेन आबाधेन… ओपक्कमिकेन आबाधेन … कम्मविपाकजेन आबाधेन… सीतेन… उण्हेन… जिघच्छाय… पिपासाय … उच्चारेन… पस्सावेन… डंसमकसवातातपसरीसपसम्फस्सेन दुक्खेन… मातुमरणेन दुक्खेन… पितुमरणेन दुक्खेन… भातुमरणेन दुक्खेन… भगिनिमरणेन दुक्खेन… पुत्तमरणेन दुक्खेन… धीतुमरणेन दुक्खेन… ञातिब्यसनेन… भोगब्यसनेन… रोगब्यसनेन… सीलब्यसनेन… दिट्ठिब्यसनेन दुक्खेन फन्दमानं सम्फन्दमानं विप्फन्दमानं वेधमानं पवेधमानं सम्पवेधमानं पस्सामि दक्खामि ओलोकेमि निज्झायामि उपपरिक्खामीति – पस्सामि लोके परिफन्दमानं.

पजं इमं तण्हगतं भवेसूति. पजाति सत्ताधिवचनं. तण्हाति रूपतण्हा, सद्दतण्हा, गन्धतण्हा, रसतण्हा, फोट्ठब्बतण्हा, धम्मतण्हा. तण्हगतन्ति तण्हागतं तण्हानुगतं तण्हायानुसटं तण्हायासन्नं तण्हाय पातितं अभिभूतं परियादिन्नचित्तं. भवेसूति कामभवे रूपभवे अरूपभवेति – पजं इमं तण्हगतं भवेसु.

हीना नरा मच्चुमुखे लपन्तीति. हीना नराति हीना नरा हीनेन कायकम्मेन समन्नागताति हीना नरा, हीनेन वचीकम्मेन समन्नागताति हीना नरा, हीनेन मनोकम्मेन समन्नागताति हीना नरा, हीनेन पाणातिपातेन समन्नागताति हीना नरा, हीनेन अदिन्नादानेन…पे… हीनेन कामेसुमिच्छाचारेन… हीनेन मुसावादेन… हीनाय पिसुणाय वाचाय… हीनाय फरुसाय वाचाय… हीनेन सम्फप्पलापेन… हीनाय अभिज्झाय… हीनेन ब्यापादेन… हीनाय मिच्छादिट्ठिया… हीनेहि सङ्खारेहि… हीनेहि पञ्चहि कामगुणेहि नीवरणेहि… हीनाय चेतनाय… हीनाय पत्थनाय… हीनाय पणिधिया समन्नागताति हीना नरा हीना निहीना ओहीना ओमका लामका छतुक्का परित्ताति – हीना नरा. मच्चुमुखे लपन्तीति. मच्चुमुखेति मारमुखे मरणमुखे, मच्चुप्पत्ता मच्चुसम्पत्ता मच्चूपागता, मारप्पत्ता मारसम्पत्ता मारूपागता, मरणप्पत्ता मरणसम्पत्ता मरणूपागता लपन्ति लालपन्ति सोचन्ति किलमन्ति परिदेवन्ति उरत्ताळिं कन्दन्ति सम्मोहं आपज्जन्तीति – हीना नरा मच्चुमुखे लपन्ति.

अवीततण्हासे भवाभवेसूति. तण्हाति रूपतण्हा…पे… धम्मतण्हा. भवाभवेसूति भवाभवे कम्मभवे पुनब्भवे कामभवे, कम्मभवे कामभवे पुनब्भवे रूपभवे, कम्मभवे रूपभवे पुनब्भवे अरूपभवे, कम्मभवे अरूपभवे पुनब्भवे पुनप्पुनब्भवे, पुनप्पुनगतिया पुनप्पुनउपपत्तिया पुनप्पुनपटिसन्धिया पुनप्पुनअत्तभावाभिनिब्बत्तिया, अवीततण्हा अविगततण्हा अचत्ततण्हा अवन्ततण्हा. अमुत्ततण्हा अप्पहीनतण्हा अप्पटिनिस्सट्ठतण्हाति – अवीततण्हासे भवाभवेसु.

तेनाह भगवा –

‘‘पस्सामि लोके परिफन्दमानं, पजं इमं तण्हगतं भवेसु;

हीना नरा मच्चुमुखे लपन्ति, अवीततण्हासे भवाभवेसू’’ति.

१२.

ममायिते पस्सथ फन्दमाने, मच्छेव [मच्छोव (सी.)] अप्पोदके खीणसोते;

एतम्पि दिस्वा अममो चरेय्य, भवेसु आसत्तिमकुब्बमानो.

ममायिते पस्सथ फन्दमानेति. ममत्ताति द्वे ममत्ता – तण्हाममत्तञ्च दिट्ठिममत्तञ्च. कतमं तण्हाममत्तं? यावता तण्हासङ्खातेन सीमकतं मरियादिकतं ओधिकतं परियन्तकतं परिग्गहितं ममायितं. इदं ममं, एतं ममं, एत्तकं ममं, एत्तावता ममं, मम रूपा सद्दा गन्धा रसा फोट्ठब्बा, अत्थरणा पावुरणा दासिदासा अजेळका कुक्कुटसूकरा हत्थिगवास्सवळवा खेत्तं वत्थु हिरञ्ञं सुवण्णं गामनिगमराजधानियो रट्ठञ्च जनपदो च कोसो च कोट्ठागारञ्च, केवलम्पि महापथविं तण्हावसेन ममायति. यावता अट्ठसतं तण्हाविचरितं, इदं तण्हाममत्तं.

कतमं दिट्ठिममत्तं? वीसतिवत्थुका सक्कायदिट्ठि, दसवत्थुका मिच्छादिट्ठि, दसवत्थुका अन्तग्गाहिका दिट्ठि; या एवरूपा दिट्ठि दिट्ठिगतं दिट्ठिगहनं दिट्ठिकन्तारो दिट्ठिविसूकायिकं दिट्ठिविप्फन्दिकं दिट्ठिसञ्ञोजनं गाहो पटिग्गाहो अभिनिवेसो परामासो कुम्मग्गो मिच्छापथो मिच्छत्तं तित्थायतनं विपरियेसग्गाहो विपरीतग्गाहो विपल्लासग्गाहो मिच्छागाहो ‘‘अयाथावकस्मिं याथावक’’न्ति गाहो. यावता द्वासट्ठिदिट्ठिगतानि, इदं दिट्ठिममत्तं. ममायिते पस्सथ फन्दमानेति ममायितं वत्थुं अच्छेदसंकिनोपि फन्दन्ति, अच्छिन्दन्तेपि फन्दन्ति, अच्छिन्नेपि फन्दन्ति, ममायितं वत्थुं विपरिणामसंकिनोपि फन्दन्ति, विपरिणामन्तेपि फन्दन्ति, विपरिणतेपि फन्दन्ति पफन्दन्ति सम्फन्दन्ति विप्फन्दन्ति वेधन्ति [वेधेन्ति (स्या.)] पवेधन्ति सम्पवेधन्ति. एवं फन्दमाने पफन्दमाने सम्फन्दमाने विप्फन्दमाने वेधमाने पवेधमाने सम्पवेधमाने पस्सथ दक्खथ ओलोकेथ निज्झायथ उपपरिक्खथाति – ममायिते पस्सथ फन्दमाने.

मच्छेव अप्पोदके खीणसोतेति. यथा मच्छा अप्पोदके परित्तोदके उदकपरियादाने काकेहि वा कुललेहि वा बलाकाहि वा परिपातियमाना उक्खिपियमाना खज्जमाना फन्दन्ति पफन्दन्ति सम्फन्दन्ति विप्फन्दन्ति वेधन्ति पवेधन्ति सम्पवेधन्ति; एवमेव पजा ममायितं वत्थुं अच्छेदसंकिनोपि फन्दन्ति, अच्छिन्दन्तेपि फन्दन्ति, अच्छिन्नेपि फन्दन्ति, ममायितं वत्थुं विपरिणामसंकिनोपि फन्दन्ति, विपरिणामन्तेपि फन्दन्ति, विपरिणतेपि फन्दन्ति पफन्दन्ति सम्फन्दन्ति विप्फन्दन्ति वेधन्ति पवेधन्ति सम्पवेधन्तीति – मच्छेव अप्पोदके खीणसोते.

एतम्पि दिस्वा अममो चरेय्याति. एतं आदीनवं दिस्वा पस्सित्वा तुलयित्वा तीरयित्वा [तिरयित्वा (क.)] विभावयित्वा विभूतं कत्वा ममत्तेसूति – एतम्पि दिस्वा. अममो चरेय्याति ममत्ताति द्वे ममत्ता – तण्हाममत्तञ्च दिट्ठिममत्तञ्च…पे… इदं तण्हाममत्तं…पे… इदं दिट्ठिममत्तं. तण्हाममत्तं पहाय दिट्ठिममत्तं पटिनिस्सज्जित्वा चक्खुं अममायन्तो सोतं अममायन्तो घानं अममायन्तो जिव्हं अममायन्तो कायं अममायन्तो मनं अममायन्तो रूपे… सद्दे… गन्धे… रसे… फोट्ठब्बे… धम्मे… कुलं… गणं… आवासं… लाभं… यसं… पसंसं… सुखं… चीवरं… पिण्डपातं… सेनासनं… गिलानपच्चयभेसज्जपरिक्खारं… कामधातुं… रूपधातुं… अरूपधातुं… कामभवं… रूपभवं… अरूपभवं… सञ्ञाभवं… असञ्ञाभवं… नेवसञ्ञानासञ्ञाभवं… एकवोकारभवं… चतुवोकारभवं… पञ्चवोकारभवं… अतीतं… अनागतं… पच्चुप्पन्नं… दिट्ठसुतमुतविञ्ञातब्बे धम्मे अममायन्तो अगण्हन्तो अपरामसन्तो अनभिनिविसन्तो चरेय्य विहरेय्य इरियेय्य वत्तेय्य पालेय्य यपेय्य यापेय्याति – एतम्पि दिस्वा अममो चरेय्य.

भवेसु आसत्तिमकुब्बमानोति. भवेसूति कामभवे रूपभवे अरूपभवे. आसत्ति वुच्चति तण्हा. यो रागो सारागो…पे… अभिज्झा लोभो अकुसलमूलं. भवेसु आसत्तिमकुब्बमानोति. भवेसु आसत्तिं अकुब्बमानो, छन्दं पेमं रागं खन्तिं अकुब्बमानो अजनयमानो असञ्जनयमानो अनिब्बत्तयमानो अनभिनिब्बत्तयमानोति – भवेसु आसत्तिमकुब्बमानो.

तेनाह भगवा –

‘‘ममायिते पस्सथ फन्दमाने, मच्छेव अप्पोदके खीणसोते;

एतम्पि दिस्वा अममो चरेय्य, भवेसु आसत्तिमकुब्बमानो’’ति.

१३.

उभोसु अन्तेसु विनेय्य छन्दं, फस्सं परिञ्ञाय अनानुगिद्धो;

यदत्तगरही तदकुब्बमानो, न लिम्पती [न लिप्पति (सी.)] दिट्ठसुतेसु धीरो.

उभोसु अन्तेसु विनेय्य छन्दन्ति. अन्ताति फस्सो एको अन्तो फस्ससमुदयो दुतियो अन्तो, अतीतो एको अन्तो अनागतो दुतियो अन्तो, सुखा वेदना एको अन्तो दुक्खा वेदना दुतियो अन्तो, नामं एको अन्तो रूपं दुतियो अन्तो, छ अज्झत्तिकानि आयतनानि एको अन्तो छ बाहिरानि आयतनानि दुतियो अन्तो, सक्कायो एको अन्तो सक्कायसमुदयो दुतियो अन्तो. छन्दोति यो कामेसु कामच्छन्दो कामरागो कामनन्दी कामतण्हा कामस्नेहो कामपरिळाहो काममुच्छा कामज्झोसानं कामोघो कामयोगो कामुपादानं कामच्छन्दनीवरणं. उभोसु अन्तेसु विनेय्य छन्दन्ति उभोसु अन्तेसु छन्दं विनेय्य पटिविनेय्य पजहेय्य विनोदेय्य ब्यन्तिं करेय्य अनभावं गमेय्याति – उभोसु अन्तेसु विनेय्य छन्दं.

फस्सं परिञ्ञाय अनानुगिद्धोति. फस्सोति चक्खुसम्फस्सो सोतसम्फस्सो घानसम्फस्सो जिव्हासम्फस्सो कायसम्फस्सो मनोसम्फस्सो, अधिवचनसम्फस्सो, पटिघसम्फस्सो, सुखवेदनीयो सम्फस्सो दुक्खवेदनीयो सम्फस्सो अदुक्खमसुखवेदनीयो सम्फस्सो, कुसलो फस्सो अकुसलो फस्सो अब्याकतो फस्सो, कामावचरो फस्सो रूपावचरो फस्सो अरूपावचरो फस्सो, सुञ्ञतो फस्सो अनिमित्तो फस्सो अप्पणिहितो फस्सो, लोकियो फस्सो लोकुत्तरो फस्सो, अतीतो फस्सो अनागतो फस्सो पच्चुप्पन्नो फस्सो, यो एवरूपो फस्सो फुसना सम्फुसना सम्फुसितत्तं – अयं वुच्चति फस्सो.

फस्सं परिञ्ञायाति फस्सं तीहि परिञ्ञाहि परिजानित्वा – ञातपरिञ्ञाय, तीरणपरिञ्ञाय [तिरणपरिञ्ञाय (स्या.)], पहानपरिञ्ञाय. कतमा ञातपरिञ्ञा? फस्सं जानाति – अयं चक्खुसम्फस्सो, अयं सोतसम्फस्सो, अयं घानसम्फस्सो, अयं जिव्हासम्फस्सो, अयं कायसम्फस्सो, अयं मनोसम्फस्सो, अयं अधिवचनसम्फस्सो, अयं पटिघसम्फस्सो, अयं सुखवेदनीयो फस्सो, अयं दुक्खवेदनीयो फस्सो, अयं अदुक्खमसुखवेदनीयो फस्सो, अयं कुसलो फस्सो, अयं अकुसलो फस्सो, अयं अब्याकतो फस्सो, अयं कामावचरो फस्सो, अयं रूपावचरो फस्सो, अयं अरूपावचरो फस्सो, अयं सुञ्ञतो फस्सो, अयं अनिमित्तो फस्सो, अयं अप्पणिहितो फस्सो, अयं लोकियो फस्सो, अयं लोकुत्तरो फस्सो, अयं अतीतो फस्सो, अयं अनागतो फस्सो, अयं पच्चुप्पन्नो फस्सोति जानाति पस्सति – अयं ञातपरिञ्ञा.

कतमा तीरणपरिञ्ञा? एवं ञातं कत्वा फस्सं तीरेति. अनिच्चतो दुक्खतो रोगतो गण्डतो सल्लतो अघतो आबाधतो परतो पलोकतो ईतितो उपद्दवतो भयतो उपसग्गतो चलतो पभङ्गुतो अधुवतो अताणतो अलेणतो असरणतो रित्ततो तुच्छतो सुञ्ञतो अनत्ततो आदीनवतो विपरिणामधम्मतो असारकतो अघमूलतो वधकतो विभवतो सासवतो सङ्खततो मारामिसतो जातिजराब्याधिमरणधम्मतो सोकपरिदेवदुक्खदोमनस्सुपायासधम्मतो संकिलेसधम्मतो समुदयतो अत्थङ्गमतो अस्सादतो आदीनवतो निस्सरणतो तीरेति – अयं तीरणपरिञ्ञा.

कतमा पहानपरिञ्ञा? एवं तीरयित्वा फस्से छन्दरागं पजहति विनोदेति ब्यन्तिं करोति अनभावं गमेति. वुत्तञ्हेतं भगवता – ‘‘यो, भिक्खवे, फस्सेसु छन्दरागो तं पजहथ. एवं सो फस्सो पहीनो भविस्सति उच्छिन्नमूलो तालावत्थुकतो अनभावं कतो आयतिं अनुप्पादधम्मो’’ति – अयं पहानपरिञ्ञा. फस्सं परिञ्ञायाति. फस्सं इमाहि तीहि परिञ्ञाहि परिजानित्वा. अनानुगिद्धोति. गेधोवुच्चति तण्हा. यो रागो सारागो…पे… अभिज्झा लोभो अकुसलमूलं. यस्सेसो गेधो पहीनो समुच्छिन्नो वूपसन्तो पटिपस्सद्धो अभब्बुप्पत्तिको ञाणग्गिना दड्ढो, सो वुच्चति अगिद्धो. सो रूपे अगिद्धो सद्दे अगिद्धो गन्धे अगिद्धो रसे अगिद्धो फोट्ठब्बे अगिद्धो कुले… गणे… आवासे… लाभे… यसे… पसंसाय… सुखे… चीवरे… पिण्डपाते… सेनासने… गिलानपच्चयभेसज्जपरिक्खारे अगिद्धो कामधातुया… रूपधातुया… अरूपधातुया… कामभवे… रूपभवे… अरूपभवे… सञ्ञाभवे… असञ्ञाभवे… नेवसञ्ञानासञ्ञाभवे… एकवोकारभवे… चतुवोकारभवे… पञ्चवोकारभवे… अतीते… अनागते… पच्चुप्पन्ने… दिट्ठसुतमुतविञ्ञातब्बेसु धम्मेसु अगिद्धो अगधितो अमुच्छितो अनज्झापन्नो वीतगेधो विगतगेधो चत्तगेधो वन्तगेधो मुत्तगेधो पहीनगेधो पटिनिस्सट्ठगेधो वीतरागो विगतरागो चत्तरागो वन्तरागो मुत्तरागो पहीनरागो पटिनिस्सट्ठरागो निच्छातो निब्बुतो सीतिभूतो सुखपटिसंवेदी ब्रह्मभूतेन अत्तना विहरतीति – फस्सं परिञ्ञाय अनानुगिद्धो.

यदत्तगरही तदकुब्बमानोति. यदन्ति यं. अत्तगरहीति द्वीहि कारणेहि अत्तानं गरहति – कतत्ता च अकतत्ता च. कथं कतत्ता च अकतत्ता च अत्तानं गरहति? कतं मे कायदुच्चरितं, अकतं मे कायसुचरितन्ति – अत्तानं गरहति. कतं मे वचीदुच्चरितं, अकतं मे वचीसुचरितन्ति – अत्तानं गरहति. कतं मे मनोदुच्चरितं, अकतं मे मनोसुचरितन्ति – अत्तानं गरहति. कतो मे पाणातिपातो, अकता मे पाणातिपाता वेरमणीति – अत्तानं गरहति. कतं मे अदिन्नादानं, अकता मे अदिन्नादाना वेरमणीति – अत्तानं गरहति. कतो मे कामेसुमिच्छाचारो, अकता मे कामेसुमिच्छाचारा वेरमणीति – अत्तानं गरहति. कतो मे मुसावादो, अकता मे मुसावादा वेरमणीति – अत्तानं गरहति. कता मे पिसुणा वाचा, अकता मे पिसुणाय वाचाय वेरमणीति – अत्तानं गरहति. कता मे फरुसा वाचा, अकता मे फरुसाय वाचाय वेरमणीति – अत्तानं गरहति. कतो मे सम्फप्पलापो, अकता मे सम्फप्पलापा वेरमणीति – अत्तानं गरहति. कता मे अभिज्झा, अकता मे अनभिज्झाति – अत्तानं गरहति. कतो मे ब्यापादो, अकतो मे अब्यापादोति – अत्तानं गरहति. कता मे मिच्छादिट्ठि, अकता मे सम्मादिट्ठीति – अत्तानं गरहति. एवं कतत्ता च अकतत्ता च अत्तानं गरहति. अथ वा, सीलेसुम्हि न परिपूरकारीति – अत्तानं गरहति. इन्द्रियेसुम्हि अगुत्तद्वारोति – अत्तानं गरहति. भोजनेम्हि [भोजने (स्या.)] अमत्तञ्ञूति – अत्तानं गरहति. जागरियं अननुयुत्तोति – अत्तानं गरहति. सतिसम्पजञ्ञेन असमन्नागतोति – अत्तानं गरहति. अभाविता मे चत्तारो सतिपट्ठानाति – अत्तानं गरहति. अभाविता मे चत्तारो सम्मप्पधानाति – अत्तानं गरहति. अभाविता मे चत्तारो इद्धिपादाति – अत्तानं गरहति. अभावितानि मे पञ्चिन्द्रियानीति – अत्तानं गरहति. अभावितानि मे पञ्च बलानीति – अत्तानं गरहति. अभाविता मे सत्त बोज्झङ्गाति – अत्तानं गरहति. अभावितो मे अरियो अट्ठङ्गिको मग्गोति – अत्तानं गरहति. दुक्खं मे अपरिञ्ञातन्ति – अत्तानं गरहति. समुदयो मे अप्पहीनोति – अत्तानं गरहति. मग्गो मे अभावितोति – अत्तानं गरहति. निरोधो मे असच्छिकतोति – अत्तानं गरहति. एवं कतत्ता च अकतत्ता च अत्तानं गरहति. एवं अत्तगरहितं कम्मं अकुब्बमानो अजनयमानो असञ्जनयमानो अनिब्बत्तयमानो अनभिनिब्बत्तयमानोति – यदत्तगरही तदकुब्बमानो. न लिम्पती दिट्ठसुतेसु धीरोति. लेपोति द्वे लेपा – तण्हालेपो च दिट्ठिलेपो च…पे… अयं तण्हालेपो…पे… अयं दिट्ठिलेपो. धीरोति पण्डितो पञ्ञवा बुद्धिमा ञाणी विभावी मेधावी. धीरो तण्हालेपं पहाय दिट्ठिलेपं पटिनिस्सज्जित्वा दिट्ठे न लिम्पति, सुते न लिम्पति, मुते न लिम्पति, विञ्ञाते न लिम्पति, न पलिम्पति [न संलिम्पति (स्या.)], न उपलिम्पति. अलित्तो अपलित्तो [असंलित्तो (स्या.)] अनुपलित्तो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – न लिम्पती दिट्ठसुतेसु धीरोति.

तेनाह भगवा –

‘‘उभोसु अन्तेसु विनेय्य छन्दं, फस्सं परिञ्ञाय अनानुगिद्धो;

यदत्तगरही तदकुब्बमानो, न लिम्पती दिट्ठसुतेसु धीरो’’ति.

१४.

सञ्ञं परिञ्ञा वितरेय्य ओघं, परिग्गहेसु मुनि नोपलित्तो;

अब्बूळ्हसल्लो चरमप्पमत्तो, नासीसती लोकमिमं परञ्च.

सञ्ञं परिञ्ञा वितरेय्य ओघन्ति. सञ्ञाति कामसञ्ञा ब्यापादसञ्ञा विहिंसासञ्ञा नेक्खम्मसञ्ञा अब्यापादसञ्ञा अविहिंसासञ्ञा रूपसञ्ञा सद्दसञ्ञा गन्धसञ्ञा रससञ्ञा फोट्ठब्बसञ्ञा धम्मसञ्ञा – या एवरूपा सञ्ञा सञ्जानना सञ्जानितत्तं – अयं वुच्चति सञ्ञा. सञ्ञं परिञ्ञाति सञ्ञं तीहि परिञ्ञाहि परिजानित्वा – ञातपरिञ्ञाय, तीरणपरिञ्ञाय, पहानपरिञ्ञाय.

कतमा ञातपरिञ्ञा? सञ्ञं जानाति – अयं कामसञ्ञा, अयं ब्यापादसञ्ञा, अयं विहिंसासञ्ञा, अयं नेक्खम्मसञ्ञा, अयं अब्यापादसञ्ञा, अयं अविहिंसासञ्ञा, अयं रूपसञ्ञा, अयं सद्दसञ्ञा, अयं गन्धसञ्ञा, अयं रससञ्ञा, अयं फोट्ठब्बसञ्ञा, अयं धम्मसञ्ञाति जानाति पस्सति – अयं ञातपरिञ्ञा.

कतमा तीरणपरिञ्ञा? एवं ञातं कत्वा सञ्ञं तीरेति. अनिच्चतो दुक्खतो रोगतो गण्डतो सल्लतो अघतो आबाधतो परतो पलोकतो ईतितो उपद्दवतो भयतो उपसग्गतो चलतो पभङ्गुतो…पे… समुदयतो अत्थङ्गमतो अस्सादतो आदीनवतो निस्सरणतो तीरेति – अयं तीरणपरिञ्ञा.

कतमा पहानपरिञ्ञा? एवं तीरयित्वा सञ्ञाय छन्दरागं पजहति विनोदेति अनभावं गमेति. वुत्तम्पि हेतं भगवता – ‘‘यो, भिक्खवे, सञ्ञाय छन्दरागो, तं पजहथ. एवं सा सञ्ञा पहीना भविस्सति उच्छिन्नमूला तालावत्थुकता अनभावं कता आयतिं अनुप्पादधम्मा’’ति – अयं पहानपरिञ्ञा. सञ्ञं परिञ्ञाति सञ्ञं इमाहि तीहि परिञ्ञाहि परिजानित्वा. वितरेय्य ओघन्ति कामोघं भवोघं दिट्ठोघं अविज्जोघं तरेय्य उत्तरेय्य पतरेय्य समतिक्कमेय्य वीतिवत्तेय्याति – सञ्ञं परिञ्ञा वितरेय्य ओघं.

परिग्गहेसु मुनि नोपलित्तोति. परिग्गहाति द्वे परिग्गहा – तण्हापरिग्गहो च दिट्ठिपरिग्गहो च…पे… अयं तण्हापरिग्गहो…पे… अयं दिट्ठिपरिग्गहो. मुनीति. मोनं वुच्चति ञाणं. या पञ्ञा पजानना…पे… अमोहो धम्मविचयो सम्मादिट्ठि, तेन ञाणेन समन्नागतो मुनि मोनप्पत्तोति. तीणि मोनेय्यानि – कायमोनेय्यं, वचीमोनेय्यं, मनोमोनेय्यं.

कतमं कायमोनेय्यं? तिविधकायदुच्चरितानं पहानं कायमोनेय्यं, तिविधं कायसुचरितं कायमोनेय्यं, कायारम्मणे ञाणं कायमोनेय्यं, कायपरिञ्ञा कायमोनेय्यं, परिञ्ञासहगतो मग्गो कायमोनेय्यं, काये छन्दरागस्स पहानं कायमोनेय्यं, कायसङ्खारनिरोधो चतुत्थज्झानसमापत्ति कायमोनेय्यं – इदं कायमोनेय्यं.

कतमं वचीमोनेय्यं? चतुब्बिधवचीदुच्चरितानं पहानं वचीमोनेय्यं, चतुब्बिधं वचीसुचरितं वचीमोनेय्यं, वाचारम्मणे ञाणं वचीमोनेय्यं, वाचापरिञ्ञा वचीमोनेय्यं, परिञ्ञासहगतो मग्गो वचीमोनेय्यं, वाचाय छन्दरागस्स पहानं वचीमोनेय्यं, वचीसङ्खारनिरोधो दुतियज्झानसमापत्ति वचीमोनेय्यं – इदं वचीमोनेय्यं.

कतमं मनोमोनेय्यं? तिविधमनोदुच्चरितानं पहानं मनोमोनेय्यं, तिविधं मनोसुचरितं मनोमोनेय्यं, चित्तारम्मणे ञाणं मनोमोनेय्यं, चित्तपरिञ्ञा मनोमोनेय्यं, परिञ्ञासहगतो मग्गो मनोमोनेय्यं, चित्ते छन्दरागस्स पहानं मनोमोनेय्यं, चित्तसङ्खारनिरोधो सञ्ञावेदयितनिरोधं मनोमोनेय्यं – इदं मनोमोनेय्यं.

‘‘कायमुनिं वाचामुनिं, मनोमुनिमनासवं;

मुनिं मोनेय्यसम्पन्नं, आहु सब्बप्पहायिनं.

‘‘कायमुनिं वाचामुनिं, मनोमुनिमनासवं;

मुनिं मोनेय्यसम्पन्नं, आहु निन्हातपापक’’न्ति [निंन्हातपापकन्ति (स्या.)].

इमेहि तीहि मोनेय्येहि धम्मेहि समन्नागता छ मुनिनो [छ मुनयो (स्या.)] – अगारमुनिनो, अनगारमुनिनो, सेखमुनिनो, असेखमुनिनो, पच्चेकमुनिनो, मुनिमुनिनोति. कतमे अगारमुनिनो? ये ते अगारिका दिट्ठपदा विञ्ञातसासना – इमे अगारमुनिनो. कतमे अनगारमुनिनो? ये ते पब्बजिता दिट्ठपदा विञ्ञातसासना – इमे अनगारमुनिनो. सत्त सेखा सेखमुनिनो. अरहन्तो असेखमुनिनो. पच्चेकबुद्धा पच्चेकमुनिनो. मुनिमुनिनो वुच्चन्ति तथागता अरहन्तो सम्मासम्बुद्धा.

‘‘न मोनेन मुनि होति, मूळ्हरूपो अविद्दसु;

यो च तुलंव पग्गय्ह, वरमादाय पण्डितो.

‘‘पापानि परिवज्जेति, स मुनि तेन सो मुनि;

यो मुनाति उभो लोके, मुनि तेन पवुच्चति.

‘‘असतञ्च सतञ्च ञत्वा धम्मं, अज्झत्तं बहिद्धा च सब्बलोके;

देवमनुस्सेहि पूजितो यो, सङ्गजालमतिच्च सो मुनी’’ति.

लेपाति द्वे लेपा – तण्हालेपो च दिट्ठिलेपो च…पे… अयं तण्हालेपो…पे… अयं दिट्ठिलेपो. मुनि तण्हालेपं पहाय दिट्ठिलेपं पटिनिस्सज्जित्वा परिग्गहेसु न लिम्पति न पलिम्पति न उपलिम्पति. अलित्तो अपलित्तो अनुपलित्तो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – परिग्गहेसु मुनि नोपलित्तो.

अब्बूळ्हसल्लो चरमप्पमत्तोति. सल्लन्ति सत्त सल्लानि – रागसल्लं, दोससल्लं, मोहसल्लं, मानसल्लं, दिट्ठिसल्लं, सोकसल्लं, कथंकथासल्लं [दुच्चरितसल्लं (सी.)]. यस्सेते सल्ला पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढा, सो वुच्चति अब्बूळ्हसल्लो अब्बहितसल्लो उद्धतसल्लो समुद्धतसल्लो उप्पाटितसल्लो समुप्पाटितसल्लो चत्तसल्लो वन्तसल्लो मुत्तसल्लो पहीनसल्लो पटिनिस्सट्ठसल्लो निच्छातो निब्बुतो सीतिभूतो सुखपटिसंवेदी ब्रह्मभूतेन अत्तना विहरतीति – अब्बूळ्हसल्लो.

चरन्ति चरन्तो विहरन्तो इरियन्तो वत्तन्तो पालेन्तो यपेन्तो यापेन्तो. अप्पमत्तोति सक्कच्चकारी सातच्चकारी अट्ठितकारी अनोलीनवुत्तिको अनिक्खित्तच्छन्दो अनिक्खित्तधुरो कुसलेसु धम्मेसु. ‘‘कथाहं अपरिपूरं वा सीलक्खन्धं परिपूरेय्यं, परिपूरं वा सीलक्खन्धं तत्थ तत्थ पञ्ञाय अनुग्गण्हेय्य’’न्ति यो तत्थ छन्दो च वायामो च उस्साहो च उस्सोळ्ही च अप्पटिवानि च सति च सम्पजञ्ञञ्च आतप्पं पधानं अधिट्ठानं अनुयोगो अप्पमादो कुसलेसु धम्मेसु. ‘‘कथाहं अपरिपूरं वा समाधिक्खन्धं परिपूरेय्यं, परिपूरं वा समाधिक्खन्धं तत्थ तत्थ पञ्ञाय अनुग्गण्हेय्य’’न्ति…पे… कुसलेसु धम्मेसु. ‘‘कथाहं अपरिपूरं वा पञ्ञाक्खन्धं परिपूरेय्यं… विमुत्तिक्खन्धं… विमुत्तिञाणदस्सनक्खन्धं परिपूरेय्यं, परिपूरं वा विमुत्तिञाणदस्सनक्खन्धं तत्थ तत्थ पञ्ञाय अनुग्गण्हेय्य’’न्ति यो तत्थ छन्दो च वायामो च उस्साहो च उस्सोळ्ही च अप्पटिवानि च सति च सम्पजञ्ञञ्च आतप्पं पधानं अधिट्ठानं अनुयोगो अप्पमादो कुसलेसु धम्मेसु. ‘‘कथाहं अपरिञ्ञातं वा दुक्खं परिजानेय्यं, अप्पहीने वा किलेसे पजहेय्यं, अभावितं वा मग्गं भावेय्यं, असच्छिकतं वा निरोधं सच्छिकरेय्य’’न्ति यो तत्थ छन्दो च वायामो च उस्साहो च उस्सोळ्ही च अप्पटिवानि च सति च सम्पजञ्ञञ्च आतप्पं पधानं अधिट्ठानं अनुयोगो अप्पमादो कुसलेसु धम्मेसूति – अब्बूळ्हसल्लो चरमप्पमत्तो.

नासीसती लोकमिमं परञ्चाति इमं लोकं नासीसति सकत्तभावं, परलोकं नासीसति परत्तभावं; इमं लोकं नासीसति सकरूपवेदनासञ्ञासङ्खारविञ्ञाणं, परं लोकं नासीसति पररूपवेदनासञ्ञासङ्खारविञ्ञाणं; इमं लोकं नासीसति छ अज्झत्तिकानि आयतनानि, परं लोकं नासीसति छ बाहिरानि आयतनानि; इमं लोकं नासीसति मनुस्सलोकं, परं लोकं नासीसति देवलोकं. इमं लोकं नासीसति कामधातुं, परं लोकं नासीसति रूपधातुं अरूपधातुं; इमं लोकं नासीसति कामधातुं रूपधातुं, परं लोकं नासीसति अरूपधातुं. पुन गतिं वा उपपत्तिं वा पटिसन्धिं वा भवं वा संसारं वा वट्टं वा नासीसति न इच्छति न सादियति न पत्थेति न पिहेति नातिजप्पतीति – नासीसती लोकमिमं परञ्चाति.

तेनाह भगवा –

‘‘सञ्ञं परिञ्ञा वितरेय्य ओघं, परिग्गहेसु मुनि नोपलित्तो;

अब्बूळ्हसल्लो चरमप्पमत्तो, नासीसती लोकमिमं परञ्चा’’ति.

गुहट्ठकसुत्तनिद्देसो दुतियो.

३. दुट्ठट्ठकसुत्तनिद्देसो

अथ दुट्ठट्ठकसुत्तनिद्देसं वक्खति –

१५.

वदन्ति वे दुट्ठमनापि एके, अथोपि [अञ्ञेपि ते (सी.), अञ्ञेपि (स्या.)] वे सच्चमना वदन्ति;

वादञ्च जातं मुनि नो उपेति, तस्मा मुनी नत्थि खिलो कुहिञ्चि.

वदन्ति वे दुट्ठमनापि एकेति ते तित्थिया दुट्ठमना विरुद्धमना पटिविरुद्धमना आहतमना पच्चाहतमना आघातितमना पच्चाघातितमना वदन्ति उपवदन्ति भगवन्तञ्च भिक्खुसङ्घञ्च अभूतेनाति – वदन्ति वे दुट्ठमनापि एके.

अथोपि वे सच्चमना वदन्तीति ये तेसं तित्थियानं सद्दहन्ता ओकप्पेन्ता अधिमुच्चन्ता सच्चमना सच्चसञ्ञिनो भूतमना भूतसञ्ञिनो तथमना तथसञ्ञिनो याथावमना याथावसञ्ञिनो अविपरीतमना अविपरीतसञ्ञिनो वदन्ति उपवदन्ति भगवन्तञ्च भिक्खुसङ्घञ्च अभूतेनाति – अथोपि वे सच्चमना वदन्ति.

वादञ्च जातं मुनि नो उपेतीति. सो वादो जातो होति सञ्जातो निब्बत्तो अभिनिब्बत्तो पातुभूतो परतोघोसो अक्कोसो उपवादो भगवतो च भिक्खुसङ्घस्स च अभूतेनाति – वादञ्च जातं. मुनि नो उपेतीति. मुनीति. मोनं वुच्चति ञाणं. या पञ्ञा पजानना अमोहो धम्मविचयो सम्मादिट्ठि, तेन ञाणेन समन्नागतो मुनि मोनप्पत्तो…पे… सङ्गजालमतिच्च सो मुनि. यो वादं उपेति सो द्वीहि कारणेहि वादं उपेति – कारको कारकताय वादं उपेति, अथ वा वुच्चमानो उपवदियमानो कुप्पति ब्यापज्जति पतिट्ठियति कोपञ्च दोसञ्च अप्पच्चयञ्च पातुकरोति. अकारकोम्हीति यो वादं उपेति सो इमेहि द्वीहि कारणेहि वादं उपेति. मुनि द्वीहि कारणेहि वादं न उपेति – अकारको मुनि अकारकताय वादं न उपेति, अथ वा वुच्चमानो उपवदियमानो न कुप्पति न ब्यापज्जति न पतिट्ठियति न कोपञ्च दोसञ्च अप्पच्चयञ्च पातुकरोति. अकारकोम्हीति मुनि इमेहि द्वीहि कारणेहि वादं न उपेति न उपगच्छति न गण्हाति न परामसति न अभिनिविसतीति – वादञ्च जातं मुनि नो उपेति.

तस्मा मुनी नत्थि खिलो कुहिञ्चीति. तस्माति तस्मा तंकारणा तंहेतु तप्पच्चया तंनिदानं मुनिनो आहतचित्तता खिलजाततापि नत्थि. पञ्चपि चेतोखिला नत्थि, तयोपि खिला नत्थि. रागखिलो दोसखिलो मोहखिलो नत्थि न सन्ति न संविज्जति नुपलब्भति, पहीनो समुच्छिन्नो वूपसन्तो पटिपस्सद्धो अभब्बुप्पत्तिको ञाणग्गिना दड्ढो. कुहिञ्चीति कुहिञ्चि किम्हिचि कत्थचि अज्झत्तं वा बहिद्धा वा अज्झत्तबहिद्धा वाति – तस्मा मुनी नत्थि खिलो कुहिञ्चीति.

तेनाह भगवा –

‘‘वदन्ति वे दुट्ठमनापि एके, अथोपि वे सच्चमना वदन्ति;

वादञ्च जातं मुनि नो उपेति, तस्मा मुनी नत्थि खिलो कुहिञ्ची’’ति.

१६.

सकञ्हि दिट्ठिं कथमच्चयेय्य, छन्दानुनीतो रुचिया निविट्ठो;

सयं समत्तानि पकुब्बमानो, यथा हि जानेय्य तथा वदेय्य.

सकञ्हि दिट्ठिं कथमच्चयेय्याति. यं ते तित्थिया सुन्दरिपरिब्बाजिकं हन्त्वा समणानं सक्यपुत्तियानं अवण्णं पकासयित्वा ‘‘एवं एतं लाभं यससक्कारं सम्मानं पच्चाहरिस्सामा’’ति ते एवंदिट्ठिका एवंखन्तिका एवंरुचिका एवंलद्धिका एवंअज्झासया एवंअधिप्पाया, ते नासक्खिंसु सकं दिट्ठिं सकं खन्तिं सकं रुचिं सकं लद्धिं सकं अज्झासयं सकं अधिप्पायं अतिक्कमितुं; अथ खो स्वेव अयसो ते पच्चागतोति, एवम्पि – सकञ्हि दिट्ठिं कथमच्चयेय्य. अथ वा ‘‘सस्सतो लोको, इदमेव सच्चं मोघमञ्ञ’’न्ति यो सो एवंवादो, सो सकं दिट्ठिं सकं खन्तिं सकं रुचिं सकं लद्धिं सकं अज्झासयं सकं अधिप्पायं कथं अच्चयेय्य अतिक्कमेय्य समतिक्कमेय्य वीतिवत्तेय्य? तं किस्स हेतु? तस्स सा दिट्ठि तथा समत्ता समादिन्ना गहिता परामट्ठा अभिनिविट्ठा अज्झोसिता अधिमुत्ताति. एवम्पि – सकञ्हि दिट्ठिं कथमच्चयेय्य? ‘‘असस्सतो लोको…पे… अन्तवा लोको… अनन्तवा लोको… तं जीवं तं सरीरं… अञ्ञं जीवं अञ्ञं सरीरं… होति तथागतो परं मरणा… न होति तथागतो परं मरणा… होति च न च होति तथागतो परं मरणा… नेव होति न न होति तथागतो परं मरणा, इदमेव सच्चं मोघमञ्ञ’’न्ति यो सो एवं वादो, सो सकं दिट्ठिं सकं खन्तिं सकं रुचिं सकं लद्धिं सकं अज्झासयं सकं अधिप्पायं कथं अच्चयेय्य अतिक्कमेय्य समतिक्कमेय्य वीतिवत्तेय्य? तं किस्स हेतु? तस्स सा दिट्ठि तथा समत्ता समादिन्ना गहिता परामट्ठा अभिनिविट्ठा अज्झोसिता अधिमुत्ताति. एवम्पि – सकञ्हि दिट्ठिं कथमच्चयेय्य.

छन्दानुनीतो रुचिया निविट्ठोति. छन्दानुनीतोति सकाय दिट्ठिया सकाय खन्तिया सकाय रुचिया सकाय लद्धिया यायति निय्यति वुय्हति संहरीयति. यथा हत्थियानेन वा अस्सयानेन वा रथयानेन वा गोयानेन वा अजयानेन वा मेण्डयानेन वा ओट्ठयानेन वा खरयानेन वा यायति निय्यति वुय्हति संहरीयति, एवमेव सकाय दिट्ठिया सकाय खन्तिया सकाय रुचिया सकाय लद्धिया यायति निय्यति वुय्हति संहरीयतीति – छन्दानुनीतो. रुचिया निविट्ठोति सकाय दिट्ठिया सकाय रुचिया सकाय लद्धिया निविट्ठो पतिट्ठितो अल्लीनो उपगतो अज्झोसितो अधिमुत्तोति – छन्दानुनीतो रुचिया निविट्ठो.

सयं समत्तानि पकुब्बमानोति. सयं समत्तं करोति परिपुण्णं करोति अनोमं करोति अग्गं सेट्ठं विसिट्ठं पामोक्खं उत्तमं पवरं करोति. ‘‘अयं सत्था सब्बञ्ञू’’ति सयं समत्तं करोति परिपुण्णं करोति अनोमं करोति अग्गं सेट्ठं विसिट्ठं पामोक्खं उत्तमं पवरं करोति. ‘‘अयं धम्मो स्वाक्खातो…पे… अयं गणो सुप्पटिपन्नो… अयं दिट्ठि भद्दिका… अयं पटिपदा सुपञ्ञत्ता… अयं मग्गो निय्यानिको’’ति सयं समत्तं करोति परिपुण्णं करोति अनोमं करोति अग्गं सेट्ठं विसिट्ठं पामोक्खं उत्तमं पवरं करोति जनेति सञ्जनेति निब्बत्तेति अभिनिब्बत्तेतीति – सयं समत्तानि पकुब्बमानो.

यथा हि जानेय्य तथा वदेय्याति यथा जानेय्य, तथा वदेय्य कथेय्य भणेय्य दीपयेय्य वोहरेय्य. ‘‘सस्सतो लोको, इदमेव सच्चं मोघमञ्ञ’’न्ति यथा जानेय्य, तथा वदेय्य कथेय्य भणेय्य दीपयेय्य वोहरेय्य. ‘‘असस्सतो लोको…पे… नेव होति न न होति तथागतो परं मरणा, इदमेव सच्चं मोघमञ्ञ’’न्ति यथा जानेय्य, तथा वदेय्य कथेय्य भणेय्य दीपयेय्य वोहरेय्याति – यथा हि जानेय्य तथा वदेय्य.

तेनाह भगवा –

‘‘सकञ्हि दिट्ठिं कथमच्चयेय्य, छन्दानुनीतो रुचिया निविट्ठो;

सयं समत्तानि पकुब्बमानो, यथा हि जानेय्य तथा वदेय्या’’ति.

१७.

यो अत्तनो सीलवतानि जन्तु, अनानुपुट्ठोव [अनानुपुट्ठो च (स्या.)] परेस पाव पावा (सी. स्या.) ;

अनरियधम्मं कुसला तमाहु, यो आतुमानं सयमेव पाव [पावा (सी. स्या.)] .

यो अत्तनो सीलवतानि जन्तूति. योति यो यादिसो यथायुत्तो यथाविहितो यथापकारो यंठानप्पत्तो यंधम्मसमन्नागतो खत्तियो वा ब्राह्मणो वा वेस्सो वा सुद्दो वा गहट्ठो वा पब्बजितो वा देवो वा मनुस्सो वा. सीलवतानीति अत्थि सीलञ्चेव वतञ्च [वत्तञ्च (स्या.), एवमुपरिपि], अत्थि वतं न सीलं. कतमं सीलञ्चेव वतञ्च? इध भिक्खु सीलवा होति, पातिमोक्खसंवरसंवुतो विहरति आचारगोचरसम्पन्नो अणुमत्तेसु वज्जेसु भयदस्सावी, समादाय सिक्खति सिक्खापदेसु. यो तत्थ संयमो संवरो अवीतिक्कमो, इदं सीलं. यं समादानं तं वतं. संवरट्ठेन सीलं; समादानट्ठेन वतं – इदं वुच्चति सीलञ्चेव वतञ्च. कतमं वतं, न सीलं? अट्ठ धुतङ्गानि – आरञ्ञिकङ्गं, पिण्डपातिकङ्गं, पंसुकूलिकङ्गं, तेचीवरिकङ्गं, सपदानचारिकङ्गं, खलुपच्छाभत्तिकङ्गं, नेसज्जिकङ्गं, यथासन्थतिकङ्गं – इदं वुच्चति वतं, न सीलं. वीरियसमादानम्पि वुच्चति वतं, न सीलं. ‘‘कामं तचो च न्हारु [नहारु (सी. स्या.)] च अट्ठि च अवसिस्सतु [अवसुस्सतु (स्या.)], सरीरे उपस्सुस्सतु मंसलोहितं. यं तं पुरिसथामेन पुरिसबलेन पुरिसवीरियेन पुरिसपरक्कमेन पत्तब्बं, न तं अपापुणित्वा वीरियस्स सण्ठानं भविस्सती’’ति – चित्तं पग्गण्हाति पदहति. एवरूपं वीरियसमादानं – इदं वुच्चति वतं, न सीलं.

‘‘नासिस्सं न पिविस्सामि, विहारतो न निक्खमे;

नपि पस्सं निपातेस्सं, तण्हासल्ले अनूहते’’ति.

चित्तं पग्गण्हाति पदहति. एवरूपम्पि वीरियसमादानं वुच्चति वतं, न सीलं. ‘‘न तावाहं इमं पल्लङ्कं भिन्दिस्सामि याव मे न अनुपादाय आसवेहि चित्तं विमुच्चिस्सती’’ति – चित्तं पग्गण्हाति पदहति. एवरूपम्पि वीरियसमादानं वुच्चति वतं, न सीलं. ‘‘न तावाहं इमम्हा आसना वुट्ठहिस्सामि, चङ्कमा ओरोहिस्सामि, विहारा निक्खमिस्सामि, अड्ढयोगा निक्खमिस्सामि, पासादा निक्खमिस्सामि, हम्मिया निक्खमिस्सामि, गुहाय निक्खमिस्सामि, लेणा निक्खमिस्सामि, कुटिया निक्खमिस्सामि, कूटागारा निक्खमिस्सामि, अट्टा निक्खमिस्सामि, माळा निक्खमिस्सामि, उद्दण्डा [उट्टण्डा (क.)] निक्खमिस्सामि उपट्ठानसालाय निक्खमिस्सामि मण्डपा निक्खमिस्सामि, रुक्खमूला निक्खमिस्सामि याव मे न अनुपादाय आसवेहि चित्तं विमुच्चिस्सती’’ति – चित्तं पग्गण्हाति पदहति. एवरूपम्पि वीरियसमादानं वुच्चति वतं, न सीलं. ‘‘इमस्मिञ्ञेव पुब्बण्हसमयं अरियधम्मं आहरिस्सामि समाहरिस्सामि अधिगच्छिस्सामि फस्सयिस्सामि सच्छिकरिस्सामी’’ति – चित्तं पग्गण्हाति पदहति. एवरूपम्पि वीरियसमादानं वुच्चति वतं, न सीलं. ‘‘इमस्मिञ्ञेव मज्झन्हिकसमयं, सायन्हसमयं, पुरेभत्तं, पच्छाभत्तं, पुरिमं यामं, मज्झिमं यामं, पच्छिमं यामं, काळे, जुण्हे, वस्से, हेमन्ते, गिम्हे, पुरिमे वयोखन्धे, मज्झिमे वयोखन्धे, पच्छिमे वयोखन्धे अरियधम्मं आहरिस्सामि समाहरिस्सामि अधिगच्छिस्सामि फस्सयिस्सामि सच्छिकरिस्सामी’’ति – चित्तं पग्गण्हाति पदहति. एवरूपम्पि वीरियसमादानं वुच्चति वतं, न सीलं. जन्तूति सत्तो नरो मानवो [माणवो (क.)] पोसो पुग्गलो जीवो जागु जन्तु इन्दगु मनुजोति – यो अत्तनो सीलवतानि जन्तु.

अनानुपुट्ठोव परेस पावाति. परेसन्ति परेसं खत्तियानं ब्राह्मणानं वेस्सानं सुद्दानं गहट्ठानं पब्बजितानं देवानं मनुस्सानं. अनानुपुट्ठोति अपुट्ठो अपुच्छितो अयाचितो अनज्झेसितो अपसादितो. पावाति अत्तनो सीलं वा वतं वा सीलब्बतं वा पावदति. अहमस्मि सीलसम्पन्नोति वा, वतसम्पन्नोति वा, सीलब्बतसम्पन्नोति वा जातिया वा गोत्तेन वा कोलपुत्तियेन वा वण्णपोक्खरताय वा धनेन वा अज्झेनेन वा कम्मायतनेन वा सिप्पायतनेन वा विज्जाट्ठानेन [विज्जट्ठानेन (स्या.)] वा सुतेन वा पटिभानेन [पटिभाणेन (सी. स्या. क.)] वा अञ्ञतरञ्ञतरेन वा वत्थुना, उच्चा कुला पब्बजितोति वा, महाकुला पब्बजितोति वा, महाभोगकुला पब्बजितोति वा, उळारभोगकुला पब्बजितोति वा, ञातो यसस्सी सगहट्ठपब्बजितानन्ति वा, लाभिम्हि चीवरपिण्डपातसेनासनगिलानपच्चयभेसज्जपरिक्खारान’’न्ति वा, सुत्तन्तिकोति वा, विनयधरोति वा, धम्मकथिकोति वा, आरञ्ञिकोति वा, पिण्डपातिकोति वा, पंसुकूलिकोति वा, तेचीवरिकोति वा, सपदानचारिकोति वा, खलुपच्छाभत्तिकोति वा, नेसज्जिकोति वा, यथासन्थतिकोति वा, पठमस्स झानस्स लाभीति वा, दुतियस्स झानस्स लाभीति वा, ततियस्स झानस्स लाभीति वा, चतुत्थस्स झानस्स लाभीति वा, आकासानञ्चायतनसमापत्तिया लाभीति वा, विञ्ञाणञ्चायतनसमापत्तिया लाभीति वा, आकिञ्चञ्ञायतनसमापत्तिया लाभीति वा, नेवसञ्ञानासञ्ञायतनसमापत्तिया लाभीति वा पावदति कथेति भणति दीपयति वोहरतीति – अनानुपुट्ठोव परेसं पाव.

अनरियधम्मं कुसला तमाहूति. कुसलाति ये ते खन्धकुसला धातुकुसला आयतनकुसला पटिच्चसमुप्पादकुसला सतिपट्ठानकुसला सम्मप्पधानकुसला इद्धिपादकुसला इन्द्रियकुसला बलकुसला बोज्झङ्गकुसला मग्गकुसला फलकुसला निब्बानकुसला, ते कुसला एवमाहंसु – ‘‘अनरियानं एसो धम्मो, नेसो धम्मो अरियानं; बालानं एसो धम्मो, नेसो धम्मो पण्डितानं; असप्पुरिसानं एसो धम्मो, नेसो धम्मो सप्पुरिसान’’न्ति. एवमाहंसु एवं कथेन्ति एवं भणन्ति एवं दीपयन्ति एवं वोहरन्तीति – अनरियधम्मं कुसला तमाहु.

यो आतुमानं सयमेव पावाति. आतुमा वुच्चति अत्ता. सयमेव पावाति सयमेव अत्तानं पावदति – ‘‘अहमस्मि सीलसम्पन्नोति वा, वतसम्पन्नोति वा, सीलब्बतसम्पन्नोति वा, जातिया वा गोत्तेन वा कोलपुत्तियेन वा वण्णपोक्खरताय वा धनेन वा अज्झेनेन वा कम्मायतनेन वा सिप्पायतनेन वा विज्जाट्ठानेन वा सुतेन वा पटिभानेन वा अञ्ञतरञ्ञतरेन वा वत्थुना, उच्चा कुला पब्बजितोति वा, महाकुला पब्बजितोति वा, महाभोगकुला पब्बजितोति वा, उळारभोगकुला पब्बजितोति वा, ञातो यसस्सी सगहट्ठपब्बजितानन्ति वा, लाभिम्हि चीवरपिण्डपातसेनासनगिलानपच्चयभेसज्जपरिक्खारानन्ति वा, सुत्तन्तिकोति वा, विनयधरोति वा, धम्मकथिकोति वा, आरञ्ञिकोति वा, पिण्डपातिकोति वा, पंसुकूलिकोति वा, तेचीवरिकोति वा, सपदानचारिकोति वा, खलुपच्छाभत्तिकोति वा, नेसज्जिकोति वा, यथासन्थतिकोति वा, पठमस्स झानस्स लाभीति वा, दुतियस्स झानस्स लाभीति वा, ततियस्स झानस्स लाभीति वा, चतुत्थस्स झानस्स लाभीति वा, आकासानञ्चायतनसमापत्तिया लाभीति वा, विञ्ञाणञ्चायतनसमापत्तिया लाभीति वा,

विभवञ्च भवञ्च विप्पहाय, वुसितवा खीणपुनब्भवो स भिक्खू’’ति.

आकिञ्चञ्ञायतनसमापत्तिया लाभीति वा, नेवसञ्ञानासञ्ञायतनसमापत्तिया लाभीति वा’’ पावदति कथेति भणति दीपयति वोहरतीति – यो आतुमानं सयमेव पावाति.

तेनाह भगवा –

‘‘यो अत्तनो सीलवतानि जन्तु, अनानुपुट्ठोव परेस पाव;

अनरियधम्मं कुसला तमाहु, यो आतुमानं सयमेव पावा’’ति.

१८.

सन्तो च भिक्खु अभिनिब्बुतत्तो, इतिहन्ति सीलेसु अकत्थमानो;

तमरियधम्मं कुसला वदन्ति, यस्सुस्सदा नत्थि कुहिञ्चि लोके.

सन्तो च भिक्खु अभिनिब्बुतत्तोति. सन्तोति रागस्स समितत्ता सन्तो, दोसस्स समितत्ता सन्तो, मोहस्स समितत्ता सन्तो, कोधस्स…पे… उपनाहस्स… मक्खस्स… पळासस्स [पलासस्स (सी. क.)] … इस्साय… मच्छरियस्स… मायाय… साठेय्यस्स… थम्भस्स… सारम्भस्स… मानस्स… अतिमानस्स… मदस्स… पमादस्स… सब्बकिलेसानं… सब्बदुच्चरितानं… सब्बदरथानं… सब्बपरिळाहानं… सब्बसन्तापानं… सब्बाकुसलाभिसङ्खारानं सन्तत्ता समितत्ता वूपसमितत्ता विज्झातत्ता निब्बुतत्ता विगतत्ता पटिपस्सद्धत्ता सन्तो उपसन्तो वूपसन्तो निब्बुतो पटिपस्सद्धोति – सन्तो. भिक्खूति सत्तन्नं धम्मानं भिन्नत्ता भिक्खु – सक्कायदिट्ठि भिन्ना होति, विचिकिच्छा भिन्ना होति, सीलब्बतपरामासो भिन्नो होति, रागो भिन्नो होति, दोसो भिन्नो होति, मोहो भिन्नो होति, मानो भिन्नो होति. भिन्नास्स होन्ति पापका अकुसला धम्मा संकिलेसिका पोनोभविका [पोनोब्भविका (स्या. क.)] सदरा दुक्खविपाका आयतिं जातिजरामरणिया.

‘‘पज्जेन कतेन अत्तना, [सभियाति भगवा]

परिनिब्बानगतो वितिण्णकङ्खो;

विभवञ्च [विभवं (सी. क.) सु. नि. ५१९] भवञ्च विप्पहाय,

वुसितवा खीणपुनब्भवो स भिक्खू’’ति.

सन्तो च भिक्खु अभिनिब्बुतत्तोति रागस्स निब्बापितत्ता अभिनिब्बुतत्तो, दोसस्स निब्बापितत्ता अभिनिब्बुतत्तो, मोहस्स निब्बापितत्ता अभिनिब्बुतत्तो, कोधस्स…पे… उपनाहस्स… मक्खस्स… पळासस्स… इस्साय… मच्छरियस्स… मायाय… साठेय्यस्स… थम्भस्स… सारम्भस्स… मानस्स… अतिमानस्स… मदस्स… पमादस्स… सब्बकिलेसानं… सब्बदुच्चरितानं… सब्बदरथानं… सब्बपरिळाहानं… सब्बसन्तापानं… सब्बाकुसलाभिसङ्खारानं निब्बापितत्ता अभिनिब्बुतत्तोति – सन्तो च भिक्खु अभिनिब्बुतत्तो.

इतिहन्ति सीलेसु अकत्थमानोति. इतिहन्ति पदसन्धि पदसंसग्गो पदपारिपूरी अक्खरसमवायो ब्यञ्जनसिलिट्ठता पदानुपुब्बतापेतं [पदानुपुब्बता मेतं (स्या. क.)] – इतिहन्ति. सीलेसु अकत्थमानोति. इधेकच्चो कत्थी होति विकत्थी. सो कत्थति विकत्थति. अहमस्मि सीलसम्पन्नोति वा, वतसम्पन्नोति वा, सीलब्बतसम्पन्नोति वा, जातिया वा गोत्तेन वा कोलपुत्तियेन वा वण्णपोक्खरताय वा…पे… नेवसञ्ञानासञ्ञायतनसमापत्तिया लाभीति वा कत्थति विकत्थति. एवं न कत्थति न विकत्थति. कत्थना आरतो विरतो पटिविरतो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – इतिहन्ति सीलेसु अकत्थमानो.

तमरियधम्मं कुसला वदन्तीति. कुसलाति ये ते खन्धकुसला धातुकुसला आयतनकुसला पटिच्चसमुप्पादकुसला सतिपट्ठानकुसला सम्मप्पधानकुसला इद्धिपादकुसला इन्द्रियकुसला बलकुसला बोज्झङ्गकुसला मग्गकुसला फलकुसला निब्बानकुसला, ते कुसला एवं वदन्ति – ‘‘अरियानं एसो धम्मो, नेसो धम्मो अनरियानं; पण्डितानं एसो धम्मो, नेसो धम्मो बालानं; सप्पुरिसानं एसो धम्मो, नेसो धम्मो असप्पुरिसान’’न्ति. एवं वदन्ति, अरियानं एवं कथेन्ति एवं भणन्ति एवं दीपयन्ति एवं वोहरन्तीति – तमरियधम्मं कुसला वदन्ति.

यस्सुस्सदा नत्थि कुहिञ्चि लोकेति. यस्साति अरहतो खीणासवस्स. उस्सदाति सत्तुस्सदा – रागुस्सदो, दोसुस्सदो, मोहुस्सदो, मानुस्सदो, दिट्ठुस्सदो, किलेसुस्सदो, कम्मुस्सदो. यस्सिमे [तस्सिमे (सी. स्या.)] उस्सदा नत्थि न सन्ति न विज्जन्ति नुपलब्भन्ति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढा. कुहिञ्चीति कुहिञ्चि किम्हिचि कत्थचि अज्झत्तं वा बहिद्धा वा अज्झत्तबहिद्धा वा. लोकेति अपायलोके मनुस्सलोके देवलोके खन्धलोके धातुलोके आयतनलोकेति – यस्सुस्सदा नत्थि कुहिञ्चि लोके.

तेनाह भगवा –

‘‘सन्तो च भिक्खु अभिनिब्बुतत्तो, इतिहन्ति सीलेसु अकत्थमानो;

तमरियधम्मं कुसला वदन्ति, यस्सुस्सदा नत्थि कुहिञ्चि लोके’’ति.

१९.

पकप्पिता सङ्खता यस्स धम्मा, पुरक्खता [पुरेक्खता (सी. क.)] सन्ति अवीवदाता;

यदत्तनि पस्सति आनिसंसं, तं निस्सितो कुप्पपटिच्चसन्तिं.

पकप्पिता सङ्खता यस्स धम्माति. पकप्पनाति द्वे पकप्पना – तण्हापकप्पना च दिट्ठिपकप्पना च…पे… अयं तण्हापकप्पना…पे… अयं दिट्ठिपकप्पना. सङ्खताति सङ्खता अभिसङ्खता सण्ठपितातिपि – सङ्खता. अथ वा अनिच्चा सङ्खता पटिच्चसमुप्पन्ना खयधम्मा वयधम्मा विरागधम्मा निरोधधम्मातिपि – सङ्खता. यस्साति दिट्ठिगतिकस्स. धम्मा वुच्चन्ति द्वासट्ठि दिट्ठिगतानीति – पकप्पिता सङ्खता यस्स धम्मा.

पुरक्खता सन्ति अवीवदाताति. पुरक्खताति द्वे पुरेक्खारा – तण्हापुरेक्खारो च दिट्ठिपुरेक्खारो च…पे… अयं तण्हापुरेक्खारो…पे… अयं दिट्ठिपुरेक्खारो. तस्स तण्हापुरेक्खारो अप्पहीनो, दिट्ठिपुरेक्खारो अप्पटिनिस्सट्ठो. तस्स तण्हापुरेक्खारस्स अप्पहीनत्ता, दिट्ठिपुरेक्खारस्स अप्पटिनिस्सट्ठत्ता सो तण्हं वा दिट्ठिं वा पुरतो कत्वा चरति तण्हाधजो तण्हाकेतु तण्हाधिपतेय्यो, दिट्ठिधजो दिट्ठिकेतु दिट्ठाधिपतेय्यो, तण्हाय वा दिट्ठिया वा परिवारितो चरतीति – पुरक्खता. सन्तीति सन्ति संविज्जन्ति अत्थि उपलब्भन्ति. अवीवदाताति अवेवदाता अवोदाता अपरिसुद्धा संकिलिट्ठा संकिलेसिकाति – पुरक्खता सन्ति अवीवदाता.

यदत्तनि पस्सति आनिसंसन्ति. यदत्तनीति यं अत्तनि. अत्ता वुच्चति दिट्ठिगतं. अत्तनो दिट्ठिया द्वे आनिसंसे पस्सति – दिट्ठधम्मिकञ्च आनिसंसं, सम्परायिकञ्च आनिसंसं. कतमो दिट्ठिया दिट्ठधम्मिको आनिसंसो? यंदिट्ठिको सत्था होति, तंदिट्ठिका सावका होन्ति. तंदिट्ठिकं सत्थारं सावका सक्करोन्ति गरुं करोन्ति [गरुकरोन्ति (सी. स्या.)] मानेन्ति पूजेन्ति अपचितिं करोन्ति. लभति च ततोनिदानं चीवरपिण्डपातसेनासनगिलानपच्चयभेसज्जपरिक्खारं – अयं दिट्ठिया दिट्ठधम्मिको आनिसंसो. कतमो दिट्ठिया सम्परायिको आनिसंसो? अयं दिट्ठि अलं नागत्ताय वा सुपण्णत्ताय वा यक्खत्ताय वा असुरत्ताय वा गन्धब्बत्ताय वा महाराजत्ताय वा इन्दत्ताय वा ब्रह्मत्ताय वा देवत्ताय वा. अयं दिट्ठि सुद्धिया विसुद्धिया परिसुद्धिया, मुत्तिया विमुत्तिया परिमुत्तिया. इमाय दिट्ठिया सुज्झन्ति विसुज्झन्ति परिसुज्झन्ति मुच्चन्ति विमुच्चन्ति परिमुच्चन्ति. इमाय दिट्ठिया सुज्झिस्सामि विसुज्झिस्सामि परिसुज्झिस्सामि, मुच्चिस्सामि विमुच्चिस्सामि परिमुच्चिस्सामीति आयतिं फलपाटिकङ्खी होति – अयं दिट्ठिया सम्परायिको आनिसंसो. अत्तनो दिट्ठिया इमे द्वे आनिसंसे पस्सति दक्खति ओलोकेति निज्झायति उपपरिक्खतीति – यदत्तनि पस्सति आनिसंसं.

तं निस्सितो कुप्पपटिच्चसन्तिन्ति. तिस्सो सन्तियो – अच्चन्तसन्ति, तदङ्गसन्ति, सम्मुतिसन्ति. कतमा अच्चन्तसन्ति? अच्चन्तसन्ति वुच्चति अमतं निब्बानं. यो सो सब्बसङ्खारसमथो सब्बूपधिपटिनिस्सग्गो तण्हक्खयो विरागो निरोधो निब्बानं. अयं अच्चन्तसन्ति. कतमा तदङ्गसन्ति? पठमं झानं समापन्नस्स नीवरणा सन्ता होन्ति; दुतियं झानं समापन्नस्स वितक्कविचारा सन्ता होन्ति; ततियं झानं समापन्नस्स पीति सन्ता होति; चतुत्थं झानं समापन्नस्स सुखदुक्खा सन्ता होन्ति; आकासानञ्चायतनं समापन्नस्स रूपसञ्ञा पटिघसञ्ञा नानत्तसञ्ञा सन्ता होति; विञ्ञाणञ्चायतनं समापन्नस्स आकासानञ्चायतनसञ्ञा सन्ता होति; आकिञ्चञ्ञायतनं समापन्नस्स विञ्ञाणञ्चायतनसञ्ञा सन्ता होति; नेवसञ्ञानासञ्ञायतनं समापन्नस्स आकिञ्चञ्ञायतनसञ्ञा सन्ता होति. अयं तदङ्गसन्ति. कतमा सम्मुतिसन्ति? सम्मुतिसन्तियो वुच्चन्ति द्वासट्ठि दिट्ठिगतानि दिट्ठिसन्तियो. अपि च सम्मुतिसन्ति इमस्मिं अत्थे अधिप्पेता सन्तीति. तं निस्सितो कुप्पपटिच्चसन्तिन्ति. कुप्पसन्तिं पकुप्पसन्तिं एरितसन्तिं समेरितसन्तिं चलितसन्तिं घट्टितसन्तिं कप्पितसन्तिं पकप्पितसन्तिं अनिच्चं सङ्खतं पटिच्चसमुप्पन्नं खयधम्मं वयधम्मं विरागधम्मं निरोधधम्मं, सन्तिं निस्सितो असितो अल्लीनो उपगतो अज्झोसितो अधिमुत्तोति – तं निस्सितो कुप्पपटिच्चसन्तिं.

