📜

नमो तस्स भगवतो अरहतो सम्मासम्बुद्धस्स

विनयपिटके

विमतिविनोदनी-टीका (पठमो भागो)

गन्थारम्भकथा

करुणापुण्णहदयं ¶ ¶ , सुगतं हितदायकं;

नत्वा धम्मञ्च विमलं, सङ्घञ्च गुणसम्पदं.

वण्णना निपुणाहेसुं, विनयट्ठकथाय या;

पुब्बकेहि कता नेका, नानानयसमाकुला.

तत्थ ¶ काचि सुवित्थिण्णा, दुक्खोगाहा च गन्थतो;

विरद्धा अत्थतो चापि, सद्दतो चापि कत्थचि.

काचि कत्थचि अपुण्णा, काचि सम्मोहकारिनी;

तस्मा ताहि समादाय, सारं सङ्खेपरूपतो.

लीनत्थञ्च पकासेन्तो, विरद्धञ्च विसोधयं;

उपट्ठितनयञ्चापि, तत्थ तत्थ पकासयं.

विनये विमतिं छेतुं, भिक्खूनं लहुवुत्तिनं;

सङ्खेपेन लिखिस्सामि, तस्सा लीनत्थवण्णनं.

गन्थारम्भकथावण्णना

विनयसंवण्णनारम्भे रतनत्तयं नमस्सितुकामो तस्स विसिट्ठगुणयोगसन्दस्सनत्थं यो कप्पकोटीहिपीतिआदिमाह. विसिट्ठगुणयोगेन हि वन्दनारहभावो, वन्दनारहे च कता वन्दना यथाधिप्पेतमत्थं साधेति ¶ . एत्थ च संवण्णनारम्भे रतनत्तयपणामकरणप्पयोजनं तत्थ तत्थ बहुधा पपञ्चेन्ति आचरिया, मयं पन इधाधिप्पेतमेव पयोजनं दस्सयिस्साम. तस्मा संवण्णनारम्भे रतनत्तयपणामकरणं यथापटिञ्ञातसंवण्णनाय अनन्तरायेन परिसमापनत्थन्ति वेदितब्बं. तथा हि वुत्तं ‘‘तस्सानुभावेन हतन्तरायो’’ति. रतनत्तयपणामकरणेन हि रागादिदोसविगमतो पञ्ञादिगुणपाटवतो आयुआदिवड्ढनतो पुञ्ञातिसयभावादितो च होतेव यथापटिञ्ञातसंवण्णनाय अनन्तरायेन परिसमापनं.

तत्थ पठमं ताव भगवतो वन्दनं कत्तुकामो ‘‘यो कप्पकोटीहिपि…पे… तस्सा’’ति आह. इमिस्सा पन विनयदेसनाय करुणाप्पधानञाणसमुट्ठितताय करुणाप्पधानमेव थोमनं आरद्धं. एसा हि आचरियस्स पकति, यदिदं आरम्भानुरूपथोमना. करुणाग्गहणेन चेत्थ अपरिमेय्यप्पभावा सब्बेपि बुद्धगुणा नयतो सङ्गहिताति दट्ठब्बा तंमूलकत्ता सेसबुद्धगुणानं. तत्थ योति इमस्स अनियमवचनस्स नाथोति इमिना सम्बन्धो. कप्पकोटीहिपि अप्पमेय्यं कालन्ति ¶ कप्पकोटिगणनावसेनपि ‘‘एत्तका कप्पकोटियो’’ति पमेतुं असक्कुणेय्यं कालं. अपि-सद्देन पगेव वस्सगणनायाति दस्सेति. अप्पमेय्यं कालन्ति च अच्चन्तसंयोगे उपयोगवचनं, तेन कप्पकोटिगणनावसेन परिच्छिन्दितुमसक्कुणेय्यमपि, असङ्ख्येय्यवसेन पन परिच्छिन्दितब्बतो सलक्खं चतुरसङ्ख्येय्यकप्पकालं अच्चन्तमेव निरन्तरं पञ्चमहापअच्चागादिअतिदुक्करानि करोन्तो खेदं कायिकं परिस्समं पत्तोति दस्सेति.

लोकहितायाति सत्तलोकस्स हिताय. नाथतीति नाथो, वेनेय्यानं हितसुखं आसीसतीति अत्थो. अथ वा नाथति वेनेय्यगते किलेसे उपतापेति, नाथति वा याचति वेनेय्ये अत्तनो हितकरणे याचित्वापि नियोजेतीति नाथो, लोकपटिसरणो लोकसामी लोकनायकोति वुत्तं होति. महाकारुणिकस्साति यो करुणाय कम्पितहदयत्ता लोकहितत्थं अतिदुक्करकिरियाय अनेकप्पकारं तादिसं दुक्खं अनुभवित्वा आगतो, तस्स महाकारुणिकस्साति अत्थो. तत्थ किरतीति करुणा, परदुक्खं विक्खिपति अपनेतीति अत्थो. दुक्खितेसु वा किरियति पसारियतीति करुणा. अथ वा किणातीति करुणा, परदुक्खे सति कारुणिकं ¶ हिंसति विबाधेति, विनासेति वा परस्स दुक्खन्ति अत्थो. परदुक्खे सति साधूनं कम्पनं हदयखेदं करोतीति वा करुणा. अथ वा कमिति सुखं, तं रुन्धतीति करुणा. एसा हि परदुक्खापनयनकामतालक्खणा अत्तसुखनिरपेक्खताय कारुणिकानं सुखं रुन्धति विबाधेति. करुणाय नियुत्तो कारुणिको, महन्तो कारुणिको महाकारुणिको, तस्स नमो अत्थूति पाठसेसो.

एवं करुणामुखेन सङ्खेपतो सकलसब्बञ्ञुगुणेहि भगवन्तं थोमेत्वा इदानि सद्धम्मं थोमेतुं असम्बुधन्तिआदिमाह. तत्थ बुद्धनिसेवितं यं असम्बुधं जीवलोको भवा भवं गच्छति, तस्स धम्मवरस्स नमोति सम्बन्धो. तत्थ असम्बुधन्ति असम्बुज्झन्तो, यथासभावं अप्पटिविज्झनतोति वुत्तं होति. हेतुअत्थो हेत्थ अन्तपच्चयो. यन्ति अनियमतो सपरियत्तिको नवलोकुत्तरधम्मो कम्मभावेन निद्दिट्ठो. बुद्धनिसेवितन्ति तस्सेव विसेसनं, सम्मासम्बुद्धेन, पच्चेकबुद्धसावकबुद्धेहिपि वा गोचरासेवनभावनासेवनाहि यथारहं निसेवितं, अजहितन्ति अत्थो. तत्थ परियत्तिफलनिब्बानानि गोचरासेवनवसेनेव निसेवितानि, मग्गो पन भावनासेवनवसेनापि पच्चवेक्खणञाणादिवसेन गोचरासेवनवसेनापि निसेवितो. भवाभवन्ति भवतो भवं. अथ वा हीनपणीतादिवसेन खुद्दकं महन्तञ्च भवन्ति अत्थो. वुड्ढत्थोपि हि अ-कारो दिस्सति असेक्खा धम्मातिआदीसु (ध. स. तिकमातिका ११) विय. अथ वा भवोति वुड्ढि, अभवोति हानि. भवोति वा सस्सतदिट्ठि, अभवोति उच्छेददिट्ठि ¶ . वुत्तप्पकारो भवो च अभवो च भवाभवो, तं भवाभवं. गच्छतीति उपगच्छति. जीवलोकोति सत्तलोको. अविज्जादिकिलेसजालविद्धंसिनोति धम्मविसेसनं. तत्थ न विदति धम्मानं यथासभावं न विजानातीति अविज्जा, अञ्ञाणं. सा आदि येसं तण्हादीनं, तेयेव किलिस्सन्ति एतेहि सत्ताति किलेसा, तेयेव च सत्तानं विबाधनट्ठेन जालसदिसाति जालं, तं विद्धंसेति सब्बसो विनासेति सीलेनाति अविज्जादिकिलेसजालविद्धंसी, तस्स.

ननु चेत्थ सपरियत्तिको नवलोकुत्तरधम्मो अधिप्पेतो, तत्थ च मग्गोयेव किलेसे विद्धंसेति, नेतरेति चे? वुच्चते – मग्गस्सापि निब्बानमागम्म ¶ किलेसविद्धंसनतो निब्बानम्पि किलेसे विद्धंसेति नाम, मग्गस्स किलेसविद्धंसनकिच्चं फलेन निट्ठितन्ति फलम्पि ‘‘किलेसविद्धंसी’’ति वुच्चति, परियत्तिधम्मोपि किलेसविद्धंसनस्स उपनिस्सयपच्चयत्ता ‘‘किलेसविद्धंसी’’ति वत्तुं अरहतीति न कोचि दोसो. धम्मवरस्स तस्साति पुब्बे अनियमितस्स नियामकवचनं. तत्थ यथानुसिट्ठं पटिपज्जमाने चतूसु अपायेसु संसारदुक्खे च अपतमाने धारेतीति धम्मो. वुत्तप्पकारो धम्मो एव अत्तनो उत्तरितराभावेन वरो पवरो अनुत्तरोति धम्मवरो, तस्स धम्मवरस्स नमो अत्थूति अत्थो.

एवं सङ्खेपनयेनेव सब्बधम्मगुणेहि सद्धम्मं थोमेत्वा इदानि अरियसङ्घं थोमेतुं गुणेहीतिआदिमाह. तत्थ गुणेहि यो युत्तो, तमरियसङ्घं नमामीति सम्बन्धो. सीलादयो गुणा चेत्थ लोकियलोकुत्तरा अधिप्पेता. ‘‘विमुत्तिविमुत्तिञाण’’न्ति वत्तब्बे एकदेससरूपेकसेसनयेन ‘‘विमुत्तिञाण’’न्ति वुत्तं, आदिसद्दपरियायेन पभुतिसद्देन वा विमुत्तिग्गहणं वेदितब्बं. तत्थ विमुत्तीति फलं. विमुत्तिञाणन्ति पच्चवेक्खणञाणं. पभुति-सद्देन छळभिञ्ञाचतुपटिसम्भिदादयो गुणा सङ्गहिताति दट्ठब्बा. कुसलत्थिकानं जनानं पुञ्ञातिसयवुड्ढिया खेत्तसदिसत्ता खेत्तन्ति आह ‘‘खेत्तं जनानं कुसलत्थिकान’’न्ति. खित्तं बीजं महप्फलभावकरणेन तायतीति हि खेत्तं. अरियसङ्घन्ति एत्थ आरकत्ता किलेसेहि, अनये न इरियनतो, अये च इरियनतो, सदेवकेन लोकेन ‘‘सरण’’न्ति अरणीयतो उपगन्तब्बतो, उपगतानञ्च तदत्थसिद्धितो अरिया, अट्ठ अरियपुग्गला, अरियानं सङ्घो समूहोति अरियसङ्घो, तं अरियसङ्घं.

इदानि रतनत्तयपणामजनितं कुसलाभिसन्दं यथाधिप्पेते पयोजने नियोजेत्वा अत्तना संवण्णियमानस्स विनयस्स सकलसासनमूलभावदस्सनमुखेन संवण्णनाकरणस्सापि सासनमूलतं ¶ दस्सेतुं इच्चेवमिच्चादिगाथाद्वयमाह. पुञ्ञाभिसन्दन्ति पुञ्ञोघं, पुञ्ञप्पवाहं पुञ्ञरासिन्ति अत्थो. तस्सानुभावेनाति तस्स यथावुत्तस्स पुञ्ञप्पवाहस्स आनुभावेन बलेन हतन्तरायो विनयं वण्णयिस्सन्ति सम्बन्धो.

अट्ठितस्स सुसण्ठितस्स भगवतो सासनं यस्मिं ठिते पतिट्ठितं होतीति योजेतब्बं. तत्थ यस्मिन्ति यस्मिं विनयपिटके. ठितेति पाळितो च अत्थतो च अनूनं हुत्वा लज्जीपुग्गलेसु पवत्तनट्ठेन ठिते. सासनन्ति ¶ सिक्खत्तयसङ्गहितं सासनं. अट्ठितस्साति कामसुखल्लिकत्तकिलमथानुयोगसङ्खाते अन्तद्वये अट्ठितस्स, ‘‘परिनिब्बुतस्सपि भगवतो’’तिपि वदन्ति. सुसण्ठितस्साति अन्तद्वयविरहिताय मज्झिमाय पटिपदाय सुट्ठु ठितस्स. अमिस्सन्ति भावनपुंसकनिद्देसो, निकायन्तरलद्धीहि असम्मिस्सं कत्वा अनाकुलं कत्वा वण्णयिस्सन्ति वुत्तं होति. निस्साय पुब्बाचरियानुभावन्ति पुब्बाचरियेहि संवण्णितं अट्ठकथं निस्साय, न अत्तनो बलेनाति अधिप्पायो.

अथ पोराणट्ठकथासु विज्जमानासु पुन विनयसंवण्णना किंपयोजनाति? आह कामञ्चातिआदि. तत्थ कामन्ति एकन्तेन, यथिच्छकं वा, सब्बसोति वुत्तं होति, तस्स संवण्णितोयं विनयोति इमिना सम्बन्धो. पुब्बाचरियासभेहीति महाकस्सपत्थेरादयो पुब्बाचरिया एव अकम्पियट्ठेन उत्तमट्ठेन च आसभा, तेहि पुब्बाचरियवरेहीति वुत्तं होति. कीदिसा पन ते पुब्बाचरियाति? आह ञाणम्बूतिआदि. अग्गमग्गञाणसङ्खातेन अम्बुना सलिलेन निद्धोतानि निस्सेसतो आयतिं अनुप्पत्तिधम्मतापादनेन धोतानि विसोधितानि रागादीनि तीणि मलानि कामासवादयो च चत्तारो आसवा येहि ते ञाणम्बुनिद्धोतमलासवा, तेहि खीणासवेहीति अत्थो. खीणासवभावेपि न एते सुक्खविपस्सकाति आह ‘‘विसुद्धविज्जापटिसम्भिदेही’’ति. तत्थ विज्जाति तिस्सो विज्जा, अट्ठ विज्जा वा. पटिसम्भिदाप्पत्तेसुपि महाकस्सपत्थेरादीनं उच्चिनित्वा गहितताय तेसं सद्धम्मसंवण्णने सामत्थियं सातिसयन्ति दस्सेन्तो आह ‘‘सद्धम्मसंवण्णनकोविदेही’’ति.

किलेसजातं, परिक्खारबाहुल्लं वा सल्लिखति तनुं करोतीति सल्लेखो, अप्पिच्छतादिगुणसमूहो, इध पन खीणासवाधिकारत्ता परिक्खारबाहुल्लस्स सल्लिखनवसेनेव अत्थो गहेतब्बो. सल्लेखेन निब्बत्तं सल्लेखियं, तस्मिं सल्लेखिये, धुतङ्गपरिहरणादिसल्लेखपअपत्तियन्ति वुत्तं होति. नोसुलभूपमेहीति सल्लेखपटिपत्तिया ‘‘असुकसदिसा’’ति नत्थि सुलभा उपमा एतेसन्ति नोसुलभूपमा, तेहि. महाविहारस्साति इमिना निकायन्तरं पटिक्खिपति ¶ . विहारसीसेन हेत्थ तत्थ निवासीनञ्चेव तेहि समलद्धिकानञ्च सब्बेसं भिक्खूनं गहणं दट्ठब्बं. तस्मा तेसं महाविहारवासीनं दिट्ठिसीलविसुद्धिया पभवत्तेन सञ्ञाणभूतत्ता ¶ धम्मसङ्गाहका महाकस्सपत्थेरादयो ‘‘महाविहारस्स धजूपमा’’ति वुत्ता, तेहि अयं विनयो संवण्णितो सम्मा अनूनं कत्वा वण्णितो. कथन्ति आह ‘‘चित्तेहि नयेही’’ति. विचित्तेहि नयेहि सम्बुद्धवरन्वयेहि सब्बञ्ञुबुद्धवरं अनुगतेहि, भगवतो अधिप्पायानुगतेहि नयेहीति वुत्तं होति.

एवं पोराणट्ठकथाय अनूनभावं दस्सेत्वा इदानि अत्तनो संवण्णनाय पयोजनविसेसं अज्झेसकञ्च दस्सेतुं संवण्णनातिआदिमाह. तत्थ सङ्खतत्ताति रचितत्ता. न कञ्चि अत्थं अभिसम्भुणातीति न कञ्चि अत्थं साधेति.

संवण्णनं तञ्चातिआदिना अत्तनो संवण्णनाय करणप्पकारं दस्सेति. तत्थ तञ्च इदानि वुच्चमानं संवण्णनं समारभन्तो सकलायपि महाअट्ठकथाय इध गहेतब्बतो महाअट्ठकथं तस्सा इदानि वुच्चमानाय संवण्णनाय सरीरं कत्वा महापच्चरियं यो विनिच्छयो वुत्तो, तथेव कुरुन्दीनामादीसु विस्सुतासु अट्ठकथासु यो विनिच्छयो वुत्तो, ततोपि विनिच्छयतो युत्तमत्थं अपरिच्चजन्तो अन्तोगधत्थेरवादं कत्वा संवण्णनं सम्मा समारभिस्सन्ति पदत्थसम्बन्धो वेदितब्बो. एत्थ च अत्थो कथीयति एतायाति अट्ठकथा त्थ-कारस्स ट्ठ-कारं कत्वा. महापच्चरियन्ति महापच्चरीनामिकं. एत्थ च पच्चरीति उळुम्पं वुच्चति, तस्मिं निसीदित्वा कतत्ता तमेव नामं जातं. ‘‘कुरुन्दीवल्लिविहारो नाम अत्थि, तत्थ कतत्ता ‘कुरुन्दी’ति नामं जात’’न्ति वदन्ति. आदिसद्देन अन्धकट्ठकथं सङ्खेपट्ठकथञ्च सङ्गण्हाति.

युत्तमत्थन्ति महाअट्ठकथानयेन, चतुब्बिधविनययुत्तिया वा युत्तमत्थं. ‘‘अट्ठकथंयेव गहेत्वा संवण्णनं करिस्सामी’’ति वुत्ते अट्ठकथासु वुत्तत्थेरवादानं बाहिरभावो सियाति तेपि अन्तोकत्तुकामो ‘‘अन्तोगधथेरवाद’’न्ति आह, थेरवादेपि अन्तोकत्वाति वुत्तं होति.

तं मेति गाथाय सोतूहि पटिपज्जितब्बविधिं दस्सेति. तत्थ धम्मप्पदीपस्साति धम्मो एव मोहन्धकारविद्धंसनतो पदीपसदिसत्ता पदीपो अस्साति धम्मप्पदीपो, भगवा, तस्स. पतिमानयन्ताति पूजेन्ता मनसा गरुं करोन्ता निसामेन्तु सुणन्तु.

बुद्धेनातिआदिना ¶ अत्तनो संवण्णनाय आगमनसुद्धिदस्सनमुखेन पमाणभावं दस्सेत्वा अनुसिक्खितब्बतं ¶ दस्सेति. तत्थ यथेव बुद्धेन यो धम्मो विनयो च वुत्तो, सो तस्स बुद्धस्स येहि पुत्तेहि महाकस्सपत्थेरादीहि तथेव ञातो, तेसं बुद्धपुत्तानं मतिमच्चजन्ता सीहळट्ठकथाचरिया यस्मा पुरे अट्ठकथा अकंसूति सम्बन्धो वेदितब्बो. तत्थ धम्मोति सुत्ताभिधम्मे सङ्गण्हाति. विनयोति सकलं विनयपिटकं. वुत्तोति पाळितो च अत्थतो च बुद्धेन भगवता वुत्तो. न हि भगवता अब्याकतं नाम तन्तिपदं अत्थि, तत्थ तत्थ भगवता पवत्तितपकिण्णकदेसनायेव हि अट्ठकथा. तथेव ञातोति यथेव बुद्धेन वुत्तो, तथेव एकपदम्पि एकक्खरम्पि अविनासेत्वा अधिप्पायञ्च अविकोपेत्वा ञातो विदितोति अत्थो. तेसं मतिमच्चजन्ताति तेसं बुद्धपुत्तानं मतिसङ्खातं थेरपरम्पराय उग्गहेत्वा आभतं अब्बोच्छिन्नं पाळिवण्णनावसेन चेव पाळिमुत्तकवसेन च पवत्तं सब्बं अट्ठकथाविनिच्छयं अपरिच्चजन्ता. अट्ठकथा अकंसूति महाअट्ठकथामहापच्चरिआदिका सीहळट्ठकथायो अकंसु. ‘‘अट्ठकथामकंसू’’तिपि पाठो, तत्थापि सोयेवत्थो.

तस्माति यस्मा तेसं बुद्धपुत्तानं अधिप्पायं अविकोपेत्वा पुरे अट्ठकथा अकंसु, तस्मा. यं अट्ठकथासु वुत्तं, तं सब्बम्पि पमाणन्ति योजना. हीति निपातमत्तं हेतुअत्थस्स तस्माति इमिनायेव पकासितत्ता, अवधारणत्थो वा, पमाणमेवाति. यदि अट्ठकथासु वुत्तं सब्बम्पि पमाणं, एवं सति तत्थ पमादलेखापि पमाणं सियाति आह ‘‘वज्जयित्वान पमादलेख’’न्ति, अपरापरं लिखन्तेहि पमादेन सतिं अपच्चुपट्ठपेत्वा अञ्ञत्थ लिखितब्बं अञ्ञत्थ लिखनादिवसेन पवत्तिता पमादलेखा नाम, सा च समन्तपासादिकायं तत्थ तत्थ सयमेव आविभविस्सति. पुन यस्माति पदस्स सम्बन्धदस्सनवसेन अयं अत्थयोजना – यस्मा अट्ठकथासु वुत्तं इध इमस्मिं सासने सिक्खासु सगारवानं पण्डितानं पमाणमेव, यस्मा च अयं वण्णनापि भासन्तरपरिच्चागादिमत्तविसिट्ठताय अत्थतो अभिन्ना, ततो एव पमाणभूताव हेस्सति, तस्मा अनुसिक्खितब्बाति.

ततोति ताहि अट्ठकथाहि. भासन्तरमेव हित्वाति सीहळभासंयेव अपनेत्वा. वित्थारमग्गञ्च समासयित्वाति पोराणट्ठकथासु यथाठाने ¶ वत्तब्बम्पि पदत्थविनिच्छयादिकं अतिवित्थिण्णेन वचनक्कमेन चेव वुत्तमेव अत्थनयं अप्पमत्तकविसेसेन पुनप्पुनं कथनेन च तत्थ तत्थ पपञ्चितं तादिसं वित्थारमग्गं पहाय सल्लहुकेन अत्थविञ्ञापकेन पदक्कमेन चेव वुत्तनयसदिसं वत्तब्बं अतिदिसित्वा च सङ्खेपनयेनेव वण्णयिस्सामाति अधिप्पायो. सारत्थदीपनियं पन विनयटीकायं ‘‘पोराणट्ठकथासु उपरि वुच्चमानम्पि आनेत्वा तत्थ तत्थ पपञ्चितं ञत्तिचतुत्थेन कम्मेन…पे… उपसम्पन्नोति भिक्खूति एत्थ अपलोकनादीनं चतुन्नम्पि ¶ कम्मानं वित्थारकथा विय तादिसं वित्थारमग्गं सङ्खिपित्वा’’ति वुत्तं, तं तन्तिक्कमं कञ्चि अवोक्कमित्वाति एत्थेव वत्तुं युत्तं. अञ्ञत्थ पाळिया वत्तब्बं अञ्ञत्थ कथनञ्हि तन्तिक्कमं वोक्कमित्वा कथनं नाम. तथा हि वुत्तं ‘‘तथेव वण्णितुं युत्तरूपं हुत्वा अनुक्कमेन आगतं पाळिं परिच्चजित्वा संवण्णनतो सीहळट्ठकथासु अयुत्तट्ठाने वण्णितं यथाठानेयेव वण्णनतो च वुत्तं ‘तन्तिक्कमं कञ्चि अवोक्कमित्वा’’’ति. तस्मा यथावुत्तनयेनेव अत्थो गहेतब्बो. कथं पन वित्थारमग्गस्स सङ्खिपने विनिच्छयो न हीयतीति? आह ‘‘विनिच्छयं सब्बमसेसयित्वा’’ति. सङ्खिपन्तोपि पुनप्पुनं वचनादिमेव सङ्खिपन्तो, विनिच्छयं पन अट्ठकथासु सब्बासुपि वुत्तं सब्बम्पि असेसयित्वा, किञ्चिमत्तम्पि अपरिहापेत्वाति वुत्तं होति. तन्तिक्कमं कञ्चि अवोक्कमित्वाति कञ्चि पाळिक्कमं अनतिक्कमित्वा, अनुक्कमेनेव पाळिं वण्णयिस्सामाति अत्थो.

सुत्तन्तिकानं वचनानमत्थन्ति वेरञ्जकण्डादीसु आगतानं झानकथादीनं सुत्तन्तवचनानं सीहळट्ठकथासु ‘‘सुत्तन्तिकानं भारो’’ति वत्वा अवण्णितब्बट्ठानं अत्थं तंतंसुत्तानुरूपं सब्बसो परिदीपयिस्सामाति अधिप्पायो. हेस्सतीति भविस्सति, करीयिस्सतीति वा अत्थो. एत्थ च पठमस्मिं अत्थविकप्पे ‘‘भासन्तरपरिच्चागादिकं चतुब्बिधं किच्चं निप्फादेत्वा सुत्तन्तिकानं वचनानमत्थं परिदीपयन्ती अयं वण्णना भविस्सती’’ति वण्णनावसेन समानकत्तुकता वेदितब्बा. पच्छिमस्मिं अत्थविकप्पे पन ‘‘हेट्ठा वुत्तभासन्तरपरिच्चागादिकं कत्वा सुत्तन्तिकानं वचनानमत्थं परिदीपयन्ती अयं वण्णना अम्हेहि करीयिस्सती’’ति एवं आचरियवसेन समानकत्तुकता वेदितब्बा.

गन्थारम्भकथावण्णनानयो निट्ठितो.

बाहिरनिदानकथा

इदानि ¶ संवरविनयपहानविनयादीसु बहूसु विनयेसु अत्तना ‘‘तं वण्णयिस्सं विनय’’न्ति एवं संवण्णेतब्बभावेन पटिञ्ञातं विनयं दस्सेन्तो आह तत्थातिआदि. तत्थ तत्थाति यथावुत्तासु गाथासु. ताव-सद्दो पठमन्ति इमस्मिं अत्थे दट्ठब्बो, तेन पठमं विनयं ववत्थपेत्वा ¶ पच्छा तस्स वण्णनं करिस्सामाति दीपेति. ववत्थपेतब्बोति नियमेतब्बो. तेनेतं वुच्चतीति यस्मा ववत्थपेतब्बो, तेन हेतुना एतं विनयो नामातिआदिकं नियामकवचनं वुच्चतीति अत्थो. अस्साति विनयस्स. मातिकाति उद्देसो. सो हि निद्देसपदानं जननीठाने ठितत्ता माता वियाति ‘‘मातिका’’ति वुच्चति.

इदानि संवण्णेतब्बमत्थं मातिकं पट्ठपेत्वा दस्सेन्तो आह वुत्तं येनातिआदि. इदं वुत्तं होति – एतं तेन समयेन बुद्धो भगवा वेरञ्जायं विहरतीतिआदिनिदानवचनपटिमण्डितं विनयपिटकं येन पुग्गलेन वुत्तं, यस्मिं काले वुत्तं, यस्मा कारणा वुत्तं, येन धारितं, येन च आभतं, येसु पतिट्ठितं, एतं यथावुत्तविधानं वत्वा ततो तेन समयेनातिआदिपाठस्स अत्थं अनेकप्पकारतो दस्सेन्तो विनयस्स अत्थवण्णनं करिस्सामीति.

एत्थ च वुत्तं येन यदा यस्माति इदं वचनं तेन समयेन बुद्धो भगवातिआदिनिदानवचनमत्तं अपेक्खित्वा वत्तुकामोपि विसुं अवत्वा ‘‘निदानेन आदिकल्याणं, इदमवोचाति निगमनेन परियोसानकल्याण’’न्ति वचनतो निदाननिगमनानिपि सत्थुदेसनाय अनुविधानत्ता तदन्तोगधानेवाति निदानस्सापि विनयपाळियंयेव अन्तोगधत्ता वुत्तं येन यदा यस्माति इदम्पि विनयपिटकसम्बन्धंयेव कत्वा मातिकं ठपेति. मातिकाय हि एतन्ति वुत्तं विनयपिटकंयेव सामञ्ञतो सब्बत्थ सम्बन्धमुपगच्छति.

इदानि पन तं विसुं नीहरित्वा दस्सेन्तो तत्थ वुत्तं येनातिआदिमाह. तत्थाति तेसु मातिकापदेसु. इदन्ति तेन समयेनातिआदिनिदानवचनं. हि-सद्दो यस्माति अत्थो दट्ठब्बो, यस्मा बुद्धस्स भगवतो अत्तपच्चक्खवचनं न होति, तस्माति वुत्तं होति. अत्तपच्चक्खवचनं न होतीति अत्तना पच्चक्खं कत्वा वुत्तवचनं न होति. अथ ¶ वा अत्तनो पच्चक्खकाले धरमानकाले वुत्तवचनं न होति. तदुभयेनापि भगवतो वुत्तवचनं न होतीति अत्थो.

पठममहासङ्गीतिकथावण्णना

पठममहासङ्गीति नाम चेसाति एत्थ च-सद्दो वत्तब्बसम्पिण्डनत्थो, उपञ्ञासत्थो वा, उपञ्ञासोति च वाक्यारम्भो वुच्चति. एसा हि गन्थकारानं पकति, यदिदं किञ्चि वत्वा पुन अपरं वत्तुमारभन्तानं च-सद्दप्पयोगो. यथापच्चयं तत्थ तत्थ देसितत्ता विप्पकिण्णानं धम्मविनयानं ¶ सभागत्थवसेन सङ्गहेत्वा गायनं कथनं सङ्गीति, महाविसयत्ता पूजनीयत्ता च महती सङ्गीति महासङ्गीति. दुतियादिं उपादाय चेसा ‘‘पठममहासङ्गीती’’ति वुत्ता. निददाति देसनं देसकालादिवसेन अविदितं विदितं कत्वा निदस्सेतीति निदानं, तत्थ कोसल्लत्थं.

वेनेय्यानं मग्गफलुप्पत्तिहेतुभूताव किरिया निप्परियायेन बुद्धकिच्चन्ति आह ‘‘धम्मचक्कप्पवत्तनञ्हि आदिं कत्वा’’ति. तत्थ सतिपट्ठानादिधम्मो एव पवत्तनट्ठेन चक्कन्ति धम्मचक्कं, चक्कन्ति वा आणा, तं धम्मतो अनपेतत्ता धम्मचक्कं, धम्मेन ञायेन चक्कन्तिपि धम्मचक्कं. कतबुद्धकिच्चेति निट्ठितबुद्धकिच्चे भगवति लोकनाथेति सम्बन्धो. कुसिनारायन्ति समीपत्थे एतं भुम्मवचनं. उपवत्तने मल्लानं सालवनेति तस्स नगरस्स उपवत्तनभूतं मल्लराजूनं सालवनुय्यानं दस्सेति. तत्थ नगरं पविसन्ता उय्यानतो उपेच्च वत्तन्ति गच्छन्ति एतेनाति ‘‘उपवत्तन’’न्ति उय्यानस्स च नगरस्स च मज्झे सालवनं वुच्चति. कुसिनाराय हि दक्खिणपच्छिमदिसाय तं उय्यानं होति, ततो उय्यानतो सालवनराजिविराजितो मग्गो पाचीनाभिमुखो गन्त्वा नगरस्स दक्खिणद्वाराभिमुखो उत्तरेन निवत्तो, तेन मग्गेन मनुस्सा नगरं पविसन्ति, तस्मा तं ‘‘उपवत्तन’’न्ति वुच्चति. तत्थ किर उपवत्तने अञ्ञमञ्ञसंसट्ठविटपानं सम्पन्नछायानं सालपन्तीनमन्तरे भगवतो परिनिब्बानमञ्चो पञ्ञत्तो, तं सन्धाय वुत्तं ‘‘यमकसालानमन्तरे’’ति. उपादीयति कम्मकिलेसेहीति उपादि, विपाकक्खन्धा कटत्ता च रूपं. तदेव कम्मकिलेसेहि सम्मा अप्पहीनताय सेसो, नत्थि एत्थ उपादिसेसोति अनुपादिसेसा, निब्बानधातु, ताय. इत्थम्भूतलक्खणे ¶ चायं करणनिद्देसो. परिनिब्बानेति निमित्तत्थे भुम्मं, परिनिब्बानहेतु तस्मिं ठाने सन्निपतितानन्ति अत्थो. सङ्घस्स थेरो जेट्ठो सङ्घत्थेरो. एत्थ च सङ्घसद्दस्स भिक्खुसतसहस्ससद्दसापेक्खत्तेपि गमकत्ता थेरसद्देन समासो यथा देवदत्तस्स गरुकुलन्ति. आयस्मा महाकस्सपो धम्मविनयसङ्गायनत्थं भिक्खूनं उस्साहं जनेसीति सम्बन्धो.

तथा उस्साहं जननस्स कारणमाह सत्ताहपरिनिब्बुतेतिआदि. सत्त अहानि समाहटानि सत्ताहं, सत्ताहं परिनिब्बुतस्स अस्साति सत्ताहपरिनिब्बुतो, सत्ताहपरिनिब्बुते सुभद्देन वुड्ढपब्बजितेन वुत्तवचनमनुस्सरन्तोति सम्बन्धो. अलं, आवुसोतिआदिना तेन वुत्तवचनं दस्सेति. तत्थ अलन्ति पटिक्खेपवचनं. तेन महासमणेनाति निस्सक्के करणवचनं, ततो महासमणतो सुट्ठु मुत्ता मयन्ति अत्थो, उपद्दुता च होम तदाति अधिप्पायो, होमाति वा अतीतत्थे वत्तमानवचनं, अहुम्हाति अत्थो. ठानं खो पनेतं विज्जतीति तिट्ठति एत्थ फलं तदायत्तवुत्तितायाति ¶ ठानं, हेतु. खोति अवधारणे, एतं कारणं विज्जतेव, नो न विज्जतीति अत्थो. किं तं कारणन्ति? आह यं पापभिक्खूतिआदि. एत्थ यन्ति निपातमत्तं, कारणनिद्देसो वा, येन कारणेन अन्तरधापेय्युं, तदेतं कारणं विज्जतीति अत्थो. अतीतो अतिक्कन्तो सत्था एत्थ, एतस्साति वा अतीतसत्थुकं, पावचनं. पधानं वचनं पावचनं, धम्मविनयन्ति वुत्तं होति. पक्खं लभित्वाति अलज्जीपक्खं लभित्वा. न चिरस्सेवाति न चिरेनेव. याव च धम्मविनयो तिट्ठतीति यत्तकं कालं धम्मो च विनयो च लज्जीपुग्गलेसु तिट्ठति.

वुत्तञ्हेतं भगवताति परिनिब्बानमञ्चे निपन्नेन भगवता वुत्तन्ति अत्थो. देसितो पञ्ञत्तोति सुत्ताभिधम्मपिटकसङ्गहितस्स धम्मस्स चेव विनयपिटकसङ्गहितस्स विनयस्स च अतिसज्जनं पबोधनं देसना. तस्सेव पकारतो ञापनं असङ्करतो ठपनं पञ्ञापनं. सो वो ममच्चयेन सत्थाति सो धम्मविनयो तुम्हाकं ममच्चयेन सत्था मयि परिनिब्बुते सत्थुकिच्चं साधेस्सति. सासनन्ति परियत्तिपटिपत्तिपटिवेधवसेन तिविधं सासनं, निप्परियायतो पन सत्तत्तिंस बोधिपक्खियधम्मा. अद्धनियन्ति अद्धानक्खमं, तदेव चिरट्ठितिकं अस्स भवेय्याति सम्बन्धो.

इदानि ¶ सम्मासम्बुद्धेन अत्तनो कतं अनुग्गहविसेसं विभावेन्तो आह यञ्चाहं भगवतातिआदि. तत्थ यञ्चाहन्ति एतस्स अनुग्गहितोति एतेन सम्बन्धो. तत्थ यन्ति यस्मा, येन कारणेनाति वुत्तं होति. किरियापरामसनं वा एतं, तेन अनुग्गहितोति एत्थ अनुग्गहणं परामसति. धारेस्ससीतिआदिकं भगवता महाकस्सपत्थेरेन सद्धिं चीवरपरिवत्तनं कातुकामेन वुत्तवचनं. धारेस्ससि पन मे त्वं कस्सपाति ‘‘कस्सप, त्वं इमानि परिभोगजिण्णानि पंसुकूलानि पारुपितुं सक्खिस्ससी’’ति वदति, तञ्च खो न कायबलं सन्धाय, पटिपत्तिपूरणं पन सन्धाय एवमाह. साणानि पंसुकूलानीति मतकळेवरं पलिवेठेत्वा छड्डितानि तुम्बमत्ते किमयो पप्फोटेत्वा गहितानि साणवाकमयानि पंसुकूलचीवरानि. रथिकादीनं यत्थ कत्थचि पंसूनं उपरि ठितत्ता अब्भुग्गतट्ठेन तेसु कूलमिवाति पंसुकूलं. अथ वा पंसु विय कुच्छितभावं उलति गच्छतीति पंसुकूलन्ति पंसुकूलसद्दस्स अत्थो दट्ठब्बो. निब्बसनानीति निट्ठितवसनकिच्चानि, परिभोगजिण्णानीति अत्थो. एकमेव तं चीवरं अनेकावयवत्ता बहुवचनं कतं. साधारणपरिभोगेनाति अत्तना समानपरिभोगेन, साधारणपरिभोगेन च समसमट्ठपनेन च अनुग्गहितोति सम्बन्धो.

इदानि ¶ नवानुपुब्बविहारछळभिञ्ञाप्पभेदे उत्तरिमनुस्सधम्मे अत्तना समसमट्ठपनत्थाय भगवता वुत्तं कस्सपसंयुत्ते (सं. नि. २.१५२) आगतं पाळिं पेय्यालमुखेन आदिग्गहणेन च सङ्खिपित्वा दस्सेन्तो आह अहं, भिक्खवेतिआदि. तत्थ यावदे आकङ्खामीति यावदेव आकङ्खामि, यत्तकं कालं इच्छामीति अत्थो, ‘‘यावदेवा’’तिपि पाठो. नवानुपुब्बविहारछळभिञ्ञाप्पभेदेति एत्थ नवानुपुब्बविहारो नाम अनुपटिपाटिया समापज्जितब्बभावतो एवंसञ्ञिता निरोधसमापत्तिया सह अट्ठ रूपारूपसमापत्तियो. छळभिञ्ञा नाम आसवक्खयञाणेन सद्धिं पञ्चाभिञ्ञायो. अत्तना समसमट्ठपनेनाति ‘‘अहं यत्तकं कालं यत्तके समापत्तिविहारे अभिञ्ञायो च वळञ्जेमि, तथा कस्सपोपी’’ति एवं यथावुत्तउत्तरिमनुस्सधम्मे अत्तना समसमं कत्वा ठपनेन, इदञ्च उत्तरिमनुस्सधम्मसामञ्ञेन थेरस्स पसंसामत्तेन वुत्तं, न ¶ भगवता सद्धिं सब्बथा समताय. भगवतो हि गुणविसेसं उपादाय सावका पच्चेकबुद्धा च कलम्पि कलभागम्पि न उपेन्ति, तस्स किमञ्ञं आणण्यं भविस्सति अञ्ञत्र धम्मविनयसङ्गायनाति अधिप्पायो. तत्थ तस्साति तस्स अनुग्गहस्स, तस्स मेति वा अत्थो गहेतब्बो. पोत्थकेसु हि केसुचि ‘‘तस्स मे’’ति पाठो दिस्सति. आणण्यं अणणभावो. सककवचइस्सरियानुप्पदानेनाति एत्थ चीवरस्स निदस्सनवसेन कवचस्सेव गहणं कतं, समापत्तिया निदस्सनवसेन इस्सरियं गहितं.

इदानि यथावुत्तमत्थं पाळिया विभावेन्तो आह यथाहातिआदि. तत्थ एकमिदाहन्ति एत्थ इदन्ति निपातमत्तं. एकं समयन्ति एकस्मिं समयेति अत्थो. पावायाति पावानगरतो. अद्धानमग्गप्पटिपन्नोति दीघमग्गप्पटिपन्नो. दीघपरियायो हेत्थ अद्धानसद्दो. सब्बं सुभद्दकण्डं वित्थारतो वेदितब्बन्ति पञ्चसतिकक्खन्धके आगतं सुभद्दकण्डं इध आनेत्वा वित्थारेतब्बं.

ततो परन्ति सुभद्दकण्डतो परं. सब्बं सुभद्दकण्डं वित्थारतो वेदितब्बन्ति इमिना ‘‘यं न इच्छिस्साम, न तं करिस्सामा’’ति एतं परियन्तं सुभद्दकण्डपाळिं दस्सेत्वा इदानि अवसेसं उस्साहजननप्पकारप्पवत्तं पाळिमेव दस्सेन्तो हन्द मयं आवुसोतिआदिमाह. तत्थ पुरे अधम्मो दिप्पतीति एत्थ ‘‘अधम्मो नाम दसकुसलकम्मपथपटिपक्खभूतो अधम्मो’’ति सारत्थदीपनियं (सारत्थ. टी. १.पठममहासङ्गीतिकथावण्णना) वुत्तं. धम्मसङ्गहणत्थं उस्साहजननप्पसङ्गत्ता पन धम्मविनयानं असङ्गायनहेतुदोसगणो सम्भवति, सो एव एत्थ अधम्मो दिप्पति तप्पटिपक्खो धम्मो च पटिबाहीयतीति वत्तब्बं. अपि च ‘‘अधम्मवादिनो बलवन्तो होन्ति धम्मवादिनो दुब्बला होन्ती’’ति वुच्चमानत्ता येन अधम्मेन ते सुभद्दवज्जिपुत्तकादयो अधम्मवादिनो, येन च धम्मेन इतरे धम्मवादिनोव होन्ति. तेयेव इध ‘‘अधम्मो’’ ¶ ‘‘धम्मो’’ति च वत्तब्बा. तस्मा सीलविपत्तिआदिहेतुको पापिच्छतादिदोसगणो अधम्मो, तप्पटिपक्खो सीलसम्पदादिहेतुको अप्पिच्छतादिगुणसमूहो धम्मोति च गहेतब्बं. पुरे दिप्पतीति अपि नाम दिप्पति. अथ वा याव अधम्मो धम्मं पटिबाहितुं समत्थो होति, ततो पुरेतरमेवाति ¶ अत्थो. दिप्पतीति दिप्पिस्सति. पुरेसद्दयोगेन हि अनागतत्थे अयं वत्तमानप्पयोगो, यथा पुरा वस्सति देवोति. अविनयोति पहानविनयादीनं पटिपक्खभूतो अविनयो.

तेन हीति उय्योजनत्थे निपातो. सकलनवङ्गसत्थुसासनपरियत्तिधरेति सकलं सुत्तगेय्यादिनवङ्गं एत्थ, एतस्स वा अत्थीति सकलनवङ्गं, सत्थुसासनं. अत्थकामेन परियापुणितब्बतो दिट्ठधम्मिकादिपुरिसत्थपरियत्तिभावतो च ‘‘परियत्ती’’ति तीणि पिटकानि वुच्चन्ति, तं सकलनवङ्गसत्थुसासनसङ्खातं परियत्तिं धारेन्तीति सकलनवङ्गसत्थुसासनपअयत्तिधरा, तादिसेति अत्थो. समथभावनासिनेहाभावेन सुक्खा लूखा असिनिद्धा विपस्सना एतेसन्ति सुक्खविपस्सका. तिपिटकसब्बपरियत्तिप्पभेदधरेति तिण्णं पिटकानं समाहारो तिपिटकं, तदेव नवङ्गादिवसेन अनेकभेदभिन्नं सब्बं परियत्तिप्पभेदं धारेन्तीति तिपिटकसब्बपरियत्तिप्पभेदधरा.

किस्स पनाति कस्मा पन. सिक्खतीति सेक्खो. तमेवाह ‘‘सकरणीयो’’ति. उपरिमग्गत्तयकिच्चस्स अपरियोसितत्ता सकिच्चोति अत्थो. अस्साति अनेन. बहुकारत्ताति बहुपकारत्ता. अस्साति भवेय्य. अतिविय विस्सत्थोति अतिविय विस्सासिको. नन्ति आनन्दत्थेरं ओवदतीति सम्बन्धो. आनन्दत्थेरस्स कदाचि असञ्ञताय नवकाय सद्धिविहारिकपरिसाय जनपदचारिकाचरणं, तेसञ्च सद्धिविहारिकानं एकक्खणे उप्पब्बज्जनञ्च पटिच्च महाकस्सपत्थेरो तं निग्गण्हन्तो एवमाह ‘‘न वायं कुमारको मत्तमञ्ञासी’’ति. एत्थ च वा-सद्दो पदपूरणो, अयं कुमारो अत्तनो पमाणं न पटिजानातीति थेरं तज्जेन्तो आह. तत्राति एवं सति.

किञ्चापि सेक्खोति इदं न सेक्खानं अगतिगमनसब्भावेन वुत्तं, असेक्खानञ्ञेव पन उच्चिनित्वा गहितत्ताति दट्ठब्बं. तस्मा ‘‘किञ्चापि सेक्खो, तथापि थेरो आयस्मन्तम्पि आनन्दं उच्चिनतू’’ति एवमेत्थ सम्बन्धो वेदितब्बो, न पन किञ्चापि सेक्खो, तथापि अभब्बो अगतिं गन्तुन्ति योजेतब्बं. अभब्बोतिआदि पनस्स सभावकथनं. तत्थ ¶ छन्दाति छन्देन सिनेहेन. अगतिं गन्तुन्ति अकत्तब्बं कातुं. परियत्तोति अधीतो उग्गहितो.

राजगहं ¶ खो महागोचरन्ति एत्थ गावो चरन्ति एत्थाति गोचरो, गुन्नं गोचरट्ठानं. गोचरो वियाति गोचरो, भिक्खाचरणट्ठानं. सो महन्तो अस्साति महागोचरं, राजगहं. उक्कोटेय्याति निवारेय्य.

सत्तसु साधुकीळनदिवसेसूति एत्थ संवेगवत्थुं कित्तेत्वा कित्तेत्वा साधुकं एव पूजावसेन कीळनतो साधुकीळनं. उपकट्ठाति आसन्ना. वस्सं उपनेति उपगच्छति एत्थाति वस्सूपनायिका.

तत्र सुदन्ति तस्सं सावत्थियं, सुदन्ति निपातमत्तं. उस्सन्नधातुकन्ति उपचितपित्तसेम्हादिधातुकं. समस्सासेतुन्ति सन्तप्पेतुं. दुतियदिवसेति जेतवनविहारं पविट्ठदिवसतो दुतियदिवसेति वदन्ति. विरिच्चति एतेनाति विरेचनं. ओसधपरिभावितं खीरमेव विरेचनन्ति खीरविरेचनं. यं सन्धायाति यं भेसज्जपानं सन्धाय वुत्तं. भेसज्जमत्ताति अप्पमत्तकं भेसज्जं. अप्पत्थो हि अयं मत्ता-सद्दो मत्ता सुखपरिच्चागातिआदीसु (ध. प. २९०) विय.

खण्डफुल्लप्पटिसङ्खरणन्ति एत्थ खण्डन्ति छिन्नं, फुल्लन्ति भिन्नं, तेसं पटिसङ्खरणं अभिनवकरणं.

परिच्छेदवसेन वेदियति दिस्सतीति परिवेणं. तत्थाति तेसु विहारेसु खण्डफुल्लप्पटिसङ्खरणन्ति सम्बन्धो. पठमं मासन्ति वस्सानस्स पठमं मासं, अच्चन्तसंयोगे चेतं उपयोगवचनं. सेनासनवत्तानं बहूनं पञ्ञत्तत्ता, सेनासनक्खन्धके (चूळव. २९४ आदयो) सेनासनपटिबद्धानं बहूनं कम्मानं विहितत्ता ‘‘भगवता…पे… वण्णित’’न्ति वुत्तं.

दुतियदिवसेति ‘‘खण्डफुल्लप्पटिसङ्खरणं करोमा’’ति चिन्तितदिवसतो दुतियदिवसे. वस्सूपनायिकदिवसेयेव ते एवं चिन्तेसुं. सिरिया निकेतनमिवाति सिरिया निवासनट्ठानं विय. एकस्मिं पानीयतित्थे सन्निपतन्ता पक्खिनो विय सब्बेसं जनानं चक्खूनि मण्डपेयेव निपतन्तीति वुत्तं ‘एकनिपाततित्थमिव च देवमनुस्सनयनविहङ्गान’’न्ति. लोकरामणेय्यकन्ति लोके रमणीयभावं, रमणं अरहतीति वा लोकरामणेय्यकं ¶ . दट्ठब्बसारमण्डन्ति दट्ठब्बेसु सारं दट्ठब्बसारं, ततो विप्पसन्नन्ति दट्ठब्बसारमण्डं. अथ वा दट्ठब्बो सारभूतो विसिट्ठतरो मण्डो ¶ मण्डनं अलङ्कारो एतस्साति दट्ठब्बसारमण्डो, मण्डपो. मण्डं सूरियरस्मिं पाति निवारेतीति मण्डपो. विविधानि कुसुमदामानि चेव मुत्तोलम्बकानि च विनिग्गलन्तं वमेन्तं निक्खामेन्तमिव चारु सोभनं वितानं एत्थाति विविधकुसुमदामोलम्बकविनिग्गलन्तचारुवितानो. नानापुप्फूपहारविचित्तसुपरिनिट्ठितभूमिकम्मत्ता एव ‘‘रतनविचित्तमणिकोट्टिमतलमिवा’’ति वुत्तं. एत्थ च मणियो कोट्टेत्वा कततलं मणिकोट्टिमतलं नाम, तमिवाति वुत्तं होति. आसनारहन्ति निसीदनारहं. दन्तखचितन्ति दन्तेहि खचितं.

आवज्जेसीति उपनामेसि. अनुपादायाति तण्हादिट्ठिवसेन कञ्चि धम्मं अग्गहेत्वा. कथादोसोति कथाय असच्चं नाम नत्थि.

यथावुड्ढन्ति वुड्ढपटिपाटिं अनतिक्कमित्वा. एकेति मज्झिमभाणकानंयेव एके. पुब्बे वुत्तम्पि हि सब्बं मज्झिमभाणका वदन्तियेवाति वेदितब्बं. दीघभाणका पन ‘‘पदसाव थेरो सन्निपातमागतो’’ति वदन्ति. तेसु केचि ‘‘आकासेना’’ति, ‘‘ते सब्बेपि तथा तथा आगतदिवसानम्पि अत्थिताय एकमेकं गहेत्वा तथा तथा वदिंसू’’ति वदन्ति.

कं धुरं कत्वाति कं जेट्ठकं कत्वा. बीजनिं गहेत्वाति एत्थ बीजनीगहणं परिसाय धम्मकथिकानं हत्थकुक्कुच्चविनोदनमुखविकारपटिच्छादनत्थं धम्मतावसेन आचिण्णन्ति वेदितब्बं. तेनेव हि अच्चन्तसञ्ञतप्पत्ता बुद्धापि सावकापि धम्मकथिकानं धम्मतादस्सनत्थमेव चित्तबीजनिं गण्हन्ति. पठमं, आवुसो उपालि, पाराजिकं कत्थ पञ्ञत्तन्ति एत्थ कथं सङ्गीतिया पुब्बे पठमभावो सिद्धोति? पातिमोक्खुद्देसानुक्कमादिना पुब्बे पठमभावस्स सिद्धत्ता. येभुय्येन हि तीणि पिटकानि भगवतो धरमानकालेयेव इमिना अनुक्कमेन सज्झायितानि, तेनेव कमेन पच्छापि सङ्गीतानि विसेसतो विनयाभिधम्मपिटकानीति दट्ठब्बं. किस्मिं वत्थुस्मिन्ति निमित्तत्थे भुम्मं. अन्तरा च, भन्ते, राजगहं अन्तरा च नाळन्दन्ति राजगहस्स च नाळन्दाय च अन्तरा, विवरे मज्झेति अत्थो. अन्तरा-सद्देन पन युत्तत्ता ¶ उपयोगवचनं कतं. राजागारकेति रञ्ञो कीळनत्थाय कते अगारके. अम्बलट्ठिकायन्ति रञ्ञो एवंनामकं उय्यानं. केन सद्धिन्ति इध कस्मा वुत्तन्ति? यस्मा पनेतं न भगवता एव वुत्तं, रञ्ञापि किञ्चि किञ्चि वुत्तमत्थि, तस्मा ‘‘कमारब्भा’’ति अवत्वा एवं वुत्तन्ति दट्ठब्बं. वेदेहिपुत्तेनाति अयं कोसलरञ्ञो धीताय पुत्तो, न विदेहरञ्ञो धीताय. यस्मा माता पनस्स पण्डिता, तस्मा सा वेदेन ञाणेन ईहति घटति वायमतीति ‘‘वेदेही’’ति पाकटनामा जाताति वेदितब्बा.

एवं ¶ निमित्तपयोजनकालदेसदेसककारककरणप्पकारेहि पठममहासङ्गीतिं दस्सेत्वा इदानि तत्थ ववत्थापितेसु धम्मविनयेसु नानप्पकारकोसल्लत्थं एकविधादिभेदे दस्सेतुं तदेतं सब्बम्पीतिआदिमाह. तत्थ अनुत्तरं सम्मासम्बोधिन्ति एत्थ अनावरणञाणपदट्ठानं मग्गञाणं, मग्गञाणपदट्ठानञ्च अनावरणञाणं ‘‘सम्मासम्बोधी’’ति वुच्चति. पच्चवेक्खन्तेन वाति उदानादिवसेन पवत्तधम्मं सन्धायाह. विमुत्तिरसन्ति अरहत्तफलस्सादं, विमुत्तिसम्पत्तिकं वा अग्गफलनिप्फादनतो, विमुत्तिकिच्चं वा किलेसानं अच्चन्तविमुत्तिसम्पादनतो. अवसेसं बुद्धवचनं धम्मोति एत्थ यदिपि धम्मो एव विनयोपि परियत्तियादिभावतो, तथापि विनयसद्दसन्निधानेन भिन्नाधिकरणभावेन पयुत्तो धम्म-सद्दो विनयतन्तिविरहितं तन्तिं दीपेति, यथा पुञ्ञञाणसम्भारो गोबलिबद्दन्तिआदि.

अनेकजातिसंसारन्ति इमिस्सा गाथाय अयं सङ्खेपत्थो – अहं इमस्स अत्तभावगेहस्स कारकं तण्हावड्ढकिं गवेसन्तो येन ञाणेन तं दट्ठुं सक्का, तं बोधिञाणं अनिब्बिसं अलभन्तो एव अभिनीहारतो पभुति एत्तकं कालं अनेकजातिसतसहस्ससङ्ख्यं इमं संसारवट्टं सन्धाविस्सं संसरिं, यस्मा जराब्याधिमरणमिस्सताय जाति नामेसा पुनप्पुनं उपगन्तुं दुक्खा, न च सा तस्मिं अदिट्ठे निवत्तति, तस्मा तं गवेसन्तो सन्धाविस्सन्ति अत्थो. दिट्ठोसीति इदानि मया सब्बञ्ञुतञ्ञाणं पटिविज्झन्तेन दिट्ठो असि. पुन गेहन्ति पुन इमं अत्तभावसङ्खातं मम गेहं. न काहसीति न करिस्ससि. कारणमाह सब्बा तेतिआदि. तव सब्बा अवसेसकिलेसफासुका मया भग्गा. इमस्स तया कतस्स अत्तभावगेहस्स अविज्जासङ्खातं कूटं कण्णिकमण्डलं ¶ विसङ्खतं विद्धंसितं. विसङ्खारं निब्बानं आरम्मणकरणवसेन गतं मम चित्तं. अहञ्च तण्हानं खयसङ्खातं अरहत्तमग्गफलं अज्झगा पत्तोस्मीति अत्थो. केचि पन ‘‘विसङ्खारगतं चित्तमेव तण्हानं खयं अज्झगा’’ति एवम्पि अत्थं वदन्ति.

केचीति खन्धकभाणका. पाटिपददिवसेति इदं पच्चवेक्खन्तस्स उप्पन्नाति एतेन सम्बन्धितब्बं, न सब्बञ्ञुभावप्पत्तस्साति एतेन. सोमनस्समयञाणेनाति सोमनस्ससम्पयुत्तञाणेन. आमन्तयामीति निवेदयामि, बोधेमीति अत्थो. अन्तरेति अन्तराळे, वेमज्झेति अत्थो.

सुत्तन्तपिटकन्ति यथा कम्ममेव कम्मन्तं, एवं सुत्तमेव सुत्तन्तन्ति वेदितब्बं. असङ्गीतन्ति सङ्गीतिक्खन्धक (चूळव. ४३७ आदयो) कथावत्थुप्पकरणादिकं. सोळसहि वारेहि ¶ उपलक्खितत्ता ‘‘सोळस परिवारा’’ति वुत्तं. तथा हि परिवारपाळियं (परि. १ आदयो) पठमं पाराजिकं कत्थ पञ्ञत्तन्तिआदिना वुत्तं. पञ्ञत्तिवारो कथापत्तिवारो विपत्तिवारो सङ्गहवारो समुट्ठानवारो अधिकरणवारो समथवारो समुच्चयवारोति इमे अट्ठ वारा, तदनन्तरं ‘‘मेथुनं धम्मं पटिसेवनपच्चया पाराजिकं कत्थ पञ्ञत्त’’न्ति (परि. १८८) एवं पच्चयमत्तविसेसेन पुन वुत्ता तेयेव अट्ठ वारा चाति इमेसं सोळसन्नं वारानं वसेन भिक्खुविभङ्गस्स च भिक्खुनीविभङ्गस्स च पकासितत्ता सोळसहि वारेहि उपलक्खितो परिवारो ‘‘सोळसपरिवारो’’ति वुत्तोति वेदितब्बो.

दळ्हीकम्मसिथिलकरणप्पयोजनाति इदं लोकवज्जपण्णत्तिवज्जेसु यथाक्कमं योजेतब्बं. सञ्ञमवेलं अभिभवित्वा पवत्तो आचारो अज्झाचारो, वीतिक्कमो. तेनाति विविधनयत्तादिहेतुना. एतन्ति विविधविसेसनयत्तातिआदिगाथावचनं. एतस्साति विनयस्स.

इतरं पनाति सुत्तं. अत्तत्थपरत्थादिभेदेति एत्थ आदि-सद्देन दिट्ठधम्मिकसम्परायिकत्थे लोकियलोकुत्तरादिअत्थे च सङ्गण्हाति. वेनेयज्झासयानुलोमेन वुत्तत्ताति विनयं विय इस्सरभावतो आणापतिट्ठापनवसेन अदेसेत्वा वेनेय्यानं अज्झासयानुलोमेन चरितानुरूपं वुत्तत्ता. अनुपुब्बसिक्खादिवसेन अदेसेत्वा वेनेय्यानं ¶ कालन्तरे अभिनिब्बत्तिं दस्सेन्तो आह ‘‘सस्समिव फल’’न्ति. उपायसमङ्गीनंयेव निप्पज्जनभावं दस्सेन्तो ‘‘धेनु विय खीर’’न्ति आह. न हि धेनुं विसाणादीसु, अकाले वा अविजातं वा दोहन्तो खीरं पटिलभति.

यन्ति यस्मा. एत्थाति अभिधम्मे. अभिधम्मेति सुपिनन्तेन सुक्कविस्सट्ठिया अनापत्तिभावेपि अकुसलचेतना उपलब्भतीतिआदिना विनयपञ्ञत्तिया सङ्करविरहिते धम्मे, ‘‘पुब्बापरविरोधाभावतो सङ्करविरहिते धम्मे’’तिपि वदन्ति. आरम्मणादीहीति आरम्मणसम्पयुत्तकम्मद्वारपटिपदादीहि. लक्खणीयत्ताति सञ्जानितब्बत्ता. यं पनेत्थ अविसिट्ठन्ति एत्थ विनयपिटकन्तिआदीसु तीसु सद्देसु यं अविसिट्ठं समानं, तं पिटकसद्दन्ति अत्थो. मा पिटकसम्पदानेनाति पाळिसम्पदानवसेन मा गण्हित्थाति वुत्तं होति. यथावुत्तेनाति एवं दुविधत्थेनातिआदिना वुत्तप्पकारेन.

देसनासासनकथाभेदन्ति एत्थ देसनाभेदं सासनभेदं कथाभेदन्ति भेदसद्दो पच्चेकं योजेतब्बो. भेदन्ति च नानत्तन्ति अत्थो. तेसूति पिटकेसु. सिक्खा च पहानानि च गम्भीरभावो ¶ च सिक्खापहानगम्भीरभावो, तञ्च यथारहं परिदीपयेति अत्थो. परियत्तिभेदन्ति परियापुणनभेदं विभावयेति सम्बन्धो. यहिं यस्मिं विनयादिके यं सम्पत्तिञ्च विपत्तिञ्च यथा पापुणाति, तम्पि सब्बं विभावयेति सम्बन्धो. अथ वा यं परियत्तिभेदं सम्पत्तिं विपत्तिञ्च यहिं यथा पापुणाति, तम्पि सब्बं विभावयेति योजेतब्बं. परिदीपना विभावना चाति हेट्ठा गाथासु वुत्तस्स अनुरूपतो वुत्तं, अत्थतो पन एकमेव.

आणारहेनाति आणं पणेतुं अरहतीति आणारहो, भगवा सम्मासम्बुद्धत्ता. सो हि महाकारुणिकताय च अविपरीततो देसकभावेन पमाणवचनत्ता च आणं पणेतुं अरहति. वोहारपरमत्थानम्पि सम्भवतो आह ‘‘आणाबाहुल्लतो’’ति. इतो परेसुपि एसेव नयो. पठमन्ति विनयपिटकं. पचुरापराधा सेय्यसकत्थेरादयो. ते हि दोसबाहुल्लतो ‘‘पचुरापराधा’’ति वुत्ता ¶ . पचुरो बहुको बहुलो अपराधो दोसो वीतिक्कमो येसन्ते पचुरापराधा. अनेकज्झासयातिआदीसु आसयोव अज्झासयो, सो च अत्थतो दिट्ठि ञाणञ्च. चरियाति रागचरियादिका छ मूलचरिया. अथ वा चरियाति चरितं, तं सुचरितदुच्चरितवसेन दुविधं. अधिमुत्ति नाम सत्तानं पुब्बपरिचयवसेन अभिरुचि, सा दुविधा हीनपणीतभेदेन. यथानुलोमन्ति अज्झासयादीनं अनुरूपं. यथाधम्मन्ति धम्मसभावानुरूपं.

संवरासंवरोति एत्थ खुद्दको महन्तो च संवरोति अत्थो. वुड्ढिअत्थो हेत्थ अ-कारो. दिट्ठिविनिवेठनाति दिट्ठिया विमोचनं. सुत्तन्तपाळियं विविच्चेव कामेहीतिआदिना (दी. नि. १.२२६; सं. नि. २.१५२) समाधिदेसनाबाहुल्लतो सुत्तन्तपिटके ‘‘अधिचित्तसिक्खा’’ति वुत्तं. वीतिक्कमप्पहानं किलेसानन्ति संकिलेसधम्मानं, कम्मकिलेसानं वा यो कायवचीद्वारेहि वीतिक्कमो, तस्स पहानं. अनुसयवसेन सन्तानमनुवत्तन्ता किलेसा परियुट्ठितापि सीलभेदवसेन वीतिक्कमितुं न लभन्तीति आह ‘‘वीतिक्कमपटिपक्खत्ता सीलस्सा’’ति. परियुट्ठानप्पहानन्ति ओकासदानवसेन चित्ते कुसलप्पवत्तिं परियादियित्वा समुप्पत्तिवसेन ठानं परियुट्ठानं, तस्स पहानं. अनुसयप्पहानन्ति अरियमग्गेन अप्पहीनभावेन सन्ताने कारणलाभे उप्पज्जनारहा थामगता कामरागादयो सत्त किलेसा सन्ताने अनु अनु सयनतो अनुसया नाम, तेसं पहानं.

तदङ्गप्पहानन्ति तेन तेन दानसीलादिकुसलङ्गेन तस्स तस्स अकुसलङ्गस्स पहानं तदङ्गप्पहानं. दुच्चरितसंकिलेसस्स पहानन्ति कायवचीदुच्चरितमेव यत्थ उप्पज्जति, तं सन्तानं सम्मा ¶ किलेसेति उपतापेतीति संकिलेसो, तस्स तदङ्गवसेन पहानं. समाधिस्स कामच्छन्दपटिपक्खत्ता सुत्तन्तपिटके तण्हासंकिलेसस्स पहानं वुत्तं. अत्तादिसुञ्ञसभावधम्मप्पकासनतो अभिधम्मपिटके दिट्ठिसंकिलेसस्स पहानं वुत्तं.

एकमेकस्मिञ्चेत्थाति एत्थ एतेसु तीसु पिटकेसु एकेकस्मिं पिटकेति अत्थो. धम्मोति पाळीति एत्थ धम्मस्स सीलादिविसिट्ठत्थयोगतो, बुद्धानं सभावनिरुत्तिभावतो च पकट्ठानं उक्कट्ठानं वचनप्पबन्धानं ¶ आळि पन्तीति पाळि, परियत्तिधम्मो. सम्मुतिपरमत्थभेदस्स अत्थस्स अनुरूपवाचकभावेन परमत्थसद्देसु एकन्तेन भगवता मनसा ववत्थापितो नामपञ्ञत्तिप्पबन्धो पाळिधम्मो नाम. देसनाय धम्मस्स च को विसेसोति चे? यथावुत्तनयेन मनसा ववत्थापितधम्मस्स परेसं बोधनभावेन अतिसज्जना वाचाय पकासना ‘‘देसना’’ति वेदितब्बा. तेनाह – ‘‘देसनाति तस्सा मनसा ववत्थापिताय पाळिया देसना’’ति. तदुभयम्पि पन परमत्थतो सद्दो एव परमत्थविनिमुत्ताय सम्मुतिया अभावा. इममेव नयं गहेत्वा केचि आचरिया ‘‘धम्मो च देसना च परमत्थतो सद्दो एवा’’ति वोहरन्ति, तेपि अनुपवज्जायेव. यथा ‘‘कामावचरपटिसन्धिविपाका परित्तारम्मणा’’ति वुच्चन्ति, एवंसम्पदमिदं दट्ठब्बं. न हि ‘‘कामावचरपटिसन्धिविपाका निब्बत्तितपरमत्थविसयायेवा’’ति सक्का वत्तुं इत्थिपुरिसादिआकारपरिवितक्कपुब्बकानं रागादिअकुसलानं मेत्तादिकुसलानञ्च आरम्मणं गहेत्वापि समुप्पज्जनतो. परमत्थधम्ममूलकत्ता पनस्स परिकप्पस्स परमत्थविसयता सक्का पञ्ञपेतुं, एवमिधापीति दट्ठब्बं. तीसुपि चेतेसु एते धम्मत्थदेसनापटिवेधा गम्भीराति सम्बन्धो. एत्थ च पिटकावयवानं धम्मादीनं वुच्चमानो गम्भीरभावो तंसमुदायस्स पिटकस्सापि वुत्तो येवाति दट्ठब्बो. दुक्खेन ओगय्हन्ति, दुक्खो वा ओगाहो ओगाहनं अन्तोपविसनमेतेसूति दुक्खोगाहा. एत्थाति एतेसु पिटकेसु, निद्धारणे चेतं भुम्मवचनं.

हेतुनो फलं हेतुफलं. धम्माभिलापोति अत्थब्यञ्जनको अविपरीताभिलापो. विसयतो असम्मोहतो चाति लोकियलोकुत्तरानं यथाक्कमं अवबोधप्पकारदस्सनं, एतस्स अवबोधोति इमिना सम्बन्धो. लोकियो हि धम्मत्थादिं आलम्बित्वाव पवत्तनतो विसयतो अवबोधोति वुच्चति. लोकुत्तरो पन निब्बानारम्मणताय तं अनालम्बमानोपि तब्बिसयमोहविद्धंसनेन धम्मादीसु पवत्तनतो असम्मोहतो अवबोधोति वुच्चति. अत्थानुरूपं धम्मेसूति कारियानुरूपं कारणेसूति अत्थो. पञ्ञत्तिपथानुरूपं पञ्ञत्तीसूति छब्बिधनामपञ्ञत्तिया पथो पञ्ञत्तिपथो, तस्स अनुरूपं पञ्ञत्तीसूति अत्थो.

धम्मजातन्ति ¶ ¶ कारणप्पभेदो कारणमेव वा. अत्थजातन्ति कारियप्पभेदो, कारियमेव वा. या चायं देसनाति सम्बन्धो. यो चेत्थाति एतासु धम्मत्थदेसनासु यो पटिवेधोति अत्थो. एत्थाति एतेसु तीसु पिटकेसु.

अलगद्दूपमाति एत्थ अलगद्दसद्देन अलगद्दग्गहणं वुच्चति वीणावादनं वीणातिआदीसु विय, गहणञ्चेत्थ यथा डंसति, तथा दुग्गहणं दट्ठब्बं, इतरग्गहणे विरोधाभावा. तस्मा अलगद्दस्स गहणं उपमा एतिस्साति अलगद्दूपमा. अलगद्दोति चेत्थ आसिविसो वुच्चति. सो हि अलं परियत्तो, जीवितहरणसमत्थो वा विससङ्खातो गदो अस्साति ‘‘अलंगदो’’ति वत्तब्बे ‘‘अलगद्दो’’ति वुच्चति.

वट्टतो निस्सरणं अत्थो पयोजनं एतिस्साति निस्सरणत्था. भण्डागारिको वियाति भण्डागारिको, धम्मरतनानुपालको, तस्स अत्थनिरपेक्खस्स परियत्ति भण्डागारिकपरियत्ति. दुग्गहितानीति दुट्ठु गहितानि. तेनाह ‘‘उपारम्भादिहेतु परियापुटा’’ति. एत्थ च उपारम्भो नाम परियत्तिं निस्साय परवम्भनं. आदि-सद्देन इतिवादप्पमोक्खलाभसक्कारादिं सङ्गण्हाति. यं सन्धायाति यं परियत्तिदुग्गहणं सन्धाय. वुत्तन्ति अलगद्दूपमसुत्ते (म. नि. १.२३८) वुत्तं. तञ्चस्स अत्थं नानुभोन्तीति तञ्च अस्स धम्मस्स सीलपरिपूरणादिसङ्खातं अत्थं एते दुग्गहितगाहिनो नानुभोन्ति न विन्दन्ति. पटिविद्धाकुप्पोति पटिविद्धअरहत्तफलो.

इदानि तीसु पिटकेसु यथारहं सम्पत्तिविपत्तियो निद्धारेत्वा दस्सेन्तो आह विनये पनातिआदि. तत्थ तासंयेवाति अवधारणं छळभिञ्ञाचतुपटिसम्भिदानं विनये पभेदवचनाभावं सन्धाय वुत्तं. वेरञ्जकण्डे (पारा. १२) हि तिस्सो विज्जाव विभत्ता. दुतिये तासंयेवाति अवधारणं चतस्सो पटिसम्भिदा अपेक्खित्वा कतं तिस्सन्नम्पि विज्जानं छसु अभिञ्ञासु अन्तोपविट्ठत्ता. तासञ्चाति एत्थ च-सद्देन सेसानम्पि तत्थ अत्थिभावं दीपेति. अभिधम्मपिटके हि तिस्सो विज्जा छ अभिञ्ञा चतस्सो पटिसम्भिदा च वुत्ता एव. पटिसम्भिदानं तत्थेव सम्मा विभत्तभावं दीपेतुं तत्थेवाति अवधारणं कतं. उपादिन्नफस्सोति मग्गेन मग्गपटिपादनफस्सो. तेसन्ति तेसं पिटकानं. एतन्ति एतं बुद्धवचनं.

चतुत्तिंसेव ¶ सुत्तन्ताति गाथाय अयमत्थयोजना – यस्स निकायस्स सुत्तगणनतो चतुत्तिंसेव सुत्तन्ता वग्गसङ्गहवसेन तयो वग्गा यस्स सङ्गहस्साति तिवग्गो सङ्गहो, एस पठमो निकायो इध दीघनिकायोति. अनुलोमिकोति अपच्चनीको, अत्थानुलोमनतो अन्वत्थनामोति ¶ वुत्तं होति. एकनिकायम्पीति एकसमूहम्पि. एवं चित्तन्ति एवं विचित्तं. यथयिदन्ति यथा इमे. पोणिकचिक्खल्लिका खत्तिया, तेसं निवासो ‘‘पोणिकनिकायो चिक्खल्लिकनिकायो’’ति वुच्चति. पञ्चदसवग्गपरिग्गहोति पञ्चदसहि वग्गेहि परिग्गहितो. सुत्तन्तानं सहस्सानि सत्त सुत्तसतानि चाति पाठे सुत्तन्तानं सत्तसहस्सानि सत्त सुत्तसतानि चाति योजेतब्बं. कत्थचि पन ‘‘सत्त सुत्तसहस्सानि, सत्त सुत्तसतानि चा’’ति पाठो. पुब्बे निदस्सिताति सुत्तन्तपिटकनिद्देसे निदस्सिता.

वेदन्ति ञाणं. तुट्ठिन्ति पीतिं. धम्मक्खन्धवसेनाति धम्मरासिवसेन. द्वासीतिसहस्सानि बुद्धतो गण्हिन्ति सम्बन्धो. द्वे सहस्सानि भिक्खुतोति धम्मसेनापतिआदीनं भिक्खूनं सन्तिका तेहियेव देसितानि द्वे सहस्सानि गण्हिं. मेति मम हदये, इति आनन्दत्थेरो अत्तानं निद्दिसति. ये धम्मा मम हदये पवत्तिनो, ते चतुरासीतिसहस्सानीति योजना. इदञ्च भगवतो धरमानकाले उग्गहितधम्मक्खन्धवसेन वुत्तं, परिनिब्बुते पन भगवति आनन्दत्थेरेन देसितानं सुभसुत्त(दई. नि. १.४४४ आदयो) गोपकमोग्गल्लानसुत्तानं (म. नि. ३.७९ आदयो), ततियसङ्गीतियं मोग्गलिपुत्ततिस्सत्थेरेन कथितकथावत्थुप्पकरणस्स च वसेन धम्मक्खन्धानं चतुरासीतिसहस्सतोपि अधिकता वेदितब्बा.

एकानुसन्धिकं सुत्तन्ति सतिपट्ठानादि (दी. नि. २.३७२ आदयो; म. नि. १.१०५ आदयो). अनेकानुसन्धिकन्ति परिनिब्बानसुत्तादि (दी. नि. २.१३४ आदयो). तञ्हि नानाठानेसु नानाधम्मदेसनानं वसेन पवत्तं. तिकदुकभाजनं धम्मसङ्गणियं निक्खेपकण्ड(ध. स. ९८५ आदयो) अट्ठकथाकण्डवसेन (ध. स. १३८४ आदयो) गहेतब्बं. चित्तवारभाजनन्ति इदं चित्तुप्पादकण्डवसेन (ध. स. १ आदयो) वुत्तं. अत्थि वत्थूतिआदीसु वत्थु नाम सुदिन्नकण्डादि (पारा. २४ आदयो). मातिकाति सिक्खापदं. अन्तरापत्तीति सिक्खापदन्तरेसु अञ्ञस्मिं वत्थुस्मिं पञ्ञत्ता आपत्ति. तिकच्छेदोति तिकपाचित्तियादितिकपरिच्छेदो ¶ . बुद्धवचनं सङ्गहितन्ति सम्बन्धो. अस्साति बुद्धवचनस्स. सङ्गीतिपरियोसाने साधुकारं ददमाना वियाति सम्बन्धो. अच्छरं पहरितुं युत्तानि अच्छरियानि, पुप्फवस्सचेलुक्खेपादीनि. या ‘‘पञ्चसता’’ति च ‘‘थेरिका’’ति च पवुच्चति, अयं पठममहासङ्गीति नामाति सम्बन्धो.

इति समन्तपासादिकाय विनयट्ठकथाय विमतिविनोदनियं

पठममहासङ्गीतिकथावण्णनानयो निट्ठितो.

दुतियसङ्गीतिकथावण्णना

एवं ¶ पठममहासङ्गीतिं दस्सेत्वा यदत्थं सा इध दस्सिता, तं निगमनवसेन दस्सेन्तो इमिस्सातिआदिमाह. तत्रायं आचरियपरम्पराति तस्मिं जम्बुदीपे अयं आचरियानं पवेणी पटिपाटि. विजिताविनोति विजितसब्बकिलेसपटिपक्खत्ता विजितवन्तो. जम्बुसिरिव्हयेति जम्बुसदिसो सिरिमन्तो अव्हयो नामं यस्स दीपस्स, तस्मिं जम्बुदीपेति वुत्तं होति. महन्तेन हि जम्बुरुक्खेन अभिलक्खितत्ता दीपोपि ‘‘जम्बू’’ति वुच्चति. अच्छिज्जमानं अविनस्समानं कत्वा. विनयवंसन्तिआदीहि तीहि विनयपाळियेव कथिता परियायवचनत्ता तेसं. पकतञ्ञुतन्ति वेय्यत्तियं, पटुभावन्ति वुत्तं होति. धुरग्गाहोति पधानग्गाही, सब्बेसं पामोक्खो हुत्वा गण्हीति वुत्तं होति. भिक्खूनं समुदायो समूहो भिक्खुसमुदायो.

यदाति निब्बायिंसूति सम्बन्धो. जोतयित्वा च सब्बधीति तमेव सद्धम्मं सब्बत्थ पकासयित्वा. जुतिमन्तोति पञ्ञाजुतिया युत्ता, तेजवन्तो वा, महानुभावाति अत्थो. निब्बायिंसूति अनुपादिसेसाय निब्बानधातुया निब्बायिंसु. अनालयाति असङ्गा.

अथाति पच्छा, यदा परिनिब्बायिंसु, ततो परन्ति अत्थो. कप्पति सिङ्गीलोणकप्पोति एत्थ कप्प-सद्दो विकप्पत्थो, तेन सिङ्गीलोणविकप्पोपि कप्पति. इदम्पि पक्खन्तरं कप्पतीति अत्थो, एवं सब्बत्थ. तत्थ सिङ्गेन लोणं परिहरित्वा अलोणकपिण्डपातेन सद्धिं भुञ्जितुं कप्पति ¶ , सन्निधिं न करोतीति अधिप्पायो. कप्पति द्वङ्गुलकप्पोति द्वङ्गुलं अतिक्कन्ताय छायाय विकाले भोजनं भुञ्जितुं कप्पतीति अत्थो. कप्पति गामन्तरकप्पोति ‘‘गामन्तरं गमिस्सामी’’ति पवारितेन अनतिरित्तभोजनं भुञ्जितुं कप्पतीति अत्थो. कप्पति आवासकप्पोति एकसीमाय नानासेनासनेसु विसुं विसुं उपोसथादीनि सङ्घकम्मानि कातुं वट्टतीति अत्थो. कप्पति अनुमतिकप्पोति ‘‘अनागतानं आगतकाले अनुमतिं गहेस्सामा’’ति तेसु अनागतेसुयेव वग्गेन सङ्घेन कम्मं कत्वा पच्छा अनुमतिं गहेतुं कप्पति, वग्गकम्मं न होतीति अधिप्पायो. कप्पति आचिण्णकप्पोति आचरियुपज्झायेहि आचिण्णो कप्पतीति अत्थो. सो पन एकच्चो कप्पति धम्मिको, एकच्चो न कप्पति अधम्मिकोति वेदितब्बो. कप्पति अमथितकप्पोति यं खीरं खीरभावं विजहितं दधिभावं असम्पत्तं, तं भुत्ताविना पवारितेन अनतिरित्तं भुञ्जितुं कप्पतीति अत्थो. कप्पति जळोगिं पातुन्ति एत्थ जळोगीति तरुणसुरा, यं मज्जसम्भारं एकतो कतं मज्जभावमसम्पत्तं, तं पातुं वट्टतीति अधिप्पायो. जातरूपरजतन्ति एत्थ सरसतो विकारं अनापज्जित्वा सब्बदा जातरूपमेव होतीति जातं रूपं ¶ एतस्साति जातरूपं, सुवण्णं. धवलसभावताय राजतीति रजतं, रूपियं. सुसुनागपुत्तोति सुसुनागस्स पुत्तो. काकण्डकपुत्तोति काकण्डकस्स ब्राह्मणस्स पुत्तो. वज्जीसूति जनपदनामत्ता बहुवचनं कतं.

तदहुपोसथेति एत्थ तदहूति तस्मिं अहनि. उपवसन्ति एत्थाति उपोसथो, उपवसन्तीति च सीलसमादानेन वा अनसनादिना वा उपेता हुत्वा वसन्तीति अत्थो. कंसपातिन्ति सुवण्णपातिं. मासकरूपन्ति मासको एव. सब्बं ताव वत्तब्बन्ति इमिना सत्तसतिकक्खन्धके (चूळव. ४४६ आदयो) आगता सब्बापि पाळि इध आनेत्वा वत्तब्बाति दस्सेति. सङ्गायितसदिसमेव सङ्गायिंसूति सम्बन्धो.

सा पनायं सङ्गीतीति सम्बन्धो. तेसूति तेसु सङ्गीतिकारकेसु थेरेसु. विस्सुता एते सद्धिविहारिका ञेय्याति सम्बन्धो. साणसम्भूतोति साणदेसवासी सम्भूतत्थेरो. दुतियो सङ्गहोति सम्बन्धितब्बं. पन्नभाराति पतितक्खन्धभारा.

अब्बुदन्ति ¶ उपद्दवं वदन्ति. ‘‘भगवतो वचनं थेनेत्वा अत्तनो वचनस्स दीपनतो अब्बुदन्ति चोरकम्म’’न्ति एके. इदन्ति वक्खमाननिदस्सनं. सन्दिस्समाना मुखा सम्मुखा. भावितमग्गन्ति उप्पादितज्झानं. साधु सप्पुरिसाति एत्थ साधूति आयाचनत्थे निपातो, तं याचामीति अत्थो. हट्ठपहट्ठोति पुनप्पुनं सन्तुट्ठो. उदग्गुदग्गोति सरीरविकारुप्पादनपीतिवसेन उदग्गुदग्गो, पीतिमा हि पुग्गलो कायचित्तानं उग्गतत्ता ‘‘उदग्गुदग्गो’’ति वुच्चति.

तेन खो पन समयेनाति यस्मिं समये दुतियं सङ्गीतिं अकरिंसु, तस्मिं समयेति अत्थो. तं अधिकरणं न सम्पापुणिंसूति तं वज्जिपुत्तकेहि उप्पादितं अधिकरणं विनिच्छिनितुं न सम्पापुणिंसु नागमिंसु. नो अहुवत्थाति सम्बन्धो. यावतायुकं ठत्वा परिनिब्बुताति सम्बन्धो. किं पन कत्वा थेरा परिनिब्बुताति? आह दुतियं सङ्गहं कत्वातिआदि. अनिच्चतावसन्ति अनिच्चताधीनतं. जम्मिन्ति लामकं. दुरभिसम्भवं अनभिभवनीयं अतिक्कमितुं असक्कुणेय्यं अनिच्चतं एवं ञत्वाति सम्बन्धो.

दुतियसङ्गीतिकथावण्णनानयो निट्ठितो.

ततियसङ्गीतिकथावण्णना

सत्त ¶ वस्सानीति अच्चन्तसंयोगे उपयोगवचनं. अतिच्छथाति अतिक्कमित्वा इच्छथ, इतो अञ्ञत्थ गन्त्वा भिक्खं परियेसथाति अत्थो. भत्तविस्सग्गकरणत्थायाति भत्तस्स अज्झोहरणकिच्चत्थाय, भुञ्जनत्थायाति अत्थो. ‘‘सोळसवस्सो’’ति उद्देसो कथनं अस्स अत्थीति सोळसवस्सुद्देसिको, ‘‘सोळसवस्सिको’’ति अत्थो.

तीसु वेदेसूतिआदीसु इरुवेदयजुवेदसामवेदसङ्खातेसु तीसु वेदेसु. तयो एव किर वेदा अट्ठकादीहि धम्मिकेहि इसीहि लोकस्स सग्गमग्गविभावनत्थाय कता. तेनेव हि ते तेहि वुच्चन्ति. आथब्बणवेदो पन पच्छा अधम्मिकेहि ब्राह्मणेहि पाणवधादिअत्थाय कतो. पुरिमेसु च तीसु वेदेसु तेहेव धम्मिकसाखायो अपनेत्वा यागवधादिदीपिका अधम्मिकसाखा पक्खित्ताति वेदितब्बा. निघण्डूति रुक्खादीनं वेवचनप्पकासकं परियायनामानुरूपं सत्थं. तञ्हि लोके ‘‘निघण्डू’’ति ¶ वुच्चति. केटुभन्ति किटति गमेति किरियादिविभागन्ति केटुभं, किरियाकप्पविकप्पो कवीनं उपकारसत्थं. एत्थ च किरियाकप्पविकप्पोति वचीभेदादिलक्खणा किरिया कप्पीयति विकप्पीयति एतेनाति किरियाकप्पो, सो पन वण्णपदबन्धपदत्थादिविभागतो बहुविकप्पोति ‘‘किरियाकप्पविकप्पो’’ति वुच्चति. इदञ्च मूलकिरियाकप्पगन्थं सन्धाय वुत्तं. सह निघण्डुना केटुभेन च सनिघण्डुकेटुभा, तयो वेदा, तेसु सनिघण्डुकेटुभेसु. ठानकरणादिविभागतो च निब्बचनविभागतो च अक्खरा पभेदीयन्ति एतेनाति अक्खरप्पभेदो, सिक्खा च निरुत्ति च. सह अक्खरप्पभेदेनाति साक्खरप्पभेदा, तेसु साक्खरप्पभेदेसु. आथब्बणवेदं चतुत्थं कत्वा ‘‘इतिह आस इतिह आसा’’ति ईदिसवचनपटिसंयुत्तो पोराणकथासङ्खातो इतिहासो पञ्चमो एतेसन्ति इतिहासपञ्चमा, तयो वेदा, तेसु इतिहासपञ्चमेसु.

यस्स चित्तन्तिआदि पञ्हद्वयं खीणासवानं चुतिचित्तस्स उप्पादक्खणं सन्धाय वुत्तं. तत्थ पठमपञ्हे उप्पज्जतीति उप्पादक्खणसमङ्गिताय उप्पज्जति. न निरुज्झतीति निरोधक्खणं अप्पत्तताय न निरुज्झति. तस्स चित्तन्ति तस्स पुग्गलस्स तं चित्तं किं निरुज्झिस्सति आयतिञ्च नुप्पज्जिस्सतीति पुच्छा, तस्सा च विभज्जब्याकरणीयताय एवमेत्थ विस्सज्जनं वेदितब्बं. अरहतो पच्छिमचित्तस्स उप्पादक्खणे तस्स चित्तं उप्पज्जति, न निरुज्झति, आयतिञ्च नुप्पज्जिस्सति, अवस्समेव निरोधक्खणं पत्वा निरुज्झिस्सति, ततो अप्पटिसन्धिकत्ता अञ्ञं नुप्पज्जिस्सति. ठपेत्वा पन पच्छिमचित्तसमङ्गिं खीणासवं इतरेसं उप्पादक्खणसमङ्गिचित्तं ¶ उप्पादक्खणसमङ्गिताय उप्पज्जति भङ्गं अप्पत्तताय न निरुज्झति, भङ्गं पन पत्वा निरुज्झिस्सतेव, अञ्ञं पन तस्मिं वा अञ्ञस्मिं वा अत्तभावे उप्पज्जिस्सति चेव निरुज्झिस्सति चाति. यस्स वा पनातिआदि दुतियपञ्हे पन निरुज्झिस्सति नुप्पज्जिस्सतीति यस्स चित्तं उप्पादक्खणसमङ्गिताय भङ्गक्खणं पत्वा निरुज्झिस्सति अप्पटिसन्धिकताय नुप्पज्जिस्सति, तस्स खीणासवस्स तं चित्तं किं उप्पज्जति न निरुज्झतीति पुच्छा, तस्सा एकंसब्याकरणीयताय ‘‘आमन्ता’’ति विस्सज्जनं वेदितब्बं. उद्धं वा अधो वा हरितुं असक्कोन्तोति उपरिमपदे वा हेट्ठिमपदं हेट्ठिमपदे वा उपरिमपदं अत्थतो समन्नाहरितुं घटेतुं पुब्बेनापरं योजेत्वा अत्थं परिच्छिन्दितुं असक्कोन्तोति अत्थो.

सोतापन्नानं ¶ सीलेसु परिपूरकारिताय समादिन्नसीलतो नत्थि परिहानीति आह ‘‘अभब्बो दानि सासनतो निवत्तितु’’न्ति. वड्ढेत्वाति उपरिमग्गत्थाय कम्मट्ठानं वड्ढेत्वा. दन्ते पुनन्ति विसोधेन्ति एतेनाति दन्तपोनं वुच्चति दन्तकट्ठं. अभिनवानं आगन्तुकानं लज्जीसभावं खन्तिमेत्तादिगुणसमङ्गितञ्च कतिपाहं सुट्ठु वीमंसित्वाव हत्थकम्मादिसम्पटिच्छनं सङ्गहकरणञ्च युत्तन्ति सामणेरस्स चेव अञ्ञेसञ्च भिक्खूनं दिट्ठानुगतिं आपज्जन्तानं ञापनत्थं थेरो तस्स भब्बरूपतं अभिञ्ञाय ञत्वापि पुन सम्मज्जनादिं अकासि. ‘‘तस्स चित्तदमनत्थ’’न्तिपि वदन्ति. बुद्धवचनं पट्ठपेसीति बुद्धवचनं उग्गण्हापेतुं आरभि. सकलविनयाचारपटिपत्ति उपसम्पन्नानमेव विहिताति तप्परियापुणनमपि तेसञ्ञेव अनुरूपन्ति आह ‘‘ठपेत्वा विनयपिटक’’न्ति. तस्स चित्ते ठपितम्पि बुद्धवचनं सङ्गोपनत्थाय निय्यातितभावं दस्सेतुं ‘‘हत्थे पतिट्ठापेत्वा’’ति वुत्तं.

एकरज्जाभिसेकन्ति सकलजम्बुदीपे एकाधिपच्चवसेन करियमानं अभिसेकं. राजिद्धियोति राजानुभावानुगतप्पभावा. यतोति यतो सोळसघटतो. देवता एव दिवसे दिवसे आहरन्तीति सम्बन्धो. देवसिकन्ति दिवसे दिवसे. अगदामलकन्ति अप्पकेनेव सरीरसोधनादिसमत्थं सब्बदोसहरं ओसधामलकं. छद्दन्तदहतोति छद्दन्तदहसमीपे ठितदेवविमानतो, कप्परुक्खतो वा, तत्थ तादिसा कप्परुक्खविसेसा सन्ति, ततो वा आहरन्तीति अत्थो. असुत्तमयिकन्ति सुत्तेहि अबद्धं दिब्बसुमनपुप्फेहेव कतं सुमनपुप्फपटं. उट्ठितस्स सालिनोति सयंजातसालिनो, समुदायापेक्खञ्चेत्थ एकवचनं, सालीनन्ति अत्थो. नव वाहसहस्सानीति एत्थ चतस्सो मुट्ठियो एको कुडुवो, चत्तारो कुडुवा एको पत्थो, चत्तारो पत्था एको आळ्हको, चत्तारो आळ्हका एकं दोणं, चत्तारि दोणानि एका मानिका ¶ , चतस्सो मानिका एका खारी, वीसति खारिका एको वाहो, तदेव ‘‘एकं सकट’’न्ति सुत्तनिपातट्ठकथादीसु (सु. नि. अट्ठ. २.कोकालिकसुत्तवण्णना) वुत्तं. नित्थुसकणे करोन्तीति थुसकुण्डकरहिते करोन्ति. तेन निम्मितं बुद्धरूपं पस्सन्तोति सम्बन्धो. पुञ्ञप्पभावनिब्बत्तग्गहणं नागराजनिम्मितानं पुञ्ञप्पभावनिब्बत्तेहि सदिसताय कतं. विमलकेतुमालाति एत्थ केतुमाला नाम सीसतो निक्खमित्वा उपरिमुद्धनि पुञ्जो हुत्वा दिस्समानरस्मिरासीति वदन्ति.

बाहिरकपासण्डन्ति ¶ बाहिरकप्पवेदितं समयवादं. परिग्गण्हीति वीमंसमानो परिग्गहेसि. भद्दपीठकेसूति वेत्तमयपीठेसु. सारोति गुणसारो. सीहपञ्जरेति महावातपानसमीपे. किलेसविप्फन्दरहितचित्तताय दन्तं. निच्चं पच्चुपट्ठितसतारक्खताय गुत्तं. खुरग्गेयेवाति केसोरोपनावसाने. अतिविय सोभतीति सम्बन्धो. वाणिजको अहोसीति मधुवाणिजको अहोसि.

पुब्बे व सन्निवासेनाति पुब्बे वा पुब्बजातियं वा सहवासेनाति अत्थो. पच्चुप्पन्नहितेन वाति वत्तमानभवे हितचरणेन वा. एवं इमेहि द्वीहि कारणेहि तं सिनेहसङ्खातं पेमं जायते. किं वियाति? आह ‘‘उप्पलं व यथोदके’’ति. उप्पलं वाति रस्सकतो वा-सद्दो अवुत्तसम्पिण्डनत्थो. यथा-सद्दो उपमायं. इदं वुत्तं होति – यथा उप्पलञ्च सेसञ्च पदुमादि उदके जायमानं द्वे कारणानि निस्साय जायति उदकञ्चेव कललञ्च, एवं पेमम्पीति (जा. अट्ठ. २.२.१७४).

धुवभत्तानीति निच्चभत्तानि. वज्जावज्जन्ति खुद्दकं महन्तञ्च वज्जं. मोग्गलिपुत्ततिस्सत्थेरस्स भारमकासीति थेरस्स महानुभावतं, तदा सासनकिच्चस्स नायकभावेन सङ्घपरिणायकतञ्च रञ्ञो ञापेतुं सङ्घो तस्स भारमकासीति वेदितब्बं, न अञ्ञेसं अजाननताय. सासनस्स दायादोति सासनस्स अब्भन्तरो ञातको होमि न होमीति अत्थो. ये सासने पब्बजितुं पुत्तधीतरो परिच्चजन्ति, ते बुद्धसासने सालोहितञातका नाम होन्ति, सकलसासनधारणे समत्थानं अत्तनो ओरसपुत्तानं परिच्चत्तत्ता न पच्चयमत्तदायकाति इममत्थं सन्धाय थेरो ‘‘न खो, महाराज, एत्तावता सासनस्स दायादो होती’’ति आह. कथञ्चरहीति एत्थ चरहीति निपातो अक्खन्तिं दीपेति. तिस्सकुमारस्साति रञ्ञो एकमातुकस्स कनिट्ठस्स. सक्खसीति सक्खिस्ससि. सिक्खाय पतिट्ठापेसुन्ति पाणातिपाता वेरमणिआदीसु विकालभोजना वेरमणिपरियोसानासु छसु सिक्खासु पाणातिपाता वेरमणिं द्वे ¶ वस्सानि अवीतिक्कम्म समादानं समादियामीतिआदिना (पाचि. १०७९) समादानवसेन सिक्खासम्मुतिदानानन्तरं सिक्खाय पतिट्ठापेसुं. छ वस्सानि अभिसेकस्स अस्साति छवस्साभिसेको.

सब्बं ¶ थेरवादन्ति द्वे सङ्गीतियो आरुळ्हा पाळि. सा हि महासङ्घिकादिभिन्नलद्धिकाहि विवेचेतुं ‘‘थेरवादो’’ति वुत्ता. अयञ्हि विभज्जवादो महाकस्सपत्थेरादीहि असङ्करतो रक्खितो आनीतो चाति ‘‘थेरवादो’’ति वुच्चति, ‘‘सथेरवाद’’न्तिपि लिखन्ति. तत्थ ‘‘अट्ठकथासु आगतथेरवादसहितं साट्ठकथं तिपिटकसङ्गहितं बुद्धवचन’’न्ति आनेत्वा योजेतब्बं. तेजोधातुं समापज्जित्वाति तेजोकसिणारम्मणं झानं समापज्जित्वा.

सभायन्ति नगरमज्झे विनिच्छयसालायं. दिट्ठिगतानीति दिट्ठियोव. न खो पनेतं सक्का इमेसं मज्झे वसन्तेन वूपसमेतुन्ति तेसञ्हि मज्झे वसन्तो तेसुयेव अन्तोगधत्ता आदेय्यवचनो न होति, तस्मा एवं चिन्तेसि. अहोगङ्गपब्बतन्ति एवंनामकं पब्बतं. ‘‘अधोगङ्गापब्बत’’न्तिपि लिखन्ति, तं न सुन्दरं. पञ्चातपेन तप्पेन्तीति चतूसु ठानेसु अग्गिं जालेत्वा मज्झे ठत्वा सूरियमण्डलं उल्लोकेन्ता सूरियातपेन तप्पेन्ति. आदिच्चं अनुपरिवत्तन्तीति उदयकालतो पभुति सूरियं ओलोकयमाना याव अत्थङ्गमना सूरियाभिमुखाव परिवत्तन्ति. वोभिन्दिस्सामाति पग्गण्हिंसूति विनासेस्सामाति उस्साहमकंसु.

विस्सट्ठोति मरणसङ्कारहितो, निब्भयोति अत्थो. मिगवं निक्खमित्वाति अरञ्ञे विचरित्वा मिगमारणकीळा मिगवं, तं उद्दिस्स निक्खमित्वा मिगवधत्थं निक्खमित्वाति अत्थो. अहिनागादितो विसेसनत्थं ‘‘हत्थिनागेना’’ति वुत्तं. तस्स पस्सन्तस्सेवाति अनादरे सामिवचनं, तस्मिं पस्सन्तेयेवाति अत्थो. आकासे उप्पतित्वाति एत्थ अयं विकुब्बनिद्धि न होतीति गिहिस्सापि इमं इद्धिं दस्सेसि अधिट्ठानिद्धिया अप्पटिक्खित्तत्ता. पकतिवण्णञ्हि विजहित्वा नागवण्णादिदस्सनं विकुब्बनिद्धि. छणवेसन्ति उस्सववेसं. पधानघरन्ति भावनानुयोगवसेन वीरियारम्भस्स अनुरूपं विवित्तसेनासनं. सोपीति रञ्ञो भागिनेय्यं सन्धाय वुत्तं.

कुसलाधिप्पायोति मनापज्झासयो. द्वेळ्हकजातोति संसयमापन्नो. एकेकं भिक्खुसहस्सपरिवारन्ति एत्थ ‘‘गण्हित्वा आगच्छथा’’ति आणाकारेन वुत्तेपि थेरा भिक्खू सासनहितत्ता गता. कप्पियसासनञ्हेतं, न गिहीनं गिहिकम्मपटिसंयुत्तं. थेरो नागच्छीति किञ्चापि ¶ ‘‘राजा ¶ पक्कोसती’’ति वुत्तेपि धम्मकम्मत्थाय आगन्तुं वट्टति, द्विक्खत्तुं पन पेसितेपि ‘‘अननुरूपा याचना’’ति नागतो, ‘‘महानुभावो थेरो यथानुसिट्ठं पटिपत्तिको पमाणभूतो’’ति रञ्ञो चेव उभयपक्खिकानञ्च अत्तनि बहुमानुप्पादनवसेन उद्धं कत्तब्बकम्मसिद्धिं आकङ्खन्तो असारुप्पवचनलेसेन नागच्छि. एकतो सङ्घटिता नावा नावासङ्घाटं. सासनपच्चत्थिकानं बहुभावतो आह ‘‘आरक्खं संविधाया’’ति. यन्ति यस्मा. अब्बाहिंसूति आकड्ढिंसु. बाहिरतोति उय्यानस्स बाहिरतो. पस्सन्तानं अतिदुक्करभावेन उपट्ठानं सन्धाय ‘‘पदेसपथवीकम्पनं दुक्कर’’न्ति आह. अधिट्ठाने पनेत्थ विसुं दुक्करता नाम नत्थि.

दीपकतित्तिरोति साकुणिकेहि समजातिकानं गहणत्थाय पोसेत्वा सिक्खेत्वा पासट्ठाने ठपनकतित्तिरो. न पटिच्च कम्मं फुसतीति गाथाय यदि तव पापकिरियाय मनो नप्पदुस्सति, लुद्देन तं निस्साय कतम्पि पापकम्मं तं न फुसति. पापकिरियाय हि अप्पोस्सुक्कस्स निरालयस्स भद्रस्स सतो तव तं पापं न उपलिम्पति, तव चित्तं न अल्लीयतीति अत्थो.

किं वदति सीलेनाति किंवादी. अथ वा को कतमो वादो किंवादो, सो एतस्स अत्थीति किंवादी. अत्तानञ्च लोकञ्च सस्सतोति वादो एतेसन्ति सस्सतवादिनो. सत्तेसु सङ्खारेसु वा एकच्चं सस्सतन्ति पवत्तो वादो एकच्चसस्सतो, तस्मिं नियुत्ता एकच्चसस्सतिका. ‘‘अन्तो, अनन्तो, अन्तानन्तो, नेवन्तो नानन्तो’’ति एवं अन्तानन्तं आरब्भ पवत्ता चत्तारो वादा अन्तानन्ता, तेसु नियुत्ता अन्तानन्तिका. न मरति न उपच्छिज्जतीति अमरा, एवन्तिपि मे नो, तथातिपि मे नोतिआदिना (दी. नि. १.६२) पवत्ता दिट्ठि चेव वाचा च, तस्सा विक्खेपो एतेसन्ति अमराविक्खेपिका. अथ वा अमरा नाम मच्छजाति दुग्गहा होति, तस्सा अमराय विय विक्खेपो एतेसन्ति अमराविक्खेपिका. अधिच्च यदिच्छकं यं किञ्चि कारणं अनपेक्खित्वा समुप्पन्नो अत्ता च लोको चाति वादे नियुत्ता अधिच्चसमुप्पन्निका. सञ्ञी अत्ताति वादो येसन्ते सञ्ञीवादा. एवं असञ्ञीवादा नेवसञ्ञीनासञ्ञीवादाति एत्थापि. ‘‘कायस्स भेदा सत्तो उच्छिज्जती’’ति (दी. नि. १.८५-८६) एवं ¶ उच्छेदं वदन्तीति उच्छेदवादा. दिट्ठधम्मोति पच्चक्खो यथासकं अत्तभावो, तस्मिंयेव यथाकामं पञ्चकामगुणपरिभोगेन निब्बानं दुक्खूपसमं वदन्तीति दिट्ठधम्मनिब्बानवादा. विभजित्वा वादो एतस्साति विभज्जवादी, भगवा. सब्बं एकरूपेन अवत्वा यथाधम्मं विभजित्वा निज्जटं निगुम्बं कत्वा यथा दिट्ठिसन्देहादयो विगच्छन्ति, सम्मुतिपरमत्था ¶ च धम्मा असङ्करा पटिभन्ति, एवं एकन्तविभजनसीलोति वुत्तं होति. परप्पवादं मद्दमानोति तस्मिं काले उप्पन्नं, आयतिं उप्पज्जनकञ्च सब्बं परवादं कथावत्थुमातिकाविवरणमुखेन निम्मद्दनं करोन्तोति अत्थो.

ततियसङ्गीतिकथावण्णनानयो निट्ठितो.

आचरियपरम्परकथावण्णना

केनाभतन्ति इमं पञ्हं विस्सज्जेन्तेन जम्बुदीपे ताव याव ततियसङ्गीति, ताव दस्सेत्वा इदानि सीहळदीपे आचरियपरम्परं दस्सेतुं ततियसङ्गहतो पन उद्धन्तिआदि आरद्धं. इमं दीपन्ति तम्बपण्णिदीपं. तस्मिं दीपे निसीदित्वा आचरियेन अट्ठकथाय कतत्ता ‘‘इमं दीप’’न्ति वुत्तं. कञ्चि कालन्ति अच्चन्तसंयोगे उपयोगवचनं, किस्मिञ्चि कालेति अत्थो. पोराणाति सीहळदीपे सीहळट्ठकथाकारका. भद्दनामोति भद्दसालत्थेरो. आगुं पापं न करोन्तीति नागा. विनयपिटकं वाचयिंसूति सम्बन्धो. तम्बपण्णियाति भुम्मवचनं. निकाये पञ्चाति विनयाभिधम्मानं विसुं गहितत्ता तब्बिनिमुत्ता पञ्च निकाया गहेतब्बा. पकरणेति अभिधम्मपकरणे वाचेसुन्ति योजना. तीणि पिटकानि स्वागतानि अस्साति ‘‘तेपिटको’’ति वत्तब्बे ‘‘तिपेटको’’ति छन्दानुरक्खणत्थं वुत्तं. तारकराजाति चन्दिमा. पुप्फनामोति एत्थ महापदुमत्थेरो सुमनत्थेरो च ञातब्बोति द्विक्खत्तुं ‘‘पुप्फनामो’’ति वुत्तं.

वनवासिन्ति वनवासीरट्ठं. करकवस्सन्ति हिमपातनकवस्सं, करकधारासदिसं वा वस्सं. हरापेत्वाति उदकोघेन हरापेत्वा. छिन्नभिन्नपटधरोति सत्थकेन छिन्नं रङ्गेन भिन्नं पटं धारणको. भण्डूति मुण्डको. मक्खं असहमानोति थेरस्स आनुभावं पटिच्च अत्तनो ¶ उप्पन्नं परेसं गुणमक्खनलक्खणं मक्खं तथा पवत्तं कोधं असहमानो. असनियो फलन्तीति गज्जन्ता पतन्ति. मे मम भयभेरवं जनेतुं पटिबलो न अस्स न भवेय्याति योजना. अञ्ञदत्थूति एकंसेन. कस्मीरगन्धाराति कस्मीरगन्धाररट्ठवासिनो. इसिवातपटिवाताति भिक्खूनं चीवरचलनकायचलनेहि सञ्जनितवातेहि परितो समन्ततो बीजयमाना अहेसुं. धम्मचक्खुन्ति हेट्ठामग्गत्तये ञाणं. अनमतग्गियन्ति अनमतग्गसंयुत्तं (सं. नि. २.१२४ आदयो). समधिकानीति साधिकानि. पञ्च रट्ठानीति पञ्च चिनरट्ठानि. वेगसाति वेगेन. समन्ततो रक्खं ठपेसीति तेसं अप्पवेसनत्थाय अधिट्ठानवसेन रक्खं ठपेसि. अड्ढुड्ढानि सहस्सानीति अड्ढेन चतुत्थानि अड्ढुड्ढानि, अतिरेकपञ्चसतानि तीणि सहस्सानीति अत्थो. दियड्ढसहस्सन्ति ¶ अड्ढेन दुतियं दियड्ढं, अतिरेकपञ्चसतिकं सहस्सन्ति अत्थो. निद्धमेत्वानाति पलापेत्वा.

राजगहनगरपरिवत्तकेनाति राजगहनगरं परिवत्तेत्वा ततो बहि तं पदक्खिणं कत्वा गतमग्गेन, गमनेन वा. आरोपेसीति पटिपादेसि. पळिनाति आकासं पक्खन्दिंसु. नगुत्तमेति चेतियगिरिमाह. पुरतोति पाचीनदिसाभागे. पुरसेट्ठस्साति सेट्ठस्स अनुराधपुरस्स. सिलकूटम्हीति एवंनामके पब्बतकूटे. सीहकुमारस्स पुत्तोति एत्थ ‘‘कलिङ्गराजधीतु कुच्छिस्मिं सीहस्स जातो सीहकुमारो’’ति वदन्ति. जेट्ठमासस्स पुण्णमियं जेट्ठनक्खत्तं वा मूलनक्खत्तं वा होतीति आह ‘‘जेट्ठमूलनक्खत्तं नाम होती’’ति. मिगानं वानतो हिंसनतो बाधनतो मिगवं, मिगविज्झनकीळा. रोहितमिगरूपन्ति गोकण्णमिगवेसं. रथयट्ठिप्पमाणाति रथपतोदप्पमाणा. एका लतायट्ठि नामाति एका रजतमया कञ्चनलताय पटिमण्डितत्ता एवं लद्धनामा. पुप्फयट्ठियं नीलादीनि पुप्फानि, सकुणयट्ठियं नानप्पकारा मिगपक्खिनो विचित्तकम्मकता विय खायन्तीति दट्ठब्बं. राजककुधभण्डानीति राजारहउत्तमभण्डानि. सङ्खन्ति दक्खिणावट्टं अभिसेकसङ्खं. वड्ढमानन्ति अलङ्कारचुण्णं, ‘‘नहानचुण्ण’’न्ति केचि. वटंसकन्ति कण्णपिळन्धनं वटंसकन्ति वुत्तं होति. नन्दियावट्टन्ति नन्दियावट्टपुप्फाकारेन मङ्गलत्थं सुवण्णेन कतं. कञ्ञन्ति खत्तियकुमारिं. हत्थपुञ्छनन्ति पीतवण्णं महग्घहत्थपुञ्छनवत्थं. अरुणवण्णमत्तिकन्ति नागभवनसम्भवं. वत्थकोटिकन्ति वत्थयुगमेव. नागमाहटन्ति नागेहि ¶ आहटं. अमतोसधन्ति एवंनामिका गुळिकजाति. अमतसदिसकिच्चत्ता एवं वुच्चति. भूमत्थरणसङ्खेपेनाति भूमत्थरणाकारेन. उप्पातपाठकाति निमित्तपाठका. अलं गच्छामाति ‘‘पुरस्स अच्चासन्नत्ता सारुप्पं न होती’’ति पटिक्खिपन्तो आह. अड्ढनवमानं पाणसहस्सानन्ति (अ. नि. ६.५३) पञ्चसताधिकानं अट्ठन्नं पाणसहस्सानं. अप्पमादसुत्तन्ति अङ्गुत्तरनिकाये महाअप्पमादसुत्तं, राजोवादसुत्तन्ति वुत्तं होति.

महच्चाति महता. उपसङ्कमन्तोति अतिविय किलन्तरूपो हुत्वा उपसङ्कमीति अत्थो. तुम्हे जाननत्थन्ति सम्बन्धो. पञ्चपण्णासायाति एत्थ ‘‘चतुपञ्ञासायाति वत्तब्बं. एवञ्हि सति उपरि वुच्चमानं द्वासट्ठि अरहन्तोति वचनं समेती’’ति सारत्थदीपनियं (सारत्थ. टी. १.आचरियपरम्परकथावण्णना) वुत्तं. दसभातिकसमाकुलन्ति मुटसिवस्स पुत्तेहि देवानंपियतिस्सादीहि दसहि भातिकेहि समाकिण्णं. चिरदिट्ठो सम्मासम्बुद्धोति धातुयो सन्धायाह. सब्बताळावचरेति सब्बानि तुरियभण्डानि, तंसहचरिते वा वादके. उपट्ठापेत्वाति उपहारकारापनवसेन सन्निपातेत्वा. वड्ढमानकच्छायायाति पच्छाभत्तं. पोक्खरवस्सन्ति पोक्खरपत्ते ¶ विय अतेमितुकामानं उपरि अतेमेत्वा पवत्तनकवस्सं. महावीरोति सत्थुवोहारेन धातु एव वुत्ता. पच्छिमदिसाभिमुखोव हुत्वा अपसक्कन्तोति एत्थ पुरत्थाभिमुखो ठितोव पिट्ठितो अपसक्कनेन पच्छिमदिसाय गच्छन्तो तादिसोपसङ्कमनं सन्धाय ‘‘पच्छिमदिसाभिमुखो’’ति वुत्तो. ‘‘महेजवत्थु नाम एवंनामकं देवट्ठान’’न्ति वदन्ति.

पज्जरकेनाति अमनुस्ससमुट्ठापितेन पज्जरकरोगेन. देवोति मेघो. अनुप्पवेच्छीति विमुच्चि. विवादो होतीति एत्थ किरियाकालमपेक्खित्वा वत्तमानप्पयोगो दट्ठब्बो. एवं ईदिसेसु सब्बत्थ. तदेतन्ति ठानं तिट्ठतीति सम्बन्धो. ‘‘छन्नं वण्णानं सम्बन्धभूतानं रंसियो चा’’ति अज्झाहरितब्बं, ‘‘छन्नं वण्णानं उदकधारा चा’’ति एवम्पेत्थ सम्बन्धं वदन्ति. परिनिब्बुतेपि भगवति तस्सानुभावेन एवरूपं पाटिहारियं अहोसि एवाति दस्सेतुं एवं अचिन्तियातिआदिगाथमाह. रक्खं करोन्तोति अत्तना उपायेन पलापितानं यक्खानं पुन अप्पविसनत्थाय परित्तानं करोन्तो. आविज्जीति परियायि.

रञ्ञो ¶ भाताति रञ्ञो कनिट्ठभाता. अनुळादेवी नाम रञ्ञो जेट्ठभातु जाया. सरसरंसिजालविस्सज्जनकेनाति सिनिद्धताय रसवन्तं ओजवन्तं रंसिजालं विस्सज्जेन्तेन. एकदिवसेन अगमासीति सम्बन्धो. अप्पेसीति लेखसासनं पतिट्ठापेसि. उदिक्खतीति अपेक्खति पत्थेति. भारियन्ति गरुकं, अनतिक्कमनीयन्ति अत्थो. मं पटिमानेतीति मं उदिक्खति. कम्मारवण्णन्ति रञ्ञो पकतिसुवण्णकारवण्णं. तिहत्थविक्खम्भन्ति तिहत्थवित्थारं. सकलजम्बुदीपरज्जेनाति एत्थ रञ्ञो इदन्ति रज्जं, सकलजम्बुदीपतो उप्पज्जनकआयो चेव आणादयो च, तेन पूजेमीति अत्थो, न सकलपथवीपासादादिवत्थुना तस्स सत्ताहं देमीतिआदिना कालपरिच्छेदं कत्वा दातुं अयुत्तत्ता. एवञ्हि देन्तो तावकालिकं देति नाम वत्थुपरिच्चागलक्खणत्ता दानस्स, पथवादिवत्थुपरिच्चागेन च पुन गहणस्स अयुत्तत्ता. नियमितकाले पन आयादयो परिच्चत्ता एवाति ततो परं अपरिच्चत्तत्ता गहेतुं वट्टति. तस्मा वुत्तनयेनेत्थ इतो परम्पि आयादिदानवसेनेव रज्जदानं वेदितब्बं. पुप्फुळका हुत्वाति केतकीपारोहङ्कुरा विय उदकपुप्फुळकाकारा हुत्वा. गवक्खजालसदिसन्ति भावनपुंसकं, वातपानेसु जालाकारेन ठपितदारुपटसदिसन्ति अत्थो, गवक्खेन च सुत्तादिमयजालेन च सदिसन्ति वा अत्थो.

देवदुन्दुभियोति एत्थ देवोति मेघो, तस्स अच्छसुक्खताय आकासमिव खायमानस्स अनिमित्तगज्जितं देवदुन्दुभि नाम, यं ‘‘आकासदुन्दुभी’’तिपि वदन्ति. फलिंसूति थनिंसु. पब्बतानं ¶ नच्चेहीति पथवीकम्पेन इतो चितो च भमन्तानं पब्बतानं नच्चेहि. विम्हयजाता यक्खा ‘‘हि’’न्तिसद्दं निच्छारेन्तीति आह ‘‘यक्खानं हिङ्कारेही’’ति. सकसकपटिभानेहीति अत्तनो अत्तनो सिप्पकोसल्लेहि. अभिसेकं दत्वाति अनोतत्तदहोदकेन अभिसेकं दत्वा.

देवताकुलानीति महाबोधिं परिवारेत्वा ठितनागयक्खादिदेवताकुलानि दत्वाति सम्बन्धो. गोपकराजकम्मिनो तथा ‘‘तरच्छा’’ति वदन्ति. इमिना परिवारेनाति सहत्थे करणवचनं, इमिना परिवारेन सहाति अत्थो. तामलित्तिन्ति एवंनामकं समुद्दतीरे पट्टनं. इदमस्स ततियन्ति सुवण्णकटाहे पतिट्ठितसाखाबोधिया रज्जसम्पदानं सन्धाय वुत्तं. ततो पन पुब्बे एकवारं रज्जसम्पदानं अच्छिन्नाय साखाय महाबोधिया एव कतं, तेन ¶ सद्धिं चतुक्खत्तुं राजा रज्जेन पूजेसि. रज्जेन पूजितदिवसेसु किर सकलदीपतो उप्पन्नं आयं गहेत्वा महाबोधिमेव पूजेसि.

पठमपाटिपददिवसेति सुक्कपक्खपाटिपददिवसे. तञ्हि कण्हपक्खपाटिपददिवसं अपेक्खित्वा ‘‘पठमपाटिपददिवस’’न्ति वुत्तं, इदञ्च तस्मिं तम्बपण्णिदीपे वोहारं गहेत्वा वुत्तं, इध पन पुण्णमितो पट्ठाय याव अपरा पुण्णमी, ताव एको मासोति वोहारो. तस्मा इमिना वोहारेन ‘‘दुतियपाटिपददिवसे’’ति वत्तब्बं सिया कण्हपक्खपाटिपदस्स इध पठमपाटिपदत्ता. गच्छति वतरेति एत्थ अरेति खेदे. समन्तायोजनन्ति अच्चन्तसंयोगे उपयोगवचनं, योजनप्पमाणे पदेसे सब्बत्थाति अत्थो. सुपण्णरूपेनाति महाबोधिं बलक्कारेन गहेत्वा नागभवनं नेतुकामानि नागराजकुलानि इद्धिया गहितेन गरुळरूपेन सन्तासेति. तं विभूतिं पस्सित्वाति देवतादीहि करीयमानं पूजामहत्तं, महाबोधिया च आनुभावमहत्तं दिस्वा सयम्पि तथा पूजेतुकामा थेरिं याचित्वाति योजना. समुद्दसालवत्थुस्मिन्ति यस्मिं पदेसे ठत्वा राजा समुद्दे आगच्छन्तं बोधिं थेरानुभावेन अद्दस, यत्थ च पच्छा समुद्दस्स दिट्ठट्ठानन्ति पकासेतुं समुद्दसालं नाम सालं अकंसु, तस्मिं समुद्दसालाय वत्थुभूते पदेसे. थेरस्साति महामहिन्दत्थेरस्स. पुप्फअग्घियानीति कूटागारसदिसानि पुप्फचेतियानि. आगतो वतरेति एत्थ अरेति पमोदे. अट्ठहि अमच्चकुलेहि अट्ठहि ब्राह्मणकुलेहि चाति सोळसहि जातिसम्पन्नकुलेहि. रज्जं विचारेसीति रज्जं विचारेतुं विस्सज्जेसि. राजवत्थुद्वारकोट्ठकट्ठानेति राजुय्यानस्स द्वारकोट्ठकट्ठाने. अनुपुब्बविपस्सनन्ति उदयब्बयादिअनुपुब्बविपस्सनं. ‘‘सह बोधिपतिट्ठानेना’’ति करणवचनेन वत्तब्बे विभत्तिपरिणामेन ‘‘सह बोधिपतिट्ठाना’’ति निस्सक्कवचनं कतं. सति हि सहसद्दप्पयोगे करणवचनेनेव भवितब्बं. दस्सिंसूति पञ्ञायिंसु. महाआसनट्ठानेति पुब्बपस्से महासिलासनेन पतिट्ठितट्ठाने. पूजेत्वा वन्दीति आगामिनं ¶ महाचेतियं वन्दि. पुरिमे पन महाविहारट्ठाने पूजामत्तस्सेव कतत्ता अनागते सङ्घस्सपि नवकता अवन्दितब्बता च पकासिताति वेदितब्बा. अनागते पन मेत्तेय्यादिबुद्धा पच्चेकबुद्धा च बुद्धभावक्खणं उद्दिस्स वन्दितब्बाव सभावेन विसिट्ठपुग्गलत्ताति गहेतब्बं.

महाअरिट्ठोति ¶ पञ्चपञ्ञासाय भातुकेहि सद्धिं चेतियगिरिम्हि पब्बजितं सन्धाय वुत्तं. मेघवण्णाभयअमच्चस्स परिवेणट्ठानेति मेघवण्णअभयस्स रञ्ञो अमच्चेन कत्तब्बस्स परिवेणस्स वत्थुभूते ठाने. मङ्गलनिमित्तभावेन आकासे समुप्पन्नो मनोहरसद्दो आकासस्स रवो विय होतीति वुत्तं ‘‘आकासं महाविरवं रवी’’ति. न हि आकासो नाम कोचि धम्मो अत्थि, यो सद्दं समुट्ठापेय्य, आकासगतउतुविसेससमुट्ठितोव सो सद्दोति गहेतब्बो. पठमकत्तिकपवारणदिवसे…पे… विनयपिटकं पकासेसीति इदं विनयं वाचेतुं आरद्धदिवसं सन्धाय वुत्तं. अनुसिट्ठिकरानन्ति अनुसासनीकरानं. राजिनोति उपयोगत्थे सामिवचनं, देवानंपियतिस्सराजानन्ति अत्थो. अञ्ञेपीति महिन्दादीहि अट्ठसट्ठिमहाथेरेहि अञ्ञेपि, तेसं सरूपं दस्सेन्तो आह तेसं थेरानन्तिआदि. तत्थ तेसं थेरानं अन्तेवासिकाति महिन्दत्थेरादीनं अट्ठसट्ठिमहाथेरानं अरिट्ठादयो अन्तेवासिका च महाअरिट्ठत्थेरस्स अन्तेवासिका तिस्सदत्तकाळसुमनादयो चाति योजेतब्बं. अन्तेवासिकानं अन्तेवासिकाति उभयत्थ वुत्तअन्तेवासिकानं अन्तेवासिकपरम्परा चाति अत्थो. पुब्बे वुत्तप्पकाराति महिन्दो इट्टियो उत्तियोतिआदिगाथाहि (पारा. अट्ठ. १.ततियसङ्गीतिकथा) पकासिता आचरियपरम्परा.

न पग्घरतीति न गळति, न पमुस्सतीति अत्थो. सतिगतिधितिमन्तेसूति एत्थ सतीति उग्गहधारणे सति. गतीति सद्दत्थविभागग्गहणे ञाणं. धितीति उग्गहपरिहरणादीसु वीरियं. कुक्कुच्चकेसूति ‘‘कप्पति न कप्पती’’ति वीमंसकुक्कुच्चकारीसु. मातापितुट्ठानियोति वत्वा तमेवत्थं समत्थेतुं आह तदायत्ताहीतिआदि. विनयपरियत्तिं निस्सायाति विनयपिटकपरियापुणनं निस्साय. अत्तनो सीलक्खन्धो सुगुत्तोति लज्जिनो विनयधारणस्स अलज्जिअञ्ञाणतादीहि छहि आकारेहि आपत्तिया अनापज्जनतो अत्तनो सीलक्खन्धो खण्डादिदोसविरहितो सुगुत्तो सुरक्खितो होति. कुक्कुच्चपकतानन्ति कप्पियाकप्पियं निस्साय उप्पन्नेन कुक्कुच्चेन पकतानं उपद्दुतानं अभिभूतानं यथाविनयं कुक्कुच्चं विनोदेत्वा सुद्धन्ते पतिट्ठापनेन पटिसरणं होति. विगतो सारदो भयमेतस्साति विसारदो. ‘‘एवं कथेन्तस्स दोसो एवं न दोसो’’ति ञत्वाव कथनतो निब्भयोव सङ्घमज्झे वोहरति ¶ . पच्चत्थिकेति अत्तपच्चत्थिके चेव वज्जिपुत्तकादिसासनपच्चत्थिके च. सहधम्मेनाति सकारणेन वचनेन सिक्खापदं दस्सेत्वा यथा ते असद्धम्मं पतिट्ठापेतुं न सक्कोन्ति, एवं सुनिग्गहितं कत्वा निग्गण्हाति. सद्धम्मट्ठितियाति ¶ परियत्तिपटिपत्तिपटिवेधसङ्खातस्स तिविधस्सापि सद्धम्मस्स ठितिया, पवत्तियाति अत्थो.

विनयो संवरत्थायातिआदीसु विनयपरियापुणनं विनयो, विनयपञ्ञत्ति वा कायवचीद्वारसंवरत्थाय. अविप्पटिसारोति कताकतं निस्साय विप्पटिसाराभावो सन्तापाभावो. पामोज्जं तरुणपीति. पीति नाम बलवपीति. पस्सद्धीति कायचित्तपस्सद्धि. यथाभूतञाणदस्सनन्ति सप्पच्चयनामरूपपरिग्गहो. निब्बिदाति विपस्सना. विरागोति अरियमग्गो. विमुत्तीति अग्गफलं. विमुत्तिञाणदस्सनन्ति पच्चवेक्खणञाणं. अनुपादाति कञ्चि धम्मं अनुपादियित्वा परिच्चजित्वा. परिनिब्बानत्थायाति पच्चवेक्खणञाणे अनुप्पन्ने अन्तरा परिनिब्बानाभावेन तंपरिनिब्बानत्थायाति पच्चयत्तेन वुत्तं अनन्तरादिपच्चयत्ता. एतदत्था कथाति अयं विनयकथा नाम एतस्स अनुपादापरिनिब्बानस्स अत्थायाति अत्थो. मन्तनाति विनयमन्तनायेव, भिक्खूनं ‘‘एवं करिस्साम, एवं न करिस्सामा’’ति विनयपटिबद्धमन्तना. उपनिसाति उपनिसीदति एत्थ फलन्ति उपनिसा, कारणं. विनयो संवरत्थायातिआदिकारणपरम्परापि एतदत्थाति अत्थो. सोतावधानन्ति इमिस्सा परम्परपच्चयकथाय अत्तानं समनत्थाय सोतावधानं, तम्पि एतमत्थं. यदिदन्ति निपातो. यो अयं चतूहि उपादानेहि अनुपादियित्वा चित्तस्स अरहत्तमग्गसङ्खातो, तप्फलसङ्खातो वा विमोक्खो, सोपि एतदत्थाय अनुपादापरिनिब्बानत्थाय. अथ वा यो अयं कञ्चि धम्मं अनुपादाचित्तस्स विमोक्खो विमुच्चनं विगमो परिनिब्बानं एतदत्था कथाति एवं उपसंहरणवसेन योजेतुम्पि वट्टति मग्गफलविमोक्खस्स पुब्बे वुत्तत्ता. आयोगोति उग्गहणादिवसेन पुनप्पुनं अभियोगो.

आचरियपरम्परकथावण्णनानयो निट्ठितो.

इति समन्तपासादिकाय विनयट्ठकथाय विमतिविनोदनियं

बाहिरनिदानकथावण्णनानयो निट्ठितो.

वेरञ्जकण्डवण्णना

सेय्यथिदन्ति ¶ ¶ तं कतमं, तं कथन्ति वा अत्थो. अनियमनिद्देसवचनन्ति अत्तनो अत्थं सरूपेन नियमेत्वा निद्दिसतीति नियमनिद्देसो, न नियमनिद्देसो अनियमनिद्देसो. सोव वुच्चते अनेनाति वचनन्ति अनियमनिद्देसवचनं. तस्साति तेनातिपदस्स. परिवितक्कोति ‘‘कतमेसानं खो बुद्धानं भगवन्तानं ब्रह्मचरियं न चिरट्ठितिकं अहोसी’’तिआदिना (पारा. १८) पवत्तो. पुब्बे वा पच्छा वाति तेनातिपदतो हेट्ठा वुत्तपाठे वा उपरि वक्खमानपाठे वाति अत्थो. अत्थतो सिद्धेनाति सामत्थियतो सिद्धेन. तत्रिदं मुखमत्तनिदस्सनन्ति तस्सा यथावुत्तयुत्तिया परिदीपने इदं उपायमत्तनिदस्सनं. मुखं द्वारं उपायोति हि अत्थतो एकं.

समयसद्दो दिस्सतीति सम्बन्धो. अस्साति समयसद्दस्स समवायो अत्थोति सम्बन्धो. कालञ्च समयञ्च उपादायाति एत्थ कालो नाम उपसङ्कमनस्स युत्तकालो, समयो नाम सरीरबलादिकारणसमवायो, ते उपादाय पटिच्चाति अत्थो. खणोति ओकासो. बुद्धुप्पादादयो हि मग्गब्रह्मचरियस्स ओकासो. सो एव समयो. तेनेव ‘‘एकोवा’’ति वुत्तं. महासमयोति महासमूहो. पवनस्मिन्ति वनसण्डे. समयोपि खो ते भद्दालीति एत्थ समयोति सिक्खापदाविलङ्घनस्स हेतु, को सो? अत्तनो विप्पटिपत्तिया भगवतो जाननं, सो समयसङ्खातो हेतु तस्सा अप्पटिविद्धोति अत्थो. भगवातिआदि तस्स पटिविज्झनाकारदस्सनं. उग्गहमानोति किञ्चि किञ्चि उग्गहेतुं समत्थताय उग्गहमानो, सुमनपरिब्बाजकस्सेवेतं नामं. समयं दिट्ठिं पवदन्ति एत्थाति समयप्पवादको, मल्लिकाय आरामो. स्वेव तिन्दुकाचीरसङ्खाताय तिम्बरुरुक्खपन्तिया परिक्खित्तत्ता ‘‘तिन्दुकाचीर’’न्ति च, एकाव निवासा साला एत्थाति ‘‘एकसालको’’ति च वुच्चति. अत्थाभिसमयाति यथावुत्तस्स दिट्ठधम्मिकसम्परायिकस्स अत्थस्स हितस्स पटिलाभतो. मानाभिसमयाति मानप्पहाना. पीळनट्ठोति पीळनं तंसमङ्गिनो हिंसनं, अविप्फारिकताकरणं, पीळनमेव अत्थो पीळनट्ठो ¶ . सन्तापोति दुक्खदुक्खतादिवसेन सन्तापनं. विपरिणामोति जराय मरणेन चाति द्विधा ¶ विपरिणामेतब्बता अभिसमेतब्बो पटिविज्झितब्बोति अभिसमयो, सोव अभिसमयट्ठो, पीळनादीनि.

एत्थ च उपसग्गानं जोतकमत्तत्ता समयसद्दस्स अत्थुद्धारेपि सउपसग्गो अभिसमयसद्दो उद्धटो. तत्थ सङ्गमवसेन पच्चयानं फलुप्पादनं पटि अयनं एकतो पवत्ति एत्थाति समयो, समवायो. विवट्टूपनिस्सयसङ्गमे सति एन्ति एत्थ सत्ता पवत्तन्तीति समयो, खणो. समेति एत्थ सङ्खतधम्मो, सयं वा एति आगच्छति विगच्छति चाति समयो, कालो. समेन्ति अवयवा एतस्मिं, सयं वा तेसूति समयो, समूहो. पच्चयन्तरसङ्गमे एति आगच्छति एतस्मा फलन्ति समयो, हेतु. सञ्ञावसेन विपल्लासतो धम्मेसु एति अभिनिविसतीति समयो, दिट्ठि. समीपं अयनं उपगमनं समयो, पटिलाभो. सम्मदेव सहितानं वाचानं अयनं विगमोति समयो, पहानं. सम्मदेव, सहितानं वा सच्चानं अयनं जाननन्ति समयो, पटिवेधो. एवं तस्मिं तस्मिं अत्थे समयसद्दस्स पवत्ति वेदितब्बा.

एत्थ च समयसद्दस्स सामञ्ञेन अनेकत्थता वुत्ता. न हि एकस्मिं अत्थविसेसे वत्तमानो सद्दो तदञ्ञेपि वत्तति. तस्मा अत्था विय तंतंवाचका समयसद्दापि भिन्ना एवाति गहेतब्बा. एवं सब्बत्थ अत्थुद्धारेसु.

तत्थ तथाति तेसु सुत्ताभिधम्मेसु उपयोगभुम्मवचनेहि. इधाति विनये, अञ्ञथाति करणवचनेन. अच्चन्तमेवाति निरन्तरमेव. भावो नाम किरिया, किरियाय किरियन्तरूपलक्खणं भावेनभावलक्खणं, यथा उदये सति चन्दे जातो राजपुत्तोति. अधिकरणञ्हीतिआदि अभिधम्मे समयसद्दो कालसमूहखणसमवायहेतुसङ्खातेसु पञ्चसु अत्थेसु वत्तति, न विनये विय काले एव, तेसु च कालसमूहत्था द्वे तत्थ वुत्तानं फस्सादिधम्मानं अधिकरणभावेन निद्दिसितुं युत्ता. खणसमवायहेतुअत्था पन तयोपि अत्तनो भावेन फस्सादीनं भावस्स उपलक्खणभावेन ¶ निद्दिसितुं युत्ताति विभावनमुखेन यथावुत्तमत्थं समत्थेतुं वुत्तं. तत्थ यस्मिञ्हि काले, धम्मसमूहे वा समये अधिकरणभूते कुसलं उप्पन्नं, तस्मिञ्ञेव काले, धम्मसमूहे वा समये फस्सादयो होन्तीति एवं अधिकरणत्थयोजना, यस्मिं पन खणे, समवाये हेतुम्हि वा समये सति विज्जमाने कुसलं उप्पन्नं, तस्मिञ्ञेव खणादिम्हि समयेपि विज्जमाने फस्सादयो होन्तीति भावेनभावलक्खणत्थयोजना च वेदितब्बा.

होति ¶ चेत्थाति एत्थ यथावुत्तअत्थविसये सङ्गहगाथा होति. अञ्ञत्राति सुत्ताभिधम्मेसु. अभिलापमत्तभेदोति देसनाविलासतो सद्दमत्तेनेव भेदो, न अत्थतो.

अविसेसेनाति सामञ्ञेन. इरियापथोतिआदीसु इरियाय सब्बद्वारिककिरियाय पथो पवत्तनट्ठानं तब्बिनिमुत्तकम्मस्स अभावाति ठानादयो इरियापथो, सोव विहारो. ब्रह्मभूता सेट्ठभूता परहितचित्तादिवसप्पवत्तितो मेत्तादयो ब्रह्मविहारो नाम. तदवसेसा पन महग्गता सब्बनीवरणविगमनादिसिद्धेन जोतनादिअत्थेन दिब्बविहारो नाम. ब्रह्मविहारभावेन विसुं गहितत्ता मेत्तादयो इध असङ्गहिता. अरियानमेव विहारोति फलसमापत्तियो अरियविहारो नाम.

रुक्खादिमूलेयेव मूलसद्दस्स निरुळ्हभावं दस्सेतुं अपरेन मूलसद्देन विसेसेत्वा ‘‘मूलमूले’’ति वुत्तं, यथा दुक्खदुक्खन्ति (विभ. अट्ठ. १९०). लोभादीनं दोसमूलादिचित्तासाधारणत्ता ‘‘असाधारणहेतुम्ही’’ति वुत्तं.

तत्थ सियाति तत्थ वेरञ्जायन्तिआदीसु पदेसु कस्सचि चोदना सियाति अत्थो. उभयथा निदानकित्तनस्स पन किं पयोजनन्ति? आह गोचरगामनिदस्सनत्थन्तिआदि. तत्थ अस्साति भगवतो.

किलमोव किलमथो, अत्तनो अत्तभावस्स किलमथो अत्तकिलमथो, तस्स अनु अनु योगो पुनप्पुनं पवत्तनं अत्तकिलमथानुयोगो. वत्थुकामारम्मणे सुखे सम्पयोगवसेन लीना युत्ता, कामतण्हा ¶ , तंसहचरिते कामे सुखे वा आरम्मणभूते अल्लीना पवत्ततीति कामसुखल्लिका तण्हा, तस्सा कामसुखल्लिकाय अनु अनु योगो कामसुखल्लिकानुयोगो. लोके संवड्ढभावन्ति आमिसोपभोगेन संवड्ढितभावं. उप्पज्जमानो बहुजनहितादिअत्थायेव उप्पज्जतीति योजना.

दिट्ठिसीलसामञ्ञेन संहतत्ता सङ्घोति इममत्थं विभावेन्तो आह दिट्ठीतिआदि. एत्थ च ‘‘यायं दिट्ठि अरिया निय्यानिका निय्याति तक्करस्स सम्मा दुक्खक्खयाय, तथारूपाय दिट्ठिया दिट्ठिसामञ्ञगतो विहरती’’ति (दी. नि. ३.३२४, ३५६; म. नि. १.४९२; ३.५४; अ. नि. ६.१२; परि. २७४) एवं वुत्ताय दिट्ठिया. ‘‘यानि तानि सीलानि अखण्डानि…पे… समाधिसंवत्तनिकानि, तथारूपेसु सीलेसु सीलसामञ्ञगतो विहरती’’ति ¶ (दी. नि. ३.३२४, ३५६; म. नि. १.४९२; ३.५४; अ. नि. ६.१२; परि. २७४) एवं वुत्तानञ्च सीलानं सामञ्ञसङ्खातेन सङ्घातो सङ्घटितो समणगणो, तेनाति अत्थो. ‘‘दिट्ठिसीलसामञ्ञसङ्घातसङ्घातेना’’ति वा पाठेनेत्थ भवितब्बं, तस्स दिट्ठिसीलसामञ्ञभूतेन संहननेन सङ्घातो समणगणो, तेनाति अत्थो. एवञ्हि पाठे सद्दतो अत्थो युत्ततरो होति. अस्साति महतो भिक्खुसङ्घस्स.

ब्रह्मं अणतीति एत्थ ब्रह्म-सद्देन वेदो वुच्चति, सो मन्तब्रह्मकप्पवसेन तिविधो. तत्थ इरुवेदादयो तयो वेदा मन्ता, ते च पधाना, इतरे पन सन्निस्सिता, तेन पधानस्सेव गहणं. मन्ते सज्झायतीति इरुवेदादिके मन्तसत्थे सज्झायतीति अत्थो. इरुवेदादयो हि गुत्तभासितब्बताय ‘‘मन्ता’’ति वुच्चन्ति. ‘‘बाहितपापत्ता ब्राह्मणो, समितपापत्ता समणो’’ति यथावुत्तमत्थद्वयं उदाहरणद्वयेन विभावेतुं वुत्तञ्हेतन्तिआदि वुत्तं. ‘‘समितत्ता हि पापानं ‘समणो’ति पवुच्चती’’ति हि इदं वचनं गहेत्वा ‘‘समितपापत्ता ‘समणो’ति वुच्चती’’ति वुत्तं, बाहितपापोति इदं पन अञ्ञस्मिं गाथाबन्धे वुत्तवचनं. यथाभुच्चगुणाधिगतन्ति यथाभूतगुणाधिगतं. सकिञ्चनोति सदोसो.

