📜

नमो तस्स भगवतो अरहतो सम्मासम्बुद्धस्स

खुद्दकनिकाये

नेत्तिप्पकरण-टीका

गन्थारम्भकथावण्णना

संवण्णनारम्भे ¶ ¶ (दी. नि. टी. १.गन्थारम्भकथावण्णना; म. नि. टी. १.१ गन्थारम्भकथावण्णना; सं. नि. टी. १.१.१ गन्थारम्भकथावण्णना) रतनत्तयवन्दना संवण्णेतब्बस्स धम्मस्स पभवनिस्सयविसुद्धिपटिवेदनत्थं, तं पन धम्मसंवण्णनासु विञ्ञूनं बहुमानुप्पादनत्थं, तं सम्मदेव तेसं उग्गहणधारणादिक्कमलद्धब्बाय सम्मापटिपत्तिया सब्बहितसुखनिप्फादनत्थं. अथ वा मङ्गलभावतो, सब्बकिरियासु पुब्बकिच्चभावतो, पण्डितेहि सम्माचरितभावतो, आयतिं परेसं दिट्ठानुगतिआपज्जनतो च संवण्णनायं रतनत्तयपणामकिरिया. अथ वा रतनत्तयपणामकरणं पूजनीयपूजापुञ्ञविसेसनिब्बत्तनत्थं, तं अत्तनो यथालद्धसम्पत्तिनिमित्तस्स कम्मस्स बलानुप्पदानत्थं, अन्तरा च तस्स असङ्कोचनत्थं, तदुभयं अनन्तरायेन अट्ठकथाय परिसमापनत्थं. इदमेव च पयोजनं आचरियेन इधाधिप्पेतं. तथा ¶ हि वक्खति ‘‘वन्दनाजनितं…पे… तस्स तेजसा’’ति. वत्थुत्तयपूजा हि निरतिसयपुञ्ञक्खेत्तसम्बुद्धिया अपरिमेय्यप्पभावो पुञ्ञातिसयोति बहुविधन्तरायेपि लोकसन्निवासे अन्तरायनिबन्धनसकलसंकिलेसविद्धंसनाय पहोति, भयादिउपद्दवञ्च निवारेति. यथाह –

‘‘पूजारहे पूजयतो, बुद्धे यदि व सावके’’ति. (ध. प. १९५; अप. थेर १.१०.१) च,

तथा ¶ –

‘‘ये, भिक्खवे, बुद्धे पसन्ना, अग्गे ते पसन्ना, अग्गे खो पन पसन्नानं अग्गो विपाको होती’’ति (अ. नि. ४.३४; इतिवु. ९०) च,

तथा –

‘‘‘बुद्धो’ति कित्तयन्तस्स, काये भवति या पीति;

वरमेव हि सा पीति, कसिणेनपि जम्बुदीपस्स;

‘‘‘धम्मो’ति…पे… ‘सङ्घो’ति…पे… दीपस्सा’’ति. (दी. नि. अट्ठ. १.६; इतिवु. अट्ठ ९०; दी. नि. टी. १.गन्थारम्भकथावण्णना; म. नि. टी. १.१; अ. नि. टी. २.४.३४) च,

तथा –

‘‘यस्मिं, महानाम, समये अरियसावको तथागतं अनुस्सरति, नेवस्स तस्मिं समये रागपरियुट्ठितं चित्तं होति, न दोस…पे… न मोहपरियुट्ठितं चित्तं होती’’ति (अ. नि. ६.१०; ११.११) च,

तथा –

‘‘अरञ्ञे ¶ रुक्खमूले वा…पे…;

भयं वा छम्भितत्तं वा, लोमहंसो न हेस्सती’’ति. (सं. नि. १.२४९) च;

तत्थ यस्स रतनत्तयस्स वन्दनं कत्तुकामो, तस्स गुणातिसययोगसन्दस्सनत्थं ‘‘महाकारुणिक’’न्तिआदिना गाथात्तयमाह. गुणातिसययोगेन हि वन्दनारहभावो, वन्दनारहे च कता वन्दना यथाधिप्पेतप्पयोजनं साधेतीति. तत्थ यस्सा संवण्णनं कत्तुकामो, सा नेत्ति विसेसतो यथानुलोमसासनसन्निस्सया, तस्स च विचित्ताकारप्पवत्तिविभाविनी. तथा हि सुत्तन्तदेसना न विनयदेसना विय करुणाप्पधाना, नापि अभिधम्मदेसना विय पञ्ञाप्पधाना, अथ खो करुणापञ्ञाप्पधानाति तदुभयप्पधानदेसनाविसेसविभावनं ताव सम्मासम्बुद्धस्स थोमनं कातुं तम्मूलकत्ता सेसरतनानं ‘‘महाकारुणिकं नाथ’’न्तिआदि वुत्तं.

तत्थ किरतीति (दी. नि. टी. १.गन्थारम्भकथावण्णना; म. नि. टी. १.१; सं. नि. टी. १.१.१; अ. नि. टी. १.१.१) करुणा, परदुक्खं विक्खिपति अपनेतीति अत्थो. अथ वा किणातीति करुणा, परदुक्खे सति कारुणिकं हिंसति विबाधतीति अत्थो ¶ . कम्पनं करोतीति वा करुणा, परदुक्खे सति साधूनं हदयखेदं करोतीति अत्थो. कमिति वा सुखं, तं रुन्धतीति करुणा. एसा हि परदुक्खापनयनकामतालक्खणा, अत्तसुखनिरपेक्खताय कारुणिकानं सुखं रुन्धति विबन्धतीति अत्थो. किरियति दुक्खितेसु पसारियतीति वा करुणा, करुणाय नियुत्तोति कारुणिको यथा ‘‘दोवारिको’’ति (अ. नि. ७.६७). यथा हि द्वारट्ठानतो अञ्ञत्थ वत्तमानोपि द्वारपटिबद्धजीविको पुरिसो द्वारानतिवत्तवुत्तिताय द्वारे नियुत्तोति ‘‘दोवारिको’’ति वुच्चति, एवं भगवा मेत्तादिवसेन करुणाविहारतो अञ्ञत्थ वत्तमानोपि करुणानतिवत्तवुत्तिताय करुणाय नियुत्तोति ‘‘कारुणिको’’ति वुच्चति. महाभिनीहारतो पट्ठाय हि याव महापरिनिब्बाना लोकहितत्थमेव लोकनाथा तिट्ठन्तीति. महन्तो कारुणिकोति महाकारुणिको. सतिपि भगवतो तदञ्ञगुणानम्पि वसेन महन्तभावे कारुणिकसद्दसन्निधानेन वुत्तत्ता करुणावसेनेवेत्थ महन्तभावो वेदितब्बो यथा ‘‘महावेय्याकरणो’’ति. एवञ्च कत्वा ‘‘महाकारुणिको’’ति इमिना पदेन पुग्गलाधिट्ठानेन सत्थु महाकरुणा वुत्ता होति.

अपरो नयो – अत्थसाधनतो करुणं करुणायनं करुणासम्पवत्तनं अरहतीति कारुणिको ¶ . भगवतो हि सब्बञ्ञुताय अनवसेसतो सत्तानं हितं, हितुपायञ्च जानतो, तत्थ च अकिलासुनो हितेसिता सत्थिका, न तथा अञ्ञेसन्ति. अथ वा करुणा करुणायनं सीलं पकति सभावो एतस्साति कारुणिको. भगवा हि पथवीफस्सादयो विय कक्खळफुसनादिसभावा करुणासभावो सभावभूतकरुणोति अत्थो. सेसं पुरिमसदिसमेव. अथ वा महाविसयताय, महानुभावताय, महप्फलताय च महती करुणाति महाकरुणा. भगवतो हि करुणा निरवसेसेसु सत्तेसु पवत्तति, पवत्तमाना च अनञ्ञसाधारणा पवत्तति, दिट्ठधम्मिकादिभेदञ्च महन्तमेव सत्तानं हितसुखं एकन्ततो निप्फादेति, महाकरुणाय नियुत्तोति महाकारुणिको, तं महाकारुणिकं. सेसं सब्बं वुत्तनयेनेव वेदितब्बं. सुमागधादिपदानं विय चेत्थ सद्दसिद्धि वेदितब्बा.

नाथतीति ¶ नाथो, वेनेय्यानं हितसुखं आसीसति पत्थेतीति अत्थो, मेत्तायनवसेन चेत्थ हितसुखासीसनं वेदितब्बं, न करुणायनवसेन पठमपदेन वुत्तत्ता. अथ वा नाथति वेनेय्यगतं किलेसब्यसनं उपतापेतीति नाथो, नाथतीति वा नाथो, याचतीति अत्थो. भगवा हि ‘‘साधु, भिक्खवे, भिक्खु कालेन कालं अत्तसम्पत्तिं पच्चवेक्खिता’’तिआदिना (अ. नि. ८.७, ८) सत्तानं तं तं हितप्पटिपत्तिं याचित्वापि महाकरुणाय समुस्साहितो ते तत्थ नियोजेति. परमेन वा चित्तिस्सरियेन समन्नागतो, सब्बसत्ते वा सीलादिगुणेहि ईसति अभिभवतीति परमिस्सरो भगवा ‘‘नाथो’’ति वुच्चति, तं नाथं.

ञातब्बन्ति ञेय्यं, अतीतादिभेदभिन्नं सब्बं सङ्खतं, असङ्खतञ्च. सङ्गरणट्ठेन सागरो, पतितपतितानं अत्तनो पुथुलगम्भीरभावेहि संसीदनं निम्मुज्जनं करोतीति अत्थो. सं-सद्दस्स चेत्थ ‘‘साभावो, सारागो’’तिआदीसु (ध. स. ३८९, ३९१) विय निरुत्तिनयेन दट्ठब्बो. सङ्गरणट्ठेनाति वा सङ्गरकरणट्ठेन, ठितधम्मताय ‘‘अयं मे मरियादा, इमं वेलं नातिक्कमामी’’ति लोकेन सङ्गरं सङ्केतं करोन्तो विय होतीति अत्थो. सङ्गरणं वा समन्ततो गलनं सन्दनं उदकेन करोतीति सागरो. कप्पवुट्ठानकाले हि महासमुद्दो इतो चितो च पग्घरित्वा सकलं लोकधातुं एकोघं करोतीति. लोकिया पन वदन्ति ‘‘सागरस्स रञ्ञो पुत्तेहि सागरेहि निब्बत्तितो खतोति सागरो, पुरत्थिमो समुद्दप्पदेसो, तंसम्बन्धताय रुळ्हिवसेन सब्बोपि समुद्दो तथा वोहरीयती’’ति. सागरसदिसत्ता सागरो, ञेय्यमेव सागरोति ञेय्यसागरो. सदिसता चेत्थ पुथुलदुत्तरगम्भीरानादिकालिकताहि वेदितब्बा, निहीनं चेतमोपम्मं. तथा हि ञेय्यस्सेव सातिसया पुथुलता अपरिमाणलोकधातुब्यापनतो, सब्बञ्ञुतञ्ञाणस्सेव तरणीयताय दुत्तरता, गम्भीरता, आदिकोटिरहिता च पवत्ति, न इतरस्स ¶ परिच्छिन्नदेसत्ता बाहिरकवीतरागेहिपि इत्तरेन खणेन अतिक्कमितब्बत्ता, परिमितगम्भीरत्ता, परिमितकालत्ता च. ञेय्यसागरस्स पारं परियन्तं गतोति ञेय्यसागरपारगू, तं ञेय्यसागरपारगुं.

गमनञ्चेत्थ ¶ ञाणगमनमेव, न इतरं ञेय्यग्गहणतो, तं पन ञाणं दुविधं सम्मसनपटिवेधभेदतो, तथा हेतुफलभेदतो. तत्थ ‘‘किच्छं वतायं लोको आपन्नो’’तिआदिना (दी. नि. २.५७; सं. नि. २.४, १०; पेटको. २३) करुणायनवसेनेव अभिनिविसित्वा अनेकाकारवोकारे सङ्खारे सम्मसन्तं भगवतो सम्मसनञाणं छत्तिंसकोटिसतसहस्समुखेन ञेय्यसागरं अज्झोगाहेत्वा तस्स पारं परियन्तं अगमासि, यं ‘‘महावजिरञाण’’न्ति वुच्चति. पटिवेधञाणं पन सब्बञ्ञुतञ्ञाणपदट्ठानं आसवक्खयञाणं, आसवक्खयञाणपदट्ठानञ्च सब्बञ्ञुतञ्ञाणं, यं ‘‘महाबोधी’’ति वुच्चति. पारगमनञ्च तस्स किच्चसिद्धिया, समत्थताय च वेदितब्बं. तथा यथावुत्तं सम्मसनञाणं हेतु, इतरं फलं. सह सम्मसनञाणेन वा आसवक्खयञाणं हेतु, सब्बञ्ञुतञ्ञाणं फलं तदानिसंसभावतोति वेदितब्बं.

वन्देति नमामि, अभित्थवामि वा. सण्हट्ठेन निपुणा, अनुपचितञाणसम्भारानं अगाधट्ठेन गम्भीरा, एकत्तादिभेदतो नन्दियावट्टादिविभागतो च विचित्रा विसिट्ठा नानाविधा नया एतिस्साति निपुणगम्भीरविचित्रनया, निपुणगम्भीरविचित्रनया देसना अस्साति निपुणगम्भीरविचित्रनयदेसनो, तं निपुण…पे… देसनं. नयतीति वा नयो, पाळिगति, सा च वुत्तनयेन अत्थतो निपुणा, अत्थतो ब्यञ्जनतो च गम्भीरा, सङ्खेपवित्थारानुलोमादिप्पवत्तिया नानाविधताय विचित्रा. तथा हि पञ्ञत्तिअनुपञ्ञत्तिआदिवसेन, संकिलेसभागियादिलोकियादितदुभयवोमिस्सतादिवसेन, कुसलादिखन्धादिसङ्गहादिसमयविमुत्तादिठपनादिकुसलमूलादितिकपट्ठानादिवसेन च अनेकविधा पाळिगतीति.

तत्थ (दी. नि. टी. १.गन्थारम्भकथावण्णना) द्वीहाकारेहि भगवतो थोमना वेदितब्बा अत्तहितसम्पत्तितो, परहितप्पटिपत्तितो च. तेसु अत्तहितसम्पत्ति अनावरणञाणाधिगमतो, सवासनानं सब्बेसं किलेसानं अच्चन्तप्पहानतो च वेदितब्बा, परहितप्पटिपत्ति लाभसक्कारादिनिरपेक्खचित्तस्स सब्बदुक्खनिय्यानिकधम्मदेसनतो, पटिविरुद्धेसुपि निच्चं हितज्झासयञाणपरिपाककालागमनतो च वेदितब्बा. सा पनेत्थ पयोगतो, आसयतो च दुविधा, परहितप्पटिपत्ति, यथावुत्तभेदा दुविधा च अत्तहितसम्पत्ति पकासिता ¶ होति. कथं? ‘‘महाकारुणिक’’न्ति इमिना आसयतो ¶ , ‘‘निपुण…पे… देसन’’न्ति इमिना पयोगतो, ‘‘नाथ’’न्ति इमिना पन उभयथापि भगवतो परहितप्पटिपत्ति पकासिता करुणाकिच्चदीपनतो, ‘‘ञेय्यसागरपारगु’’न्ति इमिना सातिसयं अत्तहितसम्पत्ति परमुक्कंसगतञाणकिच्चदीपनतो.

अथ वा तीहाकारेहि भगवतो थोमना वेदितब्बा हेतुतो, फलतो, उपकारतो च. तत्थ हेतु महाकरुणा, सा पन पठमपदेन सरूपेनेव दस्सिता. फलं चतुब्बिधं ञाणसम्पदा पहानसम्पदा आनुभावसम्पदा रूपकायसम्पदा चाति. तासु पधानभूता ञाणपहानसम्पदा ‘‘ञेय्यसागरपारगु’’न्ति इमिना पदेन पकासिता. पधाने हि दस्सिते अविनाभावतो इतरम्पि द्वयं दस्सितमेव होति. न हि बुद्धानं आनुभावरूपकायसम्पत्तीहि विना कदाचिपि धम्मकायसिरी वत्ततीति. उपकारो अनन्तरं अबाहिरं कत्वा तिविधयानमुखेन विमुत्तिधम्मदेसना, सा ‘‘नाथं, निपुण…पे… देसन’’न्ति पदद्वयेन पकासिताति वेदितब्बं.

तत्थ (दी. नि. टी. १.गन्थारम्भकथावण्णना) ‘‘महाकारुणिक’’न्ति एतेन सम्मासम्बोधिया मूलं दस्सेति. महाकरुणासञ्चोदितमानसो हि भगवा संसारपङ्कतो सत्तानं समुद्धरणत्थं कताभिनीहारो अनुपुब्बेन पारमियो पूरेत्वा अनुत्तरं सम्मासम्बोधिं अधिगतोति करुणा सम्मासम्बोधिया मूलं. ‘‘ञेय्यसागरपारगु’’न्ति एतेन पुब्बभागप्पटिपत्तिया सद्धिं सम्मासम्बोधिं दस्सेति. अनावरणञाणपदट्ठानञ्हि मग्गञाणं, मग्गञाणपदट्ठानञ्च अनावरणञाणं ‘‘सम्मासम्बोधी’’ति वुच्चति. वुत्तप्पभेदं पन सम्मसनञाणं सह पञ्ञापारमिया तस्सा पुब्बभागपटिपदा. तस्सा हि आनुभावेन लीनुद्धच्चपतिट्ठानायूहनकामसुखल्लिकत्तकिलमथानुयोगसस्सतुच्छेदादिअन्तद्वयविरहिता उक्कंसपारमिप्पत्ता मज्झिमा पटिपदा भावनापारिपूरिं गता. ‘‘नाथ’’न्ति इमिना सम्मासम्बोधिया फलं दस्सेति लोकत्तयनायकभावदीपनतो. तथा हि सब्बानत्थपरिहारपुब्बङ्गमाय निरवसेसहितसुखविधानतप्पराय निरतिसयाय पयोगसम्पत्तिया, सदेवमनुस्साय पजाय अच्चन्तुपकारिताय अपरिमितनिरुपमभावगुणविसेससमङ्गिताय च सब्बसत्तुत्तमो भगवा अपरिमाणासु लोकधातूसु अपरिमाणानं सत्तानं अनुत्तरगारवट्ठानभूतताय च ‘‘नाथो’’ति वुच्चतीति. ‘‘निपुण…पे… देसन’’न्ति इमिना सम्मासम्बोधिया पयोजनं ¶ दस्सेति. संसारमहोघतो सत्तसन्तारणत्थञ्हि भगवता सम्मासम्बोधि अभिपत्थिता, तञ्च सत्तसन्तारणं यथावुत्तदेसनासम्पत्तिया समिज्झति तदविनाभावतो. इमिना भगवतो सातिसया परहितप्पटिपत्ति दस्सिता, इतरेहि अत्तहितसम्पत्तीति तदुभयेन अत्तहिताय पटिपन्नादीसु चतूसु पुग्गलेसु भगवतो चतुत्थपुग्गलभावं ¶ दीपेति, तेन च अनुत्तरदक्खिणेय्यभावं, उत्तमवन्दनीयभावं, अत्तनो च वन्दनकिरियाय खेत्तङ्गतभावं दीपेति.

एत्थ च यथा ‘‘महाकारुणिक’’न्ति इमिना पदेन भगवतो महाकरुणा दस्सिता, एवं ‘‘ञेय्यसागरपारगु’’न्ति एतेन महापञ्ञा दस्सिता. तेसु करुणाग्गहणेन लोकियेसु महग्गतभावप्पत्तासाधारणगुणदीपनतो भगवतो सब्बलोकियगुणसम्पत्ति दस्सिता होति, पञ्ञाग्गहणेन सब्बञ्ञुतञ्ञाणपदट्ठानमग्गञाणदीपनतो सब्बलोकुत्तरगुणसम्पत्ति. तदुभयग्गहणसिद्धो एव चत्थो नाथसद्देन पकासीयति. करुणावचनेन उपगमनं निरुपक्किलेसं दस्सेति, पञ्ञावचनेन अपगमनं. तथा करुणाग्गहणेन लोकसमञ्ञानुरूपं भगवतो पवत्तिं दस्सेति लोकवोहारविसयत्ता करुणाय, पञ्ञाग्गहणेन समञ्ञाय अनतिधावनं. सभावानवबोधेन हि धम्मानं समञ्ञं अतिधावित्वा सत्तादिसम्मसनं होतीति. तथा करुणाग्गहणेन महाकरुणासमापत्तिविहारं दस्सेति, पञ्ञाग्गहणेन तीसु कालेसु अप्पटिहतञाणं, चतुसच्चञाणं, चतुपटिसम्भिदाञाणं, चतुवेसारज्जञाणं. करुणाग्गहणेन महाकरुणासमापत्तिञाणस्स गहितत्ता सेसासाधारणञाणानि, छ अभिञ्ञा, अट्ठसु परिसासु (म. नि. १.१५१, १७८) अकम्पनञाणानि, दस बलानि, चुद्दस बुद्धञाणानि, सोळस ञाणचरिया, अट्ठारस बुद्धधम्मा (महानि. ६९, १५६; चूळनि. मोघराजमाणवपुच्छानिद्देस ८५; पटि. म. ३.५; दी. नि. अट्ठ. ३.३०५; विभ. मूलटी. सुत्तन्तभाजनीयवण्णना; दी. नि. टी. ३.१४१), चतुचत्तालीस ञाणवत्थूनि सत्तसत्तति ञाणवत्थूनीति (सं. नि. २.३४) एवमादीनं अनेकेसं पञ्ञाप्पभेदानं वसेन ञाणचारं दस्सेति.

तथा करुणाग्गहणेन चरणसम्पत्ति, पञ्ञाग्गहणेन विज्जासम्पत्ति. करुणाग्गहणेन सत्ताधिपतिता, पञ्ञाग्गहणेन धम्माधिपतिता. करुणाग्गहणेन ¶ लोकनाथभावो, पञ्ञाग्गहणेन अत्तनाथभावो. तथा करुणाग्गहणेन पुब्बकारिभावो, पञ्ञाग्गहणेन कतञ्ञुता. करुणाग्गहणेन अपरन्तपता, पञ्ञाग्गहणेन अनत्तन्तपता. करुणाग्गहणेन वा बुद्धकरधम्मसिद्धि, पञ्ञाग्गहणेन बुद्धभावसिद्धि. तथा करुणाग्गहणेन परेसं तारणं, पञ्ञाग्गहणेन सयं तारणं. तथा करुणाग्गहणेन सब्बसत्तेसु अनुग्गहचित्तता, पञ्ञाग्गहणेन सब्बधम्मेसु विरत्तचित्तता दस्सिता होति. सब्बेसञ्च बुद्धगुणानं करुणा आदि तंनिदानभावतो, पञ्ञा परियोसानं ततो उत्तरि करणीयाभावतो, इति आदिपरियोसानदस्सनेन सब्बे बुद्धगुणा दस्सिता होन्ति. तथा करुणावचनेन सीलक्खन्धपुब्बङ्गमो समाधिक्खन्धो दस्सितो होति. करुणानिदानञ्हि सीलं ततो पाणातिपातादिविरतिप्पवत्तितो, सा ¶ च झानत्तयसम्पयोगिनीति. पञ्ञावचनेन पञ्ञाक्खन्धो. सीलञ्च सब्बबुद्धगुणानं आदि, समाधि मज्झे, पञ्ञा परियोसानन्ति एवम्पि आदिमज्झपरियोसानकल्याणा सब्बे बुद्धगुणा दस्सिता होन्ति नयतो दस्सितत्ता. एसो एव हि निरवसेसतो बुद्धगुणानं दस्सनुपायो, यदिदं नयग्गाहणं, अञ्ञथा को नाम समत्थो भगवतो गुणे अनुपदं निरवसेसतो दस्सेतुं. तेनेवाह –

‘‘बुद्धोपि बुद्धस्स भणेय्य वण्णं, कप्पम्पि चे अञ्ञमभासमानो;

खीयेथ कप्पो चिरदीघमन्तरे, वण्णो न खीयेथ तथागतस्सा’’ति. (दी. नि. अट्ठ. १.३०४; ३.१४१; म. नि. अट्ठ. ३.४२५; उदा. अट्ठ. ५३; अप. अट्ठ. २.७.२०; बु. वं. अट्ठ. ४.४; चरिया. अट्ठ. निदानकथा, पकिण्णककथा; दी. नि. टी. १.गन्थारम्भकथावण्णना; म. नि. टी. १.१; सं. नि. टी. १.१.१; अ. नि. टी. १.१.१; वजिर. टी. गन्थारम्भकथा; सारत्थ. टी. १.गन्थारम्भकथावण्णना);

तेनेव च आयस्मता सारिपुत्तत्थेरेनापि बुद्धगुणपरिच्छेदनं पति अनुयुत्तेन ‘‘नो हेतं, भन्ते’’ति (दी. नि. २.१४५) पटिक्खिपित्वा ‘‘अपिच मे, भन्ते, धम्मन्वयो विदितो’’ति (दी. नि. २.१४६) वुत्तं.

एवं सङ्खेपेन सकलसब्बञ्ञुगुणेहि भगवन्तं अभित्थवित्वा इदानि सद्धम्मं थोमेतुं ‘‘विज्जाचरणसम्पन्ना’’तिआदिमाह. तत्थ विज्जाचरणसम्पन्ना हुत्वाति वचनसेसो. विन्दियं धम्मानं सलक्खणं, सामञ्ञलक्खणञ्च ¶ विन्दतीति विज्जा, लोभक्खन्धादीनि वा विज्झनट्ठेन विज्जा, चतुन्नं वा अरियसच्चानं विदितकरणट्ठेन विज्जाति एवं तावेत्थ वचनत्थतो विज्जा वेदितब्बा. पभेदतो पन तिस्सोपि विज्जा विज्जा भयभेरवसुत्ते आगतनियामेनेव, अट्ठपि विज्जा विज्जा अम्बट्ठसुत्तादीसु (दी. नि. १.२७८ आदयो) आगतनियामेनेव. चरन्ति तेहीति चरणानि, सीलसंवरादयो पञ्चदस धम्मा, इति इमाहि विज्जाहि, इमेहि च चरणेहि सम्पन्ना सम्पन्नागताति विज्जाचरणसम्पन्ना.

येनाति येन धम्मेन करणभूतेन, हेतुभूतेन च. तत्थ मग्गधम्मस्स करणत्थो वेदितब्बो निय्यानकिरियासाधकतमभावतो, निब्बानधम्मस्स हेतुअत्थो आरम्मणपच्चयभावतो. पच्चयत्थो हि ¶ अयं हेत्वत्थो. परियत्तिधम्मस्सपि हेतुअत्थो युज्जतेव परम्पराय हेतुभावतो. फलधम्मे पन उभयम्पि सम्भवति. कथं? ‘‘ताय सद्धाय अवूपसन्ताया’’ति वचनतो मग्गेन समुच्छिन्नानं किलेसानं पटिप्पस्सद्धिप्पहानकिच्चताय फलस्स निय्यानानुगुणता, निय्यानपरियोसानता चाति इमिना परियायेन सिया करणत्थो निय्यानकिरियाय. सकदागामिमग्गविपस्सनादीनं पन उपनिस्सयपच्चयभावतो सिया हेतुअत्थो. एवञ्च कत्वा अग्गप्पसादसुत्तादीसु (इतिवु. ९०) अग्गादिभावेन अग्गहितापि फलपरियत्तिधम्मा छत्तमाणवकविमानादीसु (वि. व. ८८६ आदयो) सरणीयभावेन गहिताति तेसं मग्गनिब्बानानं विय महाअट्ठकथायं सरणभावो उद्धटो. विसेसतो चेत्थ मग्गपरियापन्ना एव विज्जाचरणधम्मा वेदितब्बा. ते हि निप्परियायेन निय्यानकिरियाय साधकतमभूता, न इतरे. इतरेसं पन निय्यानत्थताय निय्यानता. यदि एवं कस्मा ‘‘विज्जाचरणसम्पन्ना हुत्वा’’ति वुत्तं, निय्यानसमकालमेव हि यथावुत्तविज्जाचरणसम्पत्तिसमधिगमोति? नायं विरोधो समानकालताय एव अधिप्पेतत्ता यथा ‘‘चक्खुञ्च पटिच्च रूपे च उप्पज्जति चक्खुविञ्ञाण’’न्ति (म. नि. १.२०४, ४००; ३.४२१, ४२५, ४२६; सं. नि. २.४३-४५; ४.६०; कथा. ४६५, ४६७). सम्पन्नाति वा पदस्स वत्तमानकालत्थता वेदितब्बा ‘‘उप्पन्ना धम्मा’’ति (ध. स. तिकमातिका १७) एत्थ उप्पन्नसद्दस्स विय. एवञ्च कत्वा वचनसेसमन्तरेनेव पदयोजना सिद्धा होति. ‘‘येना’’ति ¶ च पदं उभयत्थ सम्बन्धितब्बं ‘‘येन धम्मेन विज्जाचरणसम्पन्ना, येन धम्मेन निय्यन्ती’’ति.

लोकतोति खन्धादिलोकतो, वट्टतोति अत्थो. न्ति तं मग्गनिब्बानफलपरियत्तिभेदं धम्मं. उत्तमन्ति सेट्ठं. तथा हेस अत्तना उत्तरितरस्स अभावेन ‘‘अनुत्तरो’’ति वुच्चति. तत्थ मग्गस्स निय्यानहेतुआदिअत्थेन, निब्बानस्स निस्सरणविवेकादिअत्थेन, फलस्स अरियसन्तभावादिअत्थेन च सेट्ठता वेदितब्बा. स्वायमत्थो ‘‘यावता, भिक्खवे, धम्मा सङ्खता, अरियो अट्ठङ्गिको मग्गो तेसं अग्गमक्खायती’’ति (इतिवु. ९०; अ. नि. ४.३४) आदिसुत्तपदानुसारेन विभावेतब्बो.

धम्मन्ति यथानुसिट्ठं पटिपज्जमाने अपायतो, संसारतो च अपतमाने कत्वा धारेतीति धम्मो. सम्मा, सामञ्च सब्बधम्मानं बुद्धत्ता सम्मासम्बुद्धो, सब्बञ्ञुताअनावरणञाणो समन्तचक्खु भगवा, तेन यथा सम्मासम्बोधिसमधिगमेनेव सब्बे बुद्धगुणा सम्पापुणीयन्ति, एवं सम्मदेव आसेवनाय भावनाय बहुलीकिरियाय सम्मापटिपत्तिया सम्मदेव पच्चवेक्खणाय सक्कच्चं धम्मदेसनाय वेनेय्यसन्तानेसु पतिट्ठापनेन –

‘‘अरियं ¶ , वो भिक्खवे, सम्मासमाधिं देसेस्सामि (म. नि. ३.१३६; पेटको. २४). मग्गानट्ठङ्गिको सेट्ठो (ध. प. २७३; नेत्ति. १७०; पेटको. ३०). यावता, भिक्खवे, धम्मा सङ्खता वा असङ्खता वा, विरागो तेसं अग्गमक्खायति (इतिवु. ९०; अ. नि. ४.३४). एकायनो अयं, भिक्खवे, मग्गो सत्तानं विसुद्धिया (दी. नि. २.३७३; म. नि. १.१०६; सं. नि. ५.३६७, ३८४). धम्मं, वो भिक्खवे, देसेस्सामि आदिकल्याण’’न्ति (म. नि. ३.४२०; नेत्ति. ५) –

आदिवचनेहि, अभित्थवनेन च पूजितो मानितो अपचितोति सम्मासम्बुद्धपूजितो, तं सम्मासम्बुद्धपूजितं धम्मं वन्देति सम्बन्धो.

अयं पनेत्थ सङ्खेपत्थो – यस्स धम्मस्स अधिगमने विज्जासम्पन्ना चेव होन्ति चरणसम्पन्ना च, सब्बवट्टदुक्खतो च निय्यन्ति, तमेव अरियानं सकलगुणसमङ्गिभावनिमित्तं, अनवसेसदुक्खनिस्सरणहेतुभूतञ्च उत्तमं ¶ पवरं सद्धिं परियत्तिधम्मेन नवविधं लोकुत्तरधम्मं भगवतापि सम्मापटिपत्तिआदिविधिना पूजितं नमामि, अभित्थवामि वाति.

एत्थ च ‘‘येन लोकतो निय्यन्ति, विज्जाचरणसम्पन्ना च होन्ती’’ति पदद्वयेन यथाक्कमं धम्मस्स भावेतब्बभावो, सच्छिकातब्बभावो च वुत्तो. तेसु पठमेन विज्जासम्पत्तिया धम्मं थोमेति, दुतियेन विमुत्तिसम्पत्तिया. तथा पठमेन झानसम्पदाय, दुतियेन विमोक्खसम्पदाय. पठमेन वा समाधिसम्पदाय, दुतियेन समापत्तिसम्पदाय. पठमेन वा खयञाणभावेन, दुतियेन अनुप्पादञाणभावेन. अथ वा पुरिमेन विज्जूपमताय, दुतियेन वजिरूपमताय. पुरिमेन वा विरागसम्पत्तिया, दुतियेन निरोधसम्पत्तिया. तथा पठमेन निय्यानभावेन, दुतियेन निस्सरणभावेन. पठमेन वा हेतुभावेन, दुतियेन असङ्खतभावेन. पठमेन वा दस्सनभावेन, दुतियेन विवेकभावेन. पठमेन वा अधिपतिभावेन, दुतियेन अमतभावेन धम्मं थोमेति. अथ वा पठमेन निय्यानिकभावदस्सनतो स्वाक्खातताय धम्मं थोमेति, दुतियेन सच्छिकातब्बभावतो सन्दिट्ठिकताय. तथा पुरिमेन अकालिकताय, पच्छिमेन एहिपस्सिकताय. पुरिमेन वा ओपनेय्यिकताय, पच्छिमेन पच्चत्तं वेदितब्बताय धम्मं थोमेति.

‘‘उत्तम’’न्ति च एतेन अञ्ञस्स विसिट्ठस्स अभावदीपनेन परिपुण्णताय धम्मं थोमेति ¶ , ‘‘सम्मासम्बुद्धपूजित’’न्ति एतेन परिसुद्धताय. सब्बदोसापगमेन हिस्स पूजनीयता. परिसुद्धताय चस्स पहानसम्पदा, परिपुण्णताय पभवसम्पदा. पहानसम्पत्तिया च भावनापारिपूरी अनवसेसदोससमुग्घाटनतो, पभवसम्पत्तिया सच्छिकिरियनिब्बत्ति ततुत्तरि करणीयाभावतो. अनञ्ञसाधारणताय हि उत्तमोति. तथा भावेतब्बभावेनस्स सह पुब्बभागसीलादीहि सेक्खा सीलसमाधिपञ्ञाक्खन्धा, सच्छिकातब्बभावेन सह असङ्खताय धातुया असेक्खा सीलसमाधिपञ्ञाक्खन्धा दस्सिता होन्तीति.

एवं सङ्खेपेन सब्बसद्धम्मगुणेहि सद्धम्मं थोमेत्वा इदानि अरियसङ्घं थोमेतुं ‘‘सीलादिगुणसम्पन्नो’’तिआदि वुत्तं. तत्थ सीलादिगुणसम्पन्नोति सीलसमाधिपञ्ञाविमुत्तियादिगुणेहि सम्पन्नो समन्नागतो, सम्पन्नसीलादिगुणो वा. अरियानञ्हि तंतंमग्गवज्झकिलेसप्पहानेन हतपटिपक्खा सुविसुद्धा सीलादयो ‘‘सम्पन्ना’’ति वत्तब्बतं अरहन्ति ¶ , न पुथूज्जनानं, यतो ‘‘सुप्पटिपन्नो’’तिआदिना (म. नि. १.७४; अ. नि. ६.१०; उदा. १८) अरियसङ्घो थोमीयति. अथ वा सीलादिगुणसम्पन्नोति परिपुण्णसीलादिगुणो. अरियपुग्गलानञ्हि अरियसच्चप्पटिवेधेन सहेव यथारहं सेक्खासेक्खा सीलादिधम्मक्खन्धा पारिपूरिं गच्छन्तीति. ठितो मग्गफलेसूति मग्गेसु, फलेसु च ठितो, मग्गट्ठो, फलट्ठो चाति अत्थो. योति अनियमतो अरियसङ्घं निद्दिसति, तस्स ‘‘त’’न्ति इमिना नियमं वेदितब्बं.

ननु च अरियसङ्घे न सब्बे अरियपुग्गला मग्गट्ठा, नापि सब्बे फलट्ठाति? सच्चमेतं, अवयवधम्मेन पन समुदायं निद्दिसन्तो एवमाह यथा ‘‘समं चुण्ण’’न्ति. यथा हि योगचुण्णस्स अवयवेसु लब्भमानो समभावो समुदाये अपदिसीयति ‘‘समं चुण्ण’’न्ति, एवं अरियसङ्घस्स अवयवभूतेसु अरियपुग्गलेसु लब्भमानो मग्गट्ठफलट्ठभावो समुदायभूते अरियसङ्घे ठितो ‘‘मग्गफलेसू’’ति अपदिट्ठोति वेदितब्बं.

आरकत्ता किलेसेहि, अनये न इरियनतो, अये च इरियनतो, सदेवकेन च लोकेन ‘‘सरण’’न्ति अरणीयतो अरियो, दिट्ठिसीलसामञ्ञेन संहतत्ता सङ्घो, अरियो च सो सङ्घो चाति अरियसङ्घो, तं अरियसङ्घं. पुज्जभवफलनिब्बत्तनतो अत्तनो सन्तानं पुनातीति वा पुञ्ञं, खित्तं वुत्तं बीजं विरुहनट्ठानताय तायति रक्खतीति खेत्तं केदारादि, खेत्तं वियाति खेत्तं, सत्तानं पुञ्ञस्स महप्फलभावकरणेन विरुहनट्ठानताय खेत्तन्ति पुञ्ञक्खेत्तं. अनुत्तरं वन्देति सम्बन्धो.

एत्थ ¶ च ‘‘सीलादिगुणसम्पन्नो’’ति एतेन अरियसङ्घस्स भगवतो अनुजातपुत्ततं दस्सेति, तेनस्स पभवसम्पदा दीपिता होति. ‘‘ठितो मग्गफलेसू’’ति एतेन पहानसम्पदं, ञाणसम्पदञ्च दस्सेति किलेसानं समुच्छेदप्पटिप्पस्सद्धिप्पहानदीपनतो, मग्गफलञाणाधिगमदीपनतो च. ‘‘अरियसङ्घ’’न्ति एतेन पभवसम्पदं सब्बसङ्घानं अग्गभावदीपनतो, सदेवकेन च लोकेन अरणीयभावदीपनतो. ‘‘पुञ्ञक्खेत्तं अनुत्तर’’न्ति एतेन लोकस्स बहूपकारतं दस्सेति अग्गदक्खिणेय्यभावदीपनतो.

तथा ¶ ‘‘सीलादिगुणसम्पन्नो’’ति इदं अरियसङ्घस्स सम्माउजुञायसामीचिप्पटिपन्नभावदीपनं. ‘‘ठितो मग्गफलेसू’’ति इदं सतिपि सन्तानविभागेन अनेकभावे चतुपुरिसयुगअट्ठपुरिसपुग्गलभावदीपनं. ‘‘अरियसङ्घ’’न्ति इदं आहुनेय्यादिभावदीपनं. ‘‘पुञ्ञक्खेत्तं अनुत्तर’’न्ति इदं लोकस्स हितसुखाय पटिपन्नतादीपनं. तथा ‘‘ठितो मग्गफलेसू’’ति इदं अरियसङ्घस्स लोकुत्तरसरणगमनसब्भावदीपनं, तेनस्स भगवतो ओरसपुत्तभावो दस्सितो होति. ‘‘सीलादिगुणसम्पन्नो’’ति इमिना पनस्स विहतविधस्तकिलेसा अनवसेसा सेक्खासेक्खा सीलादिधम्मक्खन्धा दस्सिता. ‘‘अरियसङ्घं पुञ्ञक्खेत्तं अनुत्तर’’न्ति इमिना तेसं तेसञ्ञेव यथावुत्तगुणविसेसानं सुपरिसुद्धतं दीपेति. तेनस्स महानुभावतं, अनुत्तरदक्खिणेय्यभावं, वन्दनारहभावं, अत्तनो च वन्दनाकिरियाय खेत्तङ्गतभावं दीपेति. सरणगमनञ्च सावकानं सब्बगुणानं आदि, सपुब्बभागप्पटिपदा सेक्खा सीलक्खन्धादयो मज्झे, असेक्खा सीलक्खन्धादयो परियोसानन्ति आदिमज्झपरियोसानकल्याणा सब्बे अरियसङ्घगुणा इमाय गाथाय पकासिताति वेदितब्बं.

एवं गाथात्तयेन सङ्खेपतो सकलगुणसंकित्तनमुखेन रतनत्तयस्स पणामं कत्वा इदानि तं निपच्चकारं यथाधिप्पेते पयोजने परिणामेन्तो ‘‘वन्दनाजनित’’न्ति गाथमाह. तत्थ वन्दनाजनितन्ति वन्दनाकारेन निब्बत्तितं, रतनत्तयगुणाभित्थवनवसेन, निपच्चकारवसेन वा उप्पादितन्ति अत्थो. इतीति एवं ‘‘महाकारुणिक’’न्तिआदिप्पकारेन. रतिजननट्ठेन रतनं, बुद्धधम्मसङ्घा, चित्तीकतादिभावो वा रतनट्ठो. वुत्तञ्हेतं –

‘‘चित्तीकतं महग्घञ्च, अतुलं दुल्लभदस्सनं;

अनोमसत्तपरिभोगं, रतनं तेन वुच्चती’’ति. (खु. पा. अट्ठ. ६.३; दी. नि. अट्ठ. २.३३; सं. नि. ५.२२३; सु. नि. अट्ठ. १.२२६; महानि. अट्ठ. ५०; दी. नि. टी. १.गन्थारम्भकथा; म. नि. टी. १.४; सं. नि. टी. १.१.४; अ. नि. टी. १.१.४; सारत्थ. टी. १.गन्थारम्भकथावण्णना);

चित्तीकतभावादयो ¶ च अनञ्ञसाधारणा बुद्धादीसु एव लब्भन्ति, रतनानं तयं रतनत्तयं, तस्मिं रतनत्तये. हतन्तरायोति विधस्तउपद्दवो हुत्वाति सम्बन्धो, एतेन अत्तनो पसादसम्पत्तिया, रतनत्तयस्स च खेत्तभावसम्पत्तिया तस्स पुञ्ञस्स अत्थसंवण्णनाय उपघातकउपद्दवानं ¶ विहनने समत्थतं दस्सेति. सब्बत्थाति सब्बस्मिं अन्तो चेव बहि च, अज्झत्तिकबाहिरवत्थूसूति अत्थो. सब्बत्थाति वा सब्बस्मिं काले, संवण्णनाय आदिमज्झपरियोसानकालेसूति वुत्तं होति. हुत्वाति पुब्बकालकिरिया, तस्स ‘‘करिस्सामत्थवण्णन’’न्ति एतेन सम्बन्धो. तस्साति यं रतनत्तये वन्दनाजनितं पुञ्ञं, तस्स. तेजसाति आनुभावेन बलेन.

एवं रतनत्तयवन्दनाय पयोजनं दस्सेत्वा इदानि नेत्तिप्पकरणस्स गम्भीरत्थत्ता अत्थसंवण्णनाय दुक्करभावं दस्सेतुं ‘‘ठिति’’न्तिआदिमाह. तत्थ ठितिन्ति ठानं अनन्तरधानं अविच्छेदप्पवत्तिं. आकङ्खमानेनाति इच्छमानेन पत्थयन्तेन, ‘‘अहोवतायं सद्धम्मनेत्ति चिरं तिट्ठेय्या’’ति एवं पत्थयन्तेनाति वुत्तं होति. चिरन्ति दीघकालं, पञ्चवस्ससहस्सपरिमाणं कालन्ति अत्थो. सद्धम्मनेत्तियाति सद्धम्मसङ्खाताय नेत्तिया. सद्धम्मो हि वेनेय्यसन्तानेसु अरियगुणानं नयनतो नेत्ति, सद्धम्मस्स वा नेत्ति सद्धम्मनेत्ति, तस्सा सद्धम्मनेत्तिया, स्वायमत्थो अट्ठकथायं विचारितो एव. थेरेनाति थिरगुणयुत्तेन. अभियाचितोति आदरगारवेन याचितो. अभिमुखं वा याचितो, अनुत्तरं कत्वा याचितोति अत्थो. उद्दिस्स वा याचितो, गरुतरं कत्वा याचितोति अत्थो, ‘‘करोतु आयस्मा नेत्तिप्पकरणस्स कञ्चि अत्थसंवण्णन’’न्ति एवं नेत्तिया अत्थसंवण्णनं पति अज्झेसितोति वुत्तं होति. एत्थ च सद्धम्मस्स चिरं ठितिकामेन अज्झासयसम्पन्नेन सासने थिरगुणयुत्तेन सब्रह्मचारिना आदरगारवेन, अभिमुखं वा याचितेन मे न सक्का तस्स अभियाचनं पटिक्खिपितुन्ति दस्सेति ‘‘ठितिं आकङ्खमानेना’’ति गाथाय.

पदुमुत्तरनाथस्साति पदुमुत्तरस्स सम्मासम्बुद्धस्स. पस्सताति पुब्बेनिवासचक्खुना, समन्तचक्खुना एव वा हत्थतले ठपितआमलकं विय अभिनीहारं पस्सन्तेन. तादिनाति तादिभावयुत्तेन ¶ , सब्बत्थ वा निब्बिकारेन, ‘‘अम्हाकं भगवता’’ति वचनसेसो. यस्साति आयस्मतो महाकच्चानत्थेरस्स. ठपितोति –

‘‘एतदग्गं, भिक्खवे, मम सावकानं भिक्खूनं संखित्तेन भासितस्स वित्थारेन अत्थं विभजन्तानं यदिदं महाकच्चानो’’ति (अ. नि. १.१८८, १९७) –

एवं ¶ ठपितो. सीलादिगुणविसेसेहि महन्ता सावकाति महासावका (थेरगा. अट्ठ. २.१२८८; अ. नि. टी. २.३.५९), महाकस्सपादयो, तेसु अयमायस्मा अञ्ञतरोति, महासावको च सो गुणविसेसयोगतो उत्तमो चाति महासावकुत्तमो.

झानादीसु सातिसयानं आवज्जनादिवसीभावानं, अरियिद्धिवसेन परमस्स च चेतोवसीभावस्स अधिगतत्ता वसिप्पत्तो. अत्थादीसु सविसेसभेदगतपटिसम्भिदाञाणत्ता पभिन्नपटिसम्भिदो. ‘‘पण्डितो, भिक्खवे, महाकच्चानो, महापञ्ञो, भिक्खवे, महाकच्चानो’’तिआदिना (म. नि. १.२०५) अनेकेसु ठानेसु भगवता पसंसितत्ता सम्बुद्धेन पसंसितो. तेन वुत्तं ‘‘सत्थु चेव संवण्णितो संभावितो, विञ्ञूनञ्च सब्रह्मचारिन’’न्ति.

अनुमोदिताति ‘‘साधु साधु, कच्चान, साधु खो, त्वं कच्चान, इमं धम्मसंवण्णनं अभासी’’ति एवं अनुमोदिता. एकस्मिं किर समये अयं महाथेरो जम्बुवनसण्डे विहरन्तो अत्तनो सन्तिकावचरानं भिक्खूनं इमं हारनयपटिमण्डितं पकरणं अभासि. भासित्वा च भगवतो सन्तिकं उपसङ्कमित्वा भगवन्तं अभिवादेत्वा एकमन्तं निसिन्नो यथाभासितं इमं पकरणं भगवतो निवेदेसि. तं सुत्वा भगवा ‘‘साधु साधू’’तिआदिना अनुमोदित्वा ‘‘तस्मातिह, त्वं कच्चान, इमं धम्मसंवण्णनं धम्मनेत्तित्वेव धारेही’’ति नामग्गहणं अकासीति वदन्ति. देसनाहारादिनन्दियावट्टनयादिहारनयानुसारेनेव सब्बधम्मसंवण्णनानं गतियोति आह ‘‘सासनस्स सदायत्ता, नवङ्गस्सत्थवण्णना’’ति.

गम्भीरञाणेहीहि गम्भीरेहि ञाणेहि, न सद्धामत्तकेन, गम्भीरञाणेहि वा महापञ्ञेहि अरियेहि. पकरणस्स गम्भीरत्थतं, अत्तनो च ञाणस्स नातिविसयतं विदित्वा संवण्णनारम्भे संसीदन्तम्पि मं सासनगुणादिउपनिस्सयसम्पदा उस्साहेसीति इममत्थं दस्सेति ‘‘किञ्चापी’’तिआदिना.

‘‘पञ्चपि ¶ निकाये ओगाहेत्वा’’ति इमिना नेत्तिया पञ्चपि महानिकाये अनुपविसित्वा अवट्ठानं, तेसं संवण्णनाभावञ्च दीपेति. तत्थ ¶ ‘‘कतमो अस्सादो च आदीनवो चा’’तिआदिपेटकोपदेसपाळिं (पेटको. २३) आनेत्वा इध देसनाहारादीनं पदत्थविनिच्छयो पेटकेन संसन्दनं नाम. ‘‘यथाबल’’न्ति इमिना सब्बथा सब्बभागेनापि नेत्तिया संवण्णना मया न सुकरा कातुं, अत्तनो पन ञाणबलानुरूपं करिस्सामीति निरतिमानतं दीपेति.

सुविसुद्धन्ति सुट्ठु विसुद्धं, निकायन्तरलद्धिदोसेहि अन्तरन्तरा अनुप्पवेसितेहि असम्मिस्सन्ति अधिप्पायो. असंकिण्णन्ति सनिकायेपि पदत्थन्तरपरिकप्पनादिना असंकिण्णं तादिससङ्कररहितं अनाकुलं सुपरिच्छिन्नं. विविधेहि आकारेहि निच्छिनोतीति विनिच्छयो. अत्थानं विनिच्छयो अत्थविनिच्छयो. गण्ठिट्ठानभूतेसु अत्थेसु खिलमद्दनाकारेन पवत्ता विमतिच्छेदकथा, निपुणो सुखुमो सण्हो अत्थविनिच्छयो एतस्साति निपुणत्थविनिच्छयो. अथ वा अत्थे विनिच्छिनोतीति अत्थविनिच्छयो, यथावुत्तअत्थविसयञाणं, निपुणो छेको अत्थविनिच्छयो एतस्साति निपुणत्थविनिच्छयो, तं निपुणत्थविनिच्छयं. समयन्ति सिद्धन्तं. इदं वुत्तं होति – महाविहारवासीनं सिद्धन्तो वुत्तनयेन सुपरिसुद्धो, अनाकुलो, सण्हसुखुमविनिच्छयो च, सिद्धन्तं तं अविलोमेन्तो अनुकूलतो तत्थ सिद्धंयेव धम्मनेत्तिं पकासयन्तो नेत्तिप्पकरणस्स अत्थसंवण्णनं करिस्सामीति.

पमादलेखन्ति अपरभागे पोत्थकारुळ्हकाले पमज्जित्वा लिखनवसेन पवत्तप्पमादपाठं. वज्जेत्वाति अपनेत्वा. पाळिं सम्मा नियोजयन्ति तं तं नेत्तिपाळिं तत्थ तत्थ उदाहरणभावेन आनीतसुत्ते सम्मदेव नियोजेन्तो, अत्थसंवण्णनाय वा तं तं उदाहरणसुत्तसङ्खातं पाळिं तस्मिं तस्मिं लक्खणभूते नेत्तिगन्थे सम्मदेव नियोजेन्तो. उपदेसन्ति नेत्तिउपनिसं नेत्तिहदयं. य्वायं सपट्ठानविभागस्स तेत्तिंसविधस्स नेत्तिपदत्थस्स सह निमित्तविभागेन असङ्करतो ववत्थितो विसयो, तं. विभावेन्तो पकासेन्तो. तस्सा नेत्तिया करिस्सामि अत्थवण्णनन्ति सम्बन्धो.

एत्थ च ‘‘अभियाचितो’’ति इमिना अत्थसंवण्णनाय निमित्तं दस्सेति, ‘‘ठितिं आकङ्खमानेन चिरं सद्धम्मनेत्तिया’’ति इमिना पयोजनं, ‘‘करिस्सामत्थवण्णन’’न्ति ¶ इमिना पिण्डत्थं. संवण्णियमाना हि पकरणत्था संवण्णनाय पिण्डत्थो. ‘‘तमुपनिस्साया’’तिआदिना करणप्पकारं.

इदानि ¶ संवण्णनाय सवने नियोजेन्तो ‘‘इति अत्थ’’न्ति ओसानगाथमाह. तत्थ ‘‘सक्कच्च’’न्ति पदं उभयत्थ योजेतब्बं ‘‘सक्कच्चं विभजन्तस्स, सक्कच्चं निसामयथा’’ति.

गन्थारम्भकथावण्णना निट्ठिता.

निदानकथावण्णना

वचनत्थजाननेन विदितप्पकरणत्थसामञ्ञत्थस्स पकरणकथा वुच्चमाना सोभेय्याति नेत्तिपदत्थपरिजाननमेव आदिम्हि युत्तरूपन्ति तदत्थं पुच्छति ‘‘तत्थ केनट्ठेन नेत्ती’’ति. तत्थ तत्थाति ‘‘तस्सा नेत्तिया करिस्सामत्थवण्णन’’न्ति यदिदं वुत्तं, तस्मिं; यस्सा करिस्सामत्थवण्णनन्ति पटिञ्ञातं, सा नेत्ति केनट्ठेन नेत्तीति अत्थो. तत्थाति वा ‘‘नेत्तिप्पकरणस्सा’’ति एतस्मिं वचने या नेत्ति वुत्ता, सा केनट्ठेन नेत्तीति अत्थो. ‘‘नयनट्ठेना’’ति इदं कत्तुकरणाधिकरणसाधनानं साधारणवचनन्ति ‘‘अरियधम्मं नयती’’ति कत्तुसाधनवसेन ताव नेत्तिसद्दस्स अत्थं वत्वा इदानि करणाधिकरणसाधनवसेन वत्तुं ‘‘नयन्ति ताया’’तिआदि वुत्तं.

तथा हि वुत्तन्ति नेत्तिउपदेसाधीनत्ता एव सुत्तावबोधस्स वुत्तं. पेटके ‘‘तस्मा निब्बायितुकामेन सुतमयेन अत्था परियेसितब्बा, तत्थ परियेसनाय अयं अनुपुब्बी भवति सोळस हारा पञ्च नया अट्ठारस मूलपदानी’’तिआदि (पेटको. ३). हारनयविचारणा विनिमुत्तो अत्थसंवण्णनाविसेसो नत्थीति आह ‘‘सुत्तस्स अत्थसंवण्णना नेत्तिउपदेसायत्ता’’ति. स्वायमत्थो परतो पकिण्णककथायं आवि भविस्सति. एवं महाविसया चायं नेत्ति कुतो पभवाति आह ‘‘सुत्तप्पभवा’’ति, एतेन नेत्तिया पमाणभूततं दस्सेति. इदञ्च सुत्तस्स नेत्तिसन्निस्सयतापरिदीपनपरं, न थेरप्पभवतापटिक्खेपपरं. थेरो हि पञ्च महानिकाये ओगाहेत्वा तंसन्निस्सयेनेव ¶ तेसं संवण्णनाभूतं इमं पकरणं अभासि, तस्मा अयमेव संवण्णनाधम्मो, यदिदं संवण्णेतब्बधम्मसन्निस्सयता.

पकरणपरिच्छेदतोति पकरणस्स विभागतो. हारविचारादयो हि तयो नेत्तिप्पकरणस्स विभागा, पकरणभूतपरिच्छेदतो वा. तीणि हि एतानि पकरणानि तयो अधिकारा, यदिदं हारविचारादयो. पाळिववत्थानतोति पाठसन्निवेसतो.

‘‘सब्बो ¶ हि पकरणत्थो’’तिआदिना सङ्गहवारस्स अन्वत्थसञ्ञतं दस्सेति. ‘‘ननु चेत्थ पट्ठानं असङ्गहित’’न्ति चोदको ब्यभिचारमाह. इतरो यदिपि सरूपतो असङ्गहितं, अत्थतो पन सङ्गहितन्ति दस्सेन्तो ‘‘नयिदमेव’’तिआदिना परिहरति. पुन ‘‘तथा ही’’तिआदिना तमेवत्थं पाळिया पाकटतरं करोति. अत्थनया नन्दियावट्टादयो. सङ्खारत्तिका पुञ्ञाभिसङ्खारादयो, कायसङ्खारादयो च. तेसु अत्थनयानं अञ्ञमञ्ञसङ्गहो परतो आवि भविस्सति. इतरे पन कामावचरा, रूपावचरा च कुसला चेतना पुञ्ञाभिसङ्खारो, अकुसला चेतना अपुञ्ञाभिसङ्खारो, अरूपावचरा कुसला चेतना आनेञ्जाभिसङ्खारो. पुञ्ञाभिसङ्खारो च अपुञ्ञाभिसङ्खारो च कायद्वारप्पवत्तो कायसङ्खारो, सो एव वचीद्वारप्पवत्तो वचीसङ्खारो, मनोद्वारप्पवत्तो पन तिविधोपि चित्तसङ्खारो. इति जातिवसेन पुरिमत्तिके वुत्ता एव धम्मा द्वारवसेन दुतियत्तिके वुत्ता, ते एव च पुरिमत्तिकेति अञ्ञमञ्ञसङ्गहो वेदितब्बो.

यत्थाति यस्मिं वारे. पेटकेति पेटकोपदेसे. सम्पतमानाति संवण्णनावसेन सन्निपतन्ता. ‘‘ब्यञ्जनविधिपुथुत्ता’’ति इदं एकस्मिं सुत्ते अनेकेसं हारानं सन्निपतनस्स कारणवचनं. तथा हि ‘‘अनेकसामत्थियनिचिता सद्दा’’ति अक्खरचिन्तका वदन्ति.

‘‘न सरूपतो’’ति इमिना सङ्गहवारे विय उद्देसनिद्देसवारेसुपि पट्ठानस्स अत्थतो उद्धटतं दस्सेति. मूलपदग्गहणेनेव गहितत्ता उद्देसवारे ताव एवं होतु, निद्देसवारे पन कथन्ति? तत्थापि नयग्गहणेनेव मूलपदानिपि गहितानीति वेदितब्बं. न हि मूलपदेहि विना काचि नययोजना सम्भवति. अपरे पन ‘‘हारनया विय पट्ठानं न ¶ सुत्तस्स संवण्णनाविसेसो, अथ खो तस्मिं तस्मिं सुत्ते संकिलेसभागियतादिलब्भमानविसेसमत्तन्ति न तस्स पकरणस्स पदत्थसङ्गहो. एवञ्च कत्वा तेत्तिंसाय नेत्तिपदत्थेसु पट्ठानं असङ्गहितं, उद्देसनिद्देसवारेसु च अनुद्धटमेवा’’ति वदन्ति.

‘‘पाळितो एव विञ्ञायती’’ति वुत्तमत्थं समत्थेन्तो ‘‘तथा हि…पे… आभत’’न्ति आह, तेन थेरेन भासितभावो विय भगवता अनुमोदितभावोपि पाळिअनुगतो एवाति दस्सेति. सावकभासितत्ता निदानं न वुत्तन्ति न सक्का वत्तुन्ति चोदेन्तो ‘‘सावक…पे… भासित’’न्ति आह. नयिदं एकन्तिकन्ति च सावकभासितबुद्धभासितभावो निदानावचनस्स, निदानवचनस्स च अकारणं उभयत्थापि उभयस्स दस्सनतो. तस्मा निदानावचनेन नेत्तिया असावकभासितता न सिज्झतीति दस्सेति. तेनाह ‘‘न च तावता तानि अप्पमाणं, एवमिधापि दट्ठब्ब’’न्ति.