तेनाह भगवा –

‘‘पकप्पिता सङ्खता यस्स धम्मा, पुरक्खता सन्ति अवीवदाता;

यदत्तनि पस्सति आनिसंसं, तं निस्सितो कुप्पपटिच्चसन्ति’’न्ति.

२०.

दिट्ठीनिवेसा न हि स्वातिवत्ता, धम्मेसु निच्छेय्य समुग्गहीतं;

तस्मा नरो तेसु निवेसनेसु, निरस्सती आदियती च धम्मं.

दिट्ठीनिवेसा न हि स्वातिवत्ताति. दिट्ठीनिवेसाति ‘‘सस्सतो लोको, इदमेव सच्चं मोघमञ्ञ’’न्ति अभिनिवेसपरामासो दिट्ठिनिवेसनं. ‘‘असस्सतो लोको…पे… अन्तवा लोको… अनन्तवा लोको … तं जीवं तं सरीरं… अञ्ञं जीवं अञ्ञं सरीरं… होति तथागतो परं मरणा… न होति तथागतो परं मरणा… होति च न च होति तथागतो परं मरणा… नेव होति न न होति तथागतो परं मरणा, इदमेव सच्चं मोघमञ्ञ’’न्ति अभिनिवेसपरामासो दिट्ठिनिवेसनन्ति. दिट्ठीनिवेसा न हि स्वातिवत्ताति दिट्ठिनिवेसा न हि स्वातिवत्ता दुरतिवत्ता दुत्तरा दुप्पतरा दुस्समतिक्कमा दुब्बिनिवत्ताति – [दुब्बीतिवत्ताति (सी. स्या. क.)] दिट्ठीनिवेसा न हि स्वातिवत्ता.

धम्मेसु निच्छेय्य समुग्गहीतन्ति. धम्मेसूति द्वासट्ठि दिट्ठिगतेसु. निच्छेय्याति निच्छिनित्वा विनिच्छिनित्वा विचिनित्वा पविचिनित्वा तुलयित्वा तीरयित्वा विभावयित्वा विभूतं कत्वा. समुग्गहीतन्ति निवेसनेसु ओधिग्गाहो बिलग्गाहो वरग्गाहो कोट्ठासग्गाहो उच्चयग्गाहो समुच्चयग्गाहो. इदं सच्चं तच्छं तथं भूतं याथावं अविपरीतं गहितं परामट्ठं अभिनिविट्ठं अज्झोसितं अधिमुत्तन्ति – धम्मेसु निच्छेय्य समुग्गहीतं.

तस्मा नरो तेसु निवेसनेसूति. तस्माति तस्मा तंकारणा तंहेतु तप्पच्चया तंनिदानं. नरोति सत्तो नरो मानवो पोसो पुग्गलो जीवो जागु जन्तु इन्दगु मनुजो. तेसु निवेसनेसूति तेसु दिट्ठिनिवेसनेसूति – तस्मा नरो तेसु निवेसनेसु.

निरस्सती आदियती च धम्मन्ति. निरस्सतीति द्वीहि कारणेहि निरस्सति – परविच्छिन्दनाय वा निरस्सति, अनभिसम्भुणन्तो वा निरस्सति. कथं परविच्छिन्दनाय निरस्सति? परो विच्छिन्देति – सो सत्था न सब्बञ्ञू, धम्मो न स्वाक्खातो, गणो न सुप्पटिपन्नो, दिट्ठि न भद्दिका, पटिपदा न सुपञ्ञत्ता, मग्गो न निय्यानिको, नत्थेत्थ सुद्धि वा विसुद्धि वा परिसुद्धि वा मुत्ति वा विमुत्ति वा परिमुत्ति वा, नत्थेत्थ सुज्झन्ति वा विसुज्झन्ति वा परिसुज्झन्ति वा मुच्चन्ति वा विमुच्चन्ति वा परिमुच्चन्ति वा, हीना निहीना ओमका लामका छतुक्का [जतुक्का (सी. स्या.)] परित्ताति – एवं परो विच्छिन्देति. एवं विच्छिन्दियमानो सत्थारं निरस्सति, धम्मक्खानं निरस्सति, गणं निरस्सति, दिट्ठिं निरस्सति, पटिपदं निरस्सति, मग्गं निरस्सति. एवं परविच्छिन्दनाय निरस्सति. कथं अनभिसम्भुणन्तो निरस्सति? सीलं अनभिसम्भुणन्तो सीलं निरस्सति, वतं अनभिसम्भुणन्तो वतं निरस्सति, सीलब्बतं अनभिसम्भुणन्तो सीलब्बतं निरस्सति. एवं अनभिसम्भुणन्तो निरस्सति. आदियती च धम्मन्ति. सत्थारं गण्हाति, धम्मक्खानं गण्हाति, गणं गण्हाति, दिट्ठिं गण्हाति, पटिपदं गण्हाति, मग्गं गण्हाति परामसति अभिनिविसतीति – निरस्सती आदियती च धम्मं.

तेनाह भगवा –

‘‘दिट्ठीनिवेसा न हि स्वातिवत्ता, धम्मेसु निच्छेय्य समुग्गहीतं;

तस्मा नरो तेसु निवेसनेसु, निरस्सती आदियती च धम्म’’न्ति.

२१.

धोनस्स हि नत्थि कुहिञ्चि लोके, पकप्पिता दिट्ठि भवाभवेसु;

मायञ्च मानञ्च पहाय धोनो, स केन गच्छेय्य अनूपयो सो.

धोनस्स हि नत्थि कुहिञ्चि लोके पकप्पिता दिट्ठि भवाभवेसूति. धोनोति. धोना वुच्चति पञ्ञा – या पञ्ञा पजानना विचयो पविचयो धम्मविचयो सल्लक्खणा उपलक्खणा पच्चुपलक्खणा पण्डिच्चं कोसल्लं नेपुञ्ञं वेभब्या चिन्ता उपपरिक्खा भूरि मेधा परिणायिका विपस्सना सम्पजञ्ञं पतोदो पञ्ञा पञ्ञिन्द्रियं पञ्ञाबलं पञ्ञासत्थं पञ्ञापासादो पञ्ञाआलोको पञ्ञाओभासो पञ्ञापज्जोतो पञ्ञारतनं अमोहो धम्मविचयो सम्मादिट्ठि. किंकारणा धोना वुच्चति पञ्ञा? ताय पञ्ञाय कायदुच्चरितं धुतञ्च धोतञ्च सन्धोतञ्च निद्धोतञ्च; वचीदुच्चरितं… मनोदुच्चरितं धुतञ्च धोतञ्च सन्धोतञ्च निद्धोतञ्च; रागो धुतो च धोतो च सन्धोतो च निद्धोतो च; दोसो…पे… मोहो… कोधो… उपनाहो… मक्खो… पळासो धुतो च धोतो च सन्धोतो च निद्धोतो च; इस्सा धुता च धोता च सन्धोता च निद्धोता च; मच्छरियं धुतञ्च धोतञ्च सन्धोतञ्च निद्धोतञ्च; माया धुता च धोता च सन्धोता च निद्धोता च; साठेय्यं धुतञ्च धोतञ्च सन्धोतञ्च निद्धोतञ्च; थम्भो धुतो च धोतो च सन्धोतो च निद्धोतो च; सारम्भो… मानो… अतिमानो… मदो… पमादो धुतो च धोतो च सन्धोतो च निद्धोतो च; सब्बे किलेसा, सब्बे दुच्चरिता, सब्बे दरथा, सब्बे परिळाहा, सब्बे सन्तापा, सब्बाकुसलाभिसङ्खारा धुता च धोता च सन्धोता च निद्धोता च. तंकारणा धोना वुच्चति पञ्ञा.

अथ वा सम्मादिट्ठिया मिच्छादिट्ठि धुता च धोता च सन्धोता च निद्धोता च; सम्मासङ्कप्पेन मिच्छासङ्कप्पो धुतो च धोतो च सन्धोतो च निद्धोतो च; सम्मावाचाय मिच्छावाचा धुता च धोता च…पे… सम्माकम्मन्तेन मिच्छाकम्मन्तो धुतो च… सम्माआजीवेन मिच्छाआजीवो धुतो च… सम्मावायामेन मिच्छावायामो धुतो च… सम्मासतिया मिच्छासति धुता च… सम्मासमाधिना मिच्छासमाधि धुतो च धोतो च सन्धोतो च निद्धोतो च; सम्माञाणेन मिच्छाञाणं धुतं च… सम्माविमुत्तिया मिच्छाविमुत्ति धुता च धोता च सन्धोता च निद्धोता च.

अथ वा अरियेन अट्ठङ्गिकेन मग्गेन सब्बे किलेसा, सब्बे दुच्चरिता, सब्बे दरथा, सब्बे परिळाहा, सब्बे सन्तापा, सब्बाकुसलाभिसङ्खारा धुता च धोता च सन्धोता च निद्धोता च. अरहा इमेहि धोनेय्येहि धम्मेहि उपेतो समुपेतो उपगतो समुपगतो उपपन्नो समुपपन्नो समन्नागतो; तस्मा अरहा धोनो. सो धुतरागो धुतपापो धुतकिलेसो धुतपरिळाहोति – धोनो. कुहिञ्चीति कुहिञ्चि किम्हिचि कत्थचि अज्झत्तं वा बहिद्धा वा अज्झत्तबहिद्धा वा. लोकेति अपायलोके…पे… आयतनलोके.

पकप्पिताति द्वे पकप्पना – तण्हापकप्पना च दिट्ठिपकप्पना च…पे… अयं तण्हापकप्पना…पे… अयं दिट्ठिपकप्पना. भवाभवेसूति भवाभवे कम्मभवे पुनब्भवे कामभवे, कम्मभवे कामभवे पुनब्भवे रूपभवे, कम्मभवे रूपभवे पुनब्भवे अरूपभवे, कम्मभवे अरूपभवे पुनब्भवे पुनप्पुनभवे पुनप्पुनगतिया पुनप्पुनउपपत्तिया पुनप्पुनपटिसन्धिया पुनप्पुनअत्तभावाभिनिब्बत्तिया. धोनस्स हि नत्थि कुहिञ्चि लोके पकप्पिता दिट्ठि भवाभवेसूति धोनस्स कुहिञ्चि लोके भवाभवेसु च कप्पिता पकप्पिता अभिसङ्खता सण्ठपिता दिट्ठि नत्थि न सन्ति न संविज्जति नुपलब्भति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढाति – धोनस्स हि नत्थि कुहिञ्चि लोके पकप्पिता दिट्ठि भवाभवेसु.

मायञ्च मानञ्च पहाय धोनोति. माया वुच्चति वञ्चनिका चरिया. इधेकच्चो कायेन दुच्चरितं चरित्वा, वाचाय दुच्चरितं चरित्वा, मनसा दुच्चरितं चरित्वा तस्स पटिच्छादनहेतु पापिकं इच्छं पणिदहति – ‘‘मा मं जञ्ञा’’ति इच्छति, ‘‘मा मं जञ्ञा’’ति सङ्कप्पेति, ‘‘मा मं जञ्ञा’’ति वाचं भासति, ‘‘मा मं जञ्ञा’’ति कायेन परक्कमति. या एवरूपा माया मायाविता अच्चसरा वञ्चना निकति निकिरणा परिहरणा गूहना परिगूहना छादना परिच्छादना अनुत्तानिकम्मं अनाविकम्मं वोच्छादना पापकिरिया, अयं वुच्चति माया.

मानोति एकविधेन मानो – या चित्तस्स उन्नति [उण्णति (स्या. क.)]. दुविधेन मानो – अत्तुक्कंसनमानो, परवम्भनमानो. तिविधेन मानो – ‘‘सेय्योहमस्मी’’ति मानो, ‘‘सदिसोहमस्मी’’ति मानो, ‘‘हीनोहमस्मी’’ति मानो. चतुब्बिधेन मानो – लाभेन मानं जनेति, यसेन मानं जनेति, पसंसाय मानं जनेति, सुखेन मानं जनेति. पञ्चविधेन मानो – ‘‘लाभिम्हि मनापिकानं रूपान’’न्ति मानं जनेति, ‘‘लाभिम्हि मनापिकानं सद्दानं…पे… गन्धानं… रसानं… फोट्ठब्बान’’न्ति मानं जनेति. छब्बिधेन मानो – चक्खुसम्पदाय मानं जनेति, सोतसम्पदाय… घानसम्पदाय… जिव्हासम्पदाय… कायसम्पदाय… मनोसम्पदाय मानं जनेति. सत्तविधेन मानो – मानो, अतिमानो, मानातिमानो, ओमानो, अधिमानो, अस्मिमानो, मिच्छामानो. अट्ठविधेन मानो – लाभेन मानं जनेति, अलाभेन ओमानं जनेति, यसेन मानं जनेति, अयसेन ओमानं जनेति, पसंसाय मानं जनेति, निन्दाय ओमानं जनेति, सुखेन मानं जनेति, दुक्खेन ओमानं जनेति. नवविधेन मानो – सेय्यस्स सेय्योहमस्मीति मानो, सेय्यस्स सदिसोहमस्मीति मानो, सेय्यस्स हीनोहमस्मीति मानो, सदिसस्स सेय्योहमस्मीति मानो, सदिसस्स सदिसोहमस्मीति मानो, सदिसस्स हीनोहमस्मीति मानो, हीनस्स सेय्योहमस्मीति मानो, हीनस्स सदिसोहमस्मीति मानो, हीनस्स हीनोहमस्मीति मानो. दसविधेन मानो – इधेकच्चो मानं जनेति जातिया वा गोत्तेन वा कोलपुत्तियेन वा वण्णपोक्खरताय वा धनेन वा अज्झेनेन वा कम्मायतनेन वा सिप्पायतनेन वा विज्जाट्ठानेन वा सुतेन वा पटिभानेन वा अञ्ञतरञ्ञतरेन वा वत्थुना. यो एवरूपो मानो मञ्ञना मञ्ञितत्तं उन्नति उन्नामो [उण्णमो (स्या. क.)] धजो सम्पग्गाहो केतुकम्यता चित्तस्स – अयं वुच्चति मानो. मायञ्च मानञ्च पहाय धोनोति. धोनो मायञ्च मानञ्च पहाय पजहित्वा विनोदेत्वा ब्यन्तिं करित्वा अनभावं गमेत्वाति – मायञ्च मानञ्च पहाय धोनो.

स केन गच्छेय्य अनूपयो सोति. उपयाति द्वे उपया – तण्हूपयो च दिट्ठूपयो च…पे… अयं तण्हूपयो…पे… अयं दिट्ठूपयो. तस्स तण्हूपयो पहीनो, दिट्ठूपयो पटिनिस्सट्ठो. तण्हूपयस्स पहीनत्ता, दिट्ठूपयस्स पटिनिस्सट्ठत्ता अनूपयो पुग्गलो केन रागेन गच्छेय्य, केन दोसेन गच्छेय्य, केन मोहेन गच्छेय्य, केन मानेन गच्छेय्य, काय दिट्ठिया गच्छेय्य, केन उद्धच्चेन गच्छेय्य, काय विचिकिच्छाय गच्छेय्य, केहि अनुसयेहि गच्छेय्य – रत्तोति वा दुट्ठोति वा मूळ्होति वा विनिबद्धोति वा परामट्ठोति वा विक्खेपगतोति वा अनिट्ठङ्गतोति वा थामगतोति वा. ते अभिसङ्खारा पहीना. अभिसङ्खारानं पहीनत्ता गतियो केन गच्छेय्य – नेरयिकोति वा तिरच्छानयोनिकोति वा पेत्तिविसयिकोति वा मनुस्सोति वा देवोति वा रूपीति वा अरूपीति वा सञ्ञीति वा असञ्ञीति वा नेवसञ्ञीनासञ्ञीति वा. सो हेतु नत्थि पच्चयो नत्थि कारणं नत्थि, येन गच्छेय्याति – स केन गच्छेय्य अनूपयो सो.

तेनाह भगवा –

‘‘धोनस्स हि नत्थि कुहिञ्चि लोके, पकप्पिता दिट्ठि भवाभवेसु;

मायञ्च मानञ्च पहाय धोनो, स केन गच्छेय्य अनूपयो सो’’ति.

२२.

उपयो हि धम्मेसु उपेति वादं, अनूपयं केन कथं वदेय्य;

अत्ता निरत्ता न हि तस्स अत्थि, अधोसि सो दिट्ठिमिधेव सब्बं.

उपयो हि धम्मेसु उपेति वादन्ति. उपयाति द्वे उपया – तण्हूपयो च दिट्ठूपयो च…पे… अयं तण्हूपयो…पे… अयं दिट्ठूपयो. तस्स तण्हूपयो अप्पहीनो, दिट्ठूपयो अप्पटिनिस्सट्ठो. तण्हूपयस्स अप्पहीनत्ता, दिट्ठूपयस्स अप्पटिनिस्सट्ठत्ता धम्मेसु वादं उपेति – रत्तोति वा दुट्ठोति वा मूळ्होति वा विनिबद्धोति वा परामट्ठोति वा विक्खेपगतोति वा अनिट्ठङ्गतोति वा थामगतोति वा. ते अभिसङ्खारा अप्पहीना. अभिसङ्खारानं अप्पहीनत्ता गतिया वादं उपेति. नेरयिकोति वा तिरच्छानयोनिकोति वा पेत्तिविसयिकोति वा मनुस्सोति वा देवोति वा रूपीति वा अरूपीति वा सञ्ञीति वा असञ्ञीति वा नेवसञ्ञीनासञ्ञीति वा वादं उपेति उपगच्छति गण्हाति परामसति अभिनिविसतीति – उपयो हि धम्मेसु उपेति वादं.

अनूपयं केन कथं वदेय्याति. उपयाति द्वे उपया – तण्हूपयो च दिट्ठूपयो च…पे… अयं तण्हूपयो…पे… अयं दिट्ठूपयो. तस्स तण्हूपयो पहीनो, दिट्ठूपयो पटिनिस्सट्ठो. तण्हूपयस्स पहीनत्ता, दिट्ठूपयस्स पटिनिस्सट्ठत्ता अनूपयं पुग्गलं केन रागेन वदेय्य, केन दोसेन वदेय्य, केन मोहेन वदेय्य, केन मानेन वदेय्य, काय दिट्ठिया वदेय्य, केन उद्धच्चेन वदेय्य, काय विचिकिच्छाय वदेय्य, केहि अनुसयेहि वदेय्य – रत्तोति वा दुट्ठोति वा मूळ्होति वा विनिबद्धोति वा परामट्ठोति वा विक्खेपगतोति वा अनिट्ठङ्गतोति वा थामगतोति वा. ते अभिसङ्खारा पहीना. अभिसङ्खारानं पहीनत्ता गतियो केन वदेय्य – नेरयिकोति वा…पे… नेवसञ्ञीनासञ्ञीति वा. सो हेतु नत्थि, पच्चयो नत्थि, कारणं नत्थि, येन वदेय्य कथेय्य भणेय्य दीपयेय्य वोहरेय्याति – अनूपयं केन कथं वदेय्य.

अत्ता निरत्ता न हि तस्स अत्थीति. अत्ताति अत्तानुदिट्ठि नत्थि. निरत्ताति उच्छेददिट्ठि नत्थि. अत्ताति गहितं नत्थि. निरत्ताति मुञ्चितब्बं नत्थि. यस्सत्थि गहितं, तस्सत्थि मुञ्चितब्बं; यस्सत्थि मुञ्चितब्बं, तस्सत्थि गहितं. गहणं मुञ्चना समतिक्कन्तो अरहा बुद्धिपरिहानिवीतिवत्तो. सो वुट्ठवासो चिण्णचरणो गतद्धो गतदिसो जातिमरणसंसारो, नत्थि तस्स पुनब्भवोति – अत्ता निरत्ता न हि तस्स अत्थि.

अधोसि सो दिट्ठिमिधेव सब्बन्ति तस्स द्वासट्ठि दिट्ठिगतानि पहीनानि समुच्छिन्नानि वूपसन्तानि पटिपस्सद्धानि अभब्बुप्पत्तिकानि ञाणग्गिना दड्ढानि. सो सब्बदिट्ठिगतं इधेव अधोसि धुनि सन्धुनि निद्धुनि पजहि विनोदेसि ब्यन्तिं अकासि अनभावं गमेसीति – अधोसि सो दिट्ठिमिधेव सब्बं.

तेनाह भगवा –

‘‘उपयो हि धम्मेसु उपेति वादं, अनूपयं केन कथं वदेय्य;

अत्ता निरत्ता न हि तस्स अत्थि, अधोसि सो दिट्ठिमिधेव सब्ब’’न्ति.

दुट्ठट्ठकसुत्तनिद्देसो ततियो.

४. सुद्धट्ठकसुत्तनिद्देसो

अथ सुद्धट्ठकसुत्तनिद्देसं वक्खति –

२३.

पस्सामि सुद्धं परमं अरोगं, दिट्ठेन संसुद्धि नरस्स होति;

एवाभिजानं परमन्ति ञत्वा, सुद्धानुपस्सीति पच्चेति ञाणं.

पस्सामि सुद्धं परमं अरोगन्ति. पस्सामि सुद्धन्ति पस्सामि सुद्धं, दक्खामि सुद्धं, ओलोकेमि सुद्धं, निज्झायामि सुद्धं, उपपरिक्खामि सुद्धं. परमं अरोगन्ति परमं आरोग्यप्पत्तं ताणप्पत्तं लेणप्पत्तं सरणप्पत्तं अभयप्पत्तं अच्चुतप्पत्तं अमतप्पत्तं निब्बानप्पत्तन्ति – पस्सामि सुद्धं परमं अरोगं.

दिट्ठेन संसुद्धि नरस्स होतीति. चक्खुविञ्ञाणं [चक्खुविञ्ञाणेन (सी. स्या.)] रूपदस्सनेन नरस्स सुद्धि विसुद्धि परिसुद्धि, मुत्ति विमुत्ति परिमुत्ति होति, नरो सुज्झति विसुज्झति परिसुज्झति, मुच्चति विमुच्चति परिमुच्चतीति – दिट्ठेन संसुद्धि नरस्स होति.

एवाभिजानं परमन्ति ञत्वाति. एवं अभिजानन्तो आजानन्तो विजानन्तो पटिविजानन्तो पटिविज्झन्तो. ‘‘इदं परमं अग्गं सेट्ठं विसिट्ठं पामोक्खं उत्तमं पवर’’न्ति ञत्वा जानित्वा तुलयित्वा तीरयित्वा विभावयित्वा विभूतं कत्वाति – एवाभिजानं परमन्ति ञत्वा.

सुद्धानुपस्सीति पच्चेति ञाणन्ति. यो सुद्धं पस्सति, सो सुद्धानुपस्सी, पच्चेति ञाणन्ति चक्खुविञ्ञाणं रूपदस्सनेन ञाणन्ति पच्चेति, मग्गोति पच्चेति, पथोति पच्चेति, निय्यानन्ति पच्चेतीति – सुद्धानुपस्सी पच्चेति ञाणं.

तेनाह भगवा –

‘‘पस्सामि सुद्धं परमं अरोगं, दिट्ठेन संसुद्धि नरस्स होति;

एवाभिजानं परमन्ति ञत्वा, सुद्धानुपस्सीति पच्चेति ञाण’’न्ति.

२४.

दिट्ठेन चे सुद्धि नरस्स होति, ञाणेन वा सो पजहाति दुक्खं;

अञ्ञेन सो सुज्झति सोपधीको, दिट्ठी हि नं पाव तथा वदानं.

दिट्ठेन चे सुद्धि नरस्स होतीति. चक्खुविञ्ञाणं रूपदस्सनेन चे नरस्स सुद्धि विसुद्धि परिसुद्धि, मुत्ति विमुत्ति परिमुत्ति होति, नरो सुज्झति विसुज्झति परिसुज्झति, मुच्चति विमुच्चति परिमुच्चतीति – दिट्ठेन चे सुद्धि नरस्स होति.

ञाणेन वा सो पजहाति दुक्खन्ति चक्खुविञ्ञाणं रूपदस्सनेन चे नरो जातिदुक्खं पजहति, जरादुक्खं पजहति, ब्याधिदुक्खं पजहति, मरणदुक्खं पजहति, सोकपरिदेवदुक्खदोमनस्सुपायासदुक्खं पजहतीति – ञाणेन वा सो पजहाति दुक्खं.

अञ्ञेन सो सुज्झति सोपधीकोति. अञ्ञेन असुद्धिमग्गेन मिच्छापटिपदाय अनिय्यानिकपथेन अञ्ञत्र सतिपट्ठानेहि अञ्ञत्र सम्मप्पधानेहि अञ्ञत्र इद्धिपादेहि अञ्ञत्र इन्द्रियेहि अञ्ञत्र बलेहि अञ्ञत्र बोज्झङ्गेहि अञ्ञत्र अरिया अट्ठङ्गिका मग्गा नरो सुज्झति विसुज्झति परिसुज्झति, मुच्चति विमुच्चति परिमुच्चति. सोपधीकोति सरागो सदोसो समोहो समानो सतण्हो सदिट्ठि सकिलेसो सउपादानोति – अञ्ञेन सो सुज्झति सोपधीको.

दिट्ठी हि नं पाव तथा वदानन्ति. साव दिट्ठि तं पुग्गलं पावदति – इति वायं पुग्गलो मिच्छादिट्ठिको विपरीतदस्सनो. तथा वदानन्ति तथा वदन्तं कथेन्तं भणन्तं दीपयन्तं वोहरन्तं. ‘‘सस्सतो लोको, इदमेव सच्चं मोघमञ्ञ’’न्ति तथा वदन्तं कथेन्तं भणन्तं दीपयन्तं वोहरन्तं. ‘‘असस्सतो लोको…पे… अन्तवा लोको… अनन्तवा लोको… तं जीवं तं सरीरं… अञ्ञं जीवं अञ्ञं सरीरं… होति तथागतो परं मरणा… न होति तथागतो परं मरणा… होति च न च होति तथागतो परं मरणा… नेव होति न न होति तथागतो परं मरणा, इदमेव सच्चं मोघमञ्ञ’’न्ति तथा वदन्तं कथेन्तं भणन्तं दीपयन्तं वोहरन्तन्ति – दिट्ठी हि नं पाव तथा वदानं.

तेनाह भगवा –

‘‘दिट्ठेन चे सुद्धि नरस्स होति, ञाणेन वा सो पजहाति दुक्खं;

अञ्ञेन सो सुज्झति सोपधीको, दिट्ठी हि नं पाव तथा वदान’’न्ति.

२५.

न ब्राह्मणो अञ्ञतो सुद्धिमाह, दिट्ठे सुते सीलवते मुते वा;

पुञ्ञे च पापे च अनूपलित्तो, अत्तञ्जहो नयिध पकुब्बमानो.

न ब्राह्मणो अञ्ञतो सुद्धिमाह दिट्ठे सुते सीलवते मुते वाति. नाति पटिक्खेपो. ब्राह्मणोति सत्तन्नं धम्मानं बाहितत्ता ब्राह्मणो – सक्कायदिट्ठि बाहिता होति, विचिकिच्छा बाहिता होति, सीलब्बतपरामासो बाहितो होति, रागो बाहितो होति, दोसो बाहितो होति, मोहो बाहितो होति, मानो बाहितो होति. बाहितास्स होन्ति पापका अकुसला धम्मा संकिलेसिका पोनोभविका सदरा दुक्खविपाका आयतिं जातिजरामरणिया.

बाहित्वा सब्बपापकानि, [सभियाति भगवा]

विमलो साधुसमाहितो ठितत्तो;

संसारमतिच्च केवली सो, असितो [अनिस्सितो (स्या.)] तादि पवुच्चते स ब्रह्मा.

न ब्राह्मणो अञ्ञतो सुद्धिमाहाति. ब्राह्मणो अञ्ञेन असुद्धिमग्गेन मिच्छापटिपदाय अनिय्यानिकपथेन अञ्ञत्र सतिपट्ठानेहि अञ्ञत्र सम्मप्पधानेहि अञ्ञत्र इद्धिपादेहि अञ्ञत्र इन्द्रियेहि अञ्ञत्र बलेहि अञ्ञत्र बोज्झङ्गेहि अञ्ञत्र अरियेन अट्ठङ्गिकेन मग्गेन सुद्धिं विसुद्धिं परिसुद्धिं, मुत्तिं विमुत्तिं परिमुत्तिं, नाह न कथेति न भणति न दीपयति न वोहरतीति – न ब्राह्मणो अञ्ञतो सुद्धिमाह.

दिट्ठे सुते सीलवते मुते वाति. सन्तेके समणब्राह्मणा दिट्ठिसुद्धिका. ते एकच्चानं रूपानं दस्सनं मङ्गलं पच्चेन्ति, एकच्चानं रूपानं दस्सनं अमङ्गलं पच्चेन्ति. कतमेसं रूपानं दस्सनं मङ्गलं पच्चेन्ति? ते कालतो वुट्ठहित्वा अभिमङ्गलगतानि रूपानि पस्सन्ति – चाटकसकुणं [वातसकुणं (स्या.), चापसकुणं (क.)] पस्सन्ति, फुस्सवेळुवलट्ठिं पस्सन्ति, गब्भिनित्थिं पस्सन्ति, कुमारकं खन्धे आरोपेत्वा गच्छन्तं पस्सन्ति, पुण्णघटं पस्सन्ति, रोहितमच्छं पस्सन्ति, आजञ्ञं पस्सन्ति, आजञ्ञरथं पस्सन्ति, उसभं पस्सन्ति, गोकपिलं पस्सन्ति. एवरूपानं रूपानं दस्सनं मङ्गलं पच्चेन्ति. कतमेसं रूपानं दस्सनं अमङ्गलं पच्चेन्ति? पलालपुञ्जं पस्सन्ति, तक्कघटं पस्सन्ति, रित्तघटं पस्सन्ति, नटं पस्सन्ति, नग्गसमणकं पस्सन्ति, खरं पस्सन्ति, खरयानं पस्सन्ति, एकयुत्तयानं पस्सन्ति, काणं पस्सन्ति, कुणिं पस्सन्ति, खञ्जं पस्सन्ति, पक्खहतं [पक्खपादं (क.)] पस्सन्ति, जिण्णकं पस्सन्ति, ब्याधिकं [ब्याधितं (सी.)] पस्सन्ति. एवरूपानं रूपानं दस्सनं अमङ्गलं पच्चेन्ति. इमे ते समणब्राह्मणा दिट्ठिसुद्धिका. ते दिट्ठेन सुद्धिं विसुद्धिं परिसुद्धिं मुत्तिं विमुत्तिं परिमुत्तिं पच्चेन्ति.

सन्तेके समणब्राह्मणा सुतसुद्धिका. ते एकच्चानं सद्दानं सवनं मङ्गलं पच्चेन्ति, एकच्चानं सद्दानं सवनं अमङ्गलं पच्चेन्ति. कतमेसं सद्दानं सवनं मङ्गलं पच्चेन्ति? ते कालतो वुट्ठहित्वा अभिमङ्गलगतानि सद्दानि सुणन्ति – वड्ढाति वा वड्ढमानाति वा पुण्णाति वा फुस्साति वा असोकाति वा सुमनाति वा सुनक्खत्ताति वा सुमङ्गलाति वा सिरीति वा सिरीवड्ढाति वा. एवरूपानं सद्दानं सवनं मङ्गलं पच्चेन्ति. कतमेसं सद्दानं सवनं अमङ्गलं पच्चेन्ति? काणोति वा कुणीति वा खञ्जोति वा पक्खहतोति वा जिण्णकोति वा ब्याधिकोति वा मतोति वा छिन्दन्ति वा भिन्दन्ति वा दड्ढन्ति वा नट्ठन्ति वा नत्थीति वा. एवरूपानं सद्दानं सवनं अमङ्गलं पच्चेन्ति. इमे ते समणब्राह्मणा सुतसुद्धिका. ते सुतेन सुद्धिं विसुद्धिं परिसुद्धिं मुत्तिं विमुत्तिं परिमुत्तिं पच्चेन्ति.

सन्तेके समणब्राह्मणा सीलसुद्धिका. ते सीलमत्तेन संयममत्तेन संवरमत्तेन अवीतिक्कममत्तेन सुद्धिं विसुद्धिं परिसुद्धिं मुत्तिं विमुत्तिं परिमुत्तिं पच्चेन्ति. समणोमुण्डिकापुत्तो [समणो मण्डिकापुत्तो (सी.), समणमुण्डिकापुत्तो (स्या.)] एवमाह – ‘‘चतूहि खो अहं, गहपति [थपति (सी. स्या.) एवमुपरिपि], धम्मेहि समन्नागतं पुरिसपुग्गलं पञ्ञापेमि सम्पन्नकुसलं परमकुसलं उत्तमपत्तिप्पत्तं समणं अयोज्जं. कतमेहि चतूहि? इध, गहपति, न कायेन पापकं कम्मं करोति, न पापकं वाचं भासति, न पापकं सङ्कप्पं सङ्कप्पति, न पापकं आजीवं आजीवति. इमेहि खो अहं, गहपति, चतूहि धम्मेहि समन्नागतं पुरिसपुग्गलं पञ्ञापेमि सम्पन्नकुसलं परमकुसलं उत्तमपत्तिप्पत्तं समणं अयोज्जं’’. एवमेव सन्तेके समणब्राह्मणा सीलसुद्धिका, ते सीलमत्तेन संयममत्तेन संवरमत्तेन अवीतिक्कममत्तेन सुद्धिं विसुद्धिं परिसुद्धिं मुत्तिं विमुत्तिं परिमुत्तिं पच्चेन्ति.

सन्तेके समणब्राह्मणा वतसुद्धिका. ते हत्थिवतिका वा होन्ति, अस्सवतिका वा होन्ति, गोवतिका वा होन्ति, कुक्कुरवतिका वा होन्ति, काकवतिका वा होन्ति, वासुदेववतिका वा होन्ति, बलदेववतिका वा होन्ति, पुण्णभद्दवतिका वा होन्ति, मणिभद्दवतिका वा होन्ति, अग्गिवतिका वा होन्ति, नागवतिका वा होन्ति, सुपण्णवतिका वा होन्ति, यक्खवतिका वा होन्ति, असुरवतिका वा होन्ति, गन्धब्बवतिका वा होन्ति, महाराजवतिका वा होन्ति, चन्दवतिका वा होन्ति, सूरियवतिका वा होन्ति, इन्दवतिका वा होन्ति, ब्रह्मवतिका वा होन्ति, देववतिका वा होन्ति, दिसावतिका वा होन्ति. इमे ते समणब्राह्मणा वतसुद्धिका. ते वतेन सुद्धिं विसुद्धिं परिसुद्धिं मुत्तिं विमुत्तिं परिमुत्तिं पच्चेन्ति.

सन्तेके समणब्राह्मणा मुतसुद्धिका. ते कालतो उट्ठहित्वा पथविं आमसन्ति, हरितं आमसन्ति, गोमयं आमसन्ति, कच्छपं आमसन्ति, फालं अक्कमन्ति, तिलवाहं आमसन्ति, फुस्सतिलं खादन्ति, फुस्सतेलं मक्खेन्ति, फुस्सदन्तकट्ठं खादन्ति, फुस्समत्तिकाय न्हायन्ति, फुस्ससाटकं निवासेन्ति, फुस्सवेठनं वेठेन्ति. इमे ते समणब्राह्मणा मुतसुद्धिका. ते मुतेन सुद्धिं विसुद्धिं परिसुद्धिं मुत्तिं विमुत्तिं परिमुत्तिं पच्चेन्ति. न ब्राह्मणो अञ्ञतो सुद्धिमाह.

दिट्ठे सुते सीलवते मुते वाति. ब्राह्मणो दिट्ठसुद्धियापि सुद्धिं नाह, सुतसुद्धियापि सुद्धिं नाह, सीलसुद्धियापि सुद्धिं नाह, वतसुद्धियापि सुद्धिं नाह, मुतसुद्धियापि सुद्धिं नाह न कथेति न भणति न दीपयति न वोहरतीति – न ब्राह्मणो अञ्ञतो सुद्धिमाह दिट्ठे सुते सीलवते मुते वा.

पुञ्ञे च पापे च अनूपलित्तोति. पुञ्ञं वुच्चति यं किञ्चि तेधातुकं कुसलाभिसङ्खारं, अपुञ्ञं वुच्चति सब्बं अकुसलं. यतो पुञ्ञाभिसङ्खारो च अपुञ्ञाभिसङ्खारो च आनेञ्जाभिसङ्खारो च पहीना होन्ति उच्छिन्नमूला तालावत्थुकता अनभावंकता आयतिं अनुप्पादधम्मा; एत्तावता पुञ्ञे च पापे च न लिम्पति न पलिम्पति न उपलिम्पति अलित्तो अपलित्तो अनूपलित्तो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – पुञ्ञे च पापे च अनूपलित्तो.

अत्तञ्जहो नयिध पकुब्बमानोति. अत्तञ्जहोति अत्तदिट्ठिजहो. अत्तञ्जहोति गाहं जहो [गाहजहो (सी. स्या.), अत्तगाहं जहो (क.)]. अत्तञ्जहोति तण्हावसेन दिट्ठिवसेन गहितं परामट्ठं अभिनिविट्ठं अज्झोसितं अधिमुत्तं, सब्बं तं चत्तं होति वन्तं मुत्तं पहीनं पटिनिस्सट्ठं. नयिध पकुब्बमानोति पुञ्ञाभिसङ्खारं वा अपुञ्ञाभिसङ्खारं वा आनेञ्जाभिसङ्खारं वा अपकुब्बमानो अजनयमानो असञ्जनयमानो अनिब्बत्तयमानो अनभिनिब्बत्तयमानोति – अत्तञ्जहो नयिध पकुब्बमानो.

तेनाह भगवा –

‘‘न ब्राह्मणो अञ्ञतो सुद्धिमाह, दिट्ठे सुते सीलवते मुते वा;

पुञ्ञे च पापे च अनूपलित्तो, अत्तञ्जहो नयिध पकुब्बमानो’’ति.

२६.

पुरिमं पहाय अपरं सितासे, एजानुगा ते न तरन्ति सङ्गं;

ते उग्गहायन्ति निरस्सजन्ति, कपीव साखं पमुञ्चं [पमुखं (सी. स्या.)] गहाय.

पुरिमं पहाय अपरं सितासेति. पुरिमं सत्थारं पहाय परं सत्थारं निस्सिता; पुरिमं धम्मक्खानं पहाय अपरं धम्मक्खानं निस्सिता; पुरिमं गणं पहाय अपरं गणं निस्सिता; पुरिमं दिट्ठिं पहाय अपरं दिट्ठिं निस्सिता; पुरिमं पटिपदं पहाय अपरं पटिपदं निस्सिता; पुरिमं मग्गं पहाय अपरं मग्गं निस्सिता सन्निस्सिता अल्लीना उपगता अज्झोसिता अधिमुत्ताति – पुरिमं पहाय अपरं सितासे.

एजानुगा ते न तरन्ति सङ्गन्ति. एजा वुच्चति तण्हा. यो रागो सारागो…पे… अभिज्झा लोभो अकुसलमूलं. एजानुगाति एजानुगा एजानुगता एजानुसटा एजाय पन्ना पतिता अभिभूता परियादिन्नचित्ता. ते न तरन्ति सङ्गन्ति रागसङ्गं दोससङ्गं मोहसङ्गं मानसङ्गं दिट्ठिसङ्गं किलेससङ्गं दुच्चरितसङ्गं न तरन्ति न उत्तरन्ति न पतरन्ति न समतिक्कमन्ति न वीतिवत्तन्तीति – एजानुगा ते न तरन्ति सङ्गं.

ते उग्गहायन्ति निरस्सजन्तीति सत्थारं गण्हन्ति, तं मुञ्चित्वा अञ्ञं सत्थारं गण्हन्ति; धम्मक्खानं गण्हन्ति, तं मुञ्चित्वा अञ्ञं धम्मक्खानं गण्हन्ति; गणं गण्हन्ति, तं मुञ्चित्वा अञ्ञं गणं गण्हन्ति; दिट्ठिं गण्हन्ति, तं मुञ्चित्वा अञ्ञं दिट्ठिं गण्हन्ति; पटिपदं गण्हन्ति, तं मुञ्चित्वा अञ्ञं पटिपदं गण्हन्ति; मग्गं गण्हन्ति, तं मुञ्चित्वा अञ्ञं मग्गं गण्हन्ति; गण्हन्ति च मुञ्चन्ति च आदियन्ति च निरस्सजन्ति चाति – ते उग्गहायन्ति निरस्सजन्ति.

कपीव साखं पमुञ्चं गहायाति. यथा मक्कटो अरञ्ञे पवने चरमानो साखं गण्हाति, तं मुञ्चित्वा अञ्ञं साखं गण्हाति. एवमेव पुथुसमणब्राह्मणा पुथुदिट्ठिगतानि गण्हन्ति च मुञ्चन्ति च आदियन्ति च निरस्सजन्ति चाति – कपीव साखं पमुञ्चं गहाय.

तेनाह भगवा –

‘‘पुरिमं पहाय अपरं सितासे, एजानुगा ते न तरन्ति सङ्गं;

ते उग्गहायन्ति निरस्सजन्ति, कपीव साखं पमुञ्चं गहाया’’ति.

२७.

सयं समादाय वतानि जन्तु, उच्चावचं गच्छति सञ्ञसत्तो;

विद्वा च वेदेहि समेच्च धम्मं, न उच्चावचं गच्छति भूरिपञ्ञो.

सयं समादाय वतानि जन्तूति. सयं समादायाति सामं समादाय. वतानीति हत्थिवतं वा अस्सवतं वा गोवतं वा कुक्कूरवतं वा काकवतं वा वासुदेववतं वा बलदेववतं वा पुण्णभद्दवतं वा मणिभद्दवतं वा अग्गिवतं वा नागवतं वा सुपण्णवतं वा यक्खवतं वा असुरवतं वा…पे… दिसावतं वा आदाय समादाय आदियित्वा समादियित्वा गण्हित्वा परामसित्वा अभिनिविसित्वा. जन्तूति सत्तो नरो …पे… मनुजोति – सयं समादाय वतानि जन्तु.

उच्चावचं गच्छति सञ्ञसत्तोति सत्थारतो सत्थारं गच्छति; धम्मक्खानतो धम्मक्खानं गच्छति; गणतो गणं गच्छति; दिट्ठिया दिट्ठिं गच्छति; पटिपदाय पटिपदं गच्छति; मग्गतो मग्गं गच्छति. सञ्ञसत्तोति कामसञ्ञाय ब्यापादसञ्ञाय विहिंसासञ्ञाय दिट्ठिसञ्ञाय सत्तो विसत्तो आसत्तो लग्गो लग्गितो पलिबुद्धो. यथा भित्तिखिले वा नागदन्ते वा भण्डं सत्तं विसत्तं आसत्तं लग्गं लग्गितं पलिबुद्धं, एवमेव कामसञ्ञाय ब्यापादसञ्ञाय विहिंसासञ्ञाय दिट्ठिसञ्ञाय सत्तो विसत्तो आसत्तो लग्गो लग्गितो पलिबुद्धोति – उच्चावचं गच्छति सञ्ञसत्तो.

विद्वा च वेदेहि समेच्च धम्मन्ति. विद्वाति विद्वा विज्जागतो ञाणी विभावी मेधावी. वेदेहीति वेदा वुच्चन्ति चतूसु मग्गेसु ञाणं पञ्ञा पञ्ञिन्द्रियं पञ्ञाबलं धम्मविचयसम्बोज्झङ्गो वीमंसा विपस्सना सम्मादिट्ठि. तेहि वेदेहि जातिजरामरणस्स अन्तगतो अन्तप्पत्तो, कोटिगतो कोटिप्पत्तो, परियन्तगतो परियन्तप्पत्तो, वोसानगतो वोसानप्पत्तो, ताणगतो ताणप्पत्तो, लेणगतो लेणप्पत्तो, सरणगतो सरणप्पत्तो, अभयगतो अभयप्पत्तो, अच्चुतगतो अच्चुतप्पत्तो, अमतगतो अमतप्पत्तो, निब्बानगतो निब्बानप्पत्तो. वेदानं वा अन्तगतोति वेदगू, वेदेहि वा अन्तगतोति वेदगू, सत्तन्नं वा धम्मानं विदितत्ता वेदगू. सक्कायदिट्ठि विदिता होति, विचिकिच्छा विदिता होति, सीलब्बतपरामासो विदितो होति, रागो विदितो होति, दोसो विदितो होति, मोहो विदितो होति, मानो विदितो होति, विदितास्स होन्ति पापका अकुसला धम्मा संकिलेसिका पोनोभविका सदरा दुक्खविपाका आयतिं जातिजरामरणिया.

वेदानि विचेय्य केवलानि, [सभियाति भगवा]

समणानं यानीधत्थि [यानिपत्थि (सी. स्या.) सु. नि. ५३४] ब्राह्मणानं;

सब्बवेदनासु वीतरागो, सब्बं वेदमतिच्च वेदगू सोति.

विद्वा च वेदेहि समेच्च धम्मन्ति. समेच्च अभिसमेच्च धम्मं. सब्बे सङ्खारा अनिच्चाति समेच्च अभिसमेच्च धम्मं; सब्बे सङ्खारा दुक्खाति समेच्च अभिसमेच्च धम्मं; सब्बे धम्मा अनत्ताति समेच्च अभिसमेच्च धम्मं; अविज्जापच्चया सङ्खाराति समेच्च अभिसमेच्च धम्मं; सङ्खारपच्चया विञ्ञाणन्ति समेच्च अभिसमेच्च धम्मं; विञ्ञाणपच्चया नामरूपन्ति…पे… नामरूपपच्चया सळायतनन्ति… सळायतनपच्चया फस्सोति… फस्सपच्चया वेदनाति… वेदनापच्चया तण्हाति… तण्हापच्चया उपादानन्ति… उपादानपच्चया भवोति… भवपच्चया जातीति… जातिपच्चया जरामरणन्ति समेच्च अभिसमेच्च धम्मं; अविज्जानिरोधा सङ्खारनिरोधोति समेच्च अभिसमेच्च धम्मं; सङ्खारनिरोधा विञ्ञाणनिरोधोति समेच्च अभिसमेच्च धम्मं; विञ्ञाणनिरोधा नामरूपनिरोधोति… नामरूपनिरोधा सळायतननिरोधोति… सळायतननिरोधा फस्सनिरोधोति… फस्सनिरोधा वेदनानिरोधोति… वेदनानिरोधा तण्हानिरोधोति… तण्हानिरोधा उपादाननिरोधोति… उपादाननिरोधा भवनिरोधोति… भवनिरोधा जातिनिरोधोति… जातिनिरोधा जरामरणनिरोधोति समेच्च अभिसमेच्च धम्मं; इदं दुक्खन्ति समेच्च अभिसमेच्च धम्मं; अयं दुक्खसमुदयोति… अयं दुक्खनिरोधोति… अयं दुक्खनिरोधगामिनी पटिपदाति समेच्च अभिसमेच्च धम्मं; इमे आसवाति समेच्च अभिसमेच्च धम्मं; अयं आसवसमुदयोति… अयं आसवनिरोधोति… अयं आसवनिरोधगामिनी पटिपदाति समेच्च अभिसमेच्च धम्मं; इमे धम्मा अभिञ्ञेय्याति समेच्च अभिसमेच्च धम्मं; इमे धम्मा परिञ्ञेय्याति… इमे धम्मा पहातब्बाति… इमे धम्मा भावेतब्बाति … इमे धम्मा सच्छिकातब्बाति समेच्च अभिसमेच्च धम्मं. छन्नं फस्सायतनानं समुदयञ्च अत्थङ्गमञ्च अस्सादञ्च आदीनवञ्च निस्सरणञ्च समेच्च अभिसमेच्च धम्मं. पञ्चन्नं उपादानक्खन्धानं समुदयञ्च अत्थङ्गमञ्च अस्सादञ्च आदीनवञ्च निस्सरणञ्च समेच्च अभिसमेच्च धम्मं. चतुन्नं महाभूतानं समुदयञ्च अत्थङ्गमञ्च अस्सादञ्च आदीनवञ्च निस्सरणञ्च समेच्च अभिसमेच्च धम्मं. यं किञ्चि समुदयधम्मं सब्बं तं निरोधधम्मन्ति समेच्च अभिसमेच्च धम्मन्ति – विद्वा च वेदेहि समेच्च धम्मं.

न उच्चावचं गच्छति भूरिपञ्ञोति न सत्थारतो सत्थारं गच्छति, न धम्मक्खानतो धम्मक्खानं गच्छति, न गणतो गणं गच्छति, न दिट्ठिया दिट्ठिं गच्छति, न पटिपदाय पटिपदं गच्छति, न मग्गतो मग्गं गच्छति. भूरिपञ्ञोति भूरिपञ्ञो महापञ्ञो पुथुपञ्ञो हासपञ्ञो जवनपञ्ञो तिक्खपञ्ञो निब्बेधिकपञ्ञो. भूरि वुच्चति पथवी. ताय पथविसमाय पञ्ञाय विपुलाय वित्थताय समन्नागतोति – न उच्चावचं गच्छति भूरिपञ्ञो.

तेनाह भगवा –

‘‘सयं समादाय वतानि जन्तु, उच्चावचं गच्छति सञ्ञसत्तो;

विद्वा च वेदेहि समेच्च धम्मं, न उच्चावचं गच्छति भूरिपञ्ञो’’ति.

२८.

स सब्बधम्मेसु विसेनिभूतो, यं किञ्चि दिट्ठं व सुतं मुतं वा;

तमेव दस्सिं विवटं चरन्तं, केनीध लोकस्मि विकप्पयेय्य.

स सब्बधम्मेसु विसेनिभूतो यं किञ्चि दिट्ठं व सुतं मुतं वाति. सेना वुच्चति मारसेना. कायदुच्चरितं मारसेना, वचीदुच्चरितं मारसेना, मनोदुच्चरितं मारसेना, रागो मारसेना, दोसो मारसेना, मोहो मारसेना, कोधो मारसेना, उपनाहो…पे… सब्बाकुसलाभिसङ्खारा मारसेना.

वुत्तञ्हेतं भगवता –

‘‘कामा ते पठमा सेना, दुतिया अरति वुच्चति;

ततिया खुप्पिपासा ते, चतुत्थी तण्हा वुच्चति.

‘‘पञ्चमी थिनमिद्धं ते, छट्ठा भीरू पवुच्चति;

सत्तमी विचिकिच्छा ते, मक्खो थम्भो ते अट्ठमो.

‘‘लाभो सिलोको सक्कारो, मिच्छालद्धो च यो यसो;

यो चत्तानं समुक्कंसे, परे च अवजानति.

‘‘एसा नमुचि ते सेना, कण्हस्साभिप्पहारिनी;

न नं असुरो जिनाति, जेत्वाव लभते सुख’’न्ति.

यतो चतूहि अरियमग्गेहि सब्बा च मारसेना सब्बे च पटिसेनिकरा किलेसा जिता च पराजिता च भग्गा विप्पलुग्गा परम्मुखा, सो वुच्चति विसेनिभूतो. सो दिट्ठे विसेनिभूतो, सुते विसेनिभूतो, मुते विसेनिभूतो, विञ्ञाते विसेनिभूतोति – स सब्बधम्मेसु विसेनिभूतो यं किञ्चि दिट्ठं व सुतं मुतं वा.

तमेव दस्सिं विवटं चरन्तन्ति. तमेव सुद्धदस्सिं विसुद्धदस्सिं परिसुद्धदस्सिं वोदातदस्सिं परियोदातदस्सिं. अथ वा, सुद्धदस्सनं विसुद्धदस्सनं परिसुद्धदस्सनं वोदातदस्सनं परियोदातदस्सनं. विवटन्ति तण्हाछदनं दिट्ठिछदनं किलेसछदनं दुच्चरितछदनं अविज्जाछदनं. तानि छदनानि विवटानि होन्ति विद्धंसितानि उग्घाटितानि समुग्घाटितानि पहीनानि समुच्छिन्नानि वूपसन्तानि पटिपस्सद्धानि अभब्बुप्पत्तिकानि ञाणग्गिना दड्ढानि. चरन्तन्ति चरन्तं विचरन्तं विहरन्तं इरियन्तं वत्तेन्तं पालेन्तं यपेन्तं यापेन्तन्ति – तमेव दस्सिं विवटं चरन्तं.

केनीध लोकस्मि विकप्पयेय्याति. कप्पाति द्वे कप्पा – तण्हाकप्पो च दिट्ठिकप्पो च…पे… अयं तण्हाकप्पो…पे… अयं दिट्ठिकप्पो. तस्स तण्हाकप्पो पहीनो, दिट्ठिकप्पो पटिनिस्सट्ठो. तण्हाकप्पस्स पहीनत्ता दिट्ठिकप्पस्स पटिनिस्सट्ठत्ता केन रागेन कप्पेय्य, केन दोसेन कप्पेय्य, केन मोहेन कप्पेय्य, केन मानेन कप्पेय्य, काय दिट्ठिया कप्पेय्य, केन उद्धच्चेन कप्पेय्य, काय विचिकिच्छाय कप्पेय्य, केहि अनुसयेहि कप्पेय्य – रत्तोति वा दुट्ठोति वा मूळ्होति वा विनिबद्धोति वा परामट्ठोति वा विक्खेपगतोति वा अनिट्ठङ्गतोति वा थामगतोति वा. ते अभिसङ्खारा पहीना. अभिसङ्खारानं पहीनत्ता गतियो केन कप्पेय्य – नेरयिकोति वा तिरच्छानयोनिकोति वा पेत्तिविसयिकोति वा मनुस्सोति वा देवोति वा रूपीति वा अरूपीति वा सञ्ञीति वा असञ्ञीति वा नेवसञ्ञीनासञ्ञीति वा. सो हेतु नत्थि, पच्चयो नत्थि, कारणं नत्थि, येन कप्पेय्य विकप्पेय्य विकप्पं आपज्जेय्य. लोकस्मिन्ति अपायलोके मनुस्सलोके देवलोके खन्धलोके धातुलोके आयतनलोकेति – केनीध लोकस्मिं विकप्पयेय्य.

तेनाह भगवा –

‘‘स सब्बधम्मेसु विसेनिभूतो, यं किञ्चि दिट्ठं व सुतं मुतं वा;

तमेव दस्सिं विवटं चरन्तं, केनीध लोकस्मि विकप्पयेय्या’’ति.

२९.

न कप्पयन्ति न पुरेक्खरोन्ति, अच्चन्तसुद्धीति न ते वदन्ति;

आदानगन्थं गथितं विसज्ज, आसं न कुब्बन्ति कुहिञ्चि लोके.

न कप्पयन्ति न पुरेक्खरोन्तीति. कप्पाति द्वे कप्पा – तण्हाकप्पो च दिट्ठिकप्पो च…पे… अयं तण्हाकप्पो…पे… अयं दिट्ठिकप्पो. तेसं तण्हाकप्पो पहीनो, दिट्ठिकप्पो पटिनिस्सट्ठो. तण्हाकप्पस्स पहीनत्ता, दिट्ठिकप्पस्स पटिनिस्सट्ठत्ता तण्हाकप्पं वा दिट्ठिकप्पं वा न कप्पेन्ति न जनेन्ति न सञ्जनेन्ति न निब्बत्तेन्ति नाभिनिब्बत्तेन्तीति – न कप्पयन्ति. न पुरेक्खरोन्तीति. पुरेक्खाराति द्वे पुरेक्खारा – तण्हापुरेक्खारो च दिट्ठिपुरेक्खारो च…पे… अयं तण्हापुरेक्खारो…पे… अयं दिट्ठिपुरेक्खारो. तेसं तण्हापुरेक्खारो पहीनो, दिट्ठिपुरेक्खारो पटिनिस्सट्ठो. तण्हापुरेक्खारस्स पहीनत्ता, दिट्ठिपुरेक्खारस्स पटिनिस्सट्ठत्ता न तण्हं वा न दिट्ठिं वा पुरतो कत्वा चरन्ति, न तण्हाधजा न तण्हाकेतू न तण्हाधिपतेय्या, न दिट्ठिधजा न दिट्ठिकेतू न दिट्ठाधिपतेय्या, न तण्हाय वा न दिट्ठिया वा परिवारिता चरन्तीति – न कप्पयन्ति न पुरेक्खरोन्ति.

अच्चन्तसुद्धीति न ते वदन्तीति अच्चन्तसुद्धिं संसारसुद्धिं अकिरियदिट्ठिं सस्सतवादं न वदन्ति न कथेन्ति न भणन्ति न दीपयन्ति न वोहरन्तीति – अच्चन्तसुद्धीति न ते वदन्ति.

आदानगन्थं गथितं विसज्जाति. गन्थाति चत्तारो गन्था – अभिज्झा कायगन्थो, ब्यापादो कायगन्थो, सीलब्बतपरामासो कायगन्थो, इदंसच्चाभिनिवेसो कायगन्थो. अत्तनो दिट्ठिया रागो अभिज्झा कायगन्थो; परवादेसु आघातो अप्पच्चयो ब्यापादो कायगन्थो; अत्तनो सीलं वा वतं वा सीलवतं वा परामसन्तीति सीलब्बतपरामासो कायगन्थो, अत्तनो दिट्ठि इदंसच्चाभिनिवेसो कायगन्थो. किंकारणा वुच्चति आदानगन्थो? तेहि गन्थेहि रूपं आदियन्ति उपादियन्ति गण्हन्ति परामसन्ति अभिनिविसन्ति; वेदनं…पे… सञ्ञं… सङ्खारे… विञ्ञाणं… गतिं … उपपत्तिं… पटिसन्धिं… भवं… संसारवट्टं आदियन्ति उपादियन्ति गण्हन्ति परामसन्ति अभिनिविसन्ति. तंकारणा वुच्चति आदानगन्थो. विसज्जाति गन्थे वोसज्जित्वा वा – विसज्ज. अथ वा गन्थे गधिते गन्थिते बन्धे विबन्धे आबन्धे लग्गे लग्गिते पलिबुद्धे बन्धने पोटयित्वा – [फोटयित्वा (स्या.)] विसज्ज. यथा वय्हं वा रथं वा सकटं वा सन्दमानिकं वा सज्जं विसज्जं करोन्ति विकोपेन्ति; एवमेव गन्थे वोसज्जित्वा – विसज्ज. अथ वा गन्थे गधिते गन्थिते बन्धे विबन्धे आबन्धे लग्गे लग्गिते पलिबुद्धे बन्धने पोटयित्वा विसज्जाति – आदानगन्थं गथितं विसज्ज.

आसं न कुब्बन्ति कुहिञ्चि लोकेति. आसा वुच्चति तण्हा यो रागो सारागो…पे… अभिज्झा लोभो अकुसलमूलं. आसं न कुब्बन्तीति आसं न कुब्बन्ति न जनेन्ति न सञ्जनेन्ति न निब्बत्तेन्ति न अभिनिब्बत्तेन्ति. कुहिञ्चीति कुहिञ्चि किम्हिचि कत्थचि अज्झत्तं वा बहिद्धा वा अज्झत्तबहिद्धा वा. लोकेति अपायलोके…पे… आयतनलोकेति – आसं न कुब्बन्ति कुहिञ्चि लोके.

तेनाह भगवा –

‘‘न कप्पयन्ति न पुरेक्खरोन्ति, अच्चन्तसुद्धीति न ते वदन्ति;

आदानगन्थं गथितं विसज्ज, आसं न कुब्बन्ति कुहिञ्चि लोके’’ति.

३०.

सीमातिगो ब्राह्मणो तस्स नत्थि, ञत्वा च दिस्वा च समुग्गहीतं;

न रागरागी न विरागरत्तो, तस्सीध नत्थि परमुग्गहीतं.

सीमातिगो ब्राह्मणो तस्स नत्थि, ञत्वा च दिस्वा च समुग्गहीतन्ति. सीमाति चतस्सो सीमायो – सक्कायदिट्ठि, विचिकिच्छा, सीलब्बतपरामासो, दिट्ठानुसयो, विचिकिच्छानुसयो, तदेकट्ठा च किलेसा – अयं पठमा सीमा. ओळारिकं कामरागसञ्ञोजनं, पटिघसञ्ञोजनं, ओळारिको कामरागानुसयो, पटिघानुसयो, तदेकट्ठा च किलेसा – अयं दुतिया सीमा. अनुसहगतं कामरागसञ्ञोजनं, पटिघसञ्ञोजनं, अनुसहगतो कामरागानुसयो, पटिघानुसयो, तदेकट्ठा च किलेसा – अयं ततिया सीमा. रूपरागो अरूपरागो मानो उद्धच्चं अविज्जा, मानानुसयो भवरागानुसयो अविज्जानुसयो, तदेकट्ठा च किलेसा – अयं चतुत्था सीमा. यतो च चतूहि अरियमग्गेहि इमा चतस्सो सीमायो अतिक्कन्तो होति समतिक्कन्तो वीतिवत्तो, सो वुच्चति सीमातिगो. ब्राह्मणोति सत्तन्नं धम्मानं बाहितत्ता ब्राह्मणो – सक्कायदिट्ठि बाहिता होति, विचिकिच्छा बाहिता होति, सीलब्बतपरामासो बाहितो होति…पे… असितो तादि पवुच्चते स ब्रह्मा. तस्साति अरहतो खीणासवस्स.

ञत्वाति परचित्तञाणेन वा ञत्वा पुब्बेनिवासानुस्सतिञाणेन वा ञत्वा. दिस्वाति मंसचक्खुना वा दिस्वा दिब्बचक्खुना वा दिस्वा. सीमातिगो ब्राह्मणो तस्स नत्थि, ञत्वा च दिस्वा च समुग्गहीतन्ति. तस्स इदं परमं अग्गं सेट्ठं विसिट्ठं [विसेट्ठं (सी. स्या.)] पामोक्खं उत्तमं पवरन्ति गहितं परामट्ठं अभिनिविट्ठं अज्झोसितं अधिमुत्तं नत्थि न सन्ति न संविज्जति नुपलब्भति, पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढन्ति – सीमातिगो ब्राह्मणो तस्स नत्थि ञत्वा च दिस्वा च समुग्गहीतं.

न रागरागी न विरागरत्तोति. रागरत्ता वुच्चन्ति ये पञ्चसु कामगुणेसु रत्ता गिद्धा गधिता मुच्छिता अज्झोसन्ना लग्गा लग्गिता पलिबुद्धा. विरागरत्ता वुच्चन्ति ये रूपावचरअरूपावचरसमापत्तीसु रत्ता गिद्धा गधिता मुच्छिता अज्झोसन्ना लग्गा लग्गिता पलिबुद्धा. न रागरागी न विरागरत्तोति यतो कामरागो च रूपरागो च अरूपरागो च पहीना होन्ति उच्छिन्नमूला तालावत्थुकता अनभावंकता [अनभावकता (सी.), अनभावंगता (स्या.)] आयतिं अनुप्पादधम्मा. एत्तावता न रागरागी न विरागरत्तो.

तस्सीध नत्थि परमुग्गहीतन्ति. तस्साति अरहतो खीणासवस्स. तस्स इदं परमं अग्गं सेट्ठं विसिट्ठं पामोक्खं उत्तमं पवरन्ति गहितं परामट्ठं अभिनिविट्ठं अज्झोसितं अधिमुत्तं नत्थि न सन्ति न संविज्जति नुपलब्भति, पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढन्ति – तस्सीध नत्थि परमुग्गहीतं.

तेनाह भगवा –

‘‘सीमातिगो ब्राह्मणो तस्स नत्थि, ञत्वा च दिस्वा च समुग्गहीतं;

न रागरागी न विरागरत्तो, तस्सीध नत्थि परमुग्गहीत’’न्ति.

सुद्धट्ठकसुत्तनिद्देसो चतुत्थो.

५. परमट्ठकसुत्तनिद्देसो

अथ परमट्ठकसुत्तनिद्देसं वक्खति –

३१.

परमन्ति दिट्ठीसु परिब्बसानो, यदुत्तरिं कुरुते जन्तु लोके;

हीनाति अञ्ञे ततो सब्बमाह, तस्मा विवादानि अवीतिवत्तो.

परमन्ति दिट्ठीसु परिब्बसानोति. सन्तेके समणब्राह्मणा दिट्ठिगतिका. ते द्वासट्ठिया दिट्ठिगतानं अञ्ञतरञ्ञतरं दिट्ठिगतं ‘‘इदं परमं अग्गं सेट्ठं विसिट्ठं पामोक्खं उत्तमं पवर’’न्ति गहेत्वा उग्गहेत्वा गण्हित्वा परामसित्वा अभिनिविसित्वा सकाय सकाय दिट्ठिया वसन्ति पवसन्ति आवसन्ति परिवसन्ति. यथा आगारिका वा घरेसु वसन्ति, सापत्तिका वा आपत्तीसु वसन्ति, सकिलेसा वा किलेसेसु वसन्ति; एवमेव सन्तेके समणब्राह्मणा दिट्ठिगतिका. ते द्वासट्ठिया दिट्ठिगतानं अञ्ञतरञ्ञतरं दिट्ठिगतं ‘‘इदं परमं अग्गं सेट्ठं विसिट्ठं पामोक्खं उत्तमं पवर’’न्ति गहेत्वा उग्गहेत्वा गण्हित्वा परामसित्वा अभिनिविसित्वा सकाय सकाय दिट्ठिया वसन्ति पवसन्ति [संवसन्ति (स्या.) नत्थि सीहळपोत्थके] आवसन्ति परिवसन्तीति – परमन्ति दिट्ठीसु परिब्बसानो.

यदुत्तरिं कुरुते जन्तु लोकेति. यदन्ति यं. उत्तरिं कुरुतेति उत्तरिं करोति, अग्गं सेट्ठं विसिट्ठं पामोक्खं उत्तमं पवरं करोति ‘‘अयं सत्था सब्बञ्ञू’’ति उत्तरिं करोति, अग्गं सेट्ठं विसिट्ठं पामोक्खं उत्तमं पवरं करोति. ‘‘अयं धम्मो स्वाक्खातो…, अयं गणो सुप्पटिपन्नो…, अयं दिट्ठि भद्दिका…, अयं पटिपदा सुपञ्ञत्ता…, अयं मग्गो निय्यानिको’’ति उत्तरिं करोति, अग्गं सेट्ठं विसिट्ठं पामोक्खं उत्तमं पवरं करोति निब्बत्तेति अभिनिब्बत्तेति. जन्तूति सत्तो नरो…पे… मनुजो. लोकेति अपायलोके…पे… आयतनलोकेति – यदुत्तरिं कुरुते जन्तु लोके.

