📜

नमो तस्स भगवतो अरहतो सम्मासम्बुद्धस्स

द्वेमातिकापाळि

भिक्खुपातिमोक्खपाळि

पुब्बकरणं-४

सम्मज्जनी ¶ ¶ पदीपो च, उदकं आसनेन च;

उपोसथस्स एतानि, ‘‘पुब्बकरण’’न्ति वुच्चति.

पुब्बकिच्चं-५

छन्द, पारिसुद्धि, उतुक्खानं, भिक्खुगणना च ओवादो;

उपोसथस्स एतानि, ‘‘पुब्बकिच्च’’न्ति वुच्चति.

पत्तकल्लअङ्गा-४

उपोसथो ¶ , यावतिका च भिक्खू कम्मप्पत्ता;

सभागापत्तियो च न विज्जन्ति;

वज्जनीया च पुग्गला तस्मिं न होन्ति, ‘‘पत्तकल्ल’’न्ति वुच्चति.

पुब्बकरणपुब्बकिच्चानि समापेत्वा देसितापत्तिकस्स समग्गस्स भिक्खुसङ्घस्स अनुमतिया पातिमोक्खं उद्दिसितुं आराधनं करोम.

निदानुद्देसो

सुणातु मे भन्ते सङ्घो? अज्जुपोसथो पन्नरसो, यदि सङ्घस्स पत्तकल्लं, सङ्घो उपोसथं करेय्य, पातिमोक्खं उद्दिसेय्य.

किं सङ्घस्स पुब्बकिच्चं? पारिसुद्धिं आयस्मन्तो आरोचेथ, पातिमोक्खं उद्दिसिस्सामि, तं सब्बेव सन्ता साधुकं सुणोम मनसि करोम. यस्स सिया आपत्ति, सो आविकरेय्य, असन्तिया आपत्तिया तुण्ही भवितब्बं, तुण्हीभावेन खो पनायस्मन्ते ‘‘परिसुद्धा’’ति वेदिस्सामि. यथा ¶ खो पन पच्चेकपुट्ठस्स वेय्याकरणं होति, एवमेवं एवरूपाय परिसाय यावततियं अनुसावितं होति. यो पन भिक्खु यावततियं अनुसावियमाने सरमानो सन्तिं आपत्तिं नाविकरेय्य, सम्पजानमुसावादस्स होति. सम्पजानमुसावादो खो पनायस्मन्तो अन्तरायिको धम्मो वुत्तो भगवता, तस्मा सरमानेन भिक्खुना आपन्नेन विसुद्धापेक्खेन सन्ती आपत्ति आविकातब्बा, आविकता हिस्स फासु होति.

उद्दिट्ठं खो आयस्मन्तो निदानं. तत्थायस्मन्ते पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थायस्मन्तो, तस्मा तुण्ही, एवमेतं धारयामीति.

निदानं निट्ठितं.

पाराजिकुद्देसो

तत्रिमे चत्तारो पाराजिका धम्मा उद्देसं आगच्छन्ति.

मेथुनधम्म सिक्खापदं

१. यो ¶ पन भिक्खु भिक्खूनं सिक्खासाजीवसमापन्नो सिक्खं अप्पच्चक्खाय दुब्बल्यं अनाविकत्वा मेथुनं धम्मं पटिसेवेय्य, अन्तमसो तिरच्छानगतायपि, पाराजिको होति असंवासो.

अदिन्नादानसिक्खापदं

२. यो पन भिक्खु गामा वा अरञ्ञा वा अदिन्नं थेय्यसङ्खातं आदियेय्य, यथारूपे अदिन्नादाने राजानो चोरं गहेत्वा हनेय्युं वा बन्धेय्युं वा पब्बाजेय्युं वा चोरोसि बालोसि मूळ्होसि थेनोसीति, तथारूपं भिक्खु अदिन्नं आदियमानो अयम्पि पाराजिको होति असंवासो.

मनुस्सविग्गहसिक्खापदं

३. यो पन भिक्खु सञ्चिच्च मनुस्सविग्गहं जीविता वोरोपेय्य, सत्थहारकं वास्स परियेसेय्य, मरणवण्णं वा संवण्णेय्य, मरणाय वा समादपेय्य ‘‘अम्भो पुरिस किं तुय्हिमिना पापकेन दुज्जीवितेन, मतं ¶ ते जीविता सेय्यो’’ति, इति चित्तमनो चित्तसङ्कप्पो अनेकपरियायेन मरणवण्णं वा संवण्णेय्य, मरणाय वा समादपेय्य, अयम्पि पाराजिको होति असंवासो.

उत्तरिमनुस्सधम्मसिक्खापदं

४. यो पन भिक्खु अनभिजानं उत्तरिमनुस्सधम्मं अत्तुपनायिकं अलमरियञाणदस्सनं समुदाचरेय्य ‘‘इति जानामि, इति पस्सामी’’ति, ततो अपरेन समयेन समनुग्गाहीयमानो वा असमनुग्गाहीयमानो वा आपन्नो विसुद्धापेक्खो एवं वदेय्य ‘‘अजानमेवं आवुसो अवचं जानामि, अपस्सं पस्सामि, तुच्छं मुसा विलपि’’न्ति, अञ्ञत्र अधिमाना, अयम्पि पाराजिको होति असंवासो.

उद्दिट्ठा खो आयस्मन्तो चत्तारो पाराजिका धम्मा. येसं भिक्खु अञ्ञतरं वा अञ्ञतरं वा आपज्जित्वा न लभति भिक्खूहि सद्धिं संवासं यथा पुरे, तथा पच्छा, पाराजिको ¶ होति असंवासो. तत्थायस्मन्ते पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थायस्मन्तो, तस्मा तुण्ही, एवमेतं धारयामीति.

पाराजिकं निट्ठितं.

सङ्घादिसेसुद्देसो

इमे खो पनायस्मन्तो तेरस सङ्घादिसेसा

धम्मा उद्देसं आगच्छन्ति.

सुक्कविस्सट्ठिसिक्खापदं

१. सञ्चेतनिका सुक्कविस्सट्ठि अञ्ञत्र सुपिनन्ता सङ्घादिसेसो.

कायसंसग्गसिक्खापदं

२. यो पन भिक्खु ओतिण्णो विपरिणतेन चित्तेन मातुगामेन सद्धिं कायसंसग्गं समापज्जेय्य हत्थग्गाहं वा वेणिग्गाहं वा अञ्ञतरस्स वा अञ्ञतरस्स वा अङ्गस्स परामसनं, सङ्घादिसेसो.

दुट्ठुल्लवाचासिक्खापदं

३. यो ¶ पन भिक्खु ओतिण्णो विपरिणतेन चित्तेन मातुगामं दुट्ठुल्लाहि वाचाहि ओभासेय्य यथा तं युवा युवतिं मेथुनुपसंहिताहि, सङ्घादिसेसो.

अत्तकामपारिचरियसिक्खापदं

४. यो पन भिक्खु ओतिण्णो विपरिणतेन चित्तेन मातुगामस्स सन्तिके अत्तकामपारिचरियाय वण्णं भासेय्य ‘‘एतदग्गं भगिनि पारिचरियानं या मादिसं सीलवन्तं कल्याणधम्मं ब्रह्मचारिं एतेन धम्मेन परिचरेय्या’’ति मेथुनुपसंहितेन, सङ्घादिसेसो.

सञ्चरित्तसिक्खापदं

५. यो ¶ पन भिक्खु सञ्चरित्तं समापज्जेय्य इत्थिया वा पुरिसमतिं पुरिसस्स वा इत्थिमतिं, जायत्तने वा जारत्तने वा, अन्तमसो तङ्खणिकायपि, सङ्घादिसेसो.

कुटिकारसिक्खापदं

६. सञ्ञाचिकाय पन भिक्खुना कुटिं कारयमानेन अस्सामिकं अत्तुद्देसं पमाणिका कारेतब्बा, तत्रिदं पमाणं, दीघसो द्वादस विदत्थियो सुगतविदत्थिया, तिरियं सत्तन्तरा, भिक्खू अभिनेतब्बा वत्थुदेसनाय, तेहि भिक्खूहि वत्थु देसेतब्बं अनारम्भं सपरिक्कमनं. सारम्भे चे भिक्खु वत्थुस्मिं अपरिक्कमने सञ्ञाचिकाय कुटिं कारेय्य, भिक्खू वा अनभिनेय्य वत्थुदेसनाय, पमाणं वा अतिक्कामेय्य, सङ्घादिसेसो.

विहारकारसिक्खापदं

७. महल्लकं पन भिक्खुना विहारं कारयमानेन सस्सामिकं अत्तुद्देसं भिक्खू अभिनेतब्बा वत्थुदेसनाय, तेहि भिक्खूहि वत्थु देसेतब्बं अनारम्भं सपरिक्कमनं. सारम्भे चे भिक्खु वत्थुस्मिं अपरिक्कमने महल्लकं विहारं कारेय्य, भिक्खू वा अनभिनेय्य वत्थुदेसनाय, सङ्घादिसेसो.

दुट्ठदोससिक्खापदं

८. यो पन भिक्खु भिक्खुं दुट्ठो दोसो अप्पतीतो अमूलकेन पाराजिकेन धम्मेन अनुद्धंसेय्य ‘‘अप्पेव नाम नं इमम्हा ब्रह्मचरिया चावेय्य’’न्ति ¶ , ततो अपरेन समयेन समनुग्गाहीयमानो वा असमनुग्गाहीयमानो वा अमूलकञ्चेव तं अधिकरणं होति, भिक्खु च दोसं पतिट्ठाति, सङ्घादिसेसो.

अञ्ञभागियसिक्खापदं

९. यो पन भिक्खु भिक्खुं दुट्ठो दोसो अप्पतीतो अञ्ञभागियस्स अधिकरणस्स किञ्चिदेसं लेसमत्तं उपादाय पाराजिकेन धम्मेन अनुद्धंसेय्य ‘‘अप्पेव नाम नं इमम्हा ब्रह्मचरिया चावेय्य’’न्ति, ततो अपरेन समयेन समनुग्गाहीयमानो वा असमनुग्गाहीयमानो वा अञ्ञभागियञ्चेव तं अधिकरणं होति कोचिदेसो लेसमत्तो उपादिन्नो, भिक्खु च दोसं पतिट्ठाति, सङ्घादिसेसो.

सङ्घभेदसिक्खापदं

१०. यो ¶ पन भिक्खु समग्गस्स सङ्घस्स भेदाय परक्कमेय्य, भेदनसंवत्तनिकं वा अधिकरणं समादाय पग्गय्ह तिट्ठेय्य, सो भिक्खु भिक्खूहि एवमस्स वचनीयो ‘‘मायस्मा समग्गस्स सङ्घस्स भेदाय परक्कमि, भेदनसंवत्तनिकं वा अधिकरणं समादाय पग्गय्ह अट्ठासि, समेतायस्मा सङ्घेन, समग्गो हि सङ्घो सम्मोदमानो अविवदमानो एकुद्देसो फासु विहरती’’ति, एवञ्च सो भिक्खु भिक्खूहि वुच्चमानो तथेव पग्गण्हेय्य, सो भिक्खु भिक्खूहि यावततियं समनुभासितब्बो तस्स पटिनिस्सग्गाय, यावततियञ्चे समनुभासियमानो तं पटिनिस्सज्जेय्य, इच्चेतं कुसलं, नो चे पटिनिस्सज्जेय्य, सङ्घादिसेसो.

भेदानुवत्तकसिक्खापदं

११. तस्सेव खो पन भिक्खुस्स भिक्खू होन्ति अनुवत्तका वग्गवादका एको वा द्वे वा तयो वा, ते एवं वदेय्युं ‘‘मायस्मन्तो एतं भिक्खुं किञ्चि अवचुत्थ, धम्मवादी चेसो भिक्खु, विनयवादी चेसो भिक्खु, अम्हाकञ्चेसो भिक्खु छन्दञ्च रुचिञ्च आदाय वोहरति, जानाति, नो भासति, अम्हाकम्पेतं खमती’’ति, ते भिक्खू भिक्खूहि एवमस्सु वचनीया ‘‘मायस्मन्तो एवं अवचुत्थ, न चेसो भिक्खु धम्मवादी, न चेसो भिक्खु विनयवादी, मायस्मन्तानम्पि सङ्घभेदो रुच्चित्थ, समेतायस्मन्तानं सङ्घेन, समग्गो हि सङ्घो सम्मोदमानो अविवदमानो एकुद्देसो फासु विहरती’’ति ¶ , एवञ्च ते भिक्खू भिक्खूहि वुच्चमाना तथेव पग्गण्हेय्युं, ते भिक्खू भिक्खूहि यावततियं समनुभासितब्बा तस्स पटिनिस्सग्गाय, यावततियञ्चे समनुभासियमाना तं पटिनिस्सज्जेय्युं, इच्चेतं कुसलं, नो चे पटिनिस्सज्जेय्युं, सङ्घादिसेसो.

दुब्बचसिक्खापदं

१२. भिक्खु पनेव दुब्बचजातिको होति उद्देसपरियापन्नेसु सिक्खापदेसु भिक्खूहि सहधम्मिकं वुच्चमानो अत्तानं अवचनीयं करोति ‘‘मा मं आयस्मन्तो किञ्चि अवचुत्थ कल्याणं वा पापकं वा, अहम्पायस्मन्ते न किञ्चि वक्खामि कल्याणं वा पापकं वा, विरमथायस्मन्तो मम वचनाया’’ति, सो भिक्खु भिक्खूहि एवमस्स वचनीयो ‘‘मायस्मा अत्तानं अवचनीयं अकासि, वचनीयमेवायस्मा अत्तानं करोतु, आयस्मापि भिक्खू वदतु सहधम्मेन, भिक्खूपि आयस्मन्तं वक्खन्ति सहधम्मेन, एवं संवद्धा हि तस्स भगवतो परिसा यदिदं अञ्ञमञ्ञवचनेन अञ्ञमञ्ञवुट्ठापनेना’’ति, एवञ्च सो भिक्खु भिक्खूहि वुच्चमानो तथेव पग्गण्हेय्य, सो भिक्खु भिक्खूहि यावततियं समनुभासितब्बो तस्स पटिनिस्सग्गाय ¶ , यावततियञ्चे समनुभासियमानो तं पटिनिस्सज्जेय्य, इच्चेतं कुसलं, नो चे पटिनिस्सज्जेय्य, सङ्घादिसेसो.

कुलदूसकसिक्खापदं

१३. भिक्खु पनेव अञ्ञतरं गामं वा निगमं वा उपनिस्साय विहरति कुलदूसको पापसमाचारो, तस्स खो पापका समाचारा दिस्सन्ति चेव सुय्यन्ति च, कुलानि च तेन दुट्ठानि दिस्सन्ति चेव सुय्यन्ति च, सो भिक्खु भिक्खूहि एवमस्स वचनीयो ‘‘आयस्मा खो कुलदूसको पापसमाचारो, आयस्मतो खो पापका समाचारा दिस्सन्ति चेव सुय्यन्ति च, कुलानि चायस्मता दुट्ठानि दिस्सन्ति चेव सुय्यन्ति च, पक्कमतायस्मा इमम्हा आवासा, अलं ते इध वासेना’’ति, एवञ्च सो भिक्खु भिक्खूहि वुच्चमानो ते भिक्खू एवं वदेय्य ‘‘छन्दगामिनो च भिक्खू, दोसगामिनो च भिक्खू, मोहगामिनो च भिक्खू, भयगामिनो च भिक्खू तादिसिकाय आपत्तिया एकच्चं पब्बाजेन्ति, एकच्चं न पब्बाजेन्ती’’ति, सो भिक्खु भिक्खूहि एवमस्स वचनीयो ‘‘मायस्मा एवं अवच, न च भिक्खू छन्दगामिनो, न च भिक्खू दोसगामिनो, न च भिक्खू मोहगामिनो, न च भिक्खू भयगामिनो, आयस्मा खो कुलदूसको पापसमाचारो, आयस्मतो ¶ खो पापका समाचारा दिस्सन्ति चेव सुय्यन्ति च, कुलानि चायस्मता दुट्ठानि दिस्सन्ति चेव सुय्यन्ति च, पक्कमतायस्मा इमम्हा आवासा, अलं ते इध वासेना’’ति, एवञ्च सो भिक्खु भिक्खूहि वुच्चमानो तथेव पग्गण्हेय्य, सो भिक्खु भिक्खूहि यावततियं समनुभासितब्बो तस्स पटिनिस्सग्गाय, यावततियञ्चे समनुभासियमानो तं पटिनिस्सज्जेय्य, इच्चेतं कुसलं, नो चे पटिनिस्सज्जेय्य, सङ्घादिसेसो.

उद्दिट्ठा खो आयस्मन्तो तेरस सङ्घादिसेसा धम्मा नव पठमापत्तिका, चत्तारो यावततियका. येसं भिक्खु अञ्ञतरं वा अञ्ञतरं वा आपज्जित्वा यावतीहं जानं पटिच्छादेति, तावतीहं तेन भिक्खुना अकामा परिवत्थब्बं. परिवुत्थपरिवासेन भिक्खुना उत्तरि छारत्तं भिक्खुमानत्ताय पटिपज्जितब्बं, चिण्णमानत्तो भिक्खु यत्थ सिया वीसतिगणो भिक्खुसङ्घो, तत्थ सो भिक्खु अब्भेतब्बो. एकेनपि चे ऊनो वीसतिगणो भिक्खुसङ्घो तं भिक्खुं अब्भेय्य, सो च भिक्खु अनब्भितो, ते च भिक्खू गारय्हा, अयं तत्थ सामीचि. तत्थायस्मन्ते पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थायस्मन्तो, तस्मा तुण्ही, एवमेतं धारयामीति.

सङ्घादिसेसो निट्ठितो.

अनियतुद्देसो

इमे खो पनायस्मन्तो द्वे अनियता धम्मा

उद्देसं आगच्छन्ति.

पठमअनियतसिक्खापदं

१. यो ¶ पन भिक्खु मातुगामेन सद्धिं एको एकाय रहो पटिच्छन्ने आसने अलंकम्मनिये निसज्जं कप्पेय्य, तमेनं सद्धेय्यवचसा उपासिका दिस्वा तिण्णं धम्मानं अञ्ञतरेन वदेय्य पाराजिकेन वा सङ्घादिसेसेन वा पाचित्तियेन वा, निसज्जं भिक्खु पटिजानमानो तिण्णं धम्मानं अञ्ञतरेन कारेतब्बो पाराजिकेन वा सङ्घादिसेसेन वा पाचित्तियेन ¶ वा, येन वा सा सद्धेय्यवचसा उपासिका वदेय्य, तेन सो भिक्खु कारेतब्बो, अयं धम्मो अनियतो.

दुतियअनियतसिक्खापदं

२. न हेव खो पन पटिच्छन्नं आसनं होति नालंकम्मनियं, अलञ्च खो होति मातुगामं दुट्ठुल्लाहि वाचाहि ओभासितुं, यो पन भिक्खु तथारूपे आसने मातुगामेन सद्धिं एको एकाय रहो निसज्जं कप्पेय्य, तमेनं सद्धेय्यवचसा उपासिका दिस्वा द्विन्नं धम्मानं अञ्ञतरेन वदेय्य सङ्घादिसेसेन वा पाचित्तियेन वा, निसज्जं भिक्खु पटिजानमानो द्विन्नं धम्मानं अञ्ञतरेन कारेतब्बो सङ्घादिसेसेन वा पाचित्तियेन वा, येन वा सा सद्धेय्यवचसा उपासिका वदेय्य, तेन सो भिक्खु कारेतब्बो, अयम्पि धम्मो अनियतो.

उद्दिट्ठा खो आयस्मन्तो द्वे अनियता धम्मा. तत्थायस्मन्ते पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थायस्मन्तो, तस्मा तुण्ही, एवमेतं धारयामीति.

अनियतो निट्ठितो.

निस्सग्गियपाचित्तिया

इमे खो पनायस्मन्तो तिंस निस्सग्गिया पाचित्तिया

धम्मा उद्देसं आगच्छन्ति.

कथिनसिक्खापदं

१. निट्ठितचीवरस्मिं ¶ भिक्खुना उब्भतस्मिं कथिने दसाहपरमं अतिरेकचीवरं धारेतब्बं, तं अतिक्कामयतो निस्सग्गियं पाचित्तियं.

उदोसितसिक्खापदं

२. निट्ठितचीवरस्मिं भिक्खुना उब्भतस्मिं कथिने एकरत्तम्पि चे भिक्खु तिचीवरेन विप्पवसेय्य, अञ्ञत्र भिक्खुसम्मुतिया निस्सग्गियं पाचित्तियं.

अकालचीवरसिक्खापदं

३. निट्ठितचीवरस्मिं ¶ भिक्खुना उब्भतस्मिं कथिने भिक्खुनो पनेव अकालचीवरं उप्पज्जेय्य, आकङ्खमानेन भिक्खुना पटिग्गहेतब्बं, पटिग्गहेत्वा खिप्पमेव कारेतब्बं, नो चस्स पारिपूरि, मासपरमं तेन भिक्खुना तं चीवरं निक्खिपितब्बं ऊनस्स पारिपूरिया सतिया पच्चासाय. ततो चे उत्तरि निक्खिपेय्य सतियापि पच्चासाय, निस्सग्गियं पाचित्तियं.

पुराणचीवरसिक्खापदं

४. यो पन भिक्खु अञ्ञातिकाय भिक्खुनिया पुराणचीवरं धोवापेय्य वा रजापेय्य वा आकोटापेय्य वा, निस्सग्गियं पाचित्तियं.

चीवरपटिग्गहणसिक्खापदं

५. यो पन भिक्खु अञ्ञातिकाय भिक्खुनिया हत्थतो चीवरं पटिग्गण्हेय्य अञ्ञत्र पारिवत्तका, निस्सग्गियं पाचित्तियं.

अञ्ञातकविञ्ञत्तिसिक्खापदं

६. यो पन भिक्खु अञ्ञातकं गहपतिं वा गहपतानिं वा चीवरं विञ्ञापेय्य अञ्ञत्र ¶ समया, निस्सग्गियं पाचित्तियं. तत्थायं समयो, अच्छिन्नचीवरो वा होति भिक्खु, नट्ठचीवरो वा, अयं तत्थ समयो.

ततुत्तरिसिक्खापदं

७. तञ्चे अञ्ञातको गहपति वा गहपतानी वा बहूहि चीवरेहि अभिहट्ठुं पवारेय्य, सन्तरुत्तरपरमं तेन भिक्खुना ततो चीवरं सादितब्बं. ततो चे उत्तरि सादियेय्य, निस्सग्गियं पाचित्तियं.

पठमउपक्खटसिक्खापदं

८. भिक्खुं पनेव उद्दिस्स अञ्ञातकस्स गहपतिस्स वा गहपतानिया वा चीवरचेतापन्नं उपक्खटं होति ‘‘इमिना चीवरचेतापन्नेन चीवरं चेतापेत्वा इत्थन्नामं भिक्खुं चीवरेन अच्छादेस्सामी’’ति, तत्र चे सो भिक्खु पुब्बे अप्पवारितो उपसङ्कमित्वा चीवरे विकप्पं आपज्जेय्य ‘‘साधु वत मं आयस्मा इमिना चीवरचेतापन्नेन एवरूपं वा एवरूपं वा चीवरं चेतापेत्वा अच्छादेही’’ति कल्याणकम्यतं उपादाय, निस्सग्गियं पाचित्तियं.

दुतियउपक्खटसिक्खापदं

९. भिक्खुं ¶ पनेव उद्दिस्स उभिन्नं अञ्ञातकानं गहपतीनं वा गहपतानीनं वा पच्चेकचीवरचेतापन्नानि उपक्खटानि होन्ति ‘‘इमेहि मयं पच्चेकचीवरचेतापन्नेहि पच्चेकचीवरानि चेतापेत्वा इत्थन्नामं भिक्खुं चीवरेहि अच्छादेस्सामा’’ति, तत्र चे सो भिक्खु पुब्बे अप्पवारितो उपसङ्कमित्वा चीवरे विकप्पं आपज्जेय्य ‘‘साधु वत मं आयस्मन्तो इमेहि पच्चेकचीवरचेतापन्नेहि एवरूपं वा एवरूपं वा चीवरं चेतापेत्वा अच्छादेथ उभोव सन्ता एकेना’’ति कल्याणकम्यतं उपादाय, निस्सग्गियं पाचित्तियं.

राजसिक्खापदं

१०. भिक्खुं पनेव उद्दिस्स राजा वा राजभोग्गो वा ब्राह्मणो वा गहपतिको वा दूतेन चीवरचेतापन्नं पहिणेय्य ‘‘इमिना चीवरचेतापन्नेन चीवरं चेतापेत्वा इत्थन्नामं भिक्खुं चीवरेन अच्छादेही’’ति. सो चे दूतो तं भिक्खुं उपसङ्कमित्वा एवं वदेय्य ‘‘इदं खो, भन्ते, आयस्मन्तं उद्दिस्स चीवरचेतापन्नं आभतं, पटिग्गण्हातु आयस्मा चीवरचेतापन्न’’न्ति. तेन भिक्खुना सो दूतो एवमस्स वचनीयो ‘‘न खो मयं, आवुसो, चीवरचेतापन्नं पटिग्गण्हाम, चीवरञ्च खो मयं पटिग्गण्हाम कालेन कप्पिय’’न्ति. सो चे दूतो ¶ तं भिक्खुं एवं वदेय्य ‘‘अत्थि पनायस्मतो कोचि वेय्यावच्चकरो’’ति. चीवरत्थिकेन, भिक्खवे, भिक्खुना वेय्यावच्चकरो निद्दिसितब्बो आरामिको वा उपासको वा ‘‘एसो खो, आवुसो, भिक्खूनं वेय्यावच्चकरो’’ति. सो चे दूतो तं वेय्यावच्चकरं सञ्ञापेत्वा तं भिक्खुं उपसङ्कमित्वा एवं वदेय्य ‘‘यं खो, भन्ते, आयस्मा वेय्यावच्चकरं निद्दिसि, सञ्ञत्तो सो मया, उपसङ्कमतायस्मा कालेन, चीवरेन तं अच्छादेस्सती’’ति. चीवरत्थिकेन, भिक्खवे, भिक्खुना वेय्यावच्चकरो उपसङ्कमित्वा द्वत्तिक्खत्तुं चोदेतब्बो सारेतब्बो ‘‘अत्थो मे, आवुसो, चीवरेना’’ति, द्वत्तिक्खत्तुं चोदयमानो सारयमानो तं चीवरं अभिनिप्फादेय्य, इच्चेतं कुसलं, नो चे अभिनिप्फादेय्य, चतुक्खत्तुं पञ्चक्खत्तुं छक्खत्तुपरमं तुण्हीभूतेन उद्दिस्स ठातब्बं, चतुक्खत्तुं पञ्चक्खत्तुं छक्खत्तुपरमं तुण्हीभूतो उद्दिस्स तिट्ठमानो तं चीवरं अभिनिप्फादेय्य, इच्चेतं कुसलं, ततो चे उत्तरि वायममानो तं चीवरं अभिनिप्फादेय्य, निस्सग्गियं पाचित्तियं. नो ¶ चे अभिनिप्फादेय्य, यतस्स चीवरचेतापन्नं आभतं, तत्थ सामं वा गन्तब्बं, दूतो वा पाहेतब्बो ‘‘यं खो तुम्हे आयस्मन्तो भिक्खुं उद्दिस्स चीवरचेतापन्नं पहिणित्थ, न तं तस्स भिक्खुनो किञ्चि अत्थं अनुभोति, युञ्जन्तायस्मन्तो सकं, मा वो सकं विनस्सा’’ति, अयं तत्थ सामीचि.

कथिनवग्गो पठमो.

कोसियसिक्खापदं

११. यो पन भिक्खु कोसियमिस्सकं सन्थतं कारापेय्य, निस्सग्गियं पाचित्तियं.

सुद्धकाळकसिक्खापदं

१२. यो पन भिक्खु सुद्धकाळकानं एळकलोमानं सन्थतं कारापेय्य, निस्सग्गियं पाचित्तियं.

द्वेभागसिक्खापदं

१३. नवं पन भिक्खुना सन्थतं कारयमानेन द्वे भागा सुद्धकाळकानं एळकलोमानं आदातब्बा, ततियं ओदातानं, चतुत्थं गोचरियानं. अनादा चे भिक्खु द्वे भागे सुद्धकाळकानं एळकलोमानं, ततियं ओदातानं, चतुत्थं गोचरियानं, नवं सन्थतं कारापेय्य, निस्सग्गियं पाचित्तियं.

छब्बस्ससिक्खापदं

१४. नवं पन भिक्खुना सन्थतं कारापेत्वा छब्बस्सानि धारेतब्बं, ओरेन चे छन्नं वस्सानं ¶ तं सन्थतं विस्सज्जेत्वा वा अविस्सज्जेत्वा वा अञ्ञं नवं सन्थतं कारापेय्य अञ्ञत्र भिक्खुसम्मुतिया, निस्सग्गियं पाचित्तियं.

निसीदनसन्थतसिक्खापदं

१५. निसीदनसन्थतं पन भिक्खुना कारयमानेन पुराणसन्थतस्स सामन्ता सुगतविदत्थि आदातब्बा दुब्बण्णकरणाय. अनादा चे भिक्खु पुराणसन्थ तस्स ¶ सामन्ता सुगतविदत्थिं, नवं निसीदनसन्थतं कारापेय्य, निस्सग्गियं पाचित्तियं.

एळकलोमसिक्खापदं

१६. भिक्खुनो पनेव अद्धानमग्गप्पटिपन्नस्स एळकलोमानि उप्पज्जेय्युं, आकङ्खमानेन भिक्खुना पटिग्गहेतब्बानि, पटिग्गहेत्वा तियोजनपरमं सहत्था हरितब्बानि असन्ते हारके. ततो चे उत्तरि हरेय्य, असन्तेपि हारके, निस्सग्गियं पाचित्तियं.

एळकलोमधोवापनसिक्खापदं

१७. यो पन भिक्खु अञ्ञातिकाय भिक्खुनिया एळकलोमानि धोवापेय्य वा रजापेय्य वा विजटापेय्य वा, निस्सग्गियं पाचित्तियं.

रूपियसिक्खापदं

१८. यो पन भिक्खु जातरूपरजतं उग्गण्हेय्य वा उग्गण्हापेय्य वा उपनिक्खित्तं वा सादियेय्य, निस्सग्गियं पाचित्तियं.

रूपियसंवोहारसिक्खापदं

१९. यो पन भिक्खु नानप्पकारकं रूपियसंवोहारं समापज्जेय्य, निस्सग्गियं पाचित्तियं.

कयविक्कयसिक्खापदं

२०. यो पन भिक्खु नानप्पकारकं कयविक्कयं समापज्जेय्य, निस्सग्गियं पाचित्तियं.

कोसियवग्गो दुतियो.

पत्तसिक्खापदं

२१. दसाहपरमं ¶ अतिरेकपत्तो धारेतब्बो, तं अतिक्कामयतो निस्सग्गियं पाचित्तियं.

ऊनपञ्चबन्धनसिक्खापदं

२२. यो पन भिक्खु ऊनपञ्चबन्धनेन पत्तेन अञ्ञं नवं पत्तं चेतापेय्य, निस्सग्गियं पाचित्तियं. तेन भिक्खुना सो पत्तो भिक्खुपरिसाय निस्सज्जितब्बो ¶ , यो च तस्सा भिक्खुपरिसाय पत्तपरियन्तो, सो तस्स भिक्खुनो पदातब्बो ‘‘अयं ते भिक्खु पत्तो याव भेदनाय धारेतब्बो’’ति, अयं तत्थ सामीचि.

भेसज्जसिक्खापदं

२३. यानि खो पन तानि गिलानानं भिक्खूनं पटिसायनीयानि भेसज्जानि, सेय्यथिदं – सप्पि नवनीतं तेलं मधु फाणितं, तानि पटिग्गहेत्वा सत्ताहपरमं सन्निधिकारकं परिभुञ्जितब्बानि, तं अतिक्कामयतो निस्सग्गियं पाचित्तियं.

वस्सिकसाटिकसिक्खापदं

२४. ‘‘मासो सेसो गिम्हान’’न्ति भिक्खुना वस्सिकसाटिकचीवरं परियेसितब्बं, ‘‘अद्धमासो सेसो गिम्हान’’न्ति कत्वा निवासेतब्बं. ओरेन चे ‘‘मासो सेसो गिम्हान’’न्ति वस्सिकसाटिकचीवरं परियेसेय्य, ओरेन‘‘द्धमासो सेसो गिम्हान’’न्ति कत्वा निवासेय्य, निस्सग्गियं पाचित्तियं.

चीवरअच्छिन्दनसिक्खापदं

२५. यो पन भिक्खु भिक्खुस्स सामं चीवरं दत्वा कुपितो अनत्तमनो अच्छिन्देय्य वा अच्छिन्दापेय्य वा, निस्सग्गियं पाचित्तियं.

सुत्तविञ्ञत्तिसिक्खापदं

२६. यो पन भिक्खु सामं सुत्तं विञ्ञापेत्वा तन्तवायेहि चीवरं वायापेय्य, निस्सग्गियं पाचित्तियं.

महापेसकारसिक्खापदं

२७. भिक्खुं पनेव उद्दिस्स अञ्ञातको गहपति वा गहपतानी वा तन्तवायेहि चीवरं ¶ वायापेय्य, तत्र चे सो भिक्खु पुब्बे अप्पवारितो तन्तवाये उपसङ्कमित्वा चीवरे विकप्पं आपज्जेय्य ‘‘इदं खो, आवुसो, चीवरं मं उद्दिस्स विय्यति, आयतञ्च करोथ, वित्थतञ्च, अप्पितञ्च, सुवीतञ्च, सुप्पवायितञ्च, सुविलेखितञ्च, सुवितच्छितञ्च करोथ, अप्पेव नाम मयम्पि आयस्मन्तानं किञ्चिमत्तं अनुपदज्जेय्यामा’’ति. एवञ्च सो भिक्खु वत्वा किञ्चिमत्तं अनुपदज्जेय्य अन्तमसो पिण्डपातमत्तम्पि, निस्सग्गियं पाचित्तियं.

अच्चेकचीवरसिक्खापदं

२८. दसाहानागतं ¶ कत्तिकतेमासिकपुण्णमं भिक्खुनो पनेव अच्चेकचीवरं उप्पज्जेय्य, अच्चेकं मञ्ञमानेन भिक्खुना पटिग्गहेतब्बं, पटिग्गहेत्वा याव चीवरकालसमयं निक्खिपितब्बं. ततो चे उत्तरि निक्खिपेय्य, निस्सग्गियं पाचित्तियं.

सासङ्कसिक्खापदं

२९. उपवस्सं खो पन कत्तिकपुण्णमं यानि खो पन तानि आरञ्ञकानि सेनासनानि सासङ्कसम्मतानि सप्पटिभयानि, तथारूपेसु भिक्खु सेनासनेसु विहरन्तो आकङ्खमानो तिण्णं चीवरानं अञ्ञतरं चीवरं अन्तरघरे निक्खिपेय्य, सिया च तस्स भिक्खुनो कोचिदेव पच्चयो तेन चीवरेन विप्पवासाय, छारत्तपरमं तेन भिक्खुना तेन चीवरेन विप्पवसितब्बं. ततो चे उत्तरि विप्पवसेय्य अञ्ञत्र भिक्खुसम्मुतिया, निस्सग्गियं पाचित्तियं.

परिणतसिक्खापदं

३०. यो पन भिक्खु जानं सङ्घिकं लाभं परिणतं अत्तनो परिणामेय्य, निस्सग्गियं पाचित्तियं.

पत्तवग्गो ततियो.

उद्दिट्ठा खो आयस्मन्तो तिंस निस्सग्गिया पाचित्तिया धम्मा. तत्थायस्मन्ते पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थायस्मन्तो, तस्मा तुण्ही, एवमेतं धारयामीति.

निस्सग्गियपाचित्तिया निट्ठिता.

सुद्धपाचित्तिया

इमे खो पनायस्मन्तो द्वेनवुति पाचित्तिया

धम्मा उद्देसं आगच्छन्ति.

मुसावादसिक्खापदं

१. सम्पजानमुसावादे ¶ पाचित्तियं.

ओमसवादसिक्खापदं

२. ओमसवादे पाचित्तियं.

पेसुञ्ञसिक्खापदं

३. भिक्खुपेसुञ्ञे ¶ पाचित्तियं.

पदसोधम्मसिक्खापदं

४. यो पन भिक्खु अनुपसम्पन्नं पदसो धम्मं वाचेय्य, पाचित्तियं.

पठमसहसेय्यसिक्खापदं

५. यो पन भिक्खु अनुपसम्पन्नेन उत्तरिदिरत्ततिरत्तं सहसेय्यं कप्पेय्य, पाचित्तियं.

दुतियसहसेय्यसिक्खापदं

६. यो पन भिक्खु मातुगामेन सहसेय्यं कप्पेय्य, पाचित्तियं.

धम्मदेसनासिक्खापदं

७. यो पन भिक्खु मातुगामस्स उत्तरिछप्पञ्चवाचाहि धम्मं देसेय्य अञ्ञत्र विञ्ञुना पुरिसविग्गहेन, पाचित्तियं.

भूतारोचनसिक्खापदं

८. यो पन भिक्खु अनुपसम्पन्नस्स उत्तरिमनुस्सधम्मं आरोचेय्य, भूतस्मिं पाचित्तियं.

दुट्ठुल्लारोचनसिक्खापदं

९. यो ¶ पन भिक्खु भिक्खुस्स दुट्ठुल्लं आपत्तिं अनुपसम्पन्नस्स आरोचेय्य अञ्ञत्र भिक्खुसम्मुतिया, पाचित्तियं.

पथवीखणनसिक्खापदं

१०. यो पन भिक्खु पथविं खणेय्य वा खणापेय्य वा पाचित्तियं.

मुसावादवग्गो पठमो.

भूतगामसिक्खापदं

११. भूतगामपातब्यताय पाचित्तियं.

अञ्ञवादकसिक्खापदं

१२. अञ्ञवादके, विहेसके पाचित्तियं.

उज्झापनकसिक्खापदं

१३. उज्झापनके ¶ , खिय्यनके पाचित्तियं.

पठमसेनासनसिक्खापदं

१४. यो पन भिक्खु सङ्घिकं मञ्चं वा पीठं वा भिसिं वा कोच्छं वा अज्झोकासे सन्थरित्वा वा सन्थरापेत्वा वा तं पक्कमन्तो नेव उद्धरेय्य, न उद्धरापेय्य, अनापुच्छं वा गच्छेय्य, पाचित्तियं.

दुतियसेनासनसिक्खापदं

१५. यो पन भिक्खु सङ्घिके विहारे सेय्यं सन्थरित्वा वा सन्थरापेत्वा वा तं पक्कमन्तो नेव उद्धरेय्य, न उद्धरापेय्य, अनापुच्छं वा गच्छेय्य, पाचित्तियं.

अनुपखज्जसिक्खापदं

१६. यो पन भिक्खु सङ्घिके विहारे जानं पुब्बुपगतं भिक्खुं अनुपखज्ज सेय्यं कप्पेय्य ¶ ‘‘यस्स सम्बाधो भविस्सति, सो पक्कमिस्सती’’ति एतदेव पच्चयं करित्वा अनञ्ञं, पाचित्तियं.

निक्कड्ढनसिक्खापदं

१७. यो पन भिक्खु भिक्खुं कुपितो अनत्तमनो सङ्घिका विहारा निक्कड्ढेय्य वा निक्कड्ढापेय्य वा, पाचित्तियं.

वेहासकुटिसिक्खापदं

१८. यो पन भिक्खु सङ्घिके विहारे उपरिवेहासकुटिया आहच्चपादकं मञ्चं वा पीठं वा अभिनिसीदेय्य वा अभिनिपज्जेय्य वा, पाचित्तियं.

महल्लकविहारसिक्खापदं

१९. महल्लकं पन भिक्खुना विहारं कारयमानेन याव द्वारकोसा अग्गळट्ठपनाय आलोकसन्धिपरिकम्माय द्वत्तिच्छदनस्स परियायं अप्पहरिते ठितेन अधिट्ठातब्बं, ततो चे उत्तरि अप्पहरितेपि ठितो अधिट्ठहेय्य, पाचित्तियं.

सप्पाणकसिक्खापदं

२०. यो पन भिक्खु जानं सप्पाणकं उदकं तिणं वा मत्तिकं वा सिञ्चेय्य वा सिञ्चापेय्य वा, पाचित्तियं.

भूतगामवग्गो दुतियो.

ओवादसिक्खापदं

२१. यो ¶ पन भिक्खु असम्मतो भिक्खुनियो ओवदेय्य, पाचित्तियं.

अत्थङ्गतसिक्खापदं

२२. सम्मतोपि चे भिक्खु अत्थङ्गते सूरिये भिक्खुनियो ओवदेय्य, पाचित्तियं.

भिक्खुनुपस्सयसिक्खापदं

२३. यो ¶ पन भिक्खु भिक्खुनुपस्सयं उपसङ्कमित्वा भिक्खुनियो ओवदेय्य अञ्ञत्र समया, पाचित्तियं. तत्थायं समयो, गिलाना होति भिक्खुनी, अयं तत्थ समयो.

आमिससिक्खापदं

२४. यो पन भिक्खु एवं वदेय्य ‘‘आमिसहेतु थेरा भिक्खू भिक्खुनियो ओवदन्ती’’ति, पाचित्तियं.

चीवरदानसिक्खापदं

२५. यो पन भिक्खु अञ्ञातिकाय भिक्खुनिया चीवरं ददेय्य अञ्ञत्र पारिवत्तका, पाचित्तियं.

चीवरसिब्बनसिक्खापदं

२६. यो पन भिक्खु अञ्ञातिकाय भिक्खुनिया चीवरं सिब्बेय्य वा सिब्बापेय्य वा, पाचित्तियं.

संविधानसिक्खापदं

२७. यो पन भिक्खु भिक्खुनिया सद्धिं संविधाय एकद्धानमग्गं पटिपज्जेय्य अन्तमसो गामन्तरम्पि अञ्ञत्र समया, पाचित्तियं. तत्थायं समयो, सत्थगमनीयो होति मग्गो, सासङ्कसम्मतो, सप्पटिभयो, अयं तत्थ समयो.

नावाभिरुहनसिक्खापदं

२८. यो पन भिक्खु भिक्खुनिया सद्धिं संविधाय एकं नावं अभिरुहेय्य उद्धंगामिनिं वा अधोगामिनिं वा अञ्ञत्र तिरियं तरणाय, पाचित्तियं.

परिपाचितसिक्खापदं

२९. यो ¶ पन भिक्खु जानं भिक्खुनिपरिपाचितं पिण्डपातं भुञ्जेय्य अञ्ञत्र पुब्बे गिहिसमारम्भा, पाचित्तियं.

रहोनिसज्जसिक्खापदं

३०. यो ¶ पन भिक्खु भिक्खुनिया सद्धिं एको एकाय रहो निसज्जं कप्पेय्य, पाचित्तियं.

ओवादवग्गो ततियो.

आवसथपिण्डसिक्खापदं

३१. अगिलानेन भिक्खुना एको आवसथपिण्डो भुञ्जितब्बो. ततो चे उत्तरि भुञ्जेय्य, पाचित्तियं.

गणभोजनसिक्खापदं

३२. गणभोजने अञ्ञत्र समया पाचित्तियं. तत्थायं समयो, गिलानसमयो, चीवरदानसमयो, चीवरकारसमयो, अद्धानगमनसमयो, नावाभिरुहनसमयो, महासमयो, समणभत्तसमयो, अयं तत्थ समयो.

परम्परभोजनसिक्खापदं

३३. परम्परभोजने अञ्ञत्र समया पाचित्तियं. तत्थायं समयो, गिलानसमयो, चीवरदानसमयो, चीवरकारसमयो, अयं तत्थ समयो.

काणमातुसिक्खापदं

३४. भिक्खुं पनेव कुलं उपगतं पूवेहि वा मन्थेहि वा अभिहट्ठुं पवारेय्य, आकङ्खमानेन भिक्खुना द्वत्तिपत्तपूरा पटिग्गहेतब्बा. ततो चे उत्तरि पटिग्गण्हेय्य, पाचित्तियं. द्वत्तिपत्तपूरे पटिग्गहेत्वा ततो नीहरित्वा भिक्खूहि सद्धिं संविभजितब्बं, अयं तत्थ सामीचि.

पठमपवारणासिक्खापदं

३५. यो पन भिक्खु भुत्तावी पवारितो अनतिरित्तं खादनीयं वा भोजनीयं वा खादेय्य वा भुञ्जेय्य वा, पाचित्तियं.

दुतियपवारणासिक्खापदं

३६. यो ¶ ¶ पन भिक्खु भिक्खुं भुत्ताविं पवारितं अनतिरित्तेन खादनीयेन वा भोजनीयेन वा अभिहट्ठुं पवारेय्य ‘‘हन्द भिक्खु खाद वा भुञ्ज वा’’ति जानं आसादनापेक्खो, भुत्तस्मिं पाचित्तियं.

विकालभोजनसिक्खापदं

३७. यो पन भिक्खु विकाले खादनीयं वा भोजनीयं वा खादेय्य वा भुञ्जेय्य वा, पाचित्तियं.

सन्निधिकारकसिक्खापदं

३८. यो पन भिक्खु सन्निधिकारकं खादनीयं वा भोजनीयं वा खादेय्य वा भुञ्जेय्य वा, पाचित्तियं.

पणीतभोजनसिक्खापदं

३९. यानि खो पन तानि पणीतभोजनानि, सेय्यथिदं – सप्पि, नवनीतं, तेलं, मधु, फाणितं, मच्छो, मंसं, खीरं, दधि. यो पन भिक्खु एवरूपानि पणीतभोजनानि अगिलानो अत्तनो अत्थाय विञ्ञापेत्वा भुञ्जेय्य, पाचित्तियं.

दन्तपोनसिक्खापदं

४०. यो पन भिक्खु अदिन्नं मुखद्वारं आहारं आहरेय्य अञ्ञत्र उदकदन्तपोना, पाचित्तियं.

भोजनवग्गो चतुत्थो.

अचेलकसिक्खापदं

४१. यो पन भिक्खु अचेलकस्स वा परिब्बाजकस्स वा परिब्बाजिकाय वा सहत्था खादनीयं वा भोजनीयं वा ददेय्य, पाचित्तियं.

उय्योजनसिक्खापदं

४२. यो पन भिक्खु भिक्खुं ‘‘एहावुसो, गामं वा निगमं वा पिण्डाय पविसिस्सामा’’ति ¶ तस्स दापेत्वा वा अदापेत्वा वा उय्योजेय्य ‘‘गच्छावुसो, न मे तया सद्धिं कथा वा निसज्जा वा फासु होति, एककस्स मे कथा वा निसज्जा वा फासु होती’’ति एतदेव पच्चयं करित्वा अनञ्ञं, पाचित्तियं.

सभोजनसिक्खापदं

४३. यो ¶ पन भिक्खु सभोजने कुले अनुपखज्ज निसज्जं कप्पेय्य, पाचित्तियं.

रहोपटिच्छन्नसिक्खापदं

४४. यो पन भिक्खु मातुगामेन सद्धिं रहो पटिच्छन्ने आसने निसज्जं कप्पेय्य, पाचित्तियं.

रहोनिसज्जसिक्खापदं

४५. यो पन भिक्खु मातुगामेन सद्धिं एको एकाय रहो निसज्जं कप्पेय्य, पाचित्तियं.

चारित्तसिक्खापदं

४६. यो पन भिक्खु निमन्तितो सभत्तो समानो सन्तं भिक्खुं अनापुच्छा पुरेभत्तं वा पच्छाभत्तं वा कुलेसु चारित्तं आपज्जेय्य अञ्ञत्र समया, पाचित्तियं. तत्थायं समयो, चीवरदानसमयो, चीवरकारसमयो, अयं तत्थ समयो.

महानामसिक्खापदं

४७. अगिलानेन भिक्खुना चतुमासप्पच्चयपवारणा सादितब्बा अञ्ञत्र पुनपवारणाय, अञ्ञत्र निच्चपवारणाय. ततो चे उत्तरि सादियेय्य, पाचित्तियं.

उय्युत्तसेनासिक्खापदं

४८. यो पन भिक्खु उय्युत्तं सेनं दस्सनाय गच्छेय्य अञ्ञत्र तथारूपप्पच्चया, पाचित्तियं.

सेनावाससिक्खापदं

४९. सिया ¶ च तस्स भिक्खुनो कोचिदेव पच्चयो सेनं गमनाय, दिरत्ततिरत्तं तेन भिक्खुना सेनाय वसितब्बं. ततो चे उत्तरि वसेय्य, पाचित्तियं.

उय्योधिकसिक्खापदं

५०. दिरत्ततिरत्तं चे भिक्खु सेनाय वसमानो उय्योधिकं वा बलग्गं वा सेनाब्यूहं वा अनीकदस्सनं वा गच्छेय्य, पाचित्तियं.

अचेलकवग्गो पञ्चमो.

सुरापानसिक्खापदं

५१. सुरामेरयपाने ¶ पाचित्तियं.

अङ्गुलिपतोदकसिक्खापदं

५२. अङ्गुलिपतोदके पाचित्तियं.

हसधम्मसिक्खापदं

५३. उदके हसधम्मे पाचित्तियं.

अनादरियसिक्खापदं

५४. अनादरिये पाचित्तियं.

भिंसापनसिक्खापदं

५५. यो पन भिक्खु भिक्खुं भिंसापेय्य, पाचित्तियं.

जोतिसिक्खापदं

५६. यो पन भिक्खु अगिलानो विसिब्बनापेक्खो जोतिं समादहेय्य वा समादहापेय्य वा अञ्ञत्र तथारूपप्पच्चया, पाचित्तियं.

नहानसिक्खापदं

५७. यो ¶ पन भिक्खु ओरेनद्धमासं नहायेय्य अञ्ञत्र समया, पाचित्तियं. तत्थायं समयो ‘‘दियड्ढो मासो सेसो गिम्हान’’न्ति ‘‘वस्सानस्स पठमो मासो’’ इच्चेते अड्ढतेय्यमासा उण्हसमयो, परिळाहसमयो, गिलानसमयो, कम्मसमयो, अद्धानगमनसमयो, वातवुट्ठिसमयो, अयं तत्थ समयो.

दुब्बण्णकरणसिक्खापदं

५८. नवं पन भिक्खुना चीवरलाभेन तिण्णं दुब्बण्णकरणानं अञ्ञतरं दुब्बण्णकरणं आदातब्बं नीलं वा कद्दमं वा काळसामं वा. अनादा चे भिक्खु तिण्णं दुब्बण्णकरणानं अञ्ञतरं दुब्बण्णकरणं नवं चीवरं परिभुञ्जेय्य, पाचित्तियं.

विकप्पनसिक्खापदं

५९. यो पन भिक्खु भिक्खुस्स वा भिक्खुनिया वा सिक्खमानाय वा सामणेरस्स वा सामणेरिया वा सामं चीवरं विकप्पेत्वा अप्पच्चुद्धारणं परिभुञ्जेय्य, पाचित्तियं.

अपनिधानसिक्खापदं

६०. यो ¶ पन भिक्खु भिक्खुस्स पत्तं वा चीवरं वा निसीदनं वा सूचिघरं वा कायबन्धनं वा अपनिधेय्य वा अपनिधापेय्य वा अन्तमसो हसापेक्खोपि, पाचित्तियं.

सुरापानवग्गो छट्ठो.

सञ्चिच्चसिक्खापदं

६१. यो पन भिक्खु सञ्चिच्च पाणं जीविता वोरोपेय्य, पाचित्तियं.

सप्पाणकसिक्खापदं

६२. यो पन भिक्खु जानं सप्पाणकं उदकं परिभुञ्जेय्य, पाचित्तियं.

उक्कोटनसिक्खापदं

६३. यो पन भिक्खु जानं यथाधम्मं निहताधिकरणं पुनकम्माय उक्कोटेय्य, पाचित्तियं.

दुट्ठुल्लसिक्खापदं

६४. यो ¶ पन भिक्खु भिक्खुस्स जानं दुट्ठुल्लं आपत्तिं पटिच्छादेय्य, पाचित्तियं.

ऊनवीसतिवस्ससिक्खापदं

६५. यो पन भिक्खु जानं ऊनवीसतिवस्सं पुग्गलं उपसम्पादेय्य, सो च पुग्गलो अनुपसम्पन्नो, ते च भिक्खू गारय्हा, इदं तस्मिं पाचित्तियं.

थेय्यसत्थसिक्खापदं

६६. यो पन भिक्खु जानं थेय्यसत्थेन सद्धिं संविधाय एकद्धानमग्गं पटिपज्जेय्य अन्तमसो गामन्तरम्पि, पाचित्तियं.

संविधानसिक्खापदं

६७. यो पन भिक्खु मातुगामेन सद्धिं संविधाय एकद्धानमग्गं पटिपज्जेय्य अन्तमसो गामन्तरम्पि, पाचित्तियं.

अरिट्ठसिक्खापदं

६८. यो ¶ पन भिक्खु एवं वदेय्य ‘‘तथाहं भगवता धम्मं देसितं आजानामि, यथा येमे अन्तरायिका धम्मा वुत्ता भगवता, ते पटिसेवतो नालं अन्तरायाया’’ति, सो भिक्खु भिक्खूहि एवमस्स वचनीयो ‘‘मायस्मा एवं अवच, मा भगवन्तं अब्भाचिक्खि, न हि साधु भगवतो अब्भक्खानं, न हि भगवा एवं वदेय्य, अनेकपरियायेनावुसो अन्तरायिका धम्मा अन्तरायिका वुत्ता भगवता, अलञ्च पन ते पटिसेवतो अन्तरायाया’’ति. एवञ्च सो भिक्खु भिक्खूहि वुच्चमानो तथेव पग्गण्हेय्य, सो भिक्खु भिक्खूहि यावततियं समनुभासितब्बो तस्स पटिनिस्सग्गाय. यावततियञ्चे समनुभासियमानो तं पटिनिस्सज्जेय्य, इच्चेतं कुसलं. नो चे पटिनिस्सज्जेय्य, पाचित्तियं.

उक्खित्तसम्भोगसिक्खापदं

६९. यो पन भिक्खु जानं तथावादिना भिक्खुना अकटानुधम्मेन तं दिट्ठिं अप्पटिनिस्सट्ठेन सद्धिं सम्भुञ्जेय्य वा, संवसेय्य वा, सह वा सेय्यं कप्पेय्य, पाचित्तियं.

कण्टकसिक्खापदं

७०. समणुद्देसोपि ¶ चे एवं वदेय्य ‘‘तथाहं भगवता धम्मं देसितं आजानामि, यथा येमे अन्तरायिका धम्मा वुत्ता भगवता, ते पटिसेवतो नालं अन्तरायाया’’ति, सो समणुद्देसो भिक्खूहि एवमस्स वचनीयो ‘‘मावुसो, समणुद्देस एवं अवच, मा भगवन्तं अब्भाचिक्खि, न हि साधु भगवतो अब्भक्खानं, न हि भगवा एवं वदेय्य, अनेकपरियायेनावुसो, समणुद्देस अन्तरायिका धम्मा अन्तरायिका वुत्ता भगवता, अलञ्च पन ते पटिसेवतो अन्तरायाया’’ति, एवञ्च सो समणुद्देसो भिक्खूहि वुच्चमानो तथेव पग्गण्हेय्य, सो समणुद्देसो भिक्खूहि एवमस्स वचनीयो ‘‘अज्जतग्गे ते, आवुसो, समणुद्देस न चेव सो भगवा सत्था अपदिसितब्बो, यम्पि चञ्ञे समणुद्देसा लभन्ति भिक्खूहि सद्धिं दिरत्ततिरत्तं सहसेय्यं, सापि ते नत्थि, चर पिरे, विनस्सा’’ति. यो पन भिक्खु जानं तथानासितं समणुद्देसं उपलापेय्य वा, उपट्ठापेय्य वा, सम्भुञ्जेय्य वा, सह वा सेय्यं कप्पेय्य, पाचित्तियं.

सप्पाणकवग्गो सत्तमो.

सहधम्मिकसिक्खापदं

७१. यो ¶ पन भिक्खु भिक्खूहि सहधम्मिकं वुच्चमानो एवं वदेय्य ‘‘न तावाहं, आवुसो, एतस्मिं सिक्खापदे सिक्खिस्सामि, याव न अञ्ञं भिक्खुं ब्यत्तं विनयधरं परिपुच्छामी’’ति, पाचित्तियं. सिक्खमानेन, भिक्खवे, भिक्खुना अञ्ञातब्बं परिपुच्छितब्बं परिपञ्हितब्बं, अयं तत्थ सामीचि.

विलेखनसिक्खापदं

७२. यो पन भिक्खु पातिमोक्खे उद्दिस्समाने एवं वदेय्य ‘‘किं पनिमेहि खुद्दानुखुद्दकेहि सिक्खापदेहि उद्दिट्ठेहि, यावदेव कुक्कुच्चाय विहेसाय विलेखाय संवत्तन्ती’’ति, सिक्खापदविवण्णके पाचित्तियं.

मोहनसिक्खापदं

७३. यो पन भिक्खु अन्वद्धमासं पातिमोक्खे उद्दिस्समाने एवं वदेय्य ‘‘इदानेव खो अहं जानामि, अयम्पि किर धम्मो सुत्तागतो सुत्तपरियापन्नो अन्वद्धमासं उद्देसं आगच्छती’’ति. तञ्चे भिक्खुं अञ्ञे भिक्खू जानेय्युं निसिन्नपुब्बं इमिना भिक्खुना द्वत्तिक्खत्तुं ¶ पातिमोक्खे उद्दिस्समाने, को पन वादो भिय्यो, न च तस्स भिक्खुनो अञ्ञाणकेन मुत्ति अत्थि, यञ्च तत्थ आपत्तिं आपन्नो, तञ्च यथाधम्मो कारेतब्बो, उत्तरि चस्स मोहो आरोपेतब्बो ‘‘तस्स ते, आवुसो, अलाभा, तस्स ते दुल्लद्धं, यं त्वं पातिमोक्खे उद्दिस्समानेन साधुकं अट्ठिं कत्वा मनसि करोसी’’ति, इदं तस्मिं मोहनके पाचित्तियं.

पहारसिक्खापदं

७४. यो पन भिक्खु भिक्खुस्स कुपितो अनत्तमनो पहारं ददेय्य, पाचित्तियं.

तलसत्तिकसिक्खापदं

७५. यो पन भिक्खु भिक्खुस्स कुपितो अनत्तमनो तलसत्तिकं उग्गिरेय्य, पाचित्तियं.

अमूलकसिक्खापदं

७६. यो पन भिक्खु भिक्खुं अमूलकेन सङ्घादिसेसेन अनुद्धंसेय्य, पाचित्तियं.

सञ्चिच्चसिक्खापदं

७७. यो ¶ पन भिक्खु भिक्खुस्स सञ्चिच्च कुक्कुच्चं उपदहेय्य ‘‘इतिस्स मुहुत्तम्पि अफासु भविस्सती’’ति एतदेव पच्चयं करित्वा अनञ्ञं, पाचित्तियं.

उपस्सुतिसिक्खापदं

७८. यो पन भिक्खु भिक्खूनं भण्डनजातानं कलहजातानं विवादापन्नानं उपस्सुतिं तिट्ठेय्य ‘‘यं इमे भणिस्सन्ति, तं सोस्सामी’’ति एतदेव पच्चयं करित्वा अनञ्ञं, पाचित्तियं.

कम्मप्पटिबाहनसिक्खापदं

७९. यो पन भिक्खु धम्मिकानं कम्मानं छन्दं दत्वा पच्छा खीयनधम्मं आपज्जेय्य, पाचित्तियं.

छन्दंअदत्वागमनसिक्खापदं

८०. यो ¶ पन भिक्खु सङ्घे विनिच्छयकथाय वत्तमानाय छन्दं अदत्वा उट्ठायासना पक्कमेय्य, पाचित्तियं.

दुब्बलसिक्खापदं

८१. यो पन भिक्खु समग्गेन सङ्घेन चीवरं दत्वा पच्छा खीयनधम्मं आपज्जेय्य ‘‘यथासन्थुतं भिक्खू सङ्घिकं लाभं परिणामेन्ती’’ति, पाचित्तियं.

परिणामनसिक्खापदं

८२. यो पन भिक्खु जानं सङ्घिकं लाभं परिणतं पुग्गलस्स परिणामेय्य, पाचित्तियं.

सहधम्मिकवग्गो अट्ठमो.

अन्तेपुरसिक्खापदं

८३. यो पन भिक्खु रञ्ञो खत्तियस्स मुद्धाभिसित्तस्स अनिक्खन्तराजके अनिग्गतरतनके पुब्बे अप्पटिसंविदितो इन्दखीलं अतिक्कामेय्य, पाचित्तियं.

रतनसिक्खापदं

८४. यो ¶ पन भिक्खु रतनं वा रतनसम्मतं वा अञ्ञत्र अज्झारामा वा अज्झावसथा वा उग्गण्हेय्य वा उग्गण्हापेय्य वा, पाचित्तियं. रतनं वा पन भिक्खुना रतनसम्मतं वा अज्झारामे वा अज्झावसथे वा उग्गहेत्वा वा उग्गहापेत्वा वा निक्खिपितब्बं ‘‘यस्स भविस्सति, सो हरिस्सती’’ति, अयं तत्थ सामीचि.

विकालगामप्पवेसनसिक्खापदं

८५. यो पन भिक्खु सन्तं भिक्खुं अनापुच्छाविकाले गामं पविसेय्य अञ्ञत्र तथारूपा अच्चायिका करणीया, पाचित्तियं.

सूचिघरसिक्खापदं

८६. यो ¶ पन भिक्खु अट्ठिमयं वा दन्तमयं वा विसाणमयं वा सूचिघरं कारापेय्य, भेदनकं पाचित्तियं.

मञ्चपीठसिक्खापदं

८७. नवं पन भिक्खुना मञ्चं वा पीठं वा कारयमानेन अट्ठङ्गुलपादकं कारेतब्बं सुगतङ्गुलेन अञ्ञत्र हेट्ठिमाय अटनिया. तं अतिक्कामयतो छेदनकं पाचित्तियं.

तूलोनद्धसिक्खापदं

८८. यो पन भिक्खु मञ्चं वा पीठं वा तूलोनद्धं कारापेय्य, उद्दालनकं पाचित्तियं.

निसीदनसिक्खापदं

८९. निसीदनं पन भिक्खुना कारयमानेन पमाणिकं कारेतब्बं, तत्रिदं पमाणं, दीघसो द्वे विदत्थियो सुगतविदत्थिया, तिरियं दियड्ढं, दसा विदत्थि. तं अतिक्कामयतो छेदनकं पाचित्तियं.

कण्डुप्पटिच्छादिसिक्खापदं

९०. कण्डुप्पटिच्छादिं पन भिक्खुना कारयमानेन पमाणिका कारेतब्बा, तत्रिदं पमाणं, दीघसो चतस्सो विदत्थियो सुगतविदत्थिया, तिरियं द्वे विदत्थियो. तं अतिक्कामयतो छेदनकं पाचित्तियं.

वस्सिकसाटिकसिक्खापदं

९१. वस्सिकसाटिकं ¶ पन भिक्खुना कारयमानेन पमाणिका कारेतब्बा, तत्रिदं पमाणं, दीघसो छ विदत्थियो सुगतविदत्थिया, तिरियं अड्ढतेय्या. तं अतिक्कामयतो छेदनकं पाचित्तियं.

नन्दसिक्खापदं

९२. यो पन भिक्खु सुगतचीवरप्पमाणं चीवरं कारापेय्य, अतिरेकं वा, छेदनकं पाचित्तियं ¶ . तत्रिदं सुगतस्स सुगतचीवरप्पमाणं, दीघसो नव विदत्थियो सुगतविदत्थिया, तिरियं छ विदत्थियो, इदं सुगतस्स सुगतचीवरप्पमाणन्ति.

रतनवग्गो नवमो.

उद्दिट्ठा खो आयस्मन्तो द्वेनवुति पाचित्तिया धम्मा. तत्थायस्मन्ते पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थायस्मन्तो, तस्मा तुण्ही, एवमेतं धारयामीति.

पाचित्तिया निट्ठिता.

पाटिदेसनीया

इमे खो पनायस्मन्तो चत्तारो पाटिदेसनीया

धम्मा उद्देसं आगच्छन्ति.

पठमपाटिदेसनीयसिक्खापदं

१. यो पन भिक्खु अञ्ञातिकाय भिक्खुनिया अन्तरघरं पविट्ठाय हत्थतो खादनीयं वा भोजनीयं वा सहत्था पटिग्गहेत्वा खादेय्य वा भुञ्जेय्य वा, पटिदेसेतब्बं तेन भिक्खुना ‘‘गारय्हं, आवुसो, धम्मं आपज्जिं असप्पायं पाटिदेसनीयं, तं पटिदेसेमी’’ति.

दुतियपाटिदेसनीयसिक्खापदं

२. भिक्खू पनेव कुलेसु निमन्तिता भुञ्जन्ति, तत्र चे सा भिक्खुनी वोसासमानरूपा ठिता होति ‘‘इध सूपं देथ, इध ओदनं देथा’’ति. तेहि भिक्खूहि सा भिक्खुनी अपसादेतब्बा ‘‘अपसक्क ताव भगिनि, याव ¶ भिक्खू भुञ्जन्ती’’ति. एकस्सपि चे भिक्खुनो न पटिभासेय्य तं भिक्खुनिं अपसादेतुं ‘‘अपसक्क ताव भगिनि, याव भिक्खू भुञ्जन्ती’’ति, पटिदेसेतब्बं तेहि भिक्खूहि ‘‘गारय्हं, आवुसो, धम्मं आपज्जिम्हा असप्पायं पाटिदेसनीयं, तं पटिदेसेमा’’ति.

ततियपाटिदेसनीयसिक्खापदं

३. यानि ¶ खो पन तानि सेक्खसम्मतानि कुलानि, यो पन भिक्खु तथारूपेसु सेक्खसम्मतेसु कुलेसु पुब्बे अनिमन्तितो अगिलानो खादनीयं वा, भोजनीयं वा सहत्था पटिग्गहेत्वा खादेय्य वा, भुञ्जेय्य वा, पटिदेसेतब्बं तेन भिक्खुना ‘‘गारय्हं, आवुसो, धम्मं आपज्जिं असप्पायं पाटिदेसनीयं, तं पटिदेसेमी’’ति.

चतुत्थपाटिदेसनीयसिक्खापदं

४. यानि खो पन तानि आरञ्ञकानि सेनासनानि सासङ्कसम्मतानि सप्पटिभयानि, यो पन भिक्खु तथारूपेसु सेनासनेसु पुब्बे अप्पटिसंविदितं खादनीयं वा, भोजनीयं वा अज्झारामे सहत्था पटिग्गहेत्वा अगिलानो खादेय्य वा, भुञ्जेय्य वा, पटिदेसेतब्बं तेन भिक्खुना ‘‘गारय्हं, आवुसो, धम्मं आपज्जिं असप्पायं पाटिदेसनीयं, तं पटिदेसेमी’’ति.

उद्दिट्ठा खो आयस्मन्तो चत्तारो पाटिदेसनीया धम्मा. तत्थायस्मन्ते पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थायस्मन्तो, तस्मा तुण्ही, एवमेतं धारयामीति.

पाटिदेसनीया निट्ठिता.

सेखिया

इमे खो पनायस्मन्तो सेखिया धम्मा उद्देसं आगच्छन्ति.

परिमण्डलसिक्खापदं

१. परिमण्डलं निवासेस्सामीति सिक्खा करणीया.

२. परिमण्डलं पारुपिस्सामीति सिक्खा करणीया.

सुप्पटिच्छन्नसिक्खापदं

३. सुप्पटिच्छन्नो ¶ ¶ अन्तरघरे गमिस्सामीति सिक्खा करणीया.

४. सुप्पटिच्छन्नो अन्तरघरे निसीदिस्सामीति सिक्खा करणीया.

सुसंवुतसिक्खापदं

५. सुसंवुतो अन्तरघरे गमिस्सामीति सिक्खा करणीया.

६. सुसंवुतो अन्तरघरे निसीदिस्सामीति सिक्खा करणीया.

ओक्खित्तचक्खुसिक्खापदं

७. ओक्खित्तचक्खु अन्तरघरे गमिस्सामीति सिक्खा करणीया.

८. ओक्खित्तचक्खु अन्तरघरे निसीदिस्सामीति सिक्खा करणीया.

उक्खित्तकसिक्खापदं

९. न उक्खित्तकाय अन्तरघरे गमिस्सामीति सिक्खा करणीया.

१०. न उक्खित्तकाय अन्तरघरे निसीदिस्सामीति सिक्खा करणीया.

परिमण्डलवग्गो पठमो.

उज्जग्घिकसिक्खापदं

११. न उज्जग्घिकाय अन्तरघरे गमिस्सामीति सिक्खा करणीया.

१२. न उज्जग्घिकाय अन्तरघरे निसीदिस्सामीति सिक्खा करणीया.

उच्चसद्दसिक्खापदं

१३. अप्पसद्दो अन्तरघरे गमिस्सामीति सिक्खा करणीया.

१४. अप्पसद्दो ¶ अन्तरघरे निसीदिस्सामीति सिक्खा करणीया.

कायप्पचालकसिक्खापदं

१५. न कायप्पचालकं अन्तरघरे गमिस्सामीति सिक्खा करणीया.

१६. न कायप्पचालकं अन्तरघरे निसीदिस्सामीति सिक्खा करणीया.

बाहुप्पचालकसिक्खापदं

१७. न बाहुप्पचालकं अन्तरघरे गमिस्सामीति सिक्खा करणीया.

१८. न बाहुप्पचालकं अन्तरघरेनिसीदिस्सामीति सिक्खा करणीया.

सीसप्पचालकसिक्खापदं

१९. न ¶ सीसप्पचालकं अन्तरघरे गमिस्सामीति सिक्खा करणीया.

२०. न सीसप्पचालकं अन्तरघरे निसीदिस्सामीति सिक्खा करणीया.

उज्जग्घिकवग्गो दुतियो.

खम्भकतसिक्खापदं

२१. न खम्भकतो अन्तरघरे गमिस्सामीति सिक्खा करणीया.

२२. न खम्भकतो अन्तरघरे निसीदिस्सामीति सिक्खा करणीया.

ओगुण्ठितसिक्खापदं

२३. न ओगुण्ठितो अन्तरघरे गमिस्सामीति सिक्खा करणीया.

२४. न ओगुण्ठितो अन्तरघरे निसीदिस्सामीति सिक्खा करणीया.

उक्कुटिकसिक्खापदं

२५. न ¶ उक्कुटिकाय अन्तरघरे गमिस्सामीति सिक्खा करणीया.

पल्लत्थिकसिक्खापदं

२६. न पल्लत्थिकाय अन्तरघरे निसीदिस्सामीति सिक्खा करणीया.

सक्कच्चपटिग्गहणसिक्खापदं

२७. सक्कच्चं पिण्डपातं पटिग्गहेस्सामीति सिक्खा करणीया.

पत्तसञ्ञीपटिग्गहणसिक्खापदं

२८. पत्तसञ्ञी पिण्डपातं पटिग्गहेस्सामीति सिक्खा करणीया.

समसूपकपटिग्गहणसिक्खापदं

२९. समसूपकं पिण्डपातं पटिग्गहेस्सामीति सिक्खा करणीया.

समतित्तिकसिक्खापदं

३०. समतित्तिकं पिण्डपातं पटिग्गहेस्सामीति सिक्खा करणीया.

खम्भकतवग्गो ततियो.

सक्कच्चभुञ्जनसिक्खापदं

३१. सक्कच्चं ¶ पिण्डपातं भुञ्जिस्सामीति सिक्खा करणीया.

पत्तसञ्ञीभुञ्जनसिक्खापदं

३२. पत्तसञ्ञी पिण्डपातं भुञ्जिस्सामीति सिक्खा करणीया.

सपदानसिक्खापदं

३३. सपदानं पिण्डपातं भुञ्जिस्सामीति सिक्खा करणीया.

समसूपकसिक्खापदं

३४. समसूपकं ¶ पिण्डपातं भुञ्जिस्सामीति सिक्खा करणीया.

नथूपकतसिक्खापदं

३५. न थूपकतो ओमद्दित्वा पिण्डपातं भुञ्जिस्सामीति सिक्खा करणीया.

ओदनप्पटिच्छादनसिक्खापदं

३६. न सूपं वा ब्यञ्जनं वा ओदनेन पटिच्छादेस्सामि भिय्योकम्यतं उपादायाति सिक्खा करणीया.

सूपोदनविञ्ञत्तिसिक्खापदं

३७. न सूपं वा ओदनं वा अगिलानो अत्तनो अत्थाय विञ्ञापेत्वा भुञ्जिस्सामीति सिक्खा करणीया.

उज्झानसञ्ञीसिक्खापदं

३८. न उज्झानसञ्ञी परेसं पत्तं ओलोकेस्सामीति सिक्खा करणीया.

कबळसिक्खापदं

३९. नातिमहन्तं कबळं करिस्सामीति सिक्खा करणीया.

आलोपसिक्खापदं

४०. परिमण्डलं आलोपं करिस्सामीति सिक्खा करणीया.

सक्कच्चवग्गो चतुत्थो.

अनाहटसिक्खापदं

४१. न ¶ अनाहटे कबळे मुखद्वारं विवरिस्सामीति सिक्खा करणीया.

भुञ्जमानसिक्खापदं

४२. न भुञ्जमानो सब्बहत्थं मुखे पक्खिपिस्सामीति सिक्खा करणीया.

सकबळसिक्खापदं

४३. न ¶ सकबळेन मुखेन ब्याहरिस्सामीति सिक्खा करणीया.

पिण्डुक्खेपकसिक्खापदं

४४. न पिण्डुक्खेपकं भुञ्जिस्सामीति सिक्खा करणीया.

कबळावच्छेदकसिक्खापदं

४५. न कबळावच्छेदकं भुञ्जिस्सामीति सिक्खा करणीया.

अवगण्डकारकसिक्खापदं

४६. न अवगण्डकारकं भुञ्जिस्सामीति सिक्खा करणीया.

हत्थनिद्धुनकसिक्खापदं

४७. न हत्थनिद्धुनकं भुञ्जिस्सामीति सिक्खा करणीया.

सित्थावकारकसिक्खापदं

४८. न सित्थावकारकं भुञ्जिस्सामीति सिक्खा करणीया.

जिव्हानिच्छारकसिक्खापदं

४९. न जिव्हानिच्छारकं भुञ्जिस्सामीति सिक्खा करणीया.

चपुचपुकारकसिक्खापदं

५०. न चपुचपुकारकं भुञ्जिस्सामीति सिक्खा करणीया.

कबळवग्गो पञ्चमो.

सुरुसुरुकारकसिक्खापदं

५१. न सुरुसुरुकारकं भुञ्जिस्सामीति सिक्खा करणीया.

हत्थनिल्लेहकसिक्खापदं

५२. न हत्थनिल्लेहकं भुञ्जिस्सामीति सिक्खा करणीया.

पत्तनिल्लेहकसिक्खापदं

५३. न ¶ ¶ पत्तनिल्लेहकं भुञ्जिस्सामीति सिक्खा करणीया.

ओट्ठनिल्लेहकसिक्खापदं

५४. न ओट्ठनिल्लेहकं भुञ्जिस्सामीति सिक्खा करणीया.

सामिससिक्खापदं

५५. न सामिसेन हत्थेन पानीयथालकं पटिग्गहेस्सामीति सिक्खा करणीया.

ससित्थकसिक्खापदं

५६. न ससित्थकं पत्तधोवनं अन्तरघरे छड्डेस्सामीति सिक्खा करणीया.

छत्तपाणिसिक्खापदं

५७. न छत्तपाणिस्स अगिलानस्स धम्मं देसेस्सामीति सिक्खा करणीया.

दण्डपाणिसिक्खापदं

५८. न दण्डपाणिस्स अगिलानस्स धम्मं देसेस्सामीति सिक्खा करणीया.

सत्थपाणिसिक्खापदं

५९. न सत्थपाणिस्स अगिलानस्स धम्मं देसेस्सामीति सिक्खा करणीया.

आवुधपाणिसिक्खापदं

६०. न आवुधपाणिस्स अगिलानस्स धम्मं देसेस्सामीति सिक्खा करणीया.

सुरुसुरुवग्गो छट्ठो.

पादुकसिक्खापदं

६१. न ¶ पादुकारुळ्हस्स अगिलानस्स धम्मं देसेस्सामीति सिक्खा करणीया.

उपाहनसिक्खापदं

६२. न ¶ उपाहनारुळ्हस्स अगिलानस्स धम्मं देसेस्सामीति सिक्खा करणीया.

यानसिक्खापदं

६३. न यानगतस्स अगिलानस्स धम्मं देसेस्सामीति सिक्खा करणीया.

सयनसिक्खापदं

६४. न सयनगतस्स अगिलानस्स धम्मं देसेस्सामीति सिक्खा करणीया.

पल्लत्थिकसिक्खापदं

६५. न पल्लत्थिकाय निसिन्नस्स अगिलानस्स धम्मं देसेस्सामीति सिक्खा करणीया.

वेठितसिक्खापदं

६६. न वेठितसीसस्स अगिलानस्स धम्मं देसेस्सामीति सिक्खा करणीया.

ओगुण्ठितसिक्खापदं

६७. न ओगुण्ठितसीसस्स अगिलानस्स धम्मं देसेस्सामीति सिक्खा करणीया.

छमासिक्खापदं

६८. न छमायं निसीदित्वा आसने निसिन्नस्स अगिलानस्स धम्मं देसेस्सामीति सिक्खा करणीया.

नीचासनसिक्खापदं

६९. न नीचे आसने निसीदित्वा उच्चे आसने निसिन्नस्स अगिलानस्स धम्मं देसेस्सामीति सिक्खा करणीया.

ठितसिक्खापदं

७०. न ठितो निसिन्नस्स अगिलानस्स धम्मं देसेस्सामीति सिक्खा करणीया.

पच्छतोगमनसिक्खापदं

७१. न ¶ ¶ पच्छतो गच्छन्तो पुरतो गच्छन्तस्स अगिलानस्स धम्मं देसेस्सामीति सिक्खा करणीया.

उप्पथेनगमनसिक्खापदं

७२. न उप्पथेन गच्छन्तो पथेन गच्छन्तस्स अगिलानस्स धम्मं देसेस्सामीति सिक्खा करणीया.

ठितोउच्चारसिक्खापदं

७३. न ठितो अगिलानो उच्चारं वा पस्सावं वा करिस्सामीति सिक्खा करणीया.

हरितेउच्चारसिक्खापदं

७४. न हरिते अगिलानो उच्चारं वा पस्सावं वा खेळं वा करिस्सामीति सिक्खा करणीया.

उदकेउच्चारसिक्खापदं

७५. न उदके अगिलानो उच्चारं वा पस्सावं वा खेळं वा करिस्सामीति सिक्खा करणीया.

पादुकवग्गो सत्तमो.

उद्दिट्ठा खो आयस्मन्तो सेखिया धम्मा. तत्थायस्मन्ते पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थायस्मन्तो, तस्मा तुण्ही, एवमेतं धारयामीति.

सेखिया निट्ठिता.

अधिकरणसमथा

इमे खो पनायस्मन्तो सत्त अधिकरणसमथा

धम्मा उद्देसं आगच्छन्ति.

उप्पन्नुप्पन्नानं ¶ अधिकरणानं समथाय वूपसमाय सम्मुखाविनयो दातब्बो.

सतिविनयो दातब्बो.

अमूळ्हविनयो दातब्बो.

पटिञ्ञाय ¶ कारेतब्बं.

येभुय्यसिका.

तस्सपापियसिका.

तिणवत्थारकोति.

उद्दिट्ठा खो आयस्मन्तो सत्त अधिकरणसमथा धम्मा. तत्थायस्मन्ते, पुच्छामि कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थायस्मन्तो, तस्मा तुण्ही, एवमेतं धारयामीति.

अधिकरणसमथा निट्ठिता.

उद्दिट्ठं खो आयस्मन्तो निदानं,

उद्दिट्ठा चत्तारो पाराजिका धम्मा,

उद्दिट्ठा तेरस सङ्घादिसेसा धम्मा,

उद्दिट्ठा द्वे अनियता धम्मा,

उद्दिट्ठा तिंस निस्सग्गिया पाचित्तिया धम्मा,

उद्दिट्ठा द्वेनवुति पाचित्तिया धम्मा,

उद्दिट्ठा चत्तारो पाटिदेसनीया धम्मा,

उद्दिट्ठा सेखिया धम्मा,

उद्दिट्ठा सत्त अधिकरणसमथा धम्मा, एत्तकं तस्स भगवतो सुत्तागतं सुत्तपरियापन्नं अन्वद्धमासं ¶ उद्देसं आगच्छति, तत्थ सब्बेहेव समग्गेहि सम्मोदमानेहि अविवदमानेहि सिक्खितब्बन्ति.

वित्थारुद्देसो पञ्चमो.

भिक्खुपातिमोक्खं निट्ठितं.

नमो तस्स भगवतो अरहतो सम्मासम्बुद्धस्स

भिक्खुनीपातिमोक्खपाळि

पुब्बकरणं-४

सम्मज्जनी ¶ ¶ पदीपो च, उदकं आसनेन च;

उपोसथस्स एतानि, ‘‘पुब्बकरण’’न्ति वुच्चति.

पुब्बकिच्चं-५

छन्द, पारिसुद्धि, उतुक्खानं, भिक्खुनिगणना च ओवादो;

उपोसथस्स एतानि, ‘‘पुब्बकिच्च’’न्ति वुच्चति.

पत्तकल्लअङ्गा-४

उपोसथो, यावतिका च भिक्खुनी कम्मप्पत्ता;

सभागापत्तियो च न विज्जन्ति;

वज्जनीया च पुग्गला तस्मिं न होन्ति, ‘‘पत्तकल्ल’’न्ति वुच्चति.

पुब्बकरणपुब्बकिच्चानि समापेत्वा देसितापत्तिकस्स समग्गस्स भिक्खुनिसङ्घस्स अनुमतिया पातिमोक्खं उद्दिसितुं आराधनं करोम.

निदानुद्देसो

सुणातु ¶ मे अय्ये सङ्घो, अज्जुपोसथो पन्नरसो, यदि सङ्घस्स पत्तकल्लं, सङ्घो उपोसथं करेय्य, पातिमोक्खं उद्दिसेय्य.

किं सङ्घस्स पुब्बकिच्चं? पारिसुद्धिं अय्यायो आरोचेथ, पातिमोक्खं उद्दिसिस्सामि, तं सब्बाव सन्ता साधुकं सुणोम मनसि करोम. यस्सा सिया आपत्ति, सा आविकरेय्य, असन्तिया आपत्तिया तुण्ही भवितब्बं, तुण्हीभावेन खो पनाय्यायो, ‘‘परिसुद्धा’’ति वेदिस्सामि. यथा खो पन पच्चेकपुट्ठस्सा वेय्याकरणं होति, एवमेवं एवरूपाय परिसाय यावततियं अनुसावितं होति. या पन भिक्खुनी यावततियं अनुसावियमाने सरमाना सन्तिं आपत्तिं नाविकरेय्य, सम्पजानमुसावादस्सा होति. सम्पजानमुसावादो खो पनाय्यायो, अन्तरायिको धम्मो ¶ वुत्तो भगवता, तस्मा सरमानाय भिक्खुनिया आपन्नाय विसुद्धापेक्खाय सन्ती आपत्ति आविकातब्बा, आविकता हिस्सा फासु होति.

उद्दिट्ठं खो, अय्यायो, निदानं. तत्थाय्यायो पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थाय्यायो, तस्मा तुण्ही, एवमेतं धारयामीति.

निदानं निट्ठितं.

पाराजिकुद्देसो

तत्रिमे अट्ठ पाराजिका धम्मा उद्देसं आगच्छन्ति.

मेथुनधम्मसिक्खापदं

१. या पन भिक्खुनी छन्दसो मेथुनं धम्मं पटिसेवेय्य, अन्तमसो तिरच्छानगतेनपि, पाराजिका होति असंवासा.

अदिन्नादानसिक्खापदं

२. या ¶ पन भिक्खुनी गामा वा अरञ्ञा वा अदिन्नं थेय्यसङ्खातं आदियेय्य, यथारूपे अदिन्नादाने राजानो चोरं गहेत्वा हनेय्युं वा बन्धेय्युं वा पब्बाजेय्युं वा चोरासि बालासि मूळ्हासि थेनासीति, तथारूपं भिक्खुनी अदिन्नं आदियमाना अयम्पि पाराजिका होति असंवासा.

मनुस्सविग्गहसिक्खापदं

३. या पन भिक्खुनी सञ्चिच्च मनुस्सविग्गहं जीविता वोरोपेय्य, सत्थहारकं वास्स परियेसेय्य, मरणवण्णं वा संवण्णेय्य, मरणाय वा समादपेय्य ‘‘अम्भो पुरिस, किं तुय्हिमिना पापकेन दुज्जीवितेन, मतं ते जीविता सेय्यो’’ति, इति चित्तमना चित्तसङ्कप्पा अनेकपरियायेन मरणवण्णं वा संवण्णेय्य, मरणाय वा समादपेय्य, अयम्पि पाराजिका होति असंवासा.

उत्तरिमनुस्सधम्मसिक्खापदं

४. या पन भिक्खुनी अनभिजानं उत्तरिमनुस्सधम्मं अत्तुपनायिकं अलमरियञाणदस्सनं समुदाचरेय्य ‘‘इति जानामि, इति पस्सामी’’ति, ततो ¶ अपरेन समयेन समनुग्गाहीयमाना वा असमनुग्गाहीयमाना वा आपन्ना विसुद्धापेक्खा एवं वदेय्य ‘‘अजानमेवं, अय्ये, अवचं जानामि, अपस्सं पस्सामि, तुच्छं मुसा विलपि’’न्ति, अञ्ञत्र अधिमाना, अयम्पि पाराजिका होति असंवासा.

उब्भजाणुमण्डलिकासिक्खापदं

५. या पन भिक्खुनी अवस्सुता अवस्सुतस्स पुरिसपुग्गलस्स, अधक्खकं उब्भजाणुमण्डलं आमसनं वा परामसनं वा गहणं वा छुपनं वा पटिपीळनं वा सादियेय्य, अयम्पि पाराजिका होति असंवासा उब्भजाणुमण्डलिका.

वज्जप्पटिच्छादिकासिक्खापदं

६. या पन भिक्खुनी जानं पाराजिकं धम्मं अज्झापन्नं भिक्खुनिं नेवत्तना पटिचोदेय्य, न गणस्स आरोचेय्य, यदा च सा ठिता वा अस्स चुता वा नासिता वा अवस्सटा वा, सा पच्छा एवं वदेय्य ‘‘पुब्बेवाहं, अय्ये, अञ्ञासिं एतं भिक्खुनिं ‘एवरूपा च ¶ एवरूपा च सा भगिनी’ति, नो च खो अत्तना पटिचोदेस्सं, न गणस्स आरोचेस्स’’न्ति, अयम्पि पाराजिका होति असंवासा वज्जप्पटिच्छादिका.

उक्खित्तानुवत्तिकासिक्खापदं

७. या पन भिक्खुनी समग्गेन सङ्घेन उक्खित्तं भिक्खुं धम्मेन विनयेन सत्थुसासनेन अनादरं अप्पटिकारं अकतसहायं तमनुवत्तेय्य, सा भिक्खुनी भिक्खुनीहि एवमस्स वचनीया ‘‘एसो खो, अय्ये, भिक्खु समग्गेन सङ्घेन उक्खित्तो, धम्मेन विनयेन सत्थुसासनेन अनादरो अप्पटिकारो अकतसहायो, माय्ये, एतं भिक्खुं अनुवत्ती’’ति, एवञ्च सा भिक्खुनी भिक्खुनीहि वुच्चमाना तथेव पग्गण्हेय्य, सा भिक्खुनी भिक्खुनीहि यावततियं समनुभासितब्बा तस्स पटिनिस्सग्गाय, यावततियं चे समनुभासियमाना तं पटिनिस्सज्जेय्य, इच्चेतं कुसलं, नो चे पटिनिस्सज्जेय्य, अयम्पि पाराजिका होति असंवासा उक्खित्तानुवत्तिका.

अट्ठवत्थुकासिक्खापदं

८. या ¶ पन भिक्खुनी अवस्सुता अवस्सुतस्स पुरिसपुग्गलस्स हत्थग्गहणं वा सादियेय्य, सङ्घाटिकण्णग्गहणं वा सादियेय्य, सन्तिट्ठेय्य वा, सल्लपेय्य वा, सङ्केतं वा गच्छेय्य, पुरिसस्स वा अब्भागमनं सादियेय्य, छन्नं वा अनुपविसेय्य, कायं वा तदत्थाय उपसंहरेय्य एतस्स असद्धम्मस्स पटिसेवनत्थाय, अयम्पि पाराजिका होति असंवासा अट्ठवत्थुका.

उद्दिट्ठा खो, अय्यायो, अट्ठ पाराजिका धम्मा. येसं भिक्खुनी अञ्ञतरं वा अञ्ञतरं वा आपज्जित्वा न लभति भिक्खुनीहि सद्धिं संवासं यथा पुरे, तथा पच्छा, पाराजिका होति असंवासा. तत्थाय्यायो, पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थाय्यायो, तस्मा तुण्ही, एवमेतं धारयामीति.

पाराजिकं निट्ठितं.

सङ्घादिसेसुद्देसो

इमे खो पनाय्यायो सत्तरस सङ्घादिसेसा

धम्मा उद्देसं आगच्छन्ति.

उस्सयवादिकासिक्खापदं

१. या ¶ पन भिक्खुनी उस्सयवादिका विहरेय्य गहपतिना वा गहपतिपुत्तेन वा दासेन वा कम्मकारेन वा अन्तमसो समणपरिब्बाजकेनापि, अयम्पि भिक्खुनी पठमापत्तिकं धम्मं आपन्ना निस्सारणीयं सङ्घादिसेसं.

चोरीवुट्ठापिकासिक्खापदं

२. या पन भिक्खुनी जानं चोरिं वज्झं विदितं अनपलोकेत्वा राजानं वा सङ्घं वा गणं वा पूगं वा सेणिं वा, अञ्ञत्र कप्पा वुट्ठापेय्य, अयम्पि भिक्खुनी पठमापत्तिकं धम्मं आपन्ना निस्सारणीयं सङ्घादिसेसं.

एकगामन्तरगमनसिक्खापदं

३. या ¶ पन भिक्खुनी एका वा गामन्तरं गच्छेय्य, एका वा नदीपारं गच्छेय्य, एका वा रत्तिं विप्पवसेय्य, एका वा गणम्हा ओहियेय्य, अयम्पि भिक्खुनी पठमापत्तिकं धम्मं आपन्ना निस्सारणीयं सङ्घादिसेसं.

उक्खित्तकओसारणसिक्खापदं

४. या पन भिक्खुनी समग्गेन सङ्घेन उक्खित्तं भिक्खुनिं धम्मेन विनयेन सत्थुसासनेन अनपलोकेत्वा कारकसङ्घं, अनञ्ञाय गणस्स छन्दं ओसारेय्य, अयम्पि भिक्खुनी पठमापत्तिकं धम्मं आपन्ना निस्सारणीयं सङ्घादिसेसं.

भोजनपटिग्गहणपठमसिक्खापदं

५. या पन भिक्खुनी अवस्सुता अवस्सुतस्स पुरिसपुग्गलस्स हत्थतो खादनीयं वा, भोजनीयं वा सहत्था पटिग्गहेत्वा खादेय्य वा भुञ्जेय्य वा, अयम्पि भिक्खुनी पठमापत्तिकं धम्मं आपन्ना निस्सारणीयं सङ्घादिसेसं.

भोजनपटिग्गहणदुतियसिक्खापदं

६. या ¶ पन भिक्खुनी एवं वदेय्य ‘‘किं ते, अय्ये, एसो पुरिसपुग्गलो करिस्सति अवस्सुतो वा अनवस्सुतो वा, यतो त्वं अनवस्सुता, इङ्घ, अय्ये, यं ते एसो पुरिसपुग्गलो देति खादनीयं वा भोजनीयं वा, तं त्वं सहत्था पटिग्गहेत्वा खाद वा भुञ्ज वा’’ति, अयम्पि भिक्खुनी पठमापत्तिकं धम्मं आपन्ना निस्सारणीयं सङ्घादिसेसं.

सञ्चरित्तसिक्खापदं

७. या पन भिक्खुनी सञ्चरित्तं समापज्जेय्य इत्थिया वा पुरिसमतिं, पुरिसस्स वा इत्थिमतिं, जायत्तने वा जारत्तने वा अन्तमसो तङ्खणिकायपि, अयम्पि भिक्खुनी पठमापत्तिकं धम्मं आपन्ना निस्सारणीयं सङ्घादिसेसं.

दुट्ठदोससिक्खापदं

८. या पन भिक्खुनी भिक्खुनिं दुट्ठा दोसा अप्पतीता अमूलकेन पाराजिकेन धम्मेन अनुद्धंसेय्य ‘‘अप्पेव नाम नं इमम्हा ब्रह्मचरिया चावेय्य’’न्ति, ततो अपरेन समयेन समनुग्गाहीयमाना वा अस मनुग्गाहीयमाना वा अमूलकञ्चेव तं अधिकरणं होति, भिक्खुनी च दोसं ¶ पतिट्ठाति, अयम्पि भिक्खुनी पठमापत्तिकं धम्मं आपन्ना निस्सारणीयं सङ्घादिसेसं.

अञ्ञभागियसिक्खापदं

९. या पन भिक्खुनी भिक्खुनिं दुट्ठा दोसा अप्पतीता अञ्ञभागियस्स अधिकरणस्स किञ्चिदेसं लेसमत्तं उपादाय पाराजिकेन धम्मेन अनुद्धंसेय्य ‘‘अप्पेव नाम नं इमम्हा ब्रह्मचरिया चावेय्य’’न्ति, ततो अपरेन समयेन समनुग्गाहीयमाना वा असमनुग्गाहीयमाना वा अञ्ञभागियञ्चेव तं अधिकरणं होति. कोचिदेसो लेसमत्तो उपादिन्नो, भिक्खुनी च दोसं पतिट्ठाति, अयम्पि भिक्खुनी पठमापत्तिकं धम्मं आपन्ना निस्सारणीयं सङ्घादिसेसं.

सिक्खंपच्चाचिक्खणसिक्खापदं

१०. या पन भिक्खुनी कुपिता अनत्तमना एवं वदेय्य ‘‘बुद्धं पच्चाचिक्खामि धम्मं पच्चाचिक्खामि, सङ्घं पच्चाचिक्खामि, सिक्खं पच्चाचिक्खामि, किन्नुमाव समणियो या समणियो सक्यधीतरो, सन्तञ्ञापि समणियो लज्जिनियो कुक्कुच्चिका सिक्खाकामा, तासाहं ¶ सन्तिके ब्रह्मचरियं चरिस्सामी’’ति. सा भिक्खुनी भिक्खुनीहि एवमस्स वचनीया ‘‘माय्ये कुपिता अनत्तमना एवं अवच ‘बुद्धं पच्चाचिक्खामि, धम्मं पच्चाचिक्खामि, सङ्घं पच्चाचिक्खामि, सिक्खं पच्चाचिक्खामि, किन्नुमाव समणियो या समणियो सक्यधीतरो, सन्तञ्ञापि समणियो लज्जिनियो कुक्कुच्चिका सिक्खाकामा, तासाहं सन्तिके ब्रह्मचरियं चरिस्सामी’ति, अभिरमाय्ये, स्वाक्खातो धम्मो, चर ब्रह्मचरियं सम्मा दुक्खस्स अन्तकिरियाया’’ति, एवञ्च सा भिक्खुनी भिक्खुनीहि वुच्चमाना तथेव पग्गण्हेय्य, सा भिक्खुनी भिक्खुनीहि यावततियं समनुभासितब्बा तस्स पटिनिस्सग्गाय, यावततियञ्चे समनुभासियमाना तं पटिनिस्सज्जेय्य, इच्चेतं कुसलं, नो चे पटिनिस्सज्जेय्य, अयम्पि भिक्खुनी यावततियकं धम्मं आपन्ना निस्सारणीयं सङ्घादिसेसं.

अधिकरणकुपितसिक्खापदं

११. या पन भिक्खुनी किस्मिञ्चिदेव अधिकरणे पच्चाकता कुपिता अनत्तमना एवं वदेय्य ‘‘छन्दगामिनियो च भिक्खुनियो, दोसगामिनियो च भिक्खुनियो, मोहगामिनियो च भिक्खुनियो, भयगामिनियो च भिक्खुनियो’’ति, सा भिक्खुनी भिक्खुनीहि एवमस्स वचनीया ‘‘माय्ये, किस्मिञ्चिदेव अधिकरणे पच्चाकता कुपिता अनत्तमना एवं अवच ‘छन्दगामिनियो ¶ च भिक्खुनियो, दोसगामिनियो च भिक्खुनियो, मोहगामिनियो च भिक्खुनियो, भयगामिनियो च भिक्खुनियो’ति, अय्या खो छन्दापि गच्छेय्य, दोसापि गच्छेय्य, मोहापि गच्छेय्य, भयापि गच्छेय्या’’ति. एवञ्च सा भिक्खुनी भिक्खुनीहि वुच्चमाना तथेव पग्गण्हेय्य, सा भिक्खुनी भिक्खुनीहि यावततियं समनुभासितब्बा तस्स पटिनिस्सग्गाय, यावततियञ्चे समनुभासियमाना तं पटिनिस्सज्जेय्य, इच्चेतं कुसलं, नो चे पटिनिस्सज्जेय्य, अयम्पि भिक्खुनी यावततियकं धम्मं आपन्ना निस्सारणीयं सङ्घादिसेसं.

पापसमाचारपठमसिक्खापदं

१२. भिक्खुनियो पनेव संसट्ठा विहरन्ति पापाचारा पापसद्दा पापसिलोका भिक्खुनिसङ्घस्स विहेसिका अञ्ञमञ्ञिस्सा वज्जप्पटिच्छादिका, ता भिक्खुनियो भिक्खुनीहि एवमस्सु वचनीया ‘‘भगिनियो खो संसट्ठा विहरन्ति पापाचारा पापसद्दा पापसिलोका भिक्खुनिसङ्घस्स विहेसिका अञ्ञमञ्ञिस्सा वज्जप्पटिच्छादिका, विविच्चथाय्ये, विवेकञ्ञेव भगिनीनं सङ्घो वण्णेती’’ति, एवञ्च ता भिक्खुनियो भिक्खुनीहि वुच्चमाना तथेव पग्गण्हेय्युं, ता भिक्खुनियो भिक्खुनीहि यावततियं समनुभासितब्बा तस्स पटिनिस्सग्गाय, यावततियञ्चे ¶ समनुभासियमाना तं पटिनिस्सज्जेय्युं, इच्चेतं कुसलं, नो चे पटिनिस्सज्जेय्युं, इमापि भिक्खुनियो यावततियकं धम्मं आपन्ना निस्सारणीयं सङ्घादिसेसं.

पापसमाचारदुतियसिक्खापदं

१३. या पन भिक्खुनी एवं वदेय्य ‘‘संसट्ठाव, अय्ये, तुम्हे विहरथ, मा तुम्हे नाना विहरित्थ, सन्ति सङ्घे अञ्ञापि भिक्खुनियो एवाचारा एवंसद्दा एवंसिलोका भिक्खुनिसङ्घस्स विहेसिका अञ्ञमञ्ञिस्सा वज्जप्पटिच्छादिका, ता सङ्घो न किञ्चि आह तुम्हञ्ञेव सङ्घो उञ्ञाय परिभवेन अक्खन्तिया वेभस्सिया दुब्बल्या एवमाह – ‘भगिनियो खो संसट्ठा विहरन्ति पापाचारा पापसद्दा पापसिलोका भिक्खुनिसङ्घस्स विहेसिका अञ्ञमञ्ञिस्सा वज्जप्पटिच्छादिका, विविच्चथाय्ये, विवेकञ्ञेव भगिनीनं सङ्घो वण्णेती’’’ति, सा भिक्खुनी भिक्खुनीहि एवमस्स वचनीया ‘‘माय्ये, एवं अवच, संसट्ठाव अय्ये तुम्हे विहरथ, मा तुम्हे नाना विहरित्थ, सन्ति सङ्घे अञ्ञापि भिक्खुनियो एवाचारा एवंसद्दा एवंसिलोका भिक्खुनिसङ्घस्स विहेसिका अञ्ञमञ्ञिस्सा वज्जप्पटिच्छादिका, ता ¶ सङ्घो न किञ्चि आह, तुम्हञ्ञेव सङ्घो उञ्ञाय परिभवेन अक्खन्तिया वेभस्सिया दुब्बल्या एवमाह – ‘भगिनियो खो संसट्ठा विहरन्ति पापाचारा पापसद्दा पापसिलोका भिक्खुनिसङ्घस्स विहेसिका अञ्ञमञ्ञिस्सा वज्जप्पटिच्छादिका, विविच्चथाय्ये, विवेकञ्ञेव भगिनीनं सङ्घो वण्णेती’’’ति, एवञ्च सा भिक्खुनी भिक्खुनीहि वुच्चमाना तथेव पग्गण्हेय्य, सा भिक्खुनी भिक्खुनीहि यावततियं समनुभासितब्बा तस्स पटिनिस्सग्गाय, यावततियञ्चे समनुभासियमाना तं पटिनिस्सज्जेय्य, इच्चेतं कुसलं, नो चे पटिनिस्सज्जेय्य, अयम्पि भिक्खुनी यावततियकं धम्मं आपन्ना निस्सारणीयं सङ्घादिसेसं.

सङ्घभेदकसिक्खापदं

१४. या पन भिक्खुनी समग्गस्स सङ्घस्स भेदाय परक्कमेय्य, भेदनसंवत्तनिकं वा अधिकरणं समादाय पग्गय्ह तिट्ठेय्य, सा भिक्खुनी भिक्खुनीहि एवमस्स वचनीया ‘‘माय्या, समग्गस्स सङ्घस्स भेदाय परक्कमि, भेदनसंवत्तनिकं वा अधिकरणं समादाय पग्गय्ह अट्ठासि, समेताय्या, सङ्घेन, समग्गो हि सङ्घो सम्मोदमानो अविवदमानो एकुद्देसो फासु विहरती’’ति. एवञ्च सा भिक्खुनी भिक्खुनीहि वुच्चमाना तथेव पग्गण्हेय्य, सा भिक्खुनी भिक्खुनीहि यावततियं समनुभासितब्बा तस्स पटिनिस्सग्गाय, यावततियञ्चे समनुभासियमाना ¶ तं पटिनिस्सज्जेय्य, इच्चेतं कुसलं. नो चे पटिनिस्सज्जेय्य, अयम्पि भिक्खुनी यावततियकं धम्मं आपन्ना निस्सारणीयं सङ्घादिसेसं.

भेदानुवत्तकसिक्खापदं

१५. तस्सायेव खो पन भिक्खुनिया भिक्खुनियो होन्ति अनुवत्तिका वग्गवादिका एका वा द्वे वा तिस्सो वा, ता एवं वदेय्युं ‘‘माय्यायो, एतं भिक्खुनिं किञ्चि अवचुत्थ धम्मवादिनी चेसा भिक्खुनी, विनयवादिनी चेसा भिक्खुनी, अम्हाकञ्चेसा भिक्खुनी छन्दञ्च रुचिञ्च आदाय वोहरति, जानाति, नो भासति, अम्हाकम्पेतं खमती’’ति, ता भिक्खुनियो भिक्खुनीहि एवमस्सु वचनीया ‘‘माय्यायो, एवं अवचुत्थ, न चेसा भिक्खुनी धम्मवादिनी, न चेसा भिक्खुनी विनयवादिनी, माय्यानम्पि सङ्घभेदो रुच्चित्थ, समेताय्यानं सङ्घेन, समग्गो हि सङ्घो सम्मोदमानो अविवदमानो एकुद्देसो फासु विहरती’’ति, एवञ्च ता भिक्खुनियो भिक्खुनीहि वुच्चमाना तथेव पग्गण्हेय्युं, ता भिक्खुनियो भिक्खुनीहि ¶ यावततियं समनुभासितब्बा तस्स पटिनिस्सग्गाय, यावततियञ्चे समनुभासियमाना तं पटिनिस्सज्जेय्युं. इच्चेतं कुसलं. नो चे पटिनिस्सज्जेय्युं, इमापि भिक्खुनियो यावततियकं धम्मं आपन्ना निस्सारणीयं सङ्घादिसेसं.

दुब्बचसिक्खापदं

१६. भिक्खुनी पनेव दुब्बचजातिका होति उद्देसपरियापन्नेसु सिक्खापदेसु भिक्खुनीहि सहधम्मिकं वुच्चमाना अत्तानं अवचनीयं करोति ‘‘मा मं अय्यायो किञ्चि अवचुत्थ कल्याणं वा पापकं वा, अहम्पाय्यायो, न किञ्चि वक्खामि कल्याणं वा पापकं वा, विरमथाय्यायो, मम वचनाया’’ति, सा भिक्खुनी भिक्खुनीहि एवमस्स वचनीया ‘‘माय्या, अत्तानं अवचनीयं अकासि, वचनीयमेव, अय्या, अत्तानं करोतु, अय्यापि भिक्खुनियो वदतु सहधम्मेन, भिक्खुनियोपि अय्यं वक्खन्ति सहधम्मेन, एवं संवद्धा हि तस्स भगवतो परिसा यदिदं अञ्ञमञ्ञवचनेन अञ्ञमञ्ञवुट्ठापनेना’’ति. एवञ्च सा भिक्खुनी भिक्खुनीहि वुच्चमाना तथेव पग्गण्हेय्य, सा भिक्खुनी भिक्खुनीहि यावततियं समनुभासितब्बा तस्स पटिनिस्सग्गाय, यावततियञ्चे समनुभासियमाना तं पटिनिस्सज्जेय्य, इच्चेतं कुसलं. नो चे पटिनिस्सज्जेय्य, अयम्पि भिक्खुनी यावततियकं धम्मं आपन्ना निस्सारणीयं सङ्घादिसेसं.

कुलदूसकसिक्खापदं

१७. भिक्खुनी ¶ पनेव अञ्ञतरं गामं वा निगमं वा उपनिस्साय विहरति कुलदूसिका पापसमाचारा, तस्सा खो पापका समाचारा दिस्सन्ति चेव सुय्यन्ति च, कुलानि च ताय दुट्ठानि दिस्सन्ति चेव सुय्यन्ति च, सा भिक्खुनी भिक्खुनीहि एवमस्स वचनीया ‘‘अय्या, खो कुलदूसिका पापसमाचारा, अय्याय खो पापका समाचारा दिस्सन्ति चेव सुय्यन्ति च, कुलानि चाय्याय, दुट्ठानि दिस्सन्ति चेव सुय्यन्ति च, पक्कमताय्या इमम्हा आवासा, अलं ते इध वासेना’’ति. एवञ्च सा भिक्खुनी भिक्खुनीहि वुच्चमाना ता भिक्खुनियो एवं वदेय्य ‘‘छन्दगामिनियो च भिक्खुनियो, दोसगामिनियो च भिक्खुनियो, मोहगामिनियो च भिक्खुनियो, भयगामिनियो च भिक्खुनियो, तादिसिकाय आपत्तिया एकच्चं पब्बाजेन्ति एकच्चं न पब्बाजेन्ती’’ति, सा भिक्खुनी भिक्खुनीहि एवमस्स वचनीया ‘‘माय्या, एवं अवच, न च भिक्खुनियो छन्दगामिनियो, न च भिक्खुनियो दोसगामिनियो ¶ , न च भिक्खुनियो मोहगामिनियो, न च भिक्खुनियो भयगामिनियो, अय्या खो कुलदूसिका पापसमाचारा, अय्याय खो पापका समाचारा दिस्सन्ति चेव सुय्यन्ति च, कुलानि चाय्याय दुट्ठानि दिस्सन्ति चेव सुय्यन्ति च, पक्कमताय्या, इमम्हा आवासा अलं ते इध वासेना’’ति. एवञ्च सा भिक्खुनी भिक्खुनीहि वुच्चमाना तथेव पग्गण्हेय्य, सा भिक्खुनी भिक्खुनीहि यावततियं समनुभासितब्बा तस्स पटिनिस्सग्गाय, यावततियञ्चे समनुभासियमाना तं पटिनिस्सज्जेय्य, इच्चेतं कुसलं. नो चे पटिनिस्सज्जेय्य, अयम्पि भिक्खुनी यावततियकं धम्मं आपन्ना निस्सारणीयं सङ्घादिसेसं.

उद्दिट्ठा खो अय्यायो सत्तरस सङ्घादिसेसा धम्मा नव पठमापत्तिका, अट्ठ यावततियका,

येसं भिक्खुनी अञ्ञतरं वा अञ्ञतरं वा आपज्जति, ताय भिक्खुनिया उभतोसङ्घे पक्खमानत्तं चरितब्बं. चिण्णमानत्ता भिक्खुनी यत्थ सिया वीसतिगणो भिक्खुनिसङ्घो, तत्थ सा भिक्खुनी अब्भेतब्बा. एकायपि चे ऊनो वीसतिगणो भिक्खुनिसङ्घो तं भिक्खुनिं अब्भेय्य, सा च भिक्खुनी अनब्भिता, ता च भिक्खुनियो गारय्हा, अयं तत्थ सामीचि. तत्थाय्यायो पुच्छामि, कच्चित्थ परिसुद्धा, दुतियम्पि, पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थाय्यायो, तस्मा तुण्ही, एवमेतं धारयामीति.

सङ्घादिसेसो निट्ठितो.

निस्सग्गिय पाचित्तिया

इमे खो पनाय्यायो तिंस निस्सग्गिया पाचित्तिया

धम्मा उद्देसं आगच्छन्ति.

पत्तसन्निचयसिक्खापदं

१. या ¶ पन भिक्खुनी पत्तसन्निचयं करेय्य, निस्सग्गियं पाचित्तियं.

अकालचीवरभाजनसिक्खापदं

२. या पन भिक्खुनी अकालचीवरं ‘‘कालचीवर’’न्ति अधिट्ठहित्वा भाजापेय्य, निस्सग्गियं पाचित्तियं.

चीवरपरिवत्तनसिक्खापदं

३. या ¶ पन भिक्खुनी भिक्खुनिया सद्धिं चीवरं परिवत्तेत्वा सा पच्छा एवं वदेय्य ‘‘हन्दाय्ये, तुय्हं चीवरं, आहर मेतं चीवरं, यं तुय्हं तुय्हमेवेतं, यं मय्हं मय्हमेवेतं, आहर मेतं चीवरं, सकं पच्चाहरा’’ति अच्छिन्देय्य वा अच्छिन्दापेय्य वा, निस्सग्गियं पाचित्तियं.

अञ्ञविञ्ञापनसिक्खापदं

४. या पन भिक्खुनी अञ्ञं विञ्ञापेत्वा अञ्ञं विञ्ञापेय्य, निस्सग्गियं पाचित्तियं.

अञ्ञचेतापन सिक्खापदं

५. या पन भिक्खुनी अञ्ञं चेतापेत्वा अञ्ञं चेतापेय्य, निस्सग्गियं पाचित्तियं.

पठमसङ्घिकचेतापनसिक्खापदं

६. या पन भिक्खुनी अञ्ञदत्थिकेन परिक्खारेन अञ्ञुद्दिसिकेन सङ्घिकेन अञ्ञं चेतापेय्य, निस्सग्गियं पाचित्तियं.

दुतियसङ्घिकचेतापनसिक्खापदं

७. या ¶ पन भिक्खुनी अञ्ञदत्थिकेन परिक्खारेन अञ्ञुद्दिसिकेन सङ्घिकेन सञ्ञाचिकेन अञ्ञं चेतापेय्य, निस्सग्गियं पाचित्तियं.

पठमगणिकचेतापनसिक्खापदं

८. या पन भिक्खुनी अञ्ञदत्थिकेन परिक्खारेन अञ्ञुद्दिसिकेन महाजनिकेन अञ्ञं चेतापेय्य, निस्सग्गियं पाचित्तियं.

दुतियगणिकचेतापनसिक्खापदं

९. या पन भिक्खुनी अञ्ञदत्थिकेन परिक्खारेन अञ्ञुद्दिसिकेन महाजनिकेन सञ्ञाचिकेन अञ्ञं चेतापेय्य, निस्सग्गियं पाचित्तियं.

पुग्गलिकचेतापनसिक्खापदं

१०. या पन भिक्खुनी अञ्ञदत्थिकेन परिक्खारेन अञ्ञुद्दिसिकेन पुग्गलिकेन सञ्ञाचिकेन अञ्ञं चेतापेय्य, निस्सग्गियं पाचित्तियं.

पत्तवग्गो पठमो.

गरुपावुरणसिक्खापदं

११. गरुपावुरणं ¶ पन भिक्खुनिया चेतापेन्तिया चतुक्कंसपरमं चेतापेतब्बं. ततो चे उत्तरि चेतापेय्य, निस्सग्गियं पाचित्तियं.

लहुपावुरणसिक्खापदं

१२. लहुपावुरणं पन भिक्खुनिया चेतापेन्तिया अड्ढतेय्यकंसपरमं चेतापेतब्बं. ततो चे उत्तरि चेतापेय्य, निस्सग्गियं पाचित्तियं.

कथिनसिक्खापदं

१३. निट्ठितचीवरस्मिं भिक्खुनिया उब्भतस्मिं कथिने दसाहपरमं अतिरेकचीवरं धारेतब्बं. तं अतिक्कामेन्तिया, निस्सग्गियं पाचित्तियं.

उदोसितसिक्खापदं

१४. निट्ठितचीवरस्मिं ¶ भिक्खुनिया उब्भतस्मिं कथिने एकरत्तम्पि चे भिक्खुनी तिचीवरेन विप्पवसेय्य, अञ्ञत्र भिक्खुनिसम्मुतिया निस्सग्गियं पाचित्तियं.

अकालचीवरसिक्खापदं

१५. निट्ठितचीवरस्मिं भिक्खुनिया उब्भतस्मिं कथिने भिक्खुनिया पनेव अकालचीवरं उप्पज्जेय्य, आकङ्खमानाय भिक्खुनिया पटिग्गहेतब्बं, पटिग्गहेत्वा खिप्पमेव कारेतब्बं, नो चस्स पारिपूरि, मासपरमं ताय भिक्खुनिया तं चीवरं निक्खिपितब्बं ऊनस्स पारिपूरिया सतिया पच्चासाय. ततो चे उत्तरि निक्खिपेय्य सतियापि पच्चासाय, निस्सग्गियं पाचित्तियं.

अञ्ञातकविञ्ञत्तिसिक्खापदं

१६. या पन भिक्खुनी अञ्ञातकं गहपतिं वा गहपतानिं वा चीवरं विञ्ञापेय्य अञ्ञत्र समया, निस्सग्गियं पाचित्तियं. तत्थायं समयो अच्छिन्नचीवरा वा होति भिक्खुनी, नट्ठचीवरा वा, अयं तत्थ समयो.

ततुत्तरिसिक्खापदं

१७. तञ्चे अञ्ञातको गहपति वा गहपतानी वा बहूहि चीवरेहि अभिहट्ठुं पवारेय्य, सन्तरुत्तरपरमं ताय भिक्खुनिया ततो चीवरं सादितब्बं. ततो चे उत्तरि सादियेय्य, निस्सग्गियं पाचित्तियं.

पठमउपक्खटसिक्खापदं

१८. भिक्खुनिं ¶ पनेव उद्दिस्स अञ्ञातकस्स गहपतिस्स वा गहपतानिया वा चीवरचेतापन्नं उपक्खटं होति ‘‘इमिना चीवरचेतापन्नेन चीवरं चेतापेत्वा इत्थन्नामं भिक्खुनिं चीवरेन अच्छादेस्सामी’’ति. तत्र चेसा भिक्खुनी पुब्बे अप्पवारिता उपसङ्कमित्वा चीवरे विकप्पं आपज्जेय्य ‘‘साधु वत, मं आयस्मा इमिना चीवरचेतापन्नेन एवरूपं वा एवरूपं वा चीवरं चेतापेत्वा अच्छादेही’’ति कल्याणकम्यतं उपादाय, निस्सग्गियं पाचित्तियं.

दुतियउपक्खटसिक्खापदं

१९. भिक्खुनिं ¶ पनेव उद्दिस्स उभिन्नं अञ्ञातकानं गहपतीनं वा गहपतानीनं वा पच्चेकचीवरचेतापन्नानि उपक्खटानि होन्ति ‘‘इमेहि मयं पच्चेकचीवरचेतापन्नेहि पच्चेकचीवरानि चेतापेत्वा इत्थन्नामं भिक्खुनिं चीवरेहि अच्छादेस्सामा’’ति. तत्र चेसा भिक्खूनी पुब्बे अप्पवारिता उपसङ्कमित्वा चीवरे विकप्पं आपज्जेय्य ‘‘साधु वत मं आयस्मन्तो इमेहि पच्चेकचीवरचेतापन्नेहि एवरूपं वा एवरूपं वा चीवरं चेतापेत्वा अच्छादेथ उभोव सन्ता एकेना’’ति कल्याणकम्यतं उपादाय, निस्सग्गियं पाचित्तियं.

राजसिक्खापदं

२०. भिक्खुनिं पनेव उद्दिस्स राजा वा राजभोग्गो वा ब्राह्मणो वा गहपतिको वा दूतेन चीवरचेतापन्नं पहिणेय्य ‘‘इमिना चीवरचेतापन्नेन चीवरं चेतापेत्वा इत्थन्नामं भिक्खुनिं चीवरेन अच्छादेही’’ति. सो चे दूतो तं भिक्खुनिं उपसङ्कमित्वा एवं वदेय्य ‘‘इदं खो, अय्ये, अय्यं उद्दिस्स चीवरचेतापन्नं आभतं, पटिग्गण्हाताय्या चीवरचेतापन्न’’न्ति. ताय भिक्खुनिया सो दूतो एवमस्स वचनीयो ‘‘न खो मयं, आवुसो, चीवरचेतापन्नं पटिग्गण्हाम, चीवरञ्च खो मयं पटिग्गण्हाम कालेन कप्पिय’’न्ति. सो चे दूतो तं भिक्खुनिं एवं वदेय्य ‘‘अत्थि पनाय्याय, कोचि वेय्यावच्चकरो’’ति, चीवरत्थिकाय, भिक्खवे, भिक्खुनिया वेय्यावच्चकरो निद्दिसितब्बो आरामिको वा उपासको वा ‘‘एसो खो, आवुसो, भिक्खुनीनं वेय्यावच्चकरो’’ति. सो चे दूतो तं वेय्यावच्चकरं सञ्ञापेत्वा तं भिक्खुनिं उपसङ्कमित्वा एवं वदेय्य ‘‘यं खो, अय्ये, अय्या वेय्यावच्चकरं निद्दिसि, सञ्ञत्तो सो मया, उपसङ्कमताय्या ¶ कालेन, चीवरेन तं अच्छादेस्सती’’ति. चीवरत्थिकाय, भिक्खवे, भिक्खुनिया वेय्यावच्चकरो उपसङ्कमित्वा द्वत्तिक्खत्तुं चोदेतब्बो सारेतब्बो ‘‘अत्थो मे, आवुसो, चीवरेना’’ति, द्वत्तिक्खत्तुं चोदयमाना सारयमाना तं चीवरं अभिनिप्फादेय्य, इच्चेतं कुसलं, नो चे अभिनिप्फादेय्य, चतुक्खत्तुं पञ्चक्खत्तुं छक्खत्तुपरमं तुण्हीभूताय उद्दिस्स ठातब्बं, चतुक्खत्तुं पञ्चक्खत्तुं छक्खत्तुपरमं तुण्हीभूता उद्दिस्स तिट्ठमाना तं चीवरं अभिनिप्फादेय्य, इच्चेतं कुसलं. ततो चे उत्तरि वायममाना तं चीवरं अभिनिप्फादेय्य, निस्सग्गियं पाचित्तियं. नो चे अभिनिप्फादेय्य, यतस्सा चीवरचेतापन्नं आभतं, तत्थ सामं वा गन्तब्बं, दूतो वा पाहेतब्बो ‘‘यं खो तुम्हे आयस्मन्तो भिक्खुनिं उद्दिस्स चीवरचेतापन्नं ¶ पहिणित्थ, न तं तस्सा भिक्खुनिया किञ्चि अत्थं अनुभोति, युञ्जन्तायस्मन्तो सकं, मा वो सकं विनस्सा’’ति, अयं तत्थ सामीचि.

चीवरवग्गो दुतियो.

रूपियसिक्खापदं

२१. या पन भिक्खुनी जातरूपरजतं उग्गण्हेय्य वा उग्गण्हापेय्य वा उपनिक्खित्तं वा सादियेय्य, निस्सग्गियं पाचित्तियं.

रूपियसंवोहारसिक्खापदं

२२. या पन भिक्खुनी नानप्पकारकं रूपियसंवोहारं समापज्जेय्य, निस्सग्गियं पाचित्तियं.

कयविक्कयसिक्खापदं

२३. या पन भिक्खुनी नानप्पकारकं कयविक्कयं समापज्जेय्य, निस्सग्गियं पाचित्तियं.

ऊनपञ्चबन्धनसिक्खापदं

२४. या पन भिक्खुनी ऊनपञ्चबन्धनेन पत्तेन अञ्ञं नवं पत्तं चेतापेय्य, निस्सग्गियं पाचित्तियं. ताय भिक्खुनिया सो पत्तो भिक्खुनिपरिसाय निस्सज्जितब्बो, यो च तस्सा भिक्खुनिपरिसाय पत्तपरियन्तो, सो तस्सा भिक्खुनिया पदातब्बो ‘‘अयं ते भिक्खुनि पत्तो यावभेदनाय धारेतब्बो’’ति, अयं तत्थ सामीचि.

भेसज्जसिक्खापदं

२५. यानि ¶ खो पन तानि गिलानानं भिक्खुनीनं पटिसायनीयानि भेसज्जानि, सेय्यथिदं – सप्पि नवनीतं तेलं मधु फाणितं, तानि पटिग्गहेत्वा सत्ताहपरमं सन्निधिकारकं परिभुञ्जितब्बानि. तं अतिक्कामेन्तिया, निस्सग्गियं पाचित्तियं.

चीवरअच्छिन्दनसिक्खापदं

२६. या पन भिक्खुनी भिक्खुनिया सामं चीवरं दत्वा कुपिता अनत्तमना अच्छिन्देय्य वा अच्छिन्दापेय्य वा, निस्सग्गियं पाचित्तियं.

सुत्तविञ्ञत्तिसिक्खापदं

२७. या ¶ पन भिक्खुनी सामं सुत्तं विञ्ञापेत्वा तन्तवायेहि चीवरं वायापेय्य, निस्सग्गियं पाचित्तियं.

महापेसकारसिक्खापदं

२८. भिक्खुनिं पनेव उद्दिस्स अञ्ञातको गहपति वा गहपतानी वा तन्तवायेहि चीवरं वायापेय्य, तत्र चेसा भिक्खुनी पुब्बे अप्पवारिता तन्तवाये उपसङ्कमित्वा चीवरे विकप्पं आपज्जेय्य ‘‘इदं खो आवुसो चीवरं मं उद्दिस्स विय्यति, आयतञ्च करोथ, वित्थतञ्च अप्पितञ्च सुवीतञ्च सुप्पवायितञ्च सुविलेखितञ्च सुवितच्छितञ्च करोथ, अप्पेव नाम मयम्पि आयस्मन्तानं किञ्चिमत्तं अनुपदज्जेय्यामा’’ति, एवञ्च सा भिक्खुनी वत्वा किञ्चिमत्तं अनुपदज्जेय्य अन्तमसो पिण्डपातमत्तम्पि, निस्सग्गियं पाचित्तियं.

अच्चेकचीवरसिक्खापदं

२९. दसाहानागतं कत्तिकतेमासिकपुण्णमं भिक्खुनिया पनेव अच्चेकचीवरं उप्पज्जेय्य, अच्चेकं मञ्ञमानाय भिक्खुनिया पटिग्गहेतब्बं, पटिग्गहेत्वा याव चीवरकालसमयं निक्खिपितब्बं. ततो चे उत्तरि निक्खिपेय्य, निस्सग्गियं पाचित्तियं.

परिणतसिक्खापदं

३०. या पन भिक्खुनी जानं सङ्घिकं लाभं परिणतं अत्तनो परिणामेय्य, निस्सग्गियं पाचित्तियं.

पत्तवग्गो ततियो.

उद्दिट्ठा ¶ खो, अय्यायो, तिंस निस्सग्गिया पाचित्तिया धम्मा. तत्थाय्यायो, पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थाय्यायो, तस्मा तुण्ही, एवमेतं धारयामीति.

निस्सग्गियपाचित्तिया निट्ठिता.