येनेव ¶ कारणेन निदानावचनस्स पमाणभावसाधनता, तेनेव कारणेन इमस्स पकरणस्स पमाणभावसिद्धीति दस्सेति ‘‘निदानञ्च नामा’’तिआदिना. इदानि ‘‘अथ वा’’तिआदिना नेत्तिया निदानावचनेन अब्यभिचारहेतुमाह. अयञ्हेत्थ पयोगो न नेत्तिया निदानं वत्तब्बं पाळिया अत्थसंवण्णनाभावतो. या हि पाळिया अत्थसंवण्णना न तस्सा निदानवचनं दिट्ठं यथा पटिसम्भिदामग्गस्स, निद्देसादीनञ्चाति.

‘‘अयं विभागो’’तिआदिना एकविधतो पट्ठाय याव चतुरासीतिसहस्सप्पभेदा, ताव यथादस्सितस्स पकरणविभागस्स पुन ‘‘आदिना नयेन पकरणविभागो वेदितब्बो’’ति इदं निगमनं. तत्थ आदिना नयेनाति आदिसद्देन अभिञ्ञेय्यधम्मनिद्देसतो पञ्ञत्तिपञ्ञपेतब्बधम्मविभजनतो तियद्धपरियापन्नधम्मविचारतो चतुरोघनित्थरणत्थतो पञ्चाभिनन्दनादिप्पहानतो छतण्हाकायुपसमनतो सङ्गहवारादिसत्तवारसङ्गहतो अट्ठमिच्छत्तसमुग्घातदीपनतोति एवमादीनं सङ्गहो दट्ठब्बो.

१. सङ्गहवारवण्णना

यन्ति अनियमत्थो सब्बनामसद्दो कम्मसाधनवसेन वुत्तो. अत्थावबोधनत्थो सद्दप्पयोगो अत्थपराधीनो केवलो अत्थपदत्थको ¶ , सो पदत्थविपरियेसकारिना इति-सद्देन परभूतेन सद्दपदत्थको जायतीति आह ‘‘यन्ति अनियमतो उपयोगनिद्देसो’’ति. लोकोति कत्तुनिद्देसोतिआदीसुपि एसेव नयो.

एवं ‘‘य’’न्तिआदीनं गाथापदानं कम्मकत्तुकिरियाकत्तुविसेसनादिदस्सनवसेन अत्थं वत्वा इदानि अवयवजोतनवसेन पदत्थं दस्सेतुं ‘‘लोकियन्ति एत्था’’तिआदिमाह. लोकसद्दो इध सामत्थियतो सत्तलोकवचनो दट्ठब्बो. तेनाह ‘‘पूजनकिरियायोग्यभूततावसेना’’ति. सासनन्तरधानतो परं पूजना अञ्ञबुद्धुप्पादेन वेदितब्बा, यथेतरहि विपस्सीआदिसम्मासम्बुद्धानं. ‘‘दीपङ्करो’’तिआदिना यदिपि बुद्धवंसदेसनायं (बु. वं. २.७५) भगवताव वुत्तं, सुमेधपण्डितत्तभावेन पन पवत्तिं सन्धाय वुत्तन्ति आह ‘‘यथाह भगवा सुमेधभूतो’’ति.

परिञ्ञाक्कमेनाति ञातपरिञ्ञादिपटिपाटिया. लक्खणावबोधप्पटिपत्तियाति विपस्सनाय. तेन ¶ वुत्तं ‘‘सुञ्ञतमुखादीही’’ति. तथा च वुत्तन्ति विञ्ञूहि वेदनीयताय एव सासनवरस्स वुत्तं भगवता –

‘‘एतु विञ्ञू पुरिसो असठो अमायावी उजुजातिको, अहमनुसासामि, अहं धम्मं देसेमि, यथानुसिट्ठं तथा पटिपज्जमानो न चिरस्सेव सामञ्ञेव उस्सति, सामं दक्खिती’’तिआदि (म. नि. २.२८१).

यं-सद्दो सासनविसयो, लोकपालसद्दो सत्थुविसयोपि लोकं पति गुणीभूतोति ‘‘तस्सा’’ति पटिनिद्देसस्स कथं सत्थुविसयताति चोदनं मनसिकत्वा आह ‘‘सलोकपालोति चेत्था’’तिआदि, गुणीभूतोपि लोकपालसद्दो पधानभूतो विय पटिनिद्देसं अरहति. अञ्ञो हि सद्दक्कमो, अञ्ञो अत्थक्कमोति.

धम्मगारवेन भगवा धम्मं पूजेन्तो वेनेय्यबन्धवे अचिन्तेत्वा समापत्तिसमापज्जनधम्मपच्चवेक्खणाहि सत्तसत्ताहं वीतिनामेसीति आह ‘‘भगवतो…पे… दीपेतब्बा’’ति. तत्थ आदिसद्देन सावकेहि धम्मस्सवनस्स, तेसं पच्चुग्गमनादीनञ्च सङ्गहो वेदितब्बो.

इच्चस्साति ¶ इति अस्स, एवं भगवतो अविपरीतअनन्तरायिकनिय्यानिकधम्मदेसनाय सब्बञ्ञुतानावरणभावदीपनेनाति अत्थो. तेनाति चतुवेसारज्जयोगेन. तदविनाभाविना दसबल…पे… पकासिता होति. आवेणिकबुद्धधम्मादीति एत्थ आदिसद्देन तीसु कालेसु अप्पटिहतञाणानि, चतुसच्चञाणानि, चतुपटिसम्भिदाञाणानि, पञ्चगतिपरिच्छेदकञाणानि, छ अभिञ्ञाञाणानि, सत्त अरियधनानि, सत्त बोज्झङ्गा, अट्ठ विज्जा, अट्ठसु परिसासु अकम्पनञाणानि, अट्ठ विमोक्खा, नव समाधिचरिया, नव अनुपुब्बविहारा, दस नाथकरणा धम्मा, दस अरियवासा, द्वादस धम्मचक्काकारा, तेरस धुतधम्मा, चुद्दस बुद्धञाणानि, पन्नरस चरणधम्मा, सोळस ञाणचरिया, सोळस आनापानस्सती, एकूनवीसति पच्चवेक्खणञाणानि, चतुवीसति पच्चयविभावनञाणानि, चतुचत्तारीस ञाणवत्थूनि, सत्तसत्तति ञाणवत्थूनि, चतुवीसतिकोटिसतसहस्ससमापत्तिसञ्चारिमहावजिरञाणं, अनन्तनयसमन्तपट्ठानपविचयदेसनाकारप्पवत्तञाणानि चाति एवमादीनं भगवतो गुणविसेसानं सङ्गहो दट्ठब्बो.

अपरो ¶ नयो – गुणविसिट्ठतं दीपेति, सा च गुणविसिट्ठता महाकरुणामहापञ्ञाहि वेदितब्बा ताहि सत्थुसम्पत्तिसिद्धितो. तत्थ महाकरुणाय पवत्तिभेदो ‘‘बहुकेहि आकारेहि पस्सन्तानं बुद्धानं भगवन्तानं सत्तेसु महाकरुणा ओक्कमती’’तिआदिना पटिसम्भिदामग्गे (पटि. म. १.११७) वुत्तनयेन वेदितब्बो. महापञ्ञाय पन पवत्तिभेदो वुत्तो एव. तत्थ करुणाय भगवतो चरणसम्पत्ति, पञ्ञाय विज्जासम्पत्ति. करुणाय सत्ताधिपतिता, पञ्ञाय धम्माधिपतिता. करुणाय लोकनाथता, पञ्ञाय अत्तनाथता. करुणाय पुब्बकारिता, पञ्ञाय कतञ्ञुता. करुणाय अपरन्तपता, पञ्ञाय अनत्तन्तपता. करुणाय बुद्धकरधम्मसिद्धि, पञ्ञाय बुद्धभावसिद्धि. करुणाय परेसं तारणं, पञ्ञाय सयं तारणं. करुणाय सब्बसत्तेसु अनुग्गहचित्तता, पञ्ञाय सब्बधम्मेसु विरत्तचित्तता पकासिता होतीति अनवसेसतो परहितपटिपत्तिया, अत्तहितसम्पत्तिया च पारिपूरी वेदितब्बा. तीसुपि अवत्थासूति हेतुफलसत्तूपकारावत्थासु.

अभिसमयो ¶ पटिवेधसासनस्स, मनसिकरणं पटिपत्तिसासनस्स, सवनादीहि परिचयकरणं परियत्तिसासनस्साति तिण्णम्पि वसेन योजेतब्बो. तेनाह ‘‘यथारह’’न्ति. ‘‘सक्कच्चं धम्मदेसनेना’’ति इमिना इध ‘‘सासन’’न्ति वुत्तस्स तिविधस्सापि सद्धम्मस्स अविसेसेन देसनापूजं वत्वा थोमनापूजनस्स वसेन तं विभजित्वा दस्सेन्तो ‘‘अरियं, वो भिक्खवे’’तिआदिमाह. तत्थ ‘‘थोमनेना’’ति पदेनापि ‘‘सक्कच्च’’न्ति पदं योजेतब्बं. पूजनाद्वयस्सापि वा वसेन इधापि पदयोजना वेदितब्बा. अरियभावादयोति अरियसेट्ठअग्गभावादयो. निय्यानादयोति निय्यानहेतुदस्सनादयो. स्वाक्खाततादयोति स्वाक्खातसन्दिट्ठिकतादयो.

इदानि अरियसङ्घगुणानम्पि इमाय गाथाय पकासितभावं दस्सेतुं ‘‘यस्मा पना’’तिआदि वुत्तं. बाल्यादिसमतिक्कमनतोति बालअब्यत्तभावादिसमतिक्कमनतो.

ञाणविसेसो सुतचिन्ताभावनामयञाणानि. सोतब्बमनसिकातब्बपटिविज्झितब्बावत्था अवत्थाभेदो. उभयन्ति ब्यञ्जनपदं, अत्थपदञ्च. उभयथाति करणकम्मसाधनवसेन पच्चेकं योजेतब्बं. पटिपज्जितब्बत्ताति ञातब्बत्ता.

‘‘अयञ्च गाथा’’तिआदि केसञ्चि वादो. तथा हि अपरे ‘‘थेरेनेवायं गाथा भासिता’’ति वदन्ति. अत्तूपनायिकापि हि कदाचि धम्मदेसना होति एव यथा ‘‘दसबलसमन्नागतो ¶ , भिक्खवे, तथागतो चतुवेसारज्जविसारदो’’तिआदि (सं. नि. २.२१-२२). एवञ्च कत्वा ‘‘कतमे सोळस हारा’’तिआदिवचनं समत्थितं होति.

यथावुत्तअत्थमुखेनेवाति मूलपदसङ्खातअत्थुद्धारेनेव. परतो आगमिस्सतीति निद्देसवारस्स परियोसाने आगमिस्सति ‘‘तीणि च नया अनूना’’तिआदिना (नेत्ति. ४ द्वादसपद).

वुच्चतीति कत्तरि कम्मनिद्देसोति आह ‘‘वदती’’ति. अथ वा वुच्चतीति कम्मकत्तुनिद्देसोयं. अयञ्हेत्थ अत्थो – हारा, नया चाति उभयं परिग्गहितं संवण्णकेन सब्बथा गहितञ्चे, वुच्चति सुत्तं, सयमेव सुत्तं संवण्णेतीति ¶ , एतेन हारनयेसु वसीभावेन सुत्तसंवण्णनाय सुकरतं दस्सेति.

पकारन्तरेनाति पुब्बे ‘‘सासन’’न्ति वुत्तमत्थं ‘‘देसना, देसित’’न्ति ततो अञ्ञेन पकारेन. नियमेत्वाति तस्स एकन्ततो विञ्ञेय्यतं अवधारेत्वा. विञ्ञेय्यता विसिट्ठेसु देसनादेसितेसु विञ्ञेय्यपदे लब्भमाना विजाननकिरिया.

देसनादेसितानि च यावदेव विजाननत्थानीति विजाननं पधानन्ति तमेव निद्धारेन्तो ‘‘तत्राति तस्मिं विजानने’’ति आह.

एत्थाहाति नवङ्गसासननवविधसुत्तन्ताति एतस्मिं अत्थवचने आह चोदको. तस्सायं अधिप्पायो – नवहि अङ्गेहि ववत्थितेहि अञ्ञमञ्ञसङ्कररहितेहि भवितब्बं, तथा च सति असुत्तसभावानेव गेय्यङ्गादीनीति नवविधसुत्तन्तवचनं विरुज्झेय्य. अथ सुत्तसभावानि गेय्यङ्गादीनि, एवं सति ‘‘सुत्त’’न्ति विसुं सुत्तङ्गं न सिया, एवं सन्ते अट्ठङ्गसासनं आपज्जतीति. तेनाह ‘‘कथं पना’’तिआदि. गेय्यङ्गादीसु कतिपयानम्पि सुत्तभावे यथावुत्तदोसानतिवत्ति, पगेव सब्बेसन्ति दस्सेति ‘‘यञ्चा’’तिआदिना. सङ्गहेसूति अट्ठकथासु. पोराणट्ठकथानञ्हि सङ्खेपभूता इदानि अट्ठकथा ‘‘सङ्गहा’’ति वुत्ता. सुत्तं नाम सगाथकं वा सिया, निग्गाथकं वाति अङ्गद्वयेनेव तदुभयङ्गं कतन्ति विसुं सुत्तङ्गस्स असम्भवो तदुभयविनिमुत्तस्स सुत्तस्स अभावतो. तेन वुत्तं ‘‘सुत्तङ्गमेव न सिया’’ति. अथापि कथञ्चि. सियाति वक्खमानं सामञ्ञविधिं सन्धायाह. एवम्पि अयं दोसोति दस्सेन्तो ‘‘मङ्गलसुत्तादीन’’न्तिआदिमाह.

तब्भावनिमित्तन्ति ¶ गेय्यङ्गभावनिमित्तं. वेय्याकरणस्स तब्भावनिमित्तन्ति सम्बन्धो. चोदको ‘‘गाथाविरहे’’ति वचनं अग्गण्हन्तो ‘‘पुच्छाविस्सज्जनं ब्याकरण’’न्ति वचनमत्तमेव गहेत्वा ‘‘एवं सन्ते’’तिआदिना चोदेति. इतरो पन ओकासविधितो अनोकासो विधि बलवाति ञायं गाथाविरहितंयेव वेय्याकरणन्ति, इधाधिप्पेतन्ति च दस्सेन्तो ‘‘नापज्जती’’तिआदिना परिहरति. तथा हीति तेनेव कारणेन, सतिपि सञ्ञन्तरनिमित्तयोगे अनोकाससञ्ञानं बलवभावेनेवाति अत्थो.

सङ्गहवारवण्णना निट्ठिता.

२. उद्देसवारवण्णना

१. विभागेनाति ¶ सरूपविभागेन. अदिट्ठं जोतीयति एतायाति अदिट्ठजोतना. दिट्ठं संसन्दीयति एतायाति दिट्ठसंसन्दना, संसन्दनं चेत्थ साकच्छावसेन विनिच्छयकरणं. विमति छिज्जति एतायाति विमतिच्छेदना. अनुमतिया पुच्छा अनुमतिपुच्छा. ‘‘तं किं मञ्ञथा’’ति हि का तुम्हाकं अनुमतीति अनुमति पुच्छिता. कथेतुकम्यताति कथेतुकम्यताय.

‘‘हरीयन्ति एतेही’’तिआदिना करणाधिकरणकत्तुभावकम्मसाधनानं वसेन हार-सद्दस्स अत्थं वत्वा सदिसकप्पनावसेन दस्सेतुं ‘‘हारा विया’’तिआदि वुत्तं. पुन गन्थकरणादिअत्थेन गन्थादिसद्दानं विय हारकरणादिअत्थेन हारसद्दसिद्धिं दस्सेतुं ‘‘हारयन्ती’’तिआदिमाह. ‘‘हरणतो, रमणतो चा’’ति इमिना मनोहरा मनोरमा चेते संवण्णनाविसेसाति दस्सेति.

उपपत्तिसाधनयुत्तीति लक्खणहेतु. वुत्तनयेनाति ‘‘ननु च अञ्ञेपि हारा युत्तिसहिता एवा’’तिआदिना देसनाहारे वुत्तनयानुसारेन.

चतुन्नं ब्यूहो एत्थाति भिन्नाधिकरणानम्पि पदानं अञ्ञपदत्थसमासो लब्भति ‘‘उरसिलोमो’’तिआदीनं (दी. नि. टी. ३.५४, ३०३) वियाति वुत्तं.

सेसन्ति ‘‘विवचनमेव वेवचन’’न्ति एवमादि.

अनुप्पवेसीयन्तीति ¶ अवगाहीयन्ति. समाधीयन्तीति परिहरीयन्ति. विना विकप्पेनाति जाति सामञ्ञं, भेदो सामञ्ञं, सम्बन्धो सामञ्ञन्तिआदिना पदत्थन्तरभावविकप्पनमन्तरेन.

पदट्ठानादिमुखेनाति पदट्ठानवेवचनभावनापहानमुखेन. केचीति पदट्ठानपरिक्खारआवट्टपरिवत्तनपञ्ञत्तिओतरणे सन्धाय वदति.

२. सम्बन्धोति हेतुफलभावयोगो. तथाभूतानञ्हि धम्मानं एकसन्तानसिद्धता एकत्तनयो. विभागो सतिपि नेसं हेतुफलभावे विभत्तसभावता. अञ्ञो एव हि हेतु, अञ्ञं फलन्ति. ब्यापारविरहो निरीहता. न हि हेतुफलानं एवं होति ‘‘अहं इमं निब्बत्तेमि, इमिनाहं निब्बत्तो’’ति. अनुरूपफलता पच्चयुप्पन्नानं पच्चयानुकूलता. समूहादिं ¶ उपादाय लोकसङ्केतसिद्धा वोहारमत्तता सम्मुतिसभावो. पथवीफस्सादीनं कक्खळफुसनादिलक्खणं परमत्थसभावो. अयञ्हेत्थ सङ्खेपो – यस्मिं भिन्ने, इतरापोहे वा चित्तेन कतेन तथा बुद्धि, इदं सम्मुतिसच्चं यथा घटे, ससम्भारजले च, तब्बिपरियायेन परमत्थसच्चन्ति. परमत्थसच्चप्पटिवेधायाति निब्बानाधिगमाय.

अन्तोति अब्भन्तरो. पधानावयवेनाति मूलभावेन. ‘‘नन्दी दुक्खस्स मूल’’न्तिआदीसु (म. नि. १.१३) तण्हा ‘‘नन्दी’’ति वुत्ता. ‘‘सङ्गामे च नन्दिं चरती’’तिआदीसु पमोदोति आह ‘‘तण्हाय, पमोदस्स वा’’ति.

३. जातिभेदतोति कुसला, अकुसलाति इमस्मा विसेसा. युज्जन्तीति एत्थ हेतुअत्थो अन्तोनीतो वेदितब्बोति आह ‘‘योजीयन्ती’’ति. केहि योजीयन्ति? संवण्णनकेहीति अधिप्पायो. युज्जन्तीति वा युत्ता होन्ति, तेहि समानयोगक्खमा तग्गहणेनेव गहिता होन्तीति अत्थो तदेकट्ठभावतो. इमस्मिं अत्थे ‘‘नवहि पदेही’’ति सहयोगे करणवचनं, पुरिमस्मिं करणे. ‘‘एते खो’’ति च पाठो. तत्थ खो-सद्दस्स पदपूरणता, अवधारणत्थता वा वेदितब्बा. एते एवाति एते तण्हादयो एव, न इतो अञ्ञेति अत्थो. अट्ठारसेव न ततो उद्धं, अधो वाति. पुरिमस्मिं पक्खे मूलपदन्तराभावो, दुतियस्मिं तेसं अनूनाधिकता दीपिता होति.

उद्देसवारवण्णना निट्ठिता.

३. निद्देसवारवण्णना

४. निद्देसवारे ¶ सामञ्ञतोति साधारणतो. विसेसेनाति असाधारणतो. पदत्थोति सद्दत्थो. लक्खणन्ति सभावो. कमोति अनुपुब्बी. एत्तावताति एत्तकप्पमाणभावो. हेत्वादीति हेतुफलभूमिउपनिसासभागविसभागलक्खणनया. विसेसतो पन लक्खणन्ति सम्बन्धो.

हारसङ्खेपवण्णना

१. यं, भिक्खवेति एत्थ यन्ति पच्चत्तवचनं, तञ्च सुखं, सोमनस्सन्ति द्वयेन समानाधिकरणन्ति कत्वा ‘‘अस्सादीयतीति अस्सादो, सुखं, सोमनस्सञ्चा’’ति ¶ वुत्तं. सुखादिवेदना विय मनापियरूपादिपि अवीतरागस्स अस्सादेतब्बन्ति आह ‘‘एवं इट्ठारम्मणम्पी’’ति. ‘‘अस्सादेति एतायाति वा अस्सादो, तण्हा’’ति एतेन ‘‘य’’न्ति हेतुअत्थे निपातोति दस्सेति. तत्रायमत्थो – येन हेतुना पञ्चुपादानक्खन्धे पटिच्च अस्सादनीयभावेन उप्पज्जति सुखं सोमनस्सं, अयं तण्हासङ्खातो अस्सादो अस्सादनकिरियाय कारणन्ति. इति कत्वा अयमत्थो दिट्ठाभिनन्दनादिभावतो विपल्लासेसुपि सम्भवतीति आह ‘‘एवं विपल्लासापी’’ति. अनिट्ठम्पीति पि-सद्देन इट्ठम्पीति योजेतब्बं, अनवसेसा सासवा धम्मा इध आरम्मणग्गहणेन गहिताति आह ‘‘सब्बेसं तेभूमकसङ्खारान’’न्ति.

दुक्खादुक्खमसुखवेदनानन्ति एत्थ दुक्खसभावा एव अदुक्खमसुखा वेदना गहिता अनिट्ठारम्मणस्स अधिप्पेतत्ता, न सुखसभावा. यं सन्धाय वुत्तं ‘‘यायं, भन्ते, अदुक्खमसुखा वेदना, सन्तस्मिं एसा पणीते सुखे वुत्ता भगवता’’ति (म. नि. २.८८; सं. नि. ४.२६७). ‘‘सुखपरियायसब्भावतो’’ति इमिना इट्ठतामत्ततोपि लेसेन सत्तानं आरम्मणस्स अस्सादनीयता सम्भवतीति दस्सेति.

आदीनवो दोसनिस्सन्दनताय दोसो, स्वायं पीळनवुत्तिया वेदितब्बोति आह ‘‘आदीनवो दुक्खा वेदना, तिस्सोपि वा दुक्खता’’ति. एवं दोसत्थतं आदीनवस्स दस्सेत्वा इदानि कपणत्थतं दस्सेतुं ‘‘अथ वा’’तिआदि वुत्तं. यतोति यस्मा दोसकपणसभावत्ताति वुत्तं होति.

निस्सरतीति ¶ विवित्ति, सब्बसङ्खारविवेकोति अत्थो. सामञ्ञनिद्देसेनाति निस्सरणसद्दवचनीयतासामञ्ञेन. पुरिमानन्ति अस्सादादीनवतानं. उपायो चातिआदीसु च-सद्दो पदपूरणमत्तन्ति कत्वा आह ‘‘पच्छिमानञ्चा’’ति, फलादीनन्ति अत्थो. तदन्तोगधभेदानन्ति अरियमग्गपरियापन्नविसेसानं.

कामभवादीनन्ति आदि-सद्देन न रूपारूपभवा एव गहिता, अथ खो ते च सञ्ञीभवादयो च एकवोकारभवादयो च गहिता. तेनाह ‘‘तिण्णं तिण्णं भवान’’न्ति.

यावदेव ¶ अनुपादापरिनिब्बानत्था भगवतो देसनाति आह ‘‘ननु च…पे… निप्फादीयती’’ति. ‘‘वुत्तमेवा’’ति इमिना पुनरुत्तिदोसं चोदेति. इतरो ‘‘सच्चमेत’’न्ति अनुजानित्वा ‘‘तञ्च खो’’तिआदिना परिहरति. ‘‘परम्पराया’’ति एतेन अज्झत्तं योनिसोमनसिकारो विय न परतोघोसो आसन्नकारणं धम्माधिगमस्स धम्मस्स पच्चत्तं वेदनीयत्ताति दस्सेति. तथा हि ‘‘अक्खातारो तथागता, पटिपन्ना पमोक्खन्ति, झायिनो मारबन्धना’’ति (ध. प. २७६) वुत्तं. तदधिगमकारणं अरियमग्गाधिगमकारणं सिया. किं पन तन्ति आह ‘‘सम्पत्तिभवहेतू’’ति, तेन चरिमत्तभावहेतुभूतं पुञ्ञसम्पत्तिं वदति.

‘‘अत्तानुदिट्ठिं ऊहच्च, एवं मच्चुतरो सिया’’ति इदं अरियमग्गस्स पुब्बभागपटिपदाय फलभावसाधनं. येन हि विधिना अत्तानुदिट्ठिसमुग्घातो, मच्चुतरणञ्च सिया, सो ‘‘एव’’न्ति इमिना पकासितोति. अत्तानुदिट्ठिसमुग्घातमच्चुतरणानं फलभावे वत्तब्बमेव नत्थि.

‘‘धम्मो हवे’’ति पन गाथायं लोकियस्स पुञ्ञफलस्स वुत्तत्ता आह ‘‘इदं फल’’न्ति. यं निब्बत्तेतब्बं, तं फलं. यं निब्बत्तकं, सो उपायो. अयमेत्थ विनिच्छयो. तेनाह ‘‘एतेन नयेना’’तिआदि. उपधिसम्पत्तीति अत्तभावसोभा.

विसुद्धीति ञाणदस्सनविसुद्धि अधिप्पेताति आह – ‘‘एत्थापि…पे… विञ्ञातु’’न्ति. ‘‘यस्मा पना’’तिआदिनापि तमेवत्थं वचनन्तरे पाकटतरं करोति.

सरूपतो आगतानि ‘‘यतो खो, भिक्खवे, भिक्खु पञ्चन्नं उपादानक्खन्धानं समुदयञ्च अत्थङ्गमञ्च अस्सादञ्च आदीनवञ्च निस्सरणञ्च यथाभूतं पजानाती’’तिआदीसु (सं. नि. ३.२६-२८). एकदेसेन ¶ आगतानि ‘‘संयोजनियेसु, भिक्खवे, धम्मेसु अस्सादानुपस्सिनो विहरतो (सं. नि. २.५३), बहुदुक्खा बहुपायासा, आदीनवो एत्थ भिय्यो (म. नि. १.११७), सङ्खारानमेतं निस्सरणं, यदिदं निब्बान’’न्तिआदीसु (पटि. म. १.२४; ३.४१). न सरूपेन आगतानि यथा सामञ्ञफलसुत्तादीसु. अत्थवसेनाति अस्सादेतब्बादिअत्थवसेन. न पपञ्चितोति न वित्थारितो.

२. एसेव ¶ नयोति अतिदेसेन विचियमानवचनसेसो अतिदिट्ठो. भावत्थे तोहि आह ‘‘विस्सज्जितन्ति विस्सज्जना’’ति. सुत्ते आगतं न अत्थसंवण्णनावसेन अट्ठकथायं आगतन्ति अधिप्पायो. पुच्छानुरूपता इध पुब्बापरन्ति चतुब्यूहपुब्बापरतो इमं विसेसेत्वा दस्सेति. पुच्छानुसन्धीति पुच्छाय विस्सज्जनेन अनुसन्धानं. अट्ठकथायं पन हेट्ठिमदेसनाय पुच्छानिमित्तपवत्तउपरिदेसनाय सम्बन्धो ‘‘पुच्छानुसन्धी’’ति वुत्तं. पुब्बापेक्खन्ति पुच्छितविस्सज्जितपदापेक्खं. ‘‘सुत्तस्सा’’ति वा इमिना पुच्छाविस्सज्जनाअनुगीतियो ठपेत्वा सेसो विचयहारपदत्थो सङ्गहितोति पदस्सापि सङ्गहो वेदितब्बो. इमस्मिं पक्खे गाथायं च-सद्दो पदपूरणमत्ते दट्ठब्बो.

‘‘चक्खु अनिच्च’’न्ति पुट्ठे ‘‘आम, चक्खु अनिच्चमेवा’’ति एकन्ततो विस्सज्जनं एकंसब्याकरणं. ‘‘अञ्ञिन्द्रियं भावेतब्बं, सच्छिकातब्बञ्चा’’ति पुट्ठे ‘‘मग्गपरियापन्नं भावेतब्बं, फलपरियापन्नं सच्छिकातब्ब’’न्ति विभजित्वा विस्सज्जनं विभज्जब्याकरणं. ‘‘अञ्ञिन्द्रियं कुसल’’न्ति पुट्ठे ‘‘किं अनवज्जट्ठो कुसलट्ठो, उदाहु सुखविपाकट्ठो’’ति पटिपुच्छित्वा विस्सज्जनं पटिपुच्छाब्याकरणं. ‘‘सस्सतो अत्ता, असस्सतो वा’’ति वुत्ते ‘‘अब्याकतमेत’’न्तिआदिना अविस्सज्जनं ठपनं. ‘‘किं पनेते कुसलाति वा धम्माति वा एकत्था, उदाहु नानत्था’’ति इदं पुच्छनं सावसेसं. विस्सज्जनस्स पन सावसेसता वेनेय्यज्झासयवसेन देसनायं वेदितब्बा. अप्पाटिहीरकं सउत्तरं. सप्पाटिहीरकं निरुत्तरं. सेसं विचयहारनिद्देसे सुविञ्ञेय्यमेव.

एत्थ च अस्सादो अस्सादहेतु याव आणत्तिहेतूति एवं हेतूनम्पि अस्सादादयो वेदितब्बा. तत्थ सङ्खेपतो सुखसुखपच्चयलक्खणो अस्सादो, सो विसेसतो सग्गसम्पत्तिया दीपेतब्बो. सा हि तस्स उक्कंसो, सेसा पनेत्थ भवसम्पत्ति तदन्वायिका वेदितब्बा. तस्स हेतु दानमयं, सीलमयञ्च पुञ्ञकिरियवत्थु. दुक्खदुक्खपच्चयलक्खणो आदीनवो. विपरिणामसङ्खारदुक्खतानं तदवरोधतो वट्टदुक्खस्सापि एत्थ सङ्गहो. विसेसतो पन कामानं ओकारोति ¶ दट्ठब्बो, स्वायं संकिलेसवत्थुना, इत्तरपच्चुपट्ठानतादीहि च विभावेतब्बो, तस्स हेतु दस अकुसलकम्मपथा. नेक्खम्मं निस्सरणं, तस्स हेतु यथारहं तदनुच्छविका पुब्बभागप्पटिपदा. फलं देसनाफलमेव, तस्स ¶ हेतु देसना. उपायो यथावुत्तउपायोव, तस्स हेतु चत्तारि चक्कानि. आणत्ति उपदेसो, तस्स रागग्गिआदीहि लोकस्स आदित्तता, सत्थु महाकरुणायोगो च हेतु.

तथा चतूसु अरियसच्चेसु समुदयेन अस्सादो, दुक्खेन आदीनवो, मग्गनिरोधेहि निस्सरणं, मग्गो वा उपायो, तदुपदेसो आणत्ति, अनुपादिसेसा निब्बानधातु फलं. इति अनुपुब्बकथाय सद्धिं बुद्धानं सामुक्कंसिकाय धम्मदेसनाय निद्धारणभावेन विचयो वेदितब्बो. पदस्स पदत्थसम्बन्धो हेतु. सो हि तस्स पवत्तिनिमित्तं, पञ्हस्स ञातुकामता, कथेकुकामता च. अदिट्ठजोतनादीनञ्हि चतुन्नं ञातुकामता, इतरस्स इतरा. विस्सज्जनस्स पञ्हो हेतु. एवं सेसानम्पि यथारहं वत्तब्बं.

३. ब्यञ्जनत्थानं युत्तायुत्तपरिक्खाति ब्यञ्जनग्गहणेन पदं गहितं, अत्थग्गहणेन पञ्हादीहि सद्धिं अस्सादादयो गहिता. विचयहारपदत्था एव हि युत्तायुत्तादिविसेससहिता युत्तिहारादीनं पदत्था. तथा हि पदट्ठानपदट्ठानिकभावविसिट्ठा तेयेव पदट्ठानहारस्स पदत्था. लक्खणलक्खितब्बताविसिट्ठा, निद्धारिता च लक्खणहारस्स, निब्बचनादिविभावनाविसिट्ठा चतुब्यूहहारस्स, सभागधम्मवसेन, विसभागधम्मवसेन च आवट्टनविसिट्ठा आवट्टहारस्स, भूमिविभागादिविसिट्ठा विभत्तिहारस्स, पटिपक्खतो परिवत्तनविसिट्ठा परिवत्तनहारस्स, परियायवेवचनविसिट्ठा वेवचनहारस्स, पभवादिपञ्ञापनविसिट्ठा पञ्ञत्तिहारस्स, खन्धादिमुखेहि ओतरणविसिट्ठा ओतरणहारस्स, पदपदत्थपञ्हारम्भसोधनविसिट्ठा सोधनहारस्स, सामञ्ञविसेसनिद्धारणविसिट्ठा अधिट्ठानहारस्स, पच्चयधम्मेहि परिक्खरणविसिट्ठा परिक्खारहारस्स, पहातब्बभावेतब्बतानिद्धारणविसिट्ठा समारोपनहारस्स पदत्था. ‘‘ब्यञ्जनस्स सभावनिरुत्तिता, अत्थस्स सुत्तादीहि अविलोमनं युत्तभावो’’ति इमिना असभावनिरुत्तिता, सुत्तादीहि विलोमनञ्च अयुत्तभावोति दीपेति, तेन युत्तायुत्तीनं हेतुं दस्सेति.

४. योनिसोमनसिकारादीति आदिसद्देन सद्धम्मस्सवनसप्पुरिसूपनिस्सयादिसाधारणं, असाधारणञ्च देय्यपटिग्गाहकादिं सङ्गण्हाति. सम्भवतोति यथारहं तस्स धम्मस्स अनुरूपं. याव सब्बधम्माति ¶ एत्थ सब्बं नाम पदेससब्बं, न सब्बसब्बन्ति. अयञ्हि सब्बसद्दो यथा पठमविकप्पे सुत्ते आगतधम्मवसेन पदेसविसयो, एवं दुतियविकप्पे पदट्ठानपदट्ठानिकनिद्धारणेन ¶ तंतंपकरणपरिच्छिन्नधम्मग्गहणतो पदेसविसयो एव, न अनवसेसधम्मविसयोति. सुत्तागतधम्मानं यानि पदट्ठानानि, तेसञ्च यानीति एवं कारणपरम्परानिद्धारणलक्खणो पदट्ठानहारो, परिक्खारहारो पन सुत्तागतधम्मानं तंतंपच्चयुप्पन्नानं पटिहेतुपच्चयताविसेसविभावनलक्खणोति सतिपि कारणविचारणभावे अयं पदट्ठानहारपरिक्खारहारानं विसेसो.

५. यथा ‘‘समानाधिकरणसमानपदे’’तिआदीसु एकसद्दस्स अत्थो समानसद्दो, एवं एकरसट्ठेन भावना ‘‘एकुप्पादा’’तिआदीसु (कथा. ४७३) विय एकलक्खणाति एत्थ एकसद्दो समानत्थोति आह ‘‘समानलक्खणा’’ति. संवण्णनावसेनाति एत्थ कम्मत्थे अन-सद्दो, संवण्णेतब्बतावसेनाति अत्थो. लक्खणाति उपलक्खणा. ‘‘नानत्तकायनानत्तसञ्ञिनो (दी. नि. ३.३४१, ३५७, ३५९; अ. नि. ९.२४), नानत्तसञ्ञानं अमनसिकारा’’तिआदीसु सहचारिता दट्ठब्बा. सञ्ञासहगता हि धम्मा तत्थ सञ्ञाग्गहणेन गहिता. ‘‘ददं मित्तानि गन्थती’’तिआदीसु (सं. नि. १.२४६; सु. नि. १८९) समानकिच्चता. पियवचनत्थचरिया समानत्ततापि हि तत्थ मित्तगन्थनकिच्चेन समानकिच्चा गय्हन्ति सङ्गहवत्थुभावतो. ‘‘फस्सपच्चया वेदना’’तिआदीसु (म. नि. ३.१२६; सं. नि. २.१, ३९; महाव. १; विभ. २२५; उदा. १; नेत्ति. २४) समानहेतुता. यथा हि फस्सो वेदनाय, एवं सञ्ञादीनम्पि सहजातादिना पच्चयो होति एवाति तेपि समानहेतुताय वुत्ता एव होन्ति. तथा हि वुत्तं ‘‘तज्जामनोविञ्ञाणधातुसम्फस्सजा चेतना’’ति (ध. स. ५), ‘‘फुट्ठो सञ्जानाति, फुट्ठो चेतेती’’तिआदि (सं. नि. ४.९३). एवं ‘‘तण्हापच्चया उपादान’’न्ति (म. नि. ३.१२६; सं. नि. २.१, ३९; महाव. १; विभ. २२५; उदा. १; नेत्ति. २४) एवमादिपि उदाहरितब्बं. ‘‘अविज्जापच्चया सङ्खारा’’तिआदीसु (म. नि. ३.१२६; सं. नि. २.१, ३९; महाव. १; विभ. २२५; उदा. १; नेत्ति. २४) समानफलता दट्ठब्बा. यथा हि सङ्खारा अविज्जाय फलं, एवं तण्हुपादादीनम्पीति तेपि तत्थ गहिताव होन्ति. तेनाह ‘‘पुरिमकम्मभवस्मिं मोहो अविज्जा आयूहना सङ्खारा निकन्ति तण्हा उपगमनं उपादान’’न्ति. ‘‘रूपं अस्सादेति अभिनन्दति ¶ , तं आरब्भ रागो उप्पज्जती’’ति (पट्ठा. १.१.४२४) वुत्ते तंसम्पयुत्ता वेदनादयो वुत्ता एव होन्ति समानारम्मणभावतो. न हि तेहि विना तस्स उप्पत्ति अत्थि. एवमादीहीति एत्थ आदिसद्देन अत्थप्पकरणलिङ्गसद्दन्तरसन्निधानसामत्थियादीनम्पि सङ्गहो दट्ठब्बो. अत्थादिवसेनपि हि सुत्ते अवुत्तानम्पि ¶ वुत्तानं विय निद्धारणं सम्भवतीति. वुत्तप्पकारेनाति ‘‘वधकट्ठेन एकलक्खणानी’’तिआदिना पाळियं, ‘‘सहचारिता’’तिआदिना अट्ठकथायञ्च वुत्तेन पकारेन.

६. ‘‘फुसनट्ठेन फस्सो’’तिआदिना निद्धारेत्वा वचनं निब्बचनं, तं पन पदस्सेव, न वाक्यस्साति आह ‘‘पदनिब्बचन’’न्ति. अधिप्पायनिदानानिपेत्थ ब्यञ्जनमुखेनेव निद्धारेतब्बानि. निब्बचनपुब्बापरसन्धीसु वत्तब्बमेव नत्थीति आह ‘‘विसेसतो ब्यञ्जनद्वारेनेव अत्थपरियेसना’’ति. पवत्तिनिमित्तं अज्झासयादि.

७. ‘‘पदट्ठाने’’ति इदं सुत्ते आगतधम्मानं कारणभूतेपि धम्मे निद्धारेत्वा सभागतो, विसभागतो च आवट्टनं कातब्बन्ति दस्सनत्थं वुत्तं, न तन्तिवसेन. तस्मा पदट्ठाननिद्धारणाय विनापि आवट्टनं युत्तमेवाति सिद्धं होति. पदस्स वा सद्दपवत्तिट्ठानं पदट्ठानं पदत्थो. एतस्मिं पक्खे ‘‘आरम्भथ निक्कमथाति (सं. नि. १.१८५; नेत्ति. २९; पेटको. ३८; मि. प. ५.१.४) वीरियस्स पदट्ठान’’न्ति (नेत्ति. २९) एत्थ य्वायमारम्भधातुआदिको अत्थो वुत्तो, तं वीरियसद्दस्स पवत्तिट्ठानं वीरियसद्दाभिधेय्यो अत्थोति एवमत्थो वेदितब्बो. सेसेसुपि एसेव नयो. सेसकं नामगहिततो इतरं, तं पन तस्स पटिपक्खभूतं वा सिया, अञ्ञं वाति आह ‘‘विसभागताय अग्गहणेन वा’’ति. संवण्णनाय योजेन्तोति यथावुत्तविसभागधम्मनिद्धारणभूतेन अत्थकथनेन पाळियं योजेन्तो. तेनाह ‘‘देसन’’न्ति. ‘‘पटिपक्खे’’ति इदं निदस्सनमत्तं दट्ठब्बं सभागधम्मवसेनपि आवट्टनस्स इच्छितत्ता.

८. नामवसेनाति साधारणनामवसेन. पाळियं पन ‘‘मिच्छत्तनियतानं सत्तानं, अनियतानञ्च सत्तानं दस्सनपहातब्बा किलेसा साधारणा’’तिआगतत्ता (नेत्ति. ३४) ‘‘दस्सनपहातब्बादिनामवसेना’’ति वुत्तं. वत्थुवसेनाति ¶ सत्तसन्तानवसेन. सो हि धम्मानं पवत्तिट्ठानताय इध ‘‘वत्थू’’ति अधिप्पेतो. तेनाह – ‘‘पुथुज्जनस्स, सोतापन्नस्स च कामरागब्यापादा साधारणा’’तिआदि (नेत्ति. ३४). वुत्तविपरियायेनाति नामतो, वत्थुतो च आवेणिकताय. तंतंमग्गफलट्ठानञ्हि तंतंमग्गफलट्ठता, भब्बानं भब्बता, अभब्बानं अभब्बता असाधारणा.

९. ‘‘भाविते’’ति इदं भावनाकिरियाय उपलक्खणं, न एत्थ कालवचनिच्छाति आह ‘‘भावेतब्बेति अत्थो’’ति. भावना चेत्थ आसेवनाति, कुसलसद्दोपि अनवज्जट्ठोति वेदितब्बो ¶ . पटिपक्खतोति विपक्खतो. विसदिसूदाहरणेन ब्यतिरेकतो यथाधिप्पेतधम्मप्पतिट्ठाना हेसा.

१०. पदत्थस्साति पदाभिधेय्यस्स अत्थस्स, सभावधम्मस्स वा.

११.

निक्खेपो देसना. पभवो समुदयो.

१२. ‘‘अवुत्तानम्पि सङ्गहो’’ति इमिना अवुत्तसमुच्चयत्थो च-सद्दोति दस्सेति.

१३. ‘‘गाथारुळ्हे’’ति इमिना पाळिआगतोव पञ्हो वेदितब्बो, न इतरोति दस्सेति. तेनाह ‘‘बुद्धादीहि ब्याकते’’ति. तस्स अत्थस्साति आरद्धस्स अत्थस्स, तेन आरम्भसोधनस्स विसयमाह. एत्थ च अत्थद्वारेनेव पदपुच्छासोधनम्पि करीयतीति पुन ‘‘तस्स अत्थस्सा’’ति वुत्तं. अथ वा विस्सज्जितम्हीति विस्सज्जने. विस्सज्जनसोधनेन हि पञ्हासोधनं. पञ्हेति पुच्छायं. गाथायन्ति उपलक्खणं, तेन गाथायं, सुत्तगेय्यादीसु चाति वुत्तं होति. यमारब्भाति यं सीलादिमारब्भ गाथादीसु देसितं, तस्मिं आरम्भेति अत्थो. पुच्छिताति पुच्छाकारिनी, ‘‘का एत्थ पदसुद्धि, का पञ्हासुद्धि, का आरम्भसुद्धी’’ति एवं पुच्छाकारिनी पुच्छं कत्वा पवत्तिता सुद्धासुद्धपरिक्खाति योजना.

१४. न विकप्पयितब्बाति यथा लोके ‘‘जाति सामञ्ञं, भेदो सामञ्ञं, सम्बन्धो सामञ्ञ’’न्तिआदिना सामञ्ञं जातिआदिं, तब्बिधुरञ्च विसेसं ¶ विकप्पेन्ति परिकप्पेन्ति, एवं न विकप्पयितब्बाति अत्थो. यदा यो कालविसेसो ‘‘स्वे’’ति लद्धवोहारो, तदा सो तंदिवसातिक्कमे ‘‘अज्जा’’ति, पुन तंदिवसातिक्कमे ‘‘हिय्यो’’ति वोहरीयतीति अनवट्ठितसभावा एते कालविसेसा. दिसायपि ‘‘एकं अवधिं अपेक्खित्वा पुरत्थिमा दिसा, ततो अञ्ञं अपेक्खित्वा पच्छिमा नाम होती’’तिआदिना अनवट्ठितसभावता वेदितब्बा. जातिआदिअपेक्खायाति जातिआदिदुक्खविसेसापेक्खाय. सच्चापेक्खायाति सच्चसामञ्ञापेक्खाय. ‘‘तण्हा’’ति वुच्चमानं कामतण्हादिअपेक्खाय सामञ्ञम्पि समानं सच्चापेक्खाय विसेसो होतीति एवमादिं सन्धायाह ‘‘एस नयो समुदयादीसुपी’’ति.

१६. एत्थाति एतस्मिं बुद्धवचने. तेनाह ‘‘सिक्खत्तयसङ्खातस्सा’’तिआदि. यथारुतं यथाकथितं सद्दतो अधिगतं निद्धारितं, न अत्थप्पकरणलिङ्गसद्दन्तरसन्निधानादिप्पमाणन्तराधिगतं ¶ . ‘‘अत्थतो दस्सिता’’ति इदं यस्मिं सुत्ते भावनाव कथिता, न पहानं, तं सन्धाय वुत्तं.

नयसङ्खेपवण्णना

१७. तण्हाविज्जाहि करणभूताहि. संकिलेसो पक्खो एतस्साति संकिलेसपक्खो, संकिलेसपक्खिको सुत्तत्थो, तस्स नयनलक्खणोति योजना. वोदानपक्खस्स सुत्तत्थस्साति सम्बन्धो. वुट्ठानगामिनिया, बलवविपस्सनाय च दुक्खादीसु परिञ्ञेय्यतादीनि मग्गानुगुणो गहणाकारो अनुगाहणनयो. यदि एवं कथं नयोति आह ‘‘तस्स पना’’तिआदि. तत्थ ‘‘नयवोहारो’’ति इमिना नयाधिट्ठानं नयोति वुत्तन्ति दस्सेति.

१८. बाधकादिभावतोति बाधकपभवसन्तिनिय्यानभावतो. अञ्ञथाभावाभावेनाति अबाधकअप्पभवअसन्ति अनिय्यानभावाभावेन. सच्चसभावत्ताति अमुसासभावत्ता. अविसंवादनतोति अरियसभावादिभावस्स न विसंवादनतो एकन्तिकत्ताति अत्थो.

१९. संकिलिट्ठधम्माति संकिलेससमन्नागता धम्मा सद्धम्मनयकोविदाति सच्चपटिच्चसमुप्पादादिधम्मनयकुसला, एकत्तादिनयकुसला वा.

२०. अत्थविस्सज्जनेसूति ¶ ‘‘इमे धम्मा कुसला’’तिआदिना (ध. स. १) सुत्ते कतपञ्हविस्सज्जनेसु चेव अट्ठकथाय कतअत्थसंवण्णनासु च. ‘‘वोदानिया’’ति इमिना अनवज्जधम्मा इध कुसलाति अधिप्पेता, न सुखविपाकाति दस्सेति. तस्स तस्स अत्थनयस्स योजनत्थं मनसा वोलोकयतेति योजना.

२१. यदि करणभूतं, कथं तस्स अत्थन्तराभावोति आह ‘‘येन ही’’तिआदि. दिसाभूतधम्मानं वोलोकयनसमानयनभावतो वोहारभूतो, कम्मभूतो च नयो, न नन्दियावट्टादयो विय अत्थभूतोति ‘‘वोहारनयो, कम्मनयो’’ति च वुच्चति.

द्वादसपदवण्णना

२३. अपरियोसिते पदेति उच्चारणवेलायं पदे असमत्ते, विप्पकतेति अत्थो. परियोसिते हि ‘‘पद’’न्त्वे समञ्ञा सिया, न ‘‘अक्खर’’न्ति अधिप्पायो. पदस्स वेवचनताय ¶ अत्थवसेन परियायं खरन्तं सञ्चरन्तं विय होति, न एवं वण्णो अवेवचनत्ताति आह परियायवसेन अक्खरणतो’’ति. न हि वण्णस्स परियायो विज्जती’’ति इदं अकारादिवण्णविसेसं सन्धाय वदति, न वण्णसामञ्ञं. तस्स हि वण्णो अक्खरन्ति परियायो वुत्तो एवाति.

अक्खरसद्दस्स अत्थं वत्वा तप्पसङ्गेन वण्णसद्दस्सपि वत्तुं ‘‘केनट्ठेन वण्णो’’तिआदिमाह. तत्थ ननु पदेन, वाक्येन वा अत्थो संवण्णीयति, न अक्खरेनाति चोदनं मनसि कत्वा आह ‘‘वण्णो एव ही’’तिआदि. पदादिभावेनाति पदवाक्यभावेन. यथासम्बन्धन्ति यथासङ्केतं. अयं-सद्दो इमस्सत्थस्स वाचको, अयं अत्थो इमस्स सद्दस्स वचनीयोति यथागहितसङ्केतानुरूपं सद्दत्थानं वाचकवचनीयभावो. अथ वा य्वायं सद्दत्थानं अञ्ञमञ्ञं अविनाभावो, सो सम्बन्धो. तदनुरूपं एकक्खरं नामपदं ‘‘मा एवं मञ्ञसी’’तिआदीसु मा-कारादि. केचीति अभयगिरिवासिनो. ते हि अभिधम्मदेसनं ‘‘मनसादेसना’’ति वदन्ति, यतो राहुलाचरियो ‘‘विसुद्धकरुणानं मनसादेसना वाचाय अक्खरणतो अक्खरसञ्ञिता’’ति आह.

सत्वप्पधानन्ति ¶ द्रब्यप्पधानं. नामपदे हि द्रब्यमाविभूतरूपं, किरिया अनाविभूतरूपा यथा ‘‘फस्सो’’ति (म. नि. ३.१२६; सं. नि. २.१, ३९; महाव. १; विभ. २२५; उदा. १; नेत्ति. २४). आख्यातपदे पन किरिया आविभूतरूपा, द्रब्यमनाविभूतरूपं यथा ‘‘फुसती’’ति. तेन नेसं सत्वकिरियाप्पधानता वुत्ता. किरियाविसेसग्गहणनिमित्तन्ति किरियाविसेसावबोधहेतु किरियाविसेसदीपनतो, यथा ‘‘चिरप्पवासि’’न्ति (ध. प. २१९) एत्थ प-सद्दो वसनकिरियाय वियोगविसिट्ठतं दीपेति. ‘‘एवं मनसि करोथ, मा एवं मनसाकत्था’’तिआदीसु किरियाविसेसस्स जोतको एवं-सद्दो. ‘‘एवंसीला (दी. नि. ३.१४२) एवंधम्मा’’तिआदीसु (दी. नि. २.१३; म. नि. ३. १९८; सं. नि. ५.३७८) सत्वविसेसस्स. एवं सेसनिपातपदानम्पीति अधिप्पायो. तेनाह ‘‘किरियाय…पे… निपातपद’’न्ति.

सङ्खेपतो वुत्तं, किं पन तन्ति आह ‘‘पदाभिहित’’न्ति. अथ वा सङ्खेपतो वुत्तं, यो अक्खरेहि सङ्कासितोति वुच्चति. पदाभिहितं पदेहि कथितं, यो पदेहि पकासितोति वुच्चति. तदुभयं, यदि पदसमुदायो वाक्यं, तस्स को परिच्छेदो. यावता अधिप्पेतत्थपरियोसानं, तावता एकवाक्यन्तिपि वदन्ति, बहूपेत्थ पकारे वण्णेन्ति. किं तेहि, साख्यातं ¶ साब्ययं सकारकं सविसेसनं ‘‘वाक्य’’न्ति दट्ठब्बं. ननु च पदेनपि अत्थो ब्यञ्जीयतीति चोदनं मनसि कत्वा आह ‘‘पदमत्तसवनेपि ही’’तिआदि. आकारेसु वाक्यविभागेसु अभिहितं कथितं निब्बचनं आकाराभिहितं निब्बचनं. ‘‘अभिहितन्ति च पाळिआगत’’न्ति वदन्ति.

‘‘निब्बानं मग्गति, निब्बानत्थिकेहि वा मग्गीयति, किलेसे वा मारेन्तो गच्छतीति मग्गो’’तिआदिना (ध. स. अट्ठ. १६) निब्बचनानं वित्थारो. तंनिद्देसकथनत्ता निद्देसोति इममत्थमाह ‘‘निब्बचनवित्थारो निरवसेसदेसनत्ता निद्देसो’’ति. पदेहीति वाक्यावयवभूतेहि, वाक्यतो विभज्जमानेहि वा आख्यातादिपदेहि. तेनाह ‘‘वाक्यस्स विभागो’’ति, तथा चाह ‘‘अपरियोसिते’’तिआदि. अपरे पन ‘‘पकतिपच्चयलोपादेसादिवसेन अक्खरविभागो आकारो, निरुत्तिनयेन पदविभागो निब्बचनं, वाक्यविभागो निद्देसो. वण्णपदवाक्यानि हि अविभत्तानि, विभत्तानि च छ ब्यञ्जनपदानी’’ति वदन्ति. छट्ठं वचनन्ति छट्ठं पदं. कातब्बन्ति ‘‘अक्खरं ¶ पदं ब्यञ्जनं आकारो तथेव निरुत्ति निद्देसो छट्ठवचन’’न्ति गाथायं एवं कत्तब्बं, संवण्णनावसेन वा आकारपदं चतुत्थं कातब्बन्ति अत्थो. सब्बो सद्दवोहारो विभत्तेहि, अविभत्तेहि च अक्खरपदवाक्येहेव, तदञ्ञप्पकारो नत्थीति आह ‘‘यानिमानी’’तिआदि.

२४. कासनासद्दो कम्मत्थोति दस्सेतुं ‘‘कासीयती’’तिआदि वुत्तं. पदेहि ताव अत्थस्स सङ्कासना, पकासना च होतु, पदावधिकापि संवण्णना इच्छिताति अक्खरेहि पन कथन्ति आह ‘‘अक्खरेहि सुय्यमानेही’’तिआदि. पदत्थसम्पटिपत्तीति पदाभिधेय्यअत्थावबोधो. ‘‘अक्खरेहि सङ्कासेती’’तिआदिना अक्खरकरणं सङ्कासनभूतं उग्घटनकिरियं वदन्तेन यथावुत्तो अत्थो साधितोति दस्सेतुं ‘‘तथा ही’’तिआदि वुत्तं.

विभजनुत्तानीकम्मपञ्ञत्तीति एकत्तनिद्देसो समाहारोति अयं द्वन्दसमासो. उभयेनाति ‘‘विवरणा, विभजना’’ति इमिना द्वयेन. एतेहीति एत्थ एव-कारो लुत्तनिद्दिट्ठोति आह ‘‘एतेहि एवा’’ति. ‘‘सङ्कासना…पे… अभावतो’’ति इमिना यथाधिप्पेतअनूनावधारणफलं दस्सेति. उग्घटनादीति आदिसद्देन विपञ्चननयानि सङ्गण्हाति.

२५. सम्मा ¶ युत्तोति सम्मा अविपरीतं, अनवसेसतो च युत्तो सहितो. तथा हि वुत्तं ‘‘अनूना’’ति. सब्बो हि पाळिअत्थो अत्थपदअत्थनयेहि अनवसेसतो सङ्गहितो. तेनाह ‘‘सब्बस्स ही’’तिआदि.

२६. कस्मा पनेत्थ मूलपदपदट्ठानानि असङ्गहितानीति? पदत्थन्तराभावतो. मूलपदानि हि नयानं समुट्ठानमत्तत्ता पदट्ठानानीति दस्सितोयं नयो. तेन वुत्तं ‘‘इतो विनिमुत्तो कोचि नेत्तिपदत्थो नत्थी’’ति.

नेत्तिया कारणभूताय. हारा संवण्णेतब्बाति सुत्तस्स अत्थसंवण्णनावसेन हारा वित्थारेतब्बा. स्वायन्ति सो अयं संवण्णनाक्कमो. येन अनुक्कमेन नेत्तियं देसिता, तेनेव सुत्ते अत्थसंवण्णनावसेन योजेतब्बाति. एवं सिद्धेति देसनाक्कमेनेव सिद्धे. अयं आरम्भोति ‘‘सोळस हारा पठम’’न्ति एवं पवत्तो आरम्भो. इममत्थन्ति इमं वुच्चमाननियमसङ्खातं अत्थं.

यदि ¶ देसितक्कमेनेव हारनया सुत्ते योजेतब्बा सियुं, किं सो कमो कारणनिरपेक्खो, उदाहु कारणसापेक्खोति? किञ्चेत्थ – यदि ताव कारणनिरपेक्खो हारनयानं अनुक्कमो, अनेके अत्था वुच्चमाना अवस्सं एकेन कमेन वुच्चन्तीति. एवं सन्ते येन केनचि कमेन सुत्ते योजेतब्बा सियुं, तथा सति नियमो निरत्थको सिया. अथ कारणसापेक्खो, किं तं कारणन्ति? इतरो कारणगवेसनं अकत्वा अत्थो एवेत्थ गवेसितब्बोति अधिप्पायेन ‘‘नायमनुयोगो न कत्थचि अनुक्कमे निविसती’’ति वत्वा ‘‘न पन मयं देवानंपियस्स मनोरथविघाताय चेतेमा’’ति कमकारणं विचारेन्तो ‘‘अपिचा’’तिआदिना देसनाहारस्स ताव आदितो देसनाय कारणं पतिट्ठपेति. तत्थ धम्मदेसनाय निस्सयो अस्सादादीनवनिस्सरणानि, सरीरं आणत्ति. पकतिया सभावेन. निद्धारणेन विनापि पतिट्ठाभावतो निस्सयभावतो.

‘‘तथा हि वक्खती’’तिआदिना यथावुत्तं अत्थं पाकटतरं करोति. एस नयो इतरेसुपि.

विचयानन्तरन्ति ¶ विचयहारानन्तरं. सेसेसुपि एसेव नयो. तथा हीति लक्खणहारविभङ्गे युत्तायुत्तानं कारणपरम्पराय परिग्गहितसभावानं अवुत्तानम्पि एकलक्खणताय गहणं वुत्तं.