हीनाति अञ्ञे ततो सब्बमाहाति अत्तनो सत्थारं धम्मक्खानं गणं दिट्ठिं पटिपदं मग्गं ठपेत्वा सब्बे परप्पवादे खिपति उक्खिपति परिक्खिपति. ‘‘सो सत्था न सब्बञ्ञू, धम्मो न स्वाक्खातो, गणो न सुप्पटिपन्नो, दिट्ठि न भद्दिका, पटिपदा न सुपञ्ञत्ता, मग्गो न निय्यानिको, नत्थेत्थ सुद्धि वा विसुद्धि वा परिसुद्धि वा मुत्ति वा विमुत्ति वा परिमुत्ति वा, नत्थेत्थ सुज्झन्ति वा विसुज्झन्ति वा परिसुज्झन्ति वा मुच्चन्ति वा विमुच्चन्ति वा परिमुच्चन्ति वा, हीना निहीना ओमका लामका छतुक्का परित्ता’’ति एवमाह एवं कथेति एवं भणति एवं दीपयति एवं वोहरतीति – हीनाति अञ्ञे ततो सब्बमाह.

तस्मा विवादानि अवीतिवत्तोति. तस्माति तंकारणा तंहेतु तप्पच्चया तंनिदाना. विवादानीति दिट्ठिकलहानि दिट्ठिभण्डनानि दिट्ठिविग्गहानि दिट्ठिविवादानि दिट्ठिमेधगानि च. अवीतिवत्तोति अनतिक्कन्तो असमतिक्कन्तो अवीतिवत्तोति – तस्मा विवादानि अवीतिवत्तो.

तेनाह भगवा –

‘‘परमन्ति दिट्ठीसु परिब्बसानो, यदुत्तरिं कुरुते जन्तु लोके;

हीनाति अञ्ञे ततो सब्बमाह, तस्मा विवादानि अवीतिवत्तो’’ति.

३२.

यदत्तनी पस्सति आनिसंसं, दिट्ठे सुते सीलवते मुते वा;

तदेव सो तत्थ समुग्गहाय, निहीनतो पस्सति सब्बमञ्ञं.

यदत्तनी पस्सति आनिसंसं, दिट्ठे सुते सीलवते मुते वाति. यदत्तनीति यं अत्तनि. अत्ता वुच्चति दिट्ठिगतं. अत्तनो दिट्ठिया द्वे आनिसंसे पस्सति – दिट्ठधम्मिकञ्च आनिसंसं, सम्परायिकञ्च आनिसंसं. कतमो दिट्ठिया दिट्ठधम्मिको आनिसंसो? यंदिट्ठिको सत्था होति, तंदिट्ठिका सावका होन्ति. तंदिट्ठिकं सत्थारं सावका सक्करोन्ति गरुं करोन्ति मानेन्ति पूजेन्ति, लभति च ततोनिदानं चीवरपिण्डपातसेनासनगिलानपच्चयभेसज्जपरिक्खारं. अयं दिट्ठिया दिट्ठधम्मिको आनिसंसो. कतमो दिट्ठिया सम्परायिको आनिसंसो? अयं दिट्ठि अलं नागत्ताय वा सुपण्णत्ताय वा यक्खत्ताय वा असुरत्ताय वा गन्धब्बत्ताय वा महाराजत्ताय वा इन्दत्ताय वा ब्रह्मत्ताय वा देवत्ताय वा; अयं दिट्ठि अलं सुद्धिया विसुद्धिया परिसुद्धिया मुत्तिया विमुत्तिया परिमुत्तिया; इमाय दिट्ठिया सुज्झन्ति विसुज्झन्ति परिसुज्झन्ति मुच्चन्ति विमुच्चन्ति परिमुच्चन्ति; इमाय दिट्ठिया सुज्झिस्सामि विसुज्झिस्सामि परिसुज्झिस्सामि मुच्चिस्सामि विमुच्चिस्सामि परिमुच्चिस्सामि आयतिं फलपाटिकङ्खी होति. अयं दिट्ठिया सम्परायिको आनिसंसो. अत्तनो दिट्ठिया इमे द्वे आनिसंसे पस्सति, दिट्ठसुद्धियापि द्वे आनिसंसे पस्सति, सुतसुद्धियापि द्वे आनिसंसे पस्सति, सीलसुद्धियापि द्वे आनिसंसे पस्सति, वतसुद्धियापि द्वे आनिसंसे पस्सति, मुतसुद्धियापि द्वे आनिसंसे पस्सति – दिट्ठधम्मिकञ्च आनिसंसं सम्परायिकञ्च आनिसंसं. कतमो मुतसुद्धिया दिट्ठधम्मिको आनिसंसो? यंदिट्ठिको सत्था होति तंदिट्ठिका सावका होन्ति…पे… अयं मुतसुद्धिया दिट्ठधम्मिको आनिसंसो. कतमो मुतसुद्धिया सम्परायिको आनिसंसो? अयं दिट्ठि अलं नागत्ताय वा…पे… अयं मुतसुद्धिया सम्परायिको आनिसंसो. मुतसुद्धियापि इमे द्वे आनिसंसे पस्सति दक्खति ओलोकेति निज्झायति उपपरिक्खतीति – यदत्तनी पस्सति आनिसंसं दिट्ठे सुते सीलवते मुते वा.

तदेव सो तत्थ समुग्गहायाति. तदेवाति तं दिट्ठिगतं. तत्थाति सकाय दिट्ठिया सकाय खन्तिया सकाय रुचिया सकाय लद्धिया. समुग्गहायाति इदं परमं अग्गं सेट्ठं विसिट्ठं पामोक्खं उत्तमं पवरन्ति गहेत्वा उग्गहेत्वा गण्हित्वा परामसित्वा अभिनिविसित्वाति – तदेव सो तत्थ समुग्गहाय.

निहीनतो पस्सति सब्बमञ्ञन्ति. अञ्ञं सत्थारं धम्मक्खानं गणं दिट्ठिं पटिपदं मग्गं हीनतो निहीनतो ओमकतो लामकतो छतुक्कतो परित्ततो दिस्सति पस्सति दक्खति ओलोकेति निज्झायति उपपरिक्खतीति – निहीनतो पस्सति सब्बमञ्ञं.

तेनाह भगवा –

‘‘यदत्तनी पस्सति आनिसंसं, दिट्ठे सुते सीलवते मुते वा;

तदेव सो तत्थ समुग्गहाय, निहीनतो पस्सति सब्बमञ्ञ’’न्ति.

३३.

तं वापि [चापि (सी.)] गन्थं कुसला वदन्ति, यं निस्सितो पस्सति हीनमञ्ञं;

तस्मा हि दिट्ठं व सुतं मुतं वा, सीलब्बतं भिक्खु न निस्सयेय्य.

तं वापि गन्थं कुसला वदन्तीति. कुसलाति ये ते खन्धकुसला धातुकुसला आयतनकुसला पटिच्चसमुप्पादकुसला सतिपट्ठानकुसला सम्मप्पधानकुसला इद्धिपादकुसला इन्द्रियकुसला बलकुसला बोज्झङ्गकुसला मग्गकुसला फलकुसला निब्बानकुसला, ते कुसला एवं वदन्ति – ‘‘गन्थो एसो, लग्गनं एतं, बन्धनं एतं, पलिबोधो एसो’’ति. एवं वदन्ति एवं कथेन्ति एवं भणन्ति एवं दीपयन्ति एवं वोहरन्तीति – तं वापि गन्थं कुसला वदन्ति.

यं निस्सितो पस्सति हीनमञ्ञन्ति. यं निस्सितोति यं सत्थारं धम्मक्खानं गणं दिट्ठिं पटिपदं मग्गं निस्सितो सन्निस्सितो अल्लीनो उपगतो अज्झोसितो अधिमुत्तो. पस्सति हीनमञ्ञन्ति अञ्ञं सत्थारं धम्मक्खानं गणं दिट्ठिं पटिपदं मग्गं हीनतो निहीनतो ओमकतो लामकतो छतुक्कतो परित्ततो दिस्सति पस्सति दक्खति ओलोकेति निज्झायति उपनिज्झायति उपपरिक्खतीति – यं निस्सितो पस्सति हीनमञ्ञं.

तस्मा हि दिट्ठं व सुतं मुतं वा, सीलब्बतं भिक्खु न निस्सयेय्याति. तस्माति तस्मा तंकारणा तंहेतु तप्पच्चया तंनिदाना दिट्ठं वा दिट्ठसुद्धिं वा सुतं वा सुतसुद्धिं वा मुतं वा मुतसुद्धिं वा सीलं वा सीलसुद्धिं वा वतं वा वतसुद्धिं वा न निस्सयेय्य न गण्हेय्य न परामसेय्य नाभिनिवेसेय्याति – तस्मा हि दिट्ठं व सुतं मुतं वा सीलब्बतं भिक्खु न निस्सयेय्य.

तेनाह भगवा –

‘‘तं वापि गन्थं कुसला वदन्ति, यं निस्सितो पस्सति हीनमञ्ञं;

तस्मा हि दिट्ठं व सुतं मुतं वा, सीलब्बतं भिक्खु न निस्सयेय्या’’ति.

३४.

दिट्ठिम्पि लोकस्मिं न कप्पयेय्य, ञाणेन वा सीलवतेन वापि;

समोति अत्तानमनूपनेय्य, हीनो न मञ्ञेथ विसेसि वापि.

दिट्ठिम्पि लोकस्मिं न कप्पयेय्य, ञाणेन वा सीलवतेन वापीति. अट्ठसमापत्तिञाणेन वा पञ्चाभिञ्ञाञाणेन वा मिच्छाञाणेन वा, सीलेन वा वतेन वा सीलब्बतेन वा, दिट्ठिं न कप्पयेय्य न जनेय्य न सञ्जनेय्य न निब्बत्तेय्य न अभिनिब्बत्तेय्य. लोकस्मिन्ति अपायलोके…पे… आयतनलोकेति – दिट्ठिम्पि लोकस्मिं न कप्पयेय्य ञाणेन वा सीलवतेन वापि.

समोति अत्तानमनूपनेय्याति. सदिसोहमस्मीति अत्तानं न उपनेय्य जातिया वा गोत्तेन वा कोलपुत्तियेन वा वण्णपोक्खरताय वा धनेन वा अज्झेनेन वा कम्मायतनेन वा सिप्पायतनेन वा विज्जाट्ठानेन वा सुतेन वा पटिभानेन वा अञ्ञतरञ्ञतरेन वा वत्थुनाति – समोति अत्तानमनूपनेय्य.

हीनो न मञ्ञेथ विसेसि वापीति. हीनोहमस्मीति अत्तानं न उपनेय्य जातिया वा गोत्तेन वा…पे… अञ्ञतरञ्ञतरेन वा वत्थुना. सेय्योहमस्मीति अत्तानं न उपनेय्य जातिया वा गोत्तेन वा…पे… अञ्ञतरञ्ञतरेन वा वत्थुनाति – हीनो न मञ्ञेथ विसेसि वापि.

तेनाह भगवा –

‘‘दिट्ठिम्पि लोकस्मिं न कप्पयेय्य, ञाणेन वा सीलवतेन वापि;

समोति अत्तानमनूपनेय्य, हीनो न मञ्ञेथ विसेसि वापी’’ति.

३५.

अत्तं पहाय अनुपादियानो, ञाणेनपि सो निस्सयं नो करोति;

स वे वियत्तेसु न वग्गसारी, दिट्ठिम्पि सो न पच्चेति किञ्चि.

अत्तं पहाय अनुपादियानोति. अत्तं पहायाति अत्तदिट्ठिं पहाय. अत्तं पहायाति गाहं [अत्तगाहं (सी. क.)] पहाय. अत्तं पहायाति तण्हावसेन दिट्ठिवसेन गहितं परामट्ठं अभिनिविट्ठं अज्झोसितं अधिमुत्तं पहाय पजहित्वा विनोदेत्वा ब्यन्तिं करित्वा अनभावं गमेत्वाति – अत्तं पहाय. अनुपादियानोति चतूहि उपादानेहि अनुपादियमानो अगण्हमानो अपरामासमानो अनभिनिविसमानोति – अत्तं पहाय अनुपादियानो.

ञाणेनपि सो निस्सयं नो करोतीति अट्ठसमापत्तिञाणेन वा पञ्चाभिञ्ञाञाणेन वा मिच्छाञाणेन वा तण्हानिस्सयं वा दिट्ठिनिस्सयं वा न करोति न जनेति न सञ्जनेति न निब्बत्तेति न अभिनिब्बत्तेतीति – ञाणेनपि सो निस्सयं नो करोति.

स वे वियत्तेसु न वग्गसारीति स वे वियत्तेसु भिन्नेसु द्वेज्झापन्नेसु द्वेळ्हकजातेसु नानादिट्ठिकेसु नानाखन्तिकेसु नानारुचिकेसु नानालद्धिकेसु नानादिट्ठिनिस्सयं निस्सितेसु छन्दागतिं गच्छन्तेसु दोसागतिं गच्छन्तेसु मोहागतिं गच्छन्तेसु भयागतिं गच्छन्तेसु न छन्दागतिं गच्छति न दोसागतिं गच्छति न मोहागतिं गच्छति न भयागतिं गच्छति न रागवसेन गच्छति न दोसवसेन गच्छति न मोहवसेन गच्छति न मानवसेन गच्छति न दिट्ठिवसेन गच्छति न उद्धच्चवसेन गच्छति न विचिकिच्छावसेन गच्छति न अनुसयवसेन गच्छति न वग्गेहि धम्मेहि यायति निय्यति वुय्हति संहरीयतीति – स वे वियत्तेसु न वग्गसारी.

दिट्ठिम्पि सो न पच्चेति किञ्चीति. तस्स द्वासट्ठि दिट्ठिगतानि पहीनानि समुच्छिन्नानि वूपसन्तानि पटिपस्सद्धानि अभब्बुप्पत्तिकानि ञाणग्गिना दड्ढानि. सो किञ्चि दिट्ठिगतं न पच्चेति न पच्चागच्छतीति – दिट्ठिम्पि सो न पच्चेति किञ्चि.

तेनाह भगवा –

‘‘अत्तं पहाय अनुपादियानो, ञाणेनपि सो निस्सयं नो करोति;

स वे वियत्तेसु न वग्गसारी, दिट्ठिम्पि सो न पच्चेति किञ्ची’’ति.

३६.

यस्सूभयन्ते पणिधीध नत्थि, भवाभवाय इध वा हुरं वा;

निवेसना तस्स न सन्ति केचि, धम्मेसु निच्छेय्य समुग्गहीतं.

यस्सूभयन्ते पणिधीध नत्थि, भवाभवाय इध वा हुरं वाति यस्साति अरहतो खीणासवस्स. अन्तोति [अन्ताति (स्या.)] फस्सो एको अन्तो, फस्ससमुदयो दुतियो अन्तो; अतीतो एको अन्तो, अनागतो दुतियो अन्तो; सुखा वेदना एको अन्तो, दुक्खा वेदना दुतियो अन्तो; नामं एको अन्तो, रूपं दुतियो अन्तो; छ अज्झत्तिकानि आयतनानि एको अन्तो, छ बाहिरानि आयतनानि दुतियो अन्तो; सक्कायो एको अन्तो, सक्कायसमुदयो दुतियो अन्तो. पणिधि वुच्चति तण्हा. यो रागो सारागो…पे… अभिज्झा लोभो अकुसलमूलं.

भवाभवायाति भवाभवाय कम्मभवाय पुनब्भवाय कामभवाय, कम्मभवाय कामभवाय पुनब्भवाय रूपभवाय, कम्मभवाय रूपभवाय पुनब्भवाय अरूपभवाय, कम्मभवाय अरूपभवाय पुनब्भवाय पुनप्पुनभवाय पुनप्पुनगतिया पुनप्पुनउपपत्तिया पुनप्पुनपटिसन्धिया पुनप्पुनअत्तभावाभिनिब्बत्तिया. इधाति सकत्तभावो, हुराति परत्तभावो; इधाति सकरूपवेदनासञ्ञासङ्खारविञ्ञाणं, हुराति पररूपवेदनासञ्ञासङ्खारविञ्ञाणं; इधाति छ अज्झत्तिकानि आयतनानि, हुराति छ बाहिरानि आयतनानि; इधाति मनुस्सलोको, हुराति देवलोको; इधाति कामधातु, हुराति रूपधातु अरूपधातु; इधाति कामधातु रूपधातु. हुराति अरूपधातु. यस्सूभयन्ते पणिधीध नत्थि भवाभवाय इध वा हुरं वाति. यस्स उभो अन्ते च भवाभवाय च इध हुरञ्च पणिधि तण्हा नत्थि न सन्ति न संविज्जन्ति नुपलब्भन्ति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढाति – यस्सूभयन्ते पणिधीध नत्थि भवाभवाय इध वा हुरं वा.

निवेसना तस्स न सन्ति केचीति. निवेसनाति द्वे निवेसना – तण्हानिवेसना च दिट्ठिनिवेसना च…पे… अयं तण्हानिवेसना…पे… अयं दिट्ठिनिवेसना. तस्साति अरहतो खीणासवस्स. निवेसना तस्स न सन्ति केचीति निवेसना तस्स न सन्ति केचि नत्थि न सन्ति न संविज्जन्ति नुपलब्भन्ति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढाति – निवेसना तस्स न सन्ति केचि.

धम्मेसु निच्छेय्य समुग्गहीतन्ति. धम्मेसूति द्वासट्ठिया दिट्ठिगतेसु. निच्छेय्याति निच्छिनित्वा विनिच्छिनित्वा विचिनित्वा पविचिनित्वा तुलयित्वा तीरयित्वा विभावयित्वा विभूतं कत्वा. समुग्गहीतन्ति ओधिग्गाहो बिलग्गाहो वरग्गाहो कोट्ठासग्गाहो उच्चयग्गाहो समुच्चयग्गाहो, ‘‘इदं सच्चं तच्छं तथं भूतं याथावं अविपरीत’’न्ति गहितं परामट्ठं अभिनिविट्ठं अज्झोसितं अधिमुत्तं नत्थि न सन्ति न संविज्जन्ति नुपलब्भन्ति, पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढन्ति – धम्मेसु निच्छेय्य समुग्गहीतं.

तेनाह भगवा –

‘‘यस्सूभयन्ते पणिधीध नत्थि, भवाभवाय इध वा हुरं वा;

निवेसना तस्स न सन्ति केचि, धम्मेसु निच्छेय्य समुग्गहीत’’न्ति.

३७.

तस्सीध दिट्ठे व सुते मुते वा, पकप्पिता नत्थि अणूपि सञ्ञा;

तं ब्राह्मणं दिट्ठिमनादियानं, केनीध लोकस्मिं विकप्पयेय्य.

तस्सीध दिट्ठे व सुते मुते वा, पकप्पिता नत्थि अणूपि सञ्ञाति. तस्साति अरहतो खीणासवस्स. तस्स दिट्ठे वा दिट्ठसुद्धिया वा सुते वा सुतसुद्धिया वा मुते वा मुतसुद्धिया वा सञ्ञापुब्बङ्गमता सञ्ञाविकप्पयेय्यता सञ्ञाविग्गहेन सञ्ञाय उट्ठपिता समुट्ठपिता कप्पिता पकप्पिता सङ्खता अभिसङ्खता सण्ठपिता, दिट्ठि नत्थि न सन्ति न संविज्जन्ति नुपलब्भन्ति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढाति – तस्सीध दिट्ठे व सुते मुते वा पकप्पिता नत्थि अणूपि सञ्ञा.

तं ब्राह्मणं दिट्ठिमनादियानन्ति. ब्राह्मणोति सत्तन्नं धम्मानं बाहितत्ता ब्राह्मणो – सक्कायदिट्ठि बाहिता होति…पे… असितो तादि पवुच्चते स ब्रह्मा. तं ब्राह्मणं दिट्ठिमनादियानन्ति. तं ब्राह्मणं दिट्ठिमनादियन्तं अगण्हन्तं अपरामसन्तं अनभिनिवेसन्तन्ति – तं ब्राह्मणं दिट्ठिमनादियानं.

केनीध लोकस्मिं विकप्पयेय्याति. कप्पाति द्वे कप्पा – तण्हाकप्पो च दिट्ठिकप्पो च…पे… अयं तण्हाकप्पो…पे… अयं दिट्ठिकप्पो. तस्स तण्हाकप्पो पहीनो, दिट्ठिकप्पो पटिनिस्सट्ठो. तण्हाकप्पस्स पहीनत्ता, दिट्ठिकप्पस्स पटिनिस्सट्ठत्ता केन रागेन कप्पेय्य केन दोसेन कप्पेय्य केन मोहेन कप्पेय्य केन मानेन कप्पेय्य काय दिट्ठिया कप्पेय्य केन उद्धच्चेन कप्पेय्य काय विचिकिच्छाय कप्पेय्य केहि अनुसयेहि कप्पेय्य – रत्तोति वा दुट्ठोति वा मूळ्होति वा विनिबद्धोति वा परामट्ठोति वा विक्खेपगतोति वा अनिट्ठङ्गतोति वा थामगतोति वा. ते अभिसङ्खारा पहीना. अभिसङ्खारानं पहीनत्ता गतियो केन कप्पेय्य – नेरयिकोति वा तिरच्छानयोनिकोति वा पेत्तिविसयिकोति वा मनुस्सोति वा देवोति वा रूपीति वा अरूपीति वा सञ्ञीति वा असञ्ञीति वा नेवसञ्ञीनासञ्ञीति वा. सो हेतु नत्थि पच्चयो नत्थि कारणं नत्थि, येन कप्पेय्य विकप्पेय्य विकप्पं आपज्जेय्य. लोकस्मिन्ति अपायलोके…पे… आयतनलोकेति – केनीध लोकस्मिं विकप्पयेय्य.

तेनाह भगवा –

‘‘तस्सीध दिट्ठे व सुते मुते वा, पकप्पिता नत्थि अणूपि सञ्ञा;

तं ब्राह्मणं दिट्ठिमनादियानं, केनीध लोकस्मिं विकप्पयेय्या’’ति.

३८.

न कप्पयन्ति न पुरेक्खरोन्ति, धम्मापि तेसं न पटिच्छितासे;

न ब्राह्मणो सीलवतेन नेय्यो, पारङ्गतो न पच्चेति तादी.

न कप्पयन्ति न पुरेक्खरोन्तीति. कप्पाति द्वे कप्पा – तण्हाकप्पो च दिट्ठिकप्पो च. कतमो तण्हाकप्पो? यावता तण्हासङ्खातेन सीमकतं मरियादिकतं ओधिकतं परियन्तकतं परिग्गहितं ममायितं – ‘‘इदं ममं, एतं ममं, एत्तकं ममं, एत्तावता ममं, मम रूपा सद्दा गन्धा रसा फोट्ठब्बा, अत्थरणा पावुरणा दासिदासा [दासीदासा (स्या. क.)] अजेळका कुक्कुटसूकरा हत्थिगवास्सवळवा खेत्तं वत्थु हिरञ्ञं सुवण्णं गामनिगमराजधानियो रट्ठञ्च जनपदो च कोसो च कोट्ठागारञ्च, केवलम्पि महापथविं तण्हावसेन ममायति, यावता अट्ठसततण्हाविचरितं – अयं तण्हाकप्पो. कतमो दिट्ठिकप्पो? वीसतिवत्थुका सक्कायदिट्ठि, दसवत्थुका मिच्छादिट्ठि, दसवत्थुका अन्तग्गाहिकादिट्ठि, या एवरूपा दिट्ठि दिट्ठिगतं दिट्ठिगहनं दिट्ठिकन्तारं दिट्ठिविसूकायिकं दिट्ठिविप्फन्दितं दिट्ठिसञ्ञोजनं गाहो पटिग्गाहो अभिनिवेसो परामासो कुम्मग्गो मिच्छापथो मिच्छत्तं तित्थायतनं विपरियासग्गाहो [विपरियेसग्गाहो (सी. स्या. क.)] विपरीतग्गाहो विपल्लासग्गाहो मिच्छागाहो, अयाथावकस्मिं याथावकन्ति गाहो, यावता द्वासट्ठि दिट्ठिगतानि – अयं दिट्ठिकप्पो. तेसं तण्हाकप्पो पहीनो, दिट्ठिकप्पो पटिनिस्सट्ठो. तण्हाकप्पस्स पहीनत्ता, दिट्ठिकप्पस्स पटिनिस्सट्ठत्ता तण्हाकप्पं वा दिट्ठिकप्पं वा न कप्पेन्ति न जनेन्ति न सञ्जनेन्ति न निब्बत्तेन्ति न अभिनिब्बत्तेन्तीति – न कप्पयन्ति.

न पुरेक्खरोन्तीति. पुरेक्खाराति द्वे पुरेक्खारा – तण्हापुरेक्खारो च दिट्ठिपुरेक्खारो च…पे… अयं तण्हापुरेक्खारो…पे… अयं दिट्ठिपुरेक्खारो. तेसं तण्हापुरेक्खारो पहीनो, दिट्ठिपुरेक्खारो पटिनिस्सट्ठो. तण्हापुरेक्खारस्स पहीनत्ता, दिट्ठिपुरेक्खारस्स पटिनिस्सट्ठत्ता न तण्हं वा न दिट्ठिं वा पुरतो कत्वा चरन्ति न तण्हाधजा न तण्हाकेतू न तण्हाधिपतेय्या न दिट्ठिधजा न दिट्ठिकेतू न दिट्ठाधिपतेय्या. न तण्हाय वा न दिट्ठिया वा परिवारेत्वा चरन्तीति – न कप्पयन्ति न पुरेक्खरोन्ति.

धम्मापि तेसं न पटिच्छितासेति. धम्मा वुच्चन्ति द्वासट्ठि दिट्ठिगतानि. तेसन्ति तेसं अरहन्तानं खीणासवानं. न पटिच्छितासेति ‘‘सस्सतो लोको, इदमेव सच्चं मोघमञ्ञ’’न्ति न पटिच्छितासे. ‘‘असस्सतो लोको… अन्तवा लोको… अनन्तवा लोको… तं जीवं तं सरीरं… अञ्ञं जीवं अञ्ञं सरीरं… होति तथागतो परं मरणा… न होति तथागतो परं मरणा… होति च न च होति तथागतो परं मरणा… नेव होति न न होति तथागतो परं मरणा, इदमेव सच्चं मोघमञ्ञ’’न्ति न पटिच्छितासेति – धम्मापि तेसं न पटिच्छितासे.

न ब्राह्मणो सीलवतेन नेय्योति. नाति पटिक्खेपो. ब्राह्मणोति सत्तन्नं धम्मानं बाहितत्ता ब्राह्मणो – सक्कायदिट्ठि बाहिता होति…पे… असितो तादि वुच्चते स ब्रह्मा. न ब्राह्मणो सीलवतेन नेय्योति. ब्राह्मणो सीलेन वा वतेन वा सीलब्बतेन वा न यायति न निय्यति न वुय्हति न संहरीयतीति – न ब्राह्मणो सीलवतेन नेय्यो.

पारङ्गतो न पच्चेति तादीति. पारं वुच्चति अमतं निब्बानं. यो सो सब्बसङ्खारसमथो सब्बूपधिपटिनिस्सग्गो तण्हक्खयो विरागो निरोधो निब्बानं. सो पारङ्गतो पारप्पत्तो अन्तगतो अन्तप्पत्तो कोटिगतो कोटिप्पत्तो [वित्थारो] जातिमरणसंसारो, नत्थि तस्स पुनब्भवोति – पारङ्गतो. न पच्चेतीति सोतापत्तिमग्गेन ये किलेसा पहीना, ते किलेसे न पुनेति न पच्चेति न पच्चागच्छति. सकदागामिमग्गेन ये किलेसा पहीना, ते किलेसे न पुनेति न पच्चेति न पच्चागच्छति. अनागामिमग्गेन ये किलेसा पहीना, ते किलेसे न पुनेति न पच्चेति न पच्चागच्छति. अरहत्तमग्गेन ये किलेसा पहीना, ते किलेसे न पुनेति न पच्चेति न पच्चागच्छतीति – पारङ्गतो न पच्चेति. तादीति अरहा पञ्चहाकारेहि तादी – इट्ठानिट्ठे तादी, चत्तावीति तादी, तिण्णावीति तादी, मुत्तावीति तादी, तंनिद्देसा तादी.

कथं अरहा इट्ठानिट्ठे तादी? अरहा लाभेपि तादी, अलाभेपि तादी, यसेपि तादी, अयसेपि तादी, पसंसायपि तादी, निन्दायपि तादी, सुखेपि तादी, दुक्खेपि तादी. एकच्चे बाहं [अङ्गं (सी.)] गन्धेन लिम्पेय्युं, एकच्चे बाहं [अङ्गं (सी.)] वासिया तच्छेय्युं – अमुस्मिं नत्थि रागो, अमुस्मिं नत्थि पटिघं, अनुनयपटिघविप्पहीनो उग्घातिनिघातिवीतिवत्तो अनुरोधविरोधसमतिक्कन्तो. एवं अरहा इट्ठानिट्ठे तादी.

कथं अरहा चत्तावीति तादी? अरहतो रागो चत्तो वन्तो मुत्तो पहीनो पटिनिस्सट्ठो. दोसो…पे… मोहो… कोधो… उपनाहो… मक्खो… पळासो… इस्सा… मच्छरियं… माया… साठेय्यं… थम्भो… सारम्भो… मानो… अतिमानो… मदो… पमादो… सब्बे किलेसा… सब्बे दुच्चरिता… सब्बे दरथा… सब्बे परिळाहा… सब्बे सन्तापा… सब्बाकुसलाभिसङ्खारा चत्ता वन्ता मुत्ता पहीना पटिनिस्सट्ठा. एवं अरहा चत्तावीति तादी.

कथं अरहा तिण्णावीति तादी? अरहा कामोघं तिण्णो भवोघं तिण्णो दिट्ठोघं तिण्णो अविज्जोघं तिण्णो सब्बं संसारपथं तिण्णो उत्तिण्णो नित्तिण्णो अतिक्कन्तो समतिक्कन्तो वीतिवत्तो. सो वुट्ठवासो चिण्णचरणो जातिमरणसंसारो, नत्थि तस्स पुनब्भवोति. एवं अरहा तिण्णावीति तादी.

कथं अरहा मुत्तावीति तादी? अरहतो रागा चित्तं मुत्तं विमुत्तं सुविमुत्तं, दोसा चित्तं मुत्तं विमुत्तं सुविमुत्तं, मोहा चित्तं मुत्तं विमुत्तं सुविमुत्तं, कोधा…पे… उपनाहा… मक्खा… पळासा… इस्साय… मच्छरिया… मायाय… साठेय्या… थम्भा… सारम्भा… माना… अतिमाना… मदा… पमादा… सब्बकिलेसेहि… सब्बदुच्चरितेहि… सब्बदरथेहि… सब्बपरिळाहेहि… सब्बसन्तापेहि… सब्बाकुसलाभिसङ्खारेहि चित्तं मुत्तं विमुत्तं सुविमुत्तं. एवं अरहा मुत्तावीति तादी.

कथं अरहा तंनिद्देसा तादी? अरहा सीले सति सीलवाति तंनिद्देसा तादी; सद्धाय सति सद्धोति तंनिद्देसा तादी; वीरिये सति वीरियवाति तंनिद्देसा तादी; सतिया सति सतिमाति तंनिद्देसा तादी; समाधिम्हि सति समाहितोति तंनिद्देसा तादी; पञ्ञाय सति पञ्ञवाति तंनिद्देसा तादी; विज्जाय सति तेविज्जोति तंनिद्देसा तादी; अभिञ्ञाय सति छळभिञ्ञोति तंनिद्देसा तादी. एवं अरहा तंनिद्देसा तादीति – पारङ्गतो न पच्चेति तादी.

तेनाह भगवा –

‘‘न कप्पयन्ति न पुरेक्खरोन्ति, धम्मापि तेसं न पटिच्छितासे;

न ब्राह्मणो सीलवतेन नेय्यो, पारङ्गतो न पच्चेति तादी’’ति.

परमट्ठकसुत्तनिद्देसो पञ्चमो.

६. जरासुत्तनिद्देसो

अथ जरासुत्तनिद्देसं वक्खति –

३९.

अप्पं वत जीवितं इदं, ओरं वस्ससतापि मिय्यति [मीयति (सी.)] ;

यो चेपि अतिच्च जीवति, अथ खो सो जरसापि मिय्यति.

अप्पं वत जीवितं इदन्ति. जीवितन्ति आयु ठिति यपना यापना इरियना वत्तना पालना जीवितं जीवितिन्द्रियं. अपि च, द्वीहि कारणेहि अप्पकं जीवितं थोकं जीवितं – ठितिपरित्तताय वा अप्पकं जीवितं, सरसपरित्तताय वा अप्पकं जीवितं. कथं ठितिपरित्तताय वा अप्पकं जीवितं? अतीते चित्तक्खणे जीवित्थ, न जीवति न जीविस्सति; अनागते चित्तक्खणे जीविस्सति, न जीवति न जीवित्थ; पच्चुप्पन्ने चित्तक्खणे जीवति, न जीवित्थ न जीविस्सति.

‘‘जीवितं अत्तभावो च, सुखदुक्खा च केवला;

एकचित्तसमायुत्ता, लहुसो वत्तते खणो.

‘‘चुल्लासीतिसहस्सानि, कप्पा तिट्ठन्ति ये मरू;

न त्वेव तेपि जीवन्ति, द्वीहि चित्तेहि संयुता [समोहिता (सी. स्या. क.)].

‘‘ये निरुद्धा मरन्तस्स, तिट्ठमानस्स वा इध;

सब्बेपि सदिसा खन्धा, गता अप्पटिसन्धिका.

‘‘अनन्तरा च ये भग्गा, ये च भग्गा अनागता;

तदन्तरे निरुद्धानं, वेसमं नत्थि लक्खणे.

‘‘अनिब्बत्तेन न जातो, पच्चुप्पन्नेन जीवति;

चित्तभग्गा मतो लोको, पञ्ञत्ति परमत्थिया.

‘‘यथा निन्ना पवत्तन्ति, छन्देन परिणामिता;

अच्छिन्नधारा वत्तन्ति, सळायतनपच्चया.

‘‘अनिधानगता भग्गा, पुञ्जो नत्थि अनागते;

निब्बत्ता ये च तिट्ठन्ति, आरग्गे सासपूपमा.

‘‘निब्बत्तानञ्च धम्मानं, भङ्गो नेसं पुरक्खतो;

पलोकधम्मा तिट्ठन्ति, पुराणेहि अमिस्सिता.

‘‘अदस्सनतो आयन्ति, भङ्गा गच्छन्ति दस्सनं;

विज्जुप्पादोव आकासे, उप्पज्जन्ति वयन्ति चा’’ति.

एवं ठितिपरित्तताय अप्पकं जीवितं.

कथं सरसपरित्तताय अप्पकं जीवितं? अस्सासूपनिबद्धं [अस्सासूपनिबन्धं (क.)] जीवितं, पस्सासूपनिबद्धं जीवितं, अस्सासपस्सासूपनिबद्धं जीवितं, महाभूतूपनिबद्धं जीवितं, कबळीकाराहारूपनिबद्धं जीवितं, उस्मूपनिबद्धं जीवितं, विञ्ञाणूपनिबद्धं जीवितं. मूलम्पि इमेसं दुब्बलं, पुब्बहेतूपि इमेसं दुब्बला, ये पच्चया तेपि दुब्बला, येपि पभाविका तेपि दुब्बला, सहभूपि इमेसं दुब्बला, सम्पयोगापि इमेसं दुब्बला, सहजापि इमेसं दुब्बला, यापि पयोजिका सापि दुब्बला. अञ्ञमञ्ञं इमे निच्चदुब्बला, अञ्ञमञ्ञं अनवट्ठिता इमे. अञ्ञमञ्ञं परिपातयन्ति इमे, अञ्ञमञ्ञस्स हि नत्थि तायिता, न चापि ठपेन्ति अञ्ञमञ्ञं इमे. योपि निब्बत्तको सो न विज्जति.

‘‘न च केनचि कोचि हायति, गन्धब्बा च इमे हि सब्बसो;

पुरिमेहि पभाविका इमे, येपि पभाविका ते पुरे मता;

पुरिमापि च पच्छिमापि च, अञ्ञमञ्ञं न कदाचि मद्दसंसू’’ति.

एवं सरसपरित्तताय अप्पकं जीवितं.

अपि च, चातुमहाराजिकानं [चातुम्महाराजिकानं (सी. स्या.)] देवानं जीवितं उपादाय मनुस्सानं अप्पकं जीवितं परित्तं जीवितं थोकं जीवितं खणिकं जीवितं लहुकं जीवितं इत्तरं जीवितं अनद्धनीयं जीवितं नचिरट्ठितिकं जीवितं. तावतिंसानं देवानं…पे… यामानं देवानं… तुसितानं देवानं… निम्मानरतीनं देवानं… परनिम्मितवसवत्तीनं देवानं… ब्रह्मकायिकानं देवानं जीवितं उपादाय मनुस्सानं अप्पकं जीवितं परित्तं जीवितं थोकं जीवितं खणिकं जीवितं लहुकं जीवितं इत्तरं जीवितं अनद्धनीयं जीवितं नचिरट्ठितिकं जीवितं. वुत्तञ्हेतं भगवता – ‘‘अप्पमिदं, भिक्खवे, मनुस्सानं आयु, गमनियो सम्परायो, मन्ताय बोद्धब्बं, कत्तब्बं कुसलं, चरितब्बं ब्रह्मचरियं, नत्थि जातस्स अमरणं. यो, भिक्खवे, चिरं जीवति, सो वस्ससतं अप्पं वा भिय्यो.

‘‘अप्पमायु मनुस्सानं, हीळेय्य नं सुपोरिसो;

चरेय्यादित्तसीसोव नत्थि मच्चुस्सनागमो.

‘‘अच्चयन्ति अहोरत्ता, जीवितं उपरुज्झति;

आयु खिय्यति मच्चानं, कुन्नदीनंव ओदक’’न्ति.

अप्पं वत जीवितं इदं.

ओरं वस्ससतापि मिय्यतीति. कललकालेपि चवति मरति अन्तरधायति विप्पलुज्जति, अब्बुदकालेपि चवति मरति अन्तरधायति विप्पलुज्जति, पेसिकालेपि चवति मरति अन्तरधायति विप्पलुज्जति, घनकालेपि चवति मरति अन्तरधायति विप्पलुज्जति, पसाखकालेपि चवति मरति अन्तरधायति विप्पलुज्जति, जातमत्तोपि चवति मरति अन्तरधायति विप्पलुज्जति, सूतिघरेपि [पसूतिघरे (स्या.), सूतिकघरे (क.)] चवति मरति अन्तरधायति विप्पलुज्जति, अद्धमासिकोपि चवति मरति अन्तरधायति विप्पलुज्जति, मासिकोपि चवति मरति अन्तरधायति विप्पलुज्जति, द्वेमासिकोपि…पे… तेमासिकोपि… चतुमासिकोपि… पञ्चमासिकोपि चवति मरति अन्तरधायति विप्पलुज्जति, छमासिकोपि… सत्तमासिकोपि… अट्ठमासिकोपि… नवमासिकोपि… दसमासिकोपि… संवच्छरिकोपि चवति मरति अन्तरधायति विप्पलुज्जति, द्वेवस्सिकोपि… तिवस्सिकोपि… चतुवस्सिकोपि… पञ्चवस्सिकोपि … छवस्सिकोपि… सत्तवस्सिकोपि… अट्ठवस्सिकोपि… नववस्सिकोपि… दसवस्सिकोपि… वीसतिवस्सिकोपि… तिंसवस्सिकोपि… चत्तारीसवस्सिकोपि… पञ्ञासवस्सिकोपि… सट्ठिवस्सिकोपि… सत्ततिवस्सिकोपि… असीतिवस्सिकोपि… नवुतिवस्सिकोपि चवति मरति अन्तरधायति विप्पलुज्जतीति – ओरं वस्ससतापि मिय्यति.

यो चेपि अतिच्च जीवतीति. यो वस्ससतं अतिक्कमित्वा जीवति सो एकं वा वस्सं जीवति, द्वे वा वस्सानि जीवति, तीणि वा वस्सानि जीवति, चत्तारि वा वस्सानि जीवति, पञ्च वा वस्सानि जीवति…पे… दस वा वस्सानि जीवति, वीसति वा वस्सानि जीवति, तिंसं वा वस्सानि जीवति, चत्तारीसं वा वस्सानि जीवतीति – यो चेपि अतिच्च जीवति. अथ खो सो जरसापि मिय्यतीति. यदा जिण्णो होति वुद्धो महल्लको अद्धगतो वयोअनुप्पत्तो खण्डदन्तो पलितकेसो विलूनं खलितसिरो [खलितं सिरो (सी.)] वलिनं तिलकाहतगत्तो वङ्को भोग्गो दण्डपरायनो, सो जरायपि चवति मरति अन्तरधायति विप्पलुज्जति, नत्थि मरणम्हा मोक्खो.

‘‘फलानमिव पक्कानं, पातो पतनतो [पपततो (सी.)] भयं;

एवं जातान मच्चानं, निच्चं मरणतो भयं.

‘‘यथापि कुम्भकारस्स, कता मत्तिकभाजना;

सब्बे भेदनपरियन्ता, एवं मच्चान जीवितं.

‘‘दहरा च महन्ता च, ये बाला ये च पण्डिता;

सब्बे मच्चुवसं यन्ति, सब्बे मच्चुपरायना.

‘‘तेसं मच्चुपरेतानं, गच्छतं परलोकतो;

न पिता तायते पुत्तं, ञाती वा पन ञातके.

‘‘पेक्खतञ्ञेव ञातीनं, पस्स लालप्पतं पुथु;

एकमेकोव मच्चानं, गोवज्झो विय निय्यति;

एवमब्भाहतो लोको, मच्चुना च जराय चा’’ति.

अथ खो सो जरसापि मिय्यति.

तेनाह भगवा –

‘‘अप्पं वत जीवितं इदं, ओरं वस्ससतापि मिय्यति;

यो चेपि अतिच्च जीवति, अथ खो सो जरसापि मिय्यती’’ति.

४०.

सोचन्ति जना ममायिते, न हि सन्ति निच्चा परिग्गहा;

विनाभावं सन्तमेविदं, इति दिस्वा नागारमावसे.

सोचन्ति जना ममायितेति. जनाति खत्तिया च ब्राह्मणा च वेस्सा च सुद्दा च गहट्ठा च पब्बजिता च देवा च मनुस्सा च. ममत्ताति द्वे ममत्ता – तण्हाममत्तञ्च दिट्ठिममत्तञ्च…पे… इदं तण्हाममत्तं…पे… इदं दिट्ठिममत्तं. ममायितं वत्थुं अच्छेदसङ्किनोपि सोचन्ति, अच्छिज्जन्तेपि सोचन्ति, अच्छिन्नेपि सोचन्ति. ममायितं वत्थुं विपरिणामसङ्किनोपि सोचन्ति, विपरिणामन्तेपि सोचन्ति, विपरिणतेपि सोचन्ति किलमन्ति परिदेवन्ति उरत्ताळिं कन्दन्ति सम्मोहं आपज्जन्तीति – सोचन्ति जना ममायिते.

न हि सन्ति निच्चा परिग्गहाति. द्वे परिग्गहा – तण्हापरिग्गहो च दिट्ठिपरिग्गहो च…पे… अयं तण्हापरिग्गहो…पे… अयं दिट्ठिपरिग्गहो. तण्हापरिग्गहो अनिच्चो सङ्खतो पटिच्चसमुप्पन्नो खयधम्मो वयधम्मो विरागधम्मो निरोधधम्मो विपरिणामधम्मो. दिट्ठिपरिग्गहोपि अनिच्चो सङ्खतो पटिच्चसमुप्पन्नो खयधम्मो वयधम्मो विरागधम्मो निरोधधम्मो विपरिणामधम्मो. वुत्तञ्हेतं भगवता – ‘‘पस्सथ नो तुम्हे, भिक्खवे, तं परिग्गहं य्वायं परिग्गहो निच्चो धुवो सस्सतो अविपरिणामधम्मो सस्सतिसमं तथेव ठस्सती’’ति? ‘‘नो हेतं, भन्ते’’. ‘‘साधु, भिक्खवे! अहम्पि खो एतं, भिक्खवे, परिग्गहं न समनुपस्सामि, य्वायं परिग्गहो निच्चो धुवो सस्सतो अविपरिणामधम्मो सस्सतिसमं तथेव ठस्सती’’ति. परिग्गहा निच्चा धुवा सस्सता अविपरिणामधम्मा नत्थि न सन्ति न संविज्जन्ति न लब्भन्तीति – न हि सन्ति निच्चा परिग्गहा.

विनाभावं सन्तमेविदन्ति. नानाभावे विनाभावे अञ्ञथाभावे सन्ते संविज्जमाने उपलब्भियमाने. वुत्तञ्हेतं भगवता – ‘‘अलं, आनन्द! मा सोचि मा परिदेवि. ननु एतं, आनन्द, मया पटिकच्चेव [पटिगच्चेव (सी.)] अक्खातं – ‘सब्बेहेव पियेहि मनापेहि नानाभावो विनाभावो अञ्ञथाभावो. तं कुतेत्थ, आनन्द, लब्भा – यं तं जातं भूतं सङ्खतं पलोकधम्मं तं वत मा पलुज्जी’ति! नेतं ठानं विज्जति. पुरिमानं पुरिमानं खन्धानं धातूनं आयतनानं विपरिणामञ्ञथाभावा पच्छिमा पच्छिमा खन्धा च धातुयो च आयतनानि च पवत्तन्ती’’ति – विनाभावं सन्तमेविदं.

इति दिस्वा नागारमावसेति. इतीति पदसन्धि पदसंसग्गो पदपारिपूरी अक्खरसमवायो ब्यञ्जनसिलिट्ठता पदानुपुब्बतापेतं. इतीति इति दिस्वा पस्सित्वा तुलयित्वा तीरयित्वा विभावयित्वा विभूतं कत्वा ममत्तेसूति – इति दिस्वा. नागारमावसेति सब्बं घरावासपलिबोधं छिन्दित्वा पुत्तदारपलिबोधं छिन्दित्वा ञातिपलिबोधं छिन्दित्वा मित्तामच्चपलिबोधं छिन्दित्वा सन्निधिपलिबोधं छिन्दित्वा केसमस्सुं ओहारेत्वा कासायानि वत्थानि अच्छादेत्वा अगारस्मा अनगारियं पब्बजित्वा अकिञ्चनभावं उपगन्त्वा एको चरेय्य विहरेय्य इरियेय्य वत्तेय्य पालेय्य यपेय्य यापेय्याति – इति दिस्वा नागारमावसे.

तेनाह भगवा –

‘‘सोचन्ति जना ममायिते, न हि सन्ति निच्चा परिग्गहा;

विनाभावं सन्तमेविदं, इति दिस्वा नागारमावसे’’ति.

४१.

मरणेनपि तं पहीयति [पहिय्यति (क.)] यं पुरिसो ममिदन्ति मञ्ञति;

एतम्पि विदित्वान [एतं दिस्वान (सी. क.)] पण्डितो, न ममत्ताय नमेथ मामको.

मरणेनपि तं पहीयतीति. मरणन्ति या तेसं तेसं सत्तानं तम्हा तम्हा सत्तनिकाया चुति चवनता भेदो अन्तरधानं मच्चुमरणं कालंकिरिया खन्धानं भेदो कळेवरस्स निक्खेपो जीवितिन्द्रियस्सुपच्छेदो. तन्ति रूपगतं वेदनागतं सञ्ञागतं सङ्खारगतं विञ्ञाणगतं. पहीयतीति पहीयति जहीयति विजहीयति अन्तरधायति विप्पलुज्जति. भासितम्पि हेतं –

‘‘पुब्बेव मच्चं विजहन्ति भोगा, मच्चोव ने पुब्बतरं जहाति;

असस्सता भोगिनो कामकामी, तस्मा न सोचामहं सोककाले.

‘‘उदेति आपूरति वेति चन्दो, अत्तं गमेत्वान पलेति सूरियो;

विदिता मया सत्तुक लोकधम्मा, तस्मा न सोचामहं सोककाले’’ति.

मरणेनपि तं पहीयति. यं पुरिसो ममिदन्ति मञ्ञतीति. यन्ति रूपगतं वेदनागतं सञ्ञागतं सङ्खारगतं विञ्ञाणगतं. पुरिसोति सङ्खा समञ्ञा पञ्ञत्ति वोहारो [लोकवोहारो (स्या.)] नामं नामकम्मं नामधेय्यं निरुत्ति ब्यञ्जनं अभिलापो. ममिदन्ति मञ्ञतीति तण्हामञ्ञनाय मञ्ञति, दिट्ठिमञ्ञनाय मञ्ञति, मानमञ्ञनाय मञ्ञति, किलेसमञ्ञनाय मञ्ञति, दुच्चरितमञ्ञनाय मञ्ञति, पयोगमञ्ञनाय मञ्ञति, विपाकमञ्ञनाय मञ्ञतीति – यं पुरिसो ममिदन्ति मञ्ञति.

एतम्पि विदित्वान पण्डितोति. एतं आदीनवं ञत्वा जानित्वा तुलयित्वा तीरयित्वा विभावयित्वा विभूतं कत्वा ममत्तेसूति, एतम्पि विदित्वा पण्डितो धीरो पण्डितो पञ्ञवा बुद्धिमा ञाणी विभावी मेधावीति – एतम्पि विदित्वान पण्डितो.

न ममत्ताय नमेथ मामकोति. ममत्ताति द्वे ममत्ता – तण्हाममत्तञ्च दिट्ठिममत्तञ्च…पे… इदं तण्हाममत्तं…पे… इदं दिट्ठिममत्तं. मामकोति बुद्धमामको धम्ममामको सङ्घमामको. सो भगवन्तं ममायति, भगवा तं पुग्गलं परिग्गण्हाति. वुत्तञ्हेतं भगवता – ‘‘ये ते, भिक्खवे, भिक्खू कुहा थद्धा [बद्धा (क.) इतिवु. १०८] लपा सिङ्गी उन्नळा असमाहिता, न मे ते, भिक्खवे, भिक्खू मामका; अपगता च ते, भिक्खवे, भिक्खू इमस्मा धम्मविनया. न च ते इमस्मिं धम्मविनये वुद्धिं विरूळ्हिं वेपुल्लं आपज्जन्ति. ये च खो ते, भिक्खवे, भिक्खू निक्कुहा निल्लपा धीरा अत्थद्धा सुसमाहिता, ते खो मे, भिक्खवे, भिक्खू मामका; अनपगता च ते, भिक्खवे, भिक्खू इमस्मा धम्मविनया. ते च इमस्मिं धम्मविनये वुद्धिं विरूळ्हिं वेपुल्लं आपज्जन्ति’’.

‘‘कुहा थद्धा लपा सिङ्गी, उन्नळा असमाहिता;

न ते धम्मे विरूहन्ति, सम्मासम्बुद्धदेसिते.

‘‘निक्कुहा निल्लपा धीरा, अत्थद्धा सुसमाहिता;

ते वे धम्मे विरूहन्ति, सम्मासम्बुद्धदेसिते’’.

न ममत्ताय नमेथ मामकोति. मामको तण्हाममत्तं पहाय दिट्ठिममत्तं पटिनिस्सज्जित्वा ममत्ताय न नमेय्य न ओनमेय्य, न तंनिन्नो अस्स न तप्पोणो न तप्पब्भारो न तदधिमुत्तो न तदधिपतेय्योति – न ममत्ताय नमेथ मामको.

तेनाह भगवा –

‘‘मरणेनपि तं पहीयति, यं पुरिसो ममिदन्ति मञ्ञति;

एतम्पि विदित्वान पण्डितो, न ममत्ताय नमेथ मामको’’ति.

४२.

सुपिनेन यथापि सङ्गतं, पटिबुद्धो पुरिसो न पस्सति;

एवम्पि पियायितं जनं, पेतं कालङ्कतं [कालकतं (सी. स्या.)] न पस्सति.

सुपिनेन यथापि सङ्गतन्ति. सङ्गतं समागतं समाहितं सन्निपतितन्ति – सुपिनेन यथापि सङ्गतं. पटिबुद्धो पुरिसो न पस्सतीति यथा पुरिसो सुपिनगतो चन्दं पस्सति, सूरियं पस्सति, महासमुद्दं पस्सति, सिनेरुं पब्बतराजानं पस्सति, हत्थिं पस्सति, अस्सं पस्सति, रथं पस्सति, पत्तिं पस्सति, सेनाब्यूहं पस्सति, आरामरामणेय्यकं पस्सति, वनरामणेय्यकं…पे… भूमिरामणेय्यकं… पोक्खरणीरामणेय्यकं पस्सति; पटिबुद्धो न किञ्चि पस्सतीति – पटिबुद्धो पुरिसो न पस्सति.

एवम्पि पियायितं जनन्ति. एवन्ति ओपम्मसम्पटिपादनं. पियायितं जनन्ति ममायितं जनं मातरं वा पितरं वा भातरं वा भगिनिं वा पुत्तं वा धीतरं वा मित्तं वा अमच्चं वा ञातिं वा सालोहितं वाति – एवम्पि पियायितं जनं.

पेतं कालङ्कतं न पस्सतीति. पेतो वुच्चति मतो. कालङ्कतं न पस्सति न दक्खति नाधिगच्छति न विन्दति न पटिलभतीति – पेतं कालङ्कतं न पस्सति.

तेनाह भगवा –

‘‘सुपिनेन यथापि सङ्गतं, पटिबुद्धो पुरिसो न पस्सति;

एवम्पि पियायितं जनं, पेतं कालङ्कतं न पस्सती’’ति.

४३.

दिट्ठापि सुतापि ते जना, येसं नाममिदं पवुच्चति;

नामंयेवावसिस्सति, [नाममेवा’वसिस्सति (सी. स्या.)] अक्खेय्यं पेतस्स जन्तुनो.

दिट्ठापि सुतापि ते जनाति. दिट्ठाति ये चक्खुविञ्ञाणाभिसम्भूता. सुताति ये सोतविञ्ञाणाभिसम्भूता. ते जनाति खत्तिया च ब्राह्मणा च वेस्सा च सुद्दा च गहट्ठा च पब्बजिता च देवा च मनुस्सा चाति – दिट्ठापि सुतापि ते जना.

येसं नाममिदं पवुच्चतीति. येसन्ति येसं खत्तियानं ब्राह्मणानं वेस्सानं सुद्दानं गहट्ठानं पब्बजितानं देवानं मनुस्सानं. नामन्ति सङ्खा समञ्ञा पञ्ञत्ति वोहारो नामं नामकम्मं नामधेय्यं निरुत्ति ब्यञ्जनं अभिलापो. पवुच्चतीति वुच्चति पवुच्चति कथीयति भणीयति दीपीयति वोहरीयतीति – येसं नाममिदं पवुच्चति.

नामंयेवावसिस्सति अक्खेय्यन्ति. रूपगतं वेदनागतं सञ्ञागतं सङ्खारगतं विञ्ञाणगतं पहीयति जहीयति विजहीयति अन्तरधायति विप्पलुज्जति, नामंयेवावसिस्सति. अक्खेय्यन्ति. अक्खातुं कथेतुं भणितुं दीपयितुं वोहरितुन्ति – नामं एवावसिस्सति अक्खेय्यं. पेतस्स जन्तुनोति. पेतस्साति मतस्स कालङ्कतस्स. जन्तुनोति सत्तस्स नरस्स मानवस्स पोसस्स पुग्गलस्स जीवस्स जागुस्स जन्तुस्स इन्दगुस्स मनुजस्साति – पेतस्स जन्तुनो.

तेनाह भगवा –

‘‘दिट्ठापि सुतापि ते जना, येसं नाममिदं पवुच्चति;

नामंयेवावसिस्सति, अक्खेय्यं पेतस्स जन्तुनो’’ति.

४४.

सोकप्परिदेवमच्छरं, न पजहन्ति गिद्धा ममायिते;

तस्मा मुनयो परिग्गहं, हित्वा अचरिंसु खेमदस्सिनो.

सोकप्परिदेवमच्छरं न पजहन्ति गिद्धा ममायितेति. सोकोति ञातिब्यसनेन वा फुट्ठस्स भोगब्यसनेन वा फुट्ठस्स रोगब्यसनेन वा फुट्ठस्स सीलब्यसनेन वा फुट्ठस्स दिट्ठिब्यसनेन वा फुट्ठस्स अञ्ञतरञ्ञतरेन ब्यसनेन समन्नागतस्स अञ्ञतरञ्ञतरेन दुक्खधम्मेन फुट्ठस्स सोको सोचना सोचितत्तं अन्तोसोको अन्तोपरिसोको अन्तोदाहो अन्तोपरिदाहो [अन्तोडाहो अन्तोपरिडाहो (स्या.)] चेतसो परिज्झायना दोमनस्सं सोकसल्लं. परिदेवोति ञातिब्यसनेन वा फुट्ठस्स…पे… दिट्ठिब्यसनेन वा फुट्ठस्स अञ्ञतरञ्ञतरेन ब्यसनेन समन्नागतस्स अञ्ञतरञ्ञतरेन दुक्खधम्मेन फुट्ठस्स आदेवो परिदेवो आदेवना परिदेवना आदेवितत्तं परिदेवितत्तं वाचा पलापो विप्पलापो लालप्पो लालप्पायना लालप्पायितत्तं. मच्छरियन्ति पञ्च मच्छरियानि – आवासमच्छरियं, कुलमच्छरियं, लाभमच्छरियं, वण्णमच्छरियं, धम्ममच्छरियं. यं एवरूपं मच्छरियं मच्छरायना मच्छरायितत्तं वेविच्छं कदरियं कटुकञ्चुकता अग्गहितत्तं चित्तस्स – इदं वुच्चति मच्छरियं. अपि च खन्धमच्छरियम्पि मच्छरियं, धातुमच्छरियम्पि मच्छरियं, आयतनमच्छरियम्पि मच्छरियं गाहो – इदं वुच्चति मच्छरियं. गेधो वुच्चति तण्हा. यो रागो सारागो…पे… अभिज्झा लोभो अकुसलमूलं. ममत्ताति द्वे ममत्ता – तण्हाममत्तञ्च दिट्ठिममत्तञ्च …पे… इदं तण्हाममत्तं…पे… इदं दिट्ठिममत्तं. ममायितं वत्थुं अच्छेदसङ्किनोपि सोचन्ति, अच्छिज्जन्तेपि सोचन्ति, अच्छिन्नेपि सोचन्ति, ममायितं वत्थुं विपरिणामसङ्किनोपि सोचन्ति, विपरिणामन्तेपि सोचन्ति, विपरिणतेपि सोचन्ति, ममायितं वत्थुं अच्छेदसङ्किनोपि परिदेवन्ति, अच्छिज्जन्तेपि परिदेवन्ति, अच्छिन्नेपि परिदेवन्ति. ममायितं वत्थुं विपरिणामसङ्किनोपि परिदेवन्ति, विपरिणामन्तेपि परिदेवन्ति, विपरिणतेपि परिदेवन्ति. ममायितं वत्थुं रक्खन्ति गोपेन्ति परिग्गण्हन्ति ममायन्ति मच्छरायन्ति; ममायितस्मिं वत्थुस्मिं सोकं न जहन्ति, परिदेवं न जहन्ति, मच्छरियं न जहन्ति, गेधं न जहन्ति नप्पजहन्ति न विनोदेन्ति न ब्यन्तिं करोन्ति न अनभावं गमेन्तीति – सोकप्परिदेवमच्छरं नप्पजहन्ति गिद्धा ममायिते.

तस्मा मुनयो परिग्गहं, हित्वा अचरिंसु खेमदस्सिनोति. तस्माति तस्मा तंकारणा तंहेतु तप्पच्चया तंनिदाना एतं आदीनवं सम्पस्समाना ममत्तेसूति – तस्मा. मुनयोति मोनं वुच्चति ञाणं. या पञ्ञा पजानना…पे… अमोहो धम्मविचयो सम्मादिट्ठि. तेन ञाणेन समन्नागता मुनयो मोनप्पत्ता. तीणि मोनेय्यानि – कायमोनेय्यं, वचीमोनेय्यं, मनोमोनेय्यं…पे… सङ्गजालमतिच्च सो मुनि. परिग्गहोति द्वे परिग्गहा – तण्हापरिग्गहो च दिट्ठिपरिग्गहो च…पे… अयं तण्हापरिग्गहो…पे… अयं दिट्ठिपरिग्गहो. मुनयो तण्हापरिग्गहं परिच्चजित्वा दिट्ठिपरिग्गहं पटिनिस्सज्जित्वा चजित्वा पजहित्वा विनोदेत्वा ब्यन्तिं करित्वा अनभावं गमेत्वा अचरिंसु विहरिंसु इरियिंसु वत्तिंसु पालिंसु यपिंसु यापिंसु. खेमदस्सिनोति खेमं वुच्चति अमतं निब्बानं. यो सो सब्बसङ्खारसमथो सब्बूपधिपटिनिस्सग्गो तण्हक्खयो विरागो निरोधो निब्बानं. खेमदस्सिनोति खेमदस्सिनो ताणदस्सिनो लेणदस्सिनो सरणदस्सिनो अभयदस्सिनो अच्चुतदस्सिनो अमतदस्सिनो निब्बानदस्सिनोति – तस्मा मुनयो परिग्गहं हित्वा अचरिंसु खेमदस्सिनो.

तेनाह भगवा –

‘‘सोकप्परिदेवमच्छरं, न जहन्ति गिद्धा ममायिते;

तस्मा मुनयो परिग्गहं, हित्वा अचरिंसु खेमदस्सिनो’’ति.

४५.

पतिलीनचरस्स भिक्खुनो, भजमानस्स विवित्तमासनं;

सामग्गियमाहु तस्स तं, यो अत्तानं भवने न दस्सये.

पतिलीनचरस्स भिक्खुनोति. पतिलीनचरा वुच्चन्ति सत्त सेक्खा [सेखा (सी. स्या.)]. अरहा पतिलीनो. किंकारणा पतिलीनचरा वुच्चन्ति सत्त सेक्खा? ते ततो ततो चित्तं पतिलीनेन्ता पतिकुटेन्ता पतिवट्टेन्ता सन्निरुद्धन्ता [सन्निरुम्भेन्ता (सी.)] सन्निग्गण्हन्ता सन्निवारेन्ता रक्खन्ता गोपेन्ता चरन्ति विचरन्ति विहरन्ति इरियन्ति वत्तेन्ति पालेन्ति यपेन्ति यापेन्ति, चक्खुद्वारे चित्तं पतिलीनेन्ता पतिकुटेन्ता पतिवट्टेन्ता सन्निरुद्धन्ता सन्निग्गण्हन्ता सन्निवारेन्ता रक्खन्ता गोपेन्ता चरन्ति विचरन्ति विहरन्ति इरियन्ति वत्तेन्ति पालेन्ति यपेन्ति यापेन्ति, सोतद्वारे चित्तं…पे… घानद्वारे चित्तं… जिव्हाद्वारे चित्तं… कायद्वारे चित्तं… मनोद्वारे चित्तं पतिलीनेन्ता पतिकुटेन्ता पतिवट्टेन्ता सन्निरुद्धन्ता सन्निग्गण्हन्ता सन्निवारेन्ता रक्खन्ता गोपेन्ता चरन्ति विचरन्ति विहरन्ति इरियन्ति वत्तेन्ति पालेन्ति यपेन्ति यापेन्ति. यथा कुक्कुटपत्तं वा न्हारुदद्दुलं वा अग्गिम्हि पक्खित्तं पतिलीयति पतिकुटति पतिवट्टति न सम्पसारियति; एवमेव ततो ततो चित्तं पतिलीनेन्ता पतिकुटेन्ता पतिवट्टेन्ता सन्निरुद्धन्ता सन्निग्गण्हन्ता सन्निवारेन्ता रक्खन्ता गोपेन्ता चरन्ति विचरन्ति विहरन्ति इरियन्ति वत्तेन्ति पालेन्ति यपेन्ति यापेन्ति, चक्खुद्वारे चित्तं…पे… सोतद्वारे चित्तं… घानद्वारे चित्तं… जिव्हाद्वारे चित्तं… कायद्वारे चित्तं… मनोद्वारे चित्तं पतिलीनेन्ता पतिकुटेन्ता पतिवट्टेन्ता सन्निरुद्धन्ता सन्निग्गण्हन्ता सन्निवारेन्ता रक्खन्ता गोपेन्ता चरन्ति विचरन्ति विहरन्ति इरियन्ति वत्तेन्ति पालेन्ति यपेन्ति यापेन्ति. तंकारणा पतिलीनचरा वुच्चन्ति सत्त सेक्खा. भिक्खुनोति पुथुज्जनकल्याणकस्स वा भिक्खुनो सेक्खस्स वा भिक्खुनोति – पतिलीनचरस्स भिक्खुनो.

भजमानस्स विवित्तमासनन्ति आसनं वुच्चति यत्थ निसीदन्ति – मञ्चो पीठं भिसि तट्टिका चम्मखण्डो तिणसन्थारो पण्णसन्थारो पलालसन्थारो. तं आसनं असप्पायरूपदस्सनेन रित्तं विवित्तं पविवित्तं, असप्पायसद्दस्सवनेन रित्तं विवित्तं पविवित्तं, असप्पायगन्धघायनेन… असप्पायरससायनेन… असप्पायफोट्ठब्बफुसनेन… असप्पायेहि पञ्चहि कामगुणेहि रित्तं विवित्तं पविवित्तं. तं विवित्तं आसनं भजतो सम्भजतो सेवतो निसेवतो संसेवतो पटिसेवतोति – भजमानस्स विवित्तमासनं.