सुद्धपाचित्तिया

इमे खो पनाय्यायो, छसट्ठिसता पाचित्तिया

धम्मा उद्देसं आगच्छन्ति.

लसुणसिक्खापदं

१. या ¶ पन भिक्खुनी लसुणं खादेय्य पाचित्तियं.

सम्बाधलोमसिक्खापदं

२. या पन भिक्खुनी सम्बाधे लोमं संहरापेय्य, पाचित्तियं.

तलघातकसिक्खापदं

३. तलघातके पाचित्तियं.

जतुमट्ठकसिक्खापदं

४. जतुमट्ठके पाचित्तियं.

उदकसुद्धिकसिक्खापदं

५. उदकसुद्धिकं पन भिक्खुनिया आदियमानाय द्वङ्गुलपब्बपरमं आदातब्बं. तं अतिक्कामेन्तिया पाचित्तियं.

उपतिट्ठनसिक्खापदं

६. या पन भिक्खुनी भिक्खुस्स भुञ्जन्तस्स पानीयेन वा विधूपनेन वा उपतिट्ठेय्य, पाचित्तियं.

आमकधञ्ञसिक्खापदं

७. या पन भिक्खुनी आमकधञ्ञं विञ्ञत्वा वा विञ्ञापेत्वा वा भज्जित्वा वा भज्जापेत्वा वा कोट्टेत्वा वा कोट्टापेत्वा वा पचित्वा वा पचापेत्वा वा भुञ्जेय्य, पाचित्तियं.

पठमउच्चारछड्डनसिक्खापदं

८. या ¶ ¶ पन भिक्खुनी उच्चारं वा पस्सावं वा सङ्कारं वा विघासं वा तिरोकुट्टे वा तिरोपाकारे वा छड्डेय्य वा छड्डापेय्य वा, पाचित्तियं.

दुतियउच्चारछड्डनसिक्खापदं

९. या पन भिक्खुनी उच्चारं वा पस्सावं वा सङ्कारं वा विघासं वा हरिते छड्डेय्य वा छड्डापेय्य वा, पाचित्तियं.

नच्चगीतसिक्खापदं

१०. या पन भिक्खुनी नच्चं वा गीतं वा वादितं वा दस्सनाय गच्छेय्य, पाचित्तियं.

लसुणवग्गो पठमो.

रत्तन्धकारसिक्खापदं

११. या पन भिक्खुनी रत्तन्धकारे अप्पदीपे पुरिसेन सद्धिं एकेनेका सन्तिट्ठेय्य वा सल्लपेय्य वा, पाचित्तियं.

पटिच्छन्नोकाससिक्खापदं

१२. या पन भिक्खुनी पटिच्छन्ने ओकासे पुरिसेन सद्धिं एकेनेका सन्तिट्ठेय्य वा सल्लपेय्य वा, पाचित्तियं.

अज्झोकाससल्लपनसिक्खापदं

१३. या पन भिक्खुनी अज्झोकासे पुरिसेन सद्धिं एकेनेका सन्तिट्ठेय्य वा सल्लपेय्य वा, पाचित्तियं.

दुतियिकउय्योजनसिक्खापदं

१४. या पन भिक्खुनी रथिकाय वा ब्यूहे वा सिङ्घाटके वा पुरिसेन सद्धिं एकेनेका सन्तिट्ठेय्य वा सल्लपेय्य वा निकण्णिकं वा जप्पेय्य दुतियिकं वा भिक्खुनिं उय्योजेय्य, पाचित्तियं.

अनापुच्छापक्कमनसिक्खापदं

१५. या ¶ पन भिक्खुनी पुरेभत्तं कुलानि उपसङ्कमित्वा आसने निसीदित्वा सामिके अनापुच्छा पक्कमेय्य, पाचित्तियं.

अनापुच्छाअभिनिसीदनसिक्खापदं

१६. या ¶ पन भिक्खुनी पच्छाभत्तं कुलानि उपसङ्कमित्वा सामिके अनापुच्छा आसने अभिनिसीदेय्य वा अभिनिपज्जेय्य वा, पाचित्तियं.

अनापुच्छासन्थरणसिक्खापदं

१७. या पन भिक्खुनी विकाले कुलानि उपसङ्कमित्वा सामिके अनापुच्छा सेय्यं सन्थरित्वा वा सन्थरापेत्वा वा अभिनिसीदेय्य वा अभिनिपज्जेय्य वा, पाचित्तियं.

परउज्झापनकसिक्खापदं

१८. या पन भिक्खुनी दुग्गहितेन दूपधारितेन परं उज्झापेय्य, पाचित्तियं.

परअभिसपनसिक्खापदं

१९. या पन भिक्खुनी अत्तानं वा परं वा निरयेन वा ब्रह्मचरियेन वा अभिसपेय्य, पाचित्तियं.

रोदनसिक्खापदं

२०. या पन भिक्खुनी अत्तानं वधित्वा वधित्वा रोदेय्य, पाचित्तियं.

रत्तन्धकारवग्गो दुतियो.

नग्गसिक्खापदं

२१. या पन भिक्खुनी नग्गा नहायेय्य, पाचित्तियं.

उदकसाटिकसिक्खापदं

२२. उदकसाटिकं पन भिक्खुनिया कारयमानाय पमाणिका कारेतब्बा, तत्रिदं पमाणं ¶ , दीघसो चतस्सो विदत्थियो सुगतविदत्थिया, तिरियं द्वे विदत्थियो. तं अतिक्कामेन्तिया छेदनकं पाचित्तियं.

चीवरसिब्बनसिक्खापदं

२३. या पन भिक्खुनी भिक्खुनिया चीवरं विसिब्बेत्वा वा विसिब्बापेत्वा वा सा पच्छा अनन्तरायिकिनी नेव सिब्बेय्य, न सिब्बापनाय उस्सुक्कं करेय्य अञ्ञत्र चतूहपञ्चाहा, पाचित्तियं.

सङ्घाटिचारसिक्खापदं

२४. या ¶ पन भिक्खुनी पञ्चाहिकं सङ्घाटिचारं अतिक्कामेय्य, पाचित्तियं.

चीवरसङ्कमनीयसिक्खापदं

२५. या पन भिक्खुनी चीवरसङ्कमनीयं धारेय्य, पाचित्तियं.

गणचीवरसिक्खापदं

२६. या पन भिक्खुनी गणस्स चीवरलाभं अन्तरायं करेय्य, पाचित्तियं.

पटिबाहनसिक्खापदं

२७. या पन भिक्खुनी धम्मिकं चीवरविभङ्गं पटिबाहेय्य, पाचित्तियं.

चीवरदानसिक्खापदं

२८. या पन भिक्खुनी अगारिकस्स वा परिब्बाजकस्स वा परिब्बाजिकाय वा समणचीवरं ददेय्य, पाचित्तियं.

कालअतिक्कमनसिक्खापदं

२९. या पन भिक्खुनी दुब्बलचीवरपच्चासाय चीवरकालसमयं अतिक्कामेय्य, पाचित्तियं.

कथिनुद्धारसिक्खापदं

३०. या ¶ पन भिक्खुनी धम्मिकं कथिनुद्धारं पटिबाहेय्य, पाचित्तियं.

नग्गवग्गो ततियो.

एकमञ्चतुवट्टनसिक्खापदं

३१. या पन भिक्खुनियो द्वे एकमञ्चे तुवट्टेय्युं, पाचित्तियं.

एकत्थरणतुवट्टनसिक्खापदं

३२. या पन भिक्खुनियो द्वे एकत्थरणपावुरणा तुवट्टेय्युं, पाचित्तियं.

अफासुकरणसिक्खापदं

३३. या पन भिक्खुनी भिक्खुनिया सञ्चिच्च अफासुं करेय्य, पाचित्तियं.

नउपट्ठापनसिक्खापदं

३४. या ¶ पन भिक्खुनी दुक्खितं सहजीविनिं नेव उपट्ठहेय्य, न उपट्ठापनाय उस्सुक्कं करेय्य, पाचित्तियं.

निक्कड्ढनसिक्खापदं

३५. या पन भिक्खुनी भिक्खुनिया उपस्सयं दत्वा कुपिता अनत्तमना निक्कड्ढेय्य वा निक्कड्ढापेय्य वा, पाचित्तियं.

संसट्ठसिक्खापदं

३६. या पन भिक्खुनी संसट्ठा विहरेय्य गहपतिना वा गहपतिपुत्तेन वा, सा भिक्खुनी भिक्खुनीहि एवमस्स वचनीया ‘‘माय्ये, संसट्ठा विहरि गहपतिनापि गहपतिपुत्तेनापि, विविच्चाय्ये, विवेकञ्ञेव भगिनिया सङ्घो वण्णेती’’ति. एवञ्च सा भिक्खुनी भिक्खुनीहि वुच्चमाना तथेव पग्गण्हेय्य, सा भिक्खुनी भिक्खुनीहि यावततियं समनुभासितब्बा तस्स पटिनिस्सग्गाय, यावततियञ्चे समनुभासियमाना तं पटिनिस्सज्जेय्य, इच्चेतं कुसलं. नो चे पटिनिस्सज्जेय्य, पाचित्तियं.

अन्तोरट्ठसिक्खापदं

३७. या ¶ पन भिक्खुनी अन्तोरट्ठे सासङ्कसम्मते सप्पटिभये असत्थिका चारिकं चरेय्य, पाचित्तियं.

तिरोरट्ठसिक्खापदं

३८. या पन भिक्खुनी तिरोरट्ठे सासङ्कसम्मते सप्पटिभये असत्थिका चारिकं चरेय्य, पाचित्तियं.

अन्तोवस्ससिक्खापदं

३९. या पन भिक्खुनी अन्तोवस्सं चारिकं चरेय्य, पाचित्तियं.

चारिकनपक्कमनसिक्खापदं

४०. या पन भिक्खुनी वस्संवुट्ठा चारिकं न पक्कमेय्य अन्तमसो छप्पञ्चयोजनानिपि, पाचित्तियं.

तुवट्टवग्गो चतुत्थो.

राजागारसिक्खापदं

४१. या ¶ पन भिक्खुनी राजागारं वा चित्तागारं वा आरामं वा उय्यानं वा पोक्खरणिं वा दस्सनाय गच्छेय्य, पाचित्तियं.

आसन्दिपरिभुञ्जनसिक्खापदं

४२. या पन भिक्खुनी आसन्दिं वा पल्लङ्कं वा परिभुञ्जेय्य, पाचित्तियं.

सुत्तकन्तनसिक्खापदं

४३. या पन भिक्खुनी सुत्तं कन्तेय्य, पाचित्तियं.

गिहिवेय्यावच्चसिक्खापदं

४४. या पन भिक्खुनी गिहिवेय्यावच्चं करेय्य, पाचित्तियं.

अधिकरणसिक्खापदं

४५. या ¶ पन भिक्खुनी भिक्खुनिया ‘‘एहाय्ये, इमं अधिकरणं वूपसमेही’’ति वुच्चमाना ‘‘साधू’’ति पटिस्सुणित्वा सा पच्छा अनन्तरायिकिनी नेव वूपसमेय्य, न वूपसमाय उस्सुक्कं करेय्य, पाचित्तियं.

भोजनदानसिक्खापदं

४६. या पन भिक्खुनी अगारिकस्स वा परिब्बाजकस्स वा परिब्बाजिकाय वा सहत्था खादनीयं वा भोजनीयं वा ददेय्य, पाचित्तियं.

आवसथचीवरसिक्खापदं

४७. या पन भिक्खुनी आवसथचीवरं अनिस्सज्जेत्वा परिभुञ्जेय्य, पाचित्तियं.

आवसथविहारसिक्खापदं

४८. या पन भिक्खुनी आवसथं अनिस्सज्जित्वा चारिकं पक्कमेय्य, पाचित्तियं.

तिरच्छानविज्जापरियापुणनसिक्खापदं

४९. या पन भिक्खुनी तिरच्छानविज्जं परियापुणेय्य, पाचित्तियं.

तिरच्छानविज्जावाचनसिक्खापदं

५०. या पन भिक्खुनी तिरच्छानविज्जं वाचेय्य, पाचित्तियं.

चित्तागारवग्गो पञ्चमो.

आरामपविसनसिक्खापदं

५१. या ¶ पन भिक्खुनी जानं सभिक्खुकं आरामं अनापुच्छा पविसेय्य, पाचित्तियं.

भिक्खुअक्कोसनसिक्खापदं

५२. या पन भिक्खुनी भिक्खुं अक्कोसेय्य वा परिभासेय्य वा, पाचित्तियं.

गणपरिभासनसिक्खापदं

५३. या ¶ पन भिक्खुनी चण्डीकता गणं परिभासेय्य, पाचित्तियं.

पवारितसिक्खापदं

५४. या पन भिक्खुनी निमन्तिता वा पवारिता वा खादनीयं वा भोजनीयं वा खादेय्य वा भुञ्जेय्य वा, पाचित्तियं.

कुलमच्छरिनीसिक्खापदं

५५. या पन भिक्खुनी कुलमच्छरिनी अस्स, पाचित्तियं.

अभिक्खुकावाससिक्खापदं

५६. या पन भिक्खुनी अभिक्खुके आवासे वस्सं वसेय्य, पाचित्तियं.

अपवारणासिक्खापदं

५७. या पन भिक्खुनी वस्संवुट्ठा उभतोसङ्घे तीहि ठानेहि न पवारेय्य दिट्ठेन वा सुतेन वा परिसङ्काय वा, पाचित्तियं.

ओवादसिक्खापदं

५८. या पन भिक्खुनी ओवादाय वा संवासाय वा न गच्छेय्य, पाचित्तियं.

ओवादूपसङ्कमनसिक्खापदं

५९. अन्वद्धमासं भिक्खुनिया भिक्खुसङ्घतो द्वे धम्मा पच्चासीसितब्बा उपोसथपुच्छकञ्च ओवादूपसङ्कमनञ्च. तं अतिक्कामेन्तिया पाचित्तियं.

पसाखेजातसिक्खापदं

६०. या पन भिक्खुनी पसाखे जातं गण्डं वा रुधितं वा अनपलोकेत्वा सङ्घं वा गणं वा पुरिसेन सद्धिं एकेनेका भेदापेय्य वा ¶ फालापेय्य वा धोवापेय्य वा आलिम्पापेय्य वा बन्धापेय्य वा मोचापेय्य वा, पाचित्तियं.

आरामवग्गो छट्ठो.

गब्भिनीसिक्खापदं

६१. या ¶ पन भिक्खुनी गब्भिनिं वुट्ठापेय्य, पाचित्तियं.

पायन्तीसिक्खापदं

६२. या पन भिक्खुनी पायन्तिं वुट्ठापेय्य, पाचित्तियं.

पठमसिक्खमानसिक्खापदं

६३. या पन भिक्खुनी द्वे वस्सानि छसु धम्मेसु असिक्खितसिक्खं सिक्खमानं वुट्ठापेय्य, पाचित्तियं.

दुतियसिक्खमानसिक्खापदं

६४. या पन भिक्खुनी द्वे वस्सानि छसु धम्मेसु सिक्खितसिक्खं सिक्खमानं सङ्घेन असम्मतं वुट्ठापेय्य, पाचित्तियं.

पठमगिहिगतसिक्खापदं

६५. या पन भिक्खुनी ऊनद्वादसवस्सं गिहिगतं वुट्ठापेय्य, पाचित्तियं.

दुतियगिहिगतसिक्खापदं

६६. या पन भिक्खुनी परिपुण्णद्वादसवस्सं गिहिगतं द्वे वस्सानि छसु धम्मेसु असिक्खितसिक्खं वुट्ठापेय्य, पाचित्तियं.

ततियगिहिगतसिक्खापदं

६७. या पन भिक्खुनी परिपुण्णद्वादसवस्सं गिहिगतं द्वे वस्सानि छसु धम्मेसु सिक्खितसिक्खं सङ्घेन असम्मतं वुट्ठापेय्य, पाचित्तियं.

पठमसहजीविनीसिक्खापदं

६८. या पन भिक्खुनी सहजीविनिं वुट्ठापेत्वा द्वे वस्सानि नेव अनुग्गण्हेय्य न अनुग्गण्हापेय्य, पाचित्तियं.

पवत्तिनीनानुबन्धनसिक्खापदं

६९. या पन भिक्खुनी वुट्ठापितं पवत्तिनिं द्वे वस्सानि नानुबन्धेय्य, पाचित्तियं.

दुतियसहजीविनीसिक्खापदं

७०. या ¶ ¶ पन भिक्खुनी सहजीविनिं वुट्ठापेत्वा नेव वूपकासेय्य न वूपकासापेय्य अन्तमसो छप्पञ्चयोजनानिपि, पाचित्तियं.

गब्भिनिवग्गो सत्तमो.

पठमकुमारिभूतसिक्खापदं

७१. या पन भिक्खुनी ऊनवीसतिवस्सं कुमारिभूतं वुट्ठापेय्य, पाचित्तियं.

दुतियकुमारिभूतसिक्खापदं

७२. या पन भिक्खुनी परिपुण्णवीसतिवस्सं कुमारिभूतं द्वे वस्सानि छसु धम्मेसु असिक्खितसिक्खं वुट्ठापेय्य, पाचित्तियं.

ततियकुमारिभूतसिक्खापदं

७३. या पन भिक्खुनी परिपुण्णवीसतिवस्सं कुमारिभूतं द्वे वस्सानि छसु धम्मेसु सिक्खितसिक्खं सङ्घेन असम्मतं वुट्ठापेय्य, पाचित्तियं.

ऊनद्वादसवस्ससिक्खापदं

७४. या पन भिक्खुनी ऊनद्वादसवस्सा वुट्ठापेय्य, पाचित्तियं.

परिपुण्णद्वादसवस्ससिक्खापदं

७५. या पन भिक्खुनी परिपुण्णद्वादसवस्सा सङ्घेन असम्मता वुट्ठापेय्य, पाचित्तियं.

खिय्यनधम्मसिक्खापदं

७६. या पन भिक्खुनी ‘‘अलं ताव ते, अय्ये, वुट्ठापितेना’’ति वुच्चमाना ‘‘साधू’’ति पटिस्सुणित्वा सा पच्छा खिय्यनधम्मं आपज्जेय्य, पाचित्तियं.

पठमसिक्खमाननवुट्ठापनसिक्खापदं

७७. या पन भिक्खुनी सिक्खमानं ‘‘सचे मे त्वं, अय्ये, चीवरं दस्ससि, एवाहं तं ¶ वुट्ठापेस्सामी’’ति वत्वा सा पच्छा अनन्तरायिकिनी नेव वुट्ठापेय्य, न वुट्ठापनाय उस्सुक्कं करेय्य, पाचित्तियं.

दुतियसिक्खमाननवुट्ठापनसिक्खापदं

७८. या ¶ पन भिक्खुनी सिक्खमानं ‘‘सचे मं त्वं, अय्ये, द्वे वस्सानि अनुबन्धिस्ससि, एवाहं तं वुट्ठापेस्सामी’’ति वत्वा सा पच्छा अनन्तरायिकिनी नेव वुट्ठापेय्य, न वुट्ठापनाय उस्सुक्कं करेय्य, पाचित्तियं.

सोकावाससिक्खापदं

७९. या पन भिक्खुनी पुरिससंसट्ठं कुमारकसंसट्ठं चण्डिं सोकावासं सिक्खमानं वुट्ठापेय्य, पाचित्तियं.

अननुञ्ञातसिक्खापदं

८०. या पन भिक्खुनी मातापितूहि वा सामिकेन वा अननुञ्ञातं सिक्खमानं वुट्ठापेय्य, पाचित्तियं.

पारिवासिकसिक्खापदं

८१. या पन भिक्खुनी पारिवासिकछन्ददानेन सिक्खमानं वुट्ठापेय्य, पाचित्तियं.

अनुवस्ससिक्खापदं

८२. या पन भिक्खुनी अनुवस्सं वुट्ठापेय्य, पाचित्तियं.

एकवस्ससिक्खापदं

८३. या पन भिक्खुनी एकं वस्सं द्वे वुट्ठापेय्य, पाचित्तियं.

कुमारिभूतवग्गो अट्ठमो.

छत्तुपाहनसिक्खापदं

८४. या पन भिक्खुनी अगिलाना छत्तुपाहनं धारेय्य, पाचित्तियं.

यानसिक्खापदं

८५. या ¶ पन भिक्खुनी अगिलाना यानेन यायेय्य, पाचित्तियं.

सङ्घाणिसिक्खापदं

८६. या पन भिक्खुनी सङ्घाणिं धारेय्य, पाचित्तियं.

इत्थालङ्कारसिक्खापदं

८७. या पन भिक्खुनी इत्थालङ्कारं धारेय्य, पाचित्तियं.

गन्धवण्णकसिक्खापदं

८८. या ¶ पन भिक्खुनी गन्धवण्णकेन नहायेय्य, पाचित्तियं.

वासितकसिक्खापदं

८९. या पन भिक्खुनी वासितकेन पिञ्ञाकेन नहायेय्य, पाचित्तियं.

भिक्खुनिउम्मद्दापनसिक्खापदं

९०. या पन भिक्खुनी भिक्खुनिया उम्मद्दापेय्य वा परिमद्दापेय्य वा, पाचित्तियं.

सिक्खमानउम्मद्दापनसिक्खापदं

९१. या पन भिक्खुनी सिक्खमानाय उम्मद्दापेय्य वा परिमद्दापेय्य वा, पाचित्तियं.

सामणेरीउम्मद्दापनसिक्खापदं

९२. या पन भिक्खुनी सामणेरिया उम्मद्दापेय्य वा परिमद्दापेय्य वा, पाचित्तियं.

गिहिनिउम्मद्दापनसिक्खापदं

९३. या पन भिक्खुनी गिहिनिया उम्मद्दापेय्य वा परिमद्दापेय्य वा, पाचित्तियं.

अनापुच्छासिक्खापदं

९४. या पन भिक्खुनी भिक्खुस्स पुरतो अनापुच्छा आसने निसीदेय्य, पाचित्तियं.

पञ्हापुच्छनसिक्खापदं

९५. या ¶ पन भिक्खुनी अनोकासकतं भिक्खुं पञ्हं पुच्छेय्य, पाचित्तियं.

असंकच्चिकसिक्खापदं

९६. या पन भिक्खुनी असंकच्चिका गामं पविसेय्य, पाचित्तियं.

छत्तुपाहनवग्गो नवमो.

मुसावादसिक्खापदं

९७. सम्पजानमुसावादे ¶ पाचित्तियं.

ओमसवादसिक्खापदं

९८. ओमसवादे पाचित्तियं.

पेसुञ्ञसिक्खापदं

९९. भिक्खुनिपेसुञ्ञे पाचित्तियं.

पदसोधम्मसिक्खापदं

१००. या पन भिक्खुनी अनुपसम्पन्नं पदसो धम्मं वाचेय्य, पाचित्तियं.

पठमसहसेय्यसिक्खापदं

१०१. या पन भिक्खुनी अनुपसम्पन्नाय उत्तरिदिरत्ततिरत्तं सहसेय्यं कप्पेय्य, पाचित्तियं.

दुतियसहसेय्यसिक्खापदं

१०२. या पन भिक्खुनी पुरिसेन सहसेय्यं कप्पेय्य, पाचित्तियं.

धम्मदेसनासिक्खापदं

१०३. या पन भिक्खुनी पुरिसस्स उत्तरिछप्पञ्चवाचाहि धम्मं देसेय्य अञ्ञत्र विञ्ञुना इत्थिविग्गहेन, पाचित्तियं.

भूतारोचनसिक्खापदं

१०४. या ¶ पन भिक्खुनी अनुपसम्पन्नाय उत्तरिमनुस्सधम्मं आरोचेय्य, भूतस्मिं पाचित्तियं.

दुट्ठुल्लारोचनसिक्खापदं

१०५. या पन भिक्खुनी भिक्खुनिया दुट्ठुल्लं आपत्तिं अनुपसम्पन्नाय आरोचेय्य अञ्ञत्र भिक्खुनिसम्मुतिया, पाचित्तियं.

पथवीखणनसिक्खापदं

१०६. या पन भिक्खुनी पथविं खणेय्य वा खणापेय्य वा, पाचित्तियं.

मुसावादवग्गो दसमो.

भूतगामसिक्खापदं

१०७. भूतगामपातब्यताय ¶ पाचित्तियं.

अञ्ञवादकसिक्खापदं

१०८. अञ्ञवादके, विहेसके पाचित्तियं.

उज्झापनकसिक्खापदं

१०९. उज्झापनके, खिय्यनके पाचित्तियं.

पठमसेनासनसिक्खापदं

११०. या पन भिक्खुनी सङ्घिकं मञ्चं वा पीठं वा भिसिं वा कोच्छं वा अज्झोकासे सन्थरित्वा वा सन्थरापेत्वा वा तं पक्कमन्ती नेव उद्धरेय्य, न उद्धरापेय्य, अनापुच्छं वा गच्छेय्य, पाचित्तियं.

दुतियसेनासनसिक्खापदं

१११. या पन भिक्खुनी सङ्घिके विहारे सेय्यं सन्थरित्वा वा सन्थरापेत्वा वा तं पक्कमन्ती नेव उद्धरेय्य, न उद्धरापेय्य, अनापुच्छं वा गच्छेय्य, पाचित्तियं.

अनुपखज्जसिक्खापदं

११२. या ¶ पन भिक्खुनी सङ्घिके विहारे जानं पुब्बुपगतं भिक्खुनिं अनुपखज्ज सेय्यं कप्पेय्य ‘‘यस्सा सम्बाधो भविस्सति, सा पक्कमिस्सती’’ति एतदेव पच्चयं करित्वा अनञ्ञं, पाचित्तियं.

निक्कड्ढनसिक्खापदं

११३. या पन भिक्खुनी भिक्खुनिं कुपिता अनत्तमना सङ्घिका विहारा निक्कड्ढेय्य वा निक्कड्ढापेय्य वा, पाचित्तियं.

वेहासकुटिसिक्खापदं

११४. या पन भिक्खुनी सङ्घिके विहारे उपरिवेहासकुटिया आहच्चपादकं मञ्चं वा पीठं वा अभिनिसीदेय्य वा अभिनिपज्जेय्य वा, पाचित्तियं.

महल्लकविहारसिक्खापदं

११५. महल्लकं पन भिक्खुनिया विहारं कारयमानाय याव द्वारकोसा अग्गळट्ठपनाय, आलोकसन्धिपरिकम्माय द्वत्तिच्छदनस्स परियायं अप्पहरिते ठिताय अधिट्ठातब्बं. ततो चे उत्तरि अप्पहरितेपि ठिता अधिट्ठहेय्य, पाचित्तियं.

सप्पाणकसिक्खापदं

११६. या ¶ पन भिक्खुनी जानं सप्पाणकं उदकं तिणं वा मत्तिकं वा सिञ्चेय्य वा सिञ्चापेय्य वा, पाचित्तियं.

भूतगामवग्गो एकादसमो.

आवसथपिण्डसिक्खापदं

११७. अगिलानाय भिक्खुनिया एको आवसथपिण्डो भुञ्जितब्बो. ततो चे उत्तरि भुञ्जेय्य, पाचित्तियं.

गणभोजनसिक्खापदं

११८. गणभोजने अञ्ञत्र समया पाचित्तियं. तत्थायं समयो, गिलानसमयो, चीवरदानसमयो ¶ , चीवरकारसमयो, अद्धानगमनसमयो, नावाभिरुहनसमयो, महासमयो, समणभत्तसमयो, अयं तत्थ समयो.

काणमातुसिक्खापदं

११९. भिक्खुनिं पनेव कुलं उपगतं पूवेहि वा मन्थेहि वा अभिहट्ठुं पवारेय्य, आकङ्खमानाय भिक्खुनिया द्वत्तिपत्तपूरा पटिग्गहेतब्बा. ततो चे उत्तरि पटिग्गण्हेय्य, पाचित्तियं. द्वत्तिपत्तपूरे पटिग्गहेत्वा ततो नीहरित्वा भिक्खुनीहि सद्धिं संविभजितब्बं, अयं तत्थ सामीचि.

विकालभोजनसिक्खापदं

१२०. या पन भिक्खुनी विकाले खादनीयं वा भोजनीयं वा खादेय्य वा भुञ्जेय्य वा, पाचित्तियं.

सन्निधिकारकसिक्खापदं

१२१. या पन भिक्खुनी सन्निधिकारकं खादनीयं वा भोजनीयं वा खादेय्य वा भुञ्जेय्य वा, पाचित्तियं.

दन्तपोनसिक्खापदं

१२२. या पन भिक्खुनी अदिन्नं मुखद्वारं आहारं आहरेय्य अञ्ञत्र उदकदन्तपोना, पाचित्तियं.

उय्योजनसिक्खापदं

१२३. या ¶ पन भिक्खुनी भिक्खुनिं ‘‘एहाय्ये, गामं वा निगमं वा पिण्डाय पविसिस्सामा’’ति तस्सा दापेत्वा वा अदापेत्वा वा उय्योजेय्य ‘‘गच्छाय्ये, न मे तया सद्धिं कथा वा निसज्जा वा फासु होति, एकिकाय मे कथा वा निसज्जा वा फासु होती’’ति एतदेव पच्चयं करित्वा अनञ्ञं, पाचित्तियं.

सभोजनसिक्खापदं

१२४. या पन भिक्खुनी सभोजने कुले अनुपखज्ज निसज्जं कप्पेय्य, पाचित्तियं.

रहोपटिच्छन्नसिक्खापदं

१२५. या ¶ पन भिक्खुनी पुरिसेन सद्धिं रहो पटिच्छन्ने आसने निसज्जं कप्पेय्य, पाचित्तियं.

रहोनिसज्जसिक्खापदं

१२६. या पन भिक्खुनी पुरिसेन सद्धिं एकेनेका रहो निसज्जं कप्पेय्य, पाचित्तियं.

भोजनवग्गो द्वादसमो.

चारित्तसिक्खापदं

१२७. या पन भिक्खुनी निमन्तिता सभत्ता समाना सन्तिं भिक्खुनिं अनापुच्छा पुरेभत्तं वा पच्छाभत्तं वा कुलेसु चारित्तं आपज्जेय्य अञ्ञत्र समया, पाचित्तियं. तत्थायं समयो, चीवरदानसमयो, चीवरकारसमयो, अयं तत्थ समयो.

महानामसिक्खापदं

१२८. अगिलानाय भिक्खुनिया चतुमासप्पच्चयपवारणा सादितब्बा अञ्ञत्र पुनपवारणाय, अञ्ञत्र निच्चपवारणाय. ततो चे उत्तरि सादियेय्य, पाचित्तियं.

उय्युत्तसेनासिक्खापदं

१२९. या पन भिक्खुनी उय्युत्तं सेनं दस्सनाय गच्छेय्य अञ्ञत्र तथारूपप्पच्चया, पाचित्तियं.

सेनावाससिक्खापदं

१३०. सिया ¶ च तस्सा भिक्खुनिया कोचिदेव पच्चयो सेनं गमनाय, दिरत्ततिरत्तं ताय भिक्खुनिया सेनाय वसितब्बं. ततो चे उत्तरि वसेय्य, पाचित्तियं.

उय्योधिकसिक्खापदं

१३१. दिरत्ततिरत्तं चे भिक्खुनी सेनाय वसमाना उय्योधिकं वा बलग्गं वा सेनाब्यूहं वा अनीकदस्सनं वा गच्छेय्य, पाचित्तियं.

सुरापानसिक्खापदं

१३२. सुरामेरयपाने ¶ पाचित्तियं.

अङ्गुलिपतोदकसिक्खापदं

१३३. अङ्गुलिपतोदके पाचित्तियं.

हसधम्मसिक्खापदं

१३४. उदके हसधम्मे पाचित्तियं.

अनादरियसिक्खापदं

१३५. अनादरिये पाचित्तियं.

भिंसापनसिक्खापदं

१३६. या पन भिक्खुनी भिक्खुनिं भिंसापेय्य, पाचित्तियं.

चारित्तवग्गो तेरसमो.

जोतिसिक्खापदं

१३७. या पन भिक्खुनी अगिलाना विसिब्बनापेक्खा जोतिं समादहेय्य वा समादहापेय्य वा अञ्ञत्र तथारूपप्पच्चया, पाचित्तियं.

नहानसिक्खापदं

१३८. या पन भिक्खुनी ओरेनद्धमासं नहायेय्य अञ्ञत्र समया, पाचित्तियं. तत्थायं समयो ‘‘दियड्ढो मासो सेसो गिम्हान’’न्ति ‘‘वस्सानस्स पठमो मासो’’ इच्चेते अड्ढतेय्यमासा उण्हसमयो, परिळाहसमयो, गिलानसमयो, कम्मसमयो, अद्धानगमनसमयो, वातवुट्ठिसमयो, अयं तत्थ समयो.

दुब्बण्णकरणसिक्खापदं

१३९. नवं ¶ पन भिक्खुनिया चीवरलाभाय तिण्णं दुब्बण्णकरणानं अञ्ञतरं दुब्बण्णकरणं ¶ आदातब्बं नीलं वा कद्दमं वा काळसामं वा. अनादा चे भिक्खुनी तिण्णं दुब्बण्णकरणानं अञ्ञतरं दुब्बण्णकरणं नवं चीवरं परिभुञ्जेय्य, पाचित्तियं.

विकप्पनसिक्खापदं

१४०. या पन भिक्खुनी भिक्खुस्स वा भिक्खुनिया वा सिक्खमानाय वा सामणेरस्स वा सामणेरिया वा सामं चीवरं विकप्पेत्वा अपच्चुद्धारणं परिभुञ्जेय्य, पाचित्तियं.

अपनिधापनसिक्खापदं

१४१. या पन भिक्खुनी भिक्खुनिया पत्तं वा चीवरं वा निसीदनं वा सूचिघरं वा कायबन्धनं वा अपनिधेय्य वा अपनिधापेय्य वा अन्तमसो हसापेक्खापि, पाचित्तियं.

सञ्चिच्चसिक्खापदं

१४२. या पन भिक्खुनी सञ्चिच्च पाणं जीविता वोरोपेय्य, पाचित्तियं.

सप्पाणकसिक्खापदं

१४३. या पन भिक्खुनी जानं सप्पाणकं उदकं परिभुञ्जेय्य, पाचित्तियं.

उक्कोटनसिक्खापदं

१४४. या पन भिक्खुनी जानं यथाधम्मं निहताधिकरणं पुनकम्माय उक्कोटेय्य, पाचित्तियं.

थेय्यसत्थसिक्खापदं

१४५. या पन भिक्खुनी जानं थेय्यसत्थेन सद्धिं संविधाय एकद्धानमग्गं पटिपज्जेय्य अन्तमसो गामन्तरम्पि, पाचित्तियं.

अरिट्ठसिक्खापदं

१४६. या पन भिक्खुनी एवं वदेय्य ‘‘तथाहं भगवता धम्मं देसितं आजानामि, यथा येमे अन्तरायिका धम्मा वुत्ता भगवता, ते पटिसेवतो नालं अन्तरायाया’’ति. सा भिक्खुनी भिक्खुनीहि एवमस्स वचनीया ‘‘माय्ये एवं अवच, मा भगवन्तं अब्भाचिक्खि, न ¶ हि साधु भगवतो अब्भक्खानं, न हि भगवा एवं वदेय्य, अनेकपरियायेनाय्ये अन्तरायिका धम्मा अन्तरायिका वुत्ता भगवता, अलञ्च पन ते पटिसेवतो ¶ अन्तरायाया’’ति. एवञ्च सा भिक्खुनी भिक्खुनीहि वुच्चमाना तथेव पग्गण्हेय्य, सा भिक्खुनी भिक्खुनीहि यावततियं समनुभासितब्बा तस्स पटिनिस्सग्गाय. यावततियञ्चे समनुभासियमाना तं पटिनिस्सज्जेय्य, इच्चेतं कुसलं. नो चे पटिनिस्सज्जेय्य, पाचित्तियं.

जोतिवग्गो चुद्दसमो.

उक्खित्तसम्भोगसिक्खापदं

१४७. या पन भिक्खुनी जानं तथावादिनिया भिक्खुनिया अकटानुधम्माय तं दिट्ठिं अप्पटिनिस्सट्ठाय सद्धिं सम्भुञ्जेय्य वा, संवसेय्य वा, सह वा सेय्यं कप्पेय्य, पाचित्तियं.

कण्टकसिक्खापदं

१४८. समणुद्देसापि चे एवं वदेय्य ‘‘तथाहं भगवता धम्मं देसितं आजानामि, यथा येमे अन्तरायिका धम्मा वुत्ता भगवता, ते पटिसेवतो नालं अन्तरायाया’’ति. सा समणुद्देसा भिक्खुनीहि एवमस्स वचनीया ‘‘माय्ये, समणुद्देसे एवं अवच, मा भगवन्तं अब्भाचिक्खि, न हि साधु भगवतो अब्भक्खानं, न हि भगवा एवं वदेय्य, अनेकपरियायेनाय्ये, समणुद्देसे अन्तरायिका धम्मा अन्तरायिका वुत्ता भगवता, अलञ्च पन ते पटिसेवतो अन्तरायाया’’ति. एवञ्च सा समणुद्देसा भिक्खुनीहि वुच्चमाना तथेव पग्गण्हेय्य, सा समणुद्देसा भिक्खुनीहि एवमस्स वचनीया ‘‘अज्जतग्गे ते, अय्ये, समणुद्देसे न चेव सो भगवा सत्था अपदिसितब्बो, यम्पि चञ्ञा समणुद्देसा लभन्ति भिक्खुनीहि सद्धिं दिरत्ततिरत्तं सहसेय्यं, सापि ते नत्थि, चर पिरे, विनस्सा’’ति. या पन भिक्खुनी जानं तथानासितं समणुद्देसं उपलापेय्य वा, उपट्ठापेय्य वा, सम्भुञ्जेय्य वा, सह वा सेय्यं कप्पेय्य, पाचित्तियं.

सहधम्मिकसिक्खापदं

१४९. या पन भिक्खुनी भिक्खुनीहि सहधम्मिकं वुच्चमाना एवं वदेय्य ‘‘न तावाहं, अय्ये, एतस्मिं सिक्खापदे सिक्खिस्सामि, याव न अञ्ञं भिक्खुनिं ब्यत्तं विनयधरं परिपुच्छामी’’ति, पाचित्तियं. सिक्खमानाय, भिक्खवे, भिक्खुनिया अञ्ञातब्बं परिपुच्छितब्बं परिपञ्हितब्बं, अयं तत्थ सामीचि.

विलेखनसिक्खापदं

१५०. या ¶ ¶ पन भिक्खुनी पातिमोक्खे उद्दिस्समाने एवं वदेय्य ‘‘किं पनिमेहि खुद्दानुखुद्दकेहि सिक्खापदेहि उद्दिट्ठेहि, यावदेव कुक्कुच्चाय विहेसाय विलेखाय संवत्तन्ती’’ति, सिक्खापदविवण्णके पाचित्तियं.

मोहनसिक्खापदं

१५१. या पन भिक्खुनी अन्वद्धमासं पातिमोक्खे उद्दिस्समाने एवं वदेय्य ‘‘इदानेव खो अहं, अय्ये, जानामि अयम्पि किर धम्मो सुत्तागतो सुत्तपरियापन्नो अन्वद्धमासं उद्देसं आगच्छती’’ति, तञ्चे भिक्खुनिं अञ्ञा भिक्खुनियो जानेय्युं निसिन्नपुब्बं इमाय भिक्खुनिया द्वत्तिक्खत्तुं पातिमोक्खे उद्दिस्समाने, को पन वादो भिय्यो, न च तस्सा भिक्खुनिया अञ्ञाणकेन मुत्ति अत्थि, यञ्च तत्थ आपत्तिं आपन्ना, तञ्च यथाधम्मो कारेतब्बो, उत्तरि चस्सा मोहो आरोपेतब्बो ‘‘तस्सा ते, अय्ये, अलाभा, तस्सा ते दुल्लद्धं, यं त्वं पातिमोक्खे उद्दिस्समाने न साधुकं अट्ठिं कत्वा मनसि करोसी’’ति, इदं तस्मिं मोहनके पाचित्तियं.

पहारसिक्खापदं

१५२. या पन भिक्खुनी भिक्खुनिया कुपिता अनत्तमना पहारं ददेय्य, पाचित्तियं.

तलसत्तिकसिक्खापदं

१५३. या पन भिक्खुनी भिक्खुनिया कुपिता अनत्तमना तलसत्तिकं उग्गिरेय्य, पाचित्तियं.

अमूलकसिक्खापदं

१५४. या पन भिक्खुनी भिक्खुनिं अमूलकेन सङ्घादिसेसेन अनुद्धंसेय्य, पाचित्तियं.

सञ्चिच्चसिक्खापदं

१५५. या पन भिक्खुनी भिक्खुनिया सञ्चिच्च कुक्कुच्चं उपदहेय्य ‘‘इतिस्सा मुहुत्तम्पि अफासु भविस्सती’’ति एतदेव पच्चयं करित्वा अनञ्ञं, पाचित्तियं.

उपस्सुति सिक्खापदं

१५६. या ¶ ¶ पन भिक्खुनी भिक्खुनीनं भण्डनजातानं कलहजातानं विवादापन्नानं उपस्सुतिं तिट्ठेय्य ‘‘यं इमा भणिस्सन्ति, तं सोस्सामी’’ति एतदेव पच्चयं करित्वा अनञ्ञं, पाचित्तियं.

दिट्ठिवग्गो पन्नरसमो.

कम्मप्पटिबाहनसिक्खापदं

१५७. या पन भिक्खुनी धम्मिकानं कम्मानं छन्दं दत्वा पच्छा खीयनधम्मं आपज्जेय्य, पाचित्तियं.

छन्दंअदत्वागमनसिक्खापदं

१५८. या पन भिक्खुनी सङ्घे विनिच्छयकथाय वत्तमानाय छन्दं अदत्वा उट्ठायासना पक्कमेय्य, पाचित्तियं.

दुब्बलसिक्खापदं

१५९. या पन भिक्खुनी समग्गेन सङ्घेन चीवरं दत्वा पच्छा खीयनधम्मं आपज्जेय्य ‘‘यथासन्थुतं भिक्खुनियो सङ्घिकं लाभं परिणामेन्ती’’ति, पाचित्तियं.

परिणामनसिक्खापदं

१६०. या पन भिक्खुनी जानं सङ्घिकं लाभं परिणतं पुग्गलस्स परिणामेय्य, पाचित्तियं.

रतनसिक्खापदं

१६१. या पन भिक्खुनी रतनं वा रतनसम्मतं वा अञ्ञत्र अज्झारामा वा अज्झावसथा वा उग्गण्हेय्य वा उग्गण्हापेय्य वा, पाचित्तियं. रतनं वा पन भिक्खुनिया रतनसम्मतं वा अज्झारामे वा अज्झावसथे वा उग्गहेत्वा वा उग्गहापेत्वा वा निक्खिपितब्बं ‘‘यस्स भविस्सति, सो हरिस्सती’’ति, अयं तत्थ सामीचि.

सूचिघरसिक्खापदं

१६२. या ¶ ¶ पन भिक्खुनी अट्ठिमयं वा दन्तमयं वा विसाणमयं वा सूचिघरं कारापेय्य, भेदनकं पाचित्तियं.

मञ्चपीठसिक्खापदं

१६३. नवं पन भिक्खुनिया मञ्चं वा पीठं वा कारयमानाय अट्ठङ्गुलपादकं कारेतब्बं सुगतङ्गुलेन अञ्ञत्र हेट्ठिमाय अटनिया. तं अतिक्कामेन्तिया छेदनकं पाचित्तियं.

तूलोनद्धसिक्खापदं

१६४. या पन भिक्खुनी मञ्चं वा पीठं वा तूलोनद्धं कारापेय्य, उद्दालनकं पाचित्तियं.

कण्डुप्पटिच्छादिसिक्खापदं

१६५. कण्डुप्पटिच्छादिं पन भिक्खुनिया कारयमानाय पमाणिका कारेतब्बा, तत्रिदं पमाणं, दीघसो चतस्सो विदत्थियो सुगतविदत्थिया, तिरियं द्वे विदत्थियो. तं अतिक्कामेन्तिया छेदनकं पाचित्तियं.

नन्दसिक्खापदं

१६६. या पन भिक्खुनी सुगतचीवरप्पमाणं चीवरं कारापेय्य, अतिरेकं वा, छेदनकं पाचित्तियं. तत्रिदं सुगतस्स सुगतचीवरप्पमाणं, दीघसो नव विदत्थियो सुगतविदत्थिया, तिरियं छ विदत्थियो, इदं सुगतस्स सुगतचीवरप्पमाणन्ति.

धम्मिकवग्गो सोळसमो.

उद्दिट्ठा खो, अय्यायो, छसट्ठिसता पाचित्तिया धम्मा. तत्थाय्यायो, पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थाय्यायो, तस्मा तुण्ही, एवमेतं धारयामीति.

पाचित्तिया निट्ठिता.

पाटिदेसनीया

इमे खो पनाय्यायो अट्ठ पाटिदेसनीया

धम्मा उद्देसं आगच्छन्ति.

सप्पिविञ्ञापनसिक्खापदं

१. या ¶ ¶ पन भिक्खुनी अगिलाना सप्पिं विञ्ञापेत्वा भुञ्जेय्य, पटिदेसेतब्बं ताय भिक्खुनिया ‘‘गारय्हं, अय्ये, धम्मं आपज्जिं असप्पायं पाटिदेसनीयं, तं पटिदेसेमी’’ति.

तेलविञ्ञापनसिक्खापदं

२. या पन भिक्खुनी अगिलाना तेलं विञ्ञापेत्वा भुञ्जेय्य…पे… तं पटिदेसेमीति.

मधुविञ्ञापनसिक्खापदं

३. या पन भिक्खुनी अगिलाना मधुं विञ्ञापेत्वा भुञ्जेय्य…पे… तं पटिदेसेमीति.

फाणितविञ्ञापनसिक्खापदं

४. या पन भिक्खुनी अगिलाना फाणितं विञ्ञापेत्वा भुञ्जेय्य…पे… तं पटिदेसेमीति.

मच्छविञ्ञापनसिक्खापदं

५. या पन भिक्खुनी अगिलाना मच्छं विञ्ञापेत्वा भुञ्जेय्य…पे… तं पटिदेसेमीति.

मंसविञ्ञापनसिक्खापदं

६. या पन भिक्खुनी अगिलाना मंसं विञ्ञापेत्वा भुञ्जेय्य…पे… तं पटिदेसेमीति.

खीरविञ्ञापनसिक्खापदं

७. या ¶ पन भिक्खुनी अगिलाना खीरं विञ्ञापेत्वा भुञ्जेय्य…पे… तं पटिदेसेमीति.

दधिविञ्ञापनसिक्खापदं

८. या पन भिक्खुनी अगिलाना दधिं विञ्ञापेत्वा भुञ्जेय्य, पटिदेसेतब्बं ताय भिक्खुनिया ‘‘गारय्हं, अय्ये, धम्मं आपज्जिं असप्पायं पाटिदेसनीयं, तं पटिदेसेमी’’ति.

उद्दिट्ठा ¶ खो, अय्यायो, अट्ठ पाटिदेसनीया धम्मा. तत्थाय्यायो, पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थाय्यायो, तस्मा तुण्ही, एवमेतं धारयामीति.

पाटिदेसनीया निट्ठिता.

सेखिया

इमे खो पनाय्यायो, सेखिया धम्मा उद्देसं आगच्छन्ति.

परिमण्डलसिक्खापदं

१. परिमण्डलं निवासेस्सामीति सिक्खा करणीया.

२. परिमण्डलं पारुपिस्सामीति सिक्खा करणीया.

सुप्पटिच्छन्नसिक्खापदं

३. सुप्पटिच्छन्ना अन्तरघरे गमिस्सामीति सिक्खा करणीया.

४. सुप्पटिच्छन्ना अन्तरघरे निसीदिस्सामीति सिक्खा करणीया.

सुसंवुतसिक्खापदं

५. सुसंवुता ¶ अन्तरघरे गमिस्सामीति सिक्खा करणीया.

६. सुसंवुता अन्तरघरे निसीदिस्सामीति सिक्खा करणीया.

ओक्खित्तचक्खुसिक्खापदं

७. ओक्खित्तचक्खुनी अन्तरघरे गमिस्सामीति सिक्खा करणीया.

८. ओक्खित्तचक्खुनी अन्तरघरे निसीदिस्सामीति सिक्खा करणीया.

उक्खित्तकसिक्खापदं

९. न उक्खित्तकाय अन्तरघरे गमिस्सामीति सिक्खा करणीया.

१०. न उक्खित्तकाय अन्तरघरे निसीदिस्सामीति सिक्खा करणीया.

परिमण्डलवग्गो पठमो.

उज्जग्घिकसिक्खापदं

११. न ¶ उज्जग्घिकाय अन्तरघरे गमिस्सामीति सिक्खा करणीया.

१२. न उज्जग्घिकाय अन्तरघरे निसीदिस्सामीति सिक्खा करणीया.

उच्चसद्दसिक्खापदं

१३. अप्पसद्दा अन्तरघरे गमिस्सामीति सिक्खा करणीया.

१४. अप्पसद्दा अन्तरघरे निसीदिस्सामीति सिक्खा करणीया.

कायप्पचालकसिक्खापदं

१५. न कायप्पचालकं अन्तरघरे गमिस्सामीति सिक्खा करणीया.

१६. न ¶ कायप्पचालकं अन्तरघरे निसीदिस्सामीति सिक्खा करणीया.

बाहुप्पचालकसिक्खापदं

१७. न बाहुप्पचालकं अन्तरघरे गमिस्सामीति सिक्खा करणीया.

१८. न बाहुप्पचालकं अन्तरघरे निसीदिस्सामीति सिक्खा करणीया.

सीसप्पचालकसिक्खापदं

१९. न सीसप्पचालकं अन्तरघरे गमिस्सामीति सिक्खा करणीया.

२०. न सीसप्पचालकं अन्तरघरे निसीदिस्सामीति सिक्खा करणीया.

उज्जग्घिकवग्गो दुतियो.

खम्भकतसिक्खापदं

२१. न खम्भकता अन्तरघरे गमिस्सामीति सिक्खा करणीया.

२२. न खम्भकता अन्तरघरे निसीदिस्सामीति सिक्खा करणीया.

ओगुण्ठितसिक्खापदं

२३. न ओगुण्ठिता अन्तरघरे गमिस्सामीति सिक्खा करणीया.

२४. न ओगुण्ठिता अन्तरघरे निसीदिस्सामीति सिक्खा करणीया.

उक्कुटिकसिक्खापदं

२५. न उक्कुटिकाय अन्तरघरे गमिस्सामीति सिक्खा करणीया.

पल्लत्थिकसिक्खापदं

२६. न ¶ पल्लत्थिकाय अन्तरघरे निसीदिस्सामीति सिक्खा करणीया.

सक्कच्चपटिग्गहणसिक्खापदं

२७. सक्कच्चं ¶ पिण्डपातं पटिग्गहेस्सामीति सिक्खा करणीया.

पत्तसञ्ञिनीपटिग्गहणसिक्खापदं

२८. पत्तसञ्ञिनी पिण्डपातं पटिग्गहेस्सामीति सिक्खा करणीया.

समसूपकपटिग्गहणसिक्खापदं

२९. समसूपकं पिण्डपातं पटिग्गहेस्सामीति सिक्खा करणीया.

समतित्तिकसिक्खापदं

३०. समतित्तिकं पिण्डपातं पटिग्गहेस्सामीति सिक्खा करणीया.

खम्भकतवग्गो ततियो.

सक्कच्चभुञ्जनसिक्खापदं

३१. सक्कच्चं पिण्डपातं भुञ्जिस्सामीति सिक्खा करणीया.

पत्तसञ्ञिनीभुञ्जनसिक्खापदं

३२. पत्तसञ्ञिनी पिण्डपातं भुञ्जिस्सामीति सिक्खा करणीया.

सपदानसिक्खापदं

३३. सपदानं पिण्डपातं भुञ्जिस्सामीति सिक्खा करणीया.

समसूपकसिक्खापदं

३४. समसूपकं पिण्डपातं भुञ्जिस्सामीति सिक्खा करणीया.

न थूपकतसिक्खापदं

३५. न थूपकतो ओमद्दित्वा पिण्डपातं भुञ्जिस्सामीति सिक्खा करणीया.

ओदनप्पटिच्छादनसिक्खापदं

३६. न सूपं वा ब्यञ्जनं वा ओदनेन पटिच्छादेस्सामि भिय्योकम्यतं उपादायाति सिक्खा करणीया.

सूपोदनविञ्ञत्तिसिक्खापदं

३७. न ¶ ¶ सूपं वा ओदनं वा अगिलाना अत्तनो अत्थाय विञ्ञापेत्वा भुञ्जिस्सामीति सिक्खा करणीया.

उज्झानसञ्ञिनीसिक्खापदं

३८. न उज्झानसञ्ञिनी परेसं पत्तं ओलोकेस्सामीति सिक्खा करणीया.

कबळसिक्खापदं

३९. नातिमहन्तं कबळं करिस्सामीति सिक्खा करणीया.

आलोपसिक्खापदं

४०. परिमण्डलं आलोपं करिस्सामीति सिक्खा करणीया.

सक्कच्चवग्गो चतुत्थो.

अनाहटसिक्खापदं

४१. न अनाहटे कबळे मुखद्वारं विवरिस्सामीति सिक्खा करणीया.

भुञ्जमानसिक्खापदं

४२. न भुञ्जमाना सब्बहत्थं मुखे पक्खिपिस्सामीति सिक्खा करणीया.

सकबळसिक्खापदं

४३. न सकबळेन मुखेन ब्याहरिस्सामीति सिक्खा करणीया.

पिण्डुक्खेपकसिक्खापदं

४४. न पिण्डुक्खेपकं भुञ्जिस्सामीति सिक्खा करणीया.

कबळावच्छेदकसिक्खापदं

४५. न कबळावच्छेदकं भुञ्जिस्सामीति सिक्खा करणीया.

अवगण्डकारकसिक्खापदं

४६. न ¶ अवगण्डकारकं भुञ्जिस्सामीति सिक्खा करणीया.

हत्थनिद्धुनकसिक्खापदं

४७. न हत्थनिद्धुनकं भुञ्जिस्सामीति सिक्खा करणीया.

सित्थावकारकसिक्खापदं

४८. न सित्थावकारकं भुञ्जिस्सामीति सिक्खा करणीया.

जिव्हानिच्छारकसिक्खापदं

४९. न ¶ जिव्हानिच्छारकं भुञ्जिस्सामीति सिक्खा करणीया.

चपुचपुकारकसिक्खापदं

५०. न चपुचपुकारकं भुञ्जिस्सामीति सिक्खा करणीया.

कबळवग्गो पञ्चमो.

सुरुसुरुकारकसिक्खापदं

५१. न सुरुसुरुकारकं भुञ्जिस्सामीति सिक्खा करणीया.

हत्थनिल्लेहकसिक्खापदं

५२. न हत्थनिल्लेहकं भुञ्जिस्सामीति सिक्खा करणीया.

पत्तनिल्लेहकसिक्खापदं

५३. न पत्तनिल्लेहकं भुञ्जिस्सामीति सिक्खा करणीया.

ओट्ठनिल्लेहकसिक्खापदं

५४. न ओट्ठनिल्लेहकं भुञ्जिस्सामीति सिक्खा करणीया.

सामिससिक्खापदं

५५. न ¶ सामिसेन हत्थेन पानीयथालकं पटिग्गहेस्सामीति सिक्खा करणीया.

ससित्थकसिक्खापदं

५६. न ससित्थकं पत्तधोवनं अन्तरघरे छड्डेस्सामीति सिक्खा करणीया.

छत्तपाणिसिक्खापदं

५७. न छत्तपाणिस्स अगिलानस्स धम्मं देसेस्सामीति सिक्खा करणीया.

दण्डपाणिसिक्खापदं

५८. न दण्डपाणिस्स अगिलानस्स धम्मं देसेस्सामीति सिक्खा करणीया.

सत्थपाणिसिक्खापदं

५९. न ¶ सत्थपाणिस्स अगिलानस्स धम्मं देसेस्सामीति सिक्खा करणीया.

आवुधपाणिसिक्खापदं

६०. न आवुधपाणिस्स अगिलानस्स धम्मं देसेस्सामीति सिक्खा करणीया.

सुरुसुरुवग्गो छट्ठो.

पादुकसिक्खापदं

६१. न पादुकारुळ्हस्स अगिलानस्स धम्मं देसेस्सामीति सिक्खा करणीया.

उपाहनसिक्खापदं

६२. न उपाहनारुळ्हस्स अगिलानस्स धम्मं देसेस्सामीति सिक्खा करणीया.

यानसिक्खापदं

६३. न यानगतस्स अगिलानस्स धम्मं देसेस्सामीति सिक्खा करणीया.

सयनसिक्खापदं

६४. न सयनगतस्स अगिलानस्स धम्मं देसेस्सामीति सिक्खा करणीया.

पल्लत्थिकसिक्खापदं

६५. न पल्लत्थिकाय निसिन्नस्स अगिलानस्स धम्मं देसेस्सामीति सिक्खा करणीया.

वेठितसिक्खापदं

६६. न ¶ वेठितसीसस्स अगिलानस्स धम्मं देसेस्सामीति सिक्खा करणीया.

ओगुण्ठितसिक्खापदं

६७. न ओगुण्ठितसीसस्स अगिलानस्स धम्मं देसेस्सामीति सिक्खा करणीया.

छमासिक्खापदं

६८. न ¶ छमायं निसीदित्वा आसने निसिन्नस्स अगिलानस्स धम्मं देसेस्सामीति सिक्खा करणीया.

नीचासनसिक्खापदं

६९. न नीचे आसने निसीदित्वा उच्चे आसने निसिन्नस्स अगिलानस्स धम्मं देसेस्सामीति सिक्खा करणीया.

ठितासिक्खापदं

७०. न ठिता निसिन्नस्स अगिलानस्स धम्मं देसेस्सामीति सिक्खा करणीया.

पच्छतोगच्छन्तीसिक्खापदं

७१. न पच्छतो गच्छन्ती पुरतो गच्छन्तस्स अगिलानस्स धम्मं देसेस्सामीति सिक्खा करणीया.

उप्पथेनगच्छन्तीसिक्खापदं

७२. न उप्पथेन गच्छन्ती पथेन गच्छन्तस्स अगिलानस्स धम्मं देसेस्सामीति सिक्खा करणीया.

ठिताउच्चारसिक्खापदं

७३. न ठिता अगिलाना उच्चारं वा पस्सावं वा करिस्सामीति सिक्खा करणीया.

हरितेउच्चारसिक्खापदं

७४. न ¶ हरिते अगिलाना उच्चारं वा पस्सावं वा खेळं वा करिस्सामीति सिक्खा करणीया.

उदकेउच्चारसिक्खापदं

७५. न उदके अगिलाना उच्चारं वा पस्सावं वा खेळं वा करिस्सामीति सिक्खा करणीया.

पादुकवग्गो सत्तमो.

उद्दिट्ठा खो, अय्यायो, सेखिया धम्मा. तत्थाय्यायो, पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थाय्यायो, तस्मा तुण्ही, एवमेतं धारयामीति.

सेखिया निट्ठिता.

अधिकरणसमथा

इमे ¶ खो पनाय्यायो, सत्त अधिकरणसमथा

धम्मा उद्देसं आगच्छन्ति.

उप्पन्नुप्पन्नानं अधिकरणानं समथाय वूपसमाय सम्मुखाविनयो दातब्बो.

सतिविनयो दातब्बो.

अमूळ्हविनयो दातब्बो.

पटिञ्ञाय कारेतब्बं.

येभुय्यसिका.

तस्सपापियसिका.

तिणवत्थारकोति.

उद्दिट्ठा खो अय्यायो सत्त अधिकरणसमथा धम्मा. तत्थाय्यायो पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा ¶ , ततियम्पि पुच्छामि, कच्चित्थ परिसुद्धा, परिसुद्धेत्थाय्यायो, तस्मा तुण्ही, एवमेतं धारयामीति.

अधिकरणसमथा निट्ठिता.

उद्दिट्ठं खो अय्यायो निदानं,

उद्दिट्ठा अट्ठ पाराजिका धम्मा,

उद्दिट्ठा सत्तरस सङ्घादिसेसा धम्मा,

उद्दिट्ठा तिंस निस्सग्गिया पाचित्तिया धम्मा,

उद्दिट्ठा छसट्ठि सता पाचित्तिया धम्मा,

उद्दिट्ठा अट्ठ पाटिदेसनीया धम्मा,

उद्दिट्ठा सेखिया धम्मा,

उद्दिट्ठा सत्त अधिकरणसमथा धम्मा, एत्तकं तस्स भगवतो सुत्तागतं सुत्तपरियापन्नं अन्वद्धमासं उद्देसं आगच्छति, तत्थ सब्बाहेव समग्गाहि सम्मोदमानाहि अविवदमानाहि सिक्खितब्बन्ति.

वित्थारुद्देसो चतुत्थो.

भिक्खुनिपातिमोक्खं निट्ठितं.

नमो तस्स भगवतो अरहतो सम्मासम्बुद्धस्स

कङ्खावितरणी-अट्ठकथा

गन्थारम्भकथा

बुद्धं ¶ ¶ ¶ धम्मञ्च सङ्घञ्च, विप्पसन्नेन चेतसा;

वन्दित्वा वन्दनामान, पूजासक्कारभाजनं.

थेरवंसप्पदीपानं, थिरानं विनयक्कमे;

पुब्बाचरियसीहानं, नमो कत्वा कतञ्जली.

पामोक्खं अनवज्जानं, धम्मानं यं महेसिना;

मुखं मोक्खप्पवेसाय, पातिमोक्खं पकासितं.

सूरतेन ¶ निवातेन, सुचिसल्लेखवुत्तिना;

विनयाचारयुत्तेन, सोणत्थेरेन याचितो.

तत्थ सञ्जातकङ्खानं, भिक्खूनं तस्स वण्णनं;

कङ्खावितरणत्थाय, परिपुण्णविनिच्छयं.

महाविहारवासीनं, वाचनामग्गनिस्सितं;

वत्तयिस्सामि नामेन, कङ्खावितरणिं सुभन्ति.

निदानवण्णना

तत्थ ¶ पातिमोक्खन्ति पअतिमोक्खं अतिपमोक्खं अतिसेट्ठं अतिउत्तमन्ति अत्थो. इति इमिना वचनत्थेन एकविधम्पि सीलगन्थभेदतो दुविधं होति. तथा हि ‘‘पातिमोक्खसंवरसंवुतो विहरती’’ति (म. नि. १.६९; ३.७५; विभ. ५०८) च ‘‘आदिमेतं मुखमेतं पमुखमेतं कुसलानं धम्मानं, तेन वुच्चति पातिमोक्ख’’न्ति (महाव. १३५) च आदीसु सीलं पातिमोक्खन्ति वुच्चति, ‘‘उभयानि खो पनस्स पातिमोक्खानि वित्थारेन स्वागतानि होन्ती’’तिआदीसु (पाचि. १४७; अ. नि. ८.५२; १०.३३) गन्थो पातिमोक्खन्ति वुच्चति. तत्थ सीलं यो नं पाति रक्खति, तं मोक्खेति मोचयति आपायिकादीहि दुक्खेहि, अत्तानुवादादीहि वा भयेहीति पातिमोक्खं. गन्थो पन तस्स पातिमोक्खस्स जोतकत्ता पातिमोक्खन्ति वुच्चति. आदिम्हि पन वुत्तो वचनत्थो उभिन्नम्पि साधारणो होति.

तत्थायं वण्णना सीलपातिमोक्खस्सापि युज्जति गन्थपातिमोक्खस्सापि, गन्थे हि वण्णिते तस्स अत्थो वण्णितोव होति. तं पनेतं गन्थपातिमोक्खं भिक्खुपातिमोक्खं भिक्खुनिपातिमोक्खन्ति दुविधं होति ¶ . तत्थ ‘‘सुणातु मे, भन्ते, सङ्घो’’तिआदिकं (महाव. १३४) पञ्चहि उद्देसपरिच्छेदेहि ववत्थितं भिक्खुपातिमोक्खं, ‘‘सुणातु मे, अय्ये, सङ्घो’’तिआदिकं चतूहि उद्देसपरिच्छेदेहि ववत्थितं भिक्खुनिपातिमोक्खं. तत्थ भिक्खुपातिमोक्खे पञ्च उद्देसा नाम निदानुद्देसो, पाराजिकुद्देसो, सङ्घादिसेसुद्देसो, अनियतुद्देसो ¶ , वित्थारुद्देसोति. तत्थ निदानुद्देसो ताव ‘‘सुणातु मे, भन्ते, सङ्घो…पे… आविकता हिस्स फासु होति, तत्थायस्मन्ते पुच्छामि, कच्चित्थ परिसुद्धा, दुतियम्पि पुच्छामि, कच्चित्थ परिसुद्धा, ततियम्पि पुच्छामि, कच्चित्थ परिसुद्धा, परिसुद्धेत्थायस्मन्तो, तस्मा तुण्ही, एवमेतं धारयामी’’ति वत्वा ‘‘उद्दिट्ठं खो आयस्मन्तो निदान’’न्तिआदिना नयेन अवसेसे सुतेन साविते उद्दिट्ठो होति. पाराजिकुद्देसादीनं परिच्छेदा निदानस्स आदितो पट्ठाय पाराजिकादीनि ओसापेत्वा योजेतब्बा. वित्थारो वित्थारोयेव ¶ . ‘‘अवसेसं सुतेन सावेतब्ब’’न्ति (महाव. १५०; परि. ३२५) वचनतो पन पाराजिकुद्देसादीसु यस्मिं विप्पकते अन्तरायो उप्पज्जति, तेन सद्धिं अवसेसं सुतेन सावेतब्बं. निदानुद्देसे पन अनिट्ठिते सुतेन सावेतब्बं नाम नत्थि. भिक्खुनिपातिमोक्खे पन अनियतुद्देसो परिहायति, सेसं वुत्तनयमेव. एवमेतेसं पञ्चहि चेव चतूहि च उद्देसपरिच्छेदेहि ववत्थितानं द्विन्नम्पि पातिमोक्खानं अयं वण्णना भविस्सति. यस्मा पनेत्थ भिक्खुपातिमोक्खं पठमं, तस्मा तस्स ताव वण्णनत्थमिदं वुच्चति.

‘‘सुणातु मे’’तिआदीनं, पदानं अत्थनिच्छयं;

भिक्खवो सीलसम्पन्ना, सिक्खाकामा सुणन्तु मेति.

एत्थ हि सुणातूतिइदं सवनाणत्तिवचनं. मेति यो सावेति, तस्स अत्तनिद्देसवचनं. भन्तेति सगारवसप्पतिस्सवचनं. सङ्घोति पुग्गलसमूहवचनं. सब्बमेव चेतं पातिमोक्खुद्देसकेन पठमं वत्तब्बवचनं. भगवता हि पातिमोक्खुद्देसं अनुजानन्तेन राजगहे वुत्तं, तस्मा यो पातिमोक्खं उद्दिसति, तेन सचे सङ्घत्थेरो होति, ‘‘आवुसो’’ति वत्तब्बं. सचे नवकतरो होति, पाळियं (महाव. १३४) आगतनयेनेव ‘‘भन्ते’’ति वत्तब्बं. सङ्घत्थेरो वा हि पातिमोक्खं उद्दिसेय्य ‘‘थेराधिकं पातिमोक्ख’’न्तिवचनतो (महाव. १५४), नवकतरो वा ‘‘अनुजानामि, भिक्खवे, यो तत्थ भिक्खु ब्यत्तो पटिबलो, तस्साधेय्यं पातिमोक्ख’’न्तिवचनतो (महाव. १५५).

‘‘सङ्घो’’तिइमिना पन पदेन किञ्चापि अविसेसतो पुग्गलसमूहो वुत्तो, अथ खो सो दक्खिणेय्यसङ्घो, सम्मुतिसङ्घो चाति दुविधो होति. तत्थ दक्खिणेय्यसङ्घोति अट्ठ अरियपुग्गलसमूहो वुच्चति. सम्मुतिसङ्घोति अविसेसेन भिक्खुसमूहो, सो इध अधिप्पेतो. सो ¶ पनेस कम्मवसेन पञ्चविधो (महाव. ३८८) होति – चतुवग्गो पञ्चवग्गो दसवग्गो वीसतिवग्गो अतिरेकवीसतिवग्गोति. तत्थ चतुवग्गेन ठपेत्वा उपसम्पदपवारणअब्भानानि सब्बं ¶ सङ्घकम्मं कातुं वट्टति. पञ्चवग्गेन ठपेत्वा मज्झिमेसु जनपदेसु उपसम्पदञ्च अब्भानकम्मञ्च सब्बं सङ्घकम्मं कातुं ¶ वट्टति. दसवग्गेन अब्भानकम्ममत्तं ठपेत्वा सब्बं सङ्घकम्मं कातुं वट्टति. वीसतिवग्गेन न किञ्चि सङ्घकम्मं कातुं न वट्टति, तथा अतिरेकवीसतिवग्गेन.सो पन चतुवग्गादिना सङ्घेन कत्तब्बं कम्मं ऊनकतरेन कातुं न वट्टति, अतिरेकेन पन वट्टतीति दस्सनत्थं वुत्तो. इमस्मिं पनत्थे चतुवग्गं उपादाय सब्बोपि सम्मुतिसङ्घो अधिप्पेतो.

अज्जुपोसथोति अज्ज उपोसथदिवसो, एतेन अनुपोसथदिवसं पटिक्खिपति. पन्नरसोति इमिना अञ्ञं उपोसथदिवसं पटिक्खिपति. दिवसवसेन हि तयो उपोसथा चातुद्दसिको पन्नरसिको सामग्गिउपोसथोति, एवं तयो उपोसथा वुत्ता. तत्थ हेमन्तगिम्हवस्सानानं तिण्णं उतूनं ततियसत्तमपक्खेसु द्वे द्वे कत्वा छ चातुद्दसिका, अवसेसा अट्ठारस पन्नरसिकाति एवं एकसंवच्छरे चतुवीसति उपोसथा, इदं ताव पकतिचारित्तं. ‘‘अनुजानामि, भिक्खवे, सकिं पक्खस्स चातुद्दसे वा पन्नरसे वा पातिमोक्खं उद्दिसितु’’न्ति (महाव. १३६) वचनतो पन ‘‘आगन्तुकेहि आवासिकानं अनुवत्तितब्ब’’न्तिआदिवचनतो (महाव. १७८) च तथारूपपच्चये सति अञ्ञस्मिम्पि चातुद्दसे उपोसथं कातुं वट्टति. पुरिमवस्संवुट्ठानं पन पुब्बकत्तिकपुण्णमा वा, तेसंयेव सचे भण्डनकारकेहि उपद्दुता पवारणं पच्चुक्कड्ढन्ति, अथ पुब्बकत्तिकमासस्स काळपक्खचातुद्दसो वा, पच्छिमकत्तिकपुण्णमा वा, पच्छिमवस्संवुट्ठानञ्च पच्छिमकत्तिकपुण्णमा एवाति इमे तयो पवारणादिवसापि होन्ति, इदम्पि पकतिचारित्तमेव. तथारूपपच्चये पन सति द्विन्नं कत्तिकपुण्णमानं पुरिमेसु चातुद्दसेसुपि पवारणं कातुं वट्टति. यदा पन कोसम्बकक्खन्धके (महाव. ४५१) आगतनयेन भिन्ने सङ्घे ओसारिते तस्मिं भिक्खुस्मिं सङ्घो तस्स वत्थुस्स वूपसमाय सङ्घस्स सामग्गिं करोति, तदा ‘‘तावदेव उपोसथो कातब्बो, पातिमोक्खं उद्दिसितब्ब’’न्ति (महाव. ४७५) वचनतो ठपेत्वा चातुद्दसपन्नरसे, अञ्ञोपि यो कोचि दिवसो सामग्गिउपोसथदिवसो नाम होति, पुरिमवस्संवुट्ठानं पन कत्तिकमासब्भन्तरे अयमेव सामग्गिपवारणादिवसो नाम होति. इति इमेसु तीसु दिवसेसु ‘‘पन्नरसो’’तिइमिना अञ्ञं उपोसथदिवसं पटिक्खिपति. तस्मा य्वायं ‘‘अज्जुपोसथो’’तिवचनेन ¶ अनुपोसथदिवसो ¶ पटिक्खित्तो, तस्मिं उपोसथो न कातब्बोयेव. यो पनायं अञ्ञो उपोसथदिवसो, तस्मिं उपोसथो कातब्बो. करोन्तेन पन सचे चातुद्दसिको होति, ‘‘अज्जुपोसथो चातुद्दसो’’ति वत्तब्बं. सचे पन्नरसिको होति, ‘‘अज्जुपोसथो पन्नरसो’’ति वत्तब्बं. सचे सामग्गिउपोसथो होति, ‘‘अज्जुपोसथो सामग्गी’’ति वत्तब्बं.

यदि ¶ सङ्घस्स पत्तकल्लन्ति एत्थ पत्तो कालो इमस्स कम्मस्साति पत्तकालं, पत्तकालमेव पत्तकल्लं. तदेतं इध चतूहि अङ्गेहि सङ्गहितं. यथाहु अट्ठकथाचरिया –

‘‘उपोसथो यावतिका च भिक्खू कम्मप्पत्ता,

सभागापत्तियो च न विज्जन्ति;

वज्जनीया च पुग्गला तस्मिं न होन्ति,

‘पत्तकल्ल’न्ति वुच्चती’’ति. (महाव. अट्ठ. १६८);

तत्थ उपोसथोति तीसु उपोसथदिवसेसु अञ्ञतरउपोसथदिवसो. तस्मिञ्हि सति इदं सङ्घस्स उपोसथकम्मं पत्तकल्लं नाम होति, नासति. यथाह ‘‘न च, भिक्खवे, अनुपोसथे उपोसथो कातब्बो, यो करेय्य, आपत्ति दुक्कटस्सा’’ति (महाव. १८३).

यावतिका च भिक्खू कम्मप्पत्ताति यत्तका भिक्खू तस्स उपोसथकम्मस्स पत्ता युत्ता अनुरूपा, सब्बन्तिमेन परिच्छेदेन चत्तारो पकतत्ता, ते च खो हत्थपासं अविजहित्वा एकसीमायं ठिता.

सीमा च नामेसा बद्धसीमा अबद्धसीमाति दुविधा होति. तत्थ एकादस विपत्तिसीमायो अतिक्कमित्वा तिविधसम्पत्तियुत्ता निमित्तेन निमित्तं सम्बन्धित्वा सम्मता सीमा बद्धसीमा नाम, ‘‘अतिखुद्दका, अतिमहती, खण्डनिमित्ता, छायानिमित्ता, अनिमित्ता, बहिसीमे ठिता सम्मता, नदिया सम्मता, समुद्दे सम्मता, जातस्सरे सम्मता, सीमाय सीमं सम्भिन्दन्तेन सम्मता, सीमाय सीमं अज्झोत्थरन्तेन सम्मता’’ति इमा हि ‘‘एकादसहि आकारेहि सीमतो कम्मानि विपज्जन्ती’’ति (परि. ४८६) वचनतो एकादस विपत्तिसीमायो नाम. तत्थ अतिखुद्दका नाम यत्थ एकवीसति भिक्खू निसीदितुं न सक्कोन्ति ¶ . अतिमहती नाम या अन्तमसो केसग्गमत्तेनापि तियोजनं अतिक्कमित्वा सम्मता. खण्डनिमित्ता नाम अघटितनिमित्ता वुच्चति, पुरत्थिमाय दिसाय निमित्तं कित्तेत्वा अनुक्कमेनेव दक्खिणाय पच्छिमाय उत्तराय दिसाय कित्तेत्वा पुन पुरत्थिमाय दिसाय पुब्बकित्तितं ¶ पटिकित्तेत्वा ठपेतुं वट्टति, एवं अक्खण्डनिमित्ता होति. सचे पन अनुक्कमेन आहरित्वा उत्तराय दिसाय निमित्तं कित्तेत्वा तत्थेव ठपेति, खण्डनिमित्ता नाम होति. अपरापि खण्डनिमित्ता नाम या अनिमित्तुपगं तचसाररुक्खं वा खाणुकं वा पंसुपुञ्जवालुकपुञ्जानं वा अञ्ञतरं अन्तरा एकं निमित्तं कत्वा सम्मता. छायानिमित्ता नाम ¶ पब्बतच्छायादीनं यं किञ्चि छायं निमित्तं कत्वा सम्मता. अनिमित्ता नाम सब्बेन सब्बं निमित्तानि अकित्तेत्वा सम्मता. बहिसीमे ठितसम्मता नाम निमित्तानि कित्तेत्वा निमित्तानं बहिठितेन सम्मता. नदिया समुद्दे जातस्सरे सम्मता नाम एतेसु नदिआदीसु सम्मता. सा हि एवं सम्मतापि ‘‘सब्बा, भिक्खवे, नदी असीमा, सब्बो समुद्दो असीमो, सब्बो जातस्सरो असीमो’’ति (महाव. १४७) वचनतो असम्मताव होति. सीमाय सीमं सम्भिन्दन्तेन सम्मता नाम अत्तनो सीमाय परेसं सीमं सम्भिन्दन्तेन सम्मता. सचे हि पोराणकस्स विहारस्स पुरत्थिमाय दिसाय अम्बो चेव जम्बू चाति द्वे रुक्खा अञ्ञमञ्ञं संसट्ठविटपा होन्ति, तेसु अम्बस्स पच्छिमदिसाभागे जम्बू, विहारसीमा च जम्बुं अन्तो कत्वा अम्बं कित्तेत्वा बद्धा होति, अथ पच्छा तस्स विहारस्स पुरत्थिमाय दिसाय विहारे कते सीमं बन्धन्ता भिक्खू तं अम्बं अन्तो कत्वा जम्बुं कित्तेत्वा बन्धन्ति, सीमाय सीमं सम्भिन्ना होति. सीमाय सीमं अज्झोत्थरन्तेन सम्मता नाम अत्तनो सीमाय परेसं सीमं अज्झोत्थरन्तेन सम्मता. सचे हि परेसं बद्धसीमं सकलं वा तस्सा पदेसं वा अन्तो कत्वा अत्तनो सीमं सम्मन्नति, सीमाय सीमं अज्झोत्थरिता नाम होति. इति इमा एकादस विपत्तिसीमायो अतिक्कमित्वा सम्मता.

तिविधसम्पत्तियुत्ताति निमित्तसम्पत्तिया परिसासम्पत्तिया कम्मवाचासम्पत्तिया च युत्ता. तत्थ निमित्तसम्पत्तिया युत्ता नाम पब्बतनिमित्तं, पासाणनिमित्तं, वननिमित्तं, रुक्खनिमित्तं, मग्गनिमित्तं, वम्मिकनिमित्तं, नदिनिमित्तं, उदकनिमित्तन्ति एवं वुत्तेसु अट्ठसु निमित्तेसु तस्मिं तस्मिं दिसाभागे यथालद्धानि ¶ निमित्तुपगानि निमित्तानि ‘‘पुरत्थिमाय दिसाय किं निमित्तं, पब्बतो, भन्ते, एसो पब्बतो निमित्त’’न्तिआदिना नयेन सम्मा कित्तेत्वा सम्मता. तत्रेवं सङ्खेपतो निमित्तुपगता वेदितब्बा – सुद्धपंसुसुद्धपासाणउभयमिस्सकवसेन हि तिविधोपि पब्बतो हत्थिप्पमाणतो पट्ठाय उद्धं निमित्तुपगो, ततो ओमकतरो न वट्टति. पासाणनिमित्ते अयोगुळम्पि पासाणसङ्खमेव गच्छति, तस्मा यो कोचि पासाणो उक्कंसवसेन हत्थिप्पमाणतो ओमकतरं आदिं कत्वा हेट्ठिमपरिच्छेदेन ¶ द्वत्तिंसपलगुळपिण्डपरिमाणो निमित्तुपगो, न ततो खुद्दकतरो. पिट्ठिपासाणो पन अतिमहन्तोपि वट्टति. वननिमित्ते अन्तोसारेहि वा अन्तोसारमिस्सकेहि वा रुक्खेहि चतुपञ्चरुक्खमत्तम्पि वनं निमित्तुपगं, ततो ऊनकतरं न वट्टति. रुक्खो जीवन्तोयेव अन्तोसारो भूमियं पतिट्ठितो, अन्तमसो उब्बेधतो अट्ठङ्गुलो, परिणाहतो सूचिदण्डकप्पमाणोपि निमित्तुपगो, ततो ओमकतरो न वट्टति. मग्गो जङ्घमग्गो वा होतु सकटमग्गो वा, यो विनिविज्झित्वा द्वे तीणि गामखेत्तानि गच्छति, तादिसो जङ्घसत्थसकटसत्थेहि वलञ्जियमानोयेव निमित्तुपगो, अवलञ्जितो ¶ न वट्टति. वम्मिको पन हेट्ठिमपरिच्छेदेन तंदिवसंजातो अट्ठङ्गुलुब्बेधो गोविसाणमत्तोपि वम्मिको निमित्तुपगो, ततो ओमकतरो न वट्टति. यं पन अबद्धसीमालक्खणे नदिं वक्खाम, सा निमित्तुपगा, अञ्ञा न वट्टति. उदकं यं असन्दमानं आवाटपोक्खरणीतळाकजातस्सरलोणिसमुद्दादीसु ठितं, तं आदिं कत्वा अन्तमसो तङ्खणेयेव पथवियं खणिते आवाटके घटेहि आहरित्वा पूरितम्पि याव कम्मवाचापरियोसाना सण्ठमानकं निमित्तुपगं, इतरं सन्दमानं वा वुत्तपरिच्छेदकालं अतिट्ठन्तं वा भाजनगतं वा न वट्टतीति.

परिसासम्पत्तिया युत्ता नाम सब्बन्तिमेन परिच्छेदेन चतूहि भिक्खूहि सन्निपतित्वा यावतिका तस्मिं गामखेत्ते बद्धसीमं वा नदिसमुद्दजातस्सरे वा अनोक्कमित्वा ठिता भिक्खू, ते सब्बे हत्थपासे वा कत्वा छन्दं वा आहरित्वा सम्मता.

कम्मवाचासम्पत्तिया ¶ युत्ता नाम ‘‘सुणातु मे, भन्ते, सङ्घो, यावता समन्ता निमित्ता कित्तिता’’तिआदिना (महाव. १३९) नयेन वुत्ताय परिसुद्धाय ञत्तिदुतियकम्मवाचाय सम्मता. एवं एकादस विपत्तिसीमायो अतिक्कमित्वा तिविधसम्पत्तियुत्ता निमित्तेन निमित्तं सम्बन्धित्वा सम्मता सीमा ‘‘बद्धसीमा’’ति वेदितब्बा. खण्डसीमा समानसंवाससीमा अविप्पवाससीमाति तस्सायेव पभेदो.

अबद्धसीमा पन गामसीमा, सत्तब्भन्तरसीमा, उदकुक्खेपसीमाति तिविधा. तत्थ यावता एकं गामक्खेत्तं, अयं गामसीमा नाम. अगामके अरञ्ञे समन्ता सत्तब्भन्तरा सत्तब्भन्तरसीमा नाम. तत्थ अगामकं नाम अरञ्ञं विञ्झाटविआदीसु वा समुद्दमज्झे वा मच्छबन्धानं अगमनपथेसु दीपकेसु लब्भति. समन्ता सत्तब्भन्तराति मज्झे ठितानं सब्बदिसासु ¶ सत्तब्भन्तरा विनिब्बेधेन चुद्दस होन्ति. तत्थ एकं अब्भन्तरं अट्ठवीसतिहत्थप्पमाणं होति, अयञ्च सीमा परिसावसेन वड्ढति, तस्मा समन्ता परिसापरियन्ततो पट्ठाय अब्भन्तरपरिच्छेदो कातब्बो. सचे पन द्वे सङ्घा विसुं उपोसथं करोन्ति, द्विन्नं सत्तब्भन्तरानं अन्तरे अञ्ञमेकं सत्तब्भन्तरं उपचारत्थाय ठपेतब्बं. या पनेसा ‘‘सब्बा, भिक्खवे, नदी असीमा’’तिआदिना (महाव. १४७) नयेन नदिआदीनं सीमभावं पटिक्खिपित्वा पुन ‘‘नदिया वा, भिक्खवे, समुद्दे वा जातस्सरे वा यं मज्झिमस्स पुरिसस्स समन्ता उदकुक्खेपा, अयं तत्थ समानसंवासा एकूपोसथा’’ति वुत्ता अयं उदकुक्खेपसीमा नाम. तत्थ यस्सा धम्मिकानं राजूनं काले अन्वड्ढमासं अनुदसाहं अनुपञ्चाहं ¶ अनतिक्कमित्वा देवे वस्सन्ते वलाहकेसु विगतमत्तेसु सोतं पच्छिज्जति, अयं नदिसङ्ख्यं न गच्छति. यस्सा पन ईदिसे सुवुट्ठिकाले वस्सानस्स चतुमासे सोतं न पच्छिज्जति, यत्थ तित्थेन वा अतित्थेन वा सिक्खाकरणीये आगतलक्खणेन तिमण्डलं पटिच्छादेत्वा अन्तरवासकं अनुक्खिपित्वा उत्तरन्तिया भिक्खुनिया एकद्वङ्गुलमत्तम्पि अन्तरवासको तेमियति, अयं समुद्दं वा पविसतु तळाकं वा, पभवतो पट्ठाय नदी नाम. समुद्दो पाकटोयेव. यो पन केनचि खणित्वा अकतो सयंजातो सोब्भो समन्ततो आगतेन उदकेन ¶ पूरितो तिट्ठति, यत्थ नदियं वुत्तप्पकारे वस्सकाले उदकं सन्तिट्ठति, अयं जातस्सरो नाम. योपि नदिं वा समुद्दं वा भिन्दित्वा निक्खन्तउदकेन खतो सोब्भो एतं लक्खणं पापुणाति, अयम्पि जातस्सरोयेव.

यं मज्झिमस्स पुरिसस्स समन्ता उदकुक्खेपाति यं ठानं थाममज्झिमस्स पुरिसस्स समन्ततो उदकुक्खेपेन परिच्छिन्नं, तत्थ यथा अक्खधुत्ता दारुगुळं खिपन्ति, एवं उदकं वा वालुकं वा हत्थेन गहेत्वा मज्झिमेन पुरिसेन सब्बथामेन खिपितब्बं, तत्थ यत्थ एवं खित्तं उदकं वा वालुकं वा पतति, अयं उदकुक्खेपो नाम.

अयं तत्थ समानसंवासा एकूपोसथाति अयं तेसु नदिआदीसु उदकुक्खेपपरिच्छिन्ना सीमा समानसंवासा चेव एकूपोसथा च, अयं पन एतेसं नदिआदीनं अन्तोयेव लब्भति, न बहि. तस्मा नदिया वा जातस्सरे वा यत्तकं पदेसं पकतिवस्सकाले चतूसु मासेसु उदकं ओत्थरति, समुद्दे यस्मिं पदेसे पकतिवीचियो ओत्थरित्वा सण्ठहन्ति, ततो पट्ठाय कप्पियभूमि, तत्थ ठत्वा उपोसथादिकम्मं कातुं वट्टति ¶ . दुब्बुट्ठिकाले वा गिम्हे वा नदिजातस्सरेसु सुक्खेसुपि सा एव कप्पियभूमि, सचे पन सुक्खे जातस्सरे वापिं वा खणन्ति, वप्पं वा करोन्ति, तं ठानं गामक्खेत्तं होति. या पनेसा ‘‘कप्पियभूमी’’ति वुत्ता, ततो बहि उदकुक्खेपसीमा न गच्छति, अन्तोयेव गच्छति, तस्मा तेसं अन्तो परिसापरियन्ततो पट्ठाय समन्ता उदकुक्खेपपरिच्छेदो कातब्बो. सचे पन द्वे सङ्घा विसुं विसुं उपोसथादिकम्मं करोन्ति, द्विन्नं उदकुक्खेपानं अन्तरे अञ्ञो एको उदकुक्खेपो उपचारत्थाय ठपेतब्बो. अयञ्हि सत्तब्भन्तरसीमा च उदकुक्खेपसीमा च भिक्खूनं ठितोकासतो पट्ठाय लब्भति. परिच्छेदब्भन्तरे हत्थपासं विजहित्वा ठितोपि परिच्छेदतो बहि अञ्ञं तत्तकंयेव परिच्छेदं अनतिक्कमित्वा ठितोपि कम्मं कोपेति, इदं सब्बअट्ठकथासु (महाव. अट्ठ. १४७) सन्निट्ठानं. एवं अबद्धसीमा वेदितब्बा. इति इमं बद्धसीमाबद्धसीमावसेन दुविधं सीमं सन्धायेतं वुत्तं ‘‘ते च खो हत्थपासं अविजहित्वा एकसीमायं ¶ ठिता’’ति. तेसु हि चतूसु भिक्खूसु एकसीमायं हत्थपासं अविजहित्वा ठितेस्वेवेतं ¶ सङ्घस्स उपोसथकम्मं पत्तकल्लं नाम होति, न इतरथा. यथाह ‘‘अनुजानामि, भिक्खवे, चतुन्नं पातिमोक्खं उद्दिसितु’’न्ति (महाव. १६८).

सभागापत्तियो च न विज्जन्तीति एत्थ यं सब्बो सङ्घो विकालभोजनादिना सभागवत्थुना लहुकापत्तिं आपज्जति, एवरूपा वत्थुसभागा ‘‘सभागा’’ति वुच्चति, विकालभोजनपच्चया आपन्नं पन आपत्तिसभागं अनतिरित्तभोजनपच्चया आपन्नस्स सन्तिके देसेतुं वट्टति. सभागापत्तिया पन सति तेहि भिक्खूहि एको भिक्खु सामन्ता आवासा सज्जुकं पाहेतब्बो ‘‘गच्छावुसो, तं आपत्तिं पटिकरित्वा आगच्छ, मयं ते सन्तिके आपत्तिं पटिकरिस्सामा’’ति, एवञ्चेतं लभेथ, इच्चेतं कुसलं, नो चे लभेथ, ब्यत्तेन भिक्खुना पटिबलेन सङ्घो ञापेतब्बो ‘‘सुणातु मे, भन्ते, सङ्घो, अयं सब्बो सङ्घो सभागं आपत्तिं आपन्नो, यदा अञ्ञं भिक्खुं सुद्धं अनापत्तिकं पस्सिस्सति, तदा तस्स सन्तिके तं आपत्तिं पटिकरिस्सती’’ति (महाव. १७१) वत्वा उपोसथो कातब्बो. सचे पन वेमतिको होति, ‘‘सुणातु मे, भन्ते, सङ्घो, अयं सब्बो सङ्घो सभागाय आपत्तिया वेमतिको, यदा निब्बेमतिको भविस्सति, तदा तं आपत्तिं पटिकरिस्सती’’ति वत्वा उपोसथो कातब्बो. सचे पनेत्थ कोचि तं सभागं आपत्तिं देसेतुं वट्टतीति मञ्ञमानो एकस्स सन्तिके देसेति, देसिता सुदेसिताव. अञ्ञं पन देसनापच्चया देसको, पटिग्गहणपच्चया पटिग्गाहको चाति उभोपि दुक्कटं आपज्जन्ति, तं नानावत्थुकं होति, तस्मा अञ्ञमञ्ञं देसेतब्बं ¶ . एत्तावता ते द्वे निरापत्तिका होन्ति, तेसं सन्तिके सेसेहि सभागापत्तियो देसेतब्बा वा आरोचेतब्बा वा. सचे ते एवं अकत्वा उपोसथं करोन्ति, ‘‘पारिसुद्धिं आयस्मन्तो आरोचेथा’’तिआदिना (महाव. १३४) नयेन सापत्तिकस्स उपोसथकरणे पञ्ञत्तं दुक्कटं आपज्जन्ति. सचे सब्बो सङ्घो सभागापत्तिया सति वुत्तविधिं अकत्वा उपोसथं करोति, वुत्तनयेनेव सब्बो सङ्घो आपत्तिं आपज्जति, तस्मा सभागापत्तिया सति सङ्घस्स पत्तकल्लं ¶ नाम न होति, तेन वुत्तं ‘‘सभागापत्तियो च न विज्जन्ती’’ति. एतासु हि सभागापत्तीसु अविज्जमानासु विसभागापत्तीसु विज्जमानासुपि पत्तकल्लं होतियेव.

वज्जनीया च पुग्गला तस्मिं न होन्तीति ‘‘न, भिक्खवे, सगहट्ठाय परिसाय पातिमोक्खं उद्दिसितब्बं, यो उद्दिसेय्य आपत्ति दुक्कटस्सा’’ति ¶ (महाव. १५४) वचनतो गहट्ठो, ‘‘न, भिक्खवे, भिक्खुनिया निसिन्नपरिसाय पातिमोक्खं उद्दिसितब्ब’’न्तिआदिना (महाव. १८३) नयेन वुत्ता भिक्खुनी, सिक्खमाना, सामणेरो, सामणेरी, सिक्खापच्चक्खातको, अन्तिमवत्थुअज्झापन्नको, आपत्तिया अदस्सने उक्खित्तको, आपत्तिया अप्पटिकम्मे उक्खित्तको, पापिकाय दिट्ठिया अप्पटिनिस्सग्गे उक्खित्तको, पण्डको, थेय्यसंवासको, तित्थियपक्कन्तको, तिरच्छानगतो, मातुघातको, पितुघातको अरहन्तघातको, भिक्खुनिदूसको, सङ्घभेदको, लोहितुप्पादको, उभतोब्यञ्जनकोति इमे वीसति चाति एकवीसति पुग्गला वज्जनीया नाम, ते हत्थपासतो बहिकरणवसेन वज्जेतब्बा. एतेसु हि तिविधे उक्खित्तके सति उपोसथं करोन्तो सङ्घो पाचित्तियं आपज्जति, सेसेसु दुक्कटं. एत्थ च तिरच्छानगतोति यस्स उपसम्पदा पटिक्खित्ता, तित्थिया गहट्ठेनेव सङ्गहिता. एतेपि हि वज्जनीया नाम. एवं पत्तकल्लं इमेहि चतूहि अङ्गेहि सङ्गहितन्ति वेदितब्बं.

सङ्घो उपोसथं करेय्यातिइमिना ये ते अपरेपि तयो उपोसथा सङ्घे उपोसथो, गणे उपोसथो, पुग्गले उपोसथोति, एवं कारकवसेन तयो उपोसथा वुत्ता, तेसु इतरे द्वे पटिक्खिपित्वा सङ्घे उपोसथमेव दीपेति. पातिमोक्खं उद्दिसेय्यातिइमिना ये ते अपरेपि तयो उपोसथा सुत्तुद्देसो, पारिसुद्धिउपोसथो, अधिट्ठानउपोसथोति, एवं कत्तब्बाकारवसेन तयो उपोसथा वुत्ता, तेसु इतरे द्वे पटिक्खिपित्वा सुत्तुद्देसमेव दीपेति. सुत्तुद्देसो नाम पातिमोक्खुद्देसो वुच्चति, सो दुविधो ओवादपातिमोक्खुद्देसो च आणापातिमोक्खुद्देसो च. तत्थ

‘‘खन्ती ¶ परमं तपो तितिक्खा…पे….

‘‘सब्बपापस्स अकरणं…पे….

‘‘अनूपवादो अनूपघातो’’ति. (दी. नि. २.९०; ध. प. १८४, १८३, १८५)

आदिना नयेन वुत्ता तिस्सो गाथायो ओवादपातिमोक्खं नाम, तं बुद्धा एव उद्दिसन्ति, न सावका. ‘‘सुणातु ¶ मे, भन्ते, सङ्घो’’तिआदिना (महाव. १३४) नयेन वुत्तं आणापातिमोक्खं नाम, तं सावका एव उद्दिसन्ति, न बुद्धा. इदमेव च इमस्मिं अत्थे ‘‘पातिमोक्ख’’न्ति अधिप्पेतं.

ये ¶ पन इतरे द्वे उपोसथा, तेसु पारिसुद्धिउपोसथो ताव अञ्ञेसञ्च सन्तिके, अञ्ञमञ्ञञ्च आरोचनवसेन दुविधो. तत्थ य्वायं अञ्ञेसं सन्तिके करीयति, सोपि पवारितानञ्च अप्पवारितानञ्च सन्तिके करणवसेन दुविधो. तत्थ महापवारणाय पवारितानं सन्तिके पच्छिमिकाय उपगतेन वा अनुपगतेन वा छिन्नवस्सेन वा चातुमासिनियं पन पवारितानं सन्तिके पुरिमिकाय उपगतेन वा अनुपगतेन वा छिन्नवस्सेन वा कायसामग्गिं दत्वा ‘‘परिसुद्धो अहं, भन्ते, ‘परिसुद्धो’ति मं धारेथा’’ति तिक्खत्तुं वत्वा कातब्बो, ठपेत्वा च पन पवारणादिवसं अञ्ञस्मिं काले आवासिकेहि उद्दिट्ठमत्ते पातिमोक्खे अवुट्ठिताय वा एकच्चाय वुट्ठिताय वा सब्बाय वा वुट्ठिताय परिसाय ये अञ्ञे समसमा वा थोकतरा वा आगच्छन्ति, तेहि तेसं सन्तिके वुत्तनयेनेव पारिसुद्धि आरोचेतब्बा. यो पनायं अञ्ञमञ्ञं आरोचनवसेन करीयति, सो ञत्तिं ठपेत्वा च अट्ठपेत्वा च करणवसेन दुविधो. तत्थ यस्मिं आवासे तयो भिक्खू विहरन्ति, तेसु उपोसथदिवसे सन्निपतितेसु एकेन भिक्खुना ‘‘सुणन्तु मे आयस्मन्ता अज्जुपोसथो चातुद्दसो’’ति वा ‘‘पन्नरसो’’ति वा वत्वा ‘‘यदायस्मन्तानं पत्तकल्लं मयं अञ्ञमञ्ञं पारिसुद्धिउपोसथं करेय्यामा’’ति ञत्तिया ठपिताय थेरेन भिक्खुना एकंसं उत्तरासङ्गं करित्वा उक्कुटिकं निसीदित्वा अञ्जलिं पग्गहेत्वा ‘‘परिसुद्धो अहं, आवुसो, ‘परिसुद्धो’ति मं धारेथा’’ति (महाव. १६८) तिक्खत्तुं वत्तब्बं. इतरेहि ‘‘भन्ते’’ति वत्वा एवमेव वत्तब्बं. एवं ञत्तिं ठपेत्वा कातब्बो. यत्थ पन द्वे भिक्खू विहरन्ति, तत्र ¶ ञत्तिं अट्ठपेत्वा वुत्तनयेनेव पारिसुद्धि आरोचेतब्बाति अयं पारिसुद्धिउपोसथो.

सचे पन एकोव भिक्खु होति, सब्बं पुब्बकरणीयं कत्वा अञ्ञेसं अनागमनं ञत्वा ‘‘अज्ज मे उपोसथो चातुद्दसो’’ति वा ‘‘पन्नरसो’’ति वा वत्वा ‘‘अधिट्ठामी’’ति वत्तब्बं. अयं अधिट्ठानुपोसथोति एवं कत्तब्बाकारवसेन तयो उपोसथाति वेदितब्बा. एत्तावता नव उपोसथा दीपिता होन्ति. तेसु दिवसवसेन पन्नरसिको, कारकवसेन सङ्घुपोसथो, कत्तब्बाकारवसेन सुत्तुद्देसोति एवं तिलक्खणसम्पन्नो उपोसथो इध निद्दिट्ठोति वेदितब्बो. तस्मिं पवत्तमाने उपोसथं अकत्वा तदहुपोसथे अञ्ञं अभिक्खुकं नानासंवासकेहि वा सभिक्खुकं आवासं वा अनावासं वा वासत्थाय अञ्ञत्र सङ्घेन, अञ्ञत्र अन्तराया गच्छन्तस्स दुक्कटं होति.

किं सङ्घस्स पुब्बकिच्चन्ति ‘‘सङ्घो उपोसथं करेय्या’’ति एवं ¶ उपोसथकरणसम्बन्धेनेव वुत्तस्स ¶ सङ्घस्स उपोसथे कत्तब्बे यं तं ‘‘अनुजानामि, भिक्खवे, उपोसथागारं सम्मज्जितु’’न्तिआदिना (महाव. १५९) नयेन पाळियं आगतं, अट्ठकथासु च –

‘‘सम्मज्जनी पदीपो च, उदकं आसनेन च;

उपोसथस्स एतानि, ‘पुब्बकरण’न्ति वुच्चति.

‘‘छन्दपारिसुद्धिउतुक्खानं, भिक्खुगणना च ओवादो;

उपोसथस्स एतानि, ‘पुब्बकिच्च’न्ति वुच्चती’’ति. (महाव. अट्ठ. १६८);

एवं द्वीहि नामेहि नवविधं पुब्बकिच्चं दस्सितं, किं तं कतन्ति पुच्छति. न हि तं अकत्वा उपोसथं कातुं वट्टति, तस्मा थेरेन आणत्तेन अगिलानेन भिक्खुना उपोसथागारं सम्मज्जितब्बं, पानीयं परिभोजनीयं उपट्ठापेतब्बं, आसनं पञ्ञापेतब्बं, पदीपो कातब्बो, अकरोन्तो दुक्कटं आपज्जति, थेरेनापि पतिरूपं ञत्वा आणापेतब्बं.

छन्दपारिसुद्धीति एत्थ उपोसथकरणत्थं सन्निपतिते सङ्घे बहि उपोसथं कत्वा आगतेन सन्निपतितट्ठानं गन्त्वा कायसामग्गिं अदेन्तेन ¶ छन्दो दातब्बो. योपि गिलानो वा होति किच्चप्पसुतो वा, तेनापि पारिसुद्धिं देन्तेन छन्दोपि दातब्बो. कथं दातब्बो? एकस्स भिक्खुनो सन्तिके ‘‘छन्दं दम्मि, छन्दं मे हर, छन्दं मे आरोचेही’’ति (महाव. १६५) अयं अत्थो कायेन वा वाचाय वा उभयेन वा विञ्ञापेतब्बो, एवं दिन्नो होति छन्दो. अकतूपोसथेन पन गिलानेन वा किच्चप्पसुतेन वा पारिसुद्धि दातब्बा. कथं दातब्बा? एकस्स भिक्खुनो सन्तिके ‘‘पारिसुद्धिं दम्मि, पारिसुद्धिं मे हर, पारिसुद्धिं मे आरोचेही’’ति (महाव. १६४) अयं अत्थो कायेन वा वाचाय वा उभयेन वा विञ्ञापेतब्बो, एवं दिन्ना होति पारिसुद्धि, तं पन देन्तेन छन्दोपि दातब्बो. वुत्तञ्हेतं भगवता ‘‘अनुजानामि, भिक्खवे, तदहुपोसथे पारिसुद्धिं देन्तेन छन्दम्पि दातुं, सन्ति सङ्घस्स करणीय’’न्ति (महाव. १६५). तत्थ पारिसुद्धिदानं सङ्घस्सपि अत्तनोपि उपोसथकरणं सम्पादेति, न अवसेसं सङ्घकिच्चं. छन्ददानं सङ्घस्सेव उपोसथकरणञ्च सेसकिच्चञ्च सम्पादेति, अत्तनो पन उपोसथो अकतोयेव होति. तस्मा पारिसुद्धिं देन्तेन छन्दोपि दातब्बो. पुब्बे वुत्तं पन सुद्धिकच्छन्दं वा इमं वा छन्दपारिसुद्धिं एकेन बहूनम्पि आहरितुं वट्टति. सचे पन सो अन्तरामग्गे अञ्ञं भिक्खुं पस्सित्वा येसं तेन छन्दो वा पारिसुद्धि ¶ वा गहिता, तेसञ्च अत्तनो च छन्दपारिसुद्धिं देति, तस्सेव सा आगच्छति, इतरा पन बिळालसङ्खलिका छन्दपारिसुद्धि नाम होति, सा नागच्छति, तस्मा सयमेव सन्निपतितट्ठानं गन्त्वा आरोचेतब्बं. सचे पन सञ्चिच्च नारोचेति, दुक्कटं आपज्जति. छन्दपारिसुद्धि पन तस्मिं हत्थपासं उपगतमत्तेयेव आगता होति.

उतुक्खानन्ति ¶ ‘‘हेमन्तादीनं उतूनं एत्तकं अतिक्कन्तं, एत्तकं अवसिट्ठ’’न्ति एवं उतूनं आचिक्खनं. भिक्खुगणनाति ‘‘एत्तका भिक्खू उपोसथग्गे सन्निपतिता’’ति भिक्खूनं गणना. इदम्पि हि उभयं कत्वाव उपोसथो कातब्बो. ओवादोति भिक्खुनोवादो. न हि भिक्खुनीहि याचितं ओवादं अनारोचेत्वा उपोसथं कातुं वट्टति. भिक्खुनियो हि ‘‘स्वे उपोसथो’’ति आगन्त्वा ‘‘अयं उपोसथो चातुद्दसो पन्नरसो’’ति पुच्छित्वा पुन उपोसथदिवसे आगन्त्वा ‘‘भिक्खुनिसङ्घो, अय्य, भिक्खुसङ्घस्स ¶ पादे वन्दति, ओवादूपसङ्कमनञ्च याचति, लभतु किर, अय्य, भिक्खुनिसङ्घो ओवादूपसङ्कमन’’न्ति (चूळव. ४१३) एवं ओवादं याचन्ति. तं ठपेत्वा बालगिलानगमिये अञ्ञो सचेपि आरञ्ञिको होति, अपटिग्गहेतुं न लभति, तस्मा येन सो पटिग्गहितो, तेन भिक्खुना उपोसथग्गे पातिमोक्खुद्देसको भिक्खु एवं वत्तब्बो ‘‘भिक्खुनिसङ्घो, भन्ते, भिक्खुसङ्घस्स पादे वन्दति, ओवादूपसङ्कमनञ्च याचति, लभतु किर, भन्ते, भिक्खुनिसङ्घो ओवादूपसङ्कमन’’न्ति. पातिमोक्खुद्देसकेन वत्तब्बं ‘‘अत्थि कोचि भिक्खु भिक्खुनोवादको सम्मतो’’ति. सचे होति कोचि भिक्खु भिक्खुनोवादको सम्मतो, ततो तेन सो वत्तब्बो ‘‘इत्थन्नामो भिक्खु भिक्खुनोवादको सम्मतो, तं भिक्खुनिसङ्घो उपसङ्कमतू’’ति (चूळव. ४१३). सचे नत्थि, ततो तेन पुच्छितब्बं ‘‘को आयस्मा उस्सहति भिक्खुनियो ओवदितु’’न्ति. सचे कोचि उस्सहति, सोपि च अट्ठहि अङ्गेहि समन्नागतो, तं तत्थेव सम्मन्नित्वा ओवादपटिग्गाहको वत्तब्बो ‘‘इत्थन्नामो भिक्खु भिक्खुनोवादको सम्मतो, तं भिक्खुनिसङ्घो उपसङ्कमतू’’ति (चुळव. ४१३). सचे पन कोचि न उस्सहति, पातिमोक्खुद्देसकेन वत्तब्बं ‘‘नत्थि कोचि भिक्खु भिक्खुनोवादको सम्मतो, पासादिकेन भिक्खुनिसङ्घो सम्पादेतू’’ति. एत्तावता हि सिक्खत्तयसङ्गहितं सकलं सासनं आरोचितं होति. तेन भिक्खुना ‘‘साधू’’ति सम्पटिच्छित्वा पाटिपददिवसे भिक्खुनीनं आरोचेतब्बं.

भिक्खुनिसङ्घेनापि ता भिक्खुनियो पेसेतब्बा, गच्छथ, अय्या, पुच्छथ ‘‘किं, अय्य, लभति भिक्खुनिसङ्घो ओवादूपसङ्कमन’’न्ति, ताहि ‘‘साधु, अय्ये’’ति सम्पटिच्छित्वा तं भिक्खुं उपसङ्कमित्वा एवं वत्तब्बं ‘‘किं, अय्य, लभति भिक्खुनिसङ्घो ओवादूपसङ्कमन’’न्ति. तेन वत्तब्बं ¶ ‘‘नत्थि कोचि भिक्खु भिक्खुनोवादको सम्मतो, पासादिकेन भिक्खुनिसङ्घो सम्पादेतू’’ति, ताहि ‘‘साधु अय्या’’ति सम्पटिच्छितब्बं. इदञ्च एकतो आगतानं द्विन्नं तिण्णं वा वसेन वुत्तं. तासु पन एकाय भिक्खुनिया वत्तब्बञ्चेव सम्पटिच्छितब्बञ्च, इतरा तस्सा सहायिका. सचे पन भिक्खुसङ्घो वा भिक्खुनिसङ्घो वा न पूरति ¶ , उभयतोपि वा गणमत्तमेव पुग्गलमत्तं वा होति.

तत्रायं ¶ वचनक्कमो – ‘‘भिक्खुनियो, अय्य, भिक्खुसङ्घस्स पादेवन्दन्ति, ओवादूपसङ्कमनञ्च याचन्ति, लभन्तु किर, अय्य, भिक्खुनियो ओवादूपसङ्कमन’’न्ति, ‘‘अहं, अय्य, भिक्खुसङ्घस्स पादे वन्दामि, ओवादूपसङ्कमनञ्च याचामि, लभामहं, अय्य, ओवादूपसङ्कमन’’न्ति, ‘‘भिक्खुनिसङ्घो, अय्या, अय्यानं पादे वन्दति, ओवादूपसङ्कमनञ्च याचति, लभतु किर, अय्या, भिक्खुनिसङ्घो ओवादूपसङ्कमन’’न्ति. ‘‘भिक्खुनियो, अय्या, अय्यानं पादे वन्दन्ति, ओवादूपसङ्कमनञ्च याचन्ति, लभन्तु किर, अय्या, भिक्खुनियो ओवादूपसङ्कमन’’न्ति, ‘‘अहं, अय्या, अय्यानं पादे वन्दामि, ओवादूपसङ्कमनञ्च याचामि, लभामहं, अय्या, ओवादूपसङ्कमन’’न्ति, ‘‘भिक्खुनिसङ्घो, अय्य, अय्यस्स पादे वन्दति, ओवादूपसङ्कमनञ्च याचति, लभतु किर, अय्य, भिक्खुनिसङ्घो ओवादूपसङ्कमन’’न्ति. ‘‘भिक्खुनियो, अय्य, अय्यस्स पादे वन्दन्ति, ओवादूपसङ्कमनञ्च याचन्ति, लभन्तु किर, अय्य, भिक्खुनियो ओवादूपसङ्कमन’’न्ति, ‘‘अहं, अय्य, अय्यस्स पादे वन्दामि, ओवादूपसङ्कमनञ्च याचामि, लभामहं, अय्य, ओवादूपसङ्कमन’’न्ति. तेनापि भिक्खुना उपोसथकाले एवं वत्तब्बं ‘‘भिक्खुनियो, भन्ते, भिक्खुसङ्घस्स पादे वन्दन्ति, ओवादूपसङ्कमनञ्च याचन्ति, लभन्तु किर, भन्ते, भिक्खुनियो ओवादूपसङ्कमन’’न्ति, ‘‘भिक्खुनी, भन्ते, भिक्खुसङ्घस्स पादे वन्दति, ओवादूपसङ्कमनञ्च याचति, लभतु किर, भन्ते, भिक्खुनी ओवादूपसङ्कमन’’न्ति. ‘‘भिक्खुनिसङ्घो, भन्ते, भिक्खुनियो, भन्ते, भिक्खुनी भन्ते आयस्मन्तानं पादे वन्दति, वन्दन्ति, वन्दति, ओवादूपसङ्कमनञ्च याचति, याचन्ति, याचति, लभतु किर, भन्ते, भिक्खुनिसङ्घो, लभन्तु किर, भन्ते, भिक्खुनियो, लभतु किर, भन्ते, भिक्खुनी ओवादूपसङ्कमन’’न्ति. उपोसथग्गेपि पातिमोक्खुद्देसकेन वा ञत्तिट्ठपकेन वा इतरेन वा भिक्खुना सचे सम्मतो भिक्खु अत्थि, पुरिमनयेनेव ‘‘तं भिक्खुनिसङ्घो, तं भिक्खुनियो, तं भिक्खुनी उपसङ्कमतु, उपसङ्कमन्तु, उपसङ्कमतू’’ति वत्तब्बं. सचे नत्थि, ‘‘पासादिकेन भिक्खुनिसङ्घो, भिक्खुनियो, भिक्खुनी सम्पादेतु, सम्पादेन्तु, सम्पादेतू’’ति वत्तब्बं. ओवादप्पटिग्गाहकेन पाटिपदे तं पच्चाहरित्वा तथेव वत्तब्बं, अयमेत्थ सङ्खेपविनिच्छयो. एवं भिक्खुनीहि याचितं ओवादं आरोचेत्वाव उपोसथो कातब्बो. तेन वुत्तं –

‘‘छन्दपारिसुद्धिउतुक्खानं ¶ ¶ ¶ , भिक्खुगणना च ओवादो;

उपोसथस्स एतानि, ‘पुब्बकिच्च’न्ति वुच्चती’’ति.

पारिसुद्धिं आयस्मन्तो आरोचेथाति अत्तनो परिसुद्धभावं आरोचेथ, ‘‘पातिमोक्खं उद्दिसिस्सामी’’तिइदं पारिसुद्धिआरोचनस्स कारणवचनं. ‘‘न च, भिक्खवे, सापत्तिकेन पातिमोक्खं सोतब्बं, यो सुणेय्य आपत्ति दुक्कटस्सा’’ति (चूळव. ३८६) हि वचनतो अपरिसुद्धेहि पातिमोक्खं सोतुं न वट्टति. तेन वुत्तं – पारिसुद्धिं आयस्मन्तो आरोचेथ, पातिमोक्खं उद्दिसिस्सामीति. एत्थ सिया ‘‘सङ्घो उपोसथं करेय्य, पातिमोक्खं उद्दिसेय्या’’ति (महाव. १३४) वुत्तत्ता इधापि ‘‘पातिमोक्खं उद्दिसिस्सती’’ति वत्तब्बं, एवञ्हि सति पुब्बेनापरं सन्धियतीति. वुच्चते, वचनमत्तमेवेतं न सन्धियति, लक्खणतो पन समेति, सङ्घस्स सामग्गिया, गणस्स सामग्गिया, पुग्गलस्स उद्देसा सङ्घस्स उद्दिट्ठं होति पातिमोक्खन्ति इदञ्हेत्थ लक्खणं, तस्मा ‘‘पातिमोक्खं उद्दिसिस्सामी’’ति इदमेवेत्थ वत्तब्बं.

तं सब्बेव सन्ता साधुकं सुणोम मनसि करोमाति न्ति पातिमोक्खं. सब्बेव सन्ताति यावतिका तस्सा परिसाय थेरा च नवा च मज्झिमा च. साधुकं सुणोमाति अट्ठिं कत्वा मनसि करित्वा सोतद्वारवसेन सब्बचेतसा समन्नाहराम. मनसि करोमाति एकग्गचित्ता हुत्वा चित्ते ठपेय्याम. एत्थ च किञ्चापि ‘‘पातिमोक्खं उद्दिसिस्सामी’’ति वुत्तत्ता ‘‘सुणोथ मनसि करोथा’’ति वत्तुं युत्तं विय दिस्सति, ‘‘सङ्घो उपोसथं करेय्या’’तिइमिना पन न समेति. समग्गस्स हि सङ्घस्सेतं उपोसथकरणं, पातिमोक्खुद्देसको च सङ्घपरियापन्नोव, इच्चस्स सङ्घपरियापन्नत्ता ‘‘सुणोम मनसि करोमा’’ति इदमेव वत्तुं युत्तं.

इदानि यं वुत्तं ‘‘पारिसुद्धिं आयस्मन्तो आरोचेथा’’ति, तत्थ यथा पारिसुद्धिआरोचनं होति, तं दस्सेतुं यस्स सिया आपत्ति, सो आविकरेय्याति आह. तत्थ यस्स सियाति यस्स छन्नं आकारानं अञ्ञतरेन आपन्नापत्ति भवेय्य. आपत्तिञ्हि ¶ आपज्जन्तो अलज्जिता, अञ्ञाणता, कुक्कुच्चप्पकतता, अकप्पिये कप्पियसञ्ञिता, कप्पिये अकप्पियसञ्ञिता, सतिसम्मोसाति इमेहि छहाकारेहि (परि. २९५) आपज्जति.

कथं अलज्जिताय आपज्जति? अकप्पियभावं जानन्तोयेव मद्दित्वा वीतिक्कमं करोति.

वुत्तम्पि ¶ चेतं –

‘‘सञ्चिच्च आपत्तिं आपज्जति, आपत्तिं परिगूहति;

अगतिगमनञ्च गच्छति, एदिसो वुच्चति अलज्जिपुग्गलो’’ति. (परि. ३५९);

कथं अञ्ञाणताय आपज्जति? अञ्ञाणपुग्गलो हि मन्दो मोमूहो कत्तब्बाकत्तब्बं अजानन्तो अकत्तब्बं करोति, कत्तब्बं विराधेति, एवं अञ्ञाणताय आपज्जति.

कथं कुक्कुच्चप्पकतताय आपज्जति? कप्पियाकप्पियं ¶ निस्साय कुक्कुच्चे उप्पन्ने विनयधरं पुच्छित्वा कप्पियं चे, कत्तब्बं सिया, अकप्पियं चे, न कत्तब्बं, अयं पन ‘‘वट्टती’’ति मद्दित्वा वीतिक्कमतियेव, एवं कुक्कुच्चप्पकतताय आपज्जति.

कथं अकप्पिये कप्पियसञ्ञिताय आपज्जति? अच्छमंसं ‘‘सूकरमंस’’न्ति खादति, विकाले कालसञ्ञाय भुञ्जति, एवं अकप्पिये कप्पियसञ्ञिताय आपज्जति.

कथं कप्पिये अकप्पियसञ्ञिताय आपज्जति? सूकरमंसं ‘‘अच्छमंस’’न्ति खादति, काले विकालसञ्ञाय भुञ्जति, एवं कप्पिये अकप्पियसञ्ञिताय आपज्जति.

कथं सतिसम्मोसा आपज्जति? सहसेय्यचीवरविप्पवासादीनि सतिसम्मोसा आपज्जति, इति इमेसं छन्नं आकारानं अञ्ञतरेन आकारेन आपन्ना यस्स सिया सत्तन्नं आपत्तिक्खन्धानं अञ्ञतरा आपत्ति थेरस्स वा नवस्स वा मज्झिमस्स वाति अत्थो.

सो आविकरेय्याति सो तं आपत्तिं देसेतु वा पकासेतु वाति वुत्तं होति. असन्तिया आपत्तियाति यस्स पन एवं अनापन्ना वा आपत्तिं ¶ आपज्जित्वा च पन वुट्ठिता वा देसिता वा आरोचिता वा आपत्ति, तस्स सा आपत्ति असन्ती नाम होति, एवं असन्तिया आपत्तिया तुण्ही भवितब्बं. तुण्हीभावेन खो पनायस्मन्ते ‘‘परिसुद्धा’’ति वेदिस्सामीति तुण्हीभावेनापि हि कारणेन अहं आयस्मन्ते ‘‘परिसुद्धा’’इच्चेव जानिस्सामीति. यथा खो पन पच्चेकपुट्ठस्स वेय्याकरणं होतीति यथा एकेनेको पुट्ठो ब्याकरेय्य, यथा एकेनेको पच्चेकपुट्ठो ‘‘मं एस पुच्छती’’ति ञत्वा ब्याकरेय्याति वुत्तं होति.

एवमेवं ¶ एवरूपाय परिसाय यावततियं अनुसावितं होतीति एत्थ एकच्चे ताव आचरिया एवं वदन्ति ‘‘एवमेवं इमिस्साय भिक्खुपरिसाय यदेतं ‘यस्स सिया आपत्ति, सो आविकरेय्य, असन्तिया आपत्तिया तुण्ही भवितब्बं, तुण्हीभावेन खो पनायस्मन्ते परिसुद्धाति वेदिस्सामी’ति तिक्खत्तुं अनुसावितं, तं एकमेकेन ‘मं एस पुच्छती’ति एवं जानितब्बं होतीति अत्थो’’ति. तं न युज्जति, कस्मा? अत्थब्यञ्जनभेदतो. अनुस्सावनञ्हि नाम अत्थतो च ब्यञ्जनतो च अभिन्नं होति ‘‘दुतियम्पि एतमत्थं वदामी’’तिआदीसु (महाव. ७२; चूळव. ३) विय, ‘‘यस्स सिया’’तिआदिवचनत्तयं पन अत्थतोपि ब्यञ्जनतोपि भिन्नं, तेनस्स अनुस्सावनत्तयं न युज्जति. यदि चेतं यावततियानुस्सावनं सिया, निदानुद्देसे अनिट्ठितेपि आपत्ति सिया. न च युत्तं अनापत्तिक्खेत्ते आपत्तिं आपज्जितुं.

अपरे ‘‘अनुसावित’’न्तिपदस्स अनुसावेतब्बन्ति अत्थं विकप्पेत्वा ‘‘यावततिय’’न्तिइदं उपरि उद्देसावसाने ‘‘कच्चित्थ परिसुद्धा…पे… ततियम्पि पुच्छामी’’ति एतं सन्धाय वुत्तन्ति आहु. तम्पि न युज्जति, कस्मा? अत्थयुत्तीनं अभावतो. इदञ्हि पदं केचि ‘‘अनुसावेत’’न्ति सज्झायन्ति, केचि ‘‘अनुसावेत’’न्ति, तं उभयं वापि अतीतकालमेव दीपेति, न अनागतं. यदि चस्स अयं अत्थो सिया, ‘‘अनुसावितं हेस्सती’’ति वदेय्य ¶ , एवं ताव अत्थाभावतो न युज्जति. यदि चेतं उद्देसावसाने वचनं सन्धाय वुत्तं सिया, ‘‘न आविकरिस्सामी’’ति चित्तं उप्पादेन्तस्स निदाने समत्तेपि वुत्तमुसावादो न सिया, कस्मा? ‘‘यावततियं अनुस्सावियमाने’’तिवचनतो (महाव. १३४) ‘‘यावततिय’’न्ति इदं वचनमेव ¶ निरत्थकं सिया, कस्मा? निदानुद्देसे यावततियानुस्सावनस्स अभावतोति एवं युत्तिअभावतो तम्पि न युज्जति. ‘‘यावततियं अनुसावितं होती’’ति इदं पन लक्खणवचनमत्तं, तेन इममत्थं दस्सेति – इदं पातिमोक्खं नाम यावततियं अनुस्सावियति, तस्मिं यावततियं अनुस्सावियमाने यो सरमानो सन्तिं आपत्तिं नाविकरोति, तस्स यावततियानुस्सावनावसाने सम्पजानमुसावादो होतीति.

तदेतं यथा अनुसावितं यावततियं अनुसावितं नाम होति, तं दस्सेतुं तत्थायस्मन्ते पुच्छामीतिआदि वुत्तं. तं पनेतं पाराजिकादीनं अवसाने दिस्सति, न निदानावसाने. किञ्चापि न दिस्सति, अथ खो उद्देसकाले ‘‘आविकता हिस्स फासु होती’’ति वत्वा ‘‘उद्दिट्ठं खो आयस्मन्तो निदानं, तत्थायस्मन्ते पुच्छामी’’तिआदिना नयेन वत्तब्बमेव. एवञ्हि निदानं सुउद्दिट्ठं होति, अञ्ञथा दुउद्दिट्ठं. इममेव च अत्थं सन्धाय उपोसथक्खन्धके वुत्तं ‘‘यावततियं अनुसावितं ¶ होतीति सकिम्पि अनुसावितं होति, दुतियम्पि अनुसावितं होति, ततियम्पि अनुसावितं होती’’ति (महाव. १३४). अयमेत्थ आचरियपरम्पराभतो विनिच्छयो.

यो पन भिक्खु…पे… सम्पजानमुसावादस्स होतीति सम्पजानमुसावादो अस्स होति, तेनस्स दुक्कटापत्ति होति, सा च खो पन न मुसावादलक्खणेन, ‘‘सम्पजानमुसावादे किं होति, दुक्कटं होती’’ति (महाव. १३५) इमिना पन भगवतो वचनेन वचीद्वारे अकिरियसमुट्ठानापत्ति होतीति वेदितब्बा.