गोत्तवसेनाति एत्थ गं तायतीति गोत्तं, गो-सद्देन चेत्थ अभिधानं बुद्धि च वुच्चति. केनचि पारिजुञ्ञेनाति ञातिपारिजुञ्ञादिना केनचि पारिजुञ्ञेन ¶ , परिहानियाति अत्थो. ततो परन्ति वेरञ्जायन्तिआदिवचनं. इत्थम्भूताख्यानत्थे उपयोगवचनन्ति इत्थं इमं पकारं भूतो आपन्नोति इत्थम्भूतो, तस्स आख्यानं इत्थम्भूताख्यानं, सोयेवत्थो इत्थम्भूताख्यानत्थो. अथ वा ‘‘इत्थं एवंपकारो भूतो जातो’’ति एवं कथनत्थो इत्थम्भूताख्यानत्थो, तस्मिं उपयोगवचनन्ति अत्थो. एत्थ च अब्भुग्गतोति एत्थ अभि-सद्दो इत्थम्भूताख्यानत्थजोतको अभिभवित्वा उग्गमनप्पकारस्स दीपनतो, तेन योगतो तं खो पन भवन्तं गोतमन्ति इदं उपयोगवचनं सामिअत्थेपि समाने इत्थम्भूताख्यानदीपनतो ‘‘इत्थम्भूताख्यानत्थे’’ति वुत्तं, तेनेवाह ‘‘तस्स खो पन भोतो गोतमस्साति अत्थो’’ति.

इदं वुत्तं होति – यथा साधु देवदत्तो मातरमभीति एत्थ अभिसद्दयोगतो इत्थम्भूताख्याने उपयोगवचनं कतं, एवमिधापि तं खो पन भवन्तं गोतमं अभि एवं कल्याणो कित्तिसद्दो उग्गतोति अभिसद्दयोगतो इत्थम्भूताख्याने उपयोगवचनन्ति. साधु देवदत्तो मातरमभीति एत्थ हि ‘‘देवदत्तो मातरमभि मातरि विसये मातुया वा साधू’’ति एवं अधिकरणत्थे वा सामिअत्थे वा भुम्मवचनस्स सामिवचनस्स वा पसङ्गे इत्थम्भूताख्यानत्थजोतकेन ¶ अभिसद्देन योगे उपयोगवचनं कतं, यथा चेत्थ देवदत्तो मातुविसये मातुसम्बन्धी वा सो वुत्तप्पकारप्पत्तोति अयमत्थो विञ्ञायति, एवमिधापि भोतो गोतमस्स सम्बन्धी कित्तिसद्दो अब्भुग्गतो अभिभवित्वा उग्गमनपकारप्पत्तोति अयमत्थो विञ्ञायति. तत्थ हि देवदत्तग्गहणं विय इध कित्तिसद्दग्गहणं, तत्थ मातरन्ति वचनं विय इध तं खो पन भवन्तं गोतमन्ति वचनं, तत्थ साधुसद्दग्गहणं विय इध उग्गतसद्दग्गहणं वेदितब्बं. कित्तिसद्दोति कित्तिभूतो सद्दो, न केवलोति दस्सनत्थं विसेसितन्ति आह ‘‘कित्ति एवा’’ति. ततो कित्तीति थुति, तस्सा पकासको सद्दो कित्तिसद्दोति दस्सेतुं ‘‘थुतिघोसो वा’’ति वुत्तं.

सो भगवाति एत्थ सोति पसिद्धियं, यो सो समत्तिंस पारमियो पूरेत्वा सब्बकिलेसे भञ्जित्वा दससहस्सिलोकधातुं कम्पेन्तो अनुत्तरं ¶ सम्मासम्बोधिं अभिसम्बुद्धो, सो लोके अतिपाकटोति ‘‘सो भगवा’’ति वुत्तं. भगवाति च इदं सत्थु नामकित्तनं, न गुणकित्तनं. परतो पन भगवाति गुणकित्तनमेव. इमिना च इमिना चाति एतेन अरहन्तिआदिपदानं पच्चेकं अनेकगुणगणं पटिच्च पवत्तभावं दस्सेति.

सुविदूरविदूरेति द्वीहि सद्देहि अतिविय दूरेति दस्सेति, सुविदूरता एव हि विदूरता. सवासनानं किलेसानं विद्धंसितत्ताति इमिना पच्चेकबुद्धादीहि असाधारणं भगवतो अरहत्तन्ति दस्सेति तेसं वासनाय अप्पहीनत्ता, वासना च नाम निक्किलेसस्सापि सकलञेय्यानवबोधादिद्वारत्तयप्पयोगविगुणताहेतुभूतो किलेसनिहितो आकारो चिरनिगळितपादानं निगळमोक्खेपि सङ्कुचिततागमनहेतुको निगळनिहितो आकारो विय. याय पिलिन्दवच्छादीनं वसलवोहारादिविगुणता होति, अयं वासनाति गहेतब्बा. आरकाति एत्थ आकारस्स रस्सत्तं क-कारस्स च ह-कारं सानुस्सरं कत्वा निरुत्तिनयेन ‘‘अरह’’न्ति पदसिद्धि वेदितब्बा. एवं उपरिपि यथारहं निरुत्तिनयेन पदसिद्धि वेदितब्बा. यञ्चेतं संसारचक्कन्ति सम्बन्धो. पुञ्ञादीति आदि-सद्देन अपुञ्ञाभिसङ्खारआनेञ्जाभिसङ्खारे सङ्गण्हाति. आसवा एव अविज्जादीनं कारणत्ता समुदयोति आह ‘‘आसवसमुदयमयेना’’ति. ‘‘आसवसमुदया अविज्जासमुदयो’’ति (म. नि. १.१०३) हि वुत्तं. विपाककटत्तारूपप्पभेदो तिभवो एव रथो, तस्मिं तिभवरथे. संसारचक्कन्ति यथावुत्तकिलेसकम्मविपाकसमुदयो.

‘‘खन्धानञ्च ¶ पटिपाटि, धातुआयतनान च;

अब्बोच्छिन्नं वत्तमाना, ‘संसारो’ति पवुच्चती’’ति. (विसुद्धि. २.६१८; दी. नि. अट्ठ. २.९५ अपसादनावण्णना; सं. नि. अट्ठ. २.२.६०; अ. नि. अट्ठ. २.४.१९९; ध. स. अट्ठ. निदानकथा; विभ. अट्ठ. २२६ सङ्खारपदनिद्देस; सु. नि. अट्ठ. २.५२३; उदा. अट्ठ. ३९; इतिवु. अट्ठ. १४, ५८; थेरगा. अट्ठ. १.६७, ९९; बु. वं. अट्ठ. ५८; पटि. म. अट्ठ. २.१.११७; चूळनि. अट्ठ. ६) –

एवं वुत्तो संसारोव चक्कं विय परिब्भमनतो चक्कं, तस्स चक्कस्स सब्बे अरा हताति सम्बन्धो. अनेनाति भगवता. बोधीति ञाणं, तं ¶ एत्थ मण्डं पसन्नं जातन्ति बोधिमण्डो. कम्मक्खयकरं ञाणफरसुन्ति अरहत्तमग्गञाणं वुत्तं, तं छिन्दितब्बं अभिसङ्खारसङ्खातं कम्मं परिच्छिन्दतीति दस्सेतुं कम्मक्खयकरविसेसनविसिट्ठं वुत्तन्ति वेदितब्बं.

एवं कतिपयङ्गेहि संसारचक्कं तदवसेसङ्गेहि फलभूतनामरूपधम्मेहि तिभवरथञ्च तस्मिं रथे योजितसंसारचक्कारानं हननप्पकारञ्च दस्सेत्वा इदानि सब्बेहिपि द्वादसहि पटिच्चसमुप्पादङ्गेहि रथविरहितमेव केवलं संसारचक्कं, तस्स अरघातनप्पकारभेदञ्च दस्सेतुं अथवातिआदि वुत्तं. तत्थ अनमतग्गन्ति अनु अनु अमतग्गं, सब्बथा अनुगच्छन्तेहिपि अविञ्ञातकोटिकन्ति अत्थो. अविज्जामूलकत्ता जरामरणपरियोसानत्ताति इदं सङ्खारादीनं दसन्नं अरभावेन एकत्तं समारोपेत्वाति वुत्तं. न हि तेसं पच्चेकं अविज्जामूलकता जरामरणपरियोसानता च अत्थि तथा पटिच्चसमुप्पादपाळियं अवुत्तत्ता. अथ वा तेसम्पि यथारहं अत्थतो अविज्जामूलकत्तं, अत्तनो अत्तनो लक्खणभूतखणिकजरामरणवसेन तप्परियोसानतञ्च सन्धायेतं वुत्तन्ति वेदितब्बं. एवञ्च तेसं पच्चेकं अरभावो सिद्धो होति.

एवं सब्बाकारं संसारचक्कमेव दस्सेत्वा इदानि येन ञाणेन इमस्स संसारचक्कस्स अरानं छेदो भगवतो सिद्धो, तस्स धम्मट्ठितिञाणस्स ‘‘पच्चयपरिग्गहे पञ्ञा धम्मट्ठितिञाण’’न्ति (पटि. म. ४; १.४५) मातिका वुत्तत्ता भवचक्कावयवेसु अविज्जादीसु पच्चयपच्चयुप्पन्नत्ता परिग्गहवसेन पवत्तिआकारं दस्सेत्वा परतो तस्स अत्थस्स निगमनवसेन वुत्तेन एवमयं अविज्जाहेतूतिआदिकेन पटिसम्भिदापाळिसहितेन (पटि. म. १.४५) पाठेन ¶ सरूपतो धम्मट्ठितिञाणं, तस्स च तेसुयेव अविज्जादीसु चतुसङ्खेपादिवसेन पवत्तिविभागञ्च दस्सेत्वा ततो परं इति भगवातिआदिपाठेन भगवतो तेन धम्मट्ठितिञाणेन पटिच्चसमुप्पादस्स सब्बाकारतो पटिविद्धभावं दस्सेत्वा पुन इमिना धम्मट्ठितिञाणेनातिआदिना भगवतो तेन ञाणेन संसारचक्कारानं विद्धंसितभावं दस्सेतुं तत्थ दुक्खादीसु अञ्ञाणं अविज्जातिआदि वुत्तं. तत्थ तिण्णं आयतनानन्ति चक्खुसोतमनायतनानं तिण्णं. एस नयो तिण्णं फस्सानन्तिआदीसुपि. रूपतण्हादिवसेन छ तण्हाकाया एव वेदितब्बा.

सग्गसम्पत्तिन्ति ¶ कामसुगतीसु सम्पत्तिं. तथेवाति कामुपादानपच्चया एव. ब्रह्मलोकसम्पत्तिन्ति रूपीब्रह्मलोकसम्पत्तिं. तेभूमकधम्मविसयस्स सब्बस्सापि रागस्स किलेसकामभावतो भवरागोपि कामुपादानमेवाति आह ‘‘कामुपादानपच्चयायेव मेत्तं भावेती’’ति. सेसुपादानमूलिकासुपीति दिट्ठुपादानसीलब्बतुपादानअत्तवादुपादानमूलिकासुपि योजनासु. तत्रायं योजनानयो – इधेकच्चो ‘‘नत्थि परलोको उच्छिज्जति अत्ता’’ति (दी. नि. १.८५-८६ अत्थतो समानं) दिट्ठिं गण्हाति, सो दिट्ठुपादानपच्चया कायेन दुच्चरितं चरतीतिआदिना, अपरो ‘‘असुकस्मिं भवे अत्ता उच्छिज्जती’’ति दिट्ठिं गहेत्वा कामरूपारूपभवूपपत्तिया तं तं कुसलं करोतीतिआदिना च दिट्ठुपादानमूलिका योजना, इमिनाव नयेन अत्तवादुपादानमूलिका योजना वेदितब्बा. अपरो ‘‘सीलेन सुद्धि वतेन सुद्धी’’ति असुद्धिमग्गं ‘‘सुद्धिमग्गो’’ति परामसन्तो सीलब्बतुपादानपच्चया कायेन दुच्चरितं चरतीतिआदिना सब्बभवेसु सीलब्बतुपादानमूलिका योजना वेदितब्बा.

इदानि यस्स संसारचक्कारानं घातनसमत्थस्स धम्मट्ठितिञाणस्स अविज्जादिपच्चयपअग्गहाकारं दस्सेतुं कामभवे च अविज्जा कामभवे सङ्खारानं पच्चयो होतीतिआदिना अविज्जादीनं पच्चयपच्चयुप्पन्नभावो दस्सितो, तमेव ञाणं अविज्जादीसु पवत्तिआकारेन सद्धिं पटिसम्भिदामग्गपाळिं आनेत्वा निगमनवसेन दस्सेन्तो एवमयन्तिआदिमाह. विसुद्धिमग्गटीकायं पन ‘‘इदानि य्वायं संसारचक्कं दस्सेन्तेन कामभवे अविज्जा कामभवे सङ्खारानं पच्चयो होतीतिआदिना अविज्जादीनं पच्चयभावो सङ्खारादीनं पच्चयुप्पन्नभावो दस्सितो, तमेव पटिसम्भिदामग्गपाळिं आनेत्वा निगमनवसेन दस्सेन्तो एवमयन्तिआदिमाहा’’ति वुत्तं. सारत्थदीपनिया विनयटीकायपि अयमेव पाठो लिखितो. तत्थ च कामभवे च अविज्जातिआदिना अविज्जादीनं पच्चयपच्चयुप्पन्नभावो संसारचक्कं दस्सेन्तेन वुत्तो न होति तस्स च अविज्जा नाभि, मूलत्तातिआदिना पुब्बेव दस्सितत्ता उपरि चक्करूपतो ¶ पयोगत्तेन उपसंहाराभावा च. ‘‘अपि च तमेव पच्चयपच्चयुप्पन्नभावं निगमनवसेन दस्सेन्तो’’ति च वुत्तं, न चेत्थ पच्चयपच्चयुप्पन्नभावो निगमनवसेन पधानत्तेन दस्सितो, अथ खो पच्चयपरिग्गहवसप्पवत्तं धम्मट्ठितिञाणमेव ¶ यथावुत्तपच्चयपरिग्गहाकारस्स निगमनवसेन दस्सितं. तथा हि ‘‘एवमयं अविज्जा हेतु, सङ्खारा हेतुसमुप्पन्ना, उभोपेते धम्मा हेतुसमुप्पन्नाति पच्चयपरिग्गहे पञ्ञा धम्मट्ठितिञाणं. अतीतम्पि अद्धानं. अनागतम्पि अद्धानं अविज्जा हेतु…पे… धम्मट्ठितिञाण’’न्ति (पटि. म. १.४६) धम्मट्ठितिञाणमेव पधानत्तेन दस्सितं. ‘‘अविज्जा हेतु, सङ्खारा हेतुसमुप्पन्ना’’तिआदि पन पच्चयपरिग्गहे पञ्ञा धम्मट्ठितिञाणन्ति (पटि. म. मातिका ४; १.४५) वुच्चमानत्ता तस्स पच्चयपरिग्गहाकारपरिदीपनत्थं विसयत्तेन वुत्तं, न पधानत्तेन.

अयञ्हेत्थ अत्थो – एवन्ति अनन्तरे वुत्तनयेन अयं अविज्जा सङ्खारानं हेतु, सङ्खारा च तेन हेतुना समुप्पन्ना. उभोपेतेति यस्मा अयं अविज्जा परपरिकप्पितपकतिइस्सरादि विय अहेतुका निच्चा धुवा न होति, अथ खो ‘‘आसवसमुदया अविज्जासमुदयो’’ति (म. नि. १.१०३) वचनतो सयम्पि सहेतुका सङ्खता अनिच्चायेव होति, तस्मा उभोपेते अविज्जासङ्खारा हेतुसमुप्पन्नायेव. इतीति एवं यथावुत्तनयेन पच्चयपरिग्गण्हने या पञ्ञा, तं धम्मानं ठितिसङ्खाते कारणे याथावतो पवत्तत्ता धम्मट्ठितिञाणं नामाति.

एत्थ हि ञाणस्स विसयविभावनवसेनेव अविज्जादीनं पच्चयादिभावो वुत्तो, न पधानत्तेन, ञाणमेव पनेत्थ पधानतो वुत्तं, तस्मा एतस्स ञाणस्स पच्चयपरिग्गहाकारदस्सनत्थमेव हेट्ठापि कामभवे च अविज्जातिआदिना अविज्जादीनं पच्चयादिभावो वुत्तो, इधापि निगमनवसेन उपसंहटो, न भवचक्कदस्सनत्थन्ति अयमेत्थ अत्तनो मति.

तत्थ च पच्चयुप्पन्नधम्मेसु अदिट्ठेसु हेतूनं पच्चयभावोपि न सक्का दट्ठुन्ति ‘‘सङ्खारा हेतुसमुप्पन्ना’’ति पच्चयपरिग्गहञाणनिद्देसे (पटि. म. १.४५) पच्चयुप्पन्नधम्मानम्पि गहणं कतन्ति वेदितब्बं. एतेन नयेनाति अविज्जायं वुत्तनयेन सङ्खारा हेतु, विञ्ञाणं हेतुसमुप्पन्नन्तिआदिना सब्बानि जातिपरियोसानानि पदानि वित्थारेतब्बानि.

एवं पटिसम्भिदामग्गपाळिया धम्मट्ठितिञाणस्स अविज्जादीसु पवत्तिआकारं दस्सेत्वा इदानि तस्स तेसु पच्चयेसु अञ्ञेहिपि आकारेहि पवत्तिआकारं ¶ दस्सेतुं तत्थातिआदि वुत्तं. तत्थ तत्थाति तेसु पटिच्चसमुप्पादङ्गेसु. सङ्खिप्पन्ति एत्थ अविज्जादयो हेतुसामञ्ञेन फलसामञ्ञेन ¶ वाति सङ्खेपो, सङ्गहो, कोट्ठासो रासीति अत्थो. सो पन जातितो दुविधोपि कालभेदवसेन चतुब्बिधो जातो. पच्चुप्पन्नो अद्धाति अनुवत्तति. तण्हुपादानभवा गहिता किलेसकम्मसामञ्ञतो तदविनाभावतो च. अविज्जादिकिलेसवट्टम्पि विपाकधम्मधम्मतासरिक्खताय इध कम्मवट्टमेवाति आह इमे पञ्च धम्मातिआदि. विपाका धम्मातिआदीसु कम्मजअरूपक्खन्धानमेव विपाकसद्दवचनीयत्तेपि नामरूपादिपदेसु रूपमिस्सम्पि फलपञ्चकं अरूपप्पधानताय च तब्बहुलताय च ‘‘विपाकवट्ट’’न्ति वुत्तं. विपाकप्पधानं वट्टं, विपाकबहुलं वा वट्टन्ति अत्थो. कम्मजपरियायो वा एत्थ विपाक-सद्दो दट्ठब्बो. जातिजरामरणापदेसेनाति परमत्थधम्मविनिमुत्तजातिजरामरणं नाम नत्थीति तदपदेसेन तेसं कथनेन तंमुखेनाति अत्थो. आकिरीयन्ति पकासीयन्तीति आकारा, अविज्जादिसरूपा, ततो पच्चयाकारतोति अत्थो. एको सन्धीति अविच्छेदप्पवत्तिहेतुभूतो हेतुफलसन्धि, दुतियो फलहेतुसन्धि, ततियो हेतुफलसन्धीति दट्ठब्बं.

एवं धम्मट्ठितिञाणस्स अविज्जादीसु अनेकेहि पकारेहि पवत्तिआकारं दस्सेत्वा इदानि तेहि, अवुत्तेहि च सब्बेहि आकारेहि भगवतो पटिच्चसमुप्पादस्स पटिविद्धभावं, तस्स च ञाणस्स धम्मट्ठितिञाणसद्दप्पवत्तिनिमित्ततं पटिसम्भिदापाळिनयेन दस्सेतुं उपसंहारवसेन इति भगवातिआदि वुत्तं. तत्थ इतीति वुत्तप्पकारपरामसनं, तेनाह चतुसङ्खेपन्तिआदि. सब्बाकारतोति इध कामभवे च अविज्जा कामभवे सङ्खारानं पच्चयोतिआदिना इध वुत्तेहि च अवुत्तेहि च पटिच्चसमुप्पादविभङ्गादीसु (विभ. २२५ आदयो) आगतेहि सब्बेहि पकारेहि पटिविज्झति. तन्ति येन ञाणेन भगवा एवं जानाति, तं ञाणं. ञातट्ठेनाति जाननट्ठेन. पजाननट्ठेनाति पटिविज्झनट्ठेन.

इदानि यमिदं धम्मट्ठितिञाणं पच्चयपरिग्गहाकारभेदेहि सद्धिं पपञ्चतो दस्सितं, तस्मिं अरघाते एतस्स उपयोगितं दस्सेतुं इमिना धम्मट्ठितिञाणेनातिआदि वुत्तं. तत्थ धम्मट्ठितिञाणेन अरे हनीति सम्बन्धो. कथन्ति? आह ‘‘ते धम्मे’’तिआदि. ते अविज्जादिके धम्मे महावजिरञाणावुधेन ¶ तेन धम्मट्ठितिञाणेन यथाभूतं ञत्वा तेन बलवविपस्सनावुधेन निब्बिन्दन्तो अरियमग्गावुधेन विरज्जन्तो विमुच्चन्तो अरे हनीति योजना. अरियमग्गञाणम्पि हि किच्चतो समुदयसच्चादिबोधतो ‘‘धम्मट्ठितिञाण’’न्ति वुच्चति.

एकेकं धम्मक्खन्धं एकेकविहारेन पूजेमीति धम्मक्खन्धं आरब्भ पवत्तापि विहारकरणपूजा भगवति पेमेनेव पवत्तत्ता सधातुकादिचेतियपटिमण्डितत्ता च भगवतोव पूजाति ¶ आह भगवन्तं उद्दिस्सातिआदि. किलेसारीन सो मुनीति एत्थ निग्गहीतलोपो, किलेसारीनं हतत्ताति अत्थो. पच्चयादीन चारहोति एत्थापि निग्गहीतलोपो दट्ठब्बो.

सम्मासम्बुद्धोति एत्थ सं-सद्दो सयन्ति अत्थे पवत्ततीति आह ‘‘साम’’न्ति, अपरनेय्यो हुत्वाति अत्थो. सब्बधम्मानन्ति इदं कस्सचि विसयविसेसस्स अग्गहितत्ता सिद्धं. पदेसग्गहणे हि असति गहेतब्बस्स निप्पदेसताव विञ्ञायति, यथा दिक्खितो न ददातीति. एवञ्च कत्वा अत्थविसेसानपेक्खा कत्तरियेव बुद्ध-सद्दसिद्धि वेदितब्बा कम्मवचनिच्छाय अभावतो. ‘‘सम्मा सामं बुद्धत्ता सम्मासम्बुद्धो’’ति एत्तकमेव हि इध सद्दतो लब्भति. सब्बधम्मानन्ति इदं पन अत्थतो लब्भमानं गहेत्वा वुत्तं, न हि बुज्झनकिरिया अविसया युज्जति. अभिञ्ञेय्येति लक्खणादितो अनिच्चादितो च अभिविसिट्ठेन लोकियलोकुत्तरञाणेन जानितब्बे चतुसच्चधम्मे. परिञ्ञेय्येति अनिच्चादिवसेन परिच्छिन्दित्वा जानितब्बं दुक्खं अरियसच्चमाह. पहातब्बेति समुदयसच्चं. सच्छिकातब्बेति निरोधसच्चं. बहुवचननिद्देसो पनेत्थ सोपादिसेसादिकं परियायसिद्धं भेदं अपेक्खित्वा कतो.

अभिञ्ञेय्यन्ति गाथाय पहातब्बभावेतब्बानं समुदयमग्गसच्चानं हेतुधम्मानं गहणेनेव तप्फलानं दुक्खसच्चनिरोधसच्चानम्पि सिद्धितो परिञ्ञातब्बञ्च परिञ्ञातं सच्छिकातब्बञ्च सच्छिकतन्ति इदम्पेत्थ सङ्गहितमेवाति दट्ठब्बं, तेनाह ‘‘तस्मा बुद्धोस्मी’’ति. यस्मा चत्तारिपि सच्चानि मया बुद्धानि, तस्मा सब्बम्पि ञेय्यं बुद्धोस्मि, अब्भञ्ञासिन्ति अत्थो.

विचित्तविसयपत्थनाकारप्पवत्तिया तण्हा दुक्खविचित्तताय पधानकारणन्ति आह ‘‘मूलकारणभावेना’’ति. उभिन्नन्ति चक्खुस्स तंसमुदयस्स च. अप्पवत्तीति अप्पवत्तिनिमित्तं, न अभावमत्तं. तस्स अवत्थुत्ता ¶ सप्पच्चयत्तादिअनेकभेदा सब्बसङ्गहिता. निरोधप्पजाननाति सच्छिकिरियाभिसमयवसेन निरोधस्स पटिविज्झना. एकेकपदुद्धारेनापीति चक्खु चक्खुसमुदयोतिआदिना एकेककोट्ठासनिद्धारणेनापि, न दुक्खसच्चादिसामञ्ञतो एवाति अधिप्पायो. तण्हायपि सङ्खारदुक्खपरियापन्नताय परिञ्ञेय्यत्ता दुक्खसच्चभावं दस्सेतुं ‘‘छ तण्हाकाया’’ति वुत्तं. यस्मिं पन अत्तभावे सा उप्पज्जति, तस्स मूलकारणभावेन समुट्ठापिका पुरिमभवसिद्धा तण्हा समुदयसच्चन्ति गहेतब्बा. कसिणानीति कसिणारम्मणानि झानानि. द्वत्तिंसाकाराति केसादयो तदारम्मणज्झानानि च. नव भवाति कामभवादयो तयो सञ्ञीभवादयो तयो एकवोकारभवादयो तयो चाति नव भवा. चत्तारि झानानीति आरम्मणविसेसं अनपेक्खित्वा सामञ्ञतो चत्तारि झानानि वुत्तानि. विपाककिरियानम्पि यथारहं ¶ सब्बत्थ सङ्गहो दट्ठब्बो. एत्थ च कुसलधम्मानं उपनिस्सयभूता तण्हासमुट्ठापिकाति वेदितब्बा, किरियधम्मानं पन तस्स अत्तभावस्स कारणभूता तण्हा. अनुलोमतोति एत्थ अविज्जा दुक्खसच्चं, तंसमुट्ठापिका पुरिमतण्हा आसवा समुदयसच्चन्ति योजेतब्बं. सङ्खारादीसु पन अविज्जादयोव समुदयसच्चभावेन योजेतब्बा. तेनाति तस्मा.

विज्जाति अत्तनो विसयं विदितं करोतीति विज्जा. सम्पन्नत्ताति समन्नागतत्ता, सम्पुण्णत्ता वा. तत्राति अम्बट्ठसुत्ते. मनोमयिद्धियाति एत्थ ‘‘इध भिक्खु इमम्हा काया अञ्ञं कायं अभिनिम्मिनाती’’ति (दी. नि. १.२३६) वुत्तत्ता सरीरब्भन्तरझानमनेन अञ्ञस्स सरीरस्स निब्बत्तिवसेन पवत्ता मनोमयिद्धि नाम, सा अत्थतो झानसम्पयुत्ता पञ्ञायेव. सत्त सद्धम्मा नाम सद्धा हिरी ओत्तप्पं बाहुसच्चं वीरियं सति पञ्ञा च. गच्छति अमतं दिसन्ति दुक्खनित्थरणत्थिकेहि दट्ठब्बतो अमतं निब्बानमेव दिसं गच्छति, इमिना च चरणानं सिक्खत्तयसङ्गहितअरियमग्गभावतो निब्बानत्थिकेहि एकंसेन इच्छितब्बतं दस्सेति. इदानिस्सा विज्जाचरणसम्पदाय सावकादिअसाधारणतं दस्सेतुं तत्थ विज्जासम्पदातिआदि वुत्तं. तत्थ आसवक्खयविज्जावसेन सब्बञ्ञुता सिज्झति, चरणधम्मभूतेसु झानेसु ¶ अन्तोगधाय महाकरुणासमापत्तिया वसेन महाकारुणिकता सिज्झतीति आह ‘‘विज्जा…पे… महाकारुणिकत’’न्ति. यथा तन्ति एत्थ तन्ति निपातमत्तं, यथा अञ्ञोपि विज्जाचरणसम्पन्नो बुद्धो नियोजेति, तथा अयम्पीति अत्थो. तेनाति अनत्थपरिवज्जनअत्थनियोजनेन. अत्तन्तपादयोति आदि-सद्देन परन्तपउभयन्तपा गहिता. असज्जमानो भवेसु अपच्चागच्छन्तोति पहीनानं पुनानुप्पत्तितो न पुन उपगच्छन्तो.

तत्राति युत्तवाचाभासने साधेतब्बे चेतं भुम्मं. अभूतन्ति अभूतत्थं. अतच्छन्ति तस्सेव वेवचनं. अनत्थसंहितन्ति पिसुणादिदोसयुत्तं. सम्मागदत्ताति सुन्दरवचनत्ता, गदनं गदो, कथनन्ति अत्थो. सुन्दरो गदो वचनमस्साति ‘‘सुगदो’’ति वत्तब्बे निरुत्तिनयेन द-कारस्स त-कारं कत्वा ‘‘सुगतो’’ति वुत्तं.

सभावतोति दुक्खसभावतो. लोकन्ति खन्धादिलोकं. यथावुत्तमत्थं सुत्ततो आह यत्थातिआदि. तत्थ यत्थाति यस्मिं लोकन्तसङ्खाते निब्बाने. तन्ति लोकस्सन्तं, ओकासलोके कायगमनेन ञातब्बं पत्तब्बन्ति नाहं वदामीति योजना. इदञ्च रोहितदेवपुत्तेन लोकस्स कायगतिवसेन अन्तगमनस्स पुच्छितत्ता वुत्तं. अप्पत्वा लोकस्सन्तन्ति खन्धादिलोकं सन्धाय वुत्तं.

किन्ते ¶ पदसा ओकासलोकपरिब्भमनेन, परिमितट्ठाने एव तं ञाणगमनेन गच्छन्तानं दस्सेमीति दस्सेन्तो अपि चातिआदिमाह. तत्थ ब्याममत्ते कळेवरेति सरीरे. तेन रूपक्खन्धं दस्सेति. ससञ्ञिम्हीति सञ्ञासीसेन वेदनादयो तयो खन्धे. समनकेति विञ्ञाणक्खन्धं. लोकन्ति खन्धादिलोकं, दुक्खन्ति अत्थो. लोकनिरोधन्ति निब्बानेन लोकस्स निरुज्झनं, निब्बानमेव वा. अदेसम्पि हि निब्बानं येसं निरोधाय होति, उपचारतो तन्निस्सितं विय होतीति ‘‘ब्याममत्ते कळेवरे लोकनिरोधम्पि पञ्ञपेमी’’ति वुत्तं, चक्खु लोके पियरूपं, सातरूपं, एत्थेसा तण्हा निरुज्झमाना निरुज्झतीतिआदीसु (दी. नि. २.४०१; विभ. २०४) विय. कुदाचनन्ति कदाचिपि. अप्पत्वाति अग्गमग्गेन अनधिगन्त्वा. तस्माति यस्मा तं गमनेन पत्तुं न सक्का, तस्मा. हवेति निपातमत्तं, एकंसत्थे वा ¶ . लोकविदूति सभावादितो खन्धादिजाननको. चतुसच्चधम्मानं अभिसमितत्ता समितावी, समितकिलेसोति वा अत्थो. नासीसति न पत्थेति अप्पटिसन्धिकत्ता.

एवं सङ्खेपतो लोकं दस्सेत्वा इदानि वित्थारतो तं दस्सेतुं अपि च तयो लोकातिआदि वुत्तं. तत्थ इन्द्रियबद्धानं खन्धानं समूहसन्तानभूतो सत्तलोको. सो हि रूपादीसु सत्तविसत्तताय ‘‘सत्तो’’ति च, लोकियन्ति एत्थ कम्मकिलेसा तब्बिपाका चाति ‘‘लोको’’ति च वुच्चति. अनिन्द्रियबद्धानं उतुजरूपानं समूहसन्तानभूतो ओकासलोको. सो हि सत्तसङ्खारानं आधारतो ‘‘ओकासो’’ति च, लोकियन्ति एत्थ तस्साधारा च आधेय्यभूताति ‘‘लोको’’ति च पवुच्चति. इन्द्रियानिन्द्रियबद्धा पन सब्बेव उपादानक्खन्धा पच्चयेहि सङ्खतट्ठेन लुज्जनपलुज्जनट्ठेन च ‘‘सङ्खारलोको’’ति च वुच्चति. आहरति अत्तनो फलन्ति आहारो, पच्चयो. तेन तिट्ठनसीला उप्पज्जित्वा याव भङ्गा पवत्तनसीलाति आहारट्ठितिका, सब्बे सङ्खतधम्मा. सब्बे सत्ताति च इमिनापि वेनेय्यानुरूपतो पुग्गलाधिट्ठानत्ता देसनाय सङ्खाराव गहिता.

यावता चन्दिमसूरिया परिहरन्तीति यत्तके ठाने चन्दिमसूरिया परिवत्तन्ति पवत्तन्ति. विरोचनाति तेसं विरोचनहेतु ओभासनहेतूति हेतुम्हि निस्सक्कवचनं. दिसा भन्तीति सब्बा दिसा यावता विगतन्धकारा पञ्ञायन्ति. अथ वा दिसाति उपयोगबहुवचनं. तस्मा विरोचमाना चन्दिमसूरिया यत्तका दिसा भन्ति ओभासेन्तीति अत्थो. ताव सहस्सधा लोकोति तत्तकेन पमाणेन सहस्सप्पकारो ओकासलोको, सहस्सचक्कवाळानीति अत्थो. एत्थाति सहस्सचक्कवाळे. वसोति इद्धिसङ्खातो वसो वत्ततीति अत्थो.

तम्पीति ¶ तिविधम्पि लोकं. अस्साति अनेन भगवता सङ्खारलोकोपि सब्बथा विदितोति सम्बन्धो. एको लोकोति य्वायं हेट्ठा वुत्तनयेन सब्बसङ्खतानं पच्चयायत्तवुत्तितो तेन सामञ्ञेन सङ्खारलोको एको एकविधो, एस नयो सेसेसुपि. सब्बत्थापि लोकियधम्माव लोकोति अधिप्पेता लोकुत्तरानं परिञ्ञेय्यत्ताभावा. उपादानानं आरम्मणभूता खन्धा उपादानक्खन्धा. सत्त विञ्ञाणट्ठितियोति ¶ तथा तथा समुप्पन्ना पजायेव वुच्चन्ति. नानत्तकाया नानत्तसञ्ञिनो, नानत्तकाया एकत्तसञ्ञिनो, एकत्तकाया नानत्तसञ्ञिनो, एकत्तकाया एकत्तसञ्ञिनो, हेट्ठिमा च तयो आरुप्पाति इमा सत्तविधा पजायेव विञ्ञाणं तिट्ठति एत्थाति विञ्ञाणट्ठितियो नाम. तत्थ नानत्तं कायो एतेसमत्थीति नानत्तकाया. नानत्तं सञ्ञा एतेसन्ति नानत्तसञ्ञिनो. सञ्ञासीसेनेत्थ पटिसन्धिविञ्ञाणं गहितं, एस नयो सेसेसुपि.

तत्थ सब्बमनुस्सा च छ कामावचरदेवा च नानत्तकाया नानत्तसञ्ञिनो नाम. तेसञ्हि अञ्ञमञ्ञं विसदिसताय नाना कायो, पटिसन्धिसञ्ञा च नवविधताय नाना. तीसु पठमज्झानभूमीसु ब्रह्मकायिका चेव चतूसु अपायेसु सत्ता च नानत्तकाया एकत्तसञ्ञिनो नाम. तेसु हि ब्रह्मपारिसज्जादीनं तिण्णम्पि सरीरं अञ्ञमञ्ञं विसदिसं, पटिसन्धिसञ्ञा पन पठमज्झानविपाकवसेन एकाव, तथा आपायिकानम्पि, तेसं पन सब्बेसं अकुसलविपाकाहेतुकाव पटिसन्धिसञ्ञा. दुतियज्झानभूमिका च परित्ताभ अप्पमाणाभ आभस्सरा एकत्तकाया नानत्तसञ्ञिनो नाम. तेसञ्हि सब्बेसं एकप्पमाणोव कायो, पटिसन्धिसञ्ञा पन दुतियततियज्झानविपाकवसेन नाना होति. ततियज्झानभूमियं परित्तसुभादयो तयो, चतुत्थज्झानभूमियं असञ्ञसत्तवज्जिता वेहप्फला, पञ्च च सुद्धावासाति नवसु भूमीसु सत्ता एकत्तकाया एकत्तसञ्ञिनो नाम. आभानानत्तेन पन सब्बत्थ कायनानत्तं न गय्हति, सण्ठाननानत्तेनेव गय्हतीति. असञ्ञसत्ता विञ्ञाणाभावेन विञ्ञाणट्ठितिसङ्ख्यं न गच्छन्ति. नेवसञ्ञा नासञ्ञायतनं पन यथा सञ्ञाय, एवं विञ्ञाणस्सापि सुखुमत्ता नेवविञ्ञाणं नाविञ्ञाणं, तस्मा परिब्यत्तविञ्ञाणकिच्चवन्तेसु विञ्ञाणट्ठितीसु न गय्हति. तस्मा सेसानि आकासानञ्चायतनादीनि तीणियेव गहितानि, तेहि सद्धिं इमा सत्त विञ्ञाणट्ठितियोति वेदितब्बा.

अट्ठ लोकधम्माति लाभो अलाभो यसो अयसो निन्दा पसंसा सुखं दुक्खन्ति इमे अट्ठ लोकस्स सभावत्ता लोकधम्मा. लाभालाभादिपच्चया उप्पज्जनका पनेत्थ अनुरोधविरोधा वा लाभादिसद्देहि वुत्ताति वेदितब्बा. नव सत्तावासाति हेट्ठा वुत्ता सत्त विञ्ञाणट्ठितियो ¶ एव ¶ असञ्ञसत्तचतुत्थारुप्पेहि सद्धिं ‘‘नव सत्तावासा’’ति वुच्चन्ति. सत्ता आवसन्ति एत्थाति सत्तावासा, सत्तनिकायो, अत्थतो तथा पवत्ता पजा एव इध सङ्खारलोकभावेन गय्हन्तीति वेदितब्बा. दसायतनानीति धम्मायतनमनायतनवज्जितानि दस.

एत्थ च तीसु भवेसु अस्साददस्सनवसेन तिस्सो वेदनाव लोकभावेन वुत्ता, तथा पच्चयदस्सनवसेन चत्तारोव आहारा. अत्तग्गाहनिमित्तदस्सनवसेन छ अज्झत्तिकानेव आयतनानि. थूलसञ्ञीभवदस्सनवसेन सत्त विञ्ञाणट्ठितियोव, अनुरोधविरोधदस्सनवसेन अट्ठ लोकधम्मा वा, थूलायतनदस्सनवसेन दसायतनानेव लोकभावेन वुत्तानि. तेसं गहणेनेव तन्निस्सयतप्पटिबद्धा तदारम्मणा सब्बे तेभूमका नामरूपधम्मा अत्थतो गहिता एव होन्ति. सेसेहि पन एकविधादिकोट्ठासेहि सरूपेनेव ते गहिताति वेदितब्बं.

आसयं जानातीतिआदीसु आहच्च चित्तं एत्थ सेतीति आसयो, अञ्ञस्मिं विसये पवत्तित्वापि चित्तं यत्थ सरसेन पविसित्वा तिट्ठति, सो वट्टासयो विवट्टासयोति दुविधो. तत्थ वट्टासयोपि सस्सतुच्छेददिट्ठिवसेन दुविधो. विवट्टासयो पन विपस्सनासङ्खाता अनुलोमिका खन्ति, मग्गसङ्खातं यथाभूतञाणञ्चाति दुविधो. यथाह –

‘‘सस्सतुच्छेददिट्ठि च, खन्ति चेवानुलोमिकं;

यथाभूतञ्च यं ञाणं, एतं आसयसद्दित’’न्ति. (सारत्थ. टी. १.वेरञ्जकण्डवण्णना);

एतं दुविधम्पि आसयं सत्तानं अप्पवत्तिक्खणेयेव भगवा सब्बथा जानाति. अनुसयन्ति कामरागानुसयादिवसेन सत्तविधं अनुसयं. चरितन्ति ‘‘सुचरितदुच्चरित’’न्ति निद्देसे वुत्तं. अथ वा चरितन्ति चरिया, ते रागादयो छ मूलचरिया, संसग्गसन्निपातवसेन अनेकविधा होन्ति. अधिमुत्तिन्ति अज्झासयधातुं, तत्थ तत्थ चित्तस्स अभिरुचिवसेन निन्नता, सा दुविधा हीनाधिमुत्ति पणीताधिमुत्तीति. याय दुस्सीलादिके हीनाधिमुत्तिके ¶ सेवन्ति, सा हीनाधिमुत्ति. याय पणीताधिमुत्तिके सेवन्ति, सा पणीताधिमुत्ति. तं दुविधम्पि अधिमुत्तिं भगवा सब्बाकारतो जानाति. अप्पं रागादिरजं एतेसन्ति अप्परजक्खा, अनुस्सदरागादिदोसा. उस्सदरागादिदोसा महारजक्खा. उपनिस्सयभूतेहि तिक्खेहि सद्धादिइन्द्रियेहि मुदुकेहि च समन्नागता तिक्खिन्द्रिया मुदिन्द्रिया च. हेट्ठा वुत्तेहि आसयादीहि सुन्दरेहि असुन्दरेहि च समन्नागता स्वाकारा द्वाकारा च वेदितब्बा. सम्मत्तनियामं ¶ विञ्ञापेतुं सुकरा सुविञ्ञापया, विपरीता दुविञ्ञापया. मग्गफलपटिवेधाय उपनिस्सयसम्पन्ना भब्बा, विपरीता अभब्बा. एवं सत्तसन्तानगतधम्मविसेसजाननेनेव सत्तलोकोपि विदितो धम्मविनिमुत्तस्स सत्तस्स अभावाति वेदितब्बं.

एकं चक्कवाळं…पे… पञ्ञासञ्च योजनानीति एत्थ होतीति सेसो. परिक्खेपतो पमाणं वुच्चतीति सेसो. चक्कवाळस्स सब्बं परिमण्डलं छत्तिंस सतसहस्सानि…पे… सतानि च होन्तीति योजेतब्बं. तत्थाति चक्कवाळे, द्वे सतसहस्सानि चत्तारि नहुतानि च योजनानि यानि एत्तकं एत्तकप्पमाणं बहलत्तेन अयं वसुन्धरा सङ्खाताति योजना. तत्थ एत्तकन्ति किरियाविसेसनं दट्ठब्बं. सन्धारकं जलं एत्तकं एत्तकप्पमाणं हुत्वा पतिट्ठितन्ति योजना. एत्थाति चक्कवाळे. अज्झोगाळ्हुग्गताति अज्झोगाळ्हा च उग्गता च. ब्रहाति महन्ता. योजनानं सतानुच्चो, हिमवा पञ्चाति योजनानं पञ्चसतानि उच्चो उब्बेधो. तिपञ्चयोजनक्खन्धपरिक्खेपाति पन्नरसयोजनप्पमाणक्खन्धपरिणाहा. नगव्हयाति रुक्खाभिधाना जम्बूति योजना. समन्ततोति सब्बसोभागेन, आयामतो च वित्थारतो च सतयोजनवित्थाराति अत्थो. यस्सानुभावेनाति यस्सा महन्तताकप्पट्ठायिकादिप्पकारेन पभावेन. परिक्खिपित्वा तं सब्बं, लोकधातुमयं ठितोति हेट्ठा वुत्तं सब्बम्पि तं परिक्खिपित्वा चक्कवाळसिलुच्चयो ठितो, अयं एका लोकधातु नामाति अत्थो, म-कारो पदसन्धिवसेन वुत्तो. अथ वा तं सब्बं लोकधातुं परिक्खिपित्वा अयं चक्कवाळसिलुच्चयो ठितोति योजेतब्बं.

तत्थाति ¶ तस्सं लोकधातुयं. तावतिंसभवनन्ति तिदसपुरं. असुरभवनन्ति असुरपुरं. अवीचिमहानिरयो च तथा दससहस्सयोजनो, सो पन चतुन्नं लोहभित्तीनमन्तरा योजनसतायामवित्थारोपि समन्ता सोळसहि उस्सदनिरयेहि सद्धिं दससहस्सयोजनो वुत्तोति वेदितब्बो. तदनन्तरेसूति तेसं चक्कवाळानं अन्तरेसु. लोकानं चक्कवाळानं अन्तरे विवरे भवत्ता लोकन्तरिका. तिण्णञ्हि सकटचक्कानं पत्तानं वा आसन्नट्ठपितानं अन्तरसदिसे तिण्णं तिण्णं चक्कवाळानं अन्तरेसु एकेको लोकन्तरिकनिरयो अट्ठयोजनसहस्सप्पमाणो सीतनरको सत्तानं अकुसलविपाकेन निब्बत्तति. अनन्तानीति तिरियं अट्ठसु दिसासु चक्कवाळानि आकासो विय अनन्तानि. उद्धं पन अधो च अन्तानेव. अनन्तेन बुद्धञाणेनाति एत्थ अनन्तञेय्यपटिवेधसामत्थिययोगतोव ञाणं ‘‘अनन्त’’न्ति वेदितब्बं.

अत्तनोति निस्सक्के सामिवचनमेतं, अत्ततोति अत्थो. गुणेहि अत्तनो विसिट्ठतरस्साति ¶ सम्बन्धो, तरग्गहणञ्चेत्थ अनुत्तरोति पदस्स अत्थनिद्देसवसेन कतं, न विसिट्ठस्स कस्सचि अत्थिताय. सदेवके हि लोके सदिसकप्पोपि नाम कोचि तथागतस्स नत्थि, कुतो सदिसो, तेनाह सीलगुणेनापि असमोतिआदि. तत्थ असमेहि सम्मासम्बुद्धेहि समो असमसमो. नत्थि पटिमा एतस्साति अप्पटिमो. एस नयो सेसेसुपि. तत्थ उपमामत्तं पटिमा, सदिसूपमा पटिभागो. युगग्गाहवसेन ठितो पटिमो पुग्गलोति वेदितब्बो. अत्तनाति अत्ततो. पुरिसदम्मेतिआदीसु दमितब्बा दम्मा, ‘‘दम्मपुरिसा’’ति वत्तब्बे विसेसनस्स परनिपातं कत्वा ‘‘पुरिसदम्मा’’ति वुत्तं, पुरिसग्गहणञ्चेत्थ उक्कट्ठवसेन इत्थीनम्पि दमेतब्बतो. निब्बिसा कता दोसविसस्स विनोदनेन. अत्थपदन्ति अत्थाभिब्यञ्जनकं पदं, वाक्यन्ति अत्थो. एकपदभावेन च अनञ्ञसाधारणो सत्थु पुरिसदम्मसारथिभावो दस्सितो होति, तेनाह भगवा हीतिआदि. अट्ठ दिसाति अट्ठ समापत्तियो. असज्जमानाति वसीभावप्पत्तिया निस्सङ्गचारा.

दिट्ठधम्मो वुच्चति पच्चक्खो अत्तभावो, तत्थ नियुत्तोति दिट्ठधम्मिको, इधलोकत्थो. कम्मकिलेसवसेन सम्परेतब्बतो समागन्तब्बतो सम्परायो ¶ , परलोको, तत्थ नियुत्तोति सम्परायिको, परलोकत्थो. परमो उत्तमो अत्थो परमत्थो, निब्बानं. सह अत्थेन वत्ततीति सत्थो, भण्डमूलेन वाणिज्जाय देसन्तरं गच्छन्तो जनसमूहो. सो अस्स अत्थीति सत्था, सत्थवाहोति निरुत्तिनयेन. सो विय भगवाति आह ‘‘सत्था, भगवा सत्थवाहो’’ति. इदानि तमत्थं निद्देसपाळिनयेन दस्सेतुं यथा सत्थवाहोतिआदि वुत्तं. तत्थ सत्थेति सत्थिके जने. कं उदकं तारेन्ति एत्थाति कन्तारो, निरुदको अरञ्ञप्पदेसो. चोरादीहि अधिट्ठितअरञ्ञप्पदेसापि दुग्गमनट्ठेन तंसदिसताय कन्तारात्वेव निरुळ्हाति सामञ्ञतो ‘‘कन्तारं तारेती’’ति वत्वा तं विवरन्तो चोरकन्तारन्तिआदिमाह.

भगवतोति निस्सक्के सामिवचनं, भगवन्ततो धम्मस्सवनेनाति अत्थो. यथा ‘‘उपज्झायतो अज्झेती’’ति, भगवतो सन्तिकेति वा अत्थो. सरे निमित्तं अग्गहेसीति पुब्बबुद्धुप्पादेसु सद्धम्मस्सवनपरिचयेन ‘‘धम्मो एसो वुच्चती’’ति सरे आकारं गण्हि. पुब्बाभियोगवसेनेव हि ईदिसानं तिरच्छानानं धम्मस्सवनादीसु पसादो उप्पज्जति वग्गुलिआदीनं विय. इतरथा सब्बतिरच्छानानम्पि तथा पसादुप्पत्तिप्पसङ्गतो. यदि हि उप्पज्जेय्य, भगवा अनन्तचक्कवाळेसु सब्बसत्तानम्पि एकक्खणे सप्पाटिहारियधम्मं सावेतुं सक्कोतीति सब्बसत्तानम्पि इतो पुब्बेव विमुत्तिप्पसङ्गो सिया. ये पन देवमनुस्सनागसुपण्णादयो पकतियाव कम्मस्सकतञ्ञाणादियुत्ता होन्ति, तेयेव पुब्बे अनुपनिस्सयापि ¶ भगवतो सद्धम्मस्सवनादिना पठमं विवट्टूपनिस्सयं पसादं उप्पादेतुं सक्कोन्ति, न इतरेति गहेतब्बं. अरे अहम्पि नामाति एत्थ ‘‘कुतोहं इध निब्बत्तोति ओलोकेत्वा मण्डूकभावतोति ञत्वा’’ति इदं एत्तकम्पि अरे अहम्पि नामाति विम्हयवचनेनेव सिज्झतीति अवुत्तन्ति वेदितब्बं. जलन्ति जलन्तो विज्जोतमानो. मण्डूकोहन्ति गाथाय उदकेति सञ्जातट्ठानदस्सनं, तेन थलमण्डूकता निवत्तनं कतं होति. उदके जातानम्पि कच्छपादीनं थलगोचरतापि अत्थीति तं निवत्तनत्थं ‘‘वारिगोचरो’’ति वुत्तं, उदकसञ्चारीति अत्थो.

विमोक्खन्तिकञाणवसेनाति एत्थ सब्बसो किलेसेहि विमुच्चतीति विमोक्खो, अग्गमग्गो, तस्स अन्तो, अग्गफलं, तत्थ भवं विमोक्खन्तिकं, सब्बञ्ञुतञ्ञाणेन सद्धिं सब्बम्पि बुद्धञाणं. इदानि सम्मासम्बुद्धपदतो बुद्धपदस्स ¶ विसेसं दस्सेतुं यस्मा वातिआदि वुत्तं. सम्मासम्बुद्धपदेन हि सत्थु पटिवेधञाणानुभावो वुत्तो, इमिना पन बुद्धपदेन देसनाञाणानुभावोपि, तेनाह अञ्ञेपि सत्ते बोधेसीतिआदि.

गुणविसिट्ठसत्तुत्तमगरुगारवाधिवचनन्ति सब्बेहि सीलादिगुणेहि विसिट्ठस्स ततो एव सब्बसत्तेहि उत्तमस्स गरुनो गारववसेन वुच्चमानवचनमिदं भगवाति. सेट्ठन्ति सेट्ठवाचकं वचनं सेट्ठगुणसहचरणतो. अथ वा वुच्चतीति वचनं, अत्थो, सो सेट्ठोति अत्थो. उत्तमन्ति एत्थापि एसेव नयो. गरुगारवयुत्तोति एत्थ गरुभावो गारवं, गरुगुणयोगतो गरुकरणं वा गारवं, तेन सावकादीनं असाधारणताय गरुभूतेन महन्तेन गारवेन युत्तोति गरुगारवयुत्तो. अथ वा गरु च सब्बलोकस्स सिक्खकत्ता तेनेव गारवयुत्तो चातिपि योजेतब्बं.

अवत्थाय विदितं आवत्थिकं. एवं लिङ्गिकं. निमित्ततो आगतं नेमित्तिकं. अधिच्च यंकिञ्चि निमित्तं अधिवचनवसेन अनपेक्खित्वा पवत्तं अधिच्चसमुप्पन्नं, तेनाह ‘‘वचनत्थमनपेक्खित्वा’’ति. यदिच्छाय आगतं यादिच्छकं. एत्थ च बाहिरं दण्डादि लिङ्गं, अब्भन्तरं तेविज्जादि निमित्तं. पचुरजनविसयं वा दिस्समानं लिङ्गं, तब्बिपरीतं निमित्तन्ति वेदितब्बं. सच्छिकापञ्ञत्तीति सब्बधम्मानं सच्छिकिरियानिमित्ता पञ्ञत्ति. अथ वा सच्छिकापञ्ञत्तीति पच्चक्खसिद्धा पञ्ञत्ति. यंगुणनिमित्ता हि सा, ते गुणा सत्थु पच्चक्खभूताति गुणा विय सापि सच्छिकता एव नाम होति, न परेसं, वोहारमत्तेनाति अधिप्पायो. यंगुणनेमित्तिकन्ति येहि गुणेहि निमित्तभूतेहि एतं नामं नेमित्तिकञ्च जातं. वदन्तीति धम्मसेनापतिस्स गरुभावतो बहुवचनेनाह, सङ्गीतिकारेहि वा कतमनुवादं सन्धाय.

इस्सरियादिभेदो ¶ भगो अस्स अत्थीति भगी. मग्गफलादिअरियगुणं अरञ्ञादिविवेकट्ठानञ्च भजि सेवि सीलेनाति भजी. चीवरादिपच्चयानं अत्थरसादीनञ्च सीलादिगुणानञ्च भागी, दायादोति अत्थो. विभजि उद्देसनिद्देसादिप्पकारेहि धम्मरतनं पविभजीति विभत्तवा. रागादिपापधम्मं भग्गं अकासीति भगवाति वुच्चतीति सब्बत्थ सम्बन्धो. गरुपि लोके भगवाति वुच्चतीति आह ‘‘गरू’’ति, यस्मा गरु, तस्मापि भगवाति अत्थो. पारमितासङ्खातं ¶ भग्यमस्स अत्थीति भग्यवा. बहूहि ञायेहीति कायभावनादिकेहि अनेकेहि भावनाक्कमेहि. सुभावितत्तनोति पच्चत्ते एतं सामिवचनं, तेन सुभावितसभावोति अत्थो. भवानं अन्तं निब्बानं गतोति भवन्तगो. तत्थ तत्थ भगवाति सद्दसिद्धि निरुत्तिनयेनेव वेदितब्बा.

इदानि भगी भजीति निद्देसगाथाय नवहि पदेहि दस्सितमत्थं भग्यवाति गाथाय छहि पदेहि सङ्गहेत्वा पदसिद्धिं अत्थयोजनानयभेदेहि सद्धिं दस्सेतुं अयं पन अपरो नयोतिआदि वुत्तं. तत्थ वण्णविपरिययोति एत्थ इति-सद्दो आदिअत्थो, तेनेव वण्णविकारो वण्णलोपो धातुअत्थेन नियोजनञ्चाति इमं तिविधं लक्खणं सङ्गण्हाति. सद्दनयेनाति सद्दलक्खणनयेन. पिसोदरादीनं सद्दानं आकतिगणभावतो वुत्तं ‘‘पिसोदरादिपक्खेपलक्खणं गहेत्वा’’ति. पक्खिपनमेव लक्खणं. तप्परियापन्नताकरणञ्हि पक्खिपनं. भग्यन्ति कुसलं.

लोभादयो चत्तारो दोसा एककवसेन गहिता. अहिरिकादयो दुकवसेन. अक्कोच्छिमन्तिआदिना (ध. प. ३-४) पुनप्पुनं कुज्झनवसेन चित्तपरियोनन्धनो कोधोव उपनाहो. परेसं पुब्बकारितालक्खणस्स गुणस्स निपुञ्छनो मक्खो नाम. बहुस्सुतादीहि सद्धिं युगग्गाहो अत्तनो समकरणं पलासो. अत्तनो विज्जमानदोसपटिच्छादना माया. अविज्जमानगुणप्पकासनं साठेय्यं. गरूसुपि थद्धता अनोनतता थम्भो. तदुत्तरिकरणलक्खणो सारम्भो. जातिआदिं निस्साय उन्नतिलक्खणो मानो. अब्भुन्नतिलक्खणो अतिमानो. जातिआदिं निस्साय मज्जनाकारप्पत्तो मानोव मदो नाम. सो सत्तवीसतिविधो. कामगुणेसु चित्तस्स वोस्सग्गो पमादो. कायदुच्चरितादीनि तिविधदुच्चरितानि. तण्हादिट्ठिदुच्चरितवसेन तिविधसंकिलेसा. रागदोसमोहाव मलानि. तेयेव कायदुच्चरितादयो च तिविधविसमानि. कामब्यापादविहिंसासञ्ञा तिविधसञ्ञा नाम. तेयेव वितक्का. तण्हादिट्ठिमाना पपञ्चा. सुभसुखनिच्चअत्तविपरियेसा चतुब्बिधविपरियेसा. छन्दादयो अगति. चीवरादीसु पच्चयेसु लोभा चत्तारो तण्हुपादा. बुद्धधम्मसङ्घसिक्खासु कङ्खा, सब्रह्मचारीसु कोपो च ¶ पञ्च चेतोखीला. कामे काये रूपे च अवीतरागता, यावदत्थं भुञ्जित्वा सेय्यसुखादिअनुयोगो, अञ्ञतरं ¶ देवनिकायं पणिधाय ब्रह्मचरियचरणञ्च पञ्च चेतोविनिबन्धा. रूपाभिनन्दनादयो पञ्च अभिनन्दना. कोधमक्खइस्सासाठेय्यपापिच्छतासन्दिट्ठिपरामासा छ विवादमूलानि. रूपतण्हादयो छ तण्हाकाया. मिच्छादिट्ठिआदयो अट्ठमग्गङ्गपटिपक्खा मिच्छत्ता. तण्हं पटिच्च परियेसना, परियेसनं पटिच्च लाभो, लाभं पटिच्च विनिच्छयो, तं पटिच्च छन्दरागो, तं पटिच्च अज्झोसानं, तं पटिच्च परिग्गहो, तं पटिच्च मच्छरियं, तं पटिच्च आरक्खा, आरक्खाधिकरणं दण्डादानादिअनेकाकुसलरासीति नव तण्हामूलका धम्मा. पाणातिपातादयो दस अकुसलकम्मपथा. चत्तारो सस्सतवादा तथा एकच्चसस्सतवादा अन्तानन्तिका अमराविक्खेपिका द्वे अधिच्चसमुप्पन्निका सोळस सञ्ञीवादा अट्ठ असञ्ञीवादा अट्ठ नेवसञ्ञीनासञ्ञीवादा सत्त उच्छेदवादा पञ्च दिट्ठधम्मनिब्बानवादाति एतानि द्वासट्ठि दिट्ठिगतानि. रूपतण्हादिछतण्हा एव पच्चेकं कामतण्हाभवतण्हाविभवतण्हावसेन अट्ठारस होन्ति, ता अज्झत्तबहिद्धरूपादीसु पवत्तिवसेन छत्तिंस, पुन कालत्तयवसेन अट्ठसततण्हाविचरितानि होन्ति. पभेद-सद्दं पच्चेकं सम्बन्धित्वा लोभप्पभेदोतिआदिना योजेतब्बं. सब्बदरथपरिळाहकिलेससतसहस्सानीति सब्बानि सत्तानं दरथसङ्खातपरिळाहकरानि किलेसानं अनेकानि सतसहस्सानि, आरम्मणादिविभागतो पवत्तिआकारविभागतो च नेसं एवं पभेदो वेदितब्बो. पञ्च मारे अभञ्जीति सम्बन्धो. परिस्सयानन्ति उपद्दवानं.

एवं भग्यवा भग्गवाति द्विन्नं पदानं अत्थं विभजित्वा इदानि तेहि द्वीहि गहितमत्थं दस्सेतुं भग्यवन्तताय चस्सातिआदि वुत्तं. तत्थ सतपुञ्ञजलक्खणधरस्साति अनेकसतपुञ्ञनिब्बत्तमहापुरिसलक्खणधरस्स भगवतो. सकचित्ते इस्सरियं नाम पटिक्कूलादीसु अप्पटिक्कूलसञ्ञितादिवसप्पवत्तिया चेव चेतोसमाधिवसेन च अत्तनो चित्तस्स वसीभावापादनमेव. अणिमा लघिमादिकन्ति आदि-सद्देन महिमा पत्ति पाकम्मं ईसिता वसिता यत्थकामावसायिताति इमे छपि सङ्गहिता. तत्थ कायस्स अणुभावकरणं अणिमा. आकासे पदसा ¶ गमनादिअरहभावेन लहुभावो लघिमा. कायस्स महन्ततापादनं महिमा. इट्ठदेसस्स पापुणनं पत्ति. अधिट्ठानादिवसेन इच्छितत्थनिप्फादनं पाकम्मं. सयंवसिता इस्सरभावो ईसिता. इद्धिविधे वसीभावो वसिता. आकासेन वा गच्छतो, अञ्ञं वा किञ्चि करोतो यत्थ कत्थचि वोसानप्पत्ति यत्थकामावसायिता, ‘‘कुमारकरूपादिदस्सन’’न्तिपि वदन्ति. सब्बङ्गपच्चङ्गसिरीति सब्बेसं अङ्गपच्चङ्गानं सोभा. अत्थीति अनुवत्तति. लहुसाधनं तं तं कालिकं इच्छितं, गरुसाधनं चिरकालिकं बुद्धत्तादिपत्थितं ¶ . भगा अस्स सन्तीति भगवाति इदं सद्दसत्थनयेन सिद्धं, सेसं सब्बं निरुत्तिनयेन सिद्धन्ति वेदितब्बं.

पीळनसङ्खतसन्तापविपरिणामट्ठेनातिआदीसु पीळनट्ठो सङ्खतट्ठोतिआदिना अत्थ-सद्दो पच्चेकं योजेतब्बो. तत्थ अत्तनो सभावेन पीळनलक्खणं दुक्खं. तस्स यो पीळनमेव अत्थो ‘‘पीळनट्ठो’’ति वुच्चति, सो सभावो. यस्मा पन तंसमुदयेन सङ्खतं, तस्मा सङ्खतट्ठो समुदयदस्सनेन आविभूतो. यस्मा च मग्गो किलेससन्तापहरत्ता सुसीतलो, तस्मास्स मग्गदस्सनेन सन्तापट्ठो आविभूतो तप्पटियोगत्ता. अविपरिणामधम्मस्स पन निरोधस्स दस्सनेन विपरिणामट्ठो आविभूतोति. एकस्सेव सभावधम्मस्स सकभावतो इतरसच्चत्तयनिवत्तितो च परिकप्पेतब्बत्ता चत्तारो अत्था वुत्ता. समुदयस्स पन रासिकरणतो आयूहनट्ठो सभावो, तस्सेव दुक्खदस्सनेन निदानट्ठो आविभूतो. विसंयोगभूतस्स निरोधस्स दस्सनेन संयोगट्ठो. निय्यानभूतस्स मग्गस्स दस्सनेन पलिबोधट्ठो आविभूतो.

निरोधस्स पन निस्सरणट्ठो सभावो, तस्सेव समुदयदस्सनेन विवेकट्ठो आविभूतो. सङ्खतस्स मग्गस्स दस्सनेन असङ्खतट्ठो, विसयभूतस्स मरणधम्मस्स वा दुक्खस्स दस्सनेन अमतट्ठो. मग्गस्स पन निय्यानट्ठो सभावो, तस्सेव समुदयदस्सनेन दुक्खस्सेवायं हेतु, निब्बानप्पत्तिया पन अयमेव हेतूति हेत्वट्ठो, अतिसुखुमनिरोधदस्सनेन इधमेव दस्सनन्ति दस्सनट्ठो, अधिकपणस्स दुक्खस्स दस्सनेन अधिपतेय्यट्ठो आविभूतो. एते एव च पीळनादयो सोळस आकाराति वुच्चन्ति.

कामेहि ¶ विवेकट्ठकायता कायविवेको. नीवरणादीहि विवित्ता अट्ठ समापत्तियो चित्तविवेको. उपधीयन्ति एत्थ यथासकं फलानीति उपधयो, पञ्चकामगुणसङ्खातकामखन्धकिलेसअभिसङ्खारा, तेहि चतूहि विवित्तं निब्बानं उपधिविवेको नाम.

अनत्तानुपस्सनाय पटिलद्धो दुक्खानिच्चानुपस्सनाहि च पटिलद्धो अरियमग्गो आगमनवसेन यथाक्कमं सुञ्ञतअप्पणिहितअनिमित्तविमोक्खसञ्ञं पटिलभति, किलेसेहि विमुत्तत्ता हि एस विमोक्खोति.

यथा लोके एकेकपदतो एकेकमक्खरं गहेत्वा ‘‘मेखला’’ति वुत्तं, एवमिधापीति अत्थो. मेहनस्साति गुय्हप्पदेसस्स. खस्साति ओकासस्स.

सह ¶ देवेहीतिआदीसु सह देवेहि वत्ततीति सदेवको लोको. तं सदेवकन्तिआदिना योजना वेदितब्बा. सदेवकवचनेनाति सदेवक-सद्दे विसेसनभावेन ठितदेववचनेन. तस्सापि सदेवकपदे अन्तोभूतत्ता अवयवे समुदायोपचारवसेन वोहारो कतो. इतरथा तेन देवविसिट्ठलोकस्सेव गहणतो पञ्चकामावचरदेवग्गहणं न सिया, एवं उपरिपि. समारकवचनेन मारसद्देन तेन सहचरिता सब्बे वसवत्तिदेवा च गहिताति आह ‘‘छट्ठकामावचरदेवग्गहण’’न्ति. ब्रह्मकायिका नाम पठमज्झानभूमिका. ते आदि येसं आरुप्पपरियन्तानं ब्रह्मानं तेसं ब्रह्मानं गहणं ब्रह्मकायिकादिब्रह्मग्गहणं. लोक-सद्दस्स ओकासलोकादीनम्पि साधारणत्ता सत्तलोकावेणिकमेव पजागहणं कतन्ति आह ‘‘पजावचनेन सत्तलोकग्गहण’’न्ति. सदेवकादिवचनेन उपपत्तिदेवानं, सस्समणवचनेन विसुद्धिदेवानञ्च गहितत्ता आह ‘‘सदेवमनुस्सवचनेन सम्मुतिदेवअवसेसमनुस्सग्गहण’’न्ति. तत्थ सम्मुतिदेवा राजानो, अवसेसमनुस्सा सम्मुतिदेवसमणब्राह्मणेहि अवसिट्ठा. सत्तलोकावेणिकस्स पजासद्दस्स विसुं गहितत्ता सदेवकं लोकन्ति एत्थ लोकसद्दग्गहणं ओकासलोकमेव नियमेतीति आह ‘‘तीहि पदेहि ओकासलोको’’ति. इदञ्च सदेवकादिपदत्तयवचनीयस्स पधानत्थस्स वसेन वुत्तं. ओकासलोकविसेसनस्स पनेत्थ देवमारादिसत्तलोकस्सापि गहणं वेदितब्बं ¶ सामत्थियतो गम्यमानत्ता सपुत्तो आगतोतिआदीसु पुत्तादीनं विय. इमस्मिञ्च नये सदेवकं समारकं सब्रह्मकं ओकासलोकं सस्समणब्राह्मणिं सदेवमनुस्सं पजञ्चाति च-कारं आनेत्वा योजेतब्बं, ओकाससत्तलोकानं गहणेन चेत्थ तदुभयसम्मुतिनिमित्तभूतो सङ्खारलोकोपि तदविनाभावतो गहितो एवाति दट्ठब्बो. अपरे पन ‘‘सदेवकन्तिआदीहि पञ्चहि पदेहि सत्तलोकोव अत्तनो अवयवभूतदेवादिविसेसनेहि विसेसेत्वा गहितो, तग्गहणेन तदाधारो ओकासलोको, तदुभयपञ्ञत्तिविसयो सङ्खारलोको च गहिता एव होन्ती’’ति वदन्ति. तेसञ्च पजन्ति इदं लोकसद्दस्स विसेसनं कत्वा सदेवकं पजं लोकं…पे… सदेवमनुस्सं पजं लोकन्ति योजेतब्बं.

अरूपावचरलोको गहितो पारिसेसञायेन इतरेसं पदन्तरेहि गहितत्ता. मारग्गहणेन तप्पधाना तंसदिसा च उपपत्तिदेवा सङ्गय्हन्तीति आह ‘‘छकामावचरदेवलोको’’ति. खत्तियपरिसा ब्राह्मणगहपतिसमणचातुमहाराजिकतावतिंसमारब्रह्मपरिसाति इमासु अट्ठसु परिसासु चातुमहाराजिकादीनं चतुन्नं परिसानं सदेवकादिपदेहि सङ्गहितत्ता इध सस्समणब्राह्मणिन्ति इमिना समणपरिसा ब्राह्मणपरिसा च, सदेवमनुस्सन्ति इमिना खत्तियपरिसा गहपतिपरिसा च वुत्ताति आह ‘‘चतुपरिसवसेना’’ति. तस्स मनुस्सलोको गहितोति ¶ इमिना सम्बन्धो. तत्थ मनुस्सलोकोति मनुस्ससमूहो, तेनाह ‘‘अवसेससब्बसत्तलोको वा’’ति.

विकप्पन्तरं दस्सेन्तो आह ‘‘सम्मुतिदेवेहि वा सह मनुस्सलोको’’ति. देवपदेन सम्मुतिदेवा, समणब्राह्मणमनुस्सपदेहि सेसमनुस्सा च गहिताति एवं विकप्पद्वयेपि मनुस्सं पजं मनुस्सिं पजन्ति पजा-सद्दं मनुस्स-सद्देन विसेसेत्वा तं पुन सह देवेहि वत्ततीति सदेवा, पजा. सदेवा च सा मनुस्सा चाति सदेवमनुस्सा, तं सदेवमनुस्सं पजं. पुन किं भूतं सस्समणब्राह्मणिन्ति एवं यथा पजासद्देन मनुस्सानञ्ञेव गहणं सिया, तथा निब्बचनं कातब्बं, इतरथा मनुस्सानञ्ञेव गहणं न सम्पज्जति सब्बमनुस्सानं विसेसनभावेन गहितत्ता अञ्ञपदत्थभूतस्स कस्सचि मनुस्सस्स अभावा. इदानि पजन्ति इमिना ¶ अवसेसनागादिसत्तेपि सङ्गहेत्वा दस्सेतुकामो आह ‘‘अवसेससब्बसत्तलोको वा’’ति. एत्थापि चतुपरिसवसेन अवसेससब्बसत्तलोको सम्मुतिदेवमनुस्सेहि वा सह अवसेससब्बसत्तलोकोति योजेतब्बं.

एत्तावता भागसो लोकं गहेत्वा योजनं दस्सेत्वा इदानि एकेकपदेन अभागसो सब्बलोकानं गहणपक्खेपि तस्स तस्स विसेसनस्स सप्फलतं दस्सेतुं अपि चेत्थातिआदि वुत्तं. उक्कट्ठपरिच्छेदतोति उक्कट्ठानं देवगतिपरियापन्नानं परिच्छिन्नवसेन जाननवसेन कित्तिसद्दो सयं अत्तनो अवयवभूतेन सदेवकवचनेन तं सुणन्तानं सावेन्तो अब्भुग्गतोति योजना. अनुसन्धिक्कमोति अत्थानञ्चेव पदानञ्च अनुसन्धानक्कमो, जाननक्कमोति अत्थो.

अभिञ्ञाति य-कारलोपेन निद्देसोति आह ‘‘अभिञ्ञाया’’ति. समन्तभद्रकत्ताति सब्बभागेहि सुन्दरत्ता. सासनधम्मोति पटिपत्तिपटिवेधसासनस्स पकासको परियत्तिधम्मो. बुद्धसुबोधिततायाति इदं तिकं धम्मस्स हेतुसरूपफलवसेन वुत्तं, तथा नाथपभवत्तिकम्पि. मज्झे तिकद्वयं फलवसेनेव वुत्तन्ति वेदितब्बं. किच्चसुद्धियाति धम्मं सुत्वा यथासुतवसेन पटिपज्जन्तानं सुप्पटिपत्तिसङ्खातकिच्चसुद्धिया.

इदानि आदिकल्याणादिप्पकारमेव धम्मं देसेन्तो भगवा सोतूनं यं सासनब्रह्मचरियं मग्गब्रह्मचरियञ्च पकासेति, तप्पकासकस्स ब्रह्मचरियपदस्स सात्थन्तिआदीनि पदानि विसेसनभावेन वुत्तानि, न धम्मपदस्साति दस्सनमुखेन नानप्पकारतो अत्थं विवरितुकामो सात्थं सब्यञ्जनन्ति एवमादीसु पनातिआदिमाह. तत्थ तिस्सो सिक्खा सकलो च तन्तिधम्मो सासनब्रह्मचरियं ¶ नाम. भगवा हि धम्मं देसेन्तो सीलादिके विय तप्पकासकं तन्तिधम्मम्पि पकासेति एव सद्दत्थसमुदायत्ता परियत्तिधम्मस्स. यथानुरूपन्ति यथारहं. सिक्खत्तयसङ्गहितञ्हि सासनब्रह्मचरियं मग्गब्रह्मचरियञ्च अत्थसम्पत्तिया सम्पन्नत्थताय, उपरूपरि अधिगन्तब्बविसेससङ्खातअत्थसम्पत्तिया च सह अत्थेन पयोजनेन वत्ततीति सात्थमेव, न तु सब्यञ्जनं, तन्तिधम्मसङ्खातं सासनब्रह्मचरियं यथावुत्तेन अत्थेन सात्थं सब्यञ्जनञ्च. किरातादिमिलक्खवचनानम्पि सात्थसब्यञ्जनत्ते समानेपि विसिट्ठत्थब्यञ्जनयोगं सन्धाय सहत्थो ¶ देवदत्तो सवित्तोतिआदि विय ‘‘सात्थं सब्यञ्जन’’न्ति वुत्तन्ति आह ‘‘अत्थसम्पत्तिया सात्थं, ब्यञ्जनसम्पत्तिया सब्यञ्जन’’न्ति. तत्थ यं अत्थं सुत्वा तथा पटिपज्जन्ता सब्बदुक्खक्खयं पापुणन्ति, तस्स तादिससम्पत्ति अत्थसम्पत्ति नाम, सम्पन्नत्थताति अत्थो. ब्यञ्जनसम्पत्ति नाम सिथिलधनितादिब्यञ्जनपरिपुण्णाय मागधिकाय सभावनिरुत्तिया गम्भीरम्पि अत्थं उत्तानं कत्वा दस्सनसमत्थता सम्पन्नब्यञ्जनताति अत्थो.

इदानि नेत्तिप्पकरणनयेनापि (नेत्ति ४ द्वादसपद) अत्थं दस्सेतुं सङ्कासनातिआदि वुत्तं. तत्थ सङ्खेपतो कासीयति दीपीयतीति सङ्कासनन्ति कम्मसाधनवसेन अत्थो दट्ठब्बो, एवं सेसेसुपि. पठमं कासनं पकासनं. उभयम्पेतं उद्देसत्थवचनसङ्खातस्स वित्थारवचनं. सकिं वुत्तस्स पुन वचनञ्च विवरणविभजनानि. उभयम्पेतं निद्देसत्थवचनं. विवटस्स वित्थारतराभिधानं विभत्तस्स च पकारेहि ञापनं उत्तानीकरणपञ्ञत्तियो. उभयम्पेतं पटिनिद्देसत्थवचनसङ्खातस्स वित्थारवचनं. अत्थपदसमायोगतोति यथावुत्तानि एव छ पदानि परियत्तिया अत्थविभागत्ता अत्थपदानि, तेहि सहितताय अत्थकोट्ठासयुत्तत्ताति अत्थो. अपरियोसिते पदे आदिमज्झगतवण्णो अक्खरं, एकक्खरं, पदं वा अक्खरं. विभत्तियन्तं पदं. पदाभिहितं अत्थं ब्यञ्जेतीति ब्यञ्जनं, वाक्यं. कथितस्सेवत्थस्स अनेकविधेन विभागकरणं आकारो नाम. आकाराभिहितस्स निब्बचनं निरुत्ति. निब्बचनत्थवित्थारो निद्देसो. अथ वा ‘‘अक्खरेहि सङ्कासेति, पदेहि पकासेति, ब्यञ्जनेहि विवरति, आकारेहि विभजति, निरुत्तीहि उत्तानिं करोति, निद्देसेहि पञ्ञपेती’’ति वचनतो सङ्कासनपकासनसङ्खआतउद्देसत्थवाचकानि वचनानि अक्खरपदानि नाम. विवरणविभजनसङ्खातनिद्देसत्थवाचकानि वचनानि ब्यञ्जनाकारा नाम. उत्तानीकरणपञ्ञत्तिसङ्खातपटिनिद्देसत्थवाचकानि वचनानि निरुत्तिनिद्देसा नाम, तेसं सम्पत्तिया सब्यञ्जनन्ति अत्थो.

अत्थगम्भीरतातिआदीसु अत्थो नाम तन्तिअत्थो, हेतुफलं वा. धम्मो नाम तन्ति, हेतु वा. देसना नाम यथाधम्मं धम्माभिलापो. पटिवेधो नाम यथावुत्तअत्थादीनं अविपरीतावबोधो. ते ¶ पनेते अत्थादयो यस्मा ससादीहि विय महासमुद्दो मन्दबुद्धीहि दुक्खोगाहा अलब्भनेय्यपतिट्ठा च, तस्मा गम्भीरा. तेसु पटिवेधस्सापि अत्थसन्निस्सितत्ता ¶ अत्थसभागत्ता च वुत्तं ‘‘अत्थगम्भीरतापटिवेधगम्भीरताहि सात्थ’’न्ति. धम्मदेसनानं अत्थसन्निस्सितत्तेपि सयं ब्यञ्जनरूपत्ता वुत्तं ‘‘धम्मगम्भीरतादेसनागम्भीरताहि सब्यञ्जन’’न्ति. यथावुत्तअत्थादीसु पभेदगतानि ञाणानि अत्थपटिसम्भिदादयो. तत्थ निरुत्तीति तन्तिपदानं निद्धारेत्वा वचनं, निब्बचनन्ति अत्थो. तीसु पटिसम्भिदासु ञाणं पटिभानपटिसम्भिदा. लोकिया सद्धेय्यवचनमुखेनेव अत्थेसु पसीदन्ति, न अत्थमुखेनाति आह सद्धेय्यतोतिआदि. केवलसद्दो सकलाधिवचनन्ति आह ‘‘सकलपरिपुण्णभावेना’’ति. ब्रह्मचरिय-सद्दो इध सिक्खत्तयसङ्गहं सकलं सासनं दीपेतीति आह सिक्खत्तयपरिग्गहितत्तातिआदि.

यथावुत्तमेवत्थं अपरेनापि परियायेन दस्सेतुं अपि चातिआदि वुत्तं. तत्थ सनिदानन्ति देसकालादिदीपकेन निदानवचनेन सनिदानं. सउप्पत्तिकन्ति अट्ठुप्पत्तिआदियुत्तियुत्तं. तत्रायं पाळियोजनाक्कमो – ‘‘वेरञ्जो ब्राह्मणो समणो खलु भो…पे… विहरती’’ति च, ‘‘तं खो पन भवन्तं गोतमं ‘इतिपि सो…पे… पवेदेती’ति एवं कल्याणो कित्तिसद्दो अब्भुग्गतो’’ति च, ‘‘सो धम्मं देसेति…पे… परियोसानकल्याणं, देसेन्तो च सात्थसब्यञ्जनादिगुणसंयुत्तं ब्रह्मचरियं पकासेती’’ति च, ‘‘साधु खो पन तथारूपानं अरहतं दस्सनं होती’’ति च अस्सोसि, सुत्वा च अथ खो वेरञ्जो ब्राह्मणो येन भगवा तेनुपसङ्कमीति.

अट्ठकथायं पन किञ्चापि ‘‘दस्सनमत्तम्पि साधु होतीति एवं अज्झासयं कत्वा अथ खो वेरञ्जो…पे… उपसङ्कमी’’ति एवं साधु खो पनातिआदिपाठस्स ब्राह्मणस्स परिवितक्कनभावेन वुत्तत्ता ब्रह्मचरियं पकासेतीति पदानन्तरमेव अस्सोसीति पदं सम्बन्धितब्बं विय पञ्ञायति, तथापि ‘‘साधु खो पन तथारूपानं अरहतं दस्सनं होती’’ति एवं यथावुत्तनिदस्सनत्थेन इति-सद्देन परिच्छिन्दित्वा वुत्तत्ता पन अञ्ञत्थ इति-सद्दस्स अदस्सनतो च अथ खो वेरञ्जोतिआदिना कत्तब्बन्तरदस्सनमुखेन पाळिया पकारन्तरे पवत्तितो च यथावुत्तवसेनेव ‘‘साधु खो पन तथारूपानं अरहतं दस्सनं होती’’ति वचनानन्तरमेव अस्सोसीति पदं आनेत्वा सम्बन्धनं युत्तं. अट्ठकथाचरियेन हि ब्राह्मणस्स अत्तना सुतवसेनेव अज्झासयो उप्पज्जतीति ¶ उपसङ्कमनहेतुदस्सनमुखेन दस्सनमत्तम्पि साधु होतीति एवं अज्झासयं कत्वातिआदि वुत्तन्ति गहेतब्बं.

२. सीतोदकं ¶ विय उण्होदकेनाति इदं उक्कमेन मुखारुळ्हवसेन वुत्तं, अनुपसन्तसभावताय ब्राह्मणस्सेव उण्होदकं विय सीतोदकेनाति अत्थो गहेतब्बो, ञाणतेजयुत्तताय वा भगवा उण्होदकोपमोति कत्वा तब्बिरहितं ब्राह्मणं सीतोदकं विय कत्वा तथा वुत्तन्ति गहेतब्बं. एकीभावन्ति सम्मोदनकिरियाय एकरूपतं. यायातिआदीसु याय कथाय सम्मोदि ब्राह्मणो, तं सम्मोदनीयं कथन्ति योजना. तत्थ खमनीयन्ति दुक्खबहुलं इदं सरीरं, कच्चि खमितुं सक्कुणेय्यं. यापनीयन्ति चिरप्पबन्धसङ्खाताय यापनाय यापेतुं सक्कुणेय्यं. रोगाभावेन अप्पाबाधं. दुक्खजीविताभावेन अप्पातङ्कं. तंतंकिच्चकरणत्थाय लहुं अकिच्छेन उट्ठातुं योग्गताय लहुट्ठानं. बलन्ति सरीरस्स सब्बकिच्चक्खमं बलं कच्चि अत्थीति पुच्छति. फासुविहारोति सुखविहारो. सरणीयमेव दीघं कत्वा ‘‘सारणीय’’न्ति वुत्तन्ति आह ‘‘सरितब्बभावतो च सारणीय’’न्ति. परियायेहीति कारणेहि.

भावोति किरिया, तस्मिं वत्तमानो नपुंसक-सद्दो भावनपुंसकनिद्देसो नाम, किरियाविसेसनसद्दोति अत्थो. एकमन्ते एकस्मिं अन्ते युत्तप्पदेसेति अत्थो. खण्डिच्चादिभावन्ति खण्डितदन्तपलितकेसादिभावं. राजपरिवट्टेति राजूनं परिवत्तनं, पटिपाटियोति अत्थो. पुरातनुच्चकुलप्पसुतताय जिण्णता, न वयसाति आह ‘‘चिरकालप्पवत्तकुलन्वये’’ति. विभवानं महन्तत्तं लाति गण्हातीति महल्लकोति आह ‘‘विभवमहत्तताय समन्नागते’’ति. विभावने नाम अत्थेति पकतिविभावनसङ्खाते अत्थे. न अभिवादेति वाति अभिवादेतब्बन्ति न सल्लक्खेति, एवं असल्लक्खणपकतिकोति वुत्तं होति. रूपं निच्चं वा अनिच्चं वाति एत्थापि निच्चपकतिकं अनिच्चपकतिकं वाति अत्थो. अनिच्चं वाति एत्थ वा-सद्दो अवधारणत्थो.

सम्पतिजातोति मुहुत्तजातो, जातसमनन्तरमेवाति अत्थो. सत्तपदवीतिहारेन गन्त्वा…पे… ओलोकेसीति एत्थ द्वारं पिधाय निक्खन्तोतिआदीसु विय गमनतो पुरे कतम्पि ओलोकनं पच्छा कतं ¶ विय वुत्तन्ति दट्ठब्बं. ओलोकेसिन्ति च लोकविवरणपाटिहारिये जाते मंसचक्खुना वोलोकेसीति अत्थो. सेट्ठोति पसत्थतरो. पतिमानेसीति पूजेसि. आसभिन्ति उत्तमं.

३. तं वचनन्ति नाहं तं ब्राह्मणातिआदिवचनं. अञ्ञाय सण्ठहेय्याति अरहत्ते पतिट्ठहेय्य. जातिवसेनाति खत्तियादिजातिवसेन. उपपत्तिवसेनाति देवेसु उपपत्तिवसेन. आविञ्छन्तीति ¶ आकड्ढन्ति. यस्स अभिवादादिकरणसङ्खातस्स सामग्गिरसस्स भगवति अभावं मञ्ञमानो ब्राह्मणो ‘‘अरसरूपो’’ति आह, तब्बिधुरस्स रूपतण्हादिकस्सेव सामग्गिरसस्स अभावेन भगवा ‘‘अरसरूपो’’ति दस्सेतुं सामग्गिरससद्दस्स रूपरसादीसु वत्तनप्पकारं दस्सेन्तो आह वत्थारम्मणादीतिआदि.

तालावत्थुकताति उच्छिन्नमूलानं तालानं वत्थु विय नेसं रूपरसादीनं वत्थु चित्तसन्तानं कतन्ति इमस्मिं अत्थे मज्झेपदलोपं दीघञ्च कत्वा निद्देसोति आह तालवत्थु वियातिआदि. तालवत्थु विय येसं वत्थु कतं ते तालावत्थुकताति विसेसनस्स परनिपातो दट्ठब्बो, कततालवत्थुकाति अत्थो. मत्थकच्छिन्नतालोयेव पत्तफलादीनं अकारणताय अवत्थूति तालावत्थु, तं विय येसं वत्थु कतं ते रूपरसादयो तालावत्थुकता, अयं अञ्ञपदत्थवसेन अत्थग्गाहो हेट्ठा वुत्तनयेन सुगमोति विसेसमत्थं दस्सेन्तो आह ‘‘मत्थकच्छिन्नतालो विय कता’’ति. एवञ्च मत्थकसदिसेसु रूपरसादीसु रागेसु छिन्नेसुपि तब्बत्थुभूतस्स तालावत्थुसदिसस्स चित्तसन्तानस्स याव परिनिब्बानट्ठानं उपपन्नमेव होति. यथारुततो पन विसेसनसमासवसेन अत्थे गय्हमाने रूपरसादीनं तालावत्थुसदिसताय ठानं आपज्जति. यं पन सारत्थदीपनियं (सारत्थ. टी. १.३) एतं दोसं परिहरितुं रूपरसादीनं कुसलाकुसलत्तं वुत्तं, तं ते तथागतस्स पहीनातिआदिपाळिया, कामसुखस्सादसङ्खाता रूपरसातिआदिअट्ठकथाय च न समेति, खीणासवानम्पि याव परिनिब्बाना कुसलाकुसलानं फलुप्पत्तितो तेसं मत्थकच्छिन्नतालसदिसतापि न युत्ताति गहेतब्बं. अथ वा मत्थकच्छिन्नतालस्स ठितं अट्ठितञ्च अमनसिकत्वा पुन अनुप्पत्तिधम्मतासदिसमत्तं उपमेत्वा तालावत्थु विय कताति विसेसनसमासवसेन ¶ अत्थग्गहणेपि न कोचि दोसो. अनु-सद्दो पच्छाति अत्थे वत्ततीति आह पच्छाभावो न होतीतिआदि. अनु अभावं गताति पच्छा अनुप्पत्तिधम्मतावसेन अभावं गता. अनच्छरियाति अनु अनु उपरूपरि विम्हयकताति अत्थो. यञ्च खो त्वं वदेसीति यं वन्दनादिसामग्गीरसाभावसङ्खातं कारणं अरसरूपताय वदेसि, तं कारणं न विज्जतीति अत्थो.

४. सन्धाय भासितमत्थन्ति यं अत्थं सन्धाय ब्राह्मणो निब्भोगो भवं गोतमोतिआदिमाह, भगवा च यं सन्धाय निब्भोगतादिं अत्तनि अनुजानाति, तं सन्धाय भासितमत्थं.

५. कुलसमुदाचारकम्मन्ति ¶ कुलाचारकम्मं. कायतो कायद्वारतो पवत्तं दुच्चरितं कायदुच्चरितं. अनेकविहिताति अनेकप्पकारा.

६. पञ्चकामगुणिकरागस्साति रूपादीसु पञ्चसु कामकोट्ठासेसु अतिविय सङ्गवसेन नियुत्तस्स कामरागस्स, एतेन अनागामीनं वत्थाभरणादीसु सङ्गनिकन्तिवसेन उप्पज्जनकामरागस्स कामरागताभावं दस्सेति तस्स रूपरागादीसु सङ्गहतो. अवसेसानन्ति एत्थ सक्कायदिट्ठिविचिकिच्छानं पठमेन मग्गेन, सेसानं चतूहिपि उच्छेदं वदति, तेनाह ‘‘यथानुरूप’’न्ति.

७. जिगुच्छति मञ्ञेति जिगुच्छति विय, ‘‘जिगुच्छती’’ति वा सल्लक्खेमि. अकोसल्लसम्भूतट्ठेनाति अञ्ञाणसम्भूतट्ठेन.

८-१०. तत्राति यथावुत्तेसु द्वीसु अत्थविकप्पेसु. पटिसन्धिपरियायोपि इध गब्भसद्दोति आह ‘‘देवलोकपटिसन्धिपटिलाभाया’’ति. अपुनब्भवभूताति खणे खणे उप्पज्जमानानं धम्मानं अभिनिब्बत्ति.

११. धम्मधातुन्ति सब्बञ्ञुतञ्ञाणं. तञ्हि धम्मे याथावतो धारेति उपधारेतीति ‘‘धम्मधातू’’ति वुच्चति. देसनाविलासप्पत्तोति अभिरुचिवसेन परिवत्तेत्वा देसेतुं समत्थता देसनाविलासो, तं पत्तो. करुणाविप्फारन्ति सब्बसत्तेसु महाकरुणाय फरणं. तादिगुणलक्खणमेव उपमाय विभावेन्तो आह ‘‘पथवीसमचित्तत’’न्ति. ततोयेव ¶ अकुज्झनसभावतो अकुप्पधम्मता. जातिया अनुगतन्ति जातिया अनुबद्धं. जराय अनुसटन्ति जराय पलिवेठितं. वट्टखाणुभूतन्ति वट्टतो उद्धरितुं असक्कुणेय्यताय वट्टे निच्चलभावेन ठितं खाणु विय भूतं. जातानं मच्चानं निच्चं मरणतो भयन्ति आह अज्ज मरित्वातिआदि. अप्पटिसमं पुरेजातभावन्ति असदिसं अरियाय जातिया पठमजातभावं, सब्बजेट्ठभावन्ति अत्थो.

‘‘अपी’’ति अवत्वा ‘‘पी’’ति वदन्तो पि-सद्दो विसुं अत्थि निपातोति दस्सेति. सम्मा अधिसयितानीति पादादीहि उपघातं अकरोन्तिया सम्मदेव उपरि सयितानि, अकम्मकस्सापि सयतिधातुनो अधिपुब्बताय सकम्मकता दट्ठब्बा. नखसिखाति नखग्गानि. सकुणानं ¶ पक्खा हत्थपादट्ठानियाति आह ‘‘सङ्कुटितहत्थपादा’’ति. एत्थाति आलोकट्ठाने. निक्खमन्तानन्ति निक्खमन्तेसु, निद्धारणे हेतं सामिवचनं. अण्डकोसन्ति अण्डकपालं.

लोकोयेव लोकसन्निवासो. अबुज्झि एत्थाति रुक्खो बोधि, सयं बुज्झति, बुज्झन्ति वा तेनाति मग्गोपि सब्बञ्ञुतञ्ञाणम्पि बोधि. बुज्झीयतीति निब्बानं बोधि. अन्तरा च बोधिन्ति दुतियमुदाहरणं विनापि रुक्ख-सद्देन बोधि-सद्दस्स रुक्खप्पवत्तिदस्सनत्थं. वरभूरिमेधसोति महापथवी विय पत्थटपञ्ञोति अत्थो. तिस्सो विज्जाति अरहत्तमग्गो अत्तना सह वत्तमानं सम्मादिट्ठिसङ्खातं आसवक्खयञाणञ्चेव इतरा द्वे महग्गतविज्जा च तब्बिनिबन्धककिलेसविद्धंसनवसेन उप्पादनतो ‘‘तिस्सो विज्जा’’ति वुच्चति. छ अभिञ्ञाति एत्थापि एसेव नयो. सावकपारमीञाणन्ति अग्गसावकेहि पटिलभितब्बं सब्बमेव लोकियलोकुत्तरञाणं. पच्चेकबोधिञाणन्ति एत्थापि एसेव नयो.

ओपम्मसम्पटिपादनन्ति ओपम्मत्थस्स उपमेय्येन समं पटिपादनं. अत्थेनाति उपमेय्यत्थेन. तिक्खखरविप्पसन्नसूरभावोति इमिना सङ्खारुपेक्खापत्ततं विपस्सनाय दस्सेति. परिणामकालोति इमिना वुट्ठानगामिनिभावापत्तिं. तदा च सा मग्गञाणगब्भं धारेन्ती विय होतीति आह ‘‘गब्भग्गहणकालो’’ति. अनुपुब्बाधिगतेनाति पठममग्गादिपटिपाटिया अधिगतेन. चतुरङ्गसमन्नागतन्ति ‘‘कामं तचो च न्हारु च अट्ठि च अवसिस्सतु ¶ (म. नि. २.१८४; सं. नि. २.२२; अ. नि. २.५; महानि. १९६), सरीरे उपसुस्सतु मंसलोहित’’न्ति एवं वुत्तचतुरङ्गसमन्नागतं वीरियं.

छन्दो कामोतिआदीसु पत्थनाकारेन पवत्तो दुब्बलो लोभो इच्छनट्ठेन छन्दो. ततो बलवा रञ्जनट्ठेन रागो. ततोपि बलवतरो छन्दरागो. निमित्तानुब्यञ्जनसङ्कप्पवसेन पवत्तो सङ्कप्पो. ततोपि बलवसङ्कप्पवसेनेव पवत्तो रागो. ततोपि बलवतरो सङ्कप्परागो. स्वायं पभेदो एकस्सेव लोभस्स पवत्तिआकारभेदेन अवत्थाभेदेन च वुत्तो.

पठमज्झानकथावण्णना

सेय्यथिदन्ति तं कथन्ति अत्थो. एतन्ति पुब्बपदेयेव अवधारणकरणं, एतं अत्थजातं वा. तन्निस्सरणतोति तेसं कामानं निस्सरणत्ता. एसाति एव-कारो. कामधातु नाम कामभवो, नेक्खम्मन्ति पठमज्झानं. एसाति नियमो. तदङ्गविक्खम्भनसमुच्छेदपटिप्पस्सद्धिनिस्सरणविवेका ¶ तदङ्गविवेकादयो. कायचित्तउपधिविवेका कायविवेकादयो, तयो एव इध झानकथाय, समुच्छेदविवेकादीनं असम्भवा. निद्देसेति महानिद्देसे. तत्थेवाति महानिद्देसे एव. विभङ्गेति झानविभङ्गे. एवञ्हि सतीति उभयेसम्पि कामानं सङ्गहे सति.

पुरिमेनाति कायविवेकेन. एत्थाति एतस्मिं कायचित्तविवेकद्वये. दुतियेनाति चित्तविवेकेन. एतेसन्ति यथावुत्तनयेन वत्थुकामकिलेसकामविवेकद्वयस्स वाचकभूतानं विविच्चेव कामेहि विविच्च अकुसलेहीति इमेसं पदानं, निद्धारणे चेतं सामिवचनं. बालभावस्स हेतुपरिच्चागोति अनुवत्तति. अकुसलधम्मो हि बालभावस्स हेतु. आसयपोसनन्ति आसयस्स विसोधनं वड्ढनञ्च. विभङ्गे नीवरणानेव वुत्तानीति सम्बन्धो. तत्थ कारणमाह ‘‘उपरिझानङ्गपच्चनीकपटिपक्खभावदस्सनतो’’ति. तत्थ उपरि सवितक्कन्तिआदिना वुच्चमानानि झानङ्गानि, तेसं अत्तनो पच्चनीकानं पटिपक्खभावदस्सनतोति अत्थो. उपरिझानङ्गानं पच्चनीकपटिपक्खभावस्स दस्सनतोतिपि पाठो. तत्थ ‘‘उपरि वुच्चमानझानङ्गानं उजुविपच्चनीकवसेन पटिपक्खभावदस्सनतो’’ति ‘‘नीवरणानं तानेव विभङ्गे वुत्तानी’’तिपि अत्थं वदन्ति ¶ . पेटकेति महाकच्चायनत्थेरेन कतं नेत्तिप्पकरणनयानुसारिपकरणं, तं पन पिटकानं वण्णनाभूतत्ता ‘‘पेटक’’न्ति वुत्तं, तस्मिन्ति अत्थो.

वितक्कनं नाम आरम्मणपरिकप्पनन्ति आह ‘‘ऊहन’’न्ति. रूपं रूपन्तिआदिना विसये आकोटेन्तस्स विसयप्पवत्तिआहननं उपरि आहननन्ति वेदितब्बं. आरम्मणे चित्तस्स आनयनं नाम आरम्मणाभिमुखकरणं. अनुसञ्चरणन्ति अनुपरिब्भमनं, तञ्च खणन्तरस्स तथाकारेन उप्पादनमेव, न हि परमत्थतो एकस्स सञ्चरणमत्थि, एवमञ्ञत्थापि ईदिसेसु. अनुमज्जनन्ति परिमज्जनं. तत्थाति आरम्मणे. सहजातानुयोजनं सकिच्चानुवत्तिताकरणेन. कत्थचीति दुतियज्झानविरहितेसु सविचारचित्तेसु सब्बत्थाति अत्थो. विचारेन सह उप्पज्जमानोपि वितक्को आरम्मणे अभिनिरोपनाकारेन पवत्तिं सन्धाय ‘‘पठमाभिनिपातो’’ति वुत्तो. विप्फारवाति अवूपसन्तसभावताय वेगवा, तेनेवेस दुतियज्झाने पहानङ्गं जातं. पठमदुतियज्झानेसूति पञ्चकनयं सन्धाय वुत्तं. अङ्गविनिमुत्तस्स झानस्स अभावं दस्सेन्तो रुक्खो वियातिआदिमाह.

विवेक-सद्दस्स भावसाधनपक्खे ‘‘तस्मा विवेका’’ति वुत्तं, इतरपक्खे ‘‘तस्मिं विवेके’’ति. पिनयतीति तप्पेति, वड्ढेति वा. फरणरसाति पणीतरूपेहि काये ब्यापनरसा. सातलक्खणन्ति ¶ इट्ठसभावं, मधुरन्ति अत्थो. सम्पयुत्तानं पीळनज्झुपेक्खनं अकत्वा अनु अनु गण्हनं उपकारिता वा अनुग्गहो. वनमेव वनन्तं. उदकमेव उदकन्तं. तस्मिं तस्मिं समये पाकटभावतोति इमिना इट्ठारम्मणादिपटिलाभसमयेपि सुखं विज्जमानम्पि अपाकटं, पीतियेव तत्थ पाकटा, पटिलद्धरसानुभवनसमये च विज्जमानपीतितोपि सुखमेव पाकटतरन्ति दस्सेति. एत्थ च चेतसिकसुखवसेनेव पटिलद्धरसानुभवनं वेदितब्बं, न कायिकसुखवसेन तस्स पीतिसम्पयोगस्सेव अभावेन इधानधिप्पेतत्ता. अयञ्च पीतीतिआदि अञ्ञपदत्थसमआसदस्सनं, अस्सत्थिपक्खे तद्धितपच्चयदस्सनं वा. दुतियविकप्पेन अञ्ञपदत्थसमासवसेनेव ‘‘विवेकजं पीतिसुख’’न्ति इदं एकं पदन्ति दस्सेति, विभत्तिया च अलोपं.

गणनानुपुब्बताति ¶ देसनाक्कमं सन्धाय वुत्तं. पठमं समापज्जतीति इदं आदिकम्मिकवसेन वुत्तं, चिण्णवसीनं पन योगीनं उप्पटिपाटियापि झानं उप्पज्जतेव. झापेतीति दहति. अनिच्चादिलक्खणविसयाय विपस्सनाय उपनिज्झायनं कथं निब्बानालम्बनस्स मग्गस्स होतीति आह विपस्सनायातिआदि. तत्थ मग्गेन सिज्झतीति निच्चादिविपल्लासप्पहायकेन सह मग्गेनेव तं लक्खणूपनिज्झानं असम्मोहतो अत्तनो सिज्झति. अथ वा मग्गेनाति मग्गकिच्चेन, विपल्लासप्पहानेनाति अत्थो.

अञ्ञोति सत्तो. अवुत्तत्ताति ‘‘सचित्तेकग्गत’’न्ति झानपाळियं (विभ. ५०८ आदयो) अवुत्तत्ता. वुत्तत्ताति तस्सा झानपाळिया विभङ्गे वुत्तत्ता.

दुतियज्झानकथावण्णना

अज्झत्तन्ति झानविसेसनत्ता वुत्तं ‘‘इध नियकज्झत्तमधिप्पेत’’न्ति. झानञ्हि अज्झत्तज्झत्तं न होति छळिन्द्रियानमेव तब्भावतो. खुद्दका ऊमियो वीचियो. महतियो तरङ्गा. सन्ता होन्ति समितातिआदीनि अञ्ञमञ्ञवेवचनानि, झानबलेन समतिक्कन्ताति अधिप्पायो. अप्पिताति गमिता विनासं पापिता. परियायोति झानपरिक्खारे झानवोहारत्ता अपरमत्थतो.

ततियज्झानकथावण्णना

तदधिगमायाति ततियमग्गाधिगमाय. उपपत्तितो इक्खतीति पञ्ञाय सहचरणपरिचयेन यथा ¶ समवाहिभावो होति, एवं युत्तितो पस्सति. विपुलायाति महग्गतभावप्पत्ताय. थामगतायाति वितक्कविचारपीतिविगमेन थिरभावप्पत्तिया, तेनेव वक्खति ‘‘वितक्कविचारपीतीहि अनभिभूतत्ता’’तिआदि. (पारा. अट्ठ. १.११ ततियज्झानकथा). उपेक्खाभेदं दस्सेत्वा इधाधिप्पेतं उपेक्खं पकासेतुं उपेक्खा पनातिआदि वुत्तं. तत्थ तत्रमज्झत्तताव खीणासवानं इट्ठानिट्ठछळारम्मणापाथे परिसुद्धपकतिभावाविजहनाकारेन अज्झुपेक्खनतो ‘‘छळङ्गुपेक्खा’’ति च, सत्तेसु मज्झत्ताकारप्पवत्तत्ता ‘‘ब्रह्मविहारुपेक्खा’’ति च, सहजातधम्मानं मज्झत्ताकारभूता ‘‘बोज्झङ्गुपेक्खा’’ति च, केवला ‘‘तत्रमज्झत्तुपेक्खा’’ति ¶ च, ततियज्झानसहगता अग्गसुखेपि तस्मिं अपक्खपातभूता ‘‘झानुपेक्खा’’ति च, चतुत्थज्झानसहगता सब्बपच्चनीकपरिसुद्धिताय ‘‘पारिसुद्धुपेक्खा’’ति च तेन तेन अवत्थाभेदेन छधा वुत्ता.

वीरियमेव पन अनच्चारद्धअनतिसिथिलेसु सहजातेसु सङ्खारेसु उपेक्खनाकारेन पवत्तं ‘‘वीरियुपेक्खा’’ति वुत्तं. अट्ठन्नं रूपारूपज्झानानं पटिलाभतो पुब्बभागे एव नीवरणवितक्कविचारादीनं पहानाभिमुखीभूतत्ता तेसं पहानेपि अब्यापारभावूपगमनेन मज्झत्ताकारप्पवत्ता समाधिवसेन उप्पन्ना अट्ठ पञ्ञा चेव उपादानक्खन्धभूतेसु सङ्खारेसु अज्झुपेक्खनाकारप्पवत्ता विपस्सनावसेन उप्पन्ना चतुन्नं मग्गानं पुब्बभागे तस्स तस्स अधिगमाय चतस्सो चतुन्नं फलसमापत्तीनं पुब्बभागे तस्स तस्स अधिगमाय अप्पणिहितविमोक्खवसेन पवत्ता चतस्सो सुञ्ञतअनिमित्तविमोक्खवसेन द्वेति दस पञ्ञा चाति इमे अट्ठारस पञ्ञा सङ्खारुपेक्खा नाम. यथावुत्तविपस्सनापञ्ञाव लक्खणविचिननेपि मज्झत्तभूता विपस्सनुपेक्खा नाम. अदुक्खमसुखवेदना वेदनुपेक्खा नाम. इमासं पन दसन्नम्पि उपेक्खानं ‘‘तत्थ तत्थ आगतनयतो विभागो धम्मसङ्गहट्ठकथायं वुत्तनयेन वेदितब्बो’’ति दस्सेन्तो आह एवमयं दसविधापीतिआदि. तत्थ तत्थ आगतनयतोति इदम्पि हि तासं विभागदस्सनस्स भूमिपुग्गलादिपदं विय विसुं मातिकापदवसेन वुत्तं, न पन भूमिपुग्गलादिवसेन विभागदस्सनस्स आगतट्ठानपरामसनं आगतट्ठानस्स अट्ठसालिनियातिआदिना वुत्तत्ता, तस्मा सारत्थदीपनियं (सारत्थ. टी. १.११ ततियज्झानकथा) यं वुत्तं ‘‘इमासं पन दसन्नम्पि उपेक्खानं भूमिपुग्गलादिवसेन विभागो तत्थ तत्थ वुत्तनयेनेव वेदितब्बोति दस्सेन्तो आह एवमयं दसविधातिआदी’’ति, तं अमनसिकत्वा वुत्तन्ति गहेतब्बं. तत्थ तत्थ आगतनयतोति ‘‘इध (खीणासवो) भिक्खु चक्खुना रूपं दिस्वा नेव सुमनो होति, न दुम्मनो, उपेक्खको विहरति सतो सम्पजानो’’तिआदिना (दी. नि. ३.३४८; अ. नि. ६.१) छळङ्गुपेक्खा आगता, ‘‘उपेक्खासहगतेन ¶ चेतसा एकं दिसं फरित्वा विहरती’’ति (दी. नि. ३.३०८; म. नि. १.७७; २.३०९; ३.२३०) एवं ब्रह्मविहारुपेक्खा आगताति इमिना नयेन ¶ दसन्नम्पि उपेक्खानं तत्थ तत्थ वुत्तपदेसेसु आगतनयदस्सनतो च अयं दसविधापि उपेक्खा धम्मसङ्गहट्ठकथायं वुत्तनयेनेव वेदितब्बाति सम्बन्धो.

भूमीतिआदीसु पन छळङ्गुपेक्खा कामावचरा, ब्रह्मविहारुपेक्खा रूपावचरातिआदिना भूमितो च, छळङ्गुपेक्खा असेक्खानमेव, ब्रह्मविहारुपेक्खा पुथुज्जनादीनं तिण्णम्पि पुग्गलानन्तिआदिना पुग्गलतो च, छळङ्गुपेक्खा सोमनस्सुपेक्खासहगतचित्तसम्पयुत्तातिआदिना चित्ततो च, छळङ्गुपेक्खा छळारम्मणातिआदिना आरम्मणतो च, ‘‘वेदनुपेक्खा वेदनाक्खन्धेन सङ्गहिता, इतरा नव सङ्खारक्खन्धेना’’ति खन्धसङ्गहवसेन च, ‘‘छळङ्गुपेक्खा ब्रह्मविहारबोज्झङ्गझान पारिसुद्धितत्रमज्झत्तुपेक्खा च अत्थतो एका. तस्मा एकक्खणे च तासु एकाय सति इतरा न उप्पज्जन्ति, तथा सङ्खारुपेक्खा विपस्सनुपेक्खापि वेदितब्बा. वेदनावीरियुपेक्खानमेकक्खणे सिया उप्पत्ती’’ति एकक्खणवसेन च, ‘‘छळङ्गुपेक्खा अब्याकता ब्रह्मविहारुपेक्खा कुसलाब्याकता, तथा सेसा. वेदनुपेक्खा पन सिया अकुसलापी’’ति एवं कुसलत्तिकवसेन च, ‘‘सङ्खेपतो चत्तारो च धम्मा वीरियवेदनातत्रमज्झत्तताञाणवसेना’’ति एवं सङ्खेपवसेन च अयं दसविधापि उपेक्खा धम्मसङ्गहट्ठकथायं वुत्तनयेनेव वेदितब्बाति योजना.

एत्थ चेता किञ्चापि अट्ठसालिनियं भूमिपुग्गलादिवसेन सरूपतो उद्धरित्वा न वुत्ता, तथापि तत्थ वुत्तप्पकारेहेव तासं भूमिपुग्गलादिविभागो नयतो उद्धरित्वा सक्का ञातुन्ति तत्थ सरूपतो वुत्तञ्च अवुत्तञ्च एकतो सङ्गहेत्वा तत्थ तत्थ आगतनयतोतिआदीहि नवहि पकारेहि अतिदेसो कतो, तेनेव ‘‘धम्मसङ्गहट्ठकथायं वुत्तवसेना’’ति अवत्वा ‘‘वुत्तनयेनेवा’’ति वुत्तं. तथाहि खीणासवो भिक्खु चक्खुना रूपं दिस्वाति आदिम्हि वुत्ते छळङ्गुपेक्खा रूपादिआरम्मणताय भूमितो कामावचरा च पुग्गलतो असेक्खानमेव च उप्पज्जति, चित्ततो सोमनस्सुपेक्खाचित्तसम्पयुत्ता, आरम्मणतो छळारम्मणा, कुसलत्तिकतो अब्याकता चाति पण्डितेहि सक्का ¶ ञातुं, तथा छळङ्गुपेक्खा च ब्रह्मविहारुपेक्खा च तत्रमज्झत्तुपेक्खा च झानुपेक्खा च पारिसुद्धुपेक्खा च अत्थतो एकातिआदिम्हि वुत्ते पनस्स सङ्खारक्खन्धसङ्गहितत्ता ब्रह्मविहारुपेक्खादीहि सह एकक्खणे अनुप्पत्तिआदयो च सक्का ञातुं, यथा च छळङ्गुपेक्खा, एवं सेसानम्पि यथारहं अट्ठसालिनियं वुत्तनयतो भूमिआदिविभागुद्धारनयो ¶ ञातब्बो. अनाभोगरसाति पणीतसुखेपि तस्मिं अवनतिपटिपक्खकिच्चाति अत्थो.

पुग्गलेनाति पुग्गलाधिट्ठानेन. किलेसेहि सम्पयुत्तानं आरक्खा. तीरणं किच्चस्स पारगमनं. पविचयो वीमंसा. इदन्ति सतिसम्पजञ्ञं. यस्मा तस्स नामकायेन सम्पयुत्तं सुखन्ति इमस्स तस्मा एतमत्थन्तिआदिना सम्बन्धो. तस्साति झानसमङ्गिनो. तंसमुट्ठानेनाति तं यथावुत्तनामकायसम्पयुत्तं सुखं समुट्ठानं कारणं यस्स रूपस्स तेन तंसमुट्ठानेन रूपेन. अस्साति योगिनो. यस्साति रूपकायस्स. फुटत्ताति अतिपणीतेन रूपेन फुटत्ता. एतमत्थं दस्सेन्तोति कायिकसुखहेतुभूतरूपसमुट्ठापकनामकायसुखं पटिसंवेदियमानो एव झानसमङ्गिताकरणे कारियोपचारतो ‘‘सुखञ्च कायेन पटिसंवेदेती’’ति वुच्चतीति इममत्थं दस्सेन्तोति अत्थो. यन्ति हेतुअत्थे निपातोति आह ‘‘यंझानहेतू’’ति. सुखपारमिप्पत्तेति सुखस्स उक्कंसपरियन्तं पत्ते. एवमेतेसं पहानं वेदितब्बन्ति सम्बन्धो. अथ कस्मा झानेस्वेव निरोधो वुत्तोति सम्बन्धो.

चतुत्थज्झानकथावण्णना

कत्थ चुप्पन्नन्ति एत्थ कत्थाति हेतुम्हि भुम्मं, कस्मिं हेतुम्हि सतीति अत्थो. नानावज्जनेति अप्पनावीथिआवज्जनतो नाना भिन्नं पुरिमवीथीसु आवज्जनं यस्स उपचारस्स, तस्मिं नानावज्जने. विसमनिसज्जाय उप्पन्नकिलमथो विसमासनुपतापो. उपचारे वातिआदि पक्खन्तरदस्सनं एकावज्जनूपचारेपि वाति अत्थो. पीतिफरणेनाति इमिना अप्पनावीथिया विय एकवीथियम्पि कामावचरपीतिया फरणमत्तस्स अभावं दस्सेति. दोमनस्सिन्द्रियस्स अस्स सिया उप्पत्तीति सम्बन्धो. एतन्ति दोमनस्सिन्द्रियं उप्पज्जतीति सम्बन्धो. वितक्कविचारप्पच्चयेपीति पि-सद्दो अट्ठानप्पयुत्तो. सो ‘‘पहीनस्सा’’ति हेट्ठा वुत्तपदानन्तरं योजेतब्बो ¶ ‘‘पहीनस्सापि दोमनस्सिन्द्रियस्सा’’ति. वितक्कविचारभावेति एत्थ ‘‘उप्पज्जति दोमनस्सिन्द्रिय’’न्ति आनेत्वा सम्बन्धितब्बं. निमित्तत्थे चेतं भुम्मं, वितक्कविचारभावहेतूति अत्थो. वितक्कविचाराति एत्थ इति-सद्दो तस्माति एतस्मिं अत्थे दट्ठब्बो, तेन यस्मा एतं दोमनस्सिन्द्रियं वितक्कविचारपच्चये…पे… नेव उप्पज्जति, यत्थ पन उप्पज्जति, तत्थ वितक्कविचारभावेयेव उप्पज्जति. यस्मा च अप्पहीनायेव दुतियज्झानूपचारे वितक्कविचारा, तस्मा तत्थस्स सिया उप्पत्तीति एवमेत्थ योजना वेदितब्बा.

तत्थाति ¶ दुतियज्झानूपचारे. अस्साति दोमनस्सिन्द्रियस्स. सिया उप्पत्तीति इदञ्च पच्चयमत्तदस्सनेन सम्भावनमत्ततो वुत्तं. दोमनस्सुप्पत्तिसम्भावनापि हि उपचारक्खणेयेव कातुं युत्ता, वितक्कविचाररहिते पन दुतियज्झानक्खणे तदुप्पत्तिसम्भावनापि न युत्ता कातुन्ति. इतरथा कुसलचित्तक्खणे अकुसलदोमनस्सुप्पत्तिया असम्भवतो ‘‘तत्थस्स सिया उप्पत्ती’’ति न वत्तब्बं सिया. समीपत्थे वा एतं भुम्मं, उपचारज्झानानन्तरवीथीसूति अत्थो. दुतियज्झानेति एत्थापि अनन्तरवीथीसुपि न त्वेव उप्पज्जतीति अत्थो, एवं उपरि सुखिन्द्रियेपि. सोमनस्सिन्द्रियस्स उप्पत्तीति सम्बन्धो. पहीनाति वुत्ताति इदं ‘‘पञ्चन्नं ओरम्भागियानं संयोजनानं परिक्खया’’ति वुत्तत्ता वुत्तं. दुक्खाभावेनाति दुक्खताभावेन. एवं सुखाभावेनाति एत्थापि. एतेनाति दुक्खसुखपटिक्खेपवचनेन. इट्ठानिट्ठविपरीतानुभवनलक्खणाति अतिइट्ठअतिअनिट्ठानं विपरीतस्स मज्झत्तारम्मणस्स अनुभवनलक्खणा, मज्झत्तारम्मणम्पि हि इट्ठानिट्ठेसु एव पविट्ठं तब्बिनिमुत्तस्स अभावा.

झानचतुक्ककथावण्णनानयो निट्ठितो.

पुब्बेनिवासकथावण्णना

१२. अरूपज्झानानम्पि अङ्गसमताय चतुत्थज्झाने सङ्गहोति आह केसञ्चि अभिञ्ञापादकानीतिआदि, तेनेव वक्खति ‘‘अट्ठ समापत्तियो निब्बत्तेत्वा’’तिआदि (पारा. अट्ठ. १.१२). तेसु च चतुत्थज्झानमेव अभिञ्ञापादकं निरोधपादकं ¶ होति, न इतरानि. दूरकारणतं पन सन्धाय ‘‘चत्तारि झानानी’’ति नेसम्पि एकतो गहणं कतन्ति दट्ठब्बं. चित्तेकग्गतत्थानीति इदं दिट्ठधम्मसुखविहारं सन्धाय वुत्तन्ति आह खीणासवानन्तिआदि. सब्बकिच्चसाधकन्ति दिब्बविहारादिसब्बबुद्धकिच्चसाधकं. सब्बलोकियलोकुत्तरगुणदायकन्ति इमिना यथावुत्तं विपस्सनापादकत्तादिसब्बं सम्पिण्डेति. इदञ्हि झानं भगवतो सब्बबुद्धगुणदायकस्स मग्गञाणस्स पदट्ठानत्ता एवं वुत्तन्ति दट्ठब्बं. यथयिदन्ति यथा इदं. अभिनीहारक्खमन्ति इद्धिविधादिअत्थं तदभिमुखं नीहरणयोग्गं.

झानप्पटिलाभपच्चयानन्ति झानप्पटिलाभहेतुकानं झानप्पटिलाभं निस्साय उप्पज्जनकानं. पापकानन्ति लामकानं. इच्छावचरानन्ति इच्छाय वसेन ओतिण्णानं नीवरणभावं तदेकट्ठतञ्च अप्पत्तानं अत्तुक्कंसनादिवसप्पवत्तानं अहो वत ममेव सत्था पटिपुच्छित्वा भिक्खूनं एवरूपं धम्मं देसेय्यातिआदिनयप्पवत्तानं मानादीनं. पोत्थकेसु पन ‘‘झानप्पटिलाभपच्चनीकान’’न्तिपि ¶ पाठं लिखन्ति, सो पमादपाठोति गहेतब्बो ‘‘झानप्पटिलाभपच्चनीकानं नीवरणानं अभावस्स नीवरणदूरीभावेन परिसुद्धो’’ति एवं पुब्बे परिसुद्धपदेयेव वुत्तत्ता. सारत्थदीपनियं (सारत्थ. टी. १.१२) पन ‘‘इच्छावचरानन्ति इच्छाय अवचरानं इच्छावसेन ओतिण्णानं पवत्तानं नानप्पकारानं कोपअप्पच्चयानन्ति अत्थोति अयम्पि पाठो अयुत्तो एवाति गहेतब्बं. ततो एव च विसुद्धिमग्गे अयं पाठो सब्बेन सब्बं न दस्सितो’’ति वुत्तं. तत्थ च नानप्पकारानं कोपअप्पच्चयानन्ति एवं नीवरणभावप्पत्तदोसानं परामट्ठत्ता अयं पाठो पटिक्खित्तोति वेदितब्बो.

अभिज्झादीनन्ति एत्थ अभिज्झा-सद्देन च अनीवरणसभावस्सेव लोभस्स मानादीनञ्च गहणं झानप्पटिलाभपच्चयानन्ति अनुवत्तमानत्ता. उभयम्पीति अनङ्गणत्तं विगतूपक्किलेसत्तञ्चाति एतं उभयम्पि यथाक्कमं अनङ्गणसुत्तवत्थसुत्तानुसारेनेव वेदितब्बं. तेसु च सुत्तेसु किञ्चापि नीवरणसभावप्पत्ता थूलदोसापि वुत्ता, तथापि अधिगतचतउत्थज्झानस्स वसेन वुत्तत्ता इध सुखुमा एव ते गहिता. अङ्गणुपक्किलेससामञ्ञेन पनेत्थ सुत्तानं अपदिसनं. तथा हि ‘‘सुत्तानुसारेना’’ति वुत्तं, न पन सुत्तवसेनाति.

पुब्बेनिवासानुस्सतियं ¶ ञाणं पुब्बेनिवासानुस्सतिञाणन्ति निब्बचनं दस्सेन्तो आह पुब्बेनिवासानुस्सतिम्हीतिआदि. इदानि पुब्बेनिवासं पुब्बेनिवासानुस्सतिं तत्थ ञाणञ्च विभागतो दस्सेतुं तत्थातिआदि वुत्तं. पुब्ब-सद्दो अतीतभवविसयो, निवास-सद्दो च कम्मसाधनोति आह ‘‘पुब्बे अतीतजातीसु निवुत्थक्खन्धा’’ति. निवुत्थता चेत्थ सकसन्ताने पवत्तता, तेनाह अनुभूतातिआदि. इदानि सपरसन्तानसाधनवसेन निवास-सद्दस्स अत्थं दस्सेतुं ‘‘निवुत्थधम्मा वा निवुत्था’’ति वत्वा तं विवरितुं गोचरनिवासेनातिआदि वुत्तं. गोचरभूतापि हि धम्मा ञाणेन निवुत्था नाम होन्ति, ते पन सपरविञ्ञाणगोचरताय दुविधाति दस्सेतुं अत्तनोतिआदि वुत्तं. परविञ्ञाणविञ्ञातापि वा निवुत्थाति सम्बन्धो. इधापि परिच्छिन्नाति पदं आनेत्वा सम्बन्धितब्बं. अनमतग्गेपि हि संसारे अत्तना अविञ्ञातपुब्बानं सत्तानं खन्धा परेहेव केहिचि विञ्ञातत्ता परविञ्ञाणविञ्ञाता नाम वुत्ता, तेसं अनुस्सरणं पुरिमतो दुक्करं येहि परेहि विञ्ञातताय ते परविञ्ञाणविञ्ञाता नाम जाता, तेसं वत्तमानसन्तानानुसारेन विञ्ञातब्बतो. ते च परविञ्ञाणविञ्ञाता दुविधा परिनिब्बुता अपरिनिब्बुताति. तेसु च परिनिब्बुतानुस्सरणं दुक्करं सब्बसो सुसमुच्छिन्नसन्तानत्ता. तं पन सिखाप्पत्तपरविञ्ञातं पुब्बेनिवासं दस्सेतुं ‘‘छिन्नवटुमकानुस्सरणादीसू’’ति वुत्तं. तत्थ छिन्नवटुमका अतीते परिनिब्बुता खीणासवा छिन्नसंसारमग्गत्ता ¶ . आदि-सद्देन अपरिनिब्बुतानं परविञ्ञाणविञ्ञातानम्पि सीहोक्कन्तिकवसएन अनुस्सरणं गहितं. याय सतिया पुब्बेनिवासं अनुस्सरति, सा पुब्बेनिवासानुस्सतीति आनेत्वा सम्बन्धितब्बं.

विहित-सद्दो विध-सद्दपरियायोति आह ‘‘अनेकविध’’न्ति, भवयोनिआदिवसेन बहुविधन्ति अत्थो. विहितन्ति वा पयुत्तं वण्णितन्ति अत्थं गहेत्वा ‘‘अनेकेहि पकारेहि विहित’’न्ति वत्तब्बे मज्झेपदलोपं कत्वा निद्दिट्ठन्ति आह ‘‘अनेकेहि…पे… संवण्णित’’न्ति. पकारेहीति नामगोत्तादिपकारेहि. संवण्णितन्ति बुद्धादीहि कथितं. अनु-सद्दो अनन्तरत्थदीपकोति आह ‘‘अभिनिन्नामितमत्ते एवा’’ति, एतेन च परिकम्मस्स आरद्धतं दस्सेति. पूरितपारमीनञ्हीतिआदिना परिकम्मं विनापि सिद्धिं दस्सेति.

आरद्धप्पकारदस्सनत्थेति ¶ अनुस्सरितुं आरद्धानं पुब्बे निवुत्थक्खन्धानं दस्सनत्थे. जायतीति जाति, भवो. सो एककम्ममूलको आदाननिक्खेपपरिच्छिन्नो खन्धप्पबन्धो इध ‘‘जाती’’ति अधिप्पेतोति आह एकम्पीतिआदि. कप्पोति असङ्ख्येय्यकप्पो, सो पन अत्थतो कालो तथापवत्तधम्ममुपादाय पञ्ञत्तो, तेसं वसेनस्स परिहानि च वड्ढि च वेदितब्बा. संवट्टो संवट्टनं विनासो अस्स अत्थीति संवट्टो, असङ्ख्येय्यकप्पो. संवट्टेन विनासेन सह तिट्ठति सीलेनाति संवट्टट्ठायी. एवं विवट्टोतिआदीसुपि. तत्थ विवट्टनं विवट्टो, उप्पत्ति, वड्ढि वा. तेजेन विनासो तेजोसंवट्टो. वित्थारतो पनाति पुथुलतो पन संवट्टसीमाभेदो नत्थि, तेनाह ‘‘सदापी’’ति. एकनगरिया विय अस्स जातक्खणे विकारापज्जनतो जातिक्खेत्तवोहारोति दस्सेतुं ‘‘पटिसन्धिआदीसु कम्पती’’ति वुत्तं. आनुभावो पवत्ततीति तदन्तोगधानं सब्बेसं सत्तानं रोगादिउपद्दवो वूपसम्मतीति अधिप्पायो. यं यावता वा पन आकङ्खेय्याति वुत्तन्ति यं विसयक्खेत्तं सन्धाय एकस्मिं एव खणे सब्बत्थ सरेन अभिविञ्ञापनं, अत्तनो रूपकायदस्सनञ्च पटिजानन्तेन भगवता ‘‘यावता वा पन आकङ्खेय्या’’ति वुत्तं.

एतेसूति निद्धारणे भुम्मं. पवत्तफलभोजनोति सयंपतितफलाहारो, इदञ्च तापसकालं सन्धाय वुत्तं. इधूपपत्तियाति इध चरिमभवे उपपत्तिया. एकगोत्तोति तुसितगोत्तेन एकगोत्तो. इतरेति वण्णादयो. तित्थियाति कम्मफलवादिनो. अभिनीहारोति अभिनीहारोपलक्खितो पुञ्ञञाणसम्भरणकालो वुत्तो. चुतिपटिसन्धिवसेनाति अत्तनो परस्स वा तस्मिं तस्मिं अत्तभावे चुतिं दिस्वा अन्तरा किञ्चि अनामसित्वा पटिसन्धिया एव गहणवसेन एवं जाननं इच्छितप्पदेसोक्कमनन्ति आह तेसञ्हीतिआदि. उभयथापीति खन्धपटिपाटियापि ¶ चुतिपटिसन्धिवसेनपि. सीहोक्कन्तवसेनपीति सीहनिपातवसेनपि. किलेसानं आतापनपरितापनट्ठेन वीरियं आतापोति आह ‘‘वीरियातापेना’’ति.

दिब्बचक्खुञाणकथावण्णना

१३. दिवि ¶ भवत्ता दिब्बन्ति देवानं पसादचक्खु वुच्चतीति आह ‘‘दिब्बसदिसत्ता’’ति. दूरेपीति पि-सद्देन सुखुमस्सापि आरम्मणस्स गहणं. वीरियारम्भवसेन इज्झनतो सब्बापि भावना, पधानसङ्खारसमन्नागतो वा इद्धिपादभावनाविसेसतो वीरियभावनाति आह ‘‘वीरियभावनाबलनिब्बत्त’’न्ति. दिब्बविहारवसेनाति कसिणादिज्झानचतउक्कवसेन. इमिना दूरकारणत्थे अस्स दिब्बभावमाह. दिब्बविहारसन्निस्सितत्ताति इमिना आसन्नकारणभूतपादकज्झानतो निब्बत्तन्ति दिब्बविहारसन्निस्सितत्ताति इमस्स दिब्बविहारपअयापन्नं अत्तना सम्पयुत्तं रूपावचरचतुत्थज्झानं निस्सयपच्चयभूतं निस्साय दिब्बचक्खुञाणस्स पवत्तत्तातिपि अत्थो. दिवुधातुस्स जुतिगतियोगं सन्धाय आलोकपअग्गहेनातिआदि वुत्तं. तत्थ आलोकपरिग्गहेनाति कसिणालोकपरिग्गहवसेन. दस्सनट्ठेनाति रूपदस्सनभावेन, इमिना ‘‘चक्खति रूपं विभावेती’’ति निब्बचनतो चक्खुत्तं दस्सेति. चक्खुकिच्चकरणेनाति इदं चक्खुमिव चक्खूति उपमाय सदिसनिमित्तदस्सनं, समविसमादिदस्सनसङ्खातस्स चक्खुकिच्चस्स करणतोति अत्थो.

यथाहाति उपक्किलेससुत्तप्पदेसं (म. नि. ३.२४२) निदस्सेति. तत्थ विचिकिच्छातिआदीसु भगवतो बोधिमूले अनभिसम्बुद्धस्सेव दिब्बचक्खुना नानाविधानि रूपानि पस्सन्तस्स ‘‘इदं नु खो किं, इदं नु खो कि’’न्ति विचिकिच्छा उप्पन्ना, ततो पन विचिकिच्छानिवत्तनत्थं तानि रूपानि अमनसिकरोतो अमनसिकरोन्तस्स थिनमिद्धं उप्पन्नं, ततो निवत्तनत्थं पुन सब्बरूपानि मनसिकरोतो रक्खसादीसु छम्भितत्तं उप्पन्नं, ‘‘किमेत्थ भायितब्ब’’न्ति भयविनोदनवसेन मनसिकरोतो अत्तनो मनसिकारकोसल्लं पटिच्च उप्पिलसङ्खाता समाधिदूसिका गेहसितपीति उप्पन्ना, तन्निसेधाय मनसिकारवीरियं सिथिलं करोन्तस्स कायालसियसङ्खातं दुट्ठुल्लं, तन्निसेधाय पुन वीरियं पग्गण्हतो अच्चारद्धवीरियं, पुन तन्निसेधाय वीरियं सिथिलयतो अतिलीनवीरियं उप्पन्नं, तन्निसेधेत्वा दिब्बरूपानि पस्सतो अभिजप्पासङ्खाता तण्हा उप्पन्ना, तन्निसेधाय हीनादिनानारूपानि मनसिकरोतो नानारम्मणविक्खेपसङ्खाता नानत्तसञ्ञा उप्पन्ना. पुन तं विहाय एकमेव मनसिकरोतो अतिनिज्झायितत्तं रूपानं अतिविय ¶ चिन्तनं उप्पन्नं. ओभासन्ति परिकम्मसमुट्ठितं ओभासं ¶ . न च रूपानि पस्सामीति ‘‘परिकम्मोभासमनसिकारपसुतताय दिब्बचक्खुना रूपानि न पस्सामी’’ति एवं उप्पत्तिक्कमसहितो अत्थो वेदितब्बो, मनुस्सानं इदन्ति मानुसकं मानुसकचक्खुगोचरं थूलरूपं वुच्चति. तदेव मनुस्सानं दस्सनूपचारत्ता मनुस्सूपचारोति आह ‘‘मनुस्सूपचारं अतिक्कमित्वा’’ति. रूपदस्सनेनाति दूरसुखुमादिरूपदस्सनेन.

यस्मा नियमेन पुरेजातट्ठितरूपारम्मणं दिब्बचक्खुञाणं आवज्जनपरिकम्मेहि विना न उप्पज्जति, न च उप्पज्जमानं भिज्जमानं रूपमस्स आरम्मणं होति दुब्बलत्ता, चुतिचित्तञ्च कम्मजरूपस्स भङ्गक्खणे एव उप्पज्जति, पटिसन्धिचित्तञ्च उपपत्तिक्खणे, तस्मा आह चुतिक्खणेतिआदि. रूपदस्सनमेवेत्थ सत्तदस्सनन्ति चवमानेतिआदिना पुग्गलाधिट्ठानेन वुत्तं. अभिरूपे विरूपेतिपीति इदं वण्ण-सद्दस्स सण्ठानवाचकतं सन्धाय वुत्तं महन्तं हत्थिराजवण्णं अभिनिम्मिनित्वातिआदीसु (सं. नि. १.१३८) विय. सुन्दरं गतिं गता सुगताति आह ‘‘सुगतिगते’’ति. इमिना पन पदेनाति यथाकम्मुपगेति इमिना पदेन.

नेरयिकानं अग्गिजालसत्थनिपातादीहि विभिन्नसरीरवण्णं दिस्वा तदनन्तरेहि कामावचरजवनेहेव ञातं तेसं दुक्खानुभवनम्पि दस्सनफलायत्तताय ‘‘दिब्बचक्खुकिच्चमेवा’’ति वुत्तं. एवं मनसिकरोतीति तेसं कम्मस्स ञातुकामतावसेन पादकज्झानं समापज्जित्वा वुट्ठाय परिकम्मवसेन किन्नु खोतिआदिना मनसिकरोति. अथस्स तं कम्मं आरम्मणं कत्वा आवज्जनपरिकम्मादीनं उपरि उप्पन्नेन रूपावचरचतुत्थज्झानेन सम्पयुत्तं यं ञाणं उप्पज्जति, इदं यथाकम्मुपगञाणं नामाति योजना. देवानं दस्सनेपि एसेव नयो. विसुं परिकम्मन्ति पुब्बेनिवासादीनं विय दिब्बचक्खुञाणपरिकम्मं विना विसुं परिकम्मं नत्थि. केचि पनेत्थ ‘‘पादकज्झानसमापज्जनपरिकम्मेहि किच्चं नत्थि, किन्नु खो कम्मन्तिआदिमनसिकारानन्तरमेव कम्मं. कम्मसीसेन तंसम्पयुत्ते च धम्मे आरम्मणं कत्वा अप्पनावीथि उप्पज्जति. एवमनागतंसञाणेपि, तेनेव विसुं परिकम्मं नाम नत्थि…पे… दिब्बचक्खुना सहेव इज्झन्तीति वुत्त’’न्ति वदन्ति. तं न गहेतब्बं वसीभूतानम्पि अभिञ्ञानं पादकज्झानादिपरिकम्मं विना अनुप्पत्तितो. पादकज्झानादिमत्तेन च विसुं परिकम्मं नाम न होतीति दिब्बचक्खुनाव एतानि ञाणानि ¶ सिद्धानीति गहेतब्बं. एवं अनागतंसञाणस्सापीति दिब्बचक्खुना दिट्ठस्स सत्तस्स अनागते पवत्तिं ञातुकामताय पादकज्झानादीनमनन्तरं ञाणबलानुरूपं अनागतेसु अनेककप्पेसु उप्पज्जनारहे पुब्बे अत्तभावपरियापन्ने ¶ पञ्चक्खन्धे तप्पटिबद्धे तदारम्मणे च सब्बे लोकियलोकुत्तरधम्मे सम्मुतिञ्च एकक्खणे आलम्बित्वा उप्पज्जनकस्स चतुत्थज्झानसम्पयुत्तस्स अनागतंसञआणस्सापि विसुं परिकम्मं नाम नत्थीति योजना.

केचि पनेत्थ ‘‘पुब्बेनिवासानुस्सतियं विय नामगोत्तादिगहणम्पि अत्थेव, तञ्च न अभिञ्ञाक्खणे, अथ खो तदनन्तरेसु कामावचरजवनक्खणेसु एव होति नामपरिकप्पकाले इतरपरिकप्पासम्भवा कम्मेनुप्पत्तियञ्च परियन्ताभावा. सब्बपरिकम्मनिमित्तेसु पन धम्मेसु अत्थेसुपि एकक्खणे अभिञ्ञाय दिट्ठेसु यथारुचिवसेन पच्छा एवंनामोतिआदिना कामावचरचित्तेन विकप्पो उप्पज्जति चक्खुना दिट्ठेसु बहूसु रूपेसु थम्भकुम्भादिविकप्पो विय. यञ्च कत्थ अविकप्पितं, तम्पि विकप्पनारहन्ति सब्बं नामगोत्तादितो विकप्पितमेव होति. यथा चेत्थ, एवं पुब्बेनिवासानुस्सतियम्पि परिकप्पारहतम्पि सन्धाय पाळियं एवंनामोतिआदिना अपदेससहितमेव वुत्त’’न्ति वदन्ति. अञ्ञे पन ‘‘नामगोत्तादिकं सब्बम्पि एकक्खणे पञ्ञायति, अभिरुचितं पन वचसा वोहरन्ती’’ति वदन्ति, तेपि अत्थतो पुरिमेहि सदिसा एव, पुब्बे दिट्ठस्स पुन वोहारकालेपि परिकप्पेतब्बतो परिकप्पारहधम्मदस्सनमेव तेहिपि अत्थतो उपगतं. एके पन ‘‘सो ततो चुतो अमुत्र उदपादिन्तिआदिवचनतो कमेनेव अतीतानागतधम्मजाननेन नामगोत्तादीहि सद्धिं गहणं सुकर’’न्ति वदन्ति, तं अयुत्तमेव बुद्धानम्पि सब्बं ञातुं असक्कुणेय्यताय सब्बञ्ञुताहानिप्पसङ्गतो. पाळियं इमे वत भोन्तोतिआदि यथाकम्मुपगञाणस्स पवत्तिआकारदस्सनं. कायवाचादि चेत्थ कायवचीविञ्ञत्तियो.