सामग्गियमाहु तस्स तं, यो अत्तानं भवने न दस्सयेति. सामग्गियोति तिस्सो सामग्गियो – गणसामग्गी, धम्मसामग्गी, अनभिनिब्बत्तिसामग्गी. कतमा गणसामग्गी? बहु चेपि भिक्खू समग्गा सम्मोदमाना अविवदमाना खीरोदकीभूता अञ्ञमञ्ञं पियचक्खूहि सम्पस्सन्ता विहरन्ति – अयं गणसामग्गी. कतमा धम्मसामग्गी? चत्तारो सतिपट्ठाना, चत्तारो सम्मप्पधाना, चत्तारो इद्धिपादा, पञ्चिन्द्रियानि, पञ्च बलानि, सत्त बोज्झङ्गा, अरियो अट्ठङ्गिको मग्गो. ते एकतो पक्खन्दन्ति पसीदन्ति सम्पतिट्ठन्ति विमुच्चन्ति; न तेसं धम्मानं विवादो पविवादो अत्थि – अयं धम्मसामग्गी. कतमा अनभिनिब्बत्तिसामग्गी? बहु चेपि भिक्खू अनुपादिसेसाय निब्बानधातुया परिनिब्बायन्ति; न तेसं निब्बानधातुया [तेन (सी.)] ऊनत्तं वा पुण्णत्तं वा पञ्ञायति – अयं अनभिनिब्बत्तिसामग्गी. भवनेति नेरयिकानं निरयो भवनं, तिरच्छानयोनिकानं तिरच्छानयोनि भवनं, पेत्तिविसयिकानं पेत्तिविसयो भवनं, मनुस्सानं मनुस्सलोको भवनं, देवानं देवलोको भवनन्ति. सामग्गियमाहु तस्स तं, यो अत्तानं भवने न दस्सयेति. तस्सेसा सामग्गी एतं छन्नं एतं पतिरूपं एतं अनुच्छविकं एतं अनुलोमं, यो एवं पटिच्छन्ने निरये अत्तानं न दस्सेय्य, तिरच्छानयोनियं अत्तानं न दस्सेय्य, पेत्तिविसये अत्तानं न दस्सेय्य, मनुस्सलोके अत्तानं न दस्सेय्य, देवलोके अत्तानं न दस्सेय्याति एवमाहंसु एवं कथेन्ति एवं भणन्ति एवं दीपयन्ति एवं वोहरन्तीति – सामग्गियमाहु तस्स तं, यो अत्तानं भवने न दस्सये.

तेनाह भगवा –

‘‘पतिलीनचरस्स भिक्खुनो, भजमानस्स विवित्तमासनं;

सामग्गियमाहु तस्स तं, यो अत्तानं भवने न दस्सये’’ति.

४६.

सब्बत्थ मुनी अनिस्सितो, न पियं कुब्बति नोपि अप्पियं;

तस्मिं परिदेवमच्छरं, पण्णे वारि यथा न लिम्पति.

सब्बत्थ मुनी अनिस्सितोति. सब्बं वुच्चति द्वादसायतनानि – चक्खुञ्चेव रूपा च, सोतञ्च सद्दा च, घानञ्च गन्धा च, जिव्हा च रसा च, कायो च फोट्ठब्बा च, मनो च धम्मा च. मुनीति. मोनं वुच्चति ञाणं…पे… सङ्गजालमतिच्च सो मुनि. अनिस्सितोति. द्वे निस्सया – तण्हानिस्सयो च दिट्ठिनिस्सयो च…पे… अयं तण्हानिस्सयो…पे… अयं दिट्ठिनिस्सयो. मुनि तण्हानिस्सयं पहाय दिट्ठिनिस्सयं पटिनिस्सज्जित्वा चक्खुं अनिस्सितो सोतं अनिस्सितो घानं अनिस्सितो जिव्हं अनिस्सितो कायं अनिस्सितो मनं अनिस्सितो रूपे… सद्दे… गन्धे… रसे… फोट्ठब्बे… धम्मे… कुलं… गणं… आवासं… लाभं… यसं… पसंसं… सुखं… चीवरं… पिण्डपातं… सेनासनं… गिलानपच्चयभेसज्जपरिक्खारं… कामधातुं… रूपधातुं… अरूपधातुं… कामभवं… रूपभवं… अरूपभवं… सञ्ञाभवं… असञ्ञाभवं … नेवसञ्ञानासञ्ञाभवं… एकवोकारभवं… चतुवोकारभवं… पञ्चवोकारभवं… अतीतं… अनागतं… पच्चुप्पन्नं… दिट्ठं… सुतं… मुतं… विञ्ञातं… सब्बे धम्मे अनिस्सितो अनल्लीनो अनुपगतो अनज्झोसितो अनधिमुत्तो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – सब्बत्थ मुनि अनिस्सितो.

न पियं कुब्बति नोपि अप्पियन्ति. पियाति द्वे पिया – सत्ता वा सङ्खारा वा. कतमे सत्ता पिया? इध यस्स ते होन्ति अत्थकामा हितकामा फासुकामा योगक्खेमकामा माता वा पिता वा भाता वा भगिनी वा पुत्ता वा धीतरा वा मित्ता वा अमच्चा वा ञाती वा सालोहिता वा – इमे सत्ता पिया. कतमे सङ्खारा पिया? मनापिका रूपा मनापिका सद्दा मनापिका गन्धा मनापिका रसा मनापिका फोट्ठब्बा – इमे सङ्खारा पिया. अप्पियाति द्वे अप्पिया – सत्ता वा सङ्खारा वा. कतमे सत्ता अप्पिया? इध यस्स ते होन्ति अनत्थकामा अहितकामा अफासुकामा अयोगक्खेमकामा जीविता वोरोपेतुकामा – इमे सत्ता अप्पिया. कतमे सङ्खारा अप्पिया? अमनापिका रूपा अमनापिका सद्दा अमनापिका गन्धा अमनापिका रसा अमनापिका फोट्ठब्बा – इमे सङ्खारा अप्पिया. न पियं कुब्बति नोपि अप्पियन्ति. ‘‘अयं मे सत्तो पियो, इमे च सङ्खारा मनापा’’ति रागवसेन पियं न करोति; ‘‘अयं मे सत्तो अप्पियो, इमे च सङ्खारा अमनापा’’ति पटिघवसेन अप्पियं न करोति न जनेति न सञ्जनेति न निब्बत्तेति नाभिनिब्बत्तेतीति – न पियं कुब्बति नोपि अप्पियं.

तस्मिं परिदेवमच्छरं पण्णे वारि यथा न लिम्पतीति. तस्मिन्ति तस्मिं पुग्गले अरहन्ते खीणासवे. परिदेवोति ञातिब्यसनेन वा फुट्ठस्स भोगब्यसनेन वा फुट्ठस्स रोगब्यसनेन वा फुट्ठस्स सीलब्यसनेन वा फुट्ठस्स दिट्ठिब्यसनेन वा फुट्ठस्स अञ्ञतरञ्ञतरेन ब्यसनेन समन्नागतस्स अञ्ञतरञ्ञतरेन दुक्खधम्मेन फुट्ठस्स आदेवो परिदेवो आदेवना परिदेवना आदेवितत्तं परिदेवितत्तं वाचा पलापो विप्पलापो लालप्पो लालप्पायना लालप्पायितत्तं. मच्छरियन्ति पञ्च मच्छरियानि – आवासमच्छरियं, कुलमच्छरियं, लाभमच्छरियं, वण्णमच्छरियं, धम्ममच्छरियं. यं एवरूपं मच्छरियं मच्छरायना मच्छरायितत्तं वेविच्छं कदरियं कटुकञ्चुकता अग्गहितत्तं चित्तस्स – इदं वुच्चति मच्छरियं. अपि च खन्धमच्छरियम्पि मच्छरियं, धातुमच्छरियम्पि मच्छरियं, आयतनमच्छरियम्पि मच्छरियं गाहो – इदं वुच्चति मच्छरियं.

पण्णे वारि यथा न लिम्पतीति. पण्णं वुच्चति पदुमपत्तं. वारि वुच्चति उदकं. यथा वारि पदुमपत्तं न लिम्पति न पलिम्पति न उपलिम्पति अलित्तं अपलित्तं अनुपलित्तं, एवमेव तस्मिं पुग्गले अरहन्ते खीणासवे परिदेवो मच्छरियञ्च न लिम्पति न पलिम्पति न उपलिम्पति अलित्ता अपलित्ता अनुपलित्ता. सो च पुग्गलो अरहन्तो तेहि किलेसेहि न लिम्पति न पलिम्पति न उपलिम्पति अलित्तो अपलित्तो अनुपलित्तो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – तस्मिं परिदेवमच्छरं पण्णे वारि यथा न लिम्पति.

तेनाह भगवा –

‘‘सब्बत्थ मुनी अनिस्सितो, न पियं कुब्बति नोपि अप्पियं;

तस्मिं परिदेवमच्छरं, पण्णे वारि यथा न लिम्पती’’ति.

४७.

उदबिन्दु यथापि पोक्खरे, पदुमे वारि यथा न लिम्पति;

एवं मुनि नोपलिम्पति, यदिदं दिट्ठसुतमुतेसु [दिट्ठसुते मुतेसु (सी.), दिट्ठसुतं मुतेसु (स्या. क.)] वा.

उदबिन्दु यथापि पोक्खरेति. उदबिन्दु वुच्चति उदकथेवो. पोक्खरं वुच्चति पदुमपत्तं. यथा उदबिन्दु पदुमपत्ते न लिम्पति न पलिम्पति न उपलिम्पति अलित्तं अपलित्तं अनुपलित्तन्ति – उदबिन्दु यथापि पोक्खरे. पदुमे वारि यथा न लिम्पतीति. पदुमं वुच्चति पदुमपुप्फं. वारि वुच्चति उदकं. यथा वारि पदुमपुप्फं न लिम्पति न पलिम्पति न उपलिम्पति अलित्तं अपलित्तं अनुपलित्तन्ति – पदुमे वारि यथा न लिम्पति.

एवं मुनि नोपलिम्पति, यदिदं दिट्ठसुतमुतेसु वाति. एवन्ति ओपम्मसम्पटिपादनं. मुनीति. मोनं वुच्चति ञाणं…पे… सङ्गजालमतिच्च सो मुनि. लेपाति द्वे लेपा – तण्हालेपो च दिट्ठिलेपो च…पे… अयं तण्हालेपो…पे… अयं दिट्ठिलेपो. मुनि तण्हालेपं पहाय दिट्ठिलेपं पटिनिस्सज्जित्वा दिट्ठे न लिम्पति, सुते न लिम्पति, मुते न लिम्पति, विञ्ञाते न लिम्पति न पलिम्पति न उपलिम्पति अलित्तो अपलित्तो अनुपलित्तो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – एवं मुनि नोपलिम्पति, यदिदं दिट्ठसुतमुतेसु वा.

तेनाह भगवा –

‘‘उदबिन्दु यथापि पोक्खरे, पदुमे वारि यथा न लिम्पति;

एवं मुनि नोपलिम्पति, यदिदं दिट्ठसुतमुतेसु वा’’ति.

४८.

धोनो न हि तेन मञ्ञति, यदिदं दिट्ठसुतमुतेसु वा;

नाञ्ञेन विसुद्धिमिच्छति, न हि सो रज्जति नो विरज्जति.

धोनो न हि तेन मञ्ञति, यदिदं दिट्ठसुतमुतेसु वाति. धोनोति धोना वुच्चति पञ्ञा. या पञ्ञा पजानना…पे… अमोहो धम्मविचयो सम्मादिट्ठि. किंकारणा धोना वुच्चति पञ्ञा? ताय पञ्ञाय कायदुच्चरितं धुतञ्च धोत च सन्धोतञ्च निद्धोतञ्च, वचीदुच्चरितं…पे… मनोदुच्चरितं धुतञ्च धोतञ्च सन्धोतञ्च निद्धोतञ्च, रागो धुतो च धोतो च सन्धोतो च निद्धोतो च, दोसो… मोहो… कोधो… उपनाहो… मक्खो… पळासो… इस्सा… मच्छरियं… माया… साठेय्यं… थम्भो… सारम्भो… मानो… अतिमानो… मदो… पमादो… सब्बे किलेसा… सब्बे दुच्चरिता… सब्बे दरथा… सब्बे परिळाहा… सब्बे सन्तापा… सब्बाकुसलाभिसङ्खारा धुता च धोता च सन्धोता च निद्धोता च. तंकारणा धोना वुच्चति पञ्ञा.

अथ वा सम्मादिट्ठिया मिच्छादिट्ठि धुता च धोता च सन्धोता च निद्धोता च, सम्मासङ्कप्पेन मिच्छासङ्कप्पो धुतो च धोतो च सन्धोतो च निद्धोतो च, सम्मावाचाय मिच्छावाचा धुता च… सम्माकम्मन्तेन मिच्छाकम्मन्तो धुतो च… सम्माआजीवेन मिच्छाआजीवो धुतो च… सम्मावायामेन मिच्छावायामो धुतो च… सम्मासतिया मिच्छासति धुता च… सम्मासमाधिना मिच्छासमाधि धुतो च… सम्माञाणेन मिच्छाञाणं धुतञ्च… सम्माविमुत्तिया मिच्छाविमुत्ति धुता च धोता च सन्धोता च निद्धोता च.

अथ वा अरियेन अट्ठङ्गिकेन मग्गेन सब्बे किलेसा… सब्बे दुच्चरिता… सब्बे दरथा… सब्बे परिळाहा… सब्बे सन्तापा… सब्बाकुसलाभिसङ्खारा धुता च धोता च सन्धोता च निद्धोता च. अरहा इमेहि धोनेहि धम्मेहि उपेतो समुपेतो उपगतो समुपगतो उपपन्नो समुपपन्नो समन्नागतो. तस्मा अरहा धोनो. सो धुतरागो धुतपापो धुतकिलेसो धुतपरिळाहोति – धोनो.

धोनो न हि तेन मञ्ञति, यदिदं दिट्ठसुतमुतेसु वाति. धोनो दिट्ठं न मञ्ञति, दिट्ठस्मिं न मञ्ञति, दिट्ठतो न मञ्ञति, दिट्ठा मेति न मञ्ञति; सुतं न मञ्ञति, सुतस्मिं न मञ्ञति, सुततो न मञ्ञति, सुतं मेति न मञ्ञति; मुतं न मञ्ञति, मुतस्मिं न मञ्ञति, मुततो न मञ्ञति, मुतं मेति न मञ्ञति; विञ्ञातं न मञ्ञति, विञ्ञातस्मिं न मञ्ञति, विञ्ञाततो न मञ्ञति, विञ्ञातं मेति न मञ्ञति. वुत्तम्पि हेतं भगवता – ‘‘अस्मीति, भिक्खवे, मञ्ञितमेतं, अयमहमस्मीति मञ्ञितमेतं, भविस्सन्ति मञ्ञितमेतं, न भविस्सन्ति मञ्ञितमेतं, रूपी भविस्सन्ति मञ्ञितमेतं, अरूपी भविस्सन्ति मञ्ञितमेतं, सञ्ञी भविस्सन्ति मञ्ञितमेतं, असञ्ञी भविस्सन्ति मञ्ञितमेतं, नेवसञ्ञीनासञ्ञी भविस्सन्ति मञ्ञितमेतं. मञ्ञितं [मञ्ञितं हि (सी.)], भिक्खवे, रोगो, मञ्ञितं गण्डो, मञ्ञितं सल्लं, मञ्ञितं उपद्दवो. तस्मातिह, भिक्खवे, अमञ्ञमानेन चेतसा विहरिस्सामाति, एवञ्हि वो, भिक्खवे, सिक्खितब्ब’’न्ति – धोनो न हि तेन मञ्ञति यदिदं दिट्ठसुतमुतेसु वा.

नाञ्ञेन विसुद्धिमिच्छतीति. धोनो अञ्ञेन असुद्धिमग्गेन मिच्छापटिपदाय अनिय्यानिकपथेन अञ्ञत्र सतिपट्ठानेहि अञ्ञत्र सम्मप्पधानेहि अञ्ञत्र इद्धिपादेहि अञ्ञत्र इन्द्रियेहि अञ्ञत्र बलेहि अञ्ञत्र बोज्झङ्गेहि अञ्ञत्र अरिया अट्ठङ्गिका मग्गा सुद्धिं विसुद्धिं परिसुद्धिं मुत्तिं विमुत्तिं परिमुत्तिं न इच्छति न सादियति न पत्थेति न पिहेति नाभिजप्पतीति – नाञ्ञेन विसुद्धिमिच्छति.

न हि सो रज्जति नो विरज्जतीति. सब्बे बालपुथुज्जना रज्जन्ति, पुथुज्जनकल्याणकं उपादाय सत्त सेक्खा विरज्जन्ति; अरहा नेव रज्जति नो विरज्जति. विरत्तो सो खया रागस्स वीतरागत्ता, खया दोसस्स वीतदोसत्ता, खया मोहस्स वीतमोहत्ता. सो वुट्ठवासो चिण्णचरणो…पे… जातिजरामरणसंसारो, नत्थि तस्स पुनब्भवोति – न हि सो रज्जति नो विरज्जति.

तेनाह भगवा –

‘‘धोनो न हि तेन मञ्ञति, यदिदं दिट्ठसुतमुतेसु वा;

नाञ्ञेन विसुद्धिमिच्छति, न हि सो रज्जति नो विरज्जती’’ति.

जरासुत्तनिद्देसो छट्ठो.

७. तिस्समेत्तेय्यसुत्तनिद्देसो

अथ तिस्समेत्तेय्यसुत्तनिद्देसं वक्खति –

४९.

मेथुनमनुयुत्तस्स, [इच्चायस्मा तिस्सो मेत्तेय्यो]

विघातं ब्रूहि मारिस;

सुत्वान तव सासनं, विवेके सिक्खिस्सामसे.

मेथुनमनुयुत्तस्साति. मेथुनधम्मो नाम यो सो असद्धम्मो गामधम्मो वसलधम्मो दुट्ठुल्लो ओदकन्तिको रहस्सो द्वयंद्वयसमापत्ति. किंकारणा वुच्चति मेथुनधम्मो? उभिन्नं रत्तानं सारत्तानं अवस्सुतानं परियुट्ठितानं परियादिन्नचित्तानं उभिन्नं सदिसानं धम्मोति – तंकारणा वुच्चति मेथुनधम्मो. यथा उभो कलहकारका मेथुनकाति वुच्चन्ति, उभो भण्डनकारका मेथुनकाति वुच्चन्ति, उभो भस्सकारका मेथुनकाति वुच्चन्ति, उभो विवादकारका मेथुनकाति वुच्चन्ति, उभो अधिकरणकारका मेथुनकाति वुच्चन्ति, उभो वादिनो मेथुनकाति वुच्चन्ति, उभो सल्लापका मेथुनकाति वुच्चन्ति; एवमेवं उभिन्नं रत्तानं सारत्तानं अवस्सुतानं परियुट्ठितानं परियादिन्नचित्तानं उभिन्नं सदिसानं धम्मोति – तंकारणा वुच्चति मेथुनधम्मो.

मेथुनमनुयुत्तस्साति. मेथुनधम्मे युत्तस्स पयुत्तस्स आयुत्तस्स समायुत्तस्स तच्चरितस्स तब्बहुलस्स तग्गरुकस्स तन्निन्नस्स तप्पोणस्स तप्पब्भारस्स तदधिमुत्तस्स तदधिपतेय्यस्साति – मेथुनमनुयुत्तस्स.

इच्चायस्मा तिस्सो मेत्तेय्योति. इच्चाति पदसन्धि पदसंसग्गो पदपारिपूरी अक्खरसमवायो ब्यञ्जनसिलिट्ठता पदानुपुब्बतापेतं – इच्चाति. आयस्माति पियवचनं गरुवचनं सगारववचनं सप्पतिस्सवचनमेतं – आयस्माति. तिस्सोति तस्स थेरस्स नामं सङ्खा समञ्ञा पञ्ञत्ति वोहारो नामं नामकम्मं नामधेय्यं निरुत्ति ब्यञ्जनं अभिलापो. मेत्तेय्योति तस्स थेरस्स गोत्तं सङ्खा समञ्ञा पञ्ञत्ति वोहारोति – इच्चायस्मा तिस्सो मेत्तेय्यो.

विघातं ब्रूहि मारिसाति. विघातन्ति विघातं उपघातं पीळनं घट्टनं उपद्दवं उपसग्गं ब्रूहि आचिक्ख देसेहि पञ्ञपेहि पट्ठपेहि विवर विभज उत्तानीकरोहि [उत्तानिं करोहि (क.)] पकासेहि. मारिसाति पियवचनं गरुवचनं सगारववचनं सप्पतिस्सवचनमेतं मारिसाति – विघातं ब्रूहि मारिस.

सुत्वान तव सासनन्ति. तुय्हं वचनं ब्यप्पथं देसनं अनुसासनं अनुसिट्ठिं सुत्वा सुणित्वा उग्गहेत्वा उपधारयित्वा उपलक्खयित्वाति – सुत्वान तव सासनं.

विवेके सिक्खिस्सामसेति. विवेकोति तयो विवेका – कायविवेको, चित्तविवेको, उपधिविवेको. कतमो कायविवेको? इध भिक्खु विवित्तं सेनासनं भजति अरञ्ञं रुक्खमूलं पब्बतं कन्दरं गिरिगुहं सुसानं वनपत्थं अब्भोकासं पलासपुञ्जं, कायेन विवित्तो विहरति. सो एको गच्छति, एको तिट्ठति, एको निसीदति, एको सेय्यं कप्पेति, एको गामं पिण्डाय पविसति, एको पटिक्कमति, एको रहो निसीदति, एको चङ्कमं अधिट्ठाति, एको चरति, एको विहरति इरियति वत्तति पालेति यपेति यापेति – अयं कायविवेको.

कतमो चित्तविवेको? पठमं झानं समापन्नस्स नीवरणेहि चित्तं विवित्तं होति, दुतियं झानं समापन्नस्स वितक्कविचारेहि चित्तं विवित्तं होति, ततियं झानं समापन्नस्स पीतिया चित्तं विवित्तं होति, चतुत्थं झानं समापन्नस्स सुखदुक्खेहि चित्तं विवित्तं होति, आकासानञ्चायतनं समापन्नस्स रूपसञ्ञाय पटिघसञ्ञाय नानत्तसञ्ञाय चित्तं विवित्तं होति, विञ्ञाणञ्चायतनं समापन्नस्स आकासानञ्चायतनसञ्ञाय चित्तं विवित्तं होति, आकिञ्चञ्ञायतनं समापन्नस्स विञ्ञाणञ्चायतनसञ्ञाय चित्तं विवित्तं होति, नेवसञ्ञानासञ्ञायतनं समापन्नस्स आकिञ्चञ्ञायतनसञ्ञाय चित्तं विवित्तं होति, सोतापन्नस्स सक्कायदिट्ठिया विचिकिच्छाय सीलब्बतपरामासा दिट्ठानुसया विचिकिच्छानुसया तदेकट्ठेहि च किलेसेहि चित्तं विवित्तं होति, सकदागामिस्स ओळारिका कामरागसञ्ञोजना पटिघसञ्ञोजना ओळारिका कामरागानुसया पटिघानुसया तदेकट्ठेहि च किलेसेहि चित्तं विवित्तं होति, अनागामिस्स अनुसहगता कामरागसञ्ञोजना पटिघसञ्ञोजना अनुसहगता कामरागानुसया पटिघानुसया तदेकट्ठेहि च किलेसेहि चित्तं विवित्तं होति, अरहतो रूपरागा अरूपरागा माना उद्धच्चा अविज्जाय मानानुसया भवरागानुसया अविज्जानुसया तदेकट्ठेहि च किलेसेहि बहिद्धा च सब्बनिमित्तेहि चित्तं विवित्तं होति – अयं चित्तविवेको.

कतमो उपधिविवेको? उपधि वुच्चन्ति किलेसा च खन्धा च अभिसङ्खारा च. उपधिविवेको वुच्चति अमतं निब्बानं. यो सो सब्बसङ्खारसमथो सब्बूपधिपटिनिस्सग्गो तण्हक्खयो विरागो निरोधो निब्बानं – अयं उपधिविवेको. कायविवेको च विवेकट्ठकायानं नेक्खम्माभिरतानं; चित्तविवेको च परिसुद्धचित्तानं परमवोदानपत्तानं; उपधिविवेको च निरूपधीनं पुग्गलानं विसङ्खारगतानं. विवेके सिक्खिस्सामसेति. सो थेरो पकतिया सिक्खितसिक्खो. अपि च धम्मदेसनं उपादाय धम्मदेसनं सावेन्तो [याचन्तो (सी. स्या.)] एवमाह – विवेके सिक्खिस्सामसेति.

तेनाह थेरो तिस्समेत्तेय्यो –

‘‘मेथुनमनुयुत्तस्स, [इच्चायस्मा तिस्सो मेत्तेय्यो]

विघातं ब्रूहि मारिस;

सुत्वान तव सासनं, विवेके सिक्खिस्सामसे’’ति.

५०.

मेथुनमनुयुत्तस्स, [मेत्तेय्याति भगवा]

मुस्सते वापि सासनं;

मिच्छा च पटिपज्जति, एतं तस्मिं अनारियं.

मेथुनमनुयुत्तस्साति. मेथुनधम्मो नाम यो सो असद्धम्मो गामधम्मो वसलधम्मो दुट्ठुल्लो ओदकन्तिको रहस्सो द्वयंद्वयसमापत्ति. किंकारणा वुच्चति मेथुनधम्मो? उभिन्नं रत्तानं सारत्तानं अवस्सुतानं परियुट्ठितानं परियादिन्नचित्तानं उभिन्नं सदिसानं धम्मोति – तंकारणा वुच्चति मेथुनधम्मो. यथा उभो कलहकारका मेथुनकाति वुच्चन्ति, उभो भण्डनकारका मेथुनकाति वुच्चन्ति, उभो भस्सकारका मेथुनकाति वुच्चन्ति, उभो विवादकारका मेथुनकाति वुच्चन्ति, उभो अधिकरणकारका मेथुनकाति वुच्चन्ति, उभो वादिनो मेथुनकाति वुच्चन्ति, उभो सल्लापका मेथुनकाति वुच्चन्ति; एवमेवं उभिन्नं रत्तानं सारत्तानं अवस्सुतानं परियुट्ठितानं परियादिन्नचित्तानं उभिन्नं सदिसानं धम्मोति – तंकारणा वुच्चति मेथुनधम्मो.

मेथुनमनुयुत्तस्साति. मेथुनधम्मे युत्तस्स पयुत्तस्स आयुत्तस्स समायुत्तस्स तच्चरितस्स तब्बहुलस्स तग्गरुकस्स तन्निन्नस्स तप्पोणस्स तप्पब्भारस्स तदधिमुत्तस्स तदधिपतेय्यस्साति – मेथुनमनुयुत्तस्स.

मेत्तेय्याति भगवा तं थेरं गोत्तेन आलपति. भगवाति गारवाधिवचनं. अपि च भग्गरागोति भगवा, भग्गदोसोति भगवा, भग्गमोहोति भगवा, भग्गमानोति भगवा, भग्गदिट्ठीति भगवा, भग्गकण्डकोति [भग्गकण्डकोति (सी. स्या.)] भगवा, भग्गकिलेसोति भगवा, भजि विभजि पविभजि धम्मरतनन्ति भगवा, भवानं अन्तकरोति भगवा, भावितकायो भावितसीलो भावितचित्तो भावितपञ्ञोति भगवा, भजि वा भगवा अरञ्ञवनपत्थानि [अरञ्ञे वनपत्थानि (सी.)] पन्तानि सेनासनानि अप्पसद्दानि अप्पनिग्घोसानि विजनवातानि मनुस्सराहस्सेय्यकानि [मनुस्सराहसेय्यकानि (सी. स्या.)] पटिसल्लानसारुप्पानीति भगवा, भागी वा भगवा चीवरपिण्डपातसेनासनगिलानपच्चयभेसज्जपरिक्खारानन्ति भगवा, भागी वा भगवा अत्थरसस्स धम्मरसस्स विमुत्तिरसस्स अधिसीलस्स अधिचित्तस्स अधिपञ्ञायाति भगवा, भागी वा भगवा चतुन्नं झानानं चतुन्नं अप्पमञ्ञानं चतुन्नं अरूपसमापत्तीनन्ति भगवा, भागी वा भगवा अट्ठन्नं विमोक्खानं अट्ठन्नं अभिभायतनानं नवन्नं अनुपुब्बविहारसमापत्तीनन्ति भगवा, भागी वा भगवा दसन्नं सञ्ञाभावनानं दसन्नं कसिणसमापत्तीनं आनापानस्सतिसमाधिस्स असुभसमापत्तियाति भगवा, भागी वा भगवा चतुन्नं सतिपट्ठानानं चतुन्नं सम्मप्पधानानं चतुन्नं इद्धिपादानं पञ्चन्नं इन्द्रियानं पञ्चन्नं बलानं सत्तन्नं बोज्झङ्गानं अरियस्स अट्ठङ्गिकस्स मग्गस्साति भगवा, भागी वा भगवा दसन्नं तथागतबलानं चतुन्नं वेसारज्जानं चतुन्नं पटिसम्भिदानं छन्नं अभिञ्ञानं [अभिञ्ञाणानं (सी.)] छन्नं बुद्धधम्मानन्ति भगवा. भगवाति नेतं नामं मातरा कतं, न पितरा कतं, न भातरा कतं, न भगिनिया कतं, न मित्तामच्चेहि कतं, न ञातिसालोहितेहि कतं न समणब्राह्मणेहि कतं, न देवताहि कतं. विमोक्खन्तिकमेतं बुद्धानं भगवन्तानं बोधिया मूले सह सब्बञ्ञुतञ्ञाणस्स पटिलाभा सच्छिका पञ्ञत्ति यदिदं भगवाति – मेत्तेय्याति भगवा.

मुस्सते वापि सासनन्ति. द्वीहि कारणेहि सासनं मुस्सति – परियत्तिसासनम्पि मुस्सति, पटिपत्तिसासनम्पि मुस्सति. कतमं परियत्तिसासनं? यं तस्स परियापुटं – सुत्तं गेय्यं वेय्याकरणं गाथा उदानं इतिवुत्तकं जातकं अब्भुतधम्मं वेदल्लं – इदं परियत्तिसासनं. तम्पि मुस्सति सम्मुस्सति पमुस्सति सम्पमुस्सति परिबाहिरो होतीति – एवम्पि मुस्सते वापि सासनं.

कतमं पटिपत्तिसासनं? सम्मापटिपदा अनुलोमपटिपदा अपच्चनीकपटिपदा अन्वत्थपटिपदा धम्मानुधम्मपटिपदा सीलेसु परिपूरकारिता इन्द्रियेसु गुत्तद्वारता भोजने मत्तञ्ञुता जागरियानुयोगो सतिसम्पजञ्ञं चत्तारो सतिपट्ठाना चत्तारो सम्मप्पधाना चत्तारो इद्धिपादा पञ्चिन्द्रियानि पञ्च बलानि सत्त बोज्झङ्गा अरियो अट्ठङ्गिको मग्गो – इदं पटिपत्तिसासनं. तम्पि मुस्सति सम्मुस्सति पमुस्सति सम्पमुस्सति परिबाहिरो होतीति. एवम्पि मुस्सते वापि सासनं.

मिच्छा च पटिपज्जतीति. पाणम्पि हनति, अदिन्नम्पि आदियति, सन्धिम्पि छिन्दति, निल्लोपम्पि हरति, एकागारिकम्पि करोति, परिपन्थेपि तिट्ठति, परदारम्पि गच्छति, मुसापि भणतीति – मिच्छा च पटिपज्जति.

एतं तस्मिं अनारियन्ति. एतं तस्मिं पुग्गले अनरियधम्मो बालधम्मो मूळ्हधम्मो अञ्ञाणधम्मो अमराविक्खेपधम्मो, यदिदं मिच्छापटिपदाति – एतं तस्मिं अनारियं.

तेनाह भगवा –

‘‘मेथुनमनुयुत्तस्स, [मेत्तेय्याति भगवा]

मुस्सते वापि सासनं;

मिच्छा च पटिपज्जति, एतं तस्मिं अनारिय’’न्ति.

५१.

एको पुब्बे चरित्वान, मेथुनं यो निसेवति;

यानं भन्तंव तं लोके, हीनमाहु पुथुज्जनं.

एको पुब्बे चरित्वानाति. द्वीहि कारणेहि एको पुब्बे चरित्वान – पब्बज्जासङ्खातेन वा गणाववस्सग्गट्ठेन वा. कथं पब्बज्जासङ्खातेन एको पुब्बे चरित्वान? सब्बं घरावासपलिबोधं छिन्दित्वा पुत्तदारपलिबोधं छिन्दित्वा ञातिपलिबोधं छिन्दित्वा मित्तामच्चपलिबोधं छिन्दित्वा सन्निधिपलिबोधं छिन्दित्वा केसमस्सुं ओहारेत्वा कासायानि वत्थानि अच्छादेत्वा अगारस्मा अनगारियं पब्बजित्वा अकिञ्चनभावं उपगन्त्वा एको चरति विहरति इरियति वत्तति पालेति यपेति यापेति. एवं पब्बज्जासङ्खातेन एको पुब्बे चरित्वान.

कथं गणाववस्सग्गट्ठेन एको पुब्बे चरित्वान? सो एवं पब्बजितो समानो एको अरञ्ञवनपत्थानि पन्तानि सेनासनानि पटिसेवति अप्पसद्दानि अप्पनिग्घोसानि विजनवातानि मनुस्सराहस्सेय्यकानि पटिसल्लानसारुप्पानि. सो एको गच्छति, एको तिट्ठति, एको निसीदति, एको सेय्यं कप्पेति, एको गामं पिण्डाय पविसति, एको पटिक्कमति, एको रहो निसीदति, एको चङ्कमं अधिट्ठाति, एको चरति विहरति इरियति वत्तति पालेति यपेति यापेति. एवं गणाववस्सग्गट्ठेन एको पुब्बे चरित्वान.

मेथुनं यो निसेवतीति. मेथुनधम्मो नाम यो सो असद्धम्मो…पे… तंकारणा वुच्चति मेथुनधम्मो. मेथुनं यो निसेवतीति. यो अपरेन समयेन बुद्धं धम्मं सङ्घं सिक्खं पच्चक्खाय हीनायावत्तित्वा मेथुनं धम्मं सेवति निसेवति संसेवति पटिसेवतीति – मेथुनं यो निसेवति.

यानं भन्तंव तं लोकेति. यानन्ति हत्थियानं अस्सयानं गोयानं अजयानं मेण्डयानं ओट्ठयानं खरयानं भन्तं अदन्तं अकारितं अविनीतं उप्पथं गण्हाति, विसमं खाणुम्पि पासाणम्पि अभिरुहति, यानम्पि आरोहनकम्पि भञ्जति, पपातेपि पपतति. यथा तं भन्तं यानं अदन्तं अकारितं अविनीतं उप्पथं गण्हाति; एवमेवं सो विब्भन्तको भन्तयानपटिभागो उप्पथं गण्हाति, मिच्छादिट्ठिं गण्हाति…पे… मिच्छासमाधिं गण्हाति. यथा तं भन्तं यानं अदन्तं अकारितं अविनीतं विसमं खाणुम्पि पासाणम्पि अभिरुहति; एवमेवं सो विब्भन्तको भन्तयानपटिभागो विसमं कायकम्मं अभिरुहति, विसमं वचीकम्मं अभिरुहति, विसमं मनोकम्मं अभिरुहति, विसमं पाणातिपातं अभिरुहति, विसमं अदिन्नादानं अभिरुहति, विसमं कामेसुमिच्छाचारं अभिरुहति, विसमं मुसावादं अभिरुहति, विसमं पिसुणवाचं अभिरुहति, विसमं फरुसवाचं अभिरुहति, विसमं सम्फप्पलापं अभिरुहति, विसमं अभिज्झं अभिरुहति, विसमं ब्यापादं अभिरुहति, विसमं मिच्छादिट्ठिं अभिरुहति, विसमे सङ्खारे अभिरुहति, विसमे पञ्च कामगुणे अभिरुहति, विसमे नीवरणे अभिरुहति. यथा तं भन्तं यानं अदन्तं अकारितं अविनीतं यानम्पि आरोहनकम्पि भञ्जति; एवमेवं सो विब्भन्तको भन्तयानपटिभागो निरये अत्तानं भञ्जति, तिरच्छानयोनियं अत्तानं भञ्जति, पेत्तिविसये अत्तानं भञ्जति, मनुस्सलोके अत्तानं भञ्जति, देवलोके अत्तानं भञ्जति. यथा तं भन्तं यानं अदन्तं अकारितं अविनीतं पपाते पपतति; एवमेवं सो विब्भन्तको भन्तयानपटिभागो जातिपपातम्पि पपतति, जरापपातम्पि पपतति, ब्याधिपपातम्पि पपतति, मरणपपातम्पि पपतति, सोकपरिदेवदुक्खदोमनस्सुपायासपपातम्पि पपतति. लोकेति अपायलोके मनुस्सलोकेति – यानं भन्तंव तं लोके.

हीनमाहु पुथुज्जनन्ति. पुथुज्जनाति केनट्ठेन पुथुज्जना? पुथु किलेसे जनेन्तीति पुथुज्जना, पुथु अविहतसक्कायदिट्ठिकाति पुथुज्जना, पुथु सत्थारानं मुखुल्लोकिकाति पुथुज्जना, पुथु सब्बगतीहि अवुट्ठिताति पुथुज्जना, पुथु नानाभिसङ्खारे [नानाभिसङ्खारेहि (स्या.)] अभिसङ्खरोन्तीति पुथुज्जना, पुथु नानाओघेहि वुय्हन्तीति पुथुज्जना, पुथु नानासन्तापेहि सन्तपन्तीति पुथुज्जना, पुथु नानापरिळाहेहि परिदय्हन्तीति पुथुज्जना, पुथु पञ्चसु कामगुणेसु रत्ता गिद्धा गधिता मुच्छिता अज्झोसन्ना [अज्झोपन्ना (सी. स्या.)] लग्गा लग्गिता पलिबुद्धाति पुथुज्जना, पुथु पञ्चहि नीवरणेहि आवुता निवुता ओवुता पिहिता पटिच्छन्ना पटिकुज्जिताति पुथुज्जना. हीनमाहु पुथुज्जनन्ति. पुथुज्जनं हीनं निहीनं ओमकं लामकं छतुक्कं परित्तन्ति एवमाहंसु एवं कथेन्ति एवं भणन्ति एवं दीपयन्ति एवं वोहरन्तीति – हीनमाहु पुथुज्जनं.

तेनाह भगवा –

‘‘एको पुब्बे चरित्वान, मेथुनं यो निसेवति;

यानं भन्तंव तं लोके, हीनमाहु पुथुज्जन’’न्ति.

५२.

यसो कित्ति च या पुब्बे, हायते वापि तस्स सा;

एतम्पि दिस्वा सिक्खेथ, मेथुनं विप्पहातवे.

यसो कित्ति च या पुब्बे, हायते वापि तस्स साति. कतमो यसो? इधेकच्चो पुब्बे समणभावे सक्कतो होति गरुकतो मानितो पूजितो अपचितो लाभी चीवरपिण्डपातसेनासनगिलानपच्चयभेसज्जपरिक्खारानं – अयं यसो. कतमा कित्ति? इधेकच्चो पुब्बे समणभावे कित्तिवण्णगतो होति पण्डितो वियत्तो मेधावी बहुस्सुतो चित्तकथी कल्याणपटिभानो – सुत्तन्तिकोति वा विनयधरोति वा धम्मकथिकोति वा आरञ्ञिकोति वा पिण्डपातिकोति वा पंसुकूलिकोति वा तेचीवरिकोति वा सपदानचारिकोति वा खलुपच्छाभत्तिकोति वा नेसज्जिकोति वा यथासन्थतिकोति वा पठमस्स झानस्स लाभीति वा दुतियस्स झानस्स लाभीति वा ततियस्स झानस्स लाभीति वा चतुत्थस्स झानस्स लाभीति वा आकासानञ्चायतनसमापत्तिया लाभीति वा विञ्ञाणञ्चायतनसमापत्तिया लाभीति वा आकिञ्चञ्ञायतनसमापत्तिया लाभीति वा नेवसञ्ञानासञ्ञायतनसमापत्तिया लाभीति वा, अयं कित्तीति – यसो कित्ति च या पुब्बे.

हायते वापि तस्स साति. तस्स अपरेन समयेन बुद्धं धम्मं सङ्घं सिक्खं पच्चक्खाय हीनायावत्तस्स सो च यसो सा च कित्ति हायति परिहायति परिधंसति परिपतति अन्तरधायति विप्पलुज्जतीति – यसो कित्ति च या पुब्बे हायते वापि तस्स सा.

एतम्पि दिस्वा सिक्खेथ मेथुनं विप्पहातवेति. एतन्ति पुब्बे समणभावे यसो कित्ति च, अपरभागे बुद्धं धम्मं सङ्घं सिक्खं पच्चक्खाय हीनायावत्तस्स अयसो च अकित्ति च; एतं सम्पत्तिं विपत्तिं. दिस्वाति पस्सित्वा तुलयित्वा तीरयित्वा विभावयित्वा विभूतं कत्वाति – एतम्पि दिस्वा. सिक्खेथाति तिस्सो सिक्खा – अधिसीलसिक्खा, अधिचित्तसिक्खा, अधिपञ्ञासिक्खा. कतमा अधिसीलसिक्खा? इध भिक्खु सीलवा होति, पातिमोक्खसंवरसंवुतो विहरति आचारगोचरसम्पन्नो अणुमत्तेसु वज्जेसु भयदस्सावी, समादाय सिक्खति सिक्खापदेसु. खुद्दको सीलक्खन्धो, महन्तो सीलक्खन्धो. सीलं पतिट्ठा आदि चरणं संयमो संवरो मुखं पमुखं कुसलानं धम्मानं समापत्तिया – अयं अधिसीलसिक्खा.

कतमा अधिचित्तसिक्खा? इध भिक्खु विविच्चेव कामेहि विविच्च अकुसलेहि धम्मेहि सवितक्कं सविचारं विवेकजं पीतिसुखं पठमं झानं उपसम्पज्ज विहरति…पे… दुतियं झानं… ततियं झानं… चतुत्थं झानं उपसम्पज्ज विहरति – अयं अधिचित्तसिक्खा.

कतमा अधिपञ्ञासिक्खा? इध भिक्खु पञ्ञवा होति उदयत्थगामिनिया पञ्ञाय समन्नागतो अरियाय निब्बेधिकाय सम्मा दुक्खक्खयगामिनिया. सो इदं दुक्खन्ति यथाभूतं पजानाति, अयं दुक्खसमुदयोति यथाभूतं पजानाति, अयं दुक्खनिरोधोति यथाभूतं पजानाति, अयं दुक्खनिरोधगामिनी पटिपदाति यथाभूतं पजानाति, इमे आसवाति यथाभूतं पजानाति, अयं आसवसमुदयोति यथाभूतं पजानाति, अयं आसवनिरोधोति यथाभूतं पजानाति, अयं आसवनिरोधगामिनी पटिपदाति यथाभूतं पजानाति – अयं अधिपञ्ञासिक्खा. मेथुनधम्मो नाम यो सो असद्धम्मो…पे… तंकारणा वुच्चति मेथुनधम्मो.

एतम्पि दिस्वा सिक्खेथ, मेथुनं विप्पहातवेति. मेथुनधम्मस्स पहानाय वूपसमाय पटिनिस्सग्गाय पटिपस्सद्धिया अधिसीलम्पि सिक्खेय्य, अधिचित्तम्पि सिक्खेय्य, अधिपञ्ञम्पि सिक्खेय्य. इमा तिस्सो सिक्खायो आवज्जन्तो सिक्खेय्य, जानन्तो सिक्खेय्य, पस्सन्तो सिक्खेय्य, पच्चवेक्खन्तो सिक्खेय्य, चित्तं अधिट्ठहन्तो सिक्खेय्य, सद्धाय अधिमुच्चन्तो सिक्खेय्य, वीरियं पग्गण्हन्तो सिक्खेय्य, सतिं उपट्ठपेन्तो सिक्खेय्य, चित्तं समादहन्तो सिक्खेय्य, पञ्ञाय पजानन्तो सिक्खेय्य, अभिञ्ञेय्यं अभिजानन्तो सिक्खेय्य, परिञ्ञेय्यं परिजानन्तो सिक्खेय्य, पहातब्बं पजहन्तो सिक्खेय्य, भावेतब्बं भावेन्तो सिक्खेय्य, सच्छिकातब्बं सच्छिकरोन्तो सिक्खेय्य आचरेय्य समाचरेय्य समादाय वत्तेय्याति – एतम्पि दिस्वा सिक्खेथ, मेथुनं विप्पहातवे.

तेनाह भगवा –

‘‘यसो कित्ति च या पुब्बे, हायते वापि तस्स सा;

एतम्पि दिस्वा सिक्खेथ, मेथुनं विप्पहातवे’’ति.

५३.

सङ्कप्पेहि परेतो सो, कपणो विय झायति;

सुत्वा परेसं निग्घोसं, मङ्कु होति तथाविधो.

सङ्कप्पेहि परेतो सो, कपणो विय झायतीति. कामसङ्कप्पेन ब्यापादसङ्कप्पेन विहिंसासङ्कप्पेन दिट्ठिसङ्कप्पेन फुट्ठो परेतो समोहितो समन्नागतो पिहितो कपणो विय मन्दो विय मोमूहो विय झायति पज्झायति निज्झायति अपज्झायति [अवज्झायति (स्या.)]. यथा उलूको रुक्खसाखायं मूसिकं मगयमानो झायति पज्झायति निज्झायति अपज्झायति, यथा कोत्थु नदीतीरे मच्छे मगयमानो झायति पज्झायति निज्झायति अपज्झायति, यथा बिळारो सन्धिसमलसङ्कटिरे मूसिकं मगयमानो झायति पज्झायति निज्झायति अपज्झायति, यथा गद्रभो वहच्छिन्नो सन्धिसमलसङ्कटिरे झायति पज्झायति निज्झायति अपज्झायति; एवमेवं सो विब्भन्तको कामसङ्कप्पेन ब्यापादसङ्कप्पेन विहिंसासङ्कप्पेन दिट्ठिसङ्कप्पेन फुट्ठो परेतो समोहितो समन्नागतो पिहितो कपणो विय मन्दो विय मोमूहो विय झायति पज्झायति निज्झायति अपज्झायतीति – सङ्कप्पेहि परेतो सो कपणो विय झायति.

सुत्वा परेसं निग्घोसं, मङ्कु होति तथाविधोति. परेसन्ति उपज्झाया वा आचरिया वा समानुपज्झायका वा समानाचरियका वा मित्ता वा सन्दिट्ठा वा सम्भत्ता वा सहाया वा चोदेन्ति – ‘‘तस्स ते, आवुसो, अलाभा, तस्स ते दुल्लद्धं, यं त्वं एवरूपं उळारं सत्थारं लभित्वा एवं स्वाक्खाते धम्मविनये पब्बजित्वा एवरूपं अरियगणं लभित्वा हीनस्स मेथुनधम्मस्स कारणा बुद्धं धम्मं सङ्घं सिक्खं पच्चक्खाय हीनायावत्तोसि. सद्धापि नाम ते नाहोसि कुसलेसु धम्मेसु, हिरीपि नाम ते नाहोसि कुसलेसु धम्मेसु, ओत्तप्पम्पि नाम ते नाहोसि कुसलेसु धम्मेसु, वीरियम्पि नाम ते नाहोसि कुसलेसु धम्मेसु, सतिपि नाम ते नाहोसि कुसलेसु धम्मेसु, पञ्ञापि नाम ते नाहोसि कुसलेसु धम्मेसू’’ति. तेसं वचनं ब्यप्पथं देसनं अनुसासनं अनुसिट्ठिं सुत्वा सुणित्वा उग्गहेत्वा उपधारयित्वा उपलक्खयित्वा मङ्कु होति, पीळितो घट्टितो ब्याधितो दोमनस्सितो होति. तथाविधोति तथाविधो तादिसो तस्सण्ठितो तप्पकारो तप्पटिभागो. यो सो विब्भन्तकोति – सुत्वा परेसं निग्घोसं मङ्कु होति तथाविधो.

तेनाह भगवा –

‘‘सङ्कप्पेहि परेतो सो, कपणो विय झायति;

सुत्वा परेसं निग्घोसं, मङ्कु होति तथाविधो’’ति.

५४.

अथ सत्थानि कुरुते, परवादेहि चोदितो;

एस ख्वस्स महागेधो, मोसवज्जं पगाहति [संगाहति (क.)] .

अथ सत्थानि कुरुते, परवादेहि चोदितोति. अथाति पदसन्धि पदसंसग्गो पदपारिपूरी अक्खरसमवायो ब्यञ्जनसिलिट्ठता पदानुपुब्बतापेतं – अथाति. सत्थानीति तीणि सत्थानि – कायसत्थं, वचीसत्थं, मनोसत्थं. तिविधं कायदुच्चरितं कायसत्थं, चतुब्बिधं वचीदुच्चरितं वचीसत्थं, तिविधं मनोदुच्चरितं मनोसत्थं. परवादेहि चोदितोति. उपज्झायेहि वा आचरियेहि वा समानुपज्झायकेहि वा समानाचरियकेहि वा मित्तेहि वा सन्दिट्ठेहि वा सम्भत्तेहि वा सहायेहि वा चोदितो सम्पजानमुसा भासति. ‘‘अभिरतो अहं, भन्ते, अहोसिं पब्बज्जाय. माता मे पोसेतब्बा, तेनम्हि विब्भन्तो’’ति भणति. ‘‘पिता मे पोसेतब्बो, तेनम्हि विब्भन्तो’’ति भणति. ‘‘भाता मे पोसेतब्बो… भगिनी मे पोसेतब्बा… पुत्तो मे पोसेतब्बो… धीता मे पोसेतब्बा… मित्ता मे पोसेतब्बा… अमच्चा मे पोसेतब्बा… ञातका मे पोसेतब्बा… सालोहिता मे पोसेतब्बा, तेनम्हि विब्भन्तो’’ति भणति. वचीसत्थं करोति सङ्करोति जनेति सञ्जनेति निब्बत्तेति अभिनिब्बत्तेतीति – अथ सत्थानि कुरुते, परवादेहि चोदितो.

एस ख्वस्स महागेधोति. एसो तस्स महागेधो महावनं महागहनं महाकन्तारो महाविसमो महाकुटिलो महापङ्को महापलिपो महापलिबोधो महाबन्धनं, यदिदं सम्पजानमुसावादोति – एस ख्वस्स महागेधो.

मोसवज्जं पगाहतीति. मोसवज्जं वुच्चति मुसावादो. इधेकच्चो सभग्गतो वा परिसग्गतो वा ञातिमज्झगतो वा पूगमज्झगतो वा राजकुलमज्झगतो वा अभिनीतो सक्खिपुट्ठो – ‘‘एहम्भो पुरिस, यं जानासि तं वदेही’’ति, सो अजानं वा आह – ‘‘जानामी’’ति, ‘‘जानं’’ वा आह – ‘‘न जानामी’’ति, अपस्सं वा आह – ‘‘पस्सामी’’ति, पस्सं वा आह – ‘‘न पस्सामी’’ति. इति अत्तहेतु वा परहेतु वा आमिसकिञ्चिक्खहेतु वा सम्पजानमुसा भासति – इदं वुच्चति मोसवज्जं.

अपि च तीहाकारेहि मुसावादो होति. पुब्बेवस्स होति – ‘‘मुसा भणिस्स’’न्ति, भणन्तस्स होति – ‘‘मुसा भणामी’’ति, भणितस्स होति – ‘‘मुसा मया भणित’’न्ति. इमेहि तीहाकारेहि मुसावादो होति. अपि च चतूहाकारेहि मुसावादो होति. पुब्बेवस्स होति – ‘‘मुसा भणिस्स’’न्ति, भणन्तस्स होति – ‘‘मुसा भणामी’’ति, भणितस्स होति – ‘‘मुसा मया भणित’’न्ति, विनिधाय दिट्ठिं. इमेहि चतूहाकारेहि मुसावादो होति. अपि च पञ्चहाकारेहि… छहाकारेहि… सत्तहाकारेहि… अट्ठहाकारेहि मुसावादो होति. पुब्बेवस्स होति – ‘‘मुसा भणिस्स’’न्ति, भणन्तस्स होति – ‘‘मुसा भणामी’’ति, भणितस्स होति – ‘‘मुसा मया भणित’’न्ति, विनिधाय दिट्ठिं, विनिधाय खन्तिं, विनिधाय रुचिं, विनिधाय सञ्ञं, विनिधाय भावं. इमेहि अट्ठहाकारेहि मुसावादो होति. मोसवज्जं पगाहतीति. मोसवज्जं पगाहति ओगाहति अज्झोगाहति पविसतीति – मोसवज्जं पगाहति.

तेनाह भगवा –

‘‘अथ सत्थानि कुरुते, परवादेहि चोदितो;

एस ख्वस्स महागेधो, मोसवज्जं पगाहती’’ति.

५५.

पण्डितोति समञ्ञातो, एकच्चरियं [एकचरियं (सी. स्या.)] अधिट्ठितो;

स चापि मेथुने युत्तो, मन्दोव परिकिस्सति.

पण्डितोति समञ्ञातोति. इधेकच्चो पुब्बे समणभावे कित्ति वण्णगतो होति – ‘‘पण्डितो वियत्तो मेधावी बहुस्सुतो चित्तकथी कल्याणपटिभानो सुत्तन्तिकोति वा विनयधरोति वा धम्मकथिकोति वा…पे… नेवसञ्ञानासञ्ञायतनसमापत्तिया लाभी’’ति वा. एवं ञातो होति पञ्ञातो समञ्ञातो होतीति – पण्डितोति समञ्ञातो.

एकच्चरियं अधिट्ठितोति. द्वीहि कारणेहि एकच्चरियं अधिट्ठितो – पब्बज्जासङ्खातेन वा गणाववस्सग्गट्ठेन वा. कथं पब्बज्जासङ्खातेन एकच्चरियं अधिट्ठितो? सब्बं घरावासपलिबोधं छिन्दित्वा…पे… एवं पब्बज्जासङ्खातेन एकच्चरियं अधिट्ठितो. कथं गणाववस्सग्गट्ठेन एकच्चरियं अधिट्ठितो? सो एवं पब्बजितो समानो एको अरञ्ञवनपत्थानि पन्तानि…पे… एवं गणाववस्सग्गट्ठेन एकच्चरियं अधिट्ठितोति – एकच्चरियं अधिट्ठितो.

स चापि मेथुने युत्तोति. मेथुनधम्मो नाम यो सो असद्धम्मो गामधम्मो…पे… तंकारणा वुच्चति मेथुनधम्मो. स चापि मेथुने युत्तोति. सो अपरेन समयेन बुद्धं धम्मं सङ्घं सिक्खं पच्चक्खाय हीनायावत्तित्वा मेथुनधम्मे युत्तो [युत्तो संयुत्तो (सी.)] पयुत्तो आयुत्तो समायुत्तोति – स चापि मेथुने युत्तो.

मन्दोव परिकिस्सतीति. कपणो विय मन्दो विय मोमूहो विय किस्सति परिकिस्सति परिकिलिस्सति. पाणम्पि हनति, अदिन्नम्पि आदियति, सन्धिम्पि छिन्दति, निल्लोपम्पि हरति, एकागारिकम्पि करोति, परिपन्थेपि तिट्ठति, परदारम्पि गच्छति, मुसापि भणति. एवम्पि किस्सति परिकिस्सति परिकिलिस्सति. तमेनं राजानो गहेत्वा विविधा कम्मकारणा कारेन्ति – कसाहिपि ताळेन्ति, वेत्तेहिपि ताळेन्ति, अद्धदण्डकेहिपि ताळेन्ति, हत्थम्पि छिन्दन्ति, पादम्पि छिन्दन्ति, हत्थपादम्पि छिन्दन्ति, कण्णम्पि छिन्दन्ति, नासम्पि छिन्दन्ति, कण्णनासम्पि छिन्दन्ति, बिलङ्गथालिकम्पि करोन्ति, सङ्खमुण्डिकम्पि करोन्ति, राहुमुखम्पि करोन्ति, जोतिमालिकम्पि करोन्ति, हत्थपज्जोतिकम्पि करोन्ति, एरकवत्तिकम्पि करोन्ति, चिरकवासिकम्पि करोन्ति, एणेय्यकम्पि करोन्ति, बळिसमंसिकम्पि करोन्ति, कहापणिकम्पि करोन्ति, खारापतच्छिकम्पि [खारापटिच्छकम्पि (क.)] करोन्ति, पलिघपरिवत्तिकम्पि करोन्ति, पलालपीठकम्पि करोन्ति, तत्तेनपि तेलेन ओसिञ्चन्ति, सुनखेहिपि खादापेन्ति, जीवन्तम्पि सूले उत्तासेन्ति, असिनापि सीसं छिन्दन्ति. एवम्पि किस्सति परिकिस्सति परिकिलिस्सति.

अथ वा कामतण्हाय अभिभूतो परियादिन्नचित्तो भोगे परियेसन्तो नावाय महासमुद्दं पक्खन्दति, सीतस्स पुरक्खतो उण्हस्स पुरक्खतो डंसमकसवातातपसरीसपसम्फस्सेहि पीळियमानो खुप्पिपासाय मिय्यमानो तिगुम्बं गच्छति, तक्कोलं गच्छति, तक्कसीलं गच्छति, कालमुखं गच्छति, पुरपूरं गच्छति, वेसुङ्गं गच्छति, वेरापथं गच्छति, जवं गच्छति, तामलिं [कमलिं (स्या.), तंमलिं (क.)] गच्छति, वङ्गं गच्छति, एळबन्धनं गच्छति, सुवण्णकूटं गच्छति, सुवण्णभूमिं गच्छति, तम्बपाणिं गच्छति, सुप्पादकं गच्छति, भारुकच्छं गच्छति, सुरट्ठं गच्छति, भङ्गलोकं गच्छति, भङ्गणं गच्छति, सरमतं गणं गच्छति, योनं गच्छति, परमयोनं [पीनं (स्या.)] गच्छति, विनकं [नवकं (सी.)] गच्छति, मूलपदं गच्छति, मरुकन्तारं गच्छति, जण्णुपथं गच्छति, अजपथं गच्छति, मेण्डपथं गच्छति, सङ्कुपथं गच्छति, छत्तपथं गच्छति, वंसपथं गच्छति, सकुणपथं गच्छति, मूसिकपथं गच्छति, दरिपथं गच्छति, वेत्ताचारं गच्छति. एवम्पि किस्सति परिकिस्सति परिकिलिस्सति.

गवेसन्तो न विन्दति, अलाभमूलकम्पि दुक्खं दोमनस्सं पटिसंवेदेति. एवम्पि किस्सति परिकिस्सति परिकिलिस्सति.

गवेसन्तो विन्दति, लद्धापि आरक्खमूलकम्पि दुक्खं दोमनस्सं पटिसंवेदेति – ‘‘किन्ति मे भोगे नेव राजानो हरेय्युं, न चोरा हरेय्युं, न अग्गी दहेय्युं, न उदकं वहेय्य, न अपिया दायादा हरेय्यु’’न्ति. तस्स एवं आरक्खतो गोपयतो ते भोगा विप्पलुज्जन्ति. सो विप्पयोगमूलकम्पि दुक्खं दोमनस्सं पटिसंवेदेति. एवम्पि किस्सति परिकिस्सति परिकिलिस्सतीति – स चापि मेथुने युत्तो, मन्दोव परिकिस्सति.

तेनाह भगवा –

‘‘पण्डितोति समञ्ञातो, एकच्चरियं अधिट्ठितो;

स चापि मेथुने युत्तो, मन्दोव परिकिस्सती’’ति.

५६.

एतमादीनवं ञत्वा, मुनिं पुब्बापरे इध;

एकच्चरियं दळ्हं कयिरा, न निसेवेथ मेथुनं.

एतमादीनवं ञत्वा, मुनि पुब्बापरे इधाति. एतन्ति पुब्बे समणभावे यसो च कित्ति च, अपरभागे बुद्धं धम्मं सङ्घं सिक्खं पच्चक्खाय हीनायावत्तस्स अयसो च अकित्ति च; एतं सम्पत्तिं विपत्तिञ्च. ञत्वाति जानित्वा तुलयित्वा तीरयित्वा विभावयित्वा विभूतं कत्वा. मुनीति. मोनं वुच्चति ञाणं. या पञ्ञा पजानना…पे… सङ्गजालमतिच्च सो मुनि. इधाति इमिस्सा दिट्ठिया इमिस्सा खन्तिया इमिस्सा रुचिया इमस्मिं आदाये इमस्मिं धम्मे इमस्मिं विनये इमस्मिं धम्मविनये इमस्मिं पावचने इमस्मिं ब्रह्मचरिये इमस्मिं सत्थुसासने इमस्मिं अत्तभावे इमस्मिं मनुस्सलोकेति – एतमादीनवं ञत्वा मुनि पुब्बापरे इध.

एकच्चरियं दळ्हं कयिराति. द्वीहि कारणेहि एकच्चरियं दळहं करेय्य – पब्बज्जासङ्खातेन वा गणाववस्सग्गट्ठेन वा. कथं पब्बज्जासङ्खातेन एकच्चरियं दळ्हं करेय्य? सब्बं घरावासपलिबोधं छिन्दित्वा पुत्तदारपलिबोधं छिन्दित्वा ञातिपलिबोधं छिन्दित्वा मित्तामच्चपलिबोधं छिन्दित्वा सन्निधिपलिबोधं छिन्दित्वा केसमस्सुं ओहारेत्वा कासायानि वत्थानि अच्छादेत्वा अगारस्मा अनगारियं पब्बजित्वा अकिञ्चनभावं उपगन्त्वा एको चरेय्य विहरेय्य इरियेय्य वत्तेय्य पालेय्य यपेय्य यापेय्य. एवं पब्बज्जासङ्खातेन एकच्चरियं दळ्हं करेय्य.

कथं गणाववस्सग्गट्ठेन एकच्चरियं दळ्हं करेय्य? सो एवं पब्बजितो समानो एको अरञ्ञवनपत्थानि पन्तानि सेनासनानि पटिसेवेय्य अप्पसद्दानि अप्पनिग्घोसानि विजनवातानि मनुस्सराहस्सेय्यकानि पटिसल्लानसारुप्पानि. सो एको गच्छेय्य, एको तिट्ठेय्य, एको निसीदेय्य, एको सेय्यं कप्पेय्य, एको गामं पिण्डाय पविसेय्य, एको पटिक्कमेय्य, एको रहो निसीदेय्य, एको चङ्कमं अधिट्ठेय्य, एको चरेय्य विहरेय्य इरियेय्य वत्तेय्य पालेय्य यपेय्य यापेय्य. एवं गणाववस्सग्गट्ठेन एकच्चरियं दळ्हं करेय्याति – एकच्चरियं दळ्हं करेय्य, थिरं करेय्य, दळ्हं समादानो अस्स, अवट्ठितसमादानो अस्स कुसलेसु धम्मेसूति – एकच्चरियं दळ्हं कयिरा.

न निसेवेथ मेथुनन्ति. मेथुनधम्मो नाम यो सो असद्धम्मो गामधम्मो…पे… तंकारणा वुच्चति मेथुनधम्मो. मेथुनधम्मं न सेवेय्य न निसेवेय्य न संसेवेय्य न पटिसेवेय्य न चरेय्य न समाचरेय्य न समादाय वत्तेय्याति – न निसेवेथ मेथुनं.

तेनाह भगवा –

‘‘एतमादीनवं ञत्वा, मुनि पुब्बापरे इध;

एकच्चरियं दळ्हं कयिरा, न निसेवेथ मेथुन’’न्ति.

५७.

विवेकञ्ञेव सिक्खेथ, एतं अरियानमुत्तमं;

न तेन सेट्ठो मञ्ञेथ, स वे निब्बानसन्तिके.

विवेकञ्ञेव सिक्खेथाति. विवेकोति तयो विवेका – कायविवेको, चित्तविवेको, उपधिविवेको. कतमो कायविवेको…पे… अयं उपधिविवेको. कायविवेको च विवेकट्ठकायानं नेक्खम्माभिरतानं. चित्तविवेको च परिसुद्धचित्तानं परमवोदानप्पत्तानं. उपधिविवेको च निरूपधीनं पुग्गलानं विसङ्खारगतानं. सिक्खाति तिस्सो सिक्खा – अधिसीलसिक्खा, अधिचित्तसिक्खा, अधिपञ्ञासिक्खा…पे… अयं अधिपञ्ञासिक्खा. विवेकञ्ञेव सिक्खेथाति विवेकञ्ञेव सिक्खेय्य आचरेय्य समाचरेय्य समादाय वत्तेय्याति – विवेकञ्ञेव सिक्खेथ.

एतं अरियानमुत्तमन्ति. अरिया वुच्चन्ति बुद्धा च बुद्धसावका च पच्चेकबुद्धा च. अरियानं एतं अग्गं सेट्ठं विसिट्ठं पामोक्खं उत्तमं पवरं यदिदं विवेकचरियाति – एतं अरियानमुत्तमं.

न तेन सेट्ठो मञ्ञेथाति. कायविवेकचरियाय उन्नतिं न करेय्य, उन्नमं न करेय्य, मानं न करेय्य, थामं न करेय्य, थम्भं न करेय्य, न तेन मानं जनेय्य, न तेन थद्धो अस्स पत्थद्धो पग्गहितसिरोति – तेन सेट्ठो न मञ्ञेथ.

स वे निब्बानसन्तिकेति. सो निब्बानस्स सन्तिके सामन्ता आसन्ने अविदूरे उपकट्ठेति – स वे निब्बानसन्तिके.

तेनाह भगवा –

‘‘विवेकञ्ञेव सिक्खेथ, एतं अरियानमुत्तमं;

न तेन सेट्ठो मञ्ञेथ, स वे निब्बानसन्तिके’’ति.

५८.

रित्तस्स मुनिनो चरतो, कामेसु अनपेक्खिनो;

ओघतिण्णस्स पिहयन्ति, कामेसु गधिता पजा.

रित्तस्स मुनिनो चरतोति. रित्तस्स विवित्तस्स पविवित्तस्स, कायदुच्चरितेन रित्तस्स विवित्तस्स पविवित्तस्स. वचीदुच्चरितेन…पे… मनोदुच्चरितेन… रागेन… दोसेन… मोहेन… कोधेन… उपनाहेन… मक्खेन… पळासेन… इस्साय… मच्छरियेन… मायाय… साठेय्येन… थम्भेन… सारम्भेन… मानेन… अतिमानेन… मदेन… पमादेन… सब्बकिलेसेहि… सब्बदुच्चरितेहि… सब्बदरथेहि… सब्बपरिळाहेहि… सब्बसन्तापेहि… सब्बाकुसलाभिसङ्खारेहि रित्तस्स विवित्तस्स पविवित्तस्स. मुनिनोति. मोनं वुच्चति ञाणं…पे… सङ्गजालमतिच्च सो मुनि. चरतोति चरतो विहरतो इरियतो वत्ततो पालयतो यपयतो यापयतोति – रित्तस्स मुनिनो चरतो.