अत्थतो निद्धारितानन्ति अत्थुद्धारपुब्बापरानुसन्धिआदिअत्थतो सुत्तन्तरतो उद्धटानं संवण्णियमानसुत्ते आनीतानं पाळिधम्मानं. सद्दतो, पमाणन्तरतो च लद्धानं इध विचारेतब्बत्ता आह ‘‘निरवसेसतो’’ति. अत्थस्साति अभिधेय्यत्थस्स. धम्मस्साति सभावधम्मस्स. तत्थ तत्थ तं अभिनिरोपेतीति तस्मिं तस्मिं अत्थे, धम्मे च तं नामं अभिनिरोपेति, ‘‘अयमेवंनामो’’ति वोहरति. ‘‘अत्थस्स, धम्मस्सा’’ति पदद्वयेन सामञ्ञतो अत्थो, धम्मो च अनवसेसेत्वा गहितोति आह ‘‘अनवसेसपरियादान’’न्ति, यतो वुत्तं ‘‘तत्थ तत्था’’ति. तथाति यथा अनवसेसत्थावबोधदीपकं अनवसेसपरियादानं कतं चतुब्यूहपाळियं, एवं पुनप्पुनं गब्भमुपेतीति एत्थ असद्दवती अत्था पवत्तिवसेन लब्भमाना सम्मापटिपत्ति उद्धटाति उपसंहारत्थो तथा-सद्दो.

तेनेवाति ¶ सुत्तन्तरसंसन्दनस्स सभागविसभागधम्मन्तरावट्टनूपायभावतो एव. यतोति सभागविसभागधम्मावट्टनस्स साधारणादिधम्मविभजनूपायत्ता. पटिविभत्तसभावेति पटिभागभावेन विभत्तसभावे.

ते धम्माति पटिपक्खतो परिवत्तितधम्मा. न परियायविभावना पञ्ञत्तिविभागपरिग्गाहिकाति आह ‘‘परिया…पे… सुबोधनञ्चा’’ति.

पुच्छाविसोधनं विस्सज्जनं. आरम्भविसोधनं देसनाय अत्थकथनं. तदुभयविचारो धातादीसु असम्मुय्हन्तस्सेव सम्भवतीति आह ‘‘धातायतना…पे… सम्पादेतु’’न्ति. सुद्धो आरम्भोतिआदिपाळिनिदस्सनेनपि अयमेवत्थो उदाहटोति वेदितब्बं.

‘‘कारणाकारो’’ति पदट्ठानं सन्धाय वदति. पभेदतो देसनाकारोति वेवचनं. निद्धारेत्वा वुच्चमानानीति उद्धरित्वा समारोपियमानानीति अधिप्पायो. सुत्तस्स अत्थं तथत्तावबोधायाति सुत्तस्स पदत्थावगममुखेन चतुसच्चाभिसमयाय.

वेनेय्यत्तययुत्तो ¶ अत्थनयत्तयूपदेसो ‘‘वेनेय्यत्तयप्पयोजितो’’ति वुत्तो. वेनेय्यत्तयञ्हि पच्चयसमवाये तदुपदेसफलं अधिगच्छन्तं अत्थं पयोजेति नामाति. तदनुक्कमेनेवाति तेसं उग्घटितञ्ञुआदीनं देसनानुक्कमेनेव. तेति तयो अत्थनया. तेसन्ति उग्घटितञ्ञुआदीनं. यथा उद्देसादीनं सङ्खेपमज्झिमवित्थारवुत्तिया तिण्णं पुग्गलानं उपकारता, एवं तेसं अत्थनयानं. तस्साति अत्थनयत्थस्स. तत्थाति तस्सं तस्सं भूमियं.

समुट्ठानं निदानं. अनेकधा सद्दनयतो, निरुत्तिनयतो चाति अनेकप्पकारं. पदत्थो सद्दत्थो. विधि अनुवादोति इदमेत्थ विधिवचनं, अयमनुवादोति अयं विभागो वेदितब्बो. समाधातब्बोति परिहरितब्बो. अनुसन्धीया अनुरूपं निगमेतब्बन्ति याय अनुसन्धिया सुत्ते उपरि देसना पवत्ता, तदनुरूपं संवण्णना निगमेतब्बा. पयोजनन्ति फलं. पिण्डत्थोति सङ्खेपत्थो. अनुसन्धीति पुच्छानुसन्धिआदिअनुसन्धि. उपोग्घाटोति निदस्सनं. चालनाति चोदना. पच्चुपट्ठानं परिहारो.

पकतिआदिपदावयवं ¶ भिन्दित्वा कथनं भेदकथा यथा ‘‘दिब्बन्तीति देवा’’ति (म. नि. अट्ठ. १.१५३). पदस्स अत्थकथनं तत्वकथा यथा ‘‘बुद्धोति यो सो भगवा सयम्भू अनाचरियको’’ति (महानि. १९२; चूळनि. पारायनत्थुतिगाथानिद्देस ९७; पटि. म. १.१६१). परियायवचनं वेवचनग्गहणं यथा ‘‘पञ्ञा पजानना’’ति (ध. स. १६). विचययुत्तिचतुब्यूहपरिवत्तनहारेकदेससङ्गहिता, वेवचनहारसङ्गहिता चाति आह ‘‘ते इध कतिपयहारसङ्गहिता’’ति.

अत्तनो फलं धारेतीति धम्मोति हेतुनो धम्मभावो वेदितब्बो. ञापकहेतूपि ञाणकरणट्ठेन कारके पक्खिपित्वा आह ‘‘कारको सम्पापकोति दुविधो’’ति. पुन चक्खुबीजादिनिब्बत्तकमेव कारणं कत्वा दस्सेन्तो ‘‘पुन…पे… तिविधो’’तिआदिमाह. ‘‘तयो कुसलहेतू’’तिआदिना (ध. स. १०५९-१०६०) आगता अलोभादयो, लोभादयो च हेतुहेतु नाम. ‘‘चत्तारो खो, भिक्खवे, महाभूता हेतु, चत्तारो महाभूता पच्चयो रूपक्खन्धस्स पञ्ञापनाया’’तिआदिना (म. नि. ३.८६) आगतो पच्चयहेतु नाम. कुसलाकुसलं कम्मं अत्तनो विपाकं पति उत्तमहेतु नाम. चक्खादिबीजादि चक्खुविञ्ञाणअङ्कुरादीनं असाधारणहेतु नाम. कुसलाकुसलानं सतिपि पच्चयधम्मभावे इट्ठानिट्ठफलविसेसहेतुभावदस्सनत्थं विसुं गहणं, सद्दमग्गानं पन ञापकसम्पापकहेतुभावदस्सनत्थन्ति दट्ठब्बं. अङ्कुरादिकस्स असाधारणहेतु बीजादिसमानजातियहेतुताय सभागहेतु ¶ . साधारणहेतु भुससलिलादिअसमानजातियताय असभागहेतु. इन्द्रियबद्धसन्तानिको अज्झत्तिकहेतु, इतरो बाहिरहेतु. केचि पन ‘‘ससन्तानिको अज्झत्तिकहेतु, इतरो बाहिरहेतू’’ति वदन्ति. परिग्गाहको उपत्थम्भको. परम्परहेतु उपनिस्सयपच्चयो.

निब्बानस्स अनिब्बत्तनियेपि समुदयप्पहानसमुदयनिरोधानं अधिगमाधिगन्तब्बभावतो निब्बानं पति मग्गस्स हेतुभावो विय मग्गं पति निब्बानस्स फलभावो उपचारसिद्धोति आह ‘‘फलपरियायो लब्भती’’ति.

पटिपज्जमानभूमि मग्गधम्मा. पटिपन्नभूमि फलधम्मा.

किच्चतोति ¶ सरसतो. लक्खणतोति उपलक्खणतो. सामञ्ञतोति समानभावतो. तेन समानहेतुता, समानफलता, समानारम्मणता च गहिता होतीति. तत्थ यं वत्तब्बं, तं हेट्ठा लक्खणहारनिद्देसवण्णनायं वुत्तमेव.

अपिचेत्थ सम्पयोगविप्पयोगविरोधपकरणलिङ्गसद्दन्तरसन्निधानसामत्थियादीनम्पि वसेन नयविभागो वेदितब्बो. तत्थ सम्पयोगतो तावनयविभागो – ‘‘नाहं, भिक्खवे, अञ्ञं एकधम्मम्पि समनुपस्सामि, यं एवं लहुपरिवत्तं, यथयिदं चित्त’’न्ति (अ. नि. १.४८) चित्तस्स लहुपरिवत्तिता गहिता, तंसम्पयोगतो चेतसिकानम्पि गहिताव होति अञ्ञत्थ नेसं चित्तेन सम्पयोगदीपनतो. अथ वा ‘‘सञ्ञिनो’’ति. सञ्ञासहिततावचनेन हि नेसं वेदनाचेतनादिवन्ततापि सम्पयोगतो दीपिता होति.

विप्पयोगतो – ‘‘अहेतुका’’ति. हेतुसम्पयुत्ता हि धम्मा ‘‘सहेतुका’’ति वुत्ताति तब्बिधुरा धम्मा विप्पयोगतो ‘‘अहेतुका’’ति वुत्ताति विञ्ञायति. अथ वा ‘‘असञ्ञिनो’’ति. सञ्ञाविप्पयुत्ता हि धम्मपवत्ति इधाधिप्पेता, न सञ्ञाय अभावमत्तन्ति विञ्ञायति.

विरोधतो – ‘‘अट्ठमको (यम. ३.इन्द्रिययमकपाळि.४३९), सद्धानुसारी’’ति (पु. प. मातिका ७.३६) च वुत्ते तं सन्ततियं संयोजनत्तयप्पहानं विञ्ञायति, तथा ‘‘सति वा उपादिसेसे अनागामिता’’ति (दी. नि. २.४०४; म. नि. १.१३७) वुत्ते पञ्चोरम्भागियसंयोजनप्पहानं ¶ , ‘‘दिट्ठेव धम्मे अञ्ञा’’ति (दी. नि. २.४०४; म. नि. १.१३७) वुत्ते अनवसेससंयोजनप्पहानं विञ्ञायति.

पकरणतो – ‘‘अब्याकता धम्मा’’ति (ध. स. मातिका). अधिकारतो हि कुसलाकुसलभावेन न कथिताति ञायति. ‘‘उपधी हि नरस्स सोचना’’ति (सं. नि. १.१२, १४४) च. बाहिरा हि धम्मा इध ‘‘उपधी’’ति अधिप्पेताति विञ्ञायति.

लिङ्गतो – ‘‘सीतेनपि रुप्पति, उण्हेनपि रुप्पती’’तिआदि (सं. नि. ३.७९). सीतादिग्गहणेन हि लिङ्गेन भूतुपादायप्पकारस्सेव धम्मस्स रूपभावो, न इतरस्स.

सद्दन्तरसन्निधानतो – ‘‘कायपस्सद्धि, कायायतन’’न्ति. ‘‘या वेदनाक्खन्धस्सा’’तिआदिवचनतो हि पुरिमो कायसद्दो समूहवाची, इतरो आयतनसद्दसन्निधानतो पसादवाची.

सामत्थियतो ¶ – ‘‘सब्बं, भिक्खवे, आदित्तं (सं. नि. ४.२८; महाव. ५४), सब्बे तसन्ति दण्डस्सा’’ति (ध. प. १२९) च, तथा ‘‘सब्बावन्तं लोकं मेत्तासहगतेन चेतसा…पे… फरित्वा विहरती’’तिआदि (दी. नि. १.५५६; ३.३०८; म. नि. १.७७, २३२, ४५९, ५०९; २.३०९; ३.२३०; विभ. ६४२). एत्थ हि सतिपि सब्बसद्दस्स अनवसेससत्तवाचकत्ते आदित्तता सापेक्खस्सेव अत्थस्स वाचकत्ता पदेसवाची सब्बसद्दो, लोकसद्दोपि सत्तवाची. सत्तारम्मणा हि अप्पमञ्ञाति. तथा ‘‘मातरं पितरं हन्त्वा’’ति (ध. प. २९४-२९५) सब्बेन सब्बं हि सपटिक्खेपतो, मातुपितुघातकम्मस्स च महासावज्जतापवेदनतो, इध च तदनुञ्ञाय कताय मातुपितुट्ठानिया तादिसा केचि पापधम्मा वेनेय्यवसेन गहिता विञ्ञायति. के पन तेति? तण्हामाना. तण्हा हि जननी सत्तानं. ‘‘तण्हा जनेति पुरिस’’न्ति (सं. नि. १.५५-५७) हि वुत्तं. पितुट्ठानियो मानो तं निस्साय अत्तसम्पग्गण्हतो ‘‘अहं असुकस्स रुञ्ञो, राजमहामत्तस्स वा पुत्तो’’ति यथा. सामत्थियादीनन्ति आदिसद्देन देसपकतिआदयो सङ्गय्हन्ति.

लब्भमानपदत्थनिद्धारणमुखेनाति तस्मिं तस्मिं सुत्ते लब्भमानअस्सादादिहारपदत्थनिद्धारणद्वारेन. यथालक्खणन्ति यं यं लक्खणं, लक्खणानुरूपं वा यथालक्खणं. हेतुफलादीनि उपधारेत्वा योजेतब्बानि तेसं वसेनाति अधिप्पायो. इदानि हेतुफलादयो ये यस्मिं ¶ हारे सविसेसं इच्छितब्बा, ते दस्सेतुं ‘‘विसेसतो पना’’तिआदिमाह. तं सुविञ्ञेय्यमेव.

निद्देसवारवण्णना निट्ठिता.

४. पटिनिद्देसवारवण्णना

१. देसनाहारविभङ्गवण्णना

५. अन्वत्थसञ्ञतन्ति अत्थानुगतसञ्ञभावं, ‘‘देसनाहारो’’ति अयं सञ्ञा अन्वत्था अत्थानुगताति अत्थो.

अवुत्तमेवाति ¶ पुब्बे असंवण्णितपदमेव. ‘‘धम्मं वो’’तिआदि (म. नि. ३.४२०) वचनस्स सम्बन्धं दस्सेतुं ‘‘कत्थ पना’’तिआदि वुत्तं. तेपिटकस्स हि बुद्धवचनस्स संवण्णनालक्खणं नेत्तिप्पकरणं, तञ्च परियत्तिधम्मसङ्गाहके सुत्तपदे संवण्णेतब्बभावेन गहिते गहितमेव होति. तेनाह ‘‘देसनाहारेन…पे… दस्सेती’’ति.

येसं अस्सादादीनं विभजनलक्खणो देसनाहारो, ते गाथाय, इधापि च आगते ‘‘अस्सादं आदीनव’’न्तिआदिना उदाहरणवसेन विभजितुं ‘‘तत्थ कतमो अस्सादो’’तिआदि आरद्धं. तत्थ तत्थाति तस्सं ‘‘अस्सादादीनवता’’ति गाथायं वुत्तो कतमो अस्सादो. अथ वा ‘‘अस्सादं आदीनव’’न्तिआदिना यो इध अस्सादादीनं उद्देसो, तत्थ कतमो अस्सादोति चेति अत्थो. एस नयो सेसेसुपि. कम्मकरणत्थभिन्नस्स विसयविसयितालक्खणस्स अस्सादद्वयस्स निदस्सनत्थं गाथाद्वयुदाहरणं, तथा कामविपरिणामलक्खणस्स, वट्टदुक्खलक्खणस्स चाति दुविधस्सापि आदीनवस्स निदस्सनत्थं ‘‘अरियमग्गो निब्बान’’न्ति दुविधस्सापि निस्सरणस्स निदस्सननिदस्सनत्थञ्च द्वे द्वे गाथा उदाहटा.

धम्मो हवे रक्खति धम्मचारिन्ति (जा. १.१०.१०२-१०३; नेत्ति. ५, २६, ३१; पेटको. २२) एत्थ ¶ धम्मचारिनो मग्गफलनिब्बानेहि सातिसयारक्खा सम्भवति, सम्पत्तिभवस्सापि विपरिणामसङ्खारदुक्खताहि दुग्गतिभावो इच्छितोवाति अधिप्पायेनाह ‘‘निस्सरणं अनामसित्वा’’ति. तथा हि वक्खति ‘‘निब्बानं वा उपनिधाय सब्बा उपपत्तियो दुग्गती’’ति.

अवेक्खस्सूति विधानं. तस्सा पन अवेक्खाय पवत्तिआकारो, विसयो, कत्ता च ‘‘सुञ्ञतो, लोकं, मोघराजा’’ति पदत्तयेन वुत्ताति आह – ‘‘सुञ्ञतो…पे… आणत्ती’’ति. तत्थ सङ्खारानं सुञ्ञता अनत्तसभावताय, अत्तसुञ्ञताय च सिया. यतो ते न वसवत्तिनो, अत्तसारविरहिता च, यतो ते अनत्ता, रित्ता, तुच्छा च अत्तना, तदुभयं दस्सेति ‘‘अवसवत्तिता’’तिआदिना. एवं मच्चुतरो सियाति एवं पटिपत्तिया मच्चुतरो भवेय्याति अत्थो. परिकप्पेत्वा विधियमानस्स मच्चुतरणस्स पुब्बभागपटिपदा देसनाय पच्चक्खतो सिज्झमानं सातिसयं फलन्ति आह ‘‘तस्स यं…पे… फल’’न्ति.

६. उदाहरणवसेनाति ¶ निदस्सनवसेन. तत्थ ‘‘पुग्गलविभागेना’’ति इमिना उग्घटितञ्ञुआदिपुग्गलपयोजितो अस्सादादीसु भगवतो देसनाविसेसोति दस्सेति.

घटितमत्तन्ति सोतद्वारानुसारेन मनोद्वारिकविञ्ञाणसन्तानेन आलम्बितमत्तं. सस्सतादिआकारस्साति सस्सतुच्छेदाकारस्स. इदञ्हि द्वयं धम्मदेसनाय चालेतब्बं, न अनुलोमिकखन्ति, यथाभूतञाणं वा. एतस्मिञ्हि चतुक्के आसयसामञ्ञता. वुत्तञ्हेतं –

‘‘सस्सतुच्छेददिट्ठी च, खन्ति चेवानुलोमिका;

यथाभूतञ्च यं ञाणं, एतं आसयसञ्ञित’’न्ति. (विसुद्धि. महाटी. १.१३६; दी. नि. टी. १.पठममहासङ्गीतिकथावण्णना; सारत्थ. टी. १.पठममहासङ्गीतिकथावण्णना, वेरञ्जकण्डवण्णना; वि. वि. टी. १.वेरञ्जकण्डवण्णना);

चलनायाति विक्खम्भनाय. परानुवत्तियाति समुच्छेदनाय. उग्घटिते जानातीति उग्घटितञ्ञूति मूलविभुजादिपक्खेपेन सद्दसिद्धि वेदितब्बा. विपञ्चितन्ति ‘‘विसमं चन्दिमसूरिया परिवत्तन्ती’’तिआदीसु (अ. नि. ४.७०) विय भावनपुंसकनिद्देसोति आह ¶ ‘‘मन्दं सणिक’’न्ति. निस्सरणआदीनवनिस्सरणअस्सादादीनवनिस्सरणानं विभावना वेनेय्यत्तयविनयनसमत्था.

चत्तारोति अस्सादो च आदीनवो च अस्सादो आदीनवो च अस्सादो निस्सरणञ्चाति एते चत्तारो. यदि निस्सरणविभावना वेनेय्यविनयनसमत्था, कस्मा पञ्चमो न गहितोति आह ‘‘आदीनवावचनतो’’ति. यदि हि उग्घटितञ्ञुं सन्धाय अयं नयो वुच्चति, निस्सरणमत्तेन सिद्धं सिया. अथ विपञ्चितञ्ञुं, नेय्यं वा, आदीनवो च निस्सरणञ्च अस्सादो च आदीनवो निस्सरणञ्च वत्तब्बो सिया? तथा अप्पवत्तत्ता न गहितो. तेनाह ‘‘आदीनवावचनतो’’तिआदि. देसनन्ति सामञ्ञतो गहितं ‘‘सुत्तेकदेसं गाथं वा’’ति विसेसेति. पदपरमअग्गहणञ्चेत्थ सउपायस्स निस्सरणस्स अनामट्ठत्ता.

‘‘कल्याण’’न्ति इमिना इट्ठविपाको, ‘‘पापक’’न्ति अनिट्ठविपाको अधिप्पेतोति आह ‘‘अयं अस्सादो, अयं आदीनवो’’ति. लाभादीनं पुञ्ञफलत्ता तदनुरोधं वा सन्धाय ‘‘अयं अस्सादो’’ति वुत्तं. तब्बिपरियायेन अलाभादीनं आदीनवता वेदितब्बा.

कामाति ¶ किलेसकामसहिता वत्थुकामा. विरूपरूपेनाति अप्पतिरूपाकारेन. मथेन्तीति मद्दन्ति. पब्बजितोम्हीति पब्बज्जं उपगतो अम्हि. अपण्णकन्ति अविरज्झनकं. सामञ्ञन्ति समणभावो. समितपापभावोयेव सेय्यो सुन्दरतरो.

तत्थ ‘‘कामा हि चित्रा मधुरा मनोरमा’’ति अयं अस्सादो, ‘‘विरूपरूपेन मथेन्ति चित्त’’न्ति अयं आदीनवो, ‘‘अपण्णकं सामञ्ञ’’न्ति इदं निस्सरणन्ति आह ‘‘अयं…पे… निस्सरणञ्चा’’ति.

फलादीनं एककवसेन च तिकवसेन च पाळियं उदाहटत्ता वुत्तं ‘‘दुकवसेनपी’’ति.

सुखा पटिपदा, दुक्खा पटिपदाति या द्वे पटिपदा, तासु एकेका दन्धखिप्पाभिञ्ञताय द्वे द्वे होन्तीति आह ‘‘पटिपदाभिञ्ञाकतो विभागो पटिपदाकतो होती’’ति. कतपुब्बकिच्चस्स पथवीकसिणादीसु सब्बपठमं ‘‘पथवी’’तिआदिना पवत्तमनसिकारो पठमसमन्नाहारो. उपचारन्ति उपचारज्झानं. पटिपज्जितब्बताय झानम्पि ‘‘पटिपदा’’ति ¶ वुच्चति. तदञ्ञा हेट्ठिमपञ्ञतो अधिका पञ्ञाति कत्वा ‘‘अभिञ्ञा’’ति वुच्चति.

किलेसेति नीवरणप्पकारे, तंसहगतकिलेसे च. अङ्गपातुभावन्ति वितक्कादिझानङ्गपटिलाभं.

अभिनिविसन्तोति पट्ठपेन्तो. रूपारूपं परिग्गण्हन्तोति रूपारूपधम्मे लक्खणादीहि परिच्छिन्दित्वा गण्हन्तो. परिग्गहितरूपारूपस्स मग्गपातुभावदन्धता च नामरूपववत्थानादीनं किच्छसिद्धिया सियाति न रूपारूपपरिग्गहकिच्छताय एव दुक्खापटिपदता वत्तब्बाति चे? न, नामरूपववत्थापनादीनं पच्चनीककिलेसमन्दताय सुखसिद्धियम्पि तथासिद्धविपस्सनासहगतानं इन्द्रियानं मन्दताय मग्गपातुभावतो. रूपारूपं परिग्गहेत्वाति अकिच्छेनपि परिग्गहेत्वा, किच्छेन परिग्गहिते वत्तब्बमेव नत्थि. एवं सेसेसुपि. नामरूपं ववत्थापेन्तोति ‘‘नामरूपमत्तमेतं, न अञ्ञो कोचि सत्तादिको’’ति ववत्थापनं करोन्तो. कतरो पनेत्थ वारो युत्तरूपोति? यो कोचि सकिं, द्विक्खत्तुं, अनेकसतक्खत्तुन्ति एवमादीसु हि विक्खम्भनवारेसु सकिं, द्विक्खत्तुञ्च विक्खम्भनवारो सुखा पटिपदा एव, न ततो उद्धं सुखा पटिपदा होति, तस्मा तिक्खत्तुं विक्खम्भनवारतो ¶ पट्ठाय दुक्खा पटिपदा वेदितब्बा. अपिच कलापसम्मसनावसाने उदयब्बयानुपस्सनाय उप्पन्नस्स विपस्सनुपक्किलेसस्स तिक्खत्तुं विक्खम्भनेन किच्छतावारो दुक्खा पटिपदा वेदितब्बा. एत्थ दन्धत्ता पटिपदाय एतस्स अकिच्छत्तेपि पुरिमानं किच्छत्ते दुक्खापटिपदता वुत्तनयाव. यस्स पन सब्बत्थ अकिच्छता, तस्स परमुक्कंसगता सुखा पटिपदा वेदितब्बा.

यथा नामरूपपरिग्गहकिच्छताय मग्गपातुभावदन्धताय दुक्खा पटिपदा दन्धाभिञ्ञा वुत्ता, तथा तब्बिपरियायेन चतुत्थी, तदुभयवोमिस्सतावसेन दुतिया, ततिया च ञातब्बाति दस्सेन्तो आह ‘‘इमिना…पे… वेदितब्बा’’ति. वट्टदुक्खतो निय्यानस्स अधिप्पेतत्ता ‘‘विपस्सनापक्खिका एवा’’ति वुत्तं.

हेतुपायफलेहीति एत्थ तण्हाचरितता, मन्दपञ्ञता च पठमाय पटिपदाय हेतु, तण्हाचरितता, उदत्थपञ्ञता च दुतियाय, दिट्ठिचरितता, मन्दपञ्ञता च ततियाय, दिट्ठिचरितता, उदत्थपञ्ञता च चतुत्थिया. उपायो पन यथाक्कमं सतिसमाधिवीरियपञ्ञिन्द्रियानि ¶ , सतिपट्ठानझानसम्मप्पधानसच्चानि च उपनिस्सयभूतानि. फलं वट्टदुक्खतो निय्यानं.

समाधिमुखेनाति समाधिमुखेन भावनानुयोगेन. तेनेवाह ‘‘समथपुब्बङ्गमाय विपस्सनाया’’ति. इधाति इमस्मिं नेत्तिप्पकरणे. वक्खति ‘‘रागविरागा चेतोविमुत्ति सेक्खफल’’न्ति, ‘‘रागविरागा चेतोविमुत्तिकामधातुसमतिक्कम’’न्ति च. सोति अनागामी.

तेनाति पटिपक्खेन. ततोति पटिपक्खतो. समानाधिकरणवसेन च चेतोविमुत्तिसद्दानं समासं कत्वा भिन्नाधिकरणवसेन वत्तुं ‘‘अथ वा’’तिआदि वुत्तं. पुन ‘‘चेतसो वा’’तिआदिना अञ्ञपदत्थवसेन चेतोविमुत्तिपदानं समासं दस्सेति. विञ्ञाणपरियायेन चेतो-सद्देन वुत्तयोजना न सम्भवतीति आह ‘‘यथासम्भव’’न्ति.

हा-सद्दो गतिअत्थो, गति चेत्थ ञाणगति अधिप्पेताति आह ‘‘हातब्बाति गमेतब्बा’’ति. नेतब्बाति ञापेतब्बा.

७. तन्ति ¶ पुग्गलविभागं. ञाणविभागेनाति सुतमयादिञाणप्पभेदेन. निब्बत्तनन्ति उप्पादनं. तत्थाति तस्मिं उग्घटितञ्ञुतातिआदिपुग्गलविभागभूते देसनाभाजने. देसनायन्ति सुत्ते. तं दस्सेतुन्ति तं पुग्गलविभागं दस्सेतुं. ‘‘स्वायं हारो कथं सम्भवती’’ति केचि पठन्ति.

साति वुत्तप्पकारधम्मत्थानं वीमंसनपञ्ञा. अधिकारतोति ‘‘सत्था वा धम्मं देसयती’’तिआदिअधिकारतो. सामत्थियतो उग्घटितञ्ञुआदिवेनेय्यविनयनसमत्थभावतो. परियत्तिधम्मस्स उपधारणन्ति एत्थापि ‘‘अधिकारतो सामत्थियतो वा’’ति आनेत्वा योजेतब्बं.

‘‘वीमंसादिपरियायवती पठमविकप्पवसेन, वीमंसादिविभागवती दुतियविकप्पवसेन, चिन्ताय हेतुभूताय निब्बत्ता चिन्तामयी’’ति एवमादिवुत्तनयानुसारेन सक्का योजेतुन्ति आह ‘‘सेसं वुत्तनयमेवा’’ति.

सुतचिन्तामयञाणेसूति सुतमयञाणे च चिन्तामयञाणे च सुतचिन्तामयञाणेसु च सुतचिन्तामयञाणेसूति एकदेससरूपेकसेसो वेदितब्बो. चिन्तामयञाणेयेव हि पतिट्ठिता महाबोधिसत्ता ¶ चरिमभवे विपस्सनं आरभन्ति, इतरे सुतचिन्तामयञाणेसूति. तेहीति तथा पठन्तेहि. वुत्तनयेनाति ‘‘उपादारूपं परिग्गण्हाति, अरूपं परिग्गण्हाती’’तिआदिना पटिपदाकथायं (नेत्ति. अट्ठ. ५) वुत्तनयेन.

८. परतो घोसो पच्चयभूतो एतिस्साति अधिप्पायो. ‘‘पच्चत्तसमुट्ठितेन च योनिसोमनसिकारेना’’ति इदं आवुत्तिनयेन दुतियं आवट्टतीति वेदितब्बं. तेन सावकानं भावनामयञाणुप्पत्ति सङ्गहिता होति. सावकानमेव वा ञाणुप्पत्ति इधाधिप्पेता उग्घटितञ्ञुआदिविभागकथनतो. एतस्मिं पक्खे पुब्बे वुत्तएकसेसनयोपि पटिक्खित्तो दट्ठब्बो. ‘‘आसयपयोगपबोधस्स निप्फादितत्ता’’ति एतेन पच्छिमचक्कद्वयपरियापन्नानि पुब्बहेतुसङ्गहानि सुतचिन्तामयञाणानि सन्धाय ‘‘इमा द्वे पञ्ञा अत्थी’’ति वुत्तन्ति दस्सेति. अत्थिभावो चेतासं पटिपक्खेन अनुपद्दुतता वेदितब्बा. अपरिक्खतत्ता अनभिसङ्खतत्ता. सुतमयञाणस्सापि पुरिमसिद्धस्स.

९. देसनापटिपदाञाणविभागेहीति ¶ निस्सरणदेसनादिदेसनाविभागेहि, दुक्खापटिपदादिपटिपदाविभागेहि, सुतमयञाणादिञाणविभागेहि.

अवसिट्ठपारिसज्जेनाति खत्तियगहपतिपरिसपरियापन्नेन. अट्ठन्नन्ति खत्तियपरिसा ब्राह्मणगहपतिसमणचातुमहाराजिकतावतिंसमारब्रह्मपरिसाति इमासं अट्ठन्नं.

समत्थेतीति समत्थं सम्बन्धत्थं करोति.

तमेव द्वादसपदभावं दीपेत्वाति सम्बन्धो. तदत्थस्साति छछक्कपरियायत्थस्स (म. नि. ३.४२० आदयो). सब्बपरियत्तिधम्मसङ्गाहकत्ता छछक्कपरियायस्स, तदत्थस्स च धम्मचक्कप्पवत्तेन सुत्तेन (सं. नि. ५.१०८१; महाव. १३; पटि. म. २.३०) सङ्गहितत्ता वुत्तं ‘‘सब्बस्सापि…पे… विभावेन्तो’’ति. विसयिभावेन ब्यञ्जनपदानं, विसयभावेन अत्थपदानं सम्बन्धं सन्धायाह ‘‘तेसं…पे… सम्बन्धभाव’’न्ति.

पदावयवो अक्खरानि. पदत्थोति पदत्थावयवो. पदत्थग्गहणस्साति पदत्थावबोधस्स. विसेसाधानं विसेसुप्पत्ति. वाक्यभेदेति वाक्यविसेसे. चित्तपरितोसनं चित्ताराधनं. बुद्धिनिसानं पञ्ञाय तेजनं तिक्खभावकरणं. नानावाक्यविसयतापि सिद्धा होति पदादीहिपि सङ्कासनस्स सिद्धत्ता ¶ . एकवाक्यविसयताय हि अत्थपदानं सङ्कासनादयो यथाक्कमं अक्खरादिविसया एवाति नियमो सिया. एतेनाति अत्थपदानं नानावाक्यविसयत्थेन.

उग्घटनादिअत्थानीति उग्घटनविपञ्चननयनप्पयोजनानि.

१०. उपतिट्ठति एत्थाति उपट्ठितन्ति उपट्ठितसद्दस्स अधिकरणत्थतं दस्सेतुं ‘‘उपतिट्ठनट्ठान’’न्ति वुत्तं यथा ‘‘पदक्कन्त’’न्ति. तेनाह ‘‘इदं नेस’’न्तिआदि. पटिपत्तिदेसनागमनेहीति पटिपत्तिगमनदेसनागमनेहि. ‘‘किच्छं वतायं लोको आपन्नो जायति च…पे… जरामरणस्सा’’तिआदिना जरामरणतो पट्ठाय पटिच्चसमुप्पादमुखेन विपस्सनं अभिनिविसित्वा महागहनं छिन्दितुं निसानसिलायं फरसुं निसेन्तो विय किलेसगहनं छिन्दितुं लोकनाथो ञाणफरसुं तेजेन्तो बुद्धभावाय हेतुसम्पत्तिया परिपाकगतत्ता सब्बञ्ञुतञ्ञाणाधिगमाय विपस्सनागब्भं ¶ गण्हापेन्तो अन्तरन्तरा नानासमापत्तियो समापज्जित्वा अनुपदधम्मविपस्सनावसेन अनेकाकारवोकारसङ्खारे सम्मसन्तो छत्तिंसकोटिसतसहस्समुखेन यं ञाणं पवत्तेसि, तं ‘‘महावजिरञाण’’न्ति वदन्ति. अट्ठकथायं पन ‘‘चतुवीसतिकोटिसतसहस्ससमापत्तिसञ्चारिमहावजिरञाण’’न्ति (दी. नि. अट्ठ. ३.१४१) आगतं, तं देवसिकं वळञ्जनकसमापत्तीनं पुरेचरानुचरञाणं सन्धाय वुत्तं. यं पन वक्खति ‘‘ञाणवजिरमोहजालपदालन’’न्ति, तं सह विपस्सनाय मग्गञाणं वेदितब्बं. एतं ब्रह्मचरियन्ति सासनब्रह्मचरियं अधिप्पेतन्ति तं दस्सेन्तो ‘‘ब्रह्मुनो’’तिआदिमाह.

देसनायाति करणत्थे इदं करणवचनं. नियुत्तोति एत्थ हेतुअत्थो अन्तोनीतोति दस्सेन्तो ‘‘निद्धारेत्वा योजितो’’ति आह.

देसनाहारविभङ्गवण्णना निट्ठिता.

२. विचयहारविभङ्गवण्णना

११. जातिलिङ्गकालसाधनविभत्तिसङ्ख्याविसेसादितो सद्दतो पदविचयो कातब्बो. तत्थ करियमानो च यथासभावनिरुत्तिया एव कतो सुकतो होतीति दस्सेन्तो ‘‘इदं नामपदं ¶ …पे… अयं सद्दतो पदविचयो’’ति वत्वा ‘‘सो पनाय’’न्तिआदिमाह. वत्तब्बअत्थसंवण्णनाति तंतंपदवचनीयस्स अत्थस्स भेदं वत्वा परियायेहि विवरित्वा कथनं.

विचियमानस्स सुत्तपदस्साति पुच्छावसेन पवत्तसुत्तपदस्स. ‘‘सुत्तन्तरपदानिपि पुच्छावसेनेव पवत्तानी’’ति वदन्ति ‘‘न सब्बम्पि सुत्तपद’’न्ति. एकस्सेव पदस्स सम्भवन्तानं अनेकेसं अत्थानं उद्धारो अत्थुद्धारो. एकस्सेव पन अत्थस्स सम्भवन्तानं अनेकेसं पदानं उद्धारो पदुद्धारो. सब्बे हि संवण्णियमाने सुत्ते लब्भमाने सब्बे पदत्थे. नव सुत्तन्तेति सुत्तगेय्यादिवसेन नवप्पकारे सुत्तस्मिं आनेत्वा विचिनतीति ¶ योजना. अथ वा ‘‘सब्बे नव सुत्तन्ते’’ति इमिना पविचयलक्खणेन हारेन सुत्तगेय्यादीनि सब्बानिपि नवप्पकारानि सुत्तानि विचिनतीति अत्थो. तेनाह ‘‘सुत्तगेय्यादिके’’तिआदि.

‘‘कोसलानं पुरा रम्मा’’तिआदिका (सु. नि. ९८२) छपञ्ञास गाथा वत्थुगाथा. ‘‘पारायनमनुगायिस्स’’न्ति (सु. नि. ११३७ आदयो) पन आदिका एकूनवीसति गाथा अनुगीतिगाथा. इदं नामं कतन्ति इदं ‘‘पारायन’’न्ति नामं कतं. तेनाह ‘‘पारं गमनीया इमे धम्मा, तस्मा इमस्स धम्मपरियायस्स ‘पारायनन्त्वेव अधिवचन’’’न्ति (सु. नि. पारायनत्थुतिगाथा; चूळनि. पारायनत्थुतिगाथा १४९ आदयो). बुद्धियं विपरिवत्तमानन्ति इमस्स विचयहारविभङ्गस्स देसनाकाले आयस्मा महाकच्चानो अत्तनो बुद्धियं वत्तमानं कत्वा एवमाहाति योजना.

एकंसब्याकरणस्स अयन्ति एकंसब्याकरणीया, एकंसेन वा ब्याकातब्बत्ता एकंसब्याकरणीया, एकंसब्याकरणयोग्गाति अत्थो. सेसपदद्वयेपि एसेव नयो. ठपनीयाति ठपेतब्बत्ता अब्याकरणीयाति अत्थो. समयन्तरपरिचयेन निवारणधम्मं पति संसयपक्खन्दो पुच्छतीति अधिप्पायेनाह ‘‘विमतिच्छेदन’’न्ति. पकतिया पन निवारणधम्मं अजानन्तो ञातुकामताय पुच्छतीति अदिट्ठजोतनाय पुच्छापि सिया. तथा हि वक्खति ‘‘लोकस्स निवारणादीनि अजानन्तेना’’ति.

एकवत्थुपरिग्गहाति एकस्स अभिधेय्यत्थस्स गहणतो.

विमुत्तिपरिपाचकइन्द्रियानि विवट्टपक्खे ठितस्स सद्धादयो धम्मा, किं पनेत्थ अरियानम्पि इन्द्रियलोकेन सङ्गहो होतीति आह ‘‘परियापन्नधम्मवसेना’’तिआदि.

काळपक्खचातुद्दसीघनवनसण्डमेघपटलच्छादनअड्ढरत्तीनं ¶ वसेन चतुरङ्गसमन्नागतेन. विविच्छाति विचिकिच्छाय. तेनाह ‘‘विचिकिच्छाहेतू’’ति. दुक्खमस्स महब्भयन्ति एत्थ वुत्तं ‘‘अस्सा’’ति पदं ‘‘जप्पाभिलेपनं अस्स ब्रूमी’’ति आनेत्वा सम्बन्धितब्बन्ति दस्सेन्तो ‘‘जप्पा तण्हा अस्स लोकस्सा’’ति आह. ‘‘सब्बसत्तान’’न्तिआदिना, ‘‘सब्बसोवा’’तिआदिना च अन्वयतो, ब्यतिरेकतो च सातिसयं अविज्जाय नीवरणभावं ¶ दस्सेति. ‘‘दूरे सन्तो पकासन्ति (ध. प. ३०४; नेत्ति. ११), रत्तो अत्थं न जानाती’’ति (नेत्ति. ११, २७) गाथाद्वयेनापि अनुगीतिविचयं दस्सेतीति योजेतब्बं.

रूपावचराति रूपावचरसत्ता. विपरिणामदुक्खताय मुच्चनस्स कारणवचनन्ति सम्बन्धो. यतो वट्टदुक्खतो मुच्चनं. तं वट्टदुक्खं अनवसेसपरियादानवसेन सङ्खारदुक्खतागहणेन.

एकाधारन्ति एकवत्थु अधिट्ठानं. निवारणं विक्खम्भनं पिधानं समुच्छेदोति अत्थद्वयस्स पुच्छितत्ता ‘‘अनेकाधारं दस्सेतु’’न्ति वुत्तं. तेनाह ‘‘निवारणसङ्खातं संवरं…पे… पिधिय्यन्ति पच्छिज्जन्ती’’ति (सु. नि. अट्ठ. २.१०४१; चूळनि. अट्ठ. ३). तस्सत्थो ‘‘निवारणसङ्खातं विक्खम्भनं, संवरं, पिधानञ्च कथेही’’ति.

‘‘वोदान’’न्ति इमिना सोतानं विक्खम्भनविसुद्धि, ‘‘वुट्ठान’’न्ति इमिना समुच्छेदविसुद्धि अधिप्पेताति आह ‘‘पुच्छाय दुविधत्थविसयतं विवरितुं ‘एव’न्तिआदि वुत्त’’न्ति. तथा चाह ‘‘वोदायति…पे… अरियमग्गो’’ति.

दिट्ठिमानाविज्जासोतापि तण्हासोतानुगाति आह ‘‘येभुय्येन अनुरोधवसेना’’ति. उपचारवसेनाति निस्सितुपचारवसेन. सब्बस्माति चक्खुतो याव मनतोति सब्बस्मा द्वारतो. सब्बप्पकारेनात्ति तण्हायनमिच्छाभिनिवेसनउन्नमनादिप्पकारेन.

तमेव सतिन्ति यायं सति पुब्बभागे सोतानं विक्खम्भनवसेन वुत्ता, तमेव सतिं. मग्गक्खणे सोतानं संवरं पिधानं ब्रूमि. यस्मा पन पिधायिकापि सति मग्गक्खणे पञ्ञानुगा, पञ्ञाकिच्चमेवेत्थ अधिकं, तस्मा वुत्तं ‘‘पञ्ञायेते पिधीयरे’’ति.

संवरपिधानानन्ति एत्थ संवरसद्देन निवारणं वुत्तं.

यस्मिं ¶ यस्मिं अरियमग्गे अनधिगते यं यं अभिसङ्खारविञ्ञाणं उप्पज्जनारहं, तस्मिं तस्मिं अधिगते तं तं विञ्ञाणं अनुप्पादनिरोधेन निरुज्झति सद्धिं अत्तना सम्पयुत्तनामरूपेनाति आह ‘‘तस्स तस्स विञ्ञाणस्स निरोधेन सहेवा’’ति. अनुप्पादनिरोधो हि एत्थ ‘‘निरोधो’’ति अधिप्पेतो अनुपादिसेसनिब्बानस्स अधिप्पेतत्ताति. अनुसन्धीयति एतेनाति अनुसन्धि, इध पुच्छियमानो अत्थो.

सह ¶ विसयेन दस्सेतुन्ति एत्थ सच्चानि एव विसयो. पहातब्बसभावं समुदयसच्चं, तस्स विसयो दुक्खसच्चं. ‘‘संयोजनियेसु, भिक्खवे, धम्मेसु अस्सादानुपस्सिनो विहरतो तण्हा पवड्ढती’’ति (सं. नि. २.५३, ५७) हि वुत्तं. पहायकसभावं मग्गसच्चं, तस्स विसयो निरोधसच्चन्ति आह ‘‘सह विसयेन…पे… सच्चेसू’’ति. कामञ्चेत्थ ‘‘समुदयो द्वीसु भूमीसु पहीयती’’ति आरद्धं, ‘‘दस्सनेन तीणि संयोजनानि पहीयन्ति, भावनाय सत्त संयोजनानि पहीयन्ती’’ति पन विभागवचनमेव वत्तन्ति आह ‘‘पहायकविभागमुखेन पहातब्बविभागं दस्सेतु’’न्ति.

निरवसेसकामरागब्यापादा ततियमग्गेन पहीयन्ति, इतरे चतुत्थमग्गेनाति वुत्तं ‘‘इतरेहि पन निरवसेस’’न्ति. तत्थाति कम्मविपाकवट्टप्पभेदेन तेधातुके भवत्तये. संयोजनवसेनाति सब्बदा योजनवसेन बन्धनवसेन.

१२. अग्गफलञाणताय एकम्पि समानं तन्निमित्तस्स खयानुप्पादारम्मणस्स पच्चवेक्खणञाणस्स वसेन फलवोहारेन द्वे नामानि लभति.

सोमनस्सनामलाभो इमिना आरम्मणसङ्केतेनाति तदत्थं विवरन्तो ‘‘खये…पे… समञ्ञाया’’ति आह.

१३. तग्गहणेनेवाति फस्सपञ्चमकपञ्चरूपिन्द्रियग्गहणेनेव. सहचरणादिनाति सहजातादिअनन्तरादिपच्चयभावेन चेव निस्सयारम्मणादिना च. ‘‘सम्पयुत्त’’न्ति इमिना सहितता अविसिट्ठता इधाधिप्पेताति आह ‘‘अविभागेन गहणीयभावं सन्धाया’’ति.

कथं समाधिन्द्रियं उप्पादेतीति आह ‘‘सतिग्गहणेन चेत्थ परियुट्ठानप्पहानं इधाधिप्पेत’’न्ति. न हि समाधिना परियुट्ठानप्पहानं सम्भवति.

पदहति ¶ एतेनाति पधानं, वीरियं. तेति वीरियसङ्खारा. एकरसेनाति यथा इन्द्रियानि एकरसानि होन्ति, एवं एकरसभावेन सरणतो पवत्तनतो. तथा पवत्तिया एव सुट्ठु वत वीरियं वाहेसीति योगिना सङ्कप्पेतब्बतो तदुपगवीरियवाहनट्ठेन ‘‘सम्पहंसना’’ति वुत्तं. तेनाह ‘‘एवं मे…पे… हेतुभावतो’’ति.

इद्धिसद्दस्स ¶ पठमो कत्तुअत्थो, दुतियो करणत्थो वुत्तो, पादसद्दस्स एको करणत्थो एव. पज्जितब्बा च इद्धी वुत्ता, न च इज्झन्ति. पज्जितब्बा च इद्धी पज्जनकरणेन पादेन समानाधिकरणा न होन्तीति ‘‘पठमेन अत्थेन इद्धि एव पादो’’ति कथं सक्का वत्तुं, तथा इद्धिकिरियाकरणेन साधेतब्बा बुद्धिसङ्खाता इद्धि पज्जनकिरियाकरणेन पज्जितब्बाति द्विन्नं करणानं न समानाधिकरणता सम्भवतीति ‘‘दुतियेन अत्थेन इद्धिया पादो’’ति कथं सक्का वत्तुन्ति चे? सक्का, पादस्स इज्झमानकोट्ठास इज्झनकरणूपायभावतो. अथ वा ‘‘पठमेन अत्थेन इद्धिया पादो, दुतियेन अत्थेन इद्धि एव पादो इद्धिपादो’’ति एवं योजनतो. कथं? अनन्तरत्थो पच्चासत्तिञायेन इध पठमोति अधिप्पेतो, ततो पुरिमो दुतियोति.

‘‘छन्दं चे भिक्खु अधिपतिं करित्वा लभति समाधि’’न्तिआदि (विभ. ४३२) वचनतो छन्दसमाधिप्पधानसङ्खारसमन्नागतं इद्धिपादं भावेतीति एत्थापि छन्दाधिपति समाधि छन्दसमाधीति अधिपतिसद्दलोपं कत्वा समासो वुत्तोति विञ्ञायति. अधिपतिसद्दत्थदस्सनवसेनेव पन ‘‘छन्दहेतुको, छन्दाधिको वा समाधी’’ति सम्मोहविनोदनियं (विभ. अट्ठ. ४३१) वुत्तं, तस्मा इधापि छन्दाधिपति समाधि छन्दसमाधीति वेदितब्बो. तं पन छन्दं वुत्तनयेन सद्धासीसेन दस्सेन्तो ‘‘सद्धाधिपतेय्या चित्तेकग्गता’’ति वुत्तं. ‘‘इदं पधान’’न्ति वा वीरियं वुत्तं. वीरियसद्दापेक्खासहितं एकवचनेन वत्वा चतुब्बिधस्सपि वीरियस्स अधिप्पेतत्ता निब्बत्तेतब्बधम्मविभागेन च ‘‘इमे सङ्खारा’’ति वुत्तं. तेन पधानभूता सङ्खाराति एवं समासो वेदितब्बो. सङ्खतसङ्खारादिनिवत्तनत्थञ्चेत्थ पधानग्गहणं. अथ वा तं तं विसेसं सङ्खरोतीति सङ्खारो, सब्बम्पि वीरियं. तत्थ चतुकिच्चसाधकतो अञ्ञस्स निवत्तनत्थं पधानग्गहणन्ति पधानभूता सेट्ठभूताति अत्थो.

वीरियिद्धिपादनिद्देसे ‘‘वीरियसमाधिप्पधानसङ्खारसमन्नागत’’न्ति (विभ. ४३५) द्विक्खत्तुं वीरियं आगतं. तत्थ पुरिमं समाधिविसेसनं ‘‘वीरियाधिपति समाधि वीरियसमाधी’’ति, दुतियं समन्नागमङ्गदस्सनत्थं. द्वे एव हि सब्बत्थ समन्नागमङ्गानि समाधि, पधानसङ्खारो च. छन्दादयो ¶ समाधिविसेसनानि. पधानसङ्खारो पन पधानवचनेनेव विसेसितो, न छन्दादीहीति न इध वीरियाधिपतिता पधानसङ्खारस्स वुत्ता होति. वीरियञ्च समाधिं विसेसेत्वा ठितमेव समन्नागमङ्गवसेन ¶ पधानसङ्खारवचनेन वुत्तन्ति नापि द्वीहि वीरियेहि समन्नागमो वुत्तो होति. यस्मा पन छन्दादीहि विसिट्ठो समाधि तथा विसिट्ठेनेव तेन सम्पयुत्तो पधानसङ्खारो, सेसधम्मा च, तस्मा समाधिविसेसनानं वसेन ‘‘चत्तारो इद्धिपादा’’ति वुत्ता. विसेसनभावो च छन्दादीनं तंतंअपस्सयनवसेन होतीति छन्दसमाधि…पे… इद्धिपादन्ति एत्थ निस्सयत्थेपि पादसद्देन उपायत्थेन छन्दादीनं इद्धिपादता वुत्ता होति. तथा हि अभिधम्मे उत्तरचूळभाजनीये ‘‘चत्तारो इद्धिपादा छन्दिद्धिपादो’’तिआदिना (विभ. ४५७) छन्दादीनमेव इद्धिपादता वुत्ता. पञ्हापुच्छके च ‘‘चत्तारो इद्धिपादा – इध भिक्खु छन्दसमाधी’’ति (विभ. ४६२) आरभित्वापि पुन छन्दादीनंयेव कुसलादिभावो विभत्तो. उपायिद्धिपाददस्सनत्थमेव हि निस्सयिद्धिपाददस्सनं कतं. अञ्ञथा चतुब्बिधताव न होतीति. अयमेत्थ पाळिवसेन अत्थविनिच्छयो वेदितब्बो.

तदङ्गसमुच्छेदनिस्सरणविवेकनिस्सितत्तं वत्वा पटिप्पस्सद्धिविवेकनिस्सितस्स अवचनं ‘‘छन्दसमाधि…पे… इद्धिपादं भावेती’’ति (विभ. ४३२) भावेतब्बानं इद्धिपादानं वुत्तत्ता. भावितिद्धिपादस्स हि सच्छिकातब्बा फलपरियापन्ना इद्धिपादाति.

वोस्सग्गसद्दो परिच्चागत्थो, पक्खन्दनत्थो चाति वोस्सग्गस्स दुविधता वुत्ता. यथावुत्तेन पकारेनाति तदङ्गसमुच्छेदप्पकारेन, तन्निन्नभावारम्मणप्पकारेन च. परिणमन्तं विपस्सनक्खणे.

१४. पुब्बभागपञ्ञायाति एकावज्जननानावज्जनवीथीसु पवत्तउपचारपञ्ञाय. अधिगमपञ्ञायाति अप्पनापञ्ञाय. पुन पुब्बभागपञ्ञायाति नानावज्जनुपचारपञ्ञाय, पटिसन्धिपञ्ञाय वा. उपचारपञ्ञायाति एकावज्जने, सब्बत्थ वा पवत्तउपचारपञ्ञाय.

पुच्छाविस्सज्जनविचयोपीति यथावुत्ताय पुच्छाय विस्सज्जनविचयोपि. वुत्तनयानुसारेनाति अदिट्ठजोतना, विमतिच्छेदना चाति हेट्ठा वुत्तनयानुगमनेन.

१५. सेखे ¶ असेखेति सेक्खे अरियपुग्गले, असेक्खे अरियपुग्गले. विपस्सनापुब्बङ्गमप्पहानेति विपस्सनं पुरेचारिकं कत्वा पवत्तकिलेसप्पहाने, पहानाभिसमयेति अत्थो.

‘‘यं ¶ अनिच्चं दुक्खं अनत्ता’’ति पाळिं दस्सेत्वा पुन ‘‘यं अनिच्चे दुक्खे अनत्तनी’’ति वचनं एवम्पेत्थ पठन्तीति दस्सेतुं.

सेससंकिलेसवोदानधम्माति गेधतो अवसिट्ठसंकिलेसधम्मा च सब्बवोदानधम्मा च. अभावेनाति अभावनेन अभावकरणेन.

पयोगपरक्कमन्ति भुसं योगो पयोगो, पयोगोव परक्कमो पयोगपरक्कमो, चित्तं. उक्खिपतीति कोसज्जपक्खे पतितुं अदेन्तो कुसलपक्खे उद्धं खिपेन्तो विय पवत्तति. पधानवीरियन्ति अकुसलानं अनुप्पादनट्ठेन उत्तमवीरियं. योजेतब्बानीति ‘‘आसेवमानो वायमती’’तिआदिना योजेतब्बानि. अनुप्पन्नाति अवत्तब्बतं आपन्नानन्ति भूमिलद्धारम्मणाधिग्गहिताविक्खम्भितासमुग्घाटितुप्पन्नानं.

१६. ‘‘अट्ठमकस्स इन्द्रियानी’’ति वुत्तत्ता ‘‘पठममग्गे सद्धादयो’’तिआदि वुत्तं. इन्द्रियग्गहणञ्च पाळियं निदस्सनमत्तं दट्ठब्बं.

असुभानुपस्सना कायानुपस्सनासतिपट्ठानन्ति आह ‘‘सतिपट्ठानभावनाय सुनिग्गहितो कामवितक्को’’ति. समाधि उप्पज्जमानो कामवितक्कम्पि निग्गहेत्वा एव उप्पज्जतीति दस्सेन्तो ‘‘अनवज्जसुखपदट्ठानेना’’तिआदिमाह. ‘‘कुसलेसु धम्मेसु आरद्धवीरियो’’तिआदिना धम्मच्छन्दतो उप्पज्जमानो वीरियच्छन्दो खन्तिं परिब्रूहेतीति दस्सेति. अनवज्जधम्मानं उपकारकधम्मासेवनं विय अनुपकारकधम्मपरिवज्जनम्पि पञ्ञानिसेवनेनेव होतीति आह ‘‘समाधिआदीन’’न्तिआदि.

१७. सब्बधम्माधिट्ठानं देसनं पुग्गलाधिट्ठानेन विभजितुं ‘‘लोको नामा’’तिआदि वुत्तन्ति दस्सेन्तो ‘‘सब्बधम्मानन्ति…पे… दस्सेतु’’न्ति आह. महग्गतधम्मेसु ठानं तंसम्पादनाव. तथा सेसेसु. वड्ढियमानेसूति यथा विमुत्तिं परिपाचयन्ति, एवं ब्रूहियमानेसु.

दस्सनपरिञ्ञाति रूपारूपधम्मानं सलक्खणतो, पच्चयतो च परिजानना. तेनाह ‘‘ञातपरिञ्ञा’’ति. पटिपक्खविधमनेन सद्धिं लक्खणत्तयविभावना इध ‘‘भावनापरिञ्ञा’’ति अधिप्पेताति आह ‘‘भावना…पे… परिञ्ञा चा’’ति ¶ . दस्सनत्था परिञ्ञा दस्सनपरिञ्ञा, भावनत्था परिञ्ञा भावनापरिञ्ञाति एवं वा एत्थ अत्थो दट्ठब्बो.

कक्खळफुसनादीति ¶ कक्खळादिफुसनादि. अभिजानित्वाति अभिञ्ञाय पञ्ञाय जानित्वा, ठितस्स अभिजाननहेतु वाति अत्थो. अत्थोति फलं. नयोति वुत्तनयो.

‘‘यं असङ्खत’’न्तिपि पठन्ति. चतुनयकोविदोति एकत्तनानत्तादिनयचतुक्के निपुणो. देसनायुत्तिकुसलोति धम्मानं देसनाविधिम्हि कुसलो.

सदिसी कातब्बा संसन्दनवसेनाति अधिप्पायो. आनेतब्बा ‘‘अयं देसना इमाय देसनाय एवं संसन्दती’’ति. अत्थतो अपेतन्ति अयुत्तत्थं. असम्बन्धत्थन्ति अञ्ञमञ्ञं असम्बन्धपदत्थं. ननु पट्ठानविचारो नयविचारो विय हारेहि असम्मिस्सो विचारणन्तरोति चोदनं मनसि कत्वा आह ‘‘यस्मा पना’’तिआदि. इध निक्खित्तोति इध सुत्तविचये सुत्तत्थविचारभावतो निक्खित्तो, एतेन वा पट्ठानस्स हारन्तोगधभावदस्सनेनेव मूलपदानं विय पट्ठानस्स पदत्थन्तराभावो दस्सितोति वेदितब्बं.

इमस्स सुत्तस्साति संवण्णियमानसुत्तं सन्धायाह. कस्मिं वा पदेति संवण्णियमानं गाथं सन्धायाह. तब्बिचयेनाति पुच्छादिविचयेन, अस्सादादिविचयेन च.

विचयहारविभङ्गवण्णना निट्ठिता.

३. युत्तिहारविभङ्गवण्णना

१८. एवमेतस्स सुत्तस्स अत्थो न गहेतब्बो, एवं पन गहेतब्बोति अग्गहेतब्बगहेतब्बानं अत्थानं विजहनग्गहणत्थाय युत्तायुत्तिविचारणायं वज्जेतब्बेसु ताव पठमं पटिपत्तीति दस्सेन्तो आह ‘‘अतथाकारेन गय्हमाना सुत्तत्था विसयो’’ति यथा ‘‘वामं मुञ्च, दक्खिणं गण्हा’’ति (ध. स. अट्ठ. ४९८; विसुद्धि. महाटी. १.१४; सं. नि. टी. १.१.२१३). वज्जेतब्बभावतो हि सुत्तपदेहि सुत्तत्थे ¶ विवेचिते गहेतब्बभावो च अवसिट्ठो होति. तथा हि वक्खति ‘‘मेत्ताविहारस्स सतो ब्यापादो चित्तं परियादाय ठस्सती’ति न युज्जति देसना, ‘ब्यापादो पहानं अब्भत्थं गच्छती’ति युज्जति देसना’’ति (नेत्ति. २१).

युत्तिनिद्धारणेन ¶ अयथासभावतो विवेचित्वा यथासभावतो धम्मस्स गहणकारणानि कथेन्तो ‘‘महन्ता अपदिसितब्बा एतेसन्ति महापदेसा’’ति इममत्थमाह ‘‘बुद्धादयो’’तिआदिना. पतिट्ठानानीति पतिट्ठानसाधनानि. सेसेसूति सङ्घापदेसादीसु. पठमत्थो एव हि इध पाळि आगतो, विनिच्छयने कारणं महापदेसोति अधिप्पायो. सुत्तोतरणादीति आदिसद्देन सुत्तानोतरणादिपि सङ्गय्हति. सुत्तोतरणविनयसन्दस्सनानि हि केनचि यथाभतस्स गन्थस्स ‘‘धम्मो’’ति विनिच्छयने कारणं. सुत्तानोतरणविनयासन्दस्सनानि ‘‘अधम्मो’’ति. यदि एवन्ति यदि यथाभतस्स गन्थस्स सुत्तविनयेहि संसन्दनं ‘‘धम्मो’’ति, असंसन्दनं ‘‘अधम्मो’’ति विनिच्छयकारणं, एवं सन्तेति अत्थो. सम्पदीयति ञापीयति धम्मो एतेहीति सम्पदाया, अक्खातारो.