भारियन्ति आनन्तरियसदिसत्ता वुत्तं. खमापने हि असति आनन्तरियमेव. तस्साति भारियसभावस्स उपवादस्स. महल्लकोति केवलं वयसाव महल्लको, न ञाणेन, ‘‘नायं किञ्चि लोकवोहारमत्तम्पि जानाति, परिसदूसको एव अम्हाकं लज्जितब्बस्स करणतो’’ति अधिप्पायेन हीळेत्वा वुत्तत्ता गुणपरिधंसनेन उपवदतीति वेदितब्बं. आवुसोतिआदिना ¶ थेरो उपरिमग्गुप्पत्तिमस्स आकङ्खन्तो करुणाय अत्तानमाविकासि. पाकतिकं अहोसीति मग्गावरणं नाहोसीति अधिप्पायो. अत्तना वुड्ढतरोति सयम्पि वुड्ढो. एत्थापि ‘‘उक्कुटिकं निसीदित्वा’’ति विसुद्धिमग्गे वुत्तं. अनागामी अरहा च आयतिं संवरत्थाय न खमेय्युं, सेसा दोसेनपीति आह ‘‘सचे सो न खमती’’ति.

ये च…पे… समादपेन्ति, तेपि मिच्छादिट्ठिकम्मसमादानाति योजेतब्बं. सीलसम्पन्नोतिआदीसु ¶ निप्परियायतो अग्गमग्गट्ठो अधिप्पेतो तस्सेव अञ्ञाराधना नियमतो, सेसापि वा पच्छिमभविका सीलादीसु ठिता तेसम्पि अञ्ञुप्पत्तिनियमतो. अञ्ञन्ति अरहत्तफलं. एवं सम्पदन्ति एवं निब्बत्तिकं. यथा तं अविरज्झनकनिब्बत्तिकं, एवमिदम्पि एतस्स निरये निब्बत्तनन्ति अत्थो. यं सन्धाय ‘‘एवंसम्पदमिद’’न्ति निद्दिट्ठं, तं दस्सेतुं तं वाचन्तिआदि वुत्तं. तं वाचन्ति अरियूपवादं. चित्तन्ति अरियूपवादकचित्तं. दिट्ठिन्ति अरियूपवादे दोसाभावदस्सनदिट्ठिं. ‘‘सब्बमेतं पजहिस्सामी’’ति चित्तेन अच्चयं देसेत्वा खमापनवसेन अप्पहाय अप्पटिनिस्सज्जित्वा. यथाभतं निक्खित्तो एवं निरयेति यथा निरयपालेहि आहरित्वा निरये ठपितो, एवं निरये ठपितो एव, अरियूपवादेनेवस्स इदं नियमेन निरये निब्बत्तनं यथा मग्गेन फलं सम्पज्जति, एवं सम्पज्जनकन्ति अधिप्पायो.

मिच्छादिट्ठि सब्बपापमूलत्ता परमा पधाना येसं वज्जानं तानि मिच्छादिट्ठिपरमानि वज्जानि, सब्बवज्जेहि मिच्छादिट्ठियेव परमं वज्जन्ति अत्थो. अवीतरागस्स मरणतो परं नाम भवन्तरुपादानमेवाति आह ‘‘परं मरणाति तदनन्तरं अभिनिब्बत्तक्खन्धग्गहणे’’ति. येन तिट्ठति, तस्स उपच्छेदेनेव कायो भिज्जतीति आह ‘‘कायस्स भेदाति जीवितिन्द्रियस्सुपच्छेदा’’ति. एति एतस्मा सुखन्ति अयो, पुञ्ञं. आयस्साति आगमनस्स, हेतुस्स वा. अयति इट्ठारम्मणादीहि पवत्ततीति आयो, अस्सादो. असुरसदिसन्ति पेतासुरसदिसं.

आसवक्खयञाणकथावण्णना

१४. सरसलक्खणपटिवेधेनाति ¶ सभावसङ्खातस्स लक्खणस्स असम्मोहतो पटिविज्झनेन. निब्बत्तिकन्ति निप्फादनं. यं ठानं पत्वाति यं निब्बानं मग्गस्स आरम्मणपच्चयट्ठेन ठानं कारणभूतं आगम्म. अप्पवत्तिन्ति अप्पवत्तिहेतुं. किलेसवसेनाति येसं आसवानं खेपनेन इदं ञाणं आसवक्खयञाणं जातं, तेसं किलेसानं वसेन, तेसं आसवानं वसेन सब्बकिलेसानं सङ्गहणतो परियायतो पकारन्तरतोति अत्थो. पाळियं अतीतकालवसेन ‘‘अब्भञ्ञासि’’न्ति वत्वापि अभिसमयकाले तस्स तस्स जाननस्स पच्चुप्पन्नतं उपादाय ‘‘एवं जानतो एवं पस्सतो’’ति वत्तमानकालेन निद्देसो कतो. कामासवादीनं विमुच्चनेनेव तदविनाभावतो दिट्ठासवस्सापि विमुत्ति वेदितब्बा.

‘‘खीणा जाती’’ति जाननं किलेसक्खयपच्चवेक्खणवसेन, वुसितं ब्रह्मचरियन्तिआदिजाननं ¶ मग्गफलनिब्बानपच्चवेक्खणवसेन होतीति आह ‘‘खीणा जातीतिआदीहि तस्स भूमि’’न्ति. तत्थ भूमिन्ति विसयं, तीसु कालेसुपि जातिक्खयं पति उजुकमेव वायामासम्भवेपि तं पति वायामकरणस्स सात्थकतं, तस्स अनागतक्खन्धानुप्पत्तिफलतञ्च दस्सेतुं या पनातिआदि वुत्तं. या पन मग्गस्स अभावितत्तातिआदिना हि मग्गेनाविहतकिलेसेहेव आयतिं खन्धानं जाति हेस्सति, तेसञ्च किलेसानं मग्गेन विनासे सति खन्धा न जायिस्सन्ति, किलेसानञ्च तेकालिकताय जातियं वुत्तनयेन केनचि पच्चयेन विनासयोगेपि चित्तसन्ताने किलेसविरुद्धअरियमग्गक्खणुप्पादनमेव तब्बिनासो विरुद्धपच्चयोपनिपातेन आयतिं अनुप्पज्जनतो बीजसन्ताने अग्गिक्खन्धोपनिपातेन आयतिं बीजत्तानुप्पत्ति विय, इति मग्गक्खणुप्पत्तिसङ्खातकिलेसाभावेन किलेसफलानं खन्धानं आयतिं अनुप्पत्तियेव जातिक्खयोति अयमत्थो विभावीयति, तेनाह ‘‘मग्गस्स भावितत्ता अनुप्पादधम्मतं आपज्जनेन खीणा’’ति. एत्थ चायमत्थो किलेसाभावसङ्खातस्स मग्गस्स भावितत्ता उप्पादितत्ता पच्चयाभावेन अनुप्पज्जन्ती खन्धानं जाति तेन आयतिं अनुप्पज्जनसङ्खातेन अनुप्पादधम्मतं आपज्जनेन वोहारतो खीणा मे जातीति. न हि सङ्खतधम्मानं पच्चयन्तरेन विनासो सम्भवति, सम्भवे च ¶ तस्स पच्चयन्तरतादिप्पसङ्गतो. तब्बिरुद्धक्खणुप्पादनमेव तब्बिनासुप्पादनं. तन्ति खीणजातिं अब्भञ्ञासिन्ति सम्बन्धो. इत्थत्तायाति इमे पकारा इत्थं, तब्भावो इत्थत्तं, तदत्थाय. दस्सेन्तोति निगमनवसेन दस्सेन्तोति.

विज्जात्तयकथावण्णनानयो निट्ठितो.

उपासकत्तपटिवेदनाकथावण्णना

१५. अञ्ञाणन्ति धि-सद्दयोगेन सामिअत्थे उपयोगवचनं. पादानीति पादे. यससाति परिवारेन. कोतूहलच्छरेति कोतूहले अच्छरे च. अयन्ति अमिक्कन्त-सद्दो. नयिदं आमेडितवसेन द्विक्खत्तुं, अथ खो अत्थद्वयवसेनाति दस्सेन्तो अथ वातिआदिमाह. अविसेसेन अत्थसामञ्ञेन निप्फन्नो अभिक्कन्तन्ति भावनपुंसकनिद्देसो, देसनापसादादिविसेसापेक्खायपि तथेव तिट्ठति पुब्बे निप्फन्नत्ताति आह ‘‘अभिक्कन्तं…पे… पसादो’’ति. अधोमुखठपितं केनचि. हेट्ठामुखजातं सयमेव. परियायेहीति पकारेहि, अरसरूपत्तादिपटिपादककारणेहि वा.

गमुधातुस्स ¶ द्विकम्मकत्ताभावा गोतमं सरणन्ति इदं पदद्वयम्पि न उपयोगवचनं. अपि च खो पुरिममेव, पच्छिमं पन पच्चत्तवचनन्ति दस्सेतुं ‘‘गोतमं सरणन्ति गच्छामी’’ति वुत्तं. तेन च इति-सद्दो लुत्तनिद्दिट्ठोति दस्सेति. अघस्साति अघतो पापतो. ताताति हि पदं अपेक्खित्वा निस्सक्कस्सेव युत्तत्ता. अधिगतमग्गे सच्छिकतनिरोधेति पदद्वयेनापि फलट्ठा एव दस्सिता, न मग्गट्ठाति दस्सेन्तो ‘‘यथानुसिट्ठं पटिपज्जमाने चा’’ति आह. वित्थारोति इमिना ‘‘यावता, भिक्खवे, धम्मा सङ्खता वा असङ्खता वा, विरागो तेसं अग्गमक्खायती’’ति (इतिवु. ९०; अ. नि. ४.३४) वुत्तपदं सङ्गण्हाति. अनेजन्ति नित्तण्हं. अप्पटिकूलन्ति अविरोधत्थदीपनतो अविरुद्धसुचिं पणीतं वा. वाचाय पगुणीकत्तब्बतो, पकट्ठेहि सद्दत्थगुणेहि योगतो वा पगुणं. संहतोति घटितो समेतो ¶ . यत्थाति येसु पुरिसयुगेसूति सम्बन्धो. अट्ठ च पुग्गलधम्मदसा तेति ते अट्ठ पुग्गला अरियधम्मस्स दिट्ठत्ता धम्मदसा.

सरणन्तिआदीसु अयं सङ्खेपत्थो – भयहिंसनादिअत्थेन रतनत्तयं सरणं नाम, तदेव मे रतनत्तयं ताणं लेणं परायणन्ति बुद्धसुबुद्धतादिगुणवसेन तप्परायणताकारप्पवत्तो चित्तुप्पादो सरणगमनं नाम. यथावुत्तेन इमिना चित्तुप्पादेन समन्नागतो सरणं गच्छति नाम. एतस्स च सरणगमनस्स लोकियलोकुत्तरवसेन दुविधो पभेदो. तत्थ लोकुत्तरं सरणगमनूपक्किलेससमुच्छेदेन मग्गक्खणेयेव सिज्झति. लोकियसरणगमनं चतुधा पवत्तति अहं अत्तानं बुद्धस्स परिच्चजामीतिआदिना अत्तनिय्यातनेन, यथावुत्ततप्परायणताय, सिस्सभावूपगमनेन, पणिपातेन चाति. सब्बत्थापि चेत्थ सेट्ठदक्खिणेय्यभाववसेनेव सरणगमनं होति, न ञातिभयाचरियादिवसेनाति वेदितब्बं. एवं ञातिआदिवसेन तित्थियं वन्दतो सरणं न भिज्जति, दक्खिणेय्यभावेन अञ्ञं वन्दतो सरणं भिज्जति. लोकियस्स सरणगमनस्स निब्बानप्पत्तिनियमं सदिसफलं सरणगतस्स अनागते निब्बानप्पत्तिनियमतो. सब्बलोकियसम्पत्तिसमधिगमो पन अपायदुक्खादिसमतिक्कमो च आनिसंसफलं. तीसु वत्थूसु चस्स संसयमिच्छाञाणादि संकिलेसो. भेदोपिस्स सावज्जानवज्जवसेन दुविधो. तत्थ पठमो मिच्छादिट्ठिपुब्बकेहि तित्थियपणिपातादीहि होति, सो च अनिट्ठफलत्ता सावज्जो. अनवज्जो पन कालकिरियाय होति. लोकुत्तरसरणगमनस्स सब्बथा संकिलेसो वा भेदो वा नत्थीति वेदितब्बं.

को उपासकोतिआदि उपासकत्तसरूपकारणादिपुच्छा. तत्थ यो गहट्ठो मनुस्सो वा अमनुस्सो वा वुत्तनयेन तिसरणं गतो, अयं उपासको. यो च सरणगमनादिकिरियाय रतनत्तयं ¶ उपासनतो ‘‘उपासको’’ति वुच्चति. पञ्च वेरमणियो चस्स सीलं. पञ्चमिच्छावाणिज्जादिपापाजीवं पहाय धम्मेन समेन जीवितकप्पनमस्स आजीवो. अस्सद्धियदुस्सीलतादयो उपासकत्तस्स विपत्ति, तदभावो सम्पत्तीति वेदितब्बा.

विहारग्गेनाति ¶ ओवरकादिवसनट्ठानकोट्ठासेन. अज्जभावन्ति अस्मिं अहनि पवत्तं पसादादिं. कायविञ्ञत्तिहेतुको सरीरावयवो कायङ्गं. वचीविञ्ञत्तिहेतुकं ओट्ठजिव्हादि वाचङ्गं. अचोपेत्वाति अचालेत्वा. एतेन च वचीपवत्तिया पुब्बभागे ठानकरणानं चलनपच्चयो वायोधातुया विकाराकारो विसुं कायविञ्ञत्ति न होति, तेन विसुं विञ्ञापेतब्बस्स अधिप्पायस्स अभावा वचीविञ्ञत्तियमेव सङ्गय्हति तदुपकारत्ता. यथा कायेन कायकण्डुयनादीसु सद्दुप्पत्तिहेतुभूतो पथवीधातुया आकारविकारो विसुं अधिप्पायस्स अविञ्ञापनतो वचीविञ्ञत्ति न होति, एवमयम्पीति दस्सेति. अधिप्पायविञ्ञापनतो हेता विञ्ञत्तियो नाम जाता, न केवलं वायुपथवीनं चलनसद्दुप्पत्तिपच्चयभूतविकाराकारमत्तताय. एवञ्च बहिद्धा रुक्खादीसु चलनसद्दुप्पत्तिपच्चयानं यथावुत्तप्पकारानं विकाराकारानं अविञ्ञत्तिता समत्थिता होतीति वेदितब्बा. केचि वाचङ्गन्ति ‘‘होतु साधू’’ति एवमादिवाचाय अवयवन्तिआदिं वदन्ति, तं अचोपेत्वाति इमिना न समेति. खन्तिं चारेत्वाति अनुमतिं पवत्तेत्वा. ‘‘खन्तिं धारेत्वा’’तिपि पाठो, बहि अनिक्खमनवसेन गण्हित्वाति अत्थो. पटिमुखोति भगवति पटिनिवत्तमुखो, तेनाह ‘‘अपक्कमित्वा’’ति.

१६. याचधातुस्स द्विकम्मकत्ता ‘‘भगवा वस्सावासं याचितो’’ति वुत्तं. सुसस्सकालेपीति वुत्तमेवत्थं पाकटं कातुं ‘‘अतिसमग्घेपी’’ति वुत्तं. अतिविय अप्पग्घेपि यदा किञ्चिदेव दत्वा बहुं पुब्बण्णापरण्णं गण्हन्ति, तादिसे कालेपीति अत्थो. भिक्खमानाति याचमाना. वुत्तसस्सन्ति वपितसस्सं. तत्थाति वेरञ्जायं, एतेन ‘‘वुत्तं सलाका एव होति एत्थाति सलाकावुत्ता’’ति विसेसनस्स परनिपातेन निब्बचनं दस्सेति. अथ वा ‘‘सब्बं सस्सं सलाकामत्तमेव वुत्तं निब्बत्तं सम्पन्नं एत्थाति सलाकावुत्ता’’तिपि निब्बचनं दट्ठब्बं, तेनाह ‘‘सलाका एव सम्पज्जती’’ति. ‘‘सलाकाय वुत्तं जीविका एतिस्सन्ति सलाकावुत्ता’’तिपि निब्बचनं दस्सेतुं सलाकाय वातिआदि वुत्तं. धञ्ञकरणट्ठानेति धञ्ञमिननट्ठाने. वण्णज्झक्खन्ति कहापणपरिक्खकं.

उञ्छेन पग्गहेनाति एत्थ पग्गहेनाति पत्तेन, तं गहेत्वाति अत्थो. पग्गय्हति एतेन भिक्खाति ¶ हि पग्गहो, पत्तो. तेनाह पग्गहेन ¶ यो उञ्छोतिआदि. अथ वा पग्गहेनाति गहणेन, उञ्छत्थाय गहेतब्बो पत्तोति सिज्झतीति आह ‘‘पत्तं गहेत्वा’’ति.

गङ्गाय उत्तरदिसापदेसो उत्तरापथो, सो निवासो एतेसं, ततो वा आगताति उत्तरापथका, तेनाह उत्तरापथवासिकातिआदि. ‘‘उत्तराहका’’तिपि पाठो, सो एव अत्थो निरुत्तिनयेन. मन्दिरन्ति अस्ससालं. ‘‘मन्दर’’न्तिपि लिखन्ति, तं न सुन्दरं. सा च मन्दिरा यस्मा परिमण्डलाकारेन बहुविधा च कता, तस्मा ‘‘अस्समण्डलिकायो’’ति वुत्ता.

गङ्गाय दक्खिणाय दिसाय देसो दक्खिणापथो, तत्थ जाता मनुस्सा दक्खिणापथमनुस्सा. बुद्धं ममायन्ति ममेवायन्ति गण्हनसीला बुद्धमामका, एवं सेसेसुपि. एवन्ति पच्छा वुत्तनयेन अत्थे गय्हमाने. पटिवीसन्ति कोट्ठासं. तदुपियन्ति तदनुरूपं तप्पहोनकं. लद्धाति लभित्वा नो होतीति सम्बन्धो. ‘‘लद्धो’’ति वा पाठो, उपट्ठाकट्ठानं नेव लभिन्ति अत्थो. ञाति च पसत्थतमगुणयोगतो सेट्ठो चाति ञातिसेट्ठो. एवरूपेसु ठानेसु अयमेव पतिरूपोति आमिसस्स दुल्लभकालेसु परिकथोभासादिं अकत्वा परमसल्लेखवुत्तिया आजीवसुद्धियं ठत्वा भगवतो अधिप्पायानुगुणं आमिसं विचारेन्तेन नाम ञातिसिनेहयुत्तेन अरियसावकेनेव कातुं युत्तन्ति अधिप्पायो.

मारावट्टनायाति मारेन कतचित्तपरिवट्टनेन, चित्तसम्मोहनेनाति अत्थो. तम्पीति उत्तरकुरुं वा तिदसपुरं वा आवट्टेय्य.

‘‘फुस्सस्साहं पावचने, सावके परिभासयिं;

यवं खादथ भुञ्जथ, मा च भुञ्जथ सालयो’’ति. (अप. थेर १.३९.८८) –

अपदाने वुत्तस्स अकुसलस्स तदा ओकासकतत्ता. निबद्धदानस्साति ‘‘दस्सामा’’ति वाचाय नियमितदानस्स. अप्पितवत्तस्साति कायेन अतिहरित्वा दिन्नवत्थुनोपि. विसहतीति सक्कोति. सङ्खेपेनाति नीहारेन. ब्यामप्पभायाति समन्ततो हेट्ठा च उपरि च असीतिहत्थमत्ते ठाने घनीभूताय छब्बण्णाय पभाय, यतो छब्बण्णरंसियो तळाकतो मातिकायो विय निक्खमित्वा दससु दिसासु ¶ धावन्ति, सा यस्मा ब्याममत्ता विय खायति, तस्मा ‘‘ब्यामप्पभा’’ति वुच्चति. यस्मा अनुब्यञ्जनानि च पच्चेकं भगवतो सरीरे पभासम्पत्तियुत्ता ¶ आकासे चन्दसूरियादयो विय विभाता विरोचन्ति, तस्मा तानि ब्यामप्पभाय सह केनचि अनभिभवनीयानि वुत्तानि.

अनत्थसञ्हितेति घातापेक्खं सामिअत्थे भुम्मवचनं, तेनाह ‘‘तादिसस्स वचनस्स घातो’’ति. अत्थो धम्मदेसनाय हेतु उप्पज्जति एत्थ, धम्मदेसनादिको वा अत्थो उप्पज्जति एतायाति अट्ठुप्पत्ति, पच्चुप्पन्नवत्थु.

एकं गहेत्वाति धम्मदेसनासिक्खापदपञ्ञत्तिसङ्खातेसु द्वीसु धम्मदेसनाकारणं गहेत्वा. रत्तिच्छेदो वाति सत्ताहकरणीयवसेन गन्त्वा बहि अरुणुट्ठापनवसेन वुत्तो, न वस्सच्छेदवसेन तस्स विसुं वुच्चमानत्ता. एतेन च वस्सच्छेदपच्चये सत्ताहकरणीयेन गमनं अनुञ्ञातन्ति वेदितब्बं. न किस्मिञ्चीति किस्मिञ्चि गुणे सम्भावनावसेन न मञ्ञन्ति. पच्छा सीलं अधिट्ठहेय्यामाति आजीवहेतु सन्तगुणप्पकासनेन आजीवविपत्तिं सन्धाय वुत्तं. अतिमञ्ञिस्सतीति अवमञ्ञिस्सति.

१७. ‘‘आयस्माति पियवचनमेत’’न्ति उच्चनीचजनसामञ्ञवसेन वत्वा पुन उच्चजनावेणिकवसेनेव दस्सेन्तो ‘‘गरुगारवसप्पतिस्साधिवचन’’न्ति आह. तत्थ सह पतिस्सयेन निस्सयेनाति सप्पतिस्सो, सनिस्सयो, तस्स गरुगुणयुत्तेसु गारववचनन्ति अत्थो. इध पन वचनमेव अधिवचनं. पप्पटकोजन्ति आदिकप्पे उदकूपरि पठमं पथवीभावेन सञ्जातं नवनीतपिण्डसदिसं उदकेपि उप्पिलनसभावं अविलीयनकं अतिसिनिद्धमधुरं अनेकयोजनसहस्सबहलं रसातलसङ्खातं पथवोजं. यं आदिकप्पिकेहि मनुस्सेहि रसतण्हाय गहेत्वा भुञ्जमानं तेसं कम्मबलेन उपरिभागे कक्खळभावं आपज्जित्वा हेट्ठा पुरिमाकारेनेव ठितं, यस्स च बलेन अयं महापथवी सपब्बतसमुद्दकानना हेट्ठाउदके अनिमुज्जमाना अविकिरियमाना कुल्लुपरि विय निच्चला तिट्ठति, तं पथवीसारमण्डन्ति अत्थो, तेनाह पथवीमण्डोतिआदि. सम्पन्नन्ति मधुररसेन उपेतं, तेनाह ‘‘सादुरस’’न्ति. उपपन्नफलोति ¶ बहुफलो. ‘‘निम्मक्खिक’’न्ति वत्वा पुन ‘‘निम्मक्खिकण्ड’’न्ति मक्खिकण्डानम्पि अभावं दस्सेति. ये पथवीनिस्सिता पाणा, ते तत्थ सङ्कामेस्सामीति एत्थ मनुस्सामनुस्सतिरच्छानगतित्थीनम्पि हत्थसङ्कामने किं अनामासदोसो न होतीति? न होति, कस्मा? ‘‘अनापत्ति, भिक्खवे, इद्धिमस्स इद्धिविसये’’ति (पारा. १५९) वचनतो, तेनेव भगवापि अनामासदोसं अदस्सेत्वा ‘‘विपल्लासम्पि सत्ता पटिलभेय्यु’’न्ति आह, खुद्दको गामो. महन्तो सापणो निगमो. पदवीतिहारेनाति पदनिक्खेपेन.

विनयपञ्ञत्तियाचनकथावण्णना

१८. विनयपञ्ञत्तिया ¶ मूलतो पभुतीति पाराजिकादिगरुकानं, तदञ्ञेसञ्च सिक्खापदानं पातिमोक्खुद्देसक्कमेन येभुय्येन अपञ्ञत्ततं सन्धाय वुत्तं, न सब्बेन सब्बं अपञ्ञत्तताय. तेनेव थेरो भगवन्तं ‘‘सावकानं सिक्खापदं पञ्ञपेय्य उद्दिसेय्य पातिमोक्ख’’न्ति पातिमोक्खुद्देसेन सह सिक्खापदपञ्ञत्तिं याचि. खन्धके हि आनन्दत्थेरादीनं पब्बज्जतो पुरेतरमेव राहुलभद्दस्स पब्बज्जाय ‘‘न, भिक्खवे, अननुञ्ञातो मातापितूहि पुत्तो पब्बाजेतब्बो, यो पब्बाजेय्य आपत्ति दुक्कटस्सा’’ति (महाव. १०५) पञ्ञत्तसिक्खापदं दिस्सति. इधेव अट्ठकथायम्पि ‘‘सामम्पि पचनं…पे… न वट्टती’’ति च, ‘‘रत्तिच्छेदो वस्सच्छेदो वा न कतो’’ति च वुत्तत्ता पुब्बेव सामपाकादिपटिक्खेपो अत्थीति पञ्ञायति. एवं कतिपयसिक्खापदानं पञ्ञत्तिसब्भावेपि अपञ्ञत्तपाराजिकादिके सन्धाय ‘‘न ताव, सारिपुत्त, सत्था सावकानं सिक्खापदं पञ्ञपेती’’ति वुत्तन्ति गहेतब्बं. पुथुत्तारम्मणतो पटिनिवत्तित्वा सम्मदेव एकारम्मणे चित्तेन लीनो पटिसल्लीनो नामाति आह ‘‘एकीभावं गतस्सा’’ति, चित्तविवेकं गतस्साति अत्थो. चिरन्ति अच्चन्तसंयोगे उपयोगवचनं.

सोळसविधाय पञ्ञायाति मज्झिमनिकाये अनुपदसुत्तन्तदेसनायं ‘‘महापञ्ञो, भिक्खवे, सारिपुत्तो पुथुपञ्ञो हासपञ्ञो जवनपञ्ञो तिक्खपञ्ञो निब्बेधिकपञ्ञो’’ति आगता छ पञ्ञा च नवानुपुब्बविहारसमापत्तिपञ्ञा च अरहत्तमग्गपञ्ञा चाति एवं सोळसविधेन आगताय पञ्ञाय. येसं बुद्धानं सावका सुद्धावासेसु सन्दिस्सन्ति, तेयेव ¶ लोके पाकटाति विपस्सीआदयोव इध उद्धटा, न इतरे पुब्बबुद्धा. तेनेव आटानाटियसुत्ते (दी. नि. ३.२७५ आदयो) देवापि अत्तनो पाकटानं तेसञ्ञेव गहणं अकंसु, नाञ्ञेसन्ति वेदितब्बं.

१९. किलासुनोति अप्पोस्सुक्का पयोजनाभावेन निरुस्साहा अहेसुं, न आलसियेन, तेनाह न आलसियकिलासुनोतिआदि. निद्दोसतायाति कायवचीवीतिक्कमसमुट्ठापकदोसाभावा. पाणं न हने न चादिन्नमादियेतिआदिना (सु. नि. ४०२) ओवादसिक्खापदानं विज्जमानत्ता वुत्तं सत्तापत्तिक्खन्धवसेनातिआदि. छन्नं छन्नं वस्सानं ओसानदिवसं अपेक्खित्वा ‘‘सकिं सकि’’न्ति वुत्तत्ता तदपेक्खमेत्थ सामिवचनं. सकलजम्बुदीपे सब्बोपि भिक्खुसङ्घो उपोसथं अकासीति सम्बन्धो.

खन्ती परमन्तिआदीसु तितिक्खासङ्खाता खन्ति सत्तसङ्खारेहि निब्बत्तानिट्ठाखमनकिलेसतपनतो परमं तपो नाम. वानसङ्खाताय तण्हाय निक्खन्तत्ता निब्बानं सब्बधम्मेहि परमं उत्तमन्ति बुद्धा वदन्ति. यथावुत्तखन्तिया अभावेन पाणवधं वा छेदनताळनादिं वा करोन्तो परूपघाती परस्सहरणपरदारातिक्कमनादीहि मुसापेसुञ्ञफरुसादीहि च परं विहेठयन्तो च बाहितपापताय अभावेन पब्बजितो वा समितपापताय अभावेन समणो वा न होतीति अत्थो. सीलसंवरेन सब्बपापस्स अनुप्पादनं लोकियसमाधिविपस्सनाहि कुसलस्स उपसम्पादनं निप्फादनं सब्बेहि मग्गफलेहि अत्तनो चित्तस्स परिसोधनं पभस्सरभावकरणं यं, तमेतं बुद्धानं सासनं अनुसिट्ठि. अनुपवादोति वाचाय कस्सचि अनुपवदनं. अनुपघातोति कायेन कस्सचि उपघाताकरणं वुत्तावसेसे च पातिमोक्खसङ्खाते सीले अत्तानं संवरणं. भत्तस्मिं मत्तञ्ञुतासङ्खातआजीवपारिसुद्धिपच्चयसन्निस्सितसीलसमायोगो तम्मुखेन इन्द्रियसंवरो पन्तसेनासनसङ्खातं अरञ्ञवासं तम्मुखेन पकासिते चतुपच्चयसन्तोसभावनारामतासङ्खातमहाअरियवंसे पतिट्ठानञ्च अधिचित्तसङ्खाते लोकियलोकुत्तरसमाधिम्हि तदुप्पादनवसेन आयोगो अनुयोगो च यं, तमेतं बुद्धानं अनुसिट्ठीति योजना.

‘‘याव ¶ सासनपरियन्ता’’ति आणापातिमोक्खस्स अभावतो वुत्तं. परिनिब्बानतो पन उद्धं ओवादपातिमोक्खुद्देसोपि नत्थेव, बुद्धा एव हि तं उद्दिसन्ति, न सावका. पठमबोधियन्ति बोधितो वीसतिवस्सपरिच्छिन्ने काले, आचरियधम्मपालत्थेरेन पन ‘‘पञ्चचत्तालीसाय वस्सेसु आदितो पन्नरस वस्सानि पठमबोधी’’ति वुत्तं, सिक्खापदपञ्ञत्तिकआलतो पन पभुति आणापातिमोक्खमेव उद्दिसन्तीति इदं पातिमोक्खुद्देसक्कमेनेव परिपुण्णं कत्वा सिक्खापदपञ्ञत्तिकालं सन्धाय वुत्तं. अट्ठानं अनवकासोति यथाक्कमं हेतुपच्चयपटिक्खेपवसेन कारणपटिक्खेपो. यन्ति येन कारणेन. अपरिसुद्धाय परिसायाति अलज्जीपुग्गलेहि वोमिस्सताय असुद्धाय परिसाय, न केवलं बुद्धानञ्ञेव अपरिसुद्धाय परिसाय पातिमोक्खुद्देसो अयुत्तो, अथ खो सावकानम्पि. चोदनासारणादिवसेन पन सोधेत्वा संवासकरणं सावकानञ्ञेव भारो, बुद्धा पन सिक्खापदानि पञ्ञपेत्वा उपोसथादिकरणविधानं सिक्खापेत्वा विस्सज्जेन्ति, चोदनासारणादीनि न करोन्ति, तेनेव भगवा असुद्धाय परिसाय पातिमोक्खं अनुद्दिसित्वा सकलरत्तिं तुण्हीभूतो निसीदि. भिक्खू च भगवतो अधिप्पायं ञत्वा असुद्धपुग्गलं बहि नीहरिंसु. तस्मा सावकानम्पि असुद्धाय परिसाय ञत्वा उपोसथादिसङ्घकम्मकरणं ब्रह्मचरियन्तरायकरणं विना न वट्टतीति वेदितब्बं.

सम्मुखसावकानन्ति ¶ बुद्धानं सम्मुखे धरमानकाले पब्बजितानं सब्बन्तिमानं सावकानं. उळारातिसयजोतनत्थं ‘‘उळारुळारभोगादिकुलवसेन वा’’ति पुन उळारसद्दग्गहणं कतं. आदि-सद्देन उळारमज्झत्तअनुळारादीनं गहणं वेदितब्बं. ते पच्छिमा सावका अन्तरधापेसुन्ति सम्बन्धो.

अपञ्ञत्तेपि सिक्खापदे यदि सावका समानजातिआदिका सियुं, अत्तनो कुलानुगतगन्थं विय भगवतो वचनं न नासेय्युं. यस्मा पन सिक्खापदञ्च न पञ्ञत्तं, इमे च भिक्खू न समानजातिआदिका, तस्मा विनासेसुन्ति इममत्थं दस्सेतुं यस्मा एकनामा…पे… तस्मा अञ्ञमञ्ञं विहेठेन्तातिआदि वुत्तं. चिरट्ठितिकवारे पन सावकानं नानाजच्चादिभावे समानेपि सिक्खापदपञ्ञत्तिया परिपुण्णताय सासनस्स चिरप्पवत्ति वेदितब्बा. यदि एवं कस्मा सब्बेपि बुद्धा सिक्खापदानि न पञ्ञपेन्तीति? यस्मा ¶ च सासनस्स चिरप्पवत्तिया न केवलं सिक्खापदपञ्ञत्तियेव हेतु, अथ खो आयतिं धम्मविनयं गहेत्वा सावकेहि विनेतब्बपुग्गलानं सम्भवोपि, तस्मा तेसं सम्भवे सति बुद्धा सिक्खापदं पञ्ञपेन्ति, नासतीति परिपुण्णापञ्ञत्तियेव वेनेय्यसम्भवस्सापि सूचनतो सासनस्स चिरप्पवत्तिया हेतु वुत्ताति वेदितब्बा. पाळियं सहस्सं भिक्खुसङ्घं…पे… ओवदतीति एत्थ सहस्ससङ्ख्यापरिच्छिन्नो सङ्घो सहस्सो सहस्सिलोकधातूतिआदीसु (दी. नि. २.१८) विय. तं सहस्सं भिक्खुसङ्घन्ति योजना. सहस्ससद्दस्स एकवचनन्तताय ‘‘भिक्खुसहस्सस्सा’’ति वत्वा अवयवापेक्खाय ‘‘ओवदियमानान’’न्ति बहुवचननिद्देसो कतोति दट्ठब्बो.

अनुपादाय आसवेहि चित्तानि विमुच्चिंसूति एत्थ आसवेहीति कत्तुअत्थे करणवचनं. चित्तानीति पच्चत्तबहुवचनं. विमुच्चिंसूति कम्मसाधनं. तस्मा आसवेहि कत्तुभूतेहि अनुपादाय आरम्मणकरणवसेन अग्गहेत्वा चित्तानि विमोचितानीति एवमेत्थ अत्थो गहेतब्बोति आह तेसञ्हि चित्तानीतिआदि. येहि आसवेहीति एत्थापि कत्तुअत्थे एव करणवचनं. विमुच्चिंसूति कम्मसाधनं. तेति आसवा. तानीति चित्तानि, उपयोगबहुवचनञ्चेतं. विमुच्चिंसूति कत्तुसाधनं, विमोचेसुन्ति अत्थो. अग्गहेत्वा विमुच्चिंसूति आरम्मणवसेन तानि चित्तानि अग्गहेत्वा आसवा तेहि चित्तेहि मुत्तवन्तो अहेसुन्ति अत्थो. अथ वा आसवेहीति निस्सक्कवचनं, विमुच्चिंसूति कत्तुसाधनं. तस्मा कञ्चि सङ्खतधम्मं तण्हादिवसेन अनुपादियित्वा चित्तानि विमुत्तवन्तानि अहेसुन्ति अत्थो गहेतब्बो. पुरिमवचनापेक्खन्ति अञ्ञतरस्मिं भिंसनके वनसण्डेति वुत्तवचनस्स अपेक्खनं तस्मिं पुरिमवचनेति एवं अपेक्खनन्ति अत्थो, तेनाह यं वुत्तन्तिआदि. भिंसनस्स भयस्स कतं करणं ¶ किरिया भिंसनकतं, तस्मिं भिंसनकिरियायाति अत्थं दस्सेन्तो आह ‘‘भिंसनकिरियाया’’ति. भिंसयतीति भिंसनो, सोव भिंसनको, तस्स भावो ‘‘भिंसनकत्त’’न्ति वत्तब्बे त-कारस्स लोपं कत्वा वुत्तन्ति पकारन्तरेन अत्थं दस्सेन्तो आह ‘‘अथ वा’’तिआदि. बहुतरानं सत्तानं वाति येभुय्येनाति पदस्स अत्थदस्सनं. तेन च यो कोचीति पदस्सापि यो यो ¶ पविसतीति विच्छावसेन नानत्थेन अत्थो गहेतब्बोति दस्सेति, यो यो पविसति, तेसु बहुतरानन्ति अत्थसम्भवतो.

निगमनन्ति पकते अत्थे यथावुत्तस्स अत्थस्स उपसंहारो. अयञ्हेत्थ निगमनक्कमो – या हि, सारिपुत्त, विपस्सीआदीनं तिण्णं बुद्धानं अत्तनो परिनिब्बानतो उपरि परियत्तिवसेन विनेतब्बानं पुग्गलानं अभावेन तेसं अत्थाय वित्थारतो सिक्खापदपञ्ञत्तियं किलासुता अप्पोस्सुक्कता, या च उपनिस्सयसम्पन्नानं वेनेय्यानं चेतसा चेतो परिच्च भिंसनकवनसण्डेपि गन्त्वा ओवदन्तानं तेसं मग्गफलुप्पादनत्थाय धम्मदेसनाय एव अकिलासुता सउस्साहता, न वित्थारतो धम्मविनयदेसनाय, अयं खो, सारिपुत्त, हेतु, अयं पच्चयो, येन विपस्सीआदीनं तिण्णं बुद्धानं ब्रह्मचरियं न चिरट्ठितिकं अहोसीति. पुरिसयुगवसेनाति पुरिसानं युगं पवत्तिकालो, तस्स वसेन, पुरिसवसेनाति अत्थो. सब्बपच्छिमकोति परिनिब्बानदिवसे पब्बजितो सुभद्दसदिसो. सतसहस्सं सट्ठिमत्तानि च वस्ससहस्सानीति इदं भगवतो जातितो पट्ठाय वुत्तं, बोधितो पट्ठाय पन गणियमानं ऊनं होतीति दट्ठब्बं. द्वेयेवाति धरमाने भगवति एकं, परिनिब्बुते एकन्ति द्वे एव पुरिसयुगानि.

२०-१. असम्भुणन्तेनाति अपापुणन्तेन. को अनुसन्धीति पुरिमकथाय इमस्स को सम्बन्धोति अत्थो. यं वुत्तन्ति यं याचितन्ति अत्थो. येसूति वीतिक्कमधम्मेसु. नेसन्ति दिट्ठधम्मिकादिआसवानं. तेति वीतिक्कमधम्मा. ञातियेव पितामहपितुपुत्तादिवसेन परिवट्टनतो परिवट्टोति ञातिपरिवट्टो. लोकामिसभूतन्ति लोकपरियापन्नं हुत्वा किलेसेहि आमसितब्बतो लोकामिसभूतं. पब्बज्जासङ्खेपेनेवाति दससिक्खापददानादिपब्बज्जामुखेन. एतन्ति मेथुनादीनं अकरणं. थामन्ति सिक्खापदपञ्ञापनसामत्थियं. सञ्छविन्ति सुक्कच्छविं पकतिच्छविं, सुन्दरच्छविं वा. सेसन्ति सेसपदयोजनदस्सनं. इदानि अत्थयोजनं दस्सेन्तो आह अयं वा हेत्थातिआदि. तत्थ वा-सद्दो अवधारणे. हि-सद्दो पसिद्धियं, अयमेव हेत्थाति अत्थो. अथ सत्थाति पदस्स अत्थं दस्सेति ‘‘तदा सत्था’’ति. रोपेत्वाति फालितट्ठाने ¶ निन्नं मंसं समं वड्ढेत्वा. सके आचरियकेति अत्तनो आचरियभावे, आचरियकम्मे वा.

विपुलभावेनाति ¶ बहुभावेन. अयोनिसो उम्मुज्जमानाति अनुपायेन अभिनिविसमाना, विपरीततो जानमानाति अत्थो. रसेन रसं संसन्दित्वाति अनवज्जसभावेन सावज्जसभावं सम्मिस्सेत्वा. उद्धम्मं उब्बिनयन्ति उग्गतधम्मं उग्गतविनयञ्च, यथा धम्मो च विनयो च विनस्सिस्सति, एवं कत्वाति अत्थो. इमस्मिं अत्थेति इमस्मिं सङ्घाधिकारे. पभस्सरोति पभासनसीलो. एवंनामो एवंगोत्तोति सोयमायस्मा सोतापन्नोतिनामगोत्तेन समन्नागतो, अयं वुच्चति सोतापन्नोति पकतेन सम्बन्धो. अविनिपातधम्मोति एत्थ धम्म-सद्दो सभाववाची, सो च अत्थतो अपायेसु खिपनको दिट्ठिआदिअकुसलधम्मो एवाति आह ‘‘ये धम्मा’’तिआदि. इदानि सभाववसेनेव अत्थं दस्सेतुं विनिपतनं वातिआदि वुत्तं. नियतोति सत्तभवब्भन्तरे नियतक्खन्धपरिनिब्बानो. तस्स कारणमाह ‘‘सम्बोधिपरायणो’’ति.

२२. अनुधम्मताति लोकुत्तरधम्मानुगतो सभावो. पवारणासङ्गहं दत्वाति ‘‘आगामिनिया पुण्णमिया पवारेस्सामा’’ति अनुमतिदानवसेन दत्वा, पवारणं उक्कड्ढित्वाति अत्थो, एतेन नयेन केनचि पच्चयेन पवारणुक्कड्ढनं कातुं वट्टतीति दीपितं होति. मागसिरस्स पठमदिवसेति चन्दमासवसेन वुत्तं, अपरकत्तिकपुण्णमाय अनन्तरे पाटिपददिवसेति अत्थो. फुस्समासस्स पठमदिवसेति एत्थापि एसेव नयो. इदञ्च निदस्सनमत्तं वेनेय्यानं अपरिपाकं पटिच्च फुस्समासतो परञ्च एकद्वितिचतुमासम्पि तत्थेव वसित्वा सेसमासेहि चारिकाय परियोसापनतो. दससहस्सचक्कवाळेति इदं देवब्रह्मानं वसेन वुत्तं. मनुस्सा पन इमस्मिंयेव चक्कवाळे बोधनेय्या होन्ति. इतरचक्कवाळेसु पन मनुस्सानं इमस्मिं चक्कवाळे उप्पत्तिया छन्दुप्पादनत्थं अनन्तम्पि चक्कवाळं ओलोकेत्वा तदनुगुणानुसासनी पाटिहारियं करोन्तियेव.

आयामाति ¶ एत्थ आ-सद्दो आगच्छाति इमिना समानत्थोति आह ‘‘आगच्छ यामा’’ति, एहि गच्छामाति अत्थो. सुवण्णरसपिञ्जराहीति विलीनसुवण्णजलं विय पिञ्जराहि सुवण्णवण्णाहीति अत्थो. पाळियं निमन्तितम्हातिआदीसु ‘‘निमन्तिता वस्संवुत्था अम्हा’’ति च, ‘‘निमन्तिता वस्संवुत्था अत्था’’ति च सम्बन्धो.

यन्ति देय्यधम्मजातं, यं किञ्चीति अत्थो. नो नत्थीति अम्हाकं नत्थि, नोति वा एतस्स विवरणं नत्थीति. एत्थाति घरावासे. तन्ति तं कारणं, किच्चं वा. कुतोति कतरहेतुतो. यन्ति येन कारणेन, किच्चेन वा. दुतिये अत्थविकप्पे एत्थाति इमस्स विवरणं इमस्मिं तेमासब्भन्तरेति. तन्ति तं देय्यधम्मं.

तत्थ ¶ चाति कुसले. तिक्खविसदभावापादनेन समुत्तेजेत्वा. वस्सेत्वाति आयतिं वासनाभागियं धम्मरतनवस्सं ओतारेत्वा. यं दिवसन्ति यस्मिं दिवसे.

२३. पत्तुण्णपत्तपटे चाति पत्तुण्णपटे चीनपटे च. तुम्बानीति चम्ममयतेलभाजनानि. अनुबन्धित्वाति अनुपगमनं कत्वा. अभिरन्त-सद्दो इध अभिरुचिपरियायोति आह ‘‘यथाज्झासय’’न्तिआदि. सोरेय्यादीनि महामण्डलचारिकाय मग्गभूतानि सोरेय्यनगरादीनि. पयागपतिट्ठानन्ति गङ्गाय एकस्स तित्थविसेसस्सापि, तंसमीपे गामस्सापि नामं. समन्तपासादिकायाति समन्ततो सब्बसो पसादं जनेतीति समन्तपासादिका, तस्सा.

ये पन पकारे सन्धाय ‘‘समन्ततो’’ति वुच्चति, ते पकारे वित्थारेत्वा दस्सेतुं तत्रिदन्तिआदि वुत्तं. तत्थ ‘‘समन्तपासादिका’’ति या संवण्णना वुत्ता, तत्र तस्सं समन्तपासादिकायं समन्तपसादिकभावे इदं वक्खमानगाथावचनं होतीति योजना. बाहिरनिदानअब्भन्तरनिदानसिक्खापदनिदानानं वसेन निदानप्पभेददीपनं वेदितब्बं. ‘‘थेरवादप्पकासनं वत्थुप्पभेददीपन’’न्तिपि वदन्ति. ‘‘सिक्खापदानं पच्चुप्पन्नवत्थुप्पभेददीपन’’न्तिपि वत्तुं वट्टति. सिक्खापदनिदानन्ति पन वेसालीआदि सिक्खापदपञ्ञत्तिया ¶ कारणभूतदेसविसेसो वेदितब्बो. एत्थाति समन्तपासादिकाय. सम्पस्सतं विञ्ञूनन्ति सम्बन्धो, तस्मा अयं समन्तपासादिकात्वेव पवत्ताति योजेतब्बा.

इति समन्तपासादिकाय विनयट्ठकथाय विमतिविनोदनियं

वेरञ्जकण्डवण्णनानयो निट्ठितो.

१. पाराजिककण्डो

१. पठमपाराजिकं

सुदिन्नभाणवारवण्णना

२४. विक्कायिकभण्डस्स ¶ ¶ विक्किणनं इणदानञ्च भण्डप्पयोजनं नाम. एवं पयोजितस्स मूलस्स सह वड्ढिया गहणवायामो उद्धारो नाम. असुकदिवसे दिन्नन्तिआदिना पमुट्ठस्स सतुप्पादनादि सारणं नाम. चतुब्बिधायाति खत्तियब्राह्मणगहपतिसमणानं वसेन, भिक्खुआदीनं वा वसेन चतुब्बिधाय. दिस्वानस्स एतदहोसीति हेतुअत्थे अयं दिस्वान-सद्दो असमानकत्तुकत्ता, यथा घतं पिवित्वा बलं होतीति, एवमञ्ञत्थापि एवरूपेसु. भब्बकुलपुत्तोति उपनिस्सयमत्तसभावेन वुत्तं, न पच्छिमभविकताय. तेनेवस्स मातादिअकल्याणमित्तसमायोगेन कतवीतिक्कमनं निस्साय उप्पन्नविप्पटिसारेन अधिगमन्तरायो जातो. पच्छिमभविकानं पुब्बबुद्धुप्पादेसु लद्धब्याकरणानं न सक्का केनचि अन्तरायं कातुं. तेनेव अङ्गुलिमालत्थेरादयो अकुसलं कत्वापि अधिगमसम्पन्ना एव अहेसुन्ति. चरिमकचित्तन्ति चुतिचित्तं. सङ्खं विय लिखितं घंसित्वा धोवितं सङ्खलिखितन्ति आह धोतइच्चादि. अज्झावसताति अधि-सद्दयोगेन अगारन्ति भुम्मत्थे उपयोगवचनन्ति आह ‘‘अगारमज्झे’’ति. कसायरसरत्तानि कासायानीति आह ‘‘कसायरसपीतताया’’ति. कसायतो निब्बत्तताय च हि रसोपि ‘‘कसायरसो’’ति वुच्चति.

२६. यदा जानाति-सद्दो बोधनत्थो न होति, तदा तस्स पयोगे सप्पिनो जानाति मधुनो जानातीतिआदीसु विय करणत्थे सामिवचनं सद्दसत्थविदू इच्छन्तीति आह ‘‘किञ्चि दुक्खेन नानुभोसी’’ति. केनचि दुक्खेन नानुभोसीति अत्थो, किञ्चीति एत्थापि हि करणत्थे सामिवचनस्स लोपो कतो, तेनेव वक्खति ‘‘विकप्पद्वयेपि पुरिमपदस्स उत्तरपदेन समानविभत्तिलोपो ¶ दट्ठब्बो’’ति. यदा पन जानाति-सद्दो सरणत्थो होति, तदा मातु सरतीतिआदीसु विय उपयोगत्थे सामिवचनं ¶ सद्दसत्थविदू वदन्तीति आह ‘‘अथ वा किञ्चि दुक्खं नस्सरतीति अत्थो’’ति, कस्सचि दुक्खस्स अननुभूतताय नस्सरतीति अत्थो. विकप्पद्वयेपीति अनुभवनसरणत्थवसेन वुत्ते दुतियततियविकप्पद्वये. पुरिमपदस्साति किञ्चीति पदस्स. उत्तरपदेनाति दुक्खस्सातिपदेन. समानाय सामिवचनभूताय विभत्तिया ‘‘कस्सचि दुक्खस्सा’’ति वत्तब्बे ‘‘किञ्चि दुक्खस्सा’’ति लोपोति दट्ठब्बो. मरणेनपि मयं तेति एत्थ तेति पदस्स सहत्थे करणवसेनपि अत्थं दस्सेतुं तया वियोगं वा पापुणिस्सामाति अत्थन्तरं वुत्तं.

२८. गन्धब्बा नाम गायनका. नटा नाम रङ्गनटा. नाटका लङ्घनकादयो. सुखूपकरणेहि अत्तनो परिचरणं करोन्तो यस्मा लळन्तो कीळन्तो नाम होति, तस्मा दुतिये अत्थविकप्पे लळातिआदि वुत्तं. दानप्पदानादीनीति एत्थ निच्चदानं दानं नाम, विसेसदानं पदानं नाम, आदि-सद्देन सीलादीनि सङ्गण्हाति.

३०. चुद्दस भत्तानीति सङ्घभत्तं उद्देसभत्तं निमन्तनं सलाकं पक्खिकं उपोसथिकं पाटिपदिकं आगन्तुकं गमिकं गिलानं गिलानुपट्ठाकं विहार-धुर-वारभत्तन्ति इमानि चुद्दस भत्तानि. एत्थ च सेनासनादिपच्चयत्तयनिस्सितेसु आरञ्ञकङ्गादिपधानङ्गानं गहणवसेन सेसधुतङ्गानिपि गहितानेव होन्तीति वेदितब्बं. वज्जीनन्ति वज्जीराजूनं. वज्जीसूति जनपदापेक्खं बहुवचनं, वज्जीनामके जनपदेति अत्थो. पञ्चकामगुणायेव उपभुञ्जितब्बतो परिभुञ्जितब्बतो च उपभोगपरिभोगा, इत्थिवत्थादीनि च तदुपकरणानीति आह ‘‘येहि तेस’’न्तिआदि. उक्कट्ठपिण्डपातिकत्ताति सेसधुतङ्गपरिवारितेन उक्कट्ठपिण्डपातिकधुतङ्गेन समन्नागतत्ता, तेनाह ‘‘सपदानचारं चरितुकामो’’ति.

३१. दोसाति रत्ति. तत्थ अभिवुत्थं परिवुसितं आभिदोसिकं, अभिदोसं वा पच्चूसकालं गतो पत्तो अतिक्कन्तो आभिदोसिको, तेनाह एकरत्तातिक्कन्तस्स वातिआदि.

३२. उदककञ्जियन्ति पानीयपरिभोजनीयउदकञ्च यागु च. तथाति समुच्चयत्थे.अनोकप्पनं असद्दहनं, अमरिसनं असहनं.

३४. तद्धितलोपन्ति ¶ पितामहतो आगतं ‘‘पेतामह’’न्ति वत्तब्बे तद्धितपच्चयनिमित्तस्स ¶ ए-कारस्स लोपं कत्वाति अत्थो. येसं सन्तकं धनं गहितं, ते इणायिका. पलिबुद्धोति ‘मा गच्छ मा भुञ्जा’तिआदिना कतावरणो, पीळितोति अत्थो.

३५. अत्तनाति सयं. सपतिनो धनसामिनो इदं सापतेय्यं, धनं. तदेव विभवो.

३६. भिज्जन्तीति अगहितपुब्बा एव भिज्जन्ति. दिन्नापि पटिसन्धीति पितरा दिन्नं सुक्कं निस्साय उप्पन्नस्स सत्तस्स पटिसन्धिपि तेन दिन्ना नाम होतीति वुत्तं. सुक्कमेव वा इध पटिसन्धिनिस्सयत्ता ‘‘पटिसन्धी’’ति वुत्तं, तेनाह ‘‘खिप्पं पतिट्ठाती’’ति. न हि पितु संयोगक्खणेयेव सत्तस्स उप्पत्तिनियमो अत्थि सुक्कमेव तथा पतिट्ठाननियमतो. सुक्के पन पतिट्ठिते याव सत्त दिवसानि, अड्ढमासमत्तं वा, तं गब्भसण्ठानस्स खेत्तमेव होति मातु मंसस्स लोहितलेसस्स सब्बदापि विज्जमानत्ता. पुब्बेपि पञ्ञत्तसिक्खापदानं सब्भावतो अपञ्ञत्ते सिक्खापदेति इमस्स पठमपाराजिकसिक्खापदे अट्ठपितेति अत्थो वुत्तो. एवरूपन्ति एवं गरुकसभावं, पाराजिकसङ्घादिसेसवत्थुभूतन्ति अत्थो, तेनाह ‘‘अवसेसे पञ्चखुद्दकापत्तिक्खन्धे एव पञ्ञपेसी’’ति. यं आदीनवन्ति सम्बन्धो. कायविञ्ञत्तिचोपनतोति कायविञ्ञत्तिया निब्बत्तचलनतो.

तेनेवाति अवधारणेन यानि गब्भग्गहणकारणानि निवत्तितानि, तानिपि दस्सेतुं किं पनातिआदि वुत्तं. तत्थ उभयेसं छन्दरागवसेन कायसंसग्गो वुत्तो. इत्थिया एव छन्दरागवसेन नाभिपरामसनं विसुं वुत्तं. सामपण्डितस्स हि माता पुत्तुप्पत्तिया सञ्जातादरा नाभिपरामसनकाले कामरागसमाकुलचित्ता अहोसि, इतरथा पुत्तुप्पत्तिया एव असम्भवतो. ‘‘सक्को चस्सा कामरागसमुप्पत्तिनिमित्तानि अकासी’’तिपि वदन्ति, वत्थुवसेन वा एतं नाभिपरामसनं कायसंसग्गतो विसुं वुत्तन्ति दट्ठब्बं. मातङ्गपण्डितस्स दिट्ठमङ्गलिकाय नाभिपरामसनेन मण्डब्यस्स निब्बत्ति अहोसि. चण्डपज्जोतमातु नाभियं विच्छिका फरित्वा ¶ गता, तेन चण्डपज्जोतस्स निब्बत्ति अहोसीति आह एतेनेव नयेनातिआदि.

अयन्ति सुदिन्नस्स पुराणदुतियिका. यं सन्धायाति यं अज्झाचारं सन्धाय. मातापितरो च सन्निपतिता होन्तीति इमिना सुक्कस्स सम्भवं दीपेति, माता च उतुनी होतीति इमिना सोणितस्स. गन्धब्बोति तत्रुपगो सत्तो अधिप्पेतो, गन्तब्बोति वुत्तं होति, त-कारस्स चेत्थ ध-कारो कतो. अथ वा गन्धब्बा नाम रङ्गनटा, ते विय तत्र तत्र भवेसु नानावेसग्गहणतो अयम्पि ‘‘गन्धब्बो’’ति वुत्तो, सो मातापितूनं सन्निपातक्खणतो पच्छापि सत्ताहब्भन्तरे ¶ तत्र उपपन्नो ‘‘पच्चुपट्ठितो’’ति वुत्तो. गब्भस्साति कललरूपसहितस्स पटिसन्धिविञ्ञाणस्स. तञ्हि इध ‘‘गब्भो’’ति अधिप्पेतं सा तेन गब्भं गण्हीतिआदीसु (पारा. ३६) विय. अस्स तं अज्झाचारन्ति सम्बन्धो. पाळियं निरब्बुदो वत भो भिक्खुसङ्घो निरादीनवोति इमस्स अनन्तरं तस्मिं भिक्खुसङ्घेति अज्झाहरित्वा सुदिन्नेन…पे… आदीनवो उप्पादितोति योजना वेदितब्बा. इतिहाति निपातसमुदायस्स एवन्ति इदं अत्थभवनं. मुहुत्तेनाति इदं खणेनाति पदस्स वेवचनं. याव ब्रह्मलोका अब्भुग्गतोपि देवानं तावमहन्तो सद्दो तेसं रूपं विय मनुस्सानं गोचरो न होति. तस्मा पच्छा सुदिन्नेन वुत्ते एव जानिंसूति दट्ठब्बं.

३७. मग्गब्रह्मचरियन्ति मग्गपदट्ठानं सिक्खत्तयमेव उपचारतो वुत्तं तस्सेव यावजीवं चरितब्बत्ता. अविप्फारिकोति उद्देसादीसु अब्यावटो. वहच्छिन्नोति छिन्नपादो, छिन्नखन्धो वा. चिन्तयीति इमिना पज्झायीति पदस्स किरियापदत्तं दस्सेति. तेन ‘‘किसो अहोसि…पे… पज्झायि चा’’ति च-कारं आनेत्वा पाळियोजना कातब्बा.

३८. गणे जनसमागमे सन्निपातनं गणसङ्गणिका, साव पपञ्चा, तेन गणसङ्गणिकापपञ्चेन. यस्साति ये अस्स. कथाफासुकाति विस्सासिकभावेन फासुककथा, सुखसम्भासाति अत्थो. उपादारूपं भूतरूपमुखेनेव मन्दनं पीननञ्च होतीति आह पसादइच्चादि. दानीति निपातो इध पन-सद्दत्थे वत्तति तक्कालवाचिनो एतरहि-पदस्स विसुं वुच्चमानत्ताति आह ‘‘सो पन त्व’’न्ति. नो-सद्दोपि नु-सद्दो विय ¶ पुच्छनत्थोति आह ‘‘कच्चि नु त्व’’न्ति. तमेवाति गिहिभावपत्थनालक्खणमेव. अनभिरतिमेवाति एव-कारेन निवत्तिताय पन तदञ्ञाय अनभिरतिया विज्जमानत्तं दस्सेतुं अधिकुसलानन्तिआदि वुत्तं, समथविपस्सना अधिकुसला नाम. इदं पनातिआदि उपरि वत्तब्बविसेसदस्सनं. परियायवचनमत्तन्ति सद्दत्थकथनमत्तं.

तस्मिन्ति धम्मे, एवं विरागाय देसिते सतीति अत्थो. नामाति गरहायं. लोकुत्तरनिब्बानन्ति विरागायातिआदिना वुत्तकिलेसक्खयनिब्बानतो विसेसेति. जातिं निस्साय उप्पज्जनकमानो एव मदजननट्ठेन मदोति मानमदो. ‘‘अहं पुरिसो’’ति पवत्तो मानो पुरिसमदो. ‘‘असद्धम्मसेवनासमत्थतं निस्साय मानो, रागो एव वा पुरिसमदो’’ति केचि. आदि-सद्देन बलमदादिं सङ्गण्हाति. तेभूमकवट्टन्ति तीसु भूमीसु कम्मकिलेसविपाका पवत्तनट्ठेन ¶ वट्टं. विरज्जतीति विगच्छति. योनियोति अण्डजादयो, ता पन यवन्ति ताहि सत्ता अमिस्सितापि समानजातिताय मिस्सिता होन्तीति ‘‘योनियो’’ति वुत्ता.

ञाततीरणपहानवसेनाति एत्थ लक्खणादिवसेन सप्पच्चयनामरूपपरिग्गहो ञातपरिञ्ञा नाम. कलापसम्मसनादिवसेन पवत्ता लोकियविपस्सना तीरणपरिञ्ञा नाम. अरियमग्गो पहानपरिञ्ञा नाम. इध पन ञाततीरणकिच्चानम्पि असम्मोहतो मग्गक्खणे सिज्झनतो अरियमग्गमेव सन्धाय तिविधापि परिञ्ञा वुत्ता, तेनेव ‘‘लोकुत्तरमग्गोव कथितो’’ति वुत्तं. कामेसु पातब्यतानन्ति वत्थुकामेसु पातब्यतासङ्खातानं सुभादिआकारानं तदाकारगाहिकानं तण्हानन्ति अत्थो. विसयमुखेन हेत्थ विसयिनो गहिता. तीसु ठानेसूति ‘‘विरागाय धम्मो देसितो…पे… नो सउपादानाया’’ति एवं वुत्तेसु.

३९. कलिसासनारोपनत्थायाति दोसारोपनत्थाय. कलीति कोधस्स नामं, तस्स सासनं कलिसासनं, कोधवसेन वुच्चमाना गरहा. अज्झाचारोव वीतिक्कमो. समणकरणानं धम्मानन्ति समणभावकरानं हिरोत्तप्पादिधम्मानं. पाळियं कथं-सद्दयोगेन न सक्खिस्ससीति अनागतवचनं कतं, ‘‘नाम-सद्दयोगेना’’तिपि वदन्ति. अतिविय दुक्खविपाकन्ति ¶ गहट्ठानं नातिसावज्जम्पि कम्मं पब्बजितानं भगवतो आणावीतिक्कमतो चेव समादिन्नसिक्खत्तयविनासनतो च महासावज्जं होतीति वुत्तं. उदके भवं ओदकं, धोवनकिच्चन्ति आह उदककिच्चन्तिआदि. समापज्जिस्ससीति अनागतवचनं नाम-सद्दयोगेन कतन्ति आह ‘‘नाम-सद्देन योजेतब्ब’’न्ति. दुब्भरतादीनं हेतुभूतो असंवरो इध दुब्भरतादि-सद्देन वुत्तो कारणे कारियोपचारेनाति आह ‘‘दुब्भरतादीनं वत्थुभूतस्स असंवरस्सा’’ति. अत्ताति अत्तभावो. दुब्भरतन्ति अत्तना उपट्ठाकेहि च दुक्खेन भरितब्बतं. सत्तेहि किलेसेहि च सङ्गणनं समोधानं सङ्गणिकाति आह गणसङ्गणिकायातिआदि. अट्ठकुसीतवत्थुपारिपूरियाति एत्थ कम्मं कातब्बन्ति एकं, तथा अकासिन्ति, मग्गो गन्तब्बोति अगमासिन्ति, नालत्थं भोजनस्स पारिपूरिन्ति, अलत्थन्ति, उप्पन्नो मे आबाधोति, अचिरवुट्ठितो गेलञ्ञाति एकन्ति इमानि अट्ठ कुसीतवत्थूनि नाम. एत्थ च कोसज्जं कुसीत-सद्देन वुत्तं. विनापि हि भावजोतनपच्चयं भावत्थो विञ्ञायति यथा पटस्स सुक्कन्ति. सब्बकिलेसापचयभूताय विवट्टायाति रागादिसब्बकिलेसानं अपचयहेतुभूताय निब्बानाय, निब्बानत्थन्ति अत्थो. संवरप्पहानपटिसंयुत्तन्ति सीलसंवरादीहि पञ्चहि संवरेहि चेव तदङ्गप्पहानादीहि पञ्चहि पहानेहि च उपेतं. असुत्तन्त विनिबद्धन्ति तीसु पिटकेसु पाळिसङ्खातसुत्तन्तवसेन अरचितं, सङ्गीतिकारेहि च अनारोपितं, तेनाह ‘‘पाळिविनिमुत्त’’न्ति. तेन च अट्ठकथासु यथानुरूपं सङ्गहितन्ति ¶ दस्सेति. एवरूपा हि पकिण्णकदेसना अट्ठकथाय मूलं. ओक्कन्तिकधम्मदेसना नाम तस्मिं तस्मिं पसङ्गे ओतारेत्वा ओतारेत्वा नानानयेहि कथियमाना धम्मदेसना, तेनाह भगवा किरातिआदि. पटिक्खिपनाधिप्पायाति पञ्ञत्तम्पि सिक्खापदं ‘‘किमेतेना’’ति मद्दनचित्ता.

वुत्तत्थवसेनाति पतिट्ठाअधिगमुपायवसेन. सिक्खापदविभङ्गे या तस्मिं समये कामेसुमिच्छाचारा आरति विरतीतिआदिना (विभ. ७०६) निद्दिट्ठविरतियो चेव, या तस्मिं समये चेतना सञ्चेतनातिआदिना (विभ. ७०४) निद्दिट्ठचेतना च, कामेसुमिच्छाचारा विरमन्तस्स फस्सो…पे… अविक्खेपोतिआदिना (विभ. ७०५) निद्दिट्ठफस्सादिधम्मा च सिक्खापदन्ति दस्सेतुं ‘‘अयञ्च अत्थो ¶ सिक्खापदविभङ्गे वुत्तनयेनेव वेदितब्बो’’ति वुत्तं. ‘‘यो तत्थ नामकायो पदकायोति इदं महाअट्ठकथायं वुत्त’’न्ति वदन्ति. नामकायोति नामसमूहो नामपञ्ञत्तियेव, सेसानिपि तस्सेव वेवचनानि. सिक्खाकोट्ठासोति विरतिआदयो वुत्ता तप्पकासकञ्च वचनं.

अत्थवसेति हितविसेसे आनिसंसविसेसे, ते च सिक्खापदपञ्ञत्तिया हेतूति आह ‘‘कारणवसे’’ति. सुखविहाराभावे सहजीवनस्स अभावतो सहजीविताति सुखविहारोव वुत्तो. दुस्सीलपुग्गलाति निस्सीला दूसितसीला च. पाराजिकसिक्खापदप्पसङ्गे हि निस्सीला अधिप्पेता, सेससिक्खापदपसङ्गे तेहि तेहि वीतिक्कमेहि खण्डछिद्दादिभावप्पत्तिया दूसितसीला अधिप्पेता. उभयेनपि अलज्जिनोव इध ‘‘दुस्सीला’’ति वुत्ताति वेदितब्बा. सब्बसिक्खापदानम्पि दस अत्थवसे पटिच्चेव पञ्ञत्तत्ता उपरि दुस्सीलपुग्गले निस्सायाति एत्थापि एसेव नयो, तेनेव ‘‘ये मङ्कुतं…पे… निग्गहेस्सती’’ति सब्बसिक्खापदसाधारणवसेन अत्थो वुत्तो. तत्थ मङ्कुतन्ति नित्तेजतं अधोमुखतं. धम्मेनातिआदीसु धम्मोति भूतं वत्थु. विनयोति चोदना चेव सारणा च. सत्थुसासनन्ति ञत्तिसम्पदा चेव अनुसावनसम्पदा च. सन्दिट्ठमानाति संसयं आपज्जमाना. उब्बाळ्हाति पीळिता. दुस्सीलपुग्गले निस्साय हि उपोसथो न तिट्ठति, पवारणा न तिट्ठति, सङ्घकम्मानि नप्पवत्तन्ति, सामग्गी न होतीति इमिना अलज्जीहि सद्धिं उपोसथादिसकलसङ्घकम्मं कातुं न वट्टति धम्मपरिभोगत्ताति दस्सेति. उपोसथपवारणानं नियतकालिकताय च अवस्सं कत्तब्बत्ता सङ्घकम्मतो विसुं गहणं वेदितब्बं. अकित्ति गरहा. अयसो परिवारहानि.

चुद्दस खन्धकवत्तानि नाम वत्तक्खन्धके (चूळव. ३५६ आदयो) वुत्तानि आगन्तुकवत्तं ¶ आवासिकगमिकअनुमोदनभत्तग्गपिण्डचारिकआरञ्ञकसेनासनजन्ताघरवच्चकुटिउपज्झायसद्धिविहारिकआचरियअन्तेवासिकवत्तन्ति इमानि चुद्दस वत्तानि, एतानि च सब्बेसं भिक्खूनं सब्बदा च यथारहं चरितब्बानि. द्वे असीति महावत्तानि पन तज्जनीयकम्मकतादिकालेयेव चरितब्बानि, न सब्बदा. तस्मा विसुं गणितानि. तानि पन ‘‘पारिवासिकानं भिक्खूनं वत्तं पञ्ञपेस्सामी’’ति (चूळव. ७५) आरभित्वा ‘‘न उपसम्पादेतब्बं…पे… न छमाय चङ्कमन्ते ¶ चङ्कमे चङ्कमितब्ब’’न्ति वुत्तावसानानि छसट्ठि, ततो परं ‘‘न, भिक्खवे, पारिवासिकेन भिक्खुना पारिवासिकेन वुड्ढतरेन भिक्खुना सद्धिं, मूलायपटिकस्सनारहेन, मानत्तचारिकेन, मानत्तारहेन, अब्भानारहेन भिक्खुना सद्धिं एकच्छन्ने आवासे वत्थब्ब’’न्तिआदिना (चूळव. ८२) वुत्तवत्तानि पकतत्तेन चरितब्बेहि अनञ्ञत्ता विसुं अगणेत्वा पारिवासिकवुड्ढतरादीसु पुग्गलन्तरेसु चरितब्बत्ता तेसं वसेन सम्पिण्डेत्वा एकेकं कत्वा गणितानि पञ्चाति एकसत्ततिवत्तानि च उक्खेपनीयकम्मकतवत्तेसु च वुत्तं ‘‘न पकतत्तस्स भिक्खुनो अभिवादनं पच्चुट्ठानं…पे… नहाने पिट्ठिपरिकम्मं सादितब्ब’’न्ति (चूळव. ८६) इदं अभिवादनादीनं असादियनं एकं, ‘‘न पकतत्तो भिक्खु सीलविपत्तिया अनुद्धंसेतब्बो’’तिआदीनि (चूळव. ५१) च दसाति एवं द्वासीति वत्तानि होन्ति, एतेस्वेव पन कानिचि तज्जनीयकम्मादिवत्तानि कानिचि पारिवासिकादिवत्तानीति अग्गहितग्गहणेन द्वासीतियेव. अञ्ञत्थ पन अट्ठकथापदेसे अप्पकं ऊनमधिकं वा गणनूपगं न होतीति असीतिखन्धकवत्तानीति आगतं. अथ वा पुरिमेहि चुद्दसवत्तेहि असङ्गहितानि विनयागतानि सब्बानि वत्तानि यथा द्वासीति वत्तानि, असीति वत्तानि एव वा होन्ति, तथा सङ्गहेत्वा ञातब्बानि.

संवरविनयोति सीलसंवरो सतिसंवरो ञाणसंवरो खन्तिसंवरो वीरियसंवरोति पञ्चविधोपि संवरो यथासकं संवरितब्बानं विनेतब्बानञ्च कायदुच्चरितादीनं संवरणतो संवरो, विनयनतो विनयोति वुच्चति. पहानविनयोति तदङ्गप्पहानं विक्खम्भनप्पहानं समुच्छेदप्पहानं पटिप्पस्सद्धिप्पहानं निस्सरणप्पहानन्ति पञ्चविधम्पि पहानं, यस्मा चागट्ठेन पहानं, विनयनट्ठेन विनयो, तस्मा ‘‘पहानविनयो’’ति वुच्चति. समथविनयोति सत्त अधिकरणसमथा. पञ्ञत्तिविनयोति सिक्खापदमेव. तम्पि हि भगवतो सिक्खापदपञ्ञत्तियाव अनुग्गहितं होति तब्भावे एव भावतो. सङ्खलिकनयं कत्वा दसक्खत्तुं योजनञ्च कत्वा यं वुत्तन्ति सम्बन्धो. तत्थ पुरिमपुरिमपदस्स अनन्तरपदेनेव योजितत्ता अयोसङ्खलिकसदिसन्ति ‘‘सङ्खलिकनय’’न्ति वुत्तं. दससु पदेसु एकमेकं पदं तदवसेसेहि नवनवपदेहि योजितत्ता ‘‘एकेकपदमूलिक’’न्ति वुत्तं.

अत्थसतं ¶ ¶ धम्मसतन्ति एत्थ यो हि सो परिवारे (परि. ३३४) यं सङ्घसुट्ठु, तं सङ्घफासूति आदिंकत्वा यं सद्धम्मट्ठितिया, तं विनयानुग्गहायाति परियोसानं खण्डचक्कवसेनेव सङ्खलिकनयो वुत्तो, तस्मिं एकमूलकनये आगतबद्धचक्कनयेन यं विनयानुग्गहाय, तं सङ्घसुट्ठूति इदम्पि योजेत्वा बद्धचक्के कते पुरिमपुरिमानि दस धम्मपदानि, पच्छिमपच्छिमानि दस अत्थपदानि चाति वीसति पदानि होन्ति. एकमूलकनये पन एकस्मिं वारे नवेव अत्थपदानि लब्भन्ति. एवं दसहि वारेहि नवुति अत्थपदानि नवुति धम्मपदानि च होन्ति, तानि सङ्खलिकनये वुत्तेहि दसहि अत्थपदेहि दसहि धम्मपदेहि च सद्धिं योजितानि यथावुत्तं अत्थसतं धम्मसतञ्च होन्तीति वेदितब्बं. यं पनेत्थ सारत्थदीपनियं (सारत्थ टी. पाराजिककण्ड २.३९) सङ्खलिकनयेपि एकमूलकनयेपि पच्चेकं अत्थसतस्स धम्मसतस्स योजनामुखं वुत्तं, तं तथा सिद्धेपि अत्थसतं धम्मसतन्ति (परि. ३३४) गाथाय न समेति द्वे अत्थसतानि द्वे धम्मसतानि चत्तारि निरुत्तिसतानि अट्ठ ञाणसतानीति वत्तब्बतो. तस्मा इध वुत्तनयेनेव अत्थसतं धम्मसतन्ति वुत्तन्ति गहेतब्बं. द्वे च निरुत्तिसतानीति अत्थजोतिकानं निरुत्तीनं वसेन निरुत्तिसतं, धम्मभूतानं निरुत्तीनञ्च वसेन निरुत्तिसतन्ति द्वे निरुत्तिसतानि. चत्तारि च ञाणसतानीति अत्थसते ञाणसतं, धम्मसते ञाणसतं, द्वीसु निरुत्तिसतेसु द्वे ञाणसतानीति चत्तारि ञाणसतानि. अतिरेकानयनत्थोति अवुत्तसमुच्चयत्थो.

पठमपञ्ञत्तिकथावण्णनानयो निट्ठितो.

सुदिन्नभाणवारवण्णना निट्ठिता.

मक्कटीवत्थुकथावण्णना

४०. पचुरत्थे हि वत्तमानवचनन्ति एकदा पटिसेवित्वा पच्छा अनोरमित्वा दिवसे दिवसे सेवनिच्छाय वत्तमानत्ता सेवनाय अभावक्खणेपि इह मल्ला युज्झन्तीतिआदीसु विय अब्बोच्छिन्नतं बाहुल्लवुत्तितञ्च उपादाय पटिसेवतीति वत्तमानवचनं कतन्ति अत्थो. आहिण्डन्ताति विचरन्ता.

४१. सहोड्ढग्गहितोति ¶ सभण्डग्गहितो, अयमेव वा पाठो. तं सिक्खापदं तथेव होतीति मनुस्सामनुस्सादिपुग्गलविसेसं किञ्चि अनुपादियित्वा सामञ्ञतो ‘‘यो पन भिक्खु मेथुनं धम्मं पटिसेवेय्या’’ति (पारा. ३९) वुत्तत्ता मनुस्सामनुस्सतिरच्छानगतानं इत्थिपुरिसपण्डकउभतोब्यञ्जनानं ¶ तिंसविधेपि मग्गे मेथुनं सेवन्तस्स तं सिक्खापदं मूलच्छेज्जकरं होति एवाति अधिप्पायो. एतेन यं अनुपञ्ञत्तिमूलपञ्ञत्तिया एव अधिप्पायप्पकासनवसेन सुबोधत्थाय वत्थुवसेन पवत्तानं विसेसत्थजोतकवसेनाति दस्सितं होति. आमसनं आमट्ठमत्तं. ततो दळ्हतरं फुसनं. घट्टनं पन ततो दळ्हतरं कत्वा सरीरेन सरीरस्स सङ्घट्टनं. तं सब्बम्पीति अनुरागेन पवत्तितं दस्सनादिसब्बम्पि.

४२. पाणातिपातादिसचित्तकसिक्खापदानं सुरापानादिअचित्तकसिक्खापदानञ्च (पाचि. ३२६ आदयो) एकेनेव लक्खणवचनेन लोकवज्जतं दस्सेतुं ‘‘यस्स सचित्तकपक्खे चित्तं अकुसलमेव होति, तं लोकवज्जं नामा’’ति वुत्तं. तत्थ सचित्तकपक्खेति इदं किञ्चापि अचित्तकसिक्खापदं सन्धायेव वत्तुं युत्तं तस्सेव सचित्तकपक्खसम्भवतो, तथापि सचित्तकसिक्खापदानम्पि असञ्चिच्च चङ्कमनादीसु लोके पाणघातवोहारसम्भवेन अचित्तकपक्खं परिकप्पेत्वा उभिन्नम्पि सचित्तकाचित्तकसिक्खापदानं साधारणवसेन ‘‘सचित्तकपक्खे’’ति वुत्तं. इतरथा सचित्तकसिक्खापदानं इमस्मिं वाक्ये लोकवज्जतालक्खणं न वुत्तं सिया. ‘‘सचित्तकपक्खे चित्तं अकुसलमेवा’’ति वुत्ते पन सचित्तकसिक्खापदानं चित्तं अकुसलमेव, इतरेसं सचित्तकपक्खेयेव अकुसलनियमो, न अचित्तकपक्खे. तत्थ पन यथासम्भवं कुसलं वा सिया, अकुसलं वा, अब्याकतं वाति अयमत्थो सामत्थियतो सिज्झतीति वेदितब्बं. सचित्तकपक्खेति वत्थुवीतिक्कमविजाननचित्तेन सचित्तकपक्खेति गहेतब्बं, न पण्णत्तिविजाननचित्तेन तथा सति सब्बसिक्खापदानम्पि लोकवज्जतापसङ्गतो. ‘‘पटिक्खित्तमिदं कातुं न वट्टती’’ति जानन्तस्स हि पण्णत्तिवज्जेपि अनादरियवसेन पटिघचित्तमेव उप्पज्जति, तस्मा इदं वाक्यं निरत्थकमेव सिया सब्बसिक्खापदानिपि लोकवज्जानीति एत्तकमत्तस्सेव वत्तब्बतापसङ्गतो.

एत्थ ¶ च सचित्तकपक्खेयेव चित्तं अकुसलन्ति नियमस्स अकतत्ता सुरापानादीसु अचित्तकपक्खे चित्तं अकुसलं न होतेवाति न सक्का नियमेतुं, केवलं पन सचित्तकपक्खे चित्तं अकुसलमेव, न कुसलादीति एवमेत्थ नियमो सिज्झति, एवञ्च सुराति अजानित्वा पिवन्तानम्पि अकुसलचित्तेनेव पानं गन्धवण्णकादिभावं अजानित्वा लिम्पन्तीनं भिक्खुनीनं विनापि अकुसलचित्तेन लिम्पनञ्च, उभयत्थापि आपत्तिसम्भवो च समत्थितो होति. यं पन सारत्थदीपनियं (सारत्थ. टी. पाराजिककण्ड २.४२) ‘‘सचित्तकपक्खे चित्तं अकुसलमेवाति वचनतो अचित्तकस्स वत्थुअजाननवसेन अचित्तकपक्खे चित्तं अकुसलमेवाति अयं नियमो नत्थीति विञ्ञायती’’ति वुत्तं, तं न युत्तं ¶ . अचित्तकेसु हि तेरससु लोकवज्जेसु सुरापानस्सेव अचित्तकपक्खेपि अकुसलचित्तनियमो, न इतरेसं द्वादसन्नं अकुसलादिचित्तेनापि आपज्जितब्बतो. यं पन एवं केनचि अनिच्छमानं सद्दतोपि अपतीयमानमिमं नियमं पराधिप्पायं कत्वा दस्सेतुं ‘‘यदि हि अचित्तकस्स अचित्तकपक्खेपि चित्तं अकुसलमेव सिया, सचित्तकपक्खेति इदं विसेसनं निरत्थकं सिया’’तिआदि वुत्तं, तं निरत्थकमेव एवं नियमस्स केनचि अनधिप्पेतत्ता. न हि कोचि सद्दसत्थविदू नियमं इच्छति, येन सचित्तकपक्खेति इदं विसेसनं निरत्थकं सियातिआदि वुत्तं भवेय्य, किन्तु सचित्तकपक्खे चित्तं अकुसलमेव, अचित्तकपक्खे पन चित्तं अनियतं अकुसलमेव वा सिया, कुसलादीसु वा अञ्ञतरन्ति एवमेव इच्छति. तेन सचित्तकपक्खेति विसेसनम्पि सात्थकं सिया. अचित्तकसिक्खापदानं सचित्तकपक्खेसु अकुसलनियमेन लोकवज्जता च सिज्झति. तेसु च सुरापानस्सेव अचित्तकपक्खेपि लोकवज्जता अकुसलचित्तता च, इतरेसं पन सचित्तकपक्खे एवाति वादोपि न विरुज्झतीति न किञ्चेत्थ अनुपपन्नं नाम.

यं पनेत्थ ‘‘सुराति अजानित्वा पिवन्तस्स…पे… विनापि अकुसलचित्तेन आपत्तिसम्भवतो…पे… सुरापानादिअचित्तकसिक्खापदानं लोकवज्जता न सिया’’तिआदि वुत्तं. यञ्च तमत्थं साधेतुं गण्ठिपदेसु आगतवचनं दस्सेत्वा बहुं पपञ्चितं, तं न सारतो पच्चेतब्बं अट्ठकथाहि विरुद्धत्ता. तथा हि ‘‘वत्थुअजाननताय चेत्थ अचित्तकता वेदितब्बा अकुसलेनेव पातब्बताय लोकवज्जता’’ति वुत्तं. यञ्चेतस्स ‘‘सचित्तकपक्खे ¶ अकुसलेनेव पातब्बतो लोकवज्जता’’ति वुत्तं अट्ठकथावचनं, तं न सुन्दरं. ‘‘सचित्तकपक्खे चित्तं अकुसलमेवा’’ति सब्बेसं लोकवज्जानं इधेव पाराजिकट्ठकथाय सामञ्ञतो वत्वा सुरापानसिक्खापदट्ठकथायं ‘‘अकुसलेनेव पातब्बताया’’ति एवं अचित्तकपक्खेपि अकुसलचित्तताय विसेसेत्वा वुत्तत्ता. न हि ‘‘सामञ्ञतो इध वुत्तोव अत्थो पुन सुरापानट्ठकथायम्पि वुत्तो’’ति सक्का वत्तुं वुत्तस्सेव पुन वचने पयोजनाभावा, तदञ्ञेसुपि अचित्तकलोकवज्जेसु वत्तब्बतापसङ्गतो च, नापि एकत्थ वुत्तो नयो तदञ्ञेसुपि एकलक्खणताय वुत्तो एव होतीति ‘‘सुरापानसिक्खापदेयेव (पाचि. ३२६ आदयो) वुत्तो’’ति सक्का वत्तुं अचित्तकलोकवज्जानं सब्बपठमे उय्युत्तसिक्खापदेयेव (पाचि. ३११ आदयो) वत्तब्बतो, सुरापानसिक्खापदेयेव वा वत्वा एसेव नयो सेसेसु अचित्तकलोकवज्जेसुपीति अतिदिसितब्बतो च.

अपिच वुत्तमेवत्थं वदन्तेन ‘‘सचित्तकपक्खे अकुसलेनेव पातब्बताया’’ति पुब्बे वुत्तक्कमेनेव ¶ वत्तब्बं सन्देहादिविगमत्थत्ता पुन वचनस्स. सिक्खापदविसये च विसेसितब्बं विसेसेत्वाव वुच्चति, इतरथा आपत्तानापत्तादिभेदस्स दुविञ्ञेय्यत्ता. तथा हि भिक्खुनीविभङ्गट्ठकथायं ‘‘विनापि चित्तेन आपज्जितब्बत्ता अचित्तकानि, चित्ते पन सति अकुसलेनेव आपज्जितब्बत्ता लोकवज्जानि चेव अकुसलचित्तानि चा’’ति गिरग्गसमज्जादीनं सचित्तकपक्खे एव लोकवज्जता अकुसलचित्तता च विसेसेत्वा वुत्ता, न एवं सुरापानस्स. तस्स पन पक्खद्वयस्सापि साधारणवसेन ‘‘अकुसलेनेव पातब्बताया’’ति वुत्तं, न पन ‘‘सचित्तकपक्खे’’ति विसेसेत्वा. तस्मा इदं सुरापानं सचित्तकाचित्तकपक्खद्वयेपि लोकवज्जं अकुसलचित्तञ्चाति दस्सेतुमेव ‘‘अकुसलेनेव पातब्बताय लोकवज्जता’’ति विसुं वुत्तन्ति सुट्ठु सिज्झति. एतेनेव यं सारत्थदीपनियं ‘‘सचित्तकपक्खे अकुसलेनेव पातब्बताय लोकवज्जता’’ति वुत्तस्स इमस्सेव अधिप्पायस्स पटिपादकमेतन्ति सञ्ञाय इमिना एव हि अधिप्पायेन अञ्ञेसुपि लोकवज्जेसु अचित्तकसिक्खापदेसु अकुसलचित्तता एव वुत्ता, न पन तिचित्तता. तेनेव भिक्खुनीविभङ्गट्ठकथायं ¶ वुत्तं ‘‘गिरग्गसमज्जं चित्तागारसिक्खापदं सङ्घाणि इत्थालङ्कारो गन्धवण्णको वासितकपिञ्ञाको भिक्खुनीआदीहि उम्मद्दनपरिमद्दनानीति इमानि दस सिक्खापदानि अचित्तकानि अकुसलचित्तानि, अयं पनेत्थ अधिप्पायो विनापि चित्तेन आपज्जितब्बत्ता अचित्तकानि, चित्ते पन सति अकुसलेनेव आपज्जितब्बत्ता लोकवज्जानि चेव अकुसलचित्तानि चा’’ति वुत्तं, तम्पि पटिसिद्धं होति तब्बिपरीतस्सेव अत्थस्स यथावुत्तनयेन साधनतो. तस्मा सुरापानस्स अचित्तकपक्खेपि चित्तं अकुसलमेवाति इमं विसेसं दस्सेतुमेव इदं वचनं वुत्तन्ति गहेतब्बं. अयञ्हेत्थ अत्थो वत्थुअजाननताय चेत्थाति एत्थ च-कारो विसेसत्थजोतको अपिचाति इमिना समानत्थो. तस्मा यदिदं अञ्ञेसु अचित्तकलोकवज्जेसु विनापि चित्तेन आपज्जितब्बत्ता अचित्तकानि, चित्ते पन सति अकुसलेनेव आपज्जितब्बत्ता लोकवज्जानि चेव अकुसलचित्तानि चाति लोकवज्जताय अकुसलचित्तताय च लक्खणं वुच्चति, तं एत्थ सुरापानसिक्खापदे नागच्छति, इध पन विसेसो अत्थीति वुत्तं होति. सो कतरोति चे? वत्थुअजाननताय एव वत्थुजाननचित्तेन विनापि आपज्जितब्बताय एव अचित्तकता वेदितब्बा, नत्थेत्थ अचित्तकताय विसेसो. किन्तु वत्थुअजाननसङ्खातअचित्तकपक्खेपि अकुसलचित्तेनेव सुरामेरयस्स अज्झोहरितब्बतायाति इमस्स सिक्खापदस्स सचित्तकपक्खेपि अचित्तकपक्खेपि लोकवज्जता अकुसलचित्तता च वेदितब्बाति अयमेत्थ विसेसो. इध हि ‘‘चित्ते पन सती’’ति अविसेसेत्वा ‘‘अकुसलेनेवा’’ति सामञ्ञतो वुत्तत्ता उभयपक्खेपि लोकवज्जता अकुसलचित्तता च सिद्धाति वेदितब्बा. तेनेव परमत्थजोतिकाय (खु. पा. अट्ठ. २.पच्छिमपञ्चसिक्खापदवण्णना) खुद्दकट्ठकथाय सिक्खापदवण्णनाय ‘‘सुरामेरयमज्जपमादट्ठानं ¶ कायतो च कायचित्ततो चाति द्विसमुट्ठान’’न्ति वुत्तं. सुराति जाननचित्ताभावेनेव हेत्थ चित्तङ्गविरहितो केवलोपि कायो एकसमुट्ठानं वुत्तो, तस्मिञ्च एकसमुट्ठानक्खणेपि याय चेतनाय पिवति, सा एकन्तअकुसला एव होति. तेनेव तत्थेव अट्ठकथायं ‘‘पठमा चेत्थ पञ्च एकन्तअकुसलचित्तसमुट्ठानत्ता पाणातिपातादीनं पकतिवज्जतो वेरमणियो, सेसा पण्णत्तिवज्जतो’’ति एवं पञ्चन्नम्पि सामञ्ञतो अकुसलचित्तता लोकवज्जतासङ्खाता पकतिवज्जता च वुत्ता. अङ्गेसु च जाननङ्गं न वुत्तं. तथा हि ‘‘सुरामेरयमज्जपमादट्ठानस्स ¶ पन सुरादीनं अञ्ञतरं होति मदनीयं, पातुकामताचित्तञ्च पच्चुपट्ठितं होति, तज्जञ्च वायामं आपज्जति, पीते च पविसतीति इमानि चत्तारि अङ्गानी’’ति वुत्तं, न पन सुराति जाननङ्गेन सद्धिं पञ्चाति. यदि हि सुराति जाननम्पि अङ्गं सिया, अवस्समेव तं वत्तब्बं सिया, न च वुत्तं. यथा चेत्थ, एवं अञ्ञासुपि सुत्तपिटकादिअट्ठकथासु कत्थचि जाननङ्गं न वुत्तं. तस्मा ‘‘अकुसलेनेव पातब्बताय लोकवज्जता’’ति इमस्स अट्ठकथापाठस्स अचित्तकपक्खेपि ‘‘अकुसलेनेव पातब्बताय लोकवज्जता’’ति एवमेव अत्थोति निट्ठमेत्थ गन्तब्बं.

अपिच यं गण्ठिपदेसु ‘‘एतं सत्तं मारेस्सामीति तस्मिंयेव पदेसे निपन्नं अञ्ञं मारेन्तस्स पाणसामञ्ञस्स अत्थिताय यथा पाणातिपातो होति, एवं एतं मज्जं पिविस्सामीति अञ्ञं मज्जं पिवन्तस्स मज्जसामञ्ञस्स अत्थिताय अकुसलमेव होति, यथा पन कट्ठसञ्ञाय सप्पं घातेन्तस्स पाणातिपातो न होति, एवं नाळिकेरपानसञ्ञाय मज्जं पिवन्तस्स अकुसलं न होती’’ति पाणातिपातेन सद्धिं सब्बथा समानत्तेन उपमेत्वा वुत्तं, तं अतिविय अयुत्तं सब्बेसं सिक्खापदानं पाणातिपातादिअकुसलानञ्च अञ्ञमञ्ञं समानताय नियमाभावा. पाणातिपातो हि परियायेनापि सिज्झति, न तथा अदिन्नादानं. तं पन आणत्तियापि सिज्झति, न च मेथुनादीसु. तस्मा पयोगङ्गादीहिपि भिन्नानमेव संसट्ठं सब्बथा समीकरणं अयुत्तमेव. ‘‘पाणातिपातो विय अदिन्नादानमेथुनादीनिपि परियायकथादीहि सिज्झन्ती’’ति केनचि वुत्ते तं किन्ति न गय्हति तथा वचनाभावाति चे? इधापि ‘‘तथा पाणातिपातसदिसं सुरापान’’न्ति वचनाभावा इदम्पि न गहेतब्बमेव. किञ्चि अट्ठकथावचनेनेव सिद्धमेवत्थं पटिबाहन्तेन विनयञ्ञुना सुत्तसुत्तानुलोमादीहि तस्स विरोधं दस्सेत्वा पटिबाहेतब्बं, न पन पयोगङ्गादीहि अच्चन्तविभिन्नेन सिक्खापदन्तरेन सह समीकरणमत्तेन. न हि ‘‘सुराति अजानित्वा पिवन्तस्सापि अकुसलमेवा’’ति एत्थ सुत्तादिविरोधो अत्थि, विनयपिटके ताव एतस्स अत्थस्स विरुद्धं सुत्तादिकं न दिस्सति, नापि सुत्तपिटकादीसु.

यं ¶ पनेत्थ केचि वदन्ति ‘‘मनोपुब्बङ्गमा धम्माति (ध. प. १, २) वुत्तत्ता सब्बानि अकुसलानि पुब्बे वीतिक्कमवत्थुं जानन्तस्सेव होन्ती’’ति. तं तेसं सुत्ताधिप्पायानभिञ्ञातमेव ¶ पकासेति. न हि ‘‘मनोपुब्बङ्गमा धम्मा’’ति इदं वचनं पुब्बे वीतिक्कमवत्थुं जानन्तस्सेव अकुसला धम्मा उप्पज्जन्तीति इममत्थं दीपेति, अथ खो कुसलाकुसला धम्मा उप्पज्जमाना उप्पादपच्चयट्ठेन पुब्बङ्गमभूतं सहजातचित्तं निस्सायेव उप्पज्जन्ति, न विना चित्तेनाति इममत्थं दीपेति. न हेत्थ ‘‘सुराति अजानित्वा पिवन्तस्स अकुसलमेवा’’ति वुत्ते सहजातचित्तं विनापि लोभादिअकुसलचेतसिका धम्मा उप्पज्जन्तीति अयमत्थो आपज्जति. येन तं निसेधाय इदं सुत्तं आहरणीयं सिया, अभिधम्मविरोधोपेत्थ नत्थि पुब्बे नामजातिआदिवसेन अजानन्तस्सेव पञ्चविञ्ञाणवीथियं कुसलाकुसलजवनुप्पत्तिवचनतो.

अपिच बालपुथुज्जनानं छसु द्वारेसु उप्पज्जमानानि जवनानि येभुय्येन अकुसलानेव उप्पज्जन्ति. कुसलानि पन तेसं कल्याणमित्तादिउपनिस्सयबलेन अप्पकानेव उप्पज्जन्ति, तुण्हीभूतानम्पि निद्दायित्वा सुपिनं पस्सन्तानम्पि उद्धच्चादिअकुसलजवनस्सेव येभुय्यप्पवत्तितो कुसलाकुसलविरहितस्स जवनस्स तेसं अभावा. अकुसला हि विसयानुगुणं वासनानुगुणञ्च यथापच्चयं समुप्पज्जन्ति, तत्थ किं पुब्बे जाननाजानननिबद्धेन. ये पन जाननादिअङ्गसम्पन्ना पाणातिपातादयो, ये च जाननादिं विनापि सिज्झमाना सुरापानमिच्छादिट्ठिआदयो, ते ते तथा तथा याथावतो ञत्वा सम्मासम्बुद्धेन निद्दिट्ठा, तेसञ्च यथानिद्दिट्ठवसेन गहणे को नाम अभिधम्मविरोधो. एवं सुत्तादिविरोधाभावतो, अट्ठकथाय च वुत्तत्ता यथावुत्तवसेनेवेत्थ अत्थो गहेतब्बो. यदि एवं कस्मा ‘‘सामणेरो जानित्वा पिवन्तो सीलभेदं आपज्जति, न अजानित्वा’’ति अट्ठकथायं वुत्तन्ति? नायं दोसो सीलभेदस्स भगवतो आणायत्तत्ता उक्खित्तानुवत्तिकादीनं सीलभेदो विय. न हि तासं अकुसलुप्पत्तिया एव सीलभेदो होति सङ्घायत्तसमनुभासनानन्तरेयेव विहितत्ता. एवमिधापि जानित्वा पिवने एव विहितो, न अजानित्वा पिवने. अञ्ञो हि सिक्खापदविसयो, अञ्ञो अकुसलविसयो. तेनेव सामणेरानं पुरिमेसु पञ्चसु सिक्खापदेसु एकस्मिं भिन्ने सब्बानिपि सिक्खापदानि भिज्जन्ति. अकुसलं पन यं भिन्नं, तेन एकेनेव होति, नाञ्ञेहि. तस्मा सामणेरस्स ¶ अजानित्वा पिवन्तस्स सीलभेदाभावेपि कम्मपथप्पत्तं अकुसलमेवाति गहेतब्बं.

यं पन सारत्थदीपनियं (सारत्थ. टी. पाराजिककण्ड २.४२) ‘‘सामणेरस्स सुराति अजानित्वा ¶ पिवन्तस्स पाराजिकं नत्थि, अकुसलं पन होती’’ति केहिचि वुत्तवचनं ‘‘तं तेसं मतिमत्त’’न्ति पटिक्खिपित्वा ‘‘भिक्खुनो अजानित्वापि बीजतो पट्ठाय मज्जं पिवन्तस्स पाचित्तियं. सामणेरो जानित्वा पिवन्तो सीलभेदं आपज्जति, न अजानित्वाति एत्तकमेव हि अट्ठकथायं वुत्तं, अकुसलं पन होतीति न वुत्त’’न्ति तत्थ कारणं वुत्तं, तं अकारणं. न हि अट्ठकथायं सामणेरानं जानित्वा पिवने एव सीलभेदो, न अजानित्वाति सीलभेदकथनट्ठाने अकुसलं पन होतीति अवचनं अजाननपक्खे अकुसलाभावस्स कारणं होति, तत्थ पसङ्गाभावा, वत्तब्बट्ठाने एव ‘‘अकुसलेनेव पातब्बताय लोकवज्जता’’ति वुत्तत्ता च. न च ते ‘‘अकुसलं पन होती’’ति वदन्ता आचरिया इमं सामणेरानं सीलभेदप्पकासकं खन्धकट्ठकथापाठमेव गहेत्वा अवोचुं, येन ‘‘एत्तकमेव अट्ठकथायं वुत्त’’न्ति वत्तब्बं सिया, अथ खो सुरापानट्ठकथागतं सुत्तपिटकट्ठकथागतञ्च अनेकविधं वचनं, महाविहारवासीनं परम्परोपदेसञ्च गहेत्वा अवोचुं. भिन्नलद्धिकानं अभयगिरिकादीनं मतञ्हेतं, यदिदं जानित्वा पिवन्तस्सेव अकुसलन्ति गहणं. तस्मा यं वुत्तं केहिचि ‘‘सामणेरस्स सुराति अजानित्वा पिवन्तस्स पाराजिकं नत्थि, अकुसलं पन होती’’ति, तं सुवुत्तन्ति गहेतब्बं.

यञ्च सारत्थदीपनियं (सारत्थ. टी. पाराजिककण्ड २.४२) ‘‘अजानित्वा पिवन्तस्सापि सोतापन्नस्स मुखं सुरा न पविसति कम्मपथप्पत्तअकुसलचित्तेनेव पातब्बतो’’ति केहिचि वुत्तवचनं ‘‘न सुन्दर’’न्ति पटिक्खिपित्वा ‘‘बोधिसत्ते कुच्छिगते बोधिसत्तमातु सीलं विय हि इदम्पि अरियसावकानं धम्मतासिद्धन्ति वेदितब्ब’’न्ति वत्वा धम्मतासिद्धत्तंयेव समत्थेतुं ‘‘भवन्तरेपि हि अरियसावको जीवितहेतुपि नेव पाणं हनति, न सुरं पिवति. सचे पिस्स सुरञ्च खीरञ्च मिस्सेत्वा मुखे पक्खिपन्ति, खीरमेव पविसति, न सुरा. यथा किं? यथा कोञ्चसकुणानं खीरमिस्सके उदके खीरमेव पविसति, न उदकं. इदं योनिसिद्धन्ति चे, इदम्पि धम्मतासिद्धन्ति वेदितब्ब’’न्ति इदं अट्ठकथावचनं दस्सितं, तम्पि न युत्तमेव. यथा हि बोधिसत्तमातु सीलं विय अरियसावकानं धम्मतासिद्धन्ति एत्थ ¶ बोधिसत्तमातु धम्मता नाम बोधिसत्तस्स च अत्तनो च पारमितानुभावेन अकुसलानुप्पत्तिनियमो एव. तथा अरियसावकानम्पि भवन्तरे पाणातिपातादीनं दसन्नं कम्मपथानं अञ्ञेसञ्च अपायहेतुकानं अकुसलानं अच्चन्तप्पहायकस्स मग्गस्स आनुभावेन तंतंसीलवीतिक्कमहेतुकस्स अकुसलस्स अनुप्पत्तिनियमो एव धम्मता. न हि सभाववादीनं धम्मता विय अहेतुकता इध धम्मता नाम. यथा वा एवंधम्मतानये कारणस्स भावे अभावे च कारियस्स भावो अभावो च धम्मता, न अहेतुअप्पच्चयाभावाभावो, एवमिधापि पाणातिपातादिकम्मपथानं हेतुभूतस्स किलेसस्स अच्चन्ताभावेन तेसं अभावो, तदवसेसानं अकुसलानं हेतुनो भावेन भावो च धम्मता ¶ , न अहेतुकता. तस्मा अपायहेतुनो रागस्स अभावेनेव अरियानं अजानित्वापि सुराय अनज्झोहरणन्ति सुवुत्तमेविदं केहिचि ‘‘अजानित्वा पिवन्तस्सापि सोतापन्नस्स मुखं सुरा न पविसति कम्मपथप्पत्तअकुसलचित्तेनेव पातब्बतो’’ति, तं केन हेतुना न सुन्दरं जातन्ति न ञायति, धम्मतासिद्धन्ति वा कथनेन कथं तं पटिक्खित्तन्ति.

यम्पि दीघनिकायट्ठकथायं (दी. नि. अट्ठ. १.३५२) ‘‘सुरञ्च खीरञ्च मिस्सेत्वा…पे… इदं धम्मतासिद्ध’’न्ति वचनं, तम्पि सुरापानस्स अचित्तकपक्खेपि अकुसलचित्तञ्ञेव साधेति. तथा हि ‘‘भवन्तरेपि हि अरियसावको जीवितहेतुपि पाणं न हनति, नादिन्नं आदियति…पे… न सुरं पिवती’’ति वुत्ते ‘‘पुरिमानं ताव चतुन्नं कम्मपथानं सचित्तकत्ता विरमणं सुकरं, पच्छिमस्स पन सुरापानस्स अचित्तकत्ता कथं विरमणं भवेय्या’’ति चोदनासम्भवं मनसिकत्वा वत्थुअजाननवसेन अचित्तकत्तेपि यस्मा कम्मपथप्पत्तअकुसलेनेव सुरा अज्झोहरितब्बा, तादिसी च अकुसलप्पवत्ति अरियसावकस्स मग्गेनेव हता, तस्मास्स परगलं सुराय पविसनं नत्थीति अत्थतो गम्यमानत्थं परिहारवचनं वदता ‘‘सचे पिस्स सुरञ्च खीरञ्चा’’तिआदि वुत्तं. तत्थ खीरमेव पविसति, न सुराति इदं सुराय सब्बथापि परगलप्पवेसाभावदस्सनपरं, न पन सुरामिस्सखीरस्स सुराय वियोजनसामत्थियदस्सनपरं. अयञ्हेत्थ अधिप्पायो – यदि हि सुरामिस्से खीरे किञ्चि पविसेय्य, खीरमेव पविसेय्य, न सुरा. खीरे पन सुराय अवियुत्ते न किञ्चि पविसतीति ¶ . इदं योनिसिद्धन्ति उदकस्स मुखे अप्पविसनं योनिसिद्धं. योनीति चेत्थ जाति अधिप्पेता. तस्मा कोञ्चजातिकानं मुखतुण्डसङ्खातानं रूपधम्मानं खीरमिस्सउदकज्झोहरणहेतुत्ताभावेन तं अप्पविसनं सिद्धन्ति अत्थो. इदम्पि हि खीरमिस्साय सुराय खीरे पविसन्तेपि परगलापविसनन्ति. धम्मतासिद्धन्ति अरियसावकस्स अरूपधम्मानं सुरापिवनहेतुभूतकिलेससहितत्ताभावसङ्खाताय धम्मताय सिद्धं. एवमेत्थ अचित्तकपक्खेपि सुराय अकुसलचित्तेनेव पातब्बतो अरियसावकानं अपिवनं समत्थितन्ति वेदितब्बं. अथापि सिया अजाननपक्खे अकुसलचित्तेन विनाव पातब्बत्तेपि सुराय अपिवनं अरियानं धम्मताति ¶ समत्थनपरमेतन्ति, तं न, अट्ठकथावचनन्तरेहि विरुज्झनतो. यथा हि वचनन्तरेहि न विरुज्झति, तथायेव अत्थो गहेतब्बो.

अपिच पाणातिपातादीनं पञ्चन्नं कम्मपथानं भवन्तरेपि अकरणं अरियानं धम्मतासीलमेव, तेसञ्च यदि सचित्तकतं समानं. सुरापानं विय इतरानिपि चत्तारि अजानन्तेनापि अरियसावकेन न कत्तब्बानि सियुं, तथा च अजानन्तानं अरियानं कुसलाब्याकतचित्तेहिपि विरमणपरमारणपरसन्तकगहणादीसु कायवचीपवत्ति न सम्पज्जेय्य, नो चे सम्पज्जति, चक्खुपालत्थेरस्स चङ्कमनेन पाणवियोगस्स, उप्पलवण्णत्थेरिया बलक्कारेन मग्गेनमग्गफुसनस्स च पवत्तत्ता. तस्मा सुरापानस्स अचित्तकपक्खेपि अकुसलेनेव पातब्बताय सुरा अरियानं परगलं न पविसतीति विसेसेत्वा वुत्तन्ति वेदितब्बं.

ननु वत्थुं जानन्तस्सेव सब्बे कम्मपथा वुत्ताति? न, मिच्छादिट्ठिया विपरीतग्गहणेनेव पवत्तत्ता. कथञ्हि नाम असब्बञ्ञुं सब्बञ्ञुतो, अनिच्चादिं निच्चादितो च गहणन्ती दिट्ठि वत्थुं विजानाति. यदि हि जानेय्य, मिच्छादिट्ठियेव न सिया. सा च कम्मपथेसु गणिताति कुतो जानन्तस्सेव कम्मपथप्पवत्तिनियमो. अथ सब्बञ्ञुं सब्बञ्ञूति गण्हन्तीपि ‘‘अयं सत्तो’’ति तस्स सरूपग्गहणतो दिट्ठिपि वत्थुं विजानातीति चे? न, सुरापानस्सपि ‘‘अयं न सुरा’’ति सरूपग्गहणस्स समानत्ता. ‘‘अय’’न्ति च वत्थुपरामसनेपि ‘‘सुरा’’ति विसेसविजाननाभावा न जानातीति चे? ‘‘अय’’न्ति पुग्गलत्तं जानन्तीपि ‘‘असब्बञ्ञू’’तिपि विसेसजाननाभावा दिट्ठिपि वत्थुं न जानातीति समानमेव. एवञ्हि तेसं ¶ बुद्धाति अहितोति अहितं वा पूरणकस्सपादिं हितो पटिघस्स वा अनुनयस्स वा उप्पादनेपि एसेव नयो. विपल्लासपुब्बकञ्हि सब्बं अकुसलं.

अपिच सुराय पीयमानाय नियमेन अकुसलुप्पादनं सभावो पीताय विय. खीरादिसञ्ञाय पीतसुरस्स पुग्गलस्स मातुभगिनिआदीसुपि रागदोसादिअकुसलप्पबन्धो वत्थुसभावेनेव उप्पज्जति, एवं पीयमानक्खणेपि तिखिणो रागो उप्पज्जतेव, तेनेव सागतत्थेरस्स अजानित्वा पिवनकाले पञ्चाभिञ्ञादिझानपरिहानि, पच्छा च बुद्धादीसु अगारवादिअकुसलप्पबन्धो याव सुराविगमा पवत्तित्थ. तेनेव भगवापि तस्स अगारवादिअकउसलप्पवत्तिदस्सनमुखेन सुरादोसं पकासेत्वा सिक्खापदं पञ्ञपेसि. न हि पञ्चनीवरणुप्पत्तिं विना झानपरिहानि होति. तस्मा अजानन्तस्सापि सुरा पीयमाना पीता च अत्तनो सभावेनेव अकुसलुप्पादिकाति अयमत्थो सागतत्थेरस्स झानपरिहानिया अन्वयतोपि, अरियानं किलेसाभावेन मुखेन सुराय अप्पवेससङ्खातब्यतिरेकतोपि सिज्झतीति निट्ठमेत्थ गन्तब्बं, एवं गहणमेव हि विभज्जवादीमतानुसारं.

यं पन ‘‘जानित्वा पिवन्तस्सेव अकुसल’’न्ति गहणं, तं भिन्नलद्धिकानं अभयगिरिकादीनमेव ¶ मतं, तं पन गण्ठिपदकारकादीहि ‘‘परवादो’’ति अजानन्तेहि अत्तनो मतिया संसन्दित्वा लिखितं विभज्जवादीमण्डलम्पि पविसित्वा यावज्जतना सासनं दूसेति, पुरापि किर इमस्मिम्पि दमिळरट्ठे कोचि भिन्नलद्धिको नागसेनो नाम थेरो कुण्डलकेसीवत्थुं परवादमथननयदस्सनत्थं दमिळकब्बरूपेन कारेन्तो ‘‘इमं सुरापानस्स जानित्वाव पिवने अकुसलनयं, अञ्ञञ्च देसकालादिभेदेन अनन्तम्पि ञेय्यं सब्बञ्ञुतञ्ञाणं सलक्खणवसेनेव ञातुं न सक्कोति ञाणेन परिच्छिन्नत्तेन ञेय्यस्स अनन्तत्तहानिप्पसङ्गतो. अनिच्चादिसामञ्ञलक्खणवसेनेव पन ञातुं सक्कोती’’ति च, ‘‘परमत्थधम्मेसु नामरूपन्तिआदिभेदो विय पुग्गलादिसम्मुतिपि विसुं वत्थुभेदो एवा’’ति च एवमादिकं बहुं विपरीतत्थनयं कब्बाकारस्स कविनो उपदिसित्वा तस्मिं पबन्धे कारणाभासेहि सतिं सम्मोहेत्वा पबन्धापेसि, तञ्च कब्बं निस्साय इमं भिन्नलद्धिकमतं इध विभज्जवादीमते ¶ सम्मिस्सं चिरं पवत्तित्थ. तं पन पच्छा आचरियबुद्धप्पियमहाथेरेन बाहिरब्भरिकं दिट्ठिजालं विघाटेत्वा इध परिसुद्धं सासनं पतिट्ठापेन्तेन सोधितम्पि सारत्थदीपनिया (सारत्थ. टी. पाराजिककण्ड २.४२) विनयटीकाय सुरापानस्स सचित्तकपक्खेयेव चित्तं अकुसलन्ति समत्थनवचनं निस्साय केहिचि विपल्लत्तचित्तेहि पुन उक्खित्तसिरं जातं, तञ्च महाथेरेहि विनिच्छिनित्वा गारय्हवादं कत्वा मद्दित्वा लद्धिगाहके च भिक्खू वियोजेत्वा धम्मेन विनयेन सत्थुसासनेन चिरेनेव वूपसमितं. तेनेवेत्थ मयं एवं वित्थारतो इदं पटिक्खिपिम्ह ‘‘मा अञ्ञेपि विभज्जवादिनो अयं लद्धि दूसेसी’’ति. तस्मा इध वुत्तानि अवुत्तानि च कारणानि सुट्ठु सल्लक्खेत्वा यथा आगमविरोधो न होति, तथा अत्थो गहेतब्बो.

सेसन्ति यस्स वत्थुविजाननचित्तेन सचित्तकपक्खेपि चित्तं अकुसलमेवाति नियमो नत्थि, तं सब्बन्ति अत्थो. रुन्धन्तीति ‘‘तिरच्छानगतित्थिया दोसो नत्थी’’तिआदिना अनापत्तिया लेसग्गहणं निवारेन्ती. द्वारं पिदहन्तीति ‘‘तञ्च खो मनुस्सित्थिया’’तिआदिना (पारा. ४१) लेसग्गहणस्स कारणसङ्खातं द्वारं पिदहन्ती. सोतं पच्छिन्दमानाति तदुभयलेसग्गहणद्वारानं वसेन अविच्छिन्नं वीतिक्कमसोतं पच्छिन्दमाना. गाळ्हतरं करोन्तीति यथावुत्तेहि कारणेहि पठमपञ्ञत्तिसिद्धं आपत्तिञ्ञेव दळ्हं करोन्ती, अनापत्तिया ओकासं अददमानाति अत्थो. सा च यस्मा वीतिक्कमाभावे, अविसयताय अब्बोहारिके वीतिक्कमे च लोकवज्जेपि सिथिलं करोन्ती उप्पज्जति, तस्मा तथा उप्पत्तिं उप्पत्तिकारणञ्च दस्सेन्तो आह अञ्ञत्र अधिमानातिआदि. अञ्ञत्र अधिमानाति इमिस्सा अनुपञ्ञत्तिया ‘‘वीतिक्कमाभावा’’ति कारणं वुत्तं. अञ्ञत्र सुपिनन्ताति इमिस्सा ‘‘अब्बोहारिकत्ता’’ति कारणं वुत्तं. तत्थ वीतिक्कमाभावाति पापिच्छाय अविज्जमानस्स उत्तरिमनुस्सधम्मस्स विज्जमानतो ¶ पकासनवसप्पवत्तविसंवादनाधिप्पायसङ्खातस्स वीतिक्कमस्स अभावतो. अधिमानिकस्स हि अनधिगते अधिगतसञ्ञिताय यथावुत्तवीतिक्कमो नत्थि. अब्बोहारिकत्ताति ‘‘अत्थेसा, भिक्खवे, चेतना, सा च खो अब्बोहारिका’’ति (पारा. २३५) वचनतो मोचनस्सादचेतनाय उपक्कमनस्स च विज्जमानत्तेपि थिनमिद्धेन अभिभूतताय ¶ अवसत्तेन अब्बोहारिकत्ता, आपत्तिकारणवोहाराभावाति अत्थो. वा-सद्दो चेत्थ समुच्चयत्थो दट्ठब्बो, ‘‘अब्बोहारिकत्ता चा’’ति वा पाठो. वुत्ताति दुविधापि चेसा अनुपञ्ञत्ति अनापत्तिकरा वुत्ताति अधिप्पायो.

अकते वीतिक्कमेति आपदासुपि भिक्खूहि सिक्खापदवीतिक्कमे अकते, कुक्कुच्चा न भुञ्जिंसूतिआदीसु विय वीतिक्कमं अकत्वा भिक्खूहि अत्तनो दुक्खुप्पत्तिया आरोचितायाति अत्थो. सिथिलं करोन्तीति पठमं सामञ्ञतो बद्धसिक्खापदं मोचेत्वा अत्तनो विसये अनापत्तिकरणवसेन सिथिलं करोन्ती. द्वारं ददमानाति अनापत्तिया द्वारं ददमाना. अपरापरम्पि अनापत्तिं कुरुमानाति दिन्नेन तेन द्वारेन उपरूपरि अनापत्तिभावं दीपेन्ती. पञ्ञत्तेपि सिक्खापदे उदायिना ‘‘मुहुत्तिकाय वेसिया न दोसो’’ति लेसेन वीतिक्कमित्वा सञ्चरित्तापज्जनवत्थुस्मिं (पारा. २९६ आदयो) पञ्ञत्तत्ता ‘‘कते वीतिक्कमे’’ति वुत्तं. पञ्ञत्तिगतिकाति अत्थतो मूलपञ्ञत्तियेवाति अधिप्पायो.

मक्कटीवत्थुकथावण्णनानयो निट्ठितो.

सन्थतभाणवारो

वज्जिपुत्तकवत्थुकथावण्णना

४३-४४. वज्जिपुत्तकवत्थुकथाय पाळियं ‘‘वेसालिका…पे… मेथुनं धम्मं पटिसेविंसू’’ति एत्थ ते ञातिकुलं गन्त्वा गिहिलिङ्गं गहेत्वा ‘‘गिहिभूता मय’’न्ति सञ्ञाय मेथुनं पटिसेविंसूति गहेतब्बं, तेनाह ञातिब्यसनेनपि फुट्ठातिआदि. ञातीनं विनासो राजदण्डादिकारणेन होतीति आह राजदण्डइच्चादि. धञ्ञहिरञ्ञदासिदासगोमहिंसादिधनानि भोगा नाम, तेसम्पि राजदण्डादिनाव विनासोति आह ‘‘एस नयो दुतियपदेपी’’ति. न सब्बञ्ञुबुद्धोतिआदिना ¶ तीसु वत्थूसु अप्पसन्नाव सासने अभब्बाति सञ्ञाय अत्तनो भब्बतं पकासेन्ता न मयन्तिआदिमाहंसूति वेदितब्बं. ‘‘अट्ठतिंसारम्मणेसू’’ति पाळियं अनागते आलोकाकासकसिणे वज्जेत्वा वुत्तं, तेहि पन ¶ सद्धिं चत्तालीस होन्ति. विभत्ता कुसला धम्माति ‘‘इमस्मिं आरम्मणे इदं होती’’ति विभागसो दस्सिता सउपचारज्झाना महग्गतकुसला धम्मा. गिहिपलिबोधन्ति सहसोकितादिवसेन गिहीसु ब्यावटतं. आवासपलिबोधन्ति सेनासनेसु नवकम्मादिवसेन निच्चब्यावटतं. दुप्परिच्चागानं इमेसं द्विन्नं पलिबोधानं वसेन सब्बेपि पलिबोधा सङ्गहिता एवाति वेदितब्बं.

येनाति कारणेन. असंवासोति इदं तस्मिं अत्तभावे केनचिपि परियायेन भिक्खु हुत्वा भिक्खूहि सद्धिं संवासं नारहतीति इममत्थं सन्धाय वुत्तन्ति आह ‘‘असंवासो’’ति. पञ्ञत्तं समूहनेय्याति ‘‘सो आगतो न पब्बाजेतब्बो’’ति अवत्वा ‘‘न उपसम्पादेतब्बो’’ति एत्तकस्सेव वुत्तत्ता पाराजिकस्स सामणेरभूमि अनुञ्ञाताति विञ्ञायति, तेनाह सामणेरभूमियं पन ठितोतिआदि. ‘‘यो पन भिक्खू’’ति वुत्तत्ता (पारा. ३९) पच्चक्खातसिक्खो यस्मा भिक्खु न होति, मेथुनसेवने च पाराजिकं नापज्जति, तस्मास्स ‘‘आगतो उपसम्पादेतब्बो’’ति उपसम्पदं अनुजानन्तो पाराजिकं न समूहनति नाम, तेनाह ‘‘भिक्खुभावे ठत्वा अविपन्नसीलताया’’ति. उत्तमत्थं अरहत्तं, निब्बानमेव वा.

चतुब्बिधविनयादिकथावण्णना

४५. नीहरित्वाति पाळितो उद्धरित्वा, तथा हि ‘‘पञ्चहुपालि, अङ्गेहि समन्नागतेन भिक्खुना नानुयुञ्जितब्बं. कतमेहि पञ्चहि? सुत्तं न जानाति, सुत्तानुलोमं न जानाती’’तिआदिपाळितो सुत्तं सुत्तानुलोमञ्च नीहरिंसु. ‘‘अनापत्ति एवं अम्हाकं आचरियानं उग्गहो परिपुच्छाति भणती’’ति एवमादितो आचरियवादं. ‘‘आयस्मा उपालि एवमाह – ‘अनापत्ति, आवुसो, सुपिनन्तेना’ति’’ एवमादितो अत्तनो मतिं नीहरिंसु, सा च थेरस्स अत्तनोमति सुत्तेन सङ्गहितत्ता सुत्तं जातं, एवमञ्ञापि सुत्तादीहि सङ्गहिताव गहेतब्बा, नेतराति वेदितब्बं. अथ वा नीहरित्वाति विभजित्वा साट्ठकथं सकलं विनयपिटकं सुत्तादीसु चतूसु पदेसेसु पक्खिपित्वा चतुधा विभजित्वा विनयं पकासेसुं ¶ तब्बिनिमुत्तस्स अभावाति अधिप्पायो. वुत्तन्ति नागसेनत्थेरेन मिलिन्दपञ्हे वुत्तं. कण्ठादिवण्णुप्पत्तिट्ठानकरणादीहि आहरित्वा अत्तनो वचीविञ्ञत्तियाव भासितवचनं आहच्चपदं. रसोति सारो ‘‘पत्तरसो’’तिआदीसु (ध. स. ६२८-६३०) विय, पटिक्खित्तअनुञ्ञातसुत्तसारोति ¶ अत्थो, रसोति वा लक्खणं पटिवत्थुकं अनुद्धरित्वा लक्खणानुलोमेन वुत्तत्ता. धम्मसङ्गाहकादिआचरियवंसेन आभता अट्ठकथा आचरियवंसोति आह ‘‘आचरियवंसोति आचरियवादो’’ति.

विनयपिटके पाळीति इध अधिकारवसेन वुत्तं. सेसपिटकेसुपि सुत्तादिचतुनया यथानुरूपं लब्भन्तेव. महापदेसाति महाओकासा महाविसया, ते अत्थतो ‘‘यं, भिक्खवे’’तिआदिपाळिवसेन अकप्पियानुलोमतो कप्पियानुलोमतो च पुग्गलेहि नयतो तथा तथा गय्हमाना अत्थनया एव. ते हि भगवता सरूपतो अवुत्तेसुपि पटिक्खित्तानुलोमेसु, अनुञ्ञातानुलोमेसु च सेसेसु किच्चेसु निवत्तिपवत्तिहेतुताय महागोचराति ‘‘महापदेसा’’ति वुत्ता, न पन ‘‘यं, भिक्खवे, मया इदं न कप्पती’’तिआदिना वुत्ता साधिप्पाया पाळियेव तस्सा सुत्ते पविट्ठत्ता. ‘‘सुत्तानुलोमम्पि सुत्ते ओतारेतब्बं…पे… सुत्तमेव बलवतर’’न्ति (पारा. अट्ठ. १.४५) हि वुत्तं, न हेसा साधिप्पाया पाळि सुत्ते ओतारेतब्बा, न गहेतब्बा वा होति, येनायं सुत्तानुलोमं सिया. तस्मा इमं पाळिअधिप्पायं निस्साय पुग्गलेहि गहिता यथावुत्तअत्थाव सुत्तानुलोमं. तप्पकासकत्ता पन अयं पाळिपि सुत्तानुलोमन्ति गहेतब्बं, तेनाह ये भगवता एवं वुत्तातिआदि. यं भिक्खवेतिआदिपाळिनयेन हि पुग्गलेहि गहेतब्बा ये अकप्पियानुलोमादयो अत्था वुत्ता, ते महापदेसाति अत्थो.

भगवतो पकिण्णकदेसनाभूता च सुत्तानुलोमभूता च अट्ठकथा. यस्मा धम्मसङ्गाहकत्थेरेहि पाळिवण्णनाक्कमेन सङ्गहेत्वा वुत्ता, तस्मा ‘‘आचरियवादो’’ति वुत्ता, एतेन च अट्ठकथा सुत्तसुत्तानुलोमेसु अत्थतो सङ्गय्हतीति वेदितब्बा. यथा च एसा, एवं अत्तनोमतिपि पमाणभूता. न हि भगवतो वचनं वचनानुलोमञ्च अनिस्साय अग्गसावकादयोपि अत्तनो ञाणबलेन सुत्ताभिधम्मविनयेसु ¶ कञ्चि सम्मुतिपरमत्थभेदं अत्थं वत्तुं सक्कोन्ति, तस्मा सब्बम्पि वचनं सुत्ते सुत्तानुलोमे च सङ्गय्हति. विसुं पन अट्ठकथादीनं सङ्गहितत्ता तदवसेसं सुत्तसुत्तानुलोमतो गहेत्वा चतुधा विनयो निद्दिट्ठो. सुत्तादयो निस्सायेव पवत्तापि अत्तनोमति तेसु सरूपेन अनागतत्ता वुत्तं ‘‘सुत्तसुत्तानुलोमआचरियवादे मुञ्चित्वा’’ति, तेनाह ‘‘अनुबुद्धिया नयग्गाहेना’’ति. तत्थ सुत्तादीनि अनुगताय एव बुद्धिया तेहि लद्धनयग्गाहेन चाति अत्थो.

थेरवादोति महासुमत्थेरादीनं गाहो. सुत्तादिं निस्सायेव विपरीततोपि अत्तनोमति उप्पज्जतीति ¶ आह तं पनातिआदि. अत्थेनाति अत्तना नयग्गहितेन अत्थेन. पाळिन्ति अत्तनो गाहस्स निस्सयभूतं साट्ठकथं पाळिं. पाळियाति तप्पटिक्खेपत्थं परेनाहटाय साट्ठकथाय पाळिया, अत्तना गहितं अत्थं निस्साय पाळिञ्च संसन्दित्वाति अत्थो. आचरियवादेति अत्तना परेन च समुद्धटअट्ठकथाय. ओतरति चेव समेति चाति अत्तना उद्धटेहि संसन्दनवसेन ओतरति, परेन उद्धटेन समेति. सब्बदुब्बलाति असब्बञ्ञुपुग्गलस्स दोसवासनाय याथावतो अत्थसम्पटिपत्तिअभावतो वुत्तं. पमादपाठवसेन आचरियवादस्स सुत्तानुलोमेन असंसन्दनापि सियाति आह ‘‘इतरो न गहेतब्बो’’ति.

समेन्तमेव गहेतब्बन्ति ये सुत्तेन संसन्दन्ति, एवरूपाव अत्था महापदेसतो उद्धरितब्बाति दस्सेति तथा तथा उद्धटअत्थानमेव सुत्तानुलोमत्ता, तेनाह ‘‘सुत्तानुलोमतो हि सुत्तमेव बलवतर’’न्ति. अप्पटिवत्तियन्ति अप्पटिबाहियं. कारकसङ्घसदिसन्ति पमाणत्ता सङ्गीतिकारकसङ्घसदिसं. बुद्धानं ठितकालसदिसन्ति धरमानकबुद्धसदिसन्ति अत्थो. सकवादी सुत्तं गहेत्वा कथेतीतिआदीसु यो यथाभूतमत्थं गहेत्वा कथनसीलो, सो सकवादी. सुत्तन्ति सङ्गीतित्तयारुळ्हं पाळिवचनं. परवादीति महाविहारवासी वा होतु अञ्ञनिकायवासी वा, यो विपरीततो अत्थं गहेत्वा कथनसीलो, सोव इध ‘‘परवादी’’ति वुत्तो. सुत्तानुलोमन्ति सङ्गीतित्तयारुळ्हं वा अनारुळ्हं वा यंकिञ्चि विपल्लासतो वा वञ्चनाय वा ‘‘सङ्गीतित्तयागतमिद’’न्ति दस्सियमानं सुत्तानुलोमं. केचि ‘‘अञ्ञनिकाये सुत्तानुलोम’’न्ति ¶ वदन्ति, तं न युत्तं सकवादीपरवादीनं उभिन्नम्पि सङ्गीतित्तयारुळ्हसुत्तादीनं एव गहेतब्बतो. तथा हि वक्खति ‘‘तिस्सो सङ्गीतियो आरुळ्हं पाळिआगतं पञ्ञायति, गहेतब्ब’’न्तिआदि. न हि सकवादी अञ्ञनिकायसुत्तादिं पमाणतो गण्हाति, येन तेसु सुत्तादीसु दस्सितेसु तत्थ ठातब्बं भवेय्य, वक्खति च ‘‘परो तस्स अकप्पियभावसाधकं सुत्ततो बहुं कारणञ्च विनिच्छयञ्च दस्सेति…पे… ‘साधू’ति सम्पटिच्छित्वा अकप्पियेयेव ठातब्ब’’न्ति (पारा. अट्ठ. १.४५). तस्मा परवादिनापि सङ्गीतित्तये अनारुळ्हम्पि अनारुळ्हमिच्चेव दस्सीयति, केवलं तस्स तस्स सुत्तादिनो सङ्गीतित्तये अनागतस्स कूटता, आगतस्स च ब्यञ्जनच्छायाय अञ्ञथा अधिप्पाययोजना च विसेसो. तत्थ च यं कूटं, तं अपनीयति. यं अञ्ञथा योजितं, तस्स विपरीततासन्दस्सनत्थं तदञ्ञेन सुत्तादिना संसन्दना करीयति. यो पन परवादिना गहितो अधिप्पायो सुत्तन्तादिना संसन्दति, सो सकवादिनापि अत्तनो गाहं विस्सज्जेत्वा गहेतब्बोति उभिन्नम्पि सङ्गीतित्तयागतमेव सुत्तादिपमाणन्ति वेदितब्बं. तेनेव कथावत्थुप्पकरणे सकवादे पञ्च सुत्तसतानि परवादे पञ्चाति (ध. स. अट्ठ. निदानकथा; कथा. अट्ठ. निदानकथा) ¶ सुत्तसहस्सम्पि अधिप्पायग्गहणनानत्तेन सङ्गीतित्तयागतमेव गहितं, न निकायन्तरे किञ्चीति.

खेपन्ति ‘‘किं इमिना’’ति पटिक्खेपं छड्डनं. गरहन्ति ‘‘किमेस बालो जानाती’’ति निन्दनं. सुत्ते ओतारेतब्बन्ति यस्स सुत्तस्स अनुलोमनतो इदं सुत्तानुलोमं अकासि, तस्मिं, तदनुरूपे वा अञ्ञतरस्मिं सुत्ते अत्तना गहितं सुत्तानुलोमं अत्थतो संसन्दनवसेन ओतारेतब्बं, ‘‘इमिना च इमिना च कारणेन इमस्मिं सुत्ते संसन्दती’’ति संसन्दित्वा दस्सेतब्बन्ति अत्थो. अयन्ति सकवादी. परोति परवादी. आचरियवादो सुत्ते ओतारेतब्बोति यस्स सुत्तस्स वण्णनावसेन अयं आचरियवादो पवत्तो, तस्मिं, तादिसे च अञ्ञतरस्मिं सुत्ते पुब्बापरअत्थसंसन्दनवसेन ओतारेतब्बं. गारय्हाचरियवादोति पमादलिखितो, भिन्नलद्धिकेहि वा ठपितो, एस नयो सब्बत्थ.

यं किञ्चि कूटसुत्तं बाहिरकसुत्तादिवचनं न गहेतब्बन्ति दस्सेतुं सुत्तं सुत्तानुलोमे ओतारेतब्बन्तिआदि वुत्तं. गुळ्हवेस्सन्तरादीनि महासङ्घिकादिभिन्नलद्धिकानं पकरणानि. आदि-सद्देन गुळ्हउम्मग्गादीनं गहणं ¶ . सकवादी सुत्तं गहेत्वा कथेति, परवादीपि सुत्तन्तिआदिना अञ्ञेपि वादालम्बना वुत्तनयेन सक्का ञातुन्ति इध न वुत्ता.

एवं सुत्तसुत्तानुलोमादिमुखेन सामञ्ञतो विवादं दस्सेत्वा इदानि विसेसतो विवादवत्थुं तब्बिनिच्छयमुखेन सुत्तादीनञ्च दस्सेतुं अथ पनायं कप्पियन्तिआदि वुत्तं. सुत्ते च सुत्तानुलोमे चाति एत्थ च-कारो विकप्पत्थो, तेन आचरियवादादीनम्पि सङ्गहो, तेनाह ‘‘कारणञ्च विनिच्छयञ्च दस्सेती’’ति. तत्थ कारणन्ति सुत्तादिनयं निस्साय अत्तनोमतिया उद्धटं हेतुं. विनिच्छयन्ति अट्ठकथाविनिच्छयं. कारणच्छायाति सुत्तादीसु ‘‘कप्पिय’’न्ति गाहस्स, ‘‘अकप्पिय’’न्ति गाहस्स च निमित्तभूतं किच्छेन पटिपादनीयं अविभूतकारणं कारणच्छाया, कारणपतिरूपकन्ति अत्थो. विनयञ्हि पत्वाति इमस्स विवरणं कप्पियाकप्पियविचारणमागम्माति. रुन्धितब्बन्ति कप्पियसञ्ञाय वीतिक्कमकरणं रुन्धितब्बं, तंनिवारणचित्तं दळ्हतरं कातब्बं. सोतं पच्छिन्दितब्बन्ति तत्थ वीतिक्कमप्पवत्ति पच्छिन्दितब्बा. गरुकभावेति अकप्पियभावे. सुत्तविनिच्छयकारणेहीति सुत्तेन अट्ठकथाविनिच्छयेन च लद्धकारणेहि. एवन्तिआदि यथावुत्तस्स अत्थस्स निगमनवचनं. अतिरेककारणन्ति सुत्तादीसु पुरिमं पुरिमं अतिरेककारणं नाम, बहुकारणं वा.

वाचुग्गतन्ति ¶ वाचाय उग्गतं, तत्थ निरन्तरं ठितन्ति अत्थो. ‘‘सुत्तं नाम सकलं विनयपिटक’’न्ति वुत्तत्ता पुन सुत्ततोति तदत्थपटिपादकं सुत्ताभिधम्मपाळिवचनं अधिप्पेतं. अनुब्यञ्जनतोति इमस्स विवरणं परिपुच्छतो च अट्ठकथातो चाति. तत्थ परिपुच्छाति आचरियस्स सन्तिका पाळिया अत्थसवनं. अट्ठकथाति पाळिमुत्तकविनिच्छयो. तदुभयम्पि हि पाळिं अनुगन्त्वा अत्थस्स ब्यञ्जनतो ‘‘अनुब्यञ्जन’’न्ति वुत्तं. विनयेति विनयाचारे, तेनेव वक्खति विनयं अविजहन्तो अवोक्कमन्तोतिआदि. तत्थ पतिट्ठानं नाम सञ्चिच्च आपत्तिया अनापज्जनादि होतीति आह ‘‘लज्जीभावेन पतिट्ठितो’’ति, तेन लज्जी होतीति वुत्तं होति. विनयधरस्स लक्खणे वत्तब्बे किं इमिना लज्जीभावेनाति आह अलज्जी हीतिआदि. तत्थ बहुस्सुतोपीति इमिना पठमलक्खणसमन्नागमं दस्सेति. लाभगरुतायातिआदिना विनये ठितताय अभावे पठमलक्खणयोगो किच्चकरो न होति, अथ ¶ खो अकिच्चकरो अनत्थकरो एवाति दस्सेति. सङ्घभेदस्स पुब्बभागो कलहो सङ्घराजि.

वित्थुनतीति वित्थम्भति, नित्थुनति वा सन्तिट्ठितुं न सक्कोति, तेनाह यं यन्तिआदि. आचरियपरम्पराति आचरियानं विनिच्छयपरम्परा, तेनेव वक्खति ‘‘अत्तनो मतिं पहाय…पे… यथा आचरियो च आचरियाचरियो च पाळिञ्च परिपुच्छञ्च वदन्ति, तथा ञातुं वट्टती’’ति. न हि आचरियानं नाममत्ततो परम्पराजानने पयोजनमत्थि. पुब्बापरानुसन्धितोति पुब्बवचनस्स अपरवचनेन सह अत्थसम्बन्धजाननतो. अत्थतोति पदत्थपिण्डत्थअधिप्पेतत्थादितो. कारणतोति तदत्थुपपत्तितो. थेरवादङ्गन्ति थेरवादपटिपाटिं, तेसं विनिच्छयपटिपाटिन्ति अत्थो.

इमेहि च पन तीहि लक्खणेहीति एत्थ पठमेन लक्खणेन विनयस्स सुट्ठु उग्गहितभावो वुत्तो. दुतियेनस्स लज्जीभावेन चेव अचलताय च पतिट्ठितता. ततियेन पाळिअट्ठकथासु अनुरूपेन अनागतम्पि तदनुलोमतो आचरियेहि दिन्ननयतो विनिच्छिनितुं समत्थता. ओतिण्णे वत्थुस्मिन्ति चोदनावसेन वीतिक्कमवत्थुस्मिं सङ्घमज्झे ओतिण्णे. चोदकेन चुदितकेन च वुत्ते वत्तब्बेति एवं ओतिण्णे वत्थुं निस्साय चोदकेन ‘‘दिट्ठं सुत’’न्तिआदिना चुदितकेन ‘‘अत्थि नत्थी’’तिआदिना च यं वत्तब्बं, तस्मिं वत्तब्बे वुत्तेति अत्थो. थुल्लच्चयदुब्भासितानं मातिकाय अनागतत्ता ‘‘पञ्चन्नं आपत्तीन’’न्ति वुत्तं. तिकदुक्कटन्ति ‘‘अनुपसम्पन्ने उपसम्पन्नसञ्ञी उज्झायति वा खीयति वा आपत्ति दुक्कटस्सा’’तिआदिना (पाचि. १०६ थोकं विसदिसं) आगतं तिकदुक्कटं. अञ्ञतरं वा आपत्तिन्ति ‘‘काले विकालसञ्ञी आपत्ति दुक्कटस्स, काले वेमतिको आपत्ति दुक्कटस्सा’’तिआदिकं (पाचि. २५०) दुकदुक्कटं ¶ सन्धाय वुत्तं. अन्तरापत्तिन्ति तस्मिं तस्मिं सिक्खापदे आगतवत्थुवीतिक्कमं विना अञ्ञस्मिं वत्थुवीतिक्कमे निदानतो पभुति विनीतवत्थुपरियोसाना अन्तरन्तरा वुत्तं आपत्तिं. इध पन ‘‘वत्थुं ओलोकेती’’ति विसुं गहितत्ता तदवसेसा अन्तरापत्तीति गहिता. पटिलातं उक्खिपतीति इदं विसिब्बनसिक्खापदे (पाचि. ३५०-३५१) आगतं. तत्थ डय्हमानं अलातं अग्गिकपालादितो बहि पतितं अविज्झातमेव पटिउक्खिपति ¶ , पुन यथाठाने ठपेतीति अत्थो. विज्झातं पन पक्खिपन्तस्स पाचित्तियमेव. अनापत्तिन्ति एत्थ अन्तरन्तरा वुत्ता अनापत्तिपि अत्थि, ‘‘अनापत्ति, भिक्खवे, इद्धिमस्स इद्धिविसये’’तिआदि (पारा. १५९) विय सापि सङ्गय्हति.