कामेसु अनपेक्खिनोति. कामाति उद्दानतो द्वे कामा – वत्थुकामा च किलेसकामा च…पे… इमे वुच्चन्ति वत्थुकामा…पे… इमे वुच्चन्ति किलेसकामा. वत्थुकामे परिजानित्वा किलेसकामे पहाय पजहित्वा विनोदेत्वा ब्यन्तिं करित्वा अनभावं गमेत्वा कामेसु अनपेक्खमानो चत्तकामो वन्तकामो मुत्तकामो पहीनकामो पटिनिस्सट्ठकामो, वीतरागो चत्तरागो वन्तरागो मुत्तरागो पहीनरागो पटिनिस्सट्ठरागो निच्छातो निब्बुतो सीतिभूतो [सीतीभूतो (सी.)] सुखप्पटिसंवेदी ब्रह्मभूतेन अत्तना विहरतीति – कामेसु अनपेक्खिनो.

ओघतिण्णस्स पिहयन्ति, कामेसु गधिता पजाति. पजाति सत्ताधिवचनं पजा कामेसु रत्ता गिद्धा गधिता मुच्छिता अज्झोसन्ना लग्गा लग्गिता पलिबुद्धा. ते कामोघं तिण्णस्स भवोघं तिण्णस्स दिट्ठोघं तिण्णस्स अविज्जोघं तिण्णस्स सब्बसङ्खारपथं तिण्णस्स उत्तिण्णस्स नित्तिण्णस्स अतिक्कन्तस्स समतिक्कन्तस्स वीतिवत्तस्स पारं गतस्स पारं पत्तस्स अन्तं गतस्स अन्तं पत्तस्स कोटिं गतस्स कोटिं पत्तस्स परियन्तं गतस्स परियन्तं पत्तस्स वोसानं गतस्स वोसानं पत्तस्स ताणं गतस्स ताणं पत्तस्स लेणं गतस्स लेणं पत्तस्स सरणं गतस्स सरणं पत्तस्स अभयं गतस्स अभयं पत्तस्स अच्चुतं गतस्स अच्चुतं पत्तस्स अमतं गतस्स अमतं पत्तस्स निब्बानं गतस्स निब्बानं पत्तस्स इच्छन्ति सादियन्ति पत्थयन्ति पिहयन्ति अभिजप्पन्ति. यथा इणायिका आनण्यं [आणण्यं (अट्ठ.)] पत्थेन्ति पिहयन्ति, यथा आबाधिका आरोग्यं पत्थेन्ति पिहयन्ति, यथा बन्धनबद्धा बन्धनमोक्खं पत्थेन्ति पिहयन्ति, यथा दासा भुजिस्सं पत्थेन्ति पिहयन्ति, यथा कन्तारद्धानपक्खन्दा [कन्तारद्धानपक्खन्ता (सी.), कन्तारद्धानपक्खन्ना (स्या.)] खेमन्तभूमिं पत्थेन्ति पिहयन्ति; एवमेवं पजा कामेसु रत्ता गिद्धा गधिता मुच्छिता अज्झोसन्ना लग्गा लग्गिता पलिबुद्धा ते कामोघं तिण्णस्स भवोघं तिण्णस्स…पे… निब्बानं गतस्स निब्बानं पत्तस्स इच्छन्ति सादियन्ति पत्थयन्ति पिहयन्ति अभिजप्पन्तीति – ओघतिण्णस्स पिहयन्ति, कामेसु गधिता पजा.

तेनाह भगवा –

‘‘रित्तस्स मुनिनो चरतो, कामेसु अनपेक्खिनो;

ओघतिण्णस्स पिहयन्ति, कामेसु गधिता पजा’’ति.

तिस्समेत्तेय्यसुत्तनिद्देसो सत्तमो.

८. पसूरसुत्तनिद्देसो

अथ पसूरसुत्तनिद्देसं वक्खति –

५९.

इधेव सुद्धिं इति वादयन्ति, नाञ्ञेसु धम्मेसु विसुद्धिमाहु;

यं निस्सिता तत्थ सुभं वदाना, पच्चेकसच्चेसु पुथू निविट्ठा.

इधेव सुद्धिं इति वादयन्तीति. इधेव सुद्धिं विसुद्धिं परिसुद्धिं मुत्तिं विमुत्तिं परिमुत्तिं वदन्ति कथेन्ति भणन्ति दीपयन्ति वोहरन्ति. ‘‘सस्सतो लोको, इदमेव सच्चं मोघमञ्ञ’’न्ति सुद्धिं विसुद्धिं परिसुद्धिं मुत्तिं विमुत्तिं परिमुत्तिं वदन्ति कथेन्ति भणन्ति दीपयन्ति वोहरन्ति. ‘‘असस्सतो लोको … अन्तवा लोको… अनन्तवा लोको… तं जीवं तं सरीरं… अञ्ञं जीवं अञ्ञं सरीरं… होति तथागतो परं मरणा… न होति तथागतो परं मरणा… होति च न च होति तथागतो परं मरणा… नेव होति न न होति तथागतो परं मरणा, इदमेव सच्चं मोघमञ्ञ’’न्ति सुद्धिं विसुद्धिं परिसुद्धिं मुत्तिं विमुत्तिं परिमुत्तिं वदन्ति कथेन्ति भणन्ति दीपयन्ति वोहरन्तीति – इधेव सुद्धिं इति वादयन्ति.

नाञ्ञेसु धम्मेसु विसुद्धिमाहूति. अत्तनो सत्थारं धम्मक्खानं गणं दिट्ठिं पटिपदं मग्गं ठपेत्वा सब्बे परवादे खिपन्ति उक्खिपन्ति परिक्खिपन्ति. ‘‘सो सत्था न सब्बञ्ञू, धम्मो न स्वाक्खातो, गणो न सुप्पटिपन्नो, दिट्ठि न भद्दिका, पटिपदा न सुपञ्ञत्ता, मग्गो न निय्यानिको, नत्थेत्थ सुद्धि वा विसुद्धि वा परिसुद्धि वा मुत्ति वा विमुत्ति वा परिमुत्ति वा, न तत्थ सुज्झन्ति वा विसुज्झन्ति वा परिसुज्झन्ति वा मुच्चन्ति वा विमुच्चन्ति वा परिमुच्चन्ति वा, हीना निहीना ओमका लामका छतुक्का परित्ता’’ति – एवमाहंसु एवं वदन्ति एवं कथेन्ति एवं भणन्ति एवं दीपयन्ति एवं वोहरन्तीति – नाञ्ञेसु धम्मेसु विसुद्धिमाहु.

यं निस्सिता तत्थ सुभं वदानाति. यं निस्सिताति यं सत्थारं धम्मक्खानं गणं दिट्ठिं पटिपदं मग्गं निस्सिता आनिस्सिता [पतिट्ठिता (सी.), सन्निस्सिता (स्या.)] अल्लीना उपगता अज्झोसिता अधिमुत्ता. तत्थाति सकाय दिट्ठिया सकाय खन्तिया सकाय रुचिया सकाय लद्धिया. सुभं वदानाति सुभवादा सोभनवादा पण्डितवादा थिरवादा [धीरवादा (स्या.)] ञायवादा हेतुवादा लक्खणवादा कारणवादा ठानवादा सकाय लद्धियाति – यं निस्सिता तत्थ सुभं वदाना.

पच्चेकसच्चेसु पुथू निविट्ठाति. पुथू समणब्राह्मणा पुथू पच्चेकसच्चेसु निविट्ठा पतिट्ठिता अल्लीना उपगता अज्झोसिता अधिमुत्ता. ‘‘सस्सतो लोको, इदमेव सच्चं मोघमञ्ञ’’न्ति निविट्ठा पतिट्ठिता अल्लीना उपगता अज्झोसिता अधिमुत्ता. ‘‘असस्सतो लोको…पे… नेव होति न न होति तथागतो परं मरणा, इदमेव सच्चं मोघमञ्ञ’’न्ति निविट्ठा पतिट्ठिता अल्लीना उपगता अज्झोसिता अधिमुत्ताति – पच्चेकसच्चेसु पुथू निविट्ठा.

तेनाह भगवा –

‘‘इधेव सुद्धिं इति वादयन्ति, नाञ्ञेसु धम्मेसु विसुद्धिमाहु;

यं निस्सिता तत्थ सुभं वदाना, पच्चेकसच्चेसु पुथू निविट्ठा’’ति.

६०.

ते वादकामा परिसं विगय्ह, बालं दहन्ती मिथु अञ्ञमञ्ञं;

वदन्ति ते अञ्ञसिता कथोज्जं, पसंसकामा कुसलावदाना.

ते वादकामा परिसं विगय्हाति. ते वादकामाति ते वादकामा वादत्थिका वादाधिप्पाया वादपुरेक्खारा वादपरियेसनं चरन्ता. परिसं विगय्हाति खत्तियपरिसं ब्राह्मणपरिसं गहपतिपरिसं समणपरिसं विगय्ह ओगय्ह अज्झोगाहेत्वा पविसित्वाति – ते वादकामा परिसं विगय्ह.

बालं दहन्ती मिथु अञ्ञमञ्ञन्ति. मिथूति द्वे जना द्वे कलहकारका द्वे भण्डनकारका द्वे भस्सकारका द्वे विवादकारका द्वे अधिकरणकारका द्वे वादिनो द्वे सल्लापका; ते अञ्ञमञ्ञं बालतो हीनतो निहीनतो ओमकतो लामकतो छतुक्कतो परित्ततो दहन्ति पस्सन्ति दक्खन्ति ओलोकेन्ति निज्झायन्ति उपपरिक्खन्तीति – बालं दहन्ती मिथु अञ्ञमञ्ञं.

वदन्ति ते अञ्ञसिता कथोज्जन्ति. अञ्ञं सत्थारं धम्मक्खानं गणं दिट्ठिं पटिपदं मग्गं निस्सिता आनिस्सिता अल्लीना उपगता अज्झोसिता अधिमुत्ता. कथोज्जं वुच्चति कलहो भण्डनं विग्गहो विवादो मेधगं. अथ वा कथोज्जन्ति अनोजवन्ती निसाकथा कथोज्जं वदन्ति, कलहं वदन्ति, भण्डनं वदन्ति, विग्गहं वदन्ति, विवादं वदन्ति, मेधगं वदन्ति कथेन्ति भणन्ति दीपयन्ति वोहरन्तीति – वदन्ति ते अञ्ञसिता कथोज्जं.

पसंसकामा कुसलावदानाति. पसंसकामाति पसंसकामा पसंसत्थिका पसंसाधिप्पाया पसंसपुरेक्खारा पसंसपरियेसनं चरन्ता. कुसलावदानाति कुसलवादा पण्डितवादा थिरवादा ञायवादा हेतुवादा लक्खणवादा कारणवादा ठानवादा सकाय लद्धियाति – पसंसकामा कुसलावदाना.

तेनाह भगवा –

‘‘ते वादकामा परिसं विगय्ह, बालं दहन्ती मिथु अञ्ञमञ्ञं;

वदन्ति ते अञ्ञसिता कथोज्जं, पसंसकामा कुसलावदाना’’ति.

६१.

युत्तो कथायं परिसाय मज्झे, पसंसमिच्छं विनिघाति होति;

अपाहतस्मिं पन मङ्कु होति, निन्दाय सो कुप्पति रन्धमेसी.

युत्तो कथायं परिसाय मज्झेति. खत्तियपरिसाय वा ब्राह्मणपरिसाय वा गहपतिपरिसाय वा समणपरिसाय वा मज्झे अत्तनो कथायं युत्तो पयुत्तो आयुत्तो समायुत्तो सम्पयुत्तो कथेतुन्ति – युत्तो कथायं परिसाय मज्झे.

पसंसमिच्छं विनिघाति होतीति. पसंसमिच्छन्ति पसंसं थोमनं कित्तिं वण्णहारियं इच्छन्तो सादियन्तो पत्थयन्तो पिहयन्तो अभिजप्पन्तो. विनिघाति होतीति पुब्बेव सल्लापा कथंकथी विनिघाती होति. ‘‘जयो नु खो मे भविस्सति, पराजयो नु खो मे भविस्सति, कथं निग्गहं करिस्सामि, कथं पटिकम्मं करिस्सामि, कथं विसेसं करिस्सामि, कथं पटिविसेसं करिस्सामि, कथं आवेठियं [आवेधियं (स्या.)] करिस्सामि, कथं निब्बेठियं [निब्बेधियं (स्या. क.)] करिस्सामि, कथं छेदं करिस्सामि, कथं मण्डलं करिस्सामी’’ति, एवं पुब्बेव सल्लापा कथंकथी विनिघाति होतीति – पसंसमिच्छं विनिघाति होति.

अपाहतस्मिं पन मङ्कु होतीति. ये ते पञ्हवीमंसका परिसा पारिसज्जा पासारिका [पासनिका (स्या.)], ते अपहरन्ति. ‘‘अत्थापगतं भणित’’न्ति अत्थतो अपहरन्ति, ‘‘ब्यञ्जनापगतं भणित’’न्ति ब्यञ्जनतो अपहरन्ति, ‘‘अत्थब्यञ्जनापगतं भणित’’न्ति अत्थब्यञ्जनतो अपहरन्ति, ‘‘अत्थो ते दुन्नीतो, ब्यञ्जनं ते दुरोपितं, अत्थब्यञ्जनं ते दुन्नीतं दुरोपितं, निग्गहो ते अकतो, पटिकम्मं ते दुक्कटं, विसेसो ते अकतो, पटिविसेसो ते दुक्कटो, आवेठिया ते अकता, निब्बेठिया ते दुक्कटा, छेदो ते अकतो, मण्डलं ते दुक्कटं विसमकथं दुक्कथितं दुब्भणितं दुल्लपितं दुरुत्तं दुब्भासित’’न्ति अपहरन्ति. अपाहतस्मिं पन मङ्कु होतीति. अपाहतस्मिं मङ्कु होति पीळितो घट्टितो ब्याधितो दोमनस्सितो होतीति – अपाहतस्मिं पन मङ्कु होति.

निन्दाय सो कुप्पति रन्धमेसीति. निन्दाय गरहाय अकित्तिया अवण्णहारिकाय कुप्पति ब्यापज्जति पतिट्ठीयति, कोपञ्च दोसञ्च अप्पच्चयञ्च पातुकरोतीति – निन्दाय सो कुप्पति. रन्धमेसीति विरन्धमेसी अपरद्धमेसी खलितमेसी गळितमेसी विवरमेसीति – निन्दाय सो कुप्पति रन्धमेसी.

तेनाह भगवा –

‘‘युत्तो कथायं परिसाय मज्झे, पसंसमिच्छं विनिघाति होति;

अपाहतस्मिं पन मङ्कु होति, निन्दाय सो कुप्पति रन्धमेसी’’ति.

६२.

यमस्स वादं परिहीनमाहु, अपाहतं पञ्हविमंसकासे [पञ्हविमंसका ये (स्या.)] ;

परिदेवति सोचति हीनवादो, उपच्चगा मन्ति अनुत्थुनाति.

यमस्स वादं परिहीनमाहूति यं तस्स वादं हीनं निहीनं परिहीनं परिहापितं न परिपूरितं, एवमाहंसु एवं कथेन्ति एवं भणन्ति एवं दीपयन्ति एवं वोहरन्तीति – यमस्स वादं परिहीनमाहु.

अपाहतं पञ्हविमंसकासेति. ये ते पञ्हवीमंसका परिसा पारिसज्जा पासारिका, ते अपहरन्ति. ‘‘अत्थापगतं भणित’’न्ति अत्थतो अपहरन्ति, ‘‘ब्यञ्जनापगतं भणित’’न्ति ब्यञ्जनतो अपहरन्ति, ‘‘अत्थब्यञ्जनापगतं भणित’’न्ति अत्थब्यञ्जनतो अपहरन्ति, ‘‘अत्थो ते दुन्नीतो, ब्यञ्जनं ते दुरोपितं, अत्थब्यञ्जनं ते दुन्नीतं दुरोपितं, निग्गहो ते अकतो, पटिकम्मं ते दुक्कटं, विसेसो ते अकतो, पटिविसेसो ते दुक्कटो, आवेठिया ते अकता, निब्बेठिया ते दुक्कटा, छेदो ते अकतो, मण्डलं ते दुक्कटं विसमकथं दुक्कथितं दुब्भणितं दुल्लपितं दुरुत्तं दुब्भासित’’न्ति, अपहरन्तीति – अपाहतं पञ्हविमंसकासे.

परिदेवति सोचति हीनवादोति. परिदेवतीति ‘‘अञ्ञं मया आवज्जितं अञ्ञं चिन्तितं अञ्ञं उपधारितं, अञ्ञं उपलक्खितं सो महापक्खो महापरिसो महापरिवारो; परिसा चायं वग्गा, न समग्गा; समग्गाय परिसाय हेतु कथासल्लापो पुन भञ्जिस्सामी’’ति, या एवरूपा [यो एवरूपो (स्या.)] वाचा पलापो विप्पलापो लालप्पो लालप्पायना लालप्पायितत्तन्ति – परिदेवति. सोचतीति ‘‘तस्स जयो’’ति सोचति ‘‘मय्हं पराजयो’’ति सोचति, ‘‘तस्स लाभो’’ति सोचति, ‘‘मय्हं अलाभो’’ति सोचति, ‘‘तस्स यसो’’ति सोचति, ‘‘मय्हं अयसो’’ति सोचति, ‘‘तस्स पसंसा’’ति सोचति, ‘‘मय्हं निन्दा’’ति सोचति, ‘‘तस्स सुख’’न्ति सोचति, ‘‘मय्हं दुक्ख’’न्ति सोचति, ‘‘सो सक्कतो गरुकतो मानितो पूजितो अपचितो लाभी चीवरपिण्डपातसेनासनगिलानपच्चयभेसज्जपरिक्खारानं, अहमस्मि असक्कतो अगरुकतो अमानितो अपूजितो अनपचितो न लाभी चीवरपिण्डपातसेनासनगिलानपच्चयभेसज्जपरिक्खारान’’न्ति सोचति किलमति परिदेवति उरत्ताळिं कन्दति सम्मोहं आपज्जतीति – परिदेवति सोचति. हीनवादोति हीनवादो निहीनवादो परिहीनवादो परिहापितवादो न परिपूरवादोति – परिदेवति सोचति हीनवादो.

उपच्चगा मन्ति अनुत्थुनातीति. सो मं वादेन वादं अच्चगा उपच्चगा अतिक्कन्तो समतिक्कन्तो वीतिवत्तोति. एवम्पि उपच्चगा मन्ति. अथ वा मं वादेन वादं अभिभवित्वा अज्झोत्थरित्वा परियादियित्वा मद्दयित्वा चरति विहरति इरियति वत्तति पालेति यपेति यापेतीति. एवम्पि उपच्चगा मन्ति. अनुत्थुना वुच्चति वाचा पलापो विप्पलापो लालप्पो लालप्पायना लालप्पायितत्तन्ति – उपच्चगा मन्ति अनुत्थुनाति.

तेनाह भगवा –

‘‘यमस्स वादं परिहीनमाहु, अपाहतं पञ्हविमंसकासे;

परिदेवति सोचति हीनवादो, उपच्चगा मन्ति अनुत्थुनाती’’ति.

६३.

एते विवादा समणेसु जाता, एतेसु उग्घातिनिघाति होति;

एतम्पि दिस्वा विरमे कथोज्जं, न हञ्ञदत्थत्थि पसंसलाभा.

एते विवादा समणेसु जाताति. समणाति ये केचि इतो बहिद्धा परिब्बजूपगता परिब्बजसमापन्ना. एते दिट्ठिकलहा दिट्ठिभण्डना दिट्ठिविग्गहा दिट्ठिविवादा दिट्ठिमेधगा समणेसु जाता सञ्जाता निब्बत्ता अभिनिब्बत्ता पातुभूताति – एते विवादा समणेसु जाता.

एतेसु उग्घातिनिघाति होतीति. जयपराजयो होति, लाभालाभो होति, यसायसो होति, निन्दापसंसा होति, सुखदुक्खं होति, सोमनस्सदोमनस्सं होति, इट्ठानिट्ठं होति, अनुनयपटिघं होति, उग्घातितनिग्घातितं होति, अनुरोधविरोधो होति, जयेन चित्तं उग्घातितं होति पराजयेन चित्तं निग्घातितं होति, लाभेन चित्तं उग्घातितं होति अलाभेन चित्तं निग्घातितं होति, यसेन चित्तं उग्घातितं होति अयसेन चित्तं निग्घातितं होति, पसंसाय चित्तं उग्घातितं होति निन्दाय चित्तं निग्घातितं होति, सुखेन चित्तं उग्घातितं होति दुक्खेन चित्तं निग्घातितं होति, सोमनस्सेन चित्तं उग्घातितं होति दोमनस्सेन चित्तं निग्घातितं होति, उन्नतिया [उण्णतिया (स्या. क.)] चित्तं उग्घातितं होति ओनतिया [ओणतिया (स्या. क.)] चित्तं निग्घातितं होतीति – एतेसु उग्घातिनिघाति होति.

एतम्पि दिस्वा विरमे कथोज्जन्ति. एतम्पि दिस्वाति एतं आदीनवं दिस्वा पस्सित्वा तुलयित्वा तीरयित्वा विभावयित्वा विभूतं कत्वा दिट्ठिकलहेसु दिट्ठिभण्डनेसु दिट्ठिविग्गहेसु दिट्ठिविवादेसु दिट्ठिमेधगेसूति – एतम्पि दिस्वा विरमे कथोज्जन्ति. कथोज्जं वुच्चति कलहो भण्डनं विग्गहो विवादो मेधगं. अथ वा कथोज्जन्ति अनोजवन्ती निसाकथा कथोज्जं न करेय्य, कलहं न करेय्य, भण्डनं न करेय्य, विग्गहं न करेय्य, विवादं न करेय्य, मेधगं न करेय्य, कलहभण्डनविग्गहविवादमेधगं पजहेय्य विनोदेय्य ब्यन्तिं करेय्य अनभावं गमेय्य, कलहभण्डनविग्गहविवादमेधगा आरतो अस्स विरतो पटिविरतो निक्खन्तो निस्सटो विप्पयुत्तो विसञ्ञुत्तो विमरियादिकतेन चेतसा विहरेय्याति – एतम्पि दिस्वा विरमे कथोज्जं.

न हञ्ञदत्थत्थि पसंसलाभाति. पसंसलाभा अञ्ञो अत्थो नत्थि अत्तत्थो वा परत्थो वा उभयत्थो वा दिट्ठधम्मिको वा अत्थो, सम्परायिको वा अत्थो, उत्तानो वा अत्थो, गम्भीरो वा अत्थो, गूळ्हो वा अत्थो, पटिच्छन्नो वा अत्थो, नेय्यो वा अत्थो, नीतो वा अत्थो, अनवज्जो वा अत्थो, निक्किलेसो वा अत्थो, वोदानो वा अत्थो, परमत्थो वा अत्थो नत्थि न सन्ति न संविज्जन्ति नुपलब्भन्तीति – न हञ्ञदत्थत्थि पसंसलाभा.

तेनाह भगवा –

‘‘एते विवादा समणेसु जाता, एतेसु उग्घातिनिघाति होति;

एतम्पि दिस्वा विरमे कथोज्जं, न हञ्ञदत्थत्थि पसंसलाभा’’ति.

६४.

पसंसितो वा पन तत्थ होति, अक्खाय वादं परिसाय मज्झे;

सो [सो तं (सी.)] हस्सती उन्नमती [उण्णमती (स्या. क.)] च तेन, पप्पुय्य तमत्थं यथा मनो अहु.

पसंसितो वा पन तत्थ होतीति. तत्थाति सकाय दिट्ठिया सकाय खन्तिया सकाय रुचिया सकाय लद्धिया पसंसितो थोमितो कित्तितो वण्णितो होतीति – पसंसितो वा पन तत्थ होति.

अक्खाय वादं परिसाय मज्झेति. खत्तियपरिसाय वा ब्राह्मणपरिसाय वा गहपतिपरिसाय वा समणपरिसाय वा मज्झे अत्तनो वादं अक्खाय आचिक्खित्वा अनुवादं अक्खाय आचिक्खित्वा थम्भयित्वा ब्रूहयित्वा दीपयित्वा जोतयित्वा वोहरित्वा परिग्गण्हित्वाति – अक्खाय वादं परिसाय मज्झे.

सो हस्सती उन्नमती च तेनाति. सो तेन जयत्थेन तुट्ठो होति हट्ठो पहट्ठो अत्तमनो परिपुण्णसङ्कप्पो. अथ वा दन्तविदंसकं हसमानो. सो हस्सती उन्नमती च तेनाति सो तेन जयत्थेन उन्नतो होति उन्नमो धजो सम्पग्गाहो केतुकम्यता चित्तस्साति – सो हस्सती उन्नमती च तेन.

पप्पुय्य तमत्थं यथा मनो अहूति. तं जयत्थं पप्पुय्य पापुणित्वा अधिगन्त्वा विन्दित्वा पटिलभित्वा. यथा मनो अहूति यथा मनो अहु, यथा चित्तो अहु, यथा सङ्कप्पो अहु, यथा विञ्ञाणो अहूति – पप्पुय्य तमत्थं यथा मनो अहु.

तेनाह भगवा –

‘‘पसंसितो वा पन तत्थ होति, अक्खाय वादं परिसाय मज्झे;

सो हस्सती उन्नमती च तेन, पप्पुय्य तमत्थं यथा मनो अहू’’ति.

६५.

या उन्नती सास्स विघातभूमि, मानातिमानं वदते पनेसो;

एतम्पि दिस्वा न विवादयेथ, न हि तेन सुद्धिं कुसला वदन्ति.

या उन्नती सास्स विघातभूमीति. या उन्नति उन्नमो धजो सम्पग्गाहो केतुकम्यता चित्तस्साति – या उन्नति. सास्स विघातभूमीति सा तस्स विघातभूमि उपघातभूमि पीळनभूमि घट्टनभूमि उपद्दवभूमि उपसग्गभूमीति – या उन्नती सास्स विघातभूमि.

मानातिमानं वदते पनेसोति. सो पुग्गलो मानञ्च वदति अतिमानञ्च वदतीति – मानातिमानं वदते पनेसो.

एतम्पि दिस्वा न विवादयेथाति. एतं आदीनवं दिस्वा पस्सित्वा तुलयित्वा तीरयित्वा विभावयित्वा विभूतं कत्वा दिट्ठिकलहेसु दिट्ठिभण्डनेसु दिट्ठिविग्गहेसु दिट्ठिविवादेसु दिट्ठिमेधगेसूति – एतम्पि दिस्वा. न विवादयेथाति न कलहं करेय्य न भण्डनं करेय्य न विग्गहं करेय्य न विवादं करेय्य, न मेधगं करेय्य, कलहभण्डनविग्गहविवादमेधगं पजहेय्य विनोदेय्य ब्यन्तिं करेय्य अनभावं गमेय्य, कलहभण्डनविग्गहविवादमेधगा आरतो अस्स विरतो पटिविरतो निक्खन्तो निस्सटो विप्पयुत्तो विसञ्ञुत्तो विमरियादिकतेन चेतसा विहरेय्याति – एतम्पि दिस्वा न विवादयेथ.

न हि तेन सुद्धिं कुसला वदन्तीति. कुसलाति ये ते खन्धकुसला धातुकुसला आयतनकुसला पटिच्चसमुप्पादकुसला सतिपट्ठानकुसला सम्मप्पधानकुसला इद्धिपादकुसला इन्द्रियकुसला बलकुसला बोज्झङ्गकुसला मग्गकुसला फलकुसला निब्बानकुसला, ते कुसला दिट्ठिकलहेन दिट्ठिभण्डनेन दिट्ठिविग्गहेन दिट्ठिविवादेन दिट्ठिमेधगेन सुद्धिं विसुद्धिं परिसुद्धिं, मुत्तिं विमुत्तिं परिमुत्तिं न वदन्ति न कथेन्ति न भणन्ति न दीपयन्ति न वोहरन्तीति – न हि तेन सुद्धिं कुसला वदन्ति.

तेनाह भगवा –

‘‘या उन्नती सास्स विघातभूमि, मानातिमानं वदते पनेसो;

एतम्पि दिस्वा न विवादयेथ, न हि तेन सुद्धिं कुसला वदन्ती’’ति.

६६.

सूरो यथा राजखादाय पुट्ठो, अभिगज्जमेति पटिसूरमिच्छं;

येनेव सो तेन पलेहि सूर, पुब्बेव नत्थि यदिदं युधाय.

सूरो यथा राजखादाय पुट्ठोति. सूरोति सूरो वीरो विक्कन्तो अभीरू अछम्भी अनुत्रासी अपलायी. राजखादाय पुट्ठोति राजखादनीयेन राजभोजनीयेन पुट्ठो पोसितो अपादितो वड्ढितोति – सूरो यथा राजखादाय पुट्ठो.

अभिगज्जमेति पटिसूरमिच्छन्ति. सो गज्जन्तो उग्गज्जन्तो अभिगज्जन्तो एति उपेति उपगच्छति पटिसूरं पटिपुरिसं पटिसत्तुं पटिमल्लं इच्छन्तो सादियन्तो पत्थयन्तो पिहयन्तो अभिजप्पन्तोति – अभिगज्जमेति पटिसूरमिच्छं.

येनेव सो तेन पलेहि सूराति. येनेव सो दिट्ठिगतिको तेन पलेहि, तेन वज, तेन गच्छ, तेन अतिक्कम, सो तुय्हं पटिसूरो पटिपुरिसो पटिसत्तु पटिमल्लोति – येनेव सो तेन पलेहि सूर.

पुब्बेव नत्थि यदिदं युधायाति. पुब्बेव बोधिया मूले ये पटिसेनिकरा किलेसा पटिलोमकरा पटिकण्डककरा पटिपक्खकरा ते नत्थि न सन्ति न संविज्जन्ति नुपलब्भन्ति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढा. यदिदं युधायाति यदिदं युद्धत्थाय कलहत्थाय भण्डनत्थाय विग्गहत्थाय विवादत्थाय मेधगत्थायाति – पुब्बेव नत्थि यदिदं युधाय.

तेनाह भगवा –

‘‘सूरो यथा राजखादाय पुट्ठो, अभिगज्जमेति पटिसूरमिच्छं;

येनेव सो तेन पलेहि सूर, पुब्बेव नत्थि यदिदं युधाया’’ति.

६७.

ये दिट्ठिमुग्गय्ह विवादयन्ति, इदमेव सच्चन्ति च वादयन्ति;

ते त्वं वदस्सू न हि तेध अत्थि, वादम्हि जाते पटिसेनिकत्ता.

ये दिट्ठिमुग्गय्ह विवादयन्तीति ये द्वासट्ठिदिट्ठिगतानं अञ्ञतरञ्ञतरं दिट्ठिगतं गहेत्वा गण्हित्वा उग्गण्हित्वा परामसित्वा अभिनिविसित्वा विवादयन्ति कलहं करोन्ति भण्डनं करोन्ति ‘विग्गहं करोन्ति विवादं करोन्ति, मेधगं करोन्ति – ‘‘न त्वं इमं धम्मविनयं आजानासि, अहं इमं धम्मविनयं आजानामि, किं त्वं इमं धम्मविनयं आजानिस्ससि, मिच्छापटिपन्नो त्वमसि, अहमस्मि सम्मापटिपन्नो, सहितं मे, असहितं ते, पुरे वचनीयं पच्छा अवच, पच्छा वचनीयं पुरे अवच, अधिचिण्णं ते विपरावत्तं, आरोपितो ते वादो, निग्गहितो त्वमसि, चर वादप्पमोक्खाय, निब्बेठेहि वा सचे पहोसी’’ति – ये दिट्ठिमुग्गय्ह विवादयन्ति.

इदमेव सच्चन्ति च वादयन्तीति. ‘‘सस्सतो लोको, इदमेव सच्चं मोघमञ्ञ’’न्ति वादयन्ति कथेन्ति भणन्ति दीपयन्ति वोहरन्ति. ‘‘असस्सतो लोको…पे… नेव होति न न होति तथागतो परं मरणा, इदमेव सच्चं मोघमञ्ञ’’न्ति वादयन्ति कथेन्ति भणन्ति दीपयन्ति वोहरन्तीति – इदमेव सच्चन्ति च वादयन्ति.

ते त्वं वदस्सू न हि तेध अत्थि, वादम्हि जाते पटिसेनिकत्ताति. ते त्वं दिट्ठिगतिके वदस्सु वादेन वादं, निग्गहेन निग्गहं, पटिकम्मेन पटिकम्मं, विसेसेन विसेसं, पटिविसेसेन पटिविसेसं, आवेठियाय आवेठियं, निब्बेठियाय निब्बेठियं, छेदेन छेदं, मण्डलेन मण्डलं, ते तुय्हं पटिसूरा पटिपुरिसा पटिसत्तू पटिमल्लाति – ते त्वं वदस्सू न हि तेध अत्थि. वादम्हि जाते पटिसेनिकत्ताति. वादे जाते सञ्जाते निब्बत्ते अभिनिब्बत्ते पातुभूतेयेव पटिसेनिकत्ता [पटिसेनिकता (क.), एवं सेसेसु तीसु पदेसुपि] पटिलोमकत्ता पटिभण्डकत्ता पटिपक्खकत्ता कलहं करेय्युं भण्डनं करेय्युं विग्गहं करेय्युं विवादं करेय्युं मेधगं करेय्युं, ते नत्थि न सन्ति न संविज्जन्ति नुपलब्भन्ति, पहीना…पे… ञाणग्गिना दड्ढाति – ते त्वं वदस्सू न हि तेध अत्थि वादम्हि जाते पटिसेनिकत्ता.

तेनाह भगवा –

‘‘ये दिट्ठिमुग्गय्ह विवादयन्ति, इदमेव सच्चन्ति च वादयन्ति;

ते त्वं वदस्सू न हि तेध अत्थि, वादम्हि जाते पटिसेनिकत्ता’’ति.

६८.

विसेनिकत्वा पन ये चरन्ति, दिट्ठीहि दिट्ठिं अविरुज्झमाना;

तेसु त्वं किं लभेथ पसूर, येसीध नत्थि परमुग्गहीतं.

विसेनिकत्वा पन ये चरन्तीति. सेना वुच्चति मारसेना. कायदुच्चरितं मारसेना, वचीदुच्चरितं मारसेना, मनोदुच्चरितं मारसेना, लोभो मारसेना, दोसो मारसेना, मोहो मारसेना, कोधो… उपनाहो… मक्खो… पळासो… इस्सा… मच्छरियं… माया… साठेय्यं… थम्भो… सारम्भो… मानो… अतिमानो… मदो… पमादो… सब्बे किलेसा… सब्बे दुच्चरिता… सब्बे दरथा… सब्बे परिळाहा… सब्बे सन्तापा… सब्बाकुसलाभिसङ्खारा मारसेना.

वुत्तञ्हेतं भगवता –

‘‘कामा ते पठमा सेना, दुतिया अरति वुच्चति…पे…;

न नं असुरो जिनाति, जेत्वाव लभते सुख’’न्ति.

यतो चतूहि अरियमग्गेहि सब्बा च मारसेना सब्बे च पटिसेनिकरा किलेसा जिता च पराजिता च भग्गा विप्पलुग्गा परम्मुखा, तेन वुच्चति विसेनिकत्वाति. येति अरहन्तो खीणासवा. चरन्तीति चरन्ति विहरन्ति इरियन्ति वत्तेन्ति पालेन्ति यपेन्ति यापेन्तीति – विसेनिकत्वा पन ये चरन्ति.

दिट्ठीहि दिट्ठिं अविरुज्झमानाति. येसं द्वासट्ठि दिट्ठिगतानि पहीनानि समुच्छिन्नानि वूपसन्तानि पटिपस्सद्धानि अभब्बुप्पत्तिकानि ञाणग्गिना दड्ढानि, ते दिट्ठीहि दिट्ठिं अविरुज्झमाना अप्पटिविरुज्झमाना अप्पहीयमाना अप्पटिहञ्ञमाना अप्पटिहतमानाति – दिट्ठीहि दिट्ठिं अविरुज्झमाना.

तेसु त्वं किं लभेथ पसूराति. तेसु अरहन्तेसु खीणासवेसु किं लभेथ पटिसूरं पटिपुरिसं पटिसत्तुं पटिमल्लन्ति – तेसु त्वं किं लभेथ पसूर.

येसीध नत्थि परमुग्गहीतन्ति. येसं अरहन्तानं खीणासवानं ‘‘इदं परमं अग्गं सेट्ठं विसिट्ठं पामोक्खं उत्तमं पवर’’न्ति गहितं परामट्ठं अभिनिविट्ठं अज्झोसितं अधिमुत्तं, नत्थि न सन्ति न संविज्जन्ति नुपलब्भन्ति, पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढन्ति – येसीध नत्थि परमुग्गहीतं.

तेनाह भगवा –

‘‘विसेनिकत्वा पन ये चरन्ति, दिट्ठीहि दिट्ठिं अविरुज्झमाना;

तेसु त्वं किं लभेथ पसूर, येसीध नत्थि परमुग्गहीत’’न्ति.

६९.

अथ त्वं पवितक्कमागमा, [पवितक्कमागम (सी.), सवितक्कमागमा (क.)] मनसा दिट्ठिगतानि चिन्तयन्तो;

धोनेन युगं समागमा, न हि त्वं सक्खसि सम्पयातवे.

अथ त्वं पवितक्कमागमाति. अथाति पदसन्धि पदसंसग्गो पदपारिपूरी अक्खरसमवायो ब्यञ्जनसिलिट्ठता पदानुपुब्बतापेतं – अथाति. पवितक्कमागमाति तक्केन्तो वितक्केन्तो सङ्कप्पेन्तो ‘‘जयो नु खो मे भविस्सति, पराजयो नु खो मे भविस्सति, कथं निग्गहं करिस्सामि, कथं पटिकम्मं करिस्सामि, कथं विसेसं करिस्सामि, कथं पटिविसेसं करिस्सामि, कथं आवेठियं करिस्सामि, कथं निब्बेठियं करिस्सामि, कथं छेदं करिस्सामि, कथं मण्डलं करिस्सामि’’ एवं तक्केन्तो वितक्केन्तो सङ्कप्पेन्तो आगतोसि उपगतोसि सम्पत्तोसि मया सद्धिं समागतोसीति – अथ त्वं पवितक्कमागमा.

मनसा दिट्ठिगतानि चिन्तयन्तोति. मनोति यं चित्तं मनो मानसं हदयं पण्डरं, मनो मनायतनं मनिन्द्रियं विञ्ञाणं विञ्ञाणक्खन्धो तज्जा मनोविञ्ञाणधातु. चित्तेन दिट्ठिं चिन्तेन्तो विचिन्तेन्तो ‘‘सस्सतो लोको’’ति वा, ‘‘असस्सतो लोको’’ति वा…पे… ‘‘नेव होति न न होति तथागतो परं मरणा’’ति वाति – मनसा दिट्ठिगतानि चिन्तयन्तो.

धोनेन युगं समागमा, न हि त्वं सक्खसि सम्पयातवेति. धोना वुच्चति पञ्ञा. या पञ्ञा पजानना…पे… अमोहो धम्मविचयो सम्मादिट्ठि. किंकारणा धोना वुच्चति पञ्ञा? ताय पञ्ञाय कायदुच्चरितं धुतञ्च धोतञ्च सन्धोतञ्च निद्धोतञ्च, वचीदुच्चरितं…पे… सब्बाकुसलाभिसङ्खारा धुता च धोता च सन्धोता च निद्धोता च. अथ वा सम्मादिट्ठिया मिच्छादिट्ठि… सम्मासङ्कप्पेन मिच्छासङ्कप्पो…पे… सम्माविमुत्तिया मिच्छाविमुत्ति धुता च धोता च सन्धोता च निद्धोता च. अथ वा अरियेन अट्ठङ्गिकेन मग्गेन सब्बे किलेसा… सब्बे दुच्चरिता… सब्बे दरथा… सब्बे परिळाहा… सब्बे सन्तापा… सब्बाकुसलाभिसङ्खारा धुता च धोता च सन्धोता च निद्धोता च. भगवा इमेहि धोनेय्येहि धम्मेहि उपेतो समुपेतो उपगतो समुपगतो उपपन्नो समुपपन्नो समन्नागतो, तस्मा भगवा धोनो. सो धुतरागो धुतपापो धुतकिलेसो धुतपरिळाहोति – धोनोति.

धोनेन युगं समागमा, न हि त्वं सक्खसि सम्पयातवेति. पसूरो परिब्बाजको न पटिबलो धोनेन बुद्धेन भगवता सद्धिं युगं समागमं समागन्त्वा युगग्गाहं गण्हित्वा साकच्छेतुं सल्लपितुं साकच्छं समापज्जितुं. तं किस्स हेतु? पसूरो परिब्बाजको हीनो निहीनो ओमको लामको छतुक्को परित्तो. सो हि भगवा अग्गो च सेट्ठो च विसिट्ठो च पामोक्खो च उत्तमो च पवरो च. यथा ससो न पटिबलो मत्तेन मातङ्गेन सद्धिं युगं समागमं समागन्त्वा युगग्गाहं गण्हितुं; यथा कोत्थुको न पटिबलो सीहेन मिगरञ्ञा सद्धिं युगं समागमं समागन्त्वा युगग्गाहं गण्हितुं; यथा वच्छको तरुणको धेनुपको न पटिबलो उसभेन चलककुना [बलक्ककुना (स्या.)] सद्धिं युगं समागमं समागन्त्वा युगग्गाहं गण्हितुं; यथा धङ्को न पटिबलो गरुळेन वेनतेय्येन सद्धिं युगं समागमं समागन्त्वा युगग्गाहं गण्हितुं; यथा चण्डालो न पटिबलो रञ्ञा चक्कवत्तिना सद्धिं युगं समागमं समागन्त्वा युगग्गाहं गण्हितुं; यथा पंसुपिसाचको न पटिबलो इन्देन देवरञ्ञा सद्धिं युगं समागमं समागन्त्वा युगग्गाहं गण्हितुं; एवमेव पसूरो परिब्बाजको न पटिबलो धोनेन बुद्धेन भगवता सद्धिं युगं समागमं समागन्त्वा युगग्गाहं गण्हित्वा साकच्छेतुं सल्लपितुं साकच्छं समापज्जितुं. तं किस्स हेतु? पसूरो परिब्बाजको हीनपञ्ञो निहीनपञ्ञो ओमकपञ्ञो लामकपञ्ञो छतुक्कपञ्ञो परित्तपञ्ञो. सो हि भगवा महापञ्ञो पुथुपञ्ञो हासपञ्ञो जवनपञ्ञो तिक्खपञ्ञो निब्बेधिकपञ्ञो, पञ्ञापभेदकुसलो पभिन्नञाणो अधिगतपटिसम्भिदो, चतुवेसारज्जप्पत्तो दसबलधारी, पुरिसासभो पुरिससीहो पुरिसनागो पुरिसाजञ्ञो पुरिसधोरय्हो, अनन्तञाणो अनन्ततेजो अनन्तयसो अड्ढो महद्धनो धनवा, नेता विनेता अनुनेता, पञ्ञापेता निज्झापेता पेक्खेता पसादेता. सो हि भगवा अनुप्पन्नस्स मग्गस्स उप्पादेता, असञ्जातस्स मग्गस्स सञ्जनेता, अनक्खातस्स मग्गस्स अक्खाता, मग्गञ्ञू मग्गविदू मग्गकोविदो मग्गानुगा च पनस्स एतरहि सावका विहरन्ति पच्छा समन्नागता.

सो हि भगवा जानं जानाति पस्सं पस्सति, चक्खुभूतो ञाणभूतो धम्मभूतो ब्रह्मभूतो, वत्ता पवत्ता अत्थस्स निन्नेता अमतस्स दाता धम्मस्सामी तथागतो; नत्थि तस्स भगवतो अञ्ञातं अदिट्ठं अविदितं असच्छिकतं अफस्सितं [अफुसितं (स्या.)] पञ्ञाय. अतीतं अनागतं पच्चुप्पन्नं उपादाय सब्बे धम्मा सब्बाकारेन बुद्धस्स भगवतो ञाणमुखे आपाथं आगच्छन्ति. यं किञ्चि नेय्यं नाम अत्थि धम्मं जानितब्बं. अत्तत्थो वा परत्थो वा उभयत्थो वा दिट्ठधम्मिको वा अत्थो, सम्परायिको वा अत्थो, उत्तानो वा अत्थो, गम्भीरो वा अत्थो, गूळ्हो वा अत्थो, पटिच्छन्नो वा अत्थो, नेय्यो वा अत्थो, नीतो वा अत्थो, अनवज्जो वा अत्थो, निक्किलेसो वा अत्थो, वोदानो वा अत्थो, परमत्थो वा अत्थो, सब्बं तं अन्तोबुद्धञाणे परिवत्तति.

सब्बं कायकम्मं बुद्धस्स भगवतो ञाणानुपरिवत्ति, सब्बं वचीकम्मं ञाणानुपरिवत्ति, सब्बं मनोकम्मं ञाणानुपरिवत्ति. अतीते बुद्धस्स भगवतो अप्पटिहतं ञाणं, अनागते अप्पटिहतं ञाणं, पच्चुप्पन्ने अप्पटिहतं ञाणं, यावतकं नेय्यं तावतकं ञाणं, यावतकं ञाणं तावतकं नेय्यं, नेय्यपरियन्तिकं ञाणं, ञाणपरियन्तिकं नेय्यं, नेय्यं अतिक्कमित्वा ञाणं नप्पवत्तति, ञाणं अतिक्कमित्वा नेय्यपथो नत्थि. अञ्ञमञ्ञपरियन्तट्ठायिनो ते धम्मा. यथा द्विन्नं समुग्गपटलानं सम्मा फुसितानं हेट्ठिमं समुग्गपटलं उपरिमं नातिवत्तति, उपरिमं समुग्गपटलं हेट्ठिमं नातिवत्तति अञ्ञमञ्ञपरियन्तट्ठायिनो; एवमेव बुद्धस्स भगवतो नेय्यञ्च ञाणञ्च अञ्ञमञ्ञपरियन्तट्ठायिनो; यावतकं नेय्यं तावतकं ञाणं, यावतकं ञाणं तावतकं नेय्यं, नेय्यपरियन्तिकं ञाणं, ञाणपरियन्तिकं नेय्यं, नेय्यं अतिक्कमित्वा ञाणं नप्पवत्तति, ञाणं अतिक्कमित्वा नेय्यपथो नत्थि. अञ्ञमञ्ञपरियन्तट्ठायिनो ते धम्मा सब्बधम्मेसु बुद्धस्स भगवतो ञाणं पवत्तति.

सब्बे धम्मा बुद्धस्स भगवतो आवज्जनपटिबद्धा आकङ्खपटिबद्धा मनसिकारपटिबद्धा चित्तुप्पादपटिबद्धा. सब्बसत्तेसु बुद्धस्स भगवतो ञाणं पवत्तति, सब्बेसञ्च सत्तानं भगवा आसयं जानाति अनुसयं जानाति चरितं जानाति अधिमुत्तिं जानाति. अप्परजक्खे महारजक्खे तिक्खिन्द्रिये मुदिन्द्रिये स्वाकारे द्वाकारे सुविञ्ञापये दुविञ्ञापये भब्बाभब्बे सत्ते पजानाति. सदेवको लोको समारको सब्रह्मको सस्समणब्राह्मणी पजा सदेवमनुस्सा अन्तोबुद्धञाणे परिवत्तति.

यथा ये केचि मच्छकच्छपा अन्तमसो तिमितिमिङ्गलं उपादाय अन्तोमहासमुद्दे परिवत्तन्ति; एवमेव सदेवको लोको समारको सब्रह्मको सस्समणब्राह्मणी पजा सदेवमनुस्सा अन्तोबुद्धञाणे परिवत्तति. यथा ये केचि पक्खी अन्तमसो गरुळं वेनतेय्यं उपादाय आकासस्स पदेसे परिवत्तन्ति; एवमेव येपि ते सारिपुत्तसमा पञ्ञाय तेपि बुद्धञाणस्स पदेसे परिवत्तन्ति. बुद्धञाणं देवमनुस्सानं पञ्ञं फरित्वा अभिभवित्वा तिट्ठतियेव.

येपि ते खत्तियपण्डिता ब्राह्मणपण्डिता गहपतिपण्डिता समणपण्डिता निपुणा कतपरप्पवादा वालवेधिरूपा. वोभिन्दन्ता [ते भिन्दन्ता (क.)] मञ्ञे चरन्ति पञ्ञागतेन दिट्ठिगतानि. ते पञ्हे अभिसङ्खरित्वा अभिसङ्खरित्वा तथागते उपसङ्कमित्वा पुच्छन्ति गूळ्हानि च पटिच्छन्नानि च. कथिता विसज्जिताव ते पञ्हा भगवता होन्ति निद्दिट्ठकारणा उपक्खित्तका च. ते भगवतो सम्पज्जन्ति. अथ खो भगवाव तत्थ अतिरोचति यदिदं पञ्ञायाति – धोनेन युगं समागमा, न हि त्वं सक्खसि सम्पयातवे.

तेनाह भगवा –

‘‘अथ त्वं पवितक्कमागमा, मनसा दिट्ठिगतानि चिन्तयन्तो;

धोनेन युगं समागमा, न हि त्वं सक्खसि सम्पयातवे’’ति.

पसूरसुत्तनिद्देसो अट्ठमो.

९. मागण्डियसुत्तनिद्देसो

अथ मागण्डियसुत्तनिद्देसं वक्खति –

७०.

दिस्वान तण्हं अरतिं रगञ्च, नाहोसि छन्दो अपि मेथुनस्मिं;

किमेविदं मुत्तकरीसपुण्णं, पादापि नं सम्फुसितुं न इच्छे.

दिस्वान तण्हं अरतिं रगञ्च, नाहोसि छन्दो अपि मेथुनस्मिन्ति. तण्हञ्च अरतिञ्च रगञ्च मारधीतरो दिस्वा पस्सित्वा मेथुनधम्मे छन्दो वा रागो वा पेमं वा नाहोसीति – दिस्वान तण्हं अरतिं रगञ्च नाहोसि छन्दो अपि मेथुनस्मिं.

किमेविदं मुत्तकरीसपुण्णं, पादापि नं सम्फुसितुं न इच्छेति. किमेविदं सरीरं मुत्तपुण्णं करीसपुण्णं सेम्हपुण्णं रुहिरपुण्णं अट्ठिसङ्घातन्हारुसम्बन्धं रुधिरमंसावलेपनं चम्मविनद्धं छविया पटिच्छन्नं छिद्दावछिद्दं उग्घरन्तं पग्घरन्तं किमिसङ्घनिसेवितं नानाकलिमलपरिपूरं पादेन अक्कमितुं न इच्छेय्य, कुतो पन संवासो वा समागमो वाति – किमेविदं मुत्तकरीसपुण्णं, पादापि नं सम्फुसितुं न इच्छे. अनच्छरियञ्चेतं मनुस्सो दिब्बे कामे पत्थयन्तो मानुसके कामे न इच्छेय्य, मानुसके वा कामे पत्थयन्तो दिब्बे कामे न इच्छेय्य. यं त्वं उभोपि न इच्छसि न सादियसि न पत्थेसि न पिहेसि नाभिजप्पसि, किं ते दस्सनं, कतमाय त्वं दिट्ठिया समन्नागतोति पुच्छतीति.

तेनाह भगवा –

‘‘दिस्वान तण्हं अरतिं रगञ्च, नाहोसि छन्दो अपि मेथुनस्मिं;

किमेविदं मुत्तकरीसपुण्णं, पादापि नं सम्फुसितुं न इच्छे’’ति.

७१.

एतादिसं चे रतनं न इच्छसि, नारिं नरिन्देहि बहूहि पत्थितं;

दिट्ठिगतं सीलवतं नु जीवितं, भवूपपत्तिञ्च वदेसि कीदिसं.

७२.

इदं वदामीति न तस्स होति, [मागण्डियाति [मागन्दियाति (सी. स्या.)] भगवा]

धम्मेसु निच्छेय्य समुग्गहीतं;

पस्सञ्च दिट्ठीसु अनुग्गहाय, अज्झत्तसन्तिं पचिनं अदस्सं.

इदं वदामीति न तस्स होतीति. इदं वदामीति इदं वदामि, एतं वदामि, एत्तकं वदामि, एत्तावता वदामि, इदं दिट्ठिगतं वदामि – ‘‘सस्सतो लोको’’ति वा…पे… ‘‘नेव होति न न होति तथागतो परं मरणा’’ति वा. न तस्स होतीति न मय्हं होति, ‘‘एत्तावता वदामी’’ति न तस्स होतीति – इदं वदामीति न तस्स होति.

मागण्डियाति भगवा तं ब्राह्मणं नामेन आलपति. भगवाति गारवाधिवचनं…पे… सच्छिका पञ्ञत्ति यदिदं भगवाति – मागण्डियाति भगवा.

धम्मेसु निच्छेय्य समुग्गहीतन्ति. धम्मेसूति द्वासट्ठिया दिट्ठिगतेसु. निच्छेय्याति निच्छिनित्वा विनिच्छिनित्वा विचिनित्वा पविचिनित्वा तुलयित्वा तीरयित्वा विभावयित्वा विभूतं कत्वा, ओधिग्गाहो बिलग्गाहो वरग्गाहो कोट्ठासग्गाहो उच्चयग्गाहो समुच्चयग्गाहो, ‘‘इदं सच्चं तच्छं तथं भूतं याथावं अविपरीत’’न्ति गहितं परामट्ठं अभिनिविट्ठं अज्झोसितं अधिमुत्तं, नत्थि न सन्ति न संविज्जति नुपलब्भति, पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढन्ति – धम्मेसु निच्छेय्य समुग्गहीतं.

पस्सञ्च दिट्ठीसु अनुग्गहायाति. दिट्ठीसु आदीनवं पस्सन्तो दिट्ठियो न गण्हामि न परामसामि नाभिनिविसामि. अथ वा न गण्हितब्बा न परामसितब्बा नाभिनिविसितब्बाति. एवम्पि पस्सञ्च दिट्ठीसु अनुग्गहाय.

अथ वा ‘‘सस्सतो लोको, इदमेव सच्चं मोघमञ्ञ’’न्ति दिट्ठिगतमेतं दिट्ठिगहनं दिट्ठिकन्तारो दिट्ठिविसूकायिकं दिट्ठिविप्फन्दितं दिट्ठिसञ्ञोजनं, सदुक्खं सविघातं सउपायासं सपरिळाहं, न निब्बिदाय न विरागाय न निरोधाय न उपसमाय न अभिञ्ञाय न सम्बोधाय न निब्बानाय संवत्ततीति. दिट्ठीसु आदीनवं पस्सन्तो दिट्ठियो न गण्हामि न परामसामि नाभिनिविसामि. अथ वा न गण्हितब्बा न परामसितब्बा नाभिनिविसितब्बाति. एवम्पि पस्सञ्च दिट्ठीसु अनुग्गहाय.

अथ वा ‘‘असस्सतो लोको, अन्तवा लोको, अनन्तवा लोको, तं जीवं तं सरीरं, अञ्ञं जीवं अञ्ञं सरीरं, होति तथागतो परं मरणा, न होति तथागतो परं मरणा, होति च न च होति तथागतो परं मरणा, नेव होति न न होति तथागतो परं मरणा, इदमेव सच्चं मोघमञ्ञ’’न्ति दिट्ठिगतमेतं दिट्ठिगहनं दिट्ठिकन्तारो दिट्ठिविसूकायिकं दिट्ठिविप्फन्दितं दिट्ठिसञ्ञोजनं, सदुक्खं सविघातं सउपायासं सपरिळाहं न निब्बिदाय न विरागाय न निरोधाय न उपसमाय न अभिञ्ञाय न सम्बोधाय न निब्बानाय संवत्ततीति. दिट्ठीसु आदीनवं पस्सन्तो दिट्ठियो न गण्हामि न परामसामि नाभिनिविसामि. अथ वा न गण्हितब्बा न परामसितब्बा नाभिनिविसितब्बाति. एवम्पि पस्सञ्च दिट्ठीसु अनुग्गहाय.

अथ वा इमा दिट्ठियो एवंगहिता एवंपरामट्ठा एवंगतिका भविस्सन्ति एवंअभिसम्परायाति. दिट्ठीसु आदीनवं पस्सन्तो दिट्ठियो न गण्हामि न परामसामि नाभिनिविसामि. अथ वा न गण्हितब्बा न परामसितब्बा नाभिनिविसितब्बाति. एवम्पि पस्सञ्च दिट्ठीसु अनुग्गहाय.

अथ वा इमा दिट्ठियो निरयसंवत्तनिका तिरच्छानयोनिसंवत्तनिका पेत्तिविसयसंवत्तनिकाति. दिट्ठीसु आदीनवं पस्सन्तो दिट्ठियो न गण्हामि न परामसामि नाभिनिविसामि. अथ वा न गण्हितब्बा न परामसितब्बा नाभिनिविसितब्बाति. एवम्पि पस्सञ्च दिट्ठीसु अनुग्गहाय.

अथ वा इमा दिट्ठियो अनिच्चा सङ्खता पटिच्चसमुप्पन्ना खयधम्मा वयधम्मा विरागधम्मा निरोधधम्माति. दिट्ठीसु आदीनवं पस्सन्तो दिट्ठियो न गण्हामि न परामसामि नाभिनिविसामि. अथ वा न गण्हितब्बा न परामसितब्बा नाभिनिविसितब्बाति. एवम्पि पस्सञ्च दिट्ठीसु अनुग्गहाय.

अज्झत्तसन्तिं पचिनं अदस्सन्ति. अज्झत्तसन्तिं अज्झत्तं रागस्स सन्तिं, दोसस्स सन्तिं, मोहस्स सन्तिं, कोधस्स… उपनाहस्स… मक्खस्स … पळासस्स… इस्साय… मच्छरियस्स … मायाय… साठेय्यस्स… थम्भस्स… सारम्भस्स… मानस्स… अतिमानस्स… मदस्स… पमादस्स… सब्बकिलेसानं… सब्बदुच्चरितानं… सब्बदरथानं… सब्बपरिळाहानं… सब्बसन्तापानं… सब्बाकुसलाभिसङ्खारानं सन्तिं उपसन्तिं वूपसन्तिं निब्बुतिं पटिपस्सद्धिं सन्तिं. पचिनन्ति पचिनन्तो विचिनन्तो पविचिनन्तो तुलयन्तो तीरयन्तो विभावयन्तो विभूतं करोन्तो, ‘‘सब्बे सङ्खारा अनिच्चा’’ति पचिनन्तो विचिनन्तो पविचिनन्तो तुलयन्तो तीरयन्तो विभावयन्तो विभूतं करोन्तो, ‘‘सब्बे सङ्खारा दुक्खा’’ति… ‘‘सब्बे धम्मा अनत्ता’’ति पचिनन्तो विचिनन्तो पविचिनन्तो… ‘‘यं किञ्चि समुदयधम्मं, सब्बं तं निरोधधम्म’’न्ति पचिनन्तो विचिनन्तो पविचिनन्तो तुलयन्तो तीरयन्तो विभावयन्तो विभूतं करोन्तो. अदस्सन्ति अदस्सं अदक्खिं अपस्सिं पटिविज्झिन्ति – अज्झत्तसन्तिं पचिनं अदस्सं.

तेनाह भगवा –

‘‘इदं वदामीति न तस्स होति, [मागण्डियाति भगवा]

धम्मेसु निच्छेय्य समुग्गहीतं;

पस्सञ्च दिट्ठीसु अनुग्गहाय;

अज्झत्तसन्तिं पचिनं अदस्स’’न्ति.

७३.

विनिच्छया यानि पकप्पितानि, [इति मागण्डियो]

ते वे मुनी ब्रूसि अनुग्गहाय;

अज्झत्तसन्तीति यमेतमत्थं, कथं नु धीरेहि पवेदितं तं.

विनिच्छया यानि पकप्पितानीति. विनिच्छया वुच्चन्ति द्वासट्ठि दिट्ठिगतानि दिट्ठिविनिच्छया. पकप्पितानीति कप्पिता पकप्पिता अभिसङ्खता सण्ठपितातिपि पकप्पिता. अथ वा अनिच्चा सङ्खता पटिच्चसमुप्पन्ना खयधम्मा वयधम्मा विरागधम्मा निरोधधम्मा विपरिणामधम्मातिपि पकप्पिताति – विनिच्छया यानि पकप्पितानि.

इति मागण्डियोति. इतीति पदसन्धि पदसंसग्गो पदपारिपूरी अक्खरसमवायो ब्यञ्जनसिलिट्ठता पदानुपुब्बतापेतं – इतीति. मागण्डियोति तस्स ब्राह्मणस्स नामं सङ्खा समञ्ञा पञ्ञत्ति वोहारो – इति मागण्डियोति.

ते वे मुनी ब्रूसि अनुग्गहाय, अज्झत्तसन्तीति यमेतमत्थन्ति. ते वेति द्वासट्ठि दिट्ठिगतानि. मुनीति. मोनं वुच्चति ञाणं…पे… सङ्गजालमतिच्च सो मुनीति. अनुग्गहायाति दिट्ठीसु आदीनवं पस्सन्तो दिट्ठियो न गण्हामि न परामसामि नाभिनिविसामीति च भणसि, अज्झत्तसन्तीति च भणसि. यमेतमत्थन्ति यं परमत्थन्ति – ते वे मुनी ब्रूसि अनुग्गहाय, अज्झत्तसन्तीति यमेतमत्थं.

कथं नु धीरेहि पवेदितं तन्ति. कथं नूति पदं संसयपुच्छा विमतिपुच्छा द्वेळ्हकपुच्छा अनेकंसपुच्छा, एवं नु खो ननु खो किं नु खो कथं नु खोति – कथं नु. धीरेहीति धीरेहि पण्डितेहि पञ्ञवन्तेहि [पञ्ञावन्तेहि (सी. स्या.)] बुद्धिमन्तेहि ञाणीहि विभावीहि मेधावीहि. पवेदितन्ति वेदितं पवेदितं आचिक्खितं देसितं पञ्ञापितं पट्ठपितं विवटं विभत्तं उत्तानीकतं पकासितन्ति – कथं नु धीरेहि पवेदितं तं.

तेनाह सो ब्राह्मणो –

‘‘विनिच्छया यानि पकप्पितानि, [इति मागण्डियो]

ते वे मुनी ब्रूसि अनुग्गहाय;

अज्झत्तसन्तीति यमेतमत्थं, कथं नु धीरेहि पवेदितं त’’न्ति.

७४.

न दिट्ठिया न सुतिया न ञाणेन, [मागण्डियाति भगवा]

सीलब्बतेनापि न सुद्धिमाह;

अदिट्ठिया अस्सुतिया अञाणा, असीलता अब्बता नोपि तेन;

एते च निस्सज्ज अनुग्गहाय, सन्तो अनिस्साय भवं न जप्पे.

न दिट्ठिया न सुतिया न ञाणेनाति. दिट्ठेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं नाह न कथेसि न भणसि न दीपयसि न वोहरसि; सुतेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं नाह न कथेसि न भणसि न दीपयसि न वोहरसि; दिट्ठसुतेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं नाह न कथेसि न भणसि न दीपयसि न वोहरसि; ञाणेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं नाह न कथेसि न भणसि न दीपयसि न वोहरसीति – न दिट्ठिया न सुतिया न ञाणेन.

मागण्डियाति भगवा तं ब्राह्मणं नामेन आलपति. भगवाति गारवाधिवचनं…पे… सच्छिका पञ्ञत्ति यदिदं भगवाति – मागण्डियाति भगवा.

सीलब्बतेनापि न सुद्धिमाहाति. सीलेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं नाह न कथेसि न भणसि न दीपयसि न वोहरसि; वतेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं नाह न कथेसि न भणसि न दीपयसि न वोहरसि; सीलब्बतेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं नाह न कथेसि न भणसि न दीपयसि न वोहरसीति – सीलब्बतेनापि न सुद्धिमाह.

अदिट्ठिया अस्सुतिया अञाणा, असीलता अब्बता नोपि तेनाति. दिट्ठिपि इच्छितब्बा. दसवत्थुका सम्मादिट्ठि – अत्थि दिन्नं, अत्थि यिट्ठं, अत्थि हुतं, अत्थि सुकतदुक्कटानं [सुकटदुक्कटानं (सी.)] कम्मानं फलं विपाको, अत्थि अयं लोको, अत्थि परो लोको, अत्थि माता, अत्थि पिता, अत्थि सत्ता ओपपातिका, अत्थि लोके समणब्राह्मणा सम्मग्गता [समग्गता (क.)] सम्मापटिपन्ना ये इमञ्च लोकं परञ्च लोकं सयं अभिञ्ञा सच्छिकत्वा पवेदेन्तीति; सवनम्पि इच्छितब्बं – परतो घोसो, सुत्तं, गेय्यं, वेय्याकरणं, गाथा, उदानं, इतिवुत्तकं, जातकं, अब्भुतधम्मं, वेदल्लं; ञाणम्पि इच्छितब्बं – कम्मस्सकतञाणं, सच्चानुलोमिकञाणं [कम्मस्सकतं ञाणं सच्चानुलोमिकं ञाणं (सी. क.) ञाणविभङ्गेपि], अभिञ्ञाञाणं, समापत्तिञाणं; सीलम्पि इच्छितब्बं – पातिमोक्खसंवरो; वतम्पि इच्छितब्बं – अट्ठ धुतङ्गानि – आरञ्ञिकङ्गं, पिण्डपातिकङ्गं, पंसुकूलिकङ्गं, तेचीवरिकङ्ग, सपदानचारिकङ्गं, खलुपच्छाभत्तिकङ्गं, नेसज्जिकङ्गं, यथासन्थतिकङ्गन्ति.

अदिट्ठिया अस्सुतिया अञाणा, असीलता अब्बता नोपि तेनाति. नापि सम्मादिट्ठिमत्तेन, नापि सवनमत्तेन, नापि ञाणमत्तेन, नापि सीलमत्तेन, नापि वतमत्तेन अज्झत्तसन्तिं पत्तो होति, नापि विना एतेहि धम्मेहि अज्झत्तसन्तिं पापुणाति. अपि च सम्भारा इमे धम्मा होन्ति अज्झत्तसन्तिं पापुणितुं अधिगन्तुं फस्सितुं सच्छिकातुन्ति – अदिट्ठिया अस्सुतिया अञाणा असीलता अब्बता नोपि तेन.

एते च निस्सज्ज अनुग्गहायाति. एतेति कण्हपक्खिकानं धम्मानं समुग्घाततो पहानं इच्छितब्बं, तेधातुकेसु कुसलेसु धम्मेसु अतम्मयता [अकम्मयता (सी. क.)] इच्छितब्बा, यतो कण्हपक्खिया धम्मा समुग्घातपहानेन पहीना होन्ति उच्छिन्नमूला तालावत्थुकता अनभावंकता आयतिं अनुप्पादधम्मा, तेधातुकेसु च कुसलेसु धम्मेसु अतम्मयता होति, एत्तावतापि न गण्हाति न परामसति नाभिनिविसति. अथ वा न गण्हितब्बा न परामसितब्बा नाभिनिविसितब्बाति. एवम्पि एते च निस्सज्ज अनुग्गहाय. यतो तण्हा च दिट्ठि च मानो च पहीना होन्ति उच्छिन्नमूला तालावत्थुकता अनभावंकता आयतिं अनुप्पादधम्माति, एत्तावतापि न गण्हाति न परामसति नाभिनिविसतीति. एवम्पि एते च निस्सज्ज अनुग्गहाय.