विनीयन्ति रागादयो एतेनाति विनयो, कारणं. तेनाह ‘‘रागादिवूपसमनिमित्त’’न्ति. किं पन तं? साधिट्ठानसमथविपस्सनादिधम्मा. ये परतो ‘‘तेचत्तालीसं बोधङ्गमा धम्मा’’ति (नेत्ति. २४) वक्खति.

विनयमहापदेसा कप्पियानुलोमतो अनुलोमकप्पियं नाम, तंसदिसताय सुत्तन्तमहापदेसापि अनुलोमकप्पियन्ति अट्ठकथावोहारो. तेन वुत्तं ‘‘यं अनुलोमकप्पियन्ति वुच्चती’’ति.

यदिपि तत्थ तत्थ पवत्ता भगवतो पकिण्णकदेसना अट्ठकथा, सा पन धम्मसङ्गाहकेहि तेपिटकं बुद्धवचनं सङ्गायित्वा तस्स अत्थसंवण्णनानुरूपेन वाचनामग्गं आरोपितत्ता आचरियवादो नाम. तेन वुत्तं ‘‘आचरियवादो नाम अट्ठकथा’’ति. तिस्सोपि सङ्गीतियो आरुळ्हो एव हि बुद्धवचनस्स अत्थसंवण्णनाभूतो कथामग्गो पच्छा तम्बपण्णियेहि महाथेरेहि सीहळभासाय ठपितो. अत्तनोमति थेरवादो. समेन्तमेव गहेतब्बन्ति यथा पाळिया संसन्दति ¶ , एवं महापदेसतो अत्था उद्धरितब्बाति दस्सेति. पमादपाठवसेन आचरियवादस्स कदाचि पाळिया असंसन्दनापि सिया, सो न गहेतब्बोति दस्सेन्तो आह – ‘‘सुत्तेन समेन्तो एव गहेतब्बो’’ति.

चतूहि महापदेसेहि युज्जतीति चतूहि महापदेसेहि न विरुज्झति. इदानि तं अविरुज्झनाकारं दस्सेन्तो ‘‘येन येना’’तिआदि वुत्तं. सुत्तोतरणादि एव हेत्थ कारणं. तस्स च अनेकाकारताय ‘‘पकारेना’’ति वुत्तो. संवण्णियमाने सुत्ते संवण्णनावसेन गहेतब्बन्ति ¶ सम्बन्धो. आभतेनाति आनीतेन. सुत्ततोति सुत्तन्तरतो. अयञ्हेत्थ अत्थो – केनचि पसङ्गेन सुत्तन्तरतो उद्धरित्वा आनीतेन सुत्तपदेन सुत्तोतरणादिना, कारणप्पकारेन च चतुमहापदेसाविरोधेन संवण्णियमाने सुत्ते संवण्णनावसेन अत्थजातं गहेतब्बन्ति. तेनाह ‘‘तेन…पे… कातब्बा’’ति. तत्थ युत्तिहारयोजना कातब्बाति युत्तिनिद्धारणवसेन अयं युत्तिहारो योजेतब्बो. अथ वा युत्तिहारयोजना कातब्बाति इमिना हारेन वक्खमाननयेन युत्तिगवेसनं कत्वा ताय युत्तिया सब्बहारयोजना कातब्बाति अत्थो. लक्खणञ्हेतं युत्तिगवेसनाय, यदिदं युत्तिहारो. तेनाह ‘‘सब्बेसं हारानं, या भूमी, यो च गोचरो तेसं. ‘‘युत्तायुत्तपरिक्खा’’ति (नेत्ति. ४), ‘‘इमाय युत्तिया अञ्ञमञ्ञेहि कारणेहि गवेसितब्ब’’न्ति (नेत्ति. २०) च.

१९. यदि वा सब्बानि पदानि एकं अत्थं अभिवदन्तीति योजना.

२०. जरायं ठितस्स अञ्ञथत्तन्ति ठितस्स यं अञ्ञथत्तं अञ्ञथाभावो, अयं जरा नाम. खणिकमरणं खणिकनिरोधो. समुच्छेदमरणं खीणासवानं खन्धपरिनिब्बानं.

केवलस्साति जराय अमिस्सस्स. अञ्ञाव जरा, अञ्ञं मरणन्ति ‘‘पटिञ्ञातस्स केवलस्स मरणस्स दिट्ठत्ता’’ति हेतु. यथा तं देवानन्ति सदिसूदाहरणं, विसदिसूदाहरणं पन इद्धिपादादयो, अन्वयब्यतिरेका गहेत्वा योजेतब्बा.

तेहीति ¶ जरामरणेहि.

‘‘जीरणभिज्जनसभावा’’ति इमिना लेसेन तण्हाजरामरणानं अनञ्ञत्तं योजेति. यदिपि ‘‘अञ्ञा तण्हा, अञ्ञा जरा, अञ्ञं मरण’’न्ति सिद्धोवायमत्थो, यं सन्धाय वुत्तं ‘‘न इद’’न्तिआदि, तथापि सक्कुणेय्यपरिहारायं चोदनाति अज्झारुळ्हं तत्थ दोसं दस्सेतुं ‘‘यदि च यथा जरामरण’’न्ति पाळिपवत्तानि दस्सेन्तो ‘‘यदि…पे… दस्सेती’’ति आह. भावोति अधिप्पायो. एतेसन्ति तण्हाजरामरणानं.

‘‘इमाय युत्तिया अञ्ञमञ्ञेहि कारणेहि गवेसितब्ब’’न्ति च केचि पठन्ति, ब्यञ्जनतोपि गवेसितब्बं, अञ्ञत्थ अत्थतो अञ्ञत्थम्पीति अधिप्पायो. तमेव ब्यञ्जनतो अञ्ञत्थं दस्सेतुं पाळियं ‘‘सल्लोति वा’’तिआदि वुत्तं. इमेसन्ति सल्लधूपायनानं. इच्छाविपरियायेति ¶ इच्छितालाभे, अप्पच्चयसमवाये वा. इदम्पि समत्थनं होति यथाधिप्पेतस्स अञ्ञत्थस्स ब्यतिरेकदस्सनभावतो. जरामरणविपरियायेति जरामरणे असति. न हि यथाधिप्पेतजरामरणाभावे तण्हा न होतीति.

द्विधा वुत्ताति द्विप्पकारेन वुत्ता, द्विक्खत्तुं वा वुत्ता. यं इदं…पे… आरम्मणकरणवसेन वा अभिलपनन्ति एवं किरियापरामसनं योजेतब्बन्ति वेदितब्बं. विसेसोति अयं एतासं इच्छातण्हानं पकतिसङ्खातो विसेसो. ‘‘द्वीहि नामेही’’तिपि पाळि. यदिपि एवन्ति कामं विसयविसेसेसु एवं यथावुत्तअवत्थाविसेसेन इच्छातण्हानं अत्थि काचि भेदमत्ताति अत्थो. सभावतो पन भेदो नत्थीति दस्सेन्तो ‘‘तथापी’’ति आह.

इच्छन्तीति कामेन्ति. तण्हायना पातुकामता. सन्तापनट्ठेनाति परिदहनभावेन. आकड्ढनट्ठेनाति अवहरणट्ठेन. सरितानीति रागवसेन अल्लानि. तंसम्पयुत्तपीतिवसेन सिनिद्धानि सिनेहितानि. विसत्तिकाति वित्थता रूपादीसु तेभूमकधम्मेसु ब्यापनवसेन. विसटाति पुरिमवेवचनमेव त-कारस्स ट-कारं कत्वा वुत्तं. विसालाति विपुला. विसक्कतीति परिसक्कति सहति. रत्तो हि रागवत्थुना पादेन ताळियमानोपि सहति. ‘‘ओसक्कनं, विप्फन्दनं वा विसक्कन’’न्ति वदन्ति. अनिच्चादिकं निच्चादितो ¶ गण्हन्ती विसंवादिका होति. विसंहरतीति तथा तथा कामेसु आनिसंसं दस्सेन्ती विविधेहि आकारेहि नेक्खम्माभिमुखप्पवत्तितो चित्तं संहरति संखिपति. विसं वा दुक्खं, तं हरति, वहतीति अत्थो. दुक्खनिब्बत्तकस्स कम्मस्स हेतुभावतो विसमूला, विसं वा दुक्खादिभेदा वेदना मूलं एतायाति विसमूला, दुक्खसमुदयत्ता विसं फलं एतिस्साति विसफला. रूपादिदुक्खस्सेव परिभोगो एताय, न अमतस्साति विसपरिभोगा. सब्बत्थ निरुत्तिवसेन पदसिद्धि वेदितब्बा. यो पनेत्थ पधानो अत्थो, तं दस्सेतुं पुन ‘‘विसता वा पना’’तिआदि वुत्तं.

सिनेहनं पेमकरणं. बन्धनट्ठेनाति संयोजनट्ठेन. आसीसनट्ठेनाति इच्छनट्ठेन. अभिनन्दनट्ठेनाति अस्सादनट्ठेन, सम्पटिच्छनट्ठेन वा.

२१. अनभिरतीति उक्कण्ठा. ञाणनिब्बिदाति निब्बिदानुपस्सना. यथा च दुक्खू…पे… चारेसु युत्ति वुत्ताति योजना.

सुखापटिपदादन्धाभिञ्ञा ¶ सुखापटिपदाखिप्पाभिञ्ञा सुखापटिपदादयो. यो दुक्खाय पटिपदाय विसेसं अधिगन्तुं भब्बो, तस्स सुखापटिपदायोग्यस्स विय करियमाना धम्मदेसना विसेसावहा न होति, तस्मा सा न युत्ताति इममत्थं दस्सेति ‘‘रागचरितो’’तिआदिना. रागचरितस्स तथा तथा कामानं आदीनवं, ओकारं, संकिलेसं, नेक्खम्मे आनिसंसञ्च अविभावेत्वा आदितो विपस्सनाकथाव करियमाना न विसेसावहा होति आसयस्स असोधितत्ताति एतमत्थं दस्सेन्तो पाळियं ‘‘विपस्सना…पे… देसना’’ति आहाति वेदितब्बं. सेसपदेसुपीति यथा ‘‘रागचरितस्सा’’तिआदिना रागचरितकोट्ठासवसेन पाळियं देसनाय अयुत्ति वुत्ता, इमिना नयेन सेसपदेसुपि दोसचरितकोट्ठासादीसुपि ‘‘दोसचरितस्स पुग्गलस्स असुभं देसेय्या’’तिआदिना पाळियं अवुत्तोपि यथासम्भवमत्थो निद्धारेत्वा वत्तब्बो. कस्मा पन युत्तिहारे अयुत्तिनिद्धारणा कताति चोदनं मनसि कत्वा आह ‘‘एत्थ चा’’तिआदि. सेसेसुपि एसेव नयोति सेसेसुपि दोसचरितादिवसेन निद्धारितेसु अयुत्तिगवेसनेसु अयमेव उपायो. अनुलोमप्पहान’’न्तिपि पाळि, सो एवत्थो.

‘‘यावतिका ¶ ञाणस्स भूमी’’ति एतेन युत्तिहारस्स महाविसयतं दस्सेति. कस्मा पनायं महाविसयोति? युत्तिविचारभावतो, संवण्णेतब्बस्स च धम्मस्स नानानयनिपुणादिगुणविसेसयोगतोति दस्सेन्तो ‘‘तं किस्स हेतू’’ति आह.

अपरभागेति पच्छाभागे. मेत्ताविहारिभागस्स अपरिहीनतावचनतो अयोगो वुत्तो. तेनाह ‘‘सतो’’ति. यथावुत्तकारणतो एवाति पटिपक्खत्ता एव.

पहानेकट्ठभावतो दिट्ठिमञ्ञितस्स. आदीनवदस्सनेन वितक्कं जिगुच्छन्ता दुतियज्झानस्स आसन्नउपचारज्झानधम्मापि वितक्कारम्मणा न होन्ति, पगेव दुतियज्झानधम्माति अधिप्पायेनाह ‘‘आरम्मणकरणत्थो हेत्थ सहगतसद्दो’’ति.

एवं युत्तिहारलक्खणं आगमतो युत्तायुत्तविचारं दस्सेत्वा इदानि आगमानुगताय युत्तियापि तं दस्सेतुं गुणमुखेन दोसविभजनं विभजन्तो ‘‘अपिचेत्था’’तिआदिमाह. तं उत्तानत्थमेव.

युत्तिहारविभङ्गवण्णना निट्ठिता.

४. पदट्ठानहारविभङ्गवण्णना

२२. तेसं ¶ तेसन्ति अनवसेसपरियादानं, तेन ये सुत्ते वुत्ता च धम्मा, ये च तेसं कारणभूतं, तेसं सब्बेसम्पीति वुत्तं होति. सब्बधम्मयाथावअसम्पटिवेधोति इममत्थं दस्सेतुं ‘‘कत्थ पन सो’’तिआदि वुत्तं.

पियायितब्बजातियन्ति पेमनीयसभावं. मिच्छापटिपदाति पमादापत्ति, मिच्छाभिनिवेसो वा. एकवारं उप्पन्नापि पाणातिपातचेतना वेरप्पसवनतो दोसस्स, एकवारं उप्पन्नापि पमादापत्ति, मिच्छाभिनिवेसो वा मोहस्स उप्पत्तिकारणन्ति पाळियं अवुत्तम्पि नयतो निद्धारेतब्बन्ति दस्सेन्तो ‘‘दोसस्स…पे… इमिनाव नयेन अत्थो वेदितब्बो’’ति आह. निमित्तत्थग्गहणलक्खणं वण्णसण्ठानं, अनुब्यञ्जनत्थग्गहणलक्खणं अनुब्यञ्जनन्ति ‘‘निमित्तानुब्यञ्जनग्गहणलक्खणा’’ति वुत्तं. तत्थ तत्थ निमित्तं इत्थिपुरिसनिमित्तं. अनुब्यञ्जनं हत्थपादहसितकथितादि. फस्सो पच्चयो एतिस्साति ¶ फस्सपच्चया, तंभावो फस्सपच्चयता. अस्सादेति एतायाति अस्सादो, तण्हा.

वत्थूनि ञेय्यधम्मोति आह ‘‘वत्थुअविप्पटिपत्ति विसयसभावपटिवेधो’’ति. इधाधिप्पेतं सम्मापटिपत्तिं दस्सेतुं ‘‘सीलसमाधिसम्पदान’’न्ति वुत्तं. एकदेसुपलक्खणवसेन, वण्णगन्धरागिसप्पायवसेन वा पाळियं ‘‘विनीलकविपुब्बकग्गहणलक्खणा असुभसञ्ञा’’ति वत्वा ‘‘तस्सा निब्बिदापदट्ठान’’न्ति वुत्तं निब्बिदं दस्सेन्तो ‘‘निब्बिदा’’तिआदि वुत्तं. तत्थ परितस्सनतो विसेसेतुं ‘‘ञाणेना’’ति विसेसितं. तथा पवत्तन्ति निब्बिदनाकारेन पवत्तनं.

योनिसो उम्मुज्जन्तिया विदेहरञ्ञो धीताय रुचाय जातिस्सरञाणं कम्मस्सकतञ्ञाणस्स कारणं अहोसि, न पन असप्पुरिसूपनिस्सयतो, अयोनिसो उम्मुज्जन्तस्स तस्सेव रञ्ञो सेनापतिनो अलातस्स बीजकस्स दासस्साति इममत्थं दस्सेन्तो ‘‘इमस्स च…पे… उदाहरितब्बो’’ति आह. सोति पसादो. अवत्थाविसेसोति सम्पयुत्तधम्मानं अनाविलभावलक्खितो अवत्थाभेदो. आयतनगतोति ठानगतो, रतनत्तयविसयोति अत्थो. ‘‘कायो’’तिआदिना अवत्थाविसेसेन विना सभावसिद्धमेव पदट्ठानं दस्सेति.

इमस्मिं च ठाने पाळियं पुब्बे येसं धम्मानं पदट्ठानं निद्धारितं, ते धम्मा येसं धम्मानं ¶ पदट्ठानानि होन्ति, ते दस्सेतुं ‘‘अपरो नयो’’तिआदि आरद्धन्ति वेदितब्बं. अस्सादमनसिकारो अयोनिसोमनसिकारलक्खणो वुत्तो निदस्सनमत्तअत्थोति वेदितब्बो, येभुय्येन सत्तानं लोभवसेन अयोनिसोमनसिकारा संवत्तन्तीत्ति दस्सनत्थं वा एवं वुत्तं. उपपत्ति एव ओपपच्चयं, तस्स भावो ओपपच्चयिकन्ति आह ‘‘उपपत्तिभवभावेना’’ति. ववत्थितभावोति ववत्थितभावो रूपस्स दस्सनादिपटिनियतारम्मणकिच्चता. भवस्स अङ्गानीति भवस्स कारणानि. दुतिये अङ्गानीति अवयवा, कम्मवट्टम्पि वा कारणङ्गभावेन योजेतब्बं.

कम्मट्ठानस्साति भावनाय ब्रूहना वड्ढना. तेसूति तित्थञ्ञुतादीसु. कल्याणमित्तस्स सम्मदेव पयिरुपासनायपीति तं निस्साय लद्धेन सब्बाय धम्मस्सवनेन धम्मुपसंहितं पामोज्जं होतीति तित्थञ्ञुता पीतञ्ञुताय पदट्ठानं. एवं याय विमुत्तिया सति विमुत्तिञाणदस्सनं होतीति ¶ सा तस्स पदट्ठानन्ति अयमत्थो पाकटोति आह ‘‘पुरिमानं…पे… सुविञ्ञेय्यो एवा’’ति. सह अधिट्ठानेनाति ञातपरिञ्ञाय सद्धिं. ञातपरिञ्ञा हि तीरणपरिञ्ञाय अधिट्ठानं. सेसं सुविञ्ञेय्यमेव.

पदट्ठानहारविभङ्गवण्णना निट्ठिता.

५. लक्खणहारविभङ्गवण्णना

२३. ‘‘लक्खणहारस्स विसयं पुच्छती’’ति वुत्तं, ‘‘को पन तस्स विसयो’’ति वुत्ते समानलक्खणा अवुत्तधम्मा. कायानुपस्सनाय समारद्धाय वेदनानुपस्सनादयो सुखेनेव सिज्झन्तीति तब्बचनेन वेदनागतासतिआदीनं वुत्तभावो दस्सितो सतिपट्ठानभावेन एकलक्खणत्ताति कायानुपस्सनासतिपट्ठानस्स सद्धानुग्गहितानि वीरियसतिसमाधिपञ्ञिन्द्रियानि साधनं, एवं इतरेसम्पीति कत्वा वुत्तं. अयं अत्थो अट्ठकथायमेव (नेत्ति. अट्ठ. ५१) परतो आगमिस्सति. इमिना नयेन सेसेसुपि एकलक्खणतानिद्देसेसु अत्थो वेदितब्बो. परतोति चतुब्यूहहारवण्णनायं (नेत्ति. अट्ठ. २०).

असम्मिस्सतोति वेदनादयोपि एत्थ सिता एत्थ पटिसन्धाति काये वेदनादिअनुपस्सनापसङ्गेपि आपन्ने तदसम्मिस्सतोति अत्थो.

अवयविगाहसमञ्ञातिधावनसारादानाभिनिवेसनिसेधनत्थं ¶ कायं अङ्गपच्चङ्गेहि, तानि च केसादीहि, केसादिके च भूतुपादायरूपेहि विनिब्भुजितुं ‘‘तथा न काये’’तिआदिमाह. पासादादिनगरावयवसमूहे अवयविवादिनोपि अवयविगाहणं करोन्ति. नगरं नाम कोचि अत्थो अत्थीति पन केसञ्चि समञ्ञातिधावनं सियाति इत्थिपुरिसादिसमञ्ञातिधावने नगरनिदस्सनं वुत्तं. अञ्ञो कोचि सत्तादिको. यं पस्सति इत्थिं, पुरिसं वा. ननु चक्खुना इत्थिपुरिसदस्सनं नत्थीति? सच्चं नत्थि, ‘‘इत्थिं पस्सामि, पुरिसं पस्सामी’’ति पन पवत्तसमञ्ञावसेन ‘‘यं पस्सती’’ति वुत्तं. मिच्छादस्सनेन वा दिट्ठिया यं पस्सति, न तं दिट्ठं रूपायतनं होति, रूपायतनं वा तं न होतीति अत्थो. अथ वा तं कोसादिभूतुपादायसमूहसङ्खातं ¶ दिट्ठं न होति, दिट्ठं वा यथावुत्तं न होतीति अत्थो. यं दिट्ठं तं न पस्सतीति यं रूपायतनं, केसादिभूतुपादायसमूहसङ्खातं वा दिट्ठं, तं पञ्ञाचक्खुना भूततो न पस्सतीति अत्थो.

न अञ्ञधम्मानुपस्सीति न अञ्ञसभावानुपस्सी, असुभादितो अञ्ञाकारानुपस्सी न होतीति वुत्तं होति.

पथवीकायन्ति केसादिं पथवीधम्मसमूहत्ता ‘‘कायो’’ति वदति, लक्खणपथविमेव वा अनेकभेदभिन्नं सकलसरीरगतं पुब्बापरियभावेन पवत्तमानं समूहवसेन गहेत्वा ‘‘कायो’’ति वदति. एवं अञ्ञत्थापि.

आकारसमूहसङ्खातस्साति अनिच्चतादिआकारसमुदायपरियायस्स.

तीसु भवेसु किलेसेति भवत्तयविसयकिलेसे. सब्बत्थिकन्ति सब्बत्थ लीने, उद्धते च चित्ते इच्छितब्बत्था, सब्बे वा लीने, उद्धते च भावेतब्बा बोज्झङ्गा अत्थिका एतायाति सब्बत्थिका. अन्तो सङ्कोचोति अन्तो ओलीयना, कोसज्जन्ति अत्थो.

२४. गहितेसूति भावनाग्गहणेन गहितेसु, भावितेसूति अत्थो, वचनेन वा गहितेसु. भावनाग्गहणदीपनत्थत्ता पन वचनेन गहणस्स भावनाग्गहणमेत्थ पधानं. यस्स सतिपट्ठाना भाविता, तस्स सम्मप्पधानादयो बोधिपक्खियधम्मा न भाविताति नेतं ठानं विज्जतीति च समानलक्खणतापदेसेन इममत्थं दस्सेतुं पाळियं ‘‘चतूसु सतिपट्ठानेसु भावियमानेसु चत्तारो सम्मप्पधाना भावनापारिपूरिं गच्छन्ती’’तिआदि वुत्तं.

विपल्लासा ¶ पहीयन्ति उजुविपच्चनीकभावतो. ‘‘आहारसमुदया कायस्स समुदयो, फस्ससमुदया वेदनानं समुदयो (सं. नि. ५.४०८), सङ्खारपच्चया विञ्ञाणं, विञ्ञाणपच्चया नामरूप’’न्ति (सं. नि. १.१, ३९; म. नि. ३.१२६; महाव. १; उदा. १; विभ. २२५) वचनतो कायादीनं समुदयभूता कबळीकाराहारफस्समनोसञ्चेतनाविञ्ञाणाहाराकायादीनं परिजाननेन परिञ्ञाता होन्ति तप्पटिपक्खप्पहानतोति दस्सेन्तो ‘‘चत्तारो ¶ आहारा’’तिआदिमाह. सब्बत्थाति ‘‘उपादानेहि अनुपादानो भवती’’ति एवमादीसु.

तत्थ यस्मा पञ्च कामगुणा सविसेसा काये लब्भन्तीति विसेसेन कायो कामुपादानस्स वत्थु, सुखवेदनस्सादवसेन परलोकनिरपेक्खो ‘‘नत्थि दिन्न’’न्तिआदि (दी. नि. १.१७१; म. नि. १.४४५; २.९४-९५, २२५; ३.९१, ११६; सं. नि. ३.२१०; ध. स. १२२१; विभ. ९३८) परामासं उप्पादेतीति दिट्ठुपादानस्स वेदना, चित्ते निच्चग्गहणवसेन सस्सतस्स ‘‘अत्तनो सीलादिवसेन परिसुद्धपरामसनं होती’’ति सीलब्बतुपादानस्स चित्तं, नामरूपपरिच्छेदेन भूतं भूततो अपस्सन्तस्स ‘‘अत्ताभिनिवेसो होती’’ति अत्तवादुपादानस्स धम्मा वत्थु, तस्मा ‘‘चतूसु सतिपट्ठानेसु भावियमानेसु उपादानेहि अनुपादानो भवती’’ति वुत्तं.

यस्मा पन वुत्तनयेनेव कायो कामयोगस्स वत्थु, भवेसु सुखग्गहणवसेन भवस्सादो होतीति भवयोगस्स वेदना, सन्ततिघनग्गहणवसेन चित्ते अत्ताभिनिवेसो होतीति दिट्ठियोगस्सचित्तं, धम्मविनिब्भोगस्स दुक्करत्ता, धम्मानं धम्ममत्तताय च दुप्पटिविज्झत्ता सम्मोहो होतीति अविज्जायोगस्स धम्मा, वत्थु, तस्मा चतुसतिपट्ठानभावनाय तेसु तेसं पहानसिद्धितो योगेहि विसंयुत्तता वुत्ता. एतेनेव आसवेहि अनासवता, ओघेहि नित्तिण्णता च संवण्णिता होति कामरागादीनं एव कामयोगकामासवकामोघादिभावतो.

वुत्तनयेनेव कायो अभिज्झाकायगन्थस्स वत्थु, ‘‘दुक्खाय वेदनाय पटिघानुसयो अनुसेती’’ति (म. नि. १.४६५) दुक्खदुक्खविपरिणामदुक्खसङ्खारदुक्खभूता वेदना विसेसेन ब्यापादकायगन्थस्स वत्थु, चित्ते निच्चाभिनिवेसवसेन सस्सतस्स ‘‘अत्तनो सीलेन सुद्धी’’तिआदिपरामसनं होतीति सीलब्बतपरामासस्स चित्तं वत्थु, सप्पच्चयनामरूपदस्सनाभावतो भवविभवदिट्ठिसङ्खातो इदंसच्चाभिनिवेसो होतीति तस्स धम्मा वत्थूति चतुसतिपट्ठानाति योजेतब्बं.

वुत्तनयेनेव ¶ ¶ विसेसतो कायो रागसल्लस्स वत्थु, वेदना दोससल्लस्स, ‘‘चित्तं निच्चग्गहणवसेन अत्ताभिनिवेसं अत्तानं सेय्यादितो दहती’’ति चित्तं मानसल्लस्स, वुत्तनयेनेव धम्मा मोहसल्लस्स वत्थूति चतुसतिपट्ठानाति योजेतब्बं.

यस्मा पन कायानुपस्सनादीहि कायवेदनाचित्तधम्मेसु परिञ्ञातेसु रूपवेदनासञ्ञासङ्खारक्खन्धा परिञ्ञाता होन्ति, चित्ते हि परिञ्ञाते सञ्ञापि परिञ्ञाताव होति, तस्मा ‘‘विञ्ञाणट्ठितियो चस्स परिञ्ञं गच्छन्ती’’ति वुत्तं.

तथा विसेसतो काये सापेक्खा छन्दागतिं गच्छतीति कायो छन्दागतिया वत्थु, वुत्तनयेनेव वेदना ब्यापादस्स निमित्तन्ति सा दोसागतिया वत्थु, सन्ततिघनग्गहणवसेन सरागादिचित्ते सम्मोहो होतीति मोहागतिया चित्तं, धम्मसभावानवबोधेन भयं होतीति भयागतिया धम्मा वत्थूति चतुसतिपट्ठानभावनाय अगतिगमनप्पहानं होतीति आह ‘‘अगतिगमनेहि च न अगतिं गच्छती’’ति.

‘‘अकुसलस्स सोमनस्सस्स वसेना’’ति इदं ‘‘अयम्पि अत्थो सम्भवती’’ति कत्वा वुत्तं. ‘‘सुखाय वेदनाय रागानुसयो अनुसेती’’ति (म. नि. १.४६५) पन वचनतो सुखवेदनाग्गहणेन तत्थानुसयनेन समुदयसच्चं देसितन्ति वेदितब्बं. देसितं दुक्खं अरियसच्चन्ति दुक्खदुक्खग्गहणेन सातिसयं दुक्खं अरियसच्चं पकासितं होतीति पाळियं ‘‘दुक्खं अरियसच्चं देसित’’न्ति वुत्तं. सहचरणादीसु यं वत्तब्बं, तं हेट्ठा निद्देसवारवण्णनायं (नेत्ति. अट्ठ. ५ आदयो) वुत्तं.

लक्खणहारविभङ्गवण्णना निट्ठिता.

६. चतुब्यूहहारविभङ्गवण्णना

२५. हारानन्ति निद्धारणे सामिवचनं. हारेसु इमस्स चतुब्यूहहारस्स विसेसतो सुत्तस्स ब्यञ्जनविचयभावतोति योजना. तेन वुत्तं ‘‘ब्यञ्जन…पे… दस्सेती’’ति. यायाति निरुत्तिया.

यथारहन्ति ¶ ¶ संवण्णियमाने सुत्ते यं यं अरहति निब्बचनं वत्तुं, तंतंलोकसमञ्ञानुरोधेनेव. पुब्बभागपटिपदा सम्पादेत्वा पच्छा सच्चाभिसमयं पापुणातीति आह ‘‘सम्मुति…पे… होती’’ति, तंतंपञ्ञत्तिग्गहणमुखेन परमत्थग्गहणं होतीति एवं वा इमिना सम्बन्धो.

यमिदं अनिन्द्रियबद्धरूपसन्तानं सन्धाय ‘‘उभयमन्तरेना’’ति इध वुत्तं. ओतरणहारे (नेत्ति. अट्ठ. ४२ आदयो) पनस्स द्वारप्पवत्तफस्सादिधम्मे सन्धाय वुत्तभावं दस्सेतुं ‘‘उभयमन्तरेनाति फस्ससमुदितेसु धम्मेसू’’ति अत्थो वुत्तो. अट्ठकथाचरिया पनाहु ‘‘अन्तरेनाति वचनं पन विकप्पन्तरदीपन’’न्ति. तस्मा अयमेत्थ अत्थो – न इमं लोकं, न हुरं लोकं, अथ खो उभयमन्तरेनाति. अपरो विकप्पो – उभयमन्तरेनाति वा वचनं विकप्पन्तराभावदीपनं. तस्सत्थो – न इमं लोकं, न हुरं लोकं निस्साय झायति झायी, उभयमन्तरेन पन अञ्ञं ठानं अत्थीति.

येपि च ‘‘अन्तरापरिनिब्बायी, सम्भवेसी’’ति च इमेसं सुत्तपदानं अत्थं मिच्छा गहेत्वा अत्थि एव अन्तराभवोति वदन्ति, तेपि यस्मा अविहादीसु तत्थ तत्थ आयुवेमज्झं अनतिक्कमित्वा अन्तरा अग्गमग्गाधिगमेन अनवसेसकिलेसपरिनिब्बानेन परिनिब्बायन्तीति अन्तरापरिनिब्बायी, न अन्तराभवभूतोति पुरिमस्स सुत्तपदस्स अत्थो. पच्छिमस्स च ये भूता एव, न पुन भविस्सन्ति, ते हि (कथा. अनुटी. ५०७) खीणासवा, पुरिमपदेहि ‘‘भूता’’ति वुत्ता. तब्बिपरीतताय सम्भवं एसन्तीति सम्भवेसिनो. अप्पहीनभवसंयोजनत्ता सेक्खा, पुथुज्जना च. चतूसु वा योनीसु अण्डजजलाबुजसत्ता याव अण्डकोसं, वत्थिकोसञ्च न भिन्दन्ति, ताव सम्भवेसी नाम. अण्डकोसतो, वत्थिकोसतो च बहि निक्खन्ता भूता नाम. संसेदजओपपातिका च पठमचित्तक्खणे सम्भवेसी नाम, दुतियचित्तक्खणतो पट्ठाय भूता नाम. येन वा इरियापथेन जायन्ति, याव ततो अञ्ञं न पापुणन्ति, ताव सम्भवेसी, ततो परं भूताति अत्थो, तस्मा नत्थीति पटिक्खिपितब्बं. सति हि उजुके पाळिअनुगते अत्थे किं अनिद्धारितसामत्थियेन अन्तराभवेन अत्तभावपरिकप्पितेन पयोजनन्ति.

यं ¶ पन ये ‘‘सन्तानवसेन पवत्तमानानं धम्मानं अविच्छेदेन देसन्तरेसु पातुभावो दिट्ठो. यथा तं वीहिआदिअविञ्ञाणकसन्ताने, एवं सविञ्ञाणकसन्तानेपि अविच्छेदेन देसन्तरेसु पातुभावेन भवितब्बं. अयञ्च नयो सति अन्तराभवे युज्जति, नाञ्ञथा’’ति युत्तिं ¶ वदन्ति. तेहि इद्धिमतो चेतोवसिप्पत्तस्स चित्तानुगतिकं कायं अधिट्ठहन्तस्स खणेन ब्रह्मलोकतो इधूपसङ्कमने, इतो वा ब्रह्मलोकगमने युत्ति वत्तब्बा. यदि सब्बत्थेव विच्छिन्नदेसे धम्मानं पवत्ति न इच्छिता, यदिपि सिया ‘‘इद्धिविसयो अचिन्तेय्यो’’ति, तं इधापि समानं ‘‘कम्मविपाको अचिन्तेय्यो’’ति वचनतो, तस्मा तं तेसं मतिमत्तमेव. अचिन्तेय्यसभावा हि सभावधम्मा, ते कत्थचि पच्चयविसेसेन विच्छिन्नदेसे पातुभवन्ति, कत्थचि अविच्छिन्नदेसे च. तथा हि मुखघोसादीहि अञ्ञस्मिं देसे आदासपब्बतप्पदेसादिके पटिबिम्बपटिघोसादिकं पच्चयुप्पन्नं निब्बत्तमानं दिस्सति, तस्मा न सब्बं सब्बत्थ उपनेतब्बन्ति अयमेत्थ सङ्खेपो. वित्थारतो पन पटिबिम्बस्स उदाहरणभावसाधनादिको अन्तराभवविचारो कथावत्थुप्पकरणस्सटीकायं (कथा. अनुटी. ५०७) गहेतब्बो.

अपरे पन ‘‘इधाति कामभवो, हुरन्ति अरूपभवो, उभयमन्तरेनाति रूपभवो वुत्तो’’ति वदन्ति, ‘‘इधाति पच्चयधम्मा, हुरन्ति पच्चयुप्पन्नधम्मा, उभयमन्तरेनाति पण्णत्तिधम्मा वुत्ता’’ति च वदन्ति, तं सब्बअट्ठकथासु नत्थि, तस्मा वुत्तनयेनेव अत्थो वेदितब्बो. अवसिट्ठं रूपन्ति आपोधातुआकासधातूहि सद्धिं लक्खणरूपानि, ओजञ्च सन्धायाह अनिन्द्रियबद्धरूपस्स अधिप्पेतत्ता. तस्स खीणासवस्स तं निब्बानारम्मणं चित्तं न जानन्ति न ञायन्ति ‘‘झायमाना’’ति वुत्तत्ता. सेसं सुविञ्ञेय्यमेव.

चतुब्यूहहारविभङ्गवण्णना निट्ठिता.

७. आवट्टहारविभङ्गवण्णना

२९. अकुसलानं धम्मानं विद्धंसनसभावत्ता, अकुसलानं वा पजहने कुसलानं सम्पादने पट्ठपनसभावत्ता आरम्भधातु. तथाभूताति सीलादीहि ¶ समङ्गीभूता. कामधातुआदिका तिधातुयोव तेधातु. तस्स अभिभवनतो तेधातुइस्सरो मच्चुराजा. अनादिमतिसंसारे चिरकालं लद्धपतिट्ठापि अचिरकालं भावितेहि कुसलेहि धम्मेहि समुच्छिन्दनीयत्ता अबला किलेसाति वुत्तं ‘‘अबलं दुब्बल’’न्ति. तेनाह ‘‘अबला नं बलीयन्ती’’ति.

इदं वचनं अयं गाथापादो. समाधिस्स पदट्ठानन्ति एत्थ समाधिस्स कारणं समतानुयोगे नियोजनतोति ¶ योजेतब्बं. एस नयो सेसेसुपि. पपञ्चाति रागादयोव. तथा चेव संवण्णितन्ति देसनाय पदट्ठानभावेनेव अत्थसंवण्णना कताति अत्थो.

न्ति तं देसनं. तस्साति सभागादिवसेन आवट्टनस्स. परिपक्कञाणानं विसेसाधिगमाय. लाभविनिच्छयपरिग्गहमच्छरियानीतिआदीसु लाभोति रूपादिआरम्मणप्पटिलाभो. सो परियेसनाय सति होतीति परियेसनाग्गहणेन गहितो. विनिच्छयोति ‘‘एत्तकं मे रूपारम्मणत्थाय भविस्सति, एत्तकं सद्दादिआरम्मणत्थाय, एत्तकं मय्हं, एत्तकं परस्स, एत्तकं परिभुञ्जिस्सामि, एत्तकं निदहिस्सामी’’ति एवं पवत्तो वितक्को विनिच्छयो. सो लापितहेतुकत्ता परियेसनमूलकताय परियेसनाग्गहणेनेव गहितो, तथा परिग्गहमच्छरियानि. तत्थ परिग्गहो ‘‘मम इद’’न्ति परिग्गण्हनं. मच्छरियं ‘‘मय्हेव होतू’’ति परेहि साधारणभावासहनं. तेनेवस्स पोराणा एवं वचनत्थं वदन्ति ‘‘मय्हेविदमच्छरियं होतु, मा अञ्ञेसं अच्छरियं होतूति पवत्तत्ता मच्छरियन्ति वुच्चती’’ति (दी. नि. अट्ठ. २.१०३; अ. नि. अट्ठ. ३.९.२३). परिभोगत्थानं पन विनिच्छयादीनं परिभोगन्तोगधता वेदितब्बा. छन्दरागो दुब्बलरागो. अज्झोसानं ‘‘मम इद’’न्ति तण्हावसेन बलवसन्निट्ठानन्ति आह ‘‘छन्दरागअज्झोसाना तण्हा एवा’’ति. आरक्खनिमित्तं द्वारपिदहनमञ्जूसागोपनादिना सुट्ठु रक्खणनिमित्तं. पापानि करोन्तो परिभोगनिमित्तं रत्तो गिद्धो गधितो मुच्छितो हुत्वा मिगोव परिभुञ्जननिमित्तं पमादं आपज्जतीति एवं परियेनारक्खा परिभोगनिमित्तं. पमादो तिविधो तण्हाय वसेन कथितोति दस्सेन्तो ‘‘तिविधो तण्हायाति वुत्त’’न्ति आह.

अविसेसेन वुत्तन्ति ‘‘कतमेन उपादानेन सउपादाना’’ति विभागेन पुच्छित्वापि ‘‘अविज्जाय च तण्हाय चा’’ति अविनिब्भुजित्वा वुत्तं. तण्हञ्च अविज्जञ्च चतुरुपादानं ¶ वसेनाति कामुपादानादीनं चतुन्नं उपादानानं वसेन विभजित्वा खन्धानं दुक्खभावेन दुक्खसच्चभावेन सह परिञ्ञेय्यभावं, उपादानानं समुदयभावेन समुदयसच्चभावेन सह पहातब्बभावं दस्सेतीति योजना.

३०. ‘‘यो’’तिआदिना वुत्तो तिविधो पमादो परियेसति, आरक्खणञ्च करोति, परिभोगनिमित्तञ्चाति सम्बन्धो. पमादो हि पमज्जन्तस्स पुग्गलस्स भोगानं परियेसनाय, आरक्खणाय च हेतुभूतो कत्तुभावेन उपचरितो, परिभोगस्स पन निमित्तं. ‘‘तप्पटिपक्खेना’’ति पदस्स अत्थं विवरति ‘‘अप्पमादानुयोगेना’’ति, तेन समथभावं दस्सेति ¶ . खेपनाति खयपापना. वोदानपक्खविसभागधम्मवसेनाति वोदानपक्खो च सो पमादस्स विसभागधम्मो चाति वोदान…पे… धम्मो, समथो, तस्स वसेन.

समथे सतीति अधिट्ठानभूते झाने सति, तं पादकं कत्वाति अत्थो. या पञ्ञाति नामरूपपरिच्छेदादिवसेन पवत्तपञ्ञा. तेनाह ‘‘अयं विपस्सना’’ति. पहीनेसूति पहीयमानेसु.

वोदानपक्खन्ति आरम्भधातुआदिवोदानपक्खं निक्खिपित्वा. विसभागधम्मवसेनाति पमादवसेनेव. सभागधम्मवसेनाति पुब्बे निक्खित्तस्स आरम्भधातुआदिवोदानधम्मस्स समथादिसभागधम्मवसेन.

पुन अपरियोदापनियं सिखाप्पत्तपरियोदापनं इधाधिप्पेतन्ति आह ‘‘तं पन अरहत्तेन होती’’ति.

मोहसमुट्ठानता वुत्ता ‘‘मोहो एव समुट्ठान’’न्ति कत्वा. अञ्ञथा पिसुणावाचाय दोससमुट्ठानता मुसावादस्स विय मोहसमुट्ठानभावा वत्तब्बा सिया.

कम्मपथभावं पत्तानं, अप्पत्तानञ्च अकुसलधम्मानं ‘‘सब्बपाप’’न्ति पदेन परिग्गहितत्ता वुत्तं ‘‘कम्मपथकम्मविभागेना’’ति.

३१. सेसपदानन्ति ‘‘कुसलस्स उपसम्पदा’’तिआदीनं (दी. नि. २.९०; ध. प. १८३; नेत्ति. ३०, ५०, ११६, १२४; पेटको. २९) गाथाय अवसिट्ठपदानं. यथाधिगतन्ति अत्तना अधिगतप्पकारं, पच्छा भूमिदिसा.

उपरि ¶ यापेन्तीति मनुस्सलोकतो उपरिट्ठिमं देवलोकं गमेन्ति.

३२. यथावुत्तस्स धम्मस्साति सीलस्स च मग्गस्स च. तण्हाविज्जादीनन्ति आदिसद्देन तदेकट्ठकिलेसा गय्हन्ति, तेसं पदट्ठानधम्मा च. समथविपस्सनादीनन्ति आदिसद्देन सामञ्ञफलानं सङ्गहो. यदग्गेन चेत्थ ‘‘निरोधो रक्खती’’ति वुत्तो, तदग्गेन मग्गो रक्खणकिरियाय ¶ करणं वुत्तं ‘‘येन रक्खती’’ति. विसभागधम्मवसेन पुरिमानि सभागधम्मावट्टनवसेन पच्छिमानि सच्चानि निद्धारितानीति योजेतब्बं.

आवट्टहारविभङ्गवण्णना निट्ठिता.

८. विभत्तिहारविभङ्गवण्णना

३३. धम्मेसूति पुञ्ञादिदानादिभेदभिन्नेसु सभावधम्मेसु. तत्थ लब्भमानोति तेसु यथावुत्तेसु धम्मेसु लब्भमानो. भूमिविभागोति कामावचरादिदस्सनादिभूमिप्पभेदो. पदट्ठानविभागोति ते पुञ्ञादिधम्मा येसं पदट्ठानं, तेसं वा ये धम्मा पदट्ठानं, तब्बिभागो. येसं सुत्तानन्ति मूलपदट्ठानभूतानं संकिलेसभागियादीनं चतुन्नं सुत्तानं वसेन. असङ्करववत्थानेन हि एतेसु सुत्तेसु सातिसयं धम्मा विभत्ता नाम होन्ति. तेनाह ‘‘विसेसतो’’ति. यदि एवं कस्मा वासनाभागियनिब्बेधभागियसुत्तानि एवेत्थ गहितानीति? नयिदमेवं निक्खमनपरियोसानभावेन इतरेसम्पि गहितत्ता. यतो हि निस्सटा वासनाभागिया धम्मा, ते संकिलेसभागिया. यंपरियोसाना निब्बेधभागिया धम्मा, ते असेक्खभागियाति द्वयग्गहणेनेव इतरम्पि द्वयं गहितमेव होति. तेनाह ‘‘इमेसं चतुन्नं सुत्तानं देसनाया’’ति. इमानि चत्तारि सुत्तानीति पाळिया, वक्खमानाय देसनाय वा इतरद्वयसङ्गहो दट्ठब्बो, न पटिक्खेपो.

तेनेवाति नियमस्स अकतत्ता, ततो च तेन तन्निस्सितेन च ब्रह्मचारी भवतीति सिद्धं होति. एव-सद्दो वा समुच्चयत्थो दट्ठब्बो. सिया तस्स पटिक्खेपोति तस्स अट्ठसमापत्तिब्रह्मचरियस्स सिया पटिक्खेपो. एवं सति सावसेसा देसना सिया.

तदङ्गादिप्पहानद्वयं ¶ पदट्ठानभूतं इध गणनूपगं न होतीति ‘‘समुच्छेदपटिप्पस्सद्धिप्पहानानं वसेना’’ति वुत्तं. तथा हेत्थ केचि ‘‘तेनेवा’’ति पठन्ति. ‘‘तेनेव ब्रह्मचरियेनाति पठन्ती’’ति इदं ‘‘संवरसीले ठितो’’ति (नेत्ति. ३३) एत्थ वुत्तं पाळिविकप्पं सन्धाय वदति. ‘‘यस्मा…पे… वक्खती’’ति इदं पच्छिमपाठस्सेव युत्तताय कारणवचनं.

कथं ¶ मन्ताति? अनिब्बेधसभावत्ता महग्गतपुञ्ञानं न निब्बेधभागियसुत्तेन सङ्गहो, वासनाभागियत्ता पन वासनाभागियसुत्तेनेव सङ्गहोति. तदुपसङ्गा हि पच्छिमो एव पाठो युत्ततरो. इतरथा सावसेसा देसना भवेय्य. तेनाह ‘‘न हि…पे… देसेती’’ति.

संकिलेसभागियअसेक्खभागियानं परतो वक्खमानत्ता वुत्तं ‘‘वक्खमानानं…पे… वसेना’’ति. ‘‘सब्बतो’’ति इदं पुब्बपरापेक्खं. तस्स परापेक्खताय ‘‘सब्बतोभागेन एकादससु ठानेसु पक्खिपित्वा’’ति अट्ठकथायं योजितं. तत्थ पदादिके विचयहारपदत्थे सन्धाय ‘‘एकादससु ठानेसू’’ति वुत्तं. पुब्बपेक्खताय पन ‘‘सब्बतोभागेन देसनाय फलेना’’तिआदिना योजेतब्बं.

संकिलेसभागियानं तण्हासंकिलेसादिना देसनानयो वेदितब्बो. फलं अपायदुक्खेन मनुस्सेसु दोभग्गियेन. असेक्खभागियानं असेक्खेहि सीलक्खन्धादीहि देसनानयो. फलं अग्गफलेन च अनुपादिसेसाय च निब्बानधातुया वेदितब्बं. इतरेसं पाळियं वुत्तमेव. कामरागब्यापादउद्धम्भागियसंयोजनग्गहणेन संकिलेसभागियानं, विरागग्गहणेन असेक्खग्गहणेनेव च असेक्खभागियानं वक्खमानत्ता वुत्तं ‘‘वक्खमानानं…पे… वसेना’’ति. पदपदत्थविचारयुत्तिनिद्धारणमुखेन धम्मविभत्तिआदिविचारो कातब्बोति दस्सेतुं पाळियं ‘‘विचयेन…पे… तब्बानी’’ति वुत्तन्ति अट्ठकथायं ‘‘विचयेन…पे… दस्सेती’’ति वुत्तं.

३४. एवन्ति इति. धम्मेति वुत्तसभागधम्मे. साधारणासाधारणभावेहीति सामञ्ञविसेसेन विसिट्ठेहि. द्वे धम्मा साधारणाति द्वे इमे धम्मा येहि सभागधम्मा साधारणा नाम होन्ति. कतमे द्वे? नामं, वत्थु च. तत्थ नामं नामपञ्ञत्ति, तंमुखेनेव सद्दतो तदत्थावगमो. सद्देन च सामञ्ञरूपेनेव तथारूपस्स अत्थस्स ¶ गहणं, न विसेसरूपेन, तस्मा सद्दवचनीया अत्था साधारणरूपनामायत्तगहणीयताय नामसाधारणा वुत्ता. वत्थूति पवत्तिट्ठानं. यत्थ हि ये धम्मा पवत्तन्ति, तेसं सब्बेसं ते धम्मा साधारणाति पवत्तिट्ठानसङ्खातानं वत्थूनं साधारणा. यस्मा पनिदं द्वयं तेसं धम्मानं साधारणभावे पकतिभूतं सभावभूतं, तस्मा वुत्तं ‘‘द्वे धम्माति दुवे पकतियो’’ति. एकसन्ततिपतिततायाति समानसन्ततिपवत्तिया. तेनाह ‘‘समानवत्थुका’’ति. दस्सनपहातब्बानञ्हि यथा मिच्छत्तनियतसत्ता पवत्तिट्ठानं, एवं अनियतापीति उभये हि ते समानवत्थुका. एस नयो इतरेसुपि. सक्कायदिट्ठिविचिकिच्छासीलब्बतपरामासा हि भिन्नसभावापेते धम्मा दस्सनेन पहातब्बतं ¶ नातिवत्तन्तीति ते नामसामञ्ञतं पत्ता, रूपरागादयो च भावनाय पहातब्बतन्ति आह ‘‘पहानेकट्ठा नामसाधारणा’’ति. यथा पन ‘‘वत्थूनं साधारणा वत्थुसाधारणा’’ति अयमत्थो लब्भति, एवं ‘‘वत्थुना साधारणा वत्थुसाधारणा’’ति अयम्पि अत्थो लब्भतीति दस्सेन्तो ‘‘सहजेकट्ठा वत्थुसाधारणा’’ति आह. ते हि अञ्ञमञ्ञं फुसनादिसभावतो भिन्नापि यस्मिं पवत्तन्ति, तेन वत्थुना साधारणा नाम होन्ति. एत्थ च लब्भमानम्पि कुसलादिनामसाधारणं अनामसित्वा वत्थुसाधारणा ताव योजिताति वेदितब्बा. पटिपक्खादीहीति आदिसद्देन समानफलतासहब्यतादिके सङ्गण्हाति. सेसपदेसूति ‘‘पुथुज्जनस्सा’’तिआदिवाक्येसु. कथं? तत्थ हि पुथुज्जनस्स, सोतापन्नस्स च सम्भवतो अनागामिनो, अरहतो च असम्भवतोतिआदिना योजेतब्बं.

कथं ते ओधिसो गहिताति केनाकारेन ते ‘‘साधारणा’’ति वुत्तधम्मा भागसो गहिता. ‘‘अमुकस्स, अमुकस्स चा’’ति अयञ्हेत्थ अत्थो. सामञ्ञभूता धम्मा साधारणा नाम, एवं सन्ते कथं तेसं मिच्छत्तनियतानियतादिवसेन विभागेन पवत्तिट्ठानता वुच्चति, न वत्तब्बन्ति अधिप्पायो. अथ विभागेन तं वत्तब्बं, ननु ते साधारणाति न वत्तब्बमेवाति? एवं साधारणाति मिच्छत्तनियतानं, अनियतानन्ति इमेसं उभयेसंयेव ते धम्मा साधारणा. तेनाह – ‘‘न सब्बसत्तानं साधारणताय साधारणा’’ति. ‘‘यस्मा’’तिआदिना तत्थ कारणमाह, तेनेतं दस्सेति ‘‘केचि धम्मा केसञ्चिदेव धम्मानं साधारणा ¶ होन्ति, अञ्ञेसं असाधारणा’’ति. तेनाह ‘‘पटिनियतञ्हि तेसं पवत्तिट्ठान’’न्ति.

इतरथाति अनियतपवत्तिट्ठानताय सब्बेसं साधारणा, असाधारणा वा सियुं, तथा सति. तथा वोहारोति ‘‘साधारणा, असाधारणा’’ति च अयं वोहारो सामञ्ञा एव न भवेय्य. एते एव धम्माति ‘‘साधारणा’’ति वुत्तधम्मा एव. एवन्ति ‘‘मिच्छत्तनियतान’’न्तिआदिना वुत्तप्पकारेन. नियतविसया परिच्छिन्नप्पवत्तिट्ठाना. ‘‘योपी’’तिआदि पुग्गलाधिट्ठानेन वुत्तस्सेवत्थस्स पाकटकरणं. ‘‘न ही’’तिआदिना अन्वयतो, ब्यतिरेकतो च तमेवत्थं विभावेति. सेसेपीति ‘‘भावनापहातब्बा’’ति एवमादिम्हिपि.

पच्चत्तनियतोति पाटिपुग्गलिको. इतरस्साति अपच्चत्तनियतस्स. तथाति असाधारणभावेन. कोचि धम्मो कञ्चि धम्मं उपादाय साधारणोपि समानो तदञ्ञं उपादाय असाधारणोपि होतीति आह ‘‘साधारणाविधुरताया’’ति. तेनाह ‘‘तं तं उपादाया’’तिआदि. तथा हि ‘‘धम्मता’’ति वुत्तपठममग्गट्ठता दीपिता, तादिसानं एव अनेकेसं अरियानं वसेन साधारणाति ¶ . पठमस्साति अट्ठमकस्स. दुतियस्साति सोतापन्नस्स. पुन अट्ठमकस्साति ‘‘अट्ठमकस्स, अनागामिस्स चा’’ति एत्थ वुत्तअट्ठमकस्स. तेनाह ‘‘अनागामिमग्गट्ठस्सा’’ति. अग्गफलट्ठतो पट्ठाय पटिलोमतो गणियमानो पठममग्गट्ठो अट्ठमको, मग्गट्ठताय, पहीयमानकिलेसताय च सब्बेपि मग्गट्ठा अट्ठमका वियाति अट्ठमका, ‘‘एकचित्तक्खणतो उद्धं न तिट्ठतीति अट्ठमको’’ति अपरे निरुत्तिनयेन. ‘‘सेक्खा’’ति नामं साधारणन्ति सम्बन्धो. इतरेसूति ‘‘भब्बाभब्बा’’ति वुत्तेसु अनरियेसु. तेनाह पाळियं ‘‘हीनुक्कट्ठमज्झिमं उपादाया’’ति.

नियामावक्कन्तियाति अवक्कन्तनियामताय. ञाणुत्थरस्साति ञाणाधिकस्स. तथाविधपच्चयसमायोगेति ञाणविसेसपच्चयसमवाये. यथा हि ञाणबलेन दन्धाभिञ्ञता न होति, एवं पटिपदापटिपन्नोपि सुखेन विसोसीयतीति. सा हि सुखापटिपदा खिप्पाभिञ्ञा तंसमङ्गिनो ञाणुत्तरत्ता विपस्सनाय पदट्ठानन्ति वुत्ता.

धम्मतो ¶ अनपेता चिन्ता धम्मचिन्ता, योनिसोमनसिकारेन पवत्तितत्ता धम्मेसु चिन्ता, धम्मो वा ञाणं, तस्मा धम्मावहा चिन्ता धम्मचिन्ता, चिन्तामयञाणस्स हेतुभूता चिन्ताति अत्थो.

पाळियं सुतमयपञ्ञाग्गहणेन ‘‘ये ते धम्मा आदिकल्याणा…पे… तथारूपास्स धम्मा बहुस्सुता होन्ती’’तिआदि (अ. नि. ८.२) सुत्तपदसङ्गहो अत्थो परिग्गहितो, तथा योनिसोमनसिकारग्गहणेन ‘‘सो ‘अनिच्च’न्ति योनिसो मनसि करोती’’तिआदिना वुत्तो उपायमनसिकारो परिग्गहितो. सम्मादिट्ठिग्गहणेन ‘‘सम्मादिट्ठिं भावेति विवेकनिस्सित’’न्तिआदिना वुत्ता सम्मादिट्ठि परिग्गहिताति दस्सेन्तो आह ‘‘अथ खो…पे… दस्सेतु’’न्ति. सेसन्ति ‘‘धम्मस्वाक्खातता’’ति एवमादि.

यस्स च पुब्बे अत्थो न संवण्णितो, तत्थ कल्याणमित्तताय आयतनगतो पसादो, चित्तवूपसमो च फलन्ति दस्सेन्तो ‘‘सप्पुरिस…पे… पदट्ठान’’न्ति आह. अत्तसम्मापणिहितत्ता पापजेगुच्छिनिब्बिदादिबहुलोव होतीति दस्सेन्तो आह ‘‘अत्थ…पे… पदट्ठान’’न्ति. धम्मो स्वाक्खातो आदितो पट्ठाय याव परियोसाना सब्बसम्पत्तिपारिपूरिहेतूति दस्सेन्तो ‘‘धम्मस्वाक्खातता…पे… पदट्ठान’’न्ति आह. कुसलमूलरोपना हि समापत्तिपरियोसानाति ¶ . सङ्घसुट्ठुताय सङ्घस्स सुट्ठुभावाय सङ्घस्स सप्पतिस्सताय ‘‘सुट्ठु, भन्ते’’ति वचनसम्पटिच्छनभावाय. इतरं सुविञ्ञेय्यमेव.

विभत्तिहारविभङ्गवण्णना निट्ठिता.

९. परिवत्तनहारविभङ्गवण्णना

३५. सम्मादिट्ठिस्स…पे… निज्जिण्णा भवतीति एत्थ यथा मग्गसम्मादिट्ठिवसेनत्थो वुत्तो, एवं कम्मस्सकताकम्मपथसम्मादिट्ठीनम्पि वसेन अत्थो लब्भतेव. कम्मपथकथा हेसा. यथावुत्तेनाकारेनाति ‘‘अविमुत्ताव समाना’’ति, ‘‘अविमुत्तिय’’न्ति च वुत्तप्पकारेन. मिच्छाभिनिवेसवसेनाति असम्मासम्बुद्धं एव सम्मासम्बुद्धोति, अनिय्यानिकं एव निय्यानिकोति, असन्तं एव पन सन्तन्ति, अनरियं एव अरियोति विपरीताभिनिवेसवसेन ¶ . मिच्छाधिमोक्खोति अयाथावपसादो, अयाथावसन्निट्ठानं वा. उप्पन्नमोहो मिच्छाविमुत्तिञाणदस्सनन्ति सम्बन्धो.

३६. वादानं वा अनुवादा वादानुवादा, तेसं वादानं उपादाति अत्थो. वादानुपवत्तियोति वादानं दोसानं अनुपवत्तियो.

अन्तद्वयपरिवत्तनन्ति कामसुखअत्तकिलमथानुयोगसङ्खातस्स अन्तद्वयस्स पटिपक्खवसेन परिवत्तनं.

एतेसुपि वारेसूति ‘‘निय्यानिको धम्मो तेसं अधम्मो, सुखो तेसं अधम्मो’’ति च इमेसु वारेसु. वुत्तनयेनाति यदि अत्तपरितापनं अत्तनो दुक्खापनं धम्मो, धम्मस्स पटिविरुद्धो अधम्मो सिया, दुक्खस्स च सुखपटिविरुद्धन्ति झानमग्गफलसुखस्स, अनवज्जपच्चयपरिभोगसुखस्स च तेसं अधम्मभावो आपज्जतीति एवं वत्तब्बा. ‘‘यं यं वा पनातिआदिना’’ति इदं अवसेसपाठामसनं. एत्थ यं यं वा पन धम्मन्ति यं वा तं वा धम्मं, कुसलं वा अकुसलं वा इट्ठं वा अनिट्ठं वाति वुत्तं होति. रोचयति वा उपगच्छति वाति चित्तेन रोचति, दिट्ठिया उपगच्छतीति. तस्स तस्स धम्मस्स यो पटिपक्खोति तस्स तस्स रुचितस्स, उपगतस्स वा धम्मस्स यो पटिपक्खो नाम. स्वस्स अनिट्ठतो अज्झापन्नो भवतीति ¶ यो धम्मो अस्स रुचितस्स, उपगतस्स वा धम्मस्स अनिट्ठतो पच्चनीकतो अब्भुपगतो होति, तेन पटिपक्खेन देसनाय परिवत्तनं परिवत्तनो हारोति अत्थो. तेनाह ‘‘पटिपक्खस्स लक्खणं विभावेती’’ति.