वुत्तम्पि चेतं –

‘‘अनालपन्तो मनुजेन केनचि,

वाचागिरं नो च परे भणेय्य;

आपज्जेय्य वाचसिकं, न कायिकं,

पञ्हामेसा कुसलेहि चिन्तिता’’ति. (परि. ४७९);

अन्तरायिकोति ¶ विप्पटिसारवत्थुताय पामोज्जादिसम्भवं निवारेत्वा पठमज्झानादीनं अधिगमाय अन्तरायं करोति. तस्माति यस्मा अयं अनाविकरणसङ्खातो सम्पजानमुसावादो अन्तरायिको होति, तस्मा. सरमानेनाति अत्तनि सन्तिं आपत्तिं जानन्तेन. विसुद्धापेक्खेनाति वुट्ठातुकामेन विसुज्झितुकामेन. सन्ती आपत्तीति आपज्जित्वा अवुट्ठिता आपत्ति. आविकातब्बाति सङ्घमज्झे वा गणमज्झे वा एकपुग्गले वा पकासेतब्बा, अन्तमसो अनन्तरस्सापि भिक्खुनो ‘‘अहं, आवुसो, इत्थन्नामं आपत्तिं आपन्नो, इतो वुट्ठहित्वा ¶ तं आपत्तिं पटिकरिस्सामी’’ति (महाव. १७०) वत्तब्बं. सचेपि वेमतिको होति, ‘‘अहं, आवुसो, इत्थन्नामाय आपत्तिया वेमतिको, यदा निब्बेमतिको भविस्सामि, तदा तं आपत्तिं पटिकरिस्सामी’’ति (महाव. १६९) वत्तब्बं. आविकता हिस्स फासु होतीतिएत्थ आविकताति आविकताय, पकासितायाति अत्थो. अलज्जितातिआदीसु (परि. २९५) विय हि इदम्पि करणत्थे पच्चत्तवचनं. हीति निपातमत्तं. अस्साति एतस्स भिक्खुनो. फासु होतीति पठमज्झानादीनं अधिगमाय फासु होति, अविप्पटिसारमूलकानं पामोज्जादीनं वसेन सुखप्पटिपदा सम्पज्जतीति अत्थो.

इति कङ्खावितरणिया पातिमोक्खवण्णनाय

निदानवण्णना निट्ठिता.

पाराजिककण्डो

इदानि ¶ ¶ यदेतं निदानानन्तरं तत्रिमे चत्तारोतिआदि पाराजिककण्डं, तत्थ तत्राति तस्मिं ‘‘पातिमोक्खं उद्दिसिस्सामी’’ति एवं वुत्ते पातिमोक्खे. इमेति इदानि वत्तब्बानं अभिमुखीकरणं. चत्तारोति गणनपरिच्छेदो. पाराजिकाति एवंनामका. धम्माति आपत्तियो. उद्देसं आगच्छन्तीति सरूपेन उद्दिसितब्बतं आगच्छन्ति, न निदाने विय ‘‘यस्स सिया आपत्ती’’ति साधारणवचनमत्तेन.

१. पठमपाराजिकवण्णना

यो पनाति रस्सदीघादिना लिङ्गादिभेदेन यो कोचि. भिक्खूति एहिभिक्खुउपसम्पदा, सरणगमनूपसम्पदा, ओवादप्पटिग्गहणूपसम्पदा, पञ्हाब्याकरणूपसम्पदा, अट्ठगरुधम्मप्पटिग्गहणूपसम्पदा, दूतेनूपसम्पदा, अट्ठवाचिकूपसम्पदा, ञत्तिचतुत्थकम्मूपसम्पदाति इमासु अट्ठसु उपसम्पदासु ञत्तिचतुत्थेन उपसम्पदाकम्मेन अकुप्पेन ठानारहेन उपसम्पन्नो. तस्स पन कम्मस्स वत्थुञत्तिअनुस्सावन सीमा परिसासम्पत्तिवसेन अकुप्पता वेदितब्बा.

तत्थ वत्थूति उपसम्पदापेक्खो पुग्गलो, सो ठपेत्वा ऊनवीसतिवस्सं अन्तिमवत्थुअज्झापन्नपुब्बं, पण्डकादयो च एकादस अभब्बपुग्गले वेदितब्बो. तत्थ ऊनवीसतिवस्सो नाम पटिसन्धिग्गहणतो पट्ठाय अपरिपुण्णवीसतिवस्सो. अन्तिमवत्थुअज्झापन्नपुब्बो नाम चतुन्नं पाराजिकानं अञ्ञतरं अज्झापन्नपुब्बो. पण्डकादयो वज्जनीयपुग्गलकथायं वुत्ता. तेसु आसित्तपण्डकञ्च उसूयपण्डकञ्च ठपेत्वा ओपक्कमिकपण्डको नपुंसकपण्डको पण्डकभावपक्खे ठितो पक्खपण्डको च इध अधिप्पेतो.

थेय्यसंवासको पन तिविधो लिङ्गत्थेनको संवासत्थेनको उभयत्थेनकोति. तत्थ यो सयं पब्बजित्वा ¶ न भिक्खुवस्सानि गणेति, न यथावुड्ढं भिक्खूनं वा सामणेरानं ¶ वा वन्दनं सादियति, न आसनेन पटिबाहति, न उपोसथादीसु सन्दिस्सति, अयं असुद्धचित्तताय लिङ्गमत्तस्सेव थेनितत्ता लिङ्गत्थेनको नाम. यो पन भिक्खूहि पब्बजितो सामणेरो समानो कासायानि अपनेत्वा तेसु सउस्साहोव ¶ मेथुनं धम्मं पटिसेवित्वा पुन निवासेत्वा सामणेरभावं पटिजानाति, अयं भिक्खूहि दिन्नलिङ्गस्स अपरिच्चत्तत्ता न लिङ्गत्थेनको, न लिङ्गानुरूपस्स संवासस्स सादितत्ता नापि संवासत्थेनको. अन्तिमवत्थुअज्झापन्नकेपि एसेव नयो. यो च खो सामणेरो समानो विदेसं गन्त्वा भिक्खुवस्सानि गणेति, यथावुड्ढं वन्दनं सादियति, आसनेन पटिबाहति, उपोसथादीसु सन्दिस्सति, अयं संवासमत्तस्सेव थेनितत्ता संवासत्थेनको नाम. भिक्खुवस्सगणनादिको हि सब्बोपि किरियभेदो इमस्मिं अत्थे ‘‘संवासो’’ति वेदितब्बो. सिक्खं पच्चक्खाय ‘‘न मं कोचि जानाती’’ति पुन एवं पटिपज्जन्तेपि एसेव नयो. यो पन सयं पब्बजित्वा विहारं गन्त्वा यथावुड्ढं वन्दनं सादियति, आसनेन पटिबाहति, भिक्खुवस्सानि गणेति, उपोसथादीसु सन्दिस्सति, अयं लिङ्गस्स चेव संवासस्स च थेनितत्ता उभयत्थेनको नाम. धुरनिक्खेपवसेन कासायानि अपनेत्वा अन्तिमवत्थुं अज्झापज्जित्वा पुन तानि अच्छादेत्वा एवं पटिपज्जन्तेपि एसेव नयो, अयं तिविधोपि थेय्यसंवासको इध अधिप्पेतो. ठपेत्वा पन इमं तिविधं.

‘‘राज दुब्भिक्ख कन्तार-रोग वेरी भयेन वा;

चीवराहरणत्थं वा, लिङ्गं आदियतीध यो.

‘‘संवासं नाधिवासेति, याव सो सुद्धमानसो;

थेय्यसंवासको नाम, ताव एस न वुच्चती’’ति. (महाव. अट्ठ. ११०);

यो पन उपसम्पन्नो तित्थियभावं पत्थयमानो सयं वा कुसचीरादिकं तित्थियलिङ्गं आदियति, तेसं वा सन्तिके पब्बजति, नग्गो वा हुत्वा आजीवकानं सन्तिकं गन्त्वा तेसं वतानि आदियति, अयं तित्थियपक्कन्तको नाम. ठपेत्वा पन मनुस्सजातिकं अवसेसो सब्बोपि तिरच्छानगतो नाम. येन मनुस्सजातिका जनेत्ति सयम्पि मनुस्सभूतेनेव सञ्चिच्च जीविता वोरोपिता, अयं मातुघातको नाम. पितुघातकेपि एसेव नयो. येन अन्तमसो गिहिलिङ्गे ठितोपि मनुस्सजातिको खीणासवो सञ्चिच्च जीविता वोरोपितो, अयं अरहन्तघातको नाम. यो पन पकतत्तं भिक्खुनिं तिण्णं मग्गानं अञ्ञतरस्मिं ¶ मग्गे दूसेति ¶ , अयं भिक्खुनिदूसको नाम. यो देवदत्तो विय सासनं उद्धम्मं उब्बिनयं कत्वा चतुन्नं कम्मानं अञ्ञतरवसेन सङ्घं भिन्दति, अयं सङ्घभेदको नाम. यो देवदत्तो विय दुट्ठचित्तेन वधकचित्तेन तथागतस्स जीवमानकसरीरे खुद्दकमक्खिकाय पिवनमत्तम्पि लोहितं उप्पादेति, अयं लोहितुप्पादको नाम. यस्स ¶ इत्थिनिमित्तुप्पादनकम्मतो च पुरिसनिमित्तुप्पादनकम्मतो च उभतो दुविधम्पि ब्यञ्जनं अत्थि, अयं उभतोब्यञ्जनको नाम. इति इमे तेरस पुग्गला उपसम्पदाय अवत्थू, इमे पन ठपेत्वा अञ्ञस्मिं उपसम्पदापेक्खे सति उपसम्पदाकम्मं वत्थुसम्पत्तिवसेन अकुप्पं होति.

कथं ञत्तिसम्पत्तिवसेन अकुप्पं होति? वत्थुसङ्घपुग्गलञत्तीनं अपरामसनानि, पच्छा ञत्तिट्ठपनञ्चाति इमे ताव पञ्च ञत्तिदोसा. तत्थ ‘‘अयं इत्थन्नामो’’ति उपसम्पदापेक्खस्स अकित्तनं वत्थुअपरामसनं नाम. ‘‘सुणातु मे, भन्ते, सङ्घो’’तिएत्थ ‘‘सुणातु मे, भन्ते’’ति वत्वा ‘‘सङ्घो’’ति अभणनं सङ्घअपरामसनं नाम. ‘‘इत्थन्नामस्स उपसम्पदापेक्खो’’ति उपज्झायस्स अकित्तनं पुग्गलअपरामसनं नाम. सब्बेन सब्बं ञत्तिया अनुच्चारणं ञत्तिअपरामसनं नाम. पठमं कम्मवाचं निट्ठापेत्वा ‘‘एसा ञत्ती’’ति वत्वा ‘‘खमति सङ्घस्सा’’ति एवं ञत्तिकित्तनं पच्छा ञत्तिट्ठपनं नाम. इति इमेहि दोसेहि विमुत्ताय ञत्तिया सम्पन्नं ञत्तिसम्पत्तिवसेन अकुप्पं होति.

अनुस्सावनवसेन अकुप्पतायपि वत्थुसङ्घपुग्गलानं अपरामसनानि, सावनाय हापनं, अकाले सावनन्ति इमे पञ्च अनुस्सावनदोसा. तत्थ वत्थादीनं अपरामसनानि ञत्तियं वुत्तसदिसानेव. तीसु पन अनुस्सावनासु यत्थ कत्थचि एतेसं अपरामसनं अपरामसनमेव. सब्बेन सब्बं पन कम्मवाचं अवत्वा चतुक्खत्तुं ञत्तिकित्तनमेव, अथ वा पन कम्मवाचाब्भन्तरे अक्खरस्स वा पदस्स वा अनुच्चारणं वा दुरुच्चारणं वा सावनाय हापनं नाम. सावनाय अनोकासे पठमं ञत्तिं अट्ठपेत्वा अनुस्सावनकरणं अकाले सावनं नाम. इति इमेहि दोसेहि विमुत्ताय अनुस्सावनाय सम्पन्नं अनुस्सावनसम्पत्तिवसेन अकुप्पं होति.

पुब्बे वुत्तं विपत्तिसीमालक्खणं समतिक्कन्ताय पन सीमाय कतं सीमासम्पत्तिवसेन अकुप्पं होति. यावतिका भिक्खू कम्मप्पत्ता, तेसं ¶ अनागमनं, छन्दारहानं छन्दस्स अनाहरणं, सम्मुखीभूतानं पटिक्कोसनन्ति इमे पन तयो परिसादोसा, तेहि विमुत्ताय परिसाय कतं परिसासम्पत्तिवसेन अकुप्पं होति. कारणारहत्ता पन सत्थु सासनारहत्ता ठानारहं नाम होति. इति यो इमिना एवं अकुप्पेन ठानारहेन ञत्तिचतुत्थेन उपसम्पदाकम्मेन ¶ उपसम्पन्नो, अयं इध ‘‘भिक्खू’’ति अधिप्पेतो. पण्णत्तिवज्जेसु पन अञ्ञेपि सङ्गहं गच्छन्ति.

भिक्खूनं सिक्खासाजीवसमापन्नोति या भिक्खूनं अधिसीलसङ्खाता सिक्खा, तञ्च, यत्थ चेते सह जीवन्ति, एकजीविका सभागवुत्तिनो ¶ होन्ति, तं भगवता पञ्ञत्तं सिक्खापदसङ्खातं साजीवञ्च, तत्थ सिक्खनभावेन समापन्नोति भिक्खूनं सिक्खासाजीवसमआपन्नो. समापन्नोति सिक्खञ्च परिपूरेन्तो साजीवञ्च अवीतिक्कमन्तो हुत्वा तदुभयं उपगतोति अत्थो. सिक्खं अपच्चक्खाय दुब्बल्यं अनाविकत्वाति यं सिक्खं समापन्नो, तं अपटिक्खिपित्वा, यञ्च साजीवं समापन्नो, तस्मिं दुब्बलभावं अप्पकासेत्वा. तत्थ चित्तखेत्तकालपयोगपुग्गलविजाननवसेन सिक्खाय पच्चक्खानं ञत्वा तदभावेन अपच्चक्खानं वेदितब्बं. कथं? उपसम्पन्नभावतो चवितुकामताचित्तेनेव हि सिक्खापच्चक्खानं होति, न दवा वा रवा वा भणन्तस्स. एवं चित्तवसेन सिक्खापच्चक्खानं होति, न तदभावेन. तथा ‘‘बुद्धं पच्चक्खामि, धम्मं पच्चक्खामि, सङ्घं पच्चक्खामि, सिक्खं, विनयं, पातिमोक्खं, उद्देसं, उपज्झायं, आचरियं, सद्धिविहारिकं, अन्तेवासिकं, समानुपज्झायकं, समानाचरियकं, सब्रह्मचारिं पच्चक्खामी’’ति एवं वुत्तानं बुद्धादीनं चुद्दसन्नं, ‘‘गिहीति मं धारेहि, उपासको, आरामिको, सामणेरो, तित्थियो, तित्थियसावको, असमणो, ‘असक्यपुत्तियो’ति मं धारेही’’ति एवं वुत्तानं गिहिआदीनं अट्ठन्नञ्चाति इमेसं द्वावीसतिया खेत्तपदानं यस्स कस्सचि सवेवचनस्स वसेन तेसु यंकिञ्चि वत्तुकामस्स यंकिञ्चि वदतो सिक्खापच्चक्खानं होति, न रुक्खादीनं अञ्ञतरस्स नामं गहेत्वा पच्चाचिक्खन्तस्स. एवं खेत्तवसेन पच्चक्खानं होति, न तदभावेन.

तत्थ यदेतं ‘‘पच्चक्खामी’’ति च, ‘‘मं धारेही’’ति (पारा. ५१) च वुत्तं वत्तमानकालवचनं, यानि च ‘‘अलं मे बुद्धेन, किं नु मे बुद्धेन, न ममत्थो बुद्धेन ¶ , सुमुत्ताहं बुद्धेना’’तिआदिना (पारा. ५२) नयेन आख्यातवसेन कालं अनामसित्वा पुरिमेहि चुद्दसहि पदेहि सद्धिं योजेत्वा वुत्तानि ‘‘अलं मे’’तिआदीनि चत्तारि पदानि, तेसंयेव च सवेवचनानं वसेन पच्चक्खानं होति, न ‘‘पच्चक्खासि’’न्ति वा ‘‘पच्चक्खिस्स’’न्ति वा ‘‘मं धारेसी’’ति वा ‘‘मं धारेस्सती’’ति वा ‘‘यंनूनाहं पच्चक्खेय्य’’न्ति (पारा. ४५) वातिआदीनि अतीतानागतपरिकप्पवचनानि भणन्तस्स. एवं वत्तमान कालवसेन चेव अनामट्ठकालवसेन च पच्चक्खानं होति, न तदभावेन.

पयोगो ¶ पन दुविधो कायिको च वाचसिको च. तत्थ ‘‘बुद्धं पच्चक्खामी’’तिआदिना (पारा. ५१) नयेन याय कायचि भासाय वचीभेदं कत्वा वाचसिकप्पयोगेनेव पच्चक्खानं होति, न अक्खरलिखनं वा हत्थमुद्दादिदस्सनं वा कायप्पयोगं करोन्तस्स. एवं वाचसिकप्पयोगेनेव पच्चक्खानं होति, न तदभावेन.

पुग्गलो पन दुविधो – यो च पच्चक्खाति, यस्स च पच्चक्खाति. तत्थ यो पच्चक्खाति, सो सचे उम्मत्तकखित्तचित्तवेदनाट्टानं अञ्ञतरो न होति. यस्स पन ¶ पच्चक्खाति, सो सचे मनुस्सजातिको होति, न च उम्मत्तकादीनं अञ्ञतरो, सम्मुखीभूतो च सिक्खापच्चक्खानं होति. न हि असम्मुखीभूतस्स दूतेन वा पण्णेन वा आरोचनं रुहति. एवं यथावुत्तपुग्गलवसेन पच्चक्खानं होति, न तदभावेन.

विजाननम्पि नियमितानियमितवसेन दुविधं. तत्थ यस्स येसं वा नियमेत्वा ‘‘इमस्स, इमेसं वा आरोचेमी’’ति वदति, सचे ते यथा पकतिया लोके मनुस्सा वचनं सुत्वा आवज्जनसमये जानन्ति, एवं तस्स वचनानन्तरमेव तस्स ‘‘अयं उक्कण्ठितो’’ति वा ‘‘गिहिभावं पत्थयती’’ति वा येन केनचि आकारेन सिक्खापच्चक्खानभावं जानन्ति, पच्चक्खाताव होति सिक्खा. अथ अपरभागे ‘‘किं इमिना वुत्त’’न्ति चिन्तेत्वा जानन्ति, अञ्ञे वा जानन्ति, अपच्चक्खाताव होति सिक्खा. अनियमेत्वा आरोचेन्तस्स पन सचे वुत्तनयेन यो कोचि मनुस्सजातिको वचनत्थं जानाति, पच्चक्खाताव होति सिक्खा. एवं विजाननवसेन पच्चक्खानं होति, न तदभावेन. यो पन अन्तमसो दवायपि पच्चक्खाति, तेन अपच्चक्खाताव होति सिक्खा. इति इमेसं वुत्तप्पकारानं ¶ चित्तादीनं वा वसेन, सब्बसो वा पन अपच्चक्खानेन सिक्खं अपच्चक्खाय सिक्खापच्चक्खानस्सेव च अत्थभूतं एकच्चं दुब्बल्यं अनाविकत्वा.

मेथुनं धम्मं पटिसेवेय्याति एत्थ मेथुनं धम्मन्ति रागपरियुट्ठानेन सदिसानं उभिन्नं धम्मं. पटिसेवेय्याति पटिसेवेय्य अज्झापज्जेय्य. अन्तमसोति सब्बन्तिमेन परिच्छेदेन. तिरच्छानगतायपीति पटिसन्धिवसेन तिरच्छानेसु गतायपि, अयमेत्थ अनुपञ्ञत्ति. पाराजिको होतीति पराजितो होति, पराजयं आपन्नो. असंवासोति पकतत्ता भिक्खू सह वसन्ति एत्थाति एककम्मादिकोव तिविधोपि विधि संवासो नाम, सो तेन सद्धिं नत्थीति असंवासो. सङ्घकम्मेसु हि एस गणपूरकोपि न होति, अयं ताव पदवण्णना.

अयं ¶ पनेत्थ विनिच्छयो – मनुस्सामनुस्सतिरच्छानगतवसेन हि तिस्सो इत्थियो, तासं वच्चमग्गपस्सावमग्गमुखमग्गवसेन तयो तयो कत्वा नव मग्गा, तथा उभतोब्यञ्जनकानं. पुरिसानं पन वच्चमग्गमुखमग्गवसेन द्वे द्वे कत्वा छ मग्गा, तथा पण्डकानन्ति एवं तिंस मग्गा. तेसु अत्तनो वा परेसं वा यस्स कस्सचि मग्गस्स सन्थतस्स वा असन्थतस्स वा, परेसं पन मतानम्पि अक्खायितस्स वा येभुय्येन अक्खायितस्स वा पकतिवातेन असंफुट्ठे अल्लोकासे यो भिक्खु एकतिलबीजमत्तम्पि अत्तनो अङ्गजातं सन्थतं वा असन्थतं वा सेवनचित्तेन पवेसेति, परेन वा पवेसियमाने पवेसनपविट्ठट्ठितउद्धरणेसु यंकिञ्चि सादियति, अयं पाराजिकापत्तिं आपन्नो नाम होति, अयं तावेत्थ असाधारणविनिच्छयो. सब्बसिक्खापदानं पन साधारणविनिच्छयत्थं अयं मातिका –

निदानं ¶ पुग्गलं वत्थुं, पञ्ञत्तिविधिमेव च;

आणत्तापत्तिनापत्ति-विपत्तिं अङ्गमेव च.

समुट्ठानविधिं किरिया-सञ्ञाचित्तेहि नानत्तं;

वज्जकम्मप्पभेदञ्च, तिकद्वयविधिं तथा.

लक्खणं सत्तरसधा, ठितं साधारणं इदं;

ञत्वा योजेय्य मेधावी, तत्थ तत्थ यथारहन्ति.

तत्थ ¶ निदानं नाम वेसालि-राजगह-सावत्थि-आळवि-कोसम्बि-सग्ग-भग्गानं वसेन सत्तविधं पञ्ञत्तिट्ठानं, इदञ्हि सब्बसिक्खापदानं निदानं. पुग्गलो नाम यं यं आरब्भ तं तं सिक्खापदं पञ्ञत्तं. वत्थु नाम तस्स तस्स पुग्गलस्स अज्झाचारो वुच्चति. पञ्ञत्तिविधिन्ति पञ्ञत्तिअनुपञ्ञत्तिअनुप्पन्नपञ्ञत्तिसब्बत्थपञ्ञत्तिपदेसपञ्ञत्तिसाधारणपञ्ञत्ति असाधारणपञ्ञत्तिएकतोपञ्ञत्तिउभतोपञ्ञत्तिवसेन नवविधा पञ्ञत्ति. तत्थ अनुप्पन्नपञ्ञत्ति नाम अनुप्पन्ने दोसे पञ्ञत्ता, सा अट्ठगरुधम्मप्पटिग्गहणवसेन (चूळव. ४०३) भिक्खुनीनंयेव आगता, अञ्ञत्र नत्थि. विनयधरपञ्चमेन (महाव. २५९) गणेन उपसम्पदा, गणङ्गणूपाहना (महाव. २५९) धुवन्हानं चम्मत्थरणन्ति एतेसं वसेन चतुब्बिधा पदेसपञ्ञत्ति नाम. मज्झिमदेसेयेव हि एतेहि आपत्ति होति, तेसुपि धुवन्हानं पटिक्खेपमत्तमेव पातिमोक्खे आगतं, ततो अञ्ञा पदेसपञ्ञत्ति नाम नत्थि. सब्बानि सब्बत्थपञ्ञत्तियेव होन्ति, साधारणपञ्ञत्तिदुकञ्च एकतोपञ्ञत्तिदुकञ्च अत्थतो एकं, तस्मा अनुप्पन्नपञ्ञत्तिञ्च ¶ सब्बत्थपञ्ञत्तिदुकञ्च एकतोपञ्ञत्तिदुकञ्च ठपेत्वा सेसानं चतस्सन्नं पञ्ञत्तीनं वसेन सब्बत्थ विनिच्छयो वेदितब्बो. आणत्तापत्तिनापत्तिविपत्तिन्तिएत्थ आणत्तीतिआणापना वुच्चति. आपत्तीति पुब्बप्पयोगादिवसेन आपत्तिभेदो. अनापत्तीति अजाननादिवसेन अनापत्ति. विपत्तीति सीलआचारदिट्ठिआजीवविपत्तीनं अञ्ञतरा. इति इमासं आणत्तादीनम्पि वसेन सब्बत्थ विनिच्छयो वेदितब्बो. अङ्गन्ति सब्बसिक्खापदेसु आपत्तीनं अङ्गं वेदितब्बं.

समुट्ठानविधिन्ति सब्बापत्तीनं कायो वाचा कायवाचा कायचित्तं वाचाचित्तं कायवाचाचित्तन्ति इमानि एकङ्गिकद्वङ्गिकतिवङ्गिकानि. छ समुट्ठानानि नाम यानि ‘‘सिक्खापदसमउट्ठानानी’’तिपि वुच्चन्ति. तत्थ पुरिमानि तीणि अचित्तकानि, पच्छिमानि सचित्तकानि. तेसु एकेन वा द्वीहि वा तीहि वा चतूहि वा छहि वा समुट्ठानेहि आपत्तियो समुट्ठहन्ति, पञ्चसमुट्ठाना नाम नत्थि. तत्थ एकसमुट्ठाना नाम चतुत्थेन च पञ्चमेन च छट्ठेन च समुट्ठानेन समुट्ठाति, न अञ्ञेन. द्विसमुट्ठाना ¶ नाम पठमचतुत्थेहि च दुतियपञ्चमेहि च ततियछट्ठेहि च चतुत्थछट्ठेहि च पञ्चमछट्ठेहि च समुट्ठानेहि, समुट्ठाति, न अञ्ञेहि. तिसमुट्ठाना नाम पठमेहि ¶ च तीहि, पच्छिमेहि च तीहि समुट्ठानेहि समुट्ठाति, न अञ्ञेहि. चतुसमुट्ठाना नाम पठमततियचतुत्थछट्ठेहि च दुतियततियपञ्चमछट्ठेहि च समुट्ठानेहि समुट्ठाति, न अञ्ञेहि. छ समुट्ठाना नाम छहिपि समुट्ठाति.

एवं –

तिधा एकसमुट्ठाना, पञ्चधा द्विसमुट्ठिता;

द्विधा तिचतुरो ठाना, एकधा छसमुट्ठिताति.

समुट्ठानवसेन सब्बाव तेरस आपत्तियो होन्ति (चूळव. १६५ आदयो), ता पठमपञ्ञत्तिसिक्खापदवसेन समुट्ठानतो तेरस नामानि लभन्ति पठमपाराजिकसमुट्ठाना, अदिन्नादान-सञ्चरित्त-समनुभासन-कथिन-एळकलोम-पदसोधम्म-अद्धान-थेय्यसत्थ-धम्मदेसनाभूतारोचन-चोरिवुट्ठापन-अननुञ्ञातसमुट्ठानाति. तत्थ या कायचित्ततो समुट्ठाति, अयं पठमपाराजिकसमुट्ठाना नाम. या सचित्तकेहि तीहि समुट्ठानेहि समुट्ठाति, अयं अदिन्नादानसमुट्ठाना नाम. या छहिपि समुट्ठाति, अयं सञ्चरित्तसमुट्ठाना नाम. या छट्ठेनेव समुट्ठाति, अयं समनुभासनसमुट्ठाना नाम. या ततियछट्ठेहि समुट्ठाति, अयं कथिनसमुट्ठाना नाम. या पठमचतुत्थेहि समुट्ठाति, अयं एळकलोमसमुट्ठाना नाम. या दुतियपञ्चमेहि समुट्ठाति ¶ , अयं पदसोधम्मसमुट्ठाना नाम. या पठमततियचतुत्थछट्ठेहि समुट्ठाति, अयं अद्धानसमुट्ठाना नाम. या चतुत्थछट्ठेहि समुट्ठाति, अयं थेय्यसत्थसमुट्ठाना नाम. या पञ्चमेनेव समुट्ठाति, अयं धम्मदेसनासमुट्ठाना नाम. या अचित्तकेहि तीहि समुट्ठानेहि समुट्ठाति, अयं भूतारोचनसमुट्ठाना नाम. या पञ्चमछट्ठेहि समुट्ठाति, अयं चोरिवुट्ठापनसमुट्ठाना नाम. या दुतियततियपञ्चमछट्ठेहि समुट्ठाति, अयं अननुञ्ञातसमुट्ठाना नामाति. इति इमस्स समुट्ठानविधिनोपि वसेन सब्बत्थ विनिच्छयो वेदितब्बो.

किरियासञ्ञाचित्तेहि नानत्तन्ति एतेहि किरियादीहि सब्बापत्तीनं नानाभावं ञत्वा सब्बत्थ विनिच्छयो वेदितब्बो. सब्बापत्तियो हि किरियावसेन पञ्चविधा होन्ति, सेय्यथिदं – अत्थापत्ति किरियतो समुट्ठाति ¶ , अत्थि अकिरियतो, अत्थि किरियाकिरियतो, अत्थि सिया किरियतो सिया अकिरियतो, अत्थि सिया किरियतो सिया किरियाकिरियतोति. तत्थ या कायेन वा वाचाय वा पथविखणनादीसु (पचि. ८४) विय वीतिक्कमं करोन्तस्स होति, अयं किरियतो समुट्ठाति नाम. या कायवाचाहि कत्तब्बं अकरोन्तस्स होति पठमकथिनापत्ति (पारा. ४५९ आदयो) विय, अयं अकिरियतो समुट्ठाति नाम. या करोन्तस्स च अकरोन्तस्स च होति अञ्ञातिकाय भिक्खुनिया हत्थतो चीवरप्पटिग्गहणापत्ति (पारा. ५०८-५११) विय, अयं किरियाकिरियतो ¶ समुट्ठाति नाम. या सिया करोन्तस्स च, सिया अकरोन्तस्स च होति रूपियप्पटिग्गहणापत्ति (पारा. ५८२) विय, अयं सिया किरियतो सिया अकिरियतो समुट्ठाति नाम. या सिया करोन्तस्स च सिया करोन्ताकरोन्तस्स च होति कुटिकारापत्ति (पारा. ३४२ आदयो) विय, अयं सिया किरियतो सिया किरियाकिरियतो समुट्ठाति नाम.

सब्बापत्तियो च सञ्ञावसेन दुविधा होन्ति सञ्ञाविमोक्खा नोसञ्ञाविमोक्खाति. तत्थ यतो वीतिक्कमसञ्ञाय अभावेन मुच्चति, अयं सञ्ञाविमोक्खा, इतरा नोसञ्ञाविमोक्खा. पुन च सब्बापि चित्तवसेन दुविधा होन्ति सचित्तका अचित्तका चाति. तत्थ या सचित्तकसमुट्ठानवसेनेव समुट्ठाति अयं सचित्तका. या अचित्तकेन वा सचित्तकमिस्सकेन वा समुट्ठाति अयं अचित्तका.

वज्जकम्मप्पभेदन्ति एत्थ सब्बापत्तियो वज्जवसेन दुविधा होन्ति लोकवज्जा पण्णत्तिवज्जा चाति. तत्थ यस्सा सचित्तकपक्खे चित्तं अकुसलमेव होति, अयं लोकवज्जा, सेसा पण्णत्तिवज्जा. सब्बा च कायकम्मवचीकम्मतदुभयवसेन तिविधा होन्ति. तत्थ ¶ कायद्वारे आपज्जितब्बा कायकम्मन्ति वुच्चति, वचीद्वारे आपज्जितब्बा वचीकम्मन्ति वुच्चति, उभयत्थ आपज्जितब्बा कायकम्मं वचीकम्मञ्चाति, मनोद्वारे आपत्ति नाम नत्थि. इति इमिना वज्जकम्मप्पभेदेनापि सब्बत्थ विनिच्छयो वेदितब्बो.

तिकद्वयविधिन्ति कुसलत्तिकवेदनात्तिकविधिं. आपत्तिं आपज्जमानो हि अकुसलचित्तो वा आपज्जति कुसलाब्याकतचित्तो वा, तथा दुक्खवेदनासमङ्गी ¶ वा इतरवेदनाद्वयसमङ्गी वा. एवं सन्तेपि सब्बसिक्खापदेसु अकुसलचित्तवसेन एकं चित्तं, कुसलाब्याकतचित्तवसेन द्वे चित्तानि, सब्बेसं वसेन तीणि चित्तानि. दुक्खवेदनावसेन एका वेदना, सुखउपेक्खावसेन द्वे, सब्बासं वसेन तिस्सो वेदनाति. अयमेव पभेदो लब्भति, न अञ्ञो.

लक्खणं सत्तरसधा, ठितं साधारणं इदं, ञत्वाति इदं निदानादिवेदनात्तिकपरियोसानं सत्तरसप्पकारं लक्खणं जानित्वा योजेय्य मेधावी. तत्थ तत्थ यथारहन्ति पण्डितो भिक्खु तस्मिं तस्मिं सिक्खापदे इदं लक्खणं यथानुरूपं योजेय्याति अत्थो. तं पन अयोजितं दुब्बिजानं होति, तस्मा नं सब्बसिक्खापदानं असाधारणविनिच्छयपरियोसाने इमं मातिकं अनुद्धरित्वाव योजेत्वा दस्सयिस्साम.

इध पनस्स अयं योजना – इदं वेसालियं सुदिन्नत्थेरं आरब्भ मेथुनवीतिक्कमवत्थुस्मिं पञ्ञत्तं. ‘‘मेथुनं धम्मं पटिसेवेय्या’’ति अयमेत्थ पञ्ञत्ति, ‘‘सिक्खं अपच्चक्खाया’’ति च ‘‘अन्तमसो तिरच्छानगतायपी’’ति च द्वे अनुपञ्ञत्तियो. अनुपञ्ञत्ति च नामेसा आपत्तिकरा च होति अञ्ञवादकसिक्खापदादीसु (पाचि. ९५ आदयो) विय, अनापत्तिकरा च अञ्ञत्र सुपिनन्तातिआदीसु (पारा. २३६-२३७) विय, आपत्तिउपत्थम्भकरा च अदिन्नादानादीसु (पारा. ९१) विय ¶ , इध पन उपत्थम्भकराति वेदितब्बा. इतो परं पन यत्थ अनुपञ्ञत्ति अत्थि, तत्थ ‘‘अयं अनुपञ्ञत्ती’’ति एत्तकमेव दस्सयिस्साम. ठपेत्वा पन अनुपञ्ञत्तिं अवसेसा पञ्ञत्तियेवाति सब्बत्थ विनिच्छयो वेदितब्बो. भिक्खुं आरब्भ उप्पन्नवत्थुस्मिंयेव ‘‘या पन भिक्खुनी छन्दसो मेथुनं धम्मं पटिसेवेय्या’’ति एवं भिक्खुनीनम्पि पञ्ञत्तितो साधारणपञ्ञत्ति. आणत्तिया अनापज्जनतो अनाणत्तिकं. भिक्खुं पन आणापेन्तो अकप्पियसमादानापत्तितो न मुच्चति, मेथुनरागेन कायसंसग्गे दुक्कटं, जीवमानकसरीरस्स वुत्तप्पकारे मग्गे सचेपि तचादीनि अनवसेसेत्वा सब्बसो छिन्ने निमित्तसण्ठानमत्तं पञ्ञायति, तत्थ अन्तमसो अङ्गजाते उट्ठितं अनट्ठकायप्पसादं पीळकं वा चम्मखिलं वा पवेसेन्तस्सापि सेवनचित्ते सति पाराजिकं, नट्ठकायप्पसादं ¶ सुक्खपीळकं वा मतचम्मं वा लोमं वा पवेसेन्तस्स दुक्कटं, सचे निमित्तसण्ठानमत्तम्पि अनवसेसेत्वा सब्बसो मग्गो उप्पाटितो, तत्थ उपक्कमतो वणसङ्खेपवसेन ¶ थुल्लच्चयं, तथा मनुस्सानं अक्खिनासाकण्णच्छिद्दवत्थिकोसेसु सत्थकेन कतवणे वा, हत्थिअस्सादीनञ्च तिरच्छानानं वत्थिकोसनासापुटेसु थुल्लच्चयं. तिरच्छानानं पन अक्खिकण्णनासावणेसु अहिमच्छादीनं पवेसनप्पमाणविरहिते अणुनिमित्ते सब्बेसञ्च उपकच्छकादीसु सेससरीरेसु दुक्कटं. मतसरीरे निमित्ते उपड्ढक्खायिततो पट्ठाय याव न कुथितं होति, ताव थुल्लच्चयं. कुथिते दुक्कटं, तथा वट्टकते मुखे अच्छुपन्तं अङ्गजातं पवेसेन्तस्स दुक्कटं. ओट्ठतो बहि निक्खन्तजिव्हाय वा दन्तेसु वा थुल्लच्चयं. निमित्ततो बहि पतितमंसपेसियं दुक्कटन्ति अयमेत्थ आपत्तिभेदो.

अजानन्तस्स असादियन्तस्स उम्मत्तकस्स खित्तचित्तस्स वेदनाट्टस्स आदिकम्मिकानञ्च अनापत्ति. एत्थ पन यो निद्दं ओक्कन्तत्ता परेन कतम्पि उपक्कमं न जानाति, सो अजानन्तो. यो जानित्वापि न सादियति, सो असादियन्तो. यो पित्तवसेन अतेकिच्छं उम्मादं पत्तो, सो उम्मत्तको. यक्खेहि कतचित्तविक्खेपो खित्तचित्तो. द्विन्नम्पि च एतेसं अग्गिसुवण्णगूथचन्दनादीसु समप्पवत्तिभावेन अजाननभावोव पमाणं. यो अधिमत्तवेदनाय आतुरत्ता किञ्चि न जानाति, सो वेदनाट्टो. यो तस्मिं तस्मिं वत्थुस्मिं आदिभूतो, सो आदिकम्मिको. अयं पन अनापत्ति. चतूसु विपत्तीसु सीलविपत्ति. तस्सा द्वे अङ्गानि सेवनचित्तञ्च मग्गेन मग्गपटिपादनञ्चाति. समुट्ठानादितो इदं सिक्खापदं पठमपाराजिकसमुट्ठानं, किरियं, सञ्ञाविमोक्खं, सचित्तकं, लोकवज्जं, कायकम्मं, अकुसलचित्तं, द्विवेदनन्ति, इमानि च समुट्ठानादीनि नाम आपत्तिया होन्ति, न सिक्खापदस्स. वोहारसुखत्थं ¶ पन सब्बट्ठकथासु सिक्खापदसीसेन देसना आगता, तस्मा अञ्ञेसुपि एवरूपेसु ठानेसु ब्यञ्जने आदरं अकत्वा अधिप्पेतमेव गहेतब्बं.

अत्थञ्हि नाथो सरणं अवोच;

न ब्यञ्जनं लोकहितो महेसी.

तस्मा अकत्वा रतिमक्खरेसु;

अत्थे निवेसेय्य मतिं मुतीमाति.

पठमपाराजिकवण्णना निट्ठिता.

२. दुतियपाराजिकवण्णना

दुतिये ¶ ¶ गामा वा अरञ्ञावाति एत्थ सब्बोपि एककुटिकादिभेदो परिक्खित्तो वा अपरिक्खित्तो वा समनुस्सो वा अमनुस्सो वा अन्तमसो अतिरेकचातुमासनिविट्ठो यो कोचि सत्थोपि ‘‘गामो’’ति वेदितब्बो. ठपेत्वा गामञ्च गामूपचारञ्च अवसेसं अरञ्ञं नाम. तत्थ असम्मोहत्थं घरं घरूपचारो गामो गामूपचारोति अयं विभागो वेदितब्बो. निब्बकोसस्स हि उदकपतनट्ठानब्भन्तरं घरं नाम. यं पन द्वारे ठितो मातुगामो भाजनधोवनउदकं छड्डेति, तस्स पतनट्ठानञ्च मातुगामेनेव अन्तोगेहे ठितेन पकतिया बहि खित्तस्स सुप्पस्स वा संमुञ्जनिया वा पतनट्ठानञ्च घरस्स पुरतो द्वीसु कोणेसु सम्बन्धित्वा मज्झे रुक्खसूचिद्वारं ठपेत्वा गोरूपानं पवेसननिवारणत्थं कतपरिक्खेपो च अयं सब्बोपि घरूपचारो नाम. यं पन सब्बन्तिमं घरं होति, तस्स घरस्स तादिसे घरूपचारे ठितस्स थाममज्झिमस्स पुरिसस्स यथा तरुणमनुस्सा अत्तनो बलं दस्सेन्तो बाहुं पसारेत्वा लेड्डुं खिपन्ति, एवं खित्तस्स लेड्डुस्स पतनट्ठानब्भन्तरं गामो नाम. ततो अञ्ञस्स लेड्डुपातस्स अब्भन्तरं गामूपचारो नाम. पतितस्स पन लेड्डुनो पवत्तित्वा गतट्ठानं न गहेतब्बं. परिक्खित्तस्स पन गामस्स परिक्खेपोयेव गामस्स परिच्छेदो, तस्स सचे द्वे इन्दखिला होन्ति अब्भन्तरिमे इन्दखिले ठितस्स लेड्डुपातब्भन्तरं गामूपचारो नाम. पदभाजनेपि (पारा. ९२) हि इमिनाव नयेन अत्थो वेदितब्बो. तत्थ य्वायं अपरिक्खित्तस्स गामस्स उपचारो दस्सितो, तस्स वसेन विकाले गामप्पवेसनादीसु आपत्ति परिच्छिन्दितब्बा. इति इमं ठपेत्वा गामञ्च गामूपचारञ्च अवसेसं इमस्मिं सिक्खापदे अरञ्ञं नाम. देसनामत्तमेव चेतं ‘‘गामा वा अरञ्ञावा’’ति. ये पन इमेसं परिच्छेददस्सनत्थं घरघरूपचारगामूपचारा वुत्ता, ततोपि पाराजिकवत्थुं अवहरन्तस्स पाराजिकं होतियेव.

अदिन्नन्ति अञ्ञस्स मनुस्सजातिकस्स सन्तकं. थेय्यसङ्खातन्ति एत्थ थेनोति ¶ चोरो, थेनस्स भावो थेय्यं, अवहरणचित्तस्सेतं नामं. सङ्खा सङ्खातन्ति अत्थतो एकं, कोट्ठासस्सेतं नामं ‘‘सञ्ञानिदाना ¶ हि पपञ्चसङ्खा’’तिआदीसु (सु. नि. ८८०; महानि. १०९) विय. थेय्यञ्च तं सङ्खातञ्चाति थेय्यसङ्खातं, थेय्यचित्तसङ्खातो एको चित्तकोट्ठासोति अत्थो. करणत्थे चेतं पच्चत्तवचनं, तस्मा थेय्यसङ्खातेनाति अत्थतो दट्ठब्बं. यो च थेय्यसङ्खातेन आदियति, सो यस्मा थेय्यचित्तो होति, तस्मा ब्यञ्जनं अनादियित्वा अत्थमेव दस्सेतुं ‘‘थेय्यचित्तो अवहरणचित्तो’’ति (पारा. ९२) एवमस्स पदभाजनं वुत्तन्ति वेदितब्बं.

आदियेय्याति ¶ पञ्चवीसतिया अवहारानं अञ्ञतरवसेन हरेय्य. ते पन अवहारा पञ्च पञ्चकानि समोधानेत्वा साधुकं सल्लक्खेतब्बा. पञ्च पञ्चकानि नाम नानाभण्डपञ्चकं एकभण्डपञ्चकं साहत्थिकपञ्चकं पुब्बपयोगपञ्चकं थेय्यावहारपञ्चकन्ति. तत्थ पुरिमानि द्वे पञ्चकानि एतस्सेव पदस्स पदभाजने वुत्तानं ‘‘आदियेय्य हरेय्य अवहरेय्य इरियापथं विकोपेय्य ठाना चावेय्या’’ति इमेसं पदानं वसेन लब्भन्ति. तत्थ नानाभण्डपञ्चकं सविञ्ञाणकाविञ्ञाणकवसेन दट्ठब्बं, इतरं सविञ्ञाणकवसेनेव. कथं? आदियेय्याति आरामं अभियुञ्जति, आपत्ति दुक्कटस्स. सामिकस्स विमतिं उप्पादेति, आपत्ति थुल्लच्चयस्स. सामिको ‘‘न मय्हं भविस्सती’’ति धुरं निक्खिपति, आपत्ति पाराजिकस्स. हरेय्याति अञ्ञस्स भण्डं हरन्तो सीसे भारं थेय्यचित्तो आमसति, दुक्कटं. फन्दापेति, थुल्लच्चयं. खन्धं ओरोपेति, पाराजिकं. अवहरेय्याति उपनिक्खित्तं भण्डं ‘‘देहि मे भण्ड’’न्ति वुच्चमानो ‘‘नाहं गण्हामी’’ति भणति, दुक्कटं. सामिकस्स विमतिं उप्पादेति, थुल्लच्चयं. सामिको ‘‘न मय्हं भविस्सती’’ति धुरं निक्खिपति, पाराजिकं. इरियापथं विकोपेय्याति ‘‘सह भण्डहारकं नेस्सामी’’ति पठमं पादं अतिक्कामेति, थुल्लच्चयं. दुतियं पादं अतिक्कामेति, पाराजिकं. ठाना चावेय्याति थलट्ठं भण्डं थेय्यचित्तो आमसति, दुक्कटं. फन्दापेति, थुल्लच्चयं. ठाना चावेति, पाराजिकं. एवं ताव नानाभण्डपञ्चकं वेदितब्बं. ससामिकस्स पन दासस्स वा तिरच्छानगतस्स वा यथावुत्तेन अभियोगादिना नयेन आदियनहरणअवहरणइरियापथविकोपनठानाचावनवसेन एकभण्डपञ्चकं वेदितब्बं.

कतमं साहत्थिकपञ्चकं? साहत्थिको आणत्तिको निस्सग्गियो अत्थसाधको धुरनिक्खेपोति. तत्थ साहत्थिको नाम परस्स भण्डं ¶ सहत्था अवहरति. आणत्तिको नाम ‘‘असुकस्स भण्डं अवहरा’’ति अञ्ञं आणापेति. निस्सग्गियो नाम सुङ्कघातकपरिकप्पितोकासानं अन्तो ठत्वा बहि पातनं. अत्थसाधको नाम ‘‘असुकस्स भण्डं यदा सक्कोति, तदा तं अवहरा’’ति अञ्ञं आणापेति. तत्थ सचे परो अनन्तरायिको हुत्वा तं अवहरति, आणापकस्स आणत्तिक्खणेयेव पाराजिकं. परस्स वा पन ¶ तेलकुम्भिया पादग्घनकतेलं अवस्सं पिवनकानि उपाहनादीनि पक्खिपति, हत्थतो मुत्तमत्तेयेव पाराजिकं. धुरनिक्खेपो पन आरामाभियोगउपनिक्खित्तभण्डवसेन वेदितब्बो. तावकालिकभण्डदेय्यानि अदेन्तस्सापि एसेवनयोति इदं साहत्थिकपञ्चकं.

कतमं पुब्बपयोगपञ्चकं? पुब्बपयोगो सहपयोगो संविधावहारो सङ्केतकम्मं निमित्तकम्मन्ति ¶ . तत्थ आणत्तिवसेन पुब्बपयोगो वेदितब्बो. ठाना चावनवसेन, खिलादीनि सङ्कामेत्वा खेत्तादिग्गहणवसेन च सहपयोगो वेदितब्बो. संविधावहारो नाम ‘‘असुकं नाम भण्डं अवहरिस्सामा’’ति संविदहित्वा संमन्तयित्वा अवहरणं. एवं संविदहित्वा गतेसु हि एकेनापि तस्मिं भण्डे ठाना चाविते सब्बेसं अवहारा होन्ति. सङ्केतकम्मं नाम सञ्जाननकम्मं. सचे हि पुरेभत्तादीसु यंकिञ्चि कालं परिच्छिन्दित्वा ‘‘असुकस्मिं काले इत्थन्नामं भण्डं अवहरा’’ति वुत्तो सङ्केततो अपच्छा अपुरे तं अवहरति, सङ्केतकारकस्स सङ्केतकरणक्खणेयेव अवहारो. निमित्तकम्मं नाम सञ्ञुप्पादनत्थं अक्खिनिक्खणादिनिमित्तकरणं. सचे हि एवं कतनिमित्ततो अपच्छा अपुरे ‘‘यं अवहरा’’ति वुत्तो, तं अवहरति, निमित्तकारकस्स निमित्तकरणक्खणेयेव अवहारोति इदं पुब्बपयोगपञ्चकं.

कतमं थेय्यावहारपञ्चकं? थेय्यावहारो पसय्हावहारो परिकप्पावहारो पटिच्छन्नावहारो कुसावहारोति. तत्थ यो सन्धिच्छेदादीनि कत्वा अदिस्समानो अवहरति, कूटमानकूटकहापणादीहि वा वञ्चेत्वा गण्हाति, तस्सेवं गण्हतो अवहारो थेय्यावहारोति वेदितब्बो. यो पन पसय्ह बलक्कारेन परेसं सन्तकं गण्हाति गामघातकादयो विय, अत्तनो पत्तबलितो वा वुत्तनयेनेव अधिकं गण्हाति राजभटादयो विय, तस्सेवं गण्हतो अवहारो ¶ पसय्हावहारोति वेदितब्बो. परिकप्पेत्वा गहणं पन परिकप्पावहारो नाम. सो भण्डोकासवसेन दुविधो. तत्रायं भण्डपरिकप्पो – साटकत्थिको अन्तोगब्भं पविसित्वा ‘‘सचे साटको भविस्सति, गण्हिस्सामि, सचे सुत्तं, न गण्हिस्सामी’’ति परिकप्पेत्वा अन्धकारे पसिब्बकं गण्हाति, तत्र चे साटको होति, उद्धारेयेव पाराजिकं. सुत्तं चे होति, रक्खति. बहि नीहरित्वा मुञ्चित्वा ‘‘सुत्त’’न्ति ञत्वा पुन आहरित्वा ठपेति, रक्खतियेव. ‘‘सुत्त’’न्ति ञत्वापि ‘‘यं लद्धं, तं गहेतब्ब’’न्ति गच्छति, पदवारेन कारेतब्बो. भूमियं ठपेत्वा गण्हाति, उद्धारे पाराजिकं. ‘‘चोरो चोरो’’ति अनुबन्धो छट्टेत्वा पलायति, रक्खति. सामिका दिस्वा गण्हन्ति, रक्खति येव. अञ्ञो चे कोचि गण्हाति, भण्डदेय्यं. सामिकेसु निवत्तेसु सयं दिस्वा पंसुकूलसञ्ञाय ‘‘पगेवेतं मया गहितं, मम दानि सन्तक’’न्ति गण्हन्तस्सापि भण्डदेय्यमेव. तत्थ य्वायं ‘‘सचे साटको भविस्सति, गण्हिस्सामी’’तिआदिना नयेन पवत्तो परिकप्पो, अयं भण्डपरिकप्पो नाम.

ओकासपरिकप्पो पन एवं वेदितब्बो – एकच्चो पन परपरिवेणादीनि ¶ पविट्ठो किञ्चि लोभनेय्यं भण्डं दिस्वा गब्भद्वारपमुखहेट्ठापासादद्वारकोट्ठकरुक्खमूलादिवसेन परिच्छेदं कत्वा ‘‘सचे मं एत्थन्तरे पस्सिस्सन्ति, दट्ठुकामताय गहेत्वा विचरन्तो विय दस्सामि, नो चे ¶ पस्सिस्सन्ति, हरिस्सामी’’ति परिकप्पेति, तस्स तं आदाय परिकप्पितपरिच्छेदं अतिक्कन्तमत्ते अवहारो होति. इति य्वायं वुत्तनयेनेव पवत्तो परिकप्पो, अयं ओकासपरिकप्पो नाम. एवमिमेसं द्विन्नम्पि परिकप्पानं वसेन परिकप्पेत्वा गण्हतो अवहारो ‘‘परिकप्पावहारो’’ति वेदितब्बो.

पटिच्छादेत्वा पन अवहरणं पटिच्छन्नावहारो नाम. सो एवं वेदितब्बो – यो भिक्खु उय्यानादीसु परेसं ओमुञ्चित्वा ठपितअङ्गुलिमुद्दिकादीनि दिस्वा ‘‘पच्छा गण्हिस्सामी’’ति पंसुना वा पण्णेन वा पटिच्छादेति, तस्स एत्तावता उद्धारो नत्थीति न ताव अवहारो होति ¶ . यदा पन सामिका विचिनन्ता अपस्सित्वा ‘‘स्वे जानिस्सामा’’ति सालयाव गता होन्ति, अथस्स तं उद्धरतो उद्धारे अवहारो. पटिच्छन्नकालेयेव ‘‘एतं मम सन्तक’’न्ति सकसञ्ञाय वा ‘‘गता दानि ते, छट्टितभण्डं इद’’न्ति पंसुकूलसञ्ञाय वा गण्हन्तस्स पन भण्डदेय्यं. तेसु दुतियततियदिवसे आगन्त्वा विचिनित्वा अदिस्वा धुरनिक्खेपं कत्वा गतेसुपि गहितं भण्डदेय्यमेव. पच्छा ञत्वा चोदियमानस्स अददतो सामिकानं धुरनिक्खेपे अवहारो होति. कस्मा? यस्मा तस्स पयोगेन तेहि न दिट्ठं. यो पन तथारूपं भण्डं यथाठाने ठितंयेव अप्पटिच्छादेत्वा थेय्यचित्तो पादेन अक्कमित्वा कद्दमे वा वालुकाय वा पवेसेति, तस्स पवेसितमत्तेयेव अवहारो.

कुसं सङ्कामेत्वा पन अवहरणं कुसावहारो नाम. सोपि एवं वेदितब्बो – यो भिक्खु विलीवमयं वा तालपण्णमयं वा कतसञ्ञाणं यंकिञ्चि कुसं पातेत्वा चीवरे भाजीयमाने अत्तनो कोट्ठासस्स समीपे ठितं अप्पग्घतरं वा महग्घतरं वा समसमं वा अग्घेन परस्स कोट्ठासं हरितुकामो अत्तनो कोट्ठासे पतितं कुसं परस्स कोट्ठासे पातेतुकामताय उद्धरति, रक्खति ताव. परस्स कोट्ठासे पातिते रक्खतेव. यदा पन तस्मिं पतिते परस्स कोट्ठासतो परस्स कुसं उद्धरति, उद्धतमत्ते अवहारो. सचे पठमतरं परकोट्ठासतो परस्स कुसं उद्धरति, अत्तनो कोट्ठासे पातेतुकामताय उद्धारे रक्खति, पातनेपि रक्खति, अत्तनो कोट्ठासतो पन अत्तनो कुसं उद्धरतो उद्धारेयेव रक्खति, तं उद्धरित्वा परकोट्ठासे पातेन्तस्स हत्थतो मुत्तमत्ते अवहारो. अयं कुसावहारो. इति यं वुत्तं ‘‘आदियेय्याति पञ्चवीसतिया अवहारानं अञ्ञतरवसेन हरेय्या’’ति, तस्सत्थो पकासितो होति.

यथारूपेति यादिसे. अदिन्नादानेति अदिन्नस्स परसन्तकस्स गहणे. राजानोतिइदं बिम्बिसारंयेव सन्धाय वुत्तं, अञ्ञे ¶ पन तथा करेय्युं वा न करेय्युं वाति ते नप्पमाणं. हनेय्युं ¶ वाति हत्थादीहि वा पोथेय्युं, सत्थेन वा छिन्देय्युं. बन्धेय्युं वाति रज्जुबन्धनादीहि ¶ बन्धेय्युं वा. पब्बाजेय्युं वाति नीहरेय्युं वा. चोरोसि बालोसि मूळ्होसि थेनोसीति इमेहि वचनेहि परिभासेय्युं. कीदिसस्स पन अदिन्नस्स आदाने राजानो एवं करोन्ति? पादस्स वा पादारहस्स वा. तथारूपं भिक्खु अदिन्नं आदियमानोति तादिसं भिक्खु पोराणकस्स कहापणस्स पादं वा पादारहं वा भण्डं अदिन्नं भूमिआदीसु यत्थ कत्थचि ठितं यंकिञ्चि सजीवनिज्जीवं वुत्तप्पकारानं अवहारानं येन केनचि अवहारेन अवहरन्तो पाराजिको होति, को पन वादो ततो अतिरेकतरस्मिन्ति.

राजगहे धनियत्थेरं आरब्भ रञ्ञो दारूनि अदिन्नं आदियनवत्थुस्मिं पञ्ञत्तं, ‘‘गामा वा अरञ्ञा वा’’ति अयमेत्थ अनुपञ्ञत्ति, साधारणपञ्ञत्ति, साणत्तिकं, हरणत्थाय गमनादिके पुब्बप्पयोगे दुक्कटं, आमसने दुक्कटं, पाराजिकवत्थुनो फन्दापने थुल्लच्चयं. आदियन्तस्स मासके वा ऊनमासके वा दुक्कटं, अतिरेकमासके वा ऊनपञ्चमासके वा थुल्लच्चयं, पञ्चमासके वा अतिरेकपञ्चमासके वा पाराजिकं. सब्बत्थ गहणकालवसेन च गहणदेसवसेन च परिभोगभाजनपरिवत्तनादीहि च परिहीनापरिहीनवसेन विनिच्छयो वेदितब्बो. सकसञ्ञिस्स, विस्सासग्गाहे, तावकालिके, पेतपरिग्गहे, तिरच्छानगतपरिग्गहे, पंसुकूलसञ्ञिस्स, उम्मत्तकादीनञ्च अनापत्ति. सीलविपत्ति, अञ्ञस्स मनुस्सजातिकस्स वसेन परपरिग्गहितं, परपरिग्गहितसञ्ञिता, गरुपरिक्खारो, थेय्यचित्तं, वुत्तप्पकारानं अवहारानं वसेन अवहरणञ्चाति इमानेत्थ पञ्च अङ्गानि. अदिन्नादानसमुट्ठानं, किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, तिवेदनन्ति.

दुतियपाराजिकवण्णना निट्ठिता.

३. ततियपाराजिकवण्णना

ततिये सञ्चिच्चाति संचेतेत्वा सद्धिं चेतेत्वा. ‘‘पाणो’’तिसञ्ञाय सद्धिंयेव ‘‘वधामि न’’न्ति वधकचेतनाय चेतेत्वा पकप्पेत्वा. मनुस्सविग्गहन्ति कललतो पट्ठाय जीवमानकमनुस्सजातिकसरीरं. जीविता ¶ वोरोपेय्याति कललकालेपि तापनमद्दनेहि वा भेसज्जसम्पदानेन वा ततो वा उद्धम्पि तदनुरूपेन उपक्कमेन जीविता वियोजेय्य. इमस्स पनत्थस्स आविभावत्थं पाणो वेदितब्बो, पाणातिपातो वेदितब्बो, पाणातिपाती वेदितब्बो, पाणातिपातस्स पयोगो वेदितब्बो. तत्थ पाणोति वोहारतो सत्तो, परमत्थतो जीवितिन्द्रियं. पाणातिपातोति ¶ याय चेतनाय जीवितिन्द्रियुपच्छेदकपयोगं समुट्ठापेति, सा चेतना. पाणातिपातीति वुत्तचेतनाय समङ्गिपुग्गलो. पाणातिपातस्स पयोगोति पाणातिपातस्स छ पयोगा साहत्थिको निस्सग्गियो आणत्तिको थावरो विज्जामयो इद्धिमयोति ¶ . तत्थ साहत्थिकोति सयं मारेन्तस्स कायेन वा कायप्पटिबद्धेन वा पहरणं. निस्सग्गियोति दूरे ठितं मारेतुकामस्स कायेन वा कायप्पटिबद्धेन वा उसुसत्तियन्तपासाणादीनं निस्सज्जनं. तत्थ एकेको उद्दिस्सानुद्दिस्सभेदतो दुविधो. तत्थ उद्दिस्सके यं उद्दिस्स पहरति, तस्सेव मरणेन कम्मबद्धो. ‘‘यो कोचि मरतू’’ति एवं अनुद्दिस्सके पहारप्पच्चया यस्स कस्सचि मरणेन कम्मबद्धो. उभयत्थापि च पहरितमत्ते वा मरतु, पच्छा वा तेनेव रोगेन, पहरितक्खणेयेव कम्मबद्धो. आणत्तिकोति ‘‘असुकं नाम मारेही’’ति अञ्ञं आणापेन्तस्स आणापनं.

तत्थ –

वत्थु कालो च ओकासो, आवुधं इरियापथो;

क्रियाविसेसोति इमे, छ आणत्ति नियामका.

तत्थ वत्थूति पुग्गलो. यञ्हि पुग्गलं ‘‘मारेही’’ति आणत्तो सचे तमेव मारेति, आणापकस्स आपत्ति. अथ अञ्ञं मारेति, तंमञ्ञमानो वा अञ्ञं मारेति, आणापको मुच्चति. ‘‘इमं मारेही’’ति आणत्ते पन आणापकस्स दुक्कटं. कालोति पुरेभत्तादिकालो. सचे हि ‘‘पुरेभत्तं मारेही’’ति आणत्तो पुरेभत्तमेव मारेति, आणापकस्स आपत्ति. अथ यं पुरेभत्तं नियामितं, ततो पच्छा वा पुरे वा मारेति, आणापको मुच्चति. इमिना नयेन सब्बत्थ विनिच्छयो वेदितब्बो. थावरोति असंहारिमेन उपकरणेन मारेतुकामस्स ¶ ओपातक्खणनं अपस्सेनसंविधानं असिआदीनं उपनिक्खिपनं तळाकादीसु विससम्पयोजनं रूपूपहारोतिएवमादि. वुत्तनयेनेव चेत्थापि उद्दिस्सानुद्दिस्सभेदो वेदितब्बो. विज्जामयोति मारणत्थं विज्जापरिजप्पनं. इद्धिमयोति कम्मविपाकजाय इद्धिया पयोजनं.

सत्थहारकं वास्स परियेसेय्याति एत्थ हरतीति हारकं, किं हरति? जीवितं. अथ वा हरितब्बन्ति हारकं, उपनिक्खिपितब्बन्ति अत्थो. सत्थञ्च तं हारकञ्चाति सत्थहारकं. अस्साति मनुस्सविग्गहस्स. परियेसेय्याति यथा लभति, तथा करेय्य, उपनिक्खिपेय्याति अत्थो. एतेन थावरपयोगं दस्सेति. इतरथा हि परियिट्ठिमत्तेयेव पाराजिको भवेय्य, न चेतं युत्तं. पदभाजने पनस्स ब्यञ्जनं अनादियित्वा यं एत्थ थावरपयोगसङ्गहितं सत्थं, तदेव ¶ दस्सेतुं ‘‘असिं वा’’तिआदि वुत्तं. मरणवण्णं वा संवण्णेय्याति वाचाय वा तालपण्णादीसु लिखित्वा वा ‘‘यो एवं मरति, सो धनं वा लभती’’तिआदिना नयेन मरणे गुणं पकासेय्य. एतेन यथा ‘‘अदिन्नादाने आदियेय्या’’ति वुत्तत्ता परियायकथाय मुच्चति, नयिध, एवं ‘‘संवण्णेय्या’’ति वचनतो पन इध परियायकथायपि न मुच्चतीति अयमत्थो वेदितब्बो. मरणाय वा समादपेय्याति ‘‘सत्थं वा आहरा’’तिआदिना (पारा. १७२) नयेन मरणत्थाय ¶ उपायं गाहापेय्य. एतेन आणत्तिकप्पयोगं दस्सेति. अम्भो पुरिसाति आलपनमेतं. किं तुय्हिमिनातिआदि संवण्णनाकारनिदस्सनं. इति चित्तमनोति इति चित्तो इति मनो. ‘‘मतं ते जीविता सेय्यो’’तिएत्थ वुत्तमरणचित्तो मरणमनोति अत्थो. एत्थ च ‘‘मनो’’तिइदं चित्तस्स अत्थदीपनत्थं वुत्तं. तेनेवस्स पदभाजने ‘‘यं चित्तं तं मनो’’ति (पारा. १७२) आह. चित्तसङ्कप्पोति विचित्तसङ्कप्पो. एत्थापि इति-सद्दो आहरितब्बो. ‘‘सङ्कप्पो’’ति च संविदहनमत्तस्सेतं नामं, न वितक्कस्सेव. तञ्च संविदहनं इमस्मिं अत्थे सञ्ञाचेतनाधिप्पायेहि सङ्गहं गच्छति, तस्मा ‘‘इति चित्तसङ्कप्पो’’ति ‘‘मतं ते जीविता सेय्यो’’तिएत्थ वुत्तमरणसञ्ञी मरणचेतनो मरणाधिप्पायोति एवमेत्थ अत्थो दट्ठब्बो. पदभाजनेपि हि अयमेव नयो दस्सितो ¶ . एतेन मरणचित्तादीहि विना ‘‘एकाहं जीवितं सेय्यो, वीरियमारभतो दळ्ह’’न्तिआदिना (ध. प. ११२) नयेन धम्मं भासन्तस्स संवण्णना नाम न होतीति दस्सेति. अनेकपरियायेनाति नानप्पकारेन उच्चावचेन कारणेन. पुन मरणवण्णन्तिआदि निगमनवचनं. पाराजिको होतीति तङ्खणूपपन्नम्पि मनुस्सविग्गहं वुत्तनयेन जीविता वोरोपेन्तो पाराजिको होतीति.

वेसालियं सम्बहुले भिक्खू आरब्भ अञ्ञमञ्ञं जीविता वोरोपनवत्थुस्मिं पञ्ञत्तं, ‘‘मरणवण्णं वा’’ति अयमेत्थ अनुपञ्ञत्ति, साधारणपञ्ञत्ति, साणत्तिकं, मारणत्थाय ओपातक्खणनादीसु दुक्कटं, अनोदिस्स खते ओपाते यस्स कस्सचि पतनेपि दुक्कटं, यक्खपेततिरच्छानगतमनुस्सविग्गहानं तिरच्छानगतस्स च दुक्खुप्पत्तियं दुक्कटमेव, मनुस्सजातिकस्स दुक्खुप्पत्तियं थुल्लच्चयं, तथा यक्खादीनं मरणे, तिरच्छानगतमरणे पन पाचित्तियं, मनुस्समरणे पाराजिकन्ति. इमिना नयेन सब्बत्थ पयोगभेदवसेन आपत्तिभेदो वेदितब्बो. असञ्चिच्च मारेन्तस्स अजानन्तस्स नमरणाधिप्पायस्स उम्मत्तकादीनञ्च अनापत्ति. तत्थ असञ्चिच्चाति ‘‘इमिना उपक्कमेन इमं मारेमी’’ति अचेतेत्वा कतेन उपक्कमेन मुसलुस्सापनवत्थुस्मिं (पारा. १८० आदयो) विय परे मतेपि अनापत्ति. अजानन्तस्साति ‘‘इमिना अयं मरिस्सती’’ति अजानन्तस्स उपक्कमेन विसगतपिण्डपातवत्थुस्मिं (पारा. १८१) विय परे मतेपि अनापत्ति. नमरणाधिप्पायस्साति मरणं अनिच्छन्तस्स ¶ उपक्कमेन भेसज्जवत्थुस्मिं (पारा. १८७) विय परे मतेपि अनापत्ति. एवं असञ्चिच्चातिआदीसु विनिच्छयो वेदितब्बो. सीलविपत्ति, मनुस्सजातिकपाणो, पाणसञ्ञिता, वधकचित्तं, उपक्कमो, तेन मरणन्ति इमानेत्थ पञ्च अङ्गानि. अदिन्नादानसमउट्ठानं, किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदनन्ति.

ततियपाराजिकवण्णना निट्ठिता.

४. चतुत्थपाराजिकवण्णना

चतुत्थे ¶ ¶ अनभिजानन्ति सकसन्ताने अनुप्पन्नत्ता अत्तनि अत्थिभावं अजानन्तो. उत्तरिमनुस्सधम्मन्ति उत्तरिमनुस्सानं झायीनञ्चेव अरियानञ्च धम्मं. अत्तुपनायिकन्ति अत्तनि तं उपनेति ‘‘मयि अत्थी’’ति समुदाचरन्तो, अत्तानं वा तत्थ उपनेति ‘‘अहं एत्थ सन्दिस्सामी’’ति समुदाचरन्तोति अत्तुपनायिको, तं अत्तुपनायिकं. एवं कत्वा समुदाचरेय्याति सम्बन्धो. अलमरियञाणदस्सनन्तिएत्थ महग्गतलोकुत्तरपञ्ञा जाननट्ठेन ञाणं, चक्खुना च दिट्ठमिव धम्मं पच्चक्खकरणतो दस्सनत्थेन दस्सनन्ति ञाणदस्सनं, अरियं विसुद्धं उत्तमं ञाणदस्सनन्ति अरियञाणदस्सनं, अलं परियत्तं किलेसविद्धंसनसमत्थं अरियञाणदस्सनमेत्थ झानादिभेदे उत्तरिमनुस्सधम्मे, अलं वा अरियञाणदस्सनमस्साति अलमरियञाणदस्सनो, तं अलमरियञाणदस्सनं. समुदाचरेय्याति वुत्तप्पकारमेतं उत्तरिमनुस्सधम्मं अत्तुपनायिकं कत्वा कायेन वा वाचाय वा तदुभयेन वा विञ्ञुस्स मनुस्सजातिकस्स आरोचेय्य. इति जानामि इति पस्सामीति समुदाचरणाकारदस्सनमेतं, अत्तुपनायिकञ्हि कत्वा विना अञ्ञापदेसेन समुदाचरन्तो एवं समुदाचरति, तस्मा य्वायं पदभाजने (पारा. २०९) ‘‘पठमं झानं समापज्जिं, समापज्जामि, समापन्नो’’तिआदिभेदो वुत्तो, सो सब्बो इधेव सङ्गहं गच्छतीति वेदितब्बो. ‘‘इति जानामि इति पस्सामी’’ति हि वदन्तो न यिदं वचनमत्तमेव वदति, अथ खो ‘‘इमिना च इमिना च कारणेन अयं धम्मो मयि अत्थी’’ति दीपेति, ‘‘समापज्जि’’न्तिआदीनि च वदन्तेन हि समापज्जनादीहि कारणेहि अत्थिता दीपिता होति, तेन वुत्तं ‘‘य्वायं पदभाजने पठमं झानं समापज्जिं, समापज्जामि, समापन्नोतिआदिभेदो वुत्तो, सो सब्बो इधेव सङ्गहं गच्छती’’ति. ततो अपरेन समयेनाति ततो आरोचितकालतो अञ्ञतरस्मिं काले. इति आपत्तिपटिजाननकालदस्सनमेतं, अयं पन आरोचितक्खणेव आपत्तिं आपज्जति. आपत्तिं पन ¶ आपन्नो यस्मा परेन चोदितो वा अचोदितो वा पटिजानाति, तस्मा ‘‘समनुग्गाहीयमानो वा असमनुग्गाहीयमानो वा’’ति वुत्तं. आपन्नोति आरोचितक्खणेयेव पाराजिकं आपन्नो. विसुद्धापेक्खोति ¶ अत्तनो गिहिभावादिकं विसुद्धिं अपेक्खमानो इच्छमानो. अयञ्हि यस्मा पाराजिकं आपन्नो, तस्मा भिक्खुभावे ठत्वा अभब्बो झानादीनि अधिगन्तुं, इच्चस्स भिक्खुभावो विसुद्धि नाम न होति. यस्मा पन गिहि वा उपासकारामिकसामणेरानं वा अञ्ञतरो हुत्वा दानादीहि सग्गमग्गं वा झानादीहि मोक्खमग्गं वा आराधेतुं भब्बो होति, तस्मास्स गिहिआदिभावो विसुद्धि नाम होति. तेन वुत्तं ‘‘गिहिभावादिकं विसुद्धिं अपेक्खमानो’’ति. एवं वदेय्याति एवं भणेय्य, कथं? ‘‘अजानमेवं, आवुसो’’तिआदिं. तत्थ अजानन्ति अजानन्तो. अपस्सन्ति अपस्सन्तो. तुच्छं मुसा विलपिन्ति अहं ¶ वचनत्थविरहतो तुच्छं, वञ्चनाधिप्पायतो मुसा विलपिं अभणिन्ति वुत्तं होति. अञ्ञत्र अधिमानाति य्वायं तिलक्खणं आरोपेत्वा सङ्खारे सम्मसन्तस्स आरद्धविपस्सकस्स अपत्ते पत्तसञ्ञितासङ्खातो अधिमानो उप्पज्जति, तं अधिमानं ठपेत्वा केवलं पापिच्छताय यो समुदाचरेय्य, अयम्पि पाराजिको होतीति अत्थो.

वेसालियं वग्गुमुदातीरिये भिक्खू आरब्भ तेसं उत्तरिमनुस्सधम्मारोचनवत्थुस्मिं पञ्ञत्तं, ‘‘अञ्ञत्र अधिमाना’’ति अयमेत्थ अनुपञ्ञत्ति, साधारणपञ्ञत्ति, अनाणत्तिकं, ‘‘पठमं झानं समापज्जि’’न्तिआदिना नयेन वुत्तप्पकारं असन्तं झानादिधम्मं आरोचेन्तस्स सचे यस्स कस्सचि आरोचेति, सो मनुस्सजातिको होति, अनन्तरमेव ‘‘अयं झानलाभी’’ति वा ‘‘अरियो’’ति वा येन केनचि आकारेन तमत्थं जानाति, पाराजिकं. सचे न जानाति, थुल्लच्चयं. सचे पन ‘‘यो ते विहारे वसि, सो भिक्खु पठमं झानं समापज्जी’’तिआदिना (पारा. २२०) नयेन अञ्ञापदेसेन आरोचेन्तस्स जानाति, थुल्लच्चयं. सचे न जानाति, दुक्कटं. अधिमानेन आरोचेन्तस्स, अनुल्लपनाधिप्पायस्स, उम्मत्तकादीनञ्च अनापत्ति. सीलविपत्ति, उत्तरिमनुस्सधम्मस्स अत्तनि असन्तता, पापिच्छताय तस्स आरोचनं, अनञ्ञापदेसो, यस्स आरोचेति, तस्स मनुस्सजातिकता, तङ्खणविजाननन्ति इमानेत्थ पञ्च अङ्गानि. समुट्ठानादीनि अदिन्नादाने वुत्तसदिसानेवाति.

चतुत्थपाराजिकवण्णना निट्ठिता.

उद्दिट्ठा ¶ खो आयस्मन्तो चत्तारो पाराजिका धम्मातिइदं इध उद्दिट्ठपाराजिकपरिदीपनमेव. समोधानेत्वा पन सब्बानेव चतुवीसति पाराजिकानि वेदितब्बानि ¶ . कतमानि चतुवीसति? पाळियं आगतानि ताव भिक्खूनं चत्तारि भिक्खुनीनं असाधारणानि चत्तारीति अट्ठ, तानि एकादसन्नं पण्डकादीनं अभब्बभावसङ्खातेहि एकादसहि पाराजिकेहि सद्धिं एकूनवीसति, गिहिभावं पत्थयमानाय भिक्खुनिया विब्भन्तभावपाराजिकेन सद्धिं वीसति, अपरानिपि लम्बी, मुदुपिट्ठिको, परस्स अङ्गजातं मुखेन गण्हाति, परस्स अङ्गजाते अभिनिसीदतीति इमेसं चतुन्नं वसेन ‘‘चत्तारि अनुलोमपाराजिकानी’’ति वदन्ति, इति इमानि च चत्तारि, पुरिमानि च वीसतीति समोधानेत्वा सब्बानेव चतुवीसति पाराजिकानि वेदितब्बानि. न लभति भिक्खूहि सद्धिं संवासन्ति उपोसथादिभेदं संवासं भिक्खूहि सद्धिं न लभति. यथा पुरे, तथा पच्छाति यथा पुब्बे गिहिकाले अनुपसम्पन्नकाले च, पच्छा पाराजिकं आपन्नोपि तथेव असंवासो होति, नत्थि तस्स भिक्खूहि सद्धिं उपोसथादिभेदो संवासोति. तत्थायस्मन्ते पुच्छामीति तेसु चतूसु पाराजिकेसु आयस्मन्ते ‘‘कच्चित्थ परिसुद्धा’’ति पुच्छामि. कच्चित्थाति कच्चि एत्थ, एतेसु चतूसु ¶ पाराजिकेसु कच्चि परिसुद्धाति अत्थो. अथ वा कच्चित्थ परिसुद्धाति कच्चि परिसुद्धा अत्थ, भवथाति अत्थो. सेसं सब्बत्थ उत्तानमेवाति.

कङ्खावितरणिया पातिमोक्खवण्णनाय

पाराजिकवण्णना निट्ठिता.

सङ्घादिसेसकण्डो

इमे ¶ ¶ खो पनाति इदानि वत्तब्बानं अभिमुखीकरणं. आयस्मन्तोति सन्निपतितानं पियवचनेन आलपनं. तेरसाति गणनपरिच्छेदो. सङ्घादिसेसाति एवंनामका. धम्माति आपत्तियो. उद्देसं आगच्छन्तीति सरूपेन उद्दिसितब्बतं आगच्छन्ति, न निदाने विय ‘‘यस्स सिया आपत्ती’’ति साधारणवचनमत्तेन.

१. सुक्कविस्सट्ठिसिक्खापदवण्णना

संविज्जति चेतना अस्साति सञ्चेतना, सञ्चेतनाव सञ्चेतनिका, सञ्चेतना वा अस्स अत्थीति सञ्चेतनिका. सुक्कविस्सट्ठीति सुक्कस्स विस्सट्ठि, रागूपत्थम्भादीसु येन केनचि अङ्गजाते कम्मञ्ञतं पत्ते आरोग्यादीसु यंकिञ्चि अपदिसित्वा अज्झत्तरूपादीसु यत्थ कत्थचि मोचनस्सादचेतनाय निमित्ते उपक्कमन्तस्स आसयधातुनानत्ततो नीलादिवसेन (पारा. २३९-२४०) दसविधेसु सुक्केसु यस्स कस्सचि सुक्कस्स ठाना चावनाति अत्थो. अञ्ञत्र सुपिनन्ताति या सुपिने सुक्कविस्सट्ठि होति, तं ठपेत्वा. सङ्घादिसेसोति या अञ्ञत्र सुपिनन्ता सञ्चेतनिका सुक्कविस्सट्ठि, अयं सङ्घादिसेसो नाम आपत्तिनिकायोति अत्थो. वचनत्थो पनेत्थ सङ्घो आदिम्हि चेव सेसे च इच्छितब्बो अस्साति सङ्घादिसेसो. किं वुत्तं होति – इमं आपत्तिं आपज्जित्वा वुट्ठातुकामस्स यं तं आपत्तिवुट्ठानं, तस्स आदिम्हि चेव परिवासदानत्थाय, आदितो सेसे मज्झे मानत्तदानत्थाय मूलाय पटिकस्सनेन वा सह मानत्तदानत्थाय, अवसाने अब्भानत्थाय च सङ्घो इच्छितब्बो, न हेत्थ एकम्पि कम्मं विना सङ्घेन सक्का कातुं. इति सङ्घो आदिम्हि चेव सेसे च इच्छितब्बो अस्साति सङ्घादिसेसोति.

सावत्थियं सेय्यसकं आरब्भ उपक्कमित्वा असुचिमोचनवत्थुस्मिं पञ्ञत्तं, ‘‘अञ्ञत्र सुपिनन्ता’’ति ¶ अयमेत्थ अनुपञ्ञत्ति, असाधारणपञ्ञत्ति, अनाणत्तिकं. सचे पन परेन अत्तनो अङ्गजाते उपक्कमं कारेत्वा मोचापेति, आपज्जतियेव. चेतेत्वा अन्तमसो आकासे कटिकम्पनेनपि निमित्ते उपक्कमन्तस्स सचे न मुच्चति, थुल्लच्चयं. सचे पन अन्तमसो ¶ यं एका खुद्दकमक्खिका पिवेय्य, तत्तकम्पि ठानतो मुच्चति, दकसोतं अनोतिण्णेपि सङ्घादिसेसो. ठानतो पन चुतं अवस्समेव दकसोतं ओतरति, तस्मा ‘‘दकसोतं ओतिण्णमत्ते बहि निक्खन्ते वा अनिक्खन्ते वा सङ्घादिसेसो’’ति (पारा. अट्ठ. २.२३७) अट्ठकथासु वुत्तं. अनुपक्कमन्तस्स च, अमोचनाधिप्पायस्स च, सुपिनं पस्सन्तस्स च, उम्मत्तकादीनञ्च मुत्तेपि अनापत्ति. सीलविपत्ति, चेतना, उपक्कमो ¶ , मुच्चनन्ति इमानेत्थ तीणि अङ्गानि. समुट्ठानादीनि पठमपाराजिके वुत्तसदिसानेवाति.

सुक्कविस्सट्ठिसिक्खापदवण्णना निट्ठिता.

२. कायसंसग्गसिक्खापदवण्णना

दुतिये ओतिण्णोति यक्खादीहि विय सत्ता अन्तो उप्पज्जन्तेन रागेन वा ओतिण्णो, कूपादीनि विय सत्ता असमपेक्खित्वा रज्जनीये ठाने रज्जन्तो सयं वा रागं ओतिण्णो, कायसंसग्गरागसमङ्गिस्सेतं अधिवचनं. विपरिणतेन चित्तेनाति परिसुद्धभवङ्गसन्ततिसङ्खातं पकतिं विजहित्वा अञ्ञथा पवत्तेन, विरूपं वा परिणतेन यथा परिवत्तमानं विरूपं होति, एवं वुत्तरागवसेन परिवत्तेत्वा ठितेन चित्तेनाति अत्थो. मातुगामेन सद्धिन्ति तदहुजातायपि जीवमानकमनुस्सित्थिया सद्धिं. कायसंसग्गं समापज्जेय्याति हत्थग्गहणादिकआयसम्पयोगं कायमिस्सीभावं समापज्जेय्य. हत्थग्गाहं वातिआदि पनस्स वित्थारेन अत्थदस्सनं. तत्थ हत्थो नाम कप्परतो पट्ठाय याव अग्गनखा. वेणी नाम विनन्धित्वा वा अविनन्धित्वा वा सुद्धकेसेहि वा नीलादिवण्णसुत्तकुसुमकहापणमालासुवण्णचीरकमुत्तावळिआदीसु अञ्ञतरमिस्सेहि वा कतकेसकलापस्सेतं अधिवचनं. वेणिग्गहणेन चेत्थ केसापि गहितायेव सद्धिं लोमेहि. इति वुत्तलक्खणस्स हत्थस्स गहणं हत्थग्गाहो, वेणिया गहणं वेणिग्गाहो. अवसेसस्स सरीरस्स परामसनं अञ्ञतरस्स वा अञ्ञतरस्स वा अङ्गस्स परामसनं नाम. यो तं हत्थग्गाहं वा वेणिग्गाहं वा अञ्ञतरस्स वा अञ्ञतरस्स वा अङ्गस्स परामसनं समापज्जेय्य, तस्स सङ्घादिसेसो नाम आपत्तिनिकायो होतीति.

सावत्थियं ¶ उदायित्थेरं आरब्भ कायसंसग्गसमापज्जनवत्थुस्मिं पञ्ञत्तं, असाधारणपञ्ञत्ति ¶ , अनाणत्तिकं, इत्थिया इत्थिसञ्ञिनो अन्तमसो लोमेन लोमं फुसन्तस्सापि, इत्थिया वा फुसियमानस्स सेवनाधिप्पायेन वायमित्वा फस्सं पटिजानन्तस्स सङ्घादिसेसो. एकेन पन हत्थेन गहेत्वा दुतियेन हत्थेन दिवसम्पि तत्थ तत्थ फुसन्तस्स एकाव आपत्ति, अग्गहेत्वा फुसन्तो पन सचे सीसतो याव पादा, ताव कायतो हत्थं अमोचेन्तोयेव फुसति, एकाव आपत्ति, पञ्चन्नं अङ्गुलीनं एकतो गहणेपि एकायेव. सचे पन नानित्थीनं पञ्चङ्गुलियो एकतो गण्हाति, पञ्च आपत्तियो. इत्थिया वेमतिकस्स, पण्डकपुरिसतिरच्छानगतसञ्ञिस्स च थुल्लच्चयं, तथा कायेन कायप्पटिबद्धेन, अमनुस्सित्थिपण्डकेहि च सद्धिं कायसंसग्गेपि. मनुस्सित्थिया पन कायप्पटिबद्धेन कायप्पटिबद्धादीसु, पुरिसकायफुसनादीसु च दुक्कटं. इत्थिया फुसियमानस्स सेवनाधिप्पायस्सापि कायेन अवायमित्वा ¶ फस्सं पटिजानन्तस्स, मोक्खाधिप्पायेन इत्थिं फुसन्तस्स, असञ्चिच्च, अस्सतिया, अजानन्तस्स, असादियन्तस्स, उम्मत्तकादीनञ्च अनापत्ति. सीलविपत्ति, मनुस्सित्थी, इत्थिसञ्ञिता, कायसंसग्गरागो, तेन रागेन वायामो, हत्थग्गाहादिसमापज्जनन्ति इमानेत्थ पञ्च अङ्गानि. समुट्ठानादीनि पठमपाराजिके वुत्तसदिसानेवाति.

कायसंसग्गसिक्खापदवण्णना निट्ठिता.

३. दुट्ठुल्लवाचासिक्खापदवण्णना

ततिये ओतिण्णता च विपरिणतचित्तता च दुट्ठुल्लवाचस्सादरागवसेन वेदितब्बा. मातुगामन्ति दुट्ठुल्लादुट्ठुल्लसंलक्खणसमत्थं मनुस्सित्थिं. दुट्ठुल्लाहिवाचाहीति वच्चमग्गपस्सावमग्गेमेथुनधम्मप्पटिसंयुत्ताहि वाचाहि. ओभासेय्याति अवभासेय्य, वण्णावण्णयाचनआयाचनपुच्छनपटिपुच्छनआचिक्खणानुसासनअक्कोसनवसेन नानप्पकारं असद्धम्मवचनं वदेय्य. यथा तन्ति एत्थ न्ति निपातमत्तं, यथा युवा युवतिन्ति अत्थो. एतेन ओभासने निरासङ्कभावं दस्सेति. मेथुनुपसंहिताहीतिइदं ¶ दुट्ठुल्लवाचाय सिखापत्तलक्खणदस्सनं. सङ्घादिसेसोति द्विन्नं मग्गानं वसेन वण्णावण्णेहि वा मेथुनयाचनादीहि वा ‘‘सिखरणीसि, संभिन्नासि, उभतोब्यञ्जनकासी’’ति इमेसु तीसु अञ्ञतरेन अक्कोसवचनेन वा मातुगामं ओभासन्तस्स सङ्घादिसेसो नाम आपत्तिनिकायो होतीति.

सावत्थियं उदायित्थेरं आरब्भ दुट्ठुल्लवाचाहि ओभासनवत्थुस्मिं पञ्ञत्तं, असाधारणपञ्ञत्ति, अनाणत्तिकं, इत्थिया इत्थिसञ्ञिनो अन्तमसो हत्थमुद्दायपि वुत्तनयेन ओभासन्तस्स ¶ सचे सा तमत्थं तस्मिंयेव खणे जानाति, सङ्घादिसेसो. पण्डके थुल्लच्चयं. तस्मिंयेव इत्थिसञ्ञिनो दुक्कटं. पुनप्पुनं ओभासन्तस्स, सम्बहुला च इत्थियो एकवाचाय ओभासन्तस्स वाचागणनाय चेव इत्थिगणनाय च आपत्तियो. सचे यं इत्थिं ओभासति, सा न जानाति, थुल्लच्चयं. अधक्खकं उब्भजाणुमण्डलं आदिस्स वण्णादिभणनेपि थुल्लच्चयं. पण्डके दुक्कटं, उब्भक्खकं अधोजाणुमण्डलं कायप्पटिबद्धञ्च आदिस्स वण्णादिभणने सब्बत्थ दुक्कटं. अत्थधम्मअनुसासनिपुरेक्खारानं उम्मत्तकादीनञ्च अनापत्ति. सीलविपत्ति, मनुस्सित्थी, इत्थिसञ्ञिता, दुट्ठुल्लवाचस्सादरागो, तेन रागेन ओभासनं, तङ्खणविजाननन्ति इमानेत्थ पञ्च अङ्गानि. अदिन्नादानसमुट्ठानं, किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, द्विवेदनन्ति.

दुट्ठुल्लवाचासिक्खापदवण्णना निट्ठिता.

४. अत्तकामसिक्खापदवण्णना

चतुत्थे ओतिण्णता च विपरिणतचित्तता च अत्तकामपारिचरियावसेन वेदितब्बा. मातुगामस्स सन्तिकेति दुट्ठुल्लोभासने वुत्तप्पकाराय इत्थिया समीपे. अत्तकामपारिचरियायाति ¶ मेथुनधम्मसङ्खातेन कामेन पारिचरिया कामपारिचरिया, अत्तनो अत्थाय कामपारिचरिया अत्तकामपारिचरिया, अत्तना वा कामिता इच्छिताति अत्तकामा, सयं मेथुनरागवसेन पत्थिताति अत्थो, अत्तकामा च सा पारिचरिया ¶ चाति अत्तकामपारिचरिया, तस्सा अत्तकामपारिचरियाय. वण्णं भासेय्याति गुणं आनिसंसं पकासेय्य. एतदग्गन्तिआदि तस्सा अत्तकामपारिचरियाय वण्णभासनाकारनिदस्सनं. तत्रायं पदसम्बन्धवसेनेव सङ्खेपत्थो – या मादिसं पाणातिपातादीहि विरहितत्ता सीलवन्तं मेथुनधम्मा विरहितत्ता ब्रह्मचारिं तदुभयेनापि कल्याणधम्मं एतेन धम्मेन परिचरेय्य अभिरमेय्य, तस्सा एवं मादिसं परिचरन्तिया या अयं पारिचरिया नाम, एतदग्गं पारिचरियानन्ति. मेथुनुपसंहितेन सङ्घादिसेसोति एवं अत्तकामपारिचरियाय वण्णं भासन्तो च ‘‘अरहसि त्वं मय्हं मेथुनधम्मं दातु’’न्तिआदिना मेथुनप्पटिसंयुत्तेनेव वचनेन यो भासेय्य, तस्स सङ्घादिसेसो.

सावत्थियं उदायित्थेरं आरब्भ अत्तकामपारिचरियाय वण्णभासनवत्थुस्मिं पञ्ञत्तं, असाधारणपञ्ञत्ति, अनाणत्तिकं, इत्थिया इत्थिसञ्ञिनो अन्तमसो हत्थमुद्दायपि वुत्तनयेनेव अत्तकामपारिचरियाय वण्णं भासन्तस्स सचे सा तमत्थं तस्मिंयेव खणे जानाति, सङ्घादिसेसो ¶ . नो चे जानाति, थुल्लच्चयं. पण्डके पण्डकसञ्ञिनोपि थुल्लच्चयं. तस्मिंयेव इत्थिसञ्ञिनो दुक्कटं. चीवरादीहि वत्थुकामेहि पारिचरियाय वण्णं भासन्तस्स उम्मत्तकादीनञ्च अनापत्ति. सीलविपत्ति, मनुस्सित्थी, इत्थिसञ्ञिता, अत्तकामपारिचरियाय रागो, तेन रागेन वण्णभणनं, तङ्खणविजाननन्ति इमानेत्थ पञ्च अङ्गानि. समुट्ठानादीनि दुट्ठुल्लोभासने वुत्तसदिसानेवाति.

अत्तकामसिक्खापदवण्णना निट्ठिता.

५. सञ्चरित्तसिक्खापदवण्णना

पञ्चमे सञ्चरित्तन्ति इत्थिपुरिसानं अन्तरे संचरणभावं. समापज्जेय्याति सम्मा पटिग्गण्हनवीमंसनपच्चाहरणानि करोन्तो आपज्जेय्य. इत्थिया वातिआदि समापज्जनाकारदस्सनं. तत्थ इत्थिया वा पुरिसमतिन्ति पुरिसेन वा तस्स मातापितादीहि वा पेसितो पुरिसस्स मतिं अधिप्पायं इत्थिया आरोचेय्याति अत्थो. पुरिसस्स वा इत्थिमतिन्ति इत्थिया वा तस्सा मातापितादीहि वा पेसितो इत्थिया मतिं अधिप्पायं पुरिसस्स ¶ आरोचेय्याति अत्थो. जायत्तने वा जारत्तने वाति जायभावे वा जारभावे वा. पुरिसस्स हि मतिं इत्थिया आरोचेन्तो जायत्तने आरोचेति, इत्थिया मतिं पुरिसस्स आरोचेन्तो जारत्तने आरोचेति. अपिच पुरिसस्सेव मतिं इत्थिया आरोचेन्तो जायत्तने वा आरोचेति निबद्धभरियभावे, जारत्तने वा मिच्छाचारभावे, तेनेवस्स पदभाजने (पारा. ३०२) ‘‘जायत्तने वाति जाया भविस्ससि, जारत्तने वाति जारी भविस्ससी’’ति वुत्तं. एतेनेव उपायेन इत्थिया मतिं पुरिसस्स आरोचनेपि ‘‘पति भविस्ससि, जारो भविस्ससी’’ति ¶ वत्तब्बता वेदितब्बा. अन्तमसो तङ्खणिकायपीति सब्बन्तिमेन परिच्छेदेन या अयं तङ्खणे मुहुत्तमत्ते संवसितब्बतो ‘‘तङ्खणिका’’ति वुच्चति, मुहुत्तिकाति अत्थो. तस्सापि ‘‘मुहुत्तिका भविस्ससी’’ति एवं पुरिसस्स मतिं आरोचेन्तस्स सङ्घादिसेसो, एतेनेव उपायेन ‘‘मुहुत्तिको भविस्ससी’’ति एवं पुरिसस्स इत्थिमतिं आरोचेन्तोपि सङ्घादिसेसं आपज्जतीति वेदितब्बो.

सावत्थियं उदायित्थेरं आरब्भ सञ्चरित्तसमापज्जनवत्थुस्मिं पञ्ञत्तं, ‘‘अन्तमसो तङ्खणिकायपी’’ति अयमेत्थ अनुपञ्ञत्ति, साधारणपञ्ञत्ति, ‘‘पटिग्गण्हाति, वीमंसति, अन्तेवासिं पच्चाहरापेती’’तिइमिना (पारा. ३३८) नयेन साणत्तिकं, अञ्ञत्र नालंवचनीयाय ¶ याय कायचि इत्थिया अन्तमसो मातुयापि पुरिसमतिं आरोचेन्तो ‘‘होहि किर भरिया धनक्कीता’’ति वत्तुकामो सचेपि छन्दवासिनीआदीसु अञ्ञतराकारेन आरोचेत्वा ताय ‘‘साधू’’ति सम्पटिच्छितेपि असम्पटिच्छितेपि पुन आगन्त्वा येन पहितो, तस्स तं पवत्तिं आरोचेति, सङ्घादिसेसं आपज्जति. सा पन तस्स भरिया होतु वा, मा वा, अकारणमेतं. सचेपि यस्सा सन्तिकं पेसितो, तं अदिस्वा अञ्ञतरस्स अवस्सारोचनकस्स ‘‘आरोचेही’’ति वत्वा पच्चाहरति, आपज्जतियेव. ‘‘मातुरक्खितं ब्रूही’’ति पेसितस्स पन गन्त्वा अञ्ञं पितुरक्खितादीसु अञ्ञतरं वदन्तस्स विसङ्केतं होति, पुरिसस्स वा इत्थिया वा वचनं ‘‘साधू’’ति कायेन वा वाचाय वा उभयेन वा पटिग्गण्हित्वा तस्सा इत्थिया वा पुरिसस्स वा आरोचेत्वा वा आरोचापेत्वा वा पुन येन पेसितो, तस्स तं पवत्तिं सयं आरोचेन्तस्स वा अञ्ञेन आरोचापेन्तस्स वा सङ्घादिसेसो ¶ . एत्तावता हि ‘‘पटिग्गण्हाति, वीमंसति, पच्चाहरती’’तिइदं अङ्गत्तयं सम्पादितमेव होति, इतो पन येहि केहिचि द्वीहि अङ्गेहि, पण्डके च अङ्गत्तयेनापि थुल्लच्चयं. एकेन दुक्कटं. सङ्घस्स वा चेतियस्स वा गिलानस्स वा किच्चेन गच्छन्तस्स, उम्मत्तकादीनञ्च अनापत्ति.

सीलविपत्ति, येसु सञ्चरित्तं समापज्जति, तेसं मनुस्सजातिकता, न नालंवचनीयता,

पटिग्गण्हनवीमंसनपच्चाहरणानीति इमानेत्थ पञ्च अङ्गानि. छसमुट्ठानं, पण्णत्तिं वा अलंवचनीयभावं वा अजानन्तस्स कायविकारेन सासनं गहेत्वा तथेव वीमंसित्वा तथेव पच्चाहरन्तस्स कायतो समुट्ठाति. ‘‘इत्थन्नामा आगमिस्सति, तस्सा चित्तं जानेय्याथा’’ति केनचि वुत्ते ‘‘साधू’’ति सम्पटिच्छित्वा तं आगतं वत्वा पुन तस्मिं पुरिसे आगते आरोचेन्तस्स कायेन किञ्चि अकतत्ता वाचतो समुट्ठाति. वाचाय ‘‘साधू’’ति सासनं गहेत्वा अञ्ञेन करणीयेन तस्सा घरं गन्त्वा अञ्ञत्थ वा गमनकाले तं दिस्वा वचीभेदेन वीमंसित्वा पुनपि अञ्ञेनेव कारणेन ततो अपक्कम्म कदाचिदेव तं पुरिसं दिस्वा आरोचेन्तस्सापि वाचतो समुट्ठाति. पण्णत्तिं अजानन्तस्स पन खीणासवस्सापि पितुवचनेन गन्त्वा अलंवचनीयं मातरम्पि ‘‘एहि मे पितरं उपट्ठाही’’ति वत्वा पच्चाहरन्तस्स कायवाचतो समुट्ठाति. इमानि तीणि अचित्तकसमुट्ठानानि. तदुभयं ¶ पन जानित्वा एतेहेव तीहि नयेहि समापज्जन्तस्स तानेव तीणि तदुभयजाननचित्तेन सचित्तकानि होन्ति, किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, कुसलादिवसेन चेत्थ तीणि चित्तानि, सुखादिवसेन तिस्सो वेदनाति.

सञ्चरित्तसिक्खापदवण्णना निट्ठिता.

६. कुटिकारसिक्खापदवण्णना

छट्ठे ¶ सञ्ञाचिकाय पनाति एत्थ सञ्ञाचिका नाम सयं पवत्तितयाचना वुच्चति, तस्मा सञ्ञाचिकायाति अत्तनो याचनायाति वुत्तं होति, सयं याचितकेहि उपकरणेहीति अत्थो. एत्थ च यंकिञ्चि परपरिग्गहितकं ¶ मूलच्छेदवसेन याचितुं न वट्टति, तावकालिकं पन वट्टति. सहायत्थाय कम्मकरणत्थाय ‘‘पुरिसं देथा’’ति वत्तुं वट्टति, पुरिसत्तकरम्पि याचितुं वट्टति, पुरिसत्तकरो नाम वड्ढकिआदिना पुरिसेन कातब्बं हत्थकम्मं. तं ‘‘पुरिसत्तकरं देही’’ति वा ‘‘हत्थकम्मं देही’’ति वा वत्वा याचितुं वट्टति. हत्थकम्मं नाम किञ्चि वत्थु न होति, तस्मा ‘‘किं, भन्ते, आगतत्था’’ति पुच्छिते वा अपुच्छिते वा याचितुं वट्टति, विञ्ञत्तिपच्चया दोसो नत्थि, मिगलुद्दकादयो पन सककम्मं न याचितब्बा. कुटिन्ति उल्लित्तादीसु अञ्ञतरं. तत्थ उल्लित्ता नाम ठपेत्वा थम्भतुलापिट्ठसङ्घाटवातपानधूमच्छिद्दादिभेदं अलेपोकासं अवसेसे लेपोकासे कुट्टेहि सद्धिं घटेत्वा छदनस्स अन्तो सुधाय वा मत्तिकाय वा लित्ता. अवलित्ता नाम तथेव वुत्तनयेनेव छदनस्स बहि लित्ता. उल्लित्तावलित्ता नाम तथेव छदनस्स अन्तो च बहि च लित्ता. कारयमानेनाति सयं वा करोन्तेन, आणत्तिया वा कारापेन्तेन. असामिकन्ति कारेता दायकेन विरहितं. अत्तुद्देसन्ति ‘‘मय्हं वासागारं एसा’’ति एवं अत्ता उद्देसो एतिस्साति अत्तुद्देसा, तं अत्तुद्देसं. पमाणिका कारेतब्बाति पमाणयुत्ता कारेतब्बा. तत्रिदं पमाणन्ति तस्सा कुटिया इदं पमाणं. दीघसोति दीघतो. द्वादस विदत्थियो सुगतविदत्थियातिएत्थ सुगतविदत्थि नाम इदानि मज्झिमस्स पुरिसस्स तिस्सो विदत्थियो, वड्ढकिहत्थेन दियड्ढो हत्थो होति. मिनन्तेन पन कुटिया बहिकुट्टे पठमं दिन्नं महामत्तिकपरियन्तं अग्गहेत्वा थुसपिण्डपरियन्तेन द्वादस विदत्थियो मिनेतब्बा, सचे थुसपिण्डकेन अनत्थिको होति, महामत्तिकलेपेनेव निट्ठापेति, स्वेव परिच्छेदो. तिरियन्ति वित्थारतो. सत्तन्तराति कुट्टस्स बहिअन्तं अग्गहेत्वा अब्भन्तरिमेन अन्तेन सत्त सुगतविदत्थियो पमाणन्ति वुत्तं होति. एत्थ च केसग्गमत्तम्पि दीघतो हापेत्वा तिरियं, तिरियतो वा हापेत्वा दीघं वड्ढेतुं न वट्टति, को पन वादो उभतोवड्ढने. या पन दीघतो सट्ठिहत्थापि होति, तिरियतो तिहत्था वा ऊनकचतुहत्था वा, यत्थ ¶ पमाणयुत्तो मञ्चो इतो चितो च न परिवट्टति, पच्छिमकोटिया चतुहत्थवित्थारा न होति, अयं कुटिसङ्ख्यं न गच्छति, तस्मा वट्टति. भिक्खू ¶ अभिनेतब्बा वत्थुदेसनायाति यस्मिं पदेसे कुटिं कारेतुकामो होति, तं सोधेत्वा पदभाजने (पारा. ३४९) वुत्तनयेन सङ्घं तिक्खत्तुं याचित्वा सब्बे वा सङ्घपरियापन्ना सङ्घेन वा सम्मता द्वे तयो भिक्खू तत्थ वत्थुदेसनत्थाय नेतब्बा. तेहि भिक्खूहि वत्थु देसेतब्बं अनारम्भं सपरिक्कमनन्ति तेहि भिक्खूहि ¶ किपिल्लिकादीनं आसयादीहि तेरसहि, पुब्बण्णापरण्णनिस्सितादीहि सोळसहि उपद्दवेहि विरहितत्ता अनारम्भं, द्वीहि वा चतूहि वा बलिबद्धेहि युत्तेन सकटेन एकं चक्कं निब्बोदकपतनट्ठाने एकं बहि कत्वा आविज्झितुं सक्कुणेय्यताय सपरिक्कमनन्ति सल्लक्खेत्वा सचे सङ्घपहोनका होन्ति, तत्थेव, नो चे, सङ्घमज्झं गन्त्वा तेन भिक्खुना याचितेहि ञत्तिदुतियेन कम्मेन वत्थु देसेतब्बं. सारम्भे चेतिआदि पटिपक्खनयेन वेदितब्बं.

आळवियं आळविके भिक्खू आरब्भ सञ्ञाचिकाय कुटिकरणवत्थुस्मिं पञ्ञत्तं, असाधारणपञ्ञत्ति, साणत्तिकं, ‘‘अदेसितवत्थुकं पमाणातिक्कन्तं कुटिं कारेस्सामी’’ति उपकरणत्थं अरञ्ञं गमनतो पट्ठाय सब्बपयोगेसु दुक्कटं, ‘‘इदानि द्वीहि पिण्डेहि निट्ठानं गमिस्सती’’ति तेसु पठमपिण्डदाने थुल्लच्चयं, दुतियदानेन लेपे घटिते सचे अदेसितवत्थुका एव वा पमाणातिक्कन्ता एव वा होति, एको सङ्घादिसेसो, द्वे च दुक्कटानि. उभयविप्पन्ना, द्वे सङ्घादिसेसा, द्वे च दुक्कटानि. सचे पन द्वारबन्धं वा वातपानं वा अट्ठपेत्वाव मत्तिकाय लिम्पति, ठपिते च तस्मिं लेपो न घटियति, रक्खति ताव. पुन लिम्पन्तस्स पन घटितमत्ते सङ्घादिसेसो. सचे तं ठपियमानं पठमदिन्नलेपेन सद्धिं निरन्तरमेव हुत्वा तिट्ठति, पठममेव सङ्घादिसेसो. केवलं सारम्भाय दुक्कटं, तथा अपरिक्कमनाय. विप्पकतं कुटिं अञ्ञस्स ददतो च, भूमिं समं कत्वा भिन्दन्तस्स च, लेणगुहातिणकुटिपण्णच्छदनगेहेसु अञ्ञतरं कारेन्तस्स, कुटिम्पि अञ्ञस्स वासत्थाय, वासागारं ठपेत्वा उपोसथागारादीसु अञ्ञतरत्थाय कारेन्तस्स च उम्मत्तकादीनञ्च अनापत्ति. सीलविपत्ति, उल्लित्तादीनं अञ्ञतरता, हेट्ठिमपमाणसम्भवो, अदेसितवत्थुकता, पमाणातिक्कन्तता, अत्तुद्देसिकता, वासागारता ¶ , लेपघटनाति इमानेत्थ छ वा सत्त वा अङ्गानि. छसमुट्ठानं, किरियञ्च, किरियाकिरियञ्च. इदञ्हि वत्थुं देसापेत्वा पमाणातिक्कन्तं वा करोतो किरियतो समुट्ठाति, अदेसापेत्वा करोतो किरियाकिरियतो समुट्ठाति. सेसमेत्थ सञ्चरित्ते वुत्तसदिसमेवाति.

कुटिकारसिक्खापदवण्णना निट्ठिता.

७. विहारकारसिक्खापदवण्णना

सत्तमे ¶ महल्लकन्ति ससामिकभावेन सञ्ञाचितकुटितो महन्तभावो एतस्स अत्थीति महल्लको, यस्मा वा वत्थुं देसापेत्वा पमाणातिक्कमेनापि कातुं वट्टति, तस्मा पमाणमहन्ततायपि ¶ महल्लको, तं महल्लकं. यस्मा पनस्स तं पमाणमहन्तत्तं ससामिकत्ताव लब्भति, तस्मा तदत्थदस्सनत्थं ‘‘महल्लको नाम विहारो ससामिको वुच्चती’’ति एवमस्स पदभाजने (पारा. ३६७) वुत्तं. सेसं सब्बं कुटिकारसिक्खापदे वुत्तसदिसं, ससामिकभावमत्तमेव हि विसेसो.

कोसम्बियं छन्नत्थेरं आरब्भ चेतियरुक्खं छेदापनवत्थुस्मिं पञ्ञत्तभावो, अकिरियमत्ततो समुट्ठानभावो, एकसङ्घादिसेसता च एत्थ विसेसो.

विहारकारसिक्खापदवण्णना निट्ठिता.

८. दुट्ठदोससिक्खापदवण्णना

अट्ठमे दुट्ठो दोसोति दूसितो चेव दूसको च. उप्पन्ने हि दोसे पुग्गलो तेन दोसेन दूसितो होति, पकतिभावं जहापितो, तस्मा ‘‘दुट्ठो’’ति वुच्चति. परञ्च दूसेति विनासेति, तस्मा ‘‘दोसो’’ति वुच्चति. इति ‘‘दुट्ठो दोसो’’ति एकस्सेवेतं पुग्गलस्स आकारनानत्तेन निदस्सनं. अप्पतीतोति नप्पतीतो, पीतिसुखादीहि विवज्जितो, न अभिसटोति अत्थो. अमूलकेनाति यं चोदकेन चुदितकम्हि ¶ पुग्गले अदिट्ठं अस्सुतं अपरिसङ्कितं, इदं एतेसं दस्सनसवनपरिसङ्कासङ्खातानं मूलानं अभावतो अमूलकं नाम. तं पन सो आपन्नो वा होतु, अनापन्नो वा, एतं इध अप्पमाणं. एत्थ च अदिट्ठं नाम अत्तनो पसादचक्खुना वा दिब्बचक्खुना वा अदिट्ठं, अस्सुतं नाम तथेव केनचि वुच्चमानं न सुतं, अपरिसङ्कितं नाम अत्तनो वा परस्स वा दिट्ठसुतमुतवसेन चेतसा अपरिसङ्कितं, इति एवरूपेन अमूलकेन. पाराजिकेनाति भिक्खुनो अनुरूपेसु एकूनवीसतिया अञ्ञतरेन, पदभाजने (पारा. ३८६) पन पाराजिकुद्देसे आगतानेव गहेत्वा ‘‘चतुन्नं अञ्ञतरेना’’ति वुत्तं. अनुद्धंसेय्याति धंसेय्य विद्धंसेय्य पधंसेय्य अभिभवेय्य. तं पन अनुद्धंसनं यस्मा अत्तना चोदेन्तोपि परेन चोदापेन्तोपि करोति, तस्मास्स पदभाजने ‘‘चोदेति वा चोदापेति वा’’ति वुत्तं. तत्थ वत्थुसन्दस्सना आपत्तिसन्दस्सना संवासप्पटिक्खेपो सामीचिप्पटिक्खेपोति सङ्खेपतो चतस्सो चोदना. तासु वत्थुसन्दस्सना नाम ‘‘त्वं मेथुनं धम्मं पटिसेवी’’तिआदिना नयेन पवत्ता. आपत्तिसन्दस्सना नाम ‘‘त्वं मेथुनधम्मापत्तिं आपन्नो’’तिआदिना नयेन पवत्ता. संवासप्पटिक्खेपो नाम ‘‘नत्थि तया सद्धिं उपोसथो वा पवारणा वा सङ्घकम्मं वा’’ति एवं पवत्तो. एत्तावता पन सीसं न एति, ‘‘अस्समणोसी’’तिआदीहि वचनेहि सद्धिं घटितेयेव सीसं ¶ एति. सामीचिप्पटिक्खेपो नाम अभिवादनपच्चुट्ठानअञ्जलिकम्मसामीचिकम्मबीजनिकम्मादीनं अकरणं, तं पटिपातिया वन्दनादीनि करोतो एकस्स अकत्वा सेसानं करणकाले वेदितब्बं. एत्तावता च चोदना नाम होति, आपत्ति पन ¶ सीसं न एति. ‘‘कस्मा मम वन्दनादीनि न करोसी’’ति पुच्छिते पन ‘‘अस्समणोसी’’तिआदिवचनेहि सद्धिं घटितेयेव सीसं एति, तस्मा यो भिक्खु भिक्खुं समीपे ठत्वा ‘‘त्वं मेथुनं धम्मं पटिसेवी’’ति वा ‘‘अस्समणोसी’’ति वा आदीहि वचनेहि हत्थमुद्दाय एव वा एतमत्थं दीपेन्तो सयं वा चोदेति, गहट्ठपब्बजितेसु वा अञ्ञतरेन चोदापेति, अयं अनुद्धंसेति नाम. अप्पेव नाम नं इमम्हा ब्रह्मचरिया चावेय्यन्ति अपि एव नाम नं पुग्गलं इमम्हा सेट्ठचरिया अपनेय्यं. ‘‘साधु वतस्स सचाहं इमं पुग्गलं इमम्हा ब्रह्मचरिया चावेय्य’’न्ति इमिना अधिप्पायेन अनुद्धंसेय्याति वुत्तं होति. एतेन ¶ एकं चावनाधिप्पायं गहेत्वा अवसेसा अक्कोसाधिप्पायो कम्माधिप्पायो वुट्ठानाधिप्पायो उपोसथट्ठपनाधिप्पायो पवारणट्ठपनाधिप्पायो अनुविज्जनाधिप्पायो धम्मकथाधिप्पायोति सत्त अधिप्पाया पटिक्खित्ता होन्ति. ततो अपरेन समयेनाति यस्मिं समये अनुद्धंसितो होति, ततो अञ्ञस्मिं समये. समनुग्गाहीयमानो वाति अनुविज्जकेन किं ते दिट्ठन्तिआदिना नयेन अनुविज्जियमानो उपपरिक्खियमानो. असमनुग्गाहीयमानो वाति दिट्ठादीसु केनचि वत्थुनावा अनुविज्जकादीसु येन केनचि पुग्गलेन वा अवुच्चमानो. इमेसं पन पदानं परतो ‘‘भिक्खु च दोसं पतिट्ठाती’’ति इमिना सम्बन्धो. इदञ्हि वुत्तं होति – एवं समनुग्गाहीयमानो वा असमनुग्गाहीयमानो वा भिक्खु च दोसं पतिट्ठाति पटिच्च तिट्ठति पटिजानाति, सङ्घादिसेसोति. इदञ्च अमूलकभावस्स पाकटकालदस्सनत्थं वुत्तं. आपत्तिं पन अनुद्धंसितक्खणेयेव आपज्जति. अमूलकञ्चेव तं अधिकरणं होतीति एत्थ पन दिट्ठमूलादीनं अभावेन अमूलकं, समथेहि अधिकरणीयभावेन अधिकरणं. यञ्हि अधिकिच्च आरब्भ पटिच्च सन्धाय समथा पवत्तन्ति, तं अधिकरणं. इध पन पाराजिकसङ्खातं आपत्ताधिकरणमेव अधिप्पेतं. यदि हि तं अधिकरणं दिट्ठादीहि मूलेहि अमूलकञ्चेव होति, अयं चोदेतुं आगतो भिक्खु च दोसं पतिट्ठाति पटिच्च तिट्ठति, ‘‘तुच्छकं मया भणित’’न्तिआदीनि (पारा. ३८६) वदन्तो पटिजानाति, तस्स भिक्खुनो अनुद्धंसितक्खणेयेव सङ्घादिसेसोति, अयं सिक्खापदस्स पदानुक्कमेन अत्थो.

राजगहे मेत्तियभूमजके भिक्खू आरब्भ अमूलकेन पाराजिकेन अनुद्धंसनवत्थुस्मिं पञ्ञत्तं, साधारणपञ्ञत्ति, साणत्तिकं, कतूपसम्पदं सुद्धं वा असुद्धं वा पुग्गलं येन पाराजिकेन चोदेति, तं ‘‘अयं अनज्झापन्नो’’ति ञत्वा चावनाधिप्पायेन ‘‘करोतु मे आयस्मा ¶ ओकासं, अहं तं वत्तुकामो’’ति एवं ओकासं अकारेत्वा चोदेन्तस्स सचे सो तङ्खणेयेव जानाति ‘‘मं चोदेती’’ति, वाचाय वाचाय सङ्घादिसेसो चेव दुक्कटञ्च. ओकासं कारेत्वा चोदेन्तस्स सङ्घादिसेसोयेव. हत्थमुद्दाय सम्मुखा चोदेन्तस्सापि एसेव नयो. परम्मुखा चोदेन्तस्स पन सीसं न एति ¶ . अत्तना समीपे ठत्वा अञ्ञं भिक्खुं आणापेति ¶ , सो तस्स वचनेन तं चोदेति, चोदापकस्सेव वुत्तनयेन आपत्तियो. अथ सोपि ‘‘मया दिट्ठं सुतं अत्थी’’ति चोदेति, द्विन्नम्पि जानानं तथेव आपत्तियो. अक्कोसाधिप्पायेन पन ओकासं अकारेत्वा वदन्तस्स वुत्तनयेनेव पाचित्तियञ्चेव दुक्कटञ्च. ओकासं कारेत्वा वदन्तस्स पाचित्तियमेव. कम्माधिप्पायेन असम्मुखा सत्तविधम्पि कम्मं करोन्तस्स दुक्कटमेव. वुट्ठानाधिप्पायेन ‘‘त्वं इत्थन्नामं आपत्तिं आपन्नो, तं पटिकरोही’’ति वदन्तस्स, उपोसथं वा पवारणं वा ठपेन्तस्स च ओकासकम्मं नत्थि, ठपनक्खेत्तं पन जानितब्बं, अनुविज्जकस्सापि ओसटे वत्थुस्मिं ‘‘अत्थेतं तवा’’ति अनुविज्जनाधिप्पायेन वदन्तस्स ओकासकम्मं नत्थि, धम्मकथिकस्सापि ‘‘यो इदञ्च इदञ्च करोति, अयं अस्समणो’’तिआदिना नयेन अनोदिसकं धम्मं कथेन्तस्स ओकासकम्मं नत्थि. सचे पन ओदिस्स नियमेत्वा ‘‘असुको च असुको च अस्समणो अनुपासको’’ति कथेति, आसनतो ओरुय्ह आपत्तिं देसेत्वा गन्तब्बं. उम्मत्तकादीनञ्च अनापत्ति, सीलविपत्ति, यं चोदेति वा चोदापेति वा, तस्स ‘‘उपसम्पन्नो’’ति सङ्ख्युपगमनं, तस्मिं सुद्धसञ्ञिता, येन पाराजिकेन चोदेति, तस्स दिट्ठादिवसेन अमूलकता, चावनाधिप्पायेन सम्मुखाचोदना, तस्स तङ्खणविजाननन्ति इमानेत्थ पञ्च अङ्गानि. समुट्ठानादीनि अदिन्नादानसदिसानि. वेदना पनेत्थ दुक्खायेवाति.

दुट्ठदोससिक्खापदवण्णना निट्ठिता.

९. अञ्ञभागियसिक्खापदवण्णना

नवमे अञ्ञभागियस्सातिआदीसु अञ्ञभागस्स इदं, अञ्ञभागो वा अस्स अत्थीति अञ्ञभागियं. अधिकरणन्ति आधारो वेदितब्बो, वत्थु अधिट्ठानन्ति वुत्तं होति. यो हि सो अट्ठुप्पत्तियं ‘‘दब्बो मल्लपुत्तो नामा’’ति छगलको वुत्तो. सो य्वायं आयस्मतो दब्बस्स मल्लपुत्तस्स भागो कोट्ठासो पक्खो मनुस्सजाति चेव भिक्खुभावो च, ततो अञ्ञस्स भागस्स कोट्ठासस्स पक्खस्स होति तिरच्छानजातिया ¶ चेव छगलकभावस्स च, सो वा अञ्ञभागो अस्स अत्थि, तस्मा अञ्ञभागियसङ्ख्यं लभति. यस्मा च तेसं ‘‘इमं मयं दब्बं ¶ मल्लपुत्तं नाम करोमा’’ति वदन्तानं तस्स नामकरणसञ्ञाय आधारो वत्थु अधिट्ठानं, तस्मा ‘‘अधिकरण’’न्ति वेदितब्बो. तञ्हि सन्धाय ‘‘सच्चं किर तुम्हे, भिक्खवे, दब्बं मल्लपुत्तं अञ्ञभागियस्स अधिकरणस्सा’’तिआदि (पारा. ३९१) वुत्तं. न विवादाधिकरणादीसु अञ्ञतरं, कस्मा? असम्भवतो. न हि मेत्तियभूमजका चतुन्नं अधिकरणानं कस्सचि अञ्ञभागियस्स अधिकरणस्स किञ्चिदेसं लेसमत्तं उप्पादियिंसु, न च चतुन्नं अधिकरणानं लेसो नाम अत्थि. जातिलेसादयो हि पुग्गलानंयेव लेसा वुत्ता, न विवादाधिकरणादीनं. तञ्च ‘‘दब्बो मल्लपुत्तो’’ति नामं तस्स अञ्ञभागियाधिकरणभावे ठितस्स छगलकस्स ¶ कोचि देसो होति थेरं पाराजिकेन धम्मेन अनुद्धंसेतुं लेसमत्तो, एत्थ च दिस्सति अपदिस्सति ‘‘अस्स अय’’न्ति वोहरीयतीति देसो, जातिआदीसु अञ्ञतरकोट्ठासस्सेतं अधिवचनं. अञ्ञम्पि वत्थुं लिस्सति सिलिस्सति वोहारमत्तेनेव ईसकं अल्लीयतीति लेसो, जातिआदीनंयेव अञ्ञतरकोट्ठासस्सेतं अधिवचनं. पदभाजने (पारा. ३९३) पन यस्स अञ्ञभागियस्स अधिकरणस्स किञ्चिदेसं लेसमत्तं उपादाय पाराजिकेन धम्मेन अनुद्धंसेय्य, तं यस्मा अट्ठुप्पत्तिवसेनेव आविभूतं, तस्मा तं अविभजित्वा यानि ‘‘अधिकरण’’न्ति वचनसामञ्ञतो अत्थुद्धारवसेन पवत्तानि चत्तारि अधिकरणानि, तेसं अञ्ञभागियता च तब्भागियता च यस्मा अपाकटा, जानितब्बा च विनयधरेहि, तस्मा तञ्च अवसाने आपत्तञ्ञभागियेन चोदनञ्च आविकातुं ‘‘अञ्ञभागियस्स अधिकरणस्साति आपत्तञ्ञभागियं वा होति अधिकरणञ्ञभागियं वा’’तिआदि वुत्तं, सेसा विनिच्छयकथा अट्ठमे वुत्तसदिसायेव. अयं पन विसेसो – इदं अञ्ञभागियस्स अधिकरणस्स किञ्चिदेसं लेसमत्तं उपादाय पाराजिकेन धम्मेन अनुद्धंसनवत्थुस्मिं पञ्ञत्तं, इध च आपत्तञ्ञभागियचोदनाय तथासञ्ञिनोपि अनापत्ति. अङ्गेसु च अञ्ञभागियस्स अधिकरणस्स किञ्चिदेसं लेसमत्तं उपादियनता अधिकाति.

अञ्ञभागियसिक्खापदवण्णना निट्ठिता.

१०. सङ्घभेदसिक्खापदवण्णना

दसमे ¶ समग्गस्स सङ्घस्साति सहितस्स भिक्खुसङ्घस्स, चित्तेन च सरीरेन च अवियुत्तस्साति अत्थो. तेनेवस्स पदभाजने (पारा. ४१२) ‘‘समग्गो नाम सङ्घो समानसंवासको समानसीमायं ठितो’’ति वुत्तं. समानसंवासको हि समचित्तताय चित्तेन अवियुत्तो होति, समानसीमायं ठितो कायसामग्गिदानतो सरीरेन अवियुत्तो. भेदाय परक्कमेय्याति ¶ ‘‘कथं नामायं भिज्जेय्या’’ति भेदनत्थाय वायामेय्य. भेदनसंवत्तनिकं वा अधिकरणन्ति भेदनस्स सङ्घभेदस्स अत्थाय संवत्तनिकं कारणं. इमस्मिञ्हि ओकासे ‘‘कामहेतु कामनिदानं कामाधिकरण’’न्ति आदीसु (म. नि. १.१६८, १७८) विय कारणं ‘‘अधिकरण’’न्ति अधिप्पेतं. तं भेदकरवत्थुवसेन अट्ठारसविधं. समादायाति गहेत्वा. पग्गय्ह तिट्ठेय्याति तं सङ्घभेदस्स अत्थाय संवत्तनिकं सङ्घभेदनिब्बत्तिसमत्थं कारणं गहेत्वा दीपेय्य चेव नप्पटिनिस्सज्जेय्य च. भिक्खूहि एवमस्स वचनीयोति ये तं पग्गय्ह तिट्ठन्तं सम्मुखा पस्सन्ति, ये वा ‘‘असुकस्मिं नाम विहारे’’ति सुणन्ति, तेहि सब्बन्तिमेन परिच्छेदेन अड्ढयोजनमत्तं गन्त्वापि य्वायं अनन्तरे ‘‘मायस्मा’’तिआदिवचनक्कमो वुत्तो, एवमस्स वचनीयो. दिस्वा वा सुत्वा वा अवदन्तानं दुक्कटं. एत्थ च माइति पदं ¶ ‘‘परक्कमी’’तिपदेन ‘‘अट्ठासी’’तिपदेन च सद्धिं ‘‘मा परक्कमि, मा अट्ठासी’’ति योजेतब्बं. समेतायस्मा सङ्घेनाति आयस्मा सङ्घेन सद्धिं समेतु समागच्छतु, एकलद्धिको होतूति अत्थो. किं कारणा? समग्गो हि सङ्घो…पे… विहरतीति. तत्थ सम्मोदमानोति अञ्ञमञ्ञसम्पत्तिया सुट्ठु मोदमानो. अविवदमानोति ‘‘अयं धम्मो, नायं धम्मो’’ति एवं न विवदमानो. एको उद्देसो अस्साति एकुद्देसो, एकतो पवत्तपातिमोक्खुद्देसोति अत्थो. फासु विहरतीति सुखं विहरति. एवं विसुम्पि सङ्घमज्झेपि तिक्खत्तुं वुच्चमानस्स अप्पटिनिस्सज्जतो दुक्कटं. एवञ्च सोतिआदिम्हि समनुभासितब्बोति समनुभासनकम्मं कातब्बं. इच्चेतं कुसलन्ति इति एतं पटिनिस्सज्जनं कुसलं खेमं सोत्थिभावो तस्स भिक्खुनो. नो चे ¶ पटिनिस्सज्जेय्य, सङ्घादिसेसोति एत्थ समनुभासनकम्मपरियोसाने अप्पटिनिस्सज्जन्तस्स सङ्घादिसेसो. सेसं उत्तानपदत्थमेव.