यतो पुञ्ञाभिसङ्खारो च अपुञ्ञाभिसङ्खारो च आनेञ्जाभिसङ्खारो च पहीना होन्ति उच्छिन्नमूला तालावत्थुकता अनभावंकता आयतिं अनुप्पादधम्माति, एत्तावतापि न गण्हाति न परामसति नाभिनिविसतीति. एवम्पि एते च निस्सज्ज अनुग्गहाय.

सन्तो अनिस्साय भवं न जप्पेति. सन्तोति रागस्स समितत्ता सन्तो, दोसस्स समितत्ता सन्तो, मोहस्स समितत्ता सन्तो, कोधस्स… उपनाहस्स… मक्खस्स… पळासस्स… इस्साय… मच्छरियस्स… मायाय… साठेय्यस्स… थम्भस्स… सारम्भस्स… मानस्स… अतिमानस्स… मदस्स… पमादस्स… सब्बकिलेसानं… सब्बदुच्चरितानं… सब्बदरथानं… सब्बपरिळाहानं… सब्बसन्तापानं… सब्बाकुसलाभिसङ्खारानं सन्तत्ता समितत्ता वूपसमितत्ता विज्झातत्ता निब्बुतत्ता विगतत्ता पटिपस्सद्धत्ता सन्तो उपसन्तो वूपसन्तो निब्बुतो पटिपस्सद्धोति – सन्तो.

अनिस्सायाति द्वे निस्सया – तण्हानिस्सयो च दिट्ठिनिस्सयो च…पे… अयं तण्हानिस्सयो…पे… अयं दिट्ठिनिस्सयो. तण्हानिस्सयं पहाय दिट्ठिनिस्सयं पटिनिस्सज्जित्वा चक्खुं अनिस्साय, सोतं अनिस्साय, घानं अनिस्साय, जिव्हं अनिस्साय, कायं अनिस्साय, मनं अनिस्साय, रूपे… सद्दे… गन्धे… रसे… फोट्ठब्बे… कुलं… गणं… आवासं… लाभं… यसं… पसंसं… सुखं… चीवरं… पिण्डपातं… सेनासनं… गिलानपच्चयभेसज्जपरिक्खारं… कामधातुं… रूपधातुं… अरूपधातुं… कामभवं… रूपभवं… अरूपभवं… सञ्ञाभवं… असञ्ञाभवं… नेवसञ्ञानासञ्ञाभवं… एकवोकारभवं… चतुवोकारभवं… पञ्चवोकारभवं… अतीतं… अनागतं… पच्चुप्पन्नं… दिट्ठसुतमुतविञ्ञातब्बे धम्मे अनिस्साय अग्गण्हित्वा अपरामसित्वा अनभिनिविसित्वाति – सन्तो अनिस्साय. भवं न जप्पेति कामभवं न जप्पेय्य, रूपभवं न जप्पेय्य, अरूपभवं न जप्पेय्य नप्पजप्पेय्य न अभिजप्पेय्याति – सन्तो अनिस्साय भवं न जप्पे.

तेनाह भगवा –

‘‘न दिट्ठिया न सुतिया न ञाणेन, [मागण्डियाति भगवा]

सीलब्बतेनापि न सुद्धिमाह;

अदिट्ठिया अस्सुतिया अञाणा, असीलता अब्बता नोपि तेन;

एते च निस्सज्ज अनुग्गहाय, सन्तो अनिस्साय भवं न जप्पे’’ति.

७५.

नो चे किर दिट्ठिया न सुतिया न ञाणेन, [इति मागण्डियो]

सीलब्बतेनापि न सुद्धिमाह;

अदिट्ठिया अस्सुतिया अञाणा, असीलता अब्बता नोपि तेन;

मञ्ञामहं मोमुहमेव धम्मं, दिट्ठिया एके पच्चेन्ति सुद्धिं.

नो चे किर दिट्ठिया न सुतिया न ञाणेनाति. दिट्ठियापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं नाह न कथेसि न भणसि न दीपयसि न वोहरसि; सुतेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं… दिट्ठसुतेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं… ञाणेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं नाह न कथेसि न भणसि न दीपयसि न वोहरसीति – नो चे किर दिट्ठिया न सुतिया न ञाणेन.

इति मागण्डियोति इतीति पदसन्धि…पे…. मागण्डियोति तस्स ब्राह्मणस्स नामं…पे… इति मागण्डियो.

सीलब्बतेनापि न सुद्धिमाहाति. सीलेनापि सुद्धिं विसुद्धिं परिसुद्धिं…पे… वतेनापि सुद्धिं विसुद्धिं परिसुद्धिं…पे… सीलब्बतेनापि सुद्धिं विसुद्धिं परिसुद्धिं, मुत्तिं विमुत्तिं परिमुत्तिं नाह न कथेसि न भणसि न दीपयसि न वोहरसीति – सीलब्बतेनापि न सुद्धिमाह.

अदिट्ठिया अस्सुतिया अञाणा, असीलता अब्बता नोपि तेनाति. दिट्ठिपि इच्छितब्बाति एवं भणसि, सवनम्पि इच्छितब्बन्ति एवं भणसि, ञाणम्पि इच्छितब्बन्ति एवं भणसि, न सक्कोसि एकंसेन अनुजानितुं, नपि सक्कोसि एकंसेन पटिक्खिपितुन्ति – अदिट्ठिया अस्सुतिया अञाणा, असीलता अब्बता नोपि तेन.

मञ्ञामहं मोमुहमेव धम्मन्ति. मोमूहधम्मो अयं तुय्हं बालधम्मो मूळ्हधम्मो अञ्ञाणधम्मो अमराविक्खेपधम्मोति एवं मञ्ञामि एवं जानामि एवं आजानामि एवं विजानामि एवं पटिविजानामि एवं पटिविज्झामीति – मञ्ञामहं मोमुहमेव धम्मं.

दिट्ठिया एके पच्चेन्ति सुद्धिन्ति. सुद्धिदिट्ठिया एके समणब्राह्मणा सुद्धिं विसुद्धिं परिसुद्धिं, मुत्तिं विमुत्तिं परिमुत्तिं पच्चेन्ति; ‘‘सस्सतो लोको, इदमेव सच्चं मोघमञ्ञ’’न्ति दिट्ठिया एके समणब्राह्मणा सुद्धिं विसुद्धिं परिसुद्धिं, मुत्तिं विमुत्तिं परिमुत्तिं पच्चेन्ति; ‘‘असस्सतो लोको…पे… नेव होति न न होति तथागतो परं मरणा, इदमेव सच्चं मोघमञ्ञ’’न्ति दिट्ठिया एके समणब्राह्मणा सुद्धिं विसुद्धिं परिसुद्धिं, मुत्तिं विमुत्तिं परिमुत्तिं पच्चेन्तीति – दिट्ठिया एके पच्चेन्ति सुद्धिं.

तेनाह सो ब्राह्मणो –

‘‘नो चे किर दिट्ठिया न सुतिया न ञाणेन, [इति मागण्डियो]

सीलब्बतेनापि न सुद्धिमाह;

अदिट्ठिया अस्सुतिया अञाणा, असीलता अब्बता नोपि तेन;

मञ्ञामहं मोमुहमेव धम्मं, दिट्ठिया एके पच्चेन्ति सुद्धि’’न्ति.

७६.

दिट्ठिञ्च [दिट्ठीसु (सी. स्या. क.)] निस्सायनुपुच्छमानो, [मागण्डियाति भगवा]

समुग्गहीतेसु पमोहमागा [समोहमागा (क.)] ;

इतो च नाद्दक्खि अणुम्पि सञ्ञं, तस्मा तुवं मोमुहतो दहासि.

दिट्ठिञ्च निस्सायनुपुच्छमानोति. मागण्डियो ब्राह्मणो दिट्ठिं निस्साय दिट्ठिं पुच्छति, लग्गनं निस्साय लग्गनं पुच्छति, बन्धनं निस्साय बन्धनं पुच्छति, पलिबोधं निस्साय पलिबोधं पुच्छति. अनुपुच्छमानोति पुनप्पुनं पुच्छतीति – दिट्ठिञ्च निस्सायनुपुच्छमानो.

मागण्डियाति भगवा तं ब्राह्मणं नामेन आलपति. भगवाति गारवाधिवचनं…पे… सच्छिका पञ्ञत्ति यदिदं भगवाति – मागण्डियाति भगवा.

समुग्गहीतेसु पमोहमागाति. या सा दिट्ठि तया गहिता परामट्ठा अभिनिविट्ठा अज्झोसिता अधिमुत्ता, तायेव त्वं दिट्ठिया मूळ्होसि पमूळ्होसि सम्मूळ्होसि मोहं आगतोसि पमोहं आगतोसि सम्मोहं आगतोसि अन्धकारं पक्खन्दोसीति – समुग्गहीतेसु पमोहमागा.

इतो च नाद्दक्खि अणुम्पि सञ्ञन्ति. इतो अज्झत्तसन्तितो वा पटिपदातो वा धम्मदेसनातो वा, युत्तसञ्ञं पत्तसञ्ञं लक्खणसञ्ञं कारणसञ्ञं ठानसञ्ञं न पटिलभति, कुतो ञाणन्ति. एवम्पि इतो च नाद्दक्खि अणुम्पि सञ्ञं. अथ वा अनिच्चं वा अनिच्चसञ्ञानुलोमं वा, दुक्खं वा दुक्खसञ्ञानुलोमं वा, अनत्तं वा अनत्तसञ्ञानुलोमं वा, सञ्ञुप्पादमत्तं वा सञ्जानितमत्तं वा न पटिलभति, कुतो ञाणन्ति. एवम्पि इतो च नाद्दक्खि अणुम्पि सञ्ञं.

तस्मा तुवं मोमुहतो दहासीति. तस्माति तस्मा तंकारणा तंहेतु तप्पच्चया तंनिदाना मोमूहधम्मतो बालधम्मतो मूळ्हधम्मतो अञ्ञाणधम्मतो अमराविक्खेपधम्मतो दहासि पस्ससि दक्खसि ओलोकेसि निज्झायसि उपपरिक्खसीति – तस्मा तुवं मोमुहतो दहासि.

तेनाह भगवा –

‘‘दिट्ठिञ्च निस्सायनुपुच्छमानो, [मागण्डियाति भगवा]

समुग्गहीतेसु पमोहमागा;

इतो च नाद्दक्खि अणुम्पि सञ्ञं, तस्मा तुवं मोमुहतो दहासी’’ति.

७७.

समो विसेसी उद वा निहीनो, यो मञ्ञति सो विवदेथ तेन;

तीसु विधासु अविकम्पमानो, समो विसेसीति न तस्स होति.

समो विसेसी उद वा निहीनो, यो मञ्ञति सो विवदेथ तेनाति. सदिसोहमस्मीति वा सेय्योहमस्मीति वा हीनोहमस्मीति वा यो मञ्ञति, सो तेन मानेन ताय दिट्ठिया तेन वा पुग्गलेन कलहं करेय्य भण्डनं करेय्य विग्गहं करेय्य विवादं करेय्य मेधगं करेय्य – ‘‘न त्वं इमं धम्मविनयं आजानासि, अहं इमं धम्मविनयं आजानामि, किं त्वं इमं धम्मविनयं आजानिस्ससि, मिच्छापटिपन्नो त्वमसि, अहमस्मि सम्मापटिपन्नो, सहितं मे, असहितं ते, पुरे वचनीयं पच्छा अवच, पच्छा वचनीयं पुरे अवच, अधिचिण्णं ते विपरावत्तं, आरोपितो ते वादो, निग्गहितो त्वमसि, चर वादप्पमोक्खाय, निब्बेठेहि वा सचे पहोसी’’ति – समो विसेसी उद वा निहीनो यो मञ्ञति सो विवदेथ तेन.

तीसु विधासु अविकम्पमानो, समो विसेसीति न तस्स होतीति. यस्सेता तिस्सो विधा पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढा, सो तीसु विधासु न कम्पति न विकम्पति, अविकम्पमानस्स पुग्गलस्स सदिसोहमस्मीति वा सेय्योहमस्मीति वा हीनोहमस्मीति वा. न तस्स होतीति. न मय्हं होतीति तीसु विधासु अविकम्पमानो, समो विसेसीति – न तस्स होति.

तेनाह भगवा –

‘‘समो विसेसी उद वा निहीनो, यो मञ्ञति सो विवदेथ तेन;

तीसु विधासु अविकम्पमानो, समो विसेसीति न तस्स होती’’ति.

७८.

सच्चन्ति सो ब्राह्मणो किं वदेय्य, मुसाति वा सो विवदेथ केन;

यस्मिं समं विसमं वापि नत्थि, स केन वादं पटिसंयुजेय्य.

सच्चन्ति सो ब्राह्मणो किं वदेय्याति. ब्राह्मणोति सत्तन्नं धम्मानं बाहितत्ता ब्राह्मणो…पे… असितो तादि पवुच्चते स ब्रह्मा. सच्चन्ति सो ब्राह्मणो किं वदेय्याति. ‘‘सस्सतो लोको, इदमेव सच्चं मोघमञ्ञ’’न्ति ब्राह्मणो किं वदेय्य किं कथेय्य किं भणेय्य किं दीपयेय्य किं वोहरेय्य; ‘‘असस्सतो लोको…पे… नेव होति न न होति तथागतो परं मरणा, इदमेव सच्चं मोघमञ्ञ’’न्ति ब्राह्मणो किं वदेय्य किं कथेय्य किं भणेय्य किं दीपयेय्य किं वोहरेय्याति – सच्चन्ति सो ब्राह्मणो किं वदेय्य.

मुसाति वा सो विवदेथ केनाति. ब्राह्मणो मय्हंव सच्चं, तुय्हं मुसाति केन मानेन, काय दिट्ठिया, केन वा पुग्गलेन कलहं करेय्य भण्डनं करेय्य विग्गहं करेय्य विवादं करेय्य मेधगं करेय्य – ‘‘न त्वं इमं धम्मविनयं आजानासि…पे… निब्बेठेहि वा सचे पहोसी’’ति – मुसाति वा सो विवदेथ केन.

यस्मिं समं विसमं वापि नत्थीति. यस्मिन्ति यस्मिं पुग्गले अरहन्ते खीणासवे सदिसोहमस्मीति मानो नत्थि, सेय्योहमस्मीति मानो नत्थि, हीनोहमस्मीति ओमानो नत्थि न सन्ति न संविज्जति नुपलब्भति, पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढन्ति – यस्मिं समं विसमं वापि नत्थि.

स केन वादं पटिसंयुजेय्याति. सो केन मानेन, काय दिट्ठिया, केन वा पुग्गलेन वादं पटिसञ्ञोजेय्य पटिबलेय्य कलहं करेय्य भण्डनं करेय्य विग्गहं करेय्य विवादं करेय्य मेधगं करेय्य – ‘‘न त्वं इमं धम्मविनयं आजानासि…पे… निब्बेठेहि वा सचे पहोसी’’ति – स केन वादं पटिसंयुजेय्य.

तेनाह भगवा –

‘‘सच्चन्ति सो ब्राह्मणो किं वदेय्य, मुसाति वा सो विवदेथ केन;

यस्मिं समं विसमं वापि नत्थि, स केन वादं पटिसंयुजेय्या’’ति.

७९.

ओकं पहाय अनिकेतसारी, गामे अकुब्बं मुनि सन्थवानि [सन्धवानि (क.)] ;

कामेहि रित्तो अपुरेक्खरानो, कथं न विग्गय्ह जनेन कयिरा.

अथ खो हालिद्दकानि [हलिद्दकानी (सी.)] गहपति येनायस्मा महाकच्चानो तेनुपसङ्कमि; उपसङ्कमित्वा आयस्मन्तं महाकच्चानं अभिवादेत्वा एकमन्तं निसीदि. एकमन्तं निसिन्नो खो हालिद्दकानि गहपति आयस्मन्तं महाकच्चानं एतदवोच – ‘‘वुत्तमिदं भन्ते, कच्चान, भगवता अट्ठकवग्गिके मागण्डियपञ्हे –

‘‘ओकं पहाय अनिकेतसारी, गामे अकुब्बं मुनि सन्थवानि;

कामेहि रित्तो अपुरेक्खरानो, कथं न विग्गय्ह जनेन कयिरा’’ति.

‘‘इमस्स नु खो भन्ते, कच्चान, भगवता सङ्खित्तेन भासितस्स कथं वित्थारेन अत्थो दट्ठब्बो’’ति?

‘‘रूपधातु खो, गहपति, विञ्ञाणस्स ओको रूपधातु रागविनिबन्धञ्च [रागविनिबद्धञ्च (सी.)] पन विञ्ञाणं ओकसारीति वुच्चति. वेदनाधातु खो, गहपति… सञ्ञाधातु खो, गहपति… सङ्खारधातु खो, गहपति, विञ्ञाणस्स ओको सङ्खारधातु रागविनिबन्धञ्च पन विञ्ञाणं ओकसारीति वुच्चति. एवं खो, गहपति, ओकसारी होति.

‘‘कथञ्च, गहपति, अनोकसारी होति? रूपधातुया खो, गहपति, यो छन्दो यो रागो या नन्दी या तण्हा ये उपायुपादाना [उपयुपादाना (क.)] चेतसो अधिट्ठानाभिनिवेसानुसया ते तथागतस्स पहीना उच्छिन्नमूला तालावत्थुकता अनभावंकता आयतिं अनुप्पादधम्मा; तस्मा तथागतो अनोकसारीति वुच्चति. वेदनाधातुया खो, गहपति… सञ्ञाधातुया खो, गहपति… सङ्खारधातुया खो, गहपति… विञ्ञाणधातुया खो, गहपति, यो छन्दो यो रागो या नन्दी या तण्हा ये उपायुपादाना चेतसो अधिट्ठानाभिनिवेसानुसया ते तथागतस्स पहीना उच्छिन्नमूला तालावत्थुकता अनभावंकता आयतिं अनुप्पादधम्मा; तस्मा तथागतो अनोकसारीति वुच्चति. एवं खो, गहपति, अनोकसारी होति.

‘‘कथञ्च, गहपति, निकेतसारी होति? रूपनिमित्तनिकेतविसारविनिबन्धा खो, गहपति, निकेतसारीति वुच्चति. सद्दनिमित्त… गन्धनिमित्त… रसनिमित्त… फोट्ठब्बनिमित्त… धम्मनिमित्तनिकेतविसारविनिबन्धा खो, गहपति, निकेतसारीति वुच्चति. एवं खो, गहपति, निकेतसारी होति.

‘‘कथञ्च, गहपति, अनिकेतसारी होति? रूपनिमित्तनिकेतविसारविनिबन्धा खो, गहपति, तथागतस्स पहीना उच्छिन्नमूला तालावत्थुकता अनभावंकता आयतिं अनुप्पादधम्मा; तस्मा तथागतो अनिकेतसारीति वुच्चति. सद्दनिमित्त… गन्धनिमित्त… रसनिमित्त… फोट्ठब्बनिमित्त… धम्मनिमित्तनिकेतविसारविनिबन्धा खो, गहपति, तथागतस्स पहीना उच्छिन्नमूला तालावत्थुकता अनभावंकता आयतिं अनुप्पादधम्मा; तस्मा तथागतो अनिकेतसारीति वुच्चति. एवं खो, गहपति, अनिकेतसारी होति.

‘‘कथञ्च, गहपति, गामे सन्थवजातो होति? इध, गहपति, एकच्चो भिक्खु गिहीहि संसट्ठो विहरति सहनन्दी सहसोकी, सुखितेसु सुखितो, दुक्खितेसु दुक्खितो, उप्पन्नेसु किच्चकरणीयेसु अत्तना वोयोगं आपज्जति. एवं खो, गहपति, गामे सन्थवजातो होति.

‘‘कथञ्च, गहपति, गामे न सन्थवजातो होति? इध, गहपति, एकच्चो भिक्खु गिहीहि असंसट्ठो विहरति न सहनन्दी न सहसोकी, न सुखितेसु सुखितो, न दुक्खितेसु दुक्खितो, उप्पन्नेसु किच्चकरणीयेसु न अत्तना वोयोगं आपज्जति. एवं खो, गहपति, गामे न सन्थवजातो होति.

‘‘कथञ्च, गहपति, कामेहि अरित्तो होति? इध, गहपति, एकच्चो भिक्खु कामेसु अवीतरागो होति अविगतच्छन्दो अविगतपेमो अविगतपिपासो अविगतपरिळाहो अविगततण्हो. एवं खो, गहपति, कामेहि अरित्तो होति.

‘‘कथञ्च, गहपति, कामेहि रित्तो होति? इध, गहपति, एकच्चो भिक्खु कामेसु वीतरागो होति विगतच्छन्दो विगतपेमो विगतपिपासो विगतपरिळाहो विगततण्हो. एवं खो, गहपति, कामेहि रित्तो होति.

‘‘कथञ्च, गहपति, पुरेक्खरानो होति? इध, गहपति, एकच्चस्स भिक्खुनो एवं होति – ‘एवंरूपो सियं अनागतमद्धान’न्ति तत्थ नन्दिं समन्नानेति, ‘एवंवेदनो सियं… एवंसञ्ञो सियं… एवंसङ्खारो सियं… एवंविञ्ञाणो सियं अनागतमद्धान’न्ति तत्थ नन्दिं समन्नानेति. एवं खो, गहपति, पुरेक्खरानो होति.

‘‘कथञ्च, गहपति, अपुरेक्खरानो होति? इध, गहपति, एकच्चस्स भिक्खुनो एवं होति – ‘एवंरूपो सियं अनागतमद्धान’न्ति न तत्थ नन्दिं समन्नानेति, ‘एवंवेदनो सियं… एवंसञ्ञो सियं… एवंसङ्खारो सियं… एवंविञ्ञाणो सियं अनागतमद्धान’न्ति न तत्थ नन्दिं समन्नानेति. एवं खो, गहपति, अपुरेक्खरानो होति.

‘‘कथञ्च, गहपति, कथं विग्गय्ह जनेन कत्ता होति? इध, गहपति, एकच्चो एवरूपिं कथं कत्ता होति – ‘न त्वं इमं धम्मविनयं आजानासि, अहं इमं धम्मविनयं आजानामि, किं त्वं इमं धम्मविनयं आजानिस्ससि, मिच्छापटिपन्नो त्वमसि, अहमस्मि सम्मापटिपन्नो, सहितं मे, असहितं ते, पुरे वचनीयं पच्छा अवच, पच्छा वचनीयं पुरे अवच, अधिचिण्णं ते विपरावत्तं, आरोपितो ते वादो, निग्गहितो त्वमसि, चर वादप्पमोक्खाय, निब्बेठेहि वा सचे पहोसी’ति. एवं खो, गहपति, कथं विग्गय्ह जनेन कत्ता होति.

‘‘कथञ्च, गहपति, कथं विग्गय्ह जनेन न कत्ता होति? इध, गहपति, एकच्चो न एवरूपिं कथं कत्ता होति – ‘न त्वं इमं धम्मविनयं आजानासि…पे… निब्बेठेहि वा सचे पहोसी’ति. एवं खो, गहपति, विग्गय्ह जनेन न कत्ता होति. इति खो, गहपति, यं तं वुत्तं भगवता अट्ठकवग्गिके मागण्डियपञ्हे –

‘‘ओकं पहाय अनिकेतसारी, गामे अकुब्बं मुनि सन्थवानि;

कामेहि रित्तो अपुरेक्खरानो, कथं न विग्गय्ह जनेन कयिरा’’ति.

‘‘इमस्स खो, गहपति, भगवता सङ्खित्तेन भासितस्स एवं वित्थारेन अत्थो दट्ठब्बो’’ति.

तेनाह भगवा –

‘‘ओकं पहाय अनिकेतसारी, गामे अकुब्बं मुनि सन्थवानि;

कामेहि रित्तो अपुरेक्खरानो, कथं न विग्गय्ह जनेन कयिरा’’ति.

८०.

येहि विवित्तो विचरेय्य लोके, न तानि उग्गय्ह वदेय्य नागो;

एलम्बुजं कण्डकवारिजं [कण्टकं वारिजं (सी.)] यथा, जलेन पङ्केन चनूपलित्तं;

एवं मुनी सन्तिवादो अगिद्धो, कामे च लोके च अनूपलित्तो.

येहि विवित्तो विचरेय्य लोकेति. येहीति येहि दिट्ठिगतेहि. विवित्तोति कायदुच्चरितेन रित्तो विवित्तो पविवित्तो, वचीदुच्चरितेन… मनोदुच्चरितेन… रागेन…पे… सब्बाकुसलाभिसङ्खारेहि रित्तो विवित्तो पविवित्तो. विचरेय्याति विचरेय्य विहरेय्य इरियेय्य वत्तेय्य पालेय्य यपेय्य यापेय्य. लोकेति मनुस्सलोकेति – येहि विवित्तो विचरेय्य लोके.

न तानि उग्गय्ह वदेय्य नागोति. नागोति आगुं न करोतीति – नागो, न गच्छतीति – नागो, नागच्छतीति – नागो. कथं आगुं न करोतीति – नागो? आगू वुच्चन्ति पापका अकुसला धम्मा संकिलेसिका पोनोभविका सदरा दुक्खविपाका आयतिं जातिजरामरणिया.

आगुं न करोति किञ्चि लोके, [सभियाति भगवा]

सब्बसञ्ञोगे विसज्ज बन्धनानि;

सब्बत्थ न सज्जति विमुत्तो, नागो तादी पवुच्चते तथत्ता.

एवं आगुं न करोतीति – नागो.

कथं न गच्छतीति – नागो? न छन्दागतिं गच्छति, न दोसागतिं गच्छति, न मोहागतिं गच्छति, न भयागतिं गच्छति, न रागवसेन गच्छति, न दोसवसेन गच्छति, न मोहवसेन गच्छति, न मानवसेन गच्छति, न दिट्ठिवसेन गच्छति, न उद्धच्चवसेन गच्छति, न विचिकिच्छावसेन गच्छति, नानुसयवसेन गच्छति, न वग्गेहि धम्मेहि यायति नीयति वुय्हति संहरीयति. एवं न गच्छतीति – नागो.

कथं नागच्छतीति – नागो? सोतापत्तिमग्गेन ये किलेसा पहीना ते किलेसे न पुनेति न पच्चेति न पच्चागच्छति. सकदागामिमग्गेन… अनागामिमग्गेन… अरहत्तमग्गेन ये किलेसा पहीना ते किलेसे न पुनेति न पच्चेति न पच्चागच्छति. एवं नागच्छतीति – नागो.

न तानि उग्गय्ह वदेय्य नागोति. नागो न तानि दिट्ठिगतानि गहेत्वा उग्गहेत्वा गण्हित्वा परामसित्वा अभिनिविसित्वा वदेय्य कथेय्य भणेय्य दीपयेय्य वोहरेय्य; ‘‘सस्सतो लोको…पे… नेव होति न न होति तथागतो परं मरणा, इदमेव सच्चं मोघमञ्ञ’’न्ति वदेय्य कथेय्य भणेय्य दीपयेय्य वोहरेय्याति – न तानि उग्गय्ह वदेय्य नागो.

एलम्बुजं कण्डकवारिजं यथा, जलेन पङ्केन चनूपलित्तन्ति. एलं वुच्चति उदकं, अम्बुजं वुच्चति पदुमं, कण्डको वुच्चति खरदण्डो, वारि वुच्चति उदकं, वारिजं वुच्चति पदुमं वारिसम्भवं, जलं वुच्चति उदकं, पङ्को वुच्चति कद्दमो. यथा पदुमं वारिजं वारिसम्भवं जलेन च पङ्केन च न लिम्पति न पलिम्पति न उपलिम्पति, अलित्तं असंलित्तं अनुपलित्तन्ति – एलम्बुजं कण्डकवारिजं यथा जलेन पङ्केन चनूपलित्तं.

एवं मुनी सन्तिवादो अगिद्धो, कामे च लोके च अनूपलित्तोति. एवन्ति ओपम्मसंपटिपादनं. मुनीति. मोनं वुच्चति ञाणं…पे… सङ्गजालमतिच्च सो मुनि. सन्तिवादोति सन्तिवादो मुनि ताणवादो लेणवादो सरणवादो अभयवादो अच्चुतवादो अमतवादो निब्बानवादोति – एवं मुनि सन्तिवादो. अगिद्धोति. गेधो वुच्चति तण्हा. यो रागो सारागो…पे… अभिज्झा लोभो अकुसलमूलं. यस्सेसो गेधो पहीनो समुच्छिन्नो वूपसन्तो पटिपस्सद्धो अभब्बुप्पत्तिको ञाणग्गिना दड्ढो सो वुच्चति अगिद्धो. सो रूपे अगिद्धो, सद्दे… गन्धे… रसे… फोट्ठब्बे… कुले… गणे… आवासे… लाभे… यसे… पसंसाय… सुखे… चीवरे… पिण्डपाते … सेनासने… गिलानपच्चयभेसज्जपरिक्खारे… कामधातुया … रूपधातुया… अरूपधातुया… कामभवे… रूपभवे… अरूपभवे… सञ्ञाभवे… असञ्ञाभवे… नेवसञ्ञानासञ्ञाभवे… एकवोकारभवे… चतुवोकारभवे… पञ्चवोकारभवे… अतीते… अनागते… पच्चुप्पन्ने… दिट्ठ-सुत-मुत-विञ्ञातब्बेसु धम्मेसु अगिद्धो अगधितो अमुच्छितो अनज्झोसन्नो [अनज्झापन्नो (सी.), अनज्झोपन्नो (स्या.)], वीतगेधो विगतगेधो चत्तगेधो वन्तगेधो मुत्तगेधो पहीनगेधो पटिनिस्सट्ठगेधो, वीतरागो विगतरागो चत्तरागो वन्तरागो मुत्तरागो पहीनरागो पटिनिस्सट्ठरागो, निच्छातो निब्बुतो सीतिभूतो सुखप्पटिसंवेदी ब्रह्मभूतेन अत्तना विहरतीति – एवं मुनि सन्तिवादो अगिद्धो.

कामे च लोके च अनूपलित्तोति. कामाति उदानतो द्वे कामा – वत्थुकामा च किलेसकामा च…पे… इमे वुच्चन्ति वत्थुकामा…पे… इमे वुच्चन्ति किलेसकामा. लोकेति अपायलोके मनुस्सलोके देवलोके खन्धलोके धातुलोके आयतनलोके. लेपाति द्वे लेपा – तण्हालेपो च दिट्ठिलेपो च…पे… अयं तण्हालेपो…पे… अयं दिट्ठिलेपो. मुनि तण्हालेपं पहाय दिट्ठिलेपं पटिनिस्सज्जित्वा कामे च लोके च न लिम्पति न पलिम्पति न उपलिम्पति, अलित्तो अपलित्तो अनुपलित्तो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – एवं मुनी सन्तिवादो अगिद्धो, कामे च लोके च अनूपलित्तो.

तेनाह भगवा –

‘‘येहि विवित्तो विचरेय्य लोके, न तानि उग्गय्ह वदेय्य नागो;

एलम्बुजं कण्डकवारिजं यथा, जलेन पङ्केन चनूपलित्तं;

एवं मुनी सन्तिवादो अगिद्धो, कामे च लोके च अनूपलित्तो’’ति.

८१.

न वेदगू दिट्ठिया [दिट्ठियायको (क. अट्ठ.) सु. नि. ८५२] न मुतिया, स मानमेति न हि तम्मयो सो;

न कम्मुना नोपि सुतेन नेय्यो, अनूपनीतो स निवेसनेसु.

न वेदगू दिट्ठिया न मुतिया, स मानमेतीति. नाति पटिक्खेपो. वेदगूति. वेदो वुच्चति चतूसु मग्गेसु ञाणं, पञ्ञा पञ्ञिन्द्रियं पञ्ञाबलं धम्मविचयसम्बोज्झङ्गो वीमंसा विपस्सना सम्मादिट्ठि. तेहि वेदेहि जातिजरामरणस्स अन्तगतो अन्तप्पत्तो, कोटिगतो कोटिप्पत्तो, परियन्तगतो परियन्तप्पत्तो, वोसानगतो वोसानप्पत्तो, ताणगतो ताणप्पत्तो, लेणगतो लेणप्पत्तो, सरणगतो सरणप्पत्तो, अभयगतो अभयप्पत्तो, अच्चुतगतो अच्चुतप्पत्तो, अमतगतो अमतप्पत्तो, निब्बानगतो निब्बानप्पत्तो, वेदानं वा अन्तं गतोति वेदगू, वेदेहि वा अन्तं गतोति वेदगू, सत्तन्नं वा धम्मानं विदितत्ता वेदगू, सक्कायदिट्ठि विदिता होति, विचिकिच्छा विदिता होति, सीलब्बतपरामासो विदितो होति, रागो विदितो होति, दोसो विदितो होति, मोहो विदितो होति, मानो विदितो होति, विदितास्स होन्ति पापका अकुसला धम्मा संकिलेसिका पोनोभविका सदरा दुक्खविपाका आयतिं जातिजरामरणिया.

वेदानि विचेय्य केवलानि, [सभियाति भगवा]

समणानं यानीधत्थि ब्राह्मणानं;

सब्बवेदनासु वीतरागो, सब्बं वेदमतिच्च वेदगू सोति.

न दिट्ठियाति तस्स द्वासट्ठि दिट्ठिगतानि पहीनानि समुच्छिन्नानि वूपसन्तानि पटिपस्सद्धानि अभब्बुप्पत्तिकानि ञाणग्गिना दड्ढानि. सो दिट्ठिया न यायति न नीयति न वुय्हति न संहरीयति, नपि तं दिट्ठिगतं सारतो पच्चेति न पच्चागच्छतीति – न वेदगू दिट्ठिया. न मुतियाति मुतरूपेन वा परतो घोसेन वा महाजनसम्मुतिया वा मानं नेति न उपेति न उपगच्छति न गण्हाति न परामसति नाभिनिविसतीति – न वेदगू दिट्ठिया न मुतिया स मानमेति.

न हि तम्मयो सोति न तण्हावसेन दिट्ठिवसेन तम्मयो होति तप्परमो तप्परायनो. यतो तण्हा च दिट्ठि च मानो चस्स पहीना होन्ति उच्छिन्नमूला तालावत्थुकता अनभावंकता आयतिं अनुप्पादधम्मा एत्तावता न तम्मयो होति न तप्परमो न तप्परायनोति – स मानमेति न हि तम्मयो सो.

न कम्मुना नोपि सुतेन नेय्योति. न कम्मुनाति पुञ्ञाभिसङ्खारेन वा अपुञ्ञाभिसङ्खारेन वा आनेञ्जाभिसङ्खारेन वा न यायति न नीयति न वुय्हति न संहरीयतीति – न कम्मुना. नोपि सुतेन नेय्योति सुतसुद्धिया वा परतो घोसेन वा महाजनसम्मुतिया वा न यायति न नीयति न वुय्हति न संहरीयतीति – न कम्मुना नोपि सुतेन नेय्यो.

अनूपनीतो स निवेसनेसूति. उपयाति द्वे उपया – तण्हूपयो च दिट्ठूपयो च…पे… अयं तण्हूपयो…पे… अयं दिट्ठूपयो. तस्स तण्हूपयो पहीनो, दिट्ठूपयो पटिनिस्सट्ठो. तण्हूपयस्स पहीनत्ता, दिट्ठूपयस्स पटिनिस्सट्ठत्ता सो निवेसनेसु अनूपनीतो अनुपलित्तो अनुपगतो अनज्झोसितो अनधिमुत्तो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – अनूपनीतो स निवेसनेसु.

तेनाह भगवा –

‘‘न वेदगू दिट्ठिया न मुतिया, स मानमेति न हि तम्मयो सो;

न कम्मुना नोपि सुतेन नेय्यो, अनूपनीतो स निवेसनेसू’’ति.

८२.

सञ्ञाविरत्तस्स न सन्ति गन्था, पञ्ञाविमुत्तस्स न सन्ति मोहा;

सञ्ञञ्च दिट्ठिञ्च ये अग्गहेसुं, ते घट्टमाना [घट्टयन्ता (स्या.) सु. नि. ८५३] विचरन्ति लोके.

सञ्ञाविरत्तस्स न सन्ति गन्थाति. यो समथपुब्बङ्गमं अरियमग्गं भावेति तस्स आदितो उपादाय गन्था विक्खम्भिता होन्ति, अरहत्ते पत्ते अरहतो गन्था च मोहा च नीवरणा च कामसञ्ञा ब्यापादसञ्ञा विहिंसासञ्ञा दिट्ठिसञ्ञा च पहीना होन्ति उच्छिन्नमूला तालावत्थुकता अनभावंकता आयतिं अनुप्पादधम्माति – सञ्ञाविरत्तस्स न सन्ति गन्था.

पञ्ञाविमुत्तस्स न सन्ति मोहाति. यो विपस्सनापुब्बङ्गमं अरियमग्गं भावेति, तस्स आदितो उपादाय मोहा विक्खम्भिता होन्ति, अरहत्ते पत्ते अरहतो मोहा च गन्था च नीवरणा च कामसञ्ञा ब्यापादसञ्ञा विहिंसासञ्ञा दिट्ठिसञ्ञा च पहीना होन्ति उच्छिन्नमूला तालावत्थुकता अनभावंकता आयतिं अनुप्पादधम्माति – पञ्ञाविमुत्तस्स न सन्ति मोहा.

सञ्ञञ्च दिट्ठिञ्च ये अग्गहेसुं, ते घट्टमाना विचरन्ति लोकेति. ये सञ्ञं गण्हन्ति कामसञ्ञं ब्यापादसञ्ञं विहिंसासञ्ञं ते सञ्ञावसेन घट्टेन्ति सङ्घट्टेन्ति. राजानोपि राजूहि विवदन्ति, खत्तियापि खत्तियेहि विवदन्ति, ब्राह्मणापि ब्राह्मणेहि विवदन्ति, गहपतीपि गहपतीहि विवदन्ति, मातापि पुत्तेन विवदति, पुत्तोपि मातरा विवदति, पितापि पुत्तेन विवदति, पुत्तोपि पितरा विवदति, भातापि भातरा विवदति, भगिनीपि भगिनिया विवदति, भातापि भगिनिया विवदति, भगिनीपि भातरा विवदति, सहायोपि सहायेन विवदति. ते तत्थ कलहविग्गहविवादमापन्ना अञ्ञमञ्ञं पाणीहिपि उपक्कमन्ति, लेड्डूहिपि [लेट्टूहिपि (क.)] उपक्कमन्ति, दण्डेहिपि उपक्कमन्ति, सत्थेहिपि उपक्कमन्ति. ते तत्थ मरणम्पि निगच्छन्ति मरणमत्तम्पि दुक्खं. ये दिट्ठिं गण्हन्ति ‘‘सस्सतो लोको’’ति वा…पे… ‘‘नेव होति न न होति तथागतो परं मरणा’’ति वा ते दिट्ठिवसेन घट्टेन्ति सङ्घट्टेन्ति, सत्थारतो सत्थारं घट्टेन्ति, धम्मक्खानतो धम्मक्खानं घट्टेन्ति, गणतो गणं घट्टेन्ति, दिट्ठिया दिट्ठिं घट्टेन्ति, पटिपदाय पटिपदं घट्टेन्ति, मग्गतो मग्गं घट्टेन्ति.

अथ वा ते विवदन्ति, कलहं करोन्ति, भण्डनं करोन्ति, विग्गहं करोन्ति, विवादं करोन्ति, मेधगं करोन्ति – ‘‘न त्वं इमं धम्मविनयं आजानासि…पे… निब्बेठेहि वा सचे पहोसी’’ति. तेसं अभिसङ्खारा अप्पहीना; अभिसङ्खारानं अप्पहीनत्ता गतिया घट्टेन्ति, निरये घट्टेन्ति, तिरच्छानयोनिया घट्टेन्ति, पेत्तिविसये घट्टेन्ति, मनुस्सलोके घट्टेन्ति, देवलोके घट्टेन्ति, गतिया गतिं… उपपत्तिया उपपत्तिं… पटिसन्धिया पटिसन्धिं… भवेन भवं… संसारेन संसारं… वट्टेन वट्टं घट्टेन्ति सङ्घट्टेन्ति वदन्ति विचरन्ति विहरन्ति इरियन्ति वत्तेन्ति पालेन्ति यपेन्ति यापेन्ति. लोकेति अपायलोके…पे… आयतनलोकेति – सञ्ञञ्च दिट्ठिञ्च ये अग्गहेसुं ते घट्टमाना विचरन्ति लोके.

तेनाह भगवा –

‘‘सञ्ञाविरत्तस्स न सन्ति गन्था, पञ्ञाविमुत्तस्स न सन्ति मोहा;

सञ्ञञ्च दिट्ठिञ्च ये अग्गहेसुं, ते घट्टमाना विचरन्ति लोके’’ति.

मागण्डियसुत्तनिद्देसो नवमो.

१०. पुराभेदसुत्तनिद्देसो

अथ पुराभेदसुत्तनिद्देसं वक्खति –

८३.

कथंदस्सी कथंसीलो, उपसन्तोति वुच्चति;

तं मे गोतम पब्रूहि, पुच्छितो उत्तमं नरं.

कथंदस्सी कथंसीलो, उपसन्तोति वुच्चतीति. कथंदस्सीति कीदिसेन दस्सनेन समन्नागतो, किंसण्ठितेन, किंपकारेन, किंपटिभागेनाति – कथंदस्सी. कथंसीलोति कीदिसेन सीलेन समन्नागतो, किंसण्ठितेन, किंपकारेन, किंपटिभागेनाति – कथंदस्सी कथंसीलो. उपसन्तोति वुच्चतीति सन्तो उपसन्तो वूपसन्तो निब्बुतो पटिपस्सद्धोति वुच्चति पवुच्चति कथीयति भणीयति दीपीयति वोहरीयति. कथंदस्सीति अधिपञ्ञं पुच्छति, कथंसीलोति अधिसीलं पुच्छति, उपसन्तोति अधिचित्तं पुच्छतीति – कथंदस्सी कथंसीलो उपसन्तोति वुच्चति.

तं मे गोतम पब्रूहीति. तन्ति यं पुच्छामि, यं याचामि, यं अज्झेसामि, यं पसादेमि. गोतमाति सो निम्मितो बुद्धं भगवन्तं गोत्तेन आलपति. पब्रूहीति ब्रूहि आचिक्ख देसेहि पञ्ञपेहि पट्ठपेहि विवर विभज उत्तानीकरोहि पकासेहीति – तं मे गोतम पब्रूहि.

पुच्छितो उत्तमं नरन्ति. पुच्छितोति पुट्ठो पुच्छितो याचितो अज्झेसितो पसादितो. उत्तमं नरन्ति अग्गं सेट्ठं विसिट्ठं पामोक्खं उत्तमं पवरं नरन्ति – पुच्छितो उत्तमं नरं.

तेनाह सो निम्मितो –

‘‘कथंदस्सी कथंसीलो, उपसन्तोति वुच्चति;

तं मे गोतम पब्रूहि, पुच्छितो उत्तमं नर’’न्ति.

८४.

वीततण्हो पुराभेदा, [इति भगवा]

पुब्बमन्तमनिस्सितो;

वेमज्झे नुपसङ्खेय्यो,

तस्स नत्थि पुरक्खतं.

वीततण्हो पुराभेदाति. पुरा कायस्स भेदा, पुरा अत्तभावस्स भेदा, पुरा कळेवरस्स निक्खेपा, पुरा जीवितिन्द्रियस्स उपच्छेदा वीततण्हो विगततण्हो चत्ततण्हो वन्ततण्हो मुत्ततण्हो पहीनतण्हो पटिनिस्सट्ठतण्हो, वीतरागो विगतरागो चत्तरागो वन्तरागो मुत्तरागो पहीनरागो पटिनिस्सट्ठरागो, निच्छातो निब्बुतो सीतिभूतो सुखप्पटिसंवेदी ब्रह्मभूतेन अत्तना विहरति.

भगवाति गारवाधिवचनं. अपि च भग्गरागोति भगवा, भग्गदोसोति भगवा, भग्गमोहोति भगवा, भग्गमानोति भगवा, भग्गदिट्ठीति भगवा, भग्गतण्होति भगवा, भग्गकिलेसोति भगवा, भजि विभजि पविभजि धम्मरतनन्ति भगवा, भवानं अन्तकरोति भगवा, भावितकायो भावितसीलो भावितचित्तो भावितपञ्ञोति भगवा, भजि वा भगवा अरञ्ञवनपत्थानि पन्तानि सेनासनानि अप्पसद्दानि अप्पनिग्घोसानि विजनवातानि मनुस्सराहस्सेय्यकानि पटिसल्लानसारुप्पानीति भगवा, भागी वा भगवा चीवरपिण्डपातसेनासनगिलानपच्चयभेसज्जपरिक्खारानन्ति भगवा, भागी वा भगवा अत्थरसस्स धम्मरसस्स विमुत्तिरसस्स अधिसीलस्स अधिचित्तस्स अधिपञ्ञायाति भगवा, भागी वा भगवा चतुन्नं झानानं चतुन्नं अप्पमञ्ञानं चतुन्नं अरूपसमापत्तीनन्ति भगवा, भागी वा भगवा अट्ठन्नं विमोक्खानं अट्ठन्नं अभिभायतनानं नवन्नं अनुपुब्बविहारसमापत्तीनन्ति भगवा, भागी वा भगवा दसन्नं पञ्ञाभावनानं दसन्नं कसिणसमापत्तीनं आनापानस्सतिसमाधिस्स असुभसमापत्तियाति भगवा, भागी वा भगवा चतुन्नं सतिपट्ठानानं चतुन्नं सम्मप्पधानानं चतुन्नं इद्धिपादानं पञ्चन्नं इन्द्रियानं पञ्चन्नं बलानं सत्तन्नं बोज्झङ्गानं अरियस्स अट्ठङ्गिकस्स मग्गस्साति भगवा, भागी वा भगवा दसन्नं तथागतबलानं चतुन्नं वेसारज्जानं चतुन्नं पटिसम्भिदानं छन्नं अभिञ्ञानं छन्नं बुद्धधम्मानन्ति भगवा. भगवाति नेतं नामं मातरा कतं, न पितरा कतं, न भातरा कतं, न भगिनिया कतं, न मित्तामच्चेहि कतं, न ञातिसालोहितेहि कतं, न समणब्राह्मणेहि कतं, न देवताहि कतं; विमोक्खन्तिकमेतं बुद्धानं भगवन्तानं बोधिया मूले सह सब्बञ्ञुतञाणस्स पटिलाभा सच्छिका पञ्ञत्ति यदिदं भगवाति – वीततण्हो पुराभेदाति भगवा.

पुब्बमन्तमनिस्सितोति पुब्बन्तो वुच्चति अतीतो अद्धा. अतीतं अद्धानं आरब्भ तण्हा पहीना, दिट्ठि पटिनिस्सट्ठा तण्हाय पहीनत्ता, दिट्ठिया पटिनिस्सट्ठत्ता. एवम्पि पुब्बमन्तमनिस्सितो. अथ वा ‘‘एवंरूपो अहोसिं अतीतमद्धान’’न्ति तत्थ नन्दिं न समन्नानेति, ‘‘एवंवेदनो अहोसिं… एवंसञ्ञो अहोसिं… एवंसङ्खारो अहोसिं… एवंविञ्ञाणो अहोसिं अतीतमद्धान’’न्ति तत्थ नन्दिं न समन्नानेति. एवम्पि पुब्बमन्तमनिस्सितो. अथ वा ‘‘इति मे चक्खु [चक्खुं (सी. क.)] अहोसि अतीतमद्धानं – इति रूपा’’ति तत्थ न छन्दरागपटिबद्धं होति विञ्ञाणं, न छन्दरागपटिबद्धत्ता विञ्ञाणस्स न तदभिनन्दति; न तदभिनन्दन्तो. एवम्पि पुब्बमन्तमनिस्सितो. ‘‘इति मे सोतं अहोसि अतीतमद्धानं – इति सद्दा’’ति, ‘‘इति मे घानं अहोसि अतीतमद्धानं – इति गन्धा’’ति, ‘‘इति मे जिव्हा अहोसि अतीतमद्धानं – इति रसा’’ति, ‘‘इति मे कायो अहोसि अतीतमद्धानं – इति फोट्ठब्बा’’ति, ‘‘इति मे मनो अहोसि अतीतमद्धानं – इति धम्मा’’ति तत्थ न छन्दरागपटिबद्धं होति विञ्ञाणं, न छन्दरागपटिबद्धत्ता विञ्ञाणस्स न तदभिनन्दति; न तदभिनन्दन्तो. एवम्पि पुब्बमन्तमनिस्सितो. अथ वा यानि तानि पुब्बे मातुगामेन सद्धिं हसितलपितकीळितानि न तदस्सादेति, न तं निकामेति, न च तेन वित्तिं आपज्जति. एवम्पि पुब्बमन्तमनिस्सितो.

वेमज्झे नुपसङ्खेय्योति. वेमज्झं वुच्चति पच्चुप्पन्नो अद्धा. पच्चुप्पन्नं अद्धानं आरब्भ तण्हा पहीना, दिट्ठि पटिनिस्सट्ठा. तण्हाय पहीनत्ता, दिट्ठिया पटिनिस्सट्ठत्ता रत्तोति नुपसङ्खेय्यो, दुट्ठोति नुपसङ्खेय्यो, मूळ्होति नुपसङ्खेय्यो, विनिबद्धोति नुपसङ्खेय्यो, परामट्ठोति नुपसङ्खेय्यो, विक्खेपगतोति नुपसङ्खेय्यो, अनिट्ठङ्गतोति नुपसङ्खेय्यो, थामगतोति नुपसङ्खेय्यो; ते अभिसङ्खारा पहीना; अभिसङ्खारानं पहीनत्ता गतिया नुपसङ्खेय्यो, नेरयिकोति वा तिरच्छानयोनिकोति वा पेत्तिविसयिकोति वा मनुस्सोति वा देवोति वा रूपीति वा अरूपीति वा सञ्ञीति वा असञ्ञीति वा नेवसञ्ञीनासञ्ञीति वा. सो हेतु नत्थि पच्चयो नत्थि कारणं नत्थि येन सङ्खं गच्छेय्याति – वेमज्झे नुपसङ्खेय्यो.

तस्स नत्थि पुरक्खतन्ति. तस्साति अरहतो खीणासवस्स. पुरेक्खाराति द्वे पुरेक्खारा – तण्हापुरेक्खारो च दिट्ठिपुरेक्खारो च…पे… अयं तण्हापुरेक्खारो…पे… अयं दिट्ठिपुरेक्खारो. तस्स तण्हापुरेक्खारो पहीनो, दिट्ठिपुरेक्खारो पटिनिस्सट्ठो. तण्हापुरेक्खारस्स पहीनत्ता, दिट्ठिपुरेक्खारस्स पटिनिस्सट्ठत्ता न तण्हं वा दिट्ठिं वा पुरतो कत्वा चरति, न तण्हाधजो न तण्हाकेतु न तण्हाधिपतेय्यो, न दिट्ठिधजो न दिट्ठिकेतु न दिट्ठाधिपतेय्यो, न तण्हाय वा दिट्ठिया वा परिवारितो चरति. एवम्पि तस्स नत्थि पुरक्खतं. अथ वा ‘‘एवंरूपो सियं अनागतमद्धान’’न्ति तत्थ नन्दिं न समन्नानेति, ‘‘एवंवेदनो सियं… एवंसञ्ञो सियं… एवंसङ्खारो सियं… एवंविञ्ञाणो सियं अनागतमद्धान’’न्ति तत्थ नन्दिं न समन्नानेति. एवम्पि तस्स नत्थि पुरक्खतं. अथ वा ‘‘इति मे चक्खु सिया अनागतमद्धानं – इति रूपा’’ति अप्पटिलद्धस्स पटिलाभाय चित्तं न पणिदहति, चेतसो अप्पणिधानप्पच्चया न तदभिनन्दति; न तदभिनन्दन्तो. एवम्पि तस्स नत्थि पुरक्खतं. ‘‘इति मे सोतं सिया अनागतमद्धानं – इति सद्दा’’ति, ‘‘इति मे घानं सिया अनागतमद्धानं – इति गन्धा’’ति, ‘‘इति मे जिव्हा सिया अनागतमद्धानं – इति रसा’’ति, ‘‘इति मे कायो सिया अनागतमद्धानं – इति फोट्ठब्बा’’ति, ‘‘इति मे मनो सिया अनागतमद्धानं – इति धम्मा’’ति अप्पटिलद्धस्स पटिलाभाय चित्तं न पणिदहति, चेतसो अप्पणिधानप्पच्चया न तदभिनन्दति; न तदभिनन्दन्तो. एवम्पि तस्स नत्थि पुरक्खतं. अथ वा ‘‘इमिनाहं सीलेन वा वतेन वा तपेन वा ब्रह्मचरियेन वा देवो वा भविस्सामि देवञ्ञतरो’’ति वा अप्पटिलद्धस्स पटिलाभाय चित्तं न पणिदहति, चेतसो अप्पणिधानप्पच्चया न तदभिनन्दति; न तदभिनन्दतो. एवम्पि तस्स नत्थि पुरक्खतं.

तेनाह भगवा –

‘‘वीततण्हो पुराभेदा, [इति भगवा]

पुब्बमन्तमनिस्सितो;

वेमज्झे नुपसङ्खेय्यो,

तस्स नत्थि पुरक्खत’’न्ति.

८५.

अक्कोधनो असन्तासी, अविकत्थी अकुक्कुचो;

मन्तभाणी अनुद्धतो, स वे वाचायतो मुनि.

अक्कोधनो असन्तासीति. अक्कोधनोति यञ्हि खो वुत्तं. अपि च कोधो ताव वत्तब्बो. दसहाकारेहि कोधो जायति – ‘‘अनत्थं मे अचरी’’ति कोधो जायति, ‘‘अनत्थं मे चरती’’ति कोधो जायति, ‘‘अनत्थं मे चरिस्सती’’ति कोधो जायति, ‘‘पियस्स मे मनापस्स अनत्थं अचरि… अनत्थं चरति… अनत्थं चरिस्सती’’ति कोधो जायति, ‘‘अप्पियस्स मे अमनापस्स अत्थं अचरि… अत्थं चरति… अत्थं चरिस्सती’’ति कोधो जायति, अट्ठाने वा पन कोधो जायति. यो एवरूपो चित्तस्स आघातो पटिघातो, पटिघं पटिविरोधो, कोपो पकोपो सम्पकोपो, दोसो पदोसो सम्पदोसो, चित्तस्स ब्यापत्ति मनोपदोसो, कोधो कुज्झना कुज्झितत्तं, दोसो दुस्सना दुस्सितत्तं, ब्यापत्ति ब्यापज्जना ब्यापज्जितत्तं, विरोधो पटिविरोधो चण्डिक्कं, असुरोपो [अस्सुरोपो (सी. क.)] अनत्तमनता चित्तस्स – अयं वुच्चति कोधो.

अपि च कोधस्स अधिमत्तपरित्तता वेदितब्बा. अत्थि कञ्चि [किञ्चि (क.)] कालं कोधो चित्ताविलकरणमत्तो होति, न च ताव मुखकुलानविकुलानो होति; अत्थि कञ्चि कालं कोधो मुखकुलानविकुलानमत्तो होति, न च ताव हनुसञ्चोपनो होति; अत्थि कञ्चि कालं कोधो हनुसञ्चोपनमत्तो होति, न च ताव फरुसवाचं निच्छारणो [फरुसवाचनिच्छारणो (स्या.)] होति; अत्थि कञ्चि कालं कोधो फरुसवाचं निच्छारणमत्तो होति, न च ताव दिसाविदिसानुविलोकनो होति; अत्थि कञ्चि कालं कोधो दिसाविदिसानुविलोकनमत्तो होति, न च ताव दण्डसत्थपरामसनो होति; अत्थि कञ्चि कालं कोधो दण्डसत्थपरामसनमत्तो होति, न च ताव दण्डसत्थअब्भुक्किरणो होति; अत्थि कञ्चि कालं कोधो दण्डसत्थअब्भुक्किरणमत्तो होति, न च ताव दण्डसत्थअभिनिपातनो होति; अत्थि कञ्चि कालं कोधो दण्डसत्थअभिनिपातमत्तो होति, न च ताव छिन्नविच्छिन्नकरणो होति; अत्थि कञ्चि कालं कोधो छिन्नविच्छिन्नकरणमत्तो होति, न च ताव सम्भञ्जनपलिभञ्जनो होति; अत्थि कञ्चि कालं कोधो सम्भञ्जनपलिभञ्जनमत्तो होति, न च ताव अङ्गमङ्गअपकड्ढनो होति; अत्थि कञ्चि कालं कोधो अङ्गमङ्गअपकड्ढनमत्तो होति, न च ताव जीवितावोरोपनो [जीवितपनासनो (स्या.)] होति; अत्थि कञ्चि कालं कोधो जीवितावोरोपनमत्तो होति, न च ताव सब्बचागपरिच्चागाय सण्ठितो होति. यतो कोधो परपुग्गलं घाटेत्वा अत्तानं घाटेति, एत्तावता कोधो परमुस्सदगतो परमवेपुल्लप्पत्तो होति. यस्स सो कोधो पहीनो समुच्छिन्नो वूपसन्तो पटिपस्सद्धो अभब्बुप्पत्तिको ञाणग्गिना दड्ढो, सो वुच्चति अक्कोधनो. कोधस्स पहीनत्ता अक्कोधनो, कोधवत्थुस्स परिञ्ञातत्ता अक्कोधनो, कोधहेतुस्स उपच्छिन्नत्ता अक्कोधनोति – अक्कोधनो.

असन्तासीति इधेकच्चो तासी होति उत्तासी परित्तासी, सो तसति न उत्तसति परित्तसति भायति सन्तासं आपज्जति. कुलं वा न लभामि, गणं वा न लभामि, आवासं वा न लभामि, लाभं वा न लभामि, यसं वा न लभामि, पसंसं वा न लभामि, सुखं वा न लभामि, चीवरं वा न लभामि, पिण्डपातं वा न लभामि, सेनासनं वा न लभामि, गिलानपच्चयभेसज्जपरिक्खारं वा न लभामि, गिलानुपट्ठाकं वा न लभामि, अप्पञ्ञातोम्हीति तसति उत्तसति परित्तसति भायति सन्तासं आपज्जति.

इध भिक्खु असन्तासी होति अनुत्तासी अपरित्तासी; सो न तसति न उत्तसति न परित्तसति न भायति न सन्तासं आपज्जति. कुलं वा न लभामि, गणं वा न लभामि, आवासं वा न लभामि, लाभं वा न लभामि, यसं वा न लभामि, पसंसं वा न लभामि, सुखं वा न लभामि, चीवरं वा न लभामि, पिण्डपातं वा न लभामि, सेनासनं वा न लभामि, गिलानपच्चयभेसज्जपरिक्खारं वा न लभामि, गिलानुपट्ठाकं वा न लभामि, अप्पञ्ञातोम्हीति न तसति न उत्तसति न परित्तसति न भायति न सन्तासं आपज्जतीति – अक्कोधनो असन्तासी.

अविकत्थी अकुक्कुचोति. इधेकच्चो कत्थी होति विकत्थी, सो कत्थति विकत्थति – अहमस्मि सीलसम्पन्नोति वा वतसम्पन्नोति वा सीलब्बतसम्पन्नोति वा जातिया वा गोत्तेन वा कोलपुत्तियेन वा वण्णपोक्खरताय वा धनेन वा अज्झेनेन वा कम्मायतनेन वा सिप्पायतनेन वा विज्जाट्ठानेन वा सुतेन वा पटिभानेन वा अञ्ञतरञ्ञतरेन वा वत्थुना. उच्चा कुला पब्बजितोति वा महाकुला पब्बजितोति वा, महाभोगकुला पब्बजितोति वा उळारभोगकुला पब्बजितोति वा, ञातो यसस्सी गहट्ठपब्बजितानन्ति वा, लाभिम्हि चीवरपिण्डपातसेनासनगिलानपच्चयभेसज्जपरिक्खारानन्ति वा, सुत्तन्तिकोति वा विनयधरोति वा धम्मकथिकोति वा, आरञ्ञिकोति वा पिण्डपातिकोति वा पंसुकूलिकोति वा तेचीवरिकोति वा, सपदानचारिकोति वा खलुपच्छाभत्तिकोति वा नेसज्जिकोति वा यथासन्थतिकोति वा, पठमस्स झानस्स लाभीति वा दुतियस्स झानस्स लाभीति वा ततियस्स झानस्स लाभीति वा चतुत्थस्स झानस्स लाभीति वा, आकासानञ्चायतनसमापत्तिया… विञ्ञाणञ्चायतनसमापत्तिया… आकिञ्चञ्ञायतनसमापत्तिया… नेवसञ्ञानासञ्ञायतनसमापत्तिया लाभीति वा कत्थति विकत्थति. एवं न कत्थति न विकत्थति, कत्थना विकत्थना आरतो विरतो पटिविरतो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – अविकत्थी.

अकुक्कुचोति. कुक्कुच्चन्ति हत्थकुक्कुच्चम्पि कुक्कुच्चं, पादकुक्कुच्चम्पि कुक्कुच्चं, हत्थपादकुक्कुच्चम्पि कुक्कुच्चं, अकप्पिये कप्पियसञ्ञिता कप्पिये अकप्पियसञ्ञिता, विकाले कालसञ्ञिता काले विकालसञ्ञिता, अवज्जे वज्जसञ्ञिता वज्जे अवज्जसञ्ञिता; यं एवरूपं कुक्कुच्चं कुक्कुच्चायना कुक्कुच्चायितत्तं चेतसो विप्पटिसारो मनोविलेखो – इदं वुच्चति कुक्कुच्चं.

अपि च द्वीहि कारणेहि उप्पज्जति कुक्कुच्चं चेतसो विप्पटिसारो मनोविलेखो कतत्ता च अकतत्ता च. कथं कतत्ता च अकतत्ता च उप्पज्जति कुक्कुच्चं चेतसो विप्पटिसारो मनोविलेखो? ‘‘कतं मे कायदुच्चरितं, अकतं मे कायसुचरित’’न्तिउप्पज्जति कुक्कुच्चं चेतसो विप्पटिसारो मनोविलेखो; ‘‘कतं मे वचीदुच्चरितं, अकतं मे वचीसुचरितं… कतं मे मनोदुच्चरितं, अकतं मे मनोसुचरित’’न्ति – उप्पज्जति कुक्कुच्चं चेतसो विप्पटिसारो मनोविलेखो; ‘‘कतो मे पाणातिपातो, अकता मे पाणातिपाता वेरमणी’’ति – उप्पज्जति कुक्कुच्चं चेतसो विप्पटिसारो मनोविलेखो; ‘‘कतं मे अदिन्नादानं, अकता मे अदिन्नादाना वेरमणी’’ति – उप्पज्जति कुक्कुच्चं चेतसो विप्पटिसारो मनोविलेखो; ‘‘कतो मे कामेसुमिच्छाचारो, अकता मे कामेसुमिच्छाचारा वेरमणी’’ति – उप्पज्जति कुक्कुच्चं चेतसो विप्पटिसारो मनोविलेखो; ‘‘कतो मे मुसावादो, अकता मे मुसावादा वेरमणी’’ति… ‘‘कता मे पिसुणा वाचा, अकता मे पिसुणाय वाचाय वेरमणी’’ति… ‘‘कता मे फरुसा वाचा, अकता मे फरुसाय वाचाय वेरमणी’’ति… ‘‘कतो मे सम्फप्पलापो, अकता मे सम्फप्पलापा वेरमणी’’ति… ‘‘कता मे अभिज्झा, अकता मे अनभिज्झा’’ति… ‘‘कतो मे ब्यापादो, अकतो मे अब्यापादो’’ति… ‘‘कता मे मिच्छादिट्ठि, अकता मे सम्मादिट्ठी’’ति – उप्पज्जति कुक्कुच्चं चेतसो विप्पटिसारो मनोविलेखो. एवं कतत्ता च अकतत्ता च उप्पज्जति कुक्कुच्चं चेतसो विप्पटिसारो मनोविलेखो.

अथ वा ‘‘सीलेसुम्हि न परिपूरकारी’’ति – उप्पज्जति कुक्कुच्चं चेतसो विप्पटिसारो मनोविलेखो; ‘‘इन्द्रियेसुम्हि अगुत्तद्वारो’’ति… ‘‘भोजने अमत्तञ्ञुम्ही’’ति… ‘‘जागरियं अननुयुत्तोम्ही’’ति… ‘‘न सतिसम्पजञ्ञेन समन्नागतोम्ही’’ति… ‘‘अभाविता मे चत्तारो सतिपट्ठाना’’ति… ‘‘अभाविता मे चत्तारो सम्मप्पधाना’’ति… ‘‘अभाविता मे चत्तारो इद्धिपादा’’ति… ‘‘अभावितानि मे पञ्चिन्द्रियानी’’ति… ‘‘अभावितानि मे पञ्च बलानी’’ति… ‘‘अभाविता मे सत्त बोज्झङ्गा’’ति… ‘‘अभावितो मे अरियो अट्ठङ्गिको मग्गो’’ति… ‘‘दुक्खं मे अपरिञ्ञात’’न्ति… ‘‘समुदयो मे अप्पहीनो’’ति… ‘‘मग्गो मे अभावितो’’ति… ‘‘निरोधो मे असच्छिकतो’’ति – उप्पज्जति कुक्कुच्चं चेतसो विप्पटिसारो मनोविलेखो. यस्सेतं कुक्कुच्चं पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढं, सो वुच्चति अकुक्कुच्चोति – अविकत्थी अकुक्कुचो.

मन्तभाणी अनुद्धतोति. मन्ता वुच्चति पञ्ञा. या पञ्ञा पजानना…पे… अमोहो धम्मविचयो सम्मादिट्ठि. मन्ताय परिग्गहेत्वा परिग्गहेत्वा वाचं भासति बहुम्पि कथेन्तो बहुम्पि भणन्तो बहुम्पि दीपयन्तो बहुम्पि वोहरन्तो. दुक्कथितं दुब्भणितं दुल्लपितं दुरुत्तं दुब्भासितं वाचं न भासतीति – मन्तभाणी. अनुद्धतोति. तत्थ कतमं उद्धच्चं? यं चित्तस्स उद्धच्चं अवूपसमो चेतसो विक्खेपो भन्तत्तं चित्तस्स – इदं वुच्चति उद्धच्चं. यस्सेतं उद्धच्चं पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढं, सो वुच्चति अनुद्धतोति – मन्तभाणी अनुद्धतो.