पाराजिकापत्तीति न ताव वत्तब्बन्ति इदं आपन्नपुग्गलेन लज्जीधम्मे ठत्वा यथाभूतं आविकरणेपि दुब्बिनिच्छयं अदिन्नादानादिं सन्धाय वुत्तं. यं पन मेथुनादीसु विजाननं, तं वत्तब्बमेव, तेनाह मेथुनधम्मवीतिक्कमो हीतिआदि. यो पन अलज्जिताय पटिञ्ञं अदत्वा विक्खेपं करोति, तस्स आपत्ति न सक्का ओळारिकापि विनिच्छिनितुं, याव सो यथाभूतं नावि करोति, सङ्घस्स च आपत्तिसन्देहो न विगच्छति, ताव नासितकोव भविस्सति. सुखुमाति चित्तपरिवत्तिया सुखुमताय सुखुमा. तेनाह ‘‘चित्तलहुका’’ति, चित्तं तस्स लहुकन्ति अत्थो. तेति वीतिक्कमे. तंवत्थुकन्ति अदिन्नादानादिमूलकं. यं आचरियो भणति, तं करोहीतिआदि सब्बं लज्जीपेसलं कुक्कुच्चकमेव सन्धाय वुत्तं. यो याथावतो पकासेत्वा सुद्धिमेव गवेसति, तेनापि, पाराजिकोसीति न वत्तब्बोति अनापत्तिकोटियापि सङ्कियमानत्ता वुत्तं, तेनेव ‘‘पाराजिकच्छाया’’ति वुत्तं. सीलानि सोधेत्वाति यस्मिं वीतिक्कमे पाराजिकासङ्का वत्तति, तत्थ पाराजिकाभावपक्खं गहेत्वा देसनावुट्ठानगामिनीनं आपत्तीनं सोधनवसेन सीलानि सोधेत्वा. द्वत्तिंसाकारन्ति पाकटभावतो उपलक्खणवसेन वुत्तं, यं किञ्चि अभिरुचितं मनसिकातुं वट्टतेव. कम्मट्ठानं घटियतीति विप्पटिसारमूलकेन विक्खेपेन अन्तरन्तरा खण्डं अदस्सेत्वा पबन्धवसेन चित्तेन सङ्घटियति. सङ्खाराति विपस्सनाकम्मट्ठानवसेन वुत्तं. सापत्तिकस्स हि पगुणम्पि कम्मट्ठानं न सुट्ठु उपट्ठाति, पगेव पाराजिकस्स. तस्स हि विप्पटिसारनिन्नताय चित्तं एकग्गं न होति. एकस्स पन वितक्कविक्खेपादिबहुलस्स सुद्धसीलस्सपि चित्तं न समाधियति, तं इध पाराजिकमूलकन्ति न गहेतब्बं. कतपापमूलकेन विप्पटिसारेनेवेत्थ चित्तस्स असमाधियनं सन्धाय ‘‘कम्मट्ठानं न घटियती’’ति वुत्तं, तेनाह विप्पटिसारग्गिनातिआदि. अत्तनाति चित्तेन करणभूतेन पुग्गलो कत्ता जानाति, पच्चत्ते वा करणवचनं, अत्ता सयं पजानातीति अत्थो.

चतुब्बिधविनयादिकथावण्णनानयो निट्ठितो.

पदभाजनीयवण्णना

यो ¶ ¶ विय दिस्सतीति यादिसो, यं-सद्दत्थे यथा-सद्दो वत्ततीति आह ‘‘येन वा तेन वा युत्तो’’ति. येन तेनाति हि पदद्वयेन अनियमतो यं-सद्दत्थोव दस्सितो. वासधुरयुत्तोति विपस्सनाधुरयुत्तो. या जाति अस्साति यंजाति, पुग्गलो, सोव यंजच्चो सकत्थे यपच्चयं कत्वा. गोत्तवसेन येन वा तेन वा गोत्तेन यथागोत्तो वा तथागोत्तो वा होतूति सम्बन्धो. सीलेसूति पकतीसु. अथ खोति इदं किन्तूति इमस्मिं अत्थे. किं वुत्तं होतीति अत्थो. इमस्मिं अत्थेति इमस्मिं पाराजिकविसये. एसोति यथावुत्तेहि पकारेहि युत्तो. अरियायाति ‘‘उद्दिस्स अरिया तिट्ठन्ति, एसा अरियानं याचना’’ति एवं वुत्ताय, न, ‘‘देहि मे’’ति कपणाय. लिङ्गसम्पटिच्छनेनाति ‘‘भिक्खं चरिस्सामी’’ति चित्ताभावेपि भिक्खाहारनिस्सितपब्बज्जालिङ्गस्स सम्पटिच्छनेन. काजभत्तन्ति काजेहि आनीतभत्तं. अधम्मिकायाति अधिसीलसिक्खादिभिक्खुगुणाभावतो वुत्तं, तेनाह ‘‘अभूताया’’ति. ‘‘मयं भिक्खू’’ति वदन्ता पटिञ्ञामत्तेनेव भिक्खू, न अत्थतोति अत्थो. इदञ्च ‘‘मयं भिक्खू’’ति पटिजाननस्सापि सम्भवतो वुत्तं. ‘‘मयं भिक्खू’’ति अप्पटिजानन्तापि हि भिक्खुवोहारनिमित्तस्स लिङ्गस्स गहणेन चेव भिक्खूनं दिन्नपच्चयभागग्गहणादिना च भिक्खुपटिञ्ञा एव नाम होन्ति. तथा हि वुत्तं पुग्गलपञ्ञत्तिअट्ठकथायं –

‘‘‘अब्रह्मचारी ब्रह्मचारिपटिञ्ञो’ति अञ्ञे ब्रह्मचारिनो सुनिवत्थे सुपारुते सुम्भकपत्तधरे गामनिगमजनपदराजधानीसु पिण्डाय चरित्वा जीविकं कप्पेन्ते दिस्वा सयम्पि तादिसेन आकारेन तथा पटिपज्जनतो ‘अहं ब्रह्मचारी’ति पटिञ्ञं देन्तो विय होति. ‘अहं भिक्खू’ति वत्वा उपोसथग्गादीनि पविसन्तो पन ब्रह्मचारिपटिञ्ञो होतियेव, तथा सङ्घिकं लाभं गण्हन्तो’’ति (पु. प. अट्ठ. ९१).

तस्मा एवरूपेहि पटिञ्ञाय भिक्खूहि गोत्रभुपरियोसानेहि सद्धिं सम्भोगपरिभोगो न वट्टति, अलज्जीपरिभोगोव होति. सञ्चिच्च आपत्तिआपज्जनादिअलज्जीलक्खणं पन उक्कट्ठानं भिक्खूनं वसेन वुत्तं सामणेरादीनम्पि ¶ अलज्जीवोहारदस्सनतो. ‘‘अलज्जीसामणेरेहि हत्थकम्मम्पि न कारेतब्ब’’न्ति हि वुत्तं. यथाविहितपटिपत्तियं अतिट्ठनञ्हि सब्बसाधारणं अलज्जीलक्खणं. दुस्सीला लिङ्गग्गहणतो पट्ठाय यथाविहितपटिपत्तिया अभावतो एकन्ता लज्जिनोव महासङ्घिकादिनिकायन्तरिका विय, लिङ्गत्थेनकादयो विय, च. याव ११ च तेसं भिक्खुपटिञ्ञा अनुवत्तति, ताव भिक्खु एव, तेहि च परिभोगो अलज्जिपअभोगोव, तेसञ्च भिक्खुसङ्घसञ्ञाय दिन्नं सङ्घे दिन्नं नाम होति. वुत्तञ्हि भगवता –

‘‘भविस्सन्ति खो पनानन्द, अनागतमद्धानं गोत्रभुनो कासावकण्ठा दुस्सीला पापधम्मा, तेसु दुस्सीलेसु सङ्घं उद्दिस्स दानं दस्सन्ति, तदापाहं, आनन्द, सङ्घगतं दक्खिणं असङ्ख्येय्यं अप्पमेय्यं वदामी’’ति (म. नि. ३.३८०).

भगवतो सङ्घं उद्दिस्स दिन्नत्ता दक्खिणा असङ्ख्येय्या अप्पमेय्या जाता. दुस्सीलानं दिन्नत्ता नाति चे? न, तेसु सङ्घं उद्दिस्साति गोत्रभूनं पटिग्गाहकत्तेन परामट्ठत्ता, इतरथा ‘‘येसु केसुचि गहट्ठेसु वा पब्बजितेसु वा सङ्घं उद्दिस्सा’’ति वत्तब्बतापसङ्गतो, तथा च ‘‘तदापाहं, आनन्दा’’ति हेट्ठिमकोटिदस्सनस्स पयोजनं न सिया. तस्मा गोत्रभूनम्पि अभावे सङ्घं उद्दिस्स दानं नत्थि, हेट्ठिमकोटिया तेसुपि दिन्ना सङ्घगता दक्खिणा असङ्ख्येय्या, न ततो परं सिज्झतीति तेपि पटिञ्ञाय भिक्खु एवाति गहेतब्बं.

ब्रह्मघोसन्ति उत्तमघोसं, ब्रह्मुनो घोससदिसं वा घोसं. एहि भिक्खूति ‘‘भिक्खू’’तिसम्बोधनं. संसारे भयइक्खक तस्स भयस्स सब्बसो विनासनत्थं तिसरणं, सासनं वा एहि मनसा ‘‘ताणं लेण’’न्ति पविस उपगच्छ. उपगन्त्वापि चर ब्रह्मचरियन्ति सासनब्रह्मचरियं मग्गब्रह्मचरियञ्च चरस्सु. भण्डूति मुण्डितकेसो. वासीति दन्तकट्ठादिच्छेदनवासि. बन्धनन्ति कायबन्धनं. युत्तो योगो समाधिपञ्ञावसेन सो युत्तयोगो, तस्स अट्ठेते परिक्खाराति सेसो. सरीरे पटिमुक्केहियेव उपलक्खितोति सेसो. ‘‘तीणि सतानी’’ति वत्तब्बे गाथाबन्धसुखत्थं ‘‘तीणि सत’’न्ति वुत्तं.

तस्माति ¶ भगवा हेट्ठा वुत्तं परामसति. हेट्ठा हि ‘‘अहं खो पन, कस्सप, जानञ्ञेव वदामि ‘जानामी’ति, पस्सञ्ञेव वदामि ‘पस्सामी’’’ति (सं. नि. २.१५४) वुत्तं, तं परामसति, यस्मा अहं जानं वदामि, तस्माति अत्थो. इहाति इमस्मिं सासने. तिब्बन्ति महन्तं. पच्चुपट्ठितं भविस्सतीति थेरादिउपसङ्कमनतो पुरेतरमेव तेसु यंनून मे हिरोत्तप्पं उपट्ठितं भविस्सतीति अत्थो. कुसलूपसंहितन्ति अनवज्जधम्मनिस्सितं. अट्ठिं कत्वाति अत्तानं तेन धम्मेन अट्ठिकं कत्वा, तं वा धम्मं ‘‘एस मे अत्थो’’ति अत्थं कत्वा. ओहितसोतोति धम्मे निहितसोतो. एवञ्हि ते, कस्सप, सिक्खितब्बन्ति ञाणसोतञ्च पसादसोतञ्च ओदहित्वा ‘‘धम्मं सक्कच्चमेव सुणिस्सामी’’ति एवमेव तया सिक्खितब्बं. सातसहगता च मे कायगतासतीति ¶ असुभेसु चेव आनापाने च पठमज्झानवसेन सुखसम्पयुत्तकायगतासति. यं पनेतस्स ओवादस्स सक्कच्चपटिग्गहणं, अयमेव थेरस्स पब्बज्जा च उपसम्पदा च अहोसि (सं. नि. अट्ठ. २.२.१५४).

उद्धुमातकपटिभागारम्मणं झानं उद्धुमातकसञ्ञा. कसिणारम्मणं रूपावचरज्झानं रूपसञ्ञा. इमेति सञ्ञासीसेन निद्दिट्ठा इमे द्वे झानधम्मा. सोपाको च भगवता पुट्ठो ‘‘रूपावचरभावेन एकत्था, ब्यञ्जनमेव नान’’न्ति आह. आरद्धचित्तोति आराधितचित्तो. गरुधम्मपटिग्गहणादिउपसम्पदा उपरि सयमेव आवि भविस्सति.

सब्बन्तिमेन परियायेनाति सब्बन्तिमेन परिच्छेदेन. ञत्तिचतुत्था कम्मवाचा उपसम्पदाकम्मस्स कारणत्ता ठानं, तस्स ठानस्स अरहं अनुच्छविकन्ति वत्थुदोसादिविनिमुत्तकम्मं ‘‘ठानारह’’न्ति वुत्तं वत्थादिदोसयुत्तस्स कम्मस्स सभावतो कम्मवाचारहत्ताभावा. अथ वा ठानन्ति निब्बानप्पत्तिहेतुतो सिक्खत्तयसङ्गहं सासनं वुच्चति, तस्स अनुच्छविकं कम्मं ठानारहं. यथाविहितलक्खणेन हि कम्मेन उपसम्पन्नोव सकलं सासनं समादाय परिपूरेतुमरहति. तस्मा परिसुद्धकम्मवाचापरियोसानं सब्बं सङ्घकिच्चं ठानारहं नाम, तेनाह ‘‘सत्थुसासनारहेना’’ति, सीलादिसकलसासनपरिपुण्णस्स अनुच्छविकेनाति अत्थो. अयं इमस्मिं अत्थेति ञत्तिचतुत्थकम्मेन उपसम्पन्नस्सेव सब्बसिक्खापदेसु वुत्तत्ता किञ्चापि एहिभिक्खूपसम्पदादीहि उपसम्पन्नानं सुद्धसत्तानं पण्णत्तिवज्जसिक्खापदवीतिक्कमेपि अभब्बता वा दोसाभावो वा ¶ सद्दतो पञ्ञायति, तथापि अत्थतो तेसम्पि पण्णत्तिवज्जेसु, लोकवज्जेसुपि वा सुरापानादिलहुकेसु मग्गुप्पत्तितो पुब्बे असञ्चिच्चादिना आपत्तिआपज्जनं सिज्झतियेव. तथा हि ‘‘द्वे पुग्गला अभब्बा आपत्तिं आपज्जितुं बुद्धा च पच्चेकबुद्धा च. द्वे पुग्गला भब्बा आपत्तिं आपज्जितुं भिक्खू च भिक्खुनियो चा’’ति (परि. ३२२) वुत्तं. ञत्तिचतुत्थेन कम्मेन उपसम्पन्नोति इदं पन सब्बसिक्खापदवीतिक्कमारहे सब्बकालिके च भिक्खू गहेत्वा येभुय्यवसेन वुत्तं. निरुत्तिवसेनाति निब्बचनवसेन. अभिलापवसेनाति वोहारवसेन. गुणवसेनाति भिक्खुवोहारनिमित्तानं गुणानं वसेन.

साजीवपदभाजनीयवण्णना

विवट्टूपनिस्सया सीलादयो लोकियेहि अभिविसिट्ठत्ता अधिसीलादिवोहारेन वुत्ताति दस्सेतुं ¶ कतमं पनातिआदि आरद्धं. तत्थ पञ्चङ्गदसङ्गसीलन्ति अबुद्धुप्पादकाले सीलं सन्धाय वुत्तं तस्स विवट्टूपनिस्सयत्ताभावा. यं पन बुद्धुप्पादे रतनत्तयगुणं तथतो ञत्वा सासने सुनिविट्ठसद्धाहि उपासकोपासिकाहि चेव सामणेरसिक्खमानाहि च रक्खियमानं पञ्चङ्गअट्ठङ्गदसङ्गसीलं, तम्पि अधिसीलमेव मग्गुप्पत्तिहेतुतो. विपस्सनामग्गुप्पत्तिनिमित्तताय हि पातिमोक्खसंवरसीलं लोकियानं सीलेहि अधिसीलं जातं अधिचित्तं विय. न हि विपस्सनामग्गनिमित्ततं मुञ्चित्वा लोकियचित्ततो अधिचित्तस्स अञ्ञो कोचि विसेसो उपलब्भति, तदुभयञ्च अनादिमतो संसारवट्टस्स अत्तादिसारविरहितताय तिलक्खणब्भाहतत्तं, ‘‘अहं ममा’’ति आकारेन पवत्तअविज्जातण्हादिदोसमूलकत्तञ्च, तंदोसमूलविद्धंसनसमत्थाय सीलचित्तबलोपत्थद्धाय विपस्सनाय उक्कंसेनेव तस्स संसारवट्टस्स विगमञ्च, तदुपदेसकस्स सम्मासम्बुद्धस्स सब्बञ्ञुतादिअपरिमितगुणगणयोगेन अविपरीतसद्धम्मदेसकत्तञ्च याथावतो ञत्वा पटिपन्नेन समादाय सिक्खितब्बताय विवट्टूपनिस्सयं जातं, न अञ्ञेन कारणेन, तञ्च विवट्टूपनिस्सयत्तं यदि सासने पञ्चसीलादिस्सापि समानं, किमिदं अधिसीलं न सिया. पञ्चसीलादिमत्ते ठितानञ्हि अनाथपिण्डिकादीनं गहट्ठानम्पि मग्गो उप्पज्जति. न हि अधिसीलाधिचित्तं विना मग्गुप्पत्ति होति, तञ्च किञ्चापि केसञ्चि ¶ अनुपनिस्सयताय तस्मिं अत्तभावे मग्गुप्पत्तिया हेतु न होति, तथापि भवन्तरे अवस्सं होतेवाति अधिसीलमेव कालं करोन्तानं कल्याणपुथुज्जनानं पातिमोक्खसंवरसीलं विय, तेनाह बुद्धुप्पादेयेव च पवत्ततीतिआदि. विवट्टं पत्थेत्वा रक्खियमानम्पि पञ्चसीलादि बुद्धुप्पादेयेव पवत्तति. न हि तं पञ्ञत्तिन्तिआदि पन उक्कट्ठवसेन सब्बं पातिमोक्खं सन्धाय वुत्तं. तदेकदेसभूतम्पि हि पाणातिपातादिन्नादानादिगहट्ठसीलम्पि. बुद्धायेव विनये पाराजिकसुत्तविभङ्गादीसु आगतवसेन सब्बसो कायवचीद्वारेसु मग्गुप्पत्तिया विबन्धकअज्झाचारसोतं विच्छिन्दित्वा मग्गुप्पत्तिया पदट्ठानभावेन पञ्ञपेतुं सक्कोन्ति, न अञ्ञे. मग्गुप्पत्तिं सन्धाय हिस्स अधिसीलता वुत्ता. तेनाह ‘‘पातिमोक्खसंवरतोपि च मग्गफलसम्पयुत्तमेव सीलं अधिसील’’न्ति. तस्सेव हि अधिसीलन्ति अब्यवधानेन मग्गाधिट्ठानाति. इध अनधिप्पेतन्ति इमस्मिं पठमपाराजिकविसये ‘‘सिक्खा’’ति अनधिप्पेतं.

लोकियअट्ठसमापत्तिचित्तानीति सासनसभावं अजानन्तेहि लोकियजनेहि समापज्जितब्बानि अट्ठ रूपारूपज्झानसम्पयुत्तचित्तानि सन्धाय वुत्तं. न हि महग्गतेसु लोकियलोकुत्तरभेदो अत्थि, येन लोकियविसेसनं लोकुत्तरनिवत्तनं सिया. तस्मा सासनिकेहि समापज्जितब्बमहग्गतज्झाननिवत्तनमेव लोकियविसेसनं कतं. यथा चेत्थ, एवं कामावचरानि पन अट्ठ कुसलचित्तानीति एत्थापि लोकियविसेसनं कातब्बमेव. अयमेव हि अधिचित्ततो ¶ चित्तस्स भेदो, यं सासनं अजानन्तस्स पुग्गलस्स समुप्पज्जनं. एवञ्च अबुद्धुप्पादेपि सासनसभावं जानन्तानं पच्चेकबुद्धादीनम्पि सीलचित्तानं अधिसीलाधिचित्तता समत्थिता होति. न विना बुद्धुप्पादाति इदं पन अञ्ञेसं अभिसमयहेतुभावेन पच्चेकबुद्धबोधिसत्तादीनं देसनासामत्थियाभावतो वुत्तं. आयतिं वासनाहेतुं पन सीलचित्तं तेपि देसेन्तियेव, तञ्च मग्गहेतुताय अधिसीलाधिचित्तम्पि होन्तं अप्पकताय विप्फारिकताबाहुजञ्ञत्ताभावेन अब्बोहारिकन्ति ‘‘बुद्धुप्पादेयेवा’’ति अवधारणं कतन्ति वेदितब्बं. न हि तंसमापन्नोतिआदिअट्ठकथावचनेहि इध अधिचित्तनिद्देसे, उपरि अधिपञ्ञानिद्देसे च मग्गफलसम्पयुत्तअधिचित्तअधिपञ्ञानमेव पटिक्खेपतो लोकियाधिचित्ताधिपञ्ञानं ¶ इध अधिप्पेतता, तं द्वयं समापन्नस्सापि मेथुनधम्मसमापज्जनसभावो च विञ्ञायति, पाळियं पन ‘‘यायं अधिसीलसिक्खा, अयं इमस्मिं अत्थे अधिप्पेता सिक्खा’’ति वुत्तत्ता लोकियापि अधिचित्ताधिपञ्ञा अनधिप्पेताति विञ्ञायति. तस्मा पाळियं अट्ठकथायञ्च एवमधिप्पायो वेदितब्बो – ‘‘मेथुनं धम्मं पटिसेविस्सामी’’ति चित्ते उप्पन्नमत्ते लोकियं अधिचित्तं अधिपञ्ञा च परिहायति, अधिसीलं पन चित्तुप्पादमत्तेन न परिहायतीति पाळियं अधिसीलसिक्खाव वुत्ता. अट्ठकथायं पन पटिलद्धलोकुत्तरमग्गस्स भिक्खुनो ‘‘मेथुनं पटिसेविस्सामी’’ति चित्तम्पि न उप्पज्जति सब्बसो अकुप्पधम्मत्ता, पुथुज्जनानं समापत्तिलाभीनम्पि केनचि कारणेन उप्पज्जति कुप्पधम्मत्ताति इमं विसेसं दस्सेतुं ‘‘न हि तंसमापन्नो’’ति लोकुत्तराव पटिक्खित्ताति वेदितब्बं.

अत्थि दिन्नन्ति एत्थ दिन्नन्ति दानचेतना अधिप्पेता, तस्स दिन्नस्स फलं अत्थीति अत्थो. एस नयो अत्थि यिट्ठन्ति एत्थापि. आदि-सद्देन हुतादीनं सङ्गहो. तत्थ यिट्ठन्ति महायागो सब्बसाधारणं महादानमेव. हुतन्ति पहोनकसक्कारो, अत्तनो वा होतु, परेसं वा दस अकुसलकम्मपथा, सब्बेपि वा अकुसला धम्मा अनत्थुप्पादनतो न सकं कम्मं नाम, तब्बिपरीता कुसला धम्मा सकं नाम, तदुभयम्पि वा कुसलाकुसलं कम्मस्सकोम्हीतिआदिवचनतो सति संसारप्पवत्तियं अधिमुच्चनट्ठेन सत्तानं सकन्ति एवं कम्मस्सकताय सकभावे अत्तनो सन्तकताय उप्पज्जनकञाणं कम्मस्सकतञ्ञाणं, उपलक्खणमत्तञ्चेतं. सासननिस्सिता पन सब्बापि वट्टगामिनिकुसलपञ्ञा कम्मस्सकतञ्ञाणे पविट्ठा. सासननिस्सिता हि विवट्टगामिनी सब्बापि पञ्ञा ‘‘सच्चानुलोमिकञाण’’न्ति वुच्चति. सा एव च अधिपञ्ञा तदवसेसं सब्बं कम्मस्सकतञ्ञाणन्ति वेदितब्बं, तेनेव भगवा ‘‘कम्मस्सकतञ्ञाणं सच्चानुलोमिकञाणं मग्गसमङ्गिस्स ञाणं फलसमङ्गिस्स ञाण’’न्ति सब्बम्पि ञाणचतुक्केयेव सङ्गहेसि. तिलक्खणाकारपरिच्छेदकं पन विपस्सनाञाणन्ति इदं पन मग्गस्स ¶ आसन्नपच्चयताय उक्कट्ठवसेन वुत्तं. तदितरासञ्हि रतनत्तयानुस्सरणादिपञ्ञानम्पि मग्गहेतुताय अधिपञ्ञता समानावाति गहेतब्बं.

साजीवपदभाजनीयवण्णनानयो निट्ठितो.

पच्चक्खानविभङ्गवण्णना

दुब्बल्ये ¶ आविकतेति यंनूनाहं बुद्धं पच्चक्खेय्यन्तिआदिना दुब्बलभावे पकासिते. मुखारुळ्हताति लोकजनानं सत्तट्ठातिआदीसु मुखारुळ्हञायेनाति अधिप्पायो. दिरत्ततिरत्तन्ति (पाचि. ५२) एत्थ यथा अन्तरन्तरा सहसेय्यावसेन तिरत्तं अग्गहेत्वा निरन्तरमेव तिस्सो रत्तियो अनुपसम्पन्नेन सद्धिं सहसेय्याय अरुणुट्ठापनवसेन तिरत्तग्गहणत्थं ‘‘दिरत्ततिरत्त’’न्ति अब्यवधानेन वुत्तन्ति दिरत्तग्गहणस्स पयोजनम्पि सक्का गहेतुं, एवमिधापि दुब्बल्यं अनाविकत्वाति इमस्सापि गहणस्स पयोजनमत्थेवाति दस्सेतुं यस्मा वा सिक्खापच्चक्खानस्सातिआदि वुत्तं.

इदानि दुब्बल्यं अनाविकत्वाति इमस्स पुरिमपदस्सेव विवरणभावं विनापि विसुं अत्थसब्भावं दस्सेतुं अपिचातिआदि वुत्तं. विसेसाविसेसन्ति एत्थ येन वाक्येन दुब्बल्याविकम्ममेव होति, न सिक्खापच्चक्खानं, तत्थ सिक्खापच्चक्खानदुब्बल्याविकम्मानं अञ्ञमञ्ञं विसेसो होति. येन पन वचनेन तदुभयम्पि होति, तत्थ नेवत्थि विसेसो अविसेसोपि, तं विसेसाविसेसं. ‘‘कठ किच्छजीवने’’ति धातूसु पठितत्ता वुत्तं ‘‘किच्छजीविकप्पत्तो’’ति. उक्कण्ठनञ्हि उक्कण्ठा, तं इतो गतोति उक्कण्ठितो, किच्छजीविकं पत्तोति अत्थो. उद्धं गतो कण्ठो एतिस्साति उक्कण्ठा, अनभिरतिया वजे निरुद्धगोगणो विय गमनमग्गं गवेसन्तो पुग्गलो उक्कण्ठो होति, तं उक्कण्ठं. अनभिरतिं इतोतिपि उक्कण्ठितोति अत्थं दस्सेन्तो आह – ‘‘उद्धं कण्ठं कत्वा विहरमानो’’ति. सा च उक्कण्ठता विक्खेपेनेवाति विक्खित्तोतिआदि वुत्तं.

समणभावतोति उपसम्पदतो. भावविकप्पाकारेनाति भिक्खुभावतो चवित्वा यं यं गिहिआदिभावं पत्तुकामो ‘‘अहं अस्स’’न्ति अत्तनो भवनं विकप्पेति, तेन तेन गिहिआदिआकारेन, अत्तनो भवनस्स विकप्पनाकारेनाति अधिप्पायो.

४६. पाळियं ¶ यदि पनाहन्ति अहं यदि बुद्धं पच्चक्खेय्यं, साधु वतस्साति अत्थो. अपाहं, हन्दाहन्ति एत्थापि वुत्तनयेनेव अत्थो गहेतब्बो. ‘‘होति मे बुद्धं पच्चक्खेय्य’’न्ति मम चित्तं उप्पज्जतीति वदति.

५०. न ¶ रमामीति पब्बज्जाय दुक्खबहुलताय सुखाभावं दस्सेति. नाभिरमामीति पब्बज्जाय विज्जमानेपि अनवज्जसुखे अत्तनो अभिरतिअभावं दस्सेति.

५१. तेनेव वचीभेदेनाति वचीभेदं कत्वापि अञ्ञेन कायप्पयोगेन विञ्ञापनं निवत्तेति. अयं सासनं जहितुकामोतिआदिना भासाकोसल्लाभावेन सब्बसो पदत्थावबोधाभावेपि ‘‘अयं अत्तनो पब्बजितभावं जहितुकामो इमं वाक्यभेदं करोती’’ति एत्तकं अधिप्पेतत्थमत्तं चेपि सो ताव जानाति, पच्चक्खानमेव होतीति दस्सेति. तेनाह ‘‘एत्तकमत्तम्पि जानाती’’ति. पदपच्छाभट्ठन्ति पदपरावत्ति, मागधभासतो अवसिट्ठा सब्बापि भासा ‘‘मिलक्खभासा’’ति वेदितब्बा. खेत्तमेव ओतिण्णन्ति सिक्खापच्चक्खानस्स रुहनट्ठानभूतं खेत्तमेव ओतिण्णं.

दूतन्ति मुखसासनं. सासनन्ति पण्णसासनं, भित्तिथम्भादीसु अक्खरं वा छिन्दित्वा दस्सेति. पच्चक्खातुकामताचित्ते धरन्तेयेव वचीभेदसमुप्पत्तिं सन्धाय ‘‘चित्तसम्पयुत्त’’न्ति वुत्तं, चित्तसमुट्ठानन्ति अत्थो. नियमितानियमितवसेन विजाननभेदं दस्सेतुमाह यदि अयमेव जानातूतिआदि. अयञ्च विभागो वदति विञ्ञापेतीति एत्थ यस्स वदति, तस्सेव विजाननं अधिप्पेतन्ति इमिना वुत्तनयेन लद्धोति दट्ठब्बं, न हेत्थ एकस्स वदति अञ्ञस्स विञ्ञापेतीति अयमत्थो सम्भवति. ‘‘तेसु एकस्मिं जानन्तेपी’’ति वुत्तत्ता ‘‘द्वेयेव जानन्तु एको मा जानातू’’ति एवं द्विन्नम्पि जनानं नियमेत्वा आरोचितेपि तेसु एकस्मिम्पि जानन्ते पच्चक्खानं होतियेवाति गहेतब्बं. परिसङ्कमानोति ‘‘वारेस्सन्ती’’ति आसङ्कमानो. समयञ्ञूति सासनसङ्केतञ्ञू, इध पन अधिप्पायमत्तजाननेनापि समयञ्ञू नाम होति, तेनाह उक्कण्ठितोतिआदि. तस्मा बुद्धं पच्चक्खामीतिआदिखेत्तपदानं सब्बसो अत्थं ञत्वापि सचे ‘‘भिक्खुभावतो चवितुकामताय एस वदती’’ति अधिप्पायं न जानाति, अप्पच्चक्खाताव होति सिक्खा. अत्थं पन अजानित्वापि ‘‘उक्कण्ठितो वदती’’ति तं जानाति, पच्चक्खाताव होति सिक्खा. सोतविञ्ञाणवीथिया सद्दमत्तग्गहणमेव, अत्थग्गहणं पन मनोविञ्ञाणवीथिपरम्परायाति आह तङ्खणञ्ञेवातिआदि.

५३. वण्णपट्ठानन्ति ¶ ¶ सत्थुगुणवण्णप्पकासकं पकरणं. उपालिगाथासूति उपालिसुत्ते उपालिगहपतिना धीरस्स विगतमोहस्सातिआदिना वुत्तगाथासु. यथारुतन्ति पाळियं वुत्तमेवाति अत्थो. अनन्तबुद्धीतिआदीनि वण्णपट्ठाने आगतनामानि. धीरन्तिआदीनि (म. नि. २.७६) पन उपालिगाथासु. तत्थ बोधि वुच्चति सब्बञ्ञुतञ्ञाणं, सा जाननहेतुत्ता पञ्ञाणं एतस्साति बोधिपञ्ञाणो. स्वाक्खातं धम्मन्तिआदीसु धम्म-सद्दो स्वाक्खातादिपदानं धम्मवेवचनभावं दस्सेतुं वुत्तो. तस्मा स्वाक्खातं पच्चक्खामीतिआदिना वुत्तेयेव वेवचनेन पच्चक्खानं नाम होति. धम्म-सद्देन सह योजेत्वा वुत्ते पन यथारुतवसेन पच्चक्खानन्ति वेदितब्बं. सुप्पटिपन्नं सङ्घन्तिआदीसुपि एसेव नयो. कुसलं धम्मन्तिआदीनिपि कुसला धम्मा अकुसला धम्मातिआदिधम्ममेव (ध. स. तिकमातिका १) सन्धाय वुत्तनामानि, इतरथा अकुसलधम्मपच्चक्खाने दोसाभावप्पसङ्गतोति, तेनाह चतुरासीतिधम्मक्खन्धसहस्सेसूतिआदि. पठमपाराजिकन्तिआदिना सिक्खापदानंयेव गहणं वेदितब्बं, न आपत्तीनं.

यस्स मूलेनाति यस्स सन्तिके. आचरियवेवचनेसु यो उपज्झं अदत्वा आचरियोव हुत्वा पब्बाजेसि, तं सन्धाय ‘‘यो मं पब्बाजेसी’’ति वुत्तं. तस्स मूलेनाति तस्स सन्तिके. ओकल्लकोति खुप्पिपासादिदुक्खातुरानं किसलूखसरीरवेसानं गहट्ठमनुस्सानं अधिवचनं. मोळिबद्धोति बद्धकेसकलापो गहट्ठो. कुमारकोति कुमारावत्थो अतिविय दहरो सामणेरो. चेल्लकोति ततो किञ्चि महन्तो. चेटकोति मज्झिमो. मोळिगल्लोति महासामणेरो. समणुद्देसोति अविसेसतो सामणेराधिवचनं. असुचिसङ्कस्सरसमाचारोति असुचि हुत्वा ‘‘मया कतं परे जानन्ति नु खो, न नु खो’’ति अत्तना, ‘‘असुकेन नु खो इदं कत’’न्ति परेहि च सङ्काय सरितब्बेन अनुस्सरितब्बेन समाचारेन युत्तो. सञ्जातरागादिकचवरत्ता कसम्बुजातो. कोण्ठोति दुस्सीलाधिवचनमेतं.

५४. तिहेतुकपटिसन्धिकाति अतिखिप्पं जाननसमत्थे सन्धाय वुत्तं, न दुहेतुकानं तत्थ असम्भवतो. सभागस्साति पुरिसस्स. विसभागस्साति मातुगामस्स. पोत्थकरूपसदिसस्साति मत्तिकादीहि कतरूपसदिसस्स ¶ . गरुमेधस्साति आरम्मणेसु लहुप्पवत्तिया अभावतो दन्धगतिकताय गरुपञ्ञस्स, मन्दपञ्ञस्साति वुत्तं होति.

इदानेत्थ सिक्खापच्चक्खानवारस्स पाळियं अट्ठकथायञ्च वुत्तनयानं सम्पिण्डनत्थवसेन एवं विनिच्छयो वेदितब्बो – तत्थ हि सामञ्ञा चवितुकामोतिआदीहि पदेहि चित्तनियमं दस्सेति. बुद्धन्तिआदीहि पदेहि खेत्तनियमं, पच्चक्खामि धारेतीति एतेन कालनियमं, वदतीति ¶ इमिना पयोगनियमं, अलं मे बुद्धेन, किं नु मे, न ममत्थो, सुमुत्ताहन्तिआदीहि अनामट्ठकालवसेनपि पच्चक्खानं होतीति दस्सेति, विञ्ञापेतीति इमिना विजानननियमं, उम्मत्तको सिक्खं पच्चक्खाति उम्मत्तकस्स सन्तिकेतिआदीहि पुग्गलनियमं, सो च नप्पटिविजानातीतिआदीहि विजानननियमाभावेन पच्चक्खानाभावं दस्सेति, दवायातिआदीहि चित्तनियमाभावेन, सावेतुकामो न सावेतीति इमिना पयोगनियमाभावेन, अविञ्ञुस्स सावेति विञ्ञुस्स न सावेतीति एतेहि यं पुग्गलं उद्दिस्स सावेति, तस्सेव सवने सीसं एति, नाञ्ञस्साति. सब्बसो वा पन न सावेति अप्पच्चक्खाता होति सिक्खाति इदं पन चित्तादिनियमेनेव सिक्खापच्चक्खानं होति, न अञ्ञथाति दस्सनत्थं वुत्तं. तस्मा चित्तखेत्तकालपयोगपुग्गलविजाननवसेन सिक्खाय पच्चक्खानं ञत्वा तदभावेन अप्पच्चक्खानं वेदितब्बं.

कथं? उपसम्पन्नभावतो चवितुकामताचित्तेनेव हि सिक्खापच्चक्खानं होति, न दवा वा रवा वा भणन्तस्स. एवं चित्तवसेन सिक्खापच्चक्खानं होति, न तदभावेन. तथा बुद्धं पच्चक्खामीतिआदिना वुत्तानं बुद्धादीनं सब्रह्मचारिपरियोसानानं चतुद्दसन्नञ्चेव गिहीति मं धारेहीतिआदिना वुत्तानं गिहिआदीनं असक्यपुत्तियपरियोसानानं अट्ठन्नञ्चाति इमेसं द्वावीसतिया खेत्तपदानं यस्स कस्सचि सवेवचनस्स वसेन तेसु यं किञ्चि वत्तुकामस्स यं किञ्चि वदतोपि सिक्खापच्चक्खानं होति. एवं खेत्तवसेन सिक्खापच्चक्खानं होति, न तदभावेन. तत्थ यदेतं ‘‘पच्चक्खामीति च मं धारेहीति चा’’ति वुत्तं वत्तमानकालवचनं, यानि च ‘‘अलं मे बुद्धेन, किं नु मे बुद्धेन, न ममत्थो बुद्धेन, सुमुत्ताहं बुद्धेना’’तिआदिना नयेन आख्यातवसेन कालं अनामसित्वा पुरिमेहि चुद्दसहि पदेहि सद्धिं योजेत्वा वुत्तानि अलं मेतिआदीनि चत्तारि पदानि, तेसंयेव च सवेवचनानं वसेन ¶ पच्चक्खानं होति, न पन ‘‘पच्चक्खासि’’न्ति वा, ‘‘पच्चक्खिस्स’’न्ति वा, ‘‘मं धारेसी’’ति वा, ‘‘मं धारेस्ससी’’ति वा, ‘‘यंनून पच्चक्खेय्य’’न्ति वातिआदीनि अतीतानागतपरिकप्पवचनानि भणन्तस्स. एवं वत्तमानकालवसेन चेव अनामट्ठकालवसेन च पच्चक्खानं होति, न तदभावेन. पयोगो पन दुविधो कायिको वाचसिको, तत्थ बुद्धं पच्चक्खामीतिआदिना नयेन याय कायचि भासाय वचीभेदं कत्वा वाचसिकपयोगेनेव पच्चक्खानं होति, न अक्खरलिखनं वा हत्थमुद्दादिदस्सनं वा कायपयोगं करोन्तस्स. एवं वाचसिकपयोगेनेव पच्चक्खानं होति, न तदभावेन.

पुग्गलो ¶ पन दुविधो यो च पच्चक्खाति, यस्स च पच्चक्खाति, तत्थ यो पच्चक्खाति, सो सचे उम्मत्तकखित्तचित्तवेदनट्टानं अञ्ञतरो न होति, यस्स पन पच्चक्खाति, सो सचे मनुस्सजातिको होति, न च उम्मत्तकादीनं अञ्ञतरो सम्मुखीभूतो च, सिक्खापच्चक्खानं होति. न हि असम्मुखीभूतस्स दूतेन वा पण्णेन वा आरोचनं रुहति. एवं यथावुत्तपुग्गलवसेन पच्चक्खानं होति, न तदभावेन. विजाननम्पि नियमितानियमितवसेन दुविधं. तत्थ यस्स येसं वा नियमेत्वा इमस्स इमेसं वा आरोचेमीति वदति, सचे ते यथा पकतिया लोके मनुस्सा वचनं सुत्वा आवज्जनसमये जानन्ति, एवं तस्स वचनानन्तरमेव ‘‘अयं उक्कण्ठितो’’ति वा, ‘‘गिहिभावं पत्थयती’’ति वा येन केनचि आकारेन मनुस्सजातिको वचनत्थं जानाति, पच्चक्खाताव होति सिक्खा. अथ अपरभागे ‘‘किं इमिना वुत्त’’न्ति चिन्तेत्वा जानन्ति, अञ्ञे वा जानन्ति, अप्पच्चक्खाताव होति. अनियमेत्वा आरोचेन्तस्स पन सचे वुत्तनयेन यो कोचि मनुस्सजातिको वचनत्थं जानाति, पच्चक्खाता होति सिक्खा, एवं जाननवसेन पच्चक्खानं होति, न तदभावेन. इति इमेसं वुत्तप्पकारानं चित्तादीनं वसेनेव सिक्खापच्चक्खानं होति, न अञ्ञथाति दट्ठब्बं.

सिक्खापच्चक्खानवण्णनानयो निट्ठितो.

मूलपञ्ञत्तिवण्णना

५५. इतो ¶ पट्ठायाति दुट्ठुल्लपदतो पट्ठाय. मेथुनधम्मो यथा सरूपेनेव दुट्ठुल्लं, एवं दस्सनादिदुट्ठुल्लधम्मपरिवारत्तापि दुट्ठुल्लन्ति दस्सेतुं यस्मातिआदि वुत्तं. अवस्सुतानन्ति मेथुनरागेन तिन्तानं. परियुट्ठितानन्ति मेथुनरागेन अभिभूतचित्तानं. मेथुन-सद्दस्स सदिससद्दपअयायत्ता वुत्तं ‘‘सदिसान’’न्ति, रत्ततादीहि सदिसानन्ति अत्थो. इदञ्च येभुय्यतो वुत्तं उभोसु अञ्ञतरस्स रागाभावेपि इतरस्स मेथुनसेवनसंसिद्धितो. मेथुन-सद्दो वा उभयसद्दपअयायो, मेथुनं युगळं यमकं उभयन्ति हि अत्थतो एकं, तेनाह ‘‘उभिन्नं रत्तान’’न्ति. ‘‘द्वयंद्वयसमापत्ती’’ति हि पाळियम्पि वुत्तं. निमित्तेनाति भुम्मत्थे करणवचनं, इत्थिनिमित्ते अत्तनो निमित्तं पवेसेतीति अत्थो. निमित्तं अङ्गजातन्ति अत्थतो एकं. तिलफलन्ति सासपमत्तं तिलबीजं अधिप्पेतं, न कोससहितं फलन्ति आह ‘‘तिलबीजमत्तम्पी’’ति. अल्लोकासेति सभावेन पिहितस्स निमित्तस्स पकतिवातेन असम्फुट्ठे तिन्तप्पदेसे. तादिसो पदेसो ¶ सचेपि केनचि वातादिविकारेन सुक्खति, तथापि अनल्लोकासोति उपक्कमतो पाराजिकमेव.

वेमज्झन्ति यथा चत्तारि पस्सानि अफुसन्तो पवेसेति, एवं कतविवरस्स इत्थिनिमित्तस्स अब्भन्तरतलं वुच्चति. पुरिसनिमित्ते पन मज्झन्ति अग्गकोटिं सन्धाय वदति. उपरीति मज्झिमपब्बेन समिञ्जित्वा पवेसियमानस्स अङ्गजातस्स समिञ्जितङ्गुलिया मज्झिमपब्बपिट्ठिसदिसअग्गकोटियेव. हेट्ठा पवेसेन्तोति इत्थिनिमित्तस्स हेट्ठाभागेन छुपियमानं पवेसेन्तो, यथा इत्थिनिमित्तस्स अल्लोकासं हेट्ठिमतलं तिलबीजमत्तम्पि अत्तनो निमित्तेन छुपति, एवं पवेसेन्तोति अत्थो. छुपनमेव हेत्थ पवेसनं, एवं सेसेसुपि. मज्झेन पवेसेन्तोति अब्भन्तरतलेन छुपियमानं पवेसेन्तो, यथा अब्भन्तरतलं छुपति, एवं पवेसेन्तोति अत्थो. कत्थचि अच्छुपन्तं पवेसेत्वा आकासगतमेव नीहरन्तस्स नत्थि पाराजिकं, दुक्कटं पन होति छिन्नसीसवत्थुस्मिं (पारा. ७३) विय. मज्झेनेव छुपन्तं पवेसेन्तोति अग्गकोटिया छुपन्तं पवेसेन्तो. मज्झिमपब्बपिट्ठिया सङ्कोचेत्वाति निमित्तं अत्तनो मज्झिमपब्बपिट्ठिया ¶ समिञ्जित्वा उपरिभागेन छुपन्तं पवेसेन्तोपि. किं विय? समिञ्जितङ्गुलि वियाति योजना. अथ वा मज्झिमपब्बपिट्ठिया समिञ्जितङ्गुलि वियाति सम्बन्धो, समिञ्जितङ्गुलिं वा मज्झिमपब्बपिट्ठिया पवेसेन्तो वियातिपि योजेतब्बं. उपरिभागेनाति सङ्कोचितस्स निमित्तस्स उपरिकोटिया.

इदानि पुरिसनिमित्तस्स हेट्ठा वुत्तेसु छसु ‘‘उपरी’’ति वुत्तस्स छट्ठस्स ठानस्स वसेन विसुं चत्तारि पस्सानि गहेत्वा पुरिसनिमित्ते दसट्ठानभेदं दस्सेन्तो तत्थातिआदिमाह. हेट्ठा पन अगहितग्गहणवसेन छ ठानानि वुत्तानि. तुलादण्डसदिसं पवेसेन्तस्सापीति असमिञ्जित्वा उजुकं पवेसेन्तस्स. चम्मखीलन्ति एळकादीनं गीवाय विय निमित्ते जातं चम्मङ्कुरं, ‘‘उण्णिगण्डो’’तिपि वदन्ति. ‘‘उपहतकायप्पसाद’’न्ति अवत्वा नट्ठकायप्पसादन्ति वचनेन उपादिन्नभावे सति केनचि पच्चयेन उपहतेपि कायप्पसादे उपहतिन्द्रियवत्थुस्मिं (पारा. ७३) विय पाराजिकमेवाति दस्सेति. इत्थिनिमित्तस्स पन नट्ठेपि उपादिन्नभावे सति मतसरीरे विय पाराजिकक्खेत्तता न विजहतीति वेदितब्बा. मेथुनस्सादेनाति इदं कायसंसग्गरागे सति सङ्घादिसेसो होतीति वुत्तं. बीजानीति अण्डानि.

मुखं अपिधायाति पमादेन समुप्पन्नम्पि हासं बीजनिया पटिच्छादनम्पि अकत्वा निसीदनं अगारवन्ति वुत्तं. अथ वा अपिधायाति पिदहित्वा, बीजनिया मुखं पटिच्छादेत्वा हसमानेन ¶ न निसीदितब्बन्ति अत्थो. दन्तविदंसकन्ति दन्ते दस्सेत्वा. गब्भितेनाति ‘‘अयुत्तकथा’’ति सङ्कोचं अनापज्जन्तेन, निरवसेसाधिप्पायकथने सञ्जातुस्साहेनाति अत्थो.

अनुपञ्ञत्तिवण्णना

पाराजिकवत्थुभूताति येसं तीसु मग्गेसु तिलबीजमत्तम्पि निमित्तस्स पवेसोकासो होति, ते इत्थिपुरिसादिभेदा सब्बे सङ्गय्हन्ति, न इतरे. इध पन तिरच्छानगतायाति-पाळिपदानुरूपतो न सब्बातिआदिना इत्थिलिङ्गवसेन वुत्तं. गोनसाति सप्पविसेसा, येसं पिट्ठीसु महन्तमहन्तानि मण्डलानि होन्ति. कच्छपमण्डूकानं चतुप्पदत्तेपि ओदकतासामञ्ञेन ¶ अपदेहि सह गहणं. मुखसण्ठानन्ति ओट्ठचम्मसण्ठानं. वणसङ्खेपन्ति वणसङ्गहं. वणे थुल्लच्चयञ्च ‘‘अमग्गेन अमग्गं पवेसेति, आपत्ति थुल्लच्चयस्सा’’ति (पारा. ६६) इमस्स सुत्तस्स वसेन वेदितब्बं. मङ्गुसाति नकुला. एतमेव हि अत्थन्ति यो नं अज्झापज्जति, तं पराजेतीति इममत्थं वुत्तानंयेव पाराजिकादिसद्दानं निब्बचनप्पसङ्गे इमिस्सा परिवारगाथाय पवत्तत्ता. भट्ठोति सासनतो परिहीनो. निरङ्कतोति निराकतो. एतन्ति आपत्तिरूपं पाराजिकं. छिन्नोति अन्तराखण्डितो.

पकतत्तेहि भिक्खूहीति एत्थ पकतत्ता नाम पाराजिकं अनापन्ना अनुक्खित्ता च. केचि पन ‘‘पकतत्तेहि भिक्खूहि एकतो कत्तब्बत्ताति अट्ठकथायं वुत्तत्ता पकतत्तभूतेहि अलज्जीहिपि सद्धिं उपोसथादिसङ्घकम्मकरणे दोसो नत्थी’’ति वदन्ति, तं न युत्तं, इमिना वचनेन तस्स अत्थस्स असिज्झनतो. यदि हि सङ्घकम्मं करीयति, पकतत्तेहेव करीयति, न अपकतत्तेहीति एवं अपकतत्तेहि सहसंवासपटिक्खेपपरं इदं वचनं, न पन पकतत्तेहि सब्बेहि अलज्जीआदीहि एकतो सङ्घकम्मं कत्तब्बमेवाति. एवं संवासविधानपरं पकतत्तेसुपि सभागापत्तिं आपन्नेहि अञ्ञमञ्ञञ्च अलज्जीहि च सद्धिं एकतो कम्मकरणस्स पटिक्खित्तत्ता. वुत्तञ्हि ‘‘सचे सब्बो सङ्घो सभागापत्तिया सति वुत्तविधिं अकत्वा उपोसथं करोति, वुत्तनयेनेव सब्बो सङ्घो आपत्तिं आपज्जती’’तिआदि (कङ्खा. अट्ठ. निदानवण्णना). ‘‘यत्थ आमिसपरिभोगो वट्टति, धम्मपरिभोगोपि तत्थ वट्टती’’ति अलज्जीहि सह परिभोगो च अट्ठकथायं पटिक्खित्तो एकतो कम्मकरणस्सापि धम्मपरिभोगत्ता. तस्मा यथा हि पाळियं पाराजिकापत्तिआपज्जनकपुग्गलनियमत्थं य्वायं ञत्तिचतुत्थेन कम्मेन…पे… उपसम्पन्नो, अयं इमस्मिं अत्थे अधिप्पेतो भिक्खूति इमस्मिं वचने सब्बेपि ञत्तिचतुत्थकम्मेन उपसम्पन्ना पाराजिकापज्जनकपुग्गलायेवाति नियमो न सिज्झति ¶ पाराजिकानापज्जनकानम्पि सेक्खादीनं सम्भवा, अथ खो ञत्तिचतुत्थकम्मेन उपसम्पन्नेसुयेव पाराजिकापत्तिआपज्जनका अलज्जी बालपुथुज्जना लब्भन्ति, न पन एहिभिक्खुआदीसूति एवं नियमो सिज्झति, एवमिधापि पकतत्तेसुयेव एकतो कम्मकरणारहा अनापत्तिका लज्जी कुक्कुच्चका सिक्खाकामा उपलब्भन्ति ¶ , न अपकतत्तेसूति एवमेव नियमो सिज्झति अपकतत्तानं गणपूरणत्ताभावेन असंवासिकत्तनियमतो. अलज्जिनो पन गणपूरका हुत्वा कम्मस्स साधनतो असंवासिकेसु न गहिता कत्तब्बविधिं अकत्वा तेहि सह मद्दित्वा कम्मं करोन्तानं आपत्ति अलज्जिता च न विगच्छतीति वेदितब्बं. ‘‘एको अलज्जी अलज्जीसतम्पि करोती’’ति (पारा. अट्ठ. २.५८५) हि वुत्तं, तेनेव वक्खति ‘‘सब्बेपि लज्जिनो एतेसु कम्मादीसु सह वसन्ती’’तिआदि. अयञ्चत्थो उपरि वित्थारतो आवि भविस्सति.

तथाति सीमापरिच्छिन्नेहीतिआदिं परामसति. एकतो वन्दनभुञ्जनगामप्पवेसनवत्तापटिवत्तकरणउग्गहपरिपुच्छासज्झायकरणादिसामग्गिकिरियावसेन भगवता पञ्ञत्तसिक्खापदसिक्खनं समसिक्खता नाम, तञ्च लज्जीहेव समं सिक्खितब्बं, न अलज्जीहीति दस्सेतुं ‘‘पञ्ञत्तं पन…पे… समसिक्खता नामा’’ति वुत्तं. तत्थ अनतिक्कमनवसेन उग्गहपरिपुच्छादिवसेन च लज्जीपुग्गलेहि समं एकतो सिक्खितब्बा समसिक्खाति सिक्खापदानि वुत्तानि, तासं समसिक्खनं यथावुत्तनयेन लज्जीहि सिक्खितब्बभावो समसिक्खता नामाति अधिप्पायो. यथावुत्तेसु एककम्मादीसु अलज्जीनं लज्जिधम्मे अनोक्कन्ते लज्जीहि सह संवासो नत्थि, ततो बहियेव ते सन्दिस्सन्तीति आह सब्बेपि लज्जिनोतिआदि.

५६. यं तं वुत्तन्ति सम्बन्धो. वत्थुमेव न होतीति सुवण्णादीहि कतइत्थिरूपानं अङ्गजातेसुपि निमित्तवोहारदस्सनतो तत्थ पाराजिकासङ्कानिवत्तनत्थं वुत्तं. तेनेव विनीतवत्थूसु लेपचित्तादिवत्थूसु सञ्जातकुक्कुच्चस्स पाराजिकेन अनापत्ति वुत्ता.

पठमचतुक्कवण्णना

५७. अस्साति आख्यातपदन्ति तस्स अत्थं दस्सेन्तो ‘‘होती’’ति आह, भवेय्याति अत्थो, होतीति वुत्तं होति. दुतिये अत्थविकप्पे ‘‘होती’’ति इदं वचनसेसो.

५८. सादियन्तस्सेवाति ¶ एत्थ सादियनं नाम सेवेतुकामताचित्तस्स उप्पादनमेवाति आह ‘‘पटिसेवनचित्तसमङ्गिस्सा’’ति. पटिपक्खन्ति अनिट्ठं ¶ अहितं. ‘‘भिक्खूनं पच्चत्थिका भिक्खुपच्चत्थिका’’ति वुत्ते उपरि वुच्चमाना राजपच्चत्थिकादयोपि इधेव पविसन्तीति तं निवत्तनत्थं भिक्खू एव पच्चत्थिकाति राजपच्चत्थिकानुरूपेन अत्थो दस्सितो. तस्मिं खणेति पवेसनक्खणे. अग्गतो हि याव मूला पवेसनकिरियाय वत्तमानकालो पवेसनक्खणो नाम. पविट्ठकालेति अङ्गजातस्स यत्तकं ठानं पवेसनारहं, तत्तकं अनवसेसतो पविट्ठकाले, पवेसनकिरियाय निट्ठितक्खणेति अत्थो. एवं पविट्ठस्स उद्धरणारम्भतो अन्तरा ठितकाले ठितं अङ्गजातं, तस्स ठिति वा ठितं नाम, अट्ठकथायं पन मातुगामस्स सुक्कविस्सट्ठिं पत्वा सब्बथा वायामतो ओरमित्वा ठितकालं सन्धाय ‘‘सुक्कविस्सट्ठिसमये’’ति वुत्तं, तदुभयम्पि ठितमेवाति गहेतब्बं. उद्धरणं नाम याव अग्गा नीहरणकिरियाय वत्तमानकालोति आह ‘‘नीहरणकाले पटिसेवनचित्तं उपट्ठापेती’’ति.

एत्थ च यस्मा परेहि उपक्कमियमानस्स अङ्गजातादिकायचलनस्स विज्जमानत्ता सेवनचित्ते उपट्ठितमत्ते तस्मिं खणे चित्तजरूपेन सञ्जायमानं अङ्गजातादिचलनं इमिना सेवनचित्तेन उप्पादितमेव होति. अपिच सेवनचित्ते उप्पन्ने परेहि अनुपक्कमियमानस्सापि अङ्गजाते चलनं होतेव, तञ्च तेन कतं नाम होति, तस्मा कायचित्ततो समुट्ठितं पाराजिकापत्तिं सो आपज्जतियेव उब्भजाणुमण्डलिका (पाचि. ६५७-६५८) विय. तत्थापि हि ‘‘अधक्खकं उब्भजाणुमण्डलं आमसनं वा…पे… पटिपीळनं वा सादियेय्या’’ति (पाचि. ६५७) सादियनमत्तेयेव आपत्ति वुत्ता, भिक्खुनो कायसंसग्गे पन ‘‘कायसंसग्गं समापज्जेय्या’’ति (पारा. २७०) अत्तनो उपक्कमस्स आपत्तिनिमित्तभावेन वुत्तत्ता इत्थिया फुसियमानस्स कायसंसग्गरागे च इत्थिया सञ्जनितकायचलने च विज्जमानेपि अत्तनो पयोगाभावेन अनापत्तियेव वुत्ताति गहेतब्बं. केचि पन ‘‘पठमसङ्घादिसेसविसयेपि परेहि बलक्कारेन हत्थादीहि उपक्कमियमानस्स मोचनस्सादो च उप्पज्जति, तेन च असुचिम्हि मुत्ते सङ्घादिसेसो, अमुत्ते थुल्लच्चयं एवा’’ति वदन्ति. अङ्गारकासुन्ति अङ्गाररासिं, अङ्गारपुण्णावाटं वा. इत्थिया उपक्कमियमाने असादियनं नाम न सब्बेसं विसयोति ¶ आह इमञ्हीतिआदि. एकादसहि अग्गीहीति रागदोसमोहजातिजरामरणसोकपरिदेवदुक्खदोमनस्सुपायाससङ्खातेहि एकादसग्गीहि. अस्साति असादियन्तस्स. चतुक्कं नीहरित्वा ठपेसीति एत्थ एकपुग्गलविसयताय एकोपि अनापत्तिवारो पवेसनपविट्ठठितउद्धरणसङ्खआतानं चतुन्नं पदानं वसेन ‘‘चतुक्क’’न्ति वुत्तो. पठमचतुक्ककथाति एत्थ पन अनापत्तिवारेन सद्धिं पञ्चन्नं वारानं वुत्तनयेन ‘‘पञ्च चतुक्का’’ति वत्तब्बेपि एकमग्गविसयताय ¶ तेसं एकत्तं आरोपेत्वा पठमचतुक्कता वुत्ता. तेनेव वक्खति तिण्णं मग्गानं वसेन तीणि सुद्धिकचतुक्कानीतिआदि.

एकूनसत्ततिद्विसतचतुक्ककथावण्णना

५९-६०. मत्तन्ति सुरादीहि मत्तं. अक्खायितनिमित्ता इध उत्तरपदलोपेन अक्खायितसद्देन वुत्ताति आह ‘‘अक्खायितनिमित्त’’न्ति. जागरन्तिन्तिआदि विसेसनरहितत्ता ‘‘सुद्धिकचतुक्कानी’’ति वुत्तं. समानाचरियकाथेराति एकाचरियस्स उद्देसन्तेवासिका. गङ्गाय अपरभागो अपरगङ्गं. वतरेति गरहत्थे निपातो. एवं विनयगरुकानन्ति इमिना उपरि उपतिस्सत्थेरेन वुच्चमानविनिच्छयस्स गरुकरणीयताय कारणं वुत्तं. सब्बं परियादियित्वाति सब्बं पाराजिकखेत्तं अनवसेसतो गहेत्वा. यदि हि सावसेसं कत्वा पञ्ञपेय्य, अलज्जीनं तत्थ लेसेन अज्झाचारसोतो पवत्ततीति आह ‘‘सोतं छिन्दित्वा’’ति. सहसेय्यादिपण्णत्तिवज्जसिक्खापदेसुयेव (पाचि. ४९-५१) सावसेसं कत्वापि पञ्ञापनं सम्भवति, न लोकवज्जेसूति आह इदञ्हीतिआदि. सहसेय्यसिक्खापदे हि (पाचि. ४९ आदयो) किञ्चापि येभुय्यच्छन्ने येभुय्यपरिच्छन्ने हेट्ठिमपरिच्छेदतो पाचित्तियं दस्सितं, उपड्ढच्छन्ने उपड्ढपरिच्छन्ने दुक्कटं, तथापि सावसेसत्ता पञ्ञत्तिया येभुय्यच्छन्नउपड्ढपरिच्छन्नादीसुपि अट्ठकथायं पाचित्तियमेव दस्सितं. इध पन निरवसेसत्ता पञ्ञत्तिया भगवता दस्सितं येभुय्येन अक्खायितनिमित्ततो हेट्ठा पाराजिकक्खेत्तं नत्थि, थुल्लच्चयादिमेव तत्थ लब्भति.

उपतिस्सत्थेरेन वुत्तस्सेव विनिच्छयस्स अञ्ञम्पि उपत्थम्भकारणं दस्सेन्तो अपिचातिआदिमाह. निमित्ते अप्पमत्तिकापि मंसराजि सचे अवसिट्ठा ¶ होति, तं येभुय्यक्खायितमेव होति, ततो परं पन सब्बसो खायिते निमित्ते दुक्कटमेवाति दस्सेन्तो आह ‘‘ततो परं थुल्लच्चयं नत्थी’’ति. केचि पनेत्थ वच्चमग्गादिं चत्तारो कोट्ठासे कत्वा ‘‘तेसु द्वे कोट्ठासे अतिक्कम्म याव ततियकोट्ठासस्स परियोसाना खायितं येभुय्यक्खायितं नाम, ततो परं थुल्लच्चयं नत्थि, याव चतुत्थकोट्ठासस्स परियोसाना खायितं, तम्पि दुक्कटवत्थुयेवा’’ति च वदन्ति, तं न युत्तं. मतसरीरस्मिंयेव वेदितब्बन्ति मतं येभुय्येन अक्खायितन्तिआदिवचनतो वुत्तं. यदिपि निमित्तन्तिआदि जीवमानकसरीरमेव सन्धाय वुत्तं तस्सेव अधिकतत्ता. तेनेव मातिकाट्ठकथायं (कङ्खा. अट्ठ. पठमपाराजिकवण्णना) ‘‘जीवमानकसरीरस्स वुत्तप्पकारे मग्गे सचेपि तचादीनि अनवसेसेत्वा सब्बसो छिन्ने’’तिआदि ¶ वुत्तं. सब्बसो खायितन्ति निमित्तमंसं सब्बं छिन्नन्ति अत्थो. निमित्तसण्ठानन्ति छिन्नमंसस्स अन्तो याव मुत्तवत्थिकोसा छिद्दाकारो अब्भन्तरछविचम्ममत्तो इत्थिनिमित्ताकारो, तेनाह ‘‘पवेसनं जायती’’ति. निमित्तसण्ठानं पन अनवसेसेत्वाति पवेसनारहछिद्दाकारेन ठितअब्भन्तरमंसादिं अनवसेसेत्वा. एतेन याव पवेसो लब्भति, ताव मग्गोयेवाति दस्सेति. निमित्ततो पतिताय मंसपेसियाति इदं निमित्तसण्ठानविरहितं अब्भन्तरमंसखण्डं सन्धाय वुत्तं. निमित्तसण्ठानं अकोपेत्वा समन्ततो छिन्दित्वा उद्धटमंसपेसिया पन मतसरीरे येभुय्येन अक्खायितनिमित्ते विय उपक्कमन्तस्स पाराजिकमेव.

एवं जीवमानकमनुस्ससरीरे लब्भमानविसेसं दस्सेत्वा इदानि मतसरीरे दस्सेतुं मतसरीरे पनातिआदिमाह. वत्थिकोसेसूति पुरिसानं अङ्गजातकोसचम्मेसु. ‘‘नवद्वारो महावणो’’तिआदि (मि. प. २.६.१) वचनतो मनुस्सानं अक्खिनासादीनि वणसङ्खेपेन थुल्लच्चयक्खेत्तानीति तेसुपि थुल्लच्चयं वुत्तं, एवं मनुस्सानं मतसरीरेपि, तेनाह मते अल्लसरीरेतिआदि. तत्थ अल्लसरीरेति अकुथितं सन्धाय वुत्तं. पाराजिकक्खेत्तेति येभुय्येन अक्खायितम्पि सन्धाय वुत्तं. थुल्लच्चयक्खेत्तेति उपड्ढक्खायितादिम्पि सन्धाय वुत्तं. एत्थ च अक्खिनासादिथुल्लच्चयक्खेत्तेसु येभुय्येन अक्खायितेसुपि थुल्लच्चयं, उपड्ढक्खायितादीसु दुक्कटन्ति वेदितब्बं. सब्बेसम्पीति यथावुत्तहत्थिआदीहि अञ्ञेसं तिरच्छानानं ¶ सङ्गण्हनत्थं वुत्तं. तिरच्छानगतानं अक्खिकण्णवणेसु दुक्कटं पन अट्ठकथाप्पमाणेन गहेतब्बं, ‘‘अमग्गेन अमग्गं पवेसेति, आपत्ति थुल्लच्चयस्सा’’ति (पारा. ६६) हि सामञ्ञतो वुत्तं, न पन मनुस्सानन्ति विसेसेत्वा. यदि हि मनुस्सानञ्ञेव वणेसु थुल्लच्चयं सिया, हत्थिअस्सादीनं नासवत्थिकोसेसुपि पटङ्गमुखमण्डूकस्स मुखसण्ठानेपि च वणसङ्खेपतो थुल्लच्चयं न वत्तब्बं सिया, वुत्तञ्च. तस्मा अट्ठकथाचरिया एवेत्थ पमाणं. मतानं तिरच्छानगतानन्ति मतकेन सम्बन्धो.

मेथुनरागेन वत्थिकोसं पवेसेन्तस्स थुल्लच्चयं वुत्तन्ति आह ‘‘वत्थिकोसं अप्पवेसेन्तो’’ति. मेथुनरागो च नाम कायसंसग्गरागं मोचनस्सादञ्च मुञ्चित्वा विसुं द्वयंद्वयसमापत्तिया रागो, सो च पुरिसादीसुपि उप्पज्जति, तेन च अपाराजिकक्खेत्ते इत्थिसरीरेपि उपक्कमन्तस्स असुचिम्हि मुत्तेपि सङ्घादिसेसो न होति, खेत्तानुरूपं थुल्लच्चयदुक्कटमेव होतीति वेदितब्बं. अप्पवेसेन्तोति इमिना तीसु मग्गेसु पवेसनाधिप्पाये असतिपि मेथुनरागेन बहि घट्टनं सम्भवतीति दस्सेति, तेनेव थुल्लच्चयं वुत्तं, इतरथा पवेसनाधिप्पायेन ¶ बहि छुपन्तस्स मेथुनस्स पुब्बपयोगत्ता दुक्कटमेव वत्तब्बं सिया. निमित्तेन निमित्तं छुपति थुल्लच्चयन्ति इदञ्च ‘‘न च, भिक्खवे, रत्तचित्तेन अङ्गजातं छुपितब्बं, यो छुपेय्य, आपत्ति थुल्लच्चयस्सा’’ति (महाव. २५२) इमस्स चम्मक्खन्धके आगतस्स सुत्तस्स वसेन वुत्तं. तत्थ च केसञ्चि अञ्ञथापि अत्थविकप्पस्स बीजं दस्सेन्तो महाअट्ठकथायं पनातिआदिमाह. मुखेनेव छुपनं सन्धायाति ओट्ठजिव्हादिमुखावयवेन छुपनं सन्धाय. ओळारिकत्ताति अज्झाचारस्स थुल्लत्ता. तं सन्धायभासितन्ति तं यथावुत्तसुत्तं. सुत्तञ्हि अज्झाचारं सन्धाय पटिच्च वुत्तत्ता ‘‘सन्धायभासित’’न्ति वुच्चति. सुट्ठुसल्लक्खेत्वाति पिट्ठिं अभिरुहन्तानं अङ्गजातमुखेनेव निमित्तछुपनस्स सम्भवं मेथुनरागीनञ्च अङ्गजातेन छुपनस्सेव अनुरूपतञ्च सुत्ते च ‘‘मुखेना’’ति अवुत्ततञ्च अञ्ञञ्च नयं यथाबलं सुट्ठु सल्लक्खेत्वाति अत्थो. सङ्घादिसेसोति मनुस्सित्थिं सन्धाय वुत्तं. पस्सावमग्गन्ति इदं चम्मक्खन्धके निदानवसेन वुत्तं. इतरमग्गद्वयं पन निमित्तमुखेन छुपन्तस्स वणसङ्खेपेन थुल्लच्चयमेव. वुत्तनयेनेवाति मेथुनरागेनेव. निमित्तमुखेन पन विना मेथुनरागेन मनुस्सित्थिया वा तिरच्छानगतित्थिया वा पस्सावमग्गं ¶ पकतिमुखेन छुपन्तस्स दुक्कटमेव पकतिमुखेन पकतिमुखछुपने विय, इतरथा तत्थापि थुल्लच्चयेन भवितब्बं, तञ्च न युत्तं खन्धकसुत्तेपि तथा अवुत्तत्ता. कायसंसग्गरागेन दुक्कटन्ति निमित्तमुखेन वा पकतिमुखादिं इतरकायेन वा कायसंसग्गरागेन छुपन्तस्स दुक्कटमेव.

एत्थ च कायसंसग्गरागेन बहिनिमित्ते उपक्कमतो अजानन्तस्सेव अङ्गजातं यदि पाराजिकक्खेत्तं छुपति, तत्थ किं होतीति? केचि ताव ‘‘मेथुनरागस्स अभावा मनुस्सित्थिया सङ्घादिसेसो, सेसेसु वत्थुवसेन थुल्लच्चयदुक्कटानी’’ति वदन्ति. अञ्ञे पन ‘‘पवेसनक्खणे फस्सस्स सादियनसम्भवतो बलक्कारेन उपक्कमनक्खणे विय पाराजिकमेवा’’ति वदन्ति, इदमेव युत्ततरं. मग्गत्तयतो हि अञ्ञस्मिं पदेसेयेव कायसंसग्गादिरागभेदतो आपत्तिभेदो लब्भति, न मग्गत्तये. तत्थ पन येन केनचि आकारेन फस्सस्स सादियनक्खणे पाराजिकमेव, तेनेव परोपक्कमेन पवेसनादीसु रागभेदं अनुद्धरित्वा सादियनमत्तेन पाराजिकं वुत्तं.

सन्थतचतुक्कभेदकथावण्णना

६१-२. पटिपन्नकस्साति आरद्धविपस्सकस्स. उपादिन्नकन्ति कायिन्द्रियं सन्धाय वुत्तं. उपादिन्नकेन फुसतीति उपादिन्नकसरीरेन फुसीयतीति कम्मसाधनेन अत्थो दट्ठब्बो. अथ वा एवं ¶ करोन्तो भिक्खु किञ्चि उपादिन्नकं उपादिन्नकेन न फुसतीति अत्थो. लेसं ओड्डेस्सन्तीति लेसं ठपेस्सन्ति, परिकप्पेस्सन्तीति अत्थो. सन्थतादिभेदेहि भिन्दित्वाति सन्थतादिविसेसनेहि विसेसेत्वा. सन्थतायाति समुदाये एकदेसवोहारो दड्ढस्स पटस्स छिद्दन्तिआदीसु विय. यथा हि पटस्स एकदेसोव वत्थतो दड्ढोति वुच्चति, तं एकदेसवोहारं समुदाये पटे उपचारतो आरोपेत्वा पुन तं समुदायं दड्ढप्पदेससङ्खातछिद्दसम्बन्धीभावेन ‘‘दड्ढस्स पटस्स छिद्द’’न्ति वोहरन्ति, एवमिधापि इत्थिया मग्गप्पदेसवोहारं समुदायभूताय इत्थिया आरोपेत्वा पुन तं इत्थिं सन्थतमग्गसम्बन्धिनिं कत्वा सन्थताय इत्थिया वच्चमग्गेनातिआदि वुत्तं. सारत्थदीपनियं (सारत्थ. टी. पाराजिककण्ड २.६१-६२) पनेत्थ ‘‘एकदेसे समुदायवोहारो’’ति वुत्तं, तं न ¶ युत्तं अवयववोहारेन समुदायस्सेव पतीयमानत्ता. इतरथा हि सन्थताय वच्चमग्गेनाति इत्थिलिङ्गता मग्गसम्बन्धिता च न सिया, एकदेसे समुदायोपचारस्स पन एकदेसोव अत्थो साखाय छिज्जमानाय रुक्खो छिज्जतीतिआदीसु विय.

वत्थादीनि मग्गस्स अन्तो अप्पवेसेत्वा बहियेव वेठनं सन्धाय ‘‘पलिवेठेत्वा’’ति वुत्तं. समुदाये अवयवूपचारेनेव भिक्खुपि सन्थतो नामातिआदि वुत्तं. यत्तके पविट्ठेति तिलबीजमत्ते पविट्ठे. अक्खिनासादीनं सन्थतत्तेपि यथावत्थुकमेवाति आह थुल्लच्चयक्खेत्ते थुल्लच्चयन्तिआदि. खाणुं घट्टेन्तस्स दुक्कटन्ति इत्थिनिमित्तस्स अन्तो खाणुं पवेसेत्वा समतलं, अतिरित्तं वा ठितं खाणुं सचे घट्टेति, घट्टेन्तस्स दुक्कटं पवेसाभावतो. सचे पन ईसकं अन्तो अल्लोकासे पवेसेत्वा ठितं अनुपादिन्नमेव खाणुसीसं अङ्गजातेन छुपति, पाराजिकमेव. तस्स तलन्ति वेळुनळादिकस्स अन्तोतलं. बहिद्धा खाणुकेति अन्तो पवेसितवेळुपब्बादिकस्स बहि निक्खन्तसीसं सन्धाय वुत्तं. यथा च इत्थिनिमित्तेतिआदीसु यथा इत्थिया पस्सावमग्गे खाणुं कत्वा घट्टनादिकं वुत्तं, एवं सब्बत्थ वच्चमग्गादीसुपि लक्खणं वेदितब्बन्ति अत्थो.

राजपच्चत्थिकादिचतुक्कभेदकथावण्णना

६५. केराटिकाति वञ्चका. पठमं इत्थिधुत्तमेव दस्सेत्वा इदानि इतरधुत्तेपि सङ्गहेत्वा दस्सेतुं ‘‘इत्थिधुत्तसुराधुत्तादयो वा’’ति वुत्तं.

आपत्तानापत्तिवारवण्णना

६६. पटिञ्ञातकरणं ¶ नत्थि सेवेतुकामता मग्गेन मग्गप्पटिपत्तीति द्विन्नं अङ्गानं सिद्धत्ता. दूसितस्स पन मग्गेन मग्गप्पटिपत्ति एवमेकं अङ्गं सिद्धं, सेवेतुकामतासङ्खातं सादियनं असिद्धं. तस्मा सो पुच्छित्वा ‘‘सादियि’’न्ति वुत्तपटिञ्ञाय नासेतब्बो. तत्थेवाति वेसालियं महावने एव. सब्बङ्गगतन्ति सब्बकायगतं. ‘‘लोहितं विया’’ति वुत्तत्ता केसादीनं विनिमुत्तट्ठाने सब्बत्थाति गहेतब्बं. निच्चमेव उम्मत्तको होतीति ¶ यस्स पित्तकोसतो पित्तं चलित्वा सब्बदा बहि निक्खन्तं होति, तं सन्धाय वुत्तं. यस्स पन पित्तं चलित्वा पित्तकोसेयेव ठितं होति, कदाचि वा निक्खन्तं पुन निक्खमति, सोपि अन्तरन्तरा सञ्ञं पटिलभति भेसज्जेन च पकतिआरोग्यं पटिलभतीति वेदितब्बं.

पदभाजनीयवण्णनानयो निट्ठितो.

पकिण्णककथावण्णना

पकिण्णकन्ति वोमिस्सकनयं. समुट्ठानन्ति उप्पत्तिकारणं. किरियातिआदि निदस्सनमत्तं अकिरियादीनम्पि सङ्गहतो. वेदनाय सह कुसलञ्च वेदितब्बन्ति योजेतब्बं. सब्बसङ्गाहकवसेनाति सब्बेसं सिक्खापदानं सङ्गाहकवसेन ‘‘कायो वाचा कायवाचा कायचित्तं वाचाचित्तं कायवाचाचित्त’’न्ति एवं वुत्तानि छ आपत्तिसमुट्ठानानि. समुट्ठानादयो हि आपत्तिया एव होन्ति, न सिक्खापदस्स. तंतंसिक्खापदस्स नियतआपत्तिया एव गहणत्थं पन सिक्खापदसीसेन समुट्ठानादीनं कथनं. एवञ्हि आपत्तिविसेसो पञ्ञायति आपत्ति-सद्दस्स सब्बापत्तिसाधारणत्ता, इमेसु पन छसु समुट्ठानेसु पुरिमानि तीणि अचित्तकानि, पच्छिमानि सचित्तकानि. समासतो तं इमं पकिण्णकं विदित्वा वेदितब्बन्ति सम्बन्धो. छ समुट्ठानानि एतस्साति छसमुट्ठानं. एवं सेसेसुपि.

अत्थि कथिनसमुट्ठानन्तिआदि समुट्ठानसीसवसेन द्विसमुट्ठानएकसमुट्ठानानं दस्सनं. तेरस हि समुट्ठानसीसानि पठमपाराजिकसमुट्ठानं अदिन्नादानसमुट्ठानं सञ्चरित्तसमुट्ठानं समनुभासनसमुट्ठानं कथिनसमुट्ठानं एळकलोमसमुट्ठानं पदसोधम्मसमुट्ठानं अद्धानसमुट्ठानं थेय्यसत्थसमुट्ठानं धम्मदेसनासमुट्ठानं भूतारोचनसमुट्ठानं चोरीवुट्ठापनसमुट्ठानं अननुञ्ञातसमउट्ठानन्ति. तत्थ अत्थि छसमुट्ठानन्ति इमिना सञ्चरित्तसमुट्ठानं वुत्तं, पञ्चसमुट्ठानस्स अभावतो ¶ ‘‘अत्थि पञ्चसमुट्ठान’’न्ति अवत्वा ‘‘अत्थि चतुसमुट्ठान’’न्ति वुत्तं, इमिना च अद्धानसमुट्ठानं अननुञ्ञातसमुट्ठानञ्च सङ्गहितं. यञ्हि पठमततियचतुत्थछट्ठेहि समुट्ठानेहि समुट्ठाति ¶ , इदं अद्धानसमुट्ठानं. यं पन दुतियततियपञ्चमछट्ठेहि समुट्ठाति, इदं अननुञ्ञातसमुट्ठानं. अत्थि तिसमुट्ठानन्ति इमिना अदिन्नादानसमुट्ठानं भूतारोचनसमुट्ठानञ्च सङ्गहितं. यञ्हि सचित्तकेहि तीहि समुट्ठाति, इदं अदिन्नादानसमुट्ठानं. यं पन अचित्तकेहि तीहि समुट्ठाति, इदं भूतारोचनसमुट्ठानं. अत्थि कथिनसमुट्ठानन्तिआदिना पन अवसेससमउट्ठानसीसवसेन द्विसमुट्ठानं एकसमुट्ठानञ्च सङ्गण्हाति. तत्थ हि यं ततियछट्ठेहि समुट्ठाति, इदं कथिनसमुट्ठानं नाम. यं पन पठमचतुत्थेहि समुट्ठाति, इदं एळकलोमसमुट्ठानं. यं छट्ठेनेव समुट्ठाति, इदं धुरनिक्खेपसमुट्ठानं, ‘‘समनुभासनसमउट्ठान’’न्तिपि तस्सेव नामं. इति सरूपेन अट्ठ आपत्तिसीसानि दस्सितानि. आदिसद्देन पनेत्थ अवसेसानि पठमपाराजिकसमुट्ठानपदसोधम्मथेय्यसत्थधम्मदेसनाचोरीवुट्ठापनसमुट्ठानानि पञ्चपि समुट्ठानसीसानि सङ्गहितानि. तत्थ यं कायचित्ततो समुट्ठाति, इदं पठमपाराजिकसमुट्ठानं. यं दुतियपञ्चमेहि समुट्ठाति, इदं पदसोधम्मसमुट्ठानं. यं चतुत्थछट्ठेहि समुट्ठाति, इदं थेय्यसत्थसमुट्ठानं. यं पञ्चमेनेव समुट्ठाति, इदं धम्मदेसनासमउट्ठानं. यं पञ्चमछट्ठेहि समुट्ठाति, इदं चोरीवुट्ठापनसमुट्ठानं. एत्थ च पच्छिमेसु तीसु सचित्तकसमुट्ठानेसु एकेकसमुट्ठानवसेन एकसमुट्ठानानि तिविधानि. द्विसमुट्ठानानि पन पठमचतुत्थेहि वा दुतियपञ्चमेहि वा ततियछट्ठेहि वा चतुत्थछट्ठेहि वा पञ्चमछट्ठेहि वा समुट्ठानवसेन पञ्चविधानीति वेदितब्बानि.

एवं समुट्ठानवसेन सब्बसिक्खापदानि तेरसधा दस्सेत्वा इदानि किरियावसेन पञ्चधा दस्सेतुं तत्रापीतिआदि वुत्तं. किञ्चीति सिक्खापदं. किरियतोति पथवीखणनादि (पाचि. ८४-८५) विय कायवचीविञ्ञत्तिजनितकम्मतो. अकिरियतोति पठमकथिनादि (पारा. ४५९ आदयो) विय कत्तब्बस्स अकरणेनेव. किरियाकिरियतोति अञ्ञातिकाय भिक्खुनिया हत्थतो चीवरपटिग्गहणादि (पारा. ५०८ आदयो) विय. सिया किरियतो, सिया अकिरियतो रूपियपटिग्गहणादि (पारा. ५८२ आदयो) विय, सिया किरियतो, सिया किरियाकिरियतो कुटिकारादि (पारा. ३४२) विय. वीतिक्कमसञ्ञाय अभावेन विमोक्खो अस्साति सञ्ञाविमोक्खन्ति मज्झेपदलोपीसमासो दट्ठब्बो. चित्तङ्गं लभति सचित्तकसमुट्ठानेहेव ¶ समुट्ठहनतो. इतरन्ति यस्स चित्तङ्गनियमो नत्थि, तं, अनापत्तिमुखेन चेतं सञ्ञादुकं वुत्तं, आपत्तिमुखेन सचित्तकदुकन्ति एत्तकमेव विसेसो, अत्थतो समानाव.

कायवचीद्वारेहि ¶ आपज्जितब्बम्पि कायकम्मे वा वचीकम्मे वा सङ्गय्हति. तत्थ बाहुल्लवुत्तितो अदिन्नादानमुसावादादयो वियाति अत्थि सिक्खापदं कायकम्मन्तिआदिना कायकम्मं वचीकम्मञ्चाति दुकमेव वुत्तं, विभागतो पन कायवचीकम्मेन सद्धिं तिकमेव होति. तेनेव मातिकाट्ठकथायं (कङ्खा. अट्ठ. पठमपाराजिकवण्णना) वुत्तं ‘‘सब्बा च कायकम्मवचीकम्मतदुभयवसेन तिविधा होन्ती’’ति. ततोयेव इधापि अदिन्नादानादीसु (पारा. ८९) कायकम्मवचीकम्मन्ति तदुभयवसेन दस्सितं. अत्थि पन सिक्खापदं कुसलन्तिआदि आपत्तिसमुट्ठापकचित्तवसेन कारिये कारणोपचारेन वुत्तं, न पन आपत्तिया कुसलादिपरमत्थधम्मतावसेन आपत्तिया सम्मुतिसभावत्ता. कुसलाकुसलादिपरमत्थधम्मे उपादाय हि भगवता आपत्तिसम्मुति पञ्ञत्ता. वक्खति हि ‘‘यं कुसलचित्तेन आपज्जति, तं कुसल’’न्तिआदि (पारा. अट्ठ. १.६६ पकण्णककथा). न हि भगवतो आणायत्ता आपत्ति कुसलादिपरमत्थसभावा होति अनुपसम्पन्नानं आदिकम्मिकानञ्च आपत्तिप्पसङ्गतो, तस्सा देसनादीहि विसुद्धिअभावप्पसङ्गतो च. न हि कारणबलेन उप्पज्जमाना कुसलादिसभावा आपत्ति अनुपसम्पन्नादीसु निवत्तति, उप्पन्नाय च तस्सा केनचि विनासो न सम्भवति. सरसविनासतो देसनादिना च आपत्ति विगच्छतीति वचनमत्थि, न पन तेन अकुसलादि विगच्छति. पितुघातादिकम्मेन हि पाराजिकं आपन्नस्स भिक्खुनो गिहिलिङ्गं गहेत्वा भिक्खुभावपरिच्चागेन पाराजिकापत्ति विगच्छति, न पाणातिपातादिअकुसलं आनन्तरियादिभावतो. तस्मा दुम्मङ्कूनं निग्गहादिदसअत्थवसे (पारा. ३९; परि. २) पटिच्च भगवता यथापच्चयं समुप्पज्जमाने कुसलाकुसलादिनामरूपधम्मे उपादाय पञ्ञत्ता सम्मुतियेव आपत्ति, सा च यथाविधिपटिकम्मकरणेन विगता नाम होतीति वेदितब्बं, तेनाह द्वत्तिंसेव हि आपत्तिसमुट्ठापकचित्तानीतिआदि. आपत्तिसमुट्ठापकत्तेनेव हेत्थ कुसलादीनं आपत्तितो भेदो सिद्धो. न ¶ हि तंसमुट्ठितस्स ततो अभेदो युत्तो समुट्ठानसमुट्ठितभेदब्यवहारुपच्छेदप्पसङ्गतो. सारत्थदीपनियं (सारत्थ. टी. पाराजिककण्ड २.६६ पकिण्णककथावण्णना) पन आपत्तिया परमत्थतो कुसलत्तमेव न सम्भवति ‘‘आपत्ताधिकरणं सिया अकुसलं, सिया अब्याकतं, नत्थि आपत्ताधिकरणं कुसल’’न्ति वचनतो, ‘‘अकुसलत्तं पन अब्याकतत्तञ्च आपत्तिया सम्भवती’’ति सञ्ञाय कुसलचित्तसमुट्ठानक्खणेपि रूपाब्याकतत्तं आपत्तिया समत्थेतुं यं कुसलचित्तेन आपज्जति, तं कुसलं, इतरेहि इतरन्ति (पारा. अट्ठ. १.६६ पकिण्णककथा) इमं अट्ठकथावचनं निस्साय वुत्तं ‘‘यं कुसलचित्तेन आपज्जतीति यं सिक्खापदसीसे गहितं आपत्तिं कुसलचित्तसमङ्गी आपज्जति, इमिना पन वचनेन तं कुसलन्ति आपत्तिया वुच्चमानो कुसलभावो परियायतो, न परमत्थतोति दस्सेति. कुसलचित्तेन हि आपत्तिं आपज्जन्तो सविञ्ञत्तिकं ¶ अविञ्ञत्तिकं वा सिक्खापदवीतिक्कमाकारप्पवत्तं रूपक्खन्धसङ्खातं अब्याकतापत्तिं आपज्जती’’ति. तत्थ यं कुसलचित्तेन आपज्जतीति इमं वचनं उद्दिस्स ‘‘इमिना पन वचनेन तं कुसलन्ति आपत्तिया वुच्चमानो कुसलभावो परियायतो, न परमत्थतोति दस्सेती’’ति वुत्तं, एवं इतरेहि इतरन्ति वचनेन ‘‘यं अकुसलचित्तेन आपज्जहि, तं अकुसलं, यं अब्याकतचित्तेन आपज्जति, तं अब्याकत’’न्ति इमस्स अत्थस्स वुत्तत्ता इतरेहीति वचनं उद्दिस्स ‘‘इमिनापि वचनेन इतरन्ति आपत्तिया वुच्चमानो अकुसलभावो अब्याकतभावो च परियायतो दस्सेती’’ति वत्तब्बं. एवं अवत्वा कुसलपक्खे एव कथनस्स कारणं न पस्साम. यं पन आपत्ताधिकरणं सिया अकुसलन्तिआदिवचनं कारणत्तेन वुत्तं, तम्पि अकारणं यं अकुसलचित्तेन आपज्जति, तं अकुसलन्तिआदिना हेट्ठा वुत्तनयेन अकुसलादिभावस्स परियायदेसितत्ता, आपत्तिया कुसलवोहारस्स अयुत्तताय नत्थि आपत्ताधिकरणं कुसलन्ति वुत्तत्ता च. आपत्तिया हि कुसलचित्तसमुट्ठितत्तेपि भगवता पटिक्खित्तभावेन सावज्जधम्मत्ता कारणूपचारेनापि अनवज्जकुसलवोहारो न युत्तो सावज्जानवज्जानं अञ्ञमञ्ञविरुद्धत्ता. यथा आकासादिसम्मुतिसच्चानं उप्पन्नतादिवोहारो विय जातिजराभङ्गानं उप्पन्नतादिवोहारो अनवट्ठानादिदेसतो अयुत्तो, एवमिधापि कुसलवोहारो अयुत्तो विरुद्धत्ता. अकुसलादिवोहारो पन युत्तो ¶ , कारणूपचारेन पन अकुसलादिसभावता यथावुत्तदोसानतिवत्तनतो. सुत्तस्सापि हि यथा सुत्तसुत्तानुलोमादीहि विरोधो न होति, तथेव अत्थो गहेतब्बो.

यं पन वुत्तं ‘‘कुसलचित्तेन हि आपत्तिं आपज्जन्तो…पे… रूपक्खन्धसङ्खातं अब्याकतापत्तिं आपज्जती’’ति, तं अयुत्तमेव रूपक्खन्धस्स खणिकताय आपत्तियापि देसनादिपटिकम्मं विनाव पटिपस्सद्धिप्पसङ्गतो. रूपपरम्परा आपत्तीति चे? तन्न, पटिकम्मेनापि अविगमप्पसङ्गतो. न हि रूपसन्ततिदेसनादीहि विगच्छति सकारणायत्तत्ता, इति सब्बथा आपत्तिया परमत्थता अयुत्ता, एतेनेव यं वुत्तं ‘‘निपज्जित्वा निरोधसमापन्नस्स सहसेय्यवसेन तथाकारप्पवत्तरूपधम्मस्सेव आपत्तिभावतो’’तिआदि, तम्पि पटिसिद्धन्ति वेदितब्बं. इध पन निरोधसमापन्नानं रूपधम्ममेव पटिच्च उप्पन्नत्ता आपत्ति अचित्ता अवेदना, अञ्ञत्थ पन सचित्ता सवेदनाव, सब्बत्थापि पञ्ञत्तिसभावाति वेदितब्बा. तेनेव दुट्ठदोससिक्खापदट्ठकथायं आपत्तिया अकुसलादिसभावं परपरिकप्पितं निसेधेतुं ‘‘आदिकम्मिकस्स अनापत्तिवचनतो…पे… पण्णत्तिमत्तमेव आपत्ताधिकरणन्ति वेदितब्ब’’न्ति सयमेव वक्खति, तस्मा ‘‘तंतंकुसलादिधम्मसमुप्पत्तिया भगवता पञ्ञत्ता आपत्तिसम्मुति समुट्ठिता’’ति च, ‘‘याव पटिप्पस्सद्धिकारणा तिट्ठती’’ति च, ‘‘पटिप्पस्सद्धिकारणेहि ¶ विनस्सती’’ति च वोहरीयति. आपत्तिया च सम्मुतिसभावत्तेपि हि सञ्चिच्च तं आपज्जन्तस्स, पटिकिरियं अकरोन्तस्स च अनादरे अकुसलरासि चेव सग्गमग्गन्तरायो च होतीति लज्जिनो यथाविधिं नातिक्कमन्ति, अनतिक्कमनप्पच्चया च तेसं अनन्तप्पभेदा सीलादयो धम्मा परिवड्ढन्तीति गहेतब्बं. द्वत्तिंसेवाति नियमो आपत्तिनिमित्तानं कायवचीविञ्ञत्तीनं एतेहेव समुप्पज्जनतो कतो, न पन सब्बापत्तीनम्पि एतेहेव समुप्पज्जनतो. निपज्जित्वा निद्दायन्तानञ्हि झाननिरोधसमापन्नानञ्च अविञ्ञत्तिजनकेहि विपाकअप्पनाचित्तेहि चेव रूपधम्मेहि च सहसेय्यादिआपत्ति सम्भवति.

दसाति किरियाहेतुकमनोविञ्ञाणधातुद्वयेन सह अट्ठ महाकिरियचित्तानि. पञ्ञत्तिं अजानित्वा इद्धिविकुब्बनादीसु अभिञ्ञानं आपत्तिसमुट्ठापकत्तं वेदितब्बं. एत्थ च किञ्चि सिक्खापदं अकुसलचित्तमेव, किञ्चि ¶ कुसलाब्याकतवसेन द्विचित्तं, किञ्चि तिचित्तन्ति अयमेव भेदो लब्भति, नाञ्ञोति वेदितब्बं. किरियासमुट्ठानन्ति परूपक्कमेन जायमानं अङ्गजातादिचलनं सादियनचित्तसङ्खाते सेवनचित्ते उप्पन्ने तेन चित्तेन समुप्पादितमेव होतीति वुत्तं इतरथा ‘‘सिया किरियसमुट्ठानं, सिया अकिरियसमुट्ठान’’न्ति वत्तब्बतो.

यं पन सारत्थदीपनियं (सारत्थ. टी. पाराजिककण्ड २.६६ पकिण्णककथावण्णना) वुत्तं ‘‘किरियसमुट्ठानन्ति इदं येभुय्यवसेन वुत्तं परूपक्कमे सति सादियन्तस्स अकिरियसमुट्ठानभावतो’’तिआदि, तं न गहेतब्बं पठमपाराजिकस्स अकिरियसमुट्ठानताय पाळिअट्ठकथासु अवुत्तत्ता. ‘‘मनोद्वारे आपत्ति नाम नत्थी’’ति (कङ्खा. अट्ठ. पठमपाराजिकवण्णना; पारा. अट्ठ. २.५८३-४) हि वुत्तं. कथञ्हि नाम परूपक्कमेन मेथुनं सादियन्तो अत्तनो अङ्गजातादिकायचलनं न सादियेय्य, सादियनचित्तानुगुणमेव पन सकलसरीरे चित्तजरूपसमुप्पत्तिया विञ्ञत्तिपि सुखुमा समुप्पन्ना एव होतीति दट्ठब्बं, तेनाह कायद्वारेनेव समुट्ठानतो कायकम्मन्तिआदि. चित्तं पनेत्थ अङ्गमत्तं होतीति कायविञ्ञत्ति एव कायकम्मभावे कारणं, न चित्तं. तं पनेत्थ कायसङ्खाताय विञ्ञत्तियायेव अङ्गमत्तं, न कायकम्मभावस्स, इतरथा मेथुनस्स ‘‘मनोकम्म’’न्ति वत्तब्बतो, तेनाह ‘‘न तस्स वसेन कम्मभावो लब्भती’’ति. कम्मभावोति कायकम्मभावो. सब्बञ्चेतन्ति एतं समुट्ठानादिकं. सिक्खापदसीसेनाति तंतंसिक्खापदनियतआपत्तिया एव गहणत्थं सिक्खापदमुखेन.

पकिण्णककथावण्णनानयो निट्ठितो.

विनीतवत्थुवण्णना

इदं ¶ किन्ति कथेतुकामतापुच्छा. इमातिआदि विस्सज्जनं. विनीतानि आपत्तिं त्वं भिक्खु आपन्नोतिआदिना (पारा. ६७) भगवता विनिच्छिनितानि वत्थूनि विनीतवत्थूनि. तं तं वत्थुं उद्धरित्वा दानतो दस्सनतो उद्दानभूता गाथा उद्दानगाथा, सङ्गहगाथा, उद्देसगाथाति वुत्तं होति. वत्थु गाथाति तेन खो पन समयेन अञ्ञतरो भिक्खूतिआदिका विनीतवत्थुपाळियेव तेसं तेसं विनीतवत्थूनं गन्थनतो ‘‘वत्थुगाथा’’ति वुत्ता ¶ , न छन्दोविचितिलक्खणेन. उद्दानगाथानं वत्थु वत्थुगाथाति एवं वा एत्थ अत्थो दट्ठब्बो. एत्थाति विनीतवत्थूसु. दुतियादीनन्ति दुतियपाराजिकादीनं. यं पस्सित्वा चित्तकारादयो सिप्पिका चित्तकम्मादीनि सिक्खन्ति, तं पटिच्छन्नकरूपं, पटिमारूपन्ति अत्थो.

६७. पुरिमानि द्वेति मक्कटीवज्जिपुत्तकवत्थूनि द्वे. तानिपि भगवता विनीतभावेन पुन विनीतवत्थूसु पक्खित्तानि. तत्थ तस्स कुक्कुच्चं अहोसीतिआदि पन किञ्चापि तेसं पठमं कुक्कुच्चं न उप्पन्नं, भिक्खूहि पन भगवता च गरहित्वा वुत्तवचनं सन्धाय पच्छा उप्पन्नत्तं सन्धाय वुत्तं. भगवतो एतमत्थं आरोचेसुन्तिआदि च भिक्खूहि आनन्दत्थेरेन च पठमं भगवतो आरोचिते, भगवता च तेसं पाराजिकत्ते पकासिते भीता ते सयम्पि गन्त्वा अत्तनो कुक्कुच्चं पच्छा आरोचेन्ति एव. ‘‘सच्चं किर त्व’’न्तिआदिना भगवता पुट्ठा पन ‘‘सच्चं भगवा’’ति पटिजाननवसेनापि आरोचेन्ति. भगवापि आपत्तिं त्वन्तिआदिना तेसं पाराजिकत्तं विनिच्छिनोति एव. अनुपञ्ञत्तिकथायं पन तं सब्बं अवत्वा अनुपञ्ञत्तिया अनुगुणमेव किञ्चिमत्तं वुत्तं, इधापि तेसं वत्थूनं भगवता विनीतभावदस्सनत्थं एवं वुत्तन्ति वेदितब्बं. केचि इमं अधिप्पायं अमनसिकत्वा ‘‘अञ्ञानेवेतानि वत्थूनी’’ति वदन्ति. कुसेति कुसतिणानि. केसेहीति मनुस्सकेसेहि.

६८. वण्णपोक्खरतायाति एत्थ पोक्खलं नाम समिद्धं सुन्दरञ्च, तस्स भावो ‘‘पोक्खरता’’ति र-कारं कत्वा वुत्तो, समिद्धता सुन्दरताति अत्थो. पधंसेसीति अभिभवि. न लिम्पतीति न अल्लीयति.

६९. एवरूपा परिवत्तलिङ्गा भिक्खुनियो अत्थतो एकतो उपसम्पन्नापि उभतोसङ्घे उपसम्पन्नासुयेव सङ्गय्हन्ति भिक्खूपसम्पदाय भिक्खुनीउपसम्पदतोपि उक्कट्ठत्ता. पाळियं ‘‘ताहि आपत्तीहि अनापत्ति’’न्ति उपयोगवचनं कत्वा अनुजानामीति पदेन सम्बन्धितब्बं. इत्थिलिङ्गन्ति ¶ थनादिकं इत्थिसण्ठानं वुत्तन्ति आह – ‘‘पुरिस…पे… इत्थिसण्ठानं उप्पन्न’’न्ति. तं नानन्तरिकतो पन ‘‘पुरिसिन्द्रियम्पि अन्तरहितं, इत्थिन्द्रियञ्च उप्पन्न’’न्ति वुत्तमेव होति, एवं उपरिपि लिङ्गग्गहणेनेव इत्थिन्द्रियादिग्गहणं वेदितब्बं. ताति आपत्तियो, तस्स वुट्ठातुन्ति इमिना सम्बन्धो, ताहि आपत्तीहि वुट्ठापेतुन्ति ¶ अत्थो. कथन्ति आह ता सब्बापि भिक्खुनीहि कातब्बन्तिआदि. तेन पटिच्छन्नायपि अप्पटिच्छन्नायपि गरुकापत्तिया पक्खमानत्तचरणादिकं विधिं दस्सेति.

ओक्कन्तिकविनिच्छयोति पसङ्गानुगुणं ओतरणकविनिच्छयो. बलवअकुसलेनाति परदारिककम्मादिना. दुब्बलकुसलेनाति यथावुत्तबलवाकुसलोपहतसत्तिना ततो एव दुब्बलभूतेन कुसलेन. दुब्बलअकुसलेनाति पुरिसभावुप्पादकब्रह्मचरियादिबलवकुसलोपहतसत्तिना ततो एव दुब्बलभूतेन परदारिकादिअकुसलेन. सुगतियं भावद्वयस्स कुसलकम्मजत्ता अकुसलेनेव विनासो कुसलेनेव उप्पत्तीति आह उभयम्पीतिआदि. दुग्गतियं पन अकुसलेनेव उभिन्नम्पि उप्पत्ति च विनासो च, तत्थ दुब्बलबलवभावोव विसेसो.

‘‘एहि मयं गमिस्सामा’’ति भिक्खुनिया सद्धिं संविधाय एकद्धानगमने पाचित्तियापत्तिपरिहारत्थं वुत्तं ‘‘संविदहनं परिमोचेत्वा’’ति. तेन एकगामक्खेत्तेपि बहिगामतो अन्तरघरं संविधाय गमनम्पि आपत्तिकरमेवाति दस्सेति. परिमोचनविधिं दस्सेन्तो आह मयन्तिआदि. बहिगामेति गामन्तरे. दुतियिका भिक्खुनी पक्कन्ता वा होतीतिआदिना (पाचि. ६९३) वुत्तअनापत्तिलक्खणं अनुलोमेतीति वुत्तं ‘‘गामन्तर…पे… अनापत्ती’’ति. कोपेत्वाति परिच्चजित्वा. लज्जिनियो…पे… लब्भतीति लिङ्गपरिवत्तनदुक्खपीळितस्स सङ्गहेपि असति हीनायावत्तनम्पि भवेय्याति ‘‘आपदासू’’ति वुत्तअनापत्तिअनुलोमेन वुत्तं. ताय दुतियिकं गहेत्वाव गन्तब्बं. अलज्जिनियो…पे… लब्भतीति अलज्जिनीहि सद्धिं एककम्मादिसंवासे आपत्तिसम्भवतो ता असन्तपक्खं भजन्तीति वुत्तं, इमिनापेतं वेदितब्बं ‘‘अलज्जिनीहि सद्धिं परिभोगो न वट्टती’’ति. यदि हि वट्टेय्य, ततोपि दुतियिकं विना गामन्तरगमनादीसु आपत्ति एव सिया सङ्गाहिकत्ता तासं सङ्गाहिकलज्जिनिगणतो विय. ञातिका न होन्ति…पे… वट्टतीति वदन्तीति इमिना अट्ठकथासु अनागतभावं दीपेति. तत्थापि विस्सासिकञातिकभिक्खुनियो विना भिक्खुनिभावे अरमन्तस्स मानपकतिकस्स आपदाट्ठानसम्भवेन तं वचनं अप्पटिक्खित्तम्पि तदञ्ञेसं न वट्टतियेवाति गहेतब्बं. भिक्खुभावेपीति भिक्खुकालेपि ¶ . तं निस्सायाति तं निस्सयाचरियं कत्वा. उपज्झा गहेतब्बाति उपसम्पदागहणत्थं उपज्झा गहेतब्बा.

विनयकम्मन्ति ¶ विकप्पनं सन्धाय वुत्तं. पुन कातब्बन्ति पुन विकप्पेतब्बं. पुन पटिग्गहेत्वा सत्ताहं वट्टतीति ‘‘अनुजानामि, भिक्खवे, भिक्खुनीनं सन्निधिं भिक्खूहि, भिक्खूनं सन्निधिं भिक्खुनीहि च पटिग्गाहापेत्वा परिभुञ्जितु’’न्ति (चूळव. ४२१) वचनतो पुन पटिग्गहेत्वा परिभुञ्जितुं वट्टतीति दस्सनत्थं वुत्तं. सत्तमे दिवसेति इदञ्च निस्सग्गियं अनापज्जित्वाव पुनपि सत्ताहं परिभुञ्जितुं वट्टतीति दस्सनत्थं वुत्तं. पकतत्तोति अपरिवत्तलिङ्गो. रक्खतीति तं पटिग्गहणविजहनतो रक्खति, अविभत्तताय पटिग्गहणं न विजहतीति अधिप्पायो.

सामं गहेत्वान निक्खिपेय्याति सहत्थेन पटिग्गहेत्वान निक्खिपेय्य. परिभुञ्जन्तस्स आपत्तीति लिङ्गपरिवत्ते जाते पुन अप्पटिग्गहेत्वा परिभुञ्जन्तस्स आपत्ति.

हीनायावत्तनेनाति एत्थ केचि ‘‘पकतत्तस्स भिक्खुनो सिक्खं अप्पच्चक्खाय ‘गिही भविस्सामी’ति गिहिलिङ्गग्गहणं हीनायावत्तन’’न्ति वदन्ति, तं न युत्तं तत्तकेन भिक्खुभावस्स अविजहनतो. अञ्ञे पन ‘‘पाराजिकं आपन्नस्स भिक्खुपटिञ्ञं पहाय गिहिलिङ्गभावूपगमनम्पि हीनायावत्तन’’न्ति वदन्ति, तं युत्तमेव. पाराजिकं आपन्नो हि तं पटिच्छादेत्वा याव भिक्खुपटिञ्ञो होति, ताव भिक्खु एव होति भिक्खूनमेव पाराजिकस्स पञ्ञत्तत्ता. ‘‘यो पन भिक्खू’’ति हि वुत्तं. तथा हि सो संवासं सादियन्तोपि थेय्यसंवासको न होति, सहसेय्यादिआपत्तिञ्च न जनेति, अत्तानं ओमसन्तस्स पाचित्तियञ्च जनेति. वुत्तञ्हि –

‘‘असुद्धो होति पुग्गलो अञ्ञतरं पाराजिकं धम्मं अज्झापन्नो, तञ्चे सुद्धदिट्ठि समानो ओकासं कारापेत्वा अक्कोसाधिप्पायो वदेति, आपत्ति ओमसवादस्सा’’ति (पारा. ३८९).

एके पन ‘‘पाराजिकं आपन्नानं दोसं पटिजानित्वा गिहिलिङ्गग्गहणं नाम सिक्खापच्चक्खाने समोधानं गच्छति तेनापि पटिञ्ञाय भिक्खुभावस्स विजहनतो. तेनेव विनयविनिच्छयादीसु हीनायावत्तनं सिक्खापच्चक्खाने समोधानेत्वा ¶ विसुं तं न वुत्तं. तस्मा भिक्खुनीनं विब्भमितुकामताय गिहिलिङ्गग्गहणं इध हीनायावत्तनं तासं सिक्खापच्चक्खानस्स अभावतो. तासं पटिग्गहणविजहनस्सापि सब्बसो वत्तब्बत्ता’’ति वदन्ति, तम्पि अप्पटिबाहियमेव. तस्मा पाराजिकानं भिक्खुनीनञ्च ‘‘उप्पब्बजिस्सामी’’ति गिहिलिङ्गग्गहणं ¶ हीनायावत्तनन्ति गहेतब्बं. विब्भमोतिपि एतस्सेव नामं, तेनेव तं खुद्दसिक्खायं ‘‘अच्छेदविस्सज्जनगाहविब्भमा’’ति अधिट्ठानविजहने विब्भमनामेन वुत्तं.

अनपेक्खविस्सज्जनेनाति अञ्ञस्स अदत्वाव अनत्थिकस्सेव पटिग्गहितवत्थूनं बहि छड्डनेन. केचि ‘‘पटिग्गहितवत्थूसु सापेक्खस्स पुरे पटिग्गहितभावतो परिमोचनत्थं तत्थ पटिग्गहमत्तस्स विस्सज्जनम्पि अनपेक्खविस्सज्जनमेव चीवरादिअधिट्ठानपच्चुद्धारो विया’’ति वदन्ति, तं न सुन्दरं तथावचनाभावा. यथेव हि चीवरादीसु अनपेक्खविस्सज्जनेन अधिट्ठानविजहनं वत्वापि विसुं पच्चुद्धारो च वुत्तो, एवमिधापि वत्तब्बं, यथा च चीवरादीसु कायपटिबद्धेसुपि पच्चुद्धारेन अधिट्ठानं विगच्छति, न एवमिध. इध पन पटिग्गहितवत्थुस्मिं अनपेक्खस्सापि कायतो मुत्तेयेव तस्मिं पटिग्गहणं विजहति. तथा हि वुत्तं ‘‘सतक्खत्तुम्पि परिच्चजतु, याव अत्तनो हत्थगतं पटिग्गहितमेवा’’ति. अनपेक्खविस्सज्जनेनाति एत्थ च ‘‘अनपेक्खाया’’ति एत्तकमेव वत्तब्बं अनपेक्खतं मुञ्चित्वा इध विसुं विस्सज्जनस्स अभावा. न हेत्थ पच्चुद्धारे विय विस्सज्जनविधानमत्थि. अपिच पटिग्गहणमत्तविस्सज्जने सति पुरे पटिग्गहितोपि आहारो भुञ्जितुकम्यताय उप्पन्नाय पटिग्गहणमत्तं विस्सज्जेत्वा पुन पटिग्गहेत्वा यथासुखं भुञ्जितब्बो सियाति, तथा च सन्निधिकारकसिक्खापदे वुत्ता सब्बापि विनिच्छयभेदा निरत्थका एव सियुं. वुत्तञ्हि तत्थ –

‘‘गण्ठिकपत्तस्स वा गण्ठिकन्तरे स्नेहो पविट्ठो होति…पे… तादिसे पत्तेपि पुनदिवसे भुञ्जन्तस्स पाचित्तिय’’न्तिआदि (पाचि. अट्ठ. २५३).

तत्थ पन ‘‘पटिग्गहणं अनपेक्खचित्तेन विस्सज्जेत्वा भुञ्जितब्ब’’न्ति एत्तकमेव वत्तब्बं, न च वुत्तं. कत्थचि ईदिसेसु च गण्ठिकपत्तादीसु पटिग्गहणे अपेक्खा कस्सचिपि नत्थेव तप्पहानाय वायामतो, तथापि तत्थगतआमिसे पटिग्गहणं न विगच्छति. कस्मा? भिक्खुस्स पत्ते पुन भुञ्जितुकामतापेक्खाय ¶ विज्जमानत्ता पत्तगतिके आहारेपि तस्सा वत्तनतो. न हि पत्तं अविस्सज्जेत्वा तग्गतिकं आहारं विस्सज्जेतुं सक्का, नापि आहारं अविस्सज्जेत्वा तग्गतिकं पटिग्गहणं विस्सज्जेतुं. तस्मा वत्थुनो विस्सज्जनमेव अनपेक्खविस्सज्जनं, न पटिग्गहणस्साति निट्ठमेत्थ गन्तब्बं. तेनेव सन्निधिसिक्खापदस्स अनापत्तिवारे –

‘‘अन्तोसत्ताहं ¶ अधिट्ठेति, विस्सज्जेति, नस्सति, विनस्सति, डय्हति, अच्छिन्दित्वा गण्हन्ति, विस्सासं गण्हन्ति, अनुपसम्पन्नस्स चत्तेन वन्तेन मुत्तेन अनपेक्खो दत्वा पटिलभित्वा परिभुञ्जती’’ति –

एवं सब्बत्थ वत्थुविस्सज्जनमेव वुत्तं. एत्थ च ‘‘अन्तोसत्ताहं अधिट्ठेती’’ति बाहिरपरिभोगाय अधिट्ठानवचनतो वत्थुं अविस्सज्जेत्वापि केवलं अनज्झोहरितुकामताय सुद्धचित्तेन बाहिरपरिभोगत्थाय नियमनम्पि विसुं एकं पटिग्गहणविजहनकारणमेव, इदञ्च सन्धाय पटिग्गहणमत्तविस्सज्जनं वुत्तं सिया, सुवुत्तमेव सिया, तथा च ‘‘पुन पटिग्गहेत्वा परिभुञ्जिस्सामी’’ति पटिग्गहणविस्सज्जनं न वत्तब्बं सिया बाहिरपरिभोगाधिट्ठानस्स इधाधिप्पेतत्ता.

सारत्थदीपनियञ्हि (सारत्थ. दी. पाराजिककण्ड २.६९) ‘‘अनपेक्खविस्सज्जनेनाति एत्थ अञ्ञस्स अदत्वाव अनत्थिकताय ‘नत्थि इमिना कम्मं न दानि नं परिभुञ्जिस्सामी’ति वत्थूसु वा, ‘पुन पटिग्गहेत्वा पटिभुञ्जिस्सामी’ति पटिग्गहणे वा अनपेक्खविस्सज्जनेना’’ति एवं परिभुञ्जितुकामस्सेव पटिग्गहणमत्तविस्सज्जनम्पि पटिग्गहणविजहनकारणं वुत्तं, तं न गहेतब्बं. पुरिममेव पन बाहिरपरिभोगाधिट्ठानं गहेतब्बं. इदं पन अट्ठकथासु ‘‘अनपेक्खविस्सज्जनसङ्खाते विस्सज्जेती’’ति वुत्तपाळिपदत्थे सङ्गहेत्वा विसुं न वुत्तं. नस्सति, विनस्सति, डय्हति, विस्सासं वा गण्हन्तीति इमानि पन पदानि अच्छिन्दित्वा गण्हन्तीति इमस्मिं पदे सङ्गहितानीति वेदितब्बं.

अच्छिन्दित्वा गहणेनाति अनुपसम्पन्नानं बलक्कारादिना अच्छिन्दित्वा गहणेन. उपसम्पन्नानञ्हि अच्छिन्दनविस्सासग्गाहेसु पटिग्गहणं न विजहति. एत्थाति भिक्खुविहारे. उपरोपकाति तेन रोपिता रुक्खगच्छा. तेरससु ¶ सम्मुतीसूति भत्तुद्देसकसेनासनपञ्ञापकभण्डागारिकचीवरपटिग्गाहकचीवरभाजकयागुभाजकफलभाजकखज्जभाजकअप्पमत्तकविस्सज्जकसादियगाहापकपत्तगाहापकआरामिकपेसकसामणेरपेसकसम्मुतिसङ्खातासु तेरससु सम्मुतीसु.

पच्छिमिकाय सेनासनग्गाहे पटिप्पस्सद्धेपि अप्पटिप्पस्सद्धेपि कथिनत्थारस्स, तम्मूलकानं पञ्चानिसंसानञ्च अभावस्स समानत्ता तत्थ विज्जमानम्पि सेनासनग्गाहपटिप्पस्सद्धिं अदस्सेत्वा तत्थ भिक्खूहि कत्तब्बं सङ्गहमेव दस्सेतुं सचे पच्छिमिकायातिआदि वुत्तं. सचे अकुसलविपाके ¶ …पे… छारत्तं मानत्तमेव दातब्बन्ति इदं पटिच्छन्नाय साधारणापत्तिया परिवसन्तस्स असमादिन्नपरिवासस्स वा लिङ्गे परिवत्ते पक्खमानत्तं चरन्तस्स वसेन वुत्तं. सचे पनस्स पक्खमानत्ते असमादिन्ने एव पुन लिङ्गं परिवत्तति, परिवासं दत्वा परिवुत्थपरिवासस्सेव छारत्तं मानत्तं दातब्बं. परिवासदानं नत्थि भिक्खुकाले अप्पटिच्छन्नभावतो. सचे पन भिक्खुकालेपि सञ्चिच्च नारोचेति, आपत्ति पटिच्छन्नाव होति, आपत्तिपटिच्छन्नभावतो परिवासो च दातब्बोति वदन्ति. पाराजिकं आपन्नानं इत्थिपुरिसानं लिङ्गे परिवत्तेपि पाराजिकत्तस्स एकस्मिं अत्तभावे अविजहनतो पुन उपसम्पदा न दातब्बाति गहेतब्बं. तेनेव तेसं सीसच्छिन्नपुरिसादयो निदस्सिता.

७१. तथेवाति मुच्चतु वा मा वाति इममत्थं अतिदिसति. अञ्ञेसन्ति पुथुज्जने सन्धाय वुत्तं. तेसञ्हि ईदिसे ठाने असादियनं दुक्करं सोतापन्नादिअरियानं तत्थ दुक्करत्ताभावा. न हि अरिया पाराजिकादिलोकवज्जापत्तिं आपज्जन्ति.

७३. सुफुसिताति उपरिमाय दन्तपन्तिया हेट्ठिमा दन्तपन्ति आहच्च ठिता, अविवटाति अत्थो. तेनाह ‘‘अन्तोमुखे ओकासो नत्थी’’ति. उप्पाटिते पन ओट्ठमंसे दन्ते सुयेव उपक्कमन्तस्स थुल्लच्चयन्ति निमित्तेन बहिनिमित्ते छुपनत्ता वुत्तं. बहिनिक्खन्तदन्तजिव्हासुपि एसेव नयो. निज्झामतण्हिका नाम लोमकूपेहि समुट्ठितअग्गिजालाहि दड्ढसरीरताय अतिविय तसितरूपा. आदि-सद्देन खुप्पिपासासुरा अट्ठिचम्मावसिट्ठा भयानकसरीरा पेतियो सङ्गहिता. विसञ्ञं कत्वाति यथा सो कतम्पि ¶ उपक्कमं न जानाति, एवं कत्वा. तेन च विसञ्ञी अहुत्वा सादियन्तस्स पाराजिकमेवाति दस्सेति. उपहतकायप्पसादोति वातपित्तादिदोसेहि कायविञ्ञाणानुप्पादकभावेन दूसितकायप्पसादो, न पन विनट्ठकायप्पसादो. सीसे पत्तेति मग्गेन मग्गप्पटिपादने जाते. अप्पवेसेतुकामताय एव निमित्तेन निमित्तछुपने थुल्लच्चयं वुत्तं, सेवेतुकामस्स पन तत्थापि दुक्कटमेवाति आह ‘‘दुक्खटमेव सामन्त’’न्ति.

७४. जाति-सद्देन सुमनपुप्फपरियायेन तन्निस्सयो गुम्बो अधिप्पेतोति आह ‘‘जातिपुप्फगुम्बान’’न्ति. तेन च जातिया उपलक्खितं वनं जातियावनन्ति अलुत्तसमासोति दस्सेति. एकरसन्ति वीथिचित्तेहि असम्मिस्सं.

७७. उप्पन्ने वत्थुम्हीति इत्थीहि कतअज्झाचारवत्थुस्मिं. रुक्खसूचिकण्टकद्वारन्ति रुक्खसूचिद्वारं ¶ कण्टकद्वारं, एवमेव वा पाठो. तत्थ यं उभोसु पस्सेसु रुक्खथम्भे निखनित्वा तत्थ मज्झे विज्झित्वा द्वे तिस्सो रुक्खसूचियो पवेसेत्वा करोन्ति, तं रुक्खसूचिद्वारं नाम. पवेसननिक्खमनकाले पन अपनेत्वा थकनकयोग्गेन कण्टकसाखापटलेन युत्तं द्वारं कण्टकद्वारं नाम. गामद्वारस्स पिधानत्थं पदरेन कण्टकसाखादीहि वा कतस्स कवाटस्स उदुक्खलपासरहितताय एकेन संवरितुं विवरितुञ्च असक्कुणेय्यस्स हेट्ठा एकं चक्कं योजेन्ति, येन परिवत्तमानेन तं कवाटं सुखथकनं होति, तं सन्धाय वुत्तं ‘‘चक्कलकयुत्तद्वार’’न्ति. चक्कमेव हि लातब्बट्ठेन संवरणविवरणत्थाय गहेतब्बट्ठेन चक्कलकं, तेन युत्तम्पि कवाटं चक्कलकं नाम, तेन युत्तं द्वारं चक्कलकयुत्तद्वारं. महाद्वारेसु पन द्वे तीणिपि चक्कलकानि योजेन्तीति आह फलकेसूतिआदि. किटिकासूति वेळुपेसिकाहि कण्टकसाखादीहि च कतथकनकेसु. संसरणकिटिकद्वारन्ति चक्कलकयन्तेन संसरणकिटिकायुत्तमहाद्वारं. गोप्फेत्वाति आवुणित्वा, रज्जूहि गन्थेत्वा वा. एकं दुस्ससाणिद्वारमेवाति एत्थ किलञ्जसाणिद्वारम्पि सङ्गहं गच्छति तग्गतिकत्ता. अथ भिक्खू…पे… निसिन्ना होन्तीति इदं भिक्खूनं सन्निहितभावदस्सनत्थं वुत्तं. निपन्नेपि आभोगं कातुं वट्टति, निपज्जित्वा निद्दायन्ते पन आभोगं कातुं न वट्टति असन्तपक्खे ठितत्ता. रहो ¶ निसज्जाय विय द्वारसंवरणं नाम मातुगामानं पवेसननिवारणत्थं अनुञ्ञातन्ति आह भिक्खुनिं वातिआदि. निस्सेणिं आरोपेत्वाति इदं हेट्ठिमतलस्स सद्वारबन्धताय वुत्तं. चतूसु दिसासु परिक्खित्तस्स कुट्टस्स एकाबद्धताय ‘‘एककुट्टके’’ति वुत्तं. पच्छिमानं भारोति पाळिया आगच्छन्ते सन्धाय वुत्तं. येन केनचि परिक्खित्तेति एत्थ परिक्खेपस्स उब्बेधतो पमाणं सहसेय्यप्पहोनके वुत्तसदिसमेव.

महापरिवेणन्ति महन्तं अङ्गणं, तेन च बहुजनसञ्चारं दस्सेति, तेनाह महाबोधीतिआदि. अरुणे उग्गते वुट्ठहति, अनापत्ति अनापत्तिखेत्तभूताय रत्तिया सुद्धचित्तेन निपन्नत्ता. पबुज्झित्वा पुन सुपति आपत्तीति अरुणे उग्गते पबुज्झित्वा अरुणुग्गमनं ञत्वा वा अञत्वा वा अनुट्ठहित्वा सयितसन्तानेन सुपति उट्ठहित्वा कत्तब्बस्स द्वारसंवरणादिनो अकतत्ता अकिरियसमुट्ठाना आपत्ति होति अनापत्तिखेत्ते कतनिपज्जनकिरियाय अनङ्गत्ता. अयञ्हि आपत्ति ईदिसे ठाने अकिरिया, दिवा असंवरित्वा निपज्जनक्खणे किरिया च अचित्तका चाति वेदितब्बा. पुरारुणा पबुज्झित्वापि याव अरुणुग्गमना सयन्तस्सापि पुरिमनयेन आपत्तियेव. अरुणे उग्गते वुट्ठहिस्सामीति…पे… आपत्तियेवाति एत्थ कदा तस्स आपत्तीति? वुच्चते – न ताव रत्तियं ‘‘दिवा आपज्जति नो रत्ति’’न्ति (परि. ३२३) वुत्तत्ता. ‘‘अनादरियदुक्कटा न मुच्चती’’ति वुत्तदुक्कटं पन दिवासयनदुक्कटमेव न ¶ होति अनादरियदुक्कटत्ता. एवं अरुणुग्गमने पन अचित्तकं अकिरियसमुट्ठानं आपत्तिं आपज्जतीति वेदितब्बं. सो सचे द्वारं संवरित्वा ‘‘अरुणे उग्गते वुट्ठहिस्सामी’’ति निपज्जति, द्वारे च अञ्ञेहि अरुणुग्गमनकाले विवटेपि तस्स अनापत्तियेव द्वारपिदहनस्स रत्तिदिवाभागेसु विसेसाभावा. आपत्तिआपज्जनस्सेव कालविसेसो इच्छितब्बो, न तप्परिहारस्साति गहेतब्बं, ‘‘द्वारं असंवरित्वा रत्तिं निपज्जती’’ति (पारा. अट्ठ. १.७७) हि वुत्तं. दिवा संवरित्वा निपन्नस्स केनचि विवटेपि द्वारे अनापत्तियेव. अत्तनापि अनुट्ठहित्वाव सति पच्चये विवटेपि अनापत्तीति वदन्ति. यथापरिच्छेदमेव च न वुट्ठातीति अरुणे उग्गतेयेव उट्ठाति. आपत्तियेवाति मूलापत्तिंयेव सन्धाय वुत्तं, अनादरियआपत्ति पन पुरारुणा उट्ठितस्सापि तस्स होतेव ‘‘दुक्कटा ¶ न मुच्चती’’ति वुत्तत्ता, दुक्कटा न मुच्चतीति च पुरारुणा उट्ठहित्वा मूलापत्तिया मुत्तोपि अनादरियदुक्कटा न मुच्चतीति अधिप्पायो.

निद्दावसेन निपज्जतीति वोहारवसेन वुत्तं, पादानं पन भूमितो अमोचितत्ता अयं निपन्नो नाम न होति, तेनेव अनापत्ति वुत्ता. अपस्साय सुपन्तस्साति कटिट्ठितो उद्धं पिट्ठिकण्टके अप्पमत्तकम्पि पदेसं भूमिं अफुसापेत्वा थम्भादिं अपस्साय सुपन्तस्स. कटिट्ठिं पन भूमिं फुसापेन्तस्स सयनं नाम होति. पिट्ठिपसारणलक्खणा हि सेय्या. दीघवन्दनादीसुपि तिरियं पिट्ठिकण्टकानं पसारितत्ता निपज्जनमेवाति आपत्ति परिहरितब्बाव ‘‘वन्दामीति पादमूले निपज्जी’’तिआदीसु निपज्जनस्सेव वुत्तत्ता. तस्सापि अनापत्ति पतनक्खणे अविसयत्ता, विसये जाते सहसा वुट्ठितत्ता च. यस्स पन विसञ्ञिताय पच्छापि अविसयो, एतस्स अनापत्तियेव पतितक्खणे विय. तत्थेव सयति न वुट्ठातीति इमिना विसयेपि अकरणं दस्सेति, तेनेव ‘‘तस्स आपत्ती’’ति वुत्तं.

एकभङ्गेनाति उभो पादे भूमितो अमोचेत्वाव एकपस्सेन सरीरं भञ्जित्वा निपन्नो. महाअट्ठकथायं पन महापदुमत्थेरेन वुत्तन्ति सम्बन्धो, तेन ‘‘महाअट्ठकथाय लिखितमहापदुमत्थेरवादो अय’’न्ति दस्सेति. तत्थ सुपन्तस्सापि अविसयत्तमत्थीति महापदुमत्थेरेन ‘‘अविसयत्ता पन आपत्ति न दिस्सती’’ति वुत्तं. आचरिया पन सुपन्तस्स विसञ्ञत्ताभावेन विसयत्ता अनापत्तिं न कथयन्ति. विसञ्ञत्ते सति अनापत्तियेव. द्वे पन जनातिआदिपि महाअट्ठकथायमेव वचनं, तदेव पच्छा वुत्तत्ता पमाणं. यक्खगहितग्गहणेनेव चेत्थ विसञ्ञीभूतोपि सङ्गहितो. एकभङ्गेन निपन्नो पन अनिपन्नत्ता आपत्तितो मुच्चतियेवाति गहेतब्बं.

७८. अपदेति ¶ आकासे. पदन्ति पदवळञ्जं, तेनाह ‘‘आकासे पद’’न्ति. एतदग्गन्ति एसो अग्गो. यदिदन्ति यो अयं. सेसं उत्तानमेव.

इति समन्तपासादिकाय विनयट्ठकथाय विमतिविनोदनियं

पठमपाराजिकवण्णनानयो निट्ठितो.

२. दुतियपाराजिकं

अदुतियेनाति ¶ ¶ असदिसेन जिनेन यं दुतियं पाराजिकं पकासितं, तस्स इदानि यस्मा संवण्णनाक्कमो पत्तो, तस्मा अस्स दुतियस्स अयं संवण्णना होतीति योजना.

धनियवत्थुवण्णना

८४. राजूहि गहितन्ति राजगहन्ति आह ‘‘मन्धातू’’ति. राजपुरोहितेन परिग्गहितम्पि राजपरिग्गहितमेवाति महागोविन्दग्गहणं, नगरसद्दापेक्खाय चेत्थ ‘‘राजगह’’न्ति नपुंसकनिद्देसो. अञ्ञेपेत्थ पकारेति सुसंविहितारक्खत्ता राजूनं गहं गेहभूतन्ति राजगहन्तिआदिके पकारे. वसन्तवनन्ति कीळावनं, वसन्तकाले कीळाय येभुय्यत्ता पन वसन्तवनन्ति वुत्तं.

सद्वारबन्धाति वस्सूपगमनयोग्गतादस्सनं. नालकपटिपदन्ति सुत्तनिपाते (सु. नि. ६८४ आदयो) नालकत्थेरस्स देसितं मोनेय्यपटिपदं. पञ्चन्नं छदनानन्ति तिणपण्णइट्ठकसिलासुधासङ्खातानं पञ्चन्नं. नो चे लभति…पे… सामम्पि कातब्बन्ति इमिना नावासत्थवजे ठपेत्वा अञ्ञत्थ ‘‘असेनासनिको अह’’न्ति आलयकरणमत्तेन उपगमनं न वट्टति. सेनासनं परियेसित्वा वचीभेदं कत्वा वस्सं उपगन्तब्बमेवाति दस्सेति. ‘‘न, भिक्खवे, असेनासनिकेना’’तिआदिना (महाव. २०४) हि पाळियं ‘‘नालकपटिपदं पटिपन्नेनापी’’ति अट्ठकथायञ्च अविसेसेन दळ्हं कत्वा वुत्तं, नावासत्थवजेसुयेव च ‘‘अनुजानामि, भिक्खवे, नावाय वस्सं उपगन्तु’’न्तिआदिना (महाव. २०३) असतिपि सेनासने आलयकरणवसेन वस्सूपगमनं अनुञ्ञातं, नाञ्ञत्थाति गहेतब्बं. अयमनुधम्मताति सामीचिवत्तं. कतिकवत्तानीति भस्सारामतादिं विहाय सब्बदा अप्पमत्तेहि भवितब्बन्तिआदिकतिकवत्तानि. खन्धकवत्तानीति ‘‘आगन्तुकादिखन्धकवत्तं पूरेतब्ब’’न्ति एवं खन्धकवत्तानि च अधिट्ठहित्वा.

वस्संवुत्थाति पदस्स अट्ठकथायं ‘‘पुरिमिकाय उपगता महापवारणाय पवारिता पाटिपददिवसतो ¶ पट्ठाय ‘वुत्थवस्सा’ति वुच्चन्ती’’ति वुत्तत्ता महापवारणादिवसे पवारेत्वा वा अप्पवारेत्वा वा अञ्ञत्थ गच्छन्तेहि ¶ सत्ताहकरणीयनिमित्ते सति एव गन्तब्बं, नासति, इतरथा वस्सच्छेदो दुक्कटञ्च होतीति वेदितब्बं. ‘‘इमं तेमासं वस्सं उपेमी’’ति हि ‘‘न, भिक्खवे, वस्सं उपगन्त्वा पुरिमं वा तेमासं पच्छिमं वा तेमासं अवसित्वा चारिका पक्कमितब्बा’’ति (महाव. १८५) च वुत्तं. इधेव च वस्संवुत्था तेमासच्चयेन…पे… पक्कमिंसूति वुत्तं. पवारणादिवसोपि तेमासपरियापन्नोव. केचि पन ‘‘अनुजानामि, भिक्खवे, वस्संवुत्थानं भिक्खूनं तीहि ठानेहि पवारेतुन्ति (महाव. २०९) पवारणाकम्मस्स पुब्बेयेव वस्संवुत्थानन्ति वुत्थवस्सताय वुत्तत्ता महापवारणादिवसे सत्ताहकरणीयनिमित्तं विनापि यथासुखं गन्तुं वट्टती’’ति वदन्ति, तं तेसं मतिमत्तं, वुत्थवस्सानञ्हि पवारणानुजाननं अनुपगतछिन्नवस्सादीनं निवत्तनत्थं कतं, न पन पवारणादिवसे अवसित्वा पक्कमितब्बन्ति दस्सनत्थं तदत्थस्स इध पसङ्गाभावा, पवारणं कातुं अनुच्छविकानं पवारणा इध विधीयति, ये च वस्सं उपगन्त्वा वस्सच्छेदञ्च अकत्वा याव पवारणादिवसा वसिंसु, ते तत्तकेन पवारणाकम्मं पति परियायतो वुत्थवस्साति वुच्चन्ति, अप्पकं ऊनमधिकं वा गणनूपगं न होतीति ञायतो, न कथिनकम्मं पति तेमासस्स अपरिपुण्णत्ता, इतरथा तस्मिं महापवारणादिवसेपि कथिनत्थारप्पसङ्गतो. ‘‘अनुजानामि, भिक्खवे, वस्संवुत्थानं भिक्खूनं कथिनं अत्थरितु’’न्ति (महाव. ३०६) इदं पन ‘‘न, भिक्खवे, वस्सं उपगन्त्वा पुरिमं वा तेमासं पच्छिमं वा तेमासं अवसित्वा चारिका पक्कमितब्बा’’तिआदि (महाव. १८५) च निप्परियायतो महापवारणाय अनन्तरपाटिपददिवसतो पट्ठाय कथिनत्थारं पक्कमनञ्च सन्धाय वुत्तं, परिवारे च ‘‘कथिनस्स अत्थारमासो जानितब्बो’’ति (परि. ४१२) वत्वा ‘‘वस्सानस्स पच्छिमो मासो जानितब्बो’’ति (परि. ४१२) वुत्तं. यो हि कथिनत्थारस्स कालो, ततो पट्ठायेव चारिकापक्कमनस्सापि कालो, न ततो पुरे वस्संवुत्थानंयेव कथिनत्थारारहत्ता. यदग्गेन हि पवारणादिवसे कथिनत्थारो न वट्टति, तदग्गेन भिक्खूपि वुत्थवस्सा न होन्ति पवारणादिवसस्स अवुत्थत्ता.

यं पन सारत्थदीपनियं (सारत्थ. टी. पाराजिककण्ड २.८४) ‘‘एकदेसेन अवुत्थम्पि तं दिवसं वुत्थभागापेक्खाय वुत्थमेव होती’’तिआदि वुत्तं, तं न युत्तं, तंदिवसपरियोसाने अरुणुग्गमनकाले वसन्तोव हि तं दिवसं वुत्थो नाम होति ¶ परिवासअरञ्ञवासादीसु विय, अयञ्च विचारणा उपरि वस्सूपनायिकक्खन्धके आवि भविस्सतीति तत्थेव तं पाकटं करिस्साम.

महापवारणाय ¶ पवारिताति पुरिमिकाय वस्सं उपगन्त्वा अच्छिन्नवस्सतादस्सनपरं एतं केनचि अन्तरायेन अप्पवारितानम्पि वुत्थवस्सत्ता. न ओवस्सियतीति अनोवस्सकन्ति कम्मसाधनं दट्ठब्बं, यथा न तेमियति, तथा कत्वाति अत्थो. अनवयोति एत्थ अनुसद्दो विच्छायं वत्ततीति आह अनु अनु अवयोतिआदि. आचरियस्स कम्मं आचरियकन्ति आह ‘‘आचरियकम्मे’’ति. कट्ठकम्मं थम्भादि. तेलतम्बमत्तिकायाति तेलमिस्साय तम्बमत्तिकाय.

८५. कुटिकाय करणभावन्ति कुटिया कतभावं. किं-सद्दप्पयोगे अनागतप्पच्चयविधानं सन्धाय तस्स लक्खणन्तिआदि वुत्तं. किञ्चापि थेरस्स पाणघाताधिप्पायो नत्थि, अनुपपरिक्खित्वा करणेन पन बहूनं पाणानं मरणत्ता पाणे ब्याबाधेन्तस्सातिआदि वुत्तं. पातब्यभावन्ति विनासेतब्बतं. पाणातिपातं करोन्तानन्ति थेरेन अकतेपि पाणातिपाते पाणकानं मरणमत्तेन पच्छिमानं लेसेन गहणाकारं दस्सेति, तेन च ‘‘मम तादिसं अकुसलं नत्थी’’ति पच्छिमानं विपल्लासलेसग्गहणनिमित्तकिच्चं न कत्तब्बन्ति दीपितं होति. दिट्ठानुगतिन्ति दिट्ठस्स कम्मस्स अनुपगमनं अनुकिरियं, दिट्ठिया वा लद्धिया अनुगमनं गाहं. घंसितब्बेति मद्दितब्बे, विनासितब्बेति अत्थो. कतं लभित्वा तत्थ वसन्तानम्पि दुक्कटमेवाति इदं भगवता कुटिया भेदापनवचनेन सिद्धं, सापि तिणदब्बसम्भारेहि तुलाथम्भादीहि अमिस्सा सुद्धमत्तिकामयापि इट्ठकाहि कता वट्टति. केचि हि इट्ठकाहियेव थम्भे चिनित्वा तदुपरि इट्ठकाहियेव वितानादिसण्ठानेन तुलादिदारुसम्भारविरहितं छदनम्पि बन्धित्वा इट्ठकामयमेव आवसथं करोन्ति, तादिसं वट्टति. गिञ्जकावसथसङ्खेपेन कताति एत्थ गिञ्जका वुच्चन्ति इट्ठका, ताहियेव कतो आवसथो गिञ्जकावसथो. वयकम्मम्पीति मत्तिकुद्धारणइट्ठकदारुच्छेदनादिकारकानं दिन्नभत्तवेत्तनादिवत्थुब्बयेन निप्फन्नकम्मम्पि अत्थि, एतेन कुटिभेदकानं गीवादिभावं परिसङ्कति. तित्थियधजोति तित्थियानमेव सञ्ञाणभूतत्ता वुत्तं. ते हि ईदिसेसु चाटिआदीसु वसन्ति. अञ्ञानिपीति पि-सद्देन अत्तना वुत्तकारणद्वयम्पि महाअट्ठकथायमेव वुत्तन्ति दस्सेति. यस्मा सब्बमत्तिकामया ¶ कुटि सीतकाले अतिसीता उण्हकाले च उण्हा सुकरा च होति चोरेहि भिन्दितुं, तस्मा तत्थ ठपितपत्तचीवरादिकं सीतुण्हचोरादीहि विनस्सतीति वुत्तं ‘‘पत्तचीवरगुत्तत्थाया’’ति. छिन्दापेय्य वा भिन्दापेय्य वा अनुपवज्जोति इदं अयं कुटि विय सब्बथा अनुपयोगारहं सन्धाय वुत्तं. यं पन पञ्चवण्णसुत्तेहि विनद्धछत्तादिकं, तत्थ अकप्पियभागोव छिन्दितब्बो, न तदवसेसो तस्स कप्पियत्ता, तं छिन्दन्तो उपवज्जोव होति. तेनेव वक्खति ‘‘घटकम्पि वाळरूपम्पि भिन्दित्वा धारेतब्ब’’न्तिआदि.