परिवत्तनहारविभङ्गवण्णना निट्ठिता.

१०. वेवचनहारविभङ्गवण्णना

३७. अञ्ञमञ्ञेहीति अञ्ञेहि अञ्ञेहि. आयतिन्ति पच्चवेक्खणकाले. कथञ्चीति येन केनचि पकारेन, पठमं वुत्तेन परियायेन अप्पटिविज्झन्तो अपरेन परियायेन पटिविज्झेय्याति अधिप्पायो. परियायवचनं निद्दिसतीति सम्बन्धो. एवं सब्बत्थ. तस्मिं खणेति परियायवचनस्स वुत्तक्खणे. विक्खित्तचित्तानन्ति आरम्मणन्तरेहि विविधखित्तचित्तानं ¶ . अञ्ञविहितानन्ति अञ्ञं चिन्तेन्तानं. कस्मा पन अञ्ञेन परियायेन तदत्थावबोधनं, ननु तेन वुत्ते दळ्हीकरणं होतीति चोदनं सन्धायाह ‘‘तेनेवा’’तिआदि. तत्थ तदञ्ञेसन्ति तेहि विक्खित्तचित्तादीहि अञ्ञेसं, येहि पठमं वचनं सम्मदेव गहितं. तत्थाति वुत्तवचनेनेव पुनप्पुनं वचने. अधिगतअन्वत्थताय पुनरुत्ति परिवज्जनत्थं विसेसनभावेन ताहि ताहि सञ्ञाहिपि अयम्पि सद्दो इमस्सत्थस्स वाचको, अयम्पि सद्दो इमस्सत्थस्स वाचकोति पञ्ञापनेहि. देसेतब्बस्स तस्स तस्स अत्थस्स अत्तनो चित्ते उपनिबन्धनं ठपनं. तत्थाति धम्मनिरुत्तिपटिसम्भिदायं. बीजावापनं हेतुसम्पादनं.

एवं भगवतो परियायदेसनायं अनेकानि पयोजनानि वत्वा इदानि अत्तनो सम्मासम्बुद्धताय एवं तथागता बुद्धलीलाय अनेकेहि परियायेहि धम्मं देसेन्तीति दस्सेन्तो ‘‘किं बहुना’’तिआदिमाह.

पाळियं ‘‘पिहा नाम या वत्तमानस्स अत्थस्स पत्थना’’ति पच्चुप्पन्नविसयतं दस्सेत्वा पुन अनागतविसयतं दस्सेतुं ‘‘सेय्यतरं वा’’तिआदि वुत्तन्ति ‘‘अनागतपच्चुप्पन्नत्थविसया तण्हा पिहा’’ति आह.

अत्थनिप्फत्तिपटिपालनाति ¶ इमस्मिं वा पदे पिहाय एवत्थवसेन अनागतपच्चुप्पन्नत्थविसयभावदीपनतो.

धम्मारम्मणेनेव सङ्गहिता ‘‘धम्मारम्मण’’न्त्वेव गहणं गता. चतुवीसति पदानीति एत्थ गेहसितदोमनस्सूपविचारादीनं चतुन्नं छक्कानं वसेन चतुवीस कोट्ठासा.

३८. सायेव पत्थनाकारेन धम्मनन्दीतिआदिमाहाति एत्थ अयमत्थो – सा एव पत्थनाकारेन पवत्तिया आसादिपरियायेन वुत्ता तण्हा रूपादिधम्मेसु नन्दनट्ठेन धम्मनन्दी. तेसं एव पियायनट्ठेन धम्मपेमं. गिलित्वा परिनिट्ठपेत्वा ठानतो धम्मज्झोसानन्ति.

इमिनापीति न केवलं ‘‘पञ्ञा पजानना’’तिआदिआवेणिकपरियायेनेव वेवचनं वत्तब्बं, अथ खो इमिना आधिपतेय्यादिसाधारणपरियायेनपि वेवचनं वत्तब्बन्ति अत्थो. इमिनाव नयेनाति एतेन परियायवचनेन ¶ . न हि देसनत्थसाधनं ‘‘इतिपि सो भगवा’’तिआदिपाळिनयदस्सनन्ति दस्सेति. बलनिप्फत्तिगतोतिआदीसु दससु तथागतबलेसु निप्फत्तिं पारिपूरिं गतो. सम्बोधिपहानन्तरायदेसना विसेसचोदनासु विसारदभावसङ्खातानि चत्तारि ञाणानि पत्तो अधिगतोति वेसारज्जप्पत्तो.

लोभज्झासयादिअज्झासयं विसेसेन अतिवत्तोति अज्झासयवीतिवत्तो. अतीतहेतुसङ्खेपादिसङ्खेपविरहितताय असङ्खेपसङ्खातं निब्बानं, अकुप्पधम्मताय गुणेहि वा असङ्खेपं असङ्ख्येय्यं गतो उपगतोति असङ्खेपगतो. सेसं सुविञ्ञेय्यमेव. उद्धेय्यन्ति उद्धरितब्बं.

धम्मानुस्सतियं एवं अत्थो दट्ठब्बोति सम्बन्धो. संसारदुक्खतो पाति, सन्तेन सुखेन रमेति चाति वा पारं.

अभूतपुब्बत्ताति अनुप्पन्नपुब्बत्ता, तेनस्स निच्चतंव विभावेति केनचि देवतोपसग्गादिना अनुपसज्जनीयत्ता अनुपसट्ठत्ता.

‘‘दुप्पस्स’’न्तिपि पाळि, दुरधिगमन्ति अत्थो. गुणसोभासुरभिभावेनाति गुणेहि सोभाय, सुगन्धिभावेन च.

यथा ¶ अक्खणवेधी पुग्गलो सिप्पनिप्फत्तिया रत्तन्धकारतिमिसाय अचिरक्खणालोकेन अतिसुखुमम्पि दूरगतं लक्खं विज्झति, एवं अरियसावको सीलसम्पत्तिया अतिसुखुमं निब्बानं चतुसच्चधम्मं एकपटिवेधेनेव पटिविज्झतीति आह ‘‘सिप्पञ्च सीलं अक्खणवेधिताया’’ति. लोकिकन्ति निदस्सनमत्तं दट्ठब्बं लोकुत्तरधम्मओलोकनस्सापि अधिट्ठानभावतो.

वेवचनहारविभङ्गवण्णना निट्ठिता.

११. पञ्ञत्तिहारविभङ्गवण्णना

३९. भगवतो साभाविकधम्मकथायाति अत्तनो भावो सभावो, सभावेन निब्बत्ता, ततो वा आगताति साभाविका, सा एव धम्मकथाति साभाविकधम्मकथा, बुद्धानं सामुक्कंसिकधम्मकथाति अत्थो ¶ , ताय करणभूताय धम्मदेसनाय अनञ्ञत्तेपि कथादेसनानं उपचारसिद्धेन भेदेनेवं वुत्तं, अवयवसमुदायविभागेन वा. तेनाह ‘‘का च पकतिकथाय देसना? चत्तारि सच्चानी’’ति. इदञ्हि अत्थस्स देसनाय अभेदोपचारं कत्वा वुत्तं. तस्सा देसनाय पञ्ञापना. अयं पञ्ञत्तिहारोति सङ्खेपेनेव पञ्ञत्तिहारस्स सरूपमाह. साति यथावुत्तदेसना. तथा तथाति यथा यथा सच्चानि देसेतब्बानि, तथा तथा. कथञ्चेतानि देसेतब्बानि? परिञ्ञेय्यादिप्पकारेन. यथाधिप्पेतन्ति अधिप्पेतानुरूपं, बोधनेय्यबन्धवानं बोधनाधिप्पायानुकूलन्ति अत्थो. अत्थन्ति देसेतब्बत्थं, दुक्खादिअत्थमेव वा. निक्खिपतीति पतिट्ठापेति. यतो ‘‘चत्तारो सुत्तनिक्खेपा’’तिआदि (म. नि. अट्ठ. १.मूलपरियायसुत्तवण्णना) अट्ठकथासु वुच्चति.

तत्थाति निक्खेपदेसनायन्ति अत्थो. मग्गपक्खियाति दुक्खसच्चतो बहिकताति अधिप्पायो.

यस्मिं ठानेति यस्मिं भवादिसङ्खाते ठाने. यथावुत्ता देसनाति चतुराहारपटिबद्धरागादिमुखेन वट्टदीपनी वुत्तप्पकारा देसना.

४१. तेपरिवट्टवसेनाति एत्थापि ‘‘सच्चेसू’’ति योजेतब्बं. परिञ्ञापञ्ञत्तीति आहाति ¶ सम्बन्धो. अज्झत्तरतो, समाहितोति पदद्वयेन समाधानविसिट्ठं अज्झत्तरतताभावनं दीपेति गोचरज्झत्ततादीपनतो. केवलो हि अज्झत्तसद्दो अज्झत्तज्झत्तगोचरज्झत्तेसुपि वत्तति. अज्झत्तरतताविसिट्ठञ्च समाधानं सातिसयं चित्तट्ठितिं दीपेतीति इममत्थं दस्सेति ‘‘समाधानविसिट्ठस्सा’’तिआदिना.

आसज्जनट्ठेनाति आसङ्गनट्ठेन. तथा दस्सनन्ति अतथाभूतस्सापि भब्बरूपस्स विय अत्तनो विदंसनं. अलक्खिकोति विलक्खिको.

कामानन्ति कामावचरधम्मानं. रूपानन्ति रूपावचरधम्मानं. निस्सरणन्ति कामानं रूपावचरधम्मा निस्सरणं, तेसं अरूपावचरधम्मा निस्सरणं. एवं तंसभावानन्ति सउत्तरसभावानं. तथाति यथा सङ्खतधम्मानं निस्सरणभावतो, किलेससमुच्छेदकस्स अरियमग्गस्स आरम्मणभावतो च ¶ अत्थेव असङ्खता धातु, तथा वुच्चमानेनापि कारणेन अत्थेव असङ्खता धातूति दस्सेति. कत्थचि विसयेति असङ्खतधातुं सन्धाय वदति. अविपरीतत्थोति भूतत्थो. ‘‘यतो खो भो अयं अत्ता पञ्चहि कामगुणेहि समप्पितो समङ्गीभूतो परिचारेति, एत्तावता खो भो अयं अत्ता परमदिट्ठधम्मनिब्बानप्पत्तो होति (दी. नि. १.९४), सपकट्ठनिब्बानभाविनो’’ति च एवमादीसु उपचारवुत्तिसब्भावतो. यथा तं सीहसद्दोति यथा ‘‘सीहो माणवको’’तिआदिना माणवकादीसु उपचारवुत्तिना वत्तमानो मिगराजे भूतत्थविसये दिट्ठो, एवं निब्बानसद्दोपि कामगुणरूपज्झानसमङ्गितासु उपचारवुत्तिया वत्तमानो कत्थचि विसये अविपरीतत्थो. यत्थ च विसये अविपरीतत्थो, सा असङ्खता धातु. हत्थतले सआमलकं विय ञेय्यं पच्चक्खतो पस्सन्तस्स एकप्पमाणस्स सत्थुवचनमेवेत्थ पमाणन्ति दस्सेन्तो ‘‘किं वा एताय युत्तिचिन्ताया’’तिआदिमाह. ‘‘पटिञ्ञातस्स अत्थस्स सिद्धिया पकासनापञ्ञत्ती’’ति निगमं सन्धायाहाति.

पञ्ञत्तिहारविभङ्गवण्णना निट्ठिता.

१२. ओतरणहारविभङ्गवण्णना

४२. इन्द्रियेहीति ¶ करणे करणवचनं ‘‘मग्गेन गच्छती’’तिआदीसु विय, ‘‘फरसुना छिन्दती’’ति एवमादीसु विय च. ओतरणाति अनुप्पवेसना.

पञ्ञाक्खन्धे सङ्गण्हनवसेन सम्मासङ्कप्पो वियाति योजना. अधिचित्तअनुयुत्तानं सद्दहनुस्सहनुपट्ठानसमादहनेहि सद्धादीसु उपकरोन्तेसु एव पञ्ञा दस्सनकिच्चं साधेतीति दस्सेन्तो ‘‘सद्धा..पे… वुत्तानी’’ति आह. नो च भवङ्गाति तेसं सङ्खारानं पवत्तिकारणताभावं दस्सेति.

४३. तथा वुत्तोति ‘‘निस्सयो’’ति वुत्तो. चेतनासीसेन तण्हं एव वदति चेतनासहचरणतो.

रत्तस्साति ¶ मग्गेन असमुच्छिन्नरागस्स. येन पुग्गलो ‘‘रत्तो’’ति वुच्चति, तस्स रागस्स सम्बन्धिनी सुखा वेदना वुत्ता तत्थ तस्स अनुसयनतो. तेनाह ‘‘सुखाय…पे… वुत्त’’न्ति. एस नयो सेसेसुपि. तेनाह ‘‘तथा’’तिआदि.

तानि एव इन्द्रियानीति सुखसोमनस्सुपेक्खिन्द्रियानि. ‘‘सङ्खारपरियापन्नानी’’ति वचनं सन्धायाह ‘‘इध वेदनासीसेन चेतना वुत्ता’’ति. न हि वेदना सङ्खारक्खन्धपरियापन्ना होति. तण्हाय, दिट्ठियाति च उपयोगे करणवचनन्ति दस्सेन्तो ‘‘तण्हाया’’तिआदिमाह. इदानि उपयोगवसेनेव ‘‘तण्हाया’’तिआदीनं अत्थं दस्सेतुं ‘‘यथा वा’’तिआदिमाह. तत्थ सेसधम्मानन्ति तण्हावज्जितअविसिट्ठधम्मानं. तण्हाय निस्सयभावेति यदा तण्हा तेसं निस्सयो होति.

तण्हाय सेसधम्मानं पच्चयभावेति यदा सेसधम्मा तण्हापच्चया होन्ति. ‘‘करजकायसन्निस्सिता’’ति इमिना वेदनादिक्खन्धत्तयनिस्सितापि गहिता कायप्पस्सद्धिभावतो. कारणभावन्ति परम्परहेतुभावं. तण्हादिट्ठिउपयेनाति दिट्ठिउपयेन च दिट्ठिसहगततण्हाउपयेन च.

‘‘आगतीति ¶ इधागति, गतीति पेच्चभवो’’ति पदद्वयेन वुत्तमेवत्थं पाकटतरं कातुं पाळियं ‘‘आगतिगतीपि न भवन्ती’’ति वुत्तं. इध हुरन्ति द्वारारम्मणधम्मा दस्सिता आसन्नदूरभावेहि द्वारारम्मणेहि विनिवत्तेत्वा गहितत्ता. इध द्वारप्पवत्तधम्मा ‘‘उभयमन्तरेना’’ति पदस्स अत्थभावेन वुत्ता. चतुब्यूहहारे पन अनिन्द्रियबद्धरूपधम्मा तथा वुत्ता. कारणभूतेन अनन्तरपच्चयभूतेन, उपनिस्सयपच्चयभूतेन च. ये धम्मा उपादाय ‘‘अत्ता’’ति समञ्ञा, तेसं विञ्ञाणादिधम्मानं अभावेन अनुप्पादधम्मतं आपादितत्ताति अत्थो. ‘‘अनिस्सितस्स चलितं नत्थी’’तिआदिना पटिलोमतो पच्चयभावो दस्सितोति दस्सेन्तो पाळियं ‘‘एसेवन्तो दुक्खस्साति पटिच्चसमुप्पादो’’ति वत्वा ननु ‘‘अविज्जापच्चया सङ्खारा’’तिआदिको पटिच्चसमुप्पादोति चोदनं सन्धाय यथावुत्तस्स पटिच्चसमुप्पादभावं दस्सेतुं ‘‘सो दुविधो’’तिआदिना लोकियलोकुत्तरवसेन पटिच्चसमुप्पादो विभत्तो. तदत्थतायाति वीतरागविमुत्तिअत्थताय. तब्भावन्ति लोकुत्तरपटिच्चसमुप्पादभावं.

ओतरणहारविभङ्गवण्णना निट्ठिता.

१३. सोधनहारविभङ्गवण्णना

४५. सोधेति ¶ नामाति पुच्छितमत्थं हत्थतले ठपितआमलकं विय पच्चक्खतो दस्सेन्तो निग्गुम्बं निज्जटं कत्वा विवरन्तो तब्बिसयअञ्ञाणसंसयादिमलापनयनेन सोधेति, एवं सोधेन्तो च पदस्स अत्थेन अभेदोपचारं कत्वा ‘‘पदं सोधेति’’च्चेव वुच्चति. तेनाह ‘‘पदं सोधेति नामा’’ति. पुच्छाय विस्सज्जनमेवेत्थ सोधनन्ति आह ‘‘तदत्थस्स विस्सज्जनतो’’ति. आरभीयतीति आरम्भो, देसनाय पकासियमानो अत्थो. तेनाह ‘‘न ताव…पे… पबोधितत्ता’’ति. इध सोधनं नाम पटिच्छन्नरूपस्स अत्थस्स देसनानुभावेन विवटभावकरणन्ति तमत्थं उपमाय विभावेतुं ‘‘अञ्ञाणपक्खन्दान’’न्तिआदि वुत्तं.

सोधनहारविभङ्गवण्णना निट्ठिता.

१४. अधिट्ठानहारविभङ्गवण्णना

४६. धारयितब्बाति ¶ उपधारेतब्बा, उपलक्खितब्बाति अत्थो. वुत्तमेव ‘‘सामञ्ञविसेसकप्पनाय वोहारभावेन अनवट्ठानतो’’तिआदिना (नेत्ति. अट्ठ. १४).

तं तं फलन्ति निरयादिं तं तं फलं. अञ्चिताति गता. योनीति एकजाति. समानवसेन मिस्सीभवति एतायाति हि योनि, उपपत्ति. पेच्चाति मरित्वा. उस्सन्नतायाति वितक्कबहुलताय. ‘‘उस्सन्नत्ता’’तिपि वदन्ति. सस्सतादीहि वा उस्सन्नत्ता. असुरजातिया निब्बत्तापनको असुरजातिनिब्बत्तनको.

सङ्खाति पञ्ञा. पञ्ञापधाना च भावनाति आह ‘‘पटिसङ्खाय पटिपक्खभावनाया’’ति.

४७. पत्थटभावेन पथवी. सभावधारणट्ठेन, निस्सत्तनिज्जीवट्ठेन च धातु. आपीयति, अप्पायतीति वा आपो. तेजनवसेन तिक्खतावसेन, दहनवसेन वा तेजो. वायनवसेन वेगगमनवसेन, समुदीरणवसेन ¶ वा वायो. वीसति आकाराति केसादयो वीसति कोट्ठासा, पकारा वा. कक्खळलक्खणाधिकताय केसादी कक्खळलक्खणा वुत्ता.

पाटियेक्को पथवीधातुकोट्ठासोति पथवीकोट्ठासमत्तो, अत्तसुञ्ञधम्ममत्तोति अत्थो. सन्तप्पतीति एत्थ सरीरपकतिमतिक्कमित्वा उण्हभावो सन्तापो, सरीरदहनवसेन पवत्तो महादाहो, अयमेतेसं विसेसो. येन च जीरीयतीति एकाहिकादिजरारोगेन जरीयतीति च अत्थो युज्जति. ‘‘सतवारं तापेत्वा तापेत्वा उदके पक्खिपित्वा उद्धटसप्पि सतधोतसप्पी’’ति वदन्ति. रसरुधिरमंसमेदन्हारुअट्ठिअट्ठिमिञ्जा रसादयो. केचि न्हारुं अपनेत्वा सुक्कं सत्तमं धातुं वदन्ति. विवेकन्ति विसुंभावं, विसदिसभावन्ति अत्थो. वत्थुसङ्खातो हि आहारो परिणामं गच्छन्तो पाणभक्खगहणिपदनिय मुत्तकरीसभावेहि विय अत्तनापि विसदिसरससङ्खातं विसुंभावं निब्बत्तेन्तो तब्भावं गच्छतीति वुच्चति, तथा रसादयोपि रुधिरादिकोट्ठासं. तेनाह ‘‘रसादिभावेन विवेकं गच्छती’’ति.

सभावलक्खणतोति असुचिभावेन लक्खितब्बतो.

४८. याथावसरसलक्खणन्ति ¶ रसितब्बोति रसो, पटिविज्झितब्बो सभावो, अत्तनो रसो सरसो, याथावो सरसो, याथावसरसो याथावसरसो एव लक्खितब्बत्ता लक्खणन्ति याथावसरसलक्खणं. अथ वा याथावसरसलक्खणन्ति अविपरीतं अत्तनो पवत्तिसङ्खातं किच्चञ्चेव पीळनसङ्खातं लक्खणञ्च. ‘‘इदं किच्चं, इदं लक्खण’’न्ति अविज्जाहेतु ञातुं न सक्कोति, तब्बिसयञाणुप्पत्तिं निवारेन्ती छादेत्वा परियोनन्धित्वा तिट्ठतीति वुत्ता. तेन वुत्तं ‘‘जानितुं पटिविज्झितुं न देती’’ति. तयिदमस्सा किच्चन्ति किच्चतो कथिता. कथिताति च वुत्ता, यतो च अविज्जा असम्पटिवेधरसाति वुच्चति. जायति एत्थाति जाति, उप्पत्तिट्ठानं. यदिपि निरोधमग्गे अविज्जा आरम्मणं न करोति, ते पन जानितुकामस्स तप्पटिच्छादनवसेन अनिरोधमग्गेसु निरोधमग्गग्गहणस्स कारणभावेन पवत्तमाना तत्थ उप्पज्जतीति वुच्चति, तेसम्पि अविज्जाय उप्पत्तिट्ठानता होति, इतरेसं आरम्मणभावेन चाति.

अत्थानत्थन्ति ¶ हिताहितं. सम्मोहविनोदनियं पन ‘‘अत्थत्थ’’न्ति (विभ. अट्ठ. २२६) वुत्तं, तत्थ अत्थो एव अत्थत्थोति अत्थस्स अविपरीततादस्सनत्थं दुतियेन अत्थसद्देन विसेसनं. न हि ञाणं अनत्थे ‘‘अत्थो’’ति गण्हातीति. कारणाकारणन्ति एत्थापि एवं दट्ठब्बं. अत्थत्थन्ति वा आमेडितवचनं सब्बेसं अत्थानं पाकटकरणभावप्पकासनत्थं, फलं फलन्ति अत्थो, हितपरियायेपि एसेव नयो. न्ति अत्थानत्थादिकं. आकारन्ति अत्थादिकारणमेव.

पटिविद्धस्स पुन अवेक्खना पच्चवेक्खणा. दुचिन्तितचिन्तितादिलक्खणस्स बालस्स भावो बाल्यं. सम्पजानातीति समं पकारेहि जानाति. बलवमोहो पमोहो. समन्ततो मोहनं सम्मोहो. दुग्गतिगामिकम्मस्स विसेसपच्चयत्ता अविन्दियं. विन्दतीति लभति. अनवज्जधम्मानं विज्जा विय विसेसपच्चयो न होतीति विन्दियं न विन्दति. अयं अविज्जाय वेमत्तताति अयं ‘‘दुक्खे अञ्ञाण’’न्तिआदिना किच्चजातिलक्खणेहि वुत्तो अविज्जाय अविसेसो. विज्जातिआदीनं वुत्तनयानसारेन अत्थो वेदितब्बो.

पासाणसक्खरवालिकाविरहिता भूमि सण्हाति ‘‘सण्हट्ठेना’’ति वुत्तं.

तत्तकमेव ¶ कालन्ति पञ्चकप्पसतानि. विभूतं समत्तिक्कन्तं रूपसञ्ञासङ्खातं रूपं एतायाति विभूतरूपं, समापत्तिन्ति पदत्थो. न हि काचि अरूपसमापत्ति रूपसञ्ञासहगता पवत्तीति. निरोधसमापत्तियं वत्तब्बमेव नत्थि, तत्थ नेवसञ्ञानासञ्ञायतनसमापत्तिया विसुं गहितत्ता वुत्तं ‘‘सेसारुप्पसमापत्तियो’’ति.

दमथं अनुपगच्छन्तो दुट्ठस्सो खलुङ्कस्सो. उत्तरिदमथायाति अरियमग्गदमथाय.

इतरोति दुक्खापटिपदो खिप्पाभिञ्ञो, सुखापटिपदो च खिप्पाभिञ्ञो. उभयतोभागेहीति रूपकायनामकायभागेहि. उभयतोति विक्खम्भनसमुच्छेदविमुत्तिवसेन.

अनेकोपीति ¶ सभावेन अनेकोपि. एकसद्दाभिधेय्यतायाति सामञ्ञसद्दाभिधेय्यताय.

अधिट्ठानहारविभङ्गवण्णना निट्ठिता.

१५. परिक्खारहारविभङ्गवण्णना

४९. ‘‘हिनोती’’ति पदस्स अत्थं दस्सेन्तो ‘‘कारणभावं गच्छती’’ति आह अनेकत्थत्ता धातूनं. एतीति आगच्छति, उप्पज्जतीति अत्थो.

अविज्जायपि हेतुभावेति एत्थ अविज्जा अनन्तराय अविज्जाय अनन्तरसमनन्तरूपनिस्सयनत्थिविगतासेवनपच्चयेहि, अनन्तराय पन सहजाताय सहजातअञ्ञमञ्ञनिस्सयसम्पयुत्तअत्थिअविगतहेतुपच्चयेहि, असहजाताय उपनिस्सयकोटिया एव पच्चयो होतीति वेदितब्बं. अत्तनो फलं करोतीति कारणन्ति आह ‘‘कारणभावो च फलापेक्खाया’’ति.

निब्बत्तिअत्थो फलत्थो फलसङ्खातो अत्थो.

यो सभावोति पुञ्ञादिअभिसङ्खारानं यो अभिसङ्खरणसभावो, सो हेतु. सेसपदेसूति विञ्ञाणादिपदेसु. यथावुत्तप्पभेदोति ‘‘असाधारणलक्खणो हेतू’’तिआदिना वुत्तप्पभेदो. यो कोचि ¶ पच्चयोति जनकादिभेदं यं किञ्चि कारणं. अभिसङ्खरणतोति पच्चक्खतो, परम्पराय च निब्बत्तनतो.

परिक्खारहारविभङ्गवण्णना निट्ठिता.

१६. समारोपनहारविभङ्गवण्णना

५०. सुत्तेन गहितेति सुत्ते वुत्ते. पदट्ठानग्गहणं अधिट्ठानविसयदस्सनत्थं, वेवचनग्गहणं अधिवचनविभागदस्सनत्थन्ति योजना. विसयाधिट्ठानभावतोति विसयसङ्खातपवत्तिट्ठानभावतो. वनीयतीति भजीयति. वनतीति भजति सेवति. वनुतेति याचति, पत्थेतीति अत्थो ¶ . पञ्च कामगुणा कामतण्हाय कारणं होति आरम्मणपच्चयताय. निमित्तग्गाहो अनुब्यञ्जनग्गाहस्स कारणं होति उपनिस्सयतायाति एवं सेसेसुपि यथारहं कारणता वत्तब्बा.

५१. ‘‘काये कायानुपस्सी विहराही’’तिआदीसु यं वत्तब्बं, तं हेट्ठा लक्खणहारविभङ्गवण्णनायं (नेत्ति. अट्ठ. २३) वुत्तनयेनेव वेदितब्बं. अयं पन विसेसो – रूपधम्मपरिञ्ञायाति रूपूपिकविञ्ञाणट्ठितिपरिञ्ञाय.

‘‘दुक्ख’’न्ति पस्सन्ती सा वेदनानुपस्सनाति योजेतब्बं. वेदनाहेतुपरिञ्ञायाति फस्सपरिञ्ञाय. ‘‘वेदनावसेना’’ति पदेन अत्तना उप्पादितदुक्खवसेन. वेदनापरिञ्ञायाति वेदनूपिकविञ्ञाणट्ठितिपरिञ्ञाय. निच्चाभिनिवेसपटिपक्खतो अनिच्चानुपस्सनायाति अधिप्पायो. निच्चसञ्ञानिमित्तस्साति निच्चसञ्ञाहेतुकस्स. सञ्ञापरिञ्ञायाति सञ्ञूपिकविञ्ञाणट्ठितिपरिञ्ञाय. पठममग्गवज्झत्ता अगतिगमनस्स वुत्तं ‘‘दिट्ठाभिनिवेसस्स…पे… अगतिगमनस्स चा’’ति.

सङ्खारपरिञ्ञायाति सङ्खारूपिकविञ्ञाणट्ठितिपरिञ्ञाय.

समारोपनहारविभङ्गवण्णना निट्ठिता.

निट्ठिता च हारविभङ्गवण्णना.

१. देसनाहारसम्पातवण्णना

‘‘एव’’न्तिआदि ¶ हारसम्पातदेसनाय सम्बन्धदस्सनं. तत्थ पुरिमेन उपमाद्वयेन सुपरिकम्मकतमणिकोट्टिमसदिसी, सुविरचितजम्बुनदाभरणसदिसी च पाळि. तत्थ कतनानावण्णपुप्फूपहारसदिसी, विविधरंसिजालासमुज्जलबद्धनानारतनावलिसदिसी च हारविभङ्गदेसनाति दस्सेति. पच्छिमेन तस्स पणीतमहारहे जटाहि सद्धिं दुक्करतरतं दीपेति. यायं गाथा वुत्ताति योजना.

५२. यस्मायं हारविभङ्गवारो नप्पयोजेति यथावुत्तेन कारणेन, तस्मा सा हारविभङ्गवारस्स आदिम्हि न पच्चामट्ठाति अधिप्पायो ¶ . हारसम्पातवारो पन तं पयोजेतीति यस्मा पन हारसम्पातवारो तं गाथं पयोजेति यथावुत्तेनेव कारणेन, तस्मा ‘‘सोळस…पे… आहा’’ति आह. योजनानयदस्सनन्ति योजनाय नयदस्सनं.

तेनाति ‘‘तं मच्चुनो पद’’न्ति वचनेन. सब्बं विपल्लासन्ति द्वादसविधम्पि विपल्लासं. सामञ्ञस्स…पे… वोहरीयति यत्थ पतिट्ठितं सामञ्ञं, सो विसेसो. अत्थतो पन सञ्ञादयो एव रूपादिविसयं विपरीताकारेन गण्हन्ते विपल्लासोति दस्सेन्तो ‘‘सञ्ञाविपल्लासो’’तिआदिमाह.

इन्दजालादिवसेन मणिआदिआकारेन उपट्ठहन्ते उपादानक्खन्धपञ्चके अहंममादिकारणताय निरुत्तिनयेन ‘‘अत्ता’’ति वुच्चमानो तंबुद्धिवोहारप्पवत्तिनिमित्तताय अत्तभावो सुखादीनं वत्थुताय ‘‘अत्तभाववत्थू’’ति पवुच्चतीति आह ‘‘तेही’’तिआदि. तेसन्ति उपादानक्खन्धानं. विपल्लासानं पवत्तिआकारो ‘‘असुभे सुभ’’न्तिआदि. विसयो कायवेदनाचित्तधम्मा. अविज्जा च…पे… एव सम्मोहपुब्बकत्ता सब्बविपल्लासानं. च-सद्दो सुभसुखसञ्ञानन्ति एत्थापि आनेत्वा योजेतब्बो.

तत्थायं योजना – ‘‘अविज्जा च सुभसुखसञ्ञानं पच्चयो एव, न तण्हा एव, अविज्जा सुभसुखसञ्ञानञ्च पच्चयो, न निच्चअत्तसञ्ञानं एवा’’ति. एवं सन्तेपि पुरिमानं द्विन्नं विपरीतसञ्ञानं तण्हा, पच्छिमानं अविज्जा विसेसपच्चयोति दस्सेन्तो आह ‘‘तथापी’’तिआदि. अविज्जासीसेन चेत्थ दिट्ठिया गहणं वेदितब्बं. तेनाह ‘‘दिट्ठिनिवुतं चित्त’’न्ति ¶ , ‘‘यो दिट्ठिविपल्लासो’’ति च आदि, यथा च अविज्जासीसेन दिट्ठिया गहणं, एवं दिट्ठिसीसेन अविज्जायपि गहणं सियाति आह ‘‘दिट्ठिसीसेन अविज्जा वुत्ता’’ति. तण्हाविज्जासु सुभसुखसञ्ञानं यथा तण्हा विसेसपच्चयो, न एवं अविज्जा. निच्चअत्तसञ्ञानं पन यथा अविज्जा विसेसपच्चयो, न तथा तण्हाति दस्सेन्तो ‘‘मोहो विसेसपच्चयो’’ति आह.

पच्छिमानं द्विन्नं…पे… होतीति अतीतंसे तण्हाभिनिवेसस्स बलवभावाभावतो. तेनेव हि ‘‘सो अतीतं रूपं अत्ततो समनुपस्सति’’च्चेव ¶ वुत्तं, न ‘‘अभिनन्दती’’ति. तण्हाविपल्लासोति तण्हं उपनिस्साय पवत्तो विपल्लासो, न हि तण्हा सयं विपल्लासो. तेनाह ‘‘तण्हामूलको विपल्लासो’’ति. दिट्ठाभिनन्दनवसेनाति तण्हुपनिस्सयदिट्ठाभिनन्दनवसेन, यतो सो ‘‘तण्हाविपल्लासो’’ति वुत्तो. एतेनाति ‘‘यो तण्हाविपल्लासो’’तिआदिपाठेन. सोळस सञ्ञीवादा, अट्ठ असञ्ञीवादा, अट्ठ नेवसञ्ञीनासञ्ञीवादा, पञ्च परमदिट्ठधम्मनिब्बानवादा च, यथा अत्तनो गताय, निब्बानप्पत्तिया च परिकप्पवसेन सुभसुखाकारग्गाहिनो, न एवं सत्त उच्छेदवादाति आह ‘‘येभुय्येना’’ति. पटिपक्खवसेनपीति विसुद्धिवसेनपि. याव हि उपक्किलेसा, ताव चित्तं न विसुज्झतेव. यदा च ते पहीना, तदा विसुद्धमेव. तेनाह ‘‘न ही’’तिआदि. ‘‘अरक्खितेन चित्तेना’’ति पाळिं निक्खिपित्वा विपल्लासमुखेनेव देसनाय निद्धारियमानत्ता वुत्तं ‘‘यथानुसन्धिनाव गाथं निट्ठपेतु’’न्ति.

मारस्साति किलेसमारस्स. तस्स हि वसे ठितो सेसमारानं हत्थगतो एवाति. तेनाह ‘‘किलेसमारग्गहणेनेवा’’तिआदि.

मारबन्धनन्ति सत्तमारपक्खे मारस्स बन्धनन्ति मारबन्धनं. सो हि किलेसबन्धनभूते अत्तनो समारकपरिसे मञ्ञति. तेन वुत्तं ‘‘अन्तलि…पे… मोक्खसी’’ति (महाव. ३३). इतरमारपक्खे मारोव बन्धनन्ति मारबन्धनं. विसङ्खारो निब्बानं.

मोहसम्पयोगतो चित्तं ‘‘मूळ्ह’’न्ति वुत्तन्ति रत्तदुट्ठानम्पि मूळ्हताय सब्भावे ‘‘मूळ्ह’’न्ति विसुं वचनं आवेणिकमोहवसेन वुत्तन्ति दस्सेन्तो ‘‘द्विन्नं मोमूहचित्तुप्पादानं वसेना’’ति आह. एवन्ति एवं रागादिअकुसलप्पत्तिया कुसलभण्डच्छेदनतो अरक्खितं चित्तं होति, सब्बोपि मिच्छाभिनिवेसो एत्थेव सङ्गहं समोसरणं गच्छतीति आह ‘‘मिच्छादिट्ठि ¶ …पे… वेदितब्ब’’न्ति. सब्बेपीति ‘‘अरक्खितं, मिच्छादिट्ठिहतं, थिनमिद्धाभिभूत’’न्ति तीहिपि पदेहि वुत्तधम्मा.

चक्खुनाति द्वारेन. रूपन्ति विसभागवत्थुसन्निस्सितं रूपायतनं. निमित्तग्गाहीति ‘‘इत्थी’’ति वा पुरिसो’’ति वा ‘‘सुभ’’न्ति वा ‘‘असुभ’’न्ति वा परिकप्पितनिमित्तं ¶ गण्हाति, तस्स वा गहणसीलो. अनुब्यञ्जनग्गाहीति हत्थपादहसितकथितादिप्पभेदे किलेसानं अनु अनु ब्यञ्जनतो अनुब्यञ्जनसञ्ञिते आकारे गण्हाति, तेसं वा गहणसीलो. यत्वाधिकरणन्ति यं निमित्तं, निमित्तानुब्यञ्जनग्गहणनिमित्तन्ति अत्थो. एवं ‘‘चक्खुन्द्रियं असंवुतं विहरन्त’’न्ति, यो ‘‘निमित्तग्गाही, अनुब्यञ्जनग्गाही’’ति च वुत्तो पुग्गलो, तमेनं चक्खुन्द्रियं चक्खुद्वारं असंवुतं सतिकवाटेन अपिहितं कत्वा वत्तन्तं, तस्स च रूपस्स इट्ठाकारग्गहणे अभिज्झा, अनिट्ठाकारग्गहणे दोमनस्सं, असमपेक्खने मोहो मिच्छाभिनिवेसे मिच्छादिट्ठीति एवं अभिज्झाब्यापादा, अञ्ञे च लामकट्ठेन पापका अकोसल्लसम्भूतट्ठेन अकुसला धम्मा अन्वास्सवेय्युं अनु अनु पवत्तेय्युं.

तस्स संवराय न पटिपज्जतीति तस्स चक्खुद्वारस्स संवराय सतिकवाटेन पिदहनत्थं न पटिपज्जति. सा पन अप्पटिपत्ति चक्खुन्द्रियस्स अनारक्खासंवरस्स अनुप्पादोति दस्सेन्तो ‘‘न रक्खति…पे… आपज्जती’’ति आह. जवने उप्पज्जमानोपि हि असंवरो तेन द्वारेन पवत्तनतो ‘‘चक्खुन्द्रियासंवरो’’त्वेव वुच्चतीति. सेसद्वारेसुपि वुत्तनयेनेव अत्थो वेदितब्बो. ‘‘पुब्बन्तकप्पनवसेन चा’’तिआदिना सङ्खेपतो वुत्तमत्थं वित्थारतो दस्सेन्तो ‘‘सङ्खेपतो च वित्थारो अञ्ञो’’ति कत्वा तं समुच्चिनन्तो ‘‘या च खो इमा’’तिआदिमाह.

यथावुत्ता अकुसला धम्माति द्वादस अकुसलचित्तुप्पादधम्मा, तेसं वत्थूनि वा. ते हि समुदयवज्जा पञ्चुपादानक्खन्धा. ‘‘एव’’न्ति इमिना नेत्तिपाळियं, अट्ठकथायञ्च निद्धारितप्पकारेन. इधाति इमिस्सं ‘‘अरक्खितेन चित्तेना’’ति गाथायं.

यदिपि देसनाहारसम्पातपाळियं ‘‘तस्मा रक्खितचित्तस्सा’’ति गाथा सरूपतो न गहिता, अत्थतो पन ‘‘तेसं भगवा परिञ्ञाया’’तिआदिना गहिता एवाति तस्सा गहितभावं विभावेतुं ‘‘कथं देसेती’’ति पुच्छित्वा ‘‘तस्मा रक्खितचित्तस्सा’’ति गाथं उद्धरि.

योनिसोमनसिकारेन कम्मं करोन्तोति ‘‘सो ‘इदं दुक्ख’न्ति योनिसो मनसि करोती’’तिआदिना ¶ नयेन विपस्सनासङ्खातेन योनिसोमनसिकारेन भावनाकम्मं करोन्तो, भावेन्तोति अत्थो ¶ . यथाभूतञाणन्ति ञातपरिञ्ञाय पुब्बभागविपस्सनाय ‘‘अविज्जासमुदया रूपसमुदयो, अविज्जानिरोधा रूपनिरोधो’’तिआदिना (पटि. म. १.५०) समपञ्ञासाय आकारेहि. निरयगतियं दुक्खदुक्खता, सुगतिविसेसे ब्रह्मलोकेकदेसे सङ्खारदुक्खता, इतरत्थ द्वे तिस्सोपीति दस्सेन्तो आह ‘‘यथासम्भवं तिविधदुक्खतायोगेना’’ति.

देसनाहारसम्पातवण्णना निट्ठिता.

२. विचयहारसम्पातवण्णना

५३. कुसलधम्मारम्मणाति कुसलधम्मे उद्दिस्स पवत्तिमत्तं सन्धाय वुत्तं, न तेसं आरम्मणपच्चयतं इध ‘‘कुसला धम्मा’’ति लोकुत्तरधम्मानं अधिप्पेतत्ता. न हि कदाचि अनुपादानिया धम्मा उपादानारम्मणा होन्ति. फलधम्मे उद्दिस्स पवत्ताय तण्हाय गहितत्ता ‘‘कुसल…पे… दट्ठब्बो’’ति वुत्तं. देसनाहारेति देसनाहारसम्पाते. कथं पन कुसलभावोति ‘‘कुसला’’ति वचनमत्तं गहेत्वा चोदेति, तञ्च निदस्सनमत्तं दट्ठब्बं, पहानहेतुभावोपिस्सा सिया चोदकेन सम्पटिच्छितोव. ‘‘मानोपि दुविधो’’तिआदिना मानस्स च तस्सा तण्हाय च सेवितब्बभावो अकुसलानं पहानाय, कुसलानं उप्पत्तिया च पच्चयभावतो.

नेक्खम्मस्सितं दोमनस्सं नाम ‘‘अरियभूमिं पापुणितुं नासक्खि’’न्ति अनुसोचतो उप्पन्नं दोमनस्सन्ति सम्बन्धो. एवन्ति इमिना पाळियं वुत्तप्पकारेन, पिहं उपट्ठपेत्वा छसु द्वारेसु इट्ठारम्मणे आपाथगते अनिच्चादिवसेन विपस्सनं पट्ठपेत्वाति योजना. इट्ठारम्मणञ्चेत्थ यथावुत्तअनुसोचनदोमनस्सुप्पत्तीनं यथाभिनिविट्ठस्स आरम्मणस्स अनिट्ठतायाति दस्सनत्थं. ‘‘कथं नेक्खम्मवसेना’’ति पदस्स अत्थं विवरितुं ‘‘विपस्सनावसेना’’तिआदि वुत्तं. विपस्सनादिविनिमुत्ता वा पठमज्झानादिवसेन वुत्ता कुसला धम्मा इध नेक्खम्मं. अनुस्सतिग्गहणेन उपचारज्झानमेव गहितन्ति ‘‘पठमज्झानादिवसेना’’ति वुत्तं. आदिसद्देन दुतियज्झानतो पट्ठाय याव अग्गफला उपरिविसेसा सङ्गहिता. याय पञ्ञाविमुत्तिया.

उपेक्खासतिपारिसुद्धिभावेनाति ¶ उपेक्खाजनितसतिपारिसुद्धिसब्भावेन. कम्मयोग्गन्ति विपस्सनाभावनादिकम्मस्स योग्गं अनुरूपं अनुच्छविकं. अस्सद्धियेति अस्सद्धियहेतु, ‘‘अस्सद्धियेना’’तिपि ¶ पठन्ति, सो एवत्थो. ओभासगतन्ति ञाणोभासगतं. कामं पुब्बेपि पञ्ञा वुत्ता, अस्सद्धियादीहि पन अञ्ञेसं किलेसानं विधमनम्पि पञ्ञाय एव होति, सा च एवंभूताति दस्सनत्थं ‘‘ओभासगतं किलेसन्धकारे न इञ्जती’’ति वुत्तं.

कोपो कोधो. अप्पच्चयो दोमनस्सं. इद्धिविधञाणादिका छ अभिञ्ञा पाकटा एवाति ‘‘द्वे च विसेसे’’ति वुत्तधम्मे दस्सेतुं ‘‘मनोमयिद्धि, विपस्सनाञाणञ्चा’’ति आह. अङ्गणानि रागादयो. उपक्किलेसा अभिज्झाविसमलोभादयो. अनुलोमनं तदेकट्ठता. फन्दना दुब्बला विक्खेपप्पवत्ति. बलवती अनवट्ठानं. सब्बो मिच्छाभिनिवेसो अयोनिसोमनसिकारेन होति, मिच्छावितक्केन च. तत्थ अयोनिसोमनसिकारो अकुसलचित्तुप्पादो तप्परियापन्नो मिच्छावितक्को विक्खेपसहितो एवाति वुत्तं ‘‘मिच्छाभिनिवेसहेतुताय दिट्ठिपक्खो’’ति वुत्तञ्हेतं ‘‘वितक्कोपि दिट्ठिट्ठानं, अयोनिसो मनसिकारोपि दिट्ठिट्ठान’’न्ति (पटि. म. १.१२४).

अथ वा इञ्जनाति फन्दना, दिट्ठपरित्तासो. यथाह ‘‘तदपि तेसं भवतं समणब्राह्मणानं अजानतं अपस्सतं वेदयितं तण्हागतानं परितस्सितविप्फन्दितमेवा’’ति (दी. नि. १.१०५ आदयो). अट्ठितीति अनवट्ठानं, दिट्ठिवितक्को. तेन हि पुथुज्जनो काले सस्सतं, काले उच्छेदन्ति तं तं दिट्ठिग्गहणं पक्खन्दन्तो सत्ततो परिब्भट्ठअन्धो विय, समुद्दे विस्सट्ठवाहनिका विय, यन्ते युत्तगोणो विय च तथा तथा परिब्भमति. तेनाह ‘‘दिट्ठियोपि दिट्ठिट्ठानं, वितक्कोपि दिट्ठिट्ठान’’न्ति (पटि. म. १.१२४) च. एतस्मिञ्च पक्खे मिच्छाभिनिवेसताय, मिच्छाभिनिवेसहेतुताय च तस्सा द्वे पक्खाति एकदेससरूपेकसेसो कतोति वेदितब्बं.

‘‘एव’’न्तिआदिना ‘‘सो उपरिम’’न्तिआदिपाळियं सम्बन्धं दस्सेति. पटिघसञ्ञाति भुम्मत्थे पच्चत्तवचनन्ति दस्सेन्तो ‘‘पटिघ…पे… सञ्ञासू’’ति आह. रूपावचरसञ्ञाति सञ्ञासीसेन रूपावचरज्झानानि वदति. नानत्तसञ्ञाति ¶ नानासभावा, नानासभावे वा आरम्मणे सञ्ञा. ठपेत्वा पटिघसञ्ञा अवसिट्ठकामावचरसञ्ञा हेता. ता समतिक्कमतीति ता रूपसञ्ञानानत्तसञ्ञायो आरम्मणेहि सद्धिं सम्मदेव अतिक्कमति.

रूपावचरज्झानोभासोपि कसिणारम्मणा. कसिणनिस्सन्दो हि आरुप्पज्झानुप्पत्ति. दस्सनन्ति कसिणरूपानं दस्सनं. अभिज्झाब्यापादप्पहानेन सद्धिं वीरियारम्भो उपकारको समथो ¶ सतिपस्सद्धियो परिक्खारङ्गता वुत्ता एव. सतिरहितं सम्मसनं नाम नत्थीति ‘‘या उपट्ठिता सति असम्मुट्ठा, अयं विपस्सना’’ति वुत्तं. तेन सतिसीसेन विपस्सना गहिताति दस्सेति. सम्मोसानं पहानमाहाति सम्बन्धो.

५४. पच्चुप्पन्नसुखआयतिसुखविपाककिरियनिरामिसअकापुरिससेवितभावेहि एव सेसा पाळियं एतस्स समाधिस्स सन्तपणीततादिविसेसा वुत्ता, तेपि इध सङ्गहिताति तेसं पदानं अत्थं दस्सेन्तो ‘‘अङ्गसन्तताया’’तिआदिमाह. तत्थ अङ्गसन्ततायाति फलझानङ्गानं उपसन्तताय. किलेसदरथसन्ततायाति किलेसदरथपटिप्पस्सद्धिया. पणीतोति उळारो. एकोदिभावेनाति मग्गसमाधिसङ्खातेन एकोदिभावेन. एकोदिभावन्ति समाधानं. लोकियसमाधिस्स पच्चनीकनीवरणपठमज्झाननिकन्तिआदीनि निग्गहेतब्बानि, अञ्ञे च किलेसा वारेतब्बा. इमस्स पन अरहत्तसमाधिस्स पटिप्पस्सद्धकिलेसत्ता न निग्गहेतब्बं, वारेतब्बञ्च अत्थीति सो मग्गानन्तरं समापत्तिक्खणेव अप्पयोगेनेव अधिगतत्ता, ठितत्ता च अपरिहानिवसेन वा अधिगतत्ता नससङ्खारनिग्गय्हवारितगतो.

‘‘सतिवेपुल्लप्पत्तो’’ति एतेन अप्पवत्तमानायपि सतिया सतिबहुलताय सतो एव नामाति दस्सेति. ‘‘यथापरिच्छिन्नकालवसेना’’ति एतेन परिच्छिन्नसतिया सतोति दस्सेति.

वक्खमानेनाति ‘‘पीतिफरणा’’तिआदिना अनन्तरं वक्खमानेन. ‘‘पीतिफरणता’’ति पन पाळि आगता. तं ‘‘पञ्चङ्गिको सम्मासमाधी’’ति (दी. नि. ३.३५५) समाधिअङ्गभावेन पञ्ञा उद्दिट्ठाति कत्वा वुत्तं. ततो एव अट्ठकथायं ‘‘पीतिफरणता’’तिआदीनञ्च अत्थसंवण्णना कता. तत्थ ‘‘सो इममेव कायं ¶ विवेकजेन पीतिसुखेन अभिसन्देती’’तिआदिना (दी. नि. १.२२६) नयेन पीतिया, सुखस्स च फरणं वेदितब्बं. सेसं सुविञ्ञेय्यमेव.

समाधिवसेन समथो उद्धटोति सभाववसेन समथो उद्धटो, न उपकारकधम्मवसेनाति अधिप्पायो.

५५. रागपटिपक्खत्ता समाधिस्स ‘‘अधिचित्तसिक्खाय सिक्खन्तो’’ति वुत्तं. वुत्तनयानुसारेनाति ‘‘सुखपणिधिआदिसमुग्घाटनेन अप्पणिहितो’’तिआदिना. एत्थ च सङ्खारानं खणभङ्गुरतं सम्मदेव पस्सन्तस्स न रागो पतिट्ठं लभतीति अनिच्चानुपस्सना रागचरितस्स सप्पाया ¶ वुत्ता, तथा सङ्खारानं सभावदुक्खतं सम्मदेव पस्सन्तस्स पकतियापि दुक्खितेसु दुक्खुप्पादनं वणे खारोदकसेकसदिसन्ति न दोसो पतिट्ठं लभतीति दुक्खानुपस्सना दोसचरितस्स सप्पाया वुत्ता, तथा सङ्खारेसु सम्मदेव घनविनिब्भोगे कते अत्तसुञ्ञताय उपट्ठहमानाय न मोहो पतिट्ठं लभतीति अनत्तानुपस्सना मोहचरितस्स सप्पाया वुत्ताति वेदितब्बं. रागपटिपक्खत्ता समाधिस्स ‘‘अधिचित्तसिक्खाय सिक्खन्तो’’ति वुत्तं. एस नयो इतरेसु. सेसमेत्थ सुविञ्ञेय्यं.

खन्तिबहुलो उप्पन्नं अरतिं अनभिरतिं अभिभुय्य विहरन्तो सुखेन समाधिं अधिगच्छतीति खन्तिप्पधानतापि समथपक्खभजनस्स कारणं वुत्ता. उट्ठानं सम्पज्जतीति सम्पन्नकायिकवीरियं. सम्माकम्मन्तवायामानं यो कायिकादिविकप्पो वुत्तो पाळियं, सो नेसं कायिकस्स पयोगस्स समुट्ठानवसेन वेदितब्बो.

‘‘खिप्पाधिगमो’’ति इमिना मग्गासेवनभावं दस्सेति. ‘‘विपस्सनाय विमुत्ताधिगमो’’ति इमिना विपस्सनानुभावेन समुच्छेदविमुत्ति विक्खम्भनविमुत्ति विय समथानुभावेनाति दस्सेति. लोकियेहीति निस्सक्कवचनं. महन्तानन्ति उळारानं, पणीतानन्ति अत्थो.

५६. तन्ति विचयहारं. विसंवादनहेतूनं लोभादीनं पापधम्मानं. सोधेन्तोति यथा सरणादिविसया अञ्ञाणादिसंकिलेसा न पवत्तन्ति, एवं सोधेन्तो. परिपूरेन्ताति यथा सीलं अखण्डादिभावेन परिपुण्णं होति अनूनं, एवं परिपूरेन्ता.

‘‘तथा ¶ पटिपज्जन्तो’’ति इमिना सत्थु महापतिकारभावो परिपुण्णो दस्सितोति पठमवादे ‘‘दस्सनाभूमिञ्च भावनाभूमिञ्चा’’ति वुत्तं.

यस्स अत्थायाति यस्स यस्स पहानत्थाय. तथा पटिपन्नस्साति यथा असुभज्झानादिं पादकं कत्वा अनागामिमग्गादिअधिगमो होति, तथा पटिपन्नस्स.

वधितन्ति घातितं.

‘‘मनुस्सभूतो’’ति इदं पुब्बापरापेक्खं कत्वा ‘‘पिता मनुस्सभूतो खीणासवो’’ति च तथा ¶ ‘‘माता मनुस्सभूता’’ति योजेतब्बं. भेदानुरूपस्स सावनं अनुस्सावनं, भेदानुरूपेन वा वचनेन विञ्ञापनं.

५७. मनुस्सत्तन्ति मनुस्सजातिता. लिङ्गसम्पत्तीति पुरिसभावो. हेतूति मनोवचीपणिधानसिद्धिया सद्धिं पुब्बहेतुसम्पदा. सत्थारदस्सनन्ति सत्थु सम्मुखीभावो. गुणसम्पत्तीति अभिञ्ञासमापत्तिलाभो. अधिकारोति अत्तनो सरीरनिरपेक्खं सत्थु उपकारकरणं. छन्दताति बुद्धभावाय दळ्हच्छन्दता अनिवत्तिधम्मता.

न उप्पज्जन्तीति पन अत्थीति ‘‘न मे आचरियो अत्थि, सदिसो मे न विज्जती’’तिआदि (म. नि. १.२८५; २.३४१; कथा. ४०५; महाव. ११; मि. प. ४.५.११) इमिस्सा लोकधातुया ठत्वा वदन्तेन भगवता ‘‘किं पनावुसो सारिपुत्त, अत्थेतरहि अञ्ञो समणो वा ब्राह्मणो वा भगवतो समसमो सम्बोधियन्ति एवं पुट्ठो अहं, भन्ते, ‘नो’ति वदेय्य’’न्ति (दी. नि. ३.१६१) वत्वा तस्स कारणं दस्सेतुं ‘‘अट्ठानमेतं अनवकासो, यं एकिस्सा लोकधातुया द्वे अरहन्तो सम्मासम्बुद्धा’’ति (दी. नि. ३.१६१; अ. नि. १.२७७) इमं सुत्तं दस्सेन्तेन धम्मसेनापतिनाव बुद्धखेत्तभूतं इमं लोकधातुं ठपेत्वा अञ्ञत्थ अनुप्पत्ति वुत्ता होतीति अधिप्पायो.

खेत्तपरिग्गहो कतो नाम होति ‘‘इदं बुद्धखेत्तं नामा’’ति.

एवं ठानाट्ठानभावं गताति वुत्तप्पकारेन ठानभूता, वुत्तनयेन वा अञ्ञेपि यथारहं ठानाट्ठानभावेन पवत्ता. सत्तपञ्ञत्तिया उपादानभूताति इन्द्रियबद्धे खन्धे सन्धाय वदति.

५८. फलस्स ¶ पच्चक्खकारिताति ‘‘इमस्स कम्मस्स इदं फल’’न्ति तंतंकम्मफलावबोधो. अप्पदानाभावोति पच्चयसमवाये कम्मस्स एकन्ततो फलुप्पादनं. तेनाह ‘‘कतूपचितान’’न्ति.

५९. अज्झोसितवत्थुनाति तण्हाभिनिवेसवसेन अभिनिविट्ठवत्थुना. रूपभवअरूपभवादिनाति भवतण्हा विय सयं दस्सेति.

खन्धत्तयवसेनाति ¶ सीलादिक्खन्धत्तयवसेन. पटिपदाविभागेनाति ‘‘सब्बत्थगामिनी’’ति आदिपटिपदाय भेदेन.

तत्थतत्थगामिनीति निरयादिनिब्बानन्ति द्वीसु गन्धब्बट्ठानेसु तत्थ तत्थेव गमनसीला. सब्बत्थगामिनीति यथावुत्तेसु सब्बट्ठानेसु च गमनसीला.

सञ्जीवो काळसुत्तं सङ्घातो रोरुवो महारोरुवो तापनो महातापनो अवीचीति एते अट्ठ महानिरया. एकेकस्स चत्तारि चत्तारि द्वारानि, एकेकस्मिं द्वारे चत्तारो चत्तारो गूथनिरयादयोति एवं सोळस उस्सदनिरये वण्णेन्ति.

सक्कसुयामादिको जेट्ठकदेवराजा. पजापतिवरुणईसानादयो विय दुतियादिट्ठानन्तरकारको परिचारको.

किलेसकामपक्खेति ‘‘सङ्कप्पो कामो, रागो कामो, सङ्कप्परागो कामोति (महानि. १) एत्थ वुत्तसङ्कप्पवसेन वुत्तं. सोपि हि विबाधति, उपतापेति चाति किलेसत्तसम्भवतो किलेसकामो वुत्तो, न किलेसवत्थुभावतो. कामपटिसंयुत्तोति कामरागसङ्खातेन कामेन सम्पयुत्तो, कामपटिबद्धो वा. अञ्ञेसु च कामपटिसंयुत्तेसु धम्मेसु विज्जमानेसु वितक्के एव कामसद्दो धातुसद्दो निरुळ्होति वेदितब्बो वितक्कस्स कामसङ्कप्पवुत्तिया सातिसयत्ता. एस नयो ब्यापादधातुआदीसु. परस्स, अत्तनो च दुक्खापनं विहिंसा. तं तु मिच्छाहि विहिंसा.

बीजादिधातुनानत्तवसेन खन्धादिनानत्तं वेदितब्बं. खन्धोति द्विधाभूतग्गो.

६०. अज्झासयधातूति ¶ अज्झासयसभावो. यथा गूथादीनं सभावो एसो यं गूथादीहेव संसन्दति, एवं पुग्गलानं अज्झासयस्सेवेस सभावो, यं दुस्सीलादयो दुस्सीलादिकेहेव संसन्दन्ति.

सद्धामूलकत्ता कुसलकिरियाय वुत्तं ‘‘यं सद्धावसेना’’तिआदि. तथा हि वुत्तं ‘‘सद्धा बीज’’न्ति (सु. नि. ७७). यं लोभवसेन, सद्धावसेन च दोसवसेन, सद्धावसेन च मोहवसेन ¶ , सद्धावसेन चाति योजेतब्बं. वीरियवसेनाति सम्मप्पधानवीरियवसेन. पञ्ञावसेनाति मग्गसम्मादिट्ठिवसेन.