स वे वाचायतो मुनीति. इध भिक्खु मुसावादं पहाय मुसावादा पटिविरतो होति सच्चवादी सच्चसन्धो थेतो पच्चयिको अविसंवादको लोकस्स. पिसुणं वाचं पहाय पिसुणाय वाचाय पटिविरतो होति – इतो सुत्वा न अमुत्र अक्खाता इमेसं भेदाय, अमुत्र वा सुत्वा न इमेसं अक्खाता अमूसं भेदाय. इति भिन्नानं वा सन्धाता, सहितानं वा अनुप्पदाता, समग्गारामो समग्गरतो समग्गनन्दी समग्गकरणिं वाचं भासिता होति. फरुसं वाचं पहाय फरुसाय वाचाय पटिविरतो होति – या सा वाचा नेला कण्णसुखा पेमनीया हदयङ्गमा पोरी बहुजनकन्ता बहुजनमनापा तथारूपिं वाचं भासिता होति. सम्फप्पलापं पहाय सम्फप्पलापा पटिविरतो होति – कालवादी भूतवादी अत्थवादी धम्मवादी विनयवादी निधानवतिं वाचं भासिता होति कालेन सापदेसं परियन्तवतिं अत्थसंहितं. चतूहि वचीसुचरितेहि समन्नागतो चतुद्दोसापगतं वाचं भासति, बात्तिंसाय तिरच्छानकथाय आरतो अस्स विरतो पटिविरतो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरति.

दस कथावत्थूनि कथेसि, सेय्यथिदं – अप्पिच्छकथं कथेति, सन्तुट्ठीकथं कथेति, पविवेककथं… असंसग्गकथं… वीरियारम्भकथं… सीलकथं… समाधिकथं… पञ्ञाकथं… विमुत्तिकथं … विमुत्तिञाणदस्सनकथं… सतिपट्ठानकथं… सम्मप्पधानकथं… इद्धिपादकथं… इन्द्रियकथं… बलकथं… बोज्झङ्गकथं… मग्गकथं… फलकथं… निब्बानकथं कथेति. वाचायतोति यत्तो परियत्तो गुत्तो गोपितो रक्खितो वूपसन्तो. मुनीति. मोनं वुच्चति ञाणं. या पञ्ञा पजानना…पे… अमोहो धम्मविचयो सम्मादिट्ठि…पे… सङ्गजालमतिच्च सो मुनीति – स वे वाचायतो मुनि.

तेनाह भगवा –

‘‘अक्कोधनो असन्तासी, अविकत्थी अकुक्कुचो;

मन्तभाणी अनुद्धतो, स वे वाचायतो मुनी’’ति.

८६.

निरासत्ति अनागते, अतीतं नानुसोचति;

विवेकदस्सी फस्सेसु, दिट्ठीसु च न नीयति.

निरासत्ति अनागतेति. आसत्ति वुच्चति तण्हा. यो रागो सारागो…पे… अभिज्झा लोभो अकुसलमूलं. यस्सेसा आसत्ति तण्हा पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढाति. एवम्पि निरासत्ति अनागते. अथ वा ‘‘एवंरूपो सियं अनागतमद्धान’’न्ति तत्थ नन्दिं न समन्नानेति, ‘‘एवंवेदनो सियं… एवंसञ्ञो सियं… एवंसङ्खारो सियं… एवंविञ्ञाणो सियं अनागतमद्धान’’न्ति तत्थ नन्दिं न समन्नानेति. एवम्पि निरासत्ति अनागते. अथ वा ‘‘इति मे चक्खु सिया अनागतमद्धानं – इति रूपा’’ति अप्पटिलद्धस्स पटिलाभाय चित्तं न पणिदहति, चेतसो अप्पणिधानप्पच्चया न तदभिनन्दति; न तदभिनन्दन्तो. एवम्पि निरासत्ति अनागते. ‘‘इति मे सोतं सिया अनागतमद्धानं – इति सद्दा’’ति…पे… ‘‘इति मे मनो सिया अनागतमद्धानं – इति धम्मा’’ति अप्पटिलद्धस्स पटिलाभाय चित्तं न पणिदहति, चेतसो अप्पणिधानप्पच्चया न तदभिनन्दति; न तदभिनन्दन्तो. एवम्पि निरासत्ति अनागते. अथ वा ‘‘इमिनाहं सीलेन वा वतेन वा तपेन वा ब्रह्मचरियेन वा देवो वा भविस्सामि देवञ्ञतरो वा’’ति अप्पटिलद्धस्स पटिलाभाय चित्तं न पणिदहति, चेतसो अप्पणिधानप्पच्चया न तदभिनन्दति; न तदभिनन्दन्तो. एवम्पि निरासत्ति अनागते.

अतीतं नानुसोचतीति. विपरिणतं वा वत्थुं न सोचति, विपरिणतस्मिं वा वत्थुस्मिं न सोचति, ‘‘चक्खु मे विपरिणत’’न्ति न सोचति, ‘‘सोतं मे… घानं मे… जिव्हा मे… कायो मे… रूपा मे… सद्दा मे… गन्धा मे… रसा मे… फोट्ठब्बा मे… कुलं मे… गणो मे… आवासो मे… लाभो मे… यसो मे… पसंसा मे… सुखं मे… चीवरं मे… पिण्डपातो मे… सेनासनं मे… गिलानपच्चयभेसज्जपरिक्खारो मे… माता मे… पिता मे… भाता मे… भगिनी मे… पुत्तो मे… धीता मे… मित्ता मे… अमच्चा मे… ञातका मे… सालोहिता मे विपरिणता’’ति न सोचति न किलमति न परिदेवति न उरत्ताळिं कन्दति न सम्मोहं आपज्जतीति – अतीतं नानुसोचति.

विवेकदस्सी फस्सेसूति. चक्खुसम्फस्सो सोतसम्फस्सो घानसम्फस्सो जिव्हासम्फस्सो कायसम्फस्सो मनोसम्फस्सो, अधिवचनसम्फस्सो पटिघसम्फस्सो, सुखवेदनीयो फस्सो दुक्खवेदनीयो फस्सो अदुक्खमसुखवेदनीयो फस्सो, कुसलो फस्सो अकुसलो फस्सो अब्याकतो फस्सो, कामावचरो फस्सो रूपावचरो फस्सो अरूपावचरो फस्सो, सुञ्ञतो फस्सो अनिमित्तो फस्सो अप्पणिहितो फस्सो, लोकियो फस्सो लोकुत्तरो फस्सो, अतीतो फस्सो अनागतो फस्सो पच्चुप्पन्नो फस्सो; यो एवरूपो फस्सो फुसना सम्फुसना सम्फुसितत्तं – अयं वुच्चति फस्सो.

विवेकदस्सी फस्सेसूति. चक्खुसम्फस्सं विवित्तं पस्सति अत्तेन वा अत्तनियेन वा निच्चेन वा धुवेन वा सस्सतेन वा अविपरिणामधम्मेन वा, सोतसम्फस्सं विवित्तं पस्सति… घानसम्फस्सं विवित्तं पस्सति… जिव्हासम्फस्सं विवित्तं पस्सति… कायसम्फस्सं विवित्तं पस्सति… मनोसम्फस्सं विवित्तं पस्सति… अधिवचनसम्फस्सं विवित्तं पस्सति… पटिघसम्फस्सं विवित्तं पस्सति… सुखवेदनीयं फस्सं… दुक्खवेदनीयं फस्सं… अदुक्खमसुखवेदनीयं फस्सं… कुसलं फस्सं… अकुसलं फस्सं… अब्याकतं फस्सं… कामावचरं फस्सं… रूपावचरं फस्सं… अरूपावचरं फस्सं… लोकियं फस्सं विवित्तं पस्सति अत्तेन वा अत्तनियेन वा निच्चेन वा धुवेन वा सस्सतेन वा अविपरिणामधम्मेन वा.

अथ वा अतीतं फस्सं अनागतेहि च पच्चुप्पन्नेहि च फस्सेहि विवित्तं पस्सति, अनागतं फस्सं अतीतेहि च पच्चुप्पन्नेहि च फस्सेहि विवित्तं पस्सति, पच्चुप्पन्नं फस्सं अतीतेहि च अनागतेहि च फस्सेहि विवित्तं पस्सति. अथ वा ये ते फस्सा अरिया अनासवा लोकुत्तरा सुञ्ञतपटिसञ्ञुत्ता, ते फस्से विवित्ते पस्सति रागेन दोसेन मोहेन कोधेन उपनाहेन मक्खेन पळासेन इस्साय मच्छरियेन मायाय साठेय्येन थम्भेन सारम्भेन मानेन अतिमानेन मदेन पमादेन सब्बकिलेसेहि सब्बदुच्चरितेहि सब्बदरथेहि सब्बपरिळाहेहि सब्बसन्तापेहि सब्बाकुसलाभिसङ्खारेहि विवित्ते पस्सतीति – विवेकदस्सी फस्सेसु.

दिट्ठीसु च न नीयतीति. तस्स द्वासट्ठि दिट्ठिगतानि पहीनानि समुच्छिन्नानि वूपसन्तानि पटिपस्सद्धानि अभब्बुप्पत्तिकानि ञाणग्गिना दड्ढानि. सो दिट्ठिया न यायति न नीयति न वुय्हति न संहरीयति; नपि तं दिट्ठिगतं सारतो पच्चेति न पच्चागच्छतीति – दिट्ठीसु च न नीयति.

तेनाह भगवा –

‘‘निरासत्ति अनागते, अतीतं नानुसोचति;

विवेकदस्सी फस्सेसु, दिट्ठीसु च न नीयती’’ति.

८७.

पतिलीनो अकुहको, अपिहालु अमच्छरी;

अप्पगब्भो अजेगुच्छो, पेसुणेय्ये च नो युतो.

पतिलीनो अकुहकोति. पतिलीनोति रागस्स पहीनत्ता पतिलीनो, दोसस्स पहीनत्ता पतिलीनो, मोहस्स पहीनत्ता पतिलीनो, कोधस्स… उपनाहस्स … मक्खस्स… पळासस्स… इस्साय… मच्छरियस्स…पे… सब्बाकुसलाभिसङ्खारानं पहीनत्ता पतिलीनो. वुत्तञ्हेतं भगवता – ‘‘कथञ्च, भिक्खवे, भिक्खु पतिलीनो होति? इमस्स, भिक्खवे, भिक्खुनो अस्मिमानो पहीनो होति उच्छिन्नमूलो तालावत्थुकतो अनभावंकतो आयतिं अनुप्पादधम्मो. एवं खो, भिक्खवे, भिक्खु पतिलीनो होती’’ति – पतिलीनो.

अकुहकोति तीणि कुहनवत्थूनि – पच्चयपटिसेवनसङ्खातं कुहनवत्थु, इरियापथसङ्खातं कुहनवत्थु, सामन्तजप्पनसङ्खातं कुहनवत्थु.

कतमं पच्चयपटिसेवनसङ्खातं कुहनवत्थु? इध गहपतिका भिक्खुं निमन्तेन्ति चीवरपिण्डपातसेनासनगिलानपच्चयभेसज्जपरिक्खारेहि. सो पापिच्छो इच्छापकतो अत्थिको चीवरपिण्डपातसेनासनगिलानपच्चयभेसज्जपरिक्खारानं भिय्योकम्यतं उपादाय चीवरं पच्चक्खाति, पिण्डपातं पच्चक्खाति, सेनासनं पच्चक्खाति, गिलानपच्चयभेसज्जपरिक्खारं पच्चक्खाति. सो एवमाह – ‘‘किं समणस्स महग्घेन चीवरेन! एतं सारुप्पं यं समणो सुसाना वा सङ्कारकूटा वा पापणिका वा नन्तकानि उच्चिनित्वा सङ्घाटिं कत्वा धारेय्य. किं समणस्स महग्घेन पिण्डपातेन! एतं सारुप्पं यं समणो उञ्छाचरियाय पिण्डियालोपेन जीविकं कप्पेय्य. किं समणस्स महग्घेन सेनासनेन! एतं सारुप्पं यं समणो रुक्खमूलिको वा अस्स सोसानिको वा अब्भोकासिको वा. किं समणस्स महग्घेन गिलानपच्चयभेसज्जपरिक्खारेन! एतं सारुप्पं यं समणो पूतिमुत्तेन वा हरितकीखण्डेन वा ओसधं करेय्या’’ति. तदुपादाय लूखं चीवरं धारेति, लूखं पिण्डपातं परिभुञ्जति, लूखं सेनासनं पटिसेवति, लूखं गिलानपच्चयभेसज्जपरिक्खारं पटिसेवति. तमेनं गहपतिका एवं जानन्ति – ‘‘अयं समणो अप्पिच्छो सन्तुट्ठो पविवित्तो असंसट्ठो आरद्धवीरियो धुतवादो’’ति भिय्यो भिय्यो निमन्तेन्ति चीवरपिण्डपातसेनासनगिलानपच्चयभेसज्जपरिक्खारेहि. सो एवमाह – ‘‘तिण्णं सम्मुखीभावा सद्धो कुलपुत्तो बहुं पुञ्ञं पसवति. सद्धाय सम्मुखीभावा सद्धो कुलपुत्तो बहुं पुञ्ञं पसवति, देय्यधम्मस्स सम्मुखीभावा सद्धो कुलपुत्तो बहुं पुञ्ञं पसवति, दक्खिणेय्यानं सम्मुखीभावा सद्धो कुलपुत्तो बहुं पुञ्ञं पसवति. ‘तुम्हाकञ्चेवायं सद्धा अत्थि, देय्यधम्मो च संविज्जति, अहञ्च पटिग्गाहको. सचेहं न पटिग्गहेस्सामि, एवं तुम्हे पुञ्ञेन परिबाहिरा भविस्सन्ति. न मय्हं इमिना अत्थो. अपि च तुम्हाकंयेव अनुकम्पाय पटिग्गण्हामी’’’ति. तदुपादाय बहुम्पि चीवरं पटिग्गण्हाति, बहुम्पि पिण्डपातं पटिग्गण्हाति, बहुम्पि गिलानपच्चयभेसज्जपरिक्खारं पटिग्गण्हाति. या एवरूपा भाकुटिका भाकुटियं कुहना कुहायना कुहितत्तं – इदं पच्चयपटिसेवनसङ्खातं कुहनवत्थु.

कतमं इरियापथसङ्खातं कुहनवत्थु? इधेकच्चो पापिच्छो इच्छापकतो सम्भावनाधिप्पायो, ‘‘एवं मं जनो सम्भावेस्सती’’ति, गमनं सण्ठपेति ठानं सण्ठपेति निसज्जं सण्ठपेति सयनं सण्ठपेति, पणिधाय गच्छति पणिधाय तिट्ठति पणिधाय निसीदति पणिधाय सेय्यं कप्पेति, समाहितो विय गच्छति समाहितो विय तिट्ठति समाहितो विय निसीदति समाहितो विय सेय्यं कप्पेति, आपाथकज्झायीव होति. या एवरूपा इरियापथस्स ठपना आठपना [अट्ठपना (सी.)] सण्ठपना भाकुटिका भाकुटियं कुहना कुहायना कुहितत्तं – इदं इरियापथसङ्खातं कुहनवत्थु.

कतमं सामन्तजप्पनसङ्खातं कुहनवत्थु? इधेकच्चो पापिच्छो इच्छापकतो सम्भावनाधिप्पायो, ‘‘एवं मं जनो सम्भावेस्सती’’ति, अरियधम्मसन्निस्सितं वाचं भासति. ‘‘यो एवरूपं चीवरं धारेति सो समणो महेसक्खो’’ति भणति; ‘‘यो एवरूपं पत्तं धारेति… लोहथालकं धारेति… धम्मकरणं धारेति… परिसावनं धारेति… कुञ्चिकं धारेति… उपाहनं धारेति… कायबन्धनं धारेति… आयोगं धारेति सो समणो महेसक्खो’’ति भणति; ‘‘यस्स एवरूपो उपज्झायो सो समणो महेसक्खो’’ति भणति; ‘‘यस्स एवरूपो आचरियो… एवरूपा समानुपज्झायका… समानाचरियका… मित्ता… सन्दिट्ठा… सम्भत्ता… सहाया सो समणो महेसक्खो’’ति भणति; ‘‘यो एवरूपे विहारे वसति सो समणो महेसक्खो’’ति भणति; ‘‘यो एवरूपे अड्ढयोगे वसति… पासादे वसति… हम्मिये वसति… गुहायं वसति… लेणे वसति… कुटिया वसति… कूटागारे वसति… अट्टे वसति … माळे वसति… उद्दण्डे वसति… उपट्ठानसालायं वसति… मण्डपे वसति… रुक्खमूले वसति, सो समणो महेसक्खो’’ति भणति.

अथ वा कोरजिककोरजिको [कोरञ्जिककोरञ्जिको (सी.)] भाकुटिकभाकुटिको कुहककुहको लपकलपको मुखसम्भाविको, ‘‘अयं समणो इमासं एवरूपानं सन्तानं विहारसमापत्तीनं लाभी’’ति तादिसं गम्भीरं गूळ्हं निपुणं पटिच्छन्नं लोकुत्तरं सुञ्ञतापटिसंयुत्तं कथं कथेसि. या एवरूपा भाकुटिका भाकुटियं कुहना कुहायना कुहितत्तं – इदं सामन्तजप्पनसङ्खातं कुहनवत्थु. यस्सिमानि तीणि कुहनवत्थूनि पहीनानि समुच्छिन्नानि वूपसन्तानि पटिपस्सद्धानि अभब्बुप्पत्तिकानि ञाणग्गिना दड्ढानि, सो वुच्चति अकुहकोति – पतिलीनो अकुहको.

अपिहालु अमच्छरीति. पिहा वुच्चति तण्हा. यो रागो सारागो…पे… अभिज्झा लोभो अकुसलमूलं. यस्सेसा पिहा तण्हा पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढा, सो वुच्चति अपिहालु. सो रूपे न पिहेति, सद्दे… गन्धे… रसे… फोट्ठब्बे… कुलं… गणं… आवासं… लाभं… यसं… पसंसं… सुखं… चीवरं… पिण्डपातं… सेनासनं… गिलानपच्चयभेसज्जपरिक्खारं… कामधातुं… रूपधातुं… अरूपधातुं… कामभवं… रूपभवं… अरूपभवं… सञ्ञाभवं… असञ्ञाभवं … नेवसञ्ञानासञ्ञाभवं… एकवोकारभवं… चतुवोकारभवं… पञ्चवोकारभवं… अतीतं… अनागतं… पच्चुप्पन्नं… दिट्ठसुतमुतविञ्ञातब्बे धम्मे न पिहेति न इच्छति न सादियति न पत्थेति नाभिजप्पतीति – अपिहालु. अमच्छरीति पञ्च मच्छरियानि – आवासमच्छरियं, कुलमच्छरियं, लाभमच्छरियं, वण्णमच्छरियं, धम्ममच्छरियं. यं एवरूपं मच्छरं मच्छरायना मच्छरायितत्तं वेविच्छं कदरियं कटुकञ्चुकता अग्गहितत्तं चित्तस्स – इदं वुच्चति मच्छरियं. अपि च खन्धमच्छरियम्पि मच्छरियं, धातुमच्छरियम्पि मच्छरियं, आयतनमच्छरियम्पि मच्छरियं गाहो – इदं वुच्चति मच्छरियं. यस्सेतं मच्छरियं पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढं, सो वुच्चति अमच्छरीति – अपिहालु अमच्छरी.

अप्पगब्भो अजेगुच्छोति. पागब्भियन्ति तीणि पागब्भियानि – कायिकं पागब्भियं, वाचसिकं पागब्भियं, चेतसिकं पागब्भियं. कतमं कायिकं पागब्भियं? इधेकच्चो सङ्घगतोपि कायिकं पागब्भियं दस्सेति, गणगतोपि कायिकं पागब्भियं दस्सेति, भोजनसालायम्पि कायिकं पागब्भियं दस्सेति, जन्ताघरेपि कायिकं पागब्भियं दस्सेति, उदकतित्थेपि कायिकं पागब्भियं दस्सेति, अन्तरघरं पविसन्तोपि कायिकं पागब्भियं दस्सेति, अन्तरघरं पविट्ठोपि कायिकं पागब्भियं दस्सेति.

कथं सङ्घगतो कायिकं पागब्भियं दस्सेति? इधेकच्चो सङ्घगतो अचित्तीकारकतो [अचित्तिकारकतो (स्या. क.)] थेरे भिक्खू घट्टयन्तोपि तिट्ठति, घट्टयन्तोपि निसीदति, पुरतोपि तिट्ठति, पुरतोपि निसीदति, उच्चेपि आसने निसीदति, ससीसं पारुपित्वापि निसीदति, ठितकोपि भणति, बाहाविक्खेपकोपि भणति. एवं सङ्घगतो कायिकं पागब्भियं दस्सेति.

कथं गणगतो कायिकं पागब्भियं दस्सेति? इधेकच्चो गणगतो अचित्तीकारकतो थेरानं भिक्खूनं अनुपाहनानं चङ्कमन्तानं सउपाहनो चङ्कमति, नीचे चङ्कमे चङ्कमन्तानं उच्चे चङ्कमे चङ्कमति, छमाय चङ्कमन्तानं चङ्कमे चङ्कमति, घट्टयन्तोपि तिट्ठति, घट्टयन्तोपि निसीदति, पुरतोपि तिट्ठति, पुरतोपि निसीदति, उच्चेपि आसने निसीदति, ससीसं पारुपित्वा निसीदति, ठितकोपि भणति, बाहाविक्खेपकोपि भणति. एवं गणगतो कायिकं पागब्भियं दस्सेति.

कथं भोजनसालायं कायिकं पागब्भियं दस्सेति? इधेकच्चो भोजनसालायं अचित्तीकारकतो थेरे भिक्खू अनुपखज्ज निसीदति, नवेपि भिक्खू आसनेन पटिबाहति, घट्टयन्तोपि तिट्ठति, घट्टयन्तोपि निसीदति, पुरतोपि तिट्ठति, पुरतोपि निसीदति, उच्चेपि आसने निसीदति, ससीसं पारुपित्वापि निसीदति, ठितकोपि भणति, बाहाविक्खेपकोपि भणति. एवं भोजनसालायं कायिकं पागब्भियं दस्सेति.

कथं जन्ताघरे कायिकं पागब्भियं दस्सेति? इधेकच्चो जन्ताघरे अचित्तीकारकतो थेरे भिक्खू घट्टयन्तोपि तिट्ठति, घट्टयन्तोपि निसीदति, पुरतोपि तिट्ठति, पुरतोपि निसीदति, उच्चेपि आसने निसीदति, अनापुच्छम्पि अनज्झिट्ठोपि कट्ठं पक्खिपति, द्वारम्पि पिदहति, बाहाविक्खेपकोपि भणति. एवं जन्ताघरे कायिकं पागब्भियं दस्सेति.

कथं उदकतित्थे कायिकं पागब्भियं दस्सेति? इधेकच्चो उदकतित्थे अचित्तीकारकतो थेरे भिक्खू घट्टयन्तोपि ओतरति, पुरतोपि ओतरति, घट्टयन्तोपि न्हायति [नहायति (सी.)], पुरतोपि न्हायति, उपरितोपि न्हायति, घट्टयन्तोपि उत्तरति, पुरतोपि उत्तरति, उपरितोपि उत्तरति. एवं उदकतित्थे कायिकं पागब्भियं दस्सेति.

कथं अन्तरघरं पविसन्तो कायिकं पागब्भियं दस्सेति? इधेकच्चो अन्तरघरं पविसन्तो अचित्तीकारकतो थेरे भिक्खू घट्टयन्तोपि गच्छति, पुरतोपि गच्छति, वोक्कम्मापि थेरानं भिक्खूनं पुरतो पुरतो गच्छति. एवं अन्तरघरं पविसन्तो कायिकं पागब्भियं दस्सेति.

कथं अन्तरघरं पविट्ठो कायिकं पागब्भियं दस्सेति? इधेकच्चो अन्तरघरं पविट्ठो, ‘‘न पविस [पविसथ (सी.) एवमञ्ञेसु पदद्वयेसुपि], भन्ते’’ति वुच्चमानो पविसति, ‘‘न तिट्ठ, भन्ते’’ति वुच्चमानो तिट्ठति, ‘‘न निसीद, भन्ते’’ति वुच्चमानो निसीदति, अनोकासम्पि पविसति, अनोकासेपि तिट्ठति, अनोकासेपि निसीदति, यानिपि तानि होन्ति कुलानं ओवरकानि गूळ्हानि च पटिच्छन्नानि च. यत्थ कुलित्थियो कुलधीतरो कुलसुण्हायो कुलकुमारियो निसीदन्ति, तत्थपि सहसा पविसति कुमारकस्सपि सिरं परामसति. एवं अन्तरघरं पविट्ठो कायिकं पागब्भियं दस्सेति – इदं कायिकं पागब्भियं दस्सेति.

कतमं वाचसिकं पागब्भियं दस्सेति? इधेकच्चो सङ्घगतोपि वाचसिकं पागब्भियं दस्सेति, गणगतोपि वाचसिकं पागब्भियं दस्सेति, अन्तरघरं पविट्ठोपि वाचसिकं पागब्भियं दस्सेति.

कथं सङ्घगतो वाचसिकं पागब्भियं दस्सेति? इधेकच्चो सङ्घगतो अचित्तीकारकतो थेरे भिक्खू अनापुच्छं वा अनज्झिट्ठो वा आरामगतानं भिक्खूनं धम्मं भणति, पञ्हं विसज्जेति, पातिमोक्खं उद्दिसति, ठितकोपि भणति, बाहाविक्खेपकोपि भणति. एवं सङ्घगतो वाचसिकं पागब्भियं दस्सेति.

कथं गणगतो वाचसिकं पागब्भियं दस्सेति? इधेकच्चो गणगतो अचित्तीकारकतो थेरे भिक्खू अनापुच्छं वा अनज्झिट्ठो वा आरामगतानं भिक्खूनं धम्मं भणति, पञ्हं विसज्जेति, ठितकोपि भणति, बाहाविक्खेपकोपि भणति. आरामगतानं भिक्खुनीनं उपासकानं उपासिकानं धम्मं भणति, पञ्हं विसज्जेति, ठितकोपि भणति, बाहाविक्खेपकोपि भणति. एवं गणगतो वाचसिकं पागब्भियं दस्सेति.

कथं अन्तरघरं पविट्ठो वाचसिकं पागब्भियं दस्सेति? इधेकच्चो अन्तरघरं पविट्ठो इत्थिं वा कुमारिं वा एवमाह – ‘‘इत्थंनामे इत्थंगोत्ते किं अत्थि? यागु अत्थि, भत्तं अत्थि, खादनीयं अत्थि. किं पिविस्साम, किं भुञ्जिस्साम, किं खादिस्साम? किं वा अत्थि, किं वा मे दस्सथा’’ति विप्पलपति, या एवरूपा वाचा पलापो विप्पलापो लालप्पो लालप्पना लालप्पितत्तं. एवं अन्तरघरं पविट्ठो वाचसिकं पागब्भियं दस्सेति – इदं वाचसिकं पागब्भियं.

कतमं चेतसिकं पागब्भियं? इधेकच्चो न उच्चा कुला पब्बजितो समानो उच्चा कुला पब्बजितेन सद्धिं सदिसं अत्तानं दहति चित्तेन, न महाकुला पब्बजितो समानो महाकुला पब्बजितेन सद्धिं सदिसं अत्तानं दहति चित्तेन, न महाभोगकुला पब्बजितो समानो महाभोगकुला पब्बजितेन सद्धिं सदिसं अत्तानं दहति चित्तेन, न उळारभोगकुला पब्बजितो समानो… न सुत्तन्तिको समानो सुत्तन्तिकेन सद्धिं सदिसं अत्तानं दहति चित्तेन, न विनयधरो समानो… न धम्मकथिको समानो… न आरञ्ञिको समानो… न पिण्डपातिको समानो… न पंसुकूलिको समानो… न तेचीवरिको समानो… न सपदानचारिको समानो… न खलुपच्छाभत्तिको समानो… न नेसज्जिको समानो… न यथासन्थतिको समानो… न पठमस्स झानस्स लाभी समानो पठमस्स झानस्स लाभिना सद्धिं सदिसं अत्तानं दहति चित्तेन…पे… न नेवसञ्ञानासञ्ञायतनसमापत्तिया लाभी समानो नेवसञ्ञानासञ्ञायतनसमापत्तिया लाभिना सद्धिं सदिसं अत्तानं दहति चित्तेन – इदं चेतसिकं पागब्भियं. यस्सिमानि तीणि पागब्भियानि पहीनानि समुच्छिन्नानि वूपसन्तानि पटिपस्सद्धानि अभब्बुप्पत्तिकानि ञाणग्गिना दड्ढानि, सो वुच्चति अप्पगब्भोति – अप्पगब्भो.

अजेगुच्छोति. अत्थि पुग्गलो जेगुच्छो, अत्थि अजेगुच्छो. कतमो च पुग्गलो जेगुच्छो? इधेकच्चो पुग्गलो दुस्सीलो होति पापधम्मो असुचिसङ्कस्सरसमाचारो पटिच्छन्नकम्मन्तो अस्समणो समणपटिञ्ञो अब्रह्मचारी ब्रह्मचारिपटिञ्ञो अन्तोपूति अवस्सुतो कसम्बुजातो – अयं वुच्चति पुग्गलो जेगुच्छो. अथ वा कोधनो होति उपायासबहुलो, अप्पम्पि वुत्तो समानो अभिसज्जति कुप्पति ब्यापज्जति पतिट्ठीयति, कोपञ्च दोसञ्च अप्पच्चयञ्च पातुकरोति – अयं वुच्चति पुग्गलो जेगुच्छो. अथ वा कोधनो होति उपनाही, मक्खी होति पळासी, इस्सुकी होति मच्छरी, सठो होति मायावी, थद्धो होति अतिमानी, पापिच्छो होति मिच्छादिट्ठि [मिच्छादिट्ठी (सी.)], सन्दिट्ठिपरामासी होति आदानग्गाही दुप्पटिनिस्सग्गी – अयं वुच्चति पुग्गलो जेगुच्छो.

कतमो च पुग्गलो अजेगुच्छो? इध भिक्खु सीलवा होति पातिमोक्खसंवरसंवुतो विहरति आचारगोचरसम्पन्नो अणुमत्तेसु वज्जेसु भयदस्सावी, समादाय सिक्खति सिक्खापदेसु – अयं वुच्चति पुग्गलो अजेगुच्छो. अथ वा अक्कोधनो होति अनुपायासबहुलो, बहुम्पि वुत्तो समानो न अभिसज्जति न कुप्पति न ब्यापज्जति न पतिट्ठीयति, न कोपञ्च दोसञ्च अप्पच्चयञ्च पातुकरोति – अयं वुच्चति पुग्गलो अजेगुच्छो. अथ वा अक्कोधनो होति अनुपनाही, अमक्खी होति अपळासी, अनिस्सुकी होति अमच्छरी, असठो होति अमायावी, अथद्धो होति अनतिमानी, न पापिच्छो होति न मिच्छादिट्ठि, असन्दिट्ठिपरामासी होति अनादानग्गाही सुप्पटिनिस्सग्गी – अयं वुच्चति पुग्गलो अजेगुच्छो. सब्बे बालपुथुज्जना जेगुच्छा, पुथुज्जनकल्याणकं उपादाय अट्ठ अरियपुग्गला अजेगुच्छाति – अप्पगब्भो अजेगुच्छो.

पेसुणेय्ये च नो युतोति. पेसुञ्ञन्ति इधेकच्चो पिसुणवाचो होति, इतो सुत्वा अमुत्र अक्खाता इमेसं भेदाय, अमुत्र वा सुत्वा इमेसं अक्खाता अमूसं भेदाय. इति समग्गानं वा भेत्ता [भेदो (क.)], भिन्नानं वा अनुप्पदाता, वग्गारामो, वग्गरतो, वग्गनन्दी, वग्गकरणिं वाचं भासिता होति – इदं वुच्चति पेसुञ्ञं.

अपि च द्वीहि कारणेहि पेसुञ्ञं उपसंहरति – पियकम्यताय वा, भेदाधिप्पायेन [भेदाधिप्पायो (बहूसु)] वा. कथं पियकम्यताय पेसुञ्ञं उपसंहरति? इमस्स पियो भविस्सामि, मनापो भविस्सामि, विस्सासिको भविस्सामि, अब्भन्तरिको भविस्सामि, सुहदयो भविस्सामीति. एवं पियकम्यताय पेसुञ्ञं उपसंहरति. कथं भेदाधिप्पायेन पेसुञ्ञं उपसंहरति? ‘‘कथं इमे नाना अस्सु विना अस्सु वग्गा अस्सु द्वेधा अस्सु द्वेज्झा अस्सु द्वे पक्खा अस्सु भिज्जेय्युं न समागच्छेय्युं दुक्खं न फासु [अफासुं (सी.)] विहरेय्यु’’न्ति. एवं भेदाधिप्पायेन पेसुञ्ञं उपसंहरति. यस्सेतं पेसुञ्ञं पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढं, सो पेसुञ्ञे नो युतो न युत्तो न पयुत्तो न सम्मायुत्तोति – पेसुणेय्ये च नो युतो.

तेनाह भगवा –

‘‘पतिलीनो अकुहको, अपिहालु अमच्छरी;

अप्पगब्भो अजेगुच्छो, पेसुणेय्ये च नो युतो’’ति.

८८.

सातियेसु अनस्सावी, अतिमाने च नो युतो;

सण्हो च पटिभानवा, न सद्धो न विरज्जति.

सातियेसु अनस्सावीति. सातिया वुच्चन्ति पञ्च कामगुणा. किंकारणा सातिया वुच्चन्ति पञ्च कामगुणा? येभुय्येन देवमनुस्सा पञ्च कामगुणे इच्छन्ति सातियन्ति पत्थयन्ति पिहयन्ति अभिजप्पन्ति, तंकारणा सातिया वुच्चन्ति पञ्च कामगुणा. येसं एसा सातिया तण्हा अप्पहीना तेसं चक्खुतो रूपतण्हा सवति आसवति [पसवति (स्या.)] सन्दति पवत्तति, सोततो सद्दतण्हा… घानतो गन्धतण्हा… जिव्हातो रसतण्हा… कायतो फोट्ठब्बतण्हा… मनतो धम्मतण्हा सवति आसवति सन्दति पवत्तति. येसं एसा सातिया तण्हा पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढा तेसं चक्खुतो रूपतण्हा न सवति नासवति [न पसवति (स्या.)] न सन्दति न पवत्तति, सोततो सद्दतण्हा…पे… मनतो धम्मतण्हा न सवति नासवति न सन्दति न पवत्ततीति – सातियेसु अनस्सावी.

अतिमाने च नो युतोति. कतमो अतिमानो? इधेकच्चो परं अतिमञ्ञति जातिया वा गोत्तेन वा…पे… अञ्ञतरञ्ञतरेन वा वत्थुना. यो एवरूपो मानो मञ्ञना मञ्ञितत्तं उन्नति उन्नमो धजो सम्पग्गाहो केतुकम्यता चित्तस्स – अयं वुच्चति अतिमानो. यस्सेसो अतिमानो पहीनो समुच्छिन्नो वूपसन्तो पटिपस्सद्धो अभब्बुप्पत्तिको ञाणग्गिना दड्ढो, सो अतिमाने च नो युतो न युत्तो नप्पयुत्तो न सम्मायुत्तोति – अतिमाने च नो युतो.

सण्हो च पटिभानवाति. सण्होति सण्हेन कायकम्मेन समन्नागतोति सण्हो, सण्हेन वचीकम्मेन… सण्हेन मनोकम्मेन समन्नागतोति सण्हो, सण्हेहि सतिपट्ठानेहि समन्नागतोति सण्हो, सण्हेहि सम्मप्पधानेहि… सण्हेहि इद्धिपादेहि… सण्हेहि इन्द्रियेहि… सण्हेहि बलेहि… सण्हेहि बोज्झङ्गेहि समन्नागतोति सण्हो, सण्हेन अरियेन अट्ठङ्गिकेन मग्गेन समन्नागतोति – सण्हो.

पटिभानवाति तयो पटिभानवन्तो – परियत्तिपटिभानवा, परिपुच्छापटिभानवा, अधिगमपटिभानवा. कतमो परियत्तिपटिभानवा? इधेकच्चस्स पकतिया परियापुटं होति – सुत्तं गेय्यं वेय्याकरणं गाथा उदानं इतिवुत्तकं जातकं अब्भुतधम्मं वेदल्लं, तस्स परियत्तिं निस्साय पटिभायति – अयं परियत्तिपटिभानवा. कतमो परिपुच्छापटिभानवा? इधेकच्चो परिपुच्छिता [परिपुच्छितं (सी.), परिपुच्छको (स्या.)] होति अत्तत्थे च ञायत्थे च लक्खणे च कारणे च ठानाठाने च, तस्स तं परिपुच्छं निस्साय पटिभायति – अयं परिपुच्छापटिभानवा. कतमो अधिगमपटिभानवा? इधेकच्चस्स अधिगता होन्ति चत्तारो सतिपट्ठाना चत्तारो सम्मप्पधाना चत्तारो इद्धिपादा पञ्चिन्द्रियानि पञ्च बलानि सत्त बोज्झङ्गा अरियो अट्ठङ्गिको मग्गो चत्तारो अरियमग्गा चत्तारि सामञ्ञफलानि चतस्सो पटिसम्भिदायो छ अभिञ्ञायो, तस्स अत्थो ञातो धम्मो ञातो निरुत्ति ञाता, अत्थे ञाते अत्थो पटिभायति, धम्मे ञाते धम्मो पटिभायति, निरुत्तिया ञाताय निरुत्ति पटिभायति; इमेसु तीसु ञाणेसु ञाणं पटिभानपटिसम्भिदा. इमाय पटिभानपटिसम्भिदाय उपेतो समुपेतो उपगतो समुपगतो उपपन्नो समुपपन्नो समन्नागतो सो वुच्चति पटिभानवा. यस्स परियत्ति नत्थि, परिपुच्छा नत्थि, अधिगमो नत्थि, किं तस्स पटिभायिस्सतीति – सण्हो च पटिभानवा.

न सद्धो न विरज्जतीति. न सद्धोति सामं सयं अभिञ्ञातं अत्तपच्चक्खं धम्मं न कस्सचि सद्दहति अञ्ञस्स समणस्स वा ब्राह्मणस्स वा देवस्स वा मारस्स वा ब्रह्मुनो वा. ‘‘सब्बे सङ्खारा अनिच्चा’’ति सामं सयं अभिञ्ञातं…पे… ‘‘सब्बे सङ्खारा दुक्खा’’ति… ‘‘सब्बे धम्मा अनत्ता’’ति… ‘‘अविज्जापच्चया सङ्खारा’’ति…पे… ‘‘जातिपच्चया जरामरण’’न्ति… ‘‘अविज्जानिरोधा सङ्खारनिरोधो’’ति…पे… ‘‘जातिनिरोधा जरामरणनिरोधो’’ति… ‘‘इदं दुक्ख’’न्ति…पे… ‘‘अयं दुक्खनिरोधगामिनी पटिपदा’’ति… ‘‘इमे आसवा’’ति…पे… ‘‘अयं आसवनिरोधगामिनी पटिपदा’’ति… ‘‘इमे धम्मा अभिञ्ञेय्या’’ति…पे… ‘‘इमे धम्मा सच्छिकातब्बा’’ति सामं सयं अभिञ्ञातं…पे… छन्नं फस्सायतनानं समुदयञ्च अत्थङ्गमञ्च अस्सादञ्च आदीनवञ्च निस्सरणञ्च, पञ्चन्नं उपादानक्खन्धानं समुदयञ्च…पे… चतुन्नं महाभूतानं समुदयञ्च अत्थङ्गमञ्च अस्सादञ्च आदीनवञ्च निस्सरणञ्च सामं सयं अभिञ्ञातं…पे… ‘‘यं किञ्चि समुदयधम्मं सब्बं तं निरोधधम्म’’न्ति सामं सयं अभिञ्ञातं अत्तपच्चक्खं धम्मं न कस्सचि सद्दहति अञ्ञस्स समणस्स वा ब्राह्मणस्स वा देवस्स वा मारस्स वा ब्रह्मुनो वा [ब्रह्मुनो वा…पे… (सी. क.)].

वुत्तञ्हेतं भगवता – ‘‘सद्दहसि त्वं, सारिपुत्त, सद्धिन्द्रियं भावितं बहुलीकतं अमतोगधं होति अमतपरायनं अमतपरियोसानं; वीरियिन्द्रियं… सतिन्द्रियं… समाधिन्द्रियं… पञ्ञिन्द्रियं भावितं बहुलीकतं अमतोगधं होति अमतपरायनं अमतपरियोसान’’न्ति?

‘‘न ख्वाहं एत्थ, भन्ते, भगवतो सद्धाय गच्छामि सद्धिन्द्रियं… वीरियिन्द्रियं… सतिन्द्रियं… समाधिन्द्रियं… पञ्ञिन्द्रियं भावितं बहुलीकतं अमतोगधं होति अमतपरायनं अमतपरियोसानं. येसं नूनेतं, भन्ते, अञ्ञातं अस्स अदिट्ठं अविदितं असच्छिकतं अफस्सितं पञ्ञाय, ते तत्थ परेसं सद्धाय गच्छेय्युं सद्धिन्द्रियं भावितं बहुलीकतं अमतोगधं होति अमतपरायनं अमतपरियोसानं. वीरियिन्द्रियं… सतिन्द्रियं… समाधिन्द्रियं … पञ्ञिन्द्रियं भावितं बहुलीकतं अमतोगधं होति अमतपरायनं अमतपरियोसानं. येसञ्च खो एतं, भन्ते, ञातं दिट्ठं विदितं सच्छिकतं फस्सितं पञ्ञाय, निक्कङ्खा ते तत्थ निब्बिचिकिच्छा. सद्धिन्द्रियं… वीरियिन्द्रियं… सतिन्द्रियं… समाधिन्द्रियं… पञ्ञिन्द्रियं भावितं बहुलीकतं अमतोगधं होति अमतपरायनं अमतपरियोसानं. मय्हञ्च खो, एतं भन्ते, ञातं दिट्ठं विदितं सच्छिकतं फस्सितं पञ्ञाय, निक्कङ्खोहं तत्थ निब्बिचिकिच्छो. सद्धिन्द्रियं… वीरियिन्द्रियं… सतिन्द्रियं… समाधिन्द्रियं… पञ्ञिन्द्रियं भावितं बहुलीकतं अमतोगधं होति अमतपरायनं अमतपरियोसान’’न्ति.

‘‘साधु साधु, सारिपुत्त! येसञ्हेतं, सारिपुत्त, अञ्ञातं अस्स अदिट्ठं अविदितं असच्छिकतं अफस्सितं पञ्ञाय, ते तत्थ परेसं सद्धाय गच्छेय्युं सद्धिन्द्रियं…पे… पञ्ञिन्द्रियं भावितं बहुलीकतं अमतोगधं होति अमतपरायनं अमतपरियोसानन्ति.

‘‘अस्सद्धो अकतञ्ञू च, सन्धिच्छेदो च यो नरो;

हतावकासो वन्तासो, स वे उत्तमपोरिसो’’ति.

न सद्धो न विरज्जतीति. सब्बे बालपुथुज्जना रज्जन्ति, पुथुज्जनकल्याणकं उपादाय सत्त सेक्खा विरज्जन्ति. अरहा नेव रज्जति नो विरज्जति, विरत्तो सो खया रागस्स वीतरागत्ता खया दोसस्स वीतदोसत्ता, खया मोहस्स वीतमोहत्ता. सो वुट्ठवासो चिण्णचरणो…पे… जातिमरणसंसारो नत्थि तस्स पुनब्भवोति – न सद्धो न विरज्जति.

तेनाह भगवा –

‘‘सातियेसु अनस्सावी, अतिमाने च नो युतो;

सण्हो च पटिभानवा, न सद्धो न विरज्जती’’ति.

८९.

लाभकम्या न सिक्खति, अलाभे च न कुप्पति;

अविरुद्धो च तण्हाय, रसेसु [रसे च (सी. स्या.)] नानुगिज्झति.

लाभकम्या न सिक्खति, अलाभे च न कुप्पतीति. कथं लाभकम्या सिक्खति? इध, भिक्खवे, भिक्खु भिक्खुं पस्सति लाभिं चीवरपिण्डपातसेनासनगिलानपच्चयभेसज्जपरिक्खारानं. तस्स एवं होति – ‘‘केन नु खो अयमायस्मा लाभी चीवरपिण्डपातसेनासनगिलानपच्चयभेसज्जपरिक्खारान’’न्ति? तस्स एवं होति – ‘‘अयं खो आयस्मा सुत्तन्तिको, तेनायमायस्मा लाभी चीवरपिण्डपातसेनासनगिलानपच्चयभेसज्जपरिक्खारान’’न्ति. सो लाभहेतु लाभपच्चया लाभकारणा लाभाभिनिब्बत्तिया लाभं परिपाचेन्तो सुत्तन्तं परियापुणाति. एवम्पि लाभकम्या सिक्खति.

अथ वा भिक्खु भिक्खुं पस्सति लाभिं चीवरपिण्डपातसेनासनगिलानपच्चयभेसज्जपरिक्खारानं. तस्स एवं होति – ‘‘केन नु खो अयमायस्मा लाभी चीवरपिण्डपातसेनासनगिलानपच्चयभेसज्जपरिक्खारान’’न्ति? तस्स एवं होति – ‘‘अयं खो आयस्मा विनयधरो…पे… धम्मकथिको… आभिधम्मिको, तेनायमायस्मा लाभी चीवरपिण्डपातसेनासनगिलानपच्चयभेसज्जपरिक्खारान’’न्ति. सो लाभहेतु लाभपच्चया लाभकारणा लाभाभिनिब्बत्तिया लाभं परिपाचेन्तो अभिधम्मं परियापुणाति. एवम्पि लाभकम्या सिक्खति.

अथ वा भिक्खु भिक्खुं पस्सति लाभिं चीवरपिण्डपातसेनासनगिलानपच्चयभेसज्जपरिक्खारानं. तस्स एवं होति – ‘‘केन नु खो अयमायस्मा लाभी चीवरपिण्डपातसेनासनगिलानपच्चयभेसज्जपरिक्खारान’’न्ति? तस्स एवं होति – ‘‘अयं खो आयस्मा आरञ्ञिको… पिण्डपातिको… पंसुकूलिको… तेचीवरिको… सपदानचारिको… खलुपच्छाभत्तिको… नेसज्जिको… यथासन्थतिको, तेनायमायस्मा लाभी चीवरपिण्डपातसेनासनगिलानपच्चयभेसज्जपरिक्खारान’’न्ति. सो लाभहेतु लाभपच्चया लाभकारणा लाभाभिनिब्बत्तिया लाभं परिपाचेन्तो आरञ्ञिको होति…पे… यथासन्थतिको होति. एवम्पि लाभकम्या सिक्खति.

कथं न लाभकम्या सिक्खति? इध भिक्खु न लाभहेतु, न लाभपच्चया, न लाभकारणा, न लाभाभिनिब्बत्तिया, न लाभं परिपाचेन्तो, यावदेव अत्तदमत्थाय अत्तसमत्थाय अत्तपरिनिब्बापनत्थाय सुत्तन्तं परियापुणाति, विनयं परियापुणाति, अभिधम्मं परियापुणाति. एवम्पि न लाभकम्या सिक्खति.

अथ वा भिक्खु न लाभहेतु, न लाभपच्चया, न लाभकारणा, न लाभाभिनिब्बत्तिया, न लाभं परिपाचेन्तो, यावदेव अप्पिच्छञ्ञेव [अप्पिच्छंयेव (सी.)] निस्साय सन्तुट्ठिञ्ञेव निस्साय सल्लेखञ्ञेव निस्साय पविवेकञ्ञेव निस्साय इदमत्थितञ्ञेव [इदमत्थिकतञ्ञेव (सी.)] निस्साय आरञ्ञिको होति, पिण्डपातिको होति, पंसुकूलिको होति, तेचीवरिको होति, सपदानचारिको होति, खलुपच्छाभत्तिको होति, नेसज्जिको होति, यथासन्थतिको होति. एवम्पि न लाभकम्या सिक्खतीति – लाभकम्या न सिक्खति.

अलाभे च न कुप्पतीति. कथं अलाभे कुप्पति? इधेकच्चो ‘‘कुलं वा न लभामि, गणं वा न लभामि, आवासं वा न लभामि, लाभं वा न लभामि, यसं वा न लभामि, पसंसं वा न लभामि, सुखं वा न लभामि, चीवरं वा न लभामि, पिण्डपातं वा न लभामि, सेनासनं वा न लभामि, गिलानपच्चयभेसज्जपरिक्खारं वा न लभामि, गिलानुपट्ठाकं वा न लभामि, अप्पञ्ञातोम्ही’’ति कुप्पति ब्यापज्जति पतिट्ठीयति, कोपञ्च दोसञ्च अप्पच्चयञ्च पातुकरोति. एवं अलाभे कुप्पति.

कथं अलाभे न कुप्पति? इध भिक्खु ‘‘कुलं वा न लभामि गणं वा न लभामि…पे… अप्पञ्ञातोम्ही’’ति न कुप्पति न ब्यापज्जति न पतिट्ठीयति, न कोपञ्च दोसञ्च अप्पच्चयञ्च पातुकरोति. एवं अलाभे न कुप्पतीति – लाभकम्या न सिक्खति अलाभे च न कुप्पति.

अविरुद्धो च तण्हाय, रसेसु नानुगिज्झतीति. विरुद्धोति यो चित्तस्स आघातो पटिघातो, पटिघं पटिविरोधो, कोपो पकोपो सम्पकोपो, दोसो पदोसो सम्पदोसो, चित्तस्स ब्यापत्ति मनोपदोसो, कोधो कुज्झना कुज्झितत्तं, दोसो दुस्सना दुस्सितत्तं, ब्यापत्ति ब्यापज्जना ब्यापज्जितत्तं विरोधो पटिविरोधो, चण्डिक्कं, असुरोपो, अनत्तमनता चित्तस्स – अयं वुच्चति विरोधो. यस्सेसो विरोधो पहीनो समुच्छिन्नो वूपसन्तो पटिपस्सद्धो अभब्बुप्पत्तिको ञाणग्गिना दड्ढो, सो वुच्चति अविरुद्धो. तण्हाति रूपतण्हा सद्दतण्हा गन्धतण्हा रसतण्हा फोट्ठब्बतण्हा धम्मतण्हा. रसोति मूलरसो खन्धरसो तचरसो पत्तरसो पुप्फरसो फलरसो, अम्बिलं मधुरं तित्तकं कटुकं लोणिकं खारिकं लम्बिकं [लपिलं (सी.), लम्बिलं (स्या.), लबिलं (क.), आयतनविभङ्गे] कसावो सादु असादु सीतं उण्हं. सन्तेके समणब्राह्मणा रसगिद्धा. ते जिव्हग्गेन रसग्गानि परियेसन्ता आहिण्डन्ति, ते अम्बिलं लभित्वा अनम्बिलं परियेसन्ति, अनम्बिलं लभित्वा अम्बिलं परियेसन्ति; मधुरं लभित्वा अमधुरं परियेसन्ति, अमधुरं लभित्वा मधुरं परियेसन्ति; तित्तकं लभित्वा अतित्तकं परियेसन्ति, अतित्तकं लभित्वा तित्तकं परियेसन्ति; कटुकं लभित्वा अकटुकं परियेसन्ति, अकटुकं लभित्वा कटुकं परियेसन्ति; लोणिकं लभित्वा अलोणिकं परियेसन्ति, अलोणिकं लभित्वा लोणिकं परियेसन्ति; खारिकं लभित्वा अखारिकं परियेसन्ति, अखारिकं लभित्वा खारिकं परियेसन्ति; लम्बिकं लभित्वा कसावं परियेसन्ति, कसावं लभित्वा लम्बिकं परियेसन्ति; सादुं लभित्वा असादुं परियेसन्ति, असादुं लभित्वा सादुं परियेसन्ति; सीतं लभित्वा उण्हं परियेसन्ति, उण्हं लभित्वा सीतं परियेसन्ति. ते यं यं लभित्वा तेन तेन न सन्तुस्सन्ति अपरापरं परियेसन्ति, मनापिकेसु रसेसु रत्ता गिद्धा गधिता मुच्छिता अज्झोसन्ना लग्गा लग्गिता पलिबुद्धा. यस्सेसा रसतण्हा पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढा, सो पटिसङ्खा योनिसो आहारं आहारेति – ‘‘नेव दवाय न मदाय न मण्डनाय न विभूसनाय, यावदेव इमस्स कायस्स ठितिया यापनाय विहिंसूपरतिया ब्रह्मचरियानुग्गहाय. इति पुराणञ्च वेदनं पटिहङ्खामि, नवञ्च वेदनं न उप्पादेस्सामि, यात्रा च मे भविस्सति अनवज्जता च फासुविहारो चा’’ति.

यथा वनं आलिम्पेय्य यावदेव रोपनत्थाय, यथा वा पन अक्खं अब्भञ्जेय्य यावदेव भारस्स नित्थरणत्थाय, यथा वा पन पुत्तमंसं आहारं आहरेय्य यावदेव कन्तारस्स नित्थरणत्थाय; एवमेव भिक्खु पटिसङ्खा योनिसो आहारं आहारेति – ‘‘नेव दवाय…पे… फासुविहारो चा’’ति. रसतण्हं पजहति विनोदेति ब्यन्तिं करोति अनभावं गमेति, रसतण्हाय आरतो अस्स विरतो पटिविरतो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – अविरुद्धो च तण्हाय रसेसु नानुगिज्झति.

तेनाह भगवा –

‘‘लाभकम्या न सिक्खति, अलाभे च न कुप्पति;

अविरुद्धो च तण्हाय, रसेसु नानुगिज्झती’’ति.

९०.

उपेक्खको सदा सतो, न लोके मञ्ञते समं;

न विसेसी न नीचेय्यो, तस्स नो सन्ति उस्सदा.

उपेक्खको सदा सतोति. उपेक्खकोति छळङ्गुपेक्खाय समन्नागतो. चक्खुना रूपं दिस्वा नेव सुमनो होति न दुम्मनो, उपेक्खको विहरति सतो सम्पजानो. सोतेन सद्दं सुत्वा…पे… मनसा धम्मं विञ्ञाय नेव सुमनो होति न दुम्मनो, उपेक्खको विहरति सतो सम्पजानो. चक्खुना रूपं दिस्वा मनापं नाभिगिज्झति नाभिहंसति [नाभिहसति (सी. स्या.)] न रागं जनेति, तस्स ठितोव कायो होति, ठितं चित्तं अज्झत्तं सुसण्ठितं सुविमुत्तं. चक्खुना खो पनेव रूपं दिस्वा अमनापं न मङ्कु होति अप्पतिट्ठितचित्तो [अप्पतिट्ठीन चित्तो (स्या.), अप्पतिट्ठनचित्तो (क.)] अलीनमनसो [आदिनमनसो (स्या.)] अब्यापन्नचेतसो, तस्स ठितोव कायो होति, ठितं चित्तं अज्झत्तं सुसण्ठितं सुविमुत्तं. सोतेन सद्दं सुत्वा… घानेन गन्धं घायित्वा… जिव्हाय रसं सायित्वा… कायेन फोट्ठब्बं फुसित्वा… मनसा धम्मं विञ्ञाय मनापं नाभिगिज्झति नाभिहंसति न रागं जनेति, तस्स ठितोव कायो होति, ठितं चित्तं अज्झत्तं सुसण्ठितं सुविमुत्तं. मनसा खो पनेव धम्मं विञ्ञाय अमनापं न मङ्कु होति अप्पतिट्ठितचित्तो अलीनमनसो अब्यापन्नचेतसो, तस्स ठितोव कायो होति, ठितं चित्तं अज्झत्तं सुसण्ठितं सुविमुत्तं.

चक्खुना रूपं दिस्वा मनापामनापेसु रूपेसु तस्स ठितोव कायो होति, ठितं चित्तं अज्झत्तं सुसण्ठितं सुविमुत्तं. सोतेन सद्दं सुत्वा…पे… मनसा धम्मं विञ्ञाय मनापामनापेसु धम्मेसु तस्स ठितोव कायो होति, ठितं चित्तं अज्झत्तं सुसण्ठितं सुविमुत्तं.

चक्खुना रूपं दिस्वा रजनीये न रज्जति, दुस्सनीये [दोसनीये (बहूसु)] न दुस्सति, मोहनीये न मुय्हति, कोपनीये न कुप्पति, मदनीये न मज्जति, किलेसनीये न किलिस्सति. सोतेन सद्दं सुत्वा…पे… मनसा धम्मं विञ्ञाय रजनीये न रज्जति दुस्सनीये न दुस्सति, मोहनीये न मुय्हति, कोपनीये न कुप्पति, मदनीये न मज्जति, किलेसनीये न किलिस्सति. दिट्ठे दिट्ठमत्तो, सुते सुतमत्तो, मुते मुतमत्तो, विञ्ञाते विञ्ञातमत्तो. दिट्ठे न लिम्पति, सुते न लिम्पति, मुते न लिम्पति, विञ्ञाते न लिम्पति. दिट्ठे अनूपयो अनपायो अनिस्सितो अप्पटिबद्धो विप्पमुत्तो विसञ्ञुत्तो विमरियादिकतेन चेतसा विहरति. सुते… मुते… विञ्ञाते अनूपयो अनपायो अनिस्सितो अप्पटिबद्धो विप्पमुत्तो विसञ्ञुत्तो विमरियादिकतेन चेतसा विहरति.

संविज्जति अरहतो चक्खु, पस्सति अरहा चक्खुना रूपं. छन्दरागो अरहतो नत्थि, सुविमुत्तचित्तो अरहा. संविज्जति अरहतो सोतं, सुणाति अरहा सोतेन सद्दं. छन्दरागो अरहतो नत्थि, सुविमुत्तचित्तो अरहा. संविज्जति अरहतो घानं, घायति अरहा घानेन गन्धं. छन्दरागो अरहतो नत्थि, सुविमुत्तचित्तो अरहा. संविज्जति अरहतो जिव्हा, सायति अरहा जिव्हाय रसं…पे… संविज्जति अरहतो कायो, फुसति अरहा कायेन फोट्ठब्बं…पे… संविज्जति अरहतो मनो, विजानाति अरहा मनसा धम्मं. छन्दरागो अरहतो नत्थि सुविमुत्तचित्तो अरहा.

चक्खु रूपारामं रूपरतं रूपसम्मुदितं, तं अरहतो दन्तं गुत्तं रक्खितं संवुतं, तस्स च संवराय धम्मं देसेति. सोतं सद्दारामं…पे… घानं गन्धारामं… जिव्हा रसारामा रसरता रससम्मुदिता, सा अरहतो दन्ता गुत्ता रक्खिता संवुता, तस्सा च संवराय धम्मं देसेति. कायो फोट्ठब्बारामो…पे… मनो धम्मारामो धम्मरतो धम्मसम्मुदितो, सो अरहतो दन्तो गुत्तो रक्खितो संवुतो, तस्स च संवराय धम्मं देसेति.

‘‘दन्तं नयन्ति समितिं, दन्तं राजाभिरूहति;

दन्तो सेट्ठो मनुस्सेसु, योतिवाक्यं तितिक्खति.

‘‘वरमस्सतरा दन्ता, आजानीया च [आजानियाव (स्या.)] सिन्धवा;

कुञ्जरा च महानागा, अत्तदन्तो ततो वरं.

‘‘न हि एतेहि यानेहि, गच्छेय्य अगतं दिसं;

यथात्तना सुदन्तेन, दन्तो दन्तेन गच्छति.

‘‘विधासु न विकम्पन्ति, विप्पमुत्ता पुनब्भवा;

दन्तभूमिमनुप्पत्ता, ते लोके विजिताविनो.

‘‘यस्सिन्द्रियानि भावितानि [विभावितानि (सी.)], अज्झत्तं बहिद्धा च [अज्झत्तबहिद्धा च (सी.), अज्झत्तञ्च बहिद्धा च (स्या. क.) सु. नि. ५२१] सब्बलोके;

निब्बिज्झ इमं [निब्बिज्झिमं (स्या.), निब्बिज्ज इमं (क.)] परञ्च लोकं, कालं कङ्खति भावितो स दन्तो’’ति.

उपेक्खको सदाति. सदा सब्बदा सब्बकालं निच्चकालं धुवकालं…पे… पच्छिमे वयोखन्धे. सतोति चतूहि कारणेहि सतो – काये कायानुपस्सनासतिपट्ठानं भावेन्तो सतो, वेदनासु… चित्ते… धम्मेसु धम्मानुपस्सनासतिपट्ठानं भावेन्तो सतो…पे… सो वुच्चति सतोति – उपेक्खको सदा सतो.

न लोके मञ्ञते समन्ति. ‘‘सदिसोहमस्मी’’ति मानं न जनेति जातिया वा गोत्तेन वा…पे… अञ्ञतरञ्ञतरेन वा वत्थुनाति – न लोके मञ्ञते समं.

न विसेसी न नीचेय्योति. ‘‘सेय्योहमस्मी’’ति अतिमानं न जनेति जातिया वा गोत्तेन वा…पे… अञ्ञतरञ्ञतरेन वा वत्थुना. ‘‘हीनोहमस्मी’’ति ओमानं न जनेति जातिया वा गोत्तेन वा…पे… अञ्ञतरञ्ञतरेन वा वत्थुनाति – न विसेसी न नीचेय्यो.

तस्स नो सन्ति उस्सदाति. तस्साति अरहतो खीणासवस्स. उस्सदाति सत्तुस्सदा – रागुस्सदो दोसुस्सदो मोहुस्सदो मानुस्सदो दिट्ठुस्सदो किलेसुस्सदो कम्मुस्सदो. तस्सिमे उस्सदा नत्थि न सन्ति न संविज्जन्ति नुपलब्भन्ति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढाति – तस्स नो सन्ति उस्सदा.

तेनाह भगवा –

‘‘उपेक्खको सदा सतो, न लोके मञ्ञते समं;

न विसेसी न नीचेय्यो, तस्स नो सन्ति उस्सदा’’ति.

९१.

यस्स निस्सयता [निस्सयना (क.)] नत्थि, ञत्वा धम्मं अनिस्सितो;

भवाय विभवाय वा, तण्हा यस्स न विज्जति.

यस्स निस्सयता नत्थीति. यस्साति अरहतो खीणासवस्स. निस्सयाति द्वे निस्सया – तण्हानिस्सयो च दिट्ठिनिस्सयो च…पे… अयं तण्हानिस्सयो…पे… अयं दिट्ठिनिस्सयो. तस्स तण्हानिस्सयो पहीनो, दिट्ठिनिस्सयो पटिनिस्सट्ठो; तण्हानिस्सयस्स पहीनत्ता दिट्ठिनिस्सयस्स पटिनिस्सट्ठत्ता निस्सयता यस्स नत्थि न सन्ति न संविज्जति नुपलब्भति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढाति – यस्स निस्सयता नत्थि.

ञत्वा धम्मं अनिस्सितोति. ञत्वाति ञत्वा जानित्वा तुलयित्वा तीरयित्वा विभावयित्वा विभूतं कत्वा, ‘‘सब्बे सङ्खारा अनिच्चा’’ति ञत्वा जानित्वा तुलयित्वा तीरयित्वा विभावयित्वा विभूतं कत्वा, ‘‘सब्बे सङ्खारा दुक्खा’’ति… ‘‘सब्बे धम्मा अनत्ता’’ति…पे… ‘‘यं किञ्चि समुदयधम्मं सब्बं तं निरोधधम्म’’न्ति ञत्वा जानित्वा तुलयित्वा तीरयित्वा विभावयित्वा विभूतं कत्वा. अनिस्सितोति द्वे निस्सया – तण्हानिस्सयो च दिट्ठिनिस्सयो च…पे… अयं तण्हानिस्सयो…पे… अयं दिट्ठिनिस्सयो. तण्हानिस्सयं पहाय दिट्ठिनिस्सयं पटिनिस्सज्जित्वा चक्खुं अनिस्सितो, सोतं अनिस्सितो, घानं अनिस्सितो, जिव्हं अनिस्सितो, कायं अनिस्सितो, मनं अनिस्सितो, रूपे… सद्दे… गन्धे… रसे… फोट्ठब्बे… कुलं… गणं… आवासं…पे… दिट्ठसुतमुतविञ्ञातब्बे धम्मे अनिस्सितो अनल्लीनो अनुपगतो अनज्झोसितो अनधिमुत्तो निक्खन्तो निस्सटो विप्पमुत्तो विसञ्ञुत्तो विमरियादिकतेन चेतसा विहरतीति – ञत्वा धम्मं अनिस्सितो.

भवाय विभवाय वा, तण्हा यस्स न विज्जतीति. तण्हाति रूपतण्हा सद्दतण्हा गन्धतण्हा रसतण्हा फोट्ठब्बतण्हा धम्मतण्हा. यस्साति अरहतो खीणासवस्स. भवायाति भवदिट्ठिया, विभवायाति विभवदिट्ठिया; भवायाति सस्सतदिट्ठिया, विभवायाति उच्छेददिट्ठिया; भवायाति पुनप्पुनभवाय पुनप्पुनगतिया पुनप्पुनउपपत्तिया पुनप्पुनपटिसन्धिया पुनप्पुनअत्तभावाभिनिब्बत्तिया. तण्हा यस्स नत्थि न सन्ति न संविज्जति नुपलब्भति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढाति – भवाय विभवाय वा तण्हा यस्स न विज्जति.

तेनाह भगवा –

‘‘यस्स निस्सयता नत्थि, ञत्वा धम्मं अनिस्सितो;

भवाय विभवाय वा, तण्हा यस्स न विज्जती’’ति.

९२.

तं ब्रूमि उपसन्तोति, कामेसु अनपेक्खिनं;

गन्था तस्स न विज्जन्ति, अतरी सो विसत्तिकं.

तं ब्रूमि उपसन्तोति. उपसन्तो वूपसन्तो निब्बुतो पटिपस्सद्धोति. तं ब्रूमि तं कथेमि तं भणामि तं दीपयामि तं वोहरामीति – तं ब्रूमि उपसन्तोति.