राजगहे देवदत्तं आरब्भ सङ्घभेदाय परक्कमनवत्थुस्मिं पञ्ञत्तं, साधारणपञ्ञत्ति, अनाणत्तिकं, समनुभासनकम्मे करियमाने अप्पटिनिस्सज्जन्तस्स ञत्तिपरियोसाने दुक्कटं, द्वीहि कम्मवाचाहि द्वे थुल्लच्चया, ‘‘यस्स नक्खमति, सो भासेय्या’’ति एवं य्य-कारपत्ताय ततियकम्मवाचाय तञ्च दुक्कटं ते च थुल्लच्चया पटिप्पस्सम्भन्ति, सङ्घादिसेसोयेव तिट्ठति. असमनुभासियमानस्स च पटिनिस्सज्जन्तस्स च उम्मत्तकादीनञ्च अनापत्ति. सीलविपत्ति, भेदाय परक्कमनं, धम्मकम्मेन समनुभासनं, कम्मवाचापरियोसानं, अप्पटिनिस्सज्जनन्ति इमानेत्थ चत्तारि अङ्गानि. समनुभासनसमुट्ठानं, अकिरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदनन्ति.

सङ्घभेदसिक्खापदवण्णना निट्ठिता.

११. भेदानुवत्तकसिक्खापदवण्णना

एकादसमे ¶ तस्सेव खो पनाति यो सङ्घभेदाय परक्कमति, तस्सेव. अनुवत्तकाति तस्स दिट्ठिं खन्तिं रुचिं गहणेन अनुपटिपज्जनका. वग्गं असामग्गिपक्खियवचनं वदन्तीति वग्गवादका. यस्मा पन तिण्णं उद्धं कम्मारहा न होन्ति. न हि सङ्घो सङ्घस्स कम्मं करोति, तस्मा ‘‘एको वा द्वे वा तयो वा’’ति वुत्तं. जानाति नोति अम्हाकं छन्दादीनि जानाति. भासतीति ‘‘एवं करोमा’’ति अम्हेहि सद्धिं भासति. अम्हाकम्पेतं खमतीति यं सो करोति, एतं अम्हाकम्पि रुच्चति. समेतायस्मन्तानं सङ्घेनाति आयस्मन्तानं चित्तं सङ्घेन सद्धिं समेतु समागच्छतु, एकीभावं गच्छतूति वुत्तं होति. सेसं पदत्थतो उत्तानमेव. विनिच्छयकथापेत्थ दसमे वुत्तसदिसायेव.

अयं पन विसेसो – इदं राजगहे सम्बहुले भिक्खू आरब्भ देवदत्तस्स ¶ सङ्घभेदाय परक्कमन्तस्स अनुवत्तनवत्थुस्मिं पञ्ञत्तं, अङ्गेसु च यथा तत्थ परक्कमनं, एवं इध अनुवत्तनं दट्ठब्बन्ति.

भेदानुवत्तकसिक्खापदवण्णना निट्ठिता.

१२. दुब्बचसिक्खापदवण्णना

द्वादसमे ¶ दुब्बचजातिकोति दुब्बचसभावो, वत्तुं असक्कुणेय्योति अत्थो. उद्देसपरियापन्नेसूति उद्देसे परियापन्नेसु अन्तोगधेसु, ‘‘यस्स सिया आपत्ति, सो आविकरेय्या’’ति एवं सङ्गहितत्ता अन्तो पातिमोक्खस्स वत्तमानेसूति अत्थो. सहधम्मिकं वुच्चमानोति सहधम्मिकेन वुच्चमानो, कारणत्थे चेतं उपयोगवचनं. पञ्चहि सहधम्मिकेहि सिक्खितब्बत्ता, तेसं वा सन्तकत्ता ‘‘सहधम्मिक’’न्ति लद्धनामेन बुद्धपञ्ञत्तेन सिक्खापदेन वुच्चमानोति अत्थो. विरमथायस्मन्तो मम वचनायाति येन वचनेन मं वदथ, ततो मम वचनतो विरमथ, मा मं तं वचनं वदथाति वुत्तं होति. वदतु सह धम्मेनाति सहधम्मिकेन सिक्खापदेन, सहधम्मेन वा अञ्ञेनपि पासादिकभावसंवत्तनिकेन वचनेन वदेतु. यदिदन्ति वुद्धिकारणदस्सनत्थे निपातो, तेन यं इदं अञ्ञमञ्ञस्स हितवचनं, आपत्तितो च वुट्ठापनं, तेन अञ्ञमञ्ञवचनेन अञ्ञमञ्ञवुट्ठापनेन. एवं संवद्धाहि तस्स भगवतो परिसाति एवं परिसाय ¶ वुद्धिकारणं दस्सितं होति. सेसं उत्तानत्थमेव. विनिच्छयकथापि दसमे वुत्तसदिसायेव.

अयं पन विसेसो – इदं कोसम्बियं छन्नत्थेरं आरब्भ अत्तानं अवचनीयकरणवत्थुस्मिं पञ्ञत्तं, अङ्गेसु च यथा तत्थ परक्कमनं, एवं इध अवचनीयकरणता दट्ठब्बाति.

दुब्बचसिक्खापदवण्णना निट्ठिता.

१३. कुलदूसकसिक्खापदवण्णना

तेरसमे गामं वा निगमंवाति एत्थ नगरम्पि गामे अन्तोगधमेव. उपनिस्साय विहरतीतितत्थ पटिबद्धचीवरादिपच्चयताय तं निस्साय वसति. पुप्फदानादीहि मनुस्सानं सद्धं विनासेन्तो कुलानि दूसेतीति कुलदूसको. मालावच्छरोपनादयो पापका समाचारा अस्साति पापसमाचारो. सो भिक्खूति सो कुलदूसको भिक्खु. आयस्मा खो ¶ कुलदूसको…पे… अलं ते इध वासेनाति इमिनास्स पब्बाजनीयकम्मारहतं दस्सेति. पब्बाजनीयकम्मकतो पनेस यस्मिं गामे वा निगमे वा कुलदूसककम्मं कतं, यस्मिञ्च विहारे वसति, नेव तस्मिं गामे वा निगमे वा चरितुं लभति, न विहारे वसितुं. एवञ्च सो भिक्खूतिएत्थ सोति पब्बाजनीयकम्मकतो अधिप्पेतो. छन्देन गच्छन्तीति छन्दगामिनो, एस नयो सेसेसु. सो भिक्खूति सो ‘‘छन्दगामिनो’’तिआदीनि ¶ वदमानो. तस्स वचनस्स पटिनिस्सग्गाय एवं वचनीयो, न कुलदूसननिवारणत्थाय. कुलदूसनकम्मेन हि सो आपज्जितब्बा आपत्तियो पुब्बेव आपन्नो, एवं पनस्स विसुम्पि सङ्घमज्झेपि वुच्चमानस्स अप्पटिनिस्सज्जतो अपरं दुक्कटं. एवञ्च सोतिआदि इतो पुब्बे वुत्तञ्च अवुत्तञ्च सब्बं उत्तानत्थमेव. विनिच्छयकथापि दसमे वुत्तसदिसायेव.

अयं पन विसेसो – इदं सावत्थियं अस्सजिपुनब्बसुके भिक्खू आरब्भ छन्दगामितादीहि पापनवत्थुस्मिं पञ्ञत्तं, अङ्गेसु च यथा तत्थ परक्कमनं, एवं इध छन्दादीहि पापनं दट्ठब्बन्ति.

कुलदूसकसिक्खापदवण्णना निट्ठिता.

निगमनवण्णना

उद्दिट्ठा ¶ खो…पे… एवमेतं धारयामीतिएत्थ पठमं आपत्ति एतेसन्ति पठमापत्तिका, पठमं वीतिक्कमनक्खणेयेव आपज्जितब्बाति अत्थो. इतरे पन यथा ततिये च चतुत्थे च दिवसे होतीति एत्थ ‘‘ततियको, चतुत्थको’’ति वुच्चति, एवं यावततिये समनुभासनकम्मे होन्तीति यावततियकाति वेदितब्बा. यावतीहन्ति यत्तकानि अहानि. जानं पटिच्छादेतीति जानन्तो पटिच्छादेति. तत्थायं पटिच्छादनलक्खणस्स मातिका – आपत्ति च होति, आपत्तिसञ्ञी च, पकतत्तो च होति, पकतत्तसञ्ञी च, अनन्तरायिको च होति, अनन्तरायिकसञ्ञी च, पहु च होति, पहुसञ्ञी च, छादेतुकामो च होति, छादेति चाति. तत्थ आपत्ति च होति, आपत्तिसञ्ञी चाति यं आपत्तिं आपन्नो, सा तेरसन्नं अञ्ञतरा होति, सोपि च तत्थ वत्थुवसेन वा ‘‘इदं भिक्खूनं न वट्टती’’ति ¶ नाममत्तवसेन वा ‘‘अयं इत्थन्नामा आपत्ती’’ति आपत्तिसञ्ञीयेव हुत्वा ‘‘न दानि नं कस्सचि आरोचेस्सामी’’ति एवं छादेतुकामोव धुरं निक्खिपित्वा अरुणं उट्ठापेति, छन्ना होति आपत्ति. सचे पनेत्थ अनापत्तिसञ्ञी वा होति, अञ्ञापत्तिक्खन्धसञ्ञी वा, वेमतिको वा, अच्छन्नाव होति. पकतत्तोति अनुक्खित्तो समानसंवासको. सो चे पकतत्तसञ्ञी हुत्वा वुत्तनयेनेव छादेति, छन्ना होति. अनन्तरायिकोति यस्स दससु राजचोरअग्गिउदकमनुस्सअमनुस्सवाळसरीसपजीवितब्रह्मचरियन्तरायेसु एकोपि नत्थि, सो चे अनन्तरायिकसञ्ञी छादेति, छन्ना होति. पहूति यो सक्कोति भिक्खुनो सन्तिकं गन्तुञ्चेव आरोचेतुञ्च, सो चे पहुसञ्ञी हुत्वा छादेति, छन्ना होति. छादेतुकामो च होति, छादेति चातिइदं उत्तानमेव. सचेपि हि सो सभागं दिस्वा ‘‘अयं मे उपज्झायो वा आचरियो वा’’ति लज्जाय नारोचेति, छन्नाव होति. उपज्झायादिभावो हि इध अप्पमाणं, सभागमत्तमेव पमाणं. अयं ‘‘जानं पटिच्छादेती’’तिपदस्स सङ्खेपतो अत्थविनिच्छयो.

तावतीहन्ति ¶ तत्तकानि अहानि, पटिच्छादितदिवसतो पट्ठाय याव आरोचितदिवसो, ताव दिवसपक्खमाससंवच्छरवसेन यत्तको कालो अतिक्कन्तो, तत्तकं कालन्ति अत्थो. अकामा परिवत्थब्बन्ति न कामेन न वसेन, अथ खो अकामेन अवसेन परिवासं समादाय वत्थब्बं. तत्थ पटिच्छन्नपरिवासो सुद्धन्तपरिवासो समोधानपरिवासो चाति तिविधो परिवासो. तत्थ पटिच्छन्नपरिवासो ताव यथापटिच्छन्नाय आपत्तिया दातब्बो. कस्सचि हि एकाहप्पटिच्छन्ना आपत्ति होति, कस्सचि द्वीहादिप्पटिच्छन्ना. कस्सचि एका आपत्ति होति, कस्सचि ¶ द्वे वा तिस्सो वा तदुत्तरि वा. तस्मा पटिच्छन्नपरिवासं देन्तेन पठममेव वुत्तनयेन पटिच्छन्नभावं ञत्वा ततो पटिच्छन्नदिवसे च आपत्तियो च सल्लक्खेत्वा सचे एका एकाहप्पटिच्छन्ना होति, ‘‘अहं, भन्ते, एकं आपत्तिं आपज्जिं सञ्चेतनिकं सुक्कविस्सट्ठिं एकाहप्पटिच्छन्न’’न्ति एवं परिवासं याचापेत्वा खन्धके (चूळव. ९८) आगतनयेन कम्मवाचं वत्वा परिवासो दातब्बो. अथ द्वीहतीहादिप्पटिच्छन्ना होति ¶ , द्वीहप्पटिच्छन्नं तीहप्पटिच्छन्नं चतूहप्पटिच्छन्नं पञ्चाहप्पटिच्छन्नं…पे… चुद्दसाहप्पटिच्छन्नन्तिएवं याव चुद्दसदिवसानि दिवसवसेन योजना कातब्बा, पञ्चदसदिवसप्पटिच्छन्नायं ‘‘पक्खप्पटिच्छन्न’’न्ति योजना कातब्बा. ततो याव एकूनतिंसतिमो दिवसो, ताव ‘‘अतिरेकपक्खप्पटिच्छन्न’’न्ति, ततो मासप्पटिच्छन्नं अतिरेकमासप्पटिच्छन्नं द्वेमासप्पटिच्छन्नं अतिरेकद्वेमासप्पटिच्छन्नं तेमासप्पटिच्छन्नं…पे… अतिरेकएकादसमासप्पटिच्छन्नन्ति एवं योजना कातब्बा. संवच्छरे पुण्णे ‘‘एकसंवच्छरप्पटिच्छन्न’’न्ति, ततो परं अतिरेकसंवच्छरं द्वेसंवच्छरं एवं याव सट्ठिसंवच्छरअतिरेकसट्ठिसंवच्छरप्पटिच्छन्नन्ति, ततो वा भिय्योपि वत्वा योजना कातब्बा.

सचे पन द्वे तिस्सो तदुत्तरि वा आपत्तियो होन्ति, यथा ‘‘एकं आपत्ति’’न्ति वुत्तं, एवं ‘‘द्वे आपत्तियो, तिस्सो आपत्तियो’’ति वत्तब्बं. ततो परं पन सतं वा होतु, सहस्सं वा, ‘‘सम्बहुला’’ति वत्तुं वट्टति. नानावत्थुकासुपि ‘‘अहं, भन्ते, सम्बहुला सङ्घादिसेसा आपत्तियो आपज्जिं एकं सुक्कविस्सट्ठिं एकं कायसंसग्गं एकं दुट्ठुल्लवाचं एकं अत्तकामं एकं सञ्चरित्तं एकाहप्पटिच्छन्नायो’’ति एवं गणनवसेन वा, ‘‘अहं, भन्ते, सम्बहुला सङ्घादिसेसा आपत्तियो आपज्जिं नानावत्थुकायो एकाहप्पटिच्छन्नायो’’ति एवं वत्थुकित्तनवसेन वा, ‘‘अहं, भन्ते, सम्बहुला सङ्घादिसेसा आपत्तियो आपज्जिं एकाहप्पटिच्छन्नायो’’ति एवं नाममत्तवसेन वा योजना कातब्बा. तत्थ नामं दुविधं सजातिसाधारणं सब्बसाधारणञ्च, तत्थ सङ्घादिसेसोति सजातिसाधारणं, आपत्तीति सब्बसाधारणं, तस्मा ‘‘सम्बहुला आपत्तियो आपज्जिं एकाहप्पटिच्छन्नायो’’ति एवं सब्बसाधारणनामवसेनापि ¶ वत्तुं वट्टति. इदञ्हि परिवासादिविनयकम्मं वत्थुवसेन गोत्तवसेन नामवसेन आपत्तिवसेन च कातुं वट्टतियेव. तत्थ सुक्कविस्सट्ठीति वत्थु चेव गोत्तञ्च, सङ्घादिसेसोति नामञ्चेव आपत्ति च, तत्थ ‘‘सुक्कविस्सट्ठिं कायसंसग्ग’’न्तिआदिवचनेनापि ‘‘नानावत्थुकायो’’तिवचनेनापि वत्थु चेव गोत्तञ्च गहितं होति, ‘‘सङ्घादिसेसो’’तिवचनेनापि ‘‘आपत्तियो’’तिवचनेनापि नामञ्चेव आपत्ति च गहिता होति, तस्मा एतेसु यस्स कस्सचि वसेन कम्मवाचा कातब्बा.

कम्मवाचापरियोसाने ¶ ¶ च सचे अप्पभिक्खुको आवासो होति, सक्का रत्तिच्छेदं अनापज्जन्तेन वसितुं, तत्थेव ‘‘परिवासं समादियामि, वत्तं समादियामी’’ति तिक्खत्तुं वत्तं समादातब्बं, समादियित्वा तत्थेव सङ्घस्स आरोचेत्वा पुन आगतागतानं भिक्खूनं आरोचेन्तेन वत्तभेदञ्च रत्तिच्छेदञ्च अकत्वा परिवसितब्बं. सचे न सक्का होति परिवासं सोधेतुं, निक्खित्तवत्तेन वसितुकामो होति, तत्थेव सङ्घमज्झे, एकपुग्गलस्स वा सन्तिके ‘‘परिवासं निक्खिपामि, वत्तं निक्खिपामी’’ति परिवासो निक्खिपितब्बो, एकपदेनापि चेत्थ निक्खित्तो होति परिवासो, द्वीहि पन सुनिक्खित्तोयेव, समादानेपि एसेव नयो. निक्खित्तकालतो पट्ठाय पकतत्तट्ठाने तिट्ठति, अथानेन पच्चूससमये एकेन भिक्खुना सद्धिं परिक्खित्तस्स विहारस्स परिक्खेपतो, अपरिक्खित्तस्स परिक्खेपारहट्ठानतो द्वे लेड्डुपाते अतिक्कमित्वा महामग्गतो ओक्कम्म गुम्बेन वा वतिया वा पटिच्छन्नट्ठाने निसीदित्वा अन्तोअरुणेयेव वत्तं समादियित्वा आरोचेतब्बं. यम्पि अञ्ञं भिक्खुं पस्सति, तस्सापि आरोचेतब्बमेव. अरुणे उट्ठिते तस्स सन्तिके वत्तं निक्खिपित्वा विहारं गन्तब्बं. सचे सो पुरे अरुणेयेव केनचि करणीयेन गतो, विहारं गन्त्वा यं सब्बपठमं भिक्खुं पस्सति, तस्स आरोचेत्वा निक्खिपितब्बं. एवं सल्लक्खेत्वा याव रत्तियो पूरेन्ति, ताव परिवत्थब्बं, अयं सङ्खेपतो पटिच्छन्नपरिवासविनिच्छयो, वित्थारो पन समन्तपासादिकाय विनयसंवण्णनाय (चूळव. अट्ठ. ९७) वुत्तनयेनेव वेदितब्बो.

इतरेसु पन द्वीसु ‘‘आपत्तिपरियन्तं न जानाति, रत्तिपरियन्तं न जानाती’’ति (चूळव. १५७) इमस्मिं वत्थुस्मिं खन्धके अनुञ्ञातो सुद्धन्तपरिवासो नाम, सो दुविधो चूळसुद्धन्तो महासुद्धन्तोति, दुविधोपि चेस रत्तिपरिच्छेदं सकलं वा एकच्चं वा अजानन्तस्स च अस्सरन्तस्स च तत्थ वेमतिकस्स च दातब्बो. आपत्तिपरियन्तं पन ‘‘एत्तिका अहं आपत्तियो आपन्नो’’ति जानातु वा, मा वा, अकारणमेतं. तस्स दानविधि खन्धके आगतो, विनिच्छयकथा पन वित्थारतो समन्तपासादिकायं (चूळव. अट्ठ. १०२) वुत्ता. इतरो पन समोधानपरिवासो नाम, सो तिविधो होति ओधानसमोधानो ¶ अग्घसमोधानो मिस्सकसमोधानोति. तत्थ ओधानसमोधानो नाम अन्तरापत्तिं आपज्जित्वा पटिच्छादेन्तस्स परिवुत्थदिवसे ओधुनित्वा ¶ मक्खेत्वा पुरिमाय आपत्तिया मूलदिवसपरिच्छेदे पच्छा आपन्नं आपत्तिं समोदहित्वा दातब्बपरिवासो वुच्चति. अग्घसमोधानो नाम सम्बहुलासु आपत्तीसु या एका वा द्वे वा तिस्सो वा सम्बहुला वा आपत्तियो सब्बचिरप्पटिच्छन्नायो, तासं अग्घेन समोधाय तासं रत्तिपरिच्छेदवसेन अवसेसानं ऊनतरप्पटिच्छन्नानं आपत्तीनं दातब्बपरिवासो वुच्चति. मिस्सकसमोधानो नाम नानावत्थुकायो आपत्तियो एकतो कत्वा दातब्बपरिवासो ¶ वुच्चति, अयं तिविधेपि समोधानपरिवासे सङ्खेपकथा, वित्थारो पन समन्तपासादिकायं (चूळव. अट्ठ. १०२) वुत्तो, इदं ‘‘परिवत्थब्ब’’न्ति पदस्स विनिच्छयकथामुखं.

उत्तरि छारत्तन्ति परिवासतो उत्तरि छ रत्तियो. भिक्खुमानत्तायाति भिक्खूनं मानभावाय, आराधनत्थायाति वुत्तं होति. पटिपज्जितब्बन्ति वत्तितब्बं. भिक्खुमानत्तञ्च पनेतं पटिच्छन्नापटिच्छन्नवसेन दुविधं. तत्थ यस्स अप्पटिच्छन्नापत्ति होति, तस्स परिवासं अदत्वा मानत्तमेव दातब्बं, इदं अप्पटिच्छन्नमानत्तं. यस्स पटिच्छन्ना होति, तस्स परिवासपरियोसाने दातब्बं मानत्तं पटिच्छन्नमानत्तन्ति वुच्चति, इदं इध अधिप्पेतं. उभिन्नम्पि पनेतेसं दानविधि विनिच्छयकथा च समन्तपासादिकायं (चूळव. अट्ठ. १०२) वुत्तनयेन वेदितब्बा, अयं पनेत्थ सङ्खेपो. सचे अयं वत्तं निक्खिपित्वा पच्चूससमये समादातुं गच्छति, सब्बन्तिमेन परिच्छेदेन चतूहि भिक्खूहि सद्धिं परिवासे वुत्तप्पकारं पदेसं गन्त्वा ‘‘मानत्तं समादियामि, वत्तं समादियामी’’ति समादियित्वा नेसं आरोचेत्वा ततो तेसु गतेसु वा अगतेसु वा पुरिमनयेन पटिपज्जितब्बं. यत्थ सिया वीसतिगणोति एत्थ वीसतिसङ्घो गणो अस्साति वीसतिगणो. तत्राति यत्र सब्बन्तिमेन परिच्छेदेन वीसतिगणो भिक्खुसङ्घो अत्थि, तत्थ. अब्भेतब्बोति अभिएतब्बो, सम्पटिच्छितब्बो, अब्भानकम्मवसेन ओसारेतब्बोति वुत्तं होति. अव्हातब्बोति वा अत्थो. अब्भानकम्मं पन पाळिवसेन खन्धके (चूळव. १०० आदयो) विनिच्छयवसेन समन्तपासादिकायं वुत्तं. अनब्भितोति न अब्भितो असम्पटिच्छितो, अकतब्भानकम्मोति वुत्तं होति. अनव्हातोति वा अत्थो. ते च भिक्खू गारय्हाति ये ऊनभावं ञत्वा ¶ अब्भेन्ति, ते भिक्खू च गरहितब्बा, सातिसारा सदोसा दुक्कटं आपज्जन्तीति अत्थो. अयं तत्थ सामीचीति अयं तत्थ अनुधम्मता लोकुत्तरधम्मं अनुगता ओवादानुसासनी सामीचि धम्मता. सेसमेत्थ वुत्तनयमेवाति.

कङ्खावितरणिया पातिमोक्खवण्णनाय

सङ्घादिसेसवण्णना निट्ठिता.

अनियतकण्डो

१. पठमानियतसिक्खापदवण्णना

अनियतुद्देसे ¶ ¶ ¶ इमे खो पनातिआदि वुत्तनयमेव. मातुगामेनाति तदहुजातायपि जीवमानकमनुस्सित्थिया. एको एकायाति एको भिक्खु मातुगामसङ्खाताय एकाय इत्थिया सद्धिं. रहोति चक्खुस्स रहो. किञ्चापि पाळियं (पारा. ४४५) सोतस्स रहो आगतो, चक्खुस्सेव पन रहो ‘‘रहो’’ति इध अधिप्पेतो. सचेपि हि पिहितकवाटस्स गब्भस्स द्वारे निसिन्नो विञ्ञू पुरिसो होति, नेव अनापत्तिं करोति. यत्थ पन सक्का दट्ठुं, तादिसे अन्तोद्वादसहत्थेपि ओकासे निसिन्नो सचक्खुको विक्खित्तचित्तोपि निद्दायन्तोपि अनापत्तिं करोति, समीपे ठितोपि अन्धो न करोति, चक्खुमापि निपज्जित्वा निद्दायन्तोपि न करोति, इत्थीनं पन सतम्पि न करोतियेव, तेन वुत्तं ‘‘रहोति चक्खुस्स रहो’’ति. पटिच्छन्ने आसनेति कुट्टादीहि पटिच्छन्नोकासे. अलंकम्मनियेति कम्मक्खमं कम्मयोग्गन्ति कम्मनियं, अलं परियत्तं कम्मनियभावायाति अलंकम्मनियं, तस्मिं अलंकम्मनिये. यत्थ अज्झाचारं करोन्ता सक्कोन्ति तं कम्मं कातुं, तादिसेति अत्थो. निसज्जं कप्पेय्याति निसज्जं करेय्य, निसीदेय्याति अत्थो. एत्थ च सयनम्पि निसज्जाय एव सङ्गहितं. सद्धेय्यवचसाति सद्धातब्बवचना, अरियसाविकाति अत्थो. निसज्जं भिक्खु पटिजानमानोति किञ्चापि एवरूपा उपासिका दिस्वा वदति, अथ खो भिक्खु निसज्जं पटिजानमानोव तिण्णं धम्मानं अञ्ञतरेन कारेतब्बो, न अप्पटिजानमानोति अत्थो. येन वा साति निसज्जादीसु आकारेसु येन वा आकारेन सद्धिं मेथुनादीनि आरोपेत्वा सा उपासिका वदेय्य, पटिजानमानोव तेन सो भिक्खु कारेतब्बो, एवरूपायपि हि उपासिकाय वचनमत्तेन आकारेन न कारेतब्बोति अत्थो. कस्मा? यस्मा दिट्ठं नाम तथापि होति, अञ्ञथापीति. अयं धम्मो अनियतोति तिण्णं आपत्तीनं यं आपत्तिं वा वत्थुं वा पटिजानाति, तस्स वसेन कारेतब्बताय अनियतो.

सावत्थियं ¶ ¶ उदायित्थेरं आरब्भ मातुगामेन सद्धिं वुत्तप्पकारे आसने निसज्जकप्पनवत्थुस्मिं पञ्ञत्तं, असाधारणपञ्ञत्ति, अनाणत्तिकं, मेथुनधम्मसन्निस्सितकिलेससङ्खातेन रहस्सादेन मातुगामस्स सन्तिकं गन्तुकामताय अक्खिअञ्जनादितो पट्ठाय सब्बपयोगेसु दुक्कटं. गन्त्वा तस्मिं वा निसिन्ने इत्थी निसीदतु, तस्सा वा निसिन्नाय सो निसीदतु, अपच्छा अपुरिमंयेव उभो वा निसीदन्तु, उभिन्नं निसज्जाय पाचित्तियं. सचे पन कायसंसग्गं वा मेथुनं वा समापज्जति, तेसं वसेन कारेतब्बो. निपज्जनेपि एसेव नयो. वुत्तप्पकारे पुरिसे निपज्जित्वा अनिद्दायन्ते अनन्धे विञ्ञुपुरिसे उपचारगते सति, ठितस्स, अरहोपेक्खस्स, अञ्ञविहितस्स च निसज्जनपच्चया अनापत्ति. उम्मत्तकादीनं पन तीहिपि आपत्तीहि अनापत्ति. सिया सीलविपत्ति, सिया आचारविपत्ति. यं पन ¶ आपत्तिं पटिजानाति, तस्सा वसेन अङ्गभेदो ञातब्बो. समुट्ठानादीनि पठमपाराजिकसदिसानेवाति.

पठमानियतसिक्खापदवण्णना निट्ठिता.

२. दुतियानियतसिक्खापदवण्णना

दुतिये इत्थीपि पुरिसोपि यो कोचि विञ्ञू अनन्धो अबधिरो अन्तोद्वादसहत्थे ओकासे ठितो वा निसिन्नो वा विक्खित्तोपि निद्दायन्तोपि अनापत्तिं करोति. बधिरो पन चक्खुमापि, अन्धो वा अबधिरोपि न करोति. पाराजिकापत्तिञ्च परिहापेत्वा दुट्ठुल्लवाचापत्ति वुत्ताति अयं विसेसो. सेसं पुरिमनयेनेव वेदितब्बं. समुट्ठानादीनि पनेत्थ अदिन्नादानसदिसानेवाति.

दुतियानियतसिक्खापदवण्णना निट्ठिता.

उद्दिट्ठा खोतिआदि सब्बत्थ वुत्तनयेनेव वेदितब्बं.

कङ्खावितरणिया पातिमोक्खवण्णनाय

अनियतवण्णना निट्ठिता.

निस्सग्गियकण्डो

इतो परं पन इमे खो पनातिआदि सब्बत्थ वुत्तनयेनेव वेदितब्बं.

१. चीवरवग्गो

१. कथिनसिक्खापदवण्णना

निस्सग्गियेसु ¶ ¶ पन चीवरवग्गस्स ताव पठमसिक्खापदे निट्ठितचीवरस्मिन्ति सूचिकम्मपरियोसानेन वा, ‘‘नट्ठं वा विनट्ठं वा दड्ढं वा चीवरासा वा उपच्छिन्ना’’ति (पारा. ४६३) इमेसु वा येन केनचि आकारेन निट्ठिते चीवरस्मिं, चीवरस्स करणपलिबोधे उपच्छिन्नेति अत्थो. अत्थतकथिनस्स हि भिक्खुनो याव इमेहाकारेहि चीवरपलिबोधो न छिज्जति, ताव कथिनानिसंसं लभति. उब्भतस्मिं कथिनेति यं सङ्घस्स कथिनं अत्थतं, तस्मिञ्च उब्भते. तत्रेवं सङ्खेपतो कथिनत्थारो च उब्भारो च वेदितब्बो. अयञ्हि कथिनत्थारो नाम भगवता पुरिमवस्संवुट्ठानं अनुञ्ञातो, सो सब्बन्तिमेन परिच्छेदेन पञ्चन्नं जनानं वट्टति, तस्मा यत्थ चत्तारो वा तयो वा द्वे वा एको वा पुरिमवस्सं उपगतो, तत्थ पच्छिमवस्सूपगते गणपूरके कत्वा अत्थरितब्बं, ते च गणपूरकाव होन्ति, आनिसंसे न लभन्ति, तस्मा सचे पुरिमवस्संवुट्ठानं गहट्ठपब्बजितेसु यो कोचि धम्मेन समेन चीवरं देति ‘‘इमिना कथिनं अत्थरथा’’ति (महाव. ३०६-३०९), तं खन्धके वुत्ताय ञत्तिदुतियकम्मवाचाय कथिनत्थारारहस्स भिक्खुनो दातब्बं. तेन तदहेव पञ्च वा अतिरेकानि वा खण्डानि छिन्दित्वा सङ्घाटि वा उत्तरासङ्गो वा अन्तरवासको वा कातब्बो, सेसभिक्खूहिपि तस्स सहायेहि भवितब्बं, सचे कतचीवरमेव उप्पज्जति, सुन्दरमेव. अच्छिन्नासिब्बितं पन न वट्टति. तेन भिक्खुना सचे सङ्घाटिया अत्थरितुकामो होति, पोराणिकं ¶ सङ्घाटिं पच्चुद्धरित्वा ¶ नवं सङ्घाटिं अधिट्ठहित्वा ‘‘इमाय सङ्घाटिया कथिनं अत्थरामी’’ति अत्थरितब्बं. उत्तरासङ्गअन्तरवासकेसुपि एसेव नयो. ततो तेन पुरिमवस्संवुट्ठे अन्तोसीमागते भिक्खू उपसङ्कमित्वा ‘‘अत्थतं, भन्ते, सङ्घस्स कथिनं, धम्मिको कथिनत्थारो, अनुमोदथा’’ति (परि. ४१३) वत्तब्बं, थेरानञ्च नवानञ्च बहूनञ्च एकस्स च अनुरूपं सल्लक्खेत्वा ¶ वत्तब्बं. तेहिपि ‘‘अत्थतं, भन्ते, सङ्घस्स कथिन’’न्ति वा ‘‘अत्थतं, आवुसो, सङ्घस्स कथिन’’न्ति वा वत्वा ‘‘धम्मिको कथिनत्थारो, अनुमोदामा’’ति वा ‘‘अनुमोदामी’’ति वा वत्तब्बं. पुरिमवस्संवुट्ठेसुपि ये अनुमोदन्ति, तेसंयेव अत्थतं होति कथिनं. ते ततो पट्ठाय याव कथिनस्सुब्भारा अनामन्तचारो, असमादानचारो, यावदत्थचीवरं, गणभोजनं, यो च तत्थ चीवरुप्पादो, तस्मिं आवासे सङ्घस्स उप्पन्नचीवरञ्चाति इमे पञ्चानिसंसे लभन्ति, अयं ताव कथिनत्थारो. तं पनेतं कथिनं ‘‘अट्ठिमा, भिक्खवे, मातिका कथिनस्सुब्भाराय पक्कमनन्तिका निट्ठानन्तिका सन्निट्ठानन्तिका नासनन्तिका सवनन्तिका आसावच्छेदिका सीमातिक्कमनन्तिका सहुब्भारा’’ति (महाव. ३१०) एवं वुत्तासु अट्ठसु मातिकासु अञ्ञतरवसेन उद्धरीयति, तत्थ वित्थारविनिच्छयो समन्तपासादिकायं (महाव. अट्ठ. ३१०) वुत्तनयेन वेदितब्बो. इति ‘‘उब्भतस्मिं कथिने’’तिइमिना सेसपलिबोधाभावं दस्सेति.

दसाहपरमन्ति दस अहानि परमो परिच्छेदो अस्साति दसाहपरमो, तं दसाहपरमं कालं धारेतब्बन्ति अत्थो. अधिट्ठितविकप्पितेसु अपरियापन्नत्ता अतिरेकं चीवरन्ति अतिरेकचीवरं, चीवरं नाम खोमं कप्पासिकं कोसेय्यं कम्बलं साणं भङ्गन्ति एतेसं वा तदनुलोमानं वा अञ्ञतरं अयमस्स जाति, पमाणतो पन तं विकप्पनुपगं पच्छिमं इध अधिप्पेतं. वुत्तञ्हेतं ‘‘अनुजानामि, भिक्खवे, आयामतो अट्ठङ्गुलं सुगतङ्गुलेन चतुरङ्गुलवित्थतं पच्छिमं चीवरं विकप्पेतु’’न्ति (महाव. ३५८). यं पन वुत्तं ‘‘अधिट्ठितविकप्पितेसु अपरियापन्नत्ता’’ति, एत्थ ‘‘अनुजानामि, भिक्खवे, तिचीवरं अधिट्ठातुं न विकप्पेतुं, वस्सिकसाटिकं वस्सानं चतुमासं अधिट्ठातुं ततो परं विकप्पेतुं, निसीदनं अधिट्ठातुं न विकप्पेतुं पच्चत्थरणं अधिट्ठातुं न विकप्पेतुं, कण्डुप्पटिच्छादिं याव आबाधा अधिट्ठातुं ततो परं विकप्पेतुं, मुखपुञ्छनचोळकं अधिट्ठातुं न विकप्पेतुं, परिक्खारचोळं अधिट्ठातुं न विकप्पेतु’’न्ति (महाव. ३५८) इमिना नयेन अधिट्ठातब्बविकप्पेतब्बता जानितब्बा. तत्थ तिचीवरं अधिट्ठहन्तेन रजित्वा कप्पबिन्दुं दत्वा पमाणयुत्तमेव अधिट्ठातब्बं, तस्स पमाणं उक्कट्ठपरिच्छेदेन सुगतचीवरतो ऊनकं वट्टति, लामकपरिच्छेदेन सङ्घाटिया ¶ ताव उत्तरासङ्गस्स ¶ च दीघतो मुट्ठिपञ्चकं, तिरियं मुट्ठित्तिकं, अन्तरवासको दीघतो मुट्ठिपञ्चको ¶ , तिरियं द्विहत्थोपि वट्टति. वुत्तप्पमाणतो पन अतिरेकञ्च ऊनकञ्च ‘‘परिक्खारचोळ’’न्ति अधिट्ठातब्बं. तत्थ यस्मा ‘‘द्वे चीवरस्स अधिट्ठानानि कायेन वा अधिट्ठेति, वाचाय वा अधिट्ठेती’’ति वुत्तं, तस्मा पुराणसङ्घाटिं ‘‘इमं सङ्घाटिं पच्चुद्धरामी’’ति पच्चुद्धरित्वा नवं हत्थेन गहेत्वा ‘‘इमं सङ्घाटिं अधिट्ठामी’’ति चित्तेन आभोगं कत्वा कायविकारं करोन्तेन कायेन वा अधिट्ठातब्बा, वचीभेदं कत्वा वाचाय वा अधिट्ठातब्बा. तत्र दुविधं अधिट्ठानं – सचे हत्थपासे होति, ‘‘इमं सङ्घाटिं अधिट्ठामी’’ति वाचा भिन्दितब्बा. अथ अन्तोगब्भादीसु सामन्तविहारे वा होति, ठपितट्ठानं सल्लक्खेत्वा ‘‘एतं सङ्घाटिं अधिट्ठामी’’ति वाचा भिन्दितब्बा. एस नयो उत्तरासङ्गे च अन्तरवासके च. नाममत्तमेव हि विसेसो. तस्मा सब्बानि सङ्घाटिं उत्तरासङ्गं अन्तरवासकन्ति एवं अत्तनो अत्तनो नामेनेव अधिट्ठातब्बानि. सचे अधिट्ठहित्वा ठपितवत्थेहि सङ्घाटिआदीनि करोति, निट्ठिते रजने च कप्पे च ‘‘इमं पच्चुद्धरामी’’ति पच्चुद्धरित्वा पुन अधिट्ठातब्बानि. इदञ्च पन तिचीवरं सुखपरिभोगत्थं परिक्खारचोळं अधिट्ठातुम्पि वट्टति.

वस्सिकसाटिका अनतिरित्तपमाणा नामं गहेत्वा वुत्तनयेनेव चत्तारो वस्सिके मासे अधिट्ठातब्बा, ततो परं पच्चुद्धरित्वा विकप्पेतब्बा, वण्णभेदमत्तरत्तापि चेसा वट्टति, द्वे पन न वट्टन्ति. निसीदनं वुत्तनयेन अधिट्ठातब्बमेव, तञ्च खो पमाणयुत्तं एकमेव, द्वे न वट्टन्ति. पच्चत्थरणम्पि अधिट्ठातब्बमेव, तं पन महन्तम्पि एकम्पि बहूनिपि वट्टन्ति, नीलम्पि पीतकम्पि सदसम्पि पुप्फदसम्पीति सब्बप्पकारम्पि वट्टति. कण्डुप्पटिच्छादि याव आबाधो अत्थि, ताव पमाणिका अधिट्ठातब्बा, आबाधे वूपसन्ते पच्चुद्धरित्वा विकप्पेतब्बा, सा एकाव वट्टति. मुखपुञ्छनचोळं अधिट्ठातब्बमेव, तं पन एकम्पि बहूनिपि महन्तम्पि वट्टतियेव. परिक्खारचोळे गणना नत्थि, यत्तकं इच्छति, तत्तकं अधिट्ठातब्बमेव. थविकापि परिस्सावनम्पि विकप्पनुपगं पच्छिमपमाणं ‘‘परिक्खारचोळ’’न्ति अधिट्ठातब्बमेव, बहूनिपि एकतो कत्वा ‘‘इमानि चीवरानि परिक्खारचोळानि अधिट्ठामी’’तिआदिना नयेन अधिट्ठातुं वट्टतियेव. मञ्चभिसि पीठभिसि बिब्बोहनं ¶ पावारो कोजवोति एतेसु पन सेनासनपरिक्खारत्थाय दिन्नपच्चत्थरणे च अधिट्ठानकिच्चं नत्थियेव. सब्बञ्च पनेतं वुत्तप्पकारेन अधिट्ठितचीवरं अञ्ञस्स दानेन, अच्छिन्दित्वा गहणेन, विस्सासग्गाहेन, हीनायावत्तनेन, सिक्खापच्चक्खानेन, कालङ्किरियाय, लिङ्गपरिवत्तनेन, पच्चुद्धरणेनाति इमेहि अट्ठहि कारणेहि अधिट्ठानं विजहति. तिचीवरं पन कनिट्ठङ्गुलिनखपिट्ठिप्पमाणेन छिद्देनापि विजहति, तञ्च ¶ खो विनिब्बेधेनेव. सचे हि छिद्दस्स अब्भन्तरे एकतन्तुपि अच्छिन्नो होति, रक्खतियेव. तत्थ सङ्घाटिया च उत्तरासङ्गस्स च दीघन्ततो विदत्थिप्पमाणस्स तिरियन्ततो ¶ अट्ठङ्गुलप्पमाणस्स पदेसस्स ओरतो छिद्दं अधिट्ठानं भिन्दति, अन्तरवासकेपि दीघन्ततो एतदेव पमाणं, तिरियन्तेन पन चतुरङ्गुलता वेदितब्बा. तिण्णन्नम्पि वुत्तोकासस्स परतो न भिन्दति, तस्मा छिद्दे जाते तिचीवरं अतिरेकचीवरट्ठाने तिट्ठति, सूचिकम्मं कत्वा पुन अधिट्ठातब्बं. वस्सिकसाटिका वस्सानमासातिक्कमेनापि, कण्डुप्पटिच्छादि आबाधवूपसमेनापि अधिट्ठानं विजहति. तस्मा सा ततो परं विकप्पेतब्बा. विकप्पनलक्खणं पन सब्बचीवरानं विकप्पनसिक्खापदेयेव वण्णयिस्साम. केवलञ्हि इमस्मिं ओकासे यं एवं अनधिट्ठितं अविकप्पितञ्च, तं ‘‘अतिरेकचीवर’’न्ति वेदितब्बं.

तं अतिक्कामयतो निस्सग्गियं पाचित्तियन्ति तं यथावुत्तजातिप्पमाणं चीवरंदसाहपरमं कालं अतिक्कामयतो एत्थन्तरे यथा अतिरेकचीवरं न होति, तथा अक्रुब्बतो निस्सग्गियं पाचित्तियं, तञ्च चीवरं निस्सग्गियं होति, पाचित्तियं आपत्ति चस्स होतीति अत्थो. अथ वा निस्सज्जनं निस्सग्गियं, पुब्बभागे कत्तब्बस्स विनयकम्मस्सेतं नामं, निस्सग्गियमस्स अत्थीति निस्सग्गियमिच्चेव. किं तं? पाचित्तियं. तं अतिक्कामयतो सह निस्सग्गियेन निस्सग्गियविनयकम्मं पाचित्तियं होतीति अयमेत्थ अत्थो. तञ्च पनेतं चीवरं यं दिवसं उप्पन्नं, तस्स यो अरुणो, सो उप्पन्नदिवसनिस्सितो, तस्मा चीवरुप्पाददिवसेन सद्धिं एकादसे अरुणुग्गमने दसाहातिक्कमितं होति, तं गहेत्वा सङ्घस्स वा गणस्स वा पुग्गलस्स वा निस्सज्जितब्बं, तत्रायं नयो – सङ्घस्स ताव एवं निस्सज्जितब्बं ‘‘इदं मे, भन्ते, चीवरं दसहातिक्कन्तं निस्सग्गियं, इमाहं सङ्घस्स निस्सज्जामी’’ति निस्सज्जित्वा ‘‘अहं, भन्ते, एकं निस्सग्गियं पाचित्तियं आपन्नो, तं ¶ पटिदेसेमी’’ति एवं आपत्ति देसेतब्बा. सचे द्वे होन्ति, ‘‘द्वे’’ति वत्तब्बं, सचे तदुत्तरि, ‘‘सम्बहुला’’ति वत्तब्बं. निस्सज्जनेपि सचे द्वे वा बहूनि वा होन्ति, ‘‘इमानि मे, भन्ते, चीवरानि दसाहातिक्कन्तानि निस्सग्गियानि, इमानाहं सङ्घस्स निस्सज्जामी’’ति वत्तब्बं, पाळिं वत्तुं असक्कोन्तेन अञ्ञथापि वत्तब्बं. ब्यत्तेन भिक्खुना पटिबलेन सङ्घो ञापेतब्बो ‘‘सुणातु मे, भन्ते, सङ्घो, अयं इत्थन्नामो भिक्खु आपत्तिं सरति विवरति उत्तानिं करोति देसेति, यदि सङ्घस्स पत्तकल्लं, अहं इत्थन्नामस्स भिक्खुनो आपत्तिं पटिग्गण्हेय्य’’न्ति (चूळव. २३९), इमिना लक्खणेन आपत्तिं पटिग्गण्हित्वा वत्तब्बो ‘‘पस्ससी’’ति, ‘‘आम पस्सामी’’ति, ‘‘आयतिं संवरेय्यासी’’ति, ‘‘साधु सुट्ठु संवरिस्सामी’’ति. द्वीसु पन सम्बहुलासु वा पुरिमनयेनेव वचनभेदो कातब्बो. देसिताय ¶ आपत्तिया ‘‘सुणातु मे, भन्ते, सङ्घो, इदं चीवरं इत्थन्नामस्स भिक्खुनो निस्सग्गियं सङ्घस्स निस्सट्ठं, यदि सङ्घस्स पत्तकल्लं ¶ , सङ्घो इमं चीवरं इत्थन्नामस्स भिक्खुनो ददेय्या’’ति (पारा. ४६४) एवं निस्सट्ठचीवरं दातब्बं, द्वीसु बहूसु वा वचनभेदो कातब्बो.

गणस्स पन निस्सज्जन्तेन ‘‘इमाह’’न्ति वा ‘‘इमानि अह’’न्ति वा वत्वा ‘‘आयस्मन्तानं निस्सज्जामी’’ति वत्तब्बं, आपत्तिप्पटिग्गाहकेनापि ‘‘सुणन्तु मे आयस्मन्ता, अयं इत्थन्नामो भिक्खु आपत्तिं सरति…पे… देसेति, यदायस्मन्तानं पत्तकल्ल’’न्ति वत्तब्बं, चीवरदानेपि ‘‘सुणन्तु मे आयस्मन्ता, इदं चीवरं इत्थन्नामस्स भिक्खुनो निस्सग्गियं आयस्मन्तानं निस्सट्ठं, यदायस्मन्तानं पत्तकल्लं, आयस्मन्ता इमं चीवरं इत्थन्नामस्स भिक्खुनो ददेय्यु’’न्ति (पारा. ४६६) वत्तब्बं, सेसं पुरिमसदिसमेव. पुग्गलस्स पन निस्सज्जन्तेन ‘‘इमाह’’न्ति वा ‘‘इमानि अह’’न्ति वा वत्वा ‘‘आयस्मतो निस्सज्जामी’’ति वत्तब्बं, निस्सज्जित्वा ‘‘अहं, भन्ते, एकं निस्सग्गियं पाचित्तियं आपन्नो, तं पटिदेसेमी’’ति एवं आपत्ति देसेतब्बा. सचे पन नवकतरो होति, ‘‘आवुसो’’ति वत्तब्बं, तेनापि ‘‘पस्ससी’’ति वा ‘‘पस्सथा’’ति वा वुत्ते ‘‘आम, भन्ते’’ति वा ‘‘आम आवुसो’’ति वा वत्वा ‘‘पस्सामी’’ति वत्तब्बं, ततो ‘‘आयतिं संवरेय्यासी’’ति वा ‘‘संवरेय्याथा’’ति वा वुत्ते ‘‘साधु सुट्ठु संवरिस्सामी’’ति वत्तब्बं. एवं देसिताय आपत्तिया ‘‘इमं चीवरं आयस्मतो दम्मी’’ति दातब्बं, द्वीसु तीसु ¶ वा पुब्बे वुत्तानुसारेनेव नयो वेदितब्बो. द्विन्नं पन यथा गणस्स, एवं निस्सज्जितब्बं, ततो आपत्तिप्पटिग्गहणञ्च निस्सट्ठचीवरदानञ्च तेसं अञ्ञतरेन यथा एकेन पुग्गलेन, तथा कातब्बं, इदं पन सब्बनिस्सग्गियेसु विधानं. चीवरं पत्तो निसीदनन्ति वत्थुमत्तमेव हि नानं, परम्मुखं पन वत्थु ‘‘एत’’न्ति निस्सज्जितब्बं. सचे बहूनि होन्ति, ‘‘एतानी’’ति वत्तब्बं. निस्सट्ठदानेपि एसेव नयो. निस्सट्ठवत्थुं ‘‘दिन्नमिदं इमिना मय्ह’’न्ति सञ्ञाय न पटिदेन्तस्स दुक्कटं, तस्स सन्तकभावं ञत्वा लेसेन अच्छिन्दन्तो सामिकस्स धुरनिक्खेपेन भण्डं अग्घापेत्वा कारेतब्बोति.

वेसालियं छब्बग्गिये भिक्खू आरब्भ अतिरेकचीवरधारणवत्थुस्मिं पञ्ञत्तं, ‘‘दसाहपरम’’न्ति अयमेत्थ अनुपञ्ञत्ति, साधारणपञ्ञत्ति, अनाणत्तिकं, अनिस्सज्जित्वा परिभुञ्जन्तस्स दुक्कटं, यथा च इध, एवं सब्बत्थ, तस्मा नं परतो न वक्खाम. दसाहं अनतिक्कन्तेपि अतिक्कन्तसञ्ञिनो वेमतिकस्स च दुक्कटं. अतिक्कन्ते अनतिक्कन्तसञ्ञिनोपि वेमतिकस्सपि निस्सग्गियं पाचित्तियमेव, तथा अनधिट्ठिताविकप्पितअअस्सज्जितअनट्ठाविनट्ठअदड्ढाविलुत्तेसु अधिट्ठितादिसञ्ञिनो. अन्तोदसाहं अधिट्ठिते विकप्पिते ¶ विस्सज्जिते नट्ठे विनट्ठे दड्ढे अच्छिन्ने विस्सासेन गाहिते उम्मत्तकादीनञ्च अनापत्ति. आचारविपत्ति, यथा च इदं, एवं इतो परानिपि, उभतोपातिमोक्खेसुपि हि पाराजिकानि च सङ्घादिसेसा च सीलविपत्ति, सेसापत्तियो आचारविपत्ति, आजीवविपत्ति वा दिट्ठिविपत्ति वा काचि आपत्ति नाम नत्थि. आजीवविपत्तिपच्चया ¶ पन ठपेत्वा दुब्भासितं छ आपत्तिक्खन्धा पञ्ञत्ता, दिट्ठिविपत्तिपच्चया पाचित्तियदुक्कटवसेन द्वे आपत्तिक्खन्धा पञ्ञत्ताति, इदमेत्थ लक्खणं, इति विपत्तिकथा इधेव निट्ठिताति, न नं इतो परं विचारयिस्साम. जातिप्पमाणसम्पन्नस्स चीवरस्स अत्तनो सन्तकता, गणनुपगता, छिन्नपलिबोधभावो, अतिरेकचीवरता, दसाहातिक्कमोति इमानेत्थ पञ्च अङ्गानि. कथिनसमुट्ठानं, अकिरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति.

कथिनसिक्खापदवण्णना निट्ठिता.

२. उदोसितसिक्खापदवण्णना

दुतिये ¶ निट्ठितचीवरस्मिं भिक्खुनातिएत्थ पुरिमसिक्खापदे विय अत्थं अग्गहेत्वा निट्ठिते चीवरस्मिं भिक्खुनोति एवं सामिवसेन करणवचनस्स अत्थो वेदितब्बो. करणवसेन हि भिक्खुना इदं नाम कम्मं कातब्बं, तं नत्थि, सामिवसेन पन भिक्खुनो चीवरस्मिं निट्ठिते कथिने च उब्भते एवं इमेहि चीवरनिट्ठानकथिनुब्भारेहि छिन्नपलिबोधो एकरत्तम्पि चे भिक्खु तिचीवरेन विप्पवसेय्याति एवं अत्थो युज्जति. तत्थ तिचीवरेनाति तिचीवराधिट्ठाननयेन अधिट्ठितेसु सङ्घाटिआदीसु येनकेनचि. विप्पवसेय्याति वियुत्तो वसेय्य, ‘‘गामो एकूपचारो नानूपचारो’’तिआदिना (पारा. ४७७) नयेन पाळियं वुत्तानं गामनिगमननिवेसनउदोसितअट्टमाळपासादहम्मियनावासत्थखेत्तधञ्ञकरणआरामविहाररुक्खमूलअज्झोकासप्पभेदानं पन्नरसानं निक्खेपट्ठानानं यत्थकत्थचि निक्खिपित्वा तेसं गामादीनं बहि हत्थपासातिक्कमेन अरुणं उट्ठापेय्याति अयमेत्थ सङ्खेपो, वित्थारो पन समन्तपासादिकायं (पारा. अट्ठ. २.४७३-४७७-८) वुत्तो. अञ्ञत्र भिक्खुसम्मुतियाति यं सङ्घो गिलानस्स भिक्खुनो तिचीवरेन अविप्पवाससम्मुतिं देति, तं ठपेत्वा अलद्धसम्मुतिकस्स भिक्खुनो एकरत्तम्पि विप्पवासतो वुत्तनयेनेव निस्सग्गियं पाचित्तियन्ति वेदितब्बं, केवलं इध ‘‘इदं मे, भन्ते, चीवरं रत्तिविप्पवुत्थं अञ्ञत्र भिक्खुसम्मुतिया निस्सग्गिय’’न्तिआदिना नयेन वचनभेदो होति, अयं पन विसेसो.

सावत्थियं ¶ सम्बहुले भिक्खू आरब्भ सन्तरुत्तरेन जनपदचारिकं पक्कमनवत्थुस्मिं

पञ्ञत्तं, ‘‘अञ्ञत्र भिक्खुसम्मुतिया’’ति अयमेत्थ अनुपञ्ञत्ति, साधारणपञ्ञत्ति, अनाणत्तिकं, अविप्पवुत्थे विप्पवुत्थसञ्ञिनो चेव वेमतिकस्स च दुक्कटं. विप्पवुत्थे विप्पवुत्थसञ्ञिनोपि अविप्पवुत्थसञ्ञिनोपि वेमतिकस्सापि निस्सग्गियं पाचित्तियं, तथा अपच्चुद्धटअविस्सज्जितादीसु च पच्चुद्धटविस्सज्जितादिसञ्ञिनो. अन्तोअरुणे पच्चुद्धटे पन पठमकथिने वुत्तविस्सज्जितादिभेदे च अनापत्ति, तथा लद्धसम्मुतिकस्स ¶ विप्पवासे. आबाधे पन वूपसन्ते पच्चागन्तब्बं, तत्थेव वा ठितेन पच्चुद्धरितब्बं, अथापिस्स पुन सो वा अञ्ञो वा आबाधो कुप्पति, लद्धकप्पियमेव. अधिट्ठितचीवरता ¶ , अनत्थतकथिनता, अलद्धसम्मुतिकता, रत्तिविप्पवासोति इमानेत्थ चत्तारि अङ्गानि. समुट्ठानादीनि पठमकथिने वुत्तप्पकारानेव. केवलञ्हि तत्थ अनधिट्ठानं अविकप्पनञ्च अकिरिया, इध अप्पच्चुद्धरणं, अयं विसेसोति.

उदोसितसिक्खापदवण्णना निट्ठिता.

३. अकालचीवरसिक्खापदवण्णना

ततिये निट्ठितचीवरस्मिं भिक्खुनाति सामिवसेनेव करणत्थो वेदितब्बो. अकालचीवरं नाम य्वायं ‘‘अनत्थते कथिने वस्सानस्स पच्छिमो मासो, अत्थते कथिने पञ्चमासा’’ति (पारा. ६४९) चीवरकालो वुत्तो, तं ठपेत्वा अञ्ञदा उप्पन्नं, यञ्च कालेपि सङ्घस्स वा ‘‘इदं अकालचीवर’’न्ति, पुग्गलस्स वा ‘‘इदं तुय्हं दम्मी’’तिआदिना नयेन दिन्नं, एतं अकालचीवरं नाम. उप्पज्जेय्याति एवरूपं चीवरं अत्तनो भागपटिलाभवसेन सङ्घतो वा सुत्तन्तिकादिगणतो वा ञातितो वा मित्ततो वा पंसुकूलं वा अत्तनो वा धनेन (पारा. ५००), अथ वा पन ‘‘अट्ठिमा, भिक्खवे, मातिका चीवरस्स उप्पादाय सीमाय देति, कतिकाय देति, भिक्खापञ्ञत्तिकाय देति, सङ्घस्स देति, उभतोसङ्घस्स देति, वस्संवुट्ठसङ्घस्स देति, आदिस्स देति, पुग्गलस्स देती’’ति (महाव. ३७९) इमासं अट्ठन्नं मातिकानं अञ्ञतरतो उप्पज्जेय्य. एत्थ च ‘‘सीमाय दम्मी’’ति एवं सीमं परामसित्वा देन्तो सीमाय देति नाम, एस नयो सब्बत्थ. एत्थ च सीमाति खण्डसीमा उपचारसीमा समानसंवाससीमा अविप्पवाससीमा लाभसीमा गामसीमा निगमसीमा नगरसीमा अब्भन्तरसीमा उदकुक्खेपसीमा जनपदसीमा रट्ठसीमा रज्जसीमा दीपसीमा चक्कवाळसीमाति पन्नरसविधा. तत्थ उपचारसीमा नाम परिक्खित्तस्स विहारस्स परिक्खेपेन, अपरिक्खित्तस्स परिक्खेपारहट्ठानेन परिच्छिन्ना. अपि च भिक्खूनं धुवसन्निपातट्ठानतो वा परियन्ते ¶ ठितभोजनसालतो वा निबद्धवसनकआवासतो वा थाममज्झिमस्स पुरिसस्स द्विन्नं लेड्डुपातानं अन्तो ‘‘उपचारसीमा’’ति वेदितब्बा. सा पन आवासे वड्ढन्ते वड्ढति, हायन्ते हायति ¶ , योजनसतम्पि उपचारसीमाव होति. तत्थ दिन्नलाभो सब्बेसं अन्तोसीमगतानं पापुणाति, भिक्खुनीनं आरामपवेसनसेनासनापुच्छनानि परिवासमानत्तारोचनं वस्सच्छेदनिस्सयसेनासनग्गाहादिविधानन्ति इदम्पि सब्बं इमिस्साव सीमाय वसेन वेदितब्बं. लाभसीमाति यं राजराजमहामत्तादयो विहारं कारापेत्वा गावुतं वा अद्धयोजनं वा योजनं वा समन्ता परिच्छिन्दित्वा ‘‘अयं अम्हाकं विहारस्स लाभसीमा, यं एत्थन्तरे ¶ उप्पज्जति, तं सब्बं अम्हाकं विहारस्स देमा’’ति ठपेन्ति, अयं लाभसीमा नाम. कासिकोसलादीनं पन रट्ठानं अन्तो बहू जनपदा होन्ति, तत्थ एको जनपदपरिच्छेदो जनपदसीमा, कासिकोसलादिरट्ठपरिच्छेदो रट्ठसीमा, एकस्स रञ्ञो आणापवत्तिट्ठानं रज्जसीमा, समुद्दन्तेन परिच्छिन्नो महादीपो वा अन्तरदीपो वा दीपसीमा, एकचक्कवाळपब्बतपरिक्खेपब्भन्तरं चक्कवाळसीमा, सेसा निदानकथायं वुत्तनया एव. तत्थ ‘‘खण्डसीमाय देमा’’ति दिन्नं खण्डसीमट्ठानंयेव पापुणाति, ततो बहिसीमाय सीमन्तरिकट्ठानम्पि न पापुणाति. ‘‘उपचारसीमाय देमा’’ति दिन्नं पन अन्तोपरिच्छेदे खण्डसीमासीमन्तरिकासु ठितानम्पि पापुणाति, समानसंवाससीमाय दिन्नं खण्डसीमासीमन्तरिकट्ठानं न पापुणाति, अविप्पवाससीमालाभसीमासु दिन्नं तासं अन्तोगधानंयेव पापुणाति, गामसीमादीसु दिन्नं तासं सीमानं अब्भन्तरे बद्धसीमट्ठानम्पि पापुणाति, अब्भन्तरसीमाउदकुक्खेपसीमासु दिन्नं तत्थ अन्तोगधानंयेव पापुणाति, जनपदसीमादीसु दिन्नम्पि तासं अब्भन्तरे बद्धसीमट्ठानम्पि पापुणाति, तस्मा यं जम्बुदीपे ठत्वा ‘‘तम्बपण्णिदीपे सङ्घस्स देमा’’ति दीयति, तं तम्बपण्णिदीपतो एकोपि गन्त्वा सब्बेसं सङ्गण्हितुं लभति. सचेपि तत्थेव एको सभागो भिक्खु सभागानं भागं गण्हाति, न वारेतब्बो. यो पन विहारं पविसित्वा ‘‘असुकसीमाया’’ति अवत्वाव केवलं ‘‘सीमाय दम्मी’’ति वदति, सो पुच्छितब्बो ‘‘सीमा नाम बहुविधा, कतरं सन्धाय वदसी’’ति, सचे वदति ‘‘अहमेतं भेदं न जानामि, सीमट्ठकसङ्घो गण्हतू’’ति, उपचारसीमट्ठेहि भाजेतब्बं.

कतिकायातिएत्थ कतिका नाम समानलाभकतिका. सा पन एवं कातब्बा, एकस्मिं विहारे सन्निपतितेहि भिक्खूहि यं विहारं सङ्गण्हितुकामा समानलाभं कातुं इच्छन्ति, तस्स नामं गहेत्वा ‘‘असुको नाम विहारो पोराणको अप्पलाभो’’ति यं ¶ किञ्चि कारणं वत्वा ‘‘तं विहारं इमिना विहारेन सद्धिं एकलाभं कातुं सङ्घस्स रुच्चती’’ति तिक्खत्तुं सावेतब्बं, एत्तावता तस्मिं विहारे निसिन्नोपि इध निसिन्नोव होति, तस्मिं विहारेपि एवमेव ¶ कातब्बं, एत्तावता इध निसिन्नोपि तस्मिं निसिन्नोव होति. एकस्मिं विहारे लाभे भाजियमाने इतरस्मिं ठितस्स भागं गहेतुं वट्टति.

भिक्खापञ्ञत्तियाति एत्थ भिक्खापञ्ञत्ति नाम दायकस्स परिच्चागपञ्ञत्तिट्ठानं, तस्मा ‘‘यत्थ मय्हं धुवकारा करीयन्ति, तत्थ दम्मी’’ति वा ‘‘तत्थ देथा’’ति वा वुत्ते यत्थ तस्स पाकवत्तं वा वत्तति, यतो वा भिक्खू निच्चं भोजेति, यत्थ वा तेन किञ्चि सेनासनं कतं, सब्बत्थ दिन्नमेव होति. सचे पन एकस्मिं ¶ धुवकारट्ठाने थोकतरा भिक्खू होन्ति, एकमेव वा वत्थं होति, मातिकं आरोपेत्वा यथा सो वदति, तथा गहेतब्बं.

सङ्घस्स देतीति एत्थ विहारं पविसित्वा ‘‘सङ्घस्स दम्मी’’ति दिन्नं उपचारसीमागतानञ्च ततो बहिद्धापि तेहि सद्धिं एकाबद्धानञ्च पापुणाति, तस्मा तेसं गाहके सति असम्पत्तानम्पि भागो दातब्बो. यं पन बहि उपचारसीमाय भिक्खू दिस्वा ‘‘सङ्घस्सा’’ति दीयति, तं एकाबद्धपरिसाय पापुणाति. ये पन द्वादसहि हत्थेहि परिसं असम्पत्ता, तेसं न पापुणाति.

उभतोसङ्घस्साति एत्थ पन यं उभतोसङ्घस्स दिन्नं, ततो उपड्ढं भिक्खूनं, उपड्ढं भिक्खुनीनं दातब्बं. सचेपि एको भिक्खु होति, एका वा भिक्खुनी, अन्तमसो अनुपसम्पन्नस्सापि उपड्ढमेव दातब्बं. ‘‘उभतोसङ्घस्स च तुय्हञ्चा’’ति वुत्ते पन सचे दस भिक्खू च दस भिक्खुनियो च होन्ति, एकवीसति पटिवीसे कत्वा एको पुग्गलस्स दातब्बो, दस भिक्खुसङ्घस्स, दस भिक्खुनिसङ्घस्स च, येन पुग्गलिको लद्धो, सो सङ्घतोपि अत्तनो वस्सग्गेन गहेतुं लभति, कस्मा? उभतोसङ्घग्गहणेन गहितत्ता, ‘‘उभतोसङ्घस्स च चेतियस्स चा’’ति वुत्तेपि एसेव नयो. इध पन चेतियस्स सङ्घतो पापुणकोट्ठासो नाम नत्थि, एकपुग्गलस्स पत्तकोट्ठाससमो एको कोट्ठासो होति. ‘‘भिक्खुसङ्घस्स च भिक्खुनीनञ्चा’’ति वुत्ते पन न मज्झे भिन्दित्वा दातब्बं, भिक्खू च भिक्खुनियो च गणेत्वा दातब्बं. ‘‘भिक्खुसङ्घस्स च भिक्खुनीनञ्च तुय्हञ्चा’’ति वुत्ते पुग्गलो विसुं न लभति, पापुणकोट्ठासतो एकमेव लभति ¶ . ‘‘चेतियस्स चा’’ति वुत्ते पन चेतियस्स एको पुग्गलपटिवीसो लब्भति. ‘‘भिक्खूनञ्च भिक्खुनीनञ्चा’’ति वुत्तेपि न मज्झे भिन्दित्वा दातब्बं, पुग्गलगणनाय एव विभजितब्बं, तेहि सद्धिं पुग्गलचेतियपरामसनं अनन्तरनयसदिसमेव, यथा च भिक्खुसङ्घं आदिं कत्वा नयो नीतो, एवं भिक्खुनिसङ्घं आदिं कत्वापि नेतब्बो. ‘‘भिक्खुसङ्घस्स च तुय्हञ्चा’’ति वुत्तेपि पुग्गलस्स विसुं न लब्भति ¶ , चेतियस्स पन लब्भति. ‘‘भिक्खूनञ्च तुय्हञ्चा’’ति वुत्तेपि विसुं न लब्भति, चेतियस्स पन लब्भतियेव.

वस्संवुट्ठसङ्घस्साति एत्थ सचे विहारं पविसित्वा ‘‘वस्संवुट्ठसङ्घस्स दम्मी’’ति वदति, ये तत्थ वस्सच्छेदं अकत्वा पुरिमवस्संवुट्ठा, तेसं बहि सीमट्ठानम्पि पापुणाति, न अञ्ञेसं. सचे पन बहिउपचारसीमायं ठितो ‘‘वस्संवुट्ठसङ्घस्सा’’ति वदति, यत्थकत्थचि वुट्ठवस्सानं सब्बेसं सम्पत्तानं पापुणाति. अथ ‘‘असुकविहारे वस्संवुट्ठस्सा’’ति वदति, तत्थ वस्संवुट्ठानंयेव याव कथिनस्सुब्भारा पापुणाति. गिम्हानं पठमदिवसतो पट्ठाय एवं वदति, तत्र सम्मुखीभूतानं सब्बेसं पापुणाति, न अञ्ञेसं.

आदिस्स देतीति आदिसित्वा परिच्छिन्दित्वा देति, कथं? भिक्खू अज्जतनाय ¶ वा स्वातनाय वा यागुया निमन्तेत्वा ते घरे यागुं पायेत्वा ‘‘इमानि चीवरानि येहि मय्हं यागु पीता, तेसं दम्मी’’ति वदति, येहि निमन्तितेहि यागु पीता, तेसंयेव पापुणाति, भत्तखज्जकादीहि निमन्तितेसुपि एसेव नयो.

पुग्गलस्स देतीति ‘‘इदं चीवरं इत्थन्नामस्स दम्मी’’ति एवं परम्मुखा वा, पादमूले ठपेत्वा ‘‘इदं तुम्हाक’’न्ति एवं सम्मुखा वा देतीति अयमेत्थ सङ्खेपकथा, वित्थारो पन समन्तपासादिकायं वुत्तो. इति इमासं अट्ठन्नं मातिकापदानं वसेन यं अकालचीवरलक्खणेन पटिलद्धं, तं सन्धाय ‘‘अकालचीवरं उप्पज्जेय्या’’ति वुत्तं.

आकङ्खमानेनाति इच्छमानेन. खिप्पमेव कारेतब्बन्ति सीघं अन्तोदसाहेयेव कारेतब्बं. नो चस्स पारिपूरीति नो चे पारिपूरी भवेय्य, यत्तकेन करियमानं अधिट्ठानचीवरं पहोति, तं चीवरं तत्तकं न भवेय्य, ऊनकं भवेय्याति अत्थो. सतिया पच्चासायाति ‘‘असुकदिवसं नाम सङ्घो चीवरानि लभिस्सति, ततो मे चीवरं उप्पज्जिस्सती’’तिइमिना ¶ नयेन सङ्घगणञातिमित्तेसु वा अञ्ञतरट्ठानतो, ‘‘पंसुकूलं वा लच्छामी’’ति, ‘‘इमिना वा कप्पियभण्डेन चीवरं गण्हिस्सामी’’ति एवं विज्जमानाय चीवरासाय. ततो चे उत्तरीति मासपरमतो चे उत्तरि निक्खिपेय्य, निस्सग्गियन्ति अत्थो. यदि पनस्स मूलचीवरं सण्हं होति, पच्चासाचीवरं थूलं होति, न सक्का योजेतुं, रत्तियो च सेसा होन्ति, न ताव मासो पूरति, न अकामा चीवरं कारेतब्बं, अञ्ञं पच्चासाचीवरं लभित्वा एव कालब्भन्तरे कारेतब्बं. सचे न लभति, पच्चासाचीवरम्पि परिक्खारचोळं अधिट्ठातब्बं. अथ मूलचीवरं ¶ थूलं होति, पच्चासाचीवरं सण्हं, मूलचीवरं परिक्खारचोळं अधिट्ठहित्वा पच्चासाचीवरमेव मूलचीवरं कत्वा ठपेतब्बं, तं पुन मासपरिहारं लभति, एतेनुपायेन याव न लच्छति, ताव अञ्ञं मूलचीवरं कत्वा ठपेतुं लब्भति. इमस्स ‘‘इदं मे, भन्ते, अकालचीवरं मासातिक्कन्तं निस्सग्गिय’’न्ति (पारा. ५००) इमिना नयेन निस्सज्जनविधानं वेदितब्बं.

सावत्थियं सम्बहुले भिक्खू आरब्भ अकालचीवरं पटिग्गहेत्वा मासं अतिक्कमनवत्थुस्मिं

पञ्ञत्तं, साधारणपञ्ञत्ति, अनाणत्तिकं, इतो परं सब्बं पठमकथिने वुत्तसदिसमेव. केवलञ्हि तत्थ दसाहातिक्कमो, इध मासातिक्कमोति अयं विसेसो. सेसं तादिसमेवाति.

अकालचीवरसिक्खापदवण्णना निट्ठिता.

४. पुराणचीवरसिक्खापदवण्णना

चतुत्थे अञ्ञातिकायाति न ञातिकाय, मातितो वा पितितो वा याव सत्तमं युगं, ताव केनचि आकारेन असम्बद्धायाति अत्थो. भिक्खुनियाति ¶ साकियानियो विय सुद्धभिक्खुसङ्घे वा उभतोसङ्घे वा उपसम्पन्नाय. पुराणचीवरन्ति रजित्वा कप्पं कत्वा एकवारम्पि निवत्थं वा पारुतं वा, यं अन्तमसो परिभोगसीसेन अंसे वा मत्थके वा कत्वा मग्गं गतो होति, उस्सीसकं वा कत्वा निपन्नो, एतम्पि पुराणचीवरमेव. धोवापेय्य वाति सचे ‘‘धोवा’’तिवाचाय वदति, कायविकारं वा करोति, हत्थेन वा हत्थे देति, पादमूले वा ठपेति, अन्तोद्वादसहत्थे ओकासे ठत्वा उपरि वा खिपति, अञ्ञस्स वा ¶ हत्थे पेसेति, ताय धोतं, धोवापितमेव होति, रजापनाकोटापनेसुपि एसेव नयो. सिक्खमानाय वा सामणेरिया वा उपासिकाय वा हत्थे धोवनत्थाय देति, सा सचे उपसम्पज्जित्वा धोवति, एवम्पि निस्सग्गियं पाचित्तियं. उपासकस्स वा सामणेरस्स वा हत्थे दिन्नं होति, सो चे लिङ्गे परिवत्ते उपसम्पज्जित्वा धोवति, दहरस्स भिक्खुस्स वा दिन्नं होति, सोपि लिङ्गे परिवत्ते धोवति, निस्सग्गियं पाचित्तियमेव, रजापनाकोटापनेसुपि एसेव नयो. ‘‘इदं मे, भन्ते, पुराणचीवरं अञ्ञातिकाय भिक्खुनिया धोवापितं निस्सग्गिय’’न्ति (पारा. ५०५) इमिना पनेत्थ नयेन निस्सज्जनविधानं वेदितब्बं.

सावत्थियं उदायित्थेरं आरब्भ पुराणचीवरधोवापनवत्थुस्मिं पञ्ञत्तं, असाधारणपञ्ञत्ति, साणत्तिकं ¶ ‘‘धोवा’’तिआदिकाय आणत्तिया, एवं आणत्ताय च भिक्खुनिया उद्धनसज्जनादीसु सब्बप्पयोगेसु भिक्खुनो दुक्कटं. धोवित्वा उक्खित्तमत्तं पन रत्तमत्तं आकोटितमत्तञ्च निस्सग्गियं होति, धोवनादीनि तीणिपि द्वे वा कारापेन्तस्स एकेन वत्थुना निस्सग्गियं, इतरेहि दुक्कटं. सचे पन ‘‘धोवा’’ति वुत्ता सब्बानिपि करोति, धोवनपच्चयाव आपत्ति. ‘‘इमस्मिं चीवरे यं कत्तब्बं, तं करोही’’ति वदतो पन एकवाचाय पाचित्तियेन सद्धिं द्वे दुक्कटानि, भिक्खुनिसङ्घवसेन एकतोउपसम्पन्नाय धोवापेन्तस्स अनिस्सज्जित्वा परिभुञ्जन्तस्स, अञ्ञस्स वा सन्तकं निसीदनपच्चत्थरणं वा धोवापेन्तस्स, ञातिकाय अञ्ञातिकसञ्ञिनो चेव, वेमतिकस्स च दुक्कटं, अञ्ञातिकाय ञातिकसञ्ञिनोपि वेमतिकस्सापि निस्सग्गियं पाचित्तियमेव. इतो परं पन एवरूपेसु ठानेसु ‘‘तिकपाचित्तिय’’न्ति वक्खाम, सचे ञातिकाय सहाया अञ्ञातिका ‘‘धोवा’’ति अवुत्ता वा धोवति, अपरिभुत्तं वा अञ्ञं वा परिक्खारं धोवति, सिक्खमानसामणेरियो वा धोवन्ति, अनापत्ति, उम्मत्तकादीनं अनापत्तियेव. पुराणचीवरता, उपचारे ठत्वा अञ्ञातिकाय भिक्खुनिया आणापनं, तस्सा धोवनादीनि चाति इमानेत्थ तीणि अङ्गानि. सञ्चरित्तसमुट्ठानं, किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति.

पुराणचीवरसिक्खापदवण्णना निट्ठिता.

५. चीवरप्पटिग्गहणसिक्खापदवण्णना

पञ्चमे ¶ अञ्ञातिकायातिइदं वुत्तनयमेव, तस्मा इतो परं कत्थचि न विचारयिस्साम. चीवरन्ति छन्नं अञ्ञतरं ¶ विकप्पनुपगं, एस नयो सब्बेसु चीवरप्पटिसंयुत्तसिक्खापदेसु. यत्थ पन विसेसो भविस्सति, तत्थ वक्खाम. पटिग्गण्हेय्यातिएत्थ हत्थेन वा हत्थे देतु, पादमूले वा ठपेतु, धम्मकथं कथेन्तस्स वत्थेसु खिपियमानेसु उपचारं मुञ्चित्वापि उपरि वा खिपतु, सचे सादियति, पटिग्गहितमेव होति. यस्स कस्सचि पन अनुपसम्पन्नस्स हत्थे पेसितं गण्हितुं वट्टति, ‘‘पंसुकूलं गण्हिस्सती’’ति सङ्कारकूटादीसु ठपितम्पि पंसुकूलं अधिट्ठहित्वा गहेतुं वट्टतियेव. अञ्ञत्र पारिवत्तकाति यं ‘‘अन्तमसो हरीटकक्खण्डम्पि दत्वा वा दस्सामी’’ति आभोगं कत्वा वा पारिवत्तकं गण्हाति, तं ठपेत्वा अञ्ञं अन्तमसो विकप्पनुपगं पटपरिस्सावनम्पि गण्हन्तस्स निस्सग्गियं होति. तत्र ‘‘इदं मे, भन्ते, चीवरं अञ्ञातिकाय भिक्खुनिया हत्थतो पटिग्गहितं ¶ अञ्ञत्र पारिवत्तका निस्सग्गिय’’न्ति (पारा. ५१२) इमिना नयेन निस्सज्जनविधानं वेदितब्बं.

राजगहे उदायित्थेरं आरब्भ चीवरप्पटिग्गहणवत्थुस्मिं पञ्ञत्तं, ‘‘अञ्ञत्र पारिवत्तका’’ति अयमेत्थ अनुपञ्ञत्ति, असाधारणपञ्ञत्ति, अनाणत्तिकं, गहणत्थाय हत्थप्पसारणादिप्पयोगे दुक्कटं, पटिलाभेन निस्सग्गियं होति, निस्सज्जितब्बं, तिकपाचित्तियं, एकतोउपसम्पन्नाय ञातिकाय च अञ्ञातिकसञ्ञिस्स वेमतिकस्स वा दुक्कटं. विस्सासग्गाहे, तावकालिके, पत्तत्थविकादिम्हि च अनधिट्ठातब्बपरिक्खारे, सिक्खमानसामणेरीनं हत्थतो गहणे, उम्मत्तकादीनञ्च अनापत्ति. विकप्पनुपगचीवरता, पारिवत्तकाभावो, अञ्ञातिकाय हत्थतो गहणन्ति इमानेत्थ तीणि अङ्गानि. सञ्चरित्तसमुट्ठानं, किरियाकिरियं, सेसं चतुत्थसदिसमेवाति.

चीवरप्पटिग्गहणसिक्खापदवण्णना निट्ठिता.

६. अञ्ञातकविञ्ञत्तिसिक्खापदवण्णना

छट्ठे गहपतिन्ति भिक्खूसु अपब्बजितमनुस्सं. गहपतानिन्ति भिक्खुनीसु अपब्बजितित्थिं, एस नयो सब्बेसु गहपतिप्पटिसंयुत्तेसु सिक्खापदेसु. विञ्ञापेय्याति ¶ याचेय्य वा याचापेय्य वा. अञ्ञत्र समयाति यो अच्छिन्नचीवरो वा होति नट्ठचीवरो वा, तस्स तं समयं ठपेत्वा अञ्ञस्मिं विञ्ञापनप्पयोगे दुक्कटं, पटिलाभेन निस्सग्गियं होति. तत्थ ‘‘इदं मे, भन्ते, चीवरं अञ्ञातकं गहपतिकं अञ्ञत्र समया विञ्ञापितं निस्सग्गिय’’न्ति (पारा. ५२४) इमिना नयेन निस्सज्जनविधानं वेदितब्बं.

सावत्थियं उपनन्दं आरब्भ चीवरविञ्ञापनवत्थुस्मिं पञ्ञत्तं. ‘‘अञ्ञत्र समया’’ति अयमेत्थ अनुपञ्ञत्ति, साधारणपञ्ञत्ति, अनाणत्तिकं, तिकपाचित्तियं, ञातके अञ्ञातकसञ्ञिनो वेमतिकस्स च दुक्कटं. समये वा ञातकप्पवारिते वा विञ्ञापेन्तस्स, अञ्ञस्स वा ञातकप्पवारिते तस्सेवत्थाय विञ्ञापेन्तस्स, अत्तनो ¶ धनेन गण्हन्तस्स, उम्मत्तकादीनञ्च अनापत्ति. विकप्पनुपगचीवरता, समयाभावो, अञ्ञातकविञ्ञत्ति, ताय च पटिलाभोति इमानेत्थ चत्तारि अङ्गानि. समुट्ठानादीनि चतुत्थसदिसानेवाति.

अञ्ञातकविञ्ञत्तिसिक्खापदवण्णना निट्ठिता.

७. ततुत्तरिसिक्खापदवण्णना

सत्तमे ¶ तञ्चेति तं अच्छिन्नचीवरं वा नट्ठचीवरं वा. अभिहट्ठुन्ति अभीति उपसग्गो, हरितुन्ति अत्थो, गण्हितुन्ति वुत्तं होति. पवारेय्याति इच्छापेय्य, इच्छं रुचिं उप्पादेय्य, ‘‘यावत्तकं इच्छसि, तावत्तकं गण्हाही’’ति एवं निमन्तेय्याति अत्थो, यथा वा ‘‘नेक्खम्मं दट्ठु खेमतो’’ति (सु. नि. ४२६, ११०४; चूळनि. जतुकण्णीमाणवपुच्छानिद्देस ६७) एत्थ दिस्वाति अत्थो, एवमिधापि ‘‘अभिहट्ठुं पवारेय्या’’ति उपनेत्वा पुरतो ठपेन्तो कायेन वा, ‘‘अम्हाकं दुस्सकोट्ठागारतो यत्तकं इच्छथ, तत्तकं गण्हथा’’ति वदन्तो वाचाय वा अभिहरित्वा निमन्तेय्याति अत्थो. सन्तरुत्तरपरमन्ति सअन्तरं उत्तरं परमं अस्स चीवरस्साति सन्तरुत्तरपरमं, निवासनेन सद्धिं पारुपनं उक्कट्ठपरिच्छेदो अस्साति वुत्तं होति. ततो चीवरं सादितब्बन्ति ततो अभिहटचीवरतो एत्तकं चीवरं गहेतब्बं, न ततो परं.

तत्रायं ¶ विनिच्छयो – यस्स अधिट्ठितचीवरस्स तीणि नट्ठानि, तेन द्वे सादितब्बानि, एकं निवासेत्वा एकं पारुपित्वा अञ्ञं सभागट्ठानतो परियेसितब्बं. यस्स द्वे नट्ठानि, तेन एकं सादितब्बं. सचे पन पकतियाव सन्तरुत्तरेन चरति, द्वे सादितब्बानि, एवं एकं सादियन्तेनेव समो भविस्सति. यस्स तीसु एकं नट्ठं, किञ्चि न सादितब्बं. यस्स पन द्वीसु एकं नट्ठं, एकं सादितब्बं. यस्स एकंयेव होति, तञ्च नट्ठं, द्वे सादितब्बानि. भिक्खुनिया पन पञ्चसु नट्ठेसु द्वे सादितब्बानि, चतूसु नट्ठेसु एकं सादितब्बं, तीसु नट्ठेसु न किञ्चि सादितब्बं, को पन वादो द्वीसु वा एकस्मिं वा. येन केनचि हि सन्तरुत्तरपरमताय ठातब्बं, ततो उत्तरि विञ्ञापनप्पयोगे दुक्कटं, पटिलाभेन निस्सग्गियं होति. तत्थ ‘‘इदं मे, भन्ते, चीवरं अञ्ञातकं गहपतिकं ततुत्तरि विञ्ञापितं निस्सग्गिय’’न्ति (पारा. ५२४) इमिना नयेन निस्सज्जनविधानं वेदितब्बं.

सावत्थियं छब्बग्गिये भिक्खू आरब्भ बहुचीवरविञ्ञापनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, ञातके अञ्ञातकसञ्ञिनो वेमतिकस्स वा दुक्कटं. द्वे चीवरानि कत्वा ‘‘सेसकं आहरिस्सामी’’ति वत्वा गण्हन्तस्स, ‘‘सेसकं तुय्हंयेव होतू’’ति वुत्तस्स, न अच्छिन्ननट्ठकारणा दिन्नं गण्हन्तस्स, वुत्तनयेन ञातकप्पवारिते विञ्ञापेन्तस्स, अत्तनो धनेन गण्हन्तस्स, उम्मत्तकादीनञ्च अनापत्ति. ततुत्तरिता ¶ , अच्छिन्नादिकारणता ¶ , अञ्ञातकविञ्ञत्ति, ताय च पटिलाभोति इमानेत्थ चत्तारि अङ्गानि. समुट्ठानादीनि चतुत्थसदिसानेवाति.

ततुत्तरिसिक्खापदवण्णना निट्ठिता.

८. उपक्खटसिक्खापदवण्णना

अट्ठमे भिक्खुं पनेव उद्दिस्साति ‘‘इत्थन्नामस्स भिक्खुनो दस्सामी’’ति एवं अपदिसित्वा. चीवरचेतापन्नन्ति हिरञ्ञादिकं चीवरमूलं. उपक्खटं होतीति सज्जितं होति, संहरित्वा ठपितं. चेतापेत्वाति परिवत्तेत्वा, कारेत्वा वा किणित्वा वाति अत्थो. चीवरेन अच्छादेस्सामीति वोहारवचनमेतं, इत्थन्नामस्स भिक्खुनो दस्सामीति अयं पनेत्थ ¶ अत्थो. तत्र चे सोति यत्र सो गहपति वा गहपतानी वा, तत्र सो भिक्खु पुब्बे अप्पवारितो उपसङ्कमित्वा चीवरे विकप्पं आपज्जेय्य चेति अयमेत्थ पदसम्बन्धो. विकप्पं आपज्जेय्याति विसिट्ठकप्पं अधिकविधानं आपज्जेय्य. यथा पन तमापज्जति, तं दस्सेतुं साधु वतातिआदिमाह. तत्थ साधूति आयाचने निपातो. वताति परिवितक्के. मन्ति अत्तानं निद्दिसति. आयस्माति परं आलपति. एवरूपं वा एवरूपं वाति आयतादीसु अञ्ञतरं. कल्याणकम्यतं उपादायाति सुन्दरकामतं विसिट्ठकामतं चित्तेन गहेत्वा, तस्स ‘‘आपज्जेय्य चे’’तिइमिना सम्बन्धो, सचे पन एवरूपं आपज्जन्तस्स तस्स वचनेन यो पठमं अधिप्पेततो मूलं वड्ढेत्वा सुन्दरतरं चेतापेति, तस्स पयोगे भिक्खुनो दुक्कटं, पटिलाभेन निस्सग्गियं होति. तत्थ ‘‘इदं मे, भन्ते, चीवरं पुब्बे अप्पवारितं अञ्ञातकं गहपतिकं उपसङ्कमित्वा विकप्पं आपन्नं निस्सग्गिय’’न्ति (पारा. ५२९) इमिना नयेन निस्सज्जनविधानं वेदितब्बं.

सावत्थियं उपनन्दं आरब्भ चीवरे विकप्पं आपज्जनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, ञातके अञ्ञातकसञ्ञिनो वेमतिकस्स वा दुक्कटं. महग्घं चेतापेतुकामं अप्पग्घं वा, एतेनेव मूलेन ‘‘अञ्ञं एवरूपं वा देही’’ति वदन्तस्स, वुत्तनयेन ञातकप्पवारिते विञ्ञापेन्तस्स, अत्तनो धनेन गण्हन्तस्स, उम्मत्तकादीनञ्च अनापत्ति. चीवरे भिय्योकम्यता, अञ्ञातकविञ्ञत्ति, ताय च पटिलाभोति इमानेत्थ तीणि अङ्गानि. समुट्ठानादीनि चतुत्थसदिसानेवाति.

उपक्खटसिक्खापदवण्णना निट्ठिता.

९. दुतियउपक्खटसिक्खापदवण्णना

नवमे ¶ इमिनाव नयेन अत्थो वेदितब्बो. इदञ्हि पुरिमस्स अनुपञ्ञत्तिसदिसं, केवलं तत्थ एकस्स पीळा कता, इध द्विन्नं, अयमेत्थ विसेसो, सेसं सब्बं पुरिमसदिसमेव. यथा च द्विन्नं, एवं बहूनं पीळं कत्वा गण्हतोपि आपत्ति वेदितब्बा. निस्सज्जनविधाने च ‘‘इदं मे, भन्ते ¶ , चीवरं पुब्बे अप्पवारिते ¶ अञ्ञातके गहपतिके उपसङ्कमित्वा विकप्पं आपन्नं निस्सग्गिय’’न्ति (पारा. ५३४) इमिना नयेन वचनभेदो ञातब्बोति.

दुतियउपक्खटसिक्खापदवण्णना निट्ठिता.

१०. राजसिक्खापदवण्णना

दसमे राजभोग्गोति राजतो भोग्गं भुञ्जितब्बं अस्स अत्थीति राजभोग्गो, ‘‘राजभोगो’’तिपि पाठो, राजतो भोगो अस्स अत्थीति अत्थो. चीवरचेतापन्नन्ति हिरञ्ञादिकं अकप्पियं. पहिणेय्याति पेसेय्य. इमिनातिआदि आगमनसुद्धिं दस्सेतुं वुत्तं. सचे हि ‘‘इदं इत्थन्नामस्स भिक्खुनो देही’’ति पेसेय्य, आगमनस्स असुद्धत्ता अकप्पियवत्थुं आरब्भ भिक्खुना कप्पियकारकोपि निद्दिसितब्बो न भवेय्य. आभतन्ति आनीतं. न खो मयन्तिआदि इदं कप्पियवसेन आभतम्पि चीवरमूलं ईदिसेन दूतवचनेन अकप्पियं होति, तस्मा तं पटिक्खिपितब्बन्ति दस्सेतुं वुत्तं. सुवण्णं रजतं कहापणो मासकोति इमानि हि चत्तारि निस्सग्गियवत्थूनि, मुत्ता मणि वेळुरियो सङ्खो सिला पवाळं लोहितङ्को मसारगल्लं सत्त धञ्ञानि दासिदासखेत्तवत्थुपुप्फारामफलारामादयोति इमानि दुक्कटवत्थूनि च अत्तनो वा चेतियसङ्घगणपुग्गलानं वा अत्थाय सम्पटिच्छितुं न वट्टन्ति, तस्मा तं सादितुं न वट्टतीति दस्सनत्थं ‘‘न खो मय’’न्तिआदि वुत्तं.

चीवरञ्च खो मयं पटिग्गण्हामाति इदं पन अत्तानं उद्दिस्स आभतत्ता वत्तुं वट्टति, तस्मा वुत्तं. कालेनाति युत्तपत्तकालेन, यदा नो अत्थो होति, तदा कप्पियं चीवरं पटिग्गण्हामाति अत्थो. वेय्यावच्चकरोति कप्पियकारको. निद्दिसितब्बोतिइदं ‘‘अत्थि पनायस्मतो कोचि वेय्यावच्चकरो’’ति कप्पियवचनेन वुत्तत्ता अनुञ्ञातं. सचे पन दूतो ‘‘को इमं गण्हाती’’ति वा ‘‘कस्स देमी’’ति वा वदति, न निद्दिसितब्बो. आरामिको वा उपासको वातिइदं सारुप्पताय वुत्तं, ठपेत्वा पन पञ्च सहधम्मिके यो कोचि कप्पियकारको ¶ वट्टति. एसो खो, आवुसोतिइदं भिक्खुस्स कप्पियवचनदस्सनत्थं वुत्तं, एवमेव हि ¶ वत्तब्बं, ‘‘एतस्स देही’’तिआदि न वत्तब्बं. सञ्ञत्तो सो मयाति आणत्तो सो मया, यथा तुम्हाकं चीवरेन अत्थे सति चीवरं दस्सति, एवं वुत्तोति अत्थो. दूतेन हि एवं आरोचितेयेव तं चोदेतुं वट्टति, नेव तस्स हत्थे दत्वा गतमत्तकारणेन. सचे पन ‘‘अयं वेय्यावच्चकरो’’ति सम्मुखा निद्दिट्ठो होति, दूतो च सम्मुखा एव तस्स हत्थे चेतापन्नं दत्वा ‘‘थेरस्स चीवरं किणित्वा देही’’ति गच्छति, एवं ‘‘सञ्ञत्तो सो मया’’ति अवुत्तेपि चोदेतुं वट्टति. सचे पन दूतो गच्छन्तोव ‘‘अहं तस्स हत्थे दस्सामि, तुम्हे चीवरं गण्हेय्याथा’’ति भिक्खुनो वत्वा वा गच्छति, अञ्ञं वा पेसेत्वा आरोचापेति, एवं सति इतरम्पि चोदेतुं वट्टतियेव. देसनामत्तमेव ¶ चेतं ‘‘दूतेना’’ति. योपि अत्तना आहरित्वा एवं पटिपज्जति, तस्मिम्पि इदमेव लक्खणं. अत्थो मे, आवुसो, चीवरेनाति चोदनालक्खणनिदस्सनमेतं. सचे हि वाचाय चोदेति, इदं वा वचनं याय कायचि भासाय एतस्स अत्थो वा वत्तब्बो, ‘‘देहि मे, आहर मे’’तिआदिना नयेन पन वत्तुं न वट्टति. अभिनिप्फादेय्याति एवं वचीभेदं कत्वा तिक्खत्तुं चोदयमानो पटिलाभवसेन साधेय्य. इच्चेतं कुसलन्ति एतं सुन्दरं.

छक्खत्तुपरमन्ति भावनपुंसकवचनमेतं. छक्खत्तुपरमञ्हि तेन चीवरं उद्दिस्स तुण्हीभूतेन ठातब्बं, न निसीदितब्बं, न आमिसं पटिग्गहेतब्बं, न धम्मो भासितब्बो. ‘‘किंकारणा आगतोसी’’ति वुत्ते पन ‘‘जानाहि, आवुसो’’ति एत्तकमेव वत्तब्बं. सचे निसज्जादीनि करोति, ठानं भञ्जति, आगतकारणं विनासेति, इदं कायेन चोदनाय लक्खणदस्सनत्थं वुत्तं. एत्थ च उक्कट्ठपरिच्छेदेन तिस्सन्नं चोदनानं छन्नञ्च ठानानं अनुञ्ञातत्ता चोदनाय दिगुणं ठानं अनुञ्ञातं होति, तस्मा सचे चोदेतियेव, न तिट्ठति, छ चोदनायो लब्भन्ति. सचे तिट्ठतियेव, न चोदेति, द्वादस ठानानि लब्भन्ति. सचे उभयं करोति, एकाय चोदनाय द्वे ठानानि हापेतब्बानि. तत्थ यो एकदिवसमेव पुनप्पुनं गन्त्वा छक्खत्तुं चोदेति, सकिंयेव वा गन्त्वा ‘‘अत्थो मे, आवुसो, चीवरेना’’ति छक्खत्तुं वदति, तथा एकदिवसमेव पुनप्पुनं गन्त्वा द्वादसक्खत्तुं तिट्ठति, सकिंयेव वा गन्त्वा तत्र तत्र ठाने तिट्ठति, सोपि सब्बचोदनायो सब्बट्ठानानि च भञ्जति, को पन वादो ¶ नानादिवसेसु एवं करोन्तस्साति अयमेत्थ विनिच्छयो. ये पन कप्पियकारके दायको सयमेव गन्त्वा निसीदति ते सतक्खत्तुम्पि चोदेतुं वट्टति. यो पन उभोहि पि अनिद्दिट्ठो मुखवेवटिककप्पियकारको च परम्मुखकप्पियकारको च, सो न किञ्चि वत्तब्बो, एवं इध दसपि कप्पियकारका दस्सिता होन्ति.

ततो ¶ चे उत्तरीति वुत्तचोदनाठानपरिमाणतो उत्तरि. निस्सग्गियन्ति उत्तरि वायाममानस्स सब्बप्पयोगेसु दुक्कटं, पटिलाभेन निस्सग्गियं होति. एत्थ च ‘‘इदं मे, भन्ते, चीवरं अतिरेकतिक्खत्तुं चोदनाय अतिरेकछक्खत्तुं ठानेन अभिनिप्फादितं निस्सग्गिय’’न्ति (पारा. ५३९) इमिना नयेन निस्सज्जनविधानं वेदितब्बं. यतस्स चीवरचेतापन्नं आभतन्ति यतो राजतो वा राजभोग्गतो वा अस्स भिक्खुनो चीवरचेतापन्नं आनीतं, ‘‘यत्वस्सा’’तिपि पाठो, अयमेव अत्थो. तत्थाति तस्स रञ्ञो वा राजभोग्गस्स वा सन्तिकं, समीपत्थे हि इदं भुम्मवचनं. न तं तस्स भिक्खुनो किञ्चि अत्थं अनुभोतीति तं चेतापन्नं तस्स भिक्खुनो अप्पमत्तकम्पि कम्मं न निप्फादेति. युञ्जन्तायस्मन्तो सकन्ति आयस्मन्तो अत्तनो सन्तकं धनं पापुणन्तु. मा वो सकं ¶ विनस्साति तुम्हाकं सन्तकं मा विनस्सतु. अयं तत्थ सामीचीति अयं तत्थ अनुधम्मता लोकुत्तरधम्मं अनुगता, वत्तधम्मताति अत्थो, तस्मा एवं अकरोन्तो वत्तभेदे दुक्कटं आपज्जति.

सावत्थियं उपनन्दं आरब्भ ‘‘अज्जुण्हो, भन्ते, आगमेही’’ति (पारा. ५३७) वुच्चमानो नागमेसि, तस्मिं वत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, ऊनकेसु चोदनाठानेसु अतिरेकसञ्ञिनो वेमतिकस्स वा दुक्कटं. अचोदनाय लद्धे, सामिकेहि चोदेत्वा दिन्ने, उम्मत्तकादीनञ्च अनापत्ति. कप्पियकारकस्स भिक्खुनो निद्दिट्ठभावो, दूतेन अप्पितता, ततुत्तरिवायामो, तेन वायामेन पटिलाभोति इमानेत्थ चत्तारि अङ्गानि. समुट्ठानादीनि चतुत्थसदिसानेवाति.

राजसिक्खापदवण्णना निट्ठिता.

चीवरवग्गो पठमो.

२. एळकलोमवग्गो

१. कोसियसिक्खापदवण्णना

एळकलोमवग्गस्स ¶ पठमे कोसियमिस्सकन्ति एकेनापि कोसियंसुना अन्तमसो तस्स करणट्ठाने ¶ वातवेगेन निपातितेनापि मिस्सीकतं. सन्थतन्ति समे भूमिभागे कोसियंसूनि उपरूपरि सन्थरित्वा कञ्जियादीहि सिञ्चित्वा कत्तब्बतालक्खणं. कारापेय्य निस्सग्गियन्ति करणकारापनप्पयोगेसु दुक्कटं, पटिलाभेन निस्सग्गियं होति. एत्थ च ‘‘इदं मे, भन्ते, कोसियमिस्सकं सन्थतं कारापितं निस्सग्गिय’’न्ति (पारा. ५४४) इमिना नयेन निस्सज्जनविधानं वेदितब्बं, इमस्सेव वचनस्स अनुसारेन इतो परं सब्बसन्थतं वेदितब्बं. सक्का हि एत्तावता जानितुन्ति न तं इतो परं दस्सयिस्साम.

आळवियं छब्बग्गिये आरब्भ कोसियमिस्सकं सन्थतं कारापनवत्थुस्मिं पञ्ञत्तं, असाधारणपञ्ञत्ति, अत्तनो अत्थाय कारापनवसेन साणत्तिकं, अत्तना विप्पकतपअयोसापननयेन चतुक्कपाचित्तियं, अञ्ञस्सत्थाय करणकारापनेसु अञ्ञेन कतं पटिलभित्वा परिभुञ्जने च दुक्कटं. वितानादिकरणे, उम्मत्तकादीनञ्च अनापत्ति. कोसियमिस्सकभावो, अत्तनो अत्थाय सन्थतस्स करणकारापनं, पटिलाभो चाति इमानेत्थ तीणि अङ्गानि. समुट्ठानादीनि धोवापनसिक्खापदे वुत्तनयेनेवाति.

कोसियसिक्खापदवण्णना निट्ठिता.

२. सुद्धकाळकसिक्खापदवण्णना

दुतिये सुद्धकाळकानन्ति सुद्धानं काळकानं अञ्ञेहि अमिस्सीकतानं. वेसालियं छब्बग्गिये आरब्भ तादिसं सन्थतं करणवत्थुस्मिं पञ्ञत्तं, सेसं पठमसदिसमेवाति.

सुद्धकाळकसिक्खापदवण्णना निट्ठिता.

३. द्वेभागसिक्खापदवण्णना

ततिये ¶ ¶ द्वे भागाति द्वे कोट्ठासा. आदातब्बाति गहेतब्बा. गोचरियानन्ति कपिलवण्णानं. अयं पनेत्थ विनिच्छयो – यत्तकेहि कत्तुकामो होति, तेसु तुलयित्वा द्वे कोट्ठासा काळकानं गहेतब्बा, एको ओदातानं, एको गोचरियानं. एकस्सापि काळकलोमस्स अतिरेकभावे निस्सग्गियं होति, ऊनकं वट्टति.

सावत्थियं छब्बग्गिये आरब्भ तादिसं सन्थतं करणवत्थुस्मिं पञ्ञत्तं, किरियाकिरियं, सेसं पठमसदिसमेवाति. इमानि पन तीणि निस्सज्जित्वा पटिलद्धानिपि परिभुञ्जितुं न वट्टन्ति.

द्वेभागसिक्खापदवण्णना निट्ठिता.

४. छब्बस्ससिक्खापदवण्णना

चतुत्थे ओरेन चे छन्नं वस्सानन्ति छन्नं वस्सानं ओरिमभागे, अन्तोति अत्थो. अञ्ञत्र भिक्खुसम्मुतियाति यं सङ्घो गिलानस्स भिक्खुनो सन्थतसम्मुतिं देति, तं ठपेत्वा अलद्धसम्मुतिकस्स छब्बस्सब्भन्तरे अञ्ञं सन्थतं करोन्तस्स निस्सग्गियं होति.

सावत्थियं ¶ सम्बहुले भिक्खू आरब्भ अनुवस्सं सन्थतं कारापनवत्थुस्मिं पञ्ञत्तं, ‘‘अञ्ञत्र भिक्खुसम्मुतिया’’ति अयमेत्थ अनुपञ्ञत्ति, सा येन लद्धा होति, तस्स याव रोगो न वूपसम्मति, वूपसन्तो वा पुन कुप्पति, ताव गतगतट्ठाने अनुवस्सम्पि कातुं वट्टति, अञ्ञस्सत्थाय कारेतुं, कतञ्च पटिलभित्वा परिभुञ्जितुम्पि वट्टति, सेसं पठमसदिसमेवाति.

छब्बस्ससिक्खापदवण्णना निट्ठिता.

५. निसीदनसिक्खापदवण्णना

पञ्चमे पुराणसन्थतं नाम यत्थ सकिम्पि निसिन्नो वा होति निपन्नो वा. समन्ताति एकपस्सतो वट्टं वा चतुरस्सं वा छिन्दित्वा गहितट्ठानं यथा ¶ विदत्थिमत्तं होति, एवं गहेतब्बं. सन्थरन्तेन पन एकदेसे वा सन्थरितब्बं, विजटेत्वा वा मिस्सकं कत्वा सन्थरितब्बं, एवं थिरतरं होति. अनादा चेति सति पुराणसन्थते अग्गहेत्वा. असति पन अग्गहेत्वापि वट्टति, अञ्ञस्सत्थाय कारेतुं, कतञ्च पटिलभित्वा परिभुञ्जितुम्पि वट्टति.

सावत्थियं सम्बहुले भिक्खू आरब्भ सन्थतविस्सज्जनवत्थुस्मिं पञ्ञत्तं, सेसं ततियसदिसमेवाति.

निसीदनसिक्खापदवण्णना निट्ठिता.

६. एळकलोमसिक्खापदवण्णना

छट्ठे ¶ अद्धानमग्गप्पटिपन्नस्साति अद्धानसङ्खातं दीघमग्गं पटिपन्नस्स, सब्बञ्चेतं वत्थुमत्तदीपनमेव, यत्थ कत्थचि पन धम्मेन लभित्वा गण्हतो दोसो नत्थि. तियोजनपरमन्ति गहितट्ठानतो तियोजनप्पमाणं देसं. सहत्थाति सहत्थेन, अत्तना हरितब्बानीति अत्थो. असन्ते हारकेति ¶ असन्तेयेव अञ्ञस्मिम्पि हारके. सचे पन अत्थि, तं गाहेतुं वट्टति. अत्तना पन अन्तमसो वाताबाधप्पटिकारत्थं सुत्तकेन अबन्धित्वा कण्णच्छिद्दे पक्खित्तानिपि आदाय तियोजनं एकं पादं अतिक्कामेन्तस्स दुक्कटं, दुतियपादातिक्कमे निस्सग्गियं पाचित्तियं.

सावत्थियं अञ्ञतरं भिक्खुं आरब्भ तियोजनातिक्कमनवत्थुस्मिं पञ्ञत्तं, असाधारणपञ्ञत्ति, अनाणत्तिकं, तिकपाचित्तियं, ऊनकतियोजने अतिरेकसञ्ञिनो वेमतिकस्स वा दुक्कटं. तियोजनं हरणपच्चाहरणे, वासाधिप्पायेन गन्त्वा ततो परं हरणे, अच्छिन्नं वा निस्सट्ठं वा पटिलभित्वा हरणे, अञ्ञं हरापने, अन्तमसो सुत्तकेनपि बद्धकतभण्डहरणे, उम्मत्तकादीनञ्च अनापत्ति. एळकलोमानं अकतभण्डता, पठमप्पटिलाभो, अत्तना आदाय वा अञ्ञस्स अजानन्तस्स याने पक्खिपित्वा वा तियोजनातिक्कमनं, आहरणपच्चाहरणं, अवासाधिप्पायताति इमानेत्थ पञ्च अङ्गानि. एळकलोमसमुट्ठानं ¶ , किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, तिचित्तं, तिवेदनन्ति.

एळकलोमसिक्खापदवण्णना निट्ठिता.

७. एळकलोमधोवापनसिक्खापदवण्णना

सत्तमे सक्केसु छब्बग्गिये आरब्भ एळकलोमधोवापनवत्थुस्मिं पञ्ञत्तं. तत्थ पुराणचीवरधोवापने वुत्तनयेनेव सब्बोपि विनिच्छयो वेदितब्बो.

एळकलोमधोवापनसिक्खापदवण्णना निट्ठिता.

८. जातरूपसिक्खापदवण्णना

अट्ठमे ¶ जातरूपरजतन्ति सुवण्णञ्चेव रूपियञ्च, अपिच कहापणो लोहमासकदारुमासकजतुमासकादयोपि ये वोहारं गच्छन्ति, सब्बे ते इध रजतन्त्वेव वुत्ता. उग्गण्हेय्य वाति अत्तनो अत्थाय दिय्यमानं वा यत्थकत्थचि ठितं वा निप्परिग्गहितं दिस्वा सयं गण्हेय्य वा. उग्गण्हापेय्य वाति तदेव अञ्ञेन गाहापेय्य वा. उपनिक्खित्तं वा सादियेय्याति ‘‘इदं अय्यस्स होतू’’ति एवं सम्मुखा वा, ‘‘असुकस्मिं नाम ठाने मम हिरञ्ञसुवण्णं, तं तुय्हं होतू’’ति एवं परम्मुखा ठितं वा केवलं वाचाय वा हत्थमुद्दाय वा ‘‘तुय्ह’’न्ति वत्वा परिच्चत्तं यो कायवाचाहि अप्पटिक्खिपित्वा चित्तेन अधिवासेय्य, अयं ‘‘सादियेय्या’’ति वुच्चति. सचे पन चित्तेन सादियति, गण्हितुकामो होति, कायेन वा वाचाय वा ‘‘नयिदं कप्पती’’ति पटिक्खिपति, कायवाचाहि अप्पटिक्खिपित्वा सुद्धचित्तो हुत्वा ‘‘नयिदं अम्हाकं कप्पती’’ति न सादियति, वट्टति. निस्सग्गियन्ति उग्गहणादीसु यंकिञ्चि करोन्तस्स ¶ अघनबद्धेसु वत्थूसु वत्थुगणनाय निस्सग्गियं पाचित्तियं. तं निस्सज्जन्तेन ‘‘अहं, भन्ते, रूपियं पटिग्गहेसिं, इदं मे, भन्ते, निस्सग्गियं, इमाहं सङ्घस्स निस्सज्जामी’’ति (पारा. ५८४) एवं सङ्घमज्झेयेव निस्सज्जितब्बं. सचे तत्थ कोचि गहट्ठो आगच्छति ¶ , ‘‘इदं जानाही’’ति वत्तब्बो. ‘‘इमिना किं आहरिय्यतू’’ति भणन्ते पन ‘‘इदं नामा’’ति अवत्वा ‘‘सप्पिआदीनि भिक्खूनं कप्पन्ती’’ति एवं कप्पियं आचिक्खितब्बं. सचे सो आहरति, रूपियप्पटिग्गाहकं ठपेत्वा सब्बेहि भाजेत्वा परिभुञ्जितब्बं. रूपियप्पटिग्गाहकस्स पन यं तप्पच्चया उप्पन्नं, तं अञ्ञेन लभित्वा दिय्यमानम्पि अन्तमसो ततो निब्बत्तरुक्खच्छायापि परिभुञ्जितुं न वट्टति. सचे पन सो किञ्चि आहरितुं न इच्छति, ‘‘इमं छट्टेही’’ति वत्तब्बो. सचे यत्थ कत्थचि निक्खिपति, गहेत्वा वा गच्छति, न वारेतब्बो. नो चे छट्टेति, पञ्चङ्गसमन्नागतो भिक्खु रूपियछट्टको सम्मन्नितब्बो. तेन अनिमित्तं कत्वाव गूथं विय छट्टेतब्बं. सचे निमित्तं करोति, दुक्कटं आपज्जति.

राजगहे उपनन्दं आरब्भ रूपियप्पटिग्गहणवत्थुस्मिं पञ्ञत्तं, साधारणपञ्ञत्ति, साणत्तिकं, तिकपाचित्तियं, अरूपिये रूपियसञ्ञिनो वेमतिकस्स वा, सङ्घचेतियादीनं अत्थाय गण्हन्तस्स, मुत्तामणिआदिप्पटिग्गहणे च दुक्कटं. रतनसिक्खापदनयेन निक्खिपन्तस्स, उम्मत्तकादीनञ्च अनापत्ति. जातरूपरजतभावो, अत्तुद्देसिकता, गहणादीसु अञ्ञतरभावोति ¶ इमानेत्थ तीणि अङ्गानि. समुट्ठानादीसु सिया किरियं गहणेन आपज्जनतो, सिया अकिरियं पटिक्खेपस्स अकरणतो, सेसं सञ्चरित्ते वुत्तनयमेवाति.

जातरूपसिक्खापदवण्णना निट्ठिता.

९. रूपियसंवोहारसिक्खापदवण्णना

नवमे नानप्पकारकन्ति कतादिवसेन अनेकविधं. रूपियसंवोहारन्ति जातरूपरजतपरिवत्तनं. पुरिमसिक्खापदेन हि निस्सग्गियवत्थुदुक्कटवत्थूनं पटिग्गहणं वारितं, इमिना परिवत्तनं. तस्मा दुक्कटवत्थुना दुक्कटवत्थुकप्पियवत्थूनि, कप्पियवत्थुना च दुक्कटवत्थुं परिवत्तेन्तस्स दुक्कटं. निस्सग्गियवत्थुना पन निस्सग्गियवत्थुं वा दुक्कटवत्थुं वा कप्पियवत्थुं वा, दुक्कटवत्थुकप्पियवत्थूहि च निस्सग्गियवत्थुं परिवत्तेन्तस्स निस्सग्गियं होति, तं पुरिमनयानुसारेनेव सङ्घमज्झे निस्सज्जितब्बं, निस्सट्ठवत्थुस्मिञ्च तत्थ वुत्तनयेनेव पटिपज्जितब्बं.

सावत्थियं ¶ छब्बग्गिये आरब्भ रूपियसंवोहारवत्थुस्मिं पञ्ञत्तं, साधारणपञ्ञत्ति, अनाणत्तिकं, यं अत्तनो धनेन परिवत्तेति, तस्स वा धनस्स वा रूपियभावो चेव, परिवत्तनञ्चाति इमानेत्थ ¶ द्वे अङ्गानि. किरियं, सेसं अनन्तरसिक्खापदे वुत्तनयमेवाति.

रूपियसंवोहारसिक्खापदवण्णना निट्ठिता.

१०. कयविक्कयसिक्खापदवण्णना

दसमे नानप्पकारकन्ति चीवरादीनं कप्पियभण्डानं वसेन अनेकविधं. कयविक्कयन्ति कयञ्चेव विक्कयञ्च. ‘‘इमिना इमं देहि, इमं आहर, परिवत्तेहि, चेतापेही’’ति इमिना हि नयेन परस्स कप्पियभण्डं गण्हन्तो कयं समापज्जति, अत्तनो कप्पियभण्डं देन्तो विक्कयं समापज्जति. तस्मा ठपेत्वा पञ्च सहधम्मिके यं एवं अत्तनो कप्पियभण्डं दत्वा मातु सन्तकम्पि कप्पियभण्डं गण्हाति, तं निस्सग्गियं होति. वुत्तलक्खणवसेन सङ्घगणपुग्गलेसु यस्स कस्सचि निस्सज्जितब्बं, ‘‘इमं भुञ्जित्वा वा गहेत्वा वा इदं नाम आहर ¶ वा करोहि वा’’ति रजनादिं आहरापेत्वा वा धमकरणादिपरिक्खारं भूमिसोधनादिञ्च नवकम्मं कारेत्वा वा सन्तं वत्थु निस्सज्जितब्बं, असन्ते पाचित्तियं देसेतब्बमेव.

सावत्थियं उपनन्दं आरब्भ कयविक्कयवत्थुस्मिं पञ्ञत्तं, ‘‘इदं किं अग्घती’’ति एवं अग्घं पुच्छन्तस्स, यस्स हत्थतो भण्डं गण्हितुकामो होति, तं ठपेत्वा अञ्ञं अन्तमसो तस्सेव पुत्तभातुकम्पि कप्पियकारकं कत्वा ‘‘इमिना इदं नाम गहेत्वा देही’’ति आचिक्खन्तस्स, ‘‘इदं अम्हाकं अत्थि, अम्हाकञ्च इमिना च इमिना च अत्थो’’ति एवं वत्वा अत्तनो धनेन लद्धं गण्हन्तस्स, सहधम्मिकेहि सद्धिं कयविक्कयं करोन्तस्स, उम्मत्तकादीनञ्च अनापत्ति. यं अत्तनो धनेन परिवत्तेति, येन च परिवत्तेति, तेसं कप्पियवत्थुता, असहधम्मिकता, कयविक्कयापज्जनञ्चाति इमानेत्थ तीणि अङ्गानि. सेसं रूपियसंवोहारे वुत्तनयमेवाति.

कयविक्कयसिक्खापदवण्णना निट्ठिता.

एळकलोमवग्गो दुतियो.

३. पत्तवग्गो

१. पत्तसिक्खापदवण्णना

पत्तवग्गस्स ¶ पठमे अतिरेकपत्तोति अनधिट्ठितो च अविकप्पितो च, सो च खो उक्कट्ठमज्झिमोमकानं अञ्ञतरो पमाणयुत्तोव, तस्स पमाणं ‘‘अड्ढाळ्हकोदनं गण्हाती’’तिआदिना (पारा ६०२) नयेन पाळियं वुत्तं. तत्रायं विनिच्छयो – अनुपहतपुराणसालितण्डुलानं सुकोट्टितपरिसुद्धानं द्वे मगधनाळियो गहेत्वा तेहि तण्डुलेहि अनुत्तण्डुलमकिलिन्नमपिण्डिकं सुविसदं कुन्दमकुळरासिसदिसं अवस्सावितोदनं पचित्वा निरवसेसं पत्ते पक्खिपित्वा तस्स ओदनस्स चतुत्थभागप्पमाणो नातिघनो नातितनुको हत्थहारियो सब्बसम्भारसङ्खतो मुग्गसूपो पक्खिपितब्बो, ततो आलोपस्स अनुरूपं यावचरिमालोपप्पहोनकं मच्छमंसादिब्यञ्जनं पक्खिपितब्बं, सप्पितेलतक्करसकञ्जियादीनि ¶ पन ¶ गणनूपगानि न होन्ति. तानि हि ओदनगतिकानेव, नेव हापेतुं, न वड्ढेतुं सक्कोन्ति, एवमेतं सब्बम्पि पक्खित्तं सचे पत्तस्स मुखवट्टिया हेट्ठिमराजिसमं तिट्ठति, सुत्तेन वा हीरेन वा छिन्दन्तस्स सुत्तस्स वा हीरस्स वा हेट्ठिमन्तं फुसति, अयं उक्कट्ठो नाम पत्तो. सचे तं राजिं अतिक्कम्म थूपीकतं तिट्ठति, अयं उक्कट्ठोमको नाम पत्तो. सचे तं राजिं न सम्पापुणाति, अन्तोगधमेव होति, अयं उक्कट्ठुक्कट्ठो नाम पत्तो. उक्कट्ठतो उपड्ढप्पमाणो मज्झिमो. मज्झिमपत्ततो उपड्ढप्पमाणो ओमको. तेसम्पि वुत्तनयेनेव भेदो वेदितब्बो. इच्चेतेसु नवसु उक्कट्ठुक्कट्ठो च ओमकोमको चाति द्वे अपत्ता, सेसा सत्त पत्ता पमाणयुत्ता नाम, अयमेत्थसङ्खेपो, वित्थारो पन समन्तपासादिकायं (पारा. अट्ठ. २.५९८ आदयो) वुत्तो, तस्मा एवं पमाणयुत्तं समणसारुप्पेन पक्कं अयोपत्तं वा मत्तिकापत्तं वा लभित्वा पुराणपत्तं पच्चुद्धरित्वा अन्तोदसाहे अधिट्ठातब्बो. सचे पनस्स मूलतो काकणिकमत्तम्पि दातब्बं अवसिट्ठं होति, अधिट्ठानुपगो न होति, अप्पच्चुद्धरन्तेन विकप्पेतब्बो. तत्थ पच्चुद्धरणाधिट्ठानलक्खणं चीवरवग्गे वुत्तनयेनेव वेदितब्बं, विकप्पनलक्खणं परतो वक्खाम. सचे पन कोचि अपत्तको भिक्खु दस पत्ते लभित्वा सब्बे अत्तनाव परिभुञ्जितुकामो होति, एकं पत्तं अधिट्ठाय पुन दिवसे तं पच्चुद्धरित्वा अञ्ञो अधिट्ठातब्बो, एतेनुपायेन वस्ससतम्पि ¶ परिहरितुं सक्का. यो पनस्स पत्तो मुखवट्टितो हेट्ठा द्वङ्गुलमत्तोकासतो पट्ठाय यत्थकत्थचि कङ्गुसित्थनिक्खमनमत्तेन छिद्देन छिद्दो होति, सो अधिट्ठानुपगो न होति. पुन छिद्दे पाकतिके कते अधिट्ठातब्बो, सेसं अधिट्ठानविजहनं तिचीवरे वुत्तनयमेव.

सावत्थियं छब्बग्गिये आरब्भ अतिरेकपत्तधारणवत्थुस्मिं पञ्ञत्तं, असाधारणपञ्ञत्ति, सेसवण्णनाक्कमो चीवरवग्गस्स पठमसिक्खापदे वुत्तनयेनेव वेदितब्बोति.

पत्तसिक्खापदवण्णना निट्ठिता.

२. ऊनपञ्चबन्धनसिक्खापदवण्णना

दुतिये ऊनानि पञ्च बन्धनानि अस्साति ऊनपञ्चबन्धनो, नास्स पञ्च बन्धनानि पूरेन्तीति अत्थो, तेन ऊनपञ्चबन्धनेन, इत्थम्भूतस्स लक्खणे करणवचनं. तत्थ यस्मा अबन्धनस्सापि पञ्च बन्धनानि न पूरेन्ति सब्बसो नत्थिताय, तेनस्स पदभाजने ‘‘ऊनपञ्चबन्धनो नाम पत्तो अबन्धनो वा एकबन्धनो वा’’तिआदि (पारा. ६१३) वुत्तं. ‘‘ऊनपञ्चबन्धनेना’’ति ¶ च वुत्तत्ता यस्स पञ्चबन्धनो पत्तो होति पञ्चबन्धनोकासो वा, तस्स सो अपत्तो, तस्मा अञ्ञं विञ्ञापेतुं वट्टति. यस्मिं पन पत्ते मुखवट्टितो हेट्ठा भट्ठा द्वङ्गुलप्पमाणा एकापि राजि होति, तं ¶ तस्सा राजिया हेट्ठिमपरियन्ते पत्तवेधकेन विज्झित्वा पचित्वा सुत्तरज्जुकमकचिरज्जुकादीहि वा तिपुसुत्तकेन वा बन्धित्वा तं बन्धनं आमिसस्स अलग्गनत्थं तिपुपट्टकेन वा केनचि बद्धसिलेसादिना वा पटिच्छादेतब्बं, सो च पत्तो अधिट्ठहित्वा परिभुञ्जितब्बो, सुखुमं वा छिद्दं कत्वा बन्धितब्बो, फाणितं झापेत्वा पासाणचुण्णेन बन्धितुम्पि वट्टति. यस्स पन द्वे राजियो वा एकायेव वा चतुरङ्गुला, तस्स द्वे बन्धनानि दातब्बानि. यस्स तिस्सो वा एकायेव वा छळङ्गुला, तस्स तीणि. यस्स चतस्सो वा एकायेव वा अट्ठङ्गुला, तस्स चत्तारि. यस्स पञ्च वा एकायेव वा दसङ्गुला, सो बद्धोपि अबद्धोपि अपत्तोयेव, अञ्ञो विञ्ञापेतब्बो, एस ताव मत्तिकापत्ते विनिच्छयो.

अयोपत्ते ¶ पन सचेपि पञ्च वा अतिरेकानि वा छिद्दानि होन्ति, तानि चे अयचुण्णेन वा आणिया वा लोहमण्डलेन वा बद्धानि मट्ठानि होन्ति, स्वेव परिभुञ्जितब्बो, अञ्ञो न विञ्ञापेतब्बो. अथ पन एकम्पि छिद्दं महन्तं होति, लोहमण्डलेन बद्धम्पि मट्ठं न होति, पत्ते आमिसं लग्गति, अकप्पियो होति अयं पत्तो, अञ्ञो विञ्ञापेतब्बो. यो पन एवं पत्तसङ्खेपगते वा अयोपत्ते, ऊनपञ्चबन्धने वा मत्तिकापत्ते सति अञ्ञं विञ्ञापेति, पयोगे दुक्कटं, पटिलाभेन निस्सग्गियो होति, निस्सज्जितब्बो. निस्सज्जन्तेन सङ्घमज्झे एव निस्सज्जितब्बो, तेन वुत्तं ‘‘भिक्खुपरिसाय निस्सज्जितब्बो’’ति. यो च तस्सा भिक्खुपरिसायातिएत्थ तेहि भिक्खूहि पकतिया एव अत्तनो अत्तनो अधिट्ठितं पत्तं गहेत्वा सन्निपतितब्बं, ततो सम्मतेन पत्तग्गाहापकेन पत्तस्स विज्जमानगुणं वत्वा ‘‘भन्ते, इमं गण्हथा’’ति थेरो वत्तब्बो. सचे थेरस्स सो पत्तो न रुच्चति, अप्पिच्छताय वा न गण्हाति, वट्टति. तस्मिं पन अनुकम्पाय अगण्हन्तस्स दुक्कटं. सचे पन गण्हाति, थेरस्स पत्तं दुतियत्थेरं गाहापेत्वा एतेनेव उपायेन याव सङ्घनवका गाहापेतब्बो, तेन परिच्चत्तपत्तो पन पत्तपरियन्तो नाम, सो तस्स भिक्खुनो पदातब्बो. तेनापि सो यथा विञ्ञापेत्वा गहितपत्तो, एवमेव सक्कच्चं परिभुञ्जितब्बो. सचे पन तं जिगुच्छन्तो अदेसे वा निक्खिपति, अपरिभोगेन वा परिभुञ्जति, विस्सज्जेति वा, दुक्कटं आपज्जति.