अकुसलस्स कम्मस्स कतोकासताय पाळियं वुत्तत्ता ‘‘विपाकावरणेन निवुत’’न्ति वुत्तं. तं पन निदस्सनमत्तं दट्ठब्बं कम्मावरणादीहिपि निवुतताय इच्छितत्ता. तथा हि यथा देवदत्तं कोकालिकं सुनक्खत्तं लिच्छविपुत्तन्ति उदाहटं, यदिपि भगवा पटिवेधस्स अट्ठानतं दिस्वा निब्बेधभागियदेसनं न देसेति, वासनाभागियं पन तथारूपस्स देसेति एवाति दस्सेन्तो ‘‘सच्चप्पटिवेध’’न्तिआदिमाह. अजातसत्तुआदीनन्ति आदिसद्देन सच्चकादीनं सङ्गहो दट्ठब्बो. तस्सापि भगवा अनागते वासनत्थाय धम्मं देसेसि. सत्था हि ‘‘अनागते तम्बपण्णिदीपे सासनं पतिट्ठहिस्सती’’ति तत्थायं कुलघरे निब्बत्तो पब्बजित्वा काळबुद्धरक्खितत्थेरो नाम पभिन्नपटिसम्भिदो महाखीणासवो भविस्सतीति इदं दिस्वा धम्मं देसेसि, सो च तथा अहोसीति.

असम्पुण्णेति एकन्ततो विपाकदानसमत्थतावसेन पारिपूरिं अनुपगते. दिट्ठुपनिस्सयदिट्ठिसहगतस्स कम्मं सन्धाय ‘‘कम्मे असम्पुण्णे’’ति वुत्तं. तेनाह ‘‘किलेसन्तराय मिस्सकं कम्मन्तरायं दस्सेत्वा’’ति.

६१. दिट्ठि पनेत्थ पधानभावेन पाळियं गहिता सीलब्बतपरामासस्स अधिप्पेतत्ता. तथा हि वुत्तं ‘‘यथा पुण्णञ्च गोवतिकं, अचेलञ्च कुक्कुरवतिक’’न्ति. असम्पुण्णत्ता एव हि तस्स मिच्छादिट्ठिकम्मसमादानस्स तेसं भगवा ‘‘चत्तारिमानि, पुण्ण, कम्मानी’’तिआदिना (म. नि. २.८१) धम्मं देसेसि. ताय च देसनाय ते तं दिट्ठिं पटिनिस्सज्जित्वा सम्मत्ते पतिट्ठहिंसु.

६२. पगुणताय ¶ वोदानं पगुणवोदानं. तदेव पठमज्झानादीहि वुट्ठहित्वा दुतियज्झानादिअधिगमस्स पच्चयत्ता वुट्ठानं नाम होतीति आह ‘‘वुट्ठानं पगुणवोदान’’न्ति. भवङ्गवुट्ठानं भवङ्गुप्पत्ति. भवङ्गचित्ते हि उप्पन्ने तंसमङ्गिसमापत्तितो वुट्ठितो नाम होति. सञ्ञावेदयितअपगमो एव अपगमविमोक्खो.

इदं वुट्ठानन्ति इदं यथावुत्तं कोसल्लं वुट्ठानहेतुभावतो वुट्ठानं. तथा हि वुत्तं ‘‘वोदानम्पि तम्हा तम्हा समाधिम्हा वुट्ठान’’न्ति (विभ. ८२८). इमाय पन वुट्ठानपाळिया असङ्गहितत्ता ¶ ‘‘निरोधसमापत्तिया वुट्ठानं पाळिमुत्तकवुट्ठानं नामा’’ति सम्मोहविनोदनियं (विभ. अट्ठ. ८२८) वुत्तं. ये पन ‘‘निरोधतो फलसमापत्तिया वुट्ठान’’न्ति पाळियं नत्थीति वदेय्युं, ते ‘‘निरोधा वुट्ठहन्तस्स नेवसञ्ञानासञ्ञायतनं फलसमापत्तिया अनन्तरपच्चयेन पच्चयो’’ति (पट्ठा. १.१.४१७) इमाय पाळिया पटिसेधेतब्बा.

६३. अयं चस्स आसयोति एत्थ आसयजाननादिना येहि इन्द्रियेहि येहि परोपरेहि सत्ता कल्याणपापासयादिका होन्ति, तेसं पजाननं विभावेतीति वेदितब्बं. एवञ्च कत्वा इन्द्रियपरोपरियत्तआसयानुसयञाणानं विसुं असाधारणता, इन्द्रियपरोपरियत्तनानाधिमुत्तिकताञाणानं विसुं बलता च सिद्धा होति.

थामगतोति एत्थ थामगमनं नाम अञ्ञेसं असाधारणो कामरागादीनं एव आवेणिको सभावो वेदितब्बो, यतो ‘‘थामगतो अनुसयं पजहती’’ति (पटि. म. ३.२१) वुत्तं.

आवज्जनमत्तेनेव सरति आकङ्खायत्तवुत्तिकत्ता. वुत्तञ्हि ‘‘आकङ्खपटिबद्धं बुद्धस्स भगवतो ञाणं, मनसिकारपटिबद्धं बुद्धस्स भगवतो ञाण’’न्तिआदि (महानि. १५६; चूळनि. मोघराजमाणवपुच्छानिद्देस ८५; पटि. म. ३.५). सब्बञ्ञुतञ्ञाणं विय हि सब्बं भगवतो ञाणं परिकम्मनिरपेक्खन्ति.

६४. उपक्किलेसविमुत्तत्ताति एत्थ चित्तादि एव उपक्किलेसा, निब्बत्तकस्स वा कम्मस्स पारिबन्धकिलेसा. कसिणकम्मपरिकम्मझाननिब्बत्तनकसिणभावो चुद्दसविधेन चित्तपरिदमनं अभिञ्ञाभिनीहारोति सब्बत्थापि ¶ वीरियबलस्स बहूपकारत्ता वुत्तं ‘‘वीरियभावनाबलनिब्बत्त’’न्ति. दिब्बसदिसत्ताति दिब्बे भवन्ति दिब्बं, यथावुत्तं पसादचक्खु, दिब्बं वियाति दिब्बं, अग्गतं अभिञ्ञाणं. दिब्बविहारो चत्तारि रूपावचरज्झानानि. तेसं वसेन निब्बत्तित्वा पटिलद्धब्बत्ता दिब्बं, तेन दिब्बहेतुकत्ता दिब्बन्ति वुत्तन्ति दस्सेति. दिब्बविहारसन्निस्सितत्ताति रूपावचरचतुत्थज्झानेन निस्सयपच्चयेन निब्बत्तत्ता, तेन दिब्बनिस्सितं दिब्बन्ति दस्सेति. दिवुसद्दं अक्खरचिन्तका कीळादीसु पठन्तीति वुत्तं ‘‘तं सब्बं सद्दसत्थानुसारेन वेदितब्ब’’न्ति. पुरिमा हि तयो अत्था कीळत्थस्स वसेन, इतरे जुतिगतिअत्थवसेनेव दस्सिताति.

मनुस्सूपचारन्ति मनुस्सगोचरं. दट्ठुं न सक्का इत्तरखणत्ता खणपच्चुप्पन्नस्स. ‘‘आसन्नचुतिका’’तिआदिना ¶ सन्ततिपच्चुप्पन्नवसेन ‘‘चवमाने उपपज्जमाने’’ति वुत्तन्ति दस्सेति. ‘‘मोहनिस्सन्दयुत्तत्ता’’तिआदिना सत्तानं हीनपणीतत्तादिभावस्स मोहादिकम्मनिदानहेतुकतं, निस्सन्दफलतञ्च दस्सेति. दिब्बचक्खुस्स पादकं एतेसन्ति दिब्बचक्खुपादकानि. तेन वुत्तं ‘‘दिब्बचक्खुना सहेव इज्झन्ती’’ति. तानि हिस्स परिभण्डञाणानि.

समादीयन्तीति समादानानि, कम्मानि समादानानि एतेसन्ति कम्मसमादाना. समादातब्बनानाविधकम्माति अत्थो पुरिमे अत्थे, दुतिये पन कम्मानि समादापेन्तीति कम्मसमादाना, मिच्छादिट्ठिया कम्मसमादाना मिच्छादिट्ठिकम्मसमादाना, हेतुअत्थे चेतं करणवचनं.

तं वाचन्ति तं अरियानं उपवदनवाचं. तं चित्तन्ति समुट्ठापकचित्तं. तं दिट्ठिन्ति येन मिच्छागाहेन अरिये अनुद्धंसेति, मिच्छाभिनिवेसं. अयम्पेत्थ अत्थो – यथा नाम हेतुसम्पन्नस्स भिक्खुनो विसुद्धं सीलं, समाधिञ्च सम्पादेत्वा ठितस्स दन्धो सतुप्पादो खिप्पाभिञ्ञाय दिट्ठेव धम्मे अञ्ञा, सति वा उपादिसेसे अनागामिता. एवमेवं यो अरियूपवादी यथावुत्तचित्तदिट्ठीहि अपक्कमित्वा अप्पतिरूपं सभावं ‘‘मया, भन्ते, तुम्हाकं उपरि वुत्त’न्ति अच्चयदेसनाय ते न खमापेति, सो कायस्स भेदा निरये एवाति. तेसु पसन्नचित्तस्स खमापनञ्हेत्थ तेसं वाचादीनं पहानं पटिनिस्सग्गोव. इतो सावज्जतरं नाम अञ्ञं नत्थि सब्बानत्थविधानतो, सब्बहितसुखपरिधंसनतो च.

कायस्स ¶ भेदाति इध कायसद्दो अत्तभावपरियायोति आह ‘‘उपादिन्नक्खन्धपरिच्चागा’’ति. तदनन्तरन्ति तस्स मरणसङ्खातस्स खन्धपरिच्चागस्स अनन्तरं. अभिनिब्बत्तक्खन्धत्थो परसद्दो, अनोरिमभूतवत्थुविसयो वा सिया, अवधिविसेसनमत्तं वा. तेसु पुरिमं सन्धायाह ‘‘अभिनिब्बत्तक्खन्धग्गहणे’’ति, पच्छिमस्स पन वसेन ‘‘चुतितो उद्ध’’न्ति.

वुत्तविपरियायेनाति ‘‘सुट्ठु चरितं, सोभनं वा चरित’’न्तिआदिना. हननन्ति घातनं.

कारणाकारणन्ति ठानाट्ठानं. चेतनाचेतनासम्पयुत्तधम्मे निरयादिनिब्बानगामिपटिपदाभूते कम्मन्ति गहेत्वा आह ‘‘कम्मपरिच्छेदमेवा’’ति. कम्मविपाकन्तरं कम्मविपाकविसेसो कम्मविपाकस्स विभागो. अप्पेतुं न सक्कोति अट्ठमनवमबलानि विय, तंसदिसं इद्धिविधञाणं विय विकुब्बितुं, एतेनस्स बलसदिसतञ्च निवारेति. झानादिञाणं विय वा अप्पेतुं ¶ , विकुब्बितुञ्च. यदिपि हि झानादिपच्चवेक्खणाञाणं इध छट्ठं बलन्ति तस्स सवितक्कसविचारता वुत्ता, तथापि झानादीहि विना पच्चवेक्खणा नत्थीति झानादिसहगतं ञाणं तदन्तोगधं कत्वा एवं वुत्तं. अथ वा सब्बञ्ञुतञ्ञाणं झानादिकिच्चं विय न सब्बं बलकिच्चं कातुं सक्कोतीति दस्सेतुं ‘‘झानं हुत्वा अप्पेतुं, इद्धि हुत्वा विकुब्बितुञ्च न सक्कोती’’ति (विभ. मूलटी. ८३१) वुत्तं, न पन कस्सचि बलस्स झानइद्धिभावोति दट्ठब्बं.

विचयहारसम्पातवण्णना निट्ठिता.

३. युत्तिहारसम्पातवण्णना

६५. पटिपक्खपटिबाळ्हा कुसला धम्मा उप्पज्जितुमेव न सक्कोन्ति, उप्पन्नापि सम्मदेव अत्तनो किच्चं कातुं असमत्थताय अनुप्पन्नसदिसाति पटिपक्खनिवारणेन कुसलानं धम्मानं किच्चकरणभावं दस्सेतुं ‘‘मनच्छट्ठानि…पे… भविस्सती’’ति वुत्तं. विहरन्तस्साति विहरणहेतु. विहरन्तोति एत्थापि एसेव नयो, तेन रक्खितचित्तता वुत्तनयेन एकन्ततो सम्मासङ्कप्पगोचरताय च संवत्ततीति दस्सेति. वुत्तनयेनाति ¶ मिच्छासङ्कप्पानं अवसरं अदत्वा विसोधितनेक्खम्मादिवितक्कताय. अविपरीतमेवाति कायादिअसुभादितो आदानं. विनिपातभयन्ति दुग्गतिभयं. सब्बोपि चायमत्थोति ‘‘सम्मासङ्कप्पगोचरो सम्मादिट्ठि भविस्सती’’तिआदीसु अत्थो युत्तिया युत्तो एव अनरूपकारणभावतो.

युत्तिहारसम्पातवण्णना निट्ठिता.

४. पदट्ठानहारसम्पातादिवण्णना

६६. यस्मा वा संकिलेसतो रक्खितचित्तस्स तीणि सुचरितानि पारिपूरिं गच्छन्ति, तस्मा रक्खितचित्तस्साति एत्थ यायं रक्खितचित्तता, सा कायसुचरितादीनं तिण्णं सुचरितानं पदट्ठानन्ति एवमेत्थ अत्थो वेदितब्बो. अत्ताधीनन्ति अत्तपराधीनं.

ततो एवाति कारणग्गहणेन फलस्स गहितत्ता एव.

६८. तत्थ ¶ इतिसद्दोति ‘‘परिपालीयती’’ति इतिसद्दो.

७३-४. पाळियं पञ्चिन्द्रियानि तीहि खन्धेहि सङ्गहितानीति एत्थ सद्धावीरियसतिन्द्रियेहि पातिमोक्खादि तिविधं सीलं गहितं सोधेतब्बत्ता. तेसन्ति तेहि सीलक्खन्धो सङ्गहितो. समाधिपञ्ञिन्द्रियेहि समाधिपञ्ञाक्खन्धा गहिताति पाकटोयमत्थो, तथा सेसम्पीति आह ‘‘इतो परेसु…पे… वुत्तनयमेवा’’ति.

७६. हेतुहेतुसमुप्पन्नपच्चयपच्चयुप्पन्नसङ्खातस्साति एत्थ हेतुपच्चयविभागो हेट्ठा वुत्तोयेव.

पदट्ठानहारसम्पातादिवण्णना निट्ठिता.

मिस्सकहारसम्पातवण्णना

इदानि यस्मा सुत्तेसु हारानं योजनानयदस्सनत्ता हारसम्पातदेसना हारविभङ्गदेसना विय न हारसरूपमत्तदस्सनत्ता, तस्मा पेटकोपदेसे ¶ आगतनयानुसारेन अपरेहि विपरियायेहि हारसम्पातयोजनाविधिं दस्सेन्तो ‘‘अपिचा’’तिआदिमाह. तत्थ विज्जाविज्जाय कुसलाकुसलचित्तप्पवत्तिया अलोभादोसलोभदोसापि परम्परभावेन पवत्तन्ति निदानभावतोति दस्सेन्तो ‘‘छ धम्मा…पे… मूलानी’’ति आह. यथा च निदानभावेन पुब्बङ्गमता, एवं अत्तनो वसेवत्तनेनापि पुब्बङ्गमता लब्भतेवाति वुत्तं ‘‘साधिपतिकानं अधिपति, सब्बचित्तुप्पादानं इन्द्रियानी’’ति. अलोभस्साति अलोभयुत्तस्स चित्तुप्पादस्स. नेक्खम्मच्छन्देनाति कुसलच्छन्देन. नेक्खम्मसद्दो पब्बज्जादीसु निरुळ्हो. वुत्तञ्हि –

‘‘पब्बज्जा पठमं झानं, निब्बानञ्च विपस्सना;

सब्बेपि कुसला धम्मा, ‘नेक्खम्म’न्ति पवुच्चरे’’ति. (इतिवु. अट्ठ. १०९; दी. नि. टी. २.३५९; अ. नि. टी. २.२.६६) –

तेसु ¶ इध कुसला धम्मा अधिप्पेता. तेन वुत्तं ‘‘कुसलच्छन्देना’’ति. नेक्खम्मच्छन्देन उपनिस्सयभूतेन, न अधिपतिभूतेन. इदं वुत्तं होति – अलोभप्पधानो चे चित्तुप्पादो होति, नेक्खम्मच्छन्देन उपनिस्सयभूतेन मनो तस्स पुब्बङ्गमो होति. सेसपदद्वयेपि एसेव नयो.

यदग्गेन तेसं धम्मानं मनो पुब्बङ्गमं, तदग्गेन तेसं जेट्ठं, पधानञ्चाति वुत्तं ‘‘मनोसेट्ठाति मनो तेसं धम्मान’’न्तिआदि. मनोमयता मनेन कतादिभावो, सो च मनस्स तेसं सहजातादिना पच्चयभावो एवाति वुत्तं ‘‘मनोमयाति…पे… पच्चयो’’ति. ते पनाति एत्थ पन-सद्दो विसेसत्थदीपको, तेनेतं दस्सेति – यदिपि तेसं धम्मानं छन्दादयोपि पच्चया एव, इन्द्रियादिपच्चयेन पन सविसेसं पच्चयभूतस्स मनस्सेव वसेनेव वुत्तं ‘‘मनोमया’’ति. तत्थ छन्दसमुदानीताति यथावुत्तनेक्खम्मादिछन्देन सम्मा उद्धमुद्धं नीता, ततो समुदागताति अत्थो. ततो एव नेक्खम्मवितक्कादितो समुप्पन्नत्ता अनाविलसङ्कप्पसमुट्ठाना. तज्जामनोविञ्ञाणधातुसम्फस्सेन सहाधिट्ठानतो फस्ससमोधाना. ‘‘फुट्ठो, भिक्खवे, वेदेति, फुट्ठो सञ्जानाति, फुट्ठो चेतेती’’ति (सं. नि. ४.९३) हि वुत्तं. इदं मनोकम्मन्ति कायङ्गवाचङ्गचोपनं अकत्वा सद्धासमन्नागतेन पसन्नेन मनसा पवत्तं इदं कुसलं मनोकम्मं. तं पन ¶ अनभिज्झासहगतं, अब्यापादसहगतं, सम्मादिट्ठिसहगतन्ति तिविधं होति.

भासतीति अविसंवादनादिना वाचङ्गचोपनावसेन पवत्तेन्तिया वचीविञ्ञत्तिया साधेतब्बं साधेतीति अत्थो, तेन कायद्वारतो पवत्तकुसलवचीकम्मम्पि सङ्गहितं होति. तथा हि वक्खति ‘‘वचीविञ्ञत्तिविप्फारतो, तथा सादियनतो च भासती’’ति. सब्बम्पि वचीकम्मं सच्चादिवसेन चतुब्बिधं. करोतीति अत्तनो, परेसञ्च हिताहितानि कारणाकारणेहि कायङ्गचोपनावसेन पवत्तेन्तिया कायविञ्ञत्तिया साधेतब्बं साधेतीति अत्थो, तेन वचीद्वारतो पवत्तकुसलकायकम्मम्पि सङ्गहितं होति. तथा च वक्खति ‘‘कायविञ्ञत्तिविप्फारतो, तथा सादियनतो च करोती’’ति (नेत्ति. अट्ठ. ७६ मिस्सकहारसम्पातवण्णना). कम्मपथवसेन गय्हमाने पाणातिपातादिवसेन तं तिविधं होति. तेनाह ‘‘इति दसकुसलकम्मपथादस्सिता’’ति. दसपुञ्ञकिरियवत्थुवसेनापि गाथाय अत्थो युज्जति. तथा हि वक्खति ‘‘सो पसन्नचित्तो’’तिआदि. भासति वा करोति वा केवलं मनसा पवत्ततीति अनियमत्थो वा-सद्दो. तथा चेव संवण्णितं.

दसविधस्स कुसलकम्मस्साति दसविधस्स कुसलकम्मपथकम्मस्स, वक्खमाननयेन वा दसपुञ्ञकिरियवत्थुसङ्खातस्स ¶ कुसलकम्मस्स. ननु तत्थ दानादिमयं तिविधमेव पुञ्ञकिरियवत्थु वुत्तन्ति? सच्चं, तं पन इतरेसं तदन्तोगधत्ता.

‘‘सुखमन्वेती’’ति सङ्खेपेन वुत्तं सुखानुगमं वित्थारेन दस्सेन्तो ‘‘इधस्सु पुरिसो’’तिआदिमाह. तत्थ एवं सन्तन्ति एवं भूतं, अप्पहीनानुसयो हुत्वा सुखवेदनीयफस्ससम्भूतन्ति अत्थो.

तत्थ ‘‘यं मनो’’तिआदिना गाथात्थवसेन चतुसच्चं निद्धारेति. आदितो ववत्थापितेसु खन्धादीसु खन्धमुखेन सच्चानं कथितत्ता सत्तानं भिन्नरुचिभावतो नानानयेहि विपस्सनाभूमिकोसल्लत्थं, पुब्बापरसम्बन्धदस्सनत्थञ्च एवं वुत्तं ‘‘एवं…पे… निद्धारेतब्बानी’’ति. सच्चमुखेन अस्सादादिके निद्धारेत्वा देसनाहारसम्पातं योजेतुं ‘‘तत्थ समुदयेना’’तिआदिमाह, तं वुत्तनयमेव. यञ्हेत्थ अञ्ञम्पि अत्थतो न विभत्तं, तं हेट्ठा वुत्तनयत्ता, उत्तानत्थत्ता चाति वेदितब्बं.

मननलक्खणेति ¶ मननलक्खणहेतु. ‘‘मननलक्खणेना’’ति वा पाठो. ईहाभावतो ब्यापाराभावतो. येन पसादेन समन्नागतत्ता मनो ‘‘पसन्नो’’ति वुत्तो, तस्स पसादस्स किच्चं मने आरोपेत्वा आह ‘‘अकालुसियतो, आरम्मणस्स ओकप्पनतो च पसन्नेना’’ति. तथा सादियनतोति वाचाय वत्तब्बं अवत्वाव फस्ससादियनतो अनुजानतो. दुतिये तथा सादियनतोति कायेन कातब्बं यथा कतं होति, तथा वाचाय संविधानतो. तथा पसुतत्ताति यथा सुखमन्वेति, तथा उपचितत्ता एवाति अत्थो. ततोति ततो कारणा, मनसा पसन्नेन, भासनेन, करणेन च हेतुनाति वुत्तं होति. अनञ्ञत्थाति एतस्मिं पन अत्थे. ततोति ततो एव. यो हि पसन्नमनो तेन यं भासनं, करणञ्च, ततो एव नं सुखमन्वेतीति वुत्तं होति. सातभावतोति सातवेदनाभावतो. इट्ठभावतोति मनापभावतो. कम्मतो विपाकुप्पत्तिफलदानसमत्थभावेन कम्मस्स निब्बत्तत्ता विपाकस्सेव अनिब्बत्तत्ताति आह ‘‘कतू…पे… अन्वेतीति वुत्त’’न्ति कारणायत्त वुत्तितोति कतभावहेतुकत्ता कम्मस्साति अधिप्पायो. असङ्कन्तितोति यस्मिं सन्ताने कम्मं निब्बत्तं, तदञ्ञसन्ताना सङ्कमनतो.

आधिपच्चयोगतोति सहजाताधिपतिवसेन आधिपच्चयुत्तत्ता. सहजातधम्मानञ्हि तंसम्पयुत्तस्स मनस्स वसेन पुब्बङ्गमता इधाधिप्पेता. ततो एवाति आधिपच्चयोगतो एव. मनस्साति उपयोगत्थे सामिवचनं. तेसं धम्मानन्ति सम्बन्धो. कुसलभावो युज्जति पसादस्स योनिसोमनसिकारहेतुकत्ता ¶ . ननु विभज्जब्याकरणेसु तेसं सावकानं सद्धा उप्पज्जतीति? नायं सद्धा, तदाकारा पन अकुसला धम्मा तथा वुच्चन्तीति वेदितब्बं. तथा हि वक्खति ‘‘नायं पसादो’’तिआदि (नेत्ति. अट्ठ. ७६ मिस्सकहारसम्पातवण्णना). सुखं अन्वेतीति युज्जति कम्मस्स फलदाने समत्थभावतो. यथा हि कतं कम्मं फलदानसमत्थं होति, तथा कतं उपचितन्ति वुच्चतीति.

मनोपविचारा इध नेक्खम्मसिता सोमनस्सूपविचारा, उपेक्खूपविचारा च वेदितब्बा कुसलाधिकारत्ता. ते पन यस्मा चित्तं निस्सायेव पवत्तन्ति, नानिस्साय, तस्मा वुत्तं ‘‘मनो मनोपविचारानं पदट्ठान’’न्ति. कुसलपक्खस्स पदट्ठानन्ति एत्थ कुसलो ताव फस्सो कुसलस्स वेदनाक्खन्धस्स ¶ सञ्ञाक्खन्धस्स सङ्खारक्खन्धस्स सहजातादिना पच्चयो होति. ‘‘फुट्ठो, भिक्खवे, वेदेति, फुट्ठो सञ्जानाति, फुट्ठो चेतेती’’ति (सं. नि. ४.९३) वुत्तं. एवं वेदनादीनम्पि वेदितब्बं. सद्धादीनम्पि पच्चयभावे वत्तब्बमेव नत्थि. सब्बस्साति चतुभूमकस्स. कामावचरा हि कुसला धम्मा यथारहं चतुभूमकस्सापि कुसलस्स पच्चया होन्ति, एवं इतरभूमकापि.

‘‘पसन्नेन मनसा भासती’’ति वुत्तत्ता विसेसतो सम्मावाचापच्चयं भासनं इधाधिप्पेतन्ति वुत्तं ‘‘भासतीति सम्मावाचा’’ति. तत्थायमधिप्पायो ‘‘भासतीति यमिदं पदं, इमिना सम्मावाचा गहिता होती’’ति. करोतीति सम्माकम्मन्तोति एत्थापि एसेव नयो. सुपरिसुद्धे कायवचीकम्मे ठितस्स आजीवपारिसुद्धि, न इतरस्साति वुत्तं ‘‘ते सम्माआजीवस्स पदट्ठान’’न्ति. तत्थ तेति सम्मावाचाकम्मन्ता. यस्मा पन आजीवट्ठमके सीले पतिट्ठितस्स उप्पन्नानुप्पन्नानं अकुसलधम्मानं पहानानुप्पादनानि, अनुप्पन्नुप्पन्नानं कुसलधम्मानं उप्पादनपारिपूरिया च सम्भवन्ति, तथा सम्मावायामे ठितस्सेव कायादीसु सुभसञ्ञादिविद्धंसिनी सम्मासति सम्भवति, तस्मा वुत्तं ‘‘सम्माआजीवो…पे…पदट्ठान’’न्ति. जेट्ठकसीलं पातिमोक्खसंवरो, सद्धासाधनो च सोति आह ‘‘तं सीलस्स पदट्ठान’’न्ति.

तेसन्ति कायवचीकम्मानं. कम्मपच्चयतायाति कुसलकम्महेतुकताय.

पदत्थो च वुत्तनयेनाति ‘‘मननतो आरम्मणविजाननतो’’तिआदिना.

अयं ¶ आवट्टोति अयं सभागविसभागधम्मावट्टनवसेन आवट्टो. एत्थ हि कुसलमूलसम्मत्तमग्गादिनिद्धारणा सभागधम्मावट्टना. अविज्जाभवतण्हानं निद्धारणा विसभागधम्मावट्टना.

विभत्तिहारे पदट्ठानभूमिविभागा वुत्तनया, सुविञ्ञेय्या चाति धम्मविभागमेव दस्सेन्तो ‘‘नयिद’’न्तिआदिमाह. तत्थ ‘‘नयिदं यथारुतवसेन गहेतब्ब’’न्ति सुत्तस्स नेय्यत्थतं वत्वा ‘‘योही’’तिआदिना तं विवरति. ‘‘दुक्खमेव अन्वेती’’ति कस्मा वुत्तं, ननु यत्थ कत्थचि हितेसिता कुसलमेवाति? नयिदमीदिसं सन्धाय वुत्तं, अधम्मं पन धम्मोति, धम्मञ्च पन ¶ अधम्मोति दीपनेन लोकस्स सब्बानत्थबीजभूतेसु सकलहितसुखुपायपटिक्खेपकेसु तित्थकरेसु असन्तगुणसम्भावनवसेन पवत्तमिच्छाधिमोक्खं सन्धाय वुत्तं. यो हि लोके अप्पमत्तकम्पि पुञ्ञं कातुकामं पापिकं दिट्ठिं निस्साय पटिबाहति, सोपि गारय्हो, किमङ्गं पन अरियविनये सम्मापटिपत्तिं पटिबाहन्तेसूति दुक्खफलाव तत्थ सम्भावनापसंसा पयिरुपासना. तथा हि वुत्तं – ‘‘न खो अहं, मोघपुरिस, अरहत्तस्स मच्छरायामि, अपिच तुय्हेवेतं पापकं दिट्ठिगतं…पे… दीघरत्तं अहिताय दुक्खाय संवत्तती’’ति (दी. नि. ३.७), ‘‘यो निन्दियं पसंसति (सु. नि. ६६३; सं. नि. १.१८०, १८१; अ. नि. ४.३; नेत्ति. ९२), सब्बस्सापि अनत्थस्स मूलं बालूपसेवना’’ति च.

इदञ्हि सुत्तन्ति ‘‘मनोपुब्बङ्गमा…पे…पद’’न्ति (ध. प. १, २) पठमं गाथं सन्धाय वदति. एतस्साति संवण्णियमानसुत्तस्स.

किच्चपञ्ञत्तीति अधिपतिपच्चयसङ्खातस्स किच्चस्स पञ्ञापनं. पधानपञ्ञत्तीति पधानभावस्स पञ्ञापना. सहजातपञ्ञत्तीति तेसं धम्मानं मनसा सहभावपञ्ञापना.

महाभूतातीति इतिसद्दो आदिअत्थो, तेन महाभूताविनाभावी सब्बो रूपधम्मो सङ्गय्हति.

‘‘मनोपुब्बङ्गमा’’ति समासपदे ‘‘मनो’’ति पदं तदवयवमत्तन्ति आह ‘‘नेव पदसुद्धी’’ति. तेनेवाह ‘‘मनोपुब्बङ्गमाति पदसुद्धी’’ति. ‘‘छायाव अनपायिनी’’ति इदं सुखानुगमस्स उदाहरणमत्तं, न यथाधिप्पेतत्थपरिसमापनं. ‘‘सुखमन्वेती’’ति पन यथाधिप्पेतत्थपरिसमापनन्ति वुत्तं ‘‘पदसुद्धि चेव आरम्भसुद्धि चा’’ति.

एकत्तताति ¶ मनोपुब्बङ्गमादिसामञ्ञं सन्धाय वदति. एवं सेसेसुपि. वेमत्तता ‘‘मनोपुब्बङ्गमा’’तिआदिना सामञ्ञतो वुत्तधम्मे पसादो धारणाय निवत्तेत्वा पसन्नसङ्खाते विसेसे अवट्ठापनतो. सेसेसुपि एसेव नयो. पसादो सिनेहसभावो, अस्सद्धियं विय लूखसभावं दोसं विनोदेतीति आह ‘‘ब्यापादविक्खम्भनतो’’ति. बहिद्धाति सद्धेय्यवत्थुं सन्धायाह. ओकप्पनतोति आरम्मणं अनुपविसित्वा अनुपक्खन्दित्वा सद्दहनतो.

देय्यधम्मादयोति ¶ एत्थ आदिसद्देन संवेगहिरोत्तप्पकसिणमण्डलादयो सङ्गय्हन्ति. इट्ठारम्मणादयोति आदिसद्देन इट्ठमज्झत्तारम्मणा, द्वारधम्मा, मनसिकारोति एवमादीनं सङ्गहो दट्ठब्बो. तथा फस्सोति यथा वेदनादीनं इट्ठारम्मणादयो पच्चयो, एवं फस्सोपीति पच्चयतासामञ्ञमेव उपसंहरति तथा-सद्दो. वेदनादीनन्ति हि वेदनादयो तयो खन्धा गहिता. विञ्ञाणस्स वेदनादयोति नामरूपं सन्धाय वदति.

‘‘सीलमयस्स अदोसो पदट्ठान’’न्ति वुत्तं खन्तिपधानत्ता सीलस्स. अधिट्ठातीति अनुयुञ्जति उप्पादेति. सोति एवं कुसलचित्तं भावेन्तो. ‘‘अनुप्पन्नान’’न्तिआदिना भावनापहानसमारोपनानि दस्सेन्तो निब्बेधभागियवसेन गाथाय अत्थं विचिनित्वा समारोपेति, एवम्पि सक्का योजेतुन्ति वासनाभागियवसेन पदट्ठाननिद्देसे उदाहरीयति.

एवं ‘‘मनोपुब्बङ्गमा धम्मा’’ति गाथाय वसेन हारसम्पातयोजनाविधिं दस्सेत्वा इदानि गाथान्तरेन दस्सेतुं ‘‘तथा ददतो पुञ्ञ’’न्तिआदिमाह. तत्थ भावनामयन्ति पञ्ञाभावनामयं.

‘‘अलोभो कुसलमूल’’न्तिआदि दानादीनं अलोभादिपधानत्ता वुत्तं, सब्बत्थ च ‘‘वुत्त’’न्ति पदं आनेत्वा योजेतब्बं. तेसन्ति रागादीनं. निस्सरणन्ति च परिनिब्बानमेव सन्धाय वदति.

परिच्चागसीलो अलोभज्झासयो कामेसु आदीनवदस्सावी सम्मदेव सीलं परिपूरेतीति आह ‘‘ददतो…पे… पदट्ठान’’न्ति. इध ओळारिका नाम किलेसा वीतिक्कमावत्थानं, तप्पहानं तदङ्गप्पहानेन वेदितब्बं. मज्झिमानन्ति परियुट्ठानावत्थानं. सुखुमानन्ति अनुसयावत्थानं. कतावीभूमि न्ति खीणासवभूमिं.

ददतोति मग्गसहगतेन अलोभेन सदेवकस्स लोकस्स अभयदानं ददतो. पुञ्ञन्ति लोकुत्तरकुसलं. ¶ संयमतोति मग्गपरियापन्नेहि सम्मावाचाकम्मन्ताजीवेहि दिट्ठेकट्ठादिसंकिलेसतो मग्गसंयमेन संयमन्तस्स. वेरन्ति पाणातिपातादिपापं. कुसलोति मग्गसम्मादिट्ठिया कुसलो विचक्खणो. जहाति पापकन्ति तेहि तेहि मग्गेहि तं तं पहातब्बं पापधम्मं ओधिसो जहाति समुच्छिन्दति. तेनाह ‘‘मग्गो वुत्तो’’ति.

‘‘ददतो’’तिआदिना ¶ पुब्बे अविभागेन कुसलमूलानि उद्धटानीति इदानि विभागेन तानि उद्धरन्तो ‘‘लोकियकुसलमूल’’न्तिआदिमाह.

पुथुज्जनभूमि सेक्खभूमि दस्सिता पहानस्स विप्पकतभावदीपनतो. असेक्खभूमि दस्सिता अनुपादापरिनिब्बानदीपनतो.

सग्गगामिनी पटिपदा पुब्बभागप्पटिपत्ति.

पुञ्ञे कथिते पुञ्ञफलम्पि कथितमेव होतीति वुत्तं ‘‘ददतो…पे… देसनमाहा’’ति. सच्चकम्मट्ठानेन विना संकिलेसप्पहानं नत्थीति दस्सेन्तो आह ‘‘कुसलो…पे… देसनमाहा’’ति.

वेरसद्दो अदिन्नादानादिपापधम्मेसुपि निरुळ्होति वुत्तं ‘‘एवं सब्बानिपि सिक्खापदानि वित्थारेतब्बानी’’ति. द्वेपि विमुत्तियो सेक्खासेक्खविमुत्तियो, सउपादिसेसअनुपादिसेसविमुत्तियो च. तथा हि वक्खति ‘‘निब्बुतोति द्वे निब्बानधातुयो’’तिआदि (नेत्ति. अट्ठ. ७६).

कारणूपचारेन, कारणग्गहणेन वा फलं गहितन्ति आह ‘‘द्वे सुगतियो’’तिआदि. वट्टविवट्टसम्पत्तियो इमिस्सा देसनाय फलं, तस्स दानं सीलं भावना उपायो, ‘‘सम्पत्तिद्वयं इच्छन्तेन दानादीसु अप्पमत्तेन भवितब्ब’’न्ति अयमेत्थ भगवतो आणत्तीति इममत्थं सन्धायाह ‘‘फलादीनि यथारहं वेदितब्बानी’’ति.

विचयोति विचयहारसम्पातो, सो वुच्चतीति अत्थो. एस नयो इतो परेसुपि. ‘‘तिविधम्पि दानमय’’न्तिआदिना पदत्थविचयं दस्सेति, तेन अस्सादादयो, इतरे च विचयहारपदत्था ¶ अत्थतो विचिता एव होन्तीति. रूपादिआरम्मणस्स परिच्चागो वुत्तोति सम्बन्धो. सब्बोति सकलो अनवसेसतो किच्चस्स वुत्तत्ता.

दानाभिरतस्स चागाधिट्ठानं पारिपूरिं गच्छतीति वुत्तं ‘‘ददतो…पे… पदट्ठान’’न्ति. विरतिसच्चे, वचीसच्चे च तिट्ठतो सच्चाधिट्ठानं पारिपूरिं गच्छतीति वुत्तं ‘‘संयम…पे… पदट्ठान’’न्ति. कोसल्लयोगतो च पापप्पहानतो च पञ्ञापारिपूरिं गच्छतीति वुत्तं ‘‘कुसलो…पे… पदट्ठान’’न्ति. अनवसेसरागादीसु पहीनेसु उपसमो उपट्ठितो नाम होतीति वुत्तं ‘‘राग…पे… पदट्ठान’’न्ति.

कुसलोति ¶ पुग्गलाधिट्ठानेन कोसल्लसम्मादिट्ठि वुत्ताति आह ‘‘कुसलो…पे… मग्गङ्गादिभावेन एकलक्खणत्ता’’ति. आदिसद्देन बोधिपक्खियभावादिं सङ्गण्हाति. खेपेतब्बभावेनाति पहातब्बभावेन.

अवेरतन्ति असपत्ततं. कुसलधम्मेहीति अनवज्जधम्मेहि, फलनिब्बानेहीति अधिप्पायो. दानस्स महप्फलता, सीलादिगुणेहि सत्थु अनुत्तरदक्खिणेय्यभावो, अनुपादापरिनिब्बानन्ति इमेसं पच्चवेक्खणा इमस्स दानस्स निदानन्ति अयमत्थो पाळियं निरुळ्होव. निब्बचननिदानसन्धयो सुविञ्ञेय्यावाति आह ‘‘निब्बचननिदानसन्धयो वत्तब्बा’’ति.

पटिपक्खनिद्देसेन समुदयोति देसनत्थं पटिपक्खनिद्देसनेन निद्धारितो अयं मच्छरियादिसंकिलेसपक्खिको समुदयो. अलोभेन…पे… दानादीहीति येहि अलोभादीहि दानादयो धम्मा सम्भवन्ति, तानि दानादिग्गहणेनेव गहितानीति कुसलमूलानि निद्धारेति ‘‘इमानि तीणि कुसलानी’’ति. तेसन्ति कुसलमूलानं.

भयहेतु देति पण्णाकारादिवसेन. रागहेतु देति सभागवत्थुस्स. आमिसकिञ्चिक्खहेतु देति लञ्जादिवसेन. अनुकम्पन्तो वा करुणाखेत्ते. अपचयमानो गुणखेत्ते, उपकारखेत्ते वा. भयूपरतोति भयेन ओरतो. तेन तथारूपेन संयमेन वेरं न चियतेव. एवं सब्बस्स अकुसलस्स पापको विपाकोति योजना.

‘‘ददतो’’तिआदिना यथा दानपटिक्खेपेन परिवत्तनं दस्सितं, एवं पहानपटिक्खेपेनपि परिवत्तनं दस्सेतब्बन्ति वुत्तं ‘‘अकुसलो पन न जहाती’’ति.

कम्मफलं ¶ सद्दहन्तो दानकिरियायं पदहन्तो येन विधिना दानं दातब्बं, तत्थ सतिं उपट्ठपेन्तो चित्तं समादहन्तो सम्मादिट्ठिं पुरक्खरोन्तो दाने सम्मापटिपन्नो होतीति आह ‘‘दानं नाम…पे… होती’’ति.

भावनापहानसमारोपनानि पाळियं सरूपतो विञ्ञायन्तीति पदट्ठानवेवचनसमारोपनानि दस्सेतुं ‘‘तं सीलस्स पदट्ठान’’न्तिआदि वुत्तं, तं सुविञ्ञेय्यं. अञ्ञञ्च यदेत्थ अत्थतो न विभत्तं, तं वुत्तनयत्ता, उत्तानत्थत्ता चाति वेदितब्बं.

हारसम्पातवारवण्णना निट्ठिता.

नयसमुट्ठानवारवण्णना

७९. ‘‘विसयभेदतो’’ति ¶ सङ्खेपेन वुत्तमत्थं वित्थारतो विवरितुं ‘‘यथा ही’’तिआदिमाह. तत्थ नयतोति नयग्गाहतो. न हि पटिवेधञाणं विय विपस्सनाञाणं पच्चक्खतो पवत्ततीति. अनुबुज्झियमानोति अभिसमयञाणस्स अनुरूपं बुज्झियमानो. यथा एकपटिवेधेनेव मग्गञाणं पवत्तति, एवं तदनुच्छविकं विपस्सनाञाणेन गय्हमानोति अत्थो. एवञ्च कत्वा नन्दियावट्टादीनं तिण्णं अत्थनयभावो समत्थितो होतीति. तथा हि अत्थविसेससरूपताय तयो नया ‘‘सुत्तत्थो’’ति वुत्ता, पदत्थविचारभावेपि पन हारा ‘‘ब्यञ्जनविचयो’’ति. यदि एवं कथं तयोति चोदनं सन्धायाह ‘‘पटिविज्झन्तानं पना’’तिआदि. तत्थ एकमेको संकिलेसवोदानानं विभागतो द्विसङ्गहोति योजना. चतुछअट्ठदिसो चाति न पच्चेकं ते नन्दियावट्टादयो चतुछअट्ठदिसा, अथ खो यथाक्कमन्ति. ‘‘एव’’न्तिआदि यथावुत्तस्स अत्थस्स निगमनं.

तथा चाति यथावुत्तस्स अत्थस्स उपचयेन समत्थना. पुब्बा कोटि न पञ्ञायतीति एत्थ यं वत्तब्बं, तं परतो पट्ठानकथायं आवि भविस्सति. ‘‘अन्धं तमं तदा होति, यं लोभो सहते नर’’न्तिआदि (चूळनि. खग्गविसाणसुत्तनिद्देस १२८) वचनतो कामतण्हापि पटिच्छादनसभावा, यतो कामच्छन्दं ‘‘नीवरण’’न्ति वुत्तं. अविज्जाय पन भवेसु आदीनवप्पटिच्छादनं ¶ सातिसयन्ति. तथा अविज्जापि संयोजनसभावा, यतो सा बहिद्धा संयोजनभावेन वुत्ता. एवं सन्तेपि तण्हाय बन्धनट्ठो सातिसयो अपेक्खितभावतोति इममत्थं दस्सेन्तो ‘‘तथापि…पे… वुत्त’’न्ति आह.

‘‘संयुत्ता’’ति पदस्स सम्पयुत्ताति अत्थोति आह ‘‘मिस्सिता’’ति. ‘‘अविज्जाभिभूता…पे… अभिनिविसन्ता’’ति एतेन अविज्जाय अयाथावगहणहेतुतं दस्सेति, ततो सो अविन्दियं विन्दतीति अविज्जाति वुच्चति. किलिस्सनं उपतापनन्ति आह ‘‘किलिस्सनप्पयोगं अत्तपरितापनपटिपत्ति’’न्ति. अल्लीयनं सेवनं.

दुक्खन्ति ¶ …पे… जानन्तीति अत्तना अनुभूयमानं तथा तथा उपट्ठितं कायिकचेतसिकदुक्खं, इतरम्पि वा एकदेसं जानन्ति. तण्हायपि एसेव नयो. सभागविसभागपटिपज्जितब्बाकारतो तत्थ तेसं ञाणं नत्थेवातिदस्सेन्तो ‘‘इदं दुक्ख’’न्तिआदिमाह. पवत्तिपवत्तिहेतुमत्तम्पीति ‘‘पवत्ति पवत्तिहेतू’’ति एत्तकम्पि. का पन कथाति पचुरजनसाधारणे लोकियेपि नाम अत्थे येसं ञाणस्स पटिघातो, परमगम्भीरे अरियानं एव विसयभूते लोकुत्तरे निवत्तिनिवत्तिहेतुसङ्खाते अत्थे का नाम कथा, छिन्ना कथाति अत्थो. अट्ठसमापत्तिपभेदस्स केवलस्स समथस्स तादिसे काले बाहिरकानञ्च इज्झनतो ‘‘विपस्सनाधिट्ठान’’न्ति विसेसितं. वूपसमो समुच्छेदो, पटिप्पस्सद्धि च.

‘‘संसारस्स अनुपच्छेदनतो’’ति इदं दिट्ठिगतानं दिट्ठिगतिकमतदस्सनं. सो हि पुत्तमुखदस्सने असति संसारो उच्छिज्जेय्याति भायति. यतो वुत्तं –

‘‘गण्डुप्पादो किकी चेव, कुन्ती ब्राह्मणधम्मिको;

एते अभयं भायन्ति, सम्मूळ्हा चतुरो जना’’ति. (सु. नि. अट्ठ. २.२९३; अ. नि. टी. ३.५.१९२);

तदभिञ्ञाति तं यथावुत्तअन्तद्वयं अभिजानन्ति गुणं आरोपेत्वा जानन्तीति तदभिञ्ञा. अत्थभञ्जनतो, रोगगण्डसल्लसदिसताय अत्तभावसंकिलेसानञ्च रोगगण्डसल्लता.

सक्कायदस्सनेति एत्थ दिट्ठिदस्सनं, सक्कायोव दस्सनं सक्कायदस्सनन्ति अत्थो वेदितब्बो. तेसन्ति दिट्ठिचरितानं. अत्ताभिनिवेसो बलवा. तस्मा यथाउपट्ठितं रूपं ‘‘अत्ता’’इच्चेव ¶ गण्हन्तीति अधिप्पायो. तथा वेदनादिं. तण्हाचरितो पन यथाउपट्ठितं रूपं तण्हावत्थुं कत्वा अत्तनियाभिनिवेसेन अभिनिविसन्ता तदञ्ञमेव अत्ततो समनुपस्सन्ति. एवं वेदनादीसु. तेनाह ‘‘तण्हाचरिता’’तिआदि. विज्जमानेति परमत्थतो उपलब्भमाने. कायेति समूहे. दिट्ठिया परिकप्पितो अत्तादि एव परमत्थतो नुपलब्भति, दिट्ठि पन लब्भतेवाति आह ‘‘सती वा विज्जमाना’’ति.

सक्कायदस्सनमुखेनाति सक्कायदिट्ठिमुखेन.

उच्छेदसस्सतन्ति ¶ तंसहचरणतो उच्छेदसस्सतदिट्ठि वुत्ता. ‘‘उच्छेदसस्सतवादा’’तिपि पाठो.

कसिणायतनानीति कसिणज्झानानि.

तेजेत्वाति निसानेत्वा.

८१. एत्तावता नन्दियावट्टस्स भूमिरचनवसेन संकिलेसपक्खो दस्सितोति आह ‘‘तत्थ दिट्ठिचरितोतिआदिना वोदानपक्खं दस्सेती’’ति. ‘‘यस्मा सल्लेखे तिब्बगारवो’’ति इमिना तत्थ तिब्बगारवत्ता संलेखानुसन्ततवुत्तिना भवतीति दस्सेति. सेसेसुपि एसेव नयो. मिच्छाधिमोक्खो सद्धापतिरूपको अवत्थुस्मिं पसादो.

पुग्गलाधिट्ठानेन धम्ममेव विभजतीति आह ‘‘सत्तापि…पे… दस्सेती’’ति.

ये हि केचीति एत्थ हि-सद्दो निपातमत्तं. ‘‘इमाहि एव चतूहि पटिपदाही’’तिपि पाळि. दुक्खापटिपदादिविभागेन मग्गो एव इध वुत्तोति आह ‘‘पटिपदा हि मग्गो’’ति चतुद्दिसासङ्खातं मग्गन्ति चतुद्दिसासङ्खातं पवत्तनुपायं. द्वे दिसा एतिस्साति द्विदिसा. नन्दियावट्टस्साति नन्दियावट्टनयस्स.

८२. विवत्तति वट्टं एत्थाति विवत्तं, विवत्तं एव विवट्टं, असङ्खतधातु, निब्बुति एव वा. तेन वुत्तं ‘‘निब्बान’’न्ति.

‘‘कत्थ ¶ दट्ठब्ब’’न्ति वा पाळि. उपचयेति उपचयावत्थायन्ति अत्थो. दसन्नन्ति लोभादिकिलेसवत्थूनं. विपल्लासहेतुभावतोति सुभसञ्ञादिविपल्लासहेतुकभावतो. विपरियेसग्गाहवसेन हि आदीनवेसु एव संयोजनियेसु धम्मेसु अस्सादानुपस्सिता. न हि यथाभूतञाणे सति तथा सम्भवो. तेन वुत्तं ‘‘दसन्नं…पे… भावतो’’ति. दसविधकारणेति दसविधे कारणे, दसविधस्स वा कारणे. अयोनिसोमनसिकारपरिक्खता धम्मा सुभारम्मणादयो.

तब्बिसया किलेसाति आहारपरिञ्ञापरिबन्धभूता किलेसा. विञ्ञाणट्ठितीसुपि एसेव नयो. काये पवत्तमानो पठमो विपल्लासो कायसमुदाये, कायेकदेसे च कबळीकारे आहारे पवत्तो एव होतीति वुत्तं ‘‘पठमे आहारे विसयभूते पठमो विपल्लासो ¶ पवत्तती’’ति. तथा वेदनायं पवत्तमानो दुतियविपल्लासो तप्पच्चये फस्साहारे, चित्ते पवत्तमानो ततियविपल्लासो तप्पच्चये मनोसञ्चेतनाहारे, धम्मेसु पवत्तमानो चतुत्थविपल्लासो तप्पच्चये विञ्ञाणाहारे पवत्तो एव होतीति वुत्तं ‘‘चतुत्थे आहारे चतुत्थो विपल्लासो’’ति. तेनाह ‘‘सेसाहारेसुपि एसेव नयो’’ति. आहारसीसेन वा आहारपटिबद्धो छन्दरागो गहितो. विञ्ञाणट्ठितीसुपि एसेव नयो. तेनेवाह ‘‘आहारसीसेन तब्बिसया किलेसा अधिप्पेता’’ति. पठमे आहारे विसयभूतेति च पठमे आहारे छन्दरागस्स विसयभावं पत्ते, तब्भावं अनतिक्कन्तेति अत्थो. अप्पहीनच्छन्दरागस्स हि तत्थ विपल्लासा सम्भवन्ति, न इतरस्स. तथा दुतियविपल्लासादीसु अप्पहीनेसु. इतरे उपादानानि पवत्तन्तेव अप्पहीनत्ताति आह ‘‘सेसपदेसुपि एसेव नयो’’ति. यस्मा च उपादानादीसु अप्पहीनेसुपि योगादयो पवत्तन्तेव यथारहं तंसभावत्ता, तदेकट्ठसभावतो च, तस्मा वुत्तं पाळियं ‘‘पठमे उपादाने पठमो योगो’’तिआदि. तेनाह ‘‘सेसपदेसुपि एसेव नयो’’ति.

८३. अपरिजानन्तस्साति ञातपरिञ्ञाय, तीरणपरिञ्ञाय, पहानपरिञ्ञायाति तीहि परिञ्ञाहि परिच्छिन्दित्वा अजानन्तस्स, तेसं समुदयञ्च अत्थङ्गमञ्च अस्सादञ्च आदीनवञ्च निस्सरणञ्च यथाभूतं अनवबुज्झन्तस्साति अत्थो. तिब्बो बहलो छन्दरागो होति तण्हाचरितभावतोति अधिप्पायो. इति उपक्किलेसस्स दिट्ठाभिनिवेसस्स हेतुभावतोति इममत्थं सन्धायाह ‘‘वुत्तनयेनेवा’’ति. सुभसुखसञ्ञाकामुपादानकामभवयोगअभिज्झाकायगन्थकामभवासव- कामभवोघरागसल्लछन्दागतिगमनानि तण्हापक्खिकताय, तण्हासभावताय च तण्हापधानानि. सीलब्बतुपादानब्यापादकायगन्थदोससल्लदोसागतिगमनानि पन तण्हाभावे भावतो ¶ , विञ्ञाणट्ठितियो तण्हाविसयतो, सब्बेसं वा तण्हाविसयतो तण्हापधानता लब्भतेव. पच्छिमकानं दिट्ठिपधानता वुत्तनयानुसारेन वेदितब्बा.

८४. कबळीकारे आहारेति कबळीकाराहारविसये छन्दरागे. ‘‘अप्पहीने’’तिआदिकं परियायकथं मुञ्चित्वा निप्परियायमेव दस्सेन्तो कबळीकाराहारस्स ¶ ‘‘असुभसभावत्ता, असुभसमुट्ठानत्ता चा’’ति वुत्तं. लब्भमाने हि उजुके अत्थे किं परियायकथायाति. छन्दरागो वा तत्थ अत्थसिद्धोति एवम्पेत्थ अत्थो वुत्तो. न हि तत्थ असति छन्दरागे विपल्लासो सम्भवति. दुक्खसभावत्ताति सङ्खारदुक्खताय दुक्खसभावत्ता. दुक्खपच्चयत्ताति तिविधदुक्खतालक्खणस्स दुक्खस्स कारणतो. विञ्ञाणे निच्चसञ्ञिनो. तथा हि साति नाम भिक्खु केवट्टपुत्तो ‘‘तंयेव विञ्ञाणं सन्धावति संसरती’’ति तत्थ निच्चाभिनिवेसं संवेदेसि. येभुय्येन सङ्खारेसु अत्तसञ्ञिता दिट्ठिगतिकानं ‘‘चेतना अत्ता’’तिआदिदिट्ठिपरिदीपनेसु वेदितब्बा. ‘‘भवविसुद्धी’’ति पदस्स अत्थवचनं ‘‘निब्बुतिसुख’’न्ति. ‘‘सीलब्बतेहि…पे… सुखन्ति दळ्हं गण्हाती’’ति इमिना सीलब्बतुपादानं इध भवुपादानन्ति दस्सेति. तथा हि वक्खति ‘‘सीलब्बतुपादानसङ्खातेन भवुपादानेना’’ति.

पच्चया होन्ति उपनिस्सयपच्चयादिना. पठमे योगे ठितोति पठमे योगे पतिट्ठितो. अप्पहीना हि किलेसा कम्मवट्टादीनं कारणभूता तंसमङ्गिनो सत्तस्स पतिट्ठाति वुच्चन्ति. परस्स अभिज्झायनं पराभिज्झायनं. भवपत्थनाय भवदिट्ठिभवरागवसेन पियायितस्स वत्थुनो विपरिणामञ्ञथाभावे दोमनस्सुप्पत्तिं सन्धाय वुत्तं ‘‘भवराग…पे… पदूसेन्ती’’ति.

गन्थित्वाति गन्थिं कत्वा. द्विधाभूतं रज्जुआदिके विय गन्थिकरणञ्हि गन्थनं. चित्तं परियादाय तिट्ठन्ता आसवानं उप्पत्तिहेतु होन्तीति सम्बन्धो. परियुट्ठानप्पत्ता एकच्चे किलेसा विसेसतो आसवुप्पत्तिहेतु होन्तीति दस्सनत्थं अट्ठकथायं उप्पटिपाटिवचनं. तप्पटिपक्खे विसये पत्थेतीति योजना. तब्बिसयबहुले भवे पत्थेतीति यथा मानुसकेहि कामेहि निब्बिन्नरूपा देवूपपत्ति. तंसभावत्ताति दिट्ठिसभावत्ता. अपरापरन्ति अञ्ञमञ्ञं. एकच्चा हि दिट्ठि एकच्चस्स दिट्ठाभिनिवेसस्स कारणं होति, यथा सक्कायदिट्ठि इतरासं. अभिनिविसन्तस्साति अभिनिवेसनहेतु. ‘‘अयोनिसोमनसिकारतो…पे… अविज्जासवो उप्पज्जती’’ति इदं सच्चाभिनिवेसस्स फलभूतं अविज्जासवं दस्सेति एकन्तवस्सिमेघवुट्ठानेन विय महोघप्पवत्ति. अविज्जासवो सिद्धो होति वुट्ठिहेतुकमहोघसिद्धिया उपरिमेघवुट्ठानं विय.

‘‘नन्दीरागसहगता’’तिआदीसु ¶ ¶ (महाव. १४) विय तब्भावत्थो सहगतसद्दोति आह ‘‘अनुसय…पे… भूता वा’’ति. चित्तस्स अब्भन्तरसङ्खातं हदयन्ति विपाकचित्तप्पवत्तिं सन्धाय वदति. विपाकवट्टेपि किलेसवासनाहिता अत्थि काचि विसेसमत्ता.

लोभसहगतस्स विञ्ञाणस्स. इतरस्स दोससहगतादिकस्स. ब्यञ्जनेन विय भोजनस्स आरम्मणस्स अभिसङ्खरणं विसेसापादनं उपसेचनं, नन्दी सप्पीतिकतण्हा उपसेचनं एतस्साति नन्दूपसेचनं उपसेचनभूतायपि नन्दिया रागसल्लउपनिसतो. उपसित्ते पन वत्तब्बमेव नत्थीति दस्सेतुं पाळिया ‘‘रागसल्लेन नन्दूपसेचनेन विञ्ञाणेना’’ति वुत्तन्ति तमत्थं पाकटं कातुं ‘‘केन पन तं नन्दूपसेचन’’न्ति पुच्छति.

रागसल्लेनाति हेतुम्हि करणवचनन्ति दस्सेन्तो ‘‘रागसल्लेन हेतुभूतेना’’ति आह. उपनिस्सयपच्चयत्थो चेत्थ हेत्वत्थो. उपगन्तब्बतो विञ्ञाणेनाति विभत्तिं परिणामेत्वा योजेतब्बं. ‘‘पतिट्ठाभावतो’’ति इमिना विञ्ञाणस्स निस्सयादिपच्चयतं वदति. तेनाह ‘‘रूपक्खन्धं निस्साय तिट्ठती’’ति. एवं दुतियादिविञ्ञाणट्ठितीसुपि निस्सयादिपच्चयता वत्तब्बा पतिट्ठावचनतो.