पाळिमुत्तकविनिच्छयवण्णना

छत्तदण्डग्गाहकं ¶ सलाकपञ्जरन्ति एत्थ यो पञ्जरसलाकानं मज्झट्ठो बुन्दे पुथुलो अहिच्छत्तकसदिसो अग्गे सछिद्दो यत्थ दण्डन्तरं पवेसेत्वा छत्तं गण्हन्ति, यो वा सयमेव दीघताय गहणदण्डो होति, अयं छत्तदण्डो नाम, तस्स अपरिगळनत्थाय छत्तसलाकानं मूलप्पदेसदण्डस्स समन्ततो दळ्हपञ्जरं कत्वा सुत्तेहि विनन्धन्ति, सो पदेसो छत्तदण्डगाहकसलाकपञ्जरं नाम, तं विनन्धितुं वट्टति. न वण्णमट्ठत्थायाति इमिना थिरकरणत्थमेव एकवण्णसुत्तेन विनन्धियमानं यदि वण्णमट्ठं होति, न तत्थ दोसोति दस्सेति. आरग्गेनाति निखादनमुखेन. दण्डबुन्देति दण्डमूले कोटियं. छत्तमण्डलिकन्ति छत्तपञ्जरे मण्डलाकारेन बद्धदण्डवलयं. उक्किरित्वाति निन्नं, उन्नतं वा कत्वा.

नानासुत्तकेहीति नानावण्णेहि सुत्तेहि. इदञ्च तथा करोन्तानं वसेन वुत्तं, एकवण्णसुत्तकेनापि न वट्टतियेव, ‘‘पकतिसूचिकम्ममेव वट्टती’’ति हि वुत्तं. पट्टमुखेति द्विन्नं पट्टानं सङ्घटितट्ठानं सन्धायेतं वुत्तं. परियन्तेति चीवरपरियन्ते, अनुवातं सन्धायेतं वुत्तं. वेणिन्ति वरकसीसाकारेन सिब्बनं. सङ्खलिकन्ति दिगुणसङ्खलिकाकारेन सिब्बनं, वेणिं वा सङ्खलिकं वा करोन्तीति पकतेन सम्बन्धो. अग्घियं नाम चेतियसण्ठानं, यं अग्घियत्थम्भोति वदन्ति. उक्किरन्तीति उट्ठपेन्ति. चतुकोणमेव वट्टतीति गण्ठिकपासकपट्टानि सन्धाय वुत्तं. कोणसुत्तपिळकाति गण्ठिकपासकपट्टानं कोणेहि बहि निग्गतसुत्तानं ¶ पिळकाकारेन ठपितकोटियोति केचि वदन्ति, ते पिळके छिन्दित्वा दुविञ्ञेय्या कातब्बाति तेसं अधिप्पायो. केचि पन ‘‘कोणसुत्ता च पिळकाति द्वेयेवा’’ति वदन्ति, तेसं मतेन गण्ठिकपासकपट्टानं कोणतो कोणेहि नीहतसुत्ता कोणसुत्ता नाम. समन्ततो पन परियन्तेन कता चतुरस्ससुत्ता पिळका नाम. तं दुविधम्पि केचि चीवरतो विसुं पञ्ञायनत्थाय विकारयुत्तं करोन्ति, तं निसेधाय ‘‘दुविञ्ञेय्यरूपा वट्टन्ती’’ति वुत्तं, न पन सब्बथा अचक्खुगोचरभावेन सिब्बनत्थाय तथासिब्बनस्स असक्कुणेय्यत्ता. यथा पकतिचीवरतो विकारो न पञ्ञायति, एवं सिब्बितब्बन्ति अधिप्पायो. रजनकम्मतो पुब्बे पञ्ञायमानोपि विसेसो चीवरे रत्ते एकवण्णताय न पञ्ञायतीति आह ‘‘चीवरे रत्ते’’ति. मणिनाति नीलमणिआदिमट्ठपासाणेन, अंसवद्धककायबन्धनादिकं पन अचीवरत्ता सङ्खादीहि घंसितुं वट्टतीति वदन्ति. कण्णसुत्तकन्ति चीवरस्स दीघतो तिरियञ्च सिब्बितानं चतूसु कण्णेसु कोणेसु च निक्खन्तानं सुत्तसीसानमेतं नामं, तं छिन्दित्वाव पारुपितब्बं, तेनाह ‘‘रजितकाले छिन्दितब्ब’’न्ति. भगवता अनुञ्ञातं एकं कण्णसुत्तम्पि अत्थि, तं पन नामेन ¶ सदिसम्पि इतो अञ्ञमेवाति दस्सेतुं यं पनातिआदि वुत्तं. लग्गनत्थायाति चीवररज्जुयं चीवरबन्धनत्थाय. गण्ठिकेति दन्तादिमये. पीळकाति बिन्दुं बिन्दुं कत्वा उट्ठापेतब्बपीळका.

थालके वाति तम्बादिमये पुग्गलिके तिविधेपि कप्पियथालके. न वट्टतीति मणिवण्णकरणप्पयोगो न वट्टति, तेलवण्णकरणत्थं पन वट्टति. पत्तमण्डलेति तिपुसीसादिमये. ‘‘न, भिक्खवे, चित्तानि पत्तमण्डलानि धारेतब्बानि रूपकाकिण्णानि भित्तिकम्मकतानी’’ति (चूळव. २५३) वुत्तत्ता ‘‘भित्तिकम्मं न वट्टती’’ति वुत्तं. ‘‘अनुजानामि, भिक्खवे, मकरदन्तकं छिन्दितु’’न्ति (चूळव. २५३) वुत्तत्ता ‘‘मकरदन्तकं पन वट्टती’’ति वुत्तं, इदं पन पाळिया लद्धम्पि इध पाळिया मुत्तत्ता पाळिमुत्तकनये वुत्तं. एवमञ्ञम्पि ईदिसं.

लेखा न वट्टतीति आरग्गेन दिन्नलेखाव न वट्टति, जातिहिङ्गुलिकादिवण्णेहि कतलेखा वट्टति. छत्तमुखवट्टियन्ति धमकरणस्स हत्थेन गहणछत्ताकारस्स ¶ मुखवट्टियं, ‘‘परिस्सावनचोळबन्धनट्ठाने’’ति केचि.

देड्डुभसीसन्ति उदकसप्पसीसं. अच्छीनीति कुञ्जरच्छिसण्ठानानि. एकमेव वट्टतीति एत्थ एकरज्जुकं दिगुणं तिगुणं कत्वापि बन्धितुं न वट्टति, एकमेव पन सतवारम्पि सरीरं परिक्खिपित्वा बन्धितुं वट्टति, बहुरज्जुके एकतो कत्वा एकेन निरन्तरं वेठेत्वा कतं ‘‘बहुरज्जुक’’न्ति न वत्तब्बं ‘‘वट्टती’’ति वुत्तत्ता, तं मुरजसङ्खं न गच्छतीति वेदितब्बं. मुरजञ्हि नानावण्णेहि सुत्तेहि मुरजवट्टिसण्ठानं वेठेत्वा कतं, इदं पन मुरजं मद्दवीणसङ्खातं पामङ्गसण्ठानञ्च दसासु वट्टति ‘‘कायबन्धनस्स दसा जीरन्ति; अनुजानामि, भिक्खवे, मुरजं मद्दवीण’’न्ति (चूळव. २७८) वुत्तत्ता.

विधेति दसापरियोसाने थिरभावाय दन्तविसाणसुत्तादीहि कत्तब्बे विधे. अट्ठ मङ्गलानि नाम सङ्खो चक्कं पुण्णकुम्भो गया सिरीवच्छो अङ्कुसो धजं सोवत्तिकन्ति वदन्ति. मच्छयुगळछत्तनन्दियावट्टादिवसेनपि वदन्ति. परिच्छेदलेखामत्तन्ति दन्तादीहि कतविधस्स उभोसु कोटीसु कतपरिच्छेदराजिमत्तं.

‘‘उजुकमेवा’’ति वुत्तत्ता चतुरस्सादिसण्ठानापि अञ्जनी वङ्कगतिका न वट्टति. सिपाटिकायाति ¶ वासिआदिभण्डनिक्खिपनपसिब्बके. आरकण्टकं नाम पोत्थकादिअअसङ्खारणत्थं कतदीघमुखसत्थकन्ति वदन्ति. ‘‘भमकारानं दारुआदिलिखनसत्थक’’न्ति केचि. वट्टमणिकन्ति वट्टं कत्वा उट्ठपेतब्बं पुप्फुळकं. अञ्ञन्ति इमिना पिळकादिं सङ्गण्हाति. पिप्फलिकेति यं किञ्चि छेदनके खुद्दकसत्थे. वलितकन्ति नखच्छेदनकाले दळ्हग्गहणत्थं वलीहि युत्तमेव करोन्ति. तस्मा तं वट्टतीति इमिना यं अञ्ञम्पि विकारं दळ्हीकम्मादिअत्थाय करोन्ति, न वण्णमट्ठत्थाय, तं वट्टतीति दीपितं, तेन च कत्तरदण्डकोटियं अञ्ञमञ्ञम्पि घट्टनेन सद्दनिच्छरणत्थाय कतं अयोवलयादिकं संयुत्तम्पि कप्पियतो उपपन्नं होति. मण्डलन्ति उत्तरारणिया पवेसनत्थं आवाटमण्डलं होति. उजुकमेव बन्धितुन्ति सम्बन्धो, उभोसु वा पस्सेसु एकपस्से वाति वचनसेसो. वासिदण्डस्स उभोसु पस्सेसु दण्डकोटीनं अचलनत्थं बन्धितुन्ति अत्थो.

आमण्डसारकेति ¶ आमलकफलानि पिसित्वा तेन कक्केन कततेलभाजने. तत्थ किर पक्खित्तं तेलं सीतलं होति. भूमत्थरणेति कटसारादिमये परिकम्मकताय भूमिया अत्थरितब्बअत्थरणे. पानीयघटेति सब्बं भाजनविकतिं सङ्गण्हाति. सब्बं…पे… वट्टतीति यथावुत्तेसु मञ्चादीसु इत्थिपुरिसरूपम्पि वट्टति तेलभाजनेसुयेव इत्थिपुरिसरूपानं पटिक्खित्तत्ता, तेलभाजनेन सह अगणेत्वा विसुं मञ्चादीनं गहितत्ता चाति वदन्ति, किञ्चापि वदन्ति, एतेसं पन मञ्चादीनं हत्थेन आमसितब्बभण्डत्ता इत्थिरूपमेवेत्थ न वट्टतीति गहेतब्बं. अञ्ञेसन्ति सीमसामिकानं. राजवल्लभेहीति लज्जीपेसलादीनं उपोसथादिअन्तरायकरा अलज्जिनो भिन्नलद्धिका च भिक्खू अधिप्पेता तेहि सह उपोसथादिकरणायोगा, तेनेव ‘‘सीमाया’’ति वुत्तं. तेसं लज्जीपरिसाति तेसं सीमासामिकानं अनुबलं दातुं समत्था लज्जीपरिसा. भिक्खूहि कतन्ति यं अलज्जीनं सेनासनभेदनादिकं लज्जीभिक्खूहि कतं, सब्बञ्चेतं सुकतमेव अलज्जीनिग्गहत्थाय पवत्तितब्बतो.

८८. अवज्झायन्तीति नीचतो चिन्तेन्ति. उज्झायनत्थोति भिक्खुनो थेय्यकम्मनिन्दनत्थो ‘‘कथञ्हि नाम अदिन्नं आदियिस्सती’’ति, न पन दारु-सद्दविसेसनत्थो तस्स बहुवचनत्ता. वचनभेदेति एकवचनबहुवचनानं भेदे. सब्बावन्तन्ति भिक्खुभिक्खुनीआदिसब्बावयववन्तं. बिम्बिसारोति तस्स नामन्ति एत्थ बिम्बीति सुवण्णं. तस्मा सारसुवण्णसदिसवण्णताय ‘‘बिम्बिसारो’’ति वुच्चतीति वेदितब्बं. पोराणसत्थानुरूपं उप्पादितो वीसतिमासप्पमाणउत्तमसुवण्णग्घनको लक्खणसम्पन्नो नीलकहापणोति वेदितब्बो. रुद्रदामेन नाम केनचि उप्पादितो रुद्रदामको. सो किर नीलकहापणस्स तिभागं अग्घति. यस्मिं पन देसे नीलकहापणा ¶ न सन्ति, तत्थापि काळकविरहितस्स निद्धन्तसुवण्णस्स पञ्चमासग्घनकेन भण्डेन पादपरिच्छेदो कातब्बो. तेनाति नीलकहापणस्स चतुत्थभागभूतेन. पाराजिकवत्थुम्हि वातिआदि पाराजिकानं सब्बबुद्धेहि पञ्ञत्तभावेन वुत्तं, सङ्घादिसेसादीसु पन इतरापत्तीसुपि तब्बत्थूसु च नानत्तं नत्थेव, केवलं केचि सब्बाकारेन पञ्ञपेन्ति, केचि एकदेसेनाति एत्तकमेव विसेसो. न हि कदाचिपि सम्मासम्बुद्धा यथापराधं अतिक्कम्म ऊनमधिकं वा सिक्खापदं पञ्ञपेन्ति.

पदभाजनीयवण्णना

९२. पुनपि ¶ ‘‘आगन्तुकामा’’ति वुत्तत्ता च सब्बथा मनुस्सेहि अनिवुत्थपुब्बे अभिनवमापिते, ‘‘पुन न पविसिस्सामा’’ति निरालयेहि परिच्चत्ते च गामे गामवोहाराभावा गामप्पवेसनापुच्छनादिकिच्चं नत्थीति वेदितब्बं. अरञ्ञपरिच्छेददस्सनत्थन्ति गामगामूपचारेसु दस्सितेसु तदञ्ञं अरञ्ञन्ति अरञ्ञपरिच्छेदो सक्का ञातुन्ति वुत्तं. मातिकायं पन गामग्गहणेनेव गामूपचारोपि गहितोति दट्ठब्बो. इन्दखीलेति उम्मारे. अरञ्ञसङ्खेपं गच्छति तथा अभिधम्मे वुत्तत्ता. असतिपि इन्दखीले इन्दखीलट्ठानियत्ता ‘‘वेमज्झमेव इन्दखीलोति वुच्चती’’ति वुत्तं. यत्थ पन द्वारबाहापि नत्थि, तत्थ पाकारवेमज्झमेव इन्दखीलोति गहेतब्बं. लुठित्वाति पवट्टित्वा.

मज्झिमस्स पुरिसस्स सुप्पपातो वातिआदि मातुगामस्स काकुट्ठापनवसेन गहेतब्बं, न बलदस्सनवसेन ‘‘मातुगामो भाजनधोवनउदकं छड्डेती’’ति (पारा. अट्ठ. १.९२) उपरि वुच्चमानत्ता, तेनेव ‘‘लेड्डुपातो’’ति अवत्वा सुप्पपातोतिआदि वुत्तं. कुरुन्दट्ठकथायं महापच्चरियञ्च घरूपचारोव गामोति अधिप्पायेन ‘‘घरूपचारे ठितस्स लेड्डुपातो गामूपचारो’’ति वुत्तं. कतपरिक्खेपोति इमिना परिक्खेपतो बहि उपचारो न गहेतब्बोति दस्सेति. सुप्पमुसलपातोपि अपरिक्खित्तगेहस्सेव, सो च यतो पहोति, तत्थेव गहेतब्बो, अप्पहोनट्ठाने पन विज्जमानट्ठानमेव गहेतब्बं. यस्स पन घरस्स समन्ततो पाकारादीहि परिक्खेपो कतो होति, तत्थ सोव परिक्खेपो घरूपचारोति गहेतब्बं.

पुब्बे वुत्तनयेनाति परिक्खित्तगामे वुत्तनयेन. सङ्करीयतीति मिस्सीयति. विकाले गामप्पवेसने ‘‘परिक्खित्तस्स गामस्स परिक्खेपं अतिक्कमन्तस्स आपत्ति पाचित्तियस्स. अपरिक्खित्तस्स गामस्स उपचारं ओक्कमन्तस्स आपत्ति पाचित्तियस्सा’’ति (पाचि. ५१३) वुत्तत्ता ¶ गामगामूपचारानं असङ्करता इच्छितब्बाति आह असङ्करतो चातिआदि. केचि पनेत्थ पाळियं ‘‘अपरिक्खित्तस्स गामस्स उपचारं ओक्कमन्तस्साति इदं परिक्खेपारहट्ठानं सन्धाय वुत्तं, न ततो परं एकलेड्डुपातपरिच्छिन्नं उपचारं ¶ . तस्मा परिक्खेपारहट्ठानसङ्खातं गामं ओक्कमन्तस्सेव आपत्ति, न उपचार’’न्ति वदन्ति, तं न गहेतब्बं ‘‘घरूपचारे ठितस्स मज्झिमस्स पुरिसस्स लेड्डुपातब्भन्तरं गामो नाम. ततो अञ्ञस्स लेड्डुपातस्स अब्भन्तरं गामूपचारो नामा’’ति (पारा. अट्ठ. १.९२) इधेव अट्ठकथायं वुत्तत्ता. विकाले गामप्पवेसनसिक्खापदट्ठकथायञ्हि अपरिक्खित्तस्स गामस्स उपचारो अदिन्नादाने वुत्तनयेनेव वेदितब्बोति (पाचि. अट्ठ. ५१२) अयमेव नयो अतिदिसितो. तेनेव मातिकाट्ठकथायम्पि ‘‘य्वायं अपरिक्खित्तस्स गामस्स उपचारो दस्सितो, तस्स वसेन विकाले गामप्पवेसनादीसु आपत्ति परिच्छिन्दितब्बा’’ति (कङ्खा. अट्ठ. दुतियपाराजिकवण्णना) वुत्तं, तस्मा परिक्खित्तस्स गामस्स परिक्खेपं अतिक्कमन्तस्स, अपरिक्खित्तस्स गामस्स घरूपचारतो पट्ठाय दुतियलेड्डुपातसङ्खातं गामूपचारं ओक्कमन्तस्स विकाले गामप्पवेसनापत्ति होति, मातिकायञ्च विकाले गामं पविसेय्याति गामग्गहणेनेव गामूपचारोपि गहितोति वेदितब्बं. विकाले गामप्पवेसनादीसूति आदि-सद्देन घरघरूपचारादीसु ठितानं उप्पन्नलाभभाजनादिं सङ्गण्हाति.

निक्खमित्वा बहि इन्दखीलाति इन्दखीलतो बहि निक्खमित्वा ठितं यं ठानं सब्बमेतं अरञ्ञन्ति योजना. आचरियधनु नाम पकतिहत्थेन नवविदत्थिपमाणं, जियाय पन आरोपिताय सत्तट्ठविदत्थिमत्तन्ति वदन्ति.

कप्पियन्ति अनुरूपवसेन वुत्तं अकप्पियस्सापि अप्पटिग्गहितस्स परिभोगे पाचित्तियत्ता. परिच्चागादिम्हि अकते ‘‘इदं मय्हं सन्तक’’न्ति वत्थुसामिना अविदितम्पि परिग्गहितमेव बालुम्मत्तादीनं सन्तकं विय, तादिसं अवहरन्तोपि ञातकादीहि पच्छा ञत्वा वत्थुसामिना च अनुबन्धितब्बतो पाराजिकोव होति. यस्स वसेन पुरिसो थेनो होति, तं थेय्यन्ति आह ‘‘अवहरणचित्तस्सेतं अधिवचन’’न्ति. पपञ्चसङ्खाति तण्हामानदिट्ठिसङ्खाता पपञ्चकोट्ठासा. एको चित्तकोट्ठासोति ठानाचावनपयोगसमुट्ठापको एको चित्तकोट्ठासोति अत्थो.

अभियोगवसेनाति अट्टकरणवसेन. सविञ्ञाणकेनेवाति इदं सविञ्ञाणकानञ्ञेव आवेणिकविनिच्छयं सन्धाय वुत्तं. पाणो अपदन्तिआदीसु हि ‘‘पदसा नेस्सामी’’ति पठमं पादं ¶ सङ्कामेति, आपत्ति थुल्लच्चयस्सातिआदिना पाळियं (पारा. १११), भिक्खु दासं दिस्वा सुखदुक्खं पुच्छित्वा ¶ वा अपुच्छित्वा वा ‘‘गच्छ, पलायित्वा सुखं जीवा’’ति वदति, सो चे पलायति, दुतियपदवारे पाराजिकन्तिआदिना (पारा. अट्ठ. १.११४) अट्ठकथायञ्च यो सविञ्ञाणकानञ्ञेव आवेणिको विनिच्छयो वुत्तो, सो आरामादिअविञ्ञाणकेसु न लब्भतीति तादिसं सन्धाय ‘‘सविञ्ञाणकेनेवा’’ति वुत्तं. यो पन विनिच्छयो आरामादिअविञ्ञाणकेसु लब्भति, सो यस्मा सविञ्ञाणकेसु अलब्भनको नाम नत्थि, तस्मा वुत्तं ‘‘नानाभण्डवसेन सविञ्ञाणकाविञ्ञाणकमिस्सकेना’’ति. सविञ्ञाणकेन च अविञ्ञाणकेन चाति अत्थो. यस्मा चेत्थ अविञ्ञाणकेनेव आदियनादीनि छपि पदानि न सक्का योजेतुं इरियापथविकोपनस्स सविञ्ञाणकवसेनेव योजेतब्बतो, तस्मा ‘‘अविञ्ञाणकेनेवा’’ति ततियं पकारं न वुत्तन्ति दट्ठब्बं.

आरामन्ति इदं उपलक्खणमत्तं दासादिसविञ्ञाणकस्सापि इध सङ्गहेतब्बतो, नानाभण्डवसेन हेत्थ योजना दस्सियति. परिकप्पितट्ठानन्ति परिकप्पितोकासं. सुङ्कघातन्ति एत्थ मग्गं गच्छन्तेहि सत्थिकेहि अत्तना नीयमानभण्डतो रञ्ञो दातब्बभागो सुङ्को नाम, सो एत्थ हञ्ञति अदत्वा गच्छन्तेहि अवहरीयति, तं वा हन्ति एत्थ राजपुरिसा अददन्तानं सन्तकं बलक्कारेनाति सुङ्कघातो, ‘‘एत्थ पविट्ठेहि सुङ्को दातब्बो’’ति रुक्खपब्बतादिसञ्ञाणेन नियमितप्पदेसस्सेतं अधिवचनं.

पञ्चवीसतिअवहारकथावण्णना

कत्थचीति एकिस्सा अट्ठकथायं. एकं पञ्चकं दस्सितन्ति ‘‘परपरिग्गहितञ्च होति, परपरिग्गहितसञ्ञी च, गरुको च होति परिक्खारो पञ्चमासको वा अतिरेकपञ्चमासको वा, थेय्यचित्तञ्च पच्चुपट्ठितं होति, ठाना चावेती’’ति (पारा. १२२) वुत्तपञ्चअवहारङ्गानि एकं पञ्चकन्ति दस्सितं. द्वे पञ्चकानि दस्सितानीति ‘‘छहि आकारेहि अदिन्नं आदियन्तस्स आपत्ति पाराजिकस्स. न च सकसञ्ञी, न च विस्सासग्गाही, न च तावकालिकं, गरुको च होति परिक्खारो पञ्चमासको वा अतिरेकपञ्चमासको वा, थेय्यचित्तञ्च पच्चुपट्ठितं होति, ठाना चावेति, आपत्ति पाराजिकस्सा’’ति (पारा. १२५) एवं वुत्तेसु छसु पदेसु एकं अपनेत्वा सेसानि ¶ पञ्च पदानि एकं पञ्चकं कत्वा हेट्ठा वुत्तपञ्चकञ्च गहेत्वा द्वे पञ्चकानि दस्सितानि. एत्थ पनाति पञ्चहाकारेहीतिआदीसु. सब्बेहिपि पदेहीति परपरिग्गहितञ्च होतीतिआदीहि सब्बेहि पञ्चहि पदेहि.

पञ्चन्नं ¶ अवहारानं समूहो पञ्चकं. सको हत्थो सहत्थो, तेन निब्बत्तो, तस्स वा सम्बन्धीति साहत्थिको, अवहारो. साहत्थिकादि पञ्चकं साहत्थिकपञ्चकन्तिआदिपदवसेन नामलाभो दट्ठब्बो. एवं सेसेसुपि. ततियपञ्चमेसु पञ्चकेसूति साहत्थिकपञ्चकथेय्यावहारपञ्चकेसु. लब्भमानपदवसेनाति साहत्थिकपञ्चके लब्भमानस्स निस्सग्गियावहारपदस्स वसेन, थेय्यावहारपञ्चके लब्भमानस्स परिकप्पावहारपदस्स च वसेन योजेतब्बन्ति अत्थो.

निस्सग्गियो नाम…पे… पाराजिकस्साति इमिना बहिसुङ्कघातपातनं निस्सग्गियपयोगोति दस्सेति. ‘‘हत्थे भारं थेय्यचित्तो भूमियं निक्खिपति, आपत्ति पाराजिकस्सा’’ति (पारा. १०१) वुत्तत्ता पन सुद्धचित्तेन गहितपरभण्डस्स थेय्यचित्तेन गुम्बादिपटिच्छन्नट्ठाने खिपनम्पि इमस्मिं निस्सग्गियपयोगे सङ्गय्हतीति दट्ठब्बं. किरियासिद्धितो पुरेतरमेव पाराजिकापत्तिसङ्खातं अत्थं साधेतीति अत्थसाधको. अथ वा अत्तनो वत्तमानक्खणे अविज्जमानम्पि किरियासिद्धिसङ्खातं अत्थं अवस्सं आपत्तिं साधेतीतिपि अत्थसाधको. असुकं नाम भण्डं यदा सक्कोसीति इदं निदस्सनमत्तं परस्स तेलकुम्भिया उपाहनादीनं निक्खेपपयोगस्सापि अत्थसाधकत्ता. तथा हि वुत्तं मातिकाट्ठकथायं –

‘‘अत्थसाधको नाम ‘असुकस्स भण्डं यदा सक्कोति, तदा तं अवहरा’ति अञ्ञं आणापेति. तत्थ सचे परो अनन्तरायिको हुत्वा तं अवहरति, आणापकस्स आणत्तिक्खणेयेव पाराजिकं. परस्स वा पन तेलकुम्भिया पादग्घनकतेलं अवस्सं पिवनकानि उपाहनादीनि पक्खिपति, हत्थतो मुत्तमत्तेयेव पाराजिक’’न्ति (कङ्खा. अट्ठ. दुतियपाराजिकवण्णना).

इमस्स ¶ अत्थसाधकस्स आणत्तिया च को विसेसोति? तङ्खणञ्ञेव गहणे नियुञ्जनं आणत्तिकपयोगो, कालन्तरेन गहणत्थं नियोगो अत्थसाधकोति अयं नेसं विसेसो. तेनेवाह ‘‘असुकं नाम भण्डं यदा सक्कोसी’’तिआदि. धुरनिक्खेपो पन उपनिक्खित्तभण्डवसेन वेदितब्बोति इदं निदस्सनमत्तं, आरामाभियुञ्जनादीसुपि तावकालिकभण्डदेय्यानं अदानेपि एसेव नयो. भण्डग्गहणप्पयोगतो आणत्तिया पुब्बत्ता आह ‘‘आणत्तिवसेन पुब्बपयोगो वेदितब्बो’’ति. पयोगेन सह वत्तमानो अवहारो सहपयोगोति आह ‘‘ठानाचावनवसेना’’ति, इदञ्च निदस्सनमत्तं खीलसङ्कमनादीसुपि असति ठानाचावने सहपयोगत्ता. वुत्तञ्हि ¶ मातिकाट्ठकथायं ‘‘ठानाचावनवसेन खीलादीनि सङ्कामेत्वा खेत्तादिग्गहणवसेन च सहपयोगो वेदितब्बो’’ति (कङ्खा. अट्ठ. दुतियपाराजिकवण्णना).

तुलयित्वाति उपपरिक्खित्वा. सामीचीति वत्तं. सकसञ्ञाय अदेन्तस्स आपत्ति नत्थीति वदन्ति. सम्मद्दोति निविद्धतासङ्खोभो. भट्ठे जनकायेति अपगते जनसमूहे. अत्तनो सन्तकं कत्वा एतस्सेव भिक्खुनो देहीति इदं उभिन्नम्पि कुक्कुच्चविनोदनत्थं वुत्तं. अवहारकस्स हि ‘‘मया सहत्थेन न दिन्नं, भण्डदेय्यं एत’’न्ति कुक्कुच्चं उप्पज्जेय्य, इतरस्स च ‘‘मया पठमं धुरनिक्खेपं कत्वा पच्छा अदिन्नं गहित’’न्ति कुक्कुच्चं उप्पज्जेय्याति.

समग्घन्ति अप्पग्घं. दारुअत्थं फरतीति दारूहि कत्तब्बकिच्चं साधेति. एकदिवसं दन्तकट्ठच्छेदनादिना या अयं अग्घहानि वुत्ता, सा सब्बा भण्डसामिना किणित्वा गहितमेव सन्धाय वुत्ता. सब्बं पनेतं अट्ठकथाचरियप्पमाणेन वेदितब्बं. पासाणञ्च सक्खरञ्च पासाणसक्खरं.

अक्खदस्साति एत्थ अक्ख-सद्देन किर विनिच्छयसाला वुच्चति, तत्थ निसीदित्वा वज्जावज्जं निरूपयन्तीति ‘‘अक्खदस्सा’’ति वुच्चन्ति धम्मविनिच्छनका. हननं नाम हत्थपादादीहि पोथनञ्चेव हत्थनासादिच्छेदनञ्च होतीति आह ‘‘हनेय्युन्ति पोथेय्युञ्चेव छिन्देय्युञ्चा’’ति.

पदभाजनीयञ्च ‘‘हत्थेन वा पादेन वा कसाय वा वेत्तेन वा अड्ढदण्डकेन वा छज्जाय वा हनेय्यु’’न्ति (पारा. ९२) वुत्तं. तत्थ अड्ढदण्डकेनाति द्विहत्थप्पमाणेन ¶ रस्समुग्गरेन, वेळुपेसिकाय वा. छेज्जाय वाति हत्थादीनं छेदनेन. छिन्दन्ति एताय हत्थपादादीनीति छेज्जा, सत्थं, तेन सत्थेनातिपि अत्थो. नीहरेय्युन्ति रट्ठतो नीहरेय्युं. ‘‘चोरोसि…पे… थेनोसी’’ति एत्थ परिभासेय्युन्ति पदं अज्झाहरित्वा अत्थो वेदितब्बोति आह ‘‘चोरोसि…पे… परिभासेय्यु’’न्ति. यं तं भण्डं दस्सितन्ति सम्बन्धो.

९३. यत्थ यत्थ ठितन्ति भूमियादीसु यत्थ यत्थ ठितं. यथा यथा आदानं गच्छतीति येन येन आकारेन गहणं उपगच्छति.

भूमट्ठकथावण्णना

९४. वाचाय ¶ वाचायाति एकेकत्थदीपिकाय वाचाय वाचाय. उपलद्धोति ञातो. पाळियं सेसअट्ठकथासु च कुदालं वा पिटकं वाति इदमेव द्वयं वत्वा वासिफरसूनं अवुत्तत्ता तेसम्पि सङ्खेपट्ठकथादीसु आगतभावं दस्सेतुं सङ्खेपट्ठकथायन्तिआदि वुत्तं. थेय्यचित्तेन कतत्ता ‘‘दुक्कटेहि सद्धिं पाचित्तियानी’’ति वुत्तं.

अट्ठविधं हेतन्तिआदीसु एतं दुक्कटं नाम थेरेहि धम्मसङ्गाहकेहि इमस्मिं ठाने समोधानेत्वा अट्ठविधन्ति दस्सितन्ति योजना. सब्बेसम्पि दुक्कटानं इमेसुयेव अट्ठसु सङ्गहेतब्बभावतो पन इतरेहि सत्तहि दुक्कटेहि विनिमुत्तं विनयदुक्कटेयेव सङ्गहेतब्बं. दसविधं रतनन्ति ‘‘मुत्ता मणि वेळुरियो सङ्खो सिला पवाळं रजतं जातरूपं लोहितको मसारगल्ल’’न्ति एवमागतं दसविधं रतनं.

‘‘मुत्ता मणि वेळुरियो च सङ्खो,

सिला पवाळं रजतञ्च हेमं;

लोहितकञ्च मसारगल्लं,

दसेते धीरो रतनानि जञ्ञा’’ति. –

हि वुत्तं. सत्तविधं धञ्ञन्ति सालि वीहि यवो कङ्गु कुद्रूसं वरको गोधुमोति इमं सत्तविधं धञ्ञं. आवुधभण्डादिन्ति आदि-सद्देन तुरियभण्डइत्थिरूपादिं सङ्गण्हाति. अनामसितब्बे वत्थुम्हि दुक्कटं अनामासदुक्कटं. दुरूपचिण्णदुक्कटन्ति ‘‘अकत्तब्ब’’न्ति वारितस्स कतत्ता दुट्ठु ¶ उपचिण्णं चरितन्ति दुरूपचिण्णं, तस्मिं दुक्कटं दुरूपचिण्णदुक्कटं. विनये पञ्ञत्तं अवसेसं दुक्कटं विनयदुक्कटं. एकादस समनुभासना नाम भिक्खुपातिमोक्खे चत्तारो यावततियका सङ्घादिसेसा अरिट्ठसिक्खापदन्ति पञ्च, भिक्खुनीपातिमोक्खे एकं यावततियकपाराजिकं चत्तारो सङ्घादिसेसा चण्डकाळीसिक्खापदन्ति छ.

सहपयोगतो पट्ठाय चेत्थ पुरिमपुरिमा आपत्तियो पटिप्पस्सम्भन्तीति आह अथ धुरनिक्खेपं अकत्वातिआदि. ‘‘धुरनिक्खेपं अकत्वा’’ति वुत्तत्ता धुरनिक्खेपं कत्वा पुन खणन्तस्स पुरिमापत्तियो न पटिप्पस्सम्भन्तीति वदन्ति. ‘‘छेदनपच्चया दुक्कटं देसेत्वा मुच्चती’’ति ¶ वत्वा पुब्बपयोगे आपत्तीनं देसेतब्बताय अवुत्तत्ता सहपयोगे पत्ते पुब्बपयोगे आपत्तियो पटिप्पस्सम्भन्तीति वेदितब्बं.

अपरद्धं विरद्धं खलितन्ति सब्बमेतं यञ्च दुक्कटन्ति एत्थ वुत्तस्स दुक्कटस्स परियायवचनं, यं मनुस्सो करेतिआदि पनेत्थ ओपम्मनिदस्सनं. संयोगभावोति द्वित्तं सन्धाय वुत्तं, तेन रस्सत्तस्सापि निमित्तं दस्सितन्ति वेदितब्बं. एकस्स मूलेति एकस्स सन्तिके. सब्बत्थापि आमसने दुक्कटं, फन्दापने थुल्लच्चयञ्च विसुं विसुं आमसनफन्दापनपयोगं करोन्तस्सेव होति, एकपयोगेन गण्हन्तस्स पन उद्धारे पाराजिकमेव, न दुक्कटथुल्लच्चयानीति वदन्ति, एकपयोगेन गण्हन्तस्सापि आमसनफन्दापनानम्पि लब्भमानत्ता तं न गहेतब्बं. न हि सक्का अनामसित्वा अफन्दापेत्वा च किञ्चि गहेतुं. ‘‘एकमेव देसेत्वा मुच्चती’’ति पंसुखणनादिसमानपयोगेपि पुरिमा आपत्ति उत्तरमुत्तरं आपत्तिं पत्वा पटिप्पस्सम्भन्तीति सञ्ञाय कुरुन्दट्ठकथायं वुत्तं, इतरट्ठकथासु पन खणनपयोगभेदेहि पयोगे पयोगे आपन्ना आपत्तियो उत्तरमुत्तरं पत्वा न पटिप्पस्सम्भन्ति अञ्ञमञ्ञं सदिसत्ता वियूहनं पत्वा ता सब्बापि पटिप्पस्सम्भन्ति विसदिसपयोगत्ताति इमिना अधिप्पायेन पटिप्पस्सद्धिविधानं वुत्तन्ति वेदितब्बं. इमिना हि अवहारकस्स आसन्नं ओरिमन्तं परामसति.

तत्थेवाति मुखवट्टियमेव. बुन्देनाति कुम्भिया हेट्ठिमतलेन. एकट्ठाने ठिताय कुम्भिया ठाना चावनं छहि आकारेहि वेदितब्बन्ति सम्बन्धो. एकट्ठानेति च सङ्खलिकबद्धभावेन एकस्मिं पतिट्ठितोकासट्ठानेति ¶ अत्थो. खाणुकं केसग्गमत्तम्पि ठाना चावेतीति खाणुकं अत्तनो पतिट्ठितट्ठानतो पञ्चहि आकारेहि ठाना चावेति. छिन्नमत्ते पाराजिकन्ति अवस्सं चे पतति, छिन्नमत्ते पाराजिकं. परिच्छेदोति पञ्चमासकादिगरुभावपरिच्छेदो. अपब्यूहन्तोति ठितट्ठानतो अपनयनवसेन वियूहन्तो रासिं करोन्तो. एवं कत्वाति भाजनमुखवट्टिया कुम्भिगतेन भाजनगतस्स एकाबद्धभावं वियोजेत्वाति अत्थो. उपड्ढकुम्भीयन्ति उपड्ढपुण्णाय कुम्भिया. विनयधम्मताति अधिककारणालाभे विनयविनिच्छयधम्मताति अधिप्पायो. न केवलञ्चेत्थ गरुकताव, सुत्तानुगमनम्पि अत्थीति दस्सेन्तो अपिचातिआदिमाह. कण्ठेन पन परिच्छिन्नकालेति मुखगतं अज्झोहटकालेति अत्थो. अज्झोहरणमेव हेत्थ परिच्छिन्दनं, न कण्ठपिदहनं. चिक्कनन्ति थद्धं, बहलं घनन्ति अत्थो.

योपि थेय्यचित्तेन परस्स कुम्भिया पादग्घनकं सप्पिं वा तेलं वा अवस्सं पिवनकं यं किञ्चि ¶ दुकूलसाटकं वा चम्मखण्डादीनं वा अञ्ञतरं पक्खिपति, हत्थतो मुत्तमत्ते पाराजिकन्ति एत्थ अवहारो वीमंसितब्बो. यदि च दुकूलादीसु सप्पितेलानं पविसनं सन्धाय पाराजिकं भवेय्य, तत्थ पविट्ठतेलादिनो कुम्भिगतेन एकाबद्धताय न ताव अवहारो भाजनन्तरं पवेसेत्वा गहणकाले विय. तथा हि वुत्तं – ‘‘भाजनं पन निमुज्जापेत्वा गण्हन्तस्स याव एकाबद्धं होति, ताव रक्खती’’तिआदि. अथ तेलादिविनासेन पाराजिकं भवेय्य, तदापि तिणज्झापनादीसु विय अवहारो नत्थि, दुक्कटेन सद्धिं भण्डदेय्यमेव होति, तथा च पादग्घनकं तेलादिं पीतं दुकूलादिं उद्धरन्तस्सापि पाराजिकं न सिया तत्थ पविट्ठस्स तेलादिनो विनट्ठट्ठेन गहणक्खणे अविज्जमानत्ता, विज्जमानत्तेन च उद्धारेयेव पाराजिकं वत्तब्बं, न हत्थतो मुत्तमत्तेति. सब्बअट्ठकथासु च दुकूलादीनं पक्खिपने हत्थतो मुत्तमत्ते पाराजिकस्स वुत्तत्ता न तं पटिक्खिपितुं सक्का. अट्ठकथाप्पमाणेन पनेतं गहेतब्बं, युत्ति पनेत्थ पण्डितेहि पुब्बापरं संसन्दित्वा उद्धारेतब्बा.

पलिबुज्झिस्सतीति निवारेस्सति. वुत्तनयेन पाराजिकन्ति हत्थतो मुत्तमत्तेयेव पाराजिकं. नेव अवहारो, न गीवाति अत्तनो भाजनत्ता ¶ वुत्तं, अनापत्तिमत्तमेव वुत्तं, न पन एवं विचारितन्ति अधिप्पायो. बहिगतं नाम होतीति ततो पट्ठाय तेलस्स अट्ठानतो अधोमुखभावतो च बहिगतं नाम होति. अन्तो पट्ठाय छिद्दे करियमाने तेलस्स निक्खमित्वा गतगतट्ठानं भाजनसङ्ख्यमेव गच्छतीति आह ‘‘बाहिरन्ततो पादग्घनके गळिते पाराजिक’’न्ति. यथा तथा वा कतस्साति बाहिरन्ततो वा अब्भन्तरन्ततो वा पट्ठाय कतस्स. मज्झे ठपेत्वा कतछिद्देति मज्झे थोकं कपालं ठपेत्वा पच्छा तं छिन्दन्तेन कतछिद्दे.

पत्थीनस्स खादनं इतरस्स पानञ्च सप्पिआदीनं परिभोगोति आह ‘‘अखादितब्बं वा अपातब्बं वा करोती’’ति. कस्मा पनेत्थ दुक्कटं वुत्तन्ति आह ‘‘ठानाचावनस्स नत्थिताय दुक्कट’’न्ति. पुरिमद्वयन्ति भेदनं छड्डनञ्च. कुम्भिजज्जरकरणेनाति पुण्णकुम्भिया जज्जरकरणेन. मातिकाउजुकरणेनाति उदकपुण्णाय मातिकाय उजुकरणेन. एकलक्खणन्ति भेदनं कुम्भिया जज्जरकरणेन, छड्डनं मातिकाय उजुकरणेन च सद्धिं एकसभावं. पच्छिमं पन द्वयन्ति झापनं अपरिभोगकरणञ्च. एत्थ एवं विनिच्छयं वदन्तीति एतस्मिं महाअट्ठकथायं वुत्ते अत्थे एके आचरिया एवं विनिच्छयं वदन्ति. पच्छिमद्वयं सन्धाय वुत्तन्ति एत्थ पुरिमपदद्वये विनिच्छयो हेट्ठा वुत्तानुसारेन सक्का विञ्ञातुन्ति तत्थ किञ्चि अवत्वा पच्छिमपदद्वयं सन्धाय ‘‘ठानाचावनस्स नत्थिताय दुक्कट’’न्ति इदं वुत्तन्ति अधिप्पायो ¶ . थेय्यचित्तेनाति अत्तनो वा परस्स वा कातुकामतावसेन उप्पन्नथेय्यचित्तेन. विनासेतुकामतायाति हत्थपादादीनि छिन्दन्तो विय केवलं विनासेतुकामताय. वुत्तनयेन भिन्दन्तस्स वा छड्डेन्तस्स वाति मुग्गरेन पोथेत्वा भिन्दन्तस्स वा उदकं वा वालिकं वा आकिरित्वा उत्तरापेन्तस्स वाति अत्थो. अयुत्तन्ति चेति पाळियं पुरिमद्वयेपि दुक्कटस्सेव वुत्तत्ता ‘‘पुरिमद्वये पाराजिक’’न्ति इदं अयुत्तन्ति यदि तुम्हाकं सियाति अत्थो. नाति अयुत्तभावं निसेधेत्वा तत्थ कारणमाह ‘‘अञ्ञथा गहेतब्बत्थतो’’ति.

एवमेके वदन्तीति हेट्ठा वुत्तस्स अत्थनयस्स अत्तना अनभिमतभावं दस्सेत्वा सयं अञ्ञथापि पाळिं अट्ठकथञ्च संसन्दित्वा अत्थं दस्सेतुकामो ¶ अयं पनेत्थ सारोतिआदिमाह. अचावेतुकामोवाति थेय्यचित्तेन ठाना अचावेतुकामोव. अछड्डेतुकामोयेवाति एत्थापि थेय्यचित्तेनाति सम्बन्धितब्बं. इदञ्हि थेय्यचित्तपक्खं सन्धाय वुत्तं नासेतुकामतापक्खस्स वक्खमानत्ता. तेनेवाह नासेतुकामतापक्खे पनातिआदि. इतरथापि युज्जतीति थेय्यचित्ताभावा ठाना चावेतुकामस्सापि दुक्कटं युज्जतीति वुत्तं होति.

भूमट्ठकथावण्णनानयो निट्ठितो.

आकासट्ठकथावण्णना

९६. आकासट्ठकथायं अन्तोवत्थुम्हीति परिक्खित्तस्स वत्थुस्स अन्तो. अन्तोगामेति परिक्खित्तस्स गामस्स अन्तो. अपरिक्खित्ते पन वत्थुम्हि गामे वा ठितट्ठानमेव ठानं. अटविमुखं करोति…पे… रक्खतीति तेन पयोगेन तस्स इच्छितट्ठानं आगतत्ता रक्खति. गामतो निक्खन्तस्साति परिक्खित्तगामतो निक्खन्तस्स. कपिञ्जरो नाम अञ्ञमञ्ञं युज्झापनत्थाय बालजनेहि पोसावनियपक्खिजाति.

वेहासट्ठकथावण्णना

९७. वेहासट्ठकथायं छिन्नमत्ते मुत्तमत्तेति यथा छिन्नं मुत्तञ्च पकतिट्ठाने न तिट्ठति, तथा छेदनं मोचनञ्च सन्धाय वुत्तं.

उदकट्ठकथावण्णना

९८. उदकट्ठकथायं ¶ सन्दमानउदके निक्खित्तं न तिट्ठतीति आह ‘‘असन्दनके उदके’’ति. अनापत्तीति हत्थवारपदवारेसु दुक्कटापत्तिया अभावं सन्धाय वुत्तं. कड्ढतीति हेट्ठतो ओसारेति. सकलमुदकन्ति दण्डेन फुट्ठोकासगतं सकलमुदकं. न उदकं ठानन्ति अत्तना कतट्ठानस्स अट्ठानत्ता. पदुमिनियन्ति पदुमगच्छे. कलापबन्धन्ति हत्थकवसेन खुद्दकं कत्वा बद्धं कलापबद्धं. भारबद्धं नाम सीसभारादिवसेन बद्धं. मुळालन्ति कन्दं. पत्तं वा पुप्फं वाति इदं कद्दमस्स अन्तो ¶ पविसित्वा ठितं सन्धाय वुत्तं. निद्धमनतुम्बन्ति वापिया उदकस्स निक्खमननाळं. उदकवाहकन्ति महामातिकं. अवहारेन सो न कारेतब्बोति इमिना पाणं जीविता वोरोपने आपत्तिया सब्बत्थ न मुच्चतीति दीपेति. मातिकं आरोपेत्वाति खुद्दकमातिकं आरोपेत्वा. मरित्वा…पे… तिट्ठन्तीति एत्थ मतमच्छानंयेव तेसं सन्तकत्ता अमते गण्हन्तस्स नत्थि अवहारो.

नावट्ठकथावण्णना

९९. नावट्ठकथायं थुल्लच्चयम्पि पाराजिकम्पि होतीति एत्थ पठमं ठाना अचावेत्वा मुत्ते थुल्लच्चयं, पठमं पन ठाना चावेत्वा मुत्ते पाराजिकन्ति वेदितब्बं. पासे बद्धसूकरो वियातिआदिना वुत्तं सन्धायाह ‘‘तत्थ युत्ति पुब्बे वुत्ताएवा’’ति. विपन्नट्ठनावाति विसमवातेहि देसन्तरं पलाता, भिज्जित्वा वा विनासं पत्वा उदके निमुज्जित्वा हेट्ठा भूमितलं अप्पत्वा सामिकेहि च अपरिच्चत्तालया वुच्चति. बलवा च वातो आगम्माति इमिना असति वाते अयं पयोगो कतोति दस्सेति. पुग्गलस्स नत्थि अवहारोति सुक्खमातिकायं उजुकरणनयेन वुत्तं. तं अत्तनो पादेन अनक्कमित्वा हत्थेन च अनुक्खिपित्वा अञ्ञस्मिं दण्डादीसु बन्धित्वा ठपिते युज्जति, अत्तनो पादेन अक्कमित्वा हत्थेन च उक्खिपित्वा ठितस्स पन बलववातेन छत्तचीवरादीसु पहटेसु पकतिं विजहित्वा दळ्हतरं अक्कमनगहणादिपयोगो अभिनवो कातब्बो सिया. इतरथा छत्तचीवरादीनि वा विगच्छन्ति, अवहारको वा सयं पतिस्सति, नावा च तदा न गमिस्सति. तस्मा ईदिसे अभिनवप्पयोगे सति अवहारेन भवितब्बं. सुक्खमातिकायं उजुकताय उदकागमनकाले कातब्बकिच्चं नत्थीति तं इध निदस्सनं न होति. दासं पन पकतिया पलायन्तं ‘‘सीघं याही’’ति वत्वा पकतिगमनतो तुरितगमनुप्पादनादिना इध निदस्सनेन भवितब्बन्ति अम्हाकं खन्ति ¶ , वीमंसित्वा गहेतब्बं. वाते आगतेपि यत्थ अतिलहुकत्ता नावाय कञ्चि पयोगं अकत्वा पकतिया अवहारको तिट्ठति, तत्थिदं अट्ठकथायं वुत्तन्ति गहेतब्बं.

यानट्ठकथावण्णना

१००. यानट्ठकथायं ¶ उभोसु पस्सेसूति चतुन्नं थम्भानं उपरि चतुरस्सं दारुसङ्घाटं आरोपेत्वा तस्स वामदक्खिणपस्सेसु उभोसु वातातपादिपरिस्सयविनोदनत्थं गरुळपक्खिनो उभो पक्खा विय कता सन्दमानिका. दुकयुत्तस्साति द्वीहि गोणेहि युत्तस्स. अयुत्तकन्ति गोणेहि अयुत्तं. कप्पकताति द्विन्नं सिखानं सन्धिट्ठाने गोसिङ्गानि विय द्वे कोटियो ठपेत्वा उपत्थम्भनी कप्पकता नाम, सा द्वीहिपि कोटीहि भूमियं पतिट्ठाति, तेनाह ‘‘छ ठानानी’’ति. तीणि वा चत्तारि वा ठानानीति अकप्पकताय उपत्थम्भनिया च द्विन्नं चक्कानञ्च वसेन तीणि ठानानि, कप्पकताय वसेन चत्तारि ठानानि, तथा पथवियं ठपितस्स तीणि ठानानीति सम्बन्धो. अक्खसीसेहीति अक्खदारुनो द्वीहि कोटीहि. अक्खुद्धीहीति अक्खदारुना सम्पटिच्छका हेट्ठिमभागे कप्पकता द्वे दारुखण्डा अक्खुद्धियो नाम, तासं कप्पकतानं द्विन्नं कप्पसीसानि चत्तारि इध ‘‘अक्खुद्धियो’’ति वुच्चन्ति, तेनाह ‘‘चतूहि च अक्खुद्धीही’’ति. ताहि पतिट्ठिताहि पतिट्ठितट्ठानानि चत्तारि धुरेन पतिट्ठितट्ठानं एकन्ति पञ्च ठानानि होन्ति. उद्धियोव ‘‘उद्धिखाणुका’’ति वुत्ता, उद्धिखाणुकानं अभावे अक्खसीसानं पतिट्ठानोकासं दस्सेन्तो आह सममेव बाहं कत्वातिआदि. तत्थ सममेवाति उद्धियो हेट्ठा अनोलम्बेत्वा बाहुनो हेट्ठिमभागं समं कत्वा द्विन्नं बाहुदारूनं मज्झे अक्खसीसप्पमाणेन छिद्दं कत्वा तत्थ अक्खसीसानि पवेसितानि होन्ति, तेन बाहानं हेट्ठाभागं सब्बं भूमिं फुसित्वा तिट्ठति, तेनाह ‘‘सब्बं पथविं फुसित्वा तिट्ठती’’ति. सेसं नावायं वुत्तसदिसन्ति इमिना यदि पन तं एवं गच्छन्तं पकतिगमनं पच्छिन्दित्वा अञ्ञं दिसाभागं नेति, पाराजिकं. सयमेव यं किञ्चि ठानं सम्पत्तं ठाना अचालेन्तोव विक्किणित्वा गच्छति, नेवत्थि अवहारो, भण्डदेय्यं पन होतीति इमं नयं अतिदिसति.

भारट्ठकथावण्णना

१०१. भारट्ठकथायं भारट्ठन्ति मातिकापदस्स भारो नामाति इदं अत्थदस्सनन्ति आह ‘‘भारोयेव भारट्ठ’’न्ति. पुरिमगलेति गलस्स पुरिमभागे. गलवाटकोति गीवाय उपरिमगलवाटको. उरपरिच्छेदमज्झेति ¶ उरपरियन्तस्स मज्झे. सामिकेहि अनाणत्तोति इदं यदि ¶ सामिकेहि ‘‘इमं भारं नेत्वा असुकट्ठाने देही’’ति आणत्तो भवेय्य, तदा तेन गहितभण्डं उपनिक्खित्तं सिया, तञ्च थेय्यचित्तेन सीसादितो ओरोपेन्तस्सापि अवहारो न सिया, सामिकानं पन धुरनिक्खेपे एव सियाति ततो उपनिक्खित्तभण्डभावतो वियोजेतुं वुत्तं, तेनेव वक्खति ‘‘तेहि पन अनाणत्तत्ता पाराजिक’’न्ति. घंसन्तोति सीसतो अनुक्खिपन्तो, यदि उक्खिपेय्य, उक्खित्तमत्ते पाराजिकं, तेनाह सीसतो केसग्गमत्तम्पीतिआदि. यो चायन्ति यो अयं विनिच्छयो.

आरामट्ठकथावण्णना

१०२. आरामट्ठकथायं आरामं अभियुञ्जतीति इदं अभियोगकरणं परेसं भूमट्ठभण्डादीसुपि कातुं वट्टतियेव. आरामादिथावरेसु पन येभुय्येन अभियोगवसेनेव गहणसम्भवतो एत्थेव पाळियं अभियोगो वुत्तो, इति इमिना नयेन सब्बत्थापि सक्का ञातुन्ति गहेतब्बं. अदिन्नादानस्स पयोगत्ताति सहपयोगमाह. वत्थुम्हियेव कतपयोगत्ता सहपयोगवसेन हेतं दुक्कटं. सयम्पीति अभियुञ्जकोपि. ‘‘किं करोमि किं करोमी’’ति एवं किङ्कारमेव पटिस्सुणन्तो विय चरतीति किङ्कारपटिस्सावी, तस्स भावो किङ्कारपटिस्साविभावो, तस्मिं, अत्तनो वसवत्तिभावेति वुत्तं होति. उक्कोचन्ति लञ्जं. सब्बेसं पाराजिकन्ति कूटविनिच्छयिकादीनं. अयं वत्थुसामीतिआदिकस्स उभिन्नं धुरनिक्खेपकरणहेतुनो पयोगस्स करणक्खणेव पाराजिकं होतीति वेदितब्बं. सचे पन सामिकस्स विमति च धुरनिक्खेपो च कमेन उप्पज्जन्ति, पयोगसमुट्ठापकचित्तक्खणे पाराजिकमेव होति, न थुल्लच्चयं. यदि विमतियेव उप्पज्जति, तदा थुल्लच्चयमेवाति वेदितब्बं, अयं नयो सब्बत्थ यथानुरूपं गहेतब्बो. धुरनिक्खेपवसेनेव पराजयोति सामिको ‘‘अहं न मुच्चामी’’ति धुरं अनिक्खिपन्तो अट्टो पराजितो नाम न होतीति दस्सेति.

विहारट्ठकथावण्णना

१०३. विहारट्ठकथायं ¶ विहारन्ति उपचारसीमासङ्खातं सकलं विहारं. परिवेणन्ति तस्स विहारस्स अब्भन्तरे विसुं विसुं पाकारादिपरिच्छिन्नट्ठानं. आवासन्ति एकं आवसथमत्तं. गणसन्तके परिच्छिन्नसामिकत्ता सक्का धुरं निक्खिपापेतुन्ति आह ‘‘दीघभाणकादिभेदस्स पन गणस्सा’’ति. इधापि सचे एकोपि धुरं न निक्खिपति, रक्खतियेव. एस नयो बहूनं सन्तके सब्बत्थ.

खेत्तट्ठकथावण्णना

१०४. खेत्तट्ठकथायं ¶ निरुम्भित्वा वातिआदीसु गण्हन्तस्साति पच्चेकं योजेतब्बं, तत्थ निरुम्भित्वा गहणं नाम वीहिसीसं अच्छिन्दित्वा यथाठितमेव हत्थेन गहेत्वा आकड्ढित्वा बीजमत्तस्सेव गहणं. एकमेकन्ति एकं वीहिसीसं. यस्मिं बीजे वातिआदि निरुम्भित्वा गहणादीसु यथाक्कमं योजेतब्बं. ‘‘तस्मिं बन्धना मोचितमत्ते’’ति वचनतो तस्मिं बीजादिम्हि बन्धना मुत्ते सति ततो अनपनीतेपि ठानन्तरस्स अभावा पाराजिकमेव. यस्स पन सीसादिकस्स सन्तरादिना सह संसिब्बनं वा एकाबद्धता वा होति, तस्स बन्धना मोचिते थुल्लच्चयं, इतरट्ठानतो मोचिते पाराजिकन्ति गहेतब्बं, तेनाह वीहिनाळन्तिआदि. सभुसन्ति पलालसहितं. खीलेनाति खाणुकेन. एत्थ च खीलसङ्कमनादीसु सहपयोगो धुरनिक्खेपो चाति उभयं सम्भवति. खीलसङ्कमनादि एत्थ सहपयोगो. तस्मिञ्च कते यदि सामिका धुरं न निक्खिपन्ति पुन गण्हितुकामाव होन्ति, न ताव अवहारो, ‘‘खीलं सङ्कामेत्वा खेत्तादिं असुको राजवल्लभो भिक्खु गण्हितुकामो’’ति ञत्वा तस्स बलं कक्खळादिभावञ्च निस्साय खीलसङ्कमनादिकिरियानिट्ठानतो पठममेव सामिका धुरं निक्खिपन्ति, न अवहारो एतस्स पयोगनिट्ठानतो पुरेतरमेव धुरस्स निक्खित्तत्ता. यदा पन खीलसङ्कमनादिपयोगेनेव धुरनिक्खेपो होति, तदायेव अवहारो, तेनेवेत्थ ‘‘तञ्च खो सामिकानं धुरनिक्खेपेना’’ति वुत्तं. खीलादीनं सङ्कमितभावं अजानित्वा सामिकानं सम्पटिच्छनम्पेत्थ धुरनिक्खेपोति वेदितब्बो. एवं सब्बत्थाति यथावुत्तमत्थं रज्जुसङ्कमनादीसुपि अतिदिसति. यट्ठिन्ति मानदण्डं. एकस्मिं अनागते थुल्लच्चयं, तस्मिं आगते पाराजिकन्ति ¶ सचे दारूनि निखणित्वा तत्तकेनेव गण्हितुकामो होति, अवसाने दारुम्हि पाराजिकं. सचे तत्थ कण्टकसाखादीहि पादानं अन्तरं पटिच्छादेत्वा कस्सचि अप्पवेसारहं कत्वा गहेतुकामो होति, अवसानसाखाय पाराजिकं, तेनाह ‘‘साखापरिवारेनेव अत्तनो कातुं सक्कोती’’ति, दारूनि च निखणित्वा साखापरिवारञ्च कत्वा एव अत्तनो सन्तकं कातुं सक्कोतीति अत्थो. खेत्तमरियादन्ति वुत्तमेवत्थं विभावेतुं ‘‘केदारपाळि’’न्ति वुत्तं. इदञ्च खीलसङ्कमनादिना गहणं आरामादीसुपि लब्भतेव.

वत्थुट्ठकथावण्णना

१०५. वत्थुट्ठकथायं तिण्णं पाकारानन्ति इट्ठकसिलादारूनं वसेन तिण्णं पाकारानं.

१०६. गामट्ठकथायं ¶ ‘‘गामो नामा’’ति पाळियं न वुत्तं सब्बसो गामलक्खणस्स पुब्बे वुत्तत्ता.

अरञ्ञट्ठकथावण्णना

१०७. अरञ्ञट्ठकथायं विनिविज्झित्वाति उजुकमेव विनिविज्झित्वा. लक्खणच्छिन्नस्साति अरञ्ञसामिकानं हत्थतो किणित्वा गण्हन्तेहि कतअक्खरादिसञ्ञाणस्स. छल्लिया परियोनद्धन्ति इमिना सामिकानं निरापेक्खताय चिरछड्डितभावं दीपेति, तेनाह ‘‘गहेतुं वट्टती’’ति. यदि सामिकानं सापेक्खता अत्थि, न वट्टति. तानि कतानि अज्झावुत्थानि च होन्तीति तानि गेहादीनि कतानि परिनिट्ठितानि मनुस्सेहि च अज्झावुत्थानि च होन्ति. दारूनीति गेहादीनं कतत्ता अवसिट्ठदारूनि. गहेतुं वट्टतीति सामिकानं अनालयत्ता वुत्तं, ते च यदि गहणकाले दिस्वा सालया हुत्वा वारेन्ति, गहेतुं न वट्टतियेव. ‘‘देही’’ति वुत्ते दातब्बमेवाति ‘‘देही’’ति वुत्ते ‘‘दस्सामी’’ति आभोगं कत्वा गच्छन्तस्स ‘‘देही’’ति अवुत्ते अदत्वा गमने आपत्ति नत्थि. पच्छापि तेहि चोदिते दातब्बमेव.

अदिस्वा गच्छति, भण्डदेय्यन्ति सुद्धचित्तेन गतस्स भण्डदेय्यं. आरक्खट्ठानम्पि सुद्धचित्तेन अतिक्कमित्वा थेय्यचित्ते उप्पन्नेपि अवहारो नत्थि ¶ आरक्खट्ठानस्स अतिक्कन्तत्ता. केचि पन ‘‘यत्थ कत्थचि नीतानम्पि दारूनं अरञ्ञसामिकानञ्ञेव सन्तकत्ता पुन थेय्यचित्तं उप्पादेत्वा गच्छति, पाराजिकमेवा’’ति वदन्ति, तं न युत्तं ‘‘आरक्खट्ठानं पत्वा…पे… अस्सतिया अतिक्कमती’’ति, सहसा तं ठानं अतिक्कमतीतिआदिना (पारा. अट्ठ. १.१०७) च आरक्खट्ठानातिक्कमेयेव आपत्तिया वुच्चमानत्ता, आरक्खट्ठानातिक्कममेव सन्धाय ‘‘इदं पन थेय्यचित्तेन परिहरन्तस्स आकासेन गच्छतोपि पाराजिकमेवा’’ति वुत्तं. यञ्च ‘‘यत्थ कत्थचि नीतानम्पि दारूनं अरञ्ञसामिकानञ्ञेव सन्तकत्ता’’ति कारणं वुत्तं, तम्पि आरक्खट्ठानतो बहि पाराजिकापज्जनस्स कारणं न होति भण्डदेय्यभावस्सेव कारणत्ता. तेसं सन्तकत्तेनेव हि बहि कतस्सापि भण्डदेय्यं जातं, इतरथा च भण्डदेय्यम्पि न सिया सुङ्कघातातिक्कमे विय. अद्धिकेहि दिन्नमेव सुङ्किकानं सन्तकं होति, नादिन्नं, तेन तं ठानं यतो कुतोचि पच्चयतो सुद्धचित्तेन अतिक्कन्तस्स भण्डदेय्यम्पि न होति. इध पन अरञ्ञसामिकानं सन्तकत्ता सब्बत्थापि भण्डदेय्यमेव होति, तेनेवेतं अरञ्ञे आरक्खट्ठानं सुङ्कघाततोपि गरुतरं ¶ जातं. यदि हि आरक्खट्ठानतो बहिपि थेय्यचित्ते सति अवहारो भवेय्य, आरक्खट्ठानं पत्वातिआदिना ठाननियमो निरत्थको सिया यत्थ कत्थचि थेय्यचित्ते उप्पन्ने पाराजिकन्ति वत्तब्बतो. तस्मा आरक्खट्ठानतो बहि थेय्यचित्तेन गच्छन्तस्स अवहारो न भवति एवाति निट्ठमेत्थ गन्तब्बं. इदं पन थेय्यचित्तेन परिहरन्तस्साति यस्मिं पदेसे अतिक्कन्ते तेसं अरञ्ञं आरक्खट्ठानञ्च अतिक्कन्तो नाम होति, तं पदेसं आकासेनापि अतिक्कमनवसेन गच्छन्तस्सापीति अत्थो.

उदककथावण्णना

१०८. उदककथायं महाकुच्छिका उदकचाटि उदकमणिको, ‘‘समेखला चाटि उदकमणिको’’तिपि वदन्ति. तत्थाति तेसु भाजनेसु. भूतगामेन सद्धिम्पीति पि-सद्देन अकप्पियपथविम्पि सङ्गण्हाति. तळाकरक्खणत्थायाति ‘‘महोदकं आगन्त्वा तळाकमरियादं मा छिन्दी’’ति तळाकरक्खणत्थं. निब्बहनउदकन्ति एत्थ तळाकस्स एकेन उन्नतेन पस्सेन अधिकजलं निब्बहति निगच्छति एतेनाति ‘‘निब्बहन’’न्ति अधिकजलनिक्खमनमातिका ¶ वुच्चति. तत्थ गच्छमानं उदकं निब्बहनउदकं नाम. निद्धमनतुम्बन्ति सस्सादीनं अत्थाय इट्ठकादीहि कतं उदकनिक्खमनपनाळि. मरियादं दुब्बलं कत्वाति एत्थ दुब्बलं अकत्वापि यथावुत्तप्पयोगे कते मरियादं छिन्दित्वा निक्खन्तउदकग्घानुरूपेन अवहारेन कत्तब्बमेव. यत्तकं तप्पच्चया सस्सं उप्पज्जतीति बीजकसिकम्मादिब्बयं ठपेत्वा यं अधिकलाभं उप्पज्जति, तं सन्धाय वुत्तं. न हि तेहि कातब्बं वयकरणम्पि एतस्स दातब्बं. इदञ्च तरुणसस्से जाते उदकं विनासेन्तस्स युज्जति, सस्से पन सब्बथा अकतेयेव उदकं विनासेन्तेन च उदकग्घमेव दातब्बं, न तप्पच्चया सकलं सस्सं तेन विनासितभण्डस्सेव भण्डदेय्यत्ता, इतरथा वाणिज्जादिअत्थाय परेहि ठपितभण्डं अवहरन्तस्स तदुभयम्पि गहेत्वा भण्डग्घं कातब्बं सिया, तञ्च न युत्तन्ति अम्हाकं खन्ति. सामिकानं धुरनिक्खेपेनाति एत्थ एकस्स सन्तके तळाके खेत्ते च जाते तस्सेव धुरनिक्खेपेन पाराजिकं, यदि पन तं तळाकं सब्बसाधारणं, खेत्तानि पाटिपुग्गलिकानि, तस्स तस्स पुग्गलस्सेव धुरनिक्खेपे अवहारो, अथ खेत्तानिपि सब्बसाधारणानि, सब्बेसं धुरनिक्खेपेयेव पाराजिकं, नासतीति दट्ठब्बं.

अनिग्गतेति अनिक्खन्ते, तळाकेयेव ठितेति अत्थो. परेसं मातिकामुखन्ति खुद्दकमातिकामुखं. असम्पत्तेवाति तळाकतो निक्खमित्वा महामातिकायं एव ठिते. अनिक्खन्ते बद्धा सुबद्धाति तळाकतो अनिक्खन्ते भण्डदेय्यम्पि न होति सब्बसाधारणत्ता उदकस्साति ¶ अधिप्पायो. निक्खन्ते पन पाटिपुग्गलिकं होतीति आह ‘‘निक्खन्ते बद्धा भण्डदेय्य’’न्ति. इध पन खुद्दकमातिकायं अप्पविट्ठत्ता अवहारो न जातो, ‘‘तळाकतो अनिग्गते परेसं मातिकामुखं असम्पत्तेवा’’ति हेट्ठा वुत्तस्स विकप्पद्वयस्स ‘‘अनिक्खन्ते बद्धा सुबद्धा, निक्खन्ते बद्धा भण्डदेय्य’’न्ति इदं द्वयं यथाक्कमेन योजनत्थं वुत्तं. नत्थि अवहारोति एत्थ ‘‘अवहारो नत्थि, भण्डदेय्यं पन होती’’ति केचि वदन्ति, तं न युत्तं. वत्थुं…पे… न समेतीति एत्थ तळाकगतउदकस्स सब्बसाधारणत्ता परसन्तकवत्थु न होतीति अधिप्पायो.

दन्तपोनकथावण्णना

१०९. दन्तकट्ठकथायं ¶ ततो पट्ठाय अवहारो नत्थीति ‘‘यथासुखं भिक्खुसङ्घो परिभुञ्जतू’’ति अभाजेत्वाव यावदिच्छकं गहणत्थमेव ठपितत्ता अरक्खितत्ता सब्बसाधारणत्ता च अञ्ञं सङ्घिकं विय न होतीति थेय्यचित्तेन गण्हन्तस्सापि नत्थि अवहारो. खादन्तु, पुन सामणेरा आहरिस्सन्तीति केचि थेरा वदेय्युन्ति योजेतब्बं.

वनप्पतिकथावण्णना

११०. वनप्पतिकथायं सन्धारितत्ताति छिन्नस्स रुक्खस्स पतितुं आरद्धस्स सन्धारणमत्तेन वुत्तं, न पन मरिचवल्लिआदीहि पुब्बे वेठेत्वा ठितभावेन. तादिसे हि छिन्नेपि अवहारो नत्थि अरञ्ञट्ठकथायं वेठितवल्लियं विय. उजुकमेव तिट्ठतीति इमिना सब्बसो छिन्दनमेव वल्लिआदीहि असम्बद्धस्स रुक्खस्स ठानाचावनं पुब्बे विय आकासादीसु फुट्ठसकलपदेसतो मोचनन्ति आवेणिकमिध ठानाचावनं दस्सेति. केचि पन ‘‘रुक्खभारेन किञ्चिदेव भस्सित्वा ठितत्ता होतियेव ठानाचावन’’न्ति वदन्ति, तन्न, रुक्खेन फुट्ठस्स सकलस्स आकासपदेसस्स पञ्चहि छहि वा आकारेहि अनतिक्कमितत्ता. वातमुखं सोधेतीति यथा वातो आगन्त्वा रुक्खं पातेति, एवं वातस्स आगमनमग्गं रुन्धित्वा ठितानि साखागुम्बादीनि छिन्दित्वा अपनेन्तो सोधेति. मण्डूककण्टकं वाति मण्डूकानं नङ्गुट्ठे अग्गकोटियं ठितकण्टकन्ति वदन्ति, एके ‘‘विसमच्छकण्टक’’न्तिपि वदन्ति.

हरणककथावण्णना

१११. हरणककथायं ¶ हरणकन्ति वत्थुसामिना हरियमानं. सो च पादं अग्घति, पाराजिकमेवाति ‘‘अन्तं न गण्हिस्सामी’’ति असल्लक्खितत्ता सामञ्ञतो ‘‘गण्हिस्सामि एत’’न्ति सल्लक्खितस्सेव पटस्स एकदेसताय तम्पि गण्हितुकामोवाति पाराजिकं वुत्तं. सभण्डहारकन्ति सहभण्डहारकं, सकारादेसस्स विकप्पत्ता सह सद्दोव ठितो, भण्डहारकेन सह तं भण्डन्ति अत्थो. सासङ्कोति ‘‘यदि उपसङ्कमित्वा ¶ भण्डं गण्हिस्सामि, आवुधेन मं पहरेय्या’’ति भयेन सञ्जातासङ्को. एकमन्तं पटिक्कम्माति भयेनेव अनुपगन्त्वा मग्गतो सयं पटिक्कम्म. सन्तज्जेत्वाति फरुसवाचाय चेव आवुधपरिवत्तनादिकायविकारेन च सन्तज्जेत्वा. अनज्झावुत्थकन्ति अपरिग्गहितकं. आलयेन अनधिमुत्तम्पि भण्डं अनज्झावुत्थकं नाम होतीति आह ‘‘आहरापेन्ते दातब्ब’’न्ति, इमिना पठमं परिच्चत्तालयानम्पि यदि पच्छापि सकसञ्ञा उप्पज्जति, तेसञ्ञेव तं भण्डं होति, बलक्कारेनापि सकसञ्ञाय तस्स गहणे दोसो नत्थि, अददन्तस्सेव अवहारोति दस्सेति. यदि पन सामिनो ‘‘परिच्चत्तं मया पठमं, इदानि मम सन्तकं वा एतं, नो’’ति आसङ्का होति, बलक्कारेन गहेतुं न वट्टति सकसञ्ञाबलेनेव पुन गहेतब्बभावस्स आपन्नत्ता. ‘‘अदेन्तस्स पाराजिक’’न्ति वचनतो चोरस्स सकसञ्ञाय विज्जमानायपि सामिकेसु सालयेसु अदातुं न वट्टतीति दीपितं होति. अञ्ञेसूति महापच्चरियादीसु. विचारणायेव नत्थीति इमिना तत्थापि पटिक्खेपाभावतो अयमेव अत्थोति दस्सेति.

उपनिधिकथावण्णना

११२. उपनिधिकथायं सङ्गोपनत्थाय अत्तनो हत्थे निक्खित्तस्स भण्डस्स गुत्तट्ठाने पटिसामनप्पयोगं विना नाहं गण्हामीतिआदिना अञ्ञस्मिं पयोगे अकते रज्जसङ्खोभादिकाले ‘‘न दानि तस्स दस्सामि, न मय्हं दानि दस्सती’’ति उभोहिपि सकसकट्ठाने निसीदित्वा धुरनिक्खेपे कतेपि अवहारो नत्थि. केचि पनेत्थ ‘‘पाराजिकमेव पटिसामनप्पयोगस्स कतत्ता’’ति वदन्ति, तं तेसं मतिमत्तं, न सारतो पच्चेतब्बं. पटिसामनकाले हिस्स थेय्यचित्तं नत्थि, ‘‘न दानि तस्स दस्सामी’’ति थेय्यचित्तुप्पत्तिक्खणे पन सामिनो धुरनिक्खेपचित्तुप्पत्तिया हेतुभूतो कायवचीपयोगो नत्थि, येन सो आपत्तिं आपज्जेय्य. न हि अकिरियसमुट्ठानायं आपत्तीति. दाने सउस्साहो, रक्खति तावाति अवहारं सन्धाय अवुत्तत्ता नाहं गण्हामीतिआदिना मुसावादकरणे पाचित्तियमेव होति, न दुक्कटं ¶ थेय्यचित्ताभावेन सहपयोगस्सापि अभावतोति गहेतब्बं. यदिपि मुखेन दस्सामीति वदति…पे… पाराजिकन्ति एत्थ कतरपयोगेन आपत्ति, न ताव पठमेन भण्डपटिसामनप्पयोगेन तदा थेय्यचित्ताभावा, नापि ‘‘दस्सामी’’ति ¶ कथनप्पयोगेन तदा थेय्यचित्ते विज्जमानेपि पयोगस्स कप्पियत्ताति? वुच्चते – सामिना ‘‘देही’’ति बहुसो याचियमानोपि अदत्वा येन पयोगेन अत्तनो अदातुकामतं सामिकस्स ञापेति, येन च सो ‘‘अदातुकामो अयं विक्खिपती’’ति ञत्वा धुरं निक्खिपति, तेनेव पयोगेनस्स आपत्ति. न हेत्थ उपनिक्खित्तभण्डे परियायेन मुत्ति अत्थि. अदातुकामताय हि कदा ते दिन्नं, कत्थ ते दिन्नन्तिआदिपरियायवचनेनापि सामिकस्स धुरे निक्खिपापिते आपत्तियेव. तेनेव अट्ठकथायं वुत्तं – ‘‘किं तुम्हे भणथ…पे… एवं उभिन्नं धुरनिक्खेपेन भिक्खुनो पाराजिक’’न्ति (पारा. अट्ठ. १.१११). परसन्तकस्स परेहि गण्हापने एव परियायतो मुत्ति, न सब्बत्थाति गहेतब्बं. अत्तनो हत्थे निक्खित्तत्ताति एत्थ अत्तनो हत्थे सामिना दिन्नताय भण्डागारिकट्ठाने ठितत्ता च ठानाचावनेपि नत्थि अवहारो, थेय्यचित्तेन पन गहणे दुक्कटतो न मुच्चतीति वेदितब्बं.

एसेव नयोति उद्धारेयेव चोरस्स पाराजिकं, कस्मा? अञ्ञेहि साधारणस्स अभिञ्ञाणस्स वुत्तत्ता. अञ्ञं तादिसमेव गण्हन्ते युज्जतीति सञ्ञाणतो ओकासतो च तेन सदिसमेव अञ्ञं गण्हन्ते युज्जति, चोरेन सल्लक्खितप्पदेसतो तं अपनेत्वा केहिचि तत्थ तादिसे अञ्ञस्मिं पत्ते ठपिते तं गण्हन्तेयेव युज्जतीति अधिप्पायो, तेन चोरेन दिवा सल्लक्खितपत्तं अञ्ञत्थ अपनेत्वा तदञ्ञे तादिसे पत्ते तत्थ ठपितेपि चोरस्स पच्छा रत्तिभागे उप्पज्जमानं थेय्यचित्तं दिवा सल्लक्खितप्पदेसे ठपितं अञ्ञं तादिसं पत्तमेव आलम्बित्वा उप्पज्जतीति दस्सितं होति. पदवारेनाति थेरेन नीहरित्वा दिन्नं पत्तं गहेत्वा गच्छतो चोरस्स पदवारेन. अतादिसमेव गण्हन्ते युज्जतीति अतादिसस्स थेरेन गहणक्खणे अवहाराभावतो पच्छा हत्थपत्तं ‘‘त’’न्ति वा ‘‘अञ्ञ’’न्ति वा सञ्ञाय ‘‘इदं गहेत्वा गच्छामी’’ति गमने पदवारेनेव अवहारो युज्जतीति अधिप्पायो.

पाराजिकं नत्थीति पदवारेपि पाराजिकं नत्थि उपनिधिभण्डे वियाति गहेतब्बं. गामद्वारन्ति बहिगामे विहारस्स पतिट्ठितत्ता गामप्पवेसस्स आरम्भप्पदेसदस्सनवसेन वुत्तं, अन्तोगामन्ति अत्थो. द्विन्नम्पि उद्धारेयेव ¶ पाराजिकन्ति थेरस्स अभण्डागारिकत्ता वुत्तं. यदि हि सो भण्डागारिको भवेय्य, सब्बम्पि उपनिक्खित्तमेव सिया, उपनिक्खित्तभण्डे च थेय्यचित्तेन गण्हतोपि न ताव थेरस्स अवहारो होति, चोरस्सेव अवहारो. उभिन्नम्पि दुक्कटन्ति ¶ थेरस्स अत्तनो सन्तकताय चोरस्स सामिकेन दिन्नत्ता अवहारो न जातो, उभिन्नम्पि असुद्धचित्तेन गहितत्ता दुक्कटन्ति अत्थो.

आणत्तिया गहितत्ताति ‘‘पत्तचीवरं गण्हा’’ति एवं थेरेन कतआणत्तिया गहितत्ता. अटविं पविसति, पदवारेन कारेतब्बोति ‘‘पत्तचीवरं गण्ह, असुकं नाम गामं गन्त्वा पिण्डाय चरिस्सामा’’ति थेरेन विहारतो पट्ठाय गाममग्गेपि सकलेपि गामे विचरणस्स नियमितत्ता मग्गतो ओक्कम्म गच्छन्तस्सेव पदवारेन आपत्ति वुत्ता. विहारस्स हि परभागे उपचारतो पट्ठाय याव तस्स गामस्स परतो उपचारो, ताव सब्बं दहरस्स थेराणत्तिया सञ्चरणूपचारोव होति, न पन ततो परं. तेनेव ‘‘उपचारातिक्कमे पाराजिकं. गामूपचारातिक्कमे पाराजिक’’न्ति च वुत्तं. पटिनिवत्तने चीवरधोवनादिअत्थाय पेसनेपि एसेव नयो. अट्ठत्वा अनिसीदित्वाति एत्थ विहारं पविसित्वा सीसादीसु भारं भूमियं अनिक्खिपित्वा तिट्ठन्तो वा निसीदन्तो वा विस्समित्वा थेय्यचित्ते वूपसन्ते पुन थेय्यचित्तं उप्पादेत्वा गच्छति चे, पादुद्धारेन कारेतब्बो. सचे भूमियं निक्खिपित्वा पुन तं गहेत्वा गच्छति, उद्धारेन कारेतब्बो. कस्मा? आणापकस्स आणत्तिया यं कत्तब्बं, तस्स तावता परिनिट्ठितत्ता. ‘‘असुकं नाम गाम’’न्ति अनियमेत्वा ‘‘अन्तोगामं गमिस्सामा’’ति अविसेसेन वुत्ते विहारसामन्ता पुब्बे पिण्डाय पविट्ठपुब्बा सब्बे गोचरगामापि खेत्तमेवाति वदन्ति. सेसन्ति मग्गुक्कमनविहाराभिमुखगमनादि सब्बं. पुरिमसदिसमेवाति अनाणत्तिया गहितेपि सामिकस्स कथेत्वा गहितत्ता हेट्ठा वुत्तविहारूपचारादि सब्बं खेत्तमेवाति कत्वा वुत्तं. एसेव नयोति अन्तरामग्गे थेय्यचित्तं उप्पादेत्वातिआदिना (पारा. अट्ठ. १.११२) वुत्तं नयं अतिदिसति.

निमित्ते वा कतेति चीवरं मे किलिट्ठं, को नु खो रजित्वा दस्सतीतिआदिना निमित्ते कते. वुत्तनयेनेवाति अनाणत्तस्स थेरेन ¶ सद्धिं पत्तचीवरं गहेत्वा गमनवारे वुत्तनयेनेव. एकपस्सेति विहारस्स महन्तताय अत्तानं अदस्सेत्वा एकस्मिं पस्से. थेय्यचित्तेन परिभुञ्जन्तो जीरापेतीति थेय्यचित्ते उप्पन्ने ठानाचावनं अकत्वा निवत्थपारुतनीहारेनेव परिभुञ्जन्तो जीरापेति, ठाना चावेन्तस्स पन थेय्यचित्ते सति पाराजिकमेव सीसे भारं खन्धे करणादीसु विय (पारा. १०१). यथा वा तथा वा नस्सतीति अग्गिआदिना नस्सति, अञ्ञो वा कोचीति इमिना येन ठपितं, सोपि सङ्गहितोति वेदितब्बं.

इतरस्साति ¶ चोरस्स. इतरं गण्हतो उद्धारे पाराजिकन्ति एत्थ ‘‘पविसित्वा तव साटकं गण्हाही’’ति इमिनाव उपनिधिभावतो मोचितत्ता, सामिकस्स इतरं गण्हतो अत्तनो साटके आलयस्स सब्भावतो च ‘‘उद्धारे पाराजिक’’न्ति वुत्तं. सामिको चे ‘‘मम सन्तकं इदं वा होतु, अञ्ञं वा, किं तेन, अलं मय्हं इमिना’’ति एवं सुट्ठु निरालयो होति, चोरस्स पाराजिकं नत्थीति गहेतब्बं. न जानन्तीति तेन वुत्तवचनं असुणन्ता न जानन्ति. एसेव नयोति एत्थ सचे जानित्वापि चित्तेन न सम्पटिच्छन्ति, एसेव नयोति दट्ठब्बं. पटिक्खिपन्तीति एत्थ चित्तेन पटिक्खेपोपि सङ्गहितोवाति वेदितब्बं. उपचारे विज्जमानेति भण्डागारस्स समीपे उच्चारपस्सावट्ठाने विज्जमाने. मयि च मते सङ्घस्स च सेनासने विनट्ठेति एत्थ ‘‘तं मारेस्सामा’’ति एत्तके वुत्तेपि विवरितुं वट्टति गिलानपक्खे ठितत्ता अविसयोति वुत्तत्ता. मरणतो हि परं गेलञ्ञं अविसयत्तञ्च नत्थि. ‘‘द्वारं छिन्दित्वा परिक्खारं हरिस्सामा’’ति एत्तके वुत्तेपि विवरितुं वट्टतियेव. सहायेहि भवितब्बन्ति तेहिपि भिक्खाचारादीहि परियेसित्वा अत्तनो सन्तकेपि किञ्चि किञ्चि दातब्बन्ति वुत्तं होति. अयं सामीचीति भण्डागारे वसन्तानं इदं वत्तं.

लोलमहाथेरोति मन्दो मोमूहो आकिण्णविहारी. इतरेहीति तस्मिंयेव गब्भे वसन्तेहि इतरभिक्खूहि. विहाररक्खणवारे नियुत्तो विहारवारिको, वुड्ढपटिपाटिया अत्तनो वारे विहाररक्खणको. निवापन्ति भत्तवेतनं. चोरानं पटिपथं गतेसूति चोरानं आगमनं ञत्वा ‘‘पठमतरञ्ञेव गन्त्वा सद्दं करिस्सामा’’ति चोरानं अभिमुखं ¶ गतेसु, ‘‘चोरेहि हटभण्डं आहरिस्सामा’’ति तदनुपथं गतेसुपि एसेव नयो. निबद्धं कत्वाति ‘‘असुककुले यागुभत्तं विहारवारिकानञ्ञेवा’’ति एवं नियमनं कत्वा. द्वे तिस्सो यागुसलाका चत्तारि पञ्च सलाकभत्तानि च लभमानोवाति इदं निदस्सनमत्तं, ततो ऊनं वा होतु अधिकं वा अत्तनो वेय्यावच्चकरस्स च यापनमत्तं लभनमेव पमाणन्ति गहेतब्बं. निस्सितके जग्गेन्तीति तेहि विहारं जग्गापेन्तीति अत्थो. असहायकस्साति सहायरहितस्स. अत्तदुतियस्साति अप्पिच्छस्स अत्ता सरीरमेव दुतियो अस्स नाञ्ञोति अत्तदुतियो. तदुभयस्सापि अत्थस्स विभावनं यस्सातिआदि, एतेन सब्बेन एकेकस्स वारो न पापेतब्बोति दस्सितन्ति वेदितब्बं. पाकवत्तत्थायाति निच्चं पचितब्बयागुभत्तसङ्खातवत्तत्थाय. ठपेन्तीति दायका ठपेन्ति. तं गहेत्वाति तं आरामिकादीहि दिय्यमानं भागं गहेत्वा. न गाहापेतब्बोति एत्थ अब्भोकासिकस्सापि अत्तनो अधिकपरिक्खारो वा ठपितो अत्थि, चीवरादिसङ्घिकभागेपि आलयो वा अत्थि, सोपि गाहापेतब्बोव. दिगुणन्ति अञ्ञेहि लब्भमानतो दिगुणं. पक्खवारेनाति अड्ढमासवारेन.

सुङ्कघातकथावण्णना

११३. सुङ्कघातकथायं ¶ सुङ्कं यत्थ राजपुरिसा हनन्ति अददन्तानं सन्तकं अच्छिन्दित्वापि गण्हन्ति, तं ठानं सुङ्कघातन्ति एवम्पि अत्थो दट्ठब्बो. वुत्तमेवत्थं पाकटं कातुं तञ्हीतिआदि वुत्तं. दुतियं पादं अतिक्कामेतीति एत्थ पठमपादं परिच्छेदतो बहि ठपेत्वा दुतियपादे उद्धटमत्ते पाराजिकं. उद्धरित्वा बहि अट्ठपितेपि बहि ठितो एव नाम होतीति कत्वा एवं सब्बत्थ पदवारेसुपीति दट्ठब्बं. परिवत्तित्वा अब्भन्तरिमं बहि ठपेति, पाराजिकन्ति इदं सयं बहि ठत्वा पठमं अब्भन्तरिमं उक्खिपित्वा वा समकं उक्खिपित्वा वा परिवत्तनं सन्धाय वुत्तं. बहि ठत्वा उक्खित्तमत्ते हि सब्बं बहिगतमेव होतीति. सचे पन सो बहि ठत्वापि बाहिरपुटकं पठमं अन्तो ठपेत्वा पच्छा अब्भन्तरिमं उक्खिपित्वा बहि ठपेति, तदापि एकाबद्धताय अविजहितत्ता अवहारो न दिस्सति. केचि पन ‘‘भूमियं पतित्वा वत्तन्तं पुन अन्तो पविसति, पाराजिकमेवाति (पारा. अट्ठ. १.११३) वुत्तत्ता बाहिरपुटके ¶ अन्तोपविट्ठेपि बहिगतभावतो न मुच्चति, अन्तोगतं पन पुटकं पठमं, पच्छा एव वा बहि ठपितमत्ते वा पाराजिकमेवा’’ति वदन्ति, तं न युत्तं. बहि भूमियं पातितस्स केनचि सद्धिं एकाबद्धताय अभावेन अन्तोपविट्ठेपि पाराजिकमेवाति वत्तुं युत्तं, इदं पन एकाबद्धत्ता तेन सद्धिं न समेति. तस्मा यथा अन्तोभूमिगतेन एकाबद्धता न होति, एवं उभयस्सापि बहिगतभावे साधितेयेव अवहारोति विञ्ञायति, वीमंसित्वा गहेतब्बं. ये पन परिवत्तित्वाति इमस्स निवत्तित्वाति अत्थं वदन्ति, तेहि पन अब्भन्तरिमं बहि ठपेतीति अयमत्थो गहितो होतीति तत्थ सङ्कायेव नत्थि. एकाबद्धन्ति काजकोटियं रज्जुया बन्धनं सन्धाय वुत्तं. अबन्धित्वा काजकोटियं ठपितमत्तमेव होति, पाराजिकन्ति बहि गहितकाजकोटियं ठपितं यदि पादं अग्घति, पाराजिकमेव, अन्तोठपितेन एकाबद्धताय अभावाति अधिप्पायो. गच्छन्ते याने वा…पे… ठपेतीति सुङ्कघातं पविसित्वा अप्पविसित्वा वा ठपेति. सुङ्कट्ठानस्स बहि ठितन्ति यानादीहि नीहटत्ता बहि ठितं. केचि पन ‘‘बहि ठपित’’न्ति पाठं विकप्पेत्वा सुङ्कट्ठानतो पुब्बेव बहि ठपितन्ति अत्थं वदन्ति, तं न सुन्दरं; सुङ्कट्ठाने पविसित्वा याने ठपितेपि पवत्तित्वा गते विय दोसाभावतो. यो पन सुङ्कट्ठानस्स अन्तोव पविसित्वा ‘‘सुङ्कट्ठान’’न्ति ञत्वा थेय्यचित्तेन आगतमग्गेन पटिनिवत्तित्वा गच्छति, तस्सापि यदि तेन दिसाभागेन गच्छन्तानम्पि हत्थतो सुङ्कं गण्हन्ति, पाराजिकमेव. इमस्मिं ठानेति यानादीहि नीहरणे. तत्राति तस्मिं एळकलोमसिक्खापदे (पारा. ५७१ आदयो).

पाणकथावण्णना

११४. पाणकथायं ¶ आठपितोति मातापितूहि इणं गण्हन्तेहि ‘‘याव इणदाना अयं तुम्हाकं सन्तिके होतू’’ति इणदायकानं निय्यातितो. अवहारो नत्थीति मातापितूहि पुत्तस्स अपरिच्चत्तत्ता मातापितूनञ्च असन्तकत्ता अवहारो नत्थि. धनं पन गतट्ठाने वड्ढतीति इमिना आठपेत्वा गहितधनं वड्ढिया सह आठपितपुत्तहारकस्स गीवाति दस्सितन्ति वदन्ति. दासस्स जातोति उक्कट्ठलक्खणं दस्सेतुं वुत्तं. दासिकुच्छियं पन अदासस्स जातोपि एत्थेव सङ्गहितो ¶ . परदेसतो पहरित्वाति परदेसविलुम्पकेहि राजचोरादीहि पहरित्वा. सुखं जीवाति वदतीति थेय्यचित्तेन सामिकानं सन्तिकतो पलापेतुकामताय वदति, तथा पन अचिन्तेत्वा कारुञ्ञेन ‘‘सुखं गन्त्वा जीवा’’ति वदन्तस्स नत्थि अवहारो, गीवा पन होति. दुतियपदवारेति यदि दुतियपदं अवस्सं उद्धरिस्सति, भिक्खुस्स ‘‘पलायित्वा सुखं जीवा’’ति वचनक्खणेयेव पाराजिकं. अनापत्ति पाराजिकस्साति तस्स वचनेन वेगवड्ढने अकतेपि दुक्कटा न मुच्चतीति दस्सेति. ‘‘अदिन्नं थेय्यसङ्खातं आदियेय्या’’ति (पारा. ८९, ९१) आदानस्सेव वुत्तत्ता वुत्तपरियायेन मुच्चतीति.

चतुप्पदकथावण्णना

११७. चतुप्पदकथायं पाळियं आगतावसेसाति पाळियं आगतेहि हत्थि आदीहि अञ्ञे पसु-सद्दस्स सब्बसाधारणत्ता. भिङ्कच्छापन्ति ‘‘भिङ्का भिङ्का’’ति सद्दायनतो एवं लद्धनामं हत्थिपोतकं. अन्तोवत्थुम्हीति परिक्खित्ते. बहिनगरे ठितस्साति परिक्खित्तनगरं सन्धाय वुत्तं, अपरिक्खित्तनगरे पन अन्तोनगरे ठितस्सापि ठितट्ठानमेव ठानं. खण्डद्वारन्ति अत्तना खण्डितद्वारं. एको निपन्नोति एत्थापि बन्धोति आनेत्वा सम्बन्धितब्बं, तेनाह ‘‘निपन्नस्स द्वे’’ति. घातेतीति एत्थ थेय्यचित्तेन विनासेन्तस्स सहपयोगत्ता दुक्कटमेवाति वदन्ति.

ओचरककथावण्णना

११८. ओचरककथायं परियायेन हि अदिन्नादानतो मुच्चतीति इदं आणत्तिकपयोगं सन्धाय वुत्तं, सयमेव पन अभियुञ्जनादीसु परियायेनपि मोक्खो नत्थि.

ओणिरक्खकथावण्णना

ओणिरक्खकथायं ¶ ओणिन्ति ओणीतं, आनीतन्ति अत्थो. ओणिरक्खस्स सन्तिके ठपितभण्डं उपनिधि (पारा. ११२) विय गुत्तट्ठाने ठपेत्वा सङ्गोपनत्थाय अनिक्खिपित्वा यथाठपितट्ठाने एव मुहुत्तमत्तं ओलोकनत्थाय ठपितत्ता तस्स भण्डस्स ठानाचावनमत्तेन ओणिरक्खकस्स पाराजिकं होति.

संविदावहारकथावण्णना

संविदावहारकथायं ¶ संविधायाति संविदहित्वा. तेन नेसं दुक्कटापत्तियोति आणत्तिवसेन पाराजिकापत्तिया असम्भवे सतीति वुत्तं. यदि हि तेन आणत्ता यथाणत्तिवसेन हरन्ति, आणत्तिक्खणे एव पाराजिकापत्तिं आपज्जन्ति. पाळियं ‘‘सम्बहुला संविदहित्वा एको भण्डं अवहरति, आपत्ति सब्बेसं पाराजिकस्सा’’ति (पारा. ११८) एत्थापि आणापकानं आणत्तिक्खणेयेव आपत्ति, अवहारकस्स उद्धारेति गहेतब्बो. सम्बहुला भिक्खू एकं आणापेन्ति ‘गच्छेतं आहरा’ति, तस्सुद्धारे सब्बेसं पाराजिकन्तिआदीसुपि एवमेव अत्थो गहेतब्बो. साहत्थिकं वा आणत्तिकस्स आणत्तिकं वा साहत्थिकस्स अङ्गं न होतीति भिन्नकालिकत्ता अञ्ञमञ्ञस्स अङ्गं न होति. तथा हि सहत्था अवहरन्तस्स ठानाचावनक्खणे आपत्ति, आणत्तिया पन आणत्तिक्खणेयेवाति भिन्नकालिकत्ता आपत्तियोति.

सङ्केतकम्मकथावण्णना

११९. सङ्केतकम्मकथायं ओचरके वुत्तनयेनेवाति एत्थ अवस्सं हारिये भण्डेतिआदिना (पारा. अट्ठ. १.११८) वुत्तनयेनेव. पाळियं ‘‘तं सङ्केतं पुरे वा पच्छा वा’’ति तस्स सङ्केतस्स पुरे वा पच्छा वाति अत्थो. ‘‘तं निमित्तं पुरे वा पच्छा वा’’ति एत्थापि एसेव नयो.

निमित्तकम्मकथावण्णना

१२०. निमित्तकम्मकथायं अक्खिनिखणनादिनिमित्तकम्मं पन लहुकं इत्तरकालं, तस्मा तङ्खणेयेव तं भण्डं अवहरितुं न सक्का. निमित्तकम्मानन्तरमेव गण्हितुं आरद्धत्ता तेनेव ¶ निमित्तेन अवहरतीति वुच्चति. यदि एवं पुरेभत्तप्पयोगोव एसोति वादो पमाणभावं आपज्जतीति? नापज्जति. न हि सङ्केतकम्मं (पारा. ११९) विय निमित्तकम्मं कालपरिच्छेदयुत्तं. कालवसेन हि सङ्केतकम्मं वुत्तं, किरियावसेन निमित्तकम्मन्ति अयमेव तेसं विसेसो. ‘‘तं निमित्तं पुरे वा पच्छा वा तं भण्डं अवहरति, मूलट्ठस्स अनापत्ती’’ति इदं पन निमित्तकरणतो पुरे ¶ गण्हन्तस्स चेव निमित्तकम्मे च कतेपि गण्हितुं अनारभित्वा पच्छा सयमेव गण्हन्तस्स च वसेन वुत्तं.

आणत्तिकथावण्णना

१२१. आणत्तिकथायं असम्मोहत्थन्ति यस्मा सङ्केतकम्मनिमित्तकम्मानि करोन्तो न केवलं पुरेभत्तादिकालसङ्केतकम्मं अक्खिनिखणनादिनिमित्तकम्ममेव वा करोति, अथ खो एवंवण्णसण्ठानभण्डं गण्हाति, भण्डनियमम्पि करोति, त्वं इत्थन्नामस्स पावद, सो अञ्ञस्स पावदतूतिआदिना पुग्गलपटिपाटिया च आणापेति, तस्मा पुब्बण्हादिकालवसेन अक्खिनिखणनादिकिरियावसेन भण्डपुग्गलपटिपाटिवसेन च आणत्ते एतेसु सङ्केतकम्मनिमित्तकम्मेसु विसङ्केता विसङ्केतभावे सम्मोहो जायति, तदपगमेन असम्मोहत्थं. यं आणापकेन निमित्तसञ्ञं कत्वा वुत्तन्ति पुब्बण्हादीसु अक्खिनिखणनादीसु वा गहणत्थं आणापेन्तेन ईदिसवण्णसण्ठानादियुत्तं गण्हाति एवं गहणस्स निमित्तभूतसञ्ञाणं कत्वा यं भण्डं वुत्तं. अयं युत्ति सब्बत्थाति हेट्ठा वुत्तेसु उपरि वक्खमानेसु च सब्बत्थ आणत्तिप्पसङ्गेसु आणत्तिक्खणेयेव पाराजिकादीनं भावसङ्खाता विनययुत्ति, सा च आणत्तस्स किरियानिट्ठापनक्खणे आणापकस्स पयोगे थेय्यचित्तानं अभावा आणत्तिक्खणे एका एव आपत्ति होतीति एवं उपपत्तिया पवत्तत्ता युत्तीति वुत्ता. ‘‘मूलट्ठस्स थुल्लच्चय’’न्ति वुत्तत्ता सङ्घरक्खितेन पटिग्गहितेपि बुद्धरक्खितधम्मरक्खितानं दुक्कटमेव, कस्मा पनेत्थ आचरियस्स थुल्लच्चयन्ति आह ‘‘महाजनो ही’’तिआदि. महाजनोति च बुद्धरक्खितधम्मरक्खितसङ्घरक्खिते सन्धाय वुत्तं. मूलट्ठस्सेव दुक्कटन्ति बुद्धरक्खितस्स दुक्कटं. इदञ्च मूलट्ठस्स थुल्लच्चयाभावदस्सनत्थं पठमं आणत्तिक्खणे दुक्कटं सन्धाय वुत्तं, न पन सङ्घरक्खितस्स पटिग्गहणपच्चया पुन दुक्कटसम्भवं सन्धाय. न हि सो एकपयोगेन दुक्कटद्वयं आपज्जति. केचि पन ‘‘विसङ्केतत्ता पाळियं ‘मूलट्ठस्सा’ति अवत्वा ‘पटिग्गण्हाति, आपत्ति दुक्कटस्सा’ति सामञ्ञेन वुत्तत्ता इदं सङ्घरक्खितस्स दुक्कटं सन्धाय वुत्त’’न्ति वदन्ति, तं किञ्चापि अट्ठकथाय न समेति, पाळितो पन युत्तं विय दिस्सति. न हि तस्स पटिग्गहणप्पयोगे अनापत्ति होतीति. इमिनाव हेट्ठा आगतवारेसुपि पटिग्गण्हन्तानं ¶ ¶ दुक्कटं वेदितब्बं. ‘‘पण्णे वा सिलादीसु वा ‘चोरियं कातब्ब’न्ति लिखित्वा ठपिते पाराजिकमेवा’’ति केचि वदन्ति, तं पन ‘‘असुकस्स गेहे भण्ड’’न्ति एवं नियमेत्वा लिखिते युज्जति, न अनियमेत्वा लिखितेति वीमंसितब्बं. मग्गानन्तरफलसदिसाति इमिना यथा अरियपुग्गलानं मग्गानन्तरे फले उप्पन्ने किलेसपटिप्पस्सद्धिपरियोसानं भावनाकिच्चं निप्फन्नं नाम होति, एवमेतिस्सा अत्थसाधकचेतनाय उप्पन्नाय आणत्तिकिच्चं निप्फन्नमेवाति दस्सेति, तेनाह ‘‘तस्मा अयं आणत्तिक्खणेयेव पाराजिको’’ति, आणत्तिवचीपयोगसमुट्ठापकचेतनाक्खणेयेव पाराजिको होतीति अत्थो.

आणत्तिकथावण्णनानयो निट्ठितो.

आपत्तिभेदवण्णना

१२२. तत्थ तत्थाति भूमट्ठथलट्ठादीसु. पाळियं मनुस्सपरिग्गहितं सन्धाय ‘‘परपरिग्गहित’’न्ति वुत्तं. आमसति फन्दापेति ठाना चावेतीति इमेहि तीहि पदेहि पुब्बपयोगसहितं पञ्चमं अवहारङ्गं वुत्तं, ठाना चावेतीति च इदं उपलक्खणमत्तं. आणत्तिकादयो सब्बेपि पयोगा धुरनिक्खेपो च इध सङ्गहेतब्बावाति दट्ठब्बं.

१२५. ठानाचावनन्ति इदं पाळिअनुसारतो वुत्तं धुरनिक्खेपस्सापि सङ्गहेतब्बतो. एस नयो उपरिपि सब्बत्थ. तत्थ हि न च सकसञ्ञीति इमिना परपरिग्गहितता वुत्ता, न च विस्सासग्गाही न च तावकालिकन्ति इमेहि परपरिग्गहितसञ्ञिता, तीहि वा एतेहि परपरिग्गहितता परपरिग्गहितसञ्ञिता च वुत्ताति वेदितब्बा. अनज्झावुत्थकन्ति ‘‘ममेद’’न्ति परिग्गहवसेन अनज्झावुत्थकं अरञ्ञे दारुतिणपण्णादि. छड्डितन्ति पठमं परिग्गहेत्वा पच्छा अनत्थिकताय छड्डितं यं किञ्चि. छिन्नमूलकन्ति नट्ठं परियेसित्वा आलयसङ्खातस्स मूलस्स छिन्नत्ता छिन्नमूलकं. अस्सामिकन्ति अनज्झावुत्थकादीहि तीहि आकारेहि दस्सितं अस्सामिकवत्थु. उभयम्पीति अस्सामिकं अत्तनो सन्तकञ्च.

अनापत्तिभेदवण्णना

१३१. तस्मिंयेव ¶ अत्तभावे निब्बत्ताति तस्मिंयेव मतसरीरे पेतत्तभावेन निब्बत्ता. रुक्खादीसु लग्गितसाटके वत्तब्बमेव नत्थीति मनुस्सेहि अगोपितं सन्धाय वुत्तं, सचे पनेतं देवालयचेतियरुक्खादीसु ¶ नियुत्तेहि पुरिसेहि रक्खितगोपितं होति, गहेतुं न वट्टति. थोके खायिते…पे… गहेतुं वट्टतीति इदं अदिन्नादानाभावं सन्धाय वुत्तं. जिघच्छितपाणिना खादियमानमंसस्स अच्छिन्दित्वा खादनं नाम कारुञ्ञहानितो लोलभावतो च असारुप्पमेव. तेनेव हि अरियवंसिका अत्तनो पत्ते भत्तं खादन्तम्पि सुनखादिं तज्जेत्वा न वारेन्ति, तिरच्छानानं आमिसदाने कुसलं विय तेसं आमिसस्स अच्छिन्दनेपि अकुसलमेवाति गहेतब्बं, तेनेव वक्खति ‘‘परानुद्दयताय च न गहेतब्ब’’न्ति (पारा. अट्ठ. १.१४०).

पकिण्णककथावण्णना

बहु एकतो दारुआदिभारियस्स एकस्स भण्डस्स उक्खिपनकाले ‘‘गण्हथ उक्खिपथा’’ति वचीपयोगेन सद्धिं कायपयोगसब्भावट्ठानं सन्धाय ‘‘साहत्थिकाणत्तिक’’न्ति वुत्तं. ‘‘त्वं एतं वत्थुं गण्ह, अहं अञ्ञ’’न्ति एवं पवत्ते पन अवहारे अत्तना गहितं साहत्थिकमेव, परेन गाहापितं आणत्तिकमेव, तेनेव तदुभयग्घेन पञ्चमासेपि पाराजिकं न होति, एकेकभण्डग्घवसेन थुल्लच्चयादिमेव होति. वुत्तञ्हि ‘‘साहत्थिकं वा आणत्तिकस्स अङ्गं न होती’’तिआदि. उपनिक्खित्तभण्डं भण्डदेय्यञ्च अदातुकामताय ‘‘देमि दम्मी’’ति विक्खिपन्तो तुण्हीभावेन विहेठेन्तोपि तेन तेन कायविकारादिकिरियाय परस्स धुरं निक्खिपापेसीति ‘‘किरियासमुट्ठानञ्चा’’ति वुत्तं.

पदभाजनीयवण्णनानयो निट्ठितो.

विनीतवत्थुवण्णना

१३५. विनीतवत्थूसु ¶ निरुत्तियेव तंतंअत्थग्गहणस्स उपायताय पथोति निरुत्तिपथो, तेनेवाह ‘‘वोहारवचनमत्ते’’ति. यथाकम्मं गतोति ततो पेतत्तभावतो मतभावं दस्सेति. अब्भुण्हेति आसन्नमरणताय सरीरस्स उण्हसमङ्गितं दस्सेति, तेनेवाह ‘‘अल्लसरीरे’’ति. कुणपभावं उपगतम्पि भिन्नमेव अल्लभावतो भिन्नत्ता. विसभागसरीरेति इत्थिसरीरे. सीसे वातिआदि अधक्खके उब्भजाणुमण्डले पदेसे चित्तविकारप्पत्तिं सन्धाय वुत्तं, यत्थ कत्थचि अनामसन्तेन कतं सुकतमेव. मतसरीरम्पि हि येन केनचि आकारेन सञ्चिच्च फुसन्तस्स अनामासदुक्कटमेवाति वदन्ति, तं युत्तमेव. न हि अपाराजिकवत्थुकेपि चित्तादिइत्थिरूपे भवन्तं दुक्कटं पाराजिकवत्थुभूते मतित्थिसरीरे निवत्तति.

कुससङ्कामनवत्थुकथावण्णना

१३८. बलसाति ¶ बलेन. साटको भविस्सति, गण्हिस्सामीति अनागतवचनं पसिब्बकग्गहणतो पुरेतरं समुप्पन्नपरिकप्पदस्सनवसेन वुत्तं. गहणक्खणे पन ‘‘साटको चे, गण्हामी’’ति पसिब्बकं गण्हातीति एवमेत्थ अधिप्पायो गहेतब्बो, न पन बहि नीहरित्वा साटकभावं ञत्वा गहेस्सामीति, तेनाह ‘‘उद्धारेयेव पाराजिक’’न्ति. इतरथा ‘‘इदानि न गण्हामि, पच्छा अन्धकारे जाते विजाननकाले वा गण्हिस्सामि, इदानि ओलोकेन्तो विय हत्थगतं करोमी’’ति गण्हन्तस्सापि गहणक्खणे अवहारो भवेय्य, न च तं युत्तं तदा गहणे सन्निट्ठानाभावा. सन्निट्ठापकचेतनाय एव हि पाणातिपातादिअकुसलं विय. न हि ‘‘पच्छा वधिस्सामी’’ति पाणं गण्हन्तस्स तदेव तस्मिं मतेपि पाणातिपातो होति वधकचेतनाय पयोगस्स अकतत्ता, एवमिधापि अत्थङ्गते सूरिये अवहरिस्सामीतिआदिना कालपरिकप्पनवसेन ठाना चावितेपि तदापि अवहारो न होति ओकासपरिकप्पे (पारा. अट्ठ. १.१३८) विय, तस्मिं पन यथापरिकप्पितट्ठाने काले आगते भण्डं भूमियं अनिक्खिपित्वापि थेय्यचित्तेन गच्छतो पदवारेन अवहारोति खायति. तस्मा भण्डपरिकप्पो ओकासपरिकप्पो कालपरिकप्पोति तिविधोपि परिकप्पो ¶ गहेतब्बो. अट्ठकथायं पन ओकासपरिकप्पे समोधानेत्वा कालपरिकप्पो विसुं न वुत्तोति अम्हाकं खन्ति, वीमंसित्वा गहेतब्बं. पदवारेन कारेतब्बोति भूमियं अनिक्खिपित्वा वीमंसितत्ता वुत्तं. परियुट्ठितोति अनुबद्धो.

परिकप्पो दिस्सतीति गहणक्खणे परिकप्पो दिस्सति, न तदा तेसं मतेन अवहारोति दस्सेति. दिस्वा हटत्ता परिकप्पावहारो न दिस्सतीति पच्छा पन बहि वीमंसित्वा साटकभावं ञत्वा ततो पच्छा थेय्यचित्तेन हटत्ता पुब्बे कतस्स परिकप्पस्स अवहारानङ्गत्ता ‘‘सुत्त’’न्ति ञत्वा हरणे विय थेय्यावहारो एव सिया. तस्मा परिकप्पावहारो न दिस्सति. साटको चे भविस्सतीतिआदिकस्स परिकप्पस्स तदा अविज्जमानत्ता केवलं अवहारो एव, न परिकप्पावहारोति अधिप्पायो, तेन भण्डपरिकप्पावहारस्स ‘‘साटको चे भविस्सति, गहेस्सामी’’ति एवं भण्डसन्निट्ठानाभावक्खणेयेव पवत्तिं दस्सेति, तेनाह ‘‘यं परिकप्पितं, तं अदिट्ठं परिकप्पितभावे ठितंयेव उद्धरन्तस्स अवहारो’’ति. यदि एवं कस्मा ओकासपअप्पावहारो भण्डं दिस्वा अवहरन्तस्स परिकप्पावहारो सियाति? नायं दोसो अभण्डविसयत्ता तस्स परिकप्पस्स, पुब्बेव दिस्वा ञातभण्डस्सेव हि ओकासपरिकप्पो वुत्तो. तं मञ्ञमानो तं अवहरीति इदं सुत्तं किञ्चापि ‘‘तञ्ञेवेत’’न्ति नियमेत्वा गण्हन्तस्स ¶ वसेन वुत्तं, तथापि ‘‘तञ्चे गण्हिस्सामी’’ति एवं पवत्ते इमस्मिं परिकप्पेपि ‘‘गण्हिस्सामी’’ति गहणे नियमसब्भावा अवहारत्थसाधकं होतीति उद्धटं, तेनेव ‘‘समेती’’ति वुत्तं.

केचीति महाअट्ठकथायमेव एकच्चे आचरिया. महापच्चरियं पनातिआदिनापि केचिवादो गारय्हो, महाअट्ठकथावादोव युत्ततरोति दस्सेति.

अलङ्कारभण्डन्ति अङ्गुलिमुद्दिकादि. कुसं पातेत्वाति विलीवमयं वा तालपण्णादिमयं वा कतसञ्ञाणं पातेत्वा. परकोट्ठासतो कुसे उद्धटेपि न ताव कुसस्स परिवत्तनं जातन्ति वुत्तं ‘‘उद्धारे रक्खती’’ति. हत्थतो मुत्तमत्ते पाराजिकन्ति इमिना ठानाचावनं धुरनिक्खेपञ्च विना कुससङ्कामनं नाम विसुं एकोयं अवहारोति दस्सेति. सब्बेपि हि अवहारा ¶ साहत्थिकाणत्तिकाधिप्पाययोगेहि निप्फादियमाना अत्थतो ठानाचावनधुरनिक्खेपकुससङ्कामनेसु तीसु समोसरन्तीति दट्ठब्बं. इतरो तस्स भागं उद्धरति, उद्धारे पाराजिकन्ति पुरिमस्स अत्तनो कोट्ठासे आलयस्स अविगतत्ता वुत्तं, आलये पन सब्बथा असति अवहारो न होति, तेनाह ‘‘विचिनितावसेसं गण्हन्तस्सापि अवहारो नत्थेवा’’ति.

नायं ममाति जानन्तोपीति एत्थ पि-सद्देन तत्थ वेमतिकोपि हुत्वा थेय्यचित्तेन गण्हन्तोपि सङ्गय्हति. सिवेय्यकन्ति सिविरट्ठे जातं.

१४०-१. कप्पियं कारापेत्वाति पचापेत्वा. तस्मिं पाचित्तियन्ति अदिन्नादानभावेन सहपयोगस्सापि अभावा दुक्कटं न वुत्तन्ति वेदितब्बं. आणत्तेहीति सम्मतेन आणत्तेहि. आणत्तेनाति सामिकेहि आणत्तेन. भण्डदेय्यन्ति सम्मतादीहि दिन्नत्ता न पराजिकं जातं, असन्तं पुग्गलं वत्वा गहितत्ता पन भण्डदेय्यं वुत्तं. अञ्ञेन दिय्यमानन्ति सम्मतादीहि चतूहि अञ्ञेन दिय्यमानं. गण्हन्तोति ‘‘अपरस्स भागं देही’’ति वत्वा गण्हन्तो. अपरस्साति असन्तं पुग्गलं अदस्सेत्वा पन ‘‘अपरं भागं देही’’ति वा कूटवस्सानि गणेत्वा वा गण्हतो गिहिसन्तके सामिना च ‘‘इमस्स देही’’ति एवं आणत्तेन च दिन्ने भण्डदेय्यम्पि न होति, सङ्घसन्तके पन होतीति इमं विसेसं दस्सेतुं असम्मतेन वा अनाणत्तेन वातिआदि पुन वुत्तं. इतरेहि दिय्यमानन्ति सम्मतेन आणत्तेन वा दिय्यमानं. एवं गण्हतोति ‘‘अपरम्पि भागं देही’’ति वत्वा कूटवस्सानि गणेत्वा वा गण्हतो. सामिकेन पनाति एत्थ पन-सद्दो विसेसत्थजोतको, तेन ‘‘अपरम्पि भागं देही’’ति वा कूटवस्सानि गणेत्वा वा गण्हन्ते सामिकेन सयं देन्ते वा दापेन्ते वा विसेसो अत्थीति वुत्तं होति. सुदिन्नन्ति भण्डदेय्यं न होतीति अधिप्पायो. हेट्ठा पन सामिकेन तेन आणत्तेन वा दिय्यमानं गिहिसन्तकं ‘‘अपरस्स भागं देही’’ति वत्वा गण्हतो अपरस्स अभावतो सामिसन्तकमेव होतीति भण्डदेय्यं जातं, इध पन तेहियेव दिय्यमानं ‘‘अपरम्पि भागं देही’’ति वत्वा वा कूटवस्सानि गणेत्वा ¶ वा गण्हतो ‘‘देही’’ति वुत्तत्ता ¶ अञ्ञातकविञ्ञत्तिमत्तं ठपेत्वा भण्डदेय्यं न होतीति सुदिन्नमेवाति वुत्तं. अस्सामिकेन पन आणत्तेन दिन्नं भण्डं गण्हतो भण्डदेय्यमेवाति वदन्ति, पत्तचतुक्के विय अवहारतावेत्थ युत्ता, सङ्घसन्तके पन ‘‘देही’’ति वुत्तेपि सामिकस्स कस्सचि अभावा सम्मतेन दिन्नेपि भण्डदेय्यं वुत्तन्ति गहेतब्बं.

१४६-९. आहरापेन्तेसु भण्डदेय्यन्ति ‘‘गहिते अत्तमनो होती’’ति वचनतो अनत्तमनस्स सन्तकं गहितम्पि पुन दातब्बमेवाति वुत्तं. ‘‘सम्मुखीभूतेहि भाजेतब्ब’’न्ति वचनतो भाजनीयभण्डं उपचारसीमट्ठानमेव पापुणातीति आह ‘‘अन्तोउपचारसीमायं ठितस्सेव गहेतुं वट्टती’’ति. भण्डदेय्यन्ति उभिन्नं सालयभावेपि चोरस्स अदत्वा सामिकस्सेव दातब्बं चोरेनापि सामिकस्सेव दातब्बतो. एसेव नयोति पंसुकूलसञ्ञाय गहिते भण्डदेय्यं, थेय्यचित्तेन पाराजिकन्ति अत्थो.

वुट्ठहन्तेसूति गामं छड्डेत्वा पलायन्तेसु. अविसेसेनाति सउस्साहतादिविसेसं अपरामसित्वा सामञ्ञतो. सउस्साहमत्तमेव आपत्तिभावस्स पमाणं सामिकानं परिच्छिन्नभावतो. ततोति गणसन्तकादितो. कुलसङ्गहणत्थाय देतीति पंसुकूलविस्सासिकादिसञ्ञाय गहेत्वा देति, तदा कुलसङ्गहपच्चया च दुक्कटं भण्डदेय्यञ्च, थेय्यचित्ते पन सति कुलसङ्गहणत्थाय गण्हतोपि पाराजिकमेव. ऊनपञ्चमासकादीसु कुलदूसकदुक्कटेन सद्धिं थुल्लच्चयदुक्कटानि. सेनासनत्थाय नियमितन्ति इदं इस्सरवताय ददतो थुल्लच्चयदस्सनत्थं वुत्तं. इतरपच्चयत्थाय दिन्नम्पि अथेय्यचित्तेन इस्सरवताय कुलसङ्गहणत्थाय वा ञातकादीनं वा ददतो दुक्कटं भण्डदेय्यञ्च होतेव. इस्सरवतायाति ‘‘मयि देन्ते को निवारेस्सति, अहमेवेत्थ पमाण’’न्ति एवं अत्तनो इस्सरियभावेन. थुल्लच्चयन्ति कुलसङ्गहणत्थाय वा अञ्ञथा वा कारणेन ददतो सेनासनत्थाय नियमितस्स गरुभण्डताय थुल्लच्चयं भण्डदेय्यञ्च. गीवाति एत्थ सेनासनत्थाय नियमिते थुल्लच्चयेन सद्धिं गीवा, इतरस्मिं दुक्कटेन सद्धिन्ति वेदितब्बं. सुखादितमेवाति अन्तोउपचारसीमायं ठत्वा भाजेत्वा अत्तनो सन्तकं कत्वा खादितत्ता वुत्तं. सङ्घिकञ्हि विहारपटिबद्धं ¶ वेभङ्गियं बहिउपचारसीमट्ठं भण्डं ¶ अन्तोउपचारट्ठेहि भिक्खूहि एव भाजेतब्बं, न बहि ठितेहि उपचारसीमाय भाजेतब्बन्ति.

१५०. ‘‘वुत्तो वज्जेमी’’ति वुत्तभिक्खुस्मिं ‘‘वुत्तो वज्जेही’’ति वुत्तस्स पच्छा उप्पज्जनकपाराजिकादिदोसारोपनतो, गहट्ठानं वा ‘‘भदन्ता अपरिच्छेदं कत्वा वदन्ती’’ति एवं दोसारोपनतो.

१५३-५. छातज्झत्तन्ति तेन छातेन जिघच्छाय उदरग्गिना झत्तं, दड्ढं पीळितन्ति अत्थो. धनुकन्ति खुद्दकधनुसण्ठानं लग्गनकदण्डं. मद्दन्तो गच्छति, भण्डदेय्यन्ति एत्थ एकसूकरग्घनकभण्डं दातब्बं एकस्मिं बन्धे अञ्ञेसं तत्थ अबज्झनतो. अदूहलन्ति यन्तपासाणो, येन अज्झोत्थटत्ता मिगा पलायितुं न सक्कोन्ति. पच्छा गच्छतीति तेन कतपयोगेन अगन्त्वा पच्छा सयमेव गच्छति, हेट्ठा वुत्तेसुपि ईदिसेसु ठानेसु एसेव नयो. रक्खं याचित्वाति राजपुरिसानं सन्तिकं गन्त्वा अनुद्दिस्स रक्खं याचित्वा. कुमीनमुखन्ति कुमीनस्स अन्तो मच्छानं पविसनमुखं.

१५६. थेरानन्ति आगन्तुकत्थेरानं. तेसम्पीति आवासिकभिक्खूनम्पि. परिभोगत्थायाति सङ्घिके कत्तब्बविधिं कत्वा परिभुञ्जनत्थाय. गहणेति पाठसेसो दट्ठब्बो. यत्थाति यस्मिं आवासे. अञ्ञेसन्ति अञ्ञेसं आगन्तुकानं. तेसुपि आगन्तुका अनिस्सराति सेनासने निरन्तरं वसन्तानं चीवरत्थाय दायकेहि भिक्खूहि वा नियमेत्वा दिन्नत्ता भाजेत्वा खादितुं अनिस्सरा, आगन्तुकेहिपि इच्छन्तेहि तस्मिं विहारे वस्सानादीसु पविसित्वा चीवरत्थाय गहेतब्बं. तेसं कतिकाय ठातब्बन्ति सब्बानि फलाफलानि अभाजेत्वा ‘‘एत्तकेसु रुक्खेसु फलानि भाजेत्वा परिभुञ्जिस्साम, अञ्ञेसु फलाफलेहि सेनासनानि पटिजग्गिस्सामा’’ति वा, ‘‘पिण्डपातादिपच्चयं सम्पादेस्सामा’’ति वा, ‘‘किञ्चिपि अभाजेत्वा चतुपच्चयत्थायेव उपनेमा’’ति वा एवं सम्मा उपनेन्तानं आवासिकानं कतिकाय आगन्तुकेहि ठातब्बं. महाअट्ठकथायं ‘‘अनिस्सरा’’ति वचनेन दीपितो एव अत्थो, महापच्चरियं चतुन्नं पच्चयानन्तिआदिना वित्थारेत्वा दस्सितो. परिभोगवसेनेवाति एत्थ एव-सद्दो अट्ठानप्पयुत्तो, परिभोगवसेन तमेव भाजेत्वाति योजेतब्बं. एत्थाति एतस्मिं विहारे, रट्ठे वा.

सेनासनपच्चयन्ति ¶ सेनासनञ्च तदत्थाय नियमेत्वा ठपितञ्च. एकं वा द्वे वा वरसेनासनानि ठपेत्वाति वुत्तमेवत्थं पुन ब्यतिरेकमुखेन दस्सेतुं ‘‘मूलवत्थुच्छेदं पन कत्वा न उपनेतब्ब’’न्ति ¶ वुत्तं, सेनासनसङ्खातवत्थुनो मूलच्छेदं कत्वा सब्बानि सेनासनानि न विस्सज्जेतब्बानीति अत्थो. केचि पनेत्थ ‘‘एकं वा द्वे वा वरसेनासनानि ठपेत्वा लामकतो पट्ठाय विस्सज्जेन्तेहिपि सेनासनभूमियो न विस्सज्जेतब्बाति अयमत्थो वुत्तो’’ति वदन्ति, तम्पि युत्तमेव इमस्सापि अत्थस्स अवस्सं वत्तब्बतो, इतरथा केचि सह वत्थुनापि विस्सज्जेतब्बं मञ्ञेय्युं.

पण्णं आरोपेत्वाति ‘‘एत्तके रुक्खे रक्खित्वा ततो एत्तकं गहेतब्ब’’न्ति पण्णं आरोपेत्वा. निमित्तसञ्ञं कत्वाति सङ्केतं कत्वा. दारकाति तेसं पुत्तनत्तादयो ये केचि गोपेन्ति, ते सब्बेपि इध ‘‘दारका’’ति वुत्ता. ततोति यथावुत्तदारुसम्भारतो. आपुच्छित्वाति कारकसङ्घं आपुच्छित्वा. तं सब्बम्पि आहरित्वाति अनापुच्छित्वापि तावकालिकं आहरित्वा. अयमेव भिक्खु इस्सरोतिआदितो पट्ठाय अत्तनो सन्तकेहि दारुसम्भारादीहि च कारापितत्ता पटिजग्गितत्ता च सङ्घिकसेनासने भागिताय च अयमेव इस्सरो, न च सो ततो वुट्ठापेतब्बोति वुत्तं होति. उदकपूजन्ति चेतियङ्गणे सिञ्चनादिपूजं. वत्तसीसेनाति केवलं सद्धाय, न वेतनादिअत्थाय. सवत्थुकन्ति सह भूमिया. कुट्टन्ति गेहभित्तिं. पाकारन्ति परिक्खेपपाकारं. ततोति छड्डितविहारतो. ततो आहरित्वा सेनासनं कतं होतीति सामन्तगामवासीहि भिक्खूहि छड्डितविहारतो दारुसम्भारादिं आहरित्वा सेनासनं कतं होति.

१५७. ‘‘पुग्गलिकपरिभोगेन परिभुञ्जती’’ति वुत्तमत्थंयेव पाकटं कातुं ‘‘आगतागतानं वुड्ढतरानं न देती’’ति वुत्तं. चतुभागउदकसम्भिन्नेति चतुत्थभागेन सम्भिन्ने. पाळियं ‘‘अनापत्ति, भिक्खवे, पाराजिकस्सा’’ति (पारा. १५७) सामिकेहि थुल्लनन्दं उद्दिस्स एतिस्सा हत्थे दिन्नत्ता, अथेय्यचित्तेन परिभुञ्जितत्ता च वुत्तं. थेय्यचित्तेन परिभुत्तेपि चस्सा भण्डदेय्यमेव उपनिक्खित्तभण्डट्ठानियत्ता. ओदनभाजनीयवत्थुस्मिन्ति ‘‘अपरस्स भागं देही’’ति आगतवत्थुस्मिं (पारा. १४१).

१५९. तस्स ¶ कुलस्स अनुकम्पाय पसादानुरक्खणत्थायातिआदिना कुलसङ्गहत्थं नाकासीति दस्सेति. ‘‘याव दारका पासादं आरोहन्ति, ताव पासादो तेसं सन्तिके होतू’’ति पुब्बे कालपरिच्छेदं कत्वा अधिट्ठितत्ता एव यथाकालपरिच्छेदमेव तत्थ तिट्ठति, ततो परं पासादो सयमेव यथाठानं गच्छति, तथागमनञ्च इद्धिविस्सज्जनेन सञ्जातं विय होतीति वुत्तं ‘‘थेरो इद्धिं पटिसंहरी’’ति. यस्मा एवं इद्धिविधञाणेन करोन्तस्स कायवचीपयोगा ¶ न सन्ति थेय्यचित्तञ्च नत्थि पासादस्सेव विचारितत्ता, तस्मा ‘‘एत्थ अवहारो नत्थी’’ति थेरो एवमकासीति दट्ठब्बं. अथ वा दारकेसु अनुकम्पाय आनयनत्थमेव पासादे उपनीते पासे बद्धसूकरादीनं आमिसं दस्सेत्वा ठानाचावनं विय करमरानीतेसु दारकेसु पासादं आरुळ्हेसुपि पुन पटिसंहरणे च इध अवहारो नत्थि कारुञ्ञाधिप्पायत्ता, भण्डदेय्यम्पि न होति कायवचीपयोगाभावा. कायवचीपयोगे सतियेव हि आपत्ति भण्डदेय्यं वा होति, तेनेव भगवा ‘‘अनापत्ति, भिक्खवे, अथेय्यचित्तस्सा’’तिआदिं अवत्वा ‘‘अनापत्ति, भिक्खवे, इद्धिमस्स इद्धिविसये’’ति (पारा. १५९) एत्तकमेव अवोच. इद्धिविसयेति चेत्थ परभण्डादायककायवचीपयोगासमुट्ठापकस्स केवलं मनोद्वारिकस्स अथेय्यचित्तभूतस्स इद्धिचित्तस्स विसये आपत्ति नाम नत्थीति अधिप्पायो गहेतब्बो. किं पन पटिक्खित्तं इद्धिपाटिहारियं कातुं वट्टतीति चोदनं सन्धायाह ‘‘ईदिसाय अधिट्ठानिद्धिया अनापत्ती’’ति. ‘‘अनापत्ति, भिक्खवे, इद्धिमस्स इद्धिविसये’’ति हि इमिनायेव सुत्तेन अधिट्ठानिद्धिया अप्पटिक्खित्तभावो सिज्झति. अत्तनो पकतिवण्णं अविजहित्वा बहिद्धा हत्थिआदिदस्सनं, ‘‘एकोपि हुत्वा बहुधा होती’’ति (दी. नि. १.२३८, २३९; म. नि. १.१४७; पटि. म. १.१०२) आगतञ्च अधिट्ठानवसेन निप्फन्नत्ता अधिट्ठानिद्धि नाम, ‘‘सो पकतिवण्णं विजहित्वा कुमारकवण्णं वा दस्सेति, नागवण्णं…पे… विविधम्पि सेनाब्यूहं दस्सेती’’ति (पटि. म. ३.१३) एवं आगता इद्धि पकतिवण्णविजहनविकारवसेन पवत्तत्ता विकुब्बनिद्धि नाम. अत्तनो पन पकतिरूपं यथासभावेन ठपेत्वाव बहि हत्थिआदिदस्सनं विकुब्बनिद्धि नाम न होति, अत्तनो रूपमेव हत्थिआदिरूपेन निम्मानं विकुब्बनिद्धीति वेदितब्बं.

पराजितकिलेसेनाति ¶ विजितकिलेसेन, निक्किलेसेनाति अत्थो. इधाति इमस्मिं सासने, तेन दुतियपाराजिकसिक्खापदेन समं अञ्ञं अनेकनयवोकिण्णं गम्भीरत्थविनिच्छयं किञ्चि सिक्खापदं न विज्जतीति योजना. तत्थ अत्थो नाम पाळिअत्थो, विनिच्छयो पाळिमुत्तकविनिच्छयो, ते गम्भीरा यस्मिं, तं गम्भीरत्थविनिच्छयं. वत्थुम्हि ओतिण्णेति चोदनावसेन वा अत्तनाव अत्तनो वीतिक्कमारोचनवसेन वा सङ्घमज्झे अदिन्नादानवत्थुस्मिं ओतिण्णे. एत्थाति ओतिण्णवत्थुम्हि. विनिच्छयोति आपत्तानापत्तिनियमनं. कप्पियेपि च वत्थुस्मिन्ति अत्तना गहेतुं युत्ते मातापितादीनं सन्तकेपि.

इति समन्तपासादिकाय विनयट्ठकथाय विमतिविनोदनियं

दुतियपाराजिकवण्णनानयो निट्ठितो.

३. ततियपाराजिकं

तीहीति ¶ कायवचीमनोद्वारेहि.

पठमपञ्ञत्तिनिदानवण्णना

१६२. या अयं हेट्ठा तं पनेतं बुद्धकाले च चक्कवत्तिकाले च नगरं होतीतिआदिना (पारा. अट्ठ. १.८४) राजगहस्स बुद्धुप्पादेयेव वेपुल्लप्पत्ति वुत्ता, सा एत्थापि समानाति दस्सेतुं ‘‘इदम्पि च नगर’’न्ति वुत्तं, तेन च न केवलं राजगहादयो एवाति दस्सेति. महावनं नामातिआदि मज्झिमभाणकसंयुत्तभाणकानं मतेन वुत्तं, दीघभाणका पन ‘‘हिमवन्तेन सद्धिं एकाबद्धं हुत्वा ठितं महावन’’न्ति वदन्ति. हंसवट्टकच्छदनेनाति हंसवट्टकपटिच्छन्नेन, हंसमण्डलाकारेनाति अत्थो. कायविच्छन्दनियकथन्ति करजकाये विरागुप्पादनकथं. छन्दोति दुब्बलरागो. रागोति बलवरागो. ‘‘केसलोमादि’’न्ति सङ्खेपतो वुत्तमत्थं विभागेन दस्सेतुं येपि हीतिआदि वुत्तं. पञ्चपञ्चप्पभेदेनाति एत्थ पञ्च पञ्च पभेदा एतस्स परियायस्साति पञ्चपञ्चप्पभेदो ¶ , तेन पञ्चपञ्चप्पभेदेनाति एवं बाहिरत्थसमासवसेन परियायविसेसनता दट्ठब्बा.

असुभायाति असुभमातिकाय. वण्णेतब्बमातिकञ्हि अपेक्खित्वा इत्थिलिङ्गे सामिवचनं, तेनाह मातिकं निक्खिपित्वातिआदि. तं विभजन्तोति मातिकं विभजन्तो. फातिकम्मन्ति निप्फत्तिकरणं. पञ्चङ्गविप्पहीनन्ति कामच्छन्दादिपञ्चनीवरणङ्गविगमेन पञ्चङ्गविप्पहीनता, अप्पनाप्पत्तवितक्कादिज्झानङ्गानं उप्पत्तिवसेन पञ्चङ्गसमन्नागतता च वेदितब्बा. तिविधकल्याणं दसलक्खणसम्पन्नन्ति एत्थ पन झानस्स आदिमज्झपरियोसानानं वसेन तिविधकल्याणता, तेसंयेव आदिमज्झपरियोसानानं लक्खणवसेन दसलक्खणसम्पन्नता च वेदितब्बा. अट्ठकथायं पन ‘‘दसलक्खणविभावनेनेव तन्निस्सयभूता तिविधकल्याणतापि झानस्स पाकटा होतीति तत्रिमानीतिआदि वुत्तं.

तत्रायं ¶ पाळीति तस्मिं दसलक्खणविभावनविसये अयं पाळि. पटिपदाविसुद्धीति गोत्रभुपरियोसानाय पुब्बभागपटिपदाय झानस्स नीवरणादिपरिबन्धतो विसुद्धि, सायं यस्मा उपेक्खानुब्रूहनादीनम्पि पच्चयत्तेन पधाना पुरिमकारणसिद्धा च, तस्मा वुत्तं ‘‘पटिपदाविसुद्धि आदी’’ति. उपेक्खानुब्रूहनाति विसोधेतब्बतादीनं अभावतो तत्रमज्झत्तुपेक्खाय किच्चनिप्फत्तिया अनुब्रूहना, सा पन परिबन्धविसुद्धिसमकालविभाविनीपि तब्बिसुद्धियाव निप्फन्नाति दीपनत्थमाह ‘‘उपेक्खानुब्रूहना मज्झे’’ति. सम्पहंसनाति वत्थुधम्मादीनं अनतिवत्तनादिसाधकस्स ञाणस्स किच्चनिप्फत्तिवसेन परियोदपना, सा पन यस्मा कत्तब्बस्स सब्बकिच्चस्स निप्फत्तियाव सिद्धा नाम होति, तस्मा वुत्तं ‘‘सम्पहंसना परियोसान’’न्ति. तीणिपि चेतानि कल्याणानि एकक्खणे लब्भमानानिपि पच्चयपच्चयुप्पन्नतादिवसेन पवत्तन्तीति दस्सनत्थं आदिमज्झपरियोसानभावेन वुत्तानि, न पन झानस्स उप्पादादिक्खणत्तये यथाक्कमं लब्भमानत्ताति दट्ठब्बं. मज्झिमं समाधिनिमित्तं पटिपज्जतीतिआदीसु मज्झिमं समाधिनिमित्तं नाम समप्पवत्तो अप्पनासमाधियेव. सो हि लीनुद्धच्चसङ्खातानं उभिन्नं अन्तानं अनुपगमनेन मज्झिमो, सविसेसं चित्तस्स एकत्तारम्मणे ठपनतो समाधियेव उपरिविसेसानं कारणभावतो ‘‘समाधिनिमित्त’’न्ति वुच्चति, तं पटिपज्जति पटिलब्भतीति अत्थो. एवं ¶ पटिपन्नत्ता मज्झिमेन समाधिनिमित्तेन तत्थ एकत्तारम्मणे अप्पनागोचरे पक्खन्दति उपतिट्ठति, एवं विसुद्धस्स पन तस्स चित्तस्स पुन विसोधेतब्बाभावतो विसोधने ब्यापारं अकरोन्तो पुग्गलो विसुद्धं चित्तं अज्झुपेक्खति नाम. समथभावूपगमनेन समथपटिपन्नस्स पुन समाधाने ब्यापारं अकरोन्तो समथपटिपन्नं अज्झुपेक्खति, समथपटिपन्नभावतो एवमस्स किलेससंसग्गं पहाय एकत्तेन उपट्ठितस्स पुन एकत्तुपट्ठाने ब्यापारं अकरोन्तो एकत्तुपट्ठानं अज्झुपेक्खति नाम.

तत्थ जातानन्तिआदीसु ये पन ते एवं उपेक्खानुब्रूहिते तस्मिं झानचित्ते जाता समाधिपञ्ञासङ्खाता युगनद्धधम्मा, तेसं अञ्ञमञ्ञं अनतिवत्तनसभावेन सम्पहंसना विसोधना परियोदपना च, सद्धादीनं इन्द्रियानं किलेसेहि विमुत्तत्ता विमुत्तिरसेन एकरसताय सम्पहंसना च, यञ्चेतं तदुपगं तेसं अनतिवत्तनएकरसभावानं अनुच्छविकं वीरियं, तस्स तदुपगवीरियस्स वाहनट्ठेन पवत्तनट्ठेन सम्पहंसना च, तस्मिं खणे यथावुत्तधम्मानं आसेवनट्ठेन सम्पहंसना च, परियोदपना च परियोदपनकस्स ञाणस्स किच्चनिप्फत्तिवसेनेव इज्झतीति वेदितब्बं. एवं तिविधत्तगतं चित्तन्तिआदीनि तस्सेव चित्तस्स थोमनवचनानि. वितक्कसम्पन्नन्ति वितक्कङ्गेन सुन्दरभावमुपगतं. चित्तस्स अधिट्ठानसम्पन्नन्ति तस्मिञ्ञेव आरम्मणे ¶ चित्तस्स निरन्तरप्पवत्तिसङ्खातेन समाधिना सम्पन्नं, इदं झानङ्गवसेन वुत्तं. समाधिसम्पन्नन्ति इदं पन इन्द्रियवसेनाति वेदितब्बं.