सक्केसु छब्बग्गिये आरब्भ बहू पत्ते विञ्ञापनवत्थुस्मिं पञ्ञत्तं, साधारणपञ्ञत्ति, अनाणत्तिकं ¶ , अबन्धनेन अबन्धनं, एकबन्धनं, दुबन्धनं, तिबन्धनं, चतुब्बन्धनं, अबन्धनोकासं, एकद्वितिचतुब्बन्धनोकासं चेतापेति, एवं एकेकेन पत्तेन दसधा दसविधं पत्तं. चेतापनवसेन पन एकं निस्सग्गियपाचित्तियसतं होति. नट्ठपत्तस्स, भिन्नपत्तस्स, अत्तनो ञातकप्पवारिते, अञ्ञस्स च ञातकप्पवारिते, तस्सेवत्थाय विञ्ञापेन्तस्स, अत्तनो धनेन गण्हतो, उम्मत्तकादीनञ्च अनापत्ति. अधिट्ठानुपगपत्तस्स ऊनपञ्चबन्धनता, अत्तुद्देसिकता, अकतविञ्ञत्ति ¶ , ताय च पटिलाभोति इमानेत्थ चत्तारि अङ्गानि. समुट्ठानादीनि धोवापनसिक्खापदे वुत्तनयानेवाति.

ऊनपञ्चबन्धनसिक्खापदवण्णना निट्ठिता.

३. भेसज्जसिक्खापदवण्णना

ततिये ¶ पटिसायनीयानीति पटिसायितब्बानि, परिभुञ्जितब्बानीति अत्थो. एतेन सयं उग्गहेत्वा निक्खित्तानं सत्ताहातिक्कमेपि अनापत्तिं दस्सेति, तानि हि पटिसायितुं न वट्टन्ति. भेसज्जानीति भेसज्जकिच्चं करोन्तु वा, मा वा, एवं लद्धवोहारानि. सप्पि नाम गवादीनं सप्पि, येसं मंसं कप्पति, तेसं सप्पि. तथा नवनीतं. तेलं नाम तिलसासपमधूकएरण्डकवसादीहि निब्बत्तितं. मधु नाम मक्खिकामधुमेव. फाणितं नाम उच्छुरसं उपादाय पन अपक्का वा अवत्थुकपक्का वा सब्बापि उच्छुविकति ‘‘फाणित’’न्ति वेदितब्बं. तानि पटिग्गहेत्वाति तानि भेसज्जानि पटिग्गहेत्वा, न तेसं वत्थूनि. एतेन ठपेत्वा वसातेलं यानेत्थ यावकालिकवत्थुकानि, तेसं वत्थूनि पटिग्गहेत्वा कतानि सप्पिआदीनि सत्ताहं अतिक्कामयतोपि अनापत्तिं दस्सेति. वसातेलं पन काले पटिग्गहितं काले निपक्कं काले संसट्ठं तेलपरिभोगेन परिभुञ्जितुं अनुञ्ञातं, तस्मा ठपेत्वा मनुस्सवसं अञ्ञं यंकञ्चि वसं पुरेभत्तं पटिग्गहेत्वा सामं पचित्वा निब्बत्तिततेलम्पि सत्ताहं निरामिसपरिभोगेन वट्टति. अनुपसम्पन्नेन पचित्वा दिन्नं पन तदहुपुरेभत्तं सामिसम्पि वट्टति, अञ्ञेसं यावकालिकवत्थूनं वत्थुं पचितुं न वट्टतियेव. निब्बत्तितसप्पि वा नवनीतं वा पचितुं वट्टति, तं पन तदहुपुरेभत्तम्पि सामिसं परिभुञ्जितुं न वट्टति. पुरेभत्तं पटिग्गहितखीरादितो अनुपसम्पन्नेन पचित्वा कतसप्पिआदीनि पन तदहुपुरेभत्तं सामिसानिपि वट्टन्ति, पच्छाभत्ततो पट्ठाय अनज्झोहरणीयानि, सत्ताहातिक्कमेपि अनापत्ति. सन्निधिकारकं परिभुञ्जितब्बानीति सन्निधिं कत्वा निदहित्वा पुरेभत्तं पटिग्गहितानि तदहुपुरेभत्तं सामिसपरिभोगेनापि वट्टन्ति, पच्छाभत्ततो ¶ पट्ठाय पन तानि च, पच्छाभत्तं पटिग्गहितानि च सत्ताहं निरामिसपरिभोगेन परिभुञ्जितब्बानीति अत्थो. ‘‘परिभुञ्जितब्बानी’’ति च वचनतो अन्तोसत्ताहे अब्भञ्जनादीनं अत्थाय अधिट्ठहित्वा ठपितेसु अनापत्ति, यावजीविकानि सासपमधूकएरण्डकअट्ठीनि तेलकरणत्थं पटिग्गहेत्वा तदहेव कततेलं सत्ताहकालिकं, दुतियदिवसे कतं छाहं वट्टति, ततियदिवसे कतं पञ्चाहं, चतुत्थपञ्चमछट्ठसत्तमदिवसे कतं तदहेव वट्टति. सचे याव अरुणस्स उग्गमना ¶ तिट्ठति, निस्सग्गियं होति, अट्ठमदिवसे कतं अनज्झोहरणीयं, अनिस्सग्गियत्ता पन बाहिरपरिभोगेन वट्टति. सचेपि न करोति, तेलत्थाय पटिग्गहितसासपादीनं पन पाळियं अनागतसप्पिआदीनञ्च ¶ सत्ताहातिक्कमे दुक्कटं आपज्जति. सीतुदकेन कतमधूकपुप्फफाणितं पन फाणितगतिकमेव, अम्बफाणितादीनि यावकालिकानि. यं पनेत्थ सत्ताहकालिकं, तं निस्सट्ठं पटिलभित्वापि अरुआदीनि वा मक्खेतुं, अज्झोहरितुं वा न वट्टति. पदीपे काळवण्णे वा उपनेतब्बं, अञ्ञस्स भिक्खुनो कायिकपरिभोगं वट्टति. यं पन निरपेक्खो परिच्चजित्वा पुन लभति, तं अज्झोहरितुम्पि वट्टति. विसुं ठपितसप्पिआदीसु, एकभाजने वा अमिस्सितेसु वत्थुगणनाय आपत्तियो.

सावत्थियं सम्बहुले भिक्खू आरब्भ सत्ताहं अतिक्कमनवत्थुस्मिं पञ्ञत्तं, सेसं चीवरवग्गस्स पठमसिक्खापदे वुत्तनयेनेव वेदितब्बन्ति.

भेसज्जसिक्खापदवण्णना निट्ठिता.

४. वस्सिकसाटिकसिक्खापदवण्णना

चतुत्थे मासो सेसो गिम्हानन्ति चतुन्नं गिम्हमासानं एको पच्छिममासो सेसो. परियेसितब्बन्ति गिम्हानं पच्छिममासस्स पठमदिवसतो पट्ठाय याव कत्तिकमासस्स पच्छिमदिवसो, ताव ‘‘कालो वस्सिकसाटिकाया’’तिआदिना सतुप्पादकरणेन, सङ्घस्स पवारितट्ठानतो, अत्तनो ञातकप्पवारितट्ठानतो पन ‘‘देथ मे वस्सिकसाटिकचीवर’’न्तिआदिकाय विञ्ञत्तियापि परियेसितब्बं. अञ्ञातकअप्पवारितट्ठाने सतुप्पादं करोन्तस्स वत्तभेदे दुक्कटं, यथा वा तथा वा ‘‘देथ मे’’तिआदिवचनेन विञ्ञापेन्तस्स अञ्ञातकविञ्ञत्तिसिक्खापदेन निस्सग्गियं पाचित्तियं. कत्वा निवासेतब्बन्ति गिम्हानं पच्छिमद्धमासस्स पठमदिवसतो पट्ठाय याव कत्तिकमासस्स पच्छिमदिवसो, ताव सूचिकम्मनिट्ठानेन ¶ सकिम्पि वण्णभेदमत्तरजनेन कप्पबिन्दुकरणेन च कत्वा परिदहितब्बा. एत्तावता गिम्हानं पच्छिमो मासो परियेसनक्खेत्तं ¶ , पच्छिमो अद्धमासो करणनिवासनक्खेत्तम्पि, वस्सानस्स चतूसु मासेसु सब्बम्पि तं वट्टतीति अयमत्थो दस्सितो होति. यो चायं गिम्हानं पच्छिमो मासो अनुञ्ञातो, एत्थ कतपरियेसितम्पि वस्सिकसाटिकं अधिट्ठातुं न वट्टति. सचे तस्मिं मासे अतिक्कन्ते वस्सं उक्कड्ढियति, पुन मासपरिहारं लभति, धोवित्वा पन निक्खिपित्वा वस्सूपनायिकदिवसे अधिट्ठातब्बा. सचे सतिसम्मोसेन वा अप्पहोनकभावेन वा अकता होति. ते च द्वे मासे वस्सानस्स चतुमासन्ति छ मासे परिहारं लभति. सचे पन कत्तिकमासे कथिनं अत्थरियति, अपरेपि चत्तारो मासे लभति, एवं दस मासा होन्ति. ततो परम्पि सतिया पच्चासाय तं मूलचीवरं कत्वा ठपेन्तस्स एकमासन्ति एवं एकादस मासे परिहारं लभति, इतो परं एकाहम्पि न लभति.

ओरेन चे मासो ¶ सेसो गिम्हानन्ति गिम्हानं पच्छिममासस्स ओरिमभागे याव हेमन्तस्स पठमदिवसो, तावाति अत्थो. परियेसेय्याति एतेसु सत्तसु पिट्ठिसमयमासेसु अञ्ञातकअप्पवारितट्ठानतो सतुप्पादकरणेन परियेसन्तस्स निस्सग्गियं पाचित्तियं, विञ्ञापेन्तस्स अञ्ञातकविञ्ञत्तिसिक्खापदेन निस्सग्गियं पाचित्तियं, ञातकप्पवारिते विञ्ञापेन्तस्स तेन सिक्खापदेन अनापत्ति, सतुप्पादं करोन्तस्स इमिना सिक्खापदेन आपत्ति. ओरेनद्धमासो सेसो गिम्हानन्ति गिम्हानस्स पच्छिमद्धमासतो ओरिमभागे एकस्मिं अद्धमासे. कत्वा निवासेय्याति एत्थन्तरे धम्मेन उप्पन्नम्पि कत्वा निवासेन्तस्स निस्सग्गियं होति.

सावत्थियं छब्बग्गिये भिक्खू आरब्भ वस्सिकसाटिकपरियेसनवत्थुस्मिं पञ्ञत्तं, असाधारणपञ्ञत्ति, अनाणत्तिकं, तिकपाचित्तियं, ऊनकमासद्धमासेसु अतिरेकसञ्ञिनो वेमतिकस्स वा दुक्कटं, तथा सतिया वस्सिकसाटिकाय नग्गस्स कायं ओवस्सापयतो. पोक्खरणियादीसु पन न्हायन्तस्स वा अच्छिन्नचीवरस्स वा नट्ठचीवरस्स वा ‘‘अनिवत्थं चोरा हरन्ती’’ति एवं आपदासु वा निवासयतो उम्मत्तकादीनञ्च अनापत्ति. एत्थ च वस्सिकसाटिकाय अत्तुद्देसिकता, असमये परियेसनता, ताय च पटिलाभोति इमानि ताव परियेसनापत्तिया तीणि अङ्गानि ¶ . सचीवरता, आपदाभावो, वस्सिकसाटिकाय सकभावो, असमये निवासनन्ति इमानि निवासनापत्तिया चत्तारि अङ्गानि. समुट्ठानादीनि धोवापनसिक्खापदे वुत्तनयानेवाति.

वस्सिकसाटिकसिक्खापदवण्णना निट्ठिता.

५. चीवरअच्छिन्दनसिक्खापदवण्णना

पञ्चमे ¶ सामं चीवरं दत्वाति वेय्यावच्चादीनि पच्चासिसमानो सयमेव दत्वा. अच्छिन्देय्याति वेय्यावच्चादीनि अकरोन्तं दिस्वा सकसञ्ञाय अच्छिन्दन्तस्स वत्थुगणनाय आपत्तियो. अच्छिन्दापेय्यातिएत्थ पन ‘‘अच्छिन्दा’’ति आणत्तिया दुक्कटं, अच्छिन्देसु यत्तकानि आणत्तानि, तेसं गणनाय आपत्तियो.

सावत्थियं उपनन्दं आरब्भ चीवरअच्छिन्दनवत्थुस्मिं पञ्ञत्तं, साधारणपञ्ञत्ति, साणत्तिकं, तिकपाचित्तियं. अनुपसम्पन्ने उपसम्पन्नसञ्ञिनो, वेमतिकस्स, अनुपसम्पन्नसञ्ञिनो वा, उपसम्पन्नस्सापि विकप्पनुपगपच्छिमचीवरं ठपेत्वा अञ्ञं परिक्खारं, अनुपसम्पन्नस्स च यंकिञ्चि अच्छिन्दतो वा दुक्कटं. तेन तुट्ठेन वा कुपितेन वा दिन्नं पन तस्स विस्सासं वा गण्हन्तस्स उम्मत्तकादीनञ्च अनापत्ति. विकप्पनुपगपच्छिमचीवरता, सामं दिन्नता, सकसञ्ञिता, उपसम्पन्नता, कोधवसेन अच्छिन्दनं वा अच्छिन्दापनं वाति इमानेत्थ पञ्च अङ्गानि. समुट्ठानादीनि अदिन्नादानसदिसानि अञ्ञत्र वेदनाय. वेदना पन इध दुक्खवेदनायेवाति.

चीवरअच्छिन्दनसिक्खापदवण्णना निट्ठिता.

६. सुत्तविञ्ञत्तिसिक्खापदवण्णना

छट्ठे ¶ सुत्तन्ति छब्बिधं खोमसुत्तादिं वा तेसं अनुलोमं वा. विञ्ञापेत्वाति चीवरत्थाय याचित्वा. वायापेय्याति ‘‘चीवरं मे, आवुसो, वायथा’’ति अकप्पियाय विञ्ञत्तिया वायापेय्य. निस्सग्गियन्ति एवं ¶ वायापेन्तस्स यो तन्तवायो चीवरवायनत्थं तुरिवेमसज्जनादिके पयोगे करोति, तस्स सब्बप्पयोगेसु दुक्कटं, पटिलाभेन निस्सग्गियं होति.

राजगहे छब्बग्गिये भिक्खू आरब्भ चीवरवायापनवत्थुस्मिं पञ्ञत्तं, साधारणपञ्ञत्ति, अनाणत्तिकं, विञ्ञापितसुत्तं विञ्ञापिततन्तवायेन वायापेन्तस्स दीघतो विदत्थिमत्ते तिरियञ्च हत्थमत्ते वीते निस्सग्गियं पाचित्तियं. इति याव चीवरं वड्ढति, ताव इमिना पमाणेन आपत्तियो वड्ढन्ति. तेनेव पन अविञ्ञत्तिया लद्धसुत्तं वायापेन्तस्स यथा पुब्बे निस्सग्गियं ¶ , एवं इध दुक्कटं. तेनेव विञ्ञत्तञ्च अविञ्ञत्तञ्च वायापेन्तस्स सचे वुत्तप्पमाणेन केदारबद्धं विय चीवरं होति, अकप्पियसुत्तमये परिच्छेदे पाचित्तियं, इतरस्मिं तथेव दुक्कटं. ततो चे ऊनतरा परिच्छेदा, सब्बपरिच्छेदेसु दुक्कटानेव. अथ एकन्तरिकेन वा सुत्तेन दीघतो वा कप्पियं तिरियं अकप्पियं कत्वा वीतं होति, पुब्बे वुत्तप्पमाणगणनाय दुक्कटानि. एतेनेव उपायेन कप्पियतन्तवायेन अकप्पियसुत्ते, कप्पियाकप्पियेहि तन्तवायेहि सुत्तेपि कप्पिये अकप्पिये कप्पियाकप्पिये च आपत्तिभेदो वेदितब्बो. तिकपाचित्तियं, अवायापिते वायापितसञ्ञिनो वेमतिकस्स वा दुक्कटं. चीवरसिब्बनआयोगकायबन्धनअंसबद्धकपत्तत्थविकपरिस्सावनानं अत्थाय सुत्तं विञ्ञापेन्तस्स, ञातकप्पवारितेहि कप्पियसुत्तं वायापेन्तस्स, अञ्ञस्सत्थाय, अत्तनो धनेन, उम्मत्तकादीनञ्च अनापत्ति, चीवरत्थाय विञ्ञापितसुत्तं, अत्तुद्देसिकता, अकप्पियतन्तवायेन अकप्पियविञ्ञत्तिया वायापनन्ति इमानेत्थ तीणि अङ्गानि. समुट्ठानादीनि धोवापनसिक्खापदे वुत्तनयानेवाति.

सुत्तविञ्ञत्तिसिक्खापदवण्णना निट्ठिता.

७. महापेसकारसिक्खापदवण्णना

सत्तमे तत्र चे सो भिक्खूति यत्र गामे वा निगमे वा तन्तवाया, तत्र. पुब्बे अप्पवारितोति चीवरसामिकेहि अप्पवारितो हुत्वा ¶ . विकप्पं आपज्जेय्याति विसिट्ठकप्पं अधिकविधानं आपज्जेय्य. इदानि येनाकारेन विकप्पं आपन्नो होति, तं दस्सेतुं इदं खो, आवुसोतिआदि वुत्तं. तत्थ आयतन्ति दीघं. वित्थतन्ति पुथुलं. अप्पितन्ति घनं. सुवीतन्ति सुट्ठु वीतं, सब्बट्ठानेसु समं कत्वा वीतं. सुप्पवायितन्ति सुट्ठु पवायितं, सब्बट्ठानेसु समं कत्वा तन्ते पसारितं. सुविलेखितन्ति लेखनिया सुट्ठु विलेखितं. सुवितच्छितन्ति कोच्छेन ¶ सुट्ठु वितच्छितं, सुट्ठु निद्धोतन्ति अत्थो. पिण्डपातमत्तम्पीति एत्थ च न भिक्खुनो पिण्डपातदानमत्तेन तं निस्सग्गियं होति, सचे पन ते तस्स वचनेन चीवरसामिकानं हत्थतो सुत्तं गहेत्वा ईसकम्पि आयतं वा वित्थतं वा अप्पितं वा करोन्ति, अथ तेसं पयोगे भिक्खुनो दुक्कटं, पटिलाभेन निस्सग्गियं होति.

सावत्थियं उपनन्दं आरब्भ चीवरे विकप्पं आपज्जनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, ञातके अञ्ञातकसञ्ञिनो वेमतिकस्स वा दुक्कटं. ञातकप्पवारितानं तन्तवायेहि, अञ्ञस्स वा अत्थाय, अत्तनो वा धनेन, महग्घं वायापेतुकामं ¶ अप्पग्घं वायापेन्तस्स, उम्मत्तकादीनञ्च अनापत्ति. अञ्ञातकअप्पवारितानं तन्तवाये उपसङ्कमित्वा विकप्पमापज्जनता, चीवरस्स अत्तुद्देसिकता, तस्स वचनेन सुत्तवड्ढनं, चीवरप्पटिलाभोति इमानेत्थ चत्तारि अङ्गानि. समुट्ठानादीनि धोवापनसिक्खापदे वुत्तनयानेवाति.

महापेसकारसिक्खापदवण्णना निट्ठिता.

८. अच्चेकचीवरसिक्खापदवण्णना

अट्ठमे दसाहानागतन्ति दस अहानि दसाहं, तेन दसाहेन अनागता दसाहानागता, दसाहेन असम्पत्ताति अत्थो, तं दसाहानागतं, अच्चन्तसंयोगवसेन भुम्मत्थे उपयोगवचनं. कत्तिकतेमासिकपुण्णमन्ति पठमकत्तिकपुण्णमं, इधापि पठमपदस्स अनुपयोगता पुरिमनयेनेव भुम्मत्थे उपयोगवचनं. इदं वुत्तं होति – यतो पट्ठाय पठमप्पवारणा ‘‘दसाहानागता’’ति वुच्चति, सचेपि तानि दिवसानि अच्चन्तमेव भिक्खुनो अच्चेकचीवरं उप्पज्जेय्य, ‘‘अच्चेकं इद’’न्ति जानमानेन भिक्खुना ¶ सब्बम्पि पटिग्गहेतब्बन्ति. तेन पवारणामासस्स जुण्हपक्खपञ्चमितो पट्ठाय उप्पन्नस्स चीवरस्स निधानकालो दस्सितो होति. कामञ्चेस ‘‘दसाहपरमं अतिरेकचीवरं धारेतब्ब’’न्तिइमिनाव सिद्धो, अट्ठुप्पत्तिवसेन पन अपुब्बं विय अत्थं दस्सेत्वा सिक्खापदं ठपितं. अच्चेकचीवरन्ति गमिकगिलानगब्भिनिअभिनवुप्पन्नसद्धानं पुग्गलानं अञ्ञतरेन ‘‘वस्सावासिकं दस्सामी’’ति एवं आरोचेत्वा दिन्नं. सचे तं पुरे पवारणाय विभजितं, येन गहितं, तेन वस्सच्छेदो न कातब्बो, करोति चे, तं चीवरं सङ्घिकं होति. याव चीवरकालसमयन्ति अनत्थते कथिने याव वस्सानस्स पच्छिमो मासो, अत्थते कथिने याव पञ्च मासा, ताव निक्खिपितब्बं.

सावत्थियं सम्बहुले भिक्खू आरब्भ अच्चेकचीवरस्स चीवरकालसमयं अतिक्कमनवत्थुस्मिं पञ्ञत्तं, सेसमेत्थ चीवरवग्गस्स पठमसिक्खापदे वुत्तनयेनेव वेदितब्बन्ति.

अच्चेकचीवरसिक्खापदवण्णना निट्ठिता.

९. सासङ्कसिक्खापदवण्णना

नवमे ¶ उपवस्सं खो पनाति एत्थ उपवस्सन्ति उपवस्स, उपवसित्वाति वुत्तं होति, उपसम्पज्जन्तिआदीसु ¶ (विभ. ५७०) विय हेत्थ अनुनासिको दट्ठब्बो, वस्सं उपगन्त्वा वसित्वा चाति अत्थो. इमस्स च पदस्स ‘‘तथारूपेसु भिक्खु सेनासनेसु विहरन्तो’’तिइमिना सम्बन्धो, इदं वुत्तं होति – वस्सं उपगन्त्वा वसित्वा च ततो परं पच्छिमकत्तिकपुण्णमपरियोसानकालं यानि खो पन तानि आरञ्ञकानि…पे… अन्तरघरे निक्खिपेय्याति. तत्थ आरञ्ञकानीति सब्बपच्छिमानि आरोपितेन आचरियधनुना गामस्स इन्दखीलतो पट्ठाय पञ्चधनुसतप्पमाणे पदेसे कतसेनासनानि. सचे पन अपरिक्खित्तो गामो होति, परिक्खेपारहट्ठानतो पट्ठाय मिनेतब्बं. सचे विहारस्स परिक्खेपो वा अपरिक्खित्तस्स यं गामतो सब्बपठमं सेनासनं वा चेतियं वा बोधि वा धुवसन्निपातट्ठानं वा याव ¶ , तं ताव पकतिमग्गेन मिनेतब्बं, अञ्ञं मग्गं कातुं, अमग्गेन वा मिनेतुं न वट्टति. सासङ्कसम्मतानीति चोरादीनं निविट्ठोकासादिदस्सनेन ‘‘सासङ्कानी’’ति सम्मतानि, एवं सञ्ञातानीति अत्थो. सह पटिभयेन सप्पटिभयानि, चोरेहि मनुस्सानं हतविलुत्ताकोटितभावदस्सनतो सन्निहितबलवभयानीति अत्थो.

अन्तरघरे निक्खिपेय्याति आरञ्ञकस्स सेनासनस्स समन्ता सब्बदिसाभागेसु अत्तना अभिरुचिते गोचरगामे निक्खिपेय्य. तञ्च खो सतिया अङ्गसम्पत्तिया, तत्रायं अङ्गसम्पत्ति – पुरिमिकाय उपगन्त्वा महापवारणाय पवारितो होति, इदमेकं अङ्गं. कत्तिकमासोयेव होति, इदं दुतियं अङ्गं. पञ्चधनुसतिकपच्छिमप्पमाणयुत्तं सेनासनं होति, इदं ततियं अङ्गं. ऊनप्पमाणे वा गावुततो अतिरेकप्पमाणे वा न लभति, यत्र हि पिण्डाय चरित्वा भुत्तवेलायमेव पुन विहारं सक्का आगन्तुं, तदेव इधाधिप्पेतं. सासङ्कसप्पटिभयमेव होति, इदं चतुत्थं अङ्गं होतीति. कोचिदेव पच्चयोति किञ्चिदेव कारणं. तेन चीवरेनाति तेन अन्तरघरे निक्खित्तचीवरेन. विप्पवासायाति वियोगवासाय. ततो चे उत्तरि विप्पवसेय्याति छारत्ततो उत्तरि तस्मिं सेनासने सत्तमं अरुणं उट्ठापेय्याति अत्थो, तथा असक्कोन्तेन पन गामसीमं ओक्कमित्वा सभायं वा यत्थ कत्थचि वा वसित्वा चीवरप्पवत्तिं ञत्वा पक्कमितुं वट्टति. अञ्ञत्र भिक्खुसम्मुतियाति यं सङ्घो गिलानस्स भिक्खुनो चीवरेन विप्पवाससम्मुतिं देति, तं ठपेत्वा अलद्धसम्मुतिकस्स अतिरेकछारत्तं विप्पवसतो निस्सग्गियं होति.

सावत्थियं सम्बहुले भिक्खू आरब्भ चीवरविप्पवासवत्थुस्मिं पञ्ञत्तं, सेसमेत्थ चीवरवग्गस्स दुतियसिक्खापदे वुत्तनयेनेव वेदितब्बन्ति.

सासङ्कसिक्खापदवण्णना निट्ठिता.

१०. परिणतसिक्खापदवण्णना

दसमे ¶ ¶ सङ्घिकन्ति सङ्घस्स सन्तकं. सो हि सङ्घस्स परिणतत्ता हत्थे अनारुळ्होपि एकेन परियायेन सङ्घसन्तको होति. लाभन्ति लभितब्बं चीवरादिवत्थुं. परिणतन्ति ‘‘दस्साम करिस्सामा’’ति वचीभेदेन वा ¶ हत्थमुद्दाय वा सङ्घस्स निन्नं हुत्वा ठितं. अत्तनो परिणामेय्याति ‘‘इदं मय्हं देथा’’तिआदीनि वदन्तो अत्तनिन्नं करेय्य. सचे पन सङ्घस्स दिन्नं होति, तं गहेतुं न वट्टति, सङ्घस्सेव दातब्बं. परिणतं पन सहधम्मिकानं वा गिहीनं वा अन्तमसो मातुसन्तकम्पि अत्तनो परिणामेन्तस्स पयोगे दुक्कटं, पटिलाभेन निस्सग्गियं होति.

सावत्थियं छब्बग्गिये भिक्खू आरब्भ परिणामनवत्थुस्मिं पञ्ञत्तं, साधारणपञ्ञत्ति, अनाणत्तिकं, परिणते वेमतिकस्स, अपरिणते परिणतसञ्ञिनो चेव वेमतिकस्स च, सङ्घचेतियपुग्गलेसु यस्स कस्सचि परिणतं अञ्ञसङ्घादीनं परिणामेन्तस्स च दुक्कटं. अपरिणतसञ्ञिनो, ‘‘कत्थ देमा’’ति पुच्छिते ‘‘यत्थ तुम्हाकं चित्तं पसीदति, तत्थ देथ, तुम्हाकं देय्यधम्मो परिभोगं वा लभेय्या’’तिआदीनि वदन्तस्स, उम्मत्तकादीनञ्च अनापत्ति. सङ्घे परिणतभावो, तं ञत्वा अत्तनो परिणामनं, पटिलाभोति इमानेत्थ तीणि अङ्गानि. समुट्ठानादीनि अदिन्नादानसदिसानीति.

परिणतसिक्खापदवण्णना निट्ठिता.

पत्तवग्गो ततियो.

इति कङ्खावितरणिया पातिमोक्खवण्णनाय

निस्सग्गियपाचित्तियवण्णना निट्ठिता.

पाचित्तियकण्डो

१. मुसावादवग्गो

१. मुसावादसिक्खापदवण्णना

पाचित्तियेसु ¶ ¶ मुसावादवग्गस्स पठमे सम्पजानमुसावादेति पुब्बेपि जानित्वा वचनक्खणेपि जानन्तस्सेव मुसावादभणने. भणनञ्च नाम इध अभूतस्स वा भूततं, भूतस्स वा अभूततं कत्वा कायेन वा वाचाय वा विञ्ञापनप्पयोगो, निमित्तत्थे चेतं भुम्मवचनं. तस्मा यो सम्पजानमुसावादं वदति, तस्स तंनिमित्तं तंहेतु तप्पच्चया पाचित्तियं होतीति एवमेत्थ अञ्ञेसु च ईदिसेसु अत्थो वेदितब्बो.

सावत्थियं हत्थकं सक्यपुत्तं आरब्भ अवजानित्वा पटिजाननादिवत्थुस्मिं पञ्ञत्तं, साधारणपञ्ञत्ति, अनाणत्तिकं, उत्तरिमनुस्सधम्मारोचनत्थं मुसा भणन्तस्स पाराजिकं, अमूलकेन पाराजिकेन अनुद्धंसनत्थं सङ्घादिसेसो, सङ्घादिसेसेन अनुद्धंसनत्थं पाचित्तियं, आचारविपत्तिया अनुद्धंसनत्थं दुक्कटं, ‘‘यो ते विहारे वसी’’तिआदिना (पारा. २२०) परियायेन उत्तरिमनुस्सधम्मारोचनत्थं पटिविजानन्तस्स मुसा भणिते थुल्लच्चयं, अप्पटिविजानन्तस्स दुक्कटं, केवलं मुसा भणन्तस्स इध पाचित्तियं. अनुपधारेत्वा सहसा भणन्तस्स, ‘‘अञ्ञं ¶ भणिस्सामी’’ति अञ्ञं भणन्तस्स, उम्मत्तकादीनञ्च अनापत्ति. विसंवादनपुरेक्खारता, विसंवादनचित्तेन यमत्थं वत्तुकामो, तस्स पुग्गलस्स विञ्ञापनपयोगो चाति इमानेत्थ द्वे अङ्गानि. समुट्ठानादीनि अदिन्नादानसदिसानीति.

मुसावादसिक्खापदवण्णना निट्ठिता.

२. ओमसवादसिक्खापदवण्णना

दुतिये ¶ ओमसवादेति ओविज्झनवचने, जातिनामगोत्तकम्मसिप्पआबाधलिङ्गकिलेसआपत्तिअक्कोसेसु भूतेन वा अभूतेन वा येन केनचि पाराजिकं आपन्नं वा अनापन्नं वा यंकिञ्चि भिक्खुं याय कायचि ¶ वाचाय वा हत्थमुद्दाय वा अनञ्ञापदेसेन अक्कोसनवचने पाचित्तियन्ति अत्थो.

सावत्थियं छब्बग्गिये भिक्खू आरब्भ ओमसनवत्थुस्मिं पञ्ञत्तं, साधारणपञ्ञत्ति, अनाणत्तिकं, तेहियेव दसहि अक्कोसवत्थूहि ‘‘सन्ति इधेकच्चे चण्डाला’’तिआदिना (पाचि. २६) नयेन अञ्ञापदेसं कत्वा अक्कोसन्तस्स, ‘‘चोरोसि गण्ठिभेदकोसी’’तिआदीहि पाळिमुत्तकपदेहि अक्कोसन्तस्स, यथा तथा वा अनुपसम्पन्नं अक्कोसन्तस्स च दुक्कटं. इध भिक्खुनीपि अनुपसम्पन्नसङ्ख्यं गच्छति. अनक्कोसितुकामस्स केवलं दवकम्यताय वदतो सब्बत्थ दुब्भासितं. अत्थधम्मअनुसासनिपुरेक्खारानं, उम्मत्तकादीनञ्च अनापत्ति. यं अक्कोसति, तस्स उपसम्पन्नता, अनञ्ञापदेसेन जातिआदीहि अक्कोसनं, ‘‘मं अक्कोसती’’ति जानना, अत्थपुरेक्खारतादीनं अभावोति इमानेत्थ चत्तारि अङ्गानि. समुट्ठानादीनि अदिन्नादानसदिसानि, वेदना पन इध दुक्खाति.

ओमसवादसिक्खापदवण्णना निट्ठिता.

३. पेसुञ्ञसिक्खापदवण्णना

ततिये भिक्खुपेसुञ्ञेति भिक्खुस्स पेसुञ्ञे, जातिआदीहि अक्कोसवत्थूहि भिक्खू अक्कोसन्तस्स भिक्खुनो सुत्वा वचनं भिक्खुनो पियकम्यताय वा भेदाधिप्पायेन वा यो अक्कुद्धो, तस्स भिक्खुस्स कायेन वा वाचाय वा उपसंहटे तस्मिं पेसुञ्ञकरणवचने पाचित्तियन्ति अत्थो.

सावत्थियं छब्बग्गिये भिक्खू आरब्भ पेसुञ्ञउपसंहरणवत्थुस्मिं पञ्ञत्तं, साधारणपञ्ञत्ति, अनाणत्तिकं, वुत्तनयेनेव अञ्ञापदेसेन अक्कोसन्तस्स वचनूपसंहारे वा पाळिमुत्तकअक्कोसूपसंहारे वा अनुपसम्पन्नस्स च उपसंहारे दुक्कटं. इधापि भिक्खुनी अनुपसम्पन्नट्ठाने ¶ ठिता. न पियकम्यताय, न भेदाधिप्पायेन केवलं पापगरहिताय वदन्तस्स, उम्मत्तकादीनञ्च अनापत्ति. जातिआदीहि अनञ्ञापदेसेन अक्कोसन्तस्स भिक्खुनो सुत्वा वचनं भिक्खुस्स उपसंहरणं, पियकम्यताभेदाधिप्पायेसु ¶ अञ्ञतरता ¶ , तस्स विजाननाति इमानेत्थ तीणि अङ्गानि. समुट्ठानादीनि अदिन्नादानसदिसानेवाति.

पेसुञ्ञसिक्खापदवण्णना निट्ठिता.

४. पदसोधम्मसिक्खापदवण्णना

चतुत्थे पदसो धम्मं वाचेय्याति सङ्गीतित्तयं अनारुळ्हम्पि राजोवादतिक्खिन्द्रियचतुपरिवत्तननन्दोपनन्दकुलुम्पसुत्तमग्गकथादिधम्मञ्च सङ्गीतित्तयमारुळ्हं तिपिटकधम्मञ्च पदं पदं वाचेय्य, पदानुपदअन्वक्खरअनुब्यञ्जनेसु एकेकं कोट्ठासन्ति अत्थो. पाचित्तियन्ति एतेसु पदादीसु भिक्खुञ्च भिक्खुनिञ्च ठपेत्वा यंकञ्चि कोट्ठासं अवसेसपुग्गलेहि सद्धिं एकतो भणन्तस्स पदादिगणनाय पाचित्तियं.

सावत्थियं छब्बग्गिये भिक्खू आरब्भ पदसो धम्मवाचनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं. उपसम्पन्ने अनुपसम्पन्नसञ्ञिनो वेमतिकस्स वा दुक्कटं. अनुपसम्पन्नेन सद्धिं एकतो उद्देसग्गहणे, सज्झायकरणे, तस्स सन्तिके उद्देसग्गहणे, येभुय्येन पगुणगन्थं भणन्तस्स, ओसारेन्तस्स च खलितट्ठाने ‘‘एवं भणाही’’ति वचने च एकतो भणन्तस्सापि, उम्मत्तकादीनञ्च अनापत्ति. अनुपसम्पन्नता, वुत्तलक्खणं धम्मं पदसो वाचनता, एकतो ओसापनञ्चाति इमानेत्थ तीणि अङ्गानि. पदसोधम्मसमुट्ठानं, किरियं, नोसञ्ञाविमोक्खं, अचित्तकं, पण्णत्तिवज्जं, वचीकम्मं, तिचित्तं, तिवेदनन्ति.

पदसोधम्मसिक्खापदवण्णना निट्ठिता.

५. पठमसहसेय्यसिक्खापदवण्णना

पञ्चमे अनुपसम्पन्नेनाति भिक्खुं ठपेत्वा अन्तमसो पाराजिकवत्थुभूतेन तिरच्छानगतेनापि. उत्तरिदिरत्ततिरत्तन्ति द्विन्नं वा तिण्णं वा रत्तीनं उपरि. सहसेय्यन्ति सब्बच्छन्नपरिच्छन्ने येभुय्येन छन्नपरिच्छन्ने वा सेनासने पुब्बापरियेन वा एकक्खणेन वा एकतो ¶ निपज्जनं. कप्पेय्याति ¶ विदहेय्य सम्पादेय्य. तत्थ छदनं अनाहच्च दियड्ढहत्थुब्बेधेन पाकारादिना परिच्छिन्नम्पि सब्बपरिच्छन्नमिच्चेव वेदितब्बं, तस्मा इमिना लक्खणेन समन्नागतो सचेपि सत्तभूमिको पासादो एकूपचारो होति, सतगब्भं वा चतुसालं, यो तत्थ वा अञ्ञत्थ वा तादिसे तेन वा अञ्ञेन वा अनुपसम्पन्नेन सह तिस्सो रत्तियो सयित्वा चतुत्थदिवसे अत्थङ्गते सूरिये अनुपसम्पन्ने निपन्ने गब्भद्वारं पिधाय वा अपिधाय वा निपज्जति, पठमनिपन्नो वा तस्मिं निपज्जन्ते न वुट्ठाति, तस्स उभिन्नं उट्ठहित्वा निपज्जनप्पयोगगणनाय अनुपसम्पन्नगणनाय च पाचित्तियं. अयमेत्थ सङ्खेपो, वित्थारो पन समन्तपासादिकायं (पाचि. अट्ठ. ५१) सब्बप्पकारतो वुत्तो.

आळवियं ¶ सम्बहुले भिक्खू आरब्भ अनुपसम्पन्नेन सहसेय्यवत्थुस्मिं पञ्ञत्तं, ‘‘उत्तरिदिरत्ततिरत्त’’न्ति अयमेत्थ अनुपञ्ञत्ति, साधारणपञ्ञत्ति, अनाणत्तिकं, तिकपाचित्तियं, उपसम्पन्ने अनुपसम्पन्नसञ्ञिनो वेमतिकस्स वा उपद्धच्छन्नपरिच्छन्नादीसु च दुक्कटं. ऊनकदिरत्ततिरत्तं वसन्तस्स, ततियाय रत्तिया पुरारुणा निक्खमित्वा पुन वसन्तस्स, सब्बच्छन्नसब्बापरिच्छन्नादीसु वसन्तस्स, इतरस्मिं निसिन्ने निपज्जन्तस्स, निपन्ने वा निसीदन्तस्स, उम्मत्तकादीनञ्च अनापत्ति. पाचित्तियवत्थुकसेनासनं, तत्थ अनुपसम्पन्नेन सह निपज्जनं, चतुत्थदिवसे सूरियत्थङ्गमनन्ति इमानेत्थ तीणि अङ्गानि. समुट्ठानादीनि एळकलोमसदिसानेवाति.

पठमसहसेय्यसिक्खापदवण्णना निट्ठिता.

६. दुतियसहसेय्यसिक्खापदवण्णना

छट्ठे मातुगामेनाति अन्तमसो तदहुजातायपि मनुस्सित्थिया. दिस्समानरूपा पन यक्खिपेतियो पण्डको मेथुनवत्थुभूता च तिरच्छानित्थियो इध दुक्कटवत्थुका होन्ति.

सावत्थियं आयस्मन्तं अनुरुद्धत्थेरं आरब्भ मातुगामेन सहसेय्यवत्थुस्मिं पञ्ञत्तं, सेसं अनन्तरसिक्खापदे वुत्तनयेनेव वेदितब्बं अञ्ञत्र ¶ रत्तिपरिच्छेदा, तत्र हि चतुत्थदिवसे आपत्ति, इध पन पठमदिवसेपीति.

दुतियसहसेय्यसिक्खापदवण्णना निट्ठिता.

७. धम्मदेसनासिक्खापदवण्णना

सत्तमे ¶ उत्तरिछप्पञ्चवाचाहीतिएत्थ एको गाथापादो एका वाचाति एवं सब्बत्थ वाचापमाणं वेदितब्बं. धम्मं देसेय्याति पदसोधम्मसिक्खापदे वुत्तलक्खणं धम्मं वा अट्ठकथाधम्मं वा भासेय्य. अञ्ञत्र विञ्ञुना पुरिसविग्गहेनाति विना विञ्ञुना पुरिसेन. मनुस्सविग्गहं गहेत्वा ठितेन पन यक्खेन वा पेतेन वा तिरच्छानेन वा सद्धिं ठितायपि धम्मं देसेतुं न वट्टति. पाचित्तियन्ति दुतियानियते वुत्तलक्खणेन मनुस्सेन विना विञ्ञुमनुस्सित्थिया छन्नं वाचानं उपरि पदादिवसेन धम्मं देसेन्तस्स पदादिगणनाय, बहूनं देसयतो मातुगामगणनाय च पाचित्तियं.

सावत्थियं उदायित्थेरं आरब्भ मातुगामस्स धम्मदेसनावत्थुस्मिं पञ्ञत्तं, ‘‘अञ्ञत्र विञ्ञुना’’ति अयमेत्थ अनुपञ्ञत्ति, साधारणपञ्ञत्ति, अनाणत्तिकं, तिकपाचित्तियं, अमातुगामे मातुगामसञ्ञिनो वेमतिकस्स वा यक्खिपेतिपण्डकमनुस्सविग्गहतिरच्छानित्थीनं देसेन्तस्स च दुक्कटं. छहि वाचाहि, ततो वा ओरं देसेन्तस्स, वुत्तलक्खणे वा पुरिसे सति, सयं वा उट्ठाय, पुन निसीदित्वा मातुगामस्स वा उट्ठहित्वा पुन निसिन्नस्स, अञ्ञस्स वा मातुगामस्स देसयतो, ‘‘दीघनिकायो नाम भन्ते किमत्थियो’’ति ¶ एवं पन पुट्ठे सब्बम्पि दीघनिकायं देसेन्तस्स, अञ्ञस्सत्थाय वुच्चमानं मातुगामे सुणन्ते, उम्मत्तकादीनञ्च अनापत्ति. वुत्तलक्खणस्स धम्मस्स छन्नं वाचानं उपरि देसना, वुत्तलक्खणो मातुगामो, इरियापथपरिवत्ताभावो, कप्पियकारकस्साभावो, अपञ्हाविस्सज्जनाति इमानेत्थ पञ्च अङ्गानि. समुट्ठानादीनि पदसोधम्मसदिसानेव, केवलं इध किरियाकिरियं होतीति.

धम्मदेसनासिक्खापदवण्णना निट्ठिता.

८. भूतारोचनसिक्खापदवण्णना

अट्ठमे ¶ उत्तरिमनुस्सधम्मन्ति चतुत्थपाराजिके वुत्तलक्खणं उत्तरिमनुस्सानं झायीनञ्चेव अरियानञ्च धम्मं. भूतस्मिं पाचित्तियन्ति अत्तनि झानादिधम्मे सति तं भिक्खुञ्च भिक्खुनिञ्च ठपेत्वा अञ्ञस्स आरोचयतो पाचित्तियं.

वेसालियं वग्गुमुदातीरिये भिक्खू आरब्भ तेसं भूतारोचनवत्थुस्मिं पञ्ञत्तं, साधारणपञ्ञत्ति ¶ , अनाणत्तिकं, निप्परियायेन अत्तनि विज्जमानं झानादिधम्मं आरोचेन्तस्स सचे यस्स आरोचेति, सो अनन्तरमेव ‘‘अयं झानलाभी’’ति वा ‘‘अरियो’’ति वा येन केनचि आकारेन तमत्थं जानाति, पाचित्तियं. नो चे जानाति, दुक्कटं. परियायेन आरोचितं पन जानातु वा, मा वा, दुक्कटमेव. तथारूपे कारणे सति उपसम्पन्नस्स आरोचयतो, आदिकम्मिकस्स च अनापत्ति. यस्मा पन अरियानं उम्मत्तकादिभावो नत्थि, झानलाभिनो पन तस्मिं सति झाना परिहायन्ति, तस्मा ते इध न गहिता. उत्तरिमनुस्सधम्मस्स भूतता, अनुपसम्पन्नस्स आरोचनं, तङ्खणविजानना, अनञ्ञापदेसोति इमानेत्थ चत्तारि अङ्गानि. भूतारोचनसमुट्ठानं, किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, कुसलाब्याकतचित्तेहि द्विचित्तं, सुखमज्झत्तवेदनाहि द्विवेदनन्ति.

भूतारोचनसिक्खापदवण्णना निट्ठिता.

९. दुट्ठुल्लारोचनसिक्खापदवण्णना

नवमे भिक्खुस्साति पाराजिकं अनज्झापन्नस्स. दुट्ठुल्लन्ति किञ्चापि द्विन्नं आपत्तिक्खन्धानमेतं अधिवचनं, इध पन सङ्घादिसेसमेव अधिप्पेतं. अञ्ञत्र भिक्खुसम्मुतियाति यं सङ्घो अभिण्हापत्तिकस्स भिक्खुनो आयतिं संवरत्थाय आपत्तीनञ्च कुलानञ्च परियन्तं कत्वा वा अकत्वा वा तिक्खत्तुं अपलोकेत्वा कतिकं करोति, तं ठपेत्वा, अयथाकतिकाय ‘‘अयं असुचिं मोचेत्वा सङ्घादिसेसं आपन्नो’’तिआदिना नयेन वत्थुना सद्धिं आपत्तिं घटेत्वा आरोचेन्तस्स पाचित्तियं.

सावत्थियं ¶ छब्बग्गिये भिक्खू आरब्भ दुट्ठुल्लापत्तिआरोचनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं ¶ , अदुट्ठुल्लाय दुट्ठुल्लसञ्ञिनो वेमतिकस्स वा दुक्कटं, अवसेसे छ आपत्तिक्खन्धे, अनुपसम्पन्नस्स पुरिमपञ्चसिक्खापदवीतिक्कमसङ्खातं दुट्ठुल्लं वा इतरं अदुट्ठुल्लं वा अज्झाचारं आरोचेन्तस्सापि दुक्कटमेव. वत्थुमत्तं वा आपत्तिमत्तं वा आरोचेन्तस्स, भिक्खुसम्मुतिपरिच्छेदं अनतिक्कमित्वा आरोचेन्तस्स, उम्मत्तकादीनञ्च अनापत्ति. वुत्तलक्खणस्स भिक्खुनो सवत्थुको सङ्घादिसेसो, अनुपसम्पन्नस्स आरोचनं, भिक्खुसम्मुतिया अभावोति इमानेत्थ तीणि अङ्गानि. समुट्ठानादीनि अदिन्नादानसदिसानि, वेदना पन इध दुक्खायेवाति.

दुट्ठुल्लारोचनसिक्खापदवण्णना निट्ठिता.

१०. पथवीखणनसिक्खापदवण्णना

दसमे ¶ पथविन्ति दुविधा पथवी जातपथवी अजातपथवीति. तत्थ जातपथवी सुद्धमिस्सपुञ्जवसेन तिविधा, तत्थ सुद्धपथवी नाम पकतिया सुद्धपंसु वा सुद्धमत्तिका वा. मिस्सपथवी नाम यत्थ पंसुतो वा मत्तिकातो वा पासाणसक्खरकथलमरुम्बवालुकासु अञ्ञतरस्स ततियभागो होति. पुञ्जपथवी नाम ‘‘अतिरेकचातुमासं ओवट्ठो पंसुपुञ्जो वा मत्तिकापुञ्जो वा’’ति (पाचि. ८६) वुत्तं, वुत्तलक्खणेन पन मिस्सकपुञ्जोपि पिट्ठिपासाणे ठितसुखुमरजम्पि च देवे फुसायन्ते सकिं तिन्तं चतुमासच्चयेन तिन्तोकासो पुञ्जपथविसङ्खमेव गच्छति. तिविधापि चेसा पथवी उद्धनपत्तपचनादिवसेन वा यथा तथा वा अदड्ढा ‘जातपथवी’ति वुच्चति, दड्ढा पन वुत्तप्पमाणतो अधिकतरपासाणादिमिस्सा वा अजातपथवी नाम होति, को पन वादो सुद्धपासाणादिभेदाय. तत्थ या ‘जातपथवी’ति वुत्ता, अयं अकप्पियपथवी. यो भिक्खु तं एवरूपं पथविं सयं खणति, खणनभेदनविलेखनपचनादीहि विकोपेति, तस्स पयोगगणनाय पाचित्तियं. यो पन खणापेति, वुत्तनयेनेव विकोपापेति, तस्स ‘‘इमं पदेस’’न्ति वा ‘‘इमं पथवि’’न्ति वा एवं नियमेत्वा ‘‘खण, भिन्दा’’तिआदिना नयेन आणापेन्तस्स आणत्तिया ¶ दुक्कटं, सकिं आणत्ते दिवसम्पि खणन्ते आणापकस्स एकमेव पाचित्तियं, सचे इतरो पुनप्पुनं आणापेति, वाचाय वाचाय पाचित्तियं.

आळवियं आळवके भिक्खू आरब्भ पथविखणनवत्थुस्मिं पञ्ञत्तं, साधारणपञ्ञत्ति, साणत्तिकं, पथविया वेमतिकस्स, अपथविया पथविसञ्ञिनो चेव वेमतिकस्स च दुक्कटं. ओकासं अनियमेत्वा ‘‘पोक्खरणिं खण, आवाटं खण, कन्दं खणा’’तिआदीनि भणन्तस्स, आतपेन सुस्सित्वा फलितकद्दमं वा गोकण्टकं वा हेट्ठा पथविया असम्बद्धं भिज्जित्वा पतितनदितटं वा महन्तम्पि नङ्गलच्छिन्नमत्तिकापिण्डन्तिएवमादीनि सब्बञ्च अजातपथविं विकोपेन्तस्स, ‘‘इमस्स थम्भस्स आवाटं जान ¶ , मत्तिकं देहि, मत्तिकं आहर, पंसुना मे अत्थो, मत्तिकं कप्पियं करोही’’ति भणन्तस्स, असञ्चिच्च रुक्खादिपवट्टनेन भिन्दन्तस्स, असतिया पादङ्गुट्ठकादीहि विलेखन्तस्स, जातपथविभावं वा, ‘‘खणामि वा अह’’न्ति अजानन्तस्स, उम्मत्तकादीनञ्च अनापत्ति. जातपथवी, पथविसञ्ञिता, खणनखणापनानं अञ्ञतरन्ति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन पण्णत्तिवज्जं, तिचित्तं, तिवेदनन्ति.

पथवीखणनसिक्खापदवण्णना निट्ठिता.

मुसावादवग्गो पठमो.

२. भूतगामवग्गो

१. भूतगामसिक्खापदवण्णना

भूतगामवग्गस्स ¶ पठमे भूतगामपातब्यतायाति एत्थ भवन्ति अहेसुञ्चाति भूता, जायन्ति वड्ढन्ति जाता वड्ढिता चाति अत्थो. गामोति रासि, भूतानं गामो, भूता एव वा गामोति भूतगामो, पतिट्ठितहरिततिणरुक्खादीनमेतं अधिवचनं. पातब्यस्स भावो पातब्यता, छेदनभेदनादीहि यथारुचि परिभुञ्जितब्बताति अत्थो, तस्सं भूतगामपातब्यताय, निमित्तत्थे चेतं भुम्मवचनं, भूतगामपातब्यताहेतु भूतगामस्स छेदनादिपच्चया पाचित्तियन्ति अत्थो. तस्मा यो भिक्खु ¶ पथविउदकपाकारादीसु यत्थकत्थचि जातं असुक्खं अन्तमसो अतिसुखुमतिणम्पि सासपबीजकसेवालम्पि उद्धरणच्छेदनविज्झनादीहि विकोपेति वा पथविखणने वुत्तनयेन विकोपापेति वा पाचित्तियं आपज्जति.

आळवियं आळवके भिक्खू आरब्भ रुक्खछिन्दनवत्थुस्मिं पञ्ञत्तं, साधारणपञ्ञत्ति, साणत्तिकं, भूतगामतो वियोजितमूलबीजखन्धबीजफलुबीजअग्गबीजबीजबीजानं अञ्ञतरं भाजनगतं वा रासिकतं वा भूमियं रोपितम्पि निक्खन्तमूलमत्तं वा निक्खन्तअङ्कुरमत्तं वा सचेपिस्स विदत्थिमत्ता पत्तवट्टि निग्गच्छति, अनिक्खन्ते वा मूले निक्खन्ते वा मूले याव अङ्कुरो हरितो न होति, ताव तं विकोपेन्तस्स दुक्कटं, तथा भूतगामबीजगामे वेमतिकस्स, अभूतगामबीजगामे भूतगामबीजगामसञ्ञिनो चेव वेमतिकस्स च. उभयत्थ पन अतथासञ्ञिस्स, उम्मत्तकादीनञ्च अनापत्ति, असञ्चिच्च असतिया अजानित्वा वा विकोपेन्तस्स, ‘इमं रुक्ख’न्ति एवं अनियमेत्वा ‘‘रुक्खं छिन्द, वल्लिं छिन्दा’’तिआदीनि भणन्तस्स, ‘‘इमं पुप्फं वा फलं वा जान, इमं देहि, इमं आहर, इमिना मे अत्थो, इमं कप्पियं करोही’’ति भणन्तस्स च अनापत्ति. एवं कप्पियवचनेन भूतगामतो वियोजितं पन बीजजातं पुन पि ‘‘कप्पियं करोही’’ति कारेत्वाव परिभुञ्जितब्बं. एवञ्हिस्स बीजगामपरिमोचनम्पि कतं होति.

कप्पियं करोन्तेन पन अग्गिना वा नखेन वा सत्थेन वा कत्तब्बं, अग्गिना करोन्तेन च येन केनचि अग्गिना एकदेसे फुसन्तेन ‘कप्पिय’न्ति ¶ वत्वाव कातब्बं. सत्थेन ¶ करोन्तेन यस्स कस्सचि तिखिणसत्थस्स अन्तमसो सूचिनखच्छेदनादीनम्पि तुण्डेन वा धाराय वा वेधं वा छेदं वा दस्सेन्तेन तथेव कातब्बं. नखेन करोन्तेन ठपेत्वा गोमहिंसादीनं खुरे येन केनचि अपूतिना मनुस्सानं वा तिरच्छानानं वा नखेन अन्तमसो छिन्दित्वा आहटेनापि सत्थे वुत्तनयेनेव कातब्बं. तत्थ सचेपि बीजानं पब्बतमत्तो रासि, रुक्खसहस्सं वा छिन्दित्वा एकाबद्धं, उच्छूनं वा महाभारो बन्धित्वा ठपितो होति, एकस्मिं बीजे वा रुक्खसाखाय वा उच्छुम्हि वा कप्पिये कते सब्बं कतं होति. उच्छुं ‘‘कप्पियं करिस्सामी’’ति तेहि सद्धिं बद्धं दारुकं विज्झति, वट्टतियेव. सचे पन याय वल्लिया भारो बद्धो, तं विज्झति, न वट्टति. मरिचपक्कादीहि मिस्सेत्वा ¶ भत्तं आहरन्ति, ‘‘कप्पियं करोही’’ति वुत्ते सचेपि भत्तसित्थे विज्झति, वट्टतियेव, तिलतण्डुलेसुपि एसेव नयो. यागुया पक्खित्तानि पन एकाबद्धानि हुत्वा न सन्तिट्ठन्ति, तत्थ एकेकं विज्झित्वाव कातब्बं. कपिट्ठफलादीनं अन्तो मिञ्जं कटाहं मुञ्चित्वा सञ्चरति, भिन्दापेत्वा कप्पियं कारेतब्बं. एकाबद्धा चे, कटाहेपि कातुं वट्टति. यं पन फलं तरुणं होति अबीजं यञ्च निब्बत्तबीजं बीजं अपनेत्वा परिभुञ्जितब्बं, तत्थ कप्पियकरणकिच्चं नत्थि. भूतगामो, भूतगामसञ्ञिता, विकोपनं वा विकोपापनं वाति इमानेत्थ तीणि अङ्गानि. समुट्ठानादीनि पथविखणनसदिसानेवाति.

भूतगामसिक्खापदवण्णना निट्ठिता.

२. अञ्ञवादकसिक्खापदवण्णना

दुतिये यमत्थं सङ्घमज्झे विनयधरो पुच्छति, ततो अञ्ञं वदतीति अञ्ञवादको, अञ्ञेनञ्ञं पटिचरणस्सेतं नामं. विहेसतीति विहेसको, तुण्हीभावस्सेतं नामं, तस्मिं अञ्ञवादके विहेसके. पाचित्तियन्ति वत्थुद्वये पाचित्तियद्वयं वुत्तं. तस्मा यो भिक्खु सावसेसं आपत्तिं आपन्नो सङ्घमज्झे अनुयुञ्जियमानो तं न कथेतुकामो अञ्ञेन वचनेन अञ्ञं छादेन्तो तथा तथा विक्खिपति, यो च तुण्हीभावेन विहेसेति, तेसं यं भगवता अञ्ञवादककम्मञ्चेव विहेसककम्मञ्च अनुञ्ञातं, तस्मिं सङ्घेन कते पुन तथा करोन्तानं पाचित्तियं.

कोसम्बियं छन्नत्थेरं आरब्भ अञ्ञेनञ्ञं पटिचरणवत्थुस्मिं पञ्ञत्तं, साधारणपञ्ञत्ति, अनाणत्तिकं, धम्मकम्मे तिकपाचित्तियं, अधम्मकम्मे तिकदुक्कटं, अनारोपिते पन अञ्ञवादके ¶ वा विहेसके वा तथा करोन्तस्स दुक्कटमेव. आपत्तिं आपन्नभावं वा अजानन्तस्स ‘‘किं तुम्हे भणथा’’ति पुच्छतो, गेलञ्ञेन वा, ‘‘सङ्घस्स भण्डनादीनि वा भविस्सन्ति, अधम्मेन वा वग्गेन वा नकम्मारहस्स वा कम्मं करिस्सन्ती’’ति ¶ इमिना अधिप्पायेन न कथेन्तस्स, उम्मत्तकादीनञ्च अनापत्ति. धम्मकम्मेन आरोपितता, आपत्तिया वा वत्थुना वा अनुयुञ्जियमानता, छादेतुकामताय ¶ अञ्ञेनञ्ञं पटिचरणं वा तुण्हीभावो वाति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन सिया किरियं, सिया अकिरियं, दुक्खवेदनञ्च होतीति.

अञ्ञवादकसिक्खापदवण्णना निट्ठिता.

३. उज्झापनकसिक्खापदवण्णना

ततिये येन वचनेन उज्झापेन्ति ‘‘छन्दाय इत्थन्नामो इदं नाम करोती’’तिआदीनि वदन्ता उपसम्पन्नं सङ्घेन सम्मतं सेनासनपञ्ञापकादिभेदं तस्स अयसकामा हुत्वा भिक्खूहि अवजानापेन्ति, अवञ्ञाय ओलोकापेन्ति, लामकतो वा चिन्तापेन्ति, तं वचनं उज्झापनकं. येन च तथेव वदन्ता खिय्यन्ति, सब्बत्थ तस्स अवण्णं पकासेन्ति, तं खिय्यनकं, तस्मिं उज्झापनके खिय्यनके. पाचित्तियन्ति वत्थुद्वये पाचित्तियद्वयं वुत्तं. तस्मा यो सम्मतस्स भिक्खुनो अयसकामताय उपसम्पन्नस्स वदन्तो उज्झापेति वा खिय्यति वा, तस्स पाचित्तियं होति.

राजगहे मेत्तियभूमजके भिक्खू आरब्भ उज्झापनखिय्यनवत्थुस्मिं पञ्ञत्तं, साधारणपञ्ञत्ति, अनाणत्तिकं, यं तस्स उपसम्पन्नस्स सम्मुतिकम्मं कतं, तस्मिं धम्मकम्मे तिकपाचित्तियं, अधम्मकम्मे तिकदुक्कटं, अनुपसम्पन्नस्स पन सन्तिके तथा भणन्तस्स, असम्मतस्स च अवण्णं यस्स कस्सचि सन्तिके भणन्तस्स, अनुपसम्पन्नस्स पन सम्मतस्स वा असम्मतस्स वा अवण्णं यस्स कस्सचिदेव सन्तिके भणन्तस्स च दुक्कटमेव. पकतियाव छन्दादिवसेन करोन्तं उज्झापेन्तस्स वा खिय्यन्तस्स वा, उम्मत्तकादीनञ्च अनापत्ति. धम्मकम्मेन सम्मतता, उपसम्पन्नता, अगतिगमनाभावो, तस्स अवण्णकामता, यस्स सन्तिके वदति, तस्स उपसम्पन्नता, उज्झापनं वा खिय्यनं वाति इमानेत्थ छ अङ्गानि. समुट्ठानादीनि अदिन्नादानसदिसानि, इदं पन दुक्खवेदनमेवाति.

उज्झापनकसिक्खापदवण्णना निट्ठिता.

४. पठमसेनासनसिक्खापदवण्णना

चतुत्थे ¶ ¶ सङ्घिकन्ति सङ्घस्स सन्तकं. मञ्चादीसु योकोचि मञ्चसङ्खेपेन कतो सब्बोपि मञ्चोयेव, पीठेपि एसेव नयो. येन केनचि पन चोळेन वा कप्पियचम्मेन वा छविं कत्वा ठपेत्वा मनुस्सलोमं तालीसपत्तञ्च येहि केहिचि लोमपण्णतिणवाकचोळेहि पूरेत्वा कतसेनासनं भिसीति वुच्चति. तत्थ निसीदितुम्पि निपज्जितुम्पि वट्टति, पमाणपरिच्छेदोपि चेत्थ नत्थि. कोच्छं पन वाकउसीरमुञ्जपब्बजादीनं अञ्ञतरमयं अन्तो संवेल्लित्वा बद्धं हेट्ठा च उपरि च वित्थतं पणवसण्ठानं मज्झे सीहचम्मादिपरिक्खित्तं होति, अकप्पियचम्मं नामेत्थ नत्थि. सेनासनञ्हि सोवण्णमयम्पि वट्टति. अज्झोकासेति ¶ एत्थ ये अवस्सिकसङ्केता वस्सानमासाति एवं असञ्ञिता अट्ठ मासा, ते ठपेत्वा इतरेसु चतूसु मासेसु सचेपि देवो न वस्सति. तथापि पकतिअज्झोकासे च ओवस्सकमण्डपे च सन्थरितुं न वट्टति. यत्थ पन हेमन्ते वस्सति, तत्थ अपरेपि चत्तारो मासे न वट्टति. गिम्हे पन सब्बत्थ विगतवलाहकं विसुद्धं नभं होति, तस्मा तदा केनचिदेव करणीयेन गच्छति, वट्टति. काकादीनं निबद्धवासरुक्खमूले पन कदाचिपि न वट्टति. इति यत्थ च यदा च सन्थरितुं न वट्टति, तं सब्बमिध अज्झोकाससङ्खमेव गतन्ति वेदितब्बं.

सन्थरित्वाति तथारूपे ठाने अत्तनो वा परस्स वा अत्थाय सन्थरित्वा. अञ्ञस्सत्थाय सन्थतम्पि हि याव सो तत्थ न निसीदति, ‘गच्छ त्व’न्ति वा न भणति, ताव सन्थारकस्सेव भारो. सन्थरापेत्वाति अनुपसम्पन्नेन सन्थरापेत्वा. एतदेव हि तस्स पलिबोधो होति, उपसम्पन्नेन सन्थतं सन्थारकस्सेव भारो, तञ्च खो याव आणापको तत्थ न निसीदति, ‘गच्छ त्व’न्ति वा न भणति. यस्मिञ्हि अत्तना सन्थरापिते वा पकतिसन्थते वा उपसम्पन्नो निसीदति, सब्बं तं निसिन्नस्सेव भारो, तस्मा सन्थरापितन्त्वेव सङ्खं गच्छति. तं पक्कमन्तो नेव उद्धरेय्य, न उद्धरापेय्याति अत्तना वा उद्धरित्वा पतिरूपे ठाने न ठपेय्य, परेन वा तथा न कारापेय्य. अनापुच्छं वा गच्छेय्याति यो भिक्खु वा सामणेरो वा आरामिको वा लज्जी ¶ होति, अत्तनो पलिबोधं विय मञ्ञति, तथारूपं अनापुच्छित्वा तं सेनासनं तस्स अनिय्यातेत्वा निरपेक्खो गच्छति, थाममज्झिमस्स पुरिसस्स लेड्डुपातं अतिक्कमेय्य, तस्स एकेन पादेन लेड्डुपातातिक्कमे दुक्कटं, दुतियपादातिक्कमे पाचित्तियं. भोजनसालाय ठितो पन ‘‘असुकस्मिं नाम दिवाविहारट्ठाने पञ्ञपेत्वा गच्छाही’’ति पेसेत्वा ततो निक्खमित्वा अञ्ञत्थ गच्छन्तो पादुद्धारेन कारेतब्बो.

सावत्थियं ¶ सम्बहुले भिक्खू आरब्भ सन्थतं अनुद्धरित्वा अनापुच्छं पक्कमनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, पुग्गलिके तिकदुक्कटं, चिमिलिकं वा उत्तरत्थरणं वा भूमत्थरणं वा तट्टिकं वा चम्मक्खण्डं वा पादपुञ्छनं वा फलकपीठं वा यं वा पनञ्ञं कञ्चि दारुभण्डं मत्तिकाभण्डं अन्तमसो पत्ताधारकम्पि वुत्तलक्खणे अज्झोकासे ठपेत्वा गच्छन्तस्स दुक्कटमेव. आरञ्ञकेन पन असति अनोवस्सके सब्बं रुक्खे लग्गेत्वापि यथा वा उपचिकाहि न खज्जति, एवं कत्वापि गन्तुं वट्टति. अब्भोकासिकेन पन चीवरकुटिकं कत्वापि रक्खितब्बं. अत्तनो सन्तके, विस्सासिकपुग्गलिके, उद्धरणादीनि कत्वा गमने, ओतापेन्तस्स, ‘‘आगन्त्वा उद्धरिस्सामी’’ति गच्छतो, वुड्ढतरा उट्ठापेन्ति, अमनुस्सो तत्थ निसीदति, कोचि इस्सरो गण्हाति, सीहादयो तं ठानं आगन्त्वा तिट्ठन्ति, एवं सेनासनं पलिबुद्धं होति, तथा पलिबुद्धे वा सेनासने, जीवितब्रह्मचरियन्तरायकरासु ¶ आपदासु वा गच्छन्तस्स, उम्मत्तकादीनञ्च अनापत्ति. मञ्चादीनं सङ्घिकता, वुत्तलक्खणे देसे सन्थरणं वा सन्थरापनं वा, अपलिबुद्धता, आपदाय अभावो, निरपेक्खता, लेड्डुपातातिक्कमोति इमानेत्थ छ अङ्गानि. समुट्ठानादीनि पठमकथिनसदिसानेव, इदं पन किरियाकिरियन्ति.

पठमसेनासनसिक्खापदवण्णना निट्ठिता.

५. दुतियसेनासनसिक्खापदवण्णना

पञ्चमे विहारेति गब्भे वा अञ्ञतरस्मिं वा सब्बपरिच्छन्ने वुत्तसेनासने. सेय्यन्ति सेय्या नाम भिसी चिमिलिका उत्तरत्थरणं भूमत्थरणं तट्टिका ¶ चम्मक्खण्डो निसीदनं पच्चत्थरणं तिणसन्थारो पण्णसन्थारोति वुत्तं. तत्थ चिमिलिका नाम परिकम्मकताय भूमिया वण्णानुरक्खणत्थं कता. उत्तरत्थरणं नाम मञ्चपीठादीनं उपरि अत्थरितब्बयुत्तकं पच्चत्थरणं. भूमत्थरणं नाम चिमिलिकाय सति तस्सा उपरि, असति सुद्धभूमियं अत्थरितब्बा कटसारकादि विकति. तट्टिका नाम तालपण्णादीहि कततट्टिका. चम्मक्खण्डो नाम यंकिञ्चि चम्मं, सीहचम्मादीनञ्हि परिहरणेयेव परिक्खेपो, सेनासनपरिभोगे पन अकप्पियचम्मं नाम नत्थि. पच्चत्थरणं नाम पावारो कोजवोति एत्तकमेव, सेसं पाकटमेव. इति इमासु दससु सेय्यासु एकम्पि सेय्यं अत्तनो वस्सग्गेन गहेत्वा वुत्तलक्खणे विहारे सन्थरित्वा वा सन्थरापेत्वा वा यो भिक्खु दिसंगमिको यथा ठपितं उपचिकाहि न खज्जति, तथा ठपनवसेन नेव उद्धरेय्य, न उद्धरापेय्य, पुरिमसिक्खापदे वुत्तनयेन अनापुच्छं ¶ वा गच्छेय्य, तस्स परिक्खित्तस्स आरामस्स परिक्खेपं, अपरिक्खित्तस्स उपचारं अतिक्कमन्तस्स पठमपादे दुक्कटं, दुतियपादे पाचित्तियं. यत्थ पन उपचिकासङ्का नत्थि, ततो अनापुच्छापि गन्तुं वट्टति, आपुच्छनं पन वत्तं.

सावत्थियं सत्तरसवग्गिये भिक्खू आरब्भ सङ्घिके विहारे सेय्यं सन्थरित्वा अनुद्धरित्वा अनापुच्छा पक्कमनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, पुग्गलिके तिकदुक्कटं, वुत्तलक्खणस्स पन विहारस्स उपचारे बहि आसन्ने उपट्ठानसालाय वा अपरिच्छन्नमण्डपे वा परिच्छन्ने वापि बहूनं सन्निपातभूते रुक्खमूले वा सन्थरित्वा वा सन्थरापेत्वा वा, मञ्चपीठञ्च विहारे वा वुत्तप्पकारे विहारूपचारे वा सन्थरित्वा वा सन्थरापेत्वा वा उद्धरणादीनि अकत्वा गच्छन्तस्स दुक्कटमेव. अत्तनो सन्तके, विस्सासिकपुग्गलिके, उद्धरणादीनि कत्वा, पुरिमनयेनेव पलिबुद्धं छड्डेत्वा गमने, यो च ‘‘अज्जेव आगन्त्वा पटिजग्गिस्सामी’’ति एवं सापेक्खो नदिपारं वा गामन्तरं वा गन्त्वा यत्थस्स गमनचित्तं उप्पन्नं, तत्थेव ठितो कञ्चि पेसेत्वा वा आपुच्छति, नदिपूरराजचोरादीसु वा केनचि पलिबुद्धो न सक्कोति पच्चागन्तुं, तस्स च, आपदासु च, उम्मत्तकादीनञ्च अनापत्ति. वुत्तलक्खणसेय्या ¶ , तस्सा सङ्घिकता, वुत्तलक्खणे विहारे सन्थरणं वा सन्थरापनं वा, अपलिबुद्धता, आपदाय अभावो, अनपेक्खस्स दिसापक्कमनं ¶ , उपचारसीमातिक्कमोति इमानेत्थ सत्त अङ्गानि. समुट्ठानादीनि अनन्तरसिक्खापदे वुत्तनयानेवाति.

दुतियसेनासनसिक्खापदवण्णना निट्ठिता.

६. अनुपखज्जसिक्खापदवण्णना

छट्ठे जानन्ति ‘‘अनुट्ठापनीयो अय’’न्ति जानन्तो, तेनेवस्स पदभाजने ‘‘वुड्ढो’ति जानाति, ‘गिलानो’ति जानाति, ‘सङ्घेन दिन्नो’ति जानाती’’ति (पाचि. १२१) वुत्तं. वुड्ढो हि अत्तनो वुड्ढताय अनुट्ठापनीयो, गिलानो गिलानताय, सङ्घो पन भण्डागारिकस्स वा धम्मकथिकविनयधरगणवाचकाचरियानं वा बहूपकारतं गुणविसिट्ठतञ्च सल्लक्खेत्वा धुववासत्थाय विहारं सल्लक्खेत्वा सम्मन्नित्वा देति, तस्मा यस्स सङ्घेन दिन्नो, सोपि अनुट्ठापनीयो. पुब्बुपगतन्ति पुब्बं उपगतं. अनुपखज्जाति मञ्चपीठानं वा तस्स वा भिक्खुनो पविसन्तस्स वा निक्खमन्तस्स वा उपचारं अनुपविसित्वा. तत्थ मञ्चपीठानं ताव महल्लके विहारे समन्ता दियड्ढो हत्थो उपचारो, खुद्दके यतो पहोति, ततो दियड्ढो हत्थो ¶ , तस्स पन पविसन्तस्स पादधोवनपासाणतो याव मञ्चपीठं, निक्खमन्तस्स मञ्चपीठतो याव पस्सावट्ठानं, ताव उपचारो. सेय्यं कप्पेय्याति तस्स सम्बाधं कत्तुकामताय तस्मिं उपचारे दससु सेय्यासु एकम्पि सन्थरन्तस्स वा सन्थरापेन्तस्स वा दुक्कटं, तत्थ निसीदन्तस्स वा निपज्जन्तस्स वा पाचित्तियं, द्वेपि करोन्तस्स द्वे पाचित्तियानि, पुनप्पुनं करोन्तस्स पयोगगणनाय पाचित्तियं.

सावत्थियं छब्बग्गिये भिक्खू आरब्भ अनुपखज्ज सेय्यकप्पनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, पुग्गलिके तिकदुक्कटं, वुत्तूपचारतो वा बहि, उपट्ठानसालादिके वा, विहारस्स उपचारे वा, सन्थरणसन्थरापनेसुपि निसज्जसयनेसुपि दुक्कटमेव. अत्तनो वा, विस्सासिकस्स वा सन्तके पन विहारे सन्थरन्तस्स, यो च गिलानो वा सीतुण्हपीळितो वा पविसति, तस्स च, आपदासु च, उम्मत्तकादीनञ्च अनापत्ति. सङ्घिकविहारता, अनुट्ठापनीयभावजाननं, सम्बाधेतुकामता, उपचारे निसीदनं वा निपज्जनं वाति इमानेत्थ ¶ चत्तारि अङ्गानि. समुट्ठानादीनि पठमपाराजिकसदिसानेव, इदं पन दुक्खवेदनमेवाति.

अनुपखज्जसिक्खापदवण्णना निट्ठिता.

७. निक्कड्ढनसिक्खापदवण्णना

सत्तमे कुपितोति कुद्धो. अनत्तमनोति अतुट्ठचित्तो. निक्कड्ढेय्य वा निक्कड्ढापेय्य वा पाचित्तियन्ति एत्थ ये अनेकभूमका ¶ पासादा, अनेककोट्ठकानि वा चतुस्सालानि, तादिसेसु सेनासनेसु गहेत्वा अन्तरा अट्ठपेत्वा एकेनेव पयोगेन अतिक्कामेन्तस्स एकं पाचित्तियं, ठपेत्वा ठपेत्वा नानापयोगेहि अतिक्कामेन्तस्स द्वारगणनाय पाचित्तियानि, हत्थेन अनामसित्वा ‘निक्खमा’ति वत्वा वाचाय निक्कड्ढन्तस्सापि एसेव नयो. निक्कड्ढापेन्तस्स पन ‘निक्कड्ढा’ति आणत्तमत्ते दुक्कटं, सकिं आणत्ते पन तस्मिं बहुकेपि द्वारे निक्खमन्ते इतरस्स एकमेव पाचित्तियं. सचे पन ‘‘एत्तकानि द्वारानि निक्कड्ढाही’’ति वा, ‘‘याव महाद्वारं, ताव निक्कड्ढाही’’ति वा एवं नियमेत्वा आणत्तो होति, द्वारगणनाय पाचित्तियानि.

सावत्थियं छब्बग्गिये भिक्खू आरब्भ भिक्खुं सङ्घिका विहारा निक्कड्ढनवत्थुस्मिं

पञ्ञत्तं ¶ , साधारणपञ्ञत्ति, साणत्तिकं, तिकपाचित्तियं, पुग्गलिके तिकदुक्कटं, तस्स परिक्खारनिक्कड्ढने, उपट्ठानसालादिका विहारूपचारा तस्स वा तस्स परिक्खारस्स वा निक्कड्ढने, अनुपसम्पन्नस्स पन अनुपसम्पन्नपरिक्खारस्स वा विहारा वा विहारूपचारा वा निक्कड्ढने निक्कड्ढापने च दुक्कटमेव. तञ्च खो असम्बद्धेसु परिक्खारेसु परिक्खारगणनाय वेदितब्बं. अत्तनो वा, विस्सासिकस्स वा सन्तका विहारा निक्कड्ढने, सकलसङ्घारामतोपि भण्डनकारकस्स वा तस्स परिक्खारस्स वा निक्कड्ढने निक्कड्ढापने वा, अत्तनो वसनट्ठानतो अलज्जिस्स, उम्मत्तकस्स, न सम्मावत्तन्तानं अन्तेवासिकसअविहारिकानं, तेसं परिक्खारस्स वा निक्कड्ढने च, सयं उम्मत्तकादीनञ्च अनापत्ति. सङ्घिकविहारो ¶ , उपसम्पन्नस्स भण्डनकारकभावादिविनिमुत्तता, कोपेन निक्कड्ढनं वा निक्कड्ढापनं वाति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

निक्कड्ढनसिक्खापदवण्णना निट्ठिता.

८. वेहासकुटिसिक्खापदवण्णना

अट्ठमे उपरिवेहासकुटियाति उपरि अच्छन्नतलाय द्विभूमिककुटिया वा तिभूमिककुटिया वा, पदभाजने पन इध अधिप्पेतं कुटिं दस्सेतुं ‘‘मज्झिमस्स पुरिसस्स असीसघट्टा’’ति (पाचि. १३१) वुत्तं. आहच्चपादकन्ति अङ्गे विज्झित्वा पवेसितपादकं. अभिनिसीदेय्याति अभिभवित्वा अज्झोत्थरित्वा निसीदेय्य, भुम्मत्थे वा एतं उपयोगवचनं, मञ्चे वा पीठे वा निसीदेय्य वा निपज्जेय्य वाति अत्थो. अभीति इदं पन पदसोभणत्थे उपसग्गमत्तमेव, तस्मा यो भिक्खु वुत्तलक्खणाय वेहासकुटिया सब्बन्तिमेन परिच्छेदेन याव पमाणमज्झिमस्स पुरिसस्स सब्बसो हेट्ठिमाहि तुलाहि सीसं न घट्टेति, एत्तकं उच्चाय तुलानं उपरि ठपिते आहच्चपादके मञ्चे वा पीठे वा निसीदति वा निपज्जति वा, तस्स अनुपखज्जसिक्खापदे वुत्तनयेन पयोगगणनाय पाचित्तियं.

सावत्थियं ¶ अञ्ञतरं भिक्खुं आरब्भ उपरिवेहासकुटिया आहच्चपादकं मञ्चं पीठं सहसा अभिनिसीदनअभिनिपज्जनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, पुग्गलिके तिकदुक्कटं, अत्तनो वा, विस्सासिकस्स वा सन्तके विहारे, अवेहासकुटिया, सीसघट्टाय, यस्स वा हेट्ठा दब्बसम्भारादीनं निक्खित्तत्ता अपरिभोगं होति, उपरितलं वा पदरसञ्चितं सुधादिपरिकम्मकतं वा, तत्थ आहच्चपादके निसीदन्तस्स, यो ¶ चे तस्मिं वेहासट्ठेपि आहच्चपादके ठितो किञ्चि गण्हाति वा लग्गति वा, यस्स च पटाणी दिन्ना होति, पादसीसानं उपरि आणी पवेसिता, तत्थ निसीदन्तस्स, उम्मत्तकादीनञ्च अनापत्ति. सङ्घिको विहारो, असीसघट्टा वेहासकुटि, हेट्ठा सपरिभोगं ¶ , अपटाणिदिन्ने आहच्चपादके निसीदनं वा निपज्जनं वाति इमानेत्थ चत्तारि अङ्गानि. समुट्ठानादीनि एळकलोमसदिसानीति.

वेहासकुटिसिक्खापदवण्णना निट्ठिता.

९. महल्लकविहारसिक्खापदवण्णना

नवमे महल्लकन्ति सस्सामिकं. विहारन्ति उल्लित्तावल्लित्तं. याव द्वारकोसातिएत्थ द्वारकोसो नाम उक्कट्ठपरिच्छेदेन पिट्ठसङ्घाटस्स सामन्ता अड्ढतेय्यहत्थो पदेसो. अग्गळट्ठपनायाति सकवाटकस्स द्वारबन्धस्स निच्चलभावत्थाय. कवाटञ्हि लहुपरिवत्तकं विवरणकाले भित्तिं आहनति, पिदहनकाले द्वारबन्धं. तेन आहनेन भित्ति कम्पति, ततो मत्तिका चलति, चलित्वा सिथिला वा होति पतति वा, तेनाह भगवा ‘‘याव द्वारकोसा अग्गळट्ठपनाया’’ति. तत्थ किञ्चापि ‘‘इदं नाम कत्तब्ब’’न्ति नेव मातिकायं, न पदभाजने वुत्तं, अट्ठुप्पत्तियं पन ‘‘पुनप्पुनं छादापेसि, पुनप्पुनं लेपापेसी’’ति (पाचि. १३४) अधिकारतो याव द्वारकोसा अग्गळट्ठपनाय पुनप्पुनं लिम्पितब्बो वा लेपापेतब्बो वाति एवमत्थो दट्ठब्बो. आलोकसन्धिपरिकम्मायातिएत्थ आलोकसन्धीति वातपानकवाटका वुच्चन्ति. ते विवरणकाले विदत्थिमत्तम्पि अतिरेकम्पि भित्तिप्पदेसं पहरन्ति, उपचारो पनेत्थ सब्बदिसासु लब्भति, तस्मा सब्बदिसासु कवाटवित्थारप्पमाणो ओकासो आलोकसन्धिपरिकम्मत्थाय लिम्पितब्बो वा लेपापेतब्बो वाति अयमेत्थ अधिप्पायो.

एवं लेपकम्मे यं कत्तब्बं, तं दस्सेत्वा इदानि छदने कत्तब्बं दस्सेतुं द्वत्तिच्छदनस्सातिआदिमाह. तत्थ द्वत्तिच्छदनस्स परियायन्ति छदनस्स द्वत्तिपरियायं, परियायं वुच्चति परिक्खेपो, परिक्खेपद्वयं वा परिक्खेपत्तयं वा अधिट्ठातब्बन्ति अत्थो. अप्पहरिते ठितेनाति अहरिते ठितेन. हरितन्ति चेत्थ सत्तधञ्ञादिभेदं ¶ पुब्बण्णं, मुग्गमासतिलकुलत्थअलाबुकुम्भण्डादिभेदञ्च अपरण्णं अधिप्पेतं. यं तस्मिं खेत्ते वुत्तं ¶ न ताव सम्पज्जति, वस्से पन पतिते सम्पज्जिस्सति, तम्पि हरितसङ्खमेव गच्छति. तस्मा तस्मिं ठत्वा अधिट्ठहन्तो दुक्कटं आपज्जति. अप्पहरिते ठत्वा अधिट्ठहन्तस्सापि अयं परिच्छेदो, पिट्ठिवंसस्स ¶ वा कूटागारथूपिकाय वा पस्से निसिन्नो पुरिसो छदनमुखवट्टिअन्तेन ओलोकेन्तो यस्मिं भूमिभागे ठितं भिक्खुं पस्सति, यस्मिञ्च ठितो तं उपरि निसिन्नकं तथेव उल्लोकेन्तो पस्सति, तस्मिं ठातब्बं, तस्स अन्तो अहरितेपि ठातुं न लभति. ततो चे उत्तरीति मग्गेन छादियमाने तिण्णं मग्गानं, परियायेन छादियमाने तिण्णं परियायानं उपरि इट्ठकसिलासुधाहि छादियमाने इट्ठकसिलासुधापिण्डगणनाय, तिणपण्णेहि छादियमाने पण्णगणनाय चेव तिणमुट्ठिगणनाय च पाचित्तियं.

कोसम्बियं छन्नत्थेरं आरब्भ पुनप्पुनं छादापनलेपापनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, ऊनद्वत्तिपरियाये अतिरेकसञ्ञिनो वेमतिकस्स वा दुक्कटं. सेतवण्णादिकरणे, द्वत्तिपरियाये वा ऊनकद्वत्तिपरियाये वा, लेणगुहातिणकुटिकादीसु, अञ्ञस्सत्थाय, अत्तनो धनेन कारेन्तस्स, वासागारं ठपेत्वा सेसानि अधिट्ठहन्तस्स, उम्मत्तकादीनञ्च अनापत्ति. महल्लकविहारता, अत्तनो वासागारता, उत्तरि अधिट्ठानन्ति इमानेत्थ तीणि अङ्गानि. समुट्ठानादीनि सञ्चरित्ते वुत्तनयानेवाति.

महल्लकविहारसिक्खापदवण्णना निट्ठिता.

१०. सप्पाणकसिक्खापदवण्णना

दसमे जानं सप्पाणकन्ति ‘‘सप्पाणकं एत’’न्ति दिस्वा वा सुत्वा वा येन केनचि आकारेन जानन्तो. सिञ्चेय्य वा सिञ्चापेय्य वाति तेन उदकेन सयं वा सिञ्चेय्य, अञ्ञं वा आणापेत्वा सिञ्चापेय्य. तत्थ धारं अविच्छिन्दित्वा सिञ्चन्तस्स एकस्मिं घटे एकाव आपत्ति, विच्छिन्दन्तस्स पयोगगणनाय आपत्तियो. मातिकं पमुखं करोति, दिवसम्पि सन्दतु, एकाव आपत्ति. तत्थ तत्थ बन्धित्वा अञ्ञतो नेन्तस्स पयोगगणनाय आपत्तियो. बहुकम्पि तिणपण्णसाखादिं एकप्पयोगेन ¶ उदके पक्खिपन्तस्स एकाव आपत्ति, एकेकं पक्खिपन्तस्स पयोगगणनाय आपत्तियो. इदञ्च यं एवं पक्खिपियमाने परियादानं गच्छति, आविलं वा होति, यथा पाणका मरन्ति, तादिसं सन्धाय वुत्तं, न महाउदकं. सिञ्चापने आणत्तिया दुक्कटं, एकाणत्तिया बहुकम्पि सिञ्चतु, आणापकस्स एकमेव पाचित्तियं.

आळवियं आळवके भिक्खू आरब्भ सिञ्चनवत्थुस्मिं पञ्ञत्तं, साधारणपञ्ञत्ति, साणत्तिकं ¶ , अप्पाणके सप्पाणकसञ्ञिनो, उभोसु ¶ वेमतिकस्स दुक्कटं. अप्पाणकसञ्ञिनो, असञ्चिच्च अस्सतिया वा सिञ्चन्तस्स, अजानन्तस्स, उम्मत्तकादीनञ्च अनापत्ति. उदकस्स सप्पाणकता, ‘‘सिञ्चनेन पाणका मरिस्सन्ती’’ति जाननं, तञ्च उदकं तादिसमेव, विना वधकचेतनाय येन केनचि करणीयेन तिणादीनं सिञ्चनन्ति इमानेत्थ चत्तारि अङ्गानि. समुट्ठानादीनि अदिन्नादानसदिसानि, इदं पन पण्णत्तिवज्जं, तिचित्तं, तिवेदनन्ति.

सप्पाणकसिक्खापदवण्णना निट्ठिता.

भूतगामवग्गो दुतियो.

३. ओवादवग्गो

१. ओवादसिक्खापदवण्णना

ओवादवग्गस्स पठमे असम्मतोति या अट्ठङ्गसमन्नागतस्स भिक्खुनो भगवता ञत्तिचतुत्थेन कम्मेन (पाचि. १४६) भिक्खुनोवादकसम्मुति अनुञ्ञाता, ताय असम्मतो. ओवदेय्याति भिक्खुनिसङ्घं वा सम्बहुला वा एकं भिक्खुनिं वा ‘‘वस्ससतूपसम्पन्नाय भिक्खुनिया तदहुपसम्पन्नस्स भिक्खुनो अभिवादनं पच्चुट्ठानं अञ्जलिकम्मं सामीचिकम्मं कातब्ब’’न्ति आदिके (चूळव. ४०३) अट्ठ गरुधम्मे ओवादवसेन ओसारेन्तो ओवदेय्य. पाचित्तियन्ति ओवादपरियोसाने पाचित्तियं.

सावत्थियं छब्बग्गिये भिक्खू आरब्भ ओवदनवत्थुस्मिं पञ्ञत्तं, असाधारणपञ्ञत्ति, अनाणत्तिकं, अञ्ञेन वा धम्मेन भिक्खुनीसु उपसम्पन्नमत्तं वा ओवदतो दुक्कटं. सम्मतस्सापि तञ्चे सम्मुतिकम्मं अधम्मकम्मं होति, तस्मिं अधम्मकम्मे अधम्मकम्मसञ्ञिनो वग्गे भिक्खुनिसङ्घे ओवदतो ¶ तिकपाचित्तियं, तथा वेमतिकस्स धम्मकम्मसञ्ञिनो चाति नव पाचित्तियानि, समग्गेपि भिक्खुनिसङ्घेन वाति अधम्मकम्मवसेन अट्ठारस. सचे पन तं धम्मकम्मं होति, ‘‘धम्मकम्मे धम्मकम्मसञ्ञी समग्गं भिक्खुनिसङ्घं समग्गसञ्ञी ओवदती’’ति (पाचि. १५१) इदं अवसानपदं ठपेत्वा तेनेव नयेन सत्तरस दुक्कटानि, ‘‘समग्गम्हाय्या’’ति ¶ च वुत्ते अञ्ञं धम्मं, ‘‘वग्गम्हाय्या’’ति च वुत्ते अट्ठ गरुधम्मे भणन्तस्स, ओवादञ्च अनिय्यातेत्वा अञ्ञं धम्मं भणन्तस्स दुक्कटमेव. यो पन धम्मकम्मे धम्मकम्मसञ्ञी समग्गं भिक्खुनिसङ्घं समग्गसञ्ञी ओवदति, गरुधम्मपाळिं उद्देसं देति, परिपुच्छं देति, ‘‘ओसारेहि अय्या’’ति वुच्चमानो ओसारेति, पञ्हं पुट्ठो कथेति, भिक्खुनीनं सुणमानानं अञ्ञस्सत्थाय भणति, सिक्खमानाय वा सामणेरिया वा भणति, तस्स, उम्मत्तकादीनञ्च अनापत्ति. असम्मतता, भिक्खुनिया परिपुण्णूपसम्पन्नता, ओवादवसेन अट्ठगरुधम्मभणनन्ति इमानेत्थ तीणि अङ्गानि. समुट्ठानादीनि पदसोधम्मसदिसानेवाति.

ओवादसिक्खापदवण्णना निट्ठिता.

२. अत्थङ्गतसिक्खापदवण्णना

दुतिये ¶ ओवदेय्याति अट्ठगरुधम्मेहि वा अञ्ञेन वा धम्मेन ओवदन्तस्स सम्मतस्सापि पाचित्तियमेव.

सावत्थियं आयस्मन्तं चूळपन्थकं आरब्भ अत्थङ्गते सूरिये ओवदनवत्थुस्मिं पञ्ञत्तं, असाधारणपञ्ञत्ति, अनाणत्तिकं, तिकपाचित्तियं, सूरिये अत्थङ्गते अत्थङ्गतसञ्ञिनो वेमतिकस्स वा, एकतोउपसम्पन्नं ओवदन्तस्स च दुक्कटं. पुरिमसिक्खापदे विय उद्देसादिनयेन अनापत्ति. अत्थङ्गतसूरियता, परिपुण्णूपसम्पन्नता, ओवदनन्ति इमानेत्थ तीणि अङ्गानि. समुट्ठानादीनि पदसोधम्मसदिसानेवाति.

अत्थङ्गतसिक्खापदवण्णना निट्ठिता.

३. भिक्खुनुपस्सयसिक्खापदवण्णना

ततिये ¶ भिक्खुनुपस्सयन्ति भिक्खुनिया एकरत्तं वसनट्ठानम्पि. ओवदेय्याति इध गरुधम्मेहि ओवदन्तस्सेव पाचित्तियं. सचे पन असम्मतो होति, द्वे पाचित्तियानि. सचे पन सूरियेपि अत्थङ्गते ओवदति, तीणि होन्ति. सम्मतस्स पन रत्तिं ओवदन्तस्सपि द्वे एव होन्ति. सम्मतत्ता हि भिक्खुस्स गरुधम्मोवादमूलकं पाचित्तियं नत्थि. गिलानाति न सक्कोति ओवादाय वा संवासाय वा गन्तुं.

सक्केसु ¶ छब्बग्गिये भिक्खू आरब्भ भिक्खुनुपस्सयं उपसङ्कमित्वा ओवदनवत्थुस्मिं पञ्ञत्तं, ‘‘अञ्ञत्र समया’’ति अयमेत्थ अनुपञ्ञत्ति, असाधारणपञ्ञत्ति, अनाणत्तिकं, तिकपाचित्तियं, अनुपसम्पन्नाय उपसम्पन्नसञ्ञिनो वेमतिकस्स वा, एकतोउपसम्पन्नं येन केनचि, इतरं अञ्ञेन धम्मेन ओवदन्तस्स च दुक्कटं. समये, अनुपसम्पन्नाय, पुरिमसिक्खापदे विय उद्देसादिनयेन च अनापत्ति. उपस्सयूपगमनं, परिपुण्णूपसम्पन्नता, समयाभावो, गरुधम्मेहि ओवदनन्ति इमानेत्थ चत्तारि अङ्गानि. समुट्ठानादीनि पठमकथिनसदिसानि, इदं पन किरियं होतीति.

भिक्खुनुपस्सयसिक्खापदवण्णना निट्ठिता.

४. आमिससिक्खापदवण्णना

चतुत्थे आमिसहेतूति चीवरादीनं अञ्ञतरहेतु. भिक्खूति सम्मता भिक्खू इधाधिप्पेता. पाचित्तियन्ति एवरूपे भिक्खू अवण्णकामताय एवं भणन्तस्स पाचित्तियं.

सावत्थियं छब्बग्गिये भिक्खू आरब्भ ‘‘आमिसहेतु ओवदन्ती’’ति भणनवत्थुस्मिं पञ्ञत्तं, असाधारणपञ्ञत्ति, अनाणत्तिकं, धम्मकम्मे तिकपाचित्तियं, अधम्मकम्मे तिकदुक्कटं, असम्मतं उपसम्पन्नञ्च, अनुपसम्पन्नञ्च सम्मतं वा असम्मतं वा एवं भणन्तस्स दुक्कटमेव. तत्थ यो भिक्खु काले सम्मुतिं लभित्वा सामणेरभूमियं सण्ठितो, अयं सम्मतो नाम अनुपसम्पन्नो. पकतिया चीवरादिहेतु ओवदन्तं पन एवं ¶ भणन्तस्स ¶ , उम्मत्तकादीनञ्च अनापत्ति. उपसम्पन्नता, धम्मेन लद्धसम्मुतिता, अनामिसन्तरता, अवण्णकामताय एवं भणनन्ति इमानेत्थ चत्तारि अङ्गानि. समुट्ठानादीनि अदिन्नादानसदिसानि, इदं पन दुक्खवेदनमेवाति.

आमिससिक्खापदवण्णना निट्ठिता.

५. चीवरदानसिक्खापदवण्णना

पञ्चमे सावत्थियं अञ्ञतरं भिक्खुं आरब्भ चीवरदानवत्थुस्मिं पञ्ञत्तं, सेसकथामग्गो पनेत्थ ¶ चीवरप्पटिग्गहणसिक्खापदे वुत्तनयेनेव वेदितब्बो. तत्र हि भिक्खु पटिग्गाहको, इध भिक्खुनी, अयं विसेसो, सेसं तादिसमेवाति.

चीवरदानसिक्खापदवण्णना निट्ठिता.

६. चीवरसिब्बनसिक्खापदवण्णना

छट्ठे चीवरन्ति निवासनपारुपनुपगं. सिब्बेय्य वा सिब्बापेय्या वाति एत्थ सयं सिब्बन्तस्स सूचिं पवेसेत्वा पवेसेत्वा नीहरणे पाचित्तियं, सतक्खत्तुम्पि विज्झित्वा सकिं नीहरन्तस्स एकमेव पाचित्तियं. ‘सिब्बा’ति वुत्तो पन सचेपि सब्बं सूचिकम्मं निट्ठापेति, आणापकस्स एकमेव पाचित्तियं. अथ ‘‘यं एत्थ चीवरे कत्तब्बं, सब्बं तं तव भारो’’ति वुत्तो निट्ठापेति, तस्स आरापथे आरापथे पाचित्तियं. आणापकस्स एकवाचाय सम्बहुलानिपि, पुनप्पुनं आणत्तियं पन वत्तब्बमेव नत्थि.

सावत्थियं उदायित्थेरं आरब्भ चीवरसिब्बनवत्थुस्मिं पञ्ञत्तं, असाधारणपञ्ञत्ति, साणत्तिकं, तिकपाचित्तियं, ञातिकाय अञ्ञातिकसञ्ञिनो वा वेमतिकस्स वा, एकतोउपसम्पन्नाय सिब्बन्तस्स च दुक्कटं. अञ्ञं थविकादिपरिक्खारं सिब्बन्तस्स, ञातिकाय, सिक्खमानसामणेरीनञ्च चीवरम्पि सिब्बन्तस्स, उम्मत्तकादीनञ्च अनापत्ति. अञ्ञातिकाय भिक्खुनिया सन्तकता ¶ , निवासनपारुपनुपगता, वुत्तलक्खणं सिब्बनं वा सिब्बापनं वाति इमानेत्थ तीणि अङ्गानि. समुट्ठानादीनि सञ्चरित्तसदिसानेवाति.

चीवरसिब्बनसिक्खापदवण्णना निट्ठिता.

७. संविधानसिक्खापदवण्णना

सत्तमे संविधायाति संविदहित्वा, गमनकाले सङ्केतं कत्वाति अत्थो. एकद्धानमग्गन्ति एकं अद्धानसङ्खातं मग्गं, एकतो वा अद्धानमग्गं. सत्थगमनीयोति सत्थेन सद्धिं गन्तब्बो, सेसं उत्तानपदत्थमेव. अयं पनेत्थ विनिच्छयो – अकप्पियभूमियं संविदहन्तस्स संविदहनपच्चया ताव दुक्कटं. तत्थ ठपेत्वा भिक्खुनुपस्सयं अन्तरारामं आसनसालं तित्थियसेय्यञ्च सेसा अकप्पियभूमि, तत्थ ठत्वा संविदहन्तस्साति अत्थो. संविदहित्वा पन ‘‘अज्ज वा स्वे वा’’ति नियमितं कालं विसङ्केतं अकत्वा, द्वारविसङ्केतं पन मग्गविसङ्केतं वा कत्वापि भिक्खुनिया ¶ सद्धिं गच्छन्तस्स याव ¶ आसन्नस्सापि अञ्ञस्स गामस्स ‘‘अयं इमस्स उपचारो’’ति मनुस्सेहि ठपितं उपचारं न ओक्कमति, ताव अनापत्ति. तं ओक्कमन्तस्स पन पठमपादे दुक्कटं, दुतियपादे पाचित्तियं, इति गामूपचारोक्कमनगणनाय पाचित्तियानि. अद्धयोजनातिक्कमे पन गामे असति अद्धयोजनगणनाय पाचित्तियं.

सावत्थियं छब्बग्गिये भिक्खू आरब्भ एकद्धानमग्गप्पटिपज्जनवत्थुस्मिं पञ्ञत्तं, ‘‘अञ्ञत्र समया’’ति अयमेत्थ अनुपञ्ञत्ति, असाधारणपञ्ञत्ति, अनाणत्तिकं, तिकपाचित्तियं, असंविदहिते संविदहितसञ्ञिनो वेमतिकस्स वा, यो च भिक्खुनिया असंविदहन्तिया केवलं अत्तनाव संविदहति, तस्स दुक्कटं. समये संविदहित्वापि गच्छन्तस्स, अत्तना असंविदहन्तस्स, विसङ्केतेन वा, आपदासु गच्छन्तस्स, उम्मत्तकादीनञ्च अनापत्ति. द्विन्नम्पि संविदहित्वा मग्गप्पटिपत्ति, अविसङ्केतता, समयाभावो, अनापदा, गामन्तरोक्कमनं वा अद्धयोजनातिक्कमो वाति इमानेत्थ पञ्च अङ्गानि. एकतोउपसम्पन्नादीहि पन सद्धिं मातुगामसिक्खापदेन आपत्ति, अद्धानसमुट्ठानं, किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति.

संविधानसिक्खापदवण्णना निट्ठिता.

८. नावाभिरुहनसिक्खापदवण्णना

अट्ठमे ¶ संविधायाति कीळापुरेक्खारो संविदहित्वा, अभिरुहनकाले सङ्केतं कत्वाति अत्थो. उद्धंगामिनिन्ति कीळावसेन उद्धं नदिया पटिसोतं गच्छन्तिं. अधोगामिनिन्ति तथेव अधो अनुसोतं गच्छन्तिं. यं पन तित्थप्पटिपादनत्थं उद्धं वा अधो वा हरन्ति, एत्थ अनापत्ति. अञ्ञत्र तिरियं तरणायाति उपयोगत्थे निस्सक्कवचनं, या तिरियं तरणा, तं ठपेत्वाति अत्थो. पाचित्तियन्ति सगामकतीरपस्सेन गमनकाले गामन्तरगणनाय, अगामकतीरपस्सेन वा योजनवित्थताय नदिया मज्झेन वा गमनकाले अद्धयोजनगणनाय पाचित्तियं, समुद्दे पन यथासुखं गन्तुं वट्टति.

सावत्थियं छब्बग्गिये भिक्खू आरब्भ नावाभिरुहनवत्थुस्मिं पञ्ञत्तं, ‘‘अञ्ञत्र तिरियं तरणाया’’ति अयमेत्थ अनुपञ्ञत्ति, सेसं अनन्तरसिक्खापदे वुत्तनयेनेव वेदितब्बन्ति.

नावाभिरुहनसिक्खापदवण्णना निट्ठिता.

९. परिपाचितसिक्खापदवण्णना

नवमे ¶ भिक्खुनिपरिपाचितन्ति भिक्खुनिया परिपाचितं, नेव तस्स नात्तनो ञातकप्पवारितानं गिहीनं सन्तिके भिक्खुस्स गुणं पकासेत्वा ‘‘देथ अय्यस्स, करोथ अय्यस्सा’’ति एवं निप्फादितं लद्धब्बं कतन्ति अत्थो. पुब्बे गिहिसमारम्भाति एत्थ समारम्भोति समारद्धं, पटियादितस्सेतं नामं. गिहीनं समारम्भो ¶ गिहिसमारम्भो, भिक्खुनिया परिपाचनतो पुब्बे पठमतरंयेव यं भिक्खूनं अत्थाय गिहीनं पटियादितभत्तं, ञातकप्पवारितानं वा सन्तकं, तं ठपेत्वा अञ्ञं जानं भुञ्जन्तस्स पाचित्तियन्ति अत्थो. तञ्च खो अज्झोहरणगणनाय, पटिग्गहणे पनस्स दुक्कटं.

राजगहे देवदत्तं आरब्भ भिक्खुनिपरिपाचितपिण्डपातभुञ्जनवत्थुस्मिं पञ्ञत्तं, ‘‘अञ्ञत्र पुब्बे गिहिसमारम्भा’’ति अयमेत्थ अनुपञ्ञत्ति, असाधारणपञ्ञत्ति, अनाणत्तिकं, एकतोउपसम्पन्नाय परिपाचितं भुञ्जन्तस्स ¶ , अपरिपाचिते परिपाचितसञ्ञिनो, उभयत्थ वेमतिकस्स च दुक्कटं. उभयत्थ अपरिपाचितसञ्ञिनो, गिहिसमारम्भे, सिक्खमानसामणेरादीहि परिपाचिते, पञ्च भोजनानि ठपेत्वा अवसेसे, उम्मत्तकादीनञ्च अनापत्ति. भिक्खुनिया परिपाचितता, परिपाचितभावजाननं, गिहिसमारम्भाभावो, ओदनादीनं अञ्ञतरता, तस्स अज्झोहरणन्ति इमानेत्थ पञ्च अङ्गानि. समुट्ठानादीनि पठमपाराजिकसअसानि, इदं पन पण्णत्तिवज्जं, तिचित्तं, तिवेदनन्ति.

परिपाचितसिक्खापदवण्णना निट्ठिता.

१०. रहोनिसज्जसिक्खापदवण्णना

दसमे सब्बोपि कथामग्गो दुतियअनियते वुत्तनयेनेव वेदितब्बो. इदञ्हि सिक्खापदं दुतियअनियतेन च उपरि उपनन्दस्स चतुत्थसिक्खापदेन च एकपरिच्छेदं, अट्ठुप्पत्तिवसेन पन विसुं पञ्ञत्तन्ति.

रहोनिसज्जसिक्खापदवण्णना निट्ठिता.

ओवादवग्गो ततियो.

४. भोजनवग्गो

१. आवसथसिक्खापदवण्णना

भोजनवग्गस्स ¶ पठमे अगिलानेनाति अद्धयोजनम्पि गन्तुं समत्थेन. एकोति एकदिवसिको. आवसथपिण्डोति ‘‘इमेसं वा एत्तकानं वा’’ति एकं पासण्डं वा, ‘‘एत्तकमेवा’’ति एवं भत्तं वा अनोदिस्स सालादीसु यत्थ कत्थचि पुञ्ञकामेहि पञ्ञत्तं भोजनं. भुञ्जितब्बोति एककुलेन वा नानाकुलेहि वा एकतो हुत्वा एकस्मिं वा ठाने, नानाठानेसु वा ‘‘अज्ज एकस्मिं, स्वे एकस्मि’’न्ति एवं अनियतट्ठाने वा पञ्ञत्तो एकस्मिं ठाने एकदिवसमेव भुञ्जितब्बो. ततो चे उत्तरीति दुतियदिवसतो पट्ठाय तस्मिं वा ठाने अञ्ञस्मिं वा ठाने तेसं सन्तकस्स पटिग्गहणे दुक्कटं, अज्झोहारे अज्झोहारे पाचित्तियं.

सावत्थियं ¶ छब्बग्गिये भिक्खू आरब्भ अनुवसित्वा आवसथपिण्डभुञ्जनवत्थुस्मिं पञ्ञत्तं, ‘‘अगिलानेना’’ति अयमेत्थ अनुपञ्ञत्ति, साधारणपञ्ञत्ति, अनाणत्तिकं, तिकपाचित्तियं, गिलानस्स अगिलानसञ्ञिनो वेमतिकस्स वा दुक्कटं. गिलानस्स गिलानसञ्ञिनो, यो च सकिं भुञ्जति, गच्छन्तो वा अन्तरामग्गे एकदिवसं ¶ , गतट्ठाने एकदिवसं, पच्चागन्तोपि अन्तरामग्गे एकदिवसं, आगतट्ठाने एकदिवसं, गमिस्सामी’ति च भुञ्जित्वा निक्खन्तो केनचि उपद्दवेन निवत्तित्वा खेमभावं ञत्वा गच्छन्तो पुन एकदिवसं भुञ्जति, यस्स वा सामिका निमन्तेत्वा देन्ति, यो वा भिक्खूनंयेव उद्दिस्स पञ्ञत्तं, न यावदत्थं पञ्ञत्तं, ठपेत्वा वा पञ्च भोजनानि अञ्ञं भुञ्जति, तस्स च, उम्मत्तकादीनञ्च अनापत्ति. आवसथपिण्डता, अगिलानता, अनुवसित्वा परिभोजनन्ति इमानेत्थ तीणि अङ्गानि. समुट्ठानादीनि एळकलोमसिक्खापदसदिसानीति.

आवसथसिक्खापदवण्णना निट्ठिता.

२. गणभोजनसिक्खापदवण्णना

दुतिये गणभोजनेति गणस्स भोजने. इध च गणोति चत्तारो वा ततुत्तरि वा भिक्खू ¶ , तेसं निमन्तनतो वा विञ्ञत्तितो वा लद्धे ओदनादीनं पञ्चन्नं भोजनानं अञ्ञतरभोजनेति अत्थो. तत्थायं विनिच्छयो – सचे हि कोचि चत्तारो भिक्खू उपसङ्कमित्वा येन केनचि वेवचनेन वा भासन्तरेन वा पञ्चन्नं भोजनानं नामं गहेत्वा ‘‘ओदनेन निमन्तेमि, ओदनं मे गण्हथा’’तिआदिना नयेन निमन्तेति, ते चे एवं एकतो वा नानातो वा निमन्तिता एकतो वा नानातो वा गन्त्वा एकतो गण्हन्ति, पच्छा एकतो वा नानातो वा भुञ्जन्ति, गणभोजनं होति. पटिग्गहणमेव हेत्थ पमाणं. सचे ओदनादीनं नामं गहेत्वा एकतो वा नानातो वा विञ्ञापेत्वा च गन्त्वा च एकतो गण्हन्ति, एवम्पि गणभोजनमेव. तस्स दुविधस्सापि एवं पटिग्गहणे दुक्कटं, अज्झोहारे अज्झोहारे पाचित्तियं. गिलानसमयादीसु यदा पादानम्पि फलितत्ता न सक्का पिण्डाय चरितुं, अयं ¶ गिलानसमयो. अत्थतकथिनानं पञ्च मासा, इतरेसं कत्तिकमासोति अयं चीवरदानसमयो. यदा यो चीवरे करियमाने किञ्चिदेव चीवरे कत्तब्बं कम्मं करोति, अयं चीवरकारसमयो. यदा अद्धयोजनम्पि गन्तुकामो वा होति गच्छति वा गतो वा, अयं अद्धानगमनसमयो. नावाभिरुहनसमयेपि एसेव नयो. यदा गोचरगामे चत्तारो भिक्खू पिण्डाय चरित्वा न यापेन्ति, अयं महासमयो. यदा योकोचि पब्बजितो भत्तेन निमन्तेति, अयं समणभत्तसमयो, एतेसु समयेसु भुञ्जितुं वट्टति.

राजगहे देवदत्तं आरब्भ विञ्ञापेत्वा भुञ्जनवत्थुस्मिं पञ्ञत्तं, ‘‘अञ्ञत्र समया’’ति अयमेत्थ सत्तविधा अनुपञ्ञत्ति, साधारणपञ्ञत्ति, अनाणत्तिकं, तिकपाचित्तियं, नगणभोजने गणभोजनसञ्ञिस्स वेमतिकस्स वा दुक्कटं. नगणभोजनसञ्ञिस्स पन, ये च द्वे तयो एकतो गण्हन्ति, बहूनं पिण्डाय ¶ चरित्वा एकतो भुञ्जन्तानं, निच्चभत्तिकादीसु, पञ्च भोजनानि ठपेत्वा सब्बत्थ, उम्मत्तकादीनञ्च अनापत्ति. गणभोजनता, समयाभावो, अज्झोहरणन्ति इमानेत्थ तीणि अङ्गानि. समुट्ठानादीनि एळकलोमसदिसानेवाति.

गणभोजनसिक्खापदवण्णना निट्ठिता.

३. परम्परभोजनसिक्खापदवण्णना

ततिये परम्परभोजनेति गणभोजने वुत्तनयेनेव पञ्चहि भोजनेहि निमन्तितस्स येन येन पठमं निमन्तितो, तस्स तस्स भोजनतो उप्पटिपाटिया वा अविकप्पेत्वा वा परस्स परस्स भोजने. तस्मा यो भिक्खु पञ्चसु सहधम्मिकेसु अञ्ञतरस्स ‘‘मय्हं भत्तपच्चासं तुय्हं ¶ दम्मी’’ति वा ‘‘विकप्पेमी’’ति वा एवं सम्मुखा वा ‘‘इत्थन्नामस्स दम्मी’’ति (पाचि. २२६) वा ‘‘विकप्पेमी’’ति वा एवं परम्मुखावा पठमनिमन्तनं अविकप्पेत्वा पच्छा निमन्तितकुले लद्धभिक्खतो एकसित्थम्पि अज्झोहरति, पाचित्तियं. समया वुत्तनया एव.

वेसालियं ¶ सम्बहुले भिक्खू आरब्भ अञ्ञत्र निमन्तितभोजनवत्थुस्मिं पञ्ञत्तं, ‘‘अञ्ञत्र समया’’ति अयमेत्थ तिविधा अनुपञ्ञत्ति, परिवारे पन विकप्पनम्पि गहेत्वा ‘‘चतस्सो अनुपञ्ञत्तियो’’ति (परि. ८६) वुत्तं, असाधारणपञ्ञत्ति, अनाणत्तिकं, तिकपाचित्तियं, नपरम्परभोजने परम्परभोजनसञ्ञिनो वेमतिकस्स वा दुक्कटं. नपरम्परभोजनसञ्ञिस्स पन, यो च समये वा विकप्पेत्वा वा एकसंसट्ठानि वा द्वे तीणि निमन्तनानि एकतो वा कत्वा भुञ्जति, निमन्तनप्पटिपाटिया भुञ्जति, सकलेन गामेन वा पूगेन वा निमन्तितो तेसु यत्थकत्थचि भुञ्जति, निमन्तियमानो वा ‘‘भिक्खं गहेस्सामी’’ति वदति, तस्स, निच्चभत्तिकादीसु, पञ्च भोजनानि ठपेत्वा सब्बत्थ, उम्मत्तकादीनञ्च अनापत्ति. परम्परभोजनता, समयाभावो, अज्झोहरणन्ति इमानेत्थ तीणि अङ्गानि. समुट्ठानादीनि पठमकथिनसदिसानेव, इदं पन किरियाकिरियन्ति.

परम्परभोजनसिक्खापदवण्णना निट्ठिता.

४. काणमातासिक्खापदवण्णना

चतुत्थे पूवेहीति पहेणकत्थाय पटियत्तेहि अतिरसकमोदकसक्खलिकादीहि येहि केहिचि खज्जकेहि. मन्थेहीति पाथेय्यत्थाय पटियत्तेहि येहि केहिचि सत्तुतिलतण्डुलादीहि. द्वत्तिपत्तपूराति मुखवट्टिया हेट्ठिमलेखं अनतिक्कन्ता द्वे वा तयो वा पत्तपूरा. ततो चे उत्तरीति सचेपि ततियं पत्तं थूपीकतं गण्हाति, मुखवट्टिया हेट्ठिमलेखतो उपरिट्ठितपूवगणनाय पाचित्तियं. द्वत्तिपत्तपूरे पटिग्गहेत्वाति एत्थ येन द्वे गहिता होन्ति, तेन बहि भिक्खुं दिस्वा ‘‘एत्थ मया द्वे पत्तपूरा गहिता, त्वं एकं गण्हेय्यासी’’ति वत्तब्बं, तेनापि अञ्ञं पस्सित्वा ‘‘पठमं आगतेन द्वे पत्तपूरा गहिता, मया एको गहितो, त्वं मा गण्ही’’ति वत्तब्बं. येन पठमं एको गहितो ¶ , तस्सापि परम्परारोचने एसेव नयो. येन पन सयमेव तयो गहिता, तेन अञ्ञं दिस्वा ‘‘मा खो त्वं एत्थ पटिग्गण्हीति वत्तब्बं, अवदन्तस्स दुक्कटं, तं सुत्वा गण्हन्तस्सापि दुक्कटमेव. ततो नीहरित्वा भिक्खूहि सद्धिं संविभजितब्बन्ति ¶ लद्धट्ठानतो सब्बासन्नं आसनसालं वा विहारं वा यत्थ वा पन निबद्धं ¶ पटिक्कमति, तत्थ गन्त्वा एकं पत्तपूरं अत्तनो ठपेत्वा सेसं भिक्खुसङ्घस्स दातब्बं. यथामित्तं पन दातुं न लब्भति. येन एको गहितो, न तेन किञ्चि अकामा दातब्बं, यथारुचि कातब्बं.

सावत्थियं सम्बहुले भिक्खू आरब्भ न मत्तं जानित्वा पटिग्गहणवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, ऊनकद्वत्तिपत्तपूरे अतिरेकसञ्ञिस्स वेमतिकस्स वा दुक्कटं. ऊनकसञ्ञिस्स पन, न पहेणकत्थाय न पाथेय्यत्थाय वा पटियत्तं, तदत्थाय पटियत्तसेसकं वा, गमने वा पटिप्पस्सद्धे, ञातकप्पवारितानं वा देन्तानं, अत्तनो धनेन गण्हन्तस्स, उम्मत्तकादीनञ्च अनापत्ति. वुत्तलक्खणपूवमन्थता, असेसकता, अप्पटिप्पस्सद्धगमनता, अनञ्ञातकादिता, अतिरेकप्पटिग्गहणन्ति इमानेत्थ पञ्च अङ्गानि, समुट्ठानादीनि सञ्चरित्तसदिसानेवाति.

काणमातासिक्खापदवण्णना निट्ठिता.

५. पठमपवारणासिक्खापदवण्णना

पञ्चमे भुत्तावीति भुत्तवा, येन पञ्चन्नं भोजनानं सासपमत्तम्पि अज्झोहरितं, सो एवं वुच्चति. पवारितोति ‘‘असनं पञ्ञायति, भोजनं पञ्ञायति, हत्थपासे ठितो अभिहरति, पटिक्खेपो पञ्ञायती’’ति (पाचि. २३९) एवं पाळियं वुत्तपञ्चङ्गवसेन कतप्पवारणो, कतप्पटिक्खेपोति अत्थो. तत्थ यस्मा ‘‘असनं पञ्ञायती’’ति इमिना विप्पकतभोजनो ‘पवारितो’ति वुत्तो. यो च विप्पकतभोजनो, तेन किञ्चि भुत्तं, किञ्चि अभुत्तं, यञ्च भुत्तं, तं सन्धाय ‘भुत्तावी’तिपि सङ्खं गच्छति. तस्मा ‘भुत्तावी’तिवचनेन विसुं किञ्चि अत्थसिद्धिं न पस्साम, ‘‘दिरत्ततिरत्त’’न्तिआदीसु (पाचि. ५२) पन दिरत्तादिवचनं विय पवारितपदस्स परिवारभावेन ब्यञ्जनसिलिट्ठताय चेतं वुत्तन्ति वेदितब्बं.

पवारणङ्गेसु पन असनं पञ्ञायतीति विप्पकतभोजनं दिस्सति, तं भुञ्जमानो चेस पुग्गलो होतीति अत्थो. भोजनं पञ्ञायतीति पवारणप्पहोनकं ¶ भोजनं दिस्सति, ओदनादीनं चे अञ्ञतरं पटिक्खिपितब्बं भोजनं होतीति अत्थो. हत्थपासे ठितोति पवारणप्पहोनकं चे भोजनं गण्हित्वा दायको अड्ढतेय्यहत्थप्पमाणे ओकासे ठितो होतीति अत्थो ¶ . अभिहरतीति ¶ सो चे दायको तस्स तं भोजनं कायेन अभिसंहरतीति अत्थो. पटिक्खेपो पञ्ञायतीति पटिक्खेपो दिस्सति, तं चे अभिहटं सो भिक्खु कायेन वा वाचाय वा पटिक्खिपतीति अत्थो. एवं पञ्चन्नं अङ्गानं वसेन पवारितो होति.

तत्रायं विनिच्छयो – ‘असन’न्तिआदीसु ताव यञ्च अस्नाति, यञ्च भोजनं हत्थपासे ठितेन अभिहटं पटिक्खिपति, तं ओदनो कुम्मासो सत्तु मच्छो मंसन्ति इमेसं अञ्ञतरमेव वेदितब्बं. तत्थ ओदनो नाम सालि वीहि यवो गोधुमो कङ्गु वरको कुद्रूसकोति इमेसं सत्तन्नं धञ्ञानं तण्डुले गहेत्वा ‘‘भत्तं पचामा’’ति वा ‘‘यागुं पचामा’’ति वा यंकिञ्चि सन्धाय पचन्तु, सचे उण्हं वा सीतलं वा भुञ्जन्तानं भोजनकाले गहितगहितट्ठाने ओधि पञ्ञायति, ओदनो होति, पवारणं जनेति. यो पन पायासो वा अम्बिलयागु वा उद्धनतो ओतारितमत्ता अब्भुण्हा सक्का होति आविज्झित्वा पिवितुं, सा यस्स हत्थेन गहितोकासेपि ओधि न पञ्ञायति, पवारणं न जनेति. सचे पन उसुमाय विगताय घनभावं गच्छति, ओधिं दस्सेति, पुन पवारणं जनेति, पुब्बे तनुकभावो न रक्खति. सचेपि बहू पण्णफलकळीरे पक्खिपित्वा मुट्ठिमत्तापि तण्डुला पक्खित्ता होन्ति, भोजनकाले चे ओधि पञ्ञायति, पवारणं जनेति. अयागुके निमन्तने ‘‘यागुं दस्सामा’’ति भत्ते उदककञ्जिकखीरादीनि आकिरित्वा ‘‘यागुं गण्हथा’’ति देन्ति, किञ्चापि तनुका होति, पवारणं जनेतियेव. सचे पन पक्कुथितेसु उदकादीसु पक्खिपित्वा पचित्वा देन्ति, यागुसङ्गहमेव गच्छति. सचे यागुयापि सासपमत्तम्पि मच्छमंसक्खण्डं वा न्हारु वा पक्खित्तं होति, पवारणं जनेति. ठपेत्वा सानुलोमानं वुत्तधञ्ञानं तण्डुले अञ्ञेहि वेळुतण्डुलादीहि वा कन्दमूलफलेहि वा येहि केहिचि कतभत्तं पवारणं न जनेति. कुम्मासो नाम यवेहि कतो. अञ्ञेहि पन मुग्गादीहि कतकुम्मासो पवारणं न जनेति. सत्तु नाम सत्त धञ्ञानि भज्जित्वा कतो. अन्तमसो खरपाकभज्जितानं वीहीनं तण्डुले ¶ कोट्टेत्वा कतचुण्णम्पि कुण्डकम्पि सत्तुसङ्गहमेव गच्छति. समपाकभज्जितानं पन आतपसुक्खानं कुण्डकं वा, ये केचि तण्डुला वा लाजा वा, लाजेहि कतभत्तसत्तुआदीनि वा न पवारेन्ति. मच्छमंसेसु सचे यागुं पिवन्तस्स यागुसित्थमत्तानेव द्वे मच्छक्खण्डानि वा मंसक्खण्डानि वा एकभाजने वा नानाभाजने वा देन्ति, तानि चे अखादन्तो अञ्ञं पवारणप्पहोनकं यंकिञ्चि पटिक्खिपति, न पवारेति. ततो एकं खादितं, एकं हत्थे वा पत्ते वा होति, सचे अञ्ञं पटिक्खिपति पवारेति. द्वेपि खादितानि होन्ति, मुखे सासपमत्तम्पि अवसिट्ठं नत्थि, सचेपि अञ्ञं पटिक्खिपति, न पवारेति. यो पन अकप्पियमंसं कुलदूसनवेज्जकम्मउत्तरिमनुस्सधम्मारोचनसादितरूपियादीहि ¶ ¶ निब्बत्तं अकप्पियभोजनञ्च अञ्ञं कप्पियं वा अकप्पियं वा खादन्तो पटिक्खिपति, न पवारेति.