८५. यदिपि अकुसलमूलादिके तिपुक्खलस्स, तण्हादिके नन्दियावट्टस्स दिसाभावेन वक्खति, तथापि अञ्ञमञ्ञानुप्पवेसतो एकस्मिं नये सिद्धे इतरेपि सिद्धा एव होन्तीति इमस्स विसेसस्स दस्सनत्थं ‘‘आहारादयो…पे… ववत्थपेतु’’न्ति वुत्तं. वक्खमाने वा अकुसलमूलतण्हादिके आदिसद्देन सङ्गहेत्वा ‘‘आहारादयो’’ति वदन्तो ‘‘नयान’’न्ति बहुवचनमाह. एकस्स अत्थस्साति रागचरितस्स उपक्किलेसतासङ्खातस्स एकस्स पयोजनस्स. ब्यञ्जनत्थोपि गहितो, न ब्यञ्जनमेव गहितन्ति सुत्तपदानि अञ्ञमञ्ञपरियायवचनानि यथारहं तण्हावत्थूनं तत्थ कथितत्ता वुत्तं ‘‘सवत्थुका तण्हा वुत्ता’’ति. दोसवत्थूनं, दिट्ठिवत्थूनञ्च तत्थ कथितत्ता ‘‘सवत्थुको दोसो, सवत्थुका दिट्ठि च वुत्ता’’ति इममत्थं सन्धायाह ‘‘वुत्तनयानुसारेना’’ति.

दुक्खाकारेन ¶ सह दुक्खाकारं गहेत्वाति अत्थो. एवञ्चेतन्ति यदि तंतंअनुपस्सनाबहुलस्स वसेन पुरिमाहारद्वयादीसु विमोक्खमुखविसेसनिद्धारणं कतं, एतं एवमेव वेदितब्बं, न अञ्ञथा. तत्थ कारणं वदन्तो ‘‘न ही’’तिआदिमाह. तस्सत्थो – यथा ¶ अरियमग्गानं ओधिसो किलेसप्पजहनतो पहातब्बेसु धम्मेसु नियमो अत्थि, न एवं विपस्सनाय परिञ्ञापहानानं अनिच्चन्तिकत्ताति.

अपरे पनाहु – पुरिमे आहारद्वये परिकिलेसभावेन, दुक्खपच्चयत्ता च दुक्खलक्खणं सुपाकटं. तत्थ पुरिमे विञ्ञाणट्ठितिद्वयविञ्ञाणाहारे ततियविञ्ञाणट्ठितियं अनिच्चलक्खणं, मनोसञ्चेतनाहारे चतुत्थविञ्ञाणट्ठितियं अनत्तलक्खणं सुपाकटन्ति तिस्सन्नं अनुपस्सनानं पवत्तिमुखताय तेहि अप्पणिहितादिविमोक्खमुखेहि परिञ्ञं गच्छन्तीति. तथा विपल्लासादीसु पुरिमद्वयं दुक्खानुपस्सनाय उजुविपच्चनीकं, इतरद्वयं अनिच्चानत्तानुपस्सनानं. इति पवत्तिमुखताय च उजुविपच्चनीकताय च इमे धम्मा यथारहं अप्पणिहितादिविमोक्खमुखेहि परिञ्ञेय्या, पहातब्बा च वुत्ता. तत्थ सुभसुखसञ्ञाकामुपादानसीलब्बतुपादानकामयोगभवयोगअभिज्झाकाय गन्थकामासवकामोघ भवोघ रागसल्लछन्दअगतिगमनानि सुखस्सादवसेन पवत्तनतो दुक्खानुपस्सनाय पटिपक्खभावतो ब्यापादकायगन्थदोससल्लदोसअगतिगमनानि पवत्तिमुखताय अप्पणिहितविमोक्खमुखेन पहातब्बानि. ततियसञ्ञादयो निच्चाभिनिवेसतन्निमित्ताहि अनिच्चानुपस्सनाय पटिपक्खभावतो अनिमित्तविमोक्खमुखेन पहातब्बा. चतुत्थसञ्ञादयो अत्ताभिनिवेसतन्नित्ताहि अनत्तानुपस्सनाय पटिपक्खभावतो सुञ्ञतविमोक्खमुखेन पहातब्बा. तत्थ मानसल्लभयअगतिगमनानं निच्चाभिनिवेसनिमित्तता वेदितब्बा. न हि अनिच्चतो पस्सतो मानजप्पनं, भयं वा सम्भवति. अविज्जायोगादीनं अत्ताभिनिवेसनिमित्तता पाकटा एवाति.

८६. अप्पमञ्ञावज्जा रूपावचरसमापत्तियो दिब्बविहारा ‘‘देवूपपत्तिसंवत्तनिककुसलसमापत्तियो चा’’ति कत्वा, सतिपि तब्भावे परहितपटिपत्तितो, निद्दोसताय च सेट्ठा विहाराति चतस्सो अप्पमञ्ञा ब्रह्मविहारा, चतस्सो फलसमापत्तियो अरियविहारा ‘‘आरका किलेसेहि अरियानं विहारा’’ति. चतस्सो आरुप्पसमापत्तियो आनेञ्जविहारा ¶ , सतिपि देवूपपत्तिसंवत्तनिककुसलसमापत्तिभावे आनेञ्जसन्तताहि लोकियेसु सिखाप्पत्तितो.

अधिकरणभेदेनाति वत्थुभेदेन.

यं अभिण्हं न पवत्तति, तं अच्छरियन्ति दस्सेतुं ‘‘अन्धस्स…पे… उप्पज्जनक’’न्ति वुत्तं. अधितिट्ठति सीलादि एतेन सच्चेन, एत्थ वा सच्चे निमित्तभूते, अधिट्ठानमत्तमेव वा तं सच्चन्ति एवं करणाधिकरणभावत्था पच्चयवसेन वेदितब्बा समानाधिकरणसमासपक्खे. तथा ¶ अञ्ञपदत्थसमासपक्खे. इतरस्मिं पन समासे करणाधिकरणत्था एव, ते च खो सीलादिवसेन च वेदितब्बा. सुखन्ति झानविपस्सनामग्गफलनिब्बानसुखं. लोकियविपाकसुखम्पि लब्भतेव. ‘‘नाञ्ञत्र बोज्झा…पे… पाणिन’’न्ति (सं. नि. १. ९८) हि इमाय गाथाय सङ्गहिता अनत्तपरिहारमुखेन सत्तानं अभया निब्बानसम्पत्तिसुखावहा चत्तारो धम्मा इध ‘‘सुखभागिया’’ति वुत्ताति. अनवसेसपरियादानतोति फरणवसेन अनवसेसग्गहणतो.

पठमस्स सतिपट्ठानस्स पठमपटिपदावसेन पवत्तस्साति अधिप्पायो. एवं सेसेसुपि. ‘‘यथा ही’’तिआदिना यथावुत्तपटिपदासतिपट्ठानानं नानन्तरियकतं उपमाय विभावेति. सतिपि च सब्बाहि पटिपदाहि सब्बेसं सतिपट्ठानानं नियमाभावे नानन्तरिकभावेन देसनाक्कमेनेवेत्थ नेसं अयमनुक्कमो कतोति वेदितब्बो. अथ वा कायवेदनासु सुभसुखसञ्ञानं दुब्बिनिवेठियताय असुभदुक्खानुपस्सनानं किच्चसिद्धितो पुरिमेन पटिपदाद्वयेन पुरिमं सतिपट्ठानद्वयं योजितं तदभावतो. इतरेन इतरं. तानि हि पुरिमेसु सतिपट्ठानेसु कतकम्मस्स इच्छितब्बानि. अथ वा यथा तण्हाचरितदिट्ठिचरितानं मन्दतिक्खपञ्ञानं वसेन चतस्सो पटिपदा योजिता, एवं चत्तारि सतिपट्ठानानि सम्भवन्तीति दस्सेतुं पटिपदासतिपट्ठानानं अयमनुक्कमो कतो.

‘‘तथा’’ति इमिना यथा समानपटिपक्खताय पठमस्स सतिपट्ठानस्स भावना पठमस्स झानस्स विसेसावहा, एवं पीतिसहगतादिसमानताय दुतियसतिपट्ठानादिभावना दुतियज्झानादीनं विसेसावहाति इममत्थं उपसंहरति. पीतिपटिसंवेदनादीति आदिसद्देन सुखपटिसंवेदनं, चित्तसङ्खारपटिसंवेदनं, पस्सम्भनञ्च सङ्गण्हाति. चित्तस्स अभिप्पमोदनग्गहणञ्चेत्थ ¶ निदस्सनमत्तं दट्ठब्बं पटिसंवेदनसमादहनविमोचनानम्पि वसेन पवत्तिया इच्छितब्बत्ता. अनिच्चविरागादीति आदिसद्देन निरोधपटिनिस्सग्गा सङ्गय्हन्ति.

रूपावचरसमापत्तीनन्ति एत्थ पटिलद्धमत्तं पठमज्झानं पठमज्झानसमापत्तिया पगुणवसीभावापादनस्स पच्चयो होति, न इतरासं. इतरासं पन अधिट्ठानभावेन परम्पराय पच्चयो होतीति वेदितब्बं. ब्यापादविहिंसावितक्कअरतिरागा ब्यापादवितक्कादयो. सुखेनाति अकिच्छेन, अकसिरेनाति अत्थो.

दिब्बविहारादिके चत्तारो विहारे पदट्ठानं कत्वा नानासन्तानेसु उप्पन्नाय वुट्ठानगामिनिविपस्सनाय ¶ यथाक्कमं अनुप्पन्नाकुसलानुप्पादनादिवसेन पवत्तविसयं सन्धाय पाळियं ‘‘पठमो विहारो भावितो बहुलीकतो’’तिआदि वुत्तं. सम्मप्पधानसदिसञ्हेत्थ सम्मप्पधानं वुत्तं. अरियविहारे च हेट्ठिमे निस्साय उपरिमग्गाधिगमाय वायमन्तस्स अयं नयो लब्भति. मग्गपरियापन्नस्सेव वा सम्मप्पधानस्स नानासन्तानिकस्स यथावुत्तविपस्सनागमनेन तंतंकिच्चादिकस्स वसेनेतं वुत्तं. सक्का हि विपस्सनागमनेन सद्धिन्द्रियादितिक्खताविसेसो विय वीरियस्स किच्चविसेसविसयो मग्गो विञ्ञातुं.

तथा सिखाप्पत्तउपेक्खासतिपारिसुद्धिदिब्बविहारं निस्साय उप्पन्नं पठमं सम्मप्पधानं मानप्पहानं उक्कंसेति, ब्रह्मविहारसन्निस्सये उप्पन्नं दुतियं सम्मप्पधानं कामालयसमुग्घातं, अरियविहारसन्निस्सयेन उप्पन्नं ततियं सम्मप्पधानं अविज्जापहानं, सन्तविमोक्खसन्निस्सयेन उप्पन्नं चतुत्थं सम्मप्पधानं भवूपसमं उक्कंसेतीति दस्सेतुं ‘‘पठमं सम्मप्पधान’’न्तिआदि वुत्तं.

पहीनमानो न विसंवादेय्याति मानप्पहानं सच्चाधिट्ठानं वड्ढेति विसंवादननिमित्तस्सेव अभावतो. अप्पहीनमानो हि माननिस्सयेन किञ्चि विसंवादेय्य. कामालये, दिट्ठालये च समुग्घाटिते चागपटिपक्खस्स अवसरो एव नत्थीति आलयसमुग्घातो चागाधिट्ठानं वड्ढेति. अविज्जाय समुच्छिन्नाय पञ्ञाबुद्धिया परिबन्धोव नत्थि, भवसङ्खारेसु ओस्सट्ठेसु अभवूपसमस्स ओकासोव नत्थीति मानप्पहानादयो सच्चाधिट्ठानादिके संवड्ढेन्तीति दस्सेतुं ‘‘मानप्पहान’’न्तिआदि वुत्तं.

अविसंवादनसीलो ¶ धम्मच्छन्दबहुलो छन्दाधिपतेय्यं समाधिं निब्बत्तेति. चागाधिमुत्तो नेक्खम्मज्झासयो अकोसज्जबहुलताय वीरियाधिपतेय्यं, ञाणुत्तरो चित्तं अत्तनो वसे वत्तेन्तो चित्ताधिपतेय्यं, वूपसन्तसभावो उपसमहेतुभूताय वीमंसाय वीमंसयतो वीमंसाधिपतेय्यं समाधिं निब्बत्तेतीति सच्चाधिट्ठानादिपारिसुद्धिछन्दसमाधिआदीनं पारिपूरिया संवत्ततीति दस्सेतुं ‘‘सच्चाधिट्ठानं भावित’’न्तिआदि वुत्तं.

धम्मच्छन्दबहुलो छन्दसमाधिम्हि ठितो इट्ठानिट्ठछळारम्मणापाते अनवज्जसेवी होति. आरद्धवीरियो वीरियसमाधिम्हि ठितो संकिलेसपक्खस्स सन्तपनवसेनेव पुञ्ञं परिपूरेति. चित्तं अत्तनो वसे वत्तेन्तो चित्तसमाधिम्हि ठितो पञ्ञाय उपकारानुपकारके धम्मे परिग्गण्हन्तो ¶ बुद्धिं फातिं गमिस्सति. वीमंसासमाधिम्हि ठितो धम्मविचयबहुलो उपधिपटिनिस्सग्गावहमेव पटिपत्तिं ब्रूहेतीति इममत्थं दस्सेतुं ‘‘छन्दसमाधि भावितो’’तिआदि वुत्तं.

दूरादूरपच्चत्थिकनिवारणे बहूपकारो इन्द्रियसंवरो मेत्ताय विसेसुप्पत्तिहेतुतो मेत्तं वड्ढेति. तपेन संकिलेसधम्मे विक्खम्भेन्तो वीरियाधिको परदुक्खापनयनकामतं साहत्थिकं करोतीति तपो करुणं संवड्ढेति. पञ्ञा परियोदापिता सावज्जानवज्जधम्मे परिग्गण्हन्ती पहासनिपाततो मुदितं रक्खन्ती परिब्रूहेति. उपधिनिस्सग्गो पक्खन्दो निन्नपोणपब्भारोव सम्मदेव सत्तसङ्खारेसु उदासिनो होतीति सो उपेक्खाविहारं परिवड्ढेतीति इममत्थं दस्सेतुं ‘‘इन्द्रियसंवरो भावितो’’तिआदि वुत्तं. तेनाह ‘‘यो यस्स विसेसपच्चयो, सो तं परिपूरेतीति वुत्तो’’ति.

८७. दिसाभावेनाति नयानं दिसाभावेनाति योजेतब्बं. अत्थोपिस्स पुब्बे वुत्तनयेनेव वेदितब्बो. येन चतुक्केन यस्स रागचरितादिपुग्गलस्स वोदानं विसुद्धि. यथा अपरिञ्ञाता, अप्पहीना च पठमाहारविपल्लासादयो रागचरितादीनं पुग्गलानं उपक्किलेसा, एवं पठमपटिपदादयो भाविता बहुलीकता नेसं विसुद्धियो होन्तीति वुत्तनयानुसारेन सक्का विञ्ञातुन्ति आह ‘‘हेट्ठा वुत्तनयमेवा’’ति.

अथ ¶ वा पुरिमाहि द्वीहि पटिपदाहि सिज्झमाना विपस्सना अत्तनो किच्चवुत्तिसङ्खातं पवत्तिदुक्खम्पि सङ्गण्हन्ती दुक्खानुपस्सनाबाहुल्लविसेसतो दुक्खलक्खणं पटिविज्झन्ती ‘‘अप्पणिहितं विमोक्खमुख’’न्ति वुत्ता. ततियाय पटिपदाय सिज्झमाना सुखप्पवत्तिकताय सम्मदेव सन्ततिघनं भिन्दित्वा अनिच्चलक्खणं विभावेन्ती ‘‘अनिमित्तं विमोक्खमुख’’न्ति वुत्ता. चतुत्थाय पन पटिपदाय सिज्झमाना सुखप्पवत्तिकताय, विसदञाणताय च समूहकिच्चारम्मणघनं भिन्दित्वा सम्मदेव अनत्तलक्खणं विभावेन्ती ‘‘सुञ्ञतं विमोक्खमुख’’न्ति वुत्ता.

तथा कायवेदनानुपस्सना विसेसतो दुक्खलक्खणं विभावेन्ती, चित्तानुपस्सना अनिच्चलक्खणं, धम्मानुपस्सना अनत्तलक्खणन्ति ता यथाक्कमं ‘‘अप्पणिहितादिविमोक्खमुख’’न्ति वुत्ता.

सप्पीतिकताय अस्सादानि पठमदुतियज्झानानि विरज्जनवसेन विसेसतो दुक्खतो पस्सन्तिया ¶ विपस्सनाय वसेन ‘‘अप्पणिहितं विमोक्खमुख’’न्ति वुत्तानि. ततियं सन्तसुखताय बाहिरकानं निच्चाभिनिवेसवत्थुभूतं सभावतो ‘‘अनिच्च’’न्ति पस्सन्तिया विपस्सनाय वसेन ‘‘अनिमित्तं विमोक्खमुख’’न्ति वुत्तं. चतुत्थं उपक्किलेसविगमादीहि परिसुद्धं सुसमाहितं यथा परेसं, एवं अत्तनो च यथाभूतसभावावबोधहेतुताय सम्मदेव ‘‘सुञ्ञ’’न्ति पस्सन्तिया विपस्सनाय वसेन ‘‘सुञ्ञतं विमोक्खमुख’’न्ति वुत्तं.

एवं विहारानं विपस्सनावसेनेव विमोक्खमुखता, तत्थ ‘‘दिब्बब्रह्मविहारानं सन्तसुखताय अस्सादनीयता’’तिआदिना अप्पणिहितविमोक्खमुखता योजेतब्बा. अरियविहारस्स पञ्ञाधिकत्ता विसेसतो अनत्तानुपस्सनासन्निस्सयताय सुञ्ञतविमोक्खता. आनेञ्जविहारस्स सन्तविमोक्खताय अनिच्चलक्खणप्पटिवेधस्स विसेसपच्चयसभावतो अनिमित्तविमोक्खमुखता योजेतब्बा.

तथा पुरिमानं द्विन्नं सम्मप्पधानानं संकिलेसविसयत्ता किलेसदुक्खवीतिक्कमस्स दुक्खानुपस्सनाबाहुल्लत्ता अप्पणिहितविमोक्खमुखता. ततियस्स अनुप्पन्नकुसलुप्पादनेन धम्मानं उदयवयवन्तताविभावनतो अनिच्चलक्खणं पाकटन्ति अनिमित्तविमोक्खमुखता. चतुत्थस्स उप्पन्नानं ठितत्तं ब्यापारापज्जनेन धम्मानं अवसवत्तितादीपनतो अनत्तलक्खणं सुपाकटन्ति सुञ्ञतविमोक्खमुखता.

मानप्पहानालयसमुग्घातानं ¶ सहायतण्हापहानताय तण्हापणिधिविसोधनतो अप्पणिहितविमोक्खमुखता. अविज्जापहानस्स पञ्ञाकिच्चाधिकताय सुञ्ञतविमोक्खमुखता. भवूपसमस्स सङ्खारनिमित्तपटिपक्खताय अनिमित्तविमोक्खमुखता.

पकतिया दुक्खसभावे सङ्खारे ञाणसच्चेन अविसंवादेन्तो दुक्खतो एव पस्सति, चागाधिविमुत्तताय तण्हं विदूरीकरोन्तो रागप्पणिधिं विसोसेतीति पुरिमं अधिट्ठानद्वयं ‘‘अप्पणिहितं विमोक्खमुख’’न्ति वुत्तं. इतरस्स पन अधिट्ठानद्वयस्स सुञ्ञतानिमित्तविमोक्खमुखता वुत्तनया एव.

छन्दाधिपतेय्या चित्तेकग्गता विसेसतो धम्मच्छन्दवतो नेक्खम्मवितक्कबहुलस्स होति, वीरियाधिपतेय्या पन कामवितक्कादिके विनोदेन्तस्साति तदुभयं निस्साय पवत्ता विपस्सना विसेसतो रागादिप्पणिधीनं विसोसनतो ‘‘अप्पणिहितं विमोक्खमुख’’न्ति वुत्ता. चित्ताधिपतेय्यं ¶ , वीमंसाधिपतेय्यञ्च निस्साय पवत्ता यथाक्कमं अनिच्चानत्तानुपस्सनाबाहुल्लतो ‘‘अनिमित्तं विमोक्खमुखं, अप्पणिहितं विमोक्खमुख’’न्ति च वुत्ता.

अभिज्झाविनयनो इन्द्रियसंवरो, कामसङ्कप्पादिविनोदनो तपो च वुत्तनयेनेव पणिधिपटिपक्खतो अप्पणिहितं विमोक्खमुखं, बुद्धि अनत्तानुपस्सनानिमित्तं, उपधिपटिनिस्सग्गो निमित्तग्गाहपटिपक्खोति तदुभयसन्निस्सया विपस्सना यथाक्कमं ‘‘सुञ्ञतं, अनिमित्तं विमोक्खमुख’’न्ति वुत्ता.

आसन्नपच्चत्थिकरागं पटिबाहन्ती मेत्ता रागपणिधिया पटिपक्खो, करुणा परदुक्खापनयनाकारवुत्तिका दुक्खसहगताय दुक्खानुपस्सनाय विसेसपच्चयोति तदुभयसन्निस्सया विपस्सना ‘‘अप्पणिहितं विमोक्खमुख’’न्ति वुत्ता. मुदिता सत्तानं मोदग्गहणबहुला तदनिच्चतादस्सनतो अनिच्चानुपस्सनाय विसेसपच्चयोति तन्निस्सया विपस्सना अनिमित्तं विमोक्खमुखं. उपेक्खा ञाणकिच्चाधिकताय अनत्तानुपस्सनाय विसेसपच्चयोति तन्निस्सया विपस्सना ‘‘सुञ्ञतं विमोक्खमुख’’न्ति वुत्ताति एवमेत्थ पवत्तिआकारतो विपस्सतो निस्सयतो, किच्चतो च भिन्दित्वा विमोक्खमुखानि योजितानीति.

समतिक्कमनं ¶ परिञ्ञापहानञ्च. सपरसन्तानेति अत्तनो, परेसञ्च सन्ताने, तेन कायिको, वाचसिको च विहारो ‘‘विक्कीळित’’न्ति वुत्तोति दस्सेति ‘‘विविधो हारो’’ति कत्वा. तस्स पन विभावना इध अधिप्पेता नयस्स भूमिभावतो. येन पटिपक्खभावेन. तेसं पटिपक्खभावोति तेसं आहारादीनं पटिपक्खभावो पहातब्बभावो पटिपदादीनं पटिपक्खभावो पहायकभावोति योजेतब्बं. तत्थ पटिपदाग्गहणेन विपस्सना कथिता. विपस्सना च चत्तारो आहारे परिजानन्ती तप्पटिबद्धछन्दरागं पजहतीति उजुकमेव तेसं पटिपक्खता, एवं झानादीनम्पि उपादानादिपटिपक्खता वेदितब्बा तदुपदेसेन विपस्सनाय कथितत्ता. विपल्लाससतिपट्ठानानं पटिपक्खभावो पाकटो एव. न्ति सीहविक्कीळितं. वीसतिया चतुक्केहि विसभागतो वित्थारेन विभत्तन्ति तीहि पदेहि सङ्गहेत्वा कथिकत्ता वुत्तं ‘‘सङ्खेपेन दस्सेन्तो’’ति.

इन्द्रियानन्ति सद्धादिइन्द्रियानं. दसन्नं चतुक्कानं निद्धारणाति योजना.

८८. निग्गच्छतीति ¶ निक्खमति. ततो निद्धारेत्वा वुच्चमानो हि निग्गच्छन्तो विय होतीति. चत्तारो पुग्गलेति ‘‘तण्हाचरितो मन्दो’’तिआदिना (नेत्ति. ६) वुत्ते चत्तारो पुग्गले. पुग्गलाधिट्ठानेन चेत्थ धम्मो वुत्तोति आह ‘‘भूमिं निद्दिसित्वा’’ति. ततो एवाति यथावुत्तपुग्गलचतुक्कतो एव. इतरत्थापीति ‘‘सुखाय…पे… पुग्गला’’ति एत्थापि. साधारणायाति पठमचतुत्थाहिपि विमिस्साय. यथावुत्तासूति दुतियततियासु.

हेट्ठाति देसनाहारविभङ्गविचयहारसम्पातवण्णनासु.

एसेव नयोति कुसलमूलादिद्वादसतिकसङ्गहो अनवज्जपक्खो. ‘‘वोदायति सुज्झति एतेनाति वोदान’’न्ति (नेत्ति. अट्ठ. ११) वं नेतब्बतं सन्धायाह.

यथा हारउद्देसो कतो, एवं नयानं अकरणे कारणं, पयोजनञ्च विभावेतुकामो ‘‘कस्मा पना’’तिआदिमाह. नयेहि नयन्तरेहि. सम्भवदस्सनत्थन्ति उपपत्तिदस्सनत्थं. तत्थ सम्भवो अनुद्देसक्कमेन निद्दिसने करणं दस्सनं पयोजनं. यदि हि इमे नया उप्पत्तिट्ठानवसेन असंकिण्णा भवेय्युं, हारा विय उद्देसानुक्कमेनेव निद्दिसितब्बा ¶ सियुं. तथा हि वुत्तं हारानं उद्देसावसाने ‘‘एते सोळस हारा पकित्तिता अत्थतो असंकिण्णा’’ति (नेत्ति. १).

यस्मा पनेते मूलपदेहि मूलपदन्तरनिद्धारणेन अञ्ञमञ्ञं ते निग्गच्छन्ति, तस्मा एकस्मिं निद्दिट्ठे इतरोपि अत्थतो निद्दिट्ठोयेव नाम होतीति इमस्स अत्थस्स दस्सनत्थं ‘‘उद्देसानुक्कमेन निद्देसो न कतो’’ति.

इदानि तमेव सङ्खेपेन वुत्तमत्थं वित्थारेन दस्सेतुं ‘‘पठमनयतो ही’’तिआदि वुत्तं. तत्थ तण्हादिट्ठिचरितवसेन द्विधा पुग्गले विभजित्वा तेसं वसेन नन्दियावट्टनयं नीहरित्वा पुन ते एव तण्हादिट्ठिचरिते चतुप्पटिपदाविभागेन विभजित्वा सीहविक्कीळितस्स नयस्स सम्भवो दस्सितो, ते एव चतुप्पटिपदाभेदभिन्ने पुग्गले पुन उग्घटितञ्ञुआदिविभागेन तिधा विभजित्वा तिपुक्खलस्स नयस्स सम्भवो दस्सितो. तं सन्धायाह ‘‘पठमनयतो…पे… निद्दिट्ठो’’ति.

यस्मा सुभसुखसञ्ञाहि लोभो, निच्चसञ्ञाय दोसो ‘‘इमिना मे अनत्थो कतो’’ति आघातुप्पत्तितो ¶ , अत्तसञ्ञाय मोहो गहितो होति. तथा असुभसञ्ञादीहि अलोभादयो, तस्मा धम्माधिट्ठानवसेन ततियनयतो दुतियनयस्स सम्भवो. यस्मा पन लोभे सति सम्भवतो लोभग्गहणेनेव दोसो गय्हति. लोभो च तण्हा, मोहो अविज्जा, तप्पटिपक्खतो अलोभादोसेहि समथो गय्हति, अमोहेन विपस्सना, तस्मा धम्माधिट्ठानवसेनेव दुतियनयतो पठमनयस्स सम्भवोति इमं विसेसं दीपेतुं उद्देसानुक्कमेन निद्देसो न कतोति दस्सेन्तो ‘‘धम्माधिट्ठानवसेन पना’’तिआदिमाह.

तेनेवाति ततियनयतो दुतियनयस्स विय दुतियनयतो पठमनयस्सपि सम्भवतो. एवं पाळियं पुग्गलाधिट्ठानवसेन आगतं निस्साय अट्ठकथायं धम्माधिट्ठानवसेनेव नयनिग्गमो निद्धारितोति अयमेव विसेसो. यदि एवन्ति पाळियं आगतप्पकारतो अञ्ञेनपि पकारेन नया निद्धारेतब्बा, एवं सन्ते यथा पुग्गलाधिट्ठानवसेन पठमनयतो ततियनयस्स, ततियनयतो दुतियनयस्स ¶ सम्भवो दस्सितो, एवं धम्माधिट्ठानवसेनेव पठमनयतो ततियनयदुतियनयानं, धम्माधिट्ठानवसेनेव दुतियनयतो ततियनयस्स सम्भवो दीपेतब्बोति इममत्थमाह ‘‘द्वे हुत्वा…पे… सिया’’ति.

तत्थ नयोति पच्छा वुत्तदुतियनयो. अत्थतोति अत्थापत्तितो, अत्थतो लब्भमानत्ता एव सरूपेन न कथितोति अत्थो. इदानि तं अत्थापत्तिं एकन्तिकं कत्वा दस्सेतुं ‘‘यस्मा’’तिआदि वुत्तं. अनुप्पवेसो इच्छितो तंतंनयमूलपदानं नयन्तरमूलपदेसु समवरुज्झनतो. तथा हि ‘‘यत्थ सब्बो अकुसलपक्खो सङ्गहं समोसरणं गच्छति, यत्थ सब्बो कुसलपक्खो सङ्गहं समोसरणं गच्छती’’ति (नेत्ति. ३) च वुत्तं. अयञ्च अत्थोति ‘‘नयानं अञ्ञमञ्ञअनुप्पवेसो निग्गमो’’ति अयं दुविधो अत्थो. पिटकानं अत्थकथनं पेटकं, सो एव उपदेसोति पेटकोपदेसो, उपदेसभूता परियत्तिसंवण्णनाति अत्थो.

आदितो पट्ठायाति नयानं अञ्ञमञ्ञअनुप्पवेसनिग्गममत्तमेव अविभावेत्वा नयविचारस्स पठमावयवतो पभुति विभावना दीपना पकासना.

दोसदिट्ठीति अप्पस्सादतादिदोसगाहिकदिट्ठी, दोसदस्सिनोति अत्थो. ते हि असमूहतानुसया, कामेसु च आदीनवदस्सिनो. इदञ्हि नेसं अङ्गद्वयं अत्तकिलमथानुयोगस्स कारणं वुत्तं. नत्थि अत्थोति यो रागाभिभूतेहि अन्धबालेहि परिकप्पितो दिट्ठधम्मिको कामेहि अत्थो, सो मधुबिन्दुगिद्धस्स मधुलित्तसत्थधारावलेहनसदिसो अप्पस्सादो बहुदुक्खो बहुपायासो बहुआदीनवो ¶ सविघातो सपरिळाहो सम्परायिको तथेवाति सब्बदापि विञ्ञूजातिकस्स कामेहि पयोजनं न विज्जति. अनज्झोसिताति अनभिभूता विहरन्ति. तेन वुच्चति सुखा पटिपदाति तेन मन्दकिलेसभावेन तेसं पुग्गलानं अकिच्छेन सिज्झमाना विपस्सना पटिपदा ‘‘सुखा पटिपदा’’ति वुच्चति. अज्झोसिताति अभिनिविट्ठा. इमे सब्बे सत्ताति इमे तण्हादिट्ठिचरितभावेन द्विधा वुत्ता अपरिमाणप्पभेदा सब्बेपि पटिपज्जन्ता सत्ता.

सुखेन ¶ पटिनिस्सज्जन्तीति किलेसे अकिच्छेन पजहन्ति. ‘‘इमा चतस्सो पटिपदा’’तिआदि पटिपदानं एत्तावतायं, विसयभावकिच्चेसु च ब्यभिचाराभावदस्सनं. अयं पटिपदाति निगमनं, अयं पटिपदा याय वसेन सीहविक्कीळितस्स नयस्स भूमिदस्सनत्थं चत्तारो पुग्गला निद्धारिताति अधिप्पायो. चतुक्कमग्गेन किलेसे निद्दिसतीति अनन्तरं वक्खमानेन आहारादिचतुक्कमग्गेन दसवत्थुके किलेससमूहे निद्दिसति. चतुक्कमग्गेन अरियधम्मेसु निद्दिसितब्बाति तप्पटिपक्खेन पटिपदादिचतुक्कमग्गेन अरियधम्मेसु बोधिपक्खियेसु विसयभूतेसु निद्धारेत्वा कथेतब्बा.

इदञ्च पमाणं चत्तारो आहाराति इमेसं विपल्लासानं पवत्तिया पमाणं, यदिदं चत्तारो आहारा. इदं वुत्तं होति – यावदेव चत्तारो आहारा परिञ्ञं न गच्छन्ति, तावदेव चत्तारो विपल्लासे विभजन्ति. यावदेव चत्तारो विपल्लासा अप्पहीना, तावदेव चत्तारि उपादानानि परिब्रूहन्तीति. एवं सब्बत्थ यथारहं वत्तब्बं. तेनाह ‘‘एवं इमानि सब्बानि दस पदानी’’ति. ‘‘योजेतब्बानी’’ति च वचनसेसो.

‘‘अभिज्झाय गन्थती’’ति इमिना अभिज्झायनमेव गन्थनन्ति दस्सेति. एस नयो सेसेसुपि. पपञ्चेन्तोति दिट्ठाभिनिवेसं वित्थारेन्तो.

विप्पटिसारुप्पत्तिहेतुभावो किलेसानं आसवनन्ति आह ‘‘आसवन्ती’’ति. किं विप्पटिसाराति तेन किलेसानं वीतिक्कमवत्थुं वदति. यस्मा अप्पहीनानुसयस्सेव विप्पटिसारा, न इतरस्स, तस्मा ‘‘ये विप्पटिसारा, ते अनुसया’’ति वुत्तं. पदद्वयेनपि फलूपचारेन कारणं वुत्तं.

पठमेन ¶ पदेनाति यथावुत्तेसु दससु सुत्तपदेसु पठमेन पदेन. पठमाय दिसायाति तदत्थसङ्खाताय सीहविक्कीळितस्स संकिलेसपक्खे पठमाय दिसाय.

इतीति एवं, वुत्तनयेनाति अत्थो. कुसलाकुसलानन्ति यथावुत्तअनवज्जसावज्जधम्मानं. पक्खपटिपक्खवसेनाति वोदानपक्खतप्पटिपक्खवसेन. योजनाति पठमदिसादिभावेन युत्ते कत्वा मनसानुपेक्खना. ‘‘मनसा वोलोकयते’’ति (नेत्ति. ४) हि वुत्तं.

तस्साति ¶ दिसालोकनस्स. सोतापत्तिफलादीनं परियोसानता इन्द्रियवसेन वेदितब्बा. येसञ्हि सद्धादीनं इन्द्रियानं वसेन सतिपट्ठानादीनि सिज्झन्ति, तेसं वसेन सोतापत्तिफलादीनं परियोसानता. तत्थ सोतापत्तिफले सद्धिन्द्रियं पारिपूरिं गच्छति. सोतापन्नो हि सद्धाय परिपूरिकारी. सकदागामिफले वीरियिन्द्रियं पारिपूरिं गच्छति. सकदागामी हि आरद्धवीरियो उपरिमग्गाधिगमाय. अनागामिफले समाधिन्द्रियं पारिपूरिं गच्छति. अनागामी समाधिस्मिं परिपूरिकारी. अग्गफले अरहत्ते सतिन्द्रियञ्च पञ्ञिन्द्रियञ्च पारिपूरिं गच्छति. अरहा हि सतिवेपुल्लप्पत्तो, पञ्ञावेपुल्लप्पत्तो चाति.

अपरे पनाहु – सद्धाबलेन सुभसञ्ञाय पहानं. सद्दहन्तो हि पटिक्कूलमनसिकारे कम्मं करोति. वीरियबलेन सुखसञ्ञाय पहानं. वीरियवा हि सुखस्सादं अभिभवित्वा योनिसोमनसिकारमनुयुञ्जति. समाधिबलेन निच्चसञ्ञाय पहानं. समाहितो हि सङ्खारानं उदयब्बयं परिग्गण्हन्तो अनिच्चसञ्ञं पटिलभति. पञ्ञाबलेन अत्तसञ्ञाय पहानं. पञ्ञवा हि सङ्खारानं अवसवत्तितं सल्लक्खेन्तो अत्तसुञ्ञतं पटिविज्झति. सति पन सब्बत्थापि इच्छितब्बा. तेनाह ‘‘सतिं च ख्वाहं, भिक्खवे, सब्बत्थिकं वदामी’’ति (सं. नि. ५.२३४; मि. प. २.१.१३). एवं चतुविपल्लासप्पहायीनं चतुन्नं इन्द्रियानं पारिपूरिट्ठानं चत्तारि सामञ्ञफलानि चतुविपल्लासमुखानं चतुन्नं दिसानं परियोसानानि वुत्तानीति.

‘‘लोभो अकुसलमूल’’न्तिआदि लोभादीनं हेतुफलभावेन सम्पयुत्तताय दस्सनं.

तत्थ मनापिकेनाति येभुय्यवसेन वुत्तं. अमनापिकेनापि हि आरम्मणेन विपरियेसवसेन लोभो उप्पज्जति. मनापिकेनाति वा मनापिकाकारेन. फस्सवेदनूपविचाररागवितक्कपरिळाहा ¶ सहजातापि लब्भन्ति, असहजातापि. ‘‘उप्पादो’’ति एतेन उप्पज्जमानसङ्खारग्गहणन्ति ‘‘उप्पज्जती’’ति वुत्तं. उप्पादलक्खणस्सेव पन गहणे ‘‘उप्पज्जती’’ति न वत्तब्बं सिया. न हि उप्पादो उप्पज्जति, रागजपरिळाहहेतुकता च तेसं रागस्स तण्हासभावत्ता. तण्हा हि दुक्खस्स समुदयो, यं किञ्चि समुदयधम्मं, सब्बं तं दुक्खन्ति. तथा च वुत्तं ‘‘तण्हासहजातवेदनाय ¶ पन लोभो सहजातादिपच्चयेहि च पच्चयो’’ति. एवं इट्ठारम्मणे उप्पन्नलोभसहगतसुखवेदनाय उदयो इध ‘‘उप्पादो सङ्खतलक्खण’’न्ति वुत्तो, तस्सा विपरिणामो ‘‘विपरिणामदुक्खता’’ति. विपरिणामावत्था च उदयावत्थं विना न होतीति सा तं निस्साय उप्पज्जन्ती विय वुत्ता ‘‘उप्पादं…पे… दुक्खता’’ति.

दोसो अकुसलमूलन्तिआदीसुपि वुत्तनयानुसारेन अत्थो वेदितब्बो. अयं पन विसेसो – ठितस्स अञ्ञथत्तं नाम जरा, तं निस्साय दोमनस्सस्स उप्पज्जनतो वुत्तं ‘‘ठितस्स…पे… दुक्खदुक्खता’’ति. दोसजपरिळाहहेतुकता जराय दोसबहुलस्स पुग्गलस्स नचिरेन जीरणतो वेदितब्बा.

वयोति सङ्खारानं निरोधो. अनिच्चतावसेन च सङ्खतधम्मानं सङ्खारदुक्खताति वुत्तं ‘‘वय…पे… सङ्खारदुक्खता’’ति. तेनाह भगवा ‘‘यदनिच्चं तं दुक्ख’’न्ति (सं. नि. ३.१५, ४५, ७६; पटि. म. २.१०). मोहजपरिळाहहेतुकता वयलक्खणस्स येभुय्येन सम्मोहनिमित्तत्ता, मरणस्स अविज्जापच्चयत्ता च संसारप्पवत्तिया वेदितब्बा.

अलोभादीनं पञ्ञादिपारिपूरिहेतुकता यथारहं उपनिस्सयकोटिसहजातकोटिया च पच्चयभावेन वेदितब्बा. सब्बे हि कुसला धम्मा सब्बेसं कुसलानं धम्मानं यथासम्भवं पच्चयविसेसा होन्ति एवाति. अब्यापादवितक्कसन्निस्सयो उपविचारो अब्यापादूपविचारो. अविहिंसूपचारेपि एसेव नयो.

अयं तिपुक्खलो नाम दुतियो नयो सद्धिं दिसालोकननयेन निद्दिट्ठोति वचनसेसो. ‘‘इमे चत्तारो’’तिआदि पुग्गलाधिट्ठानेनेव नन्दियावट्टस्स नयस्स भूमिदस्सनत्थं आरद्धं. इमे यथावुत्तपटिपदाचतुक्कस्स वसेन चतुब्बिधा. विसेसेनाति दिट्ठितण्हासन्निस्सयताविसेसेन. दिट्ठिचरितो हि तिक्खपञ्ञो, मन्दपञ्ञो च सुखाय पटिपदाय खिप्पाभिञ्ञाय ¶ च दन्धाभिञ्ञाय च निय्यातीति द्विधा वुत्तोति. तथा तण्हाचरितो दुक्खाय पटिपदाय खिप्पाभिञ्ञाय च दन्धाभिञ्ञाय च निय्यातीति द्विधा वुत्तोति दस्सितो चायमत्थो. तेनाह ‘‘द्वे होन्ति दिट्ठिचरितो च तण्हाचरितो चा’’ति.

चत्तारो ¶ हुत्वाति सीहविक्कीळितस्स नयस्स भूमिदस्सने चत्तारो हुत्वा ठिता, चतुप्पटिपदावसेन चत्तारो कत्वा वुत्ताति अत्थो. तयो होन्तीति तिपुक्खलस्स नयस्स भूमिदस्सने उग्घटितञ्ञुआदिवसेन तयो भवन्ति. तयो हुत्वाति तथा तयो हुत्वा ठिता तयो कत्वा कथिता. द्वे होन्तीति इदानि नन्दियावट्टस्स नयस्स भूमिदस्सने द्वे भवन्ति. अज्झोसानन्ति दिट्ठिअज्झोसानं. अभिनिवेसोति तण्हाभिनिवेसो. अहंकारोति अहंमानो ‘‘अह’’न्ति वा करणं अहंकारो. दिट्ठिमानमञ्ञनानं वसेन ‘‘अहमस्मी’’ति समनुपस्सना ममंकारो, ममायनं तण्हाग्गाहो.

दसपदानि ‘‘पठमा दिसा’’ति कातब्बानीति नन्दियावट्टस्स नयस्स ‘‘पठमा दिसा’’ति करणीयानि, ‘‘पठमा दिसा’’ति ववत्थपेतब्बानीति अत्थो. संखित्तेन…पे… पक्खस्साति अनेकप्पभेदस्सपि कण्हपक्खस्स संकिलेसपक्खस्स अत्थं संखित्तेन सङ्खेपेन पटिपक्खे वत्तमाने वोदानधम्मे उद्दिस्स ञापेन्ति पकासेन्ति, पठमा कातब्बाति योजना. दस पदानि दुतियकानीति तण्हादिका दस कोट्ठासा ‘‘दुतिया दिसा’’ति कातब्बा. ‘‘संखित्तेन…पे… कण्हपक्खस्सा’’ति आनेत्वा योजेतब्बं.

योनिसोति उपायसो. योनिसो मनसिकारो अनिच्चादिवसेन पठममनसिकारो. पञ्ञाति सुतचिन्तामयी पञ्ञा, झानाभिञ्ञा च. निब्बिदाति निब्बेधञाणं. सोमनस्सधम्मूपसञ्हितं पमोदादिसहगतं चेतसिकसुखं.

कुसलपक्खे चाति च-सद्दो समुच्चयत्थो, तेन उभयपक्खतो समुच्चयवसेन चतस्सो दिसा, न पच्चेकन्ति दस्सेति.

तेसन्ति तण्हादीनं, तण्हाय, तण्हापक्खिकानञ्चाति अत्थो. सतिपि अनवसेसतो रागे पहीयमाने अनवसेसतो अविज्जापि पहीयतेव, रागस्स पन चेतोविमुत्ति उजुपटिपक्खोति दस्सनत्थं ‘‘रागविरागा’’ति वुत्तं. अविज्जाविरागाति एत्थापि एसेव नयो. अयञ्च अत्थो ‘‘आसवानं खया अनासवं चेतोविमुत्तिं पञ्ञाविमुत्ति’’न्तिआदिना (म. नि. १.४३८) आगतपाळिया अत्थवण्णनावसेन वुत्ता, इध पन ‘‘रागविरागा चेतोविमुत्ति सेक्खफलं, अविज्जाविरागा ¶ पञ्ञाविमुत्ति असेक्खफल’’न्तिआदिना (नेत्ति. ५१) वेवचनसमारोपने ¶ आगतत्ता पुरिमा अनागामिफलं. तञ्हि कामरागस्स उजुविपच्चनीकतो समाधिपारिपूरियाव विसेसतो ‘‘रागविरागा चेतोविमुत्ती’’ति वुच्चति, पच्छिमा अरहत्तफलं तण्हाय, अविज्जाय च अनवसेसप्पहानतो, पञ्ञापारिपूरिया च ‘‘अविज्जाविरागा पञ्ञाविमुत्ती’’ति वुच्चति.

तत्थाति नन्दियावट्टनये. तेसूति ‘‘चत्तारि पदानी’’ति वुत्तेसु तण्हादीसु चतूसु मूलपदेसु. इध समोसरणन्ति सङ्गहो वुत्तो, सो च सभावतो, सभागतो च होतीति तण्हादीनि चत्तारि दस्सेत्वा ‘‘तेसु अट्ठारस मूलपदानि समोसरन्ती’’ति वुत्तं. समथं भजन्ति सभावतो, सभागतो चाति अधिप्पायो. विपस्सनं भजन्तीति एत्थापि एसेव नयो. नयाधिट्ठानानं नयाधिट्ठाने अनुप्पवेसो नयानं नयेसु अनुप्पवेसो एव नाम होतीति आह ‘‘तिपुक्खलो…पे… अनुप्पविसन्ती’’ति.

अलोभामोहपक्खं अभजापेत्वा अदोसपक्खं भजापेतब्बस्स नन्दियावट्टसीहविक्कीळितमूलपदस्स अभावतो अदोसो एकसुत्तकोटिया एककोव होतीति दस्सेन्तो आह ‘‘अदोसो अदोसो एवा’’ति. दोसो दोसो एवाति एत्थापि एसेव नयो. समोसरन्ति सभागतो च सभावतो च सङ्गहं गच्छन्तीति अत्थो.

भूमि गोचरोति च मूलपदानि एव सन्धाय वदति. एकेकं नयं अनुप्पविसति तंतंमूलपदानुप्पवेसतो. कुसले वा विञ्ञाते अकुसलो पटिपक्खो, अकुसले वा कुसलो पटिपक्खो अन्वेसितब्बो संवण्णियमानसुत्तपदानुरूपतो उपपरिक्खितब्बो. अन्वेसना उपपरिक्खा ‘‘दिसालोकन’’न्ति वुच्चति. सो नयो निद्दिसितब्बोति तथा अन्वेसित्वा तेहि धम्मेहि दिसा ववत्थपेत्वा सो सो नयो निद्धारेत्वा योजेतब्बो. यथा मूलपदेसु मूलपदानं अनुप्पवेसो संवण्णितो, इमिनाव नयेन मूलपदतो मूलपदानं निद्धारणाति वेदितब्बाति दस्सेन्तो ‘‘यथा एकम्हि…पे… निद्दिसितब्बानी’’ति आह. ‘‘एकेकस्मिञ्ही’’तिआदि कारणवचनं.

तत्थ तत्थाति एकेकस्मिं नये. एकस्मिं धम्मे विञ्ञातेति तण्हादिके एकस्मिं मूलपदधम्मे सरूपतो, निद्धारणवसेन वा विञ्ञाते. सब्बे ¶ धम्मा विञ्ञाता होन्तीति तदञ्ञमूलपदभूता सब्बे लोभादयो विञ्ञाता नयस्स भूमिचरणायोग्यताय पकासा पाकटा होन्ति ¶ . ‘‘इमेस’’न्तिआदि नयत्तयदिसाभूतधम्मानं मत्थकपापनेन तिण्णं नयानं कूटग्गहणं, तं हेट्ठा वुत्तनयमेव.

पुन ‘‘इमेसू’’तिआदि कम्मनयद्वयस्स विभागविभावनं, तं विञ्ञेय्यमेव.

नयसमुट्ठानवारवण्णना निट्ठिता.

सासनपट्ठानवारवण्णना

८९. सङ्गहवारादीसूति सङ्गहवारउद्देसनिद्देसवारेसु. सरूपतो न दस्सितं, अत्थतो पन दस्सितमेवाति अधिप्पायो. तमेव हि अत्थतो दस्सनत्थं उदाहरणभावेन निक्खिपति, यथा मूलपदेहि पट्ठानं निद्धारेतब्बन्ति. ‘‘अञ्ञमञ्ञसङ्गहो’’ति इदं मूलपदपट्ठानानं अञ्ञमञ्ञतो निद्धारेतब्बताय कारणवचनं ‘‘सति अनुप्पवेसे ततो विनिग्गामो सिया’’ति. पट्ठानन्ति एत्थ प-इति उपसग्गपदं, तं पन ‘‘विभत्तेसु धम्मेसु यं सेट्ठं, तदुपागमु’’न्तिआदीसु विय पकारत्थजोतकन्ति दस्सेन्तो ‘‘पकारेहि ठान’’न्तिआदीसु विय पकारत्थजोतकन्ति दस्सेन्तो ‘‘पकारेहि ठान’’न्ति आह. इधाति इमस्मिं नेत्तिप्पकरणे. तस्साति देसनासङ्खातस्स परियत्तिसासनस्स. तथाभावदीपनन्ति वेनेय्यज्झासयानुरूपेन पवत्तितत्ता संकिलेसभागियतादिप्पकारेहि ठितभावेन दीपेतब्बत्ता ‘‘दीपिस्सतीति दीपन’’न्ति कत्वा. पतिट्ठहन्ति अधिसीलसिक्खादयो समुदायरूपेन गहिता. एतेहि संकिलेसधम्मादीहि, संकिलेसधम्मादीनं अधिसीलसिक्खादीनं पवत्तनुपायता अनुपुब्बिकथाय सामुक्कंसिकाय धम्मदेसनाय दीपेतब्बा. तेसन्ति संकिलेसधम्मादीनं. पुन तेसन्ति सुत्तानि सन्धायाह.

गोट्ठाति वजा. पट्ठितगावोति गतगावो. आगतट्ठानस्मिन्ति सीहनादसुत्तं (म. नि. १.१५६) वदति. पवत्तगमनत्ता एत्थाति वचनसेसो. अथ वा गच्छति एत्थाति गमनं, देसनाञाणस्स निस्सङ्गवसेन पवत्तगमनदेसभावतो पट्ठानं नामाति अत्थो. वोमिस्साति ‘‘संकिलेसभागियञ्च वासनाभागियञ्चा’’तिआदिना दुकतिकचतुक्कभावेन मिस्सिता.

संकिलेसभावे ¶ ञापेतब्बे पवत्तं, तं विसयं कत्वा देसितन्ति अत्थो, अत्थमत्तवचनञ्चेतं ¶ , संकिलेसभागे भवन्ति सद्दनयेन अत्थो वेदितब्बो. ‘‘संकिलेसभागिक’’न्तिपि पाठो, तस्स संकिलेसभागो एतस्स अत्थि, संकिलेसभागे वा नियुत्तं, संकिलेसभागस्स वा पबोधनसीलं संकिलेसभागिकं, तदेव संकिलेसभागियन्ति अत्थो वेदितब्बो. पदालनं समुच्छिन्दनं, पदालनसन्निस्सयता चेत्थ पदालनग्गहणेन गहिताति दट्ठब्बं. असेक्खेति असेक्खधम्मे. तेसं वोमिस्सकनयवसेनाति तेसं संकिलेसभागियादीनं चतुन्नं पटिक्खेपापटिक्खेपवोमिस्सकनयवसेन.

‘‘तानि पन छ दुका’’तिआदिना पदानं गहणपरिच्छेदतो ववत्थापनतं वत्वा परतो ‘‘साधारणानि कतानी’’ति पदस्स अत्थसंवण्णनाय सयमेव सरूपतो दस्सेस्सति. ‘‘अनुद्धरणे कारणं नत्थी’ति वत्वा उद्धरणे पन कारणं दस्सेन्तो ‘‘तथा हि वक्खती’’तिआदिना पाळिमाहरि. वोदानं नाम संकिलेसतो होति संकिलिट्ठस्सेव वोदानस्स इच्छितत्ता. यस्मा वोदानं तदङ्गादिवसेन संकिलेसतो विसुज्झनं, तस्मा ‘‘तं पन अत्थतो वासनाभागियादि एव होती’’ति वुत्तं. तत्थ तदङ्गविक्खम्भनेहि वोदानं वासनाभागियादिवसेन होति, समुच्छेदपटिप्पस्सद्धीहि वोदानं निब्बेधभागियवसेन, असेक्खभागियवसेन वोदानं पटिप्पस्सद्धिया एव वेदितब्बं. यायं देसना रागादिभागिनी सिया, सा संकिलेसभागिया. यायं देसना चागादिभागिनी सिया, सा वासनाभागिया. या पन आपत्तिविच्छेदनी सावसेसं, अनवसेसञ्च, सा निब्बेधभागिया, असेक्खभागिया च.

‘‘तण्हासंकिलेसभागियं सुत्त’’न्तिआदिना पठममेव संकिलेसभागस्स दस्सितत्ता वुत्तं ‘‘संकिलेसो तिविधो…पे… विसयदस्सनत्थं आरद्ध’’न्ति. भवरागो भवपत्थना. उप्पज्जतीति न विगच्छति. तत्र तत्र भवेति यदि वा कामभवे, यदि वा रूपभवे, यदि वा अरूपभवे. पदन्तरसंयोजनवसेनाति दुकनयेनेव पदन्तरेन योजनवसेन. मिस्सितानि कतानीति संसट्ठानि कतानि.

एककचतुक्कवसेन दस्सितब्बानि पदानि एव गहेत्वा आवुत्तिनयदस्सनवसेन मिस्सेत्वा अवसिट्ठदुकवसेन, तिकचतुक्कवसेन च इतरे अट्ठ पट्ठानभागा दस्सिताति आह ‘‘तानियेव यथावुत्तानि अट्ठ सुत्तानी’’तिआदि ¶ . चत्तारो एककायेव पाळियं आदितो दस्सिता. छदुका पाळियं आगता चत्तारो, अट्ठकथायं द्वेति. चत्तारो तिका पाळियं आगता द्वे, अट्ठकथायं द्वेति. द्वे चतुक्का पन अट्ठकथायमेव आगता. ‘‘पाळियं अनागता’’ति इदं सरूपतो ¶ अनागमनं सन्धाय वुत्तं, नयतो पन आगतभावो दस्सितो एव. ये पनेत्थ पाळियं अनागता, तेसं उदाहरणानि परतो दस्सयिस्साम.

सोळसहीति सोळसविधेहि. न हि तानि सुत्तानि सोळसेव, अथ खो सोळसप्पकारानीति मूलगणनं ठपेत्वा कारणसुत्तलद्धेन सङ्खारगब्भेन तदनुरूपो यो गणनवित्थारो, तस्स पत्थरणविधि पट्ठाननयो. इमिना…पे… नत्थीति यथावुत्तपट्ठानविनिमुत्तो परियत्तिसासनप्पदेसो न विज्जति यथारहं तंतंपट्ठानभावेन पवत्तत्ताति दस्सेति. यदि सुत्तगेय्यादि नवविधं परियत्तिसासनं यथावुत्तपट्ठानवसेनेव पवत्तं, तत्थ कथमिध अनिदस्सितानं गाथादीनं संकिलेसभागियादिभावो गहेतब्बोति पञ्हं सन्धाय ‘‘गाथाय गाथा अनुमिनितब्बा’’तिआदिपाळि पवत्ताति दस्सेतुं ‘‘कथं पना’’तिआदि वुत्तं.

तत्थ अयं गाथा वियाति ‘‘कामन्धा जालसञ्छन्ना, मनोपुब्बङ्गमा धम्मा, उद्धं अधो सब्बधि विप्पमुत्तो, यस्स सेलूपमं चित्त’’न्तिआदिना इध उदाहटगाथा विय. गाथाति अञ्ञापि तेपिटके बुद्धवचने आगता इध अनुदाहटा. संवण्णनाकाले सम्मुखीभावेन ‘‘अयं गाथा विया’’ति वुत्ता या काचि गाथा ‘‘संकिलेसभागिया’’ति वा ‘‘संकिलेसवासनानिब्बेधअसेक्खभागिया’’ति वा अनुमिनितब्बा नयग्गाहेन ञापेतब्बाति दस्सेतुं वुत्तं ‘‘संकिलेस…पे… जानितब्बाति अत्थो’’ति. वा-सद्दो हि इध अवुत्तविकप्पनत्थो. सेसपदेसूति वेय्याकरणसुत्तपदेसु.

९०. अरियानं धम्मन्ति चारित्तवारित्तभेदं सीलाचारं. एकन्तकरणीयस्स अकरणम्पि वीतिक्कमो एव.

अविज्जादिके संकिलेसधम्मे तदङ्गादिवसेन धुनातीति धोना वुच्चति पञ्ञा. पच्चवेक्खित्वा परिभुञ्जनपञ्ञाति पन पकरणेन अवच्छिन्नत्ता वुत्तं. तं अतिक्कमित्वा चरन्तोति पच्चयानं अपच्चवेक्खित्वा पच्चयपरिभोगे आदीनवं अपस्सन्तो इणपरिभोगवसेन परिभुञ्जन्तो न परिमुच्चति निरयादिदुक्खतो, वट्टदुक्खतो च.

कुक्कुजनकं ¶ नाम कदलिया पुप्फनाळि. पराभवायाति विनासाय. तथाति यथा फलपाकन्ता कदली, एवं वेळुनळापि ओसधिजातिकत्ताति उपसंहारत्थो तथा-सद्दो. तेनाह ‘‘फलं वेळुं फलं नळ’’न्ति.

सुखेत्तेपीति ¶ पि-सद्देन को पन वादो ऊसरादिदोसदुट्ठेसु खेत्तेसूति दस्सेति. ‘‘छकण…पे… अत्थो’’ति एतेन यथावुत्तअभिसङ्खरणाभावेन बीजदोसदुट्ठन्ति दस्सेति.

९१. सज्जितन्ति सञ्जितं. अपरिक्खतेति पटिपक्खेहि धम्मेहि अविक्खम्भिते अरोगे.

याय समन्नागतो पुग्गलो ‘‘किं सुतं मया, किं वा सुणामी’’ति कुसलं गवेसी चरति, सा धम्मोजपञ्ञा किस्सवा नाम. दुब्भासिताति दुट्ठु भासिता, इस्सामच्छरियदोसादीहि दुट्ठा वा भासिता.

९२. विचिनातीति विसेसतो चिनाति पसवति.

विगतभूताति विगतसच्च. तेनाह ‘‘अलीकवादी’’ति.

अवजातपुत्ताति लामकपुत्त. भगवतो सासने पब्बजित्वा निहीनवुत्तितं सन्धाय वदति. नेरयिकोति निरये निब्बत्तनको. पापकम्मिनो पपतन्ति एत्थाति पपतं, नरकं.

तण्हादीनं सभावभेदतोति तण्हादिट्ठिदुच्चरितानं तण्हायनविपरीतदस्सनदुट्ठचरिततासङ्खातसभावविभागतो. अवत्थाभेदतोति तण्हाय छन्दपेमलोभरागनन्दीपिपासामुच्छादयो, दिट्ठिया गाहपरामासमिच्छाभिनिवेसविसुकविप्फन्दितविपरीतदस्सनादयो, दुच्चरितस्स तिरच्छानपेत्तिविसयअसुरयोनिगामितादयो अवत्थाविसेसा. च-सद्देन तेसं कामतण्हादिरूपतण्हादिअत्तानुदिट्ठादिसस्सतगाहादिकायदुच्चरितादि- पाणातिपातादिप्पकारभेदो सङ्गय्हति.