पटिकुटतीति सङ्कुचति. पटिवट्टतीति पटिनिवट्टति. न्हारुदद्दुलन्ति न्हारुखण्डं. पयुत्तवाचन्ति पच्चयपरियेसने नियुत्तवाचं. दण्डवागुराहीति दण्डपटिबद्धाहि दीघजालसङ्खाताहि वागुराहि.

समणकुत्तकोति कासायनिवासनादिसमणकिच्चको. वग्गुमुदाति एत्थ ‘‘वग्गुमता’’ति वत्तब्बे लोकिका ‘‘मुदा’’ति वोहरिंसूति दस्सेन्तो आह ‘‘वग्गुमता’’ति. ‘‘वग्गू’’ति मता, सुद्धसम्मताति अत्थो, तेनाह ‘‘पुञ्ञसम्मता’’ति. सत्तानं पापुननेन सोधनेन सा पुञ्ञसम्मता.

१६३. मारस्स धेय्यं ठानं, वत्थु वा निवासो मारधेय्यं, सो अत्थतो तेभूमकधम्मा एव, इध पन पञ्च कामगुणा अधिप्पेता, तं मारधेय्यं ¶ . ‘‘अयं समणकुत्तको यथासमुप्पन्नसंवेगमूलकेन समणभावूपगमनेन अतिक्कमितुं सक्खिस्सती’’ति चिन्तेत्वा अवोच, न पन ‘‘अरहत्तप्पत्तिया तीसु भवेसु अप्पटिसन्धिकताय तं अतिक्कमितुं सक्खिस्सती’’ति मरणेनेव सत्तानं संसारमोचनलद्धिकत्ता देवताय. न हि मतानं कत्थचि पटिसन्धि गच्छति. इमिना अत्थेन एवमेव भवितब्बन्ति इमिना परेसं जीविता वोरोपनत्थेन एवमेव संसारमोचनसभावेनेव भवितब्बं. ‘‘अत्तनापि अत्तानं जीविता वोरोपेन्ति, अञ्ञमञ्ञम्पि जीविता वोरोपेन्ती’’ति (पारा. १६२) वुत्तत्ता सब्बानिपि तानि पञ्चभिक्खुसतानि जीविता वोरोपेसीति इदं येभुय्यवसेन वुत्तन्ति गहेतब्बं. तस्मा ये अत्तनापि अत्तानं अञ्ञमञ्ञञ्च जीविता वोरोपेसुं, ते पुथुज्जनभिक्खू ठपेत्वा तदवसेसे च पुथुज्जनभिक्खू, सब्बे च अरिये अयं जीविता वोरोपेसीति वेदितब्बं.

१६४. एकीभावतोति पविवेकतो. उद्देसं परिपुच्छं गण्हन्तीति अत्तनो अत्तनो आचरियानं सन्तिके गण्हन्ति, गहेत्वा च आचरियेहि सद्धिं भगवन्तं उपट्ठहन्ति. तदा पन उद्देसादिदायका तनुभूतेहि भिक्खूहि भगवन्तं उपगता, तं सन्धाय भगवा पुच्छति.

आनापानस्सतिसमाधिकथावण्णना

१६५. दसानुस्सतीसु ¶ अन्तोगधापि आनापानस्सति तदा भिक्खूनं बहूनं सप्पायतं दस्सेतुं पुन गहिता. तथा हि तं भगवा तेसं देसेसि. आहारे पटिक्कूलसञ्ञा असुभकम्मट्ठानसदिसा, चत्तारो पन आरुप्पा आदिकम्मिकानं अननुरूपाति तेसं इध अग्गहणं दट्ठब्बं. अञ्ञं परियायन्ति अरहत्ताधिगमत्थाय अञ्ञं कारणं. अत्थयोजनाक्कमन्ति अत्थञ्च योजनाक्कमञ्च. अस्सासवसेनाति अस्सासं आरम्मणं कत्वाति वुत्तं होति. उपट्ठानं सतीति अप्पमुस्सनताय तमेव अस्सासं पस्सासञ्च उपगन्त्वा ठानं, तथा तिट्ठनकधम्मो सति नामाति अत्थो. इदानि सतिवसेनेव पुग्गलं निद्दिसितुकामेन यो अस्ससतीतिआदि वुत्तं. तत्थ यो अस्ससति, तस्स सति अस्सासं उपगन्त्वा तिट्ठतीतिआदिना अत्थो गहेतब्बो. अकोसल्लसम्भूतेति अविज्जासम्भूते ¶ . खणेनेवाति अत्तनो पवत्तिक्खणेनेव. अरियमग्गस्स पादकभूतो अयं समाधि अनुक्कमेन वड्ढित्वा अरियमग्गभावं उपगतो विय होतीति आह ‘‘अरियमग्गवुड्ढिप्पत्तो’’ति. ओपम्मनिदस्सनन्ति एत्थ उपमाव ओपम्मं, तस्स निदस्सनं.

बाहिरका आनापानस्सतिं जानन्ता आदितो चतुप्पकारमेव जानन्ति, न सब्बं सोळसप्पकारन्ति आह सब्बप्पकारइच्चादि. एवमस्सेतं सेनासनन्ति एत्थ एवन्ति भावनासतिया यथावुत्तनयेन आरम्मणे चित्तस्स निबन्धने सतियेव, नासतीति अत्थो, तेन मुट्ठस्सतिस्स अरञ्ञवासो निरत्थको अननुरूपोति दस्सेति. अवसेससत्तविधसेनासनन्ति ‘‘पब्बतं कन्दरं गिरिगुहं सुसानं वनपत्थं अब्भोकासं पलालपुञ्ज’’न्ति (विभ. ५०८) एवं वुत्तं. उतुत्तयानुकूलं धातुचरियानुकूलन्ति गिम्हानादिउतुत्तयस्स सेम्हादिधातुत्तयस्स मोहादिचरियत्तयस्स च अनुकूलं. निसज्जाय दळ्हभावं पल्लङ्काभुजनेन, अस्सासपस्सासानं पवत्तनसुखतं उपरिमकायस्स उजुकं ठपनेन, आरम्मणपरिग्गहूपायं परिमुखं सतिया ठपनेन उपदिसन्तो. न पणमन्तीति न ओणमन्ति. परिग्गहितनिय्यानं सतिन्ति सब्बथा गहितं सम्मोसपटिपक्खतो निग्गमनसङ्खातं सतिं कत्वा, परमं सतिनेपक्कं उपट्ठपेत्वाति अत्थो.

सतोवाति सतिया समन्नागतो एव. बात्तिंसाय आकारेहीति चतूसु चतुक्केसु आगतानि दीघरस्सादीनि सोळस पदानि अस्सासपस्सासवसेन द्विधा विभजित्वा वुत्तेहि द्वत्तिंसाकारेहि. दीघंअस्सासवसेनाति दीघअस्सासवसेन, विभत्तिअलोपं कत्वा निद्देसो, दीघन्ति वा भगवता वुत्तअस्सासवसेन. चित्तस्स एकग्गतं अविक्खेपन्ति विक्खेपपटिपक्खभावतो ‘‘अविक्खेपो’’ति लद्धनामं चित्तस्स एकग्गभावं पजानतो. पटिनिस्सग्गानुपस्सी अस्सासवसेनाति ¶ पटिनिस्सग्गानुपस्सी हुत्वा अस्सासवसेन, ‘‘पटिनिस्सग्गानुपस्सिअस्सासनवसेना’’ति वा पाठो, तस्स पटिनिस्सग्गानुपस्सिनो अस्सासवसेनाति अत्थो. आ पठमं बहिमुखं ससनं अस्सासो, ततो अन्तोमुखं पटिससनं पस्सासोति आह अस्सासोति बहिनिक्खमनवातोतिआदि, सुत्तन्तट्ठकथासु पन आकड्ढनवसेन अन्तो ससनं अस्सासो, बहि पटिससनं पस्सासोति कत्वा उप्पटिपाटिया वुत्तं.

तत्थाति ¶ बहिनिक्खमनअन्तोपविसनवातेसु, तस्स च पठमं अब्भन्तरवातो निक्खमतीति इमिना सम्बन्धो. ‘‘सब्बेसम्पि गब्भसेय्यकानन्तिआदिना दारकानं पवत्तिक्कमेन अस्सासो बहिनिक्खमनवातोति गहेतब्बन्ति दीपेती’’ति केचि वदन्ति. सुत्तनयो एव चेत्थ ‘‘अस्सासादिमज्झपरियोसानं सतिया अनुगच्छतो अज्झत्तं विक्खेपगतेन चित्तेन कायोपि चित्तम्पि सारद्धा च होन्ति इञ्जिता च फन्दिता च पस्सासादिमज्झपरियोसानं सतिया अनुगच्छतो बहिद्धा विक्खेपगतेन चित्तेन कायोपि चित्तम्पि सारद्धा च होन्ति इञ्जिता च फन्दिता चा’’ति इमाय पाळिया समेतीति गहेतब्बं. अद्धानवसेनाति कालद्धानवसेन. अयञ्हि अद्धान-सद्दो कालस्स देसस्स च वाचको. तत्थ यथा हीतिआदिना देसद्धानं उपमावसेन दस्सितं. इदानि तब्बिसिट्ठकालद्धानवसेन अस्सासपस्सासानं दीघरस्सतं उपमेय्यवसेन विभावेतुं एवन्तिआदि वुत्तं. चुण्णविचुण्णा अनेककलापभावेन. एत्थ च हत्थिआदिसरीरे सुनखादिसरीरे च अस्सासपस्सासानं देसद्धानविसिट्ठकालद्धानवसेनेव दीघरस्सता वुत्ताति वेदितब्बा अत्तभावसङ्खातं दीघं अद्धानं सणिकं पूरेत्वातिआदिवचनतो. तेसन्ति सत्तानं. तेति अस्सासपस्सासा. इत्तरमद्धानन्ति अप्पकं कालं. नवहाकारेहीति भावनमनुयुञ्जन्तस्स पुब्बेनापरं अलद्धविसेसस्स केवलं अद्धानवसेन आदितो वुत्ता तयो आकारा, ते च कस्सचि अस्सासोव, कस्सचि पस्सासोव, कस्सचि तदुभयम्पि उपट्ठातीति तिण्णं पुग्गलानं वसेन वुत्ता, तथा छन्दवसेन तयो, तथा पामोज्जवसेनाति इमेहि नवहि आकारेहि. एकेनाकारेनाति दीघं अस्सासादीसु एकेनाकारेन.

अद्धानसङ्खातेति दीघे ओकासद्धानसङ्खाते अत्तभावे कालद्धानेपि वा, एवं उपरि इत्तरसङ्खातेति एत्थापि. छन्दो उप्पज्जतीति भावनाय पुब्बेनापरं विसेसं आवहन्तिया लद्धस्सादत्ता तत्थ सातिसयो कत्तुकामतालक्खणो कुसलच्छन्दो उप्पज्जति. छन्दवसेनाति तथापवत्तछन्दस्स वसेन. पामोज्जं उप्पज्जतीति अस्सासपस्सासानं सुखुमतरभावे आरम्मणस्स सन्ततरताय, कम्मट्ठानस्स च वीथिपटिपन्नताय भावनाचित्तसहगतो पमोदो खुद्दकादिभेदा तरुणा पीति उप्पज्जति. चित्तं विवत्ततीति पटिभागनिमित्ते उप्पन्ने ¶ पकतिअस्सासपस्सासतो ¶ चित्तं निवत्तति. उपेक्खा सण्ठातीति तस्मिं पटिभागनिमित्ते उपचारप्पनाभेदे समाधिम्हि उप्पन्ने पुन झाननिब्बत्तनत्थं ब्यापाराभावतो अज्झुपेक्खनं होति, सा पनायं उपेक्खा तत्रमज्झत्तुपेक्खाति वेदितब्बा. अनुपस्सनाञाणन्ति समथवसेन निमित्तस्स अनुपस्सना, विपस्सनावसेन अस्सासपस्सासमुखेन तन्निस्सयनामरूपस्स अनुपस्सना च ञाणं. कायो उपट्ठानन्ति अस्सासपस्साससङ्खातो कायो उपगन्त्वा तिट्ठति एत्थ सतीति उपट्ठानं, नो सति, सति पन सरसतो उपतिट्ठनट्ठेन सरणट्ठेन च उपट्ठानञ्चेव सति च. तेन वुच्चतीतिआदीसु या अयं यथावुत्तअस्सासपस्सासकाये, तन्निस्सयभूते करजकाये च कायस्सेव अनुपस्सना निच्चादिभावं वा इत्थिपुरिससत्तजीवादिभावं वा अननुपस्सित्वा अस्सासपस्सासकायमत्तस्सेव अनिच्चादिभावस्स च अनुपस्सना, ताय कायानुपस्सनाय सतिसङ्खातस्स पट्ठानस्स भावना वड्ढना काये कायानुपस्सना सतिपट्ठानभावनाति अयं सङ्खेपत्थो.

इत्तरवसेनाति परित्तकालवसेन. तादिसोति दीघो रस्सो च. वण्णाति दीघादिआकारा. नासिकग्गेव भिक्खुनोति नासिकग्गे वा, वा-सद्देन उत्तरोट्ठे वाति अत्थो. तस्माति यस्मा ‘‘आदिमज्झपरियोसानवसेन सब्बं अस्सासपस्सासकायं विदितं पाकटं करिस्सामी’’ति पुब्बे पवत्तआभोगवसेन पच्छा तथा समुप्पन्नेन ञाणसम्पयुत्तचित्तेन तं अस्सासपस्सासकायं एवं विदितं पाकटं करोन्तो अस्ससति चेव पस्ससति च, तस्मा एवंभूतो सब्बकायपटिसंवेदी अस्ससिस्सामि पस्ससिस्सामीति सिक्खति नाम, न पन ‘‘अनागते एवं करिस्सामी’’ति चिन्तनमत्तेन सो एवं वुच्चतीति अधिप्पायो. तथाभूतस्साति आदिमज्झपरियोसानं विदितं करोन्तस्स. संवरोति सति वीरियम्पि वा. न अञ्ञं किञ्चीति सब्बकायं विदितं करिस्सामीतिआदिकं पुब्बाभोगं सन्धाय वदति. ञाणुप्पादनादीसूति आदि-सद्देन कायसङ्खारपस्सम्भनपीतिपटिसंवेदनादिं सङ्गण्हाति. कायसङ्खारन्ति अस्सासपस्सासं. सो हि चित्तसमुट्ठानोपि समानो करजकायपटिबद्धवुत्तिताय तेन सङ्खरीयतीति कायसङ्खारोति वुच्चति. अपरिग्गहितकालेति कम्मट्ठानस्स अनारद्धकाले, तदारम्भत्थाय कायचित्तानम्पि अपरिग्गहितकालेति अत्थो. निसीदति पल्लङ्कं ¶ आभुजित्वा उजुं कायं पणिधायाति हि इमिना कायपरिग्गहो, परिमुखं सतिं उपट्ठपेत्वाति इमिना चित्तपरिग्गहो वुत्तो. अधिमत्तन्ति बलवं ओळारिकं, लिङ्गविपल्लासेन वुत्तं. कायसङ्खारो हि अधिप्पेतो. अधिमत्तं हुत्वा पवत्ततीति किरियाविसेसनं वा एतं. सब्बेसंयेवाति उभयेसम्पि.

महाभूतपरिग्गहे सुखुमोति चतुधातुमुखेन विपस्सनाभिनिवेसं सन्धाय वुत्तं. लक्खणारम्मणिकविपस्सनायाति ¶ कलापसम्मसनमाह. निब्बिदानुपस्सनतो पट्ठाय बलवविपस्सना, ततो ओरं दुब्बलविपस्सना. पुब्बे वुत्तनयेनाति अपरिग्गहितकालेतिआदिना समथनये वुत्तनयेन.

चोदनासोधनाहीति अनुयोगपरिहारेहि. कथन्तिआदि पटिसम्भिदापाळि, तत्थ कथं सिक्खतीति सम्बन्धो. इति किरातिआदि चोदकवचनं. इति किराति एवञ्चेति अत्थो. अस्सासपस्सासो सब्बथा अभावं उपनेति चेति चोदकस्स अधिप्पायो. वातूपलद्धियाति अस्सासपस्सासवातस्स अभावेन तब्बिसयाय उपलद्धिया भावनाचित्तस्स उप्पादो वड्ढि च न होतीति अत्थो. न च नन्ति एत्थ नन्ति निपातमत्तं. पुन इति किरातिआदि यथावुत्ताय चोदनाय विस्सज्जना, तत्थ इति किर सिक्खतीति मया वुत्ताकारेन यदि सिक्खतीति अत्थो. पभावना होतीति यदिपि ओळारिका कायसङ्खारा पटिप्पस्सम्भन्ति, सुखुमा पन अत्थेवाति भावनायपि वड्ढि होतेवाति अधिप्पायो. कंसेति कंसभाजने. निमित्तन्ति निमित्तस्स, तेसं सद्दानं पवत्तिआकारस्साति अत्थो. सुखुमका सद्दाति अनुरवे आह. सुखुमसद्दनिमित्तारम्मणतापीति सुखुमो सद्दोव निमित्तं तदारम्मणतायपि.

आभिसमाचारिकसीलन्ति एत्थ अभिसमाचारोति उत्तमसमाचारो, तदेव आभिसमाचारिकं सीलं, खन्धकवत्तपरियापन्नस्स सीलस्सेतं अधिवचनं. अहं सीलं रक्खामीति उभतोविभङ्गपरियापन्नं सीलं सन्धाय वुत्तं. आवासोति आवासपलिबोधो. कुलन्तिआदीसुपि एसेव नयो. कम्मन्ति नवकम्मं. इद्धीति पोथुज्जनिका इद्धि, सा विपस्सनाय पलिबोधो. सो उपच्छिन्दितब्बोति विसुद्धिमग्गे (विसुद्धि. १.४१) वुत्तेन तस्स ¶ तस्स पलिबोधस्स उपच्छेदप्पकारेन उपच्छिन्दितब्बो. योगानुयोगोति योगस्स भावनाय अनुयुञ्जनं. अट्ठतिंसारम्मणेसूति आलोकाकासकसिणद्वयं वज्जेत्वा पाळियं आगतानं अट्ठन्नं कसिणानं वसेन वुत्तं, चत्तारीसञ्ञेव पन कम्मट्ठानानि. यथावुत्तेनेव नयेनाति योगानुयोगकम्मस्स पदट्ठानत्ताति इममत्थं अतिदिसति. इमिनाव कम्मट्ठानेनाति इमिना आनापानस्सतिकम्मट्ठानेन. महाहत्थिपथं नीहरन्तो वियाति कम्मट्ठानवीथिं महाहत्थिमग्गं कत्वा दस्सेन्तो विय.

वुत्तप्पकारमाचरियन्ति ‘‘इमिनाव कम्मट्ठानेन चतुत्थज्झानं निब्बत्तेत्वा विपस्सनं वड्ढेत्वा अरहत्तं पत्तस्सा’’तिआदिना हेट्ठा वुत्तप्पकारं आचरियं. ‘‘पियो गरु भावनीयो’’तिआदिना (अ. नि. ७.३७; नेत्ति. ११३; मि. प. ६.१.१०) विसुद्धिमग्गे (विसुद्धि. १.४२) वुत्तप्पकारमाचरियन्तिपि ¶ वदन्ति. पञ्चसन्धिकन्ति पञ्चपब्बं, पञ्चभागन्ति अत्थो. कम्मट्ठानस्स उग्गण्हनन्ति कम्मट्ठानगन्थस्स उग्गण्हनं. तदत्थपरिपुच्छा कम्मट्ठानस्स परिपुच्छा, तत्थ संसयपरिपुच्छा वा. कम्मट्ठानस्स उपट्ठानन्ति एवं भावनमनुयुञ्जन्तस्स एवमिध निमित्तं उपतिट्ठतीति उपधारणं. तथा कम्मट्ठानप्पना एवं झानमप्पेतीति. कम्मट्ठानस्स लक्खणन्ति गणनानुबन्धनाफुसनानं वसेन भावनं उस्सुक्कापेत्वा ठपनावसेन मत्थकप्पत्ति इध भावनाति कम्मट्ठानसभावस्स सल्लक्खणं, तेनाह ‘‘कम्मट्ठानसभावूपधारणन्ति वुत्तं होती’’ति.

अट्ठारससेनासनदोसविवज्जितन्ति महत्तं नवत्तं जिण्णत्तं पन्थनिस्सितत्तं सोण्डिपण्णपुप्फफलयुत्तता पत्थनीयता नगरदारुखेत्तसन्निस्सितता विसभागानं पुग्गलानं अत्थिता पट्टनसन्निस्सितता पच्चन्तसन्निस्सितता रज्जसीमसन्निस्सितता असप्पायता कल्याणमित्तानं अलाभोति इमेहि अट्ठारसहि सेनासनदोसेहि विवज्जितं. पञ्चसेनासनङ्गसमन्नागतन्ति –

‘‘इध, भिक्खवे, सेनासनं नातिदूरं होति नाच्चासन्नं गमनागमनसम्पन्नं दिवा अप्पाकिण्णं रत्तिं अप्पसद्दं अप्पनिग्घोसं अप्पडंसमकसवातातपसरीसपसम्फस्सं, तस्मिं खो पन सेनासने विहरन्तस्स अप्पकसिरेन उप्पज्जन्ति चीवरपिण्डपातसेनासनगिलानपच्चयभेसज्जपरिक्खारा, तस्मिं खो पन सेनासने ¶ थेरा भिक्खू विहरन्ति …पे… एवं खो, भिक्खवे, सेनासनं पञ्चङ्गसमन्नागतं होती’’ति (अ. नि. १०.११) –

एवं भगवता वुत्तेहि पञ्चहि सेनासनङ्गेहि समन्नागतं, एत्थ च नातिदूरतादि एकं, दिवा अप्पाकिण्णतादि एकं, अप्पडंसादिता एकं, चीवरादिलाभो एकं, थेरानं भिक्खूनं निवासो एकन्ति एवं पञ्चङ्गानि वेदितब्बानि.

उपच्छिन्नखुद्दकपलिबोधेनाति दीघानं केसादीनं हरणेन पत्तचीवरादीनं पचनतुन्नकरणरजनादिकरणेहि च उपच्छिन्ना खुद्दका पलिबोधा येन, तेन. भत्तसम्मदन्ति भोजननिमित्तं परिस्समं. आचरियतो उग्गहो आचरियुग्गहो, सब्बोपि कम्मट्ठानविधि, न पुब्बे वुत्तउग्गहमत्तं, ततो. एकपदम्पीति एककोट्ठासम्पि.

अनुवहनाति अस्सासपस्सासानं अनुगमनवसेन सतिया निरन्तरं अनुप्पवत्तना. यस्मा पन गणनादिवसेन विय फुसनावसेन विसुं मनसिकारो नत्थि, फुट्ठफुट्ठट्ठाने एव गणनादि कातब्बन्ति ¶ दस्सेतुं इध फुसनागहणन्ति दीपेन्तो ‘‘फुसनाति फुट्ठट्ठान’’न्ति आह. ठपनाति समाधानं, समाधिप्पधाना पन अप्पनाति आह ‘‘ठपनाति अप्पना’’ति. अनिच्चतादीनं लक्खणतो सल्लक्खणा विपस्सना. पवत्ततो निमित्ततो च विनिवट्टनतो विनिवट्टना मग्गो. किलेसपटिप्पस्सद्धिभावतो पारिसुद्धि फलं. तेसन्ति विनिवट्टनापारिसुद्धीनं. खण्डन्ति ‘‘एकं तीणि पञ्चा’’ति एकन्तरिकादिभावेन गणनाय खण्डनं. अथ वा खण्डन्ति अन्तरन्तरा कतिपयकालं अगणेत्वा पुन गणनवसेन अन्तरा ओधिपरिच्छेदो न दस्सेतब्बो. तथा खण्डं दस्सेन्तस्स हि ‘‘कम्मट्ठाननिन्नं पवत्तति नु खो मे चित्तं, नो’’ति वीमंसुप्पत्तिया विक्खेपो होति, तेनाह सिखाप्पत्तं नु खो मेतिआदि, इदञ्च एवं खण्डं दस्सेत्वा चिरतरं गणनाय मनसिकरोन्तस्स वसेन वुत्तं. सो हि तथा लद्धं अविक्खेपमत्तं निस्साय एवं मञ्ञेय्य. यो उपट्ठाति, तं गहेत्वाति इदं अस्सासपस्सासेसु यस्स एकोव पठमं उपट्ठाति, तं सन्धाय वुत्तं, यस्स पन उभोपि उपट्ठहन्ति, तेन उभयम्पि गहेत्वा गणितब्बं. यो उपट्ठातीति इमिनाव द्वीसु नासापुटवातेसु यो पाकटो होति, सो गहेतब्बोति ¶ अयम्पि अत्थो दीपितोति गहेतब्बं. पठमं एकेकस्मिं उपट्ठितेपि उपलक्खेत्वा गणन्तस्सेव कमेन उभोपि पाकटा होन्तीति आह ‘‘अस्सासपस्सासा पाकटा होन्ती’’ति. एवं सीघं सीघं गणेतब्बमेवाति सम्बन्धो. एवं सीघगणनारम्भस्स ओकासं दस्सेतुं इमस्सापि पुरिमनयेन गणयतोतिआदि वुत्तं. तत्थ पुरिमनयेनाति दन्धगणनाय, पाकटा हुत्वाति इमिना दन्धगणनाय आरद्धकाले चित्तस्स अविसदताय सुखुमस्सासादीनं अपाकटतं, पच्छा विसदकाले पाकटतञ्च तेसु च पाकटेसु दन्धगणनं पहाय सीघगणना कातब्बाति दस्सेति. सीघगणनाय निप्परियायतो निरन्तरप्पवत्ति अप्पनावीथियमेव, न कामावचरे भवङ्गन्तरिकत्ताति आह ‘‘निरन्तरप्पवत्तं विया’’ति. पुरिमनयेनेवाति सीघगणनाय. अन्तो पविसन्तं वातं मनसिकरोन्तो अन्तो चित्तं पवेसेति नाम.

एतन्ति एतं अस्सासपस्सासजातं. अनुगमनन्ति फुट्ठट्ठाने मनसिकरणमेव, न अस्सासपस्सासानं अनुवत्तनं, तेनाह – ‘‘तञ्च खो न आदिमज्झपरियोसानानुगमनवसेना’’ति. फुसनाठपनावसेन विसुं मनसिकारो नत्थीति इमिना यथा गणनाय फुसनाय च मनसिकरोति, एवं अनुबन्धनं विना केवलं ठपनाय च फुसनाय च मनसिकारोपि नत्थीति दस्सेन्तेन गणनं पटिसंहरित्वा याव अप्पना उप्पज्जति, ताव अनुबन्धनाय च फुसनाय च मनसिकरोति, अप्पनाय पन उप्पन्नाय अनुबन्धनाय ठपनाय च मनसिकरोति नामाति दीपितं होति, अट्ठकथायं पन अनुबन्धनाय विना ठपनाय मनसिकारो नत्थीति दस्सनत्थं ‘‘अनुबन्धनाय च फुसनाय च ठपनाय च मनसिकरोतीति वुच्चती’’ति एत्तकमेव वुत्तन्ति गहेतब्बं ¶ . या अच्चन्ताय न मिनोति न विनिच्छनति, सा मानस्स समीपेति उपमानं सिद्धसादिसेन साध्यसाधनं यथा गो विय गवयोति. पङ्गुळोति पीठसप्पी. दोलाति पेङ्खोलो. कीळतन्ति कीळन्तानं. उपनिबन्धनत्थम्भमूलेति नासिकग्गं मुखनिमित्तञ्च सन्धाय वुत्तं. आदितो पभुतीति उपमेय्यत्थदस्सनतो पट्ठाय. निमित्तन्ति उपनिबन्धननिमित्तं नासिकग्गं, मुखनिमित्तं वा. अनारम्मणमेकचित्तस्साति अस्सासपस्सासानं एकक्खणे अप्पवत्तनतो एकस्स चित्तस्स तयोपि आरम्मणं न होन्ति, निमित्तेन सह अस्सासो पस्सासो वाति द्वेयेव एकक्खणे आरम्मणं ¶ होन्तीति अत्थो. अजानतो च तयो धम्मेति निमित्तं अस्सासो पस्सासोति इमे तयो धम्मे आरम्मणकरणवसेन अविन्दन्तस्स, च-सद्दो ब्यतिरेको, तेन एवञ्च सति अयं अनिट्ठप्पसङ्गोति ब्यतिरेकं दस्सेति. भावनाति आनापानस्सतिभावना.

कथं इमे…पे… विसेसमधिगच्छतीति इदं परिहारगाथाय वुत्तमेवत्थं ककचोपमाय (म. नि. १.२२२ आदयो) विवरितुं पुच्छाठपनं. तत्थ कथं-सद्दो पच्चेकं योजेतब्बो ‘‘कथमिमे अविदिता…पे… कथं विसेसमधिगच्छती’’ति. पधानन्ति भावनानिप्फादकं वीरियं. पयोगन्ति नीवरणविक्खम्भकं भावनानुयोगं. विसेसन्ति अरहत्तपरियोसानविसेसं. पधानन्ति रुक्खस्स छेदनवीरियं. पयोगन्ति तस्सेव छेदनककिरियं. किञ्चापेत्थ ‘‘विसेसमधिगच्छती’’ति उपमायं न वुत्तं, तथापि अत्थतो योजेतब्बमेव. यथा रुक्खोतिआदि उपमासंसन्दनं. नासिकग्गे वा मुखनिमित्ते वाति दीघनासिको नासिकग्गे, इतरो मुखं निमियति छादियति एतेनाति मुखनिमित्तन्ति लद्धनामे उत्तरोट्ठे.

इदं पधानन्ति येन वीरियारम्भेन कायोपि चित्तम्पि भावनाकम्मस्स अरहं इध पधानन्ति फलेन हेतुं दस्सेति. उपक्किलेसाति नीवरणा. वितक्काति कामवितक्कादिमिच्छावितक्का, नीवरणप्पहानेन वा पठमज्झानाधिगमं दस्सेत्वा वितक्कूपसमापदेसेन दुतियज्झानादीनमधिगममाह. अयं पयोगोति अयं झानाधिगमस्स हेतुभूतो कम्मट्ठानानुयोगसङ्खातो पयोगो. संयोजना पहीयन्तीति दसपि संयोजनानि मग्गपअपाटिया समुच्छेदवसेन पहीयन्ति. ब्यन्ती होन्तीति तथा सत्तपि अनुसया भङ्गमत्तस्सपि अनवसेसतो विगतन्ता होन्ति. अयं विसेसोति इमं समाधिं निस्साय अनुक्कमेन लब्भमानो अयं संयोजनप्पहानादिको इमस्स समाधिस्स विसेसोति अत्थो. एवं इमे तयो धम्मातिआदि निगमनवचनं. परिपुण्णाति सोळसन्नं वत्थूनं पारिपूरिया सब्बसो पुण्णा. अनुपुब्बन्ति अनुक्कमेन. परिचिताति परिचिण्णा. इमं लोकन्ति खन्धादिलोकं पञ्ञापभासेन पभासेति.

इधाति ¶ इमस्मिं ठाने. अस्साति उपमाभूतस्स ककचस्स. आनयने पयोजनन्ति योजेतब्बं. निमित्तन्ति पटिभागनिमित्तं. अवसेसझानङ्गपटिमण्डिताति वितक्कादिअवसेसझानङ्गपटिमण्डिताति वदन्ति. विचारादीहीति ¶ पन वत्तब्बं निप्परियायेन वितक्कस्स अप्पनाभावतो. सो हि ‘‘अप्पना ब्यप्पना’’ति निद्दिट्ठो. एवञ्हि सति अवसेस-सद्दो उपपन्नो होति, वितक्कसम्पयोगतो वा झानङ्गेसु पधानभूतो समाधि अप्पनाति कत्वा ‘‘अवसेसझानङ्गपटिमण्डिता अप्पनासङ्खाता ठपना च सम्पज्जती’’ति वुत्तं. कस्सचि पन गणनावसेनेव मनसिकारकालतो पभुतीति एत्थ ‘‘अनुक्कमतो…पे… पत्तं विय होती’’ति उपरि वक्खमानो गन्थो पुराणपोत्थकेसु दिस्सति, तस्मा अयं पाठो एत्थापि लिखितब्बो, लेखकानं पन दोसेन गळितोति वेदितब्बो.

ओळारिके अस्सासपस्सासे निरुद्धेतिआदि हेट्ठा वुत्तनयम्पि विचेतब्बाकारप्पत्तस्स कायसङ्खारस्स विचयनविधिं दस्सेतुं आनीतं. देसतोति पुब्बे फुसनवसेन गहितट्ठानतो. निमित्तं पट्ठपेतब्बन्ति पुब्बे गहिताकारनिमित्तग्गाहिका सञ्ञा फुसनट्ठाने पट्ठपेतब्बा. इममेव हि अत्थवसन्ति इमं अनुपट्ठहन्तस्स आरम्मणस्स उपट्ठानविधिसङ्खातं कारणं पटिच्च. इतोति आनापानकम्मट्ठानतो. गरुकता च भावनादुक्करतायाति आह ‘‘गरुकभावन’’न्ति. चरित्वाति गोचरं गहेत्वा. निमित्तन्ति उग्गहनिमित्तं, पटिभागनिमित्तं वा. उभयम्पि हि इध एकज्झं वुत्तं. तथा हि तूलपिचुआदिउपमत्तयं उग्गहे युज्जति, सेसं उभयत्थ.

तारकरूपं वियाति तारकाय सरूपं विय. सञ्ञानानतायाति निमित्तुपट्ठानतो पुब्बे पवत्तसञ्ञानं नानताय. सञ्ञजन्ति भावनासञ्ञाय परिकप्पितं, न उप्पादितं अविज्जमानत्ता, तेनाह ‘‘नानतो उपट्ठाती’’ति. एवं होतीति भावनमनुयुत्तस्स एवं उपट्ठाति. एवन्ति एवं सति, यथावुत्तनयेन निमित्ते एव चित्तस्स ठपने सतीति अत्थो. इतो पभुतीति इतो पटिभागनिमित्तुप्पत्तितो पट्ठाय. निमित्तेति पटिभागनिमित्ते. ठपयन्ति ठपनावसेन चित्तं ठपन्तो. नानाकारन्ति ‘‘चत्तारो वण्णा’’ति एवं वुत्तं नानाकारं. विभावयन्ति विभावेन्तो अन्तरधापेन्तो. निमित्तुप्पत्तितो पट्ठाय हि ते आकारा अमनसिकरोतो अन्तरहिता विय होन्ति. अस्सासपस्सासेति अस्सासे पस्सासे च यो नानाकारो, तं विभावयं अस्सासपस्साससम्भूते वा निमित्ते चित्तं ठपयं सकं चित्तं निबन्धति नामाति ¶ योजना. केचि पन विभावयन्ति एतस्स विभावेन्तो विदितं पाकटं करोन्तोति अत्थं वदन्ति, तं पुब्बभागवसेन युज्जेय्य. अयञ्हेत्थ अत्थो – अस्सासपस्सासे नानाकारं ¶ विभावेन्तो पजानन्तो तत्थ यं लद्धं निमित्तं, तस्मिं चित्तं ठपेन्तो अनुक्कमेन सकं चित्तं निबन्धति अप्पेतीति.

किलेसाति अवसेसकिलेसा. सन्निसिन्नायेवाति अलद्धनीवरणसहाया ओलीनायेव. उपचारभूमियन्ति उपचारावत्थायं. लक्खणतोति विक्खम्भनादिसभावतो वा अनिच्चादिसभावतो वा. गोचरोति भिक्खाचारगामो. यत्थ दुल्लभा सप्पायभिक्खा, सो असप्पायो, इतरो सप्पायो. भस्सन्ति दसकथावत्थुनिस्सितं भस्सं, तं सप्पायं, इतरमसप्पायं. सेसेसु आवासादीसु यत्थ यत्थ असमाहितं चित्तं समाधियति, तं तं सप्पायं, इतरमसप्पायन्ति गहेतब्बं. यस्स पन एवं सत्तविधं असप्पायं वज्जेत्वा सप्पायमेव सेवन्तस्सपि अप्पना न होति, तेन सम्पादेतब्बं दसविधं अप्पनाकोसल्लं दस्सेन्तो वत्थुविसदकिरियातिआदिमाह. तत्थ वत्थुविसदकिरिया नाम केसनखच्छेदनादीहि अज्झत्तिकस्स सरीरवत्थुस्स, चीवरसेनासनादिधोवनपरिकम्मादीहि बाहिरवत्थुस्स च विसदभावकरणं. एवञ्हि ञाणम्पि विसदकिच्चनिप्फत्तिकरं होति. इन्द्रियसमत्तपटिपादनता नाम सद्धादीनं इन्द्रियानं समभावकरणं. निमित्तकुसलता नाम भावनाय लद्धनिमित्तस्स रक्खणकोसल्लं. यस्मिं समये चित्तं निग्गहेतब्बन्तिआदीसु यस्मिं समये चित्तं अच्चारद्धतादीहि कारणेहि उद्धतताय निग्गहेतब्बं, तदा धम्मविचयसम्बोज्झङ्गादयो तयो अभावेत्वा पस्सद्धादीनं तिण्णं भावनेन चित्तस्स निग्गण्हना होति. यदास्स चित्तं अतिसिथिलवीरियतादीहि लीनताय पग्गहेतब्बं, तदा पस्सद्धिसम्बोज्झङ्गादयो तयो अभावेत्वा धम्मविचयादीनं तिण्णं भावनेन चित्तस्स पग्गण्हनं होति. यदास्स पञ्ञापयोगमन्दतादीहि निरस्सादं चित्तं होति, तदा तस्स चित्तस्स अट्ठसंवेगवत्थुपच्चवेक्खणादिना (अ. नि. अट्ठ. १.१.४१८) सम्पहंसनसङ्खाता संवेजना होति. यदा पनस्स एवं पटिपज्जनतो अलीनं अनुद्धतं अनिरस्सादं आरम्मणे समप्पवत्तं समथवीथिपटिपन्नञ्च चित्तं होति, तदा तस्स पग्गहनिग्गहसम्पहंसनेसु अब्यापारतासमापज्जनेन अज्झुपेक्खना होति.

तदधिमुत्तता ¶ नाम समाधिअधिमुत्तता, समाधिनिन्नपोणपब्भारताति अत्थो. एत्थाति एतिस्सं कायानुपस्सनायं.

पारिसुद्धिं पत्तुकामोति फलं अधिगन्तुकामो समापज्जितुकामो च. तत्थ सल्लक्खणाविवट्टनावसेन पठमं मग्गानन्तरफलं अधिगन्तुकामो. ततो परं सल्लक्खणवसेन फलसमापत्तिं समापज्जितुकामोपीति एवमत्थो गहेतब्बो. आवज्जनसमापज्जन…पे… वसिप्पत्तन्ति ¶ एत्थ पटिलद्धझानतो वुट्ठाय वितक्कादीसु झानङ्गेसु एकेकं आवज्जयतो भवङ्गं उपच्छिन्दित्वा उप्पन्नावज्जनानन्तरं वितक्कादीसु यथावज्जितझानङ्गारम्मणानि कामावचरजवनानि भवङ्गन्तरितानि यदा निरन्तरं पवत्तन्ति, अथस्स आवज्जनवसी सिद्धा होति. तं पन झानं समापज्जितुकामतानन्तरं सीघं समापज्जनसमत्थता समापज्जनवसी नाम. अच्छरामत्तं वा दसच्छरामत्तं वा खणं झानं ठपेतुं समत्थता अधिट्ठानवसी नाम. तथेव लहुं खणं झानसमङ्गी हुत्वा झानतो भवङ्गुप्पत्तिवसेन वुट्ठातुं समत्थता वुट्ठानवसी नाम. ‘‘एत्तकमेव खणं समापज्जिस्सामी’’ति, ‘‘एत्तकमेव खणं झानसमङ्गी हुत्वा झानतो वुट्ठहिस्सामी’’ति च पवत्तपुब्बपरिकम्मभेदेनेत्थ अधिट्ठानवुट्ठानवसियो भिन्ना, न सरूपभेदेन, या ‘‘समापत्तिकुसलता, वुट्ठानकुसलता’’ति वुच्चन्ति. पच्चवेक्खणवसी पन आवज्जनवसिया एव वुत्ता. पच्चवेक्खणवीथियञ्हि सीघं आवज्जनुप्पत्तिया आवज्जनवसी तदनन्तरानं जवनानं समुप्पत्तिया पच्चवेक्खणवसीति आवज्जनवसीसिद्धियाव पच्चवेक्खणवसी सिद्धा एव होतीति वेदितब्बा. झानङ्गानि परिग्गहेत्वाति झानचित्तसम्पयुत्तानि झानङ्गानि लक्खणादिवसेन परिग्गहेत्वा. तेसञ्च निस्सयन्ति तेसं वत्थुनिस्सयानं भूतानं निस्सयं. इदञ्च करजकायस्स वत्थुदसकस्स भूतनिस्सयत्ता सुत्तन्तनयेन वुत्तं, न पट्ठाननयेन. न हि कलापन्तरगतानि भूतानि कलापन्तरगतानं भूतानं निस्सयपच्चया होन्ति, सुत्तन्तनयेन पन उपनिस्सयपच्चयोति वेदितब्बानि. पट्ठाने हि असङ्गहिता सब्बे पच्चया सुत्तन्तिकनयेन उपनिस्सयपच्चये सङ्गय्हन्तीति वेदितब्बं. तंनिस्सितरूपानीति उपादारूपानि. यथापरिग्गहितरूपवत्थुद्वारारम्मणं वाति एत्थ यथापरिग्गहितकेसादिरूपारम्मणं ततो पुब्बे वुत्तनयवत्थारम्मणञ्च तन्निस्सयकरजकायपअग्गहमुखेन ¶ उपट्ठितचक्खादिद्वारञ्च ससम्पयुत्तधम्मविञ्ञाणं वाति योजेतब्बं. कम्मारगग्गरीति कम्मारानं अग्गिधमनभस्ता. तज्जन्ति तदनुरूपं. तस्साति नामरूपस्स. तं दिस्वाति अविज्जातण्हादिपच्चयं दिस्वा. कङ्खं वितरतीति अहोसिं नु खो अहं अतीतमद्धानन्तिआदिनयप्पवत्तं (म. नि. १.१८; सं. नि. २.२०) सोळसवत्थुकं विचिकिच्छं अतिक्कमति. कलापसम्मसनवसेनाति यं किञ्चि रूपं अतीतानागतपच्चुप्पन्नन्तिआदिना (म. नि. १.३६१; ३.८६, ८९; अ. नि. ४.१८१) पञ्चसु खन्धेसु अतीतादिकोट्ठासं एकेककलापतो गहेत्वा अनिच्चादिवसेन सम्मसनं कलापसम्मसनं, तस्स वसेन. पुब्बभागेति पटिपदाञाणदस्सनविसुद्धिपरियापन्नाय उदयब्बयानुपस्सनाय पुब्बभागे. ओभासादयोति ओभासो ञाणं पीति पस्सद्धि सुखं अधिमोक्खो पग्गहो उपेक्खा उपट्ठानं निकन्ति च. तत्थ अधिमोक्खोति सद्धा. उपट्ठानन्ति सति. उपेक्खाति तत्रमज्झत्तता. एत्थ च ओभासादयो नव निकन्तिसङ्खाततण्हुपक्किलेसवत्थुताय उपक्किलेसा वुत्ता ¶ , निकन्ति पन उपक्किलेसताय तब्बत्थुताय च. निब्बिन्दन्तो आदीनवानुपस्सनापुब्बङ्गमाय निब्बिदानुपस्सनाय निब्बिन्दन्तो. मुञ्चितुकम्यतापटिसङ्खानुपस्सनासङ्खारुपेक्खानुलोमञाणानं चिण्णपरियन्ते उप्पन्नगोत्रभुञाणानन्तरं उप्पन्नेन मग्गञाणेन सब्बसङ्खारेसु विरज्जन्तो विमुच्चन्तो. फलक्खणे हि विमुत्तो नाम वुच्चति, मग्गक्खणे विमुच्चन्तोति. एकूनवीसतिभेदस्साति चतुन्नं मग्गवीथीनं अनन्तरं पच्चेकं उप्पज्जन्तस्स मग्गफलनिब्बानपहीनावसिट्ठकिलेसानं पञ्चन्नं पच्चवेक्खितब्बानं वसेन एकूनवीसतिभेदस्स. अरहतो हि अवसिट्ठकिलेसाभावेन एकूनवीसतिता. अस्साति आनापानकम्मट्ठानिकस्स.

सप्पीतिके द्वे झानेति पीतिसहगतानि चतुक्कनये द्वे पठमदुतियज्झानानि. तस्साति तेन योगिना. समापत्तिक्खणेति समापन्नक्खणे. आरम्मणतोति पटिभागारम्मणग्गहणमुखेन पीति पटिसंविदिता होति, आरम्मणस्स पटिसंविदितत्ता. आरम्मणे हि विदिते तब्बिसया चित्तचेतसिका धम्मा सयं अत्तनो पटिसंविदिता नाम होति सलक्खणतो सामञ्ञलक्खणतो च पच्छा गहणे सन्देहाभावतो. विपस्सनाक्खणेति विपस्सनापञ्ञाय विसयतो दस्सनक्खणे. एवं पीतिं अनिच्चादिवसेन गहणमेव असम्मोहतो पीतिपटिसंवेदनं नाम.

दीघं ¶ अस्सासवसेनाति दीघस्स अस्सासस्स आरम्मणभूतस्स वसेन, पजानतो सा पीति पटिसंविदिता होतीति सम्बन्धो. चित्तस्स एकग्गतं अविक्खेपं पजानतोति झानपरियापन्नं अविक्खेपापन्नं नाम चित्तस्सेकग्गतं तंसम्पयुत्ताय पञ्ञाय पजानतो. यथेव हि आरम्मणमुखेन पीति पटिसंविदिता होति, एवं तंसम्पयुत्तधम्मापि पटिसंविदिता एव होन्तीति. सति उपट्ठिता होतीति दीघं अस्सासवसेन झानसम्पयुत्ता सति तस्स आरम्मणे उपट्ठिता तदारम्मणज्झानेपि उपट्ठिता नाम होतीति. दीघं पस्सासवसेनातिआदीसुपि इमिनाव नयेन अत्थो वेदितब्बो. एवं दस्सितं पीतिपटिसंवेदनं आरम्मणतो असम्मोहतो च विभागतो दस्सेतुं आवज्जतोतिआदि वुत्तं. तत्थ आवज्जतोति झानं आवज्जन्तस्स. सा पीतीति सा झानपरियापन्ना पीति. जानतोति समापन्नक्खणे आरम्मणमुखेन जानतो, तस्स सा पीति पटिसंविदिता होतीति सम्बन्धो. पस्सतोति दस्सनभूतेन ञाणेन झानतो वुट्ठाय पस्सन्तस्स. पच्चवेक्खतोति झानं पच्चवेक्खन्तस्स. चित्तं अधिट्ठहतोति ‘‘एत्तकं वेलं झानसमङ्गी भविस्सामी’’ति झानचित्तं अधिट्ठहन्तस्स. एवं पञ्चन्नं वसिभावानं वसेन झानस्स पजाननमुखेन आरम्मणतो पीतिया पटिसंवेदना दस्सिता. अधिमुच्चतोति सद्दहन्तस्स, समथविपस्सनावसेनाति अधिप्पायो. वीरियं पग्गण्हतोतिआदीसुपि एसेव नयो. अभिञ्ञेय्यन्ति विसिट्ठाय पञ्ञाय जानितब्बं चतुसच्चं विपस्सनापञ्ञापुब्बङ्गमाय मग्गपञ्ञाय ¶ अभिजानतोतिआदि योजना. एवं परिञ्ञेय्यन्तिआदीसुपि परिजानतोतिआदिना योजना वेदितब्बा. तत्थ परिञ्ञेय्यन्ति दुक्खसच्चं. अवसेसपदानीति सुखपटिसंवेदी चित्तसङ्खारपटिसंवेदीति पदानि.

वेदनादयोति आदि-सद्देन सञ्ञा गहिता, तेनाह ‘‘द्वे खन्धा’’ति. विपस्सनाभूमिदस्सनत्थन्ति कायिकसुखादिसीसेन पकिण्णकसङ्खारदस्सनतो वुत्तं समथे कायिकसुखाभावतो. सोति पस्सम्भनपरियायेन वुत्तो निरोधो. वुत्तनयेनाति इमस्स हि भिक्खुनो पुब्बे अपरिग्गहितकालेतिआदिना (पारा. अट्ठ. २.१६५) कायसङ्खारे वुत्तनयेन. पीतिसीसेन वेदना वुत्ताति पीतिअपदेसेन वेदना वुत्ता, सुखग्गहणतो ¶ वेदनानुपस्सनापसङ्गतोति अधिप्पायो. द्वीसु चित्तसङ्खारपदेसूति ‘‘चित्तसङ्खारपटिसंवेदी पस्सम्भयं चित्तसङ्खार’’न्ति इमेसु द्वीसु कोट्ठासेसु. सञ्ञासम्पयुत्ता वेदनाति वेदनानुपस्सनाभावतो वुत्तं. चित्तपटिसंवेदिता वेदितब्बाति आरम्मणतो असम्मोहतोतिआदिना वुत्तनयं सन्धाय वुत्तं. चित्तन्ति झानसम्पयुत्तं विपस्सनासम्पयुत्तञ्च चित्तं. आमोदेतीति सम्पयुत्ताय पीतिया झानविसयाय मोदेति. विपस्सनाक्खणेतिआदिना वुत्तभङ्गानुपस्सनक्खणे.

आनापानस्सतिसमाधिकथावण्णनानयो निट्ठितो.

१६७. यदिपि अरिया नेव अत्तनाव अत्तानं अञ्ञमञ्ञं वा जीविता वोरोपेन्ति, नापि परेहि समादपेन्ति, तथापि यथावुत्तेहि तीहि पकारेहि मतानं पुथुज्जनानं अन्तरे मिगलण्डिकेन मारितानं अरियपुग्गलानम्पि अत्थिताय ‘‘अरियपुग्गलमिस्सकत्ता’’ति वुत्तं. अथ वा पुथुज्जनकाले अत्तनाव अत्तानं घातेत्वा मरणसमये विपस्सनं वड्ढेत्वा अरियमग्गं पटिलभित्वा मतानम्पि सब्भावतो एवं वुत्तन्ति गहेतब्बं.

पदभाजनीयवण्णना

१७२. ब्यञ्जने आदरं अकत्वाति जानित्वा सञ्जानित्वातिआदिना ब्यञ्जनानुरूपं अवुत्तत्ता वुत्तं. पाणोति जानन्तोति इदं मनुस्सोति अजानित्वापि केवलं सत्तसञ्ञाय एव पाराजिकभावदस्सनत्थं वुत्तं. वधकचेतनावसेन चेतेत्वाति ‘‘इमं मारेमी’’ति वधकचेतनाय चिन्तेत्वा. पकप्पेत्वाति ‘‘वधामि न’’न्ति एवं चित्तेन परिच्छिन्दित्वा. अभिवितरित्वाति सन्निट्ठानं कत्वा, तेनाह ‘‘निरासङ्कचित्तं पेसेत्वा’’ति. सिखाप्पत्तो अत्थोति सञ्चिच्चाति पुब्बकालकिरियावसेन ¶ वुत्तस्सपि वीतिक्कमभूतस्स अपरकालकिरियायुत्तदस्सनेन कोटिप्पत्तो अत्थो. जातिउण्णा नाम तदहुजातएळकस्स लोमं. एवं वण्णप्पटिभागन्ति एवं वण्णसण्ठानं. ततो वा उद्धन्ति दुतियसत्ताहादीसु अब्बुदादिभावप्पत्तं सन्धाय वुत्तं. परिहीनवेगस्स सन्तानस्स पच्चयो होतीति ¶ सहकारीपच्चयो होति, न जनको. कम्ममेव हि खणे खणे उप्पज्जमानानं कम्मजरूपानं जनकपच्चयो, तञ्च पवत्तियं पुब्बे उप्पज्जित्वा ठितं अनुपहतं चतुसन्ततिरूपं सहकारीपच्चयं लभित्वाव कातुं सक्कोति, न अञ्ञथा, येन केनचि विरोधिपच्चयेन निरुद्धचक्खादिप्पसादानं पुग्गलानं विज्जमानम्पि कम्मं चक्खादिकं जनेतुं न सक्कोतीति सिद्धमेव होति.

अतिपातेन्तोति अतिपातेन्तो विनासेन्तो. वुत्तपकारमेवाति जीवितिन्द्रियातिपातनविधानं वुत्तप्पकारमेव. सरसेनेव पतनसभावस्स सणिकं पतितुं अदत्वा अतीव पातनं सीघपातनं अतिपातो, पाणस्स अतिपातो पाणातिपातो. आथब्बणिकाति अथब्बणवेदिनो. अथब्बणन्ति अथब्बणवेदविहितं. मन्तं पयोजेन्तीति अलोणभोजनदब्बसयनसुसानगमनादीहि पयोगेहि मन्तं परिवत्तेन्ति, तेन यथिच्छितपाणवधादिफलं उपपज्जति, तस्मा तं कायवचीकम्मेसु पविट्ठं. ईतिन्ति पीळं. उपद्दवन्ति ततो अधिकतरं पीळं. पज्जरकन्ति विसमज्जरं. सूचिकन्ति सूचीहि विय विज्झमानं सूलं. विसूचिकन्ति ससूलं आमातिसारं. पक्खन्दियन्ति रत्तातिसारं. विज्जं परिवत्तेत्वाति गन्धारविज्जादिकं अत्तनो विज्जं कतूपचारं मन्तपठनक्कमेन परिजप्पित्वा. तेहीति तेहि वत्थूहि. पयोजनन्ति पवत्तनं. अहो वतायन्ति अयं तं कुच्छिगतं. गब्भन्ति इदं कुच्छिगतं गब्भं. कुलुम्बस्साति गब्भस्स, कुलस्सेव वा, कुटुम्बस्साति वुत्तं होति. भावनामयिद्धियाति अधिट्ठानिद्धिं सन्धाय वुत्तं. तं तेसं इच्छामत्तन्ति सुत्तत्थतो न समेतीति अधिप्पायो. अथब्बणिद्धिवसेनेव हि सुत्ते ‘‘इद्धिमा चेतोवसिप्पत्तो’’ति वुत्तं, न भावनामयिद्धिवसेनाति दट्ठब्बं.

इतरथाति परियेसेय्याति पदस्स गवेसनमत्तमेव यथारुतवसेन अत्थो सिया, तदा परियिट्ठमत्तेन परियेसित्वा सत्थादीनं लद्धमत्तेनाति अत्थो. ससन्ति हिंसन्ति एतेनाति सत्थन्ति वधोपकरणस्स पासाणरज्जुआदिनो सब्बस्सापि नामन्ति आह लगुळातिआदि. लगुळन्ति मुग्गरस्सेतं अधिवचनं. सत्थसङ्गहोति मातिकायं सत्थहारकन्ति एत्थ वुत्तसत्थसङ्गहो. परतो वुत्तनयत्ताति परतो ¶ निगमनवसेन वुत्तस्स दुतियपदस्स पदभाजने वुत्तनयत्ता. चित्तसद्दस्स अत्थदीपनत्थं वुत्तोति चित्त-सद्दस्स विचित्तादिअनेकत्थविसयत्ता इतरेहि निवत्तेत्वा विञ्ञाणत्थं नियमेतुं वुत्तो.

१७४. कम्मुना ¶ बज्झतीति पाणातिपातकम्मुना बज्झति, तं कम्ममस्स सिद्धन्ति अत्थो. उभयथापीति उद्दिसकानुद्दिसकवसेन. पच्छा वा तेन रोगेनाति एतेन अनागतम्पि जीवितिन्द्रियं आरब्भ पाणातिपातस्स पवत्तिं दस्सेति. एवञ्च ‘‘यदा सक्कोति, तदा तं जीविता वोरोपेही’’ति आणत्तिया चिरेन समिद्धियम्पि आणत्तिक्खणेयेव पाणातिपातो. ओपातखणनादिथावरपयोगेसु पयोगकरणतो पच्छा गहितपटिसन्धिकस्सापि सत्तस्स मरणे पाणातिपातो च अनागतारम्मणो उपपन्नो होति. यं पन सिक्खापदविभङ्गे ‘‘पञ्च सिक्खापदानि पच्चुप्पन्नारम्मणायेवा’’ति वुत्तं, तं पाणातिपातादितो विरतिं सन्धाय वुत्तं, न पाणातिपातादिन्ति गहेतब्बं. अञ्ञचित्तेनाति अमारेतुकामताचित्तेन. दुतियप्पहारेन मरतीति पठमप्पहारं विना दुतियेनेव मरतीति अत्थो. पठमप्पहारेनेवाति पठमप्पहारसमुट्ठापकचेतनाक्खणेयेवाति अत्थो. किञ्चापि पठमप्पहारो सयमेव न सक्कोति मारेतुं, दुतियं पन लभित्वा सक्कोन्तो जीवितविनासहेतु होति, तस्मा पठमप्पहारं विना मरणस्स असिद्धत्ता ‘‘पयोगो तेन च मरण’’न्ति इमिना संसन्दनतो पठमप्पहारेनेव कम्मबद्धो युत्तो, न दुतियेन तस्स अञ्ञचित्तेन दिन्नत्ता. यथा चेत्थ, एवं अञ्ञेन पुग्गलेन दुतियप्पहारदानादीसु विय. यदि पन दुतियप्पहारदायकस्सापि पुग्गलस्स वधकचेतना अत्थि, तस्सापि अत्तनो पयोगेनापि मतत्ता पयोगक्खणे पाणातिपातोति वेदितब्बं.

कम्मापत्तिब्यत्तिभावत्थन्ति आनन्तरियादिकम्मविभागस्स पाराजिकादिआपत्तिविभागस्स च पाकटभावत्थं. ‘‘एळकं मारेमी’’ति विपरीतग्गहणेपि ‘‘इम’’न्ति यथानिपन्नस्सेव परमत्थतो गहितत्ता यथावत्थुकं कम्मबद्धो होतियेवाति आह इमं वत्थुन्तिआदि. घातको च होतीति पाणातिपातकम्मेन बद्धोति अत्थो. मातादिगुणमहन्ते आरब्भ पवत्तवधकचेतनाय ¶ महासावज्जताय वुत्तं ‘‘इध पन चेतना दारुणा होती’’ति.

लोहितकन्ति लोहितमक्खितं. कम्मं करोन्तेति युद्धकम्मं करोन्ते. यथाधिप्पायं गतेति योधं विज्झित्वा पितरि विद्धे, योधं पन अविज्झित्वा केवलं पितरि विद्धेपि विसङ्केतो नत्थियेव पितरिपि वधकचित्तस्स अत्थिताय, केवलं योधे विद्धेपि एसेव नयो. आनन्तरियं पन नत्थीति पितुविसयं पाणातिपातकम्मं नत्थीति अत्थो.

एवं विज्झाति एवं पादेहि भूमियं ठत्वा एवं धनुं गहेत्वा आकड्ढित्वातिआदिना विज्झनप्पकारसिक्खापनमुखेन आणापेतीति अत्थो. एवं पहराति दळ्हं असिं गहेत्वा एवं पहर. एवं घातेहीति एवं कम्मकारणं कत्वा मारेहि. तत्तका उभिन्नं पाणातिपाताति अनुद्दिसित्वा ¶ येसं केसञ्चि मारणत्थाय उभोहि पयोगस्स कतत्ता वुत्तं. सचे हि आणापको ‘‘एवं विद्धे असुको एवं मरती’’ति सञ्ञाय ‘‘एवं विज्झा’’ति आणापेति, नियमितस्सेव मरणे आणापकस्स कम्मबद्धोति वदन्ति. सचे आणत्तो ‘‘असुक’’न्ति नियमेत्वा उद्दिस्स सरं खिपति, आणापको अनियमेत्वा आणापेति, आणापकस्स येसं केसञ्चि मरणेपि कम्मबद्धो, आणत्तस्स पन नियमितमरणेयेवाति वेदितब्बं. मज्झेति हत्थिनो पिट्ठिनो मज्झे. एतेनाति अधिट्ठहित्वा आणापेतीतिआदिपाळिवचनेन. तत्थाति आणत्तिकपयोगे.

किञ्चापि किरियाविसेसो अट्ठकथासु अनागतो, पाळियं पन ‘‘एवं विज्झ, एवं पहर, एवं घातेही’’ति (पारा. १७४) किरियाविसेसस्स परामट्ठत्ता आचरियपरम्परा आगतं किरियाविसेसम्पि पाळिसंसन्दनतो गहेत्वा दस्सेन्तो अपरो नयोतिआदिमाह. विज्झनन्ति उसुसत्तिआदीहि विज्झनं. छेदनन्ति असिआदीहि हत्थपादादिच्छेदनं. भेदनन्ति मुग्गरादीहि सीसादिभेदनं द्विधाकरणं. सङ्खमुण्डकन्ति सीसकटाहे चम्मं सह केसेहि उप्पाटेत्वा थूलसक्खराहि सीसकटाहं घंसित्वा सङ्खवण्णकरणवसेन सङ्खमुण्डकम्मकरणं. एवमादीति आदि-सद्देन बिळङ्गथालिकादिं सङ्गण्हाति. उरे पहरित्वा पिट्ठियं पहरित्वा गीवायं पहरित्वातिआदिना सरीरावयवप्पदेसेसु पहरणविज्झनादिनियमोपि किरियाविसेसेयेव सङ्गय्हति अट्ठकथासु सङ्खमुण्डकादिसरीरप्पदेसविसयायपि घातनाय तत्थ ¶ पवेसितत्ता, यं पन सारत्थदीपनियं (सारत्थ. टी. पाराजिककण्ड २.१७४ पयोगकथावण्णना) पुरतो पहरित्वा मारेहीतिआदिकस्स अट्ठकथापाठस्स ‘‘पुरिमपस्सादीनम्पि वत्थुसभागतो वत्थुग्गहणेनेव गहणन्ति आह पुरतो पहरित्वातिआदी’’ति एवमधिप्पायकथनं, तं सङ्खमुण्डकादिकस्स सरीरप्पदेसे कम्मकारणाकरणस्स अट्ठकथाय किरियाविसेसविसये वुत्तत्ता न युज्जति. यथाणत्तं मुञ्चित्वा पुग्गलन्तरमारणमेव हि वत्थुविसंवादो, न पहरितुं आणत्तं सरीरप्पदेसविसंवादनं, तेनाह ‘‘वत्थुं विसं वादेत्वा…पे… ततो अञ्ञं मारेति. पुरतो पहरित्वा मारेहीति वा…पे… नत्थि कम्मबद्धो’’ति, इदं पन यथाणत्तवत्थुस्मिम्पि किरियाविसेसविसङ्केतेन कम्मबद्धाभावं दस्सेतुं वुत्तन्ति पञ्ञायति. तेन ‘‘वत्थुं अविसंवादेत्वा मारेन्ती’’ति एत्तकमेव अवत्वा ‘‘यथाणत्तिया’’ति किरियाविसेसनियमोपि दस्सितो, इतरथा यथाणत्तियाति वचनस्स निरत्थकतापत्तितो. वत्थुनिद्देसे च ‘‘वत्थूति मारेतब्बो सत्तो’’ति (पारा. अट्ठ. २.१७४) एत्तकमेव वुत्तं, न पन ‘‘यथाणत्तस्स पहरितब्बसरीरप्पदेसोपी’’ति वुत्तं. तस्मा पुरतो पहरणादिपि किरियाविसेसे एव सङ्गय्हतीति अम्हाकं खन्ति, वीमंसित्वा गहेतब्बं. वत्थुविसेसेनाति मातुआदिमतसत्तविसेसेन. ¶ कम्मविसेसोति आनन्तरियादिकम्मविसेसो. आपत्तिविसेसोति पाराजिकादिआपत्तिविसेसो.

यदा कदाचि पुब्बण्हेति आणत्तदिवसतो अञ्ञस्सपि यस्स कस्सचि दिवसस्स पुब्बण्हे. एतं गामे ठितन्ति गामो पुग्गलनियमनत्थं वुत्तो, न ओकासनियमनत्थं, तस्मा ‘‘यत्थ कत्थचि मारेति, नत्थि विसङ्केतो’’ति वुत्तं, एतेन कालोकासआवुधइअयापथकिरियाविसेसानं नियमिच्छाय असति येन केनचि पकारेन मरणमेव इच्छन्तस्स आणापकस्स मुखारुळ्हवसेन वुत्तस्स देसकालादिनियमस्स विसङ्केतेपि कम्मबद्धोयेवाति ञापितं होति. यो पन चित्तेन यत्थ कत्थचि यदा कदाचि येन केनचि पकारेन मरणमेव इच्छन्तोपि कालादिविसङ्केतेन अकुसलतो चोदनतो वा मुच्चितुकामो लेसेन कालादिनियमं करोति, तस्स मनुस्सविग्गहपाराजिकतो परियायेन अमुच्चनतो कालादिविसङ्केतेपि कम्मबद्धोवाति गहेत्वा विचारणतो गहेतब्बं, केचि पनेतं न इच्छन्ति, वीमंसितब्बं. तुण्डेनाति ¶ अग्गकोटिया. थरुनाति खग्गमुट्ठिना. एतं गच्छन्तन्ति गमनेन पुग्गलोव नियमितो, न इरियापथो, तेनाह ‘‘नत्थि विसङ्केत’’न्ति.

‘‘दीघं मारेही’’ति वुत्तेपि दीघसण्ठानानं बहुभावतो ‘‘इत्थन्नामं एवरूपञ्च दीघ’’न्ति अञ्ञेसं असाधारणलक्खणेन अनिद्दिट्ठत्ता ‘‘अनियमेत्वा आणापेती’’ति वुत्तं, तेनेवाह ‘‘यं किञ्चि तादिसं मारेमी’’ति. एत्थ च चित्तेन बहूसु दीघसण्ठानेसु एकं नियमेत्वा वुत्तेपि वाचाय अनियमितत्ता अञ्ञस्मिं तादिसे मारिते नत्थि विसङ्केतोति वदन्ति. अत्तानं मुञ्चित्वा परपाणिम्हि पाणसञ्ञितालक्खणस्स अङ्गस्स अभावतो नेवत्थि पाणातिपातोति आह ‘‘आणापको मुच्चती’’ति. अत्तानं उद्दिस्स ‘‘असुकट्ठाने निसिन्न’’न्ति ओकासनियमे तस्मिं पदेसे निसिन्नस्स यस्स कस्सचि जीवितिन्द्रियं आरब्भ वधकचित्तं उप्पज्जतीति वुत्तं ‘‘नेव वधको मुच्चति न आणापको’’ति. ओकासञ्हि नियमेत्वा निद्दिसन्तो तस्मिं ओकासे निसिन्नं मारेतुकामो होति, सयं पन तदा तत्थ नत्थि, तस्मा ओकासेन सह तत्थ निसिन्नस्सेव जीवितिन्द्रियं आरम्मणं होति, न अत्तनोति गहेतब्बं. सचे पन सयं तत्थेव निसीदित्वा अत्तनो निसिन्नट्ठानमेव नियमेत्वा ‘‘मारेही’’ति वुत्तेपि अञ्ञो तत्थ निसिन्नो मारियति, तस्सापि अत्तनोपि जीवितं आरब्भ वधकचेतना पवत्तति, परस्मिं तत्थ मारिते आणापकस्स कम्मबद्धोति गहेतब्बं. एवरूपे ठाने चित्तप्पवत्तिनियमो बुद्धविसयो, न अञ्ञेसं विसयोति आह ‘‘तस्मा एत्थ न अनादरियं कातब्ब’’न्ति.

एवं ¶ आणापेन्तस्स आचरियस्स ताव दुक्कटन्ति सचे आणत्तिको यथाधिप्पायं न गच्छति, आचरियस्स आणत्तिक्खणे दुक्कटं. सचे पन सो यथाधिप्पायं गच्छति, यं परतो थुल्लच्चयं वुत्तं, आणत्तिक्खणे तदेव होति. अथ सो अवस्सं घातेति, यं परतो ‘‘आपत्ति सब्बेसं पाराजिकस्सा’’ति (पारा. १७४) वुत्तं, ततो इमस्स आणत्तिक्खणेयेव पाराजिकं होति, न दुक्कटथुल्लच्चयानीति गहेतब्बं. तेसम्पि दुक्कटन्ति बुद्धरक्खितादीनम्पि आरोचनपच्चया दुक्कटं, इदञ्च यथाणत्तिवसेन सङ्घरक्खितस्स जीविता वोरोपने असति युज्जति, वोरोपने सति तेसम्पि आरोचनक्खणेयेव पाराजिकं. पटिग्गहितमत्तेति इदं अवस्सं पटिग्गहणसभावदीपनत्थं वुत्तं, न पटिग्गहितक्खणेयेव थुल्लच्चयन्ति ¶ दस्सनत्थं. सचे हि सो अवस्सं पटिग्गहेस्सति, कम्मं पन न निप्फादेस्सति, तदा आचरियस्स आणत्तिक्खणेयेव थुल्लच्चयं होतीति दट्ठब्बं.

मूलट्ठस्सेव दुक्कटन्ति इदं महाअट्ठकथायं आगतनयदस्सनमत्तं, न पनेतं अत्तना अधिप्पेतं, तेनाह एवं सन्तेतिआदि, एवं महाअट्ठकथायं वुत्तनयेन अत्थे सतीति अत्थो. पटिग्गहणे आपत्तियेव न सियाति वधकस्स ‘‘साधु सुट्ठू’’ति मरणपटिग्गहणे दुक्कटापत्ति नेव सिया, एवं अनोळारिकविसयेपि ताव दुक्कटं, किमङ्गं पन मरणपटिग्गहणेति दस्सनत्थं सञ्चरित्तपटिग्गहणादि निदस्सितं. ‘‘अहो वत इत्थन्नामो हतो अस्सा’’ति एवं मरणाभिनन्दनदस्सनत्थं सञ्चरित्तपटिग्गहणादिभिनन्दने दुक्कटे सति पगेव ‘‘अहं तं मारेस्सामी’’ति मरणपटिग्गहणेति अधिप्पायो. पटिग्गण्हन्तस्सेवेतं दुक्कटन्ति अवधारणेन सङ्घरक्खितस्स पटिग्गहणपच्चया मूलट्ठस्स नत्थेव आपत्तीति दस्सेति, विसङ्केतत्ता पठमं आणत्तदुक्कटमेवस्स होति. केचि पन ‘‘मूलट्ठस्सापि दुक्कटमेवा’’ति वदन्ति, तं न युत्तं एकेन पयोगेन द्विन्नं दुक्कटानं असम्भवा. पुरिमनयेति समनन्तरातीते अविसक्कियदूतनिद्देसे. एतन्ति दुक्कटं. ओकासाभावेनाति मूलट्ठस्स थुल्लच्चयस्स वुच्चमानत्ता पटिग्गण्हन्तस्स दुक्कटं न वुत्तं ओकासाभावेन, न पन आपत्तिअभावतोति अधिप्पायो.

१७५. सयं सङ्घत्थेरत्ता ‘‘उपट्ठानकाले’’ति वुत्तं. वाचाय वाचाय दुक्कटन्ति ‘‘यो कोचि मम वचनं सुत्वा इमं मारेतू’’ति इमिना अधिप्पायेन अवत्वा केवलं मरणाभिनन्दनवसेनेव वुत्तत्ता चोरापि नाम तं न हनन्तीतिआदिवाचायपि दुक्कटमेव वुत्तं. द्विन्नं उद्दिस्साति द्वे उद्दिस्स, द्विन्नं वा मरणं उद्दिस्स. उभो उद्दिस्स मरणं संवण्णेन्तस्स पयोगसमुट्ठापिकाय चेतनाय एकत्तेपि ‘‘द्वे पाणातिपाता’’ति वत्तब्बतासङ्खातं बलवभावं आपज्जित्वा पटिसन्धिपवत्तीसु महाविपाकत्ता ‘‘अकुसलरासी’’ति वुत्तं, बहू उद्दिस्स मरणसंवण्णनेपि ¶ एसेव नयो. तत्तका पाणातिपाताति यत्तका संवण्णनं सुत्वा मरिस्सन्ति, तत्तकानम्पि वत्तमानं अनागतञ्च जीवितिन्द्रियं सब्बं आलम्बित्वाव चेतनाय पवत्तनतो ¶ तत्तका पाणातिपाता होन्ति, तत्तकाहि चेतनाहि दातब्बं पवत्तिविपाकं एकाव सा चेतना दातुं सक्कोतीति अत्थो, पटिसन्धिविपाकं पन सयञ्च पुब्बापरचेतना च एकेकमेव दातुं सक्कोतीति गहेतब्बं.

१७६. येसं हत्थतोति येसं ञातकपवारितादीनं हत्थतो, इदञ्च भिक्खुनो रूपियमूलस्स अभावं सन्धाय वुत्तं, अत्तनोव धनञ्चे, सयमेव मूलं गहेत्वा मुञ्चति, मूलं पन अग्गहेत्वापि पोत्थकस्स पोत्थकसामिनो सन्तकत्तापादनमेवेत्थ पमाणन्ति गहेतब्बं. लेखादस्सनकोतूहलकाति सुन्दरक्खरं दिस्वा वा ‘‘कीदिसं नु खो पोत्थक’’न्ति वा ओलोकेतुकामा.

पाणातिपातस्स पयोगत्ताति सरीरतो पाणवियोजनस्स निट्ठापकपयोगत्ता. ओपातखणनत्थं पन कुदालादिअत्थाय अयोबीजसमुट्ठापनत्थं अकप्पियपथविं वा कुदालदण्डादीनं अत्थाय भूतगामं विकोपेन्तस्स पाचित्तियमेव. पाणातिपातपयोगत्ताभावा अदिन्नादानपुब्बपयओगे विय दुतियपरियेसनादीसुपि एत्थ दुक्कटट्ठाने दुक्कटं, मुसावादादिपाचित्तियट्ठाने पाचित्तियमेवाति गहेतब्बं. पमाणेति अत्तना सल्लक्खिते पमाणे. तच्छेत्वाति उन्नतप्पदेसं तच्छेत्वा. पंसुपच्छिन्ति सब्बन्तिमं पंसुपच्छिं. एत्तकं अलन्ति निट्ठापेतुकामताय सब्बन्तिमपयओगसाधिका चेतना सन्निट्ठापकचेतना, महाअट्ठकथायं ‘‘एकस्मिं दिवसे अवूपसन्तेनेव पयोगेन खणित्वा निट्ठापेन्तं सन्धाय सब्बन्तिमा सन्निट्ठापकचेतना वुत्ता, इतरासु पन अट्ठकथासु ‘‘इमस्मिं पतित्वा मरन्तू’’ति अधिप्पायेन एकस्मिं दिवसे किञ्चि खणित्वा अपरस्मिम्पि दिवसे ततो किञ्चि किञ्चि खणित्वा निट्ठापेन्तं सन्धाय वुत्तन्ति एवं अट्ठकथानं अञ्ञमञ्ञविरोधो ञातब्बो. अत्तनो धम्मतायाति अजानित्वा, पक्खलित्वा वा. अरहन्तापि सङ्गहं गच्छन्तीति अञ्ञेहि पातियमानानं अमरितुकामानम्पि अरहन्तानं मरणं सम्भवतीति वुत्तं. पुरिमनयेति ‘‘मरितुकामा इध मरिस्सन्ती’’ति वुत्तनये. विसङ्केतोति मरितुकामानं मारेतुकामानञ्च उद्दिस्स खतत्ता अमरितुकामानं मरणे कम्मबद्धो नत्थीति अत्थो.

तत्थ ¶ पतितं बहि नीहरित्वाति इदं तत्थ पतनपच्चया मरणस्स पवत्तत्ता वुत्तं. आवाटे पतित्वा थोकं चिरायित्वा गच्छन्तं गहेत्वा मारिते तत्थ पतितरोगेन पीळितस्स गच्छतो ¶ पक्खलित्वा पासाणादीसु पतनेनापि मरणेपि ओपातखणको न मुच्चतीति वेदितब्बं. अमरितुकामा वाति अधिप्पायस्स सम्भवतो ओपपातिके उत्तरितुं असक्कुणित्वा मतेपि पाराजिकं वुत्तं. ‘‘निब्बत्तित्वा’’ति वुत्तत्ता पतनं न दिस्सतीति चे? तत्थस्स निब्बत्तियेव पतनन्ति नत्थि विरोधो. यस्मा मातुया पतित्वा परिवत्तितलिङ्गाय मताय सो मातुघातको होति, न केवलं मनुस्सपुरिसघातको, तस्मा पतितस्सेव वसेन आपत्तीति अधिप्पायेन ‘‘पतनरूपं पमाण’’न्ति वुत्तं, इदं पन अकारणं ‘‘लिङ्गे परिवत्तेपि एकसन्तानत्तस्स अविगतत्ता. मनुस्सभूतं मातरं वा पितरं वा अपि परिवत्तलिङ्गं जीविता वोरोपेन्तस्स कम्मं आनन्तरिय’’न्ति हि अट्ठकथायं वुत्तं. येन पन सभावेन सत्ता जायन्ति, तेनेव मरन्ति, सोव तेसं रूपन्तरग्गहणेपि सभावोति ‘‘मरणरूपमेव पमाणं, तस्मा पाचित्तिय’’न्ति वुत्तो. पच्छिमो वादो पमाणं, एवं सन्ते पाळियं ‘‘यक्खो वा पेतो वा तिरच्छानगतमनुस्सविग्गहो वा तस्मिं पतति, आपत्ति दुक्कटस्स. पतिते दुक्खा वेदना उप्पज्जति, आपत्ति दुक्कटस्स. मरति, आपत्ति थुल्लच्चयस्सा’’ति कस्मा वुत्तन्ति चे? नायं दोसो. ‘‘यक्खो वा पेतो वा’’ति हि पठमं सकरूपं दस्सेत्वा रूपन्तरं गहेत्वापि ठितेयेव यक्खपेते दस्सेतुं ‘‘तिरच्छानगतमनुस्सविग्गहो वा’’ति वुत्तं. तस्मा तिरच्छानगतविग्गहो मनुस्सविग्गहो वा यक्खो वा पेतो वाति एवमेत्थ योजना कातब्बा. केचि पन ‘‘मनुस्सविग्गहेन ठिततिरच्छानगतानं आवेणिकं कत्वा थुल्लच्चयं वुत्तं विय दिस्सती’’ति वदन्ति, तं न युत्तं तिरच्छानो वा मनुस्सविग्गहोति वत्तब्बतो, अट्ठकथासु च इमस्स विसेसस्स अवुत्तत्ता. यक्खपेतरूपेन मतेपि एसेव नयोति इमिना मरणरूपस्सेव पमाणत्ता थुल्लच्चयं अतिदिसति.

मुधाति अमूलेन. सो निद्दोसोति तेन तत्थ कतपयोगस्स अभावतो, यदि पन सोपि तत्थ किञ्चि करोति, न मुच्चति एवाति दस्सेन्तो एवं पतितातिआदिमाह. तत्थ एवन्ति एवं मया कतेति अत्थो ¶ . न नस्सिस्सन्तीति अदस्सनं न गमिस्सन्ति, न पलायिस्सन्तीति अधिप्पायो. सुउद्धरा वा भविस्सन्तीति इदं गम्भीरस्स ओपातस्स पूरणे पयोजनदस्सनं. उत्ताने कते ओपाते सीघं अम्हेहि गहेत्वा मारेतुं सुउद्धरा भविस्सन्तीति अधिप्पायो. विप्पटिसारे उप्पन्नेति मूलट्ठं सन्धाय वुत्तं. यदि पन पच्छिमोपि लभित्वा तत्थ वुत्तप्पकारं किञ्चि कत्वा पुन विप्पटिसारे उप्पन्ने एवं करोति, तस्सापि एसेव नयो. जातपथवी जाताति ईदिसे पुन अञ्ञेन ओपाते खते तदा मुच्चतीति दस्सनत्थं वुत्तं, जातपथवीसदिसं कत्वा पुन सुट्ठु कोट्टेत्वा दळ्हतरं पूरितेपि मुच्चतियेवाति गहेतब्बं.

थद्धतरन्ति ¶ थिरकरणत्थं अपरापराय पासयट्ठिया सद्धिं बन्धित्वा वा तमेव वा सिथिलभूतपासं थद्धतरं बन्धित्वा ठपेति. खाणुकन्ति पासयट्ठिबन्धनखाणुकं. तत्थजातकयट्ठिं छिन्दित्वा मुच्चतीति इदं अरञ्ञे यथाठितमेव दण्डं मूले अच्छिन्दित्वा पासबन्धनयोग्गं कत्वा ठपितत्ता तत्थ अञ्ञोपि कोचि पासं बन्धेय्य, मूलट्ठो न मुच्चति, तं पन मूलेपि छिन्दित्वा खण्डाखण्डं कत्वा मुच्चतीति दस्सनत्थं वुत्तं. रज्जुकेति वाकेहि एकवारं वट्टितरज्जुके. सयं वट्टितन्ति तनुकवट्टितं दिगुणतिगुणतापादनेन अत्तना वट्टितं. उब्बट्टेत्वाति पाकतिकं कत्वा. गोपेन्तोपीति हीरं हीरं कत्वा गोपेन्तोपि.

१७७. आलम्बनरुक्खो वाति तत्थजातकं सन्धाय वुत्तं. तदत्थमेव कत्वाति मारणत्थमेव अयोबीजसमुट्ठापनादिना वासिआदिं सत्थं कारेत्वा. पाकतिकन्ति अञ्ञेहि कतं पकतिसत्थमेव लभित्वा मूलट्ठेन ठपितं होतीति अत्थो. मुच्चतीति मूलट्ठो मुच्चति. विसमण्डलन्ति मञ्चपीठादीसु आलित्तं विसमण्डलं.

वत्वा असिं उपनिक्खिपतीति एत्थ मुखेन अवत्वा मनसाव चिन्तेत्वा उपनिक्खिपनेपि एसेव नयो. पुरिमनयेनाति येसं हत्थतो मूलं गहितन्तिआदिना. विसभागरोगो नाम कुट्ठादिविरूपभावतो, गण्डपीळकादि वा जीवितप्पवत्तिया पच्चनीकत्ता.

१७८. मनापियेपि एसेव नयोति एतेन मनापियं रूपं उपसंहरतीति एत्थ यं वा मनापरूपं, तस्स समीपे ठपेति, अत्तना वा मनापियेन रूपेन ¶ समन्नागतो तिट्ठतीतिआदि योजेतब्बन्ति दस्सेति. अलङ्करित्वा उपसंहरतीति ‘‘अलाभकेन सुस्सित्वा मरतू’’ति इमिना अधिप्पायेन उपसंहरति, तेनेव ‘‘सचे उत्तसित्वा मरति, विसङ्केतो’’ति वुत्तं. अलाभकेन सुस्सित्वा मरतीति एत्थ पाराजिकोति पाठसेसो दट्ठब्बो. महाकच्छु नाम वल्लिफलविसेसो, यस्स मज्जारपादस्सेव सण्ठानं दुक्खसम्फस्सानि सुखुमलोमानि च होन्ति. हंसपुप्फन्ति हंसादीनं पक्खलोमं सन्धाय वदन्ति. अत्तनो धम्मताय मरति, अनापत्तीति पाराजिकं सन्धाय वुत्तं दुक्कटा न मुच्चनतो.

१७९. असञ्चिच्चाति इदं मरणसंवत्तनिकउपक्कमस्स असल्लक्खणं सन्धाय वुत्तन्ति आह इमिना उपक्कमेनातिआदि. अजानन्तस्साति इदं पन मरणसंवत्तनिकविसादिउपक्कमकरणस्स अजाननं सन्धाय वुत्तन्ति आह इमिना अयं मरिस्सतीतिआदि. न मरणाधिप्पायस्साति इदं दुक्खुप्पादकं उपक्कमन्ति जानन्तस्सापि मरणाधिप्पायस्स अभावं सन्धाय ¶ वुत्तन्ति आह मरणं अनिच्छन्तस्सातिआदि. अनुप्पबन्धाभावाति दोमनस्सवीथीनं निरन्तरप्पवत्तिअभावा.

पदभाजनीयवण्णनानयो निट्ठितो.

विनीतवत्थुवण्णना

१८०. वोहारवसेनाति पुब्बभागवोहारवसेन, मरणाधिप्पायस्स सन्निट्ठापकचेतनाक्खणे करुणाय अभावतो कारुञ्ञेन पासे बद्धसूकरमोचनं (पारा. १५३) विय न होतीति अधिप्पायो. ‘‘यथायुना’’ति वुत्तमेवत्थं ‘‘यथानुसन्धिना’’ति परियायन्तरेन वुत्तं. हेट्ठा किस्मिञ्चि विज्जमाने साटकं वलिं गण्हातीति आह ‘‘यस्मिं वलि न पञ्ञायती’’ति. पटिवेक्खणञ्चेतं गिहीनं सन्तके एवाति दट्ठब्बं. पाळियं मुसले उस्सितेति अञ्ञमञ्ञं उपत्थम्भेत्वा द्वीसु मुसलेसु भित्तिं अपस्साय ठपितेसूति अत्थो. उदुक्खलभण्डिकन्ति उदुक्खलत्थाय आनीतं दारुभण्डं. परिबन्धन्ति भोजनपरिबन्धं, भोजनन्तरायन्ति वुत्तं होति.

१८१. अग्गकारिकन्ति ¶ एत्थ कारिक-सद्दस्स भाववचनत्ता ‘‘अग्गकिरिय’’न्ति अत्थं वत्वापि यस्मा किरियं दातुं न सक्का, तस्मा दानसङ्खाताय अग्गकिरियाय युत्तपिण्डपातमेव इध उपचारयुत्तिया अग्गकिरियाति गहेतब्बन्ति आह पठमं लद्धपिण्डपातन्तिआदि.

१८२-३. दण्डमुग्गरनिखादनवेमादीनं वसेनाति एत्थ दण्डो नाम दीघदण्डो. मुग्गरो नाम रस्सो. वेमं नाम तन्तवायानं वत्थवायनउपकरणं, येन वीतं तन्तं घट्टेन्ति. विभत्तिब्यत्तयेनाति विभत्तिविपरिणामेन. विसेसाधिगमोति समाधि विपस्सना च. विसेसाधिगमन्ति लोकुत्तरधम्मपटिलाभं. ब्याकरित्वाति आरोचेत्वा, इदञ्च विसेसस्स अधिगतभावदस्सनत्थं वुत्तं. अधिगतविसेसा हि दिट्ठानुगतिआपज्जनत्थं लज्जीभिक्खूनं अवस्सं अधिगमं ब्याकरोन्ति, अधिगतविसेसेन पन अब्याकरित्वापि आहारं उपच्छिन्दितुं न वट्टति, अधिगमन्तरायविनोदनत्थमेव आहारूपच्छेदस्स अनुञ्ञातत्ता तदधिगमे सो न कातब्बोव. किं पनाधिगमं आरोचेतुं वट्टतीति आह सभागानन्तिआदि. भण्डकं वा धोवन्ताति चीवरं वा धोवन्ता. धोवनदण्डकन्ति चीवरधोवनदण्डं.

१८५. मद्दापेत्वा पातेति, विसङ्केतोति यथाणत्तिया अकतत्ता वुत्तं, यदि पन आणापको ¶ मद्दनम्पि मद्दापनम्पि सन्धाय वोहारवसेन ‘‘मद्दित्वा पातेही’’ति वदति, विसङ्केतो नत्थीति वेदितब्बं. ‘‘मरणवण्णं वा संवण्णेय्या’’ति (पारा. १७१) वुत्तत्ता आह ‘‘परियायो नाम नत्थी’’ति, परियायेन आपत्तिमोक्खो न होतीति अधिप्पायो. अविजायनत्थाय गब्भग्गहणतो पुरेतरमेव भेसज्जं देन्तस्स कुच्छियं उप्पज्जित्वा गब्भो विनस्सतीति इमिना अधिप्पायेन दिन्ने तथामरन्तानं वसेन कम्मबद्धो, कुच्छियं न उप्पज्जिस्सतीति इमिना अधिप्पायेन दिन्ने उप्पज्जित्वा मरतु वा मा वा, नेवत्थि कम्मबद्धो.

सहधम्मिकानन्ति एकस्स सत्थु सासने सहसिक्खमानधम्मानं, सहधम्मे वा सिक्खापदे सिक्खनभावेन नियुत्तानं. समसीलसद्धानन्तिआदिना दुस्सीलानं भिन्नलद्धिकानञ्च अकातुम्पि लब्भतीति दस्सेति. ञातकपवारितट्ठानतोति ¶ अत्तनो तेसं वा ञातकपवारितट्ठानतो. अरियेहि अकता अयुत्तवसेन अकतपुब्बा विञ्ञत्ति अकतविञ्ञत्ति.

पटियादियतीति सम्पादियति. अकातुं न वट्टतीति एत्थ दुक्कटं वदन्ति, अयुत्ततावसेनेव पनेत्थ अकरणपटिक्खेपो युत्तो, न आपत्तिवसेनाति गहेतब्बं. याव ञातका पस्सन्तीति याव तस्स ञातका पस्सन्ति.

पितुभगिनी पितुच्छा. मातुभाता मातुलो. नप्पहोन्तीति कातुं न सक्कोन्ति. न याचन्तीति लज्जाय न याचन्ति. ‘‘आभोगं कत्वा’’ति वुत्तत्ता अञ्ञथा देन्तस्स आपत्तियेव. केचि पन ‘‘आभोगं अकत्वापि दातुं वट्टती’’ति वदन्ति, तं न युत्तं भेसज्जकरणस्स पाळियं ‘‘अनापत्ति भिक्खु पाराजिकस्स, आपत्ति दुक्कटस्सा’’ति (पारा. १८७) एवं अन्तरापत्तिदस्सनवसेन सामञ्ञतो पटिक्खित्तत्ता, अट्ठकथायं अवुत्तप्पकारेन करोन्तस्स सुत्तेनेव आपत्ति सिद्धाति दट्ठब्बा, तेनेव अट्ठकथायम्पि ‘‘तेसञ्ञेव सन्तक’’न्तिआदि वुत्तं. अञ्ञेसन्ति असालोहितानं, तेनाह एतेसं पुत्तपरम्परायातिआदि. कुलपरिवट्टोति कुलस्मिं ञातिपरम्परा. भेसज्जं करोन्तस्साति यथावुत्तविधिना करोन्तस्स, ‘‘तावकालिकं दस्सामी’’ति आभोगं अकत्वा देन्तस्सापि पन अन्तरापत्ति दुक्कटं विना मिच्छाजीवं वा कुलदूसनं वा न होतियेव, तेनाह – ‘‘वेज्जकम्मं वा कुलदूसकापत्ति वा न होती’’ति. ञातकानञ्हि सन्तकं याचित्वापि गहेतुं वट्टति, तस्मा तत्थ कुलदूसनादि न सिया. सब्बपदेसूति ‘‘चूळमातुया’’तिआदीसु सब्बपदेसु.

उपज्झायस्स ¶ आहरामाति इदं उपज्झायेन ‘‘मम ञातकानं भेसज्जं आहरथा’’ति आणत्तेहि कत्तब्बविधिदस्सनत्थं वुत्तं, इमिना च सामणेरादीनं अपच्चासायपि परजनस्स भेसज्जकरणं न वट्टतीति दस्सेति. वुत्तनयेन परियेसित्वाति इमिना ‘‘भिक्खाचारवत्तेन वा’’ति इमिना, ‘‘ञातिसामणेरेही’’ति इमिना च वुत्तमत्थं अतिदिसति. अपच्चासीसन्तेनाति आगन्तुकचोरादीनं करोन्तेनापि ‘‘मनुस्सा नाम उपकारका होन्ती’’ति अत्तनो तेहि लाभं अपत्थयन्तेन. पच्चासाय करोन्तस्स पन वेज्जकम्मकुलदूसनादिदोसो होतीति अधिप्पायो. ‘‘एवं उपकारे कते सासनगुणं ¶ ञत्वा पसीदन्ति, सङ्घस्स वा उपकारका होन्ती’’ति करणे पन दोसो नत्थि. केचि पन ‘‘अपच्चासीसन्तेन आगन्तुकादीनं पटिक्खित्तपुग्गलादीनम्पि दातुं वट्टती’’ति वदन्ति, तं न युत्तं कत्तब्बाकत्तब्बट्ठानविभागस्सनिरत्थकत्तप्पसङ्गतो ‘‘अपच्चासीसन्तेन सब्बेसं दातुं कातुञ्च वट्टती’’ति एत्तकमत्तस्सेव वत्तब्बतो. अपच्चासीसनञ्च मिच्छाजीवकुलदूसनादिदोसनिसेधनत्थमेव वुत्तं भेसज्जकरणसङ्खताय इमिस्सा अन्तरापत्तिया मुच्चनत्थं आगन्तुकचोरादीनं अनुञ्ञातानं दानेनेव ताय आपत्तिया मुच्चनतोति गहेतब्बं. तेनेव अपच्चासीसन्तेनापि अकातब्बट्ठानं दस्सेतुं सद्धं कुलन्तिआदि वुत्तं. पुच्छन्तीति इमिना दिट्ठदिट्ठरोगीनं परियायेनापि वत्वा विचरणं अयुत्तन्ति दस्सेति. पुच्छितस्सापि पन पच्चासीसन्तस्स परियायकथापि न वट्टतीति वदन्ति.

समुल्लपेसीति अपच्चासीसन्तो एवं अञ्ञमञ्ञं कथं समुट्ठापेसि. आचरियभागोति विनयाचारं अकोपेत्वा भेसज्जाचिक्खणेन वेज्जाचरियभागोति अत्थो. पुप्फपूजनत्थाय सम्पटिच्छियमानं रूपियं अत्तनो सन्तकत्तभजनेन निस्सग्गियमेवाति आह ‘‘कप्पियवसेन गाहापेत्वा’’ति, ‘‘अम्हाकं रूपियं न वट्टति, पुप्फपूजनत्थं पुप्फं वट्टती’’तिआदिना पटिक्खिपित्वा कप्पियेन कम्मेन गाहापेत्वाति अत्थो.

यदि ‘‘परित्तं करोथा’’ति वुत्ते करोन्ति, भेसज्जकरणं विय गिहिकम्मं विय होतीति ‘‘न कातब्ब’’न्ति वुत्तं. ‘‘परित्तं भणथा’’ति वुत्ते पन धम्मज्झेसनत्ता अनज्झिट्ठेनपि भणितब्बो धम्मो, पगेव अज्झिट्ठेनापीति ‘‘कातब्ब’’न्ति वुत्तं. चालेत्वा सुत्तं परिमज्जित्वाति इदं ‘‘परित्ताणं एत्थ पवेसेमी’’ति चित्तेन एवं कते परित्ताणा तत्थ पवेसिता नाम होतीति वुत्तं. विहारतो…पे… दुक्कटन्ति इदं अञ्ञातकगहट्ठे सन्धाय वुत्तन्ति वदन्ति. पादेसु उदकं आकिरित्वाति इदं तस्मिं देसे चारित्तवसेन वुत्तं. वुत्तञ्हि ‘‘तत्थ पाळिया निसिन्नानं भिक्खूनं पादेसु रोगवूपसमनादिअत्थाय उदकं सिञ्चित्वा परित्तं कातुं सुत्तञ्च ठपेत्वा ‘परित्तं ¶ भणथा’ति वत्वा गच्छन्ति. एवञ्हि करियमाने यदि पादे अपनेन्ति, मनुस्सा तं अवमङ्गलन्ति मञ्ञन्ति, रोगो वा न वूपसमिस्सती’’ति. तेनाह ‘‘न पादा अपनेतब्बा’’ति. मतसरीरदस्सने विय केवलं सुसानदस्सनेपि ‘‘इदं जातानं सत्तानं खयगमनट्ठान’’न्ति मरणसञ्ञा उप्पज्जतीति ¶ आह ‘‘सीवथिकदस्सने…पे… ‘मरणस्सतिं पटिलभिस्सामा’ति कम्मट्ठानसीसेन गन्तुं वट्टती’’ति. लेसकप्पं अकत्वा समुप्पन्नसुद्धचित्तेन ‘‘परिवारत्थाय आगच्छन्तू’’ति वुत्तेपि गन्तुं वट्टति.

अनामट्ठपिण्डपातोति अग्गहितअग्गो, अपरिभुत्तोति अत्थो. कहापणग्घनको होतीति इमिना दायकेहि बहुब्यञ्जनेन सम्पादेत्वा सक्कच्चं दिन्नभावं दीपेति. थालकेति सङ्घिके कंसादिमये थालके, पत्तोपि एत्थ सङ्गय्हति. न वट्टतीति इमिना दुक्कटन्ति दस्सेति. दामरिकचोरस्साति रज्जं पत्थेन्तस्स पाकटचोरस्स. अदीयमानेपि ‘‘न देन्ती’’ति कुज्झन्तीति सम्बन्धो. आमिसस्स धम्मस्स च अलाभेन अत्तनो परस्स च अन्तरे सम्भवन्तस्स छिद्दस्स च विवरस्स पटिसन्थरणं पिदहनं पटिसन्थारो, सो पन धम्मामिसवसेन दुविधो. तत्थ आमिसपटिसन्थारं सन्धाय ‘‘कस्स कातब्बो, कस्स न कातब्बो’’ति वुत्तं. ‘‘आगन्तुकस्स वा…पे… कत्तब्बो येवा’’ति सङ्खेपतो वुत्तमत्थं पाकटं कातुं आगन्तुकं तावातिआदिमाह. खीणपरिब्बयन्ति इमिना अगतिभावं कारुञ्ञभाजनतञ्च दस्सेति, तेन च तब्बिधुरानं समिद्धानं दायकादीनं आगन्तुकत्तेपि दातुं न वट्टतीति सिद्धं होति. तण्डुलादिम्हि दातब्बे सति ‘‘अवेलायं…पे… न वत्तब्बो’’ति वुत्तं. ‘‘अपच्चासीसन्तेना’’ति वत्वा पच्चासीसनप्पकारं दस्सेतुं मनुस्सा नामातिआदि वुत्तं. अननुञ्ञातानं पन अपच्चासीसन्तेनापि दातुं न वट्टति सद्धादेय्यविनिपातत्ता, पच्चासीसाय पन सति कुलदूसनम्पि होति.

उब्बासेत्वाति समन्ततो तियोजनं विलुम्पन्ते मनुस्से पलापेत्वा. वरपोत्थकचित्तत्थरणन्ति अनेकप्पकारइत्थिपुरिसादिउत्तमरूपविचित्तं अत्थरणं.

१८७. सत्तरसवग्गियेसु पुब्बे एकस्स अङ्गुलिपतोदकेन मारितत्ता सेसेसु सोळसजनेसु उदरं आरुहित्वा निसिन्नमेकं ठपेत्वा ‘‘सेसापि पन्नरस जना’’ति वुत्तं. अदूहलपासाणा वियाति अदूहले आरोपितपासाणा विय. कम्माधिप्पायाति तज्जनीयादिकम्मकरणाधिप्पाया.

आवाहेत्वाति ¶ ¶ आविसापेत्वा. रूपं कत्वा हत्थपादादीनि छिन्दन्तीति तस्मिं पिट्ठादिमये रूपे अमनुस्सं आवाहेत्वा तस्स हत्थपादादीनि छिन्दन्ति. सक्कं देवराजानं मारेय्याति इदं सम्भावनवसेन वुत्तं. न हि तादिसा महानुभावा यक्खा सत्थघातारहा होन्ति देवासुरयुद्धेपि तेसं सत्थप्पहारेन मरणाभावा.

१८८. पहारो न दातब्बोति सम्बन्धो. अमनुस्सं कोधचित्तेन पहरन्तस्स दुक्कटमेव. चिकिच्छाधिप्पायेन पहरन्तस्स अनाचारोति गहेतब्बो. तालपण्णं…पे… बन्धितब्बन्ति अमनुस्सा तालपण्णबन्धनेन पलायन्तीति कत्वा वुत्तं, इदञ्च गिहीनं वेज्जकम्मवसेन कातुं न वट्टति.

१८९. यो रुक्खेन ओत्थतोपि न मरतीतिआदीसु यं वत्तब्बं, तं भूतगामसिक्खापदट्ठकथायं सयमेव वक्खति, तं तत्थेव गहेतब्बं.

१९०. दब्बूपकरणानीति केहिचि छिन्दित्वा ठपितानि सपरिग्गहितानि सन्धाय वुत्तं. तत्थ हि ठानाचावनाभावेन विनासाधिप्पायस्स दुक्कटं वुत्तं. खिड्डाधिप्पायेनापि दुक्कटन्ति सुक्खतिणादीसु अग्गिकरणं सन्धाय वुत्तं, अल्लेसु पन कीळाधिप्पायेनपि करोन्तस्स पाचित्तियमेव. पटिपक्खभूतो, पटिमुखं गच्छन्तो वा अग्गि पटग्गि, तस्स अल्लतिणादीसुपि दानं अनुञ्ञातं, तं देन्तेन दूरतो आगच्छन्तं दावग्गिं दिस्वा विहारस्स समन्ततो एकक्खणे अदत्वा एकदेसतो पट्ठाय विहारस्स समन्ततो सणिकं झापेत्वा यथा महन्तोपि अग्गि विहारं पापुणितुं न सक्कोति, एवं विहारस्स समन्ता अब्भोकासं कत्वा पटग्गि दातब्बो, सो दावग्गिनो पटिपथं गन्त्वा एकतो हुत्वा तेन सह निब्बाति. परित्तकरणन्ति समन्ता रुक्खतिणादिच्छेदनपरिखाखणनादिआरक्खकरणं, तेनाह तिणकुटिकानं समन्ता भूमितच्छनन्तिआदि.

१९१. खेत्तमेव ओतिण्णत्ता पाराजिकन्ति द्वीसु एकस्सापि अन्तोगधत्ता ‘‘द्वीही’’ति वुत्तखेत्ते एकस्सापि ओतिण्णत्ता पाराजिकं, ‘‘द्वीहि एव मारेहि न एकेना’’ति नियमिते पन एकेनेव मारिते नत्थि पाराजिकन्ति वदन्ति, एवं द्वे एव पुरिसातिआदीसुपि. पुब्बे कतसीसच्छेदपयोगतो अञ्ञो पयोगो जीवितिन्द्रियुपच्छेदको न उपलब्भति, पठमेन पयोगेनस्स ¶ जीवितिन्द्रियं उपच्छिज्जतीति ‘‘सीसच्छेदकस्सा’’ति वुत्तं, यं पन सारत्थदीपनियं ‘‘जीवितिन्द्रियस्स अविज्जमानत्ता’’ति कारणं वुत्तं, तं अकारणं जीवितिन्द्रियसन्निस्सितचित्तसन्ततिं ¶ विना उक्खिपनसन्निरुज्झनादिवसप्पवत्तस्स गमनस्स असम्भवतो. न हि वायुवेगेन पण्णपटादयो विय कायो गच्छति, न च उक्खिपने पवत्ताव चित्तजविञ्ञत्तिआदयोव निक्खिपनादिनोपि हेतुभूताति सक्का वत्तुं विच्छिन्दित्वा पवत्तनतो. पुब्बे अनाहितवेगापि हि काचि सरीसपजाति द्विधा छिन्ना छेदनमत्ता द्वीहि विभागेहि कतिपयक्खणं द्वीसु दिसासु गच्छति, तत्थ च यस्मिं भागे हदयवत्थु तिट्ठति, तत्रट्ठं पञ्चद्वारावज्जनचित्तं द्वीसुपि भागेसु कायप्पसादे घट्टितं फोट्ठब्बं आलम्बित्वा उप्पज्जति, ततो तदारम्मणमेव यथारहमेकस्मिं भागे एकदा अञ्ञस्मिं अञ्ञदाति एवं परियायेन कायविञ्ञाणं उप्पज्जति, ततो हदयवत्थुस्मिंयेव सम्पटिच्छनादिवीथिचित्तानि भवङ्गन्तरितानि मनोद्वारवीथिविञ्ञाणानि च विञ्ञत्तिजनकानि उप्पज्जन्ति, ये हि उभयभागा गच्छन्ति वा चलन्ति वा फन्दन्ति वा. चित्तस्स पन लहुपरिवत्तिया एकक्खणे उभयभागापि चलन्ता विय उपट्ठहन्ति, सेय्यथापि नाम कुक्कुळादिनरकेसु निमुग्गसकलसरीरस्स सत्तस्स एकस्मिं खणे सकलसरीरेपि कायविञ्ञाणदुक्खं उप्पज्जमानं विय उपट्ठाति, एवंसम्पदमिदं दट्ठब्बं, ततो पन यस्मिं भागे जीवितिन्द्रियं ससेसकम्मजरूपं निरुज्झति, तत्थ कायविञ्ञाणं नप्पवत्तति, हदयवत्थुसहितभागेयेव याव जीवितिन्द्रियनिरोधा पवत्तति.

ननु नरकादीसु एकाबद्धे सरीरे सब्बत्थ परियायेन कायविञ्ञाणसमुप्पत्ति युत्ता होतु, द्विधा हुत्वा विच्छिन्ने पन भागद्वये कथन्ति? नायं दोसो. सरीरे हि एकाबद्धता नाम परमत्थधम्मब्यतिरित्ता काचि नत्थि परवादीनं अवयवीआदि विय, कम्मादिएककारणपुञ्जायत्तताय बहूनं सहुप्पत्तियेव एकाबद्धता. तत्थ च सत्थप्पहारादिविरुद्धपच्चयोपनिपातेन विभिन्नानम्पि कम्मादिएककारणानं पुञ्जायत्तता न विगच्छति, याव सा न विगच्छति, ताव अविच्छिन्नाव तत्थ विञ्ञाणप्पवत्ति. विभिन्नानं पन कम्मजरूपानं अञ्ञेसञ्च सेसतिसन्ततिरूपानञ्च उपत्थम्भनभावेन चिरं पवत्तितुं न सक्कोन्ति, याव च धरन्ति, ताव विञ्ञाणपच्चया होन्ति, विञ्ञाणेन च तेसं ¶ चलनगमनादिदेसन्तरुप्पत्ति. तस्मा कबन्धस्सपि धावक्खणे सविञ्ञाणजीवितिन्द्रियं अत्थेव, तञ्च सीसच्छेदकप्पयोगेनेव सीघं पतति, ततो अञ्ञप्पयोगस्स सरीरे विसेसुप्पादनतो पुरेतरमेव पठमेनेव किच्चनिप्फत्तितो सीसच्छेदकस्सेव कम्मबद्धोति गहेतब्बो. एवरूपानीति कबन्धवत्थुसदिसानि. इमस्स वत्थुस्साति आघातनवत्थुस्स. अत्थदीपनेति एकेन पुरिसेन पयोगेन वा मारिततासङ्खातस्स अत्थस्स दीपने.

१९२. पानपरिभोगेन ¶ वट्टतीति सम्बन्धो. एवं पन वुत्तत्ता ‘‘लोणसोवीरकं यामकालिक’’न्ति केचि वदन्ति, केचि पन ‘‘गिलानानं पाकतिकमेव, अगिलानानं पन उदकसम्भिन्न’’न्ति वुत्तत्ता ‘‘गुळं विय सत्ताहकालिक’’न्ति.

इति समन्तपासादिकाय विनयट्ठकथाय विमतिविनोदनियं

ततियपाराजिकवण्णनानयो निट्ठितो.

४. चतुत्थपाराजिकं

वग्गुमुदातीरियभिक्खुवत्थुवण्णना

१९३. अधिट्ठेमाति ¶ संविदहाम. इरियापथं सण्ठपेत्वाति पधानानुरूपं कत्वा. अनागतसम्बन्धे पन असतीति भासितो भविस्सतीति पाठसेसं कत्वा अनागतसम्बन्धे असति. भासितोति अतीतवचनं कथं अनागतवचनेन सम्बन्धमुपगच्छतीति आह लक्खणं पनातिआदि. ईदिसे हि ठाने धातुसम्बन्धे पच्चयाति इमिना लक्खणेन धात्वत्थसम्बन्धे सति अयथाकालविहितापि पच्चया साधवो भवन्तीति सद्दसत्थविदू वदन्ति.

१९४. वण्णवाति इमिना अभिनवुप्पन्नवण्णता वुत्ता. पसन्नमुखवण्णाति इमिना मुखवण्णस्स अतिपणीतता वुत्ता. विप्पसन्नच्छविवण्णाति इमिना पकतिसरीरवण्णस्सेव यथावुत्तनयेन विप्पसन्नता वुत्ता. यस्मा इन्द्रियानं उपादारूपत्ता निस्सयवसेनेव पीणनन्ति आह ‘‘अभिनिविट्ठोकासस्स परिपुण्णत्ता’’ति. पञ्चप्पसादानं विय हदयरूपस्सापि परिपुण्णता वुत्तायेवाति ¶ आह ‘‘मनच्छट्ठानं इन्द्रियान’’न्ति. उद्देसं परिपुच्छं अनुयुञ्जन्ता इमं सरीरसोभं नेव पापुणिंसूति सम्बन्धो. यथा तन्ति एत्थ तन्ति निपातमत्तं. चतुचक्कन्ति एत्थ पवत्तनट्ठेन इरियापथोव चक्कन्ति वुत्तो.

१९५. उपलब्भन्तीति दिस्सन्ति, ञायन्तीति अत्थो. पचन्तोति पीळेन्तो, गेहादीनि वा सयं डहन्तो, अञ्ञेहि वा पाचेन्तो. उद्धतेति उद्धच्चपकतिके. उन्नळेति उग्गतनळसदिसेन उग्गततुच्छमानेन सहिते. चपलेति पत्तचीवरमण्डनादिना चापल्लेन युत्ते. मुखरेति खरवचने. पाकतिन्द्रियेति असंवुतत्ता गिहिकाले विय पकतियं ठितिन्द्रिये. इरियापथसण्ठपनादीनीति आदि-सद्देन पच्चयपटिसेवनसामन्तजप्पानं गहणं वेदितब्बं. परमसल्लेखवुत्तीहि महाअरियवंसेहि भिक्खूहि निवुत्थसेनासनानि लोकसम्मतसेनासनानि नाम. परिपाचेतुन्ति विम्हापनवसेन परिणामेतुं. भिक्खाचारे असम्पज्जमानेति इदं जनपदचारिकं ¶ चरन्तीति इमिना सम्बन्धितब्बं, न पन पाळिं वाचेन्तोतिआदीहि, तानि पन पदानि अत्तनो निरन्तरवासट्ठानेपि जनपदेसुपि कत्तब्बकिच्चदस्सनवसेन वुत्तानि, तानि च ते वत्तसीसेन करोन्ति, न लाभनिमित्तं, तेनाह तन्तीतिआदि. किच्छेनाति इमस्सेव वेवचनं कसिरेनाति. तदुभयम्पि पारमीपूरणवायामं सन्धाय वुत्तं. साधारणपरिक्खारभावेनाति सङ्घिकपरिक्खारभावेन. तथाभावतो थेनेत्वाति अविस्सज्जियअवेभङ्गियभावतो थेनेत्वा, न ठानाचावनवसेनाति अधिप्पायो, तेनाह ‘‘कुलदूसकदुक्कटं आपज्जती’’ति. असन्तन्ति इमस्स अभूतन्ति इदं कारणवचनं, अनुप्पन्नत्ता अविज्जमानन्ति अत्थो. कितवस्सेवाति कितवस्स सकुणगहणमिव. केराटिकस्साति सठस्स. समणोति गोत्तमत्तं अनुभोन्ति धारेन्तीति गोत्रभुनो, नाममत्तसमणाति अत्थो. दुज्जानपरिच्छेदन्ति अनन्तदुक्खत्ता ‘‘एत्तकं दुक्ख’’न्ति सङ्ख्यावसेन परिच्छिन्दित्वा ञातुं सब्बञ्ञुतञ्ञाणेनापि दुक्करं, न पन सरूपवसेन ञातुं बुद्धञाणस्स अविसयभावा.

अधिमानवत्थुवण्णना

१९६. अरहत्तेति अग्गफले. ञाणचक्खुनाति पच्चवेक्खणञाणसङ्खातेन चक्खुना, अथ वा फलचित्तसम्पयुत्तेनेव ञाणचक्खुना. अत्तना सम्पयुत्तेनापि ¶ हि ञाणेन असम्मोहतो सयं दिट्ठं नाम होति, तथा तस्मिं अदिट्ठेति अत्थो. सब्बेसं किलेसानं पहायकवसेन आजानाति, समन्ततो सब्बेन वा पकारेन जानातीति ‘‘अञ्ञा’’ति अग्गमग्गो वुच्चति, तदुपचारेन पन तप्फलम्पीति आह ‘‘अञ्ञं ब्याकरिंसूति अरहत्तं ब्याकरिंसू’’ति. अन्तरा ठपेतीति सेखभूमियं अधिमानो ठपेति. किलेससमुदाचारं अपस्सन्तोति पुरिममग्गत्तयवज्झानंयेव किलेसानं वसेन वुत्तं, न भवरागादीनं.

सविभङ्गसिक्खापदवण्णना

१९७. पकतिमनुस्सेहि उत्तरितरानं बुद्धादिउत्तमपुरिसानं अधिगमधम्मो उत्तरिमनुस्सधम्मोति आह उत्तरिमनुस्सानन्तिआदि. पाळियं (पारा. १९८) ‘‘अत्थि च मे एते धम्मा मयी’’ति एत्थ मेति इदं पदपूरणमत्तं. अधिगन्तब्बतो अधिगमसङ्खातस्स झानादिनो पुच्छा अधिगमपुच्छा, सा च झानादीसु सामञ्ञतो पवत्ताति इदानि तत्थ पठमज्झानं वा दुतियादीसु अञ्ञतरं वा तत्थापि कसिणादिआरम्मणेसु कतरमारम्मणं झानं वा लोकुत्तरेसु च सोतापत्तिमग्गं वा सकदागामिमग्गादीसु अञ्ञतरं वा तत्थापि सुञ्ञतविमोक्खं ¶ वा अप्पणिहितविमोक्खादीसु अञ्ञतरं वाति एवं पच्चेकं भेदनिद्धारणवसेन पुच्छनाकारं दस्सेतुं पाळियं (पारा. १९८) ‘‘पुन कतमेसं त्वं धम्मानं लाभी’’ति अयं पुच्छा दस्सिताति दट्ठब्बा, तेनाह पठममग्गादीसूतिआदि. याय अनुक्कमपटिपत्तिया लोकुत्तरो अधिगमो आगच्छति, सा पुब्बभागपटिपत्ति आगमनपटिपदा. न सुज्झतीति पुच्छियमानो पटिपत्तिक्कमं उल्लङ्घित्वा कथेति. अपनेतब्बोति तया वुत्तक्कमेनायं न सक्का अधिगन्तुन्ति अधिगतमानतो अपनेतब्बो. सन्निहितेसु कप्पियेसुपि चतूसु पच्चयेसु अलग्गत्ता ‘‘आकासे पाणिसमेन चेतसा’’ति वुत्तं. वुत्तसदिसं ब्याकरणं होतीति योजना. खीणासवपटिपत्तिसदिसा पटिपदा होति सुविक्खम्भितकिलेसत्ता. इदञ्च अरहत्तं पटिजानन्तस्स वसेन वुत्तं, तेनाह खीणासवस्स नामातिआदि. एवं सुविक्खम्भितकिलेसस्स वत्तनसेक्खधम्मपटिजाननं इमिना भयुप्पादनेन, अम्बिलादिदस्सने खेळुप्पादादिना च न सक्का वीमंसितुं, तस्मा तस्स वचनेनेव तं सद्धातब्बं. अयं भिक्खु सम्पन्नब्याकरणोति ¶ इदं न केवलं अभायनकमेव सन्धाय वुत्तं एकच्चस्स सूरजातिकस्स पुथुज्जनस्सापि अभायनतो, रज्जनीयारम्मणानं बदरसाळवादिअम्बिलमद्दनादीनं उपनयनेपि खेळुप्पादादितण्हापवत्तरहितं सब्बथा सुसोधितमेव सन्धाय वुत्तन्ति गहेतब्बं.

असन्तगुणसम्भावनलक्खणा पापिच्छाति आह या सा इधेकच्चोतिआदि. आदि-सद्देन अस्सद्धोतिआदिपाठं सङ्गण्हाति. सामञ्ञं दुप्परामट्ठन्ति समणधम्मसङ्खातं सामञ्ञं खण्डसीलादिताय दुप्परामट्ठं दुट्ठु गहितं निरयाय निरयदुक्खाय तं पुग्गलं तत्थ निरये उपकड्ढति निब्बत्तापेतीति अत्थो. सिथिलोति ओलीयित्वा करणेन सिथिलगाहेन कतो, सथेन वा साठेय्येन आदिण्णो सिथिलो. परिब्बजोति समणभावो. भिय्योति पुब्बे विज्जमानानं रागरजादीनं उपरि अपरम्पि रजं आकिरतीति अत्थो. भिक्खुभावोति अधम्मिकपटिञ्ञामत्तसिद्धो भिक्खुभावो. अजानमेवाति एत्थ एव-सद्दो अवधारणे अजानन्तो एवाति, ‘‘अजानमेव’’न्तिपि पाठो, तत्थ पन एवं जानामि एवं पस्सामीति योजेतब्बं.

पदभाजनीयवण्णना

१९९. एवन्ति च पठमज्झानादिपरामसनं पठमज्झानं जानामि दुतियादिझानन्ति. असुभज्झानादीनीति आदि-सद्देन कायगतासतिज्झानं कसिणज्झानं कसिणमूलकानि आरुप्पज्झानानि च सङ्गण्हाति. विमोक्खोति चतुब्बिधो मग्गो, तस्स सगुणतो सुञ्ञतादिनामं दस्सेन्तो आह सो पनायन्तिआदि. मग्गो हि नाम पञ्चहि कारणेहि नामं लभति ¶ सरसेन वा पच्चनीकेन वा सगुणेन वा आरम्मणेन वा आगमनेन वा. सचे हि सङ्खारुपेक्खा अनिच्चतो सङ्खारे सम्मसित्वा वुट्ठाति, मग्गो अनिमित्तविमोक्खेन विमुच्चति. सचे दुक्खतो सम्मसित्वा वुट्ठाति, अप्पणिहितविमोक्खेन विमुच्चति. सचे अनत्ततो सम्मसित्वा वुट्ठाति, सुञ्ञतविमोक्खेन विमुच्चति, इदं सरसतो नामं नाम. यस्मा पनेस सङ्खारेसु अनिच्चानुपस्सनाय निच्चनिमित्तं पजहन्तो आगतो, तस्मा अनिमित्तो. दुक्खानुपस्सनाय सुखसञ्ञं पणिधिं पत्थनं पहाय आगतत्ता अप्पणिहितो. अनत्तानुपस्सनाय अत्तसञ्ञं पहाय अत्तसुञ्ञतादस्सनवसेन सुञ्ञता होति, इदं पच्चनीकतो नामं नाम. रागादीहि ¶ पनेस सुञ्ञतत्ता सुञ्ञतो, रूपनिमित्तादीनं, रागनिमित्तादीनं एव वा अभावेन अनिमित्तो, रागपणिधिआदीनं अभावतो अप्पणिहितोति वुच्चति, इदं अस्स सगुणतो नामं. रागादिसुञ्ञं अनिमित्तं अप्पणिहितञ्च निब्बानं आरम्मणं करोतीति सुञ्ञतो अनिमित्तो अप्पणिहितोति वुच्चति, इदमस्स आरम्मणतो नामं. आगमनं पन दुविधं विपस्सनागमनं मग्गागमनञ्च. तत्थ मग्गे विपस्सनागमनमेव, फले पन मग्गानन्तरे मग्गागमनं, फलसमापत्तियं विपस्सनागमनम्पि. अनत्तानुपस्सनावसेन मग्गो सुञ्ञतो अनिच्चदुक्खानुपस्सनाहि अनिमित्तो अप्पणिहितोति एवं विपस्सना अत्तनो नामं मग्गस्स देति, मग्गो फलस्साति इदं आगमनतो नामं.

सुञ्ञत्ताति विवित्तत्ता. रागादयोव पतिट्ठानट्ठेन पणिधीति आह ‘‘रागदोसमोहपणिधीन’’न्ति. इमिस्सा विज्जायाति दिब्बचक्खुविज्जायातिआदिना एकेकविज्जं सन्धाय वदन्ति. एवं एकिस्सापि नामं अग्गहेत्वापि ता एव सन्धाय ‘‘विज्जानं लाभिम्ही’’ति भणन्तोपि पाराजिको होतीति सङ्खेपट्ठकथायं अधिप्पायो. वत्थुविज्जादीनि पन सन्धाय वदन्तो न होति. एकेककोट्ठासवसेनाति महाअट्ठकथायं वुत्तनयेन लोकुत्तरविसेसं अकत्वा केवलं ‘‘सतिपट्ठानानं लाभी’’ति एकेककोट्ठासवसेनाति अधिप्पायो. तत्थाति तेसु कोट्ठासेसु. किलेसानं पहानं नाम अभावमत्तम्पि लोकुत्तरकिच्चत्ता लोकुत्तरन्ति समत्थेतुं तं पनातिआदि वुत्तं. रागा चित्तं विनीवरणताति रागतो चित्तस्स विनीवरणता, ततो रागतो विमुत्तत्ता एव वीतरागनीवरणताति अत्थो, या च पञ्च विज्जाति योजेतब्बं. न आगताति इध पदभाजने ‘‘ञाणन्ति तिस्सो विज्जा’’ति (पारा. १९९) वुत्तत्ता सेसा पञ्च विज्जा न आगताति अत्थो. निब्बत्तितलोकुत्तरत्ताति लोकियधम्मसाधारणसङ्खतस्सापि अभावा लोकियेहि सब्बथा असम्मिस्सलोकुत्तरत्ता. अञ्ञन्ति सङ्खेपट्ठकथादिं वदन्ति, तम्पि तत्थेव पटिक्खित्तन्ति सम्बन्धो.

२००. पुन ¶ आनेत्वा पठमज्झानादीहि न योजितन्ति एत्थ ‘‘पठमज्झानेनाति पाठो’’ति केचि वदन्ति, तं युत्तमेव आदि-सद्देन गहेतब्बस्स ¶ झानस्स अभावा. पठमज्झानमूलकञ्हि एकमेव खण्डचक्कं. कत्तुसाधनोपि भणित-सद्दो होतीति आह अथ वातिआदि. येन चित्तेन मुसा भणति, तेनेव चित्तेन न सक्का ‘‘मुसा भणामी’’ति जानितुं, अन्तरन्तरा पन अञ्ञाहि मनोद्वारवीथीहि ‘‘मुसा भणामी’’ति जानातीति वुत्तं ‘‘भणन्तस्स होति मुसा भणामी’’ति. अयमेत्थ अत्थो दस्सितोति तीहि अङ्गेहि समन्नागतो मुसावादोति अयमत्थो दस्सितो. दवाति सहसा. रवाति अञ्ञं वत्तुकामस्स खलित्वा अञ्ञभणनं. तं जानातीति तंञाणं, तस्स भावो तंञाणता, ञाणस्स विसयविसयीभावेन अत्तसंवेदनन्ति अत्थो. ञाणसमोधानन्ति बहूनं ञाणानं एकस्मिं खणे समोधानं, सहुप्पत्तीति अत्थो. येन चित्तेन ‘‘मुसा भणिस्स’’न्ति जानातीति इदं पुब्बभागचेतनञ्च सन्निट्ठानचेतनञ्च एकतो कत्वा वुत्तं. येन चित्तेन पुब्बभागचेतनाभूतेन सन्निट्ठानचेतनाभूतेन च विसंवादितब्बसत्तसङ्खारे जानाति, येन चित्तेन मुसा भणिस्सन्ति अत्थो. तेनेव…पे… परिच्चजितब्बाति तेनेव चित्तेन ‘‘एवं अहं मुसा भणामी’’ति वा ‘‘भणित’’न्ति वा तदेव मुसावादचित्तमारम्मणं कत्वा भिक्खु जानातीति एवं पुब्बापरसन्निट्ठानचेतनाक्खणेसु तीसु एकेनेव चित्तेन ञाणविसयञ्च ञाणञ्चाति उभयम्पि एकक्खणे पुग्गलो जानातीति अयं तंञाणता परिच्चजितब्बा विसयस्सेव तदा पकासनतोति अधिप्पायो, तेनाह न हीतिआदि. यदि ञाणस्स अत्तनो सरूपं न ञायति, कथं पच्छिमं चित्तं जानातीति आह पुरिमं पुरिमन्तिआदि. तत्थ भणिस्सामीतिआदिना तीसु कालेसु उप्पन्नं पुरिमपुरिमचित्तं अत्तानं विसयं कत्वा उप्पज्जमानस्स पच्छिमस्स पच्छिमस्स चित्तस्स तथा उप्पत्तिया पच्चयो होतीति अत्थो. तेनाति येन कारणेन तीसु खणेसु चित्तानि तदञ्ञेहेव चित्तेहि जानितब्बानि, तानि च पुरिमपुरिमचित्तेनेव अवस्सं उप्पज्जन्ति, तेन कारणेनाति अत्थो. तस्मिं सतीति भणिस्सामीति पुब्बभागे सति. सेसद्वयन्ति भणामि, भणितन्ति इदं द्वयं न हेस्सतीति एतं नत्थीति योजना होतियेवाति अत्थो. एकं विय पकासतीति भिन्नक्खणानम्पि निरन्तरुप्पत्तिया ‘‘तदेवेद’’न्ति गहेतब्बतं सन्धाय वदति.

बलवधम्मविनिधानवसेनाति ¶ बलवगाहस्स विनिधानवसेन. दुब्बलदुब्बलानन्ति दुब्बलदुब्बलानं गाहानं. सकभावपरिच्चजनवसेनाति अत्तनो सन्तकभावस्स परिच्चजनवसेन.

२०७. उत्तासितत्ताति भयं जनेत्वा विय पलापितत्ता. एवं पलापितो न पुन तं ठानं आगच्छतीति आह ‘‘पुन अनल्लीयनभावदस्सनवसेना’’ति. खेट-सद्दं सद्दत्थविदू उत्तासत्थे ¶ पठन्तीति आह स्वायमत्थोतिआदि. अणु एव अणुसहगतं, अणुत्तेन वा युत्तन्ति अत्थो.

वत्तुकामवारकथावण्णना

२१५. केवलञ्हियन्ति केवलञ्हि अयं वारोति अज्झाहरितब्बं. तङ्खणञ्ञेव जानातीति पकतिया वचनानन्तरं विजाननं सन्धाय वुत्तं. एवं पन वचीभेदं अकत्वा ‘‘यो इमम्हा आवासा पठमं पक्कमिस्सति, नं मयं ‘अरहा’ति जानिस्सामा’’ति एवं कतसङ्केता विहारा पठमं पक्कमनेन तस्मिं खणे अवीतिवत्तेपि निक्खन्तमत्तेपि पाराजिकं अञ्ञतरो भिक्खु ‘‘मं ‘अरहा’ति जानन्तू’’ति तम्हा आवासा पठमं पक्कामीति आगतवत्थुम्हि (पारा. २२७) विय. विञ्ञत्तिपथेति कायवचीविञ्ञत्तीनं गहणयोग्गे पदेसे, तेन विञ्ञत्तिपथं अतिक्कमित्वा ठितो कोचि दिब्बेन चक्खुना कायविकारं दिस्वा दिब्बाय सोतधातुया वचीभेदञ्च सुत्वा जानाति, न पाराजिकन्ति दीपेति. पाळियं ‘‘पटिविजानन्तस्स आपत्ति पाराजिकस्सा’’ति (पारा. २१५) इमस्मिं पटिविजाननवारे यस्मिं अक्खरे वा उच्चारिते कायप्पयोगे वा कतेयेव अयं पठमज्झानं समापन्नोतिआदिअत्थं परो विजानाति, ततो पुरिमेसु अक्खरुच्चारणादिप्पयोगेसु थुल्लच्चयं आपज्जित्वा पच्छिमेव पटिविजाननपयोगक्खणे पाराजिकं आपज्जतीति वेदितब्बं थुल्लच्चयस्सेवेत्थ सामन्तत्ता, तेनेव बुद्धदत्ताचरियेन –

‘‘दुक्कटं पठमस्सेव, सामन्तमिति वण्णितं;

सेसानं पन तिण्णम्पि, थुल्लच्चयमुदीरित’’न्ति –

वुत्तं ¶ , अयञ्चत्थो ‘‘न पटिविजानन्तस्स आपत्ति थुल्लच्चयस्सा’’ति इमिना सुत्तेन सङ्गहितोति दट्ठब्बो. उग्गहपरिपुच्छादिवसेनातिआदिना झानसमाधिआदिसद्दानमत्थेसु पुब्बे अकतपरिचयत्ता सुत्वा ‘‘अत्थं ईदिस’’न्ति अजानित्वा केवलं ‘‘विसिट्ठो कोचि समणगुणो अनेन लद्धो’’ति परेन ञातेपि पाराजिकमेवाति दस्सेति.

अनापत्तिभेदकथावण्णना

२२०. अनुल्लपनाधिप्पायस्साति ‘‘एवं वुत्ते उत्तरिमनुस्सधम्मो मया पकासितो होती’’ति ¶ अमनसिकत्वा ‘‘नाहं, आवुसो, मच्चुनो भायामी’’तिआदिकं कथेन्तस्स. एवं कथेन्तो च वोहारतो अञ्ञं ब्याकरोन्तो नाम होतीति वुत्तं ‘‘अञ्ञं ब्याकरोन्तस्सा’’ति. भायन्तोति ‘‘ञत्वा गरहन्ति नु खो’’ति भायन्तो.

पदभाजनीयवण्णनानयो निट्ठितो.

विनीतवत्थुवण्णना

२२३. सेक्खभूमियन्ति इमिना झानभूमिम्पि सङ्गण्हाति. तिण्णं विवेकानन्ति कायचित्तउपधिविवेकानं. पिण्डाय चरणस्स भोजनपरियोसानताय वुत्तं ‘‘याव भोजनपअयोसान’’न्ति. अन्तरघरे भुत्वा आगच्छन्तस्सापि वुत्तनयेनेव सम्भावनिच्छाय चीवरसण्ठापनादीनि करोन्तस्स दुक्कटमेव, पाळियं पन दुक्करादिवत्थूसु ‘‘अनापत्ति अनुल्लपनाधिप्पायस्सा’’ति इदं थुल्लच्चयेनापि अनापत्तिदस्सनत्थं वुत्तं. उल्लपनाधिप्पायस्सापि हि ‘‘नावुसो, दुक्करं अञ्ञं ब्याकातु’’न्ति वुत्ते थुल्लच्चयमेव अत्तुपनायिकत्ताभावतोति दट्ठब्बं.

२२७. न दानाहं तत्थ गमिस्सामीति पुन तत्थ वसितट्ठाने न गमिस्सामि, एवं सति पठमं गतो अयं पुन च नागतो, तस्मा अरहाति मञ्ञिस्सन्तीति अधिप्पायो. तं ठानन्ति आवासं वातिआदिना पुब्बे परिच्छिन्नट्ठानं. पदसा गमनं सन्धाय कतिकाय कतत्ता यानेनातिआदि वुत्तं. विज्जामयिद्धिं सन्धाय ‘‘इद्धिया’’ति वुत्तं उल्लपनाधिप्पायस्स अभिञ्ञिद्धिया असम्भवतो. अञ्ञमञ्ञं रक्खन्तीति उल्लपनाधिप्पाये ¶ सतिपि एकस्सापि पठमगमनाभावा रक्खन्ति. सचे पन कतिकं कत्वा निसिन्नेसु एकं द्वे ठपेत्वा अवसेसा उल्लपनाधिप्पायेन एकतो गच्छन्ति, गतानं सब्बेसं पाराजिकमेव. तेसु यस्स उल्लपनाधिप्पायो नत्थि, तस्स अनापत्ति. एतन्ति हेट्ठा वुत्तं सब्बं कतिकवत्तं. नानावेरज्जकाति नानाजनपदवासिनो. सङ्घलाभोति यथावुड्ढं पापुणनककोट्ठासो. अयञ्च पटिक्खेपो अविसेसेत्वा करणं सन्धाय कतो, विसेसेत्वा पन ‘‘एत्तको असुकस्सा’’ति परिच्छिन्दित्वा अपलोकेत्वा दातुं वट्टति.

२२८. धम्मधातूति सब्बञ्ञुतञ्ञाणं, धम्मानं सभावो वा. उपपत्तीति अत्तभावं सन्धाय वदति. दुस्सद्धापया होन्तीति पुथुज्जने सन्धाय वुत्तं, न लक्खणत्थेरादिके अरियपुग्गले ¶ . वितुडेन्तीति विनिविज्झित्वा डेन्ति गच्छन्ति, फासुळन्तरिकायो छिद्दावछिद्दं कत्वा ताहि गच्छन्तीति निस्सक्कवसेन अत्थो. वितुदेन्तीति पाठे फासुळन्तरिकाहीति आधारत्थे निस्सक्कवचनं. लोहतुण्डेहीति काळलोहमयेहि तुण्डेहि. अच्छरियं वताति गरहितब्बताय अच्छरं पहरितुं युत्तरूपं. चक्खुभूताति लोकस्स चक्खु विय भूता सञ्जाता, चक्खुसदिसातिपि अत्थो. तस्सेव कम्मस्साति येन गोघातककम्मेनेव निरये निब्बत्तो, तस्सेवाति अत्थे गय्हमाने एकाय चेतनाय बहुपटिसन्धियो होन्तीति आपज्जति, न चेतं युत्तं एकस्स अम्बादिबीजस्स अनेकङ्कुरुप्पत्ति वियाति तं परिहरन्तो आह तस्स नानाचेतनाहि आयूहितस्सातिआदि, तेन गोघातककम्मक्खणे पुब्बचेतना अपरचेतना सन्निट्ठापकचेतनाति एकस्मिम्पि पाणातिपाते बहू चेतना होन्ति, नानापाणातिपातेसु वत्तब्बमेव नत्थि. तत्थ एकाय चेतनाय नरके पचित्वा तदञ्ञचेतनासु एकाय अपरापरियचेतनाय इमस्मिं पेतत्तभावे निब्बत्तोति दस्सेति, तेनाह ‘‘अवसेसकम्मं वा कम्मनिमित्तं वा’’ति. एत्थ च कम्मसरिक्खविपाकुप्पत्तिं सन्धाय कम्मकम्मनिमित्तानमेव गहणं कतं, न गतिनिमित्तस्स, तेनाह ‘‘अट्ठिरासियेव निमित्तं अहोसी’’ति. पाळियं वितच्छेन्तीति तुण्डेहि तच्छेन्तो विय लुञ्चन्ति. विराजेन्तीति विलिखन्ति.

२२९. वल्लूरविक्कयेनाति ¶ सुक्खापितमंसविक्कयेन. निप्पक्खचम्मेति विगतपक्खलोमचम्मे. एकं मिगन्ति दीपकमिगं. कारणाहीति घातनाहि. ञत्वाति कम्मट्ठानं ञत्वा.

२३०. मङ्गनवसेन उलतीति मङ्गुलि, विरूपबीभच्छभावेन पवत्ततीति अत्थो. चित्तकेळिन्ति चित्तरुचियं अनाचारकीळं.

२३१. निस्सेवालपणककद्दमोति तिलबीजकादिसेवालेन नीलमण्डूकपिट्ठिवण्णेन उदकपिट्ठे उदकं नीलवण्णं कुरुमानेन पणकेन कद्दमेन च विरहितो. उण्हभावेन तपनतो तपं उदकं अस्साति तपोदकाति वत्तब्बे क-कारलोपं कत्वा ‘‘तपोदा’’ति वुच्चति. पेतलोकोति पकट्ठेन अकुसलकम्मेन सुगतितो दुग्गतिं इतानं गतानं लोको समूहो, निवासट्ठानं वा. कतहत्थाति धनुसिप्पे सुट्ठु सिक्खितहत्था, अविरज्झनलक्खवेधाति अत्थो. सिप्पदस्सनवसेन राजकुलादीसु राजसमूहं उपेच्च कतं असनं सरक्खेपो एतेसन्ति कतुपासना, सब्बत्थ दस्सितसिप्पाति अत्थो. पभग्गोति पभञ्जितो, पराजितोति अत्थो.

२३२. आनेञ्जसमाधिन्ति ¶ अरूपसमापत्तियं निरुद्धे सतिपि सद्दकण्टकेन उट्ठानारहो रूपावचरसमाधियेव इध वत्तब्बोति आह अनेजं अचलन्तिआदि. समाधिपरिपन्थकेति वितक्कादिके सन्धाय वदति, इदं पन पठमबोधियं उप्पन्नम्पि वत्थुं अनाचारमत्तवसेन भिक्खूहि चोदितेपि भगवता ‘‘अनापत्ति, भिक्खवे, मोग्गल्लानस्सा’’ति (पारा. २२८) एवं आयतिं अत्तना पञ्ञपियमानपाराजिकानुगुणं तदा एव विनीतन्ति धम्मसङ्गाहकत्थेरेहि पच्छा पञ्ञत्तस्स इमस्स सिक्खापदस्स विनीतवत्थुभावेन सङ्गहमारोपितन्ति दट्ठब्बं. सावकानं उप्पटिपाटिया अनुस्सरणाभावं दस्सेतुं ‘‘न उप्पटिपाटिया’’ति वुत्तं. दुक्करं कतन्ति अनन्तरे पञ्चकप्पसतिके काले विञ्ञाणसन्ततिं अदिस्वापि असम्मुय्हित्वा परतो ततियत्तभावे दिट्ठचुतिचित्तेन सद्धिं वत्तमानभवपटिसन्धिया अनुमानेनापि कारियकारणाभावगहणं नाम सावकानं दुक्करत्ता वुत्तं. पटिविद्धाति ¶ पटिविद्धसदिसा. यथा नाम सत्तधा फालितस्स चामरवाललोमस्स एकाय अग्गकोटिया अपरस्स वाललोमंसुनो कोटिं दूरे ठत्वा विज्झेय्य आवुनन्तो विय पटिपादेय्य, एवमेव इमिनापि दुक्करं कतन्ति वुत्तं होति. एतदग्गन्ति एसो अग्गो. यदिदन्ति यो अयं.