एवं यञ्च अस्नाति, यञ्च भोजनं हत्थपासे ठितेन अभिहटं पटिक्खिपन्तो पवारणं जनेति, तं ञत्वा इदानि यथा आपज्जति, तस्स जाननत्थं अयं विनिच्छयो वेदितब्बो – ‘‘असनं भोजन’’न्ति एत्थ ताव येन एकसित्थम्पि अज्झोहटं होति, सो सचे पत्तमुखहत्थेसु यत्थकत्थचि भोजने सति सापेक्खोव अञ्ञं वुत्तलक्खणं भोजनं पटिक्खिपति, पवारेति. सचे पन निरपेक्खो होति, यं पत्तादीसु अवसिट्ठं, तं न च अज्झोहरितुकामो, अञ्ञस्स वा दातुकामो, अञ्ञत्र वा गन्त्वा भुञ्जितुकामो, सो पटिक्खिपन्तोपि न पवारेति. ‘‘हत्थपासे ठितो’’ति एत्थ पन सचे भिक्खु निसिन्नो होति, आनिसदस्स पच्छिमन्ततो पट्ठाय, सचे ठितो, पण्हीनं अन्ततो पट्ठाय, सचे निपन्नो, येन पस्सेन निपन्नो, तस्स पारिमन्ततो पट्ठाय दायकस्स निसिन्नस्स वा ठितस्स वा निपन्नस्स वा ठपेत्वा पसारितहत्थं यं आसन्नतरं अङ्गं, तस्स ओरिमन्तेन परिच्छिन्दित्वा अड्ढतेय्यहत्थो ‘हत्थपासो’ति वेदितब्बो. तस्मिं ठत्वा अभिहटं पटिक्खिपन्तस्सेव पवारणा होति, न ततो परं. ‘अभिहरती’ति हत्थपासब्भन्तरे ठितो गहणत्थं उपनामेति. सचे पन अनन्तरनिसिन्नोपि भिक्खु हत्थे वा आधारके वा ठितं पत्तं अनभिहरित्वाव ‘‘भत्तं गण्हथा’’ति वदति, तं पटिक्खिपतो पवारणा नत्थि. भत्तपच्छिं आनेत्वा पुरतो भूमियं ठपेत्वा एवं वुत्तेपि एसेव नयो. ईसकं पन उद्धरित्वा वा अपनामेत्वा वा ‘गण्हथा’ति वुत्ते तं पटिक्खिपतो पवारणा ¶ होति. भत्तपच्छिं गहेत्वा परिविसन्तस्स अञ्ञो ‘‘अहं धारेस्सामी’’ति गहितमत्तमेव करोति, परिवेसकोयेव पन तं धारेति, तस्मा सा अभिहटाव होति, ततो दातुकामताय गण्हन्तं पटिक्खिपन्तस्स पवारणा होति. सचे पन परिवेसकेन फुट्ठमत्ताव होति, इतरोव नं धारेति, ततो दातुकामताय गण्हन्तं पटिक्खिपन्तस्स पवारणा न होति. कटच्छुना उद्धटे पन होति, द्विन्नं समभारेपि पटिक्खिपन्तो पवारेतियेव. अनन्तरस्स दिय्यमाने इतरो पत्तं पिदहति, अञ्ञस्स अभिहटं नाम पटिक्खित्तं होति, तस्मा पवारणा नत्थि. ‘पटिक्खेपो’ति एत्थ वाचाय अभिहटे पटिक्खेपो न रुहति, कायेन अभिहटं पन अङ्गुलिचलनादिना कायविकारेन वा ‘‘अलं, मा देही’’तिआदिना वचीविकारेन वा पटिक्खिपतो पवारणा होति.

एको समंसकं रसं अभिहरति, ‘‘रसं पटिग्गण्हथा’’ति वदति, तं सुत्वा पटिक्खिपतो पवारणा नत्थि. ‘मंसरस’न्ति वुत्ते पन पटिक्खिपतो पवारणा होति. ‘‘इमं गण्हथा’’ति ¶ वुत्तेपि होतियेव. मंसं विसुं कत्वा ‘मंसरस’न्ति वुत्तेपि सचे सासपमत्तम्पि खण्डं ¶ अत्थि, पटिक्खिपतो पवारणा होति. सचे नत्थि, वट्टति. कळीरपनसादीहि मिस्सेत्वा मच्छमंसं पचन्ति, तं गहेत्वा ‘‘कळीरसूपं गण्हथ, पनसब्यञ्जनं गण्हथा’’ति वदति, एवम्पि न पवारेति. कस्मा? अपवारणारहस्स नामेन वुत्तत्ता. ‘‘मच्छमंसं ब्यञ्जन’’न्ति वा ‘‘इमं गण्हथा’’ति वा वुत्ते पन पवारेति, अयमेत्थ सङ्खेपो, वित्थारो पन समन्तपासादिकायं वुत्तो. गमनादीसु पन यस्मिं इरियापथे पवारेति, तं अविकोपेन्तेनेव भुञ्जितब्बं.

अनतिरित्तन्ति न अतिरित्तं, न अधिकन्ति अत्थो. तं पन कप्पियकतादीहि सत्तहि विनयकम्माकारेहि अकतं वा गिलानस्स अनधिकं वा होति. तस्मा पदभाजने (पाचि. २३९) ‘अकप्पियकत’न्तिआदि वुत्तं, तत्थ यं फलं वा कन्दमूलादि वा पञ्चहि समणकप्पियेहि कप्पियं अकतं, यञ्च अकप्पियमंसं वा अकप्पियभोजनं वा, एतं अकप्पियं नाम, तं अकप्पियं ‘‘अलमेतं सब्ब’’न्ति एवं अतिरित्तं कतं अकप्पियकतन्ति वेदितब्बं. अप्पटिग्गहितकतन्ति भिक्खुना अप्पटिग्गहितंयेव पुरिमनयेन अतिरित्तं कतं. अनुच्चारितकतन्ति कप्पियं कारेतुं आगतेन भिक्खुना ईसकम्पि अनुक्खित्तं ¶ वा अनपनामितं वा कतं. अहत्थपासे कतन्ति कप्पियं कारेतुं आगतस्स हत्थपासतो बहि ठितेन कतं. अभुत्ताविना कतन्ति यो अतिरित्तं करोति, तेन पवारणप्पहोनकं भोजनं अभुत्तेन कतं. भुत्ताविना पवारितेन आसना वुट्ठितेन कतन्ति इदं उत्तानमेव. ‘‘अलमेतं सब्ब’’न्ति अवुत्तन्ति वचीभेदं कत्वा एवं अवुत्तं होति. इति इमेहि सत्तहि विनयकम्माकारेहि यं अतिरित्तं कप्पियं अकतं, यञ्च पन न गिलानातिरित्तं, तदुभयम्पि अनतिरित्तं. अतिरित्तं पन तस्सेव पटिपक्खनयेन वेदितब्बं.

अपिचेत्थ भुत्ताविना कतं होतीति (पाचि. २३९) अन्तमसो अनन्तरनिसिन्नस्स पत्ततो एकम्पि सित्थं वा मंसहीरं वा खादित्वा कतम्पि भुत्ताविना कतं होति, यो पातोव एवं भुत्तावी पवारितो निसीदतियेव, सो उपकट्ठेपि काले अभिहटं पिण्डं भिक्खुना उपनीतं कप्पियं कातुं लभति. सचे पन तस्मिं कप्पिये कते भुञ्जन्तस्स अञ्ञं आमिसं आकिरन्ति, तं सो पुन कातुं न लभति. यञ्हि अकतं, तं कातब्बं. येन च अकतं, तेन च कातब्बन्ति (पाचि. अट्ठ. २३८-९) वुत्तं, तस्मा तस्मिं भाजने करियमाने पठमकतेन सद्धिं कतं होतीति तं कातुं न वट्टति. अञ्ञस्मिं पन भाजने तेन वा अञ्ञेन वा कातुं वट्टति. एवं कतं पठमकतेन मिस्सेत्वापि भुञ्जितुं वट्टति, न केवलञ्च तस्स ¶ येन पन कतं, तं ठपेत्वा अञ्ञेसं पवारितानम्पि भुञ्जितुं वट्टति. यथा पन अकतेन मिस्सं न होति, एवं मुखञ्च हत्थञ्च सुद्धं कत्वा भुञ्जितब्बं. गिलानातिरित्तं पन न केवलं गिलानस्स भुत्तावसेसमेव, अथ खो यंकिञ्चि गिलानं उद्दिस्स ‘‘अज्ज वा स्वे ¶ वा यदा वा इच्छति, तदा खादिस्सती’’ति आहटं, तं सब्बं ‘गिलानातिरित्त’न्ति वेदितब्बं. खादनीयं वा भोजनीयं वाति यंकिञ्चि यावकालिकं. खादेय्य वा भुञ्जेय्य वा पाचित्तियन्ति एत्थ वुत्तनयेन पवारितस्स अनतिरित्तं यंकिञ्चि आमिसं अज्झोहरणत्थाय पटिग्गण्हतो गहणे दुक्कटं, अज्झोहारे अज्झोहारे पाचित्तियं.

सावत्थियं सम्बहुले भिक्खू आरब्भ अञ्ञत्र भुञ्जनवत्थुस्मिं पञ्ञत्तं, ‘‘अनतिरित्त’’न्ति अयमेत्थ अनुपञ्ञत्ति, असाधारणपञ्ञत्ति, अनाणत्तिकं, तिकपाचित्तियं, यामकालिकादीनि आहारत्थाय गण्हतो, निरामिसानि अज्झोहरतो च दुक्कटं, तथा अतिरित्ते अनतिरित्तसञ्ञिनो चेव वेमतिकस्स ¶ च. अतिरित्तसञ्ञिनो पन, ‘‘अतिरित्तं कारापेत्वा भुञ्जिस्सामी’’ति गण्हन्तस्स, अञ्ञस्सत्थाय गण्हन्तस्स, यामकालिकादीनि तेसं अनुञ्ञातपरिभोगवसेन निरामिसानि परिभुञ्जन्तस्स, उम्मत्तकादीनञ्च अनापत्ति. पवारितभावो, आमिसस्स अनतिरित्तता, कालेन अज्झोहरणन्ति इमानेत्थ तीणि अङ्गानि. समुट्ठानादीनि पठमकथिनसदिसानेव, इदं पन किरियाकिरियन्ति.

पठमपवारणासिक्खापदवण्णना निट्ठिता.

६. दुतियपवारणासिक्खापदवण्णना

छट्ठे अभिहट्ठुं पवारेय्याति अभिहरित्वा ‘‘हन्द, भिक्खु खाद वा भुञ्ज वा’’ति एवं पवारेय्य. जानन्ति सुत्वा वा दिस्वा वा तस्स पवारितभावं जानन्तो. आसादनापेक्खोति आसादनं चोदनं मङ्कुकरणभावं अपेक्खमानो. भुत्तस्मिं पाचित्तियन्ति एत्थ अभिहारे ताव दुक्कटं, सचे सो तं गण्हाति, पुन अभिहारकस्स दुक्कटं, तस्मिं पन भुञ्जन्ते अभिहारकस्स तस्स अज्झोहारे अज्झोहारे दुक्कटं, भोजनपरियोसाने पाचित्तियं.

सावत्थियं अञ्ञतरं भिक्खुं आरब्भ अनतिरित्तेन भोजनेन अभिहट्ठुं पवारणावत्थुस्मिं पञ्ञत्तं, असाधारणपञ्ञत्ति, अनाणत्तिकं, पवारिते पवारितसञ्ञिनो पाचित्तियं. वेमतिकस्स, यामकालिकादीनि आहारत्थाय अभिहरन्तस्स, तेसञ्च पटिग्गहणअज्झोहारेसु, अप्पवारिते ¶ च पवारितसञ्ञिनो, वेमतिकस्स च दुक्कटं. अप्पवारितसञ्ञिस्स पन, यो च अतिरित्तं कारापेत्वा देति, ‘‘कारापेत्वा वा भुञ्जाही’’ति देति, यो वा ‘‘अञ्ञस्सत्थाय हरन्तो गच्छाही’’ति देति, यो च यामकालिकादीनि ‘‘सति पच्चये परिभुञ्जाही’’ति देति, तस्स, उम्मत्तकादीनञ्च अनापत्ति. पवारितता, पवारितसञ्ञिता, आसादनापेक्खता, अनतिरित्तेन अभिहट्ठुं पवारणता, भोजनपरियोसानन्ति इमानेत्थ पञ्च अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

दुतियपवारणासिक्खापदवण्णना निट्ठिता.

७. विकालभोजनसिक्खापदवण्णना

सत्तमे ¶ ¶ विकालेति विगते काले, मज्झन्हिकातिक्कमनतो याव अरुणुग्गमनाति अधिप्पायो. तस्मा यो भिक्खु एतस्मिं अन्तरे यंकिञ्चि वनमूलफलं उपादाय आमं वा पक्कं वा आमिससङ्खेपगतं खादनीयं वा भोजनीयं वा अज्झोहरणत्थाय पटिग्गण्हाति, तस्स पटिग्गहणे दुक्कटं, अज्झोहारे अज्झोहारे पाचित्तियं.

राजगहे सत्तरसवग्गिये भिक्खू आरब्भ विकाले भोजनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, यामकालिकादीनि आहारत्थाय पटिग्गहणअज्झोहारेसु, काले विकालसञ्ञिस्स, वेमतिकस्स च दुक्कटं, काले कालसञ्ञिस्स यामकालिकादीनि सति पच्चये परिभुञ्जन्तस्स उम्मत्तकादीनञ्च अनापत्ति. ‘‘अनुजानामि, भिक्खवे, रोमट्ठकस्स रोमट्ठं, न च भिक्खवे बहिमुखद्वारा नीहरित्वा अज्झोहरितब्ब’’न्ति (चूळव. २७३) अनुञ्ञातनयेन रोमट्ठकस्सापि अनापत्ति. विकालता, यावकालिकता, अज्झोहरणन्ति इमानेत्थ तीणि अङ्गानि. समुट्ठानादीनि एळकलोमसदिसानीति.

विकालभोजनसिक्खापदवण्णना निट्ठिता.

८. सन्निधिकारकसिक्खापदवण्णना

अट्ठमे सन्निधिकारकन्ति कारो करणं किरियाति अत्थतो एकं, सन्निधि कारो अस्साति सन्निधिकारं ¶ , सन्निधिकारमेव सन्निधिकारकं, पटिग्गहेत्वा एकरत्तिं वीतिनामितस्सेतं नामं. तस्मा एवं सन्निधिकतं यंकिञ्चि यावकालिकं वा यामकालिकं वा ‘अज्झोहरिस्सामी’ति गण्हन्तस्स पटिग्गहणे दुक्कटं, अज्झोहारे अज्झोहारे पाचित्तियं. सचेपि पत्तो दुद्धोतो होति, यं अङ्गुलिया घंसन्तस्स लेखा पञ्ञायति, गण्ठिकपत्तस्स वा गण्ठिकन्तरे स्नेहो पविट्ठो होति, यो उण्हे ओतापेन्तस्स पग्घरति, उण्हयागुया वा गहिताय सन्दिस्सति, तादिसे पत्तेपि पुनदिवसे भुञ्जन्तस्स पाचित्तियं. यं पन भिक्खु निरपेक्खो सामणेरानं परिच्चजित्वा तेहि निहितं लभित्वा भुञ्जति, तं वट्टति ¶ . सयं पटिग्गहेत्वा अपरिच्चत्तमेव हि दुतियदिवसे कप्पियभोजनं भुञ्जन्तस्स पाचित्तियं. अकप्पियेसु पन मनुस्समंसे थुल्लच्चयेन सद्धिं पाचित्तियं, सेसेसु पन दुक्कटेन सद्धिं. यामकालिकं सति पच्चये अज्झोहरतो पाचित्तियं, आहारत्थाय अज्झोहरतो दुक्कटेन सद्धिं. यो पन पवारितो हुत्वा अनतिरित्तकतं अज्झोहरति, तस्स सब्बविकप्पेसु अपरम्पि पाचित्तियं वड्ढति. सचे विकाले अज्झोहरति, अनतिरित्तपच्चया सब्बविकप्पेसु अनापत्ति, सति पच्चये विकालपच्चया यामकालिकादीसु च अनापत्ति. अवसेसेसु विकालपच्चया पाचित्तियं वड्ढतियेव. भिक्खुस्स पन सन्निधि भिक्खुनिया वट्टति, भिक्खुनिया च सन्निधि भिक्खुस्स वट्टति, भिक्खुनिक्खन्धके (चूळव. ४२१-४२२) अनुञ्ञातत्ता वट्टतीति.

सावत्थियं आयस्मन्तं बेलट्ठसीसं आरब्भ सन्निधिकारकभोजनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं ¶ , सत्ताहकालिक यावजीविकानं पन आहारत्थाय पटिग्गहणे अज्झोहारे च दुक्कटं. यथा चेतानि आहारत्थाय न कप्पन्ति, एवं यावकालिकादीहि संसट्ठानिपि, वुत्तञ्हेतं ‘‘यावकालिकेन, भिक्खवे, यामकालिकं तदहुपटिग्गहितं काले कप्पति, विकाले न कप्पती’’तिआदि (महाव. ३०५). तस्मा सचेपि तं तं तेन तेन सद्धिं संसट्ठं लभति, सचे असम्भिन्नरसं वा होति सुधोतं वा, यथा इतरेन संसग्गो न पञ्ञायति, अत्तनो कालानुरूपेन परिभुञ्जितुं वट्टति.

सचे पन सम्भिन्नरसं वा होति दुद्धोतं वा, न वट्टति. यावकालिकञ्हि अत्तना सद्धिं सम्भिन्नरसानि तीणिपि यामकालिकादीनि अत्तनो सभावं उपनेति, यामकालिकं द्वेपि सत्ताहकालिकादीनि अत्तनो सभावं उपनेति, सत्ताहकालिकं यावजीविकमेव अत्तनो सभावं उपनेति. तस्मा तेन तदहुपटिग्गहितेन सद्धिं तदहुपटिग्गहितं वा पुरे पटिग्गहितं वा यावजीविकं सत्ताहं कप्पति, द्वीहप्पटिग्गहितेन छाहं, तीहप्पटिग्गहितेन पञ्चाहं…पे… सत्ताहप्पटिग्गहितेन तदहेव कप्पतीति वेदितब्बं. तस्मायेव हि ‘‘सत्ताहकालिकेन, भिक्खवे ¶ , यावजीविकं तदहुपटिग्गहित’’न्ति अवत्वा ‘‘पटिग्गहितं सत्ताहं कप्पती’’ति वुत्तं. कालयामसत्ताहातिक्कमेसु चेत्थ विकालभोजन सन्निधिभेसज्जसिक्खापदानं वसेन आपत्तियो वेदितब्बा, इमेसु पन चतूसु कालिकेसु ¶ यावकालिकं यामकालिकन्ति इममेव द्वयं अन्तोवुट्ठञ्चेव सन्निधिकारकञ्च, सत्ताहकालिकं यावजीविकञ्च अकप्पियकुटियं निक्खिपितुम्पि वट्टति, सन्निधिम्पि न जनेति. अकप्पियकुटियं अन्तोवुट्ठेन पन तेन सद्धिं इतरद्वयं तदहुपटिग्गहितम्पि न वट्टति, मुखसन्निधि नाम होति, महापच्चरियं पन अन्तोवुट्ठं होतीति वुत्तं. तत्थ नाममत्तमेव नानाकरणं, आपत्ति पन दुक्कटमेव. तत्थ अकप्पियकुटि नाम सङ्घस्स वा उपसम्पन्नपुग्गलस्स वा सन्तकं वसनत्थाय कतगेहं, तत्थ सहसेय्यप्पहोनके पदेसे वुट्ठं यावकालिकञ्च यामकालिकञ्च सङ्घिकं वा उपसम्पन्नपुग्गलस्स वा सन्तकं अन्तोवुट्ठं नाम होति, तत्थ पक्कं अन्तोपक्कं नाम, यत्थ कत्थचि पन सयं पक्कं सामं पक्कं नाम, तं सब्बं अनज्झोहरणीयं. तेन तेन सद्धिं संसट्ठम्पि तंगतिकमेव, सब्बं अज्झोहरन्तस्स दुक्कटं. तस्मा अन्तोवुट्ठअन्तोपक्कमोचनत्थं भगवता चतस्सो कप्पियभूमियो (महाव. २९५) अनुञ्ञाता, तासं विनिच्छयो समन्तपासादिकायं (महाव. अट्ठ. २९५) वुत्तो. यत्थ पनेता न सन्ति, तत्थ अनुपसम्पन्नस्स सन्तकं कत्वा परिभुञ्जितुं वट्टति. सामं पाकम्पि पुनपाकं वट्टति, असन्निधिकारके सन्निधिकारकसञ्ञिनो, वेमतिकस्स वा दुक्कटं. असन्निधिकारकसञ्ञिनो, यावकालिकादीनि तीणि निदहित्वा ¶ सकं सकं कालं अनतिक्कमित्वा, यावजीविकं सदापि सति पच्चये परिभुञ्जन्तस्स, उम्मत्तकादीनञ्च अनापत्ति. आमिसं, सन्निधिभावो, तस्स अज्झोहरणन्ति इमानेत्थ तीणि अङ्गानि. समुट्ठानादीनि एळकलोमसदिसानेवाति.

सन्निधिकारकसिक्खापदवण्णना निट्ठिता.

९. पणीतभोजनसिक्खापदवण्णना

नवमे पणीतभोजनानीति पणीतसंसट्ठानि सत्तधञ्ञनिब्बत्तानि भोजनानि. यथा हि आजञ्ञयुत्तो रथो ‘आजञ्ञरथो’ति वुच्चति, एवमिधापि पणीतसंसट्ठानि भोजनानि पणीतभोजनानीति. येहि पन पणीतेहि संसट्ठानि, तानि ‘पणीतभोजनानी’ति वुच्चन्ति, तेसं पभेददस्सनत्थं सेय्यथिदं सप्पि नवनीतन्तिआदिमाह, तत्थ सप्पिआदीनि भेसज्जसिक्खापदे ¶ (कङ्खा. अट्ठ. भेसज्जसिक्खापदवण्णना) वुत्तलक्खणेनेव वेदितब्बानि. मच्छादीसु पन सब्बोपि ‘ओदको’ति (पाचि. २६०) वुत्तलक्खणो मच्छो मच्छोयेव. येसं पन ¶ मंसं कप्पति, तेसं मंसञ्च खीरदधीनि च इधाधिप्पेतानि. एवरूपानि पणीतभोजनानीति यानि एतेहि सप्पिआदीहि संसट्ठत्ता ‘पणीतभोजनानी’ति वुच्चन्ति, तथारूपानि पणीतभोजनानि. अगिलानोति यस्स तेहि विनापि फासु होति. अत्तनो अत्थाय विञ्ञापेत्वाति एत्थ पन यो अगिलानो सुद्धानि सप्पिआदीनि भेसज्जत्थाय विञ्ञापेति, सो महानामसिक्खापदेन (पाचि. ३०३) कारेतब्बो, मच्छादीनि चत्तारि विञ्ञापेन्तो सूपोदनविञ्ञत्तिया (पाचि. ६१२-६१३) कारेतब्बो, सप्पिआदीहि संसट्ठभोजनानि विञ्ञापेन्तो इमिना कारेतब्बो. तत्रायं विनिच्छयो – ‘‘सप्पिना भत्तं देहि, सप्पिं आकिरित्वा देहि, सप्पिमिस्सकं कत्वा देहि, सह सप्पिना देहि, सप्पिञ्च भत्तञ्च देही’’ति एवं विञ्ञापेन्तस्स ताव विञ्ञत्तिया दुक्कटं, पटिग्गहणे दुक्कटं, अज्झोहरणे अज्झोहरणे पाचित्तियं. ‘‘सप्पिभत्तं देही’’ति वुत्ते पन यस्मा सालिभत्तं विय सप्पिभत्तं नाम नत्थि, तस्मा सूपोदनविञ्ञत्तिया दुक्कटमेव होति. सचे पन ‘‘सप्पिना भत्तं देही’’ति वुत्ते भत्तं दत्वा ‘‘सप्पिं कत्वा भुञ्जाही’’ति नवनीतखीरादीनि वा कप्पियभण्डं वा देति ‘‘इमिना सप्पिं गहेत्वा भुञ्जाही’’ति, यथावत्थुकमेव. ‘‘गोसप्पिना भत्तं देही’’ति वुत्ते पन गोसप्पिं वा देतु, तस्मिं असति पुरिमनयेन नवनीतादीनि वा, गाविंयेव वा देतु ‘‘इतो सप्पिना भुञ्जाही’’ति, यथावत्थुकमेव. सचे पन ‘‘गोसप्पिना देही’’ति याचितो अजिकासप्पिआदीहि देति, विसङ्केतं. एवञ्हि सति अञ्ञं याचितेन अञ्ञं दिन्नं नाम होति, तस्मा अनापत्ति, एस नयो ‘‘अजिकासप्पिना देही’’तिआदीसुपि. ‘‘कप्पियसप्पिना देही’’ति वुत्ते अकप्पियसप्पिना देति, विसङ्केतमेव. ‘‘अकप्पियसप्पिना देही’’ति वुत्ते अकप्पियसप्पिनाव देति, पटिग्गहणेपि परिभोगेपि दुक्कटमेव. इमिना नयेन सब्बपदेसु विनिच्छयो वेदितब्बो. सचे पन सब्बेहिपि सप्पिआदीहि एकट्ठाने वा नानाट्ठाने वा विञ्ञापेत्वा पटिलद्धं एकतो सम्भिन्नरसं कत्वा ततो कुसग्गेन एकबिन्दुम्पि अज्झोहरति, नव पाचित्तियानि.

सावत्थियं ¶ ¶ छब्बग्गिये भिक्खू आरब्भ पणीतभोजनविञ्ञत्तिवत्थुस्मिं पञ्ञत्तं, ‘‘अगिलानो’’ति अयमेत्थ अनुपञ्ञत्ति, असाधारणपञ्ञत्ति, अनाणत्तिकं, तिकपाचित्तियं, गिलानस्स अगिलानसञ्ञिनो, वेमतिकस्स वा दुक्कटं. गिलानसञ्ञिस्स, गिलानकाले विञ्ञापेत्वा अगिलानस्स भुञ्जतो, गिलानस्स सेसके, ञातकप्पवारितट्ठानतो, अञ्ञस्सत्थाय विञ्ञत्ते, अत्तनो धनेन गहिते, उम्मत्तकादीनञ्च अनापत्ति. पणीतभोजनता, अगिलानता, कतविञ्ञत्तिया पटिलाभो, अज्झोहरणन्ति इमानेत्थ चत्तारि अङ्गानि. अद्धानसमुट्ठानं, किरियं ¶ , नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति.

पणीतभोजनसिक्खापदवण्णना निट्ठिता.

१०. दन्तपोनसिक्खापदवण्णना

दसमे अदिन्नन्ति कायेन वा कायप्पटिबद्धेन वा गण्हन्तस्स हत्थपासे ठत्वा कायकायप्पटिबद्धनिस्सग्गियानं अञ्ञतरेन न दिन्नं, अप्पटिग्गहितकस्सेतं नामं. अप्पटिग्गहितकञ्हि भिक्खुनो अत्तनो सन्तकम्पि अज्झोहरितुं न वट्टति. पटिग्गहितं अन्तमसो विस्सासिकसन्तकम्पि वट्टति, तस्स लक्खणं वुत्तविपल्लासेन वेदितब्बं. सचे हि यो कोचि अनुपसम्पन्नो अन्तमसो तिरच्छानोपि भिक्खुस्स वा भिक्खुनिया वा हत्थपासे ठितो कायादीनं अञ्ञतरेन देति, तञ्चे भिक्खुना येन केनचि सरीरावयवेन वा, तप्पटिबद्धेन वा, संहारिमेन च अन्तमसो मञ्चेनापि, धारेतुं समत्थेन च अन्तमसो अतत्थजातकरुक्खपण्णेनापि, सूचिया परामट्ठमत्तेनापि पटिग्गहितं, पटिग्गहितमेव होति. पटिबद्धप्पटिबद्धं नाम इध नत्थि, यम्पि नत्थुकरणिया दिय्यमानं नासिकाय, अकल्लको वा मुखेन पटिग्गण्हाति, सब्बं वट्टति, आभोगमत्तमेव हेत्थ पमाणं. पुब्बाभोगे च सति पच्छा निद्दायन्तस्स पत्ते दिन्नम्पि हत्थपासे सति पटिग्गहितमेव होति. यम्पि ‘‘पत्तेन पटिग्गण्हिस्सामी’’ति निसिन्नस्सेव हत्थे पतति, तं वट्टतियेव. अभिहटभाजनतो ¶ पतितरजम्पि वट्टति, तत्थ ठितनिसिन्ननिपन्नानं पवारणासिक्खापदे वुत्तनयेनेव हत्थपासो वेदितब्बो.

सचे पन दायकप्पटिग्गाहकेसु एको आकासे होति, एको भूमियं, भूमट्ठस्स सीसेन आकासट्ठस्स च ठपेत्वा दातुं वा गहेतुं वा पसारितहत्थं यं आसन्नतरं अङ्गं, तस्स ओरिमन्तेन हत्थपासप्पमाणं परिच्छिन्दितब्बं. सचेपि एको कूपे होति, एको कूपतटे, एको वा रुक्खे, एको पथवियं, वुत्तनयेनेव हत्थपासप्पमाणं परिच्छिन्दितब्बं. तस्मिं ठत्वा सचेपि द्वे तयो वा सामणेरा यं मज्झिमो पुरिसो उक्खिपितुं सक्कोति, एवरूपं भारं पवट्टेन्ता भिक्खुनो भूमियं ठपितहत्थं ¶ आरोपेन्ति, उक्खिपित्वा वा भिक्खुनो पसारितहत्थे एकदेसेनापि ठपेन्ति, तं पटिग्गहितमेव होति. यं पन पिण्डाय चरन्तस्स पत्ते रजं पतति, तं अप्पटिग्गहितमेव होति, तस्मा पटिग्गहेत्वाव भिक्खा गण्हितब्बा. अप्पटिग्गहेत्वा गण्हन्तस्स विनयदुक्कटं, तं पन पुन पटिग्गहेत्वा भुञ्जन्तस्स अनापत्ति. सचे ¶ ‘‘पटिग्गहेत्वा देथा’’ति वुत्ते वचनं अस्सुत्वा वा अनादियित्वा वा भिक्खं देन्तियेव, विनयदुक्कटा मुच्चति, पुन पटिग्गहेत्वा अञ्ञा भिक्खा पटिग्गहेतब्बा. सचे महावातो ततो ततो रजं पातेति, न सक्का होति भिक्खं गहेतुं, ‘‘अनुपसम्पन्नस्स दस्सामी’’ति सुद्धचित्तेन आभोगं कत्वा गण्हितुं वट्टति. तं अनुपसम्पन्नस्स दत्वा पुन तेन दिन्नं वा तस्स विस्सासेन वा पटिग्गहेत्वा भुञ्जितुं वट्टति. अस्सुखेळसिङ्घाणिकादीसु यं ठानतो चवित्वा हत्थे वा पत्ते वा पतति, तं पटिग्गहेतब्बं, अङ्गलग्गं पटिग्गहितमेव. पतन्तम्पि वोच्छिन्नञ्चे अन्तरा न गहेतब्बं, उग्गहितकं नाम होति, तं पच्छा पटिग्गहितम्पि न वट्टति. यं पन भेसज्जं वा मूलफलं वा मातादीनं अत्थाय गहेत्वा छायत्थाय वा फलिनिसाखं उक्खिपित्वा गच्छति, ततो यं इच्छति, तं पुन पटिग्गहेत्वा परिभुञ्जितुं वट्टति. यो पन तत्थ जातकफलिनिसाखाय वा वल्लिया वा गहेत्वा चालेति. तस्स ततो लद्धं फलं न वट्टति, दुरुपचिण्णदुक्कटञ्च आपज्जति, अञ्ञस्स तं वट्टति, फलिरुक्खं पन अपस्सयितुं वा आलम्बितुं वा वट्टति, पटिग्गहेत्वा ठपिते यं अञ्ञं अङ्कुरादि उप्पज्जति, पटिग्गहितमेव तं. याव हि हत्थतो मुत्ते निरपेक्खो न होति, निरपेक्खताय वा हत्थतो न ¶ मुच्चति, ताव न पटिग्गहणं विजहति, अयमेत्थ सङ्खेपो, वित्थारो पन समन्तपासादिकायं वुत्तो.

मुखद्वारन्ति गलनाळिकं. मुखेन वा हि पविट्ठं होतु, नासिकाय वा, गलेन अज्झोहरणीयताय सब्बम्पि तं मुखद्वारं पवेसितमेव होति. आहारन्ति यंकिञ्चि यावकालिकं वा यामकालिकं वा सत्ताहकालिकं वा यावजीविकं वा. सब्बञ्हेतं अज्झोहरणीयत्ता ‘आहारो’ति वुच्चति, तत्थ सब्बम्पि धञ्ञं वा धञ्ञानुलोमं वा तालनाळिकेरपनसलबुजअलाबुकुम्भण्डपुस्सफलतिपुसफलएळालुकसङ्खातं नवविधं महाफलञ्चेव अपरण्णञ्च, यञ्चञ्ञं वनमूलपत्तपुप्फफलादि आहारत्थं फरति, तं सब्बं याव मज्झन्हिककालो, ताव परिभुञ्जितब्बतो यावकालिकं नाम. अम्बपानं जम्बुपानं चोचपानं मोचपानं मधुकपानं मुद्दिकपानं सालूकपानं फारुसकपानन्ति इमानि अट्ठ पानानि, यानि च तेसं अनुलोमानि वेत्ततिन्तिणिकमातुलुङ्गकपिट्ठकोसम्बकरमन्दादिखुद्दकफलपानानि, एतानि सब्बानि अनुपसम्पन्नेहि ¶ सीतोदकेन मद्दित्वा कतानि आदिच्चपाकानि वा याव रत्तिया पच्छिमयामं निदहित्वा परिभुञ्जितब्बतो यामकालिकानि नाम. अवसेसेसु अनुञ्ञातफलपत्तपुप्फरसेसुपि एसेव नयो. सप्पिआदीनि पञ्च भेसज्जानि सत्ताहं निदहित्वा परिभुञ्जितब्बतो सत्ताहकालिकानि नाम. इदं पन यावकालिकादित्तयं कालविमुत्तञ्च उदकं ठपेत्वा अवसेसमूलफलाफलादि यं नेव खादनीयत्थं न भोजनीयत्थं फरति ¶ , तं यावजीवं निदहित्वा सति पच्चये परिभुञ्जितब्बतो यावजीविकं नाम. आहरेय्याति पवेसेय्य. अञ्ञत्र उदकदन्तपोनाति इदं अनाहारेपि उदके आहारसञ्ञाय, दन्तपोने च ‘‘मुखद्वारं आहटं इद’’न्ति सञ्ञाय कुक्कुच्चायन्तानं कुक्कुच्चविनोदनत्थं वुत्तं. उदकञ्हि यथासुखं पातुं, दन्तकट्ठञ्च दन्तपोनपरिभोगेन परिभुञ्जितुं वट्टति. ठपेत्वा पन इदं द्वयं अवसेसं अज्झोहरणत्थाय गण्हतो गहणे दुक्कटं, अज्झोहारे अज्झोहारे पाचित्तियं, सचेपि दन्तकट्ठरसो अजानन्तस्स अन्तो पविसति, पाचित्तियमेव.

वेसालियं अञ्ञतरं भिक्खुं आरब्भ अदिन्नं आहारं आहरणवत्थुस्मिं पञ्ञत्तं, ‘‘अञ्ञत्र उदकदन्तपोना’’ति अयमेत्थ अनुपञ्ञत्ति, साधारणपञ्ञत्ति ¶ , अनाणत्तिकं, तिकपाचित्तियं, पटिग्गहितके अप्पटिग्गहितसञ्ञिनो, वेमतिकस्स वा दुक्कटं. पटिग्गहितसञ्ञिस्स, उदकदन्तपोने, चत्तारि महाविकटानि सति पच्चये असति कप्पियकारके सामं गहेत्वा परिभुञ्जन्तस्स, उम्मत्तकादीनञ्च अनापत्ति. एत्थ दुब्बचोपि असमत्थोपि कप्पियकारको असन्तपक्खेयेव तिट्ठति, छारिकाय असति सुक्खदारुं झापेत्वा, तस्मिञ्च असति अल्लदारुं रुक्खतो छिन्दित्वापि कातुं, मत्तिकत्थाय च पथविं खणितुम्पि वट्टति, इदं पन चतुब्बिधम्पि महाविकटं कालोदिस्सं नाम सप्पदट्ठक्खणेयेव सामं गहेतुं वट्टति, अञ्ञदा पटिग्गाहापेत्वा परिभुञ्जितब्बं. अप्पटिग्गहितकता, अननुञ्ञातता, धूमादिअब्बोहारिकाभावो, अज्झोहरणन्ति इमानेत्थ चत्तारि अङ्गानि. समुट्ठानादीनि एळकलोमसदिसानीति.

दन्तपोनसिक्खापदवण्णना निट्ठिता.

भोजनवग्गो चतुत्थो.

५. अचेलकवग्गो

१. अचेलकसिक्खापदवण्णना

अचेलकवग्गस्स पठमे एतेसं अचेलकादीनं अञ्ञतित्थियानं यंकिञ्चि आमिसं एकप्पयोगेन ¶ देन्तस्स एकं पाचित्तियं, अवच्छिन्दित्वा अवच्छिन्दित्वा देन्तस्स पयोगे पयोगे पाचित्तियं.

वेसालियं आयस्मन्तं आनन्दं आरब्भ परिब्बाजिकाय द्वे पूवे दानवत्थुस्मिं पञ्ञत्तं, असाधारणपञ्ञत्ति, अनाणत्तिकं, तिकपाचित्तियं, उदकदन्तपोनं देन्तस्स, अतित्थिये तित्थियसञ्ञिस्स, वेमतिकस्स च दुक्कटं. अतित्थिये अतित्थियसञ्ञिस्स, अनुपसम्पन्नेन दापेन्तस्स, तेसं सन्तिके भाजनं निक्खिपित्वा ‘‘इदं गण्हथा’’ति भणन्तस्स, तेसं वा निक्खित्तभाजने देन्तस्स, बाहिरलेपं ¶ देन्तस्स, उम्मत्तकादीनञ्च अनापत्ति. अञ्ञतित्थियता, अननुञ्ञातता, अज्झोहरणीयं अज्झोहरणत्थाय सहत्था अनिक्खित्तभाजने दानन्ति इमानेत्थ तीणि अङ्गानि. समुट्ठानादीनि एळकलोमसदिसानीति.

अचेलकसिक्खापदवण्णना निट्ठिता.

२. उय्योजनसिक्खापदवण्णना

दुतिये ¶ दापेत्वा वा अदापेत्वा वाति यंकिञ्चि आमिसं दापेत्वा वा न दापेत्वा वा. उय्योजेय्याति मातुगामेन सद्धिं हसनकीळनरहोनिसज्जादीनि कत्तुकामो ‘गच्छा’तिआदीनि वत्वा उय्योजेय्य. एतदेवाति एतं अनाचारमेव पच्चयं करित्वा, न अञ्ञं पतिरूपं कारणं. पाचित्तियन्ति उय्योजनमत्ते ताव दुक्कटं, यदा पनस्स सो दस्सनूपचारं वा सवनूपचारं वा एकेन पादेन विजहति, अपरं दुक्कटं, दुतियेन विजहिते पाचित्तियं. एत्थ च दस्सनूपचारस्स अज्झोकासे ठत्वा द्वादसहत्थप्पमाणं, तथा सवनूपचारस्स. सचे पन अन्तरा कुट्टद्वारपाकारादयो होन्ति, तेहि अन्तरितभावोयेव उपचारातिक्कमो.

सावत्थियं उपनन्दं आरब्भ उय्योजनवत्थुस्मिं पञ्ञत्तं, साधारणपञ्ञत्ति, उय्योजनाणत्तिकाय साणत्तिकं, तिकपाचित्तियं, अनुपसम्पन्ने तिकदुक्कटं, उभिन्नम्पि कलिसासनारोपने दुक्कटमेव, ‘‘उभो एकतो न यापेस्सामा’’ति एवमादीहि पतिरूपकारणेहि उय्योजेन्तस्स, उम्मत्तकादीनञ्च अनापत्ति. अनाचारं आचरितुकामता, तदत्थमेव उपसम्पन्नस्स उय्योजनं, एवं उय्योजितस्स उपचारातिक्कमोति इमानेत्थ तीणि अङ्गानि. समुट्ठानादीनि अदिन्नादानसदिसानीति.

उय्योजनसिक्खापदवण्णना निट्ठिता.

३. सभोजनसिक्खापदवण्णना

ततिये ¶ सह उभोहि जनेहीति सभोजनं, तस्मिं सभोजने. अथ वा सभोजनेति सभोगे, रागपरियुट्ठितपुरिसस्स हि इत्थी भोगो, इत्थिया च पुरिसो, तेनेवस्स पदभाजने ‘‘इत्थी चेव होति, पुरिसो चा’’तिआदि (पाचि. २८१) वुत्तं. अनुपखज्ज निसज्जं कप्पेय्याति अनुपविसित्वा निसीदेय्य, यं तस्मिं कुले सयनिघरं, तस्स महाचतुस्सालादीसु कतस्स महल्लकस्स पिट्ठसङ्घाटतो हत्थपासं विजहित्वा अन्तोसयनस्स आसन्ने ठाने, खुद्दकस्स वा वेमज्झं अतिक्कमित्वा निसीदेय्याति अत्थो, एवं निसिन्नस्स पाचित्तियं.

सावत्थियं ¶ उपनन्दं आरब्भ अनुपखज्ज निसज्जनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, असयनिघरे सयनिघरसञ्ञिनो, वेमतिकस्स वा दुक्कटं. नसयनिघरसञ्ञिस्स, वुत्तलक्खणं पदेसं अनतिक्कमित्वा निसिन्नस्स, भिक्खुस्मिं दुतियके सति, उभोसु निक्खन्तेसु वा, वीतरागेसु वा निसीदन्तस्स, उम्मत्तकादीनञ्च अनापत्ति. अवीतरागजायम्पतिकानं ¶ सन्निहितता, सयनिघरता, दुतियस्स भिक्खुनो अभावो, अनुपखज्ज निसीदनन्ति इमानेत्थ चत्तारि अङ्गानि. समुट्ठानादीनि पठमपाराजिकसदिसानीति.

सभोजनसिक्खापदवण्णना निट्ठिता.

४-५. रहोपटिच्छन्न-रहोनिसज्जसिक्खापदवण्णना

चतुत्थपञ्चमानि सावत्थियं उपनन्दं आरब्भ पटिच्छन्नासने च, रहो च निसज्जनवत्थुस्मिं पञ्ञत्तानि, साधारणपञ्ञत्तियो, एतेसम्पि समुट्ठानादीनि पठमपाराजिकसदिसानेव. सेसो कथानयो अनियतद्वये वुत्तनयेनेव वेदितब्बो.

रहोपटिच्छन्न-रहोनिसज्जसिक्खापदवण्णना निट्ठिता.

६. चारित्तसिक्खापदवण्णना

छट्ठे निमन्तितोति पञ्चन्नं भोजनानं अञ्ञतरेन निमन्तितो. सभत्तो समानोति तेनेव निमन्तनभत्तेन सभत्तो समानो. सन्तं भिक्खुं अनापुच्छाति अन्तोउपचारसीमाय दस्सनूपचारे भिक्खुं ¶ दिस्वा यं सक्का होति पकतिवचनेन आपुच्छितुं, तादिसं ‘‘अहं इत्थन्नामस्स घरं गच्छामी’’ति वा ‘‘चारित्तं आपज्जामी’’ति वा ईदिसेन वचनेन अनापुच्छित्वा. पुरेभत्तं वा पच्छाभत्तं वाति येन भत्तेन निमन्तितो, तस्मिं भुत्ते वा अभुत्ते वा. कुलेसु चारित्तं आपज्जेय्याति यस्मिं कुले निमन्तितो, ततो अञ्ञानि कुलानि पविसेय्य. अञ्ञत्र समया पाचित्तियन्ति सचे सो भिक्खु वुत्तलक्खणं दुविधम्पि समयं ठपेत्वा अवीतिवत्ते ¶ मज्झन्हिके अञ्ञं कुलं पविसति, अथस्स घरूपचारोक्कमने दुक्कटं, पठमपादेन उम्मारं अतिक्कमन्तस्स अपरम्पि दुक्कटं, दुतियपादेन अतिक्कमे पाचित्तियं.

राजगहे उपनन्दं आरब्भ चारित्तापज्जनवत्थुस्मिं पञ्ञत्तं, ‘‘सन्तं भिक्खुं, अनापुच्छा, पुरेभत्तं पच्छाभत्तं, अञ्ञत्र समया’’ति अयमेत्थ चतुब्बिधा अनुपञ्ञत्ति, साधारणपञ्ञत्ति, अनाणत्तिकं, तिकपाचित्तियं, अनिमन्तिते निमन्तितसञ्ञिस्स, वेमतिकस्स वा दुक्कटं. तस्मिं अनिमन्तितसञ्ञिस्स, समये सन्तं भिक्खुं आपुच्छित्वा, असन्तं भिक्खुं अनापुच्छित्वा पविसतो, अञ्ञस्स घरेन वा घरूपचारेन वा मग्गो होति, तेन गच्छतो, अन्तरारामभिक्खुनुपस्सयतित्थियसेय्यपटिक्कमनभत्तियघरानि गच्छतो, आपदासु, उम्मत्तकादीनञ्च अनापत्ति. पञ्चन्नं भोजनानं अञ्ञतरेन निमन्तनसादियनं, सन्तं भिक्खुं अनापुच्छना, भत्तियघरतो अञ्ञघरप्पविसनं, मज्झन्हिकानतिक्कमो, समयस्स वा आपदानं वा अभावोति इमानेत्थ पञ्च अङ्गानि. समुट्ठानादीनि पठमकथिनसदिसानेव, इदं पन किरियाकिरियन्ति.

चारित्तसिक्खापदवण्णना निट्ठिता.

७. महानामसिक्खापदवण्णना

सत्तमे ¶ चतुमासप्पच्चयपवारणाति चत्तारो मासे गिलानप्पच्चयपवारणा, सब्बञ्चेतं वत्थुवसेन वुत्तं. अयं पनेत्थ अत्थो – चतुमासपवारणा वा होतु, पुनपवारणा वा, निच्चपवारणा वा, सब्बापि सादितब्बा, ‘‘इदानि मम रोगो नत्थी’’ति न पटिक्खिपितब्बा, ‘‘रोगे पन सति विञ्ञापेस्सामी’’ति अधिवासेतब्बाति. ततो चे उत्तरि सादियेय्याति एत्थ सचे तत्थ रत्तीहि वा भेसज्जेहि वा परिच्छेदो कतो होति ‘‘एत्तकायेव रत्तियो, एत्तकानि वा भेसज्जानि विञ्ञापेतब्बानी’’ति, अथ ततो रत्तिपरियन्ततो वा भेसज्जपरियन्ततो वा उत्तरि, न भेसज्जकरणीयेन वा भेसज्जं, अञ्ञभेसज्जकरणीयेन वा अञ्ञं भेसज्जं विञ्ञापेन्तस्स पाचित्तियं.

सक्केसु ¶ ¶ छब्बग्गिये आरब्भ भेसज्जविञ्ञापनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, नततुत्तरि ततुत्तरिसञ्ञिनो, वेमतिकस्स वा दुक्कटं. नततुत्तरि नततुत्तरिसञ्ञिस्स, येहि भेसज्जेहि पवारितो, ततो अञ्ञेहि वा अधिकतरेहि वा अत्थे सति, यासु च रत्तीसु पवारितो, ता अतिक्कमित्वापि अत्थे सति यथाभूतं आचिक्खित्वा विञ्ञापेन्तस्स, ये च ञातके वा पुग्गलिकप्पवारणाय पवारिते वा अपरियन्तपवारणाय वा पवारिते, अञ्ञस्स वा अत्थाय, अत्तनो वा धनेन विञ्ञापेन्ति, तेसं, उम्मत्तकादीनञ्च अनापत्ति. सङ्घपवारणता, ततो भेसज्जविञ्ञत्ति, अगिलानता, परियन्तातिक्कमोति इमानेत्थ चत्तारि अङ्गानि. समुट्ठानादीनि सञ्चरित्तसदिसानीति.

महानामसिक्खापदवण्णना निट्ठिता.

८. उय्युत्तसेनासिक्खापदवण्णना

अट्ठमे उय्युत्तन्ति कतउय्योगं, गामतो निक्खन्तन्ति अत्थो. सेनन्ति चतुरङ्गिनिं. अञ्ञत्र तथारूपप्पच्चयाति तथारूपे कारणे असति केवलं सेनं दस्सनत्थाय गच्छतो पदे पदे दुक्कटं, दस्सनूपचारे ठत्वा पस्सतो पाचित्तियं. दस्सनूपचारो नाम यत्थ ठितो पस्सति, तं पन विजहित्वा पुनप्पुनं पस्सतो पयोगे पयोगे पाचित्तियं.

सावत्थियं छब्बग्गिये आरब्भ सेनादस्सनवत्थुस्मिं पञ्ञत्तं, ‘‘अञ्ञत्र तथारूपप्पच्चया’’ति अयमेत्थ अनुपञ्ञत्ति, साधारणपञ्ञत्ति, अनाणत्तिकं, तिकपाचित्तियं, हत्थिआदीसु एकमेकं दस्सनाय गमने वुत्तनयेनेव दुक्कटं, तथा अनुय्युत्ते उय्युत्तसञ्ञिनो, वेमतिकस्स च दुक्कटं. अनुय्युत्तसञ्ञिनो पन, आरामे ठत्वा अत्तनो ठितोकासं आगतं, पटिपथं आगच्छन्तञ्च पस्सतो, तथारूपप्पच्चये, आपदासु, उम्मत्तकादीनञ्च अनापत्ति. उय्युत्तसेनं दस्सनत्थाय गमनं, अनुञ्ञातोकासतो अञ्ञत्र दस्सनं, तथारूपप्पच्चयस्स आपदाय वा अभावोति ¶ इमानेत्थ चत्तारि अङ्गानि. समुट्ठानादीनि एळकलोमसदिसानि, इदं पन लोकवज्जं, अकुसलचित्तं, तिवेदनन्ति.

उय्युत्तसेनासिक्खापदवण्णना निट्ठिता.

९. सेनावाससिक्खापदवण्णना

नवमे ¶ ¶ ततो चे उत्तरीति तिरत्ततो उत्तरि चतुत्थदिवसे अत्थङ्गते सूरिये सेनाय तिट्ठतु वा निसीदतु वा सयतु वा, सचेपि आकासे इद्धिया कञ्चि इरियापथं कप्पेति, पाचित्तियमेव.

सावत्थियं छब्बग्गिये आरब्भ अतिरेकतिरत्तं सेनाय वसनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, ऊनकतिरत्ते अतिरेकसञ्ञिनो, वेमतिकस्स वा दुक्कटं. ऊनकसञ्ञिस्स, ततियाय रत्तिया पुरारुणा निक्खमित्वा पुन वसतो, गिलानस्स वा गिलानकरणीयेन वा वसतो, पटिसेनारुद्धाय सेनाय, केनचि पलिबुद्धस्स, आपदासु, उम्मत्तकादीनञ्च अनापत्ति. तिरत्तातिक्कमो, सेनाय सूरियस्स अत्थङ्गमो, गिलानतादीनं अभावोति इमानेत्थ तीणि अङ्गानि. समुट्ठानादीनि एळकलोमसदिसानेवाति.

सेनावाससिक्खापदवण्णना निट्ठिता.

१०. उय्योधिकसिक्खापदवण्णना

दसमे उग्गन्त्वा उग्गन्त्वा एत्थ युज्झन्तीति उय्योधिकं, सम्पहारट्ठानस्सेतं नामं. बलस्स अग्गं जानन्ति एत्थाति बलग्गं, बलगणनट्ठानन्ति अत्थो. सेनाय वियूहं सेनाब्यूहं, सेनानिवेसस्सेतं नामं. अनीकस्स दस्सनं अनीकदस्सनं. अनीकं नाम ‘‘द्वादसपुरिसो हत्थी, तिपुरिसो अस्सो, चतुप्पुरिसो रथो’’तिइमिना (पाचि. ३१४) लक्खणेन तयो हत्थी पच्छिमकं हत्थानीकं, अस्सानीकरथानीकेसुपि एसेव नयो. चत्तारो पन आवुधहत्था पुरिसा पच्छिमकं पत्तानीकं. एतेसु यंकिञ्चि दस्सनाय गच्छतो पदे पदे दुक्कटं, दस्सनूपचारे ठत्वा पस्सतो पाचित्तियं, उपचारं पन विजहित्वा पुनप्पुनं पस्सतो पयोगे पयोगे पाचित्तियं. सेसं उय्युत्तसेनासिक्खापदे वुत्तनयेनेव वेदितब्बं, आपत्तिभेदो पनेत्थ नत्थेवाति.

उय्योधिकसिक्खापदवण्णना निट्ठिता.

अचेलकवग्गो पञ्चमो.

६. सुरापानवग्गो

१. सुरापानसिक्खापदवण्णना

सुरापानवग्गस्स ¶ ¶ पठमे सुरामेरयपानेति एत्थ पिट्ठादीहि कतं मज्जं सुरा, पुप्फादीहि कतो आसवो मेरयं, तदुभयम्पि बीजतो पट्ठाय कुसग्गेनापि पिवतो पयोगे पयोगे पाचित्तियं.

कोसम्बियं सागतत्थेरं आरब्भ मज्जपिवनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, अमज्जे मज्जसञ्ञिस्स, वेमतिकस्स वा दुक्कटं. अमज्जसञ्ञिस्स, अमज्जं मज्जवण्णगन्धरसं लोणसोवीरकं वा सुत्तं वा पिवतो, वासग्गाहापनत्थं ईसकं मज्जं पक्खिपित्वा सूपादीनि पचन्ति, तेसु सूपसम्पाकादीसु ¶ , आमलकरसादीहि अमज्जं मज्जसदिसं अरिट्ठं करोन्ति, तं पिवतो, उम्मत्तकादीनञ्च अनापत्ति. मज्जभावो, तस्स पानञ्चाति इमानेत्थ द्वे अङ्गानि. समुट्ठानादीनि एळकलोमसदिसानि, इदं पन लोकवज्जं, अकुसलचित्तं, तिवेदनन्ति.

सुरापानसिक्खापदवण्णना निट्ठिता.

२. अङ्गुलिपतोदकसिक्खापदवण्णना

दुतिये अङ्गुलिपतोदकेति अङ्गुलीहि उपकच्छकादिघट्टनं वुच्चति, अपिच येन केनचि सरीरावयवेन हसाधिप्पायस्स उपसम्पन्नं फुसतो पाचित्तियं.

सावत्थियं छब्बग्गिये आरब्भ अङ्गुलिपतोदकेन हसनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, अनुपसम्पन्ने तिकदुक्कटं, इध पन भिक्खुनीपि भिक्खुस्स, भिक्खु च भिक्खुनिया अनुपसम्पन्नो एव, कायप्पटिबद्धादीसु सब्बत्थ दुक्कटमेव. न हसनाधिप्पायस्स, सति करणीये आमसतो, उम्मत्तकादीनञ्च अनापत्ति. हसाधिप्पायता, उपसम्पन्नस्स ¶ कायेन कायामसनन्ति इमानेत्थ द्वे अङ्गानि. समुट्ठानादीनि पठमपाराजिकसदिसानेवाति.

अङ्गुलिपतोदकसिक्खापदवण्णना निट्ठिता.

३. हसधम्मसिक्खापदवण्णना

ततिये ¶ उदके हसधम्मेति उदककीळा वुच्चति. तस्मा यो भिक्खु उपरिगोप्फके उदकेयेव गच्छन्तो हसाधिप्पायो निमुज्जति वा उम्मुज्जति वा, तस्स निमुज्जनादीनं अत्थाय ओतरन्तस्स हत्थवारे पदवारे दुक्कटं, निमुज्जनुम्मुज्जनेसु पयोगे पयोगे पाचित्तियं, निमुज्जित्वा अन्तोउदकेयेव गच्छन्तस्स हत्थवारपदवारेसु, तरन्तस्स वा येन येन अङ्गेन तरति, तस्स तस्स पयोगे पयोगे पाचित्तियं.

सावत्थियं सत्तरसवग्गिये भिक्खू आरब्भ उदके कीळनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, उदके अहसधम्मे हसधम्मसञ्ञिनो, वेमतिकस्स वा दुक्कटं, तथा नावाय कीळतो हत्थेन वा पादेन वा कट्ठेन वा कथलाय वा उदकं पहरतो, भाजनगतं उदकं वा कञ्जिकादीनि वा चिक्खल्लं वा खिपनकीळाय कीळतो दुक्कटं. अत्थजोतकं पन अक्खरं छिन्दितुं वट्टति. न हसाधिप्पायस्स, सति करणीये ओतरित्वा निमुज्जनादीनि करोन्तस्स, पारं गच्छतो, आपदासु, उम्मत्तकादीनञ्च अनापत्ति. उपरिगोप्फकता, हसाधिप्पायेन कीळनन्ति इमानेत्थ द्वे अङ्गानि. समुट्ठानादीनि पठमपाराजिकसदिसानीति.

हसधम्मसिक्खापदवण्णना निट्ठिता.

४. अनादरियसिक्खापदवण्णना

चतुत्थे ¶ अनादरियेति पुग्गलस्स वा धम्मस्स वा अनादरकरणे. तस्मा यो भिक्खु उपसम्पन्नेन पञ्ञत्तेन वुच्चमानो तस्स वा वचनं अकत्तुकामताय, तं वा धम्मं असिक्खितुकामताय अनादरियं करोति, तस्स तस्मिं अनादरिये पाचित्तियं.

कोसम्बियं ¶ छन्नत्थेरं आरब्भ अनादरियकरणवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, अनुपसम्पन्ने तिकदुक्कटं, उपसम्पन्नेन वा अनुपसम्पन्नेन वा ‘‘इदं न सल्लेखाय संवत्तती’’तिआदिना ¶ नयेन अपञ्ञत्तेन वुच्चमानस्स अनादरियेपि दुक्कटमेव. पवेणिआगतं पन उग्गहं गहेत्वा ‘‘एवं अम्हाकं आचरियानं उग्गहो परिपुच्छा’’ति (पाचि. ३४४) भणन्तस्स, उम्मत्तकादीनञ्च अनापत्ति. उपसम्पन्नस्स पञ्ञत्तेन वचनं, अनादरियकरणन्ति इमानेत्थ द्वे अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

अनादरियसिक्खापदवण्णना निट्ठिता.

५. भिंसापनसिक्खापदवण्णना

पञ्चमे भिंसापेय्याति भिंसापनत्थं रूपादीनि उपसंहरेय्य, भयानककथं वा कथेय्य. सो पन भायतु वा, मा वा, इतरस्स पाचित्तियं.

सावत्थियं छब्बग्गिये भिक्खू आरब्भ भिंसापनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं. अनुपसम्पन्ने तिकदुक्कटं, न भिंसापेतुकामस्स तथा करोतो, उम्मत्तकादीनञ्च अनापत्ति. उपसम्पन्नता, तस्स दस्सनसवनविसये भिंसापेतुकामताय वायामनन्ति इमानेत्थ द्वे अङ्गानि. समुट्ठानादीनि अनन्तरसिक्खापदसदिसानेवाति.

भिंसापनसिक्खापदवण्णना निट्ठिता.

६. जोतिसिक्खापदवण्णना

छट्ठे विसिब्बनापेक्खोति तप्पितुकामो. समादहेय्याति जालेय्य, अञ्ञत्र तथारूपप्पच्चयाति पदीपुज्जालनं वा पत्तपचनादीसु जोतिकरणं वाति एवरूपं पच्चयं विना. तत्रायं विनिच्छयो – सयं समादहन्तस्स अरणिसण्ठापनतो पट्ठाय याव जाला न उट्ठहति, ताव सब्बप्पयोगेसु दुक्कटं, जालुट्ठाने पाचित्तियं. समादहापेन्तस्स आणत्तिया दुक्कटं, सकिं आणत्तेन बहुम्पि समादहिते एकमेव पाचित्तियं.

भग्गेसु ¶ ¶ सम्बहुले भिक्खू आरब्भ जोतिं समादहित्वा विसिब्बनवत्थुस्मिं पञ्ञत्तं, ‘‘अगिलानो, अञ्ञत्र तथारूपप्पच्चया’’ति इमानेत्थ द्वे अनुपञ्ञत्तियो, साधारणपञ्ञत्ति, साणत्तिकं, तिकपाचित्तियं, गिलानस्स अगिलानसञ्ञिनो, वेमतिकस्स वा दुक्कटं, तथा पटिलातं उक्खिपन्तस्स, तञ्च अविज्झातं उक्खिपित्वा यथाठाने ठपेन्तस्स. विज्झातं पन जालयतो पाचित्तियमेव. गिलानस्स गिलानसञ्ञिस्स ¶ , अञ्ञेन कतं वा वीतच्चितङ्गारं वा विसिब्बेन्तस्स, पदीपजोतिकजन्ताघरादिके तथारूपप्पच्चये, आपदासु, उम्मत्तकादीनञ्च अनापत्ति. अगिलानता, अनुञ्ञातकारणाभावो, विसिब्बेतुकामता, समादहनन्ति इमानेत्थ चत्तारि अङ्गानि. समुट्ठानादीनि सञ्चरित्ते वुत्तनयेनेव वेदितब्बानीति.

जोतिसिक्खापदवण्णना निट्ठिता.

७. नहानसिक्खापदवण्णना

सत्तमे नहायेय्याति यो भिक्खु मज्झिमदेसे नहानदिवसतो पट्ठाय अद्धमासे अपुण्णे अञ्ञत्र समया ‘‘नहायिस्सामी’’ति चुण्णं वा मत्तिकं वा अभिसङ्खरोति, तस्स ततो पट्ठाय सब्बप्पयोगेसु दुक्कटं, नहानपरियोसाने पाचित्तियं. समयेसु परिवेणसम्मज्जनमत्तम्पि कम्मसमयो, अद्धयोजनं गन्तुकामस्स, गच्छतो, गतस्स वा अद्धानगमनसमयो, सरजेन वातेन ओकिण्णस्स द्वीसु वा तीसु वा उदकफुसितेसु काये पतितेसु वातवुट्ठिसमयोति वेदितब्बो. सेसं उत्तानमेव.

राजगहे सम्बहुले भिक्खू आरब्भ न मत्तं जानित्वा नहायनवत्थुस्मिं पञ्ञत्तं, ‘‘अञ्ञत्र समया’’ति अयमेत्थ छब्बिधा अनुपञ्ञत्ति, साधारणपञ्ञत्ति, अनाणत्तिकं, तिकपाचित्तियं, अतिरेकद्धमासे ऊनकसञ्ञिनो, वेमतिकस्स वा दुक्कटं. अतिरेकसञ्ञिस्स, समये वा नहायन्तस्स, यो वा नदीपारं गच्छन्तो वालुकं उक्किरित्वा कतआवाटेसुपि नहायति, तस्स, पच्चन्तिमे जनपदे सब्बेसं, आपदासु, उम्मत्तकादीनञ्च अनापत्ति. मज्झिमदेसो, ऊनकद्धमासे नहानं, समयानं वा नदीपारगमनस्स वा ¶ आपदानं वा अभावोति इमानेत्थ तीणि अङ्गानि. समुट्ठानादीनि एळकलोमसदिसानेवाति.

नहानसिक्खापदवण्णना निट्ठिता.

८. दुब्बण्णकरणसिक्खापदवण्णना

अट्ठमे ¶ अलभीति लभो, लभो एव लाभो, किं अलभि? चीवरं, कीदिसं? नवं, इति ‘‘नवचीवरलाभेना’’ति वत्तब्बे अनुनासिकलोपं अकत्वा नवंचीवरलाभेनाति वुत्तं, पटिलद्धनवचीवरेनाति अत्थो. मज्झे ठितपदद्वये पनाति निपातमत्तं. भिक्खुनाति येन लद्धं, तस्स निदस्सनं, सेसं पदत्थतो उत्तानमेव. अयं पनेत्थ विनिच्छयो – निवासनपारुपनुपगं चीवरं लभित्वा तस्स निट्ठितरजनस्स यस्मिं वा तस्मिं वा पदेसे कंसनीलेन वा पत्तनीलेन वा कद्दमेन वा येन केनचि काळकेन वा मोरक्खिमण्डलमङ्गुलपिट्ठीनं अञ्ञतरप्पमाणं कप्पबिन्दुं आदियित्वा तं चीवरं परिभुञ्जितब्बं, अनादियित्वा परिभुञ्जन्तस्स पाचित्तियं.

सावत्थियं सम्बहुले भिक्खू आरब्भ अत्तनो चीवरअजाननवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, आदिन्ने अनादिन्नसञ्ञिनो, वेमतिकस्स वा दुक्कटं. आदिन्नसञ्ञिस्स ¶ , कप्पे नट्ठे, कप्पकतोकासे जिण्णे, कप्पकतेन अकप्पकते संसिब्बिते, पच्छा आरोपितेसु अग्गळअनुवातपरिभण्डेसु तं परिभुञ्जन्तस्स, उम्मत्तकादीनञ्च अनापत्ति. वुत्तप्पकारस्स चीवरस्स अकतकप्पकता, न नट्ठचीवरादिता, निवासनं वा पारुपनं वाति इमानेत्थ तीणि अङ्गानि. समुट्ठानादीनि एळकलोमसदिसानि, इदं पन किरियाकिरियन्ति.

दुब्बण्णकरणसिक्खापदवण्णना निट्ठिता.

९. विकप्पनसिक्खापदवण्णना

नवमे विकप्पेत्वाति एत्थ द्वे विकप्पना सम्मुखाविकप्पना परम्मुखाविकप्पना च. कथं सम्मुखाविकप्पना होति? चीवरानं एकबहुभावं सन्निहितासन्निहितभावञ्च ¶ ञत्वा ‘इमं चीवर’न्ति वा ‘इमानि चीवरानी’ति वा ‘एतं चीवर’न्ति वा ‘एतानि चीवरानी’ति वा वत्वा ‘तुय्हं विकप्पेमी’ति वत्तब्बं, अयमेका सम्मुखाविकप्पना. एत्तावता निधेतुं वट्टति, परिभुञ्जितुं पन विस्सज्जेतुं वा अधिट्ठातुं वा न वट्टति. ‘‘मय्हं सन्तकं, मय्हं सन्तकानि परिभुञ्ज वा विस्सज्जेहि वा यथापच्चयं करोही’’ति (पाचि. ३७४) एवं पन वुत्ते पच्चुद्धारो नाम होति, ततो पभुति परिभोगादयोपि वट्टन्ति. अपरो नयो, तथेव चीवरानं एकबहुभावं ¶ सन्निहितासन्निहितभावञ्च ञत्वा तस्सेव भिक्खुनो सन्तिके ‘इमं चीवर’न्ति वा ‘इमानि चीवरानी’ति वा ‘एतं चीवर’न्ति वा ‘एतानि चीवरानी’ति वा वत्वा पञ्चसु सहधम्मिकेसु अञ्ञतरस्स अत्तना अभिरुचितस्स यस्स कस्सचि नामं गहेत्वा ‘‘तिस्सस्स भिक्खुनो विकप्पेमी’’ति वा ‘‘तिस्साय भिक्खुनिया, सिक्खमानाय, सामणेरस्स, तिस्साय सामणेरिया विकप्पेमी’’ति वा वत्तब्बं, अयं अपरापि सम्मुखाविकप्पना. एत्तावता निधेतुं वट्टति, परिभोगादीसु एकम्पि न वट्टति. तेन पन भिक्खुना ‘‘तिस्सस्स भिक्खुनो सन्तकं…पे… तिस्साय सामणेरिया सन्तकं परिभुञ्ज वा विस्सज्जेहि वा यथापच्चयं करोही’’ति वुत्ते पच्चुद्धारो नाम होति, ततो पभुति परिभोगादयोपि वट्टन्ति.

कथं परम्मुखाविकप्पना होति? चीवरानं तथेव एकबहुभावं सन्निहितासन्निहितभावञ्च ञत्वा ‘इमं चीवर’न्ति वा ‘इमानि चीवरानी’ति वा ‘एतं चीवर’न्ति वा ‘एतानि चीवरानी’ति वा वत्वा ‘‘तुय्हं विकप्पनत्थाय दम्मी’’ति वत्तब्बं. तेन वत्तब्बो ‘‘को ते मित्तो वा सन्दिट्ठो वा’’ति. ततो इतरेन पुरिमनयेनेव ‘तिस्सो भिक्खू’ति वा…पे… ‘तिस्सा सामणेरी’ति वा वत्तब्बं. पुन तेन भिक्खुना ‘‘अहं तिस्सस्स भिक्खुनो दम्मी’’ति वा…पे… ‘‘तिस्साय सामणेरिया दम्मी’’ति वा वत्तब्बं ¶ , अयं परम्मुखाविकप्पना. एत्तावता निधेतुं वट्टति, परिभोगादीसु एकम्पि न वट्टति. तेन पन भिक्खुना दुतियसम्मुखाविकप्पनायं वुत्तनयेनेव ‘‘इत्थन्नामस्स सन्तकं परिभुञ्ज वा विस्सज्जेहि वा यथापच्चयं करोही’’ति वुत्ते पच्चुद्धारो नाम होति, ततो पभुति परिभोगादयोपि वट्टन्तीति. पत्तविकप्पनायम्पि एसेव नयो. इति इमासु द्वीसु विकप्पनासु याय कायचि विकप्पनाय पञ्चसु सहधम्मिकेसु यस्स कस्सचि चीवरं विकप्पेत्वा वुत्तनयेन ¶ अकतप्पच्चुद्धारं वा येन विनयकम्मं कतं, तस्स वा विस्सासेन अग्गहेत्वा परिभुञ्जन्तस्स पाचित्तियं.

सावत्थियं उपनन्दं आरब्भ अप्पच्चुद्धारणं परिभुञ्जनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, तं पन अधिट्ठहन्तस्स वा विस्सज्जेन्तस्स वा दुक्कटं, तथा पच्चुद्धारणे अप्पच्चुद्धारणसञ्ञिस्स वेमतिकस्स वा. पच्चुद्धारणसञ्ञिस्स पन विस्सासेन परिभुञ्जन्तस्स, उम्मत्तकादीनञ्च अनापत्ति. सामं विकप्पितस्स अप्पच्चुद्धारो, विकप्पनुपगचीवरता, परिभोगोति इमानेत्थ तीणि अङ्गानि. समुट्ठानादीनि पठमकथिनसदिसानेव, इदं पन किरियाकिरियन्ति.

विकप्पनसिक्खापदवण्णना निट्ठिता.

१०. अपनिधानसिक्खापदवण्णना

दसमे ¶ पत्तन्ति अधिट्ठानुपगं. चीवरन्ति विकप्पनुपगं. निसीदनं नाम सदसं वुच्चति. सूचिघरं नाम ससूचिकं वा असूचिकं वा. कायबन्धनं नाम पट्टिका वा सूकरन्तकं वा. अपनिधेय्याति अपनेत्वा निदहेय्य. हसापेक्खोति हसाधिप्पायो. पाचित्तियन्ति सयं अपनिधेन्तस्स पाचित्तियं, अञ्ञं आणापेन्तस्स आणत्तिया दुक्कटं, तेन अपनिहिते इतरस्स पाचित्तियं.

सावत्थियं छब्बग्गिये आरब्भ अपनिधानवत्थुस्मिं पञ्ञत्तं, साधारणपञ्ञत्ति, साणत्तिकं, तिकपाचित्तियं, अनुपसम्पन्ने तिकदुक्कटं, वुत्तप्पकारानि पन पत्तादीनि ठपेत्वा अञ्ञं परिक्खारं उपसम्पन्नस्स वा अनुपसम्पन्नस्स वा सन्तकं अपनिधेन्तस्स दुक्कटमेव. दुन्निक्खित्तं पटिसामेन्तस्स, ‘‘धम्मकथं कत्वा दस्सामी’’ति पटिसामेन्तस्स, उम्मत्तकादीनञ्च अनापत्ति. उपसम्पन्नस्स सन्तकानं पत्तादीनं अपनिधानं, विहेसेतुकामता वा हसाधिप्पायता वाति इमानेत्थ द्वे अङ्गानि. समुट्ठानादीनि अदिन्नादानसदिसानीति.

अपनिधानसिक्खापदवण्णना निट्ठिता.

सुरापानवग्गो छट्ठो.

७. सप्पाणकवग्गो

१. सञ्चिच्चसिक्खापदवण्णना

सप्पाणकवग्गस्स ¶ पठमे पाणोति तिरच्छानगतपाणो अधिप्पेतो. तं खुद्दकम्पि महन्तम्पि मारेन्तस्स पाचित्तियमेव, महन्ते पन उपक्कममहन्तताय अकुसलं महन्तं होति.

सावत्थियं ¶ उदायित्थेरं आरब्भ पाणं जीविता वोरोपनवत्थुस्मिं पञ्ञत्तं, साधारणपञ्ञत्ति, साणत्तिकं, पाणे वेमतिकस्स, अपाणे पाणसञ्ञिनो, वेमतिकस्स वा दुक्कटं ¶ . अपाणसञ्ञिस्स, असञ्चिच्च, अजानन्तस्स, नमरणाधिप्पायस्स, उम्मत्तकादीनञ्च अनापत्ति. सेसं मनुस्सविग्गहे वुत्तनयमेवाति.

सञ्चिच्चसिक्खापदवण्णना निट्ठिता.

२. सप्पाणकसिक्खापदवण्णना

दुतिये सप्पाणकन्ति ये पाणका परिभोगेन मरन्ति, तेहि सप्पाणकं, तादिसञ्हि जानं परिभुञ्जन्तस्स पयोगे पयोगे पाचित्तियं.

सावत्थियं छब्बग्गिये आरब्भ जानं सप्पाणकं उदकं परिभुञ्जनवत्थुस्मिं पञ्ञत्तं, सेसमेत्थ सिञ्चनसिक्खापदे वुत्तनयेनेव वेदितब्बन्ति.

सप्पाणकसिक्खापदवण्णना निट्ठिता.

३. उक्कोटनसिक्खापदवण्णना

ततिये यथाधम्मन्ति यो यस्स अधिकरणस्स वूपसमाय धम्मो वुत्तो, तेनेव धम्मेन. निहताधिकरणन्ति निहतं अधिकरणं, समथक्खन्धके (चूळव. १८५ आदयो) सत्थारा वुत्तधम्मेनेव वूपसमितन्ति अत्थो, वूपसमननयं पनस्स अधिकरणसमथेसु दस्सयिस्साम. पुनकम्माय उक्कोटेय्याति तस्स तस्स भिक्खुनो सन्तिकं गन्त्वा ‘‘अकतं कम्म’’न्तिआदीनि (पाचि. ३९४) वदन्तो पुनकरणत्थाय उच्चालेय्य. यथाठितभावेन पतिट्ठातुं न ददेय्य, तस्सेवं करोन्तस्स पाचित्तियं. यं पन धम्मेन अधिकरणं निहतं ¶ , तं सुनिहतमेव. सचे विप्पकते कम्मे पटिक्कोसति, तं सञ्ञापेत्वा कातब्बं. इतरथा कम्मञ्च कुप्पति, कारकानञ्च आपत्ति.

सावत्थियं छब्बग्गिये भिक्खू आरब्भ उक्कोटनवत्थुस्मिं पञ्ञत्तं, साधारणपञ्ञत्ति, अनाणत्तिकं, धम्मकम्मे वेमतिकस्स, अधम्मकम्मे धम्मकम्मसञ्ञिनो, वेमतिकस्स वा दुक्कटं. उभयेसु अधम्मकम्मसञ्ञिस्स, ‘‘अधम्मेन वा वग्गेन वा अकम्मारहस्स वा कम्मं कत’’न्ति जानन्तस्स, उम्मत्तकादीनञ्च अनापत्ति. यथाधम्मं निहतभावो, जानना, उक्कोटनाति ¶ इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

उक्कोटनसिक्खापदवण्णना निट्ठिता.

४. दुट्ठुल्लसिक्खापदवण्णना

चतुत्थे दुट्ठुल्लन्ति सङ्घादिसेसं अधिप्पेतं, तं येन केनचि उपायेन ञत्वा पटिच्छादेन्तस्स पाचित्तियं. सचेपि ‘‘न दानि नं ¶ कस्सचि भिक्खुनो आरोचेस्सामी’’ति धुरं निक्खिपित्वा पच्छा आरोचेति, पाचित्तियं, आपज्जित्वाव आरोचेस्सति. सचे पन एवं धुरं निक्खिपित्वा पटिच्छादनत्थमेव अञ्ञस्स आरोचेति, सोपि अञ्ञस्साति एतेनुपायेन समणसतम्पि आपज्जतियेव ताव, याव कोटि न छिज्जति. कथं पन कोटि छिज्जति? सचे हि आपन्नो एकस्स आरोचेति, सोपि अञ्ञस्स आरोचेति, सो निवत्तित्वा येनस्स आरोचितं, तस्सेव आरोचेति, एवं ततियेन पुग्गलेन दुतियस्स आरोचिते कोटि छिन्ना होति.

सावत्थियं अञ्ञतरं भिक्खुं आरब्भ दुट्ठुल्लापत्तिपटिच्छादनवत्थुस्मिं पञ्ञत्तं, असाधारणपञ्ञत्ति, अनाणत्तिकं, दुट्ठुल्लाय आपत्तिया आदिपदे पाचित्तियं, इतरेसु द्वीसु दुक्कटं, अदुट्ठुल्लाय तिकदुक्कटं, अनुपसम्पन्नस्स दुट्ठुल्ले वा अदुट्ठुल्ले वा अज्झाचारे दुक्कटमेव. ‘‘सङ्घस्स भण्डनादीनि भविस्सन्ती’’ति (पाचि. ४०१) वा ‘‘अयं कक्खळो फरुसो जीवितन्तरायं वा ब्रह्मचरियन्तरायं वा करिस्सती’’ति वा अनारोचेन्तस्स, पतिरूपं भिक्खुं अपस्सतो ¶ , न छादेतुकामस्स, ‘‘पञ्ञायिस्सति सकेन कम्मेना’’ति अनारोचेन्तस्स, उम्मत्तकादीनञ्च अनापत्ति. उपसम्पन्नस्स दुट्ठुल्लापत्तिजाननं, ‘‘पटिच्छादेतुकामताय नारोचेस्सामी’’ति धुरनिक्खेपोति इमानेत्थ द्वे अङ्गानि. समुट्ठानादीनि समनुभासनसअसानेवाति.

दुट्ठुल्लसिक्खापदवण्णना निट्ठिता.

५. ऊनवीसतिवस्ससिक्खापदवण्णना

पञ्चमे ऊनवीसतिवस्सन्ति पटिसन्धिग्गहणतो पट्ठाय अपरिपुण्णवीसतिवस्सं. उपसम्पादेय्याति उपज्झायो हुत्वा उपसम्पादेय्य. सो च पुग्गलो अनुपसम्पन्नोति जानन्तेनापि अजानन्तेनापि ¶ उपसम्पादितो अनुपसम्पन्नोव. सचे पन सो दसवस्सच्चयेन अञ्ञं उपसम्पादेति, तञ्चे मुञ्चित्वा गणो पूरति, सूपसम्पन्नो. सोपि याव न जानाति, ताव तस्स नेव सग्गन्तरायो न मोक्खन्तरायो, ञत्वा पन पुन उपसम्पज्जितब्बं. ते च भिक्खू गारय्हाति ठपेत्वा उपज्झायं अवसेसा गारय्हा होन्ति, सब्बे दुक्कटं आपज्जन्ति. इदं तस्मिं पाचित्तियन्ति यो पन उपज्झायो हुत्वा उपसम्पादेति, तस्मिंयेव पुग्गले इदं पाचित्तियं वेदितब्बं. तस्मा यो ‘‘एवं उपसम्पादेस्सामी’’ति गणं वा आचरियं वा पत्तं वा चीवरं वा परियेसति, सीमं वा सम्मन्नति (पाचि. ४०४), उदकुक्खेपं वा परिच्छिन्दति, सो एतेसु सब्बकिच्चेसु ञत्तिया, द्वीसु च कम्मवाचासु दुक्कटानि आपज्जित्वा कम्मवाचापरियोसाने पाचित्तियं आपज्जति.

राजगहे सम्बहुले भिक्खू आरब्भ ऊनवीसतिवस्सं उपसम्पादनवत्थुस्मिं पञ्ञत्तं, असाधारणपञ्ञत्ति, अनाणत्तिकं, ऊनवीसतिवस्से वेमतिकस्स, परिपुण्णवीसतिवस्से ऊनकसञ्ञिनो, वेमतिकस्स च दुक्कटं. उभयत्थ परिपुण्णसञ्ञिस्स, उम्मत्तकादीनञ्च अनापत्ति. ऊनवीसतिवस्सता, ऊनकसञ्ञिता, उपसम्पादनन्ति ¶ इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन पण्णत्तिवज्जं, तिचित्तं, तिवेदनन्ति.

ऊनवीसतिवस्ससिक्खापदवण्णना निट्ठिता.

६. थेय्यसत्थसिक्खापदवण्णना

छट्ठे ¶ ये राजानं वा वञ्चेत्वा सुङ्कं वा परिहरितुकामा चोरा कतकम्मा चेव अकतकम्मा च मग्गप्पटिपन्ना, तेसु इध थेय्यसत्थसञ्ञिनो तस्स थेय्यसत्थभावं ञत्वा तेन सद्धिं संविधाय गच्छन्तस्स संविधाने च गमने च ओवादवग्गे वुत्तनयेन आपत्तिविनिच्छयो वेदितब्बो.

सावत्थियं अञ्ञतरं भिक्खुं आरब्भ थेय्यसत्थेन सद्धिं संविधाय एकद्धानमग्गं पटिपज्जनवत्थुस्मिं पञ्ञत्तं, साधारणपञ्ञत्ति, अनाणत्तिकं, मनुस्सेसु असंविदहन्तेसु सयमेव संविदहित्वा गच्छन्तस्स, थेय्यसत्थे वेमतिकस्स, अथेय्यसत्थे थेय्यसत्थसञ्ञिनो, वेमतिकस्स च दुक्कटं. अथेय्यसत्थसञ्ञिस्स, असंविदहित्वा वा कालविसङ्केतेन वा, आपदासु वा, गच्छन्तस्स, उम्मत्तकादीनञ्च अनापत्ति. थेय्यसत्थभावो, जाननं, संविधानं, अविसङ्केतेन गमनन्ति ¶ इमानेत्थ चत्तारि अङ्गानि. थेय्यसत्थसमुट्ठानं, किरियं, सञ्ञाविमोक्खं, सचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति.

थेय्यसत्थसिक्खापदवण्णना निट्ठिता.

७. संविधानसिक्खापदवण्णना

सत्तमे सावत्थियं अञ्ञतरं भिक्खुं आरब्भ मातुगामेन सद्धिं एकद्धानमग्गं पटिपज्जनवत्थुस्मिं पञ्ञत्तं, सेसमेत्थ भिक्खुनिया सद्धिं संविधानसिक्खापदे वुत्तनयेनेव वेदितब्बन्ति.

संविधानसिक्खापदवण्णना निट्ठिता.

८. अरिट्ठसिक्खापदवण्णना

अट्ठमे सग्गमोक्खानं अन्तरायं करोन्तीति अन्तरायिका, ते कम्मकिलेसविपाकउपवादपञ्ञत्तिवीतिक्कमनवसेन पञ्चविधा. तेसु मुदुकानं ¶ अत्थरणादीनं फस्सो विय इत्थिसम्फस्सोपि वट्टतीति मेथुनवीतिक्कमने दोसं अदिस्वा पञ्ञत्तिवीतिक्कमन्तरायिके सन्धाय ‘‘येमे अन्तरायिका धम्मा वुत्ता भगवता, ते पटिसेवतो नालं अन्तरायाया’’ति वुत्तं. अनेकपरियायेनाति ‘‘अट्ठिकङ्कलूपमा कामा’’तिआदीहि (म. नि. २.४२; पाचि. ४१७; चूळनि. खग्गविसाणसुत्तनिद्देस १४७) नेकेहि कारणेहि. सो भिक्खु भिक्खूहीति ये पस्सन्ति वा सुणन्ति वा, तेहि तिक्खत्तुं एवं वत्तब्बो ‘‘मा आयस्मा एवं अवच…पे… अलञ्च पन ते पटिसेवतो अन्तरायाया’’ति. एवं वुत्ते अप्पटिनिस्सज्जन्तस्स दुक्कटं, सुत्वा अवदन्तानम्पि ¶ दुक्कटं. पुन सङ्घमज्झम्पि आकड्ढित्वा तथेव वत्तब्बो, तत्रापि तस्स अप्पटिनिस्सज्जने, इतरेसञ्च अवचने दुक्कटमेव. एवम्पि अप्पटिनिस्सज्जन्तो पुन ञत्तिचतुत्थेन कम्मेन यावततियं समनुभासितब्बो, अथस्स अप्पटिनिस्सज्जतो पुन ञत्तिया च द्वीहि च कम्मवाचाहि दुक्कटं, कम्मवाचापरियोसाने पाचित्तियं.

सावत्थियं अरिट्ठं आरब्भ पापिकाय दिट्ठिया अप्पटिनिस्सज्जनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, अधम्मकम्मे तिकदुक्कटं. असमनुभासियमानस्स ¶ , पटिनिस्सज्जन्तस्स, उम्मत्तकादीनञ्च अनापत्ति. धम्मकम्मता, समनुभासना, अप्पटिनिस्सज्जनन्ति इमानेत्थ तीणि अङ्गानि. समुट्ठानादीनि समनुभासनसदिसानेवाति.

अरिट्ठसिक्खापदवण्णना निट्ठिता.

९. उक्खित्तसम्भोगसिक्खापदवण्णना

नवमे तथावादिनाति ‘‘तथाहं भगवता धम्म’’न्तिआदिवादिना. अकतानुधम्मेनाति अनुधम्मो वुच्चति आपत्तिया अदस्सने वा अप्पटिकम्मे वा पापिकाय दिट्ठिया अप्पटिनिस्सग्गे वा धम्मेन विनयेन उक्खित्तकस्स अनुलोमवत्तं दिस्वा कतओसारणा, सो ओसारणसङ्खातो अनुधम्मो यस्स न कतो, अयं अकतानुधम्मो नाम, तादिसेन सद्धिन्ति अत्थो. सम्भुञ्जेय्य वाति आमिससम्भोगं वा धम्मसम्भोगं वा करेय्य. संवसेय्य वाति उपोसथादिकं सङ्घकम्मं करेय्य ¶ . सह वा सेय्यं कप्पेय्याति नानूपचारेपि एकच्छन्ने निपज्जेय्य. तत्थ आमिसपरिभोगे एकप्पयोगेन बहूपि ददतो वा गण्हतो वा एकं पाचित्तियं, विच्छिन्दने सति पयोगे पयोगे पाचित्तियं. धम्मसम्भोगे पदादीहि उद्दिसन्तस्स वा उद्दिसापेन्तस्स वा पदसोधम्मे वुत्तनयेन, संवासे कम्मपरियोसानवसेन, सहसेय्याय एकस्मिं निपन्ने इतरस्स निपज्जनप्पयोगवसेन आपत्तिपरिच्छेदो वेदितब्बो.

सावत्थियं छब्बग्गिये आरब्भ अरिट्ठेन भिक्खुना सद्धिं सम्भुञ्जनवत्थुस्मिं पञ्ञत्तं, साधारणपञ्ञत्ति, अनाणत्तिकं, उक्खित्तके वेमतिकस्स, अनुक्खित्तके उक्खित्तकसञ्ञिनो चेव वेमतिकस्स च दुक्कटं. उभोसु अनुक्खित्तकसञ्ञिस्स, ‘‘ओसारितो’’ति वा ‘‘तं दिट्ठिं पटिनिस्सट्ठो’’ति वा जानन्तस्स, उम्मत्तकादीनञ्च अनापत्ति. अकतानुधम्मता, जानना, सम्भोगादिकरणन्ति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन पण्णत्तिवज्जं, तिचित्तं, तिवेदनन्ति.

उक्खित्तसम्भोगसिक्खापदवण्णना निट्ठिता.

१०. कण्टकसिक्खापदवण्णना

दसमे समणुद्देसोति सामणेरो. चराति गच्छ. पिरेति पर अमामक. विनस्साति नस्स ¶ , यत्थ तं न पस्साम, तत्थ गच्छाति वुत्तं होति. तथानासितन्तिएत्थ संवासनासना ¶ लिङ्गनासना दण्डकम्मनासनाति तिस्सो नासना. तत्थ आपत्तिया अदस्सनादीसु उक्खेपना संवासनासना नाम. दूसको नासेतब्बो (पारा. ६६), मेत्तियं भिक्खुनिं नासेथाति (चूळव. १९३; पारा. ३८४) अयं लिङ्गनासना नाम. ‘‘अज्जतग्गे ते, आवुसो समणुद्देस, न चेव सो भगवा सत्था अपदिसितब्बो’’ति (पाचि. ४२९) अयं दण्डकम्मनासना नाम, अयं इधाधिप्पेता. तेन वुत्तं ‘‘तथानासित’’न्ति. उपलापेय्याति ‘‘पत्तं वा चीवरं वा उद्देसं वा परिपुच्छं वा दस्सामी’’ति सङ्गण्हेय्य. उपट्ठापेय्याति चुण्णमत्तिकादीनि सादियन्तो तेन ¶ अत्तनो उपट्ठानं कारापेय्य. सम्भोगसहसेय्या अनन्तरसिक्खापदे वुत्तनया एव, तस्मा आपत्तिपरिच्छेदोपेत्थ तस्मिं वुत्तनयेनेव वेदितब्बो.

सावत्थियं छब्बग्गिये भिक्खू आरब्भ कण्टकसमणुद्देसउपलापनवत्थुस्मिं पञ्ञत्तं, सेसं अरिट्ठसिक्खापदे वुत्तसदिसमेवाति.

कण्टकसिक्खापदवण्णना निट्ठिता.

सप्पाणकवग्गो सत्तमो.

८. सहधम्मिकवग्गो

१. सहधम्मिकसिक्खापदवण्णना

सहधम्मिकवग्गस्स पठमे सहधम्मिकं वुच्चमानोति इमस्सत्थो दुब्बचसिक्खापदे वुत्तो. एतस्मिं सिक्खापदेति एतस्मिं सिक्खापदे यं वुत्तं, तं न ताव सिक्खिस्सामीति अत्थो. पाचित्तियन्ति एत्थ पन अनादरियभया लेसेन एवं वदन्तस्स वाचाय वाचाय पाचित्तियं वेदितब्बं. सिक्खमानेनाति ओवादं सिरसा सम्पटिच्छित्वा सिक्खितुकामेनेव हुत्वा. अञ्ञातब्बन्ति आजानितब्बं. परिपुच्छितब्बन्ति ‘‘इमस्स को अत्थो’’ति परिपुच्छितब्बं. परिपञ्हितब्बन्ति चिन्तेतब्बं तुलयितब्बं.

कोसम्बियं छन्नत्थेरं आरब्भ एवं भणनवत्थुस्मिं पञ्ञत्तं, साधारणपञ्ञत्ति, अनाणत्तिकं ¶ , तिकपाचित्तियं, अनुपसम्पन्ने तिकदुक्कटं, उभोहिपि ‘‘इदं न सल्लेखाया’’तिआदिना (पाचि. ४३६) नयेनेव अप्पञ्ञत्तेन वुच्चमानस्सापि एवं वदतो दुक्कटमेव. ‘‘जानिस्सामि सिक्खिस्सामी’’ति भणन्तस्स, उम्मत्तकादीनञ्च अनापत्ति. उपसम्पन्नस्स पञ्ञत्तेन वचनं, असिक्खितुकामताय एवं वचनन्ति इमानेत्थ द्वे अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

सहधम्मिकसिक्खापदवण्णना निट्ठिता.

२. विलेखनसिक्खापदवण्णना

दुतिये ¶ उद्दिस्समानेति आचरियेन अन्तेवासिकस्स वुच्चमाने वा सज्झायवसेन परिवत्तियमाने वा. खुद्दानुखुद्दकेहीति खुद्दकेहि च अनुखुद्दकेहि च. यावदेवाति तेसं संवत्तनमरियादपरिच्छेदवचनं. इदं वुत्तं होति – एतानि हि ये उद्दिसन्ति वा उद्दिसापेन्ति वा सज्झायन्ति वा, तेसं ताव संवत्तन्ति, याव ‘‘कप्पति नु ¶ खो, न कप्पति नु खो’’ति कुक्कुच्चविप्पटिसारो, विहेसा, विचिकिच्छा मनोविलेखा च उप्पज्जन्तियेव. अथ वा यावदेवाति अतिसयववत्थापनं. तस्स ‘संवत्तन्ती’तिइमिना सम्बन्धो, कुक्कुच्चाय विहेसाय विलेखाय अतिविय संवत्तन्तियेवाति वुत्तं होति. सिक्खापदविवण्णकेति एवं सिक्खापदानं विवण्णके गरहणे पाचित्तियं होतीति अत्थो.

सावत्थियं छब्बग्गिये आरब्भ विनयविवण्णनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, अनुपसम्पन्नस्स विवण्णने तिकदुक्कटं, उभिन्नम्पि अञ्ञधम्मविवण्णने दुक्कटमेव. न विवण्णेतुकामस्स, ‘‘इङ्घ ताव सुत्तन्ते वा गाथायो वा अभिधम्मं वा परियापुणस्सु, पच्छापि विनयं परियापुणिस्ससी’’ति भणतो, उम्मत्तकादीनञ्च अनापत्ति. गरहितुकामता च, उपसम्पन्नस्स सन्तिके सिक्खापदविवण्णनञ्चाति इमानेत्थ द्वे अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

विलेखनसिक्खापदवण्णना निट्ठिता.

३. मोहनसिक्खापदवण्णना

ततिये अन्वड्ढमासन्ति अनुपटिपाटिया अद्धमासे अद्धमासे. उद्दिस्समानेति उपोसथवसेन ¶ उद्दिसियमाने. यञ्च तत्थ आपत्तिं आपन्नोति यं सो अनाचारं आचरित्वा अञ्ञाणकेन आपन्नभावं जानापेतुकामो एवमाह, तस्मिं अनाचारे यं आपत्तिं आपन्नो. तञ्च यथाधम्मो कारेतब्बोति अञ्ञाणकेन आपन्नत्ता मोक्खो नत्थि, यथा पन धम्मो च विनयो च ठितो, तथा तं आपत्तिं कारेतब्बो, देसनागामिनिया देसापेतब्बो, वुट्ठानगामिनिया वुट्ठापेतब्बोति ¶ अत्थो. उत्तरि चस्स मोहो आरोपेतब्बोति यथाधम्मकरणतो च उत्तरि ‘‘तस्स ते, आवुसो’’तिआदिवचनेहि निन्दित्वा तस्स पुग्गलस्स ञत्तिदुतियकम्मेन मोहो आरोपेतब्बो. इदं तस्मिं मोहनके पाचित्तियन्ति यो एवं आरोपिते मोहे पुन मोहेति, तस्मिं मोहनके पुग्गले इदं पाचित्तियं वेदितब्बं, न अनारोपिते मोहेति अत्थो.

सावत्थियं छब्बग्गिये आरब्भ मोहनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, अधम्मकम्मे तिकदुक्कटं, अनारोपिते मोहे दुक्कटमेव. येन न वित्थारेन सुतं, ऊनकद्वत्तिक्खत्तुं वा वित्थारेन सुतं, ये च न मोहेतुकामा तेसं, उम्मत्तकादीनञ्च अनापत्ति. मोहारोपनं, मोहेतुकामता, वुत्तनयेन सुतभावो, मोहनन्ति इमानेत्थ चत्तारि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

मोहनसिक्खापदवण्णना निट्ठिता.

४. पहारसिक्खापदवण्णना

चतुत्थे पहारं ददेय्याति एत्थ पहरितुकामताय पहारे दिन्ने सचेपि मरति, पाचित्तियमेव.

सावत्थियं ¶ छब्बग्गिये आरब्भ पहारदानवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, अनुपसम्पन्ने तिकदुक्कटं, विरूपकरणाधिप्पायेन पन उपसम्पन्नस्सपि कण्णादिच्छेदने दुक्कटमेव. केनचि विहेठियमानस्स पन मोक्खाधिप्पायस्स, उम्मत्तकादीनञ्च अनापत्ति. कुपितता, न मोक्खाधिप्पायता, उपसम्पन्नस्स पहारदानन्ति इमानेत्थ तीणि अङ्गानि. समुट्ठानादीनि पठमपाराजिकसदिसानि, इदं पन दुक्खवेदनन्ति.

पहारसिक्खापदवण्णना निट्ठिता.

५. तलसत्तिकसिक्खापदवण्णना

पञ्चमे ¶ तलसत्तिकं उग्गिरेय्याति पहारदानाकारं दस्सेन्तो कायं वा कायप्पटिबद्धं वा उच्चारेय्य. एत्थ च उग्गिरणपच्चया पाचित्तियं. सचे पन ¶ उग्गिरित्वा विरद्धो पहारं देति, न पहरितुकामताय दिन्नत्ता दुक्कटमेव, तेन पहारेन हत्थादीसु यंकिञ्चि भिज्जति, दुक्कटमेव. सेसमेत्थ सब्बं पुरिमसिक्खापदे वुत्तनयेनेव वेदितब्बन्ति.

तलसत्तिकसिक्खापदवण्णना निट्ठिता.

६. अमूलकसिक्खापदवण्णना

छट्ठे अमूलकेनाति दिट्ठादिमूलविरहितेन. अनुद्धंसेय्याति चोदेय्य वा चोदापेय्य वा. पाचित्तियन्ति सचे चुदितको तङ्खणञ्ञेव ‘‘चोदेति म’’न्ति जानाति, चोदकस्स पाचित्तियं.

सावत्थियं छब्बग्गिये आरब्भ अमूलकेन सङ्घादिसेसेन अनुद्धंसनवत्थुस्मिं पञ्ञत्तं, साधारणपञ्ञत्ति, साणत्तिकं, तिकपाचित्तियं, आचारविपत्तिया वा दिट्ठिविपत्तिया वा अनुद्धंसने दुक्कटं, अनुपसम्पन्ने तिकदुक्कटं. तथासञ्ञिस्स, उम्मत्तकादीनञ्च अनापत्ति. उपसम्पन्नता, सङ्घादिसेसस्स अमूलकता, अनुद्धंसना, तङ्खणविजाननाति इमानेत्थ चत्तारि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

अमूलकसिक्खापदवण्णना निट्ठिता.

७. सञ्चिच्चसिक्खापदवण्णना

सत्तमे कुक्कुच्चं उपदहेय्याति ‘‘ऊनवीसतिवस्सो त्वं मञ्ञे’’तिआदीनि (पाचि. ४६६) भणन्तो उप्पादेय्य. एवं अञ्ञस्मिं उप्पादनपच्चये असति सञ्चिच्च उप्पादेन्तस्स वाचाय वाचाय पाचित्तियं.

सावत्थियं छब्बग्गिये आरब्भ कुक्कुच्चउप्पादनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, अनुपसम्पन्ने तिकदुक्कटं. नउप्पादेतुकामस्स, केवलं हितेसिताय ¶ तथा वदन्तस्स, उम्मत्तकादीनञ्च अनापत्ति. उपसम्पन्नता, अफासुकामता ¶ , कुक्कुच्चुप्पादनन्ति इमानेत्थ तीणि अङ्गानि. समुट्ठानादीनि अनन्तरसदिसानेवाति.

सञ्चिच्चसिक्खापदवण्णना निट्ठिता.

८. उपस्सुतिसिक्खापदवण्णना

अट्ठमे ¶ विवादापन्नानन्ति भण्डनकलहेहि विवड्ढितं विवादाधिकरणं आपन्नानं. उपस्सुतिन्ति सुतिसमीपं, यत्थ ठत्वा सक्का होति तेसं वचनं सोतुं, तत्थ तिट्ठेय्याति अत्थो. ‘‘तत्थ सोस्सामी’’ति चोदेतुकामताय गच्छतो पदे पदे दुक्कटं, तुरितगमनेपि ओहीयमानेपि एसेव नयो. यत्थ पन ठितो सुणाति, तत्थ ठितस्स पाचित्तियं, अत्तनो ठितोकासं आगन्त्वा तेसु मन्तयमानेसुपि उक्कासित्वा, ‘‘अहं एत्था’’ति वा वत्वा जानापेतब्बं, एवं अकरोन्तस्सापि सवने पाचित्तियमेव.

सावत्थियं छब्बग्गिये आरब्भ उपस्सुतिट्ठानवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं, अनुपसम्पन्ने तिकदुक्कटं, ‘‘इमेसं सुत्वा ओरमिस्सामि विरमिस्सामि वूपसमिस्सामि अत्तानं परिमोचेस्सामी’’ति (पाचि. ४७३) गच्छतो, उम्मत्तकादीनञ्च अनापत्ति. उपसम्पन्नता, चोदनाधिप्पायो, सवनन्ति इमानेत्थ तीणि अङ्गानि. थेय्यसत्थसमुट्ठानं इदं पन सिया किरियं, सिया अकिरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदनन्ति.

उपस्सुतिसिक्खापदवण्णना निट्ठिता.

९. कम्मप्पटिबाहनसिक्खापदवण्णना

नवमे धम्मिकानं कम्मानन्ति धम्मेन विनयेन सत्थुसासनेन कतानं अपलोकनकम्मं ञत्तिकम्मं ञत्तिदुतियकम्मं ञत्तिचतुत्थकम्मन्ति इमेसं चतुन्नं कम्मानं. तत्रायं सङ्खेपतो कम्मविनिच्छयो – तत्र अपलोकनकम्मं नाम समग्गस्स सङ्घस्स अनुमतिया तं तं वत्थुं कित्तेत्वा ‘‘रुच्चति सङ्घस्सा’’ति तिक्खत्तुं सावेत्वा कत्तब्बं कम्मं वुच्चति. समग्गस्सेव पन सङ्घस्स अनुमतिया एकाय ञत्तिया कत्तब्बं कम्मं ञत्तिकम्मं नाम. एकाय ञत्तिया चेव अनुस्सावनाय ¶ च कत्तब्बं कम्मं ञत्तिदुतियकम्मं नाम. एकाय ¶ पन ञत्तिया तीहि च अनुस्सावनाहि कत्तब्बं कम्मं ञत्तिचतुत्थकम्मं नाम.

तेसु अपलोकनकम्मं (परि. ४९६; परि. अट्ठ. ४९५-४९६) पञ्च ठानानि गच्छति ओसारणं निस्सारणं भण्डुकम्मं ब्रह्मदण्डं कम्मलक्खणन्ति. तत्थ कण्टकसामणेरस्स नासना विय निस्सारणा, तादिसंयेव सम्मावत्तन्तं दिस्वा पवेसना ‘ओसारणा’ति वेदितब्बा. पब्बज्जापेक्खस्स केसच्छेदनापुच्छनं भण्डुकम्मं (महाव. ९८) नाम. मुखरस्स भिक्खुनो भिक्खू दुरुत्तवचनेहि घट्टेन्तस्स ‘‘इत्थन्नामो भिक्खु मुखरो भिक्खू दुरुत्तवचनेहि घट्टेन्तो विहरति, सो भिक्खु यं इच्छेय्य, तं वदेय्य, भिक्खूहि इत्थन्नामो भिक्खु नेव वत्तब्बो, न ओवादानुसासनिं कत्तब्बो, न ओवदितब्बो’’ति ‘‘सङ्घं, भन्ते ¶ , पुच्छामि ‘इत्थन्नामस्स भिक्खुनो ब्रह्मदण्डस्स दानं रुच्चति सङ्घस्सा’ति, दुतियम्पि पुच्छामि, ततियम्पि पुच्छामि ‘इत्थन्नामस्स, भन्ते, भिक्खुनो ब्रह्मदण्डस्स दानं रुच्चति सङ्घस्सा’’’ति एवं कत्तब्बं कम्मं ब्रह्मदण्डं (चूळव. ४४५) नाम. यं पन भगवता भिक्खुनीनं ऊरुं विवरित्वा दस्सनादिवत्थूसु ‘‘अवन्दियो सो, भिक्खवे, भिक्खु भिक्खुनिसङ्घेन कातब्बो’’ति (चूळव. ४११) एवं अवन्दियकम्मं अनुञ्ञातं, यं भिक्खुनीहि ‘‘अय्ये, असुको नाम अय्यो भिक्खुनीनं अप्पसादनीयं दस्सेति, एतस्स अय्यस्स अवन्दियकरणं ‘रुच्चति भिक्खुनिसङ्घस्सा’’’ति एवं उपस्सये निसिन्नाहेव भिक्खुनीहि कत्तब्बं, एवरूपं कम्मं यस्मा तस्स कम्मंयेव लक्खणं न ओसारणादीनि, तस्मा कम्मलक्खणन्ति वुच्चति. इदञ्च कम्मलक्खणं नाम भिक्खुनिमूलकं पञ्ञत्तं, अपिच भिक्खूनम्पि लब्भति, तस्मा भिक्खूहिपि अच्छिन्नचीवरकादीनं चीवरादीनि वा देन्तेहि, परिभुञ्जितब्बानि अपनेतब्बानिपि वत्थूनि परिभुञ्जन्तेहि वा, अपनेन्तेहि वा, तथारूपं वा धम्मिकं कतिकं करोन्तेहि तिक्खत्तुं सावेत्वा अपलोकनकम्मं कातब्बं, सब्बञ्हेतं कम्मलक्खणमेव पविसति, इति अपलोकनकम्मं पञ्च ठानानि गच्छति.

ञत्तिकम्मं पन नव ठानानि गच्छति ओसारणं निस्सारणं उपोसथं पवारणं सम्मुतिं दानं पटिग्गहं पच्चुक्कड्ढनं कम्मलक्खणन्ति. तत्थ ‘‘सुणातु मे, भन्ते, सङ्घो, इत्थन्नामो इत्थन्नामस्स आयस्मतो उपसम्पदापेक्खो, अनुसिट्ठो सो मया, यदि सङ्घस्स पत्तकल्लं, इत्थन्नामो आगच्छेय्य ¶ , ‘आगच्छाही’ति वत्तब्बो’’ति (महाव. १२६) एवं उपसम्पदापेक्खस्स ओसारणा ओसारणा नाम. ‘‘सुणन्तु मे आयस्मन्ता, अयं इत्थन्नामो भिक्खु धम्मकथिको, इमस्स नेव सुत्तं आगच्छति, नो सुत्तविभङ्गो, सो अत्थं असल्लक्खेत्वा ¶ ब्यञ्जनच्छायाय अत्थं पटिबाहति, यदायस्मन्तानं पत्तकल्लं, इत्थन्नामं भिक्खुं वुट्ठापेत्वा अवसेसा इमं अधिकरणं वूपसमेय्यामा’’ति एवं उब्भाहिकविनिच्छये (चूळव. २३३) धम्मकथिकस्स भिक्खुनो निस्सारणा निस्सारणा नाम. ‘‘सुणातु मे, भन्ते, सङ्घो, अज्जुपोसथो…पे… उपोसथं करेय्या’’ति एवं उपोसथकम्मवसेन ठपिता ञत्ति उपोसथो नाम. ‘‘सुणातु मे, भन्ते, सङ्घो, अज्ज पवारणा पन्नरसी, यदि सङ्घस्स पत्तकल्लं, सङ्घो पवारेय्या’’ति (महाव. २१०) एवं पवारणाकम्मवसेन ठपिता ञत्ति पवारणा नाम. ‘‘सुणातु मे, भन्ते, सङ्घो, इत्थन्नामो इत्थन्नामस्स उपसम्पदापेक्खो, यदि सङ्घस्स पत्तकल्लं, अहं इत्थन्नामं अनुसासेय्य’’न्ति, ‘‘यदि सङ्घस्स पत्तकल्लं, इत्थन्नामो इत्थन्नामं अनुसासेय्या’’ति (महाव. १२६) एवं अत्तानं वा परं वा सम्मन्नितुं ठपिता ञत्ति सम्मुति नाम. ‘‘सुणातु मे, भन्ते, सङ्घो, इमं चीवरं इत्थन्नामस्स भिक्खुनो निस्सग्गियं ¶ सङ्घस्स निस्सट्ठं, यदि सङ्घस्स पत्तकल्लं, सङ्घो इमं चीवरं इत्थन्नामस्स भिक्खुनो ददेय्या’’ति (पारा. ४६४) एवं निस्सट्ठचीवरपत्तादीनं दानं दानं नाम. ‘‘सुणातु मे, भन्ते, सङ्घो, अयं इत्थन्नामो भिक्खु आपत्तिं सरति विवरति उत्तानिं करोति देसेति, यदि सङ्घस्स पत्तकल्लं, अहं इत्थन्नामस्स भिक्खुनो आपत्तिं पटिग्गण्हेय्य’’न्ति, तेन वत्तब्बो ‘पस्ससी’ति, ‘आम, पस्सामी’ति, ‘‘आयतिं संवरेय्यासी’’ति (चूळव. २३९) एवं आपत्तिप्पटिग्गहो पटिग्गहो नाम. ‘‘सुणन्तु मे आयस्मन्ता आवासिका, यदायस्मन्तानं पत्तकल्लं, इदानि उपोसथं करेय्याम, पातिमोक्खं उद्दिसेय्याम, आगमे काले पवारेय्यामा’’ति (महाव. २४०) एवं कतप्पवारणप्पच्चुक्कड्ढना पच्चुक्कड्ढना नाम. तिणवत्तारकसमथे (चूळव. २१२) सब्बसङ्गाहिकञत्ति, एकेकस्मिं पक्खे एकेका ञत्ति चाति तिस्सोपि ञत्तियो कम्मलक्खणं नाम. इति ञत्तिकम्मं नव ठानानि गच्छति.

ञत्तिदुतियकम्मं ¶ सत्त ठानानि गच्छति ओसारणं निस्सारणं सम्मुतिं दानं उद्धारं देसनं कम्मलक्खणन्ति. तत्थ भिक्खूनं अलाभाय परिसक्कनादिकेहि अट्ठहि अङ्गेहि समन्नागतस्स उपासकस्स सङ्घेन असम्भोगकरणत्थं पत्तनिक्कुज्जनवसेन निस्सारणा निस्सारणा नाम. तस्सेव सम्मावत्तन्तस्स पत्तुक्कुज्जनवसेन ओसारणा च वेदितब्बा, सा खुद्दकक्खन्धके वड्ढलिच्छविवत्थुस्मिं (चूळव. २६५-२६६) वुत्ता. सीमासम्मुति तिचीवरेन अविप्पवाससम्मुतिसन्थतसम्मुतिभत्तुद्देसकसेनासनग्गाहापकभण्डागारिकचीवरप्पटिग्गाहकयागुभाजकफलभाजकखज्जभाजकअप्पमत्तकविस्सज्जकसाटियग्गाहपकपत्तग्गाहापकआरामिकपेसकसामणेरपेसकसम्मुतीति एतासं सम्मुतीनं वसेन सम्मुति वेदितब्बा. कथिनचीवरमतकचीवरदानवसेन दानं वेदितब्बं. कथिनुद्धारवसेन उद्धारो वेदितब्बो. कुटिवत्थुविहारवत्थुदेसनावसेन ¶ देसना वेदितब्बा. या पन तिणवत्थारकसमथे (चूळव. २१२ आदयो) एकस्मिं पक्खे एका, एकस्मिं पक्खे एकाति द्वे ञत्तिदुतियकम्मवाचा वुत्ता, या च मोहारोपनादीसु कम्मवाचा (पाचि. ४४६) वुत्ता, तासं वसेन कम्मलक्खणं वेदितब्बं, इति ञत्तिदुतियकम्मं सत्त ठानानि गच्छति.

ञत्तिचतुत्थकम्मम्पि सत्तेव ठानानि गच्छति ओसारणं निस्सारणं सम्मुतिं दानं निग्गहं समनुभासनं कम्मलक्खणन्ति. तत्थ तज्जनीयकम्मादीनं (चूळव. १ आदयो) सत्तन्नं कम्मानं वसेन निस्सारणा, तेसंयेव कम्मानं पटिप्पस्सम्भनवसेन ओसारणा च वेदितब्बा, भिक्खुनोवादकसम्मुतिवसेन (पाचि. १४६-१४७) सम्मुति, परिवासदान(चऊळव. १०२) मानत्तदानवसेन (चूळव. १०५) दानं, मूलायपटिकस्सनवसेन (चूळव. ११०) निग्गहो, उक्खित्तानुवत्तिका ¶ , अट्ठ यावततियका, अरिट्ठो (पाचि. ४१७), चण्डकाळी (पाचि. ७०९) चाति इमे ते यावततियकाति इमासं एकादसन्नं समनुभासनानं वसेन समनुभासना, उपसम्पदाकम्मअब्भानकम्मवसेन कम्मलक्खणं वेदितब्बं. इति ञत्तिचतुत्थकम्मं सत्त ठानानि गच्छति.

इमेसु पन चतूसु कम्मेसु अपलोकनकम्मं अपलोकेत्वाव कातब्बं, ञत्तिकम्मादिवसेन न कातब्बं. ञत्तिकम्मम्पि एकं ञत्तिं ठपेत्वाव कातब्बं, अपलोकनकम्मादिवसेन न कातब्बं. ञत्तिदुतियकम्मं पन अपलोकेत्वा ¶ कातब्बम्पि अत्थि अकातब्बम्पि, तत्थ सीमासम्मुति सीमासमूहननं (महाव. १३९-१४०, १४४ आदयो) कथिनचीवरदानं कथिनुद्धारो कुटिवत्थुदेसना विहारवत्थुदेसनाति इमानि छ कम्मानि गरुकानि अपलोकेत्वा कातुं न वट्टन्ति, ञत्तिदुतियकम्मवाचं सावेत्वाव कातब्बानि. अवसेसा तेरस सम्मुतियो सेनासनग्गाहापकमतकचीवरदानसम्मुतियो चाति एतानि लहुकम्मानि अपलोकेत्वापि कातुं वट्टन्ति, ञत्तिकम्मादिवसेन पन न कातब्बानेव. ञत्तिचतुत्थकम्मम्पि सकलक्खणेनेव कातब्बं, न सेसकम्मवसेन. एवं अत्तनो अत्तनो लक्खणेनेव वत्थुञत्तिअनुस्सावनासीमापरिसासम्पत्तिया कतानि एतानि कम्मानि धम्मेन विनयेन सत्थुसासनेन कतत्ता धम्मो एतेसु अत्थीति धम्मिकानि नाम होन्ति, इति एतेसं धम्मिकानं कम्मानं छन्दं दत्वा पच्छा खीयनधम्मं आपज्जन्तस्स वाचाय वाचाय पाचित्तियं.

सावत्थियं छब्बग्गिये आरब्भ खीयनधम्मापज्जनवत्थुस्मिं पञ्ञत्तं, साधारणपञ्ञत्ति, अनाणत्तिकं, धम्मकम्मे वेमतिकस्स, अधम्मकम्मे धम्मकम्मसञ्ञिनो, वेमतिकस्स च दुक्कटं. अधम्मकम्मसञ्ञिस्स ¶ , ‘‘अधम्मेन वा वग्गेन वा नकम्मारहस्स वा कम्मं करोन्ती’’ति ञत्वा खीयन्तस्स, उम्मत्तकादीनञ्च अनापत्ति. धम्मकम्मता, धम्मकम्मसञ्ञिता, छन्दं दत्वा खीयनन्ति इमानेत्थ तीणि अङ्गानि. समुट्ठानादीनि अदिन्नादानसदिसानेव, इदं पन दुक्खवेदनन्ति.

कम्मप्पटिबाहनसिक्खापदवण्णना निट्ठिता.

१०. छन्दंअदत्वागमनसिक्खापदवण्णना

दसमे विनिच्छयकथायाति याव आरोचितं वत्थु अविनिच्छिकं, ञत्तिं वा ठपेत्वा कम्मवाचा अनिट्ठापिता, ताव विनिच्छयकथा वत्तमाना नाम होति. यो भिक्खु एतस्मिं अन्तरे कम्मं कोपेतुकामताय परिसाय हत्थपासं विजहति, तस्स विजहने दुक्कटं, विजहिते पाचित्तियं.

सावत्थियं अञ्ञतरं भिक्खुं आरब्भ छन्दं अदत्वा पक्कमनवत्थुस्मिं पञ्ञत्तं, साधारणपञ्ञत्ति, अनाणत्तिकं, धम्मकम्मे वेमतिकस्स, अधम्मकम्मे ¶ धम्मकम्मसञ्ञिनो, वेमतिकस्स च दुक्कटं. अधम्मकम्मसञ्ञिस्स पन, यो च ‘‘सङ्घस्स भण्डनादीनि वा भविस्सन्ति, अधम्मेन ¶ वा वग्गेन वा नकम्मारहस्स वा कम्मं करिस्सन्ती’’ति (पाचि. ४८३) ञत्वा, गिलानो वा हुत्वा, गिलानस्स वा करणीयेन, उच्चारादीहि वा पीळितो, न च कम्मं कोपेतुकामो ‘‘पुन पच्चागमिस्सामी’’ति गच्छति, तस्स, उम्मत्तकादीनञ्च अनापत्ति. विनिच्छयकथाय वत्तमानता, धम्मकम्मता, धम्मकम्मसञ्ञिता, समानसीमायं ठितता, समानसंवासकता, कोपेतुकामताय हत्थपासविजहनन्ति इमानेत्थ छ अङ्गानि. समनुभासनसमुट्ठानं, किरियाकिरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदनन्ति.

छन्दंअदत्वागमनसिक्खापदवण्णना निट्ठिता.

११. दुब्बलसिक्खापदवण्णना

एकादसमे समग्गेन सङ्घेनाति समानसंवासकेन समानसीमायं ठितेन सङ्घेन सद्धिं चीवरं दत्वा. यथासन्थुतन्ति यो यो मित्तसन्दिट्ठसम्भत्तवसेन सन्थुतो, तस्स तस्साति अत्थो. पाचित्तियन्ति ¶ एवं सङ्घेन सद्धिं सयमेव सेनासनपञ्ञापनादिवसेन सम्मतस्स भिक्खुनो चीवरं दत्वा पच्छा खीयन्तस्स वाचाय वाचाय पाचित्तियं.

राजगहे छब्बग्गिये आरब्भ चीवरं दत्वा पच्छा खीयनवत्थुस्मिं पञ्ञत्तं, साधारणपञ्ञत्ति, अनाणत्तिकं, धम्मकम्मे तिकपाचित्तियं, चीवरं ठपेत्वा अञ्ञं विस्सज्जियवेभङ्गियं परिक्खारं दत्वा पच्छाखीयन्तस्स दुक्कटं, विस्सज्जियवेभङ्गियो नाम ठपेत्वा पञ्च गरुभण्डानि अवसेसो. रासिवसेन हि पञ्च गरुभण्डानि वुत्तानि, तत्थ आरामो आरामवत्थूति एकं, विहारो विहारवत्थूति दुतियं, मञ्चो पीठं भिसि बिम्बोहनन्ति ततियं, लोहकुम्भी लोहभाणकं लोहवारको लोहकटाहं वासि परसु कुठारी कुदालो निखादनन्ति चतुत्थं, वल्लि वेळु मुञ्जं पब्बजं तिणं मत्तिका ¶ दारुभण्डं मत्तिकाभण्डन्ति पञ्चमं. एतानि हि पञ्च सङ्घसन्तकानि नेव सङ्घस्स, न गणपुग्गलानं विस्सज्जेतुं वा विभजितुं वा वट्टन्ति, विस्सज्जितविभत्तानिपि सङ्घिकानेव होन्ति. थावरेन पन थावरं, इतरेन च अकप्पियेन महग्घकप्पियेन वा इतरं सङ्घस्स उपकारं सल्लक्खेत्वा कप्पियपरिवत्तनेन परिवत्तेतुं वट्टति, वरसेनासनादीनं संरक्खणत्थं लामकानि विस्सज्जेतुं विस्सज्जेत्वा परिभुञ्जितुञ्च वट्टति. एत्थ च पुरिमेसु तीसु रासीसु अगरुभण्डं नाम किञ्चि नत्थि, चतुत्थे लोहकुम्भी अरञ्जरसण्ठानं लोहभाणकं लोहकटाहन्ति इमानि तीणि अन्तमसो पसतमत्तउदकग्गण्हनकानिपि गरुभण्डानि. लोहवारको पन काळलोहतम्बलोहकंसलोहवट्टलोहानं येन केनचि कतो सीहळदीपे पादग्गण्हनको भाजेतब्बो, पादो च नाम मगधनाळिया पञ्चनाळिमत्तं ¶ गण्हाति, ततो अतिरेकं गरुभण्डं, इमानि ताव पाळियं आगतानि लोहभाजनानि.

पाळियं पन अनागतानिपि भिङ्गारपटिग्गहउळुङ्कदब्बिकटच्छुपाति तट्टकसरकसमुग्गअङ्गारकपल्लधूमकटच्छुआदीनि खुद्दकानिपि गरुभण्डानेव, अयपत्तो अयथालकं तम्बलोहथालकन्ति इमानि पन भाजनीयानि, कंसलोहवट्टलोहभाजनविकति सङ्घिकपरिभोगेन वा गिहिविकटा वा वट्टति, पुग्गलिकपरिभोगेन न वट्टति. ठपेत्वा पन तं भाजनविकतिं अञ्ञस्मिम्पि कप्पियलोहभण्डे अञ्जनी अञ्जनिसलाका नत्थुदानं कण्णमलहरणी सूचि खुद्दको पिप्फलिको खुद्दकं आरकण्टकं कुञ्चिका ताळं कत्तरयट्ठि वेधको भिन्दिवालको यथातथाघनकतलोहंविप्पकतलोहभण्डञ्च सब्बं भाजनीयं. धूमनेत्तफालदीपरुक्खदीपकपल्लिकओलम्बकदीपइत्थिपुरिसतिरच्छानरूपकानि पन अञ्ञानि वा भित्तिच्छदनकवाटादीसु उपनेतब्बानि, अन्तमसो लोहखिलकं उपादाय सब्बानिपि लोहभण्डानि ¶ गरुभण्डानियेव, अत्तना लद्धानि परिहरित्वापि पुग्गलिकपरिभोगेन न परिभुञ्जितब्बानि, सङ्घिकपरिभोगेन वा गिहिविकटानि वा वट्टन्ति, तिपुभण्डेपि एसेव नयो. खीरपासाणमयानि तट्टकसरकादीनि गरुभण्डानियेव.

घटको ¶ पन तेलभाजनं वा पादग्गण्हनकतो अतिरेकमेव गरुभण्डं, सुवण्णरजतआरकूटजातिफलिकभाजनानि गिहिविकटानिपि न वट्टन्ति. सेनासनपरिभोगे पन आमासम्पि अनामासम्पि सब्बं वट्टति.

वासियादीसु पन याय वासिया दन्तकट्ठच्छेदनउच्छुतच्छनमत्ततो अञ्ञं महाकम्मं कातुं न सक्का, अयं भाजनीया. सेसा येन केनचि आकारेन कता गरुभण्डं, परसु पन अन्तमसो वेज्जानं सिरावेधकोपि गरुभण्डमेव, तथा कुठारी. या पन आवुधसङ्खेपेन कता, अयं अनामासा, कुदालो दण्डबन्धनिखादनं वा अगरुभण्डं नाम नत्थि. सम्मुञ्जनिदण्डखणनकं पन अदण्डकं फलमत्तकमेव, यं सक्का सिपाटिकाय पक्खिपित्वा परिहरितुं, तं भाजनीयं. सिखरम्पि निखादनेनेव सङ्गहितं, येहि मनुस्सेहि विहारे वासिआदीनि दिन्नानि होन्ति, ते चे घरे दड्ढे वा विलुत्ते वा ‘‘देथ नो, भन्ते, उपक्खरे, पुन आहरिस्सामा’’ति वदन्ति, दातब्बा. सचे हरन्ति, न वारेतब्बा, अनाहरन्तापि न चोदेतब्बा.

कम्मारतट्टकारचुन्दकारनळकारमणिकारपत्तबन्धकानं अधिकरणिमुट्ठिसण्डासतुलादीनि सब्बानि लोहमयानि उपकरणानि सङ्घे दिन्नकालतो पट्ठाय गरुभण्डानि. तिपुकोट्टकसुवण्णकारचम्मकारउपकरणेसुपि एसेव नयो. अयं पन विसेसो, तिपुकोट्टकउपकरणेसु तिपुच्छेदनकसत्थकं, सुवण्णकारउपकरणेसु सुवण्णच्छेदनकसत्थकं, चम्मकारउपकरणेसु कतपरिकम्मचम्मच्छेदनखुद्दकसत्थन्ति इमानि भाजनीयानि. न्हापिततुन्नकारउपकरणेसुपि ठपेत्वा महाकत्तरिं ¶ महासण्डासं महापिप्फलिकञ्च सब्बं वट्टति, इतरानि गरुभण्डानि.

वल्लिआदीसु वेत्तवल्लिआदिका या काचि अड्ढबाहुप्पमाणा वल्लि सङ्घस्स दिन्ना वा तत्थजातका वा रक्खितगोपिताव गरुभण्डं, सा सङ्घकम्मे च चेतियकम्मे च कते सचे अतिरेका होति, पुग्गलिककम्मेपि उपनेतुं वट्टति, सुत्तमकचिवाकनाळिकेरहीरचम्ममया रज्जुका वा योत्तानि वा वाके च नाळिकेरहीरे च वट्टेत्वा कता एकवट्टा वा द्विवट्टा वा सङ्घस्स सन्तका गरुभण्डं. सुत्तं पन अवट्टेत्वा दिन्नं मकचिवाकनाळिकेरहीरा च भाजनीया ¶ . येहि पनेतानि ¶ रज्जुकादीनि दिन्नानि होन्ति, ते अत्तनो करणीयेन हरन्ता न वारेतब्बा.

यो कोचि अट्ठङ्गुलसूचिदण्डकमत्तोपि वेळु सङ्घस्स दिन्नो वा तत्थजातको वा रक्खितगोपितो गरुभण्डं, सोपि सङ्घस्स कम्मे च चेतियकम्मे च कते अतिरेको पुग्गलिककम्मे दातुं वट्टति. पादग्गण्हनकतेलनाळि पन कत्तरयट्ठि उपाहनदण्डको छत्तदण्डो छत्तसलाकाति इदमेत्थ भाजनीयभण्डं, दड्ढगेहमनुस्सा गण्हित्वा गच्छन्ता न वारेतब्बा.

मुञ्जञ्च पब्बजञ्च अवसेसञ्च छदनतिणं मुट्ठिप्पमाणम्पि छदनतिणसङ्खेपगतेसु तालपण्णादीसु यंकिञ्चि एकपण्णम्पि सङ्घस्स दिन्नं वा तत्थजातकं वा बहिआरामे सङ्घिके तिणवत्थुस्मिं जातकं वा रक्खितगोपितं गरुभण्डं, तम्पि सङ्घकम्मे च चेतियकम्मे च कते अतिरेकं पुग्गलिककम्मे दातुं वट्टति. दड्ढगेहमनुस्सा गहेत्वा गच्छन्ता न वारेतब्बा, अट्ठङ्गुलप्पमाणोपि रित्तकपोत्थको गरुभण्डमेव.

मत्तिका पकतिमत्तिका वा होतु पञ्चवण्णा वा सुधा वा सज्जुरसकङ्गुट्ठसिलेसादीसु वा यंकिञ्चि दुल्लभट्ठाने आनेत्वा वा दिन्नं तत्थजातकं वा रक्खितगोपितं तालपक्कमत्तं गरुभण्डं होति, तम्पि सङ्घकम्मे च चेतियकम्मे च कते अतिरेकं पुग्गलिककम्मे दातुं वट्टति. हिङ्गुहिङ्गुलकहरितालमनोसिलञ्जनादीनि पन भाजनीयानि.

दारुभण्डे यो कोचि वेळुम्हि वुत्तप्पमाणो दारुभण्डको सङ्घस्स दिन्नो वा तत्थजातको वा रक्खितगोपितो गरुभण्डं, अपि च सब्बापि दारुवेळुचम्मपासाणादिविकति दारुभण्डेन सङ्गहिता, तत्थ मञ्चपीठेहि असङ्गहितानि आसन्दिकादीनि अन्तमसो चोळेन वा पलालेहि वा पण्णेहि वा कतपीठं उपादाय सब्बानि आसनानि.

वङ्कफलकं दीघफलकं चीवरधोवनफलकं घट्टनफलकं घट्टनमुग्गरो दन्तकट्ठच्छेदनगण्ठिका दण्डमुग्गरो नावा अम्बणं रजनदोणि उदकपटिच्छको दारुमयो वा दन्तमयो वा वेळुमयो वा सपादकोपि अपादकोपि समुग्गो मञ्जूसा पादग्गण्हनकतो अतिरेकप्पमाणो करण्डो उदकदोणि उदककटाहं उळुङ्को कटच्छुपानीयसरावं पानीयसङ्खोति ¶ एतेसु यंकिञ्चि सङ्घे दिन्नं गरुभण्डं. सङ्खथालकं पन भाजनीयं, तथा ¶ दारुमयो उदकतुम्बो.

पादकथलिकमण्डलं ¶ दारुमयं वा होतु चोळपण्णादिमयं वा सब्बं गरुभण्डं. आधारको पत्तपिधानं तालवण्टं बीजनी चङ्कोटकं पच्छि यट्ठिसम्मुञ्जनी मुट्ठिसम्मुञ्जनीति एतेसुपि यंकिञ्चि खुद्दकं वा महन्तं वा दारुवेळुपण्णचम्मादीसु येन केनचि कतं गरुभण्डमेव.

थम्भतुलासोपानफलकादीसु यंकिञ्चि दारुमयं वा पासाणमयं वा गेहसम्भारूपगं यो कोचि कटसारको यंकिञ्चि भूमत्थरणं यंकिञ्चि अकप्पियचम्मं, सब्बं सङ्घिकं गरुभण्डं, भूमत्थरणं कातुं वट्टति. एळकचम्मं पन पच्चत्थरणगतिकं होति, तम्पि गरुभण्डमेव, कप्पियचम्मानि भाजनीयानि, कुरुन्दियं पन सब्बं मञ्चप्पमाणं चम्मं गरुभण्डन्ति वुत्तं.

उदुक्खलं मुसलं सुप्पं निसदं निसदपोतो पासाणदोणि पासाणकटाहं सब्बं कसिभण्डम्पि गरुभण्डं, सब्बं चक्कयुत्तयानं गरुभण्डमेव. मञ्चपीठानं पादा च अटनियो च वासिपरसुआदीनं दण्डा चाति एतेसु यंकिञ्चि अनिट्ठितं भाजनीयं, तच्छितमट्ठं पन गरुभण्डं होति, अनुञ्ञातवासिया दण्डो छत्तं मुट्ठिपण्णं कत्तरयट्ठि उपाहना अरणिसहितं धम्मकरणो पादग्गण्हनकतो अनतिरित्तं आमलकतुम्बं आमलकघटो लाबुकतुम्बं लाबुकघटो विसाणतुम्बन्ति सब्बमेतं भाजनीयं, ततो परं गरुभण्डं.

हत्थिदन्तो वा यंकिञ्चि विसाणं वा अतच्छितं यथागतमेव भाजनीयं, तेहि कतमञ्चपीठपादादीसु पुरिमसदिसोव विनिच्छयो. तच्छितनिट्ठितोपि हिङ्गुकरण्डको अञ्जनिकरण्डको गण्ठिका विधो अञ्जनी अञ्जनिसलाका उदकपुञ्छनीति इदं सब्बं भाजनीयमेव.

मत्तिकाभण्डे सब्बं मनुस्सानं उपभोगपरिभोगं घटपिठरादिकुलालभाजनं, पत्तकटाहं अङ्गारकटाहं धूमदानकं दीपरुक्खको दीपकपल्लिका चयनिट्ठका छदनिट्ठका थुपिकाति सब्बं गरुभण्डं, एतेसु पन वुत्तनयेसु गरुभण्डेसु यंकिञ्चि वेळुआदिं अत्तनो अत्थाय गण्हन्तेन समकं वा अतिरेकं वा फातिकम्मं कत्वा गहेतब्बं. पादग्गण्हनकतो ¶ अनतिरित्तप्पमाणो पन घटको पत्तो थालकं कञ्चनको कुण्डिकाति इदमेत्थ भाजनीयं, यथा च मत्तिकाभण्डे एवं लोहभण्डेपि कुण्डिका भाजनीयकोट्ठासमेव भजति. इति यं भाजनीयं विस्सज्जनीयम्पि तं एवं विस्सज्जियवेभङ्गियसङ्खातं अञ्ञं परिक्खारं दत्वा खीयन्तस्स दुक्कटं, इतरं पन दातुमेव न वट्टति. इस्सरवताय देन्तो थुल्लच्चयं आपज्जति, थेय्यचित्तेन ¶ गण्हन्तो भण्डं अग्घापेत्वा कारेतब्बो. यथा च अञ्ञं परिक्खारं दत्वा खीयन्तस्स दुक्कटं, तथा सङ्घेन असम्मतस्स चीवरं वा अञ्ञं वा परिक्खारं दत्वा खीयन्तस्स दुक्कटमेव, अनुपसम्पन्ने सब्बत्थ तिकदुक्कटं. पकतिया पन छन्दादिवसेन (पाचि. ४८८) करोन्तं दिस्वा ‘‘को ¶ अत्थो तस्स दिन्नेन, लद्धापि विनिपातेस्सति, न सम्मा उपनेस्सती’’ति खीयन्तस्स, उम्मत्तकादीनञ्च अनापत्ति. उपसम्पन्नता, धम्मेन लद्धसम्मुतिता, सङ्घेन सद्धिं विकप्पनुपगचीवरदानं, पच्छा खीयितुकामताय खीयनाति इमानेत्थ चत्तारि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

दुब्बलसिक्खापदवण्णना निट्ठिता.

१२. परिणामनसिक्खापदवण्णना

द्वादसमे सब्बं तिंसककण्डे परिणामनसिक्खापदे वुत्तनयमेव. अयमेव हि विसेसो, तत्थ अत्तनो परिणामितत्ता निस्सग्गियं पाचित्तियं, इध पुग्गलस्स परिणामितत्ता सुद्धिकपाचित्तियन्ति.

परिणामनसिक्खापदवण्णना निट्ठिता.

सहधम्मिकवग्गो अट्ठमो.

९. रतनवग्गो

१. अन्तेपुरसिक्खापदवण्णना

रतनवग्गस्स पठमे खत्तियस्साति खत्तियजातिकस्स, मुद्धाभिसित्तस्साति खत्तियाभिसेकेन मुद्धनि अभिसित्तस्स. अनिक्खन्तो राजा इतोति ¶ अनिक्खन्तराजकं, तस्मिं अनिक्खन्तराजके, सयनिघरेति अत्थो. रतनं वुच्चति महेसी, निग्गतन्ति निक्खन्तं, अनिग्गतं रतनं इतोति अनिग्गतरतनकं, तस्मिं अनिग्गतरतनके, सयनिघरेति अत्थो. इन्दखीलं ¶ अतिक्कमेय्याति एत्थ अत्तनो आगतभावं अजानापेत्वा सयनिघरस्स उम्मारं पठमं पादं अतिक्कामेन्तस्स दुक्कटं, दुतियं पाचित्तियं.

सावत्थियं आयस्मन्तं आनन्दं आरब्भ रञ्ञो अन्तेपुरप्पविसनवत्थुस्मिं पञ्ञत्तं, असाधारणपञ्ञत्ति, अनाणत्तिकं, तिकपाचित्तियं, पटिसंविदिते अप्पटिसंविदितसञ्ञिनो, वेमतिकस्स च दुक्कटं. पटिसंविदितसञ्ञिस्स, न खत्तियस्स वा, न खत्तियाभिसेकेन अभिसित्तस्स वा, उभोसु वा, उभिन्नं वा अञ्ञतरस्मिं निक्खन्ते सयनिघरं पविसन्तस्स, असयनिघरे, उम्मत्तकादीनञ्च अनापत्ति. खत्तियता, अभिसित्तता, उभिन्नम्पि सयनिघरतो अनिक्खन्तता, अप्पटिसंविदितता, इन्दखीलातिक्कमोति इमानेत्थ पञ्च अङ्गानि. समुट्ठानादीनि पठमकथिनसदिसानि, इदं पन किरियाकिरियन्ति.

अन्तेपुरसिक्खापदवण्णना निट्ठिता.

२. रतनसिक्खापदवण्णना

दुतिये रतनन्ति मुत्तादिदसविधं. रतनसम्मतन्ति यंकिञ्चि मनुस्सानं उपभोगपरिभोगं. अज्झारामे वाति परिक्खित्तस्स अन्तोपटिक्खेपे अपरिक्खित्तस्स द्विन्नं लेड्डुपातानं अन्तो. अज्झावसथेति परिक्खित्तस्स अन्तोपटिक्खेपे, अपरिक्खित्तस्स मुसलपातब्भन्तरे. अयं पनेत्थ विनिच्छयो – जातरूपरजतं अत्तनो अत्थाय उग्गण्हन्तस्स वा उग्गण्हापेन्तस्स वा निस्सग्गियं पाचित्तियं ¶ . सङ्घगणपुग्गलचेतियनवकम्मानं अत्थाय दुक्कटं, अवसेसे मुत्तादिरतने सब्बेसम्पि अत्थाय दुक्कटमेव. कप्पियवत्थुं वा अकप्पियवत्थुं वा अन्तमसो मातुसन्तकम्पि भण्डागारिकसीसेन पटिसामेन्तस्स पाचित्तियं, तादिसं पन अत्तनो सन्तकं कत्वा पटिसामेतुं वट्टति. ‘‘इदं पटिसामेथा’’ति वुत्ते पन ‘‘न ¶ वट्टती’’ति पटिक्खिपितब्बं. सचे कुपिता पातेत्वा गच्छन्ति, पलिबोधो नाम होति, पटिसामेतब्बं. विहारे कम्मं करोन्ता वड्ढकीआदयो वा राजवल्लभा वा ‘‘यंकिञ्चि उपकरणं वा सयनभण्डं वा पटिसामेत्वा देथा’’ति वदन्ति, छन्देनपि भयेनपि न कातब्बमेव, गुत्तट्ठानं पन दस्सेतुं वट्टति.

अज्झारामअज्झावसथेसुपि यादिसे ठाने ‘‘भिक्खूहि वा सामणेरेहि वा गहितं भविस्सती’’ति आसङ्का उप्पज्जति, तादिसेयेव ठाने उग्गहेत्वा वा उग्गहापेत्वा वा सञ्ञाणं ¶ कत्वा निक्खिपितब्बं, ‘‘यस्स भण्डं नट्ठं, सो आगच्छतू’’ति च आचिक्खितब्बं. अथ यो आगच्छति, सो ‘‘कीदिसं ते भण्डं नट्ठ’’न्ति पुच्छितब्बो, सचे सञ्ञाणेन सम्पादेति, दातब्बं. नो चे, ‘विचिनाही’ति वत्तब्बो. तम्हा आवासा पक्कमन्तेन पतिरूपानं भिक्खूनं हत्थे, तेसु असति पतिरूपानं गहपतिकानं हत्थे निक्खिपित्वा पक्कमितब्बं. यो पन नेव पक्कमति, न सामिकं पस्सति, तेन थावरं सेनासनं वा चेतियं वा पोक्खरणिं वा कारेतब्बो. सचे दीघस्स अद्धुनो अच्चयेन सामिको आगच्छति, तं दस्सेत्वा ‘अनुमोदाही’ति वत्तब्बो. सचे नानुमोदति, ‘‘देहि मे धन’’न्ति चोदेति, समादपेत्वा दातब्बं.

सावत्थियं अञ्ञतरं भिक्खुं आरब्भ रतनउग्गण्हनवत्थुस्मिं पञ्ञत्तं, ‘‘अञ्ञत्र अज्झारामा वा, अज्झावसथा वा’’ति अयमेत्थ दुविधा अनुपञ्ञत्ति, साधारणपञ्ञत्ति, साणत्तिकं, अनुञ्ञातट्ठाने अनादरियेन उग्गहेत्वा अनिक्खिपन्तस्स दुक्कटं. अनुञ्ञातट्ठाने गहेत्वा निक्खिपन्तस्स, यं होति आमासं रतनसम्मतं, तं विस्सासं वा तावकालिकं वा उग्गण्हन्तस्स, पंसुकूलसञ्ञाय गण्हतो, उम्मत्तकादीनञ्च अनापत्ति. अननुञ्ञातकरणं, परसन्तकता, विस्सासग्गाहपंसुकूलसञ्ञानं अभावो, उग्गहणं वा उग्गहापनं वाति इमानेत्थ चत्तारि अङ्गानि. समुट्ठानादीनि सञ्चरित्तसदिसानीति.

रतनसिक्खापदवण्णना निट्ठिता.

३. विकालगामप्पवेसनसिक्खापदवण्णना

ततिये ¶ सन्तं भिक्खुं अनापुच्छाति इदं चारित्ते वुत्तनयमेव. विकालेति मज्झन्हिकातिक्कमतो पट्ठाय अन्तोअरुणे, एतस्मिं अन्तरे ‘‘विकाले गामप्पवेसनं आपुच्छामी’’ति वा, ‘‘गामं पविसिस्सामी’’ति वा अनापुच्छित्वा असति तथारूपे अच्चायिके करणीये परिक्खित्तस्स गामस्स परिक्खेपं अतिक्कमन्तस्स, अपरिक्खित्तस्स उपचारं ओक्कमन्तस्स ¶ पठमपादे दुक्कटं, दुतियपादे पाचित्तियं. सचेपि सम्बहुला केनचि कम्मेन गामं पविसन्ति, सब्बेहि अञ्ञमञ्ञं आपुच्छितब्बं. ‘‘तस्मिं गामे तं कम्मं न सम्पज्जती’’ति अञ्ञं गामं गच्छन्तानं पुन आपुच्छनकिच्चं नत्थि. सचे पन उस्साहं पटिप्पस्सम्भेत्वा विहारं गच्छन्ता अन्तरा अञ्ञं गामं पविसितुकामा होन्ति, आपुच्छितब्बमेव. कुलघरे वा आसनसालायं वा भत्तकिच्चं कत्वा तेलभिक्खाय वा सप्पिभिक्खाय ¶ वा चरितुकामेन सचे पस्से भिक्खु अत्थि, आपुच्छितब्बो, असन्ते ‘नत्थी’ति गन्तब्बं. वीथिं ओतरित्वा पन भिक्खुं दिस्वापि आपुच्छनकिच्चं नत्थि. यो पन गाममज्झेन मग्गो होति, सचे तेन गच्छन्तस्स ‘‘तेलादीनं अत्थाय चरिस्सामी’’ति चित्तं उप्पज्जति, पस्से भिक्खुं दिस्वा आपुच्छितब्बं. मग्गा अनोक्कम्म चरन्तस्स पन आपुच्छनकिच्चं नत्थि, ओक्कमन्तस्स वुत्तनयेनेव पाचित्तियं.

सावत्थियं छब्बग्गिये आरब्भ विकाले गामप्पवेसनवत्थुस्मिं पञ्ञत्तं, ‘‘सन्तं भिक्खु’’न्ति च ‘‘अनापुच्छा’’ति च ‘‘अञ्ञत्र तथारूपा अच्चायिका करणीया’’ति च इमा पनेत्थ तिस्सो अनुपञ्ञत्तियो, असाधारणपञ्ञत्ति, अनाणत्तिकं, तिकपाचित्तियं, काले विकालसञ्ञिनो, वेमतिकस्स च दुक्कटं. कालसञ्ञिनो पन, यो च अच्चायिके वा करणीये, सन्तं वा आपुच्छित्वा, असन्तं वा अनापुच्छित्वा पविसति, अन्तरारामभिक्खुनुपस्सयतित्थियसेय्यपटिक्कमनेसु वा अञ्ञतरं गच्छति, तस्स, गामेन मग्गो होति, तेन गच्छतो, आपदासु, उम्मत्तकादीनञ्च अनापत्ति. सन्तं भिक्खुं अनापुच्छता, अनुञ्ञातकारणाभावो, विकाले गामप्पविसनन्ति इमानेत्थ तीणि अङ्गानि. समुट्ठानादीनि कथिनसदिसानेव, इदं पन किरियाकिरियन्ति.

विकालगामप्पवेसनसिक्खापदवण्णना निट्ठिता.

४. सूचिघरसिक्खापदवण्णना

चतुत्थे ¶ भेदनमेव भेदनकं, तं अस्स अत्थीति भेदनकं. तस्मा एवरूपे सूचिघरे करणकारापनेसु दुक्कटं, पटिलाभेन पन तं भिन्दित्वा पाचित्तियं देसेतब्बं.

सक्केसु सम्बहुले भिक्खू आरब्भ बहुसूचिघरविञ्ञापनवत्थुस्मिं पञ्ञत्तं, साधारणपञ्ञत्ति, साणत्तिकं, अत्तना विप्पकतं अत्तना वा, परेहि वा, परेहि विप्पकतम्पि अत्तना वा, परेहि वा परियोसापेत्वा लभन्तस्स चतुक्कपाचित्तियं. अञ्ञस्सत्थाय करणकारापनेसु, अञ्ञेन कतं पटिलभित्वा परिभुञ्जने दुक्कटं. गण्ठिके अरणिके विधे अञ्जनिया अञ्जनिसलाकाय वासिजटे उदकपुञ्छनियाति एतेसु यंकिञ्चि अट्ठिआदीहि करोन्तस्स, उम्मत्तकादीनञ्च अनापत्ति. सूचिघरता, अट्ठिमयादिता, अत्तनो अत्थाय करणं वा ¶ कारापेत्वा वा पटिलाभोति इमानेत्थ तीणि अङ्गानि. समुट्ठानादीनि सञ्चरित्तसदिसानीति.

सूचिघरसिक्खापदवण्णना निट्ठिता.

५. मञ्चपीठसिक्खापदवण्णना

पञ्चमे ¶ मञ्चन्ति मसारकादीसु अञ्ञतरं. पीठम्पि तादिसमेव, तं पन मञ्चो विय अतिदीघं, आसन्दिको विय च समं चतुरस्सं न होति. छेदनकं भेदनकसदिसमेव.

सावत्थियं उपनन्दं आरब्भ उच्चे मञ्चे सयनवत्थुस्मिं पञ्ञत्तं, पमाणिकं करोन्तस्स, पमाणातिक्कन्तं लभित्वा छिन्दित्वा यथा पमाणमेव उपरि दिस्सति, एवं निखणित्वा वा, उत्तानं वा कत्वा, अट्टकं वा बन्धित्वा परिभुञ्जन्तस्स, उम्मत्तकादीनञ्च अनापत्ति. पमाणातिक्कन्तमञ्चपीठता, अत्तनो अत्थाय करणं वा कारापेत्वा वा पटिलाभोति इमानेत्थ द्वे अङ्गानि. सेसं सब्बं सूचिघरसिक्खापदसदिसमेवाति.

मञ्चपीठसिक्खापदवण्णना निट्ठिता.

६. तूलोनद्धसिक्खापदवण्णना

छट्ठे ¶ तूलं ओनद्धमेत्थाति तूलोनद्धं, चिमिलिकं पत्थरित्वा तूलं पक्खिपित्वा उपरि चिमिलिकाय ओनद्धन्ति वुत्तं होति. उद्दालनकं भेदनकसदिसमेव.

सावत्थियं छब्बग्गिये आरब्भ तूलोनद्धकारापनवत्थुस्मिं पञ्ञत्तं, आयोगे कायबन्धने अंसबद्धके पत्तत्थविकाय परिस्सावने बिम्बोहने, अञ्ञेन कतं तूलोनद्धं पटिलभित्वा उद्दालेत्वा परिभुञ्जन्तस्स, उम्मत्तकादीनञ्च अनापत्ति. बिम्बोहनञ्चेत्थ सीसप्पमाणमेव वट्टति, सीसप्पमाणं नाम यस्स वित्थारतो तीसु कोणेसु द्विन्नं अन्तरं विदत्थिचतुरङ्गुलं होति, मज्झे मुट्ठिरतनं, दीघतो दियड्ढरतनं वा द्विरतनं वा. तूलोनद्धमञ्चपीठता, अत्तनो अत्थाय करणं वा कारापेत्वा वा पटिलाभोति इमानेत्थ द्वे अङ्गानि. सेसं वुत्तनयेनेव वेदितब्बन्ति.

तूलोनद्धसिक्खापदवण्णना निट्ठिता.

७. निसीदनसिक्खापदवण्णना

सत्तमे ¶ निसीदनन्ति सन्थतसदिसं सन्थरित्वा एकस्मिं अन्ते सुगतविदत्थिप्पमाणं द्वीसु ठानेसु फालेत्वा कताहि तीहि दसाहि युत्तस्स परिक्खारस्सेतं नामं.

सावत्थियं छब्बग्गिये आरब्भ अप्पमाणिकानि निसीदनानि धारणवत्थुस्मिं पञ्ञत्तं, ‘‘दसा विदत्थी’’ति अयमेत्थ अनुपञ्ञत्ति, असाधारणपञ्ञत्ति, पमाणिकं वा ऊनकं वा करोन्तस्स, अञ्ञेन कतं पमाणातिक्कन्तं पटिलभित्वा छिन्दित्वा परिभुञ्जन्तस्स, वितानादीसु यंकिञ्चि करोन्तस्स, उम्मत्तकादीनञ्च अनापत्ति. निसीदनस्स पमाणातिक्कन्तता, अत्तनो अत्थाय करणं वा कारापेत्वा वा पटिलाभोति इमानेत्थ द्वे अङ्गानि. सेसं वुत्तनयेनेव वेदितब्बन्ति.

निसीदनसिक्खापदवण्णना निट्ठिता.

८. कण्डुप्पटिच्छादिसिक्खापदवण्णना

अट्ठमे ¶ ¶ कण्डुप्पटिच्छादिन्ति अधोनाभिउब्भजाणुमण्डलं कण्डुपीळकअस्सावथुल्लकच्छाबाधानं पटिच्छादनत्थं अनुञ्ञातं चीवरं.

सावत्थियं छब्बग्गिये आरब्भ अप्पमाणिकायो कण्डुप्पटिच्छादिकायो धारणवत्थुस्मिं पञ्ञत्तं, साधारणपञ्ञत्ति, सेसं निसीदने वुत्तनयेनेव वेदितब्बन्ति.

कण्डुप्पटिच्छादिसिक्खापदवण्णना निट्ठिता.

९. वस्सिकसाटिकसिक्खापदवण्णना

नवमे सावत्थियं छब्बग्गिये आरब्भ अप्पमाणिकायो वस्सिकसाटिकायो धारणवत्थुस्मिं पञ्ञत्तं, सेसमेत्थ यं वत्तब्बं, तं निसीदने वुत्तनयमेवाति.

वस्सिकसाटिकसिक्खापदवण्णना निट्ठिता.

१०. नन्दसिक्खापदवण्णना

दसमे ¶ सावत्थियं आयस्मन्तं नन्दं आरब्भ सुगतचीवरप्पमाणं चीवरं धारणवत्थुस्मिं पञ्ञत्तं, साधारणपञ्ञत्ति, सेसं निसीदने वुत्तनयमेवाति.

नन्दसिक्खापदवण्णना निट्ठिता.

रतनवग्गो नवमो.

कङ्खावितरणिया पातिमोक्खवण्णनाय

सुद्धपाचित्तियवण्णना निट्ठिता.

पाटिदेसनीयकण्डो

१. पठमपाटिदेसनीयसिक्खापदवण्णना

पाटिदेसनीयेसु ¶ ¶ पठमे अन्तरघरं पविट्ठायाति वचनतो सचे तस्सा अन्तरारामादीसु ठत्वापि ददमानाय हत्थतो सयं रथियाब्यूहसिङ्घाटकघरानं अञ्ञतरस्मिं ठितोपि गण्हाति, दोसो नत्थि. तस्सा पन रथियादीसु ठत्वा ददमानाय, रथियादीसु वा, अन्तरारामादीसु वा ठत्वापि यंकिञ्चि आमिसं अज्झोहरणत्थाय गण्हतो पटिग्गहणे दुक्कटं, अज्झोहारे अज्झोहारे पाटिदेसनीयं. तस्स देसेतब्बाकारो गारय्हं आवुसोतिआदिना नयेन सिक्खापदे दस्सितोयेव.

सावत्थियं अञ्ञतरं भिक्खुं आरब्भ अञ्ञातिकाय भिक्खुनिया अन्तरघरं पविट्ठाय हत्थतो आमिसं पटिग्गहणवत्थुस्मिं पञ्ञत्तं, असाधारणपञ्ञत्ति, अनाणत्तिकं, यथा चेतं, तथा सेसानिपि, तिकपाटिदेसनीयं, यामकालिकादीसु पटिग्गहणेपि अज्झोहरणेपि दुक्कटं, एकतोउपसम्पन्नाय यावकालिकेपि तथेव, ञातिकाय अञ्ञातिकसञ्ञिवेमतिकानम्पि एसेव नयो. ञातिकसञ्ञिनो पन, ञातिकाय वा दापेन्तिया, उपनिक्खिपित्वा वा ददमानाय, या च अन्तरारामभिक्खुनुपस्सयतित्थियसेय्यपटिक्कमनेसु ठत्वा गामतो बहि नीहरित्वा, यामकालिकादीनि वा ‘‘सति पच्चये परिभुञ्जा’’ति ¶ देति, तस्स, सिक्खमानसामणेरीनञ्च हत्थतो गहेत्वा परिभुञ्जन्तस्स, उम्मत्तकादीनञ्च अनापत्ति. परिपुण्णूपसम्पन्नता, अञ्ञातिकता, अन्तरघरे ठिताय हत्थतो सहत्था पटिग्गहणं, यावकालिकता, अज्झोहरणन्ति इमानेत्थ पञ्च अङ्गानि. समुट्ठानादीनि एळकलोमसदिसानीति.

पठमपाटिदेसनीयसिक्खापदवण्णना निट्ठिता.

२. दुतियपाटिदेसनीयसिक्खापदवण्णना

दुतिये ¶ इध सूपन्तिआदि वोसासनाकारदस्सनं. अपसक्क ताव भगिनीतिआदि अपसादेतब्बाकारदस्सनं. तत्रायं विनिच्छयो – एकेनापि ¶ भिक्खुना अनपसादिते अज्झोहरणत्थाय आमिसं गण्हन्तानं पटिग्गहणे दुक्कटं, अज्झोहारे अज्झोहारे पाटिदेसनीयन्ति.

राजगहे छब्बग्गिये आरब्भ भिक्खुनिया वोसासन्तिया ननिवारणवत्थुस्मिं पञ्ञत्तं, तिकपाटिदेसनीयं, एकतोउपसम्पन्नाय वोसासन्तिया ननिवारेन्तस्स दुक्कटं, तथा अनुपसम्पन्नाय उपसम्पन्नसञ्ञिनो वेमतिकस्स च. अनुपसम्पन्नसञ्ञिनो, पन यो च अत्तनो वा भत्तं दापेन्तिया, अञ्ञेसं वा भत्तं देन्तिया, यं वा न दिन्नं, तं दापेन्तिया, यत्थ वा न दिन्नं, तत्थ, सब्बेसं वा समकं दापेन्तिया, सिक्खमानाय वा सामणेरिया वा वोसासन्तिया पटिग्गहेत्वा भुञ्जति, तस्स, पञ्च भोजनानि ठपेत्वा सब्बत्थ, उम्मत्तकादीनञ्च अनापत्ति. परिपुण्णूपसम्पन्नता, पञ्चभोजनता, अन्तरघरे अनुञ्ञातपकारतो अञ्ञथा वोसासना, अनिवारणा, अज्झोहरणन्ति इमानेत्थ पञ्च अङ्गानि. समुट्ठानादीनि कथिनसदिसानीति.

दुतियपाटिदेसनीयसिक्खापदवण्णना निट्ठिता.

३. ततियपाटिदेसनीयसिक्खापदवण्णना

ततिये सेक्खसम्मतानीति लद्धसेक्खसम्मुतिकानि. पुब्बे अनिमन्तितोति घरूपचारोक्कमनतो पठमतरं उपचारं अनोक्कमन्तेयेव पुब्बे अनिमन्तितो. अगिलानो नाम यो सक्कोति पिण्डाय चरितुं. पाटिदेसनीयन्ति घरूपचारं ओक्कमित्वा आमिसं गण्हन्तस्स पटिग्गहणे ताव दुक्कटं, तं गहेत्वा यत्थकत्थचि भुञ्जन्तस्स अज्झोहारे अज्झोहारे पाटिदेसनीयन्ति.

सावत्थियं सम्बहुले भिक्खू आरब्भ न मत्तं जानित्वा पटिग्गहणवत्थुस्मिं पञ्ञत्तं, ‘‘पुब्बे ¶ अनिमन्तितो, अगिलानो’’ति इमा पनेत्थ द्वे अनुपञ्ञत्तियो, तिकपाटिदेसनीयं, यामकालिकादीसु पटिग्गहणेपि अज्झोहारेपि दुक्कटं, तथा असेक्खसम्मते सेक्खसम्मतसञ्ञिनो वेमतिकस्स च. असेक्खसम्मतसञ्ञिनो, पन यो च पुब्बे निमन्तितो वा ¶ गिलानो वा अञ्ञस्स वा तेसं घरे पञ्ञत्तं भिक्खं गण्हाति, यस्स च घरतो नीहरित्वा, आसनसालादीसु वा भिक्खुं अदिस्वा पठमंयेव नीहरित्वा, द्वारमूले वा ठपितं देन्ति, तस्स तं भुञ्जन्तस्स, निच्चभत्तके, सलाकभत्ते, पक्खिके ¶ , उपोसथिके, पाटिपदिके, यामकालिकादिं ‘‘सति पच्चये परिभुञ्जा’’ति दिन्नं परिभुञ्जन्तस्स, उम्मत्तकादीनञ्च अनापत्ति. सेक्खसम्मतता, पुब्बे अनिमन्तितता, अगिलानता, घरूपचारोक्कमनं, ठपेत्वा निच्चभत्तकादीनि अञ्ञं आमिसं गहेत्वा भुञ्जनन्ति इमानेत्थ पञ्च अङ्गानि. समुट्ठानादीनि एळकलोमसदिसानीति.

ततियपाटिदेसनीयसिक्खापदवण्णना निट्ठिता.

४. चतुत्थपाटिदेसनीयसिक्खापदवण्णना

चतुत्थे यानि खो पन तानि आरञ्ञकानीतिआदि चीवरविप्पवाससिक्खापदे वुत्तनयेनेव वेदितब्बं. पुब्बे अप्पटिसंविदितन्ति एत्थ यं इत्थिया वा पुरिसेन वा गहट्ठेन वा पब्बजितेन वा आरामं वा आरामूपचारं वा पविसित्वा ‘‘इत्थन्नामस्स, भन्ते, कुलस्स खादनीयं वा भोजनीयं वा आहरियिस्सती’’ति (पाचि. ५७३) आरोचितं, तं पच्छा यथाआरोचितमेव वा आहरियतु, तस्स परिवारं कत्वा अञ्ञं वा तेन सद्धिं बहुकम्पि, ‘‘इत्थन्नामं कुलं पटिसंविदितं कत्वा खादनीयं वा भोजनीयं वा गहेत्वा गच्छती’’ति सुत्वा अञ्ञानि वा कुलानि तेहि सद्धिं आहरन्तु, तं सब्बं पटिसंविदितं नाम. यं पन एवं अनारोचितं अनाहटञ्च, तं अप्पटिसंविदितं नाम. अगिलानो नाम यो सक्कोति पिण्डाय गन्तुं. पाटिदेसनीयन्ति एवरूपं अन्तमसो आराममज्झेन गच्छन्तेहि अद्धिकेहि दिन्नम्पि आरामे वा आरामूपचारे वा पटिग्गहेत्वा अज्झोहरन्तस्स पटिग्गहणे दुक्कटं, अज्झोहारे अज्झोहारे पाटिदेसनीयन्ति.

सक्केसु सम्बहुले भिक्खू आरब्भ आरामे चोरे पटिवसन्ते अनारोचनवत्थुस्मिं पञ्ञत्तं, ‘‘अगिलानो’’ति अयमेत्थ एका अनुपञ्ञत्ति, तिकपाटिदेसनीयं ¶ , यामकालिकादीसु आहारत्थाय पटिग्गहणेपि अज्झोहारेपि दुक्कटमेव, तथा पटिसंविदिते अप्पटिसंविदितसञ्ञिनो ¶ वेमतिकस्स च, पटिसंविदितसञ्ञिनो, पन गिलानस्स, यो च पटिसंविदितं कत्वा आहटं वा गिलानावसेसकं वा बहारामे वा पटिग्गहितं, तत्थजातकमेव वा मूलफलादिं, यामकालिकादीसु वा यंकिञ्चि ‘‘सति पच्चये परिभुञ्जा’’ति लद्धं परिभुञ्जन्तस्स, उम्मत्तकादीनञ्च अनापत्ति. यथावुत्तआरञ्ञकसेनासनता, यावकालिकस्स अतत्थजातकता, अगिलानता, अगिलानावसेसकता, अप्पटिसंविदितता, अज्झारामे पटिग्गहणं, अज्झोहरणन्ति इमानेत्थ सत्त अङ्गानि. समुट्ठानादीनि कथिनसदिसानेव, इदं पन किरियाकिरियन्ति.

चतुत्थपाटिदेसनीयसिक्खापदवण्णना निट्ठिता.

कङ्खावितरणिया पातिमोक्खवण्णनाय

पाटिदेसनीयवण्णना निट्ठिता.

सेखियकण्डो

१. परिमण्डलसिक्खापदवण्णना

सेखियेसु ¶ ¶ पठमे परिमण्डलन्ति समन्ततो मण्डलं. सिक्खा करणीयाति ‘‘एवं निवासेस्सामी’’ति आरामेपि अन्तरघरेपि सब्बत्थ सिक्खा ¶ कातब्बा, एत्थ च यस्मा वत्तक्खन्धके वुत्तवत्तानिपि सिक्खितब्बत्ता सेखियानेव होन्ति, तस्मा पाराजिकादीसु विय परिच्छेदो न कतो. चारित्तविनयदस्सनत्थञ्च ‘‘यो पन भिक्खु ओलम्बेन्तो निवासेय्य, दुक्कट’’न्ति एवं आपत्तिनामेन अवत्वा ‘‘सिक्खा करणीया’’ति एवं सब्बसिक्खापदेसु पाळि आरोपिता, पदभाजने (पाचि. ५७६) पन ‘‘आपत्ति दुक्कटस्सा’’ति वुत्तत्ता सब्बत्थ अनादरियकरणे दुक्कटं वेदितब्बं.

इदानि परिमण्डलन्ति एत्थ नाभिमण्डलं पटिच्छादेत्वा जाणुमण्डलस्स हेट्ठा जङ्घट्ठिकतो पट्ठाय अट्ठङ्गुलमत्तं निवासनं ओतारेत्वा निवासेन्तेन परिमण्डलं निवत्थं नाम होति, एवं अनिवासेत्वा अनादरियेन पुरतो वा पच्छतो वा ओलम्बेत्वा निवासेन्तस्स दुक्कटं. न केवलञ्च तस्सेव, ये चञ्ञे ‘‘तेन खो पन समयेन छब्बग्गिया गिहिनिवत्थं निवासेन्ति, हत्थिसोण्डकं मच्छवालकं चतुक्कण्णकं तालवण्टकं सतवलिकं निवासेन्ति, संवल्लियं निवासेन्ती’’ति खन्धके (चूळव. २८०) निवासनदोसा वुत्ता, तथा निवासेन्तस्सपि दुक्कटमेव.

तत्थ हत्थिसोण्डकं नाम नाभिमूलतो हत्थिसोण्डसण्ठानं ओलम्बकं कत्वा निवत्थं चोळिकइत्थीनं निवासनं विय. मच्छवालकं नाम एकतोदसन्तं एकतो पासन्तं ओलम्बेत्वा निवत्थं. चतुक्कण्णकं नाम उपरि द्वे, हेट्ठतो द्वेति एवं चत्तारो कण्णे दस्सेत्वा निवत्थं. तालवण्टकं नाम तालवण्टाकारेन साटकं ओलम्बेत्वा निवत्थं. सतवलिकं नाम दीघसाटकं अनेकक्खत्तुं ¶ ओभुजित्वा ओवट्टिकं करोन्तेन निवत्थं, वामदक्खिणपस्सेसु वा निरन्तरं वलियो दस्सेत्वा निवत्थं. सचे पन जाणुतो पट्ठाय एका वा द्वे वा वलियो पञ्ञायन्ति, वट्टति. संवल्लियन्ति ¶ मल्लकम्मकारादीहि विय कच्छं बन्धित्वा निवत्थं. एवं निवासेतुं गिलानस्सापि मग्गप्पटिपन्नस्सापि न वट्टति. यम्पि मग्गं गच्छन्ता एकं वा द्वे वा कण्णे उक्खिपित्वा अन्तरवासकस्स उपरि लग्गन्ति, अन्तो वा एकं कासावं तथा निवासेत्वा बहि अपरं निवासेन्ति, सब्बं न वट्टति.

गिलानो पन अन्तोकासावस्स ओवट्टिकं दस्सेत्वा अपरं उपरि निवासेतुं लभति, अगिलानेन द्वे निवासेन्तेन सगुणं कत्वा निवासेतब्बानि. इति इमं खन्धके पटिक्खित्तञ्च ओलम्बकञ्च सब्बं विवज्जेत्वा वुत्तलक्खणसम्पन्नं निब्बिकारं परिमण्डलं निवासेतब्बं, तथा अनिवासेत्वा यंकिञ्चि विकारं करोन्तस्स दुक्कटं.

‘‘निदानं पुग्गलं वत्थु’’न्तिआदिके (कङ्खा. अट्ठ. पठमपाराजिकवण्णना ) पन विनिच्छये सुरुसुरुकारकं कोसम्बियं पञ्ञत्तं, सामिसेन हत्थेन पानीयथालकससित्थकपत्तधोवनपटिसंयुत्तद्वयं भग्गेसु सम्बहुले भिक्खू आरब्भ, सेसानि सब्बानेव सावत्थियं छब्बग्गिये आरब्भ ओलम्बेत्वा निवासनादिवत्थुस्मिं पञ्ञत्तानि. सूपोदनविञ्ञत्तियं धम्मदेसनादीसु च गिलानवसेन एका अनुपञ्ञत्ति, सब्बानि साधारणपञ्ञत्तियो, अनाणत्तिकानि, सब्बेसु दुक्कटमेव, अञ्ञो ¶ आपत्तिभेदो नत्थि, विपत्तिविचारणा वुत्तायेव, समुट्ठानादीनि सब्बेसं अवसाने दस्सयिस्साम. अनापत्तिमत्तं पन अङ्गञ्च सब्बत्थ वत्तब्बं, तयिदं वुच्चति. इमस्मिं ताव सिक्खापदे असञ्चिच्च, अस्सतिया, अजानन्तस्स, गिलानस्स, आपदासु, उम्मत्तकादीनञ्च अनापत्ति.

तत्थ असञ्चिच्चाति ‘‘अपरिमण्डलं निवासेस्सामी’’ति एवं असञ्चिच्च, अथ खो ‘‘परिमण्डलंयेव निवासेस्सामी’’ति विरज्झित्वा अपरिमण्डलं निवासेन्तस्स अनापत्ति. अस्सतियाति अञ्ञाविहितस्सापि तथा निवासेन्तस्स अनापत्ति. अजानन्तस्साति परिमण्डलं निवासेतुं अजानन्तस्स अनापत्ति, अपिच निवासनवत्तं उग्गहेतब्बं. यो पन सुक्खजङ्घो वा होति महापिण्डिकमंसो वा, तस्स सारुप्पत्थाय अट्ठङ्गुलाधिकम्पि ओतारेत्वा निवासेतुं वट्टति. गिलानस्साति यस्स जङ्घाय वा पादे वा वणो होति, तस्स उक्खिपित्वा वा ओतारेत्वा वा निवासेतुं वट्टति. आपदासूति वाळा वा चोरा वा अनुबन्धन्ति, एवरूपासु आपदासु अनापत्ति ¶ . उम्मत्तकादयो वुत्तनया एव. अनादरियं, अनापत्तिकारणाभावो, अपरिमण्डलनिवासनन्ति ¶ इमानेत्थ तीणि अङ्गानि. यथा चेत्थ, एवं सब्बत्थ पुरिमानि द्वे तत्थ तत्थ वुत्तप्पटिपक्खकरणञ्चाति तीणियेव होन्ति, तस्मा इतो परं तानिपि अवत्वा अनापत्तिमत्तमेव वक्खामाति.

२. दुतियपरिमण्डलसिक्खापदवण्णना

दुतिये ‘‘न, भिक्खवे, गिहिपारुतं पारुपितब्ब’’न्ति (चूळव. २८०) एवं पटिक्खित्तं गिहिपारुतं अपारुपित्वा उभो कण्णे समं कत्वा पारुपनं परिमण्डलपारुपनं नाम, तत्थ यंकिञ्चि सेतपटपारुतं परिब्बाजकपारुतं एकसाटकपारुतं सुरासोण्डपारुतं अन्तेपुरिकपारुतं महाजेट्ठपारुतं कुटिप्पवेसकपारुतं ब्राह्मणपारुतं पाळिकारकपारुतन्ति एवमादि परिमण्डललक्खणतो अञ्ञथा पारुतं, सब्बमेतं गिहिपारुतं नाम. तस्मा यथा सेतपटा अड्ढपालकनिगण्ठा पारुपन्ति, यथा च एकच्चे परिब्बाजका उरं विवरित्वा द्वीसु अंसकूटेसु पावुरणं ठपेन्ति, यथा च एकसाटका मनुस्सा निवत्थसाटकस्स एकेन अन्तेन पिट्ठिं पारुपित्वा उभो कण्णे उभोसु अंसकूटेसु ठपेन्ति, यथा च सुरासोण्डादयो साटकेन गीवं परिक्खिपित्वा उभो अन्ते उरे वा ओलम्बेन्ति, पिट्ठियं वा खिपन्ति, यथा च अन्तेपुरिकायो अक्खितारकमत्तं दस्सेत्वा ओगुण्ठितं पारुपन्ति, यथा च महाजेट्ठा दीघसाटकं निवासेत्वा तस्सेव एकेनन्तेन सकलसरीरं पारुपन्ति, यथा च कस्सका खेत्तकुटिं पविसन्ता साटकं पलिवेठेत्वा उपकच्छके पक्खिपित्वा तस्सेव एकेनन्तेन सरीरं पारुपन्ति, यथा च ब्राह्मणा उभिन्नं उपकच्छकानं अन्तरे साटकं पवेसेत्वा अंसकूटेसु पक्खिपन्ति, यथा च पाळिकारको भिक्खु एकंसपारुपनेन पारुतं वामबाहुं विवरित्वा चीवरं अंसकूटे आरोपेति, एवं अपारुपित्वा ¶ सब्बेपि एते, अञ्ञे च एवरूपे पारुपनदोसे वज्जेत्वा निब्बिकारं परिमण्डलं पारुपितब्बं. तथा अपारुपित्वा आरामे वा अन्तरघरे वा अनादरेन यंकिञ्चि विकारं करोन्तस्स दुक्कटं, अनापत्ति पुरिमसदिसायेव, यथा चेत्थ, एवं सब्बत्थ. यत्थ पन विसेसो भविस्सति, तत्थ वक्खामाति.

३-४. सुप्पटिच्छन्नसिक्खापदवण्णना

ततिये ¶ सुप्पटिच्छन्नोति सुट्ठु पटिच्छन्नो, गण्ठिकं पटिमुञ्चित्वा अनुवातन्तेन गीवं पटिच्छादेत्वा उभो कण्णे समं कत्वा पटिसङ्घरित्वा याव मणिबन्धं पटिच्छादेत्वा अन्तरघरे गमिस्सामीति अत्थो, तथा अकत्वा पन जाणुं वा उरं वा विवरित्वा गच्छन्तस्स दुक्कटं.

चतुत्थे ¶ गलवाटकतो पट्ठाय सीसं, मणिबन्धतो पट्ठाय हत्थे, पिण्डिकमंसतो पट्ठाय पादे विवरित्वा सेसं छादेत्वा निसिन्नो सुप्पटिच्छन्नो नाम होति, एत्थ पन वासूपगतस्स अनापत्ति.

५-६. सुसंवुतसिक्खापदवण्णना

पञ्चमे सुसंवुतोति हत्थं वा पादं वा अकीळापेन्तो सुविनीतोति अत्थो. छट्ठेपि एसेव नयो.

७-८. ओक्खित्तचक्खुसिक्खापदवण्णना

सत्तमे ओक्खित्तचक्खूति हेट्ठा खित्तचक्खु हुत्वा पुरतो युगमत्तं भूमिभागं पेक्खमानो, एकस्मिं पन ठाने ठत्वा हत्थिअस्सादिपरिस्सयाभावं ओलोकेतुं वट्टति. अट्ठमेपि एसेव नयो.

९-१०. उक्खित्तकसिक्खापदवण्णना

नवमे उक्खित्तकायाति उक्खेपेन, इत्थम्भूतलक्खणे करणवचनं, एकतो वा उभतो वा उक्खित्तचीवरो हुत्वाति अत्थो, अन्तो इन्दखीलतो पट्ठाय एवं न गन्तब्बं.

दसमे निसिन्नकाले धमकरणं नीहरन्तेनापि चीवरं अनुक्खिपित्वाव नीहरितब्बं, वासूपगतस्स पन अनापत्ति.

११-१२. उज्जग्घिकसिक्खापदवण्णना

एकादसमे उज्जग्घिकायाति महाहसितं हसन्तोति अत्थो. इधापि हि इत्थम्भूतलक्खणेयेव करणवचनं.

द्वादसमेपि एसेव नयो. उभयत्थ हसनीयस्मिं वत्थुस्मिं मिहितमत्तं करोन्तस्स अनापत्ति.

१३-१४. उच्चसद्दसिक्खापदवण्णना

तेरसमे ¶ ¶ अप्पसद्दोति न उच्चासद्दमहासद्दो हुत्वा. चुद्दसमेपि एसेव नयो. अयं पनेत्थ अप्पसद्दतापरिच्छेदो – सचे द्वादसहत्थे गेहे आदिम्हि सङ्घत्थेरो, मज्झे दुतियत्थेरो ¶ , अन्ते ततियत्थेरोति एवं निसिन्नेसु यं सङ्घत्थेरो दुतियत्थेरेन सद्धिं मन्तेति, दुतियत्थेरो च तस्स सद्दं सुणाति, कथञ्च ववत्थपेति. ततियत्थेरो पन सद्दमेव सुणाति, कथं न ववत्थपेति, एत्तावता अप्पसद्दो होति. सचे पन ततियत्थेरो कथञ्च ववत्थपेति, महासद्दो नाम होति.

१५…पे…२०. कायप्पचालकादिसिक्खापदवण्णना

इतो परेसु छसु कायप्पचालकन्ति कायं चालेत्वा चालेत्वा, एस नयो सब्बत्थ. तस्मा कायादीनि पग्गहेत्वा निच्चलानि उजुकानि ठपेत्वा गन्तब्बञ्चेव निसीदितब्बञ्च, निसीदनप्पटिसंयुत्तेसु तीसु वासूपगतस्स अनापत्ति.

२१-२२. खम्भकतसिक्खापदवण्णना

एकवीसद्वावीसेसु खम्भकतोति कटियं हत्थं ठपेत्वा कतखम्भो.

२३-२४. ओगुण्ठितसिक्खापदवण्णना

तेवीसचतुवीसेसु ओगुण्ठितोति ससीसं पारुतो.

२५. उक्कुटिकसिक्खापदवण्णना

पञ्चवीसे उक्कुटिका वुच्चति पण्हियो उक्खिपित्वा अग्गपादेहेव, अग्गपादे वा उक्खिपित्वा पण्हीहियेव भूमियं फुसन्तस्स गमनं, करणवचनं पनेत्थ वुत्तलक्खणमेव.

२६. पल्लत्थिकसिक्खापदवण्णना

छब्बीसे ¶ ¶ न पल्लत्थिकायाति हत्थपल्लत्थिकाय वा दुस्सपल्लत्थिकाय वा न निसीदितब्बं. अनादरेन निसीदन्तस्स दुक्कटं, वासूपगतस्स पन इधापि पुरिमेसु च द्वावीसचतुवीसेसु अनापत्ति.

छब्बीसतिसारुप्पसिक्खापदवण्णना निट्ठिता.

२७. सक्कच्चपटिग्गहणसिक्खापदवण्णना

भोजनप्पटिसंयुत्तेसु पठमे सक्कच्चन्ति सतिं उपट्ठापेत्वा.

२८. पत्तसञ्ञीपटिग्गहणसिक्खापदवण्णना

दुतिये पत्ते सञ्ञा पत्तसञ्ञा, सा अस्स अत्थीति पत्तसञ्ञी, अत्तनो भाजने उपनिबद्धसञ्ञी हुत्वाति अत्थो.

२९. समसूपकपटिग्गहणसिक्खापदवण्णना

ततिये समसूपको नाम यत्थ मुग्गमासेहि वा कुलत्थादीहि वा कतो हत्थहारियो सूपो भत्तस्स चतुत्थभागप्पमाणो होति, ततो हि अधिकं गण्हन्तस्स दुक्कटं. ठपेत्वा पन सूपं अवसेसा सब्बापि सूपेय्यब्यञ्जनविकति रसरसो नाम होति, तस्मिं रसरसे, ञातकानं वा पवारितानं वा अञ्ञस्सत्थाय वा अत्तनो धनेन वा इध अनापत्ति.

३०…पे…३२. समतित्तिकसिक्खापदवण्णना

चतुत्थे समतित्तिकन्ति समपुण्णं समभरितं अधिट्ठानुपगपत्तस्स अन्तोमुखवट्टिलेखं अनतिक्कमित्वा रचितं. पिण्डपातन्ति यंकिञ्चि यावकालिकं. अनधिट्ठानुपगे पन यावकालिकं यामकालिकादीनि च यत्थकत्थचि थूपीकतानिपि वट्टन्ति, यं पन द्वीसु पत्तेसु गहेत्वा एकं पूरेत्वा विहारं हरति, यं वा पक्खिपियमानं पूवउच्छुक्खण्डफलाफलादि हेट्ठा ओरोहति ¶ , तक्कोलवटंसकादयो वा उपरि ठपेत्वा दिय्यन्ति, यञ्च पण्णे वा थालके वा पक्खिपित्वा पत्तमत्थके ठपितं होति, न तं थूपीकतं नाम, तस्मा तं सब्बं वट्टति. इध पन गिलानस्सापि अनापत्ति नत्थि, तस्मा तेनपि समतित्तिकोयेव ¶ गहेतब्बो. सब्बत्थ पन पटिग्गहेतुमेव ¶ न वट्टति, पटिग्गहितं पन सुप्पटिग्गहितं परिभुञ्जितुं वट्टति. पञ्चमछट्ठानि वुत्तनयानेव.

३३-३४. सपदानसिक्खापदवण्णना

सत्तमे सपदानन्ति तत्थ तत्थ ओधिं अकत्वा अनुपटिपाटिया. यो पन अञ्ञेसं वा देन्तो, अञ्ञभाजने वा आकिरन्तो ततो ततो ओमसति, तस्स, उत्तरिभङ्गञ्च उप्पटिपाटिया गण्हन्तस्सापि इध अनापत्ति. अट्ठमं वुत्तनयमेव.

३५. थूपकतसिक्खापदवण्णना

नवमे थूपकतोति मत्थकतो वेमज्झतोति अत्थो. यो पन परित्तके सेसे एकतो सङ्कड्ढित्वा ओमद्दित्वा भुञ्जति, तस्सापि अनापत्ति.

३६. ओदनप्पटिच्छादनसिक्खापदवण्णना

दसमे यस्स भत्तसामिका माघातसमयादीसु ब्यञ्जनं पटिच्छादेत्वा देन्ति, यो च न भिय्योकम्यताय पटिच्छादेति, तेसं अनापत्ति, गिलानस्स पन अनागतत्ता आपत्तियेव.

३७. सूपोदनविञ्ञत्तिसिक्खापदवण्णना

एकादसमे ञातकानं वा पवारितानं वा अञ्ञस्सत्थाय अत्तनो धनेनाति इदं अनापत्तियं अधिकं.

३८. उज्झानसञ्ञीसिक्खापदवण्णना

द्वादसमे उज्झाने सञ्ञा उज्झानसञ्ञा, सा अस्स अत्थीति उज्झानसञ्ञी. इधापि गिलानो ¶ न मुच्चति, ‘‘दस्सामी’’ति वा, ‘‘दापेस्सामी’’ति वा ओलोकेन्तस्स पन, न उज्झानसञ्ञिस्स च अनापत्ति.

३९. कबळसिक्खापदवण्णना

तेरसमे नातिमहन्तन्ति मयूरण्डं अतिमहन्तं, कुक्कुटण्डं अतिखुद्दकं, तेसं वेमज्झप्पमाणं. मूलखादनीयादिभेदे पन सब्बखज्जके फलाफले च अनापत्ति.

४०. आलोपसिक्खापदवण्णना

चुद्दसमे ¶ परिमण्डलन्ति अदीघं. इध पन खज्जकफलाफलेहि सद्धिं उत्तरिभङ्गेपि अनापत्ति.

४१-४२. अनाहटसिक्खापदवण्णना

पन्नरसमे अनाहटेति अनाहरिते, मुखद्वारं असम्पत्तेति अत्थो. सोळसमे सब्बहत्थन्ति सकलं हत्थं.

४३. सकबळसिक्खापदवण्णना

सत्तरसमे सकबळेनाति एत्थ यत्तकेन वचनं अपरिपुण्णं होति, तत्तके सति कथेन्तस्स आपत्ति. यो पन धम्मं कथेन्तो हरिटकादीनि मुखे पक्खिपित्वा कथेति, यत्तकेन वचनं अपरिपुण्णं न होति, तत्तके मुखम्हि सति वट्टति.

४४. पिण्डुक्खेपकसिक्खापदवण्णना

अट्ठारसमे पिण्डुक्खेपकन्ति पिण्डं उक्खिपित्वा उक्खिपित्वा, इधापि खज्जकफलाफलेसु अनापत्ति.

४५. कबळावच्छेदकसिक्खापदवण्णना

एकूनवीसतिमे कबळावच्छेदकन्ति कबळं अवच्छिन्दित्वा अवच्छिन्दित्वा, इध खज्जकफलाफलेहि सद्धिं उत्तरिभङ्गेपि अनापत्ति.

४६. अवगण्डकारकसिक्खापदवण्णना

वीसतिमे ¶ अवगण्डकारकन्ति मक्कटो विय गण्डे कत्वा कत्वा, इध फलाफलमत्तके अनापत्ति.

४७. हत्थनिद्धुनकसिक्खापदवण्णना

एकवीसतिमे हत्थनिद्धुनकन्ति हत्थं निद्धुनित्वा निद्धुनित्वा, अनापत्तियं पनेत्थ ‘‘कचवरं छड्डेन्तो हत्थं निद्धुनाती’’ति (पाचि. ६२३) इदं अधिकं.

४८. सित्थावकारकसिक्खापदवण्णना

द्वावीसतिमे ¶ सित्थावकारकन्ति सित्थानि अवकिरित्वा अवकिरित्वा, इधापि ‘‘कचवरं छड्डेन्तो सित्थं छड्डयती’’ति (पाचि. ६२३) इदं अनापत्तियं अधिकं.

४९. जिव्हानिच्छारकसिक्खापदवण्णना

तेवीसतिमे जिव्हानिच्छारकन्ति जिव्हं निच्छारेत्वा निच्छारेत्वा.

५०-५१. चपुचपुकारकसिक्खापदवण्णना

चतुवीसतिमे चपुचपुकारकन्ति चपु चपूति एवं सद्दं कत्वा कत्वा. पञ्चवीसतिमेपि एसेव नयो.

५२…पे…५४. हत्थनिल्लेहकादिसिक्खापदवण्णना

छब्बीसतिमे हत्थनिल्लेहकन्ति हत्थं निल्लेहित्वा निल्लेहित्वा. भुञ्जन्तेन ¶ हि अङ्गुलिमत्तम्पि निल्लेहितुं न वट्टति. घनयागुफाणितपायासादिके पन अङ्गुलीहि गहेत्वा अङ्गुलियो मुखे पवेसेत्वा भुञ्जितुं वट्टति, सत्तवीसतिमअट्ठवीसतिमेसुपि एसेव नयो. तस्मा एकङ्गुलियापि पत्तो न निल्लेहितब्बो, एकओट्ठोपि च जिव्हाय न निल्लेहितब्बो, ओट्ठमंसेहि एव पन गहेत्वा अन्तो पवेसेतुं वट्टति.

५५. सामिससिक्खापदवण्णना

एकूनतिंसतिमे ¶ न सामिसेनाति एतं पटिकूलवसेन पटिक्खित्तं, तस्मा सङ्घिकम्पि पुग्गलिकम्पि गिहिसन्तकम्पि अत्तनो सन्तकम्पि सङ्खोपि सरावकम्पि थालकम्पि न गहेतब्बमेव, गण्हन्तस्स दुक्कटं. सचे पन हत्थस्स एकदेसो आमिसमक्खितो न होति, तेन पदेसेन गहेतुं वट्टति, इध ‘‘धोविस्सामीति वा, धोवापेस्सामीति वा पटिग्गण्हाती’’ति (पाचि. ६३१) इदं अनापत्तियं अधिकं.

५६. ससित्थकसिक्खापदवण्णना

तिंसतिमे ‘‘उद्धरित्वा वा भिन्दित्वा वा पटिग्गहे वा नीहरित्वा वा छड्डेती’’ति इदं अनापत्तियं अधिकं. तत्थ उद्धरित्वा वाति सित्थानि उदकतो ¶ उद्धरित्वा, एकस्मिं ठाने रासिं कत्वा उदकं छड्डेति. भिन्दित्वा वाति सित्थानि भिन्दित्वा उदकगतिकानि कत्वा छड्डेति. पटिग्गहे वाति पटिग्गहेन पटिच्छन्तानं पटिग्गहे छड्डेति. नीहरित्वाति बहि नीहरित्वा छड्डेति, एवं छड्डेन्तस्स अनापत्ति.

तिंसभोजनप्पटिसंयुत्तसिक्खापदवण्णना निट्ठिता.

५७. छत्तपाणिसिक्खापदवण्णना

धम्मदेसनापटिसंयुत्तेसु पठमे यंकिञ्चि छत्तं पाणिम्हि अस्साति छत्तपाणि. सो तं छत्तं यत्थकत्थचि सरीरावयवे ठपेत्वापि याव हत्थेन न मुञ्चति, तावस्स धम्मं देसेतुं न वट्टति. सचे पनस्स अञ्ञो छत्तं धारेति, पस्से वा ठितं होति, हत्थतो अपगतमत्ते छत्तपाणि नाम न होति, तस्स देसेतुं वट्टति. धम्मपरिच्छेदो चेत्थ पदसोधम्मे वुत्तनयेनेव वेदितब्बो.

५८-५९. दण्डपाणिसिक्खापदवण्णना

दुतिये दण्डो नाम मज्झिमस्स पुरिसस्स चतुहत्थप्पमाणो, दण्डपाणिभावो पनस्स छत्तपाणिम्हि वुत्तनयेनेव वेदितब्बो. ततियेपि एसेव नयो. असिं सन्नहित्वा ठितोपि हि सत्थपाणिसङ्ख्यं न गच्छति.

६०. आवुधपाणिसिक्खापदवण्णना

चतुत्थे ¶ सब्बापि धनुविकति सद्धिं सरविकतिया आवुधन्ति वेदितब्बा, तस्मा सद्धिं वा सरेन धनुं गहेत्वा, सुद्धधनुं वा सुद्धसरं वा सजियधनुं वा निज्जियधनुं वा गहेत्वा ठितस्स वा निसिन्नस्स वा धम्मं देसेतुं न वट्टति. सचे पनस्स धनु खन्धेपि पटिमुक्कं होति, याव न गण्हाति, ताव वट्टति.

६१-६२. पादुकसिक्खापदवण्णना

पञ्चमे पादुकारुळ्हस्साति छत्तदण्डके अङ्गुलन्तरिकं अप्पवेसेत्वा केवलं अक्कन्तस्स वा, पवेसेत्वा ठानवसेन पटिमुक्कस्स वा. छट्ठेपि एसेव ¶ नयो. इध पन य्वायं पण्हिकबन्धं ओमुञ्चित्वा ठानवसेन ‘‘ओमुक्को’’ति वुच्चति, तस्सापि न वट्टति.

६३. यानसिक्खापदवण्णना

सत्तमे ¶ सचेपि द्वीहि जनेहि हत्थसङ्घाटेन गहितो, साटके वा ठपेत्वा वंसेन वय्हति, अयुत्ते वा वय्हादिके याने विसङ्खरित्वा वा ठपिते चक्कमत्तेपि निसिन्नो होति, यानगतोत्वेव सङ्खं गच्छति. सचे पन द्वेपि एकयाने निसिन्ना होन्ति, वट्टति. विसुं निसिन्नेसुपि उच्चे याने निसिन्नेन नीचे निसिन्नस्स देसेतुं वट्टति, समप्पमाणेपि वट्टति, तथा पुरिमे निसिन्नेन पच्छिमे निसिन्नस्स. पच्छिमे पन उच्चतरेपि निसिन्नेन देसेतुं न वट्टति.

६४. सयनसिक्खापदवण्णना

अट्ठमे सयनगतस्साति अन्तमसो कटसारकेपि पकतिभूमियम्पि निपन्नस्स उच्चेपि मञ्चे वा पीठे वा भूमिप्पदेसे वा ठितेन निसिन्नेन वा देसेतुं न वट्टति. सयनगतेन पन सयनगतस्स उच्चतरे वा समप्पमाणे वा निपन्नेन देसेतुं वट्टति. निपन्नेन पन ठितस्स वा निसिन्नस्स वा निपन्नस्स वा, निसिन्नेन च ठितस्स वा निसिन्नस्स वा, ठितेन ठितस्सेव वट्टति.

६५. पल्लत्थिकसिक्खापदवण्णना

नवमे ¶ हत्थपल्लत्थिकादीसु याय कायचि निसिन्नस्स देसेतुं न वट्टति.

६६. वेठितसिक्खापदवण्णना

दसमे वेठितसीसस्साति दुस्सवेठेन वा मोळिआदीहि वा यथा केसन्तो न दिस्सति, एवं वेठितसीसस्स, तेनेवस्स अनापत्तियं ‘‘केसन्तं विवरापेत्वा देसेती’’ति (पाचि. ६४३) वुत्तं.

६७. ओगुण्ठितसिक्खापदवण्णना

एकादसमे ओगुण्ठितसीसस्साति ससीसं पारुतस्स, अनापत्तियं पनेत्थ ‘‘सीसं विवरापेत्वा देसेती’’ति (पाचि. ६४४) अधिकं.

६८. छमासिक्खापदवण्णना

द्वादसमे ¶ छमायं निसीदित्वाति भूमियं निसीदित्वा. आसनेति अन्तमसो वत्थम्पि तिणानिपि सन्थरित्वा निसिन्नस्स.

६९. नीचासनसिक्खापदवण्णना

तेरसमे उच्चे आसनेति अन्तमसो भूमिप्पदेसेपि उन्नतप्पदेसे निसिन्नस्स.

७०. ठितसिक्खापदवण्णना

चुद्दसमे न ठितो निसिन्नस्साति सचे थेरस्स उपट्ठानं गन्त्वा ठितं दहरं आसने निसिन्नो महाथेरो पञ्हं पुच्छति, न कथेतब्बं. गारवेन पन थेरं ‘‘उट्ठहित्वा पुच्छा’’ति वत्तुं न सक्का, तस्मा ‘‘पस्से ठितस्स भिक्खुनो कथेस्सामी’’ति कथेतुं वट्टति.

७१. पच्छतोगमनसिक्खापदवण्णना

पन्नरसमे ¶ सचे पुरतो गच्छन्तो पञ्हं पुच्छति, तस्स तं अकथेत्वा ‘‘पच्छिमस्स भिक्खुनो कथेस्सामी’’ति कथेतब्बं. सद्धिं उग्गहितधम्मं पन सज्झायितुं, समधुरेन वा गच्छन्तस्स कथेतुं वट्टति.

७२. उप्पथेनगमनसिक्खापदवण्णना

सोळसमे न उप्पथेनाति एत्थ सचे द्वेपि सकटमग्गस्मिं एकेकचक्कपथेन वा उप्पथेन वा समधुरं गच्छन्ति, वट्टति.

७३. ठितोउच्चारसिक्खापदवण्णना

सत्तरसमे ‘‘असञ्चिच्चा’’ति अनापत्तियं सचे पटिच्छन्नट्ठानं गच्छन्तस्स सहसा उच्चारो वा पस्सावो वा निक्खमति, असञ्चिच्च कतो नाम होति.

७४. हरितेउच्चारसिक्खापदवण्णना

अट्ठारसमे यम्पि जीवमानरुक्खस्स मूलं पथवियं दिस्समानं गच्छति, साखा वा भूमिलग्गा गच्छति, सब्बं हरितसङ्खातमेव. खन्धे निसीदित्वा पन अप्पहरितट्ठाने ¶ पातेतुं वट्टति. सचे अप्पहरितट्ठानं ओलोकेन्तस्सेव सहसा निक्खमति, गिलानट्ठाने ¶ ठितो होति, ‘‘अप्पहरिते कतो हरितं ओत्थरती’’ति (पाचि. ६५२) इदमेत्थ अनापत्तियं अधिकं. तत्थ सचेपि अप्पहरितं अलभन्तेन तिणण्डुपकं वा पललण्डुपकं वा ठपेत्वा कतो पच्छा हरितं ओत्थरति, वट्टतियेव. खेळेन चेत्थ सिङ्घाणिकापि सङ्गहिता.

७५. उदकेउच्चारसिक्खापदवण्णना

एकूनवीसतिमे न उदकेति एतं परिभोगउदकमेव सन्धाय वुत्तं, वच्चकुटिसमुद्दादिउदकेसु पन अपरिभोगेसु अनापत्ति. देवे वस्सन्ते समन्ततो उदकोघे जाते ¶ अनुदकट्ठानं अलभन्तेन उदके कातुं वट्टति, इधापि ‘‘थले कतो उदकं ओत्थरती’’ति (पाचि. ६५४) इदं अनापत्तियं अधिकं, सेसं सब्बसिक्खापदेसु उत्तानमेव.

समुट्ठानादिदीपनत्थाय पनेत्थ इदं पकिण्णकं – उज्जग्घिकउच्चासद्दप्पटिसंयुत्तानि चत्तारि, सकबळेन मुखेन ब्याहरणं एकं, छमानीचासननिसिन्नठितपच्छतोगमनउप्पथगमनप्पटिसंयुत्तानि पञ्चाति इमानि दस सिक्खापदानि समनुभासनसमुट्ठानानि, एकेकमेत्थ किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदनं. सूपोदनविञ्ञत्तिसिक्खापदं थेय्यसत्थसमुट्ठानं, किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदनं. छत्तपाणिदण्डपाणिसत्थपाणिआवुधपाणिपादुकाउपाहनयानसयनपल्लत्थिकवेठितओगुण्ठितनामकानि एकादस धम्मदेसनासमुट्ठानानि, किरियाकिरियानि, सञ्ञाविमोक्खानि, सचित्तकानि, लोकवज्जानि, वचीकम्मानि, अकुसलचित्तानि, दुक्खवेदनानि. सेसानि तेपण्णास पठमपाराजिकसमउट्ठानादिभेदानीति.

एकूनवीसतिधम्मदेसनापटिसंयुत्तसिक्खापदवण्णना निट्ठिता.

कङ्खावितरणिया पातिमोक्खवण्णनाय

सेखियवण्णना निट्ठिता.

अधिकरणसमथवण्णना

अधिकरणसमथेसु ¶ सत्ताति तेसं गणनपरिच्छेदो. अधिकरणानि समेन्ति वूपसमेन्तीति अधिकरणसमथा. उद्देसं आगच्छन्तीति आपत्ताधिकरणसङ्खातासु च अवसेसाधिकरणत्तयपच्चयासु च आपत्तीसु परिसुद्धभावं पुच्छनत्थं उद्दिसितब्बतं आगच्छन्ति. उप्पन्नुप्पन्नानन्ति उप्पन्नानं उप्पन्नानं. अधिकरणानन्ति विवादाधिकरणं अनुवादाधिकरणं आपत्ताधिकरणं किच्चाधिकरणन्ति इमेसं चतुन्नं. समथाय वूपसमायाति समनत्थञ्चेव वूपसमनत्थञ्च सम्मुखाविनयो दातब्बो…पे… तिणवत्थारकोति इमे सत्त समथा दातब्बा. तत्रायं विनिच्छयो – अधिकरणेसु ताव ‘‘धम्मो’’ति वा, ‘‘अधम्मो’’ति वा अट्ठारसहि वत्थूहि विवदन्तानं भिक्खूनं यो विवादो, इदं विवादाधिकरणं नाम. सीलविपत्तिया वा आचारदिट्ठिआजीवविपत्तिया वा अनुवदन्तानं यो अनुवादो उपवदना चेव चोदना च, इदं अनुवादाधिकरणं नाम. मातिकाय आगता पञ्च, विभङ्गे द्वेति सत्तपि ¶ आपत्तिक्खन्धा आपत्ताधिकरणं ¶ , नाम. यं सङ्घस्स अपलोकनादीनं चतुन्नं कम्मानं करणं, इदं किच्चाधिकरणं नाम.

तत्थ विवादाधिकरणं (चूळव. २२८) द्वीहि समथेहि सम्मति सम्मुखाविनयेन च येभुय्यसिकाय च, सम्मुखाविनयेनेव सम्ममानं यस्मिं विहारे उप्पन्नं, तस्मिंयेव वा, अञ्ञत्थ वूपसमेतुं गच्छन्तानं अन्तरामग्गे वा, यत्थ गन्त्वा सङ्घस्स निय्यातितं, तत्थ सङ्घेन वा वूपसमेतुं असक्कोन्ते तत्थेव उब्बाहिकाय सम्मतपुग्गलेहि वा विनिच्छितं सम्मति, एवं सम्ममाने च पन तस्मिं या सङ्घसम्मुखता धम्मसम्मुखता विनयसम्मुखता पुग्गलसम्मुखता अयं सम्मुखाविनयो नाम. तत्थ च कारकसङ्घस्स सङ्घसामग्गिवसेन सम्मुखीभावो सङ्घसम्मुखता, समेतब्बस्स वत्थुनो भूतता धम्मसम्मुखता, यथा तं समेतब्बं, तथेवस्स समनं विनयसम्मुखता, यो च विवदति, येन च विवदति, तेसं उभिन्नं अत्थपच्चत्थिकानं सम्मुखीभावो पुग्गलसम्मुखता. उब्बाहिकाय वूपसमने पनेत्थ सङ्घसम्मुखता परिहायति, एवं ताव सम्मुखाविनयेनेव सम्मति.

सचे ¶ पनेवम्पि न सम्मति, अथ नं उब्बाहिकाय सम्मता भिक्खू ‘‘न मयं सक्कोम वूपसमेतु’’न्ति सङ्घस्सेव निय्यातेन्ति, ततो सङ्घो पञ्चङ्गसमन्नागतं भिक्खुं सलाकग्गाहापकं सम्मन्नित्वा तेन गुळ्हकविवट्टकसकण्णजप्पकेसु तीसु सलाकग्गाहेसु अञ्ञतरवसेन सलाकं गाहेत्वा सन्निपतितपरिसाय धम्मवादीनं येभुय्यताय यथा ते धम्मवादिनो वदन्ति, एवं वूपसन्तं अधिकरणं सम्मुखाविनयेन च येभुय्यसिकाय च वूपसन्तं होति. तत्थ सम्मुखाविनयो वुत्तनयो एव, यं पन येभुय्यसिककम्मस्स करणं. अयं येभुय्यसिका नाम, एवं विवादाधिकरणं द्वीहि समथेहि सम्मति.

अनुवादाधिकरणं (चूळव. २३६) चतूहि समथेहि सम्मति सम्मुखाविनयेन च सतिविनयेन च अमूळ्हविनयेन च तस्सपापियसिकाय च. सम्मुखाविनयेनेव सम्ममानं यो च अनुवदति, यञ्च अनुवदति, तेसं वचनं सुत्वा सचे काचि आपत्ति नत्थि, उभो खमापेत्वा, सचे अत्थि, ‘‘अयं नामेत्थ आपत्ती’’ति एवं विनिच्छितं वूपसम्मति, तत्थ सम्मुखाविनयलक्खणं वुत्तनयमेव. यदा पन खीणासवस्स भिक्खुनो अमूलिकाय सीलविपत्तिया अनुद्धंसितस्स सतिविनयं याचमानस्स सङ्घो ञत्तिचतुत्थेन कम्मेन सतिविनयं देति, तदा सम्मुखाविनयेन च सतिविनयेन च वूपसन्तं होति, दिन्ने पन सतिविनये पुन तस्मिं पुग्गले कस्सचि अनुवादो न रुहति. यदा उम्मत्तको भिक्खु उम्मादवसेन गते अस्सामणके ¶ अज्झाचारे ‘‘सरतायस्मा एवरूपिं आपत्ति’’न्ति भिक्खूहि चोदियमानो ‘‘उम्मत्तकेन मे, आवुसो, एतं कतं, नाहं तं सरामी’’ति भणन्तोपि भिक्खूहि चोदियमानोव पुन अचोदनत्थाय अमूळ्हविनयं ¶ याचति, सङ्घो चस्स ञत्तिचतुत्थेन कम्मेन अमूळ्हविनयं देति. तदा सम्मुखाविनयेन च अमूळ्हविनयेन च वूपसन्तं होति, दिन्ने पन अमूळ्हविनये पुन तस्मिं पुग्गले कस्सचि तप्पच्चया अनुवादो न रुहति.

यदा पन पाराजिकेन वा पाराजिकसामन्तेन वा चोदियमानस्स अञ्ञेनञ्ञं पटिचरतो पापुस्सन्नताय पापियस्स पुग्गलस्स ‘‘सचायं अच्छिन्नमूलो भविस्सति, सम्मा वत्तित्वा ओसारणं लभिस्सति, सचे छिन्नमूलो, सयमेवस्स नासना भविस्सती’’ति मञ्ञमानो सङ्घो ञत्तिचतुत्थेन ¶ कम्मेन तस्सपापियसिकं कम्मं करोति, तदा सम्मुखाविनयेन च तस्सपापियसिकाय च वूपसन्तं होति, एवं अनुवादाधिकरणं चतूहि समथेहि सम्मति.

आपत्ताधिकरणं (चूळव. २३९) तीहि समथेहि सम्मति सम्मुखाविनयेन च पटिञ्ञातकरणेन च तिणवत्थारकेन च. तस्स सम्मुखाविनयेनेव वूपसमो नत्थि, यदा पन एकस्स वा भिक्खुनो, निस्सग्गियवण्णनायं वुत्तनयेन सङ्घगणमज्झेसु वा भिक्खु लहुकं आपत्तिं देसेति, तदा आपत्ताधिकरणं सम्मुखाविनयेन च पटिञ्ञातकरणेन च वूपसम्मति. तत्थ सम्मुखाविनये ताव यो च देसेति, यस्स च देसेति, तेसं सम्मुखीभावो पुग्गलसम्मुखता, सेसं वुत्तनयमेव. पुग्गलस्स च गणस्स च देसनाकाले सङ्घसम्मुखता परिहायति.

या पनेत्थ ‘‘अहं, भन्ते, इत्थन्नामं आपत्तिं आपन्नो’’ति च, ‘‘पस्ससी’’ति, ‘‘आम पस्सामी’’ति च पटिञ्ञा, ताय ‘‘आयतिं संवरेय्यासी’’ति करणं पटिञ्ञातकरणं नाम. सङ्घादिसेसे परिवासादियाचना पटिञ्ञा, परिवासादीनं दानं पटिञ्ञातकरणं नाम. द्वेपक्खजाता पन भण्डनकारका भिक्खू बहुं अस्सामणकं अज्झाचारं चरित्वा पुन लज्जिधम्मे उप्पन्ने ‘‘सचे मयं इमाहि आपत्तीहि अञ्ञमञ्ञं करिस्साम, सियापि तं अधिकरणं कक्खळत्थाय वाळत्थाय संवत्तेय्या’’ति अञ्ञमञ्ञं आपत्तिया कारापने दोसं दिस्वा यदा तिणवत्थारककम्मं करोन्ति, तदा आपत्ताधिकरणं सम्मुखाविनयेन च तिणवत्थारकेन च सम्मति. तत्र हि यत्तका हत्थपासूपगता ‘‘न मेतं खमती’’ति एवं दिट्ठाविकम्मं ¶ अकत्वा निद्दम्पि ओक्कमन्ता होन्ति, सब्बेसं ठपेत्वा थुल्लवज्जञ्च गिहिप्पटिसंयुत्तञ्च सब्बापत्तियो वुट्ठहन्ति, एवं आपत्ताधिकरणं तीहि समथेहि सम्मति.

किच्चाधिकरणं (चूळव. २४२) एकेन समथेन सम्मति सम्मुखाविनयेनेव. इति इमानि चत्तारि अधिकरणानि यथानुरूपं इमेहि सत्तहि समथेहि सम्मन्ति, तेन वुत्तं ‘‘उप्पन्नुप्पन्नानं अधिकरणानं समथाय वूपसमाय सम्मुखाविनयो ¶ दातब्बो…पे… तिणवत्थारको’’ति. अयमेत्थ विनिच्छयनयो, वित्थारो पन समथक्खन्धके आगतोयेव, विनिच्छयोपिस्स समन्तपासादिकायं वुत्तो.

तत्थायस्मन्ते पुच्छामि, कच्चित्थ परिसुद्धाति ¶ तेसु सत्तसु अधिकरणसमथेसु कच्चित्थ परिसुद्धा, नत्थि वो किञ्चि समथेहि वूपसमेतब्बन्ति पुच्छामि, एतेन सब्बापत्तीहि परिसुद्धभावो पुच्छितो होति.

उद्दिट्ठं खो आयस्मन्तो निदानन्तिआदि निगमनवचनं. तत्थ एत्तकन्ति एत्तकं सिक्खापदं. सुत्तागतन्ति सुत्ते पातिमोक्खे आगतं. सुत्तपरियापन्नन्ति तत्थेव अन्तोगधं. अन्वद्धमासं उद्देसं आगच्छतीति अद्धमासे अद्धमासे उपोसथवसेन उद्दिसितब्बतं आगच्छति. समग्गेहीति कायसामग्गिवसेन समग्गेहि. सम्मोदमानेहीति चित्तसामग्गिवसेन एकज्झासयताय सुट्ठु मोदमानेहि. अविवदमानेहीति अट्ठारससु विवादवत्थूसु अञ्ञतरवसेनापि अविवदमानेहि. सिक्खितब्बन्ति तं तं सिक्खापदं अवीतिक्कमन्तेहि अधिसीलसिक्खा सम्पादेतब्बा. अन्तरन्तरा पन यं न वुत्तं, तं सब्बं पुरिमे पुरिमे सिक्खापदे वुत्तत्ता चेव उत्तानत्थत्ता चाति.

अधिकरणसमथवण्णना निट्ठिता.

कङ्खावितरणिया पातिमोक्खवण्णनाय

भिक्खुपातिमोक्खवण्णना निट्ठिता.

नमो तस्स भगवतो अरहतो सम्मसम्बुद्धस्स

भिक्खुनीपातिमोक्खवण्णना

पाराजिककण्डो

भिक्खुनीनं ¶ हितत्थाय, पातिमोक्खं पकासयि;

यं नाथो, तस्स दानेसो, सम्पत्तो वण्णनाक्कमो.

साधारणपाराजिकं

१…पे…४. मेथुनधम्मसिक्खापदवण्णना

तत्थ ¶ ¶ सुणातु मेतिआदीनं भिक्खुपातिमोक्खवण्णनायं वुत्तनयेनेव अत्थो वेदितब्बो. केवलञ्हि, भन्ते, अय्येतिआदिवसेन तस्मिञ्च इध च अभिलापमत्तमेव लिङ्गभेदमत्तञ्च विसेसो ¶ . यस्मा च भिक्खुनिया सिक्खापच्चक्खानं नाम नत्थि, तस्मा भिक्खुनीनं ‘‘सिक्खासाजीवसमापन्ना सिक्खं अपच्चक्खाय दुब्बल्यं अनाविकत्वा’’ति अवत्वा या पन भिक्खुनी छन्दसो मेथुनं धम्मं पटिसेवेय्याति वुत्तं. तत्थ छन्दसोति मेथुनरागप्पटिसंयुत्तेन छन्देन चेव रुचिया च. छन्दे पन असति बलक्कारेन पधंसिताय अनापत्ति, तस्मा या परिपुण्णूपसम्पदा भिक्खुनी मनुस्सामनुस्सतिरच्छानजातीसु पुरिसउभतोब्यञ्जनकपण्डकानं यस्स कस्सचि सजीवस्स वा निज्जीवस्स वा सन्थतस्स वा असन्थतस्स वा अक्खायितस्स वा येभुय्येन अक्खायितस्स वा अङ्गजातस्स अत्तनो वच्चमग्गपस्सावमग्गमुखेसु तीसु यत्थकत्थचि सन्थते वा असन्थते वा पकतिवातेन असंफुट्ठे अल्लोकासे अन्तमसो तिलफलमत्तम्पि पदेसं छन्दसो पवेसेति, परेन वा पवेसियमाना पवेसनपविट्ठट्ठितउद्धरणेसु यंकिञ्चि सादियति, अयं पाराजिका होति. सेसमेत्थ इतो परेसु च साधारणसिक्खापदेसु वुत्तनयानुसारेनेव वेदितब्बं.

असाधारणपाराजिकं

५. उब्भजाणुमण्डलिकासिक्खापदवण्णना

असाधारणेसु ¶ पन चतुन्नं ताव पाराजिकानं पठमे अवस्सुताति कायसंसग्गरागेन तिन्ता, किलिन्नाति अत्थो. दुतियपदेपि एसेव नयो. पुरिसपुग्गलस्साति कायसंसग्गं समापज्जितुं विञ्ञुस्स मनुस्सजातिकस्स पुरिससङ्खातस्स पुग्गलस्स. अधक्खकन्ति अत्तनो अक्खकानं अधो. उब्भजाणुमण्डलन्ति जाणुमण्डलानं उपरि, एत्थ च उब्भकप्परम्पि उब्भजाणुमण्डलेनेव सङ्गहितं. आमसनन्ति आमज्जनं फुट्ठोकासं अनतिक्कमित्वा तत्थेव सङ्घट्टनं. परामसनन्ति इतो चितो च सञ्चरणं. गहणन्ति गहितमत्तं. छुपनन्ति असङ्घट्टेत्वा फुट्ठमत्तं. पटिपीळनन्ति अङ्गे गहेत्वा निप्पीळनं. सादियेय्याति या भिक्खुनी अत्तनो यथापरिच्छिन्ने काये पुरिसस्स एतं आमसनादिं सादियति, सयं वा पन ¶ तेन कायेन पुरिसस्स यंकिञ्चि कायप्पदेसं सादयमाना छुपति, अयं उब्भजाणुमण्डलिका नाम पाराजिकाति अयमेत्थ सङ्खेपो.

‘‘निदानं पुग्गलं वत्थु’’न्तिआदिके (कङ्खा. अट्ठ. पठमपाराजिकवण्णना) तेन वित्थारविनिच्छये ¶ यस्मा सब्बानेव असाधारणपञ्ञत्तियो होन्ति, तस्मा इतो पट्ठाय सन्तिं अनुपञ्ञत्तिं वत्वा साधारणपञ्ञत्तीति वा असाधारणपञ्ञत्तीति वा न वक्खाम, आणत्तियं यत्थ आणत्ति नत्थि, तत्थ किञ्चि अवत्वा यत्थ अत्थि, तत्थेव वक्खाम, विपत्तिविचारणा वुत्तायेव.

अवसेसं पन सब्बत्थ वत्तब्बं, तयिदं वुच्चति, इदं ताव सिक्खापदं सावत्थियं सुन्दरीनन्दं आरब्भ कायसंसग्गं समापज्जनवत्थुस्मिं पञ्ञत्तं, एकतोअवस्सुते यथापरिच्छिन्नेन कायेन पुरिसस्स कायं, उभतोअवस्सुतेपि कायेन कायप्पटिबद्धं, यथापरिच्छिन्नकायप्पटिबद्धेन वा अवसेसकायेन वा तस्स कायं आमसन्तिया थुल्लच्चयं, यक्खपेतपण्डकतिरच्छानगतमनुस्सविग्गहानं उभतोअवस्सुते यथापरिच्छिन्नेन कायेन कायं आमसन्तियापि थुल्लच्चयं, सचे पन पुरिसस्स कायसंसग्गरागो नत्थि, पाराजिकक्खेत्तेपि थुल्लच्चयमेव. अवसेसे पन कायप्पटिबद्धेन कायप्पटिबद्धादिभेदे, मेथुनरागगेहसितपेमेसु च सब्बत्थ दुक्कटं. असञ्चिच्च, अस्सतिया, अजानन्तिया, असादियन्तिया ¶ , उम्मत्तिकादीनञ्च अनापत्ति. अङ्गानि समुट्ठानादीनि च भिक्खुपातिमोक्खे कायसंसग्गे वुत्तनयेनेव वेदितब्बानीति.

उब्भजाणुमण्डलिकासिक्खापदवण्णना निट्ठिता.

६. वज्जप्पटिच्छादिकासिक्खापदवण्णना

दुतिये गणस्साति अञ्ञासं भिक्खुनीनं. ठिताति सलिङ्गे ठिता. चुताति कालङ्कता. नासिताति लिङ्गनासनाय सयं वा नट्ठा, अञ्ञेहि वा नासिता. अवस्सटाति तित्थायतनं सङ्कन्ता. पुब्बेवाहं अय्ये अञ्ञासिन्ति इदं तस्सा वचनकालदस्सनं, सलिङ्गे ठिताय पन पाराजिकभावं ञत्वा ‘‘न दानि नं कस्सचि आरोचेस्सामी’’ति धुरे निक्खित्तमत्तेयेव अयं वज्जप्पटिच्छादिका नाम पाराजिका होतीति.

सावत्थियं थुल्लनन्दं आरब्भ नेवअत्तनापटिचोदना नगणस्स आरोचनवत्थुस्मिं पञ्ञत्तं, सेसमेत्थ सप्पाणकवग्गम्हि दुट्ठुल्लापत्तिप्पटिच्छादनसिक्खापदे वुत्तनयेनेव वेदितब्बं. तत्र हि पाचित्तियं, इध पाराजिकन्ति अयमेव विसेसो, सेसं तादिसमेवाति.

वज्जप्पटिच्छादिकासिक्खापदवण्णना निट्ठिता.

७. उक्खित्तानुवत्तिकासिक्खापदवण्णना

ततिये ¶ ¶ उक्खित्तन्ति आपत्तिया अदस्सनादीसु उक्खित्तं. धम्मेनाति भूतेन वत्थुना. विनयेनाति चोदेत्वा सारेत्वा. सत्थुसासनेनाति इधापि चोदेत्वा सारेत्वा करणमेव सत्थुसासनं नाम. अनादरन्ति येन सङ्घेन उक्खेपनियकम्मं कतं, तस्मिं वा, तत्थ परियापन्नगणे वा एकपुग्गले वा तस्मिं वा कम्मे आदरविरहितं, सम्मावत्तनाय अवत्तमानन्ति अत्थो. अप्पटिकारन्ति पटिकाररहितं, अनोसारितन्ति अत्थो. अकतसहायन्ति एककम्मादिके संवासे सह अयनभावेन समानसंवासका भिक्खू सहाया नाम, यस्स पन सो संवासो तेहि सद्धिं नत्थि न तेन ते सहाया कता होन्ति ¶ , इति सो अकतसहायो नाम, तं अकतसहायं, समानसंवासकभावं अनुपगतन्ति अत्थो. तमनुवत्तेय्याति तं उक्खित्तकं उक्खित्तकभावेयेव ठितं भिक्खुं या भिक्खुनी यंदिट्ठिको सो होति, ताय दिट्ठिया गहणभावेन अनुवत्तेय्य. सा भिक्खुनी भिक्खुनीहि सङ्घभेदसिक्खापदादीसु वुत्तनयेन विसुं सङ्घमज्झे च वुच्चमाना तं वत्थुं अप्पटिनिस्सज्जन्ती समनुभासनकम्मपरियोसाने उक्खित्तानुवत्तिका नाम पाराजिका होतीति.

सावत्थियं थुल्लनन्दं आरब्भ उक्खित्तानुवत्तनवत्थुस्मिं पञ्ञत्तं, ञत्तिया दुक्कटं, द्वीहि कम्मवाचाहि द्वे थुल्लच्चया, ‘‘यस्सा नक्खमति, सा भासेय्या’’ति एवं य्य-कारप्पत्ताय ततियकम्मवाचाय पाराजिकं, अधम्मकम्मे तिकदुक्कटं, सेसं सङ्घभेदसिक्खापदादीसु वुत्तनयेनेव वेदितब्बं.

उक्खित्तानुवत्तिकासिक्खापदवण्णना निट्ठिता.

८. अट्ठवत्थुकासिक्खापदवण्णना

चतुत्थे अवस्सुताति लोकस्सादमित्तसन्थववसेन कायसंसग्गरागेन तिन्ता. अयमेव हि अत्थो सीहळमातिकाट्ठकथायं वुत्तो, समन्तपासादिकायं (पाचि. अट्ठ. ६७५) पनस्स विचारणा कता, दुतियपदेपि एसेव नयो. पुरिसपुग्गलस्स हत्थग्गहणं वातिआदीसु पन यं पुरिसपुग्गलेन हत्थे गहणं कतं, तं ‘‘पुरिसपुग्गलस्स हत्थग्गहण’’न्ति वुत्तं, एसेव नयो सङ्घाटिकण्णग्गहणेपि. हत्थग्गहणन्ति एत्थ च यस्स कस्सचि अपाराजिकक्खेत्तभूतस्स अङ्गस्स गहणं हत्थग्गहणं, यस्स कस्सचि निवत्थस्स वा पारुतस्स वा गहणं सङ्घाटिकण्णग्गहणं. सन्तिट्ठेय्य वातिआदीसु कायसंसग्गसङ्खातस्स असद्धम्मस्स पटिसेवनत्थाय पुरिसस्स हत्थपासे सन्तिट्ठेय्य वा, तत्थ ठिता सल्लपेय्य वा, पुरिसेन वा ¶ ‘‘इत्थन्नामं ठानं आगच्छा’’ति ¶ वुत्ता तं सङ्केतं गच्छेय्य, तस्स वा पुरिसस्स अब्भागमनं सादियेय्य, येन केनचि वा पटिच्छन्नं ओकासं ¶ पविसेय्य, पुरिसस्स हत्थपासे ठत्वा कायं उपसंहरेय्याति एवमत्थो दट्ठब्बो. अयम्पि पाराजिकाति यथा पुरिमायो, एवं अयम्पि भिक्खुनी एतस्स कायसंसग्गसङ्खातस्स असद्धम्मस्स पटिसेवनत्थाय एतानि अट्ठ वत्थूनि पटिपाटिया वा उप्पटिपाटिया वा पूरेत्वा अट्ठवत्थुका नाम पाराजिका होतीति.

सावत्थियं छब्बग्गिया भिक्खुनियो आरब्भ अट्ठमं वत्थुं परिपूरणवत्थुस्मिं पञ्ञत्तं, सङ्केतगमने पदे पदे दुक्कटं, पुरिसस्स हत्थपासं ओक्कन्तमत्ते थुल्लच्चयं, पुरिसस्स अब्भागमनसादयमानेपि दुक्कटं. हत्थपासोक्कमने थुल्लच्चयं, सेसेसु एकेकस्मिं थुल्लच्चयमेव, अट्ठमे परिपुण्णे पाराजिकं. एकेकस्मिं पन वत्थुस्मिं सतक्खत्तुम्पि वीतिक्कन्ते ता आपत्तियो देसेत्वा मुच्चति, अपिचेत्थ गणनूपिका आपत्ति वेदितब्बा, ‘‘इदानि नापज्जिस्सामी’’ति हि धुरनिक्खेपं कत्वा देसिता गणनूपिका, देसितगणनं उपेति, पाराजिकस्स अङ्गं न होति. तस्मा या एकं आपन्ना धुरनिक्खेपं कत्वा देसेत्वा पुन किलेसवसेन आपज्जति, पुनपि देसेति, एवं अट्ठमं परिपूरेन्तीपि पाराजिका न होति. या पन आपज्जित्वा ‘‘पुनपि अञ्ञं वत्थुं आपज्जिस्सामी’’ति सउस्साहाव देसेति, तस्सा सा आपत्ति अगणनूपिका, देसितापि अदेसिता होति, पाराजिकस्स अङ्गं होति. असञ्चिच्च, अस्सतिया, अजानन्तिया असादियन्तिया, उम्मत्तिकादीनञ्च अनापत्ति. कायसंसग्गरागो, सउस्साहता, अट्ठमस्स वत्थुस्स पूरणन्ति इमानेत्थ तीणि अङ्गानि. समनुभासनसमुट्ठानं, किरियाकिरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, द्विवेदनन्ति.

अट्ठवत्थुकासिक्खापदवण्णना निट्ठिता.

उद्दिट्ठा खो अय्यायो अट्ठ पाराजिका धम्माति भिक्खू आरब्भ पञ्ञत्ता साधारणा चत्तारो, इमे चत्तारोति एवं पातिमोक्खुद्देसमग्गेन अट्ठ पाराजिका धम्मा उद्दिट्ठाति एवमेत्थ अत्थो वेदितब्बो, सेसं भिक्खुपातिमोक्खवण्णनायं वुत्तनयमेवाति.

कङ्खावितरणिया पातिमोक्खवण्णनाय

भिक्खुनिपातिमोक्खे

पाराजिकवण्णना निट्ठिता.

सङ्घादिसेसकण्डो

१. उस्सयवादिकासिक्खापदवण्णना

सङ्घादिसेसेसु ¶ ¶ पठमे उस्सयवादिकाति मानुस्सयवसेन कोधुस्सयवसेन ¶ अड्डकरणत्थाय विनिच्छयमहामत्तानं सन्तिके विवदमाना. गहपतिना वातिआदीहि ठपेत्वा पञ्च सहधम्मिके अवसेसा गहट्ठपब्बजिता सङ्गहिता. अयं भिक्खुनी पठमापत्तिकन्ति आदिम्हि पठमं आपत्ति एतस्साति पठमापत्तिको, वीतिक्कमक्खणेयेव आपज्जितब्बोति अत्थो, तं पठमापत्तिकं. आपन्नाति अड्डपरियोसाने आपन्ना. भिक्खुनिं सङ्घतो निस्सारेतीति निस्सारणीयो, तं निस्सारणीयं. सङ्घादिसेसन्ति एवंनामकं.

सावत्थियं थुल्लनन्दं आरब्भ उस्सयवादिकवत्थुस्मिं पञ्ञत्तं, साणत्तिकं, ‘‘अड्डं करिस्सामी’’ति यंकिञ्चि दुतियिकं वा सक्खिं वा सहायं वा परियेसन्तिया परियेसने दुक्कटं, यत्थ ठिताय ‘‘अड्डं कातुं गच्छामी’’ति चित्तं उप्पज्जति, ततो पट्ठाय गच्छन्तिया पदे पदे दुक्कटं, यत्थकत्थचि अन्तमसो भिक्खुनुपस्सयं आगतेपि वोहारिके दिस्वा अत्तनो कथं आरोचेन्तिया दुक्कटं. इतरेन अत्तनो कथाय आरोचिताय भिक्खुनिया थुल्लच्चयं, पठमं इतरेन पच्छा भिक्खुनिया आरोचनेपि एसेव नयो. सचे पन भिक्खुनी तं वदति ‘‘मम च तव च कथं त्वंयेव आरोचेही’’ति, सो अत्तनो वा कथं पठमं आरोचेतु, तस्सा वा, पठमारोचने भिक्खुनिया दुक्कटं, दुतिये थुल्लच्चयं, तेन एवं वुत्ताय भिक्खुनिया आरोचनेपि एसेव नयो. सचे पन भिक्खुनी अञ्ञेन कथापेति, तत्रापि एसेव नयो. यथा वा तथा वा हि आरोचियमाने पठमारोचने भिक्खुनिया दुक्कटं, दुतिये थुल्लच्चयं. उभिन्नं पन कथं सुत्वा वोहारिकेहि विनिच्छये कते अड्डपरियोसानं नाम होति, तस्मिं अड्डपरियोसाने भिक्खुनिया जयेपि पराजयेपि सङ्घादिसेसो.

या ¶ पन पच्चत्थिकमनुस्सेहि दूतं वा पहिणित्वा, सयं वा आगन्त्वा ‘‘एहि, अय्ये’’ति आकड्ढियमाना गच्छति, या वा उपस्सये अञ्ञेहि कतं अनाचारं अनोदिस्स आचिक्खन्ती रक्खं याचति, याय च किञ्चि अवुत्ता ¶ वोहारिका अञ्ञतो सुत्वा सयमेव अड्डं परियोसापेन्ति, तस्सा, उम्मत्तिकादीनञ्च अनापत्ति. अञ्ञेहि अनाकड्ढिताय अड्डकरणं, अड्डपरियोसानन्ति इमानेत्थ द्वे अङ्गानि. समुट्ठानादीनि पठमकथिनसदिसानि, इदं पन किरियमेवाति.

उस्सयवादिकासिक्खापदवण्णना निट्ठिता.

२. चोरिवुट्ठापिकासिक्खापदवण्णना

दुतिये याय पञ्चमासग्घनकतो पट्ठाय यंकिञ्चि परसन्तकं अवहरितं, अयं चोरी नाम, तं चोरिं. वज्झं विदितन्ति तेन ¶ कम्मेन ‘‘वधारहा अय’’न्ति एवं विदितं. अनपलोकेत्वाति अनापुच्छा. गणन्ति मल्लगणभटिपुत्तगणादिकं. पूगन्ति धम्मगणं. सेणिन्ति गन्धिकसेणिदुस्सिकसेणिआदिकं. यत्थ यत्थ हि राजानो गणादीनं गामनिगमे निय्यातेन्ति ‘‘तुम्हेव एत्थ अनुसासथा’’ति, तत्थ तत्थ तेयेव इस्सरा होन्ति, तस्मा ते सन्धाय इदं वुत्तं. एत्थ च राजानं वा गणादिके वा अपलोकेत्वापि भिक्खुनिसङ्घो अपलोकेतब्बोव. अञ्ञत्र कप्पाति तित्थियेसु वा अञ्ञभिक्खुनीसु वा पब्बजितपुब्बा कप्पा नाम, तं ठपेत्वा अञ्ञं उपसम्पादेन्तिया गणआचरिनी पत्तचीवरपरियेसनेसु सीमासम्मुतिया ञत्तिया च दुक्कटं, द्वीहि कम्मवाचाहि थुल्लच्चयं, कम्मवाचापरियोसाने सङ्घादिसेसो.

सावत्थियं थुल्लनन्दं आरब्भ चोरिं वुट्ठापनवत्थुस्मिं पञ्ञत्तं, चोरिया वेमतिकाय दुक्कटं, तथा अचोरिया चोरिसञ्ञाय चेव वेमतिकाय च. अचोरिसञ्ञाय, अजानन्तिया, अपलोकेत्वा वुट्ठापेन्तिया, कप्पं वुट्ठापेन्तिया, उम्मत्तिकादीनञ्च अनापत्ति. चोरिता, चोरिसञ्ञिता, अञ्ञत्र अनुञ्ञातकारणा वुट्ठापनन्ति, इमानेत्थ तीणि अङ्गानि. चोरिवुट्ठापनसमुट्ठानं, किरियाकिरियं, सञ्ञाविमोक्खं, सचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति.

चोरिवुट्ठापिकासिक्खापदवण्णना निट्ठिता.

३. एकगामन्तरगमनसिक्खापदवण्णना

ततिये ¶ ¶ गामन्तरन्तिआदीसु सकगामतो ताव निक्खमन्तिया अनापत्ति, निक्खमित्वा पन अञ्ञं गामं गच्छन्तिया पदे पदे दुक्कटं, एकेन पादेन इतरस्स गामस्स परिक्खेपे वा उपचारे वा अतिक्कन्ते थुल्लच्चयं, दुतियेन अतिक्कन्तमत्ते सङ्घादिसेसो, ततो निक्खमित्वा पुन सकगामं पविसन्तियापि एसेव नयो. सचे पन खण्डपाकारेन वा वतिच्छिद्देन वा भिक्खुनिविहारभूमिंयेव सक्का होति पविसितुं, एवं पविसमानाय कप्पियभूमिया पविट्ठा नाम होति, तस्मा वट्टति. बहिगामे ठत्वा यंकिञ्चि सकगामं वा परगामं वा अकप्पियभूमिं पदसा पविसन्तिया आपत्तीति अयमेत्थ सङ्खेपो.

नदिपारगमने वुत्तलक्खणाय नदिया दुतियिकं विना परतीरं गच्छन्तिया वा अन्तरानदियं दुतियिकाय सद्धिं भण्डित्वा पुन ¶ ओरिमतीरमेव पच्चुत्तरन्तिया वा पठमपादं उद्धरित्वा तीरे ठपितक्खणे थुल्लच्चयं, दुतियपादुद्धारे सङ्घादिसेसो. इद्धिसेतुयाननावाहि पन परतीरं ओतरितुं, नहानादिकारणेन च ओतिण्णाय ओरिमतीरं पदसापि पच्चुत्तरितुं वट्टति.

रत्तिविप्पवासे ‘‘पुरेअरुणेयेव दुतियिकाय हत्थपासं ओक्कमिस्सामी’’ति आभोगं विना एकगब्भेपि दुतियिकाय हत्थपासातिक्कमे ठत्वा अरुणं उट्ठापेन्तिया आपत्ति.

एका वा गणम्हाति एत्थ पन एका भिक्खुनीपि गणोयेव. ओहीयेय्याति अवहीयेय्य, दस्सनूपचारं वा सवनूपचारं वा विजहेय्याति अत्थो. तस्मा इन्दखीलातिक्कमतो पट्ठाय बहिगामे रुक्खथम्भसाणिपाकारादिअन्तरितभावेनापि दुतियिकाय दस्सनूपचारे विजहिते सचेपि सवनूपचारो अत्थि, आपत्तियेव. अज्झोकासे पन दूरेपि दस्सनूपचारो होति, तत्थ मग्गमूळ्हसद्देन विय धम्मस्सवनारोचनसद्देन विय च ‘अय्ये’ति सद्दायन्तिया सद्दस्सवनातिक्कमे आपत्तियेव. सचे पन मग्गं गच्छन्ती ओहीयित्वा ‘‘इदानि पापुणिस्सामी’’ति सउस्साहा अनुबन्धति, वट्टति.

सावत्थियं ¶ अञ्ञतरं भिक्खुनिं आरब्भ गामन्तरगमनवत्थुस्मिं पञ्ञत्तं, ‘‘एका वा नदिपार’’न्तिआदिका एत्थ तिविधा अनुपञ्ञत्ति, पुरे अरुणे सकगामतो निक्खमित्वा अरुणुग्गमनकाले ¶ गामन्तरपरियापन्नं नदिपारं ओक्कमनन्तिया पन चतस्सोपि आपत्तियो एकक्खणेयेव होन्ति. वुत्तम्पि चेतं –

‘‘सिक्खापदा बुद्धवरेन वण्णिता;

सङ्घादिसेसा चतुरो भवेय्युं;

आपज्जेय्य एकपयोगेन सब्बा;

पञ्हा मेसा कुसलेहि चिन्तिता’’ति. (परि. ४७९);

एतेनुपायेन तिण्णं, द्विन्नञ्च एकतोभावो वेदितब्बो. दुतियिकाय पन पक्कन्ताय वा विब्भन्ताय वा कालङ्कताय वा पक्खसङ्कन्ताय वा आपदासु वा गामन्तरगमनादीनि करोन्तिया उम्मत्तिकादीनञ्च अनापत्ति. अन्तरायेन एकतोभावो, गामन्तरगमनादीसु अञ्ञतरतापज्जनं, आपदाय अभावोति इमानेत्थ तीणि अङ्गानि. समुट्ठानादीनि पठमपाराजिकसदिसानि, इदं पन पण्णत्तिवज्जं, तिचित्तं, तिवेदनन्ति.

एकगामन्तरगमनसिक्खापदवण्णना निट्ठिता.

४. उक्खित्तकओसारणसिक्खापदवण्णना

चतुत्थे उक्खित्तन्ति आपत्तिया अदस्सनादीसु उक्खित्तं. अनञ्ञाय गणस्स ¶ छन्दन्ति तस्सेव कारकसङ्घस्स छन्दं अजानित्वा. ओसारेय्याति ओसारणकम्मं करेय्य. तस्सा एवं करोन्तिया, गणपरियेसने सीमासम्मुतिया ञत्तिया च दुक्कटं, द्वीहि कम्मवाचाहि थुल्लच्चयं, कम्मवाचापरियोसाने सङ्घादिसेसो.

सावत्थियं थुल्लनन्दं आरब्भ एवं ओसारणवत्थुस्मिं पञ्ञत्तं, तिकसङ्घादिसेसं, अधम्मकम्मे तिकदुक्कटं, कारकसङ्घं वा आपुच्छित्वा, गणस्स वा छन्दं जानित्वा, वत्ते वा वत्तन्तिं, असन्ते कारकसङ्घे ओसारेन्तिया, उम्मत्तिकादीनञ्च अनापत्ति. धम्मकम्मेन उक्खित्तता, अञ्ञत्र अनुञ्ञातकारणा ¶ ओसारणन्ति इमानेत्थ द्वे अङ्गानि. समुट्ठानादीनि सङ्घभेदसिक्खापदे वुत्तनयानेव, इदं पन किरियाकिरियन्ति.

उक्खित्तकओसारणसिक्खापदवण्णना निट्ठिता.

५. भोजनप्पटिग्गहणपठमसिक्खापदवण्णना

पञ्चमे ¶ अवस्सुताति छन्दरागेन तिन्ता. अवस्सुतस्साति तादिसस्सेव. खादेय्य वा भुञ्जेय्य वाति एत्थ पटिग्गहणे थुल्लच्चयं, अज्झोहारे अज्झोहारे सङ्घादिसेसो.

सावत्थियं सुन्दरीनन्दं आरब्भ अवस्सुताय अवस्सुतस्स हत्थतो आमिसप्पटिग्गहणवत्थुस्मिं पञ्ञत्तं, एकतोअवस्सुते पटिग्गहणे दुक्कटं, अज्झोहारे अज्झोहारे थुल्लच्चयं, यक्खपेतपण्डकतिरच्छानगतमनुस्सविग्गहानं हत्थतो उभतोअवस्सुतेपि सति एसेव नयो. तत्थ पन एकतोअवस्सुते सति दुक्कटं, सब्बत्थ उदकदन्तपोनग्गहणेपि परिभोगेपि दुक्कटमेव. उभोसु अनवस्सुतेसु, ‘‘अनवस्सुतो’’ति वा ञत्वा गण्हन्तिया, उम्मत्तिकादीनञ्च अनापत्ति. उदकदन्तपोनतो अञ्ञं अज्झोहरणीयं, उभतोअवस्सुतता, सहत्था गहणं, अज्झोहरणन्ति इमानेत्थ चत्तारि अङ्गानि. समुट्ठानादीनि पठमपाराजिकसदिसानीति.

भोजनप्पटिग्गहणपठमसिक्खापदवण्णना निट्ठिता.

६. भोजनप्पटिग्गहणदुतियसिक्खापदवण्णना

छट्ठे यतो त्वन्ति यस्मा त्वं. इङ्घाति उय्योजनत्थे निपातो. अयम्पीति या एवं उय्योजेति, सा एवं उय्योजनेन च तेन वचनेन इतरिस्सा पटिग्गहणेन च दुक्कटानि, अज्झोहारगणनाय थुल्लच्चयानि च आपज्जित्वा भोजनपरियोसाने सङ्घादिसेसं आपज्जति.

सावत्थियं अञ्ञतरं भिक्खुनिं आरब्भ एवं उय्योजनवत्थुस्मिं पञ्ञत्तं, साणत्तिकमेव, पुरिसस्स वा यक्खादीनं वा हत्थतो उदकदन्तपोनप्पटिग्गहणुय्योजने च तेसं परिभोगे च दुक्कटं, एस नयो यक्खादीनं हत्थतो अवसेसग्गहणत्थं उय्योजने, तेसं गहणे, अज्झोहारे च. भोजनपरियोसाने पन थुल्लच्चयं. ‘‘अनवस्सुतो’’ति ञत्वा ¶ वा, ‘‘कुपिता न पटिग्गण्हती’’ति ¶ वा, ‘‘कुलानुद्दयताय न पटिग्गण्हती’’ति वा उय्योजेन्तिया, उम्मत्तिकादीनञ्च अनापत्ति. मनुस्सपुरिसता, अञ्ञत्र अनुञ्ञातकारणा, ‘‘खादनीयं भोजनीयं गहेत्वा भुञ्जा’’ति उय्योजना, तेन वचनेन गहेत्वा इतरिस्सा भोजनपरियोसानन्ति इमानेत्थ तीणि अङ्गानि. समुट्ठानादीनि अदिन्नादानसदिसानीति.

भोजनप्पटिग्गहणदुतियसिक्खापदवण्णना निट्ठिता.

७-८-९. सञ्चरित्तादिसिक्खापदवण्णना

सत्तमअट्ठमनवमसिक्खापदानं ¶ सञ्चरित्तादित्तये वुत्तनयेनेव विनिच्छयो वेदितब्बो.

सञ्चरित्तादिसिक्खापदवण्णना निट्ठिता.

१०. सिक्खंपच्चाचिक्खणसिक्खापदवण्णना

दसमे किंनुमाव समणियोति किंनु इमा एव समणियो. तासाहन्ति तासं अहं. यावततियकपदत्थो भिक्खुपातिमोक्खवण्णनायं (कङ्खा. अट्ठ. निगमनवण्णना), अवसेसविनिच्छयो च तत्थेव सङ्घभेदसिक्खापदवण्णनायं वुत्तनयेनेव वेदितब्बो, इदं पन सावत्थियं चण्डकाळिभिक्खुनिं (पाचि. ७०९) आरब्भ ‘‘बुद्धं पच्चाचिक्खामी’’तिआदिवचनवत्थुस्मिं पञ्ञत्तं, एवं वचनमेव चेत्थ चतूसु अङ्गेसु पठमं अङ्गन्ति अयं विसेसो, सेसं तादिसमेवाति.

सिक्खंपच्चाचिक्खणसिक्खापदवण्णना निट्ठिता.

११. अधिकरणकुपितसिक्खापदवण्णना

एकादसमे किस्मिञ्चिदेव अधिकरणेति चतुन्नं अञ्ञतरस्मिं. पच्चाकताति पराजिता. इदम्पि सावत्थियं चण्डकाळिं आरब्भ ‘‘छन्दगामिनियो च भिक्खुनियो’’तिआदिवचनवत्थुस्मिं पञ्ञत्तं, सेसं दसमे वुत्तनयेनेव वेदितब्बन्ति.

अधिकरणकुपितसिक्खापदवण्णना निट्ठिता.

१२. पापसमाचारपठमसिक्खापदवण्णना

द्वादसमे ¶ संसट्ठाति पब्बजितानं अननुलोमेन गिहीनं कोट्टनपचनसासनहरणादिना कायिकवाचसिकेन मिस्सीभूता. पापो कायिकवाचसिको आचारो एतासन्ति पापाचारा. पापो कित्तिसद्दो एतासन्ति पापसद्दा. पापो आजीवसङ्खातो सिलोको एतासन्ति पापसिलोका ¶ . भिक्खुनिसङ्घस्स विहेसिकाति अञ्ञमञ्ञिस्सा कम्मे करियमाने पटिक्कोसनेन विहेसिका. वज्जप्पटिच्छादिकाति खुद्दानुखुद्दकस्स वज्जस्स पटिच्छादिका.

सावत्थियं ¶ सम्बहुला भिक्खुनियो आरब्भ संसट्ठविहारवत्थुस्मिं पञ्ञत्तं, सेसमेत्थापि दसमे वुत्तनयेनेव वेदितब्बं, समनुभासनकम्मकाले पन द्वेतिस्सो एकतो समनुभासितब्बाति.

पापसमाचारपठमसिक्खापदवण्णना निट्ठिता.

१३. पापसमाचारदुतियसिक्खापदवण्णना

तेरसमे एवं वदेय्याति ता समनुभट्ठा भिक्खुनियो एवं वदेय्य. एवाचाराति एवंआचारा, यादिसो तुम्हाकं आचारो, तादिसो आचारोति अत्थो, एस नयो सब्बत्थ. उञ्ञायाति अवञ्ञाय नीचं कत्वा जाननाय. परिभवेनाति ‘‘किं इमा करिस्सन्ती’’ति एवं परिभवित्वा जाननेन. अक्खन्तियाति असहनताय, कोधेनाति अत्थो. वेभस्सियाति बलवन्तस्स भावेन, अत्तनो बलप्पकासनेन समुत्रासेनाति अत्थो. दुब्बल्याति तुम्हाकं दुब्बलभावेन, सब्बत्थ उञ्ञाय च परिभवेन चाति एवं समुच्चयत्थो दट्ठब्बो. विविच्चथाति नाना होथ, अननुलोमिकं कायिकवाचसिकसंसग्गं पजहथाति अत्थो.

सावत्थियं थुल्लनन्दं आरब्भ ‘‘संसट्ठाव, अय्ये, तुम्हे विहरथ, मा तुम्हे नाना विहरित्था’’ति उय्योजनवत्थुस्मिं पञ्ञत्तं, सेसमेत्थापि दसमे वुत्तनयेनेव वेदितब्बन्ति.

पापसमाचारदुतियसिक्खापदवण्णना निट्ठिता.

१४. सङ्घभेदकादिसिक्खापदवण्णना

सङ्घभेदादीसु ¶ चतूसु वुत्तनयेनेव विनिच्छयो वेदितब्बो. केवलञ्हि भिक्खुनी सङ्घं न भिन्दति, भेदाय पन परक्कमति चेव अनुवत्तति च. उद्दिट्ठा खो अय्यायो सत्तरस सङ्घादिसेसा धम्माति भिक्खू आरब्भ पञ्ञत्ता साधारणा सत्त, असाधारणा दसाति एवं सत्तरस. उभतोसङ्घे पक्खमानत्तं चरितब्बन्ति भिक्खुनिया हि आपत्तिं छादेन्तियापि परिवासो नाम नत्थि, छादनपच्चयापि न दुक्कटं आपज्जति, तस्मा छादेत्वापि अछादेत्वापि ¶ एकं पक्खमानत्तमेव चरितब्बं. तं भिक्खुनीहि अत्तनो सीमं सोधेत्वा विहारसीमाय वा, सोधेतुं असक्कोन्तीहि खण्डसीमाय वा सब्बन्तिमेन परिच्छेदेन चतुवग्गं गणं सन्निपातापेत्वा दातब्बं. सचे एका आपत्ति होति, एकिस्सा वसेन, सचे द्वे वा तिस्सो वा सम्बहुला वा एकवत्थुका वा नानावत्थुका वा, तासं तासं वसेन ¶ भिक्खुपातिमोक्खवण्णनायं वुत्तवत्थुगोत्तनामआपत्तिभेदेसु यं यं इच्छति, तं तं आदाय योजना कातब्बा.

तत्रिदं पठमापत्तिवसेन मुखमत्तनिदस्सनं – ताय आपन्नाय भिक्खुनिया भिक्खुनिसङ्घं उपसङ्कमित्वा एकंसं उत्तरासङ्गं करित्वा वुड्ढानं भिक्खुनीनं पादे वन्दित्वा उक्कुटिकं निसीदित्वा अञ्जलिं पग्गहेत्वा एवमस्सवचनीयो ‘‘अहं, अय्ये, एकं आपत्तिं आपज्जिं उस्सयवादं, साहं, अय्ये, सङ्घं एकिस्सा आपत्तिया उस्सयवादाय पक्खमानत्तं याचामी’’ति, एवं तिक्खत्तुं याचापेत्वा ब्यत्ताय भिक्खुनिया पटिबलाय सङ्घो ञापेतब्बो –

‘‘सुणातु मे, अय्ये, सङ्घो, अयं इत्थन्नामा भिक्खुनी एकं आपत्तिं आपज्जिं उस्सयवादं, सा सङ्घं एकिस्सा आपत्तिया उस्सयवादाय पक्खमानत्तं याचति, यदि सङ्घस्स पत्तकल्लं, सङ्घो इत्थन्नामाय भिक्खुनिया एकिस्सा आपत्तिया उस्सयवादाय पक्खमानत्तं ददेय्य, एसा ञत्ति.

‘‘सुणातु मे, अय्ये, सङ्घो, अयं इत्थन्नामा भिक्खुनी…पे… दुतियम्पि…पे… ततियम्पि एतमत्थं वदामि, सुणातु मे, अय्ये, सङ्घो…पे… सा भासेय्य. दिन्नं सङ्घेन इत्थन्नामाय भिक्खुनिया एकिस्सा आपत्तिया ¶ उस्सयवादाय पक्खमानत्तं. खमति सङ्घस्स, तस्मा तुण्ही, एवमेतं धारयामी’’ति.

कम्मवाचापरियोसाने ‘‘वत्तं समादियामि, मानत्तं समादियामी’’ति समादियित्वा सङ्घस्स आरोचेत्वा निक्खित्तवत्तेन ताव वसितुकामाय तत्थेव सङ्घमज्झे वा पक्कन्तासु भिक्खुनीसु एकभिक्खुनिया वा दुतियिकाय वा सन्तिके ‘‘वत्तं निक्खिपामि, मानत्तं निक्खिपामी’’ति निक्खिपितब्बं. अञ्ञिस्सा पन आगन्तुकाय सन्तिके आरोचेत्वा निक्खिपितब्बं, निक्खित्तकालतो पट्ठाय पकतत्तट्ठाने तिट्ठति, ततो पुरेअरुणेयेव चतूहि भिक्खुनीहि तं भिक्खुनिं गहेत्वा गामूपचारतो च भिक्खूनं विहारूपचारतो च द्वे लेड्डुपाते अतिक्कमित्वा महामग्गा ओक्कम्म गुम्बवतिआदीहि पटिच्छन्ने ओकासे निसीदितब्बं. चतूहि ¶ भिक्खूहिपि तत्थ गन्तब्बं, गन्त्वा भिक्खुनीनं अविदूरे विसुं निसीदितब्बं. अथ ताय भिक्खुनिया वुत्तनयेनेव वत्तं समादियित्वा भिक्खुनिसङ्घस्स ताव एवं आरोचेतब्बं –

‘‘अहं, अय्ये, एकं आपत्तिं आपज्जिं उस्सयवादं, साहं सङ्घं एकिस्सा आपत्तिया उस्सयवादाय पक्खमानत्तं याचिं, तस्सा मे सङ्घो एकिस्सा आपत्तिया उस्सयवादाय पक्खमानत्तं अदासि, साहं मानत्तं चरामि, वेदयामहं, अय्ये, ‘वेदयती’ति मं सङ्घो धारेतू’’ति.

ततो भिक्खुसङ्घस्स सन्तिकं गन्त्वा एवं आरोचेतब्बं ‘‘अहं, अय्या, एकं आपत्तिं आपज्जिं…पे… वेदयामहं, अय्या, ‘वेदयती’ति मं सङ्घो धारेतू’’ति. आरोचेत्वा भिक्खुनिसङ्घस्सेव ¶ सन्तिके निसीदितब्बं, ततो पट्ठाय भिक्खूसु वा, दुतियिकं ठपेत्वा भिक्खुनीसु वा पक्कन्तासुपि उभतोसङ्घे मानत्तं चिण्णमेव होति. याव अरुणं न उट्ठहति, ताव यं पठमं पस्सति भिक्खुं वा भिक्खुनिं वा, तस्सा आरोचेतब्बं. उट्ठिते अरुणे वत्तं निक्खिपित्वा उपस्सयं गन्तब्बं, एवं पञ्चदस अरुणा गहेतब्बा.

अनिक्खित्तवत्ताय पन आगन्तुकेसु असति चतुन्नं भिक्खूनञ्च भिक्खुनीनञ्च देवसिकं आरोचेत्वा, आगन्तुकेसु सति सब्बेसम्पि आगन्तुकानं आरोचेन्तिया ¶ पञ्चदस दिवसानि पारिवासिकक्खन्धके (चूळव. ७५ आदयो) वुत्तनयेनेव सम्मा वत्तितब्बन्ति अयमेत्थ सङ्खेपो, वित्थारो पन समन्तपासादिकायं (चूळव. अट्ठ. ७५ आदयो) वुत्तो, चिण्णमानत्ताय भिक्खुनियाति यदा एवं चिण्णमानत्ता भिक्खुनी होति, अथस्सा यत्थ सिया वीसतिगणो भिक्खुनिसङ्घोति वुत्तनयेनेव अब्भानकम्मं कातब्बं, सेसं उत्तानमेवाति.

कङ्खावितरणिया पातिमोक्खवण्णनाय

भिक्खुनिपातिमोक्खे

सङ्घादिसेसवण्णना निट्ठिता.

निस्सग्गियकण्डो

१. पत्तसन्निचयसिक्खापदवण्णना

निस्सग्गियेसु ¶ ¶ आदिवग्गस्स ताव पठमे पत्तसन्निचयं करेय्याति पत्तसन्निधिं करेय्य, एकाहं अनधिट्ठहित्वा वा अविकप्पेत्वा वा अधिट्ठानुपगं पत्तं ठपेय्याति अत्थो.

सावत्थियं छब्बग्गिया भिक्खुनियो आरब्भ पत्तसन्निचयवत्थुस्मिं पञ्ञत्तं, सेसकथामग्गो भिक्खुपातिमोक्खवण्णनायं वुत्तनयेनेव वेदितब्बो, तत्र हि दसाहातिक्कमे आपत्ति, इध एकाहातिक्कमेति एत्तकमेव तस्स च इमस्स च नानाकरणं, सेसं तादिसमेवाति.

पत्तसन्निचयसिक्खापदवण्णना निट्ठिता.

२. अकालचीवरसिक्खापदवण्णना

दुतिये अकालचीवरन्ति अत्थते कथिने कथिनमासेहि, अनत्थते चीवरमासतो अञ्ञस्मिं काले उप्पन्नं, यं वा पन कालेपि आदिस्स दिन्नं. आदिस्स दिन्नं नाम ‘‘सम्पत्ता भाजेन्तू’’ति वत्वा वा, ‘‘इदं गणस्स, इदं तुम्हाकं दम्मी’’ति वत्वा वा, दातुकामताय पादमूले ठपेत्वा वा दिन्नं. इच्चेतं अकालचीवरं ‘‘कालचीवर’’न्ति अधिट्ठहित्वा भाजापेन्तिया पयोगे दुक्कटं, यं अत्तना लद्धं, तं निस्सग्गियं होति. निस्सट्ठं पटिलभित्वापि यथादानेयेव उपनेतब्बं, अञ्ञस्मिम्पि एवरूपे सिक्खापदे एसेव नयो.