कामेसु अनपेक्खिनन्ति. कामाति उद्दानतो द्वे कामा – वत्थुकामा च किलेसकामा च…पे… इमे वुच्चन्ति वत्थुकामा…पे… इमे वुच्चन्ति किलेसकामा. वत्थुकामे परिजानित्वा, किलेसकामे पहाय पजहित्वा विनोदेत्वा ब्यन्तिं करित्वा अनभावं गमेत्वा कामेसु अनपेक्खिनो वीतकामो चत्तकामो वन्तकामो मुत्तकामो पहीनकामो पटिनिस्सट्ठकामो, कामेसु वीतरागो विगतरागो चत्तरागो वन्तरागो मुत्तरागो पहीनरागो पटिनिस्सट्ठरागो निच्छातो निब्बुतो सीतिभूतो सुखप्पटिसंवेदी ब्रह्मभूतेन अत्तना विहरतीति – कामेसु अनपेक्खिनं.

गन्था तस्स न विज्जन्तीति. गन्थाति चत्तारो गन्था – अभिज्झा कायगन्थो, ब्यापादो कायगन्थो, सीलब्बतपरामासो कायगन्थो, इदंसच्चाभिनिवेसो कायगन्थो. अत्तनो दिट्ठिया रागो अभिज्झा कायगन्थो, परवादेसु आघातो अप्पच्चयो ब्यापादो कायगन्थो, अत्तनो सीलं वा वतं वा सीलब्बतं वा परामासो सीलब्बतपरामासो कायगन्थो, अत्तनो दिट्ठि इदंसच्चाभिनिवेसो कायगन्थो. तस्साति अरहतो खीणासवस्स. गन्था तस्स न विज्जन्तीति. गन्था तस्स नत्थि न सन्ति न संविज्जन्ति नुपलब्भन्ति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढाति – गन्था तस्स न विज्जन्ति.

अतरी सो विसत्तिकन्ति. विसत्तिका वुच्चति तण्हा. यो रागो सारागो…पे… अभिज्झा लोभो अकुसलमूलं. विसत्तिकाति केनट्ठेन विसत्तिका? विसताति विसत्तिका, विसालाति विसत्तिका, विसटाति विसत्तिका, विसमाति विसत्तिका, विसक्कतीति विसत्तिका, विसंहरतीति विसत्तिका, विसंवादिकाति विसत्तिका, विसमूलाति विसत्तिका, विसफलाति विसत्तिका, विसपरिभोगाति विसत्तिका, विसाला वा पन सा तण्हा रूपे… सद्दे… गन्धे… रसे… फोट्ठब्बे… कुले… गणे… आवासे…पे… दिट्ठसुतमुतविञ्ञातब्बेसु धम्मेसु विसतं वित्थताति विसत्तिका. अतरी सो विसत्तिकन्ति. सो इमं विसत्तिकं तण्हं अतरि उत्तरि पतरि समतिक्कमि वीतिवत्तीति – अतरी सो विसत्तिकं.

तेनाह भगवा –

‘‘तं ब्रूमि उपसन्तोति, कामेसु अनपेक्खिनं;

गन्था तस्स न विज्जन्ति, अतरी सो विसत्तिक’’न्ति.

९३.

न तस्स पुत्ता पसवो, खेत्तं वत्थुञ्च विज्जति;

अत्ता वापि निरत्ता वा, न तस्मिं उपलब्भति.

न तस्स पुत्ता पसवो, खेत्तं वत्थुञ्च विज्जतीति. नाति पटिक्खेपो. तस्साति अरहतो खीणासवस्स. पुत्ताति चत्तारो पुत्ता – अत्तजो पुत्तो, खेत्तजो पुत्तो, दिन्नको पुत्तो, अन्तेवासिको पुत्तो. पसवोति. अजेळका कुक्कुटसूकरा हत्थिगावास्सवळवा. खेत्तन्ति सालिखेत्तं वीहिखेत्तं मुग्गखेत्तं मासखेत्तं यवखेत्तं गोधुमखेत्तं तिलखेत्तं. वत्थुन्ति घरवत्थुं कोट्ठवत्थुं पुरेवत्थुं पच्छावत्थुं आरामवत्थुं विहारवत्थुं. न तस्स पुत्ता पसवो, खेत्तं वत्थुञ्च विज्जतीति. तस्स पुत्तपरिग्गहो वा पसुपरिग्गहो वा खेत्तपरिग्गहो वा वत्थुपरिग्गहो वा नत्थि न सन्ति न संविज्जन्ति नुपलब्भन्ति, पहीना समुच्छिन्ना वूपसन्ता पटिपस्सद्धा अभब्बुप्पत्तिका ञाणग्गिना दड्ढाति – न तस्स पुत्ता पसवो, खेत्तं वत्थुञ्च विज्जति.

अत्ता वापि निरत्ता वा, न तस्मिं उपलब्भतीति. अत्ताति अत्तदिट्ठि, निरत्ताति उच्छेददिट्ठि; अत्ताति गहितं नत्थि, निरत्ताति मुञ्चितब्बं नत्थि. यस्स नत्थि गहितं तस्स नत्थि मुञ्चितब्बं. यस्स नत्थि मुञ्चितब्बं तस्स नत्थि गहितं. गाहमुञ्चनसमतिक्कन्तो अरहा वुद्धिपरिहानिवीतिवत्तो. सो वुट्ठवासो चिण्णचरणो…पे… जातिमरणसंसारो नत्थि तस्स पुनब्भवोति – अत्ता वापि निरत्ता वा, न तस्मिं उपलब्भति.

तेनाह भगवा –

‘‘न तस्स पुत्ता पसवो, खेत्तं वत्थुञ्च विज्जति;

अत्ता वापि निरत्ता वा, न तस्मिं उपलब्भती’’ति.

९४.

येन नं वज्जुं पुथुज्जना, अथो समणब्राह्मणा;

तं तस्स अपुरक्खतं, तस्मा वादेसु नेजति.

येन नं वज्जुं पुथुज्जना, अथो समणब्राह्मणाति. पुथुज्जनाति पुथु किलेसे जनेन्तीति पुथुज्जना, पुथु अविहतसक्कायदिट्ठिकाति पुथुज्जना, पुथु सत्थारानं मुखुल्लोकिकाति [मुखुल्लोककाति (सी.)] पुथुज्जना, पुथु सब्बगतीहि अवुट्ठिताति पुथुज्जना, पुथु नानाभिसङ्खारे अभिसङ्खरोन्तीति पुथुज्जना, पुथु नानाओघेहि वुय्हन्तीति पुथुज्जना, पुथु नानासन्तापेहि सन्तप्पेन्तीति पुथुज्जना, पुथु नानापरिळाहेहि परिडय्हन्तीति पुथुज्जना, पुथु पञ्चसु कामगुणेसु रत्ता गिद्धा गधिता मुच्छिता अज्झोसन्ना लग्गा लग्गिता पलिबुद्धाति पुथुज्जना, पुथु पञ्चहि नीवरणेहि आवुता निवुता ओवुता पिहिता पटिच्छन्ना पटिकुज्जिताति – पुथुज्जना. समणाति ये केचि इतो बहिद्धा परिब्बजूपगता परिब्बजसमापन्ना. ब्राह्मणाति ये केचि भोवादिका. येन नं वज्जुं पुथुज्जना, अथो समणब्राह्मणाति. पुथुज्जना येन तं रागेन वदेय्युं, येन दोसेन वदेय्युं, येन मोहेन वदेय्युं, येन मानेन वदेय्युं, याय दिट्ठिया वदेय्युं, येन उद्धच्चेन वदेय्युं, याय विचिकिच्छाय वदेय्युं, येहि अनुसयेहि वदेय्युं, रत्तोति वा दुट्ठोति वा मूळ्होति वा विनिबद्धोति वा परामट्ठोति वा विक्खेपगतोति वा अनिट्ठङ्गतोति वा थामगतोति वा ते अभिसङ्खारा पहीना; अभिसङ्खारानं पहीनत्ता गतिया [गतियो (स्या.)] येन तं वदेय्युं – नेरयिकोति वा तिरच्छानयोनिकोति वा पेत्तिविसयिकोति वा मनुस्सोति वा देवोति वा रूपीति वा अरूपीति वा सञ्ञीति वा असञ्ञीति वा नेवसञ्ञीनासञ्ञीति वा. सो हेतु नत्थि पच्चयो नत्थि कारणं नत्थि येन नं वदेय्युं कथेय्युं भणेय्युं दीपयेय्युं वोहरेय्युन्ति – येन नं वज्जुं पुथुज्जना, अथो समणब्राह्मणा.

तं तस्स अपुरक्खतन्ति. तस्साति अरहतो खीणासवस्स. पुरेक्खाराति द्वे पुरेक्खारा – तण्हापुरेक्खारो च दिट्ठिपुरेक्खारो च…पे… अयं तण्हापुरेक्खारो…पे… अयं दिट्ठिपुरेक्खारो. तस्स तण्हापुरेक्खारो पहीनो, दिट्ठिपुरेक्खारो पटिनिस्सट्ठो; तण्हापुरेक्खारस्स पहीनत्ता, दिट्ठिपुरेक्खारस्स पटिनिस्सट्ठत्ता न तण्हं वा दिट्ठिं वा पुरतो कत्वा चरति, न तण्हाधजो न तण्हाकेतु न तण्हाधिपतेय्यो, न दिट्ठिधजो न दिट्ठिकेतु न दिट्ठाधिपतेय्यो, न तण्हाय वा न दिट्ठिया वा परिवारितो चरतीति – तं तस्स अपुरक्खतं.

तस्मा वादेसु नेजतीति. तस्माति तस्मा तंकारणा तंहेतु तप्पच्चया तंनिदाना वादेसु उपवादेसु निन्दाय गरहाय अकित्तिया अवण्णहारिकाय नेजति न इञ्जति न चलति न वेधति नप्पवेधति न सम्पवेधतीति – तस्मा वादेसु नेजति.

तेनाह भगवा –

‘‘येन नं वज्जुं पुथुज्जना, अथो समणब्राह्मणा;

तं तस्स अपुरक्खतं, तस्मा वादेसु नेजती’’ति.

९५.

वीतगेधो अमच्छरी, न उस्सेसु वदते मुनि;

न समेसु न ओमेसु, कप्पं नेति अकप्पियो.

वीतगेधो अमच्छरीति. गेधो वुच्चति तण्हा. यो रागो सारागो…पे… अभिज्झा लोभो अकुसलमूलं. यस्सेसो गेधो पहीनो समुच्छिन्नो वूपसन्तो पटिपस्सद्धो अभब्बुप्पत्तिको ञाणग्गिना दड्ढो, सो वुच्चति वीतगेधो. सो रूपे अगिद्धो…पे… दिट्ठसुतमुतविञ्ञातब्बेसु धम्मेसु अगिद्धो अगधितो अमुच्छितो अनज्झोसितो, वीतगेधो विगतगेधो चत्तगेधो वन्तगेधो मुत्तगेधो पहीनगेधो पटिनिस्सट्ठगेधो निच्छातो…पे… ब्रह्मभूतेन अत्तना विहरतीति – वीतगेधो. अमच्छरीति मच्छरियन्ति पञ्च मच्छरियानि – आवासमच्छरियं, कुलमच्छरियं, लाभमच्छरियं, वण्णमच्छरियं, धम्ममच्छरियं. यं एवरूपं…पे… गाहो – इदं वुच्चति मच्छरियं. यस्सेतं मच्छरियं पहीनं समुच्छिन्नं वूपसन्तं पटिपस्सद्धं अभब्बुप्पत्तिकं ञाणग्गिना दड्ढं, सो वुच्चति अमच्छरीति – वीतगेधो अमच्छरी.

न उस्सेसु वदते मुनि, न समेसु न ओमेसूति. मुनीति. मोनं वुच्चति ञाणं…पे… सङ्गजालमतिच्च सो मुनि. ‘‘सेय्योहमस्मी’’ति वा, ‘‘सदिसोहमस्मी’’ति वा, ‘‘हीनोहमस्मी’’ति वा न वदति न कथेति न भणति न दीपयति न वोहरतीति – न उस्सेसु वदते मुनि, न समेसु न ओमेसु.

कप्पं नेति अकप्पियोति. कप्पाति द्वे कप्पा – तण्हाकप्पो च दिट्ठिकप्पो च…पे… अयं तण्हाकप्पो…पे… अयं दिट्ठिकप्पो. तस्स तण्हाकप्पो पहीनो, दिट्ठिकप्पो पटिनिस्सट्ठो; तण्हाकप्पस्स पहीनत्ता, दिट्ठिकप्पस्स पटिनिस्सट्ठत्ता तण्हाकप्पं वा दिट्ठिकप्पं वा नेति न उपेति न उपगच्छति न गण्हाति न परामसति नाभिनिविसतीति – कप्पं नेति. अकप्पियोति. कप्पाति द्वे कप्पा – तण्हाकप्पो च दिट्ठिकप्पो च…पे… अयं तण्हाकप्पो…पे… अयं दिट्ठिकप्पो. तस्स तण्हाकप्पो पहीनो, दिट्ठिकप्पो पटिनिस्सट्ठो; तस्स तण्हाकप्पस्स पहीनत्ता, दिट्ठिकप्पस्स पटिनिस्सट्ठत्ता तण्हाकप्पं वा दिट्ठिकप्पं वा न कप्पेति न जनेति न सञ्जनेति न निब्बत्तेति नाभिनिब्बत्तेतीति – कप्पं नेति अकप्पियो.

तेनाह भगवा –

‘‘वीतगेधो अमच्छरी, न उस्सेसु वदते मुनि;

न समेसु न ओमेसु, कप्पं नेति अकप्पियो’’ति.

९६.

यस्स लोके सकं नत्थि, असता च न सोचति;

धम्मेसु च न गच्छति, स वे सन्तोति वुच्चति.

यस्स लोके सकं नत्थीति. यस्साति अरहतो खीणासवस्स. लोके सकं नत्थीति. तस्स मय्हं वा इदं परेसं वा इदन्ति किञ्चि रूपगतं वेदनागतं सञ्ञागतं सङ्खारगतं विञ्ञाणगतं, गहितं परामट्ठं अभिनिविट्ठं अज्झोसितं अधिमुत्तं, नत्थि न सन्ति…पे… ञाणग्गिना दड्ढन्ति – यस्स लोके सकं नत्थि. असता च न सोचतीति. विपरिणतं वा वत्थुं न सोचति, विपरिणतस्मिं वा वत्थुस्मिं न सोचति. चक्खु मे विपरिणतन्ति न सोचति. सोतं मे… घानं मे… जिव्हा मे… कायो मे… मनो मे… रूपा मे… सद्दा मे… गन्धा मे… रसा मे… फोट्ठब्बा मे… कुलं मे… गणो मे… आवासो मे… लाभो मे… यसो मे… पसंसा मे… सुखं मे… चीवरं मे… पिण्डपातो मे… सेनासनं मे… गिलानपच्चयभेसज्जपरिक्खारो मे… माता मे… पिता मे… भाता मे… भगिनी मे… पुत्तो मे… धीता मे… मित्ता मे… अमच्चा मे… ञातका मे… सालोहिता मे विपरिणताति न सोचति न किलमति न परिदेवति न उरत्ताळिं कन्दति न सम्मोहं आपज्जतीति. एवम्पि, असता च न सोचति.

अथ वा असन्ताय [असताय (सी.), असाताय (स्या.)] दुक्खाय वेदनाय फुट्ठो परेतो समोहितो समन्नागतो न सोचति न किलमति न परिदेवति न उरत्ताळिं कन्दति न सम्मोहं आपज्जति. चक्खुरोगेन फुट्ठो परेतो समोहितो समन्नागतो न सोचति न किलमति न परिदेवति न उरत्ताळिं कन्दति न सम्मोहं आपज्जति, सोतरोगेन… घानरोगेन… जिव्हारोगेन… कायरोगेन… सीसरोगेन… कण्णरोगेन… मुखरोगेन… दन्तरोगेन… कासेन… सासेन… पिनासेन… डाहेन… जरेन… कुच्छिरोगेन… मुच्छाय… पक्खन्दिकाय… सूलेन… विसूचिकाय… कुट्ठेन… गण्डेन… किलासेन… सोसेन… अपमारेन… दद्दुया… कण्डुया… कच्छुया… रखसाय … वितच्छिकाय… लोहितेन… पित्तेन… मधुमेहेन… अंसाय… पिळकाय… भगन्दलेन [भगन्दलाय (सी. स्या.)] … पित्तसमुट्ठानेन आबाधेन… सेम्हसमुट्ठानेन आबाधेन… वातसमुट्ठानेन आबाधेन… सन्निपातिकेन आबाधेन… उतुपरिणामजेन आबाधेन… विसमपरिहारजेन आबाधेन… ओपक्कमिकेन आबाधेन… कम्मविपाकजेन आबाधेन… सीतेन… उण्हेन… जिघच्छाय… पिपासाय… डंसमकसवातातपसरीसपसम्फस्सेहि फुट्ठो परेतो समोहितो समन्नागतो न सोचति न किलमति न परिदेवति न उरत्ताळिं कन्दति न सम्मोहं आपज्जतीति. एवम्पि, असता च न सोचति.

अथ वा असन्ते असंविज्जमाने अनुपलब्भमाने [अनुपलब्भियमाने (स्या. क.)] – ‘‘अहो वत मे तं नत्थि, सिया वत मे तं, तं वताहं न च लभामी’’ति न सोचति न किलमति न परिदेवति न उरत्ताळिं कन्दति न सम्मोहं आपज्जतीति. एवम्पि असता च न सोचति. धम्मेसु च न गच्छतीति न छन्दागतिं गच्छति, न दोसागतिं गच्छति, न मोहागतिं गच्छति, न भयागतिं गच्छति, न रागवसेन गच्छति, न दोसवसेन गच्छति, न मोहवसेन गच्छति, न मानवसेन गच्छति, न दिट्ठिवसेन गच्छति, न उद्धच्चवसेन गच्छति, न विचिकिच्छावसेन गच्छति, न अनुसयवसेन गच्छति न च वग्गेहि धम्मेहि यायति नीयति वुय्हति संहरीयतीति – धम्मेसु च न गच्छति.

स वे सन्तोति वुच्चतीति. सो सन्तो उपसन्तो वूपसन्तो निब्बुतो पटिपस्सद्धोति वुच्चति पवुच्चति कथीयति भणीयति दीपीयति वोहरीयतीति – स वे सन्तोति वुच्चति.

तेनाह भगवा –

‘‘यस्स लोके सकं नत्थि, असता च न सोचति;

धम्मेसु च न गच्छति, स वे सन्तोति वुच्चती’’ति.

पुराभेदसुत्तनिद्देसो दसमो.

११. कलहविवादसुत्तनिद्देसो

अथ कलहविवादसुत्तनिद्देसं वक्खति –

९७.

कुतोपहूता कलहा विवादा, परिदेवसोका सहमच्छरा च;

मानातिमाना सहपेसुणा च, कुतोपहूता ते तदिङ्घ ब्रूहि.

कुतोपहूता कलहा विवादाति. कलहोति एकेन आकारेन कलहो; विवादोतिपि तञ्ञेव. यो कलहो सो विवादो, यो विवादो सो कलहो. अथ वा अपरेन आकारेन विवादो वुच्चति कलहस्स पुब्बभागो विवादो. राजानोपि राजूहि विवदन्ति, खत्तियापि खत्तियेहि विवदन्ति, ब्राह्मणापि ब्राह्मणेहि विवदन्ति, गहपतीपि गहपतीहि विवदन्ति, मातापि पुत्तेन विवदति, पुत्तोपि मातरा विवदति, पितापि पुत्तेन विवदति, पुत्तोपि पितरा विवदति, भातापि भातरा विवदति, भातापि भगिनिया विवदति, भगिनीपि भातरा विवदति, सहायोपि सहायेन विवदति – अयं विवादो. कतमो कलहो? आगारिका दण्डपसुता कायेन वाचाय कलहं करोन्ति, पब्बजिता आपत्तिं आपज्जन्ता कायेन वाचाय कलहं करोन्ति – अयं कलहो.

कुतोपहूता कलहा विवादाति. कलहा च विवादा च कुतोपहूता कुतोजाता कुतोसञ्जाता कुतोनिब्बत्ता कुतोअभिनिब्बत्ता कुतोपातुभूता, किंनिदाना किंसमुदया किंजातिका किंपभवाति कलहस्स च विवादस्स च मूलं पुच्छति, हेतुं पुच्छति, निदानं पुच्छति, सम्भवं पुच्छति, पभवं पुच्छति, समुट्ठानं पुच्छति, आहारं पुच्छति, आरम्मणं पुच्छति, पच्चयं पुच्छति, समुदयं पुच्छति पपुच्छति याचति अज्झेसति [अज्झोसति (सी.)] पसादेतीति – कुतोपहूता कलहा विवादा.

परिदेवसोका सहमच्छरा चाति. परिदेवोति ञातिब्यसनेन वा फुट्ठस्स, भोगब्यसनेन वा फुट्ठस्स, रोगब्यसनेन वा फुट्ठस्स, सीलब्यसनेन वा फुट्ठस्स, दिट्ठिब्यसनेन वा फुट्ठस्स, अञ्ञतरञ्ञतरेन वा ब्यसनेन समन्नागतस्स, अञ्ञतरञ्ञतरेन वा दुक्खधम्मेन फुट्ठस्स, आदेवो परिदेवो, आदेवना परिदेवना, आदेवितत्तं परिदेवितत्तं, वाचा पलापो विप्पलापो लालप्पो लालप्पायना लालप्पायितत्तं. सोकोति ञातिब्यसनेन वा फुट्ठस्स, भोगरोगसीलदिट्ठिब्यसनेन वा फुट्ठस्स, अञ्ञतरञ्ञतरेन वा ब्यसनेन समन्नागतस्स, अञ्ञतरञ्ञतरेन वा दुक्खधम्मेन फुट्ठस्स, सोको सोचना सोचितत्तं, अन्तोसोको अन्तोपरिसोको, अन्तोडाहो अन्तोपरिडाहो, चेतसो परिज्झायना दोमनस्सं सोकसल्लं. मच्छरन्ति पञ्च मच्छरियानि – आवासमच्छरियं, कुलमच्छरियं, लाभमच्छरियं, वण्णमच्छरियं, धम्ममच्छरियं. यं एवरूपं मच्छरियं मच्छरायनं मच्छरायितत्तं वेविच्छं कदरियं कटुकञ्चुकता अग्गहितत्तं चित्तस्स – इदं वुच्चति मच्छरियं. अपि च, खन्धमच्छरियम्पि मच्छरियं, धातुमच्छरियम्पि मच्छरियं, आयतनमच्छरियम्पि मच्छरियं गाहो. इदं वुच्चति मच्छरियन्ति – परिदेवसोका सहमच्छरा च.

मानातिमाना सहपेसुणा चाति. मानोति इधेकच्चो मानं जनेति जातिया वा गोत्तेन वा कोलपुत्तियेन वा वण्णपोक्खरताय वा धनेन वा अज्झेनेन वा कम्मायतनेन वा सिप्पायतनेन वा विज्जाट्ठानेन वा सुतेन वा पटिभानेन वा अञ्ञतरञ्ञतरेन वा वत्थुना. अतिमानोति इधेकच्चो परं अतिमञ्ञति जातिया वा गोत्तेन वा…पे… अञ्ञतरञ्ञतरेन वा वत्थुना. पेसुञ्ञन्ति इधेकच्चो पिसुणवाचो होति – इतो सुत्वा अमुत्र अक्खाता इमेसं भेदाय, अमुत्र वा सुत्वा इमेसं अक्खाता अमूसं भेदाय. इति समग्गानं वा भेत्ता, भिन्नानं वा अनुप्पदाता, वग्गारामो वग्गरतो वग्गनन्दी वग्गकरणिं वाचं भासिता होति – इदं वुच्चति पेसुञ्ञं. अपि च द्वीहि कारणेहि पेसुञ्ञं उपसंहरति – पियकम्यताय वा भेदाधिप्पायेन वा. कथं पियकम्यताय पेसुञ्ञं उपसंहरति? इमस्स पियो भविस्सामि, मनापो भविस्सामि, विस्सासिको भविस्सामि, अब्भन्तरिको भविस्सामि, सुहदयो भविस्सामीति – एवं पियकम्यताय पेसुञ्ञं उपसंहरति. कथं भेदाधिप्पायेन पेसुञ्ञं उपसंहरति? कथं इमे नाना अस्सु, विना अस्सु, वग्गा अस्सु, द्विधा अस्सु, द्वेज्झा अस्सु, द्वे पक्खा अस्सु, भिज्जेय्युं न समागच्छेय्युं, दुक्खं न फासु विहरेय्युन्ति – एवं भेदाधिप्पायेन पेसुञ्ञं उपसंहरतीति – मानातिमाना सहपेसुणा च.

कुतोपहूता ते तदिङ्घ ब्रूहीति. कलहो च विवादो च परिदेवो च सोको च मच्छरियञ्च मानो च अतिमानो च पेसुञ्ञञ्चाति – इमे अट्ठ किलेसा कुतोपहूता कुतोजाता कुतोसञ्जाता कुतोनिब्बत्ता कुतोअभिनिब्बत्ता कुतोपातुभूता, किंनिदाना किंसमुदया किंजातिका किंपभवाति. इमेसं अट्ठन्नं किलेसानं मूलं पुच्छति, हेतुं पुच्छति, निदानं पुच्छति, सम्भवं पुच्छति, पभवं पुच्छति, समुट्ठानं पुच्छति, आहारं पुच्छति, आरम्मणं पुच्छति, पच्चयं पुच्छति, समुदयं पुच्छति पपुच्छति याचति अज्झेसति पसादेतीति – कुतोपहूता ते तदिङ्घं ब्रूहीति. इङ्घ ब्रूहि आचिक्ख देसेहि पञ्ञपेहि पट्ठपेहि विवर विभज उत्तानीकरोहि पकासेहीति – कुतोपहूता ते तदिङ्घ ब्रूहि.

तेनाह सो निम्मितो –

‘‘कुतोपहूता कलहा विवादा, परिदेवसोका सहमच्छरा च;

मानातिमाना सहपेसुणा च, कुतोपहूता ते तदिङ्घ ब्रूही’’ति.

९८.

पियप्पहूता कलहा विवादा, परिदेवसोका सहमच्छरा च;

मानातिमाना सहपेसुणा च, मच्छेरयुत्ता कलहा विवादा;

विवादजातेसु च पेसुणानि.

पियप्पहूता कलहा विवादा, परिदेवसोका सहमच्छरा चाति. पियाति द्वे पिया – सत्ता वा सङ्खारा वा. कतमे सत्ता पिया? इध यस्स ते होन्ति अत्थकामा हितकामा फासुकामा योगक्खेमकामा माता वा पिता वा भाता वा भगिनी वा पुत्तो वा धीता वा मित्ता वा अमच्चा वा ञाती वा सालोहिता वा – इमे सत्ता पिया. कतमे सङ्खारा पिया? मनापिका रूपा मनापिका सद्दा मनापिका गन्धा मनापिका रसा मनापिका फोट्ठब्बा – इमे सङ्खारा पिया.

पियं वत्थुं अच्छेदसङ्किनोपि कलहं करोन्ति, अच्छिज्जन्तेपि कलहं करोन्ति, अच्छिन्नेपि कलहं करोन्ति. पियं वत्थुं विपरिणामसङ्किनोपि कलहं करोन्ति, विपरिणामन्तेपि कलहं करोन्ति, विपरिणतेपि कलहं करोन्ति. पियं वत्थुं अच्छेदसङ्किनोपि विवदन्ति, अच्छिज्जन्तेपि विवदन्ति, अच्छिन्नेपि विवदन्ति. पियं वत्थुं विपरिणामसङ्किनोपि विवदन्ति, विपरिणामन्तेपि विवदन्ति, विपरिणतेपि विवदन्ति. पियं वत्थुं अच्छेदसङ्किनोपि परिदेवन्ति, अच्छिज्जन्तेपि परिदेवन्ति, अच्छिन्नेपि परिदेवन्ति. पियं वत्थुं विपरिणामसङ्किनोपि परिदेवन्ति, विपरिणामन्तेपि परिदेवन्ति, विपरिणतेपि परिदेवन्ति. पियं वत्थुं अच्छेदसङ्किनोपि सोचन्ति, अच्छिज्जन्तेपि सोचन्ति, अच्छिन्नेपि सोचन्ति. पियं वत्थुं विपरिणामसङ्किनोपि सोचन्ति, विपरिणामन्तेपि सोचन्ति, विपरिणतेपि सोचन्ति. पियं वत्थुं रक्खन्ति गोपेन्ति परिग्गण्हन्ति ममायन्ति मच्छरायन्ति.

मानातिमाना सहपेसुणा चाति. पियं वत्थुं निस्साय मानं जनेन्ति, पियं वत्थुं निस्साय अतिमानं जनेन्ति. कथं पियं वत्थुं निस्साय मानं जनेन्ति? मयं लाभिनो मनापिकानं रूपानं सद्दानं गन्धानं रसानं फोट्ठब्बानन्ति. एवं पियं वत्थुं निस्साय मानं जनेन्ति. कथं पियं वत्थुं निस्साय अतिमानं जनेन्ति? मयं लाभिनो मनापिकानं रूपानं सद्दानं गन्धानं रसानं फोट्ठब्बानं, इमे पनञ्ञे न लाभिनो मनापिकानं रूपानं सद्दानं गन्धानं रसानं फोट्ठब्बानन्ति. एवं पियं वत्थुं निस्साय अतिमानं जनेन्ति. पेसुञ्ञन्ति इधेकच्चो पिसुणवाचो होति, इतो सुत्वा अमुत्र अक्खाता इमेसं भेदाय…पे… एवं भेदाधिप्पायेन पेसुञ्ञं उपसंहरतीति…पे… मानातिमाना सहपेसुणा च.

मच्छेरयुत्ता कलहा विवादाति. कलहो च विवादो च परिदेवो च सोको च मानो च अतिमानो च पेसुञ्ञञ्चाति – इमे सत्त किलेसा मच्छरिये युत्ता पयुत्ता आयुत्ता समायुत्ताति – मच्छेरयुत्ता कलहा विवादा.

विवादजातेसु च पेसुणानीति. विवादे जाते सञ्जाते निब्बत्ते अभिनिब्बत्ते पातुभूते पेसुञ्ञं उपसंहरन्ति; इतो सुत्वा अमुत्र अक्खायन्ति इमेसं भेदाय, अमुत्र वा सुत्वा इमेसं अक्खायन्ति अमूसं भेदाय. इति समग्गानं वा भेत्तारो, भिन्नानं वा अनुप्पदातारो, वग्गारामा वग्गरता वग्गनन्दी वग्गकरणिं वाचं भासितारो होन्ति – इदं वुच्चति पेसुञ्ञं. अपि च द्वीहि कारणेहि पेसुञ्ञं उपसंहरन्ति – पियकम्यताय वा भेदाधिप्पायेन वा. कथं पियकम्यताय पेसुञ्ञं उपसंहरन्ति? इमस्स पिया भविस्साम, मनापा भविस्साम, विस्सासिका भविस्साम, अब्भन्तरिका भविस्साम, सुहदया भविस्सामाति. एवं पियकम्यताय पेसुञ्ञं उपसंहरन्ति. कथं भेदाधिप्पायेन पेसुञ्ञं उपसंहरन्ति? ‘‘कथं इमे नाना अस्सु, विना अस्सु, वग्गा अस्सु, द्वेधा अस्सु, द्वेज्झा अस्सु, द्वे पक्खा अस्सु, भिज्जेय्युं न समागच्छेय्युं, दुक्खं न फासु विहरेय्यु’’न्ति – एवं भेदाधिप्पायेन पेसुञ्ञं उपसंहरन्तीति – विवादजातेसु च पेसुणानि.

तेनाह भगवा –

‘‘पियप्पहूता कलहा विवादा, परिदेवसोका सहमच्छरा च;

मानातिमाना सहपेसुणा च, मच्छेरयुत्ता कलहा विवादा;

विवादजातेसु च पेसुणानी’’ति.

९९.

पिया सु लोकस्मिं कुतोनिदाना, ये चापि लोभा विचरन्ति लोके;

आसा च निट्ठा च कुतोनिदाना, ये सम्परायाय नरस्स होन्ति.

पिया सु लोकस्मिं कुतोनिदानाति. पिया कुतोनिदाना कुतोजाता कुतोसञ्जाता कुतोनिब्बत्ता कुतोअभिनिब्बत्ता कुतोपातुभूता, किंनिदाना किंसमुदया किंजातिका किंपभवाति पियानं मूलं पुच्छति…पे… समुदयं पुच्छति पपुच्छति याचति अज्झेसति पसादेतीति – पिया सु लोकस्मिं कुतोनिदाना.

ये चापि लोभा विचरन्ति लोकेति. ये चापीति खत्तिया च ब्राह्मणा च वेस्सा च सुद्दा च गहट्ठा च पब्बजिता च देवा च मनुस्सा च. लोभाति यो लोभो लुब्भना लुब्भितत्तं सारागो सारज्जना सारज्जितत्तं अभिज्झा लोभो अकुसलमूलं. विचरन्तीति विचरन्ति विहरन्ति इरियन्ति वत्तन्ति पालेन्ति यपेन्ति यापेन्ति. लोकेति अपायलोके मनुस्सलोके देवलोके खन्धलोके धातुलोके आयतनलोकेति – ये चापि लोभा विचरन्ति लोके.

आसा च निट्ठा च कुतोनिदानाति. आसा च निट्ठा च कुतोनिदाना कुतोजाता कुतोसञ्जाता कुतोनिब्बत्ता कुतोअभिनिब्बत्ता कुतोपातुभूता, किंनिदाना किंसमुदया किंजातिका किंपभवाति आसाय च निट्ठाय च मूलं पुच्छति…पे… समुदयं पुच्छति पपुच्छति याचति अज्झेसति पसादेतीति – आसा च निट्ठा च कुतोनिदाना. ये सम्परायाय नरस्स होन्तीति. ये नरस्स परायना होन्ति दीपा होन्ति ताणा होन्ति लेणा होन्ति सरणा होन्ति निट्ठा परायना होन्तीति – ये सम्परायाय नरस्स होन्ति.

तेनाह सो निम्मितो –

‘‘पिया सु लोकस्मिं कुतोनिदाना, ये चापि लोभा विचरन्ति लोके;

आसा च निट्ठा च कुतोनिदाना, ये सम्परायाय नरस्स होन्ती’’ति.

१००.

छन्दानिदानानि पियानि लोके, ये चापि [ये वापि (स्या.)] लोभा विचरन्ति लोके;

आसा च निट्ठा च इतोनिदाना, ये सम्परायाय नरस्स होन्ति.

छन्दानिदानानि पियानि लोकेति. छन्दोति यो कामेसु कामच्छन्दो कामरागो कामनन्दी कामतण्हा कामस्नेहो कामपरिळाहो काममुच्छा कामज्झोसानं कामोघो कामयोगो कामुपादानं कामच्छन्दनीवरणं. अपि च पञ्च छन्दा – परियेसनच्छन्दो, पटिलाभच्छन्दो, परिभोगच्छन्दो, सन्निधिच्छन्दो, विसज्जनच्छन्दो. कतमो परियेसनच्छन्दो? इधेकच्चो अज्झोसितोयेव अत्थिको छन्दजातो रूपे परियेसति, सद्दे… गन्धे… रसे… फोट्ठब्बे परियेसति – अयं परियेसनच्छन्दो. कतमो पटिलाभच्छन्दो? इधेकच्चो अज्झोसितोयेव अत्थिको छन्दजातो रूपे पटिलभति, सद्दे… गन्धे… रसे… फोट्ठब्बे पटिलभति – अयं पटिलाभच्छन्दो. कतमो परिभोगच्छन्दो? इधेकच्चो अज्झोसितोयेव अत्थिको छन्दजातो रूपे परिभुञ्जति, सद्दे… गन्धे… रसे… फोट्ठब्बे परिभुञ्जति – अयं परिभोगच्छन्दो. कतमो सन्निधिच्छन्दो? इधेकच्चो अज्झोसितोयेव अत्थिको छन्दजातो धनसन्निचयं करोति ‘‘आपदासु भविस्सती’’ति – अयं सन्निधिच्छन्दो. कतमो विसज्जनच्छन्दो? इधेकच्चो अज्झोसितोयेव अत्थिको छन्दजातो धनं विसज्जेति हत्थारोहानं अस्सारोहानं रथिकानं धनुग्गहानं पत्तिकानं ‘‘इमे मं रक्खिस्सन्ति गोपिस्सन्ति सम्परिवारिस्सन्ती’’ति – अयं विसज्जनच्छन्दो. पियानीति द्वे पिया – सत्ता वा सङ्खारा वा…पे… इमे सत्ता पिया…पे… इमे सङ्खारा पिया. छन्दानिदानानि पियानि लोकेति. पिया छन्दनिदाना छन्दसमुदया छन्दजातिका छन्दपभवाति – छन्दानिदानानि पियानि लोके.

ये चापि लोभा विचरन्ति लोकेति. ये चापीति खत्तिया च ब्राह्मणा च वेस्सा च सुद्दा च गहट्ठा च पब्बजिता च देवा च मनुस्सा च. लोभाति यो लोभो लुब्भना लुब्भितत्तं सारागो सारज्जना सारज्जितत्तं अभिज्झा लोभो अकुसलमूलं. विचरन्तीति विचरन्ति विहरन्ति इरियन्ति वत्तन्ति पालेन्ति यपेन्ति यापेन्ति. लोकेति अपायलोके…पे… आयतनलोकेति – ये चापि लोभा विचरन्ति लोके.

आसा च निट्ठा च इतोनिदानाति. आसा वुच्चति तण्हा. यो रागो सारागो…पे… अभिज्झा लोभो अकुसलमूलं. निट्ठाति इधेकच्चो रूपे परियेसन्तो रूपं पटिलभति, रूपनिट्ठो होति, सद्दे… गन्धे… रसे… फोट्ठब्बे… कुलं… गणं… आवासं… लाभं… यसं… पसंसं… सुखं… चीवरं… पिण्डपातं… सेनासनं… गिलानपच्चयभेसज्जपरिक्खारं … सुत्तन्तं… विनयं… अभिधम्मं… आरञ्ञिकङ्गं… पिण्डपातिकङ्गं… पंसुकूलिकङ्गं… तेचीवरिकङ्गं… सपदानचारिकङ्गं… खलुपच्छाभत्तिकङ्गं… नेसज्जिकङ्गं… यथासन्थतिकङ्गं… पठमं झानं… दुतियं झानं… ततियं झानं… चतुत्थं झानं… आकासानञ्चायतनसमापत्तिं… विञ्ञाणञ्चायतनसमापत्तिं… आकिञ्चञ्ञायतनसमापत्तिं … नेवसञ्ञानासञ्ञायतनसमापत्तिं परियेसन्तो नेवसञ्ञानासञ्ञायतनसमापत्तिं पटिलभति, नेवसञ्ञानासञ्ञायतनसमापत्तिनिट्ठो होति.

‘‘आसाय कसते खेत्तं, बीजं आसाय वप्पति;

आसाय वाणिजा यन्ति, समुद्दं धनहारका;

याय आसाय तिट्ठामि, सा मे आसा समिज्झती’’ति.

आसाय समिद्धि वुच्चते निट्ठा. आसा च निट्ठा च इतोनिदानाति. आसा च निट्ठा च इतो छन्दनिदाना छन्दसमुदया छन्दजातिका छन्दपभवाति – आसा च निट्ठा च इतोनिदाना.

ये सम्परायाय नरस्स होन्तीति. ये नरस्स परायना होन्ति दीपा होन्ति ताणा होन्ति लेणा होन्ति सरणा होन्ति निट्ठा परायना होन्तीति – ये सम्परायाय नरस्स होन्ति.

तेनाह भगवा –

‘‘छन्दानिदानानि पियानि लोके, ये चापि लोभा विचरन्ति लोके;

आसा च निट्ठा च इतोनिदाना, ये सम्परायाय नरस्स होन्ती’’ति.

१०१.

छन्दो नु लोकस्मिं कुतोनिदानो, विनिच्छया चापि [वापि (सी. स्या.)] कुतोपहूता;

कोधो मोसवज्जञ्च कथंकथा च, ये चापि धम्मा समणेन वुत्ता.

छन्दो नु लोकस्मिं कुतोनिदानोति. छन्दो कुतोनिदानो कुतोजातो कुतोसञ्जातो कुतोनिब्बत्तो कुतोअभिनिब्बत्तो कुतोपातुभूतो, किंनिदानो किंसमुदयो किंजातिको किंपभवोति छन्दस्स मूलं पुच्छति…पे… समुदयं पुच्छति पपुच्छति याचति अज्झेसति पसादेतीति – छन्दो नु लोकस्मिं कुतोनिदानो.

विनिच्छया चापि कुतोपहूताति. विनिच्छया कुतोपहूता कुतोजाता कुतोसञ्जाता कुतोनिब्बत्ता कुतोअभिनिब्बत्ता कुतोपातुभूता, किंनिदाना किंसमुदया किंजातिका किंपभवाति विनिच्छयानं मूलं पुच्छति…पे… समुदयं पुच्छति पपुच्छति याचति अज्झेसति पसादेतीति – विनिच्छया चापि कुतोपहूता.

कोधो मोसवज्जञ्च कथंकथा चाति. कोधोति यो एवरूपो चित्तस्स आघातो पटिघातो, पटिघं पटिविरोधो, कोपो पकोपो सम्पकोपो, दोसो पदोसो सम्पदोसो, चित्तस्स ब्यापत्ति मनोपदोसो, कोधो कुज्झना कुज्झितत्तं, दोसो दुस्सना दुस्सितत्तं, ब्यापत्ति ब्यापज्जना ब्यापज्जितत्तं, विरोधो पटिविरोधो, चण्डिक्कं असुरोपो अनत्तमनता चित्तस्स. मोसवज्जं वुच्चति मुसावादो. कथंकथा वुच्चति विचिकिच्छाति – कोधो मोसवज्जञ्च कथंकथा च.

ये चापि धम्मा समणेन वुत्ताति. ये चापीति ये कोधेन च मोसवज्जेन च कथंकथाय च सहगता सहजाता संसट्ठा सम्पयुत्ता, एकुप्पादा एकनिरोधा एकवत्थुका एकारम्मणा – इमे वुच्चन्ति ये चापि धम्मा. अथ वा ये ते किलेसा अञ्ञजातिका अञ्ञविहितका – इमे वुच्चन्ति ये चापि धम्मा. समणेन वुत्ताति समणेन समितपापेन ब्राह्मणेन बाहितपापधम्मेन भिक्खुना भिन्नकिलेसमूलेन सब्बाकुसलमूलबन्धना पमुत्तेन वुत्ता पवुत्ता आचिक्खिता देसिता पञ्ञपिता पट्ठपिता विवटा विभत्ता उत्तानीकता पकासिताति – ये चापि धम्मा समणेन वुत्ता.

तेनाह सो निम्मितो –

‘‘छन्दो नु लोकस्मिं कुतोनिदानो, विनिच्छता चापि कुतोपहूता;

कोधो मोसवज्जञ्च कथंकथा च, ये चापि धम्मा समणेन वुत्ता’’ति.

१०२.

सातं असातन्ति यमाहु लोके, तमूपनिस्साय पहोति छन्दो;

रूपेसु दिस्वा विभवं भवञ्च, विनिच्छयं कुब्बति [कूरुते (स्या.)] जन्तु लोके.

सातं असातन्ति यमाहु लोकेति. सातन्ति सुखा च वेदना, इट्ठञ्च वत्थु [वत्थुं (सी. क.)]. असातन्ति दुक्खा च वेदना, अनिट्ठञ्च वत्थु. यमाहु लोकेति यं आहंसु यं कथेन्ति यं भणन्ति यं दीपेन्ति यं वोहरन्तीति – सातं असातन्ति यमाहु लोके.

तमूपनिस्साय पहोति छन्दोति. सातासातं निस्साय, सुखदुक्खं निस्साय, सोमनस्सदोमनस्सं निस्साय, इट्ठानिट्ठं निस्साय, अनुनयपटिघं निस्साय छन्दो पहोति पभवति जायति सञ्जायति निब्बत्तति अभिनिब्बत्ततीति – तमूपनिस्साय पहोति छन्दो.

रूपेसु दिस्वा विभवं भवञ्चाति. रूपेसूति चत्तारो च महाभूता चतुन्नञ्च महाभूतानं उपादाय रूपं. कतमो रूपानं भवो? यो रूपानं भवो जाति सञ्जाति निब्बत्ति अभिनिब्बत्ति पातुभावो – अयं रूपानं भवो. कतमो रूपानं विभवो? यो रूपानं खयो वयो भेदो परिभेदो अनिच्चता अन्तरधानं – अयं रूपानं विभवो. रूपेसु दिस्वा विभवं भवञ्चाति रूपेसु भवञ्च विभवञ्च दिस्वा पस्सित्वा तुलयित्वा तीरयित्वा विभावयित्वा विभूतं कत्वाति – रूपेसु दिस्वा विभवं भवञ्च.

विनिच्छयं कुब्बति जन्तु लोकेति. विनिच्छयाति द्वे विनिच्छया – तण्हाविनिच्छयो च, दिट्ठिविनिच्छयो च. कथं तण्हाविनिच्छयं करोति? इधेकच्चस्स अनुप्पन्ना चेव भोगा न उप्पज्जन्ति, उप्पन्ना च भोगा परिक्खयं गच्छन्ति. तस्स एवं होति – ‘‘केन नु खो मे उपायेन अनुप्पन्ना चेव भोगा न उप्पज्जन्ति, उप्पन्ना च भोगा परिक्खयं गच्छन्ती’’ति. तस्स पन एवं होति ‘‘सुरामेरयमज्जप्पमादट्ठानानुयोगं अनुयुत्तस्स मे अनुप्पन्ना चेव भोगा न उप्पज्जन्ति, उप्पन्ना च भोगा परिक्खयं गच्छन्ति; विकालविसिखाचरियानुयोगं अनुयुत्तस्स मे अनुप्पन्ना चेव भोगा न उप्पज्जन्ति, उप्पन्ना च भोगा परिक्खयं गच्छन्ति; समज्जाभिचरणं अनुयुत्तस्स मे… जुतप्पमादट्ठानानुयोगं अनुयुत्तस्स मे… पापमित्तानुयोगं अनुयुत्तस्स मे अनुप्पन्ना चेव भोगा न उप्पज्जन्ति, उप्पन्ना च भोगा परिक्खयं गच्छन्ति; आलस्यानुयोगं अनुयुत्तस्स मे अनुप्पन्ना चेव भोगा न उप्पज्जन्ति, उप्पन्ना च भोगा परिक्खयं गच्छन्ती’’ति एवं ञाणं कत्वा छ भोगानं अपायमुखानि न सेवति, छ भोगानं आयमुखानि सेवति. एवम्पि तण्हाविनिच्छयं करोति.

अथ वा कसिया वा वणिज्जाय वा गोरक्खेन वा इस्सत्थेन [इस्सत्तेन (क. सी. क.) इसु + सत्थ] वा राजपोरिसेन वा सिप्पञ्ञतरेन वा पटिपज्जति. एवम्पि तण्हाविनिच्छयं करोति. कथं दिट्ठिविनिच्छयं करोति? चक्खुस्मिं उप्पन्ने जानाति – ‘‘अत्ता मे उप्पन्नो’’ति, चक्खुस्मिं अन्तरहिते जानाति – ‘‘अत्ता मे अन्तरहितो विगतो मे अत्ता’’ति. एवम्पि दिट्ठिविनिच्छयं करोति. सोतस्मिं… घानस्मिं… जिव्हाय… कायस्मिं… रूपस्मिं… सद्दस्मिं… गन्धस्मिं… रसस्मिं… फोट्ठब्बस्मिं उप्पन्ने जानाति – ‘‘अत्ता मे उप्पन्नो’’ति, फोट्ठब्बस्मिं अन्तरहिते जानाति – ‘‘अत्ता मे अन्तरहितो विगतो मे अत्ता’’ति. एवम्पि दिट्ठिविनिच्छयं करोति जनेति सञ्जनेति निब्बत्तेति अभिनिब्बत्तेति. जन्तूति सत्तो नरो मानवो…पे… मनुजो. लोकेति अपायलोके …पे… आयतनलोकेति – विनिच्छयं कुब्बति जन्तु लोके.

तेनाह भगवा –

‘‘सातं असातन्ति यमाहु लोके, तमूपनिस्साय पहोति छन्दो;

रूपेसु दिस्वा विभवं भवञ्च, विनिच्छयं कुब्बति जन्तु लोके’’ति.

१०३.

कोधो मोसवज्जञ्च कथंकथा च, एतेपि धम्मा द्वयमेव सन्ते;

कथंकथी ञाणपथाय सिक्खे, ञत्वा पवुत्ता समणेन धम्मा.

कोधो मोसवज्जञ्च कथंकथा चाति. कोधोति यो एवरूपो चित्तस्स आघातो पटिघातो…पे… मोसवज्जं वुच्चति मुसावादो. कथंकथा वुच्चति विचिकिच्छा. इट्ठं वत्थुं निस्सायपि कोधो जायति, अनिट्ठं वत्थुं निस्सायपि कोधो जायति. इट्ठं वत्थुं निस्सायपि मुसावादो उप्पज्जति, अनिट्ठं वत्थुं निस्सायपि मुसावादो उप्पज्जति. इट्ठं वत्थुं निस्सायपि कथंकथा उप्पज्जति, अनिट्ठं वत्थुं निस्सायपि कथंकथा उप्पज्जति.

कथं अनिट्ठं वत्थुं निस्साय कोधो जायति? पकतिया अनिट्ठं वत्थुं निस्साय कोधो जायति. अनत्थं मे अचरीति कोधो जायति, अनत्थं मे चरतीति कोधो जायति, अनत्थं मे चरिस्सतीति कोधो जायति; पियस्स मे मनापस्स अनत्थं अचरि … अनत्थं चरति… अनत्थं चरिस्सतीति कोधो जायति; अप्पियस्स मे अमनापस्स अत्थं अचरि… अत्थं चरति… अत्थं चरिस्सतीति कोधो जायति. एवं अनिट्ठं वत्थुं निस्साय कोधो जायति.

कथं इट्ठं वत्थुं निस्साय कोधो जायति? इट्ठं वत्थुं अच्छेदसङ्किनोपि कोधो जायति, अच्छिज्जन्तेपि कोधो जायति, अच्छिन्नेपि कोधो जायति. इट्ठं वत्थुं विपरिणामसङ्किनोपि कोधो जायति, विपरिणामन्तेपि कोधो जायति, विपरिणतेपि कोधो जायति. एवं इट्ठं वत्थुं निस्साय कोधो जायति.

कथं अनिट्ठं वत्थुं निस्साय मुसावादो उप्पज्जति? इधेकच्चो अन्दुबन्धनेन [अद्दुबन्धनेन (स्या. क.)] वा बद्धो [बन्धो (स्या. क.)]; तस्स बन्धनस्स मोक्खत्थाय सम्पजानमुसा भासति… रज्जुबन्धनेन वा बद्धो… सङ्खलिकबन्धनेन वा बद्धो… वेत्तबन्धनेन वा बद्धो… लताबन्धनेन वा बद्धो… पक्खेपबन्धनेन वा बद्धो… परिक्खेपबन्धनेन वा बद्धो… गामनिगमनगररट्ठबन्धनेन वा बद्धो… जनपदबन्धनेन वा बद्धो; तस्स बन्धनस्स मोक्खत्थाय सम्पजानमुसा भासति. एवं अनिट्ठं वत्थुं निस्साय मुसावादो उप्पज्जतीति.

कथं इट्ठं वत्थुं निस्साय मुसावादो उप्पज्जति? इधेकच्चो मनापिकानं [मनापानं (सी.)] रूपानं हेतु सम्पजानमुसा भासति… मनापिकानं सद्दानं… गन्धानं… रसानं… फोट्ठब्बानं हेतु… चीवरहेतु… पिण्डपातहेतु… सेनासनहेतु… गिलानपच्चयभेसज्जपरिक्खारहेतु सम्पजानमुसा भासति. एवं इट्ठं वत्थुं निस्साय मुसावादो उप्पज्जति.

कथं अनिट्ठं वत्थुं निस्साय कथंकथा उप्पज्जति? ‘‘मुच्चिस्सामि [मुञ्चिस्सामि (सी.)] नु खो चक्खुरोगतो, न नु खो मुच्चिस्सामि चक्खुरोगतो. मुच्चिस्सामि नु खो सोतरोगतो… घानरोगतो… जिव्हारोगतो… कायरोगतो… सीसरोगतो… कण्णरोगतो… मुखरोगतो… मुच्चिस्सामि नु खो दन्तरोगतो, न नु खो मुच्चिस्सामि दन्तरोगतो’’ति. एवं अनिट्ठं वत्थुं निस्साय कथंकथा उप्पज्जति.

कथं इट्ठं वत्थुं निस्साय कथंकथा उप्पज्जति? ‘‘लभिस्सामि नु खो मनापिके [मनापिये (सी. क.)] रूपे, न नु खो लभिस्सामि मनापिके रूपे. लभिस्सामि नु खो मनापिके सद्दे… गन्धे… रसे… फोट्ठब्बे… कुलं… गणं… आवासं… लाभं… यसं… पसंसं… सुखं… चीवरं… पिण्डपातं… सेनासनं… गिलानपच्चयभेसज्जपरिक्खार’’न्ति. एवं इट्ठं वत्थुं निस्साय कथंकथा उप्पज्जतीति – कोधो मोसवज्जञ्च कथंकथा च.

एतेपि धम्मा द्वयमेव सन्तेति. सातासाते सन्ते, सुखदुक्खे सन्ते, सोमनस्सदोमनस्से सन्ते, इट्ठानिट्ठे सन्ते, अनुनयपटिघे सन्ते संविज्जमाने अत्थि उपलब्भमानेति – एतेपि धम्मा द्वयमेव सन्ते.

कथंकथी ञाणपथाय सिक्खेति. ञाणम्पि ञाणपथो, ञाणस्स आरम्मणम्पि ञाणपथो, ञाणसहभुनोपि धम्मा ञाणपथो. यथा अरियमग्गो अरियपथो, देवमग्गो देवपथो, ब्रह्ममग्गो ब्रह्मपथो; एवमेव ञाणम्पि ञाणपथो, ञाणस्स आरम्मणम्पि ञाणपथो, ञाणसहभुनोपि धम्मा ञाणपथो.

सिक्खेति तिस्सो सिक्खा – अधिसीलसिक्खा, अधिचित्तसिक्खा, अधिपञ्ञासिक्खा. कतमा अधिसीलसिक्खा? इध भिक्खु सीलवा होति, पातिमोक्खसंवरसंवुतो विहरति आचारगोचरसम्पन्नो, अणुमत्तेसु वज्जेसु भयदस्सावी, समादाय सिक्खति सिक्खापदेसु, खुद्दको सीलक्खन्धो… महन्तो सीलक्खन्धो… सीलं पतिट्ठा आदि चरणं संयमो संवरो मुखं पमुखं कुसलानं धम्मानं समापत्तिया – अयं अधिसीलसिक्खा. कतमा अधिचित्तसिक्खा? इध भिक्खु विविच्चेव कामेहि…पे… चतुत्थं झानं उपसम्पज्ज विहरति – अयं अधिचित्तसिक्खा. कतमा अधिपञ्ञासिक्खा? इध भिक्खु पञ्ञवा होति, उदयत्थगामिनिया पञ्ञाय समन्नागतो अरियाय निब्बेधिकाय सम्मादुक्खक्खयगामिनिया. सो ‘‘इदं दुक्ख’’न्ति यथाभूतं पजानाति…पे… ‘‘अयं दुक्खनिरोधगामिनी पटिपदा’’ति यथाभूतं पजानाति, ‘‘इमे आसवा’’ति यथाभूतं पजानाति…पे… ‘‘अयं आसवनिरोधगामिनी पटिपदा’’ति यथाभूतं पजानाति – अयं अधिपञ्ञासिक्खा.

कथंकथी ञाणपथाय सिक्खेति. कथंकथी पुग्गलो सकङ्खो सविलेखो सद्वेळ्हको सविचिकिच्छो, ञाणाधिगमाय ञाणफुसनाय ञाणसच्छिकिरियाय अधिसीलम्पि सिक्खेय्य, अधिचित्तम्पि सिक्खेय्य, अधिपञ्ञम्पि सिक्खेय्य; इमा तिस्सो सिक्खायो आवज्जन्तो सिक्खेय्य, जानन्तो सिक्खेय्य, पस्सन्तो सिक्खेय्य, पच्चवेक्खन्तो सिक्खेय्य, चित्तं अधिट्ठहन्तो सिक्खेय्य, सद्धाय अधिमुच्चन्तो सिक्खेय्य, वीरियं पग्गण्हन्तो सिक्खेय्य, सतिं उपट्ठहन्तो सिक्खेय्य, चित्तं समादहन्तो सिक्खेय्य, पञ्ञाय पजानन्तो सिक्खेय्य, अभिञ्ञेय्यं अभिजानन्तो सिक्खेय्य, परिञ्ञेय्यं परिजानन्तो सिक्खेय्य, पहातब्बं पजहन्तो सिक्खेय्य, भावेतब्बं भावेन्तो सिक्खेय्य, सच्छिकातब्बं सच्छिकरोन्तो सिक्खेय्य आचरेय्य समाचरेय्य समादाय वत्तेय्याति – कथंकथी ञाणपथाय सिक्खे.

ञत्वा पवुत्ता समणेन धम्माति. ञत्वाति ञत्वा जानित्वा तुलयित्वा तीरयित्वा विभावयित्वा विभूतं कत्वा वुत्ता पवुत्ता आचिक्खिता देसिता पञ्ञपिता पट्ठपिता विवटा विभत्ता उत्तानीकता [उत्तानिं कता (क.)] पकासिता. ‘‘सब्बे सङ्खारा अनिच्चा’’ति ञत्वा जानित्वा तुलयित्वा तीरयित्वा विभावयित्वा विभूतं कत्वा वुत्ता पवुत्ता आचिक्खिता देसिता पञ्ञपिता पट्ठपिता विवटा विभत्ता उत्तानीकता पकासिता, ‘‘सब्बे सङ्खारा दुक्खा’’ति… ‘‘सब्बे धम्मा अनत्ता’’ति… ‘‘अविज्जापच्चया सङ्खारा’’ति…पे… ‘‘जातिपच्चया जरामरण’’न्ति… ‘‘अविज्जानिरोधा सङ्खारनिरोधो’’ति…पे… ‘‘जातिनिरोधा जरामरणनिरोधो’’ति… ‘‘इदं दुक्ख’’न्ति…पे… ‘‘अयं दुक्खनिरोधगामिनी पटिपदा’’ति… ‘‘इमे आसवा’’ति…पे… ‘‘अयं आसवनिरोधगामिनी पटिपदा’’ति… ‘‘इमे धम्मा अभिञ्ञेय्या’’ति… ‘‘इमे धम्मा परिञ्ञेय्या’’ति… ‘‘इमे धम्मा पहातब्बा’’ति… ‘‘इमे धम्मा भावेतब्बा’’ति… ‘‘इमे धम्मा सच्छिकातब्बा’’ति… छन्नं फस्सायतनानं समुदयञ्च अत्थङ्गमञ्च अस्सादञ्च आदीनवञ्च निस्सरणञ्च… पञ्चन्नं उपादानक्खन्धानं… चतुन्नं महाभूतानं… ‘‘यं किञ्चि समुदयधम्मं सब्बं तं निरोधधम्म’’न्ति ञत्वा जानित्वा तुलयित्वा तीरयित्वा विभावयित्वा विभूतं कत्वा वुत्ता पवुत्ता आचिक्खिता देसिता पञ्ञपिता पट्ठपिता विवटा विभत्ता उत्तानीकता पकासिता.

वुत्तञ्हेतं भगवता – ‘‘अभिञ्ञायाहं, भिक्खवे, धम्मं देसेमि, नो अनभिञ्ञाय. सनिदानाहं, भिक्खवे, धम्मं देसेमि, नो अनिदानं. सप्पाटिहारियाहं, भिक्खवे, धम्मं देसेमि, नो अप्पाटिहारियं. तस्स मय्हं, भिक्खवे, अभिञ्ञाय धम्मं देसयतो, नो अनभिञ्ञाय, सनिदानं धम्मं देसयतो, नो अनिदानं, सप्पाटिहारियं धम्मं देसयतो, नो अप्पाटिहारियं, करणीयो ओवादो, करणीया अनुसासनी. अलञ्च पन, भिक्खवे, वो तुट्ठिया अलं पामोज्जाय अलं सोमनस्साय सम्मासम्बुद्धो भगवा, स्वाक्खातो धम्मो, सुप्पटिपन्नो सङ्घोति. इमस्मिञ्च पन वेय्याकरणस्मिं भञ्ञमाने दससहस्सी लोकधातु अकम्पित्था’’ति – ञत्वा पवुत्ता समणेन धम्मा.

तेनाह भगवा –

‘‘कोधो मोसवज्जञ्च कथंकथा च, एतेपि धम्मा द्वयमेव सन्ते;

कथंकथी ञाणपथाय सिक्खे, ञत्वा पवुत्ता समणेन धम्मा’’ति.

१०४.

सातं असातञ्च कुतोनिदाना, किस्मिं असन्ते न भवन्ति हेते;

विभवं भवञ्चापि यमेतमत्थं, एतं मे पब्रूहि यतोनिदानं.

सातं असातञ्च कुतोनिदानाति. साता असाता कुतोनिदाना कुतोजाता कुतोसञ्जाता कुतोनिब्बत्ता कुतोअभिनिब्बत्ता कुतोपातुभूता, किंनिदाना किंसमुदया किंजातिका किंपभवाति सातासातानं मूलं पुच्छति…पे… समुदयं पुच्छति पपुच्छति याचति अज्झेसति पसादेतीति – सातं असातञ्च कुतोनिदाना.

किस्मिं असन्ते न भवन्ति हेतेति. किस्मिं असन्ते असंविज्जमाने नत्थि अनुपलब्भमाने सातासाता न भवन्ति नप्पभवन्ति न जायन्ति न सञ्जायन्ति न निब्बत्तन्ति न अभिनिब्बत्तन्तीति – किस्मिं असन्ते न भवन्ति हेते.

विभवं भवञ्चापि यमेतमत्थन्ति. कतमो सातासातानं भवो? यो सातासातानं भवो पभवो जाति सञ्जाति निब्बत्ति अभिनिब्बत्ति पातुभावो – अयं सातासातानं भवो. कतमो सातासातानं विभवो? यो सातासातानं खयो वयो भेदो परिभेदो अनिच्चता अन्तरधानं – अयं सातासातानं विभवो. यमेतमत्थन्ति यं परमत्थन्ति – विभवं भवञ्चापि यमेतमत्थं.

एतं मे पब्रूहि यतोनिदानन्ति. एतन्ति यं पुच्छामि यं याचामि यं अज्झेसामि यं पसादेमि. पब्रूहीति ब्रूहि वदेहि आचिक्ख देसेहि पञ्ञपेहि पट्ठपेहि विवर विभज उत्तानीकरोहि पकासेहीति – एतं मे पब्रूहि. यतोनिदानन्ति यंनिदानं यंसमुदयं यंजातिकं यंपभवन्ति – एतं मे पब्रूहि यतोनिदानं.

तेनाह सो निम्मितो –

‘‘सातं असातञ्च कुतोनिदाना, किस्मिं असन्ते न भवन्ति हेते;

विभवं भवञ्चापि यमेतमत्थं, एतं मे पब्रूहि यतोनिदान’’न्ति.

१०५.

फस्सनिदानं सातं असातं, फस्से असन्ते न भवन्ति हेते;

विभवं भवञ्चापि यमेतमत्थं, एतं ते पब्रूमि इतोनिदानं.

फस्सनिदानं सातं असातन्ति. सुखवेदनीयं फस्सं पटिच्च उप्पज्जति सुखा वेदना. या तस्सेव सुखवेदनीयस्स फस्सस्स निरोधा, यं तज्जं वेदयितं सुखवेदनीयं फस्सं पटिच्च उप्पन्ना सुखा वेदना सा निरुज्झति, सा वूपसम्मति. दुक्खवेदनीयं फस्सं पटिच्च उप्पज्जति दुक्खा वेदना. या तस्सेव दुक्खवेदनीयस्स फस्सस्स निरोधा, यं तज्जं वेदयितं दुक्खवेदनीयं फस्सं पटिच्च उप्पन्ना दुक्खा वेदना सा निरुज्झति, सा वूपसम्मति. अदुक्खमसुखवेदनीयं फस्सं पटिच्च उप्पज्जति अदुक्खमसुखा वेदना. या तस्सेव अदुक्खमसुखवेदनीयस्स फस्सस्स निरोधा, यं तज्जं वेदयितं अदुक्खमसुखवेदनीयं फस्सं पटिच्च उप्पन्ना अदुक्खमसुखा वेदना सा निरुज्झति, वूपसम्मति. फस्सनिदानं सातं असातन्ति. सातासाता फस्सनिदाना फस्ससमुदया फस्सजातिका फस्सप्पभवाति – फस्सनिदानं सातं असातं.

फस्से असन्ते न भवन्ति हेतेति. फस्से असन्ते असंविज्जमाने नत्थि अनुपलब्भमाने सातासाता न भवन्ति नप्पभवन्ति न जायन्ति न सञ्जायन्ति न निब्बत्तन्ति नाभिनिब्बत्तन्ति न पातुभवन्तीति – फस्से असन्ते न भवन्ति हेते.

विभवं भवञ्चापि यमेतमत्थन्ति. भवदिट्ठिपि फस्सनिदाना, विभवदिट्ठिपि फस्सनिदाना. यमेतमत्थन्ति यं परमत्थन्ति – विभवं भवञ्चापि यमेतमत्थं.

एतं ते पब्रूमि इतोनिदानन्ति. एतन्ति यं पुच्छसि यं याचसि यं अज्झेससि यं पसादेसि. पब्रूमीति ब्रूमि आचिक्खामि देसेमि पञ्ञपेमि पट्ठपेमि विवरामि विभजामि उत्तानीकरोमि पकासेमीति – एतं ते पब्रूमि. इतोनिदानन्ति इतो फस्सनिदानं फस्ससमुदयं फस्सजातिकं फस्सप्पभवन्ति – एतं ते पब्रूमि इतोनिदानं.

तेनाह भगवा –

‘‘फस्सनिदानं सातं असातं, फस्से असन्ते न भवन्ति हेते;

विभवं भवञ्चापि यमेतमत्थं, एतं ते पब्रूमि इतोनिदान’’न्ति.

१०६.

फस्सो नु लोकस्मिं कुतोनिदानो, परिग्गहा चापि [वापि (सी. स्या.)] कुतोपहूता;

किस्मिं असन्ते न ममत्तमत्थि, किस्मिं विभूते न फुसन्ति फस्सा.

फस्सो नु लोकस्मिं कुतोनिदानोति. फस्सो कुतोनिदानो कुतोजातो कुतोस