निगमनवण्णना

२३३. इधाति भिक्खुविभङ्गे. उद्दिट्ठपाराजिकपरिदीपनन्ति सिक्खापदेसु पातिमोक्खुद्देसवसेन उद्दिट्ठपाराजिकपरिदीपनं, न पन सब्बस्मिं पाराजिकविभङ्गे आगतआपत्तिपरिदीपनं तत्थ थुल्लच्चयादीनम्पि आगतत्ता तेनेव उद्दिट्ठ-सद्देन वुत्तविभङ्गस्स निद्देसत्ता. भिक्खुनीनं असाधारणानि चत्तारीति उब्भजाणुमण्डलिका (पाचि. ६५८) वज्जप्पटिच्छादिका (पाचि. ६६५) उक्खित्तानुवत्तिका (पाचि. ६६९) अट्ठवत्थुकाति (पाचि. ६७५) इमानि भिक्खूहि असाधारणानि भिक्खुनीनं एव पञ्ञत्तानि पाराजिकानीति अत्थो. वत्थुविपन्नाति पब्बज्जुपसम्पदानं वत्थुभावो वत्थु नाम, तेन वत्थुमत्तेन विपन्ना, विपन्नवत्थुकाति अत्थो. अहेतुकपटिसन्धिकाति मग्गानुप्पत्तिकारणमाह. किञ्चापि दुहेतुकानम्पि मग्गो नुप्पज्जति, ते पन पब्बज्जुपसम्पदासु ठत्वा आयतिं मग्गहेतुं सम्पादेतुं सक्कोन्ति, अहेतुका पन परिसुद्धे चतुपारिसुद्धिसीले ठत्वा सम्पादेतुं न सक्कोन्ति, तस्मा ते तम्पि पटिच्च वत्थुविपन्नावाति वेदितब्बा. पाराजिकाति कम्मविपत्तिया पटिसन्धिक्खणेयेव पराजयं आपन्ना. थेय्यसंवासकादीनं गिहिभावे ठत्वा विपस्सनाय वायमन्तानम्पि तस्मिं अत्तभावे मग्गुप्पत्तिअभावतो ‘‘मग्गो पन वारितो’’ति वुत्तं. दीघताय लम्बमानं अङ्गजातं लम्बं नाम, तं यस्स अत्थि सो लम्बी. सो एत्तावता न पाराजिको, तं पन दीघं अङ्गजातं ¶ अत्तनो मुखे वा वच्चमग्गे वा सेवनाधिप्पायेन पवेसेन्तोव पाराजिको, इध पन वच्चमग्गे पवेसेन्तोव अधिप्पेतो मुदुपिट्ठिकेनेव मुखे पवेसनस्स वुत्तत्ता. सोपि हि कतपरिकम्मताय मुदुभूताय पिट्ठिया ओनमित्वा अत्तनो अङ्गजातं मुखेन गण्हन्तोव पाराजिको होति, न केवलो. यो पन मुखेन अत्तनो वच्चमग्गं वा परेसं वच्चमग्गमुखं वा इत्थीनं पस्सावमग्गं वा गण्हाति, तस्स च पुरिसनिमित्तेन पुरिसनिमित्तं छुपन्तस्स च मग्गेन मग्गपटिपादनेपि पाराजिकं न होति पुरिसनिमित्तेन तदितरमग्गसम्पटिपादनेनेव मेथुनधम्मवोहारतो ¶ . परस्स अङ्गजाते अभिनिसीदतीति परस्स उत्तानं सयन्तस्स कम्मनिये अङ्गजाते अत्तनो वच्चमग्गं पवेसेन्तो तस्सूपरि निसीदति, इदञ्च उपलक्खणमत्तं परेसं अङ्गजातं वच्चमग्गे पवेसेन्तो सादियन्तोपि पाराजिकोव, बलक्कारेन पन वच्चमग्गे वा मुखे वा परेन पवेसियमानो यदि न सादियति, अनापत्तिकोव. एत्थ असादियनं नाम दुक्करं विरज्जितब्बतो. एत्थ च अनुपसम्पन्नभावे ठत्वा मातुपितुअरहन्तेसु अञ्ञतरं घातेन्तो भिक्खुनिं दूसेन्तो च सामणेरपब्बज्जम्पि न लभतीति दस्सनत्थं विसुं गहितत्ता मातुघातकादीनं चतुन्नं ततियपठमपाराजिकेसु अन्तोगधता वेदितब्बा. यथा एत्थ, एवं गिहिभावे ठत्वा लोहितुप्पादं करोन्तो लोहितुप्पादकोवाति गहेतब्बं. एतेन परियायेनाति उभिन्नं रागपरियुट्ठानसङ्खातेन परियायेन. दुतियविकप्पे कच्चि अत्थाति पदच्छेदो वेदितब्बो.

इति समन्तपासादिकाय विनयट्ठकथाय विमतिविनोदनियं

चतुत्थपाराजिकवण्णनानयो निट्ठितो.

निट्ठितो च पाराजिककण्डवण्णनानयो.

२. सङ्घादिसेसकण्डो

१. सुक्कविस्सट्ठिसिक्खापदवण्णना

२३४. तेरसकस्साति ¶ ¶ तेरस सिक्खापदानि परिमाणानि अस्साति तेरसको, कण्डो, तस्स. समथे विपस्सनाय वा अभिरतिरहितो इध अनभिरतो, न पब्बज्जायाति आह ‘‘विक्खित्तचित्तो’’ति. विक्खित्तताय कारणमाह कामरागाइच्चादि.

२३५. अब्बोहारिकाति सीलविपत्तिवोहारं नारहतीति कत्वा वुत्तं. अकुसलभावे पनस्सा अब्बोहारता नत्थि.

२३६-७. चेतना-सद्दतो विसुं सं-सद्दस्स अत्थाभावं इक-पच्चयस्स च अत्थवन्ततं दस्सेतुं सञ्चेतना वातिआदि दुतियविकप्पो वुत्तो. सिखाप्पत्तो अत्थोति अधिप्पेतत्थं सन्धाय वुत्तं. आसयभेदतोति पित्तसेम्हपुब्बलोहितानं चतुन्नं आसयानं भेदेन. धातुनानत्ततोति रसरुहिरादीनं सत्तन्नं, पथवादीनं वा चतुन्नं धातूनं नानत्तेन. वत्थिसीसन्ति मुत्तवत्थितो मत्थकपस्सं. हत्थिमदचलनं नामञ्च सम्भवोति आह ‘‘सम्भवो निक्खमती’’ति. सम्भववेगन्ति सम्भवस्स ठानतो चवित्वा दकसोताभिमुखं ओतरणेन सञ्जातसरीरक्खोभवेगं. बाहुसीसन्ति खन्धप्पदेसं. दस्सेसीति एत्थ इति-सद्दो हेतुत्थो, तेन यस्मा कण्णचूळिकाहि सम्भवो निक्खमति…पे… सम्भवञ्च दस्सेसि, तस्मा ततियस्स भासितं सुभासितन्ति एवं योजना वेदितब्बा. दकसोतन्ति मुत्तस्स वत्थितो निक्खमनमग्गं, अङ्गजातप्पदेसन्ति वुत्तं होति. सुक्कञ्च नामेतं रसरुहिरादिसत्तदेहधातूसु मज्झिमधातुचतुजं अट्ठिमिञ्जादि विय पथवीधातुसङ्गहितं आहारूपजीवीनं सकलकायगतं अतिदहरदारकानम्पि अत्थेव, तं पन पन्नरससोळसवस्सुद्देसतो पट्ठाय सत्तानं समुप्पज्जनककामरागेहेव ठानतो चलति, चलितञ्च आपोधातुभावेन चित्तजमेव हुत्वा दकसोतं ओतरति, दकसोततो पन पट्ठाय ¶ चित्तपच्चयउतुजं होति मत्थलुङ्गतो चलितसिङ्घाणिका विय. येसं पन समुच्छेदनविक्खम्भनादीहि रागपरियुट्ठानं नत्थि ¶ , तेसं सुक्कविस्सट्ठि न सिया. इति यथाठानतो सुक्कस्स विस्सट्ठियेव रागचित्तसमुट्ठाना, न पकतिरूपं, तेनेव कथावत्थुअट्ठकथायं (कथा. अट्ठ. ३०७) ‘‘सुक्कविस्सट्ठि नाम रागसमुट्ठाना होती’’ति सुक्कस्स विस्सट्ठि एव रागसमुट्ठाना वुत्ता, न पकतिरूपं. छन्नं पन कामावचरदेवानं विज्जमानापि सुक्कधातु द्वयंद्वयसमापत्तिवसेन परियुट्ठितरागेनापि ठानतो न गळति, यथाठाने एव ठत्वा किञ्चि विकारं आपज्जमाना तङ्खणिकपरिळाहवूपसमावहा मेथुनकिच्चनिट्ठापिता होतीति वेदितब्बं. केचि पन ‘‘कायसम्फस्ससुखमेव तेसं कामकिच्च’’न्ति वदन्ति. खीणासवानं पन अनागामीनञ्च सब्बसो कामरागाभावेन सुक्कधातुविकारम्पि नापज्जतीति वेदितब्बं. रूपीब्रह्मानं पन विक्खम्भितकामरागेन जनितत्ता अनाहारूपजीवितत्ता च सब्बथा सुक्कधातुपि नत्थेव. तथेवाति मोचनस्सादेन निमित्ते उपक्कमतोतिआदिं अतिदिसति. ‘‘विस्सट्ठीति ठानाचावना वुच्चती’’ति पदभाजने (पारा. २३७) वुत्तत्ता ‘‘दकसोतं ओतिण्णमत्ते’’ति कस्मा वुत्तन्ति आह दकसोतोरोहणञ्चेत्थातिआदि. एत्थाति तीसुपि वादेसु. अधिवासेत्वाति निमित्ते उपक्कमित्वा पुन विप्पटिसारे उप्पन्ने मोचनस्सादं विनोदेत्वा. अन्तरा निवारेतुन्ति अत्तनो निमित्ते कतूपक्कमेन ठाना चुतं दकसोतं ओतरितुं अदत्वा अन्तरा निवारेतुं. मोचनस्सादेन हत्थपरिकम्मादिं करोन्तस्स मुत्तेपि दुक्कटमेव, निमित्ते उपक्कमाभावतो पन सङ्घादिसेसो न होतीति आह ‘‘हत्थ…पे… अनापत्ती’’ति. दकसोतोरोहणञ्चेत्थातिआदिना वुत्तविनिच्छयं सन्धाय ‘‘अयं सब्बाचरियसाधारणविनिच्छयो’’ति वुत्तं.

खोभकरणपच्चयो नाम विसभागभेसज्जसेनासनाहारादिपच्चयो. नानाविधं सुपिनन्ति खुभितवातादिधातूनं अनुगुणं. अनुभूतपुब्बन्ति पुब्बे भूतपुब्बं मनसा परिकप्पितपुब्बञ्च. सग्गनरकदेसन्तरादीनम्पि हि सङ्गहेत्वा वुत्तं. अत्थकामताय वा अनत्थकामताय वाति इदं देवतानं हिताहिताधिप्पायतं दस्सेतुं वुत्तं. अत्थाय वा अनत्थाय वाति सभावतो भवितब्बं हिताहितं सन्धाय वुत्तं. ननु देवताहि उपसंहरियमानानि आरम्मणानि परमत्थतो नत्थि, कथं तानि पुरिसो पस्सति, देवता वा तानि अविज्जमानानि उपसंहरन्तीति चोदनं मनसि कत्वा ¶ आह सो तासन्तिआदि. तेन ‘‘एवमेसो परिकप्पतू’’ति देवताहि चिन्तितमत्तेन सुपन्तस्स चित्तं भवङ्गसन्ततितो निपतित्वा देवताहि चिन्तितनियामेनेव परिकप्पमानं पवत्तति, एवं तेन परिकप्पमानानि आरम्मणानि देवताहि उपसंहटानि नाम होन्ति, तानि च सो देवतानुभावेन पस्सति नामाति दस्सेति. बोधिसत्तमाता विय पुत्तपटिलाभनिमित्तन्तिआदीसु ¶ बोधिसत्तस्स गब्भोक्कन्तिदिवसे महामायादेविया अत्तनो दक्खिणपस्सेन एकस्स सेतवरवारणस्स अन्तोकुच्छिपविट्ठभावदस्सनं पुत्तपटिलाभनिमित्तं सुपिनं नाम. अम्हाकं पन बोधिसत्तस्स ‘‘स्वे बुद्धो भविस्सती’’ति चातुद्दसियं पक्खस्स रत्तिविभायनकाले हिमवन्तं बिब्बोहनं कत्वा पुरत्थिमपच्छिमसमुद्देसु वामदक्खिणहत्थे दक्खिणसमुद्दे पादे च ओदहित्वा महापथविया सयनं एको, दब्बतिणसङ्खाताय तिरिया नाम तिणजातिया नङ्गलमत्तरत्तदण्डाय नाभितो उग्गताय खणेन अनेकयोजनसहस्सं नभं आहच्च ठानं एको, सेतानं कण्हसीसानं किमीनं पादेहि उस्सक्कित्वा याव जाणुमण्डलं आहच्च ठानं एको, नानावण्णानं चतुन्नं सकुणानं चतूहि दिसाहि आगन्त्वा पादमूले सेतवण्णतापज्जनं एको, बोधिसत्तस्स महतो मीळ्हपब्बतस्स उपरि अलिम्पमानस्स चङ्कमनं एकोति इमे पञ्च महासुपिना नाम, इमे च यथाक्कमं सम्बोधिया, देवमनुस्सेसु अरियमग्गप्पकासनस्स, गिहीनञ्च सरणूपगमनस्स, खत्तियादिचतुवण्णानं पब्बजित्वा अरहत्तपटिलाभस्स, चतुन्नं पच्चयानं लाभे अलित्तभावस्स च पुब्बनिमित्तानीति वेदितब्बं. सोळस सुपिना पाकटा एव. एकन्तसच्चमेवाति फलनियमुप्पत्तितो वुत्तं. दस्सनं पन सब्बत्थ विपल्लत्थमेव. धातुक्खोभादीसु चतूसु मूलकारणेसु द्वीहि तीहिपि कारणेहि कदाचि सुपिनं पस्सन्तीति आह ‘‘संसग्गभेदतो’’ति. सुपिनभेदोति सच्चासच्चत्थताभेदो.

रूपनिमित्तादिआरम्मणन्ति एत्थ कम्मनिमित्तगतिनिमित्ततो अञ्ञरूपमेव विञ्ञाणस्स निमित्तन्ति रूपनिमित्तं, तं आदि येसं सत्तनिमित्तादीनं तानि रूपनिमित्तादीनि आरम्मणानि यस्स भवङ्गचित्तस्स तं रूपनिमित्तादिआरम्मणं. ईदिसानीति रूपनिमित्तादिआरम्मणानि रागादिसम्पयुत्तानि च. सब्बोहारिकचित्तेनाति पटिबुद्धस्स पकतिवीथिचित्तेन. को नाम पस्सतीति सुत्तपटिबुद्धभाववियुत्ताय ¶ चित्तप्पवत्तिया अभावतो सुपिनं पस्सन्तो नाम न सियाति अधिप्पायो, तेनाह ‘‘सुपिनस्स अभावोव आपज्जती’’ति. कपिमिद्धपरेतोति इमिना निद्दावसेन पवत्तमानभवङ्गसन्ततिब्यवहिताय कुसलाकुसलाय मनोद्वारवीथिया च पस्सतीति दस्सेति, तेनाह या निद्दातिआदि. द्वीहि अन्तेहि मुत्तोति कुसलाकुसलसङ्खातेहि द्वीहि अन्तेहि मुत्तो. आवज्जनतदारम्मणक्खणेति सुपिने पञ्चद्वारवीथिया अभावतो मनोद्वारे उप्पज्जनारहं गहेत्वा वुत्तं.

एत्थ च सुपिनन्तेपि तदारम्मणवचनतो अनुभूतेसु सुतपुब्बेसु वा रूपादीसु पुरापत्तिभावेन परिकप्पेत्वा विपल्लासतो पवत्तमानापि कामावचरविपाकधम्मा परित्तधम्मे निस्साय परिकप्पेत्वा पवत्तत्ता परित्तारम्मणा वुत्ता, न पन सरूपतो परित्तधम्मे गहेत्वा पवत्तत्ता ¶ एवाति गहेतब्बं. एवञ्च इत्थिपुरिसादिआकारं आरोपेत्वा पवत्तमानानं रागादिसविपाकधम्मानम्पि तेसं आरम्मणं गहेत्वा उप्पन्नानं पटिसन्धादिविपाकानम्पि परित्तारम्मणता कम्मनिमित्तारम्मणता च उपपन्ना एव होति. वत्थुधम्मविनिमुत्तं पन सम्मुतिभूतं कसिणादिपटिभागारम्मणं गहेत्वा उप्पन्ना उपचारप्पनादिवसप्पवत्ता चित्तचेतसिकधम्मा एव परित्तत्तिके (ध. स. तिकमातिका १२) न वत्तब्बारम्मणाति गहेतब्बा.

स्वायन्ति सुपिनो. विपल्लासेन परिकप्पितपरित्तारम्मणत्ता ‘‘दुब्बलवत्थुकत्ता’’ति वुत्तं, अविज्जमानारम्मणे अवसवत्तितोति अधिप्पायो, तेनाह अविसये उप्पन्नत्तातिआदि.

आपत्तिनिकायस्साति इदं सङ्घादिसेसोति पुल्लिङ्ग-सद्दस्स अनुरूपवसेन वुत्तं. अस्साति अस्स आपत्तिनिकायस्स, वुट्ठापेतुं इच्छितस्साति अत्थो, तेनाह किं वुत्तन्तिआदि. रुळ्हिसद्देनाति एत्थ समुदाये निप्फन्नस्सापि सद्दस्स तदेकदेसेपि पसिद्धि इध रुळ्ही नाम, ताय रुळ्हिया युत्तो सद्दो रुळ्हीसद्दो, तेन. रुळ्हिया कारणमाह अवयवेइच्चादिना.

कालञ्चाति ‘‘रागूपत्थम्भे’’तिआदिना दस्सितकालञ्च, ‘‘रागूपत्थम्भे’’ति वुत्ते रागूपत्थम्भे जाते तस्मिं काले मोचेतीति अत्थतो ¶ कालो गम्मति. नवमस्स अधिप्पायस्साति वीमंसाधिप्पायस्स. वत्थूति विसयं.

२३८. लोमा एतेसं सन्तीति लोमसा, बहुलोमपाणका.

२३९. मोचनेनाति मोचनप्पयोगेन. मोचनस्सादसम्पयुत्तायाति एत्थ मोचनिच्छाव मोचनस्सादो, तेन सम्पयुत्ता चेतना मोचनस्सादचेतनाति अत्थो, न पन मोचने अस्सादं सुखं पत्थेन्तिया चेतनायाति एवं अत्थो गहेतब्बो, इतरथा सुखत्थाय मोचेन्तस्सेव आपत्ति, न आरोग्यादिअत्थायाति आपज्जति. तस्मा आरोग्यादीसु येन केनचि अधिप्पायेन मोचनिच्छाय चेतनायाति अत्थोव गहेतब्बो.

२४०. वायमतोति अङ्गजाते कायेन उपक्कमतो. द्वे आपत्तिसहस्सानीति खण्डचक्कादीनि अनामसित्वाव वुत्तं, इच्छन्तेन पन खण्डचक्कादिभेदेनापि गणना कातब्बा. एकेन पदेनाति गेहसितपेमपदेन. तथेवाति मोचनस्सादचेतनाय एव गाळ्हं पीळनादिप्पयोगं ¶ अविजहित्वा सुपनेन सङ्घादिसेसोति वुत्तं. सुद्धचित्तोति मोचनस्सादस्स निमित्ते ऊरुआदीहि कतउपक्कमस्स विजहनं सन्धाय वुत्तं. तेन असुभमनसिकाराभावेपि पयोगाभावेनेव मोचनेपि अनापत्ति दीपिताति वेदितब्बा.

तेन उपक्कमेन मुत्तेति मुच्चमानं विना अञ्ञस्मिम्पि सुक्के ठानतो मुत्ते. यदि पन उपक्कमे कतेपि मुच्चमानमेव दकसोतं ओतरति, थुल्लच्चयमेव पयोगेन मुत्तस्स अभावा. जग्गनत्थायाति चीवरादीसु लिम्पनपरिहाराय हत्थेन अङ्गजातग्गहणं वट्टति, तप्पयोगो न होतीति अधिप्पायो. अनोकासन्ति अङ्गजातप्पदेसं.

२६२. सुपिनन्तेन कारणेनाति सुपिनन्ते पवत्तउपक्कमहेतुना. आपत्तिट्ठानेयेव हि अयं अनापत्ति अविसयत्ता वुत्ता. तेनाह ‘‘सचस्स विसयो होति निच्चलेन भवितब्ब’’न्तिआदि.

२६३. विनीतवत्थुपाळियं ¶ अण्डकण्डुवनवत्थुस्मिं मोचनाधिप्पायेन अण्डचलनेन अङ्गजातस्सापि चलनतो निमित्ते उपक्कमो होतीति सङ्घादिसेसो वुत्तो. यथा पन अङ्गजातं न चलति, एवं अण्डमेव कण्डुवनेन फुसन्तस्स मुत्तेपि अनापत्ति अण्डस्स अनङ्गजातत्ता.

२६४. वत्थिन्ति अङ्गजातसीसच्छादकचम्मं. उदरं तापेन्तस्स…पे… अनापत्तियेवाति उदरतापनेन अङ्गजातेपि तत्ते तावत्तकेन निमित्ते उपक्कमो कतो नाम न होतीति वुत्तं.

२६५. एहि मे त्वं, आवुसो, सामणेराति वत्थुस्मिं अञ्ञं आणापेतु, तेन करियमानस्स अङ्गजातचलनस्स मोचनस्सादेन सादियनतो तं चलनं भिक्खुस्स सादियनचित्तसमुट्ठितम्पि होतीति सुक्कविस्सट्ठिपच्चयस्स अङ्गजातचलनस्स हेतुभूता अस्सादचेतनाव आपत्तिया अङ्गं होति, न आणापनवाचा तस्सा पवत्तिक्खणे सङ्घादिसेसस्स असिज्झनतो. एवं आणापेत्वापि योनिसोमनसिकारेन मोचनस्सादं पटिविनोदेन्तस्स आपत्तिअसम्भवतो इदं सिक्खापदं अनाणत्तिकं, कायकम्मं, किरियसमुट्ठानञ्च जातन्ति गहेतब्बं, आणापनवाचाय पन दुक्कटं आपज्जति. यो पन परेन अनाणत्तेन बलक्कारेनापि करियमानप्पयोगं मोचनस्सादेन सादियति, तस्सापि मुत्ते पठमपाराजिके विय सङ्घादिसेसोव, अमुत्ते थुल्लच्चयं. मोचनस्सादे चेतनाय पन असति कायसंसग्गरागेन ¶ सादियन्तस्सापि मुत्तेपि सङ्घादिसेसेन अनापत्तीति आचरिया वदन्ति, तञ्च युत्तमेव.

२६६. कायत्थम्भनवत्थुस्मिं चलनवसेन यथा अङ्गजाते उपक्कमो सम्भवति, तथा विजम्भितत्ता आपत्ति वुत्ता.

उपनिज्झायनवत्थुस्मिं अङ्गजातन्ति जीवमानइत्थीनं पस्सावमग्गोव अधिप्पेतो, नेतरो.

२६७. पुप्फावलीति कीळाविसेसो. तं किर कीळन्ता नदीआदीसु छिन्नतटं उदकेन चिक्खल्लं कत्वा तत्थ उभो पादे पसारेत्वा निसिन्ना पतन्ति ¶ , ‘‘पुप्फावलिय’’न्तिपि पाठो. पवेसेन्तस्साति पयोजकत्तेन द्विकम्मिकत्ता ‘‘वालिकं अङ्गजात’’न्ति उभयत्थापि उपयोगवचनं कतं. चेतना, उपक्कमो, मुच्चनन्ति इमानेत्थ तीणि अङ्गानि वेदितब्बानि.

सुक्कविस्सट्ठिसिक्खापदवण्णना निट्ठिता.

२. कायसंसग्गसिक्खापदवण्णना

२६९. दुतिये केसुचि वातपानेसु विवटेसु बहिपि अन्धकारत्ता आलोको न पविसति, विवटकवाटेन अञ्ञतो आगच्छन्तस्स आलोकस्स निवारणतो कवाटस्स पिट्ठिपस्से घनन्धकारोव होति, तादिसानि सन्धाय ‘‘येसु विवटेसु अन्धकारो होती’’तिआदि वुत्तं.

ब्राह्मणी अत्तनो अङ्गमङ्गानं परामसनक्खणे अनाचारानुकूला हुत्वा न किञ्चि वत्वा भिक्खुनो वण्णभणनक्खणे वुत्तत्ता आह ‘‘पब्बजितुकामो मञ्ञेति सल्लक्खेत्वा’’ति, पब्बजितुकामो वियाति सल्लक्खेत्वाति अत्थो. कुलित्थीनं एवं परेहि अभिभवनं नाम अच्चन्तावमानोति आह ‘‘अत्तनो विप्पकार’’न्ति.

२७०. ओतिण्णसद्दस्स कम्मसाधनपक्खं सन्धाय ‘‘यक्खादीही’’तिआदि वुत्तं, कत्तुसाधनपक्खं सन्धाय ‘‘कूपादीनी’’तिआदि वुत्तं. तस्मिं वत्थुस्मिन्ति इत्थिसरीरसङ्खाते वत्थुस्मिं.

२७१. अस्साति हत्थग्गाहादिकस्स सब्बस्स.

२७३. एतेसं ¶ पदानन्ति आमसनादिपदानं. इत्थिसञ्ञीति मनुस्सित्थिसञ्ञी. नं-सद्दस्स कायविसेसनभावेन एतं कायन्ति अत्थं दस्सेतुं ‘‘अथ वा’’तिआदि वुत्तं. ओमसन्तो…पे… एकाव आपत्तीति अनिवत्थं सन्धाय वुत्तं, न निवत्थं. सनिवत्थाय पन मत्थकतो पट्ठाय हत्थं ओतारेन्तस्स निवत्थसाटकोपरि हत्थे आरुळ्हे थुल्लच्चयं. साटकतो हत्थं ओतारापेत्वा जङ्घतो पट्ठाय ओमसन्तस्स पुन सङ्घादिसेसो.

यथानिद्दिट्ठनिद्देसेति ¶ यथावुत्तकायसंसग्गनिद्देसे. तेनाति येन कारणेन वत्थुसञ्ञादयो होन्ति, तेन कारणेन. यथावुत्तसिक्खापदनिद्देसे वुत्तं गरुकं भिक्खुनो करेय्य पकासेय्याति योजना.

सञ्ञाय विरागितम्हीति सञ्ञाय विरद्धाय. इदं नाम वत्थुन्ति इमस्मिं सिक्खापदे आगतं, अनागतञ्च यं किञ्चि सविञ्ञाणकाविञ्ञाणकं फुसन्तस्स अनापत्तिअभावं सन्धाय वुत्तं.

सारत्तन्ति कायसंसग्गरागेनेव सारत्तं. विरत्तन्ति कायसंसग्गरागरहितं मातुआदिं सन्धाय वदति. दुक्कटन्ति मातुपेमादिवसेन गण्हन्तस्स वसेन वुत्तं, विरत्तम्पि इत्थिं कायसंसग्गरागेन गण्हन्तस्स पन सङ्घादिसेसो एव. इमाय पाळिया समेतीति सम्बन्धो. कथं समेतीति चे? यदि हि ‘‘इत्थिया कायप्पटिबद्धं गण्हिस्सामी’’ति चित्ते उप्पन्ने इत्थिसञ्ञा विरागिता भवेय्य. कायप्पटिबद्धग्गहणेपि थुल्लच्चयेनापि न भवितब्बं इत्थिसञ्ञाय एव पाळियं (पारा. २७६) थुल्लच्चयस्स वुत्तत्ता, तस्मा ‘‘इत्थिया कायप्पटिबद्धं गण्हिस्सामीति कायं गण्हन्तस्स इत्थिसञ्ञा विरागिता नाम न होतीति कायप्पटिबद्धं गण्हिस्सामीति कायं गण्हतो इत्थिसञ्ञाय चेव कायसंसग्गरागस्स च कायग्गहणस्स च सम्भवा यथावत्थुकं सङ्घादिसेसमेव आपज्जती’’ति महासुमत्थेरेन वुत्तवादोव इमाय पाळिया समेति. अट्ठकथायञ्हि ‘‘सम्बहुला इत्थियो बाहाहि परिक्खिपित्वा गण्हामी’’ति सञ्ञाय परिक्खिपतो मज्झगतानं वसेन थुल्लच्चयं वुत्तं. न हि तस्स ‘‘मज्झगता इत्थियो कायप्पटिबद्धेन गण्हामी’’ति सञ्ञा अत्थि, तस्मा अट्ठकथायपि समेतीति गहेतब्बं. नीलेन दुविञ्ञेय्यभावतो काळित्थी वुत्ता.

२७९. सेवनाधिप्पायोति ¶ फस्ससुखसेवनाधिप्पायो. कायप्पटिबद्धामसनवारे कायप्पटिबद्धवसेन फस्सपटिविजाननं वेदितब्बं. चित्तुप्पादमत्ते आपत्तियाभावतो अनापत्तीति इदं कायसंसग्गरागमत्तेन कायचलनस्स अनुप्पत्तितो इत्थिया करियमानकायचलनं सादियतोपि पयोगाभावं सन्धाय वुत्तं. पठमपाराजिके पन परेहि उपक्कमियमानस्स अभावतो सेवनाधिप्पाये उप्पन्ने तेन अधिप्पायेन अङ्गजातक्खोभो ¶ सयमेव अवस्सं सञ्जायति, सो च तेन कतो नाम होतीति पाराजिकं वुत्तं, तेनेव नयेन पठमसङ्घादिसेसेपि परेन करियमानपयोगसादियमानेपि अङ्गजातक्खोभसम्भवेन आपत्ति होतीति वेदितब्बं. चतुत्थेति ‘‘न च कायेन वायमति, न च फस्सं पटिविजानाती’’ति इमस्मिं वारे. फस्सपटिविजाननम्पीति अपि-सद्देन ततियवारे विय वायामोपि नत्थीति दस्सेति. निस्सग्गियेन निस्सग्गियामसने वियाति इदं पन फस्सपटिविजाननाभावमत्तस्सेव निदस्सनं, न पयोगाभावस्साति दट्ठब्बं. मोक्खाधिप्पायोति एत्थ चित्तस्स लहुपरिवत्तिताय अन्तरन्तरा कायसंसग्गरागे समुप्पन्नेपि मोक्खाधिप्पायस्स अविच्छिन्नताय अनापत्तियेव, विच्छिन्ने पन तस्मिं आपत्ति एव.

पदभाजनीयवण्णनानयो.

२८१. एत्थ गण्हाहीति न वत्तब्बाति गेहसितपेमेन कायप्पटिबद्धेन फुसने दुक्कटं सन्धाय वुत्तं, कारुञ्ञेन पन वत्थादिं गहेतुं असक्कोन्तिं ‘‘गण्हा’’ति वदन्तस्सापि अवससभावप्पत्तं उदके निमुज्जन्तिं कारुञ्ञेन सहसा अनामासन्ति अचिन्तेत्वा केसादीसु गहेत्वा मोक्खाधिप्पायेन आकड्ढतोपि अनापत्तियेव. न हि मीयमानं मातरं उक्खिपितुं न वट्टति. अञ्ञातिकाय इत्थियापि एसेव नयो. उक्कट्ठाय मातुयापि आमासो न वट्टतीति दस्सनत्थं ‘‘मातर’’न्ति वुत्तं. तस्सा कातब्बं पन अञ्ञासम्पि इत्थीनं करोन्तस्सापि अनापत्तियेव अनामासत्ते विसेसाभावा.

तिणण्डुपकन्ति हिरिवेरादिमूलेहि केसालङ्कारत्थाय कतचुम्बटकं. परिवत्तेत्वाति अत्तनो निवासनादिभावतो अपनेत्वा. पूजादिअत्थं पन तावकालिकम्पि आमसितुं वट्टति. सीसपसाधनकदन्तसूचिआदीति इदं सीसालङ्कारत्थाय पटपिलोतिकादीहि कतं सीसपसाधनकञ्चेव दन्तसूचिआदि चाति द्विधा योजेत्वा सीसपसाधनं सिपाटिकोपकरणत्थाय चेव दन्तसूचिउपकरणत्थाय च गहेतब्बन्ति यथाक्कमं अत्थं दस्सेति. केसकलापं बन्धित्वा तत्थ तिरियं पवेसनत्थाय कता दन्तसूचि एव सीसपसाधनकदन्तसूचीति एकमेव कत्वा सिपाटिकाय ¶ पक्खिपित्वा परिहरितब्बसूचियेव तस्स तस्स किच्चस्स उपकरणन्ति सिपाटिकासूचिउपकरणन्ति एवं वा योजना कातब्बा ¶ . पोत्थकरूपन्ति सुधादीहि कतं, पाराजिकवत्थुभूतानं तिरच्छानगतित्थीनं सण्ठानेन कतम्पि अनामासमेव. इत्थिरूपादीनि दस्सेत्वा कतं, वत्थभित्तिआदिञ्च इत्थिरूपं अनामसित्वा वळञ्जेतुं वट्टति. एवरूपेहि अनामासे कायसंसग्गरागे असति कायप्पटिबद्धेन आमसतो दोसो नत्थि. भिन्दित्वाति एत्थ अनामासम्पि दण्डपासाणादीहि भेदनस्स अट्ठकथायं वुत्तत्ता, पाळियम्पि आपदासु मोक्खाधिप्पायस्स आमसनेपि अनापत्तिया वुत्तत्ता च. सप्पिनीआदीहि वाळमिगीहि च गहितपाणकानं मोचनत्थाय तं सप्पिनीआदिं वत्थदण्डादीहि परिक्खिपित्वा गहेतुं, मातुआदिं उदके मीयमानं वत्थादीहि गहेतुं, असक्कोन्तिं केसादीसु गहेत्वा कारुञ्ञेन उक्खिपितुं वट्टतीति अयमत्थो गहेतब्बोव. अट्ठकथायं ‘‘न त्वेव आमसितब्बा’’ति इदं पन वचनं अमीयमानवत्थुं सन्धाय वुत्तन्ति अयं अम्हाकं खन्ति.

मग्गं अधिट्ठायाति ‘‘मग्गो अय’’न्ति मग्गसञ्ञं उप्पादेत्वाति अत्थो. पञ्ञपेत्वा देन्तीति इदं सामीचिवसेन वुत्तं, तेहि पन आसनं अपञ्ञपेत्वाव निसीदथाति वुत्ते सयमेव पञ्ञपेत्वा निसीदितुम्पि वट्टति. तत्थजातकानीति अच्छिन्दित्वा भूतगामभावेनेव ठितानि. कीळन्तेनाति वुत्तत्ता सति पच्चये आमसन्तस्स अनापत्ति. भिक्खुसन्तकं पन परिभोगारहं सब्बथा आमसितुं न वट्टति दुरुपचिण्णत्ता. अनुपसम्पन्नानं दस्सामीति इदं अप्पटिग्गहेत्वा गहणं सन्धाय वुत्तं. अत्तनोपि अत्थाय पटिग्गहेत्वा गहणे दोसो नत्थि अनामासत्ताभावा.

मणीति वेळुरियादितो अञ्ञो जोतिरसादिभेदो सब्बोपि मणि. वेळुरियोति अल्लवेळुवण्णोमणि, ‘‘मज्जारक्खि मण्डलवण्णो’’तिपि वदन्ति. सिलाति मुग्गमासवण्णा अतिसिनिद्धा काळसिला, मणिवोहारं आगता रत्तसेतादिवण्णा सुमट्ठापि सिला अनामासा एवाति वदन्ति. रजतन्ति कहापणमासादिभेदं जतुमासादिं उपादाय सब्बं वुत्तावसेसं रूपियं गहितं. लोहितङ्कोति रत्तमणि. मसारगल्लन्ति कबरवण्णो मणि, ‘‘मरकत’’न्तिपि वदन्ति. भेसज्जत्थाय पिसित्वा योजितानं मुत्तानं रतनभावविरहतो गहणक्खणेपि रतनाकारेन अपेक्खिताभावा ‘‘भेसज्जत्थाय पन वट्टती’’ति वुत्तं. याव पन ¶ ता मुत्ता रतनरूपेन तिट्ठन्ति, ताव आमसितुं न वट्टति एव. एवं अञ्ञम्पि रतनपासाणं पिसित्वा भेसज्जे योजनत्थाय गहेतुं वट्टति एव, जातरूपरजतं पन पिसित्वा योजनभेसज्जत्थायपि सम्पटिच्छितुं न वट्टति, गहट्ठेहि योजेत्वा दिन्नम्पि यदि भेसज्जे सुवण्णादिरूपेन तिट्ठति, वियोजेतुञ्च सक्का, तादिसं भेसज्जम्पि न वट्टति. तं अब्बोहारिकत्तं गतं चे, वट्टति. ‘‘जातिफलिकं ¶ उपादाया’’ति वुत्तत्ता, सूरियकन्तचन्दकन्तादिकं जातिपासाणं मणिम्हि एव सङ्गहितन्ति दट्ठब्बं. धमनसङ्खो च धोतविद्धो च रतनमिस्सो चाति योजेतब्बं. विद्धोति मणिआदिभावेन कतछिद्दो.

रतनमिस्सोति कञ्चनलतादिविचित्तो, मुत्तादिरतनखचितो च, एतेन धमनसङ्खतो अञ्ञो रतनमिस्सोव अनामासोति दस्सेति. सिलायम्पि एसेव नयो. पानीयसङ्खोति इमिनाव थालकादिआकारेन कतसङ्खमयभाजनानि भिक्खूनं सम्पटिच्छितुं वट्टतीति सिद्धं. सेसाति रतनसंयुत्तं ठपेत्वा अवसेसा.

बीजतो पट्ठायाति धातुपासाणतो पट्ठाय. पटिक्खिपीति सुवण्णमयधातुकरण्डकस्स, बुद्धरूपादिस्स च अत्तनो सन्तककरणे निस्सग्गियत्ता वुत्तं. ‘‘रूपियछड्डकट्ठाने’’ति वुत्तत्ता रूपियछड्डकस्स जातरूपरजतं आमसित्वा छड्डेतुं वट्टतीति सिद्धं. केळापयितुन्ति आमसित्वा इतो चितो च सञ्चारेतुं. वुत्तन्ति महाअट्ठकथायं वुत्तं. कचवरमेव हरितुं वट्टतीति गोपका वा होन्तु अञ्ञे वा, हत्थेन पुञ्छित्वा कचवरं अपनेतुं वट्टति, मलम्पि पमज्जितुं वट्टति एवाति वदन्ति, तं अट्ठकथाय न समेति केळायनसदिसत्ता. आरकूटलोहन्ति सुवण्णवण्णो कित्तिमलोहविसेसो. तिविधञ्हि कित्तिमलोहं कंसलोहं वट्टलोहं हारकूटलोहन्ति. तत्थ तिपुतम्बे मिस्सेत्वा कतं कंसलोहं नाम. सीसतम्बे मिस्सेत्वा कतं वट्टलोहं. रसतम्बे मिस्सेत्वा कतं हारकूटलोहं नाम. तं पन ‘‘जातरूपगतिक’’न्ति वुत्तत्ता उग्गण्हतो निस्सग्गियम्पि होतीति केचि वदन्ति. रूपियेसु पन अगणितत्ता निस्सग्गियं न होति, आमसने, सम्पटिच्छने च दुक्कटमेवाति वेदितब्बं. सब्बकप्पियोति यथावुत्तसुवण्णादिमयानं ¶ सेनासनपरिक्खारानं आमसनगोपनादिवसेन परिभोगो सब्बथा कप्पियोति अधिप्पायो. तेनाह ‘‘तस्मा’’तिआदि. ‘‘भिक्खूनं धम्मविनयवण्णनट्ठाने’’ति वुत्तत्ता सङ्घिकमेव सुवण्णादिमयं सेनासनं, सेनासनपरिक्खारा च वट्टन्ति, न पुग्गलिकानीति गहेतब्बं.

भिन्दित्वाति पठममेव अनामसित्वा पासाणादिना किञ्चिमत्तं भेदं कत्वा पच्छा कप्पियभण्डत्थाय अधिट्ठहित्वा हत्थेन गहेतुं वट्टति. तेनाह ‘‘कप्पियभण्डं करिस्सामीति सब्बम्पि सम्पटिच्छितुं वट्टती’’ति. एत्थापि किञ्चि भिन्दित्वा, वियोजेत्वा वा आमसितब्ब.

फलकजालिकादीनीति एत्थ सरपरित्ताणाय हत्थेन गहेतब्बं किटिकाफलकं अक्खिरक्खणत्थाय अयलोहादीहि जालाकारेन कत्वा सीसादीसु पटिमुञ्चितब्बं जालिकं नाम ¶ . आदि-सद्देन कवचादिं सङ्गण्हाति. अनामासानीति मच्छजालादिपरूपरोधकं सन्धाय वुत्तं, न सरपरित्ताणं तस्स आवुधभण्डत्ताभावा. तेनेव वक्खति ‘‘परूपरोधनिवारणं ही’’तिआदि. आसनस्साति चेतियस्स समन्ता कतपरिभण्डस्स. बन्धिस्सामीति काकादीहि अदूसनत्थाय बन्धिस्सामि.

‘‘भेरिसङ्घाटोति सङ्घटितचम्मभेरी. वीणासङ्घाटोति सङ्घटितचम्मवीणा’’ति सारत्थदीपनियं (सारत्थ. टी. २.२८१) वुत्तं. ‘‘चम्मविनद्धानि वीणाभेरिआदीनी’’ति महाअट्ठकथायं वुत्तवचनतो विसेसाभावा, ‘‘कुरुन्दियं पना’’तिआदिना ततो विसेसस्स वत्तुमारद्धत्ता च भेरिआदीनं विनद्धनोपकरणसमूहो भेरिवीणासङ्घाटोति वेदितब्बं सङ्घटितब्बोति सङ्घाटोति कत्वा. तुच्छपोक्खरन्ति अविनद्धचम्मभेरिवीणानं पोक्खरं. आरोपितचम्मन्ति पुब्बे आरोपितं हुत्वा पच्छा ततो अपनेत्वा विसुं ठपितमुखचम्ममत्तं, न सेसोपकरणसहितं. सहितं पन सङ्घाटोति अयं विसेसो. ओनहितुन्ति भेरिपोक्खरादीनि चम्मं आरोपेत्वा चम्मवट्टिआदीहि सब्बेहि उपकरणेहि विनन्धितुं.

पाळियं पण्डकस्साति पण्डकेन. पाराजिकप्पहोनककालेति अकुथितकाले. कायसंसग्गरागादिभावे सब्बावत्थायपि इत्थिया सण्ठाने ¶ पञ्ञायमाने अनामासदुक्कटं न विगच्छतीति दट्ठब्बं. सङ्कमादीनं ठानाचावनवसेन अचालेतब्बताय न कायप्पटिबद्धवोहारोति दुक्कटं वुत्तं.

२८२. एकपदिकसङ्कमोति तनुकसेतु. ‘‘आविञ्छन्तो’’ति वुत्तत्ता चालेतुं युत्ताय एव रज्जुया थुल्लच्चयं, न इतराय भित्तिथम्भादिगतिकत्ताति आह ‘‘या महारज्जु होती’’तिआदि. तेन चालेतुं युत्ते तनुकरज्जुदण्डके अचालेत्वा फुसन्तस्सापि थुल्लच्चयमेवाति दीपितन्ति वेदितब्बं. पटिच्छादेतब्बाति छादनादिवसेन गूहितब्बा. मनुस्सित्थी, मनुस्सित्थिसञ्ञिता, कायसंसग्गरागो, वायामो, तेन हत्थादीसु फुसनन्ति इमानेत्थ पञ्च अङ्गानि.

कायसंसग्गसिक्खापदवण्णना निट्ठिता.

३. दुट्ठुल्लवाचासिक्खापदवण्णना

२८५. ततिये असद्धम्मपटिसञ्ञुत्तन्ति मेथुनधम्मपटिसंयुत्तं. बालाति सुभासितदुब्भासितं अजानन्ती ¶ , सुरामदमत्तताय उम्मत्तकादिभावेन च अजानन्तीपि एत्थेव सङ्गय्हति. न ताव सीसं एतीति सङ्घादिसेसपच्चयत्तसङ्खातं मत्थकं पारिपूरि न होति, मग्गमेथुनेहि अघटितत्ता दुक्कटं पन होति एव.

अपसादेतीति अपसादकरवचनं करोति. दोसं देतीति दोसं पतिट्ठापेति. तीहीति अनिमित्तासीतिआदीनं पदानं अदुट्ठुल्लभावेनापि अत्थयोजनारहत्ता पस्सावमग्गादिपटिसञ्ञुत्ततानियमो नत्थीति वुत्तं, तेहि पन अट्ठहि पदेहि परिब्बाजिकावत्थुस्मिं (पारा. २८९) विय थुल्लच्चयन्ति वेदितब्बं.

कुञ्चिकपनाळिमत्तन्ति कुञ्चिकाछिद्दमत्तं. सुक्खसोताति दकसोतस्स सुक्खताय लोहितवण्णविगमो होतीति वुत्तं.

सुद्धानीति मेथुनादिपदेहि अयोजितानिपि. मेथुनधम्मेन घटितानेवाति इदं उपलक्खणमत्तं, वच्चमग्गपस्सावमग्गेहिपि अनिमित्ते ‘‘तव ¶ वच्चमग्गो, पस्सावमग्गो वा ईदिसो’’तिआदिना घटितेपि आपत्तिकरानेव.

२८६. गरुकापत्तिन्ति भिक्खुनिया उब्भजाणुमण्डलिकाय पाराजिकापत्तिं सन्धाय वदति.

२८७. हसन्तो हसन्तोति उपलक्खणमत्तं, अहसन्तोपि येन केनचि आकारेन अत्तनो विपरिणतचित्ततं इत्थिया पकासेन्तो वदति, आपत्तियेव.

कायचित्ततोति हत्थमुद्दाय ओभासेन्तस्स कायचित्ततो समुट्ठाति.

२८८. तस्मा दुक्कटन्ति अप्पटिविजाननतो दुक्कटं, पटिविजानने पन सति थुल्लच्चयमेव परिब्बाजिकावत्थुस्मिं (पारा. २८९) विय अखेत्तपदत्ता. खेत्तपदे हि पटिविजानन्तिया सङ्घादिसेसोव सिया मेथुनधम्मयाचनवत्थुद्वये (पारा. २८९) विय, तं पन वत्थुद्वयं मेथुनयाचनतो चतुत्थसङ्घादिसेसे वत्तब्बम्पि दुट्ठुल्लवाचस्सादमत्तेन पवत्तत्ता इध वुत्तन्ति वेदितब्बं. एवं खेत्तपदेन वदन्तस्स इत्थिया अप्पटिविजानन्तिया किं होतीति? किञ्चापि अयं नाम आपत्तीति पाळिअट्ठकथासु न वुत्तं, अथ खो थुल्लच्चयेनेवेत्थ भवितब्बं ¶ . तथा हि अखेत्तपदे अप्पटिविजानन्तिया दुक्कटं, पटिविजानन्तिया थुल्लच्चयं वुत्तं. खेत्तपदे पन पटिविजानने सङ्घादिसेसोव वुत्तो, अप्पटिविजानने थुल्लच्चयमेव भवितुं युत्तं, न दुक्कटं, अखेत्तपदतो विसेसाभावप्पसङ्गोति गहेतब्बं. यथा चेत्थ, एवं चतुत्थसिक्खापदेपि अखेत्तपदे पटिविजानन्तिया थुल्लच्चयं, अप्पटिविजानन्तिया दुक्कटं, खेत्तपदे पन अप्पटिविजानन्तिया थुल्लच्चयन्ति वेदितब्बं. पाळियं नवावुतन्ति नववीतं.

२८८. असद्धम्मं सन्धायाति मेथुनं सन्धाय वुत्तं. तञ्हि पुत्तसमुप्पत्तिया बीजनिक्खेपतो वप्पपरियायं लभतीति.

संसीदतीति वहति, संसरीयतीति वा अत्थो. मनुस्सित्थी, तथासञ्ञिता, दुट्ठुल्लवाचस्सादरागो, तेन ओभासनं, तङ्खणविजाननन्ति इमानेत्थ पञ्च अङ्गानि.

दुट्ठुल्लवाचासिक्खापदवण्णना निट्ठिता.

४. अत्तकामपारिचरियसिक्खापदवण्णना

२९०. चतुत्थे ¶ परेहि पत्ते पातियमानानं भिक्खापिण्डानं पातो सन्निपातोति पिण्डपातोति भिक्खाहारो वुच्चति, तंसदिसताय अञ्ञोपि यो कोचि भिक्खाचरियं विना भिक्खूहि लद्धो पिण्डपातोत्वेव वुच्चति. पति एति एतस्माति पच्चयोति आह ‘‘पतिकरणट्ठेन पच्चयो’’ति. रोगदुक्खानं वा पटिपक्खभावेन अयति पवत्ततीति पच्चयो. सप्पायस्साति हितस्स. नगरपरिक्खारेहीति नगरं परिवारेत्वा रक्खणकेहि. राजूनं गेहपरिक्खेपो परिखा उद्दापो पाकारो एसिका पलिघो अट्टोति इमे सत्त नगरपरिक्खाराति वदन्ति. सेतपरिक्खारोति विसुद्धिसीलालङ्कारो. अरियमग्गो हि इध ‘‘रथो’’ति अधिप्पेतो, तस्स च सम्मावाचादयो अलङ्कारट्ठेन ‘‘परिक्खारा’’ति वुत्ता. चक्कवीरियोति वीरियचक्को. जीवितपरिक्खाराति जीवितस्स पवत्तिकारणानि. समुदानेतब्बाति सम्मा उद्धं आनेतब्बा परियेसितब्बा.

२९१. उपचारेति यत्थ ठितो विञ्ञापेतुं सक्कोति, तादिसे ठाने. कामो चेव हेतु च पारिचरिया च अत्थोति पाळियं ‘‘अत्तनो कामं, अत्तनो हेतुं, अत्तनो अधिप्पायं, अत्तनो पारिचरिय’’न्ति (पारा. २९२) वुत्तेसु इमेसु चतूसु पदेसु कामो, हेतु, पारिचरिया ¶ च अट्ठकथायं वुत्ते पठमे अत्थविकप्पे विग्गहवाक्याधिप्पायसूचनतो अत्थो. सेसन्ति अधिप्पायपदमेकं. ब्यञ्जनन्ति ब्यञ्जनमत्तं, पठमविकप्पानुपयोगिताय वचनमत्तन्ति अत्थो. दुतिये अत्थविकप्पेपि एसेव नयो.

यथावुत्तमेव अत्थं पदभाजनेन संसन्दित्वा दस्सेतुं ‘‘अत्तनो कामं अत्तनो हेतुं अत्तनो पारिचरियन्ति हि वुत्ते जानिस्सन्ति पण्डिता’’तिआदि आरद्धं. इदं वुत्तं होति – ‘‘अत्तनो हेतु’’न्ति वुत्ते अत्तनो अत्थायाति अयमत्थो विञ्ञायति, ‘‘अत्तनो कामं अत्तनो पारिचरिय’’न्ति वुत्ते कामेन पारिचरियाति अयमत्थो विञ्ञायति. तस्मा इमेहि तीहि पदेहि अत्तनो अत्थाय कामेन पारिचरिया अत्तकामपारिचरियाति इमं अत्थविकप्पं विञ्ञू जानिस्सन्ति. ‘‘अत्तनो ¶ अधिप्पाय’’न्ति वुत्ते पन अधिप्पाय-सद्दस्स कामित-सद्देन समानत्थभावतो अत्तना अधिप्पेतकामितट्ठेन अत्तकामपारिचरियाति इममत्थं विकप्पं विञ्ञू जानिस्सन्ति.

एतदग्गन्ति एसा अग्गा. दुट्ठुल्लवाचासिक्खापदेपि (पारा. २८५) कामं ‘‘याचतिपि आयाचतिपी’’ति एवं मेथुनयाचनं आगतं, तं पन दुट्ठुल्लवाचस्सादरागवसेन वुत्तं, इध पन अत्तनो मेथुनस्सादरागवसेनाति अयं विसेसो.

विनीतवत्थूसु ‘‘अग्गदानं देही’’ति इदं अत्तनो अत्थाय वुत्तं, दुट्ठुल्लवाचासिक्खापदे पन परत्थायपि वुत्ते सीसं एतीति वेदितब्बं. सुभगाति इस्सरियादीहि सुन्दरेहि भगेहि समन्नागता. मनुस्सित्थी, तथासञ्ञिता, अत्तकामपारिचरियाय रागो, तेन कामपारिचरिययाचनं, तङ्खणविजाननन्ति इमानेत्थ पञ्च अङ्गानि.

अत्तकामपारिचरियसिक्खापदवण्णना निट्ठिता.

५. सञ्चरित्तसिक्खापदवण्णना

२९६. पञ्चमे पण्डिच्चेनाति सभावञाणेन. गतिमन्ताति सभावञाणगतियुत्ता. वेय्यत्तियेनाति इत्थिकत्तब्बेसु सिक्खितञाणेन. मेधायाति असिक्खितेसुपि तंइत्थिकत्तब्बेसु ठानुप्पत्तिया पञ्ञाय. छेकाति कायेन पचनादिकुसला.

आवहनं ¶ आवाहो, दारिकाय गहणं. विधिना परकुले वहनं पेसनं विवाहो, दारिकाय दानं.

२९७. रन्धापनं भत्तपचापनं. ब्यञ्जनादिसम्पादनं पचापनं. न उपाहटन्ति न दिन्नं. कयो नाम गहणं. विक्कयो नाम दानं. तदुभयं सङ्गहेत्वा ‘‘वोहारो’’ति वुत्तं.

३००. ‘‘अब्भुतं कातुं न वट्टती’’ति इमिना दुक्कटं होतीति दीपेति. ‘‘पराजितेन दातब्ब’’न्ति वुत्तत्ता अदेन्तो धुरनिक्खेपेन कारेतब्बो. अचिरकाले ¶ अधिकारो एतस्स अत्थीति अचिरकालाधिकारिकं, सञ्चरित्तं. ‘‘अचिरकालाचारिक’’न्ति वा पाठो. अचिरकाले आचारो अज्झाचारो एतस्साति योजना.

३०१. किञ्चापि एहिभिक्खुआदिकापि सञ्चरित्तादिपण्णत्तिवज्जं आपत्तिं आपज्जन्ति, तेसं पन असब्बकालिकत्ता, अप्पकत्ता च इधापि ञत्तिचतुत्थेनेव कम्मेन उपसम्पन्नं सन्धाय ‘‘य्वाय’’न्तिआदिपदभाजनमाह. सञ्चरणं सञ्चरो, सो एतस्स अत्थीति सञ्चरी, तस्स भावो सञ्चरित्तं. तेनाह ‘‘सञ्चरणभाव’’न्ति. सञ्चरतीति सञ्चरणो, पुग्गलो, तस्स भावो सञ्चरणभावो, तं इत्थिपुरिसानं अन्तरे सञ्चरणभावन्ति अत्थो.

जायाभावेति भरियभावाय. जारभावेति सामिभावाय, तंनिमित्तन्ति अत्थो. निमित्तत्थे हि एतं भुम्मवचनं. किञ्चापि ‘‘जारत्तने’’ति पदस्स पदभाजने ‘‘जारी भविस्ससी’’ति (पारा. ३०२) इत्थिलिङ्गवसेन पदभाजनं वुत्तं, ‘‘सञ्चरित्तं समापज्जेय्या’’ति पदस्स पन निद्देसे ‘‘इत्थिया वा पहितो पुरिसस्स सन्तिके गच्छति, पुरिसेन वा पहितो इत्थिया सन्तिके गच्छती’’ति वुत्तत्ता पुरिसस्सापि सन्तिके वत्तब्बाकारं दस्सेतुं ‘‘जारत्तने’’ति निद्देसस्स इत्थिपुरिससाधारणत्ता ‘‘इत्थिया मतिं पुरिसस्स आरोचेन्तो जारत्तने आरोचेती’’ति वुत्तं. पाळियं पन पुरिसस्स मतिं इत्थिया आरोचनवसेनेव पदद्वयेपि योजना कता, तदनुसारेन इत्थिया मतिं पुरिसस्स आरोचनाकारोपि सक्का विञ्ञातुन्ति.

इदानि पाळियं वुत्तनयेनापि अत्थं दस्सेन्तो ‘‘अपिचा’’तिआदिमाह. ‘‘पति भविस्ससी’’ति इदं जायासद्दस्स इत्थिलिङ्गनियमतो पुरिसपरियायेन वुत्तं, निबद्धसामिको भविस्ससीति अत्थो. जारो भविस्ससीति मिच्छाचारभावेन उपगच्छनको भविस्ससीति अधिप्पायो.

३०३. सेरिविहारन्ति ¶ सच्छन्दचारं. अत्तनो वसन्ति अत्तनो आणं. गोत्तवन्तेसु गोत्त-सद्दो, धम्मचारीसु च धम्म-सद्दो वत्ततीति आह ‘‘सगोत्तेही’’तिआदि. तत्थ सगोत्तेहीति समानगोत्तेहि. सहधम्मिकेहीति एकस्स सत्थु सासने सहचरितब्बधम्मेहि, समानकुलधम्मेहि ¶ वा. तेनेवाह ‘‘एकं सत्थार’’न्तिआदि. एकगणपरियापन्नेहीति मालाकारादिएकगणपरियापन्नेहि.

सस्सामिका सारक्खा. यस्सा गमने रञ्ञा दण्डो ठपितो, सा सपरिदण्डा. पच्छिमानं द्विन्नन्ति सारक्खसपरिदण्डानं. मिच्छाचारो होतीति तासु गतपुरिसानं विय तासम्पि मिच्छाचारो होति सस्सामिकभावतो. न इतरासन्ति मातुरक्खितादीनं अट्ठन्नं मिच्छाचारो नत्थि अस्सामिकत्ता, तासु गतानं पुरिसानमेव मिच्छाचारो होति मातादीहि रक्खितत्ता. पुरिसा हि परेहि येहि केहिचि गोपितं इत्थिं गन्तुं न लभन्ति, इत्थियो पन केनचि पुरिसेन भरियाभावेन गहिताव पुरिसन्तरं गन्तुं न लभन्ति, न इतरा अत्तनो फस्सस्स सयं सामिकत्ता. न हि मातादयो सयं तासं फस्सानुभवनत्थं ता रक्खन्ति, केवलं पुरिसगमनमेव तासं वारेन्ति. तस्मा केनचि अपरिग्गहितफस्सत्ता, अत्तनो फस्सत्ता च इत्थीनं न मिच्छाचारो, पुरिसानं पन परेहि वारिते अत्तनो असन्तकट्ठाने पविट्ठत्ता मिच्छाचारोति वेदितब्बो.

भोगेनाति भोगहेतु. उदपत्तं आमसित्वा गहिता ओदपत्तकिनी. धज-सद्देन सेना एव उपलक्खिताति आह ‘‘उस्सितद्धजाया’’तिआदि.

३०५. बहिद्धा विमट्ठन्ति अञ्ञत्थ आरोचितं. तं किरियं सम्पादेस्सतीति तस्सा आरोचेत्वा तं किच्चं सम्पादेतु वा मा वा, तं किरियं सम्पादने सामत्थियं सन्धाय वुत्तं. दारकं, दारिकञ्च अजानापेत्वा मातापितुआदीहि मातापितुआदीनञ्ञेव सन्तिकं सासने पेसितेपि पटिग्गण्हनवीमंसनपच्चाहरणसङ्खाताय तिवङ्गसम्पत्तिया सङ्घादिसेसो होति एवाति दट्ठब्बं.

यं उद्दिस्स सासनं पेसितं, तं एव सन्धाय तस्सा मातुआदीनं आरोचितेपि खेत्तमेव ओतिण्णभावं दस्सेतुं ‘‘बुद्धं पच्चक्खामी’’तिआदि उदाहटं, इदञ्च वचनब्यत्तयहेतुब्यत्तयानं भेदेपि ब्यत्तयसामञ्ञतो उदाहटन्ति दट्ठब्बं. तम्पि उदाहरणदोसं परिहरित्वा सुत्तानुलोमतं दस्सेतुं ‘‘तं पना’’तिआदि वुत्तं. इमिना समेतीति एत्थायमधिप्पायो ¶ – यथा सयं अनारोचेत्वा ¶ अञ्ञेसं अन्तेवासिकादीनं वत्वा वीमंसापेत्वा पच्चाहरन्तस्स नत्थि विसङ्केतो, एवं तस्सा सयं अनारोचेत्वा आरोचनत्थं मातुआदीनं वदन्तस्सापि मातुआदयो तं किरियं सम्पादेन्तु वा मा वा. यदि हि तेसं मातुआदीनं तुण्हीभूतभावम्पि पच्चाहरति, विसङ्केतो नत्थीति.

घरकिच्चं नेतीति घरणी. अञ्ञतरं वदन्तस्स विसङ्केतं अदिन्नादानादीसु आणत्तियं वत्थुसङ्केतो वियाति अधिप्पायो. मूलट्ठानञ्च वसेनाति एत्थ पुरिसस्स मातुआदयो सासनपेसने मूलभूतत्ता ‘‘मूलट्ठा’’ति वुत्ता.

३२२. पाळियं मातुरक्खिताय माता भिक्खुं पहिणतीति एत्थ अत्तनो वा धीतु सन्तिकं ‘‘इत्थन्नामस्स भरिया होतू’’ति भिक्खुं पहिणति, पुरिसस्स वा तस्स ञातकानं वा सन्तिकं ‘‘मम धीता इत्थन्नामस्स भरिया होतू’’ति पहिणतीति गहेतब्बं. एसेव नयो सेसेसुपि. पुब्बे वुत्तनयत्ताति पठमसङ्घादिसेसे वुत्तनयत्ता.

३३८. अन्ते एकेनाति एकेन पदेन. एत्तोव पक्कमतीति अपच्चाहरित्वा ततोव पक्कमति. ‘‘अनभिनन्दित्वा’’ति इदं तथा पटिपज्जमानं सन्धाय वुत्तं. सतिपि अभिनन्दने सासनं अनारोचेन्तो पन न वीमंसति नाम. ततियपदे वुत्तनयेनाति ‘‘सो तस्सा वचनं अनभिनन्दित्वा’’तिआदिना वुत्तनयेन. पाळियं अन्तेवासिं वीमंसापेत्वाति ‘‘अयं तेसं वत्तुं समत्थो’’ति अन्तेवासिना वीमंसापेत्वा. सचे पन सो अन्तेवासिको तं वचनं आदियित्वा तुण्ही होति, तस्सापि तं पवत्तिं पच्चाहरन्तस्स आचरियस्स सङ्घादिसेसोव मातुआदीसु तुण्हीभूतेसु तेसं तुण्हिभावं पच्चाहरन्तस्स वियाति दट्ठब्बं.

पाळियं चतुत्थवारे असतिपि गच्छन्तो सम्पादेति, आगच्छन्तो विसंवादेति अनापत्तीति अत्थतो आपन्नमेवातिकत्वा वुत्तं ‘‘चतुत्थे अनापत्ती’’ति.

३४०. कारुकानन्ति ¶ वड्ढकीआदीनं तच्छकअयोकारतन्तवायरजकन्हापितका पञ्च कारवो ‘‘कारुका’’ति वुच्चन्ति. एवरूपेन…पे… अनापत्तीति तादिसं गिहिवेय्यावच्चम्पि न होतीति कत्वा वुत्तं.

कायतो समुट्ठातीति पण्णत्तिं वा अलंवचनीयभावं वा तदुभयं वा अजानन्तस्स कायतो ¶ समुट्ठाति. एस नयो इतरद्वयेपि. अलंवचनीया होन्तीति इत्थी वा पुरिसो वा उभोपि वा जायाभावे, सामिकभावे च निक्खित्तछन्दताय अच्चन्तवियुत्तत्ता पुन अञ्ञमञ्ञं समागमत्थं ‘‘मा एवं अकरित्था’’तिआदिना वचनीयताय वत्तब्बताय अलं अरहाति अलंवचनीया, अलं वा कत्तुं अरहं सन्धानवचनमेतेसु इत्थिपुरिसेसूति अलंवचनीया, सन्धानकारस्स वचनं विना असङ्गच्छनका परिच्चत्तायेवाति अधिप्पायो.

पण्णत्तिं पन जानित्वाति एत्थ अलंवचनीयभावं वाति वत्तब्बं. तेनेव मातिकाट्ठकथायञ्च ‘‘तदुभयं पन जानित्वा’’तिआदि वुत्तं. भिक्खुं अजानापेत्वा अत्तनो अधिप्पायं पण्णे लिखित्वा ‘‘इमं पण्णं असुकस्स देही’’ति दिन्नं हरन्तस्स सञ्चरित्तं न होति. पण्णत्तिअलंवचनीयभावअजाननवसेनेव हि इमं सिक्खापदं अचित्तकं, न सब्बेन सब्बं सञ्चरणभावम्पि अजाननवसेन, पाळियञ्च अट्ठकथायञ्च आरोचनमेव दस्सितं. तस्मा सन्दस्सनत्थं ञत्वा पण्णसन्दस्सनवसेनापि कायेन वा वाचाय वा आरोचेन्तस्सेव आपत्ति होतीति गहेतब्बं.

३४१. यथा यथा येसु येसु जनपदेसूति परिच्चत्तभावप्पकासनत्थं कत्तब्बं पण्णदानञातिजनिस्सरादिजानापनादितंतंदेसनियतं पकारं दस्सेति, इदञ्च निबद्धभरियाभावेन गहितं सन्धाय वुत्तं. अत्तनो रुचिया सङ्गतानं पन इत्थीनं, मुहुत्तिकाय च पुरिसे चित्तस्स विरज्जनमेव अलंवचनीयभावे कारणन्ति दट्ठब्बं. दुट्ठुल्लादीसुपीति आदि-सद्देन अत्तकामसञ्चरित्तानि सङ्गण्हाति, एत्थ पन पाळियं किञ्चापि ‘‘इत्थी नाम मनुस्सित्थी न यक्खी’’तिआदिना मनुस्सित्थिपुरिसा न दस्सिता, तथापि ‘‘दस इत्थियो मातुरक्खिता’’तिआदिना मनुस्सित्थीनञ्ञेव दस्सितत्ता पुरिसानम्पि तदनुगुणानमेव गहेतब्बतो मनुस्सजातिकाव ¶ इत्थिपुरिसा इधाधिप्पेता. तस्मा येसु सञ्चरित्तं समापज्जति, तेसं मनुस्सजातिकता, न नालंवचनीयता, पटिग्गण्हन, वीमंसन, पच्चाहरणानीति इमानेत्थ पञ्च अङ्गानि.

सञ्चरित्तसिक्खापदवण्णना निट्ठिता.

६. कुटिकारसिक्खापदवण्णना

३४२. छट्ठे एत्तकेनाति एत्तकेन दारुआदिना. अपरिच्छिन्नप्पमाणायोति अपरिच्छिन्नदारुआदिपमाणायो. मूलच्छेज्जायाति परसन्तकभावतो मोचेत्वा अत्तनो एव सन्तककरणवसेनाति ¶ अत्थो. एवं याचतो अञ्ञातकविञ्ञत्तिदुक्कटञ्चेव दासपटिग्गहणदुक्कटञ्च होति ‘‘दासिदासपटिग्गहणा पटिविरतो होती’’ति (दी. नि. १.१०, १९४) वचनं निस्साय अट्ठकथासु पटिक्खित्तत्ता. सककम्मन्ति पाणवधकम्मं. इदञ्च पाणातिपातदोसपरिहाराय दुक्कटं वुत्तं, न विञ्ञत्तिपरिहाराय. अनियमेत्वापि न याचितब्बाति सामीचिदस्सनत्थं वुत्तं, सुद्धचित्तेन पन हत्थकम्मं याचन्तस्स आपत्ति नाम नत्थि. यदिच्छकं कारापेतुं वट्टतीति ‘‘हत्थकम्मं याचामि, देथा’’तिआदिना अयाचित्वापि वट्टति. सकिच्चपसुतम्पि एवं कारापेन्तस्स विञ्ञत्ति नत्थि एव, सामीचिदस्सनत्थं पन विभजित्वा वुत्तं.

सब्बकप्पियभावदीपनत्थन्ति सब्बसो कप्पियभावदीपनत्थं. मूलं देथाति वत्तुं वट्टतीति ‘‘मूलं दस्सामा’’ति पठमं वुत्तत्ता विञ्ञत्ति वा मूलन्ति वचनस्स कप्पियाकप्पियवत्थुसामञ्ञवचनत्तेपि निट्ठितभतिकिच्चानं दापनतो अकप्पियवत्थुसादियनं वा न होतीति कत्वा वुत्तं. अनज्झावुत्थकन्ति अपरिग्गहितं.

मञ्च…पे… चीवरादीनि कारापेतुकामेनापीतिआदीसु चीवरं कारापेतुकामस्स अञ्ञातकअप्पवारिततन्तवायेहि हत्थकम्मयाचनवसेन वायापने विञ्ञत्तिपच्चया दुक्कटाभावेपि चीवरवायापनसिक्खापदेन यथारहं पाचित्तियदुक्कटानि होन्तीति वेदितब्बं. अकप्पियकहापणादि न दातब्बन्ति कप्पियमुखेन लद्धम्पि हत्थकम्मकरणत्थाय इमस्स ¶ कहापणं देहीति वत्वा दानं न वट्टतीति वुत्तं. पुब्बे कतकम्मस्स दापने किञ्चापि दोसो न दिस्सति, तथापि असारुप्पमेवाति वदन्ति. कतकम्मत्थायपि कातब्बकम्मत्थायपि कप्पियवोहारेन परियायतो भतिं दापेन्तस्स नत्थि दोसो. वत्तन्ति चारित्तं, आपत्ति न होतीति अधिप्पायो.

कप्पियं कारापेत्वा पटिग्गहेतब्बानीति साखाय मक्खिकबीजनेन पण्णादिच्छेदे बीजगामकोपनस्स चेव तत्थ लग्गरजादिअप्पटिग्गहितस्स च परिहारत्थाय वुत्तं. तदुभयासङ्काय असति तथा अकरणे दोसो नत्थि. नदीयादीसु उदकस्स अपरिग्गहितताय ‘‘आहराति वत्तुं वट्टती’’ति वुत्तं. ‘‘न आहटं परिभुञ्जितु’’न्ति वचनतो विञ्ञत्तिया आपन्नं दुक्कटं देसेत्वापि तं वत्थुं परिभुञ्जन्तस्स पुन परिभोगे दुक्कटमेव, पञ्चन्नम्पि सहधम्मिकानं न वट्टति. ‘‘अलज्जीहि पन भिक्खूहि वा सामणेरेहि वा हत्थकम्मं न कारेतब्ब’’न्ति सामञ्ञतो वुत्तत्ता अत्तनो अत्थाय यंकिञ्चि हत्थकम्मं कारेतुं न वट्टति. यं पन ¶ अलज्जी निवारियमानोपि बीजनादिं करोति, तत्थ दोसो नत्थि. चेतियकम्मादीनि पन तेहि कारापेतुं वट्टति. एत्थ च ‘‘अलज्जीहि सामणेरेही’’ति वुत्तत्ता ‘‘सञ्चिच्च आपत्तिं आपज्जती’’तिआदि (परि. ३५९) अलज्जीलक्खणं उक्कट्ठवसेन उपसम्पन्ने पटिच्च उपलक्खणतो वुत्तन्ति तंलक्खणविरहितानं सामणेरादीनं लिङ्गत्थेनकगोत्रभुपरियोसानानं भिक्खुपटिञ्ञानं दुस्सीलानम्पि साधारणवसेन अलज्जितालक्खणं यथाविहितपटिपत्तियं सञ्चिच्च अतिट्ठनमेवाति गहेतब्बं.

आहरापेन्तस्स दुक्कटन्ति विञ्ञत्तिक्खणे विञ्ञत्तिपच्चया, पटिलाभक्खणे गोणानं सादियनपच्चया च दुक्कटं. गोणञ्हि अत्तनो अत्थाय अविञ्ञत्तिया लद्धम्पि सादितुं न वट्टति ‘‘हत्थिगवस्सवळवपटिग्गहणा पटिविरतो होती’’ति (दी. नि. १.१०, १९४) वुत्तत्ता. तेनेवाह ‘‘ञातिपवारितट्ठानतोपि मूलच्छेज्जाय याचितुं न वट्टती’’ति. एत्थ च विञ्ञत्तिदुक्कटाभावेपि अकप्पियवत्थुयाचनेपि पटिग्गहणेपि दुक्कटमेव. रक्खित्वाति चोरादिउपद्दवतो रक्खित्वा. जग्गित्वाति तिणदानादीहि पोसेत्वा.

ञातिपवारितट्ठाने पन वट्टतीति सकटस्स सम्पटिच्छितब्बत्ता मूलच्छेज्जवसेन याचितुं वट्टति. तावकालिकं वट्टतीति उभयत्थापि वट्टतीति अत्थो ¶ . वासिआदीनि पुग्गलिकानिपि वट्टन्तीति आह ‘‘एस नयो वासी’’तिआदि. वल्लिआदीसु च परपरिग्गहितेसु च एसेव नयोति योजेतब्बं. ‘‘गरुभण्डप्पहोनकेसुयेवा’’ति इदं विञ्ञत्तिं सन्धाय वुत्तं. अदिन्नादाने पन तिणसलाकं उपादाय परपरिग्गहितं थेय्यचित्तेन गण्हतो अवहारो एव, भण्डग्घेन कारेतब्बो. वल्लिआदीसूति एत्थ आदि-सद्देन पाळिआगतानं (पारा. ३४९) वेळुआदीनं सङ्गहो. तत्थ यस्मिं पदेसे हरितालजातिहिङ्गुलादि अप्पकम्पि महग्घं होति, तत्थ तं तालपक्कपमाणतो ऊनम्पि गरुभण्डमेव, विञ्ञापेतुञ्च न वट्टति.

साति विञ्ञत्ति. परिकथादीसु ‘‘सेनासनं सम्बाध’’न्तिआदिना (विसुद्धि. १.१९) परियायेन कथनं परिकथा नाम. उजुकमेव अकथेत्वा ‘‘भिक्खूनं किं पासादो न वट्टती’’तिआदिना (विसुद्धि. १.१९) अधिप्पायो यथाविभूतो होति, एवं भासनं ओभासो नाम. सेनासनादिअत्थं भूमिपरिकम्मादिकरणवसेन पच्चयुप्पादाय निमित्तकरणं निमित्तकम्मं नाम. उक्कमन्तीति अपगच्छन्ति.

३४४. मणि कण्ठे अस्साति मणिकण्ठो. देववण्णन्ति देवत्तभावं.

३४५. पाळियं ¶ पत्तेन मे अत्थोति (पारा. ३४५) अनत्थिकम्पि पत्तेन भिक्खुं एवं वदापेन्तो भगवा सोत्थिया मन्तपदवसेन वदापेसि. सोपि भिक्खु भगवता आणत्तवचनं वदेमीति अवोच, तेनस्स मुसा न होति. अथ वा ‘‘पत्तेन मे अत्थो’’ति इदं ‘‘पत्तं ददन्तू’’ति इमिना समानत्थन्ति दट्ठब्बं. एस नयो मणिना मे अत्थोति एत्थापि. तस्मा अञ्ञेसम्पि एवरूपं कथेन्तस्स, कथापेन्तस्स च वचनदोसो नत्थीति गहेतब्बं.

३४९. उद्धंमुखं लित्ता उल्लित्ता, छदनस्स अन्तो लिम्पन्ता हि येभुय्येन उद्धंमुखा लिम्पन्ति. तेनाह ‘‘अन्तोलित्ता’’ति. अधोमुखं लित्ता अवलित्ता. बहि लिम्पन्ता हि येभुय्येन अधोमुखा लिम्पन्ति. तेनाह ‘‘बहिलित्ता’’ति.

ब्यञ्जनं विलोमितं भवेय्याति यस्मा ‘‘कारयमानेना’’ति इमस्स हेतुकत्तुवचनस्स ‘‘करोन्तेना’’ति इदं सुद्धकत्तुवचनं परियायवचनं न ¶ होति, तस्मा ‘‘करोन्तेन वा कारापेन्तेन वा’’ति कारयमानेनाति बहुउद्देसपदानुगुणं करणवचनेनेव पदत्थं कत्वा निद्देसे कते ब्यञ्जनं विरुद्धं भवेय्य, तथा पन पदत्थवसेन अदस्सेत्वा सामत्थियतो सिद्धमेवत्थं दस्सेतुं पच्चत्तवसेन ‘‘करोन्तो वा कारापेन्तो वा’’ति पदभाजनं वुत्तन्ति अधिप्पायो. तेनाह ‘‘अत्थमत्तमेवा’’तिआदि. पदत्थतो, सामत्थियतो च लब्भमानं अत्थमत्तमेवाति अत्थो. यञ्हि कारयमानेन पटिपज्जितब्बं, तं करोन्तेनापि पटिपज्जितब्बमेवाति इदमेत्थ सामत्थियं दट्ठब्बं.

उद्देसोति सामिभावेन उद्दिसितब्बो. सेतकम्मन्ति सेतवण्णकरणत्थं सेतवण्णमत्तिकाय वा सुधाय वा कततनुकलेपो, तेन पन सह मिनियमाने पमाणातिक्कन्तं होतीति सङ्कानिवारणत्थं आह ‘‘अब्बोहारिक’’न्ति. तेन पमाणातिक्कन्तवोहारं न गच्छति कुटिया अनङ्गत्ताति अधिप्पायो.

यथावुत्तस्स अत्थस्स वुत्तनयं दस्सेन्तेन ‘‘वुत्तञ्हेत’’न्तिआदि वुत्तं. तत्थ ‘‘आयामतो च वित्थारतो चा’’ति अवत्वा ‘‘आयामतो वा वित्थारतो वा’’ति विकप्पत्थस्स वा-सद्दस्स वुत्तत्ता एकतोभागे वड्ढितेपि आपत्तीति पकासितन्ति अधिप्पायो. तिहत्थाति पकतिहत्थेन तिहत्था, ‘‘वड्ढकीहत्थेना’’तिपि (सारत्थ. टी. २.३४८-३४९) वदन्ति, तं ‘‘यत्थ…पे… अयं कुटीति सङ्ख्यं न गच्छती’’ति इमिना विरुज्झति वड्ढकीहत्थेन तिहत्थायपि कुटिया पमाणयुत्तस्स मञ्चस्स सुखेन परिवत्तनतो. ‘‘ऊनकचतुहत्था वा’’ति इदञ्च पच्छिमप्पमाणयुत्तस्स ¶ मञ्चस्स अपरिवत्तनारहं सन्धाय वुत्तं. यदि हि पकतिहत्थेन चतुहत्थायपि कुटिया पमाणयुत्तो मञ्चो न परिवत्तति, सा अकुटीयेव, तस्मा मञ्चपरिवत्तनमत्तेनेव पमाणन्ति गहेतब्बं. पमाणयुत्तो मञ्चोति सब्बपच्छिमप्पमाणयुत्तो मञ्चो. सो हि पकतिविदत्थिया नवविदत्थिको, अट्ठविदत्थिको वा होति, ततो खुद्दको मञ्चो सीसूपधानं ठपेत्वा पादं पसारेत्वा निपज्जितुं न पहोति. पमाणतो ऊनतरम्पीति उक्कट्ठप्पमाणतो ऊनतरम्पि, इदञ्च हेट्ठिमप्पमाणयुत्तायपि वत्थुदेसना कातब्बा, न वाति सन्देहनिवत्तनत्थं वुत्तं.

कलललेपोति ¶ केनचि सिलेसेन कतलेपो, सेतरत्तादिवण्णकरणत्थं कततम्बमत्तिकादिकलललेपो वा. तेनाह ‘‘अलेपो एवा’’ति. तेन तळाकादीसु घनेन कललेन कतबहललेपो मत्तिकालेपने एव पविसति लेपवोहारगमनतोति दस्सेति. पिट्ठसङ्घाटो नाम द्वारबाहसङ्खातो चतुरस्सदारुसङ्घाटो, यत्थ सउत्तरपासं कवाटं अपस्साय द्वारं पिदहन्ति.

ओलोकेत्वापीति अपलोकेत्वापि, अपलोकनकम्मवसेनापीति अत्थो, अपसद्दस्सापि ओआदेसो कतोति दट्ठब्बो.

३५३. निबद्धगोचरट्ठानम्पीति एत्थ गोचराय पक्कमन्तानं हत्थीनं निबद्धगमनमग्गोपि सङ्गय्हति. एतेसन्ति सीहादीनं. गोचरभूमीति आमिसग्गहणट्ठानं. न गहिताति पटिक्खिपितब्बभावेन न गहिता, न वारिताति अत्थो. सीहादीनञ्हि गोचरग्गहणट्ठानं हत्थीनं विय निबद्धं न होति, यत्थ पन गोमहिंसादिपाणका सन्ति, दूरम्पि तं ठानं सीघं गन्त्वा गोचरं गण्हन्ति. तस्मा तेसं तं न वारितं, निबद्धगमनमग्गोव वारितो आसयतो गमनमग्गस्स निबद्धत्ता. अञ्ञेसम्पि वाळानन्ति अरञ्ञमहिंसादीनं. आरोग्यत्थायाति निरुपद्दवाय. सेसानीति पुब्बण्णनिस्सितादीनि सोळस. तानि च जनसम्मद्दमहासम्मद्दकुटिविलोपसरीरपीळादिउपद्दवेहि सउपद्दवानीति वेदितब्बानि. अभिहनन्ति एत्थाति अब्भाघातं. ‘‘वेरिघर’’न्ति वुत्तमेवत्थं विभावेतुं ‘‘चोरानं मारणत्थाय कत’’न्ति वुत्तं.

धम्मगन्धिकाति धम्मेन दण्डनीतिया हत्थपादादिच्छिन्दनगन्धिका. गन्धिकाति च यस्स उपरि हत्थादिं ठपेत्वा छिन्दन्ति, तादिसं दारुखण्डफलकाति वुच्चति, तेन च उपलक्खितं ठानं. पाळियं रच्छानिस्सितन्ति रथिकानिस्सितं. चच्चरनिस्सितन्ति चतुन्नं रथिकानं सन्धिनिस्सितं. सकटेनाति इट्ठकसुधादिभण्डाहरणसकटेन.

पाचिनन्ति ¶ सेनासनस्स भूमितो पट्ठाय याव तलावसानं चिनितब्बवत्थुकं अधिट्ठानं, यस्स उपरि भित्तिथम्भादीनि च पतिट्ठपेन्ति. तेनाह ‘‘ततो पट्ठाया’’तिआदि. किञ्चापि इध पुब्बपयोगसहपयोगानं अदिन्नादाने विय विसेसो नत्थि, तथापि तेसं विभागेन दस्सनं ¶ भिन्दित्वा वा पुन कातब्बाति एत्थ कुटिया भेदेन परिच्छेददस्सनत्थं कतं. तदत्थायाति तच्छनत्थाय. एवं कतन्ति अदेसितवत्थुकं पमाणातिक्कन्तं वा कतं. पण्णसालन्ति पण्णकुटिया तिणपण्णचुण्णस्स अपरिपतनत्थाय अन्तो च बहि च लिम्पन्ति, तं सन्धायेतं वुत्तं. तेनेव वक्खति ‘‘पण्णसालं लिम्पती’’ति.

अन्तोलेपेनेव निट्ठापेतुकामं सन्धाय ‘‘अन्तोलेपे वा’’तिआदि वुत्तं. बहिलेपे वाति एत्थापि एसेव नयो. तस्मिन्ति द्वारबन्धे वा वातपाने वा ठपितेति योजेतब्बं. तस्सोकासन्ति तस्स द्वारबन्धादिस्स ओकासभूतं छिद्दं. पुन वड्ढेत्वाति पुब्बे ठपितोकासं खुद्दकं चे, तं द्वारवातपानच्छिद्दभेदनेन पुन वड्ढेत्वा. ठपितेति द्वारबन्धे वा गवक्खसङ्घाटे वा आनेत्वा तस्मिं वड्ढिते वा अवड्ढिते वा छिद्दे पतिट्ठापिते. लेपो न घटीयतीति समन्ततो दिन्नो लेपो तथा ठपितेन द्वारबन्धनेन वा वातपानेन वा सद्धिं न घटीयति, एकाबद्धं न होतीति वुत्तं होति. तन्ति द्वारबन्धं वा वातपानं वा. पठममेव सङ्घादिसेसोति तेसं समन्ततो पुब्बेव लेपस्स घटेत्वा निट्ठापितत्ता द्वारबन्धवातपानानं ठपनतो पुब्बे एव सङ्घादिसेसो.

लेपघटनेनेवाति इट्ठकाहि कतवातपानादीनि विना समन्ता लेपघटनेनेव आपत्ति वातपानादीनं अलेपोकासत्ता, इट्ठकाहि कतत्ता वा, वातपानादीसुपि लेपस्स भित्तिलेपेन सद्धिं घटनेनेवातिपि अत्थं वदन्ति. तत्थाति पण्णसालायं. आलोकत्थाय अट्ठङ्गुलमत्तं ठपेत्वा लिम्पतीति दारुकुट्टस्स दारूनमन्तरा अट्ठङ्गुलमत्तं विवरं याव लिम्पति, ताव आलोकत्थाय ठपेत्वा अवसेसं सकुट्टच्छदनं लिम्पति, पच्छा एतं विवरं लिम्पिस्सामीति एवं ठपने अनापत्तीति अधिप्पायो. सचे पन एवं अकत्वा सब्बदापि आलोकत्थाय वातपानवसेन ठपेति, वातपानद्वारसङ्घाटे घटिते लेपो च घटीयति, पठममेव सङ्घादिसेसोति दस्सेन्तो आह ‘‘सचे’’तिआदि. मत्तिकाकुट्टमेव मत्तिकालेपसङ्ख्यं गच्छतीति आह ‘‘सचे मत्तिकाय कुट्टं करोति, छदनलेपेन सद्धिं घटने आपत्ती’’ति. उभिन्नं अनापत्तीति पुरिमस्स लेपस्स अघटितत्ता दुतियस्स अत्तुद्देसिकताय असम्भवतो.

३५४. आपत्तिभेददस्सनत्थन्ति ¶ तत्थ ‘‘सारम्भे च अपरिक्कमने च दुक्कटं अदेसितवत्थुकताय ¶ , पमाणातिक्कन्तताय च सङ्घादिसेसो’’ति एवं आपत्तियेव विभागदस्सनत्थं.

३६१. अनिट्ठिते कुटिकम्मेति लेपपरियोसाने कुटिकम्मे एकपिण्डमत्तेनपि अनिट्ठिते. ‘‘अञ्ञस्स पुग्गलस्स वा’’ति इदं मूलट्ठस्स अनापत्तिदस्सनत्थं वुत्तं. येन पन लद्धं, तस्सापि तं निट्ठापेन्तस्स ‘‘परेहि विप्पकतं अत्तना परियोसापेति, आपत्ति सङ्घादिसेसस्सा’’तिआदिवचनतो (पारा. ३६३) आपत्तियेव. पुब्बे कतकम्मम्पि लद्धकालतो पट्ठाय अत्तनो अत्थायेव कतं नाम होति, तस्मा तेनापि सङ्घस्स वा सामणेरादीनं वा दत्वा निट्ठापेतब्बं. ‘‘अञ्ञस्स वा’’ति इदं अनुपसम्पन्नंयेव सन्धाय वुत्तन्ति गहेतब्बं, केचि पन ‘‘परतो लद्धाय कुटिया निट्ठापने अनापत्तिआदितो पट्ठाय अत्तनो अत्थाय अकतत्ता’’ति वदन्ति. अपचिनितब्बाति याव पाचिना विद्धंसेतब्बा. भूमिसमं कत्वाति पाचिनतलावसानं कत्वा.

३६४. लेणन्ति पब्बतलेणं. न हेत्थ लेपो घटीयतीति छदनलेपस्स अभावतो वुत्तं, विसुं एव वा अनुञ्ञातत्ता. सचे लेणस्स अन्तो उपरिभागे चित्तकम्मादिकरणत्थं लेपं देन्ति, उल्लित्तकुटिसङ्ख्यं न गच्छति, वट्टति एव. इट्ठकादीहि कतं चतुरस्सकूटागारसण्ठानं एककण्णिकाबद्धं नातिउच्चं पटिस्सयविसेसं ‘‘गुहा’’ति वदन्ति, तादिसं महन्तम्पि उल्लित्तावलित्तं करोन्तस्स अनापत्ति. भूमिगुहन्ति उमङ्गगुहं.

अट्ठकथासूति कुक्कुटच्छिकगेहन्तिआदीसु अट्ठकथासु तिणकुटिका कुक्कुटच्छिकगेहन्ति वत्वा पुन तं विवरन्तेहि अट्ठकथाचरियेहि छदनं दण्डकेहि…पे… वुत्ताति योजना दट्ठब्बा. तत्थ दण्डकेहि जालबद्धं कत्वाति दीघतो, तिरियतो च ठपेत्वा वल्लियादीहि बद्धदण्डकेहि जालं विय कत्वा. सो चाति उल्लित्तादिभावो. छदनमेव सन्धाय वुत्तोति छदनस्स अन्तो च बहि च लिम्पनमेव सन्धाय वुत्तो. मत्तिकाकुट्टे भित्तिलेपं विनापि भित्तिया सद्धिं ¶ छदनलेपस्स घटनमत्तेनापि आपत्तिसम्भवतो छदनलेपोव पधानन्ति वेदितब्बं. किञ्चापि एवं, अथ खो ‘‘उपचिकामोचनत्थमेव हेट्ठा पासाणकुट्टं कत्वा तं अलिम्पित्वा उपरि लिम्पति, लेपो न घटीयति नाम, अनापत्तियेवा’’तिआदिवचनतो पन छदनलेपघटनत्थं सकलायपि भित्तिया लेपो अवस्सं इच्छितब्बोव तस्सा एकदेसस्स अलेपेपि छदनलेपस्स अघटनतो. तेनाह ‘‘लेपो न घटीयती’’ति. एत्थाति तिणकुटिकायं. न केवलञ्च तिणकुटिकायं एव, लेणगुहादीसुपि सारम्भापरिक्कमनपच्चयापि अनापत्ति एव, इमिना ¶ पन नयेन अञ्ञस्सत्थाय कुटिं करोन्तस्सापि सारम्भादिपच्चयापि अनापत्तिभावो अत्थतो दस्सितो एव होतीति.

तत्थ पाळिविरोधं परिहरितुं ‘‘यं पना’’तिआदि वुत्तं. अयञ्हेत्थ अधिप्पायो – अञ्ञस्स उपज्झायादिनो अत्थाय करोन्तस्स सारम्भादिपच्चयापि अनापत्ति एव, यं पन पाळियं ‘‘आपत्तिकारुकानं तिण्णं दुक्कटान’’न्तिआदिवचनं, तं अञ्ञस्सत्थाय करोन्तस्स, न सारम्भादिपच्चया आपत्तिदस्सनत्थं वुत्तं, किञ्चरहि यथासमादिट्ठाय कुटिया अकरणपच्चया आपत्तिदस्सनत्थन्ति. तत्थ यथासमादिट्ठायाति ‘‘भिक्खु समादिसित्वा पक्कमति, ‘कुटिं मे करोथा’ति समादिसति च, देसितवत्थुका च होतु अनारम्भा च सपरिक्कमना चा’’ति एवं कारापकेन आणत्तिक्कमं मुञ्चित्वा करणपच्चयाति अधिप्पायो. कत्थचि पन पोत्थके ‘‘कुटिलक्खणप्पत्तम्पि कुटिं अञ्ञस्स…पे… करोन्तस्स अनापत्ती’’ति इमस्स पाठस्स अनन्तरं ‘‘यं पन आपत्ति कारुकान’’न्तिआदिपाठो दिस्सति, सोव युत्ततरो. एवञ्हि सति तत्थ अधिप्पायो पाकटो होति.

अनापत्तीति वत्वाति वासागारत्थाय एव अनियमितत्ता अनापत्तीति वत्वा. अदेसापेत्वा करोतोति पमाणयुत्तम्पि करोतो. अचित्तकन्ति पण्णत्तिअजाननचित्तेन अचित्तकं. उल्लित्तादीनं अञ्ञतरता, हेट्ठिमप्पमाणसम्भवो, अदेसितवत्थुकता, पमाणातिक्कन्तता, अत्तुद्देसिकता, वासागारता, लेपघटनाति सत्त वा पमाणयुत्तङ्गादीसु छ वा अङ्गानि.

कुटिकारसिक्खापदवण्णना निट्ठिता.

७. विहारकारसिक्खापदवण्णना

३६५. सत्तमे ¶ पूजावचनप्पयोगे कत्तरि सामिवचनस्सपि इच्छितत्ता ‘‘गामस्स वा पूजित’’न्ति वुत्तं. रूपिन्द्रियेसु विज्जमानं सन्धाय एकिन्द्रियता वुच्चतीति आह ‘‘कायिन्द्रियं सन्धाया’’ति. ते हि मनिन्द्रियम्पि भूतगामानं इच्छन्ति.

३६६. किरियतो समुट्ठानाभावोति वत्थुनो अदेसनासङ्खातं अकिरियं विना न केवलं किरियाय समुट्ठानभावो. किरियाकिरियतो हि इदं समुट्ठाति. इमस्मिं सिक्खापदे भिक्खू वा ¶ अनभिनेय्याति एत्थ वा-सद्दो समुच्चयत्थो, तेन ‘‘महल्लकञ्च विहारं करेय्य, भिक्खू च अनभिनेय्या’’ति किरियञ्च अकिरियञ्च समुच्चिनोति.

विहारकारसिक्खापदवण्णना निट्ठिता.

८. पठमदुट्ठदोससिक्खापदवण्णना

३८०. अट्ठमे पाकारेन च परिक्खित्तन्ति सम्बन्धो. गोपुरट्टालकयुत्तन्ति एत्थ पाकारेसु युद्धत्थाय कतो वङ्कसण्ठानो सरक्खेपछिद्दसहितो पतिस्सयविसेसो अट्टालको नाम.

सोळसविधस्साति चतूहि मग्गेहि पच्चेकं चतूसु सच्चेसु कत्तब्बस्स परिञ्ञापहानसच्छिकिरियाभावनासङ्खातस्स सोळसविधस्स. ते गारवेनाति ते किलन्तरूपा भिक्खू भत्तुद्देसकट्ठाने सन्निपतितानं भिक्खूनं पुरतो अत्तनो किलन्तसरीरं दस्सेत्वा उद्दिसापने गारवेन, लज्जायाति अत्थो. तेरसपीति भत्तुद्देसकसेनासनगाहापकभण्डागारिकचीवरपटिग्गाहकचीवरभाजकयागुभाजकफलभाजकखज्जभाजकअप्पमत्तकविस्सज्जकसाटियगाहापकपत्तगाहापकआरामिकपेसकसामणेरपेसकसम्मुतीनं वसेन तेरसपि.

पाळियं ‘‘अपिसू’’ति इदं ‘‘अपिचा’’ति इमिना समानत्थो निपातो. एवं सब्बपदेसूति पीठादीसु सेनासनसाधारणेसु, कतिकसण्ठानपवेसनिक्खमनकालादीसु पन विसुं विसुं अधिट्ठहित्वा कथापेतीति वेदितब्बं ¶ . अयञ्हि निम्मितानं धम्मताति अनियमेत्वा निम्मितानं वसेन वुत्तं, नियमेत्वा पन ‘‘एत्तका इदञ्चिदञ्च कथेन्तु, एत्तका तुण्ही भवन्तु, नानाप्पकारं इरियापथं, किरियञ्च कप्पेन्तु, नानावण्णसण्ठानवयोनियमा च होन्तू’’ति परिकम्मं कत्वा समापज्जित्वा वुट्ठाय अधिट्ठिते इच्छितिच्छितप्पकारा अञ्ञमञ्ञम्पि विसदिसाव होन्ति. अवत्थुकवचनन्ति निरत्थकवचनं.

३८३. एकचारिकभत्तन्ति अतिमनापत्ता सब्बेसम्पि पटिलाभत्थाय विसुं ठितिकाय पापेतब्बभत्तं. तद्धितवोहारेनाति चत्तारि पमाणमस्स चतुक्कन्ति एवं तद्धितवोहारेन. भवोति भवितब्बो. अतीतं दिवसभागन्ति तस्मिञ्ञेव दिवसे सलाकदानक्खणं सन्धाय वुत्तं. हिय्योति इमस्स अज्ज इच्चेव अत्थो. तेनेवाहंसु ‘‘स्वे अम्हे’’तिआदि. पधूपायन्ताति पुनप्पुनं ¶ उप्पज्जनकोधवसेन पधूपायन्ता. पाळियं किस्स मन्ति केन कारणेन मयाति अत्थो.

३८४. ‘‘सरसि त्व’’न्ति इदं एकं वाक्यं कत्वा, ‘‘कत्ता’’ति इदञ्च कत्तरि रितुपच्चयन्तं कत्वा, ‘‘असी’’ति अज्झाहारपदेन सह एकवाक्यं कत्वा, ‘‘एवरूप’’न्ति इदं, ‘‘यथायं भिक्खुनी आहा’’ति इदञ्च द्वीसु वाक्येसु पच्चेकं योजेतब्बन्ति दस्सेतुं ‘‘अथ वा’’तिआदिमाह. उजुकमेवाति त्वा-पच्चयन्तवसेन पठमं अत्थग्गहणं उजुकन्ति अधिप्पायो.

दुतियो दब्ब-सद्दो पण्डितादिवचनोति आह ‘‘न खो दब्ब दब्बा पण्डिता’’ति. निब्बेठेन्तीति दोसतो मोचेन्ति. विनयलक्खणे तन्तिन्ति विनयविनिच्छयलक्खणविसये आगमं ठपेन्तो. पाळियं यतो अहन्तिआदीसु यस्मिं काले अहं जातो, ततो पभुति सुपिनन्तेनपि मेथुनं धम्मं नाभिजानामि, न च तस्स मेथुनधम्मस्स पटिसेविता अहोसिन्ति अत्थो दट्ठब्बो. तेनाह ‘‘सुपिनन्तेनपी’’तिआदि. इदानि एकवाक्यवसेन योजनं दस्सेतुं ‘‘अथ वा’’तिआदि वुत्तं. न घटतीति यस्मा खीणासवस्स वचनेन एतिस्सा वचनं न समेति, तञ्च न घटनं यस्मा पुब्बे भिक्खूसु पसिद्धाय एव अच्चन्तदुस्सीलताय एव अहोसि, तस्मा मेत्तियं भिक्खुनिं नासेथाति अधिप्पायो.

चर पिरेति चर गच्छ पिरे पर अमामक त्वं. विनस्साति अदस्सनं गच्छ. अकारिकाति अमूलकेन चोदनाय न कारिका. कारको होतीति ¶ ‘‘अय्येनम्हि दूसिता’’ति इमाय पटिञ्ञाय यदि नासिता, तदा थेरो भिक्खुनीदूसकत्तसिद्धितो तस्स दोसस्स कारको होति. अकारको होतीति ताय कतपटिञ्ञं अनपेक्खित्वा सामञ्ञतो ‘‘मेत्तियं भिक्खुनिं नासेथा’’ति भगवता वुत्तत्ता अकारको होति. यदि हि थेरो कारको भवेय्य, अवस्सं तमेव दोसं अपदिसित्वा इमिना नाम कारणेन ‘‘मेत्तियं भिक्खुनिं नासेथा’’ति वत्तब्बं सिया, तथा अवुत्तत्ता, ‘‘दब्बञ्च अनुयुञ्जथा’’ति अवत्वा ‘‘इमे च भिक्खू अनुयुञ्जथा’’ति वुत्तत्ता च सामत्थियतो मेत्तियाय भिक्खुनिया अञ्ञेन दोसेन नासनारहता, वत्थुस्स च अमूलकभावो, थेरस्स अकारकभावो च सिद्धो होतीति अधिप्पायो.

अत्तनो सुत्तन्ति ‘‘सकाय पटिञ्ञाया’’ति इमिना पक्खेपवचनेन सहितं कूटसुत्तं. थेरो ¶ कारको होतीति एत्थ अयमधिप्पायो – ‘‘सकाय पटिञ्ञाया’’ति अवत्वा सामञ्ञतो ‘‘मेत्तियं भिक्खुनिं नासेथा’’ति ओतिण्णवत्थुस्मिंयेव तस्सा नासना विहिताति तुम्हाकं वादे थेरो कारको होति, ‘‘सकाय पटिञ्ञाया’’ति पन वुत्ते पुब्बेयेव सिद्धस्स पाराजिकस्स सुचिकाय अस्सा सकाय पटिञ्ञाय नासेथाति सिज्झनतो अम्हाकं वादे थेरो अकारको होतीति. महाविहारवासीनम्पि पन ‘‘सकाय पटिञ्ञाया’’ति वुत्ते ओतिण्णवत्थुस्मिंयेव तस्सा नासना विहिता होति, न सामञ्ञतोति अधिप्पायो. एत्थाति इमेसु द्वीसु वादेसु, सुत्तेसु वा. यं पच्छा वुत्तन्ति महाविहारवासीहि यं वुत्तं, तं युत्तन्ति अत्थो. विचारितं हेतन्ति एतं पच्छिमस्स युत्तत्तं विचारितं, ‘‘तत्र सङ्घादिसेसो वुट्ठानगामिनी…पे… असुद्धतायेव नासेसी’’ति वक्खमाननयेन विनिच्छितन्ति अत्थो. ‘‘भिक्खुनिं अनुद्धंसेति दुक्कट’’न्ति इमिना महाअट्ठकथावादो दस्सितो.

तत्राति तेसु दुक्कटपाचित्तियेसु. दुक्कटन्ति वुत्तमहाअट्ठकथावादस्स अधिप्पायं दस्सेत्वा ‘‘पाचित्तिय’’न्ति पवत्तस्स कुरुन्दिवादस्स अधिप्पायं दस्सेतुं ‘‘पच्छिमनयेपी’’तिआदि वुत्तं. वचनप्पमाणतोति विसंवादनाधिप्पाये समानेपि अनुद्धंसनादिविसेसे सङ्घादिसेसादिनो विधायकवचनबलेनाति अत्थो. भिक्खुस्स पन भिक्खुनिया दुक्कटन्ति भिक्खुनिं अनुद्धंसेन्तस्स भिक्खुस्स दुक्कटं.

एवं ¶ द्वीसुपि अट्ठकथावचनेसु अधिप्पायं विभावेत्वा इदानि पच्छिमे पाचित्तियवादे दोसं दस्सेत्वा पुरिमदुक्कटवादमेव पतिट्ठापेतुं ‘‘तत्र पना’’तिआदि वुत्तं. तत्थ विसुन्ति सम्पजानमुसावादे पाचित्तियतो (पाचि. १) विसुं पाचित्तियं वुत्तं, तत्थ अनन्तोगधभावाति अधिप्पायो. तस्माति यस्मा अमूलकानुद्धंसने विसुञ्ञेव पाचित्तियं पञ्ञत्तं, तस्मा पुरिमनयोति दुक्कटवादो. एवं अन्तरा पविट्ठं दुक्कटपाचित्तियवादं दस्सेत्वा इदानि पाकटमेव अत्थं विभावेतुं ‘‘तथा भिक्खुनी’’तिआदि आरद्धं. तत्थ तथाति यथा भिक्खुस्स भिक्खुं, भिक्खुनिञ्च अनुद्धंसेन्तस्स सङ्घादिसेसदुक्कटानि वुत्तानि, तथाति अत्थो. एतेहि नासना नत्थीति सामञ्ञतो वुत्तं, दुक्कटेन इमिस्सा पन नासना नत्थीति अधिप्पायो. दुस्सीलाति पाराजिका.

३८६. आकारनानत्तेनाति दूसिताकारस्स, दूसकाकारस्स च नानत्तेन. अनभिरद्धोति अतुट्ठो. तेनाह ‘‘न सुखितो’’ति. न पसादितोति अनुप्पादितप्पसादो. खील-सद्दो थद्धभाववचनो ¶ , कचवरपरियायो च होतीति आह ‘‘चित्त…पे… खील’’न्ति. नप्पतीतोति पीतिसुखादीहि न अभिगतो न उपगतो. तेनाह ‘‘न अभिसटो’’ति.

येन दुट्ठोति च कुपितोति च वुत्तोति एत्थ येन दुट्ठोति च वुत्तो येन कुपितोति च वुत्तो, तं मातिकायञ्च पदभाजने (पारा. ३८६) च वुत्तं उभयम्पेतन्ति योजेतब्बं. द्वीहीति ‘‘तेन च कोपेन, तेन च दोसेना’’ति वुत्तकोपदोसपदेहि द्वीहि, अत्थतो पन द्वीहिपि दोसोव दस्सितोति आह ‘‘सङ्खारक्खन्धमेव दस्सेती’’ति. यायाति अनत्तमनताय.

न चुदितकवसेनाति यदि चुदितकवसेनापि अमूलकं अधिप्पेतं सिया, अमूलकं नाम अनज्झापन्नन्ति पदभाजनं वदेय्याति अधिप्पायो. यं पाराजिकन्ति भिक्खुनो अनुरूपेसु एकूनवीसतिया पाराजिकेसु अञ्ञतरं. पदभाजने (पारा. ३८६) पन भिक्खुविभङ्गे आगतानेव गहेत्वा ‘‘चतुन्नं अञ्ञतरेना’’ति वुत्तं. एतं इध अप्पमाणन्ति एतं आपन्नानापन्नतं इधानुद्धंसने ¶ आपत्तिया अनङ्गं, आपत्तिं पन आपन्ने वा अनापन्ने वा पुग्गले ‘‘अनापन्नो एसो सुद्धो’’ति सुद्धसञ्ञाय वा विमतिया वा चावनाधिप्पायोव इध अङ्गन्ति अधिप्पायो.

तथेवाति पसादसोतेन, दिब्बसोतेन वाति इममत्थं अतिदिसति. दिट्ठानुसारेनेव समुप्पन्ना परिसङ्काव दिट्ठपरिसङ्कितं नाम. एवं सेसेसुपि. ‘‘अदिस्वा वा’’ति इदं उक्कट्ठवसेन वुत्तं, दिस्वा पक्कन्तेसुपि दोसो नत्थियेव. इमेसन्ति इमेहि. करिस्सन्तीति तस्मिं खणे उप्पज्जनाकारदस्सनं, पच्छा पन एत्तकेन कालेन कतं वाति सङ्काय चोदेति. न हि करिस्सन्तीति चोदना अत्थि. ‘‘अरिट्ठं पीत’’न्ति इदं मुखे सुरागन्धवायननिमित्तदस्सनं. अरिट्ठञ्हि सुरासदिसवण्णगन्धं कप्पियभेसज्जं.

दिट्ठं अत्थि समूलकन्तिआदीसु अज्झाचारस्स सम्भवासम्भवानं मूलामूलभावदस्सनं. अत्थि सञ्ञासमूलकन्तिआदि पन दिट्ठसञ्ञाय सम्भवासम्भवानं मूलामूलभावदस्सनं. दिस्वाव दिट्ठसञ्ञी हुत्वा चोदेतीति एत्थ यं चोदेति, ततो अञ्ञं पुग्गलं वीतिक्कमन्तं, पटिच्छन्नोकासतो निक्खमन्तं वा दिस्वा ‘‘अयं सो’’ति सञ्ञाय चोदेन्तोपि सङ्गय्हति. एस नयो सुतादीसुपि. समूलकेन वा सञ्ञासमूलकेन वाति एत्थ पाराजिकमापन्नं दिट्ठादिमूलकेन च ‘‘अयं आपन्नो’’ति असुद्धसञ्ञाय चोदेन्तो समूलकेन चोदेति नाम. सञ्ञासमूलकत्ते एव अनापत्तिसम्भवतो आपन्ने वा अनापन्ने वा पुग्गले आपन्नसञ्ञी दिट्ठादीसु ¶ , अदिट्ठादीसु वा मूलेसु दिट्ठसुतादिसञ्ञी तेन दिट्ठादिमूलकेन तं पुग्गलं चोदेन्तो सञ्ञासमूलकेन चोदेति नाम. इमेसं अनापत्ति, वुत्तविपरियायेन आपत्तिवारे अत्थो वेदितब्बो.

समीपे ठत्वाति हत्थविकारवचीघोसानं चोदनावसेन पवत्तियमानानं दस्सनसवनूपचारे ठत्वाति अत्थो. केचि पन ‘‘द्वादसहत्थब्भन्तरे ठत्वा’’ति (सारत्थ. टी. २.३८५-३८६) वदन्ति, तं न युत्तं. परतो ब्यतिरेकतो अनापत्तिं दस्सेन्तेन ‘‘दूतं वा पण्णं वा सासनं वा पेसेत्वा’’ति एत्तकमेव वुत्तं, न पन ‘‘द्वादसहत्थं मुञ्चित्वा चोदेन्तस्स सीसं न एती’’ति वुत्तं. वाचाय वाचायाति सकिं आणत्तस्स सकलम्पि दिवसं वदतो वाचाय ¶ वाचाय चोदापकस्सेव आपत्ति. सोपीति आणत्तोपि. तस्स च ‘‘मयापि दिट्ठ’’न्तिआदिं अवत्वापि ‘‘अमूलक’’न्ति सञ्ञाय चावनाधिप्पायेन ‘‘त्वं पाराजिकं धम्मं अज्झापन्नोसी’’ति इदमेव वाचं परस्स वचनं विय अकत्वा सामञ्ञतो वदन्तस्सापि सङ्घादिसेसो एव. सतिपि पन अनुद्धंसनाधिप्पाये ‘‘असुकेन एवं वुत्त’’न्ति परेन वुत्तमेव वदन्तस्स नत्थि सङ्घादिसेसो. सचे पन परेन अवुत्तम्पि वुत्तन्ति वदति, आपत्ति एव.

सम्बहुला सम्बहुले सम्बहुलेहि वत्थूहीति एत्थ सम्बहुलेति चुदितकबहुत्तनिद्देसेन पुरिमेसु तीसु वारेसु चुदितकबहुत्तेनापि वारभेदसब्भावं ञापेति. एकस्मिञ्हि चुदितकवत्थुचोदकभेदेन इदं चतुक्कं वुत्तं, चुदितकबहुत्तेनापि चतुक्कन्तरं लब्भतीति अट्ठकं होति एव.

अमूलकचोदनापसङ्गेन समूलकचोदनालक्खणादिं दस्सेतुं ‘‘चोदेतुं पन को लभती’’तिआदि आरद्धं. भिक्खुस्स सुत्वा चोदेतीतिआदि सुत्तं यस्मा ये चोदकस्स अञ्ञेसं विपत्तिं पकासेन्ति, तेपि तस्मिं खणे चोदकभावे ठत्वाव पकासेन्ति, तेसञ्च वचनं गहेत्वा इतरोपि यस्मा चोदेतुञ्च असम्पटिच्छन्तं तेहि तित्थियसावकपरियोसानेहि पठमचोदकेहि सम्पटिच्छापेतुञ्च लभति, तस्मा इध सावकभावेन उद्धटन्ति वेदितब्बं.

दूतं वातिआदीसु ‘‘त्वं एवं गन्त्वा चोदेही’’ति दूतं वा पेसेत्वा यो चोदेतुं सक्कोति, तस्स पण्णं, मूलसासनं वा पेसेत्वा. समयेनाति पकतिया जाननक्खणे.

गरुकानं द्विन्नन्ति पाराजिकसङ्घादिसेसानं. मिच्छादिट्ठि नाम ‘‘नत्थि दिन्न’’न्तिआदिनयप्पवत्ता (म. नि. १.४४५; २.९४, ९५, २२५; ३.९१, ११६, १३६; सं. नि. ३.२१०) दसवत्थुका ¶ दिट्ठि, सस्सतुच्छेदसङ्खातं अन्तं गण्हापकदिट्ठि अन्तग्गाहिका नाम. आजीवहेतु पञ्ञत्तानं छन्नन्ति आजीवहेतुपि आपज्जितब्बानं उत्तरिमनुस्सधम्मपाराजिकं (पारा. १९५), सञ्चरित्ते (पारा. ३०१, ३०२) सङ्घादिसेसो, ‘‘यो ते विहारे वसति, सो अरहा’’ति (पारा. २२०) परियायेन थुल्लच्चयं, भिक्खुस्स पणीतभोजनविञ्ञत्तिया पाचित्तियं (पाचि. २५७), भिक्खुनियापणीतभोजनविञ्ञत्तिया ¶ पाटिदेसनीयं (पाचि. १२३६), सूपोदनविञ्ञत्तिया (पाचि. ६१२-६१३) दुक्कटन्ति इमेसं परिवारे (परि. २८७) वुत्तानं छन्नं. न हेता आपत्तियो आजीवहेतु एव पञ्ञत्ता सञ्चरित्तादीनं अञ्ञथापि आपज्जितब्बतो. आजीवहेतुपि एतासं आपज्जनं सन्धाय एवं वुत्तं, आजीवहेतुपि पञ्ञत्तानन्ति अत्थो. न केवलञ्च एता एव, अञ्ञापि अदिन्नादानकुलदूसनपाणवधवेज्जकम्मादिवसेन आजीवहेतु आपज्जितब्बापि सन्ति, ता पन आपत्तिसभआगताय पाराजिकादीसु छसु एव सङ्गय्हन्तीति विसुं न वुत्ताति वेदितब्बा.

एत्तावता पन सीसं न एतीति सङ्घादिसेसं सन्धाय वुत्तं, चोदना पन कता एव होति. तिंसानीति तिंसं एतेसमत्थीति तिंसानि, तिंसाधिकानीति वुत्तं होति. नवुतानीति एत्थापि एसेव नयो.

अत्तादानं आदातुकामेनाति एत्थ अत्तना आदातब्बतो दिट्ठादिमूलकेहि गहेतब्बतो परस्स विप्फन्दितुं अदत्वा पग्गण्हनतो अत्तादानन्ति चोदना वुच्चति, तं आदातुकामेन, चोदनं कत्तुकामेनाति अत्थो.

उब्बाहिकायाति उब्बहन्ति वियोजेन्ति एताय अलज्जीनं तज्जनिं वा कलहं वाति उब्बाहिका, सङ्घसम्मुति, ताय. विनिच्छिननं नाम ताय सम्मतभिक्खूहि विनिच्छननमेव. अलज्जुस्सन्नाय हि परिसाय समथक्खन्धके (चूळव. २२७) आगतेहि दसङ्गेहि समन्नागता द्वे तयो भिक्खू तत्थेव वुत्ताय ञत्तिदुतियकम्मवाचाय सम्मन्नितब्बा, तेहि च सम्मतेहि विसुं वा निसीदित्वा, तस्सा एव वा परिसाय ‘‘अञ्ञेहि न किञ्चि कथेतब्ब’’न्ति सावेत्वा तं अधिकरणं विनिच्छितब्बं.

किम्हीति किस्मिं वत्थुस्मिं, कतरविपत्तियन्ति अत्थो. ‘‘किम्हि नं नामा’’ति इदं ‘‘कतराय विपत्तिया एतं चोदेसी’’ति याय कायचि विञ्ञायमानाय भासाय वुत्तेपि चोदकस्स विनये अपकतञ्ञुताय ‘‘सीलाचारदिट्ठिआजीवविपत्तीसु कतरायाति मं पुच्छती’’ति ¶ ञातुं असक्कोन्तस्स पुच्छा, न पन किम्हीतिआदिपदत्थमत्तं अजानन्तस्स. न हि अनुविज्जको चोदकं बालं अपरिचितभासाय ‘‘किम्हि न’’न्ति पुच्छति. ‘‘किम्हि नम्पि न जानासी’’ति इदम्पि वचनमत्तं सन्धाय वुत्तं न होति, ‘‘कतरविपत्तिया’’ति ¶ वुत्ते ‘‘असुकाय विपत्तिया’’ति वत्तुम्पि न जानासीति वचनस्स अधिप्पायमेव सन्धाय वुत्तन्ति गहेतब्बं. तेनेव वक्खति ‘‘बालस्स लज्जिस्स नयो दातब्बो’’ति वत्वा च ‘‘किम्हि नं चोदेसीति सीलविपत्तिया’’तिआदि अधिप्पायप्पकासनमेव नयदानं वुत्तं, न पन किम्हि-नं-पदानं परियायमत्तदस्सनं. न हि बालो ‘‘कतरविपत्तियं नं चोदेसी’’ति इमस्स वचनस्स अत्थे ञातेपि विपत्तिप्पभेदनं, अत्तना चोदियमानं विपत्तिसरूपञ्च जानितुं सक्कोति, तस्मा तेनेव अजाननेन अलज्जी अपसादेतब्बो. ‘‘किम्हि न’’न्ति इदम्पि उपलक्खणमत्तं, अञ्ञेन वा येन केनचि आकारेन अविञ्ञुतं पकासेत्वा विस्सज्जेतब्बोव.

‘‘दुम्मङ्कूनं पुग्गलानं निग्गहाया’’तिआदिवचनतो (पारा. ३९; परि. २) ‘‘अलज्जीनिग्गहत्थाय…पे… पञ्ञत्त’’न्ति वुत्तं. एहितीति हि-कारो एत्थ आगमो दट्ठब्बो, आगमिस्सतीति अत्थो. दिट्ठसन्तानेनाति दिट्ठनियामेन. अलज्जिस्स पटिञ्ञाय एव कातब्बन्ति वचनपटिवचनक्कमेनेव दोसे आविभूतेपि अलज्जिस्स ‘‘असुद्धोह’’न्ति दोससम्पटिच्छनपअञ्ञाय एव आपत्तिया कातब्बन्ति अत्थो. केचि पन ‘‘अलज्जिस्स एतं नत्थीति सुद्धपटिञ्ञाय एव अनापत्तिया कातब्बन्ति अयमेत्थ अत्थो सङ्गहितो’’ति वदन्ति, तं न युत्तं अनुविज्जकस्सेव निरत्थकत्तापत्तितो चोदकेनेव अलज्जिपटिञ्ञाय ठातब्बतो. दोसापगमपटिञ्ञा एव हि इध पटिञ्ञाति अधिप्पेता. तेनेव वक्खति ‘‘एतम्पि नत्थीति पटिञ्ञं न देती’’तिआदि (पारा. अट्ठ. २.३८५-३८६).

तदत्थदीपनत्थन्ति अलज्जिस्स दोसे आविभूतेपि तस्स दोसापगमपटिञ्ञाय एव कातब्बतादीपनत्थं. विवादवत्थुसङ्खाते अत्थे पच्चत्थिका अत्थपच्चत्थिका. सञ्ञं दत्वाति नेसं कथापच्छेदत्थं, अभिमुखकरणत्थञ्च सद्दं कत्वा. विनिच्छिनितुं अननुच्छविकोति ‘‘असुद्धो’’ति सञ्ञाय चोदकपक्खे पविट्ठत्ता अनुविज्जकभावतो बहिभूतत्ता अनुविज्जितुं असक्कुणेय्यतं सन्धाय वुत्तं. सन्देहे एव हि सति अनुविज्जितुं सक्का, असुद्धदिट्ठिया पन सति चुदितकेन वुत्तं सब्बं असच्चतोपि पटिभाति, कथं तत्थ अनुविज्जना सियाति.

‘‘तथा ¶ नासितकोव भविस्सती’’ति इमिना विनिच्छयं अदत्वा सङ्घतो वियोजनं नाम लिङ्गनासना विय अयम्पि एको नासनप्पकारोति दस्सेति. विरद्धं होतीति सञ्चिच्च आपत्तिं ¶ सहसा आपन्नो होति. ‘‘आदितो पट्ठाय अलज्जी नाम नत्थी’’ति इदं ‘‘पक्खानुरक्खणत्थाय पटिञ्ञं न देती’’ति इमस्स अलज्जिलक्खणसम्भवस्स कारणवचनं. पटिच्छादितकालतो पट्ठाय अलज्जी नाम एव, पुरिमो लज्जिभावो न रक्खतीति अत्थो. पटिञ्ञं न देतीति सचे मया कतदोसं वक्खामि, मय्हं अनुवत्तका भिज्जिस्सन्तीति पटिञ्ञं न देति. ठाने न तिट्ठतीति लज्जिट्ठाने न तिट्ठति, कायवाचासु वीतिक्कमो होति एवाति अधिप्पायो. तेनाह ‘‘विनिच्छयो न दातब्बो’’ति, पुब्बे पक्खिकानं पटिञ्ञाय वूपसमितस्सापि अधिकरणस्स दुवूपसन्तताय अयम्पि तथा नासितकोव भविस्सतीति अधिप्पायो.

चुदितकचोदकेसु पटिपत्तिं ञत्वाति ‘‘तुम्हे अम्हाकं विनिच्छयेन तुट्ठा भविस्सथा’’तिआदिना वुत्तं चुदितकचोदकेसु अनुविज्जकेन पटिपज्जितब्बकम्मं ञत्वा. विनिच्छयो मज्झेति आपत्तीति वा अनापत्तीति वा विनिच्छयपरियोसानअनुविज्जनानं मज्झं नामाति अत्थो.

अमूलकम्पि समूलकं कत्वा वदन्तीति आह ‘‘द्वे मूलानी’’ति. कालेन वक्खामीतिआदीसु ओकासं कारापेत्वा वदन्तो कालेन वदति नाम. सलाकग्गयागुअग्गभिक्खाचारट्ठानादीसु चोदेन्तो अकालेन वदति नाम. दोसतो वुट्ठापेतुकामताय वदन्तो अत्थसंहितेन वदति नाम. दोसन्तरोति दोसचित्तो. पन्नरससु धम्मेसूति ‘‘परिसुद्धकायसमआचारता, तथा वचीसमाचारता, सब्रह्मचारीसु मेत्तचित्तता, बहुस्सुतता, उभिन्नं पातिमोक्खानं स्वागतादिता, कालेन वक्खामी’’तिआदिना (परि. ३६२) वुत्तपञ्चधम्मा च कारुञ्ञता, हितेसिता, अनुकम्पता, आपत्तिवुट्ठानता, विनयपुरेक्खारताति (चूळव. ४०१) इमेसु पन्नरससु. तत्थ ‘‘कारुञ्ञता’’ति इमिना करुणा दस्सिता. हितेसिताति हितगवेसनता. अनुकम्पताति तेन हितेन संयोजनता, इमेहि द्वीहिपि मेत्ता दस्सिता. आपत्तिवुट्ठानताति सुद्धन्ते पतिट्ठापनता. वत्थुं चोदेत्वा सारेत्वा पटिञ्ञं आरोपेत्वा यथापटिञ्ञाय कम्मकरणं विनयपुरेक्खारता नाम.

अधिकरणट्ठेनाति ¶ अधिकातब्बट्ठेन, समथेहि वूपसमेतब्बट्ठेनाति अत्थो. तं नानत्तं दस्सेतुन्ति इध अनधिप्पेतम्पि अत्थुद्धारवसेन तं नानत्तं दस्सेतुन्ति अधिप्पायो. तेनेव वक्खति ‘‘सेसानि अत्थुद्धारवसेन वुत्तानी’’ति (पारा. अट्ठ. २.३८५-३८६). यं अधिकिच्चातिआदिना अधिकरणसद्दस्स कम्मसाधनता वुत्ता.

गाहन्ति ¶ ‘‘असुकं चोदेस्सामी’’ति मनसा चोदनाकारस्स गहणं. चेतनन्ति ‘‘चोदेस्सामी’’ति उप्पन्नचित्तब्यापारसङ्खातं चित्तकम्मं. अक्खन्तिन्ति चुदितकस्स विपत्तिं दिस्वा उप्पन्नं कोधं असहनं, तथा पवत्तं वा यं किञ्चि चित्तचेतसिकरासिं. वोहारन्ति चोदनावसप्पवत्तवचनं. पण्णत्तिन्ति चोदनावसप्पवत्तं मनसा परिकप्पितं नामपण्णत्तिं. अत्तादानं गहेत्वाति चोदनं मनसा गहेत्वा. तं अधिकरणन्ति तं गाहलक्खणं अधिकरणं. निरुज्झति चेतनाय खणिकत्ता, सा च समथप्पत्ता होतीति एवमेत्थ अनिट्ठप्पसङ्गो वेदितब्बो. एवं उपरिपि ‘‘तुण्ही होती’’ति इमिना वोहारवचनस्स निरोधं दस्सेति. तेनाह ‘‘तं अधिकरणं समथप्पत्तं भविस्सती’’ति. ‘‘तस्मा पण्णत्ति अधिकरण’’न्ति अट्ठकथासु कतसन्निट्ठानं दस्सेत्वा इदानि तस्सापि एकच्चेहि पटिक्खित्तभावं दस्सेत्वा पुन तम्पि पटिसेधेत्वा अट्ठकथासु वुत्तपण्णत्तिया एव अधिकरणतं समत्थेतुं ‘‘तं पनेत’’न्तिआदिमाह. तत्थ तं पनेतन्ति पण्णत्ति अधिकरणन्ति एतं गहणं विरुज्झतीति सम्बन्धो. पाराजिकादिआपत्ति एकन्तअकुसलसभावा वा अब्याकतसभावा वा होतीति सञ्ञाय ‘‘मेथुनधम्मपाराजिकापत्ती’’तिआदिकं सुत्तं पण्णत्तिअधिकरणवादेन विरुज्झतीति दस्सेतुं उद्धटं. तेनाह ‘‘न हि ते…पे… अच्चन्तअकुसलत्ता’’तिआदि. तेति अट्ठकथाचरिया.

अमूलकञ्चेव तं अधिकरणन्ति एत्थ अमूलकपाराजिकमेव अधिकरण-सद्देन अधिप्पेतन्ति दस्सेतुं ‘‘यञ्चेत’’न्तिआदि वुत्तं. यस्मा पनातिआदि पन इधाधिप्पेताय अमूलकपाराजिकापत्तिया एव पण्णत्तिभावो युज्जतीति दस्सेतुं आरद्धं. तत्थ याय पण्णत्तियाति सभावतो परिसुद्धेपि पुग्गले ‘‘पाराजिको’’तिआदिना चोदकेन पवत्तितं नामपण्णत्तिं सन्धाय वदति. पञ्ञत्तोति कथितो. अधिकरणे पवत्तत्ताति अविज्जमानेपि ¶ मनसा आरोपितमत्ते आपत्ताधिकरणे वाचकभावेन पवत्तत्ता.

एवं नामपण्णत्तिवसेन इमस्मिं सिक्खापदे आपत्ताधिकरणस्स पञ्ञत्तिभावं दस्सेत्वा इदानि अत्थपण्णत्तिवसेनापि दस्सेतुं ‘‘यस्मा वाय’’न्तिआदि वुत्तं. पञ्ञत्तिमत्तमेवाति अविज्जमानस्स विज्जमानाकारेन मनसा आरोपितअत्थपण्णत्तिमत्तमेवाति अत्थो. तञ्च खो इधेवाति तञ्च यथावुत्तपरियायेन पण्णत्तिया अधिकरणत्तं इधेव इमस्मिं एव सिक्खापदे. एकेति केचि. तं न युत्तन्ति यं एकच्चेहि अट्ठकथासु वुत्तं, अधिकरणस्स पण्णत्तिभावं निसेधेत्वा कुसलादिपरमत्थभावं साधेतुं ‘‘तं पनेतं मेथुनधम्मपाराजिकापत्ती’’तिआदिना पपञ्चतो दस्सितो, तं न युत्तन्ति अत्थो. तत्थ कारणमाह ‘‘आदिकम्मिकस्सा’’तिआदिना, तेन च तस्मिं वादे यदि आपत्ति नाम अकुसला वा अब्याकता वा भवेय्य, कथं आदिकम्मिकस्स ¶ अनापत्ति भवेय्य? तस्सापि अकुसलादीनं उप्पन्नत्ता भगवतो सिक्खापदपञ्ञत्तितो पट्ठाय याव आपत्तीतिपि न सक्का वत्तुं, मेथुनादीसु अकुसलादीनं सिक्खापदपञ्ञत्तितो पुब्बेपि समुप्पत्तितो. ततो एव अनुपसम्पन्नानम्पि आपत्तिप्पसङ्गो, गिलानादीनं उप्पन्नत्ता अनुपञ्ञत्तियापि अनापत्तिअभावप्पसङ्गो च सिया. अथ मतं ‘‘न केवलं अकुसलादि एव, अथ खो भगवता पटिक्खित्तभावं जानन्तस्स समुप्पज्जमाना एव अकुसलादयो आपत्ती’’ति, तम्पि असारं, सिक्खापदपञ्ञत्तिं अजानित्वा वीतिक्कमन्तस्स मेथुनादीसु अनापत्तिप्पसङ्गतो, अकुसलादिसभावाय च आपत्तिया एकपयोगादीसु एकत्तादिपि न सिया. न हि सकलम्पि दिवसं इत्थिं कायतो अमोचेत्वा फुसन्तस्स एकमेवाकुसलं उप्पज्जति, बहू वा इत्थियो फुसित्वा अपगच्छन्तस्स बहूनि, येनापत्तिया एकत्तं, बहुत्तं वा सियाति एवमादिकं अयुत्तिं सङ्गहेत्वा दस्सितन्ति वेदितब्बं.

तत्थ वत्थुञ्चाति वीतिक्कमो. तञ्हि आपत्तिसम्मुतिपञ्ञापनस्स ओकासट्ठेन ‘‘वत्थू’’ति वुच्चति. गोत्तन्ति अदिन्नादानादितो बुद्धिसद्दनिवत्तनट्ठेन परिकप्पितसामञ्ञाकारो गोत्तं. नामन्ति अविज्जमाननामपञ्ञत्ति. तस्स पन पाराजिकन्ति नामस्स अत्थभूता आपत्ति अत्थपञ्ञत्ति एवाति दट्ठब्बं ¶ . यं पन ‘‘विवादाधिकरणं सिया कुसल’’न्तिआदि (चूळव. २२०; परि. ३०३), ‘‘आपत्ताधिकरणं सिया अकुसल’’न्तिआदि (चूळव. २२२) च सुत्तं तेहि समुद्धटं, तम्पि न विवादादीनं कुसलादिभावस्स परियायदेसितत्ताति यं एत्थ वत्तब्बं, तं हेट्ठा पठमपाराजिकसमुट्ठानादिवण्णनाय सारत्थदीपनियं विरद्धट्ठानसोधनत्थं वित्थारतो वुत्तन्ति तत्थेव तं गहेतब्बं, सारत्थदीपनीकारकस्स अकुसलादिरूपाव आपत्तीति लद्धि, तेनेव सो इधापि ‘‘तस्मा पण्णत्तिअधिकरणन्ति अट्ठकथासु कतसन्निट्ठानं दस्सेत्वा इदानि तम्पि न युत्तन्ति दस्सेतुं ‘तं पनेत’न्तिआदिमाहा’’ति (सारत्थ. टी. २.३८५-३८६) एवं अत्तनो लद्धिं अट्ठकथाचरियस्सपि लद्धिं कत्वा गन्थविरोधम्पि अनोलोकेत्वा दस्सेसि. न हेत्थ बुद्धघोसाचरियो अट्ठकथावादं अयुत्तन्ति दस्सेतुं ‘‘तं पनेत’’न्तिआदिमारभि ‘‘पण्णत्तिमत्तमेव आपत्ताधिकरणन्ति वेदितब्ब’’न्ति सयमेव उपरि कथनतो, अथ खो दुल्लद्धिकानं एकच्चानं तत्थ विप्पटिपत्तिं दस्सेत्वा पुन तं पटिसेधेतुकामो आरभि, तेनेव अन्ते ‘‘एके’’ति वुत्तन्ति वेदितब्बं. विवादादीनं कुसलादिकत्ते तंसमथानम्पि तब्भावो आपज्जति परमत्थेसु पण्णत्तिया समथायोगाति आह ‘‘कुसलादिसमथेही’’ति. पञ्ञत्तिसभावानमेव चतुन्नं अधिकरणानं समथेहि अधिकरणीयता, न पन कुसलादिपरमत्थरूपानं तेसं तेसं खणिकताय सयमेव समथप्पत्तितोति हेट्ठा समत्थितमत्थं निगमनवसेन दस्सेन्तेन ‘‘इति इमिना अधिकरणट्ठेना’’ति वुत्तं, तस्स यथावुत्तनयेन ¶ समथेहि अधिकरणीयतायाति अत्थो. ‘‘इधेकच्चो’’ति इमिना इधाधिप्पेतं विवादं निवत्तेति.

अनुवादोति विपत्तीहि उपवदना चेव चोदना च. तत्थ उपवदना नाम गरहा, अक्कोसो च. पञ्चपीति मातिकापरियापन्नापत्तियो सन्धाय वुत्तं. किच्चयताति कत्तब्बता. सपदानुक्कमनिद्देसस्साति एत्थ पदानुक्कमनिद्देसोति पदभाजनं वुच्चति, तेन सहितस्स सिक्खापदस्साति अत्थो.

३८७. अस्साति कत्तुअत्थे सामिवचनन्ति आह ‘‘एतेन चोदकेना’’तिआदि. दिट्ठमूलके पनाति ‘‘दिट्ठस्स होति पाराजिकं धम्मं अज्झापज्जन्तो’’तिआदि ¶ (पारा. ३८७) पाळिवारं सन्धाय वुत्तं. तत्थ इत्थिया सद्धिं रहोनिसज्जादिदस्सनमत्तवसेन पाराजिकं धम्मं अज्झापज्जन्तो पुग्गलो तेन दिट्ठो, न पन मग्गेन मग्गप्पटिपादनादिदस्सनवसेन. यदि हि तेन सो तथा दिट्ठो भवेय्य, असुद्धसञ्ञी एवायं तस्मिं पुग्गले सिया, असुद्धसञ्ञाय च सुद्धं वा असुद्धं वा चोदेन्तस्स सङ्घादिसेसो न सिया ‘‘अनापत्ति सुद्धे असुद्धदिट्ठिस्स, असुद्धे असुद्धदिट्ठिस्सा’’तिआदिवचनतो (पारा. ३९०). तस्मा इत्थिया सद्धिं रहोनिसज्जादिमत्तमेव दिस्वापि ‘‘सद्धो कुलपुत्तो, नायं पाराजिकं आपज्जती’’ति तस्मिं सुद्धसञ्ञिस्स वा वेमतिकस्स वा ‘‘सुतो मया पाराजिकं धम्मं अज्झापज्जन्तो’’तिआदिना नियमेत्वा चोदेन्तस्सेव सङ्घादिसेसो, न असुद्धसञ्ञिस्स, तस्स पन दिट्ठं सुतन्ति मुसावादादिपच्चया लहुकापत्ति एवाति वेदितब्बं. यदि पन सो तस्मिं सुद्धदिट्ठिचावनाधिप्पायोपि दिट्ठं रहोनिसज्जादिमत्तमेव वदति, अदिट्ठं पन मग्गेनमग्गप्पटिपादनादिपाराजिकवत्थुं वा ‘‘अस्समणोसी’’तिआदिकं वा न वदति, तस्स अनापत्ति. अधिकं वदन्तस्स पन आपत्तियेव ‘‘अदिट्ठं दिट्ठ’’न्ति (पारा. ३८६-३८७) वुत्तत्ता. यो पन दिट्ठेन रहोनिसज्जादिना पठमपाराजिकेन असुद्धसञ्ञी हुत्वा चावनाधिप्पायो अदिन्नादानं अज्झापज्जन्तो ‘‘दिट्ठो’’ति वा ‘‘सुतो’’ति वा आदिं वदति, तस्सापि न सङ्घादिसेसो असुद्धे असुद्धदिट्ठितायाति केचि वदन्ति. अञ्ञे पन ‘‘येन पाराजिकेन चोदेति, तेन सुद्धसञ्ञाभावा आपत्तियेवा’’ति वदन्ति, इदं युत्तं. तथा हि वुत्तं मातिकाट्ठकथायं (कङ्खा. अट्ठ. दुट्ठदोससिक्खापदवण्णना) ‘‘येन पाराजिकेन चोदेति, तं ‘अयं अनज्झापन्नो’ति ञत्वा चावनाधिप्पायेन…पे… सङ्घादिसेसो’’ति. इमिना नयेन सुतादिमूलकेसुपि विनिच्छयो वेदितब्बो. अञ्ञत्र आगतेसूति ओमसवादादीसु आगतेसु. अवस्सुतोति ¶ तीहिपि द्वारेहि पाराजिकवत्थुभूतदुच्चरितानुवस्सनेन तिन्तो. कसम्बुजातोति कचवरभूतो, निस्सारोति अत्थो.

कोण्ठोति चोरो, दुस्सीलोति अत्थो. जेट्ठब्बतिकोति काळकण्णिदेवीवते नियुत्तो तित्थियोति वदति, सा किर काळकण्णिसिरिदेविया जेट्ठाति वुत्ता. यदग्गेनाति येन कारणेन, यत्तकेनाति अत्थो ¶ . तदग्गेनाति एत्थापि एसेव नयो. नो कप्पेतीतिआदि वेमतिकभावदीपनत्थमेव वुत्तन्ति महापदुमत्थेरस्स अधिप्पायो.

३८९. एत्थाति चोदनायं. तज्जनीयादिकम्मं करिस्सामीतिआपत्तिया चोदेन्तस्स अधिप्पायो कम्माधिप्पायो नाम. परिवासदानादिक्कमेन आपत्तितो वुट्ठापेतुं आपत्तिया चोदेन्तस्स अधिप्पायो वुट्ठानाधिप्पायो. उपोसथं, पवारणं वा सङ्घे कातुं अदानत्थाय आपत्तिया चोदयतो अधिप्पायो उपोसथपवारणट्ठपनाधिप्पायो. असम्मुखा…पे… दुक्कटन्ति अनुद्धंसेन्तस्सपि अक्कोसन्तस्सपि दुक्कटं.

सब्बत्थेवाति सब्बासु अट्ठकथासु. उपोसथपवारणानं ञत्तिकम्मभावतो ञत्तिया वत्तमानाय एव उपोसथपवारणट्ठपनं होति, न निट्ठिताय, सा च य्य-कारे पत्ते निट्ठिता नाम होतीति आह ‘‘य्य-कारे पत्ते न लब्भती’’ति.

अनुपासकोति उपासकोपि सो भिक्खु न होति सरणगमनस्सापि पटिप्पस्सद्धत्ताति वदन्ति. ‘‘अनोदिस्स धम्मं कथेन्तस्सा’’ति इमिना ओदिस्स कथेन्तेन ओकासं कारेतब्बन्ति दस्सेति. आपत्तिं देसेत्वाति ओकासाकारापनापत्तिं देसेत्वा. यं चोदेति, तस्स उपसम्पन्नोति सङ्ख्युपगमनं, तस्मिं सुद्धसञ्ञिता वेमतिकता वा, येन पाराजिकेन चोदेति, तस्स दिट्ठादिवसेन अमूलकता, चावनाधिप्पायेन ‘‘त्वं पाराजिको’’तिआदिना नियमेत्वा सम्मुखा चोदना चोदापना, तस्स तङ्खणविजाननन्ति इमानेत्थ पञ्च अङ्गानि.

पठमदुट्ठदोससिक्खापदवण्णना निट्ठिता.