सावत्थियं थुल्लनन्दं आरब्भ अकालचीवरं ‘‘कालचीवर’’न्ति ¶ अधिट्ठहित्वा भाजनवत्थुस्मिं पञ्ञत्तं, अकालचीवरे वेमतिकाय, कालचीवरे अकालचीवरसञ्ञाय चेव वेमतिकाय ¶ च दुक्कटं. उभोसु कालचीवरसञ्ञाय, उम्मत्तिकादीनञ्च अनापत्ति. अकालचीवरता, तथासञ्ञिता, ‘‘कालचीवर’’न्ति अधिट्ठाय लेसेन भाजापनं, पटिलाभोति इमानेत्थ चत्तारि अङ्गानि. समुट्ठानादीनि अदिन्नादानसदिसानीति.

अकालचीवरसिक्खापदवण्णना निट्ठिता.

३. चीवरपरिवत्तनसिक्खापदवण्णना

ततिये ¶ हन्दाति गण्ह. अच्छिन्देय्याति सयं अच्छिन्दन्तिया बन्धित्वा ठपितेसु बहूसुपि एकापत्ति, इतरेसु वत्थुगणनाय आपत्तियो. अच्छिन्दापने पन एकाय आणत्तिया बहूसु अच्छिन्नेसुपि एकावापत्ति.

सावत्थियं थुल्लनन्दं आरब्भ चीवरं परिवत्तेत्वा अच्छिन्दनवत्थुस्मिं पञ्ञत्तं, साणत्तिकं, तिकपाचित्तियं, अञ्ञस्मिं परिक्खारे तिकदुक्कटं, अनुपसम्पन्नाय चीवरेपि तिकदुक्कटमेव. या पन ताय वा दिय्यमानं, तस्सा वा विस्सासं गण्हाति, तस्सा, उम्मत्तिकादीनञ्च अनापत्ति. उपसम्पन्नता, परिवत्तितचीवरस्स विकप्पनुपगता, सकसञ्ञाय अच्छिन्दनं वा अच्छिन्दापनं वाति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

चीवरपरिवत्तनसिक्खापदवण्णना निट्ठिता.

४. अञ्ञविञ्ञापनसिक्खापदवण्णना

चतुत्थे विञ्ञापेत्वाति जानापेत्वा, ‘‘इदं नाम आहरा’’ति याचित्वा वा. अञ्ञं विञ्ञापेय्याति यं पुब्बे ‘‘किन्ते, अय्ये, अफासु, किं आहरियतू’’ति वुत्ताय विञ्ञापितं, तं पटिक्खिपित्वा तञ्चेव अञ्ञञ्च गहेतुकामा ततो अञ्ञं विञ्ञापेय्य, तस्सा विञ्ञत्तिया दुक्कटं, पटिलाभेन निस्सग्गियं होति.

सावत्थियं थुल्लनन्दं आरब्भ अञ्ञं विञ्ञापेत्वा अञ्ञं विञ्ञापनवत्थुस्मिं पञ्ञत्तं, तिकपाचित्तियं, अनञ्ञे द्विकदुक्कटं. अनञ्ञे अनञ्ञसञ्ञाय पन, तस्मिं अप्पहोन्ते पुन तञ्ञेव, अञ्ञेनपि अत्थे सति तेन सद्धिं अञ्ञञ्च, यञ्च विञ्ञत्तं, ततो चे अञ्ञं समग्घतरं ¶ होति, इमं आनिसंसं दस्सेत्वा सुद्धं ¶ अञ्ञमेव च विञ्ञापेन्तिया, उम्मत्तिकादीनञ्च अनापत्ति. लेसेन गहेतुकामता, अञ्ञस्स विञ्ञापनं, पटिलाभोति इमानेत्थ तीणि अङ्गानि. समुट्ठानादीनि सञ्चरित्तसदिसानीति.

अञ्ञविञ्ञापनसिक्खापदवण्णना निट्ठिता.

५. अञ्ञचेतापनसिक्खापदवण्णना

पञ्चमे ¶ अञ्ञं चेतापेत्वाति अत्तनो कप्पियभण्डेन ‘‘इदं नाम आहरा’’ति अञ्ञं परिवत्तापेत्वा. अञ्ञं चेतापेय्याति ‘‘एवं मे इदं दत्वा अञ्ञम्पि आहरिस्सती’’ति मञ्ञमाना ‘‘न मे इमिना अत्थो, इदं नाम मे आहरा’’ति ततो अञ्ञं चेतापेय्य. तस्सा चेतापनप्पयोगे दुक्कटं, पटिलाभेन तेन वा अञ्ञेन वा मूलेन आहटं निस्सग्गियं होति, सेसं चतुत्थसदिसमेवाति.

अञ्ञचेतापनसिक्खापदवण्णना निट्ठिता.

६. पठमसङ्घिकचेतापनसिक्खापदवण्णना

छट्ठे अञ्ञदत्थिकेनाति अञ्ञस्सत्थाय दिन्नेन. अञ्ञुद्दिसिकेनाति अञ्ञं उद्दिसित्वा दिन्नेन. सङ्घिकेनाति सङ्घस्स परिच्चत्तेन. परिक्खारेनाति कप्पियभण्डेन. अञ्ञं चेतापेय्याति ‘‘इदं नाम परिभुञ्जेय्याथा’’ति यं उद्दिसित्वा नियमेत्वा यो परिक्खारो दिन्नो, ततो अञ्ञं परिवत्तापेय्य, तस्सा पयोगे दुक्कटं, पटिलाभेन निस्सग्गियं.

सावत्थियं सम्बहुला भिक्खुनियो आरब्भ तादिसेन परिक्खारेन अञ्ञं चेतापनवत्थुस्मिं पञ्ञत्तं, तिकपाचित्तियं, अनञ्ञदत्थिके द्विकदुक्कटं. तस्मिं पन अनञ्ञदत्थिकसञ्ञाय, सेसकं उपनेन्तिया, ‘‘तुम्हेहि एतदत्थाय दिन्नो, अम्हाकञ्च इमिना नाम अत्थो’’ति सामिके अपलोकेत्वा उपनेन्तिया, यदा भिक्खुनियो विहारम्पि छड्डेत्वा पक्कमन्ति, एवरूपासु आपदासु उपनेन्तीनं, उम्मत्तिकादीनञ्च अनापत्ति. सेसं चतुत्थसदिसमेवाति.

पठमसङ्घिकचेतापनसिक्खापदवण्णना निट्ठिता.

७. दुतियसङ्घिकचेतापनसिक्खापदवण्णना

सत्तमे ¶ सञ्ञाचिकेनाति सयं याचितकेनापि. एतदेवेत्थ नानाकरणं, सेसं छट्ठसदिसमेवाति.

दुतियसङ्घिकचेतापनसिक्खापदवण्णना निट्ठिता.

८. पठमगणिकचेतापनसिक्खापदवण्णना

अट्ठमे ¶ महाजनिकेनाति गणस्स परिच्चत्तेन, इदमेत्थ छट्ठतो नानाकरणं.

पठमगणिकचेतापनसिक्खापदवण्णना निट्ठिता.

९. दुतियगणिकचेतापनसिक्खापदवण्णना

नवमे ¶ सञ्ञाचिकेनाति इदं अट्ठमतो अतिरित्तं, सेसं द्वीसुपि छट्ठसिक्खापदसदिसमेवाति.

दुतियगणिकचेतापनसिक्खापदवण्णना निट्ठिता.

१०. पुग्गलिकचेतापनसिक्खापदवण्णना

दसमे पुग्गलिकेनाति एकभिक्खुनिया परिच्चत्तेन. सञ्ञाचिकेनाति सयं याचितकेन च. अञ्ञं चेतापेय्याति यं उद्दिसित्वा दिन्नं, ततो अञ्ञं चेतापेन्तिया पयोगे दुक्कटं, पटिलाभेन निस्सग्गियं होति.

सावत्थियं थुल्लनन्दं आरब्भ तादिसेन परिक्खारेन अञ्ञं चेतापनवत्थुस्मिं पञ्ञत्तं, सेसं छट्ठसदिसमेवाति.

पुग्गलिकचेतापनसिक्खापदवण्णना निट्ठिता.

पत्तवग्गो पठमो.

११. गरुपावुरणसिक्खापदवण्णना

दुतियस्स ¶ पठमे गरुपावुरणन्ति सीतकाले पावुरणं. चतुक्कंसपरमन्ति कंसो नाम चतुक्कहापणिको होति, तस्मा सोळसकहापणग्घनकं. चेतापेतब्बन्ति ठपेत्वा सहधम्मिके च ञातकप्पवारिते च अञ्ञेन किस्मिञ्चिदेव गुणे परितुट्ठेन ‘‘वदेथाय्ये, येनत्थो’’ति वुत्ताय विञ्ञापेतब्बं. ततो चे उत्तरीति ततुत्तरि विञ्ञापेन्तिया दुक्कटं, पटिलद्धं निस्सग्गियं होति.

सावत्थियं ¶ थुल्लनन्दं आरब्भ राजानं कम्बलं विञ्ञापनवत्थुस्मिं पञ्ञत्तं, तिकपाचित्तियं, ऊनकचतुक्कंसे द्विकदुक्कटं. तस्मिं पन ऊनकसञ्ञाय, चतुक्कंसपरमं चेतापेन्तिया, ञातकप्पवारिते वा, अञ्ञस्स वा अत्थाय, अत्तनो वा धनेन, महग्घं चेतापेन्तं अप्पग्घं चेतापेन्तिया, उम्मत्तिकादीनञ्च अनापत्ति. गरुपावुरणता, अतिरेकचतुक्कंसता, अननुञ्ञातट्ठाने विञ्ञत्ति, पटिलाभोति इमानेत्थ चत्तारि अङ्गानि. समुट्ठानादीनि सञ्चरित्तसदिसानीति.

गरुपावुरणसिक्खापदवण्णना निट्ठिता.

१२. लहुपावुरणसिक्खापदवण्णना

दुतिये लहुपावुरणन्ति उण्हकाले पावुरणं. अड्ढतेय्यकंसपरमन्ति दसकहापणग्घनकं, सेसं पठमसदिसमेवाति.

लहुपावुरणसिक्खापदवण्णना निट्ठिता.

इतो परानि इमस्मिं वग्गे अट्ठ, ततियवग्गे दसाति इमानि अट्ठारस ¶ सिक्खापदानि भिक्खुपातिमोक्खवण्णनायं वुत्तनयेनेव वेदितब्बानीति.

जातरूपवग्गो ततियो.

उद्दिट्ठा खो अय्यायो तिंस निस्सग्गिया पाचित्तिया धम्माति भिक्खू आरब्भ पञ्ञत्ता साधारणा अट्ठारस, असाधारणा द्वादसाति एवं तिंस. सेसं सब्बत्थ उत्तानमेवाति.

कङ्खावितरणिया पातिमोक्खवण्णनाय भिक्खुनिपातिमोक्खे

निस्सग्गियपाचित्तियवण्णना निट्ठिता.

पाचित्तियकण्डो

१. लसुणवग्गो

१. लसुणसिक्खापदवण्णना

पाचित्तियेसु ¶ ¶ लसुणवग्गस्स ताव पठमे लसुणन्ति मगधरट्ठे जातं आमकं भण्डिकलसुणमेव, न एकद्वितिमिञ्जकं. तञ्हि ‘‘खादिस्सामी’’ति पटिग्गण्हन्तिया दुक्कटं, अज्झोहारे अज्झोहारे पाचित्तियं.

सावत्थियं थुल्लनन्दं आरब्भ लसुणं हरापनवत्थुस्मिं पञ्ञत्तं, तिकपाचित्तियं, अलसुणे द्विकदुक्कटं. तस्मिं पन अलसुणसञ्ञाय, पलण्डुके, भञ्जनके, हरितके, चापलसुणे, सूपसम्पाके, मंससम्पाके, तेलसम्पाके, साळवे, उत्तरिभङ्गे, उम्मत्तिकादीनञ्च अनापत्ति. आमकलसुणञ्चेव, अज्झोहरणञ्चाति इमानेत्थ द्वे अङ्गानि. समुट्ठानादीनि एळकलोमसदिसानीति.

लसुणसिक्खापदवण्णना निट्ठिता.

२. सम्बाधलोमसिक्खापदवण्णना

दुतिये सम्बाधेति पटिच्छन्नोकासे, उपकच्छकेसु च मुत्तकरणे चाति अत्थो. संहरापेय्याति एत्थ खुरसण्डासकत्तरिआदीसु येन केनचि संहरापेन्तिया पयोगगणनाय पाचित्तियं, न लोमगणनाय.

सावत्थियं छब्बग्गिया भिक्खुनियो आरब्भ सम्बाधे लोमं संहरापनवत्थुस्मिं पञ्ञत्तं, अत्तनो ¶ अत्थाय अञ्ञं आणापेन्तिया साणत्तिकं, आपत्तिभेदोनत्थि. आबाधपच्चया, उम्मत्तिकादीनञ्च अनापत्ति. आबाधाभावो, सम्बाधे लोमसंहरणन्ति इमानेत्थ द्वे अङ्गानि. समुट्ठानादीनि भिक्खुनिया सद्धिं एकद्धानमग्गगमनसिक्खापदसदिसानीति.

सम्बाधलोमसिक्खापदवण्णना निट्ठिता.

३. तलघातकसिक्खापदवण्णना

ततिये ¶ तलघातकेति अन्तमसो उप्पलकेसरेनापि मुत्तकरणस्स तलघातने मुत्तकरणम्हि पहारदाने पाचित्तियन्ति अत्थो.

सावत्थियं ¶ द्वे भिक्खुनियो आरब्भ तलघातकरणवत्थुस्मिं पञ्ञत्तं, पुरिमनयेनेव साणत्तिकं, आपत्तिभेदो नत्थि. इतो परं पन यत्थ नत्थि, तत्थ अवत्वाव गमिस्साम. आबाधपच्चया गण्डं वा वणं वा पहरन्तिया, उम्मत्तिकादीनञ्च अनापत्ति. आबाधाभावो, मुत्तकरणे पहारदानं, फस्ससादियनन्ति इमानेत्थ तीणि अङ्गानि. समुट्ठानादीनि पठमपाराजिकसदिसानीति.

तलघातकसिक्खापदवण्णना निट्ठिता.

४. जतुमट्ठकसिक्खापदवण्णना

चतुत्थे जतुमट्ठकेति जतुना कते मट्ठदण्डके. वत्थुवसेनेतं वुत्तं, कामरागेन पन उप्पलकेसरम्पि पवेसेन्तिया आपत्ति.

सावत्थियं अञ्ञतरं भिक्खुनिं आरब्भ जतुमट्ठकसादियनवत्थुस्मिं पञ्ञत्तं, सेसं ततियसदिसमेवाति.

जतुमट्ठकसिक्खापदवण्णना निट्ठिता.

५. उदकसुद्धिकसिक्खापदवण्णना

पञ्चमे उदकसुद्धिकन्ति मुत्तकरणस्स धोवनं. आदियमानायाति करोन्तिया. द्वङ्गुलपब्बपरमं ¶ आदातब्बन्ति द्वीसु अङ्गुलीसु एकेकं कत्वा द्वङ्गुलपब्बपरमं आदातब्बं. तं अतिक्कामेन्तियाति सचे धोवनकाले रागवसेन वित्थारतो ततियाय अङ्गुलिया अग्गपब्बं, गम्भीरतो एकिस्साव अङ्गुलिया ततियपब्बं पवेसेति पाचित्तियं.

सक्केसु अञ्ञतरं भिक्खुनिं आरब्भ अतिगम्भीरं उदकसुद्धिकं आदियनवत्थुस्मिं पञ्ञत्तं, तिकपाचित्तियं, ऊनकद्वङ्गुलपब्बे द्विकदुक्कटं. तस्मिं पन ¶ ऊनकसञ्ञाय, द्वङ्गुलपब्बपरमं आदियन्तिया, आबाधपच्चया अतिरेकम्पि, उम्मत्तिकादीनञ्च अनापत्ति, सेसं ततियसदिसमेवाति.

उदकसुद्धिकसिक्खापदवण्णना निट्ठिता.

६. उपतिट्ठनसिक्खापदवण्णना

छट्ठे भुञ्जन्तस्साति पञ्चन्नं भोजनानं अञ्ञतरं भुञ्जतो. पानीयेनाति सुद्धेन वा उदकेन, तक्कादीसु वा अञ्ञतरेन. विधूपनेनाति याय कायचि बीजनिया. उपतिट्ठेय्याति या एतेसु द्वीसु अञ्ञतरं गहेत्वा हत्थपासे तिट्ठति, तस्सा पाचित्तियं.

सावत्थियं अञ्ञतरं भिक्खुनिं आरब्भ भुञ्जन्तस्स एवं तिट्ठनवत्थुस्मिं पञ्ञत्तं, तिकपाचित्तियं, हत्थपासं विजहित्वा खादनीयं खादन्तस्स उपतिट्ठन्तिया दुक्कटं, अनुपसम्पन्ने ¶ तिकदुक्कटं. ‘‘इमं पिवथ, इमिना बीजथा’’ति एवं देन्तिया वा, दापेन्तिया वा, अनुपसम्पन्नं वा उपतिट्ठापनत्थं आणापेन्तिया, उम्मत्तिकादीनञ्च अनापत्ति. भुञ्जन्तस्स भिक्खुनो हत्थपासे ठानं, पानीयस्स वा विधूपनस्स वा गहणन्ति इमानेत्थ द्वे अङ्गानि. समुट्ठानादीनि एळकलोमसदिसानीति.

उपतिट्ठनसिक्खापदवण्णना निट्ठिता.

७. आमकधञ्ञसिक्खापदवण्णना

सत्तमे विञ्ञत्वाति अन्तमसो मातरम्पि याचित्वा. भुञ्जेय्याति अज्झोहरेय्य. एत्थ च विञ्ञत्ति चेव भोजनञ्च पमाणं, तस्मा सयं विञ्ञत्वा अञ्ञाय भज्जनादीनि कारापेत्वा वा ¶ , अञ्ञाय विञ्ञापेत्वा सयं भज्जनादीनि कत्वा वा पटिग्गहणतो पट्ठाय याव दन्तेहि संखादनं, ताव पुब्बप्पयोगेसु दुक्कटानि, अज्झोहारे अज्झोहारे पाचित्तियं.

सावत्थियं सम्बहुला भिक्खुनियो आरब्भ आमकधञ्ञं विञ्ञापनवत्थुस्मिं पञ्ञत्तं, सयं वा अञ्ञाय वा अविञ्ञत्तिया लद्धं भज्जनादीनि कत्वा ¶ वा कारेत्वा वा भुञ्जन्तिया दुक्कटं, अञ्ञाय विञ्ञत्तिया लद्धं पन सयं भज्जनादीनि कत्वापि कारेत्वापि भुञ्जन्तिया दुक्कटमेव. आबाधे सति सेदकम्मादीनं अत्थाय विञ्ञापेन्तिया, अविञ्ञत्तिया लब्भमानं नवकम्मत्थाय सम्पटिच्छन्तिया, ञातकप्पवारितट्ठाने मुग्गमासादिअपरण्णं विञ्ञापेन्तिया, उम्मत्तिकादीनञ्च अनापत्ति. सत्तन्नं धञ्ञानं अञ्ञतरस्स विञ्ञापनं वा विञ्ञापापनं वा, पटिलाभो, भज्जनादीनि कत्वा वा कारेत्वा वा अज्झोहरणन्ति इमानेत्थ तीणि अङ्गानि. समुट्ठानादीनि अद्धानमग्गसिक्खापदसदिसानीति.

आमकधञ्ञसिक्खापदवण्णना निट्ठिता.

८. पठमउच्चारछड्डनसिक्खापदवण्णना

अट्ठमे सङ्कारन्ति कचवरं. विघासन्ति यंकिञ्चि परिभुत्तावसेसं उच्छिट्ठोदकम्पि दन्तकट्ठम्पि, अट्ठिकचलकेसु पन वत्तब्बमेव नत्थि. तिरोकुट्टे वा तिरोपाकारे वाति यस्सकस्सचि कुट्टस्स वा पाकारस्स वा परतो. छड्डेय्य वा छड्डापेय्य वाति सब्बानिपेतानि एकतो छड्डेन्तिया एकप्पयोगे एकापत्ति, सकिं आणत्तिया बहुकेपि छड्डिते एकाव.

सावत्थियं अञ्ञतरं भिक्खुनिं आरब्भ उच्चारं तिरोकुट्टे छड्डनवत्थुस्मिं पञ्ञत्तं, साणत्तिकं, भिक्खुस्स दुक्कटं ¶ , ओलोकेत्वा वा अवलञ्जे वा छड्डेन्तिया, उम्मत्तिकादीनञ्च अनापत्ति. उच्चारादिभावो, अनोलोकनं, वलञ्जनट्ठानं, तिरोकुट्टतिरोपाकारता, छड्डनं वा छड्डापनं वाति इमानेत्थ पञ्च अङ्गानि. समुट्ठानादीनि सञ्चरित्तसदिसानि, इदं पन किरियाकिरियन्ति.

पठमउच्चारछड्डनसिक्खापदवण्णना निट्ठिता.

९. दुतियउच्चारछड्डनसिक्खापदवण्णना

नवमे ¶ हरितेति खेत्ते वा नाळिकेरादिआरामे वा यत्थकत्थचि रोपिमहरितट्ठाने. तानि वत्थूनि छड्डेन्तिया वा छड्डापेन्तिया वा पुरिमनयेनेव ¶ आपत्ति, तादिसे ठाने निसीदित्वा अन्तमसो उदकं पिवित्वा मत्थकच्छिन्नं नाळिकेरम्पि छड्डेन्तिया आपत्तियेव.

सावत्थियं सम्बहुला भिक्खुनियो आरब्भ उच्चारादीनि हरिते छड्डनवत्थुस्मिं पञ्ञत्तं, साणत्तिकं, तिकपाचित्तियं, भिक्खुनो दुक्कटं, भिक्खुनियापि निक्खित्तबीजे खेत्ते याव अङ्कुरो न उट्ठहति, ताव दुक्कटं, अहरिते द्विकदुक्कटं. तस्मिं पन अहरितसञ्ञाय छड्डितखेत्ते वा, सामिके अपलोकेत्वा वा छड्डेन्तिया, उम्मत्तिकादीनञ्च अनापत्ति. सेसं अट्ठमसदिसमेवाति.

दुतियउच्चारछड्डनसिक्खापदवण्णना निट्ठिता.

१०. नच्चगीतसिक्खापदवण्णना

दसमे नच्चन्ति अन्तमसो मोरनच्चम्पि. गीतन्ति अन्तमसो धम्मभाणकगीतम्पि. वादितन्ति अन्तमसो उदकभेरिवादितम्पि. दस्सनायाति एतेसु यंकिञ्चि दस्सनाय गच्छन्तिया पदे पदे दुक्कटं, यत्थ ठिता पस्सति वा सुणाति वा, एकप्पयोगे एकापत्ति, तं तं दिसं ओलोकेन्तिया पयोगे पयोगे आपत्ति.

राजगहे छब्बग्गिया भिक्खुनियो आरब्भ नच्चादीनि दस्सनाय गमनवत्थुस्मिं पञ्ञत्तं, सयं तानि वत्थूनि करोन्तिया, अञ्ञं वा आणापेन्तिया, ‘‘चेतियस्स उपहारं देथा’’ति ईदिसेन परियायेन वा भणन्तिया, ‘‘चेतियस्स उपहारं करोमा’’ति वा वुत्ते ‘‘साधू’’ति सम्पटिच्छन्तिया च पाचित्तियमेवाति सब्बअट्ठकथासु (पाचि. अट्ठ. ८३५-८३७) वुत्तं, भिक्खुनो सब्बत्थ दुक्कटं. ‘‘तुम्हाकं चेतियस्स उपट्ठानं करोमा’’ति वुत्ते पन ‘‘उपट्ठानकरणं नाम सुन्दर’’न्ति ईदिसं परियायं भणन्तिया, आरामे ठत्वा पस्सन्तिया वा सुणन्तिया वा, तथा अत्तनो ठितोकासं आगन्त्वा पयोजितं पटिपथं गच्छन्तिया सम्मुखीभूतं सलाकभत्तादिके सति करणीये ¶ गन्त्वा, आपदासु वा समज्जट्ठानं पविसित्वापि पस्सन्तिया वा सुणन्तिया वा, उम्मत्तिकादीनञ्च अनापत्ति. नच्चादीनं अञ्ञतरता, अञ्ञत्र अनुञ्ञातकारणा ¶ गमनं, दस्सनं वा सवनं ¶ वाति इमानेत्थ तीणि अङ्गानि. समुट्ठानादीनि एळकलोमसदिसानि, इदं पन लोकवज्जं, अकुसलचित्तं, तिवेदनन्ति.

नच्चगीतसिक्खापदवण्णना निट्ठिता.

लसुणवग्गो पठमो.

२. रत्तन्धकारवग्गो

१. रत्तन्धकारसिक्खापदवण्णना

अन्धकारवग्गस्स पठमे रत्तन्धकारेति रत्तिअन्धकारे. अप्पदीपेति पज्जोतचन्दसूरियअग्गीसु एकेकेनापि अनोभासिते. पुरिसेनाति सन्तिट्ठितुं सल्लपितुञ्च विञ्ञुना मनुस्सपुरिसेन सद्धिं. सन्तिट्ठेय्य वाति हत्थपासे ठितमत्ताय पाचित्तियं. सल्लपेय्याति तत्थ ठत्वा गेहसितकथं कथेन्तियापि पाचित्तियमेव.

सावत्थियं अञ्ञतरं भिक्खुनिं आरब्भ एवं सन्तिट्ठनवत्थुस्मिं पञ्ञत्तं, पुरिसस्स हत्थपासं विजहित्वा, यक्खादीनं हत्थपासं अविजहित्वापि सन्तिट्ठन्तिया, सल्लपेन्तिया वा दुक्कटं, यंकिञ्चि विञ्ञुं दुतियं गहेत्वा एवं करोन्तिया, अरहोपेक्खाय, अञ्ञविहिताय, उम्मत्तिकादीनञ्च अनापत्ति. रत्तन्धकारता, पुरिसस्स हत्थपासे ठानं वा सल्लपनं वा, सहायाभावो, रहोपेक्खताति इमानेत्थ चत्तारि अङ्गानि. थेय्यसत्थसमुट्ठानं, किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, तिवेदनन्ति.

रत्तन्धकारसिक्खापदवण्णना निट्ठिता.

२. पटिच्छन्नोकाससिक्खापदवण्णना

दुतिये पटिच्छन्ने ओकासेति कुट्टादीसु येन केनचि पटिच्छन्ने, इदमेवेत्थ नानत्तं.

पटिच्छन्नोकाससिक्खापदवण्णना निट्ठिता.

३. अज्झोकाससल्लपनसिक्खापदवण्णना

ततिये ¶ ¶ अज्झोकासेति नानं, सेसं उभयत्थापि पठमसदिसमेवाति.

अज्झोकाससल्लपनसिक्खापदवण्णना निट्ठिता.

४. दुतियिकउय्योजनसिक्खापदवण्णना

चतुत्थे रथिकायाति रच्छायं. ब्यूहेति अनिविद्धरच्छायं ¶ . सिङ्घाटकेति चच्चरे. निकण्णिकं वा जप्पेय्याति कण्णमूले किञ्चि जप्पेय्य. उय्योजेय्याति अनाचारं चरितुकामताय ‘‘गच्छ त्व’’न्ति दुतियिकं उय्योजेय्य. पाचित्तियन्ति पुरिमनयेनेव ताव सन्तिट्ठनादीसु तीणि पाचित्तियानि, उय्योजेन्तिया पन उय्योजने च हत्थपासविजहने च दुक्कटं, विजहिते पाचित्तियं.

सावत्थियं थुल्लनन्दं आरब्भ एवं सन्तिट्ठनवत्थुस्मिं पञ्ञत्तं, सेसं पुरिमत्तयसदिसमेव. अनापत्तियं पन ‘‘न अनाचारं आचरितुकामा, सति करणीये दुतियिकं भिक्खुनिं उय्योजेती’’ति (पाचि. ८५२) एत्तकं अधिकन्ति.

दुतियिकउय्योजनसिक्खापदवण्णना निट्ठिता.

५. अनापुच्छापक्कमनसिक्खापदवण्णना

पञ्चमे पुरेभत्तन्ति अरुणुग्गमनं उपादाय याव मज्झन्हिकं. आसनेति पल्लङ्कस्सोकासभूते. सामिके अनापुच्छाति तस्मिं कुले यंकिञ्चि विञ्ञुं मनुस्सं अनापुच्छा. पक्कमेय्याति एत्थ छन्नस्स अन्तो निसीदित्वा अनोवस्सकं अज्झोकासे उपचारं अतिक्कामेन्तिया पठमपादे दुक्कटं, दुतिये पाचित्तियं.

सावत्थियं अञ्ञतरं भिक्खुनिं आरब्भ अनापुच्छा पक्कमनवत्थुस्मिं पञ्ञत्तं, तिकपाचित्तियं, पल्लङ्कस्स अनोकासे दुक्कटं, तथा आपुच्छिते ¶ अनापुच्छितसञ्ञाय चेव वेमतिकाय च. आपुच्छितसञ्ञाय पन, असंहारिमे, गिलानाय, आपदासु, उम्मत्तिकादीनञ्च ¶ अनापत्ति. पुरेभत्तता, अन्तरघरे निसज्जा, आसनस्स पल्लङ्कोकासता, अञ्ञत्र अनुञ्ञातकारणा अनापुच्छनं, वुत्तपरिच्छेदातिक्कमोति इमानेत्थ पञ्च अङ्गानि. समुट्ठानादीनि कथिनसदिसानि, इदं पन किरियाकिरियन्ति.

अनापुच्छापक्कमनसिक्खापदवण्णना निट्ठिता.

६. अनापुच्छाअभिनिसीदनसिक्खापदवण्णना

छट्ठे पच्छाभत्तन्ति मज्झन्हिके वीतिवत्ते याव सूरियस्स अत्थङ्गमा. अभिनिसीदेय्य वाति आदिम्हि निसीदित्वा गच्छन्तिया एका आपत्ति, अनिसीदित्वा निपज्जित्वाव गच्छन्तियापि एका, निसीदित्वा निपज्जन्तिया द्वे.

सावत्थियं थुल्लनन्दं आरब्भ आसने अभिनिसीदनवत्थुस्मिं पञ्ञत्तं ¶ , सेसं पञ्चमसदिसमेव. यथा पन तत्थ असंहारिमे, एवमिध धुवपञ्ञत्ते अनापत्तीति.

अनापुच्छाअभिनिसीदनसिक्खापदवण्णना निट्ठिता.

७. अनापुच्छासन्थरणसिक्खापदवण्णना

सत्तमे विकालेति अत्थङ्गते सूरिये. सेय्यन्ति अन्तमसो पण्णसन्थारम्पि, सेसं छट्ठसदिसमेव.

इदं पन सावत्थियं सम्बहुला भिक्खुनियो आरब्भ विकाले कुलानि उपसङ्कमित्वा सामिके अनापुच्छित्वा सेय्यं सन्थरित्वा अभिनिसीदनवत्थुस्मिं पञ्ञत्तं, अनापत्तियञ्चेत्थ धुवपञ्ञत्तं नाम नत्थीति.

अनापुच्छासन्थरणसिक्खापदवण्णना निट्ठिता.

८. परउज्झापनकसिक्खापदवण्णना

अट्ठमे ¶ ¶ दुग्गहितेन दूपधारितेनाति यं वुत्तं, ततो अञ्ञथा गहितेन च उपधारितेन च. परन्ति ‘‘अहं किरय्ये अय्यं न सक्कच्चं उपट्ठहामी’’तिआदिना (पाचि. ८६९) नयेन उपसम्पन्नं उज्झापेन्तिया पाचित्तियं.

सावत्थियं अञ्ञतरं भिक्खुनिं आरब्भ एवं परं उज्झापनवत्थुस्मिं पञ्ञत्तं, तिकपाचित्तियं, अनुपसम्पन्नाय तिकदुक्कटं, उम्मत्तिकादीनंयेव अनापत्ति. दुग्गहितता, उज्झापनं, यं उज्झापेति, तस्सा उपसम्पन्नताति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

परउज्झापनकसिक्खापदवण्णना निट्ठिता.

९. परअभिसपनसिक्खापदवण्णना

नवमे अभिसपेय्याति सपथं करेय्य. तत्थ ‘‘निरये उपपज्जामि, निरये उपपज्जतू’’तिएवमादीनि वदमाना निरयेन अभिसपति नाम, अक्कोसतीति अत्थो. ‘‘गिहिनी होमि, गिहिनी होतू’’तिएवमादीनि वदमाना ब्रह्मचरियेन. तस्सा वाचाय वाचाय पाचित्तियं.

सावत्थियं चण्डकाळिं आरब्भ एवं अभिसपनवत्थुस्मिं पञ्ञत्तं, तिकपाचित्तियं, अनुपसम्पन्नाय तिकदुक्कटं, तिरच्छानयोनिया वा पेत्तिविसयेन वा मनुस्सदोभग्गेन वा अभिसपने दुक्कटं. अत्थधम्मानुसासनिपुरेक्खारानं उम्मत्तिकादीनञ्च अनापत्ति. निरयेन वा ब्रह्मचरियेन वा अभिसपनं ¶ , उपसम्पन्नता, अत्थधम्मपुरेक्खारादीनं अभावोति इमानेत्थ तीणि अङ्गानि. समुट्ठानादीनि अट्ठमसदिसानेवाति.

परअभिसपनसिक्खापदवण्णना निट्ठिता.

१०. रोदनसिक्खापदवण्णना

दसमे ¶ वधित्वाति हत्थादीहि पहरित्वा, उभयं करोन्तियाव पाचित्तियं.

सावत्थियं ¶ चण्डकाळिं आरब्भ अत्तानं वधित्वा रोदनवत्थुस्मिं पञ्ञत्तं, केवलं वधन्तिया वा रोदन्तिया वा दुक्कटमेव. ञातिरोगभोगब्यसनेहि फुट्ठाय केवलं रोदन्तिया एव न वधन्तिया, उम्मत्तिकादीनञ्च अनापत्ति. अत्तानं वधनञ्चेव, रोदनञ्चाति इमानेत्थ द्वे अङ्गानि. समुट्ठानादीनि समनुभासनसदिसानि, इदं पन किरियमेवाति.

रोदनसिक्खापदवण्णना निट्ठिता.

रत्तन्धकारवग्गो दुतियो.

३. नग्गवग्गो

१. नग्गसिक्खापदवण्णना

नग्गवग्गस्स पठमे नग्गाति अनिवत्था वा अपारुता वा. एवञ्हि नहायन्तिया सब्बप्पयोगेसु दुक्कटं, नहानपरियोसाने पाचित्तियं.

सावत्थियं सम्बहुला भिक्खुनियो आरब्भ एवं नहानवत्थुस्मिं पञ्ञत्तं, उदकसाटिकचीवरे अच्छिन्ने वा नट्ठे वा, ‘‘महग्घं इदं दिस्वा चोरापि हरेय्यु’’न्ति एवरूपासु आपदासु वा नहायन्तिया, उम्मत्तिकादीनञ्च अनापत्ति. नग्गता, अनुञ्ञातकारणाभावो, नहानपरियोसानन्ति इमानेत्थ तीणि अङ्गानि. समुट्ठानादीनि एळकलोमसदिसानीति.

नग्गसिक्खापदवण्णना निट्ठिता.

२. उदकसाटिकसिक्खापदवण्णना

दुतिये ¶ सावत्थियं छब्बग्गिया भिक्खुनियो आरब्भ अप्पमाणिकायो उदकसाटिकायो धारणवत्थुस्मिं पञ्ञत्तं, सेसमेत्थ सब्बं रतनवग्गे निसीदनसिक्खापदे वुत्तनयेनेव वेदितब्बन्ति.

उदकसाटिकसिक्खापदवण्णना निट्ठिता.

३. चीवरसिब्बनसिक्खापदवण्णना

ततिये विसिब्बेत्वाति दुस्सिब्बितं पुनसिब्बनत्थाय विसिब्बेत्वा. अनन्तरायिकिनीति दससु अन्तरायेसु एकेकस्मिम्पि असति. अञ्ञत्र चतूहपञ्चाहाति ¶ विसिब्बितदिवसतो पञ्च दिवसे अतिक्कामेत्वा ‘‘नेव सिब्बिस्सामि ¶ , न सिब्बापनाय उस्सुक्कं करिस्सामी’’ति धुरं निक्खित्तमत्ते पाचित्तियं.

सावत्थियं थुल्लनन्दं आरब्भ चीवरं विसिब्बेत्वा न सिब्बनवत्थुस्मिं पञ्ञत्तं, तिकपाचित्तियं, अनुपसम्पन्नाय तिकदुक्कटं, तथा उभिन्नम्पि अञ्ञस्मिं परिक्खारे. या पन अन्तरायिकिनी वा होति, परियेसित्वा वा किञ्चि न लभति, करोन्ती वा पञ्चाहं अतिक्कामेति, तस्सा च, गिलानाय च, आपदासु च, उम्मत्तिकादीनञ्च अनापत्ति. निवासनपारुपनुपगचीवरता, उपसम्पन्नाय सन्तकता, सिब्बनत्थाय विसिब्बनं वा विसिब्बापनं वा, अञ्ञत्र अनुञ्ञातकारणा पञ्चाहातिक्कमो, धुरनिक्खेपोति इमानेत्थ पञ्च अङ्गानि. समुट्ठानादीनि समनुभासनसदिसानीति.

चीवरसिब्बनसिक्खापदवण्णना निट्ठिता.

४. सङ्घाटिचारसिक्खापदवण्णना

चतुत्थे पञ्च अहानि पञ्चाहं, पञ्चाहमेव पञ्चाहिकं. सङ्घाटीनं चारो सङ्घाटिचारो, परिभोगवसेन वा ओतापनवसेन वा सङ्घटितट्ठेन ‘सङ्घाटी’ति लद्धनामं तिचीवरं, उदकसाटिका, संकच्चिकाति इमेसं पञ्चन्नं चीवरानं परिवत्तनन्ति अत्थो. अतिक्कामेय्य पाचित्तियन्ति ¶ छट्ठे अरुणुग्गमने एकस्मिं चीवरे वुत्तनयेन अपरिवत्तिते एका आपत्ति, पञ्चसु पञ्च.

सावत्थियं सम्बहुला भिक्खुनियो आरब्भ चीवरं निक्खिपित्वा सन्तरुत्तरेन जनपदचारिकं पक्कमनवत्थुस्मिं पञ्ञत्तं, तिकपाचित्तियं, पञ्चाहानतिक्कन्ते द्विकदुक्कटं. तस्मिं पन अनतिक्कन्तसञ्ञाय, पञ्चमं दिवसं पञ्च चीवरानि निवासेन्तिया वा पारुपन्तिया वा ओतापेन्तिया वा, गिलानाय, ‘‘इदं मे चीवरं महग्घं ईदिसे चोरभये न सक्का धारेतु’’न्ति एवरूपासु आपदासु, उम्मत्तिकादीनञ्च अनापत्ति. पञ्चन्नं चीवरानं अञ्ञतरता, पञ्चाहातिक्कमो, अनुञ्ञातकारणाभावो, अपरिवत्तनन्ति इमानेत्थ चत्तारि अङ्गानि. समुट्ठानादीनि कथिनसदिसानीति.

सङ्घाटिचारसिक्खापदवण्णना निट्ठिता.

५. चीवरसङ्कमनीयसिक्खापदवण्णना

पञ्चमे ¶ ¶ चीवरसङ्कमनीयन्ति सङ्कमेतब्बं चीवरं, अञ्ञिस्सा सन्तकं अनापुच्छा गहितं पुन पटिदातब्बं पञ्चन्नं अञ्ञतरं चीवरन्ति अत्थो. धारेय्याति सचे तं निवासेति वा पारुपति वा पाचित्तियं.

सावत्थियं अञ्ञतरं भिक्खुनिं आरब्भ भिक्खुनिया चीवरं आदाय अनापुच्छा पारुपनवत्थुस्मिं पञ्ञत्तं, तिकपाचित्तियं, अनुपसम्पन्नाय तिकदुक्कटं. या पन ताय वा दिन्नं, तं वा आपुच्छा, अच्छिन्ननट्ठचीवरिका वा हुत्वा, ‘‘इदं मे चीवरं महग्घं ईदिसे चोरभये न सक्का धारेतु’’न्ति एवरूपासु आपदासु वा धारेति, तस्सा, उम्मत्तिकादीनञ्च अनापत्ति. चीवरसङ्कमनीयता, उपसम्पन्नाय सन्तकता, अनुञ्ञातकारणाभावो, धारणन्ति इमानेत्थ चत्तारि अङ्गानि. समुट्ठानादीनि पठमकथिनसदिसानि, इदं पन किरियाकिरियन्ति.

चीवरसङ्कमनीयसिक्खापदवण्णना निट्ठिता.

६. गणचीवरसिक्खापदवण्णना

छट्ठे ¶ गणस्साति भिक्खुनिसङ्घस्स. चीवरलाभन्ति विकप्पनुपगम्पि पच्छिमं लभितब्बं चीवरं. अन्तरायं करेय्याति यथा ते दातुकामा न देन्ति, एवं परक्कमेय्य. पाचित्तियन्ति सचे तस्सा वचनेन ते न देन्ति, भिक्खुनिया पाचित्तियं.

सावत्थियं थुल्लनन्दं आरब्भ गणस्स चीवरलाभन्तरायकरणवत्थुस्मिं पञ्ञत्तं, अञ्ञस्मिं परिक्खारे दुक्कटं, सम्बहुलानं पन एकभिक्खुनिया वा चीवरलाभेपि दुक्कटमेव. ‘‘समग्घकाले दस्सथा’’ति एवं आनिसंसं दस्सेत्वा निवारेन्तिया, उम्मत्तिकादीनञ्च अनापत्ति. विकप्पनुपगपच्छिमता, सङ्घस्स परिणतभावो, विना आनिसंसदस्सनेन अन्तरायकरणन्ति इमानेत्थ तीणि अङ्गानि. समुट्ठानादीनि अदिन्नादानसदिसानीति.

गणचीवरसिक्खापदवण्णना निट्ठिता.

७. पटिबाहनसिक्खापदवण्णना

सत्तमे ¶ धम्मिकं चीवरविभङ्गन्ति समग्गेन सङ्घेन सन्निपतित्वा करीयमानं चीवरविभङ्ग. पटिबाहेय्याति पटिसेधेय्य, एवं पटिसेधेन्तिया पाचित्तियं.

सावत्थियं ¶ थुल्लनन्दं आरब्भ धम्मिकं चीवरविभङ्गं पटिबाहनवत्थुस्मिं पञ्ञत्तं, धम्मिके वेमतिकाय, अधम्मिके धम्मिकसञ्ञाय चेव वेमतिकाय च दुक्कटं. उभयत्थ अधम्मिकसञ्ञाय, आनिसंसं दस्सेत्वा पटिबाहन्तिया, उम्मत्तिकादीनञ्च अनापत्ति. चीवरविभङ्गस्स धम्मिकता, धम्मिकसञ्ञिता, विना आनिसंसेन पटिबाहनन्ति इमानेत्थ तीणि अङ्गानि. समुट्ठानादीनि अदिन्नादानसदिसानेवाति.

पटिबाहनसिक्खापदवण्णना निट्ठिता.

८. चीवरदानसिक्खापदवण्णना

अट्ठमे समणचीवरन्ति कप्पकतं निवासनपारुपनुपगं, एवरूपं ठपेत्वा पञ्च सहधम्मिके मातापितरो ¶ च यस्स कस्सचि गहट्ठस्स वा पब्बजितस्स वा परिच्चजित्वा देन्तिया पाचित्तियं.

सावत्थियं थुल्लनन्दं आरब्भ अगारिकस्स समणचीवरदानवत्थुस्मिं पञ्ञत्तं, भिक्खुनो दुक्कटं. मातापितूनं परिच्चजित्वापि, अञ्ञेसं तावकालिकमेव देन्तिया, उम्मत्तिकादीनञ्च अनापत्ति. समणचीवरता, ठपेत्वा सहधम्मिके च मातापितरो च अञ्ञेसं दानं, अतावकालिकताति इमानेत्थ तीणि अङ्गानि. समुट्ठानादीनि सञ्चरित्तसदिसानीति.

चीवरदानसिक्खापदवण्णना निट्ठिता.

९. कालअतिक्कमनसिक्खापदवण्णना

नवमे दुब्बलचीवरपच्चासायाति दुब्बलाय चीवरपच्चासाय, ‘‘सचे सक्कोम दस्सामा’’ति एत्तकमत्तं सुत्वा उप्पादिताय आसायाति अत्थो ¶ . चीवरकालसमयं अतिक्कामेय्याति वस्संवुट्ठभिक्खुनीहि कालचीवरे भाजियमाने ‘‘आगमेय्याथ, अय्ये, अत्थि सङ्घस्स चीवरपच्चासा’’ति वत्वा तं चीवरविभङ्गं चीवरकालं अतिक्कामेय्य, तस्सा अनत्थते कथिने वस्सानस्स पच्छिममासं, अत्थते कथिने कथिनुब्भारदिवसं अतिक्कामेन्तिया पाचित्तियं.

सावत्थियं थुल्लनन्दं आरब्भ दुब्बलचीवरपच्चासाय चीवरकालसमयं अतिक्कमनवत्थुस्मिं पञ्ञत्तं, दुब्बलचीवरे ¶ वेमतिकाय, अदुब्बलचीवरे दुब्बलचीवरसञ्ञाय चेव वेमतिकाय च दुक्कटं. उभयत्थ अदुब्बलचीवरसञ्ञाय, किञ्चापि ‘न सक्कोमा’ति वदन्ति, ‘‘इदानि पन तेसं कप्पासो वा उप्पज्जिस्सति, सद्धो वा पुरिसो आगमिस्सति, तस्मिं आगते अद्धा दस्सन्ती’’ति एवं आनिसंसं दस्सेत्वा निवारेन्तिया, उम्मत्तिकादीनञ्च अनापत्ति. दुब्बलचीवरता, दुब्बलसञ्ञिता, विना आनिसंसेन निवारणन्ति इमानेत्थ तीणि अङ्गानि. समुट्ठानादीनि अदिन्नादानसदिसानीति.

कालअतिक्कमनसिक्खापदवण्णना निट्ठिता.

१०. कथिनुद्धारसिक्खापदवण्णना

दसमे ¶ धम्मिकं कथिनुद्धारन्ति सब्बासं भिक्खुनीनं अकालचीवरं दातुकामेन उपासकेन यत्तको अत्थारमूलिको आनिसंसो, ततो अधिकं वा समकं वा दत्वा याचितेन समग्गेन भिक्खुनिसङ्घेन यं कथिनं ञत्तिदुतियकम्मेन अन्तरा उद्धरीयति, तस्स सो उद्धारो ‘धम्मिको’ति वुच्चति, एवरूपं कथिनुद्धारन्ति अत्थो. पटिबाहेय्याति निवारेय्य, तस्स एवरूपं कथिनुद्धारं निवारेन्तिया पाचित्तियं.

सावत्थियं थुल्लनन्दं आरब्भ कथिनुद्धारं पटिबाहनवत्थुस्मिं पञ्ञत्तं, सेसं सत्तमे वुत्तनयेनेव वेदितब्बन्ति.

कथिनुद्धारसिक्खापदवण्णना निट्ठिता.

नग्गवग्गो ततियो.

४. तुवट्टवग्गो

१. एकमञ्चतुवट्टनसिक्खापदवण्णना

तुवट्टवग्गस्स ¶ पठमे तुवट्टेय्युन्ति निपज्जेय्युं. तासु पन एकाय वा निपन्नाय अपरा निपज्जतु, द्वेपि वा सहेव निपज्जन्तु, द्विन्नम्पि पाचित्तियं.

सावत्थियं सम्बहुला भिक्खुनियो आरब्भ द्विन्नं एकमञ्चे तुवट्टनवत्थुस्मिं पञ्ञत्तं, सचे पन एकाय निपन्नाय एका निसीदति, उभो वा निसीदन्ति, तासं, उम्मत्तिकादीनञ्च अनापत्ति. एकमञ्चता, द्विन्नं तुवट्टनन्ति इमानेत्थ द्वे अङ्गानि. समुट्ठानादीनि एळकलोमसदिसानीति.

एकमञ्चतुवट्टनसिक्खापदवण्णना निट्ठिता.

२. एकत्थरणतुवट्टनसिक्खापदवण्णना

दुतिये ¶ ¶ एकं अत्थरणञ्चेव पावुरणञ्च एतासन्ति एकत्थरणपावुरणा, संहारिमानं पावारत्थरणकटसारकादीनं एकं अन्तं अत्थरित्वा एकं पारुपित्वा तुवट्टेन्तीनमेतं अधिवचनं. पाचित्तियन्ति तंयेव अत्थरित्वा तं पारुपित्वा निपज्जन्तीनं पाचित्तियं.

सावत्थियं सम्बहुला भिक्खुनियो आरब्भ एवं तुवट्टनवत्थुस्मिं पञ्ञत्तं, तिकपाचित्तियं, अत्थरणे वा पावुरणे वा एकस्मिं दुक्कटं, नानत्थरणपावुरणे द्विकदुक्कटं. तस्मिं पन नानत्थरणपावुरणसञ्ञाय, ववत्थानं दस्सेत्वा निपज्जन्तिया, उम्मत्तिकादीनञ्च अनापत्ति. सेसं पठमसदिसमेवाति.

एकत्थरणतुवट्टनसिक्खापदवण्णना निट्ठिता.

३. अफासुकरणसिक्खापदवण्णना

ततिये अफासुन्ति ‘‘इमिना इमिस्सा अफासु भविस्सती’’ति अनापुच्छा पुरतो चङ्कमनट्ठाननिस्सज्जादयो वा उद्दिसउद्दिसापनपरिपुच्छनसज्झायं वा करोन्तिया चङ्कमने निवत्तनगणनाय, ठानादीसु पयोगगणनाय, उद्देसादीसु पदगणनाय पाचित्तियं.

सावत्थियं ¶ थुल्लनन्दं आरब्भ सञ्चिच्च अफासुकरणवत्थुस्मिं पञ्ञत्तं, तिकपाचित्तियं, अनुपसम्पन्नाय तिकदुक्कटं, न अफासुकामताय, आपुच्छा पुरतो चङ्कमनादीनि करोन्तिया, उम्मत्तिकादीनञ्च अनापत्ति. उपसम्पन्नता, अफासुकामता, अफासुकरणं, अनापुच्छनन्ति इमानेत्थ चत्तारि अङ्गानि. समुट्ठानादीनि अदिन्नादानसदिसानि, इदं पन किरियाकिरियं, दुक्खवेदनन्ति.

अफासुकरणसिक्खापदवण्णना निट्ठिता.

४. नउपट्ठापनसिक्खापदवण्णना

चतुत्थे ¶ दुक्खितन्ति गिलानं. सहजीविनिन्ति सद्धिविहारिनिं. नेव उपट्ठहेय्याति तस्सा उपट्ठानं सयं वा अकरोन्तिया, परेहि वा अकारेन्तिया धुरं निक्खित्तमत्ते पाचित्तियं.

सावत्थियं ¶ थुल्लनन्दं आरब्भ दुक्खितं सहजीविनिं अनुपट्ठानवत्थुस्मिं पञ्ञत्तं, अन्तेवासिनिया वा अनुपसम्पन्नाय वा दुक्कटं, दससु अञ्ञतरन्तराये सति परियेसित्वा अलभन्तिया, गिलानाय, आपदासु, उम्मत्तिकादीनञ्च अनापत्ति. गिलानता, सद्धिविहारिता, अनुञ्ञातकारणाभावो, उपट्ठाने धुरनिक्खेपोति इमानेत्थ चत्तारि अङ्गानि. समुट्ठानादीनि समनुभासनसदिसानीति.

नउपट्ठापनसिक्खापदवण्णना निट्ठिता.

५. निक्कड्ढनसिक्खापदवण्णना

पञ्चमे उपस्सयं दत्वाति सकवाटबद्धं अत्तनो पुग्गलिकविहारं दत्वा. निक्कड्ढेय्याति बहूनिपि द्वारानि एकप्पयोगेन निक्कड्ढेन्तिया एका आपत्ति, नानापयोगेहि पयोगगणनाय आपत्तियो, आणत्तियम्पि एसेव नयो. सचे पन ‘‘इमञ्चिमञ्च द्वारं अतिक्कामेही’’ति आणापेति, एकाय आणत्तिया एव द्वारगणनाय आपत्तियो.

सावत्थियं ¶ थुल्लनन्दं आरब्भ एतादिसे वत्थुस्मिं पञ्ञत्तं, तिकपाचित्तियं, अकवाटबद्धतो दुक्कटं, अनुपसम्पन्नाय तिकदुक्कटं, सकवाटबद्धतो वा अकवाटबद्धतो वा उभिन्नम्पि परिक्खारनिक्कड्ढने दुक्कटमेव, सेसं सङ्घिकविहारनिक्कड्ढनसिक्खापदे वुत्तनयमेवाति.

निक्कड्ढनसिक्खापदवण्णना निट्ठिता.

६. संसट्ठसिक्खापदवण्णना

छट्ठं ¶ उत्तानपदत्थमेव. सावत्थियं चण्डकाळिं आरब्भ संसट्ठविहारवत्थुस्मिं पञ्ञत्तं, सेसमेत्थ पठमअरिट्ठसिक्खापदे वुत्तविनिच्छयसदिसमेवाति.

संसट्ठसिक्खापदवण्णना निट्ठिता.

७. अन्तोरट्ठसिक्खापदवण्णना

सत्तमे अन्तोरट्ठेति यस्स विजिते विहरति, तस्स रट्ठे. असत्थिका चारिकन्ति विना सत्थेन गच्छन्तिया, गामन्तरगणनाय, अगामके अरञ्ञे अद्धयोजनगणनाय पाचित्तियं.

सावत्थियं सम्बहुला भिक्खुनियो आरब्भ वुत्तनयेनेव देसचारिकं ¶ पक्कमनवत्थुस्मिं पञ्ञत्तं. सत्थेन सह गच्छन्तिया, खेमे अप्पटिभये, आपदासु, उम्मत्तिकादीनञ्च अनापत्ति. अन्तोरट्ठता, अखेमता, अनुञ्ञातकारणाभावो, चारिकं पक्कमनन्ति इमानेत्थ चत्तारि अङ्गानि. समुट्ठानादीनि एळकलोमसदिसानीति.

अन्तोरट्ठसिक्खापदवण्णना निट्ठिता.

८. तिरोरट्ठसिक्खापदवण्णना

अट्ठमे तिरोरट्ठेति यस्स विजिते विहरति, तं ठपेत्वा अञ्ञस्स रट्ठे. सेसं सत्तमे वुत्तनयेनेव वेदितब्बं, नगरं पनेत्थ राजगहन्ति.

तिरोरट्ठसिक्खापदवण्णना निट्ठिता.

९. अन्तोवस्ससिक्खापदवण्णना

नवमे ¶ अन्तोवस्सन्ति पुरिमं वा तेमासं, पच्छिमं वा तेमासं अवसित्वा तस्स वस्सस्स ¶ अन्तोयेव. इध सत्ताहकरणीयेन वा केनचि उब्बळ्हाय वा आपदासु वा गच्छन्तिया उम्मत्तिकादीनञ्च अनापत्ति. सेसं अट्ठमसदिसमेवाति.

अन्तोवस्ससिक्खापदवण्णना निट्ठिता.

१०. चारिकनपक्कमनसिक्खापदवण्णना

दसमे वस्संवुट्ठाति पुरिमं वा तेमासं, पच्छिमं वा तेमासं वुट्ठा. छप्पञ्चयोजनानीति एत्थ पवारेत्वा पञ्च योजनानि गन्तुम्पि वट्टति, छसु वत्तब्बमेव नत्थि. सचे पन तीणि गन्त्वा तेनेव मग्गेन पच्चागच्छति, न वट्टति, अञ्ञेन आगन्तुं वट्टति. ‘‘वुत्तप्पमाणं अद्धानं न गच्छिस्सामी’’ति धुरे निक्खित्तमत्ते पाचित्तियं.

राजगहे सम्बहुला भिक्खुनियो आरब्भ वस्सं वसित्वा चारिकं अपक्कमनवत्थुस्मिं पञ्ञत्तं. अन्तराये सति, परियेसित्वा दुतियिकं भिक्खुनिं अलभन्तिया, गिलानाय, आपदासु, उम्मत्तिकादीनञ्च अनापत्ति. वस्संवुट्ठता, अनुञ्ञातकारणाभावो, पञ्चयोजनानतिक्कमोति इमानेत्थ तीणि अङ्गानि. समुट्ठानादीनि पठमपाराजिकसदिसानि, इदं पन अकिरियं, दुक्खवेदनन्ति.

चारिकनपक्कमनसिक्खापदवण्णना निट्ठिता.

तुवट्टवग्गो चतुत्थो.

५. चित्तागारवग्गो

१. राजागारसिक्खापदवण्णना

चित्तागारवग्गस्स पठमे राजागारन्ति रञ्ञो कीळनघरं. चित्तागारन्ति कीळनचित्तसालं. आरामन्ति कीळनउपवनं. उय्यानन्ति ¶ कीळनुय्यानं. पोक्खरणिन्ति कीळनपोक्खरणिं. दस्सनायाति ¶ ‘‘एतेसु यंकिञ्चि पस्सिस्सामी’’ति ¶ गच्छन्तिया पदे पदे दुक्कटं, यत्थ ठत्वा पस्सति, तत्थ पदं अनुद्धरित्वा पञ्चापि पस्सन्तिया एकाव आपत्ति. सचे पन तं तं विलोकेत्वा पस्सति, गीवं परिवत्तनप्पयोगगणनाय आपत्तियो, न उम्मीलनगणनाय.

सावत्थियं छब्बग्गिया भिक्खुनियो आरब्भ चित्तागारं दस्सनाय गमनवत्थुस्मिं पञ्ञत्तं, भिक्खुस्स सब्बत्थ दुक्कटं, अवसेसो विनिच्छयो नच्चदस्सनसिक्खापदे वुत्तनयेनेव वेदितब्बोति.

राजागारसिक्खापदवण्णना निट्ठिता.

२. आसन्दिपरिभुञ्जनसिक्खापदवण्णना

दुतिये आसन्दी नाम अतिक्कन्तप्पमाणा वुच्चति. पल्लङ्को नाम संहारिमेन वाळेन कतोति वुत्तो. परिभुञ्जेय्याति एत्थ पन निसीदननिपज्जनप्पयोगगणनाय पाचित्तियं वेदितब्बं.

सावत्थियं सम्बहुला भिक्खुनियो आरब्भ आसन्दिपल्लङ्कपरिभोगवत्थुस्मिं पञ्ञत्तं, आसन्दिया पादे छिन्दित्वा, पल्लङ्कस्स वाळे भिन्दित्वा परिभुञ्जन्तिया, उम्मत्तिकादीनञ्च अनापत्ति. आसन्दिपल्लङ्कता, निसीदनं निपज्जनं वाति इमानेत्थ द्वे अङ्गानि. समुट्ठानादीनि एळकलोमसदिसानीति.

आसन्दिपरिभुञ्जनसिक्खापदवण्णना निट्ठिता.

३. सुत्तकन्तनसिक्खापदवण्णना

ततिये सुत्तन्ति छन्नं अञ्ञतरं. कन्तेय्याति एत्थ यत्तकं हत्थेन अञ्छितं होति, तस्मिं तक्कम्हि वेठिते एका आपत्ति. इदञ्हि सन्धाय पदभाजनीये (पाचि. ९८८) ‘‘उज्जवुज्जवे’’ति वुत्तं.

सावत्थियं छब्बग्गिया भिक्खुनियो आरब्भ सुत्तं कन्तनवत्थुस्मिं पञ्ञत्तं, कन्तनतो पुब्बे ¶ कप्पासविचिननं आदिं कत्वा सब्बप्पयोगेसु हत्थवारगणनाय ¶ दुक्कटं. कन्तितसुत्तं कन्तन्तिया, उम्मत्तिकादीनञ्च अनापत्ति. अकन्तितता, कन्तनन्ति इमानेत्थ द्वे अङ्गानि. समुट्ठानादीनि एळकलोमसदिसानीति.

सुत्तकन्तनसिक्खापदवण्णना निट्ठिता.

४. गिहिवेय्यावच्चसिक्खापदवण्णना

चतुत्थे ¶ गिहिवेय्यावच्चन्ति गिहीनं वेय्यावच्चं. सचेपि हि मातापितरो अत्तनो किञ्चि कम्मं अकारापेत्वा तेसं यागुपचनादीनि करोन्ति, पुब्बप्पयोगेसु पयोगगणनाय दुक्कटानि आपज्जित्वा यागुआदीसु भाजनगणनाय, खादनीयादीसु पूवगणनाय पाचित्तियं आपज्जति.

सावत्थियं सम्बहुला भिक्खुनियो आरब्भ गिहीनं वेय्यावच्चकरणवत्थुस्मिं पञ्ञत्तं, मनुस्सेहि सङ्घस्स यागुपाने वा भत्ते वा चेतियपूजाय वा करीयमानाय तेसं सहायभावेन यागुपचनादीनि, अत्तनो वेय्यावच्चकरस्स च तानियेव करोन्तिया, उम्मत्तिकादीनञ्च अनापत्ति. गिहिवेय्यावच्चकरणं, अनुञ्ञातकारणाभावोति इमानेत्थ द्वे अङ्गानि. समुट्ठानादीनि एळकलोमसदिसानेवाति.

गिहिवेय्यावच्चसिक्खापदवण्णना निट्ठिता.

५. अधिकरणसिक्खापदवण्णना

पञ्चमे अधिकरणन्ति चतुन्नं अञ्ञतरं. पाचित्तियन्ति इध चीवरसिब्बने विय धुरं निक्खित्तमत्ते पाचित्तियं, एकाहम्पि परिहारो नत्थि.

सावत्थियं थुल्लनन्दं आरब्भ अधिकरणं नवूपसमनवत्थुस्मिं पञ्ञत्तं, सेसमेत्थ चीवरसिब्बनसिक्खापदे वुत्तनयेनेव वेदितब्बन्ति.

अधिकरणसिक्खापदवण्णना निट्ठिता.

६. भोजनदानसिक्खापदवण्णना

छट्ठे ¶ ¶ सहत्थाति कायेन वा कायप्पटिबद्धेन वा निस्सग्गियेन वा ठपेत्वा पञ्चसहधम्मिके अवसेसानं अञ्ञत्र उदकदन्तपोना यंकिञ्चि अज्झोहरणीयं ददन्तिया पाचित्तियं.

सावत्थियं थुल्लनन्दं आरब्भ अगारिकस्स खादनीयभोजनीयदानवत्थुस्मिं पञ्ञत्तं, उदकदन्तपोने दुक्कटं. या पन दापेति न देति, उपनिक्खिपित्वा देति, बाहिरलेपं देति, तस्सा, उम्मत्तिकादीनञ्च अनापत्ति. अञ्ञत्र उदकदन्तपोना अज्झोहरणियं, ठपेत्वा पञ्च सहधम्मिके अञ्ञस्स सहत्था दानन्ति इमानेत्थ द्वे अङ्गानि. समुट्ठानादीनि एळकलोमसदिसानीति.

भोजनदानसिक्खापदवण्णना निट्ठिता.

७. आवसथचीवरसिक्खापदवण्णना

सत्तमे ¶ आवसथचीवरन्ति ‘‘उतुनियो भिक्खुनियो परिभुञ्जन्तू’’ति दिन्नचीवरं. अनिस्सज्जित्वाति चतुत्थे दिवसे धोवित्वा अञ्ञिस्सा अन्तमसो सामणेरियापि उतुनिया अदत्वा. पाचित्तियन्ति एवं अनिस्सज्जित्वा परिभुञ्जन्तिया पाचित्तियं.

सावत्थियं थुल्लनन्दं आरब्भ आवसथचीवरं अनिस्सज्जित्वा परिभुञ्जनवत्थुस्मिं पञ्ञत्तं, तिकपाचित्तियं, निस्सज्जिते द्विकदुक्कटं. तस्मिं पन निस्सज्जितसञ्ञाय, पुन परियायेन वा, अञ्ञासं उतुनीनं अभावेन वा, अच्छिन्ननट्ठचीवरिकाय वा, आपदासु वा परिभुञ्जन्तिया, उम्मत्तिकादीनञ्च अनापत्ति. आवसथचीवरता, चतुत्थदिवसता, धोवित्वा अनिस्सज्जनं, अनुञ्ञातकारणाभावोति इमानेत्थ चत्तारि अङ्गानि. समुट्ठानादीनि कथिनसदिसानि, इदं पन किरियाकिरियन्ति.

आवसथचीवरसिक्खापदवण्णना निट्ठिता.

८. आवसथविहारसिक्खापदवण्णना

अट्ठमे ¶ ¶ आवसथन्ति कवाटबद्धविहारं. अनिस्सज्जित्वाति रक्खणत्थाय अदत्वा, ‘‘इदं जग्गेय्यासी’’ति एवं अनापुच्छित्वाति अत्थो. चारिकं पक्कमेय्य पाचित्तियन्ति एत्थ सकगामतो अञ्ञं गामं एकरत्तिवासत्थायपि पक्कमन्तिया परिक्खित्तस्स आवसथस्स परिक्खेपं, अपरिक्खित्तस्स उपचारं पठमपादेन अतिक्कन्तमत्ते दुक्कटं, दुतियेन पाचित्तियं.

सावत्थियं थुल्लनन्दं आरब्भ आवसथं अनिस्सज्जित्वा चारिकं पक्कमनवत्थुस्मिं पञ्ञत्तं, तिकपाचित्तियं, अकवाटबद्धे दुक्कटं, निस्सज्जिते द्विकदुक्कटं. तस्मिं पन निस्सज्जितसञ्ञाय, सति अन्तराये, पटिजग्गिकं परियेसित्वा अलभन्तिया, गिलानाय, आपदासु, उम्मत्तिकादीनञ्च अनापत्ति. सकवाटबद्धता, वुत्तनयेन पक्कमनं, अनुञ्ञातकारणाभावोति इमानेत्थ तीणि अङ्गानि. समुट्ठानादीनि कथिनसदिसानीति, इदं पन किरियाकिरियन्ति.

आवसथविहारसिक्खापदवण्णना निट्ठिता.

९. तिरच्छानविज्जापरियापुणनसिक्खापदवण्णना

नवमे तिरच्छानविज्जन्ति यंकिञ्चि बाहिरकं अनत्थसंहितं हत्थिअस्सरथधनुथरुसिप्पआथब्बणखिलनवसीकरणसोसापनमन्तागदप्पयोगादिभेदं ¶ परूपघातकरं विज्जं. परियापुणेय्याति एत्थ यस्स कस्सचि सन्तिके तं पदादिवसेन परियापुणन्तिया पदगणनाय चेव अक्खरगणनाय च पाचित्तियन्ति.

तिरच्छानविज्जापरियापुणनसिक्खापदवण्णना निट्ठिता.

१०. तिरच्छानविज्जावाचनसिक्खापदवण्णना

दसमे वाचेय्याति पदं विसेसो. उभयम्पि सावत्थियं छब्बग्गिया चेव सम्बहुला भिक्खुनियो च आरब्भ तिरच्छानविज्जं परियापुणनवाचनवत्थुस्मिं पञ्ञत्तं. लेखे, धारणाय ¶ च, गुत्तत्थाय च यक्खपरित्तनागमण्डलादिके ¶ सब्बपरित्ते, उम्मत्तिकादीनञ्च अनापत्ति. तिरच्छानविज्जता, परियापुणनवाचना, अनुञ्ञातकारणाभावोति इमानेत्थ द्वीसुपि तीणि अङ्गानि. समुट्ठानादीनि पदसोधम्मसदिसानीति.

तिरच्छानविज्जावाचनसिक्खापदवण्णना निट्ठिता.

चित्तागारवग्गो पञ्चमो.

६. आरामवग्गो

१. आरामपविसनसिक्खापदवण्णना

आरामवग्गस्स पठमे सभिक्खुकं आरामन्ति यत्थ भिक्खू रुक्खमूलेपि वसन्ति, तं पदेसं. अनापुच्छाति एत्थ भिक्खुसामणेरआरामिकेसु यंकिञ्चि अनापुच्छा, परिक्खित्तस्स आरामस्स परिक्खेपं अतिक्कमन्तिया, अपरिक्खित्तस्स उपचारं ओक्कमन्तिया पठमपादे दुक्कटं, दुतियपादे पाचित्तियं.

सावत्थियं सम्बहुला भिक्खुनियो आरब्भ अनापुच्छा आरामं पविसनवत्थुस्मिं पञ्ञत्तं, ‘‘सन्तं भिक्खुं अनापुच्छा’’ति च ‘‘जानं सभिक्खुक’’न्ति च इमानेत्थ द्वे अनुपञ्ञत्तियो, सभिक्खुके वेमतिकाय, अभिक्खुके सभिक्खुकसञ्ञाय चेव वेमतिकाय च दुक्कटं. तस्मिं पन दुविधेपि अभिक्खुकसञ्ञाय, सन्तं भिक्खुं आपुच्छा पविसन्तिया, पठमप्पविट्ठानं वा भिक्खुनीनं सीसंनुलोकिकाय, यत्थ वा भिक्खुनियो सन्निपतिता, तत्थ ‘‘तासं सन्तिकं गच्छामी’’ति सञ्ञाय, आरामेन वा मग्गो होति, तेन गच्छन्तिया, आपदासु, उम्मत्तिकादीनञ्च अनापत्ति. सभिक्खुकारामता ¶ , सभिक्खुकसञ्ञिता, वुत्तपरिच्छेदातिक्कमो, अनुञ्ञातकारणाभावोति इमानेत्थ चत्तारि अङ्गानि. समनुभासनसमउट्ठानं, किरियाकिरियं, सञ्ञाविमोक्खं, सचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति.

आरामपविसनसिक्खापदवण्णना निट्ठिता.

२. भिक्खुअक्कोसनसिक्खापदवण्णना

दुतिये ¶ अक्कोसेय्याति दसन्नं अक्कोसवत्थूनं अञ्ञतरेन सम्मुखा वा परम्मुखा वा अक्कोसेय्य. परिभासेय्याति भयमस्स उपदंसेय्य. पाचित्तियन्ति तस्सा एवं करोन्तिया पाचित्तियं.

वेसालियं ¶ छब्बग्गिया भिक्खुनियो आरब्भ आयस्मन्तं उपालिं अक्कोसनवत्थुस्मिं पञ्ञत्तं, तिकपाचित्तियं, अनुपसम्पन्ने तिकदुक्कटं, अत्थधम्मअनुसासनिपुरेक्खाराय, उम्मत्तिकादीनञ्च अनापत्ति. उपसम्पन्नता, अक्कोसनपरिभासनं, अत्थपुरेक्खारतादीनं अभावोति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

भिक्खुअक्कोसनसिक्खापदवण्णना निट्ठिता.

३. गणपरिभासनसिक्खापदवण्णना

ततिये चण्डिकताति कुद्धा. गणन्ति भिक्खुनिसङ्घं. परिभासेय्याति एत्थ ‘‘बाला एता अब्यत्ता एता, नेता जानन्ति कम्मं वा कम्मदोसं वा कम्मसम्पत्तिं वा कम्मविपत्तिं वा’’ति एवं यत्थ कत्थचि परिभासन्तिया पाचित्तियं.

सावत्थियं थुल्लनन्दं आरब्भ गणं परिभासनवत्थुस्मिं पञ्ञत्तं, सम्बहुला वा एकं वा अनुपसम्पन्नं वा परिभासन्तिया दुक्कटं. सेसं दुतियसदिसमेवाति.

गणपरिभासनसिक्खापदवण्णना निट्ठिता.

४. पवारितसिक्खापदवण्णना

चतुत्थे गणभोजने वुत्तनयेन निमन्तिता, पवारणासिक्खापदे वुत्तनयेन पवारिता वेदितब्बा. पाचित्तियन्ति तस्सा पुरेभत्तं ठपेत्वा यागुञ्चेव सेसानि च तीणि कालिकानि अञ्ञं यंकिञ्चि आमिसं अज्झोहरणत्थाय पटिग्गण्हन्तिया गहणे दुक्कटं, अज्झोहारे अज्झोहारे पाचित्तियं.

सावत्थियं ¶ सम्बहुला भिक्खुनियो आरब्भ अञ्ञत्र भुञ्जनवत्थुस्मिं पञ्ञत्तं, तीणि कालिकानि आहारत्थाय पटिग्गण्हन्तियापि ¶ अज्झोहरन्तियापि दुक्कटं. या पन निमन्तिता अप्पवारिता यागुं पिवति, सामिके अपलोकेत्वा ¶ भुञ्जति, तीणि कालिकानि सति पच्चये परिभुञ्जति, तस्सा, उम्मत्तिकादीनञ्च अनापत्ति. निमन्तिता वा पवारिता वा तं उभयं वा, पुरेभत्तं वुत्तलक्खणस्स आमिसस्स अज्झोहारो, सामिकानं अनापुच्छनन्ति इमानेत्थ तीणि अङ्गानि. अद्धानसमुट्ठानं, निमन्तिताय अनापुच्छा भुञ्जन्तिया आपत्तिसम्भवतो सिया किरियाकिरियं, पवारिताय कप्पियं कारेत्वापि अकारेत्वापि परिभुञ्जन्तिया आपत्तिसम्भवतो सिया किरियं, नोसञ्ञाविमोक्खं, अचित्तकं, पण्णत्तिवज्जं कायकम्मं, वचीकम्मं, तिचित्तं, तिवेदनन्ति.

पवारितसिक्खापदवण्णना निट्ठिता.

५. कुलमच्छरिनीसिक्खापदवण्णना

पञ्चमे कुले मच्छरो कुलमच्छरो, कुलमच्छरो एतिस्सा अत्थि, कुलं वा मच्छरायतीति कुलमच्छरिनी. अस्साति या ईदिसी भवेय्य. पाचित्तियन्ति तस्सा ‘‘यं कुलं भिक्खुनीनं पच्चये दातुकामं, कथं नाम तत्थ भिक्खुनियो न गच्छेय्यु’’न्ति भिक्खुनीनं वा सन्तिके कुलस्स, ‘‘कथं नाम इमे तासं किञ्चि न दज्जेय्यु’’न्ति कुलस्स वा सन्तिके भिक्खुनीनं अवण्णं भासन्तिया पाचित्तियं.

सावत्थियं अञ्ञतरं भिक्खुनिं आरब्भ कुलमच्छरायनवत्थुस्मिं पञ्ञत्तं. अमच्छरायित्वा सन्तंयेव आदीनवं आचिक्खन्तिया, उम्मत्तिकादीनञ्च अनापत्ति. भिक्खुनीनं अलाभकामता, कुलस्स वा सन्तिके भिक्खुनीनं भिक्खुनीनं वा सन्तिके कुलस्स अवण्णभणनन्ति इमानेत्थ द्वे अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

कुलमच्छरिनीसिक्खापदवण्णना निट्ठिता.

६. अभिक्खुकावाससिक्खापदवण्णना

छट्ठे सचे भिक्खुनुपस्सयतो अद्धयोजनब्भन्तरे ओवाददायका भिक्खू न वसन्ति, मग्गो ¶ वा अखेमो होति न सक्का अनन्तरायेन गन्तुं ¶ , अयं अभिक्खुको नाम आवासो. तत्थ ‘‘वस्सं वसिस्सामी’’ति सेनासनपञ्ञापनपानीयउपट्ठापनादीनि करोन्तिया दुक्कटं ¶ , सह अरुणुग्गमना पाचित्तियं. अयमेत्थ सङ्खेपो, वित्थारो पन समन्तपासादिकायं (पाचि. अट्ठ. १४४ आदयो) वुत्तो.

सावत्थियं सम्बहुला भिक्खुनियो आरब्भ अभिक्खुके आवासे वस्सं वसनवत्थुस्मिं पञ्ञत्तं, यत्थ पन वस्सूपगता भिक्खू पक्कन्ता वा होन्ति विब्भन्ता वा कालङ्कता वा पक्खसङ्कन्ता वा तत्थ वसन्तिया, आपदासु, उम्मत्तिकादीनञ्च अनापत्ति. अभिक्खुकावासता, वस्सूपगमनं, अरुणुग्गमनन्ति इमानेत्थ तीणि अङ्गानि. समुट्ठानादीनि एळकलोमसदिसानेवाति.

अभिक्खुकावाससिक्खापदवण्णना निट्ठिता.

७. अपवारणासिक्खापदवण्णना

सत्तमे वस्संवुट्ठाति पुरिमं वा पच्छिमं वा तेमासं वुट्ठा. उभतोसङ्घेति भिक्खुनिसङ्घे चेव भिक्खुसङ्घे च. अयं पनेत्थ विनिच्छयकथा – भिक्खुनीहि चातुद्दसेयेव सन्निपतित्वा ‘‘सुणातु मे, अय्ये, सङ्घो, अज्ज पवारणा चातुद्दसी, यदि सङ्घस्स पत्तकल्लं, सङ्घो पवारेय्या’’ति एवं सब्बसङ्गाहिकञत्तिं वा, ‘‘तेवाचिकं पवारेय्या’’ति एवं तेवाचिकञत्तिं वा, सति अन्तराये ‘‘द्वेवाचिकं, एकवाचिकं, समानवस्सिकं पवारेय्या’’ति एवं द्वेवाचिकादिञत्तिं वा ठपेत्वा सब्बसङ्गाहिकञत्ति चे ठपिता, ‘‘सङ्घं, अय्ये, पवारेमि दिट्ठेन वा सुतेन वा परिसङ्काय वा, वदन्तु मं अय्यायो अनुकम्पं उपादाय, पस्सन्ती पटिकरिस्सामी’’ति (चूळव. ४२७) एवं सकिं वा, ‘‘दुतियम्पि, अय्ये, सङ्घं…पे… ततियम्पि, अय्ये, सङ्घं…पे… पटिकरिस्सामी’’ति एवं द्वत्तिक्खत्तुं वा वत्वा पटिपाटिया पवारेतब्बं. तेवाचिकाय ञत्तिया वचनं न हापेतब्बं, द्वेवाचिकादीसु वड्ढेतुं वट्टति, हापेतुं न वट्टति. एवं भिक्खुनिसङ्घे पवारेत्वा तत्थेव एका भिक्खुनी भिक्खुनिक्खन्धके (चूळव. ४२७) वुत्तेन ञत्तिदुतियकम्मेन भिक्खुनिसङ्घस्सत्थाय भिक्खुसङ्घं पवारेतुं सम्मन्नितब्बा. ताय सम्मताय भिक्खुनिया पन्नरसे ¶ भिक्खुनिसङ्घं आदाय भिक्खुसङ्घं उपसङ्कमित्वा एकंसं उत्तरासङ्गं करित्वा अञ्जलिं पग्गहेत्वा एवमस्स ¶ वचनीयो ‘‘भिक्खुनिसङ्घो अय्य भिक्खुसङ्घं पवारेति दिट्ठेन वा सुतेन वा परिसङ्काय वा, वदताय्य भिक्खुसङ्घो भिक्खुनिसङ्घं ¶ अनुकम्पं उपादाय, पस्सन्तो पटिकरिस्सति, दुतियम्पि अय्य…पे… ततियम्पि अय्य…पे… पस्सन्तो पटिकरिस्सती’’ति एवं पवारेतब्बं.

सचे पञ्चवग्गो भिक्खुनिसङ्घो न पूरति, चतूहि वा तीहि वा गणञत्तिं ठपेत्वा, द्वीहि विना ञत्तिया अञ्ञमञ्ञं पवारेतब्बं. एकाय ‘‘अज्ज मे पवारणा’’ति अधिट्ठातब्बं.

विहारं पन गन्त्वा ‘‘भिक्खुनियो, अय्य, भिक्खुसङ्घं पवारेन्ति दिट्ठेन वा सुतेन वा परिसङ्काय वा, वदताय्य भिक्खुसङ्घो भिक्खुनियो अनुकम्पं उपादाय, पस्सन्तियो पटिकरिस्सन्ती’’ति च, ‘‘अहं, अय्य, भिक्खुसङ्घं पवारेमि दिट्ठेन वा सुतेन वा परिसङ्काय वा, वदतु मं, अय्य, भिक्खुसङ्घो अनुकम्पं उपादाय, पस्सन्ती पटिकरिस्सामी’’ति च एवं तिक्खत्तुं वत्तब्बं.

सचे भिक्खुसङ्घो न पूरति, ‘‘भिक्खुनिसङ्घो, अय्य, अय्ये पवारेति दिट्ठेन वा सुतेन वा परिसङ्काय वा, वदन्तु अय्या भिक्खुनिसङ्घं अनुकम्पं उपादाय, पस्सन्तो पटिकरिस्सती’’ति च, ‘‘भिक्खुनिसङ्घो, अय्य, अय्यं पवारेति दिट्ठेन वा सुतेन वा परिसङ्काय वा, वदताय्यो भिक्खुनिसङ्घं अनुकम्पं उपादाय, पस्सन्तो पटिकरिस्सती’’ति च एवं तिक्खत्तुं वत्तब्बं.

उभिन्नं अपरिपूरिया ‘‘भिक्खुनियो, अय्या, अय्ये पवारेन्ति दिट्ठेन वा सुतेन वा परिसङ्काय वा, वदन्ताय्या भिक्खुनियो अनुकम्पं उपादाय, पस्सन्तियो पटिकरिस्सन्ती’’ति च, ‘‘भिक्खुनियो, अय्य, अय्यं पवारेन्ति दिट्ठेन वा सुतेन वा परिसङ्काय वा, वदताय्यो भिक्खुनियो अनुकम्पं उपादाय, पस्सन्तियो पटिकरिस्सन्ती’’ति च, ‘‘अहं, अय्या, अय्ये पवारेमि दिट्ठेन वा सुतेन वा…पे… वदन्तु मं, अय्या, अनुकम्पं उपादाय, पस्सन्ती पटिकरिस्सामी’’ति च, ‘‘अहं, अय्य, अय्यं पवारेमि दिट्ठेन वा सुतेन वा…पे… वदतु मं, अय्यो, अनुकम्पं उपादाय, पस्सन्ती पटिकरिस्सामी’’ति च एवं तिक्खत्तुं वत्तब्बं. सब्बाहेव हि इमिना ¶ नयेन उभतोसङ्घे ¶ पवारिता होति, या पन वस्संवुट्ठा ‘‘उभतोसङ्घे एवं न पवारेस्सामी’’ति धुरं निक्खिपति, तस्सा सह धुरनिक्खेपेन पाचित्तियं.

सावत्थियं सम्बहुला भिक्खुनियो आरब्भ वस्सं वसित्वा न पवारणावत्थुस्मिं पञ्ञत्तं. अन्तराये ¶ पन सति, परियेसित्वा भिक्खू अलभन्तिया, गिलानाय, आपदासु, उम्मत्तिकादीनञ्च अनापत्ति. वस्संवुट्ठता, न उभतोसङ्घे पवारणा, अनुञ्ञातकारणाभावोति इमानेत्थ तीणि अङ्गानि. समुट्ठानादीनि समनुभासनसदिसानीति.

अपवारणासिक्खापदवण्णना निट्ठिता.

८. ओवादसिक्खापदवण्णना

अट्ठमे ओवादायाति गरुधम्मस्सवनत्थाय. संवासायाति उपोसथपुच्छनत्थाय चेव पवारणत्थाय च. पाचित्तियन्ति ‘‘एतेसं अत्थाय न गच्छामी’’ति धुरं निक्खित्तमत्ते पाचित्तियं.

सक्केसु छब्बग्गिया भिक्खुनियो आरब्भ ओवादाय अगमनवत्थुस्मिं पञ्ञत्तं. अन्तराये पन सति, परियेसित्वा दुतियिकं अलभन्तिया, गिलानाय, आपदासु, उम्मत्तिकादीनञ्च अनापत्ति. ओवादसंवासानं अत्थाय अगमनं, अनुञ्ञातकारणाभावोति इमानेत्थ द्वे अङ्गानि. समुट्ठानादीनि पठमपाराजिकसदिसानि, इदं पन अकिरियं, दुक्खवेदनन्ति.

ओवादसिक्खापदवण्णना निट्ठिता.

९. ओवादूपसङ्कमनसिक्खापदवण्णना

नवमे अन्वद्धमासन्ति अद्धमासे अद्धमासे. उपोसथपुच्छकन्ति उपोसथपुच्छनं. ओवादूपसङ्कमनन्ति ओवादत्थाय उपसङ्कमनं. तं अतिक्कामेन्तियाति एत्थ भिक्खुनीहि तेरसे वा चातुद्दसे वा आरामं गन्त्वा ‘‘अयं उपोसथो चातुद्दसो पन्नरसो’’ति पुच्छितब्बं, उपोसथदिवसे ¶ निदानवण्णनायं वुत्तनयेन ओवादूपसङ्कमनं याचितब्बं. या भिक्खुनी वुत्तप्पकारे काले तदुभयं न करोति, सा तं अतिक्कामेति नाम, तस्सा ¶ ‘‘उपोसथम्पि न पुच्छिस्सामि, ओवादम्पि न याचिस्सामी’’ति धुरं निक्खित्तमत्ते पाचित्तियं.

सावत्थियं सम्बहुला भिक्खुनियो आरब्भ उपोसथओवादानं अपुच्छनअयाचनवत्थुस्मिं पञ्ञत्तं ¶ , अनापत्ति अट्ठमसदिसायेव. उपोसथोवादानं अपुच्छनअयाचनायं धुरनिक्खेपो, अनुञ्ञातकारणाभावोति इमानेत्थ द्वे अङ्गानि. समुट्ठानादीनि समनुभासनसदिसानीति.

ओवादूपसङ्कमनसिक्खापदवण्णना निट्ठिता.

१०. पसाखेजातसिक्खापदवण्णना

दसमे पसाखेति नाभिया हेट्ठा जाणुमण्डलानं उपरिपदेसे. ततो हि यस्मा रुक्खस्स साखा विय उभो ऊरू पभिज्जित्वा गता, तस्मा सो ‘‘पसाखो’’ति वुच्चति, तस्मिं पसाखे. गण्डन्ति यंकिञ्चि गण्डं. रुधितन्ति वणं. भेदापेय्य वातिआदीसु सचे ‘‘भिन्द फालेही’’ति सब्बानि आणापेति, सो च तथेव करोति, छ दुक्कटानि छ च पाचित्तियानि. अथापि ‘‘यंकिञ्चि एत्थ कत्तब्बं, तं सब्बं करोही’’ति एवं आणापेति, सो च सब्बानिपि भेदनादीनि करोति, एकवाचाय छ दुक्कटानि छ च पाचित्तियानि. सचे पन भेदनादीसु एकंयेव ‘‘इदं नाम करोही’’ति आणापेति, सो च सब्बानि करोति. यं आणत्तं, तस्सेव करणे पाचित्तियं.

सावत्थियं अञ्ञतरं भिक्खुनिं आरब्भ पसाखे जातं गण्डं पुरिसेन भेदापनवत्थुस्मिं पञ्ञत्तं, अपलोकेत्वा वा विञ्ञुं वा यंकञ्चि दुतियिकं गहेत्वा एवं करोन्तिया, उम्मत्तिकादीनञ्च अनापत्ति. पसाखे जातता, अनपलोकनं, दुतियिकाभावो, पुरिसेन भेदादीनं कारापनन्ति इमानेत्थ चत्तारि अङ्गानि. समुट्ठानादीनि कथिनसदिसानि, इदं पन किरियाकिरियन्ति.

पसाखेजातसिक्खापदवण्णना निट्ठिता.

आरामवग्गो छट्ठो.

७. गब्भिनीवग्गो

१. गब्भिनीसिक्खापदवण्णना

गब्भिनिवग्गस्स ¶ ¶ पठमे ‘‘गब्भिनी’’ति जानित्वा उपज्झायाय वुट्ठापेन्तिया गणपरियेसनादीसु च ञत्तिकम्मवाचाद्वये च दुक्कटं, कम्मवाचापरियोसाने पाचित्तियं.

सावत्थियं ¶ सम्बहुला भिक्खुनियो आरब्भ गब्भिनिं वुट्ठापनवत्थुस्मिं पञ्ञत्तं, गब्भिनिया वेमतिकाय अगब्भिनिया गब्भिनिसञ्ञाय चेव वेमतिकाय च दुक्कटं. उभोसु अगब्भिनिसञ्ञाय, उम्मत्तिकादीनञ्च अनापत्ति. गब्भिनिता, ‘गब्भिनी’ति जाननं, वुट्ठापनन्ति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन पण्णत्तिवज्जं, तिचित्तं, तिवेदनन्ति.

गब्भिनीसिक्खापदवण्णना निट्ठिता.

२. पायन्तीसिक्खापदवण्णना

दुतिये पायन्तिन्ति थञ्ञं पायमानं, यं पायेति, तस्स माता वा, धाति वा. इदं वत्थुमत्तमेवेत्थ विसेसो, सेसं पठमसिक्खापदसदिसमेवाति.

पायन्तीसिक्खापदवण्णना निट्ठिता.

३. पठमसिक्खमानसिक्खापदवण्णना

ततिये द्वे वस्सानीति पवारणावसेन द्वे संवच्छरानि. छसु धम्मेसूति पाणातिपातावेरमणिआदीसु विकालभोजनावेरमणिपरियोसानेसु छसु सिक्खापदेसु. असिक्खितसिक्खन्ति पदभाजने (पाचि. १०७७) वुत्तनयेनेव अदिन्नसिक्खं वा कुपितसिक्खं वा. सिक्खमानं वुट्ठापेय्याति तेसु छसु धम्मेसु सिक्खनतो, ते वा सिक्खासङ्खाते ¶ धम्मे माननतो एवंलद्धनामं अनुपसम्पन्नं उपसम्पादेय्य. पाचित्तियन्ति पठमसिक्खापदे वुत्तनयेनेव कम्मवाचापरियोसाने पाचित्तियं.

सावत्थियं ¶ सम्बहुला भिक्खुनियो आरब्भ एवरूपं सिक्खमानं वुट्ठापनवत्थुस्मिं पञ्ञत्तं, धम्मकम्मे तिकपाचित्तियं, अधम्मकम्मे तिकदुक्कटं. द्वे वस्सानि छसु धम्मेसु सिक्खितसिक्खं सिक्खमानं वुट्ठापेन्तिया, उम्मत्तिकादीनञ्च अनापत्ति. वुत्तनयेन असिक्खितसिक्खता, धम्मकम्मता, कम्मवाचापरियोसानन्ति इमानेत्थ तीणि अङ्गानि. समुट्ठानादीनि पठमे वुत्तनयानेवाति.

पठमसिक्खमानसिक्खापदवण्णना निट्ठिता.

४. दुतियसिक्खमानसिक्खापदवण्णना

चतुत्थे ¶ सङ्घेन असम्मतन्ति यस्सा सङ्घेन अन्तमसो उपसम्पदामाळकेपि पदभाजने (पाचि. १०८६) वुत्ता उपसम्पदासम्मुति न दिन्ना होति, तं इमा द्वेपि महासिक्खमाना नाम. इध सङ्घेन सम्मतं वुट्ठापेन्तिया, उम्मत्तिकादीनञ्च अनापत्ति. सेसं ततिये वुत्तसदिसमेव, इदं पन किरियाकिरियं होतीति.

दुतियसिक्खमानसिक्खापदवण्णना निट्ठिता.

५. पठमगिहिगतसिक्खापदवण्णना

पञ्चमे गिहिगतन्ति पुरिसन्तरगतं, इधापि इदं वत्थुमत्तमेव विसेसो. ऊनद्वादसवस्सञ्च परिपुण्णसञ्ञाय वुट्ठापेन्तिया किञ्चापि अनापत्ति, सा पन अनुपसम्पन्नाव होति. सेसं पठमसिक्खापदसदिसमेवाति.

पठमगिहिगतसिक्खापदवण्णना निट्ठिता.

६-७. दुतियततियगिहिगतसिक्खापदवण्णना

छट्ठे ¶ सब्बं ततिये वुत्तनयेन. सत्तमेपि सब्बं चतुत्थे वुत्तनयेनेव वेदितब्बन्ति.

दुतियततियगिहिगतसिक्खापदवण्णना निट्ठिता.

८. पठमसहजीविनिसिक्खापदवण्णना

अट्ठमे ¶ सहजीविनिन्ति सद्धिविहारिनिं. नेव अनुग्गण्हेय्याति सयं उद्देसादीहि नानुग्गण्हेय्य. न अनुग्गण्हापेय्याति ‘‘इमिस्सा, अय्ये, उद्देसादीनि देही’’ति एवं न अञ्ञाय अनुग्गण्हापेय्य. पाचित्तियन्ति धुरे निक्खित्तमत्ते पाचित्तियं.

सावत्थियं थुल्लनन्दं आरब्भ एवरूपे वत्थुस्मिं पञ्ञत्तं, सेसमेत्थ तुवट्टवग्गे दुक्खितसहजीविनिसिक्खापदे वुत्तसदिसमेवाति.

पठमसहजीविनिसिक्खापदवण्णना निट्ठिता.

९. नानुबन्धनसिक्खापदवण्णना

नवमे वुट्ठापितं पवत्तिनिन्ति वुट्ठापितं पवत्तिनिं याय उपसम्पादिता, तं उपज्झायिनिन्ति अत्थो. नानुबन्धेय्याति चुण्णेन मत्तिकाय दन्तकट्ठेन मुखोदकेनाति एवं तेन तेन करणीयेन न उपट्ठहेय्य. पाचित्तियन्ति नानुबन्धिस्सन्ति धुरे निक्खित्तमत्ते पाचित्तियं.

सावत्थियं ¶ सम्बहुला भिक्खुनियो आरब्भ नानुबन्धनवत्थुस्मिं पञ्ञत्तं. बालं पन अलज्जिनिं वा अननुबन्धन्तिया, गिलानाय, आपदासु, उम्मत्तिकादीनञ्च अनापत्ति. वुट्ठापितप्पवत्तिनिता, द्वे वस्सानि अननुबन्धने धुरनिक्खेपो, अनुञ्ञातकारणाभावोति इमानेत्थ तीणि अङ्गानि. समुट्ठानादीनि पठमपाराजिकसदिसानि, इदं पन अकिरियं, दुक्खवेदनन्ति.

नानुबन्धनसिक्खापदवण्णना निट्ठिता.

१०. दुतियसहजीविनिसिक्खापदवण्णना

दसमे ¶ नेव वूपकासेय्याति न गहेत्वा गच्छेय्य. न वूपकासापेय्याति ‘‘इमं, अय्ये, गहेत्वा गच्छाही’’ति अञ्ञं न आणापेय्य. पाचित्तियन्ति धुरे निक्खित्तमत्ते पाचित्तियं.

सावत्थियं थुल्लनन्दं आरब्भ सहजीविनिया अवूपकासनवत्थुस्मिं पञ्ञत्तं. सति पन अन्तराये, परियेसित्वा दुतियिकं अलभन्तिया, गिलानाय ¶ , आपदासु, उम्मत्तिकादीनञ्च अनापत्ति. सहजीविनिता, वूपकासवूपकासापने धुरनिक्खेपो, अनुञ्ञातकारणाभावोति इमानेत्थ तीणि अङ्गानि. समुट्ठानादीनि समनुभासनसदिसानीति.

दुतियसहजीविनिसिक्खापदवण्णना निट्ठिता.

गब्भिनीवग्गो सत्तमो.

८. कुमारिभूतवग्गो

१-२-३. पठमकुमारिभूतादिसिक्खापदवण्णना

कुमारिभूतवग्गस्स पठमदुतियततियानि तीहि गिहिगतसिक्खापदेहि सदिसानेव. या पन ता सब्बपठमा द्वे महासिक्खमाना, ता अतिक्कन्तवीसतिवस्साति वेदितब्बा. ता हि गिहिगता वा होन्तु, अगिहिगता वा, सम्मुतिकम्मादीसु ‘‘सिक्खमाना’’इच्चेव वत्तब्बा, ‘‘गिहिगता’’ति वा ‘‘कुमारिभूता’’ति वा न वत्तब्बा. गिहिगताय दसवस्सकाले सिक्खासम्मुतिं दत्वा द्वादसवस्सकाले उपसम्पदा कातब्बा, एकादसवस्सकाले दत्वा तेरसवस्सकाले कातब्बा, द्वादसतेरसचुद्दसपन्नरससोळससत्तरसअट्ठारसवस्सकाले सिक्खासम्मुतिं दत्वा वीसतिवस्सकाले उपसम्पदा कातब्बा. अट्ठारसवस्सकालतो पट्ठाय च पनायं ‘‘गिहिगता’’तिपि ‘‘कुमारिभूता’’तिपि वत्तुं वट्टति. या पनायं ‘‘कुमारिभूता’’ति वुत्ता सामणेरी ¶ , सा ‘‘गिहिगता’’ति न वत्तब्बा, ‘‘कुमारिभूता’’इच्चेव ¶ वत्तब्बा. सिक्खासम्मुतिदानवसेन पन सब्बापि ‘‘सिक्खमाना’’ति वत्तुं वट्टतीति.

पठमकुमारिभूतादिसिक्खापदवण्णना निट्ठिता.

४. ऊनद्वादसवस्ससिक्खापदवण्णना

चतुत्थे ऊनद्वादसवस्साति उपसम्पदावसेन अपरिपुण्णद्वादसवस्सा. पाचित्तियन्ति उपज्झाया हुत्वा वुट्ठापेन्तिया वुत्तनयेनेव दुक्कटानि अन्तरा, कम्मवाचापरियोसाने पाचित्तियन्ति.

ऊनद्वादसवस्ससिक्खापदवण्णना निट्ठिता.

५. परिपुण्णद्वादसवस्ससिक्खापदवण्णना

पञ्चमे ¶ सङ्घेन असम्मताति यस्सा सङ्घेन पदभाजने (पाचि. ११३२) वुत्ता वुट्ठापनसम्मुति न दिन्ना. सेसं उभयत्थापि महासिक्खमानासिक्खापदद्वयसदिसमेवाति.

परिपुण्णद्वादसवस्ससिक्खापदवण्णना निट्ठिता.

६. खीयनधम्मसिक्खापदवण्णना

छट्ठे अलं ताव ते अय्ये वुट्ठापितेनाति वुच्चमानाति वुट्ठापनसम्मुतिया याचिताय सङ्घेन उपपरिक्खिपित्वा ‘‘यस्मा बाला अब्यत्ता च अलज्जिनी च होति, तस्मा अलं ताव तुय्हं उपसम्पादितेना’’ति एवं निवारीयमाना. पच्छा खीयनधम्मन्ति पच्छा अञ्ञासं ब्यत्तानं लज्जिनीनं वुट्ठापनसम्मुतिं दिय्यमानं दिस्वा ‘‘अहमेव नून बाला’’तिआदीनि भणमाना यत्थ कत्थचि खीयेय्य. पाचित्तियन्ति एवं खीयनधम्मं आपज्जन्तिया पाचित्तियं.

सावत्थियं चण्डकाळिं आरब्भ एवं खीयनधम्मं आपज्जनवत्थुस्मिं पञ्ञत्तं, पकतिया छन्दादीनं वसेन करोन्तीनं खीयन्तिया, उम्मत्तिकादीनञ्च अनापत्ति. वुट्ठापनसम्मुतिया याचनं, उपपरिक्खित्वा न छन्दादिवसेन पटिक्खित्ताय ‘‘साधू’’ति पटिस्सवो, पच्छाखीयनन्ति ¶ इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

खीयनधम्मसिक्खापदवण्णना निट्ठिता.

७-८. सिक्खमाननवुट्ठापनपठमदुतियसिक्खापदवण्णना

सत्तमे सा पच्छाति सिक्खमानाय उपसम्पदाय याचियमानाय सा भिक्खुनी एवं वत्वा लद्धे चीवरे पच्छा असति अन्तराये ‘‘नेव वुट्ठापेस्सामि ¶ , न वुट्ठापनाय उस्सुक्कं करिस्सामी’’ति धुरं निक्खिपेय्य, तस्सा सह धुरनिक्खेपेन पाचित्तियन्ति. अट्ठमेपि एसेव नयो.

उभयम्पि सावत्थियं थुल्लनन्दं आरब्भ एतेसु वत्थूसु पञ्ञत्तं, द्वीसुपि सति अन्तराये, परियेसित्वा अलभन्तिया, गिलानाय, आपदासु, उम्मत्तिकादीनञ्च ¶ अनापत्ति. उभयत्थ ‘‘एवाहं तं वुट्ठापेस्सामी’’ति पटिञ्ञा, आकङ्खितनिप्फत्ति, पच्छा धुरनिक्खेपो, अनुञ्ञातकारणाभावोति इमानेत्थ चत्तारि अङ्गानि. समुट्ठानादीनि समनुभासनसदिसानीति.

सिक्खमाननवुट्ठापनपठमदुतियसिक्खापदवण्णना निट्ठिता.

९. सोकावाससिक्खापदवण्णना

नवमे सोकावासन्ति सङ्केतं कत्वा आगच्छमाना पुरिसानं अन्तोसोकं पवेसेतीति सोकावासा, तं सोकावासं. अथ वा घरं विय घरसामिका अयम्पि पुरिससमागमं अलभमाना सोकं आविसति, इति यं आविसति, स्वास्सा आवासो होतीति सोकावासा. तेनेवस्स पदभाजने (पाचि. ११६०) ‘‘सोकावासा नाम परेसं दुक्खं उप्पादेति, सोकं आविसती’’ति द्विधा अत्थो वुत्तो. पाचित्तियन्ति एवरूपं वुट्ठापेन्तिया वुत्तनयेनेव कम्मवाचापरियोसाने उपज्झायाय पाचित्तियं.

सावत्थियं थुल्लनन्दं आरब्भ एवरूपं सिक्खमानं वुट्ठापनवत्थुस्मिं पञ्ञत्तं. अजानन्तिया ¶ , उम्मत्तिकादीनञ्च अनापत्ति. सोकावासता, जाननं, वुट्ठापनन्ति इमानेत्थ तीणि अङ्गानि. समुट्ठानादीनि गब्भिनिवुट्ठापनसदिसानेवाति.

सोकावाससिक्खापदवण्णना निट्ठिता.

१०. अननुञ्ञातसिक्खापदवण्णना

दसमे मातापितूहीति विजातमातरा च जनकपितरा च. सामिकेनाति येन परिग्गहिता, तेन. अननुञ्ञातन्ति उपसम्पदत्थाय अननुञ्ञातं. द्विक्खत्तुञ्हि भिक्खुनीहि आपुच्छितब्बं, पब्बज्जाकाले च उपसम्पदाकाले च, भिक्खूनं पन सकिं आपुच्छितेपि वट्टति ¶ . तस्मा या उपसम्पदाकाले अनापुच्छा उपसम्पादेति, तस्सा वुत्तनयेनेव पाचित्तियं.

सावत्थियं ¶ थुल्लनन्दं आरब्भ अननुञ्ञातवुट्ठापनवत्थुस्मिं पञ्ञत्तं. अपलोकेत्वा वुट्ठापेन्तिया, तेसं अत्थिभावं अजानन्तिया, उम्मत्तिकादीनञ्च अनापत्ति. अनपलोकनं, अत्थिभावजाननं, वुट्ठापनन्ति इमानेत्थ तीणि अङ्गानि. अननुञ्ञातसमुट्ठानं, किरियाकिरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति.

अननुञ्ञातसिक्खापदवण्णना निट्ठिता.

११. पारिवासिकसिक्खापदवण्णना

एकादसमे पारिवासिकछन्ददानेनाति पारिवासियेन छन्ददानेन. तत्थ चतुब्बिधं पारिवासियं परिसपारिवासियं रत्तिपारिवासियं छन्दपारिवासियं अज्झासयपारिवासियन्ति.

तत्थ परिसपारिवासियं नाम भिक्खू केनचिदेव करणीयेन सन्निपतिता होन्ति, अथ मेघो वा उट्ठहति, उस्सारणा वा करीयति, मनुस्सा वा अज्झोत्थरन्ता आगच्छन्ति, भिक्खू ‘‘अनोकासा मयं, अञ्ञत्र गच्छामा’’ति छन्दं अविस्सज्जित्वाव उट्ठहन्ति, इदं परिसपारिवासियं नाम, किञ्चापि परिसपारिवासियं, छन्दस्स पन अविस्सट्ठत्ता कम्मं कातुं वट्टति.

पुन ¶ भिक्खू ‘‘उपोसथादीनि करिस्सामा’’ति रत्तिं सन्निपतित्वा ‘‘याव सब्बे सन्निपतन्ति, ताव धम्मं सुणिस्सामा’’ति एकं अज्झेसन्ति, तस्मिं धम्मकथं कथेन्तेयेव अरुणो उग्गच्छति. सचे ‘‘चातुद्दसिकं उपोसथं करिस्सामा’’ति निसिन्ना, ‘‘पन्नरसो’’ति कातुं वट्टति. सचे पन्नरसिकं कातुं निसिन्ना, पाटिपदे अनुपोसथे उपोसथं कातुं न वट्टति. अञ्ञं पन सङ्घकिच्चं कातुं वट्टति, इदं रत्तिपारिवासियं नाम.

पुन भिक्खू ‘‘किञ्चिदेव अब्भानादिसङ्घकम्मं करिस्सामा’’ति सन्निसिन्ना होन्ति, तत्रेको नक्खत्तपाठको भिक्खु एवं वदति ‘‘अज्ज नक्खत्तं दारुणं, मा इदं कम्मं करोथा’’ति. ते तस्स वचनेन छन्दं विस्सज्जेत्वा तत्थेव निसिन्ना होन्ति, अथञ्ञो आगन्त्वा ‘‘नक्खत्तं पतिमानेन्तं, अत्थो ¶ बालं उपज्झगा (जा. १.१.४९), किं नक्खत्तेन करोथा’’ति ¶ वदति, इदं छन्दपारिवासियञ्चेव अज्झासयपारिवासियञ्च. एतस्मिं पारिवासिये पुन छन्दपारिसुद्धिं अनाहरित्वा कम्मं कातुं न वट्टति, इदं सन्धाय वुत्तं ‘‘पारिवासिकछन्ददानेना’’ति. पाचित्तियन्ति एवं वुट्ठापेन्तिया वुत्तनयेनेव कम्मवाचापरियोसाने पाचित्तियं.

राजगहे थुल्लनन्दं आरब्भ एवं वुट्ठापनवत्थुस्मिं पञ्ञत्तं. छन्दं अविस्सज्जेत्वाव अवुट्ठिताय परिसाय वुट्ठापेन्तिया, उम्मत्तिकादीनञ्च अनापत्ति. पारिवासिकछन्ददानता, वुट्ठापनन्ति इमानेत्थ द्वे अङ्गानि. समुट्ठानादीनि गम्भिनिसिक्खापदसदिसानेवाति.

पारिवासिकसिक्खापदवण्णना निट्ठिता.

१२. अनुवस्ससिक्खापदवण्णना

द्वादसमे अनुवस्सन्ति अनुसंवच्छरं. एवं वुट्ठापेन्तियापि वुत्तनयेनेव पाचित्तियं.

सावत्थियं सम्बहुला भिक्खुनियो आरब्भ अनुवस्सं वुट्ठापनवत्थुस्मिं पञ्ञत्तं. एकन्तरिकं वुट्ठापेन्तिया, उम्मत्तिकादीनञ्च अनापत्ति. अनुवस्सता, वुट्ठापनन्ति इमानेत्थ द्वे अङ्गानि. समुट्ठानादीनि एकादसमे वुत्तनयानेवाति.

अनुवस्ससिक्खापदवण्णना निट्ठिता.

१३. एकवस्ससिक्खापदवण्णना

तेरसमे ¶ एकन्तरिकं एकं वुट्ठापेन्तिया, उम्मत्तिकादीनञ्च अनापत्ति. सेसं द्वादसमेन सदिसमेवाति.

एकवस्ससिक्खापदवण्णना निट्ठिता.

कुमारिभूतवग्गो अट्ठमो.

९. छत्तुपाहनवग्गो

१. छत्तुपाहनसिक्खापदवण्णना

छत्तवग्गस्स ¶ पठमे छत्तुपाहनन्ति पदभाजने (पाचि. ११७८-११८२) वुत्तलक्खणं छत्तञ्च उपाहनायो च. धारेय्याति परिभोगवसेन मग्गगमने एकप्पयोगेनेव दिवसम्पि धारेन्तिया एका आपत्ति. सचे पन तादिसं ठानं पत्वा छत्तम्पि अपनामेत्वा उपाहनापि ओमुञ्चित्वा पुनप्पुनं धारेति, पयोगगणनाय पाचित्तियं.

सावत्थियं छब्बग्गिया भिक्खुनियो आरब्भ छत्तुपाहनधारणवत्थुस्मिं पञ्ञत्तं, ‘‘अगिलाना’’ति अयमेत्थ अनुपञ्ञत्ति ¶ , छत्तस्सेव उपाहनानंयेव वा धारणे दुक्कटं, अगिलानाय तिकपाचित्तियं, गिलानाय द्विकदुक्कटं. गिलानसञ्ञाय पन, आरामे आरामूपचारे धारेन्तिया, आपदासु, उम्मत्तिकादीनञ्च अनापत्ति. उभिन्नं धारणं, अनुञ्ञातकारणाभावोति इमानेत्थ द्वे अङ्गानि. समुट्ठानादीनि एळकलोमसदिसानीति.

छत्तुपाहनसिक्खापदवण्णना निट्ठिता.

२. यानसिक्खापदवण्णना

दुतिये ¶ यानेनाति वय्हादिना. एत्थापि ओरोहित्वा पुनप्पुनं अभिरुहन्तिया पयोगगणनाय पाचित्तियं. अनापत्तियं ‘‘आरामे आरामूपचारे’’ति नत्थि, सेसं पठमे वुत्तनयेनेव वेदितब्बन्ति.

यानसिक्खापदवण्णना निट्ठिता.

३. सङ्घाणिसिक्खापदवण्णना

ततिये सङ्घाणिन्ति यंकिञ्चि कटूपगं. धारेय्याति कटियं पटिमुञ्चेय्य. एत्थापि ओमुञ्चित्वा ओमुञ्चित्वा धारेन्तिया पयोगगणनाय पाचित्तियं.

सावत्थियं अञ्ञतरं भिक्खुनिं आरब्भ सङ्घाणिं धारणवत्थुस्मिं पञ्ञत्तं. आबाधपच्चया कटिसुत्तं धारेन्तिया, उम्मत्तिकादीनञ्च अनापत्ति. सेसं वुत्तनयेनेव वेदितब्बं, इदं पन अकुसलचित्तन्ति.

सङ्घाणिसिक्खापदवण्णना निट्ठिता.

४. इत्थालङ्कारसिक्खापदवण्णना

चतुत्थे ¶ इत्थालङ्कारन्ति सीसूपगादीसु अञ्ञतरं यंकिञ्चि पिळन्धनं. इध तस्स तस्स वसेन वत्थुगणनाय आपत्ति वेदितब्बा.

सावत्थियं छब्बग्गिया भिक्खुनियो आरब्भ इत्थालङ्कारं धारणवत्थुस्मिं पञ्ञत्तं, आबाधपच्चया किञ्चिदेव धारेन्तिया, उम्मत्तिकादीनञ्च अनापत्ति. सेसं वुत्तसदिसमेवाति.

इत्थालङ्कारसिक्खापदवण्णना निट्ठिता.

५. गन्धवण्णकसिक्खापदवण्णना

पञ्चमे ¶ गन्धवण्णकेनाति येनकेनचि गन्धेन च वण्णकेन च. इध गन्धादियोजनतो पट्ठाय पुब्बपयोगे दुक्कटं, नहानपरियोसाने पाचित्तियं. आबाधपच्चया, उम्मत्तिकादीनञ्च अनापत्ति. सेसं चतुत्थसदिसमेवाति.

गन्धवण्णकसिक्खापदवण्णना निट्ठिता.

६. वासितकसिक्खापदवण्णना

छट्ठे ¶ वासितकेनाति गन्धवासितकेन. पिञ्ञाकेनाति तिलपिट्ठेन. सेसं पञ्चमसदिसमेवाति.

वासितकसिक्खापदवण्णना निट्ठिता.

७. भिक्खुनिउम्मद्दापनसिक्खापदवण्णना

सत्तमे उम्मद्दापेय्याति उब्बट्टापेय्य. परिमद्दापेय्याति सम्बाहापेय्य. एत्थ च हत्थं अमुञ्चित्वा उब्बट्टने एकाव आपत्ति, मोचेत्वा मोचेत्वा उब्बट्टने पयोगगणनाय आपत्तियो. सम्बाहनेपि एसेव नयो.

सावत्थियं ¶ सम्बहुला भिक्खुनियो आरब्भ भिक्खुनिया उम्मद्दापनपरिमद्दापनवत्थुस्मिं पञ्ञत्तं, गिलानाय, आपदासु, उम्मत्तिकादीनञ्च अनापत्ति. इध मग्गगमनपरिस्समोपि गेलञ्ञं, चोरभयादीहि सरीरकम्पनादयोपि आपदा. सेसं चतुत्थे वुत्तनयेनेव वेदितब्बन्ति.

भिक्खुनिउम्मद्दापनसिक्खापदवण्णना निट्ठिता.

८-९-१०. सिक्खमानउम्मद्दापनादिसिक्खापदवण्णना

अट्ठमनवमदसमेसुपि ¶ सिक्खमानाय सामणेरिया गिहिनियाति एत्तकमेव नानं. सेसं सत्तमसदिसमेवाति.

सिक्खमानउम्मद्दापनादिसिक्खापदवण्णना निट्ठिता.

११. अनापुच्छासिक्खापदवण्णना

एकादसमे भिक्खुस्स पुरतोति न अभिमुखमेवाति अत्थो, इदं पन उपचारं सन्धाय कथितन्ति वेदितब्बं. तस्मा भिक्खुस्स उपचारे अन्तमसो छमायपि ‘‘निसीदामि, अय्या’’ति अनापुच्छित्वा निसीदन्तिया पाचित्तियं.

सावत्थियं सम्बहुला भिक्खुनियो आरब्भ अनापुच्छा निसीदनवत्थुस्मिं पञ्ञत्तं, तिकपाचित्तियं, आपुच्छिते द्विकदुक्कटं. तस्मिं आपुच्छितसञ्ञाय, गिलानाय, आपदासु, उम्मत्तिकादीनञ्च अनापत्ति. भिक्खुस्स अनापुच्छा, उपचारे निसज्जा, अनुञ्ञातकारणाभावोति इमानेत्थ तीणि अङ्गानि. समुट्ठानादीनि कथिनसदिसानि, इदं पन किरियाकिरियन्ति.

अनापुच्छासिक्खापदवण्णना निट्ठिता.

१२. पञ्हापुच्छनसिक्खापदवण्णना

द्वादसमे अनोकासकतन्ति ‘‘असुकस्मिं नाम ठाने पुच्छामी’’ति ¶ एवं अकतओकासं, तस्मा सुत्तन्ते ओकासं कारापेत्वा विनयं वा अभिधम्मं वा पुच्छन्तिया पाचित्तियं. सेसेसुपि एसेव नयो, सब्बसो अकारिते पन वत्तब्बमेव नत्थि.

सावत्थियं ¶ सम्बहुला भिक्खुनियो आरब्भ अनोकासकतं भिक्खुं पञ्हं पुच्छनवत्थुस्मिं पञ्ञत्तं. तत्थ तत्थ ओकासं कारापेत्वा पुच्छन्तिया, अनोदिस्स ओकासं कारापेत्वा यत्थ कत्थचि पुच्छन्तिया, उम्मत्तिकादीनञ्च अनापत्ति. भिक्खुस्स अनोकासकारापनं, पञ्हं पुच्छनन्ति ¶ इमानेत्थ द्वे अङ्गानि. समुट्ठानादीनि पदसोधम्मसदिसानि, इदं पन किरियाकिरियन्ति.

पञ्हापुच्छनसिक्खापदवण्णना निट्ठिता.

१३. असंकच्चिकसिक्खापदवण्णना

तेरसमे असंकच्चिकाति अधक्खकउब्भनाभिमण्डलसङ्खातस्स सरीरस्स पटिच्छादनत्थं अनुञ्ञातसंकच्चिकविरहिता. गामं पविसेय्याति एत्थ परिक्खित्तस्स गामस्स परिक्खेपं, अपरिक्खित्तस्स उपचारं अतिक्कमन्तिया वा ओक्कमन्तिया वा पठमपादे दुक्कटं, दुतिये पाचित्तियं.

सावत्थियं अञ्ञतरं भिक्खुनिं आरब्भ असंकच्चिकाय गामं पविसनवत्थुस्मिं पञ्ञत्तं. यस्सा पन संकच्चिकचीवरं अच्छिन्नं वा नट्ठं वा, तस्सा, गिलानाय, आपदासु, उम्मत्तिकादीनञ्च अनापत्ति. असंकच्चिकता, वुत्तपरिच्छेदातिक्कमो, अनुञ्ञातकारणाभावोति इमानेत्थ तीणि अङ्गानि. समुट्ठानादीनि एळकलोमसदिसानीति.

असंकच्चिकसिक्खापदवण्णना निट्ठिता.

छत्तुपाहनवग्गो नवमो.

१०…पे…१६. मुसावादादिवग्गो

मुसावादादिसिक्खापदवण्णना

इतो परेसु मुसावादवग्गादीसु सत्तसु वग्गेसु भिक्खुपातिमोक्खवण्णनायं वुत्तनयेनेव विनिच्छयो वेदितब्बोति.

सोळसमवग्गो.

उद्दिट्ठा ¶ ¶ खो अय्यायो छसट्ठिसता पाचित्तिया धम्माति भिक्खू आरब्भ पञ्ञत्ता साधारणा सत्तति, असाधारणा छन्नवुतीति एवं छसट्ठिसता. सेसं सब्बत्थ उत्तानमेवाति.

कङ्खावितरणिया पातिमोक्खवण्णनाय

भिक्खुनिपातिमोक्खे

सुद्धपाचित्तियवण्णना निट्ठिता.

तत्रायं ¶ सङ्खेपतो असाधारणसिक्खापदेसु समुट्ठानविनिच्छयो – गिरग्गसमज्जा चित्तागारसिक्खापदं सङ्घाणी इत्थालङ्कारो गन्धवण्णको वासितकपिञ्ञाको भिक्खुनिआदीहि उम्मद्दनपरिमद्दनाति इमानि दस सिक्खापदानि अचित्तकानि लोकवज्जानि अकुसलचित्तानि. अयं पनेत्थ अधिप्पायो, विनापि चित्तेन आपज्जितब्बत्ता अचित्तकानि, चित्ते पन सति अकुसलेनेव आपज्जितब्बत्ता लोकवज्जानि चेव अकुसलचित्तानि चाति. अवसेसानि सचित्तकानि पण्णत्तिवज्जानेव. चोरिवुट्ठापनं गामन्तरं आरामसिक्खापदं गब्भिनिवग्गे आदितो पट्ठाय सत्त, कुमारिभूतवग्गे आदितो पट्ठाय पञ्च पुरिसादिसंसट्ठं पारिवासिकछन्ददानं अनुवस्सवुट्ठापनं एकन्तरिकवुट्ठापनन्ति इमानि एकूनवीसति सिक्खापदानि सचित्तकानि पण्णत्तिवज्जानि. अवसेसानि सचित्तकानि लोकवज्जानेवाति.

पाटिदेसनीयकण्डो

१. सप्पिविञ्ञापनसिक्खापदवण्णना

पाटिदेसनीयेसु ¶ ¶ पठमे सप्पिन्ति पुब्बे वुत्तविनिच्छयं पाळिआगतं (पाचि. १२३०) गोसप्पिआदिमेव. विञ्ञापेत्वा भुञ्जेय्याति एत्थ ‘‘विञ्ञत्तिया पटिलद्धं भुञ्जिस्सामी’’ति गहणे दुक्कटं, गहितस्स अज्झोहारे अज्झोहारे पाटिदेसनीयं.

सावत्थियं छब्बग्गिया भिक्खुनियो आरब्भ सप्पिं विञ्ञापेत्वा भुञ्जनवत्थुस्मिं पञ्ञत्तं, ‘‘अगिलाना’’ति अयमेत्थ अनुपञ्ञत्ति, तिकपाटिदेसनीयं, गिलानाय द्विकदुक्कटं. या पन गिलाना गिलानसञ्ञा, गिलानकाले वा विञ्ञापेत्वा पच्छा अगिलाना हुत्वा भुञ्जति, गिलानाय वा सेसकं, ञातकप्पवारितट्ठानतो वा विञ्ञत्तं, अञ्ञस्स वा अत्थाय, अत्तनो वा धनेन गहितं भुञ्जति, तस्सा, उम्मत्तिकादीनञ्च अनापत्ति. वुत्तलक्खणसप्पिता, अनुञ्ञातकारणाभावो, विञ्ञत्ति, अज्झोहारोति इमानेत्थ चत्तारि अङ्गानि. समुट्ठानादीनि अद्धानसदिसानीति.

सप्पिविञ्ञापनसिक्खापदवण्णना निट्ठिता.

२. तेलविञ्ञापनादिसिक्खापदवण्णना

दुतियादीसुपि ¶ तेलादीनि पुब्बे वुत्तविनिच्छयानि पाळियं (पाचि. १२३६) आगतानेव, पाळियं अनागतेसु पन अट्ठसुपि दुक्कटमेव. सेसं सब्बत्थ पठमे वुत्तसदिसमेवाति.

तेलविञ्ञापनादिसिक्खापदवण्णना निट्ठिता.

कङ्खावितरणिया पातिमोक्खवण्णनाय

भिक्खुनिपातिमोक्खे

पाटिदेसनीयवण्णना निट्ठिता.

१. परिमण्डलादिसिक्खापदवण्णना

इतो ¶ ¶ परं पन सेखियानि चेव अधिकरणसमथा च सब्बपकारतो भिक्खुपातिमोक्खवण्णनायं वुत्तनयेनेव वेदितब्बाति.

कङ्खावितरणिया पातिमोक्खवण्णनाय

भिक्खुनिपातिमोक्खवण्णना निट्ठिता.

निगमनकथा

एत्तावता च –

वण्णनं पातिमोक्खस्स, सोणत्थेरेन याचितो;

विनये जातकङ्खानं, कङ्खावितरणत्थिको.

आरभिं यमहं सब्बं, सीहळट्ठकथानयं;

महाविहारवासीनं, वाचनामग्गनिस्सितं.

निस्साय सा अयं निट्ठं, गता आदाय सब्बसो;

सब्बं अट्ठकथासारं, पाळियत्थञ्च केवलं.

न हेत्थ तं पदं अत्थि, यं विरुज्झेय्य पाळिया;

महाविहारवासीनं, पोराणट्ठकथाहि वा.

यस्मा तस्मा अकत्वाव, एत्थ कङ्खं हितेसिना;

सिक्खितब्बाव सक्कच्चं, कङ्खावितरणी अयं.

यथा ¶ च निट्ठं सम्पत्ता, कङ्खावितरणी अयं;

द्वावीसति भाणवारपअमाणाय पाळिया.

एवं अनन्तरायेन, निट्ठं कल्याणनिस्सिता;

अचिरं सब्बसत्तानं, यन्तु सब्बे मनोरथाति.

परमविसुद्धसद्धाबुद्धिवीरियप्पटिमण्डितेन ¶ सीलाचारज्जवमद्दवादिगुणसमुदयसमुदितेन सकसमयसमयन्तरगहनज्झोगाहणसमत्थेन पञ्ञावेय्यत्तियसमन्नागतेन तिपिटकपरियत्तिप्पभेदे साट्ठकथे सत्थुसासने अप्पटिहतञाणप्पभावेन महावेय्याकरणेन करणसम्पत्तिजनितसुविनिग्गतमधउरोदारवचनलावण्णयुत्तेन युत्तमुत्तवादिना वादीवरेन महाकविना पभिन्नपटिसम्भिदापरिवारे छळभिञ्ञादिप्पभेदगुणप्पटिमण्डिते उत्तरिमनुस्सधम्मे सुप्पतिट्ठितबुद्धीनं थेरवंसप्पदीपानं थेरानं महाविहारवासीनं वंसालङ्कारभूतेन विपुलविसुद्धबुद्धिना बुद्धघोसोति गरूहि गहितनामधेय्येन थेरेन कता अयं कङ्खावितरणी नाम पातिमोक्खवण्णना –

ताव तिट्ठतु लोकस्मिं, लोकनित्थरणेसिनं;

दस्सेन्ती कुलपुत्तानं, नयं सीलविसुद्धिया.

याव ‘‘बुद्धो’’ति नामम्पि, सुद्धचित्तस्स तादिनो;

लोकम्हि लोकजेट्ठस्स, पवत्तति महेसिनोति.

कङ्खावितरणी-अट्ठकथा निट्ठिता.