९३. विपुलन्ति उळारं, तेलादीहि चेव धनधञ्ञादीहि च पहूतसन्निचयन्ति अत्थो. सम्बाधाति जनसंमद्दसङ्घटा.

दण्डेन न हिंसतीति एत्थ वुत्तं यं दण्डनिधानं, तं वट्टविवट्टनिस्सितं. तदुभयस्सापि फलं दस्सेन्तो ‘‘सो पुग्गलो’’तिआदिमाह.

९४. किञ्चति ¶ तंसमङ्गिनं विमद्दतीति किञ्चनं, रागादि, पलिबुन्धति कुसलप्पवत्तिं निवारेतीति ¶ पलिबोधो, रागादियेव, किञ्चनमेव पलिबोधो किञ्चनपलिबोधो. अथ वा किञ्चनञ्च पलिबोधो च किञ्चनपलिबोधो, आमिसकिञ्चिक्खञ्च रागादिसंकिलेसो चाति अत्थो.

विसेसितन्ति विलोमं, विसमं किरियन्ति अत्थो. राजभण्डन्ति ओरोधे सन्धाय वदन्ति.

याचयोगोति याचनयोगो, याचकानं मनोरथपरिपूरणतो. तेनाह ‘‘याचितब्बयुत्तो’’ति. दानयुत्तोति सततं दानकिरियासमङ्गी. दानसंविभागरतोति एत्थ दानं नाम अत्थिकानं यथाधिप्पायपटियत्तपरिच्चागो, संविभागो अत्तना परिभुञ्जितब्बतो अप्पमत्तकतोपि संविभजनं. इमेहि खो…पे… होतीति एत्थ होतिसद्देन ‘‘समन्नागतो’’ति पदं सम्बन्धितब्बं, न ‘‘सोतापन्नो’’ति दस्सेतुं ‘‘सोतापन्नो…पे… होती’’ति वुत्तं. तेहि धम्मेहि समन्नागमो हि इध विधीयति, न सोतापन्नभावो, तेन सोतापन्नलक्खणमेते धम्मा, न सोतापन्नभावलक्खणन्ति दस्सेति. तथा हि ‘‘सोतापन्नेन…पे… लब्भमानतं दस्सेती’’ति वुत्तं.

९५. लपति कथेति एतेनाति लपनं, ओट्ठं.

९७. मुदितोति दिब्बसम्पत्तिया पमुदितो.

९९. किञ्चापि उदतारीति तरणकिरिया अतीतभावेन वुत्ता, तरणमेव पन गहेत्वा आह ‘‘ओघतरणस्स अरियमग्गकिच्चत्ता’’ति. एवं विप्पमुत्तो, विमुत्तोति च एत्थ मुच्चनकिरियायपि वत्तब्बं.

१००. पातु-सद्दपुब्बको भवन्ति-सद्दो सिया उप्पादपरियायो सिया आविभावपरियायोति ‘‘पातुभवन्ती’’ति पदस्स ‘‘उप्पज्जन्ति, पकासेन्ति चा’’ति अत्थो वुत्तो. पातुभूतधम्मस्साति उप्पन्नबोधिपक्खियधम्मस्स, विभूतचतुसच्चधम्मस्स वा. नो कल्लोति न युत्तो. सहेतुधम्मन्ति एत्थ पच्चयुप्पन्नधम्माव गहिता, न पच्चयधम्माति? नयिदमेवं दट्ठब्बं पच्चयधम्मानम्पि पच्चयुप्पन्नभावानतिवत्तनतो. अथ वा सहेतुधम्मन्ति पच्चयुप्पन्नधम्मो पधानभावेन वुत्तो, पच्चयधम्मो पन गुणभावेनाति एवमेत्थ उभयेसं वुत्तभावो वेदितब्बो.

आरञ्ञकन्ति ¶ ¶ आरञ्ञकङ्गसमन्नागतं. अञ्ञातोति परिचयवसेन न ञातो, असंसट्ठोति अत्थो. तेनाह ‘‘निच्चनवो’’ति.

ब्यापादविहिंसावितक्कविरहे वेरिपरिसङ्काय अभावे अकित्तिपरिमुत्तीति एवमादीहिपि कारणेहि कोधप्पहानेन सुखं सुपति. कोधपरिळाहाभावो पन पाकटतरोति आह ‘‘कोध…पे… सयती’’ति. विसमूलस्साति एत्थ विससरिक्खताय ‘‘विस’’न्ति दुक्खं अधिप्पेतन्ति आह ‘‘दुक्खविपाकस्सा’’ति. सुखन्ति चेतसिकसुखं. अक्कुट्ठस्स पच्चक्कोसित्वा च पच्चक्कोसनहेतु उप्पज्जतीति योजना.

१०१. सल्लुब्बाहनं सल्लुद्धरणं.

विसयभेदेन, पवत्तिआकारभेदेन च अनेकभेदत्ता कामसञ्ञाय वुत्तं ‘‘याय कायची’’ति.

दानमुखेनाति दानेन मुखभूतेन, दानं पमुखं कत्वाति अत्थो.

‘‘अरियमग्गसम्पापनवसेना’’ति इमिना अनुकम्पानुद्दयानं एकन्तानवज्जतमेव विभावेति. ‘‘अनुकम्पा’’ति पदस्सत्थविवरणं ‘‘करुणायना’’ति, इतरस्स ‘‘मेत्तायना’’ति.

१०२. पकतिआदीति आदिसद्देन अणुइस्सरपजापतिपुरिसकालाधिट्ठायकारिआदिके सङ्गण्हाति.

कामेसूति कामगुणेसु रूपादिविसयेसु.

बहलकिलेसतायाति बहुलकिलेसभावेन. पुब्बहेतुमन्दतायाति विवट्टूपनिस्सयस्स कुसलस्स अकतत्ता.

चित्तवूपसमभावनायाति चित्तवूपसमकरभावनाय समथविपस्सनाय.

परिस्सया ¶ सीलादिपरिपूरणस्स परिबन्धभूता किलेसा एव. अनरिया पञ्ञासीसं उक्खिपित्वा ठातुमेव न सक्कोन्तीति वुत्तं ‘‘ञाणसिरेन अधोसिरा हुत्वा’’ति.

१०३. भगवतो, भिक्खुसङ्घस्स च वसनयोग्यभावो, तेहि निवुत्थभावो च तस्स सातिसयो वण्णोति वुत्तं ‘‘पठमगाथाय जेतवनस्स वण्णं कथेत्वा’’ति. वुत्तञ्हेतं –

‘‘गामे ¶ वा यदि वारञ्ञे, निन्ने वा यदि वा थले;

यत्थ अरहन्तो विहरन्ति, तं भूमिरामणेय्यक’’न्ति. (ध. प. ९८; थेरगा. ९९१);

इध धम्मसद्दो समाधिपरियायो ‘‘एवंधम्मा ते भगवन्तो’’तिआदीसु (दी. नि. २.१३; म. नि. ३.१९८; सं. नि. ५.३७८) वियाति आह ‘‘धम्मोति समाधी’’ति समाधिपक्खिका धम्मा सतिवायामा.

नानुगच्छेय्याति नानुतसेय्य. अनुतसनमेव हि तण्हादिट्ठीहि अनुगमनं. पटिविपस्सेय्याति विपस्सनासम्मसनमाह. यमकतो, हि खणिकतो, पटिपाटितो च सम्मसनं विपस्सनायपि सम्मसनतो पटिविपस्सना नाम. सा हि विपस्सनाय दिट्ठिउग्घाटनमानसमुग्घाटननिकन्तिपरियादानहेतुताय विसेसतो पटिपक्खेन असंहीरअसंकुप्पनहेतुभूता परिब्रूहना होति. ‘‘पुनप्पुनं…पे… अप्पेन्तो’’ति एतेन निब्बानारम्मणधम्मानुब्रूहनं यथा ‘‘ब्रूहेता सुञ्ञागारान’’न्ति (म. नि. १.६४) दस्सेति.

यं किञ्चि अपदिसित्वा पटिञ्ञादानं सङ्गरो. सो पन अत्तनो किच्चविसेसं अपदिसित्वा मित्तसन्थववसेन वा कालागमनं अपदिसित्वा किञ्चिक्खानुप्पदानेन वा पटिबाहकरणं अपदिसित्वा बलग्गबोधवसेन वा सियाति तस्स मित्तकरणादिपरियायतं सन्धायाह ‘‘सङ्गरोति…पे… नाम’’न्ति. एवं पटिपन्नत्ताति एवं अनिच्चसञ्ञामुखेन तियद्धकेसु सङ्खारेसु अप्पमादप्पटिपत्तिया पटिपन्नत्ता.

दिब्बचक्खु सुविसुद्धन्ति सावसेसा देसनाति आह ‘‘यं सच्छिकरोती’’ति. रूपायतनञ्हेत्थ अधिप्पेतं.

१०४. अन्तन्ति ¶ सङ्खारानं पारिमन्तभूतं. वेदानन्ति मग्गञाणवेदानमेव. अरहत्ताधिगमेन अन्तं परियोसानं गतत्ता. कम्मविपाकवट्टानं, किलेसवट्टस्सापि च उस्सदेन उपचयेन उस्सदा, रागादयो.

सुक्कोभासताय सुक्का, अभिविसिट्ठग्गहा. सब्बानि वा तारकरूपानि सुक्का. विन्दतीति उपलभति, पटिविज्झतीति अत्थो.

‘‘अज्झत्तं विपस्सनाभिनिवेसो होती’’ति इदं ‘‘सकेसु धम्मेसू’’ति पारगुभावस्स विसेसितत्ता वुत्तं, तञ्च खो अभिनिवेसेनेव देसितं. ‘‘सब्बं ¶ , भिक्खवे, अभिञ्ञेय्य’’न्ति (सं. नि. ४.४६; पटि. म. १.३) वुत्तं. पारगुता च तेसं खन्धानं परिञ्ञाभिसमयवसेन होति. ततो च नेसं हेतुभूतसमुदये, तदप्पवत्तिलक्खणे निरोधे, निरोधगामिनिया पटिपदाय च पहानसच्छिकिरियाभावनाभिसमयपारिपूरिवसेन इतरसच्चेसुपि पारगुभावो वुत्तो एव होति. सब्बसो हि सकअत्तभावबोधेनपि चतुसच्चाभिसमयो होतियेव. वुत्तञ्हेतं ‘‘इमस्मिंयेव ब्याममत्ते कळेवरे ससञ्ञिम्हि समनके लोकञ्च पञ्ञपेमि, लोकसमुदयञ्चा’’तिआदि (सं. नि. १.१०७; अ. नि. ४.४५). अथ वा सकेसु धम्मेसूति अत्तनो धम्मेसु. अत्तधम्मा नाम अत्थकामस्स कुलपुत्तस्स सीलादिधम्मा. सीलसमाधिपञ्ञादयो हि वोदानधम्मा एकन्तहितसुखसम्पादनतो पुरिसस्स सकधम्मा नाम, न अनत्थावहा संकिलेसधम्मा विय परधम्मा. तेसं सीलादीनं पारिपूरिया पारं परियन्तं गतोति पारगू. ‘‘अक्कुल पक्कुल’’इति एवं विहिंसनकपयोगं. अजकलापेन (उदा. ७) हि तदा भगवन्तं भीसापेतुकामेन कतं यक्खगज्जितं ‘‘अक्कुल पक्कुल’’ इति इमिना आकारेन सत्तानं सोतपथं अगमासि, तस्मा तं ‘‘अक्कुलं पक्कुलकरण’’न्ति वुत्तं.

नाभिनन्दतीति ‘‘अयं मं दट्ठुं आगता’’ति न तुस्सति. यस्मा पन ‘‘भगवतो भासितं अभिनन्दी’’तिआदीसु (म. नि. १.८८) विय सम्पटिच्छनत्थोपि अभिनन्दसद्दो होति, तस्मा वुत्तं ‘‘चित्तेन न सम्पटिच्छती’’ति. न सोचतीति ‘‘मया असम्मोदिता गच्छती’’ति न चित्तसन्तापं आपज्जति. ‘‘सङ्गा सङ्गामजिं मुत्त’’न्ति इदं अभिनन्दसोचनानं अभावस्स कारणवचनं.

तेनाति उदके न्हानेन. तेनेवाह ‘‘न उदकेन सुची होती’’ति. तस्सत्थो – उदकुम्मुज्जनादिना नेव सत्तानं सुचि पापतो सुद्धि नाम होतीति. उदकुम्मुज्जनादीनि हि इध ¶ उत्तरपदलोपेन ‘‘उदक’’न्ति वुत्तं. उदकेनाति वा उम्मुज्जनादिकिरियासाधनभूतेन उदकेन सत्तानं सुचि पापसुद्धि न होतीति. अथ वा सुचितेन यथावुत्तेन उदकेन पापमलतो सुद्धो नाम सत्तो न होतीति. यदि सिया, सब्बेसमेव मच्छबन्धानं पापसुद्धि सिया. तेनाह ‘‘बह्वेत्थ न्हायती जनो’’ति. मातुघातादिपापकम्मकारीनं, अञ्ञेसञ्च गोमहिंसादीनं उदकं ओरोहन्तानं अन्तमसो मच्छकच्छपे उपादाय सब्बेसम्पि पापसुद्धि सिया ¶ , न पनेवं होति. कस्मा? न्हानीयपापहेतूनं अप्पटिपक्खभावतो. यञ्हि यं विनासेति, सो तस्स पटिपक्खो. यथा आलोको अन्धकारस्स, विज्जा अविज्जाय, न एवं न्हानं पापस्स, तस्मा निट्ठमेत्थ गन्तब्बं ‘‘न उदकेन सुची होती’’ति. येन पन सुचि होति, तं दस्सेतुं ‘‘यम्हि सच्चञ्चा’’तिआदि वुत्तं. तत्थ सच्चन्ति वचीसच्चञ्च विरतिसच्चञ्च. अथ वा सच्चन्ति ञाणसच्चञ्चेव परमत्थसच्चञ्च. धम्मोति सेसो अरियधम्मो. सच्चस्स पनेत्थ विसुं गहणं तस्स बहुकारतादस्सनत्थं. सेसं सुविञ्ञेय्यमेव.

जातिबलनिसेधकन्ति जातिमत्तब्राह्मणानं भोवादिकानं पटिसेधकं. जातिवादस्स वा निसेधकं, ‘‘न जच्चा ब्राह्मणो होती’’ति (सु. नि. ६५५) हि वुत्तं. थेरो हि तथावादेन ते अनिग्गण्हन्तोपि निग्गण्हन्तो विय होतीति कत्वा वुत्तं.

१०५. विमुत्तियन्ति अनुपादिसेसनिब्बानधातुयं.

सवासनन्ति एत्थ खीणासवस्सापि अखीणासवसदिसकायवचीपयोगहेतुभूता सन्ताने किलेसभावना वासना नाम आयस्मतो पिलिन्दवच्छस्स (अ. नि. अट्ठ. १.१.२१५; ध. प. अट्ठ. २.पिलिन्दवच्छत्थेरवत्थु) वसलवोहारो विय, सह वासनायाति सवासनं, भावनपुंसकञ्चेतं ‘‘विसमं चन्दिमसूरिया परिवत्तन्ती’’तिआदीसु (अ. नि. ४.७०) विय. यथावुत्तवासनम्पि असेसेत्वाति अत्थो. कुम्मग्गपरिहरणवसेन मग्गसम्पटिपत्तीति मग्गे कुसलो अमग्गेपि कुसलो एव होति. भगवा पन सब्बञ्ञुताय सब्बत्थेव कुसलोति आह ‘‘मग्गे च अमग्गे च कोविदो’’ति.

१०६. तमेन युत्तोति यथावुत्ततमो तस्स अत्थीति तमो, पुग्गलो. अप्पकासभावेन ठिता खन्धाव तमो. आलोकभूतोति जातिगुणालोको, पाकटगुणोति अत्थो.

किलेसमयं ¶ बन्धनं ‘‘दळ्ह’’न्ति वदन्ति. यतो सच्चानि पटिविज्झन्ता बुद्धाव नं छिन्दन्ति, न अञ्ञे.

दुच्छेदनत्थेन ¶ सतिपि दळ्हभावे सिथिलवुत्तितं तस्स दीपेतुं ‘‘बन्धनभावम्पी’’तिआदिमाह. तेन ‘‘अहो सुखुमतरं खो, भिक्खवे, मारबन्धन’’न्ति वुत्तं.

१०७. यदिपि चेतना कुसलाकुसलसाधारणा, अपुञ्ञाभिसङ्खारो इधाधिप्पेतोति तस्स वसेन अत्थं दस्सेन्तो ‘‘अकुसलचेतनावसेन चेतेती’’ति आह. चेतनं अभिसन्दहनं, चित्तस्स ब्यापारापत्तिभावेन पवत्तीति अत्थो. यस्मा पन चेतना यदा विञ्ञत्तिं समुट्ठापेति, तदा दिगुणुस्साहादिगुणवायामा विय हुत्वा पाकटं पयोगं निप्फादेति, तस्मा ‘‘पकप्पेती’’ति वुत्ता. पाकटप्पयोगकप्पनञ्हेत्थ पकप्पनं अधिप्पेतं. तेनाह ‘‘तमेव पकप्पेती’’ति. पच्चयट्ठो इध आरम्मणत्थोति वुत्तं ‘‘पवत्तिया पच्चयो होती’’ति.

१०८. यथा जलसमुद्दस्स वीचिसमुट्ठानवसेन लब्भमानो वेगो ‘‘वीचिमयो’’ति वुच्चति, एवं चक्खुसमुद्दस्सापि रूपावभासनवसेन लब्भमानो वेगो ‘‘रूपमयो’’ति वुत्तो. एसेव नयो सेसेसुपि. आविञ्छनतोति आकड्ढनतो, आकड्ढनञ्चेत्थ सन्तानस्स तन्निन्नभावहेतुताय दट्ठब्बं.

समुदनं किलेसतेमनं, अवस्सवहेतुता, किलेसानं ऊमिआदिसदिसता समावट्टनेन सत्तानं अनत्थावहताय वेदितब्बा. उपरूपरिवेगुप्पत्तिया उपगतस्स उट्ठातुं अप्पदानेन, गुणसारविनासनेन च कोधुपनाहादीनं ऊमिआदिसदिसता दट्ठब्बा.

अभिमुखो नन्दतीति तदारम्मणं सुखं सोमनस्सं सादियन्तो सम्पटिच्छति. अभिवदतीति तण्हाभिनिवेसवसेन अभिनिविस्स वदति. तञ्हिस्स अभिनिवेसं दीपेतुं ‘‘अहो सुख’’न्तिआदि वुत्तं. अज्झोसानं अधिमुच्चनभूताय तण्हाय तण्हावत्थुकस्स अनुपविसित्वा आवेणिकताकरणन्ति आह ‘‘अज्झोसाय तिट्ठतीति गिलित्वा परिनिट्ठपेत्वा’’ति.

१०९. ‘‘कस्मा’’तिआदिना सन्तापदुक्खानं असुप्पतिकारतं आह ‘‘येन वा पकारेना’’ति. येनाति येन वा कामज्झोसानदिट्ठिज्झोसानभूतेन मिच्छाभिनिवेसप्पकारेन. गहट्ठपब्बजिता तथारूपं कत्वा ¶ अत्तनो वड्ढिञ्च मञ्ञन्ति. अवड्ढि एव पन होति तस्स पकारस्स ¶ वड्ढियं अनुपायभावतो च उपायभावतो च अवड्ढियं. तथापीति तत्थ तत्थ इच्छाविघातं पापुणन्तोपि. यस्मा इतो बाहिरका सब्बेन सब्बं भवनिस्सरणं अप्पजानन्तो मन्दकिलेसं दीघायुकं सुखबहुलं एकच्चं भवं तेनेव मन्दकिलेसादिभावेन ‘‘निब्बान’’न्ति समनुपस्सन्ति, तस्मा भवेन भवविप्पमोक्खं वदन्तीति.

भवदिट्ठिसहगता तण्हा पुरिमपदे उत्तरपदलोपेन भवतण्हाति वुत्ताति आह ‘‘भवतण्हातिआदीसु विया’’ति.

यत्थाति यस्मिं भवे.

ततो एवाति भूतरतिया एव. अञ्ञमञ्ञञ्हि सत्तानं छन्दरागो बलवा होति. अनवसेसतोति अनवसेसेन, न किञ्चि सेसेत्वा.

संसारसोतस्स अनुकूलभावेन गच्छतीति अनुसोतगामी. तस्सेव पटिक्कूलवसेन निब्बिदानुपस्सनादीहि पवत्ततीति पटिसोतगामी, अचलप्पसादादिसमन्नागमेन ठितसभावोति अत्थो.

११०. ‘‘पलब्भति, निखज्जती’’तिआदीसु विय उपसग्गो पदवड्ढनमत्तन्ति आह ‘‘अभिजातिकोति जातियो’’ति. कण्हधम्मसमन्नागतत्ता वा कण्हो. पठमवयेपि मज्झिमवयेपि पापसमङ्गी हुत्वा ठितो कण्हधम्मे अभिजायति, पच्छापि पापं पसवतीति अत्थो. सुक्कोति वा एत्थ वुत्तविपरियायेनेव अत्थो वेदितब्बो.

१११. पुरिमस्मिन्ति पुरिमस्मिं पदे. विसये भुम्मं तत्थ देय्यधम्मस्स पतिट्ठापनतो. दुतिये अधिकरणे, तदधिकरणञ्हि निब्बानन्ति. गहट्ठपब्बजितकिच्चेसु वा विसिट्ठधम्मदस्सनत्थं पच्चयदानारहत्तानं समधुरतानिद्देसो. अथ वा येन येन पन वत्थुनाति रूपारूपनिरोधादिना तण्हावत्थुना. अमराविक्खेपवत्थुआदिनाति एत्थ आदि-सद्देन सुभसुखादिमिच्छाभिनिवेसवत्थुं सङ्गण्हाति. यथा वा तण्हादिट्ठिदुच्चरितानं वसेन संकिलेसभागियस्स सुत्तस्स विभागो, एवं समथविपस्सनासुचरितवसेन तण्हावोदानभागियादिसुत्तविभागोति दस्सेतुं पाळियं ‘‘तण्हा…पे… निद्दिसितब्ब’’न्ति वुत्तं.

इदं ¶ ¶ एवं पवत्तन्ति यथा दुचिन्तितादिवसेन बालो होति पुग्गलो, एवं तस्स दुचिन्तितचिन्तितादिभावनावसेन पवत्तं इदं संकिलेसभागियं नाम सुत्तन्ति पुब्बे संकिलेसधम्मविभागेन वुत्तं इदानि सामञ्ञतो सङ्गहेत्वा वदति. इदं वासनाभागियं सुत्तन्ति एत्थापि इमिना नयेन अत्थो वेदितब्बो.

किलेसट्ठानेहीति किलेसानं पवत्तिट्ठानेहि. किलेसावत्थाहीति किलेसानं पवत्तिआकारविसेसेहि. कामरागादीहि संयुज्जति कामरागादिहेतु कम्मविपाकादिना. सतिपि तेसं कालन्तरवुत्तियं संयुत्तो नाम होति, यतो कामरागादयो ‘‘संयोजन’’न्ति वुच्चन्ति. उपादियतीति दळ्हं गण्हाति पवत्तेति. सेसं वुत्तनयत्ता, उत्तानत्ता च संवण्णितं.

११२. उदाहरणवसेनाति निदस्सनवसेन, एकदेसदस्सनवसेनाति अत्थो. सकलस्स हि परियत्तिसासनस्स सोळसहि पट्ठानभागेहि गहितत्ता. यथा तदेकदेसानं सोळसन्नम्पि पट्ठानभागानं गहणं उदाहरणमत्तं, तेसं पन सोळसन्नं एकदेसग्गहणं उदाहरणन्ति किमेत्थ वत्तब्बं. तेन वुत्तं ‘‘एकदेसदस्सनवसेनाति अत्थो’’ति. कस्मा पनेत्थ पाळियं पट्ठानस्स एकदेसोव उदाहटो, न अवसेसोति? नयनिदस्सनत्थं. इमिना नयेन अवसेसोपि पट्ठानभावो वेदितब्बोति.

तत्थ ‘‘अप्पम्पि चे संहित भासमानो…पे… स भागवा सामञ्ञस्स होती’’ति (ध. प. २०) इदं वासनाभागियञ्च असेक्खभागियञ्च. एत्थ हि ‘‘अप्पम्पि चे संहित भासमानो’’ति इदं वासनाभागियं, ‘‘स भागवा सामञ्ञस्स होती’’ति इदं असेक्खभागियं.

तथा मघदेवसुत्तं. तत्थ हि ‘‘भूतपुब्बं, आनन्द, इमिस्सायेव मिथिलायं मघदेवो नाम राजा अहोसि धम्मिको धम्मराजा धम्मे ठितो महाधम्मराजा, धम्मं चरति ब्राह्मणगहपतिकेसु नेगमेसु चेव जनपदेसु च, उपोसथञ्च उपवसति चातुद्दसिं, पञ्चदसिं, अट्ठमिञ्च पक्खस्सा’’तिआदि (म. नि. २.३०८), इदं वासनाभागियं. ‘‘इदं खो पनानन्द, एतरहि मया कल्याणं वत्तं नीहरितं एकन्तनिब्बिदाय विरागाय निरोधाय उपसमाय ¶ अभिञ्ञाय सम्बोधाय निब्बानाय संवत्तती’’ति (म. नि. ३.१८९) इदं असेक्खभागियं. ‘‘पमादं अप्पमादेन, यदा नुदति पण्डितो’’ति (ध. प. २८) इदं निब्बेधभागियं. ‘‘पञ्ञापासाद…पे… अवेक्खती’’ति (ध. प. २८) इदं असेक्खभागियन्ति इदं निब्बेधभागियञ्च असेक्खभागियञ्च.

तथा ¶ ‘‘तीणिमानि, भिक्खवे, इन्द्रियानी’’ति (सं. नि. ५.४९३) सुत्तं. तत्थ ‘‘तीणिमानि, भिक्खवे, इन्द्रियानि. कतमानि तीणीति? अनञ्ञातञ्ञस्सामीतिन्द्रियं अञ्ञिन्द्रिय’’न्ति इदं निब्बेधभागियं, ‘‘अञ्ञाताविन्द्रिय’’न्ति (सं. नि. ५.४९३) इदं असेक्खभागियं.

रट्ठपालसुत्तं (म. नि. २.२९३ आदयो) संकिलेसभागियञ्च वासनाभागियञ्च असेक्खभागियञ्च. तत्थ हि ‘‘ऊनो लोको अतित्तो तण्हादासो’’तिआदिना (म. नि. २.३०६) संकिलेसो विभत्तो, ‘‘एको वूपकट्ठो’’तिआदिना (म. नि. २.२९९) असेक्खधम्मा, इतरेन वासनाधम्माति.

‘‘धम्मे च ये अरियपवेदिते रता, अनुत्तरो ते वचसा मनसा कम्मुना च;

ते सन्तिसोरच्चसमाधिसण्ठिता, सुतस्स पञ्ञाय च सारमज्झगू’’ति. (सु. नि. ३३२);

इदं वासनाभागियञ्च निब्बेधभागियञ्च असेक्खभागियञ्च. एत्थ हि ‘‘धम्मे च ये अरियपवेदिते रता’’ति अयं वासना, ‘‘अनुत्तरा…पे… सण्ठिता’’ति अयं निब्बेधो, ‘‘सुतस्स पञ्ञाय च सारमज्झगू’’ति असेक्खधम्मा.

तथा ‘‘सद्धो सुतवा नियामदस्सी’’ति गाथा (सु. नि. ३७३). तत्थ हि ‘‘सद्धो सुतवा’’ति वासना, ‘‘नियामदस्सी वग्गगतेसु न वग्गसारि धीरो, लोभं दोसं विनेय्य पटिघ’’न्ति निब्बेधो, ‘‘सम्मा सो लोके परिब्बजेय्या’’ति असेक्खधम्मा.

सब्बासवसंवरो परिस्सयादीनं वसेन सब्बभागियं वेदितब्बं. तत्थ हि संकिलेसधम्मा, लोकियसुचरितधम्मा, सेक्खधम्मा, असेक्खधम्मा च विभत्ता. असब्बभागियं पन ‘‘पस्सं पस्सती’’तिआदिकं (म. नि. १.२०३) उदकादिअनुवादनवचनं ¶ वेदितब्बं. एवमेतस्मिं सोळसविधे सासनपट्ठाने एते तण्हादिवसेन तयो ¶ संकिलेसभागा, वोदानादिवसेन तयो वासनाभागा, सेक्खानं सीलक्खन्धादीनं वसेन तयो निब्बेधभागा, असेक्खानं सीलक्खन्धादीनं एव वसेन तयो असेक्खभागा, तेसं वसेन मूलपट्ठानानि एव द्वादस होन्ति. तानि पन वित्थारनयेन विभजियमानानि छन्नवुताधिकानि चत्तारि सहस्सानि होन्ति. यथादस्सनं पनेतानि उद्धरितब्बानि. तानि पन यस्मा सङ्गहतो कामतण्हादिवसेन तयो तण्हासंकिलेसभागा, सस्सतुच्छेदवसेन द्वे दिट्ठिसंकिलेसभागा, कायदुच्चरितादिवसेन तयो दुच्चरितसंकिलेसभागाति अट्ठ संकिलेसभागा. धम्मामिसाभयदानवसेन तिविधं दानमयं पुञ्ञकिरियवत्थु, कायसुचरितादिवसेन तिविधं सीलमयं पुञ्ञकिरियवत्थु, समथविपस्सनावसेन दुविधं भावनामयं पुञ्ञकिरियवत्थूति अट्ठेव वासनाभागा.

सद्धानुसारी सद्धाविमुत्तो धम्मानुसारी दिट्ठिप्पत्तो कायसक्खीति (पु. प. मातिका ७.३२-३६; पु. प. २६-३०) पञ्चन्नं सेक्खानं पच्चेकं तयो सीलादिक्खन्धाति पन्नरस निब्बेधभागा, सुञ्ञतानिमित्तापणिहितभेदा पञ्ञाविमुत्तानं तयो अग्गफलधम्मा, तेसु पच्चेकं तयो तयो सीलादिक्खन्धा, तथा उभतोभागविमुत्तानन्ति अट्ठारस, सिक्खितब्बाभावसामञ्ञेन असङ्खतधातुं पक्खिपित्वा एकूनवीसति असेक्खभागा, इति पुरिमानि एकतिंस, इमानि एकूनवीसतीति समपञ्ञास संकिलेसभागियादिधम्मा होन्ति. तस्मा इमेसं समपञ्ञासाय संकिलेसभागियादिधम्मानं वसेन समपञ्ञास सुत्तानि होन्ति.

यस्मा च ते पञ्ञाविमुत्ता उभतोभागविमुत्तविभागं अकत्वा असङ्खताय धातुया अग्गहणेन निप्परियायेन असेक्खभागाभावतो नवेव असेक्खभागाति समचत्तालीस होन्ति, तस्मा पेटके ‘‘चत्तारीसाय आकारेहि परियेसितब्बं, पञ्ञासाय आकारेहि सासनपट्ठानं निद्दिट्ठ’’न्ति (पेटको. २१) च वुत्तं. सङ्गहतो एव पन पुब्बे वुत्तवित्थारनयेन सोळस होन्ति, पुन तिविधसंकिलेसभागियादिवसेन द्वादस होन्ति, पुन तण्हादिट्ठिदुच्चरितसंकिलेसतण्हादिट्ठिदुच्चरितवोदानभावेन छ होन्ति, पुन संकिलेसभागियं वासनाभागियं दस्सनभागियं ¶ वासनाभागियं असेक्खभागियन्ति पञ्च होन्ति, पुन मूलपट्ठानवसेन चत्तारि होन्ति, पुथुज्जनभागियसेक्खभागियअसेक्खभागियभावेन तीणि होन्ति, पुन संकिलेसभागियवोदानभागियभावेन द्वे एव होन्ति. पट्ठानभावेन पन एकविधमेव, इति पट्ठानभावेन एकविधम्पि संकिलेसवोदानभागियभावेन दुविधन्ति विभागतो याव छन्नवुताधिकं चतुसहस्सप्पभेदं होति, ताव नेतब्बं. एवमेतं पट्ठानं सङ्गहतो, विभागतो च वेदितब्बं.

इमस्सापि पट्ठानविभागस्स, न पुरिमस्सेवाति अधिप्पायो. लोकिकं अस्सत्थीति, लोकिकसहचरणतो वा लोकियं, सुत्तं पदेसेनाति एकदेसेन. सब्बपदेसूति तंतंतिकानं ततियपदेसु. बुद्धादीनन्ति बुद्धपच्चेकबुद्धबुद्धसावकानं. धम्मो पनेत्थ बुद्धादिग्गहणेन वेदितब्बो, आदिसद्देन वा.

परिणमतीति ¶ परिपच्चति. धरन्तीति पबन्धवसेन पवत्तन्ति. न्ति पापकम्मं. तेति कुसलाभिनिब्बत्तक्खन्धा. रक्खन्ति विपाकदानतो विपच्चितुं ओकासं न देन्तीति अत्थो. अयञ्च अत्थो उपपज्जवेदनीयेसु युज्जति, इतरस्मिम्पि यथारहं लब्भतेव. तेनाह ‘‘दुतिये वा ततिये वा अत्तभावे’’ति.

११३. अत्तनो अनवज्जसुखावहं पटिपत्तिं पटिपज्जन्तो परमत्थतो अत्तकामो नामाति आह ‘‘अत्तनो सुखकामो’’ति. सुखानुबन्धञ्हि सुखं कामेन्तो सुखमेव कामेतीति च सुखकामोति.

वित्थतट्ठेनाति सुविप्फारदिट्ठीनं पवत्तनट्ठानतासङ्खातेन वित्थारट्ठेन.

११४. दिट्ठे दुक्खादिधम्मेति भावेनभावलक्खणे भुम्मं, दुक्खादिधम्मे दिट्ठे ञातेति अत्थो.

‘‘उद्ध’’न्तिआदि कालदेसानं अनवसेसपरियादानन्ति आह ‘‘उद्धन्ति अनागतं, उपरि चा’’तिआदि. गमनेनाति चुतूपपातगमनेन.

११५. नगरद्वारथिरकरणत्थन्ति नगरस्स द्वारबाहथिरकरणत्थं. गम्भीरनेमतायाति ‘‘नेमं’’वुच्चति निखातथम्भादीनं पथविं अनुपविसित्वा ठितप्पदेसो ¶ , गम्भीरं नेमं एतस्साति गम्भीरनेमो, तस्स भावो गम्भीरनेमता, ताय. कम्पनं यथाठितस्स इतो चितो च सञ्चोपनं, चालनं ठितट्ठानतो चावनं. अज्झोगाहेत्वाति अविपरीतसभावाभिसमयवसेन अनुपविसित्वा, अनुपविट्ठो विय हुत्वाति अत्थो.

संयोजनानं पजहनवसेनाति गाथाय वचनसेसं आनेत्वा दस्सेति. अथ वा पहातब्बस्स पहानेन विना न भावनासिद्धीति अत्थसिद्धं पहातब्बपहानं अज्झत्तं, बहिद्धाति पदद्वयेन योजेत्वा दस्सेतुं अज्झत्तं बहिद्धाति ओरम्भागियउद्धम्भागियसंयोजनानं विसंयोगगहितोति इममत्थं पाळिया समत्थेतुं ‘‘तेनाह सब्बलोके’’ति वुत्तं.

अलोभसीसेनाति अलोभेन पुब्बङ्गमेन, यतो योगावचरो ‘‘नेक्खम्मच्छन्दो’’ति वुच्चति. असुभसञ्ञा रागप्पटिपक्खताय ‘‘विसेसतो अलोभप्पधाना’’ति वुत्ता, दसासुभवसेन ¶ वा. अधिगतज्झानादीनीति आदिसद्देन विपस्सनादीनि सङ्गण्हाति. विहिंसारतिरागानं ब्यापादहेतुकतो चत्तारोपि ब्रह्मविहारा अब्यापादपधानाति आह ‘‘चतु…पे… अब्यापादो धम्मपद’’न्ति. अधिगतानि झानादीनीति योजना. दसानुस्सति…पे… अधिगतानि सम्मासति धम्मपदं सतिसीसेन तेसं अधिगन्तब्बत्ताति अधिप्पायो. आनापानभावनायं समाधिपि पधानो, न सति एवाति दस्सनत्थं ‘‘दसकसिण…पे… सम्मासमाधि धम्मपद’’न्ति वुत्तं. चतुधातुववत्थानवसेन अधिगतानम्पि एत्थेव सङ्गहो दट्ठब्बो.

११६. उपलक्खणकारणानीति सञ्जानननिमित्तानि.

पापमेव पापियोति आह ‘‘पापं होती’’ति, ‘‘पापियो’’ति च लिङ्गविपल्लासवसेन वुत्तं. एकवचने बहुवचनन्ति एकवचने वत्तब्बे बहुवचनं वुत्तं.

११७. ओलीयनतण्हाभिनिवेसवसेनाति भवतण्हाभवदिट्ठिवसेन. ता हि भवेसु सत्ते अल्लीयापेन्ति. अतिधावनाभिनिवेसवसेनाति उच्छेददिट्ठिवसेन. सा हि अवट्टुपच्छेदमेव वट्टुपच्छेदं कत्वा अभिनिविसनतो अतिधावनाभिनिवेसो नाम. ओलीयन्तीति सम्मापटिपत्तितो सङ्कोचं आपज्जन्ति. अभिधावन्तीति सम्मापटिपत्तिं अतिक्कमन्ति.

तेसञ्चाति ¶ तेसं उभिन्नं अभिनिवेसानं, तदञ्ञेसञ्च सब्बमञ्ञितानं.

११८. इदं इट्ठविपाकं अनिट्ठविपाकन्ति इदं इट्ठविपाकसङ्खातं अनिट्ठविपाकसङ्खातं फलं.

‘‘अकङ्खतो न जानेय्यु’’न्ति एतेन ‘‘आकङ्खतो’’ति इमिना पदेन सद्धिं सम्बन्धदस्सनमुखेन ‘‘न जञ्ञा’’ति पदस्स अत्थं दस्सेति.

न उपलब्भतीति नत्थीति अत्थो.

१२०. तानीति कम्मकम्मनिमित्तगतिनिमित्तानि. पत्थरणाकारोयेव हेस, यदिदं छायानं ¶ वोलम्बनं. एवं होतीति ‘‘अकतं वत मे कल्याण’’न्तिआदिप्पकारेन विप्पटिसारो होति.

१२२. एसकेहीति गवेसकेहि सपरसन्ताने सम्पादकेहि. दुक्खुद्रयन्ति दुक्खफलं. तीहि कारणेहीति कायवाचाचित्तेहि. तानि हि तंतंसंवरानं द्वारभावेन कारणानीति वुत्तानि. तीहि ठानेहीति वा तीहि उप्पत्तिट्ठानेहि. पिहितन्ति पिधायकं.

‘‘उट्ठानट्ठानसङ्खात’’न्ति इदं पासाणभावसामञ्ञं गहेत्वा वुत्तं.

१२३. रजमिस्सकन्ति पुप्फरजमिस्सकं. तस्साति तस्स सेक्खासेक्खमुनिनो. महिच्छादीनं विय गामे चरणप्पच्चया गामवासीनं सद्धाहानि वा भोगहानि वा न होति, अथ खो उपरूपरि वुद्धियेव होतीति दस्सेन्तो ‘‘पाकतिकमेव होती’’ति आह. अज्झत्तिककम्मट्ठानन्ति चतुसच्चकम्मट्ठानं.

तेनाति कुसलेन कायवचीकम्मेन. थिरभावो थामं नामाति तस्स अत्थं दस्सेन्तो ‘‘थामवाति ठितिमा’’ति आह.

अत्तसंनिस्सयं पेमं अत्ताति गहेत्वा ‘‘अत्तसम’’न्ति वुत्तन्ति आह ‘‘अत्तपेमेन समं पेमं नत्थी’’ति. भगवतो विपस्सनाञाणोभासप्पवत्तिं सन्धायाह ‘‘पञ्ञा पन…पे… सक्कोती’’ति. सब्बञ्ञुतञ्ञाणं, पन अभिञ्ञाञाणानि च अनन्तापरिमाणं लोकधातुं ओभासेन्ति.

१२४. किस्स भीताति केन कारणेन भीता.

ठपेत्वाति ¶ पवत्तेत्वा. वचनीयो याचकानन्ति योजना, याचितब्बयुत्तोति अत्थो. यञ्ञउपक्खरोति यञ्ञोपकरणं. ‘‘एतेसु धम्मेसु ठितो चतूसू’’ति वुत्तं चतुक्कं ववत्थपेतुं ‘‘सद्धोति एकं अङ्ग’’न्तिआदि वुत्तं.

गाथायं वुत्तधम्मे द्वे द्वे एकं कत्वा अङ्गकरणं दुकनयो.

जातिधम्मन्ति ¶ पवत्तिधम्मं सन्धाय वदति.

१२५. सच्चेकदेसतो सच्चसमुदायो अनवसेसपरियादानतो विसिट्ठोति दस्सेन्तो ‘‘परमत्थसच्चं वा होतू’’ति आह. चतुरो पदाति चत्तारि पदानि, लिङ्गविपल्लासेन वुत्तं, चत्तारो धम्मकोट्ठासाति अत्थो. केवलं सत्तविभागदस्सनत्थमेव चतुपदग्गहणं, न अधिगतधम्मानुरूपताय.

निम्मदाति न मदा.

‘‘सच्चवादी जिनो रोमो’’तिपि पाठो. तत्थ रोमोति दिट्ठिरागरत्तानं तित्थियानं, तित्थकरानञ्च अधम्मवादीनं रागविपरीतधम्मदेसनतो भयजनको, अधम्मवादीनं वा तत्थ आदीनवदस्सनेन भायितब्बो, अप्पहीनासंवरानं वा दुरुपसङ्कमनतो दुरासदोति अत्थो.

सच्चो च सो धम्मो चाति सच्चधम्मो. तेनाह ‘‘एकन्तनिस्सरणभावेना’’तिआदि.

एकायनभावन्ति एकमग्गभावं, अञ्ञमग्गभावन्ति अत्थो.

दस्सनभागियं भावनाभागियन्ति निब्बेधभागियमेव द्विधा विभजित्वा वुत्तन्ति आह ‘‘संकिलेसभागियादीहि चतूहि पदेही’’ति. सेसत्तिकानन्ति सत्ताधिट्ठानत्तिकादीनं अट्ठन्नं तिकानं. सेसपदानञ्चाति संकिलेसभागियञ्च वासनाभागियञ्चातिआदिमिस्सकपदानञ्च. च-सद्देन संकिलेसभागियादिपदानि च सङ्गण्हाति. लोकियत्तिकस्सेव हि ‘‘सेसपदानी’’ति वुत्तेहि मिस्सकपदेहि एवं संसन्दने नयदस्सनं, इतरेसं पन तिकानं संकिलेसभागियादिपदेहि चेव सेसपदेहि च संसन्दने इदं नयदस्सनन्ति ‘‘वुत्तनयानुसारेन सुविञ्ञेय्य’’न्ति वुत्तं. समतिक्कमनन्ति पहानं. सतिपि वासनाभागियसंकिलेसभागियधम्मानं लोकियभावे ¶ पुरिमेहि पन पच्छिमा पहातब्बा तदङ्गवसेन, विक्खम्भनवसेन च. एवं पजहनसमत्थताय पहानन्ति वुत्तं ‘‘वासनाभागियं सुत्तं संकिलेसभागियस्स समतिक्कमाय होती’’ति. संकिलेसधम्मानं समतिक्कमेन अधिगन्तब्बा वोदानधम्मा वियाति योजना. भावना नाम तिविधा झानभावना, विपस्सनाभावना, मग्गभावनाति. तासु मग्गभावनाय गहिताय विपस्सनाभावना गहिता एव होतीति तं अनामसित्वा इतरा द्वे एव गहिता. तथापि ‘‘भावनाभागियस्स सुत्तस्स पटिनिस्सग्गाया’’ति वुत्ते किं सब्बेन सब्बं असेक्खस्स झानभावनापि ¶ पटिनिस्सट्ठाति चोदनं मनसि कत्वा पाळियं ‘‘असेक्खभागियं सुत्तं दिट्ठधम्मसुखविहारत्थ’’न्ति वुत्तन्ति दस्सेन्तो ‘‘असेक्खधम्मेसु उप्पन्नेसु मग्गभावनाकिच्चं नाम नत्थी’’ति वत्वा ‘‘झानभावनापि दिट्ठधम्मसुखविहारत्था एवा’’ति आह.

एकं एव भवबीजं पटिसन्धिविञ्ञाणं एकबीजं, तं अस्स अत्थीति एकबीजी. सन्धावित्वा समागन्त्वा, निब्बत्तनवसेन उपगन्त्वाति अत्थो. संसरित्वाति तस्सेव वेवचनं. कुलं कुलं गच्छतीति कोलंकोलो. पुरिमपदे अनुनासिकलोपं अकत्वा निद्देसो.

तेसं सोतापन्नानं. एतं पभेदन्ति एकबीजिआदिविभागं. पुरिमभवसिद्धं विवट्टूपनिस्सयपुञ्ञकम्मं इध पुब्बहेतु नाम. यो ‘‘कतपुञ्ञता’’ति वुच्चति, सो पठममग्गे साधिते चरितत्थताय विपक्कविपाकं विय कम्मं उपरिममग्गानं उपनिस्सयो न सियाति अधिप्पायेनाह ‘‘उपरि…पे… आपज्जती’’ति. तिण्णं मग्गानं निरत्थकता आपज्जति पठममग्गेनेव तेहि कातब्बकिच्चस्स साधितत्ता. पठममग्गे…पे… आपज्जतीति अनुप्पन्नस्स अत्थकिरियासम्भवतो. एवं तिण्णं वादानं युत्तिअभावं दस्सेत्वा चतुत्थवादो एवेत्थ युत्तोति दस्सेन्तो आह ‘‘विपस्सना…पे… युज्जती’’ति. ‘‘सचे ही’’तिआदिना तं युत्तिं विभावेति. विमुत्तिपरिपाचनीयानं धम्मानं परिपक्कताय इन्द्रियानं तिक्खताय ञाणस्स विसदताय विपस्सनाय बलवभावो वेदितब्बो. सो हि वोमिस्सकनयेन संसरणको इधाधिप्पेतो ‘‘देवे चेव मानुसे च सन्धावित्वा’’ति वुत्तत्ता. इध कामभवे ठितो इधट्ठको. मनुस्सदेवलोकूपपज्जनतो ओकारेन वोकिण्णो. अरियसावकस्स तंतंसत्तनिकायुपपत्ति तस्स तस्स सोधनसदिसं किलेसमलादिअनत्थापनयनतोति ¶ आह ‘‘छ देवलोके सोधेत्वा’’ति. ‘‘अकनिट्ठे ठत्वा’’ति एतेन हेट्ठाब्रह्मलोकसोधनं वुत्तमेवाति वेदितब्बं.

सद्धं धुरं कत्वाति सद्धं धुरं जेट्ठकं पुब्बङ्गमं कत्वा. सद्धाय अनुस्सति पटिपत्ति, सद्धं वा पुब्बभागियं अनुस्सति, सद्धाय वा अनुसरणसीलोति सद्धानुसारी. धम्मानुसारीति एत्थापि एसेव नयो. धम्मोति पनेत्थ पञ्ञा वेदितब्बा. सद्दहन्तो विमुत्तोति सद्धाविमुत्तो. यदिपि सब्बथा अविमुत्तो, सद्धामत्तेन पन विमुत्तोति अत्थो. सद्धाय वा अधिमुत्तोति सद्धाविमुत्तो. वुत्तनयेनाति उपरिमग्गविपस्सनाय बलवमन्दमन्दतरभावेन. दिट्ठिया पत्तोति दिट्ठिप्पत्तो, चतुसच्चदस्सनसङ्खाताय दिट्ठिया निरोधप्पत्तोति अत्थो. दिट्ठन्तं वा पत्तोति दिट्ठिप्पत्तो, दस्सनसङ्खातस्स सोतापत्तिमग्गञाणस्स अनन्तरप्पवत्तोति वुत्तं होति. पठमफलतो पट्ठाय हि याव अग्गमग्गा दिट्ठिप्पत्ताति. इदन्ति यथावुत्तसोतापन्नानं सद्धाविमुत्तदिट्ठिप्पत्ततावचनं ¶ . अट्ठन्नं विमोक्खानन्ति चतस्सो रूपावचरसमापत्तियो, चतस्सो अरूपावचरसमापत्तियोति अट्ठ विमोक्खा, तेसं.

फुट्ठन्तं सच्छिकरोतीति कायसक्खी, फुट्ठानं अन्तो फुट्ठन्तो, फुट्ठानं अरूपज्झानानं अनन्तरो कालोति अधिप्पायो. अच्चन्तसंयोगे चेतं उपयोगवचनं, फुट्ठानन्तरकालमेव सच्छिकातब्बं सच्छिकरोतीति वुत्तं होति, ‘‘विसमं चन्दिमसूरिया परिवत्तन्ती’’तिआदीसु (अ. नि. ४.७०) विय वा भावनपुंसकन्ति एतं दट्ठब्बं. यो हि अरूपज्झानेन रूपकायतो, नामकायेकदेसतो च विक्खम्भनविमोक्खेन विमुत्तो, तेन निरोधसङ्खातो विमोक्खो आलोचितो पकासितो विय होति, न कायेन सच्छिकतो, निरोधं पन आरम्मणं कत्वा एकच्चेसु आसवेसु खेपितेसु तेन सो सच्छिकतो होति. तस्मा सो सच्छिकातब्बं निरोधं यथाआलोचितं नामकायेन सच्छिकरोतीति ‘‘कायसक्खी’’ति वुच्चति, न तु विमुत्तो एकच्चानं एव आसवानं अपरिक्खीणत्ता.

अभेदेनाति अन्तरापरिनिब्बायिआदिभेदेन विना. ‘‘अभेदेना’’ति च इदं ‘‘सद्धाविमुत्तदिट्ठिप्पत्तकायसक्खिनो’’ति इधापि आनेत्वा योजेतब्बं. यथेव हि अन्तरापरिनिब्बायिआदिभेदानामसनेनेव एको अनागामी ¶ होति, एवं यथावुत्तभेदआमसनेनेव सद्धाविमुत्तो, दिट्ठिप्पत्तो, कायसक्खीति तयो अनागामिनो होन्ति. अयञ्च अनागामिनो तादिसमवत्थाभेदं गहेत्वा गणना कताति वेदितब्बं. ‘‘अविहादीसू’’तिआदि सुविञ्ञेय्यमेव.

पञ्ञाय एव विमुत्तो, न चेतोविमुत्तिभूतेन सातिसयेन समाधिनापीति पञ्ञाविमुत्तो. उभतोभागविमुत्तोति उभोहि भागेहि उभतोभागतो विमुत्तो. किलेसानं विक्खम्भनसमुच्छिन्नेहि रूपकायनामकायतो विमुत्तोति इममत्थं दस्सेन्तो ‘‘विक्खम्भन…पे… विमुत्तो नामा’’ति आह. अरूपसमापत्तिया रूपकायतो, अग्गमग्गेन अरूपकायतो विमुत्तं. यथाह –

‘‘इध, भिक्खवे, एकच्चो पुग्गलो ये ते सन्ता विमोक्खा अतिक्कम्म रूपे आरुप्पा, ते कायेन फुसित्वा विहरति, पञ्ञाय चस्स दिस्वा आसवा परिक्खीणा होन्ति, अयं वुच्चति, भिक्खवे, पुग्गलो उभतोभागविमुत्तो’’ति (म. नि. २.१८२).

यं ¶ पन महानिदानसुत्ते ‘‘रूपी रूपानि पस्सती’’तिआदिके (दी. नि. २.१२९) निरोधसमापत्तिअन्ते अट्ठ विमोक्खे वत्वा –

‘‘यतो खो, आनन्द, भिक्खु इमे अट्ठ विमोक्खे अनुलोमम्पि समापज्जति…पे… अयं वुच्चतानन्द, भिक्खु उभतोभागविमुत्तो, इमाय च, आनन्द, उभतोभागविमुत्तिया अञ्ञा उभतोभागविमुत्ति उत्तरितरा वा पणीततरा वा नत्थी’’ति (दी. नि. २.१३०) –

वुत्तं, तं उभतोभागविमुत्तसेट्ठवसेन वुत्तं. तत्थ यस्मा आरुप्पसमापत्तीसु एकायपि रूपकायो विक्खम्भितो एव नाम होति, तस्मा चतुन्नं आरुप्पसमापत्तीनं, निरोधसमापत्तिया च लाभीनं वसेन पञ्च उभतोभागविमुत्ता वेदितब्बा. एस नयो कायसक्खिम्हिपि. अट्ठविमोक्खेकदेसेपि हि अट्ठविमोक्खसमञ्ञा यथा ‘‘लोके सत्ता’’ति.

तेरससु सीसेसु पलिबोधसीसादीनि, पवत्तसीसञ्च परियादियितब्बानि, अधिमोक्खसीसादीनि परियादकानि, गोचरसीसं परियादकफलं. तञ्हि ¶ विसयज्झत्तं फलं, विमोक्खो परियादकस्स मग्गस्स, फलस्स च आरम्मणं. सङ्खारसीसं सङ्खारविवेकभूतो निरोधोति परियादियितब्बानं, परियादकफलानञ्च सह विसयसंसिद्धिदस्सनेन समसीसिभावं दस्सेतुं पटिसम्भिदायं (पटि. म. १.८७) तेरस सीसानि वुत्तानि. इध पन ‘‘यस्स पुग्गलस्स अपुब्बं अचरिमं आसवपरियादानञ्च होति जीवितपरियादानञ्चा’’ति (पु. प. १६) पुग्गलपञ्ञत्तियं आगतत्ता तेसु किलेसपवत्तसीसानं एव वसेन योजनं करोन्तो ‘‘किलेससीस’’न्तिआदिमाह. तत्थ पवत्तसीसम्पि मग्गो पवत्तितो वुट्ठहन्तो चुतितो उद्धं अप्पवत्तिकरणेन यदिपि परियादियति, याव पन चुति, ताव पवत्तिसम्भवतो ‘‘पवत्तसीसं जीवितिन्द्रियं चुतिचित्तं परियादियती’’ति आह.

किलेसपरियादानेन अत्तनो अनन्तरं विय निप्फादेतब्बा, पच्चवेक्खणवारा च किलेसपरियादानस्सेव वाराति वत्तब्बतं अरहन्ति. ‘‘विमुत्तस्मिं विमुत्तमिति ञाणं होती’’ति (म. नि. १.७८; सं. नि. ३.१२, १४) हि वचनतो पच्चवेक्खणपरिसमापनेन किलेसपरियादानं समापितं नाम होति. तं पन परिसमापनं यदि चुतिचित्तेन होति, तेनेव जीवितपरिसमापनञ्च होतीति इमाय वारचुतिसमताय किलेसपरियादानजीवितपरियादानानं अपुब्बाचरिमता ¶ होतीति आह ‘‘वारसमताया’’ति. भवङ्गं ओतरित्वा परिनिब्बायतोति एत्थ परिनिब्बानचित्तमेव भङ्गोत्तरणभावेन वुत्तन्ति दट्ठब्बं.

चरितन्ति चरिता कायवचीमनप्पवत्ति. एत्थ च येन रागाधिकभावेन पुग्गलो ‘‘रागचरितो’’ति लक्खीयति, तयिदं लक्खणं. तेनाह ‘‘रागज्झासयो रागाधिकोति अत्थो’’ति, तेन अप्पहीनभावेन सन्ताने थामगतस्स रागस्स बलभावो लक्खीयतीति दट्ठब्बं. एसेव नयो सेसेसुपि.

सीलवन्तेहीति आदिसद्दस्स लोपं कत्वा निद्देसो कतोति दस्सेन्तो आह ‘‘सीलवन्तादीही’’ति. आदिसद्देन दायकादीनं सङ्गहो दट्ठब्बो.

आरम्मणभूता ¶ ञेय्यन्ति आरम्मणभूताव ञेय्यं.

पुथुज्जनभूमिआदीसूति पुथुज्जनसेक्खासेक्खभूमीसु. तत्थ पुथुज्जनभूमिवसेन संवरो, सेक्खभूमिवसेन पहानभावना, असेक्खभूमिवसेन सच्छिकिरिया, पुथुज्जनभूमिसेक्खभूमिवसेन वा यथारहं संवरपहानभावना. पुब्बभागिया हि संवरपहानभावना पुथुज्जनस्स सम्भवन्ति, इतरा सेक्खस्स, असेक्खभूमिवसेन सच्छिकिरिया. नयतो दस्सितन्ति ‘‘यं, भिक्खवे, मया ‘इदं न कप्पती’ति अप्पटिक्खित्तं, तं चे कप्पियं अनुलोमेति, अकप्पियं पटिबाहति, तं वो कप्पती’’तिआदिना (महाव. ३०५) नयदस्सनवसेन पकासितं. सरागादिसंवत्तनन्ति सरागादिभावाय संवत्तनं.

अञ्ञमञ्ञं संसग्गतोति ‘‘संकिलेसभागियञ्च वासनाभागियञ्चा’’तिआदिना संकिलेसभागियादीनं पदानं अञ्ञमञ्ञसंसग्गतो. अनेकविधोति द्वादसविधो याव द्वानवुताधिकचतुसहस्सविधोपि अनेकप्पकारो. लोकियसत्ताधिट्ठानादिसंसग्गतोति आदिसद्देन लोकियं ञाणं, लोकुत्तरं ञाणं, लोकियञ्च लोकुत्तरञ्च ञाणं, लोकियं ञेय्यं, लोकुत्तरं ञेय्यं, लोकियञ्च लोकुत्तरञ्च ञेय्यं, लोकियं ञाणञ्च ञेय्यञ्च, लोकुत्तरं ञाणञ्च ञेय्यञ्च, लोकियञ्च लोकुत्तरञ्च ञाणञ्च ञेय्यञ्चातिआदिको सम्भवन्तो पट्ठानभेदो सङ्गहितो. उभयत्थाति संकिलेसभागियादिके, लोकियादिके च. यथारहन्ति यो यो संसग्गवसेन योजनं अरहति, सो सो धम्मो. सम्भवाविरोधेनेव हि योजना. न हि ‘‘लोकियं निब्बेधभागिय’’न्तिआदिना योजना सम्भवति.

तीसु ¶ पिटकेसु लब्भमानस्साति तिस्सो सङ्गीतियो आरुळ्हे तेपिटके बुद्धवचने उपलब्भमानस्स विज्जमानस्स, एतेन न केवलं सङ्गहो एव यथावुत्तभेदानं पट्ठानभागानं निद्धारणाय कारणं, अथ खो पाळियं दस्सनञ्चाति विभावेति. तेनाह ‘‘यं दिस्सति तासु तासु भूमीसू’’ति. ‘‘तेनेव ही’’तिआदिना यथावुत्तस्स अत्थस्स पाठानुगमं दस्सेति.

सासनपट्ठानवारवण्णना निट्ठिता.

निगमनकथावण्णना

सद्धम्मावतरट्ठानेति ¶ देसन्तरतो आगन्त्वा सद्धम्मस्स अवतरणोकासभूते सद्धम्मस्सवनधारणपरिचयपरिपुच्छामनसिकारबहुलानं निवासट्ठानतं सन्धायेतं वुत्तं, अत्तनो वा सन्ताने परियत्तिसद्धम्मस्स अनुप्पवेसनट्ठानताय एवं वुत्तं. सेसं सुविञ्ञेय्यमेवाति.

नेत्तिअट्ठकथाय लीनत्थवण्णना निट्ठिता.

नेत्तिप्पकरण-टीका निट्ठिता.