९. दुतियदुट्ठदोससिक्खापदवण्णना

३९१. नवमे मेत्तियं भिक्खुनिन्ति लिङ्गनासनाय नासितायपि तस्सा भूतपुब्बवोहारं गहेत्वा ¶ वुत्तं. अञ्ञभागस्साति थेरस्स मनुस्सजातिभिक्खुभावतो अञ्ञस्स तिरच्छानजातिछगलकभावसङ्खातस्स कोट्ठासस्स. इदन्ति सामञ्ञतो नपुंसकलिङ्गेन वुत्तं, अयं ¶ छगलकोति अत्थो. अञ्ञभागोति यथावुत्ततिरच्छानजातिछगलकभावसङ्खातो अञ्ञो कोट्ठासो, अञ्ञभागस्स इदन्ति अञ्ञभागियन्ति पठमविग्गहस्स अत्थो, अञ्ञभागमत्थीति दुतियविग्गहस्स, द्वीहिपि छगलकोव वुत्तो. इदानि द्वीहिपि विग्गहेहि वुत्तमेवत्थं वित्थारतो दस्सेन्तो ‘‘यो हि सो’’तिआदिमाह. तत्थ यो हि सो छगलको वुत्तो, सो अञ्ञस्स भागस्स होतीति च अञ्ञभागियसङ्ख्यं लभतीति च योजना. दुतियविग्गहस्स अत्थं दस्सेतुं ‘‘सो वा’’तिआदि वुत्तं. अधिकरणन्ति वेदितब्बोति एत्थापि यो हि सो ‘‘दब्बो मल्लपुत्तो नामा’’ति छगलको वुत्तो, सोति आनेत्वा सम्बन्धितब्बं. तञ्हि सन्धायाति ‘‘दब्बो’’ति नामकरणस्स अधिट्ठानभूतं छगलकं सन्धाय. ते भिक्खूति ते अनुयुञ्जन्ता भिक्खू. आपत्तियापि पुग्गलाधिट्ठानत्ता ‘‘पुग्गलानंयेव लेसा’’ति वुत्तं.

३९३. या च सा अवसाने…पे… चोदना वुत्ताति ‘‘भिक्खु सङ्घादिसेसं अज्झापज्जन्तो दिट्ठो होति सङ्घादिसेसे सङ्घादिसेसदिट्ठि होति, तञ्चे पाराजिकेन चोदेती’’तिआदिं (पारा. ४०७) चोदनाभेदं सन्धाय वदति. सत्तन्नम्पि आपत्तीनं पच्चेकं पाराजिकत्तादिसामञ्ञेपि मेथुनादिन्नादानादिवत्थुतो, रागदोसत्तादिसभावतो च विसभागतापि अत्थीति आह ‘‘यस्मा पन…पे… न होती’’ति.

वुत्तनयेनेवाति ‘‘सभागविसभागवत्थुतो’’तिआदिना (पारा. अट्ठ. २.३९३) वुत्तनयेन. कम्मलक्खणं, तंमनसिकारो च अविपन्नकम्मस्स निमित्ततो फलूपचारेन कम्मन्ति वुच्चतीति आह ‘‘तं निस्साय उप्पज्जनतो’’ति. परिवासादिं निस्साय मानत्तादीनं उप्पज्जनतो ‘‘पुरिमं पुरिम’’न्तिआदि वुत्तं.

३९५. सवत्थुकं कत्वाति पुग्गलाधिट्ठानं कत्वा. दीघादिनोति दीघरस्सादिलिङ्गस्स. दिट्ठादिनोति दिट्ठपुब्बादिनो.

४०८. एवं तथासञ्ञीति अञ्ञस्स मेथुनादिकिरियं दिस्वा ‘‘अयं सो’’ति एवं तथासञ्ञी. अङ्गानि पठमदुट्ठदोसे वुत्तसदिसानि, इध पन किञ्चिदेसं लेसमत्तं उपादियना अधिका.

दुतियदुट्ठदोससिक्खापदवण्णना निट्ठिता.

१०. पठमसङ्घभेदसिक्खापदवण्णना

४१०. दसमे ¶ ¶ बहूनन्ति दुब्बलताय अरञ्ञादिसेवाय चित्तं समाहितं कातुं असक्कोन्तानं. दुक्खस्सन्तकिरियाय तस्मिं अत्तभावे बुद्धवचनग्गहणधारणादिसङ्खातं ब्यञ्जनपदमेव परमं अस्स, न मग्गलाभोति पदपरमो. अभिसम्भुणित्वाति निप्फादेत्वा. धम्मतो अपेतं उद्धम्मं. पटिक्खित्तमेवाति ‘‘न, भिक्खवे, असेनासनिकेन वस्सं उपगन्तब्ब’’न्ति (महाव. २०४) वचनतो वुत्तं, इदमेव वचनं सन्धाय पाळियम्पि ‘‘अट्ठ मासे’’तिआदि (पारा. ४०९) वुत्तं.

तीहि कोटीहीति असुद्धमूलेहि. एत्थ च भिक्खूनं चतूसु कुलेसु पक्कपिण्डियालोपभोजननिस्सितताय, मच्छमंसभोजनविरहितस्स च कुलस्स दुल्लभताय तत्थ लद्धेसु भत्तब्यञ्जनेसु मच्छमंससंसग्गसङ्काय, दुन्निवारणताय च भिक्खूनं सरीरयापनम्पि न सियाति भगवता मच्छमंसं सब्बथा अप्पटिक्खिपित्वा तीहि कोटीहि अपरिसुद्धमेव पटिक्खित्तं. यदि हि तं भगवा सब्बथा पटिक्खिपेय्य, भिक्खू मरमानापि मच्छादिसंसग्गसङ्कितं भत्तं न भुञ्जेय्युं, ततो तण्डुलधञ्ञादिं पटिग्गहेत्वा निदहित्वा सयं पचित्वा भुञ्जितुं तदुपकरणभूतं दासिदासं, उदुक्खलमुसलादिकञ्च भिक्खूनं पत्तादि विय अवस्सं गहेतुं अनुजानितब्बं सियाति तित्थियानं विय गहट्ठावासो एव सिया, न भिक्खुआवासोति वेदितब्बं. जालं मच्छबन्धनं. वागुरा मिगबन्धनी. कप्पतीति यदि तेसं वचनेन सङ्का न वत्तति, वट्टति, न तं वचनं लेसकप्पं कातुं वट्टति. तेनेव वक्खति ‘‘यत्थ च निब्बेमतिको होति, तं सब्बं कप्पती’’ति.

पवत्तमंसन्ति आपणादीसु पवत्तं विक्कायिकं मतमंसं. भिक्खूनंयेव अत्थाय अकतन्ति एत्थ अट्ठानप्पयुत्तो एव-सद्दो, भिक्खूनं अत्थाय अकतमेवाति सम्बन्धितब्बं, तस्मा भिक्खूनञ्च मङ्गलादीनञ्चाति मिस्सेत्वा कतम्पि न वट्टतीति वेदितब्बं. केचि पन यथाठितवसेन अवधारणं गहेत्वा ‘‘वट्टती’’ति वदन्ति, तं न सुन्दरं. ‘‘वत्त’’न्ति इमिना आपत्ति नत्थीति दस्सेति.

कप्पन्ति असङ्खेय्यकप्पं, ‘‘आयुकप्प’’न्तिपि (सारत्थ. टी. २.४१०) केचि. महाकप्पस्स हि चतुत्थभागो असङ्खेय्यकप्पो, ततो वीसतिमो भागो सङ्घभेदकस्स ¶ आयुकप्पन्ति वदन्ति, तं अट्ठकथासु कप्पट्ठकथाय न समेति ‘‘कप्पविनासे एव मुच्चती’’तिआदि (विभ. अट्ठ. ८०९) ¶ वचनतो. ब्रह्मं पुञ्ञन्ति सेट्ठं पुञ्ञं. कप्पं सग्गम्हीति एत्थ पटिसन्धिपरम्पराय कप्पट्ठता वेदितब्बा.

४११. लद्धिनानासंवासकेनाति उक्खित्तानुवत्तकभावेन भावप्पधानत्ता निद्देसस्स. कम्मनानासंवासकेनाति उक्खित्तभावेन. ‘‘भेदाय परक्कमेय्या’’ति विसुं वुत्तत्ता भेदनसंवत्तनिकस्स अधिकरणस्स समादाय पग्गण्हनतो पुब्बेपि पक्खपरियेसनादिवसेन सङ्घभेदाय परक्कमन्तस्स समनुभासनकम्मं कातुं वट्टतीति वेदितब्बं. योपि चायं सङ्घभेदो होतीति सम्बन्धो.

कम्मेनाति अपलोकनादिना. उद्देसेनाति पातिमोक्खुद्देसेन. वोहारेनाति ताहि ताहि उपपत्तीहि ‘‘अधम्मं धम्मो’’तिआदिना (अ. नि. ३.१०-३९, ४२; चूळव. ३५२) वोहारेन, परेसं पञ्ञापनेनाति अत्थो. अनुसावनायाति अत्तनो लद्धिया गहणत्थमेव अनु पुनप्पुनं कण्णमूले मन्तसावनाय, कथनेनाति अत्थो. सलाकग्गाहेनाति एवं अनुसावनाय तेसं चित्तं उपत्थम्भेत्वा अत्तनो पक्खे पविट्ठभावस्स सञ्ञाणत्थं ‘‘गण्हथ इमं सलाक’’न्ति सलाकग्गाहेन. एत्थ च कम्ममेव, उद्देसो वा सङ्घभेदे पधानं कारणं, वोहारादयो पन सङ्घभेदस्स पुब्बभागाति वेदितब्बा. अब्भुस्सितन्ति अब्भुग्गतं. अच्छेय्याति विहरेय्य.

‘‘लज्जी रक्खिस्सती’’ति (विसुद्धि. १.४२; पारा. अट्ठ. १.४५) वचनतो आपत्तिभयेन आरोचनं लज्जीनं एव भारोति आह ‘‘लज्जीहि भिक्खूही’’ति, अलज्जिस्सपि अनारोचेन्तस्स आपत्तियेव. अप्पटिनिस्सज्जतो दुक्कटन्ति विसुं विसुं वदन्तानं गणनाय दुक्कटं. पहोन्तेनाति गन्तुं समत्थेन, इच्छन्तेनाति अत्थो. आपत्ति पन अड्ढयोजनब्भन्तरेनेव अगिलानस्स वसेन वेदितब्बा.

४१६. ञत्तियादीहि दुक्कटादिसब्भावं सन्धाय ‘‘सङ्घादिसेसेन अनापत्ती’’ति वुत्तं. अस्साति देवदत्तस्स. अपञ्ञत्ते सिक्खापदे समनुभासनकम्मस्सेव अभावतो ‘‘न हि पञ्ञत्तं सिक्खापदं वीतिक्कमन्तस्सा’’ति वुत्तं. सिक्खापदं पञ्ञपेन्तेनेव हि समनुभासनकम्मं अनुञ्ञातं. उद्दिस्स अनुञ्ञाततोति ‘‘अनुजानामि, भिक्खवे, रोमन्थकस्स रोमन्थन’’न्तिआदिं ¶ (चूळव. २७३) उद्दिस्सानुञ्ञातं सन्धाय वदति. अनापत्तियन्ति अनापत्तिवारे. आपत्तिं रोपेतब्बोति समनुभासनाय पाचित्तियआपत्तिं रोपेतब्बो. आपत्तियेव न जाताति सङ्घादिसेसापत्ति न जाता एव.

‘‘न ¶ पटिनिस्सज्जामी’’ति सञ्ञाय अभावेन मुच्चनतो सञ्ञाविमोक्खं. सचित्तकन्ति ‘‘न पटिनिस्सज्जामी’’ति जाननचित्तेन सचित्तकं. यो विसञ्ञी वा भीतो वा विक्खित्तो वा ‘‘पटिनिस्सज्जितब्ब’’न्तिपि, ‘‘कम्मं करिस्सती’’ति वा न जानाति, तस्स अनापत्ति. भेदाय परक्कमनं, धम्मकम्मेन समनुभासनं, कम्मवाचापरियोसानं, न पटिनिस्सज्जामीति चित्तेन अप्पटिनिस्सज्जनन्ति इमानेत्थ चत्तारि अङ्गानि.

पठमसङ्घभेदसिक्खापदवण्णना निट्ठिता.

११. दुतियसङ्घभेदसिक्खापदवण्णना

४१८. एकादसमे यस्मा उब्बाहिकादिसम्मुतिकम्मं बहूनम्पि कातुं वट्टति, तस्मा ‘‘न हि सङ्घो सङ्घस्स कम्मं करोती’’ति इदं निग्गहवसेन कत्तब्बकम्मं सन्धाय वुत्तन्ति वेदितब्बं. अङ्गानि पनेत्थ भेदाय परक्कमनं पहाय अनुवत्तनं पक्खिपित्वा हेट्ठा वुत्तसदिसानेव गहेतब्बानि.

दुतियसङ्घभेदसिक्खापदवण्णना निट्ठिता.

१२. दुब्बचसिक्खापदवण्णना

४२४. द्वादसमे वम्भनवचनन्ति गरहवचनं. सट-सद्दो पतितसद्देन समानत्थो, तस्स च विसेसनस्स परनिपातोति आह ‘‘तत्थ तत्थ पतितं तिणकट्ठपण्ण’’न्ति. केनापीति वातादिसदिसेन उपज्झायादिना.

४२६. चित्तपरियोनाहो दळ्हकोधोव उपनाहो. ततोपि बलवतरो दुम्मोचनीयो कोधाभिसङ्गो. चोदकं पटिप्फरणताति चोदकस्स ¶ पटिविरुद्धो हुत्वा अवट्ठानं. चोदकं अपसादनाति वाचाय घट्टना. पच्चारोपनाति ‘‘त्वम्पि सापत्तिको’’ति चोदकस्स आपत्तिआरोपना. पटिचरणताति पटिच्छादनता. अपदानेनाति अत्तनो चरियाय. न सम्पायनताति ‘‘यं त्वं चोदको वदेसि ‘मया एस आपत्तिं आपन्नो दिट्ठो’ति, त्वं तस्मिं समये किं करोसि, अयं किं करोति, कत्थ च त्वं अहोसि, कत्थ अय’’न्तिआदिना नयेन चरियं पुट्ठेन सम्पादेत्वा अकथनं.

‘‘यस्स ¶ सिया आपत्ती’’ति (महाव. १३४) इमिना निदानवचनेन सब्बापि आपत्तियो सङ्गहिताति आह ‘‘यस्स सिया’’तिआदि. अङ्गानि चेत्थ पठमसङ्घभेदसदिसानि, अयं पन विसेसो यथा तत्थ भेदाय परक्कमनं, इध अवचनीयकरणता दट्ठब्बा.

दुब्बचसिक्खापदवण्णना निट्ठिता.

१३. कुलदूसकसिक्खापदवण्णना

४३१. तेरसमे कीटागिरीति तस्स निगमस्स नामं. तञ्हि सन्धाय परतो ‘‘न अस्सजिपुनब्बसुकेहि भिक्खूहि कीटागिरिस्मिं वत्थब्ब’’न्ति वुत्तं, गामनिगमतो च पब्बाजनं, न जनपदतो. तेन पन योगतो जनपदोपि ‘‘कीटागिरि’’इच्चेव सङ्ख्यं गतोति आह ‘‘एवंनामके जनपदे’’ति.

तत्राति सावत्थियं. धुरट्ठानेति अभिमुखट्ठाने, जेतवनद्वारसमीपेति अत्थो. द्वीहि मेघेहीति वस्सिकेन, हेमन्तिकेन चाति द्वीहि मेघेहि. गणाचरियेहि छहि अधिकताय ‘‘समधिक’’न्ति वुत्तं.

उदकस्साति अकप्पियउदकस्स ‘‘कप्पियउदकसिञ्चन’’न्ति विसुं वक्खमानत्ता, तञ्च ‘‘आरामादिअत्थाय रुक्खरोपने अकप्पियवोहारेसुपि कप्पियउदकसिञ्चनादि वट्टती’’ति वक्खमानत्ता इधापि विभागं कत्वा कप्पियउदकसिञ्चनादि ¶ विसुं दस्सितं. यथा कोट्टनखणनादिकायिककिरियापि अकप्पियवोहारे सङ्गहिता, एवं मातिकाउजुकरणादिकप्पियवोहारेपीति आह ‘‘सुक्खमातिकाय उजुकरण’’न्ति. एत्थ पुराणपण्णादिहरणम्पि सङ्गय्हति. महापच्चरियवादोव पमाणत्ता पच्छा वुत्तो. अकप्पियवोहारेपि एकच्चं वट्टतीति दस्सेतुं ‘‘न केवलञ्च सेस’’न्तिआदिमाह. यंकिञ्चि मातिकन्ति सुक्खं वा असुक्खं वा. तत्थाति आरामादिअत्थाय रुक्खरोपने. तथाति कप्पियवोहारपरियायादीहि गन्थापनं सन्धाय वुत्तं. इमिना च कुलसङ्गहत्थाय गन्थापनादिपि न वट्टतीति दस्सेति.

वत्थुपूजनत्थाय सयं गन्थनं कस्मा न वट्टतीति चोदेन्तो ‘‘ननु चा’’तिआदिमाह. यथा आरामादिअत्थं कप्पियपथवियं सयं रोपेतुम्पि वट्टति, तथा वत्थुपूजनत्थाय सयं गन्थनम्पि कस्मा न वट्टतीति चोदकस्स अधिप्पायो. वुत्तन्तिआदि परिहारो. अथ ‘‘न पन महाअट्ठकथाय’’न्ति ¶ कस्मा वदति? महापच्चरिआदीसु वुत्तम्पि हि पमाणमेवाति नायं विरोधो, महाअट्ठकथायं अवुत्तस्स सयं रोपनस्स तत्थेव वुत्तेन उदकसिञ्चनेन सह संसन्दननयदस्सनमुखेन पमाणमेवाति पतिट्ठापेतुं वुत्तत्ता. ‘‘मञ्ञेय्यासी’’ति पदं ‘‘तं कथ’’न्ति इमिना सम्बन्धितब्बं. तत्थायं अधिप्पायो – किञ्चापि महाअट्ठकथायं सयं रोपनं न वुत्तं, कप्पियउदकस्स सयं आसिञ्चनं वुत्तमेव, तस्मा यथा आरामादिअत्थाय कप्पियउदकं सयं सिञ्चितुम्पि वट्टति, तथा वत्थुपूजनत्थाय गन्थनम्पि कस्मा न वट्टतीति. तम्पि न विरुज्झतीति यदेतं वत्थुपूजनत्थायपि गन्थनादिं पटिक्खिपित्वा आरामादिअत्थाय सयं रोपनसिञ्चनं वुत्तं, तम्पि पाळिया संसन्दनतो पुब्बापरं न विरुज्झति.

तं कथं न विरुज्झतीति आह ‘‘तत्र ही’’तिआदि. तत्राति रोपनसिञ्चनविसये. पुप्फादीहि कुलसङ्गहप्पसङ्गे ‘‘मालावच्छ’’न्ति विसेसितत्ता कुलसङ्गहत्थमेव रोपनं अधिप्पेतन्ति विञ्ञायतीति आह ‘‘मालावच्छन्ति वदन्तो’’तिआदि. एतं वुत्तन्ति ‘‘मालावच्छं रोपेन्तिपि रोपापेन्तिपि, सिञ्चन्तिपि सिञ्चापेन्तिपी’’ति एतं वुत्तं. अञ्ञत्र पनाति आरामादिअत्थाय मालावच्छादीनं रोपने पन. परियायोति सयंकरणकारापनसङ्खातो परियायो वोहारो अत्थविसेसोति अत्थो अत्थि उपलब्भति ¶ , कुलसङ्गहत्थत्ताभावाति अधिप्पायो. एवमेत्थ परियायसद्दस्स करणकारापनवसेन अत्थे गय्हमाने ‘‘गन्थेन्तिपि गन्थापेन्तिपी’’ति पाळियं पटिक्खित्तगन्थनगन्थापनं ठपेत्वा यं परतो ‘‘एवं जान, एवं कते सोभेय्या’’तिआदिकप्पियवचनेहि गन्थापनं वुत्तं, तत्थ दोसाभावो समत्थितो होति, ‘‘गन्थेही’’ति आणत्तिया कारापनस्सेव गन्थापनन्ति अधिप्पेतत्ता. तत्थ परियायं इध च परियायाभावं ञत्वाति तत्थ ‘‘मालावच्छं रोपेन्ती’’तिआदीसु ‘‘मालावच्छ’’न्ति कुलसङ्गहत्थतासूचनकस्स विसेसनस्स सब्भावतो करणकारापनसङ्खातपरियायसब्भावं. इध ‘‘गन्थेन्ती’’तिआदीसु तथाविधविसेसवचनाभावतो तस्स परियायस्स अभावञ्च ञत्वा. तं सुवुत्तमेवाति वेदितब्बन्ति योजना.

सब्बं वुत्तनयेनेव वेदितब्बन्ति अट्ठकथासु आगतनयेनेव रोपनादि, गन्थापनादि च सब्बं वेदितब्बं. न हेत्थ सन्देहो कातब्बोति निगमेति.

हरणादीसूति वत्थुपूजनत्थाय हरणादीसु. कुलित्थिआदीनं अत्थाय हरणतोति कुलित्थिआदीनं हरणस्सेव विसेसेत्वा पटिक्खित्तत्ताति अधिप्पायो. तेनाह ‘‘हरणाधिकारे ही’’तिआदि. मञ्जरीति पुप्फगोच्छं. वटंसकोति कण्णस्स उपरि पिळन्धनत्थं कतपुप्फविकति ¶ , सो च ‘‘वटंसो’’ति वुच्चति. कण्णिकाति बहूनं पुप्फानं वा मालानं वा एकतो बन्धितस्स नामं, ‘‘कण्णाभरण’’न्तिपि वदन्ति. हारसदिसन्ति मुत्ताहारसदिसं.

कप्पियेनाति कप्पियउदकेन. तेसंयेव द्विन्नन्ति कुलदूसनपरिभोगानं द्विन्नं. दुक्कटन्ति कुलसङ्गहत्थाय सयं सिञ्चने, कप्पियवोहारेन वा अकप्पियवोहारेन वा सिञ्चापने च दुक्कटं, परिभोगत्थाय पन सयं सिञ्चने, अकप्पियवोहारेन सिञ्चापने च दुक्कटं. पयोगबहुलतायाति सयं करणे, कायपयोगस्स कारापने च वचीपयोगस्स च बहुत्तेन.

गन्थेन निब्बत्तं दामं गन्थिमं. एसेव नयो सेसेसुपि. न वट्टतीति वत्थुपूजनत्थायपि न वट्टति, दुक्कटन्ति अत्थो. वट्टतीति वत्थुपूजनत्थाय वट्टति, कुलसङ्गहत्थाय पन कप्पियवोहारेन कारापेन्तस्सापि दुक्कटमेव.

नीपपुप्फं ¶ नाम कदम्बपुप्फं. पुरिमनयेनेवाति ‘‘भिक्खुस्स वा’’तिआदिना वुत्तनयेन.

कदलिक्खन्धम्हीतिआदिना वुत्तं सब्बमेव सन्धाय ‘‘तं अतिओळारिकमेवा’’ति वुत्तं, सब्बत्थ करणे, अकप्पियवचनेन कारापने च दुक्कटमेवाति अत्थो. ‘‘पुप्फविज्झनत्थं कण्टकं बन्धितुम्पि न वट्टती’’ति इमस्स उपलक्खणत्ता पुप्फदामोलम्बनादिअत्थाय रज्जुबन्धनादिपि न वट्टतीति केचि वदन्ति, अञ्ञे पन ‘‘पुप्फविज्झनत्थं कण्टकन्ति विसेसितत्ता तदत्थं कण्टकमेव बन्धितुं न वट्टति, तञ्च अट्ठकथापमाणेना’’ति वदन्ति, वीमंसित्वा गहेतब्बं. पुप्फपटिच्छकं नाम दण्डादीहि कतं पुप्फाधानं, एतम्पि नागदन्तकम्पि सछिद्दकमेव गहेतब्बं. असोकपिण्डियाति असोकसाखानं, पुप्फानं वा समूहे. धम्मरज्जु नाम चेतियादीनि परिक्खिपित्वा तेसञ्च रज्जुया च अन्तरा पुप्फप्पवेसनत्थाय बन्धरज्जु. ‘‘सिथिलवट्टिता वा रज्जुवट्टिअन्तरे पुप्फप्पवेसनत्थाय एवं बन्धा’’तिपि वदन्ति.

मत्थकदामन्ति धम्मासनादिमत्थकलम्बकदामं. तेसंयेवाति उप्पलादीनं एव. वाकेन वा दण्डकेन वाति पुप्फनाळं फालेत्वा पुप्फेन एकाबद्धं ठितवाकेन, दण्डकेन च एकबन्धनेनेव, एतेन पुप्फं बीजगामे सङ्गहं न गच्छति पञ्चसु बीजेसु अप्पविट्ठत्ता पण्णं विय, तस्मा कप्पियं अकारापेत्वापि कोपने दोसो नत्थि. यञ्च छिन्नस्सापि मकुळस्स विकसनं, तम्पि अतितरुणस्स अभावा वुड्ढिलक्खणं न होति, परिणतस्स पन मकुळस्स पत्तानं सिनेहे परियादानं गते विसुंभावो एव विकासो, तेनेव छिन्नमकुळविकासो अच्छिन्नमकुळविकासतो परिहीनो ¶ , मिलातयुत्तो वा दिस्सति. यञ्च मिलातस्स उदकसञ्ञोगे अमिलानतापज्जनं, तम्पि तम्बुलपण्णादीसु समानन्ति वुड्ढिलक्खणं न होति, पाळिअट्ठकथादीसु च न कत्थचि पुप्फानं कप्पियकरणं आगतं, तस्मा पुप्फं सब्बथा अबीजमेवाति विञ्ञायति, वीमंसित्वा गहेतब्बं. ‘‘पसिब्बके विया’’ति वुत्तत्ता पुप्फपसिब्बके वा पसिब्बकसदिसबन्धे वा यत्थ कत्थचि चीवरे वा पक्खिपितुं वट्टतीति सिद्धं. बन्धितुं न वट्टतीति रज्जुआदीहि बन्धनं सन्धाय वुत्तं, पुप्फस्सेव पन अच्छिन्नदण्डवाकेहि बन्धितुं वट्टति एव.

पुप्फपटे ¶ च दट्ठब्बन्ति पुप्फपटं करोन्तस्स दीघतो पुप्फदामस्स हरणपच्चाहरणवसेन पूरणं सन्धाय वुत्तं, तिरियतो हरणं पन वायिमं नाम होति, न पूरिमं. ‘‘पुरिमट्ठानं अतिक्कामेती’’ति सामञ्ञतो वुत्तत्ता पुरिमं पुप्फकोटिं फुसापेत्वा वा अफुसापेत्वा वा परिक्खिपनवसेन पन अतिक्कमन्तस्स आपत्तियेव. बन्धितुं वट्टतीति पुप्फरहिताय सुत्तवाककोटिया बन्धितुं वट्टति. ‘‘एकवारं हरित्वा वा परिक्खिपित्वा वा’’ति इदं पुब्बे वुत्तचेतियादिपरिक्खेपं, पुप्फपटकरणञ्च सन्धाय वुत्तं.

परेहि पूरितन्ति दीघतो पसारितं. वायितुन्ति तिरियतो हरितुं, तं पन एकवारम्पि न लब्भति. पुप्फानि ठपेन्तेनाति अगन्थितपुप्फानि अञ्ञमञ्ञं फुसापेत्वापि ठपेन्तेन. घटिकदामओलम्बकोति हेट्ठाभागे घटिकाकारयुत्तो, दारुघटिकाकारो वा ओलम्बको. सुत्तमयं गेण्डुकं नाम. सब्बत्थाति गन्थिमादीसु सब्बत्थ.

रेचकन्ति अभिनयं, ‘‘एवं नच्चाही’’ति नटनाकारदस्सनन्ति अत्थो, ‘‘चक्कं विय अत्तानं भमापन’’न्तिपि केचि. आकासेयेव कीळन्तीति ‘‘अयं सारी असुकपदं मया नीता’’ति एवं मुखेनेव उभोपि वदन्ता कीळन्ति. जूतफलकेति जूतमण्डले. पासककीळायाति द्विन्नं तिवङ्गुलप्पमाणानं दारुदन्तादिमयानं पासकानं चतूसु पस्सेसु एककादिवसेन बिन्दूनि कत्वा फलके खिपित्वा उपरिभागे दिट्ठबिन्दूनं वसेन सारियो अपनेत्वा कीळनकजूतकीळाय.

मञ्जट्ठि नाम मञ्जट्ठरुक्खसारकसावं. सलाकहत्थन्ति नाळिकेरहीरादीनं कलापस्सेतं नामं. पाळियं थरुस्मिन्ति खग्गे. उस्सेळेन्तीति मुखेन उस्सेळनसद्दं पमुञ्चन्ति, महन्तं अब्यत्तसद्दं पवत्तेन्तीति अत्थो. अप्फोटेन्तीति द्विगुणितवामहत्थे दक्खिणहत्थेन ताळेत्वा सद्दं करोन्ति. मुखडिण्डिमन्ति मुखभेरी.

४३२. तेसन्ति ¶ समासे गुणीभूतानि पब्बानिपि परामसति. बोन्दोति लोलो, मन्दधातुकोति अत्थो. भकुटिं कत्वाति भमुकभेदं कत्वा. नेलाति निद्दोसा.

४३३. पाळियं ¶ ‘‘सारिपुत्ता’’ति इदं एकसेसनयेन सारिपुत्तमोग्गल्लानानं उभिन्नं आलपनं, तेनेव बहुवचननिद्देसो कतो.

४३५. अट्ठारस वत्तानीति ‘‘न उपसम्पादेतब्ब’’न्तिआदीनि ‘‘न भिक्खूहि सम्पयोजेतब्ब’’न्ति परियोसानानि कम्मक्खन्धके (चूळव. ७) आगतानि अट्ठारस वत्तानि. न पन्नलोमाति न पतितमानलोमा, अननुकूलवत्तिनोति अत्थो.

४३७. परसन्तकं देति दुक्कटमेवाति विस्सासगाहेन दानं सन्धाय वुत्तं. थुल्लच्चयन्ति एत्थ भण्डदेय्यम्पि होति एव.

तञ्च खो वत्थुपूजनत्थायाति मातापितूनम्पि पुप्फं देन्तेन वत्थुपूजनत्थायेव दातब्बन्ति दस्सेति. मण्डनत्थाय पन सिवलिङ्गादिपूजनत्थायाति एत्तकमेव वुत्तत्ता ‘‘इमं विक्किणित्वा जीविस्सन्ती’’ति मातापितूनं दातुं वट्टति, सेसञातीनं पन तावकालिकमेव दातुं वट्टति. ञातिसामणेरेहेवाति तेसं गिहिकम्मपरिमोचनत्थं वुत्तं. इतरेति अञ्ञातका, तेहिपि सामणेरेहि आचरियुपज्झायानं वत्तसीसेन हरितब्बं. चूळकन्ति उपड्ढभागतोपि उपड्ढं.

सामणेरा…पे… ठपेन्तीति अरक्खितागोपितं सन्धाय वुत्तं. तत्थ तत्थाति मग्गे वा चेतियङ्गणे वा. ‘‘सामणेरेहि दापेतुं न लभन्ती’’ति इदं सामणेरेहि गिहीनं कम्मं कारितं विय होतीति वुत्तं, न पन पुप्फदानं होतीति सामणेरानम्पि न वट्टनतो. वुत्तञ्च ‘‘सयमेवा’’तिआदि. ‘‘अविसेसेन वुत्त’’न्ति इमिना सब्बेसम्पि न वट्टतीति दस्सेति.

खीणपरिब्बयानन्ति आगन्तुके सन्धाय वुत्तं. परिच्छिन्नेसुपि रुक्खेसु ‘‘इध फलानि सुन्दरानी’’तिआदिं वदन्तेन कुलसङ्गहो कतो नाम होतीति आह ‘‘एवं पन न वत्तब्ब’’न्ति.

रुक्खच्छल्लीति रुक्खत्तचो. अभाजनीयत्ता गरुभण्डं वुत्तं. वुत्तनयेनाति पण्णदानम्पि पुप्फफलादीसु वुत्तनयेन कुलसङ्गहो होतीति दस्सेति.

पुब्बे ¶ वुत्तप्पकारन्ति मम वचनेन भगवतो पादे वन्दथातिआदिना वुत्तप्पकारसिक्खापदे पठमं वुत्तं. ‘‘पक्कमतायस्मा’’ति इदं पब्बाजनीयकम्मवसेन ¶ वुत्तं. पुन ‘‘पक्कमतायस्मा’’ति इदम्पि पब्बाजनीयकम्मकतस्स वत्तवसेन वुत्तं. एत्थ च अस्सजिपुनब्बसुकेहि आचरियेसु अनेकविधेसु अनाचारेसु पञ्ञपेतब्बा आपत्तियो सिक्खापदन्तरेसु पञ्ञत्ता एवाति ता इध अपञ्ञपेत्वा कुलदूसकानं पब्बाजनीयकम्मवसेन निग्गहं कातुं तत्थेव सम्मा अवत्तित्वा कारकसङ्घं छन्दगामितादीहि पापेन्तानं समनुभासनाय सङ्घादिसेसं आरोपितञ्च इदं सिक्खापदं पञ्ञत्तन्ति वेदितब्बं. पठमसङ्घभेदसदिसानेवाति एत्थ अङ्गेसुपि यथा तत्थ परक्कमनं, एवमिध छन्दादीहि पापनं दट्ठब्बं. सेसं तादिसमेवाति.

कुलदूसकसिक्खापदवण्णना निट्ठिता.

निगमनवण्णना

४४२. इतरे पन यावततियकाति वेदितब्बाति सम्बन्धो. यो हि जरो एकस्मिं दिवसे आगन्त्वापि गतो अनन्तरेसु द्वीसु दिवसेसु अनुप्पज्जित्वा ततिये दिवसे उप्पज्जति, सो ततियको. यो पन ततियेपि अनुप्पज्जित्वा चतुत्थे एव दिवसे उप्पज्जति, सो चतुत्थको चाति वुच्चति. तं सन्धायाह ‘‘यथा ततिये’’तिआदि. ‘‘अकामेन अवसेना’’ति इमिना अप्पटिकम्मकरणं नाम यस्मा अलज्जिलक्खणं, सग्गमोक्खावरणञ्च, तस्मा आपन्नो पुग्गलो ‘‘पच्छा परिवसिस्सामी’’ति विक्खिपितुं न लभति, सङ्घेन च अनिच्छन्तस्सेव परिवासो दातब्बोति दस्सेति. पाळियं चिण्णमानत्तो भिक्खु…पे… अब्भेतब्बोति एत्थ यो भिक्खु चिण्णमानत्तो, सो भिक्खु अब्भेतब्बोति एवं भिक्खुसद्दद्वयस्स योजना वेदितब्बा. ते च भिक्खू गारय्हाति ऊनभावं ञत्वा अब्भेन्ति, दुक्कटापज्जनेन गरहितब्बा. सामीचीति वत्तं.

इति समन्तपासादिकाय विनयट्ठकथाय विमतिविनोदनियं

तेरसकवण्णनानयो निट्ठितो.

३. अनियतकण्डो

१. पठमअनियतसिक्खापदवण्णना

४४३. पुत्तसद्देन ¶ ¶ सामञ्ञनिद्देसतो, एकसेसनयेन वा पुत्तीपि गहिताति आह ‘‘बहू धीतरो चा’’ति. तदनन्तरन्ति भिक्खूनं भोजनानन्तरं.

४४४-५. तं कम्मन्ति तं मेथुनादिअज्झाचारकम्मं. पाळियं ‘‘सोतस्स रहो’’ति इदं अत्थुद्धारवसेन वुत्तं, उपरि सिक्खापदे ‘‘न हेव खो पन पटिच्छन्न’’न्तिआदिना (पारा. ४५४) एतस्स सिक्खापदस्स विसयं पटिक्खिपित्वा ‘‘अलञ्च खो होति मातुगामं दुट्ठुल्लाहि वाचाहि ओभासितु’’न्ति विसयन्तरभूतसोतरहस्स विसुं वक्खमानत्ता, इध पन चक्खुरहोव अधिप्पेतो ‘‘पटिच्छन्ने आसने’’तिआदिवचनतो, ‘‘सक्का होति मेथुनं धम्मं पटिसेवितु’’न्ति वुत्तत्ता च. तेनाह ‘‘किञ्चापी’’तिआदि. परिच्छेदोति रहोनिसज्जापत्तिया ववत्थानं.

इदानि चक्खुरहेनेव आपत्तिं परिच्छिन्दित्वा दस्सेन्तो ‘‘सचेपि ही’’तिआदिमाह. ‘‘पिहितकवाटस्सा’’ति इमिना पटिच्छन्नभावतो चक्खुस्स रहोव अधिप्पेतो, न सोतस्स रहोति दस्सेति. तेनाह ‘‘अपिहितकवाटस्स…पे… अनापत्ति’’न्ति. न हि कवाटपिदहनेन सोतस्स रहो विगच्छति, चक्खुस्स रहो एव पन विगच्छति. ‘‘अन्तोद्वादसहत्थेपी’’ति इदं दुतियसिक्खापदे आगतसोतस्स रहेन आपज्जितब्बदुट्ठुल्लवाचापत्तिया सब्बथा अनापत्तिभावं दस्सेतुं वुत्तं. द्वादसहत्थतो बहि निसिन्नो हि तत्थ सोतस्स रहसब्भावतो दुट्ठुल्लवाचापत्तिया अनापत्तिं न करोति, तथा च ‘‘अनापत्तिं न करोती’’ति सामञ्ञतो न वत्तब्बं सिया, ‘‘मेथुनकायसंसग्गापत्तीहि अनापत्तिं करोती’’ति विसेसेत्वा वत्तब्बं भवेय्य. तस्मा तथा तं अवत्वा सब्बथा अनापत्तिं दस्सेतुमेव ‘‘द्वादसहत्थे’’ति वुत्तन्ति गहेतब्बं. यदि हि चक्खुस्सेव ¶ रहभावं सन्धाय वदेय्य, ‘‘अन्तोद्वादसहत्थे’’ति न वदेय्य अप्पटिच्छन्ने ततो दूरे निसिन्नेपि चक्खुस्स रहासम्भवतो ¶ . यस्मा निसीदित्वा निद्दायन्तो कपिमिद्धपरेतो किञ्चि कालं चक्खूनि उम्मीलेति, किञ्चि कालं निम्मीलेति. तस्मा ‘‘निद्दायन्तोपि अनापत्तिं करोती’’ति वुत्तं.

पटिलद्धसोतापत्तिफलाति अन्तिमपरिच्छेदतो वुत्तं. निसज्जं पटिजानमानोति मेथुनकायसंसग्गादिवसेन रहो निसज्जं पटिजानमानोति अत्थो. तेनाह ‘‘पाराजिकेन वा’’तिआदि. न अप्पटिजानमानोति अलज्जीपि अप्पटिजानमानो आपत्तिया न कारेतब्बोव. सो हि याव दोसं न पटिजानाति, ताव ‘‘नेव सुद्धो, नासुद्धो’’ति वा वत्तब्बो, वत्तानुसन्धिना पन कारेतब्बो. वुत्तञ्हेतं –

‘‘पटिञ्ञा लज्जीसु कता, अलज्जीसु एवं न विज्जति;

बहुम्पि अलज्जी भासेय्य, वत्तानुसन्धितेन कारये’’ति. (परि. ३५९);

निसज्जादीसु…पे… पटिजानमानोव तेन सो भिक्खु कारेतब्बोति एत्थ पटिजानमानोति पाळियं अनागतम्पि अधिकारतो आगतमेवाति कत्वा वुत्तं.

वदापेथाति तस्स इद्धिया विगतासङ्कोपि तं ओवदन्तो आह, अनुपपरिक्खित्वा अदेसे निसिन्ना ‘‘मातुगामेन सद्धिं एकासने थेरो रहो निसिन्नो’’ति एवं मादिसेहिपि तुम्हे तुम्हाकं अवण्णं वदापेथ कथापयित्थ, मा पुन एवं करित्थाति अधिप्पायो. एवमकासिन्ति निगूहितब्बम्पि इमं विसेसाधिगमं पकासेन्तो तं सद्धापेतुमेव एवमकासिन्ति अत्थो. रक्खेय्यासिमन्ति इमं उत्तरिमनुस्सधम्मं अञ्ञेसं मा पकासयि.

४५१. निसज्जाय पाचित्तियन्ति रहोनिसज्जस्सादे वत्तमाने पाचित्तियं. सचे पन सो रहोनिसज्जस्सादं पटिविनोदेत्वा कम्मट्ठानमनसिकारादिना अञ्ञविहितो, निद्दूपगतो वा अनापत्ति एव. तेनाह ‘‘अस्सादे उप्पन्ने’’ति. ‘‘निसिन्नाय इत्थिया’’ति इमिना निसीदनक्खणे अस्सादाभावं दस्सेति. यदि हि निसीदनक्खणे अस्सादो उप्पज्जेय्य, तेन उट्ठातब्बं. इतरथा आपत्ति एव इत्थिया उट्ठायुट्ठाय पुनप्पुनं निसीदने विय, तत्थापि भिक्खुस्स ¶ उट्ठहतो अनापत्ति, तेन रहोनिसज्जापत्ति अकिरियसमुट्ठानापि होतीति वदन्ति. इदं पन अनियतसिक्खापदं, अनन्तरञ्चाति द्वेपि विसुं आपत्तिपञ्ञापनवसेन पञ्ञत्तानि न ¶ होन्ति रहोनिसज्जादीसु आपत्तिया सिक्खापदन्तरेसु पञ्ञत्तत्ता. पाराजिकादिआपत्तीहि पन केनचि चोदितस्स अनुविज्जकेहि विनिच्छयकारणनयदस्सनत्थं एवं वत्थुवसेन द्विधा विभजित्वा पञ्ञत्तानि, इमानेव च यस्मा भिक्खुनीनम्पि विनिच्छयनयग्गहणाय अलं, तस्मा तासं विसुं न वुत्तानीति वेदितब्बं. यं पन आपत्तिं पटिजानाति, तस्स वसेनेत्थ अङ्गभेदो वेदितब्बो. तेनेव ‘‘अयं धम्मो अनियतो’’ति वुत्तं.

इध अनियतवसेन वुत्तानं पाराजिकसङ्घादिसेसपाचित्तियानं तिण्णम्पि अञ्ञमञ्ञं सदिससमुट्ठानादिताय वुत्तं ‘‘समुट्ठानादीनि पठमपाराजिकसदिसानेवा’’ति.

पठमअनियतसिक्खापदवण्णना निट्ठिता.

२. दुतियअनियतसिक्खापदवण्णना

४५२. ‘‘न लभति मातुगामेन सद्धिं एको एकाय…पे… निसज्जं कप्पेतु’’न्ति अवत्वा ‘‘पटिक्खित्तं मातुगामेना’’तिआदिना वुत्तत्ता ‘‘एको’’ति पच्चत्तपदं पटिक्खित्तपदेन न समेति, ‘‘एकस्सा’’ति वत्तब्बोति साधेन्तो आह ‘‘इतरथा ही’’तिआदि.

४५३. परिवेणङ्गणादीति परिवेणस्स माळकं. आदि-सद्देन पाकारादिपरिक्खित्तं चेतियमाळकादिं सङ्गण्हाति. अन्तोगधन्ति अप्पटिच्छन्नट्ठाने एव परियापन्नं. इध इत्थीपि अनापत्तिं करोतीति सम्बन्धो. कस्मा पन इत्थी इधेव अनापत्तिं करोति, न पुरिमसिक्खापदेति? इमस्स सिक्खापदस्स मेथुनं विना दुट्ठुल्लवाचाय वसेन आगतत्ता. मेथुनमेव हि इत्थियो अञ्ञमञ्ञं पटिच्छादेन्ति महावने द्वारं विवरित्वा निद्दूपगतम्हि भिक्खुम्हि विय. दुट्ठुल्लं पन न पटिच्छादेन्ति, तेनेव दुट्ठुल्लवाचासिक्खापदे ‘‘या ता इत्थियो हिरिमना, ता निक्खमित्वा भिक्खू उज्झापेसु’’न्ति (पारा. २८३) वुत्तं, तस्मा ¶ ‘‘इत्थीपि अनापत्तिं करोती’’ति वुत्तं, ‘‘अप्पटिच्छन्नट्ठानत्ता’’तिपि कारणं वदन्ति.

कायेनापि दुट्ठुल्लोभाससम्भवतो इमस्मिं सिक्खापदे चक्खुस्स रहो, सोतस्स रहो च अधिप्पेतोति आह ‘‘अनन्धो अबधिरो’’तिआदि. केचि पन विभङ्गे ‘‘नालं कम्मनियन्ति न सक्का होति मेथुनं धम्मं पटिसेवितु’न्ति (पारा. ४५४) एत्तकमेव वत्वा ‘न सक्का होति कायसंसग्गं समापज्जितु’न्ति अवुत्तत्ता अप्पटिच्छन्नेपि ठाने रहो अञ्ञेसं अभावं दिस्वा एकाय ¶ इत्थिया कायसंसग्गोपि सक्का आपज्जितुन्ति अन्तोद्वादसहत्थे सवनूपचारे ठितो अबधिरोपि अन्धो कायसंसग्गस्सापि सब्भावाभावं न जानातीति कायेन दुट्ठुल्लोभासनसब्भावं अमनसिकत्वापि कायसंसग्गापत्तियापि परिहाराय अनन्धो अबधिरोतिआदि वुत्त’’न्ति वदन्ति. यं पन सारत्थदीपनियं ‘‘कायसंसग्गवसेन अनन्धो वुत्तो’’ति (सारत्थ. टी. २.४५३) वुत्तं, तं पन कायेन दुट्ठुल्लोभासनसम्भवं अमनसिकत्वा वुत्तं, कायसंसग्गवसेनापीति गहेतब्बं. तेनेव ‘‘इमस्मिं सिक्खापदे सोतस्स रहो एव अधिप्पेतो…पे… केनचि पन ‘द्वेपि रहा इध अधिप्पेता’ति वुत्तं, तं न गहेतब्ब’’न्ति वुत्तं. यं पन चक्खुस्स रहाभावसाधनत्थं ‘‘न हि अप्पटिच्छन्ने ओकासे चक्खुस्स रहो सम्भवती’’तिआदि वुत्तं, तं न युत्तं अतिदूरतरे ठितस्स कायेन ओभासनम्पि हत्थग्गाहादीनिपि सल्लक्खेतुं असक्कुणेय्यत्ता. तेनेव पाळियं ‘‘चक्खुस्स रहो’’ति वुत्तं, अट्ठकथायं अप्पटिक्खित्तं. न केवलञ्च अप्पटिक्खित्तं, अथ खो ‘‘अनन्धो बधिरोति च अन्धो वा अबधिरोपि न करोती’’ति च वुत्तं, तस्मा द्वेपि रहा इध गहेतब्बा. ‘‘अन्तोद्वादसहत्थे’’तिइमिना सोतस्स रहो द्वादसहत्थेन परिच्छिन्नोति इदं दस्सेति. चक्खुस्स रहो पन यत्थ ठितस्स कायविकारादयो न पञ्ञायन्ति, तेन परिच्छिन्दितब्बोति दट्ठब्बं. बधिरो पन चक्खुमापीति दुट्ठुल्लवाचासङ्घादिसेसं सन्धाय वुत्तं. दुट्ठुल्लापत्ति वुत्ताति पुरिमसिक्खापदे वुत्तेहि अधिकवसेन दुट्ठुल्लापत्ति च वुत्ताति एवमत्थो गहेतब्बो, न पन दुट्ठुल्लापत्ति एवाति कायसंसग्गस्सापि इध गहेतब्बतो. तेनेव ‘‘पाराजिकापत्तिञ्च परिहापेत्वा’’ति ¶ एत्तकमेव वुत्तं, इतरथा ‘‘कायसंसग्गञ्चा’’ति वत्तब्बं भवेय्य.

तिसमुट्ठानन्तिआदि पन पुरिमसिक्खापदे आगतेहि अधिकस्स दुट्ठुल्लवाचासङ्घादिसेसस्स वसेन वुत्तं कायसंसग्गादीनम्पि पुरिमसिक्खापदे एव वुत्तत्ता, इध पन न वुत्तन्तिपि वदन्ति, वीमंसित्वा गहेतब्बं.

दुतियअनियतसिक्खापदवण्णना निट्ठिता.

निट्ठितो अनियतवण्णनानयो.

४. निस्सग्गियकण्डो

१. चीवरवग्गो

१. पठमकथिनसिक्खापदवण्णना

४५९. समिताविनाति ¶ ¶ समितपापेन. गोतमकचेतियं नाम गोतमयक्खस्स चेतियट्ठाने कतविहारो वुच्चति.

४६१. नवमं वा दसमं वाति भुम्मत्थे उपयोगवचनं. सचे भवेय्याति सचे कस्सचि कङ्खा भवेय्य. वुत्तसदिसन्ति दसमं वाति वुत्तसदिसं परिच्छेदसदिसं, ‘‘वुत्तसदिसमेवा’’तिपि लिखन्ति. धारेतुन्ति एत्थ आहाति पाठसेसो दट्ठब्बो.

४६३. सूचिया पटिसामनन्ति सूचिघरे संगोपनं, इदञ्च सूचिकम्मस्स सब्बस्स परिनिट्ठितभावदस्सनत्थं वुत्तं. एतन्ति नट्ठचीवरं. एतेसम्पीति नट्ठचीवरादीनि परामसति, तेन चीवरपलिबोधाभावं दस्सेति. दुतियस्स पलिबोधस्साति आवासपलिबोधस्स. एत्थ च निट्ठितचीवरस्मिं, उब्भतस्मिं कथिनेति द्वीहि पदेहि द्विन्नं पलिबोधानं अभावदस्सनेन अत्थतकथिनस्स पञ्चमासब्भन्तरे याव चीवरपलिबोधआवासपलिबोधेसु अञ्ञतरं न उपच्छिज्जति, ताव अतिरेकचीवरं धारेतुं वट्टतीति दीपेति. पक्कमनं अन्तो अस्साति पक्कमनन्तिका, एवं सेसापि वेदितब्बा. वित्थारो पनेत्थ आगतट्ठाने आवि भविस्सति.

दसाहपरमं कालन्ति अच्चन्तसंयोगवचनं. इदञ्हि वुत्तं होति…पे… दसाहपरमभावोति इदं दसाहपरमतापदस्स अत्थमत्तदस्सनं, दसाहपरमभावोति इदञ्हि वुत्तं होतीति एवमेत्थ योजना वेदितब्बा. अयमत्थोतिआदि दसाहपरमपदस्सेव अधिप्पेतत्थदस्सनवसेन ¶ वुत्तं. तत्थ एत्तको कालोति ‘‘दसाहपरमता’’ति वुत्तो यो कालो, सो एत्तको कालोति अत्थो.

खोमन्ति खोमसुत्तेहि वायितं खोमपटचीवरं, तं वाकमयन्ति वदन्ति. कप्पाससुत्तेहि वायितं कप्पासिकं, एवं सेसानिपि. कम्बलन्ति एळकादीनं लोममयसुत्तेन वायितपटं. भङ्गन्ति खोमसुत्तादीनि सब्बानि, एकच्चानि वा मिस्सेत्वा वायितं चीवरं. भङ्गम्पि वाकमयमेवाति केचि. दुकूलं पत्तुण्णं सोमारपटं चीनपटं इद्धिजं देवदिन्नन्ति इमानि पन छ चीवरानि एतेसञ्ञेव ¶ अनुलोमानीति विसुं न वुत्तानि. दुकूलञ्हि साणस्स अनुलोमं वाकमयत्ता. ‘‘पत्तुण्णं कोसेय्यविसेसो’’ति अभिधानकोसे वुत्तं. सोमारदेसे, चीनदेसे च जातवत्थानि सोमारचीनपटानि. पत्तुण्णादीनि तीणि कोसेय्यस्स अनुलोमानि पाणकेहि कतसुत्तमयत्ता. इद्धिजन्ति एहिभिक्खूनं पुञ्ञिद्धिया निब्बत्तचीवरं. कप्परुक्खे निब्बत्तं, देवदिन्नञ्च खोमादीनं अञ्ञतरं होतीति तेसं सब्बेसं अनुलोमानि. मनुस्सानं पकतिविदत्थिं सन्धाय ‘‘द्वे विदत्थियो’’तिआदि वुत्तं. इमिना दीघतो वड्ढकीहत्थप्पमाणं वित्थारतो ततो उपड्ढप्पमाणं विकप्पनुपगन्ति दस्सेति. तथा हि ‘‘सुगतविदत्थि नाम इदानि मज्झिमस्स पुरिसस्स तिस्सो विदत्थियो, वड्ढकीहत्थेन दियड्ढो हत्थो होती’’ति (पारा. अट्ठ. २.३४८-३४९) कुटिकारसिक्खापदट्ठकथायं वुत्तं, तस्मा सुगतङ्गुलेन द्वादसङ्गुला सुगतविदत्थि वड्ढकीहत्थेन दियड्ढो हत्थोति सिद्धं. एवञ्च कत्वा ‘‘सुगतङ्गुलेन अट्ठङ्गुलं वड्ढकीहत्थप्पमाण’’न्ति आगतट्ठानेहि च समेति.

तं अतिक्कामयतोति एत्थ तन्ति चीवरं, कालं वा परामसति. तस्स यो अरुणोति चीवरुप्पाददिवसस्स यो अतिक्कन्तो अरुणो. चीवरुप्पाददिवसेन सद्धिन्ति चीवरुप्पाददिवसस्स आदिभूतेन अतिक्कन्तअरुणेन सद्धिन्ति अत्थो, इदञ्च भगवता ‘‘दसाहपरम’’न्ति वत्वा पुन ‘‘एकादसे अरुणुग्गमने’’ति वुत्तत्ता पुब्बापरसंसन्दनत्थं सद्दतो गम्ममानम्पि ‘‘चीवरुप्पाददिवसेन सद्धि’’न्ति एवं वुत्तं. ‘‘दसमे अरुणे’’ति वुत्ते एव हि दसाहपरमेन सद्धिं समेति. दिवसपरियोसानस्स अवधिभूतअनागतारुणवसेन हि दिवसं अतिक्कन्तं नाम होति, न पन दिवसस्स आदिभूतारुणवसेन परिवासादीसु तथा अग्गहणतो, इध पन भगवता दिवसस्स आदिअन्तपरिच्छेददस्सनवसेन ‘‘एकादसे अरुणुग्गमने’’ति वुत्तं, तस्मा अट्ठकथायं दिवसस्स आदिभूतं तंदिवसनिस्सितम्पि अरुणं गहेत्वा ‘‘एकादसे अरुणुग्गमने निस्सग्गियं होती’’ति वुत्तं. अरुणोति चेत्थ सूरियुग्गमनस्स पुरेचरो वड्ढनघनरत्तो पभाविसेसोति दट्ठब्बो.

वचनीयोति ¶ सङ्घापेक्खो. वचनभेदोति ‘‘ञत्तियं द्वे आपत्तियो सरती’’तिआदिना वत्तब्बन्ति अधिप्पायो.

४६८. ‘‘न ¶ इध सञ्ञा रक्खती’’ति इदं वेमतिकञ्च अनतिक्कन्तसञ्ञञ्च सन्धाय वुत्तं. योपि एवंसञ्ञी तस्सपीति यो अनतिक्कन्तसञ्ञी, वेमतिको वा, तस्सपीति अत्थो. अनट्ठतो अविलुत्तस्स विसेसमाह ‘‘पसय्हावहारवसेना’’ति. थेय्यावहारवसेन गहितम्पि इध नट्ठं.

अनापत्ति अञ्ञेन कतं पटिलभित्वातिआदि निसीदनसन्थतं सन्धाय वुत्तं. येन हि पुराणसन्थतस्स सामन्ता सुगतविदत्थिं अनादियित्वा नवं निसीदनसन्थतं कतं, तस्स तं निस्सग्गियम्पि ततो अञ्ञस्स पटिलभित्वा परिभुञ्जन्तस्स अनापत्तिकरन्ति सिज्झनतो अयमत्थो सब्बनिस्सग्गियेसुपि सिज्झति.

४६९. तिचीवरं अधिट्ठातुन्ति सङ्घाटिआदिनामेन अधिट्ठातुं. ‘‘न विकप्पेतु’’न्ति इमिना नामेन न विकप्पेतुं, एतेन विकप्पिततिचीवरो तेचीवरिको न होति. तस्स तस्मिं अधिट्ठिततिचीवरे विय अविप्पवासादिना कत्तब्बविधि न कातब्बोति दस्सेति, न पन विकप्पने दोसोति. ततो परन्ति चतुमासतो परं विकप्पेत्वा परिभुञ्जितुं अनुञ्ञातन्ति केचि वदन्ति, अञ्ञे पन ‘‘विकप्पेत्वा याव आगामिवस्सानं, ताव ठपेतुमेव वट्टती’’ति वदन्ति, अपरे पन ‘‘विकप्पने न दोसो, तथा विकप्पितं परिक्खारादिनामेन अधिट्ठहित्वा परिभुञ्जितब्ब’’न्ति वदन्ति.

मुट्ठिपञ्चकन्ति मुट्ठिया उपलक्खितं पञ्चकं, चतुहत्थे मिनित्वा पञ्चमं हत्थं मुट्ठिं कत्वा मिनितब्बन्ति अधिप्पायो. केचि पन ‘‘मुट्ठिहत्थानं पञ्चकं मुट्ठिपञ्चकं, तस्मा पञ्चपि हत्थे मुट्ठिं कत्वाव मिनितब्बा’’ति वदन्ति. मुट्ठित्तिकन्ति एत्थापि एसेव नयो. द्विहत्थेन अन्तरवासकेन तिमण्डलं पटिच्छादेतुं सक्काति आह ‘‘पारुपनेना’’तिआदि. अतिरेकन्ति सुगतचीवरप्पमाणतो अधिकं. ऊनकन्ति मुट्ठिपञ्चकादितो ऊनकं, तेन च तेसु तिचीवराधिट्ठानं न रुहतीति दस्सेति.

इमं सङ्घाटिं पच्चुद्धरामीति इमं सङ्घाटिअधिट्ठानं उक्खिपामि परिच्चजामीति अत्थो. कायविकारं करोन्तेनाति हत्थेन चीवरं परामसन्तेन, चालेन्तेन वा. वाचाय अधिट्ठातब्बाति एत्थ ¶ कायेनपि चालेत्वा वाचम्पि भिन्दित्वा कायवाचाहि अधिट्ठानम्पि सङ्गहितन्ति वेदितब्बं ‘‘कायेन अफुसित्वा’’ति वुत्तत्ता. दुविधन्ति अहत्थपासहत्थपासवसेन दुविधं. तत्थ हत्थपासो नाम अड्ढतेय्यहत्थो वुच्चति. द्वादसहत्थन्ति केचि वदन्ति ¶ , तं इध न समेति. ‘‘सामन्तविहारे’’ति इदं ठपितट्ठानसल्लक्खणयोग्गे ठितं सन्धाय वुत्तं. ततो दूरे ठितम्पि ठपितट्ठानं सल्लक्खेन्तेन अधिट्ठातब्बमेव. तत्थपि चीवरस्स ठपितभावसल्लक्खणमेव पमाणं. न हि सक्का सब्बथा ठानं सल्लक्खेतुं. एकस्मिं विहारे ठपेत्वा ततो अञ्ञस्मिं ठपितन्ति अधिट्ठातुं न वट्टति. केचि पन ‘‘तथापि अधिट्ठिते न दोसो’’ति वदन्ति, तं अट्ठकथाय न समेति, वीमंसितब्बं. अधिट्ठहित्वा ठपितवत्थेहीति परिक्खारचोळनामेन अधिट्ठहित्वा ठपितवत्थेहि, तेनेव ‘‘इमं पच्चुद्धरामी’’ति परिक्खारचोळस्स पच्चुद्धारं दस्सेति. एतेन च तेचीवरधुतङ्गं परिहरन्तेन पंसुकूलादिवसेन लद्धं वत्थं दसाहब्भन्तरे कत्वा रजित्वा पारुपितुं असक्कोन्तेन परिक्खारचोळवसेन अधिट्ठहित्वाव दसाहं अतिक्कमेतब्बं, इतरथा निस्सग्गियं होतीति दस्सेति. तेनेव ‘‘रजितकालतो पन पट्ठाय निक्खिपितुं न वट्टति, धुतङ्गचोरो नाम होती’’ति (विसुद्धि. १.२५) विसुद्धिमग्गे वुत्तं. ‘‘पुन अधिट्ठातब्बानी’’ति इदञ्च सङ्घाटिआदितिचीवरनामेन अधिट्ठहित्वा परिभुञ्जितुकामस्स वसेन वुत्तं, इतरस्स पन पुरिमाधिट्ठानमेव अलन्ति वेदितब्बं. ‘‘पुन अधिट्ठातब्ब’’न्ति इमिना कप्पबिन्दुपि दातब्बन्ति दस्सेति.

बद्धसीमायं अविप्पवाससीमासम्मुतिसम्भवतो न तत्थ दुप्परिहारताति आह ‘‘अबद्धसीमायं दुप्परिहार’’न्ति.

अतिरित्तप्पमाणाय छेदनकं पाचित्तियन्ति आह ‘‘अनतिरित्तप्पमाणा’’ति. ततो परं पच्चुद्धरित्वा विकप्पेतब्बाति वस्सिकमासतो परं अधिट्ठानं पच्चुद्धरित्वा विकप्पेतब्बा, इमिना चतुन्नं वस्सिकमासानं उपरि अधिट्ठानं तिट्ठतीति विञ्ञायति ततो पच्चुद्धरायोगा. यञ्च मातिकाट्ठकथायं ‘‘वस्सिकसाटिका वस्सानमासातिक्कमेनापि, कण्डुपटिच्छादि आबाधवूपसमेनापि अधिट्ठानं विजहती’’ति (कङ्खा. अट्ठ. कथिनसिक्खापदवण्णना) वुत्तं, तं समन्तपासादिकायं नत्थि. परिवारट्ठकथायञ्च ‘‘अत्थापत्ति हेमन्ते आपज्जति, नो गिम्हे’’ति एत्थ इदं वुत्तं ‘‘कत्तिकपुण्णमासिया पच्छिमे पाटिपददिवसे विकप्पेत्वा ठपितं वस्सिकसाटिकं निवासेन्तो हेमन्ते आपज्जति, कुरुन्दियं पन ‘कत्तिकपुण्णमदिवसे अपच्चुद्धरित्वा हेमन्ते आपज्जती’ति वुत्तं, तम्पि सुवुत्तं, ‘चतुमासं अधिट्ठातुं ततो परं विकप्पेतु’न्ति ¶ हि वुत्त’’न्ति (परि. अट्ठ. ३२३). तत्थ महाअट्ठकथायं निवासनपच्चया दुक्कटं ¶ वुत्तं, कुरुन्दट्ठकथायं पन अपच्चुद्धारपच्चया, तस्मा कुरुन्दियं वुत्तनयेनापि वस्सिकसाटिका वस्सानमासातिक्कमेपि अधिट्ठानं न विजहतीति पञ्ञायति. अधिट्ठानविजहनेसु च वस्सानमासआबाधानं विगमेन विजहनं मातिकाट्ठकथायम्पि न उद्धटं, तस्मा समन्तपासादिकायं आगतनयेन याव पच्चुद्धारा अधिट्ठानं तिट्ठतीति गहेतब्बं. नहानत्थाय अनुञ्ञातत्ता ‘‘वण्णभेदमत्तरत्तापि चेसा वट्टती’’ति वुत्तं. ‘‘द्वे पन न वट्टन्ती’’ति इमिना सङ्घाटिआदीसु विय दुतिये अधिट्ठानं न रुहति, अतिरेकचीवरं होतीति दस्सेति. महापच्चरियं चीवरवसेन परिभोगकिच्चस्स अभावं सन्धाय अनापत्ति वुत्ता सेनासनपरिक्खारत्थाय दिन्नपच्चत्थरणे विय. यं पन ‘‘पच्चत्थरणम्पि अधिट्ठातब्ब’’न्ति वुत्तं, तं सेनासनत्थायेवाति नियमितं न होति नवसु चीवरेसु गहितत्ता, तस्मा अत्तनो नामेन अधिट्ठहित्वा निदहित्वा परिक्खारचोळं विय यथा तथा विनियुज्जितब्बमेवाति गहेतब्बं. पावारो कोजवोति इमेसम्पि पच्चत्थरणादीनं लोकेपि वोहरणतो सेनासनपरिक्खारत्थाय दिन्नपच्चत्थरणतो विसुं गहणं कतं.

‘‘हीनायावत्तनेना’’ति इदं अन्तिमवत्थुं अज्झापज्जित्वा भिक्खुपटिञ्ञाय ठितस्स चेव तित्थियपक्कन्तस्स च भिक्खुनिया च भिक्खुनिभावे निरपेक्खताय गिहिलिङ्गतित्थियलिङ्गग्गहणं सन्धाय वुत्तं. सिक्खं अपच्चक्खाय गिहिभावूपगमनं सन्धाय वुत्तन्ति केचि वदन्ति, तं न युत्तं तदापिस्स उपसम्पन्नत्ता, चीवरस्स च तस्स सन्तकत्ताविजहनतो. पमाणचीवरस्साति पच्छिमप्पमाणं सन्धाय वुत्तं. द्वे चीवरानि पारुपन्तस्साति गामप्पवेसे दिगुणं कत्वा सङ्घाटियो पारुपनं सन्धाय वुत्तं. ‘‘एस नयो’’ति इमिना पमाणयुत्तेसु यत्थ कत्थचि छिद्दं अधिट्ठानं विजहतीतिआदिअत्थं सङ्गण्हाति.

अञ्ञं पच्छिमप्पमाणं नाम नत्थीति सुत्ते आगतं नत्थीति अधिप्पायो. इदानि तमेव विभावेतुं ‘‘यञ्ही’’तिआदि वुत्तं, तं न समेति, सङ्घाटिआदीनं मुट्ठिपञ्चकादिहेट्ठिमप्पमाणस्स सुत्ते अनागतत्ताति अधिप्पायो.

महन्तं वा खुद्दकं करोतीति एत्थ अतिमहन्तं चीवरं मुट्ठिपञ्चकादिपच्छिमप्पमाणयुत्तं कत्वा समन्ततो छिन्दनेनापि विच्छिन्दनकाले छिज्जमानट्ठानं छिद्दसङ्ख्यं ¶ न गच्छति अधिट्ठानं न विजहति एवाति सिज्झति, ‘‘घटेत्वा छिन्दति, न भिज्जती’’ति वचनेन च समेति. परिक्खारचोळं पन विकप्पनुपगपच्छिमप्पमाणतो ऊनं कत्वा छिन्नं अधिट्ठानं विजहति अधिट्ठानस्स अनिस्सयत्ता. तानि पुन बद्धानि घटितानि अधिट्ठातब्बमेवाति वेदितब्बं ¶ . केचि पन ‘‘वस्सिकसाटिकचीवरे द्विधा छिन्ने यदिपि एकेकं खण्डं पच्छिमपच्छिमप्पमाणं पहोति, एकस्मिंयेव खण्डे अधिट्ठानं तिट्ठति, न इतरे, ‘‘द्वे पन न वट्टन्ती’’ति वुत्तत्ता. निसीदनकण्डुप्पटिच्छादीसुपि एसेव नयोति वदन्ति.

सम्मुखे पवत्ता सम्मुखाति पच्चत्तवचनं, तञ्च विकप्पनविसेसनं, तस्मा ‘‘सम्मुखे’’ति भुम्मत्थे निस्सक्कवचनं कत्वापि अत्थं वदन्ति, अभिमुखेति अत्थो. अथ वा सम्मुखेन अत्तनो वाचाय एव विकप्पना सम्मुखाविकप्पना. परम्मुखेन विकप्पना परम्मुखाविकप्पनाति करणत्थेनापि अत्थो दट्ठब्बो, अयमेव पाळिया समेति. सन्निहितासन्निहितभावन्ति आसन्नदूरभावं. एत्तावता निधेतुं वट्टतीति एत्तकेनेव विकप्पनाकिच्चस्स निट्ठितत्ता, अतिरेकचीवरं न होतीति दसाहातिक्कमे न निस्सग्गियं जनेतीति अधिप्पायो. परिभुञ्जितुं…पे… न वट्टतीति सयं अपच्चुद्धरणं परिभुञ्जने पाचित्तियं, अधिट्ठाने परेसं विस्सज्जने दुक्कटञ्च सन्धाय वुत्तं.

परिभोगादयोपि वट्टन्तीति परिभोगविस्सज्जनअधिट्ठानानिपि. अपि-सद्देन निधेतुम्पि वट्टतीति अत्थो, एतेन च पच्चुद्धारेपि कते चीवरम्पि विकप्पितचीवरमेव होति, न अतिरेकचीवरं. तं पन तिचीवरादिनामेन अधिट्ठातुकामेन अधिट्ठहितब्बं, इतरेन विकप्पितचीवरमेव कत्वा परिभुञ्जितब्बन्ति दस्सेति. केचि पन ‘‘यं विकप्पितचीवरं, तं याव अपरिभोगकाला अपच्चुद्धरापेत्वाव निदहितब्बं, परिभोगकाले पन सम्पत्ते पच्चुद्धरापेत्वा अधिट्ठहित्वा परिभुञ्जितब्बं. यदि हि ततो पुरेपि पच्चुद्धरापेय्य, पच्चुद्धारेनेव विकप्पनाय विगतत्ता अतिरेकचीवरं नाम होति, दसाहातिक्कमे च निस्सग्गियं पाचित्तियं. तस्मा यं अपरिभुञ्जित्वाव ठपेतब्बं, तदेव विकप्पेतब्बं, पच्चुद्धारे च कते अन्तोदसाहेयेव अधिट्ठातब्बं. यञ्च अट्ठकथायं ‘ततो पभुति परिभोगादयोपि वट्टन्ती’तिआदि वुत्तं, तं पाळिया विरुज्झती’’ति वदन्ति, तं तेसं मतिमत्तमेव. पाळियञ्हि ¶ ‘‘अन्तोदसाहं अधिट्ठेति, विकप्पेती’’ति (पारा. ४६९) च ‘‘सामं चीवरं विकप्पेत्वा अपच्चुद्धारणं परिभुञ्जेय्य पाचित्तिय’’न्ति (पाचि. ३७३) च ‘‘अनापत्ति सो वा देति, तस्स वा विस्सासन्तो परिभुञ्जती’’ति (पाचि. ३७४) च सामञ्ञतो वुत्तत्ता, अट्ठकथायञ्च ‘‘इमं चीवरं वा विकप्पनं वा पच्चुद्धरामी’’तिआदिना पच्चुद्धारं अदस्सेत्वा ‘‘मय्हं सन्तकं परिभुञ्ज वा विस्सज्जेहि वा’’ति एवं अत्तनो सन्तकत्तं अमोचेत्वाव परिभोगादिवसेनेव पच्चुद्धारस्स वुत्तत्ता, ‘‘ततो पभुति परिभोगादयोपि वट्टन्ती’’ति अधिट्ठानं विनापि विसुं परिभोगस्स, निदहनस्स च वुत्तत्ता विकप्पनानन्तरमेव पच्चुद्धरापेत्वा अनधिट्ठहित्वा एव तिचीवरविरहितं ¶ विकप्पनारहं चीवरं परिभुञ्जितुं, निदहितुञ्च इदं पाटेक्कं विनयकम्मन्ति खायति. अपिच बहूनं पत्तानं विकप्पेतुं, पच्चुद्धारेतुञ्च वुत्तत्ता पच्चुद्धारेन तेसं अतिरेकपत्तता दस्सिताति सिज्झति तेसु एकस्सेव अधिट्ठातब्बतो. तस्मा अट्ठकथायं आगतनयेनेव गहेतब्बं.

पञ्ञत्तिकोविदो न होतीति एवं विकप्पिते ‘‘अनन्तरमेव एवं पच्चुद्धरितब्ब’’न्ति विनयकम्मं न जानाति. तेनाह ‘‘न जानाति पच्चुद्धरितु’’न्ति, इमिनापि चेतं वेदितब्बं ‘‘विकप्पनानन्तरमेव पच्चुद्धारो कातब्बो’’ति.

अविसेसेन वुत्तवचनन्ति तिचीवरादीनं साधारणवचनेन वुत्तवचनं. यं पनेत्थ ‘‘विरुद्धं विय दिस्सती’’ति वत्वा तं विरोधासङ्कं निवत्तेतुं ‘‘तिचीवरसङ्खेपेन…पे… विकप्पनाय ओकासो दिन्नो होती’’ति वुत्तं, तं ‘‘अधिट्ठेति विकप्पेती’’ति सामञ्ञतो वुत्तेपि तिचीवरम्पि विकप्पेतीति अयमत्थो न सिज्झति, ‘‘तिचीवरं अधिट्ठातुं न विकप्पेतु’’न्ति (महाव. ३५८) विसेसेत्वा वुत्तत्ता. यं पन अधिट्ठातब्बं, तं अधिट्ठाति. यं तिचीवरविरहितं, तं विकप्पेतब्बं, तं विकप्पेतीति एवमत्थो सिज्झतीति. तस्मा एत्थ पुब्बापरविरोधो न दिस्सति सामञ्ञवचनस्स वुत्तावसेसेयेव अवतिट्ठनतो. यं पनेत्थ तिचीवरस्सापि विकप्पनविधिं दस्सेतुं ‘‘तिचीवरं तिचीवरसङ्खेपेना’’तिआदि वुत्तं. तत्थ तिचीवरसङ्खेपेन परिहरियमानेसु एकम्पि पच्चुद्धरित्वा विकप्पेतुं न वट्टति, तिचीवरतो पन एकं वा सकलमेव वा अपनेत्वा अपरं तिचीवरं तिचीवरसङ्खेपेन परिहरितुकामस्स वा तिचीवराधिट्ठानं मुञ्चित्वा परिक्खारचोळवसेनेव सब्बचीवरं परिभुञ्जितुकामस्स ¶ वा पुरिमं अधिट्ठितचीवरं पच्चुद्धरित्वा विकप्पेतुं वट्टतीति एवमधिप्पायेन ‘‘तिचीवरे एकेन चीवरेन विप्पवसितुकामो होती’’तिआदि वुत्तं सिया, इच्चेतं पाळिया सद्धिं समेति. अथ पुनपि तदेव तिचीवराधिट्ठानेन अधिट्ठातुकामो हुत्वा विप्पवाससुखत्थं पच्चुद्धरित्वा विकप्पेतीति इमिना अधिप्पायेन वुत्तं सिया, तं ‘‘तिचीवरं अधिट्ठातुं न विकप्पेतु’’न्ति (महाव. ३५८) इमिना वचनेन न समेति. यदि हि सेसचीवरानि विय तिचीवरम्पि पच्चुद्धरित्वा विकप्पेतब्बं सिया, ‘‘तिचीवरं अधिट्ठातुं न विकप्पेतु’’न्ति इदं वचनमेव निरत्थकं सिया सेसचीवरेहि तिचीवरस्स विसेसाभावा. तस्मा ‘‘विकप्पेती’’ति इदं तिचीवरविरहितमेव सन्धाय वुत्तं. तिचीवरं पन विकप्पेतुं न वट्टतीति विञ्ञायति, तेनेव दुतियकथिनसिक्खापदस्स अनापत्तिवारे ‘‘विकप्पेती’’ति इदं न वुत्तं, वीमंसित्वा यथा पाळिया सद्धिं न विरुज्झति, तथा एत्थ अधिप्पायो गहेतब्बो.

तुय्हं ¶ देमीतिआदीसु परिच्चत्तत्ता मनसा असम्पटिच्छन्तेपि सम्पदानभूतस्सेव सन्तकं होति, सो इच्छितक्खणे गहेतुं लभति. इत्थन्नामस्साति परम्मुखे ठितं सन्धाय वदति. यस्स पन रुच्चतीतिआदि उभोहिपि परिच्चत्तताय अस्सामिकतं सन्धाय वुत्तं.

‘‘तं न युज्जती’’ति इदं अन्तोदसाहे एव विस्सासग्गहणं सन्धाय अनापत्तिवारस्स आगतत्ता, इध निस्सग्गियचीवरस्स कप्पियभावकरणत्थं लेसेन गहितत्ता च वुत्तं, केचि पन ‘‘परेहि सभागेन अच्छिन्ने, विस्सासग्गहिते च पुन लद्धे दोसो न दिस्सती’’ति वदन्ति. अनधिट्ठानेनाति कायवाचाहि कत्तब्बस्स अकरणेनाति अधिप्पायो. चीवरस्स अत्तनो सन्तकता, जातिपमाणयुत्तता, छिन्नपलिबोधभावो, अतिरेकचीवरता, दसाहातिक्कमोति इमानेत्थ पञ्च अङ्गानि.

पठमकथिनसिक्खापदवण्णना निट्ठिता.

२. उदोसितसिक्खापदवण्णना

४७३. दुतिये अविप्पवासेति अविप्पवासे निप्फादेतब्बे, विप्पवासदोसाभावे साधेतब्बे कत्तब्बा सम्मुतीति अत्थो.

४७५. पटिसिद्धपरियापन्नेनाति ¶ विप्पवसितुं पटिसिद्धेसु तीसु चीवरेसु अन्तोगधेन, एकेन च अवयवे समुदायोपचारं दस्सेति.

४७८-९. एत्तावताति ‘‘परिक्खित्तो’’ति इमिना. ‘‘सभायेति लिङ्गब्यत्तयेन सभा वुत्ता’’ति वत्वा पुन सयम्पि ‘‘सभाये’’ति इमिना वोहरन्तो सभा-सद्दस्स परियायो सभाय-सद्दो नपुंसकलिङ्गयुत्तो अत्थीति दस्सेति. ‘‘सभायन्ति लिङ्गब्यत्तयेन सभा वुत्ता’’ति वा पाठो. लिङ्गब्यत्तयेन सभाति च लिङ्गन्तरयुत्तो सभासद्दपरियायो सभायसद्दोति अत्थो.

सभायं गच्छतीति सभं गच्छति. वसितब्बं नत्थीति चीवरहत्थपासेयेव वसितब्बं नत्थीति अत्थो. तस्साति वीथिया. सभायस्स च द्वारस्स च हत्थपासा न विजहितब्बन्ति एत्थ सभायद्वारानमन्तरे वीथि गेहापि गहिता एव होन्ति आदिपरियोसानानं गहितत्ता. एत्थ च द्वारवीथिघरेसु वसन्तेन गामप्पवेसनसहसेय्यादिदोसं परिहरित्वा सुपटिच्छन्नतादियुत्तेनेव भवितब्बं ¶ , सभा पन यदि सब्बेसं वसनत्थाय सालासदिसा कता, अन्तरारामे विय यथासुखं वसितुं वट्टतीति वेदितब्बं. परिक्खित्तताय च एकूपचारतं, अपरिक्खित्तताय नानूपचारतञ्च निवेसनादीसुपि अतिदिसन्तो आह ‘‘एतेनेवूपायेना’’तिआदि. निवेसनादीनि बहिगामतो सन्निविट्ठानि गहितानि अन्तोगामे ठितानं गामग्गहणेनेव गहितत्ता. सब्बत्थाति गामनिगमनिवेसनादीसु पन्नरससु. परिक्खेपादीति आदि-सद्देन अपरिक्खेपस्सेव गहणं, न एककुलादीनम्पि तेसं एकूपचारतानानूपचारतानिमित्तताभावा. एत्थ च सत्थस्स कतिपाहं कत्थचि निविट्ठस्सेव परिक्खेपो होति, न गच्छन्तस्स.

४८२-७. गामतो बहि इस्सरानं समुद्दतीरादीसु कतभण्डसाला उदोसितोति आह ‘‘यानादीन’’न्तिआदि. मुण्डच्छदनपासादोति नातिउच्चो चन्दिकङ्गणयुत्तो सिखरकूटमालादिविरहितो पासादो.

४८९. परियादियित्वाति अज्झोत्थरित्वा. नदीपरिहारोति विसुंगामादीनं विय नदीपरिहारस्स अवुत्तत्ता चीवरहत्थपासो एवाति वदन्ति, अञ्ञे पन ‘‘इमिना अट्ठकथावचनेन नदीपरिहारोपि विसुं सिद्धो, नदिया ¶ हत्थपासो न विजहितब्बो’’ति वदन्ति. विहारसीमन्ति अविप्पवाससीमं सन्धायाह. एत्थ च विहारस्स नानाकुलसन्तकभावेपि अविप्पवाससीमापरिच्छेदब्भन्तरे सब्बत्थ चीवरअविप्पवाससम्भवतो तस्सा पधानत्ता तत्थ सत्थपरिहारो न लब्भतीति ‘‘विहारं गन्त्वा वसितब्ब’’न्ति वुत्तं. ‘‘सत्थसमीपे’’ति इदं यथावुत्तं अब्भन्तरपरिच्छेदवसेन वुत्तं. पाळियं नानाकुलस्स सत्थो होति, सत्थे चीवरं निक्खिपित्वा हत्थपासा न विजहितब्बन्ति एत्थ सत्थहत्थपासो गहितो.

४९०. एककुलस्स खेत्तेति अपरिक्खित्तं सन्धाय वदति.

४९१-४. विहारो नाम उपचारसीमा. तत्थ यस्मिं विहारेति तस्स अन्तोपरिवेणादिं सन्धाय वुत्तं, एककुलादिसन्तकता चेत्थ कारापकानं वसेन. छायाय फुट्ठोकासस्साति उजुकं अवक्खित्तलेड्डुपातब्भन्तरं सन्धाय वदति.

अगमनपथेति तदहेव गन्त्वा निवत्तेतुं न सक्कुणेय्यके समुद्दमज्झे ये दीपका, तेसूति योजना. इतरस्मिन्ति पुरत्थिमदिसाय चीवरे. ‘‘उपोसथकाले…पे… वड्ढती’’ति इमिना चीवरविप्पवाससत्तब्भन्तरतो समानसंवासाय सत्तब्भन्तरसीमाय अच्चन्तविसदिसतं दस्सेति ¶ . तथा हि बहूसु भिक्खूसु एकतो निसीदित्वा समन्ता सत्तब्भन्तरपरिच्छेदेसु यथासकं चीवरं ठपेत्वा परिहरन्तेसु एकेकस्स भिक्खुनो निसिन्नोकासतो पट्ठाय पच्चेकं सत्तब्भन्तरस्स परिच्छेदो अञ्ञमञ्ञविसदिसो अनेकविधो होति, न एको परिसपरियन्ततो पट्ठाय अनिमितब्बत्ता. तेनेव तत्थ परिसवसेन वुड्ढि, हानि वा न होति, न एवं सत्तब्भन्तरसीमाय. सा हि योजनिकायपि परिसपरियन्ततोव पट्ठाय समन्ता सत्तब्भन्तरपअच्छिन्ना एकाव होति. तेनेव सा परिसवसेन वड्ढति, हायति च, तस्मा अञ्ञाव सत्तब्भन्तरसीमा अञ्ञो सत्तब्भन्तरतो परिच्छिन्नो चीवरविप्पवासपरिहारो अब्भोकासोति वेदितब्बं. यञ्चेत्थ वत्तब्बं, तं खन्धके सीमाकथायमेव (महाव. १४३) वक्खाम.

४९५. नदिं ¶ ओतरतीति हत्थपासं मुञ्चित्वा ओतरति. बहिगामे ठपेत्वाति अपारुपितब्बताय वुत्तं. विनयकम्मं कातब्बन्ति उत्तरासङ्गे च बहिगामे ठपितसङ्घाटियञ्च पठमं विनयकम्मं कत्वा पच्छा उत्तरासङ्गं निवासेत्वा अन्तरवासके कातब्बं. एत्थ च बहिगामे ठपितस्सापि विनयकम्मवचनतो परम्मुखापि ठितं विस्सज्जितुं, निस्सट्ठं दातुञ्च वट्टतीति वेदितब्बं. दहरानं गमने सउस्साहत्ता ‘‘निस्सयो पन न पटिप्पस्सम्भती’’ति वुत्तं. मुहुत्तं…पे… पटिप्पस्सम्भतीति सउस्साहत्ते गमनस्स उपच्छिन्नत्ता वुत्तं. तेसं पन पुरारुणाव उट्ठहित्वा सउस्साहेन गच्छन्तानं अरुणे अन्तरा उट्ठितेपि न पटिप्पस्सम्भति ‘‘याव अरुणुग्गमना सयन्ती’’ति वुत्तत्ता. तेनेव ‘‘गामं पविसित्वा…पे… न पटिप्पस्सम्भती’’ति वुत्तं. अञ्ञमञ्ञस्स वचनं अग्गहेत्वातिआदिम्हि सउस्साहत्ता गमनक्खणे पटिप्पस्सद्धि न वुत्ता. धेनुभयेनाति तरुणवच्छगावीनं अभिधावित्वा सिङ्गेन पहरणभयेन. निस्सयो च पटिप्पस्सम्भतीति एत्थ धेनुभयादीहि ठितानं याव भयवूपसमा ठातब्बतो ‘‘अन्तोअरुणेयेव गमिस्सामी’’ति नियमेतुं असक्कुणेय्यत्ता वुत्तं. यत्थ पन एवं नियमेतुं सक्का, तत्थ अन्तरारुणे उग्गतेपि निस्सयो न पटिप्पस्सम्भति भेसज्जत्थाय गामप्पविट्ठदहरानं विय. अन्तोसीमायं गामन्ति अविप्पवाससीमासम्मुतितो पच्छा पतिट्ठापितगामं सन्धाय वदति गामञ्च गामूपचारञ्च ठपेत्वा सम्मन्नितब्बतो. पविट्ठानन्ति आचरियन्तेवासिकानं विसुं विसुं गतानं अविप्पवाससीमत्ता नेव चीवरानि निस्सग्गियानि होन्ति, सउस्साहताय निस्सयो न पटिप्पस्सम्भति. अन्तरामग्गेति धम्मं सुत्वा आगच्छन्तानं अन्तरामग्गे.

‘‘इध अपच्चुद्धरण’’न्ति इमिना अधिट्ठानविकप्पनानि विय पच्चुद्धरणम्पि कायेन वा वाचाय वा कत्तब्बन्ति दस्सेति. कायवाचाहि कत्तब्बस्स अकरणतोति इदं कायवाचासमुट्ठानं ¶ वुत्तं. अधिट्ठिततिचीवरता, अनत्थतकथिनता, अलद्धसम्मुतिता, रत्तिविप्पवासोति इमानेत्थ चत्तारि अङ्गानि.

उदोसितसिक्खापदवण्णना निट्ठिता.

३. ततियकथिनसिक्खापदवण्णना

४९७. ततिये ¶ पाळियं चीवरपच्चासा निक्खिपितुन्ति चीवरपच्चासाय सतिया निक्खिपितुन्ति अत्थो. निट्ठितचीवरस्मिं भिक्खुनाति एत्थ दुतियकथिने विय सामिवसेनेव करणवचनस्स अत्थो वेदितब्बो.

४९९-५००. तुय्हं दम्मीति दिन्नन्ति ‘‘तुय्हं, भन्ते, अकालचीवरं दम्मी’’ति एवं दिन्नं, एतम्पि काले आदिस्स दिन्नं नाम होतीति अधिप्पायो. इदं पन अट्ठकथावचनं, पाळियं ‘‘कालेपि आदिस्स दिन्न’’न्ति इदञ्च ‘‘अकालचीवर’’न्ति वचनसामञ्ञतो लब्भमानं सब्बम्पि दस्सेतुं अत्थुद्धारवसेन वुत्तं पठमअनियते सोतस्स रहो विय. सङ्घस्स हि कालेपि आदिस्स दिन्नं अकाले उप्पन्नचीवरं विय सम्मुखीभूतेहि वुत्थवस्सेहि, अवुत्थवस्सेहि च सब्बेहिपि भाजेतब्बतासामञ्ञेन अकालचीवरं नाम होतीति दस्सनत्थं अत्थुद्धारवसेन पाळियं ‘‘कालेपि आदिस्स दिन्न’’न्ति वुत्तं, न पन ‘‘ततो भाजेत्वा लद्धचीवरम्पि अकाले लद्धचीवरम्पि वुत्थवस्सानं एकमासपरिहारं, पञ्चमासपरिहारं वा न लभति, पच्चासाचीवरे असति दसाहपरिहारमेव लभती’’ति दस्सनत्थं वुत्तं, अट्ठकथायम्पि ‘‘आदिस्स दिन्न’’न्ति वचनसामञ्ञतो लब्भमानं सब्बं अत्थुद्धारवसेन दस्सेतुं ‘‘एकपुग्गलस्स वा इदं तुय्हं दम्मीति दिन्न’’न्ति वुत्तं, न पन तथालद्धं वा अकाले लद्धं वा अनत्थतकथिनानं दसाहब्भन्तरे अधिट्ठातब्बन्ति दस्सेतुन्ति वेदितब्बं इतरथा पाळिअट्ठकथाहि विरुज्झनतो. तथा हि अच्चेकचीवरसिक्खापदे अकाले उप्पन्नम्पि अच्चेकचीवरं ‘‘यावचीवरकालसमयं निक्खिपितब्ब’’न्ति (पारा. ६४८) वुत्तं, तस्स अट्ठकथायञ्च ‘‘पवारणमासस्स जुण्हपक्खपञ्चमियं उप्पन्नस्स अच्चेकचीवरस्स अनत्थते कथिने एकादसदिवसाधिको मासो, अत्थते कथिने एकादसदिवसाधिका पञ्च मासा च परिहारो वुत्तो, तमेव परिहारं सन्धाय ‘छट्ठितो पट्ठाय पन उप्पन्नं अनच्चेकचीवरम्पि पच्चुद्धरित्वा ठपितचीवरम्पि एतं परिहारं लभतियेवा’ति (पारा. अट्ठ. २.६४६-६४९) वुत्तं. तस्मा कालेपि अकालेपि च यथातथा लद्धं ¶ अतिरेकचीवरं वुत्थवस्सानं एकमासं, पञ्चमासं वा यथारहं परिहारं लभति एवाति गहेतब्बं.

एवं पन अवत्वा पदभाजनं वुत्तन्ति सम्बन्धो. तत्थ एवन्ति यं अट्ठकथायं ‘‘ततो चे उत्तरी’’ति इमस्स मासपरमतो उत्तरीति ¶ अत्थो वुत्तो, तं परामसति. पदभाजनियं एवमत्थं अवत्वा अञ्ञथा अत्थो वुत्तोति अधिप्पायो. ताव उप्पन्नं पच्चासाचीवरन्ति पच्चत्तवचनं. ‘‘मूलचीवर’’न्ति इदं उपयोगवचनं. अत्तनो गतिकं करोतीति अनन्तरा दुतियदिवसादीसु उप्पन्नं पच्चासाचीवरं मासपरमं मूलचीवरं ठपेतुं अदत्वा अत्तनो दसाहपरमताय एव पतिट्ठापेतीति अत्तनो गतिकं करोतीति. ततो उद्धं मूलचीवरन्ति एत्थ पन मूलचीवरन्ति पच्चत्तवचनं. तञ्हि वीसतिमदिवसतो उद्धं द्वावीसतिमदिवसादीसु उप्पन्नं पच्चासाचीवरं अत्तना सद्धिं एकतो सिब्बेत्वा घटितं दसाहपरमं गन्तुं अदत्वा नवाहपरमतादिवसेन अत्तनो गतिकं करोति, एकतो असिब्बेत्वा विसुं ठपितं पन पच्चासाचीवरं दसाहपरममेव.

पाळियं दसाहाति दसाहेन. एकादसे उप्पन्नेतिआदीसु एकादसाहे उप्पन्नेतिआदिना अत्थो, अयमेव वा पाठो गहेतब्बो. एकवीसे उप्पन्ने…पे… नवाहा कारेतब्बन्तिआदि पच्चासाचीवरस्स उप्पन्नदिवसं ठपेत्वा वुत्तं. तेनेव ‘‘तिंसे…पे… तदहेव अधिट्ठातब्ब’’न्ति वुत्तं. ‘‘अञ्ञं पच्चासाचीवरं…पे… कारेतब्ब’’न्ति इदं सतिया एव पच्चासाय वुत्तं. सचे पन ‘‘इतो पट्ठाय चीवरं न लभिस्सामी’’ति इच्छितट्ठानतो पच्चासाय उपच्छिन्नाय अञ्ञत्थापि येन केनचि उपायेन पच्चासं उप्पादेति, मूलचीवरं न अधिट्ठातब्बं, सब्बथा पच्चासाय उपच्छिन्नाय दसाहातिक्कन्तं मूलचीवरं तदहेव अधिट्ठातब्बं. पच्चासाचीवरम्पि परिक्खारचोळं अधिट्ठातब्बन्ति पठमतरं उप्पन्नं विसभागं सन्धाय वदति. अञ्ञमञ्ञन्ति अञ्ञं अञ्ञं, अयमेव वा पाठो. अङ्गं पनेत्थ पठमकथिने वुत्तसदिसमेव. केवलञ्हि तत्थ दसाहातिक्कमो, इध मासातिक्कमोति अयं विसेसो.

ततियकथिनसिक्खापदवण्णना निट्ठिता.

४. पुराणचीवरसिक्खापदवण्णना

५०३-५. चतुत्थे पाळियं भत्तविस्सग्गन्ति भत्तस्स उदरे विस्सज्जनं, पवेसनं अज्झोहरणं ¶ भत्तकिच्चन्ति अत्थो, भोजनपरियोसानेन भत्तस्स विस्सज्जनन्तिपि ¶ वदन्ति. तत्थ नाम त्वन्ति सो नाम त्वं, ताय नाम त्वन्ति वा अत्थो. पिता च माता च पितरो, पितूनं पिता च माता च पितामहा, ते एव युगळट्ठेन युगो, तस्मा याव सत्तमा पितामहयुगा पितामहावट्टाति एवमेत्थ अत्थो दट्ठब्बो. एवञ्हि पितामहग्गहणेन मातामहो च पितामही मातामही च गहिताव होन्ति. सत्तमयुगतो परं ‘‘अञ्ञातका’’ति वेदितब्बं. याति भिक्खुनी. पितु माता पितामही, मातु पिता मातामहो.

पयोगे पयोगे भिक्खुस्स दुक्कटन्ति ‘‘धोवा’’ति आणापनवाचाय एकाय एव तदनुगुणस्स सब्बस्सापि पयोगस्स आणत्तत्ता वुत्तं.

५०६. तदविनाभावतो धोवनस्स ‘‘कायविकारं कत्वा’’ति च ‘‘अन्तोद्वादसहत्थे’’ति च वुत्तत्ता कायेन धोवापेतुकामतं अप्पकासेत्वा दानखिपनपेसनादिं करोन्तस्स च द्वादसहत्थं उपचारं मुञ्चित्वा बहि ठत्वा कायवाचाहि आणापेत्वा खिपनपेसनादिं करोन्तस्स च अनापत्ति एव.

एकेन वत्थुनाति पठमकतेन. पञ्चसतानि पमाणं एतासन्ति पञ्चसता. भिक्खुभावतो परिवत्तलिङ्गापि भिक्खुनी भिक्खूनं सन्तिके एकतोउपसम्पन्ना एव.

५०७. तावकालिकं गहेत्वाति अत्तना कतिपाहं पारुपनादिअत्थाय तावकालिकं याचित्वा. पुराणचीवरता, उपचारे ठत्वा अञ्ञातिकाय भिक्खुनिया आणापनं, तस्सा धोवापनादीनि चाति इमानेत्थ तीणि अङ्गानि.

पुराणचीवरसिक्खापदवण्णना निट्ठिता.

५. चीवरपटिग्गहणसिक्खापदवण्णना

५०८. पञ्चमे ¶ अपञ्ञत्ते सिक्खापदेति गणम्हा ओहीयनसिक्खापदे (पाचि. ६९१-६९२) अपञ्ञत्ते. कोट्ठाससम्पत्तीति केसादिपञ्चकोट्ठासानं कल्याणता. हत्थतलेयेव दस्सेत्वाति हत्थतलतो सेसकायस्स अदस्सनं दीपेति.

५१०. विहत्थतायाति ¶ विहतताय, अमिस्सितताय अपटिसरणतायाति अत्थो. तेनाह ‘‘समभितुन्नत्ता’’ति, ब्यधितत्ताति अत्थो. परिवत्तेतब्बं परिवत्तं, तदेव पारिवत्तकं, परिवत्तेत्वा दिय्यमानन्ति अत्थो.

पुरिमसिक्खापदे विय इध द्वादसहत्थो उपचारनियमो नत्थीति आह ‘‘उपचारं मुञ्चित्वा’’ति. अञ्ञत्र पारिवत्तकाति यं अन्तमसो हरीटकखण्डम्पि दत्वा वा ‘‘दस्सामी’’ति आभोगं कत्वा वा परिवत्तकं गण्हाति, तं ठपेत्वा. ‘‘तं अचित्तकभावेन न समेती’’ति इमिना ञातिभावाजाननादीसु विय भिक्खुनीभावाजाननादिवसेनापि अचित्तकतं पकासेति.

५१३-४. तिकञ्च तं पाचित्तियञ्चाति तिकपाचित्तियं, पाचित्तियतिकन्ति अत्थो. पत्तत्थविकादीति अनधिट्ठानुपगं सन्धाय वदति. को पन वादो पत्तत्थविकादीसूति महतियापि ताव भिसिच्छविया अनधिट्ठानुपगत्ता अनापत्ति, विकप्पनुपगपच्छिमप्पमाणविरहितताय अनधिट्ठातब्बेसु किमेव वत्तब्बन्ति दस्सेति. पत्तत्थविकादीनि पन विकप्पनुपगपच्छिमानि गण्हितुं न वट्टति एव. पटिग्गहणं किरिया, अपरिवत्तनं अकिरिया. विकप्पनुपगचीवरता, पारिवत्तकाभावो, अञ्ञातिकाय हत्थतो गहणन्ति इमानेत्थ तीणि अङ्गानि.

चीवरपटिग्गहणसिक्खापदवण्णना निट्ठिता.

६. अञ्ञातकविञ्ञत्तिसिक्खापदवण्णना

५१५. छट्ठे ¶ पटु एव पट्टो. पाळियं धम्मनिमन्तनाति समणेसु वत्तब्बाचारधम्ममत्तवसेन निमन्तना, दातुकामताय कतनिमन्तना न होतीति अत्थो. तेनेव ‘‘विञ्ञापेस्सती’’ति वुत्तं. अञ्ञातकअप्पवारिततो हि विञ्ञत्ति नाम होति.

५१७. ‘‘तिणेन वा पण्णेन वा पटिच्छादेत्वा आगन्तब्ब’’न्ति इमिना भूतगामविकोपनं अनुञ्ञातन्ति आह ‘‘नेव भूतगामपातब्यताया’’तिआदि. पठमं सुद्धचित्तेन लिङ्गं गहेत्वा पच्छा लद्धिं गण्हन्तोपि तित्थियपक्कन्तको एवाति आह ‘‘निवासेत्वापि लद्धि न गहेतब्बा’’ति.

यं आवासं पठमं उपगच्छतीति एत्थापि विहारचीवरादिअत्थाय पविसन्तेनपि तिणादीहि पटिच्छादेत्वाव ¶ गन्तब्बं, न त्वेव नग्गेन आगन्तब्बन्ति सामञ्ञतो दुक्कटस्स वुत्तत्ता. चिमिलिकाहीति पटपिलोतिकाहि. परिभोगेनेवाति अञ्ञं चीवरं अलभित्वा परिभुञ्जनेन. परिभोगजिण्णन्ति यथा तं चीवरं परिभुञ्जियमानं ओभग्गविभग्गताय असारुप्पं होति, एवं जिण्णं.

५२१. अञ्ञस्सत्थायाति एत्थापि ‘‘ञातकानं पवारितान’’न्ति इदं अनुवत्तति एवाति आह ‘‘अत्तनो ञातकपवारिते’’तिआदि. इध पन अञ्ञस्स अच्छिन्ननट्ठचीवरस्स अत्थाय अञ्ञातकअप्पवारिते विञ्ञापेन्तस्स निस्सग्गियेन अनापत्तीति अत्थो गहेतब्बो, इतरथा ‘‘ञातकानं पवारितान’’न्ति इमिना विसेसो न भवेय्य. तेनेव अनन्तरसिक्खापदे वक्खति ‘‘अट्ठकथासु पन ञातकपरिवातट्ठाने…पे… पमाणमेव वट्टतीति वुत्तं, तं पाळिया न समेती’’ति (पारा. अट्ठ. २.५२६) च ‘‘यस्मा पनिदं सिक्खापदं अञ्ञस्सत्थाय विञ्ञापनवत्थुस्मिंयेव पञ्ञत्तं, तस्मा इध ‘अञ्ञस्सत्थाया’ति न वुत्त’’न्ति (पारा. अट्ठ. २.५२६) च. विकप्पनुपगचीवरता, समयाभावो, अञ्ञातकविञ्ञत्ति, ताय पटिलाभोति इमानेत्थ चत्तारि अङ्गानि.

अञ्ञातकविञ्ञत्तिसिक्खापदवण्णना निट्ठिता.

७. ततुत्तरिसिक्खापदवण्णना

५२२-५२४. सत्तमे ¶ पाळियं पग्गाहिकसालन्ति दुस्सापणं. तञ्हि वाणिजकेहि दुस्सानि पग्गहेत्वा दस्सनट्ठानताय ‘‘पग्गाहिकसाला’’ति वुच्चति. अस्स चीवरस्साति सादितब्बचीवरस्स. ‘‘तिचीवरिकेना’’ति इमिना अच्छिन्नतिचीवरतो अञ्ञस्स विहारादीसु निहितस्स चीवरस्स अभावं दस्सेति. यदि भवेय्य, विञ्ञापेतुं न वट्टेय्य. तावकालिकं निवासेत्वा अत्तनो चीवरं गाहेतब्बं, तावकालिकम्पि अलभन्तस्स भूतगामविकोपनं कत्वा तिणपण्णेहि छदनं विय विञ्ञापनम्पि वट्टति एव. अञ्ञेनाति अच्छिन्नअसब्बचीवरेन. द्वे नट्ठानीति अधिकारतो वुत्तं ‘‘द्वे सादितब्बानी’’ति.

५२६. पाळिया न समेतीति ‘‘अनापत्ति ञातकानं पवारितान’’न्ति इमाय पाळिया न समेति ततुत्तरिविञ्ञापनआपत्तिप्पसङ्गे एव वुत्तत्ता. ‘‘अञ्ञस्सत्थायाति न वुत्त’’न्ति इदं अञ्ञस्सत्थाय ततुत्तरि विञ्ञापने निस्सग्गियं पाचित्तियं होतीति इममत्थं दीपेति, तञ्च पाचित्तियं येसं अत्थाय विञ्ञापेति, तेसं वा सिया, विञ्ञापकस्सेव वा, न ताव तेसं तेहि ¶ अविञ्ञापितत्ता, नापि विञ्ञापकस्स अत्तानं उद्दिस्स अविञ्ञापितत्ता. तस्मा अञ्ञस्सत्थाय विञ्ञापेन्तस्सापि निस्सग्गियं पाचित्तियं न दिस्सति. पाळियं पन इमस्स सिक्खापदस्स अत्तनो सादियनपटिबद्धतावसेन पवत्तत्ता ‘‘अञ्ञस्सत्थाया’’ति अनापत्तिवारे न वुत्तन्ति वदन्ति, तञ्च युत्तं विय दिस्सति, वीमंसित्वा गहेतब्बं. ततुत्तरिचीवरता, अच्छिन्नादिकारणता, अञ्ञातकविञ्ञत्ति, ताय च पटिलाभोति इमानेत्थ चत्तारि अङ्गानि.

ततुत्तरिसिक्खापदवण्णना निट्ठिता.

८. पठमउपक्खटसिक्खापदवण्णना

५२८-५३१. अट्ठमे यो कत्ताति दायकं सन्धाय वुत्तं. पटो एव पटको. ‘‘अप्पग्घं चेतापेती’’ति इदं निस्सग्गियपाचित्तिया अनापत्तिं सन्धाय वुत्तं, विञ्ञत्तिपच्चया पन दुक्कटमेव. ‘‘पुब्बे अप्पवारितो’’ति हि सुत्ते ¶ विञ्ञत्तिकारणं वुत्तं. मातिकाट्ठकथायम्पि ‘‘चीवरे भिय्योकम्यता, अञ्ञातकविञ्ञत्ति, ताय च पटिलाभोति इमानेत्थ तीणि अङ्गानी’’ति (कङ्खा. अट्ठ. उपक्खटसिक्खापद) अञ्ञातकविञ्ञत्तिता पकासिता, केचि पन ‘‘दायकेन दातुकामोम्हीति अत्तनो सन्तिके अवुत्तेपि यदग्घनकं सो दातुकामो, तदग्घनकं आहरापेतुं वट्टति एवा’’ति वदन्ति, तं राजसिक्खापदट्ठकथायपि न समेति, दूतेन वा दायकेन वा ‘‘आयस्मन्तं उद्दिस्स चीवरचेतापन्नं आभत’’न्ति आरोचितेपि मुखवेवटियकप्पियकारकादीनं सन्तिका आहरापनस्स तत्थ पटिक्खित्तत्ता. वुत्तञ्हि तत्थ ‘‘इमे द्वे अनिद्दिट्ठकप्पियकारका नाम, एतेसु अञ्ञातकअप्पवारितेसु विय पटिपज्जितब्बं…पे… न किञ्चि वत्तब्बा. देसनामत्तमेव चेतं ‘दूतेन चीवरचेतापन्नं पहिणेय्या’ति सयं आहरित्वापि पिण्डपातादीनं अत्थाय ददन्तेसुपि एसेव नयो’’ति. मुखवेवटियकप्पियकारकादयो हि दायकेन परिच्चत्तेपि वत्थुम्हि ‘‘असुकस्स सन्तिके चीवरपिण्डपातादिं गण्हथा’’ति अनिद्दिट्ठत्ता एव ‘‘न किञ्चि वत्तब्बा’’ति वुत्तं, न पन तस्स वत्थुनो मुखवेवटियादीनं सन्तकत्ता, तस्मा इधापि दायकेन वा दूतेन वा ‘‘यं इच्छथ, तं वदथा’’ति अप्पवारितस्स वदतो दुक्कटमेव. अग्घवड्ढनकन्ति चीवरे अग्घवड्ढनकं निस्साय पवत्तं इदं सिक्खापदं, न पिण्डपातादीसु तेसु अग्घवड्ढनस्स दुक्कटमत्तत्ता, पणीतपिण्डपाते सुद्धिकपाचित्तियत्ता चाति गहेतब्बं. तेनेव ‘‘चीवरे भिय्योकम्यता’’ति अङ्गं वुत्तं.

पठमउपक्खटसिक्खापदवण्णना निट्ठिता.

९. दुतियउपक्खटसिक्खापदवण्णना

५३३. नवमे ¶ पाळियं पच्चेकचीवरचेतापन्नाति पच्चेकं नियमेत्वा चीवरचेतापन्ना, एकेकेन विसुं विसुं नियमिता चीवरचेतापन्नाति अत्थो. उभोव सन्ता एकेनाति उभो एकतोव सन्ता, उभो एकतो हुत्वाति अत्थो.

दुतियउपक्खटसिक्खापदवण्णना निट्ठिता.

१०. राजसिक्खापदवण्णना

५३७. दसमे ¶ ‘‘अज्जण्हो’’ति ‘‘अज्ज नो’’ति वत्तब्बे ह-कारागमं, न-कारस्स च ण-कारं कत्वा वुत्तोति आह ‘‘अज्ज एकदिवसं अम्हाक’’न्ति.

५३८-९. यं वुत्तं मातिकाट्ठकथायं (कङ्खा. अट्ठ. राजसिक्खापदवण्णना) ‘‘इमिना चीवरचेतापन्नेन चीवरं चेतापेत्वा इत्थन्नामं भिक्खुं चीवरेन अच्छादेहीति इदं आगमनसुद्धिं दस्सेतुं वुत्तं, सचे हि ‘इदं इत्थन्नामस्स भिक्खुनो देही’ति पेसेय्य, आगमनस्स असुद्धत्ता अकप्पियवत्थुं आरब्भ भिक्खुना कप्पियकारकोपि निद्दिसितब्बो न भवेय्या’’ति, तं निस्सग्गियवत्थुदुक्कटवत्थुभूतं अकप्पियचीवरचेतापन्नं ‘‘असुकस्स भिक्खुनो देही’’ति एवं आगमनसुद्धिया असति, सिक्खापदे आगतनयेन दूतवचने च असुद्धे सब्बथा पटिक्खेपो एव कातुं वट्टति, न पन ‘‘चीवरञ्च खो मयं पटिग्गण्हामा’’ति वत्तुं, तदनुसारेन न वेय्यावच्चकरञ्च निद्दिसितुं आगमनदूतवचनानं उभिन्नं असुद्धत्ता. पाळियं आगतनयेन पन आगमनसुद्धिया सति दूतवचने असुद्धेपि सिक्खापदे आगतनयेन सब्बं कातुं वट्टतीति दस्सनत्थं वुत्तं. तेन च यथा दूतवचनासुद्धियम्पि आगमने सुद्धे वेय्यावच्चकरम्पि निद्दिसितुं वट्टति, एवं आगमनासुद्धियम्पि दूतवचने सुद्धे वट्टति एवाति अयमत्थो अत्थतो सिद्धोव होति, उभयसुद्धियं वत्तब्बमेव नत्थीति उभयासुद्धिपक्खमेव सन्धाय मातिकाट्ठकथायं (कङ्खा. अट्ठ. राजसिक्खापदवण्णना) ‘‘कप्पियकारकोपि निद्दिसितब्बो न भवेय्या’’ति वुत्तन्ति वेदितब्बं.

यं पनेत्थ सारत्थदीपनियं (सारत्थ. टी. २.५३७-५३९) ‘‘आगमनस्स सुद्धिया वा असुद्धिया वा विसेसप्पयोजनं न दिस्सती’’तिआदि वुत्तं, तं मातिकाट्ठकथावचनस्स अधिप्पायं ¶ असल्लक्खेत्वा वुत्तं यथावुत्तनयेन आगमनसुद्धिआदिना सप्पयोजनत्ता. यो पनेत्थ ‘‘मूलसामिकेन कप्पियवोहारवसेन, पेसितस्स दूतस्स अकप्पियवोहारवसेन च वदतोपि कप्पियकारको निद्दिसितब्बो भवेय्या’’ति अनिट्ठप्पसङ्गो वुत्तो, सो अनिट्ठप्पसङ्गो एव न होति अभिमतत्ता. तथा हि सिक्खापदे एव ‘‘पटिग्गण्हातु आयस्मा चीवरचेतापन्न’’न्ति अकप्पियवोहारेन वदतो दूतस्स कप्पियेन ¶ कम्मेन वेय्यावच्चकरो निद्दिसितब्बो वुत्तो आगमनस्स सुद्धत्ता, आगमनस्सापि असुद्धियं पन कप्पियेनापि कम्मेन वेय्यावच्चकरो न निद्दिसितब्बोति अत्थेव आगमनस्स सुद्धिअसुद्धीसु पयोजनं. कथं पन दूतवचनेन आगमनसुद्धि विञ्ञायतीति? नायं भारो. दूतेन हि अकप्पियवोहारेनेव वुत्ते एव आगमनसुद्धि गवेसितब्बा, न इतरथा, तत्थ च तस्स वचनक्कमेन पुच्छित्वा च युत्तिआदीहि च सक्का विञ्ञातुं. इधापि हि सिक्खापदे ‘‘चीवरचेतापन्नं आभत’’न्ति दूतवचनेनेव चीवरं किणित्वा दातुं पेसितभावो विञ्ञायति. यदि हि सब्बथा आगमनसुद्धि न विञ्ञायति, पटिक्खेपो एव कत्तब्बोति.

पाळियञ्च ‘‘चीवरञ्च खो मयं पटिग्गण्हामा’’तिआदि दूतवचनस्स अकप्पियत्तेपि आगमनसुद्धिया सति पटिपज्जनविधिदस्सनत्थं वुत्तं. ‘‘एसो खो…पे… न वत्तब्बो ‘तस्स देही’’’तिआदि अकप्पियवत्थुसादियनपरिमोचनत्थं वुत्तं. ‘‘सञ्ञत्तो’’तिआदि ‘‘एवं दूतेन पुन वुत्ते एव चोदेतुं वट्टति, न इतरथा’’ति दस्सनत्थं वुत्तं. ‘‘न वत्तब्बो ‘देहि मे चीवरं…पे… चेतापेहि मे चीवर’’’न्ति इदं दूतेनाभतरूपियं पटिग्गहेतुं अत्तना निद्दिट्ठकप्पियकारकत्ताव ‘‘देहि मे चीवरं…पे… चेतापेहि मे चीवर’’न्ति वदन्तो रूपियस्स पकतत्ता तेन रूपियेन परिवत्तेत्वा ‘‘देहि चेतापेही’’ति रूपियसंवोहारं समापज्जन्तो नाम होतीति तं दोसं दूरतो परिवज्जेतुं वुत्तं रूपियपटिग्गहणेन सङ्घमज्झे निस्सट्ठरूपिये विय. वुत्तञ्हि तत्थ ‘‘न वत्तब्बो इमं वा इमं वा आहरा’’ति. तस्मा न इदं विञ्ञत्तिदोसं परिवज्जेतुं वुत्तन्ति वेदितब्बं, ‘‘अत्थो मे, आवुसो, चीवरेना’’तिपि अवत्तब्बतापसङ्गतो, तेनेव दूतनिद्दिट्ठेसु रूपियसंवोहारसङ्काभावतो अञ्ञं कप्पियकारकं ठपेत्वापि आहरापेतब्बन्ति वुत्तं. तत्थापि ‘‘दूतेन ठपितरूपियेन चेतापेत्वा चीवरं आहरापेही’’ति अवत्वा केवलं ‘‘चीवरं आहरापेही’’ति एवं आहरापेतब्बन्ति अधिप्पायो गहेतब्बो. ठानं भञ्जतीति एत्थ ठानन्ति ठितिया च कारणस्स च नामं, तस्मा आसने निसीदनेन ठानम्पि कुप्पति, आगतकारणम्पि तेसं न विञ्ञायति. ठितं पन अकोपेत्वा आमिसपटिग्गहणादीसु आगतकारणमेव भञ्जति, न ठानं. तेनाह ‘‘आगतकारणं भञ्जती’’ति ¶ . केचि पन ‘‘आमिसपटिग्गहणादिना ठानम्पि भञ्जती’’ति वदन्ति, तं अट्ठकथाय न समेति.

यतस्स ¶ चीवरचेतापन्नन्तिआदि येन अत्तना वेय्यावच्चकरो निद्दिट्ठो, चीवरञ्च अनिप्फादितं, तस्स कत्तब्बविधिदस्सनं. एवं भिक्खुना वत्थुसामिकानं वुत्ते ते चोदेत्वा देन्ति, वट्टति ‘‘सामिका चोदेत्वा देन्ती’’ति अनापत्तियं वुत्तत्ता. तेन च यो सयं अचोदेत्वा उपासकादीहि परियायेन वत्वा चोदापेति, तेसु सत्तक्खत्तुम्पि चोदेत्वा चीवरं दापेन्तेसु तस्स अनापत्ति सिद्धा होति सिक्खापदस्स अनाणत्तिकत्ता.

केनचि अनिद्दिट्ठो अत्तनो मुखेनेव ब्यावटभावं वेय्यावच्चकरत्तं पत्तो मुखवेवटिको. ‘‘अविचारेतुकामताया’’ति इमिना विज्जमानम्पि दातुं अनिच्छन्ता अरियापि वञ्चनाधिप्पायं विना वोहारतो नत्थीति वदन्तीति दस्सेति. भेसज्जक्खन्धके मेण्डकसेट्ठिवत्थुम्हि (महाव. २९९) वुत्तं ‘‘सन्ति, भिक्खवे’’तिआदिवचनमेव (महाव. २९९) मेण्डकसिक्खापदं नाम. कप्पियकारकानं हत्थेति दूतेन निद्दिट्ठकप्पियकारके सन्धाय वुत्तं, न पन भिक्खुना निद्दिट्ठे, अनिद्दिट्ठे वाति. तेनाह ‘‘एत्थ च चोदनाय पमाणं नत्थी’’तिआदि.

सयं आहरित्वा ददन्तेसूति सम्बन्धो. ‘‘पिण्डपातादीनं अत्थाया’’ति इमिना चीवरत्थायेव न होतीति दस्सेति. ‘‘एसेव नयो’’ति इमिना वत्थुसामिना निद्दिट्ठकप्पियकारकभेदेसुपि पिण्डपातादीनम्पि अत्थाय दिन्ने च ठानचोदनादि सब्बं हेट्ठा वुत्तनयेनेव कातब्बन्ति दस्सेति.

‘‘सङ्घं वा…पे… अनामसित्वा’’ति वुत्तत्ता ‘‘सङ्घस्स विहारत्थाय देमा’’तिआदिना आमसित्वा वदन्तेसु पटिक्खिपितब्बमेव. ‘‘सङ्घो सम्पटिच्छती’’ति इदं उक्कट्ठवसेन वुत्तं, गणादीसुपि सङ्घस्सत्थाय सम्पटिच्छन्तेसुपि पटिग्गहणेपि परिभोगेपि दुक्कटमेव. सारत्थदीपनियं ‘‘पटिग्गहणे पाचित्तिय’’न्ति (सारत्थ. टी. २.५३७-५३९) वुत्तं, तं न युत्तं सङ्घचेतियादीनं अत्थाय दुक्कटस्स वुत्तत्ता. चोदेतीति तस्स दोसाभावं ञत्वापि कोधेन वा लोभेन वा भण्डदेय्यन्ति चोदेति. सो एव हि मुसावादादिपच्चया पाचित्तियदुक्कटादिआपत्तीहि सापत्तिको होति, गीवातिसञ्ञाय पन वत्वा निद्दोसभावं ञत्वा विरमन्तस्स नत्थि आपत्ति.

तळाकं ¶ ¶ खेत्ते पविट्ठत्ता ‘‘न सम्पटिच्छितब्ब’’न्ति वुत्तं. चत्तारो पच्चये सङ्घो परिभुञ्जतूति देति, वट्टतीति एत्थ ‘‘भिक्खुसङ्घस्स चतुपच्चयपरिभोगत्थाय तळाकं दम्मी’’ति वा ‘‘भिक्खुसङ्घो चत्तारो पच्चये परिभुञ्जितुं तळाकं दम्मी’’ति वा ‘‘इतो तळाकतो उप्पन्ने चत्तारो पच्चये दम्मी’’ति वा वत्तुम्पि वट्टति, इदञ्च सङ्घस्स परिभोगत्थाय दिय्यमानञ्ञेव सन्धाय वुत्तं, पुग्गलस्स पन एवम्पि दिन्नं तळाकखेत्तादि न वट्टति. सुद्धचित्तस्स पन उदकपरिभोगत्थं कूपपोक्खरणीआदयो वट्टन्ति. ‘‘सङ्घस्स तळाकं अत्थि, तं कथ’’न्ति हि आदिना सब्बत्थ सङ्घवसेनेव वुत्तं. हत्थेति वसे.

‘‘ठपेथाति वुत्ते’’ति इदं सामीचिवसेन वुत्तं, अवुत्तेपि ठपेन्तस्स दोसो नत्थि. तेनाह ‘‘उदकं वारेतुं लब्भती’’ति. सस्सकालेपि तासेत्वा मुञ्चितुं वट्टति, अमुञ्चतो पन भण्डदेय्यं. पुन देतीति अच्छिन्दित्वा पुन देति, एवम्पि वट्टतीति सम्बन्धो. इमिना ‘‘येन केनचि इस्सरेन ‘परिच्चत्तमिदं भिक्खूहि, अस्सामिक’न्तिसञ्ञाय अत्तना गहेत्वा दिन्नं वट्टती’’ति दस्सेति. कप्पियवोहारेपि विनिच्छयं वक्खामाति पाठसेसो.

उदकवसेनाति उदकपरिभोगत्थं. ‘‘सुद्धचित्तान’’न्ति इदं सहत्थेन च अकप्पियवोहारेन च करोन्ते सन्धाय वुत्तं. सस्ससम्पादनत्थन्ति एवं असुद्धचित्तानम्पि पन सयं अकत्वा कप्पियवोहारेन आणापेतुं वट्टति एव. ‘‘कप्पियकारकं ठपेतुं न वट्टती’’ति इदं सहत्थादिना कततळाकत्ता ‘‘असारुप्प’’न्ति वुत्तं, ठपेन्तस्स, पन तं पच्चयं परिभुञ्जन्तस्सपि वा सङ्घस्स आपत्ति न विञ्ञायति, अट्ठकथापमाणेन वा एत्थ आपत्ति गहेतब्बा. लज्जिभिक्खुनाति लज्जिनापि, पगेव अलज्जिना मत्तिकुद्धरणादीसु कारापितेसूति अधिप्पायो. नवसस्सेति अकतपुब्बे केदारे. ‘‘कहापणे’’ति इमिना धञ्ञुट्ठापने तस्सेव अकप्पियन्ति दस्सेति, धञ्ञुट्ठापने चस्स पयोगेपि दुक्कटमेव, न कहापणुट्ठापने विय.

‘‘कसथ वपथा’’ति वचने सब्बेसम्पि अकप्पियं सियाति आह ‘‘अवत्वा’’ति. एत्तको नाम भागोति एत्थ एत्तको कहापणोति इदम्पि सन्धाय वदति. तथा वुत्तेपि हि तदा कहापणानं अविज्जमानत्ता ¶ आयतिं उप्पन्नं अञ्ञेसं वट्टति एव. तेनाह ‘‘तस्सेव तं अकप्पिय’’न्ति. तस्स पन सब्बपयोगेसु, परिभोगेसुपि दुक्कटं. केचि पन ‘‘धञ्ञपरिभोगे एव आपत्ति, न पुब्बपयोगे’’ति वदन्ति, तं न युत्तं, येन मिननरक्खणादिपयोगेन पच्छा धञ्ञपरिभोगे आपत्ति होति, तस्स पयोगस्स करणे अनापत्तिया अयुत्तत्ता. परियायकथाय पन सब्बत्थ अनापत्ति. तेनेव ‘‘एत्तकेहि वीहीहि इदञ्चिदञ्च आहरथा’’ति नियमवचने अकप्पियं ¶ वुत्तं, कहापणविचारणेपि एसेव नयो. वत्थु च एवरूपं नाम संविज्जति, कप्पियकारको नत्थीति वत्तब्बन्तिआदिवचनञ्चेत्थ साधकं.

वनं दम्मि…पे… वट्टतीति एत्थ निवासट्ठानत्ता पुग्गलस्सापि सुद्धचित्तेन गहेतुं वट्टति. सीमं देमाति विहारसीमादिसाधारणवचनेन वुत्तत्ता ‘‘वट्टती’’ति वुत्तं.

‘‘वेय्यावच्चकर’’न्तिआदिना वुत्तेपि पुग्गलस्सपि दासं गहेतुं वट्टति ‘‘अनुजानामि, भिक्खवे, आरामिक’’न्ति (पारा. ६१९; महाव. २७०) विसेसेत्वा अनुञ्ञातत्ता, तञ्च खो पिलिन्दवच्छेन गहितपरिभुत्तक्कमेन, न गहट्ठानं दासपरिभोगक्कमेन. खेत्तादयो पन सब्बे सङ्घस्सेव वट्टन्ति पाळियं पुग्गलिकवसेन गहेतुं अननुञ्ञातत्ताति दट्ठब्बं. विहारस्स देमाति सङ्घिकविहारं सन्धाय वुत्तं, ‘‘खेत्तवत्थुपटिग्गहणा पटिविरतो होती’’तिआदिना (दी. नि. १.१०, १९४) सुत्तन्तेसु आगतपटिक्खेपो भगवता आपत्तियापि हेतुभावेन कतोति भगवतो अधिप्पायं जानन्तेहि सङ्गीतिमहाथेरेहि खेत्तपटिग्गहणादिनिस्सितो अयं सब्बोपि पाळिमुत्तविनिच्छयो वुत्तोति गहेतब्बो. कप्पियकारकस्स निद्दिट्ठभावो, दूतेन अप्पितता, ततुत्तरि वायामो, तेन पटिलाभोति इमानेत्थ चत्तारि अङ्गानि.

राजसिक्खापदवण्णना निट्ठिता.

निट्ठितो चीवरवग्गो पठमो.

२. कोसियवग्गो

१. कोसियसिक्खापदवण्णना

५४२. दुतियस्स ¶ ¶ पठमे पाळियं कोसियकारकेति कोसकारकपाणानं कोसतो निब्बत्तत्ता कोसियेन सुत्तेन वत्थादिं करोन्ते. सङ्घातन्ति विनासं.

५४४. ‘‘अवायिम’’न्ति वुत्तत्ता वायित्वा करणे अनापत्ति. मिस्सेत्वाति एळकलोमेहि मिस्सेत्वा. पटिलाभेनाति परिनिट्ठानेन ‘‘परियोसापेति, निस्सग्गिय’’न्ति (पारा. ५४५) वुत्तत्ता, कोसियमिस्सकता, अत्तनो अत्थाय सन्थतस्स करणकारापनं, पटिलाभो चाति इमानेत्थ तीणि अङ्गानि.

कोसियसिक्खापदवण्णना निट्ठिता.

५४७-५५२. दुतियञ्च ततियञ्च उत्तानमेव. तत्थ पन ओदातादिमिस्सकसञ्ञाय सुद्धकाळकानञ्ञेव सन्थतस्स करणवसेन चेत्थ द्वेभागतो अधिकेसु सुद्धकाळकेसु अनधिकसञ्ञाय सन्थतस्स करणवसेन च अचित्तकता वेदितब्बा.

४. छब्बस्ससिक्खापदवण्णना

५५७. चतुत्थे हद करीसुस्सग्गे, मिह सेचनेति धातुअत्थं सन्धायाह ‘‘वच्चम्पि पस्सावम्पि करोन्ती’’ति. ऊनकछब्बस्सेसु अतिरेकछब्बस्ससङ्कितादिवसेनेत्थ अचित्तकता वेदितब्बा.

छब्बस्ससिक्खापदवण्णना निट्ठिता.

५. निसीदनसन्थतसिक्खापदवण्णना

५६५. पञ्चमे ¶ ¶ तत्थ सन्दिस्सिस्सतीति सकाय कतिकाय अयुत्तकारितावसेन विञ्ञूहि सन्दिस्सिस्सतीति अत्थो. अरञ्ञकङ्गादीनि तीणि पाळियं सेनासनादिपच्चयत्तयस्स आदिअङ्गवसेन वुत्तानि, सेसानिपि ते समादियिंसु एवाति वेदितब्बं.

५६६. पिहयन्ताति पत्थयन्ता. सन्थतस्स अवायिमत्ता, सेनासनपरिक्खारत्ता च चीवरता, अधिट्ठातब्बता च नत्थीति आह ‘‘चतुत्थचीवरसञ्ञिताया’’ति, विपल्लाससञ्ञायाति अत्थो. केचि पन ‘‘इदं निसीदनसन्थतं नाम नवसु चीवरेसु निसीदनचीवरमेव, नाञ्ञं. निसीदनसिक्खापदेपि (पाचि. ५३१ आदयो) इमस्मिं सिक्खापदे विय ‘निसीदनं नाम सदसं वुच्चती’ति च अट्ठकथायञ्चस्स ‘सन्थतसदिसं सन्थरित्वा एकस्मिं अन्ते सुगतविदत्थिया विदत्थिमत्ते पदेसे द्वीसु ठानेसु फालेत्वा तिस्सो दसा करीयन्ति, ताहि दसाहि सदसं नाम वुच्चती’ति (पाचि. अट्ठ. ५३१) च वुत्तत्ता’’ति वदन्ति, तं न युत्तं इध पमाणनियमस्स अवुत्तत्ता, सन्थतस्स च अवायिमचीवरत्ता, अधिट्ठानुपगत्ताभावा अट्ठकथायं अवुत्तत्ता च. निसीदनचीवरं पन छन्नं चीवरानं खण्डपिलोतिकानि पमाणयुत्तमेव सन्थरित्वा सन्थतं विय करोन्ति. तेनेव ‘‘सन्थतसदिस’’न्ति सदिसग्गहणं कतं, तस्मा तदेव चीवरं अधिट्ठानुपगञ्च, न इदन्ति गहेतब्बं.

५६७. सुगतविदत्थिकं अनादाय आदियन्तिसञ्ञाय, सुगतविदत्थिऊने अनूनन्तिसञ्ञाय च वसेनेत्थ अचित्तकता वेदितब्बा. वितानादीनञ्ञेव अत्थाय करणे अनापत्तिवचनतो निपज्जनत्थाय करोतोपि आपत्ति एव. परिभुञ्जितुं न वट्टतीति कोसियेसु सुद्धकाळकानञ्च वत्थूनं अकप्पियत्ता वुत्तं. तेनेव पाळियं ‘‘अञ्ञेन कतं पटिलभित्वा परिभुञ्जति, आपत्ति दुक्कटस्सा’’ति (पारा. ५४५, ५५०) तत्थ तत्थ वुत्तं, इतरेसु पन द्वीसु ‘‘अनापत्ती’’ति वुत्तं. तत्थ चतुत्थे अञ्ञस्सत्थाय करणेपि अनापत्ति, पञ्चमे तत्थ दुक्कटन्ति दट्ठब्बं. निस्सट्ठदानवचनतो पन गहणे दोसो नत्थि, परिभुञ्जने च विजटेत्वा कप्पियवसेन कते न दोसो.

निसीदनसन्थतसिक्खापदवण्णना निट्ठिता.

६. एळकलोमसिक्खापदवण्णना

५७२. छट्ठे ¶ ¶ पाळियं ‘‘अद्धानमग्गप्पटिपन्नस्सा’’ति इदं वत्थुवसेन वुत्तं. निवासट्ठाने लद्धानिपि तियोजनतो परं हरितुं न वट्टति एव. असन्ते हारकेति अनुरूपतो वुत्तं. सन्तेपि हारके हरतो नत्थि दोसो. आपत्तियेवाति अनाणत्तेन हटत्ता. पक्खद्वयस्सपि कारणमाह ‘‘सउस्साहत्ता’’ति, अनुपरतगमनिच्छत्ताति अत्थो. सुद्धचित्तपक्खस्सेव कारणमाह ‘‘अचित्तकत्ता’’ति. न समेतीति ‘‘अनापत्ति, अञ्ञं हरापेती’’ति एत्तकस्सेव परिहरणे वुत्तत्ता. अगच्छन्तेति ठिते. हेट्ठाति भूमिया.

५७५. तं हरन्तस्साति पठमं पटिलाभट्ठानतो पट्ठाय तियोजनतो उद्धं हरन्तस्साति अत्थो. तथा हरन्तस्स हि चोरेहि अच्छिन्दित्वा पुन दिन्नट्ठानतो तियोजनं हरितुं वट्टति. केचि पन ‘‘मातिकाट्ठकथायं अङ्गेसु ‘पठमप्पटिलाभो’ति वुत्तत्ता दुतियपटिलाभट्ठानतो तियोजनातिक्कमेपि अनापत्ती’’ति वदन्ति, तं न युत्तं, दुतियपटिलाभस्सापि पटिलाभट्ठाने पविसनतो वासत्थाय गमनट्ठानतो पुन गमने विय. कायबन्धनादीनन्ति द्विपटलकायबन्धनादीनं अन्तरे पक्खित्तं पसिब्बके पक्खित्तसदिसं, न कतभण्डन्ति वुत्तं, तथा निधानमुखन्ति. अकतभण्डता, पठमप्पटिलाभो, तियोजनातिक्कमनं, आहरणपच्चाहरणं, अवासाधिप्पायताति इमानेत्थ पञ्च अङ्गानि.

एळकलोमसिक्खापदवण्णना निट्ठिता.

७. एळकलोमधोवापनसिक्खापदवण्णना

५८१. सत्तमे पाळियं अनापत्तिवारे अपरिभुत्तं कतभण्डं धोवापेतीति एत्थ परिभुत्तस्स कम्बलादिकतभण्डस्स धोवापनं पुराणचीवरधोवापनसिक्खापदेन आपत्तिकरन्ति तन्निवत्तनत्थं ‘‘अपरिभुत्तं कतभण्ड’’न्ति वुत्तं. सेसमेत्थ उत्तानत्थमेव.

एळकलोमधोवापनसिक्खापदवण्णना निट्ठिता.

८. रूपियसिक्खापदवण्णना

५८३-४. अट्ठमे ¶ ¶ सुवण्णमयकहापणेन कहापणोपि रजते एव सङ्गय्हतीति आह ‘‘सोवण्णमयो वा’’ति. रूपियमयो वाति रजतेन रूपं समुट्ठपेत्वा कतकहापणो. पाकतिको नाम एतरहि पकतिकहापणो.

इच्चेतं सब्बम्पीति सिक्खापदेन, विभङ्गेन च वुत्तं सब्बम्पि निदस्सेति. तस्स चतुब्बिधं निस्सग्गियवत्थूति इमिनाव सम्बन्धो, न पन अनन्तरेन ‘‘रजत’’न्ति पदेन. इदानि तं चतुब्बिधं निस्सग्गियवत्थुं सरूपतो दस्सेन्तो ‘‘रजत’’न्तिआदिमाह. तत्थ किञ्चापि हेट्ठा रजतमासकोव वुत्तो, न केवलं रजतं, तथापि सिक्खापदे ‘‘जातरूपरजत’’न्ति पदेनेव वुत्तन्ति तम्पि दस्सेतुं ‘‘रजत’’न्ति इदं विसुं वुत्तं. पदभाजने पन मातिकापदेनेव सिद्धत्ता तं अवत्वा तेन सह सङ्गय्हमानमेव दस्सेतुं ‘‘रजतं नाम कहापणो’’तिआदि वुत्तन्ति वेदितब्बं. जातरूपमासकोति सुवण्णमयकहापणो. वुत्तप्पभेदोति ‘‘रूपियमयो वा पाकतिको वा’’तिआदिना वुत्तप्पभेदो. पटोव पटको, वत्थं. दुक्कटमेवाति पटिग्गाहकस्सेव पटिग्गहणपच्चया दुक्कटं, परिभोगे पन पञ्चसहधम्मिकेहि पटिग्गहितानं धञ्ञविरहितमुत्तादीनं कारणा उप्पन्नपच्चयं परिभुञ्जन्तानं सब्बेसम्पि दुक्कटमेव. केचि पन ‘‘धञ्ञम्पि पञ्चसहधम्मिकेहि पटिग्गहितं मुत्तादिखेत्तादि विय सब्बेसम्पि परिभुञ्जितुं न वट्टति, केवलं सङ्घिकभूमियं कप्पियवोहारेन च उप्पन्नस्स धञ्ञस्स विचारणमेव सन्धाय ‘तस्सेवेतं अकप्पिय’न्ति वुत्त’’न्ति वदन्ति.

एको सतं वा सहस्सं वातिआदि रूपिये हेट्ठिमकोटिया पवत्तनाकारं दस्सेतुं वुत्तं, न पन ‘‘एवं पटिपज्जितब्बमेवा’’ति दस्सेतुं. ‘‘इध निक्खिपाही’’ति वुत्ते उग्गण्हापनं होतीति आह ‘‘इध निक्खिपाहीति न वत्तब्ब’’न्ति. कप्पियञ्च…पे… होतीति यस्मा असादितत्ता ततो उप्पन्नपच्चया वट्टन्ति, तस्मा कप्पियं निस्साय ठितं. यस्मा पन दुब्बिचारणाय सति ततो उप्पन्नम्पि न कप्पति, तस्मा अकप्पियं निस्साय ठितन्ति वेदितब्बं.

‘‘न तेन किञ्चि कप्पियभण्डं चेतापित’’न्ति इमिना चेतापितं चे, नत्थि परिभोगूपायो उग्गहेत्वा अनिस्सट्ठरूपियेन चेतापितत्ता. ईदिसञ्हि सङ्घमज्झे निस्सज्जनं कत्वाव छड्डेत्वा पाचित्तियं देसेतब्बन्ति दस्सेति. केचि ¶ पन ‘‘यस्मा निस्सग्गियवत्थुं पटिग्गहेत्वापि चेतापितं ¶ कप्पियभण्डं सङ्घे निस्सट्ठं कप्पियकारकेहि निस्सट्ठरूपियं परिवत्तेत्वा आनीतकप्पियभण्डसदिसं होति, तस्मा विनाव उपायं भाजेत्वा परिभुञ्जितुं वट्टती’’ति वदन्ति, तं पत्तचतुक्कादिकथाय (पारा. अट्ठ. २.५८९) न समेति. तत्थ रूपियेन परिवत्तितपत्तस्स अपरिभोगोव दस्सितो, न निस्सज्जनविधानन्ति. उपनिक्खेपं ठपेत्वाति कप्पियकारकेहि वड्ढिया पयोजनं सन्धाय वुत्तं. अकप्पियन्ति तेन वत्थुना गहितत्ता वुत्तं.

५८५. ‘‘पतितोकासं असमन्नाहरन्तेना’’ति इदं निरपेक्खभावदस्सनपरन्ति वेदितब्बं. असन्तसम्भावनायाति परियायादिना अभूतारोचनं सन्धाय वुत्तं. थेय्यपरिभोगोति पच्चयसामिना भगवता अननुञ्ञातत्ता वुत्तं. इणपरिभोगोति भगवता अनुञ्ञातम्पि कत्तब्बं अकत्वा परिभुञ्जनतो वुत्तं, तेन च पच्चयसन्निस्सितसीलं विपज्जतीति दस्सेति. परिभोगे परिभोगेति कायतो मोचेत्वा मोचेत्वा परिभोगे. पच्छिमयामेसु पच्चवेक्खितब्बन्ति योजना. इणपरिभोगट्ठाने तिट्ठतीति एत्थ ‘‘हिय्यो यं मया चीवरं परिभुत्त’’न्तिआदिनापि अतीतपच्चवेक्खणा वट्टतीति वदन्ति. परिभोगे परिभोगेति उदकपतनट्ठानतो अन्तोपवेसनेसु, निसीदनसयनेसु च. सतिपच्चयता वट्टतीति पच्चवेक्खणसतिया पच्चयत्तं लद्धुं वट्टति. पटिग्गहणे च परिभोगे च पच्चवेक्खणासति अवस्सं लद्धब्बाति दस्सेति. तेनाह ‘‘सतिं कत्वा’’तिआदि. केचि पन ‘‘सतिपच्चयता पच्चये सति भेसज्जपरिभोगस्स कारणे सती’’ति एवम्पि अत्थं वदन्ति, तेसम्पि पच्चये सतीति पच्चयसब्भावसल्लक्खणे सतीति एवमत्थो गहेतब्बो पच्चयसब्भावमत्तेन सीलस्स असुज्झनतो. ‘‘परिभोगे अकरोन्तस्सेव आपत्ती’’ति इमिना पातिमोक्खसंवरसीलस्स भेदो दस्सितो, न पच्चयसन्निस्स्सिसीलस्स, तस्स अतीतपच्चवेक्खणाय विसुज्झनतो. एतस्मिं, पन सेसपच्चयेसु च इणपरिभोगादिवचनेन पच्चयसन्निस्सितसीलस्सेव भेदोति एवमिमेसं नानाकरणं वेदितब्